﻿Mazmure.
6.
Zammaareta Halaqaas Xaafetida Dawita Mazmure Hospun shayan yexetiya mazmure Abeeti Godaw, ne yiluwan tana seeropa; ne sheniyan tana hanqofa. 
Abeeti Godaw, taani daaburancho gidida gisho tana maara; abeeti Godaw, ta wozanay argaacida gisho tana mintha. 
Ta shempiya daro un7etasu; tana maaddanaw awude gakanaw gam7ay? 
Abeeti Godaw, neeni simmada tana ashsha; ne keehatetha daruwan tana kessa eka. 
Hayqida asaa giddofe nena hassayey baawa; duufon gididi nena galatey oonee? 
Taani oolen daaburas; qamma kumethi yeekashe ta hiixa irxisas; ta arsa afuthan wooqisas. 
Ta morketa gaason ta ayfey mulcatis; taani afuxida gisho demmonna ixis. 
Goday ta yeehuwa si7ida gisho, hinteno, iita ootheysato taape haakite. 
Goday ta waasuwa si7is; ta woosa ekis. 
Ta morketi ubbay yeellatidosona; dagammidosona; qoponna guye simmidi kawuyidosona. 
