﻿Mazmure.
21.
Zammaareta Halaqaas Xaafetida Dawita Mazmure. Godaw, kawoy ne wolqan ufaytees; ne immida xoonuwan hashshu gees. 
Iya Wozanaa amuwa iyaw immadasa; iya mettersha woosa iya diggabaaka. Salaha 
Lo77o anjora iya mokaasa; walahi bayna worqa kallacha iya huuphen wothaasa. 
I nena de7o oychis; daro laythinne adussa de7o immadasa. 
Neeni iyaw xoono immida gisho, iya bonchoy daris; gitatethinne teema iyaw immadasa. 
Merinaa anjuwa iyaw immadasa; ne bentuwan iya ufaysaasa. 
Kawoy Godan ammanetees; Ubbaafe dhoqa Xoossaa maarotay, iyara de7iya gisho I dagammenna. 
Ne kushey ne morketa, ne ushacha kushey nena ixeyisata demmana. 
Ne qonciya wode cooce tamada enta xuuggana; Goday ba hanqo suulon enta mittana; iya tamay enta maana. 
Neeni enta nayta biittafe, enta kochaa asaa giddofe dhaysana. 
Ne morketi ne bolla tobboosona; iitabaa maqetoosona, shin polokona. 
Neeni enta ne dongiyan dukana; enta guye zaarada gooddana. 
Godaw, ne minotethan dhoqu dhoqu ga; ne wolqaa gisho galata mazmure yexoos. 
