﻿Mazmure.
8.
Zammaareta Halaqaas Xaafetida Dawita Mazmure Suusul7en yexetiya mazmure. Abeeti Godaw nu Xoossaw, ne sunthay biitta ubban waanidi bonchetide! Neeni ne bonchuwa salope bollara dhoqu dhoqu oothadasa. 
Neeni ne morketa gisho ne morkiyanne nena mandeysa si77i oothanaw, guutha nayta doonan dhammiya nayta doonan galata kunthadasa. 
Neeni ne biradhen medhida ne salota, iya bessan bessan neeni wothida ageenanne xoolintota taani be7iya wode, 
neeni asaba qopanaw asi aybee? Woyko neeni iya xomoosanaw I aybee? 
Iya ne neepe guuthara guuthadasa; bonchonne gitatetha kallacha iya huuphen wothadasa. 
Ne medhida medhetetha ubbaa, haarana mela ne iya shuumadasa; ubbaa iya tohuwape garsara wothadasa. 
Dorsatanne meheta, wora do7ata ubbaa, 
salo kafota, abba molotanne haatha garsan qaaxiya ubbaa iyaw haarisadasa. 
Abeeti Godaw nu Xoossaw, ne sunthay biitta ubban waanidi bonchetide! 
