﻿Mazmure.
4.
Zammaareta Halaqaas Xaafetida Dawita Mazmure Diithan yexetiya mazmure Abeeti tana xillisiya Xoossaw, taani nena xeegiya wode taw koya. Taani un7etida wode ne tana la77a kessadasa; taw qadheta; ta woosa si7a. 
Hinteno asaw, hinte awude gakanaw ta bonchuwa kawushsheetii? Awude gakanaw pathonnaba doseetii? Awude gakanaw wordo kaalleetii? Salah 
Goday ammanetiya asata baw dummayidi wothidaysa erite; taani Godaa xeegiya wode I tana si7ees. 
Hanqetite, shin nagara oothopite; hinte zin7iya wode hinte wozanaa qorite; si77i giite. Salah 
Godaas like yarsho yarshite; iyan ammanetite. 
“Nuna lo77oba bessanay oonee?” yaagidi daroti oychoosona; Abeeti Godaw, ne nuna keeha ayfen xeella. 
Daro gistefenne woyne ushshafe ne ta wozanan wothida gita ufaysay aadhees. 
Abeeti Godaw, ne xalaali tana saro wothiya gisho, taani zin7ada wopu gada dhiskayis. 
