﻿Mazmure.
39.
Dawiti zammaareta halaqa, Edotaames xaafida mazmure. Taani, “Ta inxarsan nagara oothonna mela, ta ogiya naagana. Iita asati ta de7iya wode, ta doona barana” yaagas. 
Shin doona muumeda si77i gas; hari attoshin lo77oba odeteysa aggas; shin ta waayey haa daris. 
Ta wozanay ta gaathan teellis; ta qofay tamada eexis; yaatin ta inxarsan haasaya doomas. 
Godaw, ta de7uwa wursethaanne ta daanaw attida gallasaa tana bessa; ta de7oy ay mela qantheko tana erisa. 
Neeni ta laytha takadhada wothadasa; Ta laythay ne sinthan baynaba mela; tuma asi ubbay issi shempo mela. Salaha 
Tuma asi aadhiya eesho mela; I coo daaburees; shalo shiishees; shin ooni go7etaneko erenna. 
Godaw, ha77i ta naagey oonee? Taani nenan ufaysi oothayis. 
Ta bala ubbaafe tana ashsha; eeyatan tana tooshisopa. 
Hessa ubbaa oothiday nena gidiya gisho taani muumas; doonaka pogabike. 
Ne xam7a ta bollafe dentha; mino ne kushiya gaason ta daaburas. 
Ase iya nagaraa gisho seerasa; iya al7o de7uwa bilada wursaasa; tuma asi ubbay issi shempo mela. Salaha 
Godaw, ta woosa si7a; tana maaddanaw ta waasuwa hayza. Ta afuthaa be7ada si77i goopa; taani ta aawatada bete asinne imathe gidada neera de7ayis. 
Ta shaaketanapenne baanape sinthe taani ufaytana mela tana agga. 
