﻿Mazmure.
36.
Godaa aylley, Dawiti zammaareta halaqaas xaafida mazmure. Iita asi ba wozanan iitabaa qopees; I ba wozanan Xoossas yayyenna. 
I bana daro nashshiya gisho; ba nagaraa be7anaw woyko ixanaw danda7enna. 
Iya doonan geneynne wordoy kumis; Cincatethinne lo77oba ooso aggis. 
Ba hiixan zin7idi gene qopees; bana lo77o gidonna ogen kaalethees; iitabaa ixenna. 
Godaw, ne siiqoy salota gakees; ne tumatethay shaarape aadhees. 
Ne xillotethay dhoqa deretape aadhees; ne pirday abba ciimmuwafe ziqa; Godaw, neeni asenne do7a naagasa. 
Xoossaw, ne siiqoy ay mela al7o! Asay ne qefiya garsan qosetidi attees. 
Enti ne gibiraape midi kalloosona; ne keehatetha shaafape uyidi aloosona. 
De7o pultoy neepe keyees; ne poo7uwan nuuni poo7o be7oos. 
Nena ereysatas ne siiqoy, wozana suuretas ne xillotethay qanxetenna. 
Otoranchota tohoy tana yedhofo; nagaranchota kushey tana yedethofo. 
Iita asata kundethaa be7ite; enti kundidosona; dendanaw danda7okona. 
