﻿Mazmure.
28.
Dawita Mazmure Abeeti Godaw, ta zaallaw, ta nena xeegayis; ne taw si77i goopa. Ne si77i giiko, ta duufo gelida asi gidayis. 
Maade koyada ta waassiya wode; ubbaafe geeshsha dunkaaniyako, ta kushiya micciya wode ta woosa si7a. 
Iita oothiya iita asatara tana gathada oykofa; enti banta wozanan gene qopishe, banta doonan sarotethi haasayoosona. 
Enta oosuwada enta seera; enta iitatethaada entaw qanxa. Enta kushe oosuwada enta pirda; entaw bessiya iitaa entaw zaara. 
Enti Godaa oosuwanne iya kushe medhuwas, besse immonna gisho Goday enta laallana; zaaridi enta keexenna. 
Ta woosa si7ida gisho Goday galatetto. 
Goday taw wolqanne gondalle; ta wozanay iyan ammanetees; ta iyan maadetas. Ta wozanay iyan ufaytees; ta iya mazmuren sabbana. 
Goday ba asaas wolqa; ba dooridi kawa ashshiya miixa. 
Godaw, ne asaa ashsha; nebaa gididaysata anja. Enta heemmey nena gida; enta merinaw tooka. 
