﻿Mazmure.
32.
Dawita Timirte Akeekan xaafetida ginxo Iya nagaray atto geetetidaynne iya nagaray kametida uray anjetidaysa. 
Goday iya iitatethaa taybonna asi, iya qofan cimoy bayna asi anjetidaysa. 
Taani ta nagaraa paaxonna aggada, kumetha gallas oolidaysi, ta asatethaa daabursis. 
Gallasinne qamma ne kushey tana deexis; haathi dhayin bone awan melidibada, ta wolqay wuris. Salaha 
Taani ta nagaraa new paaxas; ta naaquwa neepe genthabike. “Ta nagaraa Godaas paaxana” yaagas; tana deexida nagaraa atto gadasa. Salaha 
Hessa gisho, xillo asi oonika, ne bentiya wode nena woosso; iita di7oy yaa wode he uraa gakenna. 
Ne taw qosetiya bessi; ne tana metope naagasa. Atotetha yethi yexiya asaa ta yuushuwan wothadasa. Salaha 
Xoossay, “Ta nena tamaarsana; ne baana ogiya bessaana; ta nena zorananne naagana” yaagees. 
Bixaalaninne puulon oyketonna; kiitetonna wozani bayna baquloda woyko parada hanopite. 
Iitatas waayey darana; shin Godan ammaneteyisata siiqoy kammana. 
Hinteno, xilloto, Godan ufaytitenne hashshu giite; hinteno, wozana suureto, ililite. 
