GEN 1:1 ፆሳይ ኮይሮ ሳሎታነ ሳአ መꬍስ።
GEN 1:2 ሄ ዎደ ሳእ ጊጎናነ አይብካ ባይና መላ ደኤስ። ꬉም ቢታ ማእዳ ዎልቃማ ሃꬃታ ቦላ ደኤስ። ፆሳ አያናይ ሃꬃፈ ቦላራ ቃፄስ።
GEN 1:3 ሄሳፈ ጉየ፥ ፆሳይ፥ “ፖኦይ ሀኖ” ያግን፥ ፖኦይ ሀንስ።
GEN 1:4 ፖኦይ ሎኦ ግድዳይሳ ፆሳይ በእስ፤ ፖኡዋ ꬉማፐ ሻክስ።
GEN 1:5 ፆሳይ ፖኡዋ፥ “ጋላስ” ግድ ሱንꬅስ፤ ቃስ ꬉማ “ቃማ” ግድ ሱንꬅስ። ሳእ ቃምስ ዎንትስ፤ ሄስ ኮይሮ ጋላስ።
GEN 1:6 ሄሳፈ ጉየ፥ ፆሳይ፥ “ቦላራ ደእያ ሃꬃ ጋርሳን ደእያ ሃꬃፈ ሻክያ ሳሎ ጉፋንꬆይ ሀኖ” ያግን ሀንስ።
GEN 1:7 ፆሳይ ሳሎ ጉፋንꬆ ጊግስድ፥ ሳሎ ጉፋንꬆፈ ቦላራ ደእያ ሃꬃ ጋርሳን ደእያ ሃꬃፈ ሻክስ።
GEN 1:8 ፆሳይ ሄ ጉፋንꬁዋ፥ “ሳሎ” ግድ ሱንꬅስ። ሳእ ቃምስ፤ ዎንትስ፤ ሄስ ናምአንꬆ ጋላሳ።
GEN 1:9 ሄሳፈ ጉየ፥ ፆሳይ፥ “መላ በሳይ ቆንጫናዳ ሳሎፐ ጋርሳን ደእያ ሃꬅ ኡባይ እስ በሲ ሺቆ” ያግን ሀንስ።
GEN 1:10 ፆሳይ ሄ መላ በሳ፥ “ቢታ” ግድ ሱንꬅስ፤ ቃስ እስ በሳን ሺቅዳ ሃꬃ፥ “አባ” ግድ ሱንꬅስ። ያትድ፥ ፆሳይ ሄስ ሎኦ ግድዳይሳ በእስ።
GEN 1:11 ሄሳፈ ጉየ፥ ፆሳይ፥ “ቢታይ ምꬅ ማታ ዶልሶ፤ ዘረꬃ አይፈይ ደእያ ካꬅነ ዘረꬃ አይፈይ ግዶን ደእያ ምꬅ ዶሎ” ያግስ፤ ሄሳዳካ ሀንስ።
GEN 1:12 ቢታይ ምꬅ ማታ እያ ቆሞን ቆሞን ዶልስስ። ፆሳይ ሄስ ሎኦ ግድዳይሳ በእስ።
GEN 1:13 ሳእ ቃምስ ዎንትስ፤ ሄስ ሄꬓንꬆ ጋላስ።
GEN 1:14 ሄሳፈ ጉየ፥ ፆሳይ፥ “ጋላሳ ቃማፈ ሻካናዉ ፖኦት ሳሎን ሀኖ። ኤንቲ ቃማ፥ ጋላሳ፥ ዎደነ ላይꬅ ኤርሳናዉ ማላ ግዶ።
GEN 1:15 ቢታ ቦላ ፖአና መላ ኤንቲ ሳሎ ጉፋንꬆን ሀኖ” ያግስ፤ ሄሳዳካ ሀንስ።
GEN 1:16 ፆሳይ ናምኡ ግታ ፖኦታ መꬍስ። አዊ ጋላስ፥ አጌን ቃማ ፖአና መላ ኦꬅስ። ሄሳዳካ ፆልንቶታ መꬍስ።
GEN 1:17 ፆሳይ ኤንቲ ሀ ሳአ ቦላ ፖአና መላ ሳሎን ዎꬅስ።
GEN 1:18 ሄስ፥ ጋላስነ ቃማ ሃራና መላነ ፖኦ ꬉማፐ ሻካና መላሳ። ፆሳይ ሄስ ሎኦ ግድዳይሳ በእስ።
GEN 1:19 ሳእ ቃምስ ዎንትስ፤ ሄስ ኦይዳንꬆ ጋላስ።
GEN 1:20 ሄሳፈ ጉየ፥ ፆሳይ፥ “ደኦይ ደእያ ዱማ ዱማ መተꬃት ሃꬃን ዳሮ፤ ካፎትካ ሳአፐ ቦላራ፥ ሳሎ ጉፋንꬆፈ ጋርሳን ፕራꬎ” ያግስ።
GEN 1:21 ያትድ ፆሳይ አባን ደእያ ግታ ዶአታ፥ ሃꬃ ግዶን ዎፅ ቃፅያ መተꬃታ ኡባነ ፓልያ ካፎታ ኡባ እያ ቆሞን ቆሞን መꬍስ። ፆሳይ ሄስ ሎኦ ግድዳይሳ በእስ።
GEN 1:22 ፆሳይ ኤንታ፥ “የለትተ፥ ዳርተ፥ አባ ኩምተ፥ ካፎት ቢታ ቦላ ዳሮ” ያግድ አንጅስ።
GEN 1:23 ሳእ ቃምስ ዎንትስ፤ ሄስ እቻሻንꬆ ጋላስ።
GEN 1:24 ሄሳፈ ጉየ፥ ፆሳይ፥ “ደኦይ ደእያ መተꬃት ኤንታ ቆሞን ቆሞን፥ መሄታ፥ ሳአራ ጎሸትያ መተꬃታነ ዶአታ ኤንታ ቆሞን ቆሞን ቢታይ ከሶ” ያግን ሀንስ።
GEN 1:25 ሄሳዳ ኦꬅድ ኤንታ ኡባ መꬍስ። ፆሳይ ሄስ ሎኦ ግድዳይሳ በእስ።
GEN 1:26 ሄሳፈ ስምን፥ ፆሳይ፥ “አሰ ኑና ዳንስድ አነ መꬎኦስ። ኤንቲ አባ ሞሉዋ፥ ሳሎ ካፎታ፥ ቢታ ቦላ ዎፅ ቃፅያ መተꬃ ኡባ ሃሮ” ያግስ።
GEN 1:27 ሄሳዳ ፆሳይ አሰ ባና ዳንስድ መꬍስ። እ አሰ ፆሰ ዳንስድ መꬍስ፤ ኤንታ አደነ ማጫስ ኦꬅድ መꬍስ።
GEN 1:28 ፆሳይ ኤንታና፥ “የለትተ፥ ዳርተ፥ ሳአ ኩምተ፤ ሃርተ። አባ ሞሎ፥ ሳሎ ካፎታነ ቢታ ቦላ ዎፅ ቃፅያ፥ ደኦይ ደእያ መተꬃ ኡባ ሃርተ” ያግድ አንጅስ።
GEN 1:29 ሄሳፈ ጉየ፥ ፆሳይ፥ “ታኒ ቢታ ኡባ ቦላ ዘረꬃ አይፈይ ደእያ ካꬃ ኡባነ ዘረꬃ አይፈይ ግዶን ደእያ ምꬅ ኡባ ህንተዉ እማስ፤ ሄስ ህንተዉ ካꬅ ግዶ።
GEN 1:30 ቃስካ ሀ ሳአን ደእያ መሄነ ዶአ ኡባስ፥ ሳሎ ካፎ ኡባስነ ሳአራ ጎሸትያ መተꬃ ኡባስ ምያባ ግዳና መላ፥ ጭልኦ ምꬅነ ማታ እማስ” ያግስ፤ ሄሳዳካ ሀንስ።
GEN 1:31 ፆሳይ ባ መꬍዳ ኡባባካ ፄልያ ዎደ ዳሮ ሎኦ ግድዳይሳ በእስ። ሳእ ቃምስ፤ ዎንትስ፤ ሄስ ኡሱፑንꬆ ጋላስ።
GEN 2:1 ሳሎትነ ሳእ ኤንታን ደእያባ ኡባባይ ሀይሳዳ መትድ ፖለትስ።
GEN 2:2 ፆሳይ ባ ኦሱዋ ፖልድ፥ ላፑንꬃ ጋላሳን ሸምፕስ።
GEN 2:3 ፆሳይ ላፑንꬃ ጋላሳን ባ ኦꬅያ ኦሱዋ ኦንግድ ሸምፕዳ ግሾ ሄ ጋላሳ አንጅስ፤ ጋላሳታፐ ዱማይስ።
GEN 2:4 ሳሎትነ ሳእ ሄሳዳ ሀን መትስ። ጎዳ ፆሳይ ሳአነ ሳሎታ መꬍዳ ዎደ፥
GEN 2:5 ሳአ ቦላ እር ቡክቦና ግሾነ ኦꬅያ አስ ባይና ግሾ ምꬅነ ማት ዶልቤና፤ አጭያባይካ ባዋ።
GEN 2:6 ግዶሽን፥ ሳአፐ ሃꬅ ፑልትድ፥ ቢታ ኡባ ላክሴስ።
GEN 2:7 ሄሳፈ ጉየ፥ ጎዳ ፆሳይ ቢታ ባናፐ አሰ መꬍድ እያ ሲራ ደኦ ሸምፖ ፑንድ ገልስስ። ያትን፥ ሄ አደይ ደኦራ ደእያ አሰ ግድስ።
GEN 2:8 ጎዳ ፆሳይ ዶሎሀ ባጋራ ኤደነ ጋናተ ጊግስስ፤ ያን ባ መꬍዳ አድያ ዎꬅስ።
GEN 2:9 ጎዳ ፆሳይ ፄላናዉ ሎእያ፥ ማናዉካ ማልእያ ኡባ ቆሞ ምꬅ ቢታፈ ዶልስስ። ጋናተ ግዶን ደኦ እምያነ ሎኦነ ኢታ ኤርስያ ናምኡ ምꬃታ ዎꬅስ።
GEN 2:10 ጋናተ ኡሽያ ሻፋ ሃꬃይ ኤደነፐ ጎጌስ። ሄ ሻፋይ ኤደነፐ ከይድ ኦይዱ ሻፉ ከይድ ሻከቴስ።
GEN 2:11 ኮይሮ ሻፋ ሱንꬃይ ፍሶነ። ፍሶነይ ዎርቀይ ደእያ ሀውላ ቢታ ቦላ ጎጌስ።
GEN 2:12 ሄ ቢታ ዎርቀይ ጌሻ ዎርቃ። ቃስ አልኦ ሽቶይነ ሹች ያን ደኤስ።
GEN 2:13 ናምአንꬆ ሻፋ ሱንꬃይ ግዮነ። ግዮነይ ቶጰ ቢታ ዩሹዋን ጎጌስ።
GEN 2:14 ሄꬓንꬆ ሻፋ ሱንꬃይ ፀግሮሳ። ፀግሮስ አሶረፐ ዶሎሀ ባጋራ ጎጌስ። ቃስ ኦይዳንꬆ ሻፋይ ኤፍራፂሳ።
GEN 2:15 ጎዳ ፆሳይ አስ ኤደነ ጋናተ ኦꬃና መላነ ናጋና መላ እያ ኤፍድ ያን ዎꬅስ።
GEN 2:16 ጎዳ ፆሳይ አሰ፥ “ጋናተ ምꬃ ቴራ ኡባፈ ኔኒ ማናዉ ዳንዳኣሳ።
GEN 2:17 ሽን ሎኦነ ኢታ ኤርስያ ምꬃ አይፍያፐ ሞፓ። አይስ ጊኮ፥ ኔኒ እያፐ ምዳ ጋላስ ቱማ ሀይቃና” ያግድ ኪትስ።
GEN 2:18 ሄሳፈ ጉየ፥ ጎዳ ፆሳይ፥ “አደይ ባርካ ደኤይስ ሎኦ ግደና። ታኒ እያ ማዳና መላ እያዉ እንጀትያ ላገ መꬋና” ያግስ።
GEN 2:19 ጎዳ ፆሳይ መሄታ፥ ዶአታነ ሳሎ ካፎታ ኡባ ቢታፈ መꬍስ። ያትድ፥ ኤንታ ዎይግድ ሱንꬃነኮ በአናዉ አዳመኮ ኤህን፥ አዳመይ ደኦይ ደእያ መተꬃ ኡባ ሱንꬅዳ ሱንꬃይ ኤንታ ሱንꬅ ግድድ አትስ።
GEN 2:20 ሄሳዳካ፥ አዳመይ መሄታ፥ ሳሎ ካፎታነ ባዞ ዶአታ ኡባ ሱንꬅስ። ሽን አዳመስ እንጀትያነ እያ ማድያ ላገይ በንትቤና።
GEN 2:21 ሄሳ ግሾ፥ ጎዳ ፆሳይ አዳመ ዎልቃማ ꬍስኮን የግስ። እ ꬍስኮ ሀይቅዳሽን እያ ምየ መቀꬃፈ እሱዋ ኤክድ፥ ሄ በሳ አሾን ኩንꬅስ።
GEN 2:22 ጎዳ ፆሳይ አዳመፐ ኤክዳ መቀꬃ ማጫ ኦꬅድ መꬍስ፤ ያትድ እዮ እያኮ ኤህስ።
GEN 2:23 አዳመይ፥ “ሀ መቀꬅያ ታ መቀꬃፈ፥ ሀ አሽያ ታ አሾፐ ኤከትዳሮ። እያ አደፈ ኤከትዳ ግሾ ማጫ ጌተቶ” ያግስ።
GEN 2:24 ሄሳ ግሾ አስ ባ አዋነ ባ አይዉ አግድ፥ ባ ማቸራ እስፈ ደኤስ፤ ናምአይ እስ አስ ግዶሶና።
GEN 2:25 አዳመይነ ሄዋና ናምአይካ ፅረ ካሎ ደኦሶና፤ ሽን እሶይ እሱዋስ ዬላቶኮና።
GEN 3:1 ሾሽ ጎዳ ፆሳይ መꬍዳ ዶአ ኡባፈ አꬍዳ ገናንቾ። እስ ጋላስ ሾሽ ማጫስዉ፥ “ፆሳይ ቱማ ህንተና፥ ‘ጋናትያን ደእያ ምꬃ አይፈ ኡባፈ ሞፕተ’ ግዴ?” ያግድ ኦይችስ።
GEN 3:2 ማጫስያ ሾሻኮ፥ “አካይ፥ ፆሳይ ሄሳዳ ግቤና፤ ኑኒ ጋናተ ግዶን ደእያ ምꬃታ አይፈ ማናዉ ዳንዳኦስ።
GEN 3:3 ሽን ፆሳይ ኑና፥ ‘ጋናተ ግዶን ደእያ ምꬃ አይፈ ሞፕተ፥ ቦቾፍተ፤ እፅኮ ህንተ ሀይቃና’ ግስ” ያጋሱ።
GEN 3:4 ሾሻይ ማጫስዉ፥ “ህንተ አይኮካ ሀይቀከታ።
GEN 3:5 ፆሳይ ሄሳ ግዳይ፥ ሄ ምꬃ አይፍያ ህንተ ሚኮ አኬካ ደምድ ሎኦነ ኢታ ፆሳዳ ህንተ ኤራናይሳ እ ኤርያ ግሾሳ” ያግስ።
GEN 3:6 ማጫስያ ምꬃ አይፈይ ማናዉ ማልኤይሳ፥ በአናዉ ሎኤይሳነ፥ ጭንጫተꬅ ደማናዉ አሞያባ ግደይሳ በአሱ። ሄ ምꬃ አይፍያፐ ኤካዳ ማሱ። ቃስ ባ አዝናስካ እምን እካ ምስ።
GEN 3:7 ኤንቲ ም ስሚድ፥ ናምአይካ አኬካ ደምዶሶና። ኤንቲ ፅረ ካሎ ደኤይሳ ኤርዶሶና። ሄሳ ግሾ ባላሰ ምꬃ ሀይꬅ ስክድ ዳንጭዶሶና።
GEN 3:8 ሳእ ኦማርስዳ ዎደ ጋናተ ግዶን ጎዳ ፆሳይ ሄመትሽን እያ ግርሳ አዳመይነ እያ ማችያ ስእዶሶና። ኤንቲ ጋናተ ምꬃ ግዶን ጎዳ ፆሳፈ ቆሰትዶሶና።
GEN 3:9 ሽን ጎዳ ፆሳይ አዳመ ፄግድ፥ “አዳመ፥ አዉን ደአይ?” ያግስ።
GEN 3:10 አዳመይ፥ “ጋናተ ግዶን ነ ግርሳ ስአዳ ታኒ ካሎ ደእያ ግሾ ያያዳ ቆሰታስ” ያግስ።
GEN 3:11 ጎዳ ፆሳይ፥ “ኔኒ ካሎ ደኤይሳ ነዉ ኦድዳይ ኦኔ? ታኒ ነና ሞፓ ግዳ ምꬃ አይፈፐ ማድዬ?” ያግድ ኦይችስ።
GEN 3:12 አዳመይ፥ “ታራ ዳና መላ ኔኒ እምዳ ማጫስያ ሄ ምꬃ አይፍያፐ ታዉ እምን ማስ” ያግስ።
GEN 3:13 ጎዳ ፆሳይ፥ ማጫስዉ፥ “ኔኒ ሄሳ አይስ ኦꬃዲ?” ያግድ ኦይችስ። ማጫስያ፥ “ታና ሾሻይ ጭምን ማስ” ያጋሱ።
GEN 3:14 ጎዳ ፆሳይ ሾሻ፥ “ኔኒ ሀይሳ ኦꬅዳ ግሾ፥ መሄፐነ ዶአ ኡባፈ አꬋዳ ባደትዳባ ግዳ። ኔኒ ነ ኡሎን ቢታራ ጎሸታና፤ ነ ደኦ ላይꬃ ኡባን ባና ላጫና።
GEN 3:15 ታኒ፥ ነ ግዶንነ ማጫሰ ግዶን፥ ነ ሼሻ ግዶንነ እ ሼሻ ግዶን ሞርከተꬅ ዎꬃና። እ ነ ሁጵያ ቆፃና፥ ነካ እያ ግንድያ ዱካና” ያግስ።
GEN 3:16 ማጫስዉ ጎዳ ፆሳይ፥ “ነ ቃንꬃትዳ አጌናን ዳሮ ኡንኤታና። ኔኒ ዎልቃማ ዋየን ናአ የላና። ግዶሽን፥ ኔኒ ነ አዝናራ ዳናዉ አሞታና፤ እ ነና ሃራና” ያግስ።
GEN 3:17 ጎዳ ፆሳይ አዳመኮ፥ “ኔኒ ነ ማቸ ኦዳ ስእዳ ግሾነ ታኒ ነና ሞፓ ግዳ ምꬃ አይፍያፐ ኔኒ ምዳ ግሾ፥ ቢታይ ነ ጋሶን ባደትዳይሳ ግዶ። ኔኒ ነ ደኦ ላይꬃ ኡባን ግታ ዳቡርሳን ቢታ ኦꬃዳ ማና።
GEN 3:18 ቢታይ ነዉ አጉንꬅነ ሀርመ ዶልሳና፤ ኔኒ ቢታፈ ዶልድ ካፅያባ ማና።
GEN 3:19 ኔኒ ነ መትዳ ቢታ ስማና ጋካናዉ ዳቡራን ጫዋታዳ ኦꬅዳ ነ ካꬅ ማና። ኔኒ ቢታፈ መትዳ ግሾ ቢታ ስማና” ያግስ።
GEN 3:20 አዳመይ ባ ማችዉ ደኦይ ደእያ አሳ ኡባስ አዮ ግድያ ግሾ ሄዋኖ ግድ ሱንꬅስ።
GEN 3:21 ጎዳ ፆሳይ አዳመነ እያ ማችዉ እተ ጊግስድ ማይዝስ።
GEN 3:22 ጎዳ ፆሳይ፥ “ህዛ አስ ሎኦነ ኢታ ኤሮን ኑፐ እሱዋዳ ግድስ። ኤንቲ ባንታ ኩሽያ የድድ፥ ደኦ እምያ ምꬃ አይፍያፐ ኤክድ ሞና መላነ መርናዉ ደኦን ዶና መላ ተቀታናዉ ኮሼስ” ያግስ።
GEN 3:23 ሄሳ ግሾ፥ ኤንቲ ባንታ መትዳ ቢታ ኦꬃና መላ ጎዳ ፆሳይ ኤደነ ጋናተፐ ኤንታ ከስስ።
GEN 3:24 ያትድ፥ ደኦ እምያ ምꬃኮ ኤፍያ ኦግያ ናጋና መላ ክሩቤላ ጌተትያ ደኦ መተꬃታነ ሽረት ሽረት ዎꬍያ ታማ ላጮ ማሸ ኤደነ ጋናተፐ ዶሎሀ ባጋራ ዎꬅስ።
GEN 4:1 አዳመይ ባ ማቸ ሄዋንራ አቅስ። እያ ቃንꬃታዳ አደ ናአ የላሱ። “ጎዳይ ታና ማድን አደ ናአ ደማስ” ጋዳ ቃየላ ጋዳ ሱንꬃሱ።
GEN 4:2 እያ እሻ አበላ የላሱ። አበል ዶርሰ ሄሜስ ቃስ ቃየል ቢታ ኦꬄስ።
GEN 4:3 ኡንደና ዎደፐ ጉየ፥ ቃየል ባ ጋደን ካፅዳ ካꬃፈ ጎዳስ ያርሾ ያርሽስ።
GEN 4:4 ሽን አበል ባ ዶርሳ ዉድያ ግዶን ባይራ የለትዳይሳ ሹክድ እያ አሹዋፐ ሞꬎ ባጋ ያርሽስ። ጎዳይ አበላነ እያ ያርሹዋ ኤክስ።
GEN 4:5 ሽን ቃየላነ እያ ያርሹዋ ኤክቤና። ሄሳ ግሾ፥ ቃየል ዳሮ ይሎትስ፤ እያ ሶምኦይ ꬉምስ።
GEN 4:6 ጎዳይ ቃየላኮ፥ “አይስ ይሎታይ? ነ ሶምኦይ አይስ ꬉምዴ?
GEN 4:7 ኔኒ ሎኦ ኦꬅዳባ ግድያኮ፥ ነ ሶምኦይ ፓሽካ ግደኔ? ሽን ኔኒ ሎኦ ኦꬆና እፅኮ፥ ናጋር ዶአዳ ነ ፐንገን ናጌስ። እ ነና ሃራናዉ ኮዬስ፥ ሽን ኔኒ እያ ፆናናዉ በሴስ” ያግስ።
GEN 4:8 ሄሳፈ ጉየ፥ ቃየል ባ እሻ አበላኮ፥ “አነ ደምባ በሲ ቦስ” ያግስ። ኤንቲ ደምባን ደእሽን፥ ቃየል ባ እሻ አበላ ቦላ ደንድድ እያ ዎꬍስ።
GEN 4:9 ጎዳይ ቃየላ፥ “ነ እሻይ አበል አዉኔ?” ያግድ ኦይችስ። ቃየል ዛሪድ፥ “ታኒ ኤርከ፤ ታ እሻ ናገይ ታነዬ?” ያግስ።
GEN 4:10 ጎዳይ ቃየላ፥ “ሀይሳ አይስ ኦꬃዲ? ሄኮ፥ ነ እሻ ሱꬃይ ቢታፈ ታኮ ፅሎ ፕርዳስ ዋሴስ።
GEN 4:11 ኔኒ ባደትዳባ ግድያ ግሾ ቢታ ዛራዳ ኦꬃናዉ ዳንዳአካ። ነ እሻ ዎꬋዳሳ እያ ሱꬃካ ቢታን ጉሳዳሳ።
GEN 4:12 ኔኒ ኦꬅንካ ቢታይ ነዉ አይፈና፤ በተ አሳዳ ኔኒ ሳአ ቦላ ቶይላታዳ ዳቡራና” ያግስ።
GEN 4:13 ቃየል ጎዳኮ፥ “ነ ታ ቦላ ፕርድዳ ፕርዳይ ታ ዎልቃፈ ቦላ።
GEN 4:14 ኔኒ ታና ሀች ቢታፈ የደꬃሳ፤ ነ ስንꬃፈካ ሃሳሳ። በተ አሳዳ ታኒ ሳአ ቦላ ዳቡራና፤ ታና ደምያ ኦንካ ዎꬋና” ያግስ።
GEN 4:15 ጎዳይ እያ፥ “ነና ኦንካ ዎና፤ ዎꬍኮ፥ ታኒ ላፑን ቶሆ ሀሎ ከያና” ያግስ። ሄሳ ግሾ፥ እያ ደምያ ኦንካ ዎꬎና መላ ጎዳይ እያ ቦላ ናግሶ ማላ ዎꬅስ።
GEN 4:16 ቃየል ጎዳ ስንꬃፈ ከይድ፥ ኤደነ ባጋፈ ዶሎሀ ባጋን ደእያ ኖዳ፥ ቢታን ደእስ።
GEN 4:17 ቃየል ባ ማቸራ አቅስ፤ እያ ቃንꬃታዳ ሄኖከ የላሱ። ሄ ዎደ ቃየል ካታማ ኬፅድ፥ ሄ ካታማ ባ ናኣ ሱንꬃን “ሄኖከ” ግድ ሱንꬅስ።
GEN 4:18 ሄኖከይ ጋይዳ የልስ። ጋይድ ማኤላ የልስ። ማኤል ማቱሳኤላ የልስ። ማቱሳኤል ላመሀ የልስ።
GEN 4:19 ላመህ አዶነ ሲሎ ጌተትያ ናምኡ ማቾ ኤክስ።
GEN 4:20 አዳ ያባላ የላሱ። ያባል መሄ ሃርያነ ዱንካነን ደእያ አሳታ አዋ።
GEN 4:21 እያ እሻ ሱንꬃይ ዩባላ። ዩባል ቃስ ዲꬅ ዲፀይሳታነ ሱሱልኤ ፑንያ አሳታ ኡባ አዋ።
GEN 4:22 ሲላ ቃስ ቱባልቃይና ጌተትያ ናኣ የላሱ። ቱባልቃይን ናሰ ብራታፐነ ብራታፐ ዱማ ዱማ ሚሸታ ቆፀይሳታ አዋ። ቱባልቃይና ምችያ ናእሞ።
GEN 4:23 እስ ጋላስ ላመህ ባ ማቸታ፥ “አደ፥ ሲለ፥ ስእተ፤ ታ ማቸቶ፥ ታኒ ኦድያባ ሀይዝተ። እስ ፓንꬃ አደይ ታና ደችድ ማዱንፅስዳ ግሾ፥ ታኒ እያ ዎꬋስ።
GEN 4:24 ቃየላ ሃሉዋ ከያናው ላፑን ኩሸ ኮሽኮ፥ ላመሀ ሃሉዋ ከያናው ላፑን ታማነ ላፑን ኩሸ ኮሼስ” ያግስ።
GEN 4:25 አዳመ ማችያ ሀራ አደ ናኣ የላሱ። ያታዳ፥ “ቃየል ዎꬍዳ አበላ ግሾ ፆሳይ ታዉ ሀራ ናአ እሚስ” ጋዳ እያ ሴታ ጋዳ ሱንꬃሱ።
GEN 4:26 ሴት አደ ናአ የልድ እያ “ሄኖሳ” ግድ ሱንꬅስ። አሳይ ጎዳ ሱንꬃ ፄግድ ጎይኖ ዶምዳይ ሄ ዎደ።
GEN 5:1 አዳመ የለተꬃይ ሀይሳፈ ካልድ ፃፈትዳይሳ። ፆሳይ አሰ መꬍዳ ጋላስ ባና ዳንስድ መꬍስ።
GEN 5:2 እ አደነ ማጫስ ኦꬅ መꬍድ ኤንታ አንጅስ። ኤንታ መꬍድ አሰ (አዳመ) ግድ ሱንꬅስ።
GEN 5:3 አዳመይ 130 ላይꬅ ደእድ፥ ባና ዳንያ አደ ናአ የልድ እያ “ሴታ” ግድ ሱንꬅስ።
GEN 5:4 አዳመይ ሴታ የልዳፐ ጉየ 800 ላይꬅ ደእስ። ሀራ አደ ናይታነ ማጫ ናይታ የልስ።
GEN 5:5 አዳመይ 930 ላይꬅ ደእድ ሀይቅስ።
GEN 5:6 ሴት 105 ላይꬅ ደእድ ሄኖሳ የልስ።
GEN 5:7 ሴት ሄኖሳ የልዳፐ ጉየ፥ 807 ላይꬅ ደእስ። ሀራ አደ ናይታነ ማጫ ናይታ የልስ።
GEN 5:8 ሴት 912 ላይꬅ ደእድ ሀይቅስ።
GEN 5:9 ሄኖስ 90 ላይꬅ ደእድ፥ ቃይናና የልስ።
GEN 5:10 ሄኖስ ቃይናና የልዳፐ ጉየ፥ 815 ላይꬅ ደእስ። ሀራ አደ ናይታነ ማጫ ናይታ የልስ።
GEN 5:11 ሄኖስ 905 ላይꬅ ደእድ ሀይቅስ።
GEN 5:12 ቃይናን 70 ላይꬅ ደእድ፥ ማላልኤላ የልስ።
GEN 5:13 ቃይናን ማላልኤላ የልዳፐ ጉየ፥ 840 ላይꬅ ደእስ። ሀራ አደ ናይታነ ማጫ ናይታ የልስ።
GEN 5:14 ቃይናን 910 ላይꬅ ደእድ ሀይቅስ።
GEN 5:15 ማላልኤል 65 ላይꬅ ደእድ፥ ያረዳ የልስ።
GEN 5:16 ማላልኤል ያረዳ የልዳፐ ጉየ፥ 830 ላይꬅ ደእስ። ሀራ አደ ናይታነ ማጫ ናይታ የልስ።
GEN 5:17 ማላልኤል 895 ላይꬅ ደእድ ሀይቅስ።
GEN 5:18 ያረድ 162 ላይꬅ ደእድ፥ ሄኖከ የልስ።
GEN 5:19 ያረድ ሄኖከ የልዳፐ ጉየ፥ 800 ላይꬅ ደእስ። ሀራ አደ ናይታነ ማጫ ናይታ የልስ።
GEN 5:20 ያረድ 962 ላይꬅ ደእድ ሀይቅስ።
GEN 5:21 ሄኖከይ 65 ላይꬅ ደእድ፥ ማቱሳላ የልስ።
GEN 5:22 ማቱሳላ የልዳፐ ጉየ፥ ሄኖከይ 300 ላይꬅ ፆሰ ኡፋይስያ ደኦ ደእስ። ሀራ አደ ናይታነ ማጫ ናይታ የልስ።
GEN 5:23 ሄኖከይ 365 ላይꬅ ደእስ።
GEN 5:24 ፆሲ እያ ባኮ ኤክዳ ግሾ ስሚድ በንትቤና።
GEN 5:25 ማቱሳል 187 ላይꬅ ደእድ፥ ላመሀ የልስ።
GEN 5:26 ማቱሳል ላመሀ የልዳፐ ጉየ፥ 782 ላይꬅ ደእስ። ሀራ አደ ናይታነ ማጫ ናይታ የልስ።
GEN 5:27 ማቱሳል 969 ላይꬅ ደእድ ሀይቅስ።
GEN 5:28 ላመህ 182 ላይꬅ ደእድ፥ አደ ናአ የልስ።
GEN 5:29 ያትድ፥ “ሀ ናአይ ጎዳይ ባድዳ ቢታ ቦላ ሀ ዳቡራ ኦሶ ኡባፈ ኑና ሸምፕሳና” ግድ እያ ኖሄ ግድ ሱንꬅስ።
GEN 5:30 ላመህ ኖሄ የልዳፐ ጉየ፥ 595 ላይꬅ ደእስ። ሀራ አደ ናይታነ ማጫ ናይታ የልስ።
GEN 5:31 ላመህ 777 ላይꬅ ደእድ ሀይቅስ።
GEN 5:32 ኖሄይ 500 ላይꬅ ደእ ስሚድ ሄꬑ አደ ናይታ ሴማ፥ ካማነ ያፈታ የልስ።
GEN 6:1 አሳይ ሳአ ቦላ ዳርዳ ዎደ ኤንታዉ ማጫ ናይት የለትዶሶና።
GEN 6:2 “ፆሳ ናይታ” ጌተትያ መተꬃት ሄ ማጫ ናይት ማላ ሎኦ ግደይሳ በእድ ኤንታፈ ባንታዉ ዶርዳይሳታ ማችዶሶና።
GEN 6:3 ጎዳይ፥ “አሳስ ደኦ እምያ ታ አያናይ አሳን መርናዉ ዴና። አስ ሀይቀይሳ ግድያ ግሾ፥ ህዛፐ እያ ላይꬃይ እስ ፄታነ ላታማ ግዳና” ያግስ።
GEN 6:4 ሄ ዎደነ ሄሳፈ ጉየ፥ ፆሳ ናይት አሳ ማጫ ናይታ ኤክን፥ ናይት የለትዳ ዎደ፥ ዎጋ አዱሳ አሳት ሳአ ቦላ ደእዶሶና። ኤንቲ በን ዎደ ኦላስ ምኖነ ኤረትዳ አሳታ።
GEN 6:5 ጎዳይ ሄ ዎደ ሳአ ቦላ ደእያ አሳ ኢታተꬅ ዳርዳይሳነ ኤንታ ዎዛናይ ኡባ ዎደ ቆፕያባይ ኢታ ፃላላ ግድዳይሳ
GEN 6:6 በእድ፥ አሰ ሀ ሳአ ቦላ መꬍዳይሳን አዛንስ፤ ባ ዎዛናን ዳሮ ቂሮትስ።
GEN 6:7 ታኒ አሰ አይስ መꬋድና ጋዳ ቂሮታስ። ሄሳ ግሾ፥ ጎዳይ፥ “ታኒ መꬍዳ አሰ፥ መሄ፥ ዶአ፥ ሳአራ ጎሸትያ መተꬃታነ ሳሎ ካፎታ ሳአ ቦላፈ ꬋይሳና” ያግስ።
GEN 6:8 ሽን ኖሄይ ጎዳ ስንꬃን ሳባ ደምስ።
GEN 6:9 ኖሄ ታርከይ ሀይሳፈ ካልድ ፃፈትዳይሳ። ኖሄይ ባ ዎደ ደእያ አሳ ግዶፈ ፆሳ ኡፋይስያነ ሱረ አስ።
GEN 6:10 ኖሄይ ሴማ፥ ካማነ ያፈታ ጌተትያ ሄꬑ አደ ናይታ የልስ።
GEN 6:11 ሄ ዎደ ቢታይ ኩመꬅ ፆሳ ስንꬃን ቱንስ፤ ቢታ ኡባይ ጌላተꬃን ኩምስ።
GEN 6:12 ፆሳይ ሀ ቢታ ፄልያ ዎደ ሳአን ደእያ አሳ ኡባይ ባንታ ኦግያ ቱንስድ ደኤይሳ በእስ።
GEN 6:13 ሄሳ ግሾ፥ ፆሳይ ኖሄ ሀይሳዳ ያግድ ኪትስ፤ “ታኒ አሳ ኡባ ꬋይሳና ሀናይስ። ኤንታ ጋሶን ቢታይ ጌላተꬃን ኩምዳ ግሾ፥ አሰ ቢታፈ ꬋይሳና።
GEN 6:14 ሄሳ ግሾ፥ ምኖ ምꬃፈ ነዉ ማርካበ ኬፃ። ሄ ማርካብያ ግዶን ዳሮ ቆልአታ ከሳ። ያታዳ ሶራነ ካረራ ማደ መላባን ሜሻ።
GEN 6:15 ማርካብያ ሀይሳዳ ያታዳ ኬፃ፤ አዱሳተꬃ 300 ዋꬋ፥ ጎምፓ 50 ዋꬋ፥ ጌሳ 30 ዋꬋ ኦꬃ።
GEN 6:16 ማርካብያስ ካራ መꬋ፤ ካራፐነ ጎዳፐ ግዶን እስ ዋꬋ ግድያ በሲ ዶያ አጋ። ፐንግያ ማርካብያስ ምየ ባጋራ ከሳ፤ ማርካብያ ሄꬑ ፖቀ ከሳዳ ኬፃ።
GEN 6:17 “ታኒ ሳሎፐ ጋርሳን ሸምፖራ ደእያ መተꬃ ኡባ ꬋይሳናዉ ꬋዮ ሃꬃ የዳዳ ሀ ሳኣ ቦላ ደእያባ ኡባ ꬋይሳና።
GEN 6:18 ሽን ታኒ ታ ጫቁዋ ኔራ ጫቃና። ኔኒ፥ ነ ማችዉ፥ ነ አደ ናይታነ ኤንታ ማቸታ ኤካዳ ማርካብያ ግዶ ገላ።
GEN 6:19 ኤንቲ ኔራ ደኦን ዳና መላ፥ ደኦይ ደእያ መተꬃ ኡባፈ ቆሞን ቆሞን አደነ ማጫ ናምአ ናምአ ኦꬃዳ፥ ማርካብያ ግዶ ገልሳ።
GEN 6:20 ዱማ ዱማ ቆሞ ካፎታፐ፥ ዱማ ዱማ ቆሞ መሄታፐነ ሳአራ ጎሸትያ ዱማ ዱማ ቆሞ መተꬃ ኡባፈ ናምአ ናምአ ግድድ ደኦን ዳና መላ ኔኮ ዮ።
GEN 6:21 ቃስ ህንተነ ዶአት ማናዉ ዱማ ዱማ ቆሞ ምያ ካꬅ ኤፋዳ፥ ማርካብያ ግዶን ቆላ” ያግስ።
GEN 6:22 ኖሄይ ኡባባካ ፆሳይ ኪትዳይሳዳ ኦꬅስ።
GEN 7:1 ሄሳፈ ጉየ ጎዳይ ኖሄ ሀይሳዳ ያግስ፤ “ኔኒ ነ ሶ አሳ ኡባራ ማርካብያ ግዶ ገላ። ሀ ዎድያ የለተꬃ ግዶን ታ ሸንያ ፖልዳይ ነ ፃላላ ግድዳይሳ በአስ።
GEN 7:2 ኔኒ ቱና ግዶና መሄነ ዶአ ኡባፈ እያ ቆሞፈ ቆሞፈ አደነ ማጫ ላፑን ላፑን፥ ቱና መሄነ ዶአ ኡባፈ እያ ቆሞፈ ቆሞፈ እስ አደነ እስ ማጫ ገልሳ።
GEN 7:3 ቃስ ሳሎ ካፎታፐ እያ ቆሞፈ ቆሞፈ አደነ ማጫ ላፑን ላፑን ኦꬃዳ፥ ቢታ ኡባ ቦላ ዱማ ዱማ ኮቻይ ደኦን ዳና መላ ኔራ ኤካዳ ገላ።
GEN 7:4 ላፑን ጋላሳፐ ጉየ፥ ታኒ ኦይታሙ ጋላስነ ኦይታሙ ቃማ ሀ ሳኣ ቦላ እራ ቡክሳና። ያታዳ ታኒ መꬍዳ መተꬃ ኡባ ቢታ ቦላፈ ቁቻና” ያግስ።
GEN 7:5 ያትን ኖሄይ ጎዳይ እያ ኪትዳ ኡባባ ኦꬅስ።
GEN 7:6 ꬋዮ ሃꬃይ ሀ ሳኣ ቦላ ይዳ ዎደ ኖሄስ ላይꬅ ኡሱፑን ፄታ።
GEN 7:7 ኖሄይ፥ እያ አደ ናይት፥ እያ ማችያነ እያ ናይታ ማቸት ꬋዮ ሃꬃፈ አታናዉ ማርካብያ ግዶ ገልዶሶና።
GEN 7:8 ቱና ግዶና መሄፐነ ዶአፐ፥ ቱና መሄፐነ ዶአፐ ካፎታፐነ ቢታራ ጎሸተይሳታ ኡባፈ
GEN 7:9 ፆሳይ ኖሄ ኪትዳይሳዳ አደነ ማጫስ ናምአ ናምአ ግድድ፥ ኖሄኮ ማርካብያ ግዶ ገልዶሶና።
GEN 7:10 ላፑን ጋላሳፐ ጉየ፥ ꬋዮ ሃꬃይ ሀ ሳአ ቦላ ይስ።
GEN 7:11 ኖሄይ ኡሱፑን ፄቱ ላይꬅ ደእን፥ ናምአንꬆ አጌናን፥ ታማነ ላፑንꬃ ጋላሳን፥ ቢታ ግዶን ደእያ ግታ ጪሙዋ ፑልቶ ኡባይ ꬉቅ አግስ። ሳሎን ደእያ ሃꬃ ማስኮተት ዶየትዶሶና።
GEN 7:12 እራይ ሀ ሳኣ ቦላ ኦይታሙ ጋላስነ ኦይታሙ ቃማ ቡክስ።
GEN 7:13 እር ቡካ ዶምዳ ጋላስ ኖሄይነ እያ ማችያ፥ እያ አደ ናይት፥ ሴም፥ ካምነ ያፈት፥ እያ ናይታ ሄꬓታ ማቸት እስፈ ማርካብያ ግዶ ገልዶሶና።
GEN 7:14 ዶአ ኡባፈ ባ ቆሞን ቆሞን፥ መሄ ኡባፈ ባ ቆሞን ቆሞን፥ ቢታራ ጎሸትያ ኡባፈ ባ ቆሞን ቆሞን፥ ካፎ ኡባፈ ባ ቆሞን ቆሞን ኤንታራ እስፈ ገልዶሶና።
GEN 7:15 ሸምፖራ ደኤይሳት ኡባይ ናምአ ናምአ ግድድ ኖሄኮ ማርካብያን ገልዶሶና።
GEN 7:16 ፆሳይ ኖሄ ኪትዳይሳዳ፥ መተꬃ ኡባፈ አደነ ማጫ ግድድ ማርካብያ ግዶ ገልን ኖሄፐ ጉየራ ጎዳይ ማርካብያ ፐንግያ ጎርድስ።
GEN 7:17 ꬋዮ ሃꬃይ ኦይታሙ ጋላስ ሳአ ቦላ ቡክሸ ደእስ። ሃꬃይ ዳርድ ማርካብያ ቢታፈ ፑደ ደንꬅስ።
GEN 7:18 ሃꬃይ ቢታ ቦላ ኬህ ዳርን፥ ማርካበይ ሃꬃ ቦላ ቶከትስ።
GEN 7:19 ሳሎፐ ጋርሳን ደእያ ዙማት ኡባይ ምተታና ጋካናስ ሃꬃይ ሳአ ቦላ ኬህ ዳርስ።
GEN 7:20 ሃꬃይ ዙማታ ፄራፐ አꬍድ፥ ታማነ እቻሹ ዋꬋ ጋካናስ ድጭስ።
GEN 7:21 ያትን ሳአ ቦላ ዎፅ ቃፅያ መተꬃት ኡባይ፥ ካፎት፥ መሄይ፥ ዶእነ፥ አስ ኡባይ ሀይቅስ።
GEN 7:22 ቢታ ቦላ ደእያ ባ ሲራ ደኦ ሸምፖ ሸምፕያ ኡባይካ ሀይቅስ።
GEN 7:23 ሳአ ቦላ ደኦይ ደእያ ኡባይ፥ አሳይ፥ መሄይ፥ ዶአይነ ሳሎ ካፎት ኡባይካ ሳአፐ ቁሸትዶሶና። ኖሄይነ እያራ ማርካብያ ግዶን ደኤይሳታ ፃላል አትዶሶና።
GEN 7:24 ሄ ሃꬃይ ፓጮና ፄታነ እሻታሙ ጋላስ ሳአ ቦላ ጋምእስ።
GEN 8:1 ሽን ፆሳይ ኖሄ፥ እያራ ማርካብያ ግዶን ደእያ ዶአ ኡባነ መሄ ኡባ ቆፕድ ሳአ ቦላ ጫርኮ ጫርክስን ሄ ሃꬃይ ዎꬍ ዎꬍ ብስ።
GEN 8:2 ቃስ ቢታ ግዶን ደእያ ጪሙዋ ፑልቶይነ ሳሎን ደእያ ሃꬃ ማስኮተት ጎርደትዶሶና፤ እራይካ ሳሎን ተቀትስ።
GEN 8:3 ያንን፥ ሃꬃይ ፄታነ እሻታሙ ጋላስ ጋካናዉ ዎꬍ ዎꬍ ብስ።
GEN 8:4 ሃꬃይ ዎꬍን ላፑንꬃ አጌናን፥ ታማነ ላፑንꬃ ጋላሳን ማርካበይ አራራተ ዙማታ ቦላ ኡትስ።
GEN 8:5 ሃꬃይ ታማንꬃ አጌና ጋካናዉ ዎꬍ ዎꬍ ብስ። ታማንꬆ አጌናስ ኮይሮ ጋላስ ዙማታ ፄራት በንትዶሶና።
GEN 8:6 ኦይታሙ ጋላሳፐ ጉየ፥ ኖሄይ ባ ኬፅዳ ማርካብያ ማስኮትያ
GEN 8:7 ዶይድ እስ ቁሮ ካረ የድን ቁሮይ ሃꬃይ ቢታ ቦላፈ መላና ጋካናስ፥ ያነ ሃነ ፕራꬍሸ ጋምእስ።
GEN 8:8 ቃስ ኖሄይ ሃꬃይ ቢታ ቦላፈ ዎꬍ ዉርዳኮ በአናዉ እስ ሆለ ካረ የድስ።
GEN 8:9 ሽን ሄ ሆልያ ሃꬃይ ቢታ ኡባ ቦላ ሀእካ ደእያ ግሾ፥ ሸምፕያ በሲ ደማቡኩ። ሄሳ ግሾ ስማዳ፥ ማርካብያኮ ይን፥ ኖሄይ ባ ኩሽያ የድድ፥ ባኮ ማርካብያ ግዶ ኤክስ።
GEN 8:10 ሄሳፈ ጉየ፥ ላፑን ጋላስ ጋምእድ፥ ሆልዉ ዛሪድ የድስ።
GEN 8:11 ሄ ሆልያ ሳእ ኦማርስያ ዎደ እያኮ ስማዳ ያሸ ሻማሆ አጫፐ ዱꬅዳ እርፃ ሀይꬅ ባ ዶናን ሳፃ ኤካዳ ያሱ። ያትን፥ ሃꬃይ ቢታ ቦላፈ ዎꬍዳይሳ ኖሄይ ኤርስ።
GEN 8:12 ቃስ ኖሄይ ሀራ ላፑን ጋላስ ጋምእድ፥ ሄ ሆልዉ ዛሪድ የድስ። ሽን ሄ ሆልያ እያኮ ስማዳ ያቡኩ።
GEN 8:13 ኖሄይ ኡሱፑን ፄታነ እስ ላይꬅ ደእን፥ ኮይሮ አጌናን ኮይሮ ጋላስ፥ ሃꬃይ ቢታ ቦላፈ ፅዝእስ። ኖሄይ ማርካብያ ካማ ቃር ፄልድ፥ ቢታይ ፅዝእዳይሳ በእስ።
GEN 8:14 ናምአንꬆ አጌናን ላታማነ ላፑንꬃ ጋላሳን፥ ቢታይ ኩመꬅ መልስ።
GEN 8:15 ፆሳይ ሄ ዎደ ኖሄ ሀይሳዳ ያግድ ኪትስ፤
GEN 8:16 “ኔኒ፥ ነ ማችዉ፥ ነ አደ ናይታነ ነ ናይታ ማቸታ ኤካዳ ማርካብያ ግዶፈ ከያ።
GEN 8:17 ኤንቲ የለትድ፥ ዳራና መላ ደኦይ ደእያ መተꬃ ኡባፈ ኔራ ደኤይሳታ ካፎታ፥ መሄታ፥ ዶአታነ ቢታራ ጎሸትያ ኡባ ኔራ ከሳ” ያግስ።
GEN 8:18 ያትን ኖሄይ ባ አደ ናይታራ፥ ባ ማቸራነ ባ ናይታ ማቸታራ ማርካብያ ግዶፈ ከይስ።
GEN 8:19 ያንን፥ መሄይነ ዶአይ፥ ሳአራ ጎሸትያ መተꬃይ፥ ካፎይነ ሳአ ቦላ ዎፅ ቃፅያባ ኡባይ ባ ቆሙዋን ቆሙዋን ማርካብያ ግዶፈ ከይዶሶና።
GEN 8:20 ሄሳፈ ጉየ፥ ኖሄይ ጎዳስ ያርሾ በሲ ግምብድ ቱና ግዶና መሄነ ዶአ ኡባፈ፥ ቱና ግዶና ካፎ ኡባፈ ኤክድ፥ ጊግስዳ በሳን ያርሾ ኦꬅድ ፁግስ።
GEN 8:21 ያትን፥ ጎዳይ ሄ ያርሹዋ ፔኑዋ ስንግድ፥ ባ ዎዛናን ሀይሳዳ ያግስ፤ “ናአተꬃፈ ዶምድ አስ ዎዛናን ቆፕያባ ኡባይ ኢታ ግድኮካ ታኒ አሳ ቆሆ ግሾ ጋዳ ናምአንꬆ ሀ ሳኣ ባድከ። ቃስ ታኒ ሀእ ኦꬅዳይሳዳ ደኦይ ደእያ መተꬃ ኡባ ናምአንꬆ ꬋይስከ።
GEN 8:22 ሀ ቢታይ ደእዳ ዎደ ኡባን፥ ዘርያ ዎደይነ ጫክያ ዎደይ፥ ሜጎይነ ሆምበይ፥ ቦነይነ ባልጎይ፥ ጋላስነ ቃም ኡባ ዎደ ዳና” ያግስ።
GEN 9:1 ፆሳይ ኖሄነ እያ አደ ናይታ ሀይሳዳ ያግድ አንጅስ፤ “የለትተ፥ ዳርተ፥ ሳአ ኡባ ኩምተ።
GEN 9:2 ሳኣ ዶአት፥ ሳሎ ካፎት፥ ቢታን ዎፅ ቃፅያባይነ አባን ደእያ ሞሎት ኡባይ ህንተዉ ያሻንነ ዳጋማን ደኦ። ኤንቲ ህንተዉ ሃረቶ።
GEN 9:3 ታኒ ዶልያ ዱማ ዱማ ጭልኦባታ ህንተዉ እምዳይሳዳ፥ ደኦይ ደእያ ዎፅ ቃፅያ መተꬃ ኡባይ ህንተዉ ካꬅ ግዳና መላ እማስ።
GEN 9:4 ሽን ሸምፖይ ግዶን ደእያ ግሾ ሱꬅ እያ ግዶን ደእያ አሾ ሞፕተ።
GEN 9:5 ኦንካ ሸምፖ ዎꬍዳይ ፕርደታና። ቃስ አሳ ሱꬅ ጉስያ ዶአካ ሀይቆን ፕርዳና።
GEN 9:6 ፆሳይ አሰ ባና ዳንስድ መꬍዳ ግሾ፥ አሳ ሱꬅ ጉስያ ኦና ግድኮካ እያ ሱꬃይካ አሳ ኩሸን ጉካና።
GEN 9:7 ህንተ የለትተ፥ ዳርተ፥ ህንተ ሼሻይካ ሳአ ቦላ ዳሮ” ያግስ።
GEN 9:8 ሄሳፈ ጉየ፥ ፆሳይ ኖሄነ እያራ ደእያ እያ አደ ናይታ ሀይሳዳ ያግስ፤
GEN 9:9 “ህዛ፥ ታኒ ታ ጫቁዋ ህንተራ፥ ህንተ ሼሻራነ ደኦይ ደእያ መተꬃ ኡባራ ጫቃይስ።
GEN 9:10 ታኒ ታ ጫቁዋ ካፎታራ፥ መህያራ፥ ሳአ ዶአ ኡባራነ፥ ማርካብያፐ ህንተራ ከይዳ፥ ደኦይ ደእያ መተꬃ ኡባራ ጫቃይስ።
GEN 9:11 ታኒ ህንተራ ጫቅዳይሳ መላ ህዛፐ ደኦይ ደእያ መተꬃት ꬋዮ ሃꬃን ꬋዮኮና፤ ሀ ሳኣካ ዛር ꬋዮ ሃꬅ ꬋይሰና” ያግስ።
GEN 9:12 ቃስካ ፆሳይ፥ “ታኒ ታፐነ ህንተፈ፥ ደኦይ ደእያ መተꬃ ኡባፈ ግዶን ጫቅያ ጫቁዋ ማላይ ሀይሳ፤
GEN 9:13 ታኒ ታ ዙላ ሻራን ኤሳስ። እ ታፐነ ሳአ ቦላ ደእያ መተꬃ ግዶን ደእያ ጫቁዋስ ማላ ግዳና።
GEN 9:14 ታ ሳሉዋ ሻራ ማይዝዳ ዎደነ ሻራን ዙል ኤቅዳ ዎደ፥
GEN 9:15 ታፐነ ህንተፈ ግዶን፥ ደኦይ ደእያ ዱማ ዱማ መተꬃ ኡባፈ ግዶን ጫቅዳ ታ ጫቁዋ አኬካና። ደኦይ ደእያ መተꬃ ኡባ ꬋይሳናዉ ህዛፐ ጉየ ꬋዮ ሃꬅ ዬና።
GEN 9:16 ዙል ሻራን ኤቅዳ ዎደ ታ እያ በአዳ ታፐነ ሳአ ቦላ ደእያ ዱማ ዱማ መተꬃ ኡባፈ ግዶን ጫቅዳ መርና ጫቁዋ አኬካና” ያግስ።
GEN 9:17 ፆሳይ ኖሄ፥ “ታኒ ታፐነ ሳአ ቦላ ደኦይ ደእያባ ኡባፈ ግዶን ጫቅዳ ጫቁዋ ማላይ ሀይሳ” ያግስ።
GEN 9:18 ማርካብያፐ ከይዳ ኖሄ አደ ናይት ሴማ፥ ካማነ ያፈታ፤ ካም ካናነ አዋ።
GEN 9:19 ሀ ሄꬓት ኖሄ ናይታ፤ ሳአ ኡባን ደእያ አሳይ ኤንታፈ የለትዶሶና።
GEN 9:20 ኖሄይ ጎሻንቾ፤ እ ዎይነ ቶከꬃን ኮይሮ አስ።
GEN 9:21 እስ ጋላስ ኖሄይ ሄ ዎይንያፐ ኡይድ ማꬆትድ ባ ዱንካንያ ግዶን ፅረ ካሎ ዝንእስ።
GEN 9:22 ካናነ አዋ ካም ባ አዋ ካሉዋ በእድ፥ ካረ ከይድ፥ ባ ናምኡ እሻታስ ኦድስ።
GEN 9:23 ሽን ሴምነ ያፈት አፍላ ኤክድ፥ ናምአይካ ባንታ ሀሽያራ ሀሽያራ ጋꬅ ኦይክድ፥ ጉየ ጉꬁ ሄመት ገልድ፥ ባንታ አዋ ካሉዋ ካምዶሶና። ኤንቲ ባንታ አዋ ካሉዋ በኦና መላ ባንታ አይፍያ ሀራሶ ዛርዶሶና።
GEN 9:24 ኖሄይ ማꬆይ አꬍን፥ ባርክድ፥ እያ ካሎ ናአይ ኦꬅዳባ ኤርስ።
GEN 9:25 ኖሄይ እያኮ፥ “ካናነይ ባደትዳባ ግዶ! እ ባ እሻታስ ዉርሰꬃ አይለ ግዶ” ያግስ።
GEN 9:26 ቃስካ ኖሄይ፥ “ጎዳይ፥ ሴማ ፆሳይ ጋላተቶ! ካናነይ ሴማ አይለ ግዶ፤
GEN 9:27 ፆሳይ ያፈታ ቢታ አሶ። ያፈታ ሼሻይ ሴማ ሼሻራ ዎላ ደኦና፤ ካናነይ ያፈታ አይለ ግዶ” ያግስ።
GEN 9:28 ꬋዮ ሃꬃፈ ጉየ፥ ኖሄይ ሄꬑ ፄታነ እሻታሙ ላይꬅ ደእስ።
GEN 9:29 ኖሄይ ኡዱፉን ፄታነ እሻታሙ ላይꬅ ደእድ ሀይቅስ።
GEN 10:1 ኖሄ ናይታ፥ ሴማ፥ ካማነ ያፈታ የለተꬃይ ሀይሳፈ ካልድ ፃፈትዳይሳ። ꬋዮ ሃꬃፈ ጉየ፥ ኤንታዉ አደ ናይት የለትዶሶና።
GEN 10:2 ያፈታ አደ ናይት፥ ጎመራ፥ ማጎገ፥ ማዳያ፥ ያዋና፥ ቱባላ፥ ሞሳሀነ ትራሳ።
GEN 10:3 ጎመራ አደ ናይት፥ አስካናዛ፥ እርፋታነ ቶጋርማ።
GEN 10:4 ያዋና አደ ናይት፥ ኤልሻ፥ ታርሰሳ፥ ክፅማነ ሮዳ።
GEN 10:5 ሀይሳቲ ዩሾይ አባን ተቀትዳ ቢታን ደእያ ያፈታ ሼሻታስ ማይዛታ። ኤንቲ ባንታ ቢታን ቢታን፥ ባንታ ዶናን ዶናንነ ባንታ ካዎተꬃን ካዎተꬃን ሻከትድ ደእያ ደረታ።
GEN 10:6 ካማ አደ ናይት፥ ኩሻ፥ ግብፀ፥ ሊበነ ካናነ።
GEN 10:7 ኩሻ አደ ናይት፥ ሳባ፥ ሀውላ፥ ሳብታ፥ ራእማነ ሳብታካ። ራእመ አደ ናይት፤ ሳባነ ደዳና።
GEN 10:8 ኩሽ ናምሩደ የልስ፤ ናምሩደይ ሀ ሳአን ኮይሮ ዎልቃማ ኦላንቾ ግድስ።
GEN 10:9 ጎዳ ማደን ዎልቃማ ሻንካንቾ ግድስ። አሳይ፥ “ናምሩደዳ ጎዳይ ነና ዎልቃማ ሻንካንቾ ከሶ” ግድ አንጀይ ሄሳ ግሾሳ።
GEN 10:10 እያ ካዎተꬃስ ኮይሮ ካታማት ሳናኦራ ቢታን ደእያ ባብሎነ፥ ኤረካ፥ አርካዳነ ካልነ።
GEN 10:11 እ ሄ ቢታፈ አሶረ ብድ፥ ናናወ፥ ረሆቦታነ ካላሀ ኬፅስ።
GEN 10:12 ቃስ ናናወፐነ ካላሀ ካታማፐ ግዶን ረሴና ኬፅስ።
GEN 10:13 ምፅራይም፥ ሉደታ፥ አናምመታ፥ ላሀበታ፥ ናፍቱሄታ፥
GEN 10:14 ፓትሮሳታነ ፍልስፄመ ኮቻ የልዳ ካስሉሄማታነ ቃፍቶረታ ማይዛ።
GEN 10:15 ካናነይ ባ ባይራ ናአ ስዶናነ ሄታ የልስ።
GEN 10:16 ቃስ ካናነ ሼሻት ያቡሰታ፥ አሞረታ፥ ገርገሰታ፥
GEN 10:17 ህወታ፥ አርከታ፥ ሲናታ፥
GEN 10:18 አርዋደታ፥ ፃማራታነ ሀማታታ የልስ። ሄሳፈ ጉየ፥ ካናነ ሼሻት ዱማ ዱማ በሲ ላለትዶሶና።
GEN 10:19 ካናነ ቢታ ዛዋይ ስዶናፐ ዶምድ፥ ጋራራነ ጋዛራ ጋክድ፥ ሶዶመነ ጋሞራ፥ አዳማነ ፃቦይማ ብድ፥ ላሻአ ጋክ ኤቅስ።
GEN 10:20 ሀይሳቲ ካማ ሼሻታ፤ ኤንታዉ ዱማ ዱማ ዶን፥ ዱማ ዱማ ቢትነ ዱማ ዱማ ካዎተꬅ ደኤስ።
GEN 10:21 ሴማስ ናይት የለትዶሶና። እ ያፈታስ ባይራ እሻነ ኤቦራ ናይታ ኡባስ ማይዛ።
GEN 10:22 ሴማ አደ ናይት፥ ኤላማ፥ አሶረ፥ አርፋክሳደ፥ ሉደነ አራመ።
GEN 10:23 አራመ አደ ናይት፥ ኡፃ፥ ሁላ፥ ገተራነ ማሸካ።
GEN 10:24 አርፋክሳድ ሳላ የልስ። ሳል ኤቦራ የልስ።
GEN 10:25 ኤቦራስ ናምኡ አደ ናይት የለትዶሶና። ሳአን ደእያ አሳይ እያ ዎደ ሻከትዳ ግሾ እሱዋ ፐለጋ ግድ ሱንꬅስ። እያ እሻ ሱንꬃይ ዮቅፃና።
GEN 10:26 ዮቅፃና ሼሻት ሀይሳታ። ኤንትካ አልሞዳዳ፥ ሳለፋ፥ ሀሰርሞታ፥ ያራሀ፥
GEN 10:27 ሀዶራማ፥ ኡዛላ፥ ድቅላ፥
GEN 10:28 ኦባላ፥ አብማላ፥ ሳባ፥
GEN 10:29 ኦፍራ፥ ሀውላነ ዮባባ። ሀይሳቲ ኡባይ ዮቅፃና ሼሻታ።
GEN 10:30 ኤንቲ ደእዳ ሄራይ ሜሳፐ ብድ ዶሎሀ ባጋራ ደእያ ደረይ ዳርያ ሳፋራ ቢታ ጋኬስ።
GEN 10:31 ሀይሳቲ ኡባይ ሴማ ሼሻታ፤ ኤንታዉ ዱማ ዱማ ዶን፥ ዱማ ዱማ ቢትነ ዱማ ዱማ ካዎተꬅ ደኤስ።
GEN 10:32 ሀይሳቲ ኡባይ ባንታ ሼሻን ሼሻንነ ባንታ ካዎተꬃን ካዎተꬃን ፃፈትዳ ኖሄ ናይታ። ꬋዮ ሃꬃፈ ጉየ ካዎተꬃት ሀይሳታፐ ሳአ ኡባ ላለትዶሶና።
GEN 11:1 ሳአ ቦላ ደእያ አስ ኡባይ ኮይሮ እስ ዶናን ኦደቴስ።
GEN 11:2 ኤንቲ ዶሎሀ ባጋፈ ደንድድ ብዳ ዎደ ሳናኦራ ቢታን ደምባ በሲ ደምድ ያን ኡትዶሶና።
GEN 11:3 ኤንቲ እሶይ እሱዋኮ፥ “ሃ ዪተ፥ ፁበ መꬍድ፥ ምናና መላ ታማን ፁጎስ” ያግዶሶና። ኤንቲ ሹቻ ግሾ ፁበ፥ ኡርቃ ግሾ ማደ መላባ፥
GEN 11:4 ኤክድ፥ “ሃ ዪተ፥ ኑ ሱንꬃ ፄግሳናዉነ ቃስ ኑኒ ሀ ሳአ ቦላ ላለቶና አታና መላ እስ ግታ ካታማነ ፄራይ ሳሎ ጋክያ ፖቀ ኬፆስ” ያግዶሶና።
GEN 11:5 ሽን ጎዳይ አሳት ኬፅዳ ግታ ካታማነ ፖቅያ በአናዉ ዱገ ዎꬍስ።
GEN 11:6 ጎዳይ ሀይሳዳ ያግስ፤ “ሄኮ፥ ኤንቲ እስ አስ፤ ኤንቲ ኡባይካ እስ ዶናን ኦደትዶሶና። ኤንቲ ሀእ ሀይሳ ኦꬃናዉ ዶምዶሶና። ኤንቲ ባንታዉ ኦꬃናዉ ሀልችዳባ ፖሎና አጎኮና።
GEN 11:7 ያንያ ግሾ፥ ሃይተ፤ ዱገ ዎꬍድ ኤንቲ እሶይ ሃሳይያ ዶና እሶይ ኤሮና መላ ኤንታ ዶና ዱማዮስ” ያግስ።
GEN 11:8 ጎዳይ ኤንታ ሄሳፈ ሳአ ኡባ ቦላ ላልን፥ ኤንቲ ካታማ ኬፀይሳ አጋግዶሶና።
GEN 11:9 ጎዳይ ሳአን ደእያ አሳ ዶና ያን ቡቅዳ ግሾ ሄ ካታማ ሱንꬃይ ባብሎነ ጌተትስ። ጎዳይ ኤንታ ሄሳፈ ሳአ ኡባ ቦላ ላልስ።
GEN 11:10 ሴማ የለተꬃይ ሀይሳፈ ካልድ ፃፈትዳይሳ፤ ꬋዮ ሃꬃፈ ጉየ፥ ናምኡ ላይꬅ ግድን፥ ሴማስ ላይꬅ ፄታ ግድዳ ዎደ፥ ሴም አርፋክሳደ የልስ።
GEN 11:11 ሴም አርፋክሳደ የልዳፐ ጉየ፥ እቻሹ ፄቱ ላይꬅ ደእስ። ሀራ አደ ናይታነ ማጫ ናይታ የልስ።
GEN 11:12 አርፋክሳድ 35 ላይꬅ ደእድ፥ ሳላሀ የልስ።
GEN 11:13 አርፋክሳድ ሳላ የልዳፐ ጉየ፥ 403 ላይꬅ ደእስ። ሀራ አደ ናይታነ ማጫ ናይታ የልስ።
GEN 11:14 ሳል 30 ላይꬅ ደእድ፥ ኤቦራ የልስ።
GEN 11:15 ሳል ኤቦራ የልዳፐ ጉየ፥ 403 ላይꬅ ደእስ። ሀራ አደ ናይታነ ማጫ ናይታ የልስ።
GEN 11:16 ኤቦሪ 34 ላይꬅ ደእድ፥ ፐለጋ የልስ።
GEN 11:17 ኤቦሪ ፐለጋ የልዳፐ ጉየ፥ 430 ላይꬅ ደእስ። ሀራ አደ ናይታነ ማጫ ናይታ የልስ።
GEN 11:18 ፐለግ 30 ላይꬅ ደእድ፥ ራአ የልስ።
GEN 11:19 ፐለግ ራአ የልዳፐ ጉየ 209 ላይꬅ ደእስ። ሀራ አደ ናይታነ ማጫ ናይታ የልስ።
GEN 11:20 ራእ 32 ላይꬅ ደእድ፥ ሳሩጋ የልስ።
GEN 11:21 ራእ ሳሩጋ የልዳፐ ጉየ፥ 207 ላይꬅ ደእስ። ሀራ አደ ናይታነ ማጫ ናይታ የልስ።
GEN 11:22 ሳሩግ 30 ላይꬅ ደእድ፥ ናኮራ የልስ።
GEN 11:23 ሳሩግ ናኮራ የልዳፐ ጉየ፥ 200 ላይꬅ ደእስ። ሀራ አደ ናይታነ ማጫ ናይታ የልስ።
GEN 11:24 ናኮር 29 ላይꬅ ደእድ፥ ታራ የልስ።
GEN 11:25 ናኮር ታራ የልዳፐ ጉየ፥ 119 ላይꬅ ደእስ። ሀራ አደ ናይታነ ማጫ ናይታ የልስ።
GEN 11:26 ታር 70 ላይꬅ ደእድ፥ አብራመ፥ ናኮራነ ሃራነ የልስ።
GEN 11:27 ታራ የለተꬃይ ሀይሳፈ ካልድ ፃፈትዳይሳ፤ ታሪ አብራመ፥ ናኮራነ ሃራነ የልስ። ያትን ሀራን ሎፀ የልስ።
GEN 11:28 ሀራን ባ አዋይ ታሪ ፓፃ ደእሽን፥ ባ የለትዳ ካልዳወታ ቢታን፥ ግታ ኡረ ካታማን ሀይቅስ።
GEN 11:29 አብራመይነ ናኮረይ ናምአይካ ማችዶሶና። አብራመ ማቸ ሱንꬃይ ሶራ። ቃስ ናኮራ ማቸ ሱንꬃይ ምልኮ። ምልካ ሃራና ናእዉ፤ ሃራነይ ምልካነ ዮስካ አዋ።
GEN 11:30 ሶራ ማይንꬅ ግድዳ ግሾ እዉ ናእ ባዋ።
GEN 11:31 ታር ባ ናኣ አብራመ፥ ባ ናኣ ሃራነ ናኣ ሎፀነ፥ ባ ናኣ አብራመ ማችዉ ሶራ ኤክድ፥ ካናነ ቢታ ባናዉ ካልዳወታ ካታማ ኡረፐ ደንድስ። ሽን ኤንቲ ካራነ ካታማ ጋክድ ያን ኡትዶሶና።
GEN 11:32 ታር 205 ላይꬅ ደእድ ካራነን ሀይቅስ።
GEN 12:1 ጎዳይ አብራመኮ፥ “ነ ቢታፈ፥ ነ ደርያፐ፥ ነ ሶ አሳፐ፥ ሻከታዳ ታ ነና በሲያ ቢታ ባ።
GEN 12:2 ታ ነና ዎልቃማ ደረ ኦꬃና፥ ነና ታ አንጃና ነ ሱንꬃ ግታ ከሳና፤ ነ ሀራታስ አንጆ ግዳና።
GEN 12:3 ታኒ ነና አንጀይሳታ አንጃና፤ ነና ባደይሳታ ባዳና፥ ቢታ ቦላ ደእያ ደረ ኡባይ ነ ጋሶራ አንጀታና” ያግስ።
GEN 12:4 ሄሳ ግሾ፥ አብራመይ ፆሳይ እያ ኪትዳይሳዳ ከይስ። ሎፀይ እያራ እስፈ ብስ። አብራመይ ካራነፐ ከይያ ዎደ እያዉ ላይꬅ ላፑን ታማነ እቻሻ።
GEN 12:5 አብራመይ ባ ማችዉ ሶራ፥ ባ እሻ ናአ ሎፀ፥ ካራነን ደእሸ ሺሽዳ ሻሉዋነ ባ አይለታ ኡባ ኤክድ ካናነ ቢታ ብድ ጋክዶሶና።
GEN 12:6 አብራመይ ሴከማን ደእያ ሞረ ጌተትያ ግታ ምꬃኮ ጋካናዉ ካንꬅድ ብስ። ሄ ዎደ ካናነ አሳት ሄ ቢታን ደኦሶና።
GEN 12:7 ፆሳይ አብራመስ ያን ቆንጭድ፥ “ሀ ቢታ ታኒ ነ ሼሻስ እማና” ያግስ። እካ ባ ቆንጭዳ ጎዳስ ሄ በሳን ያርሾ በሲ ጊግስስ።
GEN 12:8 ሄ በሳፈ ደንድድ ቤተለፐ ዶሎሀ ባጋራ ደእያ ዙማኮ ብስ። ያን ቤተለ ዉሎሀ ባጋን፥ ጋየ ዶሎሀ ባጋን አግድ፥ ባ ዱንካንያ ቶክስ፤ ያን ጎዳስ ያርሾ በሲ ጊግስድ ጎዳ ሱንꬃ ፄግስ።
GEN 12:9 ሄሳፈ ጉየ፥ አብራመይ በሳፈ በሰ አꬍሸ ነገበ ጋክስ።
GEN 12:10 ሄ ዎደ ካናነ ቢታን ኮሽ ከይስ። ኮሻይ ምንዳ ግሾ ጉꬃ ዎደ ያን ዳናዉ አብራመይ ግብፀ ቢታ ብስ።
GEN 12:11 ግብፀ ገላናዉ ማትያ ዎደ አብራመይ ባ ማቸ ሶራኮ፥ “ኔኒ ማላ ሎኦ ግደይሳ ታኒ ኤራይስ፤
GEN 12:12 ግብፀ አሳት ነና በእድ፥ ‘ሀና እያ ማችዉ’ ያግድ ታና ዎꬍድ ነና አጋጋና።
GEN 12:13 ሄሳ ግሾ፥ ነ ግሾ ግድ ታዉ ሎኦባ ኦꬃና መላነ ታ ሸምፕያ አታና መላ ‘ታ እያዉ ምቾ’ ያጋ” ያግስ።
GEN 12:14 አብራመይ ግብፀ ቢታ ጋክዳ መላ ግብፀ አሳት ሶራ ማላ ሎኦ ማጫስ ግዶይሳ በእዶሶና።
GEN 12:15 ግብፀ ፓሮና ሞርናት እዮ በእድ ዳሮ ናሽድ ካዋ ፋሮናስ ኦድዶሶና፥ እዮካ ካዋ ስን ኤፍዶሶና።
GEN 12:16 እ ጋሶን ካዎይ አብራመ ቦንችድ ሞክስ። ጉጅድካ ዶርሳታ፥ ሚዛታ፥ ሀረታ፥ ግማለታ፥ አደ አይለታነ ማጫ አይለታ እያዉ እሚስ።
GEN 12:17 ሽን ጎዳይ አብራመ ማቸ ሶራ ጋሶን ግብፀ ካዋነ እያ ኬꬃ ጋዶ ሀርገን ሾጭስ።
GEN 12:18 ሄሳፈ ጉየ፥ ካዎይ አብራመ ፄግስድ፥ “ነ ታ ቦላ ኦꬅዳባይ ሀይስ አይቤ? እያ ነ ማቾ ግደይሳ አይስ ታዉ ኦዳብኪ?
GEN 12:19 አይስ ታ ምቾ ጋዳ ዎርዶታዲ? ታ እዮ ማቾ ኦꬃዳ ኤካስ፥ ሽን አትስ፤ ነ ማችያ ሀናሹ ኤካ ባ” ያግስ።
GEN 12:20 ሄሳፈ ጉየ፥ አብራመነ እያ ማችዉ እያዉ ደእያባ ኡባራ ከስ የዳና መላ ካዎይ ባ አሳታ ኪትስ።
GEN 13:1 አብራመይ ባአ ማቺው ሶራነ ባዉ ደእያባ ኡባ ኤክድ ግብፀፈ ነገበ መላ ቢታ ብስ። ሎፀይካ እያራ ዎላ ብስ።
GEN 13:2 አብራመይ ሄ ዎደ መሄን፥ ብራንነ ዎርቃን ዳሮ ዱረትስ።
GEN 13:3 አብራመይ ናገበፐ ደንድድ በሳፈ በሰ አꬍሸ ቤተለ ጋካናዉ ብስ። ቤተለፐነ ጋየፐ ግዶን እ ኮይሮ ዱንካንያ ቶክዳ በሳነ
GEN 13:4 ጎዳስ ካሰ ያርሾ ያርሽዳ በሳ ጋክድ፥ ያን አብራመይ ጎዳ ሱንꬃ ፄግስ።
GEN 13:5 አብራመራ ዎላ ሄመትያ ሎፀስካ ዳሮ ዶርሳት፥ ዴሻት፥ መሄት፥ ሶ አሳትነ አይለት ደኦሶና።
GEN 13:6 ሄ ዎደ አብራመስነ ሎፀስ ዳሮ መሄይ ደእያ ግሾ ኤንቲ ባንታ መሄታ ሄምያ በሳይ ፁምስ።
GEN 13:7 ሄሳ ግሾ፥ አብራመ መሄታ ሄመይሳታ ግዶንነ ሎፀ መሄታ ሄመይሳታ ግዶን ካች ከይስ። ሄ ዎደ ካናነ አሳትነ ፓርዘ አሳት ሄ ቢታን ደኦሶና።
GEN 13:8 ሄሳ ግሾ፥ አብራመይ ሎፀኮ፥ “ኑኒ እሻንታ ግድያ ግሾ ኑ ግዶን ዎይኮ ኑ መሄታ ሄመይሳታ ግዶን ካች ዳናዉ በሰና።
GEN 13:9 ቢታይ ዳልጋ ግድያ ግሾ ኑ ዎልፐ ሻከታና። ነ ሀድርሳ ባጋ ቢኮ ታኒ ኡሻቻ ባጋ ባና፤ ኔኒ ኡሻቻ ባጋ ቢኮ ታኒ ሀድርሳ ባጋ ባና” ያግስ።
GEN 13:10 ሎፀይ ቢታ ዩይ አꬍድ ፄልያ ዎደ ዮርዳኖሰ ዛንጋራይ፥ ጎዳ ጋናትያዳ ዎይኮ ዞኣረ ባጋራ ደእያ ግብፀ ቢታ መላ ሃꬅ ኩምዳይሳ በእስ። ሄስካ፥ ሀንዳይ ጎዳይ ሶዶመነ ጋሞራ ጌተትያ ካታማታ ꬋይሳናፐ ስን።
GEN 13:11 ሄሳ ግሾ፥ ሎፀይ ዮርዳኖሰ ዛንጋራ ኡባ ባዉ ዶርድ ዶሎሀ ባጋ ብስ። ሄሳዳ ሀንድ እሶይ እሱዋፈ ሻከትዶሶና።
GEN 13:12 አብራመይ ካናነ ቢታን ደእስ። ሽን ሎፀይ ዛንጋራን ደእያ ካታማታ ግዱዋን ሶዶመ ማታን ባ ዱንካንያ ቶክስ።
GEN 13:13 ሄ ዎደ ሶዶመ አሳይ ዳሮ ኢታነ ጎዳ ስንꬃን ናጋራንቾታ።
GEN 13:14 ሎፀይ አብራመፐ ሻከትዳፐ ጉየ፥ ጎዳይ አብራመኮ፥ “ነ ደእያ በሳፈ ፑደ ꬎቁ ጋዳ ፑደሀ ባጋነ ዱገሀ ባጋ፥ ዶሎሀ ባጋነ ዉሎሀ ባጋ የዳ ፄላ።
GEN 13:15 ሄ ኔኒ በእያ ቢታ ኡባ ታኒ መርናዉ ነዉነ ነ ሼሻስ እማና።
GEN 13:16 ታኒ ነ ሼሻ ቢታ ባናዳ ዳርሳና። ኦንካ ቢታ ባና ታይባናዉ ዳንዳኦናይሳዳ ነ ሼሻይካ ታይበተና።
GEN 13:17 ታኒ ሀ ቢታ ነዉ እማና ግሾ ደንዳዳ ቢታ አዱሳተꬃንነ ዳልጋተꬃን ስመረታ።”
GEN 13:18 ሄሳ ግሾ፥ አብራመይ ባ ዱንካንያ ሾድድ ከብሮናን ደእያ ማምረ ግታ ምꬃታ ማታን ደአናዉ ብስ። ያን ጎዳስ ያርሾ በሲ ጊግስስ።
GEN 14:1 ሳናኦራ ካዎይ አምራፌል፥ ኤልሳረ ካዎይ አርዮክ፥ ኤላማ ካዎይ ኮሎዶጎሞርነ ጎይማ ካዎይ ትዳለይ ኦይዱ ካዎተꬃት ዎላ፥
GEN 14:2 እቻሹ ካዎተꬃታራ፥ ሶዶመ ካዋ በራራ፥ ጋሞራ ካዋ በርሳራ፥ አዳማ ካዋ ሰንአበራ፥ ፅቦይማ ካዋ ሳምባራነ ዞኣራ ጌተትያ ቤላ ካዉዋራ ኦለታናዉ ደንድዶሶና።
GEN 14:3 ሀ እቻሹ ካዎተꬃት እስፈ ሺቅድ ማፅነ አባ ጌተትያ ስድማ ዛንጋራን ባንታ ቶራ ሺሽዶሶና።
GEN 14:4 ሀ ካዎተꬃት ታማነ ናምኡ ላይꬅ ኮሎዶጎሞራስ ሃረትዶሶና ሽን ታማነ ሄꬓንꬆ ላይꬃን እያዉ ኪተቶና እፅዶሶና።
GEN 14:5 ታማነ ኦይዳንꬆ ላይꬃን ኮሎዶጎሞርነ እያራ ቶቢዳ ካዎተꬃት ባንታ ኦላንቾታ ኤክ ብድ ራፋይመታ አስታሮተን ደእያ ቃርናይማን፥ ዙዛይተታ ሃማን፥ ኤምመታ ሳወን ደእያ ቅራታይማን፤
GEN 14:6 ቃስ ሆራ ቢታ አሳታካ ደረይ ዳርያ ሳይረ ቢታን ኦል ፆንድ፥ መላ ቢታ ማታን ደእያ ኤልፋራና ጌተትያ በሳ ጋካናዉ ጎድዶሶና።
GEN 14:7 ያፐ ስሚድ፥ ቃደሳ ጌተትያ አይን ምስፓታ ይዶሶና። አማለቃታ ቢታ ኡባነ ሀዛዞን ታማረን ደእያ አሞረታ ቢታ ኦል ፆንድ ኦይክዶሶና።
GEN 14:8 ሄሳፈ ጉየ፥ ሶዶመ ካዎይ፥ ጋሞራ ካዎይ፥ አዳማ ካዎይ፥ ዘቦይማ ካዎይ፥ ዞኣረ ጌተትያ ቤላ ካዎይ ደንድድ ስድማ ዛንጋራን ኦላስ ጊግዶሶና።
GEN 14:9 ሀ እቻሹ ካዎተꬃት፥ ኤላማ ካዋራ፥ ጎይማ ካዋራ፥ ሳናኦራ ካዋራነ ኤልሳረ ካዋራ ሀ ኦይዱ ካዎተꬃታራ ኦለትዶሶና።
GEN 14:10 ሄ ዎደ ስድማ ዛንጋራን ማደዳ ኦይክያባት ደእያ ኦላት ደኦሶና። ሶዶመ ካዎይነ ጋሞራ ካዎት ኦላፐ አታናዉ ባቃትሸ ሄ ኦላን ዉልዶሶና። ሽን ሀንኮ ሄꬑ ካዎተꬃት ዙማኮ ባቃትድ አትዶሶና።
GEN 14:11 ኦይዱ ካዎተꬃት ሶዶመንነ ጋሞራን ደእያባ ኡባ ሀር አቶሽን፥ ኤንታ ካꬃካ ቦንቅድ ኤፍዶሶና።
GEN 14:12 አብራመ እሻ ናአይ ሎፀይ ሶዶመን ደእያ አስ ግድያ ግሾ እካ ባዉ ደእያባ ኡባራ ድኤትስ።
GEN 14:13 ሄሳፈ ጉየ፥ ድኤት ብዳ አሳፐ ከስ ኤክዳ እስ አስ ይድ ሀንዳባ ኡባ እብራወ አድያ አብራሃመስ ኦድስ። ሄ ዎደ አብራመይ አሞረ አድያ ማምረ ግታ ምꬃታ ማታን ደኤስ። ማምረይነ እያ እሻት አስኮልነ አኔር ኦላ ዛራናዉ አብራመራ ጫቅድ ኡትዶሶና።
GEN 14:14 አብራመይ ባ እሻ ናአይ ድኤትዳይሳ ስእዳ ዎደ ባ ሶን የለት ድጭድ ሎህዳ 318 ቶራንቾታ ኤክድ ኤንታ ገዶ ካልድ ዳነ ካታማ ጋካናዉ ብስ።
GEN 14:15 እ ባራ ኤክ ብዳ ቶራንቾታ ቃማ ጩጋን ጩጋን ሻክድ ሞርከታ ኦልድ ፆንስ። ዳማስቆፈ ፑደሀ ባጋራ ደእያ ሆበ ጌተትያ በሲ ጋካናዉ ጎድስ።
GEN 14:16 ያትድ ደኤትዳባ ኡባ፥ ባ እሻ ናአ ሎፀነ እያዉ ደእያባ ኡባ፥ ማጫሳነ ሀራ አሳታ ዎስስ ኤክስ።
GEN 14:17 አብራመይ ኮሎዶጎሞርነ እያራ ቶቢዳ ካዎታ ፆንድ ስምያ ዎደ ሶዶመ ካዎይ፥ ካዎታ ዛንጋራ ጌተትያ ሳወ ዛንጋራን እያ ሞካናዉ ከይስ።
GEN 14:18 ኡባፈ ꬎቃ ፆሳ ካህነይ፥ ሳሌማ ካዎይ ማልከፃደቅ ኡይꬅነ ዎይነ ኤክድ ይስ።
GEN 14:19 እ ሀይሳዳ አብራመ አንጅስ፤ “ሳሎነ ሳአ መꬍዳ፥ ኡባፈ ꬎቃ ፆሳይ ነና አንጆ።
GEN 14:20 ነ ሞርከታ ነ ኩሸን አꬅድ እምዳ፥ ኡባፈ ꬎቃ ፆሳይ ጋላተቶ” ያግድ አንጅስ። አብራመይ ባ ደምዳባ ኡባፈ አስራታ ከስድ ማልከፃደቃስ እሚስ።
GEN 14:21 ሶዶመ ካዎይ አብራመኮ፥ “ሻሉዋ ነ ኤካዳ፥ አሳ ታዉ እማ” ያግስ።
GEN 14:22 ሽን አብራመይ ሶዶመ ካዋኮ፥ “ታኒ ጎዳስ፥ ሳሉዋነ ሳአ መꬍዳ ኡባፈ ꬎቃ ፆሳስ ታ ኩሽያ ደንꬃስ።
GEN 14:23 ኔኒ፥ ‘አብራመ ዱረ ኦꬅዳይ ታና ጎናዳ’ ሀር አቶሽን ክረ ዎይኮ ጫማ ዎዶሮካ ኤክከ።
GEN 14:24 ታ አሳት ምዳይሳፈ አትሽን ታ አይብባካ ኤክከ። ቃስ ታራ ብዳ አኔር፥ አስኮልነ ማምረይ ባንታና ጋክያባ ኤኮ” ያግስ።
GEN 15:1 ሄሳፈ ጉየ፥ ጎዳይ አብራመስ አሙሆን ቆንጭድ፥ “አብራመ ባቦፋ፥ ታኒ ነዉ ጎንዳለ፥ ነ ዎይቶይ ግታ” ያግስ።
GEN 15:2 ሽን አብራመይ፥ “አቤት ኡባ ሃርያ ጎዳዉ፥ ኔኒ እምያ ዎይቶይ ታዉ አይሴ? ታዉ የሎይ ባዋ፤ ቡሮ ታና ላታናይ ዳማስቆ ኤልአዛራ ግደኔ?
GEN 15:3 አብራመይ፥ ኔኒ ታዉ የሎ እማቦና ግሾ ታ ኬꬃን ደእያ ታ አይለይ ታና ላታና” ያግስ።
GEN 15:4 ጎዳይ እያኮ፥ “ሀ አይለይ ነና ላተና፥ ሽን ነ ጉልባታፐ ከያና ነ ናአይ ነና ላታና” ያግስ።
GEN 15:5 ያግ ስሚድ እያ ካረ ከስድ፥ “ፑደ ሳሎ ፄላ፥ ኔኒ ፆልንቶታ ፓይዳናዉ ዳንዳእኮ ፓይዳ፥ ህዛ ነ ሼሻይካ ሄሳዳ ግዳና” ያግስ።
GEN 15:6 አብራመይ ጎዳ አማንስ፤ ጎዳይ እያዉ ሄሳ ፅሎተꬅ ኦꬅድ ኤክስ።
GEN 15:7 ቃስካ ጎዳይ እያኮ፥ “ኔኒ ሀ ቢታ ላታና መላ ካልዳወታ ቢታፈ ኡረ ካታማፐ ነና ከስዳ ጎዳይ ታና” ያግስ።
GEN 15:8 ሽን አብራመይ እያኮ፥ “አቤት ኡባ ሃርያ ጎዳዉ ሀ ቢታ ታ ላታናይሳ አይብን ኤሮ?” ያግስ።
GEN 15:9 ጎዳይ እያኮ፥ “ሄꬑ ላይꬅ ግድዳ እስ ኡስ፥ እስ ዴሽ፥ እስ ዶርሰነ ሄሳዳካ ሆለነ ጎርለ ታዉ ኤካዳ ያ” ያግስ።
GEN 15:10 አብራመይ ሄሳታ ኡባ ፆሳስ ኤህድ ካፎት አትሽን፥ ሀራታ ቃንፅድ ናምኡ ከስ ሻክድ እሱዋ እሱዋ ግናን ዎꬅስ።
GEN 15:11 አንኮት ሄ አሹዋ ማናዉ ቦላፈ ዎꬍዶሶና፤ ሽን አብራመይ ኤንታ ጎድስ።
GEN 15:12 አው ዉላና ሀንያ ዎደ አብራመ ዎልቃማ ꬍስኮይ ሾጭ የግስ። ዳጋንꬅያ ዎልቃማ ꬉም እያ ቦላ ዎꬍስ።
GEN 15:13 ጎዳይ አብራመኮ፥ “ነ ሼሻይ አላጋ ቢታን በተ አስ ግድድ ዳናይሳ ሎይꬃዳ ኤራ፤ ኤንቲ አይለተꬃን ኦይዱ ፄቱ ላይꬅ ናቀት ሃረታና።
GEN 15:14 ሽን ኤንታና አይለተꬃን ሃርያ ደርያ ታ ፕርዳና፤ ኤንቲ ሄ ቢታፈ ከይሸ ዳሮ ሻሎ ኤክድ ከያና።
GEN 15:15 ነና ግድኮ፥ ኔኒ ነ ማይዛታኮ ሳሮተꬃን ባና። ኔኒ ዳሮ ጭማዳ ሞገታና።
GEN 15:16 ነ ሼሻይ ቡሮ ኦይዳንꬆ የለተꬃን ሀ ቢታ ስማና። አይስ ጊኮ፥ አሞረታ ናጋራይ ፕርደታና ልክያ ቡሮ ጋክቤና” ያግስ።
GEN 15:17 አው ዉልን ሳእ ꬉማ ልንፅ ግን፥ ጮጨ ታማ ጩይነ ታማ ላጮይ በንትድ ሻከትዳ አሹዋ ግዶራ አꬍስ።
GEN 15:18 ሄ ጋላስ ጎዳይ አብራመስ፥ “ግብፀ ሻፋፐ ዶምድ ኤፍራፂሳ ሻፋ ጋካናዉ ደእያ ቢታ ኡባ ታኒ ነ ሼሻስ እማና።
GEN 15:19 ሄ ቢታይ ቄናታ ቢታ፥ ቀነዛታ ቢታ፥ ቃድሞነታ ቢታ፥
GEN 15:20 ህተታ ቢታ፥ ፓርዘታ ቢታ፥ ራፋይመታ ቢታ፥
GEN 15:21 አሞረታ ቢታ፥ ካናነታ ቢታ፥ ገርገሰታ ቢታነ ያቡሰታ ቢታ” ያግድ ጫቅስ።
GEN 16:1 አብራመ ማችያ ሶራ እያዉ ናአ የላቡኩ። ሽን እዉ ግብፀፈ ይዳ አጋሮ ጌተትያ ጋꬍንዶይ ደአዉሱ።
GEN 16:2 ሶራ አብራመኮ፥ “ታኒ ናአ የሎና መላ ጎዳይ ታና የሎ ድግስ። ኔኒ ባዳ ታ አይለራ አቃ፤ ታኒ እ ባጋራ ናአ ደማነኮነ ኦን ኤር” ያጋሱ። አብራመይ እ ቆፋ ኤክስ።
GEN 16:3 አብራመይ ካናነ ቢታን ታሙ ላይꬅ ደእዳፐ ጉየ፥ እያ ማችያ ሶራ ግብፀፈ ይዳ ባ አይልዉ አጋሮ ባ አዝናስ ማቾ ኦꬃዳ እማሱ።
GEN 16:4 አብራመይ አጋሮ ኤክስ፥ እያካ ቃንꬃታሱ። እያ ባዉ ቃንꬃትዳይሳ ኤርዳ ዎደ ባ ጎዳትዉ ካꬋሱ።
GEN 16:5 ሶራ አብራመኮ፥ “ሀ ቆሁዋስ ታና ጋꬅዳይ ነና፤ ታኒ ታ አይልዉ ነዉ እምን፥ እያ ቃንꬃትድይሳ በአዳ ታና ካꬋዉሱ። ነባነ ታባ ጎዳይ ፕርዶ” ያጋሱ።
GEN 16:6 አብራመይ ሶራኮ፥ “ሀኖ በአ ነ አይልዉ እያ ነ ኩሸና፤ ነና ሎእዳባ ኦꬃ” ያግስ። ሄሳፈ ጉየ፥ ሶራ አጋሮ ኡንኤꬅን ያፐ ከያዳ ባቃታሱ።
GEN 16:7 ጎዳ ኪታንቾይ አጋሮ መላ ቢታን፥ ፑልቶ ሃꬃ ማታን ደምስ፤ ሄ ፑልቶይ ሹራ ቢታ ኤፍያ ኦግያ ማታን ደኤስ።
GEN 16:8 ኪታንቾይ አጋሮ፥ “ሶራ አይለተ፥ አጋረ፥ አዉፐ ያዲ? አዉ ባይ?” ያግድ ኦይችስ። አጋራ ዛራዳ፥ “ታኒ ታ ጎዳተ ሶራፐ ባቃታስ” ያጋሱ።
GEN 16:9 ጎዳ ኪታንቾይ ኢኮ፥ “ነ ጎዳተኮ ስማ ባዳ እዉ ሃረታ” ያግድ ኦድስ።
GEN 16:10 ጉጅድካ ጎዳ ኪታንቾይ ኢኮ፥ “ነ የለተꬃ ኦንካ ታይባናዉ ዳንዳኦናዳ ኦꬃዳ ዳርሳና” ያግስ።
GEN 16:11 ቃስካ ጎዳ ኪታንቾይ እዮ፥ “ሄኮ ኔኒ ቃንꬃታዳሳ፥ ኔኒ አደ ናአ የላና። ፆሳይ ነ ዋሱዋ ስእዳ ግሾ እያ ኔኒ እስማኤላ ጋዳ ሱንꬃና
GEN 16:12 እ ባዞ ሀረ መላ ግዳና፥ እ ባ ቀስያ አሳ ኡባ ቦላ ደንꬃና፥ ቃስ አሳ ኡባይካ ባንታ ቀስያ እያ ቦላ ደንꬃና። እ ባ እሻታ ኡባራ እፆን ደአና” ያግስ።
GEN 16:13 አጋራ ባራ ኦደትዳ ጎዳ፥ “ኔኒ ታና በእያ ፆሳ” ያጋዳ ፄጋሱ። “ታኒ ታና በኤይሳ በአስ” ያጋሱ።
GEN 16:14 ሄሳፈ ደንዶይሳን ሄ ፑልቶ ሃꬃይ፥ “ታና በእያ ደኦ ፆሳ ፑልቱዋ” ጌተትድ ፄገትስ። ሄ ሃꬃ ፑልቶይ ቃደሳፐነ ባሬዳፐ ግዶን ደኤስ።
GEN 16:15 አጋራ አብራመስ አደ ናአ የላሱ፤ አብራመይ የለትዳ ናአ እስማኤላ ግድ ሱንꬅስ።
GEN 16:16 አጋራ አብራመስ እስማኤላ የልያ ዎደ አብራመስ ላይꬅ ሆስፑን ታማነ ኡሱፑና።
GEN 17:1 አብራመስ ላይꬅ ኡዱፉን ታማነ ኡዱፉና ግድያ ዎደ፥ ጎዳይ እያዉ ቆንጭድ፥ “ታኒ ኡባ ዳንዳእያ ፆሳ፥ ታዉ ኪተታ፥ ታ ስንꬃን ፖሎ ግዳ።
GEN 17:2 ታ ግዶንነ ነ ግዶን ደእያ ጫቁዋ ታ ምንꬃና፤ ታኒ ነ ዘረꬃ ታይባናዉ ዳንዳኤቶናዳ ኦꬃና” ያግስ።
GEN 17:3 አብራመይ ባ ሶምኡዋራ ሳአን ዱገ ጉፋንን ፆሳይ እያኮ፥
GEN 17:4 “ሄኮ ታ ነዉ ጫቅያ ጫቆይ ሀይሳ፤ ነ ዳሮ ካዎተꬃታስ አዋ ግዳና።
GEN 17:5 ታ ነና ዳሮ ካዎተꬃታስ አዋ ኦꬃና ግሾ ህዛፐ ነ ሱንꬃይ አብራመ ግድ ፄገተና፥ ሽን ነ ሱንꬃይ አብራሃመ ግድ ፄገታና።
GEN 17:6 ታኒ ነ የለተꬃ ዳርሳና፥ ታ ነና ዳሮ ደረ ከሳና፥ ካዎት ኔፐ ከያና።
GEN 17:7 ታኒ ነዉነ ኔፐ ጉየን ነ ሼሻስ ፆሰ ግዳና መላ መርና ጫቁዋ ታ ግዶንነ ነ ግዶን፥ ኔፐ ጉየራ ያ ነ ሼሻ ግዱዋን፥ የለተꬃፈ የለተꬃ ጋካናስ ታ ጫቃስ።
GEN 17:8 ኔኒ ሀእ በተ ግዳዳ ደእያ ካናነ ቢታ ኡባ ነዉነ ኔፐ ጉየራ ያ ነ ሼሻስ መርና ላታ ግዳና መላ ነዉ እማና፤ ቃስ ታኒ ኤንታ ፆሳ ግዳና” ያግስ።
GEN 17:9 ቃስካ ፆሳይ አብራሃመ፥ “ነና ግድኮ ታ ጫቁዋ ናጋ፤ ነካ ኔፐ ጉየራ ያ ነ ሼሻት፥ የለተꬃፈ የለተꬃ ጋካናዉ ናግተ።
GEN 17:10 ታ ግዱዋንነ ነ ግዱዋን፥ ኔፐ ጉየራ ያ ነ ሼሻ ግዶን ህንተ ናጋና ጫቆይ ሀይሳ፤ ህንተ ግዱዋን ደእያ አደ ኡባይ ቃፃረቶ።
GEN 17:11 ህንተ አደተꬃ ኮሁዋ ዶካልተ፤ ሄስ ታ ግዶንነ ህንተ ግዶን ደእያ ጫቁዋስ ማላ ግዳና።
GEN 17:12 ህዛፐ ያና የለተꬃን አደ ናይት ኡባይ የለትዳ ሆስፑንꬆ ጋላሳን ቃፃረቶ። ነ ሶን የለትዳይሳታ ግድን፥ ዎይኮ አላጋፐ ሚሸን ሻመትዳ አይለታ ግድን፥ ነ ዘረꬃፈ ግዶናይሳታ ዶካላ።
GEN 17:13 ነ ሶን የለትዳይሳታ ግድን ዎይኮ ሚሸን ሻመትዳይሳት ቃፃረታናዉ በሴስ። ሀይሳን ህንተ አሹዋን ደእያ ታ ጫቆይ መርና ጫቆ ግዳና።
GEN 17:14 ኦንካ ቃፃረቶና ደእያ አደ አስ ኡባይ ታ ጫቁዋ መንꬅዳ ግሾ ባ አሳፐ ዱፆ” ያግስ።
GEN 17:15 ፆሳይ አብራሃመኮ፥ “ህዛፐ ነ ማቸ ሱንꬃይ ሶራ ግድ ፄገቶፎ፤ ሀችፈ ዶምድ እ ሱንꬃይ ሳራ ጌተቶ።
GEN 17:16 ታኒ እዮ አንጃና፤ ታኒ ኢፐ ነዉ አደ ናአ እማና። ታኒ እዮ አንጃና ግሾ እያ ካዎተꬃታስ አዮ ግዳና፤ ደርያ ካዎት ኢፐ ከያና” ያግስ።
GEN 17:17 አብራሃመይ ባ ሶምኡዋራ ሳአን ጉፋንድ፥ “ሀይ አሳዉ፥ ፄቱ ላይꬃ አስ ናአ የላኔ? ኡዱፉን ታሙ ላይꬅ ግድዳ ሳርካ ናአ የላኔ?” ያግድ ባ ዎዛናን ሚጭስ።
GEN 17:18 አብራሃመይ ፆሳኮ፥ “እስማኤል ታና ላታና መላ ነ እያ አንጃርክ” ያግስ።
GEN 17:19 ሽን ፆሳይ፥ “አካይ፥ ነ ማችያ ሳራ ነዉ አደ ናአ የላና፥ ኔኒ እያ ይሳቃ ጋዳ ሱንꬃና። ታኒ እያፐ ጉየራ ያ እያ ዘረꬃስ መርና ጫቆ ግዳና መላ እያራ ታ ጫቁዋ ጫቃና።
GEN 17:20 እስማኤላባ ነ ታና ኦይችዳ ኦይሻ ስአስ። ታኒ እያካ አንጃና። ታ እያ አይፍሳና፥ እያ የለተꬃ ሎይꬃ ዳርሳና። እ ታማነ ናምኡ ሃረይሳታስ አዋ ግዳና። ታኒ እያ ግታ ካዎተꬅ ከሳና።
GEN 17:21 ሽን ታ ጫቁዋ ዎንቶ ላይꬅ ሀኖደ ሳራ ነዉ የልያ ናአ ይሳቃራ ጫቃና” ያግስ።
GEN 17:22 ፆሳይ አብራሃመራ ኦደትድ ኦንግዳፐ ጉየ እያፐ ሻከትድ ፑደ ብስ።
GEN 17:23 ሄ ጋላስ አብራሃመይ ባ ናአ እስማኤላ፥ ባ ሶን የለትዳይሳታነ ባ ሚሸን ሻምዳይሳታ፥ ባ ሶን ደእያ አደ አሳ ኡባ ፆሳይ እያ ኪትዳይሳዳ ቃፃርስ
GEN 17:24 አብራሃመይ ቃፃረትያ ዎደ እያዉ ላይꬅ ኡዱፉን ታማነ ኡዱፉና።
GEN 17:25 እያ ናአይ እስማኤል ቃፃረትያ ዎደ ታማነ ሄꬑ ላይꬃ ናአ።
GEN 17:26 አብራሃመይነ እያ ናአ እስማኤል ናምአትካ ሄ ጋላስ ቃፃረትዶሶና።
GEN 17:27 አብራሃመ ሶን ደእያ አደ ኡባይ፥ እያ ሶን የለትዳይሳትነ ሚሸን ሻመትዳይሳት ኡባይ እያራ ቃፃረትዶሶና።
GEN 18:1 አብራሃመይ ማምረ ግታ ምꬃታ ጋርሳን ባ ዱንካንያ ፐንገን ሴታ ጋላስ ኡትዳሽን ጎዳይ እያዉ ቆንጭስ።
GEN 18:2 አብራሃመይ ꬎቁ ግድ ፄልያ ዎደ እያ ማታን ኤቅዳ ሄꬑ አሳታ በእስ። እ ኤንታ በእድ ኤንታራ ጋሄታናዉ ባ ዱንካንያ ፐንገፈ ደንድድ ኤንታኮ ዎፅ ብድ ኤንታ ስንꬃን ዝግስ።
GEN 18:3 ያን ስሚድ፥ “አቤት ታ ጎዳዉ፥ ታ ነ ስንꬃን ሳባ ደምዳባ ግድኮ ታና ነ አይልያ አጋዳ አꬎፋ።
GEN 18:4 ጉꬃ ሃꬅ ዪኮ ህንተ ቶሆይ ሜጨትኮ ሀ ምꬃ ኩያን ሸምፕ ኤክተ።
GEN 18:5 ህንተ ታኮ ህንተ አይልያኮ ይዳ ግሾ ፃልድ ህንተ ብያ በሲ ባና መላ ታኒ ህንተዉ ምያባ ኤሀና” ያግስ። ኤንትካ፥ “ዳሮ ሎኦ፥ ነ ግዳይሳዳ ኦꬃ” ያግዶሶና።
GEN 18:6 አብራሃመይ ኤለስድ ሳርኮ ዱንካንያ ግዶ ገልድ፥ “ኤለሳዳ ሄꬑ ጋባተ ሎኦ ꬊለ ኤካ ሙኑቃዳ ኡይꬁ ኡካ” ያግስ።
GEN 18:7 አብራሃመይ ቃስ ባ መሄታ ግዶ ዎፅ ብድ ሎኦ ቡልዱቡልዳ ማራ ዶርድ ባ እስ አይልያስ እምን እ ኤለስድ ሹክድ ጊግስስ።
GEN 18:8 ያትድ አብራሃመይ መቃ ማꬅነ ጊግስዳ ማራ አሹዋ እማꬃታ ስን አꬅስ፤ ኤንቲ ምሽን እ ምꬃ ጋርሳን ኤንታ ማታን ኤቅስ።
GEN 18:9 ኤንቲ አብራሃመኮ፥ “ነ ማችያ ሳራ አዉኔ?” ያግድ ኦይችዶሶና። እካ፥ “ህን ዱንካንያ ግዶና” ያግስ።
GEN 18:10 ጎዳይ እያኮ፥ “ዎንቶ ላይꬅ ሀኖደ ቱማ ታ ኔኮ ስማና፤ ነ ማችያ ሳራ አደ ናአ የላና” ያግስ። ሳራ ሄ ዎደ እያፐ ጉየ ባጋራ ደእያ ዱንካንያ ፐንገን ኤቃዳ ሄሳ ስአዉሱ።
GEN 18:11 አብራሃመይነ ሳር ባንታ ላይꬃን ዳሮ ጭምዶሶና። ሳራ ናአ የልያ ዎደፐ አꬋሱ።
GEN 18:12 ሄሳ ግሾ፥ ሳራ ባ ዎዛናን፥ “ታንነ ታ ጎዳይ ናምአይካ ጭምዳፐ ጉየ ዋንድ ሀ ኡፋይሳይ ሀናኔ?” ያጋዳ ሚጫሱ።
GEN 18:13 ጎዳይ አብራሃመኮ፥ “ ‘ታኒ ጭምዳፐ ጉየ ናአ የላነ’ ጋዳ ሳራ አይስ ሚጫይ?
GEN 18:14 ጎዳስ ዳንዳኤቶናባይ ቱማ ደእዬ? ታ ነዉ ግዳይሳዳ ዎንቶ ላይꬅ ሀኖደ ታ ስማዳ ያና፤ ሄ ዎደ ሳራ አደ ናአ የላና” ያግስ።
GEN 18:15 ሳራ ያሸትዳ ግሾ፥ “ታኒ ሚጫብከ” ጋዳ ላሀሱ። ሽን እ፥ “ነ ቱማ ሚጫዳሳ” ያግስ።
GEN 18:16 አሳት ባናዉ ደንድሸ ሶዶመ ዱገ ፄልዶሶና። አብራሃመይ ኤንታና ሞይዛናዉ ኤንታራ ከይስ።
GEN 18:17 ፆሳይ እያኮ፥ “ታ ኦꬃናዉ ሀንያባ አብራሃመፐ ቆሳነዬ?
GEN 18:18 አብራሃመይ ቱማ ግታነ ዎልቃማ ካዎተꬅ ግዳና። ሀ ቢታ ካዎተꬃት ኡባይ እያን አንጀታና።
GEN 18:19 ፅሎተꬅነ ሱረ ፕርዳ ኦꬅድ ጎዳ ኦግያ ናጋና መላ ባ ናይታነ እያፐ ጉየራ ያ ባ ሶ አሳ ዞራና መላ ታኒ እያ ዶራስ። ሄስካ፥ ፆሳይ አብራሃመስ እማና ግዳ ኡፋይሳ ፖላናሳ” ያግስ።
GEN 18:20 ጎዳይ አብራሃመኮ፥ “ሶዶመ ቦላነ ጋሞራ ቦላ ዋስያ ዋሶይ ዳርስ፤ ኤንታ ናጋራይካ ዳሮ ዴፅስ።
GEN 18:21 ሄሳ ግሾ፥ ኤንታ ኦሶይ ኤንታ ዋሱዋ መለኮ በአናዉ ታኒ ዱገ ዎꬋና፤ ቃስ ሄሳ መላ ኢታ ግዶናኮ ሻካ ኤራና” ያግስ።
GEN 18:22 ሄሳፈ ጉየ፥ ናምኡ አሳት ሶዶመኮ ስሚድ ብዶሶና፥ ሽን አብራሃመይ ጎዳ ስንꬃን ኤቅዳሱዋን ደኤስ።
GEN 18:23 አብራሃመይ ጎዳኮ ሺቅድ፥ “ቱማ ኔኒ ፅሎታ ኢታታራ እስፈ ꬋይሳኔ?
GEN 18:24 ሄ ካታመን እሻታሙ ፅሎ አሳት ደእኮ ነ ꬋይሳኔ? ያን ደእያ እሻታሙ ፅሎ አሳታ ግሾ ሄ ካታማ አሽኪ?
GEN 18:25 ሄሳ መላ ኦሶይ ኔፐ ሃኮ፤ ፅሉዋ ኢታራ ዎል ጋꬃዳ ዎይስ፥ ፅሉዋነ ኢታ እስ አይፍያን ፄለይስ ኔፐ ሃኮ። ሀ ቢታ ኡባ ፕርድያ ኔኒ ፅሎ ፕርድኪ?” ያግስ።
GEN 18:26 ጎዳይ፥ “ታ ሶዶመን እሻታሙ ፅሎታ ደምያኮ ሄ በሳ ኡባ ኤንታ ግሾ ጋዳ አሻና” ያግስ።
GEN 18:27 አብራሃመይ ዛሪድ፥ “ታኒ ቢታነ ብዶ ግዳዳ ታ ጎዳራ ኦደታናዉ ምነታክቻስ፤
GEN 18:28 እሻታሙ ፅሎታፐ እቻሻት ፓጭኮቺ? ኔኒ ሄ እቻሻታ ግሾ ጋዳ ሄ ካታማ ኡባ ꬋይሳነዬ?” ያግስ። ጎዳይ፥ “ታኒ ኦይታማነ እቻሹ ፅሎታ ደምኮ ሄ ካታማ ꬋይስከ” ያግስ።
GEN 18:29 አብራሃመይ ዛሪድ፥ “ያን ኦይታሙ ፃላል ደእኮቺ?” ያግስ። እካ፥ “ኦይታማታ ግሾ ጋዳ ሄ ካታማ ꬋይስከ” ያግስ።
GEN 18:30 ቃስካ አብራሃመይ ዛሪድ፥ “ሀይ ታ ጎዳዉ፥ ታና ሀንቀቶፋ፥ ታኒ ጉጃዳካ ኦደታና። ሀስታሙ ፃላል ደእኮቺ?” ያግስ። ጎዳይ ዛሪድ፥ “ታኒ ያን ሀስታሙ ደምኮ ꬋይስከ” ያግስ።
GEN 18:31 አብራሃመይ፥ “ታኒ ጎዳራ ኦደታናዉ ምነታክቻስ፤ ኦን ኤር ያን ላታሙ ፃላል ደእኮች” ያግስ። ጎዳይካ፥ “ሄ ላታማታ ግሾ ጋዳ ꬋይስከ” ያግስ።
GEN 18:32 አብራሃመይ ቃስካ፥ “ሀይ ታ ጎዳዉ፥ ታና ሀንቀቶፋ ታ እስ ቶሆ ኦደታና፥ ያን ታሙ ፃላላ ደምኮቺ?” ያግስ። እካ፥ “ታማታ ግሾ ጋዳ ታኒ ሄ ካታማ ꬋይስከ” ያግስ።
GEN 18:33 ጎዳይ አብራሃመራ ኦደትድ ኦንግዳፐ ጉየ ብስ፤ አብራሃመይካ ባ ሶ ስምስ።
GEN 19:1 ናምኡ ኪታንቾት ኦማርስሽን ሶዶመ ካታማ ጋክዶሶና። ሄ ዎደ ሎፀይ ሄ ካታማ ፐንገን ኡትስ። ሎፀይ ኤንታ በእድ ሞካናዉ ደንድድ ኤንታኮ ብስ። ባ ሶምኡዋ ሳአ ጋꬅድ ኤንታዉ ዝግስ።
GEN 19:2 እ ኤንታኮ፥ “ታ ጎዳቶ፥ ህንተ አይልያ ሶ ገለርከት፥ ህንተ ቶሁዋ ሜጨትድ ቃማ ሀይሳን አቅተ፤ ዎንታ ጉራ ህንተ ብያ በሲ ቢተ” ያግስ። ኤንቲ፥ “አካይ፥ ኑኒ ሀ ካታማ ዳባባን አቃና” ያግድ ዛርዶሶና።
GEN 19:3 ሽን እ ኤንታ ምንꬅ ዎስዳ ግሾ ብድ እያ ሶ ገልዶሶና። እ ኤንታዉ ኡይꬅ ኡክድ አꬅን ምዶሶና።
GEN 19:4 ኤንቲ ዝንአና ሀንሽን ሶዶመ ካታማ አደ አሳ ኡባይ ናአተꬅነ ዶንꬒ እሶይካ አቶና ይድ ኬꬃ ዩይ አꬍዶሶና።
GEN 19:5 ኤንቲ ሎፀ ፄግድ፥ “ሀች ኦማርስ ነ ሶ ገልዳ አደ አሳት አዉን ደኦና? ኑኒ ኤንታራ ጋሄታና መላ ኤንታ ኑኮ ካረ ከሳ” ያግዶሶና።
GEN 19:6 ያትን ሎፀይ ኤንታራ ኦደታናዉ ካረ ከይሸ ፐንግያ ጉየራ ጎርድድ፥
GEN 19:7 ኤንታኮ፥ “ታ ዳቦቶ፥ ሀያና ሀ ኢታ ኦሱዋ ኦꬆፍተ።
GEN 19:8 ታዉ አደ ኤሮና ናምኡ ጌላኦት ደኦሶና። ታኒ ኤንታ ህንተዉ ካረ ከስኮ ህንተ ኮይዳባ ኦꬅተ። ሽን ሀይሳቲ ታ እማ ግድያ ግሾ ታ ካራፐ ጋርሳን ደኦሶና፤ ሀ አሳታ ቦላ አይብባካ ኦꬆፍተ” ያግስ።
GEN 19:9 አሳት፥ “ኑ ስንꬃፈ ገደ ክቻ” ያግዶሶና። ቃስ፥ “ሀ አደይ ባዉ በተ አስ ሽን፥ ኑ ቦላ ፕርዳናዉ ኮዬስ? ኑኒ ኤንታ ቦላ ኦꬃናዉ ኮይዳ ኢታፐ አꬅድ ነ ቦላ ኦꬃና” ያግዶሶና። ኤንቲ ሎፀ ጉየ ሱግ የግድ ፐንግያ መንꬃናዉ ሺቅዶሶና።
GEN 19:10 ሽን ናምኡ አሳት ባንታ ኩሽያ ካረ የድድ ሎፀ ሶ ጎች ገልስድ ፐንግያ ጎርድዶሶና።
GEN 19:11 ሄሳፈ ጉየ፥ ኤንቲ ኬꬃ ፐንገይ ደእያሱዋ ደሞና መላ ጉꬃፈ ግታ ጋካናዉ ቆቅስዶሶና።
GEN 19:12 ሄ ናምኡ አሳት ሎፀኮ፥ “ነዉ ሀይሳን አደ ናእ ዎይኮ ማጫ ናእ፥ ነ ማጫ ናይታ ኦይችዳይ ዎይኮ ሀራ ዳቦይ ሀ ካታማን ደኢ? ደእኮ ኤንታና ሀይሳፈ ከሳ።
GEN 19:13 አይስ ጊኮ፥ ኑ ሀ ካታማ ꬋይሳናዉ ሀኖስ። ኤንታ ቦላ ዋስያ ዋሶይ ጎዳ ስንꬃን ግታ ግድያ ግሾ ሀ ካታማ ꬋይሳና መላ ጎዳይ ኑና ኪትስ” ያግዶሶና።
GEN 19:14 ያትን ሎፀይ ባ ማጫ ናይታ ኦይችዳይሳታኮ ብድ፥ “ጎዳይ፥ ሀ ካታማ ꬋይሳና ሀንያ ግሾ ኤለስድ ሀ በሳፈ ከይተ” ያግስ። ሽን እያ ማጫ ናይታ ኦይችዳይሳት እ ቀልቅሴስ ግድ ቆፕዶሶና።
GEN 19:15 ሳእ ዎንታናዉ ጎንተይ ዞእያ ዎደ ሄ ኪታንቾት ሎፀኮ፥ “ደንዳ፥ ነ ማችዉነ ሀይሳን ደእያ ነ ናምኡ ናይታ ኤካዳ ኤለሳዳ ከያ። አካይ ጊኮ፥ ሀ ካታማይ ፕርደትያ ዎደ ነካ ꬋያሳ” ያግ ድርግስዶሶና።
GEN 19:16 ሽን ሎፀይ ከያናዉ ጋምእን፥ ጎዳይ እያዉ ቃትዳ ግሾ፥ ሄ ኪታንቾት እያ ኩሽያ፥ እያ ማቸ ኩሽያነ ናምኡ ናይታ ኩሽያ ኦይክድ ሄ ካታማፐ ከስዶሶና።
GEN 19:17 ኪታንቾት ኤንታ ከስዳ መላ ሄ ኪታንቾታፐ እሶይ፥ “ህንተ ሸምፑዋ ኤክድ ባቃትተ! ጉየ ፄሎፍተ! ሀ ሄራን አዉንካ ኤቆፍተ! ህንተ ꬋዮና መላ ዙማኮ ባቃትተ” ያግስ።
GEN 19:18 ሽን ሎፀይ ኤንታኮ፥ “ሀይ ታ ጎዳቶ፥ ያጎፕተ።
GEN 19:19 ታኒ ህንተ አይለይ ህንተ ስንꬃን ሳባ ደምዳ ግሾ ታና አሻናዉ ታዉ ዳሮ ቃትደታ። ሽን ታኒ ዙማኮ ባቃታናዉ ዳንዳእከ፤ ሀ ꬋዮይ ጋክድ ታና ꬋይሳና።
GEN 19:20 ሄኮ፥ ሀይሳን እስ ካታም ደኤስ፤ ያ ዎፅድ ባናዉ ማታነ ጉꬃ ካታማ። ታ ሸምፑዋ አሻናዉ ታ ያ ባቃቶ? እ ዳሮ ጉꬃ ካታማ ግደኔ?” ያግስ።
GEN 19:21 ኪታንቾይ፥ “ሎኦ! ታኒ ነ ዎሳ ኤካስ፤ ሄ ነ ኦድዳ ካታማ ꬋይስከ።
GEN 19:22 ሄ ካታማኮ ኤለሳዳ ባቃታ፤ ነ ያ ጋካናዉ ታ አይብባካ ኦꬅከ” ያግስ። ሄሳ ግሾ፥ ሄ ካታማ ሱንꬃይ ዞኣረ ጌተትስ።
GEN 19:23 ሎፀይ ዞኣረ ጋክያ ዎደ ቡሮ ፃልቀይ ጫረስ።
GEN 19:24 ጎዳይ ሄ ዎደ ሳሎፐ ታማነ ፁግያ ዲነ ሶዶመ ቦላነ ጋሞራ ቦላ ቡክስስ።
GEN 19:25 ሄሳዳ ኦꬅድ ጎዳይ ሄ ካታማታ፥ ሄራ ኡባ፥ ካታማታን ደእያባ ኡባ ሄ ቢታን ደእያ ምꬃነ ማታ ꬋይስስ።
GEN 19:26 ሽን ሎፀ ማችያ ጉየ ስማ ፄላዳ ማፅነ ሹቹ ግዳሱ።
GEN 19:27 ዎንተꬃ ጋላስ ዎንታ ጉራ አብራሃመይ ደንድድ ካሰ እ ጎዳ ስንꬃን ኤቅዳ በሳ ብስ።
GEN 19:28 እ ሶዶመነ ጋሞራ፥ ሄ ሄራን ደእያ ቢታ ኡባ ዱገ ፄልያ ዎደ ፁሳ ታማዳ ጩያይ ቢታፈ ደንደይሳ በእስ።
GEN 19:29 ፆሳይ ሄ ሄራን ደእያ ካታማታ ꬋይስያ ዎደ አብራሃመ ቆፕድ፥ ሎፀይ ደእያ ካታማታ ꬋይስድ፥ ሎፀ ꬋዮፐ አሽስ።
GEN 19:30 ሎፀይ ዞኣረን ዳናዉ ያሸትዳ ግሾ፥ ያፐ ደንድድ ባ ማጫ ናይታ ናምአታራ ዙማ ቦላ ከይስ። ያን ጎንጎሎ ግዶን ባ ናምኡ ማጫ ናይታራ ደእስ።
GEN 19:31 እስ ጋላስ ባይራ ናእያ ባ ካሎ ምቸኮ፥ “ኑ አዋይ ጭምስ፥ ቢታ ኡባን ደእያ ዎጋꬆ ኑራ አቃናዉ እስ አደይ ሀይሳን ባዋ።
GEN 19:32 ያንያ ግሾ፥ ሃያ! ኑ አዋ ኡሹ ኡሽድ፥ እያራ አቅድ፥ ኑ አዋፐ ኑስ ኮቸ አሾስ” ያጋሱ።
GEN 19:33 ሄ ዎደ ቃማ ባንታ አዋ ኡሹ ኡሽዶሶና። ባይራ ናእያ ገላዳ እያራ አቃሱ። እያ እያራ አቅያ ዎደነ ደንድያ ዎደ እ ኤርቤና።
GEN 19:34 ዎንተꬃ ዎደ ባይርያ ካልዉ፥ “ዝነ ቃማ ታኒ ታ አዋራ አቃስ፤ ሀች ቃማካ እያ ኡሹ ኡሽኮ፥ ነካ ገላዳ እያራ አቃ። ያትድ ኑኒ ኑ አዋፐ ኮቸ አሾስ” ያጋሱ።
GEN 19:35 ሄ ዎደ ቃማ ባንታ አዋ ኡሹ ኡሽዶሶና። ካሎ ናእያ ገላዳ እያራ አቃሱ። ሀእካ እያ እያራ አቅያ ዎደነ ደንድያ ዎደ እ ኤርቤና።
GEN 19:36 ያትድ ሎፀ ማጫ ናይት ናምአይ ባንታ አዋፐ ቃንꬃትዶሶና።
GEN 19:37 ባይርያ አደ ናአ የላሱ፤ እያ ሱንꬃ ሞአበ ጋዳ ሱንꬃሱ። እ ሀች ጋካናዉ ሞአበታ ማይዛ።
GEN 19:38 ካልያካ አደ ናአ የላሱ፤ እያ ሱንꬃ በንኣማ ጋዳ ሱንꬃሱ። እ ሀች ጋካናዉ አሞነታ ማይዛ።
GEN 20:1 አብራሃመይ ማምረፐ ደንድድ ነገበ መላ ቢታ ሄራ ብድ ቃደሳፐነ ሹራ ቢታታስ ግዱዋን ደእስ። ገራራንካ ጉꬃ ዎደ ጋምእስ።
GEN 20:2 ያን ደእሸ አብራሃመይ ባ ማችዉ ሳሮ፥ “እያ ታ ምችዉ” ያግዳ ግሾ፥ ገራራ ካዎይ አብመለከይ ኪትድ ሳሮ ባኮ ኤፍስ።
GEN 20:3 ሽን ፆሳይ እስ ቃማ አሙሆን አብመለከኮ ይድ፥ “ኔኒ ኤህዳ ማጫሰ ጋሶን ሀይቃሳ፥ እያ አዝናራ ደአዉሱ” ያግስ።
GEN 20:4 ሀኖሽን፥ አብመለከይ እዮ ቦችቤና። እ፥ “ጎዳዉ፥ ኔኒ ታናነ ታ ደረይ ቆሆና ደእሽን ጮ ꬋይሳነዬ?
GEN 20:5 እ፥ ‘እያ፥ ታ ምቾ’ ግቤኔ? ቃስ እያካ፥ ‘እ፥ ታ እሻ’ ጋብኬ? ታኒ ታ ዎዛና ፅሎተꬃንነ ታ ኩሸ ጌሻተꬃን ሀይሳ ኦꬃስ” ያግስ።
GEN 20:6 ፆሳይ አሙሆን እያኮ፥ “ኤ፥ ኔኒ ነ ዎዛና ፅሎተꬃን ኦꬅዳይሳ ታ ኤራይስ። ሄሳ ግሾ፥ ኔኒ እዮ ቦቾናዳነ ታ ስንꬃን ናጋራ ኦꬆናዳ ነና ታኒ ተቃስ።
GEN 20:7 ሀእ ሀ አድያ ማችዉ ዛራ። እ ናበ ግድያ ግሾ፥ ነዉ ፆሳ ዎስኮ ነ አታና። ሽን እዮ ዛሮና እፅኮ፥ ኔንነ ነዉ ደእያባ ኡባይ ሀይቃናይሳ ኤራ” ያግስ።
GEN 20:8 አብመለከይ ዎንተꬃ ጋላስ ዳሮ ጉራ ባ ሞርናታ ባኮ ፄግስ። ሄ ሀንዳባ ኡባ ኤንታዉ ኦድን ኤንቲ ዳሮ ባብዶሶና።
GEN 20:9 ያትን አብመለከይ አብራሃመ ፄግድ፥ “ኔኒ አይብባ ኑ ቦላ ኦꬃዲ? ነ ታ ቦላነ ታ ካዎተꬃ ቦላ ሀይሳ መላ ቆሆ ኤሀናዉ ታ ነዉ አይ ኢታባ ኦꬃድና? ኔኒ ታ ቦላ ኦሰታናዉ በሶናባ ኦꬃዳሳ” ያግስ።
GEN 20:10 ቃስ አብመለከይ አብራሃመ፥ “ኔኒ ሀይሳ አይስ ኦꬃዲ?” ያግድ ኦይችስ።
GEN 20:11 አብራሃመይ ዛሪድ፥ “ ‘ሀ በሳን ፆሳስ ያሸትያ አስ ባይና ግሾነ ቃስ ታ ማቸ ጋሶን ኤንቲ ታና ዎꬋና’ ጋዳ ቆፕዳ ግሾሳ።
GEN 20:12 ሄሳ ቦላ እያ ቱማካ ታ ምቾ፤ እያ ታ አዋ ናአፐ አትሽን ታ አየ ናአ ግዱኩ፥ ያንያ ግሾ፥ እያ ታ ማቾ ግዳሱ።
GEN 20:13 ፆሳይ ታና ታ አዋ ኬꬃፈ ከስዳ ዎደ ታኒ ኢኮ፥ ‘ኔኒ ብዳ ቢታ ኡባን ነ ታዉ ኦꬃና ኬሀተꬃይ ሀይሳ፤ “እ ታ እሻ” ጋዳ’ ኦዳ ያጋስ” ያግስ።
GEN 20:14 ሄሳፈ ጉየ፥ አብመለከይ ዶርሰ፥ መሄ፥ ማጫ አይለታነ አደ አይለታ ከስድ አብራሃመስ እሚስ፤ እያ ማችዉ ሳሮ እያዉ ዛርስ።
GEN 20:15 አብመለከይ አብራሃመኮ፥ “ሄኮ፥ ታ ቢታይ ሀይስሽ ነና ሎኦሶን ደአ” ያግስ።
GEN 20:16 ሳርኮ፥ “ታኒ ነ እሻስ እስ ሙኩሉ ብራ ሳንትመ እማይስ። ሄስ ኔራ ደእያ ኡባ ስንꬃን ኔኒ ፅሎ ግደይሳነ አይብ ኢታባካ ኦꬆናይሳ ኤርሰይሳ ግዶ” ያግስ።
GEN 20:17 ጎዳይ አብራሃመ ማቸ ሳር ጋሶን አብመለከ ኬꬃ ኡባ ማይንስዳ ግሾ አብራሃመይ ፆሳ ዎስን፥ አብመለከይ፥ እያ ማችያነ እያ ማጫ አይለት ናአ የላና መላ ፆሳይ ኤንታ ፓꬅስ።
GEN 21:1 ጎዳይ ባ ኦድዳይሳዳ ሳሮ አንጅስ፤ ባ ገልዳ ቃላካ ፖልስ።
GEN 21:2 ሳራ ቃንꬃታዳ ፆሳይ ግዳ ዎደይ ጋክን ጭምዳ አብራሃመስ አደ ናአ የላሱ።
GEN 21:3 አብራሃመይ ሳራ የልዳ ናአ ሱንꬃ ይሳቃ ግድ ሱንꬅስ።
GEN 21:4 አብራሃመይ ባ ናአ ይሳቃ ፆሳይ ኪትዳይሳዳ የለትዳ ሆስፑንꬆ ጋላሳን ቃፃርስ።
GEN 21:5 እያ ናአ ይሳቅ የለትያ ዎደ፥ አብራሃመስ ላይꬅ ፄታ።
GEN 21:6 ሳራ፥ “ፆሳይ ታዉ ሚቸ እሚስ፤ ቃስ ሀይሳ ስእያ ኡባይ ታራ ሚጫና” ያጋሱ።
GEN 21:7 ቃስካ ሳራ፥ “ሳራ አብራሃመስ ናአ የላዳ ꬋንꬃና ግዳይ ኦኔ? ግድኮካ ታኒ ሀእ እያዉ እ ጭምዳ ዎደ ናአ የላስ” ያጋሱ።
GEN 21:8 ጉꬃ ናአይ ድጭድ፤ ꬋንꬅ ዱꬅስ፤ አብራሃመይ ይሳቅ ꬋንꬅ ዱꬅዳ ጋላስ ዎልቃማ ግብራ ጊግስስ።
GEN 21:9 ሽን ግብፀፈ ይዳ አጋራ አብራሃመስ የልዳ ናአይ ይሳቃ ቶችሽን ሳራ በአሱ።
GEN 21:10 ሳራ አብራሃመኮ፥ “ሀ አይለ ናአይ ታ ናአ ይሳቃራ ኡባካ ላቶና ግሾ፥ ጋꬍንድዉነ እ ናኣ ከሳዳ ጎዳ” ያጋሱ።
GEN 21:11 ሄ ኦዳይ ባ ናአ ቦችያ ግሾ፥ አብራሃመይ ዳሮ መቶትስ።
GEN 21:12 ሽን ፆሳይ አብራሃመ፥ “ነ ኮቻይ ይሳቃ ባጋራ ፄገታና ግሾ ነ ናኣስነ ነ አይሌስ ዳሮ መቶቶፓ፤ ሳራ ነዉ ኦድያባ ኡባ ስአ።
GEN 21:13 ቃስ እካ ነ ኮቸ ግድያ ግሾ አይለ ናአ ታኒ ግታ ደረ ኦꬃና” ያግስ።
GEN 21:14 ዎንታ ጉራ አብራሃመይ ደንድድ ጉꬃ ካነ ኮዳን ሃ ኩንꬅድ፥ አጋሮ ቶስድ፥ እ ናአ እዮ እድንꬅድ ከስ ጎድስ። እያ ባዳ፥ በርሳበ መላ ቢታን ዳቡራሱ።
GEN 21:15 ሃꬃይ ኮዳፈ ዉርዳ ዎደ እያ፥ “ናአይ ሀይቅሽን፥ ኡታዳ በእከ” ጋዳ፥ ናአ እስ ቡረ ጋርሳን የጋዳ፥ ናምኡ ፄቱ ዋꬋ ግደይሳ መላ ባዳ ኡታ አጋሱ። ያን ኡታዳ፥ ባ ቃላ ꬎቁ ኦꬃዳ ዬካሱ።
GEN 21:17 ፆሳይ ናአ ዋሱዋ ስእስ። ፆሳ ኪታንቾይ አጋሮ ሳሎፐ ፄግድ፥ “አጋረ፥ ዋናዲ? ፆሳይ ናአ ዬሁዋ ስእዳ ግሾ ባቦፋ፤
GEN 21:18 ዳንዳ ኤቃዳ፥ ናአ ደንꬃዳ ነ ኩሽያን ኦይካ፤ ታኒ እያ ግታ ደረ ኦꬃና” ያግስ።
GEN 21:19 ፆሳይ እዮ ሃꬃ ኦላ በስን፥ ባዳ ኮዳን ሃ ኩንꬃዳ ናኣ ኡሻሱ።
GEN 21:20 ናአይ ድጭያ ዎደ ኡባን ፆሳይ እያራ ግድስ። እ መላ ቢታን ደእድ፥ ዶንገን ዱክያ አሰ ግድስ።
GEN 21:21 እ ፓራና መላ ቢታን ደእሽን፥ እያ አይያ ግብፀፈ እያዉ ማቾ እማሱ።
GEN 21:22 ሄ ዎደ፥ አብመለከይ፥ ባ ቶራ ሞጮና ፍኮላራ አብራሃመኮ ብድ፥ “ኔኒ ኦꬅያባ ኡባን ፆሳይ ኔራ ደኤስ።
GEN 21:23 ኔኒ ታ ቦላ ዎይኮ ታ ናይታ ቦላ ዎይኮ ታ ዘረꬃ ቦላ ጭማዳ ገነ ኦꬆና መላ፥ ሀእ ሀይሳን፥ ፆሳ ስንꬃን ታዉ ጫቃ። ታኒ ነዉ ኬህዳይሳዳ፥ ኔንካ ታስነ ኔኒ በተተꬃን ደእዳ ሀ ቢቴስ ኬሀ” ያግስ።
GEN 21:24 አብራሃመይ፥ “ታኒ ጫቃይስ” ያግስ።
GEN 21:25 ሄ ዎደ፥ አብራሃመይ፥ አብመለከ አይለት ኤክዳ ሃꬃ ኦላባ አብመለከስ ማጋንስ።
GEN 21:26 ሽን አብመለከይ፥ “ሄሳ ኦን ኦꬅዳኮ ታኒ ኤርከ። ኔንካ ቃስ ታዉ ኦዳባካ፤ ታኒ ሀች ጋካናዉ ሄሳ ስአብከ” ያግስ።
GEN 21:27 ሄሳፈ ጉየ፥ አብራሃመይ ዶርሳታነ ሚዛታ ኤህድ፥ አብመለከስ እምን፥ ኤንቲ ናምአይ ጫቅዶሶና።
GEN 21:28 አብራሃመይ ላፑን ኡዞ ዶርሳታ ዉድያፐ ሻክስ፤
GEN 21:29 አብመለከይ አብራሃመ፥ “ሀ ኔኒ ዱማ ሻካ ዎꬅዳ ላፑን ኡዞ ዶርሳታ አይስ ሻካዲ?” ያግድ ኦይችስ።
GEN 21:30 አብራሃመይ፥ “ታኒ ሀ ሃꬃ ኦላ ቦክዳይሳስ ማርካ ግዳና መላ፥ ሀ ላፑን ኡዞ ዶርሳታ ታፐ ኤካ” ያግስ።
GEN 21:31 ሄሳን ሄ ናምኡ አሳት ጫቅዳ ግሾ፥ ሄ በሳይ ባርሳበ (ጫቆ ሃꬃ ኦላ ዎይኮ ላፑን ሃꬃ ኦላ)።
GEN 21:32 በርሳበን ጫቁዋ ጫቅዳፐ ጉየ፥ አብመለከይነ እያ ቶራ ሞጮናይ ፍኮል ደንድድ፥ ፍልስፄመ ቢታ ስምዶሶና።
GEN 21:33 አብራሃመይ ባርሳበን ታማርሲክ ጌተትያ ምꬅ ቶክስ። ሄሳን ጎዳ፥ መርና ፆሳ ፄግድ እያዉ ጎይንስ።
GEN 21:34 አብራሃመይ ፍልስፄመ ቢታን ዳሮ ዎደ ደእስ።
GEN 22:1 ሄሳፈ ጉየ፥ ፆሳይ አብራሃመ ፓጭስ፤ እ እያ፥ “አብራሃመ” ያግድ ፄግስ። እ፥ “ዬ” ግድ ኮይስ።
GEN 22:2 ፆሳይ፥ “ኔኒ ዶስያ ነ እስ ናአ ይሳቃ ኤካዳ፥ ሞርያ ቢታ ባ። ያን ታኒ ነና በሲያ እስ ደረ ቦላ እያ ፁሳ ያርሾ ኦꬃዳ ታዉ ያርሻ” ያግስ።
GEN 22:3 ዎንተꬃ ጋላስ አብራሃመይ ጉራ ደንድድ፥ ባ ሀርያ ጫንስ። ባ አይለታፐ ናምአታነ ባ ናአ ይሳቃ ባራ ኤክድ፥ ፁሳ ያርሹዋስ ግድያ ምꬃ ቀር ኤክድ፥ ፆሲ እያ በሲያ በሲ ባናዉ ደንድስ።
GEN 22:4 ሄꬓንꬆ ጋላስ አብራሃመይ ꬎቁ ግድ፥ ሄ በሳ ሃሆራ በእስ።
GEN 22:5 አብራሃመይ ባ አይለታ፥ “ህንተ ሀርያራ ሀይሳን ደእሽተ። ታራ ታ ናኣራ ያ ብድ ፆሰ ጎይንድ፥ ህንተኮ ስማና” ያግስ።
GEN 22:6 አብራሃመይ ያርሹዋ ምꬃ ደንꬅድ፥ ባ ናአ ይሳቃ ቶስስ። እ ባዉ ታማነ ማሸ ኦይክስ። ኤንቲ ናምአይ እስፈ ብሽን፤
GEN 22:7 ይሳቅ ባ አዋ አብራሃመ፥ “ታ አዋዉ” ያግስ። አብራሃመይ፥ “ዬ፥ ታ ናአዉ” ያግስ። ይሳቅ፥ “ታማይነ ምꬃይ ሀይስሽ፤ ሽን ፁሳ ያርሾ ኡርገ ዶርሳይ አዉኔ?” ያግስ።
GEN 22:8 ያትን አብራሃመይ፥ “ታ ናአዉ፥ ፁሳ ያርሾ ኡርገ ዶርሳ ፆሳይ ባዉ እማና” ያግስ። ያግን ኤንቲ ናምአይ እስፈ ብዶሶና።
GEN 22:9 ኤንቲ ፆሳይ እያዉ ኦድዳ በሳ ጋክዳ ዎደ፥ አብራሃመይ ያን ያርሾ በሲ ጊግስድ፥ ምꬅ ሂፅስ። ባ ናአ ይሳቃ ቃችድ፥ ሄ ምꬃ ቦላ ዝንእስስ።
GEN 22:10 አብራሃመይ ባ ናአ ሹካናዉ ባ ኩሽያ የድድ ማሸ ኤክስ።
GEN 22:11 ሽን ጎዳ ኪታንቾይ ሳሎፐ፥ “አብራሃመ፥ አብራሃመ” ያግድ ፄግስ። እ፥ “ዬ” ያግድ ኮይስ።
GEN 22:12 ኪታንቾይ፥ “ናአ ቦላ ነ ኩሽያ ዎꬆፋ፤ እያ አይብባካ ኦꬆፋ። ኔኒ ነ እስ ናኣ ታና ድጎና ግሾ፥ ኔኒ ፆሳስ ያየይሳ ታኒ ኤራይስ” ያግስ።
GEN 22:13 አብራሃመይ ꬎቁ ግድ ፄልስ፤ ሄኮ ካጨይ ቱራን ቃፀትዳ እስ ዶርስ ደኤይሳ በእስ። አብራሃመይ ብድ ሄ ዶርሳ ኤክድ፥ ባ ናአ በሳን ፁሳ ያርሾ ኦꬅድ ያርሽስ።
GEN 22:14 ሄሳ ግሾ፥ አብራሃመይ፥ “ጎዳይ እማና” ግድ ሄ በሳ ሱንꬅስ። ሀች ጋካናስ ሄስ፥ “ጎዳ ዙማ ቦላ እመታና” ጌተቴስ።
GEN 22:15 ጎዳ ኪታንቾይ ሳሉዋፐ ናምአንꬆ አብራሃመ ፄግድ፥
GEN 22:16 “ታኒ ጎዳይ፥ ሀይሳዳ ጋዳ ታኒ ታ ሁጰን ነዉ ጫቃይስ፤ ኔኒ ሀይሳ ኦꬅዳ ግሾነ ነ እስ ናኣ ታና ድጎና ግሾ፥
GEN 22:17 ታኒ ነና ቱማ አንጃና። ነ ዘረꬃ ታኒ ሳሎ ፆልንቶ መላነ አባ ጋፃን ደእያ ሻፈ መላ ኦꬃና። ነ ዘረꬃት ባንታ ሞርከታ ካታማታ ላታና።
GEN 22:18 ኔኒ ታዉ ኪተትዳ ግሾ፥ ሀ ሳአ ካዎተꬃት ኡባይ ነ ዘረꬃ ባጋራ አንጀታና” ያግስ።
GEN 22:19 ሄሳፈ ጉየ፥ አብራሃመይ ባ አይለታኮ ጉየ ስምን፥ ኤንቲ ኡባይ እስፈ ደንድድ ባርሳበ ብዶሶና። አብራሃመይ ባርሳበን ደእስ።
GEN 22:20 ሄሳፈ ጉየ፥ አብራሃመስ፥ “ምልካ ነ እሻ ናኮራስ ናይታ የላሱ፤
GEN 22:21 ኤንትካ ባይራይ ኡፃ፤ ኡፃ እሻት ቡዛ፥
GEN 22:22 አራመ አዋ ቃሜላ፥ ከሳዳ፥ ሃዞ፥ ፕልዳሻ፥ ይድላፋነ ባቱኤላ ጌተቶሶና” ያግስ።
GEN 22:23 ሀ ሆስፑን ናይታ ምልካ አብራሃመ እሻ ናኮራስ የላሱ። ባቱኤል እርብቃ የልስ።
GEN 22:24 ረኡማ ጌተትያ እያ ናምአንꬆ ማጫስያ ቃስ ፀባ፥ ጋሃማ፥ ታሀሳነ ማካ የላሱ።
GEN 23:1 ሳራ ፄታነ ላታማነ ላፑን ላይꬅ ደአሱ።
GEN 23:2 ሄሳፈ ጉየ፥ እያ ካናነ ቢታን ደእያ ቅርያት-አርባ (ከብሮና) ካታማን ሀይቃሱ። አብራሃመይ ሳርስ ዬክስነ ካዮትስ።
GEN 23:3 ዬክ ስሚድ፥ አብራሃመይ ባ ማቸ አሀ ማታፐ ደንድድ ብድ፥ ህተታ ሀይሳዳ ያግስ፤
GEN 23:4 “ታኒ ህንተ ግዶን እማ፤ ታ ማቸ አሀ ሞጋናዉ ታዉ ህንተ ጋድያፐ ዱፎ በሲ ባይዘርከት” ያግስ።
GEN 23:5 ህተት አብራሃመ፥ “ጎዳዉ፥ ኑኒ ኦደይሳ ስአ፤ ኔኒ ኑ ግዶን ዎልቃማ ሀላቃ፤ ኔኒ ነ ማቸ አሀ ኑ ዱፉዋፐ ነና ሎእዳሶን ሞጋ፤ ኔኒ ነ ማቸ አሀ ሞጋናዉ ባ ዱፉዋ ኦንካ ነና ድገና” ያግ ዛርዶሶና።
GEN 23:7 አብራሃመይ ደንድ ኤቅድ፥ ህተታ ስንꬃን ዝግስ።
GEN 23:8 እ ኤንታኮ፥ “ህንተ ታና፥ ‘ነ ማቸ አሀ ሞጋ’ ጊኮ፥ ታኒ ግያባ ስእተ። ዞሃራ ናአ ኤፍሮናስ እያ ጋድያ ጋፃን ደእያ ማክፌላ ጌተትያ ጎንጎሉዋ ታ ዱፎ ኦꬃናዉ ባይዛና መላ ኩመꬃ ጋተን ኑና ዛልእሰርከት” ያግስ።
GEN 23:10 ህተ አድያ ኤፍሮን ሄ ዎደ ካታማ ፐንገን ሺቅዳ ባ አሳ ግዶን ኡትስ። ህተት ኡባይ ስእሽን፥ አብራሃመኮ ያግስ፤
GEN 23:11 “ሄሳዳ ግደና፤ ታ ጎዳዉ፥ ታ ኦደይሳ ስአ፤ ታኒ ጋድያካ እያ ግዶን ደእያ ጎንጎሉዋካ ነዉ እማይስ፤ ታኒ ነዉ እያ ታ አሳ ስንꬃን እማይስ፤ ኔኒ ነ ማቸ አሀ ሞጋ” ያግስ።
GEN 23:12 አብራሃመይ ሄ ቢታ አሳ ስንꬃን ዛር ዝግድ፥
GEN 23:13 አሳይ ስእሽን ኤፍሮና፥ “ታ ኦደይሳ ስአርክ! ታኒ ሄ ጋድያ ጋተ ቃንፃና፤ ኔኒ ታፐ ኤካርክ። ሄሳን ታኒ ታ ማቸ አሀ ሞጋና” ያግስ።
GEN 23:14 ኤፍሮን አብራሃመኮ ዛሪድ፥ “ታ ጎዳዉ፥ ታኒ ኦደይሳ ስአ፤ ጋደይ ኦይዱ ፄቱ ብራ ሳንትመ ከሳና፤ ሽን ሄስ ነ ግዶንነ ታ ግዶን አይብካ ግደና፤ ነ ማቸ አሀ ሞጋ” ያግስ።
GEN 23:16 አብራሃመይ ህተት ስእሽን፥ ኤፍሮን ግዳ ጋትያ ኤክስ፤ ሄ ዎደ ሚሸን ኦይዱ ፄቱ ብራ ሳንትመ ኤፍሮናስ እሚስ።
GEN 23:17 ያት ስሚድ፥ ማምረ ካታማ ማታን ማክፌላን ደእያ ኤፍሮና ጋደይ፥ ያን ደእያ ጎንጎሎይነ ሄ ጋድያን ደእያ ምꬃ ኡባይ፥
GEN 23:18 ካታማ ፐንገን ሺቅዳ ህተታ ኡባ ስንꬃን ዎጋꬆ አብራሃመ ጋደ ግድስ።
GEN 23:19 ሄሳፈ ጉየ፥ አብራሃመይ ባ ማችዉ ሳራ ካናነ ቢታን (ከብሮና) ጌተትያ ማምረ ካታማ ማታን ደእያ ማክፌላ ጌተትያ ጋደ ጎንጎሉዋን ሞግስ።
GEN 23:20 ሄሳ ግሾ፥ ሄ ጋደይነ ያን ደእያ ጎንጎሎይ ህተታ ስንꬃን ህግያን አብራሃመስ ዱፎ ግድስ።
GEN 24:1 አብራሃመይ ዳሮ ጭምስ። ጎዳይ እያ ኡባባንካ አንጅስ።
GEN 24:2 አብራሃመይ ባ አይልያ፥ ባ ሶ አሳ ኡባስ ሀላቃትያ፥ ባ አቆ ኡባ ቦላ ሱንትዳይሳ ሀይሳዳ ያግስ፥ “ነ ኩሽያን ታ ጉልባታ ኦይካ፤
GEN 24:3 ታኒ ኤንታ ግዶን ደእዳ ካናነታ ማጫ ናይታፐ ታ ናኣስ ማቾ ኦይቾና መላ፥ ጎዳን፥ ሳሎነ ሳአ ፆሳ ሱንꬃን ታኒ ነና ጫቅሳይስ፤
GEN 24:4 ሽን ኔኒ ታ የለትዳ ቢታ፥ ታ ዳቦታኮ ባዳ፥ ታ ናአ ይሳቃስ ማቾ ኦይቻ” ያግስ።
GEN 24:5 እያ አይለይ፥ “ሄ ማጫስያ ታራ ያናዉ ዶሶና እፅኮ፥ ነ ናአ ኔኒ ይዳ ቢታ ጉየ ኤፎ?” ያግድ ኦይችስ።
GEN 24:6 አብራሃመይ፥ “ታ ናአ አይ ጋሶንካ ያ ኤፎናዳ ነና ኤራ!
GEN 24:7 ጎዳይ፥ ሳሉዋ ፆሳይ፥ ታና ታ አዋ ሶፐነ ታ የለትዳ ቢታፈ ከስዳይስ ታዉ፥ ‘ነ ዘረꬃስ ታኒ ሀ ቢታ እማና’ ያግድ ጫቅዳይስ፥ ኔኒ ታ ናኣስ ያፐ ማቾ ደማና መላ፥ እ ባ ኪታንቹዋ ኔፐ ስን ኪታና።
GEN 24:8 ሄ ማጫስያ ኔራ ያናዉ ዶሶና እፅኮ፥ ሀ ታኒ ነና ጫቅስዳ ጫቆይ ነዉ ጎመ ግደና፤ ሽን ታ ናአ ያ ኡባካ ኤፎፓ” ያግስ።
GEN 24:9 አይለይ ባ ጎዳ አብራሃመ ጉልባታ ኦይክስ፤ ሄ ኦዳስ ጫቅስ።
GEN 24:10 ሄሳፈ ጉየ፥ አይለይ ባ ጎዳ ግማለታፐ ታማ ኤክድ፥ ባ ጎዳ ሚሽያፐካ ሙሩታ ሙሩታ ኤክ ብድ ማሰጰፆመ ቢታን ናኮራ ካታማ ጋክስ።
GEN 24:11 ኦማርስ፥ ማጫስ ሃ ትካናዉ ያ ዎደ፥ ካታማፐ ጋፃን ሃꬃ ኦላ ማታን ባ ግማለታ ጉልባትስስ።
GEN 24:12 እ ዎስሸ፥ “ጎዳዉ፥ ታ ጎዳ አብራሃመ ፆሳዉ፥ ሀች ታኒ ቆፓዳ ይዳይሳ ታዉ ጊግሳ፤ ቃስ ታ ጎዳ አብራሃመስ ኬሀባ ኦꬃ።
GEN 24:13 ሄኮ፥ ታኒ ሀ ሃꬃ ፑልቱዋ ማታን ኤቃይስ፤ ሀ ካታማ ማጫ ናይት ሃꬃ ትካናዉ ሃ ዮሶና።
GEN 24:14 ታኒ፥ ‘አነ ኦቱዋ ዝቅ ኦꬃዳ ታና ሃ ኡሻ’ ግያ ዎደ፥ እያ፥ ‘ሄኮ ኡያ፤ ቃስ ነ ግማለታ ታኒ ኡሻና’ ግያራ፥ ህና ነ አይልያ ይሳቃስ ኔኒ ዶርዳሮ ግዶ፤ ኔኒ ታ ጎዳስ ኬሀባ ኦꬅዳይሳ ታኒ ሄሳን ኤራና” ያግስ።
GEN 24:15 ቡሮ እ ዎሳ ዛሮና ደእሽን፥ እርብቃ ሃꬃ ኦቶ ቶካዳ ፑቱ ጋሱ። እያ ባቱኤላ ናአ፥ ባቱኤል ምልካ ናአ፥ ምልካ አብራሃመ እሻ ናኮራ ማችዉ።
GEN 24:16 እርብቂ ዳሮ የገልስን አደ ኤሮና ጌላኦ። ፑልቱዋ ዱገ ዎꬋዳ፥ ባ ኦቱዋ ኩንꬃዳ ባናዉ ደንዳሱ።
GEN 24:17 ያንን፥ ሄ አይለይ ኢኮ ዎፅ ብድ እዮ፥ “ነ ታና ጉꬃ ሃ ኡሻርክ” ያግስ።
GEN 24:18 እያ፥ “ኤሮ ታ ጎዳዉ፥ ኡያ” ያጋሱ። ኤለሳዳ ኦቱዋ ባ ሀሸፐ ዎꬃዳ፥ ገድ ኦꬃ ኦይካዳ እያ ኡሻሱ።
GEN 24:19 እያ ኡሽዳፐ ጉየ፥ “ነ ግማለትካ አላና ጋካናዉ ታኒ ኤንታዉ ሃꬃ ዱቃና” ያጋሱ።
GEN 24:20 አትዳ ሃꬃ ኤለሳዳ ጎንጌን ትጋዳ፥ ሀራ ሃ ዱቃናዉ ኦላ ዎፃሱ፤ ግማለት ኡባይ አላና ጋካናስ፥ ሃꬃ ኦላፈ ዱቃ ዱቃ ኤሀዳ ጎንገን ትጋዳ ኡሻሱ።
GEN 24:21 እ ቆፕድ ይዳ ቆፋ ጎዳይ እንጀይሸ ደእያኮነ ኤራናዉ አደይ ስእ ግድ እዮ ፄሌስ።
GEN 24:22 ግማለት ሃꬃ ኡይ ስምን፥ አደይ እቻሹ ግራመ ባጋ ሲን አꬅያ ዎርቃ ፄታነ ታሙ ግራመ ግድያ ናምኡ ዎርቃ ሳጋዮታ ጊግስስ።
GEN 24:23 እዮ፥ “ኔኒ ኦደ ናኤ? አነ ታዉ ኦዳ፤ ነ አዋ ሶን ኑስ አቅያ በሲ ዳኔ?” ያግስ።
GEN 24:24 እያ፥ “ታኒ ባቱኤላ ናአ፤ ባቱኤል ምልካ ናኮራስ የልዳ ናአ።
GEN 24:25 ኑ ሶን ግድያ ካለይነ ሀርቆይ ደኤስ፤ ቃስ ህንተ አቃናዉ በሲ ደኤስ” ያጋሱ።
GEN 24:26 አደይ ጉልባትድ ጎዳ ጎይንድ፥
GEN 24:27 ሀይሳዳ ያግስ፤ “ታ ጎዳስ ኬሄይሳነ አማነተይሳ አግቦና ጎዳይ፥ ታ ጎዳ አብራሃመ ፆሳይ ጋላተቶ፤ ታኒ ይሽን፥ ጎዳይ ታና ታ ጎዳ ዳቦታ ሶ ካለꬅስ” ያግስ።
GEN 24:28 ናእያ ዎፃ ባዳ፥ ባ አየ ሶን ደእያ አሳስ ሀንዳባ ኦዳሱ።
GEN 24:29 እርብቃስ ላባ ጌተትያ እሺ ደኤስ። ላቢ ካረ ከይድ ሃꬃ ፑልቱዋ ማታን ደእያ አድያኮ ዎፅስ።
GEN 24:30 ሲ ዎርቃነ ባ ምቸ ኩሸን ደእያ ሳጋዮታ በእዳ ዎደ እርብቃ አደይ ባና ግዶይሳ ኦድን ስእዳ ዎደ፥ ከይድ አድያኮ ብስ። አደይካ ግማለታራ ፑልቱዋ ማታን ኤቅዳይሳ ደምስ።
GEN 24:31 እያኮ፥ “ጎዳይ ነና አንጅዳይሶ፥ ሃያ፥ ኔኒ ካረን አይስ ኤቃዲ? ታኒ ነዉ ኬነ ግማለታስካ በሰ ጊግሳስ” ያግስ።
GEN 24:32 ያትን አደይ ሶ ገልስ። ላቢ ግማለታ ጫና ብልድ፥ ካለነ ꬊለ ግማለታስ እማስ። ቶሆ ሜጫናዉ እያስነ እያራ ደእያ አሳስ ሃ ኤህስ።
GEN 24:33 ካꬅ እያ ስን አꬍስ። ሽን፥ “ታኒ ታና ኤህዳባ ህንተዉ ኦዶና ደአሸ ካꬅ ሚከ” ያግስ። ላቢ፥ “ያኮ ኦዳ” ያግስ።
GEN 24:34 ሄሳ ግሾ፥ እ፥ “ታኒ አብራሃመ አይልያ።
GEN 24:35 ጎዳይ ታ ጎዳ ዳሮ አንጅዳ ግሾ እ ዱረትስ። ዶርሰ፥ ሚዝ፥ ብራ፥ ዎርቃ፥ አደ አይለታ፥ ማጫ አይለታ፥ ግማለታነ ሀረታ እያዉ እሚስ።
GEN 24:36 ታ ጎዳ ማችያ ሳራ ባ ጭማተꬃ ላይꬃን እያዉ አደ ናአ የላሱ። ያትን እ ባዉ ደእያባ ኡባ እያዉ እሚስ።
GEN 24:37 ታ ጎዳይ ታና ሀይሳዳ ጫቅስስ፥ ‘ታኒ ደእያ ካናነ ቢታ ማጫ ናይታፐ ታ ናኣስ ማቾ ኦይቾፋ።
GEN 24:38 ሽን ታ አዋ አሳኮ፥ ታ ዳቦታኮ ባዳ ታ ናኣስ ማቾ ኦይቻ’ ያግስ።
GEN 24:39 ታኒ ታ ጎዳ፥ ‘ናእያ ታራ ያናዉ ዶሶና እፅኮች?’ ያጋዳ ኦይቻስ።
GEN 24:40 እካ፥ ታኒ እያ ስንꬃን ኪተትዳ ጎዳይ ባ ኪታንቹዋ ኪታና፤ ኔኒ ታ ናኣስ ታ አዋ አሳፐ፥ ታ ኮቻፈ ማቾ ደማና መላ፥ ነ በይሳካ እንጀያና።
GEN 24:41 ኔኒ ታ ኮቻታኮ ብን፥ ኤንቲ ነዉ እዮ እሞና እፅኮ፥ ሄ ዎደ ነዉ ጫቆይ ጎመ ግደና” ያግስ።
GEN 24:42 “ታኒ ሀች ሄ ፑልቱዋኮ ያ ዎደ ያጋስ፤ ‘ጎዳዉ፥ ታ ጎዳ አብራሃመ ፆሳዉ፥ ነ ሸነ ግድኮ፥ ታኒ ብያ አላልያ ጊግሳ።
GEN 24:43 ሄኮ፥ ታኒ ሀ ፑልቱዋ ማታን ኤቃይስ፤ ጌላኦ እስንያ ሃ ትካናዉ ዪኮ፥ ታኒ እዮ፥ ታና ነ ኦቱዋፐ ጉꬃ ሃ ኡሻርክ’ ያጋና።
GEN 24:44 እያ፥ ‘ኤሮ ኡያ፥ ቃስ ነ ግማለታስካ ታኒ ሃ ዱቃና’ ግያራ፥ ጎዳይ ታ ጎዳ ናኣስ ዶርዳሮ ግዶ” ያጋስ።
GEN 24:45 “ታኒ ታ ዎዛናን ዎሰይሳ ዛሮና ደእሽን፥ እርብቃ ባ ኦቱዋ ቶካዳ፥ ፑቱ ጋሱ፤ ፑልቱዋ ዱገ ዎꬋዳ ሃ ዱቃሱ፤ ታኒ እዮ፥ ‘ታና ሃ ኡሻርክ’ ያጋስ።
GEN 24:46 “ያግን እያ ኤለሳዳ ባ ሀሽያፐ ኦቱዋ ዎꬃዳ፥ ‘ሄኮ ኡያ፤ ቃስ ታኒ ነ ግማለታ ኡሻና’ ያጋሱ። ያትን ታኒ ኡያስ፤ ቃስ ታ ግማለታ እያ ኡሻሱ።
GEN 24:47 “ታኒ እዮ፥ ‘ኔኒ ኦደ ናኤ?’ ያጋስ። “እያ ዛራዳ፥ ‘ታኒ ባቱኤላ ናኣ፤ ባቱኤል፥ ምልካ ናኮራስ የልዳ ናአ’ ያጋሱ። ታኒ ዎርቃ እ ሲን፥ ሳጋዮታ እ ኩሸን አꬃስ።
GEN 24:48 ሄሳፈ ጉየ፥ ታኒ ጉልባታዳ፥ ጎዳስ ጎይናስ። ታኒ ጎዳ፥ ታ ጎዳ አብራሃመ ፆሳ፥ ታ ጎዳ እሻ ናአ ናእዉ እያ ናኣስ ኤካናዉ ታና ልከ ኦግያ ካለꬅዳይሳስ ጋላታይስ።
GEN 24:49 ሀእካ ህንተ ታ ጎዳስ ኬሀናባነ አማነታናባ ግድኮ፥ ታዉ ኦድተ፤ ግዶና እፅኮካ ኦድተ፤ ሄሳፈ ጉየ፥ ታኒ ሀናናባ ኤራና” ያግስ።
GEN 24:50 ላብነ ባቱኤል ዛሪድ ያግዶሶና፤ “ሀ ኦዳይ ጎዳፐ ይስ፤ ኑኒ ነዉ ያ ሃ ጋናዉ ዳንዳኦኮ።
GEN 24:51 እርብቆ ሀኖ በአ፤ ኤካዳ ባ፤ ጎዳይ ግዳይሳዳ ነ ጎዳ ናኣስ ማቾ ግዶ” ያግዶሶና።
GEN 24:52 አብራሃመ አይለይ ኤንቲ ግያባ ስእዳ ዎደ፥ ሳአን ጉልባትድ ጎዳስ ጎይንስ።
GEN 24:53 አይለይ ብራ አሌቆ፥ ዎርቃ አሌቆነ ማኦ ከስድ እርብቃስ እሚስ። ቃስ አልኦ ሚሸታ እ እሻስነ እ አየስ እሚስ።
GEN 24:54 ሄሳፈ ጉየ፥ እነ እያራ ደኤይሳት ምዶሶና ኡይዶሶና፤ ያን አቅዶሶና። ኤንቲ ጉራ ደንድን፥ እ፥ “ታና ታ ጎዳኮ የድተ” ያግስ።
GEN 24:55 ያትን እ እሻይነ እ አይያ፥ “ናእያ እስ ታሙ ጋላሳ መላ ኑራ ታኮ፥ ሄሳፈ ጉየ እያ ባና” ያግዶሶና።
GEN 24:56 ሽን እ፥ “ጎዳይ ታ ይዳይሳ እንጀይን፥ ህንተ ታና ጋምእሶፕተ። ታኒ ታ ጎዳኮ ባና መላ ታና ሞይዝተ” ያግስ።
GEN 24:57 ኤንቲ፥ “ናእዉ ፄግድ አነ እዮ ኦይቾስ” ያግዶሶና።
GEN 24:58 እርብቃ ፄግድ፥ “ሀ አድያራ ባኔ?” ያግድ ኦይችዶሶና። እያ፥ “ኤ፤ ታኒ ባና” ያጋሱ።
GEN 24:59 ያንን፥ ኤንቲ ባንታ ምችዉ እርብቃ፥ እዮ ድችዳሮ፥ አብራሃመ አይልያነ እያ አሳታ ሞይዝዶሶና።
GEN 24:60 ኤንቲ እርብቃ፥ “ኑ ምቸ እርብቀ፥ ሙኩሉፐ ሙኩሉ ጋካናዉ ዳራ፤ ነ ኮቻይ ባንታ ሞርከታ ካታማታ ላቶ” ያግድ አንጅዶሶና።
GEN 24:61 ሄሳፈ ጉየ፥ እርብቅነ እ ማጫ አይለት ደንድድ፥ ግማለታ ቶግድ፥ አድያራ ብዶሶና። ያትን አይለይ እርብቃ ኤክድ ብስ።
GEN 24:62 ሄ ዎደ ይሳቅ፥ “ታና በእያ ደኦ ፆሳ ፑልቱዋ” ጌተትያ ፑልቱዋ ማታ ብድ፥ ነገበ መላ ቢታን ደኤስ።
GEN 24:63 እስ ጋላስ ኦማርስ ይሳቅ ባ ዎዛናን ቆፕሸ ደምባ ከይድ ዩዬስ፤ እ ꬎቁ ግድ ፄልያ ዎደ፥ ግማለት የይሳታ በእስ።
GEN 24:64 እርብቃካ ꬎቁ ጋዳ ፄልያ ዎደ፥ ይሳቃ በአሱ፤ ግማለታፐ ዎꬋሱ።
GEN 24:65 አብራሃመ አይልያኮ፥ “ሀ ኑራ ጋሄታናዉ ደምባራ ያ አደይ ኦኔ?” ያጋሱ። አይለይ፥ “እ፥ ታ ጎዳ” ያግስ። እያ ባ ላፃና ኤካዳ ጉሉንታሱ።
GEN 24:66 ቃስ አይለይ ባ ኦꬅዳባ ኡባ ይሳቃስ ኦድስ።
GEN 24:67 ይሳቅ እርብቃ ባ አየ ሳራ ዱንካንያ ግዶ ኤፍስ። እዮ ማችስ፤ እያካ እያዉ ማቾ ግዳሱ። እ እዮ ዶስስ፤ ባ አየ ካዩዋ ዎꬅስ።
GEN 25:1 አብራሃመይ ኬፁራ ጌተትያ ሀራ ማቾ ኤክስ።
GEN 25:2 እያ ዝምራና፥ ዮቅሳና፥ ማዳነ፥ ምድያመ፥ ያስቦቃነ ስዋ እያዉ የላሱ።
GEN 25:3 ዮቅሳን ሳባነ ደዳና የልስ። ደዳን አሾረታ፥ ለፁሰታነ ለኡማታ የልስ።
GEN 25:4 ምድያመ ናይት ገፈራ፥ ኤፈራ፥ ሄኖሀ፥ አብዳነ ኤልዳ። ሀይሳቲ ኡባይ ኬፁራ ሼሻታ።
GEN 25:5 አብራሃመይ ባባ ኡባ ይሳቃ ላትስስ።
GEN 25:6 ሽን እ ፓፃ ደእሸ፥ ሀራ ማቸታፐ የልዳ ናይታ ባዉ ደእያባፐ ዎይትስ። ባ ናአ ይሳቃፐ ኤንታ ሻክድ፥ ዶሎሀ ባጋ ቢታ የድስ።
GEN 25:7 አብራሃመይ ኩመꬅ እስ ፄታነ ላፑን ታማነ እቻሹ ላይꬅ ደእስ።
GEN 25:8 አብራሃመይ ዳሮ ዎደ ደእድ፥ ሎኦ ጭምድ፥ ሀይቅድ ባ ማይዛታን ጋሄትስ።
GEN 25:9 እያ ናይት ይሳቅነ እስማኤል እያ ማክፌላ ጌተትያ ጎንጎሎ ዱፉዋን ሞግዶሶና፤ ሄ ጎንጎሎይ ማምረ ማታን፥ ህተ አድያ ፆሃራ ናአ ኤፍሮና ጋድያን ደኤስ።
GEN 25:10 ሄስ አብራሃመይ ህተታፐ ሻምዳ ጋድያ። አብራሃመይ ባ ማችያ ሳራ ሞገትዳ ዱፉዋን ሞገትስ።
GEN 25:11 አብራሃመይ ሀይቅዳፐ ጉየ፥ ፆሳይ እያ ናአ ይሳቃ አንጅስ። ሄ ዎደ ይሳቅ፥ ቤር-ላይ-ሮእ (ታና በእያ ደኦ ፆሳ ፑልቶ) ጌተትያ ፑልቱዋ ማታን ደኤስ።
GEN 25:12 ሳራ አይልያ፥ ግብፀፈ ይዳ አጋራ፥ አብራሃመስ የልዳ ናአ እስማኤላ የለተꬃይ ሀይሳፈ ካልድ ፃፈትዳይሳ።
GEN 25:13 እስማኤላ ናይት ባንታ ሱንꬃንነ ባንታ የለታ ማራን ሀይሳታ፤ ኤንትካ፥ ናባዮታ፥ ቀዳረ፥ አድቤላ፥ ምብሳማ፥
GEN 25:14 ምስማ፥ ዱማ፥ ማሳ፥
GEN 25:15 ኩዳነ፥ ቴማ፥ እፁራ፥ ናፍሳነ ቀድማ።
GEN 25:16 እስማኤላ ናይት ሀይሳታ፤ ኤንታ ሱንꬃይ ኤንታ ሞꬃንነ ደእያ በሳን ሀይሳ። ኤንቲ ባንታ ያራንካ ታማነ ናምኡ ሀላቃታ።
GEN 25:17 እስማኤል ኩመꬅ ፄታነ ሀስታማነ ላፑን ላይꬅ ደእድ፥ ሀይቅድ ባ ማይዛታን ጋሄትስ።
GEN 25:18 እስማኤላ ኮቸት ግብፀፈ ዶሎሀ ባጋን ደእያ ሀውላፐነ ሱራፐ ግዱዋን፥ አሶረ ኤፍያ ኦግያ ማታን ደእዶሶና። ኤንቲ ባንታ እሻታ ኡባራ ሞርከተꬃን ደእዶሶና።
GEN 25:19 አብራሃመ ናአ ይሳቃ የለተꬃይ ሀይሳፈ ካልድ ፃፈትዳይሳ፤ አብራሃመይ ይሳቃ የልስ።
GEN 25:20 ይሳቃስ ላይꬅ ኦይታማ ግድን፥ እርብቃ ኤክስ፤ እያ ማሰጰፆመን ደእያ አራመ አድያ ባቱኤላ ናእዉነ ላባ ምችዉ።
GEN 25:21 ይሳቅ ባ ማችያ ማይንꬅ ግድዳ ግሾ፥ እዉ ጎዳ ዎስስ፤ ጎዳይ እያ ዎሳ ስእስ። ያትን እያ ማችያ እርብቃ ቃንꬃታሱ።
GEN 25:22 ሽን እ ኡሎን ደእያ ናይት መንተ ግድ ኡትድ፥ እሶይ እሱዋራ ሱገትዶሶና፤ እያ፥ “ሀይስ ታዉ አይስ ሀኒ?” ያጋሱ። ሄሳ ግሾ፥ ጎዳ ኦይቻናዉ ባሱ።
GEN 25:23 ጎዳይ እዮ፥ “ነ ኡሎን ናምኡ ካዎተꬅ ደኤስ፤ ቃስ ነ ግዶን ደእያ ናምኡ ደረ አሳት እሶይ እሱዋፈ ሻከታና፤ እስ ደረ አሳት ሀንኮታፐ ምናና፤ ቃስ ባይራይ ካሉዋስ ኪተታና” ያግስ።
GEN 25:24 እው የሎ ዎደይ ጋክን፥ እ ኡሎን መንተ አደ ናይት ደኦሶና።
GEN 25:25 ኮይሮ የለትዳይስ አርሰ፤ እያ ቦላ ኡባ እክሰይ ማእስ፤ ሄሳ ግሾ፥ ኤንቲ እያ ኤሳዌ (እክሳማ) ግድ ሱንꬅዶሶና።
GEN 25:26 ሄሳፈ ጉየ፥ እያ እሻይ የለትስ። እ ባ ኩሽያን ኤሳዌ ግንድያ ኦይክድ ከይስ፥ ሄሳ ግሾ፥ እያ ያይቆባ (ግንደ ኦይከይሳ) ግድ ሱንꬅዶሶና። እርብቃ ኤንታ የልዳ ዎደ ይሳቃስ ኡሱፑን ታሙ ላይꬅ ግድስ።
GEN 25:27 ናይት ድጭዶሶና፤ ኤሳዌይ ሻንካ ሂላ ኤርያ ባዞ አሰ ግድስ። ሽን ያይቆብ ዱንካነን ደእያ ዎፓ አሰ ግድስ።
GEN 25:28 ይሳቅ ኤሳዌ ዶስስ፤ አይስ ጊኮ፥ እ ሻንካተይሳፈ ማናዉ ዶሴስ፤ ሽን እርብቃ ያይቆባ ዶሳዉሱ።
GEN 25:29 እስ ዎደ ያይቆብ ዎፀ ካꬅሽን፥ ኤሳዌይ ኮሽ ዎꬍን ባዞፈ ይስ።
GEN 25:30 ኤሳዌይ ያይቆባ፥ “ታና ሀ ዞኦ ዎፅያፐ ሙዛ፥ ታና ኮሽ ዎꬌስ” ያግስ። (ሄሳ ግሾ፥ ቃስ እያ ሱንꬃይ ኤዶመ (ዞኦ) ጌተትስ)።
GEN 25:31 ያይቆብ እያ፥ “ኮይሮ ታዉ ነ ባይራተꬃ ባይዛ” ያግስ።
GEN 25:32 ያትን ኤሳዌይ፥ “ሄኮ፥ ታኒ ሀይቃና ሀናይስ፥ ሀ ባይራተꬃይ ታና አይ ማዲ?” ያግስ።
GEN 25:33 ያይቆብ ዛሪድ፥ “አነ ታዉ ኮይሮ ጫቃ” ያግስ። እ ጫቅስ፥ ባ ባይራተꬃ ያይቆባስ ባይዝስ።
GEN 25:34 ያይቆብ ኤሳዌስ ኡይꬅነ ምስረ ዎፀ እምን ምስ ኡይስ። ሄሳፈ ጉየ ደንድድ ብስ። ኤሳዌይ ባ ባይራተꬃ ሀይሳዳ ካꬍስ።
GEN 26:1 ሄ ቢታን ካሰ አብራሃመ ዎደ ከይዳ ኮሻፐ ሀራ ኮሽ ከይስ። ያንን፥ ይሳቅ ፍልስፄመ ካዋ አብመለከኮ ገራራ ብስ።
GEN 26:2 ጎዳይ ይሳቃስ ቆንጭድ “ግብፀ ቢታ ዱገ ቦፓ፥ ታኒ ነዉ ኦድዳ ቢታን ደአ።
GEN 26:3 ሀ ቢታን ጉꬃ ዎድያ ጋምኣሻ፥ ታኒ ኔራ ግዳና፥ ነና አንጃና። ሀ ቢታ ኡባ ታኒ ነዉነ ነ ሼሻስ እማና። ታኒ ነ አዋ አብራሃመስ ጫቅዳ ጫቁዋ ፖላና።
GEN 26:4 ነ ሼሻ ሳሎ ፆልንቶዳ ዳርሳና፥ ሀ ቢታ ኡባ ታኒ ኤንታዉ እማና። ሳአ ካዎተꬃት ኡባይ ነ ሼሻ ባጋራ አንጀታና።
GEN 26:5 ሄስካ፥ አብራሃመይ ታ ቃላ ስእድ፥ ታ አዋጆታ፥ ታ ኪታታነ ታ ህገታ ናግዳ ግሾሳ” ያግስ።
GEN 26:6 ሄሳ ግሾ፥ ይሳቅ ገራራን ደእስ።
GEN 26:7 ሄ ቢታ አሳይ እርብቃባ ደንꬅድ፥ “ሀና ነዉ አይቤ?” ግድ ይሳቃ ኦይችዶሶና። እ፥ “ሀና ታዉ ምቾ” ያግስ። ሄሳ እ ግዳይ፥ እርብቃ ዳሮ ማላ ሎኦ ግድያ ግሾ፥ “እያ ታ ማቾ ጊኮ፥ ሀ አሳይ እ ጋሶን ታና ዎꬋና” ያግ ቆፕድ ባብስ።
GEN 26:8 ይሳቅ ያን ዳሮ ዎደ ደእዳፐ ጉየ፥ ፍልስፄመ ካዎይ አብመለከይ ማስኮተራ ዱገ ፄልያደ፥ ይሳቅ ባ ማቸ እርብቃራ ካእሽን በእስ።
GEN 26:9 ሄሳ ግሾ፥ አብመለከይ ይሳቃ ፄግስድ፥ “ሄኮ፥ እያ ነ ማቾ፤ ኔኒ አይስ እያ ታ ምቾ ጋዲ?” ግድ ኦይችስ። ይሳቅ፥ “እያ ታ ማቾ ጊኮ፥ አሳይ ታና እ ጋሶን ዎꬋና ጋዳ ጋስ” ያግስ።
GEN 26:10 አብመለከይ፥ “ሀይስ ኔኒ ኑ ቦላ ኦꬅዳባይ አይቤ? ታ አሳፐ እስ አስ ነ ማቸራ አቅስ ሽን አትስ፥ ኔኒ ኑ ቦላ ጎመ ኤሀዳሳ ሽን” ያግስ።
GEN 26:11 ሄሳ ግሾ፥ አብመለከይ ባ አሳ፥ “ሀ ኡራ ዎይኮ እያ ማችዉ ቦችያ ኦንካ ቱማ ሀይቃና” ያግድ ኪትስ።
GEN 26:12 ይሳቅ ሄ ቢታን ካꬅ ዘርድ፥ ጎዳይ እያ አንጅዳ ግሾ ሄ ላይꬃን ፄቱ ኩሸ ኤክስ።
GEN 26:13 እ ዱረተꬃን ኤረታና ጋካናስ ዳሮ ዱረትሸ ብስ።
GEN 26:14 ይሳቃስ ዶርሳ ዉደይ፥ ሚዛ ዉደይነ አይለት አꬍድ ዳርዳ ግሾ፥ ፍልስፄመ አሳት እያ ቃናትዶሶና።
GEN 26:15 ሄሳ ግሾ፥ እያ አዋ አብራሃመ ዎደ እያ አዋ አይለት ቦክዳ ሃꬃ ኦላ ኡባ ፍልስፄመት ቢታ ኡሽድ ኩንꬅዶሶና።
GEN 26:16 ሄ ዎደ አብመለከይ ይሳቃኮ፥ “ኔኒ ኑፐ አꬋዳ ምንዳ ግሾ ኑ ማታፐ ባ” ያግስ።
GEN 26:17 ይሳቅ ሄሳፈ ደንድድ፥ ገራራ ዛንጋራ ብድ ዱንካነ ቶክድ ያን ደእስ።
GEN 26:18 ይሳቅ ባ አዋ አብራሃመ ዎደ ቦከትዳ ሃꬃ ኦላታ፥ አብራሃመይ ሀይቅዳፐ ጉየ፥ ፍልስፄመት ኩንꬅዳይሳታ ዛር ቦክ ከስድ፥ እያ አዋይ ሱንꬅዳ ሱንꬃን ፄግስ።
GEN 26:19 ይሳቃ አይለት ሄ ዛንጋራን ሃꬃ ኦላ ቦክድ ያን ሎኦ ፑልቶ ሃꬃ ደምዶሶና።
GEN 26:20 ሽን ገራራ ሄንꬃንቾት ይሳቃ ሄንꬃንቾታራ፥ “ሃꬃይ ኑባ” ያግድ ኦየትዶሶና። ኤንቲ ፓላመትዳ ግሾ፥ ይሳቅ ሄ ሃꬃ ኦላ “ኤሴቃ” ግድ ሱንꬅስ።
GEN 26:21 ሄሳፈ ጉየ፥ ኤንቲ ሀራ ሃꬃ ኦላ ቦክዶሶና። ሽን ኤንቲ ሄ ሃꬃ ኦላ ጌዶንካ ኦየትዶሶና። ሄሳ ግሾ፥ ይሳቅ ሄ ሃꬃ ኦላ “ሲፅና” ግድ ሱንꬅስ።
GEN 26:22 ሄሳፈ ጉꬅ ስን ሺቅድ ሀራ ሃꬃ ኦላ ቦክስስ። እያ ጋሶን ኦንካ ኦየትቦና ግሾ፥ “ፆሳይ ሀእ ኑስ ዳልግስስ ኑኒ ሀ ቢታን ዳራና” ግድ ሄ በሳ ረሆቦታ ግድ ሱንꬅስ።
GEN 26:23 ሄሳፈ ደንድድ ፑደ በርሳበ ከይስ።
GEN 26:24 ሄ ብዳ ጋላስ ቃማ ጎዳይ እያዉ ቆንጭድ፥ “ታኒ ነ አዋ አብራሃመ ፆሳ፥ ታኒ ኔራ ደእያ ግሾ፥ ባቦፋ። ታ አይልያ አብራሃመ ግሾ ታኒ ነና አንጃና፥ ነ ሼሻካ ዳርሳና” ያግስ።
GEN 26:25 ይሳቅ ያን ያርሾ በሲ ጊግስድ ጎዳ ሱንꬃ ፄግስ። ያን እ ባ ዱንካንያ ቶክስ፥ እያ አይለት ያን ሃꬃ ኦላ ቦክዶሶና።
GEN 26:26 ሄሳፈ ጉየ፥ አብመለከይ ባና ዞርያ አሁዛነ ቶራ ሞጮና ፍኮላ ኤክድ፥ ገራራፐ ይሳቃኮ ይስ።
GEN 26:27 ይሳቅ ኤንታኮ፥ “ህንተ ካሰ ታና እፅድ፥ ህንተ ቢታፈ ከስ የድቤከቲ? ሀእ ታኮ አይ ኤካናዉ ይደቲ?” ያግስ።
GEN 26:28 ኤንቲ፥ “ጎዳይ ኔራ ደኤይሳ ኑኒ ጌሽ ኤርዳ። ሄሳ ግሾ፥ ሳሮተꬃ ጫቆይ ኑ ግዶንነ ነ ግዶን ዳናዉ ኮሼስ።
GEN 26:29 ኑኒ ነና ቦችቦኮ፥ ነዉ ኬሀተꬃ ፃላላ ኦꬅድ፥ ነና ሳሮተꬃን ሞይዝድ የድዳ። ሄሳዳካ ኔኒ ኑ ቦላ ኢታባ ኦꬆና መላ፥ አነ ኔራ ጫቆስ። ቱማካ ሀእ ነና ጎዳይ አንጅስ” ያግዶሶና።
GEN 26:30 ሄ ዎደ ይሳቅ ኤንታዉ ግብራ ጊግስን ምዶሶና፥ ኡይዶሶና።
GEN 26:31 ዎንተꬃ ጋላስ ዎንታ ጉራ ደንድድ ኤንቲ እሶይ እሱዋራ ጫቅዶሶና። ይሳቅ ኤንታ ሞይዝን፥ ኤንቲ ሳሮ ሻከትድ ብዶሶና።
GEN 26:32 ሄ ጋላስ ይሳቃ አይለት ይድ፥ “ኑኒ ሃ ደምዳ” ያግድ ባንታ ቦክዳ ሃꬃ ኦላባ እያዉ ኦድዶሶና።
GEN 26:33 እ ሄ ሃꬃ ኦላ ሳበ (ጫቆ) ግድ ሱንꬅስ። ሄሳ ግሾ፥ ሄ ካታማ ሱንꬃይ ሀች ጋካናስ በርሳበ (ጫቆ ሃꬃ ኦላ) ጌተቴስ።
GEN 26:34 ኤሳዌስ ላይꬅ ኦይታማ ግድዳ ዎደ ህተ አድያ ብኤራ ናእዉ ዮድቶነ ህተ አድያ ኤሎና ናእዉ ባሰማቶ ማችስ።
GEN 26:35 ኤንቲ ይሳቃነ እርብቃ አዛንꬅሸ ደእዶሶና።
GEN 27:1 ይሳቅ ጭምን እያ አይፈይ ፄሎ እፅዳ ዎደ ባ ባይራ ናአ ኤሳዌ ፄግድ፥ “ታ ናአዉ” ያግስ። እካ፥ “ዬ” ግድ ኮይስ።
GEN 27:2 ይሳቅ፥ “ሄኮ፥ ሀእ ታኒ ጭማስ፥ ታኒ አዉደ ሀይቃነኮ ኤርከ።
GEN 27:3 ያንያ ግሾ፥ ሀእ ነ ሻንካ ዶንግያ ኤካዳ ባዞ ባዳ ዶአ ሻንካታዳ አሾ ኤካዳ ያ።
GEN 27:4 ማልኦ ካꬅ ታ ዶሰይሳꬆ ኦꬃ ካꬃዳ ታዉ ኤሀ። ታኒ ሀይቃናፐ ስን ማ ስማዳ ነና አንጃና” ያግስ።
GEN 27:5 ይሳቅ ባ ናአ ኤሳዌስ ኦድያ ዎደ እርብቃ ስአዉሱ። ኤሳዌይ ዶአ ሻንካትድ ኤሀናዉ ባዞ ብዳፐ ጉየ፥
GEN 27:6 እርብቃ ባ ናአ ያይቆባ፥ “ነ አዋይ ነ እሻ ኤሳዌ፥
GEN 27:7 ‘ዶአ ሻንካታ ኤሀዳ ታዉ ማልኦ ካꬅ ታ ማናዉ ካꬃ። ታኒ ሀይቃናፐ ስን ማ ስማዳ ጎዳ ስንꬃን ነና አንጃና’ ያግሽን ታኒ ስአስ።
GEN 27:8 ታ ናአዉ፥ ሀእ ታኒ ነዉ ኦደይሳ ሎይꬃ ስአ።
GEN 27:9 ዉድያ ግዶ ባዳ ናምኡ ሞꬎ ዴሻ ማራታ ታዉ ኤካዳ ያ። ታኒ ነ አዋስ ማልኦ ካꬅ እ ዶሰይሳዳ ኦꬃዳ ካꬃና።
GEN 27:10 ነ አዋይ ሀይቃናፐ ስን ምድ ነና አንጃና መላ እያዉ አꬃ” ያጋሱ።
GEN 27:11 ሽን ያይቆብ ባ አይዉ፥ “ታ እሻ ኤሳዌ ቦላ እክሰይ ደኤስ ሽን ታ ቦላይ ሊቆ።
GEN 27:12 ታ አዋይ ታና ኦይክ በእድ ታኒ እያ ጭምዳባ ዳንኮ፥ ታኒ አንጁዋ ግሾ ባደꬅ ታ ቦላ ኤሀናይሳ ኤርኪ?” ያግስ።
GEN 27:13 እያ አይያ፥ “ታ ናአዉ፥ ሄ ባደꬃይ ታና ጋኮ። ታኒ ነዉ ኦደይሳ ኦꬃ፥ ባዳ ዴሻ ማራታ ታዉ ኤካዳ ያ” ያጋሱ።
GEN 27:14 ኤህድ ባ አየስ እምን እያ አይያ ማልኦ ካꬅ እያ አዋይ ዶሰይሳዳ ኦꬃዳ ካꬃሱ።
GEN 27:15 ሄሳፈ ጉየ፥ እርብቃ ባይራ ናአ ኤሳዌ ማኦ ሎኡዋ ኤሀዳ ያይቆባ ማይዛሱ።
GEN 27:16 ቃስ ሄ ዴሻታ እትያ እያ ኩሽያነ እያ ሊቆ ቆꬍያ ማይዛሱ።
GEN 27:17 ባ ካꬅዳ ማልኦ ካꬃነ ኡይꬃ ባ ናአ ያይቆባስ እማሱ።
GEN 27:18 ያትን፥ እ ባ አዋኮ ገልድ፥ “ታ አዋዉ” ያግስ። እካ፥ “ዬ፥ ታ ናአዉ፥ ኔኒ ኦኔ?” ያግስ።
GEN 27:19 ያይቆብ ባ አዋ፥ “ታኒ ነ ባይራ ናአ ኤሳዌ። ኔኒ ታና ኪትዳይሳዳ ታኒ ኦꬃስ፤ ሀእ ደንዳ ኡታዳ፥ ታኒ ሻንካታ ኤህዳይሳፈ ማዳ፥ ታና አንጃ” ያግስ።
GEN 27:20 ይሳቅ ባ ናአ፥ “ታ ናአዉ፥ ዋታ ኤለሳዳ ደማዲ?” ያግድ ኦይችስ። ያይቆብ፥ “ጎዳይ፥ ነ ፆሳይ ታዉ ጊግስስ” ያግስ።
GEN 27:21 ይሳቅ ያይቆባ፥ “ታ ናአዉ፥ ኔኒ ቱማ ታ ናአ ኤሳዌኮ ታ ነና ኦይካ በአና አነ ሀ ሺቃ” ያግስ።
GEN 27:22 ያይቆብ ባ አዋኮ ሺቅን ኦይክ በእድ፥ “ነ ቃላይ ያይቆባ ቃላ ሽን ኩሸይ ኤሳዌ ኩሽያ ዳኔስ” ያግስ።
GEN 27:23 እያ ኩሸይ እያ እሻ ኤሳዌ ኩሽያዳ እክሰራ ደእያ ግሾ፥ ሻክድ ኤርቦና እያ አንጅስ።
GEN 27:24 እያ፥ “ቱማ ኔኒ ታ ናአ ኤሳዌ?” ያግድ ዛር ኦይችስ። እካ፥ “ኤ፥ ታና” ያግስ።
GEN 27:25 ያትን እ፥ “ታ ናአዉ፥ ታኒ ነ ሻንካታ ኤህዳባፐ ማዳ ነና አንጃና መላ አነ ሀ አꬃ” ያግስ። ያይቆብ አꬅን ምስ፥ ቃስ እያዉ ዎይነ ኤህን ኡይስ።
GEN 27:26 ሄሳፈ ጉየ፥ እያ አዋ ይሳቅ፥ “ታ ናአዉ፥ ሀ ሺቃዳ ታና ዬራ” ያግስ።
GEN 27:27 ያይቆብ ሺቅድ እያ ዬርስ። ይሳቅ እያ ማኡዋ ስንግ ስእድ፥ “ታ ናአ ፔኖይ ጎዳይ አንጅዳ ጎሻዳ ሳዌስ።
GEN 27:28 ፆሳይ ሳሎ አካነ ሳአ ሽጫ፥ ካꬅነ ዎይነ ዳርስድ ነዉ እሞ።
GEN 27:29 ካዎተꬃት ነዉ ሃረቶ፥ አሳይ ነዉ ጉልባቶ። ኔኒ ነ እሻታስ ጎዳ ግዳ፥ ነ አየ ሼሻት ነዉ ጉልባቶ። ነና ባደይሳት ባደትዳባ ግዶ፥ ነና አንጀይሳት አንጀትዳባ ግዶ” ያግድ አንጅስ።
GEN 27:30 ይሳቅ ያይቆባ አንጅድ ኦንግዳፐ ጉየ፥ ያይቆብ ባ አዋ ስንꬃፈ ቡሮ ከይያ ዎደ ኤሳዌይ ሻንካፈ ፑቱ ግስ።
GEN 27:31 እካ ቃስ ማልኦ ካꬅ ካꬅድ ባ አዋስ አꬅድ፥ “ታ አዋዉ፥ ዳንዳ ኡታዳ ታ ሻንካትዳባፐ ማ፥ ያታዳ ታና አንጃ” ያግስ።
GEN 27:32 ይሳቅ፥ “ነ ኦኔ?” ያግድ ኦይችስ። እካ፥ “ታኒ ነ ባይራ ናአ ኤሳዌ” ያግስ።
GEN 27:33 ይሳቅ ዳጋምድ ኮኮርሸ፥ “ያትን ዶአ ሻንካትዳይሳፈ ታዉ አꬅዳይ ኦኔ? ታኒ ሀእ ኔኒ ያና ስንꬃን ማዳ፥ እያ አንጃስ። እካ ቱማ አንጀትዳይሳ ግዳና” ያግስ።
GEN 27:34 ኤሳዌይ ባ አዋ ቃላ ስእዳ ዎደ ባ ቃላ ꬎቁ ኦꬅድ፥ ዳሮ ኢታ ዬሆ ዬክሸ፥ “ታ አዋዉ፥ ታናካ አንጃ” ያግስ።
GEN 27:35 ሽን እ፥ “ነ እሻይ ጭምድ ነ አንጁዋ ኤክ ድግስ” ያግስ።
GEN 27:36 ኤሳዌይ፥ “እ ኤርድ ያይቆባ (ጭመይሳ) ግድ ሱንትስ። እ ታና ጭምሽን ሀይስ ናምአንꬆ፥ ካሰ ታ ባይራተꬃ ኤክስ፥ ሀእ ቃስ ታ አንጁዋ ኤክስ” ያግስ። ያትን፥ “ኔኒ ታዉ አንጁዋፈ አይኮካ አሻብኪ?” ያግድ ኦይችስ።
GEN 27:37 ይሳቅ ኤሳዌ፥ “ታኒ እያ ነዉ ጎዳ ኦꬃስ። እያ እሻታ ኡባታካ እያዉ አይለ ኦꬃስ። ቃስ ታኒ ካꬃንነ ዎይነን እያ ምንꬃስ። ያትን፥ ታ ናአዉ፥ ነዉ ታ አይ ኦꬆ?” ያግስ።
GEN 27:38 ኤሳዌይ ባ አዋ፥ “ታ አዋዉ፥ ነዉ እስ አንጆ ፃላል ደኢ? ታ አዋዉ፥ ታናካ ቃስ አንጃ” ያግስ። ሄሳፈ ጉየ፥ ኤሳዌይ ባ ቃላ ꬎቁ ኦꬅድ ዬክስ።
GEN 27:39 እያ አዋ ይሳቅ ዛሪድ፥ “ነ ደእያ በሳይ ሀ ሳአ ዱረተꬃፈ ሃሆ፥ ሳሎ አክካ ነዉ ዎና።
GEN 27:40 ኔኒ ነ ማሻን አቃና፥ ነ እሻስ ሃረታና። ሽን ኔኒ እያራ ኤቀትያ ዎደ እያ ቃምባራ ነ ጋናፈ ሆላና” ያግስ።
GEN 27:41 ያይቆባ እያ አዋይ አንጅዳ ግሾ፥ ኤሳዌይ ባ ኡሎን እያ ሞርክስ። እ ባ ዎዛናን፥ “ታ አዋይ ሀይቃናዉ ማትስ። እ ሀይቅዳ መላ ታ እሻ ያይቆባ ዎꬋና” ያግስ።
GEN 27:42 ሽን እርብቃ ሄ ባ ባይራ ናአ ኤሳዌ ቃላ ስእዳ ግሾ፥ ባ ካሎ ናአ ያይቆባ ፄግሳ ኤሀዳ፥ “ነ እሻ ኤሳዌይ ነና ዎꬍድ ሃሉዋ ከሳናዉ ሀልቼስ።
GEN 27:43 ሀያና ታ ናአዉ፥ ታኒ ነዉ ኦደይሳ ኦꬃ። ደንዳዳ ካራነን ደእያ ታ እሻ ላባኮ ባቃታ።
GEN 27:44 ነ እሻ ሀንቆይ እርፃና ጋካናዉ ጉꬃ ዎደ እያራ ደኣሻ።
GEN 27:45 ነ እሻ ይሎይ ዎꬍያ ዎደነ ኔኒ እያ ቦላ ኦꬅዳባ እ ዶግያ ዎደ ታኒ ኪታዳ ነና ኤሀና። ታኒ እስ ጋላስ ህንተ ናምኣፈካ መላ አታናዉ ኮይከ” ያጋሱ።
GEN 27:46 ሄሳፈ ጉየ፥ እርብቃ ይሳቃኮ፥ “ኤሳዌይ ኤክዳ ህተታ ማጫ ናይታ ጋሶን ታኒ ታ ደኡዋ ሻተታስ። ቃስ ያይቆብካ ሀይሳꬆ ህተታ ማጫ ናይታፐ ማቾ ኤክኮ፥ ታዉ ሀይቆይ ሎኦ” ያጋሱ።
GEN 28:1 ሄሳ ግሾ፥ ይሳቅ ያይቆባ ፄግድ፥ “ካናነ ቢታ ማጫ ናይታፐ ማቾ ኤኮፋ።
GEN 28:2 ደንዳዳ ነ አየ አዋ ባቱኤላኮ ማሰጰፆመ ቢታ ባዳ ያፐ ነ አየ እሻ ላባ ማጫ ናይታፐ ማቾ ኤካ።
GEN 28:3 ኡባ ዳንዳእያ ፆሳይ ነና አንጆ፥ እ ነዉ ናይታ እሞ፥ ዳሮ ደረ ግዳና ጋካናስ እ ነና ዳርሶ።
GEN 28:4 ኔኒ ሀእ በተተꬃን ኡትዳ ሀ ቢታ ነባ ኦꬃና መላ ነዉነ ነ ሼሻስ ፆሳይ አብራሃመ አንጁዋ እሞ” ያግ አንጅድ ኪትስ።
GEN 28:5 ያግድ ይሳቅ ያይቆባ የድስ። ያይቆብ ማሰጰፆመ ቢታ ላባኮ ብስ። ላቢ ያይቆባነ ኤሳዌ አየ እርብቃ እሻነ አራመ አድያ ባቱኤላ ናአ።
GEN 28:6 ይሳቅ ያይቆባ አንጅድ ማሰጰፆመ ቢታፈ ማቾ ኤካና መላ እያ የድዳይሳ፥ እ ያይቆባ አንጅዳ ዎደ፥ “ካናነ ማጫስ ኤኮፋ” ግድ ኪትዳይሳነ፥
GEN 28:7 ያይቆብ ባ አዋስነ ባ አየስ ኪተትድ ማሰጰፆመ ቢታ ብዳይሳ፥ ኤሳዌይ ኤርስ።
GEN 28:8 ኤሳዌይ ሄሳን ካናነ ቢታ ማጫስ ባ አዋ ይሳቅ አይ መላ እፅያኮ ኤርስ።
GEN 28:9 ሄሳ ግሾ፥ ኤሳዌይ አብራሃመ ናአ እስማኤላኮ ብድ፥ እያ ናእዉ ማህላቶ፥ ነባዮታ ምችዉ፥ ባ ማቸታ ቦላ ጉጅድ ኤክስ።
GEN 28:10 ያይቆብ በርሳበፐ ካራነ ባናዉ ከይስ።
GEN 28:11 እ፥ እስ በሲ ጋክያ ዎደ አው ዉልን፥ ቃማ ያን አቅስ። ሄ በሳን ደእያ ሹቻታፐ እሱዋ ቦርኮትድ ሄ በሳን ꬍስክስ።
GEN 28:12 እ አሙሆ አሙህድ ኮዶ እሶይ ሳአን ኤቅን ፄራይ ሳሎ ጋክዳይሳነ፥ ፆሳ ኪታንቾት እያ ቦላራ ፑደ ከየይሳታነ ዱገ ዎይሳታ በእስ።
GEN 28:13 ሄ ኮዱዋስ ፄራን ጎዳይ ኤቅድ፥ “ታኒ ጎዳ፥ ነ አዋ አብራሃመ ፆሳ፥ ይሳቃ ፆሳ፥ ሀ ኔኒ ዝንእዳ ቢታ ነዉነ ነ ሼሻስ እማና።
GEN 28:14 ነ ሼሻ ሳአ ሻፈዳ ዳርሳና። ኔኒ ዶሎሀ ባጋ፥ ዉሎሀ ባጋ፥ ፑደሀ ባጋነ ዱገሀ ባጋ ዳልጋና። ቢታ ቦላ ደእያ አሳ ኡባይ ነ ባጋራነ ነ ሼሻ ባጋራ አንጀታና።
GEN 28:15 ታኒ ኔራ ደአይስ። ኔኒ ብያ በሳ ኡባን ታኒ ነና ናጋና። ታኒ ነና ሀ ቢታ ጉየ ዛራዳ ኤሀና። ታኒ ነዉ ኦꬃና ግዳይሳ ፖላና፥ ነና አግከ” ያግስ።
GEN 28:16 ያይቆብ ꬍስኮፈ ባርክድ፥ “ታ ኤራብከፈ አትሽን፥ ቱማ ጎዳይ ሀ በሳን ደኤስ” ያግስ።
GEN 28:17 እ ባብድ፥ “ሀ በሳይ ዋን ያሽ! ሀ በሳይ ፆሳ ኬꬅፈ አትሽን፥ ሀራሶ ግደና። ሀይስ ሳሎ ፐንገ” ያግስ።
GEN 28:18 ዎንተꬃ ጋላስ ዎንታ ጉራ ያይቆብ ደንድድ፥ ፆሳስ ዱማያናዉ ባ ቦርኮትዳ ሹቻ ኤክድ ቱሳꬆ ኤስድ እያ ቦላ ዛይተ ትግስ።
GEN 28:19 ያይቆብ ሄ በሳ ቤተለ (ፆሳ ኬꬅ) ግድ ፄግስ። ሽን ሄ ካታማይ ሄሳፈ ካሰ ሎዛ ጌተቴስ።
GEN 28:20 ያይቆብ፥ “ታ ብያ ኦግያን ነ ታና ናግኮ፥ ታዉ ካꬅነ ማኦ እምኮ፥
GEN 28:21 ነ ታና ታ አዋ ሶ ሳሮ ዛርኮ፥ ነ ታ ፆሳ ግዳና።
GEN 28:22 ታኒ ዱማያናዉ ቱሳꬆ ኤስዳ ሀ ሹቻይ ፆሳ ኬꬃ ግዳና። ቱማ ኔኒ ታዉ እምያባ ኡባፈ ታማፈ እሱዋ ነዉ እማና” ያግድ ፆሳስ ጫቅስ።
GEN 29:1 ሄሳፈ ጉየ፥ ያይቆብ ደንድድ፥ ብድ ዶሎሀ ባጋ አሳ ቢታ ጋክስ።
GEN 29:2 ያንካ ደምባ በሳን ሃꬃ ኦላ ደምስ። ሄꬑ ዶርሳ ዉደት ሄ ሃꬃ ኦላ ማታን ደኦሶና። ዉደ ኡባይ ሃ ኡየይ ሄ ኦላፈ። ሄ ሃꬃ ኦላ ዶና ጎርድያ ሹቻይ ግታ።
GEN 29:3 ዶርሳ ዉደ ኡባይ ያ ሺቅኮ፥ ዉድያ ሄመይሳት ሃꬃ ኦላ ዶናፐ ሄ ሹቻ ጎንዶርስድ ዉድያ ሃ ኡሾሶና። ኡሽ ስሚድ ሄ ሹቻ ኦላ ዶናን ዛር ዎꬆሶና።
GEN 29:4 ያይቆብ ኤንታኮ፥ “ህንተ አዉፐ ይደቲ?” ያግድ ኦይችስ። ኤንትካ፥ “ኑኒ ካራነፐ ይዳ” ያግዶሶና።
GEN 29:5 እ፥ “ናኮራ ናአ ናኣ ላባ ኤሬቲ?” ያግድ ኦይችስ። “ኤ፥ እያ ኤሮስ” ያግዶሶና።
GEN 29:6 ያይቆብ ኤንታ፥ “እ ሎኦ ደኢ?” ያግድ ኦይችስ። “ኤ፥ ሎኦ፥ እያ ናእዉ ራሄሎ ዶርሳታ ላጋዳ ያሮ ህን በአ” ያግዶሶና።
GEN 29:7 ያይቆብ ኤንታኮ፥ “ሄኮ፥ ሀእ አው ꬎቃን ደኤስ። ዉደ መሄይ ሶ ስምያ ዎደይ ቡሮ ጋክቤና፥ ዶርሳ ኡሽ ኤፍድ ሄምተ” ያግስ።
GEN 29:8 ሽን ኤንቲ፥ “ዉደ ኡባይ ሺቅን ሹቻ ሃꬃ ኦላ ዶናፐ ጎንዶርሳና ጋካናስ ኑ ኡሻናዉ ዳንዳኦኮ። ሄሳፈ ጉየ፥ ሹቻ ጎንዶርስድ ዶርሳታ ኡሻና” ያግዶሶና።
GEN 29:9 እ ቡሮ ኦድሽን፥ ላባ ናእያ ራሄላ ዶርሳታ ሄምያ ግሾ፥ ባ አዋ ዶርሳታ ላጋ ኤካዳ ጋካሱ።
GEN 29:10 ያይቆብ ባ አየ እሻ ላባ ናእዉ ራሄሎ ላባ ዶርሳታ ላጋዳ ያሮ በእዳ ዎደ ብድ ኦላ ዶናፐ ሹቻ ጎንዶርስድ ዶርሳታ ሃ ኡሽስ።
GEN 29:11 ያይቆብ ራሄሎ ዬርድ፥ ኡፋይሳን ባ ቃላ ꬎቁ ኦꬅድ ዬክስ።
GEN 29:12 ያይቆብ፥ “ታኒ ነ አዋ ምቸ እርብቃ ናአ” ያግድ እዉ ኦድስ። ሄሳ ግሾ፥ እያ ዎፃ ባዳ ባ አዋስ ኦዳሱ።
GEN 29:13 ላቢ ባ ምቸ ናአ ያይቆባ ዩሳ ስእዳ መላ ሞካናዉ ዎፅድ ብስ። እያ እድም ዬርድ ባ ሶ ኤፍስ። ያን ያይቆብ ሀንዳባ ኡባ ላባስ ኦድስ።
GEN 29:14 ላቢ እያ፥ “ኔኒ ቱማ ታ አሾነ ታ ሱꬅ” ያግስ። ያይቆብ እያራ እስ አጌና ኩመꬅ ኡትስ።
GEN 29:15 ሄሳፈ ጉየ፥ ላቢ ያይቆባ፥ “ኔኒ ታዉ ዳቦ ግድዳ ግሾ፥ ታዉ መላ ጮ ኦꬃነዬ? አነ ታ ነዉ አይ ቃንፃናዉ ኮሽያኮ ታዉ ኦዳ” ያግስ።
GEN 29:16 ላባስ ናምኡ ማጫ ናይት ደኦሶና። ባይረ ሱንꬃይ ልያ፥ ካልያ ቃስ ራሄሎ ጌተታዉሱ።
GEN 29:17 ልያ አይፈራ ጩጫ፥ ሽን ራሄላ የገልስነ ማላ ሎኦ።
GEN 29:18 ያይቆብ ራሄሎ ዶስድ፥ “ታኒ ነ ካሎ ናኤ ራሄል ግሾ ነዉ ላፑን ላይꬅ ኦꬃና” ያግስ።
GEN 29:19 ላቢ፥ “እዮ ሀራ አሳስ እማናፐ ነዉ እሞይ ሎኦ፥ ነ ታራ ሀይሳን ደአ” ያግስ።
GEN 29:20 ሄሳ ግሾ፥ ያይቆብ ራሄሎ ኤካናዉ ላፑን ላይꬅ ኦꬅስ። ሽን እ እዮ ዳሮ ዶስያ ግሾ፥ እያዉ ጉꬃ ጋላስ ዳንስ።
GEN 29:21 ሄሳፈ ጉየ፥ ያይቆብ፥ “ታ ማችዉ ታዉ እማ፥ ታ ላይꬃይ ዉርስ ታኒ እዮ ኤካናዉ ኮያይስ” ያግስ።
GEN 29:22 ሄሳ ግሾ፥ ላቢ አሳ ኡባ ፄግድ ያጋኖ ከስስ።
GEN 29:23 ሽን ሳእ ቃምን ላቢ ባ ናእዉ ልያ ኤፍድ ያይቆባስ እሚስ። ያይቆብ እዮ ኤክስ።
GEN 29:24 ቃስ ላቢ ባ አይልዉ ዛላፋ ባ ናኤ ልያስ አይለ ኦꬅድ እሚስ።
GEN 29:25 ሳእ ዎንትን እ ፄልያ ዎደ ሄኮ ልያ። ያይቆብ፥ “ሀይስ ኔኒ ታ ቦላ ኦꬅዳይስ አይቤ? ታኒ ነዉ ኦꬅዳይ ራሄል ግሾሳ ግደነዬ? ታና አይስ ጭማድ” ያግስ።
GEN 29:26 ላቢ እያኮ፥ “ኑ ቢታን ባይሪያ ደእሽን ካልዉ አዝናስ እመይስ ዎጋ ግደና።
GEN 29:27 ምሽራተꬃን ኢራ ሳምንታ ኦንግኮ፥ ቃስ ካልውካ ታኒ ነዉ እማና። ሄሳፈ ጉየ፥ ሀራ ላፑን ላይꬅ ታዉ ኦꬃሳ” ያግስ።
GEN 29:28 ያይቆብ ኦዳ ማእድ ሳምንታ ኢራ ኦንግስ። ሄሳፈ ጉየ፥ ላቢ ባ ናእዉ ራሄሎ እያዉ እሚስ።
GEN 29:29 ቃስ ላቢ ባ አይልዉ ባሎ ባ ናኤ ራሄልስ አይለ ኦꬅድ እሚስ።
GEN 29:30 ያይቆብ ራሄሎካ ኤክስ። ራሄሎ ልያፐ አꬅድ ዶስስ። ሀራ ላፑን ላይꬅ ላባስ ኦꬅስ።
GEN 29:31 ጎዳይ ልያ ራሄልꬆ ዶሰታቦናሮ በእድ፥ እዉ የሎ ኡሉዋ ዶይስ። ሽን ራሄላ ናአ የሎና ጋምአሱ።
GEN 29:32 ልያ ቃንꬃታዳ አደ ናአ የላሱ። እያ፥ “ጎዳይ ታ መቱዋ በእስ፥ ሀእ ታና ታ አዝናይ ዶሳና” ጋዳ ሄ ናአ ሮቤላ ጋዳ ሱንꬃሱ።
GEN 29:33 እያ ናምአንꬆ ቃንꬃታዳ አደ ናአ የላሱ። እያ፥ “ጎዳይ ታኒ ዶሰታቦናይሳ በእዳ ግሾ፥ ታዉ ሀይሳካ ጉጅስ” ጋዳ ስሞና ጋዳ ሱንꬃሱ።
GEN 29:34 እያ ሄꬓንꬆ ቃንꬃታዳ አደ ናአ የላሱ። እያ፥ “ታኒ እያዉ ሄꬑ አደ ናይታ የልዳ ግሾ፥ ታ አዝናይ ሀእ ታራ ሲቆን ዋፀታና” ጋዳ እያ ሌወ ጋዳ ሱንꬃሱ።
GEN 29:35 እያ ሀራ ቃንꬃታዳ አደ ናአ የላሱ። እያ፥ “ሀእ ታኒ ጎዳ ጋላታና” ጋዳ እያ ሱንꬃ ይሁዳ ጋዳ ሱንꬃሱ። ሄሳፈ ጉየ፥ የሎ ኤቃሱ።
GEN 30:1 ራሄላ ያይቆባስ ናይታ የሎናይሳ በአዳ ባ ምችዉ ቃናታሱ። ሄሳ ግሾ፥ ያይቆባ፥ “ታዉ ናአ እማ፥ እፅኮ ታኒ ሀይቃና” ያጋሱ።
GEN 30:2 ያይቆብ ራሄሎ ሀንቀትድ፥ “ታና ነዉ የሎ እማናዉ ዎይኮ ድጋናዉ ፆሰ ጋድዬ?” ያግስ።
GEN 30:3 እያ፥ “ታ ጋꬍንድዉ ባሎ ህኖ በአ። እያ ታ ግሾ የላና መላ ኔኒ ኢራ አቃ፥ ያንኮ፥ ታኒ እ ባጋራ ናአ ደማና” ያጋሱ።
GEN 30:4 ባ ጋꬍንድዉ ባሎ ማቾ ኦꬅድ ኤካና መላ እያዉ እማሱ።
GEN 30:5 ባላ ቃንꬃታዳ አደ ናአ ያይቆባስ የላሱ።
GEN 30:6 ያትን ራሄላ፥ “ፆሳይ ታዉ ፕርድስ፥ ታ ዎሳካ ስእድ ታዉ አደ ናአ እሚስ” ያጋዳ ሄ ናአ ዳነ ጋዳ ሱንꬃሱ።
GEN 30:7 ራሄል ጋꬍንድያ ባላ ቃንꬃታዳ ያይቆባስ ናምአንꬆ አደ ናአ የላሱ።
GEN 30:8 ራሄላ፥ “ታኒ ታ ምቸራ ዎልቃማ ባፀ ባፀታዳ ፆናስ” ያጋዳ ሄ ናአ ንፍታለመ ጋዳ ሱንꬃሱ።
GEN 30:9 ልያ የሎ ኤቅዳይሳ በአዳ፥ ባ ጋꬍንድያ ዛላፋ ያይቆባስ ማቾ ኦꬃዳ እማሱ።
GEN 30:10 ልያ ጋꬍንድያ ዛላፋ አደ ናአ ያይቆባስ የላሱ።
GEN 30:11 ልያ፥ “ላ ሀይስ አይብ ሎኦ ቃደ!” ያጋዳ፥ ሄ ናአ ጋደ ጋዳ ሱንꬃሱ።
GEN 30:12 ልያ ጋꬍንድያ ዛላፋ ያይቆባስ ናምአንꬆ አደ ናአ የላሱ።
GEN 30:13 ልያ፥ “ታና ዳሮ ኡፋይሴስ፤ ማጫስ ኡባይ ታና ኡፋይትያሮ ጋና” ጋዳ ሄ ናአ አሴራ ጋዳ ሱንꬃሱ።
GEN 30:14 ግስተ ጫክያ አጌናን ሮቤል ጋደ ብድ እንኮያ ምꬃ አይፈ ደምድ ባ አየ ልያስ ኤክድ ይስ። ራሄላ ልያኮ፥ “ነ ናአይ ኤህዳ እንኮያ ምꬃ አይፍያፐ ታዉ እማ” ያጋሱ።
GEN 30:15 ሽን ልያ፥ “ታ አዝና ኔኒ ዎልቃን ኤክዳይስ ግዶና እፅን ሀእ ቃስ ታ ናአ እንኮያ ሚꬃ አይፍያ ኤካኔ?” ያጋሱ። ራሄላ፥ “ነ ናአ እንኮያ ታዉ እምኮ፥ ያይቆብ ሀች ቃማ ኔራ አቆ” ያጋሱ።
GEN 30:16 ሄ ጋላስ ኦማርስ ያይቆብ ባዞፈ ያ ዎደ ልያ እያ ሞካናዉ ከያዳ፥ “ኔኒ ታራ አቃናዉ ኮሼስ፤ ታኒ ታ ናአ እንኮያ አይፈያን ነና ሻማስ” ያጋሱ። ሄሳ ግሾ፥ እ ሄ ቃማ ኢራ አቅስ።
GEN 30:17 ፆሳይ ልያ ዎሳ ስእስ። እያ ቃንꬃታዳ እቻሻንꬆ አደ ናአ ያይቆባስ የላሱ።
GEN 30:18 ልያ፥ “ታኒ ታ አይልዉ ታ አዝናስ እምዳ ግሾ፥ ፆሳይ ሄሳ ታዉ ቃንፅስ” ያጋዳ ሄ ናአ ይሳኮራ ጋዳ ሱንꬃሱ።
GEN 30:19 ልያ ሀራ ቃንꬃታዳ ኡሱፑንꬆ አደ ናአ ያይቆባስ የላሱ።
GEN 30:20 ልያ፥ “ፆሲ ታዉ አልኦ እሞታ እሚስ። ታኒ ታ አዝናስ ኡሱፑን አደ ናይታ የልዳ ግሾ፥ ሀእ እ ታና ቦንቻና” ያጋዳ ሄ ናአ ዛብሎና ጋዳ ሱንꬃሱ።
GEN 30:21 ሄሳፈ ጉየ፥ እስ ማጫ ናአ የላሱ፥ እዮ ዲና ጋዳ ሱንꬃሱ።
GEN 30:22 ፆሳይ ራሄሎ ቆፕስ። እ ዎሳ ስእድ እ የሎ ኡሉዋ ዶይስ።
GEN 30:23 እያ ቃንꬃታዳ አደ ናአ የላሱ፤ “ፆሳይ ታ ዬላ ቃርስ።
GEN 30:24 ጎዳይ ታዉ ሀራ አደ ናአካ ጉጆ” ያጋዳ ሄ ናአ ዮሰፋ ጋዳ ሱንꬃሱ።
GEN 30:25 ራሄላ ዮሰፋ የልዳፐ ጉየ፥ ያይቆብ፥ “ታኒ ታ አዋ ቢታ ስማዳ ባና ታና ሞይዛ።
GEN 30:26 ታኒ ኤንታ ግሾ ነዉ ኦꬅዳ ታ ማቸታነ ታ ናይታ እማ። ታኒ ባና፥ ታኒ ነዉ አይ መላ ኦሶ ኦꬅዳኮ ኔኒ ኤራሳ” ያግስ።
GEN 30:27 ሽን ላቢ እያኮ፥ “ታኒ ነዉ እስባ ኦዳይስ፥ ጎዳይ ነ ጋሶን ታና አንጅዳይሳ ታኒ ታ ፆሳፈ ኤራስ።
GEN 30:28 ነ ዳሞዝያ ታዉ ኦዳ፥ ታኒ ነዉ ቃንፃና” ያግስ።
GEN 30:29 ያይቆብ፥ “ታኒ ነዉ ዋታ ኦꬅዳኮ፥ ነ መሄትካ ዋን የለትዳኮ ኔኒ ኤራሳ።
GEN 30:30 ታኒ ያናፐ ካሰ ነዉ ደእያ ጉꬃይ ሀእ ሎይꬅ ዳርስ። ጎዳይ ነና ታኒ አꬍዳ በሳ ኡባን አንጅስ። ሽን ሀእ፥ ታኒ ታ ሶ አሳስ ኦꬃና ዎደ” ያግስ።
GEN 30:31 ላቢ፥ “ያትን ታኒ ነዉ አይ እሞ?” ያግድ እያ ኦይችስ። ያይቆብ፥ “ታዉ አይኮካ እሞፋ፥ ኔኒ ታዉ እስባ ኦꬃና ግድኮ፥ ታኒ ነ ዉድያ ሀእካ ሄማናነ ናጋና።
GEN 30:32 ታኒ ሀች ነ ዉደ ኡባ ግዶራ አꬋና። ሄሳን ነ ዶርሳታፐ ዋንጩዋ ዎይኮ ጋዛ፥ ካሬꬃ ማራዘታ ኡባ፥ ዴሻፐ ጋዛነ ዋንጮ ኡባ ታኒ ሻካና፥ ኤንቲ ታ ዳሞዘ ግዶ።
GEN 30:33 ሄሳ ግሾ፥ ታ ፅሎተꬃይ ነ ታዉ ቃንፅዳ ዳሞዝያ በአናዉ ያ ዎደ ታዉ ማርካታና። ታ ዴሻፐ ጋዛ ዎይኮ ፑንጫረ ግዶናባይ ዎይኮ ካሬꬅ ግዶና አይ ዶርሳት ታ ማታን በንትኮ፥ ካይሶተትዳዳ ታይባ” ያግስ።
GEN 30:34 ላቢ፥ “ኤሮ፥ ኔኒ ግዳይሳዳ ግዶ” ያግስ።
GEN 30:35 ሽን ሄ ጋላሳን ላቢ ካላደ ዎይኮ ጋዛ ግድዳ ኮሌ ኡባ፥ ዋንጮ ዎይኮ ጋዛ ግድዳ ማጫ ዴሻ ኡባ፥ ቦꬃ ዋንጮ ዴሻታነ ካሬꬃ ዋንጮ ዶርሳታ ኡባ ከስድ ባ አደ ናይታ ሄንꬅስ።
GEN 30:36 ያትድ ሄ ዉድያ ሄꬑ ጋላሳ ኦግያ ያይቆባፐ ሃስድ ኤፍስ። ሽን ያይቆብ አትዳ ላባ ዉድያ ሄምስ።
GEN 30:37 ያይቆብ ኦንጋፍረፐ፥ ባርኤፈኔ ላዉዘ ምꬃፈ ፃምአ ከስድ፥ ፖቁዋ ፖቅድ ግዶ ቦꬃ ባጋ ቃርድ ሽሎይስ።
GEN 30:38 ዉደይ ሃ ኡያናዉ ያ ዎደ ጎንገን ዉድያ ስንꬃን ፖቅዳ ፃምአ ዎꬅስ። ብራይስ ከይዳይሳት ሃ ኡያናዉ ይድ፥
GEN 30:39 ሄ ፃምአታ ስንꬃን ብራይሰቶሶና። ሄ ብራይስዳይሳት ካላደ፥ ዋንጮነ ጋዛ ማራታ የልዶሶና።
GEN 30:40 ያይቆብ ዴሻ ማራታነ ዶርሳ ዉድያፐ ሻክድ ዱማ ዎꬅስ። አትዳ ዉድያ ካላደነ ካሬꬅ ግድያ ላባ መህያኮ ዛሪድ ኤስስ። ያትድ ላባ ዉድያራ ጋꬆና ባ ዉድያ ዱማይድ ዳርስስ።
GEN 30:41 ዉድያፐ ጎባ ማጫት ብራይሳስ ከይያ ዎደ ሄ ፃምአታ ማታን ብራይሰታና መላ ያይቆብ ሄ ፃምአታ ሃꬃ ጎንገን መሄታ ስንꬃን ዎꬄስ።
GEN 30:42 ሽን መሄት ላፋ ግድኮ ኤንታ ስንꬃን ፃምአ ዎና። ሄሳ ግሾ፥ ላፋ መሄት ላባባ ግድን ጎባት ያይቆባባ ግድዶሶና።
GEN 30:43 ሄሳዳ ኦꬅድ ያይቆብ ዳሮ ዱረትድ፥ ዳሮ ዉድያ፥ ማጫ አይለታነ አደ አይለታ፥ ዳሮ ግማለታነ ሀረታ ሃርስ።
GEN 31:1 ላባ አደ ናይት፥ “ያይቆብ ኑ አዋባ ኡባ ኤክድግስ። ሀ ሻሎ ኡባ ኑ አዋባፐ ደምስ” ያግሽን ያይቆብ ስእስ።
GEN 31:2 ያይቆብ ላባ ሶምኦይ እያዉ ካሰ መላ ግዶናይሳ በእስ።
GEN 31:3 ሄ ዎደ ጎዳይ ያይቆባ፥ “ኔኒ ነ አዋታ ቢታ፥ ነ ዳቦታኮ ጉየ ስማ። ታኒ ኔራ ግዳና” ያግስ።
GEN 31:4 ያይቆብ ራሄሎነ ልያ ባ ዉደይ ሄመትያ በሳ ያና መላ ኪትድ ፄግስስ።
GEN 31:5 እ ኤንታኮ፥ “ህንተ አዋ ሶምኦይ ታዉ ካሰ መላ ግዶናይሳ ታኒ በአይስ። ሽን ታ አዋ ፆሳይ ታራ ደኤስ።
GEN 31:6 ታኒ ታ ኩመꬃ ዎልቃን ህንተ አዋስ ኦꬅዳይሳ ህንተ ኤሬታ።
GEN 31:7 ሽን ህንተ አዋይ ታና ጭምድ፥ ታ ዳሞዝያ ታሙ ቶሆ ላምስ። ግድኮካ ፆሳይ ታና እ ቆሆናዳ ድግስ።
GEN 31:8 እ፥ ‘ፑንጫረት ነ ዳሞዘ ግዶ’ ግን ዉደ ኡባይ ፑንጫረ የልስ። ቃስ እ፥ ‘ካላደት ነ ዳሞዘ ግዶ’ ግን ዉደ ኡባይ ካላደ የልስ።
GEN 31:9 ፆሳይ ሄሳን ህንተ አዋ መህያ ዎꬅ ኤክድ ታዉ እሚስ።
GEN 31:10 “መሄት ብራይሳስ ከይያ አጌናን ታኒ እስ አሙሆ አሙሀስ። ሄ አሙሁዋን ታኒ ፄልያ ዎደ መህያ ብራይስያ ዴሻ ኡርገት ካላደ፥ ፑንጫረነ ጋዛ።
GEN 31:11 ፆሳ ኪታንቾይ አሙሆን ታና፥ ‘ያይቆባ’ ያግስ። ታኒ፥ ‘ዬ’ ጋዳ ኮያስ።
GEN 31:12 እካ፥ ‘ꬎቁ ጋዳ መህያ ብራይስያ ዴሻ ኡርገ ኡባ ካላደ፥ ፑንጫረነ ጋዛ በአ። ላቢ ነ ቦላ ኦꬅያባ ኡባ ታኒ በእዳ ግሾ ሄሳ ኦꬃስ።
GEN 31:13 ኔኒ ኤስዳ ሹቻ ዛይተ ትያዳ ታዉ ጫቅዳ ቤተለ ፆሳይ ታና። ሀእ ደንዳዳ ሀ ቢታፈ ከያ። ጉየ ነ የለትዳ ቢታ ስማ’ ግስ” ያግስ።
GEN 31:14 ሄሳፈ ጉየ፥ ራሄልራነ ልያራ “ኑ አዋባፐ ኑና ጋክያባይ አይቤ?
GEN 31:15 እ ኑና አላጋዳ ፄሌስ ግደኔ? እ ኑና ባይዝ ኤክስ። ባይዝ ኤክዳባ ኡባ ምድ ꬋይስስ።
GEN 31:16 ፆሳይ ኑ አዋፐ ዎꬅ ኤክዳ ሻሎ ኡባይ ቱማካ ኑባነ ኑ ናይታባ። ሄሳ ግሾ፥ ፆሳይ ነዉ ኦድዳባ ኡባ ኦꬃ” ያግ ዛርዶሶና።
GEN 31:17 ያይቆብ ካናነ ቢታን ደእያ ባ አዋ ይሳቃኮ ባናዉ ደንድስ። እ ባ ናይታነ ባ ማቸታ ግማለ ቶግስስ። ዉደ ኡባ ላግድ፥ ማሰጰፆመን ደእሸ ሺሽዳ ሻሎ ኡባ ኤክድ ብስ።
GEN 31:19 ላቢ ባ ዶርሳታ እክስያ ቃንፃናዉ ብዳሽን፥ ራሄላ ባ አዋ ሶ ኤቃ ምስለታ ካይሶታሱ።
GEN 31:20 ቃስ ያይቆብ አራመ አድያ ላባስ ባ ቡሳ ኦዶና እፅድ ጭምስ።
GEN 31:21 እ ባዉ ደእያባ ኡባ ኤክድ ኤለስድ ኤፍራፂሳ ሻፋ ፕንድ፥ ደረይ ዳርያ ጋላዳ ቢታ ብስ።
GEN 31:22 ሄꬑ ጋላሳፐ ጉየ፥ ያይቆቢ ባቃትድ ብዳይሳ ላቢ ስእስ።
GEN 31:23 ባ ዳቦታ ባራ ኤክድ፥ ላፑን ጋላሳ ኦገ ያይቆባ ጌዶ ካልድ ደረይ ዳርያ ጋላዳ ቢታን እያ ጋክስ።
GEN 31:24 ሄ ዎደ ፆሳይ ቃማ ሶረ ላባኮ አሙሆን ቆንጭድ፥ “ኔኒ ያይቆባ ቦላ ኢታባ ግድን ሎኦባ፥ አይብባካ ኦደትኮ ነና ኤራ” ያግስ።
GEN 31:25 ላቢ ጋክያ ዎደ ያይቆብ ደረይ ዳርያ ጋላዳ ቢታን ዱንካነ ቶክድ ኡትስ። ላብካ ዳቦታራ ያን ዱንካንዶሶና።
GEN 31:26 ሄሳፈ ጉየ፥ ላቢ ያይቆባ፥ “ኔኒ ሀይሳዳ ታና አይስ ጭማዲ? ታ ማጫ ናይታካ ኦላን ድኤትዳባዳ አይስ ላጋ ከሳዲ?
GEN 31:27 ኔኒ አይስ ቆሳን ታፐ ከሳ ኤካዳ ታና ጭማዲ? ታኒ ነና ኡፋይሳንነ የꬃን፥ ካራቦንነ ዲꬃን ሞይዛና መላ አይስ ታዉ ኦዳብኪ?
GEN 31:28 ኔኒ ሀር አቶሽን፥ ታ ናይታ ናይታነ ታ ማጫ ናይታ ታኒ ዬራ ኤኮና መላ ድጋዳሳ። ኔኒ ኢታ ኦꬃዳሳ።
GEN 31:29 ታኒ ነና ገናናዉ ታዉ ዎልቅ ደኤስ ሽን ነ አዋ ፆሳይ ዝነ ቃማ ታኮ፥ ‘ያይቆባ ቦላ ኢታባ ግድን ሎኦባ አይብባካ ኦደቶናዳ ነና ኤራ’ ያግድ ታዉ ኦድስ።
GEN 31:30 ሀእ ኔኒ ነ አዋ ሶ ባናዉ ዳሮ ላሞትዳ ግሾ ከያዳሳ። ሽን ታ ሶ ኤቃ ምስለታ አይስ ካይሶታዲ?” ያግስ።
GEN 31:31 ያይቆብ ላባ፥ “ኔኒ ነ ናይታ ታፐ ዎልቃን ዎስሳ ኤካነኮነ ጋዳ ቆፕዳ ግሾ ያያዳ ሀይሳዳ ኦꬃስ።
GEN 31:32 ሽን ነ ሶ ኤቃ ምስለታ ኤክዳ አስ ኦናካ ኔኒ ደምኮ፥ ሄ ኡራይ ሀይቆ። ኑ ዳቦታ ስንꬃን ነባ ግድዳባ ኡባ ኮያዳ ኤካ” ያግስ። ያይቆብ ራሄላ ባ አዋ ሶ ኤቃ ምስለታ ካይሶትዳይሳ ኤርቤና።
GEN 31:33 ሄሳ ግሾ፥ ላቢ ያይቆባ ዱንካንያ ግዶ፥ ልያ ዱንካንያ ግዶነ ናምኡ አይለታ ዱንካንያ ግዶ ገልድ ኮይስ። ሽን አይኮካ ደምቤና። ልያ ዱንካንያፐ ከይድ፥ ራሄል ዱንካንያ ገልስ።
GEN 31:34 ራሄላ ሶ ኤቃ ምስለታ ኤካዳ ግማለ ኮራ ጋርሳን ቆሳዳ እያ ቦላ ኡታሱ። ላቢ ዱንካንያን ደእያባ ኡባ ፕልግድ ኮይስ። ሽን አይኮካ ደምቤና።
GEN 31:35 ራሄላ ባ አዋ፥ “ታ ጎዳዉ፥ ታና ሀንቀቶፋ። ታኒ ነዉ ደንዳ ኤቃናዉ ዳንዳእከ፥ ታ ኩሸ መቶራ ደአይስ” ያጋሱ። እ ኮይድ ሶ ኤቃ ምስለታ ደምቤና።
GEN 31:36 ያይቆብ ይሎትድ ላባኮ፥ “ታኒ አይ ኢሳድና? ሀይሳ ኔኒ ታና ካላናዉ ታ አይ ቆሆ ኦꬃድና?
GEN 31:37 ሀእ ኔኒ ታ ሚሸ ኡባ ፕልጋዳ ኮያዳሳ። ነ ሶ ኤቃ ምስለታፐ አይ ደማዲ? ኤንቲ ኑ ናምአ ግዶን ፕርዳና መላ ነ ዳቦታ ስንꬃንነ ታ ዳቦታ ስንꬃን ሀይሳን ዎꬃ።
GEN 31:38 “ታኒ ኔራ ላታሙ ላይꬅ ኩመꬅ ደአስ። ነ ዶርሳትነ ዴሻት አዉጫይቦኮና ዎይኮ ነ ዉድያፐ እሱዋካ ቆታዳ ማብከ።
GEN 31:39 ዶእ ምዳ ጋዉፃካ ታ ነዉ ኤሀ ኤርከ፤ ታኒ ታፐ ጭጋይስ። ጋላስ ዎይኮ ቃማ ካይሶተትዳይሳታ ቃንፅሳሳ።
GEN 31:40 ጋላሳ ሱላን፥ ቃማ ሜጎን ታኒ ቆሄታስ። ማራ ꬍስኮ ꬍስካ ኤርከ።
GEN 31:41 ታኒ ሀይሳዳ ሀናዳ ነ ሶን ላታሙ ላይꬅ ደአስ። ታማነ ኦይዱ ላይꬅ ነ ናምኡ ማጫ ናይታ ግሾ፥ ኡሱፑን ላይꬅ ነ መህያ ግሾ ነዉ ኦꬃስ። ሽን ኔኒ ታ ዳሞዝያ ታሙ ቶሆ ላማዳሳ።
GEN 31:42 ታ አዋ ፆሳይ፥ አብራሃመ ፆሳይ፥ ይሳቃ ፆሳይ ታራ ግዶናባ ግድያኮ፥ ስይ ባይና ኔኒ ታና መላ ኩሸ ከሳ የዳዳሳ። ሽን ፆሳይ ታ መቱዋነ ታ ዳቡርሳ በእድ ዝነ ቃማ ነና ሀንቅስ” ያግስ።
GEN 31:43 ላቢ ዛሪድ ያይቆባ፥ “ማጫሳት ታ ማጫ ናይታ፥ ኤንታ ናይት ታ ናይታ፥ ሀ መሄይካ ታ መህያ፥ ኔኒ በእያ ኡባይ ታባ። ሀች ሀ ማጫ ናይታ ቦላነ ኤንታ ናይታ ቦላ አይ ኦꬃናዉ ዳንዳአይና?
GEN 31:44 አነ ሃያ፥ ኔራነ ታራ ዎላ አነ ጫቆስ። ሄስ ነ ግዶንነ ታ ግዶን ማርካ ግዶ” ያግስ።
GEN 31:45 ሄሳ ግሾ፥ ያይቆብ እስ ሹቹ ኤክድ ቱሳꬆ ኤስስ።
GEN 31:46 ባ ዳቦታ፥ “ሹቹ ሺሽተ” ያግስ። ኤንቲ ሹቹ ሺሽድ ኬልዶሶና። ሄ ኬላ ማታን ካꬅ ምዶሶና።
GEN 31:47 ላቢ ሄ ኬላ፥ ይጋር-ሳሀዱታ ግድ ሱንꬅስ። ያይቆብ ቃስ እያ ጋላዳ ግድ ሱንꬅስ።
GEN 31:48 ላቢ፥ “ሀ ኬላይ ኔፐነ ታፐ ግዶን ሀች ማርካ” ያግስ። ሄሳ ግሾ፥ እያ ሱንꬃይ ጋላዳ ጌተትስ።
GEN 31:49 ላቢ፥ “ኑኒ እሶይ እሱዋፈ ሃክድ ደእያ በሳን ጎዳይ ነናነ ታና ናጎ” ግድ ሄ በሳ ምፅጳ ግድ ሱንꬅስ።
GEN 31:50 ላቢ፥ “ኔኒ ታ ማጫ ናይታ ናቅኮ፥ ዎይኮ ኔኒ ታ ማጫ ናይታ ቦላ ሀራ ማቾ ነ ኤክኮ፥ ታ ኤሮና እፅኮካ ነ ግዶንነ ታ ግዶን ፆሳይ ማርካ ግደይሳ አኬካ” ያግስ።
GEN 31:51 ላቢ ቃስካ፥ “ኬለትዳ ሹቻይነ ታኒ ነ ግዶንነ ታ ግዶን ኤስዳ ሹቻ ቱሳይ ሀይስሽ።
GEN 31:52 ታኒ ሀ ኬላፐ ነና ገናናዉ ኔኮ ካንꬆናዳ፥ ነካ ታና ገናናዉ ሀ ኬላፐነ ሀ ሹቻ ቱሳፈ ሀ አꬎናዳ ሀ ኬላይነ ሀ ሹቻ ቱሳይ ማርካ።
GEN 31:53 አብራሃመ ፆሳይ፥ ናኮራ ፆሳይ፥ ኤንታ አዋ ፆሳይ፥ ኑ ግዶን ፕርዶ” ያግስ። ያይቆብ ባ አዋ ይሳቃ ፆሳ ሱንꬃን ጫቅስ።
GEN 31:54 ያይቆብ ዙማ ቦላ ያርሾ ያርሽስ። ባ ዳቦታ ካꬅ ማናዉ ፄግስ። ኤንቲ ምድ ዙማ ቦላ አቅዶሶና።
GEN 31:55 ዎንተꬃ ጋላስ ጉራ ላቢ ደንድድ ባ ናይታ ናይታነ ባ ማጫ ናይታ አንጅድ፥ ዬርድ ባ ሶ ስምስ።
GEN 32:1 ያይቆብ ደንድድ ባ ኦግያ ብሽን ፆሳ ኪታንቾት እያራ ጋሄትዶሶና።
GEN 32:2 ያይቆብ ኤንታ በእዳ ዎደ “ሀይሳቲ ፆሳ ኦላንቾታ” ያግድ፥ ሄ በሳ ማሀናይማ (ናምኡ ጉታ) ግድ ሱንꬅስ።
GEN 32:3 ያይቆብ ኤዶመ ቢታን ሳይረ ግያ በሳን ደእያ ባ እሻ ኤሳዌኮ ኪታ ባፐ ስን ኪትስ።
GEN 32:4 እ ኤንታ፥ “ህንተ ታ ጎዳ ኤሳዌስ ጋናባይ ሀይሳ፥ ‘ታኒ ነ አይለይ ያይቆብ ሀእ ጋካናው ላባ ማታን ጋምአስ።
GEN 32:5 ታዉ ሚዝ፥ ሀረይ፥ ዶርስነ ዴሽ፥ አደ አይለትነ ማጫ አይለት ደኦሶና። ሀእ ታኒ ሀ ኪታ ታ ጎዳ ስንꬃን ሳባ ደማንድናሻ ጋዳ ኪታስ ያግስ’ ያግተ” ያግድ ኪትስ።
GEN 32:6 ኪተትዳይሳት ያይቆባኮ ስሚድ፥ “ኑኒ ነ እሻ ኤሳዌኮ ብዳ። እካ ቃስ ኔራ ጋሄታናዉ ዬስ። እያራ ኦይዱ ፄቱ አሳይ ደኦሶና” ያግዶሶና።
GEN 32:7 ያይቆብ ዳሮ ባብድ ባራ ደእያ አሳ ናምኡ ጩጋን ሻክስ። ባ ዶርሳ፥ ዴሻ፥ ሚዛነ ግማለታ ናምኡ ጩጋን ሻክስ።
GEN 32:8 እ፥ “ኤሳዌይ ይድ እስ ጩጋ ኦልያባ ግድኮ፥ አትዳ ጩጋይ ከስ ኤካና” ግድ ቆፕስ።
GEN 32:9 ሄ ዎደ ያይቆብ ሀይሳዳ ያግድ ዎስስ፥ “አቤት ጎዳዉ፥ ታ አዋ አብራሃመ ፆሳዉ፥ ታ አዋ ይሳቃ ፆሳዉ፥ ታና፥ ‘ነ ቢታ፥ ነ ዳቦታኮ ስማ፥ ታኒ ነዉ ሎኦባ ኦꬃና ግዳይሶ፥ ታና ስአርክ’፥
GEN 32:10 ኔኒ ነ አይልያስ ኬህዳባስነ አማነተꬃ ኡባስ ታኒ በሶና አስ። ታኒ ዮርዳኖሰ ሻፋ ፕንያ ዎደ ታዉ እስ ፃምአ ፃላል ደኤስ፤ ሽን ሀእ ታኒ ናምኡ ጩጋ ጎዳ ግዳስ።
GEN 32:11 ታኒ ነና ዎሳይስ ታ እሻ ኤሳዌ ኩሸፐ ታና አሻ። እ ይድ፥ ታናነ አየታ ኤንታ ናይታራ ꬋይሶና አገና ጋዳ ያያይስ።
GEN 32:12 ሽን ኔኒ ታና፥ ‘ታኒ ነዉ ቱማ ሎኦባ ኦꬃና። ታኒ ነ ሼሻ ታይባናዉ ዳንዳኤቶና አባ ሻፈዳ ኦꬃና’ ግዳይሳ ቆፓ” ያግስ።
GEN 32:13 ሄ ጋላስ ቃማ እ ያን አቅስ። ባዉ ደእያባ ኡባፈ ባ እሻ ኤሳዌስ እማናባ ቆርድ ከስስ።
GEN 32:14 እ፥ ናምኡ ፄቱ ማጫ ዴሻታነ ላታሙ ዴሻ ማራዘታ፥ ናምኡ ፄቱ ማጫ ዶርሳታነ ላታሙ ዶርሳ ማራዘታ፥ ሀስታሙ ꬋንꬅያ ግማለታ ኤንታ ማራታራ፥ ኦይታሙ ማጫ ሚዛታ፥ ታሙ ኮርማ ቦራታ፥ ላታሙ ማጫ ሀረታነ ታሙ አደ ሀረታ ቆርድ ከስስ።
GEN 32:16 ሄሳታ ዉደን ዉደን ሻክድ ባ አይለታስ እምድ፥ “ታፐ ስን ብድ ዉድያ ዉድያፐ ሃሆን ሃሆን ላግተ” ያግስ።
GEN 32:17 ስንꬃን ካለይሳ፥ “ታ እሻይ ኤሳዌይ ኔራ ጋሄትድ፥ ‘ኔኒ ኦደሴ? ኔኒ አዉ ባይ? ነ ስንꬃን ደእያ መሄ ኡባይ ኦደባዬ?’ ያግድ ኦይችኮ፥
GEN 32:18 ነ እያኮ፥ ‘ሀይሳቲ ነ አይልያ ያይቆባሳ፥ እ ታ ጎዳ ኤሳዌስ እማናዉ የድዳይሳታ። እካ ኑፐ ጉየራ ዬስ’ ያጋ” ያግድ ኪትስ።
GEN 32:19 ቃስ ናምአንꬁዋ፥ ሄꬓንꬁዋነ ዉድያ ካልያ ሀራታ ኡባ፥ “ህንተ ኤሳዌራ ጋሄትያ ዎደ ሀይሳዳ ጌታ፤
GEN 32:20 ‘ነ አይልያ ያይቆብ ኑፐ ጉየራ ዬስ’ ጎና አጎፍተ” ያግድ ኪትስ። እ፥ “ታኒ እማናዉ ስን የድዳይሳን እያ እርፅሳና። ኦን ኤር ሄሳፈ ጉየ፥ ታኒ እያራ ጋሄትያ ዎደ እ ታና ሞክ ኤካና” ያግድ ቆፕስ።
GEN 32:21 ሄሳ ግሾ፥ ባ እማናባ ባፐ ስን የድስ። ሽን እ ባ ሁጰን ሄ ጋላስ ቃማ ያን አቅስ።
GEN 32:22 ሄ ቃማ ያይቆብ ደንድድ፥ ባ ናምኡ ማቸታ፥ ባ ናምኡ አይለታ፥ ባ ናይታ ታማነ እሶታ ኤክድ፥ ያቦቃ ሻፋ ፕንስ።
GEN 32:23 እ ኤንታ ሻፋ ፕንꬅ ስሚድ ባዉ ደእያባ ኡባ ፕንꬅድ የድስ።
GEN 32:24 ሽን ያይቆብ ባርካ ጉየ አትስ። ሄ ዎደ እስ አስ ሳእ ዎንታና ጋካናስ እያራ ባፀትሸ አቅስ።
GEN 32:25 ሄ ኡራይ እያ ፆናናዉ ዳንዳኦናይሳ በእዳ ዎደ ያይቆባስ ቡልፅያ መቀꬃ ቦችን፥ እያ ቡልፀይ ከሱዋፐ ከይስ።
GEN 32:26 ያትን ኡራይ እያ፥ “ሳእ ዎንታና ሀንያ ግሾ፥ ታና የዳ” ያግስ። ሽን ያይቆብ፥ “ኔኒ ታና አንጆና ነና የድከ” ያግስ።
GEN 32:27 ኡራይ፥ “ነ ሱንꬃይ ኦኔ?” ያግድ ኦይችስ። እ ዛሪድ፥ “ያይቆባ” ያግስ።
GEN 32:28 ኡራይ፥ “ኔኒ ፆሳራነ አሳራ ባፀታዳ ፆንዳ ግሾ፥ ህዛፐ ነ ሱንꬃይ ያይቆባ ጌተቶፎ፥ እስራኤለ (ፆሳራ ባፀትስ) ጌተቶ” ያግስ።
GEN 32:29 ያይቆብ ኡራ፥ “ነ ሱንꬃይ ኦኔ?” ያግድ ኦይችስ። ሽን ኡራይ፥ “ኔኒ ታ ሱንꬃ አይስ ኦይቻይ?” ያግድ እያ አንጅስ።
GEN 32:30 ሄሳ ግሾ፥ ያይቆብ፥ “ታኒ ፆሳ ሶምኦን በአስ ሽን ፓፃ ደአይስ” ያግድ፥ ሄ በሳ ጵንኤላ (ፆሳ ሶምኦ) ግድ ሱንꬅስ።
GEN 32:31 እ ጵንኤላፐ ደንድያ ዎደ እያ ቦላ ፃልቀይ ዶልስ። እያ ቡልፀ ከሳይ ሳክያ ግሾ ዶጌስ።
GEN 32:32 ያይቆባ ቡልፀይ ዎድረ አሹዋ ማታን ቦሸትዳ ግሾ፥ እስራኤለ አሳይ መሄስ ቡልፀ አሾ ሀች ጋካናዉ ሞኮና።
GEN 33:1 ያይቆብ ꬎቁ ግድ ፄልያ ዎደ ኤሳዌይ ባ ኦይዱ ፄቱ አሳራ የይሳ በእስ። ሄሳ ግሾ፥ ናይታ ልያስ፥ ራሄልስነ ናምኡ አይለታስ ሻክ እሚስ።
GEN 33:2 አይለታነ ኤንታ ናይታ ስንꬃን፥ ልያነ እ ናይታ ኤንታ ጌዶን፥ ራሄሎነ ዮሰፋ ዉርሰꬃን ዎꬅስ።
GEN 33:3 ሽን እ ባዉ ስን አꬍድ ባ እሻኮ ማትሸ ሳአ ጋክ ጋክ ላፑንቶሆ ዝግስ።
GEN 33:4 ሽን ኤሳዌይ እያራ ጋሄታናዉ ዎፅ ይድ እያ ቆꬍያ ቆምድ ዬርስ። ናምአይካ ዬክዶሶና።
GEN 33:5 ኤሳዌይ ꬎቁ ግድ ፄልድ ማጫሳታነ ናይታ በእድ፥ “ሀ ኔራ ደኤይሳት ኦናንቴ?” ያግድ ኦይችስ። ያይቆብ፥ “ታ ጎዳዉ፥ ሀይሳቲ ፆሳይ ነ አይልያስ ባ ኬሀተꬃን እምዳ ናይታ” ያግስ።
GEN 33:6 አይለት ባንታ ናይታራ ሺቅድ እያዉ ዝግዶሶና።
GEN 33:7 ካልድ ልያራነ እ ናይታራ ይድ ዝግዶሶና። ዉርሰꬃን ዮሰፋራነ ራሄልራ ይድ ዝግዶሶና።
GEN 33:8 ኤሳዌይ፥ “ሀ ስንꬃን ብሸ ታራ ጋሄትዳ ዉደይ ኡባይ አይቤ?” ያግድ ኦይችስ። ያይቆብ፥ “ታ ጎዳዉ፥ ሄስ ታኒ ነ ስንꬃን ሳባ ደማናዉ የድዳይሳታ” ያግስ።
GEN 33:9 ሽን ኤሳዌይ፥ “ታ እሻዉ፥ ታዉ ግድያ ሻሎይ ደኤስ፥ ነባይ ነዉ ግዶ” ያግስ።
GEN 33:10 ያይቆብ፥ “ሀያና፥ ሀእ ታኒ ነ ስንꬃን ሳባ ደምዳባ ግድኮ፥ ሀ ታኒ እመይሳ ኤካ። ኔኒ ታና ሞካ ኤክዳ ግሾ፥ ታ ነ ሶምኡዋ በኤይስ ፆሳ ሶምኦ በኤይሳ መላ።
GEN 33:11 ታኒ ነዉ ኤህዳ ሀ እሞታ ኤካ። ፆሳይ ታዉ ኬህ እምዳ ግሾ ኩምስ” ያግስ። ያይቆብ ዎስድ አጎና እፅዳ ግሾ፥ ኤሳዌይ እያ እሞታ ኤክስ።
GEN 33:12 ኤሳዌይ፥ “አነ የꬋ፥ ታኒ ኔራ እስፈ ባና” ያግስ።
GEN 33:13 ሽን ያይቆብ፥ “ታ ጎዳዉ፥ ናይት ሹጎ ግደይሳ ኤራሳ። ቃስ ታኒ ጋሎ ማራታ ꬋንꬅያ ዶርሳታነ ሚዛ ናጋናዉ ኮሼስ። አሳይ ኤንታ ሀር አቶሽን፥ እስ ጋላስ ምንꬅ ላግኮ፥ መሄ ኡባይ ሀይቃና።
GEN 33:14 ሄሳ ግሾ፥ ታ ጎዳዉ፥ ነ አይለታፐ ስንꬃታዳ ባ። ታኒ ሳይረን ታ ጎዳ ጋካናስ፥ ታ ስንꬃን ደእያ መህያነ ናይታ ሄመꬃ መላ ሎዳን ካላዳ ታ ጎዳ ታኒ ኤዶመን ጋካና” ያግስ።
GEN 33:15 ኤሳዌይ፥ “ያንኮ፥ ታኒ ታ አሳፐ ጉꬃራ ነዉ አሾ” ያግስ። ሽን ያይቆብ፥ “ኮሸና፤ ታኒ ታ ጎዳ ስንꬃን ሳበትዳይስ ታዉ ግዳና” ያግስ።
GEN 33:16 ሄሳ ግሾ፥ ኤሳዌይ ሄ ጋላስ ኦገን ዎꬍድ ሳይረ ስምስ።
GEN 33:17 ሽን ያይቆብ ሱኮታ ብስ። ያን ባዉ ኬ ኬፅስ፥ ባ መሄታስ ሻቃራ ሻቃርስ። ሄሳ ግሾ፥ ሄ በሳ ሱኮታ (ኩያ ዎይኮ ጋባ) ግድ ሱንꬅስ።
GEN 33:18 ያይቆብ ማሰጰፆመፐ ስሚድ ካናነ ቢታን ደእያ ሴከማ ካታማ ሳሮን ጋክስ። እ ሄ ካታማስ ስንꬃ ባጋራ ዱንካነ ቶክድ ኡትስ።
GEN 33:19 ባ ዱንካንያ ቶክዲ ኡትዳ ጋድያ ሴከማ አዋ ሀሞራ ናይታፐ እስ ፄቱ ብራ ሳንትመን ሻምስ።
GEN 33:20 ያን ያርሾ በሲ ጊግስድ፥ “ጎዳ፥ እስራኤለ ፆሳ” ግድ ሱንꬅስ።
GEN 34:1 ልያ ያይቆባስ የልዳ ናእያ ዲና፥ ሄ ዎደ ካናነ ማጫሳታ በአናዉ ከያሱ።
GEN 34:2 ሄ ቢታ ሃርያ ህወ አድያ ሀሞራ ናአ ሴከም እዮ በእድ፥ ዳፍድ ኢስስ።
GEN 34:3 እያ ዎዛናይ ያይቆባ ናእዉ ዲናስ ቃትስ። እ እዉ ምሸትዳ ግሾ ሎኦ ቃላራ እዮ ኦድስስ።
GEN 34:4 ሴከም ባ አዋ ሀሞራ፥ “ታዉ ሀ ናእዉ ማቾ ኦይቻርክ” ያግስ።
GEN 34:5 ያይቆብ ባ ናእዉ፥ ዲና፥ አዝን ዳፍዳይሳ ስእዳ ዎደ እያ አደ ናይት መሄራ ባዞን ደኦሶና። ሄሳ ግሾ፥ ኤንቲ ያና ጋካናስ ስእ ግስ።
GEN 34:6 ሄሳፈ ጉየ፥ ሴከማ አዋ ሀሞር ያይቆባ ኦድሳናዉ ይስ።
GEN 34:7 ያይቆባ አደ ናይት ባዞፈ ይድ ሄሳ ስእዶሶና። ኤንቲ ሴከም ያይቆባ ናእዉ ዳፍድ፥ ኢስድ እስራኤለ ዬላይዳ ግሾ ዳሮ ይሎትዶሶና።
GEN 34:8 ሽን ሀሞር ኤንታኮ፥ “ታ ናአይ ሴከም ህንተ ናኤስ ዳሮ ምሸቴስ፥ ሀያና እዮ እያዉ ማቾ እመርከት።
GEN 34:9 ኑራ ኤከትተነ ገለትተ፥ ህንተ ማጫ ናይታ ኑስ እምተ፥ ኑ ማጫ ናይታካ ህንተዉ ኤክተ።
GEN 34:10 ህንተ ኑ ግዶን ዳናዉ ዳንዳኤታ። ቢታይ ዳሮ ዳልጋ፥ እያ ኦꬅድ ዛልእድ ህንተዉ አቆ ደማናዉ ዳንዳኤታ” ያግስ።
GEN 34:11 ሄ ዎደ ሴከም ዲና አዋነ እ እሻታ፥ “ታኒ ህንተ ስንꬃን ሳበትኮ፥ ህንተ ኮይያባ አይብባ ግድኮካ እማና።
GEN 34:12 ህንተ ምሽራ ናኤስ እሞታነ ኮይታ ህንተ ኮይዳ መላ ታና ኦይችተ። ታኒ ህንተ ታና ኦይችዳባ ኡባ እማና። ሽን ታኒ ማቻናዉ ናእዉ ታዉ እመርከት” ያግስ።
GEN 34:13 ባንታ ምችዉ ዲና ሴከም ቱንስዳ ግሾ፥ ያይቆባ አደ ናይት ሴከማስነ እያ አዋ ሀሞራስ ዎርዶትዶሶና።
GEN 34:14 ኤንታኮ፥ “ኑኒ ሄሳ መላ ፓላባ ኦꬃናዉ ዳንዳኦኮ፥ ኑኒ ኑ ምችዉ ቃፃረትቦና አሳስ እሞኮ፥ ሄስ ኑና ካዉሽያባ።
GEN 34:15 ህንተ ኑስ እስባ ኤሮ ጊኮ ኑ ህንተዉ ኤሮ ጋና። ሄስካ፥ ህንተ ቢታ አደ አሳ ኡባይ ቃፃረትድ ኑዳ ሀንኮ፥
GEN 34:16 ኑኒ ኑ ማጫ ናይታ ህንተዉ እማናዉ ኤሮ ጋና። ህንተ ማጫ ናይታካ ኑስ ኤካና። ኑኒ ህንተ ግዶን ደእድ ህንተራ እስ አሰ ግዳና።
GEN 34:17 ሽን ህንተ ቃፃረታናዉ ኤሮ ጎና እፅኮ፥ ኑኒ ኑ ምችዉ ኤክ ባና” ያግዶሶና።
GEN 34:18 ያትን ሀ ኤንቲ ግዳባይ ሀሞራስነ እያ ናአ ሴከማስ ሎኦ ዳንስ።
GEN 34:19 ሄ ፓንꬃይ ባ አዋ ኬꬃን ደእያ ኡባፈ አꬍድ ቦንቸትዳ ግሾ ኮይዳባ ኦꬃናዉ እያዉ ማት ደኤስ። ያይቆባ ናእዉ ዳሮ ዶስዳ ግሾ፥ ኤንቲ ግዳባ ኦꬃናዉ ጉየ ግቤና።
GEN 34:20 ሄ ዎደ ሀሞርነ እያ ናአይ ሴከም ባንታ ካታማ ዳባባ ብድ፥ ባንታ ካታማ አሳስ ሀይሳዳ ያግድ ኦድዶሶና።
GEN 34:21 “ሀ አሳት ኑራ ስጋ ደኦሶና። ቢታይ ዳሮ ዳልጋ ግድያ ግሾ ኤንቲ ሀ ቢታን ጎዮ ዛልኦ። ኤንታ ማጫ ናይታካ ኑኒ ኤካና፥ ኤንትካ ኑ ማጫ ናይታ ኤኮና።
GEN 34:22 ሽን ኑራ ኤንቲ እስ አሳዳ ደአናዉ ኑኒ እስባ ኤሮ ጋናዉ ኮሼስ። ሄስካ፥ ኤንቲ ቃፃረትዳይሳዳ ኑ አደ አሳ ኡባይ ቃፃረታናይሳ።
GEN 34:23 ኑኒ ሄሳዳ ኦꬅኮ፥ ኤንታ መሄይነ፥ ኤንታ አቆ ኡባይ ኑባ ግደኔ? ሄሳ ግሾ፥ አነ ኑኒ ኤንቲ ገይሳ ኤሮ ጎስ። ኤንትካ ኑ ግዶን ደአና” ያግዶሶና።
GEN 34:24 ካታማ ዳባባ ሺቅዳ አሳት ኡባይ ሀሞራስነ እያ ናአ ሴከማስ፥ “ኤሮ” ግዶሶና። ያትን ሄ ካታማ አደ አሳት ኡባይ ቃፃረትዶሶና።
GEN 34:25 ሄꬓንꬆ ጋላስ፥ ኤንቲ ኡባይ ባንታ ቃፃራ ማዱንꬃ ሳከትሽን፥ ያይቆባ አደ ናይታፐ ናምአይ፥ ዲና እሻት፥ ስሞናራነ ሌወራ ባንታ ማሻ ኤክድ ኦንካ ኤሮና ካታማ ገልድ አደ አሳ ኡባ ዎꬍዶሶና።
GEN 34:26 ሀሞራነ እያ ናአ ሴከማ ማሻን ዎꬍድ፥ ባንታ ምችዉ ዲና ሴከማ ኬꬃፈ ኤክ ብዶሶና።
GEN 34:27 ያይቆባ ሀራ አደ ናይት አሀታ ቦላ ገልድ ባንታ ምችዉ ዲና ቱንስዳ ካታማ ኡባ ቦንቅዶሶና።
GEN 34:28 ኤንታ ዶርሳ ዉድያ፥ ሚዛ ዉድያ፥ ሀርያ፥ ካታማ ግዶን ደእያባነ ጋፃን ደእያባ ኡባ ኤክዶሶና።
GEN 34:29 ኤንታ ኬꬃን ደእያ አቁዋ ኡባ፥ ኤንታ ናይታ ኡባነ ማጫሳታ ኡባ ድእዶሶና።
GEN 34:30 ያይቆብ ስሞናነ ሌወ፥ “ህንተ ታ ቦላ ግታ መቶ ኤህደታ። ሀ ቢታን ደእያ ካናነትነ ፓርዘት ታና እፃና። ኑኒ ታይቦን ጉꬃ፥ ኤንቲ እስፈ ግድድ ታ ቦላ ደንድኮ፥ ታንነ ታ ሶ አሳይ ꬋያና” ያግስ።
GEN 34:31 ሽን ኤንቲ፥ “ያትን፥ እ ኑ ምችዉ ላይማ ማጫሳዳ ኦꬃናዉ በሲ?” ያግዶሶና።
GEN 35:1 ሄሳፈ ጉየ፥ ፆሳይ ያይቆባ፥ “ደንዳዳ ፑደ ቤተለ ከያዳ ያን ደአ። ኔኒ ነ እሻ ኤሳዌፐ ባቃትዳ ዎደ ነዉ ቆንጭዳ ፆሳስ ያን ያርሾ በሲ ጊግሳ” ያግስ።
GEN 35:2 ሄሳ ግሾ፥ ያይቆብ ባ ሶ አሳነ እያራ ደኤይሳታ ኡባ፥ “ህንተ ግዶን ደእያ አላጋ ፆሳታ ድግተ። ህንተና ጌሽተ፥ ህንተ ማኡዋ ላምተ።
GEN 35:3 ሀይሳፈ ደንድድ ፑደ ቤተለ ቦስ። ታ መቱዋ ጋላስ ታዉ ስእዳ፥ ታኒ ብዳ በሳ ኡባን ታራ ግድዳ ፆሳስ ታኒ ያን ያርሾ በሲ ጊግሳና” ያግስ።
GEN 35:4 ኤንቲ ባንታዉ ደእያ አላጋ ፆሳታ ኡባነ ባንታ ሀይꬃን አꬅዳ ዎርቃታ ኡባ ከስድ ያይቆባስ እምዶሶና። ያይቆብ ሄሳታ ሴከማን ደእያ ዎላ ጋርሳን ሞግስ።
GEN 35:5 ሄሳፈ ጉየ፥ ያይቆብነ እያ አደ ናይት ደንድድ ብያደ ኤንታ ዩሹዋን ደእያ አሳ ቦላ ፆሳ ያሻይ ዎꬍዳ ግሾ ኤንታና ካልድ ኦይካናዉ ኦንካ ዳንዳእቤና።
GEN 35:6 ያይቆብነ እያራ ደእያ አሳ ኡባይ ካናነ ቢታን ደእያ ቤተለ ጌተትያ ሎዛ ጋክዶሶና።
GEN 35:7 ያን እ ያርሾ በሲ ጊግስስ። እ ሄ በሳ ኤል-ቤተለ (ቤተለ ፆሳ) ግድ ሱንꬅስ። እ ባ እሻፐ ባቃትድ ብያ ዎደ ፆሳይ እያዉ ቆንጭዳይ ሄ በሳና።
GEN 35:8 እርብቃ ድችያ ድቦራ ያን ሀይቃሱ። ቤተለፐ ጋርሳራ ደእያ ዎላ ጋርሳን እያ ሞገታሱ። ሄሳ ግሾ፥ ሄ ምꬃ ሱንꬃይ አሎን-ባኩተ (ዬሆ ዎላ) ጌተትስ።
GEN 35:9 ያይቆብ ማሰጰፆመፐ ስምዳፐ ጉየ፥ ፆሳይ እያዉ ዛር ቆንጭድ እያ አንጅስ።
GEN 35:10 ፆሳይ፥ “ነ ሱንꬃይ ያይቆባ። ሽን ህዛፐ ኔኒ ያይቆባ ጌተታካ፥ ነ ሱንꬃይ እስራኤለ ጌተታና” ያግድ እያ “እስራኤለ” ግድ ሱንꬅስ።
GEN 35:11 ቃስ ፆሳይ ያይቆባ፥ “ታኒ ኡባ ዳንዳእያ ፆሳ። ኔኒ የለታ፥ ዳራ። ደረይነ ካዎተꬃት ኔፐ ከዮ። ካዎትካ ነ ጉልባታፐ ከዮ።
GEN 35:12 ታኒ አብራሃመስነ ይሳቃስ እምዳ ቢታ፥ ነዉ እማና። ኔፐ ጉየ ታኒ ሀ ቢታ ነ ሼሻስ እማና” ያግስ።
GEN 35:13 ፆሳይ እያራ ኦደትዳ በሳፈ ፑደ ከይስ።
GEN 35:14 ያይቆብ ፆሳይ እያራ ኦደትዳ በሳን ቆፍስያ ሹቻ ማላ ኤስድ እያ ቦላ ዎይንያነ ዛይተ ትግስ።
GEN 35:15 ያይቆብ ፆሳይ እያራ ኦደትዳ በሳ “ቤተለ” ግድ ሱንꬅስ።
GEN 35:16 ኤንቲ ሄሳፈ ጉየ፥ ቤተለፐ ደንድድ ብዶሶና። ኤንቲ ኤፍራታ ጋካናዉ ጉꬁ አትሽን፥ ራሄሎ እቀꬅ ኦይክን ዳሮ ዋየታሱ።
GEN 35:17 እቀꬃይ እዮ ዋይስዳ ዎደ እዮ የልስያራ፥ “ባቦፋ፤ ሀይስካ አደ ናአ” ያጋሱ።
GEN 35:18 ሽን እያ ሀይቆስ ማታዳ ሸምፖይ ከያና ሀንሽን፥ ባ ናአ በኖና (መቶ ናአ) ጋዳ ሱንꬃሱ። ሽን እያ አዋይ ብንያመ (ታ ኡሻቻ) ግድ ሱንꬅስ።
GEN 35:19 ሄሳፈ ጉየ፥ ራሄላ ሀይቃ አጋሱ። ቤተለመ ጌተትያ ኤፍራታ ኤፍያ ኦግያ ጋፃን ሞገታሱ።
GEN 35:20 ያይቆብ እ ዱፉዋ ቦላ ሀዉልተ ሹቹ ኤስስ። ሄ ሀዉልተይ ሀች ጋካናዉካ ራሄል ዱፉዋ ኤርሴስ።
GEN 35:21 እስራኤለይ ሄሳፈ ደንድድ ኤደራ ግምብያፈ ሄፍንꬃን ባ ዱንካንያ ቶክስ።
GEN 35:22 እስራኤለይ ሄ ቢታን ደእሽን፥ ሮቤል ባ አዋስ የልዳ አይለ ባልራ አቅስ። እስራኤለይ ሄ ኦዳ ስእስ። ያይቆባ አደ ናይት ታማነ ናምአ።
GEN 35:23 ልያ ናይት ያይቆባ ባይራ ናአ ሮቤላ፥ ስሞና፥ ሌወ፥ ይሁዳ፥ ይሳኮራነ ዛብሎና።
GEN 35:24 ራሄል አደ ናይት ዮሰፋነ ብንያመ።
GEN 35:25 ራሄል አይለ ባል አደ ናይት ዳነነ ንፍታለመ።
GEN 35:26 ልያ አይለ ዛላፋ አደ ናይት ጋደነ አሴራ። ሀ ናይት ያይቆባስ ማሰጰፆመን የለትዳ አደ ናይታ።
GEN 35:27 ያይቆብ ከብሮና ጌተትያ ቅርያት-አርባ ማታን ማምረን ደእያ ባ አዋ ይሳቃ ሶ ብስ። ሄ በሳይ ካሰ አብራሃመይነ ይሳቅ ደእዳ በሳ።
GEN 35:28 ይሳቅ ፄታነ ሆስፑን ታሙ ላይꬅ ደእስ።
GEN 35:29 እ ዳሮ ዎድያ ደእድ ሎኦ ጭምድ፥ ሀይቅድ ባ ማይዛታን ጋሄትስ። እያ ናይት ኤሳዌይነ ያይቆብ እያ ሞግዶሶና።
GEN 36:1 ኤዶመ ጌተትያ ኤሳዌ የለተꬃይ ሀይሳፈ ካልድ ፃፈትዳይሳ፤
GEN 36:2 ኤሳዌይ ካናነ ቢታ ማጫ ናይታፐ ባዉ ማቾታ ኤክስ። ኤንትካ ህተ አድያ ኤሎና ናእዉ አዶ፥ ህወ አድያ ፅባኦና ናአይ አን የልዳ ኦሆልባሞነ
GEN 36:3 እስማኤላ ናእዉ፥ ነባዮታ ምችዉ ባሰማቶ።
GEN 36:4 አዳ ኤሳዌስ ኤልፋዛ የላሱ። ባሰማታ ራጉኤላ የላሱ።
GEN 36:5 ኦሆልባማ የኡሳ፥ ያእላማነ ቆረ የላሱ። ካናነ ቢታን ኤሳዌስ የለትዳ አደ ናይት ሀይሳታ።
GEN 36:6 ኤሳዌይ ባ ማቸታ፥ ባ አደ ናይታነ ማጫ ናይታ፥ ባ ሶ አሳ ኡባ፥ ባ ሚዛነ ባ ሀራ መሄ ኡባ ካናነ ቢታን ሃርዳባ ኡባ ኤክድ ባ እሻ ያይቆባፐ ሃክድ ሀራ ቢታ ብስ።
GEN 36:7 ኤንታ ሻሎይ ዳርዳ ግሾ፥ ኤንቲ እስፈ ዳናዉ ዳንዳእቦኮና። ኤንታ መሄይ ዳርዳ ግሾ፥ ኤንቲ ደእያ ቢታይ ኤንታ ናምኣስ ግዶና እፅስ።
GEN 36:8 ያንን፥ ኤዶመ ጌተትያ ኤሳዌይ ደረይ ዳርያ ሳይረ ቢታን ደእስ።
GEN 36:9 ደረይ ዳርያ ሳይረ ቢታን ደእዳ ኤዶመታ ማይዛ ኤሳዌ የለተꬃይ ሀይሳፈ ካልድ ፃፈትዳይሳ፤
GEN 36:10 ኤሳዌ አደ ናይታ ሱንꬃይ፥ ኤሳዌ ማቸ አድ ናኣ ኤልፋዛነ ኤሳዌ ማቸ ባሰማት ናአ ራጉኤላ።
GEN 36:11 ኤልፋዛ ናይት ተማና፥ ኦማራ፥ ፃፋ፥ ጋእታማነ ቀነዛ።
GEN 36:12 ቃስ ትምናአ ኤሳዌ ናአ ኤልፋዛስ አይለ። እያ ኤልፋዛስ አማለቃ የላሱ። ሀይሳቲ ኤሳዌ ማቸ አድ ናኣ ናይታ።
GEN 36:13 ራጉኤላ አደ ናይት ናሃታ፥ ዛራ፥ ሻማነ ሚዛ። ሀይሳቲ ኤሳዌ ማቸ ባሰማት ናአ ናይታ።
GEN 36:14 ፅባኦና ናአይ አን የልዳ ኦሆልባማ አደ ናይት ሀይሳታ፤ ኤንትካ የኡሳ፥ ያእላማነ ቆረ።
GEN 36:15 ኤሳዌ የለታ ሀላቃት ሀይሳፈ ካልድ ፃፈትዳይሳታ፤ ኤሳዌስ ባይራ ናአ ኤልፋዛ አደ ናይት፥ ሀላቃ ግድዳይሳት ተማና፥ ኦማራ፥ ፃፋ፥ ቃናዛ፥
GEN 36:16 ቆረ፥ ጋእታማነ አማለቃ፤ ኤዶመ ቢታን ኤልፋዝ የልዳ ሀላቃት ሀይሳታ፤ ሄሳት ኡባይ አድ ናኣ ናይታ።
GEN 36:17 ኤሳዌ ናአ ራጉኤላ አደ ናይት፥ ሀላቃ ግድዳይሳት ናሃታ፥ ዛራሀ፥ ሻማነ ሚዛ፤ ኤዶመ ቢታን ራጉኤል የልዳ ሀላቃት ሀይሳታ፤ ኤንቲ ኤሳዌ ማቸ ባሰማት ናአ ናይታ።
GEN 36:18 ኤሳዌ ማቸ ኦሆልባም አደ ናይት፥ ሀላቃ ግድዳይሳት የኡሳ፥ ያእላማነ ቆረ፤ ኤንቲ አና ናኤ፥ ኤሳዌ ማቸ ኦሆልባምፐ የለትዳ ሀላቃታ።
GEN 36:19 ኤዶመ ጌተትያ ኤሳዌ አደ ናይት ሀይሳታ፤ ኤንታ ሀላቃትካ ሀይሳታ።
GEN 36:20 ኤዶመ ቢታን ደእያ ሆራ ሳይረ አደ ናይት ሀይሳፈ ካልድ ፃፈትዳይሳታ፤ ሄሳትካ ሎፃና፥ ሾባላ፥ ፅባኦና፥ አና፥
GEN 36:21 ድሶና፥ ኤፀራነ ድሳና፤ ሄሳት፥ ኤዶመ ቢታን ደእያ ሳይረ አደ ናይት፥ ሆራታ ሀላቃታ።
GEN 36:22 ሎፃና አደ ናይት ሆራነ ሄማማ፤ ሎፃና ምችያ ትምናኦ።
GEN 36:23 ሶባላ አደ ናይት አልዋ፥ ማናሆታ፥ ኤባላ፥ ስፋነ ኦናማ።
GEN 36:24 ፅባኦና አደ ናይት አያነ አና፤ ሀይስ አን መላ ቢታን ባ አዋ ፅባኦና ሀረታ ሄምሸ ብልቦ ሃꬃ ፑልቱዋ ደምዳይሳ።
GEN 36:25 አና ናአይ ድሶና፤ ናእያ ቃስ ኦሆልባሞ።
GEN 36:26 ድሶና አደ ናይት ሄምዳና፥ ኤስባና፥ ይትራናነ ካራና።
GEN 36:27 ኤፀራ አደ ናይት ብልሃና፥ ዛዋናነ አቃና።
GEN 36:28 ድሳና አደ ናይት ኡፃነ አራና።
GEN 36:29 ሆራታ ሀላቃት ሀይሳታ፤ ሎፃና፥ ሾባላ፥ ፅባኦና፥ አና፥
GEN 36:30 ድሶና፥ ኤፀራነ ድሳና። ሀይሳቲ ሳይረ ቢታን ባንታ ያራን ያራን ሻከትዳ ሆራታ ሀላቃታ።
GEN 36:31 እስራኤለን ካዎይ ካዎታናፐ ካሰ ኤዶመ ቢታን ካዎትዳ ካዎት ሀይሳፈ ካልድ ፃፈትዳይሳታ።
GEN 36:32 ብኦራ ናአይ ባላቅ ኤዶመን ካዎትስ፤ እያ ካታማ ሱንꬃይ ድናባ ጌተቴስ።
GEN 36:33 ባላቅ ሀይቅን፥ ባሶራ አደይ ዛራ ናአይ ዮባብ እያ በሳን ካዎትስ።
GEN 36:34 ዮባብ ሀይቅን፥ ተማና አደይ ሁሳም ካዎትስ።
GEN 36:35 ሁሳም ሀይቅን፥ ባዳዳ ናአይ ሀዳድ፥ ምድያመታ ሞአበ ቢታን ፆንዳይስ ካዎትስ፤ እያ ካታማ ሱንꬃይ አዊታ ጌተትስ።
GEN 36:36 ሀዳድ ሀይቅን፥ ማስሬቃ አደይ ሳምል ካዎትስ።
GEN 36:37 ሳምል ሀይቅን፥ ሻፋ ማታን ደእያ ረሆቦታ አደይ ሳኡሊ ካዎትስ።
GEN 36:38 ሳኡሊ ሀይቅን፥ አክቦራ ናአይ ባአል-ሀናን ካዎትስ።
GEN 36:39 አክቦራ ናአ ባአል-ሀናን ሀይቅን፥ ሀዳድ ካዎትስ፤ እያ ካታማ ሱንꬃይ ፓኡ ጌተቴስ፤ እያ ማችያ መዛሃባ ናእያ ማፅሬዳ የልዳ ማሄፃቤሎ ጌተታዉሱ።
GEN 36:40 ኤሳዌ የለታ ሀላቃት ባንታ ያራን ያራን፥ ባንታ በሳን በሳን ባንታ ሱንꬃን ሱንꬃን ሀይሳታ፤ ትምና፥ አልዋ፥ የተታ፥
GEN 36:41 ኦሆልባማ፥ ኤላ፥ ፕኖና፥
GEN 36:42 ቃናዛ፥ ተማና፥ ምብሳራ፥
GEN 36:43 ማግደላነ እራማ። ሀይሳቲ ባንታ አይስያ ቢታን፥ ባንታ ደእያሱዋን ደእያሱዋን ኤዶመ ሀላቃታ። ሀይስ ኤሳዌይ፥ ኤዶመታ አዋ።
GEN 37:1 ያይቆብ እያ አዋይ ይሳቅ ደእዳ ካናነ ቢታን ደእስ።
GEN 37:2 ያይቆባ የለተꬃ ታርከይ ሀይሳፈ ካልድ ፃፈትዳይሳ። ዮሰፍ ታማነ ላፑን ላይꬃ ናአ ግድዳ ዎደ ባ አዋ ማቸታፐ፥ ባልፐነ ዝልፓፈ የለትዳ ባ እሻታራ መሄ ሄሜስ። እ ባ አዋስ ባ እሻት ኦꬅዳ ኢታባታ ኦዴስ።
GEN 37:3 እስራኤለይ ዮሰፋ ጭምድ የልዳ ግሾ፥ ባ ሀራ አደ ናይታ ኡባፈ አꬅድ ዶሴስ። ሄሳ ግሾ፥ እያዉ አሌቀትዳ ማኦ ጊግስስ።
GEN 37:4 እያ እሻት ኤንታ አዋይ እያ ኤንታፈ አꬅድ ዶሰይሳ በእዳ ዎደ እያ እፅዶሶና። ማልኦ ቃላካ እያኮ ኦደታናዉ ዳንዳእቦኮና።
GEN 37:5 እስ ዎደ ዮሰፍ አሙሆ አሙህድ፥ ባ እሻታስ ኦድን ኤንቲ እያ ካሰይሳፈ አꬅድ እፅዶሶና።
GEN 37:6 እ ኤንታኮ፥ “ታኒ አሙህዳ አሙሁዋ ስእተ።
GEN 37:7 ኑኒ ጋደን ግስተ ምርቅሽን ታ ምርቀይ ደንድድ ሉለ ኤቅስ። ህንተ ምርቀት ዩይ አꬍድ ታ ምርቅያስ ዝግዶሶና” ያግስ።
GEN 37:8 እያ እሻት፥ “ኔኒ ኑ ቦላ ካዎታዳ ኑና ሃራናዉ ቆፓይ?” ያግድ ኦይችዶሶና። ኤንቲ እያ አሙሁዋ ግሾነ እያ ኦዳ ግሾ፥ ካሰይሳፈ አꬅድ እፅዶሶና።
GEN 37:9 ቃስካ ዮሰፍ ሀራ አሙሆ አሙህድ ባ እሻታስ ኦድስ። “ሄኮ፥ ታኒ ሀራ አሙሆካ አሙሀስ። ሄ አሙሁዋን አው፥ አጌንነ ታማነ እስ ፆልንቶት ታዉ ዝጎሶና” ያግስ።
GEN 37:10 ባ እሻታስ ኦድዳ አሙሁዋ ባ አዋስ ኦድዳ ዎደ እያ አዋይ፥ “ሀይስ ዋንዳ አሙሆ? ቱማ ታኒ፥ ነ አያነ ነ እሻት ይድ፥ ነ ስንꬃን ዝጋነዬ?” ያግድ ሀንቀትስ።
GEN 37:11 እያ እሻት እያ ቃናትዶሶና፥ ሽን እያ አዋይ ሄ ኦዳ ባ ዎዛናን ዎꬅስ።
GEN 37:12 እስ ጋላስ እያ እሻት ሴከማን ባንታ አዋ መሄታ ሄማናዉ ብዶሶና።
GEN 37:13 እስራኤለይ ዮሰፋ፥ “ነ እሻት ሴከማን መሄታ ሄመይሳ ኤራሳ። ሃያ፥ ታኒ ነና ኤንታኮ ኪታና” ያግስ። ዮሰፍካ፥ “ኤሮ” ያግስ።
GEN 37:14 እ እያኮ፥ “ባዳ ነ እሻትነ መሄይ ሳሮ ግደይሳ በአዳ ኤንታባ ታዉ ያዳ ኦዳ” ያግድ ዮሰፋ ከብሮና ዛንጋራፐ ኪትስ። ዮሰፍ ኪተትድ ሴከማ ብስ።
GEN 37:15 ያን ደምባ በሳን ኤንታ ኮሻን ያ ሃ ስመረትሽን፥ እስ አስ እያ ደምድ፥ “ላ ናአዉ፥ አይ ኮያይ?” ያግድ ኦይችስ።
GEN 37:16 እ፥ “ታ እሻታ ኮያይስ፤ ኤንቲ መህያ ሄምያ በሳ በእዳኮ፥ ሀያና ታዉ ኦዳርኪ” ያግስ።
GEN 37:17 ኡራይ፥ “ሀይሳፈ ብዶሶና፤ ኤንቲ፥ ‘ኑኒ ዶታነ ባና’ ግሽን ስአስ” ያግስ። ሄሳ ግሾ፥ ዮሰፍ ባ እሻታ ጌዶ ካል ብድ፥ ኤንታ ዶታነን ደምስ።
GEN 37:18 ሽን እ ሃሆን ደእሽን፥ ኤንቲ እያ በእዶሶና። እ ኤንታኮ ጋኮና ደእሽን፥ ኤንቲ እያ ዎꬋናዉ ማቀትዶሶና።
GEN 37:19 ኤንቲ እሶይ እሱዋኮ፥ “ህን በእተ፥ አሙሁዋ ጎዳይ ዬስ።
GEN 37:20 ሃይተ፥ እያ ዎꬍድ፥ ሀ ኦላታፐ እሱዋን የጎስ። ሄሳፈ ጉየ፥ ‘ዶእ እያ ምስ’ ያጋና። ያትድ፥ እያ አሙሁዋ ዉርሰꬃ በአና” ያግዶሶና።
GEN 37:21 ሮቤል ሄሳ ስእዳ ዎደ፥ ኤንታ ኩሸፐ እያ አሻናዉ ኮይድ፥ “እያ ዎꬎኮ፤
GEN 37:22 እያ ዎꬋናፐ መላ ቢታን ደእያ ሀ ኦላን የግተ፤ እያ ቦላ ኩሸ ዎꬆፍተ” ያግስ። ሮቤል ሄሳ ግዳይ፥ እያ ኤንታ ኩሸፐ አሽድ ጉየ አዋኮ ዛራናሳ።
GEN 37:23 ዮሰፍ ባ እሻታኮ ጋክዳ ዎደ እ ማእዳ አሌቀትዳ ማኡዋ እያፐ ቃር ኤክዶሶና።
GEN 37:24 እያ ኤፍድ ሃꬅ ባይና መላ ኦላን የግዶሶና።
GEN 37:25 ኤንቲ ካ ምሽን ሀሳዮና እስማኤላ አሳት ጋላዳፐ ግብፀ ብሽን፥ ꬎቁ ግድ በእዶሶና። ኤንቲ ባንታ ግማለታ ቦላ ሳዉዋ፥ ማድያነ ካርብያ ጫንዶሶና።
GEN 37:26 ይሁድ ባ እሻታ፥ “ኑኒ ኑ እሻ ዎꬍድ፥ እያ ሱꬃ ቆትኮ ኑና አይ ማዳኔ?
GEN 37:27 ሃይተ፥ እያ እስማኤላ አሳስ ባይዞስ። እ ኑ እሻ፥ ኑ ሱꬁነ ኑ አሾ ግድያ ግሾ እያ ቦላ ኑ ኩሽያ ዎꬆኮ” ያግስ። እያ እሻት እያ ኦዳ ማእዶሶና።
GEN 37:28 ሄሳ ግሾ፥ ምድያመ ቢታ ዛልአንቾት ያራ አꬍሽን፥ እያ እሻት ዮሰፋ ኦላፈ ከስድ፥ እስማኤላ አሳታስ ላታሙ ብራ ሳንትመን ባይዝዶሶና። ኤንቲ ዮሰፋ ግብፀ ቢታ ኤፍዶሶና።
GEN 37:29 ሮቤል ኦላኮ ስሚድ፥ ዮሰፍ ያን ባይናይሳ በእዳ ዎደ፥ አዛንድ ባ ማኡዋ ዳክስ።
GEN 37:30 እ ጉየ ባ እሻታኮ ብድ፥ “ናአይ ያን ባዋ፤ ህዛ፥ ታኒ አይ ሀኖሻ?” ያግስ።
GEN 37:31 ኤንቲ ዮሰፋ ማኡዋ ኤክድ፥ እስ ዴሸ ሹክድ፥ ሄ ሱꬃን ናቅዶሶና።
GEN 37:32 አሌቀትዳ እያ ማኡዋ ባንታ አዋኮ ኤፍድ “ኑኒ ሀይሳ ደምዳ፤ ሀይስ ነ ናአ ማኡዋኮነ አነ በአ” ያግዶሶና።
GEN 37:33 ያይቆብ ማኡዋ ኤርድ፥ “ሀይስ ታ ናኣ ማኡዋ፤ ታ ናኣ ዶእ ምስ። ዮሰፍ ቱማካ ዛዘትስ” ያግስ።
GEN 37:34 ያይቆብ አዛንድ፥ ባ ማኡዋ ፔꬍስ። ካዮ ማኦ ማእድ፥ ባ ናኣስ ዳሮ ጋላስ ዬክስ።
GEN 37:35 እያ አደ ናይትነ ማጫ ናይት ኡባይ እያ ምንꬃናዉ ይዶሶና። ሽን እ ምነቶና እፅድ፥ “አካይ፥ ታኒ ዬሆይ ዬሆሽን ዱፎ ገላና” ያግድ፥ ዮሰፋስ ዬክስ።
GEN 37:36 ሄ ዎደ ምድያመ ቢታ አሳት ዮሰፋ፥ ግብፀ ካዋ ሞርናታነ ካዋ ናገይሳታ ሀላቃ ግድዳ ጶፅፋራስ ባይዝዶሶና።
GEN 38:1 ሄ ዎደ ይሁድ ባ እሻታፐ ሻከትድ፥ አዱላማ ካታማን ደእያ ህራ ጌተትያ ኡራራ ዳናዉ ብስ።
GEN 38:2 ያን ይሁድ ሹአ ጌተትያ ካናነ ኡራ ናእዉ ማችስ።
GEN 38:3 እያ ይሁዳስ ቃንꬃታዳ አደ ናአ የላሱ። እ ሄ ናአ ኤራ ግድ ሱንꬅስ።
GEN 38:4 ቃስካ ቃንꬃታዳ አደ ናአ የላሱ። እያ ሄ ናአ ኦናና ጋዳ ሱንꬃሱ።
GEN 38:5 ዛራዳካ ሀራ አደ ናአ የላሱ። እያ ሄ ናኣ ሴላ ጋዳ ሱንꬃሱ። ሄ ናአይ የለትያ ዎደ ይሁድ አክዚባ ቢታና።
GEN 38:6 ይሁድ ባ ባይራ ናአ ኤራስ ትማሮ ጌተትያ ማቾ እሚስ።
GEN 38:7 ይሁዳ ባይራ ናአይ፥ ኤር፥ ጎዳ ስንꬃን ኢታ አስ ግድያ ግሾ፥ ጎዳይ እያ ዎꬍስ።
GEN 38:8 ይሁድ ኦናናኮ፥ “ዎጋይ ነና ኪተይሳ መላ ነ እሻ ማቸራ አቃ። ነ እሻስ ናአ የላዳ እያ ሱንꬃ ፄግሳ” ያግስ።
GEN 38:9 ሽን ኦናን የለታና ናይት እያባ ግዶናይሳ ኤርዳ ግሾ፥ ባ እሻ ማቸራ አቅያ ዎደ ባ እሻስ ናእ የለቶና መላ ባ አቱንꬃ ሳአን ጉሴስ።
GEN 38:10 እ ኦꬅዳባይ ጎዳ ስንꬃን ኢታባ ግድዳ ግሾ፥ ጎዳይ እያካ ዎꬍስ።
GEN 38:11 ሄሳፈ ጉየ፥ ይሁድ ባ ናኣ ማችዉ ትማሮ፥ “ታ ናአይ ሴል ድጫና ጋካናስ ነ አዋ ሶ ባዳ፥ አምኤተꬃን ደኣሻ” ያግስ። ሄሳ እ ግዳይ፥ እካ ባ እሻታዳ ሀይቃነኮነ ግድ ህርግዳ ግሾሳ። ሄሳ ግሾ፥ ትማራ ባዳ ባ አዋ ሶን ደአሱ።
GEN 38:12 ዳሮ ዎደፐ ጉየ፥ ይሁዳ ማችያ፥ ሹአ ናእያ ሀይቃሱ። ይሁድ ባ ካዮ ዎድያ ኦንግድ፥ ባ ዶርሳታ እክስያ ሜድያ አሳታኮ ትምና ጌተትያ በሲ ባ ላግያ አዱላማ አድያ ህረራ ብስ።
GEN 38:13 አሳይ ትማሮ፥ “ሄኮ፥ ነ አዝና አዋይ ይሁድ፥ ባ ዶርሳታ እክስያ ሜዳናዉ ትምና ቤስ” ያግድ ኦድዶሶና።
GEN 38:14 እያ ባ አምኤተꬃ ማኡዋ ላማዳ፥ ባና ባለꬃናዉ ሻሸ ኤካዳ ጉሉንታሱ። ያታዳ፥ ትምና ኤፍያ ኦግያ ዶናን ደእያ ኤናይመ ካታማ ጋፃን ኡታሱ። ሄሳ እያ ኦꬅዳይስ፥ ሴል ድጭድ ጋክንካ እያዉ ማቾ ግዳዳ እመቶናይሳ እያ ኤርዳ ግሾሳ።
GEN 38:15 እያ ባ ሶምኡዋ ጉሉንትዳ ግሾ፥ ይሁድ እዮ በእዳ ዎደ፥ ላይማ ማጫስ ግድ ቆፕስ።
GEN 38:16 ባ ናኣ ማችዉ ግደይሳ ኤሮና ደእሸ፥ ኦግያ ጋፃ ኢኮ ሺቅድ “ታራ አቃኔ?” ያግድ ኦይችስ። እያ፥ “ታኒ ኔራ አቅኮ፥ ነ ታዉ አይ እማኔ?” ጋዳ ኦይቻሱ።
GEN 38:17 እ፥ “ታኒ ታ መህያፐ እስ ኮለ ነዉ የዳና” ያግስ። እያ፥ “ኔኒ ሄሳ ታዉ የዳና ጋካናስ አይ ኦይꬃኔ?” ያጋሱ።
GEN 38:18 እ፥ “አይ ኦይꬆ?” ያግስ። እያ፥ “ነ ማታምያ እያ ጎሹዋራነ ነ ኩሽያን ደእያ ፃምአ ኦይꬃ” ያጋሱ። እ ሄሳታ እምድ፥ ኢራ አቅስ፤ እያካ ቃንꬃታሱ።
GEN 38:19 እያ ሄሳፈ ደንዳዳ ብዳፐ ጉየ፥ ባ ጉሉንꬃ ቃራዳ፥ ባ አምኤተꬃ ማኡዋ ማአሱ።
GEN 38:20 ይሁድ ባ ኦይꬅዳባ ሄ ማጫሴፐ ዛር ኤካናዉ ዴሻ ባ ላግያ ህራ ቦላ እዉ የድስ። ሽን እ እዮ ደምቤና።
GEN 38:21 እ ሄ ቢታ አሳኮ፥ “ኤናይመ ካታማን፥ ኦገ ዶናን ኡትዳ ላይማ ማጫስያ አዉኔ?” ያግድ ኦይችስ። አሳይ፥ “ላይማ ማጫስ ሀይሳን ኡባካ ባዋ” ያግዶሶና።
GEN 38:22 እ ይሁዳኮ ስሚድ፥ “ ‘ታኒ እዮ ደማብከ፤ ሄሳ ቦላካ ሄ ቢታ አሳይ፥ ላይማ ማጫስ ሀይሳን ኡባካ ባዋ’ ያግዶሶና” ያግስ።
GEN 38:23 ይሁድ፥ “ባ ኦይክዳይሳ ባዉ ኤኮ፥ አቶ ጊኮ፥ አስ ኑና ሚጫና። ህዛ ታኒ እዉ ዴሸ የዳስ ሽን ኔኒ እዮ ደማባካ” ያግስ።
GEN 38:24 ሄꬑ አጌና ግድሽን አሳይ፥ “ነ ናኣ ማጫስያ ትማራ ላይማታዳ ቃንꬃታሱ” ያግድ ይሁዳስ ኦድዶሶና። ይሁድ፥ “እዮ ካረ ከስድ ታማን ፁግተ” ያግስ።
GEN 38:25 እዮ ካረ ከስያ ዎደ፥ “ታኒ ቃንꬃትዳይ ሀ ሚሸታ ጎዳሳ። ሀ ማታመይነ ፃምአይ ኦደባየኮ ኤራናዉ ዳንዳእኮ ኤራ” ጋዳ ባ አዝና አዋካ ኪታሱ።
GEN 38:26 ይሁድ ሄ ሚሸታ ኤርድ፥ “ታኒ ታ ናኣ ሴላስ እዮ እማቦና ግሾ፥ ታፐ እያ ፅሎ” ያግስ። ሄሳፈ ጉየ፥ እ ኢራ ዛሪድ አቅቤና።
GEN 38:27 እዉ የሎ ቃም ጋክያ ዎደ፥ እ ኡሎን መንተ ናይት ደኤይስ ኤረትስ።
GEN 38:28 እያ ማረትሽን፥ ኤንታፈ እሶይ ባ ኩሽያ ከስን የልስያራ፥ “ሀይስ ኮይሮ ከይስ” ጋናዉ ዞኦ ቃጭና ኤካዳ እያ ኩሸን ቃቻሱ።
GEN 38:29 ሽን እ ባ ኩሽያ ጉየ ኤክዳ ዎደ፥ እያ እሻይ ከይን እያ፥ “ኔኒ ዋናዳ ፖርፁ ጋዳ ከያዲ?” ያጋሱ። ሄሳ ግሾ፥ ፓረሳ (ፖርፁ ግስ) ጋዳ ሱንꬃሱ።
GEN 38:30 ሄሳፈ ጉየ፥ እያ ኩሸን ዞኦ ቃጭን ደእያ እያ እሻይ የለትስ። እያ ሱንꬃይ ዛራ (ዞኦ) ጌተትስ።
GEN 39:1 እስማኤላ አሳት ዮሰፋ ግብፀ ቢታ ኤፍዶሶና። ግብፀ ካዋ ሞርናታፐ እሱዋስ፥ ካዋ ናገይሳታ ሀላቃስ ዮሰፋ ባይዝዶሶና።
GEN 39:2 ጎዳይ ዮሰፋራ ደእያ ግሾ፥ እ ኦꬅያባ ኡባ እያዉ እንጀይስ። ያትን፥ ባ ግብፀ ጎዳ ሶን ደእስ።
GEN 39:3 ጎዳይ እያራ ደኤይሳነ እ ኦꬅያባ ኡባ እያዉ እንጀይዳይሳ ጶፅፋር በእዳ ዎደ፥
GEN 39:4 ዮሰፋ ዶስስ፥ ባዉ ማታ ኦሳንቾ ኦꬅስ። ጶፅፋር እያ ባ ኬꬃ ቦላነ ባዉ ደእያባ ኡባ ቦላ ሹምስ።
GEN 39:5 ሄ ዎደፐ ዶምድ፥ ጎዳይ ግብፀ ኡራ ኬꬃ ዮሰፋ ግሾ አንጅስ። ጎዳ አንጆይ ጶፅፋራ ሶንነ እያ ጋደን ደእያባ ኡባ ቦላ ዎꬍስ።
GEN 39:6 ሄሳ ግሾ፥ እ ምያ ካꬃፈ አትሽን፥ ባዉ ደእያ ሀራባ ኡባ ዮሰፋ ኩሸን ሼꬍስ። ዮሰፍ የገልስነ ማላ ሎኦ አስ።
GEN 39:7 ጉꬃ ዎደፐ ጉየ፥ እያ ጎዳ ማችያ ዮሰፋ በአዳ፥ “ሃያ፥ ታራ ዝንአ” ያጋሱ።
GEN 39:8 ሽን እ እፅድ፥ ኢኮ፥ “በአ፥ ታ ጎዳይ፥ ባዉ ደእያባ ኡባ ታ ኩሸን የግዳ ግሾ፥ ባ ሶን ደእያባስ አይኮካ ህርገና።
GEN 39:9 ሀ ሶን ታፐ አይ ኦንካ ባዋ። ኔኒ እያ ማቾ ግድያ ግሾ፥ ኔፐ አትሽን፥ ሀራ፥ እ ታዉ እሞናባይ ባዋ። ያትን፥ ታኒ ዋታዳ ሀይሳ መላ ዳሮ ኢታባ ሀናዳ ፆሳ ቦላ ናጋራ ኦꬆ?” ያግስ።
GEN 39:10 እያ ሄ ኦዳ ዎንታ ዎንታ ዮሰፋስ ኦድንካ፥ እ ኢራ አቆና ይኮ እ ማታ ሺቆና እፅስ።
GEN 39:11 ሽን እስ ጋላስ እ ባ ኦሶ ኦꬃናዉ ሶ ገልያ ዎደ፥ ሶ አይለታፐ ኦንካ ሶን ባዋ።
GEN 39:12 እያ ዮሰፋ አፍላ ኦይካዳ፥ “ታራ ዝንአ” ያጋሱ። ሽን እ ባ አፍላ እ ኩሽያን የግ አግድ፥ ሶፐ ካረ ዎፅ ከይስ።
GEN 39:13 ዮሰፍ ባ አፍላ እ ኩሽያን የግ አግድ፥ ሶፐ ካረ ዎፅ ከይዳይሳ እያ በእዳ ዎደ፥
GEN 39:14 ባ ሶ አይለታ ፄጋዳ፥ “ሄኮ፥ ታ አዝናይ ኤህዳ ሀ እብራወ ኡራይ ታና ካዉሻናዉ ኦይክስ። እ ታና ኢሳናዉ ታ ደእያሱዋ ገልስ፥ ሽን ታኒ ዋሳስ።
GEN 39:15 ያትን፥ እ ባ አፍላ ታ ማታን የግ አግድ፥ ሶፐ ካረ ዎፅድ ከይስ” ያጋሱ።
GEN 39:16 እ አዝናይ ሶ ያና ጋካናስ እያ ዮሰፋ አፍላ ባ ማታን ዎꬃሱ።
GEN 39:17 እ ይን፥ እያዉ ሀይሳዳ ጋዳ ኦዳሱ፤ “ሀይስ ነ ኤህዳ እብራወ አይለይ ታና ኢሳናዉ ታኮ ገልስ።
GEN 39:18 ሽን ታኒ ዋስን፥ ባ አፍላ ታ ማታን የግ አግድ፥ ሶፐ ካረ ዎፅ ከይስ” ያጋሱ።
GEN 39:19 እያ ጎዳይ ሀንዳባ ስእዳ ዎደ ዳሮ ይሎትስ።
GEN 39:20 እያ ጎዳይ ዮሰፋ ኤፍድ፥ ካዋ ቃሾ አሳይ ደእያ ቃሾ ኬꬃን የግስ።
GEN 39:21 ሽን ዮሰፍ ቃሾ ኬꬃን ደእያ ዎደ፥ ጎዳይ እያራ ደኤስ። ባ ኬሀተꬃ እያዉ ዳርስድ፥ ቃሾ ኬꬃ ካፑዋ ስንꬃን እያዉ ሳባ እሚስ።
GEN 39:22 ያንን፥ ቃሾ ኬꬃ ካፖይ ቃሾ አሳ ኡባ ዮሰፋ ኩሸን የግስ። ያን ኦሰትያባ ኡባስ አዋተꬃ እሚስ።
GEN 39:23 ጎዳይ ዮሰፋራ ግድድ፥ እ ኦꬅያባ ኡባ እያዉ እንጀይዳ ግሾ፥ ቃሾ ኬꬃ ካፖይ ዮሰፋ ኩሸን ደእያባስ አይኮካ ህርገና።
GEN 40:1 ጉꬃ ዎደፐ ጉየ፥ ግብፀ ካዋ ኡሻ ካፖይነ ካꬃ ካፖይ ባንታ ጎዳ፥ ግብፀ ካዋ ናቅዶሶና።
GEN 40:2 ካዎይ ሄ ናምኡ ካፖታ ቦላ ዳሮ ይሎትድ፥
GEN 40:3 ዮሰፍ ቃሸትዳ፥ ቃሾ ኬꬃ ናገይሳታ ካፑዋ ሶን ኤንታ ቃችስ።
GEN 40:4 ናገይሰታ ሀላቃይ ኤንታ ዮሰፋስ ሼꬍስ፥ እካ ኤንታዉ ኪተቴስ። ኤንቲ ቃሾ ኬꬃን ዳሮ ዎደ ኡትዶሶና።
GEN 40:5 ግብፀ ካዋ ኡሻ ካፖይነ ካꬃ ካፖይ፥ ቃሾ ኬꬃን ደእሸ ናምአይካ እስ ቃማ ዱማ ዱማ አሙሆ አሙህዶሶና። ሄ አሙሆታስ ዱማ ዱማ ብርሸꬃይ ደኤስ።
GEN 40:6 ዮሰፍ ዎንታ ኤንታኮ ገልያ ዎደ ኤንቲ አዛንድ ኡትዳሽን በእስ።
GEN 40:7 እ ኤንታና፥ “ሀች ህንተ ሶምኦይ አይስ ꬉምዴ?” ያግድ ኦይችስ።
GEN 40:8 ኤንቲ፥ “ኑ ናምአይካ አሙሆ አሙህዳ፥ ሽን ኑስ ብርሽያ አስ ꬋይስ” ያግዶሶና። ዮሰፍ ኤንታኮ፥ “አሙሆ ብርሽያ ኤራተꬃይ ፆሳባ ግደነዬ? አነ ህንተ አሙሁዋ ታዉ ኦድተ” ያግስ።
GEN 40:9 ያትን ኡሻ ካፖይ ባ አሙሁዋ ዮሰፋስ ኦድስ፤ “ታኒ ታ አሙሆን እስ ዎይነ ታ ስንꬃን በአስ።
GEN 40:10 ሄ ዎይንያስ ሄꬑ ታሸት ደኦሶና። እ ሀይፅድ፥ ጪይ ስሚድ ቴርስ።
GEN 40:11 ካዎ ዋንጭ ታ ኩሸን ደኤስ። ታኒ ዎይነ ቴራ ኤካዳ እያን ጉምአዳ፥ ሄ ዋንጫ ካዋ ኩሸን ዎꬃስ” ያግስ።
GEN 40:12 ዮሰፍ፥ “ሀ አሙሁዋ ብርሸꬃይ ሀይሳ፤ ሄꬑ ታሸት ሄꬑ ጋላሳታ።
GEN 40:13 ሄꬑ ጋላሳታ ግዶን ካዎይ ነና ቃሾፐ ብላና። እ ነና ካሰ ሹማተꬃኮ ዛራና። ካሰ ኔኒ ኡሻ ካፖ ግዳዳ ኦይሳዳ ኔኒ ካዋ ዋንጫ እያ ኩሽያን ዎꬃና።
GEN 40:14 ሽን ነዉ ሳእ ሎእዳ ዎደ ታና ዶጎፓ፤ ታዉ ኬሀ። ታባ ካዋስ ኦዳዳ፥ ሀ ቃሾ ኬꬃፈ ታና ከስሳ።
GEN 40:15 ታና እብራወ ቢታፈ ዎልቃን ኤህዶሶና። ሀር አቶሽን፥ ሀይሳን ታና ቃሾስ ጋꬅያባ አይብባካ ኦꬃብከ” ያግስ።
GEN 40:16 ካꬃ ካፖይ ዮሰፍ አሙሁዋ ሎይꬅድ ብርሽዳይሳ በእዳ ዎደ ዮሰፋኮ፥ “ታኒ አሙህዳ አሙሆይ ሀይሳ፤ ታ ሁጰን ሄꬑ ጋባተ ኡይꬅ ደኤስ፤
GEN 40:17 ቦላ ባጋ ጋባትያን ግብፀ ካዋስ ዱማ ዱማ ካꬃ ቆሞፈ ኡከትዳ ኡይꬃይ ደኤስ። ሽን ካፎት ሄ ታ ሁጰን ደእያ ጋባትያፐ ሞሶና” ያግስ።
GEN 40:18 ዮሰፍ፥ “ሄ አሙሁዋ ብርሸꬃይ ሀይሳ፤ ሄꬑ ጋባተት ሄꬑ ጋላሳታ።
GEN 40:19 ሄꬑ ጋላሳ ግዶን ካዎይ ነና ቃሾፐ ብላና። ነ ቆꬍያ ቃንፅስድ ምꬃን ካቅሳና፤ ነ አሹዋካ ካፎይ ማና” ያግስ።
GEN 40:20 ሄꬓንꬆ ጋላሳን ግብፀ ካዎይ ባ የለትዳ ጋላሳን ባ ሞርናታ ኡባስ ግብራ ጊግስስ። ኡሻ ካፑዋነ ካꬃ ካፑዋ ብል ኤህድ ባ አሳ ስንꬃን ኤስስ።
GEN 40:21 ኡሻ ካፑዋ እያ ሹማተꬃኮ ዛርን፥ እ ካዋ ኩሽያን ዋንጫ ዎꬅስ።
GEN 40:22 ሽን ካዎይ ካꬃ ካፑዋ ካቅስስ። ኡባይካ ዮሰፍ ኤንታ አሙሁዋ ብርሽዳይሳዳ ሀንስ።
GEN 40:23 ሽን ኡሻ ካፖይ ዮሰፋ ሀሳዮና ዶግ አግስ።
GEN 41:1 ናምኡ ላይꬃፈ ጉየ፥ ግብፀ ካዎይ አሙሆ አሙህስ። ሄ አሙሁዋን እ ናይለ ሻፋ ጋፃን ኤቅስ።
GEN 41:2 ላፑን ኦርደነ ሞꬎ ሚዛት ናይለ ሻፋፐ ከይድ፥ ማታ ምሽን በእስ።
GEN 41:3 ኤንታፈ ካልድ፥ ሀራ ላፑን ግልቃ ሚዛት ናይለ ሻፋፐ ከይድ፥ ሻፋ ጋፃን ደእያ ሀራ ሚዛታ ማታን ኤቅዶሶና።
GEN 41:4 ሄ ግልቃ ሚዛት ላፑን ኦርደነ ሞꬎ ሚዛታ ምትዶሶና። ሄሳፈ ጉየ፥ ካዎይ ባርክስ።
GEN 41:5 እ ዛር ꬍስክድ፥ ሀራ አሙሆካ አሙህስ። ላፑን ሎኦነ ሙሩታ ሞርኤት እስ ማቃ ቦላ ከይዶሶና።
GEN 41:6 ኤንታፈ ካልድ፥ ሌኦነ ዶሎሀ ባጋ ጫርኮን ሹልዳ ሀራ ላፑን ሞርኤት ከይዶሶና።
GEN 41:7 ሄ ሌእዳ ሞርኤት ሎኦነ ሙሩታ ሞርኤታ ምትዶሶና። ሄሳፈ ጉየ፥ ካዎይ ባርክድ አሙሆ ግደይሳ ኤርስ።
GEN 41:8 ሳአይ ዎንትን ꬍስኮፈ እ ደንድያ ዎደ እያ ዎዛናይ ያርክስ። ሄሳ ግሾ፥ ግብፀን ደእያ ብታንቾታነ ኤራንቾታ ኡባ ካዎይ ፄግስድ ኤንታዉ ባ አሙሁዋ ኦድስ። ሽን እያዉ ሄ አሙሁዋ ብርሽያ አስ ꬋይስ።
GEN 41:9 ኡሻ ካፖይ ሄ ዎደ ግብፀ ካዋኮ፥ “ታኒ ታ ናቁዋ ሀች ሀሳያይስ።
GEN 41:10 እስ ዎደ ካዎይ ባ አይለታ ሀንቀትድ፥ ታናነ ካꬃ ካፑዋ ቃሾ ኬꬃን የግስ።
GEN 41:11 ያን ደእሸ ኑ ናምአት አሙሆ አሙህዳ። ሄ አሙሆታስ ዱማ ዱማ ብርሸꬃይ ደኤስ።
GEN 41:12 ሄ ዎደ ናገይሳታ ካፑዋ አይለይ፥ እብራወ ፓንꬃይ፥ ኑራ ቃሾን ደኤስ። ኑኒ ኑ አሙሁዋ እያዉ ኦድን፥ እ ኑስ ሁጰን ሁጰን አሙሁዋ ብልስ።
GEN 41:13 ያንን፥ ሄ ሀኖት እ ኑስ ብልዳይሳዳ ሀንዶሶና። ሄስ አይበ ጊኮ፥ ታኒ ታ ሹማተꬃኮ ስማስ፥ ሀንኮይ ካቀትስ” ያግስ።
GEN 41:14 ያትን፥ ግብፀ ካዎይ ዮሰፋ ፄግስስ። ኤንቲ እያ ቃሾ ኬꬃፈ ኤለስድ ኤህዶሶና። እ ሜደትድ ባ ማኡዋ ላምድ፥ ካዋኮ ገልስ።
GEN 41:15 ካዎይ ዮሰፋ፥ “ታኒ አሙሆ አሙሀስ፥ ሽን ታዉ እስ አስካ ብላናዉ ዳንዳእቤና። ታኒ፥ ነ አሙሆ ብላናዉ ዳንዳኤይሳ ስአስ” ያግስ።
GEN 41:16 ዮሰፍ፥ “ታኒ ሄሳ ዳንዳእከ፥ ሽን ፆሳይ ካዋስ ሎኦነ ልከ ብርሸꬅ እማና” ያግስ።
GEN 41:17 ካዎይ፥ “ታኒ ታ አሙሆራ ናይለ ሻፋ ጋፃን ኤቅዳሽን፥
GEN 41:18 ላፑን ኦርደነ ሞꬎ ሚዛት ናይለ ሻፋፐ ከይድ፥ ማታ ሞሶና።
GEN 41:19 ኤንታፈ ካልድ፥ ሀራ ላፑን ግልቃነ ላፍዳ ሚዛት ከይዶሶና። ታኒ ሄሳ መላ ግልቃ ሚዝ ግብፀ ቢታን ኡባካ በአ ኤርከ።
GEN 41:20 ሄ ግልቃነ ላፍዳ ሚዛት ኮይሮ ከይዳ ላፑን ሞꬎ ሚዛታ ምትዶሶና።
GEN 41:21 ሽን ኤንታ ምትዳፐ ጉየ ካሰይሳዳ ግልቅ ኡትዳ ግሾ፥ ኤንቲ ምትዳባ ኦንካ ኤራናዉ ዳንዳእቤና። ሄሳፈ ጉየ ታኒ ባርካስ።
GEN 41:22 “ታኒ ታ አሙሁዋን ቃስ ላፑን ሎኦነ ሙሩታ ሞርኤት እስ ማቃ ቦላ ከይዳይሳታ በአስ።
GEN 41:23 ኤንታፈ ካልድ፥ ሌኦነ ዶሎሀ ባጋ ጫርኩዋን ሹልዳ ሀራ ላፑን ሞርኤት ከይዶሶና።
GEN 41:24 ሄ ሌእዳ ሞርኤት ላፑን ሎኦ ሞርኤታ ምዶሶና። ታኒ ሀ አሙሁዋ ብታንቾታስ ኦዳስ፥ ሽን ታዉ አሙሁዋ ብርሽያ አስ በንትቤና” ያግስ።
GEN 41:25 ሄሳፈ ጉየ ዮሰፍ ግብፀ ካዋኮ፥ “ካዋ አሙሆታ ብርሸꬃይ እስኖ። ፆሳይ ባ ኦꬃና ሀንያባ ካዋስ ቆንጭስስ።
GEN 41:26 ሄ ላፑን ሎኦ ሚዛት ላፑን ላይꬃታ፥ ቃስ ላፑን ሎኦ ሞርኤት ላፑን ላይꬃታ፥ ሀ አሙሆታ ብርሸꬃይ እስኖ።
GEN 41:27 ሄ ላፑን ግልቃነ ላፍዳ ሚዛት ላፑን ላይꬃታ፥ ቃስ ዶሎሀ ባጋ ጫርኩዋን ሹልዳ፥ ሌኦ ላፑን ሞርኤት ላፑን ኮሻ ላይꬃታ።
GEN 41:28 “ታኒ ካዋስ ኦድዳይሳዳካ፥ ፆሳይ ባ ኦꬃና ሀንያባ ካዋ በስስ።
GEN 41:29 ላፑን ዳሮ ካሎ ላይꬃት ግብፀ ቢታ ኡባን ያና።
GEN 41:30 ሽን ሄሳፈ ጉየ፥ ላፑን ኮሻ ላይꬃት ካልድ ያና። ሄ ዎደ ግብፀ ካሎይ ኡባይ ዶገታና፥ ኮሽ ቢታ ጫጫና።
GEN 41:31 ኮሻይ ዳሮ ኢታ ግድያ ግሾ ሄ ቢታ ካሎይ ዶገትድ አታና።
GEN 41:32 ናምኡ ኦግያን ካዋስ ሄ አሙሆይ በንትዳይ ፆሳይ ባ ቆፕዳባ ኦꬃናዉ ቃንፅዳ ግሾሳ። ሄሳ ፆሳይ ማታ ዎደን ኦꬃና።
GEN 41:33 “ሀእ ህዛ፥ ኔኒ ኤራንቾነ ጭንጫ አስ ኮያዳ ግብፀ ቢታን ሹማ።
GEN 41:34 ላፑን ካሎ ላይꬃን ካፅያ ካꬃፈ እቻሹ ኩሽያፐ እሱዋ ሺሻና አሳታ ሹማ።
GEN 41:35 ኤንቲ ያ ካሎ ላይꬃን ካꬃ ሺሽድ፥ ባንታ አዋተꬃን ካታማን ካታማን ምንጅድ ዎꬃና መላ ኪታ።
GEN 41:36 ቢታይ ኮሻን ꬋዮና መላ ሀ ካꬃይ ግብፀ ቢታን ላፑን ላይꬃን ደንዳና ኮሻስ ምንጀትድ ደኦ” ያግስ።
GEN 41:37 ያትን ሄ ኦዳይ ግብፀ ካዋስነ እያ ሞርናታስ ሎኦ ግድድ በንትስ።
GEN 41:38 ሄሳ ግሾ፥ ካዎይ ኤንታኮ፥ “ዮሰፋፐ አꬍያ ሀራ ፆሳ አያናራ ደእያ አስ ደማናዉ ዳንዳኦኮ” ያግስ።
GEN 41:39 ሄሳፈ ጉየ፥ ካዎይ ዮሰፋ፥ “ፆሳይ ሀይሳ ኡባ ነና ኤርስዳ ግሾ፥ ነ መላ ኤራንቾይነ ጭንጫ አስ ኦንካ ባዋ።
GEN 41:40 ታኒ ነና ታ ቢታን ሹማስ። ታ አሳ ኡባይ ነዉ ኪተታና። ታፐ ሀር ኔፐ አꬍያ ኦንካ ባዋ።
GEN 41:41 ሄኮ፥ ታኒ ነና ግብፀ ቢታ ኡባ ቦላ ሹማስ” ያግስ።
GEN 41:42 ሄሳፈ ጉየ፥ ካዎይ ባ ፓራምያ ምግዱዋ ባ ብራꬍያፈ ከስድ፥ ዮሰፋ ብራን አꬅስ። ቦንቾ ማኦነ ቆ ዎርቃ እያ ማይዝስ።
GEN 41:43 ካዎይ ባ ናምአንꬆ ፓራ ጋርያ ዮሰፋ ቶግስስ። ቦንቾ ዎታዳረይ፥ “ዝግተ! ዝግተ!” ያግሸ እያፐ ስንꬃራ ሄመቴስ። ሄሳዳ ኦꬅድ፥ ካዎይ እያ ግብፀ ቢታ ኡባ ቦላ ሹምስ።
GEN 41:44 ሄሳፈ ጉየ፥ ካዎይ ዮሰፋ፥ “ታኒ ካዎ ግድኮካ ነ ኪቶና ኦንካ ግብፀ ቢታ ኡባን ባ ኩሽያ ዎይኮ ባ ቶሁዋ ቃፆፎ” ያግስ።
GEN 41:45 ካዎይ ዮሰፋ፥ “ፃፍናት-ፓእና” ግድ ሱንꬅስ። እ እያዉ ኦና ካታማ ካህንያ ጶፅፋራ ናእዉ አስናቶ ማቾ እሚስ። ያንን፥ ዮሰፍ ግብፀ ቢታ ኡባ ቦላ ማታ ኤክስ።
GEN 41:46 ዮሰፍ ግብፀ ካዋስ ኦሶ ኦይክያ ዎደ፥ እያዉ ላይꬅ ሀስታማ። ዮሰፍ ካዋ ስንꬃፈ ከይድ፥ ግብፀ ቢታ ኡባ ግዶን ሄመትስ።
GEN 41:47 ሄ ላፑን ካሎ ላይꬃን ቢታን ዳሮ ካꬅ ካፅስ።
GEN 41:48 ዮሰፍ ግብፀ ቢታን ሄ ላፑን ካሎ ላይꬃ ካꬃ ኡባ ሺሽድ፥ ካታማታን ምንጅስ። እስ እስ ካታማ ዩሹዋን ደእያ ጋድያፐ ካꬃ ኡባ ሄ ካታማታን ሺሽስ።
GEN 41:49 ዮሰፍ አባ ሻፍያ መላ ዳሮ ካꬃ ሺሽስ። ካꬃ ዳሮተꬃፈ ደንዶይሳን ማካናዉ ዳንዳኤትቦና ግሾ፥ ማክ ማክ ቆለይሳ አጋግስ።
GEN 41:50 ኮሻ ላይꬅ ያናፐ ስን፥ ኦና ካታማ ካህነ ጶፅፋራ ናኤ አስናትፐ ዮሰፍ ናምኡ አደ ናይታ የልስ።
GEN 41:51 ዮሰፍ ባ ባይራ ናኣ ሱንꬃ፥ “ፆሳይ ታና ታ መቱዋነ ታ አዋ ሶ አሳ ኡባ ዶግስስ” ግድ ምናሰ ግድ ሱንꬅስ።
GEN 41:52 ናምአንꬆ ናኣ ሱንꬃካ፥ “ፆሳይ ታ መቶትዳ ቢታን ታዉ ናአ እሚስ” ግድ ኤፍሬማ ግድ ሱንꬅስ።
GEN 41:53 ግብፀ ቢታን ደእያ ሄ ላፑን ካሎ ላይꬃት አꬍዶሶና።
GEN 41:54 ዮሰፍ ኦድዳይሳዳ ላፑን ኮሻ ላይꬃት ካል ይዶሶና። ሀራ ቢታ ኡባን ኮሽ ከይስ፥ ሽን ግብፀ ቢታ ኡባን ካꬃይ ደኤስ።
GEN 41:55 ግብፀ ቢታይ ኡባይ ኮሻትዳ ዎደ፥ አሳይ ካꬃስ ካዋኮ ዋስዶሶና። ካዎይ ግብፀ አሳ ኡባ፥ “ዮሰፋኮ ብድ፥ እ ኦደይሳ ኦꬅተ” ያግድ ኪትስ።
GEN 41:56 ኮሻይ ግብፀ ቢታ ኡባ ጋክዳ ዎደ፥ ዮሰፍ ካꬃ ምንጅዳ ሻለታ ኡባ ዶይድ፥ ካꬅ ግብፀ አሳስ ባይዝስ።
GEN 41:57 ቢታ ኡባን ኮሽ ሱልዳ ግሾ፥ ሳአን ደእያ አሳ ኡባይ ካꬅ ዮሰፋፐ ሻማናዉ ግብፀ ይዶሶና።
GEN 42:1 ያይቆብ ግብፀን ካꬅ ደኤይሳ ስእዳ ዎደ ባ አደ ናይታ፥ “ህንተ እሶይ እሱዋ አይስ ፄሌቲ?
GEN 42:2 ግብፀን ካꬅ ደኤይሳ ታኒ ስአስ፤ ያ ብድ፥ ኑኒ ሀይቆና መላ ጉꬃ ካꬅ ሻምተ” ያግስ።
GEN 42:3 ያትን፥ ዮሰፋ እሻት ታማት ካꬅ ሻማናዉ ግብፀ ብዶሶና።
GEN 42:4 ሽን ያይቆብ እ ቆሄታና ግድ ህርግዳ ግሾ ዮሰፋ እሻ ብንያመ እያ እሻታራ የድቤና።
GEN 42:5 ካናነ ቢታን ዎልቃማ ኮሽ ደእያ ግሾ፥ ካꬅ ሻማናዉ በይሳታራ እስራኤለ አደ ናይት ግብፀ ገልዶሶና።
GEN 42:6 ሄ ዎደ ዮሰፍ ሄ ቢታ አይስያ ግሾ ቢታን ደእያ አሳ ኡባስ ካꬅ ባይዜስ። ሄሳ ግሾ፥ ዮሰፋ እሻት ያ ጋክዳ ዎደ ባንታ ሶምኡዋ ሳአ ጋꬅድ እያዉ ዝግዶሶና።
GEN 42:7 ዮሰፍ ባ እሻታ በእዳ መላካ ኤር አግስ። ሽን እ ኤንታ ኤሮና አሳዳ ሀንድ፤ ኤንታኮ፥ “ህንተ አዉፐ ይደት?” ያግድ ኦይችስ። ኤንቲ፥ “ካꬅ ሻማናዉ፥ ካናነ ቢታፈ ይዳ” ያግዶሶና።
GEN 42:8 ዮሰፍ ባ እሻታ ኤርስ፥ ሽን ኤንቲ እያ ኤርቦኮና።
GEN 42:9 ዮሰፍ ኤንታባ አሙህዳ ባ አሙሁዋ አኬክድ ኤንታኮ፥ “ህንተ ዎቻናዉ ይዳ አስ፥ ህንተ ኑ ቢታን ናጎይ ለፕያ ባጋይ አዉነኮ በአናዉ ይደታ” ያግስ።
GEN 42:10 ኤንቲ፥ “አካይ፥ ኑ ጎዳዉ፥ ኑኒ ዎቻናዉ ይዳ አስ ግዶኮ። ኑኒ ነ አይለት ካꬅ ሻማናዉ ይዳ።
GEN 42:11 ኑኒ ኡባይካ እስ አዋ ናይታ። ኑኒ ነ አይለት አማነትያ አስ” ያግዶሶና።
GEN 42:12 ዮሰፍ ኤንታኮ፥ “አካይ፥ ህንተ ኑ ቢታን ናጎይ ለፕያ ባጋይ አዉነኮ በአናዉ ይደታ” ያግስ።
GEN 42:13 ሽን ኤንቲ፥ “ኑኒ ነ አይለት ካናነ ቢታን ደእያ እስ ኡራ ናይታ፤ ኑኒ ታማነ ናምኡ እሻንታ። ዉርሰꬃ ካሎይ ሀእ ኑ አዋራ ሶን ደኤስ፥ እሶይ ሀይቅስ” ያግዶሶና።
GEN 42:14 ዮሰፍ ኤንታኮ፥ “ታኒ ህንተዉ ኦድዳይሳዳ ህንተ ቢታ ዎቸይሳታ።
GEN 42:15 ህንተ ፓጨታናይስ ሀይሳና፤ ቱማ ካዎይ ሀይቆ፥ ህንተ ዉርሰꬃ ካሎ እሻይ ሀይሳ ዮና እፅኮ፥ ህንተ ሀ በሳፈ ቤከታ።
GEN 42:16 ህንተ ኦደይስ ቱማ ግደይሳ ፓጫናዉ፥ ህንተፈ እሱዋ ኪትተ። እ ህንተ እሻ ኤክድ ዮ፥ አትዳይሳት ቃሾ ኬꬃን ጋምኤታ። ሄስ ሃኖና፥ ካዎይ ሀይቆ፥ ህንተ ቢታ ዎቸይሳታ” ያግስ።
GEN 42:17 ኤንታና ሄꬑ ጋላስ ቃሾ ኬꬃን ቃችስ።
GEN 42:18 ሄꬓንꬆ ጋላሳን ዮሰፍ ኤንታኮ፥ “ታኒ ፆሰ ያይያ አስ። ያንያ ግሾ፥ ህንተ እስባ ኦꬅኮ ህንተ ሸምፑዋ አሻና።
GEN 42:19 ህንተ ቱማካ አማነትያ አሰ ግድኮ፥ ህንተ እሻታፐ እሶይ ሀይሳን ቃሾ ኬꬃን ደኦ፤ አትዳይሳት ኮሻትያ ህንተ ሶ አሳስ ካꬅ ኤፍተ፤
GEN 42:20 ሽን ህንተ ዉርሰꬃ እሻ ታኮ ኤህኮ፥ ህንተ ቃላይ ቱማታና፤ ህንተካ ሀይቆና አታና” ያግስ። ኤንትካ እያ ኦዳ ኤሮ ግድ ኤክዶሶና።
GEN 42:21 ኤንቲ እሶይ እሱዋኮ፥ “ቱማ ኑኒ ኑ እሻስ ኦꬅዳባይ ኑና ካኤስ። እ ባ ሸምፑዋስ ዋትዋትድ ዎስያ ዎደ ኑኒ ስእሸ እፅዳ። ሄሳ ግሾ፥ ሀ ዋየይ ኑና ጋክስ” ያግዶሶና።
GEN 42:22 ሮቤል፥ “ታኒ ህንተና፥ ናኣ ቦላ ናጋራ ኦꬆፍተ ጋዳ ኦዳስ፥ ሽን ህንተ ስኦና እፅደታ። ሀእ እያ ሱꬃይ ኑና አቼስ” ያግስ።
GEN 42:23 ዮሰፍ ኤንታራ ቱርጁማነን ኦደትያ ግሾ ኤንቲ ግያባ እ ኤረይሳ ኤንቲ አኬክቦኮና፤
GEN 42:24 እ ኤንታፈ ሀራሶ ብድ ዬክስ። ሽን ዛር ኤንታኮ ይድ፥ ኤንታዉ ጉጅድካ ኦድስ። እ ስሞና ኤንታ ግዶፈ ከስድ ኤንቲ በእሽን ቃችስ።
GEN 42:25 ዮሰፍ ባ አይለታ፥ “ካꬃ ኤንታ ኦጎሩዋን ኩንꬅተ፤ ኤንታ ሚሽያካ ዛሪድ፥ ኤንታ ኦጎሩዋን ኦጎሩዋን የግተ። ኤንታዉ ኦገስ ሽንቀካ እምተ” ያግድ ኪትስ።
GEN 42:26 ኤንቲ እ ግዳይሳዳ ኦꬅዳፐ ጉየ፥ ዮሰፋ እሻት ካꬃ ባንታ ሀረታ ቦላ ጫንድ ብዶሶና።
GEN 42:27 ኤንቲ ቃማ አቅያ በሳን ኤንታፈ እሶይ ባ ሀርያስ ካꬃፈ የጋናዉ ባ ኦጎሩዋ ብልድ፥ ሄ ኦጎሩዋ ዶናን ደእያ ባ ሚሽያ ደምስ።
GEN 42:28 እ ባ እሻታኮ፥ “ታ ሚሸይ ታዉ ስምስ፤ ቱማ ሀይሳ በእተ፤ ታ ኦጎሩዋን ደኤስ” ያግስ። ኤንቲ ዳጋምድ ኮኮርሸ፥ እሶይ እሱዋኮ ስሚድ፥ “ፆሳይ ኑ ቦላ ኦꬅዳባይ ሀይስ አይቤ?” ያግዶሶና።
GEN 42:29 ኤንቲ ካናነ ቢታን ደእያ ባንታ አዋ ያይቆባኮ ይድ፥ ባንታና ጋክዳባ ኡባ እያዉ ኦድዶሶና።
GEN 42:30 ኤንቲ እያኮ፥ “ሄ ቢታ ሃርያ ኡራይ፥ ኑና ሄ ቢታ ዎችያ አሳዳ ኦꬅድ ኑ ቦላ ይሎትድ ኦደትስ።
GEN 42:31 ሽን ኑኒ እያኮ፥ ‘ኑኒ አማነትያ አስ፥ ቢታ ዎቸይሳታ ግዶኮ።
GEN 42:32 ኑኒ ታማነ ናምኡ እሻንት እስ አዋ ናይታ። እሶይ ሀይቅስ፤ ዉርሰꬃ ካሎይ ካናነ ቢታን ሀእ ኑ አዋራ ደኤስ’ ያግዳ።
GEN 42:33 ያትን ሄ ቢታ ሃርያ ኡራይ ኑና፥ ‘ህንተ አማነትያ አሰ ግደይሳ ታኒ ኤራና መላ ህንተ እሻታፐ እሱዋ ሀይሳን ታ ማታን አግድ፥ ኮሻትያ ህንተ ሶ አሳስ ካꬅ ኤክድ ቢተ።
GEN 42:34 ህንተ ቢታ ዎቸይሳታ ግዶና፥ አማነትያ አስ ግደይሳ ታኒ ኤራና መላ፥ ህንተ ዉርሰꬃ እሻ ታኮ ኤክድ ዪተ። ያትኮ፥ ታኒ ሀን አትዳ ህንተ እሻ ህንተዉ ዛራዳ እማና። ህንተካ ሀ ቢታን ደእድ ዛልአናዉ ዳንዳኤታ’ ” ያግዶሶና።
GEN 42:35 ኤንቲ ባንታ ኦጎሩዋፐ ካꬃ ቆልሸ፥ ባንታ ኦጎሩዋን ኦጎሩዋን ባንታ ሚሽያ ቃሹዋራ ኡትዳይሳ ደምዶሶና። ኤንትነ ኤንታ አዋይ ሄ ቃሹዋራ ደእያ ሚሽያ በእድ ያይዶሶና።
GEN 42:36 ኤንታ አዋ ያይቆብ ኤንታኮ፥ “ህንተ ታና ታ ናይታፐ መላ አሽደታ። ዮሰፍ ባዋ፥ ስሞን ባዋ፥ ሀእ ቃስ ብንያመ ኤፋናዉ ኮዬታ። ኡባባይ ታዉ ዞኮ ዛርስ” ያግስ።
GEN 42:37 ሄሳፈ ጉየ፥ ሮቤል ባ አዋኮ፥ “ታኒ ብንያመ ነዉ ዛራዳ ኤሆና እፅኮ፥ ታ አደ ናይታ ናምኣካ ዎꬋ። ታና አማነታዳ እያ ታ ኩሸን የጋ፤ ታኒ እያ ዛራዳ ኤሀና” ያግስ።
GEN 42:38 ሽን ያይቆብ ኤንታኮ፥ “ታ ናአይ ህንተራ ቤና፤ እያ እሻይ ሀይቅን፥ አትዳይ እያ ፃላላ። ህንተ ኤፍሽን፥ ኦገን ኢታባይ እያ ጋክኮ፥ ህንተ ታ ጭማተꬃ አፉꬁ ሙዝሸ ታ ሀይቁዋ ማታየታ” ያግስ።
GEN 43:1 ካናነ ቢታን ኮሻይ ሀእካ ካሰይሳፈ አꬍድ ዎልቃምስ።
GEN 43:2 ያንን፥ ኤንቲ ግብፀፈ ኤህዳ ካꬃ ኡባ ምድ ኦንግን፥ ኤንታ አዋይ፥ “ቃስካ ግብፀ ብድ ኑስ ጉꬃ ካꬅ ሻምተ” ያግስ።
GEN 43:3 ሽን ይሁድ፥ “ሄ ኡራይ ኑና፥ ‘ህንተ እሻይ ህንተራ ዮና እፅኮ፥ ታ ሶምኡዋ ዛር በኤከታ’ ያግድ ምንꬅድ ኦድስ።
GEN 43:4 ኔኒ ኑ እሻ ኑራ የድኮ፥ ኑኒ ግብፀ ብድ ነዉ ካꬅ ሻማና።
GEN 43:5 ሽን ሄ ኡራይ፥ ‘ህንተ እሻይ ህንተራ ዮና እፅኮ ህንተ ታ ሶምኡዋ ዛር በኤከታ’ ” ያግዳ ግሾ፥ ኔኒ እያ የዶናባ ግድኮ ኑኒ ቦኮ።
GEN 43:6 ያትን እስራኤለይ፥ “ህንተ፥ ‘ኑስ ሀራ እሽ ደኤስ’ ግድ ኦድድ ሀ መቱዋ ታ ቦላ አይስ ኤህደቲ?” ያግስ።
GEN 43:7 ኤንቲ ዛሪድ፥ “ሄ ኡራይ ኑባነ ኑ ሶ አሳባ ምንꬅድ ኦይችስ። እ ኑኮ፥ ‘ህንተ አዋይ ፓፃ ደኢ? ህንተዉ ሀራ እሽ ደኢ?’ ያግድ ኦይችስ። ኑኒ እ ኦይችዳይሳ እያዉ ዛርዳ። እ ኑና፥ ‘ህንተ እሻ ኤክ ዪተ’ ጋናባ ኑ አዉደ ኤርዶ?” ያግዶሶና።
GEN 43:8 ይሁድ ባ አዋ እስራኤለኮ፥ “ኑኒ፥ ኔንነ ኑ ናይት ኮሻን ሀይቃናፐ ናኣ ታራ የዳ፥ ኑኒ ባና።
GEN 43:9 ናአ ታ ዋሰተꬃን እማ፤ እያባ ታና ኦይቻ። ታኒ እያ ነዉ ሳሮ ዛራዳ ኤሆና እፅኮ፥ ታ ደኦ ኡባን ነ ባደꬃይ ታና ጋኮ።
GEN 43:10 ኑ ጋምኦናባ ግድያኮ፥ ሀኖደ ናምአንꬆ ያ ስማና ሽን” ያግስ።
GEN 43:11 ኤንታ አዋይ እስራኤለይ፥ “ሄሳ ግድኮ ሃረይሳስ ኩሸ ገንꬅያባ፥ ሀ ቢታን ካፅያባ ኡባፈ ሎኦባ ዶርተ። ሄስካ፥ ቅባተ፥ ሽቶ፥ ዱማ ዱማ ሳዎ፥ ኤስነ፥ ኦቾሎነ ህንተ ኦጎሩዋን የግድ፥ ኤክድ ቢተ።
GEN 43:12 ህንተ ኦጎሩዋ ዶናን ስምዳ ሚሸይ ባለትዳባ ግዳናዉ ዳንዳእያ ግሾ፥ ሚሽያ ናምኡ ኩሸ ኦꬅድ ኤክ ቢተ።
GEN 43:13 ህንተ እሻ ኤክድ፥ ሄ ኡራኮ ኤለስድ ጉየ ቢተ።
GEN 43:14 እ ሀንኮ ህንተ እሻነ ብንያመ ህንተራ የዳና መላ ኡባ ዳንዳእያ ፆሳይ ሄ ኡራይ ህንተዉ ቃታናዳ ኦꬆ። ታና ግድኮ፥ ታ ናይታፐ መላ አትኮካ አታስ” ያግስ።
GEN 43:15 ሄሳ ግሾ፥ እሻንት ዎላ ባንታ እምያባታ፥ ናምኡ ኩሸ ሚሽያነ ብንያመ ባንታራ ኤክድ ብዶሶና። ኤንቲ ግብፀ ጋክድ፥ ዮሰፋ ስን ሺቅዶሶና።
GEN 43:16 ዮሰፍ ብንያመ ኤንታራ በእዳ ዎደ ባ ኬꬃ ካፑዋኮ፥ “ሀ አሳታ ታ ሶ ኤካዳ ባ። እስ መሄ ሹካዳ ጊግሳ፤ ኤንቲ ካꬅ ታራ ማና” ያግድ ኪትስ።
GEN 43:17 ያትን ካፖይ፥ ዮሰፍ ኪትዳይሳዳ ሄ አሳታ እያ ሶ ኤፍስ።
GEN 43:18 ኤንቲ ዮሰፋ ሶ ብሸ፥ ያይድ፥ “ኤንቲ ኑና ሀይሳ ኤህዳይ ኮይሮ ኑ ኦጎሩዋን ስምዳ ሚሽያ ግሾ ግዶና አገና። ኤንቲ ኑና ቆህድ አይለተꬃን ሃሮናነ ኑ ሀረታ ኤኮና አጎኮና” ያግ ህርግዶሶና።
GEN 43:19 ሄሳ ግሾ፥ ኤንቲ ዮሰፋ ሶ ፐንገ ጋክድ፥ ኬꬃ ካፑዋ ኦድስዶሶና።
GEN 43:20 “ጎዳዉ፥ ኑኒ ኮይሮ ካꬅ ሻማናዉ ሀይሳ ይዳ።
GEN 43:21 ጉየ ስምሸ ኑኒ ቃማ አቅያ በሳን ኦጎሩዋ ብልያ ዎደ ሁጰን ሁጰን ኑ ሚሸይ ፓጮና ኑ ኦጎሩዋን ደኤይሳ ደምዳ። ሄኮ፥ ኑኒ ሄ ሚሽያ ጉየ ኤክ ይዳ።
GEN 43:22 ሀእ ኑኒ ካꬃ ሻማናዉ ሀራ ሚሸ ኦይክ ይዳ። ኑ ሚሽያ ኑ ኦጎሩዋን ኦን የግዳኮ ኤሮኮ” ያግዶሶና።
GEN 43:23 እ ዛሪድ፥ “አይኮይ ባዋ፥ ያዮፍተ፤ ህንተ ፆሳይ፥ ህንተ አዋ ፆሳይ፥ ህንተ ኦጎሩዋን ህንተዉ ሚሸ እሚስ። ታኒ ህንተ ጭግዳ ሚሽያ ኩመꬅ ኤካስ” ያግስ። ሄሳፈ ጉየ፥ ስሞና ኤንታኮ ከስስ።
GEN 43:24 ሄ ኡራይ ሄ አሳታ ዮሰፋ ሶ ኤፍድ፥ ኤንታ ቶሁዋስ ሃ ኤህን፥ ኤንቲ ሜጨትዶሶና። ኤንታ ሀረታስካ ምያባ የግስ።
GEN 43:25 ኤንቲ ዮሰፋራ ካ ማናይሳ ስእዳ ግሾ ባንታ እማናባታ ዮሰፋስ ጊግስዶሶና።
GEN 43:26 ዮሰፍ ባ ሶ ገልዳ ዎደ ኤንቲ ኤህዳ ባንታ እምያባታ እያዉ እምድ፥ እያ ስንꬃን ሳአ ጋክድ ዝግዶሶና።
GEN 43:27 እ ኤንታ ሳሮተꬃ ኦይች ስሚድ፥ “ህንተ ታዉ ኦድዳ ህንተ ጭምዳ አዋይ ሎኦ ደኢ? ሀእካ እ ፓፃ ደኢ?” ያግስ።
GEN 43:28 ኤንቲ፥ “ኤ፥ ነ አይለይ፥ ኑ አዋይ ፓፃ ደኤስ፤ እ ሎኦ” ያግድ፥ ሆክድ እያዉ ዝግዶሶና።
GEN 43:29 እ ባ አየ ናኣ ብንያመ በእዳ ዎደ ኤንታኮ፥ “ህንተ ኦድዳ ዉርሰꬃ ህንተ እሻይ ሀይሴ?” ያግስ። ብንያመ፥ “ታ ናአዉ፥ ነና ፆሳይ አንጆ” ያግስ።
GEN 43:30 ዮሰፍ፥ እያ እሻባይ እያዉ ጎምፓን ሴልዳ ግሾ፥ ኤለስድ፥ ቆልአ ገልድ ያን ዬክስ።
GEN 43:31 እ ባ ሶምኡዋ ሜጨትዳፐ ጉየ ከይድ ባና ምንꬅድ፥ ካꬅ አꬃና መላ ኪትስ።
GEN 43:32 ኤንቲ ዮሰፋስ ዱማ፥ እያ እሻታስ ዱማ አꬅዶሶና። ግብፀ አሳይ እብራወ አሳታራ እስፈ መይስ ባንታና ካዉሽያባ ኦꬅ ፄልያ ግሾ እያራ ምያ ግብፀ አሳታስ ዱማ አꬅዶሶና።
GEN 43:33 ኤንቲ ዮሰፋ ስንꬃን ባይራይ ባ ባይራተꬃን፥ ካሎይ ባ ካሎተꬃን ማራን ኡትዶሶና። ኤንቲ እሶይ እሱዋ ፄልድ፥ ኤንታ ዋትድ ኡትስዳኮ በእድ ማላለትዶሶና።
GEN 43:34 ዮሰፋ ጋይታፐ ኤንታዉ ቁም ግሸቴስ፥ ሽን ብንያመስ ሀራታፐ አꬅድ እቻሹ ኩሸ እሚስ። ያንድ፥ ኤንቲ ዮሰፋራ ምድ ኡይድ ኡፋይትዶሶና።
GEN 44:1 ዮሰፍ ባ ኬꬃ ካፑዋ፥ “ኔኒ ሀ አሳት ቶካናዉ ደንዳእዳ ኬና ኤንታ ኦጎሩዋን ካꬅ ኩንꬃ። ኤንታ ኡባ ሚሽያ ኤንታ ኦጎሩዋ ዶናን ዶናን የጋ።
GEN 44:2 ያታዳ ዉርሰꬃ ካሉዋ ኦጎሩዋ ዶናን ታ ብራ ዋንጫነ እ ሻማናዉ ኤህዳ ሚሽያ የጋ” ያግድ ኪትስ። እ ዮሰፍ ግዳይሳዳ ኦꬅስ።
GEN 44:3 ሳእ ዎንትን ሄ አሳት ባንታ ሀረታ ኤክድ ባናዉ ደንድዶሶና።
GEN 44:4 ኤንቲ ሄ ካታማፐ ከይድ ሃክ ቦና ደእሽን፥ ዮሰፍ ባ ኬꬃ ካፑዋኮ፥ “ሀ አሳታ ጌዶ ካላ። ኔኒ ኤንታ ጋክዳ ዎደ ኤንታኮ፥ ‘ህንተ አይስ ኬሀ ኢታን ዛርደቲ?
GEN 44:5 ሀይስ ታ ጎዳይ ኡየይሳነ ፁራባ ደምያ ዋንጫ ግደይሳ ኤረከቲ? አይስ ካይሶትደቲ? ሀይስ ህንተ ኦꬅዳባይ ዳሮ ኢታባ’ ያጋ” ያግስ።
GEN 44:6 ያትን እ ኤንታ ጌዶ ካል ጋክድ፥ ሄ ግዳይሳዳካ ኤንታዉ ኦድስ።
GEN 44:7 ሽን ኤንቲ፥ “ጎዳዉ ሀይሳ መላባ አይስ ኦደታይ? ሄሳ መላባ ኦሶይ ኑፐ ነ አይለታፐ ሃኮ።
GEN 44:8 ኑኒ ሀር አቶሽን፥ ኑ ኦጎሩዋ ዶናፐ ደምዳ ሚሽያ ካናነ ቢታፈ ጉየ ዛሪድ ነዉ ኤህዳይሳ ኤራሳ። ነ ጎዳ ኬꬃፈ ኑኒ ዎርቃ ዎይኮ ብራ ዋት ካይሶታኔ?
GEN 44:9 ነ አይለታ ግዶን ሄ ዋንጫይ በንትዳ ኡራይ ሀይቆ። ቃስ አትዳ ኑካ ኑ ጎዳስ አይለ ግዳና” ያግዶሶና።
GEN 44:10 እ ኤንታኮ፥ “ሄሳ ግድኮ ሎኦ፥ ህንተ ግዳይሳዳ ሀኖ። ዋንጫ ኤክዳ ኦንካ ታ አይለ ግዳና፤ አትዳይሳት ሳሮን ቤታ” ያግስ።
GEN 44:11 ሄሳፈ ጉየ፥ ኤንቲ ኤለስድ ባንታ ኦጎሩዋ ኦጎሩዋ ሳአን ዎꬅድ ብልዶሶና።
GEN 44:12 ሄ ካፖይ ኡባፈ ባይራ ኦጎሩዋፐ ዶምድ ዉርሰꬃ ካሉዋይሳ ጋካናስ ኮይድ፥ ሄ ዋንጫ ብንያመ ኦጎሩዋፐ ደምስ።
GEN 44:13 ሄሳን ኤንቲ አዛንድ፥ ባንታ ማኡዋ ፔꬍዶሶና። ባንታ ኦጎሩዋ ሀረታ ቦላ ጫንድ፥ ጉየ ካታማ ስምዶሶና።
GEN 44:14 ይሁድ ባ እሻታራ ዮሰፋኮ ገልያ ዎደ ዮሰፍ ሶን ደኤስ፤ ኤንቲ እያ ስንꬃን ሳአን ጉፋንዶሶና።
GEN 44:15 ዮሰፍ ኤንታኮ፥ “ህንተ አይብ ፓላባ ኦꬅደቲ? ታ መላ አስ ፁራባ ደማናዉ ዳንዳኤይሳ ህንተ ኤረከትዬ?” ያግስ።
GEN 44:16 ይሁድ፥ “ታ ጎዳስ ኑኒ አይ ጋኔ? ኑኒ አይ ኦደትያባይ ደኢ? ኑ ፅሎተꬃ ኑኒ ዋት በሳኔ? ፆሳይ ነ አይለታ ናቁዋ ቆንጭስስ። ህዛ ኑኒካ ሄ ዋንጫይ በንትዳ ኡራይካ ታ ጎዳስ አይለ ግድዳ” ያግስ።
GEN 44:17 ሽን ዮሰፍ፥ “ሄሳ መላባ ኦꬃናይስ ታፐ ሃኮ፤ ታ ዋንጫይ እያፐ በንትዳ ኡራ ፃላል ታ አይለ ግዳና። ሀንኮ ህንተ ህንተ አዋኮ ጉየ ሳሮ ስምተ” ያግስ።
GEN 44:18 ይሁድ እያኮ ሺቅድ “ታ ጎዳዉ፥ ኔኒ ካዋ መላ ግድኮካ ታኒ ኔራ ኦደታናዉ ነና ዎሳይስ። ታና ነ አይልያ ሀንቀቶፋ።
GEN 44:19 ኔኒ ታ ጎዳይ ኑና ነ አይለታ፥ ‘ህንተዉ አው ዎይኮ እሽ ደኢ?’ ጋዳ ኦይቻዳሳ።
GEN 44:20 ኑኒካ፥ ‘ኑስ ጭምዳ አዋይ ደኤስ። እ ጭማተꬃን የልዳ ካሎ ናአይካ ደኤስ። ሄ ናኣ እሻይ ሀይቅስ፥ ባ አየን እስኖ፥ እያ አዋይ እያ ዳሮ ዶሴስ’ ያግዳ።
GEN 44:21 “ኔኒ ኑኮ፥ ‘ታኒ እያ በአና መላ ታዉ ኤህተ’ ያጋዳሳ።
GEN 44:22 ያትን ኑኒ፥ ‘ሄ ናአይ ባ አዋፐ ሻከታናዉ ዳንዳኤና፤ ሻከትኮ እያ አዋይ ሀይቃና’ ያግዳ።
GEN 44:23 ሽን ኔኒ፥ ‘ህንተ ካሎ እሻይ ህንተራ ዮና እፅኮ፥ ታ አይፍያ ዛር በኤከታ’ ያጋዳሳ።
GEN 44:24 ኑኒ ኑ አዋኮ ስሚድ ብዳ ዎደ ነ ግዳይሳ እያዉ ኦድዳ።
GEN 44:25 “ኑ አዋይ፥ ‘ጉየ ብድ ጉꬃ ካꬅ ሻምተ’ ያግን፥
GEN 44:26 ኑኒ እያኮ፥ ‘ኑ ካሎ እሻይ ኑራ ቦና እፅኮ፥ ኡራ አይፍያ በአናዉ ዳንዳኦኮ። ኑ ካሎ እሻይ ኑራ ብያባ ግድኮ፥ ኑኒ ያ ባና’ ያግዳ።
GEN 44:27 “ያትን ኑ አዋይ ኑና፥ ‘ታ ማችያ ራሄላ ታዉ ናምኡ አደ ናይታ የልዳይሳ ህንተ ኤሬታ።
GEN 44:28 ኤንታፈ እሶይ ታፐ ሻከትድ ብን፥ እያ ዶእ ሞና አገና ያጋስ። ሀች ጋካናዉ ታኒ እያ በአብከ።
GEN 44:29 ሀይሳ ቃስ ታፐ ህንተ ሻክ ኤፍን፥ ኢታባይ እያ ጋክኮ፥ ህንተ ታና ታ ጭማተꬃን አፉꬁ ሙዝሸ ታ ሀይቁዋ ማታየታ’ ” ያግስ።
GEN 44:30 “ሄሳ ግሾ፥ ሀእ ታኒ ጉየ ታ አዋኮ ብያ ዎደ ብንያመይ ታራ ባናዉ በሴስ። ታ አዋይ ናኣ ሸምፖፈ ዶስያ ግሾ፥ ናአይ ኑራ ባይናይሳ በእኮ ሀይቃና። ኑኒ ነ አይለት ኑ አዋ ጭማተꬃ አፉꬃን ዱፎ ገልሶስ።
GEN 44:32 ታኒ ነ አይለይ ናኣ ታ ዋሰተꬃን ኤካስ። ቃስ፥ ‘ታ አዋዉ፥ ታኒ እያ ነዉ ሳሮ ዛራዳ ኤሆና እፅኮ ታ ደኡዋ ኡባን ነ ባደꬃይ ታና ጋኮ’ ያጋስ።
GEN 44:33 “ያንያ ግሾ፥ ታኒ ነ አይለይ ናኣ ግሾ አይለታዳ ሀይሳን አታና ናአይ ባ እሻታራ ጉየ ስሞ።
GEN 44:34 ናአይ ባይና ታኒ ዋናዳ ጉየ ታ አዋኮ ስማኔ? ታና ታ አዋይ ሴለታና ሴላ በሶፎ” ያግስ።
GEN 45:1 ሄ ዎደ ዮሰፍ ባ አይለታ ስንꬃን ገንጫናዉ ዳንዳእቦና ግሾ፥ “አሳ ኡባ ታ ስንꬃፈ ከስተ” ያግድ ዋስስ። ሄሳ ግሾ፥ ዮሰፍ ባ እሻታስ ባና ኤርስዳ ዎደ እያራ ኦንካ አላግ ባዋ።
GEN 45:2 እ ባ ቃላ ꬎቁ ኦꬅድ፥ ግብፀት እያ ስአና ጋካናዉ ዬክስ፤ ካዋ ሶ አሳይካ ሄ ዎርያ ስእዶሶና።
GEN 45:3 ዮሰፍ ባ እሻታኮ፥ “ታኒ ዮሰፋባይ። ታ አዋይ ሀኖ ጋካናስ ፓፃ ደኢ?” ያግድ ኦይችስ። ሽን እያ እሻት ዳሮ ዳጋምዳ ግሾ፥ እያዉ አይኮካ ዛራናዉ ዳንዳእቦኮና።
GEN 45:4 ያንን፥ ዮሰፍ ባ እሻታኮ፥ “ታኮ ሃ ሺቅተ” ያግስ። ኤንቲ እያኮ ሺቅን እ ኤንታ፥ “ታኒ ህንተ ታና ግብፀ ቢታ ባይዝዳ ህንተ እሻ ዮሰፋ።
GEN 45:5 ሀእ ህንተ ታና ባይዝዳ ግሾ፥ ቂሮቶፍተነ ህንተና ባዶፍተ። አይስ ጊኮ፥ ፆሳይ ታና ህንተፈ ስን ኪትዳይ አሳ ሸምፖ አሻናሳ።
GEN 45:6 ሀ ቢታ ኮሽ ገልን ሀይስ ናምአንꬆ ላይꬅ። አስ ጎዮና ዎይኮ ጫኮና ሀራ እቻሹ ላይꬃት ቡሮ ደኦሶና።
GEN 45:7 ሽን ታኒ ሳአን ህንተ ሼሻነ ህንተና ማላልስያ ኦገን አሻና መላ ፆሳይ ታና ህንተፈ ስን ኪትስ።
GEN 45:8 ሄሳ ግሾ፥ ታና ሀ በሳ ኪትዳይ ፆሳፈ አትሽን፥ ህንተና ግደከታ። እ ታና ግብፀ ካዋስ ዞርያ አዋ፥ እያ አቆ ኡባ ቦላ ጎዳነ ግብፀ ቢታ ሃርያ አስ ኦꬅስ።
GEN 45:9 “ሀእ ኤለስድ ጉየ ታ አዋኮ ብድ እያኮ፥ ነ ናአይ ዮሰፍ ሀይሳዳ ያጌስ ጊተ፤ ‘ፆሳይ ታና ግብፀ ቢታ ኡባ ቦላ ጎዳ ከስስ፤ ኔኒ ጋምኦና ታኮ ሃያ።
GEN 45:10 ነ ናይታ፥ ነ ናይታ ናይታ፥ ነ ዶርሳ፥ ነ ዴሻ፥ ነ መህያነ ነዉ ደእያባ ኡባ ኤካዳ ሃያ፤ ታ ማታን ጌሳመ ቢታን ደኣሳ።
GEN 45:11 ቡሮ እቻሹ ኮሻ ላይꬃት አትዶሶና። ነና፥ ነ ሶ አሳነ ነ መህያ ኮሽ ቆሆና መላ ታኒ ነና ሙዛና’ ” ያግስ።
GEN 45:12 ቃስካ ዮሰፍ ኤንታኮ፥ “ህንተካ፥ ታ እሻ ብንያመይካ፥ ሀ ህንተራ ኦደተይ ቱማ ታና ዮሰፋ ግደይሳ ህንተ አይፍያን በእደታ።
GEN 45:13 ታዉ ግብፀ ቢታን ደእያ ግታ ቦንቹዋነ ህንተ በእዳባ ኡባ ታ አዋስ ኦድተ። ታ አዋካ ኤለስድ ሃ ኤክድ ዪተ” ያግስ።
GEN 45:14 ዮሰፋራ ብንያመራ ናምአይ ዎሉ ቆምድ ዬክዶሶና
GEN 45:15 ዮሰፍ ዬክሸ ባ እሻታ ኡባ ዬርስ። ሄሳፈ ጉየ፥ እያ እሻት እያራ ኦደትዶሶና።
GEN 45:16 ዮሰፋ እሻታ ዩሳ ዎረይ ካዎ ኬꬅ ጋክዳ ዎደ ካዎይነ እያ ሞርናት ኡፋይትዶሶና።
GEN 45:17 ካዎይ ዮሰፋኮ፥ “ኔኒ ነ እሻታኮ ያጋ፤ ህንተ ሀረታ ጫንድ፥ ካናነ ቢታ ስምተ።
GEN 45:18 ህንተ አዋነ ህንተ ሶ አሳ ኤክድ፥ ጉየ ታኮ ሃ ዪተ። ታኒ ህንተዉ ግብፀ ቢታን ኡባፈ ሎእያ በሳ እምኮ፥ ሄ ቢታ ሞꬉዋ ህንተ ካሻና።
GEN 45:19 ቃስካ፥ ባንታ ናይታ፥ ባንታ ማቸታነ ባንታ አዋ ኤሀናዉ ግብፀፈ ግታ ፓራ ጋረ ኤክ ባና መላ ኤንታ ኪታ።
GEN 45:20 ግብፀ ቢታን ደእያ ኡባፈ አꬍድ ሎእያባይ ኤንታሳ ግድያ ግሾ፥ ባንታ አግድ ያ አቁዋስ ቆፖና መላ ኤንታዉ ኦዳ” ያግስ።
GEN 45:21 ያትን እስራኤለ አደ ናይት ካዎይ ግዳይሳዳ ኦꬅዶሶና። ዮሰፍ ካዎይ ኪትዳይሳዳ ግታ ፓራ ጋረታነ ኦገስ ሽንቀካ ኤንታዉ እሚስ።
GEN 45:22 ኤንታ ኡባስ ሁጰን ሁጰን ኦራꬃ ማኦ እሚስ። ሽን ብንያመስ ታማነ ኡሱፑን ክሎ ግራመ ዴፅያ ብራነ እቻሹ ኩመꬃ ማኦ እሚስ።
GEN 45:23 እ ባ አዋስ ግብፀን ደእያባፐ ሎእያባ ኡባ ታሙ አደ ሀረን ጫንድ፥ ቃስ ኦገስ ካꬅ፥ ኡይꬅነ ሀራ ካꬅ ታሙ ማጫ ሀረታን ጫንድ የድስ።
GEN 45:24 ያትድ፥ ዮሰፍ ባ እሻታ ሞይዝሸ፥ ኤንታኮ፥ “ኦግያን ብሸ ኦየቶፍተ” ያግስ።
GEN 45:25 ኤንቲ ግብፀፈ ደንድድ፥ ካናነ ቢታን ደእያ ባንታ አዋ ያይቆባኮ ስምዶሶና።
GEN 45:26 ኤንቲ ያይቆባኮ፥ “ዮሰፍ ፓፃ ደኤስ። እ ሄሳፈ አꬍድ ግብፀ ቢታ ኡባ ሃሬስ” ያግዶሶና። ያይቆብ ዳጋምድ፥ ዎዛና ꬋይዳ ግሾ፥ ኤንቲ ግያባ አማንበና።
GEN 45:27 ሽን ኤንቲ ዮሰፍ ኤንታዉ ኦድዳባ ኡባ እያዉ ኦድን፥ ቃስካ እያ ኤክ ያና መላ እ የድዳ ግታ ፓራ ጋረታ እ በእን እያዉ ሸምፖይ ስምስ።
GEN 45:28 እስራኤለይ፥ “ህዛ ታ አማነታስ። ታ ናኣ ዮሰፍ ሀኖ ጋካናስ ፓፃ ደኤስ። ታ ሀይቃናፐ ስን ባዳ እያ በአና” ያግስ።
GEN 46:1 እስራኤለይ ባዉ ደእያባ ኡባ ኤክድ፥ በርሳበ ጋክዳ ዎደ ባ አዋ ይሳቃ ፆሳስ ያርሾ ያርሽስ።
GEN 46:2 ፆሳይ ቃማ እስራኤለስ ቆንጭድ፥ “ያይቆባ፥ ያይቆባ” ያግስ። እካ፥ “ሄኮ፥ አበ ጎዳዉ” ግድ ኮይስ።
GEN 46:3 ፆሳይ እያኮ፥ “ታኒ ፆሳ፥ ነ አዋ ፆሳ፤ ኔኒ ግብፀ ባናዉ ባቦፋ። ታ ነ ሼሻ ያን ግታ ደረ ከሳና።
GEN 46:4 ታኒ ኔራ እስፈ ግብፀ ባና፤ ታኒ ነ ሼሻ ያፐ ከሳዳ ሃ ኤሀና። ነ ሀይቅያ ዎደ ዮሰፍ ነ አይፍያ ኦይካና” ያግስ።
GEN 46:5 ሄሳፈ ጉየ፥ ያይቆብ በርሳበፐ ደንድስ። እስራኤለ አደ ናይት ባንታ አዋ ያይቆባ፥ ባንታ ናይታነ ባንታ ማቸታ ግብፀ ካዎይ ኤንታዉ የድዳ ግታ ፓራ ጋረ ቦላ ኡትስድ ኤፍዶሶና።
GEN 46:6 ኤንቲ ካናነ ቢታን ሃርዳ ሃሩዋነ መሄ ኡባ ኤክ ብዶሶና። ያይቆብ ባ ሶ አሳ ኡባ ኤክድ ግብፀ ብስ።
GEN 46:7 እ ባ ሶ አሳ ኡባ፤ አደ ናይታነ ባ አደ ናይታ ናይታ፥ ባ ማጫ ናይታነ ባ ማጫ ናይታ ናይታ፥ ኡባ ባራ ኤክድ ግብፀ ብስ።
GEN 46:8 እስራኤለራ ግብፀ ቢታ ብዳ እያ ናይታ ሱንꬃይ ሀይሳፈ ካልድ ፃፈትዳይሳ። ያይቆባ ባይራ ናአይ ሮቤላ፤
GEN 46:9 ሮቤላ አደ ናይት ሀኖካ፥ ፓላ፥ ሄስሮናነ ካርማ።
GEN 46:10 ስሞና አደ ናይት ያሙኤላ፥ ያምና፥ ኦሀዳ፥ ያክና፥ ፆሃራነ ካናነ ማጫሴፐ የልዳ ሳኡላ።
GEN 46:11 ሌወ አደ ናይት ገድሶና፥ ቃሀታነ መራራ።
GEN 46:12 ይሁዳ አደ ናይት ኤራ፥ ኦናና፥ ሴላ፥ ፓረሳነ ዛራ። ሽን ኤርነ ኦናን ካናነ ቢታን ሀይቅዶሶና። ፓረሳ አደ ናይት ሄስሮናነ ሀሙላ።
GEN 46:13 ይሳኮራ አደ ናይት ቶላ፥ ፑአ፥ ዮባነ ሽምሮና።
GEN 46:14 ዛብሎና አደ ናይት ሳረዳ፥ ኤሎናነ ያህላላ።
GEN 46:15 ሀ አደ ናይትነ ማጫ ናእያ ዲና፥ ልያ ማሰጰፆመ ቢታን ያይቆባስ የልዳይሳታ። ዲና ጉጅን እያ ናይትነ ናይታ ናይት ኩመꬅ ሀስታማነ ሄꬓ።
GEN 46:16 ጋደ አደ ናይት ፃፎና፥ ሀገ፥ ሹና፥ ኤፅቦና፥ ኤር፥ አሮዳነ አርኤላ።
GEN 46:17 አሴራ አደ ናይት ይምና፥ የሱዋ፥ ይስዋነ በርአ። ኤንታ ምችያ ሳራሆ። በርአ አደ ናይት ሄቤራነ ማልክኤላ።
GEN 46:18 ሀይሳቲ ላቢ ባ ናኤ ልያስ እምዳ ዛላፋ ያይቆባስ የልዳ ናይታ። ኤንቲ ኩመꬅ ታማነ ኡሱፑና።
GEN 46:19 ያይቆባ ማቸ ራሄል አደ ናይት ዮሰፋነ ብንያመ።
GEN 46:20 ኦና ካታማ ካህነ ጶፅፋራ ናእያ አስናታ ዮሰፋስ ግብፀን ምናሰነ ኤፍሬማ የላሱ።
GEN 46:21 ብንያመ ናይት ቤላ፥ በከራ፥ አስቤላ፥ ጌራ፥ ናማነ፥ ኤሀ፥ ኦሮሻ፥ ሙፍማ፥ ሁፍማነ አራዳ።
GEN 46:22 ሀይሳቲ ያይቆባስ የለትዳ ራሄል አደ ናይታ። ኤንቲ ኩመꬅ ታማነ ኦይዳ።
GEN 46:23 ዳነ አደ ናአይ ሁሽማ።
GEN 46:24 ንፍታለመ አደ ናይት ያህፄላ፥ ጉና፥ የፀራነ ሽለመ።
GEN 46:25 ሀይሳቲ ላፑናት ላቢ ባ ናኤ ራሄልስ እምዳ ባል ያይቆባስ የልዳ ናይታነ ናይታ ናይታ።
GEN 46:26 ያይቆባራ ግብፀ ብዳ፥ እያ ጉልባታፐ ከይዳ ናይት፥ እያ ናይታ ማቸታ ጉጆና ኡሱፑን ታማነ ኡሱፑና።
GEN 46:27 ግብፀን ዮሰፋስ የለትዳ ናምኡ ናይታ ጉጅኮ፥ ግብፀ ብዳ ያይቆባ ሶ አሳይ ኩመꬅ ላፑን ታማ።
GEN 46:28 ጌሳመ ቢታን ባንታና ሞካና መላ ያይቆብ ይሁዳ ባፐ ስን ዮሰፋኮ ኪትስ። ኤንቲ ያ ጋክያ ዎደ፥
GEN 46:29 ዮሰፍ ባ ፓራ ጋርያ ጊግስድ፥ ባ አዋ እስራኤለራ ጋሄታናዉ ጌሳመ ብስ። ዮሰፍ ባ አዋ ደምዳ መላ እያ ቆꬍያን ፃፀትድ ዳሮ ዎደ ዬክስ።
GEN 46:30 እስራኤለይ ዮሰፋኮ፥ “ኔኒ ፓፃ ደእሽን፥ ታኒ ነ አይፍያ በእዳ ግሾ፥ ህዛ ታኒ ሀይቅኮካ አይኮይ ባዋ” ያግስ።
GEN 46:31 ሄሳፈ ጉየ፥ ዮሰፍ ባ እሻታነ ባ አዋ ሶ አሳታኮ፥ “ታኒ ግብፀ ካዋኮ ባዳ እያኮ፥ ‘ካናነ ቢታን ደእያ ታ እሻትነ ታ አዋ ሶ አሳይ ታኮ ይዶሶና።
GEN 46:32 ኤንቲ መሄ ሃረይሳታ፥ ኤንቲ ባንታራ ባንታ ዶርሳ፥ ባንታ ዴሻ፥ መህያነ ባንታዉ ደእያባ ኡባ ኤክድ ይዶሶና’ ያጋና።
GEN 46:33 ካዎይ ህንተና ፄግስድ፥ ‘ህንተ ኦሶይ አይቤ?’ ግድ ኦይችኮ፥
GEN 46:34 ህንተ እያኮ፥ ‘ኑኒ ነ አይለት ናአተꬃፈ ዶምድ ኑ አዋታዳ መሄ ሄሞስ’ ያግተ። ዶርሰ ሃርያ አስ ግብፀ አሳን ካትዳባ ግድያ ግሾ፥ እ ህንተ ጌሳመ ቢታን ዳና መላ ኦꬃና” ያግስ።
GEN 47:1 ዮሰፍ ባ እሻታፐ እቻሻታ ዶርድ ግብፀ ካዋኮ ገልድ ሀይሳዳ ያግስ፤ “ታ አዋይነ ታ እሻት፥ ባንታ ዶርሳ፥ ባንታ ዴሻ፥ ባንታ መህያነ ባንታዉ ደእያባ ኡባ ኤክድ ካናነ ቢታፈ ይድ፥ ሀእ ጌሳመን ደኦሶና” ያግስ።
GEN 47:3 ካዎይ ሄ እሻታኮ፥ “ህንተ ኦሶይ አይቤ?” ያግድ ኦይችስ። ኤንቲ ካዋኮ፥ “ኑኒ ነ አይለት ኑ አዋታዳ ዶርሰ ሃርያ አሳታ” ያግድ ዛርዶሶና።
GEN 47:4 ቃስካ ኤንቲ እያኮ፥ “ካናነ ቢታን ኮሽ ከይዳ ግሾነ ኑ መህያስ ምያባይ ꬋይዳ ግሾ፥ ኑኒ ሀይሳን ዳናዉ ይዳ። ሀያና ኑና ነ አይለታ ጌሳመ ቢታን ደኦ ጋርክ” ያግዶሶና።
GEN 47:5 ካዎይ ዮሰፋኮ፥ “ነ አዋይነ ነ እሻት ኔኮ ይዶሶና።
GEN 47:6 ህዛ ግብፀ ቢታይ ነ ኩሸና። ሀ ቢታን ኡባፈ አꬍድ ሎእያ በሳን ነ አዋነ ነ እሻታ ዎꬃ፤ ኤንቲ ጌሳመ ቢታን ደኦና። ኤንታ ግዶፈ ዱማ ቃራተꬅ ደኤይሳት ደእኮ፥ ሄሳታ ታ መህያ ቦላ ሹማ” ያግስ።
GEN 47:7 ሄሳፈ ጉየ፥ ዮሰፍ ባ አዋ ያይቆባ ገልስድ፥ ካዋ ስን አꬅስ። ያይቆብ ግብፀ ካዋ አንጅዳፐ ጉየ፥
GEN 47:8 ካዎይ ያይቆባ፥ “ነዉ አፑን ላይꬄ?” ያግድ ኦይችስ።
GEN 47:9 ያይቆብ ካዋኮ፥ “ታኒ ዳቡርሳን ደእዳ ላይꬃይ ፄታነ ሀስታማ። ታ ላይꬃይ በን ታ አዋት ዳቡርሳን ደእዳ ላይꬃፈ ጉꬃነ መቶይ ዳርዳ ላይꬅ” ያግስ።
GEN 47:10 ሄሳፈ ጉየ፥ ያይቆብ ካዋ አንጅድ፥ እያ ስንꬃፈ ካረ ከይስ።
GEN 47:11 ዮሰፍ ካዎይ ኪትዳይሳዳ ባ አዋነ ባ እሻታ ግብፀ ቢታን ራምሰ ካታማ ማታን ደእያ ኡባፈ አꬍዳ አራዳ ቢታን ኤንታ ዎꬅስ።
GEN 47:12 ዮሰፍ ባ አዋስ፥ ባ እሻታስነ ባራ ደእያ ኡባስ ኤንታ ናይታ ታይቡዋዳ ካꬅ እሚስ።
GEN 47:13 ቢታ ኡባን ኮሽ ሱልዳ ግሾ ቢታን ኡባን ካꬅ ባዋ፤ ግብፀይነ ካናነ ቢታይ ቆሄትዶሶና።
GEN 47:14 ዮሰፍ ግብፀ ካꬃ ባይዝድ፥ ግብፀንነ ካናነ ቢታታን ደእያ ሚሽያ ኡባ ሺሽድ ግብፀ ካዋ ኬꬃ ገልስስ።
GEN 47:15 ግብፀ ሚሸይነ ካናነ ሚሸይ ዉርዳ ዎደ ግብፀ አሳ ኡባይ ዮሰፋኮ ይድ “ኑስ ካꬅ እማ። ኑ ሚሸይ ዉርዳ ግሾ ኑኒ ነ ስንꬃን አይስ ኮሻን ሀይቃኔ?” ያግዶሶና።
GEN 47:16 ዮሰፍ ኤንታኮ፥ “ህንተ መህያ ኤክ ዪተ። ህንተ ሚሸይ ዉርዳባ ግድኮ፥ ታኒ ካꬃ ህንተ መህያራ ላማና” ያግስ።
GEN 47:17 ሄሳ ግሾ፥ ኤንቲ ባንታ መህያ ዮሰፋስ ኤህዶሶና። ዮሰፍ ኤንታ ፓራ፥ ዶርሳ፥ ዴሻ፥ ሚዛነ ሀርያ ካꬃራ ላምስ። እ ሄ ላይꬅ ኤንታ መህያ ኡባራ ካꬃ ላምድ፥ ኤንታ ሙዝድ ሻችስ።
GEN 47:18 ኤንቲ ካልያ ላይꬃን እያኮ ይድ “ኑኒ ኑ ጎዳፐ ቆስያባይ ባዋ፤ ኑ ሚሸይ ኡባይ ዉርስ። ኑ መህያካ ነዉ እም ድግዳ። ኑ ቦላፈነ ኑ ጋድያፐ አትሽን፥ ኑ ጎዳስ እማናባይ ሀራባይ ባዋ።
GEN 47:19 ኑኒ ነ በእሽን አይስ ኮሻን ሀይቃኔ? ኑ ጋደይካ አይስ ꬋዪ? ኑናካ ኑ ጋድያካ ሻማዳ ኑስ ካꬅ እማ። ኑኒ ካዋስ አይለታና፥ ኑ ጋደይካ እያባ ግዶ። ኑኒ ሀይቆና አታና መላ ኑ ጋደይካ ኦፆና መላ ዘረꬅ ኑስ እማ” ያግዶሶና።
GEN 47:20 ዮሰፍ ግብፀ ቢታ ኡባ ካዋስ ሻምስ። ኮሽ ሱልን፥ ግብፀ አሳይ ኡንኤትድ ባንታ ጋድያ ባይዝን ጋደይ ካዉዋባ ግድስ።
GEN 47:21 ዮሰፍ አሳ ኡባ ግብፀስ ሀ ጋፃፐ ህን ጋፃ ጋካናስ ካዋስ አይለ ኦꬅስ።
GEN 47:22 ሽን ካዎይ ካህነታስ ካꬅ እምያ ግሾ ዮሰፍ ኤንታ ጋድያ ሻምቤና። ሄሳ ግሾ፥ ባንታ ጋድያ ባይዝቦኮና።
GEN 47:23 ዮሰፍ አሳኮ፥ “ህዛ ሀች ታኒ ህንተናነ ህንተ ጋድያ ካዋስ ሻምዳ ግሾ፥ ዘረꬅ ኤፍድ ህንተ ጋደን ዘርተ።
GEN 47:24 ሽን ካꬃ ሺሽያ ዎደ አይፍዳባፐ እቻሹ ኩሽያፐ እስ ኩሽያ ካዋስ እምተ። አትዳ ኦይዱ ኩሸይ ህንተ ጋድያስ ዘረꬅ፥ ህንተዉነ ህንተ ሶ አሳስ ካꬅ ግዶ” ያግስ።
GEN 47:25 ኤንቲ፥ “ኔኒ ኑና አሻዳሳ። ኑ ጎዳ ስንꬃን ኑኒ ሳበትኮ፥ ኑኒ ካዋስ አይለታና” ያግዶሶና።
GEN 47:26 ሄሳ ግሾ፥ ዮሰፍ ግብፀ ቢታን አይፍዳባፐ እቻሹ ኩሽያፐ እሱዋ ካዋስ እመይሳ ህገ ከስስ። ሄ ዎጋይካ ሀች ጋካና ኤቅድ ደኤስ። ካህነታ ጋድያፐ አትሽን፥ ሀር ኡባይ ካዉዋባ ግድስ።
GEN 47:27 እስራኤለት ግብፀ ቢታን ጌሳመ ግያ በሳን ደእዶሶና። ኤንቲ ያን ዱረትዶሶና፤ የለት ዳርዶሶና።
GEN 47:28 ያይቆብ ግብፀ ቢታን ታማነ ላፑን ላይꬅ ደእስ። ያይቆብ ደእዳ ላይꬃይ ፄታነ ኦይታማነ ላፑና።
GEN 47:29 እስራኤለስ ሀይቅያ ዎደይ ማታትን፥ ባ ናኣ ዮሰፋ ፄግስድ ሀይሳዳ ያግስ፤ “ታኒ ነ ስንꬃን ሳበትዳባ ግድኮ፥ ነ ኩሽያ ታ ሸምፑዋ ቦላ ዎꬃ። ኔኒ ታዉ ምሸትያባ ግድኮ ታና ግብፀን ሞግከ ጋዳ ታዉ ጫቃ።
GEN 47:30 ሽን ታኒ ሀይቅያ ዎደ ታና ግብፀፈ ኤፋዳ፥ ታ ማይዛት ሞገትዳሱዋን ሞጋ” ያግስ። ዮሰፍ፥ “ታኒ፥ ነና ነ ግዳይሳዳ ኦꬃና” ያግስ።
GEN 47:31 ያይቆብ እያኮ፥ “አነ ታዉ ጫቃ” ያግስ። ዮሰፍ እያዉ ጫቅስ። ሄሳፈ ጉየ፥ እስራኤለይ ባ ጉፍያ ቦላ ካትድ ፆሳ ጎይንስ።
GEN 48:1 ሄሳፈ ጉየ፥ አሳይ፥ “ነ አዋይ ሳከቴስ” ያግድ ዮሰፋስ ኦድዶሶና። እ ባ ናምኡ አደ ናይታ ምናሰነ ኤፍሬማ ኤክድ ባ አዋ በአናዉ ብስ።
GEN 48:2 ያይቆብ፥ እያ ናአይ ዮሰፍ ይዳይሳ ስእዳ ዎደ፥ እስራኤለይ ባና ምንꬅድ ሂፃን ኡትስ።
GEN 48:3 ያይቆብ ዮሰፋ፥ “ኡባ ዳንዳእያ ፆሳይ ካናነ ቢታን ሎዛ ካታማን ታዉ ቆንጭድ፥ ታና አንጅስ።
GEN 48:4 እ ታና፥ ‘ታኒ ነ የለተꬃ ዳርሳና፥ ነና ዳሮ ደረ ኦꬃና። ሀ ቢታ ታኒ ኔፐ ጉየ፥ ነ ሼሻስ መርና ላታ ኦꬃዳ እማና’ ” ያግስ።
GEN 48:5 “ህዛ፥ ነ ናምኡ አደ ናይት፥ ታኒ ኔኮ ሃ ያናፐ ስን ግብፀን ነዉ የለትዳይሳት ታባ። ኤፍሬመይነ ምናሰይ ታዉ ሮቤላ መላነ ስሞና መላ።
GEN 48:6 ኤንታፈ ጉየ የለታናይሳት ነባ ግዶ። ኤንቲ ላታና ቢታይ ኤፍሬማ ሱንꬃንነ ምናሰ ሱንꬃን ግዶ።
GEN 48:7 ታኒ ማሰጰፆመፐ ስምሽን፥ ኤፍራታ ጋካናዉ ጉꬅ አትሽን፥ ራሄላ ካናነ ቢታን ሀይቃሱ። ታኒ እዮ ቤተለመ ጌተትያ ኤፍራታ ኤፍያ ኦግያ ጋፃን ሞጋስ” ያግስ።
GEN 48:8 እስራኤለይ ዮሰፋ አደ ናይታ ናምአታ በእዳ ዎደ፥ “ሀይሳቲ ኦናንቴ?” ያግድ ኦይችስ።
GEN 48:9 ዮሰፍ ባ አዋኮ፥ “ሀይሳቲ ፆሳይ ታዉ ሀ ቢታን እምዳ ናይታ” ያግስ። ያትን እስራኤለይ፥ “ታኒ ኤንታ አንጃና መላ፥ ኤንታ ታኮ ሃ ሺሻ” ያግስ።
GEN 48:10 እስራኤለይ ጭምን እያ አይፈይ እፅዳ ግሾ፥ ፄላናዉ ዳንዳኤና። ሄሳ ግሾ፥ ዮሰፍ ባ አደ ናይታ እያኮ ሺሽን፥ ያይቆብ ኤንታ እድምድ ዬርስ።
GEN 48:11 እስራኤለይ ዮሰፋ፥ “ታኒ ነ አይፍያ በአና ጋዳ ቆፓብከ፥ ሽን ፆሳይ ሄኮ ነ ናይታካ ታና በስስ” ያግስ።
GEN 48:12 ዮሰፍ ባ ናይታ ያይቆባ ጉልባታፐ ደንꬅድ፥ ባ ሶምኡዋ ሳአ ጋꬅድ ዝግስ።
GEN 48:13 ዮሰፍ ባ ናምኡ አደ ናይታ፥ ኤፍሬማ እስራኤለስ ሀድርሳ ባጋራ፥ ምናሰ እስራኤለስ ኡሻቻ ባጋራ ኤስስ።
GEN 48:14 እስራኤለይ ባ ኩሽያ ባርባፅድ ኤፍሬም ካሎ ግድኮካ፥ ባ ኡሻቻ ኩሽያ ሁጰን ዎꬅስ። ምናሰይ ባይራ ግድኮካ፥ እስራኤለይ ባ ሀድርሳ ኩሽያ ምናሰ ሁጰን ዎꬅስ።
GEN 48:15 ሄሳፈ ጉየ፥ ያይቆብ ዮሰፋ ሀይሳዳ ያግድ አንጅስ፤ “ታ አዋት አብራሃመይነ ይሳቅ፥ እያ ስንꬃን ደእዳ ፆሳይ፥ ታ ደኦ ኡባን ሀች ጋካናዉ ታና ሄምዳ ፆሳይ ነና አንጆ።
GEN 48:16 ኢታባ ኡባፈ ታና አሽዳ፥ እያ ኪታንቾይ፥ ሀ ናይታ ናጎ። ታ ሱንꬃይነ፥ ታ አዋታ አብራሃመ ይሳቃ ሱንꬃይ ኤንታን ፄገቶ። ኤንቲ ሳአ ቦላ ዳሮ” ያግድ አንጅስ።
GEN 48:17 ዮሰፍ ባ አዋይ ባ ኡሻቻ ኩሽያ ኤፍሬማ ሁጰን ዎꬅዳይሳ በእዳ ዎደ ዶስቤና። ሄሳ ግሾ፥ ኤፍሬማ ሁጵያፐ ደንꬅድ፥ ምናሰ ሁጰን ዎꬃናዉ ባ አዋ ኩሽያ ኦይክስ።
GEN 48:18 ዮሰፍ፥ “ታ አዋዉ፥ ሄሳ ግደና። ባይራይ ሀይሳ ነ ኡሻቻ ኩሽያ እያ ቦላ ዎꬃ” ያግስ።
GEN 48:19 ሽን እያ አዋይ እፅድ፥ “ታ ኤራይስ፥ ታ ናአዉ፥ ታ ኤራይስ። ምናሰይካ ግታ ደረ ግዳና፥ ሽን እያ ካሎ እሻይ እያፐ አꬍድ ግታታና። እያ ሼሻይካ ዳሮ ግታ ካዎተꬃ ግዳና” ያግስ።
GEN 48:20 እ ሄ ጋላስ ኤንታ አንጅሸ፥ “እስራኤለት አንጆ አንጅያ ዎደ፥ ‘ፆሳይ ህንተና ኤፍሬማዳነ ምናሰዳ ኦꬆ’ ያግድ ህንተ ሱንꬃን አንጃና” ያግስ። ያትድ ኤፍሬማ ምናሰፐ ስንꬃይስ።
GEN 48:21 ሄሳፈ ጉየ፥ እስራኤለይ ዮሰፋ፥ “ታኒ ሀይቃናዉ ማታስ፥ ሽን ፆሳይ ህንተራ ደኤስ። እ ህንተ አዋታ ቢታ ህንተና ጉየ ዛራና።
GEN 48:22 ታኒ አሞረታፐ ታ ማሻንነ ታ ዶንገን ኤክዳ ቢታ፥ ነ እሻታራ ነ ሻከታዳ ኤክያ ቢታ ቦላ ነዉ ጉጃዳ እማስ” ያግስ።
GEN 49:1 ሄሳፈ ጉየ፥ ያይቆብ ባ አደ ናይታ ፄግድ፥ “ስንꬃፈ ሀናናባ ታኒ ህንተዉ ኦዳና መላ ሀ ሺቅተ” ያግስ።
GEN 49:2 “ህንተኖ ያይቆባ ናይቶ፥ እስፈ ሺቅድ ስእተ፤ ህንተ አዋይ እስራኤለይ ኦደይሳ ሀይዝተ።
GEN 49:3 “ሮቤላ፥ ታ ባይራ ናአዉ፥ ኔኒ ታ ዎልቃ፤ ታ ምኖተꬃስ ኮይሩዋ፤ ኔኒ ቦንቾንካ ዎልቃንካ ኡባፈ አꬋሳ።
GEN 49:4 ኔኒ ሃꬃ መላ፥ ኤቅዳሶን ደአካ፤ ነ እሻታ ቦላ ባይራተꬅ ነዉ በሰና። ኔኒ ነ አዋ ሂፃን ከያዳሳ፤ ነ አዋ አርሳ ቱንሳዳሳ።
GEN 49:5 “ስሞንነ ሌወይ እሻታ፤ ኤንቲ ባንታ ማሻ ማካላተꬃስ ደንꬆሶና።
GEN 49:6 ኤንቲ ባንታ ሀንቁዋን አደ ዎꬍዶሶና፥ ባንታ አሙዋ ኩንꬃናዉ ቦራታ ጋድያ ቃንፅዶሶና። ያንያ ግሾ፥ ታኒ ኤንታ ዞረታን ገልከ፤ ኤንታ ሺቁዋንካ ኡትከ።
GEN 49:7 ኤንታ ዎልቃማ ሀንቆይ ኤንታ ዎዛና ኢታተꬃይ ባደትዳባ ግዶ። ታኒ፥ ኤንታ ያይቆባ አሳ ግዶን ላላና። እስራኤለ ቢታን ꬋርጫና።
GEN 49:8 “ይሁዳ፥ ነ እሻት ነና ጋላታና፤ ነ ኩሸይ ነ ሞርከታ ቆ ኦይካና፤ ነ አዋ ናይት ነዉ ሆክድ ዝጋና።
GEN 49:9 ይሁዳ፥ ኔኒ ዎዳላ ጋሞ፤ ታ ናአዉ፥ ኔኒ ሻንካፈ ዎꬍ ስሚድ፥ ጮጎትድ ዝንእዳ ጋሞ መላ። ነና ቦቻናዉ ዳንዳኤይ ባዋ።
GEN 49:10 መርናዉ ሃረይስ ያና ጋካናዉ ካዎተꬃ ፃምአይ፥ ይሁዳ ኩሸፐ ከየና፤ ካዎተꬃት እያዉ ኪተታና።
GEN 49:11 እ ባ ሀርያ ዎይነ ቦላ፥ ባ ሀረ ማራ ዶረትዳ ዎይነ ቦላ ቃቻና፤ እ ባ ማኡዋ ሱꬅ ዳንያ ዎይነ ኡሻን ሜጫና።
GEN 49:12 እያ አይፈይ ዎይነ ኡሻፈ አꬍድ ዱልካና፤ እያ አቻይ ፃማታፐ አꬍድ ቦፃና።
GEN 49:13 “ዛብሎን አባ ዶናን ዳና፤ እ አባ ዶናን ማርካበት ኤቅያ በሲ ግዳና፤ እያ ዛዋይ ስዶና ጋካና።
GEN 49:14 “ይሳኮር ምኖ ሀረ መላ፥ ጫናታ ግዶን ዝንኤስ።
GEN 49:15 ሽን እ ባ ሸምፕያ በሳይ ሎኦ ግደይሳነ ባ ቢታይ ኡፋይሰይሳ ግደይሳ በእያ ዎደ፥ ጫና ቶካናዉ ባ ሀሽያ ዝቅ ኦꬅድ፥ አይለተꬃ ኦሶ ኦꬃና።
GEN 49:16 “ዳነይ እስራኤለ ዘረꬃፈ እሱዋ ግድያ ባ አሳ ቦላ ፕርዳና።
GEN 49:17 ዳነይ ኦገ ጋፃን ደእያ ሾሻ መላ፥ ፓራ ሹቁልያ ዱክድ፥ ፓራ ቶግዳይሳ ጉየ የግያ ጎፐ መላ።
GEN 49:18 “አቤት ጎዳዉ፥ ታኒ ነ አሹዋ ናጋይስ።
GEN 49:19 “ጋደ፥ ቦንቀይሳት ቆሀና፤ ሽን እ ኤንታ ጌዶ ካልድ ኦይካና።
GEN 49:20 “አሴራ ቢታይ ኦርደ፤ እ ካዎታስ ሎኦ ካꬅ እማና።
GEN 49:21 “ንፍታለመይ ቃሸቶና የዳ ደእያ፥ ሎኦ ማራታ የልያ ገንኤ መላ።
GEN 49:22 “ዮሰፍ ሃꬃ ማታን ቶከትድ፥ ደረ ቦላ ዛእዳ፥ አይፈይ ኩምዳ ዎይነ መላ።
GEN 49:23 ዶንገን ዱከይሳት እያ ቦላ ደንዳና፤ ባንታ ዶንግያን ዱክሸ እያ ጎዳና።
GEN 49:24 ሽን ያይቆባ ፆሳ ዎልቃን፥ እስራኤለ ሄንꬃንቹዋ ናጉዋን፥ እያ ዶንገይ ምኖ፥ እያ ቀሰይ ፃላ ግዳና።
GEN 49:25 ነ አዋ ፆሳይ ነና ማዳና። ኡባ ዳንዳእያ ፆሳይ፥ ቦላ ሳሎ አንጁዋን፥ ጋርሳ ጪሙዋ አንጁዋን፥ መሄንካ የሎንካ ነና አንጃና።
GEN 49:26 ነ አዋ አንጆይ በንፐ ምንድ ደእያ ዙማታ አንጁዋፈካ፥ መርናዉ ደእያ ደረታፐ በንትያ ኡፋይስያ አንጁዋፈካ አꬌስ። ሀይስ ኡባይ ዮሰፋ ሁጰን፥ ባ እሻታ ግዶን ካፖ ግደይሳ ሊጰን ሸምፖ።
GEN 49:27 “ብንያመይ ቦንቅያ ሱꬉመ፤ ባ ኦልዳባ ዎንታ ሜስ፤ ባ ድእዳባ ኦማርስ ሻኬስ” ያግስ።
GEN 49:28 ሀይሳቲ ታማነ ናምኡ እስራኤለ ሼሻታ። ኤንታ አዋይ ኤንታ ሁጰን ሁጰን ኤንታዉ በሲያ አንጁዋ አንጅሸ ኤንታኮ ግዳባይ ሀይሳ።
GEN 49:29 ሄሳፈ ጉየ፥ እ ኤንታ ሀይሳዳ ያግድ ኪትስ፤ “ታኒ ታ ማይዛታን ጋሄታና ሀናይስ። ታና ህተ አድያ ኤፍሮና ጋደን ደእያ ጎንጎሉዋን ታ አዋታ ማታን ሞግተ።
GEN 49:30 ሄስካ፥ ካናነ ቢታን፥ ማምረ ማታን ደእያ፥ ማክፌላን ደእያ ጎንጎሉዋ። ሄ ጎንጎሎይ አብራሃመይ ሞጎስ ህተ አድያ ኤፍሮናፐ እያ ጋድያራ ሻምዳ ዱፉዋ።
GEN 49:31 አብራሃመይነ እያ ማችያ ሳራ፥ ይሳቅነ እያ ማችያ እርብቃ ያን ሞገትዶሶና። ታኒ ቃስ ልያካ ያን ሞጋስ።
GEN 49:32 ሄ ጋደይነ እያን ደእያ ጎንጎሎይ ህተታፐ ሻመትዳይሳ። ታና ያን ሞግተ” ያግስ።
GEN 49:33 ያይቆብ፥ ባ ናይታ ኪታ ኦንግዳፐ ጉየ ባ ቶሁዋ ባ ሂፃን ሺሽ ኤክድ፥ ባ ማይዛታን ጋሄትስ።
GEN 50:1 ዮሰፍ ባ አዋ አሀ ቦላ ኩንድድ፥ ዬርሸ እያዉ ዬክስ።
GEN 50:2 ሄሳፈ ጉየ፥ ዮሰፍ ꬋለ ሺሽያ ባ ኦሳንቾታ፥ ባ አዋ እስራኤለ አሀ ሽቶ ትይድ መልሳና መላ ኪትስ። ኤንቲ ትይድ መልስዶሶና።
GEN 50:3 ሽቶ ትሻ ዎጋይ ኦይታሙ ጋላስ ኩመꬅ ኤኬስ። ግብፀ አሳት እያዉ ላፑን ታሙ ጋላስ ዬክዶሶና።
GEN 50:4 ዬሆ ጋላሳት አꬍዳ ዎደ፥ ዮሰፍ ግብፀ ካዋ ኦሳንቾታ፥ “ታኒ ህንተ ስንꬃን ሳባ ደምዳባ ግድኮ፥ ታዉ ካዋስ ሀይሳዳ ያግድ ኦድተ።
GEN 50:5 ‘ታ አዋይ ታና እስ ጫቆ ጫቅስስ። ታኒ ሀይቃናዉ ማታስ። ታኒ ታ ሁጰን ካናነ ቢታን ቦክዳ ጎንጎሎ ዱፉዋን ታና ሞጋ’ ያግስ። ሄሳ ግሾ፥ ‘ሀእ ታኒ ያ ባዳ ታ አዋ ሞጋዳ ስማና መላ ታና የዳርክ’ ያግተ” ያግስ።
GEN 50:6 ያትን ካዎይ፥ “እ ነና ጫቅስዳይሳዳ ባዳ ነ አዋ ሞጋ” ያግስ።
GEN 50:7 ያትን ዮሰፍ ባ አዋ ሞጋናዉ ብስ። ካዋ ሞርናት ኡባይ፥ ካዋ ኬꬃንነ ግብፀን ደእያ ግታ አሳት ኡባይ ዮሰፋ ካልድ ብዶሶና።
GEN 50:8 ዮሰፋ ሶ አሳ ኡባይ፥ እያ እሻትነ እያ አዋ ሶ አሳት ዮሰፋራ ብዶሶና። ኤንታ ዮጋ ናይት፥ ኤንታ ዶርሳት፥ ኤንታ ዴሻትነ ኤንታ ሚዛ ዉድያ ፃላል ጌሳመን አትስ።
GEN 50:9 ፓራ ጋረትነ ቶጋት እያራ ብዶሶና። እያ ካልድ ብዳ አሳይ ዳሮ።
GEN 50:10 ኤንቲ ዮርዳኖሰ ሻፋ ማታን ደእያ አፃደ ጌተትያ ዉዱማ ጋክድ፥ ባንታ ቃላ ꬎቁ ኦꬅድ፥ ዘሌልድ ዬክዶሶና። ያን ዮሰፍ ባ አዋ ዬሁዋን ላፑን ጋላስ ኡትስ።
GEN 50:11 ሄ ቢታን ደእያ ካናነ አሳት አፃደ ዉዱማን ሄ ዬሁዋ በእዳ ዎደ፥ “ግብፀት አይብ ይባታ ዬሆ ዬኮና?” ያግዶሶና። ሄሳ ግሾ፥ ዮርዳኖሰ ማታን ደእያ ሄ በሳይ አቤል-ምፅራማ (ግብፀታ ዬሆ) ጌተትስ።
GEN 50:12 ያይቆባ ናይት ኤንታ አዋይ ኤንታ ኪትዳይሳዳ ኦꬅዶሶና።
GEN 50:13 ኤንቲ እያ አሀ ካናነ ቢታ ኤፍድ፥ ማምረፐ ኡሻቻ ባጋን ደእያ ማክፌላ ጎንጎሉዋን ሞግዶሶና። ሄስካ፥ አብራሃመይ ህተ አድያ ኤፍሮናፐ ሞጎስ ሻምዳ ጋድያ።
GEN 50:14 ዮሰፍ ባ አዋ ሞግዳፐ ጉየ፥ ባ እሻታራነ እያ አዋ ሞጋናዉ እያራ ብዳ ሀራ አሳታ ኡባታራ ግብፀ ስምስ።
GEN 50:15 ባንታ አዋይ ሀይቅዳፐ ጉየ፥ ዮሰፋ እሻት ባንታ ግዶን፥ “ኑኒ እያዉ ኦꬅዳ ኢታባ ኡባስ ዮሰፍ ኑና ባ ኡሎን ሞርክድ ሀሎ ከያናዉ ኮይኮ ኑኒ ዋናኔ?” ያግዶሶና።
GEN 50:16 ሄሳ ግሾ፥ ዮሰፋኮ ያግድ ኪታ ኪትዶሶና፤ “ነ አዋይ ሀይቃናፐ ስን ኑኮ፥
GEN 50:17 ‘ኔኒ፥ ነ እሻታ ናጋራነ ኤንታ ኢታ ናቁዋ ሀያና አቶ ያጋ ያግስ ግድ ኦድተ’ ያግስ። ሄሳ ግሾ፥ ሀእ ሀያና፥ ኑ ናጋራ፥ ነ አዋ ፆሳ አይለታ ናቁዋ አቶ ያጋ” ያግዶሶና። ዮሰፍ ሄሳ ስእድ ዬክስ።
GEN 50:18 ሄሳፈ ጉየ፥ እያ እሻት ባንታ ሁጰን እያኮ ይድ፥ እያ ስንꬃን ጉፋንድ፥ “ኑኒ፥ ነ አይለታ” ያግዶሶና።
GEN 50:19 ሽን ዮሰፍ ኤንታኮ፥ “ባቦፍተ፥ ታና ህንተዉ ፆሳ ግደትዬ?
GEN 50:20 ህንተ ታዉ ኢታ ኦꬅደታ፥ ሽን ሀእ ዳሮ አሳይ ሀይቆና አታና መላ ፆሳይ ሀይሳ ሎኦተꬃስ ኦꬅስ።
GEN 50:21 ሄሳ ግሾ፥ ህዛ ባቦፍተ። ታኒ ህንተናነ ህንተ ናይታ ሙዛና” ያግድ፥ ኤንታ ምንꬅድ ሎኦ ቃላ ሀሳይስ።
GEN 50:22 ዮሰፍ፥ እያዉ ላይꬅ ፄታነ ታማ ግዳና ጋካናስ ባ አዋ ሶ አሳራ ግብፀን ደእስ።
GEN 50:23 ኤፍሬማ ናይታነ፥ ኤንታ ናይታ ናይታ በእስ። ቃስ ምናሰ ናኣ ማክራ ናይታ፥ ባ ናይታ ኦꬅስ።
GEN 50:24 ሄሳፈ ጉየ፥ ዮሰፍ ባ እሻታ፥ “ታኒ ሀይቃናዉ ማታስ፥ ሽን ፆሳይ ህንተና ማዳናዉ ፆሞሳና። እ ህንተና ሀ ቢታፈ ከስድ፥ አብራሃመስ፥ ይሳቃስነ ያይቆባስ እማና ግድ ጫቅዳ ቢታ ኤፋና” ያግስ።
GEN 50:25 ዮሰፍ እስራኤለ ናይታ፥ “ፆሳይ ህንተና ማዳናዉ ፆሞስያ ዎደ፥ ህንተ ታ መቀꬃ ሀ ቢታፈ ኤክድ ቢተ” ያግድ ጫቅስስ።
GEN 50:26 ዮሰፍ ፄታነ ታሙ ላይꬅ ደእድ ሀይቅን፥ ሽቱዋን እያ አሀ ትይድ መልስዳፐ ጉየ፥ ግብፀ ቢታን ሳፅነን ዎꬅዶሶና።
EXO 1:1 ባንታ ሶ አሳ ኡባ ኤክድ፥ ያይቆባራ ግብፀ ብዳ እስራኤለ አደ ናይታ ሱንꬃይ ሀይሳፈ ካልድ ፃፈትዳይሳ፤
EXO 1:2 ኤንትካ ሮቤላ፥ ስሞና፥ ሌወ፥ ይሁዳ፥
EXO 1:3 ይሳኮራ፥ ዛብሎና፥ ብንያመ፥
EXO 1:4 ዳነ፥ ንፍታለመ፥ ጋደነ አሴራ።
EXO 1:5 ያይቆባ ሼሻት ኡባይ ላፑን ታማ። ዮሰፍ ካሰካ ግብፀን ደኤስ።
EXO 1:6 ዎደፐ ጉየን ዮሰፍ፥ እያ እሻትነ ሄ የለተꬃ ኡባይ ሀይቅዶሶና።
EXO 1:7 ሽን እስራኤለ ሼሻይ የለትድ ግብፀ ቢታ ኩማና ጋካናዉ ታይቦን ዳርዶሶናነ ምንዶሶና።
EXO 1:8 ሄሳፈ ጉየ፥ ዮሰፋ ኤሮና ሀራ ካዎይ ግብፀ ቢታን ካዎትስ።
EXO 1:9 ሄ ካዎይ ባ አሳ፥ “ሄኮ፥ ሀ እስራኤለት ኑፐ አꬍድ የለተꬃንነ ዎልቃን ዳርዶሶና።
EXO 1:10 ኑኒ ሂላቶና እፅኮ ኤንቲ ታይቦን ካሰይሳፈ ሃ ዳራና። ቆፖና ኦል ደንድኮ ኤንቲ ኑ ሞርከታራ እስፍድ ኑና ኦልድ፥ ቢታ የግድ ባናዉ ዳንዳኦሶና” ያግስ።
EXO 1:11 ሄሳ ግሾ ዴፆ ኦሶን ኤንታ ኡንኤꬃና መላ ኤንታ ቦላ ኢታ ካፖታ ዎꬅዶሶና። ኤንቲ ፕቶማነ ራምሰ ጌተትያ ሻሎ ዎꬅያ ካታማታ ካዋስ ኬፅዶሶና።
EXO 1:12 ሽን ግብፀት ኤንታ ዳርስ ኡንኤꬅንካ ኤንቲ ሃ ዳርድ የለትዶሶናነ ቢታ ጋክዶሶና። ግብፀት እስራኤለታ እፅዳ ግሾ ያይዶሶና።
EXO 1:13 ኤንታና ኢታ ኦሶ ኦስስዶሶና።
EXO 1:14 ኡርቃ የꬍሶን፥ ስምንቶን ፁበ መꬎን ቃስ ጋደ ኦስሶን ኤንታ ደኡዋ ጫምስዶሶና። ቃይ ባይና ዴፆ ኦሶ ኡባ ኤንታ ኦስስዶሶና።
EXO 1:15 ግብፀ ካዎይ ቃንꬃ እብራወ ማጫሳታ ኡሎ ፕትያ ስፖሮነ ፑሆ ጌተትያ ናምኡ ማጫሳታኮ ሀይሳዳ ያግስ፤
EXO 1:16 “እብራወ ማጫሳት የልያ ዎደ የለትዳ ናአይ አደ ግድኮ ዎꬍተ፥ ሽን ማጫ ግድኮ ፓፃ አግተ” ያግስ።
EXO 1:17 ሽን ኡሎ ፕተይሳት ፆሰ ባቢድ፥ ግብፀ ካዎይ ኪትዳይሳዳ ኦꬅቦኮና። ኤንቲ አደ ናይታ ፓፃ አግዶሶና።
EXO 1:18 ሄሳፈ ጉየ፥ ግብፀ ካዎይ ሄ ኡሎ ፕተይሳታ ፄግድ፥ “ህንተ አይስ ሀይሳ ኦꬅደቲ? አደ ናይታ አይስ ፓፃ አገቲ?” ያግድ ኤንታ ኦይችስ።
EXO 1:19 ኡሎ ፕተይሳት ዛሪድ፥ “እብራወ ማጫሳት ግብፀ ማጫሳታ መላ ግዶኮና። ኤንቲ ምኖ ግድያ ግሾ ኡሎ ፕተይሳት ጋካናፐ ስንꬃትድ የሎሶና” ያግዶሶና።
EXO 1:20 ሄሳ ግሾ ፆሳይ ኡሎ ፕተይሳታስ ኬህስ። እስራኤለ አሳይ ካሰይሳፈ ሃ ዳርሸነ ምንሸ ብዶሶና።
EXO 1:21 ቃስ ኡሎ ፕተይሳት ፆሳስ ያይዳ ግሾ ፆሳይ ኤንታዉ ኤንታ ሶ አስ እሚስ።
EXO 1:22 ሄሳፈ ጉየ ካዎይ ባ አሳ ኡባኮ፥ “እብራወታፐ የለትያ አደ ኡባ ናይለ ሻፋን የግተ፤ ሽን ማጫ ናእ የለትኮ ፓፃ አግተ” ያግድ ኪትስ።
EXO 2:1 ሄ ዎደ ሌወ ቆሞ ግድዳ እስ ኡራይ ሌወ ማጫስ እስዉ ኤክስ።
EXO 2:2 ሄ ማጫስያ አደ ናአ የላሱ። ናአይ ማላ ሎኦ ግደይሳ በአዳ ሄꬑ አጌና ቆሳሱ።
EXO 2:3 ሽን እያ ሄሳፈ ዳሮ ቆሳናዉ ዳንዳኦናይሳ ኤራዳ፥ ማቃፈ ዳቾ ዳዳዳ፥ ማደ መላባ ትያዳ ናኣ እያን ዎꬃሱ። ያታዳ ናይለ ሻፋ ጋፃን ማይጫ ግዶን ዎꬃሱ።
EXO 2:4 እያ ምችያ እያ ጋክያባ በአናዉ ሃሆን ኤቃሱ።
EXO 2:5 ግብፀ ካዉዋ ናእያ ቦላ ሜጨታናዉ ናይለ ሻፋ ዎꬋሱ። እ ማጫ አይለት ሃꬃ ዶናን ይያ ሃ ስመረቶሶና። እያ ዳቾ ማይጫ ግዶን ደማዳ፥ ባ አይልዉ ባዳ ኤሀና መላ ኪታሱ።
EXO 2:6 ዳቾ ዶያዳ ሄ ጉꬃ ናኣ በአሱ። እ ዬከይሳ በአዳ ቃታዳ፥ “ሀይስ እብራወታ ጉꬃ ናይታፐ እሱዋ” ያጋሱ።
EXO 2:7 ሄ ዎደ እያ ምችያ ካዉዋ ናኤኮ፥ “ሀ ናኣ ꬋንꬃና መላ እብራወ ማጫስ ነዉ ኤሆ?” ያጋዳ ኦይቻሱ።
EXO 2:8 እያ፥ “ኤ፥ ኤሀ” ያጋሱ። ናእያ ባዳ ናኣ አይዉ ኤሀሱ።
EXO 2:9 ካዉዋ ናእያ ማጫስዉ፥ “ሀ ናኣ ኤፋዳ፥ ታዉ ꬋንꬃ፤ ድቻ፤ ታኒ ነዉ ዳሞዘ ቃንፃና” ያጋሱ። ማጫስያ ናኣ ኤፋዳ ꬋንꬃሱ።
EXO 2:10 ናአይ ድጭን፥ ካዉዋ ናኤኮ ኤሀሱ፤ እ እዉ ናአ ግድስ። “ታኒ ሃꬃፈ እያ ከሳ ኤካስ” ጋዳ፥ እያ ሙሰ ጋዳ ሱንꬃሱ።
EXO 2:11 ሙሰይ ድጭዳፐ ጉየ እስ ጋላስ ባ አሳ በአናዉ ብድ፥ ኤንቲ ዴፆ ኦሶ ኦꬅሽን ኤንታ በእስ። ግብፀ አስ እሶይ እብራወታፐ እሱዋ ባ ያራ ዋꬍሽን በእስ።
EXO 2:12 እ ይያ ሃ ፄልን፥ ኦንካ ባይናይሳ በእድ፥ ሄ ግብፀ ኡራ ዎꬍድ ሻፈን ቆስስ።
EXO 2:13 ዎንተꬃ ጋላስ ከይድ፥ ናምኡ እብራወት ዋትሽን በእስ። ቆሄይሳኮ፥ “ኔኒ ነ ዳቡዋ አይስ ሾጫይ?” ያግድ ኦይችስ።
EXO 2:14 ሄ ኡራይ፥ “ነና ኑ ቦላ ሃረይሳነ ዳይና ኦꬅዳይ ኦኔ? ኔኒ ዝነ ግብፀ ኡራ ዎꬍዳይሳዳ፥ ታናካ ዎꬋናዉ ኮያይ?” ያግስ። ሙሰይ ሄ ዎደ፥ “ታኒ ኦꬅዳባይ አሳን ኤረትስ” ያግ ቆፕድ ያይስ።
EXO 2:15 ካዎይ ሄሳ ስእዳ ዎደ፥ ሙሰ ዎꬍሳናዉ ኮይስ። ሽን ሙሰይ በትድ፥ ምድያመ ቢታን ደአናዉ ብስ። እስ ጋላስ እ ሃꬃ ኦላ ዶናን ኡትስ።
EXO 2:16 ሄ ዎደ ምድያመ ካህነ እሱዋስ ላፑን ማጫ ናይት ደኦሶና። ኤንቲ ባንታ አዋ ዶርሳታ ጎንገን ሃ ዱቅ ኡሻናዉ ይዶሶና።
EXO 2:17 ሄንꬃንቾት ይድ ማጫ ናይታ ጎድዶሶና። ሽን ሙሰይ ኤንታ ማድድ ኤንታ ዶርሳታ ሃ ኡሽስ።
EXO 2:18 ኤንቲ ባንታ አዋ የቶራኮ ይዳ ዎደ፥ “ሀች ዋን ኤለስ ይደቲ?” ያግድ ኦይችስ።
EXO 2:19 ኤንቲ ዛሪድ፥ “ግብፀ አስ እሶይ ኑና ሄንꬃንቾታፐ አሽስ። ሃ ዱቅድ ዶርሳታ ኡሽስ” ያግዶሶና።
EXO 2:20 እ ባ ማጫ ናይታ፥ “ያትን እ አዉን ደኢ? ህንተ ሄ ኡራ አይስ አግድ ይደቲ? ኑራ ካꬅ ማና መላ አነ እያ ፄግተ” ያግስ።
EXO 2:21 ሙሰይ ሄ አድያራ ያን ደአናዉ ቆፋ ቃችስ። ዮቶር ባ ናእዉ ስፖሮ ሙሰስ ማቾ ኦꬅድ እሚስ።
EXO 2:22 ስፖራ አደ ናአ የልን፥ ሙሰይ እያ፥ “ታኒ ሀ ቢታን በተ አስ” ግድ ገርሳማ ግድ ሱንꬅስ።
EXO 2:23 ዳሮ ላይꬃፈ ጉየ ግብፀ ካዎይ ሀይቅስ። ሽን እስራኤለት ባንታ አይለተꬃን ኡንኤትድ ዋስዶሶና። ባንታ አይለተꬃን ኤንቲ ዋስዳ ዋሶይ ፆሳኮ ጋክስ።
EXO 2:24 ፆሳይ ኤንታ ዋሱዋ ስእድ፥ እ አብራሃመራ፥ ይሳቃራነ ያይቆባራ ጫቅዳ ጫቁዋ ሀሳይስ።
EXO 2:25 ፆሳይ እስራኤለታ አይለተꬃ ኡንኣ በእድ ኤንታና ቆፕስ።
EXO 3:1 እስ ዎደ ሙሰይ ምድያመ ቢታ ካህንያ፥ ባ ቦሉዋ ዮቶራ ዶርሳነ ዴሻ ሄሜስ። እ ሄ ዉድያ ላግ ኤክድ መላ ቢታ ጋፃን ፆሳ ዙማ ጌተትድ ፄገትያ ኮሬባ ዙማ ቦላ ኤፍስ።
EXO 3:2 ሄ በሳን ጎዳ ኪታንቾይ ቱሽያን ኤፅያ ታማ ላጩዋ ግዶን እያዉ በንትስ። ሙሰይ ቱሸይ ታማን ኦይከትንካ ታማይ ቱሽያ ሞናይሳ በእድ፥
EXO 3:3 “ታኒ ይያ ባዳ፥ ቱሸይ አይስ ታማን ሜተቶናኮ ሄ ኦራꬃባ ሺቃዳ በአና” ግድ ቆፕስ።
EXO 3:4 እ በአናዉ ሺቅዳይሳ ጎዳይ በእድ፥ ቱሽያ ግዶፈ፥ “ሙሰ! ሙሰ!” ግድ ፄግስ። ሙሰይ፥ “ሄኮ፥ አበ ጎዳዉ” ግድ ኮይስ።
EXO 3:5 ፆሳይ እያኮ፥ “ሃ ሺቆፓ። ኔኒ ኤቅዳ ቢታይ ጌሽ ግድያ ግሾ፥ ነ ቶሁዋን ደእያ ጫማ ከሳ” ያግስ።
EXO 3:6 ጎዳይ እያኮ፥ “ታኒ ነ አዋታ፥ አብራሃመ፥ ይሳቃነ ያይቆባ ፆሳ” ያግስ። ሙሰይ ፆሳ ባአናዉ ያይዳ ግሾ፥ ባ ሶምኡዋ ካምስ።
EXO 3:7 ጎዳይ ቃስካ ሀይሳዳ ያግስ፤ “ታኒ ግብፀን ደእያ ታ አሳይ አይ መላ ዋያኮ በአስ። ኤንቲ ባንታና ኡንኤꬅድ ሃረይሳታፐ አሻና መላ ታኮ ዋስያ ዋሱዋ ስአስ። ኤንታ ዋያካ ኤራይስ።
EXO 3:8 ሄሳ ግሾ፥ ታኒ ኤንታ ግብፀ አሳ ኩሸፐ አሻናዉነ ሄ ቢታፈ ኤንታ ከሳዳ፥ ሀእ ካናነት፥ ህተት፥ አሞረት፥ ፓርዘት፥ ህወትነ ያቡሰት ደእያ ቢታ፥ ማꬅነ ኤስ ኩምዳ ሎኦ ቢታ ኤሀናዉ ዎꬋስ።
EXO 3:9 ታ ደርያ ዋሶይ ሀእ ታና ጋክስ። ግብፀ አሳት ኤንታ ቆህዳ ቆሁዋ ታኒ በአስ።
EXO 3:10 ሄሳ ግሾ ሀእ ኔኒ ታ አሳ እያ ቢታፈ ከሳና መላ ግብፀ ካዋኮ ታኒ ነና ኪታይስ” ያግስ።
EXO 3:11 ሽን ሙሰይ፥ “ካዋኮ ባናዉነ እስራኤለታ ግብፀፈ ከሳናዉ ታኒ ኦኔ?” ያግስ።
EXO 3:12 ፆሳይ ዛሪድ፥ “ታኒ ኔራ ግዳና። ቃስ ታኒ ነና ኪትዳይሳስ ማላይ ሀይሳ፤ ኔኒ ታ አሳ ግብፀፈ ከስያ ዎደ ሀ ዙማ ቦላ ህንተ ታና ጎይናና” ያግስ።
EXO 3:13 ሙሰይ ፆሳኮ፥ “ግዶሽን፥ ታኒ እስራኤለታኮ ባዳ ኤንታኮ፥ ‘ህንተ አዋታ ፆሳይ ታና ህንተኮ ኪትስ’ ያግኮ፥ ኤንቲ ታና፥ ‘እያ ሱንꬃይ ኦኔ?’ ያግድ ኦይችኮ፥ ታኒ ኤንታዉ ዎይጋዳ ዛሮ” ያግስ።
EXO 3:14 “ፆሳይ ሙሰኮ፥ ‘ደኤይስነ ዳናይስ፥ ታና’ ኔኒ እስራኤለታኮ፥ ‘ታን ታና ግድዳይስ’ ታና ህንተኮ ክትስ ያጋ” ያግስ።
EXO 3:15 ፆሳይ ዛሪድ፥ “ኔኒ እስራኤለታ ጎዳይ ህንተ አዋታ፥ አብራሃመ፥ ይሳቃነ ያይቆባ ፆሳይ፥ ታና ህንተኮ ኪትስ። ሀይስ ታ መርና ሱንꬃ፤ ያና የለተꬃ ኡባይ ሀ ሱንꬃን ታና ፄጋና።
EXO 3:16 “ባዳ እስራኤለ ጭማታ ሺሻዳ፥ ጎዳይ ህንተ አዋታ ፆሳይ፥ አብራሃመ፥ ይሳቃነ ያይቆባ ፆሳይ ነዉ ቆንጭዳይሳ ኦዳ። ግብፀን ኤንቲ ዋየትያ ዋይያ ታኒ ፆሞሳዳ በእዳይሳ ኤንታዉ ኦዳ።
EXO 3:17 ታኒ ኤንታና ግብፀ ዋያፐ ከሳዳ ማꬅነ ኤስ ኩምዳ፥ ካናነታ፥ ህተታ፥ አሞረታ፥ ፓርዘታ፥ ህወታነ ያቡሰታ ቢታ ኤፋናዉ ቃላ ገላስ።
EXO 3:18 “እስራኤለ ጭማት ነ ግያባ ስአና። ሄሳፈ ጉየ ኔንነ እስራኤለ ጭማት ግብፀ ካዋኮ ብድ፥ ‘ጎዳይ፥ እብራወታ ፆሳይ፥ ኑስ ቆንጭስ። ሀእ ኑኒ ሄꬑ ጋላሳ ኦገ መላ ቢታ ብድ፥ ጎዳስ፥ ኑ ፆሳስ ያርሾ ያርሻና መላ ኑና የዳ’ ያግተ።
EXO 3:19 ሽን ዎልቃን ግዶና እፅኮ፥ ግብፀ ካዎይ ህንተና የዶናይሳ ታኒ ኤራይስ።
EXO 3:20 ሄሳ ግሾ ታኒ ታ ዎልቃን ዱማ ዱማ ማላታታ ኦꬃዳ ግብፀታ ሾጫና። ሄሳፈ ጉየ እ ህንተና የዳና።
EXO 3:21 “ቃስ ታኒ ግብፀ አሳ ስንꬃን ቴሞ ህንተዉ እማና። ያንያ ግሾ ህንተ ከይያ ዎደ መላ ኩሸ ከየከታ።
EXO 3:22 እብራወ ማጫስ ኡባይ ባ ሾሮን ደእያ ግብፀ ማጫሳኮነ ባ ሶን ደእያ ግብፀ ማጫሳኮ ብድ፥ ብራ አሌቆ፥ ዎርቃነ ማኦ እምተ ግድ ኦይቻና። ህንተ ሄሳ ኤክድ ህንተ ናይታ ማይዛና። ሄሳዳ ኦꬅድ ህንተ ግብፀ ሻሎ ኡባ ኤክድ ባና” ያግስ።
EXO 4:1 ሙሰይ፥ “ኤንቲ ታና አማኖና እፅድ፥ ዎይኮ ታኒ ግያባ ስኦና እፅድ፥ ‘ጎዳይ ነዉ ቆንጭቤና’ ጊኮ ዎይጎ?” ያግድ ኦይችስ።
EXO 4:2 ጎዳይ ሙሰኮ፥ “ነ ኩሽያን ደኤይስ አይቤ?” ያግድ ኦይችስ። “ፃምአ” ያግስ።
EXO 4:3 ጎዳይ እያኮ፥ “አነ ሳአን የጋ” ያግስ። ሙሰይ ሄ ፃምኣ ሳአን የግን፥ ሾሽ ግድን፥ ሙሰይ እያፐ ዎፅስ።
EXO 4:4 ሄሳፈ ጉየ ጎዳይ፥ “ነ ኩሽያ የዳዳ እያ ጎይና ኦይካ” ያግስ። ሙሰይ ባ ኩሽያ የድድ ሾሻ ኦይክ ደንꬅን ሾሻይ እያ ኩሸን ስሚድ፥ ፃምአ ግድስ።
EXO 4:5 ጎዳይ፥ “ነ አዋታ ፆሳይ፥ አብራሃመ፥ ይሳቃነ ያይቆባ ፆሳይ ነዉ ቆንጭዳይሳ ኤንቲ አማናና መላ ሀይሳ ኦꬃ” ያግስ።
EXO 4:6 ካልድ ጎዳይ ሙሰኮ፥ “ነ ኩሽያ ነ ሾጰን ናቃ” ያግስ። ሙሰይ ባ ኩሽያ ሾጰን ናቅስ። እ ከስያ ዎደ እያ ኩሸይ ባሮ ሀርገን ኦይከትዳዳ ቦፅስ።
EXO 4:7 ጎዳይ እያኮ፥ “ነ ኩሽያ ነ ሾጰን ዛራዳ ናቃ” ያግስ። ሙሰይ ባ ኩሽያ ባ ሾጰን ዛር ናቅድ ከስያ ዎደ እያ ኩሸይ ስሚድ ሀንኮ አሳተꬃ መላ ግድስ።
EXO 4:8 ጎዳይ፥ “ኤንቲ ነና ዎይኮ ኮይሮ ማላታ አማኖና እፅኮ፥ ናምአንꬆ ማላታ አማናና።
EXO 4:9 ሽን ኤንቲ ሀ ናምኡ ማላታታ አማኖና እፅኮ፥ ዎይኮ ኔኒ ግያባ ስኦና እፅኮ፥ ናይለ ሻፋፐ ሃ ኤካዳ፥ መላ ቢታ ቦላ ጉሳ። ሄ ሃꬃይ ቢታ ቦላ ሱꬃን ላመታና” ያግስ።
EXO 4:10 ሙሰይ ጎዳኮ፥ “አቤት ጎዳዉ፥ ካሰካ ዎይኮ ሀእ ነ ታና ኦድሶ ኦይክዳይሳፈ ዶምን ኦድድ አማንꬆይ ታዉ ሀነና። ታ ጌሻዳ ኦደታናዉ ዳንዳእከ፤ ታ እንፃርሳይ ሉፋ” ያግስ።
EXO 4:11 ጎዳይ እያኮ፥ “አሳስ ዶና እምዳይ ኦኔ? ሙመ ዎይኮ ቱለ ኦይ ኦኔ? ፄልሰይነ ቆቅሰይ ኦኔ? ታና ጎዳ ግድክናዬ?
EXO 4:12 ሀእ ኔኒ ባ፤ ኔኒ ኦደታና መላ ታ ነና ማዳና። ነ ጋናባ ታ ነዉ እማና” ያግስ።
EXO 4:13 ሽን ሙሰይ፥ “ጎዳዉ፥ ሀያና፥ ሀራ አስ ኪታ” ያግስ።
EXO 4:14 ሄሳፈ ጉየ ጎዳይ ሙሰ ቦላ ዳሮ ሀንቀትድ እያኮ፥ “ሌወ ግድዳ ነ እሻ አሮን ባዌ? እ ኦዳ ሎይꬅድ ኤረይሳ ታ ኤራይስ። ሀእ እ ኔራ ጋሄታናዉ ይሸ ኦገ ቦላ ደኤስ፤ እ ነና በእያ ዎደ ዎዛናፐ ኡፋይታና።
EXO 4:15 ኔኒ፥ ‘ያጋ’፥ ጋዳ እያዉ ኦዳና። ታኒ ህንተ ናምአይካ ዎይግ ኦዳነኮነ ዋትድ ኦꬃነኮ ህንተና ታማርሳና።
EXO 4:16 እ ነ ዶና ግድድ አሳስ ነ ግሾ ኦዳና። ኔኒ ፆሳ በሳን ግዳዳ እ ጋናባ እያዉ ኦዳና።
EXO 4:17 ሀ ፃምአ ኤካ ባዳ እያራ ማላታ ኦꬃዳ በሳ” ያግስ።
EXO 4:18 ሄሳፈ ጉየ ሙሰይ ባ ቦሉዋ ዮታራኮ ስም ብድ፥ “ሀኖ ጋካናዉ አሳይ ፓፃ ደእያኮ በአናዉ፥ ታኒ ጉየ ግብፀ ታ አሳኮ ቦ?” ያግስ። ዮቶር ሙሰኮ፥ “ኤ ባ፤ ሳሮ ጋካ” ያግስ።
EXO 4:19 ሙሰይ ምድያመ ቢታን ደእሽን ጎዳይ እያኮ፥ “ነና ዎꬋናዉ ኮይዳ አሳት ኡባይ ሀይቅዳ ግሾ ጉየ ግብፀ ስማዳ ባ” ያግስ።
EXO 4:20 ሙሰይ ባ ማችዉነ ባ አደ ናይታ ሀረ ቶግስድ ጉየ ግብፀ ስምስ። ሙሰይ ፆሳ ፃምአ ባ ኩሸን ኦይክድ ብስ።
EXO 4:21 ጎዳይ ሙሰ፥ “ኔኒ ግብፀ ስማዳ ብያ ዎደ፥ ታኒ ነዉ እምዳ ዎልቃን ግብፀ ካዉዋ ስንꬃን ማላታታ ኦꬃናይሳ ባሎፓ። ሽን ሄሳንካ እ አሳ የዶና መላ ታኒ እያ ዎዛና ሙምሳና።
EXO 4:22 ሄ ዎደ ታኒ ጎዳይ ግያባ ካዋስ ሀሳዳ ያጋዳ ኦዳ። ‘እስራኤል ታ ባይራ ናአ።
EXO 4:23 እ ታዉ ጎይናና መላ እያ የዳ ጋዳ ታኒ ነዉ ኦዳስ። ሽን ኔኒ የዶና እፃዳሳ። ሄሳ ግሾ፥ ታኒ ነ ባይራ አደ ናኣ ዎꬋና’ ያጌስ ጋዳ ኦዳ” ያግስ።
EXO 4:24 ኦገን ሸምፖ በሳን ጎዳይ ሙሰራ ጋሄትድ እያ ዎꬋናዉ ኮይስ።
EXO 4:25 እያ ማችያ ስፖራ ቃራ ሹቹ ኤካዳ፥ ባ ናኣ ቃፃራሱ። ቃፃራ ሾሁዋራ ሙሰ ቶሁዋ ቦቻሱ። እያ ሙሰኮ፥ “ኔኒ ታዉ ቱማ ሱꬃ መዳ” ያጋሱ።
EXO 4:26 ሄሳ ግሾ፥ ጎዳይ እያ ዎꬎና አግስ። ሄ ዎደ እያ ሙሰኮ፥ “ሀ ቃፃሩዋ ጋሶን ኔኒ አታዳሳ” ያጋሱ።
EXO 4:27 ሄ ዎደ ጎዳይ አሮናኮ፥ “ሙሰራ ጋሄታናዉ መላ ቢታ ባ” ያግስ። እ ብድ፥ ፆሳ ዙማ ቦላ ሙሰራ ጋሄትድ እያ ዬርስ።
EXO 4:28 ሙሰይ ግብፀ ብድ ጋናባነ ኦꬃና ማላታታ ኡባ ጎዳይ እያ ኪትዳይሳ አሮናስ ኦድስ።
EXO 4:29 ሙሰራነ አሮናራ ግብፀ ብድ፥ እስራኤለ ጭማታ ኡባ ሺሽዶሶና።
EXO 4:30 አሮን ጎዳይ ሙሰስ ኦድዳ ቃላ ኡባ ኤንታዉ ኦድስ። ቃስ ሙሰይ ማላታታ ሄ አሳ ስንꬃን ኦꬅስ።
EXO 4:31 ኤንትካ አማንዶሶና። ጎዳይ ኤንታዉ ቆፕዳይሳነ ኤንታ ዋይያ በእዳይሳ ስእዳ ዎደ ጉፋንድ ጎይንዶሶና።
EXO 5:1 ሄሳፈ ጉየ ሙሰይነ አሮን ግብፀ ካዋኮ ብድ፥ “ጎዳይ፥ እስራኤለ ፆሳይ፥ ‘ታ አሳይ ታና ቦንቻናዉ መላ ቢታን፥ ባኣለ ኦꬃና መላ ኤንታ የዳ’ ያጌስ” ያግዶሶና።
EXO 5:2 ካዎይ፥ “ታኒ እያዉ ኪተታዳ እስራኤለ የዳናዉ እ፥ ጎዳይ ኦኔ? ታኒ ጎዳ ኤርከ፤ እስራኤላካ የድከ” ያግስ።
EXO 5:3 ኤንቲ ዛሪድ፥ “እብራወታ ፆሳይ ኑስ ቆንጭስ። ሀእ ኑኒ ጎዳስ፥ ኑ ፆሳስ፥ ያርሾ ያርሻናዉ ሄꬑ ጋላሳ ኦገ መላ ቢታ ባና መላ ኑና የዳርክ። ሄሳ ኑ ኦꬆና እፅኮ እ ኑና ሀርገን ዎይኮ ኦላን ꬋይሳና” ያግዶሶና።
EXO 5:4 ሽን ግብፀ ካዎይ፥ “ሙሰ፥ አሮና፥ አሳ አይስ ኦሶ ድገቲ? ጉየ ብድ ህንተ ኦሱዋ ኦꬅተ።
EXO 5:5 ሄኮ፥ ሀ ቢታን ህንተ ዳርደታ፤ ቃስ ህንተ አሳ ኦሶ ድገታ” ያግስ።
EXO 5:6 ካዎይ ሄ ጋላስ ግብፀ ካፖታነ እስራኤለታ ኦስሰይሳታ ሀይሳዳ ያግድ ኪትስ፤
EXO 5:7 “ካሰይሳዳ ፁበ ኦꬃናው አሳስ ኡቱላ እሞፍተ። ኤንቲ ኡቱላ ባንታዉ ኮይድ ሺሾ።
EXO 5:8 ሽን ካሰይሳፈ ታይቡዋ ጉꬆና ኤንቲ ፁበ መꬍድ ሺሻና መላ ኪትተ፤ እስኖካ ፓጭሶፕተ። ኤንቲ፥ ‘ኑኒ ኑ ፆሳስ ያርሾ ያርሻና መላ ኑና የዳ’ ያግድ ታና ኦይቸይ ኤንታዉ ኦሶይ ጉፅዳ ግሾሳ።
EXO 5:9 ኤንቲ ኦሶን ጉንዳና መላነ ዎርዶ ኦዳ ስኦናዉ ኤንታዉ ዎደይ ዶና መላ ኦሶ ዴፅስተ” ያግድ ኪትስ።
EXO 5:10 ግብፀ ካፖትነ እስራኤለታ ኦስሰይሳት ከይድ፥ አሳኮ፥ “ካዎይ፥ ‘ታኒ ህንተዉ ኡቱላ እምከ።
EXO 5:11 ህንተ ብድ አዉፐካ ኮይድ ደምተ። ሽን ህንተ ኦꬅያ ፁበ ታይቡዋፐ እሶይካ ፓጨና’ ያግስ” ያግዶሶና።
EXO 5:12 ሄሳ ግሾ አሳይ ኡቱላ ኮያናዉ ግብፀ ቢታ ኡባን ላለትዶሶና።
EXO 5:13 ግብፀ ካፖት ኤንታዉ ኡቱል እመትን ኤንቲ ኦꬅያ ፁበ ታይቡዋ ኬና ኦꬅድ ሺሻና መላ ኤንታ ኡንኤꬅዶሶና።
EXO 5:14 ግብፀ ካፖት ባንታፈ ጋርሳራ ደእያ እስራኤለ ካፖታ፥ “ህንተ ካሰ ኦꬅያ ፁበ ኬና አይስ ኦꬅ ሺሽበከቲ?” ያግድ ዋꬍዶሶና።
EXO 5:15 ሄሳፈ ጉየ እስራኤለ ካፖት ካዋኮ ብድ፥ “አቤት ጎዳዉ፥ ኔኒ ነ አይለታ ሀይሳዳ አይስ ኦꬃይ? ያግድ ማጋንዶሶና።
EXO 5:16 ነ አይለታስ ኡቱል እመተና፥ ሽን ፁበ ኦꬃና መላ ኪተትዳ። ሄሳ ቦላ ኑና ዋꬎሶና፤ ሽን ባላይ ነ አሳ ቦላና” ያግዶሶና።
EXO 5:17 ሽን ካዎይ፥ “ህንተ ኦሶ ዶሶና አዛላታ፤ ህንተ ዎራ ዎꬍዳ አዛላታ። ህንተ፥ ‘ኑኒ ጎዳስ ያርሻናዉ ባና፤ ኑና የዳ’ ያግድ ዛር ዛር ታና ኦይቸይ ሄሳ ግሾሳ።
EXO 5:18 ሀእ ጉየ ብድ ኦꬅተ። ህንተዉ አይባ ኡቱልካ እመተና፥ ሽን ህንተ ካሰይሳ ኬና ፁበ ኦꬃናዉ በሴስ” ያግስ።
EXO 5:19 እስራኤለ ካፖት፥ ኤንቲ ካሰይሳ ኬና ፁበ ኦꬃና መላ ኪተትዳ ዎደ ኤንቲ መቶን ገልዳይሳ ኤርዶሶና።
EXO 5:20 ኤንቲ ካዉዋ ማታፐ ከይድ፥ ባንታና ካረን ናግያ ሙሰኮነ አሮናኮ ብዶሶና።
EXO 5:21 ኤንቲ ሙሰኮነ አሮናኮ፥ “ህንተ ኑና ካዎይነ እያ ሞርናት እፃና መላነ ዎꬋና መላ ህንተ ኦꬅዳይሳ ፆሳይ ፄሎ፤ እ ፕርዶ” ያግዶሶና።
EXO 5:22 ሙሰይ ጎዳኮ ስሚድ፥ “ጎዳዉ፥ ኔኒ ሀ አሳ ቦላ መቶ አይስ ኤሀዲ? ኔኒ ታና ኪትዳይ ሄሳሴ?
EXO 5:23 ታኒ ነ ሱንꬃን ካዋስ ኦዳናዉ ብዳ ዎደፐ ዶምን እ ሀ አሳ ቦላ መቶ ሀ ዳርስስ። ቃስ ነካ ነ አሳ አሻባካ” ያግስ።
EXO 6:1 ሄሳፈ ጉየ ጎዳይ ሙሰኮ፥ “ታኒ ግብፀ ካዉዋ ቦላ ኦꬃናባ ሀእ ኔኒ በአና። እ ታ ደርያ የዳና መላ ታኒ ታ ዎልቃ እያ በሳና። እ ኤንታ ባ ቢታፈ ጎድድ ከሳና” ያግስ።
EXO 6:2 ፆሳይ ሙሰ፥ “ታኒ ጎዳ።
EXO 6:3 ታኒ አብራሃመስ፥ ይሳቃስነ ያይቆባስ ኡባ ዳንዳእያ ፆሳ ግዳዳ ቆንጫስ። ሽን ታኒ፥ ‘ጎዳ’ ጌተትያ ታ ሱንꬃን ታናተꬃ ኤንታ ኤርሳብከ።
EXO 6:4 ቃስ ታኒ ኤንቲ በተተꬃን ደእዳ ካናነ ቢታ እማና ጋዳ ኤንታራ ጫቃስ።
EXO 6:5 ቃስካ ግብፀ አሳት አይለይያ እስራኤለታ ዋሱዋ ታኒ ስአስ፤ ታ ጫቁዋካ ቆፓስ።
EXO 6:6 “ሄሳ ግሾ ኔኒ እስራኤለታኮ፥ ‘ታኒ ጎዳ። ታኒ ህንተና ግብፀ አይለተꬃፈ አሻዳ ከሳና። ታኒ ኤንታ ታ ምኖ አፃን ኢታ ፕርዳ ፕርዳዳ ህንተና ዎዛና።
EXO 6:7 ታኒ ህንተና ታ ደረ ኦꬃና፤ ታኒ ህንተ ፆሳ ግዳና። ግብፀ አይለተꬃፈ ታኒ ህንተና ከስዳ ዎደ፥ ታኒ ጎዳ ህንተ ፆሳ ግደይሳ ህንተ ኤራና።
EXO 6:8 ታኒ አብራሃመስ፥ ይሳቃስነ ያይቆባስ እማና ጋዳ ጫቅዳ ቢታ ህንተና ኤሀና። ሄ ቢታ ታኒ ህንተዉ ላታ ቢታ ኦꬃዳ እማና። ታኒ ጎዳ’ ያጋ” ያግስ።
EXO 6:9 ሙሰይ ሄሳ እስራኤለታስ ኦድስ፥ ሽን ኤንቲ አይለተꬃ ኡንአፈ ደንዶይሳን ኡፋይስ ቃንፅዳ ግሾ እ ግያባ ስእቦኮና።
EXO 6:10 ሄሳፈ ጉየ ጎዳይ ሙሰ፥
EXO 6:11 “ባዳ ግብፀ ካዋስ፥ ‘እስራኤለታ ነ ቢታፈ የዳ’ ያጋዳ ኦዳ” ያግስ።
EXO 6:12 ሽን ሙሰይ፥ “ታ እንፃርሳይ ሉፋ። እስራኤለት ታና ስእቦኮና፥ ሽን ግብፀ ካዎይ ታና ዋንድ ስአኔ?” ያግስ።
EXO 6:13 ጎዳይ ሙሰነ አሮና፥ “ብድ፥ እስራኤላ አሳ ግብፀፈ ከሳና መላ፥ ታኒ ህንተና ኪትዳይሳ እስራኤለታስነ ግብፀ ካዋስ ኦድተ” ያግስ።
EXO 6:14 ሀይሳፈ ካልድ ፃፈትዳይሳት ኤንታ ማይዛታ፤ ያይቆባ ባይራ ናኣ ሮቤላ አደ ናይት፥ ሄኖከ፥ ፋሉ፥ ኤስሮመነ ካርማ። ሀይሳቲ ሮቤላ ሶ አሳስ ማይዛታ።
EXO 6:15 ስሞና አደ ናይት፥ ያሙኤላ፥ ያምና፥ ኦሀዳ፥ ያክና፥ ዞሃራነ ካናነ ቢታ ማጫሴፐ የለትዳ ሳኡላ። ሀይሳቲ ስሞና ሶ አሳስ ማይዛታ።
EXO 6:16 ሌወ አደ ናይት ገድሶና፥ ቃሃታነ ማራራ። ሌወይ ፄታነ ሀስታማነ ላፑን ላይꬅ ደእስ።
EXO 6:17 ገድሶና አደ ናይት ልብናነ ሳመአ ጌተቶሶና። ሀይሳቲ ባንታ ሶ አሳስ ማይዛታ።
EXO 6:18 ቃሃታ አደ ናይት አምራማ፥ እዛራ፥ ከብሮናነ ኡዝኤላ። ቃሃት ፄታነ ሀስታማነ ሄꬑ ላይꬅ ደእስ።
EXO 6:19 ማራራ አደ ናይት ማህላነ ሙሰ። ባንታ የለተꬃ ማራን ሀይሳፈ ቆሞን ፃፈትዳይሳት ሌወ ሼሻታ።
EXO 6:20 አምራም ባ አዋ ምችዉ ዮከቤዶ ማችስ። እያ አሮናነ ሙሰ እያዉ የላሱ። አምራም ፄታነ ሀስታማነ ላፑን ላይꬅ ደእስ።
EXO 6:21 እዛራዳ ናይት፥ ቆረ፥ ነፈጋነ ዝክራ።
EXO 6:22 ኡዝኤላ አደ ናይት፥ ምሳኤላ፥ ኤልዛፋናነ ስትራ።
EXO 6:23 አሮን አምናዳበ ናእዉ፥ ናአሶና ምችዉ ኤልሰቦ ማችስ። እያ እያዉ ናዳበ፥ አብዮዳ፥ አላዛራነ እታማራ የላሱ።
EXO 6:24 ቆረ አደ ናይት፥ አስራ፥ ኤልቃናነ አብያሳፋ።
EXO 6:25 አሮና ናአይ አላዛር ፑትኤላ ናይታፐ እስንዉ ማችስ። እያ እያዉ ፕንሃሳ የላሱ። ሀይሳቲ ሌወ ሼሻታነ ኤንታ ማይዛታ።
EXO 6:26 ጎዳይ፥ ሙሰነ አሮና እስራኤለ አሳ ያራን ያራን ኤንታ ሶ አሳራ ግብፀፈ ካለꬅድ ከሳና መላ ኪትስ።
EXO 6:27 እስራኤለታ ግብፀፈ ከስ የዳና መላ ግብፀ ካዋስ ኦድዳይ ኤንታ።
EXO 6:28 ጎዳይ ግብፀን ሙሰስ ኦድዳ ዎደ፥
EXO 6:29 “ታኒ ጎዳ፤ ታኒ ነዉ ኦድያባ ኡባ ግብፀ ካዋስ ኦዳ” ያግስ።
EXO 6:30 ሽን ሙሰይ፥ “ታ ዶናይ ሉፋ ግደይሳ ነ ኤራሳ፥ ያትን ካዎይ ታኒ ኦድያባ ዋን ስአኔ?” ያግስ።
EXO 7:1 ጎዳይ ሙሰኮ፥ “ሄኮ ታኒ ነና ግብፀ ካዋስ ፆሳ መላ ኦꬃስ። ነ እሻ አሮን ነ ናበ ግድድ እያዉ ኦዳና።
EXO 7:2 ታኒ ነና ኪትዳ ኪታ ኡባ አሮናስ ኦዳ። እ፥ እስራኤለታ ባ ቢታፈ ከስ የዳና መላ ካዋስ ኦዳና።
EXO 7:3 ሽን ታኒ ካዉዋ ዎዛና ሙምሳና። ታኒ ግብፀ ቢታን ማላታታነ ማላልስያባታ ኦꬅኮካ፥
EXO 7:4 እ ህንተ ኦድያባ ስኤና። ሄ ዎደ ታኒ ግብፀታ ፕርዳና፤ ታ ደርያ እስራኤለ ግብፀፈ ከሳና።
EXO 7:5 ሄስ ሀንያ ዎደ ታኒ ጎዳ ግድዳይሳ ግብፀት ኤራና” ያግስ።
EXO 7:6 ሙሰይነ አሮን ጎዳይ ኪትዳይሳዳ ኦꬅዶሶና።
EXO 7:7 ኤንቲ ካዋስ ኦድያ ዎደ፥ ሙሰስ ሆስፑን ታሙ ላይꬅ፤ አሮናስ ቃስ ሆስፑን ታማነ ሄꬑ ላይꬅ።
EXO 7:8 ጎዳይ ሙሰነ አሮና፥
EXO 7:9 “ካዎይ ህንተና፥ ማላታ ኦꬅድ ታና በስተ ጊኮ፥ አሮን ባ ፃምአ ኤክድ ካዉዋ ስንꬃን የጋና መላ እያዉ ኦዳ፤ ሄ ፃምአይ ሾሽ ግዳና” ያግስ።
EXO 7:10 ሙሰይነ አሮን ካዋኮ ብድ ጎዳይ ኤንታ ኪትዳይሳዳ ኦꬅዶሶና። አሮን ባ ፃምኣ ካዉዋ ስንꬃንነ እያ ሞርናታ ስንꬃን የግን ፃምአይ ሾሹ ግድስ።
EXO 7:11 ሄሳፈ ጉየ ካዎይ ማሮታነ ብታንቾታ ፄግስስ። ኤንትካ ባንታ ብታን ሄሳዳ ኦꬅዶሶና።
EXO 7:12 ኤንቲ ኡባይ ባንታ ፃምኣ ሳአን የግዳ ዎደ ፃምአት ሾሽ ግድዶሶና። ሽን አሮና ፃምአይ ኤንታ ፃምአታ ምትስ
EXO 7:13 ግዶሽን ጎዳይ ግዳይሳ መላ ካዋ ዎዛናይ ሙምስ። እ ኤንቲ ገይሳ ስኦና እፅስ።
EXO 7:14 ጎዳይ ሙሰ፥ “ካዋ ዎዛናይ ሙምስ፤ እ አሳ የዶና እፅስ።
EXO 7:15 ዎንቶ ዎንታ ጉራ ሾሽ ላመትዳ ፃምኣ ኤካዳ፥ ናይለ ሻፋ ማታን ኤቃዳ፥ ካዉዋራ ጋሄታናዉ ናጋ።
EXO 7:16 እያኮ፥ ‘ጎዳይ፥ እብራወታ ፆሳይ ታ አሳይ መላ ቢታን ታዉ ጎይናና መላ የዳ’ ያግድ ታና ኔኮ ኪትስ። ሽን ኔኒ ሀኖ ጋካናዉ እፃዳሳ።
EXO 7:17 ጎዳይ፥ እ፥ ጎዳ ግደይሳ እ ኦꬅያባን ኔኒ ኤራና። ታኒ ናይለ ሻፋ ሃꬃ ታ ኩሸን ደእያ ፃምአን ሾጭኮ ሃꬃይ ሱꬅ ላመታና።
EXO 7:18 ናይለ ሻፋን ደእያ ሞሎይ ሀይቃና፤ ሻፋይካ ፅንቃና። ግብፀት ሄ ሻፋ ሃꬃ ኡያናዉ ዳንዳኦኮና” ያጋዳ ኦዳ።
EXO 7:19 ጎዳይ ሙሰኮ፥ “አሮን ግብፀን ደእያ ሃꬃታ ቦላ፥ ሻፋታ ቦላ፥ ዛራ ሃꬃታ ቦላ፥ ተቀ ሃꬃ ቦላነ ዱቀትዳ ሃꬅ ኡባ ቦላ ባ ፃምኣ ደንꬃና መላ ኦዳ። ሄ ዎደ ሃꬃ ኡባይ ሱꬅ ላመታና። ሀር አቶሽን ግብፀ ቢታን ምꬃፈነ ሹቻፈ ኦሰትዳ ሃ ትክያ ሚሸታን ደእያ ሃꬃይ ኡባይ ሱꬅ ላመታና ያጋ” ያግስ።
EXO 7:20 ሙሰይነ አሮን ጎዳይ ኪትዳይሳዳ ኦꬅዶሶና። ካዉዋ ስንꬃንነ እያ ሞርናታ ስንꬃን ባ ፃምኣ ደንꬅድ፥ ናይለ ሻፋ ሃꬃ ሾጭስ። ሃꬃ ኡባይ ሱꬅ ላመትስ።
EXO 7:21 ሄ ሻፋ ሃꬃን ደእያ ሞሎት ሀይቅዶሶና። ሻፋ ሃꬃይ ኢታ ፅንቅዳ ግሾ፥ ግብፀ አሳይ ኡያናዉ ዳንዳእቦኮና። ግብፀ ቢታ ኡባን ሱꬅ ኩምስ።
EXO 7:22 ሽን ግብፀ ብታንቾት ባንታ ብታን ሄሳዳ ኦꬅዶሶና። ጎዳይ ግዳይሳዳ ካዉዋ ዎዛናይ ሙምን፥ ሙሰይነ አሮን ኦድዳይሳ ስኦና እፅስ።
EXO 7:23 ካዎይ ሄ ሀንዳባ አይብንካ ታይቦና የግ አግድ ባ ጋꬎ ስሚድ ብስ።
EXO 7:24 ግብፀ አሳይ ናይለ ሻፋ ሃꬃ ኡያናዉ ዳንዳእቦና ግሾ፥ ኡይያ ሃꬅ ደማናዉ ሻፋ ጋፃን ኦላ ቦክዶሶና።
EXO 7:25 ጎዳይ ሃꬃ ሾጭ ስምን ላፑን ጋላስ ግድስ።
EXO 8:1 ሄሳፈ ጉየ ጎዳይ ሙሰኮ፥ “ግብፀ ካዋኮ ባዳ፥ ‘ጎዳይ፥ ታዉ ጎይናና መላ ታ አሳ የዳ።
EXO 8:2 ኔኒ ኤንታ የዶና እፅኮ፥ ነ ቢታ ኡባን ሾ ጋዶ የዳና።
EXO 8:3 ናይለ ሻፋን ሾይ ኩማና። ኤንቲ ያፐ ከይድ ነ ካዎተꬃ፥ ነ ዝንእያ ክፍልያ፥ ነ ሂፃ፥ ነ ሞርናታ ኬꬃነ ነ ደርያ ኬꬃ ኡባን ገላና። ሄሳዳካ ነ ጮጨንነ ሙኑቃ ሚሸ ኡባን ገላና።
EXO 8:4 ሾት ነ ቦላ፥ ነ አሳ ቦላነ ነ ሹማታ ኡባ ቦላ ጉፓና ያጌስ’ ያጋዳ ኦዳ” ያግስ።
EXO 8:5 ጎዳይ ሙሰኮ፥ “አሮን ግብፀን ደእያ ሃꬃታ ቦላ፥ ዛራ ሃꬃታ ቦላነ ተቀ ሃꬃ ኡባ ቦላ ባ ፃምኣ ደንꬃና መላ ኦዳ” ያግስ።
EXO 8:6 አሮን ግብፀ ሃꬃታ ቦላ ባ ፃምኣ ደንꬅዳ ዎደ ሾት ከይድ፥ ግብፀ ቢታ ማእዶሶና።
EXO 8:7 ሽን ማሮትካ ባንታ ብታን ሄሳዳ ኦꬅድ ግብፀ ቢታን ሾ ከስዶሶና።
EXO 8:8 ካዎይ ሙሰነ አሮና ፄግስድ፥ “ሀ ሾታ ታፐነ ታ አሳፐ ድጋና መላ ጎዳ ህንተ ዎስኮ ታ ህንተ አሳ ጎዳስ ያርሾ ያርሻና መላ የዳና” ያግስ።
EXO 8:9 ሙሰይ ካዋኮ፥ “ሾት ኔፐ፥ ነ ሞርናታፐነ ነ አሳፐ ክቻና መላ ታ ዎሳናዉ ቃፃሮ እማ። ሄሳፈ ጉየ ሻፋ ሾት ኔፐነ ነ ኬꬃፈ ክችድ ናይለ ፃላላን ደአና” ያግስ።
EXO 8:10 ካዎይ ዛሪድ፥ “ዎንቶ ግዶ” ያግስ። ሙሰይ፥ “ኑ ጎዳ ፆሳ መል ሀር ኦንካ ባይናይሳ ኔኒ ኤራና መላ ነ ግዳይሳዳ ኦꬃና።
EXO 8:11 ሾት ኔፐ፥ ነ ኬꬃፈነ፥ ነ ሞርናታፐ ክችድ ናይለ ሻፋ ፃላላን አታና” ያግስ።
EXO 8:12 ሙሰይነ አሮን ካዉዋ ማታፐ ከይድ፥ ካዉዋ ቦላ ጎዳይ ኤህዳ ሾታ ድጋና መላ ሙሰይ ጎዳ ዎስስ።
EXO 8:13 ጎዳይ ሙሰይ ኦይችዳይሳዳ ኦꬅን ሶን፥ ካረንነ ጌሻን ደእያ ሾት ሀይቅዶሶና።
EXO 8:14 ግብፀ አሳይ ሀይቅዳ ሾታ ሺሽድ ዶርዶሶና፤ ቢታ ኡባይ ፅንቅስ።
EXO 8:15 ሽን ሾት ሀይቅዳይሳ ካዎይ በእዳ ዎደ እያ ዎዛናይ ዛር ሙምስ። ጎዳይ ግዳይሳ መላ እ ሙሰነ አሮና ስኦና እፅስ።
EXO 8:16 ሄሳፈ ጉየ፥ ጎዳይ ሙሰኮ “አሮን ባ ፃምአ ደንꬅድ ቢታ ባና ሾጫና መላ ኦዳ። ግብፀ ቢታ ኡባን ደእያ ባናይ ቦፀ ግዳና” ያግስ።
EXO 8:17 ኤንቲ ኪተትዳይሳዳ ኦꬅዶሶና። አሮን ፃምአራ ቢታ ባና ሾጭስ። ግብፀን ደእያ ባና ኡባይ ቦፀ ላመትድ መህያነ አሳ ማእስ።
EXO 8:18 ማሮትካ ባንታ ብታን ሄሳዳ ኦꬃናዉ ፓጭዶሶና፥ ሽን ፆነትዶሶና። ቦፀይ አሳ ቦላነ መህያ ቦላ ላለትስ።
EXO 8:19 ማሮት ካዋኮ፥ “ሀይስ ፆሳ ኦሶ” ያግዶሶና። ሽን ካዋ ዎዛናይ ሙምስ። ጎዳይ ግዳይሳ መላ እ ኤንታና ስኦና እፅስ።
EXO 8:20 ጎዳይ ሙሰ፥ “ጉራ ደንዳዳ፥ ካዎይ ሻፋ ብሽን እያራ ጋሄታዳ፥ ‘ጎዳይ፥ ታና ጎይናና መላ ታ አሳ የዳ።
EXO 8:21 ኔኒ ታ አሳ የዶና እፅኮ፥ ታኒ፥ ነ ቦላ፥ ነ ሞርናታ ቦላነ፥ ነ አሳ ቦላ ኡዱንፀ ጋዶ የዳና። ግብፀታ ኬꬃነ ኤንቲ ደእያ ቢታ ኡባን ኡዱንፀይ ኩማና።
EXO 8:22 ሽን ሄ ጋላስ ታ አሳይ ደእያ ጌሳመ ቢታን ኡዱንፀይ ዶናዳ ኤንታ ተቃዳ አሻና። ታኒ ጎዳይ፥ ሄ ዎደ ሀ ቢታን ታኒ ጎዳይ ኦይሳ ኔኒ ኤራና።
EXO 8:23 ታኒ፥ ታ አሳነ ነ አሳ ሻካና፤ ሄ ግታ ማላታይ ዎንቶ ሀናና’ ያጌስ ጋዳ ኦዳ” ያግስ።
EXO 8:24 ሄሳፈ ጉየ፥ ጎዳይ ግዳይሳዳ ኦꬅስ። ካዉዋ ጋꬎነ እያ ሞርናታ ሶ ዳሮ ኡዱንፀ ጋዶ የድስ። ኩመꬃ ግብፀ ቢታይ ኡዱንፀ ጋዶን ቆሄትስ።
EXO 8:25 ሄ ዎደ ካዎይ ሙሰነ አሮና ፄግስድ፥ “ብድ፥ ሀ ቢታን ህንተ ፆሳስ ያርሾ ያርሽተ” ያግስ።
EXO 8:26 ሽን ሙሰ ዛሪድ፥ “ሄስ ሀኖናባ። ኑኒ ጎዳስ፥ ኑ ፆሳስ ያርሽያ ያርሾይ ግብፀታ ማታን እፀትያ ግሾ፥ ሄሳ ኦꬆኮ። ኑ ያርሽሽን ኤንቲ በእኮ ኑና ሹቻን ጫዳና።
EXO 8:27 ኑና ኪትዳይሳ መላ፥ ኑኒ ጎዳስ፥ ኑ ፆሳስ ያርሾ ያርሻናዉ ሄꬑ ጋላስ ኦገ መላ ቢታ ባናዉ በሴስ” ያግስ።
EXO 8:28 ካዎይ ዛሪድ፥ “ጎዳስ፥ ህንተ ፆሳስ መላ ቢታ ብድ ያርሻና መላ ታኒ ህንተና የዳና። ሽን ህንተ ሃክድ ቦፕተ፤ ታዉ ዎስተ” ያግስ።
EXO 8:29 ሙሰይ ዛሪድ፥ “ታኒ ነ ማታፐ ከይዳ መላ ጎዳ ዎሳና። ሀ ኡዱንፀይ ዎንቶ ካዉዋፐ፥ እያ ሞርናታፐነ እያ አሳፐ ክቻና። ሽን ካዎይ አሳይ ጎዳስ ጎይናናይሳ ድግድ ዛር ኑና ጭሞፎ” ያግስ።
EXO 8:30 ሄሳፈ ጉየ ሙሰይ ካዉዋ ማታፐ ከይድ፥ ጎዳ ዎስስ።
EXO 8:31 ጎዳይ ሙሰይ ኦይችዳይሳዳ ኦꬅስ። ኡዱንፀይ ካዉዋፐ፥ እያ ሞርናታፐነ እያ አሳፐ እሶይካ አቶና ክችስ።
EXO 8:32 ሽን ሀእካ ካዉዋ ዎዛናይ ሙምን አሳ የዶና እፅስ።
EXO 9:1 ጎዳይ ሙሰኮ፥ “ግብፀ ካዋኮ ባዳ፥ ጎዳይ፥ እብራወታ ፆሳይ ኔኮ፥ ‘ኤንቲ ታዉ ጎይናና መላ ታ አሳ የዳ።
EXO 9:2 ኔኒ የዶና ኤንታ እፅኮ፥
EXO 9:3 ታኒ ነ ፓራታ ቦላ፥ ነ ሀረታ ቦላ፥ ነ ግማለታ ቦላ፥ ነ መህያ ቦላ፥ ነ ዶርሳታ ቦላነ ነ ዴሻታ ቦላ ኢታ ጋዶ የጋና።
EXO 9:4 ሽን ታኒ ጎዳይ እስራኤለ አሳ መህያ ግዶንነ ግብፀ አሳ መህያ ግዶን ዱማተꬅ መꬋና። እስራኤለ አሳ መህያፐ እሶይካ ሀይቀና።
EXO 9:5 ዎንቶ ታኒ ሄሳ ኦꬃና ግድ ጎዳይ ዎደ ቃንፅስ’ ያጋ” ያግስ።
EXO 9:6 ዎንተꬃ ጋላስ ጎዳይ ግዳይሳዳ ኦꬅስ። ግብፀ አሳ መሄ ኡባይ ሀይቅስ፥ ሽን እስራኤለ አሳ መህያፐ እሶይካ ሀይቅቤና።
EXO 9:7 ካዎይ ሀንዳባነ እስራኤለታ መህያፐ ሀር አቶሽን እሶይካ ሀይቆናይሳ አሰ ኪትድ፥ ኦይችድ ኤርስ። ሽን ሀእካ እያ ዎዛናይ ሙምዳ ግሾ አሳ የዶና እፅስ።
EXO 9:8 ሄሳፈ ጉየ፥ ጎዳይ ሙሰነ አሮና፥ “ጮጨፐ ብዶ ኩጭ ኤክድ፥ ካዎይ በእሽን ቦላ ꬋርጭተ።
EXO 9:9 ሄስ ግብፀ ቢታ ኡባ ቦላ ባና ግድድ ላለታና። ግብፀ ቢታን ደእያ አሳ ቦላነ መሄይ ቦላ ክፃ ጋዶ ኤሀና” ያግስ።
EXO 9:10 ኤንቲ ጮጨፐ ጉꬃ ብዶ ኤክድ ካዉዋ ስንꬃን ኤቅዶሶና። ሙሰይ ሄሳ ቦላ ላልን፥ አሳ ቦላነ መህያ ቦላ ክፃ ጋዶይ ዎꬍ አግስ።
EXO 9:11 ግብፀ አሳ ቦላ ዎꬍዳ ክፃይ ማሮታ ቦላካ ዎꬍዳ ግሾ ሙሰ ስንꬃን ኤቃናዉ ዳንዳእቦኮና።
EXO 9:12 ሽን ጎዳይ ሙሰስ ግዳይሳ መላ፥ ካዎይ ባ ዎዛና ሙምስዳ ግሾ፥ ሙሰነ አሮና ስኦና እፅስ።
EXO 9:13 ሄሳፈ ጉየ፥ ጎዳይ ሙሰኮ፥ “ካዋኮ ጉራ ደንዳ ባዳ፥ ‘ጎዳይ፥ እብራወታ ፆሳይ፥ ታዉ ጎይናና መላ ታ አሳ የዳ።
EXO 9:14 ሀእ ነ እፃስ ጊኮ፥ ነ ሞርናታነ ነ አሳ ፃላላ ግዶናሽን ነ ቦላካ ኢታ ጋዶ ኤሀና። ሄ ዎደ አላመ ኡባን ጎድ ታ ፃላላ ግደይሳ ኔኒ ኤራና።
EXO 9:15 ታኒ ታ ኩሽያ ደንꬃዳ ነናነ ነ አሳ ጋዶን ሾጭዳባ ግድያኮ ሀእ ጋካናስ ህንተ ቢታ ቦላ ደኤከታሽን።
EXO 9:16 ሽን ታ ሱንꬃይ ቢታ ኡባን ኤረታና መላ ታኒ ታ ዎልቃ በሳናዉ ነና ደኦን ዎꬃስ።
EXO 9:17 ኔኒ ሀእካ ኦቶርታዳ ታ አሳ የዶና እፃዳሳ።
EXO 9:18 ታኒ ዎንቶ ሀኖደ ግብፀ ቢታይ መꬎቶሳፐ ሀች ጋካናዉ ቡክ ኤሮና ዎልቃማ ሻች ቡክሳና።
EXO 9:19 ሀእ ኔኒ ነ መህያነ ካረን ደእያባ ኡባ ኤለ ሶ ገልሳና መላ ኪታ። ሶ ገሎና አሳ ቦላነ መህያ ኡባ ቦላ ሻች ቡክድ፥ ኤንታ ዎꬋና ያጌስ’ ያጋ” ያግስ።
EXO 9:20 ካዉዋ ሞርናታፐ እሶት እሶት ጎዳይ ግዳይሳ ስእድ ያይዳ ግሾ፥ ባንታ አይለታነ ባንታ መሄታ ሶ ገልስዶሶና።
EXO 9:21 ሽን ሀራት ጎዳይ ግዳይሳ ስኦና እፅድ ባንታ አይለታነ ባንታ መህያ ካረን አጋግዶሶና።
EXO 9:22 ሄሳፈ ጉየ፥ ጎዳይ ሙሰ፥ “ግብፀ ቢታ ኡባ ቦላ፥ አሳ ቦላ፥ መህያ ቦላነ ጋደን ደእያ ካꬃ ቦላ ሻች ቡካና መላ ነ ኩሽያ ሳሎ ደንꬃ” ያግስ።
EXO 9:23 ሙሰይ ባ ፃምኣ ሳሎ ደንꬅዳ ዎደ፥ ጎዳይ ዎልቃማ ደሾነ ዎልአንꬅ የድስ። ሄሳዳ ኦꬅድ ጎዳይ ግብፀን ሻች ቡክስስ።
EXO 9:24 ጎዳይ ገደራ ሃራ ዎልቃማ ዎልአንꬅ የድስ። ሄሳ መላባይ ግብፀ ቢታን አስ ዱሱ ኦይኮደፐ ሀን ኤረና።
EXO 9:25 ሄ ሻቻይ ግብፀን ደእያ አሳነ መህያ ሾጭስ። ጋደን ደእያባ፥ ምꬅነ ማታ ኡባ ꬋይስስ።
EXO 9:26 እስራኤለት ደእያ ጌሳመ ቢታ ፃላላን ሻች ቡክቤና።
EXO 9:27 ካዎይ ሙሰነ አሮና ፄግስድ፥ “ታኒ ሀእ ናጋራ ኦꬃስ። ጎዳይ ቱማንቾ፤ ታንነ ታ አሳይ ባላ።
EXO 9:28 ደሾይነ ሻቻይ ኑ ቦላ ዳርድ ኡንኤꬅዳ ግሾ ኑስ ጎዳ ዎስተ። ታኒ ህንተና የዳና፤ ህዛፐ ህንተ ሀይሳን ጋምኤከታ” ያግስ።
EXO 9:29 ሙሰይ እያኮ፥ “ታኒ ሀ ካታማፐ ከይዳ ዎደ ታ ኩሽያ ደንꬃዳ ጎዳ ዎሳና። ደሾይነ ሻቻይ ኤቅያ ዎደ ሳአይ ጎዳባ ግደይሳ ኔኒ ሄሳን ኤራና።
EXO 9:30 ሽን ነነ ነ ሞርናት ሀእካ ጎዳ ፆሳ ያዮናይሳ ታኒ ኤራይስ” ያግስ።
EXO 9:31 ታልባይ ጪሸ፥ ባንጋይ ቆርፃ ግድያ ግሾ ኡባይ ሻቻን ꬋይስ።
EXO 9:32 ሽን ግስተይነ ሙርቃይ ጋክቦና ግሾ ሻቻን ꬋይቤና።
EXO 9:33 ሙሰይ ካዉዋ ማታፐ ከይድ፥ ካታማፐ ጋፃ ብድ ባ ኩሽያ ደንꬅድ ጎዳ ዎስስ። ያትን ደሾይ፥ ሻቻይነ እራይ ኤለስድ ኤቅ አግስ።
EXO 9:34 ሽን ካዎይ ሄ ኡባይ ኤቅዳይሳ በእዳ ዎደ ዛሪድ ናጋራ ኦꬅስ። እያራነ እያ ሞርናታራ ባንታ ዎዛና ጉጅድ ምንꬅዶሶና።
EXO 9:35 ጎዳይ ሙሰ ባጋራ ኦድዳይሳ መላ ካዉዋ ዎዛናይ ሙምን፥ እስራኤለታ የዶና እፅስ።
EXO 10:1 ሄሳፈ ጉየ፥ ጎዳይ ሙሰኮ፥ “ግብፀ ካዋኮ ባ። ታኒ ሀ ማላታታ ኤንታ ግዶን ኦꬃናዉ ኮያዳ ካዉዋ ዎዛናነ እያ ሞርናታ ዎዛና ሙምሳስ።
EXO 10:2 ታኒ ሄሳ ኦꬅዳይ ታ ማላታታን ዋታዳ ግብፀታ ሴርዳኮ ህንተ ህንተ ናይታስነ ህንተ ናይታ ናይታስ ኦዳና መላ ኮይዳ ግሾሳ። ሄ ዎደ ታኒ ጎዳ ግደይሳ ህንተ ኤራና” ያግስ።
EXO 10:3 ሙሰይነ አሮን ካዋኮ ብድ፥ “ጎዳይ፥ እብራወታ ፆሳይ ኔኮ፥ ‘ኔኒ ታዉ ኪተተꬅ እፀይ አዉደ ጋካናሴ? ታዉ ጎይናና መላ ታ አሳ የዳ።
EXO 10:4 ኔኒ ኤንታ የዶ እፅኮ፥ ዎንቶ ነ ቢታ ቦላ ታኒ ቦለ የዳና።
EXO 10:5 ቦለይ ዳሮተꬃፈ ደንዶይሳን ቢታ ኡባ ካማና። ኤንቲ ሻቻ ጋዱዋፐ አትዳ ጉꬃባነ ምꬃ ሀይꬅ ኡባ ማና።
EXO 10:6 ነ ኬꬃ፥ ነ ሞርናታ ኬꬃነ ግብፀ አሳ ኡባ ኬꬃ ኤንቲ ኩማና። ሄስ ነ ማይዛት ሀ ቢታን ደኦሳፐ ሀኖ ጋካናዉ በእዳ ኢታባፐ አꬍያባ ግዳና’ ያጌስ” ያግዶሶና። ሄሳፈ ጉየ፥ ሙሰይ ካዉዋ ስንꬃፈ ከይድ ብስ።
EXO 10:7 ካዋ ሞርናት ካዋኮ፥ “ሀ ኡራይ አዉደ ጋካናዉ ኑስ ፅሄ ግዳኔ? አሳይ ጎዳ፥ ባንታ ፆሳ ጎይናና መላ ኤንታ የዳ። ግብፀ ቢታይ ꬋየይሳ ኔኒ አኬክኪ?” ያግዶሶና።
EXO 10:8 ካዎይ ሙሰነ አሮና ጉየ ፄግስድ፥ “ብድ ጎዳ፥ ህንተ ፆሳ ጎይንተ፥ ሽን በይሳት ኦናንቴ?” ያግስ።
EXO 10:9 ሙሰይ፥ “ኑኒ ብያ በሳን ጎዳ ቦንቻናዉ ባኣለ ኦꬃና ግሾ፥ ኑኒ ኑ ጉꬃ ናይታ፥ ኑ ጭማታ፥ ኑ አደ ናይታ፥ ኑ ማጫ ናይታ፥ ኑ ዶርሳታነ ኑ ሚዛታ ኤክድ እስፈ ባና” ያግስ።
EXO 10:10 ካዎይ፥ “ህንተ ህንተ ናይታነ ህንተ ማጫሳታ ኤክ ቦና መላ ታኒ ጎዳን ጫቅሳይስ። ህንተ ህንተ ዎዛናን ኢታባ ቆፕዳይስ ኤረቴስ።
EXO 10:11 ህንተ፥ ብድ ጎዳ ጎይናናዉ ኮያባ ግድኮ አደታ ፃላላ ኤክ ቢተ” ያግስ። ሄሳፈ ጉየ፥ ሙሰነ አሮና ካዉዋ ስንꬃፈ ጎደትድ ከይዶሶና።
EXO 10:12 ጎዳይ ሙሰኮ፥ “ቦለይ ይድ ሻቻ ጋዱዋፐ አትዳ ኡባ ማና መላ ነ ኩሽያ ግብፀ ቢታ ቦላ ደንꬃ” ያግስ።
EXO 10:13 ሙሰይ ባ ፃምኣ ግብፀ ቢታ ቦላ ደንꬅዳ ዎደ፥ ጎዳይ ዶሎሀ ባጋ ጫርኮ ሄ ቃማነ ጋላስ ኩመꬅ ቢታ ቦላ ጫርክስስ። ዎንትያ ዎደ ሄ ጫርኮይ ቦለ ኤህስ።
EXO 10:14 ቦለይ ግብፀ ቢታ ኡባ ጋክድ ማእስ። ሄሳ መላ ቦለ ጋዶይ ሄ ቢታን ካሰካ ሀንቤና፤ ስንꬃፈካ ሀነና።
EXO 10:15 ቢት ꬉማና ጋካናዉ ቦለይ ቢታ ኡባ ማእስ። ሄ ቦለይ ሻቻፈ አትድ ጋደን ድጭያባ ኡባነ ምꬃ አይፈ ኡባ ምዶሶና። ግብፀ ቢታን ደእያ ምꬃ ሀይꬅነ ጭልኦባ ኡባ ምድግስ።
EXO 10:16 ካዎይ ሙሰነ አሮና ኤለስ ፄግስድ፥ “ታኒ ጎዳ ህንተ ፆሳነ ህንተና ናቃስ።
EXO 10:17 ህዛ ታ ናጋራ ታዉ እስ ቶሆ አቶ ጊተ። ሀ ꬋይስያ ጋዱዋ ታፐ ድጋና መላ ጎዳ ህንተ ፆሳ ዎስተ” ያግስ።
EXO 10:18 ሙሰይ ካዉዋ ማታፐ ከይድ ጎዳ ዎስስ።
EXO 10:19 ጎዳይ ዉሎሀ ዎልቃማ ጫርኩዋ ኪትድ ቦልያ ቢታፈ ደንꬅድ፥ ዞኦ አባ የድስ። ግብፀ ቢታ ኡባን እስ ቦለይካ ሀይቅቤና።
EXO 10:20 ሽን ጎዳይ ካዉዋ ዎዛና ሙምስዳ ግሾ እስራኤለታ የዶና እፅስ።
EXO 10:21 ጎዳይ ሙሰ፥ “ግብፀ ቢታን አስ ኦይክ በእያ ꬉም ꬉማና መላ ነ ኩሽያ ሳሎ ደንꬃ” ያግስ።
EXO 10:22 ሙሰይ ባ ኩሽያ ሳሎ ደንꬅስ። ግብፀ ቢታ ኡባን ሄꬑ ጋላስ ኩመꬅ ሳካና ꬉማይ ꬉምስ።
EXO 10:23 ሄ ሄꬑ ጋላሳታን ግብፀት እሶይ እሱዋ በእቦኮና ዎይኮ ኦንካ ባ ሶፐ ከይቤና። ሽን እስራኤለት ደእያ ጌሳመን ፖኦይ ደኤስ።
EXO 10:24 ካዎይ ሙሰ ፄግስድ፥ “ብድ ህንተ ጎዳ ጎይንተ። ህንተ ማጫሳይነ ህንተ ናይት ህንተራ ባናዉ ዳንዳኦሶና። ህንተ ዶርሳ ዉድያነ ህንተ ሚዛ ዉድያ ፃላላ አግድ ቢተ” ያግስ።
EXO 10:25 ሽን ሙሰይ፥ “ኑኒ ፁሳ ያርሾነ ሀራ ያርሾ ጎዳ ፆሳስ ያርሻና መላ መሄ ኔኒ ኑስ እማናዉ ኮሼስ።
EXO 10:26 እሶይካ ጉየ አቶና ኑ መሄይ ኑራ ባናዉ ኮሼስ። ጎዳ፥ ኑ ፆሳ ጎይናናዉ መህያፐ ዶራናዉ በሰይ ኑና። ኑኒ ያ ጋኮና ደእሸ አይ መሄ ያርሻነኮ ኤራናዉ ዳንዳኦኮ” ያግስ።
EXO 10:27 ሽን ጎዳይ ካዉዋ ዎዛና ሙምስዳ ግሾ፥ እ ኤንታ የዳናዉ ኮይቤና።
EXO 10:28 ሄሳፈ ጉየ፥ ካዎይ ሙሰኮ፥ “ታ ስንꬃፈ ክቻ፤ ታ ስንꬃን ዛራ በንታዳ ነና ኤራ። ታ አይፍያ ነ በእዳ ጋላስ ሀይቃና” ያግስ።
EXO 10:29 ሙሰይ እያኮ፥ “ቱማካ ነ ግዳይሳዳ ኔኒ ታ አይፍያ ዛራዳ በአካ” ያግስ።
EXO 11:1 ጎዳይ ሙሰኮ፥ “ታኒ ግብፀ ካዉዋ ቦላነ እያ አሳ ቦላ እስ ሀራ ጋዶ የዳና። ሄሳፈ ጉየ፥ እ ህንተና ከስ የዳና። እ ህንተና ኡባ ጎድድ ከሳና።
EXO 11:2 እስራኤለ አሳይ፥ አደይነ ማጫስ ባንታ ሾሮታፐ ብራነ ዎርቃ አሌቆ ኦይቻና መላ ኤንታዉ ኦዳ” ያግስ።
EXO 11:3 ጎዳይ እስራኤለ አሳስ ግብፀታ ስንꬃን ቴሞ እሚስ። ግብፀ ካዉዋ ሞርናትነ አሳይ ሙሰ ዳሮ ቦንቸትዳ አሳዳ ፄልዶሶና።
EXO 11:4 ሙሰይ ካዋኮ፥ “ጎዳይ ሀይሳዳ ያጌስ፤ ‘ቃማ ብላሄ ታኒ ግብፀ ቢታ ግዶራ ካንꬃና።
EXO 11:5 ግብፀ ቢታን ደእያ ባይራ አደ ናእ ኡባይ፥ ካዋ አራታ ላታናዉ ደእያ ባይራ ናኣፐ ዶምድ፥ ዎፃን ጋጭያ ማጫ አይለ ባይራ ናአ ጋካናዉ፥ ባይራ የለትዳ መሄ ኡባይ ሀይቃና።
EXO 11:6 ግብፀ ቢታ ኡባን ሄሳፈ ካሰካ ስንꬃፈካ ሀኖና ግታ ዬሆይ ዬኬታና።
EXO 11:7 ሽን እስራኤለ አሳ ቦላ ዎይኮ ኤንታ መህያ ቦላ ካንካ ቦጨና።’ ሄ ዎደ ታኒ ጎዳይ ግብፀታ ግዶንነ እስራኤለ ግዶን ዱማተꬅ መይሳ ኔኒ ኤራና።
EXO 11:8 ነ ሞርናት ኡባይ ይድ ታ ስንꬃን ጉፋናና። ታ አሳ ኤካዳ ሀ ቢታፈ ከያና መላ ኤንቲ ታና ዎሳና። ሄሳፈ ጉየ፥ ታኒ ባና” ያግስ። ሙሰይ ሸነን ፁገትድ ካዋ ስንꬃፈ ከይድ ብስ።
EXO 11:9 ጎዳይ ሙሰስ ካሰ፥ “ግብፀ ቢታን ታኒ ማላልስያባ ዳርሳዳ ኦꬃና ጋሶ ካዎይ ህንተና ስኤና” ያግድ ኦድ ዎꬅስ።
EXO 11:10 ሙሰይነ አሮን ማላልስያባ ኡባ ካዋ ስንꬃን ኦꬅዶሶና። ሽን ጎዳይ ካዉዋ ዎዛና ሙምስዳ ግሾ፥ እስራኤለታ ባ ቢታፈ የዶና እፅስ።
EXO 12:1 ጎዳይ ግብፀ ቢታን ሙሰነ አሮና ሀይሳዳ ያግስ፤
EXO 12:2 “ሀ አጌናይ ህንተዉ ላይꬃስ ኮይሮ አጌና ግዶ።
EXO 12:3 እስራኤለ አሳ ኡባስ ሀ ዎጋ ኦድተ። ሀ አጌናይ ገልዳ ታማንꬆ ጋላሳን፥ እስ አስ ባ ሶ አሳስ እስ ማራዘ ዎይኮ እስ ኮለ ኤኮ።
EXO 12:4 ሄ ኬꬃ አሳ ታይቦይ ሄ መህያ ዉርስድ ማናዉ ዳንዳኦና እፅኮ፥ እያራነ እያ ማታ ሾሩዋራ ባንታ ሶ አሳ ታይቡዋ መላነ እስ እስ አስ ምድ ዉርሳናዉ ዳንዳእያ ኬና ኤክድ ሄ መህያ ሹክድ እስፈ ሞና።
EXO 12:5 ህንተ ዶርያ መሄይ ዶርሰ ዎይኮ ዴሸ ግዳናዉ ዳንዳኤስ፥ ሽን እስ ላይꬅ ኩምዳይሳነ እያ ቦላ ቦረይ ባይና አደ ግዶ።
EXO 12:6 ሀ አጌናስ ታማነ ኦይዳንꬆ ጋላስ ጋካናዉ ኤንታ ሄምተ። ሄ ጋላስ ኦማርስ ላድያ ዎደ እስራኤለ አሳ ማባራ ኡባይ ኤንታ ሹካናዉ በሴስ።
EXO 12:7 አሳይ ሄ ሱꬃፈ ኤክድ ኤንቲ ምያ ኬꬃ ዉላ ጋርሳ፥ ቆሙዋነ ቦኮሉዋ ትዮ።
EXO 12:8 አሹዋ ሄ ጋላስ ቃማ ታማን ጫጭድ ጫምያ ቦንጮራነ ኡይꬃራ ሚተ።
EXO 12:9 አሹዋ ቃየ ዎይኮ ካꬅድ ሞፕተ። ሁጵያ፥ ገዳታነ ኡሎ አሾታ ኡባ ጫጭድ ሚተ።
EXO 12:10 ሄ አሹዋፐ ዎንታና ጋካናዉ አይኮካ አሾፍተ። ዎንታና ጋካናዉ አትኮ ሄሳ ፁግተ።
EXO 12:11 ኦገስ ጊግያ ማኦ ማእድ፥ ህንተ ጫማ አꬅድ፥ ህንተ ፃምኣ ኦይክድ ኤሶን ሚተ። ሄስ ታና ጎዳ ቦንችያ ፓስካ ባኣለ ህንተዉ ግዶ።
EXO 12:12 “ታኒ ሄ ቃማ ግብፀራ ካንꬃዳ ባይራ የለትዳ ኡባ፥ አሳነ መህያ ዎꬋና። ግብፀ ኤቃታ ኡባ ፕርዳና፤ ታኒ ጎዳ።
EXO 12:13 ሄ ሱꬃይ ህንተ ደእያ ኬꬃ ኤርስያ ማላ ግዳና። ታኒ ግብፀታ ፕርድያ ዎደ ሄ ሱꬃ በአዳ ህንተና ቆሆና አጋ አꬋና።
EXO 12:14 “ሀ ጋላሳይ ታኒ ጎዳይ ህንተዉ ኦꬅዳይሳ ላይꬃን ላይꬃን ቆፍስያ ጎዳ ቦንችያ ባኣለ ግዶ” ያግስ።
EXO 12:15 “ላፑን ጋላስ ጋካናዉ እርሾይ ገሎና ኡይꬅ ሚተ። ኮይሮ ጋላስ እርሾ ህንተ ሶፐ ድግተ። ሄ ላፑን ጋላሳታን እርሾይ ደእያ ኡይꬅ ምያ አስ እስራኤለ አሳ ግዶፈ ዱፅድ ኩረቶ።
EXO 12:16 ኮይሮ ጋላሳንነ ላፑንꬃ ጋላሳን ጎይናናዉ ሺቅተ። ሄ ጋላሳታን አይብ ኦሶካ ኦꬆፍተ፥ ሽን ካꬅ ካꬃናዉ ዳንዳኤታ።
EXO 12:17 “ታኒ እስራኤለ ደርያ ግብፀፈ ከስዳይ ሄ ጋላስ ግድያ ግሾ ሀ ኡይꬃ ባልያ ላይꬃን ላይꬃን ቦንችተ። ሄስ ህንተዉ መርና ዎጋ ግዶ።
EXO 12:18 ኮይሮ አጌናን፥ ታማነ ኦይዳንꬆ ጋላስ ኦማርሳፈ ዶምድ፥ ላታማነ እስንꬆ ጋላስ ኦማርስ ጋካናዉ እርሾይ ገልቦና ኡይꬃ ሚተ።
EXO 12:19 ላፑን ጋላስ ጋካናዉ እርሾይ ህንተ ሶን በንቶፎ። እርሾይ ገልዳባ ምያ ቢታ አዉ ናአ ግድን ዎይኮ አሳ ጋደ አስ ግድን፥ ሄ ኬꬃ አዋይ እስራኤለ ማባራ ግዶፈ ኩረቶ።
EXO 12:20 እርሾይ ገልዳባ አይኮካ ሞፕተ። ህንተ ደእያሶን አዉንካ እርሾይ ገልቦና ኡይꬁ ሚተፐ አትሽን፥ እርሾይ ገልዳ ኡይꬁ ሞፕተ” ያግስ።
EXO 12:21 ሙሰይ እስራኤለ ጭማታ ኡባ ፄግስድ ሀይሳዳ ያግስ፤ “ህንተ እሶይ እሶይ ሶ ብድ ፓስካ ባኣለ ቦንቻናዉ ማራዘ ዎይኮ ኮለ ሹክተ።
EXO 12:22 ህሶጰ ምꬃ ሀይꬃፈ ዳንክ ኤክድ፥ ከረን ደእያ ሱꬃን የድ ኤክድ ዉላ ጋርሳ፥ ቆሙዋነ ቦኮሉዋ ትይተ። ዎንታና ጋካናዉ ህንተፈ እሶይካ ባ ኬꬃፈ ካረ ከዮፖ።
EXO 12:23 ጎዳይ ግብፀ ባይራታ ዎꬋናዉ ሄ ቢታራ ካንꬅያ ዎደ፥ ሄ ሱꬃ ዉላ ጋርሳ፥ ቆሙዋንነ ቦኮሉዋ ቦላ በእድ አግድ አꬋና። ሀይቆ ኤህያ ኪታንቾይ ህንተ ሶ ገልድ ህንተና ዎꬎና መላ ድጋና።
EXO 12:24 “ህንተነ ህንተ ናይት ሀ ኪታ መርናዉ ናግተ።
EXO 12:25 ጎዳይ ካሰ እማና ግድ ቃላ ገልዳ ቢታ ህንተ ገልያ ዎደ ሀ ዎጋ ኦꬅተ።
EXO 12:26 ህንተ ናይት ህንተና፥ ‘ሀ ባልያ ኑ አይስ ቦንችዉ?’ ግድ ኦይችያ ዎደ፥
EXO 12:27 ህንተ ኤንታኮ፥ ‘ሀይስ ጎዳ ቦንችያ ፓስካ ያርሾ። ሄስካ ጎዳይ ግብፀ ቢታን እስራኤለ አሳ ኬꬃ አግድ፥ አꬍድ፥ ግብፀ ባይራታ ዎꬍድ፥ ኑና አሽዳ ግሾሳ’ ያግተ” ያግስ። ሄሳፈ ጉየ፥ እስራኤለት ጉልባትድ ጎይንዶሶና።
EXO 12:28 እስራኤለት፥ ጎዳይ ሙሰነ አሮና ኪትዳይሳዳ ኦꬅዶሶና።
EXO 12:29 ግድ ብላሄ ጎዳይ ግብፀን ባይራ የለትዳ ኡባ፥ ካዉዋ አራታ ላታናዉ ደእያ ባይራ ናኣፐ ዶምድ፥ ቃሾ ኬꬃን ደእያ አሳታ ባይራ ናይታ ጋካናዉነ ባይራ የለትዳ መሄ ኡባይ ሀይቅዶሶና።
EXO 12:30 ካዎይ፥ እያ ሞርናትነ ግብፀ ቢታ አሳ ኡባይ ቃማ ደንድዶሶና። ግብፀ ቢታን አስ ሀይቅቦና እስ ኬꬅካ ባይና ግሾ፥ አሳይ ባንታ ቃላ ꬎቁ ኦꬅድ ግታ ዬሆ ዬክዶሶና።
EXO 12:31 ሄ ቃማ ካዎይ ሙሰነ አሮና ፄግስድ፥ “ህንተነ ህንተ እስራኤለት ታ ቢታፈ ከይድ ቢተ። ህንተ ታና ኦይችዳይሳዳ ብድ ህንተ ጎዳ ጎይንተ።
EXO 12:32 ህንተ ግዳይሳ መላ ህንተ ዶርሳነ መህያ ዉድያ ኤክድ ቢተ። ቃስ ህንተ ፆሳይ ታና አንጃና መላ ዎስተ” ያግስ።
EXO 12:33 ግብፀ አሳይ፥ “እስራኤለት ባንታ ቢታፈ ኤለስድ ከያና መላ ድርግስዶሶና። ህንተ ከዮና እፅኮ ኑ ኡባይ ዉሮስ” ያግዶሶና።
EXO 12:34 ሄሳ ግሾ፥ እስራኤለ አሳይ እርሾይ ገልቦና ሙናቃ ከረን ኩንꬅድ፥ ባንታ ማኡዋን ካምድ፥ ባንታ ሀሸን ቶክዶሶና።
EXO 12:35 እስራኤለት ሙሰይ ኤንታ ኪትዳይሳዳ ግብፀታ፥ ብራ አሌቆ፥ ዎርቃ አሌቆነ ማኦ እማና መላ ኦይችዶሶና።
EXO 12:36 ጎዳይ፥ እስራኤለት ግብፀታ ስንꬃን ሳበታናዳ ኦꬅን፥ ግብፀት ኤንቲ ኦይችዳባ ኡባ እምዶሶና። ሄሳዳ ያትድ ኤንቲ ግብፀታ ሻሉዋ ቦንቅ ኤክድ ብዶሶና።
EXO 12:37 እስራኤለት ራምሰ ካታማፐ ደንድድ ሱኮታ ጌተትያ በሲ ቶሆን ብዶሶና። አሳ ታይቦይ ናይታነ ማጫሳ ጉጆና ኡሱፑን ፄቱ ሙኩላ።
EXO 12:38 ቃስ ኤንታራ ሀራ ዳሮ ዋላካ አሳይ፥ መሄይነ ዶርሳ ዴሻ ዉደይ ላገትድ ብስ።
EXO 12:39 ግብፀፈ ኤንቲ ድርጎን ከይዳ ግሾ ካꬅ ካꬃናዉ ዎደ ꬋይዶሶና። ኤንቲ ከይሸ ኤክ ከይዳ እርሾይ ገልቦና ሙኑቃፐ ኤክድ ኡይꬅ ኡክዶሶና።
EXO 12:40 እስራኤለት ግብፀ ቢታን ደእዳ ላይꬃይ ኦይዱ ፄታነ ሀስታማ።
EXO 12:41 ኦይዱ ፄታነ ሀስታሙ ላይꬃይ ዉርያ ሄ ዉርሰꬃ ጋላስ ጎዳ አሳ ኡባይ ግብፀ ቢታፈ ከይዶሶና።
EXO 12:42 ጎዳይ ባ አሳ ናግድ፥ ግብፀፈ ከስዳ ዎደ ሳእ ቃማ። ሄ ቃማይ የለተꬃፈ የለተꬃ ጋካናዉ እስራኤለ አሳይ ባርክድ ናግሸ አቅያ፥ ጎዳስ ዱማትዳ ቃማ።
EXO 12:43 ጎዳይ ሙሰነ አሮና፥ “ፓስካ ጋላሳ ቦንችያ ዎጋይ ሀይሳ ያግስ፤ አሳ ጋደ አስ ፓስካ ካꬃፈ ሞፖ።
EXO 12:44 ህንተ ህንተ ሚሸን ሻምዳ አይለይ ቃፃረትዳፐ ጉየ ሞ።
EXO 12:45 ሽን ህንተራ ጋምእያ እማꬅነ ኡነ ኦꬅያ አስ እያፐ ሞፖ።
EXO 12:46 “ሄ ፓስካ ካꬃይ ካፅዳ ኬꬃን ያን ሚተ። ሄ አሹዋፐ አይኮካ ካረ ከሶፍተ። መቀꬃታፐ እሱዋካ መንꬆፍተ።
EXO 12:47 እስራኤለ ማባራ ኡባይ ፓስካ ባኣለ ቦንቻናዉ ኮሼስ።
EXO 12:48 “አሳ ጋደ አስ ግድድ ህንተ ግዶን ደእያ አስ ጎዳ ፓስካ ባኣለ ቦንቻናዉ ኮይኮ፥ እያራነ እያ ሶን ደእያ አደ ኡባይ ቃፃረቶ። ሄሳፈ ጉየ፥ እ ቢታ አዉ ናአዳ ታይበትድ ፓስካ ባኣለ ቦንቻናዉ ዳንዳኤስ። ሽን ቃፃረትቦና አስ እያፐ ሞፖ።
EXO 12:49 ሀ ዎጋይ ቢታ አዉ ናይታስነ ሀራ ቢታ አስ ግድድ ህንተ ግዶን ደእያ አሳስ እስኖ” ያግስ።
EXO 12:50 እስራኤለ ኡባይ፥ ጎዳይ ሙሰነ አሮና ኪትዳይሳዳ ኦꬅዶሶና።
EXO 12:51 ሄ ጋላስ ጎዳይ እስራኤለታ ጩጋን ጩጋን ግብፀ ቢታፈ ከስስ።
EXO 13:1 ጎዳይ ሙሰኮ፥
EXO 13:2 “ባይራ የለትዳ አደ ኡባ ታዉ ዱማያ። እስራኤለ አሳ ግዶን ባይራ የለትዳ ኡባይ፥ አሰ ዎይኮ መሄ ግድን ኡባይ ታባ” ያግስ።
EXO 13:3 ሄሳፈ ጉየ፥ ሙሰይ አሳኮ፥ “ሀ ጋላሳይ፥ ህንተ ግብፀ አይለተꬃፈ ከይዳ ጋላስ ግድያ ግሾ እያ ቆፕተ። ጎዳይ ባ ግታ ዎልቃን ህንተና ከስዳይ ሄ ጋላሳና ግድያ ግሾ፥ እርሾይ ገልዳባ አይኮካ ሞፕተ።
EXO 13:4 አቢባ አጌናን፥ ሀች ጋላሳን ህንተ ግብፀፈ ከይደታ።
EXO 13:5 ጎዳይ ካናነታ፥ ህተታ፥ አሞረታ፥ ህወታነ ያቡሰታ ቢታ ህንተና ላትሳናዉ ህንተ ማይዛታስ ጫቅስ። ጎዳይ ህንተና ማꬅነ ኤስ ኩምዳ ሄ ቢታ ጋꬅያ ዎደ ላይꬃን ላይꬃን ሀ ኮይሮ አጌናን ሀ ጋላሳ ቦንችተ።
EXO 13:6 ላፑን ጋላስ ኩመꬅ እርሾይ ገልቦና ኡይꬅ ሚተ። ላፑንꬃ ጋላሳይ ጎዳ ቦንችያ ባኣለ ግዳና።
EXO 13:7 ሄ ላፑን ጋላሳታን እርሾይ ገልቦና ኡይꬅ ሚተ። እርሾይ ዎይኮ እርሾይ ደእያባይ ህንተ ግዶንነ ህንተ ዛዋን በንቶፎ።
EXO 13:8 ሄ ጋላስ ኔኒ፥ ‘ታኒ ሀይሳ ኦይ ታኒ ግብፀፈ ከይያ ዎደ ጎዳይ ታዉ ኦꬅዳይሳ ቆፓናሳ’ ያጋዳ ነ ናይታስ ኦዳ።
EXO 13:9 ሀ ባለይ ህንተ ኩሸን ዎይኮ ህንተ ሶምኦን ቃሸትዳ ማላ ግድድ ህንተና ቆፍስያባ ግዳና። ጎዳይ ህንተና ባ ግታ ዎልቃን ግብፀፈ ከስዳ ግሾ፥ ጎዳ ዎጋይ ህንተ ዶናፐ ዎꬎና መላነ ሀራታስ ህንተ ኦዳና መላ ህንተና ቆፍሳና።
EXO 13:10 ሄሳ ግሾ፥ ህንተ ሀ ባልያ ላይꬃን ላይꬃን ባ ዎድያን ቦንችተ።
EXO 13:11 “ጎዳይ ህንተዉነ ህንተ ማይዛታስ እማና ግድ ጫቅዳ ካናነታ ቢታ ገልስድ፥ ሄ ቢታ ህንተዉ እምያ ዎደ፥
EXO 13:12 ባይራ የለትዳ ኡባ ጎዳስ እማ። ነ መሄታን ባይራ የለትያ አደ ኡባይ ጎዳሳ።
EXO 13:13 ባይራ የለትያ ሀረ ማር ኡባ ዶርሳ ማራን ዎዛ። ዎዞና እፅኮ እያ ሞርግያ መንꬃ። ነ አደ ናይታ ግዶን ባይራ የለትዳ ኡባ ዎዛ።
EXO 13:14 ስንꬃራ ያና ላይꬃታን ነ ናይት ነና፥ ‘ሀይስ አይቤ?’ ግድ ኦይችኮ ኔኒ፥ ‘ጎዳይ ኑና ባ ግታ ዎልቃን ግብፀ አይለተꬃፈ ከስስ።
EXO 13:15 ግብፀ ካዎይ ባ ዎዛና ሙምስድ ኑና የዶና እፅን፥ ጎዳይ ግብፀ ቢታን ደእያ አሳፐ ዶምድ መሄ ጋካናዉ ባይራ ኡባ ዎꬍስ። ኑኒ ባይራ የለትዳ መሄ አደ ጎዳስ ያርሸይነ ባይራ አደ ናይታ ኑኒ ዎዘይ ሄሳሳ ያጋ።
EXO 13:16 ጎዳይ ኑና ባ ግታ ዎልቃን ግብፀፈ ከስዳ ግሾ፥ ሀ ባለይ ኑ ኩሸን ዎይኮ ኑ ሶምኦን ቃሸትዳ ማላ ግድድ ኑና ቆፍስያባ ግዳና’ ያጋ” ያግስ።
EXO 13:17 ካዎይ አሳ የድዳ ዎደ፥ ፆሳይ ኤንታ ማታ ግድዳ ፍልስፄመ ቢታራ ካንꬅስያ ኦግያራ ካለꬅቤና። ፆሳይ ሄሳ ኦꬅዳይ፥ “አሳ ኦል ጋክኮ፥ ባንታ ቆፋ ላምድ ጉየ ግብፀ ስማና” ያግድ ቆፕዳ ግሾሳ።
EXO 13:18 ሄሳ ግሾ፥ ፆሳይ አሳ መላ ቢታ ኦግያራ ዩሽድ፥ ዞኦ አባኮ ካለꬅስ። እስራኤለት ኦላስ ጊግድ ግብፀ ቢታፈ ከይዶሶና።
EXO 13:19 ዮሰፍ፥ “ፆሳይ ቱማ ህንተና አሻናዉ ያና። ሄ ዎደ ህንተ ታ መቀꬃ ሀ ቢታፈ ኤክድ ቢተ” ያግድ እስራኤለታ ጫቅስድ ዎꬅዳ ግሾ ሙሰይ እያ መቀꬃ ባራ ኤክድ ብስ።
EXO 13:20 ኤንቲ ሱኮታፐ ደንድድ መላ ቢታ ጋፃን ደእያ ኤታማን ኡትዶሶና።
EXO 13:21 ኤንቲ ጋላስነ ቃማ ሄመታና መላ ጋላስ ኤንታና ካለꬃናዉ ሻራ ቱሳን፥ ቃማ ፖእስድ ኤንታ ካለꬃናዉ ታማ ቱሳን ኤንታ ስንꬃን ብስ።
EXO 13:22 ጋላስ ሻራ ቱሳይ፥ ቃማ ታማ ቱሳይ አሳ ስንꬃፈ ክችቤና።
EXO 14:1 ሄሳፈ ጉየ፥ ጎዳይ ሙሰኮ፥
EXO 14:2 “ኤንቲ ጉየ ስሚድ ምግዶላፐነ ዞኦ አባፈ ግዶን፥ ፕሀህሮታ ስንꬃን፥ ባኣል-ዛፎና ማታን ኡታና መላ ኦዳ።
EXO 14:3 ካዎይ፥ ‘እስራኤለት መላ ቢታ ከያናዉ ኦገ ꬋይድ ጮ ቶይላቶሶና’ ያግድ ቆፓና።
EXO 14:4 ታኒ ካዉዋ ዎዛና ሙምሳና፤ እ ኤንታ ጎዳና። ታኒ ካዋነ እያ ኦላንቾታ ኡባ ፆናዳ ቦንቸታና። ሄ ዎደ ግብፀት ታኒ ጎዳ ግደይሳ ኤራና” ያግስ። ሄሳ ግሾ እስራኤለት እ ኦድዳይሳዳ ኦꬅዶሶና።
EXO 14:5 አሳይ ከስ ኤክዳይሳ ግብፀ ካዎይ ስእድ፥ እያራነ እያ ሞርናታራ ባንታ ቆፋ ላምድ፥ “ኑኒ አይስ ሄሳ ኦꬅዶ? ኑኒ እስራኤለታ የድድ፥ ኑና ሀጋዝያ አስ አይስ ꬋያነ” ያግዶሶና።
EXO 14:6 ሄሳ ግሾ እ ባ ፓራ ጋርያ ኮርድ፥ ባ ኦላንቾታ ኤክድ ደንድስ።
EXO 14:7 እ ኡሱፑን ፄቱ ዶረትዳ ፓራ ጋረታነ ግብፀ ቢታን ደእያ ሀራ ጋረታ ኡባ ኤንታ ሀላቃታራ ኤክድ ብስ።
EXO 14:8 ጎዳይ ግብፀ ቢታ ካዉዋ ዎዛና ሙምስዳ ግሾ ያሽ ባይና ከሳ ቦላ ደእያ እስራኤለ አሳ የደꬅስ።
EXO 14:9 ግብፀ ካዉዋ ፓራት፥ ፓራ ጋረትነ ኦላንቾት እስራኤለታ ካልድ ብድ፥ አባ ዶናን ባኣል-ዛፎናነ ፕሀህሮታ ማታን ኤንቲ ኡትዳሽን ደምዶሶና።
EXO 14:10 ካዎይ ባ ኦላንቾታራ ይሽን እስራኤለት ደምድ ያይዶሶና፤ ባንታና ማዳና መላ ጎዳኮ ዋስዶሶና።
EXO 14:11 ኤንቲ ሙሰኮ፥ “ግብፀ ቢታን ኑስ ዱፎይ ꬋይዴ? ኑኒ መላ ቢታ ሀይቃና መላ ኑና ከስዳይ ሄሳሴ? ኑና ግብፀፈ አይስ ኤሀዲ?
EXO 14:12 ግብፀን ደእሸ ሀይስ ሀናናይሳ ኤርድ፥ ‘ኑና አጋ ኑኒ ግብፀታስ ሃረታና’ ያግድ ነዉ ኦድቦኮ? መላ ቢታን ሀይቃናፐ ኤንታዉ ሃረተይስ ኑስ ሎኦሽን” ያግዶሶና።
EXO 14:13 ሽን ሙሰይ ዛሪድ፥ “ያዮፍተ፤ ምንድ ኤቅተ። ጎዳይ ሀች ህንተና አሽያ አሹዋ ህንተ በአና። ሀች ህንተ በእያ ግብፀታ ዛር በኤከታ።
EXO 14:14 ህንተ ስእ ጊተ፤ ጎዳይ ህንተ ግሾ ኦለታና” ያግስ።
EXO 14:15 ጎዳይ ሙሰኮ፥ “ኔኒ አይስ ታኮ ዋሳይ? እስራኤለት ስን ሄመታና መላ ኦዳ።
EXO 14:16 ነ ፃምአ አባ ቦላ ደንꬃ፤ ሃꬃይ ሻከታና። እስራኤለት መላ ቢታራ አባ ፕንድ ባና።
EXO 14:17 ታኒ ግብፀታ ዎዛና ሙምሳና፤ ኤንቲ ህንተ ጌዶ ካልድ አባን ገላና። ታኒ ካዉዋ፥ እያ ኦላንቾታ፥ እያ ፓራ ጋርያነ እያ ፓራ ጋርያ ላገይሳታ ፆናዳ ቦንቸታና።
EXO 14:18 ታ ኤንታ ፆንዳ ዎደ፥ ታኒ ጎዳ ግደይሳ ግብፀት ኤራና” ያግስ።
EXO 14:19 ፆሳ ኪታንቾይ፥ እስራኤለ ኦላንቾታፐ ስንꬃራ ሄመተይስ ኤንታፈ ጉየ አꬍድ ሄመትስ። ሻራ ቱሳይ ኤንታ ስንꬃፈ ጉየ ባጋ አꬍድ፥
EXO 14:20 ግብፀታስነ እስራኤለታስ ግዶን ኤቅስ። ሄ ሻራይ ግብፀታስ ꬉምስድ፥ እስራኤለታስ ፖእስስ። ያትን ቃማ ኩመꬅ ግብፀት እስራኤለታኮ ሺቅቦኮና።
EXO 14:21 ሙሰይ አባ ቦላ ባ ኩሽያ ምጭስ። ጎዳይ ሄ ቃማ ዎልቃማ ዶሎሀ ጫርኮ የድድ መላ ቢት በንታና ጋሶ አባ ሾጭስ። ሃꬃይ ሻከትስ።
EXO 14:22 ሃꬃይ ሻከትድ ናምኡ ባጋን ጎዳዳ ኤቅን፥ እስራኤለት መላ ቢታራ ሄመትድ ፕንዶሶና።
EXO 14:23 ግብፀ ካዉዋ ፓራት፥ እያ ፓራ ጋረትነ እያ ፓራ ጋርያ ላገይሳት ኤንታና ካልድ፥ አባን ገልዶሶና።
EXO 14:24 ሳእ ዎንታና ሀንሽን ጎዳይ ታማነ ሻራ ቱሳን ግድድ ግብፀ ኦላንቾታ ዱገ ፄልድ፥ ኤንታዉ ሀናናባ ꬋይስስ።
EXO 14:25 ፓራ ጋረታ ገርቶይ ገንደረቶና መላ ጎዳይ ኤንታ ፓራ ጋረታ ገርቱዋ ሳአራ ኦይꬅስ። ግብፀት፥ “ጎዳይ እስራኤለታ ማድድ ኑና ኦልያ ግሾ፥ ኑኒ ኤንታ አግድ ባቃቶስ” ያግዶሶና።
EXO 14:26 ጎዳይ ሙሰኮ፥ “ሃꬃይ ግብፀታ ቦላ፥ ኤንታ ፓራ ጋረታ ቦላነ ኤንታ ፓራ ጋርያ ላገይሳታ ቦላ ጉየ ስማና መላ ነ ኩሽያ አባ ቦላ ምጫ” ያግስ።
EXO 14:27 ሙሰይ ባ ኩሽያ አባ ቦላ ምጭን፥ ሳእ ዎንትያ ዎደ አባይ ባ ካሰ በሳ ጉየ ስምስ። ግብፀት ባቃታናዉ ኮይዶሶና፥ ሽን ጎዳይ ኤንታ አባን የግስ።
EXO 14:28 ሃꬃይ ጉየ ስሚድ፥ እስራኤለታ ካልድ አባን ገልዳ ፓራ ጋረታ፥ ፓራ ጋረታ ላገይሳታነ ግብፀ ኦላንቾታ ምትስ። ኤንታፈ እሶይካ አትቤና።
EXO 14:29 ሽን እስራኤለት አባ ግዶራ መላ ቢታራ ሄመትድ፥ ሃꬃይ ሻከትድ ጎዳዳ ኤቅዳሽን ፕንዶሶና።
EXO 14:30 ጎዳይ ሄ ጋላስ እስራኤለ አሳ ግብፀታ ኩሸፐ አሽስ። እስራኤለት ሀይቅድ ዝንእዳ ግብፀታ አባ ዶናን በእዶሶና።
EXO 14:31 እስራኤለት ጎዳይ ግብፀታ ቦላ በስዳ ግታ ዎልቃ በእዳ ዎደ ጎዳ ያይዶሶና። ጎዳነ እያ አይልያ ሙሰ አማንዶሶና።
EXO 15:1 ሄ ዎደ ሙሰይነ እስራኤለ አሳይ ሀ ማዝሙርያ ጎዳስ የፅዶሶና። እ ባ ግታ ፆኑዋን ቦንቸትዳ ግሾ፥ ታኒ ታ ጎዳስ ጋላታ ማዝሙርያ የፃና። ፓራነ ፓራ ቶገይሳ አባን የግስ።
EXO 15:2 ጎዳይ ታ ምኖተꬃነ ታ ማዝሙርያ ጋሱዋ፥ እ ታና አሸይሳ። እ ታ ፆሳ፤ ታኒ እያ ሳባና። እ ታ አዋታ ፆሳ፤ ታኒ እያ ቦንቻና፤ ጋላታና።
EXO 15:3 ጎዳይ ኦላንቾ፤ እያ ሱንꬃይካ ጎዳ።
EXO 15:4 ግብፀ ካዉዋ ፓራ ጋረታነ እያ ኦላንቾታ አባን የግስ። ግብፀ ካዉዋ፥ ኡባፈ አꬎ ግድዳ ቶራ ሞጮናታ፥ ዞኦ አባን ምትስስ።
EXO 15:5 ኤንታና ጪሞ ሃꬃይ ምትስ፤ ኤንቲ ሹቻዳ ጪሞን ምተትዶሶና።
EXO 15:6 “አቤት ጎዳዉ፥ ነ ኡሻቻ ኩሸይ ዎልቃን ጎባ፤ ነ ኩሸይ ሞርክያ መንረꬅስ።
EXO 15:7 ነ ግታ ፆኑዋን፥ ኔራ ኤቀተይሳታ ኦላዳሳ። ነ ሸነይ ታማዳ ኤፅድ፥ ኤንታ ካፍለዳ ምስ።
EXO 15:8 ነ ሀንቁዋን ነ አባ ፑንን፥ ሃꬃይ ጎዳዳ ኤቅስ። አባ ጪሞት ጋርሳን ሹቻዳ ምንዶሶና።
EXO 15:9 “ሞርከይ፥ ‘ታኒ ኤንታ የደꬃዳ ኦይካና፤ ታኒ ኤንታ ሻሉዋ ሻካዳ፥ ታ ኮይዳባ ኡባ ኤካና። ታኒ ታ ማሻ ሾዳዳ ኤንታ ꬋይሳና’ ያግድ ጬቀትስ።
EXO 15:10 ሽን ኔኒ ኤንታ ፑንን፥ አባይ ኤንታ ምትስ። ኤንቲ አባ ጪሙዋን ብራታዳ ምተትዶሶና።
EXO 15:11 አቤት ጎዳዉ፥ ፆሳታ ግዶን ነ ማል ኦኔ? ጌሻተꬃን ያሸይ ነ ማል ኦኔ? ቦንቾይ ዳጋንይነ ማላልስያባ ኦይ ነ ማል ኦኔ?
EXO 15:12 ኔኒ ነ ኡሻቻ ኩሽያ ምጭዳ ዎደ፥ ቢታይ ኤንታ ምትስ።
EXO 15:13 “ኔኒ ዎዝዳ አሳ ነ መርና ሲቁዋን ካለꬃዳሳ። ኔኒ ነ ዎልቃን ኤንታ ነ ጌሻ ቢታ ገልሳዳሳ።
EXO 15:14 ካዎተꬃት ሄሳ ስእድ ያሻን ኮኮርዶሶና። ፍልስፄመ ቢታ አሳትካ ኡንኤትዶሶና።
EXO 15:15 ሄ ዎደ ኤዶመ ቢታ ሀላቃት ዳጋምዶሶና፤ ሞአበ ቢታ ሃረይሳት ያሻን ኮኮርዶሶና፤ ካናነ አሳት ዳጋማን ዳቡርዶሶና።
EXO 15:16 ዳጋምነ ያሽ ኤንታ ኦይክስ። አቤት ጎዳዉ፥ ኤንቲ ነ ዎልቃ ግታተꬃ በእድ፥ ነ አሳይ አꬋና ጋካናዉ፥ ኔኒ ዎዝዳ አሳይ አꬋና ጋካናዉ፥ ሹቻዳ ቶለትድ ኤቅዶሶና።
EXO 15:17 ኔኒ ኤንታ ኤሀዳ፥ ነ ዙማ ሁጰን ቶካና። አቤት ጎዳዉ፥ ሄ በሳይ ኔኒ ነዉ ዳናዉ ዶርዳ በሲ፥ ኔኒ ነ ኩሽያን ምንꬃዳ ኬፅዳ ነ ኬ።
EXO 15:18 ጎዳይ መርና ጋካናዉ ካዎታና” ያግድ የፅዶሶና።
EXO 15:19 እስራኤለት አባ ግዶራ መላ ቢታራ ፕንን፥ ግብፀ ካዉዋ ፓራት፥ እያ ፓራ ጋረትነ እያ ፓራ ቶገይሳት አባን ገልዳ ዎደ ጎዳይ ኤንታ ቦላ አባ ሃꬃ ዛርን ሃꬃይ ኤንታ ምትስ።
EXO 15:20 አሮና ምችያ፥ ናብያ ማይራማ ካራቦ ኤካሱ። ሀራ ማጫሳት ኡባይ ባንታ ካራቦ ኤክድ ባቅሸነ የፅሸ እዮ ካልዶሶና።
EXO 15:21 ማይራማ፥ “እ ባ ግታ ፆኑዋን ቦንቸትዳ ግሾ፥ ፓራነ ፓራ ቶገይሳታ እ አባን የግዳ ግሾ፥ እያዉ ማዝሙርያ የፅተ” ያጋዳ ኤንታዉ የፃሱ።
EXO 15:22 ሄሳፈ ጉየ፥ ሙሰይ ዞኦ አባ ማታፐ እስራኤለታ ደንꬅድ ሹራ መላ ቢታ ጋካናዉ ካለꬅስ። ሄ መላ ቢታን ኤንቲ ሄꬑ ጋላስ ሄመትዶሶና ሽን ሃ ደምቦኮና።
EXO 15:23 ኤንቲ ማራ ጌተትያ በሲ ጋክድ ሃ ደምዶሶና፥ ሽን ሃꬃይ ጫሞ ግድያ ግሾ ኡያናዉ ዳንዳእቦኮና። ሄሳ ግሾ ሄ በሳይ ማራ ጌተትስ።
EXO 15:24 አሳይ፥ “ኑኒ አይ ኡያኔ?” ግድ ሙሰ ቦላ ዙዙምዶሶና።
EXO 15:25 ያንን፥ ሙሰይ ጎዳኮ ዋስስ፤ ጎዳይ እያ እስ ምꬅ በስስ። ሙሰይ ሄ ምꬃ ሃꬃን የግን ሃꬃይ ማልእስ። ያን ጎዳይ ኤንታዉ ህገ እሚስ፤ ያን ጎዳይ ኤንታ ፓጭስ።
EXO 15:26 ሙሰይ ኤንታኮ፥ “ህንተ ህንተ ጎዳ ፆሳስ ኪተትተ፤ እ ኮያባ ኦꬅተ። ህንተ ታዉ ፖሎ ኪተትኮነ ታ ግያባ ስእኮ ግብፀታ ቦላ ታ የድዳ ሀርግያን ህንተና ፕርድከ። ታኒ ህንተና ፓꬅያ ጎዳ” ያግስ።
EXO 15:27 ሄሳፈ ጉየ ኤንቲ ኤልማ ብዶሶና። ያን ታማነ ናምኡ ሃꬃ ፑልቶትነ ላፑን ታሙ ዛምባ ምꬃት ደኦሶና። ኤንቲ ያን ሃꬃ ዶናን ኡትዶሶና።
EXO 16:1 ግብፀፈ ከይዳ ናምአንꬆ አጌናን፥ ታማነ እቻሻንꬆ ጋላስ እስራኤለ አሳ ኡባይ ኤልማፐ ደንድድ፥ ኤልማፐነ ሲናፐ ግዶን ደእያ ሲነ ጌተትያ መላ ቢታ ይዶሶና።
EXO 16:2 እስራኤለ አሳ ኡባይ መላ ቢታን ሙሰ ቦላነ አሮና ቦላ ዙዙምዶሶና።
EXO 16:3 እስራኤለት ኤንታኮ፥ “ኑኒ ግብፀ ቢታን ጎዳ ኩሸን ሀይቅዳ ግዶርኮሽን። ሀር አቶ ኑኒ ያን ዎꬍ ኡትድ አሹዋነ ሀራ ካꬅ ኡባ ኑ ኮይዳ መላ ሞስ። ሽን ህንተ ኑና ኡባ ከስድ ሀ መላ ቢታ ኮሻን ዎꬍሴታ” ያግዶሶና።
EXO 16:4 ጎዳይ ሙሰኮ፥ “ታኒ ህንተዉ ሳሎፐ ካꬅ ቡክሳና። አሳይ ጋላስ ጋላስ ከይድ፥ ሀችስ ግድያባ ማፃናዉ ኮሼስ። አሳይ ታው ኪተትያኮነ ኪተቶናኮ ታኒ ኤንታ ሄሳን ፓጫና።
EXO 16:5 ሳምንታን ሳምንታን ኡሱፑንꬆ ጋላስ ኤንቲ ካሰ ማፀይሳስ ናምኡ ኩሸ ማፅድ ካꬆ” ያግስ።
EXO 16:6 ሄሳ ግሾ ሙሰይነ አሮን እስራኤለ አሳኮ፥ “ህንተና ግብፀ ቢታፈ ከስዳይ ጎዳ ግደይሳ ኦማርስ ህንተ ኤራና።
EXO 16:7 ህንተ ጎዳ ቦላ ዙዙምዳይሳ እ ስእዳ ግሾ፥ ዎንታ ጎዳ ቦንቹዋ ህንተ በአና። ህንተ ኑ ቦላ ዙዙማናዉ ኑኒ ኦኔ?” ያግዶሶና።
EXO 16:8 ሄሳፈ ጉየ ሙሰይ፥ “ህንተ ጎዳ ቦላ ዙዙምዳይሳ እ ስእዳ ግሾ፥ እ ህንተዉ ኦማርስ ማናዉ አሾ እመይነ ዎንታ ማናዉ ህንተ ኮይያ መላ ኡይꬁ እመይ ጎዳ ግደይሳ ህንተ ኤራና። ህንተ ኑ ቦላ ግዶናሽን ጎዳ ቦላ ዙዙመታ” ያግስ።
EXO 16:9 ሙሰይ አሮናኮ፥ “ኔኒ እስራኤለ አሳ ኡባ፥ ‘ጎዳይ ህንተ ዙዙንꬃ ስእዳ ግሾ፥ ይድ ጎዳ ስንꬃን ኤቅተ’ ያጋ” ያግስ።
EXO 16:10 አሮን እስራኤለ አሳ ኡባስ ኦድዳ ዎደ ኤንቲ መላ ቢታ ስሚድ፥ ሻራ ግዶራ ቆንጭዳ ጎዳ ቦንቹዋ በእዶሶና።
EXO 16:11 ጎዳይ ሙሰኮ፥ “ታኒ እስራኤለታ ዙዙንꬃ ስአስ። ኔኒ ኤንታዉ ‘ኦማርስ አሾ ህንተ ማና፤ ዎንታ ህንተ ኮይዳ መላ ኡይꬁ ኤካና። ሄ ዎደ ህንተ ታኒ ጎዳ ህንተ ፆሳ ግደይሳ ኤራና’ ያጋዳ ኦዳ” ያግስ።
EXO 16:13 ሄ ጋላስ ኦማርስ ኩራቾት ይድ፥ እስራኤለ አሳይ ደእያ በሳ ማእዶሶና። ዎንታ ኤንታ ሄራን አክ ቢታ ማእስ።
EXO 16:14 አካይ፥ ፅዝእዳ ዎደ ሌኦነ ላፋባይ መላ ቢታ ቦላ በንትስ። እካ ሻቻዳ ቦꬅ።
EXO 16:15 እስራኤለት ሄሳ በእዳ ዎደ እያ ኤሮና ግሾ፥ እሶይ እሱዋኮ፥ “ሀይስ አይቤ?” ያግዶሶና። ያትን ሙሰይ ኤንታኮ፥ “ህንተ ማና መላ ጎዳይ እምዳ ካꬃይ ሀይሳ።
EXO 16:16 ጎዳይ፥ ‘አሳይ እሶይ እሶይ ባዉ ኮሸይሳ መላ ሺሾ፤ ሶን ደእያ እስ እስ አስ ባ ሁጰን ናምኡ ልትሮ ኤኮ’ ያጋ” ያግድ ኪትስ።
EXO 16:17 እስራኤለት ኪተትዳይሳዳ ኦꬅዶሶና፤ ባጋይ ዳርስድ፥ ባጋይ ጉꬅድ ሺሽዶሶና።
EXO 16:18 ኤንቲ ሺሽድ ልትሮን ማክያ ዎደ ዳርስ ሺሽዳይሳስ ፓላህቤና፤ ጉꬁ ሺሽዳይሳስካ ፓጭቤና። እሶይ እሶይ ባዉ ኮሸይሳ መላ ሺሽስ።
EXO 16:19 ሙሰይ ኤንታኮ፥ “ኦንካ እያፐ ዎንታስ አሾፎ” ያግድ ኪትስ።
EXO 16:20 ሽን ኤንታፈ እሶት እሶት ሙሰይ ኦድዳይሳ ስኦና እፅድ ዎንታስ ምንጅዶሶና። ኤንቲ ምንጅዳይስ ጉፁንትድ ፅንቅስ። ሄሳ ግሾ ሙሰይ ኤንታ ቦላ ሀንቀትስ።
EXO 16:21 ዎንታ ዎንታ አሳ ኡባይ ባንታዉ ኮሸይሳ መላ ሺሼስ። አዋይ ምችያ ዎደ ሳአን አትዳይስ ትልኤስ።
EXO 16:22 ኡሱፑንꬆ ጋላስ ኤንቲ ካሰ ሺሽያ ናምኡ ልትሩዋ ቦላ እያ መላ ጉጅድ እስ እስ አሳስ ኦይዱ ልትሮ ሺሾ። ያትን እስራኤለ ሀላቃት ብድ ሄሳ ሙሰስ ኦድዶሶና።
EXO 16:23 ሙሰይ ዛሪድ፥ “ዎንቶይ ሸምፖ ጋላስ ግድድ ጎዳ ቦንችያ ጌሻ ሳምባታ። ሄሳ ግሾ፥ ህንተ ኡክያባ ኡክተ፤ ዶይስያባ ዶይስተ። ዎንቶስ ዎꬅተ” ያግስ።
EXO 16:24 ኤንቲ ሙሰይ ኪትዳይሳዳ ዎንቶስ ዎꬅን፥ ፅንቅቤና ዎይኮ ጉፁንትቤና።
EXO 16:25 ሙሰይ ኤንታኮ፥ “ሀይሳ ሀች ሚተ፤ ሀች ጎዳ ቦንችያ ሸምፖ ሳምባታ ግድያ ግሾ፥ ህንተ ሀች ደንባን ደመከታ።
EXO 16:26 ህንተ ካꬃ ኡሱፑን ጋላሳታን ሺሻናዉ ዳንዳኤታ፥ ሽን ላፑንꬃ ጋላሳይ ሸምፖ ጋላስ ግድያ ግሾ አይብ ካꬅካ ሄ ዎደ ዴና” ያግስ።
EXO 16:27 ላፑንꬃ ጋላሳን እስ እስ አሳይ ሺሻናዉ ከይዶሶና፥ ሽን አይኮካ ደምቦኮና።
EXO 16:28 ያትን፥ ጎዳይ ሙሰኮ፥ “ታ ኪታነ ታ ህግያ ህንተ ናጎና እፀይ አዉደ ጋካናሴ?
EXO 16:29 ታኒ ህንተዉ ሳምባታ እምዳይሳ አኬክተ። ኡሱፑንꬆ ጋላሳን እ ህንተዉ ናምኡ ጋላሳ ካꬅ እመይ ሄሳ ግሾሳ። ላፑንꬃ ጋላሳን ኦንካ ካረ ከዮና ባ ሶን ባ ሶን ጋምኦ” ያግስ።
EXO 16:30 ሄሳ ግሾ፥ አሳይ ላፑንꬃ ጋላሳን ሸምፕስ።
EXO 16:31 እስራኤለ አሳይ ሄ ካꬃ ማና ግድ ፄግዶሶና። ማናይ ዴቦ አይፈ መላ ግድድ ቦꬅ። እ ኤሳራ ኡክዳ ኡይꬃዳ ማልኤስ።
EXO 16:32 “ታኒ ህንተና ግብፀ ቢታፈ ከስዳ ዎደ መላ ቢታን ሙዝዳይ ማና ግደይሳ ያና የለተꬃይ በአና መላ እያፐ ናምኡ ክሎ ግራመ ዎꬅተ” ያግድ ጎዳይ ኪትዳይሳ ሙሰይ እስራኤለ አሳስ ኦድስ።
EXO 16:33 ሙሰይ አሮናኮ፥ “ናምኡ ክሎ ግራመ ማና ኤካዳ ፃሮን ቆላዳ ያና የለተꬃስ ጎዳይ ጎይነትያ በሳን ዎꬃ” ያግስ።
EXO 16:34 ጎዳይ ሙሰ ኪትዳይሳዳ፥ አሮን ማና ጎዳ ስንꬃን ታቦትያ ግዶን ዎꬅስ።
EXO 16:35 እስራኤለት ባንታ ደእያ ካናነ ቢታ ዛዋ ይድ ጋካናዉ ኦይታሙ ላይꬅ ማና ምዶሶና።
EXO 16:36 ሄ ዎደ አሳይ ማክያ ሚሸይ ላታማነ ናምኡ ልትሮ ኦይኬስ።
EXO 17:1 እስራኤለ አሳ ኡባይ ጎዳይ ኪትዳይሳዳ እስ በሳፈ ሀራ በሲ ዩይሸ፥ ሲን መላ ቢታፈ ደንድድ ራፍድማ ጌተትያ በሳን ኡትዶሶና። ሽን ኤንቲ ኡያናዉ ሃꬅ ሄ በሳን ꬋይስ።
EXO 17:2 ኤንቲ፥ “ኑስ ኡያናዉ ሃ እማ” ያግድ ሙሰራ ካጨትዶሶና። ሙሰይ ዛሪድ፥ “ህንተ ታራ አይስ ካጨቴቲ? ጎዳ አይስ ፓጨቲ?” ያግስ።
EXO 17:3 ሽን አሳይ ያን ሃꬃ ሳሞትድ፥ “ኔኒ ኑና፥ ኑ ናይታነ ኑ መህያ ሳሞን ዎꬋናዉ ግብፀፈ ከሳዳ ሀይሳ አይስ ኤሀዲ?” ያግድ ሙሰ ቦላ ዛር ዛር ዙዙምዶሶና።
EXO 17:4 ያትን ሙሰይ፥ “ታኒ ሀ አሳ ዋቶ? ኤንቲ ታና ሹቻን ጫዳና ሀኖሶና” ያግድ ጎዳ ዎስስ።
EXO 17:5 ጎዳይ ሙሰኮ፥ “ኔኒ እስራኤለ አሳፐ ጭማታ ኔራ ኤካዳ አሳፐ ስን አꬋዳ ሄመታ። ቃስ ናይለ ሻፋ ሾጭዳ ፃምኣ ነ ኩሸን ኦይካዳ ባ።
EXO 17:6 ታኒ ኮሬባ ዙማን ዛላ ቦላ ነ ስንꬃን ኤቃና። ሄ ዛላ ሾጫ፤ አሳይ ኡያና ሃꬃይ እያፐ ከያና” ያግስ። ሙሰይ እስራኤለ ጭማታ ስንꬃን ሄሳ ኦꬅስ።
EXO 17:7 እስራኤለት፥ “ቱማ ጎዳይ ኑራ ደኢ?” ያግድ ዙዙምዳ ግሾነ ጎዳ ፓጭዳ ግሾ ሄ በሳ ማሳሀነ ማርባ ግድ ሱንꬅስ።
EXO 17:8 አማለቃት ይድ ራፍድማን እስራኤለታ ኦልዶሶና።
EXO 17:9 ሙሰ እያሱኮ፥ “ኔኒ ዎንቶ አማለቃታ ኦላናዉ ጉꬃ አስ ዶራ። ታኒ ፆሳ ፃምኣ ኦይካዳ ዙማ ሁጰን ኤቃና” ያግስ።
EXO 17:10 ሙሰይ ኪትዳይሳዳ እያሱይ አማለቃታ ኦልስ። ሙሰይ፥ አሮንነ ሆር ዙማ ሁጰ ከይዶሶና።
EXO 17:11 ሙሰይ ባ ኩሽያ ደንꬅድ ጋምእያ ዎደ እስራኤለት ፆኖሶና፥ ሽን እ ባ ኩሽያ ዎꬅያ ዎደ አማለቃት ፆኖሶና።
EXO 17:12 ሙሰ ኩሸይ አርጋጭዳ ዎደ አሮናራነ ሁራራ ሹች ኤህድ ሙሰ እያ ቦላ ኡትስዶሶና። አሮንነ ሁር ኡሻቻራነ ሀድርሳራ ኤቅድ አዋይ ዉላና ጋካናዉ እያ ኩሽያ ካትስ ኦይክዶሶና።
EXO 17:13 ሄሳዳ ኦꬅድ እያሱይ አማለቃታ ማሻን ኦልድ ꬋይስስ።
EXO 17:14 ሄሳፈ ጉየ ጎዳይ ሙሰኮ፥ “ሀይስ ኡባ ዎደ ሀሳየታና መላ ሀ ፆኑዋ ታርክያ ፃፋ። ታኒ አማለቃታ ቡርፆራ ꬋይሳናይሳነ ኤንቲ ዶገታናይሳ እያሱስ ኦዳ” ያግስ።
EXO 17:15 ሙሰይ ያርሾ በሲ ጊግስድ፥ “ጎዳይ ታ ፆኑዋ ባንድራ” ግድ ሱንꬅስ።
EXO 17:16 እ፥ “ጎዳ ፆኖ ባንድራ ꬎቁ ኦꬅድ ኦይክተ። ጎዳይ አማለቃታ መርናዉ ኦላና” ያግስ።
EXO 18:1 ምድያመ ቢታ ካህነይ፥ ሙሰ ቦሎይ ዮቶር፥ ጎዳይ ሙሰስነ ባ አሳ እስራኤለታስ ኦꬅዳባነ ኤንታና ግብፀፈ ከስዳባ ስእስ።
EXO 18:2 ሄ ዎደ ሙሰ ቦሎይ ዮቶር፥ እያ ማታን ሙሰይ አግድ ብዳ እያ ማችዉ ስፖሮነ፥
EXO 18:3 እ ናምኡ ናይታ ኤክድ ይስ። ሙሰይ፥ “ታኒ አላጋ ቢታን በተ አስ ግዳስ” ግድ ባይራ ናኣ ገርሳማ ግድ ሱንꬅስ።
EXO 18:4 ካሉዋ ቃስ፥ “ታ አዋ ፆሳይ፥ ታና ግብፀ ካዉዋ ማሻፈ አሽስ” ግድ አላዛራ ግድ ሱንꬅስ።
EXO 18:5 ሙሰ ቦሎይ ዮቶር፥ እያ ማችዉነ እ አደ ናይታ ባራ ኤክድ፥ መላ ቢታን፥ ፆሳ ዙማ ማታን ደእያ ሙሰኮ ይስ።
EXO 18:6 እ ባንታ ዩሳ ኤርሳናዉ ሙሰኮ ኪትስ።
EXO 18:7 ሄሳ ግሾ፥ ሙሰይ ባ ቦሉዋ ሞካናዉ ከይድ፥ እያ ዝግ ሳሮꬅድ እያ ዬርስ። ኤንቲ እሶይ እሱዋ ሳሮꬅ ስሚድ ሙሰ ዱንካንያ ግዶ ገልዶሶና።
EXO 18:8 ጎዳይ እስራኤለታ አሻናዉ ግብፀ አሳ ቦላነ ኤንታ ካዉዋ ቦላ ኦꬅዳባ ኡባነ ኦገን ኤንታ ጋክዳ መቱዋ ኡባን ጎዳይ ዋት ማድዳኮ ሙሰይ ባ ቦሉዋስ ኦድስ።
EXO 18:9 ዮቶር ጎዳይ እስራኤለ አሳ ግብፀታ ኩሸፐ አሻናዉ ኦꬅዳ ሎኦ ኦሶታባ ስእድ ኡፋይትስ።
EXO 18:10 እ፥ “ህንተና ግብፀታፐ ኤንታ ካዉዋ ኩሽያፐ አሽድ፥ ግብፀ አይለተꬃፈ ከስዳ ጎዳይ፥ እ ጋላተቶ።
EXO 18:11 ኦቶሮን ኤንታ ቦላ ኢታባ ኦꬅዳ ግብፀታፐ እስራኤለታ አሻናዉ ሄሳ ኦꬅዳ ግሾ፥ ጎዳይ ፆሳታ ኡባፈ ግታ ግደይሳ ታኒ ሀእ ኤራስ” ያግስ።
EXO 18:12 ሄሳፈ ጉየ ዮቶር፥ ሙሰ ቦሎይ፥ ፁሳ ያርሾነ ሀራ ያርሾ ፆሳስ ያርሽስ። አሮንነ እስራኤለ ጭማት ኡባይ ፆሳ ስንꬃን እያራ ጌሻ ካꬃ ማናዉ ይዶሶና።
EXO 18:13 ዎንተꬃ ጋላስ ሙሰይ አሳስ ፕርዳናዉ ኡትስ። አሳይ ሙሰ ዩሹዋን ዎንታፈ ኦማርስ ጋካናዉ ኤቅድ ደኤስ።
EXO 18:14 ሙሰ ቦሎይ ሙሰይ አሳስ ኦይሳ ኡባ በእድ፥ “ኔኒ ነ ፃላላ ሀይሳ አይስ ኦꬃይ? አሳይ ዎንታፈ ኦማርስ ጋካናዉ ነ ዩሹዋን ኤሳዳ አይስ ነርካ ኦꬃይ?” ያግስ።
EXO 18:15 ሙሰይ ባ ቦሉዋኮ፥ “አሳይ ፆሳ ሸንያ ኦይቻናዉ ኮይድ ታኮ ይያ ግሾሳ።
EXO 18:16 ኤንታ ግዶን ኦድ ደእኮ ታኮ ዮሶና። ታ ኤንታ ግዶን ባልነ ቱም ኦነኮ ሻካይስ፤ ፆሳ ኪታነ ህግያ ኤንታዉ ኦዳይስ” ያግስ።
EXO 18:17 ሙሰ ቦሎይ፥ “ሀይስ ነ ኦይስ ሎኦ ግደና።
EXO 18:18 ነካ ኔኮ ይያ አሳ ኡባይ ዳቡረታ። ሀ ኦሶይ እስ አሳፐ ዳሮ ግድያ ግሾ፥ ኔኒ ነርካ ኦꬃናዉ ዳንዳአካ።
EXO 18:19 ሀእ ታኒ ነና ዞረይሳ ስአ፤ ፆሳይ ኔራ ግዳና። ኔኒ ሀ አሳ በሳን ግዳዳ ኤንታባ ፆሳስ ኦዳ።
EXO 18:20 ፆሳ ኪታነ ህግያ ኤንታ ታማርሳ። ኤንቲ ዋን ዳነኮነ አይ ኦꬃነኮ ኤንታ በሳ።
EXO 18:21 ቃስ አሳ ግዶን ኦዳ ሻክድ ኤርያ አሳታ፥ ፆሳ ያየይሳታ፥ አማንይሳታነ ዎꬋፈ ኤኮናይሳት ዶራ። ኤንታና አሳ ቦላ ሻላቃታ፥ ማቶ ሀላቃታ፥ ሀምሳላቃታነ አስራላቃታ ኦꬃዳ ሹማ።
EXO 18:22 ኤንቲ ኡባ ዎደ ካዉሻ ኦዳታ ባንታዉ ፕርዶ፥ ሽን ዴፆ ኦዳታ ኔኮ ኤሆ። ሄሳዳ ነ ኦꬅኮ ቶሆይ ነዉ ካዉያና።
EXO 18:23 ነ ኦꬃና መላ ፆሲ ኮየይ ሄሳ። ቃስ ነ ዳቡራካ ሀ አሳ ኡባይ ባ አላለይ ፖለትን ባ ሶ ባ ሶ ስማና” ያግስ።
EXO 18:24 ሙሰይ ዮቶራ ዞርያ ስእስ፤ እ ግዳባ ኡባ ኦꬅስ።
EXO 18:25 ሙሰይ እስራኤለታ ግዶፈ ኦዳ ሻክ ኤርያ አሳታ ዶርስ። ኤንታና አሳ ቦላ ሻላቃታ፥ ማቶ ሀላቃታ፥ ሀምሳላቃታነ አስራላቃታ ኦꬅድ ሹምስ።
EXO 18:26 ሹማት ካዉሻ ኦዳታ ባንታዉ ፕርድዶሶና፥ ሽን ዴፆ ኦዳታ ሙሰኮ ኤሆሶና።
EXO 18:27 ሄሳፈ ጉየ ሙሰይ ባ ቦሉዋ ሞይዝን፥ እ ባ ቢታ ስምስ።
EXO 19:1 እስራኤለ አሳይ ግብፀፈ ከይዳ ሄꬓንꬆ አጌናስ ኮይሮ ጋላሳን ሲና መላ ቢታ ጋክዶሶና።
EXO 19:2 ኤንቲ ራፍድማፐ ደንድድ ብድ፥ ሲና ዙማ ስንꬃን ደእያ መላ ቢታን ኡትዶሶና።
EXO 19:3 ሙሰይ ፆሳራ ጋሄታናዉ ዙማ ቦላ ከይስ። ጎዳይ ዙማ ሁጰፐ እያ ፄግድ፥ “ያይቆባ ሼሽ ግድዳ እስራኤለታስ ሀይሳዳ ያጋ፤
EXO 19:4 ‘ታኒ ግብፀታ ቦላ ኦꬅዳባነ አርጋንꬅ ባ ናአ ባ ቀፍያን ቶከይስዳ ታ ህንተና ዋታ ቶካዳ ታኮ ኤህዳኮ ህንተ ህንተ ሁጰን በእደታ።
EXO 19:5 ሀእ ህንተ ታዉ ኪተትኮነ ታ ጫቁዋ ናግኮ፥ ቢታ ኩመꬃይ ታባ ግድኮካ ህንተ ታዉ ዶረትዳ ደረ ግዳና።
EXO 19:6 ህንተ ታዉ ጌሻ ደረ ግዳና፤ ህንተ ካዎተꬃን ካህነ ግድድ ታና ሀጋዛና።’ ኔኒ እስራኤለታስ ኦዳና ቃላይ ሀይሳ” ያግስ።
EXO 19:7 ሙሰይ ጉየ ብድ፥ ዙማኮ ጭማታ ፄግ ሺሽድ፥ ጎዳይ ኦድዳ ቃላ ኡባ ኤንታዉ ኦድስ።
EXO 19:8 ኤንቲ፥ “ጎዳይ ግዳባ ኡባ ኑኒ ኦꬃና” ያግዶሶና። ሙሰይ ኤንቲ ግዳይሳ ጎዳስ ኦድስ።
EXO 19:9 ጎዳይ ሙሰኮ “ታኒ ኔራ ሃሳይሽን አሳይ ስአናዳነ ኤንቲ ነና ኡባ ዎደ አማናናዳ ታኒ ሙምዳ ሻራራ ኔኮ ያና” ያግስ። ሄሳፈ ጉየ ሙሰይ አሳይ ግዳይሳ ጎዳስ ኦድስ።
EXO 19:10 ጎዳይ ሙሰኮ “ኔኒ አሳኮ ባዳ ሀችነ ዎንቶ ታራ ጋሄታናዉ ባንታና ጌሻና መላ ኤንታዉ ኦዳ። ኤንቲ ባንታ ማኡዋ ሜጭድ፥
EXO 19:11 ሄꬓንꬆ ጋላሳስ ጊገቶ። ሄ ጋላስ አሳ ኡባይ ታና በእሽን ታኒ ሲና ዙማ ቦላ ዎꬋና።
EXO 19:12 ኔኒ ሀ ዙማ ዩሹዋን ዛዋ ዎꬃ። አሳይ ዙማ ከዮና ቦላ መላ ዎይኮ ዙማ ፃጱዋ ቦቾና መላ ኤንታዉ ኦዳ። ዙማ ቦችዳ ኦንካ ሀይቃና።
EXO 19:13 ሄ ኡራይ ሹቻን ጫደትድ ዎይኮ ዶንገን ዱከትድ ሀይቆ፤ እያ ኩሸን ኦንካ ቦቾፎ። መሄይ ዎይኮ አስ ሄሳዳ ሀይቆ። ሞይዘይ ፑነትያ ዎደ ኤንቲ ዙማ ቦላ ከያናዉ ዳንዳኦሶና” ያግስ።
EXO 19:14 ሙሰይ ዙማ ቦላፈ ዎꬍድ፥ አሳይ ፆሳ ጎይናናዉ ባንታና ጊግሳና መላ ኦድስ። ኤንትካ ባንታ ማኡዋ ሜጭዶሶና።
EXO 19:15 ሙሰይ አሳኮ፥ “ሄꬓንꬆ ጋላሳስ ጊገትተ፤ ህንተ ማቸታራ አቆፕተ” ያግስ።
EXO 19:16 ሄꬓንꬆ ጋላስ ዎንታ ጉራ ደሾይ ደችስ። ዎልአንꬅነ ሳካና ሻር ዙማ ማእድ በንትስ። ዎልቃማ ሞይዘ ዋሶይ ስኤትስ። አሳይ ዱንካንዳ በሳ ኡባን ያሻን ኮኮርዶሶና።
EXO 19:17 ሄሳፈ ጉየ፥ ሙሰይ አሳ ፆሳራ ጋꬃናዉ ኤንታና ዱንካንያፐ ከስድ ኤፍስ፤ ኤንቲ ዙማ ፃጶን ኤቅዶሶና።
EXO 19:18 ጎዳይ ሲና ዙማ ቦላ ታማ ላጮራ ዎꬍዳ ግሾ ሲና ደረይ ጩያን ካመትስ። ግታ ጮጨፐ ጩይ ከየይሳዳ እያፐ ጩይያ ዙለይ ሱረ ከይስ። አሳ ኡባይ ዳሮ ኮኮርዶሶና።
EXO 19:19 ሞይዝያ ዋሶይ ዳር ዳር ብዳ ዎደ ሙሰይ ኦድን፥ ፆሳይ ደሾን እያዉ ዛርስ።
EXO 19:20 ጎዳይ ሲና ዙማ ሁጰ ቦላ ዎꬍድ፥ ሙሰ ፑደ ዙማ ቦላ ፄግስ። ሙሰይ ዙማ ቦላ ከይስ።
EXO 19:21 ጎዳይ እያኮ፥ “ኔኒ ዱገ ባዳ አሳይ ታና በአና ግድ፥ ዛዋ አꬎና መላነ ኤንታፈ ዳሮይ ሀይቆና መላ ኤንታዉ ኦዳ።
EXO 19:22 ሀር አቶ ጎዳ ማት ሺቅያ ካህነትካ ባንታና ጌሾ። ኤንቲ ሄሳ ኦꬆና እꬅኮ ታ ኤንታ ሀንቃና” ያግስ።
EXO 19:23 ሙሰይ ጎዳኮ፥ “ኔኒ ዙማ ዱማይዳ ግሾነ ዛዋ እምዳ ግሾ አሳይ ዙማ ሁጰ ከያናዉ ዳንዳኦኮና” ያግስ።
EXO 19:24 ጎዳይ እያኮ፥ “ኔኒ ዱገ ባዳ አሮና ኔራ ኤካዳ ያ። ካህነትነ አሳይ ዛዋ ካንꬅድ ታኮ ይሸ ꬋዮና መላ ኤንታዉ ኦዳ” ያግስ።
EXO 19:25 ሄሳ ግሾ ሙሰይ አሳኮ ዎꬍድ ጎዳይ ግዳይሳ ኤንታዉ ኦድስ።
EXO 20:1 ፆሳይ እስራኤለ አሳኮ ሀይሳዳ ያግስ፤
EXO 20:2 “ነና ግብፀፈ አይለተꬃፈ ከስዳ ጎዳይ ነ ፆሳይ ታና።
EXO 20:3 “ታፐ አትሽን፥ ሀራ ፆሰ ጎይኖፋ።
EXO 20:4 “ቦላ ሳሉዋን ደእያባ፥ ዎይኮ ጋርሳ ሳአን ደእያባ፥ ዎይኮ ሳአፐ ጋርሳን ሃꬃ ግዶን ደእያባ አይባካ ነዉ ጎይንያ ኤቃ ዳንሳዳ ኦꬆፋ።
EXO 20:5 ኤንታዉ ሆኮፋ ዎይኮ ኤንታ ጎይኖፋ። አይስ ጊኮ፥ ታኒ፥ ጎዳይ ነ ፆሳይ፥ ታ ቦንቹዋ ሀራ ፆሳታራ ኮፆና ፆሰ። ታና እፅያ አዋታ ናጋራ ግሾ ናይታ ሄꬓንꬆ ዎይኮ ኦይዳንꬆ የለተꬅ ጋካናዉ ሀንቃና።
EXO 20:6 ሽን ታና ሲቀይሳታነ ታ ኪታ ናገይሳታ ሼሻ ሙኩሉ የለተꬅ ጋካናዉ ኬሀና።
EXO 20:7 “ፆሳ ነ ጎዳ ሱንꬃ ሀዳን ደንꬆፋ። ጎዳይ ባ ሱንꬃ ሀዳን ደንይሳታ ሴሮና አገና።
EXO 20:8 “ሳምባታ ጌሻ ጋላስ ኦꬃዳ ናጋ።
EXO 20:9 ኔኒ ኦሶ ኦꬃናዉ በሲያ ኡሱፑን ጋላሳት ደኦሶና።
EXO 20:10 ሽን ላፑንꬃ ጋላሳይ ኔኒ ጎዳ ቦንችያ ሸምፖ ጋላስ። ሄ ጋላሳን አይባ ኦሶካ ኦꬆፋ። ኔኒ፥ ዎይኮ ነ ናይት፥ ዎይኮ ነ አይለት፥ ዎይኮ ነ መሄይ፥ ዎይኮ ነ ቢታን ደእያ አሳ ጋደ አሳት ሄ ጋላሳን ኦሶ ኦꬆፍተ።
EXO 20:11 ኡሱፑን ጋላሳ ግዶን ጎዳይ ሳሎታ፥ ሳኣ፥ አባነ ኤንታ ግዶን ደእያ ኡባ መꬍስ፥ ሽን ላፑንꬃ ጋላሳን ሸምፕስ። ሄሳ ግሾ ጎዳይ ሳምባታ ጋላሳ አንጅስነ ዱማይስ።
EXO 20:12 “ጎዳይ ነ ፆሳይ ነዉ እምያ ቢታን ነ ላይꬃይ አዱቃና መላ ነ አዋነ ነ አይዉ ቦንቻ።
EXO 20:13 “አሳ ዎꬎፓ።
EXO 20:14 “ላሞፋ።
EXO 20:15 “ካይሶቶፓ።
EXO 20:16 “ነ ላግያ ቦላ ዎርዶ ማርካቶፋ።
EXO 20:17 “ነ ላግያ ኬꬃ አሞቶፋ። ነ ላግያ ማችዉ፥ ዎይኮ እያ አይለታ፥ ዎይኮ እያ መህያ፥ ዎይኮ እያ ሀርያ፥ ዎይኮ እያዉ ደእያባ አይባካ አሞቶፋ” ያግስ።
EXO 20:18 አሳ ኡባይ ደሾይ ደቸይሳነ ሞይዘይ ፑነተይሳ ስእድ፥ ዎልአንꬃይ ዎልአመይሳነ ደረይ ጩየይሳ በእድ ያሻን ኮኮርሸ ሃሆን ኤቅዶሶና።
EXO 20:19 ኤንቲ ሙሰኮ፥ “ኔኒ ኑስ ኦዳ፤ ኑኒ ስአና። ሽን ኑኒ ሀይቆና መላ ፆሳይ ኑስ ኦዶፖ” ያግዶሶና።
EXO 20:20 ሙሰይ አሳኮ፥ “ያዮፍተ፤ ፆሳይ ህንተና ፓጫናዉነ ህንተ እያዉ ኪተትድ ናጋራ ኦꬆና መላ እ ይስ” ያግስ።
EXO 20:21 አሳይ ባንታ ደእያሱዋን ሃክድ ኤቅዳሽን፥ ፆሳይ ደእያሱዋ ሙምዳ ሻራኮ ሙሰይ ሺቅስ።
EXO 20:22 ሄሳፈ ጉየ፥ ጎዳይ ሙሰኮ “እስራኤለ አሳስ ሀይሳዳ ያጋዳ ኦዳ፤ ‘ሳሎፐ ታኒ ህንተዉ ኦድሽን ህንተ ታና ህንተ ሁጰን በእደታ።
EXO 20:23 ያንያ ግሾ፥ ብራ ኤቃ ዎይኮ ዎርቃ ኤቃ ህንተዉ ኦꬅድ ታ ቦላ ጉጅድ ጎይኖፍተ።
EXO 20:24 ነን ታዉ ያርሾ በሲ ኡርቃፈ ጊግሳ። ነ ዶርሳታፐነ ነ ቦራታፐ ኤካዳ ፁሳ ያርሾነ እስፈተꬃ ያርሾ እያ ቦላ ያርሻ። ህንተ ታና ጎይናና መላ ታኒ ዶርዳ በሳ ኡባን ህንተኮ ያዳ ህንተና አንጃና።
EXO 20:25 ህንተ ታዉ ያርሾ በሲ ሹቻፈ ኬፅያባ ግድኮ ማሰትዳ ሹቻፈ ኬፆፋ። ኔኒ ማስያ ሚሸን እያ ቦችኮ ቱንሳሳ።
EXO 20:26 ህንተ ከይሸ ካሎቶና መላ ታዉ ያርሾ በሲ ኮዶራ ከይያ በሳን ኬፆፋ’ ” ያግስ።
EXO 21:1 ጎዳይ ሙሰ ባጋራ ባ ደርያስ እምዳ ዎጋይ ሀይሳ፤
EXO 21:2 “ነ እብራወ አይለ ሻምኮ፥ እ ነዉ ኡሱፑን ላይꬅ ኦꬆ፥ ሽን ላፑንꬃ ላይꬃን አይኮካ ቃንፆና፥ አይለተꬃፈ ጮ የደቶ።
EXO 21:3 እ ማቾ ኤኮና ሻመትዳባ ግድኮ፥ ባርካ የደቶ። እ ማችድ፥ ሻመትዳባ ግድኮ፥ እያ ማችያካ እያራ የደቶ።
EXO 21:4 እያ ጎዳይ እያዉ ማቾ እምዳባ ግድኮነ ማችያ እያዉ አደ ናይታ ዎይኮ ማጫ ናይታ የልዳባ ግድኮ፥ እያ ማችያነ እ ናይት እያ ጎዳባ ግዶ፤ አደይ ባርካ የደቶ።
EXO 21:5 ሽን አይለይ፥ ‘ታኒ ታ ጎዳ፥ ታ ማችዉነ ታ ናይታ ዶሳይስ’ ግድ አይለተꬃፈ ከያናዉ ኮዮና እፅኮ፥
EXO 21:6 እያ ጎዳይ፥ ጎዳ ስን እያ አꬆ። ያትድ፥ ፐንገ ዎይኮ ፐንገ ዝዝግያ ማታን እያ ኤስድ፥ እያ ሀይꬃ ጎꬃን ሉኮ። ሄሳፈ ጉየ፥ እ ባ ደኦ ላይꬃ ኡባን እያዉ አይለ ግዶ።
EXO 21:7 “እስ አስ ባ ማጫ ናእዉ አይለተꬃስ ባይዝኮ፥ አደ አይለታꬆ አይለተꬃፈ ከዮፖ።
EXO 21:8 እዮ ሻምድ ማቻናዉ ኤፍዳ ጎዳይ እዮ ዶሶና እፅኮ፥ እ ጎዳይ እዮ ደርያን ዎዝሶ። እ ጎዳይ እ ቦላ ኢታባ ኦꬅዳ ግሾ፥ እዮ አላጋስ ባይዛናዉ ዳንዳኤና።
EXO 21:9 እ እዮ ባ ናኣስ እማናዉ ኮይኮ፥ ባ ማጫ ናአꬆ ኦꬅድ ኤኮ።
EXO 21:10 እ ሀራ ማቾ እ ቦላ ኤክኮ፥ ኮይሮ ማቼስ ካꬅ፥ ማኦነ እንዳስ በሲያ ዎጋ እዉ ፓጭሶፖ።
EXO 21:11 እ ሀ ሄꬑባታ እዉ ኦꬆና እፅኮ፥ አይብ ሚሸካ ቃንፆና አይለተꬃፈ ከያዳ ቦ።”
EXO 21:12 “አሰ ሾጭድ ዎꬍያ ኦንካ ሀይቃናዉ በሴስ።
EXO 21:13 እ ዎꬋናዉ ቆፖና እያፐ ሀይቅያባ ግድኮ፥ እ ባቃትድ አታና በሲ ታኒ እያዉ ጊግሳና።
EXO 21:14 ሽን አስ ቆፕድ ሀራ አስ ዎꬍኮ፥ ሄ ኡራይ ታ ያርሾ በሲ ቢኮ ያፐ ድጋዳ ሀራ በሳን ዎꬋ።
EXO 21:15 “ባ አዋ ዎይኮ ባ አይዉ ደችያ ኦንካ ሀይቆ።
EXO 21:16 “አሰ ባይዛናዉ ዎይኮ ሃራናዉ ዎልቃን ኦይክያ አስ ሀይቃናዉ በሴስ።
EXO 21:17 “ባ አዋ ዎይኮ ባ አይዉ ጫየይ ሀይቆ።
EXO 21:18 “ናምኡ አሳት ኦየትድ፥ እሶይ እሱዋ ሹቻን ጫድድ ቆእኮ፥ ዎይኮ ዡልትኮ፥ ሄ ደሸትዳይስ ሀይቆና አትድ ሀርግድ ሂፃን ፔእኮ፥
EXO 21:19 ደንድድ ጉፈትድ ካረ ሄራን ሄመትኮ፥ ሄ ደችዳይስ ሀይቆፐ አቴስ። ግድኮካ እ እያ ኦሶፐ አሽዳ ግሾ፥ አጫናዉነ ፓፃና ጋካናዉ ሀርግሳናዉ ኮሼስ።
EXO 21:20 “እስ አስ ባ አደ አይልያ ዎይኮ ማጫ አይልዉ ፃምአን ሾጭድ ዎꬍኮ ሴረታናዉ በሴስ።
EXO 21:21 ሽን ሄ አይለይ እስ ዎይኮ ናምኡ ጋላሳ ግዶን ሀይቆና እፅኮ፥ እያ ጎዳይ ሴረቶፎ። ሄ አይለይ እያ ሻሎ ግድያ ግሾ እያ ሀይቆይ ባዉ ሴራ።
EXO 21:22 “ናምኡ አሳት እሶይ እሱዋራ ዋትድ ቃንፃትዳ ማጫስዉ ደችድ፥ እያ ቦሸታና መላ ኦꬅኮ፥ ሀራ ኢታ ቆሆ ጋꬆና እፅኮ፥ ሄ ደችዳ ኡራይ፥ ሄ ማቸ አዝናይ ኦይችያ አጫ ዳይናት ፕርድኮ ጭጎ።
EXO 21:23 ሽን ሄ ማጫሰ ደሸꬃይ ዳርኮ፥ ሸምፖ ግሾ ሸምፖ፥
EXO 21:24 አይፈ ግሾ አይፈ፥ አቻ ግሾ አቸ፥ ኩሸ ግሾ ኩሸ፥ ቶሆ ግሾ ቶሆ፥
EXO 21:25 ፁሳ ግሾ ፁስ፥ ማዱንꬃ ግሾ ማዱንꬅ፥ ቆኦ ግሾ ቆኦ ኤካናዉ ኮሼስ።
EXO 21:26 “እስ አስ ባ አደ አይልያስ ዎይኮ ማጫ አይሌስ አይፈ ባቅድ ቶይስኮ፥ ሄ አይፍያ ግሾ አይለተꬃፈ ከስ የዶ።
EXO 21:27 ሄሳዳካ፥ ባ አይልያ አቸ ዎይኮ ባ አይለ አቸ መንꬅኮ፥ ሄ አቻ ግሾ አይለተꬃፈ ከስ የዶ።
EXO 21:28 “ቦር አሰ ቃይጭድ ዎꬍኮ፥ ሄ ቦራይ ሹቻን ጫደት ሀይቆ። እያ አሾይ ሜተቶፎ፥ ሽን ቦራ ጎዳይ ሴረቶፎ።
EXO 21:29 ሽን ቦራይ ካሰካ ቃይጭያባ ግድኮነ ኮይሮትድ ቦራ ጎዳስ ኦደትን፥ እ ቃቾና እፅዳባ ግድኮ፥ ሄ ቦራይ አሰ ዎꬍኮ፥ ቦራይነ ቦራ ጎዳይ እስፈ ሹቻን ጫደትድ ሀይቆ።
EXO 21:30 ሽን ቦራ ጎዳይ አጫ ቃንፃና መላ ኦይሸትኮ፥ ኤንቲ ኦይችዳባ ቃንፅድ ባ ሸምፑዋ ዎዞ።
EXO 21:31 ቦራይ አደ ናአ ዎይኮ ማጫ ናአ ቃይጭድ ዎꬍኮ ፕርዳይ እያ መላ ግዶ።
EXO 21:32 ቦራይ አደ አይለ ዎይኮ ማጫ አይለ ቃይጭድ ዎꬍኮ፥ ቦራ ጎዳይ አይልያ ጎዳስ ሀስታሙ ብራ ሳንትመ ቃንፆ፤ ቦራይ ሹቻን ጫደትድ ሀይቆ።
EXO 21:33 “እስ አስ ኦላ ቦክድ ካሞና አግኮ ዎይኮ ካማ ደንꬅን ቦር ዎይኮ ሀረይ ሄ ኦላን ዉልኮ፥
EXO 21:34 ሄ ኦላ ጎዳይ መህያ ጋትያ ቃንፆ። እ እያ ጎዳስ ጋትያ ቃንፅድ፥ ሀይቅዳ መህያ ባዉ ኤኮ።
EXO 21:35 “እስ አሳ ቦር ሀራ አሳ ቦር ጫድድ ዎꬍኮ፥ ፓፃ ቦራ ባይዝድ፥ እያ ሚሽያነ ሀይቅዳ ቦራ አሹዋ ናምአይ ሻክ ኤኮ።
EXO 21:36 ሽን ሄ ቦራይ ካሰካ ቃይጭያባ ግደይሳ ኤርሸ፥ እያ ጎዳይ ቃቾና አግዳባ ግድኮ፥ ሄ ኡራይ እያዉ ቦር ቃንፆ። ያትድ፥ ሄ ሀይቅዳይሳ ባዉ ኤኮ።”
EXO 22:1 “እስ አስ ቦር ዎይኮ ዶርሰ ካይስድ ሹክኮ፥ ዎይኮ ባይዝኮ፥ ቦራ ግሾ እቻሹ ቦራታ፥ ዶርሳ ግሾ ኦይዱ ዶርሳታ ጭጎ።
EXO 22:2 “ካይሶይ ኬ ቦክሸ ኦይከትድ ሾጨትድ ሀይቅኮ፥ ሾጭ ዎꬍዳይስ ኦይሸተና።
EXO 22:3 ሽን ሄስ ሀንዳይ ጋላስ ግድኮ፥ እ ሄ ጉስዳ ሱꬃ አጩዋን ኦይሸቴስ። ካይሶይ ባ ካይስዳይሳ ዛሮ፥ ሽን እያዉ ዛራናባይ ꬋይኮ ባ ሁጰን አይለተꬃስ ባይዘቶ።
EXO 22:4 እ ካይስዳ መሄይ ፓፃ ደእሸ እያ ኩሸን በንትኮ፥ ቦር ዎይኮ ሀረ ዎይኮ ዶርሰ ግድኮ፥ እ ካይስዳይሳስ ናምኡ ኩሸ ጭጎ።
EXO 22:5 “እስ አስ ባ መህያ ደንባን ዎይኮ ዎይነ ጋደን ሄምሽን፥ መሄይ ሀራ አሳ ካꬅ ሚኮ፥ እ ባ ካꬃፈ ዎይኮ ባ ዎይንያፐ ሎኡዋ አጫ ቃንፆ።
EXO 22:6 “እስ አስ ባ ጋደን ታማ ፁግሽን ታማይ ቡርያ ካንꬅድ ሀራ አሳ ጋደን ድጭያ ካꬃነ ዶርያ ሚኮ፥ ታማ ኦይꬅዳ ኡራይ አጮ ቃንፆ።
EXO 22:7 “እስ አስ ብራ ዎይኮ ሀራ አልኦ ሚሸ ባ ሾሩዋስ ሀዳራ እምን፥ ሄ ሾሩዋ ሶፐ ካይሶይ ሄ ሚሽያ ኤክኮነ ሄ ካይሶይ ኦይከትኮ፥ ሄ ካይሶይ ሚሽያ ናምኡ ኩሸ ጭጎ።
EXO 22:8 ሽን ካይሶይ በንቶና እፅኮ፥ ኡራይ ፆሳ ስን ሺቅድ፥ ባ ሾሩዋ ሚሽያ፥ እ ኤኮናይሳ ኤርሳናዉ ጫቆ።
EXO 22:9 “ናምኡ አሳት ቦራ ጋሶን ዎይኮ ሀረ ጋሶን ዎይኮ ዶርሳ ጋሶን ዎይኮ ማኦ ጋሶን ዎይኮ ሀራ ꬋይዳባ ጋሶን ሞተትድ፥ ፆሳ ስን ሺቅኮ፥ ፆሳይ እያ ቦላ ፕርድዳይስ ናምኡ ኩሸ ጭጎ።
EXO 22:10 “እስ አስ ሀረ ዎይኮ ቦር ዎይኮ ዶርሰ ዎይኮ ሀራ መሄ ሀዳራ እምዳሱዋን ሀይቅኮ ዎይኮ መእኮ ዎይኮ ኦንካ በኦና ካይሶተትኮ፥
EXO 22:11 ሀዳራ ኤክዳይስ ባ ላግያ መህያ ካይሶቶናይሳ ጎዳ ስንꬃን ጫቆ። ሄ መህያ ጎዳይ ጫቁዋ ኤኮ፤ መሄይ እያፐ ꬋይዳ ኡራይ ጭጋናዉ ኮሸና።
EXO 22:12 ሽን መሄይ ካይሶተትዳባ ግድኮ፥ መህያ ጎዳስ ጭጎ።
EXO 22:13 ሄ መህያ ዶእ ምዳባ ግድኮ፥ ማርካ ግዳናዳ ጋዉፃ ኤሆ፤ ዶእ ምዳባ ግድኮ እያዉ ጭጎፎ።
EXO 22:14 “አስ ባ ሾሩዋፐ መሄ ዎስ ኤክኮ እያ ጎዳይ ባይና በሳን ሄ መሄይ ደሸትኮ ዎይኮ ሀይቅኮ፥ ሄ መህያስ ጭጋ እሞ።
EXO 22:15 ሽን እያ ጎዳይ እያራ ደእሽን ሄስ ሀንዳባ ግድኮ አጫ ቃንፆፎ። ሀሸ ኤክዳባ ግድኮ፥ ሄ ሀሸ ሚሸይ አጮ ጋተ ግዶ።
EXO 22:16 “እስ አስ እስ ጌላእዉ ጭምድ፥ ኢራ ዝንኤትያባ ግድኮ፥ እዉ አጫ እምድ፥ ባዉ ማቾ ኦꬆ።
EXO 22:17 እ አዋይ እዮ እያዉ እማናዉ ኮዮና እፅኮ፥ ጌላኦ ኤክያ ኡራይ አጫ እምያ ሚሸ መላ እ አዋስ እምድ አጮ።
EXO 22:18 “ብታ ብትያ ማጫስ ሀይቆ።
EXO 22:19 “መሄራ ቱንያ ኦንካ ሀይቆ።
EXO 22:20 “ፆሳፈ ሀራ ጎዳታስ ያርሽያ ኦንካ ሀይቆ።
EXO 22:21 ህንተ ግብፀ ቢታን በተ አስ ግድድ፥ ደእዳ ግሾ፥ በተ አስ ቆሆፕተ ዎይኮ ኡንኤꬆፍተ።
EXO 22:22 አምኤታነ ይኦታ ኡንኤꬆፍተ።
EXO 22:23 ህንተ ኤንታ ኡንኤꬅኮ፥ ኤንቲ ታኮ ዋሳና፤
EXO 22:24 ታኒ ኤንታ ዋሱዋ ስአና። ሄ ዎደ ታ ህንተ ቦላ ሀንቀታዳ ህንተና ኦላን ዉርሳና። ህንተ ማቸት አምኦ፥ ህንተ ናይትካ አዉ ባይናይሳታ ግዳና።
EXO 22:25 “ህንተ ግዶን ደእያ ማንቆ ግድዳ ታ አሳፐ ኦደስካ ሚሸ ታልእኮ፥ የሎን ታልእያ አሳዳ የሎ ኦይቾፍተ።
EXO 22:26 ኔኒ እስባ ግሾ፥ እያ ማኡዋ ኦይክዳ አስ ደእኮ፥ አው ዉሎና ደእሽን እያ ማኡዋ ዛራ።
EXO 22:27 እ ማእድ አቀይ እ ፃላላ። እ ሀራ አይ ማእድ አቃናዉ ዳንዳኢ? ታኒ ቃትያ ፆሲ ግድያ ግሾ፥ እ ታኮ ዋስያ ዎደ ስአና።
EXO 22:28 “ፆሳ ቦላ ጫሻ ቃላ ሃሳዮፓ፥ ዎይኮ ነ ደርያ አይሰይሳ ባዶፋ።
EXO 22:29 ነ ካꬃፈ፥ ነ ዎይነ ኡሻፈነ ነ ሻማሆ ዛይትያፐ ታዉ ያርሾ ያርሻ። “ባይራ ግድድ የለትዳ አደ ናኣ ታዉ እማ።
EXO 22:30 ነ ሚዛፐነ ነ ዶርሳፈ ባይራ የለትዳይሳ ታዉ እማ። ኤንቲ ላፑን ጋላስ ጋካናዉ፥ ባንታ አየታራ ጋምኦ፤ ሆስፑንꬆ ጋላሳን ኤንታ ታዉ እማ።
EXO 22:31 “ህንተ ታዉ ጌሻ አስ ግዳናዉ ኮሼስ። ሄሳ ግሾ፥ ዶእ መንꬅድ ዎꬍዳ መሄ አሾ ሞፕተ፤ ሄሳ ካናስ የግተ።”
EXO 23:1 “ዎርዶ ኦዳ ጋሰꬆፋ፤ ዎርዶ ማርካታዳ ባላ አስ ማዶፋ።
EXO 23:2 ኢታባ ኦꬃናዉ ዳሮ አሳ ካሎፋ። ፕርዳ ዎብሳናዉ ዳሮ አሳራ እስፋዳ ማርካቶፋ።
EXO 23:3 ማንቆይ ፕርዳስ ሺቅያ ዎደ እያ ማንቆተꬃ በአዳ ማዶፋ።
EXO 23:4 “ነ ሞርክያ ቦራይ ዎይኮ ሀረይ ꬋይን ደምኮ፥ ዛራዳ እያዉ ኤፋ።
EXO 23:5 ነና እፅያ ኡራ ሀረይ ጫናራ ኩንድን በአዳ፥ ኡራ ማዳዳ ደንꬆና አጋዳ አꬎፋ።
EXO 23:6 “ፕርዳ ዳባባን ማንቆይ ፕርዳስ ሺቅያ ዎደ እያ ፕርዳ ዎቢሶፓ።
EXO 23:7 ኦናካ ማልተን ሞቶፓ፤ ፅሉዋ ዎꬎፓ። ሄሳ መላባ ኦꬅዳይሳ ታኒ ፕርዶና አግከ።
EXO 23:8 ዎꬋፈ ኤኮፋ፤ ዎꬋፈይ ሱረ ፄልያ አሳ አይፈ ቆቅሴስ፥ ፅሎታ ፕርዳ ምርቄስ።
EXO 23:9 “በታንቹዋ ናቆፋ። ህንተ ግብፀ ቢታን በተ አስ ግድድ ደእዳ ግሾ፥ አሳ ጋደ አስ ግዶይ አይ መላ ስኤትያኮ ኤሬታ።
EXO 23:10 “ኔኒ ነ ጋድያ ኡሱፑን ላይꬅ ጎያዳ ማ።
EXO 23:11 ላፑንꬃ ላይꬃን ጋድያ ጎዮና ሻቻ፤ እያን ዶልድ ካፅያባ ሺሾፓ። ነ አሳ ግዶን ደእያ ማንቆት እያፐ ሞ፤ ቃስ ኤንታፈ አትዳይሳ ዶአት ሞ። ነ ዎይነ ጋድያነ ነ ሻማሆ ጋድያ ሄሳዳ ኦꬃ።
EXO 23:12 “ኔኒ ኡሱፑን ጋላስ ኦሶ ኦꬃ። ነ ቦራይነ ነ ሀረይ ሸምፓና መላነ ነ ሶን የለትዳ አይለይነ በተ አስ ሸምፓና መላ ላፑንꬃ ጋላሳን ኦሶ ኦꬆፋ።
EXO 23:13 ታኒ ህንተዉ ኦድዳባ ኡባ ምንꬅድ ኦꬅተ። ሀራ ፆሳታ ሱንꬃ ፄግድ ዎሶፍተ፤ ኤንታ ሱንꬃ ደንꬆፍተ።
EXO 23:14 “ታና ቦንቻናዉ ላይꬃን ሄꬑ ባኣለ ጋላሳት ህንተዉ ደኦ።
EXO 23:15 ህንተ ግብፀፈ ከይዳ አቢባ ጌተትያ አጌናን፥ ታኒ ህንተና ኪትዳይሳዳ ኡይꬃ ባኣለ ቦንችተ። ላፑን ጋላስ እርሾ የግድ ኡክዳ ኡይꬅ ሞፕተ። ታና ጎይናናዉ ይሸ መላ ኩሸ ዮፕተ።
EXO 23:16 “ቃስ ህንተ፥ ህንተ ጋደን ዘርን፥ ኮይሮ ጋክዳ ካꬃ ጫክያ ዎደ ካꬃ ጫኮ ባኣለ ቦንችተ። “ላይꬃ ዉርሰꬃን፥ ዎይንያነ ሄሳ መላ ምꬃታ አይፍያ ህንተ ጋደፐ ማፅያ ዎደ ሻቃራ ባኣለ ቦንችተ።
EXO 23:17 ላይꬃን ላይꬃን ቦንቸትያ ሀ ሄꬑ ባለታን አደ ኡባይ ታና፥ ህንተ ጎዳ ጎይናናዉ ዮ።
EXO 23:18 “ኔኒ ታዉ መሄ ያርሽያ ዎደ እርሾ የግድ ኡክዳ ኡይꬃራ ታዉ ያርሾፋ። ባኣለ ቦንችያ ጋላስ ያርሸትዳ ሞꬉዋፈ ዎንታስ አይብካ አቶፎ።
EXO 23:19 ህንተ ጋደን ባይራ ካፅዳ ካꬃ ኡባፈ ሎኡዋ ጎዳ፥ ህንተ ፆሳ ሶ ኤህተ። ዴሻ ማር ዎይኮ ዶርሳ ማር እያ አየ ማꬃን ዶይሶፓ።
EXO 23:20 “ነ ኦግያን ነና ናጋና ማላነ ታኒ ነዉ ጊግስዳ በሳ ነና ኤፋና መላ ታኒ ኪታንቾ ነ ስንꬃን ኪታና።
EXO 23:21 እ ኦድያባ ስአዳ እያዉ ኪተታ፤ እያ ቦላ ማካሎፋ። ታ እያዉ ማታ እምዳ ግሾ፥ ህንተ ናጋራ ኦꬅያባ ግድኮ፥ ህንተ ናጋራ ማረና።
EXO 23:22 ህንተ እያዉ ኪተትኮነ ታ ኪታ ኡባ ፖልኮ፥ ህንተ ሞርከታ ኡባ ሞርካና፤ ህንተራ ኤቀተይሳታ ታኒ ኦላና።
EXO 23:23 ታ ኪታንቾይ ህንተ ስንꬃን ብድ፥ ህንተና አሞረታ፥ ህተታ፥ ፓርዘታ፥ ካናነታ፥ ህወታነ ያቡሰታ ቢታ ኤሀና። ታኒ ኤንታ ꬋይሳና።
EXO 23:24 ኤንታ ፆሳታስ ዝጎፍተ ዎይኮ ጎይኖፍተ፥ ዎይኮ ኤንታ አማኖ ዎጋ ካሎፍተ። ኤንታ ፆሳታ ꬋይስተ፥ ኤንታ ኤቃ ሹቻታ መንረꬅተ።
EXO 23:25 ጎዳ፥ ህንተ ፆሳ ታና፥ ጎይንተ። ሄሳዳ ህንተ ኦꬅኮ፥ ታኒ ህንተ ካꬃነ ህንተ ሃꬃ አንጃና፤ ሀርግያካ ህንተ ግዶፈ ድጋና።
EXO 23:26 ህንተ ቢታን ማጫሳይ ቦሸተና፤ ማይነና። ታኒ ህንተ ላይꬃ አዱሳና።
EXO 23:27 “ታኒ ነ ሞርከታ ቦላ ታ ያሻ የዳና። ህንተራ ኤቀትያ ካዎተꬃታ ኡባ ዳጋንꬃና። ህንተ ሞርከት ኡባይ ህንተዉ ዞኮ ዛሪድ ባቃታና መላ ኦꬃና።
EXO 23:28 ታኒ ህንተ ሞርከታ ቦላ ካዠ የዳዳ ህወታ፥ ካናነታነ ህተታ ህንተ ስንꬃፈ ጎዳ ከሳና።
EXO 23:29 ሽን ቢታይ መላ አቶናዳነ ባዞ ዶእ ህንተና ዋይሶናዳ እስ ላይꬃን ኤንታ ጎድከ።
EXO 23:30 ሽን ህንተ ታይቦን ዳርድ፥ ምንድ፥ ሄ ቢታ ላታና ጋካናዉ ኤንታ ጉꬃራ ጉꬃራ ጎዳ ከሳና።
EXO 23:31 ታኒ ህንተ ዛዋ ዞኦ አባፈ ፍልስፄመ አባ፥ መላ ቢታፈ ብድ ኤፍራፂሳ ሻፋ ጋካናዉ ዳልግሳና። ሄ ቢታን ደእያ ኡባ ታኒ ህንተ ኩሸን አꬃዳ እማና፤ ህንተካ ኤንታ ጎድድ ከሳና።
EXO 23:32 ኤንታራ ዎይኮ ኤንታ ፆሳታራ ጫቆ ኦꬆፍተ።
EXO 23:33 ኤንታ ህንተ ቢታን ዎꬆፍተ። ሀንኮደ ኤንቲ ህንተና ታ ቦላ ናጋራ ኦስሳና። ኤንታ ፆሳታ ህንተ ጎይንኮ ህንተዉ ፅሄ ግዳና” ያግስ።
EXO 24:1 ጎዳይ ሙሰኮ፥ “ኔኒ፥ አሮን፥ ናዳብ አብዮዳነ እስራኤለ ጭማታፐ ላፑን ታሙ አሳት ታኮ ዙማ ቦላ ከይድ፥ ሃሆን ኤቅድ፥ ጉፋንድ፥ ታዉ ጎይንተ።
EXO 24:2 ሽን ኔኒ ነርካ ታኮ ሺቃ፤ ሀራት ታ ማት ሺቆፖ። ቃስ አሳይካ ኔራ ዙማ ቦላ ከዮፖ” ያግስ።
EXO 24:3 ሙሰይ ብድ፥ ጎዳ ቃላነ ዎጋ ኡባ አሳስ ኦድን፥ አሳ ኡባይ እስ ቃላን፥ “ጎዳይ ግዳባ ኡባ ኑኒ ኦꬃና” ያግዶሶና።
EXO 24:4 ሙሰይ ጎዳይ ኦድዳባ ኡባ ፃፍስ። ዎንተꬃ ጋላስ ጉራ ደንድድ፥ ዙማ ጋርሳን ያርሾ በሰ ጊግስስ። ታማነ ናምኡ እስራኤለ ሼሻታ ሱንꬃን፥ ታማነ ናምኡ ሹቻ ቱስ ኤስስ።
EXO 24:5 እስራኤለ ፓንꬃታ እ ኪትን፥ ኤንቲ ብድ ፁሳ ያርሹዋነ እስፈተꬃ ያርሹዋስ ኮርማታ ሹክድ፥ ጎዳስ ያርሽዶሶና።
EXO 24:6 ሙሰይ መህያ ሱꬃፈ ባጋ ኤክድ ከርያን ትግስ፤ አትዳ ባጋ ሱꬃ ያርሾ በሳን ꬋርጭስ።
EXO 24:7 ሄሳፈ ጉየ ጫቆ ማፃፋ ኤክድ፥ አሳስ ናባብን፥ ኤንቲ፥ “ጎዳይ ግዳባ ኡባ ኑኒ ኦꬃና፤ ኑኒ እያ ኪታ ፖላና” ያግዶሶና።
EXO 24:8 ሄሳፈ ጉየ፥ ሙሰይ ሄ ሱꬃ ኤክድ፥ አሳ ቦላ ꬋርጭድ፥ ኤንታ፥ “ጎዳይ ህንተዉ ሀ ኪታታ እምያ ዎደ ህንተራ ገልዳ ጫቁዋ ምንꬅያ ሱꬃይ ሀይሳ” ያግስ።
EXO 24:9 ሙሰይ፥ አሮን፥ ናዳብ፥ አብዮዳነ እስራኤለ ጭማታፐ ላፑን ታማይ ዙማ ቦላ ከይድ፥
EXO 24:10 እስራኤለ ፆሳ በእዶሶና። እያ ቶሁዋፐ ጋርሳን ሳሎዳ ጌይዳ፥ ሳንፓረ ጌተትያ ሹቻፈ ኦሰትዳባ ዳንያ ደምባ በሲ ደኤስ።
EXO 24:11 ሽን ፆሳይ እስራኤለ አሳ ሀላቃታ ዎꬍቤና። ኤንቲ ፆሳ በእዶሶና፤ እያ ስንꬃን ምዶሶናነ ኡይዶሶና።
EXO 24:12 ጎዳይ ሙሰኮ፥ “ኔኒ ታኮ ዙማ ቦላ ሃ ከያዳ፥ ሀይሳን ጋምአ። ታ አሳይ ታዉ ኪተታና መላ ናምኡ ሎቸ ሹቻታ ቦላ ታ ኩሸን ታ ፃፍዳ ህገታ ነዉ እማና” ያግስ።
EXO 24:13 ሙሰይነ እያዉ ኪተትያ እያሱይ ባናዉ ደንድዶሶና፤ ሙሰይ ፆሳራ ጋሄታናዉ ዙማ ቦላ ከይስ።
EXO 24:14 ሙሰይ እስራኤለ ጭማታኮ፥ “ኑኒ ህንተኮ ስማና ጋካናዉ ሀይሳን ጋምእተ። አሮንነ ሁር ሀይሳን ህንተራ ደኦሶና፤ ኦድ ደእያ ኦንካ ኤንታኮ ቦ” ያግስ።
EXO 24:15 ሙሰይ ዙማ ቦላ ከይዳ ዎደ ሻራይ ዙማ ማእስ።
EXO 24:16 ጎዳ ቦንቾይ ሲና ዙማ ቦላ ኡትስ። ሄ ሻራይ ኡሱፑን ጋላስ ዙማ ቦላ ማእስ፤ ላፑንꬃ ጋላስ ጎዳይ ሻራ ግዶን ግድድ ሙሰ ፄግስ።
EXO 24:17 ዙማ ቦላ ቆንጭዳ ጎዳ ቦንቾይ እስራኤለታስ ታማ ላጮ ዳንድ በንትስ።
EXO 24:18 ሄሳፈ ጉየ፥ ሙሰይ ዙማ ሁጵያ ከይድ ሻራ ግዶ ገልስ፤ ያን ኦይታሙ ጋላስነ ኦይታሙ ቃማ ጋምእስ።
EXO 25:1 ጎዳይ ሙሰኮ ሀይሳዳ ያግስ፤
EXO 25:2 “ታዉ እሞታ ኤሀና መላ እስራኤለታስ ኦዳ። እያ ዎዛን እያ እማ እማ ግዳባ እምያ እሞታ አሳ ኡባፈ ታዉ ኤካ።
EXO 25:3 ህንተ ኤንታፈ ኤካና እሞታይ፥ ዎርቃ፥ ብራ፥ ናሰ ብራታ፥
EXO 25:4 ካሎሰ ቃጭና፥ ኦቻ ቴራ ዳንያ ቃጭና፥ ዞኦ ቃጭናነ አልኦ ሊኖ፥ ዴሻ እክሰ፥
EXO 25:5 ሃሸትድ ዞኦ ቃላመን ትየትዳ ዶርሳ እተ፥ ሎኦ ዶአ እተ፥ ሶቃላ ምꬅ፥
EXO 25:6 ፆምፐስ ማድያ ሻማሆ ዛይተ፥ ሹማተꬃ ዛይትያንነ እፃንያን ጉዠትያ ሳዎታ፥
EXO 25:7 ካህነ ሀላቃይ ማእያ ኤፉደ ጌተትያ ማኡዋ ቦላነ እያ ትራን ዎሰትያ ማርግደ ጌተትያ አልኦ ሹቻነ ሀራ አሌቆ ሹቻታ ኤሆ።
EXO 25:8 ታኒ ኤንታ ግዶን ዳና መላ ኤንቲ ታና ጎይንያ በሲ ጊግሶ።”
EXO 25:9 ዱንካንያነ እያ ግዶን ደእያ ሚሸታ ኡባ ታ ነና በሲያ ማራን ኦꬃ።
EXO 25:10 “ሶቃላ ምꬃፈ፥ አዱሳተꬃይ ናምኡ ዋꬋነ ታካꬎ፥ ጎምፓይ እስ ዋꬋነ ታካꬎ፥ ጌሳይ እስ ዋꬋነ ታካꬎ ግድያ ሳፅነ ኦꬅተ።
EXO 25:11 ጋꬃነ ካርያ ዋላህ ባይና ዎርቃን ካማ፤ እያ ዩሹዋካ ዎርቃን ላንፃ።
EXO 25:12 ሄ ታቦትያስ ኦይዱ ዎርቃ ሳጋዮታ ኦꬃዳ፤ ኦይዱ ገዳታ ቦላ እስ ባጋራ ናምኡ ሳጋዮታ፥ ቃስ ሀንኮ ባጋራ ናምኡ ሳጋዮታ አꬃዳ ጋሰꬃ።
EXO 25:13 ታቦትያ ቶክያ ካሶ ምꬃታ ሶቃላ ምꬃፈ ከሳዳ ዎርቃን ላንፃ።
EXO 25:14 ታቦትያ ቶካናዉ እያ ምየን ደእያ ሳጋዮታን ካሶ ምꬃታ አꬃ።
EXO 25:15 ቶክያ ካሶ ምꬃት ታቦትያ ሳጋዮታ ግዶን ደኦ፤ ኤንቲ ያፐ ከዮፖ።
EXO 25:16 ታቦትያ ግዶን ታኒ ነዉ እምያ፥ ታሙ ኪታት ፃፈትዳ ናምኡ ሎቸ ሹቻታ ዎꬃ።
EXO 25:17 “ዋላህ ባይና ዎርቃፈ አዱሳተꬃይ ናምኡ ዋꬋነ ታካꬎ፥ ጎምፓይ እስ ዋꬋነ ታካꬎ ግድያ ናጋራ አቶተꬃ ካማ ኦꬃ።
EXO 25:18 ቀፈራ ደእያ ናምኡ ክሩበታ ዎርቃፈ ቆፃዳ ኦꬃ።
EXO 25:19 እስ ክሩብያ እስ ባጋ ጋፃን፥ ናምአንꬆ ክሩብያ ሀንኮ ባጋ ጋፃን ዎꬃዳ ናምኣ ታቦትያ ጉጵያራ ኦይꬃዳ ኦꬃ።
EXO 25:20 ክሩበት ዎልኮ ስም ኡትድ፥ ባንታ ቀፍያ ደንꬅድ፥ አቶተꬃ ካማ ካሞ።
EXO 25:21 ታኒ ነዉ እምያ ሎቸ ሹቻ ቦላ ፃፈትዳ ታሙ ኪታታ ታቦትያ ግዶን ዎꬃ። ያታዳ፥ ጉጵያ ታቦትያ ቦላ ዎꬃ።
EXO 25:22 ታቦትያ ጉጵያ ቦላ ደእያ ናምኡ ክሩበታፐ ግዶን ግዳዳ ታኒ ኔራ ጋሄታና። እስራኤለ አሳስ እምያ ኪታ ኡባ ታኒ ያን ነዉ እማና።”
EXO 25:23 “ሶቃላ ምꬃፈ አዱሳተꬃይ ናምኡ ዋꬋ፥ ጎምፓይ እስ ዋꬋ፥ ጌሳይ እስ ዋꬋነ ታካꬎ ግድያ እስ ፃርጴዛ ኦꬃ።
EXO 25:24 ያታዳ፥ ዋላህ ባይና ዎርቃን ላንፃ፤ እያ ዩሹዋካ ዎርቃን ላንፃ።
EXO 25:25 ሄሳዳካ፥ ጎምፓይ ታካꬎ ግድያ ጎሳ እያ ቦላ ዩሻ አꬃ። ያታዳ፥ እያ ዩሹዋ ዎርቃን ላንፃ።
EXO 25:26 ሄ ፃርጴዛስ ኦይዱ ዎርቃ ሳጋዮታ ኦꬃዳ፥ ፃርጴዛ ኦይዱ ቶሆታራ ኦይꬃ።
EXO 25:27 ፃርጴዛ ቶካናዉ ካሶ ምꬃታ አꬅያ ሳጋዮት ፃርጴዛ ጎሳ ማታን ሺቅድ ደኦ።
EXO 25:28 ሄ ቶክያ ካሶታ ሶቃላ ምꬃፈ ከሳዳ፥ ዎርቃን ላንፃ።
EXO 25:29 ሄሳዳካ፥ ሻተታነ ጭልፓታ፥ ዎይነ ያርሹዋ ዱቅያ ሚሸታነ ፁአታ ዋላህ ባይና ዎርቃፈ ኦꬃ።
EXO 25:30 ፃርጴዛይ ታቦትያስ ስንꬃ ባጋራ ኡቶ። ታ ስንꬃን ኡትያ ጌሻ ኡይꬃይ ኡባ ዎደ ፃርጴዛ ቦላፈ ꬋዮፖ።”
EXO 25:31 “ፆምፐ ዎꬅያ ኮጫ ዋላህ ባይና ዎርቃፈ ኦꬃ። ሄ ኮጫይ ኤቅያ ቶሁዋነ ቶማ ዎርቃፈ ቆፃዳ ኦꬃ። አሌቆስ ኦሰትያ ዋላፃት፥ ጋምቡꬃትነ ጪሻት ኡባይ እስኖ ግድድ ኦሰታናዉ በሴስ።
EXO 25:32 ናምኡ ባጋራ፥ ሄꬑ ሄꬑ ታሸታ እያዉ ከሳ።
EXO 25:33 ኡሱፑን ታሸታስ ፄራን ፄራን ሄꬑ ሄꬑ አሌቆ ጋምቡꬃትነ ጪሻት ደእያ ላውዘ ምꬃ ጪሸ ዳንያባይ ደኦ።
EXO 25:34 ፆምፕያ ዎꬅያ ኮጫ ግዶን ደእያ ቶማ ፄራን ኦይዱ አሌቆ ጋምቡꬃትነ ጪሻት ደእያ ላዉዘ ምꬃ ጪሸ ዳንያባይ ደኦ።
EXO 25:35 ታሸታፐ ጋርሳን፥ ናምኡ ታሸት ጋሄትያ በሳን እስ እስ ጋምቡꬅ ደኦ።
EXO 25:36 ጋምቡꬃይ፥ ታሸይነ ፆምፕያ ዎꬅያ ኮጫይ እስኖ ግድድ፥ ዋላህ ባይና ዎርቃፈ ቆፀትድ ኦሰቶ።
EXO 25:37 “ፆምፐ ዎꬅያ ኮጫ ቦላ ላፑን ፆምፐታ ጊግሳዳ፥ ኤንቲ ስን ፖአና መላ ꬎቁ ኦꬃዳ ዎꬃ።
EXO 25:38 ፆምፕያ ናጋናዉ ማድያ ቃጰታነ ኤንታ ዎꬅያባታ ዋላህ ባይና ዎርቃፈ ኦꬃ።
EXO 25:39 ፆምፐ ዎꬅያ ኮጫይነ እያ ሚሸት ኡባይ ሀስታማነ እቻሹ ክሎ ግራመ ግድያ ዋላህ ባይና ዎርቃፈ ኦሰቶ።
EXO 25:40 ታኒ ነና ዙማ ቦላ በስዳ ሌምሱዋ ካላዳ፥ አኬካዳ ኦꬃ።”
EXO 26:1 “ዱንካንያ ጋꬃ ባጋስ አልኦ ሊኖፐ ኦሰትዳ፥ ታሙ ገሸ ጊግሳ። ኤንታ ካሎሰ፥ ኦቻ ቴራ ዳነይሳንነ ዞኦ ቃጭናን ዳዳዳ ክሩበታ ምስልያራ አሌቅሳ።
EXO 26:2 ገሸት ኡባይ እስ ልከ ግዶ፤ አዱሳተꬃይ ላታማነ ኦይዳ፥ ጎምፓይ ቃስ ኦይዱ ዋꬋ ግዶ።
EXO 26:3 እቻሹ ገሸታ እስፈ ጋꬃዳ ስካ፤ ሀንኮ አትዳ እቻሻታ ሄሳዳ ኦꬃ።
EXO 26:4 እስፈ ጋሄትድ ስከትዳ ናምኡ ገሸታስ እሱዋ እሱዋ ጋፃን ካሎሰ አፍላፐ ኦሰትዳ ሳጋዮታ ኦꬃ።
EXO 26:5 እስፈ ስከትዳ ኮይሮ ማጋራጁዋ ቦላ ኮይሮ ማራን ካሎሰ አፍላፐ ኦሰትዳ እሻታሙ ሳጋዮታ ኦꬃ፤ ሄሳዳካ ናምአንꬆ ማጋራጁዋ ቦላ ዉርሰꬃ ጋፃን እሻታሙ ሳጋዮታ ኦꬃ።
EXO 26:6 ጌሻ ዱንካነይ እስኖ ግዳና መላ ናምኡን ሻከት ስከትዳ ገሸታ ዎል ጋꬅድ ኦይሰꬃናዉ፥ እሻታሙ ዎርቃፈ ኦሰትዳ ኦይክያባታ ኦꬃ።
EXO 26:7 “ጌሻ ዱንካንያ ቦላራ ካማና መላ ታማነ እስ ገሸታ ዴሻ እክሰፐ ኦꬃ።
EXO 26:8 ታማነ እስ ገሸት እስ ግና ግዶ፤ እስ እስ ማጋራጁዋ አዱሳተꬃይ ሀስታሙ ዋꬋ፥ ጎምፓይ ኦይዱ ዋꬋ ግዶ።
EXO 26:9 እቻሹ ገሸታ እስ ባጋራ፥ ኡሱፑን ገሸታ ሀንኮ ባጋራ ጋꬃዳ ስካ። ኡሱፑንꬆ ማጋራጆይ ዳኮየትድ፥ ዱንካንያስ ስንꬃ ባጋራ ዳቡለቶ።
EXO 26:10 ዎል ጋꬅ ስክዳ ገሸታፐ እስ ማጋራጁዋስ ማጫራ ቦላ እሻታሙ ሳጋዮታ ኦꬃ፤ ቃስ ሀንኮ ማጋራጁዋስ ማጫራ ቦላ እሻታሙ ሳጋዮታ ኦꬃ።
EXO 26:11 ናምኡን ሻከት ስከትዳ ገሸት እስ ካማ ግዳና መላ እሻታሙ ናሰ ብራታፐ ኦሰትዳ ኦይክያባታ ኦꬃ።
EXO 26:12 ሄ ዱንካንያ ገሸታፐ ፓላህዳ ባጋ ኤካዳ ጌሻ ዱንካንያስ ጉየ ባጋራ ካቃ።
EXO 26:13 ዱንካንያ ገሸታፐ አዱሳተꬃ ባጋራ ፓላህዳ ጎምፓይ እስ እስ ዋꬋ ግድዳ ገሸታ ጌሻ ዱንካንያስ ናምኡ ባጋራ ካቃ።
EXO 26:14 “ዱንካንያስ ቦላ ባጋራ ዳቡልድ ካማናዉ ዞኦ ቃላመን ትየትዳ ማራዘ እተነ ሎኦ ዶአ እተ ኦꬃ።
EXO 26:15 ጌሻ ዱንካንያ ቱቀታ ሶቃላ ምꬃፈ ኦꬃ።
EXO 26:16 እስ እስ ቱቅያ አዱሳተꬃይ ታሙ ዋꬋ፥ ጎምፓይ እስ ዋꬋነ ባጋ ግዶ።
EXO 26:17 ናምኡ ቱቀት እስፈ ኦይከታና መላ እስ እስ ቱቅያስ ኦይሰꬅያባይ ደኦ። ጌሻ ዱንካንያ ቱቀታ ኡባ ሄሳዳ ኦꬃ።
EXO 26:18 ጌሻ ዱንካንያ ዉሎሀ ባጋራ ላታሙ ቱቀታ ኦꬃ።
EXO 26:19 ኤንታና ኤሳናዉ ኤንታ ጋርሳን ብራ ብራታፐ ኦሰትዳ ኦይታሙ ሉሆይ ደእያ ቶሆታ ኦꬃ። እስ እስ ቱቅያስ ናምኡ ናምኡ ቶሆ ከሳ።
EXO 26:20 ጌሻ ዱንካንያ ፑደሀ ባጋራ ላታሙ ቱቀታ ኦꬃ።
EXO 26:21 ኤንታና ኤሳናዉ ኤንታ ጋርሳን ብራ ብራታፐ ኦሰትዳ ኦይታሙ ሉሆይ ደእያ ቶሆታ ኦꬃ። እስ እስ ቱቅያስ ናምኡ ናምኡ ቶሆ ከሳ።
EXO 26:22 ጌሻ ዱንካንያስ ጉየራ ዉሎሀ ባጋራ ኡሱፑን ቱቀታ ኦꬃ።
EXO 26:23 ጉየ ባጋራ ደእያ ማዛነታስ ናምኡ ቱቀታ ኦꬃ።
EXO 26:24 ሄ ማዛንያን ደእያ ቱቀት ቶሆፐ ሁጰ ጋካናዉ ኦይከቶ። ናምኡ ማዛነታ መꬍያ ናምኡ ቱቀታ ሄሳꬆ ኦሰታናዉ በሴስ።
EXO 26:25 ሄሳዳካ ናምኡ ናምኡ ቶሆይ ደእያ ሆስፑን ቱቀታ ኦꬃዳ፥ ኤንታዉ ብራ ብራታፐ ኦሰትዳ ታማነ ኡሱፑን ሉሆይ ደእያ ቶሆታ ኦꬃ።
EXO 26:26 “ቱኡቀታ ሳꬅድ ኦይꬅያ ሶቃላ ምꬃፈ ኦሰትዳ ታማነ እቻሹ ልዮታ ከሳ። ኤንታፈ እቻሻታ ጌሻ ዱንካንያስ እስ ባጋ ምየን ደእያ ቱቀታስ፥
EXO 26:27 ቃስ እቻሻታ ሀንኮ ባጋ ምየን ደእያ ቱቀታስ፥ ሄሳዳካ አትዳ እቻሻታ ዉሎሀ ባጋን ደእያ ቱቀታስ ኦꬃ።
EXO 26:28 ሀ ጋፃ ቱቅያፐነ ያ ጋፃ ቱቅያፐ ይያ ልዮት ግዶ ቱቅያራ ኦይከቶ።
EXO 26:29 ቱኡቀታ ዎርቃን ላንፃ፤ ልዮታ ኦይካናዉ ማድያ ሳጋዮታ ዎርቃፈ ኦꬃ፤ ቃስ ልዮታ ዎርቃን ላንፃ።
EXO 26:30 ጌሻ ዱንካንያ ዙማ ቦላ ታ ነና በስዳይሳዳ ኦꬃ።
EXO 26:31 “አልኦ ሊኖፐ እስ ማጋራጆ ኦꬃዳ፥ እያ ካሎሰ፥ ኦቻ ቴራ ዳነይሳንነ ዞኦ ቃጭናን ዳዳዳ ክሩበታ ምስለን አሌቅሳ።
EXO 26:32 እያ ሶቃላ ምꬃፈ ኦꬃዳ፥ ዎርቃን ሜሸትዳ ኮጫታንነ ብራ ብራታፐ ኦሰትዳ ኦይዱ ቶሆይ ደእያ ቱሳታ ቦላ ካቃ።
EXO 26:33 ሄ ማጋራጁዋ ጌሻ ዱንካንያስ ካራን ደእያ ቃጰታፐ ጋርሳን ካቃ። ያታዳ ህገይ ፃፈትዳ ናምኡ ሎቸ ሹቻታ ኦይክዳ ጫቆ ታቦትያ ማጋራጁዋስ ጉየ ባጋን ዎꬃ። ሄ ገሸይ፥ ጌሻ በሳነ ኡባፈ ጌሻ በሳፈ ሻኬስ።
EXO 26:34 ናጋራ አቶተꬃ ካማን ጫቆ ታቦትያ ካማ።
EXO 26:35 ፃርጴዛ፥ ኡባፈ ጌሻ በሳፈ ካረራ፥ ጌሻ ዱንካንያፐ ፑደሀ ባጋን ዎꬃ፤ ፆምፐ ዎꬅያ ኮጫ ዱገሀ ባጋራ ዎꬃ።
EXO 26:36 “ዱንካንያ ፐንገ ማጋራጁዋ፥ አልኦ ሊኖፐ ጊግሳዳ፥ ካሎሰ፥ ኦቻ ቴራ ዳነይሳንነ ዞኦ ቃጭናን ዳዳዳ አሌቅሳ።
EXO 26:37 ማጋራጁዋስ እቻሹ ቱሳታ ሶቃላ ምꬃፈ ኦꬃዳ ዎርቃን ላንፃ፤ ኮጫትካ ዎርቃፈ ኦሰትዳይሳታ ግዶ። ቱሳታስ ናሰ ብራታፐ እቻሹ ቶሆታ ጊግሳ።”
EXO 27:1 “ሶቃላ ምꬃፈ ያርሾ በሲ ኦꬃ። አዱሳተꬃይነ ጎምፓይ ኦይዱ ዋꬋነ ታካꬎ፥ ጌሳይ ሄꬑ ዋꬋ ግድዳ ኦይዱ ማዛነራ ደእያ ያርሾ በሲ ኦꬃ።
EXO 27:2 ኦይዱ ማዛነታ ቦላ ካጨ ዳንያባ ከሳ፤ ካጨት ያርሾ በሳራ እስኖ ግድድ ኦሰቶ። ያታዳ፥ ያርሾ በሳ ኡባ ናሰ ብራታን ላፃ።
EXO 27:3 እያዉ ጎኤትያ ሚሸታ፤ ብዶ ከስያ ከረታ፥ አካፋታ፥ ባልደታ፥ አሾ ቃጰታነ ጮጨታ ኡባ ናሰ ብራታፐ ኦꬃ።
EXO 27:4 ያታዳ፥ ናሰ ብራታፐ ዛርዛረ ዳንያባ ኦꬃዳ፥ እያዉ ኦይዱ ማዛነታ ቦላ ኦይዱ ሳጋዮታ ጊግሳ።
EXO 27:5 ሄ ዛርዛርያ ያርሾ በሳ ጎሳፈ ጋርሳን ያርሾ በሳስ ባጋ ዛዋ ጋꬃዳ ዎꬃ።
EXO 27:6 ሶቃላ ምꬃፈ ያርሾ በሳ ቶክያ ካሶ ምꬃታ ከሳዳ፥ ናሰ ብራታን ላንፃ።
EXO 27:7 ያርሾ በሳ ቶክያ ዎደ ማዳና መላ ሄ ካሶ ምꬃታ ናምኡ ምየራ ደእያ ሳጋዮታን አꬃ።
EXO 27:8 ታኒ ነና ዙማ ቦላ በስዳይሳዳ ያርሾ በሲ ፃዉላፐ ኦꬃዳ፥ ግዱዋ ካይስ ኦꬃ።”
EXO 27:9 “ጌሻ ዱንካንያ ዳባባ ገቻናዉ አልኦ ሊኖፐ ማጋራጆ ጊግሳ። ገሸታስ አዱሳተꬃይ ዱገሀ ባጋራ ፄቱ ዋꬋ ግዶ።
EXO 27:10 እያዉ ካተ ግዳና መላ ናሰ ብራታፐ ኦሰትዳ ላታሙ ቱሳታነ ላታሙ ቶሆታ ኦꬃ። ኤንታ ቦላ ብራ ብራታፐ ኦሰትዳ ፃምአታነ ካጨታ ኦꬃ።
EXO 27:11 ዳባባስ ፑደሀ ባጋራካ ሄሳዳ ኦꬃ።
EXO 27:12 “ዳባባስ ዉሎሀ ባጋ አዱሳተꬃይ እሻታሙ ዋꬋ ግድዳ ገሸት ኦሰትድ፥ ኤንታዉ ታሙ ቶሆይ ደእያ ቱሳት ደኦ።
EXO 27:13 ገልያ ዉላይ ደእያ፥ ዶሎሀ ባጋ ዳባባ ጎምፓይ እሻታሙ ዋꬋ ግዶ።
EXO 27:14 ዳባባ ፐንግያፈ እስ ባጋራ አዱሳተꬃይ ታማነ እቻሹ ዋꬋ ግድያ ገሸት ደኦ፤ ኤንታዉ ሄꬑ ቶሆይ ደእያ ሄꬑ ቱሳት ደኦ።
EXO 27:15 ሀንኮ ባጋራ ደእያ ገሸትካ ሄሳዳ ኦሰቶ።
EXO 27:16 “ዳባባ ገልያ ዉላስ አዱሳተꬃይ ላታሙ ዋꬋ ግድያ፥ አልኦ ሊኖፐ ማጋራጆ ጊግሳዳ፥ ካሎሰ፥ ኦቻ ቴራ ዳነይሳንነ ዞኦ ቃጭናን ዳዳዳ አሌቅሳ። ኤንቲ እያን ዘምፓና መላ ኦይዱ ቶሆራ ደእያ ኦይዱ ቱሳታ ጊግሳ።
EXO 27:17 ዳባባ ዩሹዋን ደእያ ቱሳት ኡባይ ብራ ብራታፐ ኦሰትዳ ፃምአታን ኦይከቶ፤ ኤንታ ካጨት ብራ ብራታፐ፥ ኤንታ ቶሆት ናሰ ብራታፐ ኦሰቶ።
EXO 27:18 ዳባባ አዱሳተꬃይ ፄቱ ዋꬋ፥ ጎምፓይ ኦይታሙ ዋꬋ፥ ጌሳይ እቻሹ ዋꬋ ግዶ። ማጋራጆት አልኦ ሊኖፐ፥ ኤንታ ቶሆትካ ናሰ ብራታፐ ኦሰቶ።
EXO 27:19 “ጌሻ ዱንካንያን ጎኤትያ ሚሸ ኡባይ፥ ዱንካንያነ ዳባባ ꬍሸት ኡባይ ናሰ ብራታፐ ኦሰቶ።
EXO 27:20 “ፆምፐይ ቃማ ፖእሸ አቃና መላ ጉምእ ፅልስዳ ሻማሆ ዛይተ ነዉ ኤሀና መላ እስራኤለ አሳ ኪታ።
EXO 27:21 አሮንነ እያ ናይት፥ ፖኦይ፥ ጎዳ ስንꬃን ኦማርሳፈ ዎንታ ጋካናዉ ፖአና መላ ጌሻ ዱንካንያ ግዶን፥ ማርካ ታቦትያ ስንꬃን ደእያ ማጋራጁዋፈ ካረ ባጋራ ኤꬆ። ሄስ እስራኤለ አሳስ መርና ዎጋ ግድድ ደኦ።
EXO 28:1 “ነ እሻ አሮናነ እያ ናይታ ናዳባ፥ አብዮዳ፥ አላዛራነ እታማራ ኔኮ ፄጋ። ኤንቲ ካህነ ግድድ ታዉ ሀጋዛና መላ እስራኤለ አሳ ግዶፈ ኤንታ ዱማያ።
EXO 28:2 እያዉ ቦንቾነ ቴማ እማና መላ ነ እሻ አሮናስ ቦንቾ ማኦታ ጊግሳ።
EXO 28:3 አሮን ካህነተꬃን ዱማትድ ታዉ ሀጋዛናዳ፥ ታኒ ሂላተꬅ እምዳ ኦሳንቾታ ኡባ ፄጋዳ፥ አሮናስ ማኦታ ጊግሳና መላ ኦዳ።
EXO 28:4 ኤንቲ ጊግሳና ማኦትካ ሀይሳታ፤ ትራን ማኤትያ ማኦ፥ ኤፉደ፥ አዱሳ ቃምሰ፥ አሌቀትድ ዳደትዳ ሻምዘ፥ ቃጨነ ዳንጮ። ነ እሻይ አሮንነ እያ ናይት ካህነ ግድድ ታዉ ሀጋዝሸ ማአና መላ ጌሻ ማኦታ ኤንታዉ ጊግሶ።
EXO 28:5 ኩሸ ሂላንቾት ሄ ማኦታ ዎርቃ ጫቻፈ፥ ካሎሰፐ፥ ኦቻ ቴራ ዳነይሳፈ ዞኦ ቃጭናፐነ አልኦ ሊኖፐ ጊግሶ።
EXO 28:6 “ኤፉደ ጌተትያ ማኡዋ ዎርቃ ጫቻ ቃጭናፐ፥ ካሎሰፐ፥ ኦቻ ቴራ ዳነይሳፈ፥ ዞኦ ቃጭናፐነ አልኦ ሊኖፐ ኩሸ ሂላንቾት አሌቅስድ ጊግሶ።
EXO 28:7 ናምኡ ሀሽያራ ዎꬍድ፥ ናምኡ ባጋ ዎል ጋꬅድ ቃቻናዉ ማድያ ቃንጎት ደኦ።
EXO 28:8 ኤፉደይ ኦሰትዳባፐ ሂላን ኦሰትዳ ዳንጮይ ኤፉድያራ ዎላ ኦሰትዳባ ግድድ እስፈ ኦይከቶ።
EXO 28:9 ማርግደ ጌተትያ ናምኡ ሹቻታ ኤካዳ፥ ታማነ ናምኡ ያይቆባ ናይታ ሱንꬃ ኤንታ ቦላ ዎጫዳ ፃፋ።
EXO 28:10 ኤንታ የለታ ማራዳ እስ ሹቻ ቦላ ኡሱፑን ሱንꬃታ፥ ሀንኮ ሹቻ ቦላ አትዳ ኡሱፑን ሱንꬃታ ዎጫዳ ፃፋ።
EXO 28:11 ሀ ናምኡ ሹቻታ ቦላ ታማነ ናምኡ ያይቆባ ናይታ ሱንꬃ ዎጫድ ፃፋናዉ ሂላንቾ ደማ፤ ሄ ፃፈትዳ ሹቻታ ኤፉድያ ቦላ ኦይꬃናዉ እያ ዩሹዋ ዎርቃን ላንፃ።
EXO 28:12 ያታዳ ታማነ ናምኡ እስራኤለ ሼሻ ቆፍስያባ ግዳና መላ ሀ ናምኡ ሹቻታ ኤፉድያራ ኦይꬃዳ ሀሽያራ አꬍያ ቃንጉዋ ቦላ ዎꬃ። ታኒ፥ ጎዳይ፥ ታ አሳ ኡባ ዎደ ሀሳያና መላ አሮን ኤንታ ሱንꬃ ባ ሀሽያን ቶኮ።
EXO 28:13 ሄ ሹቻታ ኦይከይሳ ዎርቃፈ ኦꬃ።
EXO 28:14 ቃስ ዋላህ ባይና ዎርቃፈ ዎዶሮዳ ዶቀትዳ ናምኡ ሳንꬃላታ ሀሽያራ አꬍያ ቃንጉዋራ ኦይከታና መላ ኦꬃ።
EXO 28:15 “ጎዳ ሸንያ ኦይችድ ኤራናዉ፥ ትራን ማኤትያ ማኡዋ ኩሸ ሂላንቾን ኦስሳ። ሄ ትራን ማኤትያ ማኡዋ ዎርቃ ጫቻ ቃጭናፐ፥ ካሎሰፐ፥ ኦቻ ቴራ ዳነይሳፈ፥ ዞኦ ቃጭናፐነ አልኦ ሊኖፐ ኤፉድያዳ አሌቅስድ ጊግሶ። ካሎሰፐ ኦሰትዳባፐ ኦꬃዳ አሌቅሳ።
EXO 28:16 እያዉ ጌሳይነ ጎምፓይ እስ እስ ታካꬎ ግድድ ኦይዱ ማዛነይ ደኦ።
EXO 28:17 እያዉ ኦይዱ ማራን አልኦ ሹቻታ ዎꬃ። ኮይሮ ማራን ሳርድዮነ፥ ቶጳዘነ ጶልያ አልኦ ሹቻታ ዎꬃ።
EXO 28:18 ናምአንꬆ ማራን ባሉረ፥ ሳንፐረነ አልማዘ ጌተትያ አልኦ ሹቻታ ዎꬃ።
EXO 28:19 ሄꬓንꬆ ማራን ያክንተ፥ ከልቀዶነነ አመተስፅኖሳ ጌተትያ አልኦ ሹቻታ ዎꬃ።
EXO 28:20 ኦይዳንꬆ ማራን ብረለ፥ ማርግደ፥ ያስጵደ ጌተትያ አልኦ ሹቻታ ዎꬃ። ሀይሳቲ ኡባይ ዎርቃ ካቁዋ ቦላ ዎሰቶ።
EXO 28:21 እስራኤለ ናይታስ ቆፍሶ ግዳና መላ ሀ ታማነ ናምኡ አልኦ ሹቻታ፥ እስ እስ ያይቆባ ናይታ ሱንꬃይ፥ እስ እስ ሹቻ ቦላ ዎጨትድ ፃፈቶ።
EXO 28:22 “ትራን ማኤትያ ማኡዋስ ዋላህ ባይና ዎርቃፈ ዎዶሮዳ ዶቃዳ ሳንꬃላታ ኦꬃ።
EXO 28:23 ናምኡ ዎርቃ ምግዶታ ኦꬃዳ፥ ትራን ማኤትያ ማኡዋስ ቆሞ ጋፃ ማዛንያን ጋꬃዳ ኦይꬃ።
EXO 28:24 ሄ ናምኡ ዎርቃ ሳንꬃላታታ ምግዶታራ ጋꬃዳ ኦይꬃ።
EXO 28:25 ሀንኮ ባጋን ደእያ ናምኡ ሳንꬃላታ ጋፃ ናምኡ ቃንጎታራ ጋሰꬃ። ሄሳዳ ኦꬃዳ ስንꬃ ባጋራ፥ ሀሽያራ ዎꬍያ ኤፉድያ ቃንጉዋራ ጋሰꬃ።
EXO 28:26 ቃስ ናምኡ ዎርቃ ሳጋዮታ ኦꬃዳ፥ ኤፉድያፐ ጋꬃ ባጋራ ካልድ ደእያ ትራን ማኤትያ ማኡዋስ ናምኡ ማዛነታ ፄራን አꬃ።
EXO 28:27 ሄሳዳካ፥ ዎርቃፈ ሀራ ናምኡ ምግዶታ ኦꬃዳ፥ ኤፉድያስ ስንꬃ ባጋ ሀሽያራ ዎꬍያ ቃንጉዋስ ጋርሳ ባጋራ ጋሰꬃ። ኤፉድያ ስኩዋ ማታን ዳንጩዋፈ ቆሞ ባጋራ ኤንታ ጋሰꬃናዉ በሴስ።
EXO 28:28 ትራን ማኤትያ ማኡዋን ደእያ ምግዶታ ኤፉድያን ደእያ ምግዶታራ ጋꬃዳ ካሎሰ ቃጭናን ቃቻ። ሄሳዳ ኦꬅኮ፥ ትራን ማኤትያ ማኦይ ፄሳፈ ቆሞን ደእያ ግሾ፥ ቃሾይ ዶልኤና።
EXO 28:29 “አሮን ጌሻ በሳ ገልያ ዎደ እስራኤለ ማይዛታ ሱንꬃ ኦይክዳ፥ ትራን ማኤትያ ማኡዋ ማኦ። ያንያ ግሾ፥ ታኒ፥ ጎዳይ ኡባ ዎደ ታ አሳ ቆፓና።
EXO 28:30 ቃስ ሳማ የግያ ናምኡ ጌሻ ሹቻታ ትራን ማኤትያ ማኡዋን የጋ። አሮን ጌሻ ዱንካንያ ገልያ ዎደ ባ ትራን ኤንታ ቶክድ ገሎ። ታ ሸንያ እስራኤለ አሳ ኤርሳናዉ ታ ስን ገልያ ዎደ ኡባን ትራ ኪስያፐ ꬋይሶፎ።
EXO 28:31 “ኤፉድያፐ ቦላራ ማእያ አዱሳ ማኡዋ ኩመꬅ ካሎሰ አፍላፐ ጊግሳ።
EXO 28:32 ሄ አዱሰ ማኡዋስ ሁጰ አꬅያ ሉሆ መꬋ። ሄ ሉሆይ ፔቶና መላ ጉየ ቃላምአዳ ዩሻ አꬃዳ ስካ።
EXO 28:33 አዱሳ ማኡዋስ ዱገ ባጋ ማጫራ ዩሹዋን ካሎሰ፥ ኦቻ ቴራ ዳነይሳንነ ዞኦ ቃጭናፐ፥ ኦሮማነ ቴራ ምስለ መꬋ። ያታዳ ኤንታ ግዶን አꬃ አꬃ ዎርቃፈ ኦሰትዳ ዳላታ ኦꬃ።
EXO 28:34 ዎርቃ ዳላትነ ኦሮማነ ቴራ ምስለት ሄ አዱሰ ማኡዋስ ዱገ ባጋ ማጫራ ዩሹዋን አꬎ።
EXO 28:35 አሮን ካህነተꬃን ኦꬅያ ዎደ ሀ አዱሳ ማኡዋ ማኦ። ጎዳ ስን፥ ጌሻ በሳ ገልያ ዎደነ ከይያ ዎደ፥ ዳላይ ጊራና፤ እካ ሀይቀና።
EXO 28:36 ዋላህ ባይና ዎርቃፈ እስ አሌቆ ኦꬃዳ፥ እያ ቦላ ‘ጎዳስ ዱማትስ’ ያጋዳ ዎጫዳ ፃፋ።
EXO 28:37 ያታዳ ሁጵያ ቃጭያ ቦላ ካሎሰ ቃጭናራ ቃቻ።
EXO 28:38 አሮን እያ ባ ሶምኡዋን ዎꬆ። ሄሳን እስራኤለ አሳይ ጎዳስ እሞታ እምሸ ባልዳባይ ደእኮ፥ ሄ ባላ አሮን ቶኬስ። አሳይ ኤህያባ ጎዳይ ኤካና መላ እ ሄሳ ኡባ ዎደ ባ ሶምኡዋን ዎꬃናዉ ኮሼስ።
EXO 28:39 “አሮና ሻምዝያነ ቃጭያ አልኦ ሊኖፐ ዳዳ። ቃስ ዳንጩዋካ አልኦ ሊኖፐ ዳዳዳ አሌቅሳ።
EXO 28:40 አሮና ናይታስ ቦንቾነ ፑላ እማና መላ ሻምዘታ፥ ዳንጮታነ ሁጰን ዎꬅያ ቆበታ ጊግሳ።
EXO 28:41 ኔኒ ሀ ማኦታ ነ እሻ አሮናነ እያ ናይታ ማይዛ። ኤንቲ ካህነተꬃን ታዉ ሀጋዛና መላ ኤንታ ሻማሆ ዛይተን ትያዳ ታዉ ዱማያ።
EXO 28:42 ኤንታ ካሎይ ካመታና መላ ጋርሳን ማእያ ማኡዋ ፄሳፈ ብድ ዎድረ ጋካናዉ ካምያባ አልኦ ሊኖፐ ጫርቀፈ ሱረ ጊግሳ።
EXO 28:43 አሮንነ እያ ናይት ጌሻ ዱንካንያ ገልያ ዎደ ዎይኮ ጌሻ በሳን ካህነተꬃን ሀጋዛናዉ ያርሾ በሲ ሺቅያ ዎደ ሀ ማኦታ ማኦ። ሄሳዳ ሀንኮ፥ ኤንቲ ባንታ ቦላ ሀይቆ ኤሆኮና። ሄስ አሮናስነ እያ ሼሻታስ መርና ዎጋ ግዶ።
EXO 29:1 “አሮንነ እያ ናይት ካህነተꬃን ታዉ ሀጋዛና መላ ኔኒ ኤንታ ዱማያናዉ ሀይሳዳ ኦꬃ፤ ቦረይ ባይና ዎፋኖነ ናምኡ ማራዘ ኤካ።
EXO 29:2 ጌሻ ግስተ ꬊለ ኤካዳ፥ እርሾ የጎና ሻማሆ ዛይተራ ግንዳዳ ኡይꬁ ኡካ። ቃስ ዛይተይ ገሎና ሀራ ኡይꬁ ኡካ፤ ሄሳዳካ፥ ሌኦ ኡይꬁ ኡካዳ ዛይተን ትያ።
EXO 29:3 ዎፋኑዋነ ናምኡ ማራዘታ ያርሽያ ዎደ ሄ ኡይꬃ ኡባ ጋይታን ዎꬃዳ ታዉ ሺሻ።
EXO 29:4 “ያታዳ አሮናነ እያ ናይታ ጌሻ ዱንካንያ ፐንገ ኤሀዳ ሃꬃን ኤንቲ ሜጨታና መላ ኦዳ።
EXO 29:5 ሄሳፈ ጉየ፥ ካህነተꬃ ማኦታ፥ ሻምዝያ፥ ኤፉድያ፥ ኤፉድያ ቦላራ ማእያ አዱሳ ማኡዋነ ትራን ማኤትያ ማኡዋ አሮና ማይዛ፤ ዳንጩዋካ ዳንጭሳ።
EXO 29:6 ቃጭያ ቃጭሳ፤ እያ ቦላ፥ ‘ጎዳስ ዱማትስ’ ጌተትድ ፃፈትዳ ዎርቃ አሌቁዋ ዎꬃ።
EXO 29:7 ትሻ ዛይትያ ኤካዳ እያ ሁጵያን ትጋዳ ትያ።
EXO 29:8 እያ ናይታ ኤሀዳ ሻምዝያ ማይዛ።
EXO 29:9 ኤንታ ፄሳ ዳንጭሳ፤ ኤንታ ሁጵያንካ ቆበ ዎꬃ። አሮናነ እያ ናይታ ያታዳ ካህነተꬃን ሹማ። ሄስካ፥ ኤንታዉ መርና ዎጋ ግዶ።
EXO 29:10 “ዎፋኑዋ ጌሻ ዱንካንያ ስን ኤሀዳ፥ አሮንነ እያ ናይት እያ ሁጵያን ባንታ ኩሽያ ዎꬃና መላ ኦꬃ።
EXO 29:11 ዎፋኑዋ ጌሻ ዱንካንያ ፐንግያን ጎዳ ስንꬃን ሹካ።
EXO 29:12 ዎፋኑዋ ሱꬃፈ ጉꬁ ኤካዳ ነ ብራꬍያን፥ ያርሾ በሳ ቦላ ደእያ ካጨታ ትያ። አትዳይሳ ያርሾ በሳፈ ጋርሳን ጉሳ።
EXO 29:13 ሄሳፈ ጉየ፥ ኡሎ አሹዋ ካምዳ ሞꬉዋ ኡባ፥ ትርያስ ሎኦ ባጋ፥ ናምኡ ክላሆታነ ኤንታ ካምዳ ሞꬉዋ ኤካዳ፥ ያርሾ በሳ ቦላ ዎꬃዳ ፁጋ።
EXO 29:14 ሽን ዎፋኑዋ ኡሎ አሹዋ፥ እያ ጋልባነ ማራጭያ ጉታፐ ጋፃ ከሳዳ ፁጋ። ሄስ ካህነታ ናጋራ ቁችያ ያርሾ።
EXO 29:15 “ናምኡ ማራዘታፐ እሱዋ ኤካዳ፥ አሮንነ እያ ናይት ባንታ ኩሽያ እያ ሁጰን ዎꬃና መላ ኦꬃ።
EXO 29:16 ሄ ማራዝያ ሹካዳ፥ ሱꬃ ያርሾ በሳን ኦይዱ ማዛነታን ዉርፃ።
EXO 29:17 እያ አሹዋ ቃንፀረꬃዳ፥ ኡሎ አሹዋነ ገዳ ሜጫዳ፥ ሁጵያ ሀራ ቆሞ አሾታራ እስፈ ያርሾ በሳን ዎꬃ።
EXO 29:18 ሄሳፈ ጉየ፥ ኩመꬃ አሹዋ ያርሾ በሳን ፁጋ። ሄስካ ጎዳስ ፁሳ ያርሾ። ሄ ያርሹዋ ሳዎይ ጎዳ ኡፋይሴስ።
EXO 29:19 “ቃስ ካህነተꬃ ዎጋስ ኤከትዳ ሀንኮ ማራዝያ ኤካዳ አሮንነ እያ ናይት ባንታ ኩሽያ እያ ሁጰን ዎꬃና መላ ኦዳ።
EXO 29:20 እያ ሹካዳ፥ ሱꬃፈ ጉꬁ ኤካዳ፥ አሮናስነ እያ ናይታስ ኡሻቻ ሀይꬃታስ ጋፃ፥ ኤንታ ኡሻቻ ኩሽያስነ ቶሁዋስ ዎጋ ብራታ ትያ። አትዳ ሱꬃ ያርሾ በሳ ኦይዱ ማዛነታን ዉርፃ።
EXO 29:21 ያርሾ በሳን ደእያ ሱꬃፈነ ትይያ ዛይትያፐ ጉꬁ ኤካዳ፥ አሮና ቦላነ እያ ማኡዋ ቦላ፥ ቃስካ እያ ናይታ ቦላነ ኤንታ ማኡዋ ቦላ ዉርፃ። ሄሳን አሮንነ እያ ናይት ባንታ ማኡዋራ ታዉ ዱማትዳይሳታ ግዳና።
EXO 29:22 “ሄ ማራዘይ ካህነታ ሹማ ዎጋስ ኤከትያ ግሾ፥ ጎይና ሞꬉዋ፥ ኡሎ አሹዋ ካምዳ ሞꬉዋ፥ ትርያ ካምዳ ሞꬍያ፥ ናምኡ ክላሆታ፥ ኤንታ ካምዳ ሞꬍያነ ኡሻቻ ጉየ ገዳ ቃንፃዳ ሻካ።
EXO 29:23 ጎዳ ስንꬃን ዎꬅዳ ኡይꬃታፐ፥ ዛይተይ ገልቦና ኡይꬃ፥ ዛይተራ ኡክዳ ኡይꬃነ ሌኦ ኡይꬃፈ እሱዋ ኤካ።
EXO 29:24 ኔኒ ሀ ካꬃ ኡባ አሮና ኩሽያንነ እያ ናይታ ኩሽያን ዎꬃ። ኤንቲ እያ ዩሾ ያርሾ ኦꬅድ ጎዳስ እምያ ያርሾ ኦꬅድ ጎዳ ስንꬃን ሺሾ።
EXO 29:25 ሄሳፈ ጉየ፥ ኤንታ ኩሸፐ ኤካዳ ያርሾ በሳ ቦላ ዎꬃ፤ ፁሳ ያርሹዋራ ጋꬃዳ፥ ጎዳ ሳዋና መላ ያርሾ በሳ ቦላ ታማን ፁጋ።
EXO 29:26 አሮን ካህነ ግድድ ሹመትያ ዎደ ሹክዳ ማራዝያ አንጋሱዋ ኤካዳ፥ ጎዳ ስንꬃን ዩሾ ያርሾ ኦꬃ። ሄስ ህንተና ጋክያ ግሾ ግዳና።
EXO 29:27 “ካህነይ ሹመትያ ዎደ፥ አሮናነ እያ ናይታ ካህነተꬃን ሹማናዉ ኤከትዳ አንጋሱዋነ ቶሆ አሹዋ ታዉ ዱማያ። ሄስካ፥ ካህነታ ጋክያ ግሾ ግዶ።
EXO 29:28 እስራኤለት ኡባይ ካህነ ሹማናዉ ዎይኮ አንጀታናዉ ጎዳስ አንጋሶነ ጉየ ቶሆ ያርሾ እምያ ዎደ አሾይ ታዉ ዱማትዳይሳ ግዶ። ሽን ግሾይ አሮናስነ እያ ናይታስ ጋኮ፤ ሄ ዎጋይ ላመቶፎ።
EXO 29:29 “አሮን ሀይቅዳ ዎደ እያ ናይት እያ ካህነተꬃ ማኡዋ ላቶ። ኤንቲ ካህነተꬃን ሹመትዳፐ ጉየ ሄ ማኡዋ ማኦ።
EXO 29:30 እያ ናይታፐ እያ በሳን ካህነ ግድድ፥ ጌሻ በሳን ሀጋዛናዉ ጌሻ ዱንካንያ ይያ ናእ ሄ ማኡዋ ላፑን ጋላስ ማኦ።
EXO 29:31 “አሮንነ እያ ናይት ካህነ ግድድ ሹመትያ ዎደ ሹከትዳ ማራዝያ አሹዋ ኤካዳ፥ ጌሻ በሳን ካꬃ።
EXO 29:32 አሮንነ እያ ናይት ማራዝያ አሹዋ ጋይታን አትዳ ኡይꬃራ ጌሻ ዱንካንያ ፐንገን ሞ።
EXO 29:33 ኤንቲ ካህነ ግድድ ሹመትያ ዎደ ናጋራ አቶተꬃስ ያርሸትዳ ሄ አሹዋ ሞና። ሽን ሄ ካꬃይ ጌሽ ግድዳ ግሾ፥ ካህነታ ፃላል ሞ፤ ሀራ አስ ኦንካ ሞፖ።
EXO 29:34 አሹዋፐነ ካꬃፈ ምሽን አትድ አቅኮ፥ ታማን ፁገቶ፤ ጌሽ ግድዳ ግሾ ሜተቶፎ።
EXO 29:35 “አሮንነ እያ ናይት ካህነ ግድድ ሹመትያ ዎደ፥ ታ ነና ኪትዳ ኡባ ኦꬃ፤ ባለይ ላፑን ጋላሳን ፖለቶ።
EXO 29:36 ናጋራ አቶተꬃስ እስ እስ ጋላሳን እስ ዎፋኖ ሹካዳ ያርሻ። ሄስ ያርሾ በሳ ጌሼስ። ያታዳ ያርሾ በሳ ፖሎ ጌሻናዉ ሻማሆ ዛይተ ትያ።
EXO 29:37 ሄሳ ላፑን ጋላስ ጋካናዉ ጋላስ ጋላስ ኦꬃ። ያትኮ ያርሾ በሳይ ፖሎ ጌሽ ግዳና። እ ፖሎ ጌሽ ግድዳ ግሾ፥ እያ ቦችያ አስ ዎይኮ ሀራባ ኡባይ ጌያና።
EXO 29:38 “ላይꬃን ላይꬃን ያርሾ በሳን ጋላስ ጋላስ እስ ላይꬅ ግድዳ ናምኡ ማራዘታ ያርሻ።
EXO 29:39 ማራዘታፐ እሱዋ ዎንታ፥ ቃስ ሀንኩዋ ኦማርስ ያርሻ።
EXO 29:40 ኮይሮ ማራዝያራ እስ ክሎ ግራመ ግድያ ጌሻ ሎኦ ግስተ ꬊለ፥ እስ ልትሮ ሻማሆ ዛይተራ ግንዳዳ ያርሻ። እስ ልትሮ ዎይነ ኡሻ ያርሾ ኦꬃዳ ጉሳ።
EXO 29:41 ሀንኮ ማራዝያ ኦማርስ ያርሻሸ ዎንታ ያርሾይሳ መላ ꬊለ፥ ዛይተነ ዎይነ ኡሻ ሺሻ። ሄስ ታዉ ያርሸትያ ካꬃ ያርሾ፤ እያ ሳዎይ ታና ኡፋይሰይሳ ግዳና።
EXO 29:42 “ላይꬃን ላይꬃን ሄ ፁሳ ያርሾይ ጌሻ ዱንካንያ ፐንገን፥ ጎዳ ስንꬃን ፓጭ ባይና ያሸታናዉ በሴስ። ሄ በሳን ታኒ ታ ደርያራ ጋሄታና፤ ኔራካ ያን ኦደታና።
EXO 29:43 ያን ታኒ እስራኤለታራ ጋሄታና፤ ታ ቦንቾይ ሄ በሳ ዱማያና።
EXO 29:44 ታኒ ጌሻ ዱንካንያነ ያርሾ በሳ ዱማያና፤ ኤንቲ ታዉ ካህነ ግድድ ሀጋዛና መላ አሮናነ እያ ናይታ ዱማያና።
EXO 29:45 ያታዳ፥ ታኒ እስራኤለታ ግዶን ዳና፤ ኤንታ ፆሳ ግዳና።
EXO 29:46 ኤንታ ግዶን ዳናዉ ግብፀፈ ኤንታ ከስዳ ጎዳይ፥ ኤንታ ፆሳይ ታና ግደይሳ ኤንቲ ኤራና። ታኒ ጎዳ፥ ኤንታ ፆሳ።
EXO 30:1 “እፃነ ጩይስያ በሳ ሶቃላ ምꬃፈ መꬋ።
EXO 30:2 እያዉ ኦይዱ ማዛነይ ደኦ። አዱሳተꬃይነ ጎምፓይ እስ እስ ዋꬋ፥ ጌሳይ ናምኡ ዋꬋ ግዶ። ኦይዱ ማዛንያን ደእያ ካጨት እያራ ኦይከትድ ኦሰቶና።
EXO 30:3 እያዉ ቦላ ባጋ፥ እያ ኦይዱ ማዛነታነ እያ ካጨታ ዋላህ ባይና ዎርቃን ላንፃ። እያ ዩሹዋካ ዎርቃን ላንፃ።
EXO 30:4 ናምኡ ዎርቃ ሳጋዮታ ኦꬃዳ፥ ፃርጴዛ ቶካናዉ ማድያ ካሶ ምꬃታ አꬃናዉ ጎሳስ ናምኡ ባጋራ ኦይꬃ።
EXO 30:5 ካሶ ምꬃታ ሶቃላ ምꬃፈ ከሳዳ፥ ኤንታ ዎርቃን ላንፃ።
EXO 30:6 ሄ እፃነ ያርሾ ፃርጴዛ፥ ጫቆ ታቦትያ ስንꬃን ካቀትዳ ማጋራጁዋፈ ካረ ባጋራ ዎꬃ። ያን ታኒ ኔራ ጋሄታና።
EXO 30:7 “አሮን ዎንታ ዎንታ ፆምፐታ ጊግሳናዉ ይያ ዎደ፥ ሳውያ እፃነ ያርሽያ በሳን ጩይሶ።
EXO 30:8 ሄሳዳ፥ አሮን ኦማርስ ፆምፐታ ፆምፕያ ዎደካ እፃነ ጩይሶ። ሄ እፃንያ ያርሾይ ያና ላይꬃ ኡባን ጎዳ ስንꬃን ጩዮ።
EXO 30:9 ሀ ያርሾ በሳን ሀራ ድገትዳ እፃነ፥ ካꬃ ያርሾ፥ መሄ ያርሾነ ዎይነ ያርሾ ያርሾፋ።
EXO 30:10 አሮን፥ ናጋራ አቶተꬃስ ላይꬃፈ እስ ቶሆ ሹከትያ መህያ ሱꬃፈ ኤክድ፥ ሄ ያርሾ በሳ ማዛነታ ቦላ ደእያ ካጨታ ዎꬅድ ጌሾ ዎጋ ፖሎ። ሀ ዎጋይ ስንꬃራ ያና ዎደ ኡባን ላይꬃን ላይꬃን ፖለቶ። ሄ ያርሾ በሳይ ጌሽ ግድያ ግሾ ጎዳስ ዱማትስ” ያግስ።
EXO 30:11 ሄሳፈ ጉየ፥ ጎዳይ ሙሰኮ ሀይሳዳ ያግስ፤
EXO 30:12 “ኔኒ እስራኤለ አሳ ታይብያ ዎደ፥ እስ እስ አስ ባ ሸምፑዋ ዎዛናዉ ጎዳስ ሚሸ ቃንፆ። ያትኮ ኔኒ ኤንታ ታይብያ ዎደ ጋዶይ ኤንታ ቦላ ዬና።
EXO 30:13 ታይቦን ገልያ አስ ኦንካ ሁጰን ሁጰን ጌሻ ዱንካነን ኤረትዳ ምዛነ ግናን ብራ ጭጎ። እስ እስ አስ ሄሳ ታዉ ያርሾ ኦꬅድ እሞ።
EXO 30:14 ታይቦን ገልያ አስ ኦንካ ላይꬅ ላታማነ እያፐ ቦላ ግድዳ ኡባይ ጎዳስ ሄሳ ኤሆ።
EXO 30:15 ኤንቲ ባንታ ሸምፑዋ ዎዛናዉ ጎዳስ እሞታ እምያ ዎደ፥ ዱረይካ ማንቆይካ እስ ግና እሞፈ አትሽን፥ ዱረይ ዳርስድ ዎይኮ ማንቆይ ጉꬅድ እሞፎ።
EXO 30:16 ሄ ሚሽያ እስራኤለ አሳፐ ኤካዳ፥ ጌሻ ዱንካንያ ናጋናዉ ፔሻ። ሄ ሚሸይ ኤንታ ሸምፑዋ ዎዛናዉነ ታ ኤንታ ናጋና መላ ቆፍስያባ ግዳና” ያግስ።
EXO 30:17 ጎዳይ ሙሰኮ ሀይሳዳ ያግስ፤
EXO 30:18 “ሜቻ ከርያነ እያ ቶሁዋ ናሰ ብራታፐ መꬋ። እያን ሃ ትጋዳ ጌሻ ዱንካንያፐነ ያርሾ በሳፈ ግዶን ዎꬃ።
EXO 30:19 አሮንነ እያ ናይት ባንታ ኩሽያነ ባንታ ቶሁዋ ያን ሜጨቶ።
EXO 30:20 ኤንቲ ጌሻ ዱንካንያ ገላናፐነ ያርሾ ያርሻናፐ ስን ሄሳ ኦꬃናዉ በሴስ። ሄሳ ኤንቲ ኦꬅኮ ሀይቆፐ አቶሶና።
EXO 30:21 ኤንቲ ሀይቆና መላ፥ ባንታ ኩሽያነ ባንታ ቶሁዋ ሜጨታናዉ በሴስ። ሄስ አሮናስነ እያ ሼሻታስ፥ ይያ የለተꬃ ኡባስ መርና ዎጋ ግዳና” ያግስ።
EXO 30:22 ጎዳይ ሙሰኮ ሀይሳዳ ያግስ፤
EXO 30:23 “ጌሻ ሳዎታ፥ ሄሳትካ፤ ኡሱፑን ክሎ ግራመ ጉክያ ካርበ፥ ሄꬑ ክሎ ግራመ ሳውያ ቃራፋ፥ ሄꬑ ክሎ ግራመ ሳውያ ማታ፥
EXO 30:24 ኡሱፑን ክሎ ግራመ ቡርጉደ ኤካ። ሄ ኡባይካ ጌሻ ዱንካነን ኤረትዳ ምዛንያ ግና ግዶ። ሄሳታ ቦላ ኦይዱ ልትሮ ዛይተ ጉጃ።
EXO 30:25 ሄሳታ ሽቶዳ ዋላካዳ፥ ሳውያ ጌሻ ዛይተ ኦꬃዳ፥
EXO 30:26 ጌሻ ዱንካንያነ ጫቆ ታቦትያ ትያ።
EXO 30:27 ፃርጴዛነ እያ ሚሸታ፥ ፆምፐ ዎꬅያ ኮጫነ እያ ሚሸታ፥ እፃነ ጩይስያ ፃርጴዛ፥
EXO 30:28 ፁሳ ያርሾ በስነ እያን ቦላ ደእያ ሚሸታ ኡባ፥ ሜቻ ከርያነ እያ ቶሁዋ ትያ።
EXO 30:29 ኤንቲ ፖሎ ጌሽ ግዳና መላ ኤንታ ዱማያ። ኤንታ ቦችያ ኦንካ ጌሽ ግዳና።
EXO 30:30 “ሄሳፈ ጉየ፥ አሮንነ እያ ናይት ካህነ ግድድ ታዉ ሀጋዛና መላ ኤንታ ትያዳ ዱማያ።
EXO 30:31 እስራኤለ አሳስ፥ ‘ሀይስ ጌሻ ሹማተꬃ ዛይተይ ይያ የለተꬃስ ታና ሀጋዛናዉ ማድያ ዛይተ ግዶ።
EXO 30:32 ሄ ዛይትያ ጮ አሳ ቦላ ጉሶፋ፤ ቃስ አይ ዛይተካ እያ ኦꬅዳ ኦግያን ኦꬆፋ። ዛይተይ ጌሽ ግድዳ ግሾ፥ ህንተካ እያ ጌሻተꬃ ኤርተ።
EXO 30:33 ሄ ሽቱዋ ጊግስያ አስ፥ ዎይኮ ካህነ ግዶና ሀራ አስ ትይያ ኦንካ ታ አሳ ግዶፈ ህለቶ’ ያጋ” ያግስ።
EXO 30:34 ጎዳይ ሙሰኮ ሀይሳዳ ያግስ፤ “ጌሻ ሳዎታ፥ ፆክያ ምꬃ ማደ፥ ꬋ ኬꬃን ደእያ ሽቶ፥ ሳውያ ማደነ ሳውያ እፃነ ኤካ፤ ኤንታ ኡባ ምዛነይ እስ ግና ግዶ።
EXO 30:35 ሽቶዳ ዋላሄትዳ እፃነ ኦꬃዳ ኤንታ ጎኤታ። ዋላህ ባይናነ ጌሽ ግዳና መላ እያን ማፅነ የጋ።
EXO 30:36 እያፐ ጉꬃራ ኤካዳ ሊቅሳ ጫዳዳ፥ ታኒ ኔራ ጋሄትያ ጌሻ ዱንካንያ ግዶን፥ ጫቆ ታቦትያ ስንꬃን ዉርፃ። ሄ እፃነይ ነዉ ፖሎ ጌሽ ግዶ።
EXO 30:37 ህንተዉ ጎኤታናዉ ሄ እፃንያ አይ ኦገንካ ጊግሶፕተ። ሄስ ታዉ ዱማትዳይሳ ግደይሳ ኤርተ።
EXO 30:38 ሄሳꬆ ኦꬅድ፥ እያ ሳዉዋ ስንግድ ኡፋይታናዉ ኮይያ ኦንካ፥ ታ አሳ ግዶፈ ꬋያና” ያግስ።
EXO 31:1 ጎዳይ ሙሰኮ ሀይሳዳ ያግስ፤
EXO 31:2 “ታኒ ይሁዳ ሼሻፐ ግድዳ ሁራ ናኣ ናኣ፥ ኡረ ናኣ፥ ባስልኤላ ዶራስ።
EXO 31:3 ታኒ እያ ታ አያናን ኩንꬃስ፤ ታኒ ሂላ፥ አኬካነ ኦሶ ኡባ ኦꬅያ ኤራ እያዉ እማስ።
EXO 31:4 ሄስካ፥ ሂላን ኦꬃና ኦሶታ ሀልችድ ዎርቃፈ፥ ብራፐነ ናሰ ብራታፐ ዱማ ዱማባ ከስድ ኦꬃናሳ።
EXO 31:5 ሄሳዳካ፥ አልኦ ሹቹ ማስድ ጊግሰይሳ፥ ምꬅ ማሰይሳነ ሀራ ኦሶ ኡባ ኦꬃና መላ ጭንጫተꬅ እማስ።
EXO 31:6 ቃስ እያ ማዳና መላ ዳነ ሼሽ ግድዳ አህሳማካ ናኣ ኤልያባ ዶራስ። ታኒ ነና ኪትዳባ ኡባ ኤንቲ ኦꬃና መላ ኩሸ ሂላ ኤርያ ሀራታ ኡባስ ግታ ኤራተꬅ እማስ።
EXO 31:7 ኤንቲ ኦꬃናባት፥ ጌሻ ዱንካንያ፥ ጫቆ ታቦትያ፥ እያ ቦላ ዎꬅያ ናጋራ አቶተꬃ ካማ፥ ዱንካንያ ግዶን ጎኤትያ ሚሸ ኡባ፥
EXO 31:8 ፃርጴዛነ እያ ሚሸታ፥ ዋላህ ባይና ዎርቃፈ ኦሰትዳ ፆምፐ ዎꬅያ ኮጫነ እያ ሚሸ ኡባ፥ እፃነ ጩይስያ ፃርጴዛ፥
EXO 31:9 ፁሳ ያርሾ በስነ እያ ሚሸ ኡባ፥ ሜቻ ከርያነ እያ ቶሁዋ፥
EXO 31:10 አሮንነ እያ ናይት ካህነተꬃን ሀጋዝሸ ማእያ ካህነተꬃ ማኡዋ፥
EXO 31:11 ሹማተꬃ ዛይትያነ ጌሻ በሳስ ሀንያ ሳውያ እፃንያ፥ ታኒ ነና ኪትዳይሳዳ ኤንቲ ኦꬃና” ያግስ።
EXO 31:12 ጎዳይ ሙሰ ሀይሳዳ ያግድ ኪትስ፤
EXO 31:13 “እስራኤለ አሳ፥ ‘ታ ሳምባታ ናግተ። ሄስ ታኒ፥ ጎዳይ፥ ህንተና ታዉ ጌሻ ደረ ኦꬃዳ ዶርዳይሳ በሲያ ማላ ግድድ፥ ያና የለተꬃ ኡባስ ታፐነ ህንተፈ ግዶን ደኦ።
EXO 31:14 ሄ ጋላሳይ ጌሽ ግድያ ግሾ፥ እያ ቦንችተ። ሳምባታ ቦንቾናይነ ሄ ጋላሳን ኦሶ ኦꬅያ ኦንካ ታ አሳ ግዶፈ ꬋዮ ዎይኮ ሀይቆ።
EXO 31:15 ህንተ ኦሶ ኦꬃናዉ በሲያ ኡሱፑን ጋላሳት ደኦሶና። ሽን ላፑንꬃ ጋላሳይ ጎዳስ ዱማትዳ፥ ሸምፖ ጋላስ። ሳምባታ ጋላሳን ኦሶ ኦꬅያ ኦንካ ሀይቆ።
EXO 31:16 እስራኤለ የለተꬃ ኡባይ ሀ ሳምባታ ጋላሳ መርና ጫቆ ማላ ኦꬅድ ቦንቾ።
EXO 31:17 ታኒ ኡሱፑን ጋላሳን ሳሉዋነ ሳኣ መꬍዳ ግሾነ ላፑንꬃ ጋላሳን ኦሶ አጋዳ ሸምፕዳ ግሾ፥ ታ ግዶንነ እስራኤለታ ግዶን ሄስ መርናዉ ኤቅድ ደእያ ማላ ግዳና’ ያጋ” ያግስ።
EXO 31:18 ጎዳይ ሙሰ ሲና ዙማ ቦላ ኦድሰይሳ ኦንግዳ ዎደ፥ እ ባ ብራን ፃፍዳ ታሙ ኪታታ ኦይክዳ ናምኡ ሎቸ ሹቻታ ሙሰስ እሚስ።
EXO 32:1 አሳይ፥ ሙሰይ ዙማ ቦላፈ ዎꬋናዉ ጋምእዳይሳ በእዳ ዎደ አሮናኮ ይድ፥ “ኑና ካለꬅሸ ናጋና ፆሳታ ኑስ ኦꬃ። ግብፀ ቢታፈ ኑና ከስዳ ሙሰይ ዋንዳኮ ኤሮኮ” ያግዶሶና።
EXO 32:2 አሮን ኤንታኮ፥ “ህንተ ማቸታ፥ ህንተ አደ ናይታነ ህንተ ማጫ ናይታ ሀይꬃን ደእያ ዎርቃ ከስድ፥ ታዉ ሃ ኤክድ ዪተ” ያግስ።
EXO 32:3 አሳ ኡባይ ባንታ ሀይꬃ ዎርቃ ከስድ፥ አሮናስ ኤህዶሶና።
EXO 32:4 እ ሄሳ ኤንታፈ ኤክድ፥ ታማን ሼሽዳፐ ጉየ፥ ቆፅድ፥ ዎርቃ ማራ ምስለ ኦꬅድ መꬍስ። ኤንቲ፥ “እስራኤለቶ፥ ኑና ግብፀ ቢታፈ ካለꬅድ ከስዳ ኑ ፆሳት ሀይሳታ” ያግዶሶና።
EXO 32:5 አሮን ሄሳ በእዳ ዎደ፥ ሄ ማራ ስንꬃን ያርሾ በሰ ጊግስድ፥ “ዎንቶ ጎዳ ቦንችያ ባኣለ ጋላስ ግዳና” ያግድ ኤርስስ።
EXO 32:6 ዎንተꬃ ጋላስ ጉራ አሳይ ደንድድ፥ ፁሳ ያርሾነ እስፈተꬃ ያርሾ ያርሽዶሶና። ያትድ፥ አሳይ ማናዉነ ኡያናዉ ኡትዶሶና። ም ኡይ ስሚድ፥ ዱራናዉነ ፖኮባ ሀናናዉ ደንድዶሶና።
EXO 32:7 ጎዳይ ሙሰኮ፥ “ኔኒ ግብፀፈ ከሳዳ፥ ኤህዳ ነ አሳይ ናጋራ ኦꬅድ፥ ባንታና ቱንስዳ ግሾ ኤለሳዳ ዱገ ዎꬋ።
EXO 32:8 ታኒ ኤንታ ኪትዳ ኦግያፐ ኤንቲ ኤለስድ ሽረትዶሶና። ዎርቃ ሼሽድ ማራ ምስለ ኦꬅድ፥ ባንታዉ ኤቃ መꬍድ እያ ጎይንዶሶና። እያዉ ያርሽድ፥ ‘ኑና ግብፀ ቢታፈ ከስዳ ኑ ፆሳይ ሀይሳ’ ያግዶሶና።
EXO 32:9 ጎዳይ ሙሰኮ፥ ሀ አሳይ አይ መላ ዎዛና ሙመኮ ታ በአስ።
EXO 32:10 ሀእ ታ ሀንቆይ ኤንታ ቦላ ኤፅን፥ ታኒ ኤንታ ꬋይሳናዉ ጊገትዳ ግሾ፥ ኔኒ ታና ድጎፋ። ያታዳ፥ ታኒ ነና ግታ ደረ ኦꬃና” ያግስ።
EXO 32:11 ሽን ሙሰይ ባ ጎዳ፥ ፆሳ ሀይሳዳ ያግድ ዎስስ፤ “አቤት ጎዳዉ፥ ኔኒ ነ ግታ ዎልቃንነ ነ ምኖ ኩሽያን ግብፀፈ ከሳዳ ኤህዳ ነ አሳ ቦላ ነ ሀንቆይ አይስ ኤፂ?
EXO 32:12 ነ ሄሳ ኦꬅያባ ግድኮ፥ ግብፀት፥ ‘ጎዳይ ኤንታና ደረታ ቦላ ዎꬋናዉነ ቢታፈ ፕትድ ꬋይሳናዉ ከስስ’ አይስ ጋኔ? ነ ያሽያ ሀንቁዋፈ ስማ። ነ አሳ ꬋይሳናዉ ቆፕዳይሳ አጋ።
EXO 32:13 ነ አይለታ አብራሃመ፥ ይሳቃነ ያይቆባ ሀሳያ። ኔኒ ኤንታዉ፥ ‘ታኒ ህንተ ሼሻ ሳሎ ፆልንቶዳ ዳርሳና፤ ታኒ ህንተዉ እማና ግዳ ሀ ቢታ ኡባ ህንተ ሼሻታስ እማና፤ ኤንቲ ሄ ቢታ መርናዉ ላታና’ ጋዳ ነ ሁጰን ነ ጫቅዳ ጫቁዋ ቆፓ” ያግስ።
EXO 32:14 ሄሳ ግሾ፥ ጎዳይ ባ ደርያ ቦላ ኢታባ ኤሀናዉ ቆፕዳይሳ አግድ፥ ኤንታ ማርስ።
EXO 32:15 ሙሰይ ናምኡ ባጋራ ፃፈትዳ፥ ታሙ ኪታት ደእያ ናምኡ ሎቸ ሹቻታ ባ ኩሸን ኦይክድ፥ ዙማፐ ዱገ ዎꬍስ።
EXO 32:16 ሄ ማሰትዳ ሹቻታ ጊግስዳይ ፆሳ፤ ሹቻታ ቦላ ዎጭድ ፃፍዳይካ ፆሳ።
EXO 32:17 እያሱይ አሳ ኮሽንቻ ስእዳ ዎደ፥ ሙሰኮ፥ “አሳይ ሲራትዳ በሳን ኦላ ዋሶይ ስኤቴስ” ያግስ።
EXO 32:18 ሙሰይ ዛሪድ፥ “ሀይስ ፆንዳ አሳ ጬቆ ዎይኮ ፆነትዳ አሳ ዬሆ ግዶናሽን፥ የꬃ ዋሶ” ያግስ።
EXO 32:19 ሙሰይ ጉታኮ ማትዳ ዎደ ማራነ ዱርሳ በእድ ዳሮ ሀንቀትስ። ሄ ዎደ ባ ኩሸን ኦይክድ ይዳ፥ ማሰትዳ ሹቻታ ዙማ ፃጶን ሆልድ መንረꬅስ።
EXO 32:20 ኤንቲ መꬍዳ ማራ ኤክድ፥ ታማን ፁግስ። ሄሳፈ ጉየ፥ ሊቃና ጋካናዉ ጋጭድ ሃꬃራ ማꬍድ፥ እስራኤለ አሳይ ኡያናዳ ኦꬅስ።
EXO 32:21 ሙሰይ አሮናኮ፥ “ሀ አሳይ ነዉ አይ ኦꬅን፥ ኤንታ ሀይሳ መላ ኢታ ናጋራ ባንታ ቦላ ኦꬃና መላ ኦꬃዲ?” ያግስ።
EXO 32:22 አሮን ዛሪድ፥ “ታ ጎዳዉ፥ ታና ሀንቀቶፋ። ሀ አሳይ ኢታባ ኦꬃናዉ አይ መላ ኮያኮ ነ ኤራሳ።
EXO 32:23 ኤንቲ፥ ‘ኑና ግብፀፈ ከስድ ኤህዳ፥ ሙሰይ ዋንዳኮ ኑ ኤሮኮ። ሄሳ ግሾ፥ ካለꬅያ ፆሳታ ኑስ ኦꬃ’ ያግዶሶና።
EXO 32:24 ታኒ ኤንታኮ፥ ‘ህንተ ሀይꬃን ደእያ ዎርቃ ከስድ፥ ሀምተ’ ያጋስ። ኤንቲ ታዉ እምዳ ዎርቃ ታኒ ታማን የግን፥ ሀ ማራ ምስለይ ከይስ” ያግስ።
EXO 32:25 አሮን አሳ ጮ የድ አግን፥ አሳይ ባ ሞርከታ ስንꬃን ካዉይድ፥ ካትዳይሳ ሙሰይ በእስ።
EXO 32:26 ሄሳ ግሾ፥ ሙሰይ ጉታ ገልያ ፐንግያን ኤቅድ፥ “ጎዳ ባጋ ግድያ አስ ኦንካ ታኮ ዮ” ያግስ። ሄ ዎደ ሌወት ኡባይ እያኮ ሺቅዶሶና።
EXO 32:27 እ፥ ኤንታኮ፥ “ጎዳይ፥ እስራኤለ ፆሳይ፥ ህንተ እሶይ እሶይ ህንተ ማሻ ሾድድ፥ ጉታስ ሀ ፐንገፈ ህን ፐንገ ጋካናዉ ብድ፥ ህንተ እሻታ፥ ህንተ ላገታነ ህንተ ሾሮታ ዎꬍተ” ያግስ።
EXO 32:28 ሌወት ሙሰይ ኪትዳይሳዳ ኦꬅድ፥ ሄ ጋላስ ሄꬑ ሙኩሉ ግድያ አሳ ዎꬍዶሶና።
EXO 32:29 ሙሰይ ሌወታኮ፥ “ሀች ህንተ፥ ህንተ ናይታነ ህንተ እሻታ ዎꬋናዉ ኪተትድ ህንተና ጎዳስ ዱማይደታ። ጎዳይ ህንተና አንጅስ” ያግስ።
EXO 32:30 ዎንተꬃ ጋላስ ሙሰይ አሳኮ፥ “ህንተ ኢታ ናጋራ ኦꬅደታ፤ ሽን ሀእ ታኒ ጎዳኮ ዙማ ቦላ ከያዳ፥ ኦን ኤር ህንተ ናጋራስ አቶተꬅ ደሞና አግከ” ያግስ።
EXO 32:31 ያትን ሙሰይ ጎዳኮ ስሚድ ብድ፥ “ሀ አሳይ ኢታ ናጋራ ኦꬅዶሶና፤ ኤንቲ ባንታዉ ዎርቃፈ ፆሰ መꬍዶሶና።
EXO 32:32 ሽን ሀያና፥ ሀእ ኤንታ ናጋራ አቶ ያጋ። ሄስ ሀኖናባ ጊኮ፥ ነ አሳ ነ ፃፍዳ ማዝጋብያፐ ታ ሱንꬃ ቁቻ” ያግስ።
EXO 32:33 ጎዳይ ዛሪድ ሙሰኮ፥ “ታኒ ታ ማዝጋብያፐ ቁቻና አሳ ሱንꬃይ፥ ታ ቦላ ናጋራ ኦꬅዳይሳታ ሱንꬃ።
EXO 32:34 ሀእ ባዳ፥ ሀ አሳ ታኒ ነዉ ኦድዳ በሳ ካለꬃ። ታ ኪታንቾይካ ነና ካለꬃናይሳ አኬካ፥ ሽን ታኒ ሀ አሳ ኤንታ ናጋራ ግሾ ሴራና ዎደይ ያናይስ አተና” ያግስ።
EXO 32:35 አሮን ዎርቃፈ ማራ ምስልያ መꬋናዳ ኦꬅዳይ አሳ ግድያ ግሾ፥ ጎዳይ አሳ ቦላ ዎልቃማ ጋዶ የድስ።
EXO 33:1 ሄሳፈ ጉየ፥ ጎዳይ ሙሰኮ፥ “ኔንነ ነ ግብፀፈ ከስዳ አሳይ ሀ በሳፈ ደንድድ፥ ታኒ አብራሃመስ፥ ይሳቃስ፥ ያይቆባስነ ኤንታ ሼሻታስ እማና ያጋዳ ጫቅዳ ቢታ ቢተ።
EXO 33:2 ታኒ ህንተ ስንꬃን ኪታንቹዋ ኪታና። ካናነታ፥ አሞረታ፥ ህተታ፥ ፓርዘታ፥ ህወታነ ያቡሰታ ታኒ ጎዳዳ ከሳና።
EXO 33:3 ማꬅነ ኤስ ጎግያ ሄ ቢታ ቢተ። ሽን ህንተ፥ ዎዛን ሙምዳ አስ ግድያ ግሾ ታ ህንተና ኦገን ꬋይሶና መላ ህንተራ ቢከ” ያግስ።
EXO 33:4 አሳይ ሄ ያሽያ ኦዳ ስእድ ዬክዶሶና። ሄ ዎደፐ ዶምድ ኡባይ ባንታ አሌቁዋ አꬅቦኮና።
EXO 33:5 ጎዳይ ሙሰኮ፥ እስራኤለ አሳስ ሀይሳዳ ያጋዳ ኦዳ ያግስ፤ “ህንተ ዎዛና ሙመ አስ። ታኒ ህንተራ ሀር አቶሽን ጉꬃ ዎደስካ ቢኮ፥ ህንተ ታፐ ꬋያና። ሀእ ህንተ፥ ህንተ አሌቆታ ከስተ፤ ታኒ ህንተ ቦላ ኦꬃናባ በሳና ያጋ” ያግስ።
EXO 33:6 ሄ ዎደ እስራኤለት ኮሬባ ዙማ አግድ ብዳፐ ጉየ፥ ባንታ አሌቆታ አꬅቦኮና።
EXO 33:7 እስራኤለ አሳይ ብሸ ሲራትያ ጉታ ኡባን ሙሰይ ዱንካንያ ጉታፐ ሃስድ ቶኬስ። ሄ ዱንካነይ፥ “ጎዳራ ጋሄትያ ዱንካነ” ጌተትድ ፄገትስ። ጎዳ ኦይቻናዉ ኮይያ ኡባይ ይያ ቤስ።
EXO 33:8 ሙሰይ ዱንካንያኮ ብያ ዎደ አሳ ኡባይ ባ ዱንካንያ ፐንገን ፐንገን ኤቅድ፥ ሙሰይ ይያ ገላና ጋካናዉ እያ በኦሶና።
EXO 33:9 ሙሰይ ይያ ገልዳፐ ጉየ፥ ሻራ ቱሳይ ዎꬍድ ዱንካንያ ፐንገን ኤቄስ። ጎዳይ ሻራ ግዶን ግድድ ሙሰራ ኦደቴስ።
EXO 33:10 አሳይ ሻራ ቱሳ ዱንካንያ ፐንግያን በእዳ ዎደ ኡባን፥ ባ ፐንገን ፐንገን ጉልባትድ ጎዳስ ጎይኖሶና።
EXO 33:11 አስ ባ ላገራ ኦደተይሳዳ ጎዳይ ሙሰራ ሶምኦን ኦደቴስ። ሄሳፈ ጉየ፥ ሙሰይ ጉታ ስሜስ። ሽን እያ ማድያ ናአተꬃይ፥ ናወ ናኣ እያሱይ፥ ጎዳራ ጋሄትያ ዱንካንያፐ ሻከተና።
EXO 33:12 ሙሰይ ጎዳኮ፥ “ኔኒ ታና፥ ሀ አሳ ታ ግዳ ቢታ ካለꬃ ያጋዳሳ። ሽን ታራ ባና መላ ኔኒ ኪተይ ኦነኮ፥ ታና ኤርሳባካ። ኔኒ፥ ታና ኤረይሳነ ታናን ኡፋይተይሳ ታዉ ቆንጭሳዳሳ።
EXO 33:13 ሄስ ቱማ ግድኮ፥ ታ ነና ሀጋዛና መላነ ጉጃ ኡፋይሳና መላ ነ ኦግያ ታና ታማርሳ። ሀ አሳይ ነ ደረ ግደይሳ በአ” ያግስ።
EXO 33:14 ጎዳይ ዛሪድ፥ “ታኒ፥ ኔራ ባና መላነ ነዉ ሳሮ እማና መላ ኮያይ?” ያግስ።
EXO 33:15 ሙሰይ ዛሪድ፥ “ኔኒ ኑራ ቦናባ ግድኮ፥ ሀይሳፈ ኑና ከሶፋ።
EXO 33:16 ኔኒ ኑራ ቦናባ ግድኮ፥ ታናንነ ነ አሳን ነ ኡፋይትዳይሳ አሳ ኡባይ ዋትድ ኤራኔ? ቢታ ኡባን ደእያ ሀራ አሳ ኡባፈ ታንነ ነ አሳይ ዱማተይ ነ ኑራ ደኤይሳን ግደነዬ?” ያግስ።
EXO 33:17 ጎዳይ ሙሰኮ፥ “ታኒ ነና ኤርያ ግሾነ ነናን ኡፋይትዳ ግሾ፥ ነ ታና ኦይችዳይሳ ኡባ ኦꬃና” ያግስ።
EXO 33:18 ሙሰይ ጎዳኮ፥ “ሀያና ነ ኩመꬃ ቦንቹዋ ታና በሳ?” ያግስ።
EXO 33:19 ጎዳይ ዛሪድ፥ “ታኒ ታ ማሮታነ ታ ሎኦተꬃ ኡባ ነ ስንꬃራ አꬃና። ታ ጌሻ ሱንꬃ ነ ማታን አዋጃና። ታኒ ጎዳ፤ ታ ዶርዳይሳታ ማራናነ ኤንታዉ ቃታና።
EXO 33:20 ሽን ኦንካ ታ ሶምኡዋ በእድ ፓፃ ዶና ግሾ፥ ኔኒ ታ ሶምኡዋ በአካ” ያግስ።
EXO 33:21 ሽን፥ “ኔኒ ዛላ ቦላ ኤቃናዉ ሀይሳን ታ ማታን በሲ ደኤስ።
EXO 33:22 ታ ቦንቾይ አꬍያ ዎደ ታኒ ዛእዳ ዛላ ግዶን ነና ዎꬃና። ታ አꬋና ጋካናዉ ታ ኩሽያን ነና ካማና።
EXO 33:23 ሄሳፈ ጉየ፥ ታኒ ታ ኩሽያ ደንꬃና፤ ኔኒ ታ ዞኩዋ በአና፥ ሽን ታ ሶምኡዋ በአካ” ያግስ።
EXO 34:1 ጎዳይ ሙሰኮ፥ “ኮይሮይሳታ ዳንያ ናምኡ ሎቸ ሹቻታ ማሳዳ ጊግሳ። ታኒ ሄ ሹቻታ ቦላ ካሰ ኔኒ መንꬅዳ ሹቻታ ቦላ ደእያ ቃላታ ፃፋና።
EXO 34:2 ዎንቶ ዎንታ ጉራ ታራ ጋሄታናዉ ሲና ዙማ ሁጵያ ከያ።
EXO 34:3 ኔራ ኦንካ ከዮፖ ዎይኮ ዙማ ቦላ አዉንካ በንቶፎ። ሀር አቶሽን ዶርሳ ዎይኮ መሄ ዉደይ ዙማ ፃጶን ሄመቶፎ ዎይኮ ሞፖ” ያግስ።
EXO 34:4 ሄሳ ግሾ፥ ሙሰይ ኮይሮ ሹቻታ ዳንያ ናምኡ ሹቻታ ማስድ፥ ጎዳይ ኪትዳይሳዳ፥ ሹቻታ ኦይክድ ዎንታ ጉራ ሲና ዙማ ቦላ ከይስ።
EXO 34:5 ጎዳይ ሻራራ ዎꬍድ፥ እያራ ያን ኤቅድ፥ “ታኒ ጎዳ” ያግድ ባ ጌሻ ሱንꬃ አዋጅስ።
EXO 34:6 ጎዳይ ሙሰ ስንꬃራ አꬍሸ ሀይሳዳ ያግድ አዋጅስ፤ “ታኒ ፆሳ፥ ታ ሱንꬃይ ጎዳ። ታኒ፥ ቃይነ ማሮታይ ኩምዳ ፆሳ። ታኒ ዳንዳአንነ መርና ሲቆን ኩምዳይሳነ ዳሮ አማንይሳ።
EXO 34:7 ታኒ፥ ታ አሳስ ገልያ ቃላ ሙኩሉ የለተꬅ ጋካናዉ ናገይሳነ ኢታተꬃ፥ ማካላነ ናጋራ አቶ ገይሳ። ሽን ሄꬓንꬆነ ኦይዳንꬆ የለተꬅ ጋካናዉ አዋታ ናጋራ ግሾ ናይታ ሴሮና አግከ” ያግስ።
EXO 34:8 ሙሰይ ኤለስድ ቢታን ጉፋንድ ጎይንስ።
EXO 34:9 እ ዛሪድ፥ “አቤት ጎዳዉ፥ ኔኒ ታናን ኡፋይትያባ ግድኮ፥ ኑራ እስፈ የꬋ። ሀይስ አሳይ ስኦና አስ፤ ኑ ኢታተꬃነ ኑ ናጋራ አቶ ያጋዳ፥ ኑና ነ አሰ ኦꬃ” ያግስ።
EXO 34:10 ጎዳይ ሙሰኮ፥ “ታኒ እስራኤለ አሳራ ጫቃና። ሀይሳፈ ካሰ ቢታ ቦላ አዉንካ ሀን ኤሮና ማላልስያባ ነ አሳ ስንꬃን ኦꬃና። ታኒ ጎዳይ፥ አይ መላ ማላልስያባ ኦꬅያኮ፥ ኔኒ ኤንታ ግዶን ደእያ አሳይ በአና።
EXO 34:11 ሀች ታኒ ህንተና ኪትያ ኪታ ናግተ። ህንተ ስንꬃፈ አሞረታ፥ ካናነታ፥ ህተታ፥ ፓርዘታ፥ ህወታነ ያቡሰታ ታኒ ጎዳና።
EXO 34:12 ኤንቲ ህንተዉ ፅሄ ግዶና መላ ህንተ ገልያ ቢታን ደእያ አሳራ ጫቆፍተ።
EXO 34:13 ኤንታ ያርሾ በሳታ ላልተ፤ ጎይኖ ቱሳታ መንረꬅተ። አሼራ ጌተትያ ማጫ ፆሰ ምስለ ቱሳታ ቃንፀረꬅተ።
EXO 34:14 ታኒ ጎዳይ፥ ታ ቦንቹዋ ሀራ ፆሳታራ ኮፆና ፆሰ ግድያ ግሾ፥ ታፐ ሀራ ፆሳታስ ጎይኖፍተ።
EXO 34:15 ሄ ቢታን ደእያ አሳታራ አይባ ጫቆካ ጫቆፍተ። ኤንቲ ባንታ ፆሳታ ጎይንያ ዎደነ ኤንታዉ ያርሽያ ዎደ፥ ኤንቲ ህንተና ባንታራ እስፋና መላ ኦይችኮ፥ ህንተ ኤንቲ ባንታ ፆሳታስ ያርሽያ ካꬃ ማናዉ ፓጨትድ፥ ታዉ አማነቶና እፃና።
EXO 34:16 ቃስ ህንተ ኤንታ ማጫ ናይታፐ ህንተ አደ ናይታስ እምኮ፥ ሄ ዎደ ሄ ማጫ ናይት ባንታ ፆሳታ ጎይንድ፥ ህንተ አደ ናይትካ ታዉ አማነቶና እፅድ፥ ባንታ ፆሳታ ጎይናና መላ ኦꬃና።
EXO 34:17 “ብራታፐ ቆፀትድ፥ መትዳ ፆሳታ ጎይኖፍተ።
EXO 34:18 “ኡይꬃ ባኣለ ቦንችተ። ህንተ ግብፀፈ ከይዳይ፥ አቢባ አጌናን ግድያ ግሾ፥ ታኒ ህንተና ኪትዳይሳዳ፥ ሄ አጌናን፥ ላፑን ጋላስ ጋካናዉ ኡይꬅ ሚተ።
EXO 34:19 “ባይራ የለትያ አደ ናእ ኡባይነ ባይራ የለትያ መሄ አደ ኡባይ ታባ።
EXO 34:20 ኮይሮ የለትዳ ሀረ ማር ዶርሳ ማራራ ላማዳ ዎዛ። ዎዞና እፅኮ፥ እያ ሞርግያ መንꬃ። ባይራ የለትዳ አደ ናአ ኡባ ዎዛ። “ኦንካ እምያባ ኦይኮና መላ ኩሸ ታ ስንꬃን ሺቆፖ።
EXO 34:21 “ኡሱፑን ጋላስ ኦꬅተ፥ ሽን ላፑንꬃ ጋላሳን ሸምፕተ። ዘርያ ዎደ ግድን ዎይኮ ካꬃ ጫክያ ዎደ ላፑንꬃ ጋላሳን ሸምፕተ።
EXO 34:22 “ኮይሮ ህንተ ግስትያ ጫኮ ዶምያ ዎደ፥ ካꬃ ሺሾ ባኣለ ቦንችተ። ቃስ ላይꬃ ዉርሰꬃ ካꬃ ሺሽያ ዎደ፥ ሻቃራ ባኣለ ቦንችተ።
EXO 34:23 ላይꬃን ሄꬑ ቶሆ እስራኤለ አደ ኡባይ መተꬃ ጎዳ፥ እስራኤለ ፆሳ ጎይናናዉ ዮ።
EXO 34:24 ካዎተꬃታ ታኒ ህንተ ስንꬃፈ የደꬃ ከሳዳ ህንተ ዛዋ አሳና። ህንተ ታና ጎይናናዉ ላይꬃን ሄꬑ ቶሆ ይያ ዎደ፥ ኦንካ ህንተ ቢታ ኦልድ ኤካናዉ አሞተና።
EXO 34:25 “ህንተ ታዉ መሄ ያርሽያ ዎደ፥ እርሾ የግድ ኡክዳ ኡይꬃራ ሽሾፕተ። ፓስካ ቦንችያ ጋላሳስ ያርሽዳ ያርሹዋፈ ዎንታስ አይባካ አሾፍተ።
EXO 34:26 “ህንተ ጋደን ባይራ ካፅዳ ካꬃፈ ኮይሮ አይፍያ ጎዳ ህንተ ፆሳ ኬꬅ ኤህተ። “ዴሻ ማር እያ አየ ማꬃን ዶይሶፕተ” ያግስ።
EXO 34:27 ጎዳይ ሙሰኮ፥ “ታኒ ኔራነ እስራኤለ አሳራ ጫቆ ገለይ ሀ ቃላታን ግድያ ግሾ፥ ሀ ቃላታ ፃፋ” ያግስ።
EXO 34:28 ሙሰይ ሞናነ ኡዮና፥ ኦይታሙ ጋላስነ ኦይታሙ ቃማ ጎዳራ ዙማ ቦላ ጋምእስ። እ፥ ጫቆ ቃላ ገልዳ ታሙ ኪታታ ሎቸ ሹቻታን ፃፍስ።
EXO 34:29 ሙሰይ ጎዳራ ኦደትሸ ጋምእድ፥ ታሙ ኪታታ ኦይክዳ ናምኡ ሎቸ ሹቻታ ኤክድ ሲና ዙማፐ ዎꬍያ ዎደ እያ ሶምኦይ ጶሌስ፥ ሽን እ ሄሳ ኤርቤና።
EXO 34:30 አሮንነ እስራኤለ አሳ ኡባይ ሙሰ ፄልድ፥ እያ ሶምኦይ ጶለይሳ በእድ፥ እያኮ ሺቃናዉ ያይዶሶና።
EXO 34:31 ሽን ሙሰይ ኤንታ ፄግስ። አሮንነ እስራኤለ ሀላቃት ኡባይ እያኮ ሺቅን፥ እ ኤንታ ኦድስስ።
EXO 34:32 ሄሳፈ ጉየ፥ እስራኤለ አሳ ኡባይ እያኮ ሺቅን፥ ጎዳይ እያዉ ሲና ዙማ ቦላ እምዳ ኪታ ኡባ እ ኤንታዉ እሚስ።
EXO 34:33 ሙሰይ ኤንታራ ኦደተይሳ ዉርስዳ ዎደ ባ ሶምኡዋ ላፃናን ካምስ።
EXO 34:34 ሽን ሙሰይ ጎዳ ስን፥ እያራ ኦደታናዉ ገልያ ዎደ ላፃና ባ ሶምኡዋፈ ቃሬስ። ያፐ ከይያ ዎደ፥ ጎዳይ እያ ኪትዳባ ኡባ እስራኤለ አሳስ ኦዴስ።
EXO 34:35 ሄ ኡባን ኤንቲ እያ ሶምኦይ ጶለይሳ በኦሶና። ሄሳ ግሾ፥ ሙሰይ ጎዳራ ኦደታናዉ ባና ጋካናዉ፥ ባ ሶምኡዋ ላፃናን ካሜስ።
EXO 35:1 ሙሰይ እስራኤለ አሳ ኡባ ፄግድ፥ “ህንተ ኦꬃና መላ ጎዳይ ኪትዳባይ ሀይሳ፤
EXO 35:2 ሳምንታ ግዶን ኡሱፑን ጋላሳ ፃላላን ኦሶ ኦꬅተ፤ ሽን ላፑንꬃ ጋላሳይ ህንተዉ ጌሻ ጋላስ፤ ጎዳስካ ዱማትዳ ሸምፖ ሳምባታ። ሄ ጋላሳን ኦሶ ኦꬅያ ኦንካ ሀይቃናዉ በሴስ።
EXO 35:3 ሳምባታ ጋላስ ህንተ ሶን ታማ ኤꬆፍተ” ያግስ።
EXO 35:4 ሙሰይ እስራኤለ አሳኮ፥ “ጎዳይ ሀይሳዳ ያግድ ህንተና ኪትስ፤
EXO 35:5 ጎዳስ ህንተ ዎዛናይ እሞ ግያባ እማናዉ ኤህተ። ህንተ እማናዉ ኤህያባት ዎርቃ፥ ብራ፥ ናሰ ብራታ፥
EXO 35:6 ካሎሰ ቃጭና፥ ኦቻ ቴራ ዳንያ ቃጭና፥ ዞኦ ቃጭናነ አልኦ ሊኖ፥ ዴሻ እክሰ፥
EXO 35:7 ዞኦ ቃላመን የግ ከስዳ ዶርሳ እተ፥ ሎኦ ዶአ እተ፥ ሶቃላ ምꬅ፥
EXO 35:8 ፆምፐስ ሻማሆ ዛይተ፥ ሹማተꬃ ዛይተ፥ እያን የገትያ ሳዋነ እፃነ ሳዎ፥
EXO 35:9 ኤፉድያስነ ትራን ማኤትያ ማኡዋስ ሀንያ ማርግደ ጌተትያ ሹቻነ ሀራ አሌቆታ ኤሆ።
EXO 35:10 “ህንተ ግዶን ደእያ ኩሸ ሂላንቾ ኡባይ ይድ፥ ጎዳይ ኪትዳይሳ ኡባ ኦꬆ።
EXO 35:11 ጌሻ ዱንካንያ፥ እያ ጋꬃ ካማነ ካረ ካማ፥ ካቆታ፥ ቱቀታ፥ ልዮታ፥ ቱሳታነ ኤንቲ ኤቅያ ቶሆታ፤
EXO 35:12 ታቦትያነ እያ ቶክያ ካሶ ምꬃታ፥ ናጋራ አቶተꬃ ካማነ ታቦትያ ገንꬅያ ማጋራጁዋ፤
EXO 35:13 ፃርጴዛ፥ እያ ቶክያ ካሶ ምꬃታነ፥ እያ ሚሸታ ኡባነ ጎዳ ስንꬃን ዎꬅያ ጌሻ ኡይꬃ፤
EXO 35:14 ፆምፐ ዎꬅያ ኮጫ፥ እያ ሚሸታ፥ ፆምፕያነ ፆምፐ ዛይትያ፤
EXO 35:15 እፃነ ጩይስያ ፃርጴዛነ እያ ቶክያ ካሶታ፥ ሹማተꬃ ዛይትያነ ሳውያ እፃነ፥ ጌሻ ዱንካንያ ፐንገ ማጋራጁዋ፤
EXO 35:16 ፁሳ ያርሾ በስነ እያ ናሰ ብራታ ዛርዛርያ፥ እያ ቶክያ ካሶታነ እያ ሚሸታ ኡባ፥ ናሰ ብራታፐ ኦሰትዳ ሜቻ ከርያነ እያ ቶሁዋ፤
EXO 35:17 ዳባባ ጎዳ ገሸታ፥ ቱሳታነ ኤንታ ቶሆታ፥ ዳባባ ፐንገ ማጋራጁዋ፥
EXO 35:18 ጌሻ ዱንካንያነ ዳባባ ዱንካንያ ቶለ ꬍሸታነ ኤንታ ዎዶሮታ፤
EXO 35:19 አሮንነ እያ ናይት ጌሻ በሳን ሀጋዝሸ ማአናዉ አሌቀትድ ኦሰትዳ ቦንቾ ማኦታ ኦꬆ” ያግስ።
EXO 35:20 ሄሳፈ ጉየ፥ እስራኤለ አሳ ኡባይ ሙሰ ስንꬃፈ ከይዶሶና።
EXO 35:21 አሳ ኡባይ ባ ዎዛናን እሞ እሞ ግዳባ ጌሻ ዱንካንያስ፥ እያ ግዶን ኦሰትያ ኦሶ ኡባስነ ቦንቾ ካህነ ማኦታስ ኮሽያባ ኡባ ኤህዶሶና።
EXO 35:22 እማናዉ ኮይዳ ማጭ አደ ኡባይ ዎርቃ አሌቆታ፥ ሲ ዎርቃታ፥ ምግዶታ፥ ቆ ዎርቃ ኤህድ፥ ጎዳስ እሞ ኦꬅድ እምዶሶና።
EXO 35:23 ካሎሰ ቃጭና፥ ኦቻ ቴራ ዳንያ ቃጭና፥ ዞኦ ቃጭና፥ አልኦ ሊኖ፥ ዎይኮ ዴሻ እክሰ፥ ዎይኮ ዞኦ ቃላመን የግ ከስዳ ዶርሳ እተ ዎይኮ፥ ሎኦ ዶአ እተይ ደእያ አስ ኡባይ ኤህስ።
EXO 35:24 ብራ ዎይኮ ናሰ ብራታ እማናዉ ዳንዳእያ ኡባይ ባንታ እሞታ ጎዳስ እምዶሶና። ቃስ ሶቃላ ምꬅ ደእያ አስ ኡባይ ዱማ ዱማ ኦሱዋስ ኤህስ።
EXO 35:25 ኩሸ ሂላ ማጫሳ ኡባይ ባንታ ኩሸን ሱቅዳ ካሎሰ ቃጭና፥ ኦቻ ቴራ ዳንያ ቃጭና፥ ዞኦ ቃጭናነ አልኦ ሊኖ ኤህዶሶና።
EXO 35:26 ቃስካ እሞታ እማናዉ ኮይዳ ማጫሳ ኡባይ ዴሻ እተፐ ዶቀትዳ ዎዶሮ ኤህዶሶና።
EXO 35:27 ሀላቃት ኤፉድያስነ ትራን ማኤትያ ማኡዋስ ሀንያ ማርግደነ ሀራ ሎኦ ሹቻታ፥
EXO 35:28 ቃስካ ኤንቲ እፃነን፥ ሹማተꬃስነ ፆምፐስ ማድያ ሻማሆ ዛይተን የገትያ ሳዎ ኤህዶሶና።
EXO 35:29 እስራኤለ አሳ ኡባይ፥ ኦꬃና መላ ጎዳይ ሙሰ ባጋራ ኪትዳ ኦሱዋስ ሀንያ እሞታታ ኡባ ባንታ ዶሳን ጎዳስ ኤህዶሶና።
EXO 35:30 ሙሰይ እስራኤለ አሳኮ ሀይሳዳ ያግስ፤ “ጎዳይ ይሁዳ ሼሻፐ ግድዳ ሁራ ናኣ ናኣ፥ ኡረ ናኣ፥ ባስልኤላ ዶርስ።
EXO 35:31 ጎዳይ እያ ባ አያናን፥ ሂላን፥ አኬካንነ ኦሶ ኡባ ኦꬅያ ኤራን ኩንꬅስ።
EXO 35:32 ሄስካ፥ ሂላን ኦꬃና ኦሶታ ሀልችድ ዎርቃፈ፥ ብራፐነ ናሰ ብራታፐ ዱማ ዱማባ ከስድ ኦꬃናሳ።
EXO 35:33 ሄሳዳካ፥ አልኦ ሹቹ ማስድ ጊግሶ፥ ምꬅ ማሰꬅነ ሀራ ኦሶ ኡባ ኦꬃና መላ ጭንጫተꬅ እሚስ።
EXO 35:34 ቃስ እያስነ ዳነ ሼሽ ግድዳ አህሳማካ ናኣ ኤልያባስ፥ ባንታ ሂላ ሀራታ ታማርሳና መላ ኤራተꬅ እሚስ
EXO 35:35 ኤንቲ ዱማ ዱማ ኦሶ ኦꬃና መላ ኦሶ ሀልቾ ከሳና መላ፥ ካሎሰን፥ ኦቻ ቴራ ዳነይሳንነ ዞኦ ሱፈ ቃጭናን አልኦ ሊኖ አሌቅስድ፥ ዳድያ ሂላተꬅ እሚስ። ጎዳይ ኤንታ፥ ኤራተꬃን ኩንꬅስ። ኤንቲ ኡባይ ዱማ ዱማ ኦሶን ሉፅዳ ሂላንቾ ግድዶሶና።
EXO 36:1 “ሄሳ ግሾ፥ ባስልኤል፥ ኤልያብነ ጌሻ ዱንካንያ ኬፃና መላ ጎዳይ ሂላነ ኤራተꬅ እምዳ አሳ ኡባይ፥ ጎዳይ ኪትዳይሳዳ ኡባባ ኦꬃና” ያግስ።
EXO 36:2 ሙሰይ ባስልኤላ፥ ኤልያባ፥ ጎዳይ ዱማ ኤራተꬅ እምዳይሳታነ ኦሶ ኦꬃናዉ ኮይያ ኡባ ፄግድ፥ ኦሱዋ ዶማና መላ ኪትስ።
EXO 36:3 ኤንቲ፥ እስራኤለ አሳይ ጌሻ ዱንካንያ ኦꬃናዉ ኤህዳ እሞ ኡባ ሙሰ ኩሸፐ ኤክዶሶና። ቃስ አሳይ ባ ዶሳን እምያ እሞታ ዎንታ ዎንታ ኤሁዋ አግቦኮና።
EXO 36:4 ያትን፥ ጌሻ ዱንካንያ ኦꬅያ ሂላንቾት ባንታ ኦሱዋ ኤስድ፥ ሙሰኮ ብድ፥
EXO 36:5 “አሳይ፥ ጎዳይ ኪትዳ ኦሱዋስ ኮሸይሳፈ አꬅድ ኤሆ ቦላ ደኦሶና” ያግዶሶና።
EXO 36:6 ሙሰይ፥ “ጌሻ ዱንካንያ ኬፃናዉ ኦንካ እምያባ ኤሆፖ” ያግድ ኪትን፥ አሳይ ኤሄይሳ አጋግዶሶና።
EXO 36:7 ኤንቲ ኤህዳ እሞታይ ኦሶ ኡባ ኦꬅ ፖላናዉ ግድድ ፓላሄስ።
EXO 36:8 ኦሱዋ ኦይሳታፐ ሂላን አይሳት ጌሻ ዱንካንያ ኦꬅዶሶና። ኤንቲ እያ አልኦ ሊኖፐ፥ ካሎሰን ኦቻ ቴራ ዳነይሳንነ ዞኦ ቃጭናን አሌቅስድ ዳድዳ ታሙ ገሸታ ጊግስድ፥ እያ ቦላ ክሩበታ ምስልያ ስክዶሶና።
EXO 36:9 ማጋራጆት ኡባይ እስ ግና ግድድ፥ አዱሳተꬃይ ላታማነ ኦይዱ ዋꬋ፥ ጎምፓይ ኦይዱ ዋꬋ።
EXO 36:10 እቻሹ ገሸታ እስፈ ጋꬅድ ስክዶሶና፤ ቃስ ሀንኮ አትዳ እቻሹ ገሸታካ ሄሳዳ ኦꬅዶሶና።
EXO 36:11 እስፈ ጋꬅድ ስክዳ ገሸታፐ እስ ማጋራጁዋስ ዉርሰꬃ ጋፃን ካሎሰ አፍላፐ ኦሰትዳ ሳጋዮታ መꬍዶሶና። ቃስ እስፈ ጋꬅድ ስክዳ ሀንኮ ገሸታፐ እሱዋ ጋፃንካ ሄሳዳ ኦꬅዶሶና።
EXO 36:12 ኤንቲ እስፈ ስከትዳ ኮይሮ ማጋራጁዋ ቦላ ኮይሮ ማራን ካሎሰ አፍላፐ ኦሰትዳ እሻታሙ ሳጋዮታ፥ ሄሳዳካ ናምአንꬆ ማጋራጁዋ ቦላ ዉርሰꬃ ማራን፥ ሀንኮ ሳጋዮታ ግናን፥ እሻታሙ ሳጋዮታ ኦꬅዶሶና።
EXO 36:13 ኤንቲ ናምኡ ባጋን ደእያ ገሸታ ጋሰꬅድ እስኖ ኦꬃናዉ ዎርቃፈ እሻታሙ ኦይክያ በሳታ መꬍዶሶና።
EXO 36:14 ጌሻ ዱንካንያ ቦላራ ካማናዉ ታማነ እስ ገሸታ ዴሻ እክሰፐ ዳድዶሶና።
EXO 36:15 ታማነ እስ ገሸታ አዱሳተꬃ ላታማነ ኡሱፑን ዋꬋ፥ ጎምፓ ኦይዱ ዋꬋ ኦꬅድ መꬍዶሶና።
EXO 36:16 እቻሹ ገሸታ እስ ባጋራ፥ ቃስ ኡሱፑን ገሸታ ሀንኮ ባጋራ ጋꬅድ ስክዶሶና።
EXO 36:17 ዎል ጋꬅድ ስክዳ ገሸታፐ ዉርሰꬃ ማጋራጁዋ ማጫራን እሻታሙ ሳጋዮታ፥ ቃስ ዎል ጋꬅድ ስክዳ ሀንኮ ገሸታፐ ዉርሰꬃ ማጋራጁዋ ማጫራን እሻታሙ ሳጋዮታ መꬍዶሶና።
EXO 36:18 ናምኡ ባጋራ ደእያ ገሸታ ጋሰꬅድ እስ ካማ ኦꬃናዉ ናሰ ብራታፐ እሻታሙ ኦይክያ በሳታ መꬍዶሶና።
EXO 36:19 ዱንካንያ ካማናዉ ዞኦ ቃላመን የግ ከስዳ ዶርሳ እተ፥ ቃስ እያ ቦላራ ካማናዉ ሎኦ ዶአ እተ ጊግስዶሶና።
EXO 36:20 ጌሻ ዱንካንያ ቱቀታ ሶቃላ ምꬃፈ ከስዶሶና።
EXO 36:21 እስ እስ ቱቅያ አዱሳተꬃይ ታሙ ዋꬋ፥ ጎምፓይ እስ ዋꬋነ ታካꬎ።
EXO 36:22 እስ ቱቅያ እሱዋራ ጋሰꬃናዉ ናምኡ ሉሆት ደኦሶና። ጌሻ ዱንካንያ ቱቀታ ኡባ ሄሳዳ ኦꬅዶሶና።
EXO 36:23 ጌሻ ዱንካንያስ ዱገሀ ባጋራ ላታሙ ቱቀታ መꬍዶሶና።
EXO 36:24 እስ እስ ቱቀታስ ናምኡ ቶሆ መꬍድ፥ ሄ ቶሆታ ኦይꬃናዉ ኦይታሙ ሉሆታ ብራታፐ ጊግስዶሶና።
EXO 36:25 ጌሻ ዱንካንያስ ፑደሀ ባጋራ ላታሙ ቱቀታ መꬍዶሶና።
EXO 36:26 እስ እስ ቱቀታስ ናምኡ ቶሆ መꬍድ፥ ሄ ቶሆታ ኦይꬃናዉ ኦይታሙ ሉሆታ ብራታፐ ጊግስዶሶና።
EXO 36:27 ጌሻ ዱንካንያስ ጉየ ባጋን፥ ዉሎሀ ባጋራ ኡሱፑን ቱቀታ መꬍዶሶና።
EXO 36:28 ጌሻ ዱንካንያ ጉየ ባጋን ደእያ ማዛነታስ ናምኡ ቱቀታ ጊግስዶሶና።
EXO 36:29 ሄ ናምኡ ማዛነ ቱቀት ፃጶፐ ፄራ ጋካናዉ ኦይከት ብዶሶና። ናምኡ ማዛንያን ደእያ ናምኡ ቱቀት ሄሳዳ ሀንድ ኦሰትዶሶና።
EXO 36:30 ሄሳ ግሾ፥ እስ እስ ቱቅያስ ጋርሳን ናምኡ ናምኡ ቶሆት ደኦሶና። ሆስፑን ቱቀታስ ብራታፐ ኦሰትዳ ታማነ ኡሱፑን ቶሆት ደኦሶና።
EXO 36:31 ቃስ ኤንቲ ሶቃላ ምꬃፈ ታማነ እቻሹ ልዮታ ከስዶሶና። እቻሹ ልዮት ጌሻ ዱንካንያ እስ ባጋ ምየን፥
EXO 36:32 ቃስ እቻሹ ልዮታ ሀንኮ ባጋ ምየን፥ ሄሳዳካ እቻሹ ልዮታ ጉየ ባጋራ ዉሎሀ ባጋን ዎꬅዶሶና።
EXO 36:33 ቱኡቀታስ ምየ ባጋራ ግዶን ደእያ ልዮይ፥ ሀ ጋፃፐ ያ ጋፃ ጋካናዉ ካንꬅ ከያና መላ ኦꬅዶሶና።
EXO 36:34 ቱኡቀታነ ልዮታ ዎርቃን ላንፅዶሶና። ልዮት ኤንታ ግዶራ ካንꬅ አꬋና መላ ዎርቃ ሳጋዮታ ቱቀታራ ኦይሰꬅዶሶና።
EXO 36:35 ማጋራጁዋ አልኦ ሊኖፐ ካሎሰን፥ ኦቻ ቴራ ዳነይሳንነ፥ ዞኦ ቃጭናን አሌቅስድ ኦꬅዶሶና። ሄ ማጋራጁዋ ቦላ ክሩበ ምስለታ ስክዶሶና።
EXO 36:36 ማጋራጁዋ ካቃናዉ ኦይዱ ቱሳታ ሶቃላ ምꬃፈ ጊግስድ፥ ዎርቃን ላንፅዶሶና። ያትድ ዎርቃ ሳጋዮታ ኤንታስ ጊግስዶሶና። ቃስ ቱሳታ ኤስያ ኦይዱ ቶሆታ ብራ ብራታፐ መꬍዶሶና።
EXO 36:37 ጌሻ ዱንካንያ ፐንግያስ አልኦ ሊኖፐ ካሎሰን፥ ኦቻ ቴራ ዳነይሳፈነ ዞኦ ቃጭናን አሌቅስድ ማጋራጆ ጊግስዶሶና።
EXO 36:38 ቃስ እያዉ ኮጫት ደእያ እቻሹ ቱሳታ መꬍድ፥ ኤንታዉ ፄራነ ቶሁዋ ዎርቃን ላንፅዶሶና። ቱሳታስ ናሰ ብራታፐ ኦሰትዳ እቻሹ ቶሆታ ጊግስዶሶና።
EXO 37:1 ባስልኤል ታቦትያ ሶቃላ ምꬃፈ ጊግስስ። ታቦትያ አዱሳተꬃይ ናምኡ ዋꬋነ ባጋ፥ ጎምፓይነ ጌሳይ እስ ዋꬋነ ባጋ።
EXO 37:2 ታቦትያ ጊግስድ፥ ጋꬃነ ካርያ ዋላህ ባይና ዎርቃን ላንፅስ። እያ ዩሹዋ ቦላካ ዎርቃን ላንፅስ።
EXO 37:3 ኦይዱ ዎርቃ ሳጋዮታ ታቦትያስ ኦይዱ ገዳታ ቦላ፥ እስ ባጋራ ናምኡ ሳጋዮታ፥ ቃስ ሀንኮ ባጋራ ናምኡ ሳጋዮታ አꬅስ።
EXO 37:4 ያትድ ሶቃላ ምꬃፈ ኦሰትዳ ካሶታ ከስድ ኤንታ ዎርቃን ላንፅስ።
EXO 37:5 ታቦትያ ቶካናዉ፥ ታቦትያስ ምይያን ደእያ ሳጋዮታን ካሶታ አꬅስ።
EXO 37:6 ዋላህ ባይና ዎርቃፈ፥ አዱሳተꬃይ ናምኡ ዋꬋነ ባጋ፥ ጎምፓይ እስ ዋꬋነ ባጋ ግድዳ ናጋራ አቶተꬃ ካማ ኦꬅስ።
EXO 37:7 ቀፈይ ደእያ ናምኡ ክሩበታ ቆፀትዳ ዎርቃፈ ኦꬅድ፥
EXO 37:8 እስ ክሩብያ እስ ባጋን፥ ሀንኮ ክሩብያ ሀንኮ ባጋን ዎꬅድ፥ አቶተꬃ ካሙዋራ እስኖ ኦꬅድ መꬍስ።
EXO 37:9 ክሩበት ባንታ ቀፍያ ምጭድ፥ አቶተꬃ ካሙዋ ካምድ፥ እሶይ እሱዋ ፄሎሶና።
EXO 37:10 አዱሳተꬃይ ናምኡ ዋꬋ፥ ጎምፓይ እስ ዋꬋ፥ ጌሳይ እስ ዋꬋነ ባጋ ግድዳ ፃርጴዛ ሶቃላ ምꬃፈ መꬍስ።
EXO 37:11 ዋላህ ባይና ዎርቃን እያ ላንፅድ፥ ዩሹዋካ ዎርቃን ላንፅስ።
EXO 37:12 ሄሳዳካ፥ ጎምፓይ ታካꬎ ግድያ ጎሰ ኦꬅድ፥ እያ ዎርቃን ዩሽ አꬅድ ላንፅስ።
EXO 37:13 ታቦትያ ቶካናዉ ማድያ ኦይዱ ዎርቃ ሳጋዮታ መꬍድ፥ ኦይዱ ገዳታ ኦይዱ ማዛነታ ቦላ ዎꬅስ።
EXO 37:14 ፃርጴዛ ቶካናዉ ካሶታ አꬅያ ሳጋዮት ፃርጴዛ ጎሳ ማታን ኦሰትዶሶና።
EXO 37:15 ፃርጴዛ ቶክያ ካሶ ምꬃታ ሶቃላ ምꬃፈ ከስድ፥ ዎርቃን ላንፅስ።
EXO 37:16 ሄሳዳካ፥ ፃርጴዛ ቦላ ዎꬅያ ዱማ ዱማ ሚሸታ ዋላህ ባይና ዎርቃፈ መꬍስ። ሄሳትካ ሳነታ፥ ጭልፓታ፥ ከረታ፥ ዎይነ ያርሾ ትግያ ፁአታ።
EXO 37:17 ሄሳፈ ጉየ፥ ባስልኤል ፆምፐ ዎꬅያ ኮጫ ዋላህ ባይና ዎርቃፈ ኦꬅስ። ኮጫ ኤስያ ቶሁዋነ ቶማ ቆፀትዳ ዎርቃፈ ጊግስስ። አሌቆስ ኦሰትያ፥ እያ ጋምቡꬃታ፥ እያ ዋላፃታነ እያ ጪሻታ ኡባ እያራ እስፈ ኦይꬅድ መꬍስ።
EXO 37:18 እስ ባጋራ ሄꬑ ታሸት፥ ቃስ ሀንኮ ባጋራ ሄꬑ ታሸት ደእያ ኡሱፑን ታሸታ እያ ምይያን መꬍስ።
EXO 37:19 ኡሱፑን ታሸታስ ፄራን ፄራን ሄꬑ ሄꬑ አሌቆ ጋምቡꬃትነ ጪሻት ደእያ ላዉዘ ምꬃ ጪሸ ዳንያባ መꬍስ።
EXO 37:20 ፆምፐ ዎꬅያ ኮጫ ግዶን ደእያ ቶማ ፄራን ኦይዱ አሌቆ ጋምቡꬃትነ ጪሻት ደእያ ላዉዘ ምꬃ ጪሸ ዳንያባ መꬍስ።
EXO 37:21 ዋꬃን ደእያ ሄꬑ ሄꬑ ታሸታፐ ጋርሳን እስ እስ ጋምቡꬅ ኦሰትስ።
EXO 37:22 ጋምቡꬃት፥ ታሸትነ ፆምፐ ዎꬅያ ኮጫይ እስኖ ግድድ፥ ዋላህ ባይና ዎርቃፈ ቆፀትድ ኦሰትዶሶና።
EXO 37:23 ፆምፐ ዎꬅያ ኮጫስ ላፑን ፆምፐታ፥ ፆምፐ ቶይስያ ቃጰታነ ኤንታ ዎꬅያባታ ዋላህ ባይና ዎርቃፈ ኦꬅስ።
EXO 37:24 ፆምፐ ዎꬅያ ኮጫነ እያዉ ጎኤትያ ሚሸ ኡባ ኦꬃናዉ ሀስታማነ እቻሹ ክሎ ግራመ ግድያ፥ ዋላህ ባይና ዎርቃ ኦንግስ።
EXO 37:25 ባስልኤል እፃነ ጩይስያ ፃርጴዛ ሶቃላ ምꬃፈ ጊግስስ። እያዉ ኦይዱ ማዛነይ ደኤስ። ሄ ፃርጴዛስ አዱሳተꬃይነ ጎምፓይ እስ ዋꬋ፤ ቃስ ጌሳይ ናምኡ ዋꬋ። ኦይዱ ማዛንያን ደእያ ካጨት እያራ እስኖ ግድ ኦይከትድ ኦሰትዶሶና።
EXO 37:26 እያዉ ቦላ ባጋ፥ ኦይዱ ምያነ ካጨታ ዋላህ ባይና ዎርቃን ላንፅስ፥ እያ ዩሹዋካ ዎርቃን ላንፅድ ዩሽ አꬅስ።
EXO 37:27 እያዉ ጋፃ ቦላ ቶካናዉ ማድያ ናምኡ ዎርቃ ሳጋዮታ መꬍድ፥ ናምኡ ባጋ ምይያን ዎꬅስ። ኤንቲ እፃነ ፃርጴዛ ቶክያ ዎደ ካሶ ምꬃታ አꬃናዉ ማደይሳታ።
EXO 37:28 ካሶ ምꬃታ ሶቃላ ምꬃፈ ከስድ፥ ዎርቃን ላንፅስ።
EXO 37:29 ጌሻ ሹማተꬃ ዛይትያነ ሳውያ ሎኦ እፃነ ሽቶዳ ዋላክድ ኦꬅስ።
EXO 38:1 ሶቃላ ምꬃፈ ፁሳ ያርሾ በሲ ኦꬅስ። ሄ ያርሾ በሳ አዱሳተꬃይነ ጎምፓይ፥ እቻሹ እቻሹ ዋꬋ፥ ቃስ ጌሳይ ናምኡ ዋꬋነ ታካꬎ። እያዉ ኦይዱ ማዛነይ ደኤስ።
EXO 38:2 ኦይዱ ማዛነታራ ኦይከትድ ኦሰትዳ ካጨታ መꬍስ። ያትድ፥ ሄ ያርሾ በሳ ናሰ ብራታን ላንፅስ።
EXO 38:3 ሄ ያርሾ በሳን ጎኤትያ ሚሸታ፥ ድስተታ፥ ባልደታ፥ አካፋታ፥ አሹዋ ቃጵያ ቃጰታነ ታማ ጮጨታ ኡባ ናሰ ብራታፐ መꬍስ።
EXO 38:4 ናሰ ብራታፐ ግተ ዳንያ ተቀ ያርሾ በሳስ ጊግስድ፥ ያርሾ በሳስ ግዶ ዛዋ ዩሽ አꬅድ ዎꬅስ።
EXO 38:5 ቶካናዉ ማድያ ካሶታ አꬃናዉ፥ ኦይዱ ሳጋዮታ መꬍድ፥ ኦይዱ ማዛነታ ቦላ ዎꬅስ።
EXO 38:6 ሶቃላ ምꬃፈ ያርሾ በሳ ቶክያ ካሶ ምꬃታ ከስድ፥ ናሰ ብራታን ላንፅስ።
EXO 38:7 ሀ ካሶታ ናምኡ ምየን ደእያ ሳጋዮታን አꬅስ። ያርሾ በሳ ፃዉላፐ ጊግስድ፥ ግዱዋ ካይስ ኦꬅስ።
EXO 38:8 ናሰ ብራታፐ ሜቻ ከረነ እያ ዎꬅያ ቶሆ መꬍስ። ሄ ናሰ ብራታይ፥ ጌሻ ዱንካንያ ፐንገን ኦꬅያ ማጫሳት ኤህዳ ማስቶትያፐ ኤከትስ።
EXO 38:9 ጌሻ ዱንካንያስ ዳባባ ባጋ ገቻናዉ አልኦ ሊኖፐ ማጋራጆ ኦꬅስ። ዱገሀ ባጋ ገሸታስ አዱሳተꬃይ ፄቱ ዋꬋ።
EXO 38:10 ገሸታስ ካተ ግዳና መላ ላታሙ ቱሳታነ ኤንቲ ኤቅያ ቶሆታ ናሰ ብራታፐ ኦꬅስ። ኤንታ ፃምአታነ ካጨታ ብራ ብራታፐ ኦꬅስ።
EXO 38:11 ፑደሀ ባጋ ዳባባይካ ሄሳዳ ሀንድ ኦሰትስ።
EXO 38:12 ዉሎሀ ባጋ ገሸታ አዱሳተꬃይ እሻታሙ ዋꬋ። ኤንታዉ ታሙ ቱሳትነ ቱሳት ኤቅያ ታሙ ቶሆት ደኦሶና። ቱሳታስ ብራ ብራታፐ ኦሰትዳ ፃምአትነ ካጨት ደኦሶና።
EXO 38:13 ዳባባ ገልያ ፐንገይ ደእያ፥ ዶሎሀ ባጋ ማጋራጁዋ ጎምፓይ እሻታሙ ዋꬋ።
EXO 38:14 እስ ባጋራ ደእያ ማጋራጁዋ አዱሳተꬃይ ታማነ እቻሹ ዋꬋ። እያዉ ሄꬑ ቱሳትነ ቱሳት ኤቅያ ቶሆት ደኦሶና።
EXO 38:15 ሀንኮ ባጋራ ደእያ ማጋራጁዋ አዱሳተꬃይ ታማነ እቻሹ ዋꬋ። እያዉ ሄꬑ ቱሳትነ ቱሳት ኤቅያ ቶሆት ደኦሶና።
EXO 38:16 ዳባባ ዩሹዋን ደእያ ገሸት ኡባይ አልኦ ሊኖፐ ኦሰትዶሶና።
EXO 38:17 ቱኡሳት ኤቅያ ቶሆት ናሰ ብራታፐ ኦሰትዶሶና። ፃምአት፥ ካጨትነ ቱሳታ ፄራ ጎሳት ብራ ብራታፐ ኦሰትዶሶና። ዳባባ ዩሹዋን ደእያ ቱሳት ኡባይ ብራ ፃምአታን ኦይከትዶሶና።
EXO 38:18 ዳባባ ፐንግያን ደእያ ማጋራጁዋ አልኦ ሊኖፐ ኦꬅድ፥ ካሎሰን ኦቻ ቴራ ዳነይሳንነ ዞኦ ቃጭናን ዳድድ አሌቅስስ። እያዉ ሀንኮ ዳባባ ገሸታዳ አዱሳተꬃይ ላታሙ ዋꬋ፤ ቃስ ጌሳይ እቻሹ ዋꬋ።
EXO 38:19 እያ፥ ኦይዱ ቶሆት ደእያ ኦይዱ ቱሳታ ቦላ ካቅስ። ካጨት፥ ፃራ ካመይሳትነ ፃምአት ብራ ብራታፐ ኦሰትዶሶና።
EXO 38:20 ጌሻ ዱንካንያ ꬍሸትነ እያ ዩሹዋን ደእያ ገሸታ ꬍሸት ኡባይ ናሰ ብራታፐ ኦሰትዶሶና።
EXO 38:21 ታሙ ኪታታ ኦይክዳ ናምኡ ሎቸ ሹቻት ደእያ በሳን፥ ጌሻ ዱንካንያን፥ ጎኤትያ ሚሸታ ማዝጋበይ ሀይሳ። ሄ ሚሸታ ማዝጋባና መላ ካህንያ አሮና ናአ እታማራ አዋተꬃ ጋርሳን ደእያ ሌወታ ሙሰይ ኪትስ።
EXO 38:22 ይሁዳ ሼሻፐ ግድዳ ሁራ ናኣ ናኣ፥ ኡረ ናኣ፥ ባስልኤል፥ ጎዳይ ኪትዳይሳዳ ኡባባ ኦꬅስ።
EXO 38:23 ዳነ ሼሻፐ ግድዳ አህሳማካ ናኣ ኤልያብ፥ ኩሸ ሂላንቾይ፥ ኦꬅያባስ ኮይሮ ሀልቾ ከስያ አስ፤ እ፥ ካሎሰ፥ ኦቻ ቴራ ዳነይሳነ ዞኦ ቃጭናን አልኦ ሊኖ ዳድድ አሌቅስያ አስ።
EXO 38:24 ጌሻ ዱንካንያ ኦሱዋስ ሀናና መላ ጎዳስ እመትዳ ዎርቃይ ጌሻ ዱንካነን ኤረትዳ ምዛነን እስ ሙኩሉ ክሎ ግራመ ግድስ።
EXO 38:25 ታይቦን ደእያ አሳፐ ኤከትዳ ብራይ ጌሻ ዱንካነን ኤረትዳ ምዛነን፥ ሄꬑ ሙኩሉነ ኦይዱ ፄታነ ሀስታሙ ክሎ ግራመ ግድስ።
EXO 38:26 ሄስካ፥ ታይቦን ገልዳ አደ አሳይ፥ እሶይ እሶይ ጌሻ ዱንካነን ኤረትዳ ምዛንያ ልከን ኮየትያ ኡባ እምዶሶና። ላታሙ ላይꬅነ እያፐ ቦላ ግድዳ፥ ማዝጋበን ገልዳ፥ አደ አሳ ታይቦይ ኡሱፑን ፄታነ ሄꬑ ሙኩሉነ እቻሹ ፄታነ እሻታማ።
EXO 38:27 ጌሻ ዱንካንያነ ማጋራጆታ ኤሳናዉ ማድያ ፄቱ ቶሆታ ኦꬃናዉ 3,400 ክሎ ግራመ ብራ ብራታ ኤክዶሶና። ሄስካ፥ እስ እስ ቶሆይ ሀስታማነ ኦይዱ ክሎ ግራመ ብራ ብራታ ኤክስ።
EXO 38:28 ባስልኤል፥ አትዳ ሀስታሙ ክሎ ግራመ ብራ ብራታን ፃምአታ፥ ካጨታነ ቱሳታስ ፄራ ጎሳታ ኦꬅስ።
EXO 38:29 አሳይ ጎዳስ እምዳ ናሰ ብራታይ 2,425 ክሎ ግራመ።
EXO 38:30 ሄ ናሰ ብራታን ጌሻ ዱንካንያ ፐንግያ ኤስያ ቶሆታ፥ ግተ ዳንያባራ ናሰ ብራታ ያርሾ በሳነ እያ ግዶን ጎኤትያ ዱማ ዱማ ሚሸታ መꬍስ።
EXO 38:31 ቃስ ዳባባ ዩሹዋን ደእያ ድርሳ ቶሆትነ ፐንግያ ቦላ ኤቅዳ ቶሆት፥ ጌሻ ዱንካነይነ እያ ዩሹዋን ደእያ ዳባባ ድርሳ ꬍሸት ኡባይ ሄ ናሰ ብራታፐ ኦሰትዶሶና።
EXO 39:1 ካህነት ጌሻ ዱንካንያን ኦꬅያ ዎደ ማአና ቦንቾ ማኦታ፥ ካሎሰን፥ ኦቻ ቴራ ዳንያ ቃጭናፐነ ዞኦ ቃጭናን ዳድዶሶና። አሮን ማእያ ካህነተꬃ ማኡዋ ጎዳይ ሙሰ ኪትዳይሳዳ ኦꬅዶሶና።
EXO 39:2 ቃስ ኤፉድያ፥ ዎርቃፈ፥ ካሎሰፐ፥ ኦቻ ቴራ ዳንያ ቃጭናፐ፥ ዞኦ ቃጭናፐነ አልኦ ሊኖፐ ዳድዶሶና።
EXO 39:3 ኤንቲ ዎርቃ ቆፅድ፥ ሌእስድ፥ እያ ቃራርድ፥ ቃጭናዳ ከስዶሶና። ያትድ ካሎሰን፥ ኦቻ ቴራ ዳነይሳን፥ ዞኦ ቃጭናንነ አልኦ ሊኖን አሌቅስድ ዳድዶሶና።
EXO 39:4 ኤንቲ ናምኡ ሀሽያራ ዎꬍድ፥ ናምኡ ባጋ ዎል ጋꬅድ ኦይሰꬃናዉ ማድያ ቃንጎታ ኤፉድያስ ኦꬅዶሶና።
EXO 39:5 ጎዳይ ሙሰ ኪትዳይሳዳ፥ ሂላንቾይ አሌቅስዳ ዳንጮይካ ኤፉደይ ኦሰትዳይሳታፐ ኦሰትድ፥ ዎርቃን፥ ካሎሰን፥ ኦቻ ቴራ ዳነይሳን፥ ዞኦ ቃጭናንነ አልኦ ሊኖን ዳደትስ።
EXO 39:6 ኤንቲ ማርግደ ጌተትያ ሹቻታ ጊግስድ፥ ዎርቃፈ ኦሰትዳ ካቁዋ ቦላ ዎꬅዶሶና። ማታመ ቦላ ዎጭድ ፃፈይሳዳ፥ ሄ ሹቻታ ቦላ እስራኤለ ናይታ ሱንꬃ ዎጭድ ፃፍዶሶና።
EXO 39:7 ጎዳይ ሙሰ ኪትዳይሳዳ፥ ታማነ ናምኡ እስራኤለ ናይታ ቆፍስያባ ግዳና መላ ኤንታ፥ ኤፉድያ ቃንጎታን ዎꬅዶሶና።
EXO 39:8 ኤንቲ፥ ትራን ማኤትያ ማኡዋ ኤፉደይ ኦሰትዳይሳታፐ ኦꬅድ፥ ኤፉድያዳ አሌቅስዶሶና።
EXO 39:9 እያዉ ኦይዱ ማዛነት ደኦሶና፤ ጌሳይነ ጎምፓይ እስ እስ ታካꬎ ግድድ፥ ዳኮየቴስ።
EXO 39:10 እያ ቦላ ኦይዱ ማራን እንቆ ጌተትያ አልኦ ሹቻታ ዎꬅዶሶና። ኮይሮ ማራን ሳርድዮነ፥ ቶጳዘነ ጶልያ አልኦ ሹቻታ፤
EXO 39:11 ናምአንꬆ ማራን ባሉረ፥ ሳንፓረነ አልማዘ ጌተትያ አልኦ ሹቻታ፤
EXO 39:12 ሄꬓንꬆ ማራን ያክንተ፥ ከልቀዶነነ አመተስፅኖሳ ጌተትያ አልኦ ሹቻታ፤
EXO 39:13 ኦይዳንꬆ ማራን ብርለ፥ ማርግደነ ያስጵደ ጌተትያ አልኦ ሹቻታ ዎꬅዶሶና። ሄሳታ ኡባ ዎርቃፈ ኦሰትዳ ካቁዋ ቦላ ዎꬅዶሶና።
EXO 39:14 ታማነ ናምኡ ሹቻታ ቦላ እስ እስ እስራኤለ ናይታ ሱንꬃይ ዎጨትድ ፃፈትስ።
EXO 39:15 ትራን ማኤትያ ማኡዋስ ዋላህ ባይና ዎርቃፈ ዎዶሮዳ ዶቃዳ ሳንꬃላታ ኦꬃ።
EXO 39:16 ናምኡ ዎርቃ ካቆታነ ናምኡ ዎርቃ ሳጋዮታ መꬍድ፥ ናምኡ ዎርቃ ሳጋዮታ ትራን ማኤትያ ማኡዋስ ቆሞ ባጋን ደእያ ማዛነታራ ጋꬅድ ኦይሰꬅዶሶና።
EXO 39:17 ሄ ናምኡ ዎርቃ ሳንꬃላታታ ናምኡ ዎርቃ ሳጋዮታራ ጋꬅድ ኦይሰꬅዶሶና።
EXO 39:18 ሄ ሳንꬃላታታ፥ ሀንኮ ባጋ ፄራ፥ ናምኡ ካቆታራ ጋሰꬅዶሶና። ያትድ፥ ኤፉድያስ ስንꬃ ባጋራ፥ ሀሽያራ ዎꬍያ ቃንጎታራ ጋꬅድ ቃችዶሶና።
EXO 39:19 ቃስ ናምኡ ዎርቃ ሳጋዮታ መꬍድ፥ ኤፉድያስ ስንꬃ ባጋራ ደእያ ትራን ማኤትያ ማኡዋስ፥ ጋꬃ ባጋራ ደእያ ናምኡ ማዛነታ ፄራን አꬅዶሶና።
EXO 39:20 ሄሳዳካ፥ ዎርቃፈ ሀራ ናምኡ ምግዶታ ኦꬃዳ፥ ኤፉድያስ ስንꬃ ባጋ ሀሽያራ ዎꬍያ ቃንጉዋስ ጋርሳ ባጋራ፥ ስኩዋ ማታን ዳንጩዋፈ ቆሞ ባጋራ ኦይሰꬅዶሶና።
EXO 39:21 ጎዳይ ሙሰ ኪትዳይሳዳ፥ ትራን ማኤትያ ማኡዋ ቦላ ደእያ ምግዶታ ኤፉድያን ደእያ ምግዶታራ ጋꬅድ፥ ካሎሰ ቃጭና ቃችዶሶና። ትራን ማኤትያ ማኦይ ፄሳፈ ቆሞን ፔእያ ግሾ ቃሾይ ዶልኤና።
EXO 39:22 ኤፉድያፐ ቦላራ ማኤትያ አዱሳ ማኦይ ኩመꬅ ካሎሰ አፍላፐ ጊግስዶሶና።
EXO 39:23 ሄ አዱሳ ማኡዋስ ሁጰ አꬅያ ሉሆ መꬍድ፥ ፔቶና መላ ጉየ ቃላምእድ፥ ዩሽ አꬅድ ስክዶሶና።
EXO 39:24 አዱሳ ማኡዋስ ዱገ ባጋ ማጫራ ዩሹዋን ካሎሰን፥ ኦቻ ቴራ ዳንያ ዞኦ ቃጭናንነ አልኦ ሊኖን፥ ኦሮማነ ቴራ ምስለታ መꬍዶሶና።
EXO 39:25 ኤንቲ ዋላህ ባይና ዎርቃፈ ዳላታ መꬍድ፥ አዱሳ ማኡዋስ ዱገ ባጋ ጋፃን፥ ኦሮማነ ምስለታ ግዶን ዎꬅዶሶና።
EXO 39:26 ጎዳይ ሙሰ ኪትዳይሳዳ፥ ኦሮማነ ቴራ ምስለታ፥ አዱሳ ማኡዋስ ዱገ ባጋ ማጫራ ዩሹዋን አꬅዶሶና።
EXO 39:27 ኤንቲ፥ ጎዳይ ሙሰ ኪትዳይሳዳ፥ አሮናስነ እያ ናይታስ፥ ሻምዘታ፥
EXO 39:28 ሁጰ ቃጨታ፥ ኡከታነ ጋꬃ ሱረታ አልኦ ሊኖፐ ዳድድ ጊግስዶሶና።
EXO 39:29 ቃስ ዳንጩዋ ካሎሰን፥ ኦቻ ቴራ ዳንያ ቃጭናን፥ ዞኦ ቃጭናንነ አልኦ ሊኖን አሌቅስድ፥ ጊግስዶሶና።
EXO 39:30 ኤንቲ፥ ጌሻ ካላቻ ምስልያ ዋላህ ባይና ዎርቃፈ መꬍድ፥ እያ ቦላ፥ “ጎዳስ ዱማትስ” ግያ ቃላ ዎጭድ ፃፍዶሶና።
EXO 39:31 ያትድ፥ ጎዳይ ሙሰ ኪትዳይሳዳ፥ ሁጰ ቃጭያ ቦላ ካሎሰ ቃጭናራ ቃችዶሶና።
EXO 39:32 ጌሻ ዱንካንያ ኦሶ ኡባይ ኩመꬅ ፖለትስ። እስራኤለ አሳይ፥ ጎዳይ ሙሰ ኪትዳይሳዳ ኦꬅዶሶና።
EXO 39:33 ሄሳፈ ጉየ፥ ኤንቲ ጌሻ ዱንካንያነ እያ ሚሸታ ሙሰኮ ኤህዶሶና። ሄሳትካ፥ ካጨታ፥ ቱሳታ፥ ልዮታ፥ ቱቀታነ ኤንቲ ኤቅያ ቶሆታ።
EXO 39:34 ቦላ ካማስ፥ ዞኦ ቃላመን የግድ ከስዳ ዶርሳ እተ፥ ሃሸትዳ ዶአ እተ፥ ማጋራጁዋ፥
EXO 39:35 ታሙ ኪታታ ኦይክዳ ታቦትያ፥ እያ ቶክያ ካሶ ምꬃታነ ናጋራ አቶተꬃ ካማ፥
EXO 39:36 ፃርጴዛነ እያ ሚሸታ ኡባ፥ ጎዳ ስንꬃን ደእያ ጌሻ ዳቡዋ፥
EXO 39:37 ዋላህ ባይና ዎርቃፈ ኦሰትዳ ፆምፐ ዎꬅያ ኮጫ፥ እያ ቦላ ደእያ ፆምፐታ፥ እያ ሚሸታ ኡባነ ፆምፐ ዛይተ፥
EXO 39:38 ዎርቃፈ ኦሰትዳ ያርሾ በሲ፥ ሹማተꬃ ዛይተ፥ ሳውያ እፃነ፥ ጌሻ ዱንካንያ ፐንገ ማጋራጁዋ፥
EXO 39:39 ናሰ ብራታፐ ኦሰትዳ ያርሾ በሲ፥ ናሰ ብራታ ተቅያ፥ ቶሆ ካሶ ምꬃታነ እያ ሚሸታ ኡባ፥ ሜቻ ከረነ እያ ዎይሳ፥
EXO 39:40 ዳባባ ገልያ ፐንገ ማጋራጁዋ፥ ቱሳታነ፥ ኤንቲ ኤቅያ ቶሆታ፥ ዳባባ ማጋራጁዋ፥ ቶለ ዎዶሮታ፥ ꬍሸታ፥ ጌሻ ዱንካንያን ጎኤትያ ሚሸታ ኡባ፥
EXO 39:41 ካህነት ጌሻ በሳን ማእያ ቦንቾ ማኦታ፥ አሮንነ እያ ናይት ማእያ ካህነተꬃ ማኦታ።
EXO 39:42 እስራኤለ አሳይ ኦሶ ኡባ፥ ጎዳይ ሙሰ ኪትዳይሳዳ ኦꬅዶሶና።
EXO 39:43 አሳይ፥ ኦሶ ኡባ፥ ጎዳይ ኪትዳይሳዳ ኦꬅዳይሳ ሙሰይ በእስ። ሄሳ ግሾ፥ ሙሰይ ኤንታ አንጅስ።
EXO 40:1 ጎዳይ ሙሰኮ ሀይሳዳ ያግስ፤
EXO 40:2 “ኮይሮ አጌናን፥ ኮይሮ ጋላሳን፥ ጌሻ ዱንካንያ ቶካ።
EXO 40:3 ታሙ ኪታታ ኦይክዳ ጫቆ ታቦትያ እያ ግዶን ዎꬃዳ፥ እያ ስንꬃን ማጋራጁዋ ካቃ።
EXO 40:4 ፃርጴዛ ጋꬅ ገልሳዳ፥ ኮሽያ ሚሸታ ኡባ እያ ቦላ ዎꬃ። ፆምፐ ዎꬅያ ኮጫ ገልሳዳ እያ ቦላ ፆምፐታ ዎꬃ።
EXO 40:5 እፃነ ጩይስያ ዎርቃ ፃርጴዛ ጫቆ ታቦትያ ስንꬃን ዎꬃ። ጌሻ ዱንካንያ ፐንገ ማጋራጁዋ ካቃ።
EXO 40:6 ፁሳ ያርሾ በሲ ጌሻ ዱንካንያ ስንꬃን ዎꬃ።
EXO 40:7 ሜቻ ከርያ ጌሻ ዱንካንያፐነ ያርሾ በሳፈ ግዶን ዎꬃዳ፥ እያን ሃ ኩንꬃ።
EXO 40:8 ጌሻ ዱንካንያፐ ካረራ ዳባባ ዩሻ አꬃ ጊግሳዳ፥ ማጋራጁዋ ዱንካንያ ፐንገ ቦላ ካቃ።
EXO 40:9 “ያታዳ፥ ጌሻ ዛይትያ ኤካዳ፥ ጌሻ ዱንካንያነ እያ ግዶን ደእያ ኡባባ ትያዳ፥ ዱማያ፤ እ ጌሽ ግዳና።
EXO 40:10 ካላዳ፥ ፁሳ ያርሾ በስነ እያን ጎኤትያ ሚሸ ኡባ ትያዳ፥ ዱማያ፤ እ ፖሎ ጌሽ ግዳና።
EXO 40:11 ሜቻ ከርያነ እያ ዎꬅያ ሚሸታ ትያዳ፥ ዱማያ።
EXO 40:12 “አሮናነ እያ ናይታ ጌሻ ዱንካንያ ፐንገ ኤሀዳ ሃꬃን ኤንታ ሜጫ።
EXO 40:13 ካህነ ማኡዋ አሮና ማይዛዳ፥ እ ታዉ ካህነተꬃን ኦꬃና መላ እያ ትያዳ፥ ዱማያ።
EXO 40:14 እያ አደ ናይታካ ኤሀዳ ሻምዘ ማይዛ።
EXO 40:15 ኤንቲ ታዉ ካህነተꬃን ኦꬃና መላ፥ ኤንታ አዋይ ትየትዳይሳዳ፥ ኤንታካ ትያ። ሄ ትሻ ጋሶን፥ ያና ላይꬃ ኡባን፥ ኤንቲ ታዉ ካህነ ግድድ ኦꬃና” ያግስ።
EXO 40:16 ሙሰይ፥ ኡባባ ጎዳይ ኪትዳይሳዳ ኦꬅስ።
EXO 40:17 ሄሳ ግሾ፥ ኤንቲ ግብፀፈ ከይዳ ናምአንꬆ ላይꬃን፥ ኮይሮ አጌናን፥ ኮይሮ ጋላሳን ጌሻ ዱንካንያ ቶክስ።
EXO 40:18 ሙሰይ፥ ዱንካንያ ቶሆታ ኤስስ፥ ቱቀታ፥ ልዮታነ ቱሳታ አꬅስ።
EXO 40:19 ጎዳይ ኪትዳይሳዳ፥ ሙሰይ፥ ጋርሳ ካማነ ቦላ ካማ ዱንካንያ ቦላ ካምስ።
EXO 40:20 ያትድ፥ ታሙ ኪታታ ኦይክዳ ናምኡ ሎቸ ሹቻታ፥ ታቦትያ ግዶን ዎꬅስ። ቶሆ ካሶ ምꬃታ ታቦትያ ሳጋዮታን አꬅስ፤ ናጋራ አቶተꬃ ካማካ ታቦትያ ቦላ ዎꬅስ።
EXO 40:21 ታቦትያ ጌሻ ዱንካንያ ግዶ ገልስድ፥ ገሸ ማጋራጁዋ ካቅስ። ያትድ፥ ጎዳይ ኪትዳይሳዳ፥ ጫቆ ታቦትያ ካምስ።
EXO 40:22 ሙሰይ፥ ፃርጴዛ ጌሻ ዱንካንያ ግዶ ገልስድ፥ ማጋራጁዋፈ ካረራ፥ ፑደሀ ባጋን ዎꬅስ።
EXO 40:23 ጎዳይ ኪትዳይሳዳ፥ ጎዳ ስንꬃን ዎꬅያ ጌሻ ዳቡዋ እያ ቦላ ዎꬅስ።
EXO 40:24 ፆምፐ ዎꬅያ ኮጫ፥ ጌሻ ዱንካንያ ግዶ ገልስድ፥ ፃርጴዛፐ ስንꬃ ባጋራ ጌሻ ዱንካንያስ ዱገሀ ባጋን ዎꬅስ።
EXO 40:25 ጎዳይ ኪትዳይሳዳ፥ ሙሰይ፥ ጎዳ ስንꬃን ፆምፐታ ኦይꬅስ።
EXO 40:26 ሙሰይ፥ ዎርቃ ያርሾ በሳ ጌሻ ዱንካንያ ግዶ ገልስድ፥ ማጋራጁዋፈ ስንꬃ ባጋራ ዎꬅስ።
EXO 40:27 ጎዳይ ኪትዳይሳዳ፥ ሳውያ እፃነ እያ ቦላ ጩይስስ።
EXO 40:28 ጌሻ ዱንካንያ ፐንገን ማጋራጁዋ ካቅስ።
EXO 40:29 ፁሳ ያርሾ በሲ፥ ጌሻ ዱንካንያ ፐንገ ስንꬃን ዎꬅስ። ጎዳይ ኪትዳይሳዳ፥ እያ ቦላ ፁሳ ያርሾነ ካꬃ ያርሾ ያርሽስ።
EXO 40:30 ሜቻ ከርያ ጌሻ ዱንካንያፐነ ያርሾ በሳፈ ግዶን ዎꬅድ፥ እያን ሃ ኩንꬅስ።
EXO 40:31 ሙሰይ፥ አሮንነ እያ ናይት ባንታ ኩሽያነ ቶሁዋ እያን ሜጨትዶሶና።
EXO 40:32 ጎዳይ ኪትዳይሳዳ፥ ኤንቲ ጌሻ ዱንካንያ ገልያ ዎደ ዎይኮ ያርሾ በሲ ሺቅያ ዎደ ሄሳ ኦꬆሶና።
EXO 40:33 ጌሻ ዱንካንያነ ያርሾ በሳ ዩሽ አꬅድ ዳባባ ጊግስድ፥ ሄ ዳባባ ፐንገን ማጋራጆ ካቅስ። ሄሳዳ ኦꬅድ፥ ሙሰይ ኦሱዋ ፖልስ።
EXO 40:34 ሄሳፈ ጉየ፥ ሻራይ ጌሻ ዱንካንያ ካምስ፤ ጎዳ ቦንቾይካ እያ ኩምስ።
EXO 40:35 ሻራይ ጌሻ ዱንካንያ ካምዳ ግሾነ ጎዳ ቦንቾይ እያን ኩምዳ ግሾ፥ ሙሰይ እያ ግዶ ገላናዉ ዳንዳእቤና።
EXO 40:36 እስራኤለት ባንታ ደእያ በሳ የድድ፥ ባናዉ ደንደይ፥ ሄ ሻራይ ዱንካንያፐ ደንድያ ዎደና።
EXO 40:37 ሽን ሻራይ ደንዶና እፅኮ፥ ኤንቲ ባንታ ደእያ በሳ የድድ ቦኮና።
EXO 40:38 ጎዳ ሻራይ ጋላስ ጋላስ ጌሻ ዱንካንያ ካሜስ፥ ቃማ ቃማ ቃስ ሻራ ግዶን ታማይ ኤፄስ። እስራኤለ አሳይ ብያ ዎደ ኡባን ሄ ሻራ በኦሶና።
LEV 1:1 ጎዳ ፆሳይ፥ ጌሻ ዱንካንያ ግዶን ግድድ ሙሰ ፄግድ ያግስ፤
LEV 1:2 እስራኤለ አሳስ ሀይሳዳ ያጋዳ ኦዳ፤ ህንተፈ ኦንካ ጎዳስ ያርሾ ያርሽያ ዎደ ባ መህያፐ፥ ባ ዶርሳፈነ ባ ዴሻፐ ኤሆ።
LEV 1:3 ሄ ያርሾይ መሄፐ ፁሳ ያርሾስ ግድኮ ቦረይ ባይና ዎፋኖ ግዶ። ጎዳይ ሄ ያርሹዋ ኤካና መላ ጌሻ ዱንካንያ ገልያ ፐንገን ያርሾ።
LEV 1:4 ያርሹዋ ያርሽያ ኡራይ ፁሳ ያርሾስ ኤህዳ መህያ ሁጰን ባ ኩሽያ ዎꬆ። ሄስ እያ ናጋራ አቶተꬃስ ጎዳይ ኤክዳ ያርሾ ግዳና።
LEV 1:5 እ ሄ ዎፋኑዋ ጎዳ ስንꬃን ሹኮ፤ ካህነት፥ አሮና ናይት ሄ ሱꬃ ኤክድ፥ ጌሻ ዱንካነ ገልያ ፐንገን ደእያ ያርሾ በሳ ኦይዱ ማዛነታ ቦላ ዉርፆ።
LEV 1:6 ሄ መህያ ጋልባ ቃርድ፥ አሹዋ ቆሞን ቆሞን ከሶ።
LEV 1:7 ካህንያ አሮና ናይት ያርሾ በሳን ምꬅ ዎꬅድ ታማ ኤꬆ።
LEV 1:8 ካህነት፥ አሮና ናይት ሄ ከስዳ አሹዋ ቦላ ሁጵያነ ሞꬉዋ ጉጅድ፥ ያርሾ በሳን ታማን ደእያ ምꬃ ቦላ ማራይድ ዎꬆ።
LEV 1:9 ሽን ሄ ኡራይ ኡሎ አሹዋነ ገዳታ ሃꬃን ሜጮ። ካህነይ ሄ ኡባ ያርሾ በሳን ፁጎ፤ ሄስ ጎዳስ ታማን ፁገትያ ሳዎ ቶንኩ ግያ ያርሾ ግዳና።
LEV 1:10 ፁገትያ ያርሾስ እ እምያ እሞይ ዶርሳፈ ዎይኮ ዴሻፐ ግድኮ፥ ቦረይ ባይና ማራዘ ዎይኮ ኮለ ግዶ።
LEV 1:11 ሄ መህያ ያርሾ በሳፈ ፑደሀ ባጋራ ጎዳ ስንꬃን ሹኮ። ካህነት፥ አሮና ናይት ሄ ሱꬃ ኤክድ ያርሾ በሳ ኦይዱ ማዛነታ ኡባ ቦላ ዉርፆ።
LEV 1:12 ሄ ኡራይ አሹዋ ቆሞን ቆሞን ከሶ፤ ካህነይ ሄ ከስዳ አሹዋ ቦላ ሁጵያነ ሞꬉዋ ጉጅድ፥ ያርሾ በሳን ታማን ደእያ ምꬃ ቦላ ማራይድ ዎꬆ።
LEV 1:13 ሽን ሄ ኡራይ ኡሎ አሹዋነ ገዳታ ሃꬃን ሜጮ፤ ካህነይ ሄ ኡባ ያርሾ በሳን ፁጎ፤ ሄስ ጎዳስ ታማን ፁገትያ ሳዎ ቶንኩ ግያ ያርሾ ግዳና።
LEV 1:14 ጎዳስ ያርሸትያ ፁሳ ያርሾይ ካፎ ግድኮ ሆለ ዎይኮ ኩራቾ ግዶ።
LEV 1:15 ካህነይ ሄሳ ኤክድ ቆꬍያ ኩሸራ ዱꬆ፤ ሁጵያ ያርሾ በሳ ቦላ ደእያ ታማን ፁጎ። እያ ሱꬃይ ያርሾ በሳ ምየራ ጉኮ።
LEV 1:16 ኡሎ አሹዋነ ቀፍያ ከስድ፥ ያርሾ በሳፈ ዶሎሀ ባጋራ ብዶ ቆልያ በሳን የጎ።
LEV 1:17 እ ሄ ካፉዋ ቀፈታ ኦይክድ ሻኮ፥ ሽን ኩመꬅ ሻኮፎ። ካህነይ ያርሾ በሳ ቦላ ደእያ ታማን ዎꬅድ ፁጎ፤ ሄስ ጎዳስ ታማን ፁገትያ ሳዎ ቶንኩ ግያ ያርሾ ግዳና።
LEV 2:1 ኦንካ ካꬃ ያርሾ ጎዳስ ያርሽያ ዎደ ሄ ያርሾይ ሎኦ ꬊለ ግዶ፤ እያ ቦላ ዛይተነ እፃነ ጉጆ።
LEV 2:2 ሄሳ ካህነ ግድዳ አሮና ናይታኮ ኤሆ፤ ካህነት ሄ ሎኦ ꬊልያፈ እስ ኩጫ ኤክድ፥ ዛይተነ እፃነ ኡባ ጉጅድ ያርሾ በሳ ቦላ ታማን ፁጎ። ሄስ ጎዳስ ታማን ፁገትያ ሳዎ ቶንኩ ግያ ቆፍሶ ያርሾ ግዳና።
LEV 2:3 ካꬃ ያርሹዋፈ አትዳይስ አሮናስነ እያ ናይታስ ግዳና። ሄስ ጎዳስ ታማን ፁገትዳ ኡባፈ ጌሻ ያርሾ ግዳና።
LEV 2:4 ያርሸትያ ኡይꬃይ ጮጨን ኮምፐትዳ ግድኮ፥ ዛይተራ ሙኑቀትዳ ሎኦ ꬊለ ግዶ። ሄ ኡይꬃይ እርሾይ ባይና ዛይተን ሙኑቀትዳይሳ ዎይኮ ሌኦን ኡከትድ ዛይተን ትየትዳይሳ ግዶ።
LEV 2:5 ያርሸትያ ኡይꬃይ በሸን ኡከትዳባ ግድኮ፥ እርሾይ ባይና ዛይተን ሙኑቀትዳ ሎኦ ꬊለ ግዶ።
LEV 2:6 እያ መንꬃዳ እያ ቦላ ዛይተ ትጋዳ ካꬃ ያርሾ ኦꬃዳ ያርሻ።
LEV 2:7 ነ ያርሽያ ካꬃይ ኦቶን ካፅዳባ ግድኮ ዛይተን ሙኑቀትዳ ሎኦ ꬊለ ግዶ።
LEV 2:8 ሄሳዳ ሀንድ ጊግዳ ካꬃ ያርሹዋ ጎዳስ ኤሀዳ ካህንያስ እማ፤ ካህነይ ሄሳ ኤክድ ያርሾ በሳን ያርሾ።
LEV 2:9 ካህነይ ሄ ካꬃ ያርሹዋ ኤክድ፥ ያርሾ በሳን ፁሳ ያርሾ ኦꬅድ ታማን ፁጎ። ሄስ ጎዳስ ታማን ፁገትያ ሳዎ ቶንኩ ግያ ቆፍሶ ያርሾ ግዳና።
LEV 2:10 ካꬃ ያርሹዋፈ አትዳይስ አሮናስነ እያ ናይታስ ግዳና። ሄስ ጎዳስ ታማን ፁገትዳ ኡባፈ ጌሻ ያርሾ ግዳና።
LEV 2:11 ኔኒ እርሾ ዎይኮ ኤስ ጎዳስ ታማን ፁጋዳ ያርሻናዉ በሶና ግሾ ጎዳስ ህንተ ኤህያ ካꬃ ያርሾይ እርሾይ ደእያባ ግዶፖ።
LEV 2:12 ሀይሳታ ባይራ ያርሾ ኦꬅድ ጎዳስ ያርሻናዉ ዳንዳኤታ፥ ሽን ሳዎ ቶንኩ ግያ ያርሾ ኦꬅድ ጎዳስ ያርሾ በሳን ፁጎፍተ።
LEV 2:13 ማፅነይ፥ ኔኒ ነ ፆሳራ ጫቅዳ ጫቁዋስ ማላ ግድያ ግሾ ነ ካꬃ ያርሾ ኡባን ማፅነ የጋ። ነ ካꬃ ያርሾ ኡባ ማፅነን ማልኤꬃ።
LEV 2:14 ኔኒ ካꬃፈ ባይራ ጎዳስ ኤህያ ዎደ ጫጨትድ ሽርከትዳ ትያ ግዳናዉ በሴስ።
LEV 2:15 ሄስ ካꬃ ያርሾ ግድያ ግሾ እያ ቦላ ዛይተ ትጋ፤ እፃነ ዎꬃ።
LEV 2:16 ካህነይ ሄ ጫጨትድ ሽርከትዳነ ዛይተይ ትገትዳ ካꬃ ያርሹዋፈ ባጋ ኤክድ እፃነ ኡባራ ቆፍሶ ያርሾ ኦꬅድ ጎዳስ ታማን ፁጎ።
LEV 3:1 እስ አስ እስፈተꬃ ያርሾስ ባ መህያፐ ቦረይ ባይና ኡስ ዎይኮ ዎፋኖ ጎዳ ስን ሺሾ።
LEV 3:2 ያርሻናዉ ኤህዳ መህያ ሁጰን ባ ኩሽያ ዎꬅድ ጌሻ ዱንካንያ ፐንገን ሹኮ። ካህነት፥ አሮና ናይት ሱꬃ ኤክድ ያርሾ በሳ ኦይዱ ማዛንያ ቦላ ዉርፆ።
LEV 3:3 እስፈተꬃ ያርሹዋፈ ፁሳ ያርሾ ኦꬅድ ጎዳስ ሺሾ፤ ሄስካ ኡሎ አሹዋ ካምዳ ሞꬍያ፥
LEV 3:4 ናምኡ ክላሆታ፥ ኤንታ ቦላ ደእያ ሞꬍያነ ትርያ ፄራ ባጋ ኤኮ።
LEV 3:5 አሮና ናይት ሄሳ ፁሳ ያርሹዋራ እስፈ ያርሾ በሳ ቦላ ደእያ ምꬃ ቦላ ዎꬅድ ፁጎ። ሄስ ጎዳስ ፁገትያ ሳዎ ቶንኩ ግያ ያርሾ ግዳና።
LEV 3:6 እስፈተꬃ ያርሾስ ሺቀይ ማጫ ዎይኮ አደ ዶርሰ ግድኮ ቦረይ ባይናባ ግዶ።
LEV 3:7 እስ አስ ዶርሳ ኡርገ ያርሽያባ ግድኮ ሄሳ ጎዳ ስንꬃን ሺሾ።
LEV 3:8 ሄ ዶርሳ ኡርግያ ሁጰን ባ ኩሽያ ዎꬅድ ጌሻ ዱንካንያ ፐንገን ሹኮ። አሮና ናይት ሱꬃ ኤክድ ያርሾ በሳ ኦይዱ ማዛንያ ቦላ ዉርፆ።
LEV 3:9 እስፈተꬃ ያርሹዋፈ ጎዳስ ፁሳ ያርሾ ኦꬅድ ያርሾ፤ ሄስካ ሞꬉዋ፥ ጎይናፐ ብድ ዞኮ መቀꬃ ጋካናዉ ደእያ ሞꬉዋ፥ ኡሎ አሹዋ ካምዳ ሞꬍያ፥
LEV 3:10 ናምኡ ክላሆታ፥ ኤንታ ካምዳ ሞꬍያ ትርያ ፄራ ባጋ ኤኮ።
LEV 3:11 ካህነይ ሄሳ ጎዳስ ፁሳ ያርሾ ኦꬅድ ያርሾ በሳን ፁጎ።
LEV 3:12 እ ያርሸይ ዴሸ ግድኮ እ ሄሳ ጎዳ ስን ሺሾ።
LEV 3:13 እያ ሁጰን ባ ኩሽያ ዎꬅድ ጌሻ ዱንካንያ ስንꬃን ሹኮ። አሮና ናይት ሱꬃ ኤክድ ያርሾ በሳ ዩሹዋ ዉርፆ።
LEV 3:14 እ ሄ ያርሹዋፈ ኤክድ ጎዳስ ፁሳ ያርሾ ኦꬅድ ያርሾ፤ ሄስካ ኡሎ አሹዋ ካምዳ ሞꬍያ ኡባ፥
LEV 3:15 ናምኡ ክላሆታ፥ ኤንታ ካምዳ ሞꬍያ ትርያ ፄራ ባጋ ኤኮ።
LEV 3:16 ካህነይ ሄሳ ጎዳስ ሳዎ ቶንኩ ግያ ያርሾ ኦꬅድ ያርሾ በሳን ፁጎ። ሞꬎ ኡባይ ጎዳባ።
LEV 3:17 ህንተ ሞꬎነ ሱꬅ ሞፕተ። ሄስ ህንተስነ ያና የለተꬃይ ደእያ በሳ አዉንካ ናግያ ዎጋ ግዶ።
LEV 4:1 ጎዳይ ሙሰኮ ሀይሳዳ ያግስ፤
LEV 4:2 ኔኒ እስራኤለ አሳስ ሀይሳዳ ያጋዳ ኦዳ፤ ኦንካ ቆፖና ናጋራ ኦꬅኮ ዎይኮ ጎዳ ኪታታፐ እሱዋ መንꬅኮ፥
LEV 4:3 ዶረትዳ ካህነይ ናጋራ ኦꬅድ አሳ ጎመን ጋꬅኮ፥ እ ባ ኦꬅዳ ናጋራ ግሾ ቦረይ ባይና ዎፋኖ ጎዳስ ናጋራ ያርሾ ኦꬅድ ኤሆ።
LEV 4:4 ሄ ዎፋኑዋ ጌሻ ዱንካንያ ፐንገ ኤህድ፥ ሁጰን ባ ኩሽያ ዎꬅድ ጎዳ ስንꬃን ሹኮ።
LEV 4:5 ዶረትዳ ካህነይ ዎፋኑዋ ሱꬃፈ ጉꬃራ ኤክድ ጌሻ ዱንካንያ ገልስድ፥
LEV 4:6 ባ ብራꬍያ ሱꬃን የድ ኤክድ ጌሻ ዱንካንያ ማጋራጁዋ ስንꬃን ጎዳ ስንꬃን ላፑን ቶሆ ዉርፆ።
LEV 4:7 ካህነይ ጉꬃ ሱꬅ ኤክድ ጌሻ ዱንካንያን ጎዳ ስንꬃን ሳውያ እፃነ ጩይስያ በሳን ደእያ ካጨታ ትዮ። አትዳ ሱꬃ ጌሻ ዱንካንያ ገልያ ፐንገ ባጋራ ደእያ ፁሳ ያርሾ በሳ ጋርሳን ጉሶ።
LEV 4:8 ናጋራ ያርሾስ ሹከትዳ ዎፋኑዋ ሞꬉዋ ኡባ፥ ኡሎ አሹዋ ማእዳ ሞꬉዋ፥
LEV 4:9 ናምኡ ክላሆታ፥ ኤንታ ካምዳ ሞꬍያነ ትርያ ፄራ ባጋ ኤኮ።
LEV 4:10 እስፈተꬃ ያርሾስ ሹከትዳ ዎፋኑዋ ሞꬉዋ ከስዳይሳዳ እያፐ ሞꬉዋ ከሶ። ካህነይ ፁሳ ያርሾ ኦꬅድ ያርሾ በሳን ፁጎ።
LEV 4:11 ሽን ዎፋኑዋ ጋልባ፥ እያ አሹዋ ኡባ፥ እያ ሁጵያ፥ እያ ቶሆታ፥ ኡሎ አሹዋ፥ ቶጭያ፥
LEV 4:12 አሹዋፐ አትዳይሳ ኡባ ጉታፐ ካረ ከስድ ብዶ የግያ ዎጋ መላ ጌሻ በሲ ኤፍድ ያን ታማን ፁጎ።
LEV 4:13 እስራኤለ ማባራ ኡባይ ቆፖና ናጋራ ኦꬅኮነ ጎዳ ኪታታፐ እሱዋ መንꬅኮ ሄስ ኤንታፈ ቆሰትኮካ ኤንታዉ ባላ ግድድ ታይበታና።
LEV 4:14 ኤንቲ ኦꬅዳ ናጋራ አኬክያ ዎደ ናጋራ ያርሾስ ሀንያ ዎፋኖ ጌሻ ዱንካንያ ስን ኤሆ።
LEV 4:15 ማባራ ጭማት ባንታ ኩሽያ ዎፋኑዋ ሁጰን ዎꬅድ ጎዳ ስንꬃን ሹኮ።
LEV 4:16 ዶረትዳ ካህነይ ዎፋኑዋ ሱꬃፈ ጉꬃራ ኤክድ ጌሻ ዱንካንያ ግዶ ገሎ።
LEV 4:17 እ ባ ብራꬍያ ሱꬃን የድ ኤክድ ማጋራጁዋ ስንꬃ ባጋራ ጎዳ ስንꬃን ላፑን ቶሆ ዉርፆ።
LEV 4:18 ቃስ ጉꬃ ሱꬅ ኤክድ፥ ጌሻ ዱንካንያ ግዶን ጎዳ ስንꬃን እፃነ ጩይስያ በሳን ደእያ ካጨታ ቦላ ትዮ። አትዳ ሱꬃ ጌሻ ዱንካንያ ገልያ ፐንግያ ባጋራ ደእያ ፁሳ ያርሾ በሳ ጋርሳን ጉሶ።
LEV 4:19 ሞꬎ ኡባ ኤክድ ያርሾ በሳን ፁጎ።
LEV 4:20 ሀ ዎፋኑዋካ ናጋራ ያርሾስ ሹከትዳ ዎፋኑዋ መላ ኦꬃዳ ሺሻ። ሄሳዳ ኦꬅድ፥ ካህነይ ናጋራ አቶተꬃ ዎጋ ፖላና፤ አሳ ናጋራይ አቶ ጌተታና።
LEV 4:21 ካህነይ ዎፋኑዋ ጉታፐ ካረ ከስድ፥ ኮይሮ ዎፋኖይ ፁገትዳይሳዳ እያካ ፁጎ፤ ሄስ ማባራስ ያርሸትያ ናጋራ ያርሾ።
LEV 4:22 አሳ ካለꬅያ ሹማታፐ እሶይ ቆፖና ናጋራ ኦꬅኮነ ጎዳ ፆሳ ኪታፐ እሱዋ መንꬅኮ ሄ ኡራይ ባላ።
LEV 4:23 እ ባ ኦꬅዳ ናጋራ አኬክዳፐ ጉየ፥ ቦረይ ባይና እስ ኮለ ኤሆ።
LEV 4:24 ሄ ኮልያ ሁጰን ባ ኩሽያ ዎꬅድ ፁሳ ያርሾይ ያርሸትያ በሳን ጎዳ ስንꬃን ሹኮ፤ ሄስ ናጋራ ያርሾ።
LEV 4:25 ካህነይ ባ ብራꬍያ ሱꬃን የድ ኤክድ፥ ፁሳ ያርሾ በሳን ደእያ ካጨታ ቦላ ትዮ፤ አትዳ ሱꬃ ቃስ ፁሳ ያርሾ በሳ ጋርሳን ጉሶ።
LEV 4:26 እስፈተꬃ ያርሾስ ሺቅዳ ሞꬉዋ ኡባ ፁግዳይሳዳ ሀ ኮልያ ሞꬉዋ ፁጎ። ሄሳዳ ኦꬅድ፥ ካህነይ ሄ ኡራ ናጋራ ቁሽሴስ፤ ሄ ኡራ ናጋራይ አቶ ጌተታና።
LEV 4:27 ማባራፐ እስ አስ ቆፖና ናጋራ ኦꬅኮነ ጎዳ ኪታፐ እሱዋ መንꬅኮ ሄ ኡራይ ባላ ግዴስ።
LEV 4:28 እ ባ ኦꬅዳ ናጋራ አኬክዳፐ ጉየ ቦረይ ባይና ማጫ ዴሽ ባ ናጋራ ግሾ ኤሆ።
LEV 4:29 ባ ኩሽያ ሄ ዴሸ ሁጰን ዎꬆ፤ ያትድ ፁሳ ያርሾ በሳን ናጋራ ያርሾ ኦꬅድ ሹኮ።
LEV 4:30 ሄሳፈ ጉየ፥ ካህነይ ሄ ዴሸ ሱꬃን ባ ብራꬍያ የድ ኤክድ ፁሳ ያርሾ በሳን ደእያ ካጨታ ቦላ ትዮ። አትዳ ሱꬃ ኡባ ያርሾ በሳፈ ጋርሳን ጉሶ።
LEV 4:31 እስፈተꬃ ያርሾስ ሹከትዳ መህያፐ ሞꬉዋ ከስዳይሳ መላ ሄ ዴሸ ሞꬉዋ ቃር ከስድ፥ ያርሾ በሳን ጎዳስ ሳዎ ቶንኩ ግያ ያርሾ ኦꬅድ ፁጎ። ሄሳዳ ኦꬅድ፥ ካህነይ ሄ ኡራ ናጋራ ቁሽሴስ፤ እያ ናጋራይ አቶ ጌተታና።
LEV 4:32 ሄ ኡራይ ባ ናጋራ ግሾ ያርሸይ ዶርሰ ግድኮ፥ ቦረይ ባይና ማጫ ዶርሰ ግዶ።
LEV 4:33 እ ባ ኩሽያ ሄ ዶርሰ ሁጰን ዎꬆ፤ ያትድ፥ ፁሳ ያርሾ መሄ ሹክያ በሳን ሹኮ።
LEV 4:34 ሄሳፈ ጉየ፥ ካህነይ ዶርሰ ሱꬃን ባ ብራꬍያ የድ ኤክድ ፁሳ ያርሾይ ያርሸትያ በሳን ደእያ ካጨታ ቦላ ትዮ። አትዳ ሱꬃ ያርሾ በሳፈ ጋርሳን ጉሶ።
LEV 4:35 እስፈተꬃ ያርሾስ ሹከትዳ መህያፐ ሞꬉዋ ከስዳይሳዳ ሄ ዶርሰ ሞꬉዋ ቆር ከስድ፥ ያርሾ በሳን ጎዳስ ፁሳ ያርሾ ኦꬅድ ፁጎ። ሄሳዳ ኦꬅድ፥ ካህነይ ሄ ኡራ ናጋራ ቁሽሴስ፤ እያ ናጋራይ አቶ ጌተታና።
LEV 5:1 እስ አስ ባ በእዳባ ዎይኮ ባ ኤርያባ ማርካታና መላ ኦይሸትድ ማርካቶና እፅኮ ሄ ኡራይ ናጋራ ኦꬅዳ ግሾ ሴረቶ።
LEV 5:2 እስ አስ ኤሮና ደእሸ ቱናባ፥ ሄስካ፥ ሀይቅዳ ዶአ ዎይኮ መሄ ዎይኮ ሳአራ ጎሸትያ ዶአታ ቦችኮ፥ ሄስ ቱና ግደይሳ እ ኤሮና እፅኮካ ቱና ግድያ ግሾ ባላ ግዴስ።
LEV 5:3 እስ አስ ኤሮና ደእሸ አሳ አሳተꬃፈ ጎግድ ቱንስያባ ቦችኮ፥ ሄስ ቱና ግደይሳ እ ኤሮና እፅኮ፥ ቱና ግድያ ግሾ ባላ ግዴስ።
LEV 5:4 እስ አስ ኢታባ ግድን ሎኦባ ኦꬃናዉ ኤሶን ጫቅኮነ ባ ጫቅዳይሳ ዶግድ፥ ጉየፐ እ አኬክዳ ዎደፐ ዶምድ ባላ ግዴስ።
LEV 5:5 እስ አስ ሀ ኦደትዳ ባላታፐ እሱዋ ኦꬅዳባ ግድኮ ባ ኦꬅዳ ናጋራ ፓፆ።
LEV 5:6 እ ባ ኦꬅዳ ናጋራ ግሾ ጎዳስ ባ መህያ ግዶፈ ማጫ ዶርሰ ዎይኮ ማጫ ዴሸ ናጋራ ያርሾ ኦꬅድ ሺሾ። ካህነይ ኤክድ ሄ ኡራ ናጋራ ቁሸꬃስ ያርሻና።
LEV 5:7 እስ አስ ባ ኦꬅዳ ናጋራ ግሾ ያርሻናዉ ዶርሰ ዎይኮ ዴሸ ሻማናዉ እያዉ ጋተይ ጋኮና እፅኮ ናምኡ ኩራቾታ ዎይኮ ናምኡ ሆለታ፥ እሱዋ ናጋራ ያርሾስ ቃስ እሱዋ ፁሳ ያርሾስ ኦꬅድ ጎዳስ ኤሆ።
LEV 5:8 እ ኤንታ ካህንያስ እሞ፤ ካህነይ ናምኡ ሆለታፐ እሱዋ ቆꬍያ ምርቅድ ዱꬆናሽን፥ ናጋራ ያርሾ ኦꬅድ ሺሾ።
LEV 5:9 ያትድ ሱꬃፈ ጉꬃራ ኤክድ፥ ያርሾ በሳ ማታን ዉርፆ፤ አትዳ ሱꬃ ያርሾ በሳ ጋርሳን ጉሶ፤ ሄስ ናጋራ ያርሾ።
LEV 5:10 ሀንኮ ሆልያ ቃስ ህገይ ኪተይሳዳ ፁሳ ያርሾ ኦꬅድ ፁጎ። ካህነይ ሀይሳዳ ኦꬅድ፥ ኡራይ ኦꬅዳ ናጋራ ቁሽሳናዉ ያርሾ ያርሼስ፤ ሄ ኡራ ናጋራይ አቶ ጌተታና።
LEV 5:11 ሽን እስ አስ ናምኡ ሆለ ዎይኮ ናምኡ ኩራቾ ኤሀናዉ ጋተይ ጋኮና እፅኮ፥ እስ ክሎ ግራመ ሎኦ ꬊለ ባ ናጋራ ግሾ ያርሾ ኦꬅድ ኤሆ። ሄ ꬊለይ ናጋራ ያርሾ ግድያ ግሾ ዛይተይ ዎይኮ እፃነይ እያ ቦላ ጉዠቶፎ።
LEV 5:12 እ ሄሳ ኤህድ ካህንያስ እሞ፤ ካህነይ ሄ ꬊልያፈ እስ ኩጫ ኤክድ፥ ጎዳስ ሺቅያ ካꬃ ያርሹዋራ ጋꬅድ፥ ቆፍሶ ኦꬅድ ያርሾ በሳን ፁጎ፤ ሄስ ናጋራ ያርሾ።
LEV 5:13 እስ አስ ሀ ናጋራታፐ እሱዋ ኦꬅኮ ሀይሳዳ ኦꬅድ እያ ናጋራ ቁሽሴስ፤ ሄ ኡራ ናጋራይ አቶ ጌተታና። ሄ ያርሹዋፈ አትዳይስ ካꬃ ያርሹዋዳ ካህንያስ ግዶ።
LEV 5:14 ጎዳይ ሙሰኮ ሀይሳዳ ያግስ፤
LEV 5:15 ኦንካ ጎዳ ናቅኮነ ጌሻ ሚሸታ ቱንስድ ቆፖና ናጋራ ኦꬅኮ ባ ናቁዋስ ባ መህያ ግዶፈ ቦረይ ባይና እስ ማራዘ ጎዳስ ኤሆ። እያ ጋተይ ጌሻ ዱንካነን ኤረትዳ ምዛነ ግናን ጭገቶ፤ ሄስ ናቆ ያርሾ።
LEV 5:16 እ ጌሻ ሚሸታ ቦላ ናጋራ ኦꬅዳ ግሾ ኮይሮ ጭጋናዉ በሲያ ጋትያ ቦላ ፄታፐ ላታሙ ኩሸ ጉጅድ ካህንያስ እሞ። ካህነይ ሄሳ ማራዝያራ ጋꬅ ያርሽድ ኡራ ናቁዋ ቁሽሴስ፤ እያ ናጋራይ አቶ ጌተቴስ።
LEV 5:17 እስ አስ ቆፖናሽን፥ ጎዳ ኪታታፐ እሱዋ መንꬅድ ናጋራ ኦꬅኮ እ ሄሳ ኤሮና እፅኮካ ባላ ግድያ ግሾ ባ ናጋራን ሴረቶ።
LEV 5:18 እ ባ መህያፐ ቦረይ ባይናነ ጋተ ኩንꬅያ እስ ማራዘ ናቆ ያርሾስ ካህንያኮ ኤሆ። ካህነይ ሄ ማራዝያ ያርሽድ ኡራ ናቁዋ ቁሽሴስ፤ እያ ናቆይ አቶ ጌተቴስ።
LEV 5:19 እ ቱማፐ ጎዳ ናቅዳ ግሾ ሄስ ናቆ ያርሾ።
LEV 6:1 ጎዳይ ሙሰኮ ሀይሳዳ ያግስ፤
LEV 6:2 እስ አስ ሀራ አስ ሀዳራ ዎꬅዳባ ዎይኮ ታልእዳባ ላህኮ ዎይኮ ቦንቅኮ ዎይኮ ጭምኮ፥
LEV 6:3 ዎይኮ ꬋይዳባ ደምድ ታ በአብከ ግድ ዎርዶን ጫቅኮነ አስ ኦꬅያ ሀይሳ መላባፐ እሱዋ ኦꬅኮ፥
LEV 6:4 ሄሳን ናጋራንቾ ግድድ በንትኮ፥ ካይስዳባ ዎይኮ ቦንቅዳባ ዎይኮ ሀዳራ ኤክዳባ ዎይኮ ꬋይን ደምዳባ፥
LEV 6:5 ዎይኮ ዎርዶን ጫቅድ ኤክዳ ኩመꬃ ሻሉዋ ጎዳስ ዛሮ። ቃስ ባ ናቆ ያርሹዋ ያርሽያ ጋላስ ባ ኤክዳባ ቦላ ፄታፐ ላታሙ ኩሸ ጉጅድ ሻሉዋ ጎዳስ እሞ።
LEV 6:6 ቃስ ባ ናቁዋ ግሾ ጎዳስ ያርሾ ያርሽያ ዎደ ባ መህያ ግዶፈ ቦረይ ባይና እስ ማራዘ ካህንያኮ ኤሆ። ሄ ዶርሳይ ናቆ ያርሾስ ጋተ ኩንይሳ ግዶ።
LEV 6:7 ካህነይ ሄ ዶርሳ ያርሽድ ሄ ኡራ ናቁዋ ቁሽሴስ፤ ሄ ኡራ ናቆይ አቶ ጌተታና።
LEV 6:8 ጎዳይ ሙሰኮ ሀይሳዳ ያግስ፤
LEV 6:9 አሮናነ እያ አደ ናይታ ሀይሳዳ ያጋዳ ኪታ፤ ፁሳ ያርሹዋስ ደእያ ዎጋይ ሀይሳ፤ ፁሳ ያርሾይ ሳእ ዎንታና ጋካናዉ ያርሾ በሳን ደኦ። ታማይ ያርሾ በሳን ቃማ ኩመꬅ ኤፅሸ አቆ።
LEV 6:10 ካህነይ ሊኖፐ ዳደትዳ ቃምሰ ማእድ፥ ሱረ ዳንጭድ፥ ፁሳ ያርሹዋ ታማይ ምዳ ብዱዋ ካሽድ ያርሾ በሳ ምየን ላሎ።
LEV 6:11 ያትድ ማኡዋ ቃር ዎꬅድ ሀራ ማኦ ማእድ ሄ ብዱዋ ጉታፐ ጋፃ ኤፍድ ዎጋዳ ጌሻ በሳን ቆሎ።
LEV 6:12 ያርሾ በሳ ቦላ ደእያ ታማይ ቶኦና ኡባ ዎደ ኤፅሸ ደኦ። ካህነይ ዎንታ ዎንታ ምꬅ እያ ቦላ ጉጆ። ፆሳ ያርሹዋ ምꬃ ቦላ ማራን ዎꬅድ፥ እስፈተꬃ ያርሹዋ ሞꬉዋ እያ ቦላ ፁጎ።
LEV 6:13 ታማይ ያርሾ በሳ ቦላ ኡባ ዎደ ኤፅሸ ደኦ፤ ቶአናዉ ኮሸና።
LEV 6:14 ካꬃ ያርሾስ እመትዳ ዎጋይ ሀይሳ፤ ካህነ ግድዳ አሮና ናይት ያርሾ በሳፈ ስንꬃ ባጋራ ጎዳ ስንꬃን ያርሾ።
LEV 6:15 ካህነይ እስ ኩጫ ሎኦ ꬊለነ ዛይተ ኤክድ ካꬃ ያርሹዋ ቦላ ደእያ እፃንያራ ያርሾ በሳን ጎዳስ ሳዎ ቶንኩ ግያ ቆፍሶ ያርሾ ኦꬅድ ፁጎ።
LEV 6:16 እያፐ አትዳይሳ አሮንነ እያ አደ ናይት ኡይꬅ ኡክድ ዱንካንያ ዳባባን ደእያ ጌሻ በሳን ሞ።
LEV 6:17 ሄ ኡይꬃይ እርሾይ ባይና ኡከቶ። ታማን ፁሳ ያርሹዋፈ ሄሳ ታኒ ኤንታዉ ግሾ ኦꬃዳ እማስ። ናጋራ ያርሹዋ መላነ ናቆ ያርሹዋ መላ እ ኡባፈ ጌሽ።
LEV 6:18 ጎዳስ ታማን ፁሳ ያርሹዋፈ ኤንታ ጋክያ ግሾ ግድያ ግሾ ያ የለተꬃን አሮና ኮቸ ግድዳ አደት ኡባይ ሄሳ ሞ። ሄ ያርሹዋ፥ ጌሽ ግዶና ኦንካ ቦቾፎ።
LEV 6:19 ጎዳይ ሙሰኮ ሀይሳዳ ያግስ፤
LEV 6:20 አሮንነ እያ አደ ናይት ካህነተꬃን ትየትያ ዎደ እስ ክሎ ግራመ ግድያ ሎኦ ꬊለ ካꬃ ያርሾ ኦꬅድ ጎዳስ ኤሆ። እያፐ ባጋ ዎንታ፥ ባጋ ኦማርስ ያርሾ።
LEV 6:21 ሄ ꬊለይ ዛይተራ ዋላከትድ ሎይꬅ ሙኑቀትድ ባሸን ኡከቶ፤ እያ መንꬃዳ ያርሾ በሳን ሳዎ ቶንኩ ግያ ካꬃ ያርሾ ኦꬃዳ ጎዳስ ያርሻ።
LEV 6:22 ቃስ አሮና አደ ናይታፐ እያ ካህነተꬃ ላታናዉ ትየትያ ኦንካ ሄ ዎጋ ጊግሴስ። ሄስ ጎዳስ ኡባ ዎደ ያርሸትያ ያርሾ ግድያ ግሾ ኩመꬅ ፁገቶ።
LEV 6:23 ካህነይ ካꬃ ያርሹዋ ጉየ አሾና ፁጋናዉ ኮሼስ፤ እ ሜተታናዉ በሰና።
LEV 6:24 ጎዳይ ሙሰኮ ሀይሳዳ ያግስ፤
LEV 6:25 አሮናስነ እያ አደ ናይታስ ሀይሳዳ ያጋ፤ “ናጋራ ያርሾ ዎጋይ ሀይሳ፤ ናጋራስ ሹከትያ ያርሾይ ፁሳ ያርሾይ ሹከትያ በሳን ጎዳ ስንꬃን ሹከቶ። ሄ ያርሾይ ኡባፈ ጌሻ ያርሾ።
LEV 6:26 ሄ ያርሹዋ ያርሽያ ካህነይ ዱንካንያ ዳባባን ደእያ ጌሻ በሳን ሞ።
LEV 6:27 ሄ አሹዋ ቦችያ ኦንካ ጌሽ ግዶ፤ ቃስ ሹክሽን ሱꬅ ማኡዋ ቦችኮ ሄ ማኦይ ጌሻ በሳን ሜጨቶ።
LEV 6:28 አሾይ ካፅዳ ኦቶይ መቆ፤ ብራታ ድስተን ካፅዳባ ግድኮ ሄ ሚሽያ ቃጭድ ሃꬃን ሜጫናዉ ኮሼስ።
LEV 6:29 ካህነ ኮቻፈ አደ ግድዳ ኦንካ ሄ አሹዋ ሞ፤ ሄ ያርሾይ ኡባፈ ጌሽ።
LEV 6:30 ሽን ጌሻ በሳን ናጋራ አቶተꬃስ ሱꬃ ኤክድ ዱንካንያ ግዶ ገልዳባ ግድኮ ሄ መህያ አሾይ ሜተታናዉ ኮሸና፤ እ ታማን ፁገታናዉ በሴስ።”
LEV 7:1 ኡባፈ ጌሽ ግድያ ግሾ ናቆ ያርሾ ዎጋይ ሀይሳ፤
LEV 7:2 ፁሳ ያርሾ መሄይ ሹከትያ በሳን ናቆ ያርሾ መሄይ ሹከቶ፤ እያ ሱꬃይ ያርሾ በሳ ኦይዱ ባጋን ዉርፀቶ።
LEV 7:3 እያ ሞꬉዋ ኡባ፥ ሄስካ ጎይናፐ ብድ ዞኮ መቀꬃ ጋካናዉ ደእያ ሞꬉዋ፥ ኡሎ አሹዋ ካምዳ ሞꬍያ፥
LEV 7:4 ናምኡ ክላሆታ፥ ኤንታ ካምዳ ሞꬍያነ ትርያ ፄራ ባጋ ኤክድ ያርሾ።
LEV 7:5 ካህነይ ሀይሳታ ታማን ፁሳ ያርሾ ኦꬅድ ጎዳስ ያርሾ፤ ሄስ ናቆ ያርሾ።
LEV 7:6 ካህነ ያራ ግድዳ አደ ኡባይ ሄ ያርሾ አሹዋ ሞ። ሄ ያርሾይ ኡባፈ ጌሽ ግድያ ግሾ ጌሻ በሳን ሜተቶ።
LEV 7:7 ናቆ ያርሹዋነ ናጋራ ያርሹዋ ዎጋይ እስኖ። ሄ መህያ አሾይ ናጋራ አቶተꬃስ ያርሽዳ ካህንያስ እመቴስ።
LEV 7:8 ኦንካ ፁሳ ያርሾ መሄ ኤህን ኤክድ ያርሽያ ካህነይ ሄ መህያ ጋልባ ባዉ ኤኮ።
LEV 7:9 ጮጨን ኮምፐትዳ ዎይኮ ኦቶን ካፅዳ ዎይኮ ባሸን ኡከትዳ ኡባይ ሄ ያርሹዋ ያርሽዳ ካህንያስ እመቴስ።
LEV 7:10 ቃስ ዛይተራ ሙኑቀትዳ ዎይኮ ሙኑቀቶና ካꬃ ያርሾ ኡባይ አሮና አደ ናይታ ኡባስ እስ ግና ሻከትድ እመቴስ።
LEV 7:11 እስ አስ እስፈተꬃ ያርሾ ጎዳስ ያርሽያ ዎደ እያዉ ደእያ ዎጋይ ሀይሳ፤
LEV 7:12 እ ያርሸይ ጋላታ ያርሾ ግድኮ ሄ ያርሹዋራ እስፈ ዛይተራ ሙኑቅዳ ኡይꬁ፥ እርሾይ ገሎና ኡከትድ ዛይተን ትየትዳ ሌኦ ኡይꬁነ ሎኦ ꬊለፈ ዛይተራ ሙኑቀትዳ ኡይꬁ ሺሾ።
LEV 7:13 ሄ እስፈተꬃ ያርሹዋራ እስፈ እርሾራ ኡከትዳ ኡይꬃ እሞታ ኦꬅድ ያርሾ።
LEV 7:14 ሄ እስ እስ ኡይꬃፈ እሱዋ ደንꬅድ ጎዳስ ያርሾ ኦꬅድ ኤሆ። ሄስ እስፈተꬃ ያርሹዋ ሱꬃ ዉርፅዳ ካህንያስ እመቶ።
LEV 7:15 ሄ መህያ አሾይ ሄ ጋላስ ሜተቶ፤ ዎንታስ አይብካ አቶፎ።
LEV 7:16 ሽን እያ ያርሾይ ጋሶ ያርሾ ዎይኮ ዶሳ ያርሾ ግድኮ ሄ አሾይ ሄ ያርሸትዳ ጋላስ ሜተቶ፤ እያፐ አተይ ደእኮ ዎንተꬃ ጋላስ ሜተቶ።
LEV 7:17 ሄ አሹዋፐ ፓላህድ ሄꬓንꬆ ጋላስ ጋካናዉ ጋምእኮ ሄስ ታማን ፁገቶ።
LEV 7:18 እስ አስ ሺሽዳ እስፈተꬃ ያርሾ አሾይ ሄꬓንꬆ ጋላሳን ሜተትኮ እያ ያርሾይ ኤከተና፤ ያርሾይ ያርሸትዳዳ ታይበተና። ሄ ያርሾይ ቱና፤ እያፐ ምዳ ኦንካ ባ ናጋራን ኦይሸቴስ።
LEV 7:19 ቱናባ ቦችዳ አሾይ ሜተቶፎ፤ እ ታማን ፁገታናዉ ኮሼስ። ሀራ አሹዋ ዎጋን ቱና ግዶና አስ ኦንካ ማና ጊኮ ሞ።
LEV 7:20 ሽን እስ አስ ቱና ግድ ኡትድ፥ ጎዳስ ሺቅዳ እስፈተꬃ ያርሾ አሹዋፐ ምያባ ግድኮ፥ ሄ ኡራይ አሳ ግዶፈ ኩረቶ።
LEV 7:21 እስ አስ ቱናባ ቦችኮ፥ አሳ ቱናተꬅ ግድን ዎይኮ ቱና መሄ ግድን ዎይኮ ሀራ እፀትያ ቱናባ ቦችድ፥ ጎዳስ ያርሸትዳ እስፈተꬃ ያርሾ አሹዋፐ ሚኮ፥ ሄ ኡራይ ባ አሳ ግዶፈ ኩረቶ።
LEV 7:22 ጎዳይ ሙሰኮ ሀይሳዳ ያግስ፤
LEV 7:23 እስራኤለ አሳስ ሀይሳዳ ያጋዳ ኦዳ፤ ኮርማ ዎይኮ ማራዘ ዎይኮ ኮለ ሞꬎ አሹዋ ሞፕተ።
LEV 7:24 ሀይቅዳ መሄ ዎይኮ ዶእ ዎꬍዳ መህያ ሞꬉዋ ሀራባስ ጎኤትተፐ አትን፥ እያፐ አይባካ ሞፕተ።
LEV 7:25 ጎዳስ ታማን ፁሳ ያርሾስ ሺቅያ መህያ ሞꬎ አሹዋ ምያ ኦንካ ባ አሳ ግዶፈ ኩረቶ።
LEV 7:26 ህንተ ደእያ በሳን አዉን ግድኮካ፥ ካፎ ሱꬅ ዎይኮ መሄ ሱꬅ ሞፕተ።
LEV 7:27 ሱꬅ ምያ ኦንካ ባ አሳ ግዶፈ ኩረቶ።
LEV 7:28 ጎዳይ ሙሰኮ ሀይሳዳ ያግስ፤
LEV 7:29 እስራኤለ አሳስ ሀይሳዳ ያጋዳ ኦዳ፤ ጎዳስ እስፈተꬃ ያርሾ ሺሽያ ኦንካ ሄ እስፈተꬃ ያርሹዋፈ ሻክድ ባ እሞታ ኦꬅድ ጎዳስ ዱማይድ ያርሾ።
LEV 7:30 ሄሳ እ ጎዳስ ታማን ፁሳ ያርሾ ኦꬅድ፥ ባ ኩሸን ኤክድ ኤሆ። ቃስ ሞꬉዋ አንጋሱዋራ ጋꬅ ኤህድ ዩሾ ያርሾ ኦꬅድ ጎዳ ስንꬃን ያርሾ።
LEV 7:31 ካህነይ ያርሾ በሳን ሞꬉዋ ፁጎ፤ ሽን አንጋሶይ አሮናስነ እያ አደ ናይታስ እመቶ።
LEV 7:32 ህንተ እስፈተꬃ ያርሹዋፈ ኡሻቻ ገዳ እሞታ ኦꬅድ ካህንያስ እምተ።
LEV 7:33 ሄ ኡሻቻ ገዳይ እስፈተꬃ ያርሹዋ ሱꬃነ ሞꬉዋ ያርሽያ ካህንያ ጋክያ ግሾ ግዶ።
LEV 7:34 ታኒ እስራኤለ አሳ እስፈተꬃ ያርሹዋፈ ዩሾ አንጋሱዋን ሺቅዳ ገዳ እስራኤለ አሳፐ ኤካዳ፥ ካህንያ አሮናስነ እያ አደ ናይታስ ግሾ ኦꬃዳ እማስ። ሄስ ኤንታ ጋክያ ኤንታ ግሾ ግድያ ግሾ እስራኤለ አሳይ መርናዉ ሄሳ ኤንታዉ እምሸ ዳና።
LEV 7:35 አሮንነ እያ አደ ናይት ካህነ ግድድ ሹመትዳ ጋላስ ጎዳስ ሺቅዳ ፁሳ ያርሹዋፈ፥ ሄስካ ኤንታዉ ግሾ ግድድ እመትስ።
LEV 7:36 ጎዳይ ኤንታ ካህነተꬃስ ትይዳ ጋላስ፥ ሄሳ ኤንታዉ እማና መላ እስራኤለ አሳ ኪትስ፤ ሄስ ያና የለተꬃን ኤቅድ ደእያ ዎጋ ግዳና።
LEV 7:37 ህዛ ፁሳ ያርሹዋ፥ ካꬃ ያርሹዋ፥ ናጋራ ያርሹዋ፥ ናቆ ያርሹዋ፥ ካህነት ትየትያ ዎደ ያርሸትያ ያርሹዋነ እስፈተꬃ ያርሹዋ ዎጋይ ሀይሳ።
LEV 7:38 እስራኤለ አሳይ ሲና መላ ቢታን ባንታ ያርሹዋ ጎዳስ ያርሻና መላ ጎዳይ ኪትዳ ጋላስ፥ ሲና ዙማ ቦላ ጎዳይ ሙሰ ኪትዳ ዎጋይ ሀይሳ።
LEV 8:1 ጎዳይ ሙሰስ ሀይሳዳ ያግድ ኦድስ፤
LEV 8:2 አሮናነ እያ አደ ናይታ፥ ኤንታራ እስፈ ካህነተꬃ ማኡዋ፥ ትዮ ዛይትያ፥ ናጋራ ያርሹዋ ሹከትያ ኮርማ፥ ናምኡ ማራዘታነ፥ እርሾይ ገልቦና ኡከትዳ ኡይꬃ ዎꬅያ ጋይታ ኤካዳ ያ።
LEV 8:3 ቃስ እስራኤለ አሳ ኡባ ፄጋዳ ዱንካንያ ፐንገ ሺሻ።
LEV 8:4 ሙሰይ ጎዳይ ኪትዳይሳዳ ኦꬅስ፤ አሳ ኡባይ ዱንካንያ ፐንገ ሺቅስ።
LEV 8:5 ሙሰይ አሳኮ፥ ታ ኦꬃና መላ ጎዳይ ኪትዳይስ ሀይሳ።
LEV 8:6 ሙሰይ አሮናነ እያ አደ ናይታ ኤህድ ሃꬃን ሜጭስ።
LEV 8:7 አሮና ማኡዋ ማይዝድ፥ ዳንጮ ዳንጭስስ፤ አዱሳ ማኡዋ ማይዝድ እያ ቦላ ኤፉደ ማኡዋ ማይዝስ። ኤፉድያ አሌቅስድ ዳድዳ ሳቅያን አሮና ፄሳራ ጋꬅድ ቃችስ።
LEV 8:8 ኤፉድያ ቦላ ትራ ኪሰ ስክድ እያን ኡሪመነ ቱሚመ ዎꬅስ።
LEV 8:9 አሮና ሁጰን ፃꬃ ቃጨ ዎꬅስ። ጎዳይ ሙሰ ኪትዳይሳዳ ፃꬃ ቃጭያ ስንꬃ ባጋራ ጌሻ ዎርቃ ጉቸ ምስልያ ዎꬅስ።
LEV 8:10 ሄሳፈ ጉየ ሙሰይ ትዮ ዛይትያ ኤክድ፥ ዱንካንያነ ዱንካንያ ግዶን ደእያ ሚሸ ኡባ ትይድ ዱማይስ።
LEV 8:11 ሄ ዛይትያፐ ኤክድ ያርሾ በሳ ቦላ ላፑን ቶሆ ዉርፅስ፤ እያ ሚሸታ፥ ሜቻ ከርያነ እያ ኡቱዋ ዱማያናዉ ሄ ዛይትያራ ትይስ።
LEV 8:12 ሄ ትዮ ዛይትያፐ ጉꬃራ ኤክድ አሮና ሁጰን ትግድ እያ ዱማይስ።
LEV 8:13 ጎዳይ ሙሰ ኪትዳይሳዳ ሙሰይ አሮና አደ ናይታ ስን አꬅድ ማኦ ማይዝድ ዳንጮ ዳንጭስስ። ኤንታ ሁጰን ፃꬃ ቃጨ ዎꬅስ።
LEV 8:14 ሙሰይ ናጋራ ያርሾስ ያርሸትያ ኮርማ ኤህስ፤ አሮንነ እያ አደ ናይት ሄ ኮርማ ሁጰን ባንታ ኩሽያ ዎꬅዶሶና።
LEV 8:15 ሙሰይ ሄ ኮርማ ሹክድ እያ ሱꬃን ባ ብራꬍያ የድ ኤክድ፥ ያርሾ በሳን ደእያ ካጨታ ትይድ ያርሾ በሳ ጌሽስ። አትዳ ሱꬃ ያርሾ በሳፈ ጋርሳን ጉስስ፤ ሄሳዳ ኦꬅድ ያርሾ በሳ ፆሳስ ዱማይድ ጌሽስ።
LEV 8:16 ሙሰይ ኡሎ አሹዋ ካምዳ ሞꬉዋ ኡባ፥ ትርያ ፄራ ባጋ፥ ክላሆታነ ኤንታ ካምዳ ሞꬉዋ ኤክድ፥ ያርሾ በሳን ፁግስ።
LEV 8:17 ሽን ጎዳይ ሙሰ ኪትዳይሳዳ ኮርማ ጋልባ፥ አትዳ አሹዋነ ቶጭያ ጉታፐ ጋፃ ከስድ ፁግስ።
LEV 8:18 ሄሳፈ ጉየ ሙሰይ ፁሳ ያርሾስ ማራዘ ኤህስ፤ አሮንነ እያ አደ ናይት ሄ ማራዝያ ሁጰን ባንታ ኩሽያ ዎꬅዶሶና።
LEV 8:19 ሙሰይ ሄ ማራዝያ ሹክስ፤ እያ ሱꬃ ያርሾ በሳ ኦይዱ ማዛነታ ቦላ ዉርፅስ።
LEV 8:20 ሙሰይ ማራዝያ አሹዋ ቆሞን ቆሞን ቃንፀረꬅስ፤ ሁጵያ፥ አትዳ አሹዋነ ሞꬉዋ ፁግስ።
LEV 8:21 ጎዳይ ሙሰ ኪትዳይሳዳ ኡሎ አሹዋነ ገዳታ ሜጭድ፥ ኩመꬃ ዶርሳ ጎዳስ ሳዎ ቶንኩ ግያ ፁሳ ያርሾ ኦꬅድ ያርሾ በሳን ፁግስ።
LEV 8:22 ካህነት ሹመትያ ዎደ ሺቅያ ናምአንꬆ ዶርሳ ሙሰይ ኤህስ፤ አሮንነ እያ አደ ናይት ሄ ዶርሳ ሁጰን ባንታ ኩሽያ ዎꬅዶሶና።
LEV 8:23 ሙሰይ ሄ ማራዝያ ሹክስ፤ እያ ሱꬃፈ ኤክድ፥ አሮናስ ኡሻቻ ሀይꬃ፥ ኡሻቻ ኩሽያ ዎጋ ብራꬍያነ፥ ኡሻቻ ቶሁዋ ዎጋ ብራꬍያ ትይስ።
LEV 8:24 ቃስ ሙሰይ አሮና አደ ናይታ ስን አꬅድ፥ ሄ ሱꬃፈ ኤክድ፥ ኤንታ ኡሻቻ ሀይꬃ፥ ኡሻቻ ኩሽያ ዎጋ ብራꬍያነ ኡሻቻ ቶሁዋ ዎጋ ብራꬍያ ትይስ። ያትድ፥ ሙሰይ አትዳ ሱꬃ ያርሾ በሳ ኦይዱ ማዛነታ ቦላ ዉርፅስ።
LEV 8:25 ሞꬉዋ፥ ጎይናፐ ብድ ዞኮ መቀꬃ ጋካናዉ ደእያ ሞꬉዋ፥ ትርያ ፄራ ባጋ፥ ክላሆታነ ኤንታ ካምዳ ሞꬉዋነ ኡሻቻ ገዳ ኤክስ።
LEV 8:26 ጎዳ ስንꬃን ደእያ ጋይታፐ እርሾይ ባይና ኡከትዳ እስ ኡይꬃ፥ ኡከትድ ዛይተን ትየትዳ እስ ኡይꬃነ ሌኦን ኡከትዳ ኡይꬃ ኤክድ ሞꬉዋ ቦላነ ኡሻቻ ገዳ ቦላ ዎꬅስ።
LEV 8:27 እ ሄ ካꬃ ኡባ አሮና ኩሸንነ እያ አደ ናይታ ኩሸን ዎꬅን፥ ጎዳ ስንꬃን ዩሾ ያርሾ ኦꬅድ ያርሽዶሶና።
LEV 8:28 ሙሰይ ሄ ካꬃ ኤንታ ኩሸፐ ኤክድ፥ ፁሳ ያርሹዋራ ጋꬅድ፥ ካህነታ ሹምያ ዎደ ጎዳስ ሳዎ ቶንኩ ግያ ያርሾ ኦꬅድ ያርሾ በሳን ፁግስ።
LEV 8:29 ቃስ ሙሰይ አንጋሱዋ ኤክድ፥ ዩሾ ያርሾ ኦꬅድ ጎዳ ስንꬃን ያርሽስ። ጎዳይ ሙሰ ኪትዳይሳዳ፥ ካህነታ ሹምያ ዎደ ያርሸትያ ማራዝያ አሹዋፐ ሄስ ሙሰ ጋክያ ግሾ።
LEV 8:30 ሙሰይ ትዮ ዛይትያፐነ ያርሾ በሳን ደእያ ሱꬃፈ ኤክድ፥ አሮና ቦላነ እያ ማኡዋ ቦላ፥ እያ አደ ናይታ ቦላነ፥ ኤንታ ማኡዋ ቦላ ዉርፅስ፤ አሮናነ እያ ማኡዋ፥ እያ ናይታነ ኤንታ ማኡዋ ዱማይስ።
LEV 8:31 ሙሰይ አሮናነ እያ አደ ናይታኮ ሀይሳዳ ያግስ፤ አሹዋ ዱንካንያ ፐንገን ካꬅተ፤ አሮንነ እያ አደ ናይት ታ ኪትዳይሳዳ ጋይታን ደእያ ጌሻ ኡይꬃራ ሚተ።
LEV 8:32 ሄ አሹዋፐነ ኡይꬃፈ ፓላህዳይ ደእኮ ታማን ፁግተ።
LEV 8:33 ካህነታ ሹምያ ዎጋይ ላፑን ጋላስ ኤክያ ግሾ ሄ ዎጋይ ፖለትያ ላፑን ጋላሳይ ዉራና ጋካናዉ ዱንካንያ ፐንገፈ ካረ ከዮፕተ።
LEV 8:34 ጎዳይ ኪትን ሀች ፖለትዳ ዎጋይ ህንተ ናጋራ ቁቻናሳ።
LEV 8:35 ዱንካንያ ፐንገን ላፑን ጋላስ ኩመꬅ ጋላስነ ቃማ ጋምእተ፤ ጎዳ ዎጋ ናግተ፤ እፅኮ ህንተ ሀይቃና። ታና ጎዳይ ኪትዳይ ሀይሳ።
LEV 8:36 አሮንነ እያ አደ ናይት ጎዳይ ሙሰ ባጋራ ኪትዳባ ኡባ ኦꬅዶሶና።
LEV 9:1 ሆስፑንꬃ ጋላስ ሙሰይ አሮና፥ እያ አደ ናይታነ እስራኤለ ጭማታ ፄግስ።
LEV 9:2 አሮናኮ ሀይሳዳ ያግስ፤ ቦረይ ባይና እስ ኮርማ ናጋራ ያርሾስ፥ ቃስ እስ ማራዘ ፁሳ ያርሾስ ጎዳ ስን ሺሻ።
LEV 9:3 ቦረይ ባይና እስ ኮለ ናጋራ ያርሾስ፥ እስ ላይꬅ ኩምዳ ማርነ ዶርሳ ኡርገ ፁሳ ያርሾስ ባንታዉ ኤሀና መላ እስራኤለ አሳስ ኦዳ።
LEV 9:4 ቃስ እስፈተꬃ ያርሾስ እስ ኮርማ፥ እስ ማራዘነ ካꬃ ያርሾስ ዛይተራ ሙኑቀትዳ ꬊለ ኤሀና መላ ኤንታዉ ኦዳ። ሀች ጎዳይ ህንተዉ ቆንጫና ግሾ ሄሳ ኦꬅተ።
LEV 9:5 ኤንቲ ሙሰይ ኪትዳባ ኡባ ጌሻ ዱንካንያ ስን ኤህዶሶና፤ ማባራ ኡባይ ሺቅድ ጎዳ ስንꬃን ኤቅዶሶና።
LEV 9:6 ሙሰይ ኤንታኮ፥ ጎዳ ቦንቾይ ህንተዉ ቆንጫና መላ ህንተ ኦꬃና መላ ጎዳይ ኪትዳይ ሀይሳ።
LEV 9:7 ሙሰይ አሮናኮ ሀይሳዳ ያግስ፤ “ያርሾ በሳኮ ሺቃዳ ነ ናጋራ ግሾ ናጋራ ያርሾነ ፁሳ ያርሾ ያርሻ። ጎዳይ ኪትዳይሳዳ አሳ ናጋራ አቶተꬃስ ያርሾ ያርሻ።”
LEV 9:8 አሮን ያርሾ በሳኮ ይድ፥ ባ ናጋራ ግሾ ያርሸትያ ማራ ሹክስ።
LEV 9:9 አሮና ናይት ሱꬃ ኤክድ እያዉ ኤህዶሶና፤ እ፥ ባ ብራꬍያ ሄ ሱꬃን የድ ኤክድ፥ ያርሾ በሳን ደእያ ካጨታ ትይስ፤ አትዳ ሱꬃ ያርሾ በሳፈ ጋርሳን ጉስስ።
LEV 9:10 ጎዳይ ሙሰ ኪትዳይሳዳ፥ አሹዋፐ ሞꬉዋ፥ ክላሆታነ ትርያ ፄራ ባጋ ኤክድ ያርሾ በሳን ፁግስ።
LEV 9:11 ሽን አትዳ አሹዋነ ጋልባ ጉታፐ ካረ ከስድ ፁግስ።
LEV 9:12 አሮን ፁሳ ያርሾስ ሺቅዳ መህያ ሹክስ፤ እያ ናይት ሱꬃ ኤክድ እያዉ ኤህዶሶና። እ ያርሾ በሳ ኦይዱ ማዛነታ ቦላ ዉርፅስ።
LEV 9:13 ኤንቲ አሹዋ ቆሞን ቆሞን ከስድ፥ ሁጵያራ ዎላ እያዉ ኤህዶሶና፤ እ ኤክድ ያርሾ በሳን ፁግስ።
LEV 9:14 ኡሎ አሹዋነ ገዳታ ሃꬃን ሜጭድ፥ ያርሾ በሳን ደእያ ፁሳ ያርሹዋ ቦላ ዎꬅድ ፁግስ።
LEV 9:15 ሄሳፈ ጉየ፥ አሮን አሳ ግሾ ያርሾ ያርሽስ። እ አሳ ናጋራ ግሾ ያርሸትያ ኮልያ ኤክድ ሹክስ፤ እ ካሰ ባ ናጋራ ያርሽዳይሳዳ ኤንታ ናጋራ ግሾ ያርሽስ።
LEV 9:16 ዎጋይ ኪተይሳዳ ፁሳ ያርሾስ ሺቅያ መህያ ኤህድ ያርሽስ።
LEV 9:17 ካꬃ ያርሹዋ ኤህድ፥ እያፐ እስ ኩጫ ኤክድ፥ ዎንታ ዎንታ ፁሳ ያርሹዋ ቦላ ጉጅድ ያርሾ በሳን ፁግስ።
LEV 9:18 አሮን ኮርማነ ማራዝያ አሳስ እስፈተꬃ ያርሾ ኦꬅድ ሹክስ፤ እያ አደ ናይት ሱꬃ እያዉ ኤህዶሶና፤ እ ሄ ሱꬃ ኤክድ ያርሾ በሳ ኦይዱ ማዛነታ ቦላ ዉርፅስ።
LEV 9:19 ኮርማነ ማራዝያ አሹዋፐ ሞꬉዋ፥ ጎይናፐ ብድ ዞኮ መቀꬃ ጋካናዉ ደእያ ሞꬉዋ፥ ኡሎ አሹዋ ካምዳ ሞꬉዋ፥ ክላሆታነ ትርያ ፄራ ባጋ ኤክድ፥
LEV 9:20 ኤንቲ አንጋይሱዋ ቦላ ዎꬅን፥ አሮን ያርሾ በሳን ፁግስ።
LEV 9:21 ጎዳይ ሙሰ ኪትዳይሳዳ፥ አሮን አንጋይሱዋነ ኡሻቻ ገዳ ዩሾ ያርሾ ኦꬅድ ጎዳ ስንꬃን ዩሽስ።
LEV 9:22 ሄሳፈ ጉየ፥ አሮን ባ ኩሽያ አሳኮ ደንꬅድ ኤንታ አንጅስ። እ ናጋራ ያርሹዋ፥ ፁሳ ያርሹዋነ እስፈተꬃ ያርሹዋ ያርሽዳፐ ጉየ ያርሾ በሳፈ ዎꬍስ።
LEV 9:23 ሙሰይነ አሮን ጌሻ ዱንካንያ ግዶ ገልዶሶና፤ ኤንቲ ያፐ ከይድ አሳ አንጅዶሶና። ሄ ዎደ ጎዳ ቦንቾይ አሳ ኡባስ ቆንጭስ።
LEV 9:24 ጎዳ ማታፐ ታም ዎꬍድ፥ ያርሾ በሳን ደእያ ፁሳ ያርሹዋነ ሞꬉዋ ምስ። አሳ ኡባይ ሄሳ በእዳ ዎደ እልልዶሶና፤ ጉፋንድ ቦንችዶሶና።
LEV 10:1 አሮና አደ ናይት፥ ናዳብነ አብዮድ፥ ባንታ እፃነ ጩይስያ ሚሸ ኤክድ እያ ቦላ ታማ ዎꬅዶሶና፤ እያ ቦላ እፃነ ጉጅዶሶና። ጎዳይ ኤንታ ኪትቦና ጮ ታማ ጎዳ ስንꬃን ሺሽዶሶና።
LEV 10:2 ሄሳ ጋሶን ጎዳ ማታፐ ታም ይድ ኤንታ ምን፥ ኤንቲ ጎዳ ስንꬃን ሀይቅዶሶና።
LEV 10:3 ሙሰይ አሮናኮ፥ ጎዳይ፥ “ታኒ አሳ ግዶፈ ታኮ ሺቀይሳታ፥ ታ ጌሻተꬃ በሳና። ቃስ አሳ ኡባ ስንꬃን ታ ቦንቸታና” ግድ ኦድዳይሳ ሀይሳ በአ። አሮን ዛሮ እሞና ስእ ግስ።
LEV 10:4 ሙሰይ አሮና አዋ እሻ ኡዝኤላ አደ ናይታ ምሳኤላነ ኤልዛፋና ፄግድ፥ “ሃ ይድ ህንተ አዋ እሻ ናይታ አሀ ጌሻ ዱንካንያ ስንꬃፈ ደንꬅድ፥ ጉታፐ ጋፃ ከስተ” ያግስ።
LEV 10:5 ኤንቲ ይድ፥ ሙሰይ ኪትዳይሳዳ ኤንታ ካህነተꬃ ማኡዋራ ኤንታ አሀ ቶክድ፥ ጉታፐ ጋፃ ከስዶሶና።
LEV 10:6 ሙሰይ አሮናነ እያ አደ ናይታ፥ አላዛራነ እታማራ ሀይሳዳ ያግስ፤ “ህንተ ሀይቆና መላነ ጎዳይ ባ አሳ ቦላ ሀንቀቶና መላ ህንተ ሁጵያ ሜዶፕተ፤ ህንተ ማኡዋካ ዳኮፍተ። ሽን ህንተ እሻት፥ እስራኤለ አሳይ፥ ጎዳይ ባ ታማን ዎꬍዳይሳታስ ዬኮ።
LEV 10:7 ጎዳ ትዮ ዛይተይ ህንተ ቦላ ድእያ ግሾ ዱንካንያ ፐንገፈ ካረ ከዮፕተ፤ ከይኮ ህንተ ሀይቃና” ያግስ። ኤንቲ ሙሰይ ግዳይሳዳ ኦꬅዶሶና።
LEV 10:8 ጎዳይ አሮናኮ ሀይሳዳ ያግስ፤
LEV 10:9 ህንተ ሀይቆና መላ ዱንካንያ ግዶ ገልያ ዎደ ነነ ነ ናይት ዎይነ ኡሽ ዎይኮ ሀራ ማꬆይያ ኡሽ ኡዮፕተ፤ ሄስ ስንꬃፈ ያና የለተꬃስ መርናዉ ኤቅድ ደእያ ዎጋ ግዳና።
LEV 10:10 ህንተ ጌሻባነ ጌሽ ግዶናባ ቃስ ቱናባነ ቱና ግዶናባ ሻክድ ኤርተ።
LEV 10:11 ጎዳይ ሙሰ ባጋራ ኦድዳ ዎጋ ኡባ እስራኤለ አሳ ታማርስተ።
LEV 10:12 ሙሰይ አሮናነ አትዳ እያ አደ ናይታ አላዛራነ እታማራ ሀይሳዳ ያግስ፤ ጎዳስ ፁሳ ያርሹዋፈ አትዳ ካꬃ ያርሹዋ ኤክድ እርሾ የጎና ኡክተ። እ ኡባፈ ጌሽ ግድያ ግሾ ያርሾ በሳ ማታን ሚተ።
LEV 10:13 ጎዳስ ፁሳ ያርሹዋፈ ሄስ ነናነ ነ አደ ናይታ ጋክያ ግሾ ግድያ ግሾ፥ ሄሳ ህንተ ጌሻ በሳን ሚተ፤ ሀይሳ ህንተ ኦꬃና መላ ጎዳይ ታና ኪትስ።
LEV 10:14 ሽን ዩሾ ያርሾስ ሺቅዳ አንጋሱዋነ ገዳ ኔኒ፥ ነ አደ ናይትነ ነ ማጫ ናይት ጌሻ በሳን ሚተ። ሄስ እስራኤለ አሳይ ሺሽያ እስፈተꬃ ያርሹዋፈ ነናነ ነ አደ ናይታ ጋክያ ህንተ ግሾ።
LEV 10:15 ጎዳስ ያርሽዳ ገዳነ ዩሾ ያርሾስ ሺቅዳ አንጋሱዋ ሞꬉዋራ እስፈ ጋꬅድ ጎዳ ስንꬃን ዩሾ ያርሾ ኦꬅድ ያርሻናዉ ሺቆ። ጎዳይ ኪትዳይሳዳ፥ ሄስ ነዉነ ነ አደ ናይታስ መርናዉ ህንተና ጋክያ ግሾ ግዳና።
LEV 10:16 ሙሰይ ናጋራ ያርሾስ ሺቅዳ ዴሻ ኤንቲ ዋትዳኮ ኤራናዉ ኮይድ ኦይችስ፤ እ ፁገትዳይሳ ኤርዳ ዎደ አትዳ አሮና አደ ናይታ፥ አላዛራነ እታማራ ቦላ ሀንቀትስ።
LEV 10:17 “ናጋራ ያርሾስ ሺቅዳ አሹዋ አይስ ጌሻ በሳን ምቤከቲ? እ ኡባፈ ጌሽ። ጎዳ ስንꬃን አሳ ናጋራ ድግድ አሳስ አቶተꬅ እማና መላ ሄስ ህንተዉ እመትስ።
LEV 10:18 ሄ መህያ ሱꬃይ ጌሻ ዱንካንያ ግዶ ገልቦና ግሾ፥ ታኒ ህንተና ኪትዳይሳዳ፥ ህንተ እያ ጌሻ በሳን ማናዉ በሴስ፥ ሽን አግደታ” ያግስ።
LEV 10:19 አሮን ሙሰኮ፥ “ሄኮ፥ ሀ አሳት ሀች ባንታ ናጋራ ያርሹዋነ ፁሳ ያርሹዋ ጎዳ ስን ኤህዶሶና። ግዶሽን፥ ሄሳ መላባይ ታ ቦላ ጋክስ። ታኒ ናጋራ ያርሹዋ ሀች ምዳባ ግድያኮ፥ ጎዳይ ኡፋይታናሽን አትዴ?” ያግስ።
LEV 10:20 ሙሰይ ሄሳ ስእዳ ዎደ እያ ዛሩዋን ኡፋይትስ።
LEV 11:1 ጎዳይ ሙሰኮነ አሮናኮ፥
LEV 11:2 እስራኤለ አሳስ ሀይሳዳ ያግድ ኦድተ፤ “ቢታ ቦላ ደእያ መሄታፐነ ዶአታፐ ህንተ ማናይሳት ሀይሳታ፤
LEV 11:3 ሹቁለይ ጳልቀትዳይሳታነ ዋሞትያ መሄታ ሚተ።
LEV 11:4 ሽን ዋሞትሸ ሹቁለይ ጳልቀቶናይሳታነ ሹቁለይ ጳልቀꬅ ግድድ ዋሞቶናይሳታ ሞፕተ። ግማለይ ዋሞቴስ፥ ሽን ሹቁለይ ጳልቀቶና ግሾ፥ ህንተዉ ቱና ግዶ።
LEV 11:5 ጉፓለይ ዋሞቴስ፥ ሽን ሹቁለይ ጳልቀቶና ግሾ፥ ህንተዉ ቱና ግዶ።
LEV 11:6 ኤሸይ ዋሞቴስ፥ ሽን ሹቁለይ ጳልቀꬅ ግዶና ግሾ፥ ህንተዉ ቱና ግዶ።
LEV 11:7 ጉዱንꬆ ሞፕተ፤ እያዉ ሹቁለይ ጳልቀꬅ፥ ሽን ዋሞቶና ግሾ፥ እ ህንተዉ ቱና።
LEV 11:8 ህንተ ሄሳታ ሞፕተ፤ ኤንታ ባዉታ ቦቾፍተ፤ ኤንቲ ህንተዉ ቱና።
LEV 11:9 “ሃꬃ ግዶን ደእያ መተꬃ ኡባፈ ህንተ ማናይሳት ሀይሳታ፤ አባ ግዶን ዎይኮ ሻፋ ሃꬃ ግዶን ደእያ ኡባፈ ቀፈይነ ፖቆይ ደእያ ኡባ ሚተ።
LEV 11:10 ሽን አባ ግዶን ዎይኮ ጎግያ ሃꬃን ደእያ ቀፈይነ ፖቆይ ባይና መተꬃት ህንተዉ ቱና ግድያ ግሾ ሞፕተ።
LEV 11:11 ሀይሳቲ ህንተዉ ቱና፤ ኤንታ ሞፕተ፤ ኤንታ ባዉታ ቦቾፍተ።
LEV 11:12 ቀፈይነ ፖቆይ ባይና ሃꬃ ግዶን ደእያ መተꬃት ኡባይ ህንተዉ ቱና።
LEV 11:13 “ካፎታፐ ህንተዉ ቱና ግድዳይሳትነ ህንተ ማናዉ በሶናይሳት ሀይሳታ፤ አርጋንꬅ፥ አንኮ፥ ሞሎ ካፎ፥
LEV 11:14 ፅሎ፥ ጵርጮ ቆሞ ኡባ፥
LEV 11:15 ቁሮ ኡባ
LEV 11:16 ያንቾ፥ ሶሎ፥ ቆለ፥ ጉቶ ኡባ፥
LEV 11:17 ጉꬃ ጉቶ፥ ሀዛዞ፥ ዲድን፥
LEV 11:18 ሃꬃ ኩቶ፥ ሽአ አንኮ፥ ዳረ አንኮ፥
LEV 11:19 ስላጎ፥ ሳብሳነ እያ ቆሞ ኡባ፥ አያና ካፎነ ሽርሽቆ።
LEV 11:20 “ቀፈራ ደእያ ኦይዱ ቶሆን ሄመትያ ላፋ መተꬃት ኡባይ ህንተዉ ቱና።
LEV 11:21 ግዶሽን፥ ቀፈይ ደእያ ኦይዱ ቶሆን ሄመተይሳታፐ ኤንታ ቶሁዋፐ ቦላራ ጉፓናዉ ማድያ ቶሆይ ደኤይሳታ ሚተ።
LEV 11:22 ሄሳትካ፥ ቦለ ቆሞ ኡባ፥ ፃቆ ኡባነ ሰረ ኡባ።
LEV 11:23 ሽን ሀራ ቀፈራ ደእያ ኦይዱ ቶሆይ ደእያ መተꬃት ኡባይ ህንተዉ ቱና።
LEV 11:24 “ሀይሳቲ ህንተና ቱንሳና፤ ኤንታ ባዉታ ቦችያ ኦንካ ኦማርስ ጋካናዉ ቱና ግዳና።
LEV 11:25 ኤንታ ባዉታ ደንꬅያ ኦንካ ባ ማኡዋ ሜጮ፤ ሽን ኦማርስ ጋካናዉ እ ቱና ግዶ።
LEV 11:26 ሹቁለይ ደእሸ ጳልቀꬅ ግዶናይሳት ዎይኮ ዋሞቶናይሳት ኡባይ ህንተዉ ቱና፤ ኤንታ ቦችያ ኦንካ ቱኔስ።
LEV 11:27 ኦይዱ ቶሆታን ሄመትያ ዶአ ኡባፈ ግንደራ ሄመተይሳት ህንተዉ ቱና፤ ኤንታ ባዉታ ቦችያ ኦንካ ኦማርስ ጋካናዉ ቱኔስ።
LEV 11:28 ኤንታ ባዉታ ደንꬅያ ኦንካ ባ ማኡዋ ሜጮ፤ ሽን ኦማርስ ጋካናዉ እ ቱና። ኤንትካ ህንተዉ ቱና።
LEV 11:29 “ሳአራ ሄመተይሳታፐ ሀይሳቲ ህንተዉ ቱና። ኤንትካ ግሮ፥ ኤጨረ፥ ዱማ ዱማ ኮቸ፥
LEV 11:30 ጌገ፥ ሀይላሾ፥ ኮርቸ፥ ዋካላነ ሻቃንቾ።
LEV 11:31 ሳአራ ሄመትያ ኡባፈ ሀይሳቲ ህንተዉ ቱና፤ ኤንታ ባዉታ ቦችያ ኦንካ ኦማርስ ጋካናዉ ቱና ግዴስ።
LEV 11:32 ኤንታ ባዉታ ቦችያ አይ ሚሸይካ ቱና ግዴስ፤ ምꬃ ሚሸይ ዎይኮ ማኦይ ዎይኮ ጋልብ ዎይኮ ኦጎሮይ ቱና ግዴስ። ኤንታ ባዉታይ ቦችዳ ሚሸ ኡባይ ሃꬃን ሙከትድ ኦማርስ ጋካናዉ ጋምኦ፤ ሄሳፈ ጉየ ጌሽ ግዳና።
LEV 11:33 ኤንታፈ እሱዋ ባዉታይ ኦቶ ግዶን ዎꬍድ በንትኮ፥ እያ ግዶን ደእያባ ኡባይ ቱና፤ ሄ ኦቱዋ መንꬅተ።
LEV 11:34 አይ ካꬅ ግድን ሄ ኦቱዋ ግዶን ደእያ ሃꬃፈ ፆክኮ፥ ሄ ካꬃይ ቱና ግዴስ፤ ኡየትያባ ግድን፥ ሄ ኦቱዋ ግዶን ደእኮ ቱና ግዴስ።
LEV 11:35 ሄ ባዉታፐ እሶይ ዎꬍዳ ሚሸ ኡባይ ቱና፤ ጮጨ ዎይኮ ኦቶ ግድኮካ መንꬅተ፤ ኤንቲ ህንተዉ ቱና።
LEV 11:36 ሄ ባዉታይ ቦችዳ ኡባይ ቱና ግድኮካ ፑልቶይነ ሃꬃ ኦል ቱነና።
LEV 11:37 ኤንታ ባዉታፐ እሶይ ዘረꬃ ካꬃ ቦላ ዎꬍኮ፥ ሄስ ቱነና።
LEV 11:38 ሽን ሄ ዘረꬃ ቦላ ሃꬅ ጉክድ ስምን፥ ኤንታ ባዉታፐ እሶይ እያ ቦላ ዎꬍኮ፥ ሄ ዘረꬃይ ህንተዉ ቱና።
LEV 11:39 “ሜተትያ መሄታፐ እሶይ ባዉትኮ፥ እያ ባዉታ ቦችያ ኦንካ ኦማርስ ጋካናዉ ቱና።
LEV 11:40 ኦንካ ሄ መህያ ባዉታፐ ሚኮ፥ ባ ማኡዋ ሜጮ፤ ኦማርስ ጋካናዉ እ ቱና። ኦንካ እያ ባዉታ ቶክድ ደንꬅኮ፥ ባ ማኡዋ ሜጮ፤ ኦማርስ ጋካናዉ እ ቱና።
LEV 11:41 “ሳአራ ጎሸትያ መተꬅ ኡባይ ህንተዉ ቱና፤ እያ ሞፕተ።
LEV 11:42 ኡሎራ ጎሸትያባ ግድን፥ ኦይዱ ቶሆራ ሄመትያባ ግድን፥ ዳሮ ቶሆይ ደእያባ ግድን፥ ሳአራ ጎሸትያ መተꬅ ኡባይ ህንተዉ ቱና ግድያ ግሾ ሞፕተ።
LEV 11:43 ሀ ሳአራ ጎሸትያ መተꬃታን ህንተና ቱንሶፕተ፤ ኤንታ ጋሶን ህንተ አሳተꬃ ቱንሶፕተ።
LEV 11:44 ታኒ ጎዳ፥ ህንተ ፆሳ። ታኒ ጌሽ ግድያ ግሾ፥ ህንተና ዱማይድ ጌሽ ግድተ። ሳአራ ጎሸትያባታን ህንተ አሳተꬃ ቱንሶፕተ።
LEV 11:45 ታኒ ህንተዉ ፆሰ ግዳናዉ ህንተና ግብፀ ቢታፈ ከስዳ ህንተ ጎዳ። ሄሳ ግሾ፥ ታኒ ጌሽ ግድያ ግሾ፥ ህንተካ ጌሽ ግድተ።
LEV 11:46 “መሄ፥ ካፎ፥ ሃꬃ ግዶን ቃፅያ መተꬅ ኡባነ ሳአራ ሄመትያ መተꬃ ኡባ ዎጋይ ሀይሳ።
LEV 11:47 ሄሳን ህንተ ቱናነ ቱና ግዶናይሳታ ግዶን፥ ቃስ ሜተትያነ ሜተቶና መተꬃታ ግዶን ደእያ ዱማተꬃ ሻክድ ኤራና።”
LEV 12:1 ጎዳይ ሙሰኮ ሀይሳዳ ያግስ፤
LEV 12:2 እስራኤለ አሳስ ሀይሳዳ ያጋዳ ኦዳ፤ “እስ ማጫስ ቃንꬃታዳ አደ ናአ የልኮ፥ ባ ኩሸ መቱዋ በእያ ዎደ ቱና ግደይሳዳ ላፑን ጋላስ ጋካናዉ ቱና ግዳና።
LEV 12:3 ሆስፑንꬃ ጋላስ ናአይ ቃፃረታናዉ ኮሼስ።
LEV 12:4 ሄሳፈ ጉየ፥ ማጫስያ ባ የሎ ሱꬃይ ፅዝአና ጋካናዉ ሀስታማነ ሄꬑ ጋላስ ጋምኦ፤ ቃስ ባ ጌይያ ጋላሳይ ዉራና ጋካናዉ ጌሻባ ቦቾፎ፤ ጌሻ ዱንካንያካ ገሎፖ።
LEV 12:5 “ሽን እስ ማጫስ ማጫ ናአ የልኮ፥ ባ ኩሸ መቶ በእዳ ዎደ እያ ቱና ግድዳይሳዳ ናምኡ ሳምንታ ጋካናዉ እያ ቱና ግዳና። ሄሳፈ ጉየ፥ ባ የሎ ሱꬃይ ፅዝአና ጋካናዉ ኡሱፑን ታማነ ኡሱፑን ጋላስ ጋምኦ።
LEV 12:6 “ማጫስያ አደ ናአ ዎይኮ ማጫ ናአ የላዳ ባ ጌይያ ዎድያ ኦንግዳፐ ጉየ፥ ፁሳ ያርሾስ እስ ላይꬃ ዶርሰነ ናጋራ ያርሾስ ቃስ እስ ሆለ ዎይኮ እስ ኩራቾ ጌሻ ዱንካንያ ፐንገን ደእያ ካህንያኮ ኤሆ።
LEV 12:7 ካህነይ ሄሳ ኤክድ ጎዳ ስንꬃን እ ናጋራ አቶተꬃስ ያርሼስ። ሄሳፈ ጉየ፥ እያ ጌያና። አደ ናአ ዎይኮ ማጫ ናአ የልያ ማጫሳስ ደእያ ዎጋይ ሀይሳ።
LEV 12:8 “ሽን እያ እስ ላይꬃ ዶርሰ ኤሀናዉ ዳንዳኦና እፅኮ፥ ናምኡ ሆለታ ዎይኮ ናምኡ ኩራቾታ ኤሆ። ኤንታፈ እሶይ ፁሳ ያርሾስ፥ ቃስ እሶይ ናጋራ ያርሾስ ግዶ። ሄሳዳ ኦꬅድ ካህነይ እ ናጋራ አቶተꬃስ ያርሼስ፤ እያካ ጌሽ ግዳና።”
LEV 13:1 ጎዳይ ሙሰኮነ አሮናኮ ሀይሳዳ ያግስ፤
LEV 13:2 “እስ አሳ አሳተꬃ ቦላ ክፅ ዎꬍኮ ዎይኮ ሻቶይ ዎይኮ እራለይ ከይኮ እያ ጎጋይ ሀርገን ላመትኮ፥ ሄ ኡራ ካህንያ አሮናኮ ዎይኮ ካህነ ግድዳ እያ አደ ናይታፐ እሱዋኮ ኤሆ።
LEV 13:3 ካህነይ እያ ጎጋ ቦላ ደእያ ማዱንꬃ በኦ። ሄ ማዱንፅዳ በሳን ደእያ እክሰይ ቦፅኮነ ማዱንꬃይ ኦላትኮ፥ ሄስ ጎጋ ሀርገ። ካህነይ ሄሳ በእድ ኡራይ ቱና ግደይሳ ኤርሶ።
LEV 13:4 ሽን እያ ጎጋ ቦላ ደእያ ማዱንꬃይ ቦꬅ ግድድ፥ ጎጋፐ ካንꬅድ ኦላትቦናባ ግድኮ ሄ ማዱንꬃ ቦላ ደእያ እክሰይ ቦፆናባ ግድኮ፥ ካህነይ ሄ ኡራ ዱማ ኬꬃን ላፑን ጋላስ ጎርድድ ዎꬆ።
LEV 13:5 ላፑንꬃ ጋላስ ካህነይ እያ ዛሪድ በኦ፤ እ በእያ ዎደ ማዱንꬃይ ኡራ ጎጋ ቦላ ዳልጎና ካሰይስዳ ደእኮ፥ ካህነይ ሄ ኡራ ናምአንꬆ ዱማ ኬꬃን ላፑን ጋላስ ጎርድድ ዎꬆ።
LEV 13:6 ቃስካ ላፑንꬃ ጋላስ ካህነይ እያ በኦ፤ እ በእያ ዎደ ማዱንꬃይ ዳልጎና እፅድ ꬋይ ꬋይ ቢኮ፥ ካህነይ እ ቱና ግደይሳ ኤርሶ። ሄስ ጎኦ ግደይሳ ኤርሶ፤ ሄ ኡራይ ባ ማኡዋ ሜጭድ ቱና ግዶናይሳ ኤርሴስ።
LEV 13:7 ሽን እ ጌያናዉ ባና ካህንያ በስዳፐ ጉየ፥ ሄ ጎኦይ እያ ጎጋ ቦላ ዳልግ ዳልግ ቢኮ እ ዛሪድ ባና በሳናዉ ካህንያኮ ቦ።
LEV 13:8 ካህነይ እያ በኦ፤ ሄ ጎኦይ ኡራ ጎጋ ቦላ ዳልግ ዳልግ ቢኮ፥ ሄስ ጎጋ ሀርገ ግድያ ግሾ ካህነይ እ ቱና ግደይሳ ኤርሶ።
LEV 13:9 “ኦንካ ጎጋ ሀርገን ኦይከትኮ እያ ካህንያኮ ኤሆ።
LEV 13:10 ካህነይ እያ በእያ ዎደ እያ ጎጋ ቦላ ቦꬃ ክፅ ደእኮ፥ እክሰይ ቦꬅ ላምኮነ ሄ ክፃ ግዶን አሾይ በንትኮ፥
LEV 13:11 ሄስ ጎጋ ቦላ ጋምእዳ ሀርገ ግድያ ግሾ፥ ካህነይ እ ቱና ግደይሳ ኤርሶ። እ ቱና ግደይስ ኤረትዳ ግሾ፥ እያ ዱማ ኬꬃን ጎርድድ ዎꬃናዉ ኮሸና።
LEV 13:12 ካህነይ ጎጋ ሀርገይ አድያ አሳተꬃ ቦላ ዳልግኮ፥ ሁጰፐ ቶሆ ጋካናዉ ኡባ ማእዳባ ግድኮ በኦ።
LEV 13:13 ሄ ጎጋ ሀርገይ እያ አሳተꬃ ኡባ ማእኮ፥ እያ አሳተꬃይ ኩመꬅ ላመትድ ቦꬅ ግድዳ ግሾ፥ እ ቱና ግዶናይሳ ካህነይ ኤርሶ።
LEV 13:14 ሽን ሄ ማዱንꬃ ግዶራ አሾይ በንትኮ እ ቱና።
LEV 13:15 ካህነይ ሄ አሹዋ በእድ ሄ ኡራይ ቱና ግደይሳ ኤርሶ። ሄ አሾይ ጎጋ ሀርገ ግድያ ግሾ እ ቱና።
LEV 13:16 ሽን ሄ አሾይ ቃስካ ላመትድ ቦፅኮ፥ ሄ ኡራይ ካህንያኮ ቦ።
LEV 13:17 ካህነይ እያ በኦ፤ እያ ማዱንꬃይ ቦፅዳባ ግድኮ፥ ሄ ኡራይ ቱና ግዶናይሳ ካህነይ ኤርሶ፤ እ ቱና ግዳና።
LEV 13:18 “እስ አሳ ቦላ መርኮይ ዎꬍድ ፓፅዳባ ግድኮ፥
LEV 13:19 እያ በሳን ቦꬃ ክፃይ ዎꬍኮ ዎይኮ ዞእዳ እራለይ ከይኮ ሄ ኡራይ ካህንያኮ ቦ።
LEV 13:20 ካህነይ እያ በኦ፤ ሄ ማዱንꬃይ ኦላትኮ፥ ማዱንꬃ ቦላ ደእያ እክሰይ ላመትድ ቦፅኮ፥ ሄ ኡራይ ቱና ግደይሳ ካህነይ ኤርሶ። ሄስ መርኮዳ ዶምዳ ጎጋ ሀርገ።
LEV 13:21 ሽን ካህነይ በእያ ዎደ እክሰይ ቦፆናባ ግድኮ፥ ማዱንꬃይ ጎጋ ካንꬅድ ኦላትቦናባ ግድኮ፥ ቃስ ꬋይ ꬋይ ቢኮ፥ ካህነይ እያ ዱማ ኬꬃን ላፑን ጋላስ ጎርድድ ዎꬆ።
LEV 13:22 ሄስ እያ ጎጋ ቦላ ዳልግ ዳልግ ቢኮ፥ ሄስ ጎጋ ሀርገ ግድያ ግሾ ሄ ኡራይ ቱና ግደይሳ ካህነይ ኤርሶ።
LEV 13:23 ሽን ሄ እራለይ ዳልግ ዳልግ ቦና እስ በሳን ደእኮ፥ ሄስ መርኮይ ፓፅዳ ቤታ ግድያ ግሾ፥ ሄ ኡራይ ቱና ግዶናይሳ ኤርሶ።
LEV 13:24 “ታም እስ አስ ሚኮ ሄ ምዳ በሳን ቦꬃ ዎይኮ ዞኦ እራለይ ከይኮ፥
LEV 13:25 ካህነይ ሄ በሳ በኦ። ሄ በሳን ደእያ እክሰይ ቦፅኮነ ሄ ማዱንꬃይ ኦላትኮ፥ ሄስ ጎጋ ሀርገ። እ ታማይ ምዳ በሳራ ከይዳ ግሾ ካህነይ እ ቱና ግደይሳ ኤርሶ።
LEV 13:26 ሽን ካህነይ በእያ ዎደ ሄ ማዱንꬃ ቦላ ደእያ እክሰይ ቦፆናባ ግድኮ፥ ማዱንꬃይ ጎጋ ካንꬅድ ኦላትቦናባ ግድኮነ ቃስ ꬋይ ꬋይ ብዳባ ግድኮ፥ ካህነይ እያ ዱማ ኬꬃን ላፑን ጋላስ ጎርድድ ዎꬆ።
LEV 13:27 ላፑንꬃ ጋላስ ካህነይ እያ በእያ ዎደ ሄ በሳይ ዳልግ ዳልግ ቢኮ፥ ሄስ ጎጋ ሀርገ ግድያ ግሾ እ ቱና ግደይሳ ካህነይ ኤርሶ።
LEV 13:28 ሽን ሄ ማዱንꬃይ ጎጋ ቦላ ዳልጎና አግድ እስ በሳን ኡትኮነ ꬋይ ꬋይ ቢኮ፥ ሄስ ታማይ ምዳ በሳን አትዳ ቤታ ግድያ ግሾ፥ እ ቱና ግዶናይሳ ካህነይ ኤርሶ።
LEV 13:29 “እስ አደይ ዎይኮ ማጫሳ ሁጰን ዎይኮ ጋጮ ቦላ ማዱንꬅ ከይኮ፥
LEV 13:30 ካህነይ ሄ ማዱንꬃ በእያ ዎደ ማዱንꬃይ ጎጋ ካንꬅድ ኦላትኮ እያ ቦላ ደእያ እክሰይ ሌእድ ጋላልኦ ዳንኮ፥ ሄስ ሁጰን ዎይኮ ጋጮ ቦላ ከይያ ቃችያ ጎጋ ሀርገ ግድያ ግሾ፥ ሄ ኡራይ ቱና ግደይሳ ካህነይ ኤርሶ።
LEV 13:31 ቃስ ካህነይ ሄ ሀርግያ በእያ ዎደ ጎጋ ካንꬅድ ኦላትቦናባ ግድኮ፥ ካሬꬃ እክሰይ እያ ቦላ ꬋይኮ፥ ሄ ቃችያ ሀርገይ ደእያ ኡራ ካህነይ ዱማ ኬꬃን ላፑን ጋላስ ጎርድድ ዎꬆ።
LEV 13:32 ላፑንꬃ ጋላስ ካህነይ ሄ ሀርግያ በእያ ዎደ ቃችያ ሀርገይ ዳልጎናባ ግድኮ፥ እያ ቦላ ጋላልኦ ዳንያ እክሰይ ባይናባ ግድኮነ ጎጋ ካንꬅድ ኦላትቦናባ ግድኮ፥
LEV 13:33 ሄ ኡራ ቃችያ በሳን ደእያ እክስያ ግዶናሽን፥ ማዱንꬃ ዩሾን ደእያ እክስያ ሜዶ። ካህነይ ሄ ኡራ ዱማ ኬꬃን ሀራ ላፑን ጋላስ ጎርድድ ዎꬆ።
LEV 13:34 ላፑንꬃ ጋላስ ካህነይ ሄ ቃችያ በሳ በእያ ዎደ ኡራ ጋልባ ቦላ ዳልጎና እፅኮነ ጎጋ ካንꬅድ ኦላቶና እፅኮ፥ ሄ ኡራይ ቱና ግዶናይሳ ካህነይ ኤርሶ። ኡራይ ባ ማኡዋ ሜጭድ ጌሽ ግዳና።
LEV 13:35 ሽን እ ጌይዳፐ ጉየ፥ ቃችያ ሀርገይ ሄ ኡራ ጋልባ ቦላ ዳልግ ዳልግ ቢኮ፥
LEV 13:36 ካህነይ እያ በእያ ዎደ ሄ ቃችያ ሀርገይ ዳልግዳባ ግድኮ፥ ሄ ኡራይ ቱንዳ ግሾ ካህነይ ጋላልኦ ዳንያ እክስያ ኮዮፖ።
LEV 13:37 ሽን ካህነይ በእያ ዎደ ሄ ቃችያ በሳይ ዳልጎናባ ግድኮነ ካሬꬃ እክሰይ እያ ቦላ ዶልዳባ ግድኮ፥ ሄ ቃችያ በሳይ ፓፅስ። ሄ ኡራይ ቱና ግዶና ግሾ፥ እ ጌሽ ግደይሳ ካህነይ ኤርሶ።
LEV 13:38 “እስ አደ ዎይኮ ማጫሳ ጎጋ ቦላ ቦꬃ እራለይ ከይኮ፥
LEV 13:39 ካህነይ በእያ ዎደ ኤንታ ጎጋ ቦላ ደእያ እራለይ ቡላ ግድኮ፥ ሄስ ጎጋ ቦላ ጮ ከይዳባ ግድያ ግሾ ሄ ኡራይ ቱና ግደና።
LEV 13:40 “እስ አሳስ ሁጰ ብናናይ ቆቆፈትኮ፥ ቦአ ግዴስፐ አትሽን፥ እ ቱና ግደና።
LEV 13:41 እስ አስ ስንꬃራ ቦአትኮ፥ እያ ቲሽ ምስፐ አትሽን፥ እ ቱና ግደና።
LEV 13:42 ሽን እያ ቦእ ዎይኮ ቲሽ ምዳይሳ ቦላ ዞኦ ዎይኮ ቦꬃ ማዱንꬅ ከይኮ፥ ሄስ እያ ቦአን ዎይኮ እያ ቲሻ ቦላ ከይዳ ጎጋ ሀርገ።
LEV 13:43 እያ ካህነይ በእያ ዎደ እያ ቦእ ዎይኮ ቲሽ ምዳይሳ ቦላ ደእያ ማዱንꬃይ ጋልባ ቦላ ከይያ ጎጋ ሀርገ መላ ዞኦ ግድኮ፥
LEV 13:44 ሄ ኡራይ ቱማ ጎጋ ሀርገን ኦይከትዳ ሀርጋንቾ። እ ቱና ግድያ ግሾነ እያ ሀርገይ እያ ሁጰን ደእያ ግሾ እ ቱና ግደይሳ ካህነይ ኤርሶ።
LEV 13:45 “ጎጋ ሀርገይ ኦይክዳ አስ ፔትዳ ማኦ ማኦ፤ ባ ሁጵያ ፕፆፖ፤ ባ ዶና ካሞ፤ ባ ቃላ ꬎቁ ኦꬅድ፥ ‘ታኒ ቱና፥ ታኒ ቱና!’ ያጎ።
LEV 13:46 ሄ ሀርገይ እያ ቦላ ደእዳ ዎደ ኡባን እ ቱና። እ ቱና ግድያ ግሾ፥ አሳፐ ሻከትድ፥ ጉታፐ ካረን ባርካ ደኦ።
LEV 13:47 “አይ ማኦ ቦላ ቡቅዳ በሲ በንትኮ፥ ሄ ማኦይ ሱፈ ግድን ዎይኮ ሊኖ ግድን፥
LEV 13:48 ቃጭናፐ ዎይኮ ሻሎፐ ዳደትዳ ሊኖ ዎይኮ ሱፈ ግድን፥ ጋልባ ዎይኮ ጋልባፈ ኦሰትዳ ማኦ ግድን፥
LEV 13:49 ሄ ማኡዋ ቦላ በንትዳ ቡቃይ ጭሊሎ ዎይኮ ዞኦ ማላ በስኮ፥ እ ቃጭናፐ ዎይኮ ሻሎፐ ዳደትዳባ ግድን፥ ጋልባ ዎይኮ ጋልባፈ ኦሰትዳባ ግድን፥ ሄስ አሳፐ አሰ ኦይክያ ሀርገ ግድያ ግሾ፥ ሄሳ ካህነይ በሳናዉ ኮሼስ።
LEV 13:50 ካህነይ ሄ ቡቃ በእድ፥ ሄ ቡቅዳ ማኡዋ ዱማ ኬꬃን ላፑን ጋላስ ጎርድድ ዎꬆ።
LEV 13:51 ላፑንꬃ ጋላስ ካህነይ ሄ ማኡዋ በእያ ዎደ ሄ ማኡዋ ቦላ ደእያ ቡቃይ ዳልግ ዳልግ ቢኮ፥ እ ቃጭና ዎይኮ ሻሎ ግድን፥ ጋልባ ዎይኮ ጋልባፈ ኦሰትዳ ማኦ ግድን፥ ሄስ እሱዋፈ እሱዋ ኦይክያ ቡቃ ሀርገ ግድያ ግሾ ሄ ማኦይ ቱና።
LEV 13:52 ሄ ማኦይ ቃጭና ዎይኮ ሻሎ ግድን፥ ሊኖ ዎይኮ ሱፈ ግድን፥ ጋልባፈ ኦሰትዳባ አይባ ግድን፥ ካህነይ እያ ፁጎ። ሄስ እሱዋፈ እሱዋ ኦይክያ ቡቃ ሀርገ ግድያ ግሾ፥ እ ፁገታናዉ በሴስ።
LEV 13:53 “ሽን ካህነይ በእያ ዎደ ሄ ቡቃ ማኡዋ ቦላ ዳልግቦናባ ግድኮ፥ እ ቃጭና ዎይኮ ሻሎ ዎይኮ ጋልባፈ ኦሰትዳባ አይባ ግድን፥
LEV 13:54 ሄ ቡቃይ ደእያ ማኡዋ ሜጫና መላ ካህነይ ኪቶ። ሄሳፈ ጉየ፥ ሄ ማኡዋ ዱማ ኬꬃን ሀራ ላፑን ጋላስ ጎርድድ ዎꬆ።
LEV 13:55 ሄ ማኦይ ሜጨትዳፐ ጉየ ቃስካ ካህነይ በእያ ዎደ ሄ ቡቃይ ባ ማላ ላሞናባ ግድኮነ ዳልግ ዳልግ ቦና እፅኮካ እ ቱና። ሄ ቡቃ በሳይ ማኡዋስ ጉየ ባጋራ ዎይኮ ስንꬃ ባጋራ ደእኮካ ሄ ማኦይ ታማን ፁገታናዉ ኮሼስ።
LEV 13:56 ሽን ሄ ማኡዋ ሜጭ ስምን ካህነይ በእያ ዎደ ቡቃይ ꬋይ ꬋይ ቢኮ፥ እ ጋልባ ግድን፥ ቃጭና ዎይኮ ሻሎ ግድን፥ ሄ ቡቃይ ደእያ በሳ ካህነይ ዳክድ ከሶ።
LEV 13:57 ሄሳፈ ጉየ፥ ማኡዋ ቦላ ስሚድ ከይኮ፥ ሄ ማኦይ ቃጭና ዎይኮ ሻሎ ግድን፥ ጋልባፈ ኦሰትዳባ ግድን፥ ሄስ ዳልግ ዳልግ ቢኮ ሄ ቡቃይ ደእያ ማኦይ ታማን ፁገታናዉ በሴስ።
LEV 13:58 ሽን ሜጨትዳ ማኦይ ቃጭና ዎይኮ ሻሎ ግድን፥ ዎይኮ ጋልባፈ ኦሰትዳባ ማኦ ግድን፥ ቡቃ ማላይ ꬋይኮ፥ ሄ ማኦይ ናምአንꬆ ሜጨቶ፤ ሄሳፈ ጉየ፥ እ ጌዬስ” ያግስ።
LEV 13:59 እስ ማኦይ ሱፈ ዎይኮ ሊኖ ግድን፥ ቃጭና ዎይኮ ሻሎ ግድን፥ ዎይኮ ጋልባፈ ኦሰትዳባ ግድን፥ ሄ ማኡዋ ጌሽ ዎይኮ ቱና ያግሳናዉ ዳንዳእያ ዎጋይ ሀይሳ።
LEV 14:1 ጎዳይ ሙሰኮ ሀይሳዳ ያግስ፤
LEV 14:2 ጎጋ ሀርገይ ኦይክዳ ኡራይ ጌይያ ጋላስ ኦꬃናዉ ኮሽያ ዎጋይ ሀይሳ። ሄ ኡራ ካህንያኮ ኤሀናዉ ኮሼስ።
LEV 14:3 ካህነይ ጉታፐ ጋፃ ከይድ እያ ሀርግያ በኦ። እ በእያ ዎደ ጎጋ ሀርገይ ኡራ አሳተꬃፈ ꬋይዳባ ግድኮ፥
LEV 14:4 ካህነይ ናምኡ ቱና ግዶና ካፎታ፥ ዝጋ ምꬃ ቃንፆ፥ ዞኦ ቃጭናነ ህሶጰ ቦንጮ ሄ ሀርግያፈ ጌይያ ኡራ ግሾ ኤሀና መላ ኪቶ።
LEV 14:5 ሄሳፈ ጉየ፥ ካህነይ ናምኡ ካፎታፐ እሱዋ ፑልቶፈ ዱቅድ ከረን ቆልዳ ሃꬃ ቦላ ሹካና መላ ኪቶ።
LEV 14:6 ሀንኮ ካፉዋ ዞኦ ቃጭናራነ ህሶጰ ቦንጮራ ኤክድ፥ ከረን ደእያ ፑልቶ ሃꬃ ቦላ ሹክዳ ካፉዋ ሱꬃን ናቆ።
LEV 14:7 ሄ ሱꬃ፥ ሄ ጎጋ ሀርግያፈ ጌይያ ኡራ ቦላ ላፑን ቶሆ ዉርፆ፤ ሄ ኡራይ ቱና ግዶናይሳ ኤርሶ፤ ፓፃ ደእያ ካፉዋ ደምባ የዶ።
LEV 14:8 ሄ ሀርግያፈ ጌይያ ኡራይ ባ ማኡዋ ሜጮ፤ ባ አሳተꬃ ቦላ ደእያ እክሰ ኡባ ሜደቶ፤ ባ አሳተꬃ ሜጨቶ። ሄሳፈ ጉየ፥ እ ጌይድ ጉታ ገሎ፥ ሽን ባ ዱንካንያ ግዶ ገሎና ላፑን ጋላስ ካረን ጋምኦ።
LEV 14:9 ላፑንꬃ ጋላስ ባ ሁጵያ፥ ቡቻ፥ ዴሙዋነ ባ አሳተꬃ ቦላ ደእያ ሀራ እክሰ ኡባ ሜደቶ፤ ቃስ ባ ማኡዋ ሜጮ፤ ባ አሳተꬃካ ሜጨቶ፤ ሄሳፈ ጉየ፥ እ ጌሽ ግዳና።
LEV 14:10 ሆስፑንꬃ ጋላሳን ቦረይ ባይና ናምኡ ኡርገ ዶርሳታነ እስ ላይꬅ ግድዳ እስ ማጫ ዶርሰ ኤሆ። ቃስ ካꬃ ያርሾስ ዛይተራ ሙኑቀትዳ ሄꬑ ክሎ ግራመ ሎኦ ꬊለነ እስ ልትሮ ዛይተፐ ስኮ ኤሆ።
LEV 14:11 እያ ጌሽያ ካህነይ ኡራነ እ ኤህዳ ያርሾታራ እስፈ ጌሻ ዱንካንያ ፐንገን ጎዳ ስንꬃን ሺሾ።
LEV 14:12 ካህነይ ናምኡ ዶርሳ ኡርገታፐ እሱዋ ኤክድ፥ እስ ልትሮስ ስኮ ዛይተራ እስፈ ናቆ ያርሾ ኦꬅድ ሺሾ፤ ሄ ሺቅዳ ያርሹዋ ዩሾ ያርሾ ኦꬅድ ጎዳ ስንꬃን ሺሾ።
LEV 14:13 ያትድ፥ እ ሄ ዶርሳ ኡርግያ ናጋራ ያርሾነ ፁሳ ያርሾ ሹክያ ጌሻ በሳን ሹኮ። ናጋራ ያርሹዋ መላ ናቆ ያርሾይካ ካህንያስ እመቴስ፤ እካ ኡባፈ አꬍዳ ጌሽ።
LEV 14:14 ካህነይ ናቆ ያርሹዋ ሱꬃፈ ጉꬅ ኤክድ፥ ሄ ጌይያ ኡራስ ኡሻቻ ባጋ ሀይꬃ፥ ኡሻቻ ኩሽያ ዎጋ ብራꬍያነ ኡሻቻ ቶሁዋ ዎጋ ብራꬍያ ትዮ።
LEV 14:15 ሄሳፈ ጉየ፥ ካህነይ ዛይትያፐ ጉꬃራ ኤክድ፥ ባ ሀድርሳ ኩሽያ ቃቃን ትጎ።
LEV 14:16 ሄ ሀድርሳ ኩሽያ ቃቃን ደእያ ዛይትያ ባ ኡሻቻ ኩሸ ብራꬍያ የድ የድ ኤክድ፥ ጎዳ ስንꬃን ላፑን ቶሆ ዉርፆ።
LEV 14:17 ያትድ፥ ባ ኩሽያ ቃቃን ደእያ ዛይትያፐ ኤክድ፥ ጌይያ ኡራስ ኡሻቻ ሀይꬃ፥ ኡሻቻ ኩሽያ ዎጋ ብራꬍያነ ኡሻቻ ቶሁዋ ዎጋ ብራꬍያ ካሰ ናቆ ያርሹዋ ሱꬃ ትይዳ በሳን ትዮ።
LEV 14:18 ቃስ ባ ኩሽያ ቃቃን አትዳ ዛይትያ ካህነይ ጌይያ ኡራ ሁጰን ጉሶ፤ ያትድ ጎዳ ስንꬃን ሄ ኡራ ናጋራ አቶ ያግሶ።
LEV 14:19 ሄሳፈ ጉየ ካህነይ ጌይያ ኡራ ናጋራ አቶተꬃስ ሺቅዳ ያርሹዋ ያርሼስ፤ ካልድ ቃስ ፁሳ ያርሾስ ሺቅዳ መህያ ሹኬስ።
LEV 14:20 ካህነይ ፁሳ ያርሹዋ ካꬃ ያርሹዋራ እስፈ ያርሾ በሳን ዎꬅድ ፁጌስ፤ ያትድ ኡራ ናጋራ አቶ ያግሴስ፤ ሄ ኡራይ ጌዬስ።
LEV 14:21 ሽን ኡራይ ሄሳ ኡባ ኤሀናዉ ዳንዳኦና ማንቆ ግድኮ፥ ጎዳ ስንꬃን እያ ናጋራ አቶተꬃስ ዩሻናዉ ናቆ ያርሾስ እስ ዶርሳ ኡርገ ኤሆ። ካꬃ ያርሾስ ዛይተራ ሙኑቀትዳ እስ ክሎ ግራመ ሎኦ ꬊለነ እስ ልትሮ ዛይተፐ ስኩዋ ኤሆ።
LEV 14:22 ባዉ ዳንዳኤትዳ መላ ናምኡ ሆለ ዎይኮ ናምኡ ኩራቾ እሱዋ ናጋራ ያርሾስ፥ እሱዋ ፁሳ ያርሾስ ኤሆ።
LEV 14:23 ሆስፑንꬃ ጋላስ ባ ቱናተꬃፈ ጌይያ ኡራይ ጌሻ ዱንካንያ ፐንገን ጎዳ ስን ኤህድ ካህንያስ እሞ።
LEV 14:24 ካህነይ ናቆ ያርሾስ ይዳ ዶርሳ ኡርግያነ ዛይትያ ኤክድ፥ ዩሾ ያርሾ ኦꬅድ ጎዳ ስንꬃን ዩሾ።
LEV 14:25 ናቆ ያርሾስ ይዳ ዶርሳ ኡርግያ ሹኮ፤ ሄ ኡርግያ ሱꬃፈ ጉꬃራ ኤክድ፥ ሀ ጌይያ ኡራ ኡሻቻ ሀይꬃ፥ ኡሻቻ ኩሽያ ዎጋ ብራꬍያነ ኡሻቻ ቶሁዋ ዎጋ ብራꬍያ ትዮ።
LEV 14:26 ካህነይ ዛይትያፐ ጉꬃራ ባ ሀድርሳ ኩሽያ ቃቃን ትጎ።
LEV 14:27 ሀድርሳ ኩሽያ ቃቃን ደእያ ዛይትያፐ ኡሻቻ ኩሽያ ብራꬍያ የድ ኤክድ፥ ጎዳ ስንꬃን ላፑን ቶሆ ዉርፆ።
LEV 14:28 ካህነይ ባ ኩሽያ ቃቃን ደእያ ዛይትያፐ ጉꬃራ ኤክድ፥ ጌይያ ኡራስ ኡሻቻ ሀይꬃ፥ ኡሻቻ ኩሽያ ዎጋ ብራꬍያነ ኡሻቻ ቶሁዋ ዎጋ ብራꬍያ ካሰ ናቆ ያርሾ ሱꬃ ትይዳ በሳን ትዮ።
LEV 14:29 ጎዳ ስንꬃን ኡራ ናጋራ አቶተꬃስ ካህነይ ባ ኩሸን አትዳ ዛይትያ ጌይያ ኡራ ሁጰን ትጎ።
LEV 14:30 ሄሳፈ ጉየ፥ ጌይያ ኡራይ ባዉ ዳንዳኤትዳይሳ መላ ሆለ ዎይኮ ኩራቾ ኤሆ።
LEV 14:31 እሱዋ ናጋራ ያርሾስ ናምአንꬁዋ ፁሳ ያርሾስ ካꬃ ያርሹዋራ እስፈ ሺሾ። ካህነይ ጌይያ ኡራ ናጋራ ጎዳ ስንꬃን እያ ናጋራ አቶ ያግሶ።
LEV 14:32 ባ አሳተꬃ ቦላ ደእያ ጎጋ ሀርግያፈ ጌያናዉ ማንቆተꬅ ድግዳ ኡራስ ደእያ ዎጋይ ሀይሳ።
LEV 14:33 ጎዳይ ሙሰኮነ አሮናኮ ሀይሳዳ ያግስ፤
LEV 14:34 “ታኒ ህንተዉ እምያ ካናነ ቢታ ህንተ ገልያ ዎደ ሄ ቢታን ደእያ ህንተ ኬꬃፈ እሱዋን ታኒ ቡቃ የድያ ዎደ፥
LEV 14:35 ሄ ኡራይ ካህንያኮ ብድ፥ ‘ታ ኬꬃ ቦላ ቡቃ ዳንያባይ ደኤስ’ ያግድ ኦዶ።
LEV 14:36 ካህነይ ሶ ገልድ ቡቃ ቆሙዋ በአናፐ ካሰትድ፥ ሶን ደእያባይ ኡባይ ቱና ጌተቶና መላ ሶን ደእያባ ኡባ ካረ ከሳና መላ ኪቶ፤ ሄሳፈ ጉየ፥ ካህነይ በአናዉ ሶ ገሎ።
LEV 14:37 እ ገልድ በእያ ዎደ ቡቃይ ጎዳ ቦላ ጭሊሎ ዎይኮ ዞኦ ማላ በስኮነ ቃስ ጎዳ ምድ ኦላይድ ግዶ ገልኮ፥
LEV 14:38 ካህነይ ካረ ከይድ፥ ኬꬃ ላፑን ጋላስ ጋካናዉ ጎርዶ።
LEV 14:39 ላፑንꬃ ጋላሳን ካህነይ ሄ ኬꬃ ዛሪድ ፄልያ ዎደ ሄ ቡቃይ ኬꬃ ጎዳ ቦላ ዳልግኮ፥
LEV 14:40 ቡቃይ ደእያ ሹቻ ኡባ ጎዳፐ ሾድድ፥ ካታማፐ ጋፃ ከስድ ቱና በሳን የጋና መላ ኪቶ።
LEV 14:41 ካልድ ጎዳ ሜሽዳ ኡርቃ ሶ ባጋራ ቦክድ፥ ዩሽ አꬅድ ቆቆፋና መላ ኦꬆ፤ ያትድ ሄ ኡርቃ ካታማፐ ጋፃን ደእያ ቱና በሳን የጎ።
LEV 14:42 ሄሳፈ ጉየ፥ ሄ ሾደትዳ ሹቻታ በሳን ሀራ ሹቻታ ዎꬆ፤ ሀራ ኡርቃን ኬꬃ ሜሾ።
LEV 14:43 “ሹቻይ ሾደትን፥ ኡርቃይ ቆቆፈትን፥ ሀራ ኡርቃ ሜሽ ስምን፥ ቡቃይ ኬꬃ ግዶን ዛር በንትኮ፥
LEV 14:44 ካህነይ ሄሳ በኦ። እ በእያ ዎደ ቡቃይ ሄ ኬꬃ ግዶን ዳልግኮ፥ ሄስ አሳፐ አሰ ኦይክያ ቡቃ ሀርገ ግድያ ግሾ ሄ ካꬃይ ቱና።
LEV 14:45 ሄሳ ግሾ ሄ ኬꬃ፥ እያ ሹቻ፥ እያ ምꬃነ እ ሜሸትዳ ኡርቃ ኡባ ላልድ ካታማፐ ጋፃ ኤፍድ፥ ቱና በሳን የጎ።
LEV 14:46 ሄ ኬꬃይ ጎርዳን ጋምእያ ዎደ እያ ግዶ ገልያ ኦንካ ኦማርስ ጋካናዉ ቱና።
LEV 14:47 ሄ ኬꬃን አቅያ ዎይኮ ካꬅ ምያ ኡራይ ባ ማኡዋ ሜጮ።
LEV 14:48 “ሽን ካህነይ ይድ ፄልያ ዎደ ኬꬃይ ሜሸትድ ስምን፥ ዛሪድ ዳልጎና እፅኮ፥ ቡቃይ ꬋይዳ ግሾ፥ ሄ ኬꬃይ ቱና ግዶናይሳ ካህነይ ኤርሶ።
LEV 14:49 ኬꬃ ጌሻናዉ ናምኡ ካፎታ፥ ዝጋ ምꬃ ቃንፆ፥ ዞኦ ቃጭናነ ህሶጰ ቦንጮ ኤሆ።
LEV 14:50 ካፎታፐ እሱዋ ፑልቶፈ ዱቅድ ከረን ቆልዳ ሃꬃን ሹኮ።
LEV 14:51 ሄሳፈ ጉየ፥ ዝጋ፥ ህሶጰ ቦንጩዋ፥ ዞኦ ቃጭናነ ፓፃ ደእያ ካፉዋ ኤክድ፥ ከረን ደእያ ሹከትዳ ካፉዋ ሱꬃንነ ፑልቶ ሃꬃን የድ ኤክድ ላፑን ቶሆ ሄ ኬꬃ ዉርፆ።
LEV 14:52 ያትድ፥ ካህነይ ሄ ኬꬃ ካፉዋ ሱꬃን፥ ፑልቶ ሃꬃን፥ ፓፃ ደእያ ካፉዋን፥ ዝጋ ምꬃን፥ ህሶጰ ቦንጩዋንነ ዞኦ ቃጭናን ጌሾ።
LEV 14:53 ፓፃ ደእያ ካፉዋ ካታማፐ ጋፃ የዶ። ሄሳዳ ኦꬅድ፥ ኬꬃ ጌሽያ ዎጋ ፖሌስ፤ ኬꬃይ ጌሽ ግዴስ።
LEV 14:54 “ዱማ ዱማ ጎጋ ሀርጌስነ ጎኦ ሀርጌስ እመትዳ ዎጋይ ሀይሳ።
LEV 14:55 ማኦ ቦላ ዎይኮ ኬꬃ ቦላ ከይያ ቡቃ ሀርገ ግድን፥
LEV 14:56 ክፃ ግድን፥ መርኮ ግድን፥ እራለ ግድን፥
LEV 14:57 እስባይ ቱና ግደይሳነ ቱና ግዶናይሳ ኤርስያ ዎጋይ ሀይሳ።”
LEV 15:1 ጎዳይ ሙሰኮነ አሮናኮ ሀይሳዳ ያግስ፤
LEV 15:2 እስራኤለ አሳስ ሀይሳዳ ያግድ ኦድተ፤ “እስ አሳ አሳተꬃፈ ጎግያባይ ደእኮ ሄስ ቱና።
LEV 15:3 ጎግያባይ ደእያ ኡራ ቱና ኦꬅያ ዎጋይ ሀይሳ፤ ሄ ጎግያባይ አግን፥ አጎና እፅን፥ ሄ ኡራ ቱና ኦꬄስ።
LEV 15:4 “እያ አሳተꬃፈ ጎግያባይ ደእያ ኡራይ ዝንእያ ሂፃይነ ኡትያ ኦይደ ኡባይ ቱና።
LEV 15:5 እያ ሂፃ ቦችያ ኦንካ ባ ማኡዋ ሜጮ፤ ባ አሳተꬃካ ሜጨቶ፤ ያትድ ኦማርስ ጋካናዉ ቱና ግዴስ።
LEV 15:6 ጎግያባይ ደእያ ኡራይ ኡትዳባ ቦላ ኡትያ ኦንካ ባ ማኡዋ ሜጮ፤ ባ አሳተꬃካ ሜጨቶ፤ ያትድ ኦማርስ ጋካናዉ ቱና ግዴስ።
LEV 15:7 “ጎግያባይ ደእያ ኡራ አሳተꬃ ቦችያ ኦንካ ባ ማኡዋ ሜጮ፤ ባ አሳተꬃ ሜጨቶ፤ ያትድ ኦማርስ ጋካናዉ እ ቱና ግዴስ።
LEV 15:8 “ጎግያባይ ደእያ አስ ቱና ግዶና አሳ ቦላ ጩትኮ፥ ሄ ኡራይ ባ ማኡዋ ሜጮ፤ ባ አሳተꬃካ ሜጨቶ፤ ያትድ ኦማርስ ጋካናዉ እ ቱና ግዴስ።
LEV 15:9 “ጎግያባይ ደእያ ኡራይ ኡትያ ቶጋ ኮር ቱና።
LEV 15:10 እያፐ ጋርሳራ ደእያባ ቦችያ ኦንካ ኦማርስ ጋካናዉ ቱና ግዴስ፤ ቃስ ሄሳ ቶክያ ኦንካ ባ ማኡዋ ሜጮ፤ ባ አሳተꬃ ሜጨቶ፤ ያትድ ኦማርስ ጋካናዉ እ ቱና ግዴስ።
LEV 15:11 “ጎግያባይ ደእያ አስ ባ ኩሽያ ሜጨቶና ቦችያ አስ ኦንካ ባ ማኡዋ ሜጮ፤ ባ አሳተꬃ ሜጨቶ፤ ያትድ ኦማርስ ጋካናዉ ቱና ግዴስ።
LEV 15:12 “ጎግያባይ ደእያ ኡራይ ቦችያ ኦቶ ኡባ መንꬅተ፤ ምꬃፈ ኦሰትዳ ሚሸ ኡባይ ሃꬃን ሜጨቶ።
LEV 15:13 “ጎግያባይ ደእያ አስ ሄ ጎግያባፐ ጌይዳ ዎደፐ ላፑን ጋላስ ጋምኦ። ባ ማኡዋ ሜጮ፤ ባ አሳተꬃ ፑልቶ ሃꬃን ሜጨቶ፤ ያትድ እ ጌሽ ግዴስ።
LEV 15:14 ሆስፑንꬃ ጋላሳን ናምኡ ሆለታ ዎይኮ ናምኡ ኩራቾታ ኤክድ፥ ጌሻ ዱንካንያ ፐንገ፥ ጎዳ ስን ኤህድ ካህንያስ እሞ።
LEV 15:15 ካህነይ ሆለታፐ እሱዋ ናጋራ ያርሾስ፥ እሱዋ ቃስ ፁሳ ያርሾስ ያርሼስ፤ ያትድ ካህነይ ኡራ አሳተꬃፈ ጎግያባ ግሾ ጎዳ ስንꬃን እያ ናጋራ አቶ ያግሴስ።
LEV 15:16 “እስ አደፈ እያ አቱንꬃይ ጉክኮ፥ ባ ኩመꬃ አሳተꬃካ ሜጨቶ፤ ያትድ ኦማርስ ጋካናዉ እ ቱና ግዴስ።
LEV 15:17 አቱንꬃይ ቦችዳ ማኦ ኡባይ ዎይኮ ጋልባ ኡባይ ሃꬃን ሜጨቶ፤ ያትድ ኦማርስ ጋካናዉ ቱና ግዴስ።
LEV 15:18 እስ አደይ ማጫራ አቅን፥ እያ አቱንꬃይ ጉክኮ፥ ናምአይካ ሃꬃን ሜጨቶ፤ ያትድ ኦማርስ ጋካናዉ ኤንቲ ቱና ግዶሶና።
LEV 15:19 “እስ ማጫስ ባ ኩሸ መቶ በእኮ፥ ላፑን ጋላስ ጋካናዉ እያ ቱና፤ እዮ ቦችያ ኦንካ ኦማርስ ጋካናዉ ቱና።
LEV 15:20 “ባ ኩሸ መቶ ዎደ እያ ዝንእያ ሂፃይነ እያ ኡትያ ኦይደይ ኡባይ ቱና።
LEV 15:21 እያ ዝንእያ ሂፃ ቦችያ ኡባይ ባ ማኡዋ ሜጮ፤ ባ አሳተꬃካ ሜጨቶ፤ ያትድ ኦማርስ ጋካናዉ ቱና ግዶ።
LEV 15:22 እያ ኡትያባ ቦችያ ኡባይ ባ ማኡዋ ሜጮ፤ ባ አሳተꬃ ሜጨቶ፤ ያትድ ኦማርስ ጋካናዉ ቱና ግዶ።
LEV 15:23 እያ ዝንእያ ሂፃ ግድን ዎይኮ እያ ኡትያባ ቦችያ ኦንካ ኦማርስ ጋካናዉ ቱና።
LEV 15:24 “እስ ማጫስ ኩሸ መቶራ ደእያ ዎደ አደይ ኢራ አቅኮ፥ ሄ ኩሸ መቱዋ እ ቦችኮ፥ ላፑን ጋላስ ጋካናዉ እ ቱና ግዴስ፤ እ ዝንእያ ሂፃ ኡባይ ቱና ግዴስ።
LEV 15:25 “እስ ማጫስ፥ ባ ኩሸ መቶ ዎደይ አꬍን፥ ሱꬅ አጎና ጎግኮ ዎይኮ ኩሸ መቶ ዎደይ ባ ቃማፈ አꬍድ ጎግኮ፥ ኩሸ መቶ ዎደ እያ ቱና ግድዳይሳዳ ሱꬃይ ኤቃና ጋካናዉ እያ ቱና ግዳዉሱ።
LEV 15:26 ሱꬅ ኢፐ ጎግያ ዎደ እያ ዝንእያ ሂፃ ኡባይ፥ ባ ኩሸ መቶ በእያ ዎደ እያ ዝንእዳ ሂፃ መላነ እያ ኡትያ ኦይድያ መላ ቱና ግዴስ።
LEV 15:27 ሄ ቱንዳባታ ቦችያ ኦንካ ቱና ግድያ ግሾ እ ባ ማኡዋ ሜጮ፤ ባ አሳተꬃ ሜጨቶ፤ ያትድ ኦማርስ ጋካናዉ ቱና ግዴስ።
LEV 15:28 “ኢፐ ጎግያ ሱꬃይ ኤቅኮ፥ እያ ሄ ዎደፐ ዶማዳ ላፑን ጋላስ ጋምኦ፤ ሄሳፈ ጉየ፥ እያ ጌሽ ግዳና።
LEV 15:29 ሆስፑንꬃ ጋላስ እያ ናምኡ ሆለታ ዎይኮ ናምኡ ኩራቾታ ኤሀዳ ጌሻ ዱንካንያ ፐንገን ካህንያስ እሞ።
LEV 15:30 ካህነይ ሆለታፐ እሱዋ ናጋራ ያርሾስ፥ እሱዋ ፁሳ ያርሾስ ያርሾ። ያትድ፥ ካህነይ ኢፐ ጎግያ ቱናተꬃ ግሾ ጎዳ ስንꬃን እ ናጋራ አቶ ያግሴስ።
LEV 15:31 “እስራኤለ አሳይ ባንታ ግዶን ደእያ ጌሻ ዱንካንያ ቱንስድ፥ ሀይቆና መላ ኔኒ ሀይሳዳ ኦꬃዳ ኤንቲ ባንታና ቱንስያባፐ ዱማይድ ዳና መላ ናጋ።”
LEV 15:32 እያ አሳተꬃፈ ጎግያባይ ደእያ አሳስ፥ እያ አቱꬃይ ጉክን ቱንያ አደስ፥
LEV 15:33 ባ ኩሸ መቶ ጋሶን ቱንያ ማጫሳስ፥ አደ ግድን ማጫ ግድን ጎግያባይ ደእያ አሳስነ ቱንዳ ማጫራ አቅያ አደስ እመትዳ ዎጋይ ሀይሳ።
LEV 16:1 አሮና አደ ናይት ናምአይ ጎዳ ስን ሺቅድ ሀይቅዳፐ ጉየ፥ ጎዳይ ሙሰኮ ሀይሳዳ ያግስ፦
LEV 16:2 ታኒ ታቦትያ ናጋራ አቶተꬃ ካማ ቦላ ሻራን ግዳዳ ቆንጭያ ግሾ ማጋራጁዋፈ ጉየን ደእያ ኡባፈ ጌሻ በሳ ባ ኮይዳ ዎደ ገልድ ሀይቆና መላ ነ እሻ አሮናስ ኦዳ።
LEV 16:3 አሮን ናጋራ ያርሾስ እስ ዎፋኖ፥ ፁሳ ያርሾስ እስ ማራዘ ኤክድ ኡባፈ ጌሻ በሳ ገሎ።
LEV 16:4 አሮን ሊኖፐ ኦሰትዳ ጌሻ አዱሳ ቃምሰነ ጋርሳራ ማኤትያ ማኦ ማኦ። ሊኖፐ ኦሰትዳ ዳንጮ ዳንጮ፤ ሄሳዳ ባ ሁጰን ሊኖፐ ኦሰትዳ ፃꬃ ቃጨ ዎꬆ። ሄ ማኦት ጌሽ ግድያ ግሾ፥ ማአናፐ ስን ባ አሳተꬃ ሜጨቶ።
LEV 16:5 እስራኤለ ማባራይ ናጋራ ያርሾስ ናምኡ ኮለታ፥ ፁሳ ያርሾስ እስ ማራዘ አሮናስ ኤሆ።
LEV 16:6 አሮን ባ ናጋራስነ ባ ሶ አሳ ናጋራ አቶተꬃስ እስ ዎፋኖ ያርሾ።
LEV 16:7 ሄሳፈ ጉየ፥ ናምኡ ኮለታ ጌሻ ዱንካንያ ፐንገን ጎዳ ስን ኤሆ።
LEV 16:8 ሄ ናምኡ ዴሻታ ኤክድ እሱዋ ጎዳሳ፥ እሱዋ ቃስ አዛዘላሳ ግድ ኤንታ ቦላ ሳማ የጎ።
LEV 16:9 አሮን ሳማን ጎዳስ ግድዳ ዴሻ ኤክድ ናጋራ ያርሾ ኦꬅድ ያርሾ።
LEV 16:10 ሽን ሳማን አዛዘላስ ግድዳ ዴሻ አሳ ናጋራ አቶተꬃስ መላ ቢታ የዳናዉ ፓፃ ደእሽን ጎዳስ ሺሾ።
LEV 16:11 አሮን ባ ናጋራስነ ባ ሶ አሳ ናጋራ አቶተꬃስ እስ ዎፋኖ ናጋራ ያርሾ ኦꬅድ ሺሾ። ያትድ ባ ናጋራ ግሾ ሄ ዎፋኑዋ ሹኮ።
LEV 16:12 ጎዳ ስንꬃን ደእያ ያርሾ በሳፈ እፃነ ጩይስያ ሚሸን ቦንቆ ኩንꬅድ፥ ሊቅድ ጋጨትዳ ሳውያ እፃነ ናምኡ ኩጫ ኤክድ ማጋራጁዋ ግዶ ገሎ።
LEV 16:13 ጎዳ ስንꬃን ደእያ ታማን እፃነ ዎꬆ። እ ሀይቆና መላ እፃንያ ጩያይ ታቦትያ ቦላ ደእያ ናጋራ አቶተꬃ ካማ ካሞ።
LEV 16:14 ዎፋኑዋ ሱꬃፈ ጉꬃራ ኤክድ፥ ባ ብራꬍያ የድ ኤክድ አቶተꬃ ካማ ስንꬃ ባጋ ዉርፆ። ናጋራ አቶተꬃ ካማ ስንꬃ ባጋራ ደእያ በሳ ላፑን ቶሆ ዉርፆ።
LEV 16:15 ሄሳፈ ጉየ፥ አሳ ናጋራ ግሾ ግድያ ዴሻ ሹክድ፥ እያ ሱꬃ ማጋራጁዋ ግዶ ኤህድ፥ ዎፋኑዋ ሱꬃ ዉርፅዳይሳዳ ናጋራ አቶተꬃ ካማነ ታቦትያ ስንꬃ ዉርፆ።
LEV 16:16 ኡባፈ ጌሻ በሳ እስራኤለ አሳ ቱናተꬃፈነ ናጋራፐ ጌሼስ። ኤንቲ ቱናባ ኦꬅሽን፥ ኤንታ ግዶን ደእያ ጌሻ ዱንካንያ ሀይሳዳ ኦꬅድ ጌሾ።
LEV 16:17 አሮን ኡባፈ ጌሻ በሳ ገልድ፥ ባ ናጋራ፥ ባ ሶ አሳ ናጋራነ ኩመꬃ እስራኤለ አሳ ናጋራ አቶተꬃስ ያርሽድ ከያና ጋካናዉ፥ ኦንካ ጌሻ ዱንካንያ ግዶን ደኦፖ።
LEV 16:18 ሄሳፈ ጉየ፥ ጎዳ ስንꬃን ደእያ ያርሾ በሳ ከይድ እያ ጌሾ። ዎፋኑዋ ሱꬃፈነ ዴሻ ሱꬃፈ ጉꬃራ ኤክድ፥ ያርሾ በሳ ዩሹዋን ደእያ ካጨታ ትዮ።
LEV 16:19 ሄ ሱꬃን ባ ብራꬍያ የድ ኤክድ ላፑን ቶሆ ዉርፆ፤ ሄሳዳ ኦꬅድ እስራኤለ አሳ ቱናተꬃፈ ሄ ያርሾ በሳ ጌሾ።
LEV 16:20 አሮን ኡባፈ ጌሻ በሳ፥ ጌሻ ዱንካንያነ ያርሾ በሳ ጌሽያ ዎጋ ፖልዳፐ ጉየ፥ ፓፃ ደእያ ዴሻ ሺሾ።
LEV 16:21 አሮን ባ ናምኡ ኩሽያ ፓፃ ደእያ ዴሻ ሁጰን ዎꬅድ፥ እስራኤለ አሳ ናቆ ኡባ፥ ኤንታ ማካላ ኡባ፥ ኤንታ ናጋራ ኡባ ፓፆ። ያትድ ሄ ዴሻ ሁጰን ሄሳ ቶሶ፤ ሄ ዴሻ ኤፋና መላ ጊግስዳ ኡራ ቦላ መላ ቢታ የዶ።
LEV 16:22 ዴሻይ ኤንታ ናጋራ ኡባ ቶክድ፥ አስ ባይና በሲ መላ ቢታ ቦ።
LEV 16:23 ሄሳፈ ጉየ፥ አሮን ጌሻ ዱንካንያ ብድ ኡባፈ ጌሻ በሳ ገሎ። ሊኖፐ ኦሰትዳ ካሰ እ ማእድ ገልዳ ማኡዋ ቃርድ ያን ዎꬆ።
LEV 16:24 ጌሻ በሳን ባ አሳተꬃ ሜጨትድ፥ ባ ካሰ ማኡዋ ማእ ከይድ ባ ናጋራነ አሳ ናጋራ አቶተꬃስ ፁሳ ያርሾ ያርሽሶ።
LEV 16:25 ናጋራ ያርሹዋ ሞꬉዋ ያርሾ በሳን ፁጎ።
LEV 16:26 ባዞ የደትያ ዴሻ ኤፍዳ ኡራይ ባ ማኡዋ ሜጮ፤ ባ አሳተꬃ ሜጨቶ፤ ያት ስሚድ ጉታ ገሎ።
LEV 16:27 ናጋራ አቶተꬃስ አሮን ኤንታ ሱꬃ ኡባፈ ጌሻ በሳ ኤህዳ ዎፋኑዋነ ዴሻ ጋልባ፥ አትዳ አሹዋነ ቶጭያ ጉታፐ ጋፃ ከስድ ፁጎ።
LEV 16:28 ሄሳ ፁግዳ ኡራይ ባ ማኡዋ ሜጮ፤ ባ አሳተꬃ ሜጨቶ፤ ሄሳፈ ጉየ፥ ጉታ ገሎ።
LEV 16:29 ሀይስ ህንተዉ መርና ዎጋ ግዶ፤ ላፑንꬃ አጌናይ ገልዳ ታማንꬆ ጋላስ ህንተና ካዉሽተ፤ ቢታ አዉ ናአ ግድን ዎይኮ ሀራ ቢታ አስ ግድን፥ አይ ኦሶካ ኦꬆፍተ።
LEV 16:30 አይስ ጊኮ ሄ ጋላሳይ ህንተ ናጋራ አቶተꬅ ደምያ ጋላስ፤ ህንተ ጎዳ ስንꬃን ህንተ ናጋራ ኡባፈ ጌያና።
LEV 16:31 ሄስ ህንተዉ ግታ ሳምባታ ሸምፖ ጋላስ ግዳና። ሄ ጋላስ ህንተና ካዉሽተ፤ ሄስ ህንተዉ መርና ዎጋ ግዶ።
LEV 16:32 ቃስ ባ አዋ በሳን ካህነ ግዳና መላ ትየትያነ ዱማትያ ካህነይ ጌሽ ግድዳ ሊኖፐ ኦሰትዳ ማኡዋ ማእድ፥ ናጋራ አቶተꬃ ዎጋ ፖሎ።
LEV 16:33 እ ኡባፈ ጌሻ በሳ፥ ገሻ ዱንካንያ፥ ያርሾ በሳ፥ ካህነታነ እስራኤለ አሳ ኡባ ጌሾ።
LEV 16:34 እስራኤለ አሳ ኡባ ናጋራ አቶተꬃስ ላይꬃን ላይꬃን እስ ቶሆ ኦꬃናዉ ሀይስ ህንተዉ መርና ዎጋ ግዶ። ጎዳይ ኪትዳይሳዳ ሙሰይ ኦꬅስ።
LEV 17:1 ጎዳይ ሙሰኮ ሀይሳዳ ያግስ፤
LEV 17:2 “አሮናስ እያ አደ ናይታስነ እስራኤለ አሳ ኡባስ ሀይሳዳ ያጋዳ ኦዳ፤ ጎዳይ ኪትዳይስ ሀይሳ፤
LEV 17:3 እስራኤለ አሳፐ ኦንካ ቦር ዎይኮ ማራዘ ዎይኮ ኮለ ጉታን ዎይኮ ጉታፐ ጋፃን ሹክድ፥
LEV 17:4 ጎዳስ እሞታ ኦꬅድ እማናዉ ጌሻ ዱንካንያ ፐንገ ጎዳ ስን ኤሆና እፅኮ፥ እ ሄ ሱꬃን ኦይሸቴስ። ሄ ኡራይ ሱꬁ ጉስዳ ግሾ ባ አሳ ግዶፈ ኩረቶ።
LEV 17:5 ሄሳ ግሾ፥ እስራኤለ አሳይ ያርሾ መሄ ጮ ደንባን ሹከይሳ አግድ፥ ጎዳ ስንꬃን ጌሻ ዱንካንያ ፐንገን ደእያ ካህንያኮ ኤሆ። ካህነይ ሄሳ ኤክድ፥ ጎዳስ እስፈተꬃ ያርሾ ኦꬅድ ሹኮ።
LEV 17:6 ካህነይ ጌሻ ዱንካንያ ፐንገን ደእያ ያርሾ በሳ ቦላ ሄ ሱꬃ ዉርፆ። ሞꬉዋ ጎዳስ ሳዎ ቶንኩ ግያ ያርሾ ኦꬅድ ፁጎ።
LEV 17:7 እስራኤለ አሳይ ጎዳ አግድ ካልዳ ቱና አያናታስ ዛሪድ ባንታ ያርሹዋ ያርሾፎ። ሄስ ኤንታዉነ ያና የለተꬃ ኡባስ መርና ዎጋ ግዶ።
LEV 17:8 “ኤንታኮ ሀይሳዳ ያጋ፤ እስራኤለ አሳፐ ግድን ዎይኮ ኤንታ ግዶን ደእያ አላጋ ቢታ አሳፐ ግድን፥ ኦንካ ፁሳ ያርሾ ዎይኮ ሀራ ያርሾ ሺሽያ ዎደ፥
LEV 17:9 ጎዳስ ያርሻናዉ ጌሻ ዱንካንያ ፐንገ ኤሆና እፅኮ፥ ሄ ኡራይ ባ አሳ ግዶፈ ኩረቶ።
LEV 17:10 “እስራኤለ አሳፐ ዎይኮ ኤንታ ግዶን ደእያ አላጋ ቢታ አሳፐ ኦንካ ሱꬁ ሚኮ፥ ሄ ሱꬃ ምያ ኡራ ቦላ ታ ዞኮ ዛራና፤ ታኒ ሄ ኡራ አሳ ግዶፈ ኩራና።
LEV 17:11 አይስ ጊኮ አሾ ማእዳ ኡባ ደኦይ እያ ሱꬃ ግዶን ደኤስ፤ ሱꬅ ደኦይ እያ ግዶን ደእያ ግሾ ናጋራ አቶ ጊሴስ። ህንተ ናጋራ አቶተꬃስ ሱꬁ ያርሻና መላ ህንተዉ እማስ።
LEV 17:12 ታኒ እስራኤለ አሳኮ፥ ህንተፈ ዎይኮ ህንተ ግዶን ደእያ አላጋ ቢታ አሳፐ ኦንካ ሱꬁ ሞፖ ያግዳይ ሄሳ ግሾሳ።
LEV 17:13 “እስራኤለ አሳፐ ዎይኮ ኤንታ ግዶን ደእያ አላጋ ቢታ አሳፐ ኦንካ ሜተትያ ዶአ ዎይኮ ካፎ ሻንካትድ ዎꬍኮ፥ እያ ሱꬃ ሳአን ጉስድ ቢታ ካሞ።
LEV 17:14 አይስ ጊኮ አሾ ማእዳ ኡባ ደኦይ እያ ሱꬃ ግዶና። አሾ ማእዳ መተꬃታ ኡባ ደኦይ እያ ሱꬃ ግዶን ደእያ ግሾ፥ ሱꬁ ሞፕተ፤ ቃስ ምያ ኦንካ ባ አሳ ግዶፈ ኩረቶ ያጋዳ እስራኤለ አሳስ ኦዳስ።
LEV 17:15 “እስራኤለ አሳ ግድን ዎይኮ ኤንታ ግዶን ደእያ አላጋ ቢታ አሳ ግድን፥ ኦንካ ባዉታ ዎይኮ ዶእ ዎꬍዳባ ሚኮ፥ ባ ማኡዋ ሜጮ፤ ባ አሳተꬃ ሜጨቶ፤ ያትድ ኦማርስ ጋካናዉ ቱና ግዴስ። ሄሳፈ ጉየ፥ እ ጌሽ ግዳና።
LEV 17:16 ባ ማኡዋ ሜጮና እፅኮ፥ ባ አሳተꬃ ሜጨቶና አግኮ፥ እ ባ ናጋራ ባዉ ቶኬስ።”
LEV 18:1 ጎዳይ ሙሰኮ ሀይሳዳ ያግስ፤
LEV 18:2 “እስራኤለ አሳስ ሀይሳዳ ያጋዳ ኦዳ፤ ታኒ ጎዳ፥ ህንተ ፆሳ።
LEV 18:3 ህንተ ካሰ ደእዳ ግብፀ አሳይ ኦይሳዳ ኦꬆፕተ፤ ዎይኮ ሀእ ታኒ ህንተና ገልስያ ካናነ ቢታ አሳይ ኦይሳዳ ኦꬆፕተ፤ ኤንታ ዎጋ ካሎፍተ።
LEV 18:4 ህንተ ታ ኪታ ኦꬅተ፤ ታ ዎጋ ናግተ፤ ታኒ ጎዳ፥ ህንተ ፆሳ።
LEV 18:5 ታ ኪታነ ታ ዎጋ ናግተ፥ ህንተ ሄሳ ኦꬅኮ ደኦን ዳና። ታኒ ጎዳ።
LEV 18:6 “ህንተፈ ኦንካ ባ ማታ ዳቦራ ፃሎፎ። ታኒ ጎዳ።
LEV 18:7 “ነ አይዉ ፃላዳ ነ አዋ ካዉሾፋ። እያ ነ አይዉ ግድያ ግሾ እዮ ፃሎፋ።
LEV 18:8 “ነ አዋ ማችዉ ፃላዳ ነ አዋ ካዉሾፋ።
LEV 18:9 “ነ ምችዉ ፃሎፋ፤ ሶን የለትዳ ዎይኮ ካረን የለትዳ ነ አዋ ናእዉ ዎይኮ ነ አየ ናእዉ ፃሎፋ።
LEV 18:10 “ነ ናኣ ናእዉ ዎይኮ ነ ናኤ ናእዉ ፃላዳ ነ ነና ካዉሾፋ።
LEV 18:11 “ነ ምቾ ግድያ ግሾ ነ አዋ ማቸ ናእዉ ፃሎፋ።
LEV 18:12 “ነ አዋ ምችዉ ፃሎፋ፤ እያ ነ አዋስ ማታ ዳቦ።
LEV 18:13 “ነ አየ ምችዉ ፃሎፋ፤ እያ ነ አየስ ማታ ዳቦ።
LEV 18:14 “ነ አዋ እሻ ማችዉ ፃሎፋ፤ እያ ነ አዋ እሻ ማችዉ።
LEV 18:15 ነ ናኣ ማችዉ ፃሎፋ፤ እያ ነ ናኣ ማችዉ።
LEV 18:16 “ነ እሻ ማችዉ ፃላዳ ነ እሻ ካዉሾፋ።
LEV 18:17 “አይዉነ እ ናእዉ ፃሎፋ፤ እ ናኤ ናእዉ ዎይኮ እ ናኣ ናእዉ ፃሎፋ። ኤንቲ እዉ ማታ ዳቦ ግድያ ግሾ፥ ሄስ ኢታ ቱና።
LEV 18:18 “ነ ማችያ ፓፃ ደእሽን፥ ነ ማቸ ምችዉ ዳዉꬆፋ።
LEV 18:19 “ኩሸ መቶራ ደእያ ማጫስ ፃሎፋ።
LEV 18:20 “ኔኒ ቱኖና መላ ነ ሾሩዋ ማችዉ ፃሎፋ።
LEV 18:21 “ነ ፆሳ ሱንꬃይ ጫየቶና መላ ነ ናይታፐ እሱዋ ታማን ፁጋዳ፥ ሞሎካ ግያ ኤቃስ ያርሾ ኦꬃዳ እሞፋ። ታኒ ጎዳ።
LEV 18:22 “ፆሳ ስንꬃን እፀትዳባ ግድያ ግሾ ማጫሳራ ጋሄተይሳዳ አደራ ጋሄቶፋ።
LEV 18:23 “ኔኒ ቱኖና መላ መሄራ ጋሄቶፋ፤ ማጫስ መሄራ ጋሄታናዉ መሄ ስን አꬎፎ። ሄስ ዎጋን ባይናባ።
LEV 18:24 “ታኒ ህንተ ስንꬃፈ የደꬅያ ካዎተꬃት ሄ ኦሶታን ቱንዳ ግሾ፥ ህንተ ሄ ኦሶታን ኤንታ መላ ቱኖፕተ።
LEV 18:25 ሀር አቶሽን፥ ቢታይካ ቱንዳ ግሾ፥ እያ ናጋራ ግሾ ታ እያ ሴራስ። ቢትያ ባናን ደኤይ አሳ ጩታሱ።
LEV 18:26 ሽን ህንተ ታ ህግያነ ታ ኪታ ናግተ። ህንተና ግድን ዎይኮ ህንተ ግዶን ደእያ አላጋ ቢታ አሳ ግድን ኦንካ ሄሳ መላ ቱና ኦሶ ኦꬆፕተ።
LEV 18:27 “ህንተፈ ካሰ ሀ ቢታን ደእዳ አሳይ ሄሳ መላ ቱናባ ኦꬅዳ ግሾ፥ ቢትያ ቱናሱ።
LEV 18:28 ህንተ ሀ ቢታ ቱንስኮ፥ ህንተፈ ካሰ ደእዳ ካዎተꬃታ ሀ ቢትያ ጩትዳይሳዳ ህንተናካ ጩቶና መላ ናገትተ።
LEV 18:29 ሄሳታ ዳንያ ቱና ኦሶታፐ እሱዋካ ኦꬅያ አስ ደእኮ፥ ሄ ኡራይ ባ አሳ ግዶፈ ኩረቶ።
LEV 18:30 ሄሳ ግሾ፥ ህንተፈ ካሰ ደእዳ አሳት ኦꬅዳ ቱና ኦሶታ ኡባ ኦꬅድ ህንተ ቱኖና መላ ታ ኪታ ናግተ፤ ታኒ ጎዳ፥ ህንተ ፆሳ” ያግስ።
LEV 19:1 ጎዳይ ሙሰኮ ሀይሳዳ ያግስ።
LEV 19:2 እስራኤለ አሳ ኡባስ ሀይሳዳ ያጋዳ ኦዳ፤ “ታኒ፥ ጎዳይ፥ ህንተ ፆሳይ፥ ጌሽ ግድያ ግሾ፥ ህንተካ ጌሽ ግድተ።
LEV 19:3 “ህንተፈ እሶይ እሶይ ባ አዋነ ባ አይዉ ቦንቾ፤ ታ ሳምባታ ቦንችተ። ታኒ ጎዳ፥ ህንተ ፆሳ።
LEV 19:4 “ታና አግድ ኤቃታ ጎይኖፍተ፤ ዎይኮ ብራታፐ ኦሰትዳ ፆሳታ ህንተዉ ኦꬆፕተ። ታኒ ጎዳ፥ ህንተ ፆሳ።
LEV 19:5 “ህንተ እስፈተꬃ ያርሾ ጎዳስ ያርሽያ ዎደ ሄ ያርሾይ ህንተ ግሾ ኤከታና መላ በሰይሳዳ ያርሽተ።
LEV 19:6 ሄ ያርሾይ ህንተ ያርሽዳ ጋላስ ዎይኮ ዎንተꬃ ጋላስ ሜተቶ፤ ሄꬓንꬆ ጋላስ ጋካናዉ አትዳይ ደእኮ ታማን ፁገቶ።
LEV 19:7 ሄꬓንꬆ ጋላስ ሜተትኮ፥ ሄስ ቱንስያባ፤ ታኒ ሄሳ ኤክከ።
LEV 19:8 ሄሳ ምያ ኦንካ ጎዳስ ጌሽ ግድዳባ ቱንስዳ ግሾ ባ ናጋራን ኦይሸታና። ሄ ኡራይ ባ አሳ ግዶፈ ኩረቶ።
LEV 19:9 “ህንተ ጋደን ካፅዳ ካꬃ ህንተ ጫክያ ዎደ ጋድያ ጋፃ ጋካናዉ ደኤይሳ ጫኮፍተ፤ ጫክ ስምን ደእያ ፖሽልያ ቆሮፕተ።
LEV 19:10 ነ ዎይነ አይፍያ ማፅያ ዎደ ምꬃ ቦላ ቆሰትድ አትዳይሳ ዎይኮ ሳአን ዎꬍዳ ዎይነ አይፍያ ማፆፓ። ሄሳ ማንቆታስነ በተ አሳስ አጋጋ። ታኒ ጎዳ፥ ህንተ ፆሳ።
LEV 19:11 “ካይሶቶፕተ። “ዎርዶቶፕተ። “እሶይ እሱዋ ጭሞፍተ።
LEV 19:12 “ታ ሱንꬃን ዎርዶ ጫቆፍተ፤ ህንተ ፆሳ ሱንꬃ ቱንሶፕተ። ታኒ ህንተ ጎዳ።
LEV 19:13 “ነ ሾሩዋ ቦላ ገነ ኦꬆፋ፤ ዎይኮ እያ ቦንቆፋ። “ኡነ ኦꬅያ ኡራ ዳሞዝያ ድጋዳ፥ እስ ቃማካ ነ ማታን አይሶፓ።
LEV 19:14 “ቱልያ ጫዮፓ፤ ዎይኮ ቆቅያ ስንꬃን ꬉበ ዎꬆፋ፥ ሽን ኔኒ ፆሳስ ያያ። ታኒ ነ ጎዳ።
LEV 19:15 “ፕርዳ ጌላዮፕተ፤ ማንቁዋ እያ ማንቆተꬃ ግሾ ማዳዳ ፕርዶፋ፤ ዱርያ እያ ዱረተꬃ ግሾ ያያዳ አጎፋ። ሽን ነ ሾሩዋስ ሱረ ፕርዳ።
LEV 19:16 “ነ አሳ ግዶን ኢታ ዝግርስ ኤካዳ ዩዮፓ። “ነ ሾሩዋ ሀይቆስ ጋꬅያባ አይኮካ ኦꬆፋ። ታኒ ነ ጎዳ።
LEV 19:17 “ነ እሻ ነ ዎዛናን እፆፋ። ነ ሾሩዋ ጋሶን ነ ናጋራ ኦꬆና መላ እያ ሀንቃ።
LEV 19:18 “ሀሎ ከዮፓ፤ ነ አሳፐ እሱዋ ቦላካ ሽፎፓ። ሽን ነ ሾሩዋ ነ ሁጰዳ ዶሳ። ታኒ ነ ጎዳ።
LEV 19:19 “ታ ኪታታ ናጋ። “እስ ቆሞ መሄ ሀራ ቆሞ መሄራ ብራይስሶፓ። “እስ ሾቃን ናምኡ ቆሞ ዘረꬅ ዘሮፓ። “ናምኡ ቆሞፈ ኦሰትዳ ማኦ ማኦፋ።
LEV 19:20 “እስ አስ አዝናስ ኦይሸታዳ ደእሽን፥ ዎዞ ሚሸይ እመትድ ዉሮናሽን ዎይኮ ላአ ከዮናሽን፥ ሄ አይለራ አቅኮ ኤንቲ ሴረታናዉ በሴስ፥ ሽን ኤንቲ ሀይቃናዉ በሰና።
LEV 19:21 ግዶሽን፥ ሄ ኡራይ ባ ናቆ ያርሾስ ግድያ ማራዘ ጌሻ ዱንካንያ ፐንገን ጎዳ ስን ኤሆ።
LEV 19:22 ካህነይ ሄ ናቆ ያርሾ ማራዝያ ኤክድ፥ ኡራ ናጋራ አቶተꬃስ ጎዳ ስንꬃን ያርሼስ፤ እያ ናጋራይ አቶ ጌተታና።
LEV 19:23 “ህንተ ካናነ ቢታ ገልያ ዎደ አይፈ እምያ አይ ቆሞ ምꬅ ቶክኮካ፥ ሄ ምꬃ አይፈይ ሜተቶና መላ ድገትዳይሳ አኬክተ። ሄꬑ ላይꬅ ዉራና ጋካናዉ ሄ ምꬃ አይፈይ ሜተቶፎ።
LEV 19:24 ኦይዳንꬆ ላይꬃን ሄ ምꬃ አይፈይ ጎዳስ ጋላታስ ሺቅያ ጌሻ ያርሾ ግዳና።
LEV 19:25 እቻሻንꬆ ላይꬃን ሄ ምꬃ አይፍያ ሚተ። ህንተ ሄሳዳ ኦꬅኮ፥ ህንተ ምꬃ አይፈይ ዳራና። ታኒ ጎዳ፥ ህንተ ፆሳ።
LEV 19:26 “ሱꬅ እያ ግዶን ደእያ አሾ ሞፕተ። ማሮቶፕተ ዎይኮ ብቶፕተ።
LEV 19:27 “ህንተ ሁጰ ብናና ጋርሳራ ዩሽ አꬅድ ጪሮፕተ፤ ህንተ ቡቻ ዩሽ አꬅድ ሜዶፕተ።
LEV 19:28 “ሀይቅዳ አሳ ግሾ ህንተ አሳተꬃ ጋሮፕተ፤ ዎይኮ ጫቻ ቤታ ህንተ አሳተꬃ ቦላ መꬎፍተ። ታኒ ነ ጎዳ።
LEV 19:29 “ቢትያ ላይማተꬃንነ ቱናተꬃን ኩሞና መላ ነ ማጫ ናእዉ ላይማተꬃስ አꬃ እማዳ ቱንሶፓ።
LEV 19:30 “ታ ሳምባታ ቦንችተ፤ ታ ጎይነትያ በሳ ቦንችተ። ታኒ ጎዳ።
LEV 19:31 “ሞይትለ ኦድስያ አሳኮ ዎይኮ ማሮታኮ ቦፕተ፤ ህንተ ቱኖና መላ ኤንታ ኮዮፕተ። ታኒ ጎዳ፥ ህንተ ፆሳ።
LEV 19:32 “ዶንꬓ አስነ ጭማ አስ በእያ ዎደ ኡትዳ በሳፈ ደንዳ ኤቃዳ ኤንታ ቦንቻ፤ ነ ፆሳስ ያያ። ታኒ ጎዳ።
LEV 19:33 “ህንተ ቢታን ደእያ በተ አሰ ሱጎፕተ።
LEV 19:34 ህንተ ቢታን ደእያ በተ አስ ህንተ ጋደ አሳዳ ፄልተ፤ እያ ህንተ ሁጰዳ ዶስተ። ህንተ ካሰ ግብፀ ቢታን በተ አስ ግድድ ደእደታ። ታኒ ጎዳ፥ ህንተ ፆሳ።
LEV 19:35 “ህንተ ዋꬍያባን፥ ማክያባንነ ምዛነን ዎርዶቶፕተ።
LEV 19:36 ህንተ ምዛነይ፥ ህንተ ማክያባይነ ዋꬍያባይ እስኖ ግዶ። ታኒ ህንተና ግብፀ ቢታፈ ከሳዳ ኤህዳ ጎዳ ህንተ ፆሳ።
LEV 19:37 “ህንተ ታ ህግያነ ታ ኪታ ኡባ ናግተነ ኦꬅተ። ታኒ ጎዳ።”
LEV 20:1 ጎዳይ ሙሰኮ ሀይሳዳ ያግስ።
LEV 20:2 እስራኤለ አሳስ ሀይሳዳ ያጋዳ ኦዳ፤ “እስራኤለ አሳፐ ግድን፥ ዎይኮ ህንተ ግዶን ደእያ አላጋ አሳፐ ግድን፥ ኦንካ ባ ናአ ሞሎካ ጌተትያ ኤቃስ አꬅድ እምኮ፥ እ ሀይቆ፤ እስራኤለ አሳይ እያ ሹቻን ጫድድ ዎꬎ።
LEV 20:3 ባ ናኣ ሞሎካ ጌተትያ ኤቃስ እምድ ታ ዱንካንያ ቱንሰይነ ታ ጌሻ ሱንꬃ ካዉሸይ ታ ስንꬃን እፀትዳባ ግዳና። ታ አሳ ግዶፈ ሻካዳ ታኒ እያ ꬋይሳና።
LEV 20:4 ሽን ሄ ኡራ እስራኤለ አሳይ በእሸ ቀል ግድ አꬍኮነ ዎꬎና እፅኮ፥
LEV 20:5 ታኒ ሄ አድያነ እያ ሶ አሳ ሞርካና፤ እያነ ሞሎካ ካልዳይሳታ ኤንታ ደርያ ግዶፈ ሻካዳ ꬋይሳና።
LEV 20:6 “ኦንካ ታና አማነቶና እፅድ ሞይትለ ፄግኮነ ማሮ ሶ ቢኮ፥ ታኒ እያዉ ሞርከ ግዳና፤ አሳ ግዶፈ እያ ꬋይሳና።
LEV 20:7 “ታኒ፥ ጎዳይ፥ ህንተ ፆሳ ግድያ ግሾ፥ ህንተ ህንተና ዱማይተ፤ ጌሽ ግድተ።
LEV 20:8 ታ ዎጋ ናግተ፤ እያ ፖልተ። ታኒ ህንተና ጌሽያ፥ ህንተ ጎዳ።
LEV 20:9 “ኦንካ ባ አዋ ዎይኮ ባ አይዉ ጫይኮ ሀይቆ። እ ባ አዋ ዎይኮ ባ አይዉ ጫይዳ ግሾ፥ እያ ሱꬃ አጮይ እያ ቦላ ግዶ።
LEV 20:10 “እስ አስ ባ ሾሩዋ ማችዉ ፃልኮ፥ ኤንቲ ናምአይ ሀይቆ።
LEV 20:11 እስ አስ ባ አዋ ማችዉ ፃልኮ፥ እ ባ አዋ ካዉሽስ፤ ኤንቲ ናምአይ ሀይቆ። ኤንታ ሱꬃ አጮይ ኤንታ ቦላ ግዶ።
LEV 20:12 እስ አስ ባ ናኣ ማችዉ ፃልኮ፥ ኤንቲ ናምአይ ሀይቆ። ኤንቲ ቱናባ ኦꬅዶሶና፤ ኤንታ ሱꬃ አጮይ ኤንታ ቦላ ግዶ።
LEV 20:13 “እስ አደይ ማጫሳራ ጋሄተይሳዳ አደራ ጋሄትኮ፥ ኤንቲ ናምአይ እፀትዳባ ኦꬅዳ ግሾ ሀይቆ። ኤንታ ሱꬃ አጮይ ኤንታ ቦላ ግዶ።
LEV 20:14 እስ አስ ናእዉነ አይዉ ማቾ ኤክኮ፥ ሄስ ቱናባ። ህንተ ግዶን ቱናተꬅ ዶና መላ እነ ኤንቲ ታማን ፁገቶ።
LEV 20:15 “እስ አስ መሄራ ጋሄትኮ፥ እ ሀይቆ፤ ሄ ሚዝዉ ዎꬍተ።
LEV 20:16 እስ ማጫስ መሄራ ጋሄትኮ ሄ ማጫስያነ ሄ መሄይ ናምአይ ሀይቆ፤ ኤንታ ሱꬃ አጮይ ኤንታ ቦላ ግዶ።
LEV 20:17 “እስ አስ ባ አዋ ናእዉ ዎይኮ ባ አየ ናእዉ ማቾ ኤክኮ፥ ሄስ ቱናባ። ኤንቲ ባንታ አሳ ግዶፈ ሻከትድ ሀይቆ። እ ባ ምችዉ ካዉሽዳ ግሾ፥ ባ ናጋራን ባዉ ኦይሸቶ።
LEV 20:18 እስ አስ ኩሸ መቶራ ደእያ ማጫሳራ አቅኮ፥ እ ቀꬃ ቃርዳ ግሾ፥ ኤንቲ ናምአይ ባንታ አሳ ግዶፈ ኩረቶ።
LEV 20:19 “ነ አየ ምችዉ ዎይኮ ነ አዋ ምችዉ ፃሎፋ፤ ሄሳ ኦይ ባ ማታ ዳቦተꬃ ካዉሼስ። ኤንቲ ናምአይ ባንታ ናጋራን ኦይሸቶ።
LEV 20:20 እስ አስ ባ አዋ እሻ ማችዉ ፃልኮ፥ እ ባ አዋ እሻ ካዉሽስ። ኤንቲ ባንታ ናጋራን ባንታዉ ኦይሸቶ፤ ኤንቲ ናምአይ ናአ የሎና ሀይቃና።
LEV 20:21 እስ አስ ባ እሻ ማችዉ ኤክኮ፥ ሄስ ቱና። እ ባ እሻ ካዉሽስ፤ ኤንቲ ናምአይ የሎ ꬋያና።
LEV 20:22 “ህንተ ዳና መላ ታ ህንተና ገልስያ ቢታይ ህንተና ጩቶና መላ ህንተ ታ ህግያነ ታ ኪታ ናግተ።
LEV 20:23 ታኒ ህንተ ስንꬃፈ ꬋይስያ አሳ ደኡዋ ዎጋ ካሎፍተ። ኤንቲ ሄሳ ኡባ ኦꬅዳ ግሾ፥ ታ ኤንታ እፃስ።
LEV 20:24 ህንተ ኤንታ ቢታ ላታና፤ ማꬅነ ኤስ ጎገይ ቢታ ህንተዉ እማና። ታኒ ህንተና ሀራ አሳፐ ዱማያዳ ከስዳ፥ ጎዳ ህንተ ፆሳ።
LEV 20:25 “ሄሳ ግሾ፥ ህንተ ቱናነ ቱና ግዶና መሄታነ ካፎታ ሻክድ ኤርተ። ታኒ ሄሳት ህንተዉ ቱና ጋዳ ዎꬅዳ መሄታ፥ ካፎታነ ቢታን ቃፅያባታ ኡባን ህንተና ቱንሶፕተ።
LEV 20:26 ታኒ ጎዳይ ጌሽ ግድያ ግሾነ ህንተ ታባ ግዳና መላ ህንተና ሀራ አሳፐ ዱማይዳ ግሾ፥ ህንተካ ታዉ ጌሽ ግድተ።
LEV 20:27 “አደይ ዎይኮ ማጭ ሞይትለራ ሃሳይኮ ዎይኮ ማሮትኮ፥ ኤንቲ ሀይቃናዉ በሴስ። ኤንቲ ሹቻን ጫደትድ ሀይቆ፤ ኤንታ ሱꬃ አጮይ ኤንታ ቦላ ግዶ።”
LEV 21:1 ጎዳይ ሙሰኮ፥ “ካህነ ግድዳ አሮና አደ ናይታስ ሀይሳዳ ያጋዳ ኦዳ። ህንተፈ ኦንካ
LEV 21:2 ባ ማታ ዳቦ፥ ባ አየ፥ ባ አዋ፥ ባ አደ ናኣ፥ ባ ማጫ ናኤ፥ ባ እሻ፥
LEV 21:3 ዎይኮ አዝና ገሎና፥ እያ ሶን ደእያ ባ ምቸ አሀ ግዶና እፅኮ፥ ሀይቅዳ አሳ አሀ ቦችድ ባና ቱንሶፖ።
LEV 21:4 ኤኮንነ ገሎን ዳቦትዳ አሳ አሀ ቦችድ ባና ቱንሶፖ።
LEV 21:5 “ካህነት ካዮስ ባንታ ሁጵያነ ባንታ ቡቻ ሜዶፖ፤ ዎይኮ ባንታ አሳተꬃ ጋሮፖ።
LEV 21:6 ኤንቲ ጎዳስ ፁሳ ያርሾነ ካꬃ ያርሾ ሺሽያ ካህነታ ግድያ ግሾ ባንታ ፆሳስ ጌሽ ግዶ፤ ባንታ ፆሳ ሱንꬃ ቱንሶፖ። ሄሳ ግሾ፥ ኤንቲ ጌሽ ግዳናዉ በሴስ።
LEV 21:7 “ካህነት ባንታ ፆሳስ ጌሽ ግድያ ግሾ፥ ካህነት ላይማ ማጫስ፥ ጌላኦ ግዶና ማጫስ ዎይኮ አዝን የድዳ ማጫስ ኤኮፎ።
LEV 21:8 ካህነት ህንተ ፆሳስ ካꬃ ያርሾ ያርሸይሳታ ግድያ ግሾ፥ ህንተ ኤንታ ጌሽ ኦꬅድ ኤክተ። ህንተና ጌሽያ ጎዳይ፥ ታኒ፥ ጌሽ ግድያ ግሾ፥ ኤንቲ ጌሽ ግዶ።
LEV 21:9 ካህንያ ናእያ ላይማታዳ ባና ቱንስኮ፥ እያ ባ አዋ ካዉሻሱ፤ እያ ታማን ፁገታዳ ሀይቆ።
LEV 21:10 “ካህነ ሀላቃይ፥ እያ ሁጰን ትዮ ዛይተይ ጉክዳይስነ ካህነተꬃ ማኡዋ ማአናዉ ዱማትዳይስ፥ ባ ሁጵያፐ ፃꬃ ቃጭያ ደንꬆፎ፤ ባ ማኡዋ ዳኮፎ።
LEV 21:11 አህ ደእያ ሶ ገሎፖ፤ ሀር አቶሽን ባ አዋ ዎይኮ ባ አየ አሀ ግድኮካ፥ ሄሳ ቦችድ ባና ቱንሶፖ።
LEV 21:12 እያ ዱማያናዉ ትይዳ ፆሳ ዛይተይ እያ ቦላ ደእያ ግሾ፥ ካህነይ ጌሻ ዱንካንያፐ ከዮፖ፤ ጌሻ ዱንካንያ ቱንሶፖ። ታኒ ጎዳ።
LEV 21:13 “እ ኤክያ ማችያ ጌላኦ ግዶ።
LEV 21:14 አዝን ሀይቅዳ ማጫስ ዎይኮ አዝን የድዳ ማጫስ ዎይኮ ላይማ ማጫስ ማቾ ኤኮፎ። ሽን ባ አሳ ግዶፈ ጌላኦ ማጫ ናአ ዶርድ ማቾ ኤኮ።
LEV 21:15 ሄስ ሀኖና እፅኮ፥ ባ አሳ ግዶን ባ ናይታ ቱና ኦꬄስ። ታኒ እያ ጌሸይሳ፥ እያ ጎዳ።”
LEV 21:16 ጎዳይ ሙሰኮ ሀይሳዳ ያግስ።
LEV 21:17 “ኔኒ አሮናስ ሀይሳዳ ያጋዳ ኦዳ፤ ነ ኮቻፈ አሳተꬃን ቦረይ ደእያ ኦንካ ካꬃ ያርሾ ታዉ ያርሻናዉ በሰና።
LEV 21:18 አሳተꬃን ቦረይ ደእያ አስ፥ ሄስካ ቆቀ ዎይኮ ዎበ ዎይኮ ሶምኦይ ኢትዳ አስ ዎይኮ ላቆይ ደእያ አስ፥
LEV 21:19 ዎይኮ ቶሆይ ዎይኮ ኩሸይ ስልዳ አስ፥
LEV 21:20 ዎይኮ ኩና አስ ዎይኮ ዳሮ ቃንꬃ አስ ዎይኮ አይፈ ሙልጫ አስ ዎይኮ ፑሶይ ኦይክዳ አስ ዎይኮ እራለይ ደእያ አስ ዎይኮ ሹፋ አስ ታዉ ካꬃ ያርሾ ያርሻናዉ በሰና።
LEV 21:21 ካህንያ አሮና ኮቻፈ አሳተꬃን ቦረይ ደእያ አስ ኦንካ ጎዳስ ፁሳ ያርሾነ ካꬃ ያርሾ ሺሻናዉ ያርሾ በሳ ያናዉ በሰና።
LEV 21:22 እ ጌሻ ካꬃነ ኡባፈ ጌሽ ግድዳ ባ ፆሳ ካꬃ ማናዉ ዳንዳኤስ።
LEV 21:23 ሽን እያ አሳተꬃን ቦረይ ደእያ አስ ግድያ ግሾ፥ እ ታ ዱንካንያ ቱንሶና መላ ማጋራጁዋኮ ዎይኮ ያርሾ በሳኮ ሺቆፖ። ኤንታና ጌሽያ ጎዳይ ታና።”
LEV 21:24 ሙሰይ ሄሳ ኡባ አሮናስ፥ እያ አደ ናይታስነ እስራኤለ አሳ ኡባስ ኦድስ።
LEV 22:1 ጎዳይ ሙሰኮ ሀይሳዳ ያግስ፤
LEV 22:2 ታ ጌሻ ሱንꬃ ኤንቲ ቱንሶና መላ፥ እስራኤለ አሳይ ታዉ ዱማይዳ እሞታታ አሮንነ እያ አደ ናይት ቦንቾን ኤክድ፥ ጌሻተꬃን ናጋና መላ ኤንታዉ ኦዳ። ታኒ ጎዳ።
LEV 22:3 ኤንታኮ ሀይሳዳ ያጋ፤ “ያና የለተꬃ ኡባን ህንተ ኮቻፈ ኦንካ ቱንድ ደእሸ፥ እስራኤለ አሳይ ጎዳስ ዱማይዳ ጌሻ ያርሹዋኮ ሺቅኮ፥ ሄ ኡራይ ታ ስንꬃን በንቶፎ። ታኒ ጎዳ።
LEV 22:4 “አሮና ኮቻፈ ጎጋ ሀርገይ ደእያ፥ ዎይኮ አሳተꬃፈ ጎግያባይ ደእያ ኦንካ ጌያና ጋካናዉ ጌሻ ያርሹዋ ሞፖ። አሀ ቦችድ ቱንዳባ ዎይኮ እያ አቱንꬃይ ጉክዳ ኡራ ቦችያ ኦንካ ቱና።
LEV 22:5 ቃስ ሳአራ ጎሸትያ ቱንስያባታ፥ ዎይኮ አይብባንካ ቱና ግድዳባ ቦችያ ኦንካ፥
LEV 22:6 ዎይኮ ሄሳ መላባ ቦችያ ኦንካ፥ ኦማርስ ጋካናዉ ቱና ግዴስ። እ ባ አሳተꬃ ሃꬃን ሜጨቶና ደእሸ፥ ጌሻ ያርሹዋፈ ማናዉ ኮሸና።
LEV 22:7 አው ዉልያ ዎደ እ ጌሽ ግዴስ። ሄሳፈ ጉየ፥ ሄ ጌሻ ያርሹዋፈ ባና ጋክያ ግሹዋ ሞ።
LEV 22:8 ሀይቅዳባ ዎይኮ ዶእ ዎꬍዳ መሄ አሾ ሞፖ፤ ሄስ ቱንስያባ። ታኒ ጎዳ።
LEV 22:9 “ካህነት ታ ዎጋ ናጎ፤ ኤንቲ እያ ናጎና እፅድ ባንታ ባላን ሀይቃና። ኤንታ ጌሽያ ጎዳይ ታና።
LEV 22:10 “ሄ ጌሻ ያርሹዋ ካህንያ ሶ አሳፐ አትሽን፥ ሀራ አስ ሞፖ። ካህንያ ሶ ይዳ እማ ግድን፥ ቃፃረትድ ኦꬅያ አሰ ግድን ሞፖ።
LEV 22:11 ሽን ካህነይ ባ ብራን ሻምዳ አይለይ ዎይኮ እያ ሶን የለትዳ አይለይ ሄ ካꬃ ሞ።
LEV 22:12 ካህነ ግዶና አስ ገልዳ ካህንያ ናእያ ሄ ጌሻ ያርሹዋፈ ሞፖ።
LEV 22:13 ሽን እ አዝናይ ሀይቅኮ ዎይኮ እዮ የድኮ ቃስ እዉ ናእ ባይና እፅኮ፥ እያ ካሰ ባ ጌላኦተꬃን ደእዳይሳዳ ስማዳ ባ አዋ ሶን ደእኮ፥ እያ ባ አዋ ጋከይሳፈ ሞ። ሽን ሀራ አስ ኦንካ ሄሳፈ ሞፖ።
LEV 22:14 “እስ አስ ኤሮና ደእሸ ጌሻ ያርሹዋፈ ሚኮ፥ ሄ እ ምዳ ካꬃ ጋትያ ቦላ ፄታፐ ላታሙ ኩሸ ጉጅድ ካህንያስ እሞ።
LEV 22:15 እስራኤለ አሳይ ጎዳስ ያርሽያ ጌሻ ያርሹዋ ካህነት ቱንሶፖ።
LEV 22:16 ኤንቲ ባንታ ኤህዳ ጌሻ ያርሹዋ ባንታዉ ምድ ናጋራን ኦይሸታና መላ ኦꬆፎ። ኤንታ ጌሽያ ጎዳይ ታና።”
LEV 22:17 ጎዳይ ሙሰኮ ሀይሳዳ ያግስ፤
LEV 22:18 “አሮናስ፥ እያ አደ ናይታስነ እስራኤለ አሳ ኡባስ ሀይሳዳ ያጋዳ ኦዳ፤ እስራኤለ አስ ግድን ዎይኮ ኤንታ ግዶን ደእያ በተ አስ ግድን፥ ኦንካ ጎዳስ ፁሳ ያርሾ ባ ዶሳን እመይ ዎይኮ ባ ቃንገꬃ ጋይ፥
LEV 22:19 ሄ ያርሾይ ኤከታና መላ ቦረይ ባይና ዎፋኖ፥ ዎይኮ ማራዘ ዎይኮ ኮለ ኤሆ።
LEV 22:20 ቦረይ ደእያ አይ መሄይካ ኤከቶና ግሾ ሄሳ ሺሾፕተ።
LEV 22:21 “እስ አስ ባ ቃንገꬃ ጋꬃናዉ እስፈተꬃ ያርሾ ጎዳስ ያርሽያ ዎደ ዎይኮ ባ መህያፐ ዶሳን እሞታ ጎዳስ ሺሽያ ዎደ ሄስ ኤከታና መላ ሄ መሄይ ቦረይ ባይናባ ግዶ።
LEV 22:22 ህንተ መህያፐ ቆቀ ዎይኮ መቆ ዎይኮ ዎበ ዎይኮ ግይያ ማዱንꬅ ዎይኮ ፑሶይ ዎይኮ ሻቶይ ደእያባ ጎዳስ ያርሾፍተ። ታማን ፁሳ ያርሾ ኦꬅድ ያርሾ በሳን ጎዳስ ሺሾፕተ።
LEV 22:23 እያ ቦላ ላቆይ መት ዎይኮ ቦላ ፓጭ ደእያ ኮርማ ዎይኮ ዶርሰ እስ አስ ባ ዶሳን እምያ ያርሾ ሺሻናዉ ዳንዳኤስ፤ ሽን ቃንገꬃ ጋሶስ ግድኮ ሄስ ኤከተና።
LEV 22:24 ሳንጋ ዎይኮ ማዱንፅዳባ ጎዳስ ያርሾፍተ። ህንተ ቢታን ሄሳ መላባ ኦꬆፕተ።
LEV 22:25 ህንተ ግዶን ደእያ አላጋ አሳታፐ ኤክዳ ሄሳ መላ መህያ ህንተ ፆሳስ ካꬃ ያርሾ ኦꬅድ ሺሾፕተ። ኤንታ ቦላ ቦረይ ደእያ ግሾ ህንተ ግሾ ኤከቶኮና።”
LEV 22:26 ጎዳይ ሙሰኮ ሀይሳዳ ያግስ፤
LEV 22:27 “ቦራ ናእ ዎይኮ ማራዘይ ዎይኮ ኮለይ የለትያ ዎደ ላፑን ጋላስ ባ አየራ ጋምኦ። ሆስፑንꬃ ጋላሳፐ ዶምድ፥ ጎዳስ ፁሳ ያርሾ ኦꬅድ ሺሻናዉ ዳንዳኤቴስ።
LEV 22:28 ሚዝ ዎይኮ ዶርሰ እ ማራራ እስ ጋላስ ሹኮፍተ።
LEV 22:29 “ህንተ ጋላታ ያርሾ ጎዳስ ሺሽያ ዎደ ህንተ ያርሾይ ኤከታና መላ ያርሽተ።
LEV 22:30 ያርሾይ ያርሸትዳ ጋላስ ሜተትድ ዉራናዉ ኮሼስ፤ እያፐ ዎንቶስ አሾፍተ። ታኒ ጎዳ።
LEV 22:31 “ታ ኪታ ናግተነ ፖልተ። ታኒ ጎዳ።
LEV 22:32 ታ ጌሻ ሱንꬃ ቱንሶፕተ። ታ ጌሽ ግደይስ እስራኤለ አሳ ግዶን ኤረታናዉ በሴስ። ህንተና ጌሽያ ጎዳይ ታና።
LEV 22:33 ህንተ ፆሰ ግዳናዉ ህንተና ግብፀ ቢታፈ ከስዳይ ታና። ታኒ ጎዳ።”
LEV 23:1 ጎዳይ ሙሰኮ ሀይሳዳ ያግስ፤
LEV 23:2 እስራኤለ አሳስ ሀይሳዳ ያጋዳ ኦዳ፤ ጌሻ ሺቆ ያግድ አዋጅሸ፥ ህንተ ቦንቻናዉ በሲያ ኤረትዳ ጎዳ ባለት ሀይሳታ።
LEV 23:3 ህንተ ኡሱፑን ጋላስ ኦሶ ኦꬄታ፥ ሽን ላፑንꬃ ጋላሳይ ህንተ ሸምፕያ ሳምባታ ጋላስ። ሄ ጋላስ ጌሻ ሺቆ ሺቅተ፤ አይ ኦሶካ ኦꬆፕተ፤ ህንተ ደእያ በሳ ኡባን ሄስ ጎዳስ ሳምባታ።
LEV 23:4 ኤንታ ዎደን ዎደን ጌሻ ሺቆ ኦꬅድ ህንተ ቦንቻናዉ በሲያ ኤረትዳ ጎዳ ባለት ሀይሳታ፤
LEV 23:5 ኮይሮ አጌናን ታማነ ኦይዳንꬆ ጋላስ ሳእ ኦማርስያ ዎደ ጎዳ ፓስካይ ዶሜስ።
LEV 23:6 ሄ አጌናን ታማነ እቻሻንꬆ ጋላሳን ጎዳስ ኡይꬃ ባኣለ ጋላሳይ ዶሜስ። ሄሳ ግሾ ላፑን ጋላሳታን እርሾይ ገልቦና ኡይꬅ ሚተ።
LEV 23:7 ሄ ጋላሳታፐ ኮይሮ ጋላስ ጌሻ ሺቆ ሺቅተ፤ ኦሶ ኦꬆፕተ።
LEV 23:8 ላፑን ጋላስ ኡባ ጎዳስ ፁሳ ያርሾ ያርሽተ፤ ላፑንꬃ ጋላሳን ጌሻ ሺቆ ሺቅተ፤ ኦሶ ኦꬆፕተ።
LEV 23:9 ጎዳይ ሙሰኮ ሀይሳዳ ያግስ፤
LEV 23:10 እስራኤለ አሳስ ሀይሳዳ ያጋዳ ኦዳ፤ ታኒ ህንተዉ እምያ ቢታ ገልድ ህንተ ካꬅ ጫክያ ዎደ፥ ሄ ካꬃ ኮይሮ ምርቅያ ካህንያስ ኤህተ።
LEV 23:11 ጎዳይ ህንተባ ኤካና መላ ሳምባታ ካልያ ዎንተꬃ ጋላስ ካህነይ ሄ ምርቅያ ጎዳ ስንꬃን ꬎቁ ኦꬅድ ዩሾ።
LEV 23:12 ህንተ ምርቅያ ዩሽዳ ሄ ጋላስ ቦረይ ባይና እስ ላይꬃ ማራዘ ፁሳ ያርሾ ኦꬅድ ጎዳስ ሺሽተ።
LEV 23:13 ሄ ያርሹዋራ እስፈ ሻማሆ ዛይተራ ሙኑቀትዳ ናምኡ ክሎ ግራመ ሎኦ ꬊለ ካꬃ ያርሾ ኦꬅድ ሺሽተ። ሄስ ጎዳስ ሳዎ ቶንኩ ግያ ፁሳ ያርሾ ግዳና፤ እያራ እስፈ እስ ልትሮ ግድያ ዎይነ ኡሽ ሺሽተ።
LEV 23:14 ሀ ያርሹዋ ህንተ፥ ህንተ ፆሳስ ሺሽያ ጋላሳይ ጋካናዉ፥ ዋቻ ካꬃፈ ቃየ ዎይኮ ጫጫ ዎይኮ ኡክድ ሞፕተ። ሄስ ህንተ ደእያ በሳ ኡባን ያና የለተꬃስ መርና ዎጋ ግዶ።
LEV 23:15 ህንተ ዩሾ ያርሾ ምርቅያ ኤህዳ ሳምባታ ዎንተꬃ ጋላሳፐ ዶምድ፥ ላፑን ሳምንታ ታይብተ።
LEV 23:16 ላፑንꬃ ሳምባታ ካልያ ዎንተꬃ ጋላሳይ ጋካናዉ እሻታሙ ጋላስ ታይብተ፤ ዋቻ ካꬃፈ ያርሾ ጎዳስ ሺሽተ።
LEV 23:17 ህንተ ደእያ በሳፈ ናምኡ ክሎ ግራመ ግድያ ሎኦ ꬊልያን እርሾ የግድ ኡክዳ ናምኡ ኡይꬅ ዩሾ ያርሾስ ኤክድ ዪተ። ሄስ ዋቻ ካꬃፈ ጎዳስ ሺቅያ ያርሾ ግዴስ።
LEV 23:18 ሄ ኡይꬃራ እስፈ ቦረይ ባይና እስ ላይꬅ ግድዳ ላፑን ዶርሳ ኡርገታ፥ እስ ዎፋኖነ ናምኡ ማራዘታ ሺሽተ። ኤንታ ካꬃ ያርሾራነ ኡሻ ያርሾራ እስፈ ጎዳስ ፁገትያ ሳዎ ቶንኩ ግያ ያርሾ ኦꬅድ ያርሽተ።
LEV 23:19 ቃስ እስ ኮለ ናጋራ ያርሾስ፥ እስ ላይꬅ ግድዳ ናምኡ ዶርሳ ኡርገታ እስፈተꬃ ያርሾስ ሺሽተ።
LEV 23:20 ካህነይ ባይራ ካꬃ፥ ኡይꬃነ ናምኡ ዶርሳ ኡርገታ ዩሾ ያርሾ ኦꬅድ፥ ጎዳ ስንꬃን ꬎቁ ኦꬅድ ዩሾ። ሄሳት ጎዳስ ጌሽ፤ ካህነታስ ቃስ ግሾ።
LEV 23:21 ሄ ጋላስ ህንተዉ ጌሻ ሺቆ ግዳና መላ አዋጅተ፤ ኦሶ ኦꬆፕተ። ሀይስ ህንተ ደእያ በሳ ኡባን ያና የለተꬃስ መርና ዎጋ ግዶ።
LEV 23:22 ህንተ ቢታን ካፅዳ ካꬃ ጫክያ ዎደ ጋድያ ጋፃ ጋካናዉ ጫኮፍተ፤ ጫክሽን አትዳ ፖሽልያ ቆሮፕተ፤ ሄሳ ማንቆታስነ በተ አሳስ አጋግተ። ታኒ ጎዳ ህንተ ፆሳ።
LEV 23:23 ጎዳይ ሙሰኮ ሀይሳዳ ያግስ፤
LEV 23:24 እስራኤለ አሳስ ሀይሳዳ ያጋዳ ኦዳ፤ ላፑንꬃ አጌናን ኮይሮ ጋላሳ ሸምፖ ጋላስ ኦꬅድ ቦንችተ፤ ሀሳይሶ ሞይዘ ፑንሸ ጌሻ ሺቆ ሺቅተ።
LEV 23:25 ሄ ጋላስ ጎዳስ ፁሳ ያርሾ ሺሽተፐ አትሽን፥ ኦሶ ኦꬆፕተ።
LEV 23:26 ጎዳይ ሙሰኮ ሀይሳዳ ያግስ፤
LEV 23:27 ላፑንꬃ አጌናን ታማንꬆ ጋላሳይ ናጋራ አቶተꬃ ጋላስ፤ ሄ ጋላስ ጌሻ ሺቆ ሺቅተ። ሄ ጋላስ ህንተና ካዉሽተ፤ ጎዳስ ፁሳ ያርሾ ሺሽተ።
LEV 23:28 ሄ ጋላሳይ ጎዳ ህንተ ፆሳ ስንꬃን ህንተ ናጋራይ ቁሸታና መላ ህንተ ናጋራ አቶተꬃ ጋላስ ግድያ ግሾ ሄ ጋላሳን ኦሶ ኦꬆፕተ።
LEV 23:29 ሄ ጋላስ ባናተꬃ ካዉሾና አስ ኦንካ ባ አሳ ግዶፈ ኩረቶ።
LEV 23:30 ሄ ጋላስ ኦሶ ኦꬅያ ኡራ ኦናካ ታኒ እያ አሳ ግዶፈ ኩራና።
LEV 23:31 ሄ ጋላስ ኦሶ ኦꬆፕተ። ሀይስ ህንተ ደእያ በሳ ኡባን ያና የለተꬃስ መርና ዎጋ ግዶ።
LEV 23:32 ሄስ ህንተዉ ዱማትዳ ሸምፖ ጋላስ፤ ሄ ጋላስ ህንተናተꬃ ካዉሽተ። ሄ አጌናን ኡዱፉንꬆ ጋላስ ኦማርሳፈ ዶምድ፥ ታማንꬃ ጋላስ ኦማርስ ጋካናዉ ህንተ ሳምባታ ቦንችተ።
LEV 23:33 ጎዳይ ሙሰኮ ሀይሳዳ ያግስ፤
LEV 23:34 እስራኤለ አሳስ ሀይሳዳ ያጋዳ ኦዳ፤ ላፑንꬃ አጌናን ታማነ እቻሻንꬆ ጋላሳፐ ዶምድ፥ ላፑን ጋላስ ጋካናዉ ጎዳስ ሻቃራ ባኣለ።
LEV 23:35 ሄ ጋላሳታፐ ኮይሮ ጋላሳን ጌሻ ሺቆ ሺቅተ፤ ኦሶ ኦꬆፕተ።
LEV 23:36 ላፑን ጋላስ ኡባን ጎዳስ ፁሳ ያርሾ ሺሽተ፤ ሆስፑንꬆ ጋላሳን ጌሻ ሺቆ ሺቅተ። ጎዳስ ፁሳ ካꬃ ያርሾ ሺሽተ። ሄ ጋላሳይ ባልያ ዉርሰꬃ ጋላስ ግድያ ግሾ፥ ኦሶ ኦꬆፕተ።
LEV 23:37 ፁሳ ያርሾ፥ ካꬃ ያርሾ፥ ሀራ ያርሾታነ ኡሻ ያርሾ ኮሽያ ዎደን ጎዳስ ሺሻናዉ ጌሻ ሺቆ ኦꬅድ አዋጃና ጎዳ ባለት ሀይሳታ።
LEV 23:38 ሀ ያርሾት ጎዳ ሳምባታታፐ፥ ጎዳስ እምያ እሞታታፐ፥ ቃንገꬃ እሞታታፐነ ዶሳን እምያ እሞታታፐ ዱማ።
LEV 23:39 ህንተ ጋደን ካፅዳ ካꬃ ሺሽዳፐ ጉየ፥ ታማነ እቻሻንꬆ ጋላሳፐ ዶምድ ላፑን ጋላስ ጋካናዉ ጎዳ ባኣለ ቦንችተ። ኮይሮ ጋላሳይነ ሆስፑንꬆ ጋላሳይ ህንተዉ ዱማ ሸምፖ ጋላስ ግዳና።
LEV 23:40 ኮይሮ ጋላስ ሎኦ ምꬃ አይፈ፥ ዛምባ ታሸ፥ ጭልኦ ምꬃ ሀይነ ሻፋ ጋፃን ድጭያ ምꬃ ሀይꬅ ኤክድ፥ ጎዳ ህንተ ፆሳ ስንꬃን ኡፋይትሸ ላፑን ጋላስ ባኣለ ቦንችተ።
LEV 23:41 ሄ ባልያ ላይꬃን ላይꬃን ላፑንꬃ አጌናን ላፑን ጋላስ ጎዳ ቦንችተ። ሄስ ያና የለተꬃስ መርና ዎጋ ግዶ።
LEV 23:42 ሄ ላፑን ጋላሳ ሻቃራን ደእተ፤ እስራኤለ አስ ግድዳ ኡባይ ሄ ሻቃራን ደኦ።
LEV 23:43 ታኒ ህንተና ግብፀ ቢታፈ ከስዳ ዎደ ሻቃራን ዳና መላ ኦꬅዳይሳ ያና የለተꬃይ ኤራና። ታኒ ጎዳ ህንተ ፆሳ።
LEV 23:44 ሄሳዳ ኦꬅድ፥ ሙሰይ ጎዳ ባለታ ቦንችያ ዎጋ እስራኤለ አሳስ ኦድስ።
LEV 24:1 ጎዳይ ሙሰኮ ሀይሳዳ ያግስ፤
LEV 24:2 ፆምፐይ ቶኦና ኤፅሸ ዳና መላ እያዉ ኮሽያ ጉምእድ ፅልስዳ ሻማሆ ዛይተ ነዉ ኤሀና መላ እስራኤለ አሳ ኪታ።
LEV 24:3 ጌሻ ዱንካንያ ግዶን ደእያ ማርካተꬃ ማጋራጁዋፈ ካረ ባጋራ ኦማርሳፈ ዎንታ ጋካናዉ አሮን ጎዳ ስንꬃን ሄ ፆምፕያ ኡባ ዎደ ኤꬆ። ያና የለተꬃ ኡባስ ሄስ መርና ዎጋ ግዶ።
LEV 24:4 ፆምፐ ዎꬅያ ዋላህ ባይና ዎርቃ ኮጫ ቦላ ደእያ ፆምፐት ጎዳ ስንꬃን ኡባ ዎደ ኤፃና መላ አሮን ናጎ።
LEV 24:5 ታማነ ናምኡ ክሎ ግራመ ግድያ ሎኦ ꬊለ ኤካዳ ታማነ ናምኡ ኡይꬅ ኡካ።
LEV 24:6 ሄ ኡይꬃታ ኡሱፑና ኡሱፑና ናምኡ ማራን ጎዳ ስንꬃን ደእያ ዋላህ ባይና ዎርቃ ፃርጴዛ ቦላ ዎꬃ።
LEV 24:7 ጎዳስ ፁገታናዉ ሺቅዳ ካꬃ ያርሾ ግደይሳ ኤርሳናዉ፥ ናምኡ ማራታ ምየን ጌሻ እፃነ ዎꬃ።
LEV 24:8 ሀ ኡይꬃ ሳምባታን ሳምባታን ኡባ ዎደ አሮን እስራኤለ አሳ ግሾ መርና ጫቆ ኦꬅድ ጎዳ ስንꬃን ዎꬆ።
LEV 24:9 ሄስ አሮናነ እያ አደ ናይታ ጋክያ ግሾ፤ ኤንቲ እያ ጌሻ በሳን ሞ። ሄስ ጎዳስ ፁሳ ያርሹዋፈ ዎጋዳ አሮናነ እያ ናይታ ጋክያ ግሾ ግድያ ግሾ ኡባፈ ጌሽ።
LEV 24:10 ባ አየን እስራኤለ፥ ባ አዋን ግብፀ አስ ግድዳ እስ ኡራይ ደኤስ። እስ ጋላስ እ ሀራ እስራኤለ አሳራ ሄራን ዋትስ።
LEV 24:11 ባ አየን እስራኤለ ግድዳ ኡራይ ጎዳ ሱንꬃ ጫይስ፤ ያትን እያ አሳይ ሙሰኮ ኤህዶሶና። ሄ ኡራ አይያ ዳነ ኮቸ ግድዳ ደብራ ናአ። እ ሱንꬃይ ሳሎምቶ።
LEV 24:12 ሄ ኡራ ዋታነኮ ጎዳ ሸነይ ቆንጫና ጋካናዉ እያ ናግስዶሶና።
LEV 24:13 ጎዳይ ሙሰ ሀይሳዳ ያግስ፤
LEV 24:14 ሄ ጫይዳ ኡራ ጉታፐ ጋፃ ከሳ። እ ጫይሽን ስእዳ አሳ ኡባይ ባንታ ኩሽያ እያ ሁጵያ ቦላ ዎꬆ፤ እስራኤለ ማባራ ኡባይ እያ ሹቻ ጫድድ ዎꬎ።
LEV 24:15 እስራኤለ አሳስ ሀይሳዳ ያጋዳ ኦዳ፤ እስ አስ ባ ፆሳ ጫይኮ፥ እ ባ ናጋራን ኦይሸታና።
LEV 24:16 ጎዳ ሱንꬃ ጫይያ አስ ሀይቆ፤ እስራኤለ ማባራ ኡባይ እያ ሹቻን ጫዶ። በተ አስ ዎይኮ ጋደ አስ ጎዳ ሱንꬃ ጫይኮ ሀይቆ።
LEV 24:17 አሰ ዎꬍዳ አስ ሀይቆ።
LEV 24:18 አሳ መሄ ዎꬍዳ አስ ኦንካ ባ ዎꬍዳ መህያ ግሾ ፓፃ መህያ ቃንፆ።
LEV 24:19 እስ አስ ባ ሾሩዋ ቆህኮ፥ እ ኦꬅዳይሳዳ እያ ቦላ ኦሰቶ።
LEV 24:20 መንꬅኮ መኦ፤ አይፈ ግሾ አይፈ፤ አቻ ግሾ አቸ። አሳ ቦላ ቆሆ ጋꬅዳ ኦንካ እ ጋꬅዳ ቆሁዋዳ እያ ቦላ ጋኮ።
LEV 24:21 መሄ ዎꬍዳ አስ ሄ መህያ ጋትያ ቃንፆ፤ ሽን አሰ ዎꬍዳ አስ ሀይቆ።
LEV 24:22 በተ አሳስነ እስራኤለ አሳስ ህገይ እስኖ ግዶ። ታኒ ጎዳ ህንተ ፆሳ።
LEV 24:23 ሙሰይ ሄሳ እስራኤለ አሳስ ኦድስ፤ ኤንቲ ሄ ጫይዳ ኡራ ጉታፐ ጋፃ ከስድ፥ ሹቻን ጫድድ ዎꬍዶሶና። ያትድ እስራኤለ አሳይ ጎዳይ ሙሰ ኪትዳይሳዳ ኦꬅዶሶና።
LEV 25:1 ሲና ዙማ ቦላ ጎዳይ ሙሰኮ ሀይሳዳ ያግስ።
LEV 25:2 ኔኒ እስራኤለ አሳስ ሀይሳዳ ያጋዳ ኦዳ፤ ታኒ ህንተዉ እምያ ቢታ ህንተ ገልያ ዎደ ቢትያ ባ ሁጰን ጎዳ ሳምባታ ቦንቾ።
LEV 25:3 ኡሱፑን ላይꬅ ኩመꬅ ህንተ ጋደን ዘርተ፤ ኡሱፑን ላይꬅ ኩመꬅ ህንተ ዎይነ ፄራ ፁንቅተ፤ እያ አይፍያ ማፅተ።
LEV 25:4 ሽን ላፑንꬃ ላይꬃይ ቢታስ ሸምፖ ሳምባታ፤ ሄስ ጎዳ ሳምባታ። ሄ ላፑንꬃ ላይꬃን ጋደን ዘሮፕተ፤ ህንተ ዎይነ ፄራ ፁንቆፍተ።
LEV 25:5 ህንተ ቢታን አሰቦ ካፅዳባ ሺሾፕተ፤ ዎይነ ፄራ ፁንቆፍተ፤ አይፍያ ማፆፕተ። ሄ ላይꬃይ ቢታስ ኩመꬅ ሸምፖ ላይꬅ ግዶ።
LEV 25:6 ሄ ሳምባታ ላይꬃን ቢታይ ኦሰቶና ደእሽን ካፅያ ካꬃ ኔኒ፥ ነ አደ አይለይ፥ ነ ማጫ አይለይ፥ ነ ሶን ኡነ ኦይ፥ ጉꬃ ዎደስ ደእያ በተ አስ ማናዉ ዳንዳኤስ።
LEV 25:7 ሄሳዳካ፥ ነ መህያስነ ነ ቢታን ደእያ ዶአታስ ግድያ ካꬅ ደማና፤ ቢታን ካፅያባ ኡባይ ሜተቶ።
LEV 25:8 ላይꬃታስ ግዶን ደእያ ላፑን ሳምባታታ ታይባ፤ ላፑን ሳምባታታስ ላይꬃ ታይቦይ ላፑን ቶሆ ላፑና፤ ሄስካ ኦይታማነ ኡዱፉን ላይꬅ።
LEV 25:9 ላፑንꬃ አጌናን፥ ታማንꬆ ጋላስ ቦንቸትያ ናጋራ አቶተꬃ ጋላሳን ሞይዘ ፑንያ አስ ቢታ ኡባ ኪታ።
LEV 25:10 እሻታማንꬆ ላይꬃ ዱማይድ፥ ሄ ቢታን ደእያ ኡባስ ላአተꬅ አዋጅተ። ሄስ ህንተዉ እሻታማንꬆ ላይꬃ ባኣለ። ሄ ዎደ ህንተ ኡባይ ህንተ ጋድያኮነ ህንተ ሶ አሳኮ ስምተ።
LEV 25:11 ሄ ላይꬃይ ህንተዉ እሻታማንꬆ ላይꬃ ባኣለ። ሄ ላይꬃን ዘሮፕተ፤ አሰቦ ካፅዳባ ጫኮፍተ፤ ፄራ ፁንቆና አይፍዳ ዎይነ አይፍያ ማፆፕተ።
LEV 25:12 ሄስ እሻታማንꬆ ላይꬃ ባኣለ ግድያ ግሾ እ ህንተዉ ጌሽ፤ ጎዮና ጮ ደንባን ካፅዳባ ሚተ።
LEV 25:13 ሄ እሻታማንꬆ ላይꬃ ባኣለ ዎደ አስ ኡባይ ባ ጋደ ስሞ።
LEV 25:14 ህንተ፥ ህንተ ሾሩዋፐ ጋደ ሻምኮ ዎይኮ እያዉ ባይዝኮ እሶይ እሱዋ ጭሞፍተ።
LEV 25:15 ህንተ እሻታማንꬆ ላይꬃ ባልያፐ ጉየ ደእያ ላይꬃታ ታይቡዋን ህንተ ሾሩዋፐ ሻምተ። ህንተ ሾሮይ ጋደይ ካꬅ እማናዉ ደእያ ላይꬃታ ታይቡዋዳ ባይዞ።
LEV 25:16 ላይꬃ ታይቦይ ዳሮ ግድኮ ጋተይ ዳሬስ፤ ላይꬃታ ታይቦይ ጉፅኮ ጋተይ ጉፄስ። ጋድያ ሎኦተꬃዳ ህንተ ሾሮይ ህንተዉ ባይዜስ።
LEV 25:17 ህንተ እሶይ እሱዋ ጭሞፍተ፤ ሽን ህንተ፥ ህንተ ፆሳ ያይተ። ታኒ ጎዳ፥ ህንተ ፆሳ።
LEV 25:18 ህንተ ሀ ቢታን ሳሮ ዳና መላ ታ ኪታ ፖልተ፤ ታ ህግያ ናግተ።
LEV 25:19 ቢታይ ባ አይፍያ ህንተዉ እምን ህንተ ካላና ጋካናዉ ማና፤ ሄ ቢታን ህንተ ሳሮ ዳና።
LEV 25:20 ሄኮ፥ ኑኒ ዘሮና አግድ፥ ቃስ ካꬅ ሺሾና አግድ፥ ላፑንꬃ ላይꬃን አይ ማኔ? ጊኮ፥
LEV 25:21 ታኒ ኡሱፑንꬆ ላይꬃን ታ አንጁዋ ህንተዉ ኪታና፤ ቢታይ ሄꬑ ላይꬃስ ግድያ ካꬅ እማና።
LEV 25:22 ሆስፑንꬃ ላይꬃን ህንተ፥ ህንተ ቢታን ዘርያ ዎደ ሻቻ ካꬃ ማና። ህንተ ዘርያ ካꬃ ኡዱፉንꬆ ላይꬃን ሺሻና ጋካናዉ ሻቻ ካꬃ ማና።
LEV 25:23 ቢታይ ታባ ግድያ ግሾነ ህንተ ሄ ቢታን እማነ በተ ግድድ ደእያ ግሾ ቢታ ስሞናዳ ኦꬅድ ባይዞፕተ።
LEV 25:24 ህንተ ኦይክዳ ጋድያ ጎዳት፥ ዎዛና ማታይ እስራኤለ ኡባን ናገታናዉ በሴስ።
LEV 25:25 እስ እስራኤለ አስ ማንቅድ ባ ጋድያፐ ባይዝኮ፥ እያ ማታ ዳቦይ ሄ ጋድያ እያዉ ዎዞ።
LEV 25:26 እያው ሄ ጋድያ ዎዝያ ዳቦይ ꬋይኮ፥ እ ዎንቶ ዱረትድ ዎዝያ ሚሸ ደምኮ ዛሪድ ዎዛናዉ ዳንዳኤስ።
LEV 25:27 ባ ባይዝዳ ዎደፐ ዶምድ ደእያ ላይꬃ ታይብድ፥ አትዳ ላይꬃ ሚሽያ ሻምዳይሳስ ዛሮ፤ ያትድ እ ባ ጋድያ ስሞ።
LEV 25:28 ሽን እያዉ ሄ ጋድያ ዎዛናዉ ግድያ ሚሸይ ꬋይኮ፥ እሻታማንꬆ ላይꬃ ባለይ ጋካናዉ ጋደይ ሻምዳ ኡራ ኩሸን ጋምኦ። እሻታማንꬆ ላይꬃ ባኣለ ዎደ እያ ጋደይ እያዉ ስሞ።
LEV 25:29 እስ አስ ግምበትዳ ካታማ ግዶን ደእያ ኬ ባይዝኮ፥ እ ባይዝዳ ዎድያፐ ብድ እስ ላይꬅ ኩማና ጋካናዉ ዛሪድ ዎዛናዉ ዳንዳኤስ።
LEV 25:30 ሽን እስ ላይꬃ ግዶን ዎዛናዉ ዳንዳኤቶና እፅኮ፥ ሄ ግምበትዳ ካታማ ግዶን ደእያ ኬꬃይ ሻምዳ ኡራስነ እያ ኮቻስ ግዴስ። እሻታማንꬆ ላይꬃ ባኣለ ዎደ ስመና።
LEV 25:31 ሽን ግምበትቦና ሄራን ደእያ ኬꬃት ጋደ መላ ዎዘቶሶና። እሻታማንꬆ ላይꬃ ባኣለ ዎደ ባይዝዳይሳስ ስሞሶና።
LEV 25:32 ግዶሽን፥ ሌወት ካታማታን ደእያ ባንታ ኬꬃ ባንታ ኮይዳ ዎደ ዎዛናዉ ዳንዳኦሶና።
LEV 25:33 ሌወታፐ እስ አስ ኤንታ ካታማ ግዶን ደእያ ኬꬃ ባይዝድ ዎዛናዉ ፆነትኮ፥ ሄ ኤንታ ካታማ ግዶን ደእያ ኬꬃይ እሻታማንꬆ ላይꬃ ባልያ ዎደ ስሜስ። ሌወታ ካታማ ግዶን ደእያ ኬꬃይ እስራኤለ አሳ ግዶን ሌወታሳ።
LEV 25:34 ሽን ኤንታ ካታማ ዩሹዋን ደእያ ሄንꬃ ቢታይ ኤንታዉ መርና አቆ ግድያ ግሾ ባይዘተና።
LEV 25:35 እስ እስራኤለ አስ ማንቅድ ባና አይሳናዉ ፆነትኮ፥ እማꬃዳ ዎይኮ በተ አሳዳ እ ኔራ ዳና መላ ማዳ።
LEV 25:36 እያ ኔራ ዎꬃናዉ እያፐ የሎ ኤኮፋ ዎይኮ ዎ ሞፓ። ሽን ነ ፆሳ ያያ።
LEV 25:37 ነ ብራ እያዉ የሎራ ታልኦፋ፤ ነ ካꬃ እያዉ ዎራ ባይዞፓ።
LEV 25:38 ህንተዉ ካናነ ቢታ እማናዉነ ህንተ ፆሳ ግዳናዉ፥ ህንተና ግብፀ ቢታፈ ከስዳ፥ ታኒ፥ ጎዳ ህንተ ፆሳ።
LEV 25:39 እስ እስራኤለ አስ ማንቅድ፥ ባና ነዉ አይለ ኦꬅድ ባይዝኮ እያ አይለዳ ኦስሶፓ።
LEV 25:40 እ በተ አሳዳ ኡነ ኦꬅድ እሻታማንꬆ ላይꬃ ባለይ ጋካናዉ ኔራ ደኦ።
LEV 25:41 ሄ ዎደ እ ባ ናይታራ እስፈ ነ ሶፐ ከይድ ባ ሶ አሳኮ ቦ፤ ባ አዋ ጋደ ስሞ።
LEV 25:42 እስራኤለ አሳይ ታኒ ግብፀ ቢታፈ ከስዳ ታ አይለ ግድያ ግሾ ኤንቲ አይለተꬃስ ባይዘቶፎ።
LEV 25:43 ኔኒ ኤንታ ኡንኤꬃዳ ሃሮፓ፤ ሽን ኔኒ፥ ነ ፆሳ ያያ።
LEV 25:44 ነዉ አደነ ማጫ አይለይ ዳና መላ ኮይኮ፥ ነ ዩሹዋን ደእያ ካዎተꬃታፐ ሻማ።
LEV 25:45 ህንተ ቢታን ደእያ በተ አሳ ናይታ ሻማናዉ ዳንዳኤታ። ህንተ ቢታን ደእሸ የለትዳ ኤንታ ሶ አሳፐ ህንተዉ ሻሎ ኦꬃናዉ ዳንዳኤታ።
LEV 25:46 ህንተፈ ጉየ፥ ህንተ ናይት ኤንታ መርናዉ ላታና መላ ህንተ ናይታስ እምተ። ህንተ ኤንታ ኡባ ዎደ ህንተ አይለ ኦꬃናዉ ዳንዳኤታ፤ ሽን እስራኤለ አስ ኡንኤꬅድ ሃሮፕተ።
LEV 25:47 ነ ማታን ደእያ እማꬅ ዎይኮ በተ አስ ዱረትኮ፥ እያ ማታን ደእያ እስራኤለ ኡራይ ማንቅድ፥ ነ ማታን ደእያ እማꬃስ ዎይኮ በተ ኡራስ ዎይኮ እማꬃ አድያ ኮቻፈ እሱዋስ ባና ባይዝኮ፥
LEV 25:48 እ ባይዘትድ ስምን፥ እያ ዎዛናዉ ዳንዳኤቴስ፤ እያ ዳቦታፐ እሶይ እያ ዎዞ።
LEV 25:49 እያ አዋ እሻይ፥ ዎይኮ እያ አዋ እሻ ናአይ ዎይኮ እያ ያራፐ ማታ ዳቦይ እያ ዎዞ፤ ዎይኮ እ ባ ሁጰን ዱረትድ ባና ዎዞ።
LEV 25:50 እ ባና ሻምዳ ኡራራ ግድድ፥ እ ባና ባይዝዳ ላይꬃፈ ዶምድ እሻታማንꬆ ላይꬃ ባለይ ጋካናዉ ደእያ ላይꬃታ ታይቦ። እያ ላአተꬃ ጋተይ፥ ሄ ላይꬃ ታይቡዋ ኬና ግዶ። እ ባና ሻምዳይሳራ ጋምእዳ ዎድያ ጋተይ እስ አስ ኡነ ኦꬅድ ደምያ ሚሽያራ ግና ግዶ።
LEV 25:51 እሻታማንꬆ ላይꬃ ባለይ ጋካናዉ ዳሮ ላይꬅ አትዳባ ግድኮ፥ ባ ባይዘትዳ ጋትያፐ ሄ ላይꬃ ታይቦን ባና ዎዝያ ጋትያ ቃንፆ።
LEV 25:52 እሻታማንꬆ ላይꬃ ባለይ ጋካናዉ አትዳ ላይꬃይ ጉꬃ ግድኮ፥ ባና ሻምዳይሳራ እስፈ ታይብድ፥ ሄ ላይꬃ ታይቦን ባና ዎዝያ ጋትያ ቃንፆ።
LEV 25:53 እ ላይꬃን ላይꬃን ኡነ ኦꬅያ አሳዳ ባና ሻምዳይሳራ ደኦ፤ እያ ጎዳይ እያ ኡንኤꬅድ ሃራናዉ በሰና።
LEV 25:54 ሽን እ ሄሳ መላ ሀኖን ዎዘቶና እፅኮ፥ እሻታማንꬆ ላይꬃ ባለይ ጋክያ ዎደ እነ እያ ናይት አይለተꬃፈ ከዮ።
LEV 25:55 እስራኤለ አሳይ፥ ታ ግብፀ ቢታፈ ከስዳ ታ አይለ። ታኒ፥ ጎዳ ህንተ ፆሳ።
LEV 26:1 ጎይናናዉ ኤቃታ ኦꬆፍተ፤ ቃስ ሀዉልተ ዎይኮ ኤቃ ቱሱ ዎይኮ ሹቻ ኤቃ ኤሶፍተ። ታኒ ጎዳ፥ ህንተ ፆሳ።
LEV 26:2 ታ ሳምባታታ ናግተ፤ ታ ጎይኖ በሳ ቦንችተ። ታኒ ጎዳ።
LEV 26:3 ህንተ ታ ህግያ ካልኮነ ታ ኪታ ናግኮ፥
LEV 26:4 ታኒ ህንተዉ እራ ዎደን ዎደን እማና፤ ቢታይ ካꬃ ዳርስድ ዶልሳና፤ ጋደን ደእያ ምꬃይ አይፋና።
LEV 26:5 ህንተ ካꬃ ሺሽድ ኦንጎና ደእሽን ዎይነ ማፅያ ዎደይ ጋካና፤ ዎይንያ ማፅድ ዉርሶና ካꬃ ዘርያ ዎደይ ጋካና። ህንተ ካላና ጋካናዉ ካꬅ ማና፤ ህንተ፥ ህንተ ቢታን ሳሮ ዳና።
LEV 26:6 ታኒ ቢታስ ሳሮተꬅ እማና፤ ኦንካ ህንተና ያሽሶና ህንተ ዝንአና። ኢታ ዶአታ ታኒ ቢታፈ ꬋይሳና፤ ህንተ ቢታን ናምአንꬆ ኦል ደንደና።
LEV 26:7 ህንተ ሞርከታ ህንተ የደꬃና፤ ኤንቲ ህንተ ስንꬃን ማሻን ሀይቃና።
LEV 26:8 ህንተፈ እቻሻይ ፄታ የደꬃና፤ ቃስ ፄታይ ታሙ ሙኩላ የደꬃና። ህንተ ሞርከት ህንተ ስንꬃን ማሻን ሀይቃና።
LEV 26:9 ታኒ ህንተና ማሮታ አይፈን በአና፤ ህንተና አይፍሳና፤ ህንተና ዳርሳና፤ ታኒ ታ ጫቁዋ ህንተራ ምንꬃና።
LEV 26:10 ህንተ ሻቻ ካꬃ ምድ ዉርሶና ደእሸ፥ ዋቻ ካꬃ ዎꬃናዉ፥ ሻቻ ካꬃ ድግድ በሰ ጊግሳና።
LEV 26:11 ታኒ ታ ደእያ በሳ ህንተ ግዶን ኦꬃና፤ ታኒ ህንተና እፅከ።
LEV 26:12 ታኒ ህንተ ግዶን ሄመታና፤ ህንተ ፆሳ ግዳና፤ ህንተ ታ አሰ ግዳና።
LEV 26:13 ህንተ ግብፀታስ አይለ ግዶና መላ ሄ ቢታፈ ህንተና ከስዳ ጎዳይ፥ ታኒ ህንተ ፆሳ። ታኒ ህንተ አይለተꬃ ቃምባራ መንꬃስ፤ ህንተ ꬎቁ ግድ ሄመታና መላ ኦꬃስ።
LEV 26:14 ሽን ህንተ ታና ስኦና እፅኮነ፥ ታ ኪታ ፖሎና እፅኮ፥
LEV 26:15 ታ ዎጋ ካꬍኮ፥ ታ ኪታ ኡባ ፖሎና እፅድ ታ ጫቁዋ መንꬃናዉ ታ ህግያ ቦርኮ፥
LEV 26:16 ሄ ዎደ ታኒ ህንተ ቦላ ሀይሳ ኦꬃና፤ ህንተ አኬኮና ደእሽን ያሽ፥ ግልቃተꬅ፥ ህንተ አይፍያ ተልጁምስያነ ህንተ አሳተꬃ መልስያ ምሻ ሀርገ ህንተ ቦላ የዳና። ህንተ ሞርከት ማና ግሾ ህንተ ዘርያ ዘረꬃይ መላ ግዳና።
LEV 26:17 ታ ህንተና ኢታ አይፈን ፄላና፤ ህንተ ሞርከታ ስንꬃን ህንተ ኩንዳና፤ ህንተና እፀይሳት ሃራና፤ ኦንካ የደꬆና ህንተ ባቃታና።
LEV 26:18 ሄሳ ኡባ ኦꬅንካ ህንተ ታና ስኦና እፅኮ፥ ታኒ ህንተ ናጋራ ግሾ ህንተ ሴራ ላፑን ዳኮ ኦꬃና።
LEV 26:19 ታ ህንተ ኦቶሩዋ መንꬃና፤ ሳሉዋ ብራታ፤ ሳአ ናሰ ብራታ ኦꬃና።
LEV 26:20 ህንተ ቢታይ ካꬅ፥ ህንተ ምꬃይ አይፈ እሞና ግሾ ህንተ ዎልቃይ ጮ በሳን ዉራና።
LEV 26:21 ህንተ ታዉ እፃስ ጊኮነ ታና ስኦና እፅኮ፥ ህንተ ናጋራ መላ ላፑን ዳኮ ጋዶ ታኒ ህንተ ቦላ ኤሀና።
LEV 26:22 ታኒ ህንተ ቦላ ባዞ ዶአታ የዳና፤ ኤንቲ ህንተ ናይታ ቦንቃና። ህንተ መሄታ ꬋይሳና፤ ህንተ ታይቡዋ ጉꬃና፤ ሄሳ ጋሶን ህንተ ሄመትያ ኦገይ ሁሳታና።
LEV 26:23 ሄ ሴራ ኡባን ህንተ ታኮ ስሞና እፅኮ፥
LEV 26:24 ሄ ዎደ ታካ ህንተዉ እፃስ ጋና። ህንተ ናጋራ ግሾ ታኒ ታ ሁጰን ህንተና ላፑን ዳኮ ሴራና።
LEV 26:25 ታ ጫቁዋ ህንተ መንꬅዳ ግሾ፥ ኩሸ ዛራናዉ ማሻ ህንተ ቦላ ኤሀና። ህንተ፥ ህንተ ካታማታን ሺቅኮካ፥ ታኒ ህንተ ቦላ ጋዶ የዳና። ህንተ፥ ህንተ ሞርከታ ኩሸን አꬍድ እመታና።
LEV 26:26 ህንተ ካꬃ ታኒ ꬋይስያ ዎደ ታሙ ማጫሳት እስ በሸን ኡይꬁ ኡካና፤ ሄ ኡይꬃ ምዛነን ሻክድ ኤካና፤ ህንተ ሄሳ ማና ሽን ካለከታ።
LEV 26:27 ሀ ኡባን ህንተ ታና ስኦና እፅኮነ ህንተ ኢታተꬃን ጉጅድ ቢኮ፥
LEV 26:28 ታ ህንተ ቦላ ሀንቆን ደንዳና። ህንተ ናጋራ ግሾ ታኒ ህንተና ላፑን ዳኮ ሴራና።
LEV 26:29 ህንተ፥ ህንተ አደ ናይታነ ህንተ ማጫ ናይታ አሹዋ ማና።
LEV 26:30 ታኒ፥ ህንተ ꬎቃ ጎይኖ በሳታ ꬋይሳና፤ ህንተ እፃነ ያርሽያ በሳ ላላና። ታኒ ህንተ አሀ ህንተ ኤቃታ አሀ ቦላ ሆላና፤ ታኒ ህንተና ፖሎ እፃና።
LEV 26:31 ታኒ ህንተ ካታማታ ባይሳ ኦꬃና፤ ህንተ ጎይኖ በሳታ ꬋይሳና፤ ህንተ ሳውያ ያርሹዋ ስንግከ።
LEV 26:32 ታኒ ህንተ ቢታ ꬋይሳና፤ ሄ ቢታን ደእያ ሞርከት ሄሳን ማላለታና።
LEV 26:33 ታኒ ህንተና ካዎተꬃታ ግዶን ላላና፤ ህንተ ቦላ ታ ማሻ ሾዳና። ህንተ ቢታይ ባይሳታና፤ ህንተ ካታማት ላለታና።
LEV 26:34 ህንተ ሞርከታ ቢታን ደእያ ዎደ፥ ባይሳ ጊግድ ደእያ ህንተ ቢታይ ባ ሳምባታ ቦንቻና። ሄ ዎደ ህንተ ቢታይ ሸምፓናነ ባ ሳምባታ ቦንችሸ ኡፋይታና።
LEV 26:35 ህንተ ሄ ቢታን ደእያ ዎደ ሳምባታታን ደምቦና ሸምፑዋ ሀእ ባይሳ ግድዳ ዎደ ደማና።
LEV 26:36 ህንተ ድኤትድ ብያ ዎደ ጉየ አትዳ አሳታ ዎዛናን ያሽ የዳና፤ ጫርኮይ ቃꬅያ ቦንጮ ግርሳይ ኤንታ ዳጋንꬃና፤ ኤንቲ ማሻፈ ባቃትያ መላ ባቃታና፤ ኤንታ ኦንካ የደꬆና ኩንዳና።
LEV 26:37 ኦንካ የደꬆና ኦላፐ ባቃትያዳ ባቃትሸ፥ እሶይ እሱዋራ ꬉበትድ ኩንዳና። ህንተ፥ ህንተ ሞርከታ ስንꬃን ኤቃናዉ ህንተዉ ዎልቅ ꬋያና።
LEV 26:38 ካዎተꬃታ ግዶን ህንተ ꬋያና፤ ህንተ ሞርከታ ቢታን ህንተ ምተትድ ꬋያና።
LEV 26:39 ሞርከታ ቢታን አትዳይሳት ባንታ ናጋራ ግሾነ ባንታ አዋታ ናጋራ ግሾ ግልቅድ ꬋያና።
LEV 26:40 ሽን ኤንቲ ባንታ ናጋራነ ታ ቦላ ማካልድ ስኦና እፅዳ ባንታ አዋታ ናጋራ ፓፅኮ፥
LEV 26:41 ታ ኤንታ እፃናዳነ ኤንታ ሞርከታ ቢታ የደꬃናዳ ኦꬅዳ ባንታ ናጋራ አግኮነ ኤንታ ኪተቶና ዎዛናይ ስምኮ፥
LEV 26:42 ታኒ ያይቆባራ፥ ይሳቃራነ አብራሃመራ ጫቅዳ ጫቁዋ ሀሳያና፤ ኤንታ ቢታ ዛራ ቆፓና።
LEV 26:43 ኤንታ ቢታይ ባይሳ አታና፤ ሄ ኤንቲ ꬋይን ባይሳ ግድድ ደእዳ ዎደን ቢታይ ሳምባታ ቦንችሸ ኡፋይታና። ኤንቲ ታ ኪታ ካꬍዳ ግሾነ ታ ዎጋ ለቅዳ ግሾ ባንታ ናጋራ ሴራ ኤካና።
LEV 26:44 ግዶሽን፥ ኤንቲ ባንታ ሞርከታ ቢታን ደእዳ ዎደ ኩመꬅ ꬋያና ጋካናዉ ኤንታራ ደእያ ታ ጫቁዋ መንꬅከ፤ ኤንታ የግከ። ታኒ፥ ጎዳ ኤንታ ፆሳ።
LEV 26:45 ታኒ ኤንታ ፆሳ ግዳናዉ፥ ካዎተꬃት ፄልሽን፥ ግብፀ ቢታፈ ከስዳ ኤንታ ማይዛታራ ታኒ ጫቅዳ ጫቁዋ ኤንታ ግሾ ሀሳያና። ታኒ ጎዳ።
LEV 26:46 ጎዳይ ሲና ዙማ ቦላ ሙሰ ባጋራ ባፐነ እስራኤለ አሳፐ ግዶን ዎꬅዳ ዎጋት ኪታትነ ህገት ሀይሳታ።
LEV 27:1 ጎዳይ ሙሰኮ ሀይሳዳ ያግስ።
LEV 27:2 እስራኤለ አሳስ ሀይሳዳ ያጋዳ ኦዳ፤ እስ አስ ጎዳስ አሰ እማናዉ ቃንግኮ፥ ዎዞ ጋትያ ነ ጋማትዳይሳ መላ ሄ ኡራ ግሾ ሚሸ ቃንፆ።
LEV 27:3 ላታሙ ላይꬃፈ ብድ ኡሱፑን ታሙ ላይꬅ ጋካናዉ ደእያ አደ ግድኮ ጌሻ ዱንካነን ኤረትዳ ምዛነን ኡሱፑን ፄቱ ብራ ሳንትመ ቃንፆ።
LEV 27:4 ማጫ ግድኮ ሀስታሙ ብራ ሳንትመ ቃንፆ።
LEV 27:5 እቻሹ ላይꬃፈ ብድ ላታሙ ላይꬅ ጋካናዉ ደእያ አደ ግድኮ ላታሙ ብራ ሳንትመ ቃንፆ፤ ቃስ ማጫስ ግድኮ ታሙ ብራ ሳንትመ ቃንፆ።
LEV 27:6 እስ አጌናፐ ብድ እቻሹ ላይꬅ ጋካናዉ ደእያ አደ ግድኮ እቻሹ ብራ ሳንትመ ቃንፆ፤ ቃስ ማጫስ ግድኮ ሄꬑ ብራ ሳንትመ ቃንፆ።
LEV 27:7 ላይꬅ ኡሱፑን ታማነ እያፐ ቦላ ግድዳ አደ ግድኮ፥ ታማነ እቻሹ ብራ ሳንትመ፤ ቃስ ማጫስ ግድኮ ታሙ ብራ ሳንትመ ቃንፆ።
LEV 27:8 ቃንግዳ ኡራይ ኔኒ ጋማትዳይሳ ቃንፃናዉ ዳንዳኦና ማንቆ ግድኮ፥ እ ባ ቃንገꬃ ጋꬃናዉ እምዳ ኡራ ኤህድ ካህንያ ስንꬃን ኤሶ፤ ቃንገትዳ ኡራይ ቃንፃናዉ ዳንዳኤይሳ ኬና ቆፕድ ካህነይ ጋማቶ።
LEV 27:9 እስ አስ ጎዳስ ያርሾ ኦꬅድ እማናዉ ቃንግዳይ መሄ ግድኮ ጎዳስ እመትያ መሄ ኡባይ ጌሽ ግዴስ።
LEV 27:10 ሄ መህያ ግሾ ሀራ መሄ እሞፎ፤ ዎይኮ እያ ሀራ መሄራ ላሞፎ። ሎኡዋ ኢታራ ዎይኮ ኢታ ሎኡዋራ ላሞፎ፤ ሽን እ ላምኮ፥ ኮይሮ መሄይነ ላመ እምዳ መሄይ ናምአይካ ጌሽ ግዶ።
LEV 27:11 እስ አስ ጎዳስ ያርሾ ኦꬅድ እማናዉ ገፕዳ መሄይ ጌሽ ግዶና እፅኮ፥ ሄ ኡራይ ሄ መህያ ካህንያ ስን ኤሆ።
LEV 27:12 ሎኦ ግድን፥ ኢታ ግድን ካህነይ ሄ መህያ ጋማቶ፤ ካህነይ ጋማትዳይስ እያዉ ጋተ ግዶ።
LEV 27:13 ሽን ሄ መህያ ጎዳይ ዛሪድ ዎዛናዉ ኮይኮ፥ ሄ መህያ ጋትያ ቦላ ፄታፐ ላታሙ ኩሸ ጉጆ።
LEV 27:14 እስ አስ ባ ኬꬃ ጌሽ ኦꬅድ ጎዳስ ዱማይኮ፥ ሎኦ ግድን፥ ኢታ ግድን ካህነይ ሄ ኬꬃ ጋማቶ፤ ካህነይ ጋማትዳይስ እያዉ ጋተ ግዶ።
LEV 27:15 ባ ኬꬃ ጌሽ ኦꬅድ ጎዳስ ዱማይዳ ኡራይ ዛሪድ ዎዛናዉ ኮይኮ፥ ሄ ኬꬃ ጋትያ ቦላ ፄታፐ ላታሙ ኩሸ ጉጆ፤ ስሚድ ኬꬃይ እያባ ግዴስ።
LEV 27:16 እስ አስ ባ ላታ ጋድያፐ ሻክድ ጌሽ ኦꬅድ ጎዳስ ዱማይኮ፥ ሄ ጋድያ ጋተይ እያን ዘረትያ ዘረꬃን ጋማተቶ። ሄስካ ናምኡ ፄታነ ላታሙ ክሎ ግራመ ባንጋ ዘርያ ጋደ ግድኮ፥ እሻታሙ ሳቅለ ቃንፆ።
LEV 27:17 እ ባ ጋድያ እሻታማንꬆ ላይꬃ ባለፐ ዶምድ ጌሽ ኦꬅድ ጎዳስ ዱማይኮ፥ ሄ ጋድያ ኩመꬃ ጋትያ ቃንፆ።
LEV 27:18 ሽን እ ባ ጋድያ እሻታማንꬆ ላይꬃ ባለይ አꬍን፥ ጌሽ ኦꬅድ ጎዳስ ዱማይኮ፥ ካልድ ደእያ እሻታማንꬆ ላይꬃ ባለይ ጋካናዉ ደእያ ላይꬃታ ካህነይ ታይብድ፥ እያ ኩመꬃ ጋትያፐ ዎꬎ።
LEV 27:19 ሄ ጋድያ ጌሽ ኦꬅድ ጎዳስ ዱማይዳ ኡራይ ዛሪድ ዎዛናዉ ኮይኮ፥ ጋማተትዳ ጋትያ ቦላ ፄታፐ ላታሙ ኩሸ ጉጆ፤ ስሚድ ጋደይ እያባ ግዴስ።
LEV 27:20 ሽን እ ጋድያ ዛሪድ ዎዛናፐ ስን ሀራ አሳስ ባይዝኮ፥ ሄ ጋድያ ዎዛናዉ ዳንዳኤና።
LEV 27:21 እሻታማንꬆ ላይꬃ ባለይ ጋክን ጋደይ የደትያ ዎደ ሄ ጋደይ ናምአንꬆ ጉየ ስሞና ጎዳስ ጌሽ ግዶ፤ ሄ ጋደይ ካህነታባ ግዴስ።
LEV 27:22 እስ አስ ሀራ አሳፐ ሻምዳ ጋድያ ጌሽ ኦꬅድ ጎዳስ ዱማያናዉ ኮይኮ፥
LEV 27:23 ካልያ እሻታማንꬆ ላይꬃ ባለይ ጋካናዉ ደእያ ጋትያ ካህነይ ጋማትኮ፥ ኡራይ ሄ ጋላስ ጋማትዳ ጋትያ ቃንፆ፤ ሄ ሚሸይ ጎዳስ ዱማትዳ ሚሸ ግዳና።
LEV 27:24 እሻታማንꬆ ላይꬃ ባለይ ጋክያ ዎደ ሄ ጋደይ ኮይሮ ላታን ኤክድ ባይዝዳ ኡራስ ስሜስ።
LEV 27:25 ኤንታ ጋተይ ጌሻ ዱንካንያን ኤረትዳ ምዛነን ጋማተቴስ። (እስ ሳቅለይ ላታሙ ጌራ ግዴስ)።
LEV 27:26 ሽን ኦንካ ባይራ የለትዳ መሄ ጎዳስ ዱማይድ ሺሻናዉ ዳንዳኤና፤ እ ካሰካ ጎዳባ። ሚዝ ዎይኮ ዶርሰ ግድን ጎዳባ።
LEV 27:27 ሄ መሄይ ጌሽ ግዶና እፅኮ፥ እ ጋማተትዳ ጋትያ ቦላ እቻሻፐ እስ ኩሸ ጉጅድ እያ ጎዳይ ዛሪድ ዎዞ። እ ዎዞና እፅኮ፥ ጋማተትዳ ጋትያን ሀራ አሳስ ባይዘቶ።
LEV 27:28 እስ አስ ጎዳስ ዱማይድ እምዳባይ አይባ ግድኮካ፥ አሰ ዎይኮ መሄ ዎይኮ እያ ላታ ጋደ ግድን፥ ባይዘተናነ ዎዘተና። እ ዱማይዳባ ኡባይ ጎዳስ ኡባፈ ጌሽ።
LEV 27:29 አሳ ግዶፈ ሀይቃና መላ ፕርደትዳ አስ ኦንካ ዎዘቶፎ፤ ሄ ኡራይ ሀይቆ።
LEV 27:30 ጋደን ካፅዳ ካꬅ ዎይኮ ምꬃ አይፈ ግድን ታማፈ እሶይ ጎዳባ። ሄስ ጎዳስ ጌሽ።
LEV 27:31 እስ አስ ባ አስራታ ዎዛናዉ ኮይኮ፥ እያ ጋትያ ቦላ ፄታፐ ላታሙ ኩሸ ጉጅድ ዎዞ።
LEV 27:32 ሚዛ አስራታ ዎይኮ ዶርሳ አስራታ ዎይኮ ዴሻ አስራታ ግድን፥ ሄንꬃንቹዋ ፃምአፈ ጋርሳራ አꬍያ ታማፈ እሶይ ጎዳስ ጌሽ።
LEV 27:33 ታማንꬆ መሄይ ኢታ ግድን፥ ሎኦ ግድን ዶሮፖ፤ ዎይኮ እያ ሀራራ ላሞፎ። ላምኮ፥ ኮይሮይነ ላመ እምዳ ናምአይ ጎዳስ ጌሽ ግዶሶና፤ ዛሪድ ዎዛናዉ ዳንዳኤተና።
LEV 27:34 ሲና ዙማ ቦላ ጎዳይ ሙሰ ባጋራ እስራኤለ አሳ ኪትዳ ኪታይ ሀይሳ።
NUM 1:1 እስራኤለ አሳይ ግብፀ ቢታፈ ከይዳ ናምአንꬆ ላይꬃን፥ ናምአንꬆ አጌናን፥ ሄ አጌና ኮይሮ ጋላሳን፥ ጎዳይ ሲና መላ ቢታን ጌሻ ዱንካንያን ሙሰኮ ሀይሳዳ ያግስ፤
NUM 1:2 “ኔራነ አሮናራ እስራኤለ አሳ ኡባ ኤንታ ኮቻን ኮቻን፥ ቃስ ኤንታ ሶ አሳን አሳን ታይባድ፥ አደ አሳ ሱንꬃ ፃፍተ።
NUM 1:3 ላይꬅ ላታማነ እያፐ ቦላ ግድዳ፥ ኦለታናዉ ዳንዳእያ እስራኤለ አሳ ኡባ ታይብተ።
NUM 1:4 ኮቻፐ ኮቻፐ እስ እስ አስ ባ ሶ አሳስ ሀላቃ ግድድ ህንተና ማዶ።
NUM 1:5 ህንተና ማዳና አሳ ሱንꬃይ ሀይሳፈ ካልድ ፃፈትዳይሳ። ሮቤላፐ፥ ሻደኡራ ናኣ ኤልፁራ፤
NUM 1:6 ስሞናፐ ሱርሳዳያ ናአ ሳሉምኤላ፤
NUM 1:7 ይሁዳፐ አምናዳበ ናኣ ናአሶና፤
NUM 1:8 ይሳኮራፐ ዙአራ ናኣ ናትናኤላ፤
NUM 1:9 ዛብሎናፐ ሄሎና ናኣ ኤልኣባ፤
NUM 1:10 ዮሰፋ ናይታፐ፥ ኤፍሬማፐ አምሁዳ ናኣ ኤልሻማአ፤ ምናሰፐ ፓዳዙራ ናኣ ጋማልኤላ፤
NUM 1:11 ብንያመፐ ጋድዮና ናኣ አብዳና፤
NUM 1:12 ዳናፐ አምሳዳያ ናኣ አክኤዘራ፤
NUM 1:13 አሴራፐ ኦክራና ናኣ ፓግኤላ፤
NUM 1:14 ጋዳፐ ራጉኤላ ናኣ ኤልያሳፋ፤
NUM 1:15 ንፍታለመፐ ኤናና ናአ አክራ፤
NUM 1:16 ሀ አሳይ ባንታ አዋታ ኬꬃ አሳፐ ካለꬃናዉ ዶረትዳ እስራኤለ ያራታ ሀላቃታ” ያግስ።
NUM 1:17 ያትን ሙሰይነ አሮን ሄ ዶረትዳ አሳታ ኤክድ፥
NUM 1:18 ናምአንꬆ አጌናን ኮይሮ ጋላሳን ኩመꬃ ማባራ ፄግድ ሺሽዶሶና። አሳይ ባንታ ኮቻን ኮቻን፥ ቃስ ባንታ ሶ አሳን አሳን ላታሙ ላይꬅነ እያፐ ቦላ ግድዳ አደ ኡባይ ፃፈትስ።
NUM 1:19 ጎዳይ እያ ኪትዳይሳዳ ሙሰይ ኤንታ ሲና መላ ቢታን ታይብስ።
NUM 1:20 ኦለታናዉ ዳንዳእያ አደ ኡባይ፥ ላታሙ ላይꬅነ እያፐ ቦላ ግድዳ አደ ኡባይ ታይበትድ ሁጰን ሁጰን ፃፈትዶሶና። ኤንቲ ባንታ ኮቻን ኮቻንነ ባንታ ሶ አሳን ሻከትድ ሀይሳፈ ካልድ ደእያ ታይቦ ማራን ማዝጋበትዶሶና። ባይራ ናኣ ሮቤላፐ 46,500
NUM 1:22 ስሞናፐ 59,300
NUM 1:24 ጋዳፐ 45,650
NUM 1:26 ይሁዳፐ 74,600
NUM 1:28 ይሳኮራፐ 54,400
NUM 1:30 ዛብሎናፐ 57,400
NUM 1:32 ዮሰፋ ናኣ ኤፍሬማፐ 40,500
NUM 1:34 ዮሰፋ ናኣ ምናሰፐ 32,200
NUM 1:36 ብንያመፐ 35,400
NUM 1:38 ዳነፐ 62,700
NUM 1:40 አሴራፐ 41,500
NUM 1:42 ንፍታለመፐ 53,400
NUM 1:44 ሙሰይ፥ አሮንነ ባንታ ሶ አሳፐ አሳፐ ዶረትዳ ታማነ ናምኡ እስራኤለ ኮቻ ሀላቃት ታይብዳ አሳይ ሀይሳታ።
NUM 1:45 ኦለታናዉ ዳንዳእያ አደ ኡባይ፥ ላታሙ ላይꬅነ እያፐ ቦላ ግድዳ አሳይ ባንታ ሶ አሳን አሳን ታይበትዶሶና።
NUM 1:46 ኩመꬃ አሳ ታይቦይ 603,550.
NUM 1:47 ሽን ሌወ ኮቻት ታይበትቦኮና።
NUM 1:48 ጋሶይካ ካሰ ጎዳይ ሙሰኮ ሀይሳዳ ያግስ፤
NUM 1:49 “ሌወ ኮቻታ ታይቦፓ፤ ኤንታ አትዳ እስራኤለ አሳ ታይቦን ገልሶፋ።
NUM 1:50 ሌወታ፥ ጌሻ ዱንካንያንነ እያን ደእያ ሚሸታ ኡባ ቦላ ሀላቃ ኦꬃዳ ሹማ። ኤንቲ ዱንካንያነ እያን ደእያ ሚሸታ ቶካና፤ እያ ግዶን ኦꬃናነ እያ ዩሾን ዱንካናና።
NUM 1:51 ጌሻ ዱንካነይ ሾደትያ ዎደ ሌወት ሾዶ፤ ጌሻ ዱንካነይ ኤቅያ ዎደ ሌወት ኤሶ፤ ኤንታፈ ሀር ኦንካ እያኮ ሺቅኮ ሀይቆ።
NUM 1:52 ሀንኮ እስራኤለ አሳይ ባንታ ሄራንነ ባንታ ጩጋን ጩጋን ሻከትድ፥ ባንታ ዱንካንያ ዱንካኖና።
NUM 1:53 ሽን ጎዳ ሀንቆይ እስራኤለ ማባራ ቦላ ዎꬎና መላ ሌወት ዱንካንያ ዩሹዋን ባንታ ዱንካንያ ዱንካንድ ናጎ” ያግስ።
NUM 1:54 እስራኤለ አሳይ ጎዳይ ሙሰ ኪትዳ ኡባ ኦꬅዶሶና።
NUM 2:1 ጎዳይ ሙሰነ አሮና ሀይሳዳ ያግስ፤
NUM 2:2 እስራኤለ አሳይ ባንታ ኮቻን ኮቻን ማላነ ባንታ ኮቻ ኮቻ ኤርስያ ባንድራ ካልድ፥ ጌሻ ዱንካንያፐ ጉꬅ ሃክድ እያ ዩሹዋን ዱንካኖና።
NUM 2:3 ዶሎሀ ባጋራ ይሁዳ ኮቻይ ባንታ ማላ ካልድ ዱንካኖና። ይሁዳ ኮቻ ካለይ አምናዳበ ናኣ ናአሶና።
NUM 2:4 እያ ጩጋ ታይቦይ 74,600.
NUM 2:5 ይሁዳ ጋክድ ዱንካናናይ ይሳኮረ ኮቻ። ይሳኮራ ኮቻ ካለይ ዙአራ ናኣ ናትናኤላ።
NUM 2:6 እያ ጩጋ ታይቦይ 54,400.
NUM 2:7 እያፐ ካልድ ዛብሎና ኮቻይ ዱንካኔስ። ዛብሎና ኮቻ ካለይ ሄሎና ናኣ ኤልኣባ።
NUM 2:8 እያ ጩጋ ታይቦይ 57,400
NUM 2:9 ይሁዳ ባጋን ዱንካንዳ ኦላንቾታ ታይቦይ 186,400. እስራኤለ አሳይ ጉታ የድድ ብያ ዎደ ኮይሮት ከየይ ኤንታ።
NUM 2:10 ዱገሀ ባጋራ ሮቤላ ኮቻይ ባንታ ማላ ካልድ ዱንካኖና። ኤንታ ካለይ ሳድዮራ ናኣ ኤልሱራ።
NUM 2:11 እያ ጩጋ ታይቦይ 46,500.
NUM 2:12 ሮቤላ ጋክድ ዱንካነይ ስሞና ኮቻ። ስሞና ኮቻ ካለይ ዙርሻዳያ ናአ ሳሉምኤላ።
NUM 2:13 እያ ጩጋ ታይቦይ 59,300.
NUM 2:14 እያፐ ካልድ ጋደ ኮቻይ ዱንካኔስ። ኤንታ ካለይ ደኡኤላ ናኣ ኤልያሳፋ።
NUM 2:15 ኤንታ ጩጋ ታይቦይ 45,650.
NUM 2:16 ሮቤላ፥ ባጋን ዱንካንዳ ኦላንቾታ ታይቦይ 151,450. እስራኤለ አሳይ ጉታ የድድ ብያ ዎደ ናምአንꬆ ከየይ ኤንታ።
NUM 2:17 ሄሳፈ ጉየ ኮይሮ ከይያ ይሁዳ ጩጋፐነ ናምአንꬆ ከይያ ሮቤላ ጩጋፐ ግዶን ጌሻ ዱንካንያ ቶክድ ሌወት ገሎሶና። እስ እስ ኮቻይ ባንታ ዱንካንዳ ማራን ባንታ ማላ ኦይክድ ከዮ።
NUM 2:18 ዉሎሀ ባጋራ ኤፍሬማ ባጋይ ባንታ ማላ ካልድ ዱንካኖና። ኤንታና ካለይ አምሁዳ ናኣ ኤልሻማአ።
NUM 2:19 ኤንታ ጩጋ ታይቦይ 40,500.
NUM 2:20 ኤንታ ጋክድ ምናሰ ኮቻይ ዱንካኔስ። ኤንታና ካለይ ፓዳዙራ ናኣ ጋማልኤላ።
NUM 2:21 ኤንታ ኦላንቾታ ታይቦይ 32,200.
NUM 2:22 እያፐ ካልድ ዱንካነይ ብንያመ ኮቻ። ብንያመ ኮቻ ካለይ ግድኦና ናኣ አብዳና።
NUM 2:23 ኤንታ ጩጋ ታይቦይ 35,400.
NUM 2:24 ኤፍሬማ ባጋን ዱንካንዳ ኦላንቾታ ታይቦይ 108,100. እስራኤለ አሳይ ጉታ የድድ ብያ ዎደ ሄꬓንꬆ ከየይ ኤንታ።
NUM 2:25 ፑደሀ ባጋራ ዳነ ኮቻይ ባንታ ማላ ካልድ ዱንካኖና። ኤንታና ካለይ አምሳዳያ ናኣ አክኤዘራ።
NUM 2:26 ኤንታ ጩጋ ታይቦይ 62,700.
NUM 2:27 ኤንታና ጋክድ አሴራ ኮቻይ ዱንካኔስ። አሴራ ኮቻ ካለይ ኦክራና ናኣ ፓግኤላ።
NUM 2:28 ኤንታ ጩጋ ታይቦይ 41,500.
NUM 2:29 እያፐ ካልድ ንፍታለመ ኮቻይ ዱንካኔስ። ንፍታለመ ኮቻ ካለይ ኤናና ናኣ አክራ።
NUM 2:30 ኤንታ ጩጋ ታይቦይ 53,400
NUM 2:31 ዳነ ባጋን ዱንካንዳ ኦላንቾታ ታይቦይ 157,600. እስራኤለ አሳይ ጉታ የድድ ብያ ዎደ ዉርሰꬃን ከየይ ኤንታ።
NUM 2:32 ባንታ ኮቻን ኮቻን ሻከትድ ታይበትዳ እስራኤለ ኦላንቾታ ታይቦይ 603,550.
NUM 2:33 ሽን ጎዳይ ሙሰ ኪትዳይሳዳ፥ ሌወት ሀራ እስራኤለ አሳራ ታይበትቦኮና።
NUM 2:34 እስራኤለ አሳይ፥ ጎዳይ ሙሰ ኪትዳባ ኡባ ኦꬅዶሶና። ኤንቲ ባንታ ማላ ካልድ ዱንካንዶሶና፤ ቃስ ባንታ ኮቻነ ባንታ ሶ አሳ አሳ ካልድ ከዮሶና።
NUM 3:1 ጎዳይ ሲና ዙማ ቦላ ሙሰራ ኦደትያ ዎደ ደእያ አሮናነ ሙሰ ሶ አሳይ ሀይሳፈ ካልድ ፃፈትዳይሳ።
NUM 3:2 አሮና አደ ናይታ ሱንꬃይ፥ ባይራይ ናዳባ፥ ካለይ አብዮዳ፥ አላዛራነ እታማራ።
NUM 3:3 ሄ አሮና አደ ናይት ኡባይ፥ ካህነ ግድድ ኦꬃናዉ ትየትድ ሹመትዶሶና።
NUM 3:4 ሽን ኤንታ ግዶፈ ናዳበይነ አብዮድ ሲና መላ ቢታን ጎዳ ስንꬃን ጌሽ ግዶና ታማን ያርሾ ያርሽድ ሀይቅዶሶና። ኤንታዉ ናእ ባዋ። ሄሳ ግሾ፥ ኤንታ አዋይ አሮን ፓፃ ደእዳ ላይꬃ ኡባን አላዛርነ እታማራ ፃላል ካህነ ግድድ ኦꬅዶሶና።
NUM 3:5 ጎዳይ ሙሰኮ፥
NUM 3:6 “ሌወ ኮቻታ ኤሀዳ ካህንያ አሮና ማዳና መላ ኤንታ እያ ስን ሺሻ።
NUM 3:7 ኤንቲ አሮናነ እስራኤለ ማባራ ኡባ ጌሻ ዱንካንያ ስንꬃን ዱማ ዱማ ኦሶ ኦꬅድ ማዶ።
NUM 3:8 ኤንቲ ጌሻ ዱንካንያ ግዶን ደእያ ሚሸ ኡባ አዋተꬃን አይሶ። እስራኤለ አሳ ግሾ ጌሻ ዱንካንያ ግዶን ኦሶ ኡባ ኤንቲ ኦꬆና።
NUM 3:9 አሮናነ እያ አደ ናይታ ማዳና መላ ሌወታ ሹማ። ኤንቲ እስራኤለ አሳ ግዶፈ ሻከትድ አሮና ማዳና መላ እመትዶሶና።
NUM 3:10 አሮናነ እያ አደ ናይታ ካህነ ኦꬃዳ ሹማ። ኤንታፈ ሀራ አስ ኦንካ ጌሻ ዱንካንያኮ ሺቅኮ ሀይቆ” ያግስ።
NUM 3:11 ቃስ ጎዳይ ሙሰኮ፥
NUM 3:12 “ታኒ እስራኤለን የለትያ ባይራ አደ ናይታ ግሾ ሌወታ ኤካስ። ሌወት ታባ።
NUM 3:13 አይስ ጊኮ፥ ባይራ የለትዳ ኡባይ ታባ። ታ ግብፀ ቢታን ባይራ የለትዳ ኡባ ዎꬍዳ ጋላሳን፥ እስራኤለን ባይራ የለትዳባ ኡባ አሰ ግድን፥ መሄ ግድን፥ ታዉ ዱማያስ። ኤንቲ ታባ ግዳና። ታኒ ጎዳ” ያግስ።
NUM 3:14 ቃስካ ጎዳይ ሙሰኮ ሲና መላ ቢታን፥
NUM 3:15 “ሌወታ ኤንታ ኮቻን፥ ቃስ ኤንታ ሶ አሳን አሳን ታይባ። የለትን እስ አጌናነ እያፐ ቦላ ግድዳ አደ ናይታ ኡባ ታይባ” ያግስ።
NUM 3:16 ያትን ጎዳይ ኪትዳይሳዳ ሙሰይ ኤንታ ታይብስ።
NUM 3:17 ሌወ አደ ናይት ገድሶና፥ ቃሀታ ማራራ።
NUM 3:18 ገድሶና አደ ናይት ልብናነ ሳመአ ጌተቶሶና።
NUM 3:19 ቃሃታ አደ ናይት አምራማ፥ ይዝሃራ፥ ከብሮናነ ኡዝኤላ።
NUM 3:20 መራራ አደ ናይት ማህላነ ሙሳ ጌተቶሶና። ሌወታ ማይዛት ሀይሳታ።
NUM 3:21 ናምኡ ገድሶና ኮቻት ልብናነ ስምአ።
NUM 3:22 የለትን እስ አጌናነ እያፐ ቦላ ግድዳ አደ ናይታ ታይቦይ 7,500.
NUM 3:23 ገድሶና ኮቻት ጌሻ ዱንካንያፐ ጉየን ዉሎሀ ባጋን ዱንካንዶሶና።
NUM 3:24 ገድሶና ኮቻ ሶ አሳ ሀላቃይ ላኤላ ናኣ ኤልያሳፋ።
NUM 3:25 ገድሶና ኮቻስ ጌሻ ዱንካንያ ቦላ ደእያ አዋተꬃይ፥ ዱንካንያ፥ ጋꬃ ካማ፥ ካረ ካማ፥ ዉላ ማጋራጁዋ፥
NUM 3:26 ዱንካንያ ዩሾን ደእያ ዳባባ ማጋራጁዋ፥ ያርሾ በሳ ማጋራጁዋ፥ ዳባባ ዉላ ማጋራጁዋ፥ ዎዶሮታነ እያን ጎኤትያ ሚሸታ ኡባ አዋተꬃን አይሶሶና።
NUM 3:27 ቃሃታ ኮቻት አምራማ፥ ይዝሃራ፥ ከብሮናነ ኡዝኤላ።
NUM 3:28 የለትን እስ አጌናነ እያፐ ቦላ ግድዳ አደ ናይታ ታይቦይ 8,600. ቃሃታ ኮቻት ጌሻ ዱንካንያ አዋተꬃን ናጎሶና።
NUM 3:29 ቃሃታ ኮቻት ጌሻ ዱንካንያፐ ዱገሀ ባጋራ ዱንካንዶሶና።
NUM 3:30 ቃሃታ ኮቻ ካለይ ኡዝኤላ ናኣ ኤልዛፋና።
NUM 3:31 ኤንቲ ታቦትያ፥ ፃርጴዛ፥ ፆምፐ ዎꬅያ ኮጫ፥ ያርሽሶ በሳ፥ ካህነት ጎኤትያ ጌሻ ዱንካንያ ሚሸታ፥ ኡባፈ ጌሻ በሳ ገልያ ዉላ ቦላ ደእያ ማጋራጁዋ አዋተꬃን አይሶ።
NUM 3:32 ሌወታ ሀላቃይ ካህንያ አሮና ናኣ አላዛራ። እ ጌሻ በሳን ኦይሳታስ ሹማ።
NUM 3:33 መራራ ኮቻት ማህላነ ሙሳ።
NUM 3:34 የለትን እስ አጌናነ እያፐ ቦላ ግድዳ አደ ናይታ ታይቦይ 6,200.
NUM 3:35 መራራ ኮቻ ካለይ አብካላ ናኣ ዙርኤላ። መራራ ኮቻይ ጌሻ ዱንካንያፐ ፑደሀ ባጋራ ዱንካንዶሶና።
NUM 3:36 መራራ ኮቻይ ዱንካንያ ቱቀታ፥ ልዮታ፥ ቱሳታነ ቱሳት ኤቅያ ገዳታ፥ ሄሳዳካ ግዶን ኮሽያ ሚሸታ ኡባ ኤንቲ አዋተꬃን አይሶሶና።
NUM 3:37 ጉጅድካ፥ ዱንካንያ ዩሾን ደእያ ዳባባ ቱሳታነ ኤንታ ገዳታ፥ ꬍሸታነ ዎዶሮታ አዋተꬃን አይሶሶና።
NUM 3:38 ጌሻ ዱንካንያ ስንꬃን ዶሎሀ ባጋራ ሙሰይ፥ አሮንነ እያ አደ ናይት ዱንካንዶሶና። ጌሻ ዱንካንያ ግዶን እስራኤላ አሳ ግሾ ኦሰትያ ኦሶ ኡባ ኤንቲ አዋተꬃን አይሶሶና። ሀራ አስ ጌሻ ዱንካንያኮ ሺቅኮ ሀይቆ።
NUM 3:39 ጎዳይ፥ ሙሰነ አሮና ኪትዳይሳ መላ እስ አጌናነ እያፐ ቦላ ግድዳ ሌወታ አደ ናይታ ታይቦይ 22,000.
NUM 3:40 ጎዳይ ሙሰኮ፥ “የለትን እስ አጌናነ እያፐ ቦላ ግድዳ እስራኤለ ባይራ አደ ናይታ ታይባዳ ኤንታ ሱንꬃ ፃፋ።
NUM 3:41 እስራኤለ ባይራ አደ ናይታ በሳን ሌወታ፥ ቃስ እስራኤለ ባይራ መህያ በሳን ሌወታ ባይራ መህያ ታዉ ኤካ። ታኒ ጎዳ” ያግስ።
NUM 3:42 ጎዳይ ሙሰ ኪትዳይሳዳ እስራኤለን ባይራ የለትዳ ኡባ ታይብስ።
NUM 3:43 የለትን እስ አጌናነ እያፐ ቦላ ግድዳ ባይራ አደ ናይታ ታይቦይ 22,273.
NUM 3:44 ጎዳይ ሙሰኮ፥
NUM 3:45 “እስራኤለ ባይራ አደ ናይታ በሳን ሌወታ ታዉ ዱማያ። ቃስ እስራኤለ ባይራ መሄታ በሳን ሌወታ ባይራ መህያ ታዉ ዱማያ፤ ታኒ ጎዳ።
NUM 3:46 እስራኤለ ባይራ አደ ናይታ ታይቦይ ሌወታ ባይራ አደ ናይታ ታይቡዋፐ 273 አꬍያ ግሾ ሄ አትዳይሳታ ታዉ ዎዛ።
NUM 3:47 እሱዋስ እሱዋስ ጌሻ ዱንካነን ኤረትዳ ምዛነን እቻሹ ብራ ሳንትመን ዎዛ።
NUM 3:48 ሄ ዎዞ ሚሽያ አሮናስነ እያ አደ ናይታስ እማ” ያግስ።
NUM 3:49 ፓላህዳይሳታ ዎዞ ሚሽያ ሙሰይ ሺሽስ።
NUM 3:50 ጌሻ ዱንካንያ ምዛንያ ልከን እስራኤለ ባይራ አደ ናይታ ዎዞ ሚሽያ 1,365 ብራ ሳንትመ ኤክስ።
NUM 3:51 ጎዳይ ኪትዳይሳዳ ሙሰይ ዎዞ ሚሽያ አሮናስነ እያ አደ ናይታስ እሚስ።
NUM 4:1 ጎዳይ ሙሰነ አሮና ሀይሳዳ ያግስ፤
NUM 4:2 “ሌወ ኮቻታፐ ቃሃታ ኮቻታነ ኤንታ ሶ አሳ አሳ ሻካዳ ታይባ።
NUM 4:3 ላይꬅ 30-50 ጋክዳ አደ ኡባ ጌሻ ዱንካንያን ኦꬃናዉ ዳንዳኤይሳታ ታይባ።
NUM 4:4 ቃሃታ ኮቻት ጌሻ ዱንካንያን ኦꬃና ኦሶይ ዱንካንያን ጎኤትያ ጌሻ ሚሸታ አዋተꬃን ናጎ።
NUM 4:5 “አሳይ ጉታፐ ባናዉ ደንድያ ዎደ አሮንነ እያ አደ ናይት ጌሻ ዱንካንያ ግዶ ገልድ፥ ጫቆ ታቦትያ ስንꬃን ደእያ ማጋራጁዋ ዎꬍስድ ሄ ጫቆ ታቦትያ እያራ ፃፆ።
NUM 4:6 ሄ ካማ ቦላ ሊቆ ጋልባ ካሞ፤ እያ ቦላ ጉጅድ ካሎሰ ጫርቀ ካሞ፤ ቶክያ ካሶታ ሳጋዮታን አꬆ።
NUM 4:7 “ጎዳስ ሺቅያ ኡይꬃ ዎꬅያ ፃርጴዛ ቦላ ካሎሰ ጫርቀ ካሞ። ፃርጴዛ ቦላ ሳነታ፥ ጭልፓታ፥ ፁአታነ ዎይነ ኡሻ ያርሹዋ ዱቅያ ኦቶታ ዎꬆና። ኡይꬃይ ኡባ ዎደ ፃርጴዛ ቦላ ደኦ።
NUM 4:8 ሄ ኡባ ቦላ ዞኦ ጫርቀ ካምድ እያ ቦላ ቃስ ሊቆ ጋልባ ካሞ፤ ሄሳፈ ካልድ ቶክያ ካሶታ ሳጋዮታን አꬆ።
NUM 4:9 “ካሎሰ ጫርቀ ኤክድ ፆምፐ ዎꬅያ ኮጫ፥ እያ ፆምፐታራ፥ እያ ቃጰታራ፥ ብዶ ከስያ ከረታራነ ዛይተ ትግያ ፃሮታራ ኡባ ካሞ።
NUM 4:10 ያትድ እያ ሚሸታ ኡባ ሊቆ ጋልባን ካምድ ቶክያ አርሳ ቦላ ዎꬆና።
NUM 4:11 “ካልድ ዎርቃ ያርሾ ሳፅንያ ካሎሰ ጫርቀን ካሞ፤ ቃስ እያ ቦላራ ሊቆ ጋልባ የጎ። ያትድ ቶክያ ካሶታ ሳጋዮታን አꬆ።
NUM 4:12 ሄሳዳካ፥ ጌሻ ዱንካንያ ግዶን ጎኤትያ ሚሸታ ኡባ ካሎሰ ጫርቀን ፃፆ፤ እያ ቦላ ሊቆ ጋልባ የግድ፥ ቶክያ አልጋ ቦላ ዎꬆ።
NUM 4:13 “ናሰ ያርሾ በሳፈ ብዱዋ ፕትድ እያ ቦላ ኦቻ ቴራ ዳንያ ጫርቀ ካሞ።
NUM 4:14 ያርሾ በሳን ጎኤትያ ሚሸታ ኡባ፤ ታማ ጮጨታ፥ አሾ ቃጰታ፥ አካፋታነ ሃꬃ ከረታ እያ ቦላ ዎꬅድ፥ ሊቆ ጋልባ ካሞ። ያትድ ቶክያ ካሶታ ሳጋዮታን አꬆ።
NUM 4:15 አሮንነ እያ አደ ናይት፥ ጌሻባታነ እያን ጎኤትያ ጌሻ ሚሸታ ኡባ ካምዳፐ ጉየ እስራኤለ አሳይ ጉታፐ ደንድያ ዎደ ቃሃታ ኮቻይ ይድ ቶኮ። ሽን ኤንቲ ሀይቆና መላ ጌሻ ሚሸታ ቦቾፎ። ጌሻ ዱንካነይ በሳፈ ደንድያ ዎደ ቃሃታ ኮቻስ ደእያ አዋተꬃይ ሀይሳ።
NUM 4:16 “ካህንያ አሮና ናአይ አላዛር ፆምፐ ዛይትያ፥ ሳውያ እፃንያ፥ ያርሾ ካꬃነ ትዮ ዛይትያ፥ ሄሳዳካ ጌሻ ዱንካንያን ደእያ ዱማ ዱማ ጌሻ ሚሸታ ኡባ ቦላ አዋተꬅ ደኤስ” ያግስ።
NUM 4:17 ጎዳይ ሙሰኮነ አሮናኮ፥
NUM 4:18 “ቃሃታ ኮቻይ ሌወ ኮቻ ግዶፈ ሀይቅድ ꬋያና መላ ኦꬆፍተ።
NUM 4:19 ኡባፈ ጌሻ ሚሽያኮ ሺቅድ ሀይቆና መላ አሮንነ እያ አደ ናይት ጌሻ ዱንካንያ ግዶ ገልድ፥ ቆሃታ ኮቻይ ሁጰን ሁጰን ኦꬃና ኦሱዋነ ቶካና ቶሁዋ ሻክድ በሶ።
NUM 4:20 ቃሃታ ኮቻይ ሀይቆናዳ ጌሻ ሚሸታ በአናዉ ጉꬃ ዎደስካ ዱንካንያ ግዶ ገሎፖ” ያግስ።
NUM 4:21 ጎዳይ ሙሰኮ፥
NUM 4:22 “ሌወ ኮቻፈ ገድሶና ኮቻነ ኤንታ ሶ አሳ አሳ ሻካዳ ታይባ።
NUM 4:23 ላይꬅ 30-50 ጋክዳ አደ ኡባ ጌሻ ዱንካንያ ግዶን ኦꬃናዉ ዳንዳኤይሳታ ታይባ።
NUM 4:24 ገድሶና ኮቻት ኦꬃና ኦሶይ ሀይሳፈ ካልድ ደኤይሳ፤
NUM 4:25 ኤንቲ ጌሻ ዱንካንያ ጋꬃ ካማ፥ ካረ ካማ፥ ቦላራ የገትያ ሊቆ ዶአ ጋልባ፥ ገልያ ዉላ ቦላ ካቀትያ ማጋራጁዋ ቶኮ።
NUM 4:26 ሄሳዳካ ጌሻ ዱንካንያነ ያርሾ በሳ ዩሹዋን ደእያ ዳባባ ማጋራጆታ፥ ዳባባ ገልያ ዉላ ቦላ ደእያ ገሸታ፥ ዎዶሮታነ እያዉ ጎኤትያ ሚሸታ ኡባ ቶኮ። ገድሶና ኮቻይ ሚሸታን ኦꬃናዉ በሲያ ኦሶ ኡባ ኦꬆ።
NUM 4:27 ቶሆ ግድን፥ ሀራ ኦሶ ግድን፥ ኤንቲ ኦꬅያ ኦሶ ኡባ አሮንነ እያ አደ ናይት ኤንታ ካል ኦስሶ። ኤንቲ ቶካናዉ በሲያባታ ኡባ ነ አዋተꬃን ኤንታዉ ግሻ።
NUM 4:28 ጌሻ ዱንካንያ ግዶን ገድሶና ኮቻይ ኦꬃና ኦሶይ ሀይሳ። ኤንታ ኦሱዋ ካህንያ አሮና ናአይ እታማር ካልድ ኦስሶ።
NUM 4:29 “ሌወ ኮቻፈ መራራ ኮቻነ ኤንታ ሶ አሳ አሳ ሻካዳ ታይባ።
NUM 4:30 ላይꬅ 30-50 ጋክዳ አደ ኡባ ጌሻ ዱንካንያ ግዶን ኦꬃናዉ ዳንዳኤይሳታ ታይባ።
NUM 4:31 “ኤንቲ ዱንካንያ ቱቀታ፥ ልዮታ፥ ቱሳታ፥ ዱንካንያ ገዳታ፥
NUM 4:32 ዱንካንያ ዩሾን ዳባባን ኤቅያ ቱሳታ፥ ሄ ቱሳታ ገዳታ፥ ꬍሸታ፥ ዎዶሮታነ እያን ኮሽያ ሚሸታ ኡባ ቶኮ። እሶይ እሶይ ቶካናዉ በሲያ ሚሽያ እያ ሱንꬃን ሻካዳ ግሻ።
NUM 4:33 ጌሻ ዱንካንያ ግዶን መራራ ኮቻይ ኦꬃና ኦሶይ ሀይሳ። ኤንቲ ኦꬃና ኦሶ ኡባ ካህንያ አሮና ናኣ እታማር አዋተꬃን ካልድ ኦስሶ” ያግስ።
NUM 4:34 ሙሰይ፥ አሮንነ እስራኤለ ሀላቃት ቃሃታ ኮቻ ኤንታ ሶ አሳን አሳን ሻክድ ታይብዶሶና።
NUM 4:35 ላይꬅ 30-50 ጋክዳ አደ ኡባ ጌሻ ዱንካንያ ግዶን ኦꬃናዉ ዳንዳኤይሳታ ታይብዶሶና።
NUM 4:36 ኤንታ ታይቦይ 2,750.
NUM 4:37 ጎዳይ ሙሰ ኪትዳይሳዳ ጌሻ ዱንካንያ ግዶን ኦꬃና መላ ሙሰይነ አሮን ታይብዳ ቃሃታ ኮቻት ሀይሳታ።
NUM 4:38 ገድሶና ኮቻት ባንታ ሶ አሳን አሳን ሻከትድ ታይበትዶሶና።
NUM 4:39 ላይꬅ 30-50 ጋክዳ አደት ኡባ ጌሻ ዱንካንያ ግዶን ኦꬃናዉ ዳንዳኤይሳታ
NUM 4:40 ታይቦይ 2,630.
NUM 4:41 ጎዳይ ሙሰ ኪትዳይሳዳ ጌሻ ዱንካንያ ግዶን ኦꬃና መላ ሙሰይነ አሮን ታይብዳ ገድሶና ኮቻት ሀይሳታ።
NUM 4:42 መራራ ኮቻት ባንታ ሶ አሳን አሳን ሻከትድ ታይበትዶሶና።
NUM 4:43 ላይꬅ 30-50 ጋክዳ አደት ኡባይ፥ ጌሻ ዱንካንያ ግዶን ኦꬃናዉ ዳንዳኤይሳታ
NUM 4:44 ታይቦይ 3,200.
NUM 4:45 ጎዳይ ሙሰ ኪትዳይሳዳ ጌሻ ዱንካንያ ግዶን ኦꬃና መላ ሙሰይነ አሮን ታይብዳ መራራ ኮቻት ሀይሳታ።
NUM 4:46 ሙሰይ፥ አሮንነ እስራኤለ ሀላቃት ሌወታ ኡባ ኤንታ ኮቻንነ ኤንታ ሶ አሳን አሳን ሻክድ ታይባ።
NUM 4:47 ላይꬅ 30-50 ጋክዳ አደት ኡባይ፥ ጌሻ ዱንካንያ ግዶን ኦꬃናዉኑነ ሚሸታ ቶካናዉ ዳንዳእያ፥
NUM 4:48 ሌወታ ታይቦይ 8,580.
NUM 4:49 ጎዳይ ሙሰ ኪትዳይሳዳ፥ ኤንቲ ሁጰን ሁጰን ታይበትዶሶና። ሄሳዳካ ጎዳይ ሙሰ ኪትዳይሳዳ ኤንቲ ኦꬃና ኦሶይነ ቶካና ቶሆይ እመትስ።
NUM 5:1 ጎዳይ ሙሰኮ፥
NUM 5:2 “እስራኤለ አሳይ ባሮ ሀርገን ኦይከትዳ አስ ዎይኮ አሳተꬃፈ ጎግያባይ ደእያ አስ ዎይኮ አሀ ቦችድ ቱንዳ አስ ኦናካ ባንታ ጉታፐ ከሳና መላ ኪታ።
NUM 5:3 ታ ኤንታ ግዶን ደእያ ጉታ ቱንሶና መላ ሀ ጌሽ ግዶና አሳት ማጫ ግድን አደ ኤንታ ግዶፈ ከሳዳ ጎዳ” ያግስ።
NUM 5:4 ጎዳይ ሙሰ ኪትዳይሳዳ እስራኤለ አሳይ ኤንታ ኡባ ጉታፐ ከስድ ጎድዶሶና።
NUM 5:5 ጎዳይ ሙሰኮ፥
NUM 5:6 “ኔኒ እስራኤለ አሳስ ሀይሳ ኦዳ፤ አደ ግድን ዎይኮ ማጭ ግድን ኦንካ ጎዳስ አማነቶና እፅድ ሀራ አስ ናቅኮ ሄ ኡራይ ባላ ኦꬅስ።
NUM 5:7 እ ባ ናጋራ ፓፆ፤ ባ ናጋራ አጭያ ኩመꬃ አጫ ቦላ ፄታፐ ላታሙ ኩሸ ጉጅድ እ ናቅዳ ኡራስ ጭጎ።
NUM 5:8 ሽን ሄ ናቀትዳ ኡራይ ሀይቅዳባ ግድኮ፥ አጫ ኤካናዉ ማታ ዳቦይ እያዉ ꬋይኮ፥ ሄ አጫይ ጎዳስ ግድድ ካህንያስ እመቶ። ሄ አጫ ቦላ ጉጅድ እያ ናጋራ አቶተꬃስ ቆሆ ያርሾስ ግድያ ማራዘ ዶርስ እሞ።
NUM 5:9 ቃስ እስራኤለ አሳይ ጎዳስ እምያ ጌሻ እሞ ኡባይ ሄ ካህንያስ ግዶ።
NUM 5:10 እስ እስ አስ እምያ ጌሻ እሞታይ ሄ ኡራባ፥ ሽን ካህንያስ እምኮ ሄ እሞታይ ካህንያሳ” ያግስ።
NUM 5:11 ጎዳይ ሙሰኮ፥
NUM 5:12 “እስራኤለ አሳስ ያጋዳ ኦዳ፤ እስ አድያ ማችያ ካረ ሄመታዳ እያዉ አማነቶና እፅኮ፥
NUM 5:13 ሀራ አደራ አቅኮ፥ ቃስ ሄሳ እያ ባ አዝናፐ ቆስኮ፥ እያ ላይማትሽን በእዳ ማርክ ባይናባ ግድኮ፥
NUM 5:14 እ አዝናይ እዮ ቱናሱ ግድ ስꬍኮ፥ ዎይኮ እያ ቱኖና ደእሽን እ ባ ማችዉ ስꬍኮ፥
NUM 5:15 ሄ አደይ ባ ማችዉ ካህንያኮ ኤፎ። እ ግሾ ያርሻናዉ እስ ክሎ ግራመ ባንጋ ꬊለ ኤፎ። ሄ አደይ ባ ማችዉ ስꬍዳ ግሾ፥ እ ቆሁዋ ቆንጭስያ ካꬃ ያርሾ ግድያ ግሾ፥ ꬊልያ ቦላ ዛይተ ትጎፖ፤ እፃነ እያ ቦላ ዎꬆፎ።”
NUM 5:16 ካህነይ ሄ ማጫስዉ ጎዳ ስንꬃን ኤሶ።
NUM 5:17 ጌሻ ሃꬅ ከረን ኤኮ። ጌሻ ዱንካንያ ዉይግያፐ ቢታ ኤክድ ሄ ሃꬃን ጉጆ።
NUM 5:18 ሄ ማጫስዉ ጎዳ ስንꬃን ኤሶ፤ ሄ ማጫሰ ሁጵያ ብልድ ስꬍዳ ግሾ ያርሸትያ ቆሁዋ ቆንጭስያ ካꬃ ያርሾ እ ኩሸን ዎꬆ፤ ቃስ ካህነይ ባ ኩሸን ባደꬅ ኤህያ ጫሞ ሃꬃ ከረን ኦይኮ።
NUM 5:19 ሄሳፈ ጉየ ማጫስዉ ያግድ ጫቅሶ፤ “ኔኒ ሀራ አደራ አቃቦናባ ግድኮ፥ ነናተꬃ ቱንሳቦናባ ግድኮ፥ ባደꬅ ኤህያ ሃꬃይ ነዉ ጎመ ግዶፖ።
NUM 5:20 ሽን ኔኒ ነ አዝና አጋዳ ሀራ አደራ አቃዳ ቱንዳባ ግድኮ፥
NUM 5:21 ጎዳይ ነ የሎ ኬꬃ ጉንድስድ፥ ነ ኡሉዋ ጋቢስድ ነ አሳ ስንꬃን ነና ባደትዳባ ኦꬆ።
NUM 5:22 ሀ ባደꬅ ኤህያ ሃꬃይ ነ ኡሉዋን ገልድ ነ ኡሉዋ ጋቢሶ፤ ነ የሎ ኬꬃ ጉንድሶ” ያግድ ጫቅሶ። ማጫስያ፥ “አምንእ፥ ሄስ ታና ጋኮ” ያጎ።
NUM 5:23 “ሀይሳፈ ጉየ፥ ካህነይ ሄ ባደꬃ ፃፎ፤ ሄ ፃፍዳይሳ ከርያን ደእያ ሃꬃን ሜጮ።
NUM 5:24 ቃንገꬅ ኤህያ ሃꬃ ማጫስዉ ኡሻናፐ ስን፥
NUM 5:25 ካህነይ ማጫሰ ኩሸፐ ያርሾ ꬊልያ ኤክድ፥ ደንꬆ ያርሾ ኦꬅድ ጎዳስ ያርሾ።
NUM 5:26 ካህነይ ያርሾ ካꬃፈ ዞለ ኤክድ ባላ ቆንጭስያ ያርሾ ኦꬅድ ያርሾ በሳን ፁጎ። ሄሳፈ ጉየ፥ ማጫስዉ ሄ ሃꬃ ኡሾ።
NUM 5:27 እያ ባ አዝናስ አማነቶና እፃዳ ቱንዳባ ግድኮ ባደꬃ ሃꬃይ እ ኡሉዋን ጫሞ ሳሆ መꬎ። እ ኡሎይ ጋባና፤ እ የሎ ኬꬃይካ ጉንዳና፤ እያ ባ አሳ ግዶን ባደትዳሮ ግዳና።
NUM 5:28 እያ ቱናቦናባነ ፅሎ ማጫስ ግድኮ፥ እያ ጌሽ ግዳና፤ ናአ የላናዉ ዳንዳአዉሱ።
NUM 5:29 “እስ አስ ባ ማችዉ ላይማታሱ ግድ ስꬍኮ ዎይኮ ቃናትኮ ያርሾ በሲ ኤህድ እዮ ኤሶ። ካህነይ ሄ ዎጋ ኡባ እ ቦላ ፖሎ።
NUM 5:31 አዝናይ፥ ቆሆይ ባይናባ ግዳና፥ ሽን ማችያ ባ ናጋራ ጋሶን ጋክያ ዋየ ኡባ ቶካና” ያግስ።
NUM 6:1 ጎዳይ ሙሰኮ፥
NUM 6:2 “እስራኤለ አሳ ሀይሳዳ ጋዳ ኪታ፤ አደ ግድን ዎይኮ ማጫ ባና ጎዳስ ዱማይድ ናዝራወ ግዳናዉ ቃንግኮ፥
NUM 6:3 ዎይነ ዎይኮ ሀራ ማꬆይያ ኡሽ ኡዮፖ። ጫላባነ ማꬆያባ ኡዮፖ፤ ዎይነ ቴራ፥ ትያነ መላ ሞፖ።
NUM 6:4 እ ባና ጎዳስ ዱማይዳ ዎደ ኡባን፥ ዎይነ አይፍያ ግድን ፖቁዋ ግድን ዎይኮ ኮቻ ግድን ሞፖ።
NUM 6:5 “እ ባና ጎዳስ ዱማይዳ ዎደ ኡባን፥ ባ ሁጵያ ሜደቶፎ ዎይኮ ቃንፀቶፎ። እ ባ ሁጰ ብናና አዱስድ ድቾ። እ ባና ጎዳስ ዱማይዳ ዎደይ ፖለታና ጋካናዉ ጌሽ ግዳናዉ ኮሼስ።
NUM 6:6 እ ባና ጎዳስ ዱማይዳ ዎደን ኡባን አሀኮ ሺቆፖ።
NUM 6:7 እ ባና ዱማይዳይሳ ኤርሰይ እያ ሁጵያ ግድያ ግሾ፥ እያ አዋይ ዎይኮ እያ አይያ ዎይኮ እያ እሻይ ዎይኮ እያ ምችያ ሀይቅኮ ኤንታ አሀ ቦችድ ባና ቱንሶፖ።
NUM 6:8 እ ባና ጎዳስ ዱማይዳ ዎደ ኡባን ጎዳስ ጌሽ።
NUM 6:9 “አስ እያ ማታን ቆፖና ሀይቅኮ፥ ጎዳስ ጌሽ ግድዳ ባ ሁጵያ ቱንስኮ ላፑን ጋላስ ጋምእድ ባ ሁጵያ ሜደቶ።
NUM 6:10 ሆስፑንꬃ ጋላሳን ናምኡ ሆለታ ዎይኮ ናምኡ ኩራቾታ ጌሻ ዱንካንያ ፐንገን ደእያ ካህንያስ ኤሆ።
NUM 6:11 ናዝራወይ አሀ ቦችድ ቱንዳ ግሾ ናጋራፐ እያ ጌሻናዉ ካህነይ ሆለታፐ እሱዋ ናጋራ ያርሾ፥ ሀንኩዋ ቃስ ፁሳ ያርሾ ኦꬅድ ያርሾ። ሄ ጋላስ እ ባ ሁጵያ ዎጋዳ ዛሪድ ጎዳስ ጌሾ፤
NUM 6:12 እ ባና ዛሪድ ጎዳስ ዱማዮ። ያትድ እስ ላይꬃ ማራዘ ናቆ ያርሾ ኦꬅድ ያርሾ። እ ጎዳስ ዱማይዳ ሁጰይ ቱንዳ ግሾ፥ ካሰ እ ባና ጎዳስ ዱማይድ ደእዳ ዎደይ ታይበተና።
NUM 6:13 “እስ ናዝራወይ ባ ቃንገꬃ ዎድያ ኦንግዳ ዎደ ፖላና ዎጋይ ሀይሳ፤ ጌሻ ዱንካንያ ፐንገ ብድ፤
NUM 6:14 ቦረይ ባይና እስ ላይꬃ ዶርሳ ኡርገ ፁሳ ያርሾስ፥ እስ ላይꬃ ኡዞ ዶርስ ናጋራ ያርሾስ፥ እስ ማራዘ እስፈተꬃ ያርሾስ ሄ በሳ ኤሆ።
NUM 6:15 ቃስ ካꬃ ያርሾነ ኡሻ ያርሾ ኤንታራ እስፈ ያርሻናዉ ኤሆ። ሄ ካꬃ ያርሾይ እርሾይ ገልቦና ሎኦ ꬊለ ሻማሆ ዛይተራ ኡከትዳ ኦርደ ኡይꬅነ ሻማሆ ዛይተን ትየትዳ ሌኦ ጋይታን ኤሆ።
NUM 6:16 “ካህነይ ሄ ኡባ ናጋራ ያርሾነ ፁሳ ያርሾ ኦꬅድ ጎዳስ ያርሾ።
NUM 6:17 ካህነይ ማራዝያ ጋይታን ደእያ ኡይꬃራ ጎዳስ እስፈተꬃ ያርሾ ኦꬅድ ያርሾ፤ ካልድ ካꬃ ያርሹዋነ ኡሻ ያርሹዋ ያርሾ።
NUM 6:18 ናዝራወይ ጎዳስ ዱማይዳ ባ ሁጵያ ጌሻ ዱንካንያ ፐንገን ሜደትድ፥ ብናና እስፈተꬃ ያርሾይ ኤፅያ ታማን የጎ።
NUM 6:19 “ናዝራወይ ባ ሁጵያ ሜደትዳፐ ጉየ፥ ካህነይ ዶይሰትዳ ማራዝያ ገዳ አሹዋ ጋይታን ደእያ ኦርደ ኡይꬃፈነ ሌኦ ኡይꬃፈ ኤክድ፥ ናዝራውያ ኩሸን ዎꬆ።
NUM 6:20 ያትድ ካህነይ ሄ ኡባ ዩሾ ያርሾ ኦꬅድ፥ ጎዳስ ያርሾ። ሄ ኡባይ ካህንያ ግሾ ግድያ አንጋሱዋራነ ገዳራ ካህንያስ ጌሻ ያርሾ ግዴስ። ሄሳፈ ጎዳስ ናዝራወይ ዎይነ ኡሻ ኡዮ።
NUM 6:21 ህዛ ጎዳስ ባና ዱማይዳ ናዝራወይ ኦꬃና መላ እመትዳ ዎጋይ ሀይሳ። ሽን ናዝራወይ ያርሻናዉ ኮሽያ ያርሾታፐ አꬅድ እማናዉ ቃንግዳባ ግድኮ፥ ባ ቃንገꬃ ጋꬃናዉ ኮሼስ” ያግስ።
NUM 6:22 ጎዳይ ሙሰኮ፥
NUM 6:23 “አሮንነ እያ አደ ናይት እስራኤለ አሳ አንጅያ ዎደ ሀይሳዳ ያግድ አንጅተ ያጋ፤
NUM 6:24 “ ‘ጎዳይ ህንተና አንጆ፥ ጎዳይ ህንተና ናጎ፤
NUM 6:25 ጎዳይ ባ ሶምኡዋ ህንተዉ ፖእሶ፤ እ ህንተዉ ቃቶ፤
NUM 6:26 ጎዳይ ባ ኬሀ አይፍያን ፄሎ፤ እ ህንተዉ ሳሮተꬅ እሞ’ ያግድ አንጅተ” ያጋ።
NUM 6:27 “ኤንቲ እስራኤለ አሳ ታ ሱንꬃን አንጅያ ዎደ ታ ኤንታ አንጃና” ያግስ።
NUM 7:1 ሙሰይ ጌሻ ዱንካንያ ቶክድ ኦንግዳ ዎደ ሄ ዱንካንያነ እያ ሚሽያ፥ ያርሾ በሳነ እያ ሚሽያ ኡባ ዛይተን ትይድ ጌሽስ።
NUM 7:2 ሄሳፈ ጉየ፥ እስራኤለ አሳ ኮቻን ኮቻን ታይብድ ካለꬅያ ዎደ ሀላቃ ግድዳ ኡባይ፥
NUM 7:3 ጎዳስ እሞታ ሺሽዶሶና። ኤንቲ እምዳ እሞታይ ናምኡ ሀላቃ ሱንꬃን እስ ፓራ ጋረ፥ ቃስ እስ እስ ሀላቃ ሱንꬃን እስ እስ ቦሩ ኦꬅድ፥ ኡሱፑን ጋረታነ ታማነ ናምኡ ቦራታ ጌሻ ዱንካንያ ኤህዶሶና።
NUM 7:4 ጎዳይ ሙሰኮ፥
NUM 7:5 “ጌሻ ዱንካንያ ኦሱዋስ ጎአና መላ ኔኒ ሄ እሞታ ኤንታፈ ኤካዳ፥ ኤንታ ኦሱዋስ ኦሱዋስ ኮሸይሳዳ ሻካዳ ሌወታስ እማ” ያግስ።
NUM 7:6 ሄሳ ግሾ፥ ሙሰይ ጋረታነ ቦራታ ኤክድ ሌወታስ እሚስ።
NUM 7:7 ገድሶና ኮቻስ ኮሸይሳዳ ሻክድ ኤንታ ኦሱዋስ ናምኡ ጋረታነ ኦይዱ ቦራታ እሚስ።
NUM 7:8 መራራ ኮቻስ ኮሸይሳዳ ሻክድ፥ ኤንታ ኦሱዋስ ኡይዱ ጋረታነ ሆስፑን ቦራታ እሚስ። ኤንታ ኦሱዋ አዋተꬃን ካለይ ካህንያ አሮና ናኣ እታማራ።
NUM 7:9 ሽን ቃሃታ ኮቻ ኦሶይ ዱንካንያ ጌሻ ሚሸታ ሀሸን ቶሆ ግድያ ግሾ ሙሰይ ኤንታዉ ፓራ ጋረነ ቦሩ እምቤና።
NUM 7:10 ሙሰይ ያርሾ በሲ ጎዳስ ዱማይዳ ጋላስ ሀላቃት ያርሾ በሳ ስን ባንታ እሞታ ኤህዶሶና።
NUM 7:11 ጎዳይ ሙሰኮ፥ “እስ እስ ጋላስ እስ እስ ሀላቃይ ያርሾ በሲ ጎዳስ ዱማያናዉ ባ እሞታ እሞ” ያግስ።
NUM 7:12 ኮይሮ ጋላስ ባ እሞታ ኤህዳይ ይሁዳ ኮቻፈ አምናዳበ ናኣ ናአሶና።
NUM 7:13 ናአሶን ኤህዳ እሞታይ ጌሻ ዱንካነን ኤረትዳ ምዛነን 1,500 ግራመ ብራፐ ኦሰትዳ ፕጫ ሳነ፥ 800 ግራመ ብራፐ ኦሰትዳ ኦላትያ ሳነ፥ ናምኣካ ካꬃ ያርሾ ያርሻናዉ ዛይተራ ዋላከትዳ ሎኦ ꬊለ ኩምዳይሳ፤
NUM 7:14 ቃስ 110 ግራመ ዎርቃፈ ኦሰትዳ እፃነይ ኩምዳ ሻተ፤
NUM 7:15 ፁሳ ያርሾስ፥ እስ ዎፋኖ፥ እስ ማራዘ፥ እስ ላይꬃ ኡርገ ዶርስ፤
NUM 7:16 ናጋራ ያርሾስ እስ ኮለ፤
NUM 7:17 እስፈተꬃ ያርሾስ ናምኡ ቦራታ፥ እቻሹ ማራዘታ፥ እቻሹ ኮለታነ እቻሹ ኡርገ ዶርሳታ ኤህስ። ካልያ ሀንኮ ሀላቃትካ አምናዳበ ናአይ ናአሶን እምዳይሳዳ ባንታ እሞታ ኤህዶሶና።
NUM 7:18 ናምአንꬆ ጋላሳን ይሳኮራ ኮቻፈ ዙአራ ናአይ ናትናኤል ባ እሞታ ኤህስ።
NUM 7:24 ሄꬓንꬆ ጋላሳን ዛብሎና ኮቻፈ ሄሎና ናአይ ኤልኣብ ባ እሞታ ኤህስ።
NUM 7:30 ኦይዳንꬆ ጋላሳን ሮቤላ፥ ኮቻፈ ሻደኡራ ናአይ ኤልዙር ባ እሞታ ኤህስ።
NUM 7:36 እቻሻንꬆ ጋላሳን ስሞና ኮቻፈ ዙርሻዳያ ናአይ ሳሉምኤል ባ እሞታ ኤህስ።
NUM 7:41 ኡሱፑንꬆ ጋላሳን ጋደ ኮቻፈ ራጉኤላ ናአይ ኤልያሳፍ ባ እሞታ ኤህስ።
NUM 7:48 ላፑንꬃ ጋላሳን ኤፍሬማ ኮቻፈ አምሁዳ ናአይ ኤልሻማእ ባ እሞታ ኤህስ።
NUM 7:54 ሆስፑንꬃ ጋላሳን ምናሰ ኮቻፈ ፓዳዙራ ናአይ ጋማልኤል ባ እሞታ ኤህስ።
NUM 7:60 ኡዱፉንꬆ ጋላሳን ብንያመ ኮቻፈ ግዳኦና ናአይ አብዳን ባ እሞታ ኤህስ።
NUM 7:66 ታማንꬆ ጋላሳን ዳነ ኮቻፈ አምሳዳያ ናአይ አክኤዘር ባ እሞታ ኤህስ።
NUM 7:72 ታማነ እስንꬆ ጋላሳን አሴራ ኮቻፈ ኦክራና ናአይ ፓግኤል ባ እሞታ ኤህስ።
NUM 7:78 ታማነ ናምአንꬆ ጋላሳን ንፍታለመ ኮቻፈ ኤናና ናአይ አክራ ባ እሞታ ኤህስ።
NUM 7:84 ያርሾ በሳይ ትየትያ ዎደ ጎዳስ ዱማያናዉ እስራኤለ ሀላቃት ኤህዳ እሞታይ ሀይሳፈ ካልድ ደኤይሳ። ብራፐ ኦሰትዳ ታማነ ናምኡ ፕጫ ሳነታነ ኦላትያ ሳነታ፤ ዎርቃፈ ኦሰትዳ ታማነ ናምኡ እፃነይ ኩምዳ ሻተታ ኤህዶሶና።
NUM 7:85 እሶይ እሶይ 1,500 ግራመ ብራፐ ኦሰትዳ ፕጫ ሳነ፤ ቃስ እሶይ እሶይ 800 ግራመ ብራፐ ኦሰትዳ ኦላትያ ሳነ፥ ጌሻ ዱንካነን ኤረትዳ ምዛነን ሄ ኡባ 28 ክሎ ግራመ ኤህዶሶና።
NUM 7:86 እፃነይ ኩምዳ ታማነ ናምኡ ዎርቃ ሻተታ 1.4 ክሎ ግራመ ጌሻ ዱንካነን ኤረትዳ ምዛነን ሺሽዶሶና።
NUM 7:87 ፁሳ ያርሾስ ሺቅዳ መሄይ ካꬃ ያርሹዋራ ዎላ ታማነ ናምኡ ዎፋኖታ፥ ታማነ ናምኡ ማራዘ፥ ታማነ ናምኡ እስ ላይꬃ ኡርገ ዶርስነ፥ ታማነ ናምኡ ኮለታ ናጋራ ያርሾስ ሺሽዶሶና።
NUM 7:88 እስፈተꬃ ያርሾስ ላታማነ ኦይዱ ቦራት፥ ኡሱፑን ታሙ ማራዘታ፥ ኡሱፑን ታሙ ኮለታ፥ ኡሱፑን ታሙ እስ ላይꬃ ኡርገ ዶርሳታ ሺሽዶሶና። ጌሻ ዱንካንያ ዱማያናዉ ትያ ዎደ ሺቅዳ ያርሾት ሀይሳታ።
NUM 7:89 ሙሰይ ጎዳራ ኦደታናዉ ጌሻ ዱንካንያ ገልያ ዎደ ጫቆ ታቦትያ ካማ ቦላ ደእያ ናምኡ ክሩበታፐ ግዶን ግድድ ጎዳይ ኦድሽን ስእስ።
NUM 8:1 ጎዳይ ሙሰኮ፥
NUM 8:2 “አሮን ላፑን ፆምፐታ ኮጫ ቦላ ዎꬅያ ዎደ ፖኦይ ስንꬃ ባጋራ ደእያ ሄራ ፖእሳና መላ ኦꬅድ ዎꬆ ጋዳ ኦዳ” ያግስ።
NUM 8:3 ጎዳይ ሙሰ ኪትዳይሳዳ፥ አሮን ፆምፐታ ኮጫ ቦላ ዎꬅድ ስንꬃ ባጋራ ደእያ ሄራ ፖእሳና መላ ኦꬅስ።
NUM 8:4 ፆምፐ ዎꬅያ ኮጫይ፥ ጎዳይ ሙሰ በስዳይሳዳ ቶማፐ ብድ ቦላ ጪሻ ጋካናዉ ቆፀትዳ ዎርቃፈ ኦሰትስ።
NUM 8:5 ጎዳይ ሙሰኮ፥
NUM 8:6 “እስራኤለ አሳ ግዶፈ ሌወታ ሻካዳ ዎጋዳ ኤንታ ጌሻ።
NUM 8:7 ኔኒ ኤንታ ጌሻናዉ ሀይሳዳ ኦꬃ፤ ጌሽያ ሃꬃ ኤካዳ ኤንታ ቦላ ዉርፃ፤ ኤንቲ ባንታ አሳተꬃ ኡባ ሜደቶ፤ ባንታ ማኡዋ ሜጮ፤ ያንድ ኤንቲ ዎጋዳ ጌሽ ግዳና።
NUM 8:8 ካልድ ኤንቲ እስ ዎፋኖነ ካꬃ ያርሾስ ግድያ ዛይተራ ዋላሄትዳ ሎኦ ꬊለ ኤኮ፤ ቃስ ኔኒ ናጋራ ያርሾስ ሀራ እስ ዎፋኖ ኤካ።
NUM 8:9 ሄሳፈ ጉየ እስራኤለ አሳ ኡባ ሺሻዳ፥ ሌወታ ጌሻ ዱንካንያ ስን ኤሀዳ ኤሳ።
NUM 8:10 እስራኤለ አሳይ ኤንታ ሁጵያ ቦላ ባንታ ኩሽያ ዎꬆ።
NUM 8:11 ሌወት እስራኤለ አሳ ግዶፈ ታዉ ዱማትድ ኦꬃና መላ ዩሾ ያርሾ ኦꬅድ አሮን ታ ስን ሺሾ።
NUM 8:12 ሌወት ባንታ ኩሽያ ናምኡ ዎፋኖታ ሁጰን ዎꬆ። ሌወታ ናጋራ አቶተꬃስ እሱዋ ናጋራ ያርሾ፥ ቃስ ሀንኩዋ ፁሳ ያርሾ ኦꬃዳ ጎዳስ ያርሻ።
NUM 8:13 “ሌወታ ሻካዳ ታዉ ዱማያ፤ አሮናነ እያ አደ ናይታ ኤንታ ቦላ ሹማ።
NUM 8:14 ሄሳዳ ኦꬃዳ ሌወታ እስራኤለ አሳፐ ታዉ ዱማያ፤ ኤንቲ ታባ ግዳና።
NUM 8:15 “ኔኒ ኤንታ ጌሽዳፐነ ዱማይዳፐ ጉየ ሌወት ጌሻ ዱንካንያን ባንታ ኦሱዋ ኦꬃናዉ ዮ።
NUM 8:16 እስራኤለ አሳ ግዶፈ ኩመꬅ ኤንቲ ታዉ እመትዶሶና፤ እስራኤለን ባይራ የለትዳ አደ ናይታ በሳን ሌወታ ታዉ ኤካስ።
NUM 8:17 እስራኤለ አሳ ግዶን ባይራ የለትዳ አሰ ግድን መሄ ግድን ኡባይ ታባ። ታኒ ግብፀ ቢታን ባይራ ኡባ ዎꬍዳ ዎደ ኤንታ ታዉ ዱማያስ።
NUM 8:18 እስራኤለን ባይራ የለትዳ አደ ናይታ በሳን ታዉ ሌወታ ኤካስ።
NUM 8:19 እስራኤለ አሳ ግዶፈ ሌወታ አሮናስነ እያ አደ ናይታስ እማስ። እስራኤለ አሳይ ጌሻ ዱንካንያኮ ሺቅድ ቆሄቶና መላ ሌወት እስራኤለ አሳ ግሾ ጌሻ ዱንካንያን ኦꬃናዉነ ናጋራ አቶተꬅ ኤሀናዉ ዶረትዶሶና” ያግስ።
NUM 8:20 ጎዳይ ሙሰ ኪትዳይሳዳ፥ ሙሰይ፥ አሮንነ እስራኤለ አሳ ኡባይ ሌወታ ዱማይዶሶና።
NUM 8:21 ሌወት ባንታና ጌሽዶሶና፤ ባንታ ማኡዋ ሜጭዶሶና። አሮን ኤንታ ጎዳስ ዱማ እሞ ኦꬅድ ሺሽስ፤ ኤንታዉ ናጋራ አቶተꬃስ ያርሽድ ኤንታ ጌሽስ።
NUM 8:22 ሄሳፈ ጉየ፥ ሌወት አሮናነ እያ አደ ናይታ አዋተꬃ ጋርሳን ግድድ ጌሻ ዱንካንያ ግዶን ባንታ ኦሱዋ ኦꬃናዉ ይዶሶና። ጎዳይ ሙሰ ሌወታ ዱማያናዉ ኪትዳይሳዳ ኤንቲ ኦꬅዶሶና።
NUM 8:23 ጎዳይ ሙሰኮ፥
NUM 8:24 “ሀይስ ሌወት ኦꬃና ዎጋ፤ ላይꬅ ላታማነ እቻሻነ እያፐ ቦላ ግድዳ ሌወ አደ ኡባይ ጌሻ ዱንካንያን ኦꬃናዉ ዮ።
NUM 8:25 ሽን ላይꬅ እሻታሙ ግድያ ዎደ ባንታ ኦሱዋፐ ሸምፖ፤ ዛር ኦꬆፎ።
NUM 8:26 ኤንቲ ጌሻ ዱንካንያን ኦꬅያ ባንታ እሻታ ኦꬅ ማዳናዉ ዳንዳኦሶና። ሽን ኤንቲ ባንታዉ አይ ኦሶካ ኦꬆፎ። ህዛ ኔኒ ሌወታ ሀይሳዳ ኦስሳ” ያግስ።
NUM 9:1 እስራኤለ አሳይ ግብፀፈ ከይዳ ናምአንꬆ ላይꬃን ኮይሮ አጌናን ሲና መላ ቢታን ጎዳይ ሙሰኮ ሀይሳዳ ያግስ፤
NUM 9:2 “እስራኤለ አሳይ ፓስካ ባኣለ እያ ቃማን ቦንቾ።
NUM 9:3 ሀ አጌናን ታማነ ኦይዳንꬆ ጋላሳን እያ ቃማን ኦማርስ እያ ዎጋ ኡባዳነ እያ ኪታ ኡባዳ ቦንቾ” ያግስ።
NUM 9:4 ሄሳ ግሾ፥ ሙሰይ እስራኤለ አሳይ ፓስካ ባኣለ ቦንቻና መላ ኤንታዉ ኦድስ።
NUM 9:5 ጎዳይ ሙሰ ኪትዳይሳዳ፥ እስራኤለ አሳይ ኮይሮ አጌናን ታማነ ኦይዳንꬆ ጋላሳን፥ ኦማርስ ሲና መላ ቢታን ፓስካ ባኣለ ቦንችዶሶና።
NUM 9:6 ሽን ኤንታፈ ባጋት አሀ ቦችድ ቱንዳ ግሾ ሄ ጋላስ ፓስካ ባኣለ ቦንቻናዉ ዳንዳእቦኮና። ሄሳ ግሾ፥ ኤንቲ ሄ ጋላስ ሙሰኮነ አሮናኮ ይድ፥
NUM 9:7 “ኑኒ አሀ ቦችዳ ግሾ ቱንዳ፥ ሽን ሄ ቃማን ሀራ እስራኤለ አሳራ ጎዳስ ያርሾ ያርሾና መላ አይስ ድገትዶ?” ያግዶሶና።
NUM 9:8 ሙሰይ ዛሪድ፥ “ጎዳይ ህንተባ ታዉ ኦዳና ጋካናዉ ጋምእሽተ” ያግስ።
NUM 9:9 ጎዳይ ሙሰኮ፥
NUM 9:10 “እስራኤለ አሳኮ ሀይሳዳ ያጋ፤ ህንተፈ ዎይኮ ህንተ ኮቻፈ ኦንካ አሀ ቦችድ ቱንኮ ዎይኮ ኦገትዳባ ግድኮ፥ ፓስካ ባኣለ ቦንቻናዉ ዳንዳኤስ።
NUM 9:11 ናምአንꬆ አጌናን ታማነ ኦይዳንꬆ ጋላስ ኦማርስ ፓስካ ባኣለ ቦንቾ። ፓስካ ዶርሳ ኡይꬃራነ ጫሞ ቦንጮራ ሞ።
NUM 9:12 ሳአይ ዎንታና ጋካናዉ ዶርሳ አሹዋፐ አይብካ አቶፎ፤ ቃስ እያ መቀꬃፈ እሱዋካ መንꬆፎ። ፓስካ ባልያ ዎጋ ኡባ ኦꬆ።
NUM 9:13 ሽን ጌሽነ ኦገቶና አስ ፓስካ ቦንቾና እፅኮ፥ እ ታ አሳ ግዶፈ ኩረቶ። ጎዳ ያርሹዋ እያ ቃማን ያርሽቦና ግሾ ባ ናጋራ ግሾ ፕርዳ ኤኬስ።
NUM 9:14 “ህንተ ግዶን ደእያ በተ አስ ፓስካ ባኣለ ቦንቻናዉ ኮይኮ፥ ፓስካ ዎጋዳ ቦንቾ። በታንቾይነ ቢታ አዉ ናእ ኡባይ ሄ ዎጋꬆ ኦꬆ” ያግስ።
NUM 9:15 ጌሻ ዱንካነይ ቶከትዳ ጋላስ ሻራይ ጌሻ ዱንካንያ ማእስ። ኦማርሳፈ ዶምድ፥ ዎንታ ጋካናዉ ጌሻ ዱንካንያ ቦላራ ደእያ ሻራይ ታማ ዳኔስ።
NUM 9:16 ሄሳዳ ጋላስ ጋላስ ሻራይ ማኤስ፤ ቃማ ቃማ ሄ ሻራይ ታማዳ ፖኤስ።
NUM 9:17 ሄ ሻራይ ጌሻ ዱንካንያ ቦላፈ ደንድያ ዎደ ኡባን እስራኤለ አሳይ ባንታ ዱንካንዳ ጉታፐ ደንዶሶና። ቃስ ሄ ሻራይ ዎꬍያ በሳን እስራኤለ አሳይ ዱንካኖሶና።
NUM 9:18 እስራኤለ አሳይ ጎዳ ኪታን ጉታፐ ደንዶሶና፤ ቃስ ጎዳ ኪታን ዱንካኖሶና። ሻራይ ጌሻ ዱንካንያ ቦላ ጋምእያ ዎደ ኡባን ባንታ ዱንካንዳ ጉታን ጋምኦሶና።
NUM 9:19 ሻራይ ጌሻ ዱንካንያ ቦላ ዳሮ ጋላስ ጋምእኮካ፥ እስራኤለ አሳይ ጎዳ ኪታ ናጎሶናፐ አትሽን፥ አዉካ ቦኮና።
NUM 9:20 እስ እስ ቶሆ ሻራይ ጌሻ ዱንካንያ ቦላ ጉꬃ ጋላስ ጋምኤስ። ግድኮካ ኤንቲ ጎዳ ኪታን ዱንካኖሶና፤ ቃስ ጎዳ ኪታን ጉታፐ ደንዶሶና።
NUM 9:21 እስ እስ ቶሆ ሻራይ ኦማርሳፈ ዎንታና ጋካናዉ ፃላላ ጋምኤስ፤ ሻራይ ደንድያ ዎደ ኤንቲ ደንዶሶና። ጋላስ ግድን፥ ቃማ ግድን፥ ሻራይ ደንድያ ዎደ ኤንቲ ደንዶሶና።
NUM 9:22 ሻራይ ጌሻ ዱንካንያ ቦላ ናምኡ ጋላስ ግድን ዎይኮ እስ አጌና ዎይኮ እስ ላይꬅ ጋምእን እስራኤለ አሳይ ባንታ ዱንካንዳ ጉታን ጋምኦሶናፐ አትሽን፥ ቦኮና። ሽን ሻራይ ደንድያ ዎደ ኤንትካ ደንዶሶና።
NUM 9:23 ጎዳይ ሙሰ ኪትዳይሳዳ ኤንቲ ጎዳ ኪታን ዱንካኖሶና ቃስ ጎዳ ኪታን ጉታፐ ደንድድ ቦሶና።
NUM 10:1 ጎዳይ ሙሰኮ፥
NUM 10:2 አሳ ሺቆስ ፄጋናዉነ ዱንካንዳ ጉታፐ ደንꬃናዉ ማድያ ናምኡ ሞይዘታ ብራፐ ቆፃዳ መꬋ።
NUM 10:3 ሀ ናምኡ ሞይዘት ፑነትያ ዎደ አሳ ኡባይ ጌሻ ዱንካንያ ፐንገን ኔኮ ሺቆ።
NUM 10:4 ሽን እስ ሞይዘ ፃላል ፑነትኮ፥ እስራኤለ ኮቻ ሀላቃት ነ ስን ሺቆ።
NUM 10:5 ሞይዘይ ኮይሮ ፑነትያ ዎደ ጌሻ ዱንካንያፐ ዶሎሀ ባጋን ዱንካንዳ ኮቻይ ደንዶ።
NUM 10:6 ሞይዘይ ናምአንꬆ ፑነትያ ዎደ ዱገሀ ባጋን ዱንካንዳ ኮቻይ ደንዶ። ሞይዘይ ሄሳꬆ ፑነትያ ዎደ ጉታፐ ደንዳናዉ ማላ ግዶ።
NUM 10:7 አሳ ሺሻናዉ ሞይዘ ፑና፥ ሽን ሀንኮይሳዳ ዱማ ማላራ ፑኖፋ።
NUM 10:8 ካህነት፥ አሮና ናይት ሞይዘ ፑኖ። ሀይስ ነዉነ ያና የለተꬃ ኡባስ መርና ዎጋ ግዶ።
NUM 10:9 “ህንተ ጋድያ ቦላ ኦላ ደንꬅዳ ህንተ ሞርክያራ ህንተ ኦለታናዉ ከይያ ዎደ ሄ ሞይዘታ ጎችድ ፑንተ። ሄ ዎደ ጎዳይ፥ ህንተ ፆሳይ ህንተና አኬክድ፥ ህንተ ሞርከታፐ አሻና።
NUM 10:10 ህንተ ኡፋይሳ ጋላሳታን ሄስካ አጌና ፄሮን፥ ኤረትዳ ባለታን፥ ፁሳ ያርሾ ዎደንነ እስፈተꬃ ያርሾ ዎደ ሞይዘ ፑንተ። ሄስ ፆሳ ስንꬃን ህንተና አኬክስያባ ግዳና። ታኒ ጎዳ፥ ህንተ ፆሳ” ያግስ።
NUM 10:11 አሳይ ግብፀፈ ከይን፥ ናምአንꬆ ላይꬃን፥ ናምአንꬆ አጌናን፥ ላታማንꬆ ጋላሳን፥ ሻራይ ጌሻ ዱንካንያ ቦላፈ ደንድስ።
NUM 10:12 ያትን አሳይ ሲና መላ ቢታፈ ማራን ማራን ደንድዶሶና፤ ሻራይ ፓራና መላ ቢታ ጋክድ ዎꬍስ።
NUM 10:13 ጎዳይ ሙሰ ኪትዳይሳዳ ኤንቲ ባናዉ ኮይሮ ደንድዶሶና።
NUM 10:14 ኮይሮ ይሁዳ ኮቻ ባጋን ዱንካንዳ ኮቻይ ባንታ ማላ ኤክድ ከይዶሶና። ኤንታና ካለይ አምናዳበ ናኣ ናአሶና።
NUM 10:15 ይሳኮራ ኮቻ ካለይ ዙአራ ናኣ ናትናኤላ።
NUM 10:16 ዛብሎና ኮቻ ካለይ ሄሎና ናኣ ኤልኣባ።
NUM 10:17 ያትን፥ ጌሻ ዱንካነይ ሾደትን፥ ገድሶና ኮቻትነ መራራ ኮቻት ቶክድ ደንድዶሶና።
NUM 10:18 ካልድ ሮቤላ ኮቻ ባጋን ዱንካንዳ ኮቻይ ባንታ ማላ ኦይክደ ከይዶሶና። ሮቤላ ኮቻ ካለይ ሻደኡራ ናኣ ኤልዙራ።
NUM 10:19 ስሞና ኮቻ ካለይ ዙርሻዳያ ናኣ ሳሉምኤላ።
NUM 10:20 ጋደ ኮቻ ካለይ ራጉኤላ ናኣ ኤልያሳፋ።
NUM 10:21 ያትን ቃሃታ ኮቻይ ጌሻ ሚሸታ ቶክድ ደንድዶሶና። ኤንቲ ካልያ ጉታ ጋካናፐ ስን ጌሻ ዱንካነይ ቶከትድ ኡቴስ።
NUM 10:22 ካልድ ኤፍሬማ ኮቻ ባጋን ዱንካንዳ ኮቻት ባንታ ማላ ኦይክድ ከዮሶና። ኤፍሬማ ኮቻ ካለይ አምሁዳ ናኣ ኤልሻማአ።
NUM 10:23 ምናሰ ኮቻ ካለይ ፓዳዙራ ናኣ ጋማልኤላ።
NUM 10:24 ብንያመ ኮቻ ካለይ ጋድዮና ናኣ አብዳና።
NUM 10:25 ዉርሰꬃን ዳነ ኮቻ ባጋን ዱንካንዳ ኮቻይ፥ ኡባስ ጉየ ባጋራ ካተ ግድድ፥ ባንታ ማላ ኦይክድ ከይዶሶና። ዳነ ኮቻ ካለይ አምሳዳያ ናኣ አክኤዘራ።
NUM 10:26 አሴራ ኮቻ ካለይ ኦክራና ናኣ ፓግኤላ።
NUM 10:27 ንፍታለመ ኮቻ ካለይ ኤናና ናኣ አክራ።
NUM 10:28 እስራኤለ አሳይ ባንታ ዘረꬃን ዘረꬃን ጉታፐ ደንድድ ብያ ማራይ ሄሳ።
NUM 10:29 ሙሰይ ምድያመ አድያ ራጉኤላ ናኣ ሆባባኮ፥ “ጎዳይ ኑስ እማና ግዳ ቢታ ላታናዉ ቦስ፤ ጎዳይ እስራኤለ አንጃና ግዳ ግሾ ኑራ የꬋ፤ ኑኒ ነዉ ሎኦባ ኦꬃና” ያግስ።
NUM 10:30 ያትን ሆባብ፥ “አካይ፥ ታኒ ታ ቢታ ታ ዳቦታኮ ባና” ያግስ።
NUM 10:31 ሙሰይ ዛሪድ፥ “ሀያና፥ ኑና የጋዳ ቦፓ። ኑ ብያ መላ ቢታን ኑኒ ዱንካናና በሳ ነ ኤራሳ፤ ኑ ባና ኦግያ ኑና ካለꬃናዉ ዳንዳኣሳ።
NUM 10:32 ኔኒ ኑራ ቢኮ፥ ጎዳይ ኑስ እምያ አንጁዋ ኡባ ኑ ኔው ሻካና” ያግስ።
NUM 10:33 አሳይ ጎዳ ዙማፐ ደንድድ፥ ሄꬑ ጋላሳ ኦገ ብዶሶና። ጎዳ ጫቆ ታቦተይ ኤንቲ ሸምፓና በሲ ኮይሸ ሄꬑ ጋላስ ኤንታፈ ስን ስን ብስ።
NUM 10:34 ኤንቲ ዱንካንዳ ጉታፐ ደንድያ ዎደ ኡባን ጎዳ ሻራይ ጋላስ ጋላስ ኤንታፈ ቦላራ ደኤስ።
NUM 10:35 ታቦተይ ደንድያ ዎደ ኡባን ሙሰይ፥ “አቤት ጎዳዉ፥ ደንዳ፤ ነ ሞርከት ላለቶ፤ ነና እፀይሳት ነ ስንꬃፈ ባቃቶ” ያጌስ።
NUM 10:36 ታቦተይ ሸምፕያ ዎደ ኡባን ሙሰይ፥ “አቤት ጎዳዉ፥ ዳሮ ሙኩላን ታይበትያ እስራኤለ አሳኮ ስማ” ያጌስ።
NUM 11:1 እስራኤለ አሳይ ባንታና ጋክዳ መቱዋን ጎዳ ቦላ ዙዙምዶሶና። ኤንታ ዙዙንꬃ ጎዳይ ስእዳ ዎደ እያ ሀንቆይ ኤፅን፥ ፁግያ ታማ ኤንታ ቦላ የድስ፤ ሄ ታማይ ኤንቲ ዱንካንዳ ጉታፐ እስ ባጋ ጋፃ ምስ።
NUM 11:2 ያትን ሙሰይ ኤንታ ግሾ ጎዳ ዎሳና መላ ኤንቲ ሙሰኮ ይድ ዬክዶሶና። ሙሰይ ዎስን ታማይ ቶእስ።
NUM 11:3 ጎዳ ታማይ ኤንታ ግዶን ኤፅዳ ግሾ፥ ሄ በሳይ ታቤራ ጌተትድ ፄገትስ።
NUM 11:4 እስራኤለታራ ግብፀፈ ከይዳ ዱማ ዱማ ደረይ ሀራ ካꬅ ማናዉ ዳሮ አሞትዶሶና። ኤንቲ፥ “ኑ አሾ አዉፐ ደማኔ?
NUM 11:5 ኑኒ ግብፀን ደእያ ዎደ ሚሸ ቃንፆና ምያ ሞሉዋ፥ ሌህያ፥ ሀባበ፥ ሹንኩርተ፥ ምስካት ባይና ሹንኩርተነ ቱሙዋ ሀሳዮስ።
NUM 11:6 ሽን ሀእ ኑ ቆይ ጎርደትስ፤ ኑ አይፈይካ ሀ ማናፈ አትሽን፥ ሀራባ አይባካ በኤና” ያግድ ዬክዶሶና።
NUM 11:7 ማናይ ዴቦ አይፈ ዳኔስ፤ እያ ማላይ ቦꬃ አድልኤ ጪሸ ዳኔስ።
NUM 11:8 ማናይ ቃማ ዎꬌስ፤ አሳይ ዩይድ እያ ማፅድ ዎፃን ጋጭድ ዎይኮ ኡዱላን ጫድድ ካꬆሶና። ያትድ ኡኮሶና፤ እያ ማልኦይ ሻማሆ ዛይተራ ኡከትዳ ኡይꬃ መላ።
NUM 11:9 ማን ቃማ ኤንታ ጉታን አካራ ዎꬌስ።
NUM 11:10 አሳይ ባንታ ዱንካንያ ፐንገን ፐንገን ኤቅድ ዬክሽን ሙሰይ ስእስ። ኤንቲ ጎዳ ሀንቁዋ ደንꬅዳ ግሾ፥ ሙሰይ ኡንኤትስ።
NUM 11:11 ሙሰይ ጎዳኮ፥ “ነ አይልያ፥ ታ ቦላ አይስ ሀ መቱዋ ኤሀዲ? ነ ታናን አይስ ኡፋይታብኪ? ነ ሀ አሳ ኡባ ቶሁዋ ታ ቦላ አይስ ዎꬃዲ?
NUM 11:12 ሀ አሳ ኡባ ታ ቃንꬃታድናዬ? ዎይኮ ኤንታ ታ የላድናዬ? ነ ኤንታ ማይዛታስ፥ እማና ጋዳ ጫቅዳ ቢታ ጋꬆ ጋዳ ናአ እድማዳ ድችያ አሴዳ ታ ክኦን አይስ ኤንታ የጋዲ?
NUM 11:13 ሀ አሳ ኡባስ ታ አሾ አዉፐ ኤሀኔ? ኤንቲ ታኮ ይድ፥ ‘ማናዉ ኑስ አሾ እማ’ ያግድ ዬኮሶና።
NUM 11:14 ታኒ ሀ አሳ ኡባ ታርካ ቶካናዉ ዳንዳእከ፤ ታዉ ሄስ ዴፆ ቶሆ።
NUM 11:15 ህዛ ኔኒ ታና ሀይሳዳ ኦꬃናፐ ታዉ ቃታ፤ ሀእ ታና ዎꬋ፤ ሀ መቱዋፐ ታ ሸምፓ አጋና” ያግስ።
NUM 11:16 ጎዳይ ሙሰኮ፥ “አሳ ካለꬃናዉ ዳንዳእያ እስራኤለ ሀላቃታፐ ላፑን ታሙ ጭማታ ዶራ። ኤንታ ጌሻ ዱንካንያኮ ኤሀዳ ነ ማታን ኤሳ።
NUM 11:17 ታኒ ዎꬋዳ ኔራ ያን ኦደታና፤ ታ ነዉ እምዳ አያናፐ ሻካዳ ኤንታ ቦላ ዎꬃና። ኔኒ አሳ ቶሁዋ ነርካ ቶኮና መላ ኤንቲ ነና ማዳና።
NUM 11:18 “ኔኒ አሳኮ ሀይሳዳ ያጋ፤ ‘ዎንቶ ህንተ አሾ ማና ግሾ ህንተና ጌሽተ። ኑ አሾ አዉፐ ደማኔ? ኑስ ግብፀን ሳእ ሎኦሽን’ ያግድ ህንተ ዬክዳ ዬሁዋ ጎዳይ ስእስ። ሀእ ጎዳይ አሾ እማና፤ ህንተካ ማና።
NUM 11:19 ህንተ ማናይ እስ ጋላስ ዎይኮ ናምኡ ጋላስ ዎይኮ እቻሹ ጋላስ ዎይኮ ታሙ ጋላስ ዎይኮ ላታሙ ጋላስ ፃላላ ግደና።
NUM 11:20 ሽን ‘ህንተ ግዶን ደእያ ጎዳ ህንተ ካꬍዳ ግሾነ ግብፀፈ ከዮና አትዳኮ ኑስ ሎኦሽን ግዳ ግሾ፥ ህንተዉ ሲራ ከያና ጋካናዉነ ህንተ ሳለታና ጋካናዉ እስ አጌና ኩመꬅ ህንተ አሾ ማና’ ያጋ” ያግስ።
NUM 11:21 ሽን ሙሰይ ጎዳኮ፥ “ሄኮ፥ ታ 600,000 አሳ ካለꬃሸ ደአይስ። ኔኒ እስ አጌና ኩመꬅ ኤንቲ አሾ ማና መላ እማና ጋሳ።
NUM 11:22 ሚዛ ዉደነ ዶርሳ ዉደ ኡባ ሹክን ኤንታዉ ግዳኔ? አባን ደእያ ሞሎ ኡባ ሺሽያኮ ኤንታዉ ግዳኔ?” ያግስ።
NUM 11:23 ያትን፥ ጎዳይ ሙሰኮ፥ “ጎዳ ኩሸይ ቃንዬ? ታኒ ነዉ ኦድያባይ ቱሜኮነ ዎርዶኮ ኔኒ ሀእ በአና” ያግስ።
NUM 11:24 ሄሳ ግሾ ሙሰይ ካረ ከይድ፥ ጎዳይ ግዳይሳ አሳስ ኦድስ። እስራኤለ ጭማታፐ ላፑን ታሙ አሳ ሺሽድ፥ ጌሻ ዱንካንያ ዩሾን ኤስስ።
NUM 11:25 ያትን፥ ጎዳይ ሻራራ ዎꬍድ እያራ ኦደትስ፤ እያ ቦላ ደእያ አያናፐ ኤክድ፥ ሄ ላፑን ታሙ ጭማታ ቦላ ዎꬅስ። አያናይ ኤንታ ቦላ ሸምፕዳ ዎደ ኤንቲ ናበዳ ትንብተ ኦድዶሶና። ሽን ሄሳፈ ጉየ ዛሪድ ትንብተ ኦድቦኮና።
NUM 11:26 ሄ ላፑን ታሙ ጭማታራ ፃፈትዳ አሳታፐ ኤልዳዳነ ሞዳዳ ጌተትያ ናምአት ዱንካንዳ ጉታን አትድ ጌሻ ዱንካንያኮ ይቦኮና። ሽን ኤንታ ቦላካ አያናይ ዎꬍን፥ ዱንካንዳ ጉታን ትንብተ ኦድዶሶና።
NUM 11:27 እስ ፓንꬃ አደይ ሙሰኮ ዎፅ ይድ፥ “ኤልዳድነ ሞዳድ ዱንካንዳ ጉታን ትንብተ ኦዶሶና” ያግስ።
NUM 11:28 ያንን፥ ባ ናአተꬃፈ ዶምድ፥ ሙሰ ማድያ ናወ ናኣ እያሱይ ሙሰኮ፥ “ታ ጎዳዉ፥ ሙሰ፥ ኤንታ ተቃ” ያግስ።
NUM 11:29 ሽን ሙሰይ ዛሪድ፥ “ታ ግሾ ነ ቃናታይ? ጎዳይ ባ አሳ ኡባ ቦላ ባ አያና ዎꬅድ ናበዳ ትንብተ ኦድስያባ ግድያኮ ታ ኡፋይታይስ” ያግስ።
NUM 11:30 ያትድ፥ ሙሰይነ እስራኤለ ጭማት ዱንካንዳ ጉታ ስምዶሶና።
NUM 11:31 ቆፖና ጎዳይ ጫርኮ ደንꬅድ፥ ሳአፐ ናምኡ ዋꬋ መላ ꬎቁ ግድ ፕራꬍያ ኩራቾታ አባፈ ኤህስ። ኤንታ ዱንካንያ ዩሹዋን ኡባ ባጋራ እስ ጋላሳ ኦገ መላ ሳአን ዎꬍዶሶና።
NUM 11:32 ሄ ጋላስነ ሄ ቃማ ኡባ፥ ቃስ ዎንተꬃ ጋላስካ አሳይ ካረ ከይድ፥ ሄ ኩራቾታ ኦይክድ ሺሽዶሶና። ኤንታፈ ኦንካ 10 ክሎ ግራመፐ ጉꬁ ሺሽበና። ኤንቲ ዱንካንያ ጉታ ዩሾን መልሳናዉ ምጭዶሶና።
NUM 11:33 ሽን አሾይ ቡሮ ኤንታ ዶናን ደእሽንነ ሜተትድ ዉሮና ደእሽን፥ ጎዳ ሀንቆይ አሳ ቦላ ኤፅስ፤ ጎዳይ አሳ ዎልቃማ ቦሻን ሾጭስ።
NUM 11:34 አሾ አሞትድ ሀይቅዳ አሳ ኤንቲ ሄ በሳን ሞግዳ ግሾ ሄ በሳይ ከብሮት-ሀታባ ጌተትድ ሱንትስ።
NUM 11:35 አሳይ ሄ በሳፈ ደንድ ብድ ሀፀሮታ ጌተትያ በሳን ዱንካንዶሶና።
NUM 12:1 ሙሰይ ቶጰ ቢታ ማጫስ ኤክዳ ግሾ፥ ማይራማነ አሮን ሙሰ ያግድ ቦርዶሶና።
NUM 12:2 “ጎዳይ ሙሰ ባጋራ ፃላላ ኦደትዴ? እ ኑ ባጋራ ኦድቤኔ?” ያግዶሶና። ጎዳይ ኤንቲ ግዳይሳ ስእስ።
NUM 12:3 ሙሰይ ቢታን ደእያ አሳ ኡባፈ አꬍያ አዳ አስ።
NUM 12:4 ቆፖና ጎዳይ ሙሰ፥ አሮናነ ማይራሞ፥ “ህንተ ሄꬓት ጌሻ ዱንካንያኮ ከይተ” ያግስ። ኤንትካ ከይዶሶና።
NUM 12:5 ጎዳይ ሻራ ቱሳራ ዎꬍድ ጌሻ ዱንካንያ ፐንገን ኤቅድ፥ አሮና! ማይራመ! ያግድ ፄግስ። ኤንቲ ናምአይ እያ ስን ሺቅን፥
NUM 12:6 ጎዳይ፥ “ታ ኦደይሳ ስእተ፤ ህንተ ግዶን ናበይ ደእኮ፥ ታ እያዉ ቆንጫይስ፤ ቃስ እያዉ አሙሆን ኦዳይስ።
NUM 12:7 ሽን ታ አይለይ ሙሰ ሄሳዳ ግደና፤ እ ታ ኬꬃ ኡባን አማነትዳይሳ።
NUM 12:8 ታኒ ሙሰራ ሶምኦን ኦደታስፐ አትሽን፥ ሌምሶን ኦድከ። እ ታ ማላ በኤስ። ያትን፥ ህንተ ታ አይልያ ሙሰ ቦራናዉ አይስ ያይበከቲ?” ያግስ።
NUM 12:9 ጎዳ ሀንቆይ ኤንታ ቦላ ኤፅን፥ እ ኤንታ አግድ ብስ።
NUM 12:10 ሻራይ ጌሻ ዱንካንያ ቦላፈ ደንድዳ ዎደ ማይራማ ባሮ ሀርገን ምልፅ ጋዳ ቦፃሱ። አሮን ኢኮ ስሚድ ፄልያ ዎደ ባሮ ሀርገን ኦይከትዳሮ በእስ።
NUM 12:11 አሮን ሙሰኮ፥ “ሀይ ታ ጎዳዉ፥ ኑኒ ኤያተꬃን ኦꬅዳ ናጋራስ ኑና ሀይሳዳ ሴሮፓ።
NUM 12:12 እዮ ባ አየ ኡሎፐ ከይያ ዎደ እ አሳተꬃፈ ባጋይ ሜተትን፥ ሀይቅድ የለትዳ ናአ መላ ኦꬆፋ” ያግስ።
NUM 12:13 ያትን፥ ሙሰይ፥ “አቤት ጎዳዉ፥ እዮ ፓꬃርክ” ያግድ ጎዳ ዎስስ።
NUM 12:14 ጎዳይ ሙሰኮ፥ “እ አዋይ እ ሶምኦን ጩትያባ ግድያኮ፥ እያ ላፑን ጋላስ ዬላራ ጋምአዉሱ ግድኬ? ሄሳ ግሾ፥ ላፑን ጋላስ ዱንካንያ ጉታፐ እዮ ጋፃ ከሳዳ ዱማ በሳን ዎꬃ፤ ሄሳፈ ጉየ ስማዳ ዮ” ያግስ።
NUM 12:15 ያትን፥ ማይራማ ዱንካንያ ጉታፐ ጋፃ ከያዳ ላፑን ጋላስ ኡታሱ። እያ ስማና ጋካናዉ አሳይ ጉታ አግድ ባናዉ ደንድቤና።
NUM 12:16 ሄሳፈ ጉየ፥ አሳይ ሀፀሮታ ጌተትያ በሳፈ ደንድድ፥ ፓራና መላ ቢታን ዱንካንዶሶና።
NUM 13:1 ጎዳይ ሙሰኮ፥
NUM 13:2 “ታኒ እስራኤለታስ እማና ካናነ ቢታ ዎቻና መላ ታማነ ናምኡ እስራኤለ ኮቻፈ እስ እስ አስ ሀላቃ ኦꬃዳ ኪታ” ያግስ።
NUM 13:3 ያትን ሙሰይ ጎዳይ ኪትዳይሳዳ ፓራና መላ ቢታፈ እስራኤለ ኮቻፈ ታማነ ናምኡ ሀላቃታ ኪትስ።
NUM 13:4 ኤንታ ሱንꬃይ ሀይሳፈ ካልድ ፃፈትዳይሳታ። ሮቤላ ኮቻፈ ዛኩራ ናኣ ሳሙአ፤
NUM 13:5 ስሞና ኮቻፈ ሆራ ናኣ ሻፋፃ፤
NUM 13:6 ይሁዳ ኮቻፈ ዮፎና ናኣ ካለባ፤
NUM 13:7 ይሳኮራ ኮቻፈ ዮሰፋ ናኣ ይግኣላ፤
NUM 13:8 ኤፍሬማ ኮቻፈ ናወ ናኣ አውሰ፤
NUM 13:9 ብንያመ ኮቻፈ ራፉ ናኣ ፋልፃ፤
NUM 13:10 ዛብሎና ኮቻፈ ሶዳ ናኣ ጋድኤላ፤
NUM 13:11 ዮሰፋ ናኣ ምናሰ ኮቻፈ ሱሳ ናኣ ጋደ፤
NUM 13:12 ዳነ ኮቻፈ ጋማላ ናኣ አምኤላ፤
NUM 13:13 አሴራ ኮቻፈ ምካኤላ ናኣ ሳቱራ፤
NUM 13:14 ንፍታለመ ኮቻፈ ዋፍሳ ናኣ ናህባ፤
NUM 13:15 ጋደ ኮቻፈ ማካ ናኣ ገኡኤላ።
NUM 13:16 ሄ ቢታ ዎቻና መላ ሙሰይ ኪትዳ አሳታ ሱንꬃይ ሀይሳታ። ሙሰይ ናወ ናኣ አውሰ ሱንꬃ እያሱ ግድ ሱንꬃ ላምስ።
NUM 13:17 ሙሰይ ኤንታ፥ “ነገበ መላ ቢታ ካንꬅድ ፑደ ደረይ ዳርያ ቢታ ከይተ።
NUM 13:18 ቢታይ አይ መላ ቢታኮ፥ አሳይ አይ መላ ምኖኮነ ታይቦን ጉኮ ዳሮኮ በእተ።
NUM 13:19 ኤንቲ ደእያ ቢታይ ሎኦኮ ኢተኮ፥ ኤንታ ካታማት ድረትዳኮነ መላ ደእያኮ፥
NUM 13:20 ቢታይ አራደኮ ላደኮ፥ ቢታይ ዎራን ካመትዳኮነ ቁኤኮ በእተ። ምንተ፤ ሄ ቢታን ደእያ ካꬃ አይፍያፐ ኤኮና ዮፕተ” ያግስ። ሄ ዎደይ ዎይነይ ቴርድ ማፀትያ ዎደ።
NUM 13:21 ኤንቲ ከይድ ሲና መላ ቢታፈ ዶምድ፥ ለቦ-ሀማታ ማታን ደእያ ረሆባ ጋካናዉ ደእያ ቢታ ዎችዶሶና።
NUM 13:22 ነገበ መላ ቢታ ካንꬅድ፥ ከብሮና ጋክዶሶና። ሄ በሳን አክማና፥ ሰሳያነ ታልማያ ጌተትያ ኤናቃ ኮቻት ደኦሶና። ከብሮን ግብፀን ደእያ ፆኣነ ካታማፐ ላፑን ላይꬅ ኮይሮትድ ኬፀትስ።
NUM 13:23 ያራ ካንꬅድ፥ ኤሽኮላ ዛንጋራ ብድ ጋክያ ዎደ ቴራ ዎይነ ታሽያራ ቃንፅዶሶና። ሄ ታሸይ ዴፆ ግድያ ግሾ ናምኡ አስ ካሶ አꬅድ ቶክዶሶና። እያ ቦላ ጉጅድ ኦሮማነነ ባላሰ ምꬃ አይፈ ኤክድ ይዶሶና።
NUM 13:24 እስራኤለ አሳይ ሄ በሳፈ ዎይነ ታሽያ ቃንፅዳ ግሾ ሄ በሳ ኤሽኮላ ዛንጋራ ግድ ፄግዶሶና።
NUM 13:25 ኤንቲ ሄ ቢታ ኦይታሙ ጋላስ ዎችድ ጉየ ስምዶሶና።
NUM 13:26 ፓራና መላ ቢታን ቃደሳን ደእያ ሙሰኮ፥ አሮናኮነ እስራኤለ ማባራ ኡባኮ ይዶሶና። ኤንቲ በእዳባ አሳ ኡባስ ኦድዶሶና፤ ሄ ቢታፈ ኤክድ ይዳ አይፍያካ ኤንታ በስዶሶና።
NUM 13:27 ኤንቲ ሙሰኮ፥ “ኔኒ ኑና የድዳ ቢታ ብዳ፤ ሄ ቢታን ማꬅነ ኤስ ጎጌስ፤ ሄ ቢታ አይፍያካ ሀይሳ በአ።
NUM 13:28 ሽን ሄ ቢታን ደእያ አሳይ ዎልቃማ፤ ኤንታ ካታማትካ ግምበ ድርሳን ድረትዳይሳታነ ግታ። ኑኒ ኡባፈ አꬅድ ኤናቃ ኮቻታ ያን በእዳ።
NUM 13:29 አማለቃት ነገበ መላ ቢታን፤ ህተትነ፥ ያቡሰት ደረይ ዳርያ አሞረታ ቢታን፤ ቃስ ካናነት መደትራነ አባ ዶናንነ ዮርዳኖሰ ሻፋ ጋፃን ደኦሶና” ያግዶሶና።
NUM 13:30 ያትን ካለብ አሳ ሙሰ ስንꬃን ስእ ኦꬅድ፥ “ኑኒ ፆናናዉ ዳንዳእያ ግሾ፥ ሀእ ከይድ ሄ ቢታ የግስድ አነ ኦይኮስ” ያግስ።
NUM 13:31 ሽን ካለባራ ብዳ አሳት፥ “ሄ ቢታ አሳይ ኑፐ አꬍድ ምንያ ግሾ፥ ኑኒ ኤንታ ፆናናዉ ዳንዳኦኮ” ያግዶሶና።
NUM 13:32 ኤንቲ ዩይድ ዎችዳ ቢታባ እስራኤለ አሳስ ሀይሳዳ ያግድ ኢታ ኦዳ ኦድዶሶና። “ኑኒ ዎችዳ ቢታይ ያን ደእያ አሳካ ምያ ቢታ፤ ያን ደእያ አሳይካ ዳሮ አዱሰ።
NUM 13:33 ኑኒ ያን ኤናቃ ኮቸ ግድዳ ንፍልመ አሳታ በእዳ። ኤንታ በእዳ አይፈን ኑና ፄልያ ዎደ ኑኒ ፃቆ መላ፤ ኤንትካ ኑና ሄሳዳ በኦሶና” ያግዶሶና።
NUM 14:1 ሄ ዎደ ቃማ ማባራ ኡባይ ባንታ ቃላ ꬎቁ ኦꬅድ ዬክዶሶና።
NUM 14:2 እስራኤለ አሳይ ሙሰ ቦላነ አሮና ቦላ ዙዙምዶሶና። ኩመꬃ ማባራይ፥ “ኑኒ ግብፀ ቢታን ደእሸ ዎይኮ ሀ መላ ቢታን ሀይቅዳ ግዶርኮ።
NUM 14:3 ኑኒ ማሻን ዉራና መላ ጎዳይ ሀ ቢታ ኑና አይስ ኤሂ? ኑ ማቸትነ ኑ ናይት ድኤታና፤ ሄሳ ሀናናፐ ጉየ ግብፀ ስሞይ ኑስ ኬሄኔ?” ያግዶሶና።
NUM 14:4 ኤንቲ እሶይ እሱዋኮ፥ “ኑና ካለꬅያ አስ ዶርድ ጉየ ግብፀ ስሞስ” ያግዶሶና።
NUM 14:5 ያትን፥ ሙሰይነ አሮን ሄ በሳን ሺቅዳ እስራኤለ ማባራ ስንꬃን ሶምኦራ ሳአን ጉፋንዶሶና።
NUM 14:6 ቢታ ዎቻናዉ ብዳ አሳ ግዶፈ ናወ ናኣ እያሱይነ ዮፎና ናኣ ካለብ ባንታ ማኡዋ ፔꬍዶሶና።
NUM 14:7 እስራኤለ ማባራኮ፥ “ኑኒ ካንꬅ ከይድ ዎችዳ ቢታይ ዳሮ ሎኦ።
NUM 14:8 ጎዳይ ኑናን ኡፋይትያባ ግድኮ ማꬅነ ኤስ ጎግያ ቢታ ኑና ገልሳና፤ ሄ ቢታ ኑስ እማና።
NUM 14:9 ሄሳ ግሾ፥ ጎዳ ቦላ ማካሎፍተ። ሄ ቢታ አሳስ ያዮፍተ፤ ኤንቲ ኑስ ኦይꬅካ ግዶኮና። ኤንታዉ ኤሾይ ባዋ፤ ጎዳይ ኑራ ደኤስ፤ ህንተ ኤንታዉ ያዮፍተ” ያግዶሶና።
NUM 14:10 ያትን እስራኤለ ማባራይ ኤንታ ሹቻን ጫዳናዉ ደንድስ። ሄ ዎደ ጎዳ ቦንቾይ ፆሳ ዱንካንያን እስራኤለ አሳ ኡባስ ቆንጭስ።
NUM 14:11 ጎዳይ ሙሰኮ፥ “ሀ አሳይ ታና ካይ አዉደ ጋካናሴ? ታኒ ኤንታ ግዶን ኦꬅዳ ማላታታ በእሸ፥ አዉደ ጋካናዉ ታናን አማኖና እፃኔ?
NUM 14:12 ታኒ ኤንታ ጋዶን ሾጫዳ ꬋይሳና፥ ሽን ነና ኤንታፈ ዳርያነ ምንያ ካዎተꬃስ አዋ ኦꬃና” ያግስ።
NUM 14:13 ሙሰይ ዛሪድ ጎዳኮ፥ “ኔኒ ነ ዎልቃን ሀ አሳ ግብፀፈ ከስዳይሳ ኤርያ ግብፀት ሄሳ ስእኮ ዎይጋኔ?
NUM 14:14 ኤንቲ ሄ ቢታን ደእያ አሳስ ሄሳ ኦዳና። አቤት ጎዳዉ፥ ኔኒ ሀ አሳራ ደኤይሳ ኤንቲ ስእዶሶና። አቤት ጎዳዉ፥ ኑኒ ነና በእዳይሳ፥ ነ ሻራይ ኑ ቦላ ኩያትዳይሳነ ጋላስ ሻራ ቱሳን፥ ቃማ ታማ ቱሳን ኔኒ ኑና ካለꬅዳይሳ ኤንቲ በእዶሶና።
NUM 14:15 ያትን፥ ሀእ ኔኒ ሀ አሳ ኡባ እስ ቶሆ ዎꬋ ꬋይስያባ ግድኮ ነ ካሰ ኦꬅዳይሳ ስእዳ ካዎተꬃት፥
NUM 14:16 ‘ጎዳይ፥ ሀ አሳስ እማና ግድ ጫቅዳ ቢታ ኤንታ ገልሳናዉ ዳንዳእቦና ግሾ መላ ቢታን ዎꬍ ꬋይስስ ያግድ’ ኦዳና።
NUM 14:17 “ሄሳ ግሾ፥ ጎዳዉ፥ ነ ዎልቃ ኑና በሳ፤ ነ ኑስ ገልዳ ቃላ ቆፓ።
NUM 14:18 ‘ጎዳይ ኤለ ሀንቀተና፤ ማሮትነ ሲቆይ ኩምዳይሳ ናጋራነ ጌላተꬅ አቶ ገይሳ፤ ሽን ባልዳ ኡራ ሴሮና አገና። የልዳይሳታ ናጋራ ግሾ ሄꬓንꬆነ ኦይዳንꬆ የለተꬅ ጋካናዉ ናይታ ሴራና’ ያጋዳሳ።
NUM 14:19 ሀ አሳይ ግብፀፈ ከዮሶፐ ዶማዳ ሀች ጋካናዉ ኤንታ ማርዳይሳዳ ነ መርና ሲቁዋን ሀ አሳ ናጋራ አቶ ጋርክ” ያግስ።
NUM 14:20 ጎዳይ ዛሪድ፥ “ነ ኦይችዳይሳዳ ታ ኤንታ ማራና።
NUM 14:21 ሽን ታ ደኦ ግደይሳዳነ ታ ቦንቾይ ሳአ ኡባ ኩምዳይሳዳ፥
NUM 14:22 ሀ አሳፐ እስ አስካ ሄ ቢታ በኤና። ግብፀ ቢታንነ መላ ቢታን ኦꬅዳ ማላታታ ሀ አሳት በእዶሶና፤ ሽን ኤንቲ ታሙ ቶሆ ታና ፓጭድ ታዉ ኪተቶና እፅዶሶና።
NUM 14:23 ሄሳ ግሾ፥ ታ ኤንታ ማይዛታስ እማና ጋዳ ጫቅዳ ቢታ ታና ካꬍዳይሳታፐ እሶይካ ገለና።
NUM 14:24 ሽን ታ አይለይ ካለብ ኤንታፈ ዱማትያ ግሾነ ታና ፖሎ ዎዛናፐ ካልዳ ግሾ፥ እ ካሰ ዎችዳ ቢታ እያዉ እማና፤ እያ ዘረꬃይካ ሄ ቢታ ላታና።
NUM 14:25 ሽን ሀእ አማለቃትነ ካናነት ዛንጋራን ደእያ ግሾ፥ ዎንቶ ዞኦ አባኮ ኤፍያ ኦግያ ኦይክድ መላ ቢታ ጉየ ስምተ” ያግስ።
NUM 14:26 ጎዳይ ሙሰኮነ አሮናኮ፥
NUM 14:27 “ሀ ኢታ አሳይ ታ ቦላ አዉደ ጋካናዉ ዙዙማኔ? ታኒ እስራኤለ አሳ ዙዙንꬃ ስአስ።
NUM 14:28 ሄሳ ግሾ፥ ኔኒ ኤንታዉ ሀይሳዳ ጋዳ ኦዳ፤ ‘ታኒ ታ ደኡዋን ጫቃይስ፤ ህንተ ግዳይሳዳ ታ ህንተዉ ኦꬃና።’ ታኒ፥ ጎዳይ ሀይሳ ኦዳይስ።
NUM 14:29 አሳይ ታይበትያ ዎደ ላይꬅ ላታማነ እያፐ ቦላ ግድዳ አስ ኡባይ ታ ቦላ ዙዙምዳ ግሾ፥ ህንተ አሀይ ሀ መላ ቢታን ኩንዳና።
NUM 14:30 ዮፎና ናአ ካለባፐነ ናወ ናአ እያሱፐ አትሽን፥ ህንተፈ ኦንካ ታ ህንተና ላትሳናዉ ጫቅዳ ሄ ቢታ ገለና።
NUM 14:31 ህንተ፥ ‘ኑ ናይት ድኤት አታና’ ግዳ ህንተ ናይታ፥ ሄ ህንተ ካꬍዳ ቢታ ገልሳና፤ ሄ ቢታይ ኤንታዉ ላታ ግዳና።
NUM 14:32 ሽን ህንተ አሀይ ሀ መላ ቢታን ኩንድድ አታና።
NUM 14:33 ህንተ አማነትቦና ግሾ፥ ህንተፈ ዉርሰꬃ አሀይ ሀ መላ ቢታን ኩንዳና ጋካናዉ፥ ህንተ ናይት ሀ መላ ቢታን ዋየትሸ ኦይታሙ ላይꬅ ዶርሰ ሄማና።
NUM 14:34 ህንተ ቢታ ዎችዳ ኦይታሙ ጋላሳ ታይቦን፥ እስ ጋላሳስ እስ ላይꬅ፥ ኦይታሙ ላይꬅ ህንተ ናጋራ ግሾ ዋየታና፤ ሄ ዎደ ታ ህንተ ቦላ አይ መላ ሀንቀትዳኮ ህንተ ኤራና።
NUM 14:35 እስፈ ታ ቦላ ደንድዳ ሀ ኢታ ማባራ ቦላ ታ ሀይሳዳ ኦꬃና፤ ኤንቲ ሀ መላ ቢታን ኩንድ አታና ሀይሳን ኤንቲ ሀይቃና፤ ታ ጎዳይ ሀይሳ ኦዳይስ” ያግስ።
NUM 14:36 ሄ ቢታ ዎቻና መላ ሙሰይ ኪትዳ አሳት ስሚድ፥ ሄ ቢታባ ኢታ ኦዳ ኦድድ፥ ሙሰ ቦላ አሳይ ዙዙማና መላ ኦꬅዳይሳት፥
NUM 14:37 ጎዳ ስንꬃን ቦሻን ሀይቅዶሶና።
NUM 14:38 ሄ ቢታ ዎቻናዉ ብዳ አሳፐ ዮፎና ናአይ ካለብነ ናወ ናአይ እያሱ ፃላል አትዶሶና።
NUM 14:39 ሙሰይ ሄሳ እስራኤለ አሳስ ኦድዳ ዎደ አሳይ ዳሮ ዬክስ።
NUM 14:40 ዎንተꬃ ጋላስ ዎንታ ጉራ ደንድድ፥ ገዘ ቢታ ከይድ፥ “ኑኒ ናጋራ ኦꬅዳ፥ ሽን ሀእ ጎዳይ ኑስ እማና ግዳ በሳ ፑደ ከያና” ያግዶሶና።
NUM 14:41 ሽን ሙሰይ ኤንታኮ፥ “ጎዳ ኪታ ህንተ አይስ መንቲ? ህንተዉ ሀነና።
NUM 14:42 ጎዳይ ህንተራ ዶና ግሾ፥ ቦፕተ፤ ህንተ ሞርከት ህንተና ፆናና።
NUM 14:43 አማለቃ አሳራነ ካናነ አሳራ ህንተ ኦለትድ ማሻን ሀይቃና። ጎዳስ ህንተ ኪተቶና እፅዳ ግሾ፥ ጎዳይ ህንተራ ዴና” ያግስ።
NUM 14:44 ሽን ኤንቲ ጎዳ ጫቆ ታቦተይነ ሙሰይ ጉታፐ ደንዶና ደእሽን፥ ደረይ ዳርያ ቢታ ባናዉ ምንድ ደንድዶሶና።
NUM 14:45 ያንን ደረይ ዳርያ ቢታን ደእያ አማለቃ አሳይነ ካናነ አሳይ ኤንታ ኦላን ፆንድ፥ ሆርማ ጋካናዉ ኤንታ የደꬅዶሶና።
NUM 15:1 ጎዳይ ሙሰኮ፥
NUM 15:2 “እስራኤለ አሳ ሀይሳዳ ያጋ፤ ህንተ ዳና መላ ታ ህንተዉ እምያ ቢታ ገልያ ዎደ፥
NUM 15:3 ፁሳ ያርሾ ግድን ዎይኮ ጋሶ ያርሾ ግድን ዎይኮ ዶሳን ያርሽያ ያርሾ ግድን ዎይኮ ባኣለ ጋላሳ ያርሾ ግድን፥ መሄፐ ዎይኮ ዶርሳፈ ጎዳስ ታማን ፁገትያ ሳውያ ያርሾ ያርሽተ።
NUM 15:4 ያርሹዋ ያርሽያ ኡራይ ካꬃ ያርሹዋስ እስ ክሎ ግራመ ሎኦ ꬊለ ሳይሶ ልትሮ ሻማሆ ዛይተን ሙኑቀትዳይሳ ኤሆ።
NUM 15:5 ቃስ ፁሳ ያርሾስ ዎይኮ ሀራ ያርሾስ ኤህያ እስ እስ ዶርሳራ ሳይሶ ልትሮ ዎይነ ኡሻ ያርሾ ኦꬅድ ጊግስተ።
NUM 15:6 ማራዘ ያርሽያ ዎደ ናምኡ ክሎ ግራመ ሎኦ ꬊለ እስ ልትሮነ ባጋ ሻማሆ ዛይተን ሙኑቀትዳይሳ ኤህተ።
NUM 15:7 ኡሻ ያርሹዋስ ስኮ ልትሮ ዎይነ ኡሻ ያርሹዋስ ኤህተ። ሄስ ጎዳስ ሳውያ ያርሾ ግዳና።
NUM 15:8 ጋሶ ዎይኮ እስፈተꬃ ያርሾስ ዎፋኖ ፁሳ ያርሾ ኦꬃዳ ጎዳስ ያርሽያ ዎደ፥
NUM 15:9 ዎፋኑዋራ እስፈ ሄꬑ ክሎ ግራመ ሎኦ ꬊለ፥ ናምኡ ልትሮ ሻማሆ ዛይተን ሙኑቀትዳይሳ ካꬃ ያርሾ ኦꬃዳ ኤሀ።
NUM 15:10 ኡሻ ያርሹዋስ ባጋ ልትሮ ዎይነ ኡሻ ኤህተ። ሄስ ጎዳስ ሳውያ ፁሳ ያርሾ ግዳና።
NUM 15:11 “እስ እስ ዎፋኖይ ዎይኮ እስ እስ ማራዘይ ዎይኮ እስ እስ ኮለይ ያርሸትያ ዎደ ሀይሳዳ ሀንድ ኦሰቶ።
NUM 15:12 ዳሮ መሄይ ያርሸትያ ዎደ ያርሸትያ ካꬃ ያርሾይካ ሄሳዳ ዳሮ።
NUM 15:13 እስራኤለ አስ ግድዳ ኦንካ ሳውያ ፁሳ ያርሾ ጎዳስ ያርሽያ ዎደ ኡባን ሀይሳዳ ኦꬃናዉ ኮሼስ።
NUM 15:14 ያና የለተꬃን ህንተ ግዶን ደእያ በተ ዎይኮ ሀራ አስ ኦንካ ሳውያ ፁሳ ያርሾ ጎዳስ ያርሻናዉ ኮይኮ ሄሳዳ ኦꬃናዉ ኮሼስ።
NUM 15:15 ህንተዉነ ህንተ ግዶን ደእያ በተ አሳስ ሄ ዎጋይ እስኖ፤ ሄስ ያና የለተꬃስካ ኤቅድ ዳና ዎጋ፤ ህንተካ በተ አሳትካ ጎዳ ስንꬃን እስኖ።
NUM 15:16 ህንተዉነ ህንተ ግዶን ደእያ በተ አሳስ ህገይነ ዎጋይ እስኖ” ያግስ።
NUM 15:17 ጎዳይ ሙሰኮ፥
NUM 15:18 “እስራኤለ አሳስ ሀይሳዳ ጋዳ ኦዳ፤ ታኒ ህንተና ኤፍያ ቢታ ህንተ ገልድ፥
NUM 15:19 ሄ ቢታን ካፅያ ካꬅ ህንተ ምያ ዎደ ሄ ካꬃፈ ፄራ ከስድ ህንተ ጎዳስ ያርሽተ።
NUM 15:20 ሄስካ፥ ባይራ ካፅዳ ካꬃፈ ኡክዳ ኮይሮ ኡይꬅ፥ ግድሽን፥ ካꬅ ቡክያ ዉዱማፈ እምያ ያርሾ ኦꬅድ ያርሽተ።
NUM 15:21 የለተꬃ ኡባን ህንተ ቢታን ካፅዳ ካꬃፈ ኮይሩዋ ኡክድ ጎዳስ ያርሾ ያርሽተ።
NUM 15:22 “ጎዳይ፥ ሙሰስ ኦድዳ ኪታ ህንተ ኤሮና እፅድ ናጎና አትኮ፥
NUM 15:23 ዎይኮ ጎዳይ እያ ባጋራ እምዳ ኪታ ኡባ፥ ጎዳይ እምዳ ጋላሳፐ ዶምድ ያና የለተꬃ ጋካናዉ ናጎና እፅኮ፥
NUM 15:24 ቃስ ሄሳ እስራኤለ ማባራይ ኤሮና ኦꬅዳባ ግድኮ ማባራ ኡባይ ጎዳስ እስ ዎፋኖ ሳውያ ፁሳ ያርሾ ኦꬅድ፥ ዎጋይ ኪተይሳዳ ካꬃ ያርሹዋራነ ኡሻ ያርሹዋራ ያርሾ፤ ቃስ ናጋራ ያርሾ ኦꬅድ እስ ኮለ ያርሾ።
NUM 15:25 ካህነይ ኩመꬃ እስራኤለ ማባራስ ናጋራ አቶተꬃ ያርሾ ሺሼስ። ኤንቲ ኤሮና ባልዳ ባንታ ናቁዋ ግሾ ጎዳስ ፁሳ ያርሾነ ናጋራ ያርሾ ያርሽዳ ግሾ ኤንታ ናጋራይ አቶ ጌተታና።
NUM 15:26 እስራኤለ ማባራይነ ኤንታ ግዶን ደእያ በተ አሳይ ኤሮና ሄ ባላ ኦꬅዳ ግሾ አሳ ኡባ ናጋራይ አቶ ጌተታና።
NUM 15:27 “እስ አስ ኤሮና ናጋራ ኦꬅኮ እስ ላይꬃ ኮለ ናጋራ ያርሾ ኦꬅድ ያርሾ።
NUM 15:28 ኤሮና ደእሸ ናጋራ ኦꬅዳ ኡራስ ካህነይ ጎዳ ስንꬃን ናጋራ አቶተꬃ ዎጋ ፖሎ፤ እያ ናጋራይ አቶ ጌተታና።
NUM 15:29 ኤሮና ናጋራ ኦꬅዳ ኡራስ ካህነይ ጎዳ ስንꬃን ናጋራ አቶተꬃ ዎጋ ፖሎ፤ እያ ናጋራይ አቶ ጌተታና።
NUM 15:30 “ሽን እስራኤለ አስ ግድን ዎይኮ በተ አስ ግድን ኤርሸ ኦቶሮን ናጋራ ኦꬅያ ኡራይ ጎዳ ጫዬስ። ሄ ኡራይ ደርያ ግዶፈ ꬋዮ።
NUM 15:31 ሄ ኡራይ ጎዳ ኪታ ኤርሸ ካꬍዳ ግሾነ እያ ኪታ ካዉሽዳ ግሾ እያዉ ꬋዮይ በሴስ። እያ ባላይ እያ ቦላ ግዶ” ያግስ።
NUM 15:32 እስ ጋላስ እስራኤለ አሳይ መላ ቢታን ደእሽን፥ እስ ኡራይ ሳምባታ ጋላስ ምꬅ ምፅሸ ኦይከትስ።
NUM 15:33 ሄ ኡራ አሳይ ሙሰኮ፥ አሮናኮነ እስራኤለ ማባራኮ ኤህዶሶና።
NUM 15:34 ኤንቲ እያ ቦላ ኦꬃናባ ኤርቦና ግሾ ቃሾን ጋምእስዶሶና።
NUM 15:35 ሄሳፈ ጉየ ጎዳይ ሙሰኮ፥ “ሀ ኡራይ ሀይቃናዉ በሴስ፤ እስራኤለ ማባራይ ባንታ ጉታፐ ጋፃ ከስድ ሹቻን ጫድድ ዎꬎ” ያግስ።
NUM 15:36 ያትን እስራኤለ ማባራ ኡባይ ጎዳይ ሙሰ ኪትዳይሳዳ፥ ጉታፐ ጋፃ ከስድ ሹቻን ጫድድ ዎꬍዶሶና።
NUM 15:37 ጎዳይ ሙሰኮ፥
NUM 15:38 “እስራኤለ አሳስ ሀይሳዳ ጋዳ ኦዳ፤ ህንተነ ያና የለተꬃይ ህንተ አፍላ ጋፃን ማጫራ ከስድ ሄ ማጫራ ጋፃን ካሎሰ ቃጭና ስክተ።
NUM 15:39 ሄ ማጫራ ህንተ በእያ ዎደ ኡባን ታ ኪታታ፥ አኬክድ ፖሌታ፤ ታፐ ሃክድ ህንተ አይፍያ አሙዋነ ህንተ ዎዛና ቆፋ ካልድ ላመተከታ።
NUM 15:40 ሄ ማጫራ በእድ ህንተ ታ ኪታ ኡባ አኬክድ ፖላናነ ፆሳስ ዱማትዳይሳታ ግዳና።
NUM 15:41 ታኒ ጎዳ፥ ህንተ ፆሳ፤ ታ ህንተ ፆሳ ግዳናዉ ህንተና ግብፀፈ ከሳስ። ታኒ ጎዳ፥ ህንተ ፆሳ ያጋ” ያግስ።
NUM 16:1 ሌወ ኮቻፈ ቃሃታ ኮቸ ግድዳ ይስአራ ናአይ ቆረይ፥ ሮቤላ ኮቻፈ ኤልኣባ ናይት ዳታነይነ አቤሮይ ቃስ ፋለታ ናአይ ኦን፥
NUM 16:2 ሙሰ ቦላ ደንድዶሶና። ኤንታራ ናምኡ ፄታነ እሻታሙ አሳት ደኦሶና፤ ሄ አሳት አሳን ኤረትዳይሳታነ ማባራ ካለይሳታ።
NUM 16:3 ኤንቲ ሙሰነ አሮና ስን ሺቅድ፥ “ህንተ ዳርስደታ፤ ማባራ ኡባይ ጌሽ፤ ጎዳይ ኤንታራ ደኤስ። ያትን፥ ጎዳ ማባራ ቦላ ህንተና አይስ ꬎቁ ꬎቁ ኦቲ?” ያግዶሶና።
NUM 16:4 ሙሰይ ሄሳ ስእዳ ዎደ ጎዳ ስንꬃን ጉፋንስ።
NUM 16:5 ቆረኮነ እያ ጩጋኮ፥ “ጎዳይ ዎንቶ ዎንታ ኦን እያ ባገኮነ ኦን ጌሸኮ በሳና፤ ሄ እ ዶርዳ ኡራ ባኮ ሺሻና፤ ሄ ኡራይ እያኮ ሺቃና።
NUM 16:6 ዎንቶ ዎንታ ኔራነ ነ አሳራ ሀይሳ ኦꬅተ፤ እፃነ ጩይስያ ሚሸ ኤክድ፥
NUM 16:7 ቦንቆ ታማ እያን ዎꬅድ፥ ጎዳ ስንꬃን እፃነ ጩይስተ። ጎዳይ ዶርያ ኡራይ እ ጌሽ ግዳና። ህንተ፥ ሌወት ዛዋፐ አꬍደታ።”
NUM 16:8 ቃስካ ሙሰይ ቆረኮ፥ “ህንተ ሌወት ስእተ።
NUM 16:9 እስራኤለ ፆሳይ ህንተና ባ ማባራ ግዶፈ ዱማይድ፥ ጌሻ ዱንካንያን ኦꬃና መላነ ባ አሳ ስንꬃን ኤቅድ ሀጋዛና መላ ባኮ ሺሽዳይስ ህንተዉ ጉፅዴ?
NUM 16:10 እ ህንተናነ ህንተ እሻታ ሌወታ ኡባ ባኮ ሺሽስ፤ ሽን ሀእ ህንተ ካህነታ በሳ ኮዬታ።
NUM 16:11 ኔንነ ነ ጩጋ ኡባይ ጎዳ ቦላ ማካልድ ደንድደታ፤ ህንተ እያ ቦላ ዙዙማናዉ እ አሮን ኦኔ?” ያግስ።
NUM 16:12 “ያትድ፥ ሙሰይ፥ ኤልኣባ ናይታ፥ ዳታነነ አቤሮ ፄግስስ፤ ሽን ኤንቲ፥ ‘ኑኒ ቦኮ’ ያግዶሶና።
NUM 16:13 ኔኒ መላ ቢታን ኑና ዎꬋናዉ ማꬅነ ኤስ ጎግያ ቢታፈ ኑና ከስዳይስ ጉፅስ ጋዳ ሀእ ኑ ቦላ ሀላቃ ግዳናዉ ኮያይ?
NUM 16:14 ኔኒ ኑና ማꬅነ ኤስ ጎግያ ቢታ ገልሳባካ፤ ዎይኮ ኔኒ ኑስ ላታ ኦꬃዳ ጎሻ ጋደነ ዎይነ ጋደ እማባካ፤ ኔኒ ኑና ጭማሳ፤ ኑኒ ቦኮ” ያግዶሶና።
NUM 16:15 ያትን፥ ሙሰይ ዳሮ ሀንቀትድ፥ ጎዳኮ፥ “ኔኒ ኤንታ ያርሹዋ ኤኮፋ፤ ታ ኤንታፈ እሱዋካ ቆሀብከ፤ ቃስ ሀር አቶሽን እስ ሀረካ ኤንታፈ ኤካብከ” ያግስ።
NUM 16:16 ቃስ ሙሰይ ቆረኮ፥ “ዎንቶ ኔራነ ነ አሳራ ሄሳዳ አሮንካ ጎዳ ስን ሺቅተ።
NUM 16:17 እስ እስ አስ ባ እፃነ ጩይስያ ሚሽያ ኤኮ፤ እፃነካ እያን ዎꬆ፤ ኡባይ እስፈ ናምኡ ፄታነ እሻታሙ እፃነ ጩይስያ ሚሸ ግዴስ፤ እፃነ እያን ዎꬅድ ጎዳ ስን ሺሾ። ኔኒነ አሮን ህንተ እፃንያ ሄሳዳ ሺሽተ” ያግስ።
NUM 16:18 ያትን፥ እስ እስ አስ ባ ሚሸን እፃነነ ታማ ቦንቆ ዎꬅድ ጌሻ ዱንካንያ ፐንገን ሙሰራነ አሮናራ እስፈ ኤቅዶሶና።
NUM 16:19 ቆረይ ባ አሳራ ጌሻ ዱንካንያ ፐንገን ሙሰ ስንꬃንነ አሮና ስንꬃን ኤቅዶሶና። ሄ ዎደ ጎዳ ቦንቾይ ኩመꬃ ማባራስ ቆንጭስ።
NUM 16:20 ጎዳይ ሙሰኮነ አሮናኮ፥
NUM 16:21 “ታኒ እስ ቶሆ ሀ አሳ ꬋይሳና ግሾ፥ ኤንታፈ ሻከትተ” ያግስ።
NUM 16:22 ሽን ሙሰይነ አሮን ሳአን ጉፋንድ፥ “አቤት ፆሳዉ፥ አሳ ሸምፖ ኡባ መꬍዳ ፆሳዉ፥ እስ አስ ናጋራ ኦꬅኮ፥ ኔኒ ኩመꬃ ማባራ ሀንቀታዬ?” ያግዶሶና።
NUM 16:23 ያትን፥ ጎዳይ ሙሰኮ፥
NUM 16:24 “አሳስ ‘ቆረ፥ ዳታነነ አቤሮ ዱንካንያ ማታፐ ክችተ’ ጋዳ ኦዳ” ያግስ።
NUM 16:25 ሙሰይ ደንድድ፥ ዳታነኮነ አቤሮኮ ብን፥ እስራኤለ ጭማት እያ ካልዶሶና።
NUM 16:26 እ ማባራኮ፥ “ሀ ኢታ አሳ ዱንካንያ ማታፐ ክችተ፤ ኤንታባ አይብባካ ቦቾፍተ። አካይ፥ ጊኮ፥ ኤንታ ናጋራ ጋሶን ህንተካ ፕተትድ ꬋያና” ያግድ ምንꬅድ ኦድስ።
NUM 16:27 ያትን አሳይ ቆረ፥ ዳታነነ አቤሮ ዱንካንያ ማታፐ ክችዶሶና። ዳታነይነ አቤሮይ ካረ ከይድ፥ ባንታ ማቸታራነ ባንታ ናይታራ ባንታ ዱንካነታ ፐንገን ኤቅዶሶና።
NUM 16:28 ሙሰይ አሳኮ፥ “ታኒ ሀ ኦሶ ኡባ ኦꬃና መላ፥ ጎዳይ ታና ኪትዳይሳነ ታኒ ታ ሸነን ኦꬆናይሳ ህንተ ኤራናይ ሀይሳና።
NUM 16:29 ሀ አሳት አስ ሀይቀይሳዳ ሀይቅኮ ዎይኮ አሳ ቦላ ጋክያባ ፃላል ኤንታ ቦላ ጋክኮ ጎዳይ ታና ኪትቤና።
NUM 16:30 ሽን፥ ጎዳይ ኦራꬃባ ኦꬅድ፥ ቢታይ ዶየትድ ኤንታነ ኤንታዉ ደእያባ ኡባ ምትኮነ ኤንቲ ፓፃ ደእሸ ዱፎ ገልኮ ሄ ዎደ ሀ አሳት ጎዳ ካꬍዳይሳ ህንተ ኤራና” ያግስ።
NUM 16:31 እ ያግድ ኦንግዳ ዎደ ኤንቲ ኤቅዳ ቢታይ ዶየትድ፥
NUM 16:32 ኤንታነ ኤንታ ሶ አሳ፥ ቆረ ጩጋ ኡባነ ኤንታዉ ደእያባ ኡባ ምትስ።
NUM 16:33 ያትን ኤንቲ ባንታዉ ደእያባ ኡባራ ፓፃ ደእሸ፥ ዱፎ ገልዶሶና። ቢታይ ኤንታ ቦላ ጎርደትስ፤ ኤንቲ ማባራ ግዶፈ ꬋይዶሶና።
NUM 16:34 ኤንታ ዋሱዋ ጋሶን ኤንታ ማታን ደእያ እስራኤለ አሳ ኡባይ፥ “ቢታይ ኑናካ ምታና ሀኔስ” ያግድ ባቃትዶሶና።
NUM 16:35 ቃስ ታም ጎዳ ማታፐ ይድ እፃነ ጩይስያ ናምኡ ፄታነ እሻታሙ አሳ ምስ።
NUM 16:36 ሄሳፈ ጉየ ጎዳይ ሙሰኮ፥
NUM 16:37 “ካህነይ፥ አሮና ናኣ አላዛር ናሰ ብራታፐ ኦሰትዳ እፃነ ጩይስያ ሚሸታ ፁገትዳ አሳፐ ኤክድ፥ ሄ ሚሸት ጌሽ ግድያ ግሾ፥ ቦንቆ ታማ ሀራ ሶ ኤፍድ ላላና መላ ኦዳ።
NUM 16:38 ሄ ሚሸት ባንታ ደኡዋ ꬋይሳናዉ ናጋራ ኦꬅዳ አሳይ እፃነ ጩይስያ ሚሸ። ሄ ሚሸት ጎዳስ እመትዳ ግሾነ ጌሽ ግድያ ግሾ ሌእሳ ቆፃዳ ያርሾ በሳ ላንፃ። ሄስ እስራኤለ አሳስ ናግሶ ማላ ግዶ” ያግስ።
NUM 16:39 ያትን ካህነይ አላዛር እፃነ ጩይስያ ሚሸታ ኤክድ ያርሾ በሳ ላንፃናዉ ሌእስድ ቆፅስ።
NUM 16:40 ጎዳይ ሙሰ ባጋራ ኪትዳይሳዳ፥ አሮና ኮቸ ግዶና ኦንካ ጎዳ ስንꬃን እፃነ ጩይሳናዉ ሺቆና መላ፥ እፃስ ጊኮ፥ ቆረ ቦላነ እያ ካለይሳታ ቦላ ጋክዳይስ እያ ጋኮና መላ እስራኤለ አሳ አኬክሳናዉ ሀይሳታ ኦꬅስ።
NUM 16:41 ዎንተꬃ ጋላስ እስራኤለ ማባራ ኡባይ፥ “ጎዳ አሳ ህንተ ዎꬍደታ” ያግድ ሙሰ ቦላነ አሮና ቦላ ዙዙምዶሶና።
NUM 16:42 ኤንቲ ሙሰነ አሮና ቦላ ደንዳናዉ ሺቅድ፥ ኤንቲ ጌሻ ዱንካንያ ፄልያ ዎደ ሻራይ ጌሻ ዱንካንያ ካምን፥ ጎዳ ቦንቾይ ቆንጭስ።
NUM 16:43 ሄሳፈ ጉየ፥ ሙሰይነ አሮን ጌሻ ዱንካንያ ስን ይድ ኤቅዶሶና።
NUM 16:44 ያትን ጎዳይ ሙሰኮ፥
NUM 16:45 “ሀ አሳ ግዶፈ ክችተ፤ ታ ኤንታ እስ ቶሆን ꬋይሳና” ያግስ። ሙሰይነ አሮን ሳአን ጉፋንዶሶና።
NUM 16:46 ሙሰይ አሮናኮ፥ “እፃነ ጩይስያ ነ ሚሽያ ኤካዳ ያርሾ በሳፈ ቦንቆ ታማ ኤካዳ እያን ዎꬃ፤ እያ ቦላ እፃነ ጉጃዳ እስራኤለ ማባራኮ ኤፋ። ጎዳ ሀንቆይ እያ ማታፐ ከይ ክችስ፤ ቦሻይካ ዶምስ” ያግስ።
NUM 16:47 ያትን አሮን፥ ሙሰይ ኪትዳይሳዳ ባ እፃነ ጩይስያ ሚሽያ ኤክድ ማባራ ግዶ ዎፅድ ገልስ። ቦሻይ አሳ ዎꬎ ኦይክስ ሽን፥ አሮን እፃነ ጩይስድ አሳስ አቶተꬅ ኤህስ።
NUM 16:48 ያትድ፥ እ ሀይቅዳይሳታነ ፓፃታ ግዶን ኤቅን፥ ቦሻይ አግስ።
NUM 16:49 ቆረ ጋሶን ሀይቅዳ አሳይ አትሽን፥ ሄ ቦሻን ሀይቅዳ አሳ ታይቦይ 14,700.
NUM 16:50 ቦሻይ ኤቅዳፐ ጉየ፥ አሮን ጌሻ ዱንካንያ ፐንገን ደእያ ሙሰኮ ስምስ።
NUM 17:1 ጎዳይ ሙሰኮ፥
NUM 17:2 “እስራኤለ አሳይ እስ እስ ኮቻ ሀላቃታፐ እስ እስ ፃምአ ኤክድ ታማነ ናምኡ ፃምአ ነዉ ኤሀና መላ ኤንታዉ ኦዳ። ሄ ፃምኣ ቦላ እስ እስ አሳ ሱንꬃ ፃፋ።
NUM 17:3 እስ እስ ኮቻ ሀላቃስ እስ ፃምአ ኮሽያ ግሾ፥ ሌወ ፃምኣ ቦላ አሮና ሱንꬃ ፃፋ።
NUM 17:4 ሄ ፃምአታ ጌሻ ዱንካንያ ግዶን ታ ኔራ ጋሄትያ ታቦትያ ስንꬃን ዎꬃ።
NUM 17:5 ታ ዶርያ ኡራ ፃምአይ አጫና፤ ሄሳዳ ኦꬃዳ ህንተ ቦላ እስራኤለ አሳ ዙዙንꬃ ታ ተቃና” ያግስ።
NUM 17:6 ሄሳ ሙሰይ እስራኤለ አሳስ ኦድን፥ ታማነ ናምኡ ሀላቃት ሁጰን ሁጰን እስ እስ ፃምአ ኤህዶሶና። አሮና ፃምአይካ ሄ ፃምአታ ግዶን ደኤስ።
NUM 17:7 ሙሰይ ሄ ፃምአታ ኡባ ጌሻ ዱንካንያ ግዶን ጎዳ ስንꬃን ዎꬅስ።
NUM 17:8 ዎንተꬃ ጋላስ ሙሰይ ጌሻ ዱንካንያ ግዶ ገልያ ዎደ ሌወ ኮቸ ግድዳ አሮና ፃምአይ አጭዳይሳ፥ ጋምቡፅዳይሳ፥ ጪይዳይሳነ ላዉዘ ምꬃ አይፈ አይፍዳይሳ በእስ።
NUM 17:9 ሙሰይ ፃምአ ኡባ ጎዳ ስንꬃፈ ኤህድ እስራኤለ አሳ በስስ። ኤንቲ ሀንዳባ በእዳፐ ጉየ እስ እስ ሀላቃይ ባንታ ፃምኣ ፃምኣ ኤክዶሶና።
NUM 17:10 ጎዳይ ሙሰኮ፥ “አሮና ፃምኣ ታቦትያ ስንꬃን ዛራዳ ዎꬃ። ማካልዳ እስራኤለ አሳይ ታ ቦላ ዙዙንꬃ አጎና እፅኮ ሀይቃናይሳ ኤንታዉ ማላታ ኦꬃዳ ዎꬃ” ያግስ።
NUM 17:11 ሙሰይ፥ ጎዳይ ኪትዳይሳዳ ኦꬅስ።
NUM 17:12 እስራኤለ አሳይ ሙሰኮ፥ “ሄሳ ግድኮ፥ ኑ ኡባይ ሀይቃና፤ ꬋያና።
NUM 17:13 ጌሻ ዱንካንያኮ ሺቅያ ኡባይ ሀይቃና ግድኮ፥ ኑ ኡባይካ ሀይቆስ ጉሰዬ?” ያግዶሶና።
NUM 18:1 ጎዳይ አሮናኮ፥ “ጌሻ ዱንካንያን ኦሰትያ ናጋራስ ኔኒ፥ ነ አደ ናይትነ ነ አዋ ሶ አሳይ ኦይሸታና፤ ህንተ ካህነተꬃ ኦሱዋን ፖለትያ ናጋራ ነነ ነ አደ ናይታ ፃላል ኦይሸታና።
NUM 18:2 ኔንነ ነ አደ ናይት ጌሻ ዱንካንያ ስንꬃን ኦꬅያ ዎደ ህንተና ኦꬅድ ማዳና መላ ሌወ ኮቸ ግድዳ ነ ዳቦታ ኤሀ።
NUM 18:3 ኤንቲ ህንተፈ ጋርሳን ጌሻ ዱንካንያ ኦሶ ኡባ ኦꬆና፤ ሽን ኤንትካ ህንተካ ሀይቆና መላ ኤንቲ ጌሻ ዱንካንያ ሚሽያኮነ ያርሾ በሳኮ ሺቆፖ።
NUM 18:4 ኤንቲ ህንተራ እስፈ ግድድ ጌሻ ዱንካንያን ደእያ ኦሶ ኡባ ኦꬆ። ሽን ሌወታፐ አትሽን፥ ሀራ አስ ኦንካ ህንተ ደእያ በሳ ሺቆፖ።
NUM 18:5 ዛሪድ እስራኤለ አሳ ቦላ ሀንቆይ ዎꬎና መላ ጌሻ ዱንካንያንነ ያርሾ በሳን ኦሰትያ ኦሱዋ ህንተ ፃላላ ኦꬅተ።
NUM 18:6 ሌወታ፥ ህንተ ዳቦታ፥ እስራኤለ አሳ ግዶፈ ታ ዶራስ። ኤንቲ ጌሻ ዱንካንያ ኦሱዋ ኦꬃና መላ ታኒ ኤንታ ታዉ ዱማያስ።
NUM 18:7 ሽን ያርሾ በሳንነ ማጋራጁዋፈ ጋꬃ ባጋን ደእያ ኦሱዋ ነነ ነ አደ ናይታ ፃላል ኦꬅተ። ካህነተꬃ ኦሱዋ ታኒ ህንተዉ እሞታ ኦꬃዳ እማስ፤ ሀራ አስ ኦንካ ሄ በሳ ሺቅኮ ሀይቆ” ያግስ።
NUM 18:8 ጎዳይ አሮናኮ፥ “እስራኤለ አሳይ ታዉ እምያ ጌሻ እሞታ ኡባ ታ ነዉ እማስ። ታኒ ነዉነ ነ አደ ናይታስ መርና ግሾ ኦꬃዳ እማስ።
NUM 18:9 ታዉ እመትያ ዳሮ ጌሻ እሙዋፐ ታማን ፁገቶና ባጋይ ህንተባ ግዳና። ኤንቲ ታዉ እምያ ጌሻ እሞ ኡባይ ካꬃ ያርሾ ግድን ናጋራ ያርሾ ግድን ናቆ ያርሾ ግድን ነዉነ ነ አደ ናይታስ ግዳና።
NUM 18:10 ህንተ ሄሳ ጌሻ በሳን ሚተ፤ አደ ኡባይ ሄሳ ሞ፤ ሄስ ህንተዉ ጌሽ ግዳና።
NUM 18:11 “ቃስ እስራኤለ አሳይ ታዉ ያርሽያ ዩሾ ያርሾ ኡባ ነዉ፥ ነ አደ ናይታስነ ነ ማጫ ናይታስ መርናዉ ግሾ ኦꬃዳ እማስ፤ ህንተ ሶ አሳ ግዶን ዎጋዳ ቱና ግዶና ኡባይ ሄሳ ሞ።
NUM 18:12 “እስራኤለ አሳይ ታዉ ባይራ ኦꬅድ እምያ ኮይሮ አይፍያፐ፥ ሻማሆ ዛይተ ኡባ፥ ያላጋ ዎይነ ኡባነ ካꬃ ኡባ ነዉ እማስ።
NUM 18:13 ኤንቲ ጎዳስ ኤህያ ጋደን ኮይሮ ጋክዳ አይፈይ ህንተሳ፤ ህንተ ሶ አሳ ግዶን ዎጋዳ ቱና ግዶና ኡባይ ሄሳ ሞ።
NUM 18:14 “እስራኤለ አሳ ግዶፈ ጎዳስ ዱማትዳ ኡባይ ህንተሳ።
NUM 18:15 ባይራ የለትዳ አስ ዎይኮ መሄይ እስራኤለ አሳይ ጎዳስ እምዳ ኡባይ ህንተሳ። ሽን ባይራ የለትዳ አደ ናአነ ባይራ የለትዳ ጌሽ ግዶና መሄ ህንተ ዎዛናዉ በሴስ።
NUM 18:16 እስ አጌና ናይታ ዎዛናዉ ጌሻ ዱንካነን ኤረትዳ ምዛነን እቻሹ ብራ ሳንትመ ዎዞ ጋተ ቃንፅተ።
NUM 18:17 ሽን ኤንቲ ጌሽ ግድያ ግሾ መሄ፥ ዶርሰነ ዴሻ ባይራ ህንተ ዎዛናዉ ኮሸና። ኤንታ ሱꬃ ያርሾ በሳ ቦላ ጉሳ፤ ጎዳስ ሳውያ ፁሳ ያርሾ ኦꬃዳ ኤንታ ሞꬎ አሹዋ ታማን ፁጋ።
NUM 18:18 አንጋሶይነ ኡሻቻ ገዳይ ዩሾ ያርሾን ነባ ግድዳይሳዳ ኤንታ አሾይካ ነባ።
NUM 18:19 እስራኤለ አሳይ ጎዳስ እምያ ጌሻ ያርሾ ኡባ ነዉ፥ ነ አደ ናይታስነ ነ ማጫ ናይታስ መርናዉ ግሾ ኦꬃዳ እማስ። ሄስ ታኒ ኔራነ ነ ኮቻራ ጫቅያ መርና ጫቁዋ።”
NUM 18:20 ቃስካ ጎዳይ አሮናኮ፥ “ኤንታ ቢታፈ ነና ጋክያ ግሾይ ዎይኮ ላት ባዋ፤ እስራኤለ አሳ ግዶን ነ ላታይነ ነና ጋክያ ግሾይ ታና።”
NUM 18:21 ጎዳይ፥ “ሌወት ጌሻ ዱንካንያን ኦꬅያ ኦሱዋስ ዳሞዘ ግዳና መላ እስራኤለ አሳይ ታዉ ኤህያ አስራታ ኡባ ኤንታዉ እማስ።
NUM 18:22 ሀችፈ ዶምድ እስራኤለ አሳይ ባንታ ናጋራ ጋሶን ሀይቆና መላ ጌሻ ዱንካንያኮ ሺቆፖ።
NUM 18:23 ጌሻ ዱንካንያ ግዶን ኦይሳትነ እያ ግዶን ፖለትያ ናጋራ ቶከይ ሌወታ። ሄስ የለተꬃ ኡባስ መርና ዎጋ። ሌወታስ እስራኤለ አሳ ግዶን ላት ባዋ።
NUM 18:24 ሄሳ ግሾ፥ እስራኤለ አሳይ ጎዳስ እምያ አስራታ፥ ታ ሌወታስ እማስ። ታኒ፥ ኤንታዉ እስራኤለ አሳ ግዶን ላት ባዋ ግዳይ ሄሳሳ” ያግስ።
NUM 18:25 ቃስ ጎዳይ ሙሰኮ፥
NUM 18:26 “ኔኒ ሌወታኮ ሀይሳዳ ያጋ፤ ታኒ ህንተዉ ላታ ኦꬃዳ እምዳ አስራታ ህንተ እስራኤለ አሳፐ ኤክያ ዎደ ህንተ ሄ አስራታፐ አስራታ ጎዳስ እምተ።
NUM 18:27 ህንተ እሞይ ዉዱማፈ ሺቅዳ ካꬃዳ ዎይኮ ጉምእያ በሳፈ ሀእ ከይዳ ዎይነዳ ህንተዉ ታይበታና።
NUM 18:28 ሄሳዳካ እስራኤለ አሳፐ ህንተ ኤክያ አስራታ ኡባፈ ዱማ እሞ ጎዳስ እምተ፤ ህንተ አስራታፐ ጎዳ ግሾ ግድዳ እሞታ ካህንያ አሮናስ እምተ።
NUM 18:29 ህንተ ኤክያ እሞታ ኡባፈ ሎኡዋነ ጌሻ ጎዳስ ግሾ ኦꬅድ እማናዉ በሴስ።
NUM 18:30 ኡባፈ ሎኦ እሙዋ ህንተ እምያ ዎደ አትዳይስ ህንተዉ ቡከትያ ዉዱማ ካꬃዳነ ጉምኤትያ ዎይንያዳ ታይበታና።
NUM 18:31 አትዳይስ ጌሻ ዱንካንያን ህንተ ኦꬅያ ኦሱዋስ ዳሞዘ ግድያ ግሾ ህንተነ ህንተ ሶ አሳይ አዉንካ ማናዉ ዳንዳኤታ።
NUM 18:32 ሎኦ ባጋ ጎዳስ እምዳፐ ጉየ ህንተ ሚኮ ሄስ ህንተዉ ናጋራ ግደና። ሎኦ ባጋ ከሶና ደእሸ ሄ እሞታፐ ምድ ህንተ እስራኤለ አሳ እሞታ ቱንሶና መላ ናገትተ፤ ሄሳ ህንተ ኦꬆና እፅኮ ህንተ ሀይቃና” ያጋዳ ሌወታስ ኦዳ።
NUM 19:1 ጎዳይ ሙሰኮነ አሮናኮ፥
NUM 19:2 “ጎዳይ ህግያን ኪተትዳ ዎጋይ ሀይሳ፤ ቦርሶይ ባይና፥ እ ጋናን ቃምባር ዎꬍቦና ዞኦ ኡሱ ኤሀና መላ እስራኤለ አሳስ ኦድተ።
NUM 19:3 ካህንያ አላዛራስ እዮ እምተ፤ ጉታፐ እዮ ጋፃ ከስድ ካህንያ ስንꬃን ሹኮ።
NUM 19:4 ካህነይ አላዛር እ ሱꬃፈ ጉꬃራ ኤክድ ባ ብራꬍያን ጌሻ ዱንካንያኮ ስሚድ ላፑን ቶሆ ዉርፆ።
NUM 19:5 ካህነይ በእሽን ኡስያ ፁገቶ፤ ጋልባይ፥ አሾይ፥ ሱꬃይነ ቶጨይ ፁገቶ።
NUM 19:6 ካህነይ ዝጋ ምꬅ፥ ህሶጰ ታሸነ ዞኦ ቃጭና ኤክድ ኡስያ ኤፅያ ታማን የጎ።
NUM 19:7 ሄሳፈ ጉየ ካህነይ ባ ማኡዋነ ባ አሳተꬃ ሜጨትድ ጉታ ገሎ፤ ሽን ኦማርስ ጋካናዉ ዎጋዳ ቱና ግዳና።
NUM 19:8 ሄ ኡስዉ ፁግዳይስ ባ ማኡዋነ ባ አሳተꬃ ሜጨቶ፤ እካ ኦማርስ ጋካናዉ ዎጋዳ ቱና ግዳና።
NUM 19:9 “ሄሳፈ ጉየ፥ ሀራ ጌሻ አስ ኡስያ ፁገትዳ ብዱዋ ሺሽድ ጉታፐ ጋፃን ጌሻ በሳን ዎꬆ። እስራኤለ አሳይ ቱናተꬃፈ ጌሽያ ሃꬃን ጎኤታናዉ ሄስ ናገትድ ኡታና፤ ሄስ ናጋራፐ ጌሻናዉ ጎኤስ።
NUM 19:10 ቃስ ኡሴ ብዱዋ ሺሽዳ ኡራይካ ባ ማኡዋ ሜጮ፤ እ ኦማርስ ጋካናዉ ዎጋዳ ቱና ግዳና። ሀ ዎጋይ እስራኤለ አሳስነ ኤንታ ግዶን ደእያ ሀራ ደረ አሳስ መርና ዎጋ ግዳና።
NUM 19:11 “አሀ ቦችያ ኦንካ ላፑን ጋላስ ዎጋዳ ቱና ግዳና።
NUM 19:12 ቱናተꬃፈ ጌሽያ ሃꬃን ሄꬓንꬆ ጋላስነ ላፑንꬃ ጋላስ እ ባና ጌሾ፤ ሄሳፈ ጉየ፥ እ ዎጋዳ ጌሽ ግዳና። ሽን ሄꬓንꬆ ጋላስነ ላፑንꬃ ጋላስ እ ባና ጌሾና እፅኮ እ ጌሽ ግደና።
NUM 19:13 ሀይቅዳ አሳ አሀ ቦችያ ኦንካ ባና ጌሾና እፅኮ እ ጎዳ ዱንካንያ ቱንሴስ፤ ሄ ኡራይ እስራኤለ አሳ ግዶፈ ኩረቶ። ቱናተꬃፈ ጌሽያ ሃꬃይ እያ ቦላ ዉርፀትቦና ግሾ እ ቱና፤ እ ቱና ግድድ ጋምኤስ።
NUM 19:14 “እስ አስ ዱንካንያ ግዶን ሀይቅኮ ኦꬃና ዎጋይ ሀይሳ፤ ዱንካንያ ግዶ ገልያ ኦንካ፥ ቃስ ዱንካንያ ግዶን ደእያ ኦንካ ላፑን ጋላስ ጋካናዉ ቱና ግዳና።
NUM 19:15 ሄሳዳካ፥ ካመቶና ዶያ ደእያ ሚሸ ኡባይ ቱና ግዳና።
NUM 19:16 ቃስ ደንባን ሀይቅዳ አሳ አሀ ዎይኮ ሀርገትድ ሀይቅዳ አሳ አሀ ዎይኮ መቀꬅ ዎይኮ ዱፎ ቦችያ ኦንካ ላፑን ጋላስ ጋካናዉ ቱና ግዳና።
NUM 19:17 “ቱናተꬃፈ ጌሻናዉ ፁገትዳ ኡሴ ብዱዋፐ ጉꬃራ ኤካዳ ኦቶን የጋዳ ፑልቶ ሃ እያ ቦላ ትጋ።
NUM 19:18 ጌሻ አስ ህሶጰ ውርጮ ኤክድ ሃꬃን ናቅ ከስድ፥ ዱንካንያ፥ እያ ግዶን ደእያ ሚሽያነ አሳ ኡባ ቦላ ዉርፆ። ቃስ ሀይቅዳ አሳ አሀ ዎይኮ መቀꬅ ዎይኮ ዱፎ ዎይኮ ሀርገት ሀይቅዳ አስ ቦችዳ አሳ ቦላ ዉርፆ።
NUM 19:19 ጌይዳ አስ ሄꬓንꬆ ጋላስነ ላፑንꬃ ጋላስ ጌይቦና ኡራ ቦላ ዉርፆ። እ ላፑንꬃ ጋላስ ሄ ኡራ ቱናተꬃፈ ጌሾ፤ ሄ ጌይዳ አደይ፥ ባ ማኡዋነ ባ አሳተꬃ ሜጨቶ፤ ሄ ጋላስ ኦማርስ እ ጌሽ ግዳና።
NUM 19:20 “ሽን ቱና ኡራይ ባና ጌሾና እፅኮ፥ ሄ ኡራይ ጌሻ ዱንካንያ ቱንስዳ ግሾ፥ እስራኤለ አሳ ግዶፈ ኩረቶ፤ ቱናተꬃፈ ጌሽያ ሃꬃይ እያ ቦላ ዉርፀትቦና ግሾ እ ቱና።
NUM 19:21 ሀይስ ህንተዉ መርና ዎጋ ግዳና። ቱናተꬃፈ ጌሽያ ሃꬃ ዉርፅያ ኡራይ ባ ማኡዋ ሜጮ፤ ቃስ ቱናተꬃፈ ጌሽያ ሃꬃ ቦችያ ኦንካ ኦማርስ ጋካናዉ ቱና ግዳና።
NUM 19:22 ቱና ኡራይ ቦችያ አይብባይካ ቱኔስ፤ ቃስ ሄ ሚሽያ ቦችያ ኦንካ ኦማርስ ጋካናዉ ቱና ግዴስ” ያግስ።
NUM 20:1 ኮይሮ አጌናን እስራኤለ አሳ ኡባይ ሲና መላ ቢታ ጋክድ፥ ቃደሳ ጌተትያ በሳን ዱንካንዶሶና። ማይራማ ያን ሀይቃዳ ሞገታሱ።
NUM 20:2 ሄ በሳን አሳስ ሃꬅ ꬋይን፥ አሳይ ሙሰ ቦላነ አሮና ቦላ ደንድዶሶና።
NUM 20:3 ኤንቲ፥ “ኑ እሻት ጎዳ ስንꬃን ሀይቅዳ ዎደ ኑካ ሀይቅዳ ግዶርኮሽን።
NUM 20:4 ኑነ ኑ መሄይ ሀ መላ ቢታን ሀይቃና መላ ጎዳ ማባራ ሀ በሳ አይስ ኤህደቲ?
NUM 20:5 ግብፀፈ ከስድ ሀ ኢታ በሳ ኑና አይስ ኤህደቲ? ሀይሳን ካꬅ ዎይኮ ባላሰይ ዎይኮ ዎይነይ ዎይኮ ኦሮማነይ ባዋ፤ ሀር አቶሽን ኡየትያ ሃꬅካ ሀይሳን ባዋ” ያግድ ሙሰራ ካጨትዶሶና።
NUM 20:6 ያትን ሙሰይነ አሮን አሳ ማታፐ ጌሻ ዱንካንያ ፐንገ ብድ ሳአን ጉፋንዶሶና፤ ጎዳ ቦንቾይካ ኤንታዉ ቆንጭስ።
NUM 20:7 ጎዳይ ሙሰኮ፥
NUM 20:8 “ነ ፃምአ ኤካ፤ ኔራነ ነ እሻ አሮናራ ማባራ ሺሽተ። ኤንታ ስንꬃን ዛላይ ሃ ከሳና መላ ኦዳ። ህንተ ዛላፈ ሃ ከስድ፥ ኤንታነ ኤንታ መህያ ኡሻና” ያግስ።
NUM 20:9 ጎዳይ ኪትዳይሳዳ ሙሰይ ጎዳ ስንꬃፈ ፃምኣ ኤክስ።
NUM 20:10 ሙሰይነ አሮን ማባራ ዛላ ስንꬃን ሺቃና መላ ኦꬅድ፥ አሳኮ፥ “ህንተኖ ጌላቶ፥ ስእተ፤ ሀ ዛላፈ ህንተዉ ኑኒ ቱማ ሃ ከሳኔ?” ያግስ።
NUM 20:11 ሙሰይ ባ ፃምአ ደንꬅድ ዛላ ናምኡ ቶሆ ሾጭስ፤ ሃꬅ ꬉቅድ ከይን ኤንትነ ኤንታ መሄት ኡይዶሶና።
NUM 20:12 ሽን ጎዳይ ሙሰኮነ አሮናኮ፥ “እስራኤለ አሳ ስንꬃን ህንተ ታ ጌሻተꬃ በሳናዉ አማነትቦና ግሾ ታ ኤንታዉ እምያ ቢታ ሀ አሳ ካለꬅድ ህንተ ገለከታ” ያግስ።
NUM 20:13 እስራኤለ አሳይ ጎዳራ ካጨትዳ ግሾነ ጎዳይ ባ ጌሻተꬃ ኤንታ ግዶን ቆንጭስዳ ግሾ ሄ በሳይ ማርባ ሃꬃ ጌተትስ።
NUM 20:14 ኤዶመ ካዋኮ ሙሰይ ቃደሳፐ ሀይሳዳ ያግድ ኪታ የድስ። “ነ እሻይ እስራኤለይ ሀይሳዳ ያጌስ፤ ኑና ጋክዳ መቶ ኡባ ነ ስአዳሳ።
NUM 20:15 ኑ ማይዛት ዱገ ግብፀ ዎꬍዶሶና፤ ያን ኑኒ ዳሮ ላይꬅ ደእዳ። ግብፀት ኑናነ ኑ አዋታ ኡንኤꬅዶሶና።
NUM 20:16 ኑኒ ጎዳኮ ዋስን፥ እ ኑ ዋሱዋ ስእድ፥ ባ ኪታንቹዋ ኪትድ ኑና ግብፀፈ ከስስ። ሀእ ኑኒ ነ ቢታ ጋፃን ደእያ ቃደሳ ካታማን ደኦስ።
NUM 20:17 ሀያና፥ ኑኒ ነ ቢታራ ካንꬅድ አꬋና መላ ኦꬃርክ፤ ኑኒ ኦገፐ ጋፃ ከዮኮ፤ ነ ጎሻ ዎይኮ ዎይነ ጋደ ግዶ ገሎኮ፤ ኑኒ ሃꬃ ኦላፈ ሃ ኡዮኮ። ኑኒ ካዎ ኦገ ኦይክድ ባና፤ ኑኒ ነ ቢታራ ካንꬅድ አꬋና ጋካናዉ ሀድርስ ዎይኮ ኡሻች ጎኮ” ያግስ።
NUM 20:18 ሽን ኤዶመ አሳይ፥ “ኑ ቢታራ ካንꬅሶኮ፤ ህንተ ሀይሳራ ካንꬃናዉ ቆፕኮ፥ ኑኒ ደንድድ ህንተና ኦላና” ያግዶሶና።
NUM 20:19 ያትን እስራኤለ አሳይ፥ “ኑኒ ካዎ ኦግያራ ባና፤ ኑኒ ዎይኮ ኑ መሄይ ህንተ ሃꬃፈ ኡይኮ፥ ኑኒ ሄሳስ ጋተ ጭጋና፤ ኑኒ ቶሆራ አꬃ ፃላላ ኮዮስ፤ ሀራባ አይኮካ ኮዮኮ” ያግዶሶና።
NUM 20:20 ኤዶመ አሳይ ዛሪድ፥ “ህንተ ሀይሳራ አꬋናዉ ዳንዳኤከታ” ያግስ። ካልድ፥ ዳሮነ ዎልቃማ ኦላንቾታ ኤክድ እስራኤለ አሳ ኦላናዉ ከይስ።
NUM 20:21 ኤዶመ አሳይ ባንታ ቢታራ እስራኤለ አሳ አꬆና እፅን፥ እስራኤለ አሳይ ስሚድ ሀራ ኦገራ ብዶሶና።
NUM 20:22 እስራኤለ አሳ ኡባይ ቃደሳፐ ደንድድ ሆራ ዙማኮ ብዶሶና።
NUM 20:23 ኤዶመ ዛዋን ደእያ ሆራ ዙማን፥ ጎዳይ ሙሰኮነ አሮናኮ፥
NUM 20:24 “አሮን ባ ማይዛታን ጋሄትያ ዎደይ ጋክስ። ህንተ ናምአይ ማርባ ሃꬃ ማታን ታ ኪታ ቦላ ጌላትዳ ግሾ እስራኤለ አሳስ ታ እምያ ቢታ እ ገለና።
NUM 20:25 አሮናነ እያ ናኣ አላዛራ ኤካዳ ሆራ ዙማ ቦላ ከያ።
NUM 20:26 አሮና ካህነተꬃ ማኡዋ ቃራዳ፥ እያ ናኣ አላዛራ ማይዛ። አሮን ያን ሀይቃና” ያግስ።
NUM 20:27 ጎዳይ ኪትዳይሳዳ ሙሰይ ኦꬅስ፤ እስራኤለ አሳ ኡባይ በእሽን፥ ኤንቲ ሆራ ዙማ ቦላ ከይዶሶና።
NUM 20:28 ሙሰይ አሮና ካህነተꬃ ማኡዋ ቃርድ እያ ናኣ አላዛራ ማይዝስ። አሮን ሄ ዙማ ሁጰን ሀይቅስ። ሙሰይነ አላዛር ዙማፐ ዎꬍዶሶና።
NUM 20:29 አሮን ሀይቅዳይሳ እስራኤለ አሳይ ኤርዳ ዎደ እስራኤለ አሳይ አሮናስ ሀስታሙ ጋላስ ዬክዶሶና።
NUM 21:1 ካናነ ቢታን፥ ነገበ መላ ቢታን ደእያ አራዳ ካዎይ፥ እስራኤለ አሳይ አታርማ ኤፍያ ኦግያራ የይሳ ስእዳ ዎደ እስራኤለ አሳራ ኦለትድ ኤንታፈ ጉꬃ አሳ ድእዶሶና።
NUM 21:2 ሄ ዎደ እስራኤለ አሳይ፥ “ኔኒ ሀ አሳ ኑ ኩሸን አꬃዳ እምኮ፥ ኑኒ ኤንታነ ኤንታ ካታማታ ኩመꬅ ꬋይሳና” ያግድ ጎዳስ ቃንግዶሶና።
NUM 21:3 ጎዳይ እስራኤለ አሳ ዎሳ ስእድ፥ ካናነታ ኤንታ ኩሸን አꬅድ እምን፥ ኤንቲ ካናነታነ ኤንታ ካታማታ ኩመꬅ ꬋይስዶሶና። ሄሳ ግሾ፥ ሄ በሳይ ሆርማ ጌተትድ ሱንትስ።
NUM 21:4 እስራኤለ አሳይ ሆራ ዙማፐ ደንድድ፥ ኤዶመ ቢታ ዩሹዋራ ባናዉ ዞኦ አባኮ ኤፍያ ኦግያራ ብዶሶና፤ ሽን ኦገ ቦላ አሳስ ዳንዳአይ ዉርስ።
NUM 21:5 አሳይ፥ “ኑኒ መላ ቢታ ሀይቃና መላ ግብፀፈ ኑና አይስ ከስደቲ? ካꬅ ባዋ፤ ሃꬅ ባዋ፤ ሀ ኢታ ካꬃይ ኑና ሻትስ” ያግድ ፆሳ ቦላነ ሙሰ ቦላ ዙዙምዶሶና።
NUM 21:6 ያትን፥ ጎዳይ አሳ ግዶ ማርዘራ ደእያ ሾሽ የድን፥ እስራኤለ አሳፐ ዳሮት ዱከትድ ሀይቅዶሶና።
NUM 21:7 አሳይ ሙሰኮ ይድ፥ “ኑኒ ጎዳ ቦላነ ነ ቦላ ዙዙምድ፥ ናጋራ ኦꬅዳ። ጎዳይ ሀ ሾሻታ ኑፐ ሃሳና መላ ኑስ ዎሳርክ” ያግዶሶና። ያትን፥ ሙሰይ አሳ ግሾ ዎስስ።
NUM 21:8 ሄ ዎደ ጎዳይ ሙሰኮ፥ “ናሰ ብራታፐ ሾሽ መꬋዳ፥ ኤንታ ስንꬃን ምꬃ ቦላ ካቃ፤ ሾሻን ዱከትዳ ኦንካ እያ በእኮ ፓፃና” ያግስ።
NUM 21:9 ያትን፥ ሙሰይ ናሰ ብራታፐ ሾሽ መꬍድ፥ ምꬃ ቦላ ካቅስ። ሾሻን ዱከትዳ አሳ ኡባይ ናሰ ብራታ ሾሻ በእድ ፓፅዶሶና።
NUM 21:10 እስራኤለ አሳይ ሆራፐ ደንድድ ኦቦታ ጌተትያ በሳን ዱንካንዶሶና።
NUM 21:11 ኦቦታፐ ደንድድ፥ ሞአበፐ ስንꬃ ባጋን ደእያ መላ ቢታን፥ ዶሎሀ ባጋን አባሪማን ዱንካንዶሶና።
NUM 21:12 ያፐ ደንድድ፥ ዛሬዳ ዛንጋራን ዱንካንዶሶና።
NUM 21:13 ያፐ ደንድድ፥ አሞረታ ቢታ ጋፃ ጋካናዉ ደእያ መላ ቢታን አርኖና ሻፋፐ ሄፍንꬃን ዱንካንዶሶና። አርኖና ሻፋይ ሞአበ ቢታስነ አሞረ ቢታስ ግዶን ደእያ ዛዋ።
NUM 21:14 ሄሳ ግሾ፥ ጎዳ ኦላ ታርክያ ኦድያ ማፃፋን፥ “ሱፋ ሄራን ደእያ ዋሄባ ካታማነ አርኖና ሻፋ ዛንጋራ፥
NUM 21:15 ኤራ ካታማነ ሞአበ ቢታ ዛዋ ጋካናዉ ደእያ ዛንጋራ” ያገትድ ፃፈትስ።
NUM 21:16 ኤንቲ ያፐ ደንድድ፥ ጎዳይ ሙሰኮ፥ “አሳ ሺሻ፤ ታ ኤንታዉ ሃ እማና” ያግድ ኦድዳ ቤራ ጌተትያ ሃꬃ ኦላኮ ብዶሶና።
NUM 21:17 ሄ ዎደ እስራኤለ አሳይ ሀ ማዝሙርያ የፅዶሶና። “ሃꬃ ኦላዉ፥ ፑልታ፤ ህንተካ የፅተ።
NUM 21:18 ሀላቃት ቦክዳ ሃꬃ ኦላስ፥ ካለይሳት ካዎተꬃ ፃምአንነ ባንታ ፃምአን ቦክዳ ሃꬃ ኦላስ የፅተ” ያግስ። ኤንቲ ሄ መላ ቢታፈ ደንድድ ማታና ጌተትያ በሳ ብዶሶና።
NUM 21:19 ማታናፐ ናህልኤላ፥ ናሀልኤላፐ ባሞታ ጌተትያ በሳ ብዶሶና።
NUM 21:20 ባሞታፐ ደንድድ፥ ሞአበን ደእያ ዛንጋራ ብዶሶና፤ ሄ ዛንጋራይ ፕስጋ ዙማፐ ጋርሳን ባዙዋ ግናን ደኤስ።
NUM 21:21 ሄሳፈ ጉየ፥ እስራኤለ አሳይ አሞረ ካዋ ስሆነኮ ሀይሳዳ ያግድ ኪታ የድዶሶና።
NUM 21:22 “ሀያና፥ ኑ ነ ቢታራ ካንꬅድ አꬋና መላ ኦꬃርክ፤ ኑኒ ኦገፐ ጋፃ ከዮኮ፤ ነ ጎሻ ዎይኮ ዎይነ ጋደ ግዶ ገሎኮ፤ ኑኒ ሃꬃ ኦላፈ ሃ ኡዮኮ። ኑኒ ነ ቢታራ ካንꬅድ አꬋና ጋካናዉ ሀድርስ ዎይኮ ኡሻች ጎኮ” ያግስ።
NUM 21:23 ስሆነይ እስራኤለ አሳይ ባ ቢታራ ካንꬆና መላ ድግስ። እ ባ ኦላንቾታ ኡባ ሺሽድ፥ እስራኤለ አሳ ኦላናዉ መላ ቢታ ብስ፤ ያሃፃ ጌተትያ በሳ ብድ እስራኤለ አሳራ ኦለትስ።
NUM 21:24 እስራኤለ አሳይ ኦላን አሞረታፐ ዳሮታ ማሻን ዎꬍድ፥ አርኖና ሻፋፐ ዶምድ፥ አሞነታ ዛዋን ደእያ ያቦቃ ሻፋ ጋካናዉ ኦይክስ። አሞነ አሳ ቢታ ዛዋይ ግምበትድ ደእያ ግሾ፥ ኤንቲ ያ ገልቦኮና።
NUM 21:25 እስራኤለ አሳይ አሞረታ፥ ሀሰቦናነ እያ ዩሹዋን ደእያ ካታማታ ኡባ ፆን ኤክድ ያን ኡትዶሶና።
NUM 21:26 ሀሰቦና ካታማይ አሞረታ ካዋ ስሆነ ኡትያ ካታማ። ስሆነይ ካሰ ሞአበ ቢታ ካዋ ኦልድ፥ አርኖና ሻፋ ጋካናዉ ደእያ ቢታ ኡባ ኤክስ።
NUM 21:27 ሄሳ ግሾ፥ ሌምሶን ሀይሳዳ ያግዶሶና፤ “ሀሰቦናኮ ሃይተ፤ ሀ ካታማይ ዛሪድ ኬፀቶ፤ ስሆነ ካታማይ ካሰ ባ በሳ ስሞ።
NUM 21:28 ታም ሀሰቦናፐ ከይስ፤ ላጮይ ስሆና ካታማን በንትስ፤ ሞአበን ደእያ ኤራ ꬋይስስ፤ አርኖና ꬎቃ በሳታ ምስ።
NUM 21:29 ሞአበ፥ ነና አየ! ካሞሻ አሳይ ꬋይደታ። ህንተ አደ ናይት ባቃታናዳ፥ ህንተ ማጫ ናይት ድኤታናዳ፥ አሞረታ ካዋ ስሆነስ እሚስ።
NUM 21:30 ኑኒ ህንተ ኮቻታ ሀሰቦናፐ ዶምድ፥ ድቦና ጋካናዉ ኩመꬅ ꬋይስዳ። መደባ ማታን ደእያ ኖፋ ጋካናዉ ደእያ ኡባ ታም ꬋይስስ” ያግዶሶና።
NUM 21:31 ያትድ፥ እስራኤለ አሳይ አሞረታ ቢታን ደእዶሶና።
NUM 21:32 ቃስ ሙሰይ ዎቸይሳታ ያእዜራ ካታማ የድን፥ እስራኤለ አሳይ ሄ ካታማነ እያ ሄራን ደእያ ጉꬃ ካታማታ ኦይክድ፥ ያን ደእያ አሞረታ ከስድ ጎድዶሶና።
NUM 21:33 ሄሳፈ ጉየ፥ እስራኤለ አሳይ ስሚድ፥ ባሳነ ኤፍያ ኦግያራ ከይዶሶና። ባሳነ ካዎይ ኦገይ ባ ኦላንቾታራ ኤድራአ ካታማን ኤንታራ ኦለታናዉ ከይስ።
NUM 21:34 ሽን ጎዳይ ሙሰኮ፥ “ሀ ኡራስ ባቦፋ፤ ህዛ፥ ካዋ ኦገ፥ እያ አሳነ እያ ቢታ ኡባ ነ ኩሸን አꬃዳ እማስ። ሀሰቦናን ኡትድ ሃርዳ አሞረታ ካዋ ስሆነ ቦላ ኦይሳዳ ኔኒ እያ ቦላ ኦꬃና” ያግስ።
NUM 21:35 ሄሳ ግሾ፥ እስራኤለ አሳይ ኦገ፥ እያ ናይታነ እያ አሳ ኡባ እሶይ አቶና ዎꬍድ እያ ቢታ ላትዶሶና።
NUM 22:1 እስራኤለ አሳይ ደንድድ፥ እያርኮ ግናን፥ ዮርዳኖሰፐ ሄፍንꬃን ደእያ ሞአበ ደንባን ዱንካንዶሶና።
NUM 22:2 እስራኤለ አሳይ አሞረታ ቦላ ኦꬅዳይሳ ኡባ ስፎራ ናአይ ባላቅ ስእስ።
NUM 22:3 እስራኤለ አሳይ ዳሮ ግድዳ ግሾ፥ ሞአበት ዳሮ ዳጋምድ ያይዶሶና።
NUM 22:4 ሞአበት ምድያመ ጭማታኮ፥ “ቦር ማታ ፕትድ ምድ ꬋይሰይሳዳ ሀ ዉደ አሳይ ኑ ዩሹዋን ደእያ ኡባ ምድ ꬋይሳና” ያግዶሶና። ሄ ዎደ ሞአበ ካዎይ፥ ስፎራ ናአይ ባላቅ፥
NUM 22:5 አማዋ ቢታን፥ ኤፍራፂሳ ሻፋ ማታን፥ ፓቶራ ካታማን ደእያ ብኦራ ናኣ ባላማኮ ሀይሳዳ ያግድ ኪትስ። “ግብፀፈ ከይዳ ዳሮ አሳይ ቢታ ኡባ ማእድ፥ ታ ማታን ዱንካንዶሶና።
NUM 22:6 ኤንቲ ታፐ ዳሮ ዎልቃማ ግድያ ግሾ፥ ሀያና ያዳ ኤንታ ባዳርክ። ኦን ኤር፥ ታ ኤንታ ፆናናዉነ ቢታፈ ከሳናዉ ዳንዳአና። ህዛ፥ ኔኒ አንጀይስ አንጀተይሳ ቃስ ኔኒ ባደይስ ባደትዳባ ግደይሳ ታኒ ኤራይስ” ያግስ።
NUM 22:7 ሞአበ ጭማትነ ምድያመ ጭማት ባደꬃ ሚሽያ ኤክድ ባላማኮ ብድ ባላቅ ግዳይሳ እያዉ ኦድዶሶና።
NUM 22:8 ባላም ኤንታኮ፥ “ሀች ቃማ ሀይሳን አቅተ፤ ጎዳይ ታዉ ኦደይሳ ታ ህንተዉ ኦዳና” ያግስ። ያንን፥ ሞአበ ሀላቃት ባላማራ ጋምእዶሶና።
NUM 22:9 ፆሳይ ባላማ፥ “ሀይሳቲ ኔራ ደእያ አሳት ኦኔ?” ያግድ ኦይችስ።
NUM 22:10 ባላም ፆሳኮ፥ “ሞአበ ካዎይ፥ ስፎራ ናአይ ባላቅ፥
NUM 22:11 ‘ግብፀፈ ከይዳ ዳሮ አሳይ፥ ኤንቲ ቢታ ኡባ ኩምዶሶና። ኔኒ ያዳ፥ ኤንታ ባዳርክ። ኦን ኤር፥ ታ ኤንታ ፆናናዉነ ቢታፈ ከሳናዉ ዳንዳኦና አግከ’ ያግድ ኤንታ ታኮ ኪትስ” ያግስ።
NUM 22:12 ያትን ፆሳይ ባላማኮ፥ “ኔኒ ኤንታራ ቦፓ፤ እስራኤለ አሳይ አንጀትዳ ደረ ግድያ ግሾ፥ ኔኒ ኤንታ ባዶፋ” ያግስ።
NUM 22:13 ዎንተꬃ ጋላስ ዎንታ ባላም ደንድድ፥ ባላቃ ሀላቃታኮ፥ “ታኒ ህንተራ ቦናዳ ጎዳይ ድግዳ ግሾ፥ ህንተ ቢታ ስምተ” ያግስ።
NUM 22:14 ሞአበ ሀላቃት ባላቃኮ ጉየ ስሚድ፥ “ባላም ኑራ ዮና እፅስ” ያግዶሶና።
NUM 22:15 ዛሪድ ባላቅ ካሰይሳታፐ አꬎ ቦንቸትዳነ ታይቦን ዳሮ ሀላቃታ እያኮ ኪትስ።
NUM 22:16 ኤንቲ ባላማኮ ብድ፥ “ስፎራ ናአይ ባላቅ፥ ‘ኔኒ ታኮ ያናይሳ ነና አይብካ ተቆፎ።
NUM 22:17 ታ ነዉ ዳሮ ዎይቶ እማና፤ ነ ኦይችያባ ኡባ ታ ነዉ ኦꬃና። ሀያና ያዳ ሀ አሳ ባዳርክ’ ያግስ” ያግድ ኦድዶሶና።
NUM 22:18 ሽን ባላም ኤንታኮ፥ “ባላቅ ሀር አቶሽን ባ ካዎተꬃን ኩምዳ ብራነ ዎርቃ ታዉ እምያባ ግድኮካ ጎዳ፥ ታ ፆሳ ኪታ መንꬃዳ አይኮካ ፓጭሳናዉ ዎይኮ ጉጃናዉ ዳንዳእከ።
NUM 22:19 ጎዳይ ታዉ በሲያ ሀራባይ ደእኮ ታ ኤራና መላ ህንተካ ሀች ቃማ ሀይሳን አቅተ” ያግስ።
NUM 22:20 ሄ ቃማ ፆሳይ ባላማኮ፥ “ሀ አሳይ ነና ፄጋናዉ ይዳ ግሾ፥ ኔኒ ኤንታራ ባ፤ ሽን ታ ነዉ ኦደይሳ ፃላላ ኦꬃ” ያግስ።
NUM 22:21 ያትን ዎንተꬃ ጋላስ ባላም ባ ሃሪው ኮርድ ሞአበ ሀላቃታራ ብስ።
NUM 22:22 ሽን እ ብያ ግሾ ፆሳይ ሀንቀትስ። ሄ ዎደ ባላም ባ ሃሪው ቶግድ፥ ባ ናምኡ አይለታራ ብሽን ጎዳ ኪታንቾይ እያ ተቃናዉ ኦገን ኤቅስ።
NUM 22:23 ጎዳ ኪታንቾይ ማሻ ሾድድ ኦገን ኤቅዳይሳ ሀሪያ በአዳ፥ ኦግያ አጋዳ ጎሻ ግዶ ገላሱ። ባላም ሀሪው ኦገን ዛራናዉ ሾጭስ።
NUM 22:24 ያትን፥ ጎዳ ኪታንቾይ ናምኡ ዎይነ ጋደታፐ ግዶን ያ ባጋራነ ሀ ባጋራ ግምበን ድረትዳ ፁንꬃ ኦገን ኤቅስ።
NUM 22:25 ሀርያ ጎዳ ኪታንቹዋ በእዳ ዎደ ግምበ ድርሳኮ ሺቅዳ፥ ባላማ ቶሁዋ ግምበ ድርሳራ ኦይꬃሱ፤ ያትን እ ሃሪው ናምአንꬆ ሾጭስ።
NUM 22:26 ሄሳፈ ጉየ፥ ጎዳ ኪታንቾይ ስንꬃ አꬍድ፥ ሀድርስ ዎይኮ ኡሻች ስማናዉ ኦገይ ባይና ፁንꬃ በሳን ኤቅስ።
NUM 22:27 ሀርያ ጎዳ ኪታንቹዋ በአዳ፥ ባላም ቶግድ ደእሽን ዝንአሱ፤ ባላም ዳሮ ይሎትድ፥ ባ ፃምአን ሃሪው ሾጭስ።
NUM 22:28 ሄሳፈ ጉየ፥ ጎዳይ ሀረይ ዶና ዶይን፥ ሀርያ ባላማ፥ “ታ ነዉ አይ ኢስን ታና ሄꬑ ቶሆ ሾጫዲ?” ያጋሱ።
NUM 22:29 ባላም ዛሪድ፥ “ኔኒ ታና ይሎይዳ ግሾሳ፤ ታ ኩሸን ማሽ ደእያባ ግድያኮ ታ ነና ሀእ ዎꬋናሽን” ያግስ።
NUM 22:30 ሃሪያ ባላማኮ፥ “ኔኒ ሀች ጋካናዉ ቶግያ ነ ሃሪው ግድክና? ታኒ ነዉ ሀይሳዳ ሀና ኤርያና?” ያጋሱ። ባላም ዛሪድ፥ “ሀና ኤራካ” ያግስ።
NUM 22:31 ሄ ዎደ ጎዳይ ባላማ አይፍያ ዶይን፥ ጎዳ ኪታንቾይ ሾደትዳ ማሻ ኦይክድ ኦገን ኤቅዳይሳ በእስ። እ ልች ግድ ሶምኦራ ሳአን ጉፋንስ።
NUM 22:32 ጎዳ ኪታንቾይ፥ “ነ ሃሪው ሄꬑ ቶሆ አይስ ሾጫዲ? ነ ኦገይ ታ ስንꬃን ጌላ ግድያ ግሾ ታ ነና ተቃናዉ ያስ።
NUM 22:33 ሀርያ ታና በአዳ ታ ስንꬃፈ ሄꬑ ቶሆ ሀራ ሶ ስማሱ። ሀርያ ሀራ ሶ ስማቦናባ ግድያኮ፥ ሀኖደ ታ ነና ዎꬋዳ ሀርው አሻናሽን” ያግስ።
NUM 22:34 ባላም ዛሪድ፥ “ታኒ ናጋራ ኦꬃስ፤ ኔኒ ታና ተቃናዉ ኦገ ቦላ ኤቅዳይሳ ታ ኤራብከ። ነ ዶሶናባ ግድኮ ታ ሀእ ጉየ ስማና” ያግስ።
NUM 22:35 ሽን ኪታንቾይ ባላማኮ፥ “ኔኒ ሀ አሳታራ ባ፤ ሽን ታ ነዉ ኦደይሳ ፃላላ ኦዳ” ያግስ። ያትን፥ ባላም ባላቃ ቢታ ሀላቃታራ ብስ።
NUM 22:36 ባላም የይሳ ባላቅ ስእዳ ዎደ አርኖና ሻፋ ጋፃን ባ ቢታ ዛዋን ደእያ ሞአበታ ካታማን እያ ሞካናዉ ብስ።
NUM 22:37 ባላቅ ባላማኮ፥ “ኔኒ ኤለሳዳ ያና መላ ታ ኪታብክና? ኔኒ አይስ ታኮ ኤለሳዳ ያብኪ? ታኒ ነዉ ኩሸ ዛራናዉ ዳንዳእክና?” ያግስ።
NUM 22:38 ባላም ባላቃኮ፥ “ሄኮ፥ ሀእ ታ ኔኮ ያስ፤ ሽን ታ አይኮካ ታፐ ጋናዉ ዳንዳእከ። ፆሳይ ታና ኦዳ ግዳባ ፃላላ ኦዳና” ያግስ።
NUM 22:39 ያትን፥ ባላም ባላቃራ ቅርያት-ሀፆታ ካታማ ብስ።
NUM 22:40 ያን ባላቅ መሄነ ዶርሰ ያርሽድ፥ አሹዋፐ ጉꬃራ ባላማስነ እያራ ደእያ ሀላቃታስ እሚስ።
NUM 22:41 ዎንተꬃ ጋላስ ባላቅ ባላማ ባሞት-ባኣል ጌተትያ በሳ ከስስ፤ ባላም ያን ኤቅድ እስራኤለ አሳፐ ባጋ በእስ።
NUM 23:1 ባላም ባላቃኮ፥ “ሀይሳን ታዉ ላፑን ያርሾ በሳታ ግምባ፤ ቃስ ላፑን ኮርማታነ ላፑን ማራዘታ ታዉ ጊግሳ” ያግስ።
NUM 23:2 ባላም ግዳይሳዳ ባላቅ ኦꬅስ፤ ኤንቲ ናምአይ እስ እስ ያርሾ በሳን እስ ኮርማነ እስ ማራዘ ያርሽዶሶና።
NUM 23:3 ያትድ፥ ባላም ባላቃኮ፥ “ኔኒ ነ ያርሹዋ ማታን ደኣሻ፤ ታኒ ገደ ባና። ኦን ኤር ጎዳይ ታራ ጋሄታናዉ ዮና አገና፤ እ ታዉ ቆንጭስያባ ኡባ ታ ነዉ ኦዳና” ያግድ እስ ደረ ቦላ ከይስ።
NUM 23:4 ያን ፆሳይ ባላማራ ጋሄትን፥ ባላም፥ “ታኒ ላፑን ያርሾ በሳታ ጊግሳስ፤ እስ እስ ያርሾ በሳን እስ ኮርማነ እስ ማራዘ ያርሻስ” ያግስ።
NUM 23:5 ባላም ጋናባ ጎዳይ እያዉ ኦድድ፥ “ኔኒ ባላቃኮ ስማዳ እያዉ ሀ ኪታ ኦዳ” ያግስ።
NUM 23:6 ባላም ስምያ ዎደ ባላቅ ሞአበ ሀላቃታ ኡባራ ባ ያርሹዋ ማታን ኤቅስ።
NUM 23:7 ባላም ሀይሳዳ ያግድ ትንብተ ኦድስ፤ “ሞአበ ካዎይ፥ ባላቅ፥ ዶሎሀ ባጋ ደረታፐ፥ ሶረ ቢታፈ ታና ኤህስ፤ ‘ሃ ያ፤ ያይቆባ ታዉ ባዳ፤ እስራኤለ አሳ ባዳ’ ያግስ።
NUM 23:8 ፆሲ ባድቦናይሳ ታ ዋታዳ ባዶ? ጎዳይ፥ ባድቦናይሳ ታ ዋታዳ ባዶ?
NUM 23:9 ታ ꬎቃ ዛላ ሁጰን ኤቃዳ ኤንታ ፄላይስ፤ ዙማ ቦላ ኤቃዳ ኤንታ በአይስ። ኤንቲ ባንታርካ ደእያ ደረ፤ ኤንቲ ሀራ ካዎተꬃታፐ ዱማ ግደይሳ ኤሮሶና።
NUM 23:10 ያይቆባ ባና ኦን ታይብ ኦንጋኔ? እስራኤለ ሳይሱዋ ኦን ታይብ ካንꬃኔ? ፅሎታ ሀይቁዋ ታ ሀይቃርክና፤ ታ ዉርሰꬃይ ኤንታይሳዳ ሀኖ” ያግስ።
NUM 23:11 ባላቅ ባላማኮ፥ “ኔኒ ታ ቦላ ኦꬅያባይ አይቤ? ታኒ ነና ታ ሞርከታ ባዳና መላ ኤሀስ፥ ሽን ኔኒ ኤንታ አንጃዳሳ፤ ሀራባ አይኮካ ኦꬃባካ” ያግስ።
NUM 23:12 ባላም ዛሪድ፥ “ጎዳይ ታዉ ኦደይሳፈ ሀራ ኦዶዬ?” ያግስ።
NUM 23:13 ባላቅ ባላማኮ፥ “ኤንታ ኔኒ በአናዉ ዳንዳእያ ሀራ በሲ ታራ የꬋ፤ ያንካ ነ ኤንታፈ ጉꬃራ በኣሳፐ አትሽን፥ ኡባ በአካ። ኔኒ ያን ኤቃዳ ኤንታ ባዳርክ” ያግስ።
NUM 23:14 ፕስጋ ደርያ ሁጰን ደእያ ፆፍማ ደምባ ኤፍስ። ያን ላፑን ያርሾ በሳታ ግምብድ፥ እስ እስ ያርሾ በሳን እስ ኮርማነ እስ ማራዘ ያርሽስ።
NUM 23:15 ባላም ባላቃኮ፥ “ኔኒ ሀይሳን ነ ያርሹዋ ማታን ደኣሻ፤ ታኒ ጎዳራ ጋሄታናዉ ገደ ባና” ያግስ።
NUM 23:16 ጎዳይ ባላማራ ጋሄትድ፥ “ኔኒ ባላቃኮ ስማዳ እያዉ ሀ ኪታ ኦዳ” ያግስ።
NUM 23:17 ባላም ስሚድ ያ ዎደ ባላቅ ሞአበ ቢታ ሀላቃታራ ያርሹዋ ማታን ኤቅዳይሳ ደምስ። ባላቅ እያኮ፥ “ጎዳይ ነዉ አይ ኦድዴ?” ያግስ።
NUM 23:18 ባላም ሀይሳዳ ያግድ ትንብተ ኦድስ፤ “ስፎራ ናአዉ፥ ባላቃ፥ ደንዳ፤ ታ ኦደይሳ ሎይꬃዳ ስአ።
NUM 23:19 ዎርዶታናዉ ፆሳይ አሰ ግደና፤ ባ ቆፋ ላማናዉ አሳ ናአ ግደና። ኦድድ፥ ባ ኦድዳይሳ ኦኔ? ዎይኮ ባ ግዳይሳ ፖለኔ?
NUM 23:20 ታኒ አንጃናዉ ኪታ ኤካስ፤ እ አንጅስ፤ ታ ላማናዉ ዳንዳእከ።
NUM 23:21 ያይቆባ ኮቻ ቦላ ኢታባይ ዬና፤ እስራኤለ አሳ መቶይ ጋከና። ጎዳይ፥ ኤንታ ፆሳይ ኤንታራ ደኤስ፤ እ ኤንታዉ ካዎ ግደይሳ አዋጆሶና።
NUM 23:22 ፆሳይ ኤንታ ግብፀፈ ከስስ፤ እ ምኖ መንꬃዳ ኤንታዉ ኦለቴስ።
NUM 23:23 ያይቆባ ኮቻ ቦላ ብት ኦና፤ እስራኤለ አሳ ቆሀና ሙሩኖይ ባዋ። ሄኮ፥ ያይቆባስነ እስራኤለስ ‘ፆሳይ ኦꬅዳባ በእተ’ ያጋና።
NUM 23:24 ሀ አሳይ ማጫ ጋሞዳ ደንዴስ፤ ባ ኦይክዳባ ማና ጋካናዉ፥ ባ ዎꬍዳይሳ ሱꬃ ኡያና ጋካናዉ፥ ሸምፖና ጋሞዳ ደንዶሶና” ያግስ።
NUM 23:25 ያትን፥ ባላቅ ባላማኮ፥ “ነ ኤንታ ኡባካ ባዶፋ፤ ኡባካ አንጆፋ” ያግስ።
NUM 23:26 ባላም ዛሪድ፥ “ታኒ ጎዳይ ግያባ ፃላላ ኦꬃና ጋዳ ነዉ ኦዳብክና?” ያግስ።
NUM 23:27 ባላቅ ባላማኮ፥ “ሃያ፤ ታ ነና ሀራ በሲ ኤፋና። ኦን ኤር፥ ሄሳን ፆሳይ ኡፋይትድ፥ ኔኒ ያን ኤቃዳ ኤንታ ባዳና መላ ኦꬃናዉ ዳንዳኤስ” ያግስ።
NUM 23:28 ባላቅ ባላማ ባዙዋ ዱገ ፄልያ ፓኦራ ዙማ ቦላ ኤፍስ።
NUM 23:29 ባላም፥ “ኔኒ ሀይሳን ታዉ ላፑን ያርሾ በሳታ ግምባ፤ ቃስ ላፑን ኮርማታነ ላፑን ማራዘታ ታዉ ጊግሳ” ያግስ።
NUM 23:30 ባላም ግዳይሳዳ ባላቅ ኦꬅስ፤ እስ እስ ያርሾ በሳን እስ ኮርማነ እስ ማራዘ ያርሽስ።
NUM 24:1 ባላም እስራኤለ አንጀይስ ጎዳ ኡፋይስዳይሳ እ በእዳ ዎደ ካሰ እ ኦይሳዳ ብታ ማላ ኮይቤና፥ ሽን ባ ሶምኡዋ መላ ቢታኮ ዛርስ።
NUM 24:2 እ ꬎቁ ግድ ፄልያ ዎደ እስራኤለ አሳይ ባ ኮቻን ኮቻን ዱንካንድ ኡትዳይሳ በእያ ዎደ ፆሳ አያናይ እያ ቦላ ዎꬍስ።
NUM 24:3 እ ሀይሳዳ ያግድ ትንብተ ኦድስ፤ “ብኦራ ናኣ ባላማ ትንብትያ፤ እያ አይፈይ ዶየትን ፄልያ አድያ ትንብትያ፤
NUM 24:4 ፆሳይ ግያባ ስኤይሳ ትንብትያ፤ እ ሶምኦራ ጉፋንን፥ እያ አይፈይ ዶየትዳይስ፤ ኡባ ዳንዳእያ ፆሳ ቆንጨꬃ በእዳ አድያ ትንብተይ ሀይሳ።
NUM 24:5 ያይቆባ፥ ነ ዱንካነት፥ እስራኤለ፥ ነ ጉታት፥ አይባ ሎኦና።
NUM 24:6 ኤንቲ ምጨትዳ ዛንጋራዳ፥ ሻፋ ጋፃን ደእያ አታክልትያ በሳዳ፥ ጎዳይ ቶክዳ ጎዳረ ኡꬃዳ፥ ሃꬃ ጋፃን ደእያ ዝጋ ምꬃዳ ሀኖሶና።
NUM 24:7 ኤንታ ፁጋይ ሃꬃን ኩማና፤ ኤንታ ኮቻይ ግድያ ሃꬅ ደማና። ኤንታ ካዎይ ካዋ አጋጋፐ አꬋና፤ ኤንታ ካዎተꬃይ ቦንቸታና።
NUM 24:8 ፆሳይ ኤንታ ግብፀፈ ከስስ፤ እ ምኖ መንꬃዳ ኤንታዉ ኦለቴስ። ኤንታ ሞርከታ መንረꬄስ፤ ኤንታ መቀꬃ ጋጬስ፤ ባ ዶንግያን ጫዴስ።
NUM 24:9 ኤንቲ ጋሞዳ ዝንእዶሶና፤ ማጫ ጋሞዳ ዛቁልዶሶና፤ ኤንታ ቦሸቻናዉ ዳንዳኤይ ኦኔ? ኤንታ አንጅያ ኡባይ አንጀታና፤ ኤንታ ባድያ ኡባይ ባደታና” ያግስ።
NUM 24:10 ያትን፥ ባላቅ ባላማ ቦላ ይሎትስ። ባ ኩሽያ ባቅድ ባላማኮ፥ “ታ ሞርከታ ባዳና መላ ታ ነና ኤሀስ፥ ሽን ኔኒ ሄꬑ ቶሆ ኤንታ አንጃዳሳ።
NUM 24:11 ሀእ ኤለሳዳ ነ ሶ ባ፤ ታ ነና ዳሮባ ዎይታና ጋስ፥ ሽን ኔኒ ዎይቱዋ ኤኮና መላ ጎዳይ ነና ድግስ” ያግስ።
NUM 24:12 ባላም ባላቃኮ ዛሪድ፥ “ኔኒ ታኮ ኪትዳ አሳኮ፥
NUM 24:13 ‘ባላቅ ሀር አቶሽን ባ ካዎተꬃን ኩምዳ ብራነ ዎርቃ ታዉ እምያባ ግድኮካ ጎዳይ ኦድዳይሳ መንꬃዳ ሎኦ ዎይኮ ኢታ ታ ሸነን ኦꬃናዉ ዳንዳእከ። ታኒ ጎዳይ ግያባ ፃላላ ኦዳና’ ጋዳ ነዉ ኦዳብክናዬ?” ያግስ።
NUM 24:14 ባላም ባላቃኮ፥ “ታኒ ሀእ ታ አሳኮ ባይስ፤ ሽን ነ ሃያ፤ እስራኤለ አሳይ ያና ዎድያን ነ አሳ ኦꬃናባ ታ ነዉ ኦዳና” ያግስ።
NUM 24:15 እ ባ ትንብትያ ሀይሳዳ ያግድ ኦድስ፤ “እያ አይፈይ ትሽ ኦꬅድ ፄልያ፥ ብኦራ ናኣ ባላማ ትንብተይ ሀይሳ።
NUM 24:16 ሀይስ ፆሳይ ግያባ ስኤይሳ ትንብትያ፥ ኡባ ዳንዳእያ ፆሳፈ ግድዳ ኤራተꬅ ደእያ ኡራይ። ልች ግድ ሶምኦራ ጉፋንን፥ እያ አይፈይ ዶየትዳይስነ ኡባ ዳንዳእያ ፆሳ ቆንጨꬃ በኤይሳ ትንብተይ ሀይሳ።
NUM 24:17 “ታኒ እያ በአይስ፥ ሽን ዎደይ ሀእ ግደና፤ ታ እያ ፄላይስ፥ ሽን ማታን ዴና። ያይቆባ ሼሻፐ ፆልንቶይ ከያና፤ እስራኤለፐ ካዎተꬃ ፃምአይ ከያና። ሞአበ አሳ ሶምኡዋ እ ጋጫና፤ ሴታ አሳ ኡባ ሁጵያ እ ትንቻና።
NUM 24:18 ኤዶመይ ፆነታና፤ እያ ሞርከይ ሳይረይ ኦይከታና፤ ሽን እስራኤለይ ምን ምን ባና።
NUM 24:19 ያይቆባፐ ሃረይስ ከያና፤ ካታማን ፓፃ አትዳይሳታ ꬋይሳና” ያግስ።
NUM 24:20 ሄሳፈ ጉየ፥ ባላም አማለቃ በእድ ሀይሳዳ ያግድ ትንብተ ኦድስ፤ “አማለቅ ካዎተꬃታ ግዶን ኮይሮ፥ ሽን ኤንታ ዉርሰꬃይ ꬋዮ” ያግስ።
NUM 24:21 ቃስ ባላም ቄና በእድ ሀይሳዳ ያግድ ትንብተ ኦድስ። “ህንተ ደእያ በሳይ ሳሮ በሲ፤ ህንተ ኬꬃይ ዛላ ቦላ ኬፀትስ።
NUM 24:22 ሽን አሶረት ህንተና ድእያ ዎደ፥ ህንተ ቄና አሳይ ꬋያና” ያግስ።
NUM 24:23 ዉርሰꬃን ባላም ሀይሳዳ ያግድ ትንብተ ኦድስ፤ “ፆሳይ ሄሳ ኦꬅያ ዎደ፥ ኦን ደኦን ዳናዉ ዳንዳኢ?
NUM 24:24 ማርካበት ቆጵሮሳፐ ያና፤ ኤንቲ አሶረነ ኤቤራ ፆናና፤ ሽን ኤንትካ ቃስ ꬋያና” ያግስ።
NUM 24:25 ሄሳፈ ጉየ፥ ባላም ደንድድ ባ ሶ ስምስ፤ ባላቅካ ባ ኦግያ ብስ።
NUM 25:1 እስራኤለ አሳይ ሴፅማ ጌተትያ በሳን ዱንካንድ ደእሽን፥ እስራኤለ አደት ሞአበ ማጫታራ ላይማቶ ዶምዶሶና።
NUM 25:2 ሄ ማጫሳት ባንታ ፆሳታ ያርሹዋ ማና መላ ፄግዶሶና። ኤንቲ ሄ ያርሾ ካꬃ ምድ ኤንታ ፆሳታ ጎይንዶሶና።
NUM 25:3 እስራኤለት ብኤል-ፋጎራ ጌተትያ ኤቃ ጎይንዳ ግሾ ጎዳይ ኤንታ ቦላ ሀንቀትስ።
NUM 25:4 ያትን፥ ጎዳይ ሙሰኮ፥ “ጎዳ ሀንቆይ እስራኤለፐ ስማና መላ ካለꬅያ አሳ ኡባ ኤፋዳ ሴታ ጋላስ ጎዳ ስንꬃን ካቃ” ያግስ።
NUM 25:5 ሙሰይ እስራኤለ ዳይናታኮ፥ “ህንተ እሶይ እሶይ ብኤል-ፋጎራ ጌተትያ ኤቃ ጎይንዳ አሳ ኡባ ዎꬍተ” ያግስ።
NUM 25:6 ሙሰይነ ማባራይ ኡባይ ጌሻ ዱንካንያ ፐንገን ዬክሽን፥ እስራኤለታፐ እሶይ ምድያመ ማጫስዉ ኤንታ ስንꬃራ አꬅድ፥ ባ ኬꬃ አሳኮ ኤህስ።
NUM 25:7 ካህንያ አሮና ናኣ አላዛራ ናአይ ፕንሃስ ሄሳ በእዳ ዎደ ማባራ ግዶፈ ደንድድ፥ ቶራ ኤክድ፥
NUM 25:8 እስራኤለ አድያ ካልድ ዱንካንያ ግዶ ገልድ፥ ኡራነ ማጫስዉ ቶራን ጫድድ ካንꬅ ከስስ። ሄስ ሀንን እስራኤለታ ዉርስያ ጋዶይ ኤቅስ።
NUM 25:9 ሽን ሄ ጋዶይ ላታማነ ኦይዱ ሙኩሉ አሳ ዎꬍስ።
NUM 25:10 ጎዳይ ሙሰኮ፥
NUM 25:11 “ካህንያ አሮና ናኣ አላዛራ ናአይ ፕንሃስ እስራኤለ አሳ ግዶን ታኒ ታ ቦንቹዋስ ምሸተይሳዳ ምሸትዳ ግሾ፥ ታኒ ህንተ ቦላ ሀንቀትዳ ሀንቁዋ ዶሽስስ። ታኒ ታ ቃናትያን ኤንታ ፖሎ ꬋይሳብከ።
NUM 25:12 ሄሳ ግሾ፥ ታኒ ታ ሳሮተꬃ ጫቁዋ እያራ ጫቃናይሳ ፕንሃሳስ ኦዳ።
NUM 25:13 እ ባ ፆሳ ቦንቹዋስ ምሸትዳ ግሾነ እስራኤለ አሳስ ናጋራ አቶተꬃ ኤህዳ ግሾ፥ እነ እያ ኮቻይ መርናዉ ካህነ ግዳና” ያግስ።
NUM 25:14 ምድያመ ማጫሴራ ሀይቅዳ ኡራ ሱንꬃይ ሳሉ ናኣ ዝምራ ጌተቴስ። ሳሉ ስሞና ኮቻን እስ ኮቻ ሀላቃ።
NUM 25:15 ሀይቅዳ ምድያመ ማጫሰ ሱንꬃይ ኮዝቦ፤ እ አዋይ ዙር ምድያመታ ኮቻ ሀላቃ።
NUM 25:16 ጎዳይ ሙሰኮ፥
NUM 25:17 “ምድያመ ቢታ አሳ ሞርክድ ኤንታ ዎꬍተ።
NUM 25:18 ኤንቲ ህንተና ሞርክድ ፓኦራን ጭምዶሶና ቃስ ቦሻ ጋላስ ፓኦራን ሀይቅዳ ምድያመታ ኮቻ ሀላቃ ናኤ ኮዝብ ጋሶን ህንተና ሞርክዶሶና” ያግስ።
NUM 26:1 ቦሻፐ ጉየ፥ ጎዳይ ሙሰኮነ ካህንያ አሮና ናኣ አላዛራኮ፥
NUM 26:2 “ላይꬅ ላታማነ እያፐ ቦላ ግድዳ እስራኤለታ፥ ኦላናዉ ዳንዳኤይሳታ ኡባ፥ ኤንታ ኬꬃን ኬꬃን ታይብተ” ያግስ።
NUM 26:3 ያትን፥ ሙሰይነ ካህነይ አላዛር ዮርዳኖሰ ሻፋፐ ሄፍንꬃን፥ እያርኮ ማታን፥ ሞአበ ደንባን አሳ ሺሽድ፥
NUM 26:4 “ጎዳይ ሙሰ ኪትዳይሳዳ፥ ላይꬅ ላታማነ እያፐ ቦላ አሳ ታይብዶሶና።” ግብፀፈ ከይዳ እስራኤለ አሳይ ሀይሳታ።
NUM 26:5 እስራኤለ ባይራ ናኣ ሮቤላ ኮቻት ባንታ ኮቻን ኮቻን፥ ሀኖካ ኮቻ፥ ፋሉ ኮቻ፥
NUM 26:6 ሄስሮና ኮቻነ ካርማ ኮቻ፤
NUM 26:7 ሀይሳቲ ሮቤላ ኮቻታ፤ ኤንታ ኩመꬃ ታይቦይ 43,730.
NUM 26:8 ፋሉ ናአይ ኤልኣባ፤
NUM 26:9 ኤልኣባ አደ ናይት ነሙኤላ፥ ዳታነነ አቤሮ። ዳታንነ አቤሮይ ማባራይ ዶርዳይሳታ፥ ሽን ኤንቲ ቆረነ እያ ካለይሳታራ ቶቢድ ጎዳ ቦላ ማካልድ ሙሰ ቦላነ አሮና ቦላ ደንድዶሶና።
NUM 26:10 ቢታይ ዶየትድ ኤንታ ቆረራ እስፈ ምትስ፤ ኤንታ ካልያ 250 አሳ ታም ምን ሀይቅዶሶና። ያትን፥ ሀራት ኤንታ በእድ ናገታና መላ ማላ ግድዶሶና።
NUM 26:11 ሽን ቆረ አደ ናይት ኡባይ ሀይቅድ ꬋይቦኮና።
NUM 26:12 ስሞና ዘረꬃይ ባንታ ኮቻን ኮቻን፥ ነሙኤላ ኮቻ፥ ያምና ኮቻ፥ ያክና ኮቻ፥
NUM 26:13 ዛራ ኮቻነ ሳኡላ ኮቻ።
NUM 26:14 ሀይሳቲ ስሞና ኮቻታ፤ ኤንታ ኩመꬃ ታይቦይ 22,200.
NUM 26:15 ጋደ ዘረꬃይ ባንታ ኮቻ ኮቻን፥ ፅፎና ኮቻ፥ ሀግ ኮቻ፥ ሹና ኮቻ፥
NUM 26:16 ኤስና ኮቻ፥ ኤራ ኮቻ፥
NUM 26:17 አሮዳ ኮቻነ አርኤላ ኮቻ።
NUM 26:18 ሀይሳቲ ጋደ ኮቻታ፤ ኤንታ ኩመꬃ ታይቦይ 40,500.
NUM 26:19 ይሁዳ አደ ናይት ኤርነ ኦናን ካናነ ቢታን ሀይቅዶሶና።
NUM 26:20 ይሁዳ ኮቻት ባንታ ኮቻን ኮቻን፥ ሴላ ኮቻ፥ ፋረሳ ኮቻነ ዛራ ኮቻ።
NUM 26:21 ፋረሳ ኮቻይ ሄስሮናነ ሀሙላ።
NUM 26:22 ሀይሳቲ ይሁዳ ኮቻታ፤ ኤንታ ኩመꬃ ታይቦይ 76,500.
NUM 26:23 ይሳኮራ ዘረꬃይ ባንታ ኮቻን ኮቻን፥ ቶላ ኮቻ፥ ፑአ ኮቻ፥
NUM 26:24 ያሱባ ኮቻነ ሽምሮና ኮቻ።
NUM 26:25 ሀይሳቲ ይሳኮራ ኮቻታ፤ ኤንታ ኩመꬃ ታይቦይ 64,300.
NUM 26:26 ዛብሎና ዘረꬃይ ባንታ ኮቻን ኮቻን፥ ሳረዳ ኮቻ፥ ኤሎና ኮቻነ ያህላላ ኮቻ።
NUM 26:27 ሀይሳቲ ዛብሎና ኮቻታ፤ ኤንታ ኩመꬃ ታይቦይ 60,500.
NUM 26:28 ዮሰፋ ናይታ ምናሰነ ኤፍሬማ ኮቻት ባንታ ኮቻን ኮቻን፥
NUM 26:29 ምናሰይ ማክራ የልስ፥ ማክር ጋላዳ የልስ።
NUM 26:30 ጋላዳ ኮቻት፥ እዘራ ኮቸ፥ ከለጋ ኮቸ፥
NUM 26:31 አስርኤላ ኮቸ፥ ሴከማ ኮቻ፥
NUM 26:32 ሻምዳ ኮቸነ ሄፌራ ኮቸ።
NUM 26:33 ሄፌራ ናአይ ሰሎጳድ ማጫ ናአ ፃላላ የልስ፤ እያዉ አደ ናእ ባዋ። ሰሎጳዳ ማጫ ናይታ ሱንꬃይ ማህሎ፥ ኖኦ፥ ሆግሎ፥ ምልኮነ ትርፆ።
NUM 26:34 ሀይሳቲ ምናሰ ኮቻታ፤ ኤንታ ኩመꬃ ታይቦይ 52,700.
NUM 26:35 ኤፍሬማ ዘረꬃይ ባንታ ኮቻን ኮቻን፥ ሹቱላ ኮቻ፥ በከራ ኮቻ፥ ታሀና ኮቻታነ
NUM 26:36 ሹቱላ ናኣ ኤራና ኮቻታ።
NUM 26:37 ሀይሳቲ ኤፍሬማ ኮቻታ፤ ኤንታ ኩመꬃ ታይቦይ 32,500. ዮሰፋ ኮቻት ባንታ ኮቻን ኮቻን ሀይሳታ።
NUM 26:38 ብንያመ ዘረꬃይ ባንታ ኮቻን ኮቻን፥ ቤላ ኮቻ፥ አስቤላ ኮቻ፥ አክራ ኮቻ፥
NUM 26:39 ሹፋማ ኮቻ፥ ሁፋማ ኮቻ፥
NUM 26:40 ቤላ ናኣ አራዳ ኮቻነ ቤላ ናኣ ናማነ ኮቻ።
NUM 26:41 ሀይሳቲ ብንያመ ኮቻታ፤ ኤንታ ኩመꬃ ታይቦይ 45,600.
NUM 26:42 ዳነ ዘረꬃይ ሳማ ኮቻ።
NUM 26:43 ሹሃማ ኮቻ ኩመꬃ ታይቦይ 64,400.
NUM 26:44 አሴራ ዘረꬃይ ባንታ ኮቻን ኮቻን፥ ይምና ኮቻ፥ ይስዋ ኮቻ፥ በርአ ኮቻ፥
NUM 26:45 በርአ ናአ ሄቤራ ኮቻነ በርአ ናኣ ማልክኤላ ኮቻ።
NUM 26:46 አሴራስ ሳራሆ ጌተትያ ማጫ ናእ ደአዉሱ።
NUM 26:47 ሀይሳቲ አሴራ ኮቻታ፤ ኤንታ ኩመꬃ ታይቦይ 53,400.
NUM 26:48 ንፍታለመ ዘረꬃይ ባንታ ኮቻን ኮቻን፥ ያህፄላ ኮቻ፥ ጉና ኮቻ፥
NUM 26:49 የፀራ ኮቻነ ሽለመ ኮቻ።
NUM 26:50 ሀይሳቲ ንፍታለመ ኮቻታ፤ ኤንታ ኩመꬃ ታይቦይ 45,400.
NUM 26:51 ታይበትዳ እስራኤለ አደ አሳ ታይቦይ ኩመꬅ 601,730.
NUM 26:52 ጎዳይ ሙሰኮ፥
NUM 26:53 “ሀ ኮቻታስ ኤንታ ሱንꬃ ሱንꬃ ታይቡዋን ቢታ ሻካዳ ላታ ኦꬃዳ ኤንታዉ እማ።
NUM 26:54 ታይቦን ዳረይሳታስ ዳርሳዳ ቃስ ታይቦን ጉፀይሳታስ ጉꬃዳ እማ። ኡባይካ ፃፈትዳ ባንታ ታይቡዋ ኬና ኤኮ።
NUM 26:55 ሽን ቢታይ ሳማን ሻከቶ፤ እስ እስ ኮቻይ ላታ ኤከይ ባ ኮቻ ሱንꬃን ግዶ።
NUM 26:56 እስ እስ ላታይ ታይቦን ዳሮታ ግዶንነ ታይቦን ጉꬃታ ግዶን ሳማን ሻከቴስ” ያግስ።
NUM 26:57 ባንታ ዘረꬃን ዘረꬃን ታይበትዳ ሌወ ኮቻት ሀይሳታ፤ ገድሶና ኮቻ፥ ቃሃታ ኮቻነ መራራ ኮቻ።
NUM 26:58 ሀይሳቲካ ቃስ ሌወ ኮቻታ፤ ልብና ኮቻ፥ ከብሮና ኮቻ፥ ሞሆላ ኮቻ፥ ሙሰ ኮቻነ ቆረ ኮቻ። ቃሃት አምራማ የልስ።
NUM 26:59 አምራማ ማቸ ሱንꬃይ ዮከቤዶ፤ እያ ግብፀን ሌወፐ የለትዳ ሌወ ናአ። እያ አሮና፥ ሙሰነ ኤንታ ምችዉ ማይራሞ የላሱ።
NUM 26:60 አሮናስ ናዳበ፥ አብዮዳ፥ አላዛራነ እታማራ ጌተትያ ኦይዱ ናይት ደኦሶና።
NUM 26:61 ሽን ናዳበይነ አብዮድ ጎዳ ስንꬃን ጌሽ ግዶና ታማን ያርሾ ያርሽዳ ግሾ ቦሻን ሀይቅዶሶና።
NUM 26:62 ላይꬅ እስ አጌናነ እያፐ ቦላ ግድዳ ሌወ አደ ናይታ ታይቦይ ላታማነ ሄꬑ ሙኩላ። እስራኤለ አሳ ግዶን ኤንታዉ ላታ ቢት እመትቦና ግሾ ኤንቲ እስራኤለታራ ታይበትቦኮና።
NUM 26:63 ዮርዳኖሰ ሻፋፐ ሄፍንꬃን፥ እያርኮ ማታን፥ ሞአበ ደንባን ሙሰይነ ካህነይ አላዛር እስራኤለ አሳ ታይብዳ ዎደ ታይበትዳ አሳይ ሀይሳ።
NUM 26:64 ሙሰይነ ካህነይ አሮን ኮይሮ ሲና መላ ቢታን እስራኤለ ታይብዳ ዎደ ታይበትዳ አሳፐ መፅ እስ አስካ አትቤና።
NUM 26:65 ጎዳይ ሀ እስራኤለታባ፥ “ኤንቲ ኡባይ መላ ቢታን ሀይቃና” ያግድ ኦድዳ ግሾ፥ ዮፎና ናኣ ካለባፐነ ናወ ናኣ እያሱፐ አትሽን፥ ሀር እስ አስካ አትቤና።
NUM 27:1 ሰሎጳድ ሄፌራ ናአ፤ ሄፌር ጋላዳ ናአ፤ ጋላድ ማክራ ናአ፤ ማክር ምናሰ ናአ፤ ምናሰይ ዮሰፋ ናአ። ሰሎጳዳ ማጫ ናይት ማህሎ፥ ኖኦ፥ ሆግሎ፥ ምልኮነ ትርፆ።
NUM 27:2 ሀ ማጫ ናይት ጌሻ ዱንካንያ ፐንገን ሙሰ ስንꬃን፥ ካህንያ አላዛራ ስንꬃን፥ ሀላቃታ ስንꬃንነ ማባራ ኡባ ስንꬃን ኤቅድ፥
NUM 27:3 “ኑ አዋይ መላ ቢታን ሀይቅስ፤ እ ባ ናጋራ ጋሶን ሀይቅስፐ አትሽን፥ ጎዳ ቦላ ደንድዳ ቆረ ካለይሳታ ግዶን ዴና። እያዉ አደ ናእ ባዋ።
NUM 27:4 ያትን፥ ኑ አዋይ አደ ናአ የልቦና ግሾ እያ ሱንꬃይ እያ ኮቻ ግዶፈ ዋንድ ꬋዪ? ኑ አዋ ዳቦታ ግዶን ኑስ ላታ ቢታ እማ” ግዶሶና።
NUM 27:5 ያትን፥ ሙሰይ ኤንታ ኦይሻ ጎዳ ስን ሺሽስ።
NUM 27:6 ጎዳይ ሙሰኮ፥
NUM 27:7 “ሰሎጳዳ ማጫ ናይታ ኦይሻይ ልከ፤ ኤንታ አዋ ዳቦታ ግዶን ኔኒ ኤንታዉ ላታ ቢታ እማ፤ እያ ግሾይ ኤንታ ላታ ግዶ።
NUM 27:8 ቃስ እስራኤለ አሳኮ፥ ‘እስ አስ አደ ናአ የሎና ሀይቅኮ እያ ማጫ ናይት ላቶ።
NUM 27:9 እያዉ ማጫ ናእ ባይናባ ግድኮ እያ እሻት ላቶ።
NUM 27:10 እያዉ እሽ ባይናባ ግድኮ እያ አዋ እሻት ላቶ።
NUM 27:11 እያዉ አዋ እሽ ባይናባ ግድኮ እያ ማታ ዳቦይ ላቶ። ታኒ ጎዳይ ነና ኪትዳይሳዳ ሀይስ እስራኤለ አሳስ ዎጋ ግዶ’ ” ያግስ።
NUM 27:12 ጎዳይ ሙሰኮ፥ “አባሪማ ዙማ ቦላ ከያዳ ታ እስራኤለ አሳስ እምዳ ቢታ በአ።
NUM 27:13 ነ በእዳፐ ጉየ፥ ነ እሻ አሮናዳ ነካ ሀይቃዳ ነ ማይዛታን ጋሄታና።
NUM 27:14 ፂና መላ ቢታን፥ ማርባ ሃꬃ ማታን አሳይ ታ ቦላ ዙዙምዳ ዎደ ህንተ ናምአይ ኤንታ ስንꬃን ታና ጌሽ ኦꬅድ ቦንችቤከታ” ያግስ። (ማርባ ሃꬃይ ፂና መላ ቢታን፥ ቃደሳ ጌተትያ በሳን ደእያ ፑልቶ።)
NUM 27:15 ሙሰይ ጎዳኮ፥
NUM 27:16 “አሳ ኡባስ ደኦ እምያ ጎዳ ፆሳዉ፥ ነ አሳይ ሄንꬃንቾይ ባይና ዉደ መላ ግዶናዳ፥
NUM 27:17 ሀ አሳ ስንꬃን ከያነ ገልያ ቃስ ኤንታ ካለꬅድ ከስያነ ገልስያ እስ አስ ሀ ማባራ ቦላ ሹማ” ያግስ።
NUM 27:18 ጎዳይ ሙሰኮ፥ “አያናይ እያን ደእያ ናወ ናኣ እያሱ ኤካዳ ነ ኩሽያ እያ ቦላ ዎꬃ።
NUM 27:19 እያ ካህንያ አላዛራ ስንꬃንነ ማባራ ኡባ ስንꬃን ኤሳዳ ኤንቲ በእሽን ሹማ።
NUM 27:20 እስራኤለ ኡባይ እያዉ ኪተታና መላ ነ ማታፐ እያዉ ሻካዳ እማ።
NUM 27:21 እካ ኡሪመን ጎዳ ሸንያ ኦይችድ ሻክያ ካህንያ አላዛራ ስንꬃን ኤቆ። እያሱይነ እስራኤለ ማባራይ ኡባይ አላዛራ ኪታን ከዮነ ገሎ” ያግስ።
NUM 27:22 ሙሰይ ጎዳይ ኪትዳይሳዳ ኦꬅስ፤ እያሱ ኤፍድ፥ ካህንያ አላዛራ ስንꬃንነ ማባራ ኡባ ስንꬃን ኤስስ።
NUM 27:23 ጎዳይ ኪትዳይሳዳ ሙሰይ ባ ኩሽያ እያ ቦላ ዎꬅድ ሹምስ።
NUM 28:1 ጎዳይ ሙሰኮ፥
NUM 28:2 “እስራኤለ አሳ ሀይሳዳ ያጋዳ ኪታ፤ ፁገትያ ሳውያ ካꬃ ያርሾ ዎደን ዎደን ታዉ ያርሽተ።
NUM 28:3 ጎዳስ ታማን ፁገትድ ያርሸትያ ያርሾይ ሀይሳ፤ ኩመꬃ ቦላራ ደእያ እስ ላይꬅ ኩምዳ ናምኡ ማራዘታ ዎንታ ዎንታ ፁሳ ያርሾ ኦꬅድ ያርሽተ።
NUM 28:4 ማራዘታፐ እሱዋ ዎንታ እሱዋ ቃስ ኦማርስ ያርሽተ።
NUM 28:5 ቃስ ሄ ማራዝያራ እስ ልትሮ ሻማሆ ዛይተን ሙኑቀትዳ እስ ክሎ ግራመ ሎኦ ግስተ ꬊለ ካꬃ ያርሾ ያርሽተ።
NUM 28:6 ሀይስ ጎዳ ኡፋይስያ ፁሳ ያርሾ። እካ ሲና ዙማ ቦላ ያርሸትዳ ኮይሮ ፁሳ ያርሾ።
NUM 28:7 ኮይሮ ማራዝያራ እስ ልትሮ ጫላ ዎይነ ኡሻ ያርሾ ኦꬅድ ያርሾ በሳን ጎዳስ ጉስተ።
NUM 28:8 ኦማርስ ናምአንꬆ ማራዝያ ያርሽያ ዎደ ኮይሮይሳ መላ ካꬃ ያርሹዋነ ኡሻ ያርሹዋ ጉጅድ ያርሽተ። እካ ጎዳ ኡፋይስያ ሳዎ ያርሾ ግዳና።”
NUM 28:9 “ሳምባታ ጋላስ ቦረይ ባይና እስ ላይꬅ ኩምዳ ናምኡ ማራዘታ ዛይተን ሙኑቀትዳ ናምኡ ክሎ ግራመ ሎኦ ግስተ ꬊለ ኤክድ ካꬃ ያርሾነ ኡሻ ያርሾ ኦꬅድ ያርሽተ።
NUM 28:10 ጋላስ ጋላስ ያርሸትያ ፁሳ ያርሹዋ ቦላ ሳምባታን ሳምባታን ህንተ ያርሻና ፁሳ ያርሾይነ ኡሻ ያርሾይ ሀይሳ።”
NUM 28:11 “አጌን ፄርያ ኮይሮ ጋላስ ናምኡ ዎፋኖታ፥ እስ ማራዘነ እስ ላይꬅ ኩምዳ ቦረይ ባይና ላፑን ዶርሳ ኡርገታ ፁሳ ያርሾ ኦꬅድ ጎዳስ ያርሽተ።
NUM 28:12 እስ እስ ዎፋኑዋራ ሻማሆ ዛይተን ሙኑቀትዳ ሄꬑ ክሎ ግራመ ግድያ ሎኦ ግስተ ꬊለራ ካꬃ ያርሾ ኦꬅድ ያርሽተ። ቃስ ሻማሆ ዛይተን ሙኑቀትዳ ናምኡ ክሎ ግራመ ግድያ ሎኦ ግስተ ꬊልያ ማራዝያራ ዎላ ያርሻ።
NUM 28:13 ላፑን ማራዘታፐ እስ እስ ማራዘ ሻማሆ ዛይተን ሙኑቀትዳ እስ ክሎ ግራመ ሎኦ ግስተ ꬊለራ ፁገትያ ሳውያ ካꬃ ያርሾ ኦꬃዳ ጎዳስ ያርሻ።
NUM 28:14 ቃስ ኡሻ ያርሹዋ እስ እስ ዎፋኑዋስ ናምኡ ልትሮ ዎይነ፥ እስ ማራዝያስ እስ ልትሮነ ባጋ ዎይነ ኡሻነ እስ እስ ዶርሳ ኡርግያስ እስ ልትሮ ግድያ ዎይነ ኡሽ ሺሽተ። ሀይስ ላይꬃ ግዶን አጌን ፄርያ ኮይሮ ጋላሳን ኦሰትያ ፁሳ ያርሾ።
NUM 28:15 ጋላስ ጋላስ ያርሸትያ ፁሳ ያርሹዋ ቦላነ ኡሻ ያርሹዋ ቦላ እስ ኮለ ናጋራ ያርሾ ኦꬅድ ጎዳስ ያርሽተ።”
NUM 28:16 “ኮይሮ አጌናን ታማነ ኦይዳንꬆ ጋላሳይ ጎዳ ፓስካ ቦንችያ ጋላስ ግዶ።
NUM 28:17 ቃስ ሄ አጌናን ታማነ እቻሻንꬆ ጋላሳን ኡይꬃ ባለይ ቦንቸቴስ፤ ሄ ጋላሳፐ ዶምድ ላፑን ጋላስ ጋካናዉ እርሾይ ገልቦና ኡይꬃ ሚተ።
NUM 28:18 ሄ ጋላሳታፐ ኮይሮ ጋላሳን ጎይናናዉ ሺቅተ፤ ሄ ጋላሳን አይ ኦሶካ ኦꬆፍተ።
NUM 28:19 ቦረይ ባይና ናምኡ ዎፋኖታ፥ እስ ማራዘነ እስ ላይꬅ ኩምዳ ላፑን ዶርሳ ኡርገታ ፁሳ ያርሾ ኦꬅድ ጎዳስ ያርሽተ።
NUM 28:20 እስ ዎፋኑዋራ ሻማሆ ዛይተን ሙኑቀትዳ ሄꬑ ክሎ ግራመ ሎኦ ግስተ ꬊለ፥ እስ ማራዝያራ ናምኡ ክሎ ግራመ ꬊለነ
NUM 28:21 ላፑን ዶርሳ ኡርገታፐ እስ እስ ዶርሳራ እስ ክሎ ግራመ ꬊለ ያርሽተ።
NUM 28:22 ቃስ እስ ዴሽ ደርያ ናጋራስ አቶተꬅ ግዳና መላ ናጋራ ያርሾ ኦꬅድ ያርሽተ።
NUM 28:23 ሄሳ ኡባ ዎደ ጋላስ ጋላስ ያርሸትያ ያርሹዋ ቦላ ጉጅድ ያርሽተ።
NUM 28:24 ኡባ ዎደ ኦሰትያ ፁሳ ያርሹዋ ቦላነ ኡሻ ያርሹዋ ቦላ ጉጅድ ላፑን ጋላስ ጎዳስ ሳውያ ካꬃ ያርሾ ኦꬅድ ያርሽተ።
NUM 28:25 ላፑንꬃ ጋላሳን ጎይኖስ ሺቅተ፤ ሄ ጋላስ አይ ኦሶካ ኦꬆፍተ።”
NUM 28:26 “ካꬃ ሺሾ ባኣለ ሳምንታን ኮይሮ ጋላስ ጎይኖስ ሺቅያ ዎደ ህንተ ኦራꬃ ካꬃፈ ያርሾ ያርሽተ፤ ሄ ዎደ አይ ኦሶካ ኦꬆፍተ።
NUM 28:27 ናምኡ ዎፋኖታ፥ እስ ማራዝያነ እስ ላይꬅ ኩምዳ ላፑን ዶርሳ ኡርገታ ጎዳስ ሳውያ ፁሳ ያርሾ ኦꬅድ ያርሽተ።
NUM 28:28 እስ እስ ዎፋኑዋራ ሻማሆ ዛይተን ሙኑቀትዳ ሄꬑ ክሎ ግራመ ሎኦ ግስተ ꬊለ፥ እስ ዶርሳ ኡርግያራ ናምኡ ክሎ ግራመ ꬊለነ
NUM 28:29 ላፑን ዶርሳ ኡርገታፐ እስ እስ ኡርግያራ እስ ክሎ ግራመ ግስተ ꬊለ ኤክድ ያርሽተ።
NUM 28:30 እያ ቦላ ጉጅድ እስ ኮለ ናጋራ አቶꬃ ያርሾ ኦꬅድ ያርሽተ።
NUM 28:31 ጋላስ ጋላስ ያርሸትያ ያርሹዋ ቦላነ ኡሻ ያርሹዋ ቦላ ካꬃ ያርሾ ያርሽተ። ህንተ ያርሽያ መሄት ቦረይ ባይናባ ግዶ።”
NUM 29:1 “ላፑንꬃ አጌናስ ኮይሮ ጋላሳን ጎይናናዉ ሺቅተ፤ አይ ኦሶካ ኦꬆፍተ፤ ሄ ጋላሳይ ሞይዘይ ፑነትያ ጋላስ።
NUM 29:2 ቦረይ ባይና እስ ዎፋኖ፥ እስ ማራዘነ እስ ላይꬅ ኩምዳ ላፑን ዶርሳ ኡርገታ ሳውያ ፁሳ ያርሾ ኦꬅድ ጎዳስ ያርሽተ።
NUM 29:3 ሄ ዎፋኑዋራ ሻማሆ ዛይተን ሙኑቀትዳ ሄꬑ ክሎ ግራመ ሎኦ ግስተ ꬊለ፥ እስ ማራዝያራ ናምኡ ክሎ ግራመ ግስተ ꬊለነ፥
NUM 29:4 ላፑን ዶርሳ ኡርገታፐ እስ እስ ኡርግያራ እስ ክሎ ግራመ ꬊለ ያርሽተ።
NUM 29:5 ቃስ እስ ኮለ ህንተዉ ናጋራ አቶተꬃስ ያርሽተ።
NUM 29:6 ዎጋይ ኪተይሳꬆ፥ አጌና ፄሮን ያርሸትያ ፁሳ ያርሾ ቦላ፥ ካꬃ ያርሾ ቦላ፥ ጋላስ ጋላስ ያርሸትያ ፁሳ ካꬃ ያርሾ ቦላነ ኡሻ ያርሾ ቦላ ጉጅድ ያርሽተ፤ ሄስ ጎዳ ሳውያ ፁሳ ያርሾ።
NUM 29:7 “ላፑንꬃ አጌናን ታማንꬆ ጋላሳን አይ ኦሶካ ኦꬆፍተ፤ ህንተና ካዉሽድ ጎይኖስ ሺቅተ።
NUM 29:8 ቦረይ ባይና እስ ዎፋኖ፥ እስ ማራዘነ እስ ላይꬅ ኩምዳ ላፑን ዶርሳ ኡርገታ ሳውያ ፁሳ ያርሾ ኦꬅድ ጎዳስ ያርሽተ።
NUM 29:9 ካꬃ ያርሾ ኦꬅድ እስ ዎፋኖራ ሻማሆ ዛይተን ሄꬑ ክሎ ግራመ ሎኦ ግስተ ꬊለ፥ እስ ዶርሳ ኡርግያራ ናምኡ ክሎ ግራመ ꬊለነ
NUM 29:10 ላፑን ዶርሳ ኡርገታፐ እስ እስ ኡርግያራ እስ ክሎ ግራመ ꬊለ ያርሽተ።
NUM 29:11 ቃስ ናጋራ ያርሾ ኦꬅድ እስ ኮለ ያርሽተ። ናጋራ አቶꬃ ያርሹዋ ቦላ፥ ጋላስ ጋላስ ያርሸትያ ፁሳ ያርሹዋ ቦላ፥ ካꬃ ያርሹዋ ቦላነ ኡሻ ያርሹዋ ቦላ ሄሳ ጉጅድ ያርሽተ።
NUM 29:12 “ላፑንꬃ አጌናን ታማነ እቻሻንꬆ ጋላሳን፥ ዴፆ ኦሶ ኦꬆፍተ፤ ላፑን ጋላስ ኩመꬅ ጎዳ ቦንቻናዉ ሻቃራ ባኣለ ቦንችተ።
NUM 29:13 ቦረይ ባይና ታማነ ሄꬑ ዎፋኖታ፥ ናምኡ ማራዘታ፥ እስ ላይꬅ ኩምዳ ታማነ ኦይዱ ዶርሳ ኡርገታ ሳውያ ፁሳ ያርሾ ኦꬅድ ጎዳስ ያርሽተ።
NUM 29:14 ካꬃ ያርሾ ግዳና መላ ታማነ ሄꬑ ዎፋኖታፐ እስ እስ ዎፋኑዋራ ሻማሆ ዛይተን ሙኑቀትዳ ሄꬑ ክሎ ግራመ ሎኦ ግስተ ꬊለ፥ ናምኡ ማራዘታፐ እስ እስ ኡርግያራ ናምኡ ክሎ ግራመ ꬊለነ
NUM 29:15 ታማነ ኦይዱ ዶርሳ ኡርገታፐ እስ እስ ኡርግያራ እስ ክሎ ግራመ ꬊለ ያርሽተ።
NUM 29:16 ቃስ ናጋራ ያርሹዋስ እስ ኮለ ያርሽተ። ሄስ ጋላስ ጋላስ ፁሳ ያርሹዋ ቦላ፥ ካꬃ ያርሹዋ ቦላነ ኡሻ ያርሾ ቦላ ጉጅድካ ያርሽተ።
NUM 29:17 “ናምአንꬆ ጋላሳን ታማነ ናምኡ ቦረይ ባይና ዎፋኖታ፥ ናምኡ ማራዘታነ እስ ላይꬅ ኩምዳ ታማነ ኦይዱ ኡርገታ ያርሽተ።
NUM 29:18 ዎፋኖታራ፥ ማራዘታራነ ዶርሳ ኡርገታራ ካꬃ ያርሹዋነ ኡሻ ያርሹዋ ዎጋይ ኪተይሳ መላ ኤንታ ታይቡዋዳ ያርሽተ።
NUM 29:19 ጋላስ ጋላስ ያርሸትያ ፁሳ ያርሹዋ ቦላ፥ ካꬃ ያርሹዋ ቦላነ ኡሻ ያርሹዋ ቦላ ጉጅድ ናጋራ ያርሹዋስ እስ ኮለ ያርሽተ።
NUM 29:20 “ሄꬓንꬆ ጋላሳን ቦረይ ባይና ታማነ እስ ዎፋኖታ፥ ናምኡ ማራዘታ እስ ላይꬅ ኩምዳ ታማነ ኦይዱ ዶርሳ ኡርገታ ያርሽተ።
NUM 29:21 ዎፋኖታራ፥ ማራዘታራነ ዶርሳ ኡርገታራ ካꬃ ያርሹዋነ ኡሻ ያርሹዋ ዎጋይ ኪተይሳ መላ ኤንታ ታይቡዋዳ ያርሽተ።
NUM 29:22 ጋላስ ጋላስ ያርሸትያ ፁሳ ያርሹዋ ቦላ፥ ካꬃ ያርሹዋ ቦላነ ኡሻ ያርሹዋ ቦላ ናጋራ ያርሾስ እስ ኮለ ጉጅድ ያርሽተ።
NUM 29:23 “ኦይዳንꬆ ጋላሳን ቦረይ ባይና ታሙ ዎፋኖታ፥ ናምኡ ማራዘታነ እስ ላይꬅ ኩምዳ ታማነ ኦይዱ ዶርሳ ኡርገታ ያርሽተ።
NUM 29:24 ዎፋኖታራ፥ ማራዘታራነ ዶርሳ ኡርገታራ ካꬃ ያርሹዋነ ኡሻ ያርሹዋ ዎጋይ ኪተይሳ መላ ኤንታ ታይቡዋዳ ያርሽተ።
NUM 29:25 ጋላስ ጋላስ ያርሸትያ ፁሳ ያርሹዋ ቦላ፥ ካꬃ ያርሹዋ ቦላነ ኡሻ ያርሹዋ ቦላ ጉጅድ ናጋራ ያርሾስ እስ ኮለ ያርሽተ።
NUM 29:26 “እቻሻንꬆ ጋላሳን ቦረይ ባይና ኡዱፉን ዎፋኖታ፥ ናምኡ ማራዘታነ እስ ላይꬅ ኩምዳ ታማነ ኦይዱ ዶርሳ ኡርገታ ያርሽተ።
NUM 29:27 ዎፋኖታራ፥ ማራዘታራነ ዶርሳ ኡርገታራ ካꬃ ያርሹዋነ ኡሻ ያርሹዋ ዎጋይ ኪተይሳዳ ኤንታ ታይቡዋዳ ያርሽተ።
NUM 29:28 ጋላስ ጋላስ ያርሸትያ ፁሳ ያርሹዋ ቦላ፥ ካꬃ ያርሹዋ ቦላነ ኡሻ ያርሹዋ ቦላ ጉጅድ ናጋራ ያርሾስ እስ ኮለ ያርሽተ።
NUM 29:29 “ኡሱፑንꬆ ጋላሳን ቦረይ ባይና ሆስፑን ዎፋኖታ፥ ናምኡ ማራዘታነ እስ ላይꬅ ኩምዳ ታማነ ኦይዱ ዶርሳ ኡርገታ ያርሽተ።
NUM 29:30 ዎፋኖታራ፥ ማራዘታራነ ዶርሳ ኡርገታራ ካꬃ ያርሹዋነ ኡሻ ያርሹዋ ዎጋይ ኪተይሳ መላ ኤንታ ታይቡዋዳ ያርሽተ።
NUM 29:31 ጋላስ ጋላስ ያርሸትያ ፁሳ ያርሹዋ ቦላ፥ ካꬃ ያርሹዋ ቦላነ ኡሻ ያርሹዋ ቦላ ጉጅድ ናጋራ ያርሾስ እስ ኮለ ያርሽተ።
NUM 29:32 “ላፑንꬃ ጋላሳን ላፑን ዎፋኖታ፥ ናምኡ ማራዘታነ እስ ላይꬅ ኩምዳ ታማነ ኦይዱ ዶርሳ ኡርገታ ያርሽተ።
NUM 29:33 ዎፋኖታራ፥ ማራዘታራነ ዶርሳ ኡርገታራ ካꬃ ያርሹዋነ ኡሻ ያርሹዋ ዎጋይ ኪተይሳ መላ ኤንታ ታይቡዋዳ ያርሽተ።
NUM 29:34 ጋላስ ጋላስ ያርሸትያ ፁሳ ያርሹዋ ቦላ፥ ካꬃ ያርሹዋ ቦላነ ኡሻ ያርሹዋ ቦላ ጉጅድ ናጋራ ያርሾስ እስ ኮለ ያርሽተ።
NUM 29:35 “ሆስፑንꬃ ጋላሳን ጎይናናዉ ሺቅተ፤ አይ ኦሶካ ኦꬆፍተ።
NUM 29:36 ቦረይ ባይና እስ ዎፋኖ፥ እስ ማራዘ፥ እስ ላይꬅ ኩምዳ ላፑን ዶርሳ ኡርገታ ሳውያ ፁሳ ያርሾ ኦꬅድ ጎዳስ ያርሽተ።
NUM 29:37 ዎፋኖታራ፥ ማራዘታራነ ዶርሳ ኡርገታራ ካꬃ ያርሹዋነ ኡሻ ያርሹዋ ዎጋይ ኪተይሳዳ ኤንታ ታይቡዋዳ ያርሽተ።
NUM 29:38 ጋላስ ጋላስ ያርሸትያ ፁሳ ያርሹዋ ቦላ፥ ካꬃ ያርሹዋ ቦላነ ኡሻ ያርሹዋ ቦላ ጉጅድ ናጋራ ያርሾስ እስ ኮለ ያርሽተ።
NUM 29:39 “ህንተ ጋሶ ያርሹዋ ቦላነ ህንተ ዶሳ ያርሹዋ ቦላ ፁሳ ያርሾ፥ ካꬃ ያርሾ፥ ኡሻ ያርሾነ እስፈተꬃ ያርሾ ባልያ ቦንቻናዉ ኪተትዳ ዎድያን ያርሽተ” ያግስ።
NUM 29:40 ሙሰይ፥ ጎዳይ ባና ኪትዳይሳ ኡባ እስራኤለ አሳስ ኦድስ።
NUM 30:1 ሙሰይ እስራኤለ ዘረꬃ ሀላቃታኮ፥ “ጎዳ ኪታይ ሀይሳ፤
NUM 30:2 እስ አስ ጎዳስ እስባ ኦꬃናዉ ጫቅኮ ዎይኮ እስባፐ ባና ናጋናዉ ቃንግኮ ጉየ ጎና ፖሎ።
NUM 30:3 “ባ አዋ ሶን ደእያ ጌላእያ ጎዳስ እስባ ኦꬃናዉ ጫቅኮ ዎይኮ እስባፐ ባና ናጋናዉ ቃንግኮ፥
NUM 30:4 እ አዋይ እያ ጫቅዳይሳ ዎይኮ እያ ቃንገትዳይሳ ስእድ፥ እዮ ድጎና እፅኮ፥ እያ ፖላናዉ ኮሼስ።
NUM 30:5 ሽን እ አዋይ ሄሳ ስእድ እዮ ድግኮ እ ጫቆይነ እ ቃንገꬃይ አታናዉ ዳንዳኤስ። እ አዋይ እዮ ድግዳ ግሾ ጎዳይ እዉ አቶ ጋና።
NUM 30:6 “ገሎና ማጫ ናእያ ጫቃዳ ደአሸ ዎይኮ እስባፐ ባና ናጋናዉ ቃንገታዳ ደአሸ አዝና ገልኮ፥
NUM 30:7 እ አዝናይ ሄሳ ስእድ እዮ ድጎና እፅኮ እያ ባ ጫቁዋነ ባ ቃንገꬃ ፖላናዉ ኮሼስ።
NUM 30:8 ሽን እ አዝናይ ሄሳ ስእድ እዮ ድግኮ እያ ጫቅዳ ጫቆይ ዎይኮ ቃንገትዳ ቃንገꬃይ እዮ ጎመና። ሄሳ ጎዳይ እዉ አቶ ጋና።
NUM 30:9 “ሽን አምእያ ዎይኮ ሳዮ ማጫስ ጫቅዳ ጫቁዋ ዎይኮ ቃንግዳ ቃንገꬃ ፖላናዉ በሴስ።
NUM 30:10 “አዝናራ ደእያ ማጫስ ጫቅኮ ዎይኮ እስባ ኦꬃናዉ ቃንግኮ፥
NUM 30:11 እ አዝናይ ሄሳ ስእድ እዮ ድጎና እፅኮ፥ እያ ጫቅዳ ጫቁዋነ ቃንገትዳ ቃንገꬃ ፖሎ።
NUM 30:12 እ አዝናይ ሄሳ ስእዳ ጋላስ እዮ ድግኮ እ ጫቆይ ዎይኮ እያ ኦꬃናዉ ቃንገትዳ ቃንገꬃይ እዮ ጎመና። እ አዝናይ ድግዳ ግሾ ጎዳይ እዉ አቶ ጋና።
NUM 30:13 እ አዝናይ እያ ጫቅዳ ጫቁዋ ዎይኮ እያ ባና ካዉሻናዉ ቃንገትዳ ቃንገꬃ ላላናዉ ዎይኮ ምንꬃናዉ ዳንዳኤስ።
NUM 30:14 ሽን እ አዝናይ ሄ ጋላስ ዎይኮ ዎንተꬃ ጋላስ አይኮካ ጎና እፅኮ፥ እ ጫቁዋ ዎይኮ እ ቃንገꬃ ምንꬅስ ጉሱ። እ ሄሳ ስእድ፥ ስእ ጊኮ እ ቆፋ ማእስ ጉሱ።
NUM 30:15 ሽን እ ሄሳ ስእ ጋምእድ ዛር ድግያባ ግድኮ ሄሳስ ኦይሸተይ እያ” ያግስ።
NUM 30:16 ህዛ ሀይስ አዝና ግዶንነ ማች ግዶን፥ ባ አዋራ ሶን ደእያ ጌላኦ ግዶንነ እ አዋ ግዶን ደእያ ጋሄተꬃባ ጎዳይ ሙሰስ እምዳ ዎጋ።
NUM 31:1 ጎዳይ ሙሰኮ፥
NUM 31:2 “እስራኤለ አሳ ቆህዳ ግሾ ምድያመ አሳ ኦላዳ ሀሎ ከያ፤ ሄሳፈ ጉየ፥ ኔኒ ሀይቃዳ ነ ማይዛታ ጋካና” ያግስ።
NUM 31:3 ሄሳ ግሾ፥ ሙሰይ አሳኮ፥ “ምድያመ አሳ ኦልድ ጎዳ ሀሎ ከያና መላ ህንተ ግዶፈ ጉꬃ አሳ ኦላስ ዳንጭስተ።
NUM 31:4 እስ እስ እስራኤለ ኮቻፈ እስ ሙኩሉ አደ አሳ ኦላስ የድተ” ያግስ።
NUM 31:5 ሄሳ ግሾ፥ እስ እስ እስራኤለ ኮቻፈ እስ እስ ሙኩሉ አሳይ ከይድ፥ ታማነ ናምኡ ሙኩሉ ኦላንቾት ኦላስ ጊግዶሶና።
NUM 31:6 ሙሰይ ካህንያ አላዛራ ናኣ ፕንሃሳ አዋተꬃን፥ እስ እስ ኮቻፈ እስ እስ ሙኩሉ አስ ዶርድ ኦላስ የድስ፤ ፕንሃስ ብሸ ጌሻ ሚሸታነ ማላስ ፑንያ ዛየ ኤክድ ብስ።
NUM 31:7 ጎዳይ ሙሰ ኪትዳይሳዳ፥ ኤንቲ ምድያመ አሳ ኦልድ አደ ኡባ ዎꬍዶሶና።
NUM 31:8 እቻሹ ምድያመ ካዎታ፥ ኤዋ፥ ረቄማ፥ ዙራ፥ ሁራነ ሬባ ጌተትያ አሳታ ዎꬍዶሶና፤ ቃስ ብኦራ ናኣ ባላማካ ማሻን ዎꬍዶሶና።
NUM 31:9 እስራኤለ አሳይ ምድያመ ማጫሳነ ናይታ ድእዶሶና፤ ኤንታ መህያ፥ ዶርሳነ ዴሻ ዉድያነ ኤንታ ሚሸ ኡባ ድእዶሶና።
NUM 31:10 ኤንቲ ደእያ ካታማታነ ኤንታ ጉታታ ኡባ ፁግዶሶና።
NUM 31:11 አሳ መህያነ ደእዳባ ኡባ ኤክድ ብዶሶና።
NUM 31:12 ኤንቲ ድእዳ አሳ፥ መህያነ ሻሎ ኡባ እያርኮፈ ሄፍንꬃን፥ ዮርዳኖሰ ሻፋ ማታን ደእያ ሞአበ ደንባን ዱንካንዳ ሙሰኮ፥ ካህንያ አላዛራኮነ እስራኤለ ማባራኮ ኤህዶሶና።
NUM 31:13 ሙሰይ፥ ካህነያ አላዛርነ ማባራ ሀላቃት ኡባይ ዱንካንዳ ጉታፐ ጋፃ ከይድ ኤንታና ሞክዶሶና።
NUM 31:14 ሙሰይ ኦላፐ ስምዳ ቾራ ሞጮናታ፥ ሻላቃታነ ማቶ ሀላቃታ ቦላ ሀንቀትስ።
NUM 31:15 ሙሰይ ኤንታኮ፥ “ማጫሳ ኡባ አይስ ዎꬍቤከቲ?
NUM 31:16 ኤንቲ ባላማ ዞርያ ስእድ፥ ፐኦራ ጌተትያ በሳን እስራኤለ አሳይ ጎዳ አግድ፥ ቦሻን ሀይቃናዳ ኦꬅዳይ ማጫሳ ግደይሳ ዶግደቲ?
NUM 31:17 ሄሳ ግሾ፥ ሀእ አደ ናይታነ አደራ አቅዳ ማጫስ ኡባ ዎꬍተ።
NUM 31:18 ሽን አደራ አቅቦና ማጫ ናይታ ኡባ ህንተዉ አሽተ።
NUM 31:19 ህንተ ግዶፈ አሰ ዎꬍዳ አስ ዎይኮ አሀ ቦችዳ ኦንካ ጉታፐ ጋፃን ላፑን ጋላስ ኡቶ፤ ሄꬓንꬆ ጋላሳንነ ላፑንꬃ ጋላሳን ህንተናነ ህንተ ድእዳ አሳ ጌሽተ።
NUM 31:20 ሄሳዳካ ማኦ ኡባ፥ ጋልባፈ፥ ዴሻ እክሰፐነ ምꬃፈ ኦሰትዳባታ ኡባ ጌሽተ” ያግስ።
NUM 31:21 ካህነይ አላዛር ኦላፐ ስምዳ ኦላንቾታኮ፥ “ጎዳይ ሙሰስ እምዳ ህግያ ማራይ ሀይሳ፤
NUM 31:22 ዎርቃ፥ ብራ፥ ናሰ፥ ብራታ፥ ቆርቆሮ፥ እርሳሰ፥
NUM 31:23 ታማን ሜተቶናባት ኡባይ ታማን ጌያናዉ በሴስ። ሽን ታማን ሜተትያባት ጌሾ ሃꬃን ጌያናዉ በሴስ።
NUM 31:24 ላፑንꬃ ጋላሳን ህንተ ማኡዋ ሜጭተ፤ ህንተና ጌሽተ። ሄሳፈ ጉየ፥ ጉታ ገልተ” ያግስ።
NUM 31:25 ጎዳይ ሙሰኮ፥
NUM 31:26 “ኔራ፥ ካህንያ አላዛራራነ እስራኤለ ማባራ ሀላቃት ድኤትዳ አሳነ መህያ ታይብተ።
NUM 31:27 ኦላ ብዳይሳታስነ ቦናይሳታስ ናምኡ ከስድ ሻክተ።
NUM 31:28 ኦላ ብዳይሳታ ግሹዋፐ አሰ ግድን ሚዝ ግድን ሀረ ግድን ዶርሰ ዎይኮ ዴሸ ግድን እቻሹ ፄታፐ እስኖ ጎዳስ እምተ።
NUM 31:29 ኤንታ ግሹዋፐ ኤክዳ ጎዳ እሞታ ካህንያ አላዛራስ እምተ።
NUM 31:30 ሀንኮ እስራኤለታ ጋክዳ ግሹዋፐ፥ አሰ ግድን ሚዝ ግድን ሀረ ግድን ዶርሰ ዎይኮ ዴሸ ግድን እሻታማፈ እስኖ ኤክድ ጎዳ ዱንካንያ አዋተꬃን አይስያ ሌወታስ እምተ” ያግስ።
NUM 31:31 ሙሰይነ ካህነይ አላዛር ጎዳይ ኪትዳይሳዳ ኦꬅዶሶና።
NUM 31:32 ኦላንቾት ባንታዉ ኤክን አትዳ ድኦይ 675,000 ዶርሳታ፥ 72,000 ሚዛታ፥ 61,000 ሀረታነ 32,000 ጌላኦ ማጫ ናይታ።
NUM 31:36 ኦላ ብዳይሳታ ጋክዳ ግሾይ 337,500 ዶርሳታ፤
NUM 31:37 ኤንታፈ ጎዳስ እመትዳይ 675.
NUM 31:38 ሚዛት 36,000፤ ኤንታፈ ጎዳስ እመትዳይ 72.
NUM 31:39 ሀረት 30,500፤ ኤንታፈ ጎዳስ እመትዳይ 61.
NUM 31:40 ማጫሳት 16,000፤ ኤንታፈ ጎዳስ እመትዳይ 32.
NUM 31:41 ጎዳይ ሙሰ ኪትዳይሳዳ ጎዳ እሞታ ካህንያ አላዛራስ እሚስ።
NUM 31:42 ኦላ ቦና እስራኤለ ማባራ ጋክዳ ግሾይ ኦላ ብዳ አሳ ግሹዋራ እስ ግና፤ እካ 337,500 ዶርሳታ፥ 36,000 ሚዛታ፥ 30,500 ሀረታነ 16,000 ጌላኦ ማጫ ናይታ።
NUM 31:47 እስራኤለ ማባራ ጋክዳ ግሹዋፐ እሻታሙ አሳፐነ መህያፐ እሶ እሶ ከስድ ጎዳይ እያ ኪትዳይሳዳ ጌሻ ዱንካንያ አዋተꬃን አይስያ ሌወታስ እሚስ።
NUM 31:48 ሄሳፈ ጉየ፥ ቶራ ሞጮናት፥ ሻላቃትነ ማቶ ሀላቃት ሙሰኮ ሺቅድ፥
NUM 31:49 “ኑኒ ነ አይለት ኑ አዋተꬃ ጋርሳን ደእያ ኦላንቾታ ታይብን እሶይካ ፓጭቤና።
NUM 31:50 ጎዳይ ኑ ሸምፑዋ አሽዳ ግሾ፥ ኑ እሶይ እሶይ ኤክዳ ዎርቃ አሌቆታ፥ ሳጋዮታ፥ ቶሆ አልቦታ፥ ምግዶታ፥ ሀይꬃ ዎርቃታነ ቆ ዎርቃታ ጎዳስ እማናዉ ኤክድ ይዳ” ያግዶሶና።
NUM 31:51 ሙሰይነ ካህነይ አላዛር ዎርቃ አሌቆታ ኡባ ኤንታፈ ኤክዶሶና።
NUM 31:52 ሻላቃትነ ማቶ ሀላቃት ጎዳስ እምዳ ዎርቃይ ናምኡ ፄቱ ክሎ ግራመ ግድስ።
NUM 31:53 ሀንኮ ኦላንቾት ኤህዳ ድኡዋ ባንታዉ ኤክዶሶና።
NUM 31:54 ሙሰይነ ካህነይ አላዛር ሻላቃታፐነ ማቶ ሀላቃታፐ ኤክዳ ዎርቃ ጎዳ ስንꬃን እስራኤለ አሳ ሀሳይስያባ ኦꬅድ ጌሻ ዱንካንያ ግዶ ኤህዶሶና።
NUM 32:1 ሮቤላነ ጋደ ኮቻስ ዳሮ መሄይ ደኤስ። ኤንቲ ያእዜራ ቢታይነ ጋላዳ ቢታይ መሄስ እንጀ ግደይሳ፥
NUM 32:2 በእድ ሙሰኮ፥ ካህንያ አላዛራኮነ እስራኤለ ማባራ ሀላቃታኮ ይድ ሀይሳዳ ያግዶሶና።
NUM 32:3 “እስራኤለ አሳይ ላታና መላ ጎዳይ ማድዳ ቢታይ፥ አፃሮተይ፥ ድቦን፥ ያእዜር፥ ንምር፥ ሀሰቦን፥ ኤልያል፥ ሰባም፥ ናቦይነ ባኦን መሄስ እንጀ ቢታ፤ ኑስ ህንተ አይለታስ ዳሮ መሄይ ደኤስ።
NUM 32:5 ኑኒ ህንተ ስንꬃን ሳባ ደምዳባ ግድኮ፥ ሄ ቢታ ኑስ ህንተ አይለታ ላታ ኦꬅድ እምተ፤ ኑና ዮርዳኖሰ ሻፋፐ ሄፍንꬅ ፕንꬆፍተ” ያግዶሶና።
NUM 32:6 ሙሰይ ጋደ ኮቻታኮነ ሮቤላ ኮቻታኮ፥ “ህንተ ባጋ ግድዳ እስራኤለ አሳይ ኦላስ ብያ ዎደ ህንተ ሀይሳን ኡታናዉ ኮዬቲ?
NUM 32:7 ጎዳይ ኤንታዉ እምዳ ቢታ ኤንቲ ፕኖና መላ ህንተ አይስ ኤንታ ዎዛና ሹግሴቲ?
NUM 32:8 ቃደሳ ባርነፈ ሀ ቢታ ዎቻና መላ ህንተ አዋታ ታ የድዳ ዎደ ኤንትካ ሀይሳዳ ኦꬅዶሶና።
NUM 32:9 ኤንቲ ኤሽኮላ ዛንጋራ ጋካናዉ ብድ ሄ ቢታ በእ ስሚድ እስራኤለት ጎዳይ ኤንታዉ እምዳ ቢታ ገሎና መላ እስራኤለታ ዎዛና ሹግስዶሶና።
NUM 32:10 ጎዳይ ሄ ጋላስ ዳሮ ሀንቀትድ ሀይሳዳ ያግድ ጫቅስ፤
NUM 32:11 ‘ባንታ ኩመꬃ ዎዛናፐ ታና ካልቦና ግሾ፥ ግብፀ ቢታፈ ከይዳይሳታፐ ላይꬅ ላታማነ እያፐ ቦላ ግድዳ አደ አሳፐ እሶይካ አብራሃመስ፥ ይሳቃስነ ያይቆባስ እማና ጋዳ ጫቅዳ ቢታ ገለኮና።
NUM 32:12 ባንታ ኩመꬃ ዎዛናፐ ካልዳ ግሾ፥ ቀነዛ ዮፎና ናኣ ካለባፐነ ናወ ናኣ እያሱፐ አትሽን፥ ሀር ኦንካ ገለና’ ያግስ።
NUM 32:13 ጎዳ ሀንቆይ እስራኤለ አሳ ቦላ ኤፅዳ ግሾ ጎዳ ስንꬃን ኢታ ኦꬅዳ ሄ የለተꬃ ኡባይ ꬋያና ጋካናዉ መላ ቢታን ኦይታሙ ላይꬅ ቶይላትዶሶና።
NUM 32:14 ህንተኖ፥ ናጋራንቾታ ናይቶ ህንተ አዋታ በሳን ኤቅድ ጎዳይ እስራኤለ አሳ ቦላ ጉጅድ ሀንቀታና መላ ኦꬄታ።
NUM 32:15 ህንተ ጎዳ ካሎና እፅኮ፥ እ ቃስካ ባ ደርያ መላ ቢታን አጋና። ኤንታና ጋክያ ꬋዩዋስ ህንተ ኦይሸታና” ያግስ።
NUM 32:16 ኤንቲ ሙሰኮ ሺቅድ፥ “ኑኒ ሀይሳን ኑ መህያስ ዳራ፥ ኑ ናይታስነ ኑ ማቸታስ ካታማ ኬፃናዉ ኮዮስ።
NUM 32:17 ሽን እስራኤለ አሳይ ባንታ በሳ ኤካና ጋካናዉ ኑኒ ኦላ ሚሸ ዳንጭድ ኤንታ ስንꬃን ከይድ ኦለታናዉ ጊገትዳ። ሄ ዎደ ሄ ቢታን ደእያ አሳይ ኑ ናይታነ ኑ ማቸታ ቆሆና መላ ግምበትድ ኡትዳ ካታማታን ደኦና።
NUM 32:18 እስራኤለ አሳ ኡባይ ባንታ ላታ ላታ ኤካና ጋካናዉ፥ ኑኒ ኑ ሶ ስሞኮ።
NUM 32:19 ኑኒ ኑ ላታ ዮርዳኖሰ ሻፋፐ ሀፍንꬃን ዶሎሀ ባጋን ላትዳ ግሾ፥ ዮርዳኖሰፐ ሄፍንꬃን ዉሎሀ ባጋን ኤንታራ ላታ ኤኮኮ” ያግዶሶና።
NUM 32:20 ሙሰይ ኤንታኮ፥ “ህንተ ገይስ ቱማ ግድኮ ሀይሳን ጎዳ ስንꬃን ኦላ ባናዉ ዳንጨትተ።
NUM 32:21 ጎዳይ ባ ሞርከታ ባ ስንꬃፈ ጎዳና ጋካናዉ ህንተ ኦላ ሚሽያ ዳንጭድ፥ ዮርዳኖሰ ሻፋ ጎዳ ስንꬃን ፕንኮ፥
NUM 32:22 ሄ ቢታ ጎዳይ ፆንዳፐ ጉየ ህንተ ስማናዉ ዳንዳኤታ። ሄ ዎደ ህንተ ጎዳስነ እስራኤለ አሳስ ኦለትድ ፖልደታ ጉሱ። ቃስ ሄ ቢታይ ጎዳ ስንꬃን ህንተዉ ላታ ግዳና።
NUM 32:23 “ህንተ ሄሳ ኦꬆና እፅኮ ጎዳ ቦላ ናጋራ ኦꬄታ፤ ህዛ፥ ህንተ ናጋራ ግሾ ህንተና ሴር ጋካናይሳ ሎይꬅ ኤርተ።
NUM 32:24 ህንተ ህንተዉ ካታማታ፥ ህንተ መህያስ ዳራ ኬፅተ፥ ሽን ህንተ ገልዳ ቃላ ፖልተ” ያግስ።
NUM 32:25 ጋደ ኮቻይነ ሮቤላ፥ ኮቻይ ሙሰኮ፥ “ኑኒ ነ አይለት ነ ኪትዳይሳዳ ኦꬃና።
NUM 32:26 ኑ ናይት፥ ኑ ማቸት፥ ኑ ዶርሳትነ ኑ መሄይ ሀይሳን ጋላዳ ካታማታን ደእሾና።
NUM 32:27 ሽን ኑኒ ነ አይለት፥ ኦላንቾት ኡባይ፥ ኔኒ ኑ ጎዳይ ግዳይሳዳ ኦለታናዉ ጎዳ ስንꬃን ዮርዳኖሰ ሻፋ ፕናና” ያግዶሶና።
NUM 32:28 ሄሳ ግሾ፥ ሙሰይ ካህንያ አላዛራ፥ ናወ ናአ እያሱነ እስራኤለ ኮቻታ ሀላቃታ ኤንታባ ያግድ ኪትስ።
NUM 32:29 “ጋደ ኮቻይነ ሮቤላ ኮቻይ ኡባይ ኦላ ሚሽያ ዳንጭድ፥ ጎዳ ስንꬃን ህንተራ ዮርዳኖሰ ሻፋ ፕንኮነ ህንተ ሄ ቢታ ፆንኮ፥ ሄሳፈ ጉየ፥ ጋላዳ ቢታ ህንተ ኤንታ ላትስተ።
NUM 32:30 ሽን ኤንቲ ኦላ ሚሽያ ዳንጭድ፥ ህንተራ ፕንድ ኦላስ ቦና እፅኮ፥ ህንተዳ ኤንታዉ ካናነ ቢታን ላት እመቶ” ያግስ።
NUM 32:31 ያትን። ጋደ ኮቻይነ ሮቤላ ኮቻይ ዛሪድ፥ “ኑኒ ነ አይለት ጎዳይ ግዳይሳ ኦꬃና።
NUM 32:32 ኑኒ ኦላ ሚሽያ ዳንጭድ፥ ጎዳ ስንꬃን ካናነ ቢታ ገላናዉ ፕናና፤ ሽን ኑኒ ላትያ ላታይ ዮርዳኖሰፐ ሀፍንꬃ ባጋ ግዶ” ያግዶሶና።
NUM 32:33 ሄሳ ግሾ፥ ሙሰይ ጋደ ኮቻስ፥ ሮቤላ ኮቻስነ ዮሰፋ ናኣ ምናሰ ኮቻፈ ባጋስ አሞረ ካዋ ስሆና ካዎተꬃነ ባሳነ ካዋ ኦገ ካዎተꬃ ኤንታ ዩሹዋን ደእያ ካታማታራ እሚስ።
NUM 32:34 ጋደ ኮቻይ ድቦና፥ አፃሮታ፥ አሮኤራ
NUM 32:35 አፅሮት-ሻፋና፥ ያእዜራ፥ ዮግባ፥
NUM 32:36 ቤት-ንምራነ ቤት-ሀራና ጌተትያ ግምበን ድረትዳ ካታማታ ዛሪድ ኬፅዶሶና፤ ባንታ መህያስ ዳራ ኬፅዶሶና።
NUM 32:37 ሮቤላ፥ ኮቻይ ሀሰቦና፥ ኤልኣላ፥ ቅራታይማ፥
NUM 32:38 ናባ፥ ባኣል-ማኦናነ ሰባማ ጌተትያ ካታማታ ዛረꬅ ኬፅዶሶና፤ ሄ ካታማታ ሱንꬃ ላምዶሶና።
NUM 32:39 ምናሰ ናኣ ማክራ ኮቻት ጋላዳ ቢታ ኦል ኦይክድ ያን ደእያ አሞረታ ጎድዶሶና።
NUM 32:40 ሄሳ ግሾ፥ ምናሰ ናኣ ማክራ ኮቻስ ሙሰይ ጋላዳ ቢታ እምን ኤንቲ ያን ደእዶሶና።
NUM 32:41 ምናሰ ኮች ግድዳ ያእር ሄ ካታማታ ኦል ኦይክድ፥ “ያእራ ካታማታ” ያግድ ሱንꬅስ።
NUM 32:42 ኖባ ቃናታ ካታማነ እያ ዩሹዋን ደእያ ጉታታ ኦላን ኦይክደ፥ ባ ሱንꬃን “ኖባ” ግድ ሱንꬅስ።
NUM 33:1 ሙሰይነ አሮን ካለꬅን፥ እስራኤለ አሳይ፥ ባንታ ጩጋን ጩጋን ግብፀፈ ከይድ ሲራትዳ ጉታታ ኦድያ ታርከይ ሀይሳ።
NUM 33:2 ጎዳይ ኪትዳይሳ መላ ሙሰይ ኤንቲ ሲራትዳ በሳታ ሱንꬃ ኡባ ካል ካል ፃፍስ።
NUM 33:3 እስራኤለ አሳይ ኮይሮ አጌናን፥ ታማነ እቻሻንꬆ ጋላሳን፥ ፓስካ ቦንችያ ናምአንꬆ ጋላስ ደንድድ፥ ግብፀ አሳ ኡባይ በእሽን፥ ያዮና ራምሰፐ ከይዶሶና።
NUM 33:4 ሄ ዎደ ግብፀ አሳይ ጎዳ ጋዶን ሀይቅዳ ባንታ ባይራ ናይታ ሞጎሶና። ሄሳዳ ኦꬅድ፥ ጎዳይ ኤንታ ፆሳታ ቦላ ፕርዳ ኤህስ።
NUM 33:5 እስራኤለ አሳይ ራምሰፐ ደንድድ ሱኮታ ጌተትያ በሳን ዱንካንዶሶና።
NUM 33:6 ሱኮታፐ ደንድድ መላ ቢታ ጋፃን ደእያ ኤታማን ዱንካንዶሶና።
NUM 33:7 ኤታማፐ ደንድድ ባአል-ፃፎናፐ ዶሎሀ ባጋን ደእያ ፕሀህሮታ ስሚድ ምግዶላ ማታን ዱንካንዶሶና።
NUM 33:8 ፕሀህሮታፐ ደንድድ፥ ዞኦ አባ ፕንድ፥ ሱዛ መላ ቢታ ብዶሶና። ኤታማ መላ ቢታን ሄꬑ ጋላስ ሄመትድ ማራን ዱንካንዶሶና።
NUM 33:9 ማራፐ ደንድድ ታማነ ናምኡ ፑልቶትነ ላፑን ታሙ ዛምባት ደእያ ኤልማን ዱንካንዶሶና።
NUM 33:10 ኤልማፐ ደንድድ ዞኦ አባ ማታን ዱንካንዶሶና።
NUM 33:11 ዞኦ አባ ማታፐ ደንድድ ሲና መላ ቢታን ዱንካንዶሶና።
NUM 33:12 ሲና መላ ቢታፈ ደንድድ ራፋቃን ዱንካንዶሶና።
NUM 33:13 ራፋቃፐ ደንድድ ኤሉሳን ዱንካንዶሶና።
NUM 33:14 ኤሉሳፐ ደንድድ ሃꬅ ባይና በሳን ራፍድማን ዱንካንዶሶና።
NUM 33:15 ራፍድማፐ ደንድድ ሲና መላ ቢታን ዱንካንዶሶና።
NUM 33:16 ሲና መላ ቢታፈ ደንድድ ክብሮት ሀትአዋን ዱንካንዶሶና።
NUM 33:17 ክብሮት ሀትአዋፐ ደንድድ ሀፀሮታን ዱንካንዶሶና።
NUM 33:18 ሀፀሮታፐ ደንድድ እርትማን ዱንካንዶሶና።
NUM 33:19 እርትማፐ ደንድድ እርሞን-ፓሬዛን ዱንካንዶሶና።
NUM 33:20 እርሞን-ፓሬዛፐ ደንድድ ልብናን ዱንካንዶሶና።
NUM 33:21 ልብናፐ ደንድድ እርሳን ዱንካንዶሶና።
NUM 33:22 እርሳፐ ደንድድ ቃሄላታን ዱንካንዶሶና።
NUM 33:23 ቃሄላታፐ ደንድድ ሸፋራ ዙማን ዱንካንዶሶና።
NUM 33:24 ሸፋራ ዙማፐ ደንድድ ሀራዳን ዱንካንዶሶና።
NUM 33:25 ሀራዳፐ ደንድድ ማቅሄሎታን ዱንካንዶሶና።
NUM 33:26 ማቅሄሎታፐ ደንድድ ታሀታን ዱንካንዶሶና።
NUM 33:27 ታሀታፐ ደንድድ ታራን ዱንካንዶሶና።
NUM 33:28 ታራፐ ደንድድ ምትቃን ዱንካንዶሶና።
NUM 33:29 ምትቃፐ ደንድድ ሀሽሞናን ዱንካንዶሶና።
NUM 33:30 ሀሽሞናፐ ደንድድ ሞሰሮታን ዱንካንዶሶና።
NUM 33:31 ሞሰሮታፐ ደንድድ በን-ያእቃናን ዱንካንዶሶና።
NUM 33:32 በን-ያእቃናፐ ደንድድ ሆር-ሀግድጋዳን ዱንካንዶሶና።
NUM 33:33 ሆር-ሀግድጋዳፐ ደንድድ ዮፅባታን ዱንካንዶሶና።
NUM 33:34 ዮፅባታፐ ደንድድ አብሮናን ዱንካንዶሶና።
NUM 33:35 አብሮናፐ ደንድድ ኤፅዮን-ጋብራን ዱንካንዶሶና።
NUM 33:36 ኤፅዮን-ጋብራፐ ደንድድ ሲና መላ ቢታን ቃደሳን ዱንካንዶሶና።
NUM 33:37 ቃደሳፐ ደንድድ ኤዶመ ቢታ ዛዋን ደእያ ሆራ ዙማን ዱንካንዶሶና።
NUM 33:38 ካህነይ አሮን ጎዳ ኪታን ሆራ ዙማ ቦላ ከይድ፥ እስራኤለ አሳይ ግብፀ ቢታፈ ከይዳ ኦይታማንꬆ ላይꬃን፥ እቻሻንꬆ አጌናን፥ ኮይሮ ጋላሳን ያን ሀይቅስ።
NUM 33:39 አሮን ሆራ ዙማ ቦላ ሀይቅያ ዎደ እያዉ ላይꬅ ፄታነ ላታማነ ሄꬓ።
NUM 33:40 ነገበ መላ ቢታን ካናነን ደእያ አራዳ ካዎይ እስራኤለ አሳ ዩሳ ስእስ።
NUM 33:41 እስራኤለ አሳይ ሆራ ዙማፐ ደንድድ ፃልሞናን ዱንካንዶሶና።
NUM 33:42 ፃልሞናፐ ደንድድ ፑኖናን ዱንካንዶሶና።
NUM 33:43 ፑኖናፐ ደንድድ ኦቦታን ዱንካንዶሶና።
NUM 33:44 ኦቦታፐ ደንድድ ሞአበ ቢታ ዛዋን ደእያ አባሪማን ዱንካንዶሶና።
NUM 33:45 አባሪማፐ ደንድድ ድቦን-ጋዳን ዱንካንዶሶና።
NUM 33:46 ድቦን-ጋዳፐ ደንድድ አልሞን-ድብላታይማን ዱንካንዶሶና።
NUM 33:47 አልሞን-ድብላታይማፐ ደንድድ ናቦ ዙማ ስንꬃን አባሪማ ዙማታ ቦላ ዱንካንዶሶና።
NUM 33:48 አባሪማ ዙማታፐ ደንድድ እያርኮፈ ሄፍንꬃን፥ ዮርዳኖሰ ሻፋ ማታን ደእያ ሞአበ ደንባን ዱንካንዶሶና።
NUM 33:49 ዮርዳኖሰ ሻፋ ማታን ደእያ ሞአበ ደንባን፥ ቤት-ያሽሞታፐነ አቤል-ሳፅማ ዛንጋራፐ ግዶን ዱንካንዶሶና።
NUM 33:50 እያርኮፈ ሄፍንꬃን፥ ዮርዳኖሰ ሻፋ ማታን ደእያ ሞአበ ደምባን ጎዳይ ሙሰኮ፥
NUM 33:51 “እስራኤለ አሳስ ያጋዳ ኦዳ፤ ዮርዳኖሰ ሻፋ ፕንድ፥ ካናነ ቢታ ህንተ ገልያ ዎደ
NUM 33:52 ሄ ቢታን ደእያ አሳ ኡባ ህንተ ስንꬃፈ የደꬅተ። ሹቻፈ ማሰትድ ኦሰትዳ ምስለታነ ሼሽድ መꬍዳ ኤቃታ ꬋይስተ። ꬎቃ ጎይኖ በሳታ ኡባ ላልተ።
NUM 33:53 ሄ ቢታ ታ ህንተዉ እምዳ ግሾ እያ ላትድ ያን ደእተ።
NUM 33:54 ህንተ ኮቻን ኮቻን ሳማ ከስድ ቢታ ሻከትተ። ታይቦን ዳርያ ኮቻታስ ዳልጋ ላታ እምተ፤ ታይቦን ጉፅያ ኮቻታስ ጉꬃ ላታ እምተ። ሳማን ኤንታ ጋክዳ ቢታይ ኤንታባ ግዳና። ቢታ ህንተ ማይዛታ ኮቻን ኮቻን ሻክድ ኤክተ።
NUM 33:55 ሽን ሄ ቢታን ደእያ አሳ ህንተ የደꬆና እፅኮ፥ ህንተ አሽዳይሳት ህንተ አይፍያስ ፕንጮ፥ ህንተ ምይያስ አጉንꬁ ግዳና፤ ህንተ ዳና ቢታን ኡባ ዎደ ኦላ ደንꬅድ ህንተና ዋይሳና።
NUM 33:56 ህንተ ኤንታ የደꬆና እፅኮ፥ ታ ኤንታ ቦላ ኦꬃናዉ ሀልችዳባ ህንተ ቦላ ኦꬃና ጋዳ ኦዳ” ያግስ።
NUM 34:1 ጎዳይ ሙሰኮ፥
NUM 34:2 “እስራኤለ አሳስ ሀይሳዳ ጋዳ ኦዳ፤ ህንተ ካናነ ገልያ ዎደ ታ ህንተዉ ላታ ኦꬃዳ እማና ቢታ ዛዋይ ሀይሳ።
NUM 34:3 ዱገሀ ባጋ ዛዋይ ሲና መላ ቢታፈ ደንድድ ኤዶመ ዛዋ ካንꬄስ። ዶሎሀ ባጋራ ህንተ ዛዋይ ማፅነ አባፈ ዱገ ባጋራ ዶምድ፥
NUM 34:4 አቅራብማ አꬍያ በሳ ሻክድ ሲና ቢታ ባዙዋ ካንꬅድ ዱገሀ ባጋራ ቃደስ-ባርነ ጋኬስ። ያፐ ሀዳር-አዳራ ካንꬅድ አፅሞና ጋኬስ።
NUM 34:5 አፅሞናፐ ደንድድ ግብፀ ሻፋ ጉየ ስሚድ መደትራነ አባ ጋኬስ።
NUM 34:6 “ዉሎሀ ባጋ ዛዋይ መደትራነ አባ ጋፃ ግዳና።
NUM 34:7 “ፑደሀ ባጋ ዛዋይ መደትራነ አባ ካልድ ሆራ ዙማ ጋካናዉ ቤስ።
NUM 34:8 ሆራ ዙማፐ ሀማታ ገልያ በሳ ጋካናዉ ቤስ፤ ሄ ዛዋ ዉርሰꬃይ ፃዳዳ።
NUM 34:9 ያፐ ደንድድ ዝፍሮና ጋክድ፥ ሀፃር-ኤናናን ኤቄስ፤ ፑደሀ ባጋ ዛዋይ ሀይሳ።
NUM 34:10 “ዶሎሀ ባጋ ዛዋይ ሀፃር-ኤናናፐ ሳፋማ ማላ ጋኬስ።
NUM 34:11 ሳፋማ ማላፈ ደንድድ አይናፐ ዶሎሀ ባጋራ እርብላ ዱገ ዎꬍድ ከነሬታ አባፈ ዶሎሀ ባጋራ ደእያ ዙማታ ጋኬስ።
NUM 34:12 ሄሳፈ ህንተ ዛዋይ ዱገ ዮርዳኖሰ ሻፋ ዎꬍ ዛዋይድ ማፅነ አባ ጋኬስ። ህንተ ቢታ ዩሾ ዛዋት ሀይሳታ” ያግስ።
NUM 34:13 ሙሰይ እስራኤለ አሳ ሀይሳዳ ያግድ ኪትስ፤ “ኡዱፉን ባጋ ኮቻስ ህንተ ሳማ የግድ ሻካና ላታ ቢታይ ሀይሳ።
NUM 34:14 ሮቤላ ኮቻይ፥ ጋደ ኮቻይነ ምናሰ ኮቻፈ ባጋይ፥
NUM 34:15 ባንታ ላታ እያርኮፈ ሄፍንꬃን፥ ዮርዳኖሰ ሻፋፐ ዶሎሀ ባጋን ኤክዶሶና” ያግስ።
NUM 34:16 ጎዳይ ሙሰኮ፥
NUM 34:17 “ካህንያ አላዛራነ ናወ ናኣ እያሱይ ሄ ቢታ አሳስ ሻኮ።
NUM 34:18 ቃስ ቢታ ሻካናዉ ማዳና መላ እስ እስ ኮቻፈ እስ እስ ሀላቃ ዶርተ።
NUM 34:19 ኤንታ ሱንꬃይ ሀይሳፈ ካልድ ደኤይሳ። ይሁዳ ኮቻፈ ዮፎና ናኣ ካለባ፤
NUM 34:20 ስሞና ኮቻፈ አምሁዳ ናኣ ሳላምኤላ፤
NUM 34:21 ብንያመ ኮቻፈ ክስሎና ናኣ ኤልዳዳ፤
NUM 34:22 ዳነ ኮቻፈ ዮግላ ናኣ ቡቃ፤
NUM 34:23 ዮሰፋ ናኣ ምናሰ ኮቻፈ ሱፌዳ ናኣ ሀንኤላ፤
NUM 34:24 ዮሰፋ ናኣ ኤፍሬማ ኮቻፈ ሽፍፃና ናኣ፤ ቃሙኤላ፤
NUM 34:25 ዛብሎና ኮቻፈ ፋርናካ ናኣ ኤልሳፋና፤
NUM 34:26 ይሳኮራ ኮቻፈ ሆዛ ናኣ ፓልፅኤላ፤
NUM 34:27 አሴራ ኮቻፈ ሳሎማ ናኣ አሁዳ፤
NUM 34:28 ንፍታለመ ኮቻፈ አምሁዳ ናኣ ፓዳህኤላ፤
NUM 34:29 ካናነ ቢታ እስራኤለ አሳስ ላታ ኦꬅድ ሻክድ እማና መላ ጎዳይ ኪትዳ አሳት ሀይሳታ” ያግስ።
NUM 35:1 እያርኮፈ ሄፍንꬃን፥ ዮርዳኖሰ ሻፋ ማታን ደእያ ሞአበ ደንባን፥ ጎዳይ ሙሰኮ ሀይሳዳ ያግስ፤
NUM 35:2 “እስራኤለት ባንታ ላታፐ ሌወት ዳና ካታማታነ ኤንታ ዩሹዋን ሄንꬃ ቢታ እማና መላ ኤንታዉ ኦዳ።
NUM 35:3 ሄ ካታማት ኤንታዉ ዱሳ በሲ ግዶ፤ ሄንꬃ ቢታት ኤንታ ሚዛስ፥ ኤንታ ዶርሳስነ ኤንታ ሀራ መሄታስ ግዶ።
NUM 35:4 ህንተ ኤንታዉ እምያ ሄንꬃ ቢታይ ኡባ ባጋራ ካታማ ግምበ ድርሳፈ እስ ሙኩሉ ዋꬋ ግዶ።
NUM 35:5 ካታማ ግዶ ኦꬅድ ዶሎሀ ባጋራ ናምኡ ሙኩሉ ዋꬋ፥ ዱገሀ ባጋራ ናምኡ ሙኩሉ ዋꬋ፥ ዉሎሀ ባጋራ ናምኡ ሙኩሉ ዋꬋነ ፑደሀ ባጋራ ናምኡ ሙኩሉ ዋꬋ ዋꬍተ። ሌወት ሄ ሄራ ባንታ ካታማስ ሄንꬃ ቢታ ኦꬆ።
NUM 35:6 “ሌወታስ ህንተ እምዳ ካታማት፥ አሰ ዎꬍዳ ኡራይ ባቃትድ አትያ ኡሱፑን ካታማታ፤ ሄሳታ ቦላ ጉጅድካ፥ ኦይታማነ ናምኡ ሀራ ካታማታ ኤንታዉ እምተ።
NUM 35:7 ኦይታማነ ሆስፑን ካታማታ ኤንታ ሄንꬃ ቢታራ እስፈ ሌወታስ እምተ።
NUM 35:8 እስራኤለ አሳ ላታፐ ኤንታ ላታ መላ ዳሮ ኮቻፈ ዳሮ ካታማ፥ ጉꬃ ኮቻፈ ጉꬃ ካታማ ኤክድ ሌወታስ እምተ” ያግስ።
NUM 35:9 ጎዳይ ሙሰኮ፥
NUM 35:10 “እስራኤለ አሳኮ ሀይሳዳ ያጋ፤ ዮርዳኖሰ ሻፋ ፕንድ፥ ካናነ ቢታ ህንተ ገልያ ዎደ፥
NUM 35:11 እስ አስ ቆፖና አሰ ዎꬍዳባ ግድኮ ሄ ኡራይ ባቃትድ አታና መላ ካታማታ ህንተዉ ዶርተ።
NUM 35:12 ያን ሱꬁ ዛራናዉ ኮያ ሀይቅዳ ኡራ ዳቦታፐ እ አቴስ። ሸምፖ ዎꬍዳ ደርያ ስንꬃን ፕርዳስ ሺቆና ሀይቃናዉ በሰና።
NUM 35:13 ሀ ህንተ እምያ ኡሱፑን ካታማት ህንተ ባቃትድ አትያ ካታማ ግዶ።
NUM 35:14 ሄꬑ ካታማት ዮርዳኖሰ ሻፋፐ ዶሎሀ ባጋን ግዶ፤ ቃስ አትዳ ሄꬓት ካናነ ቢታን ግዶ።
NUM 35:15 ሀ ኡሱፑን ካታማት ኤሮና አሰ ዎꬍዳ እስራኤለ አሳይ፥ በታንቾትነ ጉꬃ ዎደስ ህንተ ግዶን ደእያ አሳት ባቃትድ አትያ በሲ ግዶ።
NUM 35:16 “እስ አስ ሀራ አስ ብራታ ሚሸን ሾጭድ ዎꬍኮ ሄ ኡራይ ሸምፖ ዎꬍስ፤ እ ሀይቆ።
NUM 35:17 እስ አስ ዎꬋናዉ ዳንዳእያ ሹቻን ሀራ አስ ጫድድ ዎꬍኮ ሄ ኡራይ ሸምፖ ዎꬍስ፤ እ ሀይቆ።
NUM 35:18 እስ አስ ዎꬋናዉ ዳንዳእያ ምꬃ ሚሸን ሀራ አስ ሾጭድ ዎꬍኮ ሄ ኡራይ ሸምፖ ዎꬍስ፤ እ ሀይቆ።
NUM 35:19 ሱꬁ ዛርያ ማታ ዳቦይ ሄ ሸምፖ ዎꬍዳይሳ ደምኮ ዎꬎ።
NUM 35:20 “እስ አስ ሀራ አስ ባ ዎዛናን ሞርክድ ሱግ የግኮ ዎይኮ ሀይቆ ግድ እያ ቦላ እስባ ሆልን ሄ ኡራይ ሀይቅኮ፥
NUM 35:21 ዎይኮ ሞርክድ ባ ኩሸ ጩጩምድ ደችን ሄ ኡራይ ሀይቅኮ፥ እ ሸምፖ ዎꬍስ፤ እ ሀይቆ። ሱꬁ ዛርያ ማታ ዳቦይ ሸምፖ ዎꬍዳይሳ ደምኮ ዎꬎ።
NUM 35:22 “ሽን ሞርከተꬅ ባይናን፥ እስ አስ ሀራ አስ አኬኮና ሱግድ ዎይኮ ቆፖና እያ ቦላ እስባ ሆልኮ፥
NUM 35:23 ዎይኮ ዎꬋናዉ ዳንዳእያ ሹቹ እ በኦና እያ ቦላ ሆልን፥ ሄ ኡራይ ሀይቅኮ፥ ሄሳን ሞርከተꬅ ባይና ግሾነ እያ ቆሀናዉ ቆፕድ ደንዶና ግሾ፥
NUM 35:24 ዱላታይ እያ ግዶንነ እያ ሱꬃ ዛራናዉ ኮያ ኡራ ግዶን ፕርድያ ዎጋይ ካልድ ደእያ ዎጋꬆ ግዶ።
NUM 35:25 ኤሮና ዎꬍዳይሳ ሱꬃ ዛራናዉ ኮየይሳ ኩሸፐ ሄ ኡራ ዱላታይ አሽድ፥ እ ባቃትድ አትያ ካታማ ዛሮ። ሄ ዎደ ደእያ ዛይተን ትየትዳ ካህነ ሀላቃይ ሀይቃና ጋካናዉ እ ያን ደኦ።
NUM 35:26 “ሽን ኤሮና ዎꬍዳይስ ባቃትድ አትያ ካታማ ዛዋፐ በትኮ፥
NUM 35:27 ሀይቅዳ ኡራ ዳቦይ እያ ደምድ ዎꬍኮ፥ ሸምፖ ዎꬎን ኦይሸተና።
NUM 35:28 ሄ ዎደ ደእያ ካህነ ሀላቃይ ሀይቃና ጋካናዉ ሄ ኤሮና ዎꬍዳ ኡራይ ባቃትድ አትያ ካታማን ኡቶ። ሽን ሄ ካህነ ሀላቃይ ሀይቅዳፐ ጉየ ኤሮና ዎꬍዳ ኡራይ ባ ሶ ስማናዉ ዳንዳኤስ።
NUM 35:29 “ሀ ዎጋይነ ህገይ ህንተ ደእያ ቢታን ህንተዉነ ህንተ ዘረꬃስ ኤቅድ ደእያ ዎጋ ግዶ።
NUM 35:30 “አሰ ዎꬍዳ ኦንካ እ ሸምፖ ዎꬍዳይሳ ናምኡ ዎይኮ ሄꬑ ማርክ ማርካትኮ ሀይቆ፥ ሽን እስ አሳ ማርካተꬃን ኦንካ ሀይቃናዉ በሰና።
NUM 35:31 ቃስ ሸምፖ ዎꬍዳ አሳፐ አጫ ኤኮፍተ፤ እ ሀይቃናዉ በሴስ።
NUM 35:32 ባቃትድ አትያ ካታማ በትዳ ኦደፈካ ካህነ ሀላቃይ ሀይቃናፐ ስን ባ ሶ ስማና መላ አጫ እያፐ ኤኮፍተ።
NUM 35:33 ሱꬅ ቢታ ቱንስያ ግሾ ሱꬁ ጉሶፍተ። ሱꬁ ጉስዳ ኡራ ሱꬃፈ አትሽን፥ ሱꬅ ጉክዳ ቢታ ሀራ ኦገራ ቱናተꬃፈ ጌሽያ ዎግ ባዋ።
NUM 35:34 ታኒ፥ ጎዳይ እስራኤለ አሳ ግዶን ደእያ ግሾ፥ ህንተ ደእያ ቢታ፥ ታኒ አቅያ ቢታ ቱንሶፕተ” ያግስ።
NUM 36:1 ዮሰፋ ኮቻፈ፥ ምናሰ ናኣ ማክራ ናኣ ጋላዳ ኮቻ ሀላቃት ሙሰኮነ እስራኤለ ሀላቃታኮ ይድ
NUM 36:2 “ኑ ጎዳዉ፥ እስራኤለ አሳስ ላታ ቢታ ሳማን ሻካዳ እማና መላ ጎዳይ ነና ኪትስ፤ ቃስ ኑ እሻ ሰሎጳዳ ላታ እያ ማጫ ናይታስ እማና መላ ነና ኪትስ።
NUM 36:3 ኤንቲ ሀራ ኮቸ ግድዳ እስራኤለ አስ ገልኮ ኤንታ ላታይ ኑ አዋታ ላታፐ ኤከትድ ኤንታ ኤክያ ዘረꬃስ ጉዠቴስ። ሄሳ ግሾ፥ ኑስ ሳማን እመትዳ ላታይ ጉፄስ።
NUM 36:4 እስራኤለ አሳስ እሻታማንꬆ ላይꬃ ቦንችያ ባለይ ጋክያ ዎደ ኤንታ ላታይ ኤንታ ኤክዳ አሳ ኮቻስ ጉዠቴስ፤ ሄሳ ግድኮ ኤንታ ላታይ ኑ አዋታ ኮቻ ላታፐ ኤከታና” ያግዶሶና።
NUM 36:5 ሄሳ ግሾ፥ ሙሰይ ጎዳፐ ኤክዳ ኪታ እስራኤለ አሳስ ሀይሳዳ ያግድ ኦድስ፤ “ዮሰፋ ኮቻይ ግዳይስ ልከ።
NUM 36:6 ጎዳይ ሰሎጳዳ ማጫ ናይታባ ኪትዳይስ ሀይሳ፤ ኤንቲ ባንታዉ ዶስዳ አዝና ገላናዉ ዳንዳኦሶና፥ ሽን ኤንታ ኮቻፈ ግዳናዉ ኮሼስ።
NUM 36:7 እስራኤለ አሳ ላታይ እስ ኮቻፈ ሀራ ኮቻስ አꬎፎ፤ እስራኤለ አሳይ ባንታ ኮቻ ላታ ቢታ ምንꬅድ ናጎ።
NUM 36:8 እስራኤለ አሳ ግዶን ላታ ቢታ ኤክዳ ማጫስ ኦንካ ባ አዋ ኮቸ ግድዳ አዝና ገላናዉ ኮሼስ። ሄሳዳ ኦꬅኮ ኤንታ ኮቻ ላታይ ኤንታ ኩሸን ጋምኤስ።
NUM 36:9 ያትኮ፥ ላታይ እስ ኮቻፈ ሀራ ኮቻኮ አና። እስ እስ ኮቻይ ባ ላታ ቢታ ኦይክዳ መላ ዳና” ያግስ።
NUM 36:10 ያትን፥ ሰሎጳዳ ማጫ ናይት ጎዳይ ሙሰ ኪትዳይሳዳ ኦꬅዶሶና።
NUM 36:11 ሰሎጳዳ ማጫ ናይት፥ ማህሎ፥ ትርፆ፥ ሆግሎ፥ ምልኮነ ኖኦ ጌተተይሳት ባንታ አዋ እሻታ ናይታ ገልዶሶና።
NUM 36:12 ኤንቲ ዮሰፋ ናኣ ምናሰ ናይታ ኮቻፈ አዝና ገልዶሶና፤ ኤንታ ላታይ ኤንታ አዋ ኮቻስ ግድስ።
NUM 36:13 እያርኮፈ ሄፍንꬃን፥ ዮርዳኖሰ ሻፋ ማታን፥ ደእያ ሞአበ ደንባን ሙሰ ባጋራ፥ ጎዳይ እስራኤለ አሳስ ኪትዳ ህገትነ ዎጋት ሀይሳታ።
DEU 1:1 ሀ ማፃፋን ፃፈትዳ ቃላ ኡባይ ዮርዳኖሰ ሻፋፐ ሄፍንꬃን ደእያ መላ ቢታን ኤንቲ ደእሽን፥ ሙሰይ እስራኤለ አሳስ ኦድዳ ቃላ። ሄ ዎደ ኤንቲ ሱፋፐ ስንꬃ ባጋራ ፓራና ካታማስ እስ ባጋራ፥ ቃስ ቶፌላ፥ ላባና፥ ሀፀሮታነ ድዛባ ካታማታ ግዶን ደእያ ዮርዳኖሰ ዛንጋራን ደኦሶና።
DEU 1:2 ሳይረ ደርያ ባጋራ ኮሬባ ዙማፐ ብድ ቃደስ-ባርነ ጋካናዉ ቶሆን ታማነ እስ ጋላሳ ኦገ።
DEU 1:3 ግብፀፈ ኤንቲ ከይዳ ኦይታማንꬆ ላይꬃን፥ ታማነ እስንꬆ አጌናን፥ ኮይሮ ጋላሳን፥ ጎዳይ ኤንታባ ሙሰ ኪትዳባ ኡባ እስራኤለ አሳስ ኦድስ።
DEU 1:4 ሄስ ሀንዳይ ሀሰቦና ካታማን ካዎትድ አሞረታ ሃርያ ስሆናነ አስታሮታንነ ኤድራአን ካዎትድ ባሳነ ሃርያ ኦገ፥ ሙሰይ ፆንዳፐ ጉየና።
DEU 1:5 አሳይ ዮርዳኖሰፐ ዶሎሀ ባጋራ፥ ሞአበን ደእሽን፥ ሙሰይ ሀ ህግያ ሀይሳዳ ያግድ ኤንታዉ ቆንጭሰꬅ ዶምስ።
DEU 1:6 ኑኒ ኮሬባ ዙማ ቦላ ደእሽን፥ ጎዳይ፥ ኑ ፆሳይ ኑኮ ሀይሳዳ ያግስ። “ህንተ ሀ ደርያ ቦላ ዳሮ ጋምእደታ።
DEU 1:7 ዱንካንያ ላልተ፤ ደንድድ ደረይ ዳርያ አሞረታ ቢታነ አራባን ደእያ ኤንታ ዩሹዋን ደእያ ቢታ ኡባ ቢተ። ሄስካ ዮርዳኖሰ ዛንጋራ፥ ገዘነ ጋꬋ ቢታ፥ ነገባነ መደትራነ አባ ጋፃ አꬍተ። ካናነ ቢታ ቢተ፤ ልባኖሰ ደረታ ካንꬅድ፥ ኤፍራፂሳ ሻፋ ጋካናዉ ቢተ።
DEU 1:8 ሄኮ፥ ታኒ ህንተዉ ሀ ቢታ እማስ። ብድ ህንተ አዋታስ፥ አብራሃመስ፥ ይሳቃስ፥ ያይቆባስነ ኤንታ ሼሻስ እማናዉ ጎዳይ ጫቅዳ ቢታ ላትተ” ያግስ።
DEU 1:9 ሙሰይ አሳኮ፥ “ሄ ዎደ ታኒ ህንተዉ ሀይሳዳ ያጋዳ ኦዳስ፤ ታኒ ታርካ ህንተና ቶካናዉ ዳንዳእከ።
DEU 1:10 ጎዳይ፥ ህንተ ፆሳይ ህንተ ታይቡዋ ሳሎ ፆልንቶዳ ዳርስስ።
DEU 1:11 ጎዳይ ህንተ አዋታ ፆሳይ፥ ህንተና ሀይሳፈ አꬅድ ሙኩሉ ቶሆ ጉጅድ ዳርሶነ እ ግዳይሳዳ ህንተና አንጆ።
DEU 1:12 ሽን ህንተ መቱዋ፥ ህንተ ቶሁዋነ ህንተ ኦሻ ኡባ ታኒ ታርካ ዋታ ቶካናዉ ዳንዳአይና?
DEU 1:13 ህንተ ኮቻታፐ ጭንጫ፥ አኬካንቾነ ቦንቸትዳ አሳታ ዶርተ፤ ታኒ ህንተ ቦላ ኤንታ ሀላቃ ኦꬃና” ያግስ።
DEU 1:14 ህንተ ዛሪድ፥ “ነ ቆፋይ ሎኦ” ያግደታ።
DEU 1:15 ሄሳ ግሾ፥ ታኒ ህንተ ኮቻፈ ጭንጫነ ቦንቸትዳ አሳታ ኤካዳ፥ ሻላቃ፥ ማቶ ሀላቃ፥ ሀምሳላቃነ አስራላቃ፥ ህንተና አይሰይሳታ ኦꬃዳ ህንተ ቦላ ሹማስ።
DEU 1:16 ታኒ ኤንታ፥ “ህንተ እሻታ ግዶን ደእያ ኦዳ ስእተ፤ ሄ ኦዳይ እስ እስራኤለ አሳፐነ እያ እሻፐ ግዶን ዎይኮ እስራኤለ አሳፐነ ሀራ ደረ አሳፐ ግዶን ደእያባ ግድኮካ፥ ኦዳ ስእድ ሱረ ፕርድተ።
DEU 1:17 ፕርድ ፆሳባ ግድያ ግሾ፥ ህንተ ፕርዳን እስ ባጋ ማዶፍተ፤ ግታ ስኤይሳዳ ጉꬃ ስእተ፤ አሳ ሶምኦስ ያዮፍተ። ዳሮ ዴፆ ግድዳ ኦዳታ ታኮ ኤህተ፤ ሄሳ ታኒ ስአና።”
DEU 1:18 ህንተ ኦꬃናባ ኡባ ታ ሄ ዎደ ህንተና ኪታና።
DEU 1:19 ሄሳፈ ጉየ፥ “ኑኒ ኮሬባ ዙማፐ ደንድዳ፤ ጎዳይ ኑ ፆሳይ ኑና ኪትዳይሳዳ፥ ደረይ ዳርያ አሞረታ ቢታ ብያ ኦገን ደእያ ሄ ህንተ በእዳ ግታነ ያሽያ መላ ቢታ ካንꬅድ ቃደስ-ባርነ ጋክዳ።
DEU 1:20 ጎዳይ ኑ ፆሳይ ኑና ላትስያ፥ ደረይ ዳርያ አሞረታ ቢታይ ሀይሳ።
DEU 1:21 ጎዳይ ህንተ ፆሳይ ሀ ቢታ ህንተዉ እሚስ። ጎዳይ ህንተ አዋታ ፆሳይ ህንተዉ ኦድዳይሳዳ ከይድ፥ ሀ ቢታ ላትተ፤ ያዮፍተ፤ ኡፋይስ ቃንፆፍተ” ያጋስ።
DEU 1:22 ህንተ ኡባይ ታኮ ይድ፥ “ሄ ቢታ ፆሞስድ፥ ኑ ባናዉ በሲያ ኦግያባነ ገላና ካታማታ ሀኖታ ነዉ ኤህያ አሳታ ኑፐ ስን የዶስ” ያግደታ።
DEU 1:23 ሄ ቆፋይ ታዉ ሎኦ ዳንን፥ ህንተፈ ታማነ ናምኡ አሳ፥ ኮቻፈ ኮቻፈ እስ አስ ዶራስ።
DEU 1:24 ኤንቲ ብድ፥ ሄ ደረይ ዳርያ ቢታ ካንꬅድ፥ ኤሽኮላ ዛንጋራ ጋካናዉ ደእያ ቢታ ዎችዶሶና።
DEU 1:25 ሄ ቢታን ዶልያባፐ ጉꬃ አይፈ ባንታ ኩሸን ኦይክድ ኑኮ ይዶሶና። ቃስ፥ “ጎዳይ ኑ ፆሳይ ኑስ እምያ ቢታይ ሎኦ ቢታ” ግያ ዎረ ኤክድ ይዶሶና።
DEU 1:26 ሽን ህንተ ጎዳ ህንተ ፆሳ ኪታ እፃስ ግድ ያ ቦና እፅደታ።
DEU 1:27 ህንተ ዱንካንያ ግዶን እሶይ እሱዋራ ሀይሳዳ ያግድ ዙዙምደታ። “ጎዳይ ኑና እፅዳ ግሾ፥ ꬋይሳናዉ አሞረ ቢታ አሳታ ኩሸን አꬅድ እማናዉ ግብፀ ቢታፈ ከስስ።
DEU 1:28 ያትን ያ አይስ ባኔ? ኑ እሻት፥ ‘ሄ ቢታን ደእያ አሳት ኑፐ ዳሮሶናነ አዱቆሶና። ካታማትካ ግታነ ሳሎ ጋካናዉ ግምበትዳይሳታ። ሄሳ ቦላ ቃስ አናቀ ጌተትያ ዳሮ አዱሳ አሳታ ያን በእዳ’ ያግድ፥ ኑ ዎዛና ትልእስዶሶና” ያግደታ።
DEU 1:29 ያትን ታኒ፥ “ያዮፍተ ዎይኮ ዳጋሞፍተ።
DEU 1:30 ህንተ ስንꬃራ ብያ ጎዳይ ህንተ ፆሳይ ካሰ ግብፀን ህንተ አይፍያ ስንꬃን ህንተዉ ኦꬅዳይሳዳ ሀእካ ህንተዉ እ ኦለታና።
DEU 1:31 ቃስ ህንተ ሀ መላ ቢታ ጋካናዉ ይዳ ኦገ ኡባን አስ ባ ናአ ቶከይሳዳ ጎዳይ ህንተ ፆሳይ ህንተና ቶክዳይሳ በእደታ” ያጋስ።
DEU 1:32 ሀ ኡባይ ሀንንካ፥ ህንተ ዱንካናና በሳነ ህንተ ባና ኦግያ በሳናዉ ቃማ ታማ ቱሳን፥ ጋላስ ሻራ ቱሳን ህንተና ካለꬅዳ ጎዳ ህንተ ፆሳ አማንበከታ።
DEU 1:34 “ጎዳይ ህንተ ሃሳያ ስእድ ሀንቀትስ፤ ሀይሳዳ ያግድ ጫቅስ፤
DEU 1:35 ታኒ ህንተ ማይዛታስ እማና ጋዳ ጫቅዳ ሀ ሎኦ ቢታ፥ ሀ ኢታ የለተꬃፈ እሶይካ በኤና።
DEU 1:36 ሀ ቢታ በአናይ ዮፎና ናኣ ካለባ ፃላላ። እ የꬍዳ ቢታ እያስነ እያ ኮቻስ እማና፤ እ ባ ኩመꬃ ዎዛናፐ ጎዳ ካልስ” ያግድ ጫቅስ።
DEU 1:37 ህንተ ጋሶን ጎዳይ ታ ቦላካ ሀንቀትድ፥ ሀይሳዳ ያግስ፤ “ሀር አቶሽን፥ ነካ ሄ ቢታ ገላካ።
DEU 1:38 ሽን ነና ማድያ ናወ ናአይ፥ እያሱይ ሄ ቢታ ገላና። እ እስራኤለ አሳ ሄ ቢታ ላትሳናዉ ደእያ ግሾ ኔኒ እያ ምንꬃ።
DEU 1:39 ህንተ፥ ኑ ናይት ድኤታና ግዳ ጉꬃት፥ ኢታነ ኬሀ ሻክድ ኤሮና ህንተ ናይት ሄ ቢታ ገላና። ታኒ ሄ ቢታ ኤንታዉ እማና፤ ኤንትካ ላታና።
DEU 1:40 ሽን ህንተ ጉየ ስሚድ፥ ዞኦ አባ ኤፍያ ኦግያ ኦይክድ፥ መላ ቢታ ቢተ” ያግስ።
DEU 1:41 ህንተ ዛሪድ፥ “ኑኒ ጎዳ ቦላ ናጋራ ኦꬅዳ፤ ሀእ ኑኒ ጎዳይ ኑ ፆሳይ ኪተይሳዳ፥ ከይድ ኦለታና” ያግደታ። ህንተ ኡባይ ኦላ ሚሸ ዳንጭድ፥ ደረይ ዳርያ ቢታ ከይድ ኦለታናይሳ ላፋባ ኦꬅድ ቆፕደታ።
DEU 1:42 ሽን ጎዳይ ታኮ፥ “ታኒ ኤንታራ ዶና ግሾ፥ ኤንቲ ከይድ ኦለቶና መላ ኦዳ። አካይ፥ ጊኮ፥ ኤንታ ሞርከት ኤንታ ፆናና” ያግስ።
DEU 1:43 ያግን፥ ታኒ ህንተዉ ኦዳስ፥ ሽን ህንተ ጎዳ ኪታ እፅደታፐ አትሽን፥ ታ ኦደይሳ ስእቤከታ፤ ያትድ ኦቶሮን ደረይ ዳርያ ቢታ ከይደታ።
DEU 1:44 ሄ ደረይ ዳርያ ቢታን ደእያ አሞረት ህንተራ ኦላ ጋሄትድ፥ ህንተና ማꬅ ጎደይሳዳ ጎድድ፥ ሳይረ ቢታፈ ብድ ሆርማ ጋካናዉ ሾጭዶሶና።
DEU 1:45 ህንተ ጉየ ስሚድ፥ ጎዳኮ ዬክደታ፤ ሽን ጎዳይ ህንተ ዬሁዋ ስእቤና ዎይኮ ሀይዝቤና።
DEU 1:46 ሄሳ ግሾ፥ ህንተ ቃደሳን አዱሳ ዎደ ጋምእደታ።
DEU 2:1 ሄሳፈ ጉየ፥ ጎዳይ ታና ኪትዳይሳዳ፥ ኑኒ ዞኦ አባ ኤፍያ ኦግያ ኦይክድ ጉየ ስሚድ መላ ቢታ መቶትሸ፥ ደረይ ዳርያ ሳይረ ቢታን ዳሮ ጋላሳ ቶይላትሸ ዩይዳ።
DEU 2:2 ሄሳፈ ጉየ፥ ጎዳይ ታኮ ሀይሳዳ ያግስ።
DEU 2:3 “ሀ ደረይ ዳርያ ቢታ አዱሳ ዎደ ዩይዳይስ ህንተዉ ግዳና፤ ፑደሀ ባጋ ስሚድ ቢተ።
DEU 2:4 አሳ ኔኒ ያጋዳ ኪታ፤ ‘ሳይረን ደኤይ ኤሳዌ ናይታ ህንተ እሻታ ግድያ ግሾ ኤንታ ቢታራ ህንተ ካንꬄታ። ኤንቲ ህንተዉ ያያና፥ ሽን ህንተ ኬህ ናገትተ።
DEU 2:5 ታኒ ኤንታ ቢታፈ ቶሆይ የꬍያ በሳ መላ ህንተዉ እሞና ግሾ ኤንታራ ኦለቶፍተ። ታኒ ደረይ ዳርያ ሳይረ ቢታ ላታ ኦꬃዳ ኤሳዌስ ኮይሮታዳ እማስ።
DEU 2:6 ህንተ ምያ ካꬃነ ኡያ ሃꬃ ኤንታፈ ሚሸን ሻምተ’ ” ያጋዳ ኪታ።
DEU 2:7 ጎዳይ ህንተ ፆሳይ ህንተ ኦꬅዳባ ኡባ አንጅስ፤ ህንተ ሀ ዎልቃማ መላ ቢታን ሄመትያ ዎደ ህንተና ናግስ። ኦይታሙ ላይꬃ ኡባን ጎዳይ ህንተ ፆሳይ ህንተራ ደእስ፤ ህንተዉ አይባካ ፓጭስቤና።
DEU 2:8 ሄሳ ግሾ፥ “ኑኒ ኑ እሻታ ግድያ ኤሳዌ ናይት ደእያ ሳይረ ቢታራ ካንꬅድ ብዳ። ቃስ ኤላታነ ኤፅዮን-ጋብራ ካታማታፐ ደንድድ፥ ማፅነ አባኮ ጋꬅያ ኦግያ አግድ፥ ሞአበ መላ ቢታራ አꬍዳ።
DEU 2:9 ጎዳይ ታኮ፥ ‘ታኒ ኤንታ ቢታፈ አይባካ ህንተዉ እሞና ግሾ፥ ሞአበ አሳራ ካጨቶፍተ ዎይኮ ኤንታ ኦሎፕተ። ኤራ ካታማ ታኒ ላታ ኦꬃዳ ሎፀ ኮቻስ ኮይሮ እማስ’ ” ያግስ።
DEU 2:10 (ሄ ቢታን ካሰ ምኖነ ዳሮ ግድዳ፥ ቃስ አናቀ ኮቻታዳ አዱሰ ግድዳ ኤምመታ ጌተትያ አሳት ደእዶሶና።
DEU 2:11 ኤንቲ አናቀታዳ ራፋይመታ ጌተቶሶና። ሽን ሞአበ አሳይ ኤንታ ኤምመታ ግድ ፄጎሶና።
DEU 2:12 ሆራ ቢታ አሳይ ካሰ ሳይረን ደእዶሶና፥ ሽን እስራኤለ አሳይ ላታና መላ ጎዳይ ኤንታዉ እምዳ ቢታን ኤንቲ ኦꬅዳይሳዳ ኤሳዋ ኮቻት ሆራታ ኤንታ ቢታፈ ሾድዶሶና። ቃስ ባንታ ስንꬃፈ ኤንታ ꬋይስድ ኤንታ በሳን ኡትዶሶና።)
DEU 2:13 ጎዳይ ኑኮ፥ “ሀእ ደንድተ፥ ዛረአዳ ሻፋ ፕንተ” ያግን፥ ኑኒ ዛረዳ ሻፋ ፕንዳ።
DEU 2:14 ኑኒ ቃደስ-ባርነፈ ደንድድ፥ ዛረዳ ሻፋ ፕናና ጋካናዉ ሀስታማነ ሆስፑን ላይꬅ አꬍስ። ሄ ዎደ ጎዳይ ኤንታዉ ጫቅዳይሳዳ ኦላስ ጋክዳ አደ ኡባይ ዉርስ።
DEU 2:15 ዱንካንዳ ጉታፐ ኤንቲ ኩመꬅ ꬋያና ጋካናዉ፥ ጎዳ ኩሸይ ኤንታ ቦላ ዴፅስ።
DEU 2:16 ኦላስ ጋክዳ አደ አሳ ኡባይ ኩመꬅ ꬋይዳፐነ አሳ ግዶፈ ሀይቅድ ዉርዳፐ ጉየ፥
DEU 2:17 ጎዳይ ታኮ፥
DEU 2:18 “ኤራ ኦግያራ ሀች ህንተ ሞአበ ቢታ ካንꬄታ።
DEU 2:19 ህንተ አሞነ አሳ ቢታ ጋክያ ዎደ ኤንታ ቦቾፍተ ዎይኮ ኤንታራ ኦየቶፍተ። አሞነ አሳታ ቢታፈ አይብባካ ታኒ ህንተዉ ላታ ኦꬃዳ እምከ። ታኒ ሄ ቢታ ሎፀ ኮቻስ ላታ ኦꬃዳ ኮይሮ እማስ” ያግስ።
DEU 2:20 [ሄ ቢታይ ካሰ ያን ደእያ አሳይ ፄገትያ ሱንꬃ ራፋይመታ ቢታ ጌተትድ ፄገቴስ። ቃስ አሞነት ኤንታ ዛምዙመታ ግድ ፄጎሶና።
DEU 2:21 ኤንቲ አናቀታዳ አዱሰ፥ ምኖነ ዳሮ ደረ፥ ሽን ጎዳይ ኤንታ ꬋይስን፥ አሞነት ኤንታ ቢታ ላትድ ኡትዶሶና።
DEU 2:22 ጎዳይ ሳይረን ደእያ ኤሳዌ ኮቻስ ኦꬅዳይሳዳ፥ ኤንታ ቦላ ኦꬅስ። ሄስካ እ ሄ ቢታን ደእያ ሆራታ ꬋይስን፥ ኤሳዌ ኮቻይ ኤንታ ቢታ ላትድ ሀች ጋካናዉ ኡትዶሶና።
DEU 2:23 ጋዛ ጋካናዉ ደእያ ሄራን ደእያ አዌት፥ ካፍቶረ ቢታፈ ይዳ ካፍቶረት ኤንታ ꬋይስድ ኤንታ ቢታን ኡትዶሶና።]
DEU 2:24 ቃስካ ጎዳይ ኑኮ፥ “ደንድተ፤ አርኖና ሻፋ ፕንተ። ሄኮ፥ አሞረ ቢታ አስ ግድዳ ሀሰቦና ካዋ ስሆናነ እያ ቢታ ታ ህንተ ኩሸን አꬃዳ እማስ፤ እያ ኦልድ እያ ቢታ ላትተ።
DEU 2:25 ሀችፈ ዶምን ሳሎፐ ጋርሳን ደእያ አሳ ኡባይ ህንተዉ ያያና መላ ታኒ ኦꬃና። ኤንቲ ህንተባ ስእያ ዎደ ኡባን ያሻን ኮኮራና” ያግስ።
DEU 2:26 ሄሳፈ ጉየ፥ ቅደሞታ መላ ቢታፈ ሀሰቦና ካዋ ስሆናስ ኪታንቾታ ቦላ ሀይሳዳ ያጋዳ ሳሮ ቃላ ኪታስ።
DEU 2:27 “ኑና ነ ቢታራ አꬃርክ፤ ኑኒ ዎጋ ኦግያ ፃላላ ኦይክድ ባና፤ እያፐ ኡሻች ዎይኮ ሀድርስ ጎኮ።
DEU 2:28 ኑኒ ምያ ካꬃስነ ኡያ ሃꬃስ ሚሸ ቃንፃና። ኑ ኮየይ ነ ቢታራ ካንꬅ አꬃ ፃላላ።
DEU 2:29 ሳይረን ደእያ ኤሳዌ ኮቻትነ፥ ኤራን ደእያ ሞአበ ኮቻት ኑና አꬅዳይሳዳ ጎዳይ ኑ ፆሳይ፥ ኑስ እምያ ቢታስ ዮርዳኖሰ ሻፋ ኑኒ ፕናና ጋካናዉ ያራ ኑና አꬃ” ያጋስ።
DEU 2:30 ሽን ሀሰቦና ካዎይ ስሆነይ ኑና አꬆና እፅስ። ጎዳይ ህንተ ፆሳይ ሀእ ኦꬅዳይሳዳ እያ ህንተ ኩሸን አꬅድ እማናዉ ኮይዳ ግሾ እያ ዎዛና ሙምስስድ፥ ኦቶራንቾ ኦꬅስ።
DEU 2:31 ሄሳፈ ጉየ ጎዳይ ታኮ፥ “ሄኮ፥ ስሆናነ እያ ቢታ ታ ነዉ አꬃዳ እሞ ዶማስ፤ ሀእ ፆናዳ እያ ቢታ ላታ” ያግስ።
DEU 2:32 ስሆነይ ባ ኦላንቾታ ኡባ ኤክድ ያሃፃ ጌተትያ በሳን ኑራ ኦለታናዉ ከይስ።
DEU 2:33 ሽን ጎዳይ ኑ ፆሳይ ኑስ እያ አꬅድ እምን፥ እያ፥ እያ አደ ናይታነ እያ ኦላንቾታ ኡባ ኑኒ ዎꬍዳ።
DEU 2:34 ሄ ዎደ ኑኒ እያ ካታማታ ኡባ ኦይክድ፥ እያን ደእያ አደ፥ ማጫነ ናአ ኡባ አሾና ꬋይስዳ።
DEU 2:35 ኤንታ መህያነ ኑኒ ኦይክዳ ካታማታፐ ድእዳይሳ ፃላላ ኑስ ኤክዳ።
DEU 2:36 አርኖና ዛንጋራ ጋፃን ደእያ አሮኤራፐነ ሄ ዛንጋራ ግዶን ደእያ ካታማፐ ብድ ጋላዳ ቢታ ጋካናዉ ኑራ ኤቀትዳ እስ ካታምካ ዴና። ጎዳይ ኑ ፆሳይ ኤንታ ኡባ ኑ ኩሸን አꬅድ እሚስ።
DEU 2:37 ሽን ኑኒ አሞነ ቢታኮ፥ ያቦቃ ሻፋ ጋፃን ደእያ ቢታኮ፥ ገዘ ቢታን ደእያ ካታማታኮነ ጎዳይ ኑ ፆሳይ ኑኒ ቦና መላ ድግዳ በሳ ኡባ ሺቅቦኮ።
DEU 3:1 ሄሳፈ ጉየ፥ ኑኒ ስሚድ ባሳነ ኤፍያ ኦግያራ ከይዳ። ባሳነ ካዎይ ኦገይ፥ ባ ኦላንቾታ ኡባራ ኤድራአ ጌተትያ በሳን ኑራ ኦለታናዉ ከይስ።
DEU 3:2 ሽን ጎዳይ ታኮ፥ “እያዉ ያዮፋ፤ ታኒ እያ፥ እያ ኦላንቾታነ እያ ቢታ ኡባ ነ ኩሸን አꬃዳ እማስ። ሀሰቦናን ኡትድ ካዎትዳ አሞረታ ካዋ ስሆና ቦላ ኦꬅዳይሳዳ ኔኒ እያ ቦላ ኦꬃና” ያግስ።
DEU 3:3 ሄሳ ግሾ፥ ጎዳይ ኑ ፆሳይ ባሳነ ካዋ ኦገነ እያ አሳ ኡባ ኑ ኩሸን አꬅድ እሚስ፤ ኑኒ ኤንታፈ እሱዋካ አሾና ዉርስድ ዎꬍዳ።
DEU 3:4 ሄ ዎደ ኑኒ እያ ካታማታ ኡባ ኦይክዳ፤ ኑኒ ኦይክቦና እስ ካታምካ ዴና፤ ሄስካ፥ ባሳነ ካዋ ኦገይ አርጎባ ቢታን አይስያ ኡሱፑን ታሙ ካታማታ ኡባ ኦይክዳ።
DEU 3:5 ሀ ካታማት ኡባይ አዱሳ ግምበን ድረትዳይሳታነ ፐንገት ኮበትዳይሳታ። ግምበ ድርስ ባይና ዳሮ ጉታትካ ደኦሶና።
DEU 3:6 ሀሰቦና ካዋ ስሆና ቦላ ኦꬅዳይሳዳ ኑኒ ኤንታ ኩመꬅ ꬋይስዳ። ኤንታ ካታማታን ደእያ አደ፥ ማጫነ ናአ አሾና ꬋይስዳ።
DEU 3:7 ሽን መሄ ኡባነ ካታማታፐ ድእዳባ ኑስ ኤክዳ።
DEU 3:8 ሄ ዎደ ኑኒ አርኖና ዛንጋራፐ ብድ አርሞና ዙማ ጋካናዉ ደእያ ቢታ፥ ዮርዳኖሰ ሻፋፐ ዶሎሀ ባጋራ ደእያ ናምኡ አሞረ ቢታታ ካዎታፐ ኤክዳ።
DEU 3:9 (ስዶና ቢታ አሳይ አርሞና ዙማ፥ ስርዮና ግድ ፄግያ ዎደ፥ አሞረ ቢታ አሳይ ሳንራ ግድ ፄጎሶና።)
DEU 3:10 ኑኒ ደምባ ቢታን ደእያ ካታማታ ኡባ፥ ጋላዳ ቢታ ኡባ፥ ባሳነ ቢታ ኡባነ ባሳነ ቢታን ኦገይ ሃርያ ሳላካነ ኤድራአ ካታማታ ጋካናዉ ደእያ በሳ ኦይክዳ።
DEU 3:11 (ራፋይመታፐ አትዳይ ባሳነ ካዋ ኦገ ፃላላ። እያ አርሳይ ብራታ አርስ፤ ሄ አርሳይ ሀች ጋካናዉ ራባ ጌተትያ አሞነታ ካታማን ደኤስ፤ እያ አዱሳተꬃይ ሆስፑን ዋꬋ፤ ጎምፓይ ኦይዱ ዋꬋ።)
DEU 3:12 ሄ ቢታ ኑኒ ላትዳፐ ጉየ፥ አርኖና ሻፋ ዶናን ደእያ አሮኤራ ካታማፐ ዶምድ ደእያ በሳነ ደረይ ዳርያ ጋላዳ ቢታፈ ባጋ ጉጃዳ እያ ካታማታራ ሮቤላስነ ጋደ ኮቻስ ታኒ እማስ።
DEU 3:13 ጋላዳፐ አትዳይሳነ ኦገይ ሃርያ ባሳነ ቢታ ኡባ ምናሰ ኮቻ ባጋስ እማስ፤ ሄስካ፥ አርጎባ ካዎተꬃ። (ሄ ባሳነ ቢታይ ኡባይ ራፋይመታ ቢታ ጌተትድ ፄገቴስ።
DEU 3:14 ምናሰ ኮቻፈ ያእር ኩመꬃ አርጎባ ቢታ ላትስ፤ ሄስካ ጌሹረታነ ማእካታ ቢታ ጋፃ ጋካናዉ ደእያ ባሳነ ቢታ። እ ሄ ካታማታ ባ ሱንꬃን ፄገታና መላ ኦꬅስ፤ ሄሳ ግሾ፥ ኤንቲ ሀች ጋካናዉ፥ ያእራ ካታማታ ጌተትድ ፄገቶሶና።)
DEU 3:15 ጋላዳ ቢታ ምናሰ ኮቸ ግድዳ ማክራስ እማስ።
DEU 3:16 ሮቤላነ ጋደ ኮቻስ ጋላዳፐ ብድ አርኖና ሻፋ ማታ ጋካናዉ ደእያ ቢታ እማስ። ዱገሀ ባጋራ አርኖና ሻፋፐ ባጋይ ኤንታ ዛዋ፤ ቃስ ፑደሀ ባጋራ አሞነታ ቢታስ ጋፃ ግድዳ ያቦቃ ሻፋይ ዛዋ።
DEU 3:17 ዉሎሀ ባጋራ፥ ኤንታ ዛዋይ አራባን ደእያ ዮርዳኖሰ ሻፋ ጋኬስ፤ ሄስካ ጋልላ አባፈ ዶምድ ፕስጋ ዙማ ፃጶን ደእያ ማፅነ አባ (ሃይቆ አባ) ጋካናሳ።
DEU 3:18 ሄ ዎደ ታኒ ህንተና ሀይሳዳ ያጋዳ ኪታስ። “ጎዳይ ህንተ ፆሳይ ሄ ቢታ ህንተ ላታና መላ ህንተዉ እሚስ። ህዛ ህንተዉ ደእያ ቶራንቾታ ኡባ ኦላ ሚሸ ዳንጭስድ፥ ህንተ እሻታ ግድዳ እስራኤለ አሳፐ ስን አꬅተ።
DEU 3:19 ህንተዉ ዳሮ መሄይ ደኤይሳ ታኒ ኤራይስ፤ ሄሳ ግሾ፥ ህንተ ማቸት፥ ህንተ ናይትነ ህንተ መሄይ ታኒ ህንተዉ እምዳ ካታማታን ደእሾና።
DEU 3:20 ጎዳይ ህንተና ሸምፕስዳይሳዳ ህንተ እሻታ ሸምፕሳና ጋካናዉነ ዮርዳኖሰ ሻፋፐ ሄፍንꬃን ጎዳይ፥ ህንተ ፆሳይ ኤንታዉ እምያ ቢታ ኤንቲ ኤካና ጋካናዉ ኤንታዉ ኦለትተ። ሄሳፈ ጉየ፥ ታኒ ህንተዉ እምዳ ቢታ ስመታ” ያግስ።
DEU 3:21 ታኒ ሄ ዎደ እያሱ ሀይሳዳ ያጋዳ ኪታስ። “ጎዳይ፥ ህንተ ፆሳይ ሀ ናምኡ ካዎታ ቦላ ኦꬅዳባ ኡባ ኔኒ ነ አይፈን በአዳሳ፤ ህንተ ኦይካናዉ ብያ ካዎተꬃታ ኡባ ቦላ ጎዳይ ሄሳዳ ኦꬃና።
DEU 3:22 ህንተዉ ኦለተይ ጎዳ ህንተ ፆሳ ግድያ ግሾ፥ ኤንታዉ ያዮፍተ” ያጋስ።
DEU 3:23 ሄ ዎደ ታኒ ሀይሳዳ ያጋዳ ጎዳ ምንꬃዳ ዎሳስ።
DEU 3:24 “ኡባ ሃርያ ጎዳዉ፥ ነ ግታተꬃነ ነ ምኖ ኩሽያ ታና፥ ነ አይልያ በሳናዉ ዶማዳሳ። ነ ኦꬅያ ዎልቃማ ኦሶታ ኦꬃናዉ ዳንዳኤይ ሳሎን ግድን ሳአን ሀራ ፆሲ ደኢ?
DEU 3:25 ጎዳዉ፥ ታኒ ባዳ ዮርዳኖሰ ሻፋፐ ሄፍንꬃን ደእያ ደረይ ዳርያ ሎኦ ቢታነ ልባኖሰ ደርያ በአና መላ ታና የዳርክ” ያግስ።
DEU 3:26 ሽን ጎዳይ ህንተ ጋሶን ታና ሀንቀትድ ስኦናን እፅስ። ጎዳይ ታኮ፥ “ህዛ ነዉ ግዳና፤ ሀ ኦዳ ናምአንꬆ ደንꬃዳ ሃሳዮፓ።
DEU 3:27 ሄሳ አጋዳ ደንዳ፤ ፕስጋ ዙማ ቦላ ከያ፤ ያን ኤቃዳ ሄ ቢታ ዉሎሀ ባጋ፥ ፑደሀ ባጋ፥ ዱገሀ ባጋነ ዶሎሀ ባጋ ነ አይፍያ ꬎቁ ኦꬃዳ ፄላ። ኔኒ ሀ ዮርዳኖሰ ሻፋ ፖሎ ፕናካ።
DEU 3:28 ሽን ኔኒ እያሱ ኪታ፤ እያ ዞራነ ምንꬃ። እ ሀ አሳ ካለꬅድ ፕንꬃናነ ሀ ኔኒ በእያ ቢታ ኤንታ ላትሳና” ያግስ።
DEU 3:29 ሄሳ ግሾ፥ ኑኒ ቤት-ፓኦራ ስንꬃን ደእያ ዛንጋራን ጋምእዳ።
DEU 4:1 ሀእካ እስራኤለ አሳዉ፥ ህንተ ደኦን ዳና መላነ ጎዳይ፥ ህንተ ማይዛታ ፆሳይ፥ ህንተዉ እምያ ቢታ ህንተ ላታና መላ ታ ህንተና ታማርስያ ዎጋነ ህግያ ስእተነ ኦꬅተ።
DEU 4:2 ታ ህንተና ኪትያ፥ ጎዳ ህንተ ፆሳ ኪታ ናግተፐ አትሽን፥ እያ ቦላ አይኮካ ጉጆፍተ፤ እያፐ አይኮካ ፓጭሶፕተ።
DEU 4:3 ብኤል-ፋጎራ ዙማ ቦላ ጎዳይ ኦꬅዳባ ህንተ፥ ህንተ አይፈን በእደታ። ጎዳይ፥ ህንተ ፆሳይ ብኤል-ፋጎራ ኤቃ ጎይንዳይሳታ ኡባ ህንተ ግዶፈ ꬋይስስ።
DEU 4:4 ሽን ህንተ ጎዳስ፥ ህንተ ፆሳስ አማነትዳ ግሾ፥ ሀች ጋካናዉ ኡባይካ ደኦን ደኤታ።
DEU 4:5 ሄኮ፥ ህንተ ላታናዉ ገልያ ቢታን ኦꬃና መላ ጎዳይ፥ ታ ፆሳይ ታና ኪትዳ ዎጋነ ህግያ ታ ህንተና ታማርሳስ።
DEU 4:6 ህንተ ኤንታ ናግተነ ኦꬅተ። ህንተ ሄሳ ኦꬅኮ፥ ህንተ አይ መላ ጭንጨኮ ሀራ አሳይ ህንተና በአና። ኤንቲ ሀ ዎጋባ ስእያ ዎደ፥ “ቱማካ ሀ ግታ ካዎተꬃይ ጭንጫነ አኬካንቾ ካዎተꬅ” ያጋና።
DEU 4:7 ኑኒ እያ ፄግያ ዎደ ኡባን ጎዳይ፥ ኑ ፆሳይ ኑስ ማታ ግደይሳዳ ፆሲ ማታ ግድዳ ሀራ አይ ዎልቃማ ካዎተꬅ ደኢ?
DEU 4:8 ታኒ ሀች ህንተ ስንꬃን ዎꬅያ ሀ ህገ ኡባ መላ ፅሎ ግድዳ ዎግነ ህገይ ደእያ ሀራ አይ ግታ ካዎተꬅ ደኢ?
DEU 4:9 ህዛ ነ ደኦ ላይꬃ ኡባን ሀ ነ በእዳባ ኡባ ዶጎና መላነ ነ ዎዛናን ዎꬃና መላ ናገታ። ነ ናይታነ ነ ናይታ ናይታ ታማርሳ።
DEU 4:10 ኮሬባ ዙማ ቦላ ጎዳ፥ ህንተ ፆሳ ስንꬃን ህንተ ኤቅዳ ዎደ ጎዳይ ታኮ፥ “ታ ቃላ ኤንቲ ስእድ፥ ባንታ ላይꬃ ኡባን ታዉ ያያና መላነ ባንታ ናይታ ሄሳ ታማርሳና መላ አሳ ታኮ ሺሻ” ግዳይሳ አኬክተ።
DEU 4:11 ሄ ዎደ ህንተ ሺቅድ ዙማ ፃጶን ኤቅደታ፤ ሳሎ ጋካናዉ ታም ኤፅስ። ሄ ዙማ ፃጶይ ሳካና ꬉማንነ ሻራን ጎዘትስ።
DEU 4:12 ጎዳይ ታማ ግዶን ግድድ ህንተዉ ኦድስ። ህንተ እያ ግርሳ ስእደታፐ አትሽን፥ እያ ማላ በእቤከታ።
DEU 4:13 ህንተ ኦꬃና መላ እ ህንተና ኪትዳ ባ ጫቁዋ ህንተዉ ኦድስ፤ ሄስካ ታሙ ኪታታ። እ ኤንታ ናምኡ ሎቸ ሹቻታ ቦላ ፃፍስ።
DEU 4:14 ህንተ ላታናዉ ብያ ቢታን ኦꬃና መላ ዎጋነ ህግያ ህንተና ታማርሳና መላ ጎዳይ ታና ሄ ዎደ ኪትስ።
DEU 4:15 ጎዳይ ኮሬባ ዙማ ቦላ ታማ ግዶን ግድድ ህንተዉ ኦድዳ ጋላስ ህንተ እያ ማላ በእቦና ግሾ ሎይꬅ ናገትተ።
DEU 4:16 አደ ዎይኮ ማጫ መꬎን ኦሰትዳባ ግድን፥
DEU 4:17 ሳአን ደእያ ዶአ ኡባ ሌምሶን ግድን፥ ሳሎራ ፓልያ ካፎ ኡባ ሌምሶን ግድን፥
DEU 4:18 ሳአ ቦላ ኡሎራ ጎሸትያ መተꬃ ሌምሶን ግድን፥ ሃꬃ ግዶን ደእያ ሞሎ ሌምሶን ግድን፥ ህንተ ቱኖና መላ ህንተዉ ፆሰ ኦꬅድ መꬎፍተ።
DEU 4:19 ሳሎ ፑደ ፄልዳ፥ ጎዳይ ነ ፆሳይ ሳሎፐ ጋርሳን ደእያ ካዎተꬃታስ እምዳ አዋ፥ አጌና፥ ፆልንቶታነ ሳሎ መተꬃታ ኡባ በእዳ፥ ነ ኤንታዉ ጎይናዳ ባሎና መላ ናገታ።
DEU 4:20 ሽን ጎዳይ ህንተና ሀች ህንተ ሀንዳይሳዳ ባዉ ዱማትዳ አሰ ኦꬃናዉ ብራታ ሴርስያ ጮጨ መላ ግድዳ ግብፀፈ ከስድ ኤህስ።
DEU 4:21 ህንተ ጋሶን ጎዳይ ታና ሀንቀትድ፥ ዮርዳኖሰ ፕኖና መላነ ጎዳይ ህንተ ፆሳይ፥ ላታ ኦꬅድ ህንተዉ እምያ ሎኦ ቢታ ታኒ ገሎና መላ ጫቅስ።
DEU 4:22 ሄሳ ግሾ፥ ታኒ ዮርዳኖሰ ሻፋ ፕኖና ሀ ቢታን ሀይቃና፥ ሽን ህንተ ፕንድ ሄ ሎኦ ቢታ ላቴታ።
DEU 4:23 ህዛ ጎዳይ፥ ህንተ ፆሳይ ህንተራ ጫቅዳ ጫቁዋ ዶጎፕተ። ጎዳይ፥ ነ ፆሳይ ነና ኦꬆፋ ግዳ አይ መꬎን ኦሰትዳ ምስለ ነዉ ኤቃ ኦꬆና መላ ናገታ።
DEU 4:24 ጎዳይ፥ ነ ፆሳይ ምያ ታማነ ቃናትያ ፆሲ።
DEU 4:25 ነ ናይታነ፥ ናይታ ናይታ የላዳ ሄ ቢታን አዱሳ ዎደ ደእያ ዎደ አይ መꬎን ኦሰትዳ ምስለ ጎይናዳ ቱንኮ፥ ቃስ ጎዳ፥ ነ ፆሳ ሀንቀꬃናዉ እያ ስንꬃን ኢታባ ኦꬅኮ፥
DEU 4:26 ህንተ ዮርዳኖሰ ሻፋ ፕንድ ላታናዉ ብያ ቢታፈ እሶይካ አቶና ኤለ ꬋያናዉ ደኤይሳስ፥ ታ ሀች ህንተ ቦላ ሳሎነ ሳአ ማርካያይስ። ህንተ ፖሎ ꬋያናፐ አትሽን፥ ሄ ቢታን አዱሳ ዎደ ደኤከታ።
DEU 4:27 ጎዳይ ህንተና ሀራ አሳ ግዶን ላላና፤ ህንተና እ ላልያ ካዎተꬃታ ግዶን ህንተ ታይቦይ ጉꬃ ግዳና።
DEU 4:28 ያን ህንተ ምꬃፈነ ሹቻፈ አሳ ኩሸን ጊግዳ በኦና፥ ስኦና፥ ሞናነ ስንጎና ፆሳታ ጎይናና።
DEU 4:29 ሽን ያን ደአሸ ነ ጎዳ፥ ነ ፆሳ ኮያና፤ ነ እያ ኩመꬃ ዎዛናፐነ ኩመꬃ ሸምፖፈ ኮይኮ ደማና።
DEU 4:30 ሄ መቶ ኡባ ግዶን ነ ኡንኤታዳ ደእያ ዎደ ዉርሰꬃን ጎዳኮ፥ ነ ፆሳኮ ስማናነ እያ ቃላስ ኪተታና።
DEU 4:31 ጎዳይ፥ ነ ፆሳይ ማሮተꬃን ኩምዳ ፆሰ ግድያ ግሾ፥ እ ነና አገና ዎይኮ ꬋይሰና፤ ነ ማይዛታስ ጫቅዳ ጫቁዋ ዶገና።
DEU 4:32 ጎዳይ ቢታን አሰ መꬍዳ ጋላሳፐ ዶምድ፥ ህንተፈ ካሰ አꬍዳ ዎድያ አነ ፕልግተ፤ ሄሳ መላ ግታባይ ፖሎ ሀን ኤርያኮ ዎይኮ ስኤትድ ኤርያኮ ሳሉዋስ ሀ ጋፃፐ ያ ጋፃ ጋካናዉ አነ ኦይችተ።
DEU 4:33 ታማ ላጮ ግዶን ጎዳይ ሃሳይን ስእድ፥ ህንተ ꬋዮና ደኦን ደኤይሳዳ ጎዳይ ኦድሽን ስእድ፥ ደኦን ደእዳ ሀራ አስ ደኢ?
DEU 4:34 ዎይኮ ጎዳይ፥ ህንተ ፆሳይ ህንተ ፄልሽን፥ ግብፀ ቢታን ህንተዉ ኦꬅዳይሳዳ ፓጨን፥ ማላታን፥ ማላልስያባን፥ ኦላን፥ ዎልቃማ ኩሸንነ ምጨትዳ ቀሰን፥ ግታ ያሻን ሀራ ካዎተꬃ ግዶ ገልድ፥ እስ ካዎተꬃ ባዉ ኤካናዉ ቡተትዳ ሀራ ፆሲ ደኢ?
DEU 4:35 ጎዳይ፥ ፆሰ ግደይሳ ህንተ ኤራና መላ ሄሳ እ ህንተና በስስ፤ እያፐ አትሽን፥ ሀራ ፆሲ ባዋ።
DEU 4:36 እ ህንተና ታማርሳናዉ ኮይዳ ግሾ፥ ባ ግርሳ ሳሎፐ ስስስ። ቃስ ሀ ሳአን ባ ግታ ታማ ህንተና በስስ፤ ሄ ታማ ግዶፈ ህንተ እያ ቃላ ስእደታ።
DEU 4:37 እ ሄሳ ኦꬅዳይ ህንተ አዋታ ሲቅድ፥ ኤንታፈ ጉየ የለትያ ኤንታ ሼሻታ ዶርዳ ግሾ፥ ህንተና ግብፀፈ ባ ግታ ዎልቃን ከስስ።
DEU 4:38 ሀች ህንተ በኤይሳዳ፥ ህንተና ገልሳናዉነ ኤንታ ቢታ ህንተዉ ላታ ኦꬅድ እማናዉ፥ ህንተፈ ዳርያነ ዎልቃምያ ካዎተꬃታ ህንተ ስንꬃፈ የደꬅድ ከስስ።
DEU 4:39 ህዛ፥ ቦላ ሳሎን ግድን፥ ጋርሳ ሳአን ግድን፥ ጎዳይ ፆሰ ግደይሳ ኤርተ፤ ህንተ ዎዛናን ዎꬅተ፤ ሀራ ፆሲ ባዋ።
DEU 4:40 ሄሳ ግሾ፥ ህንተዉነ ህንተፈ ጉየ ህንተ ናይታስ ኡባባይ ሎኦ ግዳና መላ፥ ቃስ ጎዳይ ህንተ ፆሳይ ህንተዉ መርናዉ እምያ ቢታን ህንተ ላይꬃይ አዱቃና መላ፥ ታኒ ሀች ህንተና ኪትያ ዎጋነ ህግያ ናግተ።
DEU 4:41 ሄሳፈ ጉየ፥ ሙሰይ ዮርዳኖሰ ሄፍንꬃን ዶሎሀ ባጋራ ሄꬑ ካታማታ ዱማይስ።
DEU 4:42 ሄሳ እ ዱማይዳይ ካሰ ሞርከተꬅ ባይና ደእሽን፥ ኤሮና ደእሸ አሰ ዎꬍዳ አስ ያ ባቃታና መላሳ። ሄ ኡራይ ሄ ካታማታፐ እሱዋኡ ባቃትድ ባ ሸምፑዋ አሻናዉ ዳንዳኤስ።
DEU 4:43 ሄሳ ግሾ፥ ሮቤላ ኮቻስ ጋꬋን ደረ ቦላ ደእያ ቦሶራ ካታማ፥ ጋደ ኮቻስ ጋላዳን ደእያ ራሞታነ ምናሰ ኮቻስ ባሳነን ደእያ ጎላና ካታማታ ዱማይስ።
DEU 4:44 ሙሰይ እስራኤለ አሳስ እምዳ ጎዳ ህገይ ሀይሳ፤
DEU 4:45 ሙሰይ ሀ ዎጋ፥ አዋጁዋነ ህግያ ኤንቲ ግብፀፈ ከይዳ ዎደ እሚስ።
DEU 4:46 ሄስ ኤንታዉ እመትዳይ ኤንቲ ቤት-ፓኦራ ካታማ ስንꬃን ደእያ ዮርዳኖሰፐ ዶሎሀ ባጋራ ደእያ ዛንጋራን ደእሽና። ሄ በሳይ ሙሰይነ እስራኤለ አሳይ ግብፀፈ ከይዳ ዎደ ኦልድ ፆንዳ፥ ሀሰቦናን ኡትድ አሞረ ሃርያ ካዋ ስሆና ቢታ።
DEU 4:47 ሄ ዎደ ኤንቲ እያ ቢታነ ባሳነ ካዋ ኦገ ቢታ፥ ሄስካ ዮርዳኖሰፐ ዶሎሀ ባጋን ደእያ ናምኡ አሞረ ካዎታ ላትዶሶና።
DEU 4:48 ሄ ቢታይ አርኖና ዛንጋራን አሮኤራ ካታማፐ ብድ፥ ስርዮና ደርያ ጋኬስ፤ ስርዮና ጌተትድ ፄገትያ ደረይ አርሞና ዙማ።
DEU 4:49 ሄ ቢታይ ዮርዳኖሰፐ ዶሎሀ ባጋራ ደእያ አራባ ቢታ ኡባ ኤክድ ብድ፥ ፕስጋ ደርያ ፃጶን ደእያ ማፅነ አባ ጋኬስ።
DEU 5:1 ሙሰይ እስራኤለ አሳ ኡባ እስፈ ፄግድ፥ ሀይሳዳ ያግስ፤ “ህንተኖ፥ እስራኤለ አሳዉ ታኒ ሀች ህንተዉ ኦድያ ዎጋነ ህግያ ስእተ፤ ኤንታ ታማርተ፤ ምንꬅድ ናግተ።
DEU 5:2 ጎዳይ፥ ኑ ፆሳይ ኮሬባ ዙማ ቦላ ኑራ ጫቅስ።
DEU 5:3 ጎዳይ ሄ ጫቁዋ ጫቅዳይ ኑ አዋታ ፃላላራ ግዶናሽን፥ ሀች ደኦን ደእያ ኑ ኡባራ ጫቅስ።
DEU 5:4 ሄ ዙማ ቦላ ኤፅያ ታማ ግዶን ግድድ፥ ጎዳይ ሶምኦን ህንተራ ሃሳይስ።
DEU 5:5 ታኒ ሄ ዎደ ጎዳይ ግያባ ህንተዉ ኦዳናዉ፥ ጎዳፐነ ህንተፈ ግዶን ኤቃስ። ህንተ ታማስ ያይድ ዙማ ቦላ ከይበከታ። ጎዳይ ሀይሳዳ ያግስ።
DEU 5:6 “ግብፀ ቢታፈ፥ አይለተꬃ ኬꬃፈ ነና ዎዝዳይ ታኒ ጎዳ፥ ነ ፆሳ።
DEU 5:7 “ታፐ አትሽን፥ ሀራ ፆሳት ነዉ ደኦፖ።
DEU 5:8 “ቦላ ሳሎን ደእያባ ግድን፥ ጋርሳ ሳአን ደእያባ ግድን፥ ዎይኮ ሃꬃ ግዶን ደእያባ ግድን፥ አይ ምስለ ነዉ ኤቃ ኦꬆፋ።
DEU 5:9 ነ እያዉ ሆኮፋ ዎይኮ እያዉ ጎይኖፋ። ታኒ ታና እፀይሳታ አዋታ ናጋራ ግሾ፥ ናይታ ሄꬓንꬆነ ኦይዳንꬆ የለታ ጋካናዉ ሴራይስ። ታኒ፥ ጎዳይ፥ ነ ፆሳይ ቃናትያ ፆሳ።
DEU 5:10 ሽን ታኒ ታና ሲቀይሳታነ ታ ኪታ ናገይሳታ ሙኩሉ የለታ ጋካናዉ ታ መርና ሲቁዋ በሳይስ።
DEU 5:11 “ጎዳ፥ ነ ፆሳ ሱንꬃ ጮ ፄጎፓ። ጎዳይ ባ ሱንꬃ ጮ ፄግያ ኡራ ሴሮና አገና።
DEU 5:12 “ጎዳይ፥ ነ ፆሳይ ነና ኪትዳይሳዳ ሳምባታ ጋላሳ ጌሽ ኦꬃዳ ናጋ።
DEU 5:13 ኔኒ ነ ኦሶ ኡባ ኡሱፑን ጋላሳን ኦꬃ።
DEU 5:14 ሽን ላፑንꬃ ጋላሳይ ጎዳስ፥ ነ ፆሳስ ሳምባታ። ሄ ጋላስ አይ ኦሶካ ኦꬆፋ። ኔኒ ዎይኮ ነ አደ ናአይ ዎይኮ ነ ማጫ ናእያ ዎይኮ ነ ኦሳንቾይ ዎይኮ ነ ኦሳንችያ ዎይኮ ነ ቦራይ ዎይኮ ነ ሀረይ ዎይኮ ነ ሀራ መሄት ዎይኮ ነ ካታማን ደእያ በተ አስ ሄ ጋላስ አይ ኦሶካ ኦꬆፕተ። ኔኒ ሸምፐይሳዳ ነ አደ አይለይትነ ማጫ አይለት ሸምፖ።
DEU 5:15 ኔኒ ግብፀ ቢታን አይለ ግዳዳ ደእዳይሳ ዶጎፓ። ጎዳይ፥ ነ ፆሳይ ባ ዎልቃማ ኩሽያንነ ባ ምጨትዳ ቀስያን ያፐ ነና ከስዳይሳ ዶጎፓ። ጎዳይ፥ ነ ፆሳይ ሳምባታ ጋላስ ኔኒ ናጋና መላ ኪትዳይ ሄሳ ግሾሳ።
DEU 5:16 “ጎዳይ፥ ነ ፆሳይ ነዉ እምያ ቢታን ነ ላይꬃይ አዱቃና ማላነ ነዉ ሎአና መላ ጎዳይ፥ ነ ፆሳይ ነና ኪትዳይሳዳ ነ አዋነ ነ አይዉ ቦንቻ።
DEU 5:17 “ዎꬎፓ።
DEU 5:18 “ላሞፋ።
DEU 5:19 “ካይሶቶፓ።
DEU 5:20 “ዎርዶ ማርካቶፋ።
DEU 5:21 “ሀራ አሳ ማቾ አሞቶፋ፤ እያ ኬꬃ፥ እያ ሾቃ፥ እያ አደ አይልያ ዎይኮ እያ ማጫ አይልዉ ዎይኮ እያ ቦራ ዎይኮ እያ ሀርያ ዎይኮ እያዉ ደእያባ አይባካ አሞቶፋ” ያግስ።
DEU 5:22 ዙማ ቦላ ታማ፥ ሻራነ ꬉማ ግዶፈ ጎዳይ ꬎቁ ግዳ ግርሳን ዱላታ ኡባስ ኦድዳ ቃላት ሀይሳታ። እ ኤንታ ቦላ አይባካ ጉጅቤና፤ ኤንታ ናምኡ ሎቸ ሹቻታ ቦላ ፃፍድ ታዉ እሚስ።
DEU 5:23 ዙማይ ታማን ፁገትሽን፥ ꬉማ ግዶፈ ግርሳ ህንተ ስእዳ ዎደ ህንተ ኮቻ ሀላቃትነ ጭማት ታኮ ይድ፥
DEU 5:24 ሀይሳዳ ያግዶሶና፤ “ኑኒ ጎዳ፥ ኑ ፆሳ ግርሳ ታማ ግዶፈ ስእዳ ዎደ ጎዳይ፥ ኑ ፆሳይ ባ ቦንቹዋነ ባ ግታተꬃ ኑና በስስ። ፆሲ አሳራ ሃሳይን ስእድ አስ ደኦን ዳናዉ ዳንዳኤይሳ ሀች ኑኒ በእዳ።
DEU 5:25 ሽን ሀ ዎልቃማ ታማይ ኑና ꬋይሳናዉ ዳንዳኤስ፤ ያትን፥ ኑኒ አይስ ሀይቃኔ? ጎዳ፥ ኑ ፆሳ ቃላ ኑኒ ናምአንꬆ ስእኮ ሀይቃና።
DEU 5:26 አሾ ማእዳ አሳን ኑኒ ስእዳይሳዳ ታማ ግዶን ግድድ ኦድሽን፥ ደኦ ፆሳ ቃላ ስእድ ደኦን ደእዳ አስ ኦኔ?
DEU 5:27 ሄሳ ግሾ፥ ኔኒ ሺቃዳ ጎዳይ፥ ኑ ፆሳይ ግያባ ኡባ ስአ፤ ጎዳይ፥ ኑ ፆሳይ ነዉ ኦድያባ ኑስ ኦዳ፤ ኑካ ስእድ ኪተታና” ያግደታ።
DEU 5:28 ህንተ ታዉ ኦድሽን ጎዳይ፥ ህንተ ግያባ ስእድ፥ ታኮ ሀይሳዳ ያግስ፤ “ሀ አሳይ ነዉ ኦድያባ ኡባ ስአስ፤ ኤንቲ ግዳባ ኡባይ ልከ።
DEU 5:29 ኤንታዉነ ኤንታ ናይታስ መርናዉ ኡባባይ እንጀታና መላ ታዉ ያያናዉነ ታ ኪታ ናጋናዉ ኤንታዉ ኡባ ዎደ ሄሳ መላ ዎዛን ደኤረነ።
DEU 5:30 ሀእ ኔኒ ባዳ ኤንቲ ባንታ ዱንካንያ ስማና መላ ኦዳ።
DEU 5:31 ሽን ኔኒ ሀይሳን ታ ማታን ጋምአ። ኤንቲ ላታና መላ ታኒ ኤንታዉ እምያ ቢታን ኤንቲ ኦꬃናባ ኔኒ ኤንታ ታማርሳና ታ ኪታ፥ ታ አዋጁዋነ ታ ህግያ ኡባ ታ ነዉ ኦዳና” ያግስ።
DEU 5:32 ህንተኖ፥ እስራኤለ አሳዉ፥ ጎዳይ፥ ህንተ ፆሳይ ህንተና ኪትዳባ ኡባ ኦꬃናዉ ናገትተ፤ እያፐ ኡሻች ዎይኮ ሀድርስ ጎፕተ።
DEU 5:33 ህንተ ደኦን ዳና መላ፥ ኡባይ ህንተዉ እንጀታና መላነ ህንተ ላትያ ቢታን ህንተ ላይꬃይ አዱቃና መላ፥ ጎዳይ ህንተ ፆሳይ ህንተና ኪትዳ ኪታ ናግተ።
DEU 6:1 ህንተ ላታናዉ ብያ ቢታን ህንተ ኦꬃና መላ ታ ህንተና ታማርሳና መላ ጎዳይ፥ ህንተ ፆሳይ ታና ኪትዳ ኪታይ፥ አዋጆይነ ህገይ ሀይሳ።
DEU 6:2 ነ ላይꬃይ አዱቃና መላ ነ፥ ነ ናይትነ ነ ናይታ ናይት ጎዳ ነ ፆሳ ያይተ፤ ታ ሀች ነዉ እምያ ጎዳ አዋጅያነ ህግያ ነ ላይꬃ ኡባን ናጋ።
DEU 6:3 ነኖ፥ እስራኤለ ስአ፤ ኡባባይ ነዉ እንጀታና መላነ ጎዳይ ነ አዋታ ፆሳይ፥ ነዉ ግዳይሳዳ ማꬅነ ኤስ ጎግያ ቢታን ነ ዳራና መላ ሀ ህገታ ስአ፤ ምንꬃዳ ናጋ።
DEU 6:4 ነኖ፥ እስራኤለ ስአ፤ ጎዳይ ኑ ፆሳይ እስ ፆሲ።
DEU 6:5 ነ ጎዳ፥ ነ ፆሳ ነ ኩመꬃ ዎዛናፐ፥ ነ ኩመꬃ ሸምፑዋፈነ ነ ኩመꬃ ዎልቃፈ ዶሳ።
DEU 6:6 ሀች ታ ነና ኪትያ ሀ ኪታ ነ ዎዛናን ዎꬃ።
DEU 6:7 ኤንታ ኔኒ ነ ናይታ ታማርሳ፤ ኔኒ ነ ሶን ኡትያ ዎደ፥ ኦገ ሄመትያ ዎደ፥ ዝንእያ ዎደነ ደንድያ ዎደ ኤንታባ ሃሳያ።
DEU 6:8 ማላ ኦꬃዳ ነ ኩሸን ኤንታ ቃቻ፤ ቃስ ነ ሶምኦን ማላዳ ዎꬃ።
DEU 6:9 ነ ፐንገ ዝዝገታ ቦላነ ነ ድርሳ ፐንግያ ቦላ ኤንታ ፃፋ።
DEU 6:10 ጎዳይ፥ ነ ፆሳይ ነዉ እማና ግድ ነ አዋታስ አብራሃመስ፥ ይሳቃስነ ያይቆባስ ጫቅዳ፥ ነ ኬፃቦና ግታነ ሎኦ ካታማት ኩምዳ ቢታ ነዉ እማና።
DEU 6:11 ኔኒ ሺሻቦና ዱረተꬃን ኩምዳ ኬꬃታ፥ ነ ቦካቦና ሃꬃ ኦላታ፥ ነ ቶካቦና ዎይነነ ሻማሆ ነዉ እምያ ዎደ፥ ኔኒ ማዳ ካልዳ ዎደ፥
DEU 6:12 ነና ግብፀ አይለተꬃ ቢታፈ ከስዳ፥ ጎዳ ዶጎና መላ ናገታ።
DEU 6:13 ጎዳ፥ ነ ፆሳ ያያ፤ እያ ፃላላ ጎይና፤ እያ ሱንꬃን ጫቃ።
DEU 6:14 ነ ዩሾን ደእያ አሳይ ጎይንያ ሀራ ፆሳታ ጎይኖፋ።
DEU 6:15 ነ ግዶን ደእያ ጎዳይ፥ ነ ፆሳይ ቃናትያ ፆሱ። እያ ሀንቆይ ነ ቦላ ኤፃና፤ እ ነና ቢታ ቦላፈ ፕትድ ꬋይሳና።
DEU 6:16 ማሳሀን ህንተ እያ ፓጭዳይሳዳ ጎዳ ህንተ ፆሳ ፓጮፕተ።
DEU 6:17 ጎዳይ፥ ህንተ ፆሳይ ህንተና ኪትዳ እያ ኪታ፥ እያ ዎጋነ እያ አዋጁዋ ምንꬅድ ናግተ።
DEU 6:18 ነዉ ኡባባይ እንጀታና መላ ጎዳ ስንꬃን ነ ሱረባነ ሎኦባ ኦꬃ። ሄሳ ኦꬅኮ፥ ነዉ እማናዉ ጎዳይ ነ አዋታስ ጫቅዳ፥ ሄ ሎኦ ቢታ ነ ላታና።
DEU 6:19 ጎዳይ ግዳይሳዳ ኔኒ፥ ነ ሞርከታ ኡባ ነ ስንꬃፈ ጎዳና።
DEU 6:20 ዎደፐ ነ ናይት፥ “ጎዳይ፥ ኑ ፆሳይ ህንተና ኪትዳ ሀ ዎጋ፥ አዋጅያነ ህግያ ብርሸꬃይ አይቤ?” ያግድ ህንተና ኦይችያ ዎደ፥
DEU 6:21 ነ ኤንታዉ ሀይሳዳ ያጋዳ ዛራና፤ “ኑኒ ግብፀ ቢታን ግብፀ ካዋ አይለታ፥ ሽን ጎዳይ ባ ምኖ ኩሽያን ኑና ግብፀፈ ከስስ።
DEU 6:22 ጎዳይ ኑ ፄልሽን፥ ግብፀ ቢታ ቦላ፥ ግብፀ ካዋ ቦላነ እያ ሹማታ ኡባ ቦላ ግታነ ያሽያ ማላታታነ ማላልስያባታ ኦꬅስ።
DEU 6:23 ሽን እ ኑ ማይዛስ እማና ግድ ጫቅዳ ቢታ ኑስ እማናዉ ኑና ግብፀፈ ከስስ።
DEU 6:24 ያትድ ሀች ህንተ በኤይሳዳ ኑስ ኡባ ዎደ ሎኦ ግዳና መላነ ኑኒ ደኦን ዳና መላ፥ ጎዳይ፥ ሀ አዋጆታ ኡባ ኑን ናጋና መላነ ጎዳስ ኑ ፆሳስ ያያና መላ ኪትስ።
DEU 6:25 እ ኑና ኪትዳይሳዳ፥ ጎዳ፥ ኑ ፆሳ ስንꬃን ሀ ኪታ ኡባ ምንꬅድ ናግኮ፥ ሄስ ኑስ ፅሎተꬅ ግዳና” ያግተ።
DEU 7:1 ጎዳይ፥ ነ ፆሳይ ነ ላታናዉ ብያ ቢታ ነና ገልስያ ዎደነ ኔፐ ዎልቃማነ ምንያ ላፑን ካዎተꬃታ፥ ሄሳትካ ህተታ፥ ገርገሰታ፥ አሞረታ፥ ካናነታ፥ ፓርዘታ፥ ህወታነ ያቡሰታ ነ ስንꬃፈ ጎድያ ዎደ፥
DEU 7:2 ጎዳይ ነ ፆሳይ ነ ኩሸን አꬅድ እምን፥ ነ ኤንታ ፆንያ ዎደ፥ ኤንታ ኩመꬅ ꬋይሳ። ኤንታራ አይብባካ ጫቆፋ፤ ኤንታዉ ቃቶፋ።
DEU 7:3 ኤንታራ ኤከቶፋ፤ ገለቶፋ። ነ ማጫ ናይታ ኤንታ አደ ናይታስ እሞፋ ዎይኮ ኤንታ ማጫ ናይታ ነ አደ ናይታስ ኤኮፋ።
DEU 7:4 ኤንቲ ነ ናይታ ታና ካለይሳ አግድ ሀራ ኤቃታ ጎይናና መላ ኦꬃና። ሄ ዎደ ጎዳ ሀንቆይ ነ ቦላ ኤፃና፤ ነና ኤለስድ ꬋይሳና።
DEU 7:5 ሄሳ ግሾ፥ ኤንታ ያርሾ በሳ ላልተ፤ ጎይንያ ሹቻ ኤቃታ መንረꬅተ። አሼራ ጌተትያ ኤቃ ምስልያ ትንቸረꬅተ፤ ኩሸን ኦሰትዳ ምስለታ ታማን ፁግተ።
DEU 7:6 ኔኒ፥ ነ ጎዳ ፆሳስ ጌሻ ደረ። ጎዳይ፥ ነ ፆሳይ ነና ባዉ ዱማ አስ ኦꬅድ ቢታ ቦላ ደእያ አሳ ኡባፈ ነና ዶርስ።
DEU 7:7 ጎዳይ ህንተና ዶስዳይነ ዶርዳይ ህንተ ሀራ አሳፐ ታይቦን ዳርዳ ግሾ ግደና። ህንተ ሀራ አሳ ኡባፈ ታይቦን ጉꬃ።
DEU 7:8 ሽን ጎዳይ ህንተና ዶስዳ ግሾነ ህንተ ማይዛታስ ጫቅዳ ጫቁዋ ናግዳ ግሾ፥ እ ህንተና አይለተꬃ ቢታፈ፥ ግብፀ ካዋ ኩሸፐ፥ ባ ዎልቃማ ኩሽያን ከስስነ ዎዝስ።
DEU 7:9 ሄሳ ግሾ፥ ጎዳይ፥ ህንተ ፆሳይ ፆሴ ግደይሳ ኤርተ። እ ባና ዶሰይሳታስነ ባ ኪታ ናገይሳታስ ሙኩሉ የለተꬅ ጋካናዉ፥ ባ ሲቁዋ ናግያ አማነትያ ፆሲ።
DEU 7:10 ሽን እ ባና እፀይሳታ ሴራናዉነ ꬋይሳናዉ ጉየ ጌና።
DEU 7:11 ሄሳ ግሾ፥ ታኒ ሀች ነዉ እምያ ኪታ፥ አዋጁዋነ ህግያ ናጋ።
DEU 7:12 ነ ሀ ኪታ ስአዳ ምንꬅ ናግኮ፥ ጎዳይ፥ ነ ፆሳይ ህንተ ማይዛታስ ጫቅዳይሳዳ ባ ሲቆ ጫቁዋ ነዉ ናጋና።
DEU 7:13 እ ነና ዶሳና፤ ነና አንጃና፤ ነ ታይቡዋ ዳርሳና። ቃስ እ ነዉ እማናዉ ነ ማይዛታስ ጫቅዳ ቢታን ነ ኡሎ አይፍያ፥ ቢታ አይፍያ፤ ካꬃ፥ ዎይንያ፥ ዛይትያ፥ መሄ ማራታነ ዶርሳ ማራታ ዳርስድ ነና አንጃና።
DEU 7:14 ነ ሀራ አሳፐ አꬋዳ አንጀትዳይሳ ግዳና። አደይ ዎይኮ ማጭ ዎይኮ ነ መሄይ ማይነና።
DEU 7:15 ጎዳይ ሀርገ ኡባፈ ነና ናጋና። ነኒ ግብፀ ቢታን ኤርያ ኢታ ሀርግያ ነ ቦላ ኤሄና፥ ሽን እ ነና እፅያ ኡባ ቦላ ሄ ሀርግያ ኤሀና።
DEU 7:16 ጎዳይ፥ ነ ፆሳይ ነዉ አꬅድ እምያ አሳ ኡባ ቃቶና ꬋይሳ። ሄስ ነዉ ፅሄ ግዳና ግሾ፥ ኤንታ ፆሳታ ጎይኖፋ።
DEU 7:17 ኔኒ፥ ነ ዎዛናን፥ “ሀ ካዎተꬃት ታፐ ምኖሶና፤ ያትን፥ ታ ኤንታ ዋታዳ ጎዳዳ ከሳኔ?” ጋናዉ ዳንዳኣሳ።
DEU 7:18 ሽን ኤንታዉ ያዮፋ። ጎዳይ፥ ነ ፆሳይ፥ ግብፀ ካዋ ቦላነ ግብፀ ቢታ ኡባ ቦላ ኦꬅዳይሳ አኬካ።
DEU 7:19 ጎዳይ፥ ነ ፆሳይ ነና ግብፀፈ ከስያ ዎደ ኦꬅዳ ግታ ጋዶታ፥ ማላታታ፥ ማላልስያባታ፥ እያ ዎልቃማ ኩሽያነ እያ ምጨትዳ ቀስያ ነ፥ ነ አይፈን በአዳሳ። ሀች ነ ያይያ አሳ ኡባ ቦላ ጎዳይ፥ ነ ፆሳይ ሄሳዳ ኦꬃና።
DEU 7:20 ቃስ ኔፐ ባቃትድ ቆሰትዳይሳት ꬋያና ጋካናዉ ጎዳይ፥ ነ ፆሳይ ኤንታ ግዶን ካዠ የዳና።
DEU 7:21 ሄሳ ግሾ፥ ነ ኤንታዉ ያዮፋ፤ ኔራ ደእያ ጎዳይ፥ ነ ፆሳይ፥ ግታነ ያሽያ ፆሲ።
DEU 7:22 ጎዳይ፥ ነ ፆሳይ ሄ ካዎተꬃታ ጉꬃራ ጉꬃራ ጎድድ፥ ነ ስንꬃፈ ꬋይሳና። ነ ኤንታ ኡባ እስ ቶሆ ꬋይሳካ፤ ሄሳ ነ ኦꬅኮ፥ ቢታን ደእያ ዶአት ዳርድ ነና ዋይሳና።
DEU 7:23 ሽን ጎዳይ፥ ነ ፆሳይ ኤንታ ነ ኩሸን አꬅድ እማና፤ ኤንቲ ꬋያና ጋካናዉ እ ኤንታ ዳጋንꬃና።
DEU 7:24 ኤንታ ካዎታ ነ ኩሸን አꬅድ እማና። ነ ኤንታ ሱንꬃ ሳሎፐ ጋርሳን ቁቻዳ ꬋይሳና። ኦንካ ኔራ ኤቀትድ ዳንዳኤና፤ ነ ኤንታ ꬋይሳና።
DEU 7:25 ኩሸን ኦሰትዳ ኤንታ ኤቃ ምስለታ ታማን ፁጋ። ሄ ምስለታ ቦላ ደእያ ብራ ዎይኮ ዎርቃ አሞቶፍተ፤ ነባ ኦꬃዳ ኤኮፋ። ሄስ ጎዳስ፥ ነ ፆሳስ ቱና ግድያ ግሾ፥ እያፐ ነ ኤክኮ ነዉ ፅሄ ግዳና።
DEU 7:26 ኤንቲ ባንታ ሁጰን ቃንገትዳይሳታ ግድያ ግሾ፥ ነ ሄ ቱና ኤቃታ ነ ሶ ገልሳዳ፥ ኤንታ መላ ባደትዳይሳታ ግዶፓ። ኤንታ ኩመꬅ እፃ፤ ሻተታ።
DEU 8:1 ህንተ ደኦን ዳና መላ፥ ህንተ ታይቦይ ዳራና መላነ ጎዳይ ካሰ ህንተ ማይዛታስ እማና ግድ ጫቅዳ ቢታ ገልድ፥ ህንተ ላታና መላ ሀች ታ ህንተና ኪትያ ኪታ ኡባ ምንꬅድ ናግተ።
DEU 8:2 ጎዳይ፥ ነ ፆሳይ ነዉ እምዳ ኪታ ነ ናግያኮነ ናጎናኮ፥ ነ ዎዛና ቆፋ ኤራናዉ ነና ፓጫናዉነ ነና አዳ ኦꬃናዉ ኦይታሙ ላይꬅ ኩመꬅ ነና መላ ቢታን ዋት ካለꬅዳኮ አኬካ።
DEU 8:3 አዳተꬅ ኤርሳናዉ ነና ኮሻይስስ፤ ያትድ ነ ዎይኮ ነ ማይዛት ኤሮና ማና ነና ሙዝስ። ሄሳ እ ኦꬅዳይ አስ ጎዳ ዶናፐ ከይያ ቃላ ኡባናፐ አትሽን፥ ካꬃ ፃላላን ደኦናይሳ ነና ታማርሳናሳ።
DEU 8:4 ሀ ኦይታሙ ላይꬃታ ግዶን ነ ማእዳ ማኦይ ዉርቤና፤ ነ ቶሆይ ክፅቤና።
DEU 8:5 አስ ባ ናአ ሴረይሳዳ ጎዳይ፥ ነ ፆሳይ ነና ሴሮይሳ አኬካ።
DEU 8:6 እያዉ ያያሸነ እያ ቦንቻሸ ጎዳ ነ ፆሳ ኪታ ናጋ።
DEU 8:7 ጎዳይ ነ ፆሳይ ነና ዛንጋራፐነ ደርያፐ ጎግያ ሻፋትነ ፑልቶት ደእያ ሎኦ ቢታ ገልሳናዉ ኤህስ።
DEU 8:8 ሄ ቢታይ ግስተይነ ባንግ፥ ዎይነይነ ባላሰይ፥ ኦሮማነይ፥ ሻማሆ ዛይተይነ ኤስ ኩምዳ ቢታ።
DEU 8:9 ሄ ቢታይ አይኮይካ ፓጮና ህንተ ካልድ ምያ ቢታ። ሄ ቢታይ ብራት ሹቻዳ ገላ ግድዳ ቢታ። ዙማፐ ማዳበ ብራታ ቦክድ ኤክያ ቢታ።
DEU 8:10 ነ ማዳ ካልዳ ዎደ ነው እ እምዳ ሎኦ ቢታ ግሾ፥ ጎዳ ነ ፆሳ ጋላታ።
DEU 8:11 ታ ሀች ነና ኪትያ እያ ኪታ፥ እያ ህግያነ እያ አዋጁዋ ናጎና እፃዳ፥ ጎዳ ነ ፆሳ ዶጎና መላ ናገታ።
DEU 8:12 ነ ማዳ ካልያ ዎደ፥ ሎኦ ኬꬅ ኬፃዳ እያን ደእያ ዎደ፥
DEU 8:13 ነ መሄይነ ዶርሳይ ዳርያ ዎደ፥ ነዉ ብርነ ዎርቅ ዳጋየትያ ዎደ፥ ነዉ ደእዳባይ ኡባይ ዳርያ ዎደ፥
DEU 8:14 ሄ ዎደ፥ ነ ዎዛናይ ኦቶርቶና መላ፥ ግብፀ አይለተꬃ ኬꬃፈ ነና ዎዝዳ ጎዳ፥ ነ ፆሳ ዶጎና መላ ናገታ።
DEU 8:15 እ ነና ኢታ ሾሻይነ ኮርነይ ኩምዳ፥ ሃꬅ ባይና፥ ግታነ ያሽያ መላ ቢታራ ነና ካለꬅዳይሳ ዶጎፓ። እ ነዉ መላ ቢታን ዛላፈ ሃ ꬉስስ።
DEU 8:16 ነ ማይዛት ኤሮና ማና እ ነና መላ ቢታን ሙዝስ። ዉርሰꬃን ነዉ ኡባባይ እንጀታና መላ ነና አዳ ኦꬃናዉነ ፓጫናዉ ሄሳ ኦꬅስ።
DEU 8:17 ኔኒ፥ “ታ ዎልቃይነ ታ ኩሸ ምኖተꬃይ ሀ ዱረተꬃ ታዉ ኤህስ” ጎና መላ ናገታ።
DEU 8:18 ሽን ነ ዱረታና መላ ነዉ ዎልቃ እምዳይ ጎዳ፥ ነ ፆሳ ግደይሳ አኬካ። እ ሄሳ ኦꬅዳይ፥ ሀች ነ በኤይሳዳ፥ ነ ማይዛታራ ጫቅዳ ጫቁዋ ምንꬃናሳ።
DEU 8:19 ሽን ህንተ ጎዳ ህንተ ፆሳ አግድ፥ ሀራ ፆሳታ ካልኮ፥ ኤንታዉ ሆክኮነ ጎይንኮ፥ ህንተ ቱማ ꬋያናይሳ ታ ሀች ማርካታይስ።
DEU 8:20 ጎዳይ፥ ህንተ ፆሳይ ሀራ ካዎተꬃታ ህንተ ስንꬃፈ ꬋይስዳይሳዳ ህንተ እያዉ ኪተቶና እፅኮ ህንተናካ ꬋይሳና።
DEU 9:1 ነኖ፥ እስራኤለ ስአ፤ ኔፐ ግታትያነ ዎልቃምያ ካዎተꬃታ፥ ግምበይ ሳሎ ጋክዳ ግታ ካታማታ ላታናዉ ሀች ዮርዳኖሰ ፕናሳ።
DEU 9:2 ሄ ቢታን ደእያ አሳይ ምኖነ አዱሰ። ኔኒ፥ “ኦንካ ኤንታራ ኤቀታናዉ ዳንዳኦና አናቀ ኮቻታ” ግሽን ስአዳሳ።
DEU 9:3 ሽን ምያ ታማዳ ኔፐ ስንꬃራ በይ ጎዳ፥ ነ ፆሳ ግደይሳ ሀች ኤራ። እ ኤንታ ꬋይሳናነ ነ ስንꬃን ኤንታ ካዉሻና። ጎዳይ ነዉ ግዳይሳዳ ነ ኤንታ ጎዳዳ ከሳናነ ኤለሳዳ ꬋይሳና።
DEU 9:4 ጎዳይ፥ ነ ፆሳይ ኤንታ ነ ስንꬃፈ ጎድዳፐ ጉየ፥ ነ ዎዛናን፥ “ታኒ ፅሎ ግድያ ግሾ፥ ሀ ቢታ ታ ላታና መላ ጎዳይ ታና ኤህስ” ጎፓ። ጎዳይ ኤንታ ነ ስንꬃፈ የደꬅድ ከስዳይ ኤንቲ ኢታ ግድያ ግሾሳ።
DEU 9:5 ነ ኤንታ ቢታ ላታናዉ ይዳይ ነ ፅሎነ ሱረ ግድያ ግሾ ግደና። ሽን ጎዳይ፥ ነ ፆሳይ ኤንታ ነ ስንꬃፈ ጎድዳይ ሀ ካዎተꬃት ኢታ ግድያ ግሾነ በን ነ ማይዛታስ አብራሃመስ፥ ይሳቃስነ ያይቆባስ ጫቅዳ ጫቁዋ ናጋናሳ።
DEU 9:6 ህዛ ነ ሄሳ አኬካ። ጎዳይ፥ ነ ፆሳይ ሀ ሎኦ ቢታ ነና ላትሰይ ነ ፅሎተꬃ ግሾሳ ግደና፤ ነኒ ዎዛን ሙምዳ አስ።
DEU 9:7 ጎዳ፥ ህንተ ፆሳ መላ ቢታን ዋትድ ይሎይዳኮ ዶጎፕተ። ህንተ ግብፀ ቢታፈ ከይዳ ጋላሳፐ ዶምድ፥ ሀች ሀ በሳ ጋካናዉ ጎዳ ቦላ ማካልደታ።
DEU 9:8 ኮሬባ ዙማ ቦላ ጎዳይ ህንተና ꬋይሳናዉ ደንዳና ጋካናዉ ህንተ ጎዳ ይሎይደታ።
DEU 9:9 ጎዳይ ህንተራ ጫቅዳ ጫቆይ ፃፈትዳ ሎቸ ሹቻታ ኤካናዉ ታኒ ዙማ ቦላ ከይዳ ዎደ፥ ያን ካꬅ ሞናነ ሃ ኡዮና ኦይታሙ ጋላስነ ኦይታሙ ቃማ ጋምአስ።
DEU 9:10 ሄሳፈ ጉየ፥ ፆሳ ብራን ፃፈትዳ ናምኡ ሎቸ ሹቻታ ጎዳይ ታዉ እሚስ። ህንተ ዙማ ፃጶን ሺቅዳ ዎደ ታማ ግዶን ጎዳይ ህንተዉ እምዳ ኪታት ሄ ሎቸ ሹቻ ቦላ ፃፈትድ ኡትዶሶና።
DEU 9:11 ኦይታሙ ጋላሳፐነ ቃማፈ ጉየ፥ ጎዳይ ባ ጫቆ ቃላይ ፃፈትዳ ናምኡ ሎቸ ሹቻታ ታዉ እሚስ።
DEU 9:12 ሄሳፈ ጉየ፥ ጎዳይ ታኮ፥ “ኤለሳዳ ሀይሳፈ ዱገ ዎꬋ፤ ኔኒ ግብፀፈ ከስዳ ነ አሳይ ቱንስ፤ ኤንቲ ታ ኪታ ኤሶን አግድ፥ ኩሸን ኦሰትዳ ኤቃ ጎይናናዉ ስምዶሶና” ያግስ።
DEU 9:13 ቃስካ ጎዳይ ታኮ፥ “ታኒ ሀ አሳ በአስ፤ ኤንቲ ቱማ ዎዛና ሙመ አስ።
DEU 9:14 ህዛ ታ ኤንታ ꬋይሶና መላነ ኤንታ ሱንꬃ ቢታ ቦላፈ ቁቾና መላ ታና ድጎፋ። ታ ነና ኤንታፈ ምኖነ ዳርያ ካዎተꬅ ከሳና” ያግስ።
DEU 9:15 ታኒ ጫቆ ቃላይ ፃፈትዳ ናምኡ ሎቸ ሹቻታ ታ ኩሸን ኦይካዳ ዙማ ቦላፈ ዎꬋስ፤ ሄ ዎደ ታማ ላጮይ ዙማ ቦላ በንቴስ።
DEU 9:16 ሄ ዎደ ጎዳ፥ ህንተ ፆሳ ቦላ ህንተ ናጋራ ኦꬅዳይሳ በአስ። ህንተ ማራ ምስለን ኦሰትዳ ዎርቃ ኤቃ ጊግስደታ። ጎዳይ፥ ህንተና ኪትዳ ኦግያፐ ኤሶን ሀራ ሶ ስምደታ።
DEU 9:17 ታኒ ታ ኩሸን ኦይክዳ ናምኡ ሎቸ ሹቻታ ሆላዳ ህንተ በእሽን መንꬃስ።
DEU 9:18 ሄሳፈ ጉየ፥ ጎዳ ይሎያናዉ ህንተ እያ ስንꬃን ኢታ ኦሶ ኦꬅድ፥ ናጋራ ኦꬅዳ ግሾ፥ ካሰይሳዳ ኦይታሙ ጋላስነ ኦይታሙ ቃማ ጎዳ ስንꬃን ጉፋናዳ ጋምአስ፤ ሄ ዎደ ታ ካꬅ ማብከ፤ ሃ ኡያብከ።
DEU 9:19 ጎዳይ ህንተ ቦላ ይሎትድ ꬋይሳናዉ ደንድዳ ግሾ ታኒ ያያስ። ሽን ጎዳይ ዛሪድ ታና ስእስ።
DEU 9:20 ቃስ ጎዳይ ይሎትድ አሮናካ ꬋይሳናዉ ኮይስ፤ ሽን ታኒ ሄ ዎደ አሮናስ ዎሳስ።
DEU 9:21 ታኒ ህንተ ናጋራን ኩምዳ ሄ ማራ ምስልያ ኤካዳ፥ ታማን ፁጋስ። እያ ትንቸረꬃ ጋጫዳ ꬊለ ከሳስ፤ ሄ ꬊልያ ዙማፐ ጎግያ ሃꬃራ የዳስ።
DEU 9:22 ቃስ ህንተ ታበራን፥ ማሳሀንነ ቅብሮት-ሀታዋን ጎዳ ይሎይደታ።
DEU 9:23 ጎዳይ ህንተኮ፥ “ብድ፥ ታኒ ህንተዉ እምዳ ቢታ ላትተ” ያግድ፥ ቃደስ-ባርነፈ የድዳ ዎደካ ህንተ ጎዳ፥ ህንተ ፆሳ ኪታ እፅድ ማካልደታ። እያዉ አማነትበከታ ዎይኮ እያ ቃላስ ኪተትበከታ።
DEU 9:24 ታኒ ህንተና ኤርዳ ዎድያፐ ዶምድ፥ ህንተ ጎዳስ ማካልደታ።
DEU 9:25 ጎዳይ ህንተና ꬋይሳና ግዳ ግሾ፥ ታኒ ኦይታሙ ጋላስነ ኦይታሙ ቃማ ጎዳ ስንꬃን ጉፋናዳ ጋምአስ።
DEU 9:26 ታኒ ጎዳ ፆሳኮ ሀይሳዳ ያጋዳ ዎሳስ፤ “አቤት ኡባ ሃርያ ጎዳዉ፥ ኔኒ ነ ግታ ዎልቃን ዎዝዳነ ነ ምኖ ኩሸን ግብፀፈ ከስዳ፥ ነ ላታ ግድዳ ነ አሳ ꬋይሶፋ።
DEU 9:27 ነ አይለታ፥ አብራሃመ፥ ይሳቃነ ያይቆባ ቆፓ፤ ኤንታ ዎዛና ምኖተꬃ፥ ኤንታ ኢታተꬃነ ኤንታ ናጋራ ታይቦፓ።
DEU 9:28 ሄስ ሀኖና አትኮ፥ ኔኒ ኑና ያፐ ከስዳ ግብፀ አሳይ፥ ‘ጎዳይ ኤንታዉ እማና ግዳ ቢታ ገልሳናዉ ዳንዳእቦና ግሾነ ኤንታ እፅዳ ግሾ፥ መላ ቢታን ዎꬋናዉ ኤንታ ከስስ’ ያጋና።
DEU 9:29 ግዶሽን፥ ሀ አሳይ ኔኒ ነ ግታ ዎልቃንነ ነ ምጨትዳ ቀሰን ግብፀፈ ከስዳ ነ ላታ ግድዳ ነ አሳ” ያጋስ።
DEU 10:1 ሄ ዎደ ጎዳይ ታኮ፥ “ኮይሮይሳ መላ ናምኡ ሎቸ ሹቻታ ጊግሳዳ ታኮ ዙማ ቦላ ከያ። ቃስ እያ ዎꬃናዉ ምꬃፈ ታቦተ ኦꬃ።
DEU 10:2 ታኒ ካሰ ነ መንꬅዳ ሹቻታ ቦላ ደእያ ቃላታ ሀ ሹቻታ ቦላ ፃፋና፤ ነ ኤንታ ታቦትያ ግዶን ዎꬃ” ያግስ።
DEU 10:3 ታኒ ሶቃላ ምꬃፈ ታቦተ ኦꬃስ። ካሰይሳ መላ ናምኡ ሎቸ ሹቻታ ጊግሳስ፤ ሄ ሹቻታ ታ ኩሸን ኦይካዳ ዙማ ቦላ ከያስ።
DEU 10:4 ህንተ ዙማ ፃጶን ሺቅዳ ጋላስ፥ ታማ ግዶፈ ጎዳይ ህንተዉ ኦድዳ ቃላታ፥ ሄስካ ታሙ ኪታታ፥ ካሰ ፃፍዳይሳታ ሄ ሹቻታ ቦላ ጎዳይ ፃፍድ ኤንታ ታዉ እሚስ።
DEU 10:5 ሄሳፈ ጉየ፥ ታኒ ዙማ ቦላፈ ዎꬋዳ፥ ጎዳይ ታና ኪትዳይሳዳ፥ ሄ ሹቻታ ታ ኦꬅዳ ታቦትያ ግዶን ዎꬃስ፤ ሀእካ ኤንቲ ያን ደኦሶና።
DEU 10:6 እስራኤለ አሳይ ባኣሮታ በንያቃናፐ ደንድድ፥ ሙሰራ ብዶሶና። አሮን ያን ሀይቅድ ሞገትስ፤ እያ ናአይ አላዛር እያ ላትድ፥ እያ በሳን ካህነ ሀላቃ ግድስ።
DEU 10:7 ኤንቲ ያፐ ጉድጎዳ ጌተትያ በሳ ብዶሶና፤ ያፐ ቃስ ጎግያ ሃꬃት ደእያ ዮፅባታ ጌተትያ በሳ ብዶሶና።
DEU 10:8 ሄ ዎደ ጎዳ ጫቆ ታቦትያ ቶካና መላ፥ ጎዳ ስንꬃን ኤቅድ እያ ሀጋዛና መላነ ሀች ጋካናዉ ኤንቲ ኦይሳ መላ ጎዳ ሱንꬃን አንጃና መላ ሌወ ኮቻ ጎዳይ ባዉ ዱማይስ።
DEU 10:9 ሄሳ ግሾ፥ ሌወ ኮቻስ ኤንታ እሻታ ግዶን ግሾይ ዎይኮ ላት ባዋ፤ ጎዳይ፥ ህንተ ፆሳይ ኤንታዉ ግዳይሳዳ ኤንታ ላታይ ጎዳ።
DEU 10:10 ታኒ ካሰይሳዳ ኦይታሙ ጋላስነ ኦይታሙ ቃማ ዙማ ቦላ ጋምአስ። ጎዳይ ዛሪድ ታ ዎሳ ስእድ ህንተና ꬋይሳናዉ ኮይቤና።
DEU 10:11 ጎዳይ ታኮ፥ “ታኒ ኤንታ አዋታስ እማና ጋዳ ጫቅዳ ቢታ ኤንቲ ገላና መላነ ላታና መላ ሀ አሳ ካለꬃ” ያግስ።
DEU 10:12 ነኖ፥ እስራኤለ፥ ጎዳይ ኔፐ ኮየይ ሀይሳ፤ ጎዳ፥ ነ ፆሳ ያያ፤ እያ ኦግያ ኡባን ባ፤ እያ ዶሳ፤ ነ ኩመꬃ ዎዛናፐነ ነ ኩመꬃ ሸምፑዋፈ ጎዳ ነ ፆሳስ ኦꬃ።
DEU 10:13 ነዉ እንጀታና መላ ታ ሀች ነዉ እምያ ጎዳ ኪታታነ አዋጆታ ናጋ።
DEU 10:14 ሳሎይነ ሳሎፐ ቦላራ ደእያ ሳሎት፥ ቃስ ሳእነ ሳአን ደእያ ኡባይ ጎዳ፥ ነ ፆሳባ ግደይስ ቱማ።
DEU 10:15 ግዶሽን፥ ጎዳይ ህንተ ማይዛታን ኡፋይትድ፥ ኤንታ ሲቅስ፤ ሀች ህንተ በኤይሳዳ ኤንታፈ ጉየን ኤንታ ሼሽ ግድዳ ህንተና ካዎተꬃታ ኡባፈ አꬅድ ዶርስ።
DEU 10:16 ሄሳ ግሾ፥ ህንተ ዎዛና ቃፃርተ፤ ህዛፐ ህንተ ዎዛና ምንꬆፍተ።
DEU 10:17 ጎዳይ፥ ህንተ ፆሳይ ፆሳታ ፆስነ ጎዳታ ጎዳ። እ ግታ ፆሲ፤ እ ዎልቃማነ ያሽያ ፆሲ። እ ሶምኦ በእድ ፕርደና፤ ዎꬋፈ ኤከና።
DEU 10:18 እ ይኦታስነ አምኤታስ ሱረ ፕርዴስ፤ በታንቹዋ ሲቅድ፥ እያዉ ካꬅነ ማኦ እሜስ።
DEU 10:19 ህንተካ በታንቾታ ሲቅተ፤ ህንተ ህንተ ሁጰን በተ አስ ግድድ ግብፀን ደእደታ።
DEU 10:20 ጎዳ፥ ነ ፆሳ ያያ፤ እያዉ ኦꬃ፤ እያራ ኦይከታ፤ እያ ሱንꬃን ጫቃ።
DEU 10:21 ኔኒ ነ አይፈን በእዳ ግታነ ያሽያ ማላልስያባታ ነዉ ኦꬅዳይ፥ እ ነ ጋላታ፤ ነ ፆሳ።
DEU 10:22 ግብፀ ቢታ ዎꬍዳ ህንተ ማይዛት ኩመꬅ ላፑን ታማ፤ ሀእ ጎዳይ፥ ህንተ ፆሳይ ህንተና ሳሎ ፆልንቶታዳ ዳርስስ።
DEU 11:1 ህዛ ጎዳ፥ ነ ፆሳ ዶሳ፤ እያ አዋጁዋ፥ ዎጋ፥ እያ ህግያነ እያ ኪታ ኡባ ዎደ ናጋ።
DEU 11:2 ህንተ ናይት በኦናባነ ኤሮናባ ግድኮካ፥ ህንተ ሀች ጎዳ ሴራ፥ እያ ግታተꬃ፥ እያ ዎልቃማ ኩሽያነ ምጨትዳ ቀስያ በእዳይሳ አኬክተ።
DEU 11:3 ህንተ እ ኦꬅዳ ማላታታነ ግብፀ ካዋ ቦላነ እያ ቢታ ኡባ ቦላ ኦꬅዳ ማላልስያባታ በእደታ።
DEU 11:4 ኤንቲ ህንተና ካልድ ጎድዳ ዎደ፥ ጎዳይ ግብፀ ቢታ ኦላንቾታ፥ ኤንታ ፓራታነ ፓራ ጋረታ ዞኦ አባን ምትስድ፥ ሀች ጋካናዉ ኤንታ ኩመꬅ ꬋይስዳይሳ በእደታ።
DEU 11:5 ህንተ ሀ በሳ ጋካናዉ መላ ቢታን ጎዳይ ህንተዉ ኦꬅዳባ ህንተ ኤሬታ።
DEU 11:6 ሮቤላ ኮቻፈ ኤልኣባ ናይታ ግድዳ ዳታነ ቦላነ አቤሮ ቦላ ጎዳይ ኦꬅዳይሳ አኬክተ። እስራኤለ አሳ ኡባይ በእሽን፥ ቢታይ ዶየትድ፥ ኤንታ፥ ኤንታ ሶ አሳ፥ ኤንታ ዱንካንያነ ሸምፖራ ደእያ ኤንታባ ኡባ ምትስ።
DEU 11:7 ጎዳይ ኦꬅዳ ሀ ግታ ኦሶታ ኡባ ህንተ፥ ህንተ አይፈን በእደታ።
DEU 11:8 ህዛ ህንተ ምኖ ግዳና መላነ ዮርዳኖሰ ፕንድ ህንተ ኤካናዉ ብያ ቢታ ላታና መላ ታኒ ሀች ህንተና ኪትያ ኪታ ኡባ ናግተ።
DEU 11:9 ህንተ ኪተትኮ፥ ጎዳይ ህንተ ማይዛታስነ ኤንታ ኮቻስ እማና ግድ ጫቅዳ፥ ማꬅነ ኤስ ጎግያ ቢታን ህንተ አዱሳ ላይꬅ ዳና።
DEU 11:10 ነ ላታናዉ ብያ ቢታይ፥ ነ ከያዳ ይዳ ግብፀ ቢታ መላ ግደና። ግብፀን ነ ካꬅ ዘራዳ፥ ጎሻ ቢታ ኡባ አታክልተ በሳዳ ሃ ኡሻሳ።
DEU 11:11 ሽን ዮርዳኖሰ ፕንድ ህንተ ላታናዉ ብያ ቢታይ፥ ደረይነ ዛንጋራይ ደእያ፥ ሳሎ እራን አልያ ቢታ።
DEU 11:12 ሄ ቢታይ፥ ጎዳይ ነ ፆሳይ ናግያ ቢታ፤ ላይꬃ ዶመꬃፈ ብድ ላይꬃ ዉርሰꬃ ጋካናዉ ጎዳ፥ ነ ፆሳ አይፈይ እያ ቦላ ደእያ ቢታ።
DEU 11:13 ሄሳ ግሾ፥ ጎዳ፥ ህንተ ፆሳ ሲቅኮ፥ ህንተ ኩመꬃ ዎዛናፐነ ህንተ ኩመꬃ ሸምፑዋፈ እያ ጎይንኮ፥ ታኒ ሀች ህንተዉ እምያ ኪታ ህንተ ናግኮ፥
DEU 11:14 ነ ካꬅ፥ ዎይነይ ዛይተይ ፓጮና ሺሻና መላ ቶርቸነ ስላ እራ ዎደን ዎደን ቡክሳና።
DEU 11:15 ጎዳይ ነ መህያስ ማታ ዳርሳና፤ ነ ማና፤ ካላና።
DEU 11:16 ህንተ ዎዛና ሀራ ሶ ዛሪድ፥ ሀራ ፆሳታ ጎይኖና መላነ ሆኮና መላ ናገትተ።
DEU 11:17 ሄሳ ህንተ ኦꬅኮ፥ ጎዳ ሀንቆይ ህንተ ቦላ ኤፃና፤ እራይ ቡኮና መላነ ካꬅ ዶሎና መላ እ ሳሉዋ ጎርዳና። ህንተ ጎዳይ ህንተዉ እምያ ሎኦ ቢታፈ ኤሶን ꬋያና።
DEU 11:18 ህዛ፥ ሀ ኪታታ ህንተ ዎዛናንነ ህንተ ቆፋን ዎꬅተ። ማላዳ ኤንታ ህንተ ኩሸን ቃችተ፤ ቃስ ህንተ ሶምኦን ቃችተ።
DEU 11:19 ህንተ ናይታ ታማርስተ። ህንተ ሶን ደእያ ዎደ፥ ኦገን ሄመትያ ዎደ፥ ዝንእያ ዎደነ ደንድያ ዎደ ኤንታዉ ኦድተ።
DEU 11:20 ህንተ ፐንገ ዝዝግያ ቦላነ ህንተ ድርሳ ፐንግያ ቦላ ፃፍተ።
DEU 11:21 ሄሳ ህንተ ኦꬅኮ፥ ጎዳይ ህንተ ማይዛታስ እማና ግድ ጫቅዳ ቢታን፥ ህንተ ላይꬃይነ ህንተ ናይታ ላይꬃይ ሳአፐ ቦላራ ደእያ ሳሎ መላ ግዳና።
DEU 11:22 ህንተ ጎዳ፥ ህንተ ፆሳ ዶስኮ፥ እያ ኦገ ኡባን ህንተ ቢኮ፥ እያዉ አማነትኮ፥ ታ ሀች ህንተዉ እምያ ኪታ ህንተ ምንꬅድ ናግኮ፥
DEU 11:23 ጎዳይ ሀ ካዎተꬃታ ኡባ ህንተ ስንꬃፈ ጎድድ ከሳና። ህንተፈ ዳርያነ ዎልቃምያ ካዎተꬃታ ቢታ የግስድ ኤካና።
DEU 11:24 ቶሆን ህንተ የꬍዳ ቢታ ኡባይ ህንተባ ግዳና። ህንተ ዛዋይ ዱገሀ መላ ቢታፈ ብድ ልባኖሰ ጋካናዉነ ኤፍራፂሳ ሻፋፐ ብድ ግታ አባ ጋካናዉ ግዳና።
DEU 11:25 ህንተራ አይ አስካ ኤቀታናዉ ዳንዳኤና፤ ጎዳይ፥ ህንተ ፆሳይ ህንተዉ ግዳይሳዳ ህንተ ብያ ሶ ኡባን አሳይ ህንተና በእድ ዳጋማና መላነ ህንተዉ ያያና መላ ኦꬃና።
DEU 11:26 ሄኮ፥ ታ ሀች ህንተ ስንꬃን አንጆነ ባደꬅ ዎꬃይስ።
DEU 11:27 ታ ሀች ህንተና ኪትያ ጎዳ፥ ህንተ ፆሳ ኪታ ናግኮ፥ ህንተ አንጀታና።
DEU 11:28 ሽን ታኒ ህንተና ሀች ኪትያ ጎዳ፥ ህንተ ፆሳ ኪታ ናጎና እፅድ፥ ሀራ ፆሳታ ጎይናናዉ እያ ኦግያፐ ደሽኮ፥ ህንተ ባደታና።
DEU 11:29 ጎዳይ፥ ህንተ ፆሳይ ህንተ ላታናዉ ብያ ቢታ ህንተና ገልስያ ዎደ፥ ባደꬃ ጋርዛና ዙማ ቦላ፥ አንጁዋ ኤባላ ዙማ ቦላ አዋጅተ።
DEU 11:30 ሀ ዙማት ዮርዳኖሰ ሻፋፐ ሄፍንꬃን ኦግያፐ ዉሎሀ ባጋን፥ አራባን ደእያ ካናነታ ቢታን፥ ጋልጋላ ስንꬃን ደእያ ሞረ ምꬃ ማታን ደኦሶና።
DEU 11:31 ህንተ ሀእ ጎዳይ፥ ህንተ ፆሳይ ህንተዉ እምያ ቢታ ላታናዉ ዮርዳኖሰ ሻፋ ፕናና ሀኔታ። ህንተ ሄ ቢታ ኤክድ ያን ደእያ ዎደ፥
DEU 11:32 ታ ሀች ህንተዉ እምያ አዋጆታነ ህግያ ኡባ ምንꬅድ ናግተ።
DEU 12:1 ህንተ ላታና መላ ጎዳይ፥ ህንተ አዋታ ፆሳይ ህንተዉ እምዳ ቢታን ህንተ ደእዳ ዎደ ኡባን ህንተ ኦꬃናዉ በሲያ አዋጆትነ ህገት ሀይሳታ።
DEU 12:2 ህንተ ላትያ ቢታን ደእያ ካዎተꬃታስ ደርያ ቦላ፥ ዙማ ቦላነ እስ እስ ምꬃ ጋርሳን ደእያ ጎይኖ በሳታ ꬋይስተ።
DEU 12:3 ኤንታ ያርሾ በሳታ ላልተ፤ ኤንታ ጎይኖ ሹቻ ቱሳታ መንረꬅተ። አሼራ ጌተትያ ኤንታ ኤቃ ምስልያ ታማን ፁግተ፤ ኩሸን ኦሰትዳ ኤንታ ፆሳታ ምስለታ ꬋይስተ፤ ኤንታ ሱንꬃታ ሄ በሳፈ ቁችተ።
DEU 12:4 ጎዳ፥ ህንተ ፆሳ ኤንቲ ባንታ ፆሳ ጎይንያ ኦገን ጎይኖፍተ።
DEU 12:5 ጎዳይ፥ ህንተ ፆሳይ ህንተ ኮቸ ኡባ ግዶፈ ባ ሱንꬃይ ያን ፄገታና መላ ዶርዳ በሳ ኮይተ። ሄ በሳ ህንተ ባናዉ ኮሼስ።
DEU 12:6 ህንተ ፁሳ ያርሹዋ፥ ሀራ ያርሹዋ፥ ህንተ አስራታ፥ ህንተ እሙዋ፥ ህንተ ቃንገꬃ፥ ህንተ ዶስድ እምያ እሙዋ፥ ህንተ መህያፐነ ዶርሳፈ ባይራ ሄ በሳ ኤህተ።
DEU 12:7 ጎዳይ፥ ህንተ ፆሳይ ህንተና አንጅዳ ግሾ፥ ሄሳን፥ ጎዳይ፥ ህንተ ፆሳይ ደእያ በሳን፥ ህንተነ ህንተ ሶ አሳይ ማና፤ ህንተ ኩሸይ ኦꬅዳባ ኡባን ህንተ ኡፋይታና።
DEU 12:8 ሀች ሀይሳን ህንተ እሶይ እሶይ፥ ዶስዳባ ኦይሳዳ ሄ ዎደ ኦከታ።
DEU 12:9 ጎዳይ፥ ህንተ ፆሳይ ህንተዉ እምያ ሸምፖ ቢታ ቡሮ ጋክበከታ።
DEU 12:10 ሽን ህንተ ዮርዳኖሰ ፕንድ፥ ጎዳይ ህንተ ፆሳይ እምያ ሄ ቢታ ላትድ ያን ኡታና። ህንተና ተቅዳ ሞርከታፐ እ ህንተና ሸምፕስያ ግሾ ያን ዎፑ ግድ ህንተ ዳና።
DEU 12:11 ሄ ዎደ ጎዳይ፥ ህንተ ፆሳይ ባ ሱንꬃይ ሄሳን ፄገታናዉ ዶርዳ ሄ በሳን፥ ታ ህንተና ኪትያባ ኡባ፥ ፁሳ ያርሹዋ፥ ሀራ ያርሹዋ፥ ህንተ አስራታ፥ ህንተ እሙዋነ ህንተ ቃንገꬃ ኡባ ያ ኤሄታ።
DEU 12:12 ህንተ፥ ህንተ አደ ናይትነ ህንተ ማጫ ናይት፥ ህንተ አደ አይለትነ ማጫ አይለት ህንተራ ላታ ኤክቦና ህንተ ካታማን ደእያ ሌወታራ እስፈ ያን ጎዳ፥ ህንተ ፆሳ ስንꬃን ኡፋይታና።
DEU 12:13 ኔኒ ፁሳ ያርሹዋ ነ ኮይዳ በሳን ጮ ያርሾና መላ ናገታ።
DEU 12:14 ኔኒ፥ ነ ኮቻፈ እሱዋን፥ ጎዳይ ዶርዳ በሳን፥ ነ ፁሳ ያርሹዋ ያርሻ፤ ታ ነና ኪትዳ ኡባ ያን ኦꬃ።
DEU 12:15 ግዶሽን ነ ደእያ በሳን አዉንካ ነ መህያፐ ጎዳይ ነና አንጅዳይሳዳ ሹካዳ ማ። ዎጋዳ ቱና ግድን ዎይኮ ቱና ግዶና አስ ኦንካ ጋራነ ገንኤ መይሳዳ ነ መህያፐ ሹካዳ ማ።
DEU 12:16 ሽን ሱꬅ ሃꬃዳ ሳአን ጉሳፈ አትሽን፥ ሞፓ።
DEU 12:17 ነ ካꬃፈ፥ ዎይንያፐነ ዛይትያፐ እምያ አስራታ፥ ነ መህያፐነ ዶርሳ ዉድያፐ እምያ ባይራ፥ ጎዳስ ቃንግዳባ ኡባነ ነ ዶሳን እምያ እሙዋ ኡባ ነ ደእያ ሄራን ሞፓ።
DEU 12:18 ሽን ነኒ፥ ነ አደ ናይትነ ነ ማጫ ናይት፥ ነ አደ አይለትነ ማጫ አይለት ኔራ ላታ ኤክቦና ነ ካታማን ደእያ ሌወታራ እስፈ ጎዳይ፥ ነ ፆሳይ ዶርዳ በሳን፥ ጎዳ፥ ነ ፆሳ ስንꬃን፥ ሀ ያርሾ ኡባ ማ። ነ ዳቡራዳ ሺሽዳባን ጎዳ፥ ነ ፆሳ ስንꬃን ኡፋይታ።
DEU 12:19 ነ ደኦ ላይꬃ ኡባን ሌወታ ቀል ጎና መላ ናገታ።
DEU 12:20 እ ነዉ ገልዳ ቃላዳ ጎዳይ ነ ፆሳይ ነ ዛዋ ዳልግስያ ዎደ ነና አሾ ማናዉ ኮሽያ ዎደ ነ ኮይዳ መላ ማ።
DEU 12:21 ሽን ጎዳይ፥ ነ ፆሳይ ባ ሱንꬃይ ያን ፄገታና መላ ዶርዳ በሳይ ነዉ ሃክኮ፥ ጎዳይ ነዉ እምዳ ነ መሄ ዎይኮ ዶርሳ ዉድያፐ ታ ነና ኪትዳይሳዳ፥ ነ ኮይዳ መላ ነ ካታማን ሹካዳ ማ።
DEU 12:22 ዎጋዳ ቱና ግድን ዎይኮ ቱና ግዶና አስ ኦንካ ጋራ ዎይኮ ገንኤ መይሳዳ ሞ።
DEU 12:23 ደኦይ ሱꬃን ደእያ ግሾ፥ ሱꬅ ደእያ አሾ ሞና መላ ናገታ፤ ሄሳ ግሾ፥ ደኦ አሾራ ጋꬃዳ ሞፓ።
DEU 12:24 ሱꬅ ሃꬃዳ ቢታን ጉሳፈ አትሽን፥ ሞፓ።
DEU 12:25 ነዉነ ኔፐ ጉየራ ያና ነ ናይታስ እንጀታና መላ ሱꬅ ሞፓ። ሄሳ ነ ኦꬅኮ ጎዳ ኡፋይሳሳ።
DEU 12:26 ሽን ነ ጎዳስ ዱማይዳባነ እያዉ ቃንግዳባ ኤካዳ፥ ጎዳይ ዶርዳ በሳ ባ።
DEU 12:27 ፁሳ ያርሾ አሹዋነ ሱꬃ ጎዳ፥ ነ ፆሳ ያርሾ በሳን ያርሻ። ሀራ ያርሾ ሱꬃ ጎዳ፥ ነ ፆሳ ያርሾ በሳ ማታን ጉሳዳ አሹዋ ማ።
DEU 12:28 ነዉነ ነ ናይታስ እንጀታና መላ ታ ነና ኪትያ ኪታ ምንꬃዳ ናጋ። ሄሳ ነ ኦꬅኮ፥ ጎዳ ነ ፆሳ ኡፋይስያባነ ሱረባ ኦꬃሳ።
DEU 12:29 ነ ላታናዉ ብያ ካዎተꬃ፥ ጎዳይ ነ ፆሳይ ነ ስንꬃፈ ꬋይስያ ዎደነ ነ ኤንታ ቢታ ላትያ ዎደ፥
DEU 12:30 ኤንቲ ነ ስንꬃፈ ꬋይዳፐ ጉየ፥ ነ ኤንታ ፆሳታ ጎይናዳ፥ ፅሄን ኦይከቶና መላ ናገታ። ኔኒ፥ “ሀ ካዎተꬃት ባንታ ፆሳታ ዋትድ ጎይኖና?” ያጋዳ ካላዳ ኦይቾና መላ ናገታ።
DEU 12:31 ኤንቲ ባንታ ፆሳታ ጎይንያ ዎደ ጎዳይ እፅያ ኡባ ኦꬅያ ግሾ፥ ጎዳ ነ ፆሳ ነ ሄሳዳ ጎይናናዉ በሰና። ኤንቲ ሀር አቶሽን፥ ባንታ አደ ናይታነ ማጫ ናይታ ባንታ ፆሳታስ ያርሾ ኦꬅድ ታማን ፁጎሶና።
DEU 12:32 ህዛ ታ ነና ኪትዳባ ኡባ ኦꬃ፤ እያ ቦላ ጉጆፋ፤ እያፐ ፓጭሶፓ።
DEU 13:1 ነ ግዶን ትንብተ ኦድያ ዎይኮ አሙሆ ብርሽያ አስ ደንድድ፥ ማላታነ ማላልስያባታ ኦꬅኮ፥
DEU 13:2 እ ኦድዳ ማላታይ ዎይኮ ማላልስያባይ ቱማ ግድድ ፖለትን፥ እ ኔኮ፥ “አነ ካሰ ነ ኤሮና ሀራ ፆሳታ ጎይኖስ” ያግኮ፥
DEU 13:3 ነ እያ ኡባራካ ስኦፓ። ህንተ ኩመꬃ ዎዛናፐነ ኩመꬃ ሸምፑዋፈ ጎዳ ህንተ ፆሳ ዶስያኮነ ዶሶናኮ ፓጫናዉ ሄሳ ኦꬄስ።
DEU 13:4 ጎዳ ህንተ ፆሳ ካልተ፤ እያዉ ያይተ፤ እያ ኪታ ናግተ፤ እያ ቃላ ስእተ፤ እያዉ ጎይንተ፤ እያፐ ዱፆፍተ።
DEU 13:5 ህንተና ግብፀ አይለተꬃፈ ዎዝዳ ጎዳ፥ ህንተ ፆሳ ቦላ ህንተ ማካላና መላ ታማርስያ ናበ ዎይኮ አሙሆ ብርሽያ ኡራ ዎꬍተ። ሄሳ መላ አስ ህንተ ጎዳ፥ ህንተ ፆሳ ኪታፐ ካረ ከያና መላ ኦꬅያ ግሾ፥ እያ ዎꬍተ፤ ኢታ ህንተ ግዶፈ ድግተ።
DEU 13:6 ሀር አቶሽን፥ ነ እሻይ ዎይኮ ነ አደ ናአይ ዎይኮ ነ ማጫ ናእያ ዎይኮ ነ ዶስያ ማችያ ዎይኮ ነ ማታ ላገይ፥ “ካሰ ነነ ነ ማይዛት ጎይን ኤሮና ፆሳታ ጎይናናዉ የꬋ።
DEU 13:7 ቢታ ሀ ጋፃፐ ያ ጋፃ ጋካናዉ ደእያ፥ ነ ዩሾ ኡባን ማታንነ ሃሆን ደእያ አሳ ኡባይ ጎይንያ ፆሳታ ጎይናናዉ የꬋ” ያግድ ባለꬅኮ፥
DEU 13:8 እያዉ ኤሮ ጎፓ፤ እ ገይሳ ስኦፓ። እያዉ ቃታዳ እያ ሸምፑዋ አሾፋ፤
DEU 13:9 እያ ዎꬋናዉ በሴስ። እያ ዎꬋናዉ ኮይሮ ነ ዶማ፤ ሄሳፈ ጉየ፥ አሳ ኡባይ ካልድ ዎꬎ።
DEU 13:10 እ ሀይቃና ጋካናዉ ሹቻን ጫዳ፤ እ ነና ግብፀ ቢታፈ፥ አይለተꬃ ኬꬃፈ ከስዳ ጎዳ፥ ነ ፆሳፈ ነና ሻካናዉ ኮዬስ።
DEU 13:11 እስራኤለ አሳይ ሄሳ ስእድ ያያና፤ ቃስ ሄሳ መላ ኢታባ ዛሪድ ህንተ ግዶን ኦንካ ኦና።
DEU 13:12 ጎዳይ፥ ነ ፆሳይ ነ ዳና መላ እምዳ ካታማፐ እሱዋን ነ ደእያ ዎደ፥
DEU 13:13 ነ አሳ ግዶን ኢታት ደንድድ፥ አሳኮ፥ “ኑኒ ኤሮና ፆሳታ ጎይናናዉ ደንድተ” ያግድ ባለꬅሽን ነ ስእኮ፥
DEU 13:14 ሄ ሀኖታ ኦይቻ፤ ምንꬃዳ ፕልጋ። ሄ ነ ግዶን ኦሰትዳ ቱናባይ ቱማ ግደይሳ ሻካዳ ኤርኮ፥
DEU 13:15 ሄ ካታማን ደእያ አሳ ኡባ ማሻን ዉርሳ፤ ሄ ካታማነ እያን ደእያ መህያ አሾና ꬋይሳ።
DEU 13:16 ሄ ካታማፐ ነ ኤክዳ ድኦ ኡባ ካታማ ዳባባ ሺሻዳ፥ ሄ ካታማነ እያ ድኡዋ ኡባ ጎዳስ፥ ነ ፆሳስ፥ ፁሳ ያርሾ ኦꬃዳ ዉርሳዳ ፁጋ። እ መርናዉ ዛሪድ ኬፀቶና ላለꬃ ዶረ ግድድ አታና።
DEU 13:17 ሀ ድገትዳ ሚሸታፐ አይብካ ነ ኩሸን በንቶፎ። ጎዳይ ባ ዎልቃማ ሀንቁዋፈ ስሚድ፥ ነና ማራና፤ እ ነዉ ቃታና። ካሰ ነ ማይዛታስ ጫቅዳ ጫቁዋዳ ነ ታይቡዋ ዳርሳና።
DEU 13:18 ታኒ ሀች ነና ኪትያ ኪታ ኡባ ነ ናጋዳ፥ ጎዳ፥ ነ ፆሳስ ኪተትኮ፥ ጎዳ ነ ፆሳ ኡፋይስያባ ኦꬅኮ፥ ሀ ግዳባይ ነዉ ፖለታና።
DEU 14:1 ህንተ፥ ጎዳ ህንተ ፆሳ ናይታ፤ ሀይቅዳ አሳስ ህንተ አሳተꬃ ጋሮፕተ፤ ህንተ ሁጵያ ቡሉሶፕተ።
DEU 14:2 ህንተ፥ ጎዳ ህንተ ፆሳስ ጌሻ ደረ፤ ጎዳይ ህንተና ባ አሰ ግዳና መላ ቢታን ደእያ አሳ ኡባፈ ባዉ ዶርስ።
DEU 14:3 ኔኒ ቱናባ አይባካ ሞፓ።
DEU 14:4 ነ ማና መሄትነ ዶአት ሀይሳታ፤ ቦር፥ ዶርሰ፥ ዴሸ፥
DEU 14:5 ዶገ፥ ባቾ፥ ዎሽኤ፥ ዎራ ዴሽ፥ ዋልያ፥ ጋራነ ዙማ ዶርሰ።
DEU 14:6 ሹቁለይ ጳልቀትዳይሳነ ዋሞትያ መሄታነ ዶአታ ኡባ ሚተ።
DEU 14:7 ሽን ሹቁለይ ጳልቀቶናይሳታነ ዋሞቶናይሳታ ሞፓ፤ ሄስካ ግማለ፥ ኤሸነ ጉፓለ። ሀይሳቲ ዋሞቶሶና፥ ሽን ኤንታ ሹቁለይ ጳልቀትቦና ግሾ፥ ኤንቲ ህንተዉ ቱና።
DEU 14:8 ጉዱንꬆስ ሹቁለይ ጳልቀꬅ፥ ሽን ዋሞቶና ግሾ እ ህንተዉ ቱና። እያ አሹዋ ሞፓ፤ እያ ባዉታ ቦቾፍተ።
DEU 14:9 ሃꬃ ግዶን ደእያ መተꬃታ ግዶፈ ህንተ ማናይሳት ሀይሳታ፤ ሞሎ መላ ቀፈይነ ፖቆይ ደእያ ኡባ ሚተ።
DEU 14:10 ሽን ሞሎ መላ ቀፈይነ ፖቆይ ባይናይሳታ ሞፕተ ሄስ ህንተዉ ቱና።
DEU 14:11 ቱና ግዶና ካፎ ኡባ ሚተ።
DEU 14:12 ሽን ካፎታፐ ህንተ ሞና አጋና ካፎት ሀይሳታ፤ አርጋንꬅ፥ ባዞ አንኮ፥ ካሬꬃ አንኮ፥
DEU 14:13 ጵርጮ፥ ፅሎ ኮቸ ኡባ፥
DEU 14:14 ቆራሰ ኮቸ ኡባ፥
DEU 14:15 ያንቾ፥ ሃꬃ ካፎ፥ ቃማ ካፎ ኮቸ ኡባ፥
DEU 14:16 ላፋ ጉቶ፥ ዲድን፥ ሃꬃ ኩቶ፥
DEU 14:17 ባዞ ጉቶ፥ ሞሎ ካፎ፥ ሶሌ፥ ሀዛዞ፥
DEU 14:18 ሳብሳ ጌተትያ ካፎ ኮቸ ኡባ፥ አያና ካፎነ ሽርሽቆ።
DEU 14:19 ቀፈራ ደእያ ላፋ መተꬃት ኡባይ ህንተዉ ቱና፤ ኤንታ ሞፕተ።
DEU 14:20 ሽን ቀፈራ ደእያባታፐ ቱና ግዶናይሳታ ሚተ።
DEU 14:21 ኔኒ፥ ጎዳ ነ ፆሳስ ጌሻ አስ ግድያ ግሾ፥ ባዉታ ኡባ ሞፓ። ሄሳ ህንተ ካታማን ደእያ በተ አሳይ ማና መላ ኤንታዉ እማናዉ ዳንዳኤታ፤ ዎይኮ ሀራ ቢታ አሳስ ባይዛናዉ ዳንዳኤታ። ዴሻ ናአ እያ አየ ማꬃራ ካꬆፋ።
DEU 14:22 ነ ጋደን ላይꬃን ላይꬃን ካፅያ ካꬃ አይፈ ኡባፈ አስራታ ከሳ።
DEU 14:23 ነ ኡባ ዎደ ጎዳስ ነ ፆሳስ፥ ያሽ ታማራና መላ ባ ሱንꬃይ ፄገታና መላ እ ዶርዳ በሳን፥ ነ ካꬃ፥ ዎይነ ኡሻነ ዛይትያ አስራታ፥ ነ ዶርሳፈነ መህያፐ ባይራ የለትዳይሳ ያን፥ ጎዳ፥ ነ ፆሳ ስንꬃን ማ።
DEU 14:24 ጎዳይ ነ ፆሳይ ባ ሱንꬃይ ፄገታና መላ ዶርዳ በሳይ፥ ነ ደእያ በሳፈ ዳሮ ሃሆ ግድኮ፥ ጎዳይ ነና አንጃና መላ ነ አስራታ ያ ኤፋናዉ ዳንዳኦናባ ግድኮ፥
DEU 14:25 ሄ አስራታ ባይዛዳ ሚሽያ ጎዳይ፥ ነ ፆሳይ ዶርዳ በሳ ኤፋ።
DEU 14:26 ሄ ሚሽያን ነ ኮይዳ ሚዝ ዎይኮ ዶርሰ ዎይኮ ዎይነ ኡሽ ዎይኮ ሀራ ምኖ ኡሽ ዎይኮ ሀራ ነ ኮይያባ ሻማዳ፥ ነነ ነ ሶ አሳይ ጎዳ፥ ነ ፆሳ ስንꬃን ሄሳ ማዳ ኡፋይታ።
DEU 14:27 ኤንቲ ኔራ ሻከትድ ኤክዳ ሀራ ላት ኤንታዉ ባይና ግሾ፥ ሄሳ ነ ኦꬅያ ዎደ ነ ካታማን ደእያ ሌወታ ዶጎፓ።
DEU 14:28 ሄꬓንꬆ ላይꬃን ላይꬃን ነ ካꬃ አስራታ ኤሀዳ ነ ካታማን ሺሻ።
DEU 14:29 ሄሳ ነ ካታማን ደእያ፥ ኔራ ሻክትድ ኤክዳ ሀራ ላት ባይና ሌወት፥ በተ አሳይ፥ ይኦ ናይትነ አምኤት ይድ ሞ። ያትኮ፥ ነ ኦꬅያ ኦሶ ኡባን ጎዳይ፥ ነ ፆሳይ ነና አንጃና።
DEU 15:1 “ላፑንꬃ ላይꬃ ዉርሰꬃን ታልኤ አጮ ኡባ ማራ።
DEU 15:2 ነ አጮ ማራና ዎጋይ ሀይሳ፤ እስራኤለ ግድዳ ባ እሻስ ታልእዳ ኦንካ ሄ አጩዋ ማሮ። ጎዳ ማሮተꬃይ አዋጀትዳ ግሾ፥ እስራኤለ ግድዳ ባ እሻስ ታልእዳ ባ ታልእያ ኦይቾፎ።
DEU 15:3 ሀራ ቢታ አሳስ ነ ታልእዳ አጩዋ ኤካናዉ ዳንዳኣሳ፥ ሽን ነ ኮቻስ ታልእዳባ ኡባ ማራ።
DEU 15:4 “ነ ላታና መላ ጎዳይ፥ ነ ፆሳይ ነዉ አቆ ኦꬅድ እምያ ቢታን፥ ጎዳይ ነና አንጃና ግሾ ነ ግዶን ማንቆይ ዴና።
DEU 15:5 ነ ጎዳስ ነ ፆሳስ ኪተትኮ፥ ታ ሀች ነና ኪትያ ኪታ ኡባ ናግኮ፥ ነ ፖሎ አንጀታና።
DEU 15:6 ጎዳይ፥ ነ ፆሳይ ነዉ ኦድዳይሳዳ ነና አንጃና፤ ዳሮ ካዎተꬃት ህንተፈ ታልአና፥ ሽን ህንተ እሱዋፈካ ታልኤከታ። ቃስ ነ ካዎተꬃታ ሃራና፥ ሽን እሶይካ ነና ሃረና።
DEU 15:7 “ጎዳይ፥ ነ ፆሳይ ነዉ እምያ ቢታን ደእያ ካታማታፐ እሱዋን ደእያ እስራኤለ አስ ማንቅድ በንትኮ፥ እያዉ ኡሎ ምኖፋ፤ ነ ኩሽያ ሺሻ ኤኮፋ።
DEU 15:8 ነ ኩሽያ እያዉ ብርሻ፤ እያ ኮሽያባ ታልአ።
DEU 15:9 “አጮ ማርያ ላፑንꬃ ላይꬅ ማትስ” ጋዳ፥ ማንቆ እስራኤለ አስ ታልኤ ድጎፋ፤ ሄሳ መላ ኢታ ቆፍ ነ ዎዛናን ገሎፖ። ነ እያዉ ታልኦና እፅን፥ እ ፆሳኮ ዬክኮ፥ ሄስ ነዉ ናጋራ ግዳና።
DEU 15:10 ነ እያዉ ኬሀተꬃን እማ፤ ነ ዎዛናን አይስ እምያና ጋዳ ኡዘቶፋ። ሄሳ ነ ኦꬅኮ፥ ጎዳይ ነ ፆሳይ ነና ኦይክዳባን የꬍዳባን ኡባን አንጃና።
DEU 15:11 አዉደካ ግድን፥ ቢታ ቦላፈ ማንቆይ ꬋዮና ግሾ፥ ነ እስራኤለታስ፥ ማንቆታስነ መቶታንቾታስ ህንተ ኬሀ ግዳና መላ ኪታይስ።
DEU 15:12 አደ ግድን ማጫ ግድን፥ እስራኤለ አስ፥ አይለ ኦꬅድ ሻምኮ፥ እ ነዉ ኡሱፑን ላይꬅ ኦꬆ፤ ላፑንꬃ ላይꬃን አይለተꬃፈ ላአ ከዮ።
DEU 15:13 ነኒ አይለተꬃፈ እያ ከሳ የድያ ዎደ መላ ኩሸ የዶፋ።
DEU 15:14 ጎዳይ ነ ፆሳይ ነና አንጅዳይሳ መላ ነ መህያፐ፥ ሻልያፐነ ዎይነ ጉምኤꬃፈ ኤንታዉ ኬሀተꬃን እማ።
DEU 15:15 ነኒ ካሰ ግብፀ ቢታን አይለ ግድዳይሳነ ጎዳይ ነ ፆሳይ ነና ያፐ ዎዝዳይሳ ዶጎፓ። ታ ሀች ሀ ኪታ ነዉ እመይ ሄሳሳ።
DEU 15:16 ሽን ነ አይለይ ነናነ ነ ኬꬃ አሳ ዶስዳ ግሾነ ኔራ ደኦይ እያዉ ሎኦ ግድያ ግሾ፥ “ታኒ ነ ሶፐ ቢከ” ያግኮ፥
DEU 15:17 እያ ፐንገ ኤፋዳ፥ ጎꬅ ኤካዳ፥ እያ ሀይꬃ ሉካ። ያትኮ፥ እ ነዉ መርናዉ አይለ ግዳና፤ ቃስ ማጫ አይለስካ ሄሳዳ ኦꬃ።
DEU 15:18 እያ ኔኒ አይለተꬃፈ ከሳዳ የድያ ዎደ ኔኒ ቆሄታስ ጋዳ ቆፖፋ። እ ሀ ኡሱፑን ላይꬃታ ግዶን አስ ኡነ ኦይሳፈ ዳኮ ዳሮ ነዉ ኦꬅስ። ሄሳ ግሾ፥ ኔኒ ኦꬅያባ ኡባን ጎዳይ፥ ነ ፆሳይ ነና አንጃና።
DEU 15:19 ነ መህያፐነ ነ ዶርሳ ዉድያፐ ባይራ የለትዳ አደ ኡባ ጎዳስ፥ ነ ፆሳስ ዱማያ። ነ ዱማይዳ መህያፐ ባይራ የለትዳ ቦራ ጎዮፓ፤ ነ ዶርሳ ዉድያፐ ባይራ የለትዳ ዶርሳ እክስያ ሜዶፓ።
DEU 15:20 ነነ ነ ሶ አሳይ ጎዳይ ዶርያ በሳን ጎዳ፥ ነ ፆሳ ስንꬃን ሄሳታ ላይꬃን ላይꬃን ማ።
DEU 15:21 ሽን ነ ያርሽያ መህያ ቦላ ቦርስያባይ በንትኮ፥ እ ዎበ ዎይኮ ቆቀ ዎይኮ ሀራ ኢታ ቦርስያባይ እያ ቦላ ደእኮ፥ ሄሳ ጎዳስ፥ ነ ፆሳስ ያርሾፋ።
DEU 15:22 ሄሳ ነ ደእያ ነ ካታማን ማ፤ ዎጋዳ ቱና ግዶና አስ ግድን ዎይኮ ቱና አስ ግድን ጋራነ ገንኤ አሾዳ ሞ።
DEU 15:23 ግዶሽን፥ ነ እያ ሱꬃ ሃꬃዳ ሳአን ጉሳፈ አትሽን፥ ሞፓ።
DEU 16:1 አቢባ አጌናን ጎዳ፥ ነ ፆሳ ፓስካ ባኣለ ቦንቻ፤ ጎዳይ፥ ነ ፆሳይ ነና አቢባ አጌናን ቃማ ግብፀፈ ከስስ።
DEU 16:2 ኔኒ ዶርሳፈነ መሄ ዉድያፐ ጎዳይ ባ ሱንꬃይ ፄገታና መላ ዶርዳ በሳን፥ ጎዳስ፥ ነ ፆሳስ፥ ፓስካ ያርሻ።
DEU 16:3 ሄ ያርሹዋ ነ ምያ ዎደ እርሾይ ገልዳ ኡይꬃራ ሞፓ። ኔኒ ግብፀ የዳዳ ኤሶን ከይያ ዎደ ኦꬅዳይሳዳ እርሾይ ገልቦና መቶ ኡይꬃ ላፑን ጋላስ ኩመꬅ ማ። ነ ደኦ ላይꬃ ኡባን ነ ግብፀፈ ከይዳ ጋላሳ ሀሳያና።
DEU 16:4 ነ ቢታ ኡባን ላፑን ጋላሳስ አይባ እርሾይ በንቶፎ። ቃስ ነ ኮይሮ ጋላስ ኦማርስ ያርሽዳ አሹዋፐ ዎንታስ አይብካ አቶፎ።
DEU 16:5 ነ ፓስካ ያርሹዋ ጎዳይ ነ ፆሳይ ነዉ እምያ ካታማ አዉንካ ጮ ሹኮፋ።
DEU 16:6 ጎዳይ ነ ፆሳይ ባ ሱንꬃይ ፄገታና መላ ዶርያ በሳን ነ ፓስካ ያርሹዋ ሹካ። ቃስ አው ዉልያ ዎደ ግብፀፈ ነ ከይዳ ግሾ ሄ ሳትያን ሹካ።
DEU 16:7 ጎዳይ፥ ነ ፆሳይ ዶርያ በሳን፥ ያን ካꬃዳ ማ፤ ያታዳ ሳእ ዎንትያ ዎደ ነ ሶ ሶ ባ።
DEU 16:8 ኡሱፑን ጋላስ ኩመꬅ እርሾይ ገልቦና ኡይꬃ ማ፤ ላፑንꬃ ጋላስ ጎዳ፥ ነ ፆሳ ጎይናናዉ ሺቃ፤ ሄ ጋላስ አይ ኦሶካ ኦꬆፋ።
DEU 16:9 ነ ካꬃ ጫካ ኦይክዳ ኮይሮ ዎድያፐ ዶማዳ፥ ላፑን ሳምንታ ኩመꬅ ታይባ።
DEU 16:10 ያታዳ፥ ጎዳይ፥ ነ ፆሳይ ነና አንጅዳይሳ መላ ነ፥ ነ ዶሳን እምያ እሙዋ ኤሀዳ፥ ጎዳ፥ ነ ፆሳ ሳምንታ ባኣለ ቦንቻ።
DEU 16:11 ሄሳን ኔኒ፥ ነ አደ ናይት፥ ነ ማጫ ናይት፥ ነ አደ አይለትነ ነ ማጫ አይለት፥ ነ ካታማን ደእያ ሌወት፥ በተ አሳይ፥ ይኦ ናይትነ ነ ግዶን ደእያ አምኤት ኡባይ፥ ጎዳይ፥ ነ ፆሳይ ባ ሱንꬃይ ፄገታና መላ ዶርያ በሳን ኡፋይትተ።
DEU 16:12 ኔኒ ግብፀ ቢታን አይለ ግድዳይሳ ሀሳያዳ ሀ ዎጋ ናጋ።
DEU 16:13 ነ ዉዱማፈ ነ ካꬃ፥ ዎይነ የꬍያ በሳፈ ነ ዎይንያ ሺሽዳፐ ጉየ፥ ላፑን ጋላስ ሻቃራ ባኣለ ቦንቻ።
DEU 16:14 ኔኒ፥ ነ አደ ናይትነ ማጫ ናይት፥ ነ አደ አይለትነ ማጫ አይለት፥ ነ ካታማን ደእያ ሌወት፥ በተ አሳይ፥ ይኦ ናይትነ አምኤት ኡባይ ሄ ባልያን ኡፋይትተ።
DEU 16:15 ጎዳይ ዶርያ በሳን ላፑን ጋላስ ጎዳ፥ ነ ፆሳ፥ ባኣለ ቦንቻ። ነ ኡፋይታና መላ ነ አይፍስዳባንነ ነ ኩሸ ኦሶ ኡባን ጎዳይ፥ ነ ፆሳይ ነና አንጃና።
DEU 16:16 ህንተ ቢታን ደእያ አደ ኡባይ ላይꬃን ሄꬑ ቶሆ፥ ኡይꬃ ባኣለ ዎደ፥ ሳምንታ ባኣለ ዎደነ ሻቃራ ባኣለ ዎደ ጎዳ፥ ህንተ ፆሳ ስንꬃን፥ እ ዶርያ በሳን በንቶ። ኤንቲ ጎዳ ስን ይሸ፥ መላ ኩሸ ዮፖ።
DEU 16:17 ጎዳይ፥ ነ ፆሳይ ነና አንጅዳይሳ መላ እሶይ እሶይ ባዉ ዳንዳኤይሳ መላ እሞ።
DEU 16:18 ጎዳይ፥ ህንተ ፆሳይ እምያ ካታማታን እስ እስ ኮቻስ ዳይናነ ሀላቃ ህንተዉ ሹምተ፤ ኤንቲ አሳስ ፅሎ ፕርዳ ፕርዶ።
DEU 16:19 ፅሎ ፕርዳ ዎቢሶፓ፤ ሶምኦ በአዳ ማዶፋ፤ ዎꬋፈ ኤኮፋ። ዎꬋፈይ ጭንጫታ አይፍያ ቆቅሴስ፥ ፅሎታ ቃላ ጌላዬስ።
DEU 16:20 ነ ደኦን ዳና ማላነ ጎዳይ ነ ፆሳይ ነዉ እምያ ቢታ ነ ላታና መላ ፅሎ ፕርዳ።
DEU 16:21 ኔኒ ጎዳ፥ ፆሳ ያርሾ በሳ ማታን አሼራ ኤቃ ምስልያ ኤሶፋ።
DEU 16:22 ህንተ ጎዳይ፥ ፆሳይ እፅያ ጎይኖ ሹቻ ቱሱ ነዉ ኤሶፋ።
DEU 17:1 ጎዳስ፥ ነ ፆሳስ፥ ቦርስያባይ ደእያ መሄ ዎይኮ ዶርሰ ያርሾ ኦꬃዳ ሺሾፓ፤ ሄስ ፆሳ ስንꬃን እፀትዳባ።
DEU 17:2 ጎዳይ፥ ነ ፆሳይ ነዉ እምያ ካታማታፐ አዉንካ አደ ዎይኮ ማጫ ግድን ጎዳ፥ ነ ፆሳ ስንꬃን ኢታባ ኦꬅኮነ እያ ጫቁዋ መንꬅድ በንትኮ፥
DEU 17:3 ታ ኪታ አግድ፥ ሀራ ፆሳታ፥ አዋ ዎይኮ አጌና ዎይኮ ሳሎ ፆልንቶ ጎይንዳ አስ ደእኮ፥
DEU 17:4 ሄሳ መላባ ህንተ ስእኮ፥ ሄ ኦዳ ምንꬅድ ፕልጋ። ህንተ ኮይን፥ ሄሳ መላ ቱናባይ እስራኤለ ግዶን ኦሰትዳይስ ቱማነ ጌሽ ግድኮ፥
DEU 17:5 ሄ ኢታ ኦꬅዳ አድያ ዎይኮ ማጫስዉ ነ ካታማፐ ጋፃ ከሳዳ፥ ሹቻን ጫዳዳ ዎꬋ።
DEU 17:6 እስ አስ ናምኡ ዎይኮ ሄꬑ ማርክ ማርካቶና ደእሽን ሀይቆፎ፤ እስ አሳ ማርካን አይ አስካ ሀይቆፎ።
DEU 17:7 እያ ቦላ ማርካትዳ አሳት ኮይሮ እያ ሹቻን ጫዶ፤ ኤንታ ካልድ ሀንኮ አሳይ ጫዶ። ሄሳዳ ኦꬃዳ፥ ኢታ ነ ግዶፈ ድጋ።
DEU 17:8 ህንተ ስን ሺቅያ ሞቶይ ዴፆ ግድኮ፥ ሄስካ፥ ሸምፖ ዎꬎ፥ ሾቸ፥ ማዱንꬅ፥ ዱማ ዱማ ሞቶታ ጎዳይ፥ ነ ፆሳይ ዶርዳ በሳ ኤሀ።
DEU 17:9 ካህነ ግድዳ ሌወታኮነ ዳይናታኮ ሄ ሞቱዋ ሺሻ፤ ሄ ሞቱዋ ኤንቲ ፕርዶ።
DEU 17:10 ጎዳይ ዶርዳ በሳን ኤንቲ ፕርድዳይሳዳ ኦꬃ፤ ነ ኦꬃና መላ ኤንቲ ኪትያባ ኡባ አኬካዳ ኦꬃ።
DEU 17:11 ኤንቲ ነና ታማርስዳ ህግያዳነ ኤንቲ ኦድዳ ፕርዳዳ ኦꬃ፤ ኤንቲ ፕርድዳ ፕርዳፈ ኡሻች ዎይኮ ሀድርስ ጎፓ።
DEU 17:12 ጎዳስ፥ ነ ፆሳስ ኦꬅያ ዳይናስ ዎይኮ ካህንያስ ኪተቶና እፅያ አስ ደእኮ፥ ሄ ኡራይ ሀይቆ። ሄሳዳ ኦꬃዳ፥ ኢታ እስራኤለ ግዶፈ ድጋ።
DEU 17:13 አሳ ኡባይ ሄሳ ስእድ ያያና፤ ዛሪድ ሄሳ መላ ኢታ ኦꬅያ አስ ዴና።
DEU 17:14 ጎዳይ፥ ነ ፆሳይ ነዉ እምያ ቢታ ላታዳ፥ ያን ደኦ ዶምያ ዎደ፥ ነ ዩሾን ደእያ ካዎተꬃታዳ፥ “ኑካ ኑ ቦላ ካዎ ካዎꬃና” ያግኮ፥
DEU 17:15 ነ ካዎꬃና ካዎይ ጎዳይ፥ ነ ፆሳይ ነዉ ዶርዳይሳ ግዳናዉ በሴስ። ሄስካ፥ ነ አሳ ግዶፈ ዶረትዳይሳ ግዶፐ አትሽን፥ ሀራ ቢታ አስ ነ ቦላ ካዎꬆፋ።
DEU 17:16 ጎዳይ፥ “ሄ ኦግያራ ግብፀ ስሞፕተ” ያግዳ ግሾ፥ ሄ ካዎይ ዳሮ ፓራ ሺሻናዉ በሰና፤ ባ አሳካ ፓራ ሻማና መላ ግብፀ የዶፎ።
DEU 17:17 እያ ዎዛና ባለꬆና መላ ካዎይ ዳሮ ማቾ ኤኮፎ፤ ዳሮ ዎርቃነ ብራ ሺሾፖ።
DEU 17:18 እ ባ አራታን ኡትያ ዎደ ሌወ ኮቸ ግድዳ ካህነት ናግያ ማፃፋፐ ሀ ህግያ ዱቅድ ባዉ ኤኮ።
DEU 17:19 እ ሀ ህግያ ቃላነ ዎጋ ናጎነ ፖሎ ኤርድ ጎዳስ፥ ባ ፆሳስ፥ ያሽ ታማራና መላ፥ ሀ ማፃፋይ እያራ ደኦ፤ እካ ሀ ማፃፋ ባ ደኦ ላይꬃ ኡባን ናባቦ።
DEU 17:20 እ ባ ዎዛናን፥ “ታኒ ታ ላገታፐ አꬋይስ” ግድ ባ እሻታ ቦላ ኦቶርተና። እካ ፆሳ ህግያፈ ሀድርስ ዎይኮ ኡሻች ጌና። እ ባ ካዎተꬃን አዱሳ ላይꬅ ካዎታና፤ እያ ናይት እስራኤለ ቢታን ዳሮ ላይꬅ ካዎታና።
DEU 18:1 ሌወ ኮቸ ግድዳ ካህነታስነ አትዳ ኤንታ ኮቻስ እስራኤለ ግዶን ላታ ቢት ባዋ። አሳይ ጎዳስ ሺሽያ ፁሳ ያርሾይ ኤንታ ግሾ ግድያ ግሾ እያ ምሸ ዳና።
DEU 18:2 ኤንታዉ ኤንታ እሻታ ግዶን ላት ዴና፤ ጎዳይ ኤንታዉ ግዳይሳዳ እ ኤንታ ላታ።
DEU 18:3 ኮርማ ዎይኮ ዶርሰ አሳይ ያርሾስ ሺሽዳይሳፈ ካህነታ ግሾይ ሀይሳ፤ ምሳይ፥ ጋጮይነ ኡሎ አሾይ ኤንታዉ እመቶ።
DEU 18:4 ነ ካꬃፈ፥ ዎይንያፐነ ዛይትያፐ ኮይሮ ጋክዳ አይፍያነ ነ ዶርሳ እክስያፐ ባይራ ካህነታስ እማ።
DEU 18:5 ሌወት ጎዳ ሱንꬃን መርናዉ ካህነ ግድድ ኦꬃና መላ ነ ኮቻ ግዶፈ ጎዳይ፥ ነ ፆሳይ ኤንታ ዶርስ።
DEU 18:6 እስ ሌወይ እስራኤለ ቢታን ደእያ እስ ካታማፐ ደንድድ፥ ጎዳይ ዶርያ በሳ ባናዉ ኮይኮ፥
DEU 18:7 እ ብያ በሳን ደእያ ሌወት ጎዳ ስንꬃን ኤቅድ ኦይሳዳ እካ ጎዳ ባ ፆሳ ስንꬃን ኤቅድ ኦꬆ።
DEU 18:8 ባና ጋክያ ግሹዋ ኤክዳባ ግድኮካ፥ ካህነት ጎኤትያ ኡባ ኤንታራ ግና ሻከትድ ኤኮ።
DEU 18:9 ጎዳይ ነ ፆሳይ እምዳ ቢታ ነ ገልያ ዎደ ሄ ቢታን ደእያ አሳይ ኦꬅያ እፀትዳ ኦሶታ ኦꬆፋ።
DEU 18:10 ባ አደ ናኣ ዎይኮ ማጫ ናእዉ ያርሾስ ታማን ፁግያ ኦንካ ነ ግዶን በንቶፎ። ብት፥ ማራጨ በኤይ፥ ማሮተይ፥ ህግሸይ፥
DEU 18:11 ሞይትለ በኤይ፥ ሀይቅዳ አሳ አያና ፄገይ፥ ዎይኮ ሀይቅዳ አሳ አያናራ ኦደተይ ነ ግዶን ደኦፖ።
DEU 18:12 ሄሳ መላባ ኦꬅያ ኦንካ ጎዳ ማታን እፀትዳ አስ። ኤንቲ ሄሳ መላ ቱና ኦꬅያ ግሾ፥ ጎዳይ ነ ፆሳይ ሄ ካዎተꬃታ ነ ስንꬃፈ ጎዳና።
DEU 18:13 ሽን ነኒ ጎዳ ነ ፆሳ ስንꬃን ቦረይ ባይናይሳ ግዳ።
DEU 18:14 ነኒ ላታናዉ ብያ ቢታን ደእያ ካዎተꬃት ሙሩነይሳታነ ብተይሳታ፤ ሽን ነ ሄሳ ኦꬆና መላ ጎዳይ ነ ፆሳይ ነና ድግስ።
DEU 18:15 ጎዳይ፥ ነ ፆሳይ ነ ኮቻ ግዶፈ ታ መላ ናበ ነዉ ደንꬃና። ነ እ ገይሳ ስአ።
DEU 18:16 ኮሬባ ዙማ ቦላ ነ ሺቅዳ ዎደ ጎዳ ነ ፆሳ ሀይሳዳ ያጋዳ ኦይቻዳሳ፤ “ታ ሀይቆና መላ ጎዳ፥ ታ ፆሳ ግርሳ ዛራዳ ስእከ፤ ሀ ዎልቃማ ታማ ዛራዳ በእከ” ያጋዳሳ።
DEU 18:17 ጎዳይ ታኮ፥ “ኤንቲ ቱማ ግዶሶና።
DEU 18:18 ታ ኤንታ ኮቻ ግዶፈ ነ መላ ናበ ኤንታዉ ደንꬃና፤ ታኒ ታ ቃላ እያ ዶናን ዎꬃና፤ እ፥ ታ ኪትያ ኡባ ኤንታዉ ኦዳና።
DEU 18:19 እ ታ ሱንꬃን ኦድያ ታ ቃላ ስኦና ኦናካ ታ ኦይቻና።
DEU 18:20 ሽን ታ ኪቶናባ ታ ሱንꬃን ኦድያ ዎይኮ ሀራ ፆሳታ ሱንꬃን ኦድያ ሄ ናበይ ሀይቆ” ያግስ።
DEU 18:21 ኔኒ፥ “ናበይ ኦድያ ቃላይ ፆሳፈ ግዶናይሳ ታ አይብን ሻካዳ ኤራኔ?” ያግኮ፥
DEU 18:22 ሄ ናበይ ጎዳ ሱንꬃን ኦድዳ ቃላይ ፖለቶና እፅኮ፥ ሄስ ጎዳይ ኦድቦና ቃላ ግደይሳ ኤራሳ። ሄ ናበይ ኦድያ ቃላይ ዎርዶ ግድዳ ግሾ እያ ያዮፋ።
DEU 19:1 ጎዳይ፥ ነ ፆሳይ ነዉ እምያ ቢታን ደእያ ካዎተꬃታ ꬋይስያ ዎደነ ነ ኤንታ ጎዳዳ፥ ኤንታ ካታማታንነ ኤንታ ኬꬃታን ዱሱ ዶምያ ዎደ፥
DEU 19:2 ጎዳይ፥ ነ ፆሳይ ላታ ኦꬅድ እምያ ቢታን ደእያ ካታማታፐ ሄꬑ ካታማታ ነዉ ዱማያ።
DEU 19:3 ጎዳይ፥ ነ ፆሳይ ነዉ ላታ ኦꬅድ እምያ ቢታ ሄꬓ ከሳዳ ሻካ። ያታዳ አሰ ዎꬍዳ ኦንካ ሄ ካታማታኮ ኤሶን ባቃትድ አታና መላ ኦገ ጊግሳ።
DEU 19:4 እስ አስ ካሰ ሞርከተꬅ ባይና ደእሽን፥ ኤሮና ባ ላግያ ዎꬍኮ፥ እ ሄ ካታማታፐ እሱዋኮ ባቃትድ ባ ሸምፑዋ አሾ።
DEU 19:5 ናምኡ አሳት ምꬅ ቃንፃናዉ ዎራ ብን፥ እሶይ ምꬃ ቃንፅሽን፥ ምꬃፈ ካልታ አይፈይ ኮለትድ ሀንኩዋ ዎꬍኮ፥ ዎꬍዳ ኡራይ ሀ ሄꬑ ካታማታፐ እሱዋኮ ባቃትድ፥ ባ ሸምፑዋ አሾ።
DEU 19:6 ባቃትድ አትያ ካታማይ እስን ፃላላ ግድኮ፥ ዎꬍዳ ኡራይ ኤሶን ዎፅድ ጋካናዉ ኦገይ አዱሰ ግድኮ፥ ሱꬅ ዛርያ ማታ ዳቦይ ጎድ ጋክድ፥ ይሎን ደንድድ ሀይቃናዉ በሶና ኡራ ዎꬋናዉ ዳንዳኤስ። እ ባ ላግያ ዎꬍዳይ ካሰ ሞርከተꬅ ደእያ ግሾ ግደና።
DEU 19:7 ህንተ ሄꬑ ካታማታ ዱማይ ዎꬃና መላ ታ ነና ኪተይ ሄሳሳ።
DEU 19:8 ጎዳይ፥ ነ ፆሳይ ካሰ ነ ማይዛታስ ጫቅዳይሳዳ ነ ዛዋ ዳልግስኮነ ነ ማይዛታስ እማና ግዳ ቢታ ኡባ ነዉ እምኮ፥
DEU 19:9 ሀ ሄꬑ ካታማታ ቦላ ሀራ ሄꬑ ካታማታ ጉጃ። ሀች ታ ነና ኪትያ ኡባ ነ ፖልኮ፥ ጎዳ ነ ፆሳ ዶስኮነ እ ነና ታማርስዳ ኦግያን ምናዳ ደእኮ፥ ሀ ቢታይ ነዉ እመታና።
DEU 19:10 ሄሳ ነ ኦꬅኮ፥ ጎዳይ፥ ነ ፆሳይ ላታ ኦꬅድ ነዉ እምያ ቢታን ፅሎ አሳ ሱꬅ ጉከና፤ ነካ ሱꬅ ጉሳዳ ኦይሸታካ።
DEU 19:11 ሽን እስ አስ ባ ሾሩዋ እፅድ፥ ቆሰት ናግድ እያ ዎꬍድ፥ ሀ ካታማታፐ እሱዋኮ ባቃትኮ፥
DEU 19:12 እ ደእያ ካታማን ደእያ ጭማት እ ባቃትዳ ካታማፐ ኤህስድ፥ ኩሸ ዛራናዉ ኮየይሳስ አꬅድ እሞ።
DEU 19:13 እያዉ አይባካ ቃቶፋ፤ ነዉ ኡባባይ እንጀታና መላ፥ ፅሎ ሱꬅ ጉስዳ ኡራ እስራኤለ ግዶፈ ድጋ።
DEU 19:14 ጎዳይ ነ ፆሳይ ነኒ ላታና መላ እምያ ቢታን፥ በን አሳይ ኤስዳ ጋደ ዛዋ ሾዶፋ።
DEU 19:15 እስ አስ ባላ ኦꬃናዉ እስ ማርካ ፃላል ግደና። ናምኡ ዎይኮ ሄꬑ ማርክ ማርካትን፥ ሄ ሞቶይ ፕርደታናዉ ኮሼስ።
DEU 19:16 እስ አስ ሀራ አስ ዎርዶን ሞትኮ፥
DEU 19:17 ሞተይስነ ሞተተይስ ናምአይ ጎዳ ስንꬃን፥ ካህነታ ስንꬃንነ ዳይናታ ስንꬃን ኤቆ።
DEU 19:18 ዳይናት ሄ ኦዳ ምንꬅድ ፕልጎ፤ ሄ ኡራይ ባ እሻ ዎርዶን ሞተይስ ቱማ ግድኮ፥
DEU 19:19 ሄ ሞተተይስ ኤካናዉ ደእያ ሴራ ሞተይስ ሴረቶ። ሄሳዳ ኦꬃዳ፥ ኢታ ኡራ ነ ግዶፈ ድጋ።
DEU 19:20 ሄሳዳ ኦꬅኮ፥ ሀራ አሳይ ሄሳ ስእድ ያያና፤ ሄሳ መላ ኢታ ኦሶይ ዛሪድ ኦሰተና።
DEU 19:21 ሄሳ መላ ኢታ ኦሶ ኦꬅዳይሳስ ቃቶፋ፤ ሸምፖ ግሾ ሸምፖ፤ አይፈ ግሾ አይፈ፤ አቻ ግሾ አቸ፤ ኩሸ ግሾ ኩሸ፤ ገዳ ግሾ ገዳ መንꬃ።
DEU 20:1 ነኒ ሞርከታራ ኦለታናዉ ብያ ዎደ፥ ኤንታ ፓራት፥ ፓራ ጋረትነ ኤንታ ኦላንቾት ኔፐ ዳርን በአዳ፥ ኤንታዉ ያዮፋ፤ ነና ግብፀፈ ከስዳ ጎዳይ፥ ነ ፆሳይ ኔራ ደኤስ።
DEU 20:2 ህንተ ኦላ ዶማናፐ ኮይሮ፥ ካህነይ ኦላንቾታ ስን አꬍድ ሀይሳዳ ያጎ፤
DEU 20:3 “እስራኤለ አሳዉ፥ ስእተ፤ ሀች ህንተ፥ ህንተ ሞርከታራ ኦለታናዉ ሀኔታ። ህዛ ህንተ ዎዛናይ ዳጋሞፎ፤ ያዮፍተ፤ ኤንታ ስንꬃን ኮኮሮፕተ፤ ህርጎፍተ።
DEU 20:4 ጎዳይ፥ ህንተ ፆሳይ ህንተራ ብያ ግሾ፥ ህንተ ሞርከታ ኦልድ፥ ህንተዉ ፆኖ እማና” ያጎ።
DEU 20:5 ቶራ ሞጮናት ኦላንቾታኮ፥ “ኦራꬃ ኬꬅ ኬፅድ ገልቦና አስ ደእኮ፥ እ ኦላን ሀይቅን፥ ሀራ አስ እያ ኬꬃን ገሎና መላ እ ሶ ስሞ።
DEU 20:6 ዎይኮ ዎይነ ቶክድ፥ አይፈ ሞና አስ ደእኮ፥ እ ኦላን ሀይቅን፥ ሀራ አስ እያ ዎይነ አይፍያ ሞና መላ እ ሶ ስሞ።
DEU 20:7 ማቾ ኦይችድ ኤክቦና አስ ደእኮ፥ እ ኦላን ሀይቅን፥ ሀራ አስ እያ ማችዉ ኤኮና መላ እ ሶ ስሞ” ያጎ።
DEU 20:8 ቶራ ሞጮናት ጉጅድ ሀይሳዳ ያጎ፤ “ሀ አሳ ግዶን ያያነ ህርግያ ኦንካ ደእኮ፥ እ ባ ላገታ ዎዛና ያሻን ትልእሳናፐ ሶ ስሞ” ያጎ።
DEU 20:9 ቶራ ሞጮናት ሄሳ አሳስ ኦድ ዉርስያ ዎደ ጩጋስ ጩጋስ ቶራ ሞጮናታ ዶሮ።
DEU 20:10 እስ ካታማ ኦላናዉ ባዳ ነ እያኮ ማትያ ዎደ፥ ኮይሮትድ ሳሮራ ኤንቲ ኩሸ እማና መላ ኦይቻ።
DEU 20:11 ኤንቲ ሳሮራ ባንታ ኩሽያ እምድ፥ ባንታ ግምበ ፐንግያ ዶይድ ነና ገልስኮ፥ ሄ ካታማን ደእያ አሳ ኡባይ ነዉ ዴፆ ኦሶ ኦꬅድ ሀጋዞ።
DEU 20:12 ሄ ካታማ አሳይ ነዉ ሳሮራ ኩሸ እሞና እፅድ፥ ኦላስ ጊገትኮ፥ ነ ሄ ካታማ ዩሹዋ ተቃ።
DEU 20:13 ጎዳይ፥ ነ ፆሳይ ኤንታ ነዉ አꬅድ እምያ ዎደ ሄ ካታማን ደእያ አደ ኡባ ማሻን ዉርሳ።
DEU 20:14 ግዶሽን፥ ማጫሳ፥ ናይታ፥ መህያነ ካታማን ደእያ ኡባባ ነዉ ድአ። ጎዳይ፥ ነ ፆሳይ ነዉ እምያ ነ ሞርከታ ሻሉዋ ጎኤታ።
DEU 20:15 ነ ደእያ በሳፈ ሃክድ ደእያ ካታማታ ነ ኦይክያ ዎደ ሄሳዳ ኦꬃ።
DEU 20:16 ሽን ጎዳይ፥ ነ ፆሳይ ነዉ ላታ ኦꬅድ እምያ ቢታን ሸምፖራ ደእያባ እሱዋካ አሾና ዎꬋ።
DEU 20:17 ጎዳይ፥ ነ ፆሳይ ኪትዳይሳዳ ህተታ፥ አሞረታ፥ ካናነታ፥ ፓርዘታ፥ ህወታነ ያቡሰታ ዉርሳዳ ዎꬋ።
DEU 20:18 ሄስ ሀኖና እፅኮ፥ ኤንቲ ባንታ ፆሳታ ጎይንሸ ኦꬅያ እፀትዳ ኦሶታ ህንተ ኦꬃና መላ ህንተና ታማርስድ፥ ጎዳ ህንተ ፆሳ ቦላ ህንተ ናጋራ ኦꬃና መላ ደንꬃና።
DEU 20:19 እስ ካታማ ኦይካናዉ ዩሹዋ ነ ተቃዳ፥ ዳሮ ጋላስ ኦለታሸ ጋምእያ ዎደ፥ እያን ደእያ አይፈ እምያ ምꬃ አይፍያ ማፐ አትሽን፥ ቃንፆፋ። ነ ዩሹዋ ተቅድ ኦለይ አሰፐ አትሽን፥ ደንባን ደእያ ምꬃ ግደና።
DEU 20:20 ግዶሽን፥ ነ አይፈ እሞና ሀራ ምꬃታ ቃንፃዳ፥ ኔራ ኦለትያ ካታማይ ኩንዳና ጋካናዉ ያን ሚፃ ኬፃ።
DEU 21:1 ነ ላታና መላ ጎዳይ፥ ነ ፆሳይ ነዉ እምያ ቢታን፥ ኦን ዎꬍዳኮ ኤረቶና አህ ኩንድድ በንትኮ፥
DEU 21:2 ህንተ ዳይናትነ ጭማት ብድ፥ አሀይ ኩንድዳ በሳፈ ማታ ካታማታ ጋካናዉ ደእያ ሃሆተꬃ ዋꬎ።
DEU 21:3 ሄሳፈ ጉየ፥ አሀይ ኩንድዳ በሳስ ማትያ ካታማ ጭማት፥ ዋታቦናነ ሞርገን ቃምባር ዎꬍቦና ኡስ ኤኮ።
DEU 21:4 እዮ ጎግያ ሃꬅ ደእያ ጎየትድ ኤሮናነ ዘረትድ ኤሮና ዛንጋራ ኤፍድ፥ ሄ ኡሴ ቆꬍያ ምርቅድ መንꬆ።
DEU 21:5 ሄሳ መላ ቆሁዋነ ኦሻ ሻክድ ፕርዳናዉ ጎዳይ፥ ህንተ ፆሳይ ባ ስንꬃን ኦꬃና መላነ ባ ሱንꬃን አንጃና መላ ኤንታ ዶርዳ ግሾ፥ ሌወ ኮቸ ግድዳ ካህነት ሄ በሳ ቦ።
DEU 21:6 ሄሳፈ ጉየ፥ አሀይ ኩንድዳ በሳስ ማትያ ካታማ ጭማት ዛንጋራን ቆ ምርቅድ ዎꬍዳ ኡሴ ቦላ ባንታ ኩሽያ ሜጨትድ፥
DEU 21:7 “ኑ ኩሸይ ሀ ሱꬃ ጉስቤና፤ ኑ አይፈይ ሄሳ በእቤና።
DEU 21:8 አቤት ጎዳዉ፥ ኔኒ ዎዝዳ ነ አሳ፥ እስራኤለ ማራ፤ ሀ ፅሎ ሱꬃ ነ አሳ ቦላ ናቆ ኦꬃዳ ታይቦፓ። ሀ ፅሎ ሱꬃ ግሾ ኑ ናጋራይ አቶ ጋ” ያጎ።
DEU 21:9 ነኒ ጎዳ አይፍያ ስንꬃን ሄሳዳ ኦꬃዳ፥ ፅሎ ሱꬃይ ጉክዳ ናጋራ ነ ግዶፈ ድጋ።
DEU 21:10 ነ ሞርከታራ ነ ኦለታናዉ ከይን፥ ጎዳይ፥ ነ ፆሳይ ኤንታ ነ ኩሸን አꬅድ እምን፥ ኤንታ ድእያ ዎደ፥
DEU 21:11 ድኤትዳ አሳ ግዶን እስ ማላ ሎኦ ማጫስ በአዳ፥ እዉ ምሸታዳ ማቻናዉ ኮይኮ፥
DEU 21:12 እዮ ነ ሶ ኤሀ። እ ሁጵያ ሜዳ፤ እ ፁጉንꬃ ጭጋ፤
DEU 21:13 ድኤትያ ዎደ ደእያ ማኡዋ ላማዳ፥ እስ አጌና ነ ሶን ኡታዳ፥ ባ አዋስነ ባ አየስ ካዮቶ። ሄሳፈ ጉየ፥ እዮ ማቻ።
DEU 21:14 ያታ ስማዳ፥ ኢራ ዱሳይ ነና ኡፋይሶና እፅኮ፥ እያ ባ ኮይዳ ሶ ባና መላ እዮ የዳ። ኔኒ እዮ ማቾ ኦꬃዳ ኢራ እስፈ አቅዳ ግሾ፥ እዮ ሚሸን ባይዛናዉ ዎይኮ አይለ ኦꬃናዉ በሰና።
DEU 21:15 እስ አሳስ እ ዶስያነ ዶሶና ናምኡ ማቸት ደእኮ፥ ሄ ናምአይካ እያዉ አደ ናአ የልኮ፥ ባይራይ እ ዶሶና ማቸፔ የለትዳባ ግድኮ፥
DEU 21:16 እ ባ ናይታ ባ ሻሉዋ ላትስያ ዎደ፥ እ ዶሶናርፐ የለትዳ ባይራይ ደእሽን፥ እ ዶስያርፐ የለትዳ ካሉዋ ባይራያናዉ በሰና።
DEU 21:17 ሀራ ናይታስ እመይሳፈ እያዉ ናምኡ ኩሸ አꬅድ እምድ እ ዶሶናር ናአይ ባይራ ግደይሳ ኤርሳናዉ በሴስ። ሄ ናአይ እያዉ ኩሸ ቶሆ ጳልቅዳ ባይራ ግድያ ግሾ፥ ባይራተꬃ እ ኤካናዉ በሴስ።
DEU 21:18 አዋስነ አየስ ኪተቶና እፅዳ፥ ኤንቲ ሴርንካ ስሞና፥ ዎዛና ሙመነ ማካላንቾ ግድዳ ናእ ደእኮ፥
DEU 21:19 አዋይነ አይያ ሄ ካታማ ፐንገን ደእያ ጭማታኮ እያ ኤሆ።
DEU 21:20 ኤንቲ ጭማታኮ፥ “ሀይስ ኑ ናአይ ዎዛና ሙመነ ማካላንቾ፤ እ ኑስ ኪተተና፤ እ ያራምባነ ኡሻንቾ” ያግድ ኦዶ።
DEU 21:21 ሄሳፈ ጉየ፥ ሄ ካታማን ደእያ አደ ኡባይ እያ ሹቻን ጫድድ ዎꬎ። ሄሳዳ ኦꬅድ ህንተ ግዶፈ ኢታ ኡራ ꬋይስተ፤ እስራኤለ ኡባይ ሄሳ ስእድ ያያና።
DEU 21:22 እስ አስ ሀይቆ ፕርድስያ ባላ ኦꬅኮ፥ ነ እያ ምꬃ ቦላ ካቃዳ ዎꬍኮ፥
DEU 21:23 ሄ ምꬃ ቦላ እያ አሀይ አቆፖ፤ እያ ሄ ጋላስ ሞጋ። ምꬃ ቦላ ካቀትድ ሀይቅያ ኦንካ ፆሳን ባደትዳይሳ። ጎዳይ፥ ነ ፆሳይ ነዉ ላታ ኦꬅድ እምያ ነ ቢታ ቱንሶፓ።
DEU 22:1 እስራኤለ አሳ ቦር ዎይኮ ዶርስ ꬋይድ ብሽን ደምኮ አጋ አꬎፋ፤ ላጋ ኤሀዳ እያ ጎዳስ እማ።
DEU 22:2 ሄ መህያ ጎዳይ ነ ሄራ አስ ግዶና እፅኮ ዎይኮ እያ ጎዳይ ኦነኮ ነ ኤሮና እፅኮ፥ እያ ጎዳይ ኮይሸ ያና ጋካናዉ ነ ሶ ኤፋ፤ እ ኮይሸ ዪኮ እያዉ እማ።
DEU 22:3 ሄሳዳ ሀረ ዎይኮ ማኦ ዎይኮ አይባካ ꬋይዳባ ደምኮ፥ ሄሳዳ ኦꬃ።
DEU 22:4 እስራኤለ አሳ ሀረይ ዎይኮ ቦር ኦገን ኩንድን በእኮ፥ ማዳዳ ደንꬃፈ አትሽን፥ አጋዳ አꬎፋ።
DEU 22:5 ማጫስ አደ ማኦ ማኦፎ፤ አደይካ ማጫሳ ማኦ ማኦፎ። ሄሳ መላባ ኦꬅያ ኦናካ ጎዳይ፥ ህንተ ፆሳይ እፄስ።
DEU 22:6 ነ ኦገ ብሽን፥ ምꬃ ቦላ ግድን፥ ሳአን ባ ናኣ ዎይኮ ባ ጱጱልያ ሀጵዳ ካፎ ደምኮ፥ እዮ፥ እ ናይታራ ኦይካዳ ነ ሶ ኤፎፓ።
DEU 22:7 ናይታ ኤፋናዉ ዳንዳኣሳ፤ ሽን አይዉ ባና መላ የዳ አጋ። ሄሳዳ ኦꬅኮ፥ ኔኒ ዱረታዳ አዱሳ ላይꬅ ዳና።
DEU 22:8 ኦራꬃ ኬꬅ ኬፅያ ዎደ ካራፐ አስ ኩንድ ሀይቅን ነ ኦይሸቶና መላ ኬꬃ ቦላ ካተ ጊግሳ።
DEU 22:9 ነ ዎይነ ጋደን ናምኡ ቆሞ ካꬅ ዘሮፓ፤ ሄሳዳ ኦꬅኮ፥ ነ ዘርዳ ካꬃይነ ዎይነይ ናምአይካ ኢታና።
DEU 22:10 ቦርነ ሀረ እስፈ ዋፃዳ ጎዮፓ።
DEU 22:11 ሱፈፐነ ሊኖፐ ኦሰትዳ ማኦ ማኦፋ።
DEU 22:12 ነ ማእያ ማኦይ ኦይዱ ባጋራ ማጫር ደእያባ ግዶ።
DEU 22:13 እስ አስ ማቾ ኤክ ስሚድ እዮ ዶሶና እፅድ፥
DEU 22:14 “ሀ ማችው ታ ኤክያ ዎደ ኩመꬅ ግዱኩ” ያግድ እዮ ኢስድ ኦደትኮ፥
DEU 22:15 ናኤ አዋይነ ናኤ አይያ እ ጌላኦተꬃ ማላ ኤፍድ፥ ካታማ ፐንገን ደእያ ጭማታ በሶ።
DEU 22:16 ናኤ አዋይ ጭማታስ ሀይሳዳ ያግድ ኦዶ፤ “ታኒ ታ ናእዉ ሀ ኡራስ ማቾ ኦꬃዳ እማስ፥ ሽን እዮ እፅስ።
DEU 22:17 እ፥ ‘ነ ናእያ ኩመꬅ ግዱኩ’ ያግድ እዮ ኢስድ ኦድስ። ግዶሽን፥ ‘ታ ናኤ ጌላኦተꬃ ማላ ሀይሳ በእተ’ ” ያግድ፥ እ ጌላኦተꬃ ኤርስያ ጫርቅያ በሶ።
DEU 22:18 ያትኮ፥ ሄ ካታማ ጭማት እያ ጋራፎ።
DEU 22:19 እ እስራኤለ ጌላኤ ሱንꬃ ኢስዳ ግሾ፥ ጭማት እያ ፄቱ ብራ ሳንትመ አጭስድ፥ ናኤ አዋስ እሞ። ናእያ እያዉ ማቾ ግዳዳ ደኦ፤ ባ ደኦ ላይꬃ ኡባን እዮ የዳናዉ በሰና።
DEU 22:20 እያ ሞቶይ ቱማ ግድድ፥ ናእያ ኩመꬅ ግዶና እፅኮ፥
DEU 22:21 እያ ባ አዋ ሶን ደአሸ ላይማትዳ ግሾ፥ ናእዉ እ አዋ ካረ ኤህድ፥ ሄ ካታማ አደት እዮ ሹቻን ጫድድ ዎꬎ። እስራኤለ ግዶን እያ ቦርሶባ ኦꬃሱ፤ ሄሳዳ ኦꬃዳ ነ ግዶፈ ኢታ ድጋ።
DEU 22:22 እስ አስ ሀራ አሳ ማችራ ላይማትሸ ኦይከትኮ፥ እነ እያራ ላይማትዳ ማጫስያ ሀይቆ። ሄሳዳ ኦꬃዳ ነ ግዶፈ ኢታ ድጋ።
DEU 22:23 እስ አስ ሀራ አሳስ ኦይሸታ ጊግዳ ጌላእዉ ካታማ ግዶን ደምድ ኢራ ላይማትኮ፥
DEU 22:24 ኤንታ ናምኣ ካታማፐ ጋፃ ከስድ፥ ሹቻን ጫድድ ዎꬍተ። ናእያ ሀይቀይ፥ ካታማ ግዶን ደአሸ፥ አስ አሻና መላ ዋሳቦና ግሾሳ። ናአይ ሀይቀይ፥ ሀራ አሳስ ጊግዳ ጌላእዉ ኢስዳ ግሾሳ። ሄሳዳ ኦꬃዳ ነ ግዶፈ ኢታ ድጋ።
DEU 22:25 እስ አስ አሳስ ጊግዳ ጌላእዉ አስ ባይና በሳን ዎልቃን ኦይክድ፥ እዮ ኢስኮ፥ እያ ፃላል ሀይቆ።
DEU 22:26 እያ ሀይቆስ ጋꬅያ ናጋራ ኦꬃቦና ግሾ፥ ናኤ ቦላ አይባካ ኦꬆፕተ። ሄስ እስ አስ ጮ ደንድድ ሀራ አስ ዎይሳ መላ።
DEU 22:27 እ እዮ አስ ባይና በሳን ደምድ ኦይክን፥ ሄ ጌላእያ ዋሳሱ፥ ሽን እዮ አሽያ አስ በንትቤና።
DEU 22:28 እስ አስ ኦይሸታቦና ጌላእዉ ኦይክድ፥ እ ጌላኦተꬃ ኤክድ ኦይከተኮ፥
DEU 22:29 ናኤ አዋ እሻታሙ ብራ ሳንትመ አጮ። ያትድ ናእዉ ባዉ ማቾ ኦꬆ። ባ ደኦ ላይꬃ ኡባን እዮ የዶፎ።
DEU 22:30 እስ አስ ባ አዋ ማችዉ ኤክድ፥ ባ አዋ ካዉሾፎ።
DEU 23:1 ሳንጋትዳ ዎይኮ ቃራተትዳ አደይ ጎዳ ሺቁዋ ገሎፖ።
DEU 23:2 ላይማተꬃን የለትዳ አስ ጎዳ ሺቁዋ ገሎፖ። ሀር አቶሽን ታማንꬆ የለተꬅ ጋካናዉ፥ እያ ኮቻፈ ኦንካ ጎዳ ሺቁዋ ገሎፖ።
DEU 23:3 አሞነ አስ ግድን ዎይኮ ሞአበ አስ ግድን፥ ጎዳ አሳ ሺቁዋ ገሎፖ። ሀር አቶሽን ታማንꬆ የለተꬅ ጋካናዉ ኤንታ አሰ ግድዳ ኦንካ ጎዳ አሳ ሺቁዋ ገሎፖ።
DEU 23:4 ኔኒ ግብፀፈ ከያዳ ብሽን፥ ኤንቲ ካꬃራነ ሃꬃራ ነና ሞክቦኮና። ኤንቲ ማሰጰፆመን ፓቶራ ካታማን ደእያ ብኦራ ናኣ ባላም ነና ባዳና መላ ሻምዶሶና።
DEU 23:5 ጎዳይ፥ ነ ፆሳይ ነና ዶስዳ ግሾ ባላማ ስእቤና፤ እያ ባደꬃ ነዉ አንጆን ላምስ።
DEU 23:6 ነ ደኦ ላይꬃ ኡባን ኤንቲ ሳሮ ዳና መላነ ዱረታና መላ አሞቶፋ።
DEU 23:7 ኤዶመት ነዉ ዳቦ ግድያ ግሾ ኤንታ ካꬎፓ፤ ነ ኤንታ ቢታን በተ አስ ግዳዳ ደእዳ ግሾ ግብፀታ ካꬎፓ።
DEU 23:8 ኤንታ ሄꬓንꬆ የለተꬃይ ጎዳ ሺቁዋ ገላናዉ ዳንዳኦሶና።
DEU 23:9 ነ ሞርከታ ኦላናዉ ከያዳ ዱንካንዳ በሳን ነና ቱናተꬃፈ ናጋ።
DEU 23:10 ቃማ አሙሆን አቱንꬃይ ጉክን፥ እርፃባይ እያ ቦላ ደእያ ኦንካ ጉታፐ ጋፃ ከይድ ያን ጋምኦ።
DEU 23:11 ሳእ ኦማርስያ ዎደ ባ አሳተꬃ ሜጨትድ፥ አው ዉልያ ዎደ ጉታ ስሞ።
DEU 23:12 ነ ዎራ ሼሽ ኡትያ በሲ ጉታፐ ካረን ጊግሳ።
DEU 23:13 ሼሻስ ኡትያ ኦላ ቦክያ ሚሸ ኦላ ሚሸራ ጋꬃዳ ኦይካ፤ ሼሻስ ኡታ ስማዳ ኦላን ቢታ ዛራ።
DEU 23:14 ጎዳይ፥ ነ ፆሳይ ነና ናጋናዉነ ነ ሞርከታ ነ ኩሸን አꬅድ እማናዉ፥ ነ ጉታን ስመረቴስ። እ ያን ሻትያባ በእድ፥ ነና አግድ ስሞና መላ ነ ጉታይ ጌሽ ግዳናዉ ኮሼስ።
DEU 23:15 ባ ጎዳፐ ባቃትድ፥ ኔኮ ይዳ አይልያ ዛራዳ እያ ጎዳስ እሞፋ።
DEU 23:16 እ ነ ካታማታፐ እሱዋን፥ ባ ኮይዳ በሳን ባ ኮይዳ ዎደ ጋካናዉ ደኦ፤ እያ ኡንኤꬆፋ።
DEU 23:17 እስራኤለ አሳፐ ኦንካ አደ ግድን ዎይኮ ማጫ ግድን፥ ኤቃ ጎይንያ አሳይ ኦይሳዳ ላይማቶፖ።
DEU 23:18 አደ ግድን ዎይኮ ማጫስ ግድን፥ ላይማተꬃን ደምዳ ሚሸ ቃንገꬅ ጋꬃናዉ ጎዳ ነ ፆሳ ኬꬅ ኤሆፖ። ኤንታ ናምኣ ጎዳይ ነ ፆሳይ እፄስ።
DEU 23:19 ህንተ ኮቸ ግድዳ እስራኤለ አሳስ ሚሸ ዎይኮ ካꬅ ዎይኮ ሀራባ ታልአዳ የሎ ኤኮፋ።
DEU 23:20 ሀራ ቢታ አሳፐ የሎ ኤካናዉ ዳንዳኣሳ፤ ሽን ኔኒ ላታናዉ ገልያ ቢታን ነ ኦꬅያባ ጎዳይ፥ ነ ፆሳይ አንጃና መላ ነ ኮቸ ግድዳ እስራኤለ አሳስ የሎራ ታልኦፋ።
DEU 23:21 ጎዳስ፥ ነ ፆሳስ፥ እማናዉ ቃንገትዳባ ጋꬃናዉ ጋምኦፋ። ጎዳይ ነ ፆሳይ ነ ቃንግዳይሳ ኩመꬅ ኔፐ ኮይያ ግሾ፥ ፖሎና እፅኮ ነዉ ናጋራ ግዳና።
DEU 23:22 ሽን ነ ቃንጎና አግኮ ሄስ ናጋራ ግደና።
DEU 23:23 ጎዳስ ነ ፆሳስ፥ እማና ግዳ ነ ዶናን ኦደትዳባ ኔኒ ዶሳን እማና ግዳ ግሾ፥ ነ እንፃርሳን ኦደትዳባ ፖላ።
DEU 23:24 ኔኒ እስ አሳ ዎይነ ጋደ ግዶራ አꬍያ ዎደ ዎይንያፐ ኮይዳ መላ ማ፥ ሽን እያፐ አይባካ ነ ኦይክዳ ሚሸን የጎፋ።
DEU 23:25 እስ አሳ ጋደራ ኔኒ አꬍያ ዎደ ሄ ጋድያን ደእያ ትያፐ ዱꬃዳ ማ፤ ሽን ካꬃፈ ጫካዳ ነ ሶ ኤፎፓ።
DEU 24:1 እስ አስ ማቾ ኤክ ስሚድ፥ እስ ኢታባ እ ቦላ ደምድ እዮ እፅድ፥ ፕርማ ዳክድ፥ የድኮ፥
DEU 24:2 እያ ሶፐ ከያዳ፥ ሀራ አዝና ገልኮ፥
DEU 24:3 ሄ ናምአንꬆ አዝናይ እዮ ዶሶና እፅድ፥ ፕርማ ዳክድ፥ እዮ ባ ሶፐ ከስድ የድኮ፥ ዎይኮ እዮ ኤክዳ ናምአንꬆ አዝናይ ሀይቅኮ፥
DEU 24:4 እያ ቱንዳ ግሾ፥ ኮይሮ ኤክዳ አዝናይ፥ ዛሪድ እዮ ኤኮፎ። ሄስ ጎዳ ስንꬃን እፀትዳባ፤ ነ ጎዳይ፥ ነ ፆሳይ ነ እምያ ቢታን ሄሳ መላ ናጋራ ኦꬆፋ።
DEU 24:5 ኦራꬃ ማቾ ኤክዳ አስ ኦላስ ቦፖ፤ ሀራ ዴፆ ኦሶ ኦꬆፎ። እስ ላይꬅ አꬋና ጋካናዉ አዉካ ቦና ባ ማችዉ ኡፋይሶ።
DEU 24:6 እስ አሳ ዎፃ ዎይኮ ማይደ አጮስ ኦይኮፋ፤ ሄስ ኬꬃ አሳይ ምያባ ꬋይድ ሀይቆ ጉሱ።
DEU 24:7 እስ እስራኤለ ግድዳ ባ እሻ ካይሶት ኤፍድ፥ አይለ ከሰይ ዎይኮ ሀራስ ባይዝያ ኡራይ ሀይቆ። ሄሳዳ ኦꬃዳ ኢታ ኡራ ነ ግዶፈ ድጋ።
DEU 24:8 ጎጋ ሀርገፈ ነና ምንꬃዳ ናጋ፤ ሌወ ኮቸ ግድዳ ካህነት ነና ታማርስያ ኡባ ፖላ፤ ታ ኤንታዉ እምዳ ኪታ ናጋ።
DEU 24:9 ኔኒ ግብፀፈ ከያዳ ኦገን ደእሽን፥ ጎዳይ ነ ፆሳይ ማይራም ቦላ ኦꬅዳይሳ አኬካ።
DEU 24:10 እስ አሳስ እስባ ታልአዳ፥ ኦይꬅያባ ኦይቻናዉ እያ ሶ ገሎፓ።
DEU 24:11 ኔኒ ካረን ኤቅዳሽን፥ ነ ታልእዳ ኡራይ ኦꬅያባ ሶፐ ከስድ ነዉ እሞ።
DEU 24:12 እ ማንቆ ግድኮ፥ ኔኒ አጮስ ኦይክዳ እያ ማኡዋ ነ ሶን አይሶፓ።
DEU 24:13 እ ማእድ አቃና መላ ሳእ ኦማርስያ ዎደ እያዉ ጉየ ዛራ፤ እ ነና ጋላታና። ሄስ ጎዳ ነ ፆሳ ስንꬃን ነዉ ፅሎተꬃ ኦሶ ግድድ ታይበታና።
DEU 24:14 ማንቆነ ማደ ኮይድ ዶካለትዳ፥ እስራኤለ ግድዳ ነ እሻ ግድን ዎይኮ ነ ካታማታፐ እሱዋን ደእያ ሀራ ቢታ አስ ናቆፋ።
DEU 24:15 እ ሀች ኦꬅዳይሳ ሀች ኤካናዉ ምንꬅድ ኮይያ ግሾ፥ አው ዉሎና እያዉ ቃንፃ። ሄስ ሀኖና እፅኮ፥ ማንቆይ ጎዳኮ ዋስን ሄስ ነዉ ናጋራ ግዳና።
DEU 24:16 ናይት ኦꬅዳ ናጋራ ግሾ፥ አዋታ ዎꬋናዉ በሰና፤ ቃስ አዋት ኦꬅዳ ናጋራ ግሾ ናይታ ዎꬋናዉ በሰና። ኦንካ ባ ኦꬅዳ ናጋራን ናጋራን ሀይቃናዉ በሴስ።
DEU 24:17 ሀራ ቢታ አሳ ፕርዳነ ይኦ ናይታ ፕርዳ ዎቢሶፓ፤ አምኤ ማኡዋ አጮ ግሾ ኦይኮፋ።
DEU 24:18 ኔኒ ግብፀ ቢታን አይለ ግድዳይሳነ ጎዳይ ነ ፆሳይ ነና ያፐ ዎዝድ ከስዳይሳ አኬካ። ታኒ ነና ኪተይ ሄሳ ግሾሳ።
DEU 24:19 ኔኒ ካꬅ ጫክያ ዎደ ነ ዶግዳ ምርቅያ ኤካናዉ ጉየ ስሞፋ። ጎዳይ፥ ነ ፆሳይ ነ ኩሸ ኦሶ ኡባን ነና አንጃና መላ ሄሳ በተ አሳስ፥ ይኦ ናይታስነ አምኤታስ አጋጋ።
DEU 24:20 ኔኒ ሻማሆ አይፈ ማፅያ ዎደ ዉርሳዳ ማፃናዉ ናምአንꬆ ጉየ ስሞፋ። አትዳይሳ በተ አሳስ፥ ይኦ ናይታስነ አምኤታስ አጋጋ።
DEU 24:21 ኔኒ ዎይነ አይፈ ማፅያ ዎደ ዉርሳዳ ማፃናዉ ናምአንꬆ ጉየ ስሞፋ። አትዳይሳ በተ አሳስ፥ ይኦ ናይታስነ አምኤታስ አጋጋ።
DEU 24:22 ኔኒ ግብፀ ቢታን አይለ ግዳዳ ደእዳይሳ ዶጎፓ። ታኒ ነና ኪተይ ሄሳ ግሾሳ።
DEU 25:1 ናምኡ አሳት ኦየትድ ፕርዳ ኬꬅ ቢኮ፥ ዳይናት ፅሉዋ ነ ልከ ግድ፥ ናቅዳይሳ ነ ባላ ግድ ፕርዶ።
DEU 25:2 ባልዳይሳ ጋራፎ በሲያባ ግድኮ፥ እያ ትራራ ዝንእስድ ዞኮን ሾጫና መላ ዳይናይ ኪቶ። እ ጋራፈተይ ዳይና ስንꬃንነ እ ኦꬅዳ ባላ መላ ግዶ።
DEU 25:3 እ ኦይታሙ ጋካናዉ ጋራፈታናዉ ዳንዳኤስ፥ ሽን ሄሳፈ ዳሮፖ። ሄሳፈ ዳርኮ ነ እሻይ ነ ስንꬃን ካዉያና።
DEU 25:4 ዉዱማን ካꬅ የꬍያ ቦራ ዶና ቃቾፋ።
DEU 25:5 እስፈ ደእያ እሻታፐ እሶይ ናአ የሎና ሀይቅኮ፥ እያ ማችያ ሀራ አስ ገሎፖ። እ አዝና እሻይ እዮ ኤክድ፥ እዉ ኮሽያባ ኩንꬆ።
DEU 25:6 ሀይቅዳ እሻ ሱንꬃይ እስራኤለ አሳ ግዶፈ ቁሸትድ ꬋዮና መላ እያ፥ ኮይሮ የልያ አደ ናአይ ሀይቅዳ እሻ ሱንꬃን ፄገቶ።
DEU 25:7 ግዶሽን፥ እ ባ እሻ ማችዉ ኤካናዉ ኮዮና እፅኮ፥ ማጫስያ ካታማ ፐንገን ደእያ ጭማታኮ ባዳ፥ “ታ አዝና እሻይ ባ እሻ ሱንꬃይ እስራኤለን ዳና መላ ኮይቤና፤ ታና ኤክድ፥ ታዉ ኮሽያባ ኩንꬆና እፅስ” ያጋዳ ኦዶ።
DEU 25:8 ካታማ ጭማት እያ ፄግድ ኦይችን፥ እ ሀእካ፥ “ታኒ እዮ ኤክከ” ጊኮ፥
DEU 25:9 ማጫስያ ጭማታ ስንꬃን እያኮ ሺቃዳ፥ እያ ጫማፈ እሱዋ ከሳዳ፥ እያ ሶምኦን ጩታዳ፥ “ባ እሻስ ዘረꬅ ዳና መላ ኮዮና አሳ ቦላ ሀይሳ መላ ካዉሽ ጋካናዉ በሴስ” ያጎ።
DEU 25:10 ያትን፥ ሄ ኡራ ሶ አሳይ እስራኤለ ኮቻ ግዶን፥ “ጫማ ከስዳ አሳ ሶ” ጌተትድ ፄገትሸ ዳና።
DEU 25:11 ናምኡ አሳት ዋትሽን፥ እሱዋ ማችያ ያዳ፥ ባ አዝና ሾጨይሳ ኩሸፐ አሻናዉ፥ ባ ኩሽያ የዳዳ ሀንኩዋ አደተꬃ ኦይክኮ፥
DEU 25:12 እ ኩሸይ ቃይ ባይና ቃንፀቶ።
DEU 25:13 ግታነ ጉꬅ ግድዳ ናምኡ ምዛነ ኦይኮፋ።
DEU 25:14 ዳሮነ ጉꬅ ማክያ ናምኡ ማካ ሚሸይ ነዉ ዶፖ።
DEU 25:15 ጎዳይ፥ ነ ፆሳይ ነዉ እምያ ቢታን አዱሳ ላይꬅ ነ ዳና መላ ልከ ምዛነይነ ማካ ሚሸይ ነዉ ደኦ።
DEU 25:16 ጎዳይ ነ ፆሳይ ሄሳ መላባ ኦꬅድ፥ ባለꬅያ ኦናካ እፄስ።
DEU 25:17 ነ ግብፀፈ ከያዳ ኦገ ቦላ ደእሽን፥ አማለቃት ነ ቦላ ኦꬅዳባ አኬካ።
DEU 25:18 ኤንቲ ፆሰ ያዮና ደረ፤ ነ ኦግያን ኤንቲ ኔራ ኤቀትዶሶና። ነ ብሽን፥ ዳቡርድ ጉየ አትዳ አሳ ኡባ ዎꬍዶሶና።
DEU 25:19 ሄሳ ግሾ፥ ጎዳይ ነ ፆሳይ ነና ሄ ቢታ ላትስድ፥ ነ ዩሹዋን ደእያ ሞርከታፐ ነና ሸምፕስያ ዎደ ሀ ቢታን ኤንታ ሀሳይያ አስ ꬋያና ጋካናዉ አማለቃታ ኡባ ꬋይሳ፤ ሄሳ ኦꬃናይሳ ዶጎፓ።
DEU 26:1 ጎዳይ፥ ነ ፆሳይ ነና ላትስያ ቢታ ገላዳ፥ ዎፑ ጋዳ ዱስ ኦይክያ ዎደ፥
DEU 26:2 ጎዳይ፥ ነ ፆሳይ ነዉ እምያ ቢታን ሞክዳ ካꬃ ኡባፈ ባይራ፥ ጎዳይ ነ ፆሳይ ባ ሱንꬃይ ፄገታና መላ ዶርዳ በሳ ኤካዳ ባ።
DEU 26:3 ሄ ዎደ አዋትያ ካህንያኮ ባዳ፥ “ጎዳይ ታዉ እማና ግድ ካሰ ኑ ማይዛታስ ጫቅዳ በሳ ኑና ገልስዳ ጎዳስ፥ ኑ ፆሳስ፥ ሀች ማርካታይስ” ያግተ።
DEU 26:4 ካህነይ ካꬃ ነ ኩሸፐ ኤክድ፥ ጎዳ ነ ፆሳ ያርሾ በሳ ስንꬃን ዎꬆ።
DEU 26:5 ሄሳፈ ጉየ፥ ጎዳ ነ ፆሳ ስንꬃን ሀይሳዳ ያጋ፤ “ታ ማይዛይ በሳፈ በሰ ዩይሸ ደእዳ ሶረ ቢታ አስ፤ እ ታይቦን ጉꬃ አሳታራ ግብፀ ዎꬍድ ያን ደእስ። እ ያን ደእሸ ግታ፥ ዎልቃማነ ታይቦን ዳሮ ደረ ግድስ።
DEU 26:6 ሽን ግብፀት ኑኒ አይለ ግድድ ኦꬃና መላ ኡንኤꬅዶሶና፤ ካዉሽዶሶና።
DEU 26:7 ያትን፥ ኑኒ ጎዳኮ፥ ኑ አዋታ ፆሳኮ ዋስዳ። ጎዳይ ኑ ዋሱዋ ስእስ፤ ኑ ዋይያ፥ ኑ ዳቡራነ ኑ ኡንኤተꬃ በእስ።
DEU 26:8 ጎዳይ ባ ዎልቃማ ኩሽያን፥ ባ ምጨትዳ ቀስያን፥ ግታ ዳጋማን፥ ማላታንነ ማላልስያባታን ኑና ግብፀፈ ከስስ።
DEU 26:9 ሀ በሳ ኑና ኤህድ፥ ማꬅነ ኤስ ጎግያ ሀ ቢታ ኑስ እሚስ።
DEU 26:10 ሄኮ፥ ጎዳይ ኑስ እምዳ ቢታ አይፍያፐ ባይራ ኤሀስ” ያጋዳ፥ ካꬃ ጎዳ ነ ፆሳ ስንꬃን ዎꬃዳ፥ እያ ስንꬃን ጉፋና።
DEU 26:11 ነዉነ ነ ሶ አሳስ ጎዳይ፥ ነ ፆሳይ እምዳ ሎኦባ ኡባን ኡፋይታሸ፥ ጎዳ ጋላታ። ሌወትነ ነ ግዶን ደእያ በተ አሳ ኡባይካ ኔራ ኡፋይቶ።
DEU 26:12 አስራታ ከስያ ሄꬓንꬆ ላይꬃን፥ ነ ካꬃፈ አስራታ ከሳ ኦንግዳፐ ጉየ ነ ካታማን ደእያ ሌወታስ፥ በተ አሳስ፥ ይኦታስነ አምኤታስ እማዳ ኤንቲ ካልድ ማና መላ ኦꬃ።
DEU 26:13 ጎዳ፥ ነ ፆሳኮ፥ “ታኒ ታ ሶፐ ዱማትዳ ካꬃ እሞታ ከሳዳ፥ ነ ታና ኪትዳይሳዳ ሌወታስ፥ በተ አሳስ፥ ይኦታስነ አምኤታስ እማስ። ታኒ ነ ኪታፐ እሱዋካ መንꬃብከ፤ እሱዋካ ዶጋ አጋብከ።
DEU 26:14 ታ ካዮትያ ዎደካ፥ ሄ አስራታፐ አይባካ ማብከ፤ ታ ቱንዳ ዎደካ እያ ቦቻብከ፤ ሀይቅዳ አሳስ እያፐ እማብከ። ታኒ ጎዳ፥ ታ ፆሳ ቦንቻስ፤ እ ታና ኪትዳባ ኡባ ፖላስ።
DEU 26:15 ነኒ ደእያ ጌሻ በሳፈ፥ ሳሎፐ ዱገ ፄላ፤ ነ ደርያ እስራኤለ አንጃ፤ ካሰ ኑ ማይዛታስ ነ እማና ጋዳ ጫቅዳ ማꬅነ ኤስ ጎግያ ቢታ ኑስ አንጃ” ያጋ።
DEU 26:16 ነ ሀ አዋጆታነ ዎጋታ ናጋና መላ ጎዳይ ነ ፆሳይ ሀች ነና ኪትስ። ሄሳ ግሾ፥ ነ ኩመꬃ ዎዛናፐነ ኩመꬃ ሸምፑዋፈ ኤንታ ናጋ።
DEU 26:17 ጎዳይ፥ ነው ፆሰ ግደይሳነ ነኒ እያ ኦግያን ባናዉ፥ እያ ዎጋ፥ እያ ኪታነ ህግያ ናጋናይሳ ሀች ኤርሳዳሳ።
DEU 26:18 ጎዳይ ባ ገልዳ ቃላዳ ነኒ እያ ደረ ግደይሳ፥ እያዉ ቡዞ ሚሸ ግደይሳነ እያ ኪታ ኡባ ናገይሳታ ግደይሳ ሀች ነና ኤርስስ።
DEU 26:19 ሄሳ ነኒ ኦꬅኮ፥ እ መꬍዳ ደረ ኡባፈ አꬅድ ነና ጋላታን፥ ሱንꬃንነ ቦንቾን ግታ ደረ ኦꬃና። እ ገልዳ ቃላዳ ነኒ እያዉ ጌሻ ደረ ግዳና።
DEU 27:1 ሄሳፈ ጉየ፥ ሙሰይነ እስራኤለ ጭማት አሳኮ፥ “ታኒ ሀች ህንተና ኪትያ ኪታ ናግተ።
DEU 27:2 ዮርዳኖሰ ሻፋ ፕናዳ፥ ጎዳይ ነ ፆሳይ ነዉ እምያ ቢታ ገልያ ዎደ ግታ ሹቻታ ኤሳዳ ኖራ ትያ።
DEU 27:3 ጎዳይ፥ ነ አዋታ ፆሳይ ነዉ እማና ግዳይሳዳ ማꬅነ ኤስ ጎግያ ቢታ፥ ጎዳይ ነ ፆሳይ ነዉ እምያ ቢታ ነ ፕንያ ዎደ ሀ ህገታ ኡባ ሄ ሹቻታ ቦላ ፃፋ።
DEU 27:4 ኔኒ ዮርዳኖሰ ፕንዳ ዎደ ታ ነና ሀች ኪትዳይሳዳ ሀ ሹቻታ ኤባላ ዙማ ቦላ ኤሳዳ ኤንታ ቦላ ኖራ ትያ።
DEU 27:5 ሄ በሳን ጎዳስ፥ ነ ፆሳስ፥ ብራት ቦቾና ሹቻፈ ያርሾ በሲ ጊግሳ።
DEU 27:6 ጎዳስ፥ ነ ፆሳስ ያርሾ በሲ ማሰትቦና ሹቻፈ ኦꬃ፤ እያ ቦላ ጎዳስ፥ ነ ፆሳስ ፁሳ ያርሾ ያርሻ።
DEU 27:7 እስፈተꬃ ያርሹዋ ሺሻዳ ማሸ ጎዳ፥ ነ ፆሳ ስንꬃን ኡፋይታ።
DEU 27:8 ሀ ህገታ በንታና መላ ኦꬃዳ ሀ ሹቻታ ቦላ ቆንጨን ፃፋ” ያግስ።
DEU 27:9 ሙሰይነ ሌወ ግድዳ ካህነት እስፈ አሳኮ፥ “እስራኤለ፥ ስእ ጋዳ ዎዛናፐ ስአ፤ ሀች ነ ጎዳ፥ ነ ፆሳ ደረ ግዳዳሳ።
DEU 27:10 ታ ሀች ነዉ እምያ ጎዳ፥ ነ ፆሳ አዋጆታ ናጋነ ኪተታ” ያግስ።
DEU 27:11 ሄ ጋላስ ሙሰይ አሳ ሀይሳዳ ያግድ ኪትስ።
DEU 27:12 “ህንተ ዮርዳኖሰ ፕንዳፐ ጉየ ጋርዛና ዙማ ቦላ ኤቅድ አሳ አንጃናይሳት፥ ስሞና፥ ሌወ፥ ይሁዳ፥ ይሳኮራ፥ ዮሰፋነ ብንያመ ኮቻታ።
DEU 27:13 ቃስ ኤባላ ዙማ ቦላ ኤቅድ አሳ ባዳናይሳት፥ ሮቤላ፥ ጋደ፥ አሴራ፥ ዛብሎና፥ ዳነነ ንፍታለመ ኮቻታ።
DEU 27:14 “ሌወት ባንታ ቃላ ꬎቁ ኦꬅድ፥ እስራኤለ አሳኮ ሀይሳዳ ያጎ።
DEU 27:15 ጎዳ ስንꬃን እፀትዳባ ግድያ ግሾ፥ ኩሸ ሂላንችጮይ ምꬅ ማስድ፥ ብራታ ሼሽድ ዎይኮ ሹች ቆፅድ ኦꬅዳ ኤቃ ጌማን ጎይንያ ኦንካ ባደትዳይሳ ግዶ” ጊኮ፥
DEU 27:16 “ባ አዋ ዎይኮ ባ አይዉ ካዉሽያ ኦንካ ባደትዳይሳ ግዶ” ጊኮ፥
DEU 27:17 “ባ ሾሩዋ ዛዋ ሱግያ አስ ባደትዳይሳ ግዶ” ጊኮ፥
DEU 27:18 “ቆቀይ ባናዉ በሲያ ኦግያፐ ሀራ ሶ ዛርያ አስ ባደትዳይሳ ግዶ” ጊኮ፥
DEU 27:19 “በተ አሳ፥ ይኦ ናይታነ አምኤታ ፕርዳ ጌላይያ አስ ባደትዳይሳ ግዶ” ያግኮ፥
DEU 27:20 “ባ አዋ ማችዉ ፃልድ፥ ባ አዋ ቦንቹዋ ቃርያ አስ ባደትዳይሳ ግዶ” ጊኮ፥
DEU 27:21 “መሄራ ቱንያ አስ ባደትዳይሳ ግዶ” ጊኮ፥
DEU 27:22 “ባ ምቾ ግድዳ አዋ ዎይኮ አየ ናኤራ ቱንያ አስ ባደትዳይሳ ግዶ” ጊኮ፥
DEU 27:23 “ባ ማቸ አየራ ቱንያ አስ ባደትዳይሳ ግዶ” ጊኮ፥
DEU 27:24 “አሰ ጌማን ዎꬍያ አስ ባደትዳይሳ ግዶ” ጊኮ፥
DEU 27:25 “ሚሸን ሻመትድ፥ ፅሎ አስ ዎꬍያ አስ ባደትዳይሳ ግዶ” ጊኮ፥
DEU 27:26 “ሀ ህገታ ናጎና አስ ባደትዳይሳ ግዶ” ጊኮ፥
DEU 28:1 ኔኒ ጎዳ ነ ፆሳስ ፖሎ ኪተትኮ፥ ሀች ታ ነዉ እምያ ኪታ ኡባ ምንꬃዳ ናግኮ፥ ጎዳይ፥ ነ ፆሳይ ቢታን ደእያ ካዎተꬃታ ኡባፈ አꬅድ ነና ꬎቁ ꬎቁ ኦꬃና።
DEU 28:2 ኔኒ ጎዳ፥ ነ ፆሳስ ኪተትኮ፥ ሀይሳፈ ካልድ ደእያ አንጆ ኡባይ ነባ ግዳና።
DEU 28:3 ነ ካታማንነ ነ ጎሻን አንጀትዳይሳ ግዳና።
DEU 28:4 ነ ኡሎ አይፈይ፥ ነ ካꬃይ፥ ነ መሄይ፥ ነ ዶርሳትነ ነ ዴሻት አንጀትዳይሳታ ግዳና።
DEU 28:5 ነ ኬሸይነ ነ ሙናቃ ሚሸይ አንጀትዳይሳ ግዳና።
DEU 28:6 ነ ከሳይነ ነ ገሎይ አንጀትዳይሳ ግዳና።
DEU 28:7 ነ ቦላ ደንድያ ነ ሞርከታ፥ ጎዳይ ነ ስንꬃን ፆነትዳይሳታ ኦꬃና። ኤንቲ ነ ቦላ እስ ኦገራ ያና፥ ሽን ላፑን ኦገራ ነ ስንꬃፈ ባቃታና።
DEU 28:8 ጎዳይ ነ ኩሸይ ኦይክያባነ ነ ሻልያ አንጃና፤ ጎዳይ፥ ነ ፆሳይ ነዉ እምያ ቢታን ነና አንጃና።
DEU 28:9 ኔኒ ጎዳ፥ ነ ፆሳ ኪታ ናግኮነ እያ ኦግያን ቢኮ፥ እ ነዉ ጫቅዳይሳዳ ጎዳይ ነና ባዉ ጌሻ ደረ ኦꬅድ ኤሳና።
DEU 28:10 ሄሳፈ ጉየ፥ ቢታን ደእያ አሳ ኡባይ ጎዳይ ባ ሱንꬃን ነና ፄግዳይሳ በእድ ያያና።
DEU 28:11 ጎዳይ ነዉ እማናዉ ነ ማይዛታስ ጫቅዳ ሄ ቢታን፥ ነ ኡሎ አይፍያ፥ ነ መህያ፥ ነ ጎሻ አይፍያ ዳርስድ አንጃና።
DEU 28:12 ነ ኩሸ ኦሶ ኡባ አንጃናዉነ፥ ጎዳይ ነ ቢታስ እራ ዎደን ዎደን ቡክሳናዉ ባ ምንጃ ኬꬃ፥ ሳሎ ፐንግያ ነዉ ዶያና። ኔኒ ዳሮ ካዎተꬃታስ ገደ ታልአናፐ አትሽን፥ ኦደፈካ ሃ ታልአካ።
DEU 28:13 ጎዳይ ነና ኡባስ ካጨ ከሳናፐ አትሽን፥ ጎይና ከሰና። ሀች ታ ነዉ እምያ፥ ጎዳ፥ ነ ፆሳ ኪታ ስአዳ፥ ምንꬃዳ ናግኮ፥ ነ ቦላ ግዳናፐ አትሽን፥ ጋርሰ ግዳካ።
DEU 28:14 ታ ነዉ ሀች እምዳ ኪታፐ ሀድርስ ዎይኮ ኡሻች ጋዳ፥ ሀራ ፆሳታ ካሎፋ፤ ኤንታ ጎይኖፋ።
DEU 28:15 ሽን ኔኒ ጎዳ፥ ነ ፆሳስ ኪተቶና እፃዳ፥ ሀች ታ ነና ኪትያ ዎጋነ ህግያ ኡባ ናጎና እፅኮ፥ ሀይሳፈ ካልድ ደእያ ባደꬃት ኡባይ ነ ቦላ ያናነ ነና ደማና።
DEU 28:16 ነ ካታማንነ ነ ጎሻን ባደትዳይሳ ግዳና።
DEU 28:17 ነ ኬሸይነ ሙናቃ ሚሸይ ባደትዳይሳ ግዳና።
DEU 28:18 ነ ኡሎ አይፈይ፥ ነ ካꬃ አይፈይ፥ ነ መሄይ፥ ነ ዶርሳይነ ዴሻይ ባደትዳይሳ ግዳና።
DEU 28:19 ነ ከሳይነ ነ ገሎይ ባደትዳይሳ ግዳና።
DEU 28:20 ኔኒ ኢታ ኦሶ ኦꬃዳ ታና አግዳ ግሾ፥ ኔኒ ኤሶን ꬋያና ጋካናዉ ነ ኦꬅያ ኦሶ ኡባን ጎዳይ ባደꬅ፥ ዳጋማነ ካዉሻተꬅ የዳና።
DEU 28:21 ኔኒ ላታናዉ ብያ ቢታፈ ꬋያና ጋካናዉ ጎዳይ፥ ጋዶይ ኔፐ ዱፆና መላ ኦꬃና።
DEU 28:22 ጎዳይ ነና ግልቃተꬃን፥ ምሻን፥ ማዱንꬃን፥ ፁግያ አዋን፥ ኮሻን፥ ዎልኦንነ ካꬅ ꬋይስያ ሀርመን ነ ꬋያና ጋካናዉ ሾጫና።
DEU 28:23 ኔፐ ቦላራ ደእያ ሳሎይ ናሰ ብራታ ግዳና፤ ኔፐ ጋርሳራ ደእያ ቢታይ ብራታ ግዳና።
DEU 28:24 ጎዳይ ነ ቢታን ቡክያ እራ ብዶነ ባና ከሳና፤ ኔኒ ꬋያና ጋካናዉ ሳሎፐ ባን ቡካና።
DEU 28:25 ጎዳይ ነና ነ ሞርከታን ፆንሳና። ነኒ ኤንታ ኦላናዉ እስ ኦገራ ከያና፤ ሽን ላፑን ኦገራ ነ ኤንታ ስንꬃፈ ባቃታና። ቢታን ደእያ ካዎተꬅ ኡባይ ነ ቦላ ጋክዳባ በእድ፥ ያሻን ኮኮራና።
DEU 28:26 ነ አሀይ ሳሎ ካፎታስነ ባዞ ዶአታስ ካꬅ ግዳና፤ ኤንታ የደꬅያ ኦንካ ዴና።
DEU 28:27 ጎዳይ ነና ፓፆይ ባይና ግብፀ ጋዶን፥ ክፃን፥ ማዱንꬃንነ ፑሶ ሄርገን ሾጫና።
DEU 28:28 ጎዳይ ነና ጎሻተꬃን፥ ቆቀተꬃንነ ዳጋማን ሾጫና።
DEU 28:29 ሴታ ጋላስ ኔኒ ቆቀይ ታታፈይሳዳ ታታፋና፤ ነ ኦꬅያባ ኡባይ ነዉ ጊጎና እፃና። ነ ደኦ ላይꬃ ኡባን ነ ኡንኤታናነ ቦንቀታዳ ዳና። ነና ማድያ አስ ደማካ።
DEU 28:30 ነ ማቾ ኦይቻ ጊግሳና፥ ሽን እዮ ሀር ዳፍ ኤክድ ኢሳና። ኔኒ ኬ ኬፃና፥ ሽን እያን ደአካ። ዎይነ ቶካና፥ ሽን እያ አይፍያ ማካ።
DEU 28:31 ነ ቦራይ ነ ስንꬃን ሹከታና፥ ሽን እያ አሹዋ ማካ። ነ ሀረይ ኔፐ ዎልቃን ኤከታና፥ ሽን ነዉ ጉየ ስመና። ነ ዶርሳት ነ ሞርከታስ እመታና፥ ኤንታ አሻናዉ ነና ማድያ አስ ዴና።
DEU 28:32 ነ አይፈይ በእሽን ነ አደ ናይትነ ማጫ ናይት ሀራ ካዎተꬃስ እመታና። ኤንቲ ስምን በአና ጋዳ ፄልሽን፥ ነ አይፈይ ቶሉ ግድ አታና፤ ሄሳ ድጋናዉ ነዉ ዎልቅ ዴና።
DEU 28:33 ነ ቢታ አይፍያነ ነ ጫዋ ኡባ ነ ኤሮና አስ ማና፤ ነ ደኦ ላይꬃ ኡባን ኡንኤትዳይሳነ ናቀትዳይሳ ግዳና።
DEU 28:34 ነ በእያ ኢታት ነና ጎሻና።
DEU 28:35 ጎዳይ ፓፆይ ባይና ኢታ ማዱንꬃን ነ ጉልባታነ ነ ዎድርያ ሀርግሳና፤ ቶሆፐ ሁጰ ጋካናዉ፥ ነና ሄ ማዱንꬃን ሾጫና።
DEU 28:36 ጎዳይ ነናነ ነ ካዋ፥ ነናነ ነ ማይዛታ ኤሮና አሳ ቢታ ኤፋና። ሄሳን ኔኒ ምꬃፈነ ሹቻፈ ኦሰትዳ ሀራ ፆሳታ ጎይናና።
DEU 28:37 ጎዳይ ነና ላልያ ሀራ ካዎተꬃታ ግዶን ኔኒ ሚቻስነ ካሳስ አታና።
DEU 28:38 ኔኒ ዳሮ ካꬅ ነ ጎሻን ዘራና፤ ሽን ቦለይ ምድግን፥ ጉꬃ ካꬅ ሺሻና።
DEU 28:39 ዎይነ ቶካዳ እያ ሀርማና፥ ሽን ጉፁነይ እያ ምድግን፥ እያፐ አይፈ ደማካ ዎይኮ እያፐ ኡያካ።
DEU 28:40 ነ ቢታ ኡባን ሻማሆይ ዶላና፥ ሽን አይፈይ ቆቆፈትድ ዉርያ ግሾ፥ ሻማሆ ዛይተ ደማካ።
DEU 28:41 ነ አደነ ማጫ የላና፥ ሽን ኦል ድእድ ኤፍያ ግሾ ኤንቲ ኔራ ዶኮና።
DEU 28:42 ነ ምꬃነ ነ ቢታ አይፍያ ቦለይ ዉርሳና።
DEU 28:43 ነ ግዶን ደእያ በተ አሳይ ነ ቦላ ꬎቁ ꬎቁ ጋና፥ ሽን ነ ጉየ አታዳ ዝቅ ዝቅ ጋና።
DEU 28:44 እ ነዉ ታልአናፐ አትሽን፥ ነ እያዉ ታልአካ፤ እ ሁጰ ግዳና፤ ኔኒ ጎይና ግዳና።
DEU 28:45 ጎዳ፥ ነ ፆሳ፥ ነ ኪተቶና እፅዳ ግሾነ እያ ዎጋነ ህግያ ናጎና እፅዳ ግሾ፥ ነ ꬋያና ጋካናዉ ሀ ባደꬃት ኡባይ ነ ቦላ ዎꬋና፤ ነና ኤንቲ የደꬃና።
DEU 28:46 ሀ ባደꬃት ነ ቦላነ ነ ኮቻ ቦላ መርናዉ ማላታነ ማላልስያባ ግዳና።
DEU 28:47 ነዉ ሳእ እንጀትዳ ዎደ ጎዳ፥ ነ ፆሳ ኡፋይሳንነ ጋላታን ጎይኖና ግሾ፥
DEU 28:48 ነና ኮሻን፥ ሳሞን፥ ካሎተꬃንነ መቶን ኡባባ ꬋያዳ፥ ጎዳይ ነ ቦላ የድያ ነ ሞርከታስ ሃረታና። ጎዳይ ነና ꬋይሳና ጋካናዉ ነ ሞርገን ብራታ ቃምባራ ዎꬃና።
DEU 28:49 ጎዳይ ነ ኤንታ ቃላ ኤሮና ካዎተꬃታ፥ ቢታ ጋፃፐ አንኮይ ፕራꬍድ ዎይሳዳ ነ ቦላ ኤሀና።
DEU 28:50 ኤንቲ ዎዛና ምኖታ፤ ጭማ ቦንቾናይሳታ፤ ናይታስ ቃቶናይሳታ።
DEU 28:51 ነ ꬋያና ጋካናዉ ኤንቲ ነ መህያነ ጎሻ አይፍያ ማና። ኔኒ ꬋያና ጋካናዉ ነ ካꬃ፥ ነ ዎይንያ፥ ነ ዛይትያ፥ ነ ሚዛነ ነ ዶርሳ ዉድያ ማሮኮና።
DEU 28:52 ጎዳይ፥ ነ ፆሳይ ነዉ እምያ ቢታን ደእያ ነ አማነትያ አዱሰነ ምኖ ድርሳት ላለታና ጋካናዉ ነ ካታማ ዩሹዋ ተቅድ ነና ኡንኤꬃና።
DEU 28:53 ነ ሞርከት ካታማ ተቅድ ነና ኡንኤꬅያ ዎደ ምያባ ꬋያዳ፥ ጎዳይ ነ ፆሳይ ነዉ እምዳ ነ ኡሎ አይፈ ግድዳ ነ አደ ናይታነ ነ ማጫ ናይታ ማና።
DEU 28:54 ነ ግዶን ሀር አቶሽን ካሰ እንጀን ደእዳ አስካ ባ እሻስ፥ ባ ዶስያ ማቸስነ ባ የልዳ ናይታስ ባ ካꬃፈ ሻከና።
DEU 28:55 ሞርከት ካታማ ተቅድ ኡንኤꬅያ ዎደ ማናባይ ሀር ባይና ግሾ፥ ምያ ባ ናይታ አሹዋፐ ሀራ ኦደስካ እመና።
DEU 28:56 ነ ግዶን ካሰ እንጀን ደእዳ፥ ባ እንጅያፈ ደንዶይሳን ሳአ የꬋናዉ ሻተትያ ማጫስያ፥ ባ ዶስያ አዝናስነ ባ የልዳ ናይታስ ኡዘታና።
DEU 28:57 ሞርከት እያ ደእያ ካታማ ተቅድ እዮ ኡንኤꬅዳ ግሾነ ዋይስዳ ግሾ፥ እዉ ሀር ምያባይ ꬋይን፥ ባ የልዳ ናኣነ ዶኣ ኤንታ ጋꬆና ጌማን ባርካ ማና።
DEU 28:58 ሀ ማፃፋን ፃፈትዳ ህገታ ነ ናጎና እፅኮ፥ ማላልስያነ ያሽያ ጎዳ፥ ነ ፆሳ ሱንꬃ ቦንቾና እፅኮ፥
DEU 28:59 ነ ቦላነ ነ ኮቻ ቦላ ጎዳይ፥ ያሽያ ጋዶ፥ ዳሮ ዎደ ጋምእያ፥ ፓፆይ ባይና ኢታ ሀርገ የዳና።
DEU 28:60 ካሰ ግብፀ አሳ ቦላ በአዳ፥ ነ ያይዳ ግብፀ ሀርገ ኡባ ዛሪድ ነ ቦላ ኤሀና፤ ሄ ሀርገይ ነና የደና።
DEU 28:61 ጉጅድካ፥ ሀ ህገ ማፃፋን ፃፈትቦና ሀርገታነ ጋዶታ ኡባ ነ ꬋያና ጋካናዉ ጎዳይ ነ ቦላ ኤሀና።
DEU 28:62 ጎዳ፥ ህንተ ፆሳ ህንተ ስኦና እፅዳ ግሾ፥ ሳሎ ፆልንቶዳ ዳርዳ ህንተፈ ጉꬅ አታና።
DEU 28:63 ጎዳይ፥ ህንተዉ ሎኦባ ኦꬅያ ዎደነ ህንተ ታይቦይ ዳርያ ዎደ ኡፋይትዳይሳዳ ሀእ ህንተ ቦላ ጋዶ ኤህያ ዎደነ ህንተና ꬋይስያ ዎደ ኡፋይታና፤ ህንተ ላታናዉ ብያ ቢታፈ ሾደትድ ꬋያና።
DEU 28:64 ጎዳይ ነና ሀ ጋፃፐ ያ ጋፃ ጋካናዉ ካዎተꬃታ ኡባ ግዶን ላላና። ያን ነኒ ዎይኮ ነ ማይዛት ኤሮና ሀራ ምꬅነ ሹቻ ፆሳታ ጎይናና።
DEU 28:65 ሄ ካዎተꬃታ ግዶን ህንተ ሸምፖ ደመከታ፤ ቶሆይ የꬍያ በስካ ነዉ ዴና። ያን ጎዳይ ነዉ ቆፋን ኩምዳ ጉገ፥ አሞን አርጋጭዳ አይፈነ ኡፋይስ ቃንፅዳ ዎዛና እማና።
DEU 28:66 ነ ደኦይ ህርጋን ኩማና፤ ጋላስነ ቃማ ዳጋማንነ ሀይቆ ያሻን ኡንኤታዳ ዳና።
DEU 28:67 ነ ዎዛናን ኩምዳ ያሻፈነ ነ አይፈይ በእያ ፓላባፐ ደንዶይሳን፥ ዎንትያ ዎደ ነኒ፥ “አዉደ ቃማንዴሻ” ቃስ ቃምያ ዎደ፥ “አዉደ ዎንታንደሻ” ያጋና።
DEU 28:68 ታ ነና፥ “ዛራዳ ሀ ኦግያራ ባካ” ግዳ ኦግያራ ጎዳይ ነና ዛሪድ ማርካበን ጉየ ግብፀ የዳና። ያን ነኒ አይለ ግዳናዉ ነ ሞርከታስ ነና ባይዛናዉ ኮያና፥ ሽን ህንተና አይለያናዉ ሻምያ አስ ደመከታ።
DEU 29:1 ጎዳይ ኮሬባ ዙማን፥ እስራኤለ አሳራ ጫቅዳ ጫቁዋ ቦላ ጉጅድ ሞአበን ኤንታራ ጫቃናዉ ሙሰ ኪትዳ ጫቆ ቃላት ሀይሳታ።
DEU 29:2 ሙሰይ እስራኤለ አሳ ኡባ ፄግ ሺሽድ፥ ሀይሳዳ ያግስ። ጎዳይ ግብፀ ካዋ ቦላ፥ እያ ኦላንቾታ ቦላነ እያ ቢታ ኡባ ቦላ ኦꬅዳባነ ጋꬅዳባ ህንተ፥ ህንተ አይፈን በእደታ።
DEU 29:3 ኤንታ ቦላ ጋꬅዳ ኢታ መቶታ፥ ማላልስያባታነ ግታ ማላታታ ህንተ፥ ህንተ አይፈን በእደታ።
DEU 29:4 ሽን ሀች ጋካናዉ ጎዳይ፥ ህንተዉ አኬክያ ዎዛና፥ ፄልያ አይፈነ ስእያ ሀይꬅ እምቤና።
DEU 29:5 ጎዳይ ኦይታሙ ላይꬅ ኩመꬅ ህንተና መላ ቢታን ካለꬅያ ዎደ ህንተ ማኦይ ዉርቤና፥ ህንተ ጫማይ ጭምቤና።
DEU 29:6 ጎዳይ፥ ህንተ ፆሳ ግደይሳ ህንተ ኤራና መላ ኡይꬅ ምቤከታ፤ ዎይነ ዎይኮ ሀራ ማꬆይያ ኡሽ ኡይቤከታ።
DEU 29:7 ኑኒ ሀ በሳ ጋክዳ ዎደ ሀሰቦና ካዎይ ስሆንነ ባሳነ ካዎይ ኦገይ ኑራ ኦለታናዉ ከይዶሶና፥ ሽን ኑኒ ኤንታ ፆንዳ።
DEU 29:8 ኤንታ ቢታ ኤክድ፥ ሮቤላነ ጋደ ኮቻስ፥ ቃስ ምናሰ ኮቻፈ ባጋስ ላታ ኦꬅድ እምዳ።
DEU 29:9 ህንተ ኦይክያባይነ የꬍያባይ ህንተዉ አንጀታና መላ ሀ ጫቆ ቃላታ አማነትድ ናግተ።
DEU 29:10 ሀች ህንተ ኡባይ፥ ኮቻታ ሀላቃት፥ ጭማት፥ ሹማትነ እስራኤለ አሳ ኡባይ ሀይሳን ጎዳ ስንꬃን ኤቅደታ።
DEU 29:11 ህንተ ናይታራ፥ ህንተ ማቸታራ፥ ህንተ ግዶን ደእድ፥ ምꬅ ምፅያነ ሃ ትክያ ሀራ ቢታ አሳራ እስፈ ሀይሳን ኤቅደታ።
DEU 29:12 ጎዳ፥ ህንተ ፆሳራ ቃላ ገላናዉ ሀይሳን ኤቅደታ። ጎዳይ ሀ ቃላ ሀች ህንተራ ጫቆን ምንꬃና።
DEU 29:13 ጎዳይ ህንተና ባ አሰ ኦꬅድ ምንꬃና፤ ህንተዉነ ህንተ ማይዛታስ፥ አብራሃመስ፥ ይሳቃስነ ያይቆባስ ጫቅዳይሳዳ እ ህንተዉ ፆሰ ግዳና።
DEU 29:14 ጎዳይ ሀ ጫቆ ቃላ ኤሰይ ህንተ ፃላላራ ግደና።
DEU 29:15 ሀች ሀይሳን፥ ጎዳ፥ ኑ ፆሳ ስንꬃን ኤቅዳ ኑ ኡባራነ ስንꬃፈ ያና የለታ ኡባራ ኤሴስ።
DEU 29:16 ኑኒ ግብፀን ዋንድ ደእዳኮነ ሀእ ጋካናዉ ኦገን ደእያ ካዎተꬃታ ግዶራ ዋንድ ካንꬅድ ይዳኮ ኤሬታ።
DEU 29:17 ኤንታ ግዶን ደእያ እፀትዳ ምꬃ፥ ሹቻ፥ ብራነ ዎርቃ ኤቃ ምስለታ በእደታ።
DEU 29:18 ሀ ህንተፈ ኦንካ አደ ግድን ማጫ ግድን፥ እስ ሶ አስ ግድን፥ እስ ኮች ግድን ጎዳ፥ ኑ ፆሳፈ፥ ሃክድ ሀራ ካዎተꬃታ ፆሳታ ጎይኖና መላ ናገትተ። ሄሳ መላ ጫምያነ ዎꬍያ አይፈ አይፍያ አስ ህንተ ግዶን ደኦፖ።
DEU 29:19 ሀ ጫቆ ቃላ ስእድ፥ ባ ዎዛናን፥ “ታ ሸነን ታኒ ቢኮካ፥ መቶይ ባዋ” ያግድ ባና ጭምኮ፥ ሄሳ መላ አስ ሎኦታ ቦላነ ኢታታ ቦላ ꬋዮ ኤሄስ።
DEU 29:20 ጎዳ ሀንቆይነ ቃናተይ ሄሳ መላ አሰ ቦላ ኤፅድ ከያና። ሀ ማፃፋን ፃፈትዳ ባደꬅ ኡባይ እያ ቦላ ያና፤ ሳሎፐ ጋርሳን እያ ሱንꬃ ጎዳይ ቁቻና።
DEU 29:21 ጎዳይ ሀ ህገ ማፃፋን ፃፈትዳ ባደꬃ ጫቆ ቃላዳ ሄ ኡራ እስራኤለ ግዶፈ ሻክድ ꬋይሳና።
DEU 29:22 ያና የለተꬃይ፥ ህንተ ሼሻይነ ሃሆ ቢታፈ ያ ሀራ ቢታ አሳይ፥ ጎዳይ ህንተ ቦላ ኤህዳ ጋዱዋነ ሀርግያ በአና።
DEU 29:23 ቢታ ኡባይ ዲነንነ ማፅነን ኩማና፤ ቶከትያባይ ዴና፤ ዶልያባይ በንተና፤ ማትነ ምꬅ ዶለና። ጎዳይ ባ ሀንቆን ꬋይስዳ ሶዶማዳነ ጋሞራዳ፥ አዳማዳነ ፃቦይማ ካታማታዳ ሀናና።
DEU 29:24 ካዎተꬃት፥ “ጎዳይ ሀ ቢታ ቦላ ሀይሳ መላባ አይስ ኦꬅዴ? ሀ ዎልቃማ ሀንቁዋስ ጋሶይ አይቤ?” ያጋና።
DEU 29:25 አሳይ ዛሪድ፥ “ኤንቲ ጎዳይ፥ ኤንታ አዋታ ፆሳይ፥ ኤንታ ግብፀፈ ከስዳ ዎደ ኤንታራ ገልዳ ጫቆ ቃላ መንꬅዳ ግሾሳ።
DEU 29:26 ኤንቲ ኤሮና ፆሳታስነ እ ጎይኖፍተ ግዳ ፆሳታ ጎይንዶሶና።
DEU 29:27 ሄሳ ግሾ፥ ጎዳይ ሀንቀትድ፥ ሀ ማፃፋን ፃፈትዳ ባደꬃታ ኡባ ኤንታ ቦላ ኤህስ።
DEU 29:28 ጎዳይ ዎልቃማ ሀንቆ ሀንቀትድ፥ ኤንታ ቢታፈ ኤንታና ሾድድ ሀራ ቢታ የደꬅስ” ያጋና።
DEU 29:29 ፁራይ ኑ ጎዳ ኑ ፆሳሳ፥ ሽን ኑኒ ሀ ህገ ቃላ ኦꬃና መላ ቆንጭዳይሳት መርናዉ ኑሳነ ኑ ናይታሳ።
DEU 30:1 ሀች ታ ነ ስንꬃን ዎꬅዳ አንጆይነ ባደꬃይ ነ ቦላ ጋክያ ዎደ ጎዳይ፥ ነ ፆሳይ ነና ላልያ ሀራ ካዎተꬃታ ግዶን ደእሸ ሀይሳ ነ አኬክኮ፥
DEU 30:2 ነነ ነ ናይት ጎዳ፥ ነ ፆሳኮ፥ ስማዳ፥ ነ ኩመꬃ ዎዛናፐነ ነ ኩመꬃ ሸምፑዋፈ ታ ሀች ነና ኪትያ ህግያስ ኪተትኮ፥
DEU 30:3 ያን ጎዳይ፥ ነ ፆሳይ ነ ድኤትዳ ቢታፈ ነና ዛራና። እ ህንተዉ ቃትድ ህንተና ላልዳ ካዎተꬃታ ኡባ ግዶፈ ዛሪድ ሺሻና።
DEU 30:4 ቢታ ጋፃፐ ጋፃ ጋካናዉ ነ ላለትኮካ፥ ያፐ ጎዳይ፥ ነ ፆሳይ ነና ዛሪድ ሺሻና።
DEU 30:5 ነ አዋት ካሰ ላትዳ ቢታ፥ ነካ ላታና መላ ጎዳይ፥ ነ ፆሳይ ነና ሄ ቢታ ኤሀና። ያን ነና ነ አዋታፐ አꬅድ ዱረያና፤ ነ ታይቡዋ ዳርሳና።
DEU 30:6 ነ ደኦን ዳና መላነ ጎዳ፥ ነ ፆሳ ነ ኩመꬃ ዎዛናፐነ ነ ኩመꬃ ሸምፑዋፈ ዶሳና መላ እ ነዉነ ነ ናይታስ ኪተትያ ዎዛና እማና።
DEU 30:7 ጎዳይ፥ ነ ፆሳይ ሀ ባደꬃታ ኡባ ነ ሞርከታነ ነና ጎደይሳታ ቦላ ኤሀና።
DEU 30:8 ሀች ታ ነና ኪትያ ህግያ ነ ናጋና፤ ዛራዳ ጎዳስ፥ ነ ፆሳስ ኪተታና።
DEU 30:9 ሄ ዎደ ጎዳይ ነ ፆሳይ ነና ነ ኩሸ ኦሶ ኡባን፥ ነ ኡሎ አይፍያን፥ መህያንንነ ነ ጎሻ አይፍያን ነና ዳርስድ አንጃና። ጎዳይ ካሰ ነ አዋታ አንጅድ ኡፋይትዳይሳዳ ነና አንጅድ ኡፋይታና።
DEU 30:10 ሄስ ሀናናይ ሀ ህገ ማፃፋን ፃፈትዳ ጎዳ፥ ነ ፆሳ ህግያነ ዎጋ ናጋዳ፥ ጎዳ፥ ነ ፆሳኮ ነ ኩመꬃ ዎዛናፐነ ነ ኩመꬃ ሸምፑዋፈ ስምኮ።
DEU 30:11 ሀች ታ ነና ኪትያ ኪታት ሄሳ መላ ዴፆ ግዶኮና፤ ኔፐ ሃኮኮና።
DEU 30:12 ኔኒ፥ “ኑኒ ስእድ ኪተታና መላ ሳሎ ከይድ ኑስ ዎꬍሳናይ ኦኔ?” ጎና መላ ሳሎና ግደና።
DEU 30:13 “ኑኒ ስእድ ኪተታና መላ ኑስ አባ ፕንድ ኤሀናይ ኦኔ?” ጎና መላ አባፈ ሄፍንꬃና ግደና።
DEU 30:14 ቃላይ ነዉ ዳሮ ማታን ደኤስ፤ ነ ኦꬃና መላ ቃላይ ነ ዎዛናንነ ነ ዶናን ደኤስ።
DEU 30:15 ሄኮ፥ ታ ሀች ነ ስንꬃን ደኦነ ሎኦተꬅ፥ ሀይቆነ ꬋዮ ዎꬃስ።
DEU 30:16 ነ ጎዳ፥ ነ ፆሳ ዶስኮ፥ እያ ኦግያን ቢኮ፥ እያ ኪታ፥ እያ አዋጁዋነ እያ ህግያ ታግኮ፥ ነ ደኦን ዳናነ ዳራና። ነ ላታናዉ ገልያ ቢታን ጎዳይ፥ ነ ፆሳይ ነና አንጃና።
DEU 30:17 ሽን ነ ዎዛናይ ጎዳፐ ሃክን፥ እያዉ ኪተቶና እፃዳ፥ ሀራ ፆሳታስ ጉፋናዳ ኤንታ ጎይንኮ፥
DEU 30:18 ህንተ ኡባይ ꬋያናይሳ ታ ሀች ህንተዉ ኦዳይስ። ዮርዳኖሰ ፕንድ ህንተ ላታናዉ ብያ ቢታን ህንተ ላይꬃይ አዱቀና።
DEU 30:19 ታ ህንተ ስንꬃን ደኦነ ሀይቆ፥ አንጆነ ባደꬅ ዎꬅዳይሳስ ሀች ሳሎነ ሳአ ህንተ ቦላ ማርካያና። ህዛ ህንተነ ህንተ ሼሻይ ደኦን ዳና መላ ደኦ ዶርተ።
DEU 30:20 ጎዳ ነ ፆሳ ዶሳ፤ እያ ቃላ ስአ፥ እያዉ ኪተታ፤ እያራ ኦይከታ። ሄሳዳ ሀንኮ፥ ጎዳይ ካሰ ነ ማይዛታስ፥ አብራሃመስ፥ ይሳቃስነ ያይቆባስ እማናዉ ጫቅዳ ቢታን ነነ ነ ሼሻይ አዱሳ ላይꬅ ዳና።
DEU 31:1 ሙሰይ ባ ኦዳ ዉርስዳፐ ጉየ እስራኤለ አሳኮ ሀይሳዳ ያግስ፤
DEU 31:2 “ሀእ ታዉ ፄታነ ላታሙ ላይꬅ ግድዳ ግሾ፥ ህዛፐ ጉየ ካለꬃናዉ ዳንዳእከ። ጎዳይ ታኮ፥ ‘ነ ዮርዳኖሰ ፕናካ’ ያግስ።
DEU 31:3 ጎዳይ፥ ነ ፆሳይ ነ ስን አꬍድ ነና ካለꬃና። ያን ደእያ ካዎተꬃታ እ ꬋይሳና ግሾ፥ ኤንታ ቢታ ነ ላታና። ጎዳይ ግዳይሳዳ እያሱይ ህንተና ካለꬃና።
DEU 31:4 ጎዳይ አሞረ ካዎታ ስሆናነ ኦገ ፆንድ፥ ኤንታ ቢታ ꬋይስዳይሳዳ ህንተ ሞርከታ ሄሳዳ ኦꬃና።
DEU 31:5 ጎዳይ ኤንታ ህንተዉ አꬅድ እምን፥ ህንተ ኤንታ ቦላ ታ ህንተና ኪትዳይሳዳ ኦꬃና።
DEU 31:6 ምንተ፤ ገንጭተ፤ ያዮፍተ። ኤንታ በእድ ዳጋሞፕተ። ጎዳይ ህንተ ፆሳይ ህንተራ ግዳና፤ እ ህንተና የገና፥ አገና” ያግስ።
DEU 31:7 ሙሰይ እያሱ ፄግድ፥ እስራኤለ አሳ ኡባ ስንꬃን ሀይሳዳ ያግስ፤ “ምና፤ ገንጫ። ነ ሀ አሳራ እስፈ ጎዳይ ኤንታ ማይዛታስ እማና ግድ ጫቅዳ ቢታ ገላሳ፤ ሄ ቢታ ኤንታ ላትሳሳ።
DEU 31:8 ጎዳይ፥ እ ባ ሁጰን ኔራ ግድድ ነና ካለꬃና። እ ነና የገና፤ አገና። ሄሳ ግሾ፥ ያዮፋ፤ ኡፋይስ ቃንፆፋ” ያግስ።
DEU 31:9 ሙሰይ ሀ ህግያ ፃፍድ፥ ጎዳ ቃላ ጫቆ ታቦትያ ቶክያ ካህነ ግድዳ ሌወ ናይታስነ እስራኤለ ጭማታስ እሚስ።
DEU 31:10 ሙሰይ ኤንታኮ፥ “አጮ ኡባይ አቶ ጌተትያ ላፑንꬃ ላይꬃ ዉርሰꬃን፥ ሻቃራ ባለይ ቦንቸትያ ጋላስ፥ ሀ ህግያ ꬎቁ ኦꬅድ ናባብተ።
DEU 31:11 ጎዳ፥ ህንተ ፆሳ ስንꬃን፥ እ ዶርዳ በሳን፥ እያ ጎይናናዉ እስራኤለ አሳ ኡባይ ሺቅያ ዎደ ኤንታዉ ናባብተ።
DEU 31:12 ኤንቲ ኡባይ ስእድ፥ ጎዳ፥ ህንተ ፆሳስ ያሽ ታማራና መላ ሀ ህገ ቃላ ኡባ ናጋና መላ አደታ፥ ማጫሳታ፥ ናይታነ ህንተ ቢታን ደእያ ሀራ ቢታ አሳ እስፈ ሺሽተ።
DEU 31:13 ሀ ህገ ቃላ ኤሮና ኤንታ ናይትካ ዮርዳኖሰ ፕንድ፥ ህንተ ላታናዉ ብያ ቢታን፥ ህንተ ደእያ ላይꬃ ኡባን ሀ ህግያ ስኦ፤ ጎዳስ፥ ህንተ ፆሳስ፥ ያሽ ታማሮ” ያግድ ኪትስ።
DEU 31:14 ጎዳይ ሙሰኮ፥ “ነ ሀይቅያ ዎደይ ማትስ። እ ካለꬃና ዎጋ ታ እያዉ እማና መላ እያሱ ፄጋዳ፥ እያራ እስፈ ዱንካንያ ፐንገ ሺቅተ” ያግን፥ ሙሰይነ እያሱይ ዱንካንያ ፐንግያኮ ሺቅዶሶና።
DEU 31:15 ጎዳይ ዱንካንያ ፐንገን ኤቅዳ ሻራ ቱሳን ኤንታዉ ቆንጭስ።
DEU 31:16 ጎዳይ ሙሰኮ፥ “ኔኒ ማታ ዎደ ሀይቃዳ ነ አዋታን ጋሄታሳ። ኔፐ ጉየ፥ ሀ አሳይ ታዉ አማነቶናይሳታ ግዳና፤ ታ ኤንታራ ገልዳ ጫቁዋ መንꬃና። ኤንቲ ታና አግድ፥ ባንታ ላትያ ቢታን ደእያ ኤቃታ ካላና።
DEU 31:17 ሄስ ሀንያ ዎደ ታ ሀንቆይ ኤንታ ቦላ ኤፃና፤ ታ ኤንታ አጋጋና፤ ታ ሶምኡዋ ኤንታፈ ሀራ ሶ ዛራና። ኤንቲ ꬋያና፤ ኢታ መቶይነ ꬋዮይ ኤንታ ቦላ ያና። ሄ ዎደ ኤንቲ፥ ‘ቱማ ሀ መቶይ ኑና ጋክዳይ ኑ ፆሳይ ኑ ግዶን ባይና ግሾ ግደኔ?’ ያጋና።
DEU 31:18 ሀራ ፆሳታ ጎይንድ፥ ኤንቲ ኦꬅዳ ኢታ ኦሱዋ ግሾ፥ ታ ሄ ጋላስ ታ ሶምኡዋ ኤንታፈ ሀራ ሶ ዛራና።
DEU 31:19 “ሀእ ሀ ማዝሙርያ ፃፋዳ፥ እስራኤለ አሳ ኡባ ታማርሳ። ሀ ማዝሙረይ ታዉ እስራኤለ አሳ ቦላ ማርካ ግዳና መላ ኤንታ የፅሳ።
DEU 31:20 ኤንታ ማይዛታስ ገልዳ ቃላዳ፥ ማꬅነ ኤስ ጎግያ ቢታ ታ ኤንታ ገልሳ ስምን፥ ኤንቲ ም ካልድ ጎብዳፐ ጉየ፥ ሀራ ፆሳታ ጎይንድ፥ ታና ካꬋና፤ ታ ጫቁዋ መንꬃና።
DEU 31:21 ዳሮ መቶይነ ꬋዮይ ኤንታ ቦላ ጋክዳ ዎደ ሀ ማዝሙረይ ኤንታ ናይታፐ ባለቶና ግሾ፥ ኤንታ ቦላ ማርካ ግዳና። ታኒ ጫቅዳ ቢታ ኤንታ ቡሮ ገልሶና ደእሽን፥ ሃራ ኤንቲ ቆፕያ ቆፋ ታኒ ኤራይስ” ያግስ።
DEU 31:22 ሙሰይ ሄ ጋላስ ማዝሙርያ ፃፍድ፥ እስራኤለ አሳ ታማርስስ።
DEU 31:23 ሄሳፈ ጉየ፥ ጎዳይ ናወ ናኣ እያሱኮ፥ “ምና፥ ገንጫ፤ ታ ኤንታዉ እማናዉ ቃላ ገልዳ ቢታ እስራኤለ አሳ ኤፋዳ ገልሳ። ታ ኔራ ግዳና” ያግስ።
DEU 31:24 ሙሰይ ሀ ህገታ ኮይሮፐ ዉርሰꬅ ጋካናዉ ፃፍድ ዉርስዳፐ ጉየ፥
DEU 31:25 ጎዳ፥ ቃላ ጫቆ ታቦትያ ቶክያ ሌወታ ሀይሳዳ ያግድ ኪትስ፤
DEU 31:26 “ጎዳ ህገይ ፃፈትዳ ሀ ማፃፋ ኤፍድ፥ ጎዳ፥ ህንተ ፆሳ ቃላ ጫቆ ታቦትያ ማታን ዎꬅተ። ያን እ ህንተ ቦላ ማርካ ግዳና።
DEU 31:27 ህንተ አይ መላ ጌለኮነ ዎዛና ኢተኮ ታ ኤራይስ። ቱማ፥ ታ ህንተራ ደእዳ ላይꬃ ኡባን ህንተ ጎዳስ ማካላታ፥ ሽን ታ ሀይቅን፥ ኡባ ዋንድ ማካላንደቲ?
DEU 31:28 ሄሳ ግሾ፥ ሀይሳ ኡባ ታ ኤንታዉ ኦዳናዉነ ሳሎነ ሳአ ታ ኤንታ ቦላ ማርካያናዉ ህንተ ኮቻ ሀላቃታነ ደርያ ካለꬅያ አሳ ኡባ ታዉ ሺሽተ።
DEU 31:29 ታ ሀይቅዳፐ ጉየ፥ ህንተ ቱማ ኢታ አሰ ግዳናይሳነ ታኒ ህንተና ታማርስዳ ኪታፐ ሀራ ሶ ስማናይሳ ታኒ ኤራይስ። ህንተ እያ ስንꬃን ኢታባ ኦꬅድ፥ ጎዳ ይሎይያ ግሾ፥ ዎደፐ እ ህንተ ቦላ ኢታ ጋዶ ኤሀና” ያግስ።
DEU 31:30 ሄሳፈ ጉየ፥ ሙሰይ ሀ ማዝሙረ ቃላታ ዉራና ጋካናዉ ሺቅዳ እስራኤለ ማባራ ኡባ ናባብድ ስስስ።
DEU 32:1 ሳሎቶ፥ ታኒ ኦደይሳ ስእተ፤ ቢታይ ታ ዶና ቃላ ሀይዞ።
DEU 32:2 ታ ትምርተይ እራ መላ ቡኮ፤ ታ ቃላይ አካዳ ዎꬎ። ማታ ቦላ ዎꬍያ ፃሳዳ ዶላ ቦላ ዎꬍያ ፑሰዳ ዎꬎ።
DEU 32:3 ታኒ ጎዳ ሱንꬃ አዋጃና፤ ግታተꬃ ኑ ፆሳስ እምተ።
DEU 32:4 እ ኑ ዛላ፤ እያ ኦሶይ ፖሎ፤ እያ ኦገይ ሱረ። ፆሳይ አማንይሳ፤ ዎርዶይ ባይናይሳ፤ እ ቱማንቾነ ሱረ።
DEU 32:5 እያ ስንꬃን ባንታ ቱናተꬃ በስዶሶና፤ ኤንቲ እያ ናአ ግዶኮና፤ ኤንቲ ኢታነ ጌላ የለተꬅ።
DEU 32:6 ህንተኖ፥ ኤያነ አኬክ ባይና አሳዉ፥ ህንተ ጎዳስ እምያ ዛሮይ ሀይሴ? እ ህንተና መꬍዳ ህንተ አዋ ግደኔ? ህንተና መꬍድ ምንꬅ ኤስዳይ እያ ግደኔ?
DEU 32:7 በን ዎድያ ቆፓ፤ አꬍዳ የለተꬃ አኬካ። ነ አዋ ኦይቻ፤ እ ነዉ ኦዳና፤ ጭማታ ኦይቻ፤ ኤንቲ ነዉ ቆንጭሳና።
DEU 32:8 ኡባፈ ዎልቃማይ ካዎተꬃታስ ኤንታ ላታ ሻክዳ ዎደ፥ አሳ ዘረꬅካ ዱማይዳ ዎደ፥ እስራኤለ አሳ ታይቡዋ መላ፥ አሳስ ኤንታ ዛዋ ኤስስ።
DEU 32:9 ጎዳ ጋክዳ ግሾይ እስራኤለ፤ ያይቆብ እያ ጋክዳ ላታ።
DEU 32:10 እ ኤንታ መላ ቢታን፥ አይኮይ ባይና መላ ቢታን፥ ጫርኮይ ባቅሽን ደምስ። እያዉ ጎንዳለ ግድስ፥ እያ ናግስ፤ ባ አይፈ ናኤዳ ምንꬅድ ናግስ።
DEU 32:11 አርጋንꬅ ባ ናአ ፓሎ ታማርሰይሳዳ፥ ባ ምጭዳ ቀፍያን ጋክድ አሸይሳዳ፥ ጎዳይ ባ ቀፍያን ሀጵድ ኤንታ አሽስ።
DEU 32:12 ጎዳይ ባ ፃላላ ኤንታ ካለꬅስ፤ ሀራ አላጋ ፆሲ እያራ ባዋ።
DEU 32:13 እ ቢታስ ꬎቃ በሳ ኤንታ ከስስ፤ ጎሻ አይፍያ ኤንታ ሙዝስ። ዛላ ቆጶፐ ኤንታ ኤስ ካልስስ፤ ሹቻ ቢታፈ በንትያ ዛይተ ኡሽስ።
DEU 32:14 ኤንታ መህያፐ ቄሳ ማꬅ፥ ዶርሳፈነ ዴሻፐ ፃማታ ማꬅ፥ ሞꬎ ዶርሰነ ዴሻ አሾ ምዶሶና። ባሳነ ዶርሳነ ዴሻ አሹዋ፥ ሎኦ ግስተ ኡይꬃራ ምዶሶና፤ ሱꬅ ዳንያ ዎይነ ኡሻ ኡይዶሶና።
DEU 32:15 ሽን እስራኤለይ ኦርድስ፤ ማካልስ፤ ምድ ካልድ ሞሎትስ። ባና መꬍዳ ፆሳ አግስ፤ ባ አቶተꬃ ዛላ ካዉሽስ።
DEU 32:16 ኤንቲ አላጋ ፆሳታ ጎይንድ፥ እያ ቃናትስዶሶና። እፀትዳ ባንታ ኤቃታን እያ ሀንቀꬅዶሶና።
DEU 32:17 ፆሰ ግዶናይሳታስ፥ ካሰ ኤንቲ ኤሮና ፆሳታስ፥ ዝነ ደንድዳይሳታስ፥ ኤንታ አዋት ጎይንቦና ፆሳታስ ያርሽዶሶና።
DEU 32:18 ኤንታዉ ደኦ እምያ ዛላ ዶግዶሶና፤ የልድ ድችዳ ፆሳ አግዶሶና።
DEU 32:19 አደ ናይትነ ማጫ ናይት እያ ይሎይዶሶና፤ ጎዳይ ሄሳ በእድ ኤንታ ካꬍስ።
DEU 32:20 እ፥ “ኤንቲ ጌላነ አማነቶና ደረ ግድያ ግሾ፥ ታኒ ታ ሶምኡዋ ኤንታፈ ገንꬃና፤ ኤንታ ዉርሰꬃ ስእ ጋዳ በአና” ያግስ።
DEU 32:21 ፆሰ ግዶናይሳታን ታና ቃናትስዶሶና፤ ባንታ ኤቃታን ታና ይሎይዶሶና። ታኒ ኤንታ ካትዳ አሳን ቃናትሳና፤ ኤያ አሳን ኤንታ ይሎያና።
DEU 32:22 ታ ሀንቆይ ታማዳ ኤፃና፤ ስኦለ ጋካናዉ ፁጋና። ቢታን ደእያባ ኡባ ማና፥ ደርያ ባሱዋ ጋካናዉ ፁጋና።
DEU 32:23 “ታኒ ኤንታ ቦላ መቶ ዶራና፤ ታ ዶንግያን ኤንታ ዱካና።
DEU 32:24 ታ ኤንታ ቦላ ኢታ ኮሻ የዳና፤ ኤንቲ ሀርገንነ ጋዶን ዉራና። ኤንታ ቦላ ኢታ ባዞ ዶአታነ ዱክድ ዎꬍያ ኢታ ሾሻታ የዳና።
DEU 32:25 ኤንታ፥ ማሽ ኦገ ቦላ ዉርሳና፤ ኬꬃ ጋርሳን ዳጋም ካዎታና። ናአተꬃ አደትነ ማጫት ዉራና፤ ጉꬃ ናይትነ ጭማት አቶኮና።
DEU 32:26 ታ ኤንታ ꬋይሳናዉነ ኤንታ ሀሳይያ አስ ዶና መላ ኦꬃናዉ ቆፓስ።
DEU 32:27 ሽን ኤንታ ሞርከት፥ ‘ፆንዳይ ኑና፤ ሀ ኡባ ኦꬅዳይ ጎዳ ግደና፤ ያግድ ኦቶሮን ጬቀቶና መላ ጋዳ አጋጋስ’ ” ያግስ።
DEU 32:28 እስራኤለ አሳይ ዎዛን ባይና አስ፤ ኤንቲ አኬኮኮና።
DEU 32:29 ኤንቲ ጭንጭድ አኬክዳኮ ሀይሳ ኤራና፥ ባንታ ዉርሰꬃካ ሻካናሽን።
DEU 32:30 ጎዳይ ኤንታ ፆሳይ ኤንታ ባይዞናኮ፥ ኤንታ መꬍዳ ዎልቃማይ አꬅድ እሞናኮ፥ ዋትድ እስ አስ ሙኩሉ አሳ፥ ኑምኡ አስ ታሙ ሙኩሉ አሳ ፆኒ?
DEU 32:31 ኑ ዛላይ ኑ ሞርከታ ዛላ መላ ግዶናይሳ ኤንቲ ኤሮሶና።
DEU 32:32 ኤንታ ዎይነይ ሶዶመ ዎይንያፐ ዬስ፥ ኤንቲ ጋሞራ ጎሻን ዶልዶሶና፤ አይፍያን ማርዘይነ ጫሞይ ኩምስ።
DEU 32:33 ኤንታ ዎይነይ ሾሻ ማርዘ፤ ዎꬍያ ሶጎ።
DEU 32:34 ጎዳይ፥ “ታ ሄሳ ዶጋድና? ታ ማዝጋበን ፃፋብክና?
DEU 32:35 ኤንታዉ ꬋዮ ጋላስ ማትስ፤ ኤንታ ቦላ ጋካናባይ ኤለሴስ። ሄ ዎደ ኤንታ ቶሆይ ꬉበታና፤ ታ ሀሎ ከያናነ ኩሸ ዛራና።”
DEU 32:36 ኤንታ ዎልቃይ ዉርዳይሳነ ኤንታ ማድያ አስ ባይናይሳ በእዳ ዎደ፥ ጎዳይ ባ አሳስ ፕርዳና፤ ባ አይለታስ ቃታና።
DEU 32:37 ፆሳይ ኤንታኮ፥ “ኤንቲ አማነትያ ኤንታ ፆሳት አዉኔ? ኤንቲ ባቃትድ ቆሰትያ ኤንታ ዛላይ አዉኔ?” ያጋና።
DEU 32:38 ኤንታ ሞꬎ ያርሹዋ ምዳይሳት፥ ኤንታ ዎይነ ኡሻ ያርሹዋ ኡይዳይሳት፥ ሀእ ደንድድ ኤንታ ማዶ፤ ኤንታ አሾ።
DEU 32:39 “ቱማ፥ ጎድ ታና፤ ፆሲ ታ ፃላላ፤ ታፐ አትሽን፥ ሀራ ፆሲ ባዋ። ዎይነ ፓይ ታና፤ ታ ማዱንፅሳይስ፤ ታ ፓꬃይስ፤ ታ ኩሸፐ ኦንካ አሸና።
DEU 32:40 ታ ኩሽያ ደንꬃዳ ሀይሳዳ ያጋና፤ ታኒ መርናዉ ደኦ፤
DEU 32:41 ጶልያ ታ ማሻ ሌፋዳ፥ ፕርዳናዉ ታ ኩሸን ኦይክያ ዎደ፥ ታ ሞርከታ ቦላ ታ ሀሎ ከያና፤ ታና እፀይሳታስ ኩሸ ዛራና።
DEU 32:42 ታ ዶንገይ ኤንታ ሱꬃን ማꬆታና፤ ታ ማሻይ ኤንታ አሹዋ ማና። ታና እፅያ ኡባ ማርከ፤ ማዱንፅዳይሳትነ ድኤትዳይሳት ሀይቃና።”
DEU 32:43 ካዎተꬃቶ፥ ጎዳ አሳራ ኡፋይትተ፤ እ ባ አይለታ ሱꬃ አጫና። ባ ሞርከታ ቦላ ሀሎ ከያና፤ ቢታን ደእያ ባ አሳ ናጋራ አቶ ጋና።
DEU 32:44 ሙሰይነ ናወ ናአይ እያሱይ እስራኤለ አሳ ሺሽድ፥ ሀ ማዝሙርያ ኡባ አሳይ ስእሽን የፅዶሶና።
DEU 32:45 ሙሰይ ሀ ቃላ ኡባ እስራኤለ አሳስ ኦድ ዉርስዳፐ ጉየ፥
DEU 32:46 ኤንታኮ፥ “ሀ ህገ ቃላ ኡባ ህንተ ናይት ናጋና መላነ ኪተታና መላ ሀች ታ ህንተዉ ማርካ ኦꬃዳ እምያ ቃላ ኡባ ህንተ ዎዛናን ዎꬅተ።
DEU 32:47 ሀ ቃላይ ህንተዉ ደኦፐ አትሽን፥ ጮ ቃላ ግደና። ህንተ ሀ ቃላ ናግኮ፥ ዮርዳኖሰ ፕንድ ላታና ቢታን አዱሳ ላይꬅ ዳና” ያግስ።
DEU 32:48 ሄ ጋላስ ጎዳይ ሙሰ ሀይሳዳ ያግስ፤
DEU 32:49 “ሞአበን፥ እያርኮ ካታማፐ ስንꬃ ባጋራ ደእያ አባሪማ ዙማታፐ እሱዋ ግድዳ ናቦ ዙማ ቦላ ከያ፤ ያን እስራኤለ አሳ ታ ላትሳና፥ ካናነ ቢታ ሃሆን ፄላ።
DEU 32:50 ነ እሻ አሮን ሆራ ዙማ ቦላ ሀይቅድ፥ ባ ማይዛታ ጋክዳይሳዳ ነካ ሀ ዙማ ቦላ ሀይቃዳ ነ ማይዛታ ጋካና።
DEU 32:51 ህንተ ናምአይ እስራኤለ አሳ ስንꬃን ታዉ አማነትበከታ። ሲና መላ ቢታን፥ ቃደሳ ማታን ደእያ ማርባ ሃꬃ ማታን ታ ጌሻተꬃ እስራኤለ አሳ በስበከታ።
DEU 32:52 ሄሳ ግሾ፥ ኔኒ ሄ ቢታ ሃሆን ፄላናፐ አትሽን፥ ታ እስራኤለ አሳ ላትሳና ቢታ ገላካ” ያግስ።
DEU 33:1 ፆሳ አስ ግድዳ ሙሰይ ሀይቃናፐ ስን፥ እስራኤለ አሳ አንጅዳ አንጆ ቃላይ ሀይሳ።
DEU 33:2 ሙሰይ፥ “ጎዳይ ሲና ዙማፐ ይስ፤ ሳይረ ዙማፐ ኑ ቦላ ፖእስ። ፓራና ዙማፐ ጶልስ። ሙኩላን ታይበትያ ኪታንቾት እያራ ደኦሶና፤ እያ ኡሻቻን ታማ ላጮይ ደኤስ።
DEU 33:3 ጎዳዉ ኔኒ ነ አሳ ዶሳዳሳ፤ ጌሻት ኡባይ ነ ኩሸን ደኦሶና። ነ ቶሁዋ ጋርሳን ኡባይ ጉልባትድ ጎይኖሶና፤ ኔፐ ኪታ ኤኮሶና።
DEU 33:4 ሙሰይ እምዳ ህግያ እስራኤለ አሳ ላታ ኤኮሶና።
DEU 33:5 እስራኤለ ዘረꬃት ደርያ ሀላቃታራ ሺቅዳ ዎደ፥ ጎዳይ ባ አሳ፥ እስራኤለ ቦላ ካዎትስ።
DEU 33:6 “ሮቤላ ኮቻይ ታይቦን ጉꬃ ግድኮካ፥ እ ሀይቆፎ፤ ፓፃ ደኦ።”
DEU 33:7 ሙሰይ ይሁዳ ኮቻባ፥ “ጎዳዉ፥ ይሁዳ ዋሱዋ ስአ፤ ሀንኮ እያ ያራታራ እያ ቡአ። ኤንታ ኩሽያ ምንꬃ፤ ኤንቲ ባንታ ሞርከታራ ኦለትያ ዎደ ኤንታ ማዳ።
DEU 33:8 ሙሰይ ሌወ ኮቻባ፥ ነ ቱሚመይነ ኡሪመይ፥ ኔኒ ማሳሀን ፓጭዳነ ማርባን ፓላምዳ፥ ነ ጌሻ አሳሳ።
DEU 33:9 ባንታና የልዳይሳታፐ፥ ባንታ እሻታፐነ ባንታ ናይታፐ አꬅድ፥ ኤንቲ ነዉ አማነትዶሶና፤ ነ ጫቆ ቃላ ናግዶሶና።
DEU 33:10 ኤንቲ ነ ዎጋ ያይቆባ፥ ነ ህግያ እስራኤለ ታማርሶሶና። ኤንቲ ነ ስንꬃን እፃነ ጩይሶሶና፤ ያርሾ በሳን ፁሳ ያርሾ ያርሾሶና።
DEU 33:11 አቤት ጎዳዉ፥ ሌወታ አንጃ፤ ኤንታ ኩሸ ኦሱዋን ነ ኡፋይታ። ኤንታ ቦላ ደንድያ ሞርከታ መንረꬃ ዛር ደንዶና መላ ኤንታ ሞርከታ ጫዳ።”
DEU 33:12 ብንያመ ኮቻባ፥ “ጎዳን ዶሰትዳይ እያን አማነትድ ደኤስ፤ ቃማ ጋላስ እ ኤንታ ናጌስ፤ ባ ሀሽያን ቶክድ ሸምፕሴስ።”
DEU 33:13 ዮሰፋ ኮቻባ፥ “ጎዳይ፥ ሳሎፐ እራን፥ ሳአፐ ፑልቶ ሃꬃን ኤንታ ቢታ አንጆ።
DEU 33:14 አዋን ካፅድ ዶረትዳ አይፈንነ ዎደን ዎደን ካፅያ አይፈን አንጀቶ።
DEU 33:15 በንፐ ደእያ ደረትነ ዙማት ሎኦ አይፈን አንጀቶ።
DEU 33:16 ኤንታ ቢታይ ሎኦባይ ኩምዳ ቢታ ግዶ፤ ቱሽያ ግዶን ኤፅያ ታማን ቆንጭዳ ጎዳይ እያ አንጆ። ሀ አንጆት ኡባይ ዮሰፋ ኮቻ ጋኮ፤ እ ባ እሻታ ግዶን ሀላቃ ግዶ።
DEU 33:17 ዮሰፍ ኮይሮ የለትዳ ኮርማዳ ምኖ፤ እያ ካጨት መንꬃ ካጨዳ ምኖ። እያ ካጨት ታሙ ሙኩሉን ታይበትያ ኤፍሬማ ኮቻታ፤ ሙኩላን ታይበትያ ምናሰ ኮቻታ። ሄ ካጨታን እ ካዎተꬃታ ቃይጫና፤ ቢታ ጋፃ ጋካናዉ እ ኤንታ ሱጋና።”
DEU 33:18 ዛብሎና ኮቻባ፥ “ዛብሎና፥ ኔኒ ነ ከሳን ኡፋይታ፤ ይሳኮራ፥ ኔኒ ነ ዱንካንያን ኡፋይታ።
DEU 33:19 ኤንቲ አሳ ባንታ ዙማኮ ፄጋና፤ ያን ኤንቲ ጌሻተꬃ ያርሾ ያርሻና። ባንታ አቁዋነ ባንታ ዱረተꬃ፥ አባፈነ አባ ጋፃን ደእያ ሻፍያፐ ደማና” ያግስ።
DEU 33:20 ጋደ ኮቻባ፥ “ኤንታ ቢታ ዳልግስዳ ጎዳይ ጋላተቶ፤ ጋድ ሞርከ ሶምኦ ዎይኮ ቀሰ መንꬃናዉ፥ ጋሞዳ ናጌስ።
DEU 33:21 ኤንቲ ሎኦ ቢታ ባንታዉ ዶርዶሶና፤ ሀላቃታስ ግዳ ቢታ ኤንቲ ኤክዶሶና። እስራኤለ ሀላቃት ሺቅዳ ዎደ፥ ጎዳ ጌሻ ሸንያ ሻክድ ኤርዶሶና እስራኤለስ ሱረ ፕርዳ ፕርድዶሶና” ያግስ።
DEU 33:22 ዳነ ኮቻባ፥ “ዳነይ ዎዳላ ጋሞ መላ፤ እ ባሳነፐ ጉፕድ ከያና” ያግስ።
DEU 33:23 ንፍታለመ ኮቻባ፥ “ንፍታለመይ ጎዳ አꬎ ኬሀተꬃን፥ እያ አንጁዋን ዱረትስ፤ ኤንታ ቢታይ አባፈ ዱገሀ ባጋ ጋኬስ” ያግስ።
DEU 33:24 አሴራ ኮቻባ፥ “አሴር ሀራ ኮቻታፐ አꬍድ አንጀትዳይሳ፤ ባ እሻታን ዶሰትዳይሳ ግዶ፤ እያ ቢታይ ሻማሆ ዛይተን ዱረቶ።
DEU 33:25 እያ ካታማት ብራታ ፐንገን ጎርደትድ ናገቶ፤ ባ ላይꬃ ኡባን እ ዎልቃማ ግዶ።
DEU 33:26 እስራኤለ፥ ሳሎፐ ነና ማዳናዉ፥ ባ ግታተꬃን ሻራ ቦላ ሄመትያ፥ ነ ፆሳ መላ ፆሲ ኦኔ?
DEU 33:27 መርና ፆሳይ ነ ደእያ በሲ፤ እያ መርና ኩሸት ኔፐ ጋርሳራ ደኦሶና። እ ነ ሞርከታ ነ ስንꬃፈ ከስድ፥ ‘ኤንታ ꬋይሳ’ ያግስ።
DEU 33:28 ሄሳ ግሾ፥ እስራኤለ ኮቻይ፥ ሳሎ እራይ ቡክያ በሳን፥ ካꬅነ ዎይነይ ኩምዳ ቢታን፥ ህርግ ባይና ሳሮ ዳና።
DEU 33:29 እስራኤለ፥ ነ አንጀታዳይሳ፤ ጎዳይ አሽዳ ነ መል ኦኔ? እ ነዉ ጎንዳለነ ማድያ ማሻ፤ ነ ሞርከት ነ ስንꬃን ጉፋናና፤ ነ ኤንታ ባሱዋ ላላና” ያግስ።
DEU 34:1 ሙሰይ ሞአበ ደምባፈ ደንድድ፥ ናቦ ዙማ ሁጵያ፥ ቃስ እያርኮፈ ዶሎሀ ባጋራ ደእያ ፕስጋ ዙማ ሁጵያ ጋክስ። ያን ጎዳይ ዳነ ጋካናዉ ደእያ ጋላዳ ቢታ፥
DEU 34:2 ንፍታለመ ቢታ ኡባ፥ ኤፍሬመነ ምናሰ ቢታ፥ ዉሎሀ ባጋራ ብድ መደትራነ አባ ጋካናዉ ደእያ ይሁዳ ቢታነ
DEU 34:3 ዱገሀ ባጋራ ዞኣረፐ ደንድድ፥ ዛምብ ደእያ እያርኮ ካታማ፥ ዛንጋራን ደእያ ደምባ ኡባ በስስ።
DEU 34:4 ጎዳይ ሙሰኮ፥ “ታኒ ህንተ ሼሻስ እማና ጋዳ አብራሃመስ፥ ይሳቃስነ ያይቆባስ፥ ጫቅዳ ቢታይ ሀይሳ። ሀእ ኔኒ ነ አይፈን በአና መላ ኦꬃስ፥ ሽን ኔኒ ያ ፕናካ” ያግስ።
DEU 34:5 ጎዳ አይለይ፥ ሙሰይ፥ ጎዳይ ግዳይሳዳ፥ ያን ሞአበ ቢታን ሀይቅስ።
DEU 34:6 ጎዳይ ቤት-ፓኦራ ካታማፐ ስንꬃ ባጋን ሞአበ ዛንጋራን እያ ሞግስ። ሽን ሀች ጋካናዉ እ ሞገትዳ ዱፉዋ ኤርያ አስ ባዋ።
DEU 34:7 ሙሰይ ሀይቅያ ዎደ እያዉ ላይꬅ ፄታነ ላታማ፤ ሽን እያ አይፈይ እፅቤና፤ እያ ዎልቃይ ዳቡርቤና።
DEU 34:8 እስራኤለ አሳይ ሞአበ ደንባን ሀስታሙ ጋላስ ሙሰስ ዬክዶሶና። ሄሳፈ ጉየ፥ ባለይ ደንድን፥ ዬሆ ዎደይ ዉርስ።
DEU 34:9 ሙሰይ፥ ባ በሳን ኦꬃና መላ፥ እያ ቦላ ባ ኩሽያ ዎꬅዳ ግሾ፥ ናወ ናአይ እያሱይ ጭንጫተꬃ አያናን ኩምስ። እስራኤለ አሳይ እያሱስ ኪተትዶሶና፤ ጎዳይ ሙሰ ባጋራ እምዳ ኪታ ናግዶሶና።
DEU 34:10 ጎዳ ሶምኦን ኦድስዳ፥ ሙሰ መላ ናበይ፥ እስራኤለ ቢታን ደንድቤና።
DEU 34:11 ጎዳይ ሙሰ ግብፀ ካዋኮ፥ እያራ ኦꬅያ ሞርናታኮነ ኩመꬃ አሳኮ የድድ፥ እያ ባጋራ ማላታታነ ማላልስያባታ ኡባ ኦꬅዳ፥ ሙሰ መላ ሀራ ናበይ ኦንካ ባዋ።
DEU 34:12 እስራኤለ ኡባ ስንꬃን ግታ ዎልቃን ማላልስያባ ኦꬅዳ፥ ሙሰ መላ አስ ኦንካ ባዋ።
JOS 1:1 ጎዳ አይለይ ሙሰይ ሀይቅዳፐ ጉየ፥ ጎዳይ ሙሰ ማድያ ናወ ናኣ እያሱ፥ ሀይሳዳ ያግስ፤
JOS 1:2 “ታ አይለይ፥ ሙሰይ ሀይቅስ። ሄሳ ግሾ፥ ኔራነ ሀ አሳ ኡባይ ደንድድ፥ ታኒ እስራኤለ አሳስ እማናዉ ደእያ ቢታ ገላናዉ፥ ዮርዳኖሰ ሻፋ ፕንተ።
JOS 1:3 ታኒ ሙሰስ ኦድዳይሳዳ፥ ህንተ ቶሆይ የꬍያሶ ኡባ ህንተዉ እማስ።
JOS 1:4 ህንተ ዛዋይ ዱገሀ ነገበ መላ ቢታፈ ደንድድ፥ ፑደሀን ደእያ ልባኖሰ ዙማ ጋካናሳ። ቃስ ዶሎሃ ባጋን ደእያ ኤፍራፂሳ ዎጋ ሻፋፐ ደንድድ፥ ህተታ ቢታ ኡባ ኤክድ ዉሎሀ ባጋን ደእያ መደትራነ አባ ጋካናሳ።
JOS 1:5 እያሱ፥ ነ ላይꬃ ኡባን ኦንካ ኔራ ኤቀታናዉ ዳንዳኤና። ታኒ ሙሰራ ግድዳይሳዳ፥ ኔራካ ግዳና። ታኒ ነና የግከ፤ አግከ።
JOS 1:6 አይኮይ ባዋ ምና። ታኒ ኤንታ ማይዛታስ እማና ጋዳ ጫቅዳ ቢታ ኔን ሀ አሳ ላትሳና።
JOS 1:7 አይኮይ ባዋ ምና። ታ አይለይ ሙሰይ ነዉ እምዳ ህግያ ኡባ ምንꬃዳ ናጋ። ኔን ብያ በሳ ኡባን ነዉ እንጀታና መላ እያፐ ኡሻች ዎይኮ ሀድርስ ጎፓ።
JOS 1:8 ሀ ህገ ማፃፋይ ነ ዶናፐ ሻከቶፎ። እያን ፃፈትዳባ ኡባ ምንꬃዳ ናጋናዉ ጋላስነ ቃማ እያ ቆፓ። ሄሳ ነ ኦꬅኮ፥ ነዉ ኡባባይ እንጀታናነ ፖለታና።
JOS 1:9 ነ ብያ በሳ ኡባን ታኒ ጎዳይ ነ ፆሳይ ኔራ ደእያ ግሾ፥ ባቦፋ፤ ህርጎፋ፤ ያጋዳ ነዉ ኦዳይስ” ያግስ።
JOS 1:10 ሄሳፈ ጉየ፥ እያሱይ ደርያ ሀላቃታ ሀይሳዳ ያግስ፤
JOS 1:11 “አሳይ ዱንካንድ ደእያ ጉታ ብድ፥ ሄꬑ ጋላሳ ጋርሳን፥ ‘ጎዳይ፥ ህንተ ፆሳይ፥ ህንተዉ እምያ ቢታ ላታናዉ ዮርዳኖሰ ሻፋ ፕንያ ግሾ፥ ህንተዉ ሽንቀ ጊግስተ’ ያግድ ደርያስ ኦድተ” ያግስ።
JOS 1:12 እያሱይ፥ ሮቤላነ ጋዳ ኮቻታ ቃስ ምናሰ ኮቻታፐ ባጋ ሀይሳዳ ያግስ፤
JOS 1:13 “ጎዳይ፥ ህንተ ፆሳይ፥ ህንተና ሸምፕሳና፥ ሀ ቢታ ህንተዉ እማና ያግድ፥ ጎዳ አይለይ ሙሰይ ኦድዳይሳ ቆፕተ።
JOS 1:14 ህንተ ማቸት፥ ህንተ ናይትነ ህንተ መሄይ ዮርዳኖሰ ሻፋፐ ሀፍንꬃን ሙሰይ ህንተዉ እምዳ ቢታን ደእሾና። ሽን ህንተ ኦላንቾት ባንታ ኦላ ሚሽያ ኦይክድ፥ ህንተ አሳፐ ስንꬃትድ፥ ኦለታናዉ ዮርዳኖሰ ሻፋ ፕኖና።
JOS 1:15 ጎዳይ ህንተና ሸምፕስዳይሳዳ፥ ኤንታካ ሸምፕሳና ጋካናዉነ ጎዳይ ህንተ ፆሳይ ኤንታዉ እምያ ቢታ ኤንቲ ላታና ጋካናዉ፥ ኤንታ ማድተ፤ ኦለትተ። ያትድ፥ ስም ይድ፥ ዮርዳኖሰ ሻፋፐ ሀፍንꬃን ዶሎሀ ባጋን፥ ጎዳ አይለይ ሙሰይ እምዳ ህንተ ቡዞ ቢታን ደእተ” ያግስ።
JOS 1:16 ኤንቲ ዛሪድ እያሱኮ፥ “ነ ኑና ኪትዳ ኡባ ኑኒ ኦꬃና፤ ነ ኪትያሶ ኡባ ባና።
JOS 1:17 ኑኒ ሙሰስ ኡባባን ኪተትዳይሳዳ፥ ነዉካ ኪተታና። ጎዳይ፥ ነ ፆሳይ ሙሰራ ግድዳይሳዳ፥ ኔራካ ግዶ።
JOS 1:18 ኔራ ኤቀተይነ ነ ኪታ እፅያ ኦንካ ደእኮ፥ ሀይቆ። ግዶሽን ኔን ምና” ያግዶሶና።
JOS 2:1 ናወ ናአይ እያሱይ፥ ቢታ ዎች በእያ ናምኡ አሳታ ሴፅማ ጌተትያ በሳፈ ቆሳን ኪትሸ፥ “ብድ ቢታ ዎችተ፤ ቃስ እያርኮ ካታማ ዱማይድ ዎችተ” ያግድ ኪትስ። ኤንቲ ብድ፥ ራቦ ጌተትያ ላይማተꬃን አቅያ አሰ ሶ አቃናዉ ገልዶሶና።
JOS 2:2 እያርኮ ካዎይ፥ “እስራኤለ አሳፐ ኪተትዳይሳት ሀ ቢታ ዎቻናዉ ሀች ቃማ ይዶሶና” ግያ ኦዳ ስእስ።
JOS 2:3 ያትን፥ እያርኮ ካዎይ ራብኮ፥ “ነ ሶ ገልዳ አሳት ቢታ ዎቻናዉ ይዳ አስ ግድያ ግሾ፥ ኤንታና ከሳዳ እማ” ያግድ ኪትስ።
JOS 2:4 ሽን ማጫስያ ሄ ናምኡ አሳታ ቆታዳ፥ “ኤ አሳት ታኮ ይዶሶና፥ ሽን ኤንቲ አዉፐ ይዳኮ ታ ኤርከ።
JOS 2:5 ኦማርስ ካታማ ፐንግያ ጎርዳና ሀንያ ዎደ፥ ኤንቲ ከይድ ብዶሶና። ኤንቲ አዉ ብዳኮ ታ ኤርከ። ኤለስድ ኤንታ ህንተ ካልኮ፥ ኦይካና” ያጋዳ ኤንታዉ ኦዳሱ።
JOS 2:6 ሽን እያ አሳታ ዳሳ ቦላ ከሳዳ ታልባ ጮይና ግዶን ቆሳሱ።
JOS 2:7 ያትን፥ ካዎይ ኪትዳ አሳት ዎቸይሳታ ኮይሸ፥ ዮርዳኖሰ ሻፋ ፕንꬅያ ኦግያ ጋካናዉ ብዶሶና። ኤንቲ ካታማፐ ቡሮ ከይዳ መላ ካታማ ፐንገይ ጎርደትስ።
JOS 2:8 ዎቸይሳት ꬍስካናፐ ካሰታዳ፥ እያ ኤንታኮ ከያዳ፥
JOS 2:9 ሀይሳዳ ያጋሱ፤ “ጎዳይ ሀ ቢታ ህንተዉ እምዳይሳ ታ ኤራይስ። ጋሶይካ፥ ህንተፈ ደንድዳይሳን ግታ ያሻን አሳ ኡባይ ትልእስ።
JOS 2:10 ግብፀ ቢታፈ ህንተ ከይዳ ዎደ፥ ጎዳይ ህንተ ስንꬃን ዞኦ አባ ዋት መልስዳኮ ኑ ስእዳ። ቃስ ዮርዳኖሰ ሻፋፐ ዶሎሀ ባጋራ ደእያ አሞረ ካዎታ ናምአታ፥ ስሆናነ ኦገ ህንተ ዋትድ ዎꬍዳኮነ ኤንታ ካታማ ዋትድ ꬋይስዳኮ ኑ ስእዳ።
JOS 2:11 ኑኒ ሄሳ ስእዳ ዎደ፥ ኑ ዎዛናይ ያሻን ትልእስ። ህዛ፥ ህንተ ጎዳይ፥ ፆሳይ ሳሉዋካ ሳኣካ ሃረይስ እያ ግደይሳ ኑ ኤርዳ።
JOS 2:12 ሄሳ ግሾ፥ ታ ህንተዉ ኬህዳይሳዳ ህንተ ታ አዋ ሶ አሳስ ኬሀናዳ ጎዳ ሱንꬃን ጫቅተ። ሄሳስ አማንꬅያ ማላ ታዉ እምተ።
JOS 2:13 ታ አዋነ ታ አይዉ፥ ታ እሻታነ ታ ምቸታ ኤታ ሶ አሳ ኡባ ዎꬎኮ ግድ ጫቅተ” ያጋሱ።
JOS 2:14 ሄ አሳት ዛሪድ፥ “ኑ ነዉ ጫቅዳ ጫቁዋ ፖሎና እፅኮ፥ ፆሳይ ኑና ዎꬎ። ኑ ኦꬅያባ ነ አሳስ ቆንጭሶና እፅኮ፥ ጎዳይ ሀ ቢታ ኑስ እምያ ዎደ፥ ኑኒ ነዉ አማነታናነ ኬሀና” ያግዶሶና።
JOS 2:15 ራኣብ ኬꬃይ ካታማ ግምበ ድርሳራ ኦይከትድ ኬፀትዳ ግሾ፥ ማስኮትያራ ዎዶሮ ዱገ የዳዳ፥ ኤንታና ዱገ ዎꬍሳሱ።
JOS 2:16 ራኣባ ኤንታኮ፥ “ህንተና ኮየይሳት ደሞና መላ ደርያኮ፥ ብድ ኤንቲ ስማና ጋካናዉ ያን ሄꬑ ጋላስ ቆሰትተ። ያን ስሚድ፥ ህንተ ብያ በሳ ባናዉ ዳንዳኤታ” ያጋሱ።
JOS 2:17 አሳት ዛሪድ፥ “ኑኒ ሀ ቢታ ኦይካናዉ ገልያ ዎደ፥ ሀ ዞኦ ዎዶሩዋ ነ ኑና ዎꬍስዳ ማስኮትያን ቃቾና እፅኮነ ነ አዋ፥ ነ አይዉ፥ ነ እሻታነ ነ ሶ አሳ ኡባ ነ ሶ ሺሾና እፅኮ፥ ነ ኑና ጫቅስዳ ጫቆይ ኑስ ጎመ ግደና።
JOS 2:19 ኦንካ ነ ሶፐ ካረ ከይድ ሀይቅኮ፥ ሄስ እያ ጎመ። ኑኒ ሄሳስ ኦይሸቶኮ። ኔራ ሶን ደእሸ ኦንካ ቆሄትኮ፥ እያ ሱꬃ ጎመይ ኑና ጋኮ።
JOS 2:20 ሽን ኑ ኦꬅያባ ኔን አሳስ ቆንጭስኮ ኔን ኑና ጫቅስዳ ጫቆይ ኑስ ጎመ ግደና” ያግዶሶና።
JOS 2:21 እያ ዛራዳ፥ “ህንተ ቃላዳ ሀኖ” ጋዳ ኤንታ ሞይዛሱ። ኤንቲ ብዳፐ ጉየ፥ ሄ ዞኦ ዎዶሩዋ ማስኮትያን ቃቻሱ።
JOS 2:22 ኤንቲ ደርያኮ ብድ፥ ኤንታ ኮየይሳት እያርኮ ስማና ጋካናዉ ያን ሄꬑ ጋላስ ቆሰትዶሶና። ኤንታ ኮየይሳት ኦገ ኡባን ኮይዶሶና፥ ሽን ደምቦኮና።
JOS 2:23 ሄሳፈ ጉየ ሄ ናምኡ አሳት ደርያፐ ዎꬍዶሶና። ዮርዳኖሰ ፕንድ፥ ናወ ናኣ እያሱኮ ይድ፥ ባንታና ጋክዳባ ኡባ ኦድዶሶና።
JOS 2:24 ኤንቲ እያሱኮ፥ “ጎዳይ ቱማ ሄ ቢትዉ ኑስ አꬅድ እምስ። ቃስ ሄ ቢታን ደእያ አሳ ኡባይ፥ ኑስ ያይድ ትልእዶሶና” ያግዶሶና።
JOS 3:1 ዎንተꬃ ጋላስ፥ ዎንታ ጉራ እያሱይነ አሳይ ሴፅማ ጌተትያ በሳፈ ደንድድ፥ ዮርዳኖሰ ሻፋ ብድ፥ ፕኖና ያን ዱንካንዶሶና።
JOS 3:2 ሄꬑ ጋላሳፐ ጉየ፥ ሀላቃት ኤንቲ ዱንካንዳ ጉታ ገልድ፥
JOS 3:3 “ሌወ ኮቸ ግድዳ ካህነት ቶክዳ፥ ጎዳ፥ ህንተ ፆሳ ጫቆ ታቦትያ ህንተ በእዳ ዎደ ዱንካንዳ ጉታፐ ደንድድ ኤንታ ካልተ።
JOS 3:4 ህንተ ካሰ ሀ ኦግያራ ብድ ኤሮና ግሾ፥ ህንተ ባና ኦግያ ኤንቲ በሳና። ሽን ጫቆ ታቦትያኮ ሺቆፕተ። ህንተ ግዶንነ ጫቆ ታቦትያ ግዶን ናምኡ ሙኩሉ ዋꬋ ግድያ ሃሆተꬅ ደኦ” ያግድ ኦድዶሶና።
JOS 3:5 እያሱይ አሳኮ፥ “ጎዳይ ዎንቶ ህንተ ግዶን ማላልስያባ ኦꬃና ግሾ፥ ህንተናተꬃ ጌሽተ” ያግስ።
JOS 3:6 ቃስ ካህነታስ፥ “ጫቆ ታቦትያ ቶክድ፥ አሳፐ ስን አꬍተ” ያግድ ኪትስ። ካህነት ጫቆ ታቦትያ ቶክድ፥ አሳፐ ስን አꬍዶሶና።
JOS 3:7 ጎዳይ እያሱኮ፥ “ታኒ ሙሰራ ግድዳይሳዳ፥ ኔራካ ግዳናይሳ አሳ ኡባይ ኤራና መላ ሀች እስራኤለ ኡባ ስንꬃን ነና ꬎቁ ꬎቁ ኦሶ ዶማና።
JOS 3:8 ኔን፥ ጫቆ ታቦትያ ቶክያ ካህነታስ፥ ‘ዮርዳኖሰ ሻፋ ዶና ጋክያ ዎደ ሃꬃ ግዶ ገልድ ኤቅተ’ ጋዳ ኪታ” ያግስ።
JOS 3:9 እያሱይ እስራኤለ አሳኮ፥ “ሃ ይድ ጎዳ፥ ህንተ ፆሳ ቃላ ስእተ።
JOS 3:10 ደኦ ፆሳይ ህንተ ግዶን ደኤይሳ ህንተ ኤራናይ፥ ካናነታ፥ ህተታ፥ ህወታ፥ ፓርዘታ፥ ገርገሰታ፥ አሞረታነ ያቡሰታ ህንተ ስንꬃፈ እ ጎድድ ከሰይሳና።
JOS 3:11 ቢታ ኡባ ጎዳ ጫቆ ታቦተይ ህንተፈ ስንꬃትድ፥ ዮርዳኖሰ ሻፋ ፕናና።
JOS 3:12 ህዛ ታማነ ናምኡ እስራኤለ ዘረꬃታፐ እስ እስ አስ ዶርተ።
JOS 3:13 ቢታ ኡባ ጎዳ ጫቆ ታቦትያ ቶክዳ ካህነታ ቶሆይ ዮርዳኖሰ ሃꬃ የꬍያ ዎደ ሃꬃይ ኤቃና። ቆሞፈ ዱገ ጎግያ ዮርዳኖሰ ሃꬃይ እስ ቦላ ሺቅድ ዶረታና” ያግስ።
JOS 3:14 አሳይ ዮርዳኖሰ ሻፋ ፕናናዉ ዱንካንዳ ጉታፐ ደንድያ ዎደ፥ ጫቆ ታቦትያ ቶክዳ ካህነት አሳ ስንꬃን ቦሶና።
JOS 3:15 ካꬅ ሺሽያ ዎደ ዮርዳኖሰ ሻፋይ መꬋይሳዳ ክፅኮካ፥ ጫቆ ታቦትያ ቶክዳ ካህነት ዮርዳኖሰ ሻፋ ጋክድ፥ ኤንታ ቶሆይ ሃꬃ ጋፃ የꬍዳ ዎደ፥
JOS 3:16 ቆሞፈ ዱገ ጎግያ ሃꬃይ ኤቅስ። ዛርታና ማታን ደእያ አዳማ ካታማ ጋካናዉ ሺቅድ ዶረትስ። ዱገ ማፅነ አባኮ ጎግያ ሃꬃይ ኤቅስ። ያንን፥ አሳይ እያርኮ ካታማ ፕንዶሶና።
JOS 3:17 እስራኤለ አሳይ መላ ቢታራ ፕንድ ዉራና ጋካናዉ ጎዳ ጫቆ ታቦትያ ቶክዳ ካህነት ዮርዳኖሰ ሻፋ ግዶን መላ ቢታን ኤቅዶሶና።
JOS 4:1 አሳ ኡባይ ዮርዳኖሰ ፕንዳፐ ጉየ ጎዳይ እያሱኮ፥
JOS 4:2 “እስ እስ እስራኤለ ኮቻፈ እስ እስ አስ ኤካዳ ታማነ ናምኡ አሳታ ዶራ።
JOS 4:3 ሄ አሳት ዮርዳኖሰ ሻፋ ግዶን ካህነት ኤቅዳ በሳፈ ታማነ ናምኡ ሹቻታ ኤካና መላነ ሄ ሹቻታ ሀች ህንተ ዱንካንድ አቅያ በሳን ዎꬃና መላ ኦዳ” ያግስ።
JOS 4:4 እያሱይ እስራኤለ ዘረꬃታፐ ዶረትዳ ታማነ ናምኡ አሳታ ፄግስ።
JOS 4:5 ኤንታኮ፥ “ጎዳ ህንተ ፆሳ ጫቆ ታቦተይ ደእያ በሳ ጉየ ዮርዳኖሰ ሻፋ ገልድ፥ እስ እስ እስራኤለ ዘረꬃታ ታይቦን ኡባይ እስ እስ ሹች ህንተ ሀሸን ቶክተ።
JOS 4:6 ሀ ሹቻት፥ ጎዳይ ሀች ኦꬅዳባ ህንተና ቆፍስያ ማላታ ግዳና። ዎንቶ ህንተ ናይት፥ ‘ሀ ሹቻት አይብሴ?’ ያግድ ኦይችያ ዎደ፥
JOS 4:7 ህንተ ዛሪድ፥ ‘ጎዳ ጫቆ ታቦተይ ፕንያ ዎደ ዮርዳኖሰ ሃꬃይ ጎገꬅ አግስ። ሄሳ ግሾ፥ ሀ ሹቻት ሀ በሳን ሀንዳባ እስራኤለ አሳ ኡባ ዎደ ቆፍስያባ ግዳና’ ” ያግስ።
JOS 4:8 ሄ አሳት እያሱይ ኪትዳይሳዳ ኦꬅዶሶና። ጎዳይ እያሱስ ኦድዳይሳዳ፥ እስራኤለ ዘረꬃታ ታይቦን ዮርዳኖሰ ሻፋፐ ታማነ ናምኡ ሹቻታ ኤፍድ፥ ኤንቲ አቅያ በሳን ዎꬅዶሶና።
JOS 4:9 እያሱይ፥ ካህነት ዮርዳኖሰ ሻፋን ጫቆ ታቦትያ ቶክድ፥ ኤቅዳ በሳን ታማነ ናምኡ ሹቻታ ኤስስ። ሄ ሹቻት ሀች ጋካናዉ ያን ደኦሶና።
JOS 4:10 ሙሰይ እያሱ ኪትዳይሳ መላ፥ ጎዳይ እያሱ ኪትዳባ ኡባይ ፖለታና ጋካናዉ፥ ጫቆ ታቦትያ ቶክዳ ካህነት ዮርዳኖሰ ሻፋን ኤቅድ ጋምእዶሶና። አሳይ ኤለስድ ሻፋ ፕንዶሶና።
JOS 4:11 አሳ ኡባይ፥ ፕንዳፐ ጉየ፥ ጎዳ ጫቆ ታቦትያ ቶክዳ ካህነት አሳፐ ስን አꬍድ ካለꬅዶሶና።
JOS 4:12 ሙሰይ ኪትዳይሳዳ፥ ሮቤላነ ጋዳ ኮቻት፥ ቃስ ምናሰ ኮቻፈ ባጋይ ኦላስ ዳንጨትድ፥ አሳፐ ስንꬃትድ ፕንዶሶና።
JOS 4:13 ዳሮተꬃን ኦይታሙ ሙኩሉ ግድያ ኦላንቾት፥ ጎዳ ስንꬃን፥ እያርኮ ማታን ደእያ ደንባን ኦለታናዉ ሺቅዶሶና።
JOS 4:14 ሄ ጋላስ፥ ጎዳይ እያሱ እስራኤለ አሳ ኡባ ስንꬃን ꬎቁ ꬎቁ ኦꬅስ። ኤንቲ ሙሰ ቦንችዳይሳዳ እያሱካ እያ ደኦ ላይꬃ ኡባን ቦንችዶሶና።
JOS 4:15 ጎዳይ እያሱኮ፥
JOS 4:16 “ጫቆ ታቦትያ ቶክዳ ካህነት ዮርዳኖሰ ሻፋፐ ከያና መላ ኦዳ” ያግስ።
JOS 4:17 እያሱይ ካህነት ዮርዳኖሰ ሻፋፐ ከያና መላ ኦድስ።
JOS 4:18 ጎዳ ጫቆ ታቦትያ ቶክዳ ካህነት ዮርዳኖሰ ሻፋፐ ከይዶሶና። ኤንታ ቶሆይ መላ ቢታ የꬍዳ ዎደ ኤለስድ፥ ዮርዳኖሰ ሃꬃይ ባ በሳ ስሚድ፥ ካሰ ጎገይሳዳ ጋፃ ጋክድ ጎገꬅ ኦይክስ።
JOS 4:19 አሳይ ኮይሮ አጌናን ታማንꬆ ጋላሳን ዮርዳኖሰ ሻፋ ፕንድ፥ እያርኮስ ዶሎሀ ባጋን ደእያ ጋልጋላን ዱንካንዶሶና።
JOS 4:20 እያሱይ ዮርዳኖሰ ሻፋፐ ኤከትዳ ታማነ ናምኡ ሹቻታ ጋልጋላን ኤስድ፥
JOS 4:21 እስራኤለ አሳኮ ሀይሳዳ ያግስ፤ “ዎንቶ ህንተ ናይት፥ ‘ሀ ሹቻት አይብሴ?’ ያግድ ህንተና ኦይችያ ዎደ፥
JOS 4:22 ‘እስራኤለ አሳይ ዮርዳኖሰ ሻፋ መላ ቢታራ የꬍድ ፕንዳይሳ ቆፍስያባ’ ያግድ ኦዴታ።
JOS 4:23 ኑኒ ፕናና ጋካናዉ፥ ጎዳይ፥ ኑ ፆሳይ ዞኦ አባ ካሰ ኑ ስንꬃን መልስዳይሳዳ፥ ህንተካ ፕናና ጋካናስ፥ ጎዳይ፥ ህንተ ፆሳይ ዮርዳኖሰ ሻፋ ህንተ ስንꬃን መልስዳይሳ ኦድተ።
JOS 4:24 ሄሳ ግሾ፥ ቢታን ደእያ አሳ ኡባይ፥ ጎዳ ዎልቃይ አይ መላ ግቴኮ ኤራና፤ ህንተካ ጎዳ፥ ህንተ ፆሳ፥ መርናዉ ቦንቻና” ያግስ።
JOS 5:1 ዮርዳኖሰ ሻፋፐ ዉሎሀ ባጋን ደእያ አሞረታ ካዎትነ መደትራነ አባ ላንቀን ደእያ ካናነታ ካዎት ኡባይ፥ እስራኤለ አሳይ ፕናና ጋካናስ ዮርዳኖሰ ሻፋ ጎዳይ ዋት መልስዳኮ ስእዳ ዎደ ኤንታ ዎዛናይ ትልእን፥ እስራኤለ አሳራ ኤቀታናዉ ፃላተꬅ ꬋይዶሶና።
JOS 5:2 ሄ ዎደ ጎዳይ እያሱኮ፥ “ሳሎ ሹቹ ቃራያዳ እስራኤለ አደ አሳ ናምአንꬆ ቃፃራ” ያግስ።
JOS 5:3 እያሱይ ቃራ ሳሎ ሹቻ ኤክድ፥ “ቃፃራ ደረ” ጌተትያ በሳን እስራኤለታ ቃፃርስ።
JOS 5:4 እ ሄሳ ኦꬅዳይ፥ ግብፀፈ ከይዳ አደታን ላይꬅ ኦላስ ጋክዳ ኡባይ መላ ቢታን ሀይቅ ዉርዳ ግሾሳ።
JOS 5:5 ግብፀፈ ከይዳ አደ አሳ ኡባይ፥ ቃፃረትዶሶና፥ ሽን ግብፀፈ ብሸ መላ ቢታን የለትዳ አደ ናይት ቃፃረትቦኮና።
JOS 5:6 ግብፀፈ ከይያ ዎደ ላይꬅ ኦላስ ጋክዳ አደ አሳ ኡባይ ጎዳስ ኪተቶና እፅዳ ግሾ፥ ኤንቲ ሀይቅድ ዉራና ጋካናስ እስራኤለት መላ ቢታን ኦይታሙ ላይꬅ ዩይዶሶና። ጎዳይ፥ ኑስ እማና ግድ ኤንታ ማይዛታስ ጫቅዳ ኤስነ ማꬅ ጎግያ አራዳ ቢታ ሀይቅዳ ኤንታ ናይት ላቶና መላ ካሰ ጫቅስ።
JOS 5:7 ሄሳ ግሾ እያሱይ ቃፃርዳይ ጎዳይ ኤንታ በሳን ደንꬅዳ ኤንታ ናይታ። ኤንቲ ኦገ ቦላ የለትዳ ግሾ ቃፃረትቦኮና።
JOS 5:8 አሳ ኡባይ፥ ቃፃረትዳፐ ጉየ፥ ኤንታ ማዱንꬃይ ፓፃና ጋካናዉ ኤንቲ ዱንካንዳ በሳን ጋምእዶሶና።
JOS 5:9 ጎዳይ እያሱኮ፥ “ሀች ታኒ ግብፀታ ቦርያ ህንተፈ ድጋስ” ያግስ። ሄሳ ግሾ፥ ሄ በሳ ሱንꬃይ ሀች ጋካናዉ ጋልጋላ ጌተትድ ፄገቴስ።
JOS 5:10 እስራኤለ አሳይ እያርኮ ደንባን ጋልጋላ ጌተትያ በሳን ዱንካንድ፥ ኮይሮ አጌናን ታማነ ኦይዳንꬆ ጋላሳን ኦማርስ ፓስካ ባልያ ቦንችዶሶና።
JOS 5:11 ፓስካፐ ጉየ፥ ዎንተꬃ ጋላስ፥ ሄ ጋድያን ዶልዳ ካꬃ አይፍያ፥ ኡይꬁነ ትያ ጫጫ ምዶሶና።
JOS 5:12 ሄ ጋድያን ሞክዳ ካꬃ ኤንቲ ምዳ ዎንተꬃ ጋላስ ማናይ ዎይሳ አግስ። ሄ ዎደፐ ዶምድ እስራኤለ አሳይ ማና ደምቦኮና። ሄሳፈ ጉየ ኤንቲ ካናነን ካፅዳ ካꬃ ምድ ደእዶሶና።
JOS 5:13 እያሱይ እያርኮ ማታን ደእያ ዎደ ማሻ ኦይክድ ባ ስንꬃን ኤቅዳ እስ አደ በእስ። እያሱይ እያኮ ሺቅድ፥ “ኔን ኑ ባጋየ ዎይኮ ኑ ሞርከታ ባጌ?” ያግድ ኦይችስ።
JOS 5:14 አደይ ዛሪድ፥ “ታኒ ኦደ ባጋካ ግድከ። ሽን ታ ጎዳ ቶራ ሞጮና ግዳዳ ያስ” ያግስ። እያሱይ ሳአን ኩንድ ጎይንድ፥ “ታ ጎዳዉ፥ ታ ኦꬃናባ ታዉ ኦዳ” ያግስ።
JOS 5:15 ጎዳ ቶራ ሞጮናይ እያሱኮ፥ “ኔን ኤቅዳ በሳይ ጌሽ ግድያ ግሾ፥ ነ ቶሁዋፐ ጫማ ከሳ” ያግስ። ያትን እያሱይ እ ግዳይሳዳ ኦꬅስ።
JOS 6:1 እስራኤለ አሳስ ያይዳ ግሾ፥ እያርኮ ካታማ ግምበ ድርሳ ፐንገት ጎርደትዶሶና። ኦንካ ካታማ ገላናዉነ ከያናዉ ዳንዳኤና።
JOS 6:2 ጎዳይ እያሱኮ፥ “እያርኮ ካታማ እያ ካዉራነ እያ ምኖ ኦላንቾታራ ነ ኩሸን አꬃ እማስ።
JOS 6:3 ኔራነ ነ ኦላንቾታራ ሳልፕድ፥ ጋላሳን እስ ቶሆ ኡሱፑን ጋላስ ጋካናዉ፥ ካታማ ግምበ ድርሳ ዩሹዋ ዩይተ።
JOS 6:4 ላፑን ካህነት እሶይ እሶይ ሞይዘ ኦይክድ፥ ጎዳ ጫቆ ታቦትያ ስንꬃን ቦ። ላፑንꬃ ጋላስ ካህነት ሞይዘ ፑንያ ዎደ ህንተ ካታማ ላፑን ቶሆ ዩይተ።
JOS 6:5 ካህነት ሞይዘ ጎችድ ፑኑዋ ህንተ ስእያ ዎደ፥ አሳ ኡባይ ኤለስድ ባንታ ቃላ ꬎቁ ኦꬅድ ዋሶ። ሄሳፈ ጉየ፥ ካታማ ግምበ ድርሳይ ኩንዳና። ሄ ዎደ አሳ ኡባይ ግዶ ላዉሁ ግድ ገላና” ያግስ።
JOS 6:6 ናወ ናአ እያሱ ካህነታ ፄግድ፥ “ጎዳ ጫቆ ታቦትያ ቶክተ። ህንተፈ ላፑን ካህነት ሞይዘ ኦይክድ፥ ጫቆ ታቦትያፐ ስን አꬍድ ቦ” ያግስ።
JOS 6:7 አሳኮ ቃስ፥ “ብድ፥ ካታማ ዩሹዋን ዩይተ፤ ኦላንቾት ጎዳ ጫቆ ታቦትያ ስንꬃን ሄመቶና” ያግድ ኪትስ።
JOS 6:8 እያሱይ ኦድዳይሳዳ፥ ላፑን ካህነት ላፑን ሞይዘ ፑንሸ ጎዳ ስንꬃን ሄመትዶሶና፤ ቃስ ጎዳ ጫቆ ታቦተይ ኤንታ ካልስ።
JOS 6:9 ኦላስ ዳንጭዳይሳት ሞይዘ ፑንያ ካህነታ ስንꬃን ሄመቶሶና። ካህነት ቃንፆና ሞይዘ ፑንያ ዎደ ደረይ ታቦትያፐ ጉየራ ካሌስ።
JOS 6:10 ሽን እያሱይ፥ “ታ ህንተና ዋሶ ጎናሽን ዋሶፍተ ዎይኮ ህንተ ቃላ ስሶፍተ፤ ሀር አቶሽን እስ ቃላካ ኦደቶፍተ። ታ ህንተና ዋሶ ግያ ሄ ጋላስ ዋስተ” ያግድ አሳ ኪትስ።
JOS 6:11 ሄሳ ግሾ፥ ጎዳ ጫቆ ታቦተይ ሄ ካታማ እስ ቶሆ ዩያናዳ ኦꬅስ። ያትድ አሳይ ባንታ ዱንካንዳ ጉታ ስሚድ፥ ያን አቅዶሶና።
JOS 6:12 ዎንተꬃ ጋላስ እያሱይ ጉርድ ደንድስ፤ ካህነትካ ጎዳ ጫቆ ታቦትያ ቶክዶሶና።
JOS 6:13 ላፑን ሞይዘታ ኦይክዳ ላፑን ካህነት ባንታ ሞይዝያ ቃንፆና ፑንሸ ጫቆ ታቦትያ ስንꬃን ቦሶና። ሞይዘይ ቃንፆና ፑነትያ ዎደ ኦላንቾት ካህነታፐ ስንꬃን ቃስ ደረይ ታቦትያፐ ጉየራ ካሌስ።
JOS 6:14 ናምአንꬆ ጋላስ ካታማ እስ ቶሆ ዩይድ፥ ባንታ ዱንካንዳ ጉታ ስምዶሶና። ኡሱፑን ጋላስ ጋካናዉ ሄሳዳ ኦꬅዶሶና።
JOS 6:15 ላፑንꬃ ጋላስ ጎንተይ ዋꬍሽን ደንድድ፥ ካሰይሳዳ ካታማ ላፑን ቶሆ ዩይዶሶና። ሄ ጋላሳ ፃላላ ካታማ ላፑን ቶሆ ኤንቲ ዩይዶሶና።
JOS 6:16 ላፑንꬃ ዩሹዋን፥ ካህነት ሞይዘ ፑንያ ዎደ፥ እያሱይ አሳኮ፥ “ጎዳይ ሀ ካታማ ህንተዉ አꬅድ እምዳ ግሾ፥ ዋስተ” ያግድ ኪትስ።
JOS 6:17 “ካታማይነ እያ ግዶን ደእያባ ኡባይ ጎዳስ ቃንገትዳባ ግድድ ꬋያናዉ በሴስ። ኑኒ ቢታ ፆሞሳና መላ የድዳ አሳታ ቆሳዳ አሽዳ፥ ላይምያ ራባነ እ ሶን ደእያ አሳ ፃላል አታናዉ በሴስ።
JOS 6:18 ሽን ህንተ መቶነ ቆሆ እስራኤለ ጉታ ቦላ ኤሆና መላ ꬋያናዉ በሲያባፐ አይባካ አሞትድ ኤኮናዳ ህንተ ሁጰስ ናገትተ።
JOS 6:19 ብራይነ ዎርቀይ፥ ናሰ ብራታፐ ኦሰትዳ ሚሸት ኡባይ፥ ጎዳስ ዱማትዳባ ግዶ። ኤንቲ ጎዳ ሚሽያ ምንጅያ ሻልያን ደኦ” ያግስ።
JOS 6:20 ሄሳ ግሾ፥ ሞይዘይ ፑነትስ፤ አሳይ ዋስስ። ደረይ ሞይዘ ፑኑዋ ስእዳ ዎደ ባንታ ቃላ ꬎቁ ኦꬅ ዋስን፥ ካታማ ግምብያ ድርሳይ ኩንድስ። ሄ ሳተን አሳይ ላዉሁ ግድ ገልድ ካታማ ኦይክዶሶና።
JOS 6:21 ባንታ ማሻ ደንꬅድ፥ ማጫ አደ፥ ናአ ጭማ፥ መሄ፥ ዶርሰ፥ ሀረነ ካታማን ሸምፖራ ደእያባ ኡባ ዎꬍዶሶና።
JOS 6:22 እያሱይ ቢታ ፆሞሳናዉ ኪተትዳ ናምኡ አሳታኮ፥ “ላይመ ራብ ሶ ብድ፥ ካሰ ህንተ እዉ ጫቅዳይሳዳ፥ እዮነ እ ሶ አሳ ኡባ ከስተ” ያግስ።
JOS 6:23 ኤንቲ ብድ፥ ራቦ፥ እ አዋ፥ እ አይዉ፥ እ እሻታነ እ ዳቦታ ኡባ እስራኤለ አሳይ ዱንካንዳ ጉታፐ ጋፃ ከስድ ዎꬅዶሶና።
JOS 6:24 ያት ስሚድ ካታማነ እያ ግዶን ደእያባ ኡባ ፁግዶሶና። ሽን ብራነ ዎርቃ፥ ናሰ ብራታፐ ኦሰትዳ ሚሸታ ጎዳ ሚሽያ ምንጅያ ሻልያን ዎꬅዶሶና።
JOS 6:25 ሽን ላይምያ ራባ እያርኮ ፆሞሳና መላ ኪተትዳ አሳታ ቆሳዳ አሽዳ ግሾ፥ እያሱይ እዮ፥ እ አዋ ሶ አሳነ ኢራ ደእያ ዳቦታ ኡባ ሀይቆፐ አሽስ። እ ኮቻት ሀች ጋካናዉ እስራኤለ ቢታን ደኦሶና።
JOS 6:26 ሄ ዎደ እያሱይ፥ “እያርኮ ካታማ ዛር ኬፃናዉ ደንድያ ኦንካ፥ ጎዳ ስንꬃን ባደትዳባ ግዶ። ቡሮ ባስያ ዎደ እያ ባይራ ናአይ ሀይቆ፥ ፐንግያ አꬅያ ዎደ እያ ተሾ ናአይ ሀይቆ” ያግድ ባድስ።
JOS 6:27 ጎዳይ እያሱራ ግድዳ ግሾ፥ እያ ሱንꬃይ ቢታ ኡባ ጋክስ።
JOS 7:1 እስራኤለ አሳይ ድገትዳባ ቦችድ፥ ጎዳስ ኪተቶና እፅዶሶና። ይሁዳ ኮቸ ግድዳ ካርማ ናአይ፥ ዘብዳ ናኣ ናአይ፥ ዛራ ናአይ አካን፥ ድገትዳባታፐ ኤክድ እስራኤለ ቦላ ጎዳ ሀንቁዋ ደንꬅስ።
JOS 7:2 እስራኤለ አሳይ እያርኮ ማታን ዱንካንድ ደእሽን፥ እያሱይ ቤት-አዌና ማታን ቤተለፐ ዶሎሀ ባጋን ደእያ ጋየ ካታማነ እያ ሄራ ፆሞስድ ያና መላ ጉꬃ አሳታ ኪትስ። ኪተትዳ አሳት ብድ፥ ጋየ ካታማ ፆሞስዶሶና።
JOS 7:3 ኤንቲ እያሱኮ ስሚድ ይድ፥ “ጋየ ካታማ ኦላናዉ አሳ ኡባይ ባናዉ ኮሸና፤ ናምኡ ዎይኮ ሄꬑ ሙኩሉ ኦላንቾት ቢኮ ግዳና። ያን ጉꬃ አስ ደእያ ግሾ፥ አሳ ኡባይ ዳቡራናዉ በሰና” ያግዶሶና።
JOS 7:4 ያትን፥ ሄꬑ ሙኩሉ ግድያ አሳት ኦላናዉ ጋየ ካታማ ብዶሶና። ሽን እስራኤለት ጋየ ካታማ አሳ ስንꬃፈ ባቃትዶሶና።
JOS 7:5 ጋየ ካታማ አሳይ እስራኤለ አሳፐ ሀስታማነ ኡሱፑን አሳ ዎꬍድ፥ ካታማ ድርሳ ፐንግያፈ ዶምድ፥ ሸባርመ ጋካናዉ እስራኤለ አሳ ዎꬍሸ ጎድዶሶና። እስራኤለ አሳ ዎዛናይ ትልእድ፥ ሃ ግድስ።
JOS 7:6 ያንን፥ እያሱይነ እስራኤለ ጭማት አዛንድ፥ ባንታ ማኡዋ ዳክዶሶና። ጎዳ ታቦትያ ስንꬃን ኦማርስ ጋካናዉ ጉፋንዶሶና። ባንታ ሁጰን ብዶ ቆልዶሶና።
JOS 7:7 ያትን፥ እያሱይ፥ “ሀይእ ጎዳ ፆሳዉ፥ ዮርዳኖሰ ሻፋ ፕንꬃዳ ነ ኑና ኤህዳይ አሞረታስ ኑና አꬃ እማናሴ? ዮርዳኖሰፐ ሄፍንꬃን ደእዳኮ ኑስ ሎኦሽን።
JOS 7:8 አቤት ጎዳዉ፥ እስራኤለ አሳይ ፆነትድ፥ ባንታ ሞርከታ ስንꬃፈ ባቃትኮ፥ ታ ዎይጎ?
JOS 7:9 ካናነትነ ሀ ቢታን ደእያ አሳ ኡባይ፥ ሄሳ ስእድ፥ ኑና ተቅድ፥ ቢታፈ ꬋይሳና። ያትን፥ ነ ግታ ሱንꬃ ግሾ ነ ኦꬃናይ አይቤ?” ያግስ።
JOS 7:10 ጎዳይ እያሱኮ፥ “አይስ ጉፋናዲ? ደንዳ ኤቃ።
JOS 7:11 እስራኤለ አሳይ ቆህዶሶና፤ ታ ኤንታና ኪትዳ ኪታ ናጎና እፅድ፥ ጫቁዋ መንꬅዶሶና። ኤንቲ ድገትዳባፐ ኤክዶሶና፤ ካይሶትዶሶና፤ ዎርዶትዶሶና፤ ቃስ ሄ ሚሽያ ባንታ ሚሽያራ ዋላክዶሶና።
JOS 7:12 ሄሳ ግሾ፥ እስራኤለ አሳይ ባንታ ሞርከታ ስንꬃን ኤቃናዉ ዳንዳእቦኮና። ኤንቲ ꬋያናዉ በሲያ ግሾ፥ ባንታ ሞርከታ ስንꬃፈ ጉየ ስሚድ ባቃትዶሶና። ህንተ ግዶፈ ꬋያናዉ በሲያባ ህንተ ꬋይሶና እፅኮ፥ ህዛፐ ታ ህንተራ ግድከ።”
JOS 7:13 ባዳ አሳ ጌሻ። ጎዳይ፥ እስራኤለ ፆሳይ፥ “ህንተ ኤካናዉ በሶናባ ኤክዳ ግሾ፥ ዎንቶስ ህንተናተꬃ ጌሽተ” ያጌስ ጋዳ ኦዳ። እስራኤለ አሳዉ፥ ሄሳ ህንተ ግዶፈ ድጎና እፅኮ፥ ህንተ ሞርከታ ስንꬃን ኤቃናዉ ዳንዳኤከታ።
JOS 7:14 ዎንቶ ዎንታ፥ ህንተ ዛርያን ዛርያን ሺቅተ። ጎዳይ ሻክያ ዛረይ ባ ኮቻን ኮቻን ሺቆ። ጎዳይ ሻክያ ኮቻይ ባ ሶ አሳን አሳን ሺቆ፤ ቃስ ጎዳይ ሻክያ ሶ አሳይ፥ እሶይ እሶይ ባዉ ሺቆ።
JOS 7:15 ድገትዳባ ኤክዳ ኡራይ ጎዳ ጫቁዋ መንꬅዳይነ እስራኤለ አሳ ቆህዳይ እያ ግድያ ግሾ፥ እነ እያዉ ደእያባ ኡባይ ታማን ፁገቶ።
JOS 7:16 እያሱይ ዎንተꬃ ጋላስ ጉራ ደንድድ፥ ኮቻን ኮቻን እስራኤለ አሳ ሺሽን፥ ጎዳይ ይሁዳ ኮቻይ ባላ ግደይሳ በስስ።
JOS 7:17 እያሱይ ይሁዳ ኮቻ ሺሽን፥ ጎዳይ ዛራሀ ኮቻይ ባላ ግደይሳ በስስ። ዛራሀ ኮቻ ሺሽን፥ ጎዳይ ዛብዳ ሶ አሳይ ባላ ግደይሳ በስስ።
JOS 7:18 ዛብዳ ሶ አሳይ እሶይ እሶይ ባዉ ሺቅን፥ ዉርሰꬃን ጎዳይ ዛብዳ ናአ ናኣ፥ ካርማ ናኣ አካን ባላ ግደይሳ ቆንጭስስ።
JOS 7:19 እያሱይ አካናኮ፥ “ታ ናአዉ፥ ጎዳ፥ እስራኤለ ፆሳ ቦንቻ፤ አነ ነ ኦꬅዳባ ታዉ ቆሶና ኦዳ” ያግስ።
JOS 7:20 አካን ዛሪድ፥ “ኤ ቱማ፥ ታኒ ጎዳ እስራኤለ ፆሳ ናቃስ። ታኒ ኦꬅዳይ ሀይሳ፤
JOS 7:21 ኑኒ ድእድ ኤክዳ ሚሽያ ግዶፈ እስ ሎኦ ሳናኦራ ቢታ ካባ፥ ናምኡ ክሎ ግድያ ብራታ ብራነ ባጋ ክሎ ግድያ ዎርቃ በአዳ አሞታስ፤ ኤካስ። ያታዳ ታ ዱንካንያ ግዶን ቢታ ቦካዳ ብራ ጋርሳራ ዎꬃዳ ሞጋስ።”
JOS 7:22 ያትን፥ እያሱይ አሰ ኪትስ። ኤንቲ ዎፅ ብድ ዱንካንያ ግዶን ብራ ጋርሳራ ዎꬅድ ሞግዳ ሚሸታ ደምዶሶና።
JOS 7:23 ኪተትድ ብዳ አሳት ሄ ሚሸታ ዱንካንያፐ እያሱኮነ እስራኤለ አሳ ኡባኮ ኤህድ፥ ጎዳ ስንꬃን ዎꬅዶሶና።
JOS 7:24 ያትን እያሱይነ እስራኤለ አሳ ኡባይ፥ አካና፥ ብራ፥ ካባ፥ ዎርቃ፥ እያ አደ ናይታነ እያ ማጫ ናይታ፥ እያ መህያ፥ እያ ሀረታ፥ እያ ዶርሳታ፥ እያ ዱንካንያነ እያዉ ደእያባ ኡባ መቶ ዛንጋራ ጌተትያ በሳ ኤፍዶሶና።
JOS 7:25 እያሱይ አካናኮ፥ “ሀ መቱዋ ኑ ቦላ አይስ ኤሀዲ? ጎዳይ ሀች ነ ቦላ መቶ ኤሀና” ያግስ። ያትን እስራኤለ አሳ ኡባይ፥ አካናነ እያ ሶ አሳ ሹቻን ጫድ ዎꬍድ፥ እያዉ ደእያባ ኡባራ ዎል ጋꬅድ ታማን ፁግዶሶና።
JOS 7:26 ኤንቲ አካና ቦላ ሀች ጋካናዉ በንትያ ዳሮ ሹች ኬልዶሶና። ያትን፥ ጎዳይ ባ ኤፅያ ሀንቁዋፈ ስምስ። ሀች ጋካናዉ ሄ በሳይ መቶ ዛንጋራ ጌተትድ ፄገቴስ።
JOS 8:1 ጎዳይ እያሱኮ፥ “ያዮፋ፤ ህርጎፋ፤ ኦላንቾታ ኡባ ኔራ ኤካዳ፥ ጋየ ካታማ ኦላናዉ ከያ። ጋየ ካዋ፥ እያ አሳ፥ እያ ካታማነ እያ ቢታ ታ ነ ኩሸን አꬃዳ እማስ።
JOS 8:2 ኔን እያርኮ ቦላነ እያ ካዋ ቦላ ኦꬅዳይሳዳ ጋየ ቦላነ እያ ካዋ ቦላ ኦꬃና። ሽን ህንተ ሀእ ኦልድ ድእያ ሻሎነ መሄ ህንተዉ ኤክተ። ካታማፐ ጉየ ባጋራ ቆፖና መንꬃ ገላናዉ ጊገታ።”
JOS 8:3 ሄሳ ግሾ፥ እያሱይነ ኦላንቾት ኡባይ፥ ጋየ ካታማ ኦላናዉ ደንድዶሶና። እያሱይ ባ ኦላንቾታ ግዶፈ ሀስታሙ ሙኩሉ ግድያ ምኖ ኦላንቾታ ዶርድ ቃማ የድሸ፥
JOS 8:4 ኤንታና ሀይሳዳ ያግድ ኪትስ፤ “ብድ ካታማፐ ጉየ ባጋራ ቆሰትድ ናግተ። ካታማፐ ሃክድ ቦናሽን፥ መንꬅ ገላናዉ ጊግድ ናግተ።
JOS 8:5 ታነ ታራ ደእያ አሳ ኡባይ፥ ካታማኮ ሺቃና። ሄ ዎደ ጋየ ካታማ አሳይ ኑና ኦላናዉ ያ ዎደ ካሰይሳዳ ኑ ኤንታ ስንꬃፈ ጉየ ስሚድ ባቃታና።
JOS 8:6 ኤንቲ ከሰይሳዳ ኑ ኤንታ ስንꬃፈ ባቃትያ ዳንን፥ ኑፐ ባቃቶሶና ግድ፥ ካታማፐ ኑ ኤንታ ሃሳና ጋካናዉ ኑና ካላና።
JOS 8:7 ሄ ዎደ ህንተ ቆሰትዳ በሳፈ ከይድ ካታማ ኦይክተ። ጎዳይ ህንተ ፆሳይ ካታማ ህንተ ኩሸን አꬅድ እማና።
JOS 8:8 ካታማ ኦይክዳፐ ጉየ፥ ጎዳይ ኪትዳይሳ መላ ታማን ፁግተ። ታ ህንተና ኪታስ” ያግስ።
JOS 8:9 ሄሳፈ ጉየ እያሱይ ኦላንቾታ ኪትስ። ኤንቲ ብድ ጋየ ካታማፐ ዉሎሀ ባጋን ቤተለፐነ ጋየፐ ግዶን ቆሰትድ ናግዶሶና። ሽን እያሱይ ሄ ቃማ አሳራ አቅስ።
JOS 8:10 ዎንተꬃ ጋላስ ጉራ እያሱይ ደንድድ፥ ኦላንቾታ ፄግስ። ያትድ፥ እነ እስራኤለ ጭማት ኦላንቾታ ካለꬅድ ጋየ ካታማ ብዶሶና።
JOS 8:11 እያራ ደእያ ኦላንቾት ኡባይ፥ ስን ብድ ጋየ ካታማ ማትድ፥ ካታማፐ ፑደሀ ባጋን ዱንካንዶሶና። ኤንታፈነ ጋየ ካታማፐ ግዶን ዛንጋር ደኤስ።
JOS 8:12 እያሱይ እቻሹ ሙኩሉ ኦላንቾታ ዶርድ፥ ካታማፐ ዉሎሀ ባጋራ፥ ቤተለፐነ ጋየፐ ግዶን ቆስድ ዎꬅስ።
JOS 8:13 ኦላንቾታፐ ባጋ ካታማፐ ፑደሀ ባጋራ፥ ቃስ ካታማ መንꬅድ ገላና ኦላንቾታ ዉሎሀ ባጋራ በሰ በሰ ኦይꬅስ። ሄ ቃማ እያሱይ ሄ ዛንጋራን አቅስ።
JOS 8:14 ጋየ ካታማ ካዎይ ሄሳ በእዳ ዎደ፥ ባ ኦላንቾታ ኡባ ኤክድ፥ እስራኤለ አሳራ ኦለታናዉ ደምባ ቢታ ከይዶሶና። ሽን ካዎይ ካታማፐ ጉየ ባጋራ ቆሰት ኡትዳ ኦላንቾት ደኤይሳ ኤርቤና።
JOS 8:15 እያሱይነ እስራኤለ አሳ ኡባይ ፆነትዳባ ዳንድ፥ ኤንታ ስንꬃፈ መላ ቢታ ስሚድ ባቃትዶሶና።
JOS 8:16 ጋየ ካታማን ደእያ አሳ ኡባይ፥ ኤንታ የደꬃናዉ ፄገረት ከይድ፥ እያሱ ጎድሸ ካታማፐ ሃክድ ብዶሶና።
JOS 8:17 ጋየ ዎይኮ ቤተለን ደእያ አሳ ኡባይ፥ እስራኤለ አሳ የደꬃናዉ ካታማ የግድ ከይን ካታማ ፐንገያ ናግያ አስ ꬋይዳ ግሾ፤ ዶያ አትስ።
JOS 8:18 ሄሳፈ ጉየ ጎዳይ እያሱኮ፥ “ነ ቶራ ጋየ ካታማ ቦላ ደንꬃ። ታኒ ጋየ ካታማ ነ ኩሸን አꬃዳ እማና” ያግስ። ያትን እያሱይ ባ ቶራ ካታማ ቦላ ደንꬅስ።
JOS 8:19 እያሱይ ባ ቶራ ደንꬅዳ ዎደ ቆሰትዳ ኦላንቾት ባንታ በሳፈ ደንድድ፥ ካታማ ገል ኦይክድ፥ ኤለስድ ታማን ፁግዶሶና።
JOS 8:20 ጋየ ካታማ አሳይ ጉየ ስሚድ ፄልያ ዎደ፥ ካታማ ጩያይ ሳሎ ደንድሽን በእዶሶና። መላ ቢታ ባቃትዳ እስራኤለ አሳይ፥ ባንታና የደꬅያ አሳ ቦላ ጉየ ስምዳ ግሾ፥ ኤንቲ አዉ ባጋራካ ከስ ኤካናዉ ዳንዳእቦኮና።
JOS 8:21 እያሱነ እያራ ደእያ አሳ ኡባይ፥ ቆሰት ኡትዳ ኦላንቾት ካታማ ኦይክዳይሳነ ጩያይ ሳሎ ደንድዳይሳ በእዳ ዎደ ጉየ ስሚድ፥ ጋየ ካታማ አሳ ዎꬍዶሶና።
JOS 8:22 ካታማ ገልድ ኦይክዳ ኦላንቾትካ ካታማፐ ኤንታ ቦላ ከይዶሶና። ያትን፥ ጋየ አሳይ እስራኤለ ኦላንቾታን ኡባ ባጋራ ተቀትዳ ግሾ፥ እሶይካ አቶና ዎይኮ ከስ ኤኮና ኡባ ዎꬍድ ዉርስዶሶና።
JOS 8:23 ሽን ጋየ ካታማ ካዋ ደእድ፥ እያሱኮ ኤህዶሶና።
JOS 8:24 እስራኤለ አሳይ ጋየ ካታማ አሳ ኤንታና የደꬅዳ በሳን ማሻን ዎꬍድ ኦንግዳፐ ጉየ፥ ኡባይ ጉየ ካታማ ስሚድ፥ ካታማን አትዳ አሳ ኡባ ማሻን ዎꬍዶሶና።
JOS 8:25 ሄ ጋላስ ጋየ ካታማን ሀይቅዳ አደይነ ማጭ ታማነ ናምኡ ሙኩላ።
JOS 8:26 እያሱይ ጋየ ካታማን ደእያባ ኡባ ኦንጋና ጋካናዉ ካታማ ቦላ ደንꬅዳ ቶራ ዱገ ዎꬅቤና።
JOS 8:27 ሽን ጎዳይ እያሱ ኪትዳይሳ መላ እስራኤለ አሳይ ሄ ካታማ መህያነ ሻሉዋ ባንታዉ ድእዶሶና።
JOS 8:28 እያሱይ ጋየ ካታማ ፁግስ፤ ሄ ካታማይ ሀች ጋካናዉ ላለꬃ ዶረነ አስ ባይና በሲ ግድድ አትስ።
JOS 8:29 እያሱይ፥ ጋየ ካታማ ካዋ ዎꬍድ ኦማርስ ጋካናዉ ምꬃ ቦላ ካቅስ። አው ዉልያ ዎደ፥ እያ አሀ ካታማ ገልያ ፐንገን የጋና መላ ኦꬅስ። እያ ቦላ ዳሮ ሹቻ ኬልዶሶና፤ ሄ ኬላ ሹቻይ ሀች ጋካናዉ ሄ በሳን ደኤስ።
JOS 8:30 ሄሳፈ ጉየ፥ እያሱይ ኤባላ ደርያ ቦላ ጎዳስ እስራኤለ ፆሳስ ያርሾ በሲ ኬፅስ።
JOS 8:31 ጎዳ አይለይ ሙሰይ እስራኤለ አሳ ኪትዳይሳዳነ ህገ ማፃፋን ፃፈትዳይሳዳ፥ ያርሾ በሳ ማሰትቦናነ ብራት ቦችቦና ሹቻፈ ኬፅድ፥ እያ ቦላ ጎዳስ ፁሳ ያርሾነ እስፈተꬃ ያርሾ ያርሽዶሶና።
JOS 8:32 እያሱይ፥ እስራኤለ አሳ ስንꬃን፥ ሙሰ ህግያ ሹቻ ቦላ ዛሪድ ፃፍስ።
JOS 8:33 እስራኤለ አሳ አንጃና መላ ጎዳ አይለይ ሙሰይ ኪትዳይሳዳ እስራኤለ አሳ ኡባይ፥ አሳ ጋደ አሳታ፥ ኤንታ ጭማት፥ ኤንታ ሹማትነ ዳይናት ኡባይ፥ ጎዳ ጫቆ ታቦትያ ቶክዳ ሌወ ኮቸ ግድዳ ካህነታ ስንꬃን ኡሻቻ ባጋንነ ሀድርሳ ባጋን ኤቅዶሶና። ኤንታፈ ባጋይ ጋርዛና ዙማ ስንꬃን፥ ቃስ ባጋይ ኤባላ ደርያ ስንꬃን ኤቅዶሶና።
JOS 8:34 ህገ ማፃፋን ፃፈትዳይሳዳ፥ እያሱይ ህገ ቃላ ኡባ፥ አንጁዋነ ባደꬃ ናባብስ።
JOS 8:35 ሙሰይ ኪትዳ ህግያ እያሱይ፥ እስራኤለ አሳ ኡባስ፥ ማጫሳስ፥ ናይታስነ፥ አሳ ጋደ አሳስ እስ ቃላካ አሾና ናባብስ።
JOS 9:1 ዮርዳኖሰ ሻፋፐ ዉሎሀ ባጋን ደረይ ዳርያ ቢታንነ ጋꬋን መደትራነ አባፈ ብድ ልባኖሰ ጋካናዉ ደእያ ህተታ፥ አሞረታ፥ ካናነታ፥ ፓርዘታ፥ ህወታነ ያቡሰታ ካዎት ኡባይ፥ ጋየ አሳይ ፆነትዳይሳ ስእዳ ዎደ፥
JOS 9:2 እያሱነ እስራኤለታ ኦላናዉ እስፈ ሺቅድ ዞረትዶሶና።
JOS 9:3 ጋባኦና አሳይ እያሱይ እያርኮ ቦላነ ጋየ ካታማ ቦላ ኦꬅዳባ ስእድ፥
JOS 9:4 እያሱ ጭማናዉ ኮይዶሶና። ኤንቲ ሽንቀ ቃችድ፥ ጭማ ዎይነ ኦጎሮነ ጩርቃ ቃርፂቴ ሀረ ቦላ ጫንድ፥ እያሱኮ አሰ ኪትዶሶና።
JOS 9:5 ኪተትዳ አሳት ዉርዳ ጫማ አꬅዶሶና፤ ፔትዳ አፍላ ማእዶሶና፤ ኤንቲ ኦይክዳ ሽንቀይካ መልዳባነ መቀርትዳባ።
JOS 9:6 ኤንቲ እስራኤለ አሳይ ዱንካንዳ ጉታ ጋልጋላ ብድ፥ እያሱኮነ እስራኤለ አሳኮ፥ “ኑኒ ሃሆ ጋደፐ ይዳ። ኑ ይዳይ ህንተራ ጫቀትድ ሳሮ ዳናሳ” ያግዶሶና።
JOS 9:7 ያትን፥ እስራኤለ አሳይ ጋባኦነ አሳኮ፥ “ህንተ ኑ ማታን ደእያ አሰኮሽ? ኑ አይብን ኤርድ ህንተራ ጫቀታኔ?” ያግዶሶና።
JOS 9:8 ኤንቲ እያሱኮ፥ “ኑ ነ አይለታ” ያግድ ዛርዶሶና። እያሱይ ዛሪድ፥ “ህንተ ኦናንቴ? አዉፐ ይደቲ?” ያግድ ኦይችስ።
JOS 9:9 ኤንቲ ዛሪድ፥ “ኑኒ ነ አይለት ጎዳይ ህንተ ፆሳይ ግብፀን ኦꬅዳይሳ ስእዳ ግሾ፥ ዳሮ ሃሆ ጋደፐ ይዳ።
JOS 9:10 ቃስ ዮርዳኖሰ ሻፋፐ ሄፍንꬃን ዉሎሀ ባጋን ደእያ ናምኡ አሞረ ካዎታ፥ ሀሰቦና ካዋ ስሆናነ አስታሮተን ደእያ ባሳነ ካዋ ኦገ ቦላ እ ኦꬅዳይሳ ኑ ስእዳ።
JOS 9:11 ኑ ቢታ ጭማትነ ኑ ቢታን ደእያ ኡባይ፥ ኦገስ ሽንቀ ጊግስ ኦይክድ ብድ ኤንታራ ጋሄትድ፥ ኤንታኮ፥ ‘ኑ ህንተ አይለታ፤ ኑ ይዳይ ህንተራ ጫቀትድ ሳሮ ዳናሳ’ ያግተ።
JOS 9:12 “ኑ ኦይክዳ ሽንቅያ በእተ። ኑ ሶፐ ኤክድ ከይያ ዎደ ሆኦ፥ ሽን ሀእ መልዳይሳነ ፑሉምዳይሳ በእተ።
JOS 9:13 ሀ ዎይንያ ኦጎሮታን ኑ ኩንꬅያ ዎደ ኦራꬅ፥ ሽን ሀእ ዳከትዳይሳ በእተ። ኦግያ ሃሆተꬃፈ ደንዶይሳን ኑ ማኦይነ ኑ ጫማይ ዉርስ” ያግዶሶና።
JOS 9:14 ሽን ጎዳ ሸንያ ኦይቾና ደእሸ፥ እስራኤለ አሳይ ኤንታ ሽንቅያፈ ጉꬃራ ኤክዶሶና።
JOS 9:15 ያትን፥ እያሱይ ህንተና ዎꬎኮ ግድ ሳሮ ጫቆ ኤንታራ ጫቀትስ። እስራኤለ ጭማትካ ሄ ጫቁዋ መንꬆኮ ግድ ጫቅዶሶና።
JOS 9:16 ኤንታራ ጫቅዳ ሄꬓንꬆ ጋላሳን ሄ አሳት ኤንታ ቢታን ደኤይሳነ ኤንታዉ ሾሮ ግደይሳ እስራኤለ አሳይ ስእዶሶና።
JOS 9:17 እስራኤለ አሳይ ሄꬑ ጋላስ ሄመትድ፥ ሄ አሳት ደእያ ካታማታ ጋክዶሶና። ኤንታ ካታማት ጋባኦና፥ ካፍራ፥ ባሮተነ ቅርያት-ይኣርማ ጌተትድ ፄገቶሶና።
JOS 9:18 ሽን እስራኤለ ጭማት ኤንታዉ ጎዳ፥ እስራኤለ ፆሳ ሱንꬃን ጫቅዳ ግሾ፥ እስራኤለ አሳይ ኤንታ ዎꬍቦኮና። ያትን፥ አሳ ኡባይ ጭማታ ቦላ ዙዙምዶሶና።
JOS 9:19 ሽን እስራኤለ ጭማት፥ “ኑ ኤንታዉ ጎዳ እስራኤለ ፆሳ ሱንꬃን ጫቅዳ ግሾ፥ ሀእ ኤንታ ቦቻናዉ ዳንዳኦኮ።
JOS 9:20 ኑኒ ኤንታዉ ሀይሳዳ ኦꬃና፤ ኑኒ ኤንታዉ ጫቅዳ ጫቁዋ መንꬅን ጎዳ ሀንቆይ ኑ ቦላ ዮናዳ ኤንታ ዎꬎኮ።
JOS 9:21 ኤንቲ ደኦ ጊተ። ግዶሽን እስራኤለ አሳ ኡባስ ምꬅነ ሃ ሺሸይሳታ ግዶ” ያግዶሶና። ሄሳ ግሾ፥ ጭማት ባንታ ጫቁዋ ናግዶሶና።
JOS 9:22 እያሱይ ጋባኦና አሳ ፄግድ፥ “ኑ ማታን ደእሸ፥ ‘ኑኒ ዳሮ ሃሆ ቢታፈ ይዳ’ ግድ፥ ኑና አይስ ጭምደቲ?
JOS 9:23 ህንተ ሄሳ ኦꬅዳ ግሾ፥ ባደትዳይሳታ። ህንተ መርናዉ ታ ፆሳ ኬꬃን ምꬅነ ሃ ሺሽያ አይለ ግዳና” ያግስ።
JOS 9:24 ኤንቲ ዛሪድ፥ “ኑኒ ነ አይለት፥ ጎዳይ ህንተ ፆሳይ ሀ ቢታን ደእያ አሳ ኡባ ꬋይስድ፥ ቢታ ህንተዉ እማናዉ ባ አይልያ ሙሰስ ኦድዳይሳ ስእዳ። ሄሳ ግሾ፥ ህንተዉ ባብድ ሀይሳ ኦꬅዳ።
JOS 9:25 ሀእ ኑኒ ነ ኩሸን ደኦስ። ነዉ ሎኦነ ሱረ ዳንድ በንትዳባ ኦꬃ” ግድ ዛርዶሶና።
JOS 9:26 እያሱይ እስራኤለ አሳይ ኤንታ ዎꬎና መላ አሽስ።
JOS 9:27 ሄ ጋላስ እያሱይ፥ ጋባኦና አሳታ እስራኤለታስነ ጎዳይ ዶርዳ በሳን ደእያ እያ ያርሾ በሳስ ሃነ ምꬅ ሺሽያ አስ ግዳና መላ ኦꬅስ። ጋባኦና አሳት ሀች ጋካናዉ ሄሳ ኦꬆሶና።
JOS 10:1 እያሱይ እያርኮ ካታማ ኦል ꬋይስድ፥ እያ ካዋ ዎꬍዳይሳዳ፥ ጋየ ካታማ ኦል ꬋይስድ፥ እያ ካዋ ዎꬍዳይሳ የሩሳላመ ካዎይ አዶን-ፀደቅ ስእስ። ቃስ ጋባኦና አሳይ እስራኤለ አሳራ ሳሮ ዳናዉ ጫቀትዳይሳ ስእስ።
JOS 10:2 ጋባኦን ሀንኮ ካዎ ካታማታዳ ግታ ካታማ፤ ሄ ካታማይ ጋየ ካታማፐ አꬌስ፤ እያን ደእያ አደትካ ምኖ ኦላንቾ ግደይሳ ኤርያ ግሾ፥ አዶንፀደቅነ እያ አሳይ ዳሮ ያይዶሶና።
JOS 10:3 ሄሳ ግሾ፥ የሩሳላመ ካዎይ አዶን-ፀደቅ፥ ከብሮና ካዋ ሆሀማስ፥ ያርሙታ ካዋ ፕራማስ፥ ላክሶ ካዋ ያፍአስነ፥ ኤግሎና ካዋ ዳብራስ ሀይሳዳ ያግድ ኪትስ፤
JOS 10:4 “ጋባኦና አሳይ እያሱራነ እስራኤለ አሳራ ሳሮ ደአናዉ ጫቅዳ ግሾ፥ ኤንታ ኦላናዉ ይድ ታና ማድተ” ያግስ።
JOS 10:5 ሀ እቻሹ አሞረ ካዎት ባንታ ኦላንቾታ እስፈ ጋꬅድ፥ ጋባኦና ኦልዶሶና።
JOS 10:6 ጋባኦና አሳይ ጋልጋላን ዱንካንዳ እያሱኮ፥ “ኑና ነ አይለታ አጎፋ፤ ኤለሳ ያዳ ኑና አሻ። ደረይ ዳርያ ቢታን ደእያ አሞረ ካዎት ኡባይ ኑና ኦላናዉ ባንታ ኦላንቾታ እስኖ ኦꬅዳ ግሾ፥ ነ ኑና ማዳ” ያግድ ኪትዶሶና።
JOS 10:7 ሄሳ ግሾ፥ እያሱይ፥ ባራ ደእያ ኦላንቾታነ ምኖ አሳታ ኡባ፥ ጋልጋላፐ ኤክድ ብስ።
JOS 10:8 ጎዳይ እያሱኮ፥ “ኤንታዉ ባቦፋ፤ ታኒ ኤንታ ነ ኩሸን አꬃዳ እማስ። ኤንታፈ እስ አስካ ኔራ ኤቀታናዉ ዳንዳኤና” ያግስ።
JOS 10:9 እያሱይ ጋልጋላፐ ቃማ ኩመꬅ ሄመትሸ አቅድ፥ ጋባኦነ አሳይ ቆፖና ደእሽን ኤንታ ቦላ ኦላ ደንꬅስ።
JOS 10:10 ጎዳይ እስራኤለ አሳ ስንꬃን ኤንታዉ ዎዛና ካሀ ꬋይስስ። እስራኤለ አሳይ ኤንታ ጋባኦናን ዎꬍዶሶና። እስራኤለት ኤንታ ቤት-ሆሮና ኤፍያ ኦግያ ኦይꬅድ ጎድሸ፥ አዜቃነ ማቀዳ ጋካናዉ ጎድዶሶና።
JOS 10:11 ኤንቲ ቤት-ሆሮናፐ ዱገ አዜቃ ኤፍያ ኦግያራ እስራኤለ አሳ ስንꬃፈ ባቃትሽን፥ ጎዳይ ግታ ሻቻ ሹቹ ሳሎፐ ኤንታ ቦላ ቡክስስ። እስራኤለ አሳይ ዎꬍዳ አሳፐ፥ ሻቻይ ዎꬍዳ አሳይ ዳሮ።
JOS 10:12 ጎዳይ እስራኤለ አሳስ አሞረታ፥ አꬅድ እምዳ ጋላስ፥ እስራኤለ አሳይ ስእሽን፥ እያሱይ፥ “አዋይ ጋባኦና ቦላ ዉሎና ኤቆ። አጌናይካ ኤሎና ዛንጋራ ቦላ ኤቆ” ያግድ ጎዳ ዎስስ።
JOS 10:13 እስራኤለ አሳይ ባንታ ሞርከታ ፆናና ጋካናዉ፥ አዋይ ዉሎና ኤቅስ፤ አጌናይካ ባ ደእያ በሳፈ ቃፅቤና። ሄስ ያሻራ ማፃፋን ፃፈትስ። አዋይ ሳሎስ ግዶን ቃፆና ኤቅስ፤ እስ ጋላስ ኩመꬅ አዋይ ዉሎና ጋምእስ።
JOS 10:14 ጎዳይ አሳ ቃላ ስእዳ ሄ ጋላሳ መላ ጋላስ ሀይሳፈ ካሰካ ሀይሳፈ ስንꬃንካ ዴና። ቱማካ ጎዳይ እስራኤለ አሳስ ኦለትስ።
JOS 10:15 ሄሳፈ ጉየ፥ እያሱይነ እያ ኦላንቾት ባንታ ዱንካንዳ ጉታ ጋልጋላ ስምዶሶና።
JOS 10:16 ሄ እቻሹ አሞረ ካዎት ባቃትድ፥ ማቀዳ ጎንጎሉዋን ቆሰትዶሶና።
JOS 10:17 እቻሹ ካዎት፥ ማቀዳ ጎንጎሉዋን ቆሰትድ ደእሽን ደምዳይሳ እያሱስ ኦድዶሶና።
JOS 10:18 እያሱይ ዛሪድ፥ “ግታ ሹቻታ ጎንዶርስድ፥ ጎንጎሉዋ ዶና ጎርድተ፤ ኤንታ ናጋና መላ አሰ ያን ዎꬅተ።
JOS 10:19 ሽን ህንተ ያን ጋምኦፍተ፤ ኤንቲ ባንታ ካታማ ገልድ አቶና መላ ህንተ ሞርከታ ጎድድ ኤንታ ዎꬍተ። ጎዳይ ህንተ ፆሳይ ኤንታ ህንተ ኩሸን አꬅድ እምስ” ያግስ።
JOS 10:20 ጉꬃ አሳት ባቃትድ ባንታ ግምበትዳ ካታማ ገልድ አትኮካ፥ እያሱይነ እስራኤለ አሳይ አሳ ኡባ ዎꬍዶሶና።
JOS 10:21 ሄሳፈ ጉየ፥ እስራኤለ አሳ ኡባይ ሳሮን ስሚድ፥ እያሱይ ዱንካንድ ደእያ ጉታ ማቀዳ ይዶሶና። ሄ ዎደፐ ዶምድ ኦንካ እስራኤለ አሳ ቦላ እስ ቃላካ ኦደታናዉ ፃልዳ አስ ባዋ።
JOS 10:22 ሄሳፈ ጉየ፥ እያሱይ፥ “ጎንጎሉዋ ዶና ዶይድ፥ ሄ እቻሹ ካዎታ ከስድ፥ ታዉ ሀ ኤክድ ዪተ” ያግስ።
JOS 10:23 ጎንጎሉዋ ዶና ዶይድ፥ የሩሳላመ ካዋ፥ ከብሮና ካዋ፥ ያርሙታ ካዋ፥ ላክሶ ካዋነ ኤግሎና ካዋ እያኮ ኤህዶሶና።
JOS 10:24 ኤንቲ ሄ ካዎታ እያኮ ኤህዳ ዎደ፥ እያሱይ እስራኤለ አሳ ኡባ ባኮ ፄግድ፥ ባራ ብዳ ቶራ ሞጮናታኮ፥ “ሃ ይድ፥ ህንተ ቶሁዋ ሀ ካዎታ ቆꬍያን ዎꬅተ” ያግስ። ኤንቲ ይድ ኪተትዳይሳዳ ኦꬅዶሶና።
JOS 10:25 እያሱይ ኤንታኮ፥ “ህንተ ኦለትያ ህንተ ሞርከታ ቦላ ጎዳይ ሀይሳዳ ኦꬃና ግሾ፥ አይኮይ ባዋ ያዮፍተ፤ ምንተ” ያግስ።
JOS 10:26 እያሱይ ሄ እቻሹ ካዎታ ዎꬍድ፥ እቻሹ ምꬃ ቦላ ካቅስ፤ ኤንታ አሀይ ኦማርስ ጋካናዉ ያን ፔእስ።
JOS 10:27 አው ዉልያ ዎደ እያሱይ፥ “አሀ ዎꬍስድ፥ ኤንቲ ካሰ ቆሰትዳ ጎንጎሉዋን ሆልተ። ያትድ፥ ሄ ጎንጎሉዋ ዶና ግታ ሹቻን ጎርድተ” ያግድ ኪትስ። ሄ ሹቻት ሀች ጋካናዉ ያን ደኦሶና።
JOS 10:28 ሄ ጋላስ እያሱይ ማቀዳ ካታማ ኦይክስ፤ ካታማ ካዋካ ዎꬍስ፤ ካታማን ደእያ አሳ ኡባ እስ አስካ አሾና ꬋይስስ። እያርኮ ካታማ ካዋ ቦላ ኦꬅዳይሳዳ፥ ማቀዳ ካታማ ካዋ ቦላ ኦꬅስ።
JOS 10:29 ያፐ ስሚድ፥ እያሱይነ እያ ኦላንቾት ኡባይ ማቀዳፐ ብድ ልብና ካታማ ኦልዶሶና።
JOS 10:30 ጎዳይ ሄ ካታማነ ካታማ ካዋ ኤንታ ኩሸን አꬅድ እምስ። እያሱይ ካታማን ደእያ አሳፐ እሱዋካ አሾና ማሻን ዎꬍስ። እያርኮ ካታማ ካዋ ቦላ ኦꬅዳይሳዳ ልብና ካታማ ካዋ ቦላ ኦꬅስ።
JOS 10:31 እያሱይነ እያ ኦላንቾት ልብና ካታማፐ ላክሶ ካታማ ብድ፥ ሄ ካታማ ኦልዶሶና።
JOS 10:32 ጎዳይ ላክሶ ካታማ እስራኤለ አሳ ኩሸን አꬅድ እምን፥ እያሱይ ሄ ካታማ ዩሹዋ ተቅድ ናምአንꬆ ጋላሳን ኦይክስ። ልብና ካታማን ኦꬅዳይሳዳ ላክሶ ካታማን ደእያ አሳ ኡባ ማሻን ዎꬍስ።
JOS 10:33 ሄ ዎደ፥ ገዘራ ካዎይ ሆራም፥ ላክሶ ካዋ ማዳናዉ ይስ፥ ሽን እያሱይ እያነ እያ ኦላንቾታ ꬋይስስ፤ ኤንታፈ እስ አስካ አትቤና።
JOS 10:34 ሄሳፈ ስሚድ፥ እያሱይነ እያ ኦላንቾት ኡባይ ላክሶ ካታማፐ ኤግሎና ካታማ ብድ፥ ሄ ካታማ ዩሹዋ ተቅድ ኦልዶሶና።
JOS 10:35 ሄ ጋላስ ኤግሎና ካታማ ኦይክድ፥ ላክሶ ካታማን ኦꬅዳይሳዳ ማሻን አሰ ኡባ ዎꬍዶሶና።
JOS 10:36 ያት ስሚድ፥ እያሱይነ እያ ኦላንቾት ኤግሎናፐ ከብሮና ብድ፥ ከብሮና ኦልዶሶና።
JOS 10:37 ሄ ካታማነ እያ ዩሹዋን ደእያ ጉꬃ ካታማታ ኦይክድ እያን ደእያ አሳነ ካዋ ዎꬍዶሶና። እያሱይ ኤግሎናን ኦꬅዳይሳዳ ሄ ካታማ ቦላካ ኦꬅስ።
JOS 10:38 ሄሳፈ ጉየ፥ እያሱይነ እያራ ደእያ እስራኤለ ኦላንቾት ጉየ ስሚድ ዳብራ ካታማ ኦልዶሶና።
JOS 10:39 ሄ ካታማነ እያ ዩሹዋን ደእያ ጉꬃ ጉታታ ኦይክድ፥ እያን ደእያ አሳነ ካዋ ዎꬍዶሶና። እያሱይ ከብሮናነ ልብና ካታማታ ቦላ ኦꬅዳይሳዳ ዳብራ ቦላ ኦꬅስ።
JOS 10:40 እያሱይ ሄ ቢታን ደእያ ካታማታ ኡባ ኦይክስ። ደረይ ዳርያ ቢታን፥ ነገበ ጋꬋን፥ ሎቡዋነ ኤንታ ካዎታ ኡባ ኦይክስ። ጎዳይ እስራኤለ ፆሳይ እያ ኪትዳይሳዳ፥ ቢታ ቦላ ደእያ አስ እሱዋካ አሾና ኡባ ዎꬍድ ꬋይስስ።
JOS 10:41 እያሱይ ቃደስ-ባርነፈ ብድ ጋዛ ጋካናዉ ቃስ ጎሸና ቢታፈ ብድ ጋባኦና ጋካናዉ ደእያ ኡባ ኦልድ ፆንስ።
JOS 10:42 ጎዳይ፥ እስራኤለ ፆሳይ፥ እስራኤለታስ ኦለትዳ ግሾ እያሱይ ሀ ካዎታነ ኤንታ ቢታ ኡባ ኦልድ ኦይክስ።
JOS 10:43 ሄሳፈ ጉየ፥ እያሱይነ እስራኤለ ኦላንቾት ባንታ ዱንካንዳ ጉታ ጋልጋላ ስምዶሶና።
JOS 11:1 ሀዞራ ካዎይ ያብን፥ እስራኤለታ ፆኑዋ ስእዳ ዎደ ማዶና ካዋ ዮባባስ፥ ሽምሮና ካዋስ፥ አዝፋ ካዋስ፥
JOS 11:2 ፑደሀ ገዘን ደእያ ካዎታስ፥ ከነሬታ አባፈ ዱገሀ ባጋን ዮርዳኖሰ ዛንጋራን ደእያ ካዎታስ፥ ናፋት-ዶራፐ ዉሎሀ ባጋራ ጋꬋን ደእያ ካዎታስ ኪታ የድስ።
JOS 11:3 ቃስ ዶሎሀነ ዉሎሀ ባጋን ደእያ ካናነታስ፥ አሞረታስ፥ ህተታስ፥ ፓርዘታስ፥ ደረይ ዳርያ ቢታን ደእያ ያቡሰታስነ ምፅጳን አርሞና ዙማፐ ጋርሳን ደእያ ህወታስ ኪትስ።
JOS 11:4 ኤንቲ ኡባይ፥ ባንታ ኦላንቾታ፥ ፓራታነ ፓራ ጋረታ እስፈ ጋꬅድ ይዶሶና። ኤንታ ታይቦይ አባ ጋፃን ደእያ ሻፈ መላ።
JOS 11:5 ሄ ካዎት ኡባይ ባንታ ዎልቃ እስፈ ጋꬅድ፥ እስራኤለታ ኦላናዉ መሮመ ሃꬃ ማታን ዱንካንዶሶና።
JOS 11:6 ጎዳይ እያሱኮ፥ “ነ ኤንታዉ ባቦፋ፤ ታኒ ዎንቶ ሀኖደ ኤንታ ኡባ ዎꬋዳ እስራኤለ አሳስ አꬃ እማና። ኔን ኤንታ ፓራታ ጋድያ ቃንፃና፤ ኤንታ ፓራ ጋረታካ ታማን ፁጋና” ያግስ።
JOS 11:7 እያሱይነ እያ ኦላንቾት ኡባይ ኤንቲ ቆፖና ደእሽን መሮመ ሃꬃ ማታን ኤንታ ቦላ ከይድ ኦልዶሶና።
JOS 11:8 ጎዳይ ኤንታና እስራኤለታ ኩሸን አꬅድ እምስ። እስራኤለት ኤንታ ኦልድ፥ ግታ ስዶናነ ማስሮታ ጋካናዉ፥ ቃስ ዶሎሀ ባጋን ደእያ ምፅጳ ዛንጋራ ጋካናዉ ኤንታና የደꬅዶሶና። ኤንታፈ እስ አስካ አሾና ኡባ ዎꬍዶሶና።
JOS 11:9 እያሱይ፥ ጎዳይ ኪትዳይሳዳ ኡባ ቦላ ኦꬅስ፤ ኤንታ ፓራታ ጋድያ ቃንፅስ፤ ኤንታ ጋረታ ፁግስ።
JOS 11:10 ያትድ፥ እያሱይ ጉየ ስሚድ፥ ሀዞራ ኦል ኦይክድ፥ ካዉዋካ ማሻን ዎꬍስ። ሄ ዎደ ሀዞራ ካዎተꬃይ ሀራ ካዎተꬃ ኡባስ ሁጰ።
JOS 11:11 እስራኤለ አሳይ ሀዞራን ደእያ አሳ ኡባ ማሻን ዎꬍዳ ግሾ ሸምፖራ አትዳ አስ ባዋ። ሄ ካታማይ ታማን ፁገትስ።
JOS 11:12 ጎዳ አይለይ ሙሰይ ኪትዳይሳዳ፥ እያሱይ ሄ ካታማታነ ኤንታ ካዎታ ኡባ ድእስ። እስ አስካ አሾና አሳ ኡባ ማሻን ዎꬍስ።
JOS 11:13 ግዶሽን፥ እያሱይ ፁግዳ ሀዞራ ካታማፐ አትሽን፥ ዞዘ ቦላ ኬፀትዳ ካታማታ እስራኤለ አሳይ ፁግቦኮና።
JOS 11:14 እስራኤለ አሳይ ሄ ካታማታፐ ቦንቅዳ፥ ሚሽያነ መሄ ኡባ ባንታዉ ኤክዶሶና። እስ አስካ አሾና አሳ ኡባ ማሻን ዎꬍዶሶና።
JOS 11:15 ጎዳይ ባ አይልያ ሙሰ ኪትዳይሳዳ፥ ሙሰይ እያሱ ኪትስ፤ እያሱይካ ኪታ ፖልስ። ጎዳይ ሙሰ ኪትዳባፐ እስባካ እያሱይ አሽቤና፤ ኡባ ኦꬅስ።
JOS 11:16 እያሱይነ እያ ኦላንቾት ደረይ ዳርያ ቢታ፥ ነገበ መላ ቢታ፥ ጎሸና ቢታ ኡባ፥ ዉሎሀ ባጋን ደእያ ጋꬋነ ዮርዳኖሰ ዛንጋራ ኦልድ ኦይክስ።
JOS 11:17 እ ሳይረ ካንꬅስያ ሀላቃ ዙማፐ ብድ፥ አርሞና ዙማፐ ጋርሳ ባጋን ደእያ ልባኖሰ ዛንጋራነ ባኣል-ጋደ ጋካናዉ ደእያ ቢታታ ኦይክስ። ኤንታ ካዎታ ኡባ ሾጭስ፤ ድእድ ዎꬍስ።
JOS 11:18 እያሱይ ዳሮ ዎደ ሄ ካዎታ ኡባራ ኦለትስ።
JOS 11:19 ጋባኦናን ደእያ ህወታፐ አትሽን፥ ሀራ ካታም እስራኤለታራ ሳሮ ዳናዉ ጫቅዳይ ባዋ። እስራኤለት ሀራ ካታማታ ኡባ ኦላን ፆንድ ኦይክዶሶና።
JOS 11:20 ጎዳይ ሙሰ ኪትዳይሳዳ፥ እያሱይ ኤንታ ማሮት ባይና ኡባ ዎꬋና መላ ጎዳይ ኤንታ ዎዛና ሙምስድ እስራኤለታ ኦላና መላ ደንꬅስ።
JOS 11:21 ሄ ዎደ እያሱይ ብድ ደረይ ዳርያ ከብሮናን፥ ዳብራን፥ አናባን፥ ደረይ ዳርያ ይሁዳንነ እስራኤለን ደእያ አዱሳታ፥ አናቀ ኮቻታ ዎꬍድ ኦንግስ። እያሱይ ኤንታነ ኤንታ ካታማታ ኩመꬅ ꬋይስስ።
JOS 11:22 አናቀ ኮቻታፐ ኦንካ እስራኤለ ቢታን አትቤና፥ ሽን ጋዛን፥ ጋታንነ አሽዶዳን ጉꬃት አትዶሶና።
JOS 11:23 ጎዳይ ሙሰ ኪትዳይሳዳ እያሱይ ቢታ ኡባ ኦይክድ፥ እስራኤለ አሳ ኮቻን ኮቻን ሻክድ ላትስስ። ሄሳፈ ጉየ ቢታይ ኦላፐ ሸምፕስ።
JOS 12:1 እስራኤለ አሳይ ዮርዳኖሰ ሻፋፐ ዶሎሀ ባጋራ ደእያ አርኖና ዛንጋራፐ ብድ አርሞና ዙማ ጋካናዉ፥ ቃስ ዶሎሀ ባጋራ ዮርዳኖሰ ዛንጋራ ጋካናዉ ደእያ ቢታ ኡባ ኦልድ ኦይክስ። ሄ ፆነትዳ ካዎት ሀይሳፈ ካልድ ፃፈትዳይሳታ፤
JOS 12:2 ሀሰቦናን ኡትድ ሃርያ አሞረታ ካዋ ስሆና። እ ጋላዳ ቢታስ ባጋ ኤክድ፥ አርኖና ዛንጋራ ማታን ደእያ አሮራፐ ደንድድ፥ አሞነታ ዛዋ ያቦቃ ሻፋ ጋካናዉ ደኤይሳ ሃሬስ።
JOS 12:3 ቃስ ዶሎሀ ባጋራ ዮርዳኖሰ ዛንጋራን ከነሬታ አባፈ ብድ፥ ቤት-ያሽሞታ ባጋራ ማፅነ አባ ካንꬅድ፥ ፕስጋ ደርያፐ ጋርሳ ባጋራ ደእያ ቢታታ ሃሬስ።
JOS 12:4 ሄሳዳካ፥ ራፋይመታ ሼሻፐ ዉርሰꬅ ግድዳ፥ አስታሮተነ ኤድራአ ሃርያ፥ ባሳነ ካዋ ኦገ ፆንስ።
JOS 12:5 ኦገይ፥ ሃርያ ዛዋይ ፑደሀን አርሞና ዙማ፥ ዶሎሀን ሳላካ ካታማ ጋክድ፥ ዉሎሀን ጌሹረታነ ማካታ ዛዋ ጋካናዉ ደእያ ባሳነ ቢታ ኡባ ጋኬስ። ሀሰቦና ካዋ ስሆና ቢታ ጋላዳ ፑደሀ ባጋ ጉጅድ ሃሬስ።
JOS 12:6 ጎዳ አይለይ ሙሰይ ካለꬅን፥ እስራኤለ አሳይ ሀ ካዎታ ፆንዶሶና። ጎዳ አይለይ ሙሰይ ኤንታ ቢታ ሮቤላ ኮቻታስ፥ ጋዳ ኮቻታስነ ምናሰ ኮቻፈ ባጋስ ሻክድ ላትስስ።
JOS 12:7 እያሱይነ እስራኤለ አሳይ ዮርዳኖሰ ሻፋፐ ዉሎሀ ባጋን ደእያ ካዎታ ኡባ ፆንዶሶና። ሄ ቢታይ ልባኖሰ ዛንጋራን ደእያ ባኣል-ጋደፐ ብድ፥ ዱገሀ ባጋራ ሳይረ ማታን ደእያ ሀላቃ ደርያ ጋኬስ። እያሱይ ሄ ቢታ ሻክድ፥ እስራኤለ ኮቻታስ ላታ ቢታ ኦꬅድ እምስ።
JOS 12:8 ሄ እ እምዳ ቢታይ፥ ደረይ ዳርያ ቢታ፥ ዉሎሀ ባጋን ደእያ ጋꬋ፥ ዮርዳኖሰ ዛንጋራ፥ ይሁዳነ ነገበ መላ ቢታ። ሄ ቢታይ ካሰ ህተት፥ አሞረት፥ ካናነት፥ ፓርዘት፥ ህወትነ ያቡሰት ደእያ ቢታ።
JOS 12:9 እስራኤለ አሳይ ፆንዳ ካዎት ሀይሳፈ ካልድ ፃፈትዳይሳታ፤ እያርኮ ካዋ፥ ቤተለ ማታን ደእያ ጋየ ካዋ፥
JOS 12:10 የሩሳላመ ካዋ፥ ከብሮና ካዋ፥
JOS 12:11 ያርሙታ ካዋ፥ ላክሶ ካዋ፥
JOS 12:12 ኤግሎና ካዋ፥ ገዘራ ካዋ፥
JOS 12:13 ዳብራ ካዋ፥ ገደራ ካዋ፥
JOS 12:14 ሆርማ ካዋ፥ አራዳ ካዋ፥
JOS 12:15 ልብና ካዋ፥ አዱላማ ካዋ፥
JOS 12:16 ማቀዳ ካዋ፥ ቤተለ ካዋ፥
JOS 12:17 ታፑሀ ካዋ፥ ሄፌራ ካዋ፥
JOS 12:18 አፌቃ ካዋ፥ ሳሮና ካዋ፥
JOS 12:19 ማዶና ካዋ፥ ሀዞራ ካዋ፥
JOS 12:20 ሽምሮን-ማሮና ካዋ፥ አዝፋ ካዋ፥
JOS 12:21 ታናካ ካዋ፥ ማግዶ ካዋ፥
JOS 12:22 ቃደሳ ካዋ፥ ቃርመሎሳን ደእያ ዮቅናመ ካዋ፥
JOS 12:23 ገዘን ደእያ ዶራ ካዋ፥ ጋልጋላን ደእያ ጎይማ ካዋነ
JOS 12:24 ትርሳ ካዋ። ኤንቲ ኩመꬅ ሀስታማነ እስ ካዎታ።
JOS 13:1 እያሱይ ዳሮ ጭምዳ ዎደ ጎዳይ እያኮ፥ “ኔን ጭማዳሳ፤ ነ ላይꬃይካ ሱገትስ፥ ግዶሽን ኦይከቶና አትዳ ዳሮ ቢታት ደኦሶና።
JOS 13:2 ኦይከትቦና ቢታት ሀይሳታ፤ ፍልስፄመታነ ጌሹረታ ቢታ ኡባ።
JOS 13:3 ግብፀፈ ዶሎሀ ባጋን ደእያ ሽሆራ ሻፋፐ ብድ፥ ፑደሀ ባጋን ደእያ ኤክሮና ቢታ ጋካናዉ ደእያ ቢታ ኡባ። ሄ ቢታት ካናነ ቢታ ጌተቶሶና። ኤንትካ እቻሹ ፍልስፄመ ካዎት አይስያ ጋዛ፥ አሽዶዳ፥ አስቀሎና፥ ጋተነ ኤክሮና ጌተትያ ካታማታ። አዌታ ቢታይካ ቡሮ ኦይከትቤና።
JOS 13:4 ዱገሀ ባጋን ደእያ ካናነታ ቢታነ፥ ስዶናታ ቢታ ግድዳ ማራፐ ብድ አሞረታ ዛዋ አፌቃ ጋካናዉ ደእያ ቢታይ ኦይከትቤና።
JOS 13:5 ገባላታ ቢታይነ ባኣል-ጋደፐ ዶሎሀ ባጋን ደእያ አርሞና ዙማፐ ብድ፥ ሀማታ ፕኖ ጋካናዉ ቡሮ ኦይከትቤና።
JOS 13:6 ልባኖሰፐ ብድ ማሰሮና ጋካናዉ ገዘ ቢታን ደእያ ስዶናታ ኡባ ታኒ እስራኤለታ ስንꬃፈ ጎዳ ከሳና። ታኒ ነና ኪትዳይሳዳ ሄ ቢታ እስራኤለ አሳስ ላታ ኦꬃዳ ሻካ።
JOS 13:7 ኔን ሄ ቢታ ኡዱፉን ኮቻታስነ ምናሰ ኮቻፈ ባጋስ ሻካ” ያግስ።
JOS 13:8 ሮቤላ ኮቻይ፥ ጋዳ ኮቻይነ ምናሰ ኮቻፈ ባጋይ ጎዳ አይለይ ሙሰይ ዮርዳኖሰፐ ሄፍንꬃን፥ ዶሎሀ ባጋን ደእያ ቢታ ካሰ ላታ ኦꬅድ ኤንታዉ እምስ።
JOS 13:9 ኤንታ ቢታይ አርኖና ዛንጋራ ማታን ደእያ አሮኤራፐ ብድ፥ ሄ ዛንጋራን ደእያ ካታማፐ ብድ፥ መደባ ገዝያ ካንꬅድ ድቦና ጋካናሳ።
JOS 13:10 ቃስ ሀሰቦናን ኡትድ አሞነታ ዛዋ ጋካናዉ ሃርያ አሞረታ ካዋ ስሆና ካታማታ ኡባ ጋኬስ።
JOS 13:11 ሄሳዳካ፥ ጋላዳታ፥ ጌሹረታነ ማእካታ ቢታ ኡባ፥ አርሞና ዙማ ኡባነ ሳላካ ጋካናዉ ደእያ ባሳነ ቢታ ኡባ ኦይኬስ።
JOS 13:12 አስታሮተንነ ኤድራአን ኡትድ፥ ሃርዳ ባሳነ ካዋ ኦገ ቢታ ኡባ ኦይኬስ፤ ሄ ቢታይ ካሰ ራፋይመታፐ አትዳ ቢታ። ሙሰይ ኤንታ ፆንድ ቢታፈ ጎድድ ከስስ።
JOS 13:13 ሽን እስራኤለ አሳይ ጌሹረታነ ማእካታ ጎድድ ከስቦኮና። ኤንቲ ሀች ጋካናዉ እስራኤለ አሳ ግዶን ደኦሶና።
JOS 13:14 ሙሰይ ሌወ ኮቻስ ላታ ቢታ እምቤና። ጎዳይ፥ እስራኤለ ፆሳይ፥ ኤንታዉ ኪትዳይሳዳ ታማን ፁሳ ያርሾ ኤንታዉ ላታ ኦꬅድ እምስ።
JOS 13:15 ሙሰይ ሮቤላ ኮቻስ ኤንታ ኮቻን ኮቻን ላታ እምስ።
JOS 13:16 ኤንታ ቢታይ አርኖና ዛንጋራ ማታን ደእያ አሮኤራፐ ብድ፥ ሄ ዛንጋራን ደእያ ካታማ ካንꬅድ ገዘ መደባ ጋኬስ።
JOS 13:17 ሀሰቦና፥ ገዘ ካታማታ፥ ድቦና፥ ባሞት-ባኣላ፥ ቤት-ባል-መኦና፥
JOS 13:18 ያሃፃ፥ ቀደሞታ፥ መፋታ፥
JOS 13:19 ቅራታይማ፥ ሰባማ፥ ደረይ ዳርያ ዛንጋራን ደእያ ፀረት-ሻሃረ፥
JOS 13:20 ቤት-ፓኦራ፥ ፕስጋ ዙማፐ ጋርሳን ደእያ ቢታነ ቤት-ያሽሞታ ጌተትያ ቢታታ ኡባ ጋኬስ።
JOS 13:21 ቃስ ገዘን ደእያ ካታማታነ ሀሰቦናን ኡትድ ሃርዳ አሞረታ ካዋ ስሆና ቢታ ኡባ ጋኬስ። ሙሰይ ካዋ ስሆናነ ምድያመታ ሀላቃታ ኤዋ፥ ረቄማ፥ ፁራ፥ ሁራነ ሬባ ኦልድ ፆንስ። ሀይሳቲ ካዋ ስሆናፐ ጋርሳን ሄ ቢታ ሃረይሳታ።
JOS 13:22 እስራኤለ አሳይ ማሩዋ፥ ብኦራ ናኣ፥ ባላማ ዎꬍዶሶና።
JOS 13:23 ሮቤላ ኮቻስ ዉሎሀ ባጋ ዛዋይ ዮርዳኖሰ ሻፋ። ሮቤላ ኮቻስ ኮቻን ኮቻን ላታ ግድድ እመትዳ ካታማትነ ጉታት ሀይሳታ።
JOS 13:24 ሙሰይ ጋዳ ኮቻስ ኤንታ ኮቻን ኮቻን ላታ ቢታ ሻክድ እምስ።
JOS 13:25 ኤንታ ቢታይ ያእዜራ፥ ጋላዳን ደእያ ካታማታ ኡባነ አሞነታ ቢታፈ ባጋ ኤክድ፥ ራባ ዶሎሀ ባጋን ደእያ አሮኤራ ጋኬስ።
JOS 13:26 ሄሳዳካ፥ ሀሰቦናፐ ደንድድ፥ ራሞት-ምፅጳነ በፆንማ ጋኬስ። ቃስ ማህናይማፐ ብድ ዳቤራ ዛዋ ጋኬስ።
JOS 13:27 ቃስ ዮርዳኖሰ ዛንጋራን፥ ሀሰቦና ካዋ ስሆና ካዎተꬃፈ አትዳ፥ ቤት-ሀራመ፥ ቤት-ንምራ፥ ሱኮታነ ፃፎና ጌተትያ ካታማታ ኤኬስ። ኤንታ ዛዋይ ዉሎሀ ባጋን ዮርዳኖሰ ሻፋ፥ ቃስ ፑደሀ ባጋን ከነሬታ አባ ጋኬስ።
JOS 13:28 ጋዳ ኮቻስ ኮቻን ኮቻን ላታ ቢታ ግድድ እመትዳ ካታማትነ ጉታት ሀይሳታ።
JOS 13:29 ሙሰይ ምናሰ ኮቻፈ ባጋስ ኤንታ ኮቻን ኮቻን ላታ ቢታ እምስ።
JOS 13:30 ኤንታ ቢታይ ማህናይማነ ባሳነ ቢታ ኡባ ጋክ ኦይኬስ። ባሳነ ካዋ ኦገ ካዎተꬃ ኡባነ ባሳነን ደእያ ኡሱፑን ታሙ ያእራ ካታማታ ኦይኬስ።
JOS 13:31 ቃስ ጋላዳፐ ባጋነ ባሳነን ኦገ ካዎተꬃስ ዋና ካታማ ግድዳ አስታሮተነ ኤድራአ ጌተትያ ካታማታ ጋኬስ። ሄ ኡባይ ምናሰ ናአ ማክራ ኮቻስ ኤንታ ኮቻን ኮቻን ጋክዳይሳ።
JOS 13:32 ሙሰይ ዮርዳኖሰፐ ሄፍንꬃን፥ እያርኮፈ ዶሎሀ ባጋን ደእያ ሞአበ ደንባን ደእሸ ሻክድ እምዳ ቢታይ ሀይሳ።
JOS 13:33 ሽን ሙሰይ ሌወ ኮቻስ ላታ ቢታ እምቤና። ጎዳይ፥ እስራኤለ ፆሳይ ኤንታ ላታ።
JOS 14:1 ካህነይ አላዛር፥ ናወ ናአይ እያሱይነ እስራኤለ ሶ አሳ ሀላቃት፥ ካናነ ቢታ ኤንታ ኮቻን ኮቻን ሻክን፥ እስራኤለ አሳ ጋክዳ ቢታይ ሀይሳፈ ካልድ ደኤይሳ።
JOS 14:2 ጎዳይ ሙሰ ኪትዳይሳዳ ላታ ቢታይ ኡዱፉናነ ባጋ ኮቻስ ሳማን ሻከትስ።
JOS 14:3 ሙሰይ ካሰ ናምአነ ባጋ ኮቻስ ዮርዳኖሰፐ ዶሎሀ ባጋን ደእያ ቢታ እምስ፥ ሽን ሌወ ኮቻስ ኤንታ ግዶን ላታ ቢታ እምቤና።
JOS 14:4 ዮሰፋ ናይት ምናሰይነ ኤፍሬመይ ናምኡ ኮቸ ግድዶሶና። ሌወ ኮቻስ ዱሳ ካታማታነ መሄ ሄምያ ቢታ እምስፐ አትሽን፥ ላታ ቢታ እምቤና።
JOS 14:5 ጎዳይ ሙሰ ኪትዳይሳዳ እስራኤለ አሳይ ቢታ ሻከትድ ኤክዶሶና።
JOS 14:6 እስ ጋላስ ይሁዳ አሳይ እያሱኮ ጋልጋላ ይዶሶና። ኤንታፈ እሶይ፥ ቀነዛ ኮቻይ፥ ዮፎና ናአይ ካለብ እያሱኮ፥ “ኑኒ ቃደስ-ባርነን ደእያ ዎደ ጎዳይ ናብያ ሙሰ ባጋራ ነባነ ታባ ኦድዳይሳ ኤራሳ።
JOS 14:7 ጎዳ አይለይ ሙሰይ ሀ ቢታ ዎቻና መላ ቃደስ-ባርነፈ ታና ኪትያ ዎደ ታዉ ላይꬅ ኦይታማ። ሄ ዎደ ታኒ አማንꬅያ ኦዳ ሙሰስ ኤሀስ።
JOS 14:8 ታራ ብዳ አሳት አሳ ዎዛና ያሻን ትልእስዶሶና፥ ሽን ታኒ ጎዳ፥ ፆሳ ፖሎ ካላስ።
JOS 14:9 ሄ ጋላስ ሙሰይ፥ ‘ኔን፥ ጎዳ፥ ፆሳ ፖሎ ካልዳ ግሾ፥ ነ ቶሆይ የꬍዳ ቢታይ ነዉነ ነ ኮቻስ መርና ላታ ቢታ ግዳና’ ግድ ታዉ ጫቅስ።
JOS 14:10 እያሱ፥ አነ ቆፓ፤ ጎዳይ ሄሳ ሙሰስ ኦድ ስምን ሀች ኦይታማነ እቻሹ ላይꬅ ግድስ። እስራኤለ አሳይ መላ ቢታን ስመረትያ ዎደ ኡባን ሀች ጋꬃናዉ ጎዳይ ታና ፓፃ ዎꬅስ። ሀእ ታዉ ላይꬅ ሆስፑን ታማነ እቻሻ ግድስ።
JOS 14:11 ታዉ ሄ ዎደ ደእያ ምኖተꬃይ ሀችካ ደኤስ። ኦለታናዉ፥ ከያናዉነ ገላናዉ ታዉ ሀእካ ዎልቅነ ፃላተꬅ ደኤስ።
JOS 14:12 ሄ ዎደ ጎዳይ ታዉ እማና ግድ ጫቅዳ ሄ ደረይ ዳርያ ቢታ ታዉ እማ። ሄ ቢታን አናቀት ደኤይሳነ ኤንታ ካታማት ግታነ ግምበትዳ ካታማ ግደይሳ ሄ ዎደ ነ ስአዳሳ። ግድኮካ ጎዳይ ግዳይሳዳ እ ታራ ግድኮ፥ ኤንታ ሄ ቢታፈ ታኒ ጎዳና” ያግስ።
JOS 14:13 እያሱይ ዮፎና ናአ ካለባ አንጅድ፥ ከብሮና እያዉ ላታ ኦꬅ እምስ።
JOS 14:14 እ ጎዳ፥ እስራኤለ ፆሳ ፖሎ ካልዳ ግሾ፥ ከብሮና ሀች ጋካናዉ ቀነዛ ኮቻ ዮፎና ናኣ ካለባ ኮቻስ ላታ ቢታ ግድስ።
JOS 14:15 ካሰ ከብሮና ሱንꬃይ ቅርያት-አርባ ጌተቴስ። አርብ፥ አናቀታ ግዶን ኤረትዳ ግታ አሰ። ሄሳፈ ጉየ፥ ቢታይ ኦላፐ ሸምፕስ።
JOS 15:1 ይሁዳ ኮቻስ ኤንታ ኮቻን ኮቻን ሻከትዳ ቢታይ ኤዶመን ዛዋትድ፥ ዱገሀ ባጋን ደእያ ፂነ መላ ቢታ ዉርሰꬃ ጋኬስ።
JOS 15:2 ዱገሀ ባጋን ኤንታ ዛዋይ ማፅነ አባፈ ዱገሀ ባጋን ዉርሰꬃ ጋፃ ጋኬስ።
JOS 15:3 አክራብማ ፕኑዋ ካንꬅድ፥ ፂነፐ ብድ፥ ቃደስ-ባርነስ ዱገሀ ባጋ ጋኬስ። ቃስ ሄፅሮና ካንꬅድ፥ አዳረ ከይድ፥ ቃርቃኮ ስሜስ።
JOS 15:4 ሄሳፈ ቃስ አፅሞና ካንꬅድ፥ ግብፀ ሻፋ ጋክድ፥ መደትራነ አባን ዛዋቴስ። ዱገሀ ባጋን ደእያ ይሁዳ ዛዋይ ሄሳ።
JOS 15:5 ዶሎሀ ባጋ ዛዋይ ማፅነ አባ ብድ፥ ዮርዳኖሰ ሻፋ ዉርሰꬃ ጋኬስ። ፑደሀ ባጋ ዛዋይ ቃስ ዮርዳኖሰ ሻፋይ ገልያሱዋፕ ብድ፥
JOS 15:6 ቤት-ሆግላ ከዬስ። ያፐ ቤት-አራባ ባጋራ ካንꬅድ፥ ሮቤላ ናኣ ቦሃና ቆፍሶ ሹቻን ዛዋቴስ።
JOS 15:7 ያፐ ዛዋይ አኮራ ዛንጋራፐ ዳብራ ከይድ፥ ዛንጋራፐ ዱገሀ ባጋን ደእያ አዱምማ ፕኑዋ ስንꬃ ባጋን አግድ ፑደሀ ባጋራ ጋልጋላ ስሜስ። ሄሳፈ ቃስ ኤንሸመሸ ፑልቱዋ ካንꬅድ፥ ኤንሮጌላን ዛዋቴስ።
JOS 15:8 ሄሳፈ ህኖማ ዛንጋራ ካንꬅድ፥ ያቡሰታ ካታማ ግድዳ የሩሳላመ ዱገሀ ባጋ ጋኬስ። ካልድ ዛዋይ ህኖመ ዛንጋራፐ ዉሎሀ ባጋን ደእያ ዙማ ሁጵያ ከይድ፥ ፑደሀ ባጋን ራፋይመ ዛንጋራ ጋኬስ።
JOS 15:9 ሄ ዙማ ሁጵያፐ ብድ፥ ናፍቶሀ ፑልቱዋ ካንꬅድ፥ ኤፍሮና ዙማ ቦላ ደእያ ካታማታኮ ከዬስ። ሄሳፈ ቃስ ባኣላ ዎይኮ ቅርያት-ይኣርማ ስሜስ።
JOS 15:10 ባላ ፑደሀ ባጋራ ዛዋይድ፥ ሳይረ ዙማኮ ዉሎሀ ባጋ ምርቀትድ፥ ይኣርመ ዎይኮ ክሳሎነ ደርያ ጋክድ፥ እያፐ ዱገ ቤት-ሳሜሳ ዎꬍድ፥ ትምና ፕኔስ።
JOS 15:11 ሄ ዛዋይ ኤቅሮና ፑደሀ ባጋራ ካንꬅድ፥ ሽክሮና ምርቀትድ፥ ባላ ዙማራ ብድ፥ ያብንኤላን ዛዋቴስ። ሄ ዛዋ ዉርሰꬃይ መደትራነ አባ ግድድ፥
JOS 15:12 ዉሎሀ ባጋ ዛዋይ መደትራነ አባስ ጋፃ ግዴስ። ይሁዳ ኮቻይ ደእዳ ቢታ ዛዋይ ሀይሳ።
JOS 15:13 ጎዳይ ኪትዳይሳዳ፥ እያሱይ፥ ዮፎና ናኣ ካለባ ጋክያ ላታ ይሁዳ ቢታፈ ቅርያት-አርባ ጌተትያ ከብሮና እምስ። አርብ አናቀ አዋ።
JOS 15:14 ካለብ አናቀ ኮቻታ፥ ሰሳያ፥ አክማናነ ታልማያ ጌተትያ ሄꬓታ ከብሮናፐ ከስስ።
JOS 15:15 ሄሳፈ ደንድድ፥ ዳብራን ደእያ አሳ ኦላናዉ ብስ። ዳብራ ካታማይ ካሰ ቅርያት-ሰፈራ ጌተቴስ።
JOS 15:16 ካለብ፥ “ቅርያት-ሰፈራ ኦልድ፥ ኦይክያ አድያስ ታኒ፥ ታ ናእዉ አክሶ እማና” ያግስ።
JOS 15:17 ያትን፥ ካለባ እሻ ቃናዛ ናአይ፥ ጎቶንያል ሄ ካታማ ኦልድ ኦይክን፥ ካለብ ባ ናእዉ አክሶ እያዉ እምስ።
JOS 15:18 አክሳ ጎቶንያላ ገልያ ዎደ እ አዋይ እዉ ጋደ እማናዳ ዎሳና መላ ጎቶንያል እዮ ዞርስ። እያ ባቁሎ ቦላፈ ዎꬍን፥ ካለብ እዮ፥ “አይ ኮያይ?” ያግድ ኦይችስ።
JOS 15:19 እያ ዛራዳ፥ “ነ ካሰ ታዉ ዎይትዳ ቢታይ መላ ቢታ ግድያ ግሾ፥ ሃꬃ ፑልቶይ ደእያ ቢታ ታዉ ጉጃዳ እማርክ” ያጋሱ። ያትን፥ ካለብ ቆሞንነ ጋርሳን ደእያ ፑልቶ ሃꬃ እዉ እምስ።
JOS 15:20 ይሁዳ ኮቻት ባንታ ኮቻን ኮቻን ኤክዳ ላታይ ሀይሳፈ ካልድ ፃፈትዳይሳ።
JOS 15:21 ዱገሀ ባጋን ኤዶመ ጋፃን ደእያ ይሁዳ ካታማት፥ ቃብዱኤላ፥ ኤደራ፥ ያጉራ፥
JOS 15:22 ቂና፥ ድሞና፥ አዳዳ፥
JOS 15:23 ቃደሳ፥ ሀፆራ፥ ይትናና፥
JOS 15:24 ዚፋ፥ ፀለማ፥ ባሎታ፥
JOS 15:25 ሀፆር-ሀዳታ፥ ቅርዮት-ሄፅሮና ዎይኮ ሀፆራ፥
JOS 15:26 አማማ፥ ሻማአ፥ ሞሎዳ፥
JOS 15:27 ሀፃር-ጋዳ፥ ሄሽሞና፥ ቤት-ፓለፃ፥
JOS 15:28 ሀፃር-ሹኣላ፥ በርሳበህ፥ ብዝዮታ፥
JOS 15:29 ባኣላ፥ እዩማ፥ ኤፀማ፥
JOS 15:30 ኤልቶላዳ፥ ከስላ፥ ሆርማ፥
JOS 15:31 ፅቅላጋ፥ ማድማና፥ ሳንሳና፥
JOS 15:32 ለባዎታ፥ ሽልሃማ፥ አይናነ እርሞና። ሀ ካታማት ባንታ ጉታታራ እስፈ ላታማነ ኡዱፉና።
JOS 15:33 ዉሎሀ ባጋን ዙማ ፃጶን ደእያ ካታማት፥ ኤሽታኦላ፥ ፆርአ፥ አሽና፥
JOS 15:34 ዛኖሀ፥ ኤንጋንማ፥ ታፑሀ፥ ኤናማ፥
JOS 15:35 ያርሙታ፥ አዱላማ፥ ሶኮ፥ አዜቃ፥
JOS 15:36 ሻእራይማ፥ አድታይማ፥ ገደራነ ገደሮታይማ። ሀ ካታማት ባንታ ጉታታራ እስፈ ታማነ ኦይዳ።
JOS 15:37 ቃስ ሀራ ካታማት፥ ፅናና፥ ሀዳሻ፥ ምግዳል-ጋዳ፥
JOS 15:38 ድልአና፥ ምፅጳ፥ ዮቅትኤላ፥
JOS 15:39 ላክሶ፥ ቦፅቃታ፥ ኤግሎና፥
JOS 15:40 ካቦና፥ ላህማሳ፥ ክትሊሻ፥
JOS 15:41 ገደሮታ፥ ቤት-ዳጎና፥ ናእማናነ ማቀዳ። ሀ ካታማት ባንታ ጉታታራ እስፈ ታማነ ኡሱፑና።
JOS 15:42 ቃስ ልብና፥ ኤተራ፥ አሸና፥
JOS 15:43 ይፍታሄ፥ አሽና፥ ነፅባ፥
JOS 15:44 ቃእላ፥ አክዚባነ ማሬሳ። ሀ ካታማት ባንታ ጉታታራ እስፈ ኡዱፉና።
JOS 15:45 ሄሳዳካ፥ ኤቅሮና ካታማይ ባ ጉታራ ያን ደኤስ።
JOS 15:46 ኤቅሮናፐ ዉሎሀ ባጋን አሽዶዳ ካታማይነ እያ ጉታት ደኦሶና።
JOS 15:47 ቃስ አሽዶዳነ ጋዛ ካታማት ባንታ ጉታታራ ብድ፥ ግብፀ ሻፋ ዛዋነ መደትራነ አባ ላንቅያ ጋካናዉ ደኦሶና።
JOS 15:48 ደረይ ዳርያ ካታማት፥ ሳምራ፥ ያትራ፥ ሶኮ፥
JOS 15:49 ዳነ፥ ቅርያት-ሰፈራ ዎይኮ ዳብራ፥
JOS 15:50 አናባ፥ ኤሽታሞአ፥ አንማ፥
JOS 15:51 ጎሸና፥ ሆሎናነ ግሎ። ሀ ካታማት ባንታ ጉታታራ እስፈ ታማነ እስኖ።
JOS 15:52 ቃስ አራባ፥ ዱማ፥ ኤሽአና፥
JOS 15:53 ያንማ፥ ቤት-ታፑሀ፥ አፌቃ፥
JOS 15:54 ሁምፃ፥ ከብሮና ዎይኮ ቅርያት-አርባነ ፅኦራ። ሀ ካታማት ባንታ ጉታታራ እስፈ ኡዱፉና።
JOS 15:55 ቃስ ማኦና፥ ቃርመሎሳ፥ ዚፋ፥ ዩፃ፥
JOS 15:56 እዝራኤለ፥ ዮቅድኣማ፥ ዛኖሀ፥
JOS 15:57 ቃይና፥ ግብአነ ትምና። ሀ ካታማት ባንታ ጉታታራ እስፈ ታማ።
JOS 15:58 ሄሳዳካ ሀልሁላ፥ ቤት-ፁራ፥ ጋዶራ፥
JOS 15:59 ማእራታ፥ ቤት-አኖታነ ኤልትቆና። ሀ ካታማት ባንታ ጉታታራ እስፈ ኡሱፑና።
JOS 15:60 ቃስ ቅርያት-ባኣለ ዎይኮ ቅርያት-ይኣርማነ ራባ። ሀ ካታማት ባንታ ጉታታራ እስፈ ናምአ።
JOS 15:61 መላ ቢታን ቃስ ቤት-አራባ፥ ምድና፥ ሰካካ፥
JOS 15:62 ንብሻና፥ ማፅነ ካታማነ ኤንጋደ። ሀ ካታማት ባንታ ጉታታራ እስፈ ኡሱፑና።
JOS 15:63 ግዶሽን፥ ይሁዳ አሳይ የሩሳላመን ደእያ ያቡሰታ ጎድድ ከሳናዉ ዳንዳእቦኮና። ሄሳ ግሾ፥ ያቡሰት ሀች ጋካናዉ የሩሳላመን ይሁዳ አሳራ እስፈ ደኦሶና።
JOS 16:1 ዮሰፋ ኮቻታ ጋክዳ ላታ ቢታይ ዱገሀ ባጋራ እያርኮ ማታን ደእያ ዮርዳኖሰን ዶሜስ። እያርኮ ፑልቱዋስ ዉሎሀ ባጋ ጋፃፐ ብድ፥ መላ ቢታ ካንꬅድ፥ ደረይ ዳርያ ቢታ ኤክድ፥ ቤተለ ጋኬስ።
JOS 16:2 ቤተለፐ ብድ፥ አርከት ደእያ አፃሮት-አዳረ ካንꬅድ፥ ሎዛ ጋኬስ።
JOS 16:3 ሄሳፈ ዉሎሀ ባጋን ደእያ ያፍሌፃታ ቢታ ዱገ ዎꬍድ፥ ጋርሳ ቤት-ሆሮና ጋክድ፥ ያፐ ገዘራ ካንꬅድ፥ መደትራነ አባን ዛዋቴስ።
JOS 16:4 ዮሰፋ ኮቻት፥ ምናሰነ ኤፍሬማ ኮቻት፥ ባንታና ጋክያ ቢታ ላትዶሶና።
JOS 16:5 ኤፍሬማ ኮቻ ኤንታ ኮቻን ኮቻን ጋክዳ ቢታይ ሀይሳ፤ ኤንታ ዛዋይ ዶሎሀ ባጋራ ደእያ አፃሮት-አዳረፐ ብድ፥ ቆሞ ባጋ ቤት-ሆሮና ከዬስ።
JOS 16:6 ያፐ ካንꬅድ መደትራነ አባን ዛዋቴስ። ቃስ ፑደሀ ባጋራ ደእያ ዛዋይ ምክማታታ። ያፐ ዶሎሀ ባጋራ ደእያ ታናት-ሴሎኮ ምርቀትድ፥ ያኖሀ ጋኬስ።
JOS 16:7 ያኖሃፐ ደንድድ፥ አፃሮተነ ናአራተ ዎꬍድ፥ እያርኮ ጋክድ፥ ዉርሰꬃይ ዮርዳኖሰ ሻፋን ኤቄስ።
JOS 16:8 ጋፃ ዛዋይ ታፑሀፐ ብድ፥ ዉሎሀ ባጋራ ደእያ ቃና ሻፋ ላንቅያ ኦይክድ፥ መደትራነ አባን ኤቄስ። ኤፍሬማ ኮቻይ ባንታ ኮቻን ኮቻን ላትዳ ቢታይ ሀይሳ።
JOS 16:9 ሄስ ምናሰ ኮቻ ላታ ግዶን ኤፍሬማ ኮቻስ እመትዳ ካታማታነ ኤንታ ጉታታ ኡባ ጉጄስ።
JOS 16:10 ግዶሽን፥ ኤፍሬማ ኮቻይ ገዘራን ደእያ ካናነታ ጎድድ ከስቦኮና። ሄሳ ግሾ፥ ካናነት ሀች ጋካናዉ ኤፍሬማ ኮቻ ግዶን ደኦሶና። ሽን ኤፍሬማ ኮቻስ አይለትድ ኦꬆሶና።
JOS 17:1 ዮሰፋ ባይራ ናኣ ምናሰ ኮቻስ እመትዳ ላታ ቢታይ ካልድ ደኤይሳ፤ ጋላዳ አዋይ ማክር ምናሰ ባይራ ናአ። ማክር ምኖ ኦላንቾ ግድዳ ግሾ፥ ጋላዳነ ባሳነ ቢታ ኤክዶሶና።
JOS 17:2 ዮርዳኖሰ ሻፋፐ ዉሎሀ ባጋራ ደእያ ቢታይ ሀንኮ አትዳ ምናሰ ኮቻስ፥ አብኤዘራስ፥ ሄለቃስ፥ አስርኤላስ፥ ሴከማስ፥ ሄፌራስነ ሻምዳአስ እመትስ። ሀይሳቲ ዮሰፋ ናኣ ምናሰ ኮቻታ።
JOS 17:3 ሄፌራ ናኣ ሰሎጳዳ፥ ጋላዳ ናኣ ሄፌራ፥ ማክራ ናኣ ጋላዳ፥ ምናሰ ናኣ ማክራ። ሰሎጳዳስ ማጫ ናአፐ አትሽን፥ አደ ናእ ባዋ። ሄ ማጫ ናይታ ሱንꬃይ ማህሎ፥ ኖኦ፥ ሆግሎ፥ ምልኮነ ትርፆ።
JOS 17:4 ኤንቲ ካህንያ አላዛራኮ፥ ናወ ናኣ እያሱኮነ ደርያ ጭማታኮ ብድ፥ “ኑ ዳቦታዳ ኑስካ ላታ ቢታ እማና መላ ጎዳይ ሙሰ ኪትስ” ያግዶሶና። ያትን፥ ጎዳይ ኪትዳይሳዳ ኤንታ ዳቦታዳ ኤንታዉካ ላታ ቢታ እምስ።
JOS 17:5 ምናሰ ኮቻት ዮርዳኖሰ ሻፋፐ ዶሎሀ ባጋን ደእያ ጋላዳነ ባሳነ ቦላ ጉጅድ ታሙ ቢታታ ሳማን ኤክዶሶና።
JOS 17:6 ሄሳ ግሾ፥ ምናሰ ኮቻፈ ማጫ ናይት አደ ናይታራ እስፈ ላታ ቢታ ሻከትዶሶና። ጋላዳ ቢታይ አትዳ ምናሰ ኮቻስ ግድስ።
JOS 17:7 ምናሰ ኮቻ ቢታ ዛዋይ አሴራፐ ብድ፥ ሴከማፐ ዶሎሀ ባጋን ደእያ ምክማታታ ጋኬስ። ሄ ዛዋይ ያፐ ካንꬅድ፥ ዱገሀ ባጋን አንታፑሀን ደእያ ደርያ ጉጄስ።
JOS 17:8 ታፑሀ ቢታይ ምናሰ ኮቻሳ፥ ሽን ምናሰ ዛዋን ደእያ ታፑሀ ካታማይ ኤፍሬማ ኮቻሳ።
JOS 17:9 ቃስ ሄ ዛዋይ ያፐ ብድ፥ ቃና ሻፋን ዛዋቴስ። ምናሰ ካታማታ ግዶን ኤፍሬማ ካታማትካ ደኦሶና። ሽን ምናሰ ዛዋይ ቃና ሻፋፐ ፑደሀ ባጋራ ብድ መደትራነ አባን ኤቄስ።
JOS 17:10 ሻፋፐ ዱገሀ ባጋን ደእያ ቢታይ ኤፍሬማሳ፤ ቃስ ፑደሀ ባጋን ደእያ ቢታይ ምናሰሳ። ምናሰ ቢታ ዛዋይ መደትራነ አባ ጋኬስ። እያዉ ፑደሀ ባጋራ አሴር፥ ቃስ ዶሎሀ ባጋራ ይሳኮር ዛዋቴስ።
JOS 17:11 ይሳኮራነ አሴራ ቢታታ ግዶን፥ ቤት-ሳና፥ ይብላማ፥ ዶራ፥ ኤንዶራ፥ ታናካነ ማግዶ ጌተትያ ካታማትነ ጉታት ምናሰሳ።
JOS 17:12 ሽን ምናሰ ኮቻት ሄ ካታማታን ደእያ አሳታ ከስድ ካታማታ ኦይካናዉ ዳንዳእቦኮና። ሄሳ ግሾ፥ ካናነት ያን ዱስ ኦይክዶሶና።
JOS 17:13 እስራኤለ አሳይ ዎልቃን ምንኮካ፥ ካናነት ዎልቃ ኦሶ ኦꬃና መላ ኡንኤꬅዶሶናፐ አትሽን፥ ኤንታ ኩመꬅ ጎድድ ከስቦኮና።
JOS 17:14 ዮሰፋ ኮቻይ፥ “ጎዳይ ኑና አንጅድ፥ ዳርስስ፤ ያትን፥ አይስ እስ ሳማ ፃላላ ላታ ቢታ ኑስ እማዲ?” ያግድ እያሱ ኦይችዶሶና።
JOS 17:15 እያሱይ ዛሪድ፥ “ህንተ ዳሮ ግድኮ፥ ደረይ ዳርያ ኤፍሬማ ቢታይ ህንተዉ ጉፅዳባ ግድኮ፥ ፓርዘትነ ራፋይመት ደእያ ቢታ ብድ ዎራ ቄፅተ” ያግስ።
JOS 17:16 ዮሰፋ ኮቻይ፥ “ሄ ደረይ ዳርያ ቢታይካ ኑስ ግደና። ቃስ ቤት-ሳና ካታማንነ እያ ጉታን ደኤይሳታስነ እዝራኤለ ዛንጋራን ደእያ ካናነታስ ብራታ ፓራ ጋረት ደኦሶና” ያግዶሶና።
JOS 17:17 ያትን እያሱይ ዮሰፋ ኮቸ ግድዳ ኤፍሬማነ ምናሰ፥ “ህንተ ዳሮነ ዎልቃማ፤ ህንተዉ እስ ሳማ ፃላላ ግዳናዉ በሰና።
JOS 17:18 ሄሳ ግሾ፥ ደረይ ዳርያ ቢታይ ህንተባ ግዳና። ሄ ገዘይ ዎራ ግድኮካ ቄፅድ፥ ጋፃ ጋካናዉ ህንተባ ኦꬅተ። ካናነታስ ብራታ ፓራ ጋረት ደእኮካ፥ ቃስ ኤንቲ አይ ምኖ ግድኮካ ህንተ ኤንታ ጎድድ ከሳናዉ ዳንዳኤታ” ያግስ።
JOS 18:1 ቢታ ኦል ፆንድ ኦይክዳፐ ጉየ፥ እስራኤለ አሳ ኡባይ ሴሎን ሺቅድ፥ ጎዳ ጎይኖ ዱንካንያ ያን ኤስዶሶና።
JOS 18:2 ሽን እስራኤለ አሳፐ ላታ ቢታ ኤክቦና ላፑን ኮቻት አትዶሶና።
JOS 18:3 ሄሳ ግሾ፥ እያሱይ እስራኤለ አሳኮ፥ “ጎዳይ ህንተ አዋታ ፆሳይ ህንተዉ እምዳ ቢታ ላቶና አዉደ ጋካናዉ ጋምአኔ?
JOS 18:4 እስ እስ ኮቻፈ ሄꬑ ሄꬑ አሳታ ዶርተ። እስ እስ ኮቻይ ላታና ቢታ ኤንቲ ዩይድ፥ ፆሞስ በእድ፥ ማዝጋብድ ያና መላ ታ ኤንታ ኪታና። ኤንቲ ሄ ቢታባ ፃፍ ኤክድ፥ ስሚድ ታኮ ያና።
JOS 18:5 ሄ ቢታ ላፑን በሳን ሻካና። ይሁዳ ኮቻይ ዱገሀ ባጋን፥ ዮሰፋ ኮቻይ ፑደሀ ባጋን ደእያ ባንታ ቢታ ኦይክዳ መላ ዳና።
JOS 18:6 ሀ ላፑን በሳን ሻከታና ቢታ ቆንጭስ ፃፍድ ኤክ ዪተ። ጎዳ፥ ኑ ፆሳ ስንꬃን ኤንታዉ ሳማ የጋና።
JOS 18:7 ግዶሽን፥ ሌወ ኮቻት ካህነ ግድድ፥ ጎዳስ ኦꬅያ ግሾ፥ ህንተራ ላታ ቢታ ኤኮኮና። ጋዳ ኮቻይ፥ ሮቤላ ኮቻይነ፥ ምናሰ ኮቻፈ ባጋይ ዮርዳኖሰ ሻፋፐ ዶሎሀ ባጋን፥ ጎዳ አይለይ፥ ሙሰይ ኤንታዉ እምዳ ቢታ ኮይሮትድ ላትዶሶና” ያግስ።
JOS 18:8 ሄ አሳት ቢታ ፆሞስድ፥ ፃፋናዉ ባናፐ ስን፥ እያሱይ፥ “ብድ ቢታ ዩይድ ፆሞስድ ፃፍተ፤ ስሚድ ታኮ ዪተ። ታኒ ሀይሳን፥ ሴሎን፥ ጎዳ ስንꬃን ህንተዉ ሳማ የጋና” ያግድ ኪትስ።
JOS 18:9 አሳት ብድ፥ ቢታ ኡባ ዩይዶሶና። ካታማታ ኡባ ፃፍድ፥ ቢታ ዋት ላፑን በሳን ሻካነኮ ቆንጭስዶሶና። ያት ስሚድ፥ እያሱይ ዱንካንዳ ጉታ፥ ሴሎ ስምዶሶና።
JOS 18:10 እያሱይ ጎዳ ስንꬃን፥ ሴሎን ኤንታዉ ሳማ የግስ። አትዳ እስራኤለ ዘረꬃታ ጋክያ ላታ ቢታ ሻክድ እምስ።
JOS 18:11 ኮይሮ ሳማይ ብንያመ ኮቻ ኤንታ ኮቻን ኮቻን ጋክስ። ኤንታ ጋክዳ ቢታይ ይሁዳፐነ ዮሰፋ ኮቻፈ ግዶን ደኤስ።
JOS 18:12 ፑደሀ ባጋራ ኤንታ ዛዋይ ዮርዳኖሰፐ ደንድድ፥ እያርኮ ፑደ ከይድ፥ ዉሎሀ ባጋን ደእያ ደረይ ዳርያ ቢታ ካንꬅድ፥ ቤት-አዌና መላ ቢታን ኤቄስ።
JOS 18:13 ሄ ዛዋይ ዱገሀ ባጋራ ካሰ ሎዛ ጌተትድ ፄገትያ ቤተለ ካንꬅድ፥ ዱገሀ አፃሮት-አዳረ ዎꬍድ፥ ቤት-ሆሮናፐ ዱገሀ ባጋን ደእያ ዙማን ዛዋቴስ።
JOS 18:14 ሄ ዛዋይ ዱገሀ ባጋራ ቤት-ሆሮና ስንꬃን ደእያ ዙማፐ ዉሎሀ ባጋ ፃፀትድ፥ ይሁዳ ኮቻ ካታማ ግድዳ፥ ቅርያት-ባኣለ ዎይኮ ቅርያት-ይኣርማ አꬌስ። ሄስ ዉሎሀ ባጋራ ደእያ ዛዋ።
JOS 18:15 ዱገሀ ባጋ ዛዋይ ዉሎሀ ባጋራ ቅርያት-ይኣርመፐ ደንድድ፥ ናፍቶሀ ፑልቶታን ዛዋቴስ።
JOS 18:16 ሄሳፈ ሄ ዛዋይ ዱገ ብድ ራፋይመ ዛንጋራፐ ፑደሀ ባጋን ደእያ ሄኖማ ዛንጋራፐ ስንꬃ ባጋራ ዱገ ዎꬌስ። ያፐ ያቡሰታ ካታማፐ ዱገሀ ባጋን ደእያ ላንቅያ ኦይክድ፥ ህኖመ ዛንጋራ ዎꬍድ፥ ኤንሮጌላን ዛዋቴስ።
JOS 18:17 ያፐ ፑደሀ ባጋ ምርቀትድ ኤንሸመሸ ባጋራ አዱምማ ዙማ ስንꬃን ደእያ ገልሎታ ጋኬስ። ያፐ ቃስ ሮቤላ ናኣ ቦሃና ሹቻኮ ዱገ ዎꬌስ።
JOS 18:18 ቃስ ቤት-አራባ ፑደሀ ባጋ ላንቅያ ኦይክድ፥ ዱገ ዮርዳኖሰ ዛንጋራ ዎꬌስ።
JOS 18:19 ሄሳፈ ቤት-ሆግላ ፑደሀ ላንቅያ ካንꬅ ብድ፥ ዮርዳኖሰ ሻፋይ ጎግድ ገልያ ማፅነ አባፈ ፑደሀ ባጋ ጋፃ ጋኬስ። ሀይስ ዱገሀ ባጋ ዛዋ።
JOS 18:20 ዶሎሀ ባጋ ዛዋይ ዮርዳኖሰ ሻፋ። ብንያመ ኮቻት ላትዳ ቢታይ ኡባ ባጋራ ዛዋትዳ ዛዋይ ሀይሳ።
JOS 18:21 ብንያመ ኮቻይ ባንታ ኮቻን ኮቻ ላትዳ ካታማት፥ እያርኮ፥ ቤት-ሆግላ፥ ኤመቅ-ቃፅፃ፥
JOS 18:22 ቤት-አራባ፥ ዛማራይመ፥ ቤተለ፥
JOS 18:23 አዊመ፥ ፓራ፥ ኦፍራ፥
JOS 18:24 ከፋር-አሞና፥ ኦፍናነ ግብአ። ኤንቲ ኩመꬅ ታማነ ናምኡ ካታማ። ኤንታ ዩሹዋን ደእያ ጉታትካ ኤንታ ቦላ ጉዠቶሶና።
JOS 18:25 ቃስ ጋባኦና፥ ራማ፥ በኤሮታ፥
JOS 18:26 ምፅጳ፥ ከፍራ፥ ሞፃ፥
JOS 18:27 ረቄማ፥ ይርጳኤላ፥ ታራላ፥
JOS 18:28 ፀላአ፥ ኤለፋ፥ የሩሳላመ ጌተትያ ያቡሰታ ካታማ፥ ግብአነ ቅርያት-ይኣርማ። ኤንቲ ኩመꬅ ታማነ ኦይዱ ካታማ። ኤንታ ዩሹዋን ደእያ ጉታትካ ኤንታ ቦላ ጉዠቶሶና። ብንያመ ኮቻይ ባንታ ኮቻን ላትዳ ቢታይ ሀይሳ።
JOS 19:1 ናምአንꬆ ሳማይ ስሞና ኮቻ ኤንታ ኮቻን ኮቻን ጋክስ። ኤንቲ ላትዳ ቢታይ ይሁዳ ኮቻት ላትዳ ቢታ ግዶን ደኤስ።
JOS 19:2 ኤንቲ ላትዳ ካታማት፥ በርሳበ ዎይኮ ሴባ፥ ሞላዳ፥
JOS 19:3 ሀፃር-ሹኣላ፥ ባላ፥ ኤፀማ፥
JOS 19:4 ኤልቶላዳ፥ ባቱላ፥ ሆርማ፥
JOS 19:5 ፅቅላጋ፥ ቤት-ማርካቦታ፥ ሀፃር-ሱሳ፥
JOS 19:6 ቤት-ላባኦታነ ሻሩሀ። ኤንቲ ኩመꬅ ታማነ ሄꬓ ካታማ። ኤንታ ዩሹዋን ደእያ ጉታት ኤንታ ቦላ ጉዠቶሶና።
JOS 19:7 ቃስ ሀራ በሳን አይና፥ እርሞና፥ ኤተራነ አሻና ጌተትያ ኦይዱ ካታማታነ ኤንታ ዩሹዋን ደእያ ጉታታ ኦይክዶሶና።
JOS 19:8 ስሞና ቢታይ ዱገሀ ባጋን ደእያ ባእላት-ባኤራ ዎይኮ ራማ ካታማታነ ኤንታ ዩሹዋን ደእያ ጉታታ ኡባ ጋኬስ። ስሞና ኮቻይ ባንታ ኮቻን ኮቻን ላትዳ ቢታይ ሀይሳ።
JOS 19:9 ይሁዳ ኮቻታ ጋክዳ ቢታይ ዳልጋ ግድዳ ግሾ፥ እያፐ ሻከትድ፥ ስሞና ኮቻታስ እመትስ።
JOS 19:10 ሄꬓንꬆ ሳማይ ዛብሎና ኮቻ ኤንታ ኮቻን ኮቻን ጋክስ። ኤንቲ ላትዳ ቢታይ ሳርዳ ጋኬስ።
JOS 19:11 ያፐ ደንድድ ዛዋይ ዉሎሀ ባጋን ደእያ ማርአላ ካንꬅድ፥ ዳባሼታ ቦችሸ፥ ዮቅናማ ማታን ደእያ ሃꬃ ጋኬስ።
JOS 19:12 ሳርዳፐ ዶሎሀ ባጋ ምርቀትድ፥ ክስሎት-ታቦራ ካንꬅድ ዳብራታንነ ያፋን ዛዋቴስ።
JOS 19:13 ያፐ ዉሎሀ ባጋራ ካንꬅድ፥ ጋት-ሄፌራነ እት-ቃፅናና ጋክድ፥ እርሞናኮነ ነአኮ ምርቀቴስ።
JOS 19:14 ፑደሀ ባጋ ዛዋይ ሀናቶነ ዩይድ፥ ይፍታሄ ዛንጋራን ዛዋቴስ።
JOS 19:15 ሄ ዛዋይ ቃፃታ፥ ናህላላ፥ ሽምሮና፥ ይዳላነ ቤተለመ ጌተትያ ካታማታ ኦይኬስ። ኤንቲ ኩመꬅ ታማነ ናምኡ ካታማ፤ ኤንታ ዩሹዋን ደእያ ጉታት ኤንታ ቦላ ጉዠቶሶና።
JOS 19:16 ዛብሎና ኮቻት ባንታ ኮቻን ኮቻን ላትዳ ካታማትነ ኤንታ ዩሹዋን ደእያ ጉታት ሀይሳታ።
JOS 19:17 ኦይዳንꬆ ሳማይ ይሳኮራ ኮቻ ኤንታ ኮቻን ኮቻን ጋክስ።
JOS 19:18 ኤንታ ዛዋይ እዝራኤለ፥ ካሱሎታ፥ ሱኔማ፥
JOS 19:19 ሀፋራይማ፥ ሽኦና፥ አናሃራታ፥
JOS 19:20 ራብታ፥ ቅሶና፥ አቤፃ፥
JOS 19:21 ራመታ፥ ኤንጋንማ፥ ኤንሀዳነ ቤት-ጳፀፃ ኦይኬስ።
JOS 19:22 ሄ ቢታ ዛዋይ ታቦረ፥ ሻሀፁማነ ቤት-ሳሜሳ ቦችሸ ብድ፥ ዮርዳኖሰ ሻፋን ዛዋቴስ። ኤንቲ ኩመꬅ ታማነ ኡሱፑን ካታማ፤ ኤንታ ዩሹዋን ደእያ ጉታት ኤንታ ቦላ ጉዠቶሶና።
JOS 19:23 ይሳኮራ ኮቻይ ባንታ ኮቻን ኮቻን ላትዳ ቢታ ግዶን ደእያ ካታማትነ ኤንታ ዩሹዋን ደእያ ጉታት ሀይሳታ።
JOS 19:24 እቻሻንꬆ ሳማይ አሴራ ኮቻ ኤንታ ኮቻን ኮቻን ጋክስ።
JOS 19:25 ኤንታ ቢታ ዛዋይ፥ ሄልቃታ፥ ሀላ፥ በፀና፥ አዝፋ፥
JOS 19:26 አላመለከ፥ አማዳነ ምሻላ ኤኬስ። ዉሎሀ ባጋራ ቃርመሎሳንነ ስሆር-ልብናታን ዛዋቴስ።
JOS 19:27 ቃስ ዶሎሀ ባጋራ ቤት-ዳጎናኮ ምርቀትድ፥ ዛብሎናነ ይፍታህኤላ ዛንጋራ ቦችሸ ብድ፥ ፑደሀ ባጋራ ቤት-ኤመቃነ ንኤላ ጋኬስ። ቃስ ፑደሀ ባጋራ ካቡላ፥
JOS 19:28 ኤብሮና፥ ረሆባ፥ ሀሞናነ ቃና ካንꬅድ፥ ስዶናን ዛዋቴስ።
JOS 19:29 ሄ ዛዋይ ራማ ዩይድ፥ ግምበን ድረትዳ ፅሮሳ ካታማ ጋክድ፥ ሆሳኮ ምርቀትድ፥ መደትራነ አባን ዛዋቴስ። ቃስ ማሀላባ፥ አክዚባ፥
JOS 19:30 ኡማ፥ አፌቃነ ረሆባ ጌተትያ ካታማታ ጋክድ ዛዋቴስ። ኤንቲ ኩመꬅ ላታማነ ናምኡ ካታማ፤ ኤንታ ዩሹዋን ደእያ ጉታት ኤንታ ቦላ ጉዠቶሶና።
JOS 19:31 አሴራ ኮቻይ ባንታ ኮቻን ኮቻን ላትዳ ካታማትነ ኤንታ ዩሹዋን ደእያ ጉታት ሀይሳታ።
JOS 19:32 ኡሱፑንꬆ ሳማይ ንፍታለመ ኮቻ ኤንታ ኮቻን ኮቻን ጋክስ።
JOS 19:33 ኤንታ ዛዋይ ሄለፋፐነ ዛናንመ ዎላፐ ብድ፥ አዳም-ነቀባ፥ ያብንኤላነ ላቁማ ካንꬅድ፥ ዉርሰꬃይ ዮርዳኖሰ ሻፋን ኤቄስ።
JOS 19:34 ቃስ ሄ ዛዋይ ዉሎሀ ባጋራ አዝኖት-ታቦራኮ ምርቀትድ፥ ሁቆቃን ኤቄስ። ሄ ዛዋይ ዱገሀ ባጋን ዛብሎና፥ ዉሎሀ ባጋን አሴራ፥ ዶሎሀ ባጋን ዮርዳኖሰ ሻፋ ካንꬅድ ይሁዳን ጋኬስ።
JOS 19:35 ግምበን ድረትዳ ካታማት፥ ፅድማ፥ ፄራ፥ ሀማታ፥ ራቃታ፥ ከነሬታ አባ፥
JOS 19:36 አዳማ፥ ራማ፥ ሀፆራ፥
JOS 19:37 ቄደሻ፥ ኤድራአ፥ ኤንሀፆራ፥
JOS 19:38 ይርኦና፥ ማግደላ፥ ሆረማ፥ ቤት-አናታነ ቤት-ሳሜሳ ካታማታ ኦይኬስ። ሄ ካታማት ኩመꬅ ታማነ ኡዱፉና፤ ኤንታ ዩሹዋን ደእያ ጉታት ኤንታ ቦላ ጉዠቶሶና።
JOS 19:39 ንፍታለመ ኮቻይ ባንታ ኮቻን ኮቻን ላትዳ ካታማትነ ኤንታ ዩሹዋን ደእያ ጉታት ሀይሳታ።
JOS 19:40 ላፑንꬃ ሳማይ ዳነ ኮቻ ኤንታ ኮቻን ኮቻን ጋክስ።
JOS 19:41 ኤንቲ ላትዳ ካታማት ፆርአ፥ ኤሽታኦላ፥ እርሸመሻ፥
JOS 19:42 ሻአልብማ፥ ኤሎና፥ ይታላ፥
JOS 19:43 ኤሎና፥ ትምና፥ ኤቅሮና፥
JOS 19:44 ኤልታቃ፥ ግብቶና፥ ባላታ፥
JOS 19:45 የሁዳ፥ በነባራቃ፥ ጋት-ርሞና፥
JOS 19:46 ማያርቆና፥ ራቆናነ ዮጰ ካታማ ዩሹዋን ደእያ ሄራታ ኦይኬስ።
JOS 19:47 ዳነ ኮቻይ ኤንታ ላታ ቢታይ ኤንታፈ ኤከትን፥ ላሸማ ካታማ ብድ፥ ኦላን ፆንድ፥ ሄ ካታማን ደእያ አሳ ማሻን ዎꬍድ፥ ሄ ቢታ ባንታባ ኦꬅዶሶና። ሄ ካታማ ሱንꬃ ላምድ፥ ባንታ አዋ ዳነ ሱንꬃን ዳነ ግድ ሱንꬅዶሶና።
JOS 19:48 ዳነ ኮቻት ባንታ ኮቻን ኮቻን ላትዳ ካታማትነ ኤንታ ዩሹዋን ደእያ ጉታት ሀይሳታ።
JOS 19:49 እስራኤለ አሳይ ቢታ ሻሁዋ ኦንግዳ ዎደ፥ ናወ ናኣ እያሱስ ላታ ቢታ እምዶሶና።
JOS 19:50 ጎዳይ ካሰ ኪትዳይሳዳ እያሱይ ደረይ ዳርያ ኤፍሬማን ደእያ ትምናት-ሳራ ካታማ እማና መላ ኦይችን፥ እያዉ እምዶሶና። ሄ ካታማ ዛር ጊግስድ፥ ያን ደእስ።
JOS 19:51 ካህነይ አላዛር፥ ናወ ናኣ እያሱይነ እስራኤለ ሶ አሳ ሀላቃት ሴሎን፥ ጎዳ ስንꬃን ፆሳ ዱንካንያ ፐንገን ሳማ የግድ፥ ሻክዳ ላታ ቢታይ ሀይሳ። ኤንቲ ቢታ ያት ሻክድ ኦንግዶሶና።
JOS 20:1 ሄሳፈ ጉየ ጎዳይ እያሱኮ ሀይሳዳ ያግስ፤
JOS 20:2 “ታኒ ሙሰ ባጋራ ኪትዳይሳዳ፥ ‘አሳይ ባቃትድ አትያ ካታማታ ዱማያና መላ’ እስራኤለ አሳስ ኦዳ።
JOS 20:3 ኦንካ ቆፖናነ ኤሮና አሰ ዎꬍኮ፥ ያ ባቃትድ ጉክዳ ሱꬃ ግሾ ሱꬅ ዛራናዉ ኮያ ኡራፐ አታና።
JOS 20:4 አሰ ዎꬍዳይስ ሄ ካታማታፐ እሱዋኮ ባቃትድ ብድ፥ ካታማ ፐንገን ኤቅድ፥ ሀንዳባ ኡባ ሄ ካታማ ጭማታስ ኦዶ። ሄሳፈ ጉየ፥ ኤንቲ ባንታ ካታማ ኤፍድ፥ እ ዳና በሲ እምኮ ኤንታራ ያን ደኦ።
JOS 20:5 ሱꬃ ግሾ ሱꬅ ዛራናዉ ኮያ ኡራይ እያ ካልድ ዪኮ፥ እ ባ እሻ ኤርድ፥ ቆሀናዉ ኮይድ ዎꬍቦና ግሾ ሄ ካታማ ጭማት እያ አꬅድ እሞፎ።
JOS 20:6 ሻንጎ ስንꬃን ሺቅድ፥ ፕርደታና ጋካናዉነ ሄ ዎደ ደእያ ካህነ ሀላቃይ ሀይቃና ጋካናዉ ሄ ካታማን ደኦ። ሄሳፈ ጉየ፥ ባቃትድ ከይዳ ካታማ ጉየ ስሚድ ባ ሶ ገሎ” ያግስ።
JOS 20:7 ያትን እስራኤለ አሳይ ደረይ ዳርያ ንፍታለመን ጋልላን ደእያ ቃደሳ፥ ደረይ ዳርያ ኤፍሬማን ደእያ ሴከማነ ደረይ ዳርያ ይሁዳን ደእያ ቅርያት-አርባ ዎይኮ ከብሮና ዱማይዶሶና።
JOS 20:8 ዮርዳኖሰ ሻፋፐ ሄፍንꬃን፥ እያርኮፈ ዶሎሀ ባጋን ꬎቃን፥ መላ ቢታን፥ ሮቤላ፥ ኮቻታ ቢታን ደእያ ቦሶራ፥ ጋዳ ኮቻታ ቢታን፥ ጋላዳን ደእያ ራሞታነ ምናሰ ኮቻታ ቢታን፥ ባሳነን ደእያ ጎላና ዱማይዶሶና።
JOS 20:9 እስራኤለ አሳይነ ኤንታ ግዶን ደእያ በታንቾት ባቃትድ አታና መላ ዱማትዳ ካታማት ሀይሳታ። ኦንካ ኤሮና ደእሸ አሰ ዎꬍኮ፥ ሻንጎ ስንꬃን ፕርደቶና ደእሸ፥ ሀይቆና አታናዉ ሀ ካታማታፐ እሱዋኮ ባቃታናዉ ዳንዳኤስ።
JOS 21:1 ሄሳፈ ጉየ፥ እስራኤለ አሳይ ካናነ ቢታን፥ ሴሎን ዱንካንድ ደእሽን፥ ሌወ ሶ አሳ ሀላቃት ካህንያ አላዛራኮ፥ ናወ ናኣ እያሱኮነ እስራኤለ ሀላቃታኮ ይድ፥ “ኑኒ ዳና ካታማታነ መሄ ሄምያ ቢታ ኑስ እማና መላ፥ ጎዳይ ሙሰ ባጋራ ኪትስ” ያግዶሶና።
JOS 21:3 ሄሳ ግሾ፥ ጎዳይ ኪትዳይሳዳ፥ እስራኤለ አሳይ ሌወታስ ካታማታነ መሄ ሄምያ ቢታ ባንታ ቢታፈ ሻክድ፥ እምዶሶና።
JOS 21:4 ኮይሮ ሳማይ ቃሃታ ኮቻስ ከይስ። ካህንያ አሮና ኮቻይ፥ ይሁዳ፥ ስሞናነ ብንያመ ኮቻፈ ታማነ ሄꬑ ካታማታ ሳማን ኤክዶሶና።
JOS 21:5 አትዳ ቃሃታ ኮቻይ፥ ኤፍሬማ፥ ዳነነ ዉሎሀ ባጋን ደእያ ምናሰ ኮቻፈ ታሙ ካታማታ ሳማን ኤክዶሶና።
JOS 21:6 ገድሶና ኮቻይ፥ ይሳኮራ፥ አሴራ ንፍታለመነ ዶሎሀ ባጋን ደእያ ምናሰ ኮቻፈ ታማነ ሄꬑ ካታማታ ሳማን ኤክዶሶና።
JOS 21:7 መራራ ኮቻይ፥ ሮቤላ፥ ጋደነ ዛብሎና ኮቻፈ ታማነ ናምኡ ካታማታ ኤክዶሶና።
JOS 21:8 ጎዳይ ሙሰ ባጋራ ኪትዳይሳዳ፥ እስራኤለ አሳይ ሀ ካታማታነ መሄ ሄምያ ቢታ ሌወታስ ሳማን ሻክድ እምዶሶና።
JOS 21:9 እስራኤለ አሳይ ይሁዳነ ስሞና ኮቻፈ ካልድ ሱንꬃን ፄገትዳ ካታማታ እምዶሶና።
JOS 21:10 ኮይሮ ሳማይ ሌወ ኮቻፈ የለትዳ፥ ቃሃታ ኮቸ ግድዳ አሮና ያራስ ከይን፥ ኤንታዉ እመትዳ ካታማት ሀይሳታ፤
JOS 21:11 ደረይ ዳርያ ይሁዳን ደእያ ቅርያት-አርባ ዎይኮ ከብሮነነ እያ ዩሹዋን ደእያ ሄንꬃ ቢታታ ኤንታዉ እምዶሶና። (አርብ አናቀ አዋ።)
JOS 21:12 ሽን ኮይሮ ሄ ካታማ ዩሹዋን ደእያ ቢታነ ጉታታ ዮፎና ናኣ ካለባስ ላታ ኦꬅድ እምዶሶና።
JOS 21:13 ካህንያ አሮና ያራስ አሰ ዎꬍዳ አስ ባቃትድ አትያ ከብሮነነ ሄንꬃ ቢታ፥ ልብናነ ሄንꬃ ቢታ፥
JOS 21:14 ያትራነ ሄንꬃ ቢታ፥ ኤሽታሞአነ ሄንꬃ ቢታ፥
JOS 21:15 ሆሎናነ ሄንꬃ ቢታ፥ ዳብራነ ሄንꬃ ቢታ፥
JOS 21:16 አይናነ ሄንꬃ ቢታ፥ ዩፃነ ሄንꬃ ቢታ፥ ቤት-ሳሜሳነ ሄንꬃ ቢታ። ሀይሳቲ ይሁዳፐነ ስሞናፐ ኤከትዳ፥ ካታማት ኩመꬅ ኡዱፉና።
JOS 21:17 ብንያመ ኮቻፈ ኤከትዳ ኦይዱ ካታማት፥ ጋባኦናነ ሄንꬃ ቢታ፥ ግብአነ ሄንꬃ ቢታ፥
JOS 21:18 አናቶተነ ሄንꬃ ቢታ፥ አልሞናነ ሄንꬃ ቢታ።
JOS 21:19 አሮና ኮቸ ግድዳ ካህነታስ እመትዳ ካታማትነ ሄንꬃ ቢታት ታማነ ሄꬓ።
JOS 21:20 ሌወ ኮቸ ግድዳ፥ አትዳ ቃሃታ ኮቻስ፥ ኤፍሬማስ እመትዳ ቢታፈ ሻከትድ እመትስ።
JOS 21:21 ቃስ ኤንታዉ ደረይ ዳርያ ኤፍሬማን፥ አሰ ዎꬍዳ አስ ባቃትድ አትያ ኦይዱ ካታማት ሴከማነ ሄንꬃ ቢታ፥ ገዘራነ ሄንꬃ ቢታ፥
JOS 21:22 ቅብፃይማነ ሄንꬃ ቢታ፥ ቤት-ሆሮናነ ሄንꬃ ቢታ እምዶሶና።
JOS 21:23 ዳነ ኮቻፈ ሻከት እመትዳ ኦይዱ ካታማት፥ ኤልታቃነ ሄንꬃ ቢታ፥ ግበቶናነ ሄንꬃ ቢታ፥
JOS 21:24 ኤሎናነ ሄንꬃ ቢታ፥ ጋት-ርሞናነ ሄንꬃ ቢታ።
JOS 21:25 ምናሰ ኮቻ ባጋፈ ሻከት እመትዳ ናምኡ ካታማት፥ ታናካነ ሄንꬃ ቢታ፥ ጋት-ርሞናነ ሄንꬃ ቢታ።
JOS 21:26 አትዳ ቃሃታ ኮቻት ሄንꬃ ቢታራ እስፈ ታሙ ካታማ ኤክዶሶና።
JOS 21:27 ሀራ ሌወ ኮቸ ግድዳ ገድሶና ኮቻስ እመትዳ ቢታይ፥ ምናሰ ኮቻ ባጋፈ አሰ ዎꬍዳ አስ ባቃትድ አትያ ናምኡ ካታማት፥ ባሳነን ደእያ ጎላናነ ሄንꬃ ቢታ፥ በኤሽትራነ ሄንꬃ ቢታ።
JOS 21:28 ይሳኮራ ኮቻፈ እመትዳ ኦይዱ ካታማት፥ ቅሶናነ ሄንꬃ ቢታ፥ ደብራታነ ሄንꬃ ቢታ።
JOS 21:29 ያርሙታነ ሄንꬃ ቢታ፥ ኤንጋንማነ ሄንꬃ ቢታ።
JOS 21:30 አሴራ ኮቻፈ ሻከት እመትዳ ኦይዱ ካታማት ምሻላነ ሄንꬃ ቢታ፥ አብዶናነ ሄንꬃ ቢታ፥
JOS 21:31 ሄልቃተነ ሄንꬃ ቢታ፥ ረሆባነ ሄንꬃ ቢታ።
JOS 21:32 ንፍታለመ ኮቻፈ ሻከት እመትዳ ሄꬑ ካታማት፥ አሰ ዎꬍዳ አስ ባቃትድ አትያ፥ ጋልላን ደእያ ቃደሳነ ሄንꬃ ቢታ፥ ሀሞት-ዶራነ ሄንꬃ ቢታ፥ ቃርታናነ ሄንꬃ ቢታ።
JOS 21:33 ገድሶና ኮቻት ሄንꬃ ቢታራ እስፈ ታማነ ሄꬑ ካታማታ ኤክዶሶና።
JOS 21:34 ሌወ ኮቸ ግድዳ አትዳ መራራ ኮቻት፥ ዛብሎና ኮቻፈ ሻከት እመትዳ ኦይዱ ካታማት፥ ዮቅናማነ ሄንꬃ ቢታ፥ ቃርታናነ ሄንꬃ ቢታ፥
JOS 21:35 ድምናነ ሄንꬃ ቢታ፥ ናህላላነ ሄንꬃ ቢታ ኤክዶሶና።
JOS 21:36 ሮቤላ፥ ኮቻፈ ሻከትድ እመትዳ ኦይዱ ካታማት፥ ቦሶራነ ሄንꬃ ቢታ፥ ያሃፃነ ሄንꬃ ቢታ፥
JOS 21:37 ቅደሞታነ ሄንꬃ ቢታ፥ መፋታነ ሄንꬃ ቢታ።
JOS 21:38 ጋዳ ኮቻፈ ሻከትድ እመትዳ ኦይዱ ካታማት፥ ጋላዳን አሰ ዎꬍዳ አስ ባቃትድ አትያ፥ ራሞታነ ሄንꬃ ቢታ፥ ማህናይመ፥
JOS 21:39 ሀሰቦና፥ ያእዜራ።
JOS 21:40 ሌወ ኮቸ ግድዳ አትዳ መራራ ኮቻይ ኤክዳ ካታማት ታማነ ናምአ።
JOS 21:41 እስራኤለ አሳይ ላትዳ ቢታፈ ሌወ ኮቻስ እመትዳ ካታማት ሄንꬃ ቢታራ እስፈ ኦይታማነ ሆስፑና።
JOS 21:42 ሄ ካታማታ ኡባ ዩሹዋን ሄንꬃ ቢታት ደኦሶና።
JOS 21:43 ጎዳይ ኤንታ አዋታስ እማና ግድ ጫቅዳ ቢታ ኡባ እስራኤለ አሳስ እምስ። ኤንቲ ሄ ቢታ ላትድ፥ ያን ደእዶሶና።
JOS 21:44 ጎዳይ ኤንታ አዋታስ ጫቅዳይሳዳ፥ ኤንታ ሳሮን ዎꬅስ። ኤንቲ ኦላስ ከይዳ ዎደ ኡባን ኤንታ ሞርከት ኤንታራ ኤቀታናዉ ዳንዳእቦኮና።
JOS 21:45 ጎዳይ እስራኤለ አሳስ እማና ግድ ጫቅዳ ሎኦባ ኡባ ፖልስፐ አትሽን፥ እሶይካ አትቤና።
JOS 22:1 ሄሳፈ ጉየ፥ እያሱይ ሮቤላ፥ ጋደነ ምናሰ ኮቻፈ ባጋ ፄግድ፥
JOS 22:2 “ጎዳ አይለይ ሙሰይ ህንተና ኪትዳ ኡባ ፖልደታ፤ ቃስ ታዉ ኪተትደታ።
JOS 22:3 ሄ ኡባን ሀች ጋካናዉ ህንተ እሻታ የግቤከታ። ጎዳ፥ ህንተ ፆሳ ኪታ ኡባ ፖልደታ።
JOS 22:4 ጎዳይ ህንተ ፆሳይ ህንተዉ ጫቅዳ ቃላዳ፥ ህንተ እሻታ ሸምፕስስ። ሄሳ ግሾ፥ ጎዳ አይለይ ሙሰይ ህንተዉ ዮርዳኖሰ ሻፋፐ ዶሎሀ ባጋን እምዳ፥ ላታ ቢታን ደእያ ህንተ ሶ ሶ ስምተ።
JOS 22:5 ጎዳ አይለይ ሙሰይ ህንተና ኪትዳ ህግያ ምንꬅድ ናግተ። ጎዳ ህንተ ፆሳ ሲቅተ። እያ ኦግያፐ ደሾፕተ፤ እያ ኪታ ፖልተ። እያራ ሽጵ ግድ ደእተ፤ ህንተ ኩመꬃ ዎዛናፐነ ኩመꬃ ሸምፑዋፈ እያዉ ኦꬅተ” ያግስ።
JOS 22:6 እያሱይ ኤንታ አንጅድ የድን ኤንቲ ባንታ ሶ ስምዶሶና።
JOS 22:7 እያሱይ፥ ምናሰ ኮቻ ባጋስ ባሳነን ላታ ቢታ እምስ። አትዳ ባጋ ኮቻስ ቃስ ዮርዳኖሰፐ ዉሎሀ ባጋን ላታ ቢታ እምስ። እያሱይ ኤንታ አንጅድ ሞይዝሸ፥
JOS 22:8 ህንተ፥ “ዳሮ መሄ፥ ብራ፥ ዎርቃ፥ ናሰ፥ ብራታነ ዳሮ ማኦ ኤክድ ህንተ ሶ ስማና ሀኔታ። ሄሳ ግሾ፥ ህንተ ሞርከታፐ ድእዳይሳ ህንተ እሻታራ ሻከትተ” ያግስ።
JOS 22:9 ሮቤላ፥ ጋድነ ምናሰ ኮቻ ባጋይ ባንታ ላታ ቢታ ስምዶሶና። ኤንቲ፥ ጎዳይ ሙሰ ባጋራ ኪትን ላትዳ ጋላዳ ቢታ፥ ካናነ ቢታን፥ ሴሎን ደእያ እስራኤለ አሳፐ ሻከትድ ብዶሶና።
JOS 22:10 ሮቤላ፥ ጋድነ ምናሰ ኮቻፈ ባጋይ ዮርዳኖሰ ማታን ካናነ ቢታን ደእያ ጋልሎታ ይድ፥ ሻፋ ማታን ማላልስያ ግታ ያርሾ በሲ ኬፅዶሶና።
JOS 22:11 ሮቤላ፥ ጋድነ ምናሰ ኮቻፈ ባጋይ ዮርዳኖሰ ማታን፥ ጋልሎታን፥ ካናነ ቢታን ያርሾ በሲ ኬፅዳይሳ አትዳ እስራኤለ አሳይ ስእዶሶና።
JOS 22:12 እስራኤለ አሳይ ሄሳ ስእድ፥ ኤንታ ኦላናዉ ሴሎን ሺቅዶሶና።
JOS 22:13 ሄሳፈ ስን እስራኤለ አሳይ፥ ካህንያ አላዛራ ናኣ ፕንሃሳ፥ ጋላዳን ደእያ ሮቤላ፥ ጋደነ ምናሰ ኮቻፈ ባጋታኮ የድዶሶና።
JOS 22:14 እስ እስ ኮቻይ ባ ሶ ሀላቃታፐ እስ እስ አሰ ዶርድ፥ ታሙ አስ ፕንሃሳራ የድዶሶና።
JOS 22:15 ኤንቲ ሮቤላ፥ ጋድነ ምናሰ ኮቻፈ ባጋይ ጋላዳ ብድ፥
JOS 22:16 “ጎዳ አሳይ፥ ‘እስራኤለ ፆሳ ቦላ ደእያ ህንተ አማኑዋ አይስ ፓጭሴቲ? ህንተዉ ያርሾ በሲ ኬፅድ፥ ጎዳፐ ሃክደታ። እያ ቦላ አይስ ማካልደቲ?
JOS 22:17 ፐኦራን ኑ ኦꬅዳ ናጋራይ ግደኔ? ጎዳ አሳ ቦላ ቦሽ ዎꬍስ፤ ሀች ጋካናዉ ኑኒ ሄ ናጋራፐ ጌይቦኮ።
JOS 22:18 ጎዳ ቦላ ሀች ህንተ ዞኮ ዛርደታ። ሀች ህንተ እያ ቦላ ዞኮ ዛርኮ ዎንቶ እ ኩመꬃ እስራኤለ አሳ ሀንቃና።
JOS 22:19 ህንተ ደእያ ቢታይ ቱንዳባ ግድኮ፥ ጎዳ ዱንካነይ ደእያ ቢታ፥ ሃ ኑኮ ይድ፥ ኑ ላታ ሻከትተ። ሽን ጎዳ፥ ኑ ፆሳ ያርሾ በሳፈ ሀራ ያርሾ በሲ ኬፅድ ፆሳ ቦላ ዎይኮ ኑ ቦላ ማካሎፍተ።
JOS 22:20 ዛራ ናአይ አካን ድገትዳባ ኤክድ፥ ናጋራ ኦꬅዳ ግሾ፥ ኩመꬃ እስራኤለ አሳ ቦላ ጎዳ ሀንቆይ ዎꬍቤነዬ? እያ ናጋራ ጋሶን ሀይቅዳይ እያ ፃላላ ግደና’ ” ያግዶሶና።
JOS 22:21 ያትን ሮቤላ፥ ጋደነ ምናሰ ኮቻፈ ባጋይ ሀይሳዳ ያግድ ዛርዶሶና።
JOS 22:22 “ጎዳ ፃላል ፆሰ! ጎዳ ፃላል ፆሰ! ኑኒ ሀይሳ አይስ ኦꬅዳኮ እ ኤሬስ፤ ህንተካ ኤራና መላ ኑ ኮዮስ። ኑኒ ጎዳ ቦላ ማካልዳባነ ኪተቶና እፅዳባ ግድኮ፥ ሀች ኑና ፓፃ ዎꬆፍተ።
JOS 22:23 ኑ ጎዳስ ኪተቶና እፅድ፥ ፁሳ ያርሹዋ፥ ካꬃ ያርሹዋነ እስፈተꬃ ያርሹዋ ያርሻናዉ ያርሾ በሲ ኬፅዳባ ግድኮ፥ ጎዳይ ኑና ሀንቆ።
JOS 22:24 ኑ ሄሳ ቆፕድ ኬፅቦኮ። ኑኒ ያርሾ በሲ ኬፅዳይ፥ ዎንቶ ህንተ ናይት፥ ኑ ናይታኮ፥ ‘ህንተዉ ጎዳ፥ እስራኤለ ፆሳራ አይ ጋሄተꬅ ደኢ?
JOS 22:25 ጎዳይ ኑ ግዶንነ ሮቤላነ ጋዳ ኮቻ ግዶን ዮርዳኖሰ ሻፋ ዛዋ ዎꬅስ። ሄሳ ግሾ፥ ጎዳራ ህንተዉ ጋሄተꬅ ባዋ’ ጋንደሻ ግድ ያይዳ ግሾሳ። ቃስ ህንተ ኮቻይ ኑ ኮቻ ጎዳ ጎይኖ ድጎና አጎኮና” ያግድ ቆፕዳ።
JOS 22:26 “ኑ ያርሾ በሲ ኬፅዳይ ሄሳሳ። ፁሳ ዎይኮ ሀራ ያርሾ ያርሻናሳ ግደና።
JOS 22:27 ኑኒ ያርሾ በሲ ኬፅዳይ፥ ፁሳ፥ እስፈተꬃነ ሀራ ያርሹዋ ያርሽሸ ደእዳይሳስነ ጎዳ ዱንካንያ ስንꬃን ጎይንሸ ደእዳይሳስ፥ ኑ ግዶንነ ህንተ ግዶን ቃስ ካልያ የለታ ግዶን ሄስ ማርካ ግዳና መላሳ። ሄስ ህንተ ናይት ኑ ናይታኮ፥ ‘ህንተዉ ጎዳራ አይ ጋሄተꬅካ ባዋ’ ያጎና መላ ማዳና።
JOS 22:28 ኤንቲ ዎደፐ ኑኮ ዎይኮ ኑ ኮቻኮ ሄሳዳ ጊኮ፥ ኑ ናይት ዛሪድ፥ ‘ኑ አዋት ጎዳስ ኬፅዳ ያርሾ በሳ ሌምሱዋ ሀይሳ በእተ። ሄስ ህንተ ግዶንነ ኑ ግዶን ማርካ ግዳና መላሳፈ አትሽን፥ ፁሳ ዎይኮ ሀራ ያርሾ ያርሻናሳ ግደና’ ጋናዉ ዳንዳአና መላሳ።
JOS 22:29 ኑ ጎዳ ቦላ ማካላናይስ ኑፐ ሃኮ። ጎዳ ኑ ፆሳ ዱንካንያ ስንꬃን ደእያ ያርሾ በሳፈ ሀራ ፁሳ፥ ካꬃነ ሀራ ያርሾ በሲ ኬፅድ ፆሳ ጎይኖ አጎኮ” ያግድ ዛርዶሶና።
JOS 22:30 ካህነይ ፕንሃስነ እያራ ደእያ እስራኤለ ሀላቃት፥ ሮቤላ፥ ጋደነ ምናሰ ኮቻፈ ባጋይ ኦድዳይሳ ስእድ፥ ኡፋይትዶሶና።
JOS 22:31 ካህንያ አላዛራ ናአይ ፕንሃስ፥ ሮቤላ፥ ጋደነ ምናሰ ኮቻታኮ፥ “ጎዳይ ኑራ ደኤይሳ ኑ ሀች ኤርዳ። ህንተ ጎዳ ቦላ ማካልቤከታ። ህንተ እስራኤለ አሳ ጎዳ ፕርዳፈ አሽደታ” ያግስ።
JOS 22:32 ካህንያ አላዛራ ናአይ ፕንሃስነ እያራ ደእያ ሀላቃት ጋላዳን ደእያ ሮቤላነ ጋዳ ኮቻ ማታፐ ካናነን ደእያ እስራኤለ አሳኮ ስሚድ፥ ሀንዳባ ኤንታዉ ኦድዶሶና።
JOS 22:33 እስራኤለ አሳይ ኡፋይትድ፥ ፆሳ ጋላትዶሶና። ሄሳፈ ጉየ፥ ሮቤላነ ጋዳ አሳት ደእያ ቢታ ኦልድ ꬋይሳናዉ ኦደትቦኮና።
JOS 22:34 ሮቤላነ ጋዳ ኮቻይ፥ “ሀ ያርሾ በሳይ ጎዳ ፃላል ፆሳ ግደይሳስ ኑስ ማርካ” ያግድ፥ ሄ ያርሾ በሳ “ማርካ” ግድ ሱንꬅዶሶና።
JOS 23:1 ዳሮ ዎደ ጋካናዉ ጎዳይ እስራኤለ አሳ ኤንታ ዩሹዋን ደእያ ሞርከታፐ ሸምፕስስ። ሄ ዎደ እያሱይ ጭምን፥ ላይꬅ ሱገትስ።
JOS 23:2 እያሱይ፥ እስራኤለ አሳ ኡባ፥ ጭማታ፥ ሀላቃታ፥ ዳይናታነ ቶራ ሞጮናታ እስፈ ፄግድ፥ “ታኒ ሀእ ዳሮ ጭማስ።
JOS 23:3 ጎዳይ፥ ህንተ ፆሳይ ሀ ቢታን ደእያ ካዎተꬃታ ኦል ፆናና መላ ዋትድ ህንተና ማድዳኮ በእደታ።
JOS 23:4 ዶሎሀን ዮርዳኖሰ ሻፋ፥ ዉሎሀን መደትራነ አባ ጋካናዉ ደእያ ኦይከትዳ ቢታነ ኦይከቶና ቢታ ኡባ ህንተ ኮቻስ ሻካ እማስ።
JOS 23:5 ጎዳይ፥ ህንተ ፆሳይ ኤንታ ህንተ ስንꬃፈ ጎድድ ከሳና። ጎዳይ፥ ህንተ ፆሳይ ህንተዉ ጫቅዳይሳዳ ህንተ ኤንታ ቢታ ላታና።
JOS 23:6 “ሙሰ ህገ ማፃፋን ፃፈትዳ ኡባ ምንድ ናግተነ ፖልተ፤ እያፐ ኡሻች ዎይኮ ሀድርስ ጎፕተ።
JOS 23:7 ህንተ ግዶን አትዳ ደርያራ ዋላከቶፍተ። ኤንታ ፆሳታ ሱንꬃ ፄጎፕተ ዎይኮ ኤንታ ሱንꬃን ጫቆፍተ። ኤንታዉ ኦꬆፍተ ዎይኮ ኤንታዉ ጎይኖፍተ።
JOS 23:8 ሽን ሀች ጋካናዉ ህንተ ኦꬅዳይሳዳ ጎዳ ህንተ ፆሳስ አማነትተ።
JOS 23:9 “ጎዳይ፥ ግታነ ምኖ ካዎተꬃታ ህንተ ስንꬃፈ ጎድድ ከስስ። ህንተራ ሀች ጋካናዉ ኦንካ ኤቀታናዉ ዳንዳእቤና።
JOS 23:10 ጎዳይ፥ ህንተ ፆሳይ ህንተዉ ጫቅዳይሳዳ፥ እ ህንተዉ ኦለትያ ግሾ፥ ህንተፈ እስ አስ ሙኩሉ አሳ የደꬃና።
JOS 23:11 ጎዳ፥ ህንተ ፆሳ ኡባ ዎደ ሲቅተ።
JOS 23:12 ሽን ህንተ ጉየ ስሚድ፥ ህንተ ግዶን አትዳ ደርያራ ዋላከትኮ፥ ህንተ ኤንታ ማጫሳ፥ ቃስ ኤንቲ ህንተ ማጫሳ ኤክድ ኤንታራ ቃሸትኮ፥
JOS 23:13 ጎዳይ፥ ህንተ ፆሳይ ሄ ደርያ ህንተ ስንꬃፈ ጎድድ ከሶናይሳ ኤርተ። ጎዳይ፥ ህንተ ፆሳይ ህንተዉ እምዳ ሀ ሎኦ ቢታፈ ህንተ ꬋያና ጋካናዉ፥ ኤንቲ ህንተዉ ፅሄነ ግተ ግዳና። ኤንቲ ህንተ ዞኩዋስ ልሶ፥ ህንተ አይፍያስ አጉንꬁ ግዳና።
JOS 23:14 “ሀእ ታ ሀይቃናዉ ማታስ። ጎዳይ፥ ህንተ ፆሳይ ህንተዉ እማና ግድ ጫቅዳ ሎኦባ ኡባፈ እሶይካ አትቦናይሳ ህንተ ኡባይ፥ ህንተ ዎዛናንነ ሸምፑዋን ኤሬታ። እ ህንተዉ እማና ግድ ጫቅዳባፐ እሶይካ አቶና ኡባይ ፖለትስ።
JOS 23:15 ጎዳይ፥ ህንተ ፆሳይ ህንተራ ጫቅዳ ጫቁዋ ህንተ መንꬅድ፥ ሀራ ፆሳታስ ኦꬅኮነ ጎይንኮ፥ ጎዳ ሀንቆይ ህንተ ቦላ ኤፃና።
JOS 23:16 ጎዳይ፥ ህንተ ፆሳይ ህንተዉ እማና ግድ ጫቅዳ ሎኦባ ኡባ አሾና ፖልዳይሳዳ፥ እ ህንተዉ እምዳ ሀ ሎኦ ቢታፈ ህንተና ꬋይሳና ጋካናዉ ኢታ ኡባ ህንተ ቦላ ኤሀና። እ ህንተዉ እምዳ ሎኦ ቢታፈ ኤለስድ ህንተ ꬋያና።”
JOS 24:1 እያሱይ እስራኤለ አሳ ኡባ ሴከማን ፄግስ። ጭማታ፥ ሀላቃታ፥ ዳይናታነ ኦላ ሞጮናታ ፄግን፥ ኤንቲ ፆሳ ስንꬃን ሺቅዶሶና።
JOS 24:2 እያሱይ አሳኮ፥ “ጎዳይ እስራኤለ ፆሳይ ሀይሳዳ ያጌስ፤ ‘በን ህንተ አዋት ኤፍራፂሳ ሻፋፐ ሄፍንꬃን፥ ሀራ ፆሳታስ ጎይንሸ ደእዶሶና። ኤንታፈ እሶይ አብራሃመነ ናኮራ አዋ ታራ።
JOS 24:3 ሽን ህንተ አዋ አብራሃመ፥ ኤፍራፂሳ ሻፋፐ ሄፍንꬃን ደእያ ቢታፈ ፄጋዳ፥ ካናነ ቢታን ካለꬃስ። እያ ኮቻ ዳርሳስ፤ ይሳቃካ እያዉ እማስ።
JOS 24:4 ይሳቃስ ያይቆባነ ኤሳዌ እማስ። ኤሳዌ፥ ደረይ ዳርያ ሳይረ ቢታ ላትሳስ፥ ሽን ያይቆብነ እያ ናይት ግብፀ ብዶሶና።
JOS 24:5 “ ‘ጉየፐ ሙሳነ አሮና ኪታዳ ግብፀ ቢታ ጋዶን ሾጫስ፤ ዉርሰꬃን ህንተና ከሳስ።
JOS 24:6 ህንተ አዋታ ግብፀፈ ከስዳ ዎደ ዞኦ አባኮ ብዶሶና። ግብፀት ፓራታንነ ፓራ ጋረታን ህንተ አዋታ ጉየ ዛራናዉ የደꬅዶሶና።
JOS 24:7 ኤንቲ ታኮ ዋስዳ ዎደ ኤንታ ግዶንነ ግብፀታ ግዶን ꬉማ የጋስ። ያታዳ፥ አባይ ኤንታ ቦላ ስማናዳነ ኤንታ ምታናዳ ኦꬃስ። ታኒ ግብፀታ ቦላ ኦꬅዳባ ህንተ ህንተ አይፈን በእደታ። ህንተ መላ ቢታን ዳሮ ዎደ ደእደታ።
JOS 24:8 ሄሳፈ ጉየ፥ ዮርዳኖሰ ሻፋፐ ዶሎሀ ባጋን ደእያ አሞረታ ቢታ ህንተና ኤሀስ። ኤንቲ ህንተና ኦልዶሶና፥ ሽን ታ ህንተዉ ፆኖ እማስ። ታ ኤንታ ꬋይስን፥ ህንተ ኤንታ ቢታ ላትደታ።
JOS 24:9 ሄሳፈ ጉየ፥ ሞአበ ቢታ ካዎይ፥ ስፎራ ናአይ ባላቅ፥ ደንድድ፥ እስራኤለታራ ኦለትስ። እ ህንተና ባዳና መላ ብኦራ ናኣ፥ ባላማ ፄግስ።
JOS 24:10 ሽን ታ ባላማ ስአብከ፤ እ ህንተና አንጃና መላ ኦꬃዳ፥ ህንተና ባላቃ ኩሽያፐ አሻስ።
JOS 24:11 ህንተ ዮርዳኖሰ ሻፋ ፕንድ፥ እያርኮ ይደታ። እያርኮ አሳይ፥ አሞረት፥ ፓርዘት፥ ካናነት፥ ህተት፥ ገርገሰት፥ ህወትነ ያቡሰት ህንተራ ኦለታናዉ ደንድዶሶና፥ ሽን ታ ህንተና ፆንሳስ።
JOS 24:12 ዮርዳኖሰ ሻፋፐ ዶሎሀ ባጋን ደእያ ናምኡ አሞረ ካዎታ ቦላ ኦꬅዳይሳዳ፥ ካዠ ኪታዳ ኤንታና ህንተ ስንꬃፈ ጎዳ ከሳስ። ሄስ ሀንዳይ፥ ህንተ ማሻና ዎይኮ ህንተ ዶንግያና ግደና።
JOS 24:13 ህንተ ቄፅ ከስቦና ቢታነ ህንተ ኬፅቦና ካታማታ ታኒ ህንተዉ እምን ደኤታ። ሀእ ህንተ ቶክቦና ዎይነ አይፍያነ ሻማሆ አይፍያ ሜታ’ ” ያጌስ።
JOS 24:14 ቃስካ እያሱይ ካልድ፥ “ጎዳ ቦንችተ፤ ፖሎ አማነተꬃንነ ሱረ ዎዛናን እያዉ ኪተትተ። ህንተ ማይዛት ኤፍራፂሳ ሻፋፐ ሄፍንꬃንነ ግብፀን ጎይንዳ ኤቃታ አግድ ጎዳ ጎይንተ።
JOS 24:15 ህንተ ጎዳ ጎይናናዉ ኮዮና እፅኮ፥ ህንተ አዋት ኤፍራፂሳ ሻፋፐ ሄፍንꬃን ደእሸ ጎይንዳ ኤቃታ ግድን፥ ዎይኮ ሀእ ህንተ ደእያ አሞረታ ኤቃታ ግድን፥ ህንተ ጎይናና ፆሳ ሀች ዶርተ። ሽን ታኒ፥ ታ ሶ አሳራ ኑ ጎዳ ጎይናና” ያግስ።
JOS 24:16 አሳይ ዛሪድ፥ “ጎዳ አግድ፥ ሀራ ኤቃ ፆሳታ ጎይናናይስ ኑፐ ሃኮ።
JOS 24:17 ኑ ጎዳ ፆሳይ ኑናነ ኑ አዋታ ግብፀ አይለተꬃፈ ከስስ፤ እ ኦꬅዳ ግታ ማላታታ በእዳ። ኑ ካንꬅድ አꬍዳ ቢታ ኡባን ጎዳይ ኑና ናግስ።
JOS 24:18 ጎዳይ አሞረታነ ሄ ቢታን ደእያ ሀራ ካዎተꬃታ ኑ ስንꬃፈ ጎድድ ከስስ። ሄሳ ግሾ፥ እ ኑ ፆሳ ግድያ ግሾ ኑ እያ ጎይናና” ያግዶሶና።
JOS 24:19 እያሱይ ዛሪድ፥ “ጎዳይ ጌሽነ ቃናትያ ፆስ ግድያ ግሾ፥ ህንተ እያ ጎይናናዉ ዳንዳኤከታ። እ ህንተ ናቁዋ ዎይኮ ህንተ ናጋራ አቶ ጌና።
JOS 24:20 ህንተ ጎዳስ ዞኮ ዛሪድ፥ ኤቃ ፆሳታ ጎይንኮ፥ እ ህንተዉ ካሰ ሎኦ ግድኮካ ስሚድ ህንተና ቆሀናነ ꬋይሳና” ያግስ።
JOS 24:21 አሳይ ዛሪድ፥ “ኑ ሀራ ኤቃ ፆሳታ ጎይኖኮ፤ ኑኒ ጎዳ፥ እያ ፃላላ ጎይናና” ያግስ።
JOS 24:22 እያሱይ፥ “ህንተ ጎዳ ጎይናና ግዳይሳስ ህንተ፥ ህንተ ሁጰን ማርካ” ያግስ። ኤንትካ፥ “ኤ ኑኒ ማርካ” ያግዶሶና።
JOS 24:23 እያሱይ ዛሪድ፥ “ህንተ ግዶን ደእያ ኤቃ ፆሳታ ድግተ፤ ህንተ ዎዛና ጎዳኮ፥ እስራኤለ ፆሳኮ ዛርተ” ያግስ።
JOS 24:24 ኤንትካ፥ “ኑኒ ጎዳ፥ ኑ ፆሳ ጎይናና፤ እያ ኪታ ናጋና” ያግዶሶና።
JOS 24:25 ሄ ጋላስ እያሱይ፥ ሴከማን አሳይ ፆሳራ ጫቃና መላ ኦꬅስ። ኤንቲ ካላና ህግያ ኤንታዉ ጊግስድ፥
JOS 24:26 ህገ ማፃፋን ፃፍስ። ሄሳፈ ጉየ፥ እስ ግታ ሹች ኤክድ፥ ጎዳ ዱንካንያ ማታን ደእያ ዎላ ጋርሳን ኤስስ።
JOS 24:27 እያሱይ አሳኮ፥ “ሀ ሹቻ በእተ፤ እ ኑ ቦላ ማርካ። ጎዳይ ኑስ ኦድዳባ ኡባ ሀ ሹቻይ ስእስ። ህንተ ፆሳ ቦላ ማካልኮ፥ ሀ ሹቻይ ህንተ ቦላ ማርካ ግዳና” ያግስ።
JOS 24:28 ያትድ፥ እያሱይ አሳ ኡባ ሞይዝስ። አሳ ኡባይ ባንታ ላታ ቢታ ስሚድ ብዶሶና።
JOS 24:29 ጎዳ አይለይ፥ ናወ ናኣ እያሱይ ፄታነ ታሙ ላይꬃን ሀይቅስ።
JOS 24:30 አሳይ እያ ጋኣሳ ዙማፐ ፑደሀ ባጋን፥ ደረይ ዳርያ ኤፍሬማን ደእያ እያ ላታ ቢታን፥ ትምናት-ሳራን እያ ሞግዶሶና።
JOS 24:31 እያሱይ ፓፃ ደእዳ ዎደ ኡባን እስራኤለ አሳይ ጎዳ ጎይንዶሶና። እያፐ ጉየ፥ ፆሳይ እስራኤለ አሳስ ኦꬅዳ ኦሶ ኡባ ባንታ አይፈን በእዳ ጭማታ ዎደ ኡባን ጎዳ ጎይንዶሶና።
JOS 24:32 እስራኤለ አሳይ ግብፀ ቢታፈ ኤክ ከይዳ፥ ዮሰፋ መቀꬃ ሴከማን ሞግዶሶና። ሄ በሳ ያይቆብ ሴከማ አዋ ሀሞራ ናይታፐ እስ ፄቱ ብራ ሳንትመን ሻምስ። ሄ ቢታ ጉየፐ ዮሰፋ ኮቻይ ላትዶሶና።
JOS 24:33 አሮና ናአይ አላዛር ሀይቅድ፥ እያ ናኣ ፕንሃሳስ እመትዳ ደረይ ዳርያ ኤፍሬማ ቢታን ደእያ ግብአን ሞገትስ።
JDG 1:1 እያሱይ ሀይቅዳፐ ጉየ እስራኤለ አሳይ፥ “ካናነ ቢታ ኦላናዉ ኑ ኮቻታፐ ኮይሮትድ ከያናይ ኦኔ?” ያግድ ጎዳ ኦይችዶሶና።
JDG 1:2 ጎዳይ፥ “ይሁዳ ኮቻይ ኮይሮትድ ከዮ። ታኒ ቢታ እያ ኩሸን አꬃዳ እማስ” ያግስ።
JDG 1:3 ይሁዳ አሳይ ባንታ እሻታ፥ ስሞና ኮቻታ፥ “ኑኒ ካናነታ ኦላና መላ ኑና ግሾን ጋክዳ ቢታ ኑራ የꬍተ። ኑካ ህንተና ግሾን ጋክዳ ቢታ ህንተራ ባና” ያግስ። ስሞና ኮቻይ ይሁዳ ኮቻራ እስፈ ኦላናዉ ብስ።
JDG 1:4 ጎዳይ ካናነታነ ፓርዘታ ኤንታ ኩሸን አꬅድ እምን፥ ቤዘቃ ካታማን ታሙ ሙኩሉ አሳ ዎꬍዶሶና።
JDG 1:5 ቤዘቃ ካታማን ካዋ አዶን-ቤዘቃ ደምድ፥ እያራ ኦለትድ ካናነታነ ፓርዘታ ፆንዶሶና።
JDG 1:6 አዶን-ቤዘቅ ባቃትያ ዎደ ኤንቲ የደꬅ ኦይክድ፥ እያ ኩሽያነ እያ ቶሁዋ ዎጋ ብራታ ቃንፅዶሶና።
JDG 1:7 አዶን-ቤዘቅ፥ “ኩሸነ ቶሆ ዎጋ ብራታ ታኒ ቃንፅዳ ላፑን ታሙ ካዎት ታ ጋይታፐ ዎꬍዳ ቲፍያ ማፅድ ሞሶና። ታኒ ኤንታ ቦላ ኦꬅዳይሳዳ ፆሳይ ታ ቦላ ኦꬅስ” ያግስ። እያ የሩሳላመ ኤህን ያን ሀይቅስ።
JDG 1:8 ይሁዳ አሳይ የሩሳላመ ኦል ኦይክድ አሳ ማሻን ዎꬍድ፥ ካታማ ታማን ፁግዶሶና።
JDG 1:9 ሄሳፈ ጉየ፥ ይሁዳ አሳይ ደረይ ዳርያ ቢታን፥ ነገባ መላ ቢታንነ ጋꬋን ደእያ ካናነታ ኦላናዉ ብዶሶና።
JDG 1:10 ካሰ ቅርያት-አርባ ጌተትያ ከብሮና ካታማን ደእያ ካናነታ ኦልድ ሰሳያ፥ አክማናነ ታልማያ ጌተትያ ኮቻታ ፆንዶሶና።
JDG 1:11 ያፐ ደንድድ ይሁዳ አሳይ ደብራ ካታማን ደእያ አሳ ኦላናዉ ብዶሶና። ደብራ ካታማይ ካሰ ቅርያት-ሰፈራ ጌተቴስ።
JDG 1:12 ካለብ፥ “ቅርያት-ሰፈራ ኦልድ ኦይክያ ኡራስ ታኒ ታ ናእዉ አክሶ እማና” ያግስ።
JDG 1:13 ካለባ ካሎ እሻ ቃናዛ ናአይ ጎቶንያል ሄ ካታማ ኦልድ ኦይክን፥ ካለብ ባ ናእዉ አክሶ እያዉ እሚስ።
JDG 1:14 አክሳ ጎቶንያላ ገልያ ዎደ፥ እ አዋይ እዉ ጋደ እማናዳ ዎሳና መላ ጎቶንያል እዮ ዞርስ። እያ ባቁሎ ቦላፈ ዎꬍሽን ካለብ ታ ናተ፥ “አይ ኮያይ?” ያግድ ኦይችስ።
JDG 1:15 እያ፥ “ታዉ ዎይቶ እማ። ኔኒ ካሰ ታዉ እምዳ ቢታይ ቃኤ ግድዳ ግሾ ሃꬃ ፑልቶታ ታዉ እማርክ” ያጋሱ። ካለብ ቆሞ ፑልቱዋነ ጋርሳ ፑልቱዋ እዉ እሚስ።
JDG 1:16 ሙሰይ ቦሉዋ ቀናት ኮቻት ይሁዳ አሳራ ዛምባ ካታማ ጌተትያ እያርኮ ካታማፐ ደንድድ አራዳ ካታማፐ ዱገሀ ባጋራ፥ ነገባን ደእያ ይሁዳ መላ ቢታ ብድ ያን ደእያ አሳ ግዶን ኡትዶሶና።
JDG 1:17 ይሁዳ አሳይ ስሞና አሳራ እስፈ ብድ፥ ፃፋታ ካታማን ደእያ ካናነታ ፆንድ ካታማ ኩመꬅ ꬋይስድ፥ ሄ ካታማ ሆርማ ግድ ሱንꬅዶሶና።
JDG 1:18 ይሁዳ አሳይ ጉጅድ ጋዛ፥ አስቃሎና፥ ኤቅሮናነ ኤንታ ዩሹዋን ደእያ ጉታታ ኦይክዶሶና።
JDG 1:19 ጎዳይ ይሁዳ አሳራ ደእያ ግሾ፥ ደረይ ዳርያ ቢታ ላትዶሶና። ሽን ደምባ ቢታን ደእያ አሳታስ ብራታፐ ኦሰትዳ ኦላ ፓራ ጋረት ደእያ ግሾ፥ ይሁዳ አሳይ ኤንታ ጎድድ ከሳናዉ ዳንዳእቦኮና።
JDG 1:20 ሙሰይ ኪትዳይሳዳ፥ ከብሮና ካታማ ካለባስ እምን ካለብ አናቀ ኮቸ ግድዳ ሄꬑ ኮቻታ ጎድድ ከስስ።
JDG 1:21 ሽን ብንያመ ኮቻት የሩሳላመን ደእያ ያቡሰታ ጎድድ ከስቦኮና። ሄ ዎደፐ ዶምን ያቡሰት ብንያመ ኮቻታራ እስፈ የሩሳላመን ደእዶሶና።
JDG 1:22 ቃስ ዮሰፋ ኮቻት ቤተለ ካታማ ኦልዶሶና፤ ፆሳይ ኤንታራ ደኤስ።
JDG 1:23 ዮሰፋ ኮቻት ካሰ ሎዛ ጌተትያ ቤተለ ካታማ ዎችያ አሳታ ኪትዶሶና።
JDG 1:24 ኤንቲ ካታማፐ ከይያ እስ አድያ ደምድ፥ “ካታማ ግዶ ዋንድ ገላናዉ ዳንዳኤትያኮ ኑና በሳ፤ ኑኒ ነዉ ኬሀና” ያግዶሶና።
JDG 1:25 እ ኤንታ በስን ካታማን ደእያ አሳ ማሻን ቡꬅዶሶና፤ ሽን ሄ አድያነ እያ ሶ አሳ ኡባ አሽዶሶና።
JDG 1:26 ጉይፐ ሄ አደይ ህተታ ቢታ ብድ፥ ያን ካታማ ኬፅድ ሎዛ ግድ ሱንꬅስ። ሀች ጋካናዉ ሄ ካታማይ ሄ ሱንꬃን ፄገቴስ።
JDG 1:27 ምናሰ ኮቻት ቤት-ሳና፥ ታናካ፥ ዶራ፥ ይብላማ ማግዶነ ኤንታ ዩሹዋን ደእያ ጉታታን ደእያ አሳታ ጎድድ ከስቦኮና። ያትን፥ ካናነት ያን ዱሱ ኦይክዶሶና።
JDG 1:28 እስራኤለ አሳይ ምንዳ ዎደ ካናነታ ባንታዉ ዎልቃን ኦስስዶሶና፤ ሽን ኤንታ ኩመꬅ ቢታፈ ከስድ ጎድቦኮና።
JDG 1:29 ኤፍሬማ ኮቻትካ ገዘራ ካታማን ደእያ ካናነታ ጎድድ ከስቦኮና፤ ያትን፥ ካናነት ያን ኤንታራ ደእዶሶና።
JDG 1:30 ዛብሎና ኮቻት ቅትሮናንነ ናህላላን ደእያ አሳታ ጎድድ ከስቦኮና፤ ያትን፥ ካናነት ያን ኤንታራ እስፈ ደእዶሶና። ሽን ዛብሎና ኮቻት ኤንታ ባንታዉ ዎልቃን ኦስስዳሶና።
JDG 1:31 አሴራ ኮቻት አኮን፥ ስዶናን፥ አህላባን፥ አክዚባን፥ ሄልባን፥ አፌቃንነ ረሆባን ደእያ አሳታ ጎድ ከስቦኮና።
JDG 1:32 ካናነት ከዮና አትዳ ግሾ አሴራ ኮቻት ኤንታራ ያን እስፈ ደእዶሶና።
JDG 1:33 ንፍታለመ ኮቻት ቤት-ሳሜሳንነ ቤት-አናታን ደእያ አሳታ ጎድ ከስቦኮና፤ ሽን ካናነታራ ያን እስፈ ደእዶሶና። ቤት-ሳሜሳነ ቤት-አናታ አሳታ ባንታዉ ዎልቃን ኦስስዶሶና።
JDG 1:34 አሞረት ዳነ ኮቻታ ደረይ ዳርያ ቢታ የደꬅዶሶና፤ ኤንቲ ደምባ ቢታ ዎꬎና መላ ተቅዶሶና።
JDG 1:35 አሞረት ሄሬሳ ደርያን፥ ኤሎናንነ ሻአልብማን ዱሱ ኦይክዶሶና፤ ሽን ዮሰፋ ኮቻት ምን ምን ብድ ባንታዉ ዎልቃን ኦስስዶሶና።
JDG 1:36 አሞረታ ቢታ ዛዋይ ሰላአ ማታን ደእያ አክራብማ ፑደꬃ ከዬስ።
JDG 2:1 ጎዳ ኪታንቾይ ጋልጋላፐ ቦክማ ብድ፥ እስራኤለ አሳኮ ሀይሳዳ ያግስ፤ “ታኒ ህንተና ግብፀፈ ከሳዳ በን ህንተ ማይዛታስ እማና ጋዳ ጫቅዳ ቢታ ህንተና ገልሳዳ፥ ‘ታኒ ህንተራ ጫቅዳ ጫቁዋ መንꬅከ፤
JDG 2:2 ህንተ ሀ ቢታን ደእያ አሳታራ ጫቆፍተ፤ ኤንታ ያርሾ በሳ ላልተ’ ያጋስ። ሽን ህንተ ታዉ ኪተትበከታ፤ አይስ ሄሳ ሀንደቲ?
JDG 2:3 ሄሳ ግሾ፥ ታኒ ኤንታ ህንተ ስንꬃፈ ጎድከ፤ ኤንቲ ህንተዉ ሞርከ ግዳና፤ ኤንታ ፆሳት ህንተዉ ፅሄ ግዳና” ያግስ።
JDG 2:4 ጎዳ ኪታንቾይ እስራኤለ አሳስ ሄሳ ኦድዳ ዎደ አሳይ ባንታ ቃላ ꬎቁ ኦꬅድ ዬክዶሶና።
JDG 2:5 ያትድ ሄ በሳ ቦክማ ያግድ ሱንꬅድ ያን ጎዳስ ያርሽዶሶና።
JDG 2:6 እያሱይ እስራኤለ አሳ የድዳፐ ጉየ፥ አሳይ እሶይ እሶይ ባና ጋክዳ ላታ ቢታ ኤካናዉ ብስ።
JDG 2:7 እያሱይ ፓፃ ደእያ ላይꬃንነ ጎዳይ እስራኤለ አሳስ ኦꬅዳ ግታ ኦሶ ኡባ በእዳ ጭማት ደእያ ዎደ አሳይ ጎዳስ ኪተትዶሶና።
JDG 2:8 ጎዳ አይለይ፥ ናወ ናአይ እያሱይ ላይꬃይ ፄታነ ታማ ግድን ሀይቅስ።
JDG 2:9 ኤንቲ እያ ጋኣሳ ዙማፐ ፑደሀ ባጋን፥ ኤፍሬማ ገዘ ቢታን፥ ትምናት-ሳራሀ ጌተትያ በሳን እያ ላታ ቢታን ሞግዶሶና።
JDG 2:10 ሄ የለተꬃ ኡባይ ሀይቅድ ባንታ ማይዛታን ጋሄትዶሶና። ሄሳፈ ጉየ ጎዳ ዎይኮ ጎዳይ እስራኤለ አሳስ ኦꬅዳባ ኤሮና ሀራ የለተꬅ ደንድስ።
JDG 2:11 ሄሳፈ ጉየ፥ እስራኤለ አሳይ ጎዳ ስንꬃን ኢታባ ኦꬅዶሶና፤ ባኣለ ኤቃ ምስለታ ጎይንዶሶና።
JDG 2:12 ግብፀ ቢታፈ ኤንታ ከስዳ ጎዳ፥ ባንታ ማይዛታ ፆሳ አግዶሶና። ኤንታ ዩሹዋን ደእያ አሳ ኤቃታኮ ስሚድ፥ ኤንታዉ ጎይንዶሶና፤ ሄሳን ጎዳ ሀንቀꬅዶሶና።
JDG 2:13 ቃስ ጎዳ አግድ፥ ባኣለነ አስታሮተ ኤቃ ጎይንዶሶና።
JDG 2:14 ያትን፥ ጎዳ ሀንቆይ እስራኤለ አሳ ቦላ ኤፅስ፤ ቦንቀይሳት ኤንታ ቦንቃና መላ ኦꬅስ። ኤንታ ዩሹዋን ደእያ ሞርከታስ አꬅድ እሚስ። ያትን፥ ኤንቲ ባንታ ሞርከታራ ኤቀታናዉ ዳንዳእቦኮና።
JDG 2:15 ኤንቲ ኦለታናዉ ከይያ ዎደ ኡባን፥ ጎዳይ ካሰ ኤንታዉ ኦድዳይሳዳነ ጫቅዳይሳዳ ኤንቲ ፆነታና መላ እ ኤንታ ቦላ ደንድስ። ያትን፥ ኤንቲ ዳሮ ኡንኤትዶሶና።
JDG 2:16 ያትን፥ ጎዳይ አይሰይሳታ ኤንታዉ ደንꬅን፥ ኤንቲ እስራኤለ አሳ ቦንቀይሳታ ኩሸፐ አሽዶሶና።
JDG 2:17 ግዶሽን እስራኤለ አሳይ ሃረይሳታስ ኪተትቦኮና፤ ጎዳስ አማነቶና እፅድ ሀራ ፆሳታ ጎይንዶሶና። ኤንታ አዋት ጎዳስ ኪተትድ ሄመትዳ ኦግያ አግድ ሀራ ሶ ስምዶሶና።
JDG 2:18 ጎዳይ ኤንታዉ አይሰይሳታ ደንꬅዳ ዎደ ኡባን እ አይሰይሳታራ እስፈ ግድድ ሄ አይሰይስ ፓፃ ደእያ ላይꬃ ኡባን ኤንታ ሞርከታ ኩሸፐ አሽስ። ኤንቲ ኡንአንነ መቶን ግድድ ጎዳኮ ዋስያ ዎደ ኡባን ጎዳይ ኤንታዉ ቃቴስ።
JDG 2:19 ሽን አይሰይስ ሀይቅዳፐ ጉየ፥ አሳይ ጉየ ስሚድ፥ ካሰ ኤንታ አዋት ኦꬅዳ ኢታፐ አꬍዳ ኢታ ኦꬅዶሶና። ኤንቲ ሀራ ፆሳታኮ ስሚድ፥ ኤንታዉ ጎይንዶሶና። ባንታ ኢታ ኦሱዋነ ጌላ ኦግያ አጎና እፅዶሶና።
JDG 2:20 ጎዳይ እስራኤለ አሳ ቦላ ይሎ ኤፅድ፥ “ሀ አሳይ ታኒ ኤንታ ማይዛታስ ጫቅዳ ጫቁዋ መንꬅዳ ግሾነ ታዉ ኪተቶና እፅዳ ግሾ፥
JDG 2:21 እያሱይ ሀይቅያ ዎደ ቢታ ቦላ አትዳ ካዎተꬃታፐ እሱዋካ ታኒ ኤንታ ስንꬃፈ ጎዳዳ ከስከ።
JDG 2:22 እስራኤለ አሳይ ካሰ ባንታ ማይዛታዳ ታ ኦግያ ካልያኮነ ካሎናኮ ፓጫናዉ ታኒ ሀ አትዳ ካዎተꬃታ ጎኤታና” ያግስ።
JDG 2:23 ሄሳ ግሾ፥ ጎዳይ ሄ ካዎተꬃት ቢታፈ ጎደቶና ጋምአና መላ ኦꬅስ። እ ኤንታ ኤለስድ ጎድ ከስቤና፤ ኤንታ እያሱስ አꬅድ እምቤና።
JDG 3:1 ካናነን ኦላ ሜዘትቦና እስራኤለ አሳ ፓጫናዉ ጎዳይ ካናነን አሽዳ አሳይ ሀይሳታ።
JDG 3:2 እ ሄሳ ኦꬅዳይ ሀይሳፈ ካሰ ኦላ ሜዘትቦና እስራኤለ የለተꬃ ኦላ ሂላ ታማርሳናሳ።
JDG 3:3 ሄሳትካ እቻሹ ፍልስፄመ ሀላቃታ፥ ካናነታ፥ ስዶናታነ ባኣል-አርሞና ዙማፐ ዶምድ ሀማታ ጋካናዉ ልባኖሰ ዙማ ቦላ ደእያ ህወታ።
JDG 3:4 ጎዳይ ሙሰ ባጋራ ካሰ እስራኤለ ማይዛታስ እምዳ ኪታ ኤንቲ ኪተትያኮነ ኪተቶናኮ ፓጫናዉ ኤንታ ከሶና አግስ።
JDG 3:5 ያትን፥ እስራኤለ አሳይ ካናነታራ፥ ህተታራ፥ አሞረታራ፥ ፓርዘታራ፥ ህወታራነ ያቡሰታራ እስፈ ደእዶሶና።
JDG 3:6 ኤንታ ማጫ ናይታ ባንታዉ ኤክዶሶና፤ ባንታ ማጫ ናይታ ኤንታ አደ ናይታስ እምዶሶና። ያትድ ኤንታ ፆሳታ ጎይንዶሶና።
JDG 3:7 እስራኤለ አሳይ ጎዳ ስንꬃን ኢታባ ኦꬅዶሶና። ኤንቲ ጎዳ ባንታ ፆሳ ዶግድ፥ ባኣለነ አሼራ ጌተትያ ፆሳታ ጎይንዶሶና።
JDG 3:8 ሄሳ ግሾ፥ ጎዳ ሀንቆይ እስራኤለ አሳ ቦላ ኤፅስ። ጎዳይ ማሰጰፆመ ካዋ ኩሻን-ርሻታይም ኤንታ ሃራና መላ አꬅድ እምን፥ ኤንቲ እያዉ ሆስፑን ላይꬅ ሃረትዶሶና።
JDG 3:9 ሽን እስራኤለ አሳይ ጎዳኮ ዋስዳ ዎደ ኤንታ አሽያ፥ ካለባ ካሎ እሻ ቃናዘ ናኣ ጎቶንያላ ደንꬅስ።
JDG 3:10 ጎዳ አያናይ እያ ቦላ ዎꬍን፥ እ እስራኤለ ቦላ ፕርደይሳ ግድስ። እ ኦላስ ከይዳ ዎደ ጎዳይ ማሰጰፆመ ካዋ ኩሻን-ርሻታይማ እያዉ አꬅድ እምን ፆንስ።
JDG 3:11 ያትን፥ ቢታይ ኦይታሙ ላይꬅ ዎፑ ግድ ደእስ። ሄሳፈ ጉየ፥ ቃናዘ ናአይ ጎቶንያል ሀይቅስ።
JDG 3:12 እስራኤለ አሳይ ዛሪድ ጎዳ ስንꬃን ኢታባ ኦꬅዶሶና። ሄሳ ግሾ፥ ጎዳይ ሞአበ ካዎይ ኤግሎን እስራኤለ ቦላ ዎልቃታናዳ ኦꬅስ።
JDG 3:13 ኤግሎን አሞነታነ አማለቃታ ሺሽድ እስራኤለ አሳ ኦል ፆንድ፥ ዛምባ ካታማ እያርኮ ኦይክስ።
JDG 3:14 ያትን፥ እስራኤለ አሳይ ሞአበ ካዋ ኤግሎናስ ታማነ ሆስፑን ላይꬅ ሃረትዶሶና።
JDG 3:15 ሽን እስራኤለ አሳይ ጎዳኮ ዋስዳ ዎደ ኤንታ አሽያ፥ ብንያመ ኮቸ ግድዳ ጌራ ናኣ ናኦዳ፥ ሀድርሳ ኩሸን ኦይሳ ደንꬅስ። እስራኤለ አሳይ ናኦዳ ሞአበ ካዋ ኤግሎናኮ ጊራራ ኪትስ።
JDG 3:16 ናኦድ ናምኡ ባጋራ ቃራትዳ እስ ዋꬋ ማሸ ጊግስድ ኡሻቻ ባጋን ባ ማኡዋ ጋርሳን ዳንጭስ።
JDG 3:17 ሄሳፈ ጉየ፥ ዳሮ ኦርደ ግድዳ ሞአበ ካዋ ኤግሎናስ ጊራ ኤፍድ እሚስ።
JDG 3:18 ናኦድ ጊራ ካዋስ እምዳፐ ጉየ፥ ጊራ ቶክድ ብዳ አሳ ሞይዝስ።
JDG 3:19 ሽን ናኦድ ጋልጋላ ማታን ደእያ ማሰትዳ ሹቻታ ማታፐ ኤግሎናኮ ጉየ ስም ብድ፥ “ካዋዉ፥ ታ ነዉ ኦድያ እስ ፁር ደኤስ” ያግስ። ካዎይ፥ “ስእ ጋ” ያግስ። እያ ናገይሳት ኡባይ ካረ ከይዶሶና።
JDG 3:20 ሄ ዎደ ካዎይ ፖቅያ ቦላ እስ ክፍልያን ባርካ ኡትዳሽን፥ ናኦድ እያኮ ሺቅድ፥ “ፆሳይ ነዉ ኪትዳባይ ደኤስ” ያግን፥ ካዎይ ባ ኡትዳ በሳፈ ደንድ ኤቅስ።
JDG 3:21 ናኦድ ባ ሀድርሳ ኩሽያ የድድ፥ ኡሻቻ ባጋ ፄሳን ደእያ ማሻ ሾድድ፥ ካዋ ኡሉዋን ድርግም ኦꬅስ።
JDG 3:22 ማሻ ቱይተይ አቶና ኡሎ ግዶ ገልድ፥ ዞኩዋራ ካንꬅ ከይስ። ሞꬎይ ካምዳ ግሾ ናኦድ ማሻ ካዋ ኡሉዋፐ ሾድቦና።
JDG 3:23 ሄሳፈ ጉየ፥ ናኦድ ካረ ከይድ፥ ክፍልያ ፐንግያ ጎርድድ እያ ቦላ ቁልፕስ።
JDG 3:24 ናኦድ ብዳፐ ጉየ አይለት ይድ፥ ፐንገይ ጎርደትዳይሳ በእድ፥ “ካዎይ ግዶ ክፍልያን ሼሻስ ኡቶና አገና” ያግድ ቆፕዶሶና።
JDG 3:25 ኤንቲ ሳለታና ጋካናዉ ናግዶሶና። ሽን ካዎይ ፐንግያ ዶዮና እፅን፥ ቁልፐ ኤክድ ፐንግያ ዶይድ፥ ባንታ ጎዳይ ሀይቅድ፥ ዉይገን ኩንድዳይሳ በእዶሶና።
JDG 3:26 ኤንቲ ያን ኤቅድ ናግሽን፥ ናኦድ ከስ ኤክድ ኤቃ ሹቻታ ማታራ አꬍድ ሳኢራ ባቃትስ።
JDG 3:27 እ ብድ ደረይ ዳርያ ኤፍሬማ ቢታ ጋክዳ ዎደ እስራኤለ አሳይ ኦላስ ሺቃና መላ ሞይዘ ፑንን፥ አሳይ እያ ካልድ ዱገ ዎꬍዶሶና።
JDG 3:28 እ ኤንታኮ፥ “ታና ካልተ፤ ጎዳይ ህንተ ሞርከታ፥ ሞአበታ ህንተ ኩሸን አꬅድ እሚስ” ያግስ። ኤንቲ እያ ካል ዎꬍድ፥ ዮርዳኖሰ ሻፋ ፕንያ በሳ ኦይክዶሶና። ሞአበ አሳፐ እስ አስካ ያራ አꬎና መላ ተቅዶሶና።
JDG 3:29 ሄ ዎደ ሞአበ አሳፐ ታሙ ሙኩሉ ግድያ ዶረትዳ ምኖ ኦላንቾታ ዎꬍዶሶና፤ እስ አስካ ከስ ኤክቤና።
JDG 3:30 ሄ ጋላስ እስራኤለ አሳይ ሞአበ አሳ ፆንዶሶና። ቢታይ ሆስፑን ታሙ ላይꬅ ዎፑ ግድ ደእስ።
JDG 3:31 ናኦዳፐ ጉየ፥ አናታ ናአይ ሳምጋር ደንድድ፥ ፍልስፄመ አሳፐ ኡሱፑን ፄቱ አሳ ቦሩ ላግያ ብራታ ፃምአን ዎꬍድ እስራኤለ አሳ አሽስ።
JDG 4:1 ናኦድ ሀይቅዳፐ ጉየ እስራኤለ አሳይ ጎዳ ስንꬃን ዛሪድ ኢታባ ኦꬅዶሶና።
JDG 4:2 ሄሳ ግሾ፥ ጎዳይ ሀፆራ ካታማን ደእያ ካናነ ካዋ እያብሳስ ኤንታ አꬅድ እሚስ። እያ ቶራ ሞጮናይ ሀሮሴት ሀጎይማ ካታማን ደእያ ስሳራ።
JDG 4:3 እያብሳስ ኡዱፉን ፄቱ ብራታ ፓራ ጋረት ደእያ ግሾነ እ እስራኤለ አሳ ቃይ ባይና ላታሙ ላይꬅ ኡንኤꬅዳ ግሾ ኤንቲ ማዶ ደማናዉ ጎዳኮ ዋስዶሶና።
JDG 4:4 ሄ ዎደ ላፍዶታ ማችያ፥ ናብያ ድቦራ እስራኤለ አሳ ካለꬃዉስ።
JDG 4:5 ድቦራ ደረይ ዳርያ ኤፍሬማ ቢታን፥ ራማፐነ ቤተለፐ ግዶን ደእያ ድቦራ ዛምባ ጋርሳን ኡታዳ ፕርዳዉሱ። እስራኤለ አሳይ ፕርዳ ደማናዉ ኢኮ ዮሶና።
JDG 4:6 እስ ጋላስ ድቦራ አብኖማ ናኣ ባራቃ ንፍታለመ ቢታን ደእያ ቃደሳፐ ፄግሳዳ፥ “ጎዳይ እስራኤለ ፆሳይ ነና ሀይሳዳ ያግድ ኪትስ፤ ‘ንፍታለመነ ዛብሎና ዛርያፐ ታሙ ሙኩሉ አሳ ኤካዳ ታቦረ ዙማ ቦላ ከያ።
JDG 4:7 ታኒ ያብና ቶራ ሞጮናታ ስሳር ፓራ ጋረታነ ኦላንቾታ ኤክድ፥ ቅሶና ሻፋን ነና ኦላናዉ ያና መላ ኦꬃና። ያን ታኒ ነዉ እያ አꬃዳ እማና’ ያጌስ” ያጋሱ።
JDG 4:8 ባራቅ፥ “ኔኒ ታራ ቢኮ ታኒ ባና፤ ሽን ኔኒ ታራ ቦና እፅኮ ታኒ ቢከ” ያግስ።
JDG 4:9 እያ ዛራዳ፥ “ኤሮ፥ ታኒ ኔራ ባና፤ ሽን ጎዳይ ስሳራ ማጫሳ ኩሸን አꬅድ እማና ግሾ ታ ቡሳይ ነዉ ቦንቾ ግደና” ያጋሱ። ሄሳ ግሾ ድቦራ ደንዳዳ፥ ባራቃራ ቃደሳ ባሱ።
JDG 4:10 ባራቅ ንፍታለመነ ዛብሎና ኮቻታ ቃደሳ ፄግን፥ ታሙ ሙኩሉ አስ እያ ካልድ ከይስ፤ ድቦራካ እያራ ባሱ።
JDG 4:11 ሄ ዎደ ቄና አስ ግድዳ ሄቤር፥ ሙሰ ቦሎይ፥ ሆባባ ያራይ ሀራ ቄናታፐ ሻከትድ ቃደሳ ማታን ዘናንመን ደእያ ዎላ ማታን ባ ዱንካንያ ቶክስ።
JDG 4:12 አብኖማ ናአይ ባራቅ ታቦረ ዙማ ብዳይሳ ስሳር ስእዳ ዎደ፥
JDG 4:13 ኡዱፉን ፄቱ ብራታ ፓራ ጋረታነ ባራ ደእያ አሳ ኡባ ፄግስድ፥ ሀሮሴት-ሀጎይማፐ ቅሶና ሻፋ ሺሽስ።
JDG 4:14 ያትን ድቦር ባራቃኮ፥ “ሀች ጎዳይ ስሳራ ነ ኩሸን አꬅድ እምያ ጋላስ ግድያ ግሾ ደንዳ። ሄኮ፥ ጎዳይ ነዉ ስን አꬍስ” ያጋሱ። ባራቅ ታሙ ሙኩሉ ኦላንቾታ ካለꬅድ፥ ታቦረ ዙማፐ ዎꬍስ።
JDG 4:15 ጎዳይ ስሳራ፥ እያ ፓራ ጋረታነ እያ ኦላንቾታ ኡባ ባራቃ ማሻስ አꬅድ እሚስ። ያትን፥ ስሳር ባ ፓራ ጋርያፐ ዎꬍድ ቶሆን ባቃትስ።
JDG 4:16 ባራቅ ፓራ ጋረታነ ኦላንቾታ ሀሮሴት-ሀጎይማ ጋካናዉ የደꬅስ። ስሳራ ኦላንቾት ኡባይ ማሻን ሀይቅዶሶና፤ እስ አስካ አትቤና።
JDG 4:17 ሄ ዎደ ሀፆራ ካዎይ ያብን ሄቤራ ኬꬃ አሳራ ሳሮ ደኤስ። ሄሳ ግሾ፥ ስሳር ቶሆን ባቃትድ፥ ቄና አስ ግድዳ ሄቤራ ማቸ ያኤል ዱንካንያ ጋክስ።
JDG 4:18 ያኤላ ስሳራ ሞካናዉ ከያዳ፥ “ታ ጎዳዉ፥ ገላ፤ ሃ ገላ፤ ያዮፋ” ያጋሱ። እ ዱንካንያ ግዶ ኢኮ ገልን እያ አፍላራ ካማስ።
JDG 4:19 ስሳር፥ “ታና ሳሜስ፤ ሃ ታና ኡሻርክ” ያግስ። እያ ማꬃ ኦጎሮ ዶያዳ ኡሻሱ፤ ያታዳ ዛራዳ ካማሱ።
JDG 4:20 ሄሳፈ ጉየ፥ እ፥ “ዱንካንያ ፐንገን ኤቃ። አይ አስካ ይድ፥ ‘ሀይሳን አስ ደኢ?’ ያግድ ኦይችኮ፥ ‘ባዋ’ ያጋ” ያግስ።
JDG 4:21 ስሳር ዳሮ ዳቡርዳ ግሾ ꬍስኮ ሀይቅ አግስ። ሄቤራ ማችያ ያኤላ ናርቃነ ዱንካነ ꬍሸ ኤካዳ፥ ሎዳራ እያኮ ሺቃዳ ꬍሽያ ሀይꬃ ካረን ꬍሻዳ፥ ሳአራ ኦይꬅን ስሳር ሀይቅስ።
JDG 4:22 ባራቅ ስሳራ ኮይሸ ይን፥ ያኤላ እያ ሞካናዉ ካረ ከያዳ፥ “ሃያ፤ ነ ኮይያ አድያ ታኒ ነና በሳና” ያጋሱ። ሄሳ ግሾ፥ ኢራ ዱንካንያ ግዶ ገልድ፥ ስሳራ ሀይꬃ ካረን ꬍሸይ ገልን እያ አሀይ ሳአን ዝንእዳይሳ በእስ።
JDG 4:23 ሄ ጋላስ ፆሳይ እስራኤለ አሳይ ካናነ ካዋ ያብና ፆናና መላ ኦꬅስ።
JDG 4:24 ያብና ካዋ ꬋይሳና ጋካናዉ እስራኤለ አሳይ እያ ቦላ ምን ምን ብስ።
JDG 5:1 ሄ ጋላስ ድቦራነ አብኖማ ናአይ ባራቅ ሀ ማዝሙርያ የፅዶሶና።
JDG 5:2 ሀላቃት እስራኤለ አሳ ካለꬅዳ ግሾ፥ አሳይካ ባና አꬅድ እምዳ ግሾ፥ ጎዳ ጋላትተ።
JDG 5:3 ህንተኖ ካዎቶ፥ ስእተ፤ ህንተኖ ሃረይሳቶ፥ ሀይዝተ፤ ታኒ ጎዳስ የፃና። እስራኤለ ፆሳ ጋላታና።
JDG 5:4 አቤት ጎዳዉ፥ ኔኒ ሳይረ ዙማፐ ደንድያ ዎደ፥ ኤዶመ ቢታፈ ነ ከይያ ዎደ፥ ቢት ቃፅስ፤ ሳሎፐ እር ቡክስ፤ ሃꬅ ሻራፐ ጎግስ።
JDG 5:5 ሲና ጎዳ፥ እስራኤለ ፆሳ ስንꬃን፥ ደረት ቃፅዶሶና፤
JDG 5:6 አናታ ናኣ ሳምጋራ ዎደነ ያኤላ ዎደ ኦገይ ዶገትስ፤ ዛልአንቾት ዩሾ ኦገራ ቦሶና።
JDG 5:7 ድቦር እስራኤለ አሳስ፥ አዮ ግዳዳ ደንዳና ጋካናዉ፥ እስራኤለ ጉታት ባይሳትዶሶና፤
JDG 5:8 እስራኤለ አሳይ አላጋ ፆሳታ ዶርዳ ዎደ፥ ቢታ ቦላ ኦል ደንድስ። ኦይታሙ ሙኩሉ እስራኤለ ኦላንቾታ ግዶን፥ እስ ጎንዳለይ ዎይኮ እስ ቶር በንትቤና።
JDG 5:9 ታ ዎዛናይ እስራኤለ ቶራ ሞጮናታራ፥ አሳ ግዶፈ ዶሳን ባንታና አꬅድ፥ እምዳይሳታራ ደኤስ። ጎዳ ጋላትተ፤
JDG 5:10 ህንተኖ፥ ቦꬃ ሀረታ ቶገይሳቶ፥ ሎኦ ግላስያ ቦላ ኡትድ ድንጫከተይሳቶ፥ ኦገ ጋፃራ ሄመተይሳቶ ሀይሳ ስእተ።
JDG 5:11 ሃꬃ ኦላታ ማታን፥ ሺቅዳ አሳ የꬃ ስእተ። ኤንቲ ጎዳ ፆኑዋ የፆሶና፤ እስራኤለ አሳ ፆኑዋ ኦዶሶና። ሄሳፈ ጉየ፥ ጎዳ አሳይ ካታማ ፐንገታኮ ዎꬍዶሶና።
JDG 5:12 ድቦራ፥ ደንዳ! ደንዳ! ደንዳ! ደንዳዳ ማዝሙረ የፃ። አብኖማ ናአዉ፥ ባራቃ፥ ደንዳ! ነ ድእዳባ ኤካዳ ያ።
JDG 5:13 ሄሳፈ ጉየ፥ አትዳ አሳት፥ ሀላቃታኮ ዎꬍዶሶና። ጎዳ አሳት ኦለታናዉ ጊግድ ባራቃኮ ይዶሶና።
JDG 5:14 አማለቃ ኮቻት በን ደእዳ በሳን ደእያ ኤፍሬማ አሳት ይዶሶና። ብንያመ አሳት ኤንታ ካልዶሶና። ማክራፐ ሀላቃት፥ ዛብሎናፐ ካዎተꬃ ፃምአ ኦይከይሳት ይዶሶና።
JDG 5:15 ይሳኮራ ሀላቃት ድቦራራ ደኦሶና፤ ኤ፥ ይሳኮረ አሳይ ባራቃራ ይዶሶና፤ ኤንቲ እያ ካልድ፥ ዛንጋራ ገልዶሶና። ሽን ሮቤላ ኮቻት ቆፋን ሻከትድ፥ ባንታ ዎዛናን ሄትዶሶና።
JDG 5:16 ኤንቲ አይስ አትዶና? ዶርሳታ ሄማናሰዬ? ሮቤላ ኮቻት ቆፋን ሻከትድ፥ ባንታ ዎዛናን ሄትዶሶና።
JDG 5:17 ጋደ ኮቻት ዮርዳኖሰ ፕንꬃን አትስ፥ ዳና ኮቻት ማርካበታን አትዶሶና። አሴራ ኮቻት ባንታ ደእያሶን፥ አባ ጋፃን አትዶሶና።
JDG 5:18 ዛብሎና ኮቻት፥ ባንታና ሀይቆስ አꬅድ እምዶሶና። ንፍታለመ ኮቻት፥ ቶራ ደንባን ባንታና አꬅድ እምዶሶና።
JDG 5:19 ማግዶ ፑልቶታ ማታን ታናካን፥ ካዎት ኦለትዶሶና። ካናነ ካዎት ያን ኦለትድ፥ ብራ ዎይኮ ሀራባ ድእቦኮና።
JDG 5:20 ሳሎፐ ፆልንቶት ኦለትዶሶና፤ ባንታ ዩሻን ስሳራ ኦልዶሶና።
JDG 5:21 ቅሶና ሻፋይ ኤንታ ኤፍስ፤ በንፐ ደእያ ቅሶን ኤንታ ሾክስ። ታ ሸምፐ፥ ምና፤ ስን ሆርዶፋ።
JDG 5:22 ፓራት አዳርስሸ ይዶሶና፥ ባንታ ቶሁዋን ቢታ ጊርሶሶና።
JDG 5:23 ጎዳ ኪታንቾይ ሀይሳዳ ያግስ፤ “መሮዛ ባድተ! ያን ደእያ አሳ ኢስድ ባድተ! ኤንቲ ጎዳ ማዳናዉ ይቦኮና፤ እያ ዎልቃማ ሞርከታ ኦላናዉ ከይቦኮና።”
JDG 5:24 ቄና አስ ግድዳ ሄቤራ ማችያ፥ ያኤል ማጫሳ ኡባፈ አንጀትዳሮ ግዶ። ዱንካነን ደእያ ማጫሳ ኡባፈ፥ እያ አንጀትዳሮ ግዶ።
JDG 5:25 ስሳር እዮ ሃ ኦይችን ማꬅ እማሱ፤ ሎኦ ኦጎሮን መቅዳ ማꬅ ኤሀሱ።
JDG 5:26 ባ ሀድርሳ ኩሸን ዱንካነ ꬍሸ፥ ባ ኡሻቻ ኩሸን ኦሳንቾታ ናርቃ ኦይካሱ። ስሳራ ሁጰን ꬍሻሱ፤ እያ ሀይꬃ ካረራ ካንꬃ ከሳሱ።
JDG 5:27 እ ቶሁዋ ጋርሳን ኩንድስ፤ እ ቶሁዋ ማታን ዞሄትስ። እ ቶሁዋ ጋርሳን ኩንድስ፤ ሄ ኩንድዳ በሳን ሀይቅስ።
JDG 5:28 ስሳራ አይያ ማስኮተራ ካረ ፄላሱ፤ “ታ ናኣ ፓራ ጋረይ አይስ ጋምእዴ? ፓራት አይስ ኤለስድ ስምቦኮና?” ያጋዳ ባና ኦይቻሱ።
JDG 5:29 እ ጭንጫ ማጫሳት እ ኦይሻ ዛርዶሶና፤ ሽን እያ ባ ቆፋን ዛራ ዛራዳ ያጋሱ።
JDG 5:30 “ኤንቲ ድኦ ደምድ ሻከቶና አጎኮና፤ እስ እስ አደስ ኢስ ገላኦይ ዎይኮ ናምኡ ጌላኦት ጋኮና አገና። ኤንቲ ስሳራስ ሎእያ ማኦ እማና፤ ታዉካ ቆን ማእያ፥ አሌቀትዳ ማኦ ኤሀና” ያጋሱ።
JDG 5:31 አቤት ጎዳዉ፥ ነ ሞርከት ኡባይ ሀይሳዳ ሀይቆ፤ ሽን ነና ዶሰይሳት ዎንታ ፃልቀዳ ጶሎ። ሄሳፈ ጉየ፥ ቢታይ ኦይታሙ ላይꬅ ዎፑ ግድ ደእስ።
JDG 6:1 እስራኤለ አሳይ ጎዳ ስንꬃን ዛሪድ ኢታባ ኦꬅዶሶና። ሄሳ ግሾ፥ ጎዳይ ኤንታ ምድያመ አሳስ አꬅድ እምን ላፑን ላይꬅ ኤንታ ሃርዶሶና።
JDG 6:2 ምድያመ አሳይ እስራኤለ አሳ ኡንኤꬅን፥ ኤንታፈ አታናዉ ደረ ቦላ፥ ጎንጎሎንነ ሆምኦን ባንታ ካꬃ ቆስዶሶና።
JDG 6:3 እስራኤለ አሳይ ካꬅ ዘርያ ዎደ ኡባን፥ ምድያመ አሳይ አማለቃ አሳራነ ዶሎሀ ባጋ አሳራ ይድ ኤንታ ኦሎሶና።
JDG 6:4 ኤንቲ ሄ ቢታን ዱንካንድ፥ ጋዛ ጋካናዉ፥ ቢታ ቦላ ዶልዳባ ኡባ ꬋይሶሶና። ዶርሰ፥ መሄነ ሀረ ላግድ ኤፍያ ግሾ፥ እስራኤለ አሳስ አይባካ አሾኮና።
JDG 6:5 ባንታ መህያነ ባንታ ዱንካንያ ኤክድ፥ ቦለይ ያዳ ዳርድ ዮሶና። ኤንታነ ኤንታ ግማለታ ታይባናዉ ዳንዳኤተና፤ ኤንቲ ይሸ ቢታ ꬋይሶሶና።
JDG 6:6 እስራኤለ አሳይ ምድያመታ ጋሶን ዳሮ መቶትዶሶና፤ ማደ ደማናዉ ጎዳኮ ዋስዶሶና።
JDG 6:7 ምድያመታ ጋሶን እስራኤለ አሳይ ጎዳኮ ዋስዳ ዎደ፥
JDG 6:8 ጎዳይ ኤንታዉ እስ ናበ ኪትን፥ ናበይ ኤንታኮ፥ “ጎዳይ እስራኤለ ፆሳይ ሀይሳዳ ያጌስ፤ ግብፀፈ፥ አይለተꬃ ቢታፈ ታ ህንተና ከሳስ።
JDG 6:9 ታኒ ህንተና ግብፀ አሳ ኩሸፐነ ኡንኤꬅያ አሳ ኡባ ኩሸፐ አሻስ። ህንተ ስንꬃፈ ኡንኤꬅያ አሳ ጎዳዳ ኤንታ ቢታ ህንተዉ እማስ።
JDG 6:10 ታኒ ህንተና፥ ‘ታኒ ጎዳ ህንተ ፆሳ፤ ህንተ ኤንታ ቢታ ላትዳ አሞረታ ፆሳታ ጎይኖፍተ’ ያጋስ። ሽን ህንተ ታ ቃላ ስኦና እፅደታ” ያግስ።
JDG 6:11 ሄሳፈ ጉየ፥ ጎዳ ኪታንቾይ ኦፍራ ጌተትያ በሳን ደእያ አበዜራ አድያ እዮኣሳ ዎላ ጋርሳን ኡትስ። ሄ ዎደ እዮኣሳ ናአይ ገድዮን ምድያመ አሳፐ ቆሰተድ ዎይነ ጉምእያ በሳን ግስተ ቡኬስ።
JDG 6:12 ያን ጎዳ ኪታንቾይ እያዉ ቆንጭድ፥ “ላ ነኖ፥ ምኖ ኦላንቻዉ፥ ጎዳይ ኔራ ደኤስ” ያግስ።
JDG 6:13 ገድዮን፥ “ታ ጎዳዉ፥ ጎዳይ ኑራ ደእያባ ግድኮ ሀ መቶ ኡባይ ኑና አይስ ጋክዴ? ኑ አዋት፥ ‘ጎዳይ ኑና ግብፀ ቢታፈ ከስስ’ ያግድ ኑስ ኦድዳ ማላልስያ እያ ኦሶት ኡባይ አዉን ደኢ? ሽን ሀእ ጎዳይ ኑና ኩመꬅ አግስ፤ ምድያመ አሳስ አꬅድ እሚስ” ያግስ።
JDG 6:14 ሄሳፈ ጉየ ጎዳይ እያኮ ስሚድ፥ “ነዉ ደእያ ሀ ዎልቃን ባዳ እስራኤለ አሳ ምድያመ ኩሸፐ አሻ። ነና ኪተይ ታና” ያግስ።
JDG 6:15 ገድዮን ዛሪድ፥ “አቤት ጎዳዉ፥ ታኒ እስራኤለ አሳ ዋታዳ አሾ? ታ ያራይ ምናሰ ኮቻ ኡባፈ አꬍዳ ላፋ፤ ታኒ ታ አዋ ሶ አሳ ኡባፈ ጉꬃ” ያግስ።
JDG 6:16 ጎዳይ፥ “ታኒ ኔራ ግዳና፤ እስ አስ ሾጭያ መላ ኔኒ ምድያመ አሳ ሾጫዳ ፆናና” ያግስ።
JDG 6:17 ገድዮን፥ “ኔኒ ታናን ኡፋይትያባ ግድኮ፥ ቱማ ታራ ኦደተይ ኔኒ ጎዳ ግድኮ፥ ነና ኤርስያ ማላ ታና በሳ።
JDG 6:18 ታኒ ጉየ ስማ ባዳ ታ ያርሹዋ ኤሀና ጋካናዉ ሀያና ሀይሳፈ ቦፓ” ያግስ። ጎዳይ፥ “ኔኒ ስማና ጋካናዉ ታኒ ሀይሳን ናጋና” ያግስ።
JDG 6:19 ገድዮን ሶ ገልድ፥ ኡርገ ዴሽ ሹክድ ካꬅስ፤ ታሙ ክሎ ግራመ ግድያ ꬊለ ኤክድ ኡይꬅ ኡክስ። አሹዋ ጋይታን ዎꬅድ፥ ጫምባ ሻተን ትግድ፥ ዎላ ጋርሳን ኡትዳ ጎዳ ኪታንቹዋስ ሺሽስ።
JDG 6:20 ፆሳ ኪታንቾይ፥ “አሹዋነ ኡይꬃ ሀ ሹቻ ቦላ ዎꬃ፤ ጫምባ እያ ቦላ ትጋ” ያግስ። ገድዮን ኪተትዳይሳዳ ኦꬅስ።
JDG 6:21 ጎዳ ኪታንቾይ ባ ኩሸን ኦይክዳ ፃምኣ ፄራን አሹዋነ ኡይꬃ ቦችን ታም ሹቻ ግዶፈ ከይድ፥ አሹዋነ ኡይꬃ ምስ። ሄሳፈ ጉየ፥ ጎዳ ኪታንቾይ እያ ስንꬃፈ ጌምስ።
JDG 6:22 ገድዮን በእዳይ ጎዳ ኪታንቹዋ ግደይሳ አኬክዳ ዎደ፥ “ጎዳ ፆሳዉ ታና አየ! ታኒ ጎዳ ኪታንቹዋ ታ አይፈን በአስ” ያግስ።
JDG 6:23 ሽን ጎዳይ፥ “ሳሮይ ነዉ ግዶ፤ ያዮፋ! ነ ሀይቃካ” ያግስ።
JDG 6:24 ገድዮን ጎዳስ ያርሾ በሲ ያን ጊግስድ፥ “ጎዳይ ሳሮ ፆሲ” ያግድ ፄግስ። ሄ ያርሾ በሳይ አብኤዜራ ኮቻባ ግድዳ ኦፍራን ሀች ጋካናዉ ኤቅድ ደኤስ።
JDG 6:25 ሄ ቃማ ጎዳይ ገድዮናኮ፥ “ነ አዋ ኮርማታፐ ላፑን ላይꬅ ግድዳ ሎኦ ኮርማ ኤካ። ነ አዋይ ባኣለ ኤቃስ ያርሽያ በሳ ላላ፤ እያ ማታን ደእያ አሼራ ኤቃ ምስልያ መንረꬃ የጋ።
JDG 6:26 ሀ ዙማ ሁጰን ጎዳስ ነ ፆሳስ፥ ሹቻን ያርሾ በሲ ሎይꬃዳ ጊግሳ። ሄሳፈ ጉየ፥ ኔኒ መንረꬅዳ አሼራ ኤቃ ምስልያ ቀረꬃ ኤꬃዳ፥ ሄ ኮርማ ፁሳ ያርሾ ኦꬃዳ ያርሻ” ያግስ።
JDG 6:27 ገድዮን ባ ኦሳንቾታፐ ታማታ ኤክድ፥ ጎዳይ እያዉ ኦድዳይሳዳ ኦꬅስ። ሽን እ ባ አዋ ሶ አሳስነ ካታማን ደእያ አሳስ ያይዳ ግሾ ጋላስ ኦꬃናይሳ አግድ ቃማ ኦꬅስ።
JDG 6:28 ዎንታ ጉራ ካታማ አሳይ ደንድያ ዎደ ባኣለ ኤቃ ያርሾ በሳይ ላለትን፥ እያ ማታን ደእያ አሼራ ምስለይ መቅድ ዎꬍዳይሳ በእዶሶና። ቃስ ሄ በሳን ያርሾ በሲ ጊግዳይሳነ እያ ቦላ ኮርማ ያርሽዳይሳ በእዶሶና።
JDG 6:29 ኤንቲ እሶይ እሱዋ፥ “ላ ሀይሳ ኦꬅዳይ ኦኔ?” ያግድ ኦይችዶሶና። ኤንቲ ሄሳ ፕልግድ በእዳ ዎደ ሄሳ ኦꬅዳይ እዮኣሳ ናኣ ገድዮና ግደይሳ ኤርዶሶና።
JDG 6:30 ሄሳፈ ጉየ፥ ካታማ አሳይ እዮኣሳኮ፥ “ባኣለ ያርሾ በሳ ላልዳ ግሾነ እያ ማታን ደእያ አሼራ ምስልያ መንረꬅድ የግዳ ግሾ ነ ናኣ ሃ ከሳ፤ ኑ እያ ዎꬋና” ያግዶሶና።
JDG 6:31 ሽን እዮኣስ ባ ቦላ ደንድዳ አሳኮ፥ “ህንተ ባኣለስ ሞተተቲ? ዎይኮ ህንተ እያ አሻናዉ ኮዬቲ? ህንተ ግዶፈ እያዉ ሞተትያ አስ ደእኮ፥ ሳእ ዎንታናዉ እ ሀይቆ። ባኣለይ ፆሰ ግድኮ ባ ያርሾ በሳ ላልዳይሳራ እ ባዉ ሞተቶ” ያግስ።
JDG 6:32 ሄ ጋላስ እዮኣስ፥ “ላለትዳይ እያ ያርሾ በሳ ግድያ ግሾ እያራ ባኣለይ ሞተቶ” ያግድ ገድዮና የሩባኣላ ግድ ሱንꬅስ።
JDG 6:33 ሄሳፈ ጉየ፥ ምድያመ፥ አማለቃነ ዶሎሀ ባጋ ቢታ አሳይ እስፈ ሺቅድ፥ ዮርዳኖሰ ሻፋ ፕንድ እዝራኤላ ዛንጋራን ዱንካንዶሶና።
JDG 6:34 ጎዳ አያናይ ገድዮና ቦላ ዎꬍን አብኤዘራ ኮች ግድዳ አሳ ኡባይ ባና ካላና መላ ኤንታ ፄጋናዉ ሞይዘ ፑንስ።
JDG 6:35 ምናሰ ኮቻ ኡባስ ኪታ የድድ፥ ባና ካላና መላ ኤንታ ፄግስስ። ቃስ አሴራ፥ ዛብሎናነ ንፍታለመ ኮቻታስ ኪታ የድን፥ ኤንቲ እያራ ኦላስ ባናዉ ከይዶሶና።
JDG 6:36 ገድዮን ፆሳኮ፥ “ነ ታዉ ቃላ ገልዳይሳዳ እስራኤለ አሳ አሻናዉ ታና ዶርዳባ ግድኮ፥
JDG 6:37 ሄኮ፥ ታኒ ግስተ ቡክያ ዉዱማን ፓደትዳ ዶርሰ እክሰ ዎꬃና። ሀራ ቢታ ኡባይ መላ ግድድ ሄ እክስያ ቦላ ፃላላ አክ ዎꬍኮ ነ ኦድዳይሳዳ እስራኤለ አሳ ታ ኩሸን አሻናይሳ ታ ኤራና” ያግስ።
JDG 6:38 እ ግዳይሳዳ ሀንስ። ዎንተꬃ ጋላስ ዎንታ ጉራ ደንድድ፥ ዶርሳ እክስያ ጉምእዳ ዎደ እስ ፃሮ ግድያ ሃꬅ እያፐ ከይስ።
JDG 6:39 ቃስ ገድዮን፥ “ሀያና ሀንቀቶፋ፤ ታኒ ነና ጉጃዳካ ሀራ ኦይሾ ኦይቻና። ዶርሳ እክስያ ቦላ ሀራ ማላ በሳና መላ ኦይቻይስ። ሀእ ዶርሳ እክሰይ መላ ግድን ዩሹዋን ደእያ ቢታይ አካትድ ላካናዳ ኦꬃ” ያግስ።
JDG 6:40 ሄ ቃማ ፆሳይ ሄ ማላ ኦꬅስ። ዎንተꬃ ጋላስ ዶርሳ እክሰይ መላ ግድን ቢታ ኡባይ አካትድ ላክስ።
JDG 7:1 ዎንተꬃ ጋላስ የሩባኣላ ጌተትያ ገድዮንነ እያራ ደእያ አሳ ኡባይ ዎንታ ጉራ ደንድድ ብድ፥ ሀሮዳ ፑልቱዋ ማታን ዱንካንዶሶና። ምድያመ አሳይ ኤንታፈ ፑደሀ ባጋራ ሞረ ዙማ ማታን ደእያ ዛንጋራን ዱንካንዶሶና።
JDG 7:2 ጎዳይ ገድዮናኮ፥ “ኔራ ደእያ አሳይ ዳሮ ግድያ ግሾነ እስራኤለ አሳይ፥ ‘ኑኒ ኑ ዎልቃን ፆንዳ’ ግድ ታ ቦላ ጬቀቶና መላ ታኒ ምድያመታ ህንተ ኩሸን አꬃዳ እምከ።
JDG 7:3 ሄሳ ግሾ፥ አሳኮ፥ ‘ያይያ አስ ደእኮ ጋላዳ ዙማፐ ስሚድ ጉየ ባ ሶ ሶ ቦ’ ያጋዳ አዋጃ” ያግስ። ያትን፥ ላታማነ ናምኡ ሙኩሉ አሳይ ጉየ ስምን ታሙ ሙኩሉ አስ አትስ።
JDG 7:4 ግዶሽን፥ ጎዳይ ገድዮናኮ፥ “ሀእካ አሳይ ዳሮ። ነ ኤንታ ኤካዳ ዱገ ሻፋ ዎꬋ፤ ታኒ ኤንታ ያን ፓጫና። ታኒ፥ ‘ሀይስ ኔራ ቦ’ ገይስ ኔራ ቦ፤ ታኒ፥ ‘ሀይስ ኔራ ቦፖ’ ገይስ ቦፖ” ያግስ።
JDG 7:5 ገድዮን አሳ ሻፉ ኤክድ ብስ። ጎዳይ እያኮ፥ “ሀ አሳ ግዶፈ ጉልባትድ ሃ ኡየይሳታነ ካናዳ ሃ እንፃርሳን ኡየይሳታ ሻካ” ያግስ።
JDG 7:6 ባንታ ኩሸን ሃ ኡየይሳታ ታይቦይ ሄꬑ ፄታ፤ ሽን አትዳይሳት ኡባይ ሃ ጉልባትድ ኡይዶሶና።
JDG 7:7 ጎዳይ ገድዮናኮ፥ “ባንታ ኩሸን ሃ ኮጰትድ ኡይዳ ሄꬑ ፄቱ አሳታን ታኒ ህንተና አሻና፤ ምድያመታ ህንተዉ አꬃዳ እማና። ሽን አትዳ አሳ ኡባይ ባ ሶ ሶ ስሞ” ያግስ።
JDG 7:8 ሄሳ ግሾ፥ ገድዮን አሳታ ሽንቅያነ ኤንታ ሞይዝያ ኤክዳ ሄꬑ ፄቱ አሳታ ባራ አሽድ፥ ሀንኮ አሳ ኡባ ኤንታ ሶ ሶ የድስ። ሀ ኡባይ ሀንያ ዎደ ምድያመ ኦላንቾት ኤንታፈ ጋርሳ ባጋራ ደእያ ዛንጋራን ዱንካንድ ኡትዶሶና።
JDG 7:9 ሄ ቃማ ጎዳይ ገድዮናኮ፥ “ታኒ ነዉ አꬃዳ እምዳ ግሾ ደንዳዳ ኤንቲ ዱንካንዳ በሳን ደእሽን ኦላ።
JDG 7:10 ኔኒ ኤንታ ኦላናዉ ያይኮ ነ ኦሳንቹዋ ፑራ ኤካዳ ኤንቲ ዱንካንዳ በሳ ዱገ ዎꬋ።
JDG 7:11 ኤንቲ ግያባ ስአ። ሄሳፈ ጉየ፥ ኔኒ ኤንታ ኦላናዉ ምኖተꬅ ደማና” ያግስ። ገድዮንነ እያ አይለይ ፑር፥ ምድያመት ዱንካንዳ በሳ ማታን ናግያ ኦላንቾታኮ ብዶሶና።
JDG 7:12 ሄ ዎደ ቦለዳ ዳርዳ ምድያመት፥ አማለቃትነ ዶሎሀ ባጋ አሳ ኡባይ ዛንጋራን ዱንካንድ ኡትዶሶና። ኤንታ ግማለት አባ ጋፃን ደእያ ሻፈ መላ ታይባናዉ ዳንዳኤተና።
JDG 7:13 ገድዮን ያ ጋክያ ዎደ እስ አደይ ባ አሙሁዋ ባ ላግያስ ኦድሽን ስእስ። ሄስካ፥ “እስ ባንጋ ኡይꬅ ኦኮለት ጋክድ ምድያመታ ዱንካንያ ዶምእስ፤ ዱንካነይ ሽረት ዎꬍድ ምጨትስ” ያግስ።
JDG 7:14 እያ ላገይ ዛሪድ፥ “ሄስ እስራኤለ አድያ፥ እዮኣሳ ናኣ ገድዮና ማሻፈ አትሽን፥ ሀራባ ግደና። ፆሳይ ምድያመነ ምድያመታራ ደእያ ኦላንቾታ ኡባ ገድዮናስ አꬅድ እሚስ” ያግስ።
JDG 7:15 ገድዮን ሄ አሙሁዋነ እያ ብርሸꬃ ስእዳ ዎደ ጉልባትድ ፆሳ ጎይንስ። እስራኤለ አሳይ ዱንካንዳ በሳ ጉየ ስሚድ፥ “ደንድተ፤ ጎዳይ ምድያመ ኦላንቾታ ህንተ ኩሸን አꬅድ እሚስ” ያግስ።
JDG 7:16 ሄꬑ ፄቱ አሳታ ሄꬑ ጩጋን ሻክድ ኤንታዉ ሁጰን ሁጰን እስ እስ ሞይዘነ ግዶን ኤፅያ ፆምፐይ ደእያ እስ እስ ፃሮ እሚስ።
JDG 7:17 ገድዮን ኤንታኮ፥ “ታና ፄልተ፤ ታኒ ኤንቲ ዱንካንዳ በሳ ጋክያ ዎደ ኦይሳዳ ህንተካ ኦꬅተ።
JDG 7:18 ታነ ታራ ደኤይሳት ኡባይ ሞይዘ ፑንይ ዎደ ህንተካ ኤንቲ ዱንካንዳ በሳ ዩሹዋን ኤቅድ ሞይዘ ፑንሸ፥ ‘ጎዳሳነ ገድዮናሳ’ ያግድ ዋስተ” ያግስ።
JDG 7:19 ግድ ብላሄ ግድያ ዎደ ናገይሳት ላመትዳፐ ጉየ ገድዮንነ እያራ ደእያ ፄቱ አሳት ብድ፥ ምድያመት ዱንካንዳ በሳ ጋክድ ባንታ ሞይዝያ ፑንዶሶና፤ ኦይክዳ ፃሩዋ መንꬅዶሶና።
JDG 7:20 ሀራ ባጋራ ደእያ ናምኡ ጩጋይ ሄሳዳ ኦꬅዶሶና። ባንታ ሀድርሳ ኩሸን ኤፅያ ፆምፐ፥ ባንታ ኡሻቻ ኩሸን ሞይዘ ኦይክድ፥ “ጎዳነ ገድዮና ማሻ” ያግድ ዋስዶሶና።
JDG 7:21 አሳ ኡባይ ምድያመት ዱንካንዳ በሳ ዩሾን ባ በሳን በሳን ኤቅዳሽን፥ ምድያመ ኦላንቾት ኡባይ ዋስሸ ባቃትዶሶና።
JDG 7:22 ሄꬑ ፄቱ አሳይ ባንታ ሞይዝያ ፑንዳ ዎደ ሞርከ ኦላንቾት ባንታ ማሻ እሶይ እሱዋ ቦላ ደንꬃና መላ ጎዳይ ኦꬅስ። አትዳ ኦላንቾት ፃራራኮ ስሚድ ቤት-ሽፃ ጋካናዉ፥ ያፐ አꬍድ፥ ፃባታ ማታን ደእያ አቤል-ማሆላ ጋካናዉ ባቃትዶሶና።
JDG 7:23 ሄሳፈ ጉየ ንፍታለመ፥ አሴራነ ምናሰ ኮቻት ፄገትድ፥ ሺቅድ ምድያመታ የደꬅዶሶና።
JDG 7:24 ደረይ ዳርያ ኤፍሬማ ቢታን ደእያ አሳኮ ገድዮን ኪትድ፥ “ምድያመታ ኦላናዉ ዱገ ዎꬍድ ቤት-ባራ ጋካናዉ ደእያ ዮርዳኖሰን ገልያ ሻፋታ ኤንታፈ ካሰትድ ኦይክተ” ያግስ። ኤፍሬማ አሳ ኡባይ ፄገትድ፥ ሺቅድ ቤት-ባራ ጋካናዉ ዮርዳኖሰን ገልያ ሻፋታ ኦይክዶሶና።
JDG 7:25 ኤንቲ ኦሬባነ ዘባ ጌተትያ ናምኡ ምድያመ ሀላቃታ ድእዶሶና። ኦሬባ፥ “ኦሬባ ዛላ” ጌተትያ በሳን፥ ቃስ ዘባ፥ “ዘባ ዎይነ ጉምእያ በሲ” ጌተትያ በሳን ዎꬍዶሶና። ሄሳፈ ጉየ፥ አትዳ ምድያመታ የደꬅድ፥ ኦሬባነ ዘባ ቆꬍያ ቃንፅድ ኤንታ ሁጵያ፥ ዮርዳኖሰ ሻፋፐ ሄፍንꬃን ደእያ ገድዮናኮ ኤህዶሶና።
JDG 8:1 ኤፍሬማ አሳይ ገድዮናኮ፥ “ምድያመታ ኦላናዉ ባሸ ኑና አይስ ፄጋብኪ? ኑ ቦላ ሄሳ መላባ አይስ ኦꬃዲ?” ያግድ ይሎትዶሶና።
JDG 8:2 ሽን ገድዮን፥ “ህንተ ኦꬅዳይስ ታ ኦꬅዳይሳፈ አኔ? ታ ኮቻይ አብኤዘር ሺሽዳ ካꬃፈ ህንተ ኤፍሬማ ኮቻት ቆርዳ ቡይ አኔ?
JDG 8:3 ምድያመ ሀላቃታ፥ ኦሬባነ ዘባ ፆሳይ ህንተ ኩሸን አꬅድ እሚስ። ህንተ ኦꬅዳይሳ መላ ታኒ አይ ኦꬃናዉ ዳንዳእያና?” ያግስ። እ ያግን ኤንቲ ዛርብዶሶና።
JDG 8:4 ገድዮንነ እያራ ደእያ ሄꬑ ፄቱ አሳይ ዮርዳኖሰ ሻፋ ፕንዶሶና። ኤንቲ አይ ዳቡርኮካ ባንታ ሞርከታ የደꬆ አግቦኮና።
JDG 8:5 ኤንቲ ሱኮታ ጋክዳ ዎደ ገድዮን ሄ ካታማ አሳኮ፥ “ታ አሳይ ዳቡርዳ ግሾ፥ ሀያና ጉꬃ ካꬅ እመርከት። ታኒ ምድያመ ካዎታ ዘባነ ሳልሞና የደꬃሸ ደአይስ” ያግስ።
JDG 8:6 ሱኮታ ካታማ ሀላቃት፥ “ዘባነ ሳልሞና ኔኒ ድአባካሽን ነ ኦላንቾታስ አይስ ካꬅ እማኔ?” ያግዶሶና።
JDG 8:7 ገድዮን፥ “ሎኦ አይኮይ ባዋ፤ ጎዳይ ዘባነ ሳልሞና ታ ኩሸን አꬅድ እምያ ዎደ ታኒ ባዞ አጉንꬃንነ ፁንዱቀን ህንተና ዋꬋና” ያግስ።
JDG 8:8 ያፐ ደንድድ ፓኑኤላ ብድ፥ ያን ደእያ አሳካ ሄ ኦይሻ ኦይችን፥ ፓኑኤላ አሳይ ሱኮታ አሳይ ዛርዳይሳዳ ዛርዶሶና።
JDG 8:9 እ ፓኑኤላ አሳኮ፥ “ታኒ ፆናዳ ሳሮ ስምያ ዎደ ህንተ ካታማ ናግያ ሀ አዱሳ ግምብያ ላላና” ያግስ።
JDG 8:10 ሄ ዎደ ዘብነ ሳልሞን ዶሎሀ ባጋፈ ይዳ ኦላንቾታፐ አትዳ 15,000 ኦላንቾታራ ቃርቆራን ደኦሶና። ኤንታፈ 120,000 ኦላንቾት ኦላን ሀይቅዶሶና።
JDG 8:11 ገድዮን ኖባፐነ ዮግባፐ ዶሎሀ ባጋን ደእያ ባዞ ኦግያራ ብድ፥ ያን ደእያ ኦላንቾት ቆፖና ደእሽን ኦላ ደንꬅስ።
JDG 8:12 ናምኡ ምድያመ ካዎት ዘብነ ሳልሞን ባቃትዶሶና፤ ሽን ገድዮን ኤንታ የደꬅ ጋክድ ድእስ። ኤንታ ኦላንቾት ኡባይ ዎልቃማ ዳጋማን ኩንድዶሶና።
JDG 8:13 እዮኣሳ ናአይ ገድዮን ሄሬሳ ባጋራ ኦላፐ ስምስ።
JDG 8:14 ሱኮታፐ እስ ናአተꬃ ናኣ ኦይክድ ኦይችስ። ሄ ናአይ ላፑን ታማነ ላፑን ሱኮታ ሀላቃታነ ጭማታ ሱንꬃ ፃፍድ እያዉ እሚስ።
JDG 8:15 ሄሳፈ ጉየ፥ ገድዮን ሱኮታ ይድ፥ “ ‘ዘባነ ሳልሞና ኔኒ ድአባካሽን፥ ዳቡርዳ ነ አሳስ አይስ ካꬅ እማኔ?’ ግድ ታ ቦላ ቀልቅስደታ፤ ሽን ዘባነ ሳልሞና ሀይሳ በእተ” ያግስ።
JDG 8:16 ገድዮን ባዞ አጉንꬅነ ፁንዱቀ ኤክድ ሱኮታ ሀላቃታ ዋꬍስ።
JDG 8:17 ቃስ ፓኑኤላን ካታማ አዱሳ ግምበ ሻኩዋ ላልድ ካታማን ደእያ አደታ ዎꬍስ።
JDG 8:18 ያትድ ገድዮን ዘባነ ሳልሞና፥ “ህንተ ታቦረን አይ መላ አስ ዎꬍደቲ?” ያግድ ኦይችስ። ኤንቲ፥ “ነ መላ አስ፤ ኤንቲ ካዎ ናአ ዳኖሶና” ያግድ ዛርዶሶና።
JDG 8:19 ገድዮን፥ “ኤንቲ ታ እሻታ፤ ኤንቲ ታ አየ ናይታ። ደኦ ፆሲ ኤርያ መላ ኤንታ ህንተ ዎꬎናባ ግድያኮ ታ ህንተና ዎꬍከሽን” ያግስ።
JDG 8:20 ባ ባይራ ናኣ የተራኮ፥ “ደንዳዳ፥ ሀይሳታ ዎꬋ” ያግስ። የተር ቡሮ ዮጋ ግድያ ግሾ ያይድ ባ ማሻ ሾድቤና።
JDG 8:21 ዘብነ ሳልሞን ገድዮናኮ፥ “ህዛ ነ ኑና ዎꬋ፤ አደ ኦሶ ኦꬃናዉ አደ ኮሼስ” ያግዶሶና። ያትን፥ ገድዮን ኤንታ ዎꬍስ፤ ኤንታ ግማለታ ቆን ደእያ አሌቆ ኡባ ኤክስ።
JDG 8:22 እስራኤለ አሳይ ገድዮናኮ፥ “ኔኒ ኑና ምድያመታፐ አሽዳ ግሾ ኔኒ፥ ነ ናአይነ ነ ናኣ ናአይ ኑና ሃርተ” ያግስ።
JDG 8:23 ሽን ገድዮን፥ “ታኒ ህንተና ሃርከ፤ ታ ናአይካ ህንተና ሃረና፤ ጎዳይ ህንተና ሃራና” ያግስ።
JDG 8:24 እ ኤንታኮ፥ “ታ ህንተና እስባ ኦይቻይስ፤ ህንተ ኡባይ ድእድ ኤህዳ ሀይꬃ ዎርቅያፈ ታዉ እምተ” ያግስ። (እስማኤላ አሳስ ሀይꬃን ዎርቃ አሶይ ዎጋ።)
JDG 8:25 እስራኤለ አሳይ ዛሪድ፥ “ኤሮ፥ ኡፋይትድ እማና” ያግዶሶና። አፍላ ሂፅድ፥ አሳ ኡባይ ድእድ ኤህዳ ሀይꬃ ዎርቅያ የግዶሶና።
JDG 8:26 ገድዮን ኤክዳ ሀይꬃ ዎርቀይ ላታሙ ክሎ ግራመ ዴፄስ። ሄስካ፥ ሀራ አሌቆታ፥ ቆን አꬅያ ጎዝዳታ፥ ምድያመ ካዎት ማእያ ኦቻ ቴራ ዳንያ ማኦታነ ኤንታ ግማለታ ቆꬍያፐ ኤከትዳ አሌቆታ ጉጆናሽና።
JDG 8:27 ገድዮን ዎርቃ ኤቃ ምስልያ ጊግስድ፥ ባ ደእያ ኦፍራ ካታማን ዎꬅስ። እስራኤለ አሳ ኡባይ ጎዳ አግድ ሄ ኤቃ ምስልያ ጎይንዶሶና፤ ሄስ ገድዮናስነ እያ ሶ አሳስ ፅሄ ግድስ።
JDG 8:28 ሄሳዳ ሀንድ፥ ምድያመ አሳይ እስራኤለ አሳስ ሃረትስ፤ ኤንቲ እስራኤለ አሳ ቦላ ናምአንꬆ ደንድቦኮና። ገድዮን ሀይቃና ጋካናዉ ኦይታሙ ላይꬅ ቢታይ ዎፑ ግድ ደእስ።
JDG 8:29 የሩባኣላ ጌተትያ ገድዮን፥ እዮኣሳ ናአይ ባ ሶ ስሚድ ደእስ።
JDG 8:30 ገድዮን ዳሮ ማቾ ኤክዳ ግሾ፥ እያዉ ላፑን ታሙ አደ ናይት የለትዶሶና።
JDG 8:31 ሴከማን ደእያ ላገꬅያ እያዉ አደ ናኣ የልን፥ እያ ሱንꬃ አብመለከ ያግድ ሱንꬅስ።
JDG 8:32 እዮኣሳ ናአይ ገድዮን ሎኦ ጭምድ ሀይቅስ፤ ባ አዋ እዮኣሳ ዱፎን ሞገትስ። ሄ ዱፎይ አበዜራ ኮቻት ደእያ ኦፍራን ደኤስ።
JDG 8:33 ገድዮን ሀይቅዳፐ ጉየ፥ እስራኤለ አሳይ ጎዳ አግድ ባኣለ ፆሳታ ጎይንዶሶና። ባኣል-ብሪታ ጌተትያ ኤቃ ባንታዉ ፆሰ ኦꬅዶሶና።
JDG 8:34 እስራኤለ አሳይ ባንታ ዩሹዋን ደእያ ሞርከታ ኡባፈ ኤንታ አሽዳ ጎዳ ባንታ ፆሳ ሀሳይቦኮና።
JDG 8:35 እስራኤለ አሳስ ኦꬅዳ ሎኦ ኦሱዋ ግሾ የሩባኣላ ጌተትያ ገድዮና ሶ አሳስ ሎኦ ኩሸ ዛርቦኮና።
JDG 9:1 ገድዮና ናአይ፥ አብመለከይ ሴከማን ደእያ ባ አየ ዳቦታኮ ብድ፥ ኤንታነ ባ አየ ኮቻታ ሀይሳዳ ያግስ፤
JDG 9:2 “ሴከማን ደእያ አሳ፥ ‘ገድዮና ላፑን ታሙ ናይት ኡባይ ህንተና ሃርኮ ሎኦዬ? ዎይኮ እስ አስ ሃርኮ ሎኦ?’ ያግድ ኦይችተ። ታኒ ህንተ አሾነ ህንተ መቀꬅ ግደይሳ ዶጎፕተ” ያግስ።
JDG 9:3 እያ አየ ዳቦት ሀ ቃላ ኡባ እያ ግሾ ሴከማ አሳስ ኦድን፥ አብመለከይ ኤንታዉ ዳቦ ግድዳ ግሾ ሴከማ አሳይ እያ ካላናዉ ዶስዶሶና።
JDG 9:4 ኤንቲ ባኣል-ብሪታ ኤቃ ኬꬃፈ ላፑን ታሙ ብራ ሳንትመ ኤክድ እያዉ እምዶሶና። አብመለከይ ሄ ብራን ኢታ አሳታነ ቦንቀይሳታ ሻምድ ባና ካላናዳ ኦꬅስ።
JDG 9:5 ኦፍራን ደእያ ባ አዋ ሶ ብድ፥ ላፑን ታሙ ባ እሻታ ገድዮና ናይታ፥ እስ ሹቻ ቦላ ጎይርስ። ሽን ገድዮና ናአይ፥ ተሾይ፥ እዮአታም ቆሰትድ ሀይቆና አትስ።
JDG 9:6 ሄሳፈ ጉየ፥ ሴከማ አሳይነ ቤት-ምሎ አሳይ እስፈ ሺቅድ፥ ሴከማን ኤቃ ቱሳ ማታን ደእያ ጎይኖ ዎላኮ ብድ ያን አብመለከ ካዎꬅዶሶና።
JDG 9:7 እዮአታም ሄሳ ስእዳ ዎደ ጋርዛና ደርያ ቦላ ከይድ ባ ቃላ ꬎቁ ኦꬅድ፥ “ህንተኖ ሴከማ አሳዉ፥ ፆሳይ ህንተና ስአና መላ ታ ኦደይሳ ስእተ።
JDG 9:8 እስ ጋላስ ምꬃት ኡባይ ሺቅድ፥ ባንታ ቦላ ካዎ ካዎꬃናዉ ብድ ሻማሆ፥ ‘ሃያ፥ ኑ ቦላ ካዎታ’ ያግዶሶና።
JDG 9:9 ሽን ሻማሆይ፥ ‘ፆሳታነ አሳታ ቦንችስያ ዛይተ እመይሳ አጋዳ ምꬃታ ቦላ ካዎቶ?’ ያግድ ዛርስ።
JDG 9:10 “ያትን፥ ምꬃት ባላሰ ምꬃ፥ ‘ሃያ፥ ኑ ቦላ ካዎታ’ ያግዶሶና።
JDG 9:11 ሽን ባላሰይ፥ ‘ማልኦነ ሎኦ ግድዳ አይፈ እመይሳ አጋዳ ምꬃታ ቦላ ካዎታናዉ ቦ?’ ያግድ ዛርስ።
JDG 9:12 “ያትን፥ ምꬃት ዎይነኮ፥ ‘ሃያ፥ ኑ ቦላ ካዎታ’ ያግዶሶና።
JDG 9:13 ሽን ዎይነይ፥ ‘ፆሳታነ አሳታ ኡፋይስያ ኡሻ እመይሳ አጋዳ ምꬃታ ቦላ ካዎታናዉ ቦ?’ ያግድ ዛርስ።
JDG 9:14 “ያትን፥ ዉርሰꬃን ምꬃት ኡባይ ፁንዱቀኮ፥ ‘ሃያ፥ ኑ ቦላ ካዎታ’ ያግዶሶና።
JDG 9:15 ፁንዱቀይ፥ ‘ህንተ ቱማ ታና ህንተ ቦላ ካዎꬃናዉ ኮይኮ፥ ሃ ይድ ታ ኩያን ሸምፕተ። ሄሳ ህንተ እፅኮ፥ ፁንዱቀ ታሽያፐ ታም ከይድ ልባኖሰ ዝጋ ሞ’ ያግስ።
JDG 9:16 “ህንተ አብመለከ ካዎꬅዳይ ቱማተꬃንነ ሱረተꬃኔ? ገድዮን ህንተዉ ኦꬅዳባ አኬክድ እያ ሶ አሳስ ሎኦ ኩሸ ዛርደቲ?
JDG 9:17 ታ አዋይ ህንተዉ ኦለትዳይሳ አኬክተ፤ ምድያመ አሳፐ ህንተና አሻና ያግድ፥ ባና ሀይቆስ አꬅድ እሚስ።
JDG 9:18 ሽን ህንተ ሀች ታ አዋ ሶ አሳ ቦላ ደንድድ፥ እያ ላፑን ታሙ ናይታ እስ ሹቻ ቦላ ጎይርደታ። ገድዮና አይለፈ የለትዳ አብመለከይ ህንተዉ ዳቦ ግድዳ ግሾ ሴከማን ካዎꬅደታ።
JDG 9:19 ሀእ ስሚድ ገድዮናስነ እያ ሶ አሳስ ህንተ ኦꬅዳ ኦሶይ ቱማተꬃንነ ሱረተꬃን ግድኮ አብመለከራ ኡፋይትተ፤ እካ ህንተራ ኡፋይቶ።
JDG 9:20 ሽን ሄስ ሀኖና እፅኮ አብመለከፐ ታም ከይድ ሴከማነ ቤት-ምሎ አሳ ሞ። ቃስ ሴከማ አሳፐነ ቤት-ምሎ አሳፐ ታም ከይድ አብመለከ ሞ” ያግስ።
JDG 9:21 እዮአታም ባ እሻ አብመለከስ ያይዳ ግሾ ባቃትድ ቤራ ብድ ያን ደእስ።
JDG 9:22 አብመለከይ እስራኤለ ቢታን ሄꬑ ላይꬅ ካዎትስ።
JDG 9:23 ሄሳፈ ጉየ፥ ፆሳይ አብመለከ ግዶንነ ሴከማ አሳ ግዶን ኢታ አያና ኪትን ሴከማ አሳይ አብመለከ ቦላ ማካልዶሶና።
JDG 9:24 ፆሳይ ሄሳ ኦꬅዳይ፥ አብመለከይ ባ እሻታ ዎꬍዳ ግሾነ ኤንታ ዎꬋና መላ ሴከማ አሳይ እያ ምንꬅዳ ግሾሳ።
JDG 9:25 ሴከማ አሳይ ጉꬃ አስ ዶርድ ደርያ ሁጵያን ኡትድ አብመለከ ቦላ ሞርከተꬃን ደንዳና መላ ኦꬅዶሶና። ኤንቲ ኦገራ አꬍያ አሳ ኡባ ቦንቅዶሶና፤ አብመለከይ ሄሳ ስእስ።
JDG 9:26 ሄ ዎደ ኤቤዳ ናአይ ጋል ባ እሻታራ ሴከማ ይን፥ ሴከማ አሳይ እያን አማነትዶሶና።
JDG 9:27 ኡባይ ባንታ ጋደ ብድ ዎይነ ማፅዶሶና፤ ዎይንያ አግድ ግታ ግብራ ጊግስዶሶና። ባንታ ኤቃ ኬꬃ ገልድ ያን ምሸነ ኡይሸ አብመለከ ጫይዶሶና።
JDG 9:28 ኤቤዳ ናአይ ጋል፥ “ኑኒ ሴከማ አሳይ እያዉ ሃረታናዉ አብመለከይ ኦኔ? እ የሩባኣላ ናኣ ግደኔ? ዛቡል ሀ ካታማ ሃራና መላ አብመለከይ ሹምዳይሳ ግደኔ? ሄሳፈ ሴከማ ሼሽ ግድዳ ሀሞረ አሳስ ሃረታና።
JDG 9:29 ሀ አሳ ካለይ ታና ግድያኮ አብመለከ ድጋናሽን። አብመለከ ፄጋዳ፥ ‘ነ ኦላንቾታ ዳርሳ ኤካዳ ኦለታናዉ ሃያ’ ያጋናሽን” ያግስ።
JDG 9:30 ኤቤዳ ናአይ ጋል ግዳይሳ ካታማ ሃርያ ዛቡል ስእዳ ዎደ ዳሮ ይሎትስ።
JDG 9:31 ቆሳን አብመለከኮ አሰ ኪትድ፥ “ኤቤዳ ናአይ ጋልነ እያ እሻት ሴከማ ይድ ያን ደእያ አሳ ነ ቦላ ደንꬆሶና።
JDG 9:32 ሄሳ ግሾ፥ ኔንነ ኔራ ደእያ አሳይ ቃማ ደንድድ እስ በሳን ዙግድ ናግተ።
JDG 9:33 ዎንተꬃ ጋላስ አው ዶልያ ዎደ ኤንቲ ቆፖና ካታማ ኦልተ። ጋልነ እያራ ደእያ አሳይ ህንተና ኦላናዉ ከይያ ዎደ ህንተ ኮይዳ መላ ኤንታ ቦላ ኦꬅተ” ያግስ።
JDG 9:34 አብመለከይነ እያራ ደእያ አሳ ኡባይ ቃማ ደንድድ ሴከማፐ ካረራ ኦይዱ ጩጋን ሻከትድ ዙግዶሶና።
JDG 9:35 አብመለከይነ እያራ ደእያ አሳይ ኤቤዳ ናአይ ጋል ከይድ ካታማ ፐንግያን ኤቅዳይሳ በእድ ቆሰትዳ በሳፈ ከይዶሶና።
JDG 9:36 ጋል አሳ በእዳ ዎደ ዛቡላኮ፥ “ሄኮ፥ አሳይ ደርያ ሁጵያፐ ዎꬌስ” ያግስ። ዛቡል፥ “ሀይስ ደርያ ኤሾፐ አትሽን፥ አሰ ግደና” ያግድ ዛርስ።
JDG 9:37 ጋል ዛሪድ፥ “ሄኮ፥ አሳይ ደርያስ ግዱዋ ኦይክድ ዎꬌስ፤ ሀራ ጩግ ቃስ ማሮታ ዎላይ ደእያ ኦግያራ ዬስ” ያግስ።
JDG 9:38 ዛቡል ጋላኮ፥ “ ‘ኑኒ እያዉ ሃረታናዉ አብመለከይ ኦኔ?’ ያግዳ ነ ዶናይ ሀእ አዉ ብዴ? ሀይሳቲ ኔኒ ካꬍዳ አሳ ግዶኮናዬ? ሀእ ከያዳ ኤንታራ ኦለታ” ያግስ።
JDG 9:39 ጋል ሴከማ አሳ ካለꬅ ከይድ አብመለከራ ኦለትስ።
JDG 9:40 አብመለከይ የደꬅን ጋል ባቃትስ፤ ካታማ ፐንግያ ጋካናዉ ዳሮት ደሸትድ ኩንድዶሶና።
JDG 9:41 አብመለከይ አሩማን ደእን፥ ዛቡል ጋላነ እያ እሻታ ሴከማፐ የደꬅድ ከስስ።
JDG 9:42 ዎንተꬃ ጋላስ ሴከማ አሳይ ጎሻስ ብዳይሳ አብመለከይ ስእስ።
JDG 9:43 እ ባ አሳ ኤክድ ሄꬑ ጩጋን ሻክድ፥ እስ በሳን ዙግድ ናጋናዳ ኦꬅስ። አሳይ ካታማፐ ከየይሳ በእዳ ዎደ ኤንታ ዎꬋናዉ ቆሰትዳ በሳፈ ከይስ።
JDG 9:44 አብመለከይነ እያራ ደእያ ጩጋይ ስን ዎፅ ብድ፥ ካታማ ፐንግያን ኤቅዶሶና። አትዳ ናምኡ ጩጋይ ጎሻን ደእያ አሳ ኦልድ ዎꬍዶሶና።
JDG 9:45 ጋላስ ኩመꬅ አብመለከይ አሳራ ኦለትድ ኦይክዳፐ ጉየ ካታማን ደእያ አሳ ኡባ ዎꬍስ፤ ካታማ ꬋይስስ፤ ቢታ ቦላ ማፅነ ላልስ።
JDG 9:46 ሴከማ አዱሳ ግምብያ ግዶን ደእያ አሳ ኡባይ ሄሳ ስእዳ ዎደ ባኣል-ባርታ ኤቃ ኬꬃን ደእያ ጎንጎሉዋን ቆሰትዶሶና።
JDG 9:47 አብመለከይ ኤንቲ ያን ሺቅዳይሳ፥
JDG 9:48 ስእድ እነ እያራ ደእያ አሳ ኡባይ ሳልሞና ደርያ ከይዶሶና። አብመለከይ ካልታ ኤክድ ምꬃ ታሸ ቃንፅድ፥ ባ ሀሽያን ቶክስ። ባራ ደእያ አሳኮ፥ “ታኒ ኦꬅሽን በእዳይሳዳ ህንተ ኤለስድ ኦꬅተ” ያግስ።
JDG 9:49 አሳ ኡባይ ምꬃ ታሸ ቃንፅ ኤክድ፥ አብመለከ ካልስ። ሄ ታሸታ ሳአ ኬꬃ ቦላ ዶርድ አሳይ እያ ግዶን ደእሽን ታማ ኦይꬅዶሶና። እያን ደእያ አሳ ኡባይ ሀይቅዶሶና። ሀይቅዳ አደይነ ማጫሳ ታይቦይ እስ ሙኩሉ ግዳና።
JDG 9:50 አብመለከይ ተሜሳ ብድ ካታማ ተቅድ ኦይክስ።
JDG 9:51 ሄ ካታማ ግዶን እስ ምኖ አዱሳ ግምበይ ደኤስ። ካታማ አሳይ ማጭ፥ አደይ፥ ካለይሳትነ ሀራ አሳ ኡባይ አቶና ዎፅድ አዱሳ ግምብያ ግዶ ገልዶሶና። ፐንግያ ጎርድድ ግምብያ ሁጰ ከይዶሶና።
JDG 9:52 አብመለከይ ኦልሸ አዱሳ ግምብያ ጋክድ ታማን ፁጋናዉ ፐንግያኮ ሺቅስ።
JDG 9:53 ሽን እስ ማጫስያ አብመለከ ሁጰን ዎፃ ማይደ ሆላዳ እያ ጉግያ ጳልቃ የጋሱ።
JDG 9:54 እያ ኦላ ሚሽያ ቶክያ ናአተꬃ ኤለስ ፄግድ፥ “አብመለከ ማጫስ ዎꬍስ ጎናዳ ነ ማሻ ሾዳዳ ታና ዎꬋ” ያግስ። ያግን ናአተꬃይ ጫድን እ ሀይቅስ።
JDG 9:55 እስራኤለ አሳ ኡባይ አብመለከይ ሀይቅዳይሳ በእድ ባ ሶ ሶ ብስ።
JDG 9:56 አብመለከይ ላፑን ታሙ ባ እሻታ ዎꬍድ፥ ባ አዋ ቦላ እ ኦꬅዳ ጎምያ ፆሳይ እያ ቦላ ዛርስ።
JDG 9:57 ፆሳይ ሴከማ አሳ ኢታተꬃ ኡባ ኤንታ ቦላ ዛርስ። ሄሳዳ ሀንድ ገድዮና ናአይ እዮአታም ባድዳ ባደꬃይ ኤንታ ጋክስ።
JDG 10:1 አብመለከይ ሀይቅዳፐ ጉየ፥ ይሳኮራ ኮቸ ግድዳ ዶዳ ናኣ፥ ፑሀ ናአይ ቶል፥ እስራኤለ አሳ አሻናዉ ደንድስ። እ ደረይ ዳርያ ኤፍሬማ ቢታን ሳምራን ደእስ።
JDG 10:2 ቶል እስራኤለ አሳ ላታማነ ሄꬑ ላይꬅ አይስስ። ቶል ሀይቅድ፥ ሳምራን ሞገትስ።
JDG 10:3 ቶላፐ ካልድ፥ ጋላዳ አደይ ያእር ደንድስ። እ እስራኤለ አሳ ላታማነ ናምኡ ላይꬅ አይስስ።
JDG 10:4 እያዉ ሀስታሙ ባቁሎ ቶግያ ሀስታሙ አደ ናይት ደኦሶና። ኤንታዉ ጋላዳ ቢታን ሀስታሙ ካታማት ደኦሶና። ሄ ካታማት ሀች ጋካናዉ ያእራ ካታማታ ጌተትድ ፄገቶሶና።
JDG 10:5 ያእር ሀይቅድ ቃሞናን ሞገትስ።
JDG 10:6 ቃስካ እስራኤለ አሳይ ጎዳ ስንꬃን ኢታባ ኦꬅዶሶና። ኤንቲ ባኣለነ አስታሮታ ኤቃታ፥ ሶረ ፆሳታ፥ ስዶና ፆሳታ፥ ሞአበ ፆሳታ፥ አሞነ ፆሳታነ ፍልስፄመ ፆሳታ ጎይንዶሶና። ኤንቲ ጎዳ አጋግዶሶና፤ እያ ጎይንቦኮና።
JDG 10:7 ጎዳይ እስራኤለ አሳ ቦላ ሀንቀትድ፥ ኤንታ ፍልስፄመ አሳስነ አሞነ አሳስ አꬅድ እሚስ።
JDG 10:8 ሄ ላይꬅ ፍልስፄመትነ አሞነት እስራኤለ አሳ ኡንኤꬅዶሶና። ዮርዳኖሰ ሻፋፐ ዶሎሀ ባጋን፥ አሞረት ካሰ ደእዳ ጋላዳ ቢታን ደእያ እስራኤለ አሳ ኤንቲ ታማነ ሆስፑን ላይꬅ ሃርዶሶና።
JDG 10:9 ቃስካ አሞነ አሳይ ይሁዳ፥ ብንያመነ ኤፍሬማ ኮቻታ ኦላናዉ ዮርዳኖሰ ሻፋ ፕንዶሶና፤ እስራኤለ አሳይ ዳሮ ኡንኤትዶሶና።
JDG 10:10 ሄሳፈ ጉየ፥ እስራኤለ አሳይ፥ “ኑኒ ነና ኑ ፆሳ አግድ፥ ባኣለ ጎይንድ፥ ናጋራ ኦꬅዳ” ያግድ ጎዳኮ ዋስዶሶና።
JDG 10:11 ጎዳይ ኤንታኮ፥ “ግብፀት፥ አሞረት፥ አሞነት፥ ፍልስፄመት፥
JDG 10:12 ስዶናት፥ አማለቃትነ ሞኣነት ህንተና ኡንኤꬅን፥ ህንተ ታኮ ዋስን፥ ታኒ ህንተና ኤንታ ኩሸፐ አሻብክና?
JDG 10:13 ሽን ህንተ ታና አግድ ሀራ ፆሳታ ጎይንደታ፤ ህዛፐ ታኒ ህንተና አሽከ።
JDG 10:14 ብድ ህንተ ዶርዳ ፆሳኮ ዋስተ። ህንተና መቶይ ጋክያ ዎደ አነ ኤንቲ አሾ” ያግድ ዛርስ።
JDG 10:15 ሽን እስራኤለ አሳይ ዛሪድ ጎዳኮ፥ “ኑኒ ናጋራ ኦꬅዳ። ነ ኮይዳባ ኑ ቦላ ኦꬃ፤ ሽን ሀያና ሀች ኑና አሻ” ያግዶሶና።
JDG 10:16 አላጋ ፆሳታ ባንታ ግዶፈ ድግድ፥ ጎዳ ጎይንዶሶና። ጎዳይ እስራኤለ አሳ ኡንኤተꬃ በእድ ምሸትስ።
JDG 10:17 ሄሳፈ ጉየ፥ አሞነ ኦላንቾት ኦላስ ጊግድ፥ ጋላዳን ሺቅዶሶና። እስራኤለ አሳይ እስፈ ሺቅድ ጋላዳን ምፅጳን ዱንካንዶሶና።
JDG 10:18 ጋላዳ ቢታ ሀላቃት ባንታ ግዶን፥ “አሞነ ኦላንቾታራ ኮይሮትድ ኦላ ጋሄታናይ ኦኔ? ሄ አደይ ጋላዳ ቢታን ደእያ አሳ ኡባስ ሀላቃ ግዳና” ያግዶሶና።
JDG 11:1 ጋላዳ ቢታን ደእያ ዮፍታሄይ ምኖ ኦላንቾ። እያ አዋ ሱንꬃይ ጋላዳ፤ ሽን እያ አይያ ላይማ ማጫስ።
JDG 11:2 ጋላዳ ማችያ እያዉ አደ ናይታ የላሱ። ኤንቲ ድጭድ ጋክዳ ዎደ ባንታ እሻ ዮፍታሄ፥ “ኔኒ ሀራ ማጫሳፐ የለትዳ ናአ ግድያ ግሾ ኑ አዋ አቁዋፐ አይኮካ ላታካ” ያግድ ሶፐ የደꬅዶሶና።
JDG 11:3 ያትን፥ ዮፍታሄይ ባ እሻታፐ ባቃትድ፥ ቶባ ቢታን ደእስ። ያን እ ደእሽን ጉꬃ ዎራንꬖት እያኮ ሺቅድ እያ ካልዶሶና።
JDG 11:4 ጉꬃ ዎደፐ ጉየ አሞነት እስራኤለታራ ኦለትዶሶና።
JDG 11:5 አሞነት እስራኤለታራ ኦለትዳ ዎደ ጋላዳ ቢታ ጭማት ቶባፐ ዮፍታሄ ዛሪድ ኤሀናዉ ብዶሶና።
JDG 11:6 ኤንቲ እያኮ፥ “አሞነታ ኑኒ ኦላና መላ ያዳ ኑስ ሀላቃ ግዳ” ያግዶሶና።
JDG 11:7 ሽን ዮፍታሄይ፥ “ታና እፅድ፥ ታ አዋ ኬꬃፈ የደꬅቤከቲ? ሀእ ህንተና መቶይ ጋክን ታኮ አይስ ይደቲ?” ያግስ።
JDG 11:8 ጋላዳ ጭማት፥ “ግዶሽን ሀእ ኑኒ ኔኮ ስምዳ፤ ኔኒ ኦላ ካለꬃዳ አሞነታ ኑስ ኦላና መላነ ጋላዳ ቢታስ ሀላቃ ግዳና መላ ኮዮስ” ያግዶሶና።
JDG 11:9 ዮፍታሄይ፥ “አሞነታራ ኦለታና መላ ህንተ ታና ጉየ ዛርን፥ ጎዳይ ኤንታ ታ ኩሸን አꬅድ እምኮ፥ ህንተ ቱማ ታና ሀላቃ ኦꬃኔ?” ያግስ።
JDG 11:10 ጋላዳ ጭማት፥ “ጎዳይ ኑ ግዶን ማርካ፤ ኔኒ ግያባ ኑ ኦꬃና” ያግዶሶና።
JDG 11:11 ዮፍታሄይ ጋላዳ ጭማታራ ብስ፤ ኤንቲ እያ ባንታ ሀላቃነ ካለይሳ ኦꬅዶሶና። ዮፍታሄይ ምፅጳን ጎዳ ስንꬃን ዛሪድ ቃላ ገልስ።
JDG 11:12 ዮፍታሄይ አሞነ ካዋኮ አሰ ኪትድ፥ “ኔኒ ኑ ቢታ ኦላና መላ ኑኒ ነዉ አይ ኦꬅዶ?” ያግድ ኦይችስ።
JDG 11:13 አሞነ ካዎይ ዮፍታሄይ ኪትዳ አሳኮ፥ “እስራኤለ አሳይ ግብፀፈ ከይዳ ዎደ አርኖና ሻፋፐነ ያቦቃ ሻፋፐ ግዶን፥ ዮርዳኖሰ ሻፋ ጋካናዉ ደእያ ታ ቢታ ኤክዶሶና። ሀእ ታ ቢታ ታዉ ሳሮን ዛርተ” ያግድ ዛርስ።
JDG 11:14 ዮፍታሄይ ናምአንꬆ አሞነ ካዋኮ አሰ ኪትስ።
JDG 11:15 ኪተትዳ አሳይ፥ “እስራኤለ አሳይ ሞአበ ቢታ ዎይኮ አሞነ ቢታ ኤክቤና።
JDG 11:16 እስራኤለ አሳይ ግብፀፈ ከይዳ ዎደ ባዞ ካንꬅ ብድ፥ ዞኦ አባ ጋክስ፤ ያፐ ቃደሳ ብስ።
JDG 11:17 እስራኤለ አሳይ ኤዶመ ካዋኮ፥ ‘ነ ቢታራ ኑና አꬃርኪ?’ ያግድ አሰ ኪትስ፤ ሽን ኤዶመ ካዎይ አꬆና እፅስ። ሄሳዳካ፥ ሞአበ ካዋኮ ኪትን፥ እካ አꬆና እፅስ፤ ያትን፥ እስራኤለ አሳይ ቃደሳን ጋምእስ።
JDG 11:18 “ዉርሰꬃን ኤንቲ ባዙዋ ካንꬅድ፥ ኤዶመነ ሞአበ ቢታ ጋፃ ኦይክድ፥ ሞአበ ቢታፈ ዶሎሀ ባጋራ ይድ አርኖና ሻፋፐ ሄፍንꬃ ባጋን ዱንካንዶሶና። ሽን አርኖና ሻፋይ ሞአበ ዛዋ ግድዳ ግሾ ሞአበ ባጋ ፕንቦኮና።
JDG 11:19 “ሄሳፈ ጉየ፥ እስራኤለ አሳይ ሀሰቦና ካታማን ደእያ አሞረታ ካዋ ስሆናኮ አሰ ኪትድ፥ ‘ሀያና፥ ነ ቢታራ ኑና አꬃርክ’ ያግድ ኦይችስ።
JDG 11:20 ሽን ስሆነይ እስራኤለ አሳ አማነቶና ግሾ አꬃናዉ ኮይቤና። እ ባ ኦላንቾታ ኤክድ ያሃፃን ዱንካንድ እስራኤለ አሳ ኦልስ።
JDG 11:21 ጎዳይ እስራኤለ ፆሳይ ስሆናነ እያ ኦላንቾታ እስራኤለ አሳ ኩሸን አꬅድ እምን፥ ኤንታ ፆንዶሶና። ያን ደእያ አሞረታ ቢታ ኡባ ላትዶሶና።
JDG 11:22 አርኖና ሻፋፐ ብድ ያቦቃ ሻፋ ጋካናዉ፥ ባዙዋፈ ብድ ዮርዳኖሰ ሻፋ ጋካናዉ ደእያ አሞረታ ቢታ ኡባ ኤክዶሶና።
JDG 11:23 “ሄሳዳ ኦꬅድ ጎዳይ፥ እስራኤለ ፆሳይ ባ አሳ እስራኤለ ስንꬃፈ አሞረታ የደꬅድ ꬋይስስ። ያትን፥ ኔኒ ዛራዳ ነዉ ኤካናዉ ዋታ ቆፓይ?
JDG 11:24 ኔኒ ነ ፆሳይ ካሞሽ ነዉ እመይሳ ኤክኪ? ሽን ኑኒ፥ ጎዳይ ኑ ፆሳይ ኑስ እምዳባ ኡባ ላትድ ዳና።
JDG 11:25 ግዶሽን ኔኒ ስፎራ ናኣ፥ ሞአበ ካዋ ባላቃፐ ምናይ? እ እስራኤለ አሳራ ኦየትደ ዎይኮ ኦለትዴ?
JDG 11:26 እስራኤለ አሳይ ሀሰቦና፥ አሮኤራነ ኤንታ ዩሹዋን ደእያ ጉታታ ኡባ፥ ቃስ አርኖና ሻፋ ማታን ደእያ ካታማታ ኡባ ላትድ ሄꬑ ፄቱ ላይꬅ ደእስ። ያትን፥ ሄ ዎደ አይስ ዎꬃ ኤካብኪ?
JDG 11:27 ታኒ ህንተና አይኮካ ቆሀብከ፤ ሽን ታና ኦላናዉ ደንዳዳ ናቀይ ነና። ፕርድያ ጎዳይ ሀች እስራኤለፐነ አሞነፐ ግዶን ፕርዶ” ያግስ።
JDG 11:28 ሽን ዮፍታሄይ ኪትዳ ኪታ አሞነታ ካዎይ ስኦና እፅስ።
JDG 11:29 ሄ ዎደ ጎዳ አያናይ ዮፍታሄ ቦላ ዎꬍን፥ ጋላዳነ ምናሰ ቢታ ካንꬅ ብድ፥ ጋላዳ ቢታን ደእያ ምፅጳ ስምስ። ያፐ ኦላንቾታ ካለꬅድ አሞነ ቢታ ብስ።
JDG 11:30 ዮፍታሄይ ጎዳስ ቃንገትድ፥ “ኔኒ አሞነታ ታ ኩሸን አꬃዳ እምኮ፥
JDG 11:31 ታኒ ኦላ ፆናዳ ሶ ስምያ ዎደ ታና ሞካናዉ ታ ሶፐ ከይያ አይብካ ኔሳ፤ ታኒ እያ ፁግያ ያርሾ ኦꬃዳ ነዉ ሺሻና” ያግስ።
JDG 11:32 ሄሳፈ ጉየ፥ ዮፍታሄይ አሞነታ ኦላናዉ ዛዋ ብን፥ ጎዳይ ኤንታ እያ ኩሸን አꬅድ እሚስ።
JDG 11:33 አሮኤራፐ ብድ ምንታነ አቤል-ክራምማ ጋካናዉ ደእያ ላታሙ ካታማታ ኦልድ ꬋይስስ፤ ዳሮ አሳ ዎꬍስ። ሄሳፈ ጉየ፥ አሞነት እስራኤለታስ ሃረትዶሶና።
JDG 11:34 ዮፍታሄይ ባ ሶ ምፅጳ ስምያ ዎደ እያ ናእያ ካራቦ ኦይካዳ የፃሸነ ዱራሸ እያ ሞካናዉ ከያሱ። እያዉ ኢፐ አትሽን፥ ሀራ ናእ ባዋ።
JDG 11:35 እ እዮ በእዳ ዎደ አዛንድ ባ ማኡዋ ዳክድ፥ “ሀይ ታ ናተ! ታና ካዉሻዳሳ፤ ታና መቶን የጋዳሳ። ታኒ ጎዳስ ቃንጋስ፤ ጋꬆና አጋናዉ ዳንዳእከ” ያግስ።
JDG 11:36 ናእያ፥ “ታ አዋዉ፥ ኔኒ ጎዳስ ቃንግዳባ ግድኮ፥ ጎዳይ ነ ሞርከታ፥ አሞነታ ቦላ ኔኒ ሀሎ ከይዳ ግሾ ነ ቃንግዳባ ታ ቦላ ፖላ” ያጋሱ።
JDG 11:37 ሽን እያ ባ አዋኮ፥ “ታዉ እስባ ኦꬃርክ። ታኒ አዝና ገሎና አትያ ግሾ፥ ታ ላገታራ ባዳ ዙማ ቦላ ታ ጌላኦተꬃስ ዬካና መላ ናምኡ አጌናስ ታና የዳርክ” ያጋዳ ኦይቻሱ።
JDG 11:38 እ፥ “ባ” ያግድ፥ ናምኡ አጌናስ እዮ የድስ። እያ ባ ላገታራ ዙማ ቦላ ከያዳ ባ ጌላኦተꬃስ ኤንታራ ዬካሱ።
JDG 11:39 ናምኡ አጌናፐ ጉየ፥ ባ አዋኮ ስማዳ ያሱ። እ አዋይ ጎዳስ ቃንግዳ ባ ቃንገꬃ ጋꬅስ፤ እያ ጌላኦሽን ሀይቃሱ። ሄ ዎደፐ ዶምድ፥
JDG 11:40 እስራኤለ ማጫ ናይት ላይꬃን ላይꬃን ኦይዱ ጋላስ ባንታ ሶፐ ሃክ ብድ፥ ጋላዳ አድያ ዮፍታሄ ናኤስ ዬከይስነ ካዮተይስ ሜዘ ግድስ።
JDG 12:1 ኤፍሬማ አሳይ ኦላ ባናዉ ፄገትድ፥ ዮርዳኖሰ ሻፋ ፕንድ፥ ፃፎና ጋክዳ ዎደ ዮፍታሄኮ፥ “አሞነታ ኦላናዉ ዛዋ ፕናዳ ባሸ ኑኒ ኔራ ባና መላ አይስ ፄጋብኪ? ኑኒ ነ ቦላ ጎርድድ ነ ኬꬃን ታማ የዳና” ያግዶሶና።
JDG 12:2 ዮፍታሄይ ኤንታኮ፥ “ታንነ ታ አሳይ አሞነታራ ዳሮ ባፀን ገልዳ ዎደ ህንተና ፄጋስ፤ ሽን ህንተ ታና ኤንታፈ አሽበከታ።
JDG 12:3 ህንተ ታና አሾናይሳ በእዳ ዎደ ዛዋ ፕናዳ ታ ሸምፑዋስ ቃቶና አሞነታ ኦላናዉ ባስ፤ ጎዳይ ኤንታ ታ ኩሸን አꬅድ እሚስ። ያትን፥ ህንተ ሀች አይስ ታና ኦላናዉ ይደቲ?” ያግስ።
JDG 12:4 ዮፍታሄይ ጋላዳ አሳ ኡባ ሺሽድ፥ ኤፍሬማ አሳራ ኦለትን ጋላዳ አሳይ ፆንዶሶና። ኤፍሬማ አሳይ ካሰ ኤንታ፥ “ህንተ ጋላዳ አሳይ ካሰ ኤፍሬማነ ምናሰ ኮቻታ ካድድ ይዳይሳታ ግደከቲ?” ያጎሶና።
JDG 12:5 ኤፍሬማ አሳይ ከስ ኤኮናዳ ዮርዳኖሰ ሻፋ ፕኑዋ ኡባ ጋላዳት ኦይክዶሶና። ከስ ኤካናዉ ኮይያ ኤፍሬማ አስ ፕናናዉ ኦይችያ ዎደ ጋላዳት፥ “ኔኒ ኤፍሬማ አሴ?” ያግድ ኦይቾሶና። እ፥ “ግድከ” ጊኮ፥
JDG 12:6 ኤንቲ፥ “አነ፥ ‘ሽቦሌተ’ ጋ” ያጎሶና። ሽን እ፥ “ሽ” ጌተትያ ፕዳልያ ሎይꬅ ፄጋናዉ ዳንዳኦና ግሾ፥ “ስቦሌተ” ያጌስ። እ ሄሳ ግያ ዎደ ኦይክድ፥ ዮርዳኖሰ ሻፋ ፕንያ በሳን ዎꬎኦሶና። ሄ ዎደ ያን ኤፍሬማ አሳፐ ኦይታማነ ናምኡ ሙኩሉ አሳይ ሀይቅስ።
JDG 12:7 ዮፍታሄይ እስራኤለ አሳ ኡሱፑን ላይꬅ አይስስ። ጋላዳ አደይ ዮፍታሄይ ሀይቅድ ጋላዳን ደእያ እስ ካታማን ሞገትስ።
JDG 12:8 ዮፍታሄፐ ካልድ፥ ቤተለመን እብፃን እስራኤለ አሳ ሃርስ።
JDG 12:9 እብፃናስ ሀስታሙ አደ ናይትነ ሀስታሙ ማጫ ናይት ደኦሶና። እ ባ ማጫ ናይታ ባ ኮቸ ግዶና አደ ናይታስ እሚስ፤ ባ አደ ናይታስ ባ ኮቸ ግዶና ማጫ ናይታ ጊግስድ እሚስ። እብፃን እስራኤለ ላፑን ላይꬅ አይስስ።
JDG 12:10 ሄሳፈ ጉየ፥ እብፃን ሀይቅድ ቤተለመን ሞገትስ።
JDG 12:11 እብፃናፐ ካልድ ዛብሎና ኮቸ ግድዳ ኤሎን እስራኤለ አሳ ታሙ ላይꬅ ሃርስ።
JDG 12:12 ሄሳፈ ጉየ ኤሎን ሀይቅድ ዛብሎና ቢታን ደእያ አያሎናን ሞገትስ።
JDG 12:13 ኤሎናፐ ካልድ፥ ፕራቶና አደይ፥ ህላላ ናአይ አብዶን እስራኤለ አይስስ።
JDG 12:14 አብዶናስ ላፑን ታሙ ባቁሎታ ቶግያ ኦይታሙ አደ ናይትነ ሀስታሙ ናአ ናእ ደኤስ። አብዶን እስራኤለ ሆስፑን ላይꬅ አይስስ።
JDG 12:15 ሄሳፈ ጉየ፥ ህላላ ናአይ አብዶን ሀይቅድ ደረይ ዳርያ አማለቃን፥ ኤፍሬማ ቢታን፥ ፕራቶና ጌተትያ ዱፎን ሞገትስ።
JDG 13:1 እስራኤለ አሳይ ጎዳ ስንꬃን ቃስካ ኢታባ ኦꬅዶሶና። ያትን፥ ጎዳይ ኤንታ ኦይታሙ ላይꬅ ፍልስፄመ አሳ ኩሸን አꬅድ እሚስ።
JDG 13:2 ሄ ዎደ ፆርአ ካታማን ማኑሄ ጌተትያ እስ አደይ ደኤስ። እ ዳነ ኮቸ፤ እያ ማችያ ማይንꬅ ግድዳ ግሾ እያዉ ናአ የላቡኩ።
JDG 13:3 እስ ጋላስ ጎዳ ኪታንቾይ ሄ ማጫሴስ ቆንጭድ፥ “ኔኒ ማይንꬅ፤ ነዉ ናእ ባዋ፤ ሽን ነ ቃንꬃታና፤ አደ ናአካ የላና።
JDG 13:4 ሄሳ ግሾ፥ ዎይነ ዎይኮ ማꬆይያ ኡሽ ኡዮና መላነ ቱናባ አይባካ ሞና መላ ናገታ።
JDG 13:5 ነ ቃንꬃታዳ አደ ናአ የላና። ናአይ የለትዳ ዎድያፐ ዶምድ ፆሳስ ዱማትዳ ናዝራወ ግድያ ግሾ እያ ሁጵያ ሜዶፓ። እ እስራኤለ ፍልስፄመታ ኩሸፐ አሾ ዶማና” ያግስ።
JDG 13:6 ማጫስያ ባዳ፥ ባ አዝናስ ሀይሳዳ ያጋዳ ኦዳሱ፤ “እስ ፆሳ አስ ታኮ ይስ፤ እያ መꬎይ ፆሳ ኪታንቾ መላ ዳሮ ያሼስ። እ አዉፐ ይዳኮ ታኒ እያ ኦይቻብከ፤ እካ ባ ሱንꬃ ታዉ ኦድቤና።
JDG 13:7 ሽን እ ታኮ፥ ‘ነ ቃንꬃታና፤ አደ ናአ የላና። ናአይ የለትዳ ዎደፐ ዶምድ ሀይቃና ጋካናዉ ፆሳስ ዱማትዳ ናዝራወ ግድያ ግሾ ዎይነ ዎይኮ ማꬆይያ ኡሽ ኡዮፓ፤ ቱናባካ ሞፓ’ ያግስ” ያጋሱ።
JDG 13:8 ሄሳፈ ጉየ፥ ማኑሄይ፥ “አቤት ጎዳዉ፥ ናአይ የለትያ ዎደ አይ ኦꬃናዉ ኮሽያኮ ኤርሳና መላ ኔኒ ኪትዳ ፆሳ ኡራይ ኑኮ ስሚድ ያና መላ ኦꬃርክ” ያግድ ጎዳ ዎስስ።
JDG 13:9 ፆሳይ ማኑሄ ዎሳ ስእስ። ማችያ ጋደን ኡትዳሽን ፆሳ ኪታንቾይ ናምአንꬆ ይስ፤ ሽን ሄ ዎደ እ አዝናይ ማኑሄይ ኢራ ዴና።
JDG 13:10 ማችያ ኤለሳዳ ባ አዝናኮ ባዳ፥ “ሄደ ታኮ ይዳ አደይ ሀች ታዉ ቆንጭስ” ያጋሱ።
JDG 13:11 ማኑሄይ ኡትዳ በሳፈ ደንድድ፥ ባ ማችዉ ካል ብድ ኡራኮ፥ “ታ ማቸራ ኦደትዳይ ነኔ?” ያግድ ኦይችስ። ኡራይ፥ “ኤ፥ ታና” ያግስ።
JDG 13:12 ማኑሄይ፥ “ኔኒ ኦድዳ ቃላይ ፖለትያ ዎደ የለታና ናኣ ደኡዋስነ ኦሱዋስ ዎጋይ አይቤ?” ያግድ እያ ኦይችስ።
JDG 13:13 ጎዳ ኪታንቾይ፥ “ነ ማችያ ታኒ ኦድዳ ኡባፈ ናገቶ።
JDG 13:14 ዎይነ ምꬃፈ በንትያባ አይባካ ሞፖ፤ ዎይነ ዎይኮ ማꬆይያ ኡሽ ኡዮፖ፤ ቱና ግድዳባ ሞፖ። ታኒ እዉ ኦድዳ ኡባ ኦꬆ” ያግስ።
JDG 13:15 ማኑሄይ ጎዳ ኪታንቹዋኮ፥ “ኑኒ ነዉ እስ ኡርገ ዴሽ ሹክድ ጊግሳና ጋካናዉ ሀያና ጉꬁ ጋምአርክ” ያግስ።
JDG 13:16 ጎዳ ኪታንቾይ፥ “ታኒ ጋምእያኮካ ነ ካꬃ ሚከ። ሽን ኔኒ ፁሳ ያርሾ ጊግሳናዉ ኮይኮ፥ ጎዳስ ያርሻናዉ ዳንዳኣሳ” ያግስ። እ ጎዳ ኪታንቾ ግደይሳ ማኑሄይ ኤርቤና።
JDG 13:17 ማኑሄይ ጎዳ ኪታንቹዋኮ፥ “ኔኒ ኦድዳ ቃላይ ፖለትያ ዎደ ኑኒ ነና ቦንቻና መላ ነ ሱንꬃይ ኦኔ?” ያግድ ኦይችስ።
JDG 13:18 ጎዳ ኪታንቾይ፥ “ነ ታ ሱንꬃ አይስ ኦይቻይ? ታ ሱንꬃይ ማላልሰይሳ” ያግድ ዛርስ።
JDG 13:19 ማኑሄይ ኡርገ ዴሽነ ካꬃ ያርሹዋ ኤክድ ሹቻ ቦላ ጎዳስ ያርሽስ። ማኑሄይነ እያ ማችያ ፄልሽን፥ ጎዳይ ማላልስያባ ኦꬅስ።
JDG 13:20 ያርሾ በሳፈ ታማ ላጮይ ፑደ ላፅድ ከይሽን፥ ጎዳ ኪታንቾይ ታማ ላጩዋ ግዶራ ሳሎ ከይስ። ማኑሄይነ እያ ማችያ ሄሳ በእድ ሶምኦራ ሳአን ጉፋንዶሶና።
JDG 13:21 ጎዳ ኪታንቾይ ማኑሄስነ እያ ማቼስ ዛር በንቶና አግን፥ ማኑሄይ እ ጎዳ ኪታንቾ ግድዳይሳ ሄ ዎደ አኬክስ።
JDG 13:22 ማኑሄይ ባ ማቸኮ፥ “ኑኒ ፆሳ በእዳ ግሾ ሀይቃና” ያግስ።
JDG 13:23 ሽን እያ ማችያ፥ “ጎዳይ ኑና ዎꬋናዉ ኮይዳባ ግድያኮ፥ ፁሳ ያርሹዋነ ካꬃ ያርሹዋ ኑፐ ኤከና ዎይኮ ሀ ኡባ ኑና በሰና ዎይኮ ሀይሳ ኑስ ኦደና” ያጋዳ ዛራሱ።
JDG 13:24 ማችያ አደ ናአ የላሱ፤ እያ ሱንꬃ ሳምሶና ጋዳ ፄጋሱ። ናአይ ድጭስ፤ ጎዳይካ እያ አንጅስ።
JDG 13:25 ናአይ ፆርአፈነ ኤሽታኦላፐ ግዶን ደእያ ዳነ ጉታን ደእሽን ጎዳ አያናይ እያ ደንꬆ ዶምስ።
JDG 14:1 እስ ጋላስ ሳምሶን ትምና ዎꬍስ፤ ያን እስ ፍልስፄመ ጌላእዉ በእስ።
JDG 14:2 እ ሶ ስሚድ ባ አዋነ ባ አይዉ፥ “ታኒ ትምናን እስ ፍልስፄመ ጌላእዉ በአስ፤ ሀእ እዮ ታዉ ኦይችድ እምተ” ያግስ።
JDG 14:3 ሽን እያ አዋነ አይያ፥ “ማቾ ኦይቻናዉ ሀ ቃፃረትቦና ፍልስፄመታኮ ባናዉ ነና አይ ኮሽዴ? ኑ ኮቻ ግዶን ዎይኮ ኑ አሳ ኡባ ግዶን ነዉ ሀንያ ማጫ ናአ ደማናዉ ዳንዳአብኪ?” ያግድ ኦይችዶሶና። ሽን ሳምሶን ባ አዋኮ፥ “ታኒ እዮ ዶስዳ ግሾ፥ እዮ ኦይቻዳ ታዉ እማ” ያግስ።
JDG 14:4 ፍልስፄመታ ኦላናዉ ጎዳይ ጋሶ ኮይድ፥ ሄሳ ኤንታ ቦላ ኦይሳ ሳምሶና አዋይነ አይያ ኤርቦኮና። ሄ ዎደ ፍልስፄመት እስራኤለታ ሃሮሶና።
JDG 14:5 ሳምሶን ባ አዋራነ ባ አየራ ትምና ዎꬍስ። ኤንቲ ትምና ዎይነ ጋደ ማታራ ካንꬅድ አꬍያ ዎደ እስ ዎዳላ ጋሞይ ጉድሸ እያ ቦላ ከይስ።
JDG 14:6 ሄ ዎደ ጎዳ አያናይ ሳምሶና ቦላ ዎልቃን ዎꬍስ፤ እ ዴሻ ማር ዱሰረይሳዳ ባ ኩሸን አይኮካ ኦይኮና ጋሙዋ ዱሰረꬅ የግስ። ባ ኦꬅዳይሳ ባ አዋስነ ባ አየስ ኦድቤና።
JDG 14:7 ሄሳፈ ጉየ ብድ ጌላእዉ ኦድስስ፤ እዮ ዶስስ።
JDG 14:8 ጉꬃ ዎደፐ ጉየ እዮ ኤካናዉ ያ ስሚድ ብስ። ኦግያ ብሸ ባ ዎꬍዳ ጋሞ ባዉታ በአናዉ ኦገፐ ጋፃ ከይድ ብያ ዎደ ጋሞ ባዉታ ግዶን ማꬅ ኤስ ኤስዳይሳ በእስ።
JDG 14:9 ሄ ኤሳፈ ጉꬃራ ቃንፅ ኤክድ ምሸ ኦግያ ብስ። ባ አዋነ ባ አይዉ ጋክድ፥ ባ ኦይክዳ ኤሳፈ ጉꬃራ እምን፥ ኤንትካ ምዶሶና። ሽን ሳምሶን ሄ ኤሳ ጋሞ ባዉታ ግዶፈ ኤክዳይሳ ኤንታዉ ኦድቤና።
JDG 14:10 እያ አዋይ ጌላእዉ በአናዉ እ ሶ ብን፥ ሳምሶን ያን ግብራ ጊግስስ። ሄሳ መላ ግብራይ ያጋኖን ናአተꬃት ኦꬅያ ሜዘትዳ ዎጋ።
JDG 14:11 ፍልስፄመ አሳይ እያ በእዳ ዎደ እያራ ጋምአና መላ ሀስታሙ ናአተꬃታ ዶርድ የድዶሶና።
JDG 14:12 ሳምሶን ኤንታ፥ “አነ ህንተ ኤርያኮ እስ ቃንእሸ ታ ህንተና ኦይቻና። ያጋኖይ ቦንቸትያ ላፑን ጋላሳ ግዶን ሀ ቃንእሽያ ብርሸꬃ ታዉ ህንተ ኦድያባ ግድኮ ታኒ ህንተዉ ሀስታሙ ሊኖ አፍላነ ሀስታሙ ኩመꬃ ማኦ እማና።
JDG 14:13 ሽን ህንተ ታዉ ብርሸꬃ ኦዳናዉ ዳንዳኦና እፅኮ ህንተ ታዉ ሀስታሙ ሊኖ አፍላነ ሀስታሙ ኩመꬃ ማኦ እሜታ” ያግድ ኦይችስ። ኤንቲ፥ “ኤሮ፥ ነ ቃንእሽያ ኑስ ኦዳ” ያግዶሶና።
JDG 14:14 እ፥ “መይሳፈ ሜተትያባይ በንትስ፤ ምኑዋ ጋርሳፈ ማልእያባይ ከይስ” ያግስ። ሄꬑ ጋላስ ጋካናዉ ኤንቲ ቃንእሽያ ብርሻናዉ ዳንዳእቦኮና።
JDG 14:15 ኦይዳንꬆ ጋላስ ኤንቲ ሳምሶና ማችዉ፥ “ነ አዝና ጭማዳ ቃንእሽያ ብርሸꬃ እ ኑስ ኦዳና መላ ኦꬃ። ሄስ ሀኖና እፅኮ፥ ኑኒ ነናነ ነ አዋ ኬꬃ ታማን ፁጋና። ህንተ ኑና ፄግዳይ ኑና ማንቅሳናሴ?” ያግዶሶና።
JDG 14:16 ያትን፥ ሳምሶና ማችያ ዬካሸ እያኮ ሺቃዳ፥ “ኔኒ ታና ዶሳካ፤ ነ ታና ዳሮ እፃሳ። ኔኒ ታ ቢታ አሳ ቃንእሸ ኦይቻዳ ብርሸꬃ ታዉ ኦዳባካ” ያጋሱ። እ ዛሪድ፥ “ሄሳ ታኒ ታ አዋስነ ታ አየስ ኦዳብከ። ያትን፥ ነዉ አይስ ኦዶ?” ያግስ።
JDG 14:17 ያጋኖይ ቦንቸትያ ላፑን ጋላሳ ኡባን ዬካዳ ሸምፖ ድጋሱ። ላፑንꬃ ጋላስ ቃንእሽያ ብርሸꬃ እዉ ኦድስ፤ እያ ባዳ ባ ቢታ አሳስ ኦዳሱ።
JDG 14:18 ያትን፥ ላፑንꬃ ጋላስ አው ዉላናፐ ስን ካታማ አሳይ፥ “ኤሳፈ አꬍድ ማልእያባይ፥ ጋሞፈ አꬍድ ምንያባይ አይቤ?” ያግድ ቃንእሽያ ብርሸꬃ ኦድዶሶና። ሳምሶን ኤንታኮ፥ “ህንተ ታ ኡሰን ጎዮናባ ግድያኮ፥ ታ ቃንእሽያ ብርሸꬃ ኤረከታሽን” ያግስ።
JDG 14:19 ሄሳፈ ጉየ፥ ጎዳ አያናይ እያ ቦላ ዎልቃን ዎꬍን፥ አስቃሎና ዎꬍድ፥ ሀስታሙ አስ ዎꬍስ። ኤንታ ማኡዋ ቃር ኤክድ ቃንእሽያ ብርሽዳ አሳስ እሚስ። ሀንዳባ ኡባን ዳሮ ሸነትድ ባ አዋ ሶ ስምስ።
JDG 14:20 ሳምሶና ማችያ ዋና ላዛንꬅ ግድዳ እያ ላግያስ እመታሱ።
JDG 15:1 ጉꬃ ዎደፐ ጉየ፥ ግስተ ጫካ ዎደ ሳምሶን ባ ማችዉ በአናዉ እስ ኡርገ ኮለ ኤክድ ብስ። ናኤ አዋኮ፥ “ታኒ ታ ማችያ ደእያ ክፍልያ ገላናዉ ኮያይስ” ያግስ። ሽን እ አዋይ እ ገሎናዳ ድግስ።
JDG 15:2 እ አዋይ ሳምሶናኮ፥ “ኔኒ እዮ እፅዳባ ዳንን እዮ ነ ላዛንꬃስ እማስ። ሽን እ፥ ካሎ ምችያ ኢፐ አꬋዳ ማላ ሎኦ ግደኬ? እዮ ኤካ” ያግስ።
JDG 15:3 ሳምሶን፥ “ታኒ ሀእ ፍልስፄመ አሳ ቦላ ኢታባ ኦꬅኮ ባላ ግድከ” ያግስ።
JDG 15:4 ሄሳፈ ጉየ፥ ብድ ሄꬑ ፄቱ ዎርካናታ ኦይክድ ናምኣ ናምአ ጎይና እስፈ ጋꬅ ቃችድ ጎይናታፐ ግዶን ፆምፐ ዎꬅድ ቃችስ።
JDG 15:5 ፆምፕያን ታማ ኦይꬅድ ቡሮ ጫከትቦና ፍልስፄመታ ካꬃ ግዶ ዎርካናታ የድስ። ታማይ ጫከትዳ ካꬃ፥ ኤቆን ደእያ ካꬃ፥ ዎይንያነ ሻማሁዋ ምስ።
JDG 15:6 ፍልስፄመት፥ “ሀይሳ ኦꬅዳይ ኦኔ?” ያግድ ኦይችዶሶና። አሳይ፥ “ሄሳ ኦꬅዳይ ሳምሶና። ትምና አስ ግድዳ እያ ቦሎይ፥ እያ ማችዉ እያ ላዛንꬃስ እምዳ ግሾ ሄሳ ኦꬅስ” ያግዶሶና። ፍልስፄመት ብድ እዮነ እ አዋ ታማን ፁግዶሶና።
JDG 15:7 ሳምሶን ኤንታኮ፥ “ህንተ ሄሳ ኦꬅዳ ግሾ ታ ሀሎ ከዮና አግከ” ያግስ።
JDG 15:8 እ ኤንታ ዎልቃማ ኢታ ሾች ሾጭድ ዳሮታ ዎꬍስ። ሄሳፈ ጉየ ብድ፥ ኤታማ ጎንጎሉዋን ደእስ።
JDG 15:9 ፍልስፄመ አሳይ ይድ ይሁዳን ዱንካንድ ለሀ ካታማ ኦልስ።
JDG 15:10 ይሁዳ አሳይ፥ “አይስ ኑና ኦላናዉ ይደቲ?” ያግድ ኦይችዶሶና። ኤንቲ፥ “ኑኒ ሳምሶና ኦይክድ ቃቻናዉነ እ ኑ ቦላ ኦꬅዳይሳዳ እያ ቦላ ኦꬃናዉ ይዳ” ያግድ ዛርዶሶና።
JDG 15:11 ያትን፥ ይሁዳፐ ሄꬑ ሙኩሉ አሳይ ኤታማ ጎንጎሉዋ ብድ፥ ሳምሶና፥ “ኑና ሃረይ ፍልስፄመ ግደይሳ ኤርኪ? ያትን፥ ኑ ቦላ ሀይሳ መላ ፓላባ አይስ ኦꬃይ?” ያግዶሶና። እ ዛሪድ፥ “ኤንቲ ታ ቦላ ኦꬅዳይሳዳ ታንካ ኤንታ ቦላ ኦꬃስ” ያግስ።
JDG 15:12 ኤንቲ ዛሪድ፥ “ኑኒ ይዳይ ነና ቃችድ፥ ፍልስፄመታስ አꬅድ እማናሳ” ያግዶሶና። ሳምሶን ዛሪድ፥ “ህንተ ኑ ነና ዎꬎኮ ግድ ታዉ ጫቅተ” ያግስ።
JDG 15:13 ኤንቲ፥ “ኤሮ፥ ኑኒ ነና ቃችድ ኤንታዉ አꬅድ እማናፐ አትሽን፥ ዎꬎኮ” ያግድ ዛርዶሶና። ሄሳ ግሾ፥ ናምኡ ኦራꬃ ዎዶሮን ቃችድ ጎንጎሉዋፐ ከስድ ኤፍዶሶና።
JDG 15:14 ሳምሶን ለሀ ብዳ ዎደ ፍልስፄመት ቡራቅሸ እያኮ ይዶሶና። ጎዳ አያናይ እያ ቦላ ዎልቃን ዎꬍስ። እያ ኩሸይ ቃሸትዳ ዎዶሮይ ሻሎይ ታማ በእድ ዱፀረተይሳዳ ዱፀረት ዎꬍስ።
JDG 15:15 ማታ ዎደ ሀይቅዳ ሀረ ጋጮ ደምድ፥ እያራ ሙኩሉ አስ ዎꬍስ።
JDG 15:16 ሳምሶን፥ “ሀረ ጋጮን፥ አሀ ቦላ አሀ ዶራስ። ሀረ ጋጮን ሙኩሉ አስ ዎꬋስ” ያግስ።
JDG 15:17 ሃሳያ ዉርስዳፐ ጉየ፥ ባ ኦይክዳ ጋጩዋ ሆልድ ሄ በሳ ራማት-ለሀ ያግድ ፄግስ።
JDG 15:18 ሳምሶን ዳሮ ሳሞትድ፥ “ኔኒ ሀይሳ መላ ግታ ፆኖ ታዉ ነ አይልያስ እማዳሳ። ያትን፥ ታኒ ሀእ ሳሞን ሀይቆ? ሀ ቃፃረቶና አሳ ኩሸን ዎꬎ?” ያግድ ፆሳኮ ዋስስ።
JDG 15:19 ፆሳይ ለሀን ደእያ አፎ ካካ ጳልቅን እያፐ ሃꬅ ከይስ። ሳምሶን ሄ ሃꬃ ኡይድ አልዳ ዎደ እያዉ ሸምፖይ ስምስ። ሄሳ ግሾ፥ ሄ በሳ አይን-ሀቆረ ያግድ ፄግስ። ሄ በሳይ ሀች ጋካናዉ ለሀን ደኤስ።
JDG 15:20 ፍልስፄመት ቢታ ሃርያ ዎደ ሳምሶን እስራኤለ ላታሙ ላይꬅ አይስስ።
JDG 16:1 እስ ጋላስ ሳምሶን ፍልስፄመ ካታማ ግድዳ ጋዛ ካታማ ብስ፤ ያን እስ ላይማ ማጫስ በእድ ኢራ አቃናዉ እ ሶ ገልስ።
JDG 16:2 ጋዛ ካታማ አሳይ ሳምሶን ኤንታ ካታማ ይዳይሳ ስእድ ኬꬃ ተቅድ ቃማ ኩመꬅ ናግሸ ካታማ ፐንግያን አቅዶሶና። ሳእ ዎንትኮ ዎꬋና ግድ ናግሸ ዶና ጱቆና አቅዶሶና።
JDG 16:3 ሽን ሳምሶን ያን ግድ ብላሄ ጋካናዉ ጋምእስ። ብላሄ ደንድድ ካታማ ድርሳ ፐንግያ፥ ፐንግያ ኦይክያ ናምኡ ቱሳታነ ኮበ ብራታታ እስፈ ሾድስ። ሄ ኡባ ሀሸን ቶክድ ከብሮናፐ ስንꬃ ባጋራ ደእያ ዙማ ሁጰ ከስስ።
JDG 16:4 ጉꬃ ዎደፐ ጉየ ሳምሶን ሶረቃ ዛንጋራን ደእያ እስ ዳልሎ ጌተትያ ማጫስዉ ዶስስ።
JDG 16:5 ፍልስፄመ ሀላቃት ኢኮ ብድ፥ “ኔኒ እያ ጭማዳ፥ ሄ ዎልቃ ኡባ እ አዉፐ ደምያኮነ ኑኒ እያ ዋት ፆንድ ቃቻናዉ ዳንዳእያኮ ኦይቻ። ኑኒ እሶይ እሶይ ነዉ ታማነ እስ ክሎ ግራመ ብራ ሳንትመ እማና” ያግዶሶና።
JDG 16:6 ሄሳ ግሾ ዳልላ ሳምሶናኮ፥ “ሀይሳ መላ ምኖተꬅ ነ አዉፐ ደምዳኮ፥ ሀያና ታዉ ኦዳርኪ። አስ ነና ቃችድ ዋትድ ነ ዎልቃ ዳቡርሳናዉ ዳንዳኢ?” ያጋሱ።
JDG 16:7 ሳምሶን፥ “ታና ላፑን እርፃ ዳፎራ አስ ቃችኮ ዳቡራዳ ሀራ አሳዳ ሀናና” ያግድ ዛርስ።
JDG 16:8 ፍልስፄመ ሀላቃት ዳልላስ ላፑን እርፃ ዳፎታ ኤህን እያ ሳምሶና ቃቻሱ።
JDG 16:9 ቆልአን አሰ ቆታ ዎꬃዳ፥ “ሳምሶና፥ ፍልስፄመት ይዶሶና” ጋዳ ፄጋሱ። ሽን ሻሎይ ታም ኦይክን ዱፀረተይሳዳ ዳፎታ ዱሰረꬅ የግስ። ሀእካ እያ ምኖተꬃ ፁራይ ኤረትቤና።
JDG 16:10 ዳልላ ሳምሶናኮ፥ “ኔኒ ታና ኤያ ኦꬃሳ፤ ነ ታዉ ዎርዶ ኦዳዳሳ። ሀእካ ነና ዋት ቃቻናዉ ዳንዳኤትያኮ ሀያና ታዉ ኦዳ” ያጋሱ።
JDG 16:11 እ ዛሪድ፥ “አስ ጎኤትቦና ኦራꬃ ዎዶሮን ታና ቃችኮ ዳቡራዳ ሀራ አሳዳ ሀናና” ያግስ።
JDG 16:12 ዳልላ ኦራꬃ ዎዶሮ ኤካዳ ሳምሶና ቃቻሱ። ቆልአን አሰ ቆታ ዎꬃዳ፥ “ሳምሶና፥ ፍልስፄመት ይዶሶና” ያጋሱ። ሽን እ ዎዶሩዋ ባ ቀስያፐ ሻሎዳ ዱሰረꬅ የግስ።
JDG 16:13 ዳልላ ሳምሶናኮ፥ “ሀእ ጋካናዉ ነ ታና ጭማሳ፤ ኔኒ ታዉ ዎርዶ ኦዳዳሳ። ሀእካ ነና ዋትድ ቃቻናዉ ዳንዳኤትያኮ ሀያና ታዉ ኦዳ” ያጋሱ። እ ዛሪድ፥ “ታ ሁጵያ ላፑን ብናና ዳꬃታ ቃጭናራ ጋꬃዳ፥ ቁፃራዳ ዳድኮ፥ ታኒ ዳቡራዳ ሀራ አሳዳ ሀናና” ያግስ።
JDG 16:14 ሄሳፈ ጉየ፥ ሳምሶን ꬍስክዳሽን፥ ዳልላ እያ ሁጵያ ላፑን ብናና ዳꬃታ ቃጭናራ ጋꬃዳ ዶቃሱ። ሄሳፈ ጉየ፥ “ሳምሶና፥ ፍልስፄመት ይዶሶና” ያጋሱ። እ ꬍስኮፈ ባርክድ፥ ባ ብናናይ ዶቀትድ ቶለትዳ በሳፈ ሾድ ኤክስ።
JDG 16:15 ያትን እያ፥ “ነ ዎዛናይ ታራ ዴና፥ ‘ዎይጋዳ ታ ነና ዶሳይስ’ ጋይ? ሄꬑ ቶሆ ታና ጭማዳሳ። ኔኒ ሀ ምኖተꬃ አዉፐ ደምያኮ ታዉ ኦዳ” ያጋሱ።
JDG 16:16 ጋላስ ጋላስ ኦይቻዳ እ ሀይቆ አሞታና ጋካናዉ እያ ዋይሳሱ።
JDG 16:17 ዉርሰꬃን ሳምሶን፥ “ታ አየ ኡሎፐ ዶምን ታኒ ፆሳስ ዱማትዳ ናዝራወ ግድዳ ግሾ፥ ታ ሁጰ ብናናይ ሜደትድ ኤረና። ታ ብናናይ ሜደትኮ፥ ታ ዎልቃይ ታፐ ኤከትን፥ ታኒ ዳቡራዳ ሀራ አሳዳ ሀናና” ያግድ፥ ባ ፁራ ኡባ እዉ ኦድስ።
JDG 16:18 ባ ዎዛናን ደእያባ ኡባ እ ኦድዳይሳ ዳልላ በእዳ ዎደ፥ “ባ ዎዛናን ደእያባ ኡባ ታዉ ኦድዳ ግሾ፥ አነ እስ ቶሆ ስሚድ ዪተ” ያጋዳ ፍልስፄመ ሀላቃታስ ኪታ የድን ኤንቲ ብራ ኤክድ ኢኮ ይዶሶና።
JDG 16:19 ዳልላ ሳምሶና ባ ዎድረ ቦላ ꬍስክሳዳ እስ አስ ፄግን ይድ፥ እያ ሁጵያ ላፑን ዳꬃ ብናና ሜድን እያ ዎልቃይ እያፐ ꬋይስ። ሄሳፈ ጉየ፥ እያ ዋይሶ ዶማሱ።
JDG 16:20 እያ፥ “ሳምሶና፥ ፍልስፄመት ይዶሶና” ያጋሱ። እ ꬍስኮፈ ባርክድ፥ ካሰይሳዳ ዱሰረꬃዳ ባና ያግድ ቆፕስ፤ ሽን ጎዳይ እያፐ ሻከትዳይሳ ኤርቤና።
JDG 16:21 ፍልስፄመት እያ ኦይክዳፐ ጉየ፥ እያ ናምኡ አይፈታ ዎጭ ከስዶሶና። ጋዛ ካታማ ኤፍድ ናሰ ብራታ ሳንꬃላታን ቃችድ ቃሾ ኬꬃን ካꬅ ጋጭስዶሶና።
JDG 16:22 ኤንቲ እያ ሁጵያ ብናና ሜድዳፐ ጉየ፥ ብናናይ ስሚድ ዶሎ ዶምስ።
JDG 16:23 ፍልስፄመ ሀላቃት፥ “ኑ ፆሳይ ኑ ሞርክያ ሳምሶና ኑ ኩሸን አꬅድ እሚስ” ያግድ ባንታ ፆሳ ዳጎናስ ያርሾ ያርሻናዉነ ኡፋይታናዉ እስፈ ሺቅዶሶና።
JDG 16:24 አስ ኡባይ እያ በእዳ ዎደ፥ “ኑ ቢታ ꬋይስዳነ ኑፐ ዳሮታ ዎꬍዳ ኑ ሞርክያ፥ ኑ ፆሳይ ኑ ኩሸን አꬅድ እሚስ” ያግድ ባንታ ፆሳ ጋላትዶሶና።
JDG 16:25 ኤንቲ ዳሮ ኡፋይትዳ ግሾ፥ “ዱርድ ኑና ኡፋይሳና መላ ሳምሶና ፄግተ” ያግዶሶና። ሳምሶና ቃሾ ኬꬃፈ ፄግድ ኤህን፥ እ ኤንታ ስንꬃን ዱርዳፐ ጉየ ቱሳታፐ ግዶን ኤስዶሶና።
JDG 16:26 ሳምሶን ባ ኩሽያ ኦይክድ ካለꬅያ ናኣኮ፥ “ታኒ ኤንታን ዘምፓዳ ኤቃና መላ ኬꬃ ቶክዳ ቱሳታ ታና ኦይꬃ” ያግስ።
JDG 16:27 ኬꬃ ግዶን አደይነ ማጫስ፥ ሄሳዳካ ፍልስፄመ ሀላቃት ኡባይ ኩምድ ደኦሶና። ሳምሶን ዱርሽን፥ ፖቅያ ቦላ ኡትድ በእያ ሄꬑ ሙኩሉ ግድያ አደይነ ማጫስ በኦሶና።
JDG 16:28 ሄ ዎደ ሳምሶን፥ “አቤት ኡባ ሃርያ ጎዳዉ፥ ታና ቆፓርክ። አቤት ፆሳዉ፥ ፍልስፄመት ታ ናምኡ አይፈታ ከስዳ ግሾ፥ ሀሎ ከያና መላ ታና እስ ቶሆ ምንꬃርክ!” ያግድ ጎዳ ዎስስ።
JDG 16:29 ሳምሶን ኬꬃ ቶክዳ ግዶ ቱሳታ ናምኣካ ኦይክስ። እሱዋ ኡሻቻ ኩሸን፥ እሱዋ፥ ሀድርሳ ኩሸን ኦይክዳፐ ጉየ፥
JDG 16:30 “ታኒ ፍልስፄመታራ እስፈ ሀይቃና” ያግድ ዋስስ። ባዉ ደእያ ዎልቃ ኡባን ሱግን፥ ኬꬃይ ሀላቃታ ቦላነ ጋርሳን ደእያ አሳ ኡባ ቦላ ኩንድስ። ሳምሶን ፓፃ ደእሸ ዎꬍዳ አሳፐ ሀይቅሸ ዎꬍዳ አሳይ ዳሮ።
JDG 16:31 እያ እሻትነ እያ ዳቦት ኡባይ ይድ፥ እያ አሀ ኤክዶሶና። ፆርአፈነ ኤሽታኦላፐ ግዶን እያ አዋ ማኑሄ ዱፉዋን ሞግዶሶና። ሳምሶን እስራኤለ ላታሙ ላይꬅ አይስስ።
JDG 17:1 ደረይ ዳርያ ኤፍሬማ ቢታን ምካ ጌተትያ እስ አደይ ደኤስ።
JDG 17:2 እስ ጋላስ ሚክ ባ አይዉ፥ “ኔፐ አስ ታማነ እስ ክሎ ግራመ ብራ ሳንትመ ካይስን ኔኒ ሄ ካይስዳ አድያ ባድሽን ታ ስአስ። ሄ ሚሸይ ታ ማታን ደኤስ፤ ታኒ ኤካስ” ያግስ። እያ አይያ፥ “ታ ናአዉ፥ ነና ጎድ አንጆ” ያጋሱ።
JDG 17:3 ናአይ ታማነ እስ ክሎ ግራመ ብራ ሳንትመ አየስ ዛርስ። እያ አይያ፥ “ባደꬃይ ታ ናኣ ጋኮና መላ ታኒ ሀ ሚሽያ ጎዳስ ዱማያና። ብራ ሼሽድ፥ ምꬃፈ ኦሰትዳ ኤቃ ምስልያ ትያናዉ ጎኤታና፤ ብራ ታ ነዉ ዛራና” ያጋሱ።
JDG 17:4 ናአይ ሚሽያ ባ አየስ ዛርን፥ እያ ሄ ብራፐ ናምኡ ፄቱ ብራ ሳንትመ ኤካዳ፥ ምꬅ ማስድ፥ ብራ ሼሽ ትይድ፥ ኤቃ ምስለ መꬍያ፥ እስ ሂላስ እማሱ። እ ኦꬅዳ ምስለይ ምካ ሶን ኡትስ።
JDG 17:5 ምካስ ኤቃ ጎይንያ ኬꬅ ደኤስ። እ ኤፉደነ ሶ ግዶ ኤቃ ምስለታ ጊግስድ፥ ሄ ኬꬃን ባ ናይታፐ እሱዋ ካህነ ኦꬅድ ሹምስ።
JDG 17:6 ሄ ዎደ እስራኤለ ቢታን ካዎይ ባዋ፤ አስ ኡባይ ባዉ ሎኦ ዳንዳባ ኦꬄስ።
JDG 17:7 ሄ ዎደ ይሁዳ ቢታን ቤተለመ ካታማን ሌወ ኮቸ ግድዳ እስ ናአተꬃይ ደኤስ።
JDG 17:8 ሀ አደይ ባዉ ደእያ በሲ ኮያናዉ ቤተለመ ካታማፐ ደንድድ ደረይ ዳርያ ኤፍሬማ ቢታን ደእያ ምካ ሶ ጋክስ።
JDG 17:9 ምክ፥ “አዉፐ ያዲ?” ያግድ ኦይችስ። አደይ፥ “ታኒ ይሁዳ ቢታ ቤተለመ ካታማፐ ያስ፤ ታኒ ሌወ ኮቸ። ሀእ ታኒ ደእያ በሲ ኮያይስ” ያግድ ዛርስ።
JDG 17:10 ሚክ እያኮ፥ “ታራ ደአ፤ ታዉ አዋነ ካህነ ግዳ። ታኒ ነዉ ላይꬃን ላይꬃን ታሙ ብራ ሳንትመ፥ ኩመꬃ አፍላነ ምያባ እማና” ያግስ።
JDG 17:11 ናአተꬃ ሌወይ ምካራ እስፈ ዳናዉ ገልስ፤ ምካስ የልዳ ናአዳ ሀንስ።
JDG 17:12 ሚክ እያ ባ ካህነ ኦꬅድ ሹምን እያ ሶን ደእስ።
JDG 17:13 ሚክ፥ “እስ ሌወይ ታዉ ካህነ ግድዳ ግሾ ጎዳይ ታባ ሎይꬃናይሳ ኤራይስ” ያግስ።
JDG 18:1 ሄ ዎደ እስራኤለ ቢታን ካዎይ ባዋ። ሄ ዎደይ ጋካናዉ ዳነ ኮቻት እስራኤለ ኮቻታ ግዶን ላትዳ ቢት ባዋ። ኤንቲ ባንታዉ ደእያ ቢታ ኮይሸ ደኦሶና።
JDG 18:2 ሄሳ ግሾ፥ ዳነ ኮቻት ባንታ ግዶፈ እቻሹ ምኖ ኦላንቾታ ዶርድ ቢታ ዎቻና መላ ፆርአፈነ ኤሽታኦላፐ ኤንታ ኪትዶሶና። ኤንቲ ደረይ ዳርያ ኤፍሬማ ቢታ ጋክድ ምካ ሶን አቅዶሶና።
JDG 18:3 ኤንቲ ምካ ሶን ደእያ ዎደ ሌወ ኮቸ ግድዳ ናአተꬃ እያ ኦዳን ኤርዶሶና። ኤንቲ እያኮ ሺቅድ፥ “ነና ሀይሳ ኤህዳይ ኦኔ? ሀይሳ አይስ ያዲ?” ያግድ ኦይችዶሶና።
JDG 18:4 እ ዛሪድ፥ “ሚክ ታዉ ዳሞዘ ቃንፅን፥ ታኒ እያዉ ካህነ ግዳዳ ኦꬃይስ” ያግስ።
JDG 18:5 ኤንቲ፥ “ኑኒ ብያ ኦገይ ኑስ ሱራነ፥ ሱረነ ሀያና ኑስ ፆሰ ኦይቻ” ያግዶሶና።
JDG 18:6 ካህነይ፥ “ሳሮ ቢተ፤ ህንተ ብያ ኦግያን ጎዳይ ህንተራ ግዳና” ያግስ።
JDG 18:7 ሄሳፐ ጉየ፥ እቻሹ አሳት ያፐ ደንድድ፥ ላይሻ ካታማ ጋክዶሶና። ያን ደእያ አሳይ ስዶና ቢታ አሳዳ ሳሮን ደኤይሳ በእዶሶና፤ አሳት ኦንካ ስꬎና ዎፑ ግዳ አስ፤ ኤንታዉ አይኮይካ ፓጮና ኡባባይ ኩምዳ አስ። አይ አሳራካ ጋሄቶና ስዶና አሳፐ ሃክድ ባንታዉ ዱማ ደኦሶና።
JDG 18:8 እቻሹ አሳት ፆርአንነ ኤሽታኦላን ደእያ ባንታ እሻታኮ ስምዶሶና፤ ኤንታ እሻት፥ “አይ ዎረ ኤክድ ይደቲ?” ያግዶሶና።
JDG 18:9 ኤንቲ ዛሪድ፥ “ቢታይ ዳሮ አራዳ ግደይሳ ኑ በእዳ። አነ ደንድድ ላይሻ ኦሎስ። ሀይሳን ኦሶ ꬋይድ ጮ ኡቶፍተ፤ ኤለ ብድ ኦይክተ።
JDG 18:10 ህንተ ያ ብድ፥ ኦናነ ስꬎና ኡትዳ አሳኮ ጋካና። ቢታይ ዳልጋ፤ አሳስ ኮሽያ ኡባባይ ሄ ቢታን ደኤስ። ፆሳይ ሄ ቢታ ህንተዉ እሚስ” ያግዶሶና።
JDG 18:11 ያትን፥ ዳነ ኮቻፈ ቶራ ዳንጭዳ ኡሱፑን ፄቱ አሳት ፆርአፐነ ኤሽታኦላፐ ደንድድ ብዶሶና።
JDG 18:12 ይሁዳ ቢታን ቅርያት-ይኣርማፐ ዉሎሀ ባጋራ ኡትዶሶና። ሄሳ ግሾ፥ ሄ በሳይ ሀች ጋካናዉ ዳነ ጉታ ጌተትድ ፄገቴስ።
JDG 18:13 ያፐ ደንድድ ደረይ ዳርያ ኤፍሬማ ቢታን ደእያ ምካ ሶ ይዶሶና።
JDG 18:14 ላይሻ ቢታ ዎቻናዉ ብዳ እቻሹ አሳት ባንታ እሻታኮ፥ “ሀ በሳን፥ ሀ ኬꬃታፐ እሱዋን ኤፉደይ፥ ሶ ግዶ ኤቃ ምስለትነ ምꬃፈ ኦꬅድ ብራ ሼሽድ ትይዳ ምስለይ ደኤይሳ ኤሬቲ? አነ አይ ኦꬃናዉ ኮሽያኮ ቆፕተ” ያግዶሶና።
JDG 18:15 ኤንቲ ኦግያፐ ስሚድ፥ ሌወ ኮቸ ግድዳ ናአተꬃ ካህነይ ደእያ ምካ ሶ ብድ እያ ሳሮꬅዶሶና።
JDG 18:16 ሄ ዎደ ኡሱፑን ፄቱ ዳነ ኦላንቾት ኦላ ሚሸ ኦይክድ ፐንገ ቦላ ኤቅዶሶና።
JDG 18:17 ኤንቲ ሄ ካህንያራ ያን ኤቅዳሽን፥ ቢታ ዎችያ እቻሹ አሳት ምካ ሶ ገልድ፥ ምꬃፈ ኦꬅድ፥ ብራ ሼሽድ፥ ትይዳ ኤቃ ምስልያ፥ ኤፉድያነ ሶ ግዶ ኤቃ ምስለታ ኤክዶሶና።
JDG 18:18 ሄ ዎደ ካህነይ ኤንታ፥ “ዋተቲ?” ያግድ ኦይችስ።
JDG 18:19 ኤንቲ እያ፥ “ሀይዛ፥ እስ ቃላካ ፖጎፓ። ኑራ ባዳ ኑስ አዋነ ካህነ ግዳ። እስ ኬꬃ አሳስ ካህነ ግደይሳፈ እስራኤለ ግድያ እስ ኮቻስ ካህነ ግደይስ ነዉ ሎኤኔ?” ያግዶሶና።
JDG 18:20 ካህነይ ሄሳ ስእድ ኡፋይትድ ኤፉድያ፥ ሶ ግዶ ኤቃ ምስለታነ ምꬃፈ ኦꬅድ ብራ ሼሽድ ትይዳ ምስልያ ኤክድ ኤንታራ ብስ።
JDG 18:21 ያፐ ደንድድ፥ ባንታ ናይታ፥ ባንታ መህያነ ባንታዉ ደእያባ ኡባ ስን አꬅድ ብዶሶና።
JDG 18:22 ኤንቲ ምካ ሶፐ ሃክድ ብዳፐ ጉየ፥ ሚክ ባ ሾሮታ ፄግን፥ ዳነ አሳታ ካልድ ጋክዶሶና።
JDG 18:23 ኤንታ ጋክድ ዋስን፥ ዳነ አሳት ጉየ ስሚድ፥ “ዋናዲ? ሀ አሳ ኡባ አይስ ሺሻዲ?” ያግድ ምካ ኦይችዶሶና።
JDG 18:24 ሚክ ዛሪድ፥ “ታኒ መꬍዳ ታ ፆሳታነ ታዉ ኦꬅያ ካህንያ ቦንቅደታ። ያትን ታዉ አትዳባይ አይቤ? ታና፥ ‘ዎይግድ ዋናድ፥ ጌቲ?’ ” ያግስ።
JDG 18:25 ዳነ አሳት፥ “አነ ዶና ፖጋዳ ነና ኤራ! ሀ ሸነራ ደእያ አሳ ኔኒ ደንꬅኮ፥ ኤንቲ ነ ቦላ ደንዳና፤ ነናነ ሶ አሳ ኡባ ꬋይሳና” ያግዶሶና።
JDG 18:26 ዳነ አሳት ባንታ ኦግያ ብዶሶና። ምክካ ኤንቲ ባፐ ዳሮ ምኖ ግደይሳ በእድ ባ ሶ ስምስ።
JDG 18:27 ዳነ አሳት ሚክ መꬍዳ ፆሳታነ እያ ካህንያ ኤክድ፥ ሌሳን ኦናካ ስꬎና ሳሮ ደእያ አሳታኮ ብድ፥ አሳ ኡባ ማሻን ዎꬍድ ካታማ ታማን ፁግዶሶና።
JDG 18:28 ላይሻ ካታማይ ስዶናፐ ሃክድ ደእያ ግሾነ ኤንቲ ሀራ አሳራ ጋሄትድ ኤሮና ግሾ ኤንታ አሻናዉ ኦንካ ዳንዳእቤና። ላይሻ ካታማይ ቤት-ረሆባ ጌተትያ በሳ ማታን ደእያ ዛንጋራን ደኤስ። ዳነ አሳት ካታማ ዛር ኬፅድ ያን ደእዶሶና።
JDG 18:29 ካታማ ሱንꬃ በን ባንታ ማይዛ ያይቆባ ናኣ ዳነ ሱንꬃን ላምድ፥ ዳነ ያግድ ሱንꬅዶሶና፤ ሽን ኮይሮ ሄ ካታማይ ላይሻ ጌተቴስ።
JDG 18:30 ዳነ አሳት ባንታዉ ኤቃ ምስልያ ያን ዎꬅድ፥ ሙሰ ናኣ ገድሶናፐ የለትዳ ዮናታና ባንታ ካህነ ኦꬅዶሶና። እያ ኮቻት አሳይ ድኤትድ ብዳ ዎደ ጋካናዉ ያን ካህነ ግድዶሶና።
JDG 18:31 ሄሳዳ ሀንድ፥ ጌሻ ዱንካነይ ሴሎን ደእዳ ላይꬃ ኡባን ሚክ ኦꬅዳ ምስለት ያን ጋምእዶሶና።
JDG 19:1 እስራኤለ ቢታን ካዎይ ባይና ዎደ ደረይ ዳርያ ኤፍሬማ ቢታን፥ ሃሆ በሳን፥ ሌወ ኮቸ ግድዳ እስ ኡራይ ደኤስ። ሄ ኡራይ ይሁዳ ቢታን፥ ቤተለመ ካታማፐ እስ ላገꬆ ባዉ ኤህስ።
JDG 19:2 ሽን እያራ ኦየታዳ ይሁዳ ቢታን ቤተለመ ካታማን ደእያ ባ አዋ ሶ ባዳ ያን ኦይዱ አጌና ኡታሱ።
JDG 19:3 እ አዝናይ እዮ ጭማትድ ሶ ዛራናዉ ባ አይልያነ ናምኡ ሀረታ ኤክድ ብስ። እ ያ ጋክያ ዎደ እያ ሞካ ኤካዳ ባ አዋ ሶ ገልሳሱ፤ እ አዋይ እያ በእዳ ዎደ ኡፋይትድ ሞክስ።
JDG 19:4 ናኤ አዋይ እያ የዶና እፅን፥ ያን እያራ ምሸነ ኡይሸ ሄꬑ ጋላስ ጋምእስ።
JDG 19:5 ኦይዳንꬆ ጋላስ ዎንታ ጉራ ደንድድ፥ ባናዉ ጊግዶሶና። ሽን ናኤ አዋይ ባ ናኤ አዝናኮ፥ “ጉꬃ ካꬅ ማዳ ጋሽታዳ ባ” ያግስ።
JDG 19:6 ናምኡ አሳት ኡትድ እስፈ ምዶሶናነ ኡይዶሶና። ሄሳፈ ጉየ ናኤ አዋይ እያኮ፥ “ሀያና፥ ሀች ኡፋይታዳ ሀይሳን አቃ” ያግስ።
JDG 19:7 ሌወይ ባናዉ ደንድን፥ ናኤ አዋይ ቦና መላ ዎስን ቃስካ ያን አቅስ።
JDG 19:8 እቻሻንꬆ ጋላስ ዎንታ ጉራ ባናዉ ደንድን፥ ናኤ አዋይ፥ “ሀያና፥ ጉꬃ ካꬅ ማዳ፥ ጋሽታዳ ኦማርስ ባ” ያግስ። ኤንቲ ናምአይካ እስፈ ካꬅ ምዶሶና።
JDG 19:9 ሌወይ ባ ላገራነ ባ አይልያራ ባናዉ ከይን፥ ናኤ አዋይ፥ “ሄኮ፥ ሳእ ቃምስ፤ ሀእካ አቅተ፤ ዎንታ ጉራ ደንድድ ህንተ ሶ ቢተ” ያግስ።
JDG 19:10 ሽን እ ያን አቃናዉ ኮይቦና ግሾ ባ ላገꬅዉ፥ ባ አይልያነ ናምኡ ጫነትዳ ሀረታ ኤክድ ያቡሰ ጌተትያ የሩሳላመ ካታማ ጋክዶሶና።
JDG 19:11 ኤንቲ ያቡሰ ማትያ ዎደ ሳእ ዳሮ ኦማርስን፥ አይለይ፥ “ሀይሳን፥ ያቡሰታ ካታማን አቅኮ ዋናኔ?” ያግድ ባ ጎዳ ኦይችስ።
JDG 19:12 ሽን እያ ጎዳይ፥ “ሀይሳን፥ እስራኤለ አስ ባይና አላጋ ካታማ ቦኮ። ግብአ ካታማ ጋካናዉ ባና” ያግስ።
JDG 19:13 ቃስካ ባ አይልያኮ፥ “ሃያ፥ ኑኒ ግብአን ዎይኮ ራማን አቅያ በሲ ደማና” ያግስ።
JDG 19:14 ሄሳ ግሾ ባንታ ኦግያ ኦይክድ ብዶሶና። ብንያመ ቢታን ግብአ ካታማ ኤንቲ ማትያ ዎደ አው ዉልስ።
JDG 19:15 ኤንቲ ግብአ ካታማ ገልድ አቃናዉ ያ ብዶሶና። ሄ ካታማ አሳይ ዱላታ ኡትያ በሳን ኡትዶሶና፤ ሽን ኤንታ ባ ሶ ኤፍድ አይስያ አስ በንትቤና።
JDG 19:16 ኤንቲ ያን ኡትዳሽን፥ ሳእ ኦማርስን ጋደፐ ባ ሶ ስምያ እስ ጭማ አደይ ኤንታ ማታራ አꬍስ። ሀ አደይ ካሰ ደረይ ዳርያ ኤፍሬማ ቢታፈ ይዳ አስ፤ ሽን ሀእ ግብአ ካታማን ደኤስ። ሄ ቢታን ብንያመ ኮቻፈ የለትዳ አሳይ ደኦሶና።
JDG 19:17 ሄ ጭማ አደይ፥ ካታማ አሳይ ዱላታ ኡትያ በሳን ኡትዳ አድያ በእድ፥ “አዉፐ ያዲ? አዉ ባይ?” ያግድ ኦይችስ።
JDG 19:18 ሌወይ ዛሪድ፥ “ኑኒ ይሁዳ ቢታን ቤተለመ ካታማፐ ይዳ። ሀእ ደረይ ዳርያ ኤፍሬማ ቢታን፥ ሃሆ በሳን ደእያ ፆሳ ኬꬅነ ኑ ሶ ቦስ። ኑና ባ ሶ ኤፍድ አይስያ አስ ደምቦኮ።
JDG 19:19 ኑ ሀረታስ ኡቱልነ ካለይ ደኤስ፤ ታዉ፥ ታ ላገስነ ታ አይልያስ ግድያ ካꬅነ ዎይነ ኡሽ ደኤስ፤ ኑስ ኮሽያባ ኡባ ኦይክዳ” ያግስ።
JDG 19:20 ጭማ አደይ፥ “ሳሮይ ህንተዉ ግዶ፤ ታ ሶ የꬍተ፤ ታ ሶን አቅተ፤ ህንተ ኮያባ ኡባ ታ ህንተዉ እማና። ሀ ካታማ ዳባባን ህንተ አቃናዉ በሰና” ያግስ።
JDG 19:21 ኤንታ ባ ሶ ኤፍስ፤ ኤንታ ሀረታስ ምያባ የግስ። እማꬃት ባንታ ቶሁዋ ሜጨትድ ካሆ ምዶሶና።
JDG 19:22 ኤንቲ ኡፋይትሽን፥ ካታማፐ ኢታ አሳት ይድ፥ ኬꬃ ተቅድ፥ ፐንግያ ቆፀꬅ ዶምዶሶና። ኤንቲ ጭማ አድያኮ፥ “ሀ ነ ሶ ገልዳ አድያ ሃ ከሳ፤ ኑኒ እያራ ጋሄታናዉ ኮዮስ” ያግዶሶና።
JDG 19:23 ሄ ኬꬃ ጎዳይ፥ “ሀነና፤ ታ እሻቶ፥ ሄሳ መላ ፓላባ ኦꬆፕተ፤ ሀ አደይ ታ እማ።
JDG 19:24 ሄኮ፥ ታ ጌላኦ ናእያነ እያ ላገꬅያ ሀይሳን ደኦሶና። ታኒ ኤንታ ህንተዉ ካረ ከሳና፤ ህንተ ኤንታ ቦላ ኮይዳባ ኦꬅተ፤ ሽን ሀ አድያ ቦላ ሄሳ መላ ኢታባ ኦꬆፍተ” ያግስ።
JDG 19:25 ሽን አሳት እ ግዳይሳ ስኦና እፅዶሶና። ሌወይ ባ ላገꬅዉ ካረ ሆልስ። ሳእ ዎንታና ጋካናዉ ቃማ ኩመꬅ ታራን ታራን ኢራ ዎልቃን ጋሄትድ፥ እዮ ፓፃ ካእሸ አይስዶሶና፤ ሳእ ዎንታና ሀንሽን እዮ የድ አግዶሶና።
JDG 19:26 ዎንታናዉ ጎንተይ ዞእያ ዎደ ያዳ፥ እ ጎዳይ አቅዳ ጭማ አድያ ኬꬃ ፐንገን ኩንዳሱ፤ ፃልቀይ ዶላና ጋካናዉ ያን ዝንአሱ።
JDG 19:27 ዎንታ እ ጎዳይ ደንድድ፥ ባ ኦግያ ባናዉ ፐንግያ ዶይድ ከይያ ዎደ እያ ላገꬅያ ኬꬃ ፐንገን ባ ኩሽያ ምጫዳ ጉፋንዳሮ በእስ።
JDG 19:28 እ ጎዳይ፥ “ደንዳ፤ አነ ቦስ” ያግስ። ሽን እያ አይኮካ ዛራቡኩ። ያትን፥ እ አሀ ሀረን ጫንድ ባ ሶ ብስ።
JDG 19:29 እ ባ ሶ ጋክዳ ዎደ ማሻ ኤክድ፥ ባ ላገ አሀ ታማነ ናምኡ በሳን ቃንፀረꬅድ፥ እስ እስ ቃንፁዋ ታማነ ናምኡ እስራኤለ ኮቻታስ የድስ።
JDG 19:30 ሄሳ በእዳ ኡባይ፥ “እስራኤለ አሳይ ግብፀ ቢታፈ ከዮደፐ ሀች ጋካናዉ ሀይሳ መላባይ ሀንቤና፤ ኑካ በእቦኮ። አነ ሀይሳ ቆፕ በእድ፥ አኬካን ዞረትድ፥ አይ ኦꬃነኮ ኑስ ኦድተ” ያግዶሶና።
JDG 20:1 ዳነፐ በርሳበ ጋካናዉ ጋላዳን ደእያ እስራኤለ አስ ኡባይ እስ አሳዳ ምፅጳን ጎዳ ስንꬃን እስፈ ሺቅዶሶና።
JDG 20:2 ሄ ሺቅዳ ፆሳ አሳራ፥ እስራኤለ ዛረ ኡባ ሀላቃት ደኦሶና። ኤንታ ግዶን ማሸ ዳንጭድ ኦለታናዉ ዳንዳእያ 400,000 ኦላንቾት ደኦሶና።
JDG 20:3 ሄ ዎደ እስራኤለ አሳይ ምፅጳን ሺቅዳይሳ ብንያመ አሳይ ስእዶሶና። እስራኤለ አሳይ፥ “ሀ ኢታባይ ዋንድ ሀንዳኮ ኑስ ኦድተ” ያግዶሶና።
JDG 20:4 ሀይቅዳ ላገ አዝናይ፥ ሌወይ፥ ሀይሳዳ ያግድ ዛርስ፤ “ታንነ ታ ላገꬅያ ሳእ ቃምን አቃናዉ ብንያመ ቢታን ደእያ ግብአ ካታማ ይዳ።
JDG 20:5 ግብአ ካታማ አሳት ታና ዎꬋናዉ ይድ፥ ኬꬃ ዩሹዋ ተቅዶሶና። ሽን ጉየፐ ታ ላገራ ዎልቃን፥ ታራን ታራን ጋሄትድ እዮ ዎꬍዶሶና።
JDG 20:6 ታኒ እ አሀ ኤካዳ ቃንፀረꬃስ፤ ኤንቲ ሀ ኢታባነ ዬላባ እስራኤለን ኦꬅዳ ግሾ እስራኤለ አሳይ ደእያ ቢታ ኡባ እስ እስ ቃንፆ የዳስ።
JDG 20:7 ህዛ፥ ህንተ ኡባይ እስራኤለ አስ፤ ዞረትድ በሲያ ፕርዳ እምተ” ያግስ።
JDG 20:8 አሳ ኡባይ እስፈ ደንድድ፥ “ኑ ግዶፈ ኦንካ ባ ዱንካንያ ዎይኮ ባ ኬꬃ ጉየ ስመና።
JDG 20:9 ኑኒ ግብአ ቦላ ሀይሳ ኦꬃና፤ ሳማ የግድ፥ ግብአ ካታማ ኦላናዉ ባና አሳታ ዶራና።
JDG 20:10 እስራኤለ ዛረ ኡባፈ ኦላ ብያ አሳስ ሽንቀ ጊግሳና መላ ፄታፐ ታማ፥ ሙኩላፐ ፄታ፥ ታሙ ሙኩላፐ እስ ሙኩላ ዶርድ ኤካና። አትዳ ኦላንቾት ብንያመ ቢታን ደእያ ግብአ ብድ፥ እስራኤለ ቦላ ሀይሳ መላ ኢታባ ኦꬅዳ አሳ ቦላ ሀሎ ከያናዉ ቦ” ያግዶሶና።
JDG 20:11 እስራኤለ አሳ ኡባይ ካታማ ኦላናዉ እስፈ ሺቅዶሶና።
JDG 20:12 እስራኤለ ኮቻት ብንያመ ኮቻ ኡባስ ሀይሳዳ ያግድ አሰ ኪትዶሶና፤ “ህንተ ግዶን ሀንዳ ሀ ኢታባይ አይቤ?
JDG 20:13 ኑኒ ኤንታ ዎꬍድ፥ እስራኤለፐ ኢታባ ꬋይሳና መላ ግብአን ደእያ ሄ ኢታ አሳታ ከስድ ኑስ እምተ” ያግዶሶና። ሽን ብንያመት እስራኤለ አሳይ ኦድዳይሳ ስኦና እፅዶሶና።
JDG 20:14 ኤንቲ እስራኤለ አሳራ ኦለታናዉ ባንታ ካታማታፐ ከይድ እስፈ ግብአን ሺቅዶሶና።
JDG 20:15 ሄ ጋላስ ብንያመ ካታማታፐ ይዳ ማሻን ኦለትያ ላታማነ ኡሱፑን ሙኩሉ ኦላንቾታ ሺሽዶሶና። ሄስካ ግብአን ደእያ አሳ ግዶፈ ዶረትዳ ላፑን ፄቱ አሳፐ ሀራ።
JDG 20:16 ሀ ኦላንቾታ ግዶፈ ላፑን ፄቱ አሳት ሀድርሳ ኩሸን ኦይሳታ፤ ኤንቲ ያምባርሻን ሹቹ ሆልድ፥ ሀር አቶሽን እስ ብናናካ ባሎኮና።
JDG 20:17 ብንያመ አሳ ጉጆና፥ እስራኤለ አሳይ ማሻን ኦለትያ 400,000 ኦላንቾታ ሺሽዶሶና።
JDG 20:18 እስራኤለ አሳይ ደንድድ፥ ቤተለ ብድ፥ “ብንያመ አሳ ኦላናዉ ኑፐ ስንꬃትድ ከያናይ ኦኔ?” ያግድ ፆሳ ኦይችዶሶና። ጎዳይ፥ “ይሁዳ ኮቻይ ስንꬃትድ ከዮ” ያግስ።
JDG 20:19 ዎንተꬃ ጋላስ ዎንታ ጉራ እስራኤለ አሳይ ደንድድ ግብአ ካታማ ማታን ሺቅዶሶና።
JDG 20:20 ሄሳፈ ጉየ እስራኤለ አሳይ ብንያመ አሳ ኦላናዉ ብድ ግብአ ካታማ ማታን ሳልፕዶሶና።
JDG 20:21 ሄ ጋላስ ብንያመ አሳይ ግብአፐ ከይድ፥ እስራኤለ አሳፐ 22,000 ኦላንቾታ ዎꬍዶሶና።
JDG 20:22 እስራኤለ አሳይ እሶይ እሱዋ ምንꬅን፥ ኮይሮ ጋላስ ኤንቲ ኦላስ ሳልፕዳ በሳን ናምአንꬆ ሳልፕዶሶና።
JDG 20:23 እስራኤለ አሳይ ብድ ሳእ ቃማና ጋካናዉ ጎዳ ስንꬃን ዬክዶሶና። ኤንቲ፥ “ኑ እሻታራ፥ ብንያመ አሳታራ ኦለታናዉ ናምአንꬆ ከይኖ?” ያግድ ጎዳ ኦይችዶሶና። ጎዳይ፥ “ኤ፥ ኤንታራ ኦለታናዉ ከይተ” ያግስ።
JDG 20:24 እስራኤለ አሳይ ብንያመ አሳራ ኦለታናዉ ናምአንꬆ ሺቅዶሶና።
JDG 20:25 ናምአንꬆ ጋላስካ ብንያመ አሳይ ግብአ ካታማፐ ከይድ፥ እስራኤለ ኦላንቾታፐ ማሻን ኦለትያ 28,000 አሳ ዎꬍዶሶና።
JDG 20:26 ሄሳፈ ጉየ፥ እስራኤለት ኡባይ ቤተለ ብድ ዬክዶሶና፤ ያን ፆምሸ ሳእ ቃማና ጋካናዉ፥ ጎዳ ስንꬃን ኡትዶሶና። ጎዳ ስንꬃን ፁሳ ያርሾነ እስፈተꬃ ያርሾ ሺሽዶሶና።
JDG 20:27 ሄ ዎደ ፆሳ ጫቆ ታቦተይ ቤተለ ካታማን ደእያ ግሾ እስራኤለ አሳይ ጎዳ ኦይችዶሶና።
JDG 20:28 ሄ ዎደ አሮና ናአይ፥ አላዛራ ናአይ ፍንሃስ ካህነተꬃን ኦꬄስ። እስራኤለ አሳይ፥ “ኑ እሻ ግድዳ ብንያመ አሳራ ኦለታናዉ ከይኖየ አትኖ” ያግድ ጎዳ ኦይችዶሶና። ጎዳይ፥ “ብድ ኦለትተ፤ ታኒ ኤንታ ዎንቶ ህንተ ኩሸን አꬃዳ እማና” ያግስ።
JDG 20:29 እስራኤለ አሳይ ጉꬃ ኦላንቾት ግብአ ካታማ ዩሹዋን ዙግድ ናጋና መላ ኦꬅዶሶና።
JDG 20:30 ሄꬓንꬆ ጋላስ እስራኤለ ኦላንቾት ካሰይሳዳ ብንያመ ኦላንቾታ ኦላናዉ ብድ፥ ግብአ ካታማፐ ስንꬃ ባጋራ ሳልፕዶሶና።
JDG 20:31 ብንያመ አሳይ ኤንታራ ኦለታናዉ ካታማፐ ከይድ፥ ኤንታ ካል ከይድ ሃክድ ብዶሶና። ካሰይሳዳ ቤተለነ ግብአ ኤፍያ ዳልጋ ኦገታንነ ደምባታን እስራኤለ አሳፐ ሀስታሙ ግድያ አሳ ዎꬍዶሶና።
JDG 20:32 ብንያመ አሳይ፥ “ኑኒ ካሰይሳዳ ኤንታ ፆንዳ!” ያግዶሶና። ሽን እስራኤለ አሳይ፥ “ኤንቲ ካታማፐ ሃክድ፥ ኦግያ ቦላ ከያና መላ አነ ኑኒ ባቃቶስ” ያግድ ዎፅዶሶና።
JDG 20:33 እስራኤለ አሳ ኡባይ ባንታ በሳፈ ደንድድ፥ ባኣል-ታማራ ጌተትያ በሳን ሳልፕያ ዎደ ግብአ ደንባን ዙግድ ኡትዳ እስራኤለት ከይዶሶና።
JDG 20:34 እስራኤለ አሳፐ ዶረትዳ ታሙ ሙኩሉ አሳይ ግብአ ቦላ ኦላ ደንꬅዶሶና፤ ኦላይ ዳሮ ዎልቃምስ። ሄ ኡባይ ሀንያ ዎደ ብንያመ አሳስ ꬋዮይ ማትዳይሳ ኤርቦኮና።
JDG 20:35 እስራኤለት ብንያመ አሳ ቦላ ፆኖ ደማና መላ ጎዳይ ኦꬅስ። ሄ ጋላስ እስራኤለ አሳይ ብንያመ አሳፐ ማሻን ኦለትያ ላታማነ እቻሹ ሙኩሉነ እስ ፄቱ ኦላንቾታ ዎꬍዶሶና።
JDG 20:36 ሄሳፈ ጉየ፥ ብንያመ አሳይ ፆነትዳይሳ ኤርዶሶና። እስራኤለ አሳይ ግብአ ካታማ ዩሹዋን ዙግድ ኡትዳ ኦላንቾታን አማነትዳ ግሾ፥ ብንያመ አሳን ፆነትዳባ ዳንድ ጉየ ሺቅዳ ግሾሳ።
JDG 20:37 ቆሰትድ ናግያ ኦላንቾት ግብአ ካታማ ኤለስ ዎፅ ገልድ ካታማ ግዶን ደምዳ ኡባ ዎꬍዶሶና።
JDG 20:38 ቆሰትድ ናግያ አሳትነ እስራኤለ አሳይ ጩያ ሻራዳ ደንꬃና መላ ካሰ ዞረት ኡትዶሶና።
JDG 20:39 ኦላ ደንባን ደእያ እስራኤለ አሳይ ባቃተይሳ አግድ፥ ጉየ ስሚድ፥ ኤንታ ኦልዶሶና። ብንያመ አሳይ እስራኤለ አሳፐ ሀስታሙ ግድያ አሳ ዎꬍድ፥ “ካሰይሳዳ ሀእካ ኑ ኤንታ ፆንዳ” ያግዶሶና።
JDG 20:40 ሽን ማላ ጩያይ ካታማፐ ፑደ ከስ ዶምስ። ብንያመ አሳይ ጉየ ፄልያ ዎደ ካታማይ ታማን ፁገትን፥ ጩያይ ፑደ ከየይሳ በእዶሶና።
JDG 20:41 ሄሳፈ ጉየ፥ እስራኤለት ብንያመ አሳ ቦላ ጉየ ስምዶሶና። ብንያመ አሳይ ዉራና ሀነይሳ ኤርዳ ግሾ ዳጋምዶሶና።
JDG 20:42 ሄሳ ግሾ፥ ኤንቲ እስራኤለ አሳ ስንꬃፈ ባዞ ስሚድ ባቃትዶሶና፤ ሽን ከስ ኤካናዉ ዳንዳእቦኮና። ካታማታፐ ከይዳ እስራኤለ ኦላንቾት ግዱዋን ኤንታ ዎꬍ ዉርስዶሶና።
JDG 20:43 እስራኤለት ብንያመ አሳ ተቅድ፥ ግብአ ካታማፐ ዶሎሀ ባጋራ ደእያ በሳ ጋካናዉ የደꬅድ ዳሮታ ዎꬍዶሶና።
JDG 20:44 ያን ብንያመ አሳፐ ታማነ ሆስፑን ሙኩሉ ምኖ ኦላንቾት ሀይቅዶሶና፤
JDG 20:45 ኤንታፈ አትዳይሳት ጉየ ስሚድ፥ ባዙዋ ካንꬅድ፥ እርሞና ዛላኮ ባቃትዶሶና። እስራኤለት ኤንታፈ እቻሹ ሙኩሉ አሳ ኦገ ቦላ ዎꬍዶሶና። ኤንታፈ አትዳይሳታ ግዶማ ጋካናዉ የደꬅድ ናምኡ ሙኩሉ አሳ ዎꬍዶሶና።
JDG 20:46 ሄ ጋላስ ብንያመ አሳፐ ማሻን ኦለትያ ላታማነ እቻሹ ሙኩሉ ምኖ ኦላንቾት ሀይቅዶሶና።
JDG 20:47 ሽን ኡሱፑን ፄቱ አሳት ባዙዋ ካንꬅድ፥ እርሞና ዛላኮ ባቃትድ፥ ያን ኦይዱ አጌና ጋምእዶሶና።
JDG 20:48 እስራኤለ አሳይ አትዳ ብንያመ አሳኮ ጉየ ስሚድ፥ አደነ ማጫ፥ ናይታነ መህያ ኡባ ዎꬍዶሶና፤ ሄራን ደእያ ካታማታ ኡባ ታማን ፁግዶሶና።
JDG 21:1 እስራኤለ አሳይ ምፅጳን ሺቅዳ ዎደ፥ “ኑ ግዶፈ ኦንካ ብንያመ አሳስ ባ ናአ ማቾ እሞፎ” ያግድ ጫቅ ኡትዶሶና።
JDG 21:2 እስራኤለት ቤተለ ካታማ ብድ፥ ያን ሳእ ቃማና ጋካናዉ ፆሳ ስንꬃን ኡትድ፥ ባንታ ቃላ ꬎቁ ኦꬅድ ዬክዶሶና።
JDG 21:3 ኤንቲ፥ “አቤት ጎዳዉ፥ እስራኤለ ፆሳዉ፥ ሀይስ እስራኤለን አይስ ሀንዴ? ሀች እስራኤለ አሳ ግዶፈ እስ ኮቻይ አይስ ፓጭዴ?” ያግዶሶና።
JDG 21:4 ዎንተꬃ ጋላስ ጉራ ደንድድ፥ ያርሾ በስ ጊግስድ፥ ፁሳ ያርሾነ እስፈተꬃ ያርሾ ሺሽዶሶና።
JDG 21:5 እስራኤለት፥ “እስራኤለ ዛረ ኡባፈ ጎዳ ስንꬃን ሺቅያ በሳ ዮና ኮቻይ ኦኔ?” ያግድ ኦይችዶሶና። ኤንቲ ሄሳ ኦይችዳ ጋሶይ፥ “ምፅጳ ካታማን ጎዳ ስንꬃን ሺቃናዉ ይቦና አስ ኦንካ ሀይቆ” ያግድ ካሰ ጫቅዳ ግሾሳ።
JDG 21:6 እስራኤለ አሳይ ባንታ እሻታስ፥ ብንያመ ኮቻታስ ቃትድ፥ “ሀች እስራኤለፐ እስ ኮቻይ ꬋይስ።
JDG 21:7 ኑኒ ኑ ማጫ ናይታ ኤንታዉ እሞና መላ ጎዳን ጫቅዳ ግሾ ሀይቆፐ አትዳ ብንያመ ኮቻት ማቾ ኤካና መላ ኑኒ አይ ኦꬅኖ?” ያግዶሶና።
JDG 21:8 ቃስካ ኤንቲ፥ “እስራኤለ ኮቻታፐ ምፅጳን ጎዳ ስን ዮናይ ኦኔ?” ያግድ ኦይችዶሶና። ጋላዳን ደእያ ያበሳ ካታማፐ እስ አስካ ቃንገꬅ ጋꬃናዉ ዮናይሳ በእዶሶና።
JDG 21:9 ኤንቲ አሳ ታይብዳ ዎደ ጋላዳን ደእያ ያበሳፐ እስ አስካ በንትቤና።
JDG 21:10 ሄሳ ግሾ፥ ማባራይ 12,000 ምኖ ኦላንቾታ ጋላዳን ደእያ ያበሳ ካታማ ኪትዶሶና። ብድ፥ “ያበሳን ደእያ ማጫሳነ ናይታ እሱዋካ አሾና ማሻን ቡꬅተ።
JDG 21:11 ሄሳዳ ኦꬅድ፤ አደነ አደራ አቅዳ ማጫ ኡባ ዎꬍተ” ያግድ ኪትዶሶና።
JDG 21:12 ያበሳ ካታማን ደእያ አሳ ግዶፈ አደራ አቅቦና ኦይዱ ፄቱ ጌላኦ ማጫ ናይታ ደምዶሶና። ኤንታ ካናነ ቢታን፥ ሴሎን ዱንካንዳ ጉታ ኤክድ ይዶሶና።
JDG 21:13 ሄሳፈ ጉየ፥ ኩመꬃ ማባራይ እርሞና ዛላ ማታን ደእያ ብንያመ አሳራ ስገታናዉ ጭማ የድዶሶና።
JDG 21:14 ብንያመ አሳት ስሚድ ይዶሶና። እስራኤለ አሳይ ያበሳ ካታማፐ ዎꬎና ኤህዳ ጌላኦ ናይታ ኤንታዉ እምዶሶና። ሽን ጌላኦታ ታይቦይ አደታ ታይቡዋራ ግንቤና።
JDG 21:15 እስራኤለ ኮቻታ ግዶን ደእያ እስፈተꬃይ ዱፃና መላ ጎዳይ ኦꬅዳ ግሾ አሳይ ብንያመታስ ዳሮ ቃትዶሶና።
JDG 21:16 ማባራ ጭማት፥ “ብንያመ ኮቻታፐ ማጫስ ሀይቅድ ዉርዳ ግሾ፥ ሀይቆፐ አትዳ አደታስ ኑኒ ማጫስ ዋትድ ደማኔ?
JDG 21:17 እስራኤለ አሳ ግዶፈ ቁሸትድ ꬋዮና መላ ብንያመ ኮቻታፐ አትዳይሳታ ላትያ ናእ ዳናዉ ኮሼስ።
JDG 21:18 ግዶሽን፥ ኑኒ ኑ ማጫ ናይታፐ ኤንታዉ እማናዉ ዳንዳኦኮ። እስራኤለ አሳይ ካሰ፥ ‘ባ ናአ ብንያመ ኮቻስ እምያ ኡራይ ባደትዳይሳ ግዶ’ ያግድ ጫቀትድ ኡትዶሶና” ያግዶሶና።
JDG 21:19 ያትን፥ ጭማት፥ “ሄኮ፥ ላይꬃን ላይꬃን ሴሎን ጎዳ ቦንችያ ባለይ ማትስ” ያግዶሶና። ሴሎይ ቤተለፐ ፑደሀ ባጋራ፥ ላቦናፐ ዱገሀ ባጋራ፥ ቤተለፐ ሴከማ ኤፍያ ኦግያፐ ዶሎሀ ባጋራ ደኤስ።
JDG 21:20 ሄሳ ግሾ፥ ጭማት፥ ብንያመ አሳታ ሀይሳዳ ያግድ ኪትዶሶና፤ “ብድ ዎይነ ጋደ ግዶን ቆሰትድ፥
JDG 21:21 ናግተ። ሴሎ ካታማ ማጫ ናይት ባኣለ ጋላስ ካራቦ ኦይክድ፥ የፅሸነ ዱርሸ ያ ዎደ ህንተ ዎይነ ጋደ ግዶፈ ከይተ። ሴሎ ማጫ ናይታፐ ዳፍ ኤክድ፥ ብንያመ ቢታ ኤፍተ።
JDG 21:22 ኤንታ አዋት ዎይኮ ኤንታ እሻት ኑኮ ማጋናናዉ ያ ዎደ ኑኒ ኤንታኮ፥ ‘ሀያና፥ ኤንታ ኑስ እምተ፤ ኑኒ ኤንታ ኦላ በሳፈ ኡንኤꬅድ ኤክቦኮ። ህንተ ዶስድ እምቦና ግሾ ባላ ግደከታ’ ያጋና” ያግዶሶና።
JDG 21:23 ብንያመ አሳይ እስራኤለ ጭማት ግዳይሳዳ ኦꬅዶሶና። እሶይ እሶይ ሴሎን የፅያ ማጫ ናይታፐ ባዉ ማቾ ዳፍድ ኤክስ። ኤንቲ ባንታ ላታ ቢታ ስሚድ፥ ካታማታ ዛር ኬፅድ ያን ደእዶሶና።
JDG 21:24 ሄ ዎደ እስራኤለ አሳይ ያፐ ላለትድ፥ እሶይ እሶይ ባ ኮቻኮ፥ ባ ኮቻኮነ ባ ሶ አሳኮ ብስ።
JDG 21:25 ሄ ዎደ እስራኤለ ቢታን ካዎይ ባዋ፤ አስ ኡባይ ባዉ ሎኦ ዳንዳባ ኦꬄስ።
RUT 1:1 እስራኤለ ቢታ ዳይናት አይስያ ዎደ ሄ ቢታን ኮሽ ከይስ። እስ አደይ ባ ማቸራነ ባ ናምኡ አደ ናይታራ ይሁዳ ቢታን ቤተለመ ካታማፐ ደንድድ ሞአበ ቢታ ጉꬃ ዎደ ያን ዳናዉ በትስ።
RUT 1:2 ሄ አድያ ሱንꬃይ አበመለከ፥ እያ ማቸ ሱንꬃይ ኑሃሞ፥ እያ ናምኡ አደ ናይታ ሱንꬃይ ማሀሎናነ ከለዎና። ኤንቲ ይሁዳ ቤተለመን ደእያ ኤፍራታ ያራ። ኤንቲ ሞአበ ብድ ያን ደእዶሶና።
RUT 1:3 ኤንቲ ያን ደእሽን ኑሃም አዝናይ አበመለከይ ሀይቅን፥ እያ ባ ናምኡ ናይታራ አታሱ።
RUT 1:4 ሄ ናይት ሞአበ ቢታ ማጫ ናይታፐ ኦርፋነ ኡሩቶ ጌተተይሳታ ማችድ፥ ታሙ ላይꬅ ደኣፐ ጉየ፥
RUT 1:5 ማሀሎንነ ከለዎን ናምአይካ ሀይቅዶሶና። ኑሃማ እ አዝናይነ ናምኡ ናይት ሀይቅን ባርካ አታሱ።
RUT 1:6 እያ ሞአበን ደእሽን፥ ጎዳይ ባ አሳ እስራኤለስ ኬህድ ካꬅ ኤንታዉ እምዳይሳ ስአዳ ባ ናምኡ ናይታ ማቸታራ ሞአበ ቢታፈ ጉየ ስማናዉ ደንዳሱ።
RUT 1:7 እያ ባ ደእያ በሳፈ ናምኡ ባ ናይታ ማቸታራ ጉየ ይሁዳ ኤፍያ ኦገ ቦላ ከይዶሶና።
RUT 1:8 ኑሃማ ባ ናይታ ማቸታኮ፥ “ህንተ ኡባትካ ህንተ አየ ሶ፥ አየ ሶ ስምተ። ህንተ ሀይቅዳይሳታስነ ታዉ ኬህዳይሳዳ ጎዳይ ህንተዉ ኬሆ።
RUT 1:9 ህንተ ገላና አዝናታ ሶን ጎዳይ ህንተዉ ሸምፖ እሞ” ያጋዳ ዬራዳ ኤንታና አንጃሱ። ኤንትካ ባንታ ቃላ ꬎቁ ኦꬅድ ዬክድ፥
RUT 1:10 “ኑካ ኔራ ነ አሳኮ ባና” ያግዶሶና።
RUT 1:11 ሽን ኑሃማ ኤንታኮ፥ “ታ ናይቶ ህንተ ሶ ስምተ። ህንተ ታራ አይስ ቤቲ? ህንተዉ አዝና ግዳና አደ ናይታ ህዛፐ ጉየ የላና ዳኒ?
RUT 1:12 ታ ናይቶ ስምተ፥ ታኒ አዝና ገሎናዳ ጭማስ። እ ዎና ታኒ የላና ግያኮ ኡባ ሀች ቃማ አዝና ገላዳ አደ ናአ የልያኮካ፥
RUT 1:13 ሄሳት ድጭድ ጋካና ጋሶ ኤንታና ናጋነዬ? ኤንታ ግሾ ግድ አዝና ገሎና አታናዬ? ታ ናይቶ፥ ሄስ ሀኖናባ ግደይሳ ህንተ ኤሬታ። ጎዳይ ታና ኡንኤꬅዳ ግሾ ህንተፈ ታ አꬎ ጫመታስ” ያጋሱ።
RUT 1:14 ሄሳን ኤንቲ ባንታ ቃላ ꬎቁ ኦꬅድ ዳርስ ዬክዶሶና። ኦርፍ ባ አዝና አይዉ ዬራዳ ጉየ ስማሱ። ሽን ኡሩታ ኢፐ ሻከትከ ጋዳ ጋንታ ካና ሻሾ ግዳሱ።
RUT 1:15 ኑሃማ ዛራዳ፥ “በአ፥ ነ አዝና እሻ ማችያ ባ አሳኮነ ባ ፆሳታኮ ስማሱ፥ ነካ ኢራ ስማዳ ባ” ያጋሱ።
RUT 1:16 ሽን ኡሩታ ዛራዳ፥ “ታኒ ኔፐ ሻከታና መላነ ነና አጋዳ ጉየ ስማና መላ ታና ዋይሶፓ። ኔኒ ብያ ሶ አዉ ግድኮነ ታ ባና፥ ኔኒ ደእያ ሶ አዉንካ ታኒ ዳና። ነ ደረይ ታ ደረ ግዳና፥ ነ ፆሳይ ታ ፆሳ ግዳና።
RUT 1:17 ነ ሀይቅያ ሶን ታ ሀይቃና፥ ያን ሞገታና። ሀይቆፐ አትሽን፥ ሀራባይ ታና ኔፐ ሻክኮ፥ ጎዳይ ታና ፕርዶ።”
RUT 1:18 ኡሩታ ኢራ ባናዉ ቃንፅዳይሳ ኑሃማ ኤራዳ ስእ ጋሱ።
RUT 1:19 ያፐ ናምኡ ማጫሳት ቤተለመ ጋካናዉ ብዶሶና። ብድ ኤንቲ ቤተለመ ጋክዳ ዎደ ሄ ካታማ አሳ ኡባይ ኤንታባን ማላለትዶሶና። ቃስ ማጫሳይ፥ “ሀና ኑሃሞ?” ያግዶሶና።
RUT 1:20 እያ ዛራዳ ኡባ ዳንዳእያ ፆሳይ ታ ደኡዋ ዳሮ ጫመꬅዳ ግሾ፥ “ታና ኑሃሞ ጎፕተ፤ ‘ማራ’ ጊተ።
RUT 1:21 ታኒ ኩመꬅ ከያዳ ባስ፥ ሽን ጎዳይ ታና መላ ኩሸ ዛርስ። ጎዳይ ታና ካዉሽስ፤ ኡባ ዳንዳእያ ፆሳይ ታና ኡንኤꬅስ። ታና አይስ ኑሃመ ግድ ፄገቲ?” ያጋሱ።
RUT 1:22 ሄሳዳ ሀናዳ ኑሃማ ባ ናኣ ማቸ ሞአበ ኡሩትራ ስማሱ። ኤንቲ ቤተለመ ጋክዳይ ባንግ ቡሮ ጫካ ዶመትያ ዎደና።
RUT 2:1 ኑሃምስ እ አዝና አበመለከ ባጋራ ዳቦꬅያ፥ ቦኤዛ ጌተትያ እስ ኤረትዳ ዱረ አደይ ደኤስ።
RUT 2:2 እስ ጋላስ ሞአበ ኡሩታ ኑሃሞ፥ “ታዉ ቃትያ አስ ካላዳ ቡ ቆራናዉ ካꬅ ጫክያ በሲ ቦሻ?” ያጋሱ። እያካ፥ “ኤ ታ ናተ ባ” ያጋሱ።
RUT 2:3 ሄሳ ግሾ፥ ኡሩታ ባዳ ካꬃ ጫክያ አሳ ጌዱዋፐ ቡ ቆሮ ዶማሱ። ፕኮ መላ ቡꬍያ ቆርያ ጋደይ አበመለከ ዳቡዋ ቦኤዛ ጋደ ግድስ።
RUT 2:4 ሄኮ፥ ጉꬃ ዎደፐ ቦኤዝ ቤተለመፐ ጋደ ብድ፥ ካꬅ ጫክያ አሳ፥ “ጎድ ዎልቃ እሞ” ግድ ሳሮꬅስ። ኤንቲ ዛሪድ፥ “ጎድ አንጆ” ያግዶሶና።
RUT 2:5 ያትን፥ ቦኤዝ ካꬅ ጫከይሳታ ካፑዋ፥ “ሀና ናአተꬃ ማጫስያ ኦኔ?” ያግድ ኦይችስ።
RUT 2:6 ካꬃ ጫከይሳታ ካፖይ ዛሪድ፥ “ሀና የገልስያ ኑሃምራ ሞአበ ቢታፈ ይዳ ሞአበ ማጫስ።
RUT 2:7 እያ ታና፥ ‘ካꬃ ጫከይሳታ ጌዱዋ ካላዳ ምርቅያ ግዶፈ ቡ ቆሮ?’ ጋዳ ኦይቻሱ። ሀእ ቡሮ ሸምፓናዉ ኡታውስ፤ ዎንታ ጉራ ዮደፐ ሀኖ ጋካናዉ ሀይሳን ቆራሸ ጋምአሱ” ያግስ።
RUT 2:8 ቦኤዝ ኡሩቶ፥ “ታ ናተ ስአ፤ ህዛፐ ቡ ቆራናዉ ሀራ ጋደ ቦፓ። ቃስ ሀይሳፈ አዉካ ቃፆፋ። ታ ማጫ አይለታራ ሀይሳን ፔአ።
RUT 2:9 አሳይ ካꬅ ጫክያ በሳ ፄላ ፄላዳ ማጫ አይለታራ ግዳዳ ኤንታ ጌዶ ካላዳ ቆራ። አደ አይለት ነና ቦቾናዳ ታኒ ኤንታዉ ኦዳስ። ቃስ ነና ሳምኮ፥ አደ አይለት ትክድ ዎꬅዳ ሃꬃፈ ፓቃዳ ኡያ” ያግስ።
RUT 2:10 ኡሩታ ሾጫ ዝጋዳ፥ “ታኒ አላጋ ግድክና? ኔኒ ሀይሳ መላ ታዉ ቃትዳይ አይባሰ?” ያጋሱ።
RUT 2:11 ቦኤዝ ዛሪድ፥ “ነ አዝናይ ሀይቆሳፐ ዶምን፥ ኔኒ ነ አዝና አየስ ኦꬅዳባ ኡባ፥ ኔኒ ነ አይዉ፥ ነ አዋነ ነ የለትዳ ቢታ አጋዳ፥ ነ ኤሮና ደርያራ ዳናዉ ይዳይሳ ታኒ ጌሻዳ ስአስ።
RUT 2:12 ኔኒ ኦꬅዳባስ ጎድ ነዉ ኩሸ ዛሮ። ኔኒ እያ ቀፍያ ጋርሳን አታና ጋዳ ይዳ፥ እስራኤለ ጎዳይ ፆሳይ ነዉ ኩመꬃባ እሞ” ያግስ።
RUT 2:13 ኡሩታ፥ “ታ ጎዳዉ፥ ኔኒ ታዉ ዳሮ ቃታዳሳ፤ ታኒ ነ አይለታፐ እስንዉካ ጋክከ፥ ሽን ታዉ ኬሀባ ሀሳያዳ፥ ታና ምንꬃዳሳ” ያጋሱ።
RUT 2:14 ቁማ ምያ ዎደ ቦኤዝ፥ “ሃ ሺቃ፤ ኡይꬁ ኤካዳ ዎይንያን ቱሻዳ ማ” ያግስ። እያካ ካꬃ ጫክያ አሳ ማታን ኡታሱ። ቦኤዝ እዉ ባንጋ ሻሽ እሚስ፤ እያ ማዳ ካልን ካꬃይ ግድድ ፓላህስ።
RUT 2:15 እያ ቡ ቆራናዉ ደንድያ ዎደ፥ ቦኤዝ ባ አይለታ፥ “ምርቅያ ግዶፈካ እያ ቆርኮ እዮ ዬላዮፕተ።
RUT 2:16 ኡባካ ምርቅያፈ ሾድድ እዉ የግተ እያ ኤኮ፤ እዮ ካጮፍተ” ያግስ።
RUT 2:17 ሄሳን ኡሩታ ኦማርስ ጋካናዉ ቆራሱ። እያ ቆራ ፐእዳይሳ ቆፅን፥ ታሙ ክሎ ግራመ ባንጋ ግደይሳ ኤካሱ።
RUT 2:18 እያ ሄ ካꬃ ባአ ኤካዳ ካታማ ስማሱ፤ እያ አይ መላ ቆርዳኮ ኤሀዳ ባ አዝና አይዉ በሳሱ። ቃስ እያ ምሽን አትዳ ካꬅ ኤህዳይሳ ከሳዳ እዉ እማሱ።
RUT 2:19 እ አዝና አይያ፥ “ሀች ሀይሳ አዉፐ ቆራዲ? አዉን ኦꬃ ፔአዲ? ነዉ ሀይሳዳ ኬህዳ ኡራይ አንጀቶ” ያጋሱ። ያግን ኡሩታ እያ ባ ኦꬃ ፔእዳ ጋድያ ጎዳባ ባ አዝና አየስ ኦዳሱ። “ታኒ ሀች ኦꬃዳ ፔእዳ ጋድያ ጎዳ ሱንꬃይ ቦኤዛ ጌተቴስ” ያጋሱ።
RUT 2:20 ኑሃማ ዛራዳ፥ “ሀይቅዳይሳታስነ ደኦን ደኤይሳታስ ባ ኬሀተꬃ አግቦና ጎዳይ እያ አንጆ” ያጋሱ። ጉጃዳካ፥ “ሀ አደይ ኑስ ማታ ዳቦ፤ ኑና ኡባ ዎዛናዉ ጋꬅያ አሳታፐ እሶይ እያ” ያጋሱ።
RUT 2:21 ሞአበ ኡሩታ፥ “እ ታና፥ ‘ታ ካꬃይ ጫከትድ ዉራና ጋካናዉ፥ ታ ኦሳንቾታፐ ሻከቶናሽን ያዳ ቡ ቆራ’ ያግስ” ያጋሱ።
RUT 2:22 ኑሃማ ባ ናአ ማቸ ኡሩትኮ፥ “ታ ናተ፥ ቱማካ ቦኤዛ ጋድያን ኦꬅያ ማጫሳታራ ቢኮ ነዉ ሎኦ። ሀራ አሳ ጋደ ቢኮ ነና መቶꬃና” ያጋሱ።
RUT 2:23 ሄሳ ግሾ፥ ባንጋይነ ግስትያ ጫካይ ዉራና ጋካናዉ ኡሩታ ቦኤዛ ማጫ አይለታኮ ሺቃዳ፥ ቡꬍያ ቆራሸ ጋምአሱ። ቃስ ባ አዝና አየራ እስፈ ደአሱ።
RUT 3:1 እስ ጋላስ ኑሃማ ባ ናአ ማችዉ፥ “ታ ናተ፥ ኔኒ ጊግን ዳና መላ ታኒ ነዉ ዉላ ኮያኮ ዋናኔ?
RUT 3:2 ኔኒ ኤንታራ ጋምእዳ ማጫ አይለታ ጎዳይ፥ ቦኤዝ፥ ኑስ ማታ ዳቦ ግደነዬ? እ ሀች ቃማ ዉዱማን ባንጋ ፑናና።
RUT 3:3 ኔኒ ሜጨታዳ ሽቶ ትየታ፤ ነ ሎኦ ማኡዋ ማአዳ፥ ዱገ ዉዱማን ባ፤ ባዳ ቦኤዝ ምድ ኡይድ ስማና ጋካናዉ እያ አይፈን ከዮፓ።
RUT 3:4 እ ሂፃ አꬍያ ዎደ እ አዉን ꬍስክያኮ በአዳ፥ እያ አፍላ ቃራዳ እያ ቶሆሶን ዝንአ አጋ። ኔኒ ሀናናባ እ ነዉ ኦዳና” ያጋሱ።
RUT 3:5 ኡሩታ፥ “ኔኒ ግዳባ ኡባ ታ ኦꬃና” ያጋሱ።
RUT 3:6 ሄሳ ግሾ፥ ኡሩታ ደንዳዳ ዱገ ሞꬅ ባዳ፥ እ አዝና አይያ እዉ ኦድዳባ ኡባ ኦꬃሱ።
RUT 3:7 ቦኤዝ ምድ ኡይድ ባ ቦላ ፓሽክስዳፐ ጉየ፥ ካꬃ ጫቻ ማታን አꬍድ ዝንእስ። ኡሩታ ለፓራ ሺቃዳ፥ እያ ቶሁዋ ቃራዳ ዝንአሱ።
RUT 3:8 ግድ ብላሄ ግድያደ እ ዳጋም ደንድድ ሽረትያ ዎደ፥ እስ ማጫስ እያ ቶሆሶን ዝንእዳሮ ደምስ።
RUT 3:9 እካ፥ “ኔኒ ኦኔ?” ያግድ ኦይችስ። እያ፥ “ታኒ ነ አይልዉ ኡሩቶ፤ ኔኒ ታ አዝናስ ማታ ዳቦነ ታና ዎዛናዉ ዳንዳኤይ ነና ግድያ ግሾ ታ ቦላ ነ አፍላ የጋ” ያጋሱ።
RUT 3:10 ቦኤዝ ዛሪድ፥ “ታ ናተ፥ ጎዳይ ነና አንጆ! ሀ ኬሀተꬃይ ካሰ ነ ኦꬅዳይሳፈ አꬌስ። ኔኒ ማንቆ ዎይኮ ዱረ ግድዳ ናአተꬃ አደ ኮያባካ።
RUT 3:11 ሀእ ታ ናተ ባቦፋ። ኔኒ ኦይችዳባ ኡባ ነዉ ታኒ ኦꬃና። ታ ካታማን ደእያ አሳ ኡባይ ኔኒ ሎኦ ማጫስ ግደይሳ ኤሬስ።
RUT 3:12 ታኒ ማታ ዳቦ ግደይስ ቱማ፤ ሽን ታፐ ዳሮ ማተይ ደኤስ።
RUT 3:13 ሀች ቃማ ሀይሳን አቃ። ዎንቶ እ ነና ዎዛናዉ ኮይኮ ሎኦ፥ ዎዞ። ሽን እ ዎዛናዉ ኮዮና እፅኮ፥ ደኦ ጎዳይ ኤርያ መላ፥ ታኒ ነና ዎዛና። ሳእ ዎንታና ጋካናዉ ሀይሳን ዝንአ” ያግስ።
RUT 3:14 ሄሳ ግሾ፥ እያ ቦኤዛ ቶሆሶን ሳእ ዎንታና ጋካናዉ ዝንአዳ አቃሱ። ቦኤዝ፥ “ማጫስ ካꬃ ሞꬅ ይዳይሳ ኦንካ ኤሮፖ” ግዳ ግሾ ኡሩታ አስ አሰ ሻክድ ኤሮና ዎደ ዎንታ፥ ዳሮ ጉራ ደንዳሱ።
RUT 3:15 ቦኤዝ እዮ፥ “ነ ማእዳ ይዳ ላፃና ሀ በሳ” ያግስ። እያ በስን ላታሙ ክሎ ግራመ ባንጋ ማክ ቆልድ እዮ ባእስስ። እካ ባአዳ ጉየ ካታማ ባሱ።
RUT 3:16 ኡሩታ ባ አዝና አየኮ ስማዳ ይን፥ ኑሃማ፥ “ታ ናተ፥ ነ ብዳ አላለይ ዋንዴ?” ያጋዳ ኦይቻሱ። ኡሩታካ ቦኤዝ ኦꬅዳባ ኡባ ኦዳሱ፤
RUT 3:17 ጉጃዳካ፥ “ ‘ነ አዝና አየኮ መላ ኩሸ ቦፓ’ ግድ ሀይሳ ላታሙ ክሎ ግራመ ባንጋ እሚስ” ያጋሱ።
RUT 3:18 ያግን ኑሃማ፥ “ታ ናተ፥ አይብ ሀናኔኮ ኤረታና ጋካናዉ ናጋ። አደይ ሀች ሀ አላለይ ኦገ ኦይኮና ሸምፐና” ያጋሱ።
RUT 4:1 ቦኤዝ ፑደ ካታማ ፐንግያ ማታን ደእያ ዳባባን ከይድ ኡትስ። እ ያን ኡትዳሽን ካሰ እ ኦድዳ ማታ ዳቦይ ሄ በሳ ይን፥ ቦኤዝ እያኮ፥ “ላ፥ ሀ ሺቃዳ ሀይሳን ኡታ” ያግስ። እካ፥ ሺቅድ ኡትስ።
RUT 4:2 ቦኤዝ ሄ ካታማ ጭማታፐ ታሙ አሳታ ዶርድ፥ “ሀይሳን ኡትተ” ያግስ። ኤንትካ ኡትዶሶና።
RUT 4:3 ቦኤዝ ባ ማታ ዳቡዋኮ “ሞአበ ቢታፈ ስማዳ ይዳ ኑሃማ፥ ኑ እሻ አበመለከ ጋድያ ባይዛና ጋዉሱ።
RUT 4:4 ሄሳ ግሾ፥ ሀይሳን ኡትዳ አሳ ስንꬃንነ ታ ካታማ ጭማታ ስንꬃን፥ ዎዛ ጋዳ ታ ነዉ ኦዳናዉ ቆፓስ። ኔፐ ሀር ማት ባይና ግሾ ኔኒ ዎዛናዉ ኮይኮ ዎዛ፤ እፅኮ፥ ኔፐ ካልያ ማታ ዳቦይ ታና ግድያ ግሾ ታና ኤርሳ” ያግስ። እ “ታኒ ዎዛና” ያግስ።
RUT 4:5 ቦኤዝ፥ “ኑሃምፐነ ሞአበ ኡሩትፐ ጋድያ ነ ሻምያ ጋላስ አምእዉ ኡሩቶካ ዎዛ፤ ያትኮ ሀይቅዳይሳ ሱንꬃይ እያ ላታ ጋድያን ፄገታና” ያግስ።
RUT 4:6 ሀ ማታ ዳቦይ፥ “ሄሳ ግድኮ፥ ታኒ ዎዛናዉ ዳንዳእከ፤ አይስ ጊኮ፥ ሄስ ታ ቡዞ ላታ ቆሄስ። ሄሳ ግሾ፥ ኔኒ ዎዛ፥ ታኒ ዳንዳእከ” ያግስ።
RUT 4:7 በን ዎደ እስራኤለ ቢታን ዎዙዋነ ላታ ዱꬃናዉ ባይዝያ ዎይኮ ላትስያ ባጋይ ባ ጫማ ቶሁዋፐ ከስድ፥ ሀንኮ ሻምያ ዎይኮ ላትያ ባጋስ እሜስ። እስራኤለ ቢታን ዛልኤስነ ላታስ ማራይ ሀይሳ።
RUT 4:8 ሄሳ ግሾ፥ ሄ ማታ ዳቦይ ቦኤዛኮ፥ “ኔኒ ዎዛ” ግድ፥ ባ ጫማ ቶሁዋፐ ከስድ እሚስ።
RUT 4:9 ያትን፥ ቦኤዝ ጭማታነ አሳ ኡባ፥ “ታኒ አበመለከስ፥ ከልዎናስነ ማህሎናስ ደእያባ ኡባ ኑሃምፐ ሻምዳይሳስ ሀች ህንተ ማርካ።
RUT 4:10 ቃስ ሀይቅዳይሳ ሱንꬃይ ኤንታ ሶ አሳ ሱንꬃ ግዶፈ ዎይኮ ካታማ አሳ ታይቡዋፐ ꬋዮናዳ እያ ሱንꬃ እያ ላታ ጋድያን ፄግሳናዉ ካሰ ማህሎና ማችዉ ኡሩቶካ ታኒ ዎዘይሳስ ሀች ህንተ ኡባይ ማርካ” ያግስ።
RUT 4:11 ካታማ ፐንግያ ዳባባን ደእያ ጭማትነ አሳ ኡባይ፥ “ኤ፥ ሀይሳስ ኑኒ ማርካ! ጎዳይ ሀኖ ነ ኤክያ ማጫስዉ፥ እስራኤለ አሳ ማይዛ አየታ ግድዳ ራሄልዳነ ልያዳ ኦꬆ። ኔንካ ኤፍራታን ዱረ ግዳ፥ ነ ሱንꬃይ ቤተለመን ኤረቶ።
RUT 4:12 ነ ኬꬃይ፥ ጎዳይ፥ ሀ ናአተꬃ ማጫሴፐ ነዉ እምያ ዘረꬃን ትማራ ይሁዳስ የልዳ ፋረሳ ኬꬃዳ ኦꬆ” ያግስ።
RUT 4:13 ሄሳዳካ ኦꬅድ፥ ቦኤዝ ኡሩቶ ኤክስ እያካ እያዉ ማቾ ግዳሱ። ጎዳይ እዮ ቃንꬃታና መላ ኦꬅን አደ ናአ የላሱ።
RUT 4:14 ማጫሳት ኑሃሞ፥ “ሀች ነና ሄማና አስ ꬋይስቦና ጎዳይ ጋላተቶ! እያ ሱንꬃይ እስራኤለን ꬎቁ ጎ!
RUT 4:15 እያን ነዉ ሳኢ ስማና፥ ነ ጭምያ ዎደ እ ነና ሄማና። አይስ ጊኮ፥ ላፑን አደ ናይታፐካ አꬃዳ ነና ሲቅያራነ ነዉ ኬህያራ፥ ነ ናአ ማችያ ነዉ ናአ የላሱ” ያግዶሶና።
RUT 4:16 ኑሃማ ናኣ እድማሱ፤ ሎይꬃ ድቻሱ።
RUT 4:17 እ ሾሮ ማጫሳት፥ “ኑሃምስ አደ ናእ የለትስ” ያግድ እያ ሱንꬃካ ዮበዳ ግዶሶና። ዮበድ ዳዊታ አዋ እሰየ የልዳይሳ።
RUT 4:18 ፋረሳ የለተꬃይ ሀይሳፈ ካልድ ፃፈትዳይሳ፤ ፋረስ ሄስሮና የልስ፤
RUT 4:19 ሄስሮን ራመ የልስ፤ ራመይ አምናዳበ የልስ፤
RUT 4:20 አምናዳበይ ናአሶና የልስ፤ ናአሶን ሳልሞና የልስ፤
RUT 4:21 ሳልሞን ቦኤዛ የልስ፤ ቦኤዝ ዮበዳ የልስ፤
RUT 4:22 ዮበድ እሰየ የልስ፤ እሰየይ ዳዊታ የልስ።
1SA 1:1 ደረይ ዳርያ ኤፍሬማ ቢታን፥ ራማ ካታማን ደእያ፥ ኤፍሬማ ኮቸነ ዙፋ ኮቸ ግድዳ፥ ህልቃና ጌተትያ እስ አደይ ደኤስ። እ ይሮሃማ ናአ፤ ይሮሃም ኤልሁ ናአ፤ ኤልሁ ቶሁ ናአ፤ ቶሁይ ዙፋ ናኣ።
1SA 1:2 ህልቃናስ ናምኡ ማቸት ደኦሶና፤ እስነ ሱንꬃይ ሃኖ፤ ሀንኮር ሱንꬃይ ፕናኖ። ፕናንስ ናይት ደኦሶና፥ ሽን ሃናስ ናእ ባዋ።
1SA 1:3 ህልቃን ላይꬃን ላይꬃን ኡባፈ ዎልቃማ ጎዳ ጎይናናዉነ እያዉ ያርሻናዉ ሴሎ ቤስ። ኤል ናይት ናምአይ፥ አፍናንነ ፍንሃስ ጎዳ ካህነ ግድድ ሴሎን ሀጋዞሶና።
1SA 1:4 ህልቃን ያርሾ ያርሽያ ዎደ ኡባን አሹዋፐ እስ እስ ኩሸ ባ ማቸ ፕናንስ፥ ባ አደ ናይታስነ ማጫ ናይታስ ሁጰን ሁጰን እሜስ።
1SA 1:5 ጎዳይ ሃኖ የሎ ድግኮካ፥ ህልቃን እዮ ዶስያ ግሾ፥ እዉ ናምኡ ኩሸ እሜስ።
1SA 1:6 ጎዳይ ሃኖ የሎ ድግዳ ግሾ፥ እ ዳዉꬅያ እዮ ቶቻዳ ይሎያዉሱ።
1SA 1:7 ሄስ ላይꬃን ላይꬃን ኡባ ዎደ ሀንያባ። ሃና ጎዳ ኬꬅ ብዳ ዎደ ኡባን እ ዳዉꬅያ እያ ዬካና ጋካናዉነ ካꬅ እፃና ጋካናዉ ይሎያዉሱ።
1SA 1:8 እ አዝናይ ህልቃን፥ “ሃነ፥ ነ አይስ ዬካይ? አይስ ካꬅ ሚኪ? ነ ዎዛናይ አይስ አዛኒ? ታኒ ነዉ ታሙ ናይታፐ አꬍክናዬ?” ያጌስ።
1SA 1:9 እስ ጋላስ ኤንቲ ሴሎን ምዳፐነ ኡይዳፐ ጉየ፥ ሃና ደንዳ ኤቃሱ። ካህነይ ኤል ጎዳ ኬꬃ ፐንግያ ማታን ባ ኡትያ በሳን ኡትስ።
1SA 1:10 ሃና ዳሮ አዛንዳ ግሾ ጫመታዳ ዬካሸ ጎዳ ዎሳሱ።
1SA 1:11 እያ ሀይሳዳ ያጋዳ ቃንገታሱ፤ “ኡባፈ ዎልቃማ ጎዳዉ፥ ታና ነ አይልዉ በአ። ታ መቱዋ በአዳ፥ ታና ሀሳያ፤ ታና ነ አይልዉ ዶጎፓ። ኔኒ ታዉ ነ አይሌስ አደ ናአ እምኮ፥ እያ ደኦ ላይꬃ ኡባን ታኒ እያ ነዉ እማና፤ እያ ሁጰይ ፖሎ ሜደተና” ያጋሱ።
1SA 1:12 ሃና ጎዳ ዎሳ አዱስዳ ዎደ ኤል እ ዶና በኤስ።
1SA 1:13 ሃና ባ ዎዛናን ፆሳ ዎስያ ዎደ እ መተርሻይ ቃፄስ፥ ሽን እ ቃላይ ስኤተና፤ ሄሳ ግሾ፥ ኤል እዮ ማꬆትዳዳ ቆፕስ።
1SA 1:14 እ፥ “ኔኒ አዉደ ጋካናዉ ማꬆታይ? ዎይነ ኡሻ ኔፐ ድጋ” ያግስ።
1SA 1:15 ሃን ዛራዳ፥ “ታ ጎዳዉ፥ ግደና፤ ታኒ ዳሮ አዛንዳ ማጫስ፤ ታኒ ታ ሸምፑዋፈ ጎዳ ዎሳይስፐ አትሽን፥ ዎይነ ዎይኮ ማꬆይያ ኡሹ ኡያብከ።
1SA 1:16 ታኒ መቶይነ አዛኖይ ዳርዳ ግሾ ዎሳይስ። ታና ነ አይልዉ ፓና ማጫስ ኦꬃዳ ቆፖፋ” ያጋሱ።
1SA 1:17 ኤል ዛሪድ፥ “ሳሮ ባ፤ ኔኒ ዎስያባ እስራኤለ ፆሳይ ነዉ እሞ” ያግስ።
1SA 1:18 ሃና፥ “ነ አይልያ ነ ስንꬃን ሳባ ደሞ” ያጋሱ። ሄሳፈ ጉየ፥ እያ ባ ኦግያ ባዳ ካꬅ ማሱ፤ ሄሳፈ ስማዳ እያ አዛናቡኩ።
1SA 1:19 ዎንተꬃ ጋላስ ጉራ ደንድድ፥ ህልቃንነ እያ ሶ አሳይ ጎዳ ጎይንዳፐ ጉየ፥ ራማ ካታማን ደእያ ባንታ ሶ ስምዶሶና። ህልቃን ባ ማቸ ሃንራ አቅስ፤ ጎዳይ እዮ ቆፕስ።
1SA 1:20 እያ ቃንꬃታዳ አደ ናአ የላሱ። ሃና፥ “ታኒ ጎዳ ዎስን እ ታና ስእስ” ጋዳ እያ ሱንꬃ ሳሜላ ሱንꬃሱ።
1SA 1:21 ህልቃን ባ ሶ አሳ ኡባራ ላይꬃ ያርሾ ጎዳስ ያርሻናዉነ ቃንገꬃ ጋꬃናዉ ሴሎ ብስ።
1SA 1:22 ሽን ሃና ባቡኩ። እያ ባ አዝናኮ፥ “ናአይ ꬋንꬅ ዱꬅዳፐ ጉየ፥ እያ ኤፋዳ፥ ጎዳስ እማና፤ እ መርናዉ ያን ዳና” ያጋሱ።
1SA 1:23 ህልቃን፥ “ነና ሎእዳባ ኦꬃ፤ እ ꬋንꬅ ዱꬃና ጋካናዉ ሶን ጋምአናዉ ዳንዳኣሳ፤ ጎዳይ ባ ገልዳ ቃላ ነዉ ፖሎ” ያግስ። ሃና ባ ናኣ ꬋንꬅ ዱꬃና ጋካናዉ ሶን ጋምአሱ።
1SA 1:24 ሃና ናአይ ꬋንꬅ ዱꬅዳፐ ጉየ፥ ናኣነ ሄꬑ ላይꬃ ዎፋኖ ላታሙ ክሎ ግራመ ꬊለነ ኦጎሮ ኩመꬃ ዎይነ ኡሹ ኤካዳ ሴሎን ደእያ ጎዳ ኬꬅ ባሱ፤ ሄ ዎደ ናአይ ጉꬃ።
1SA 1:25 ኤንቲ ዎፋኑዋ ሹክዳፐ ጉየ ናኣ ኤልኮ ኤፍዶሶና።
1SA 1:26 ሃና፥ “ታ ጎዳዉ፥ ነ ሸምፖይ ኤሮ፤ ነ ስንꬃን ኤቃዳ ጎዳ ዎስዳ ማጫስያ ታና።
1SA 1:27 ሀ ናኣ እማና መላ ዎስን፥ ጎዳይ ታ ዎስዳባ እሚስ።
1SA 1:28 ሄሳ ግሾ፥ ታኒ እያ ጎዳስ እማስ፤ እ ባ ደኦ ላይꬃ ኡባን ጎዳስ እመትስ” ያጋሱ። ኤንቲ ያን ጎዳ ጎይንዶሶና።
1SA 2:1 ሃና ሀይሳዳ ያጋዳ ዎሳሱ፤ “ታ ዎዛናይ ጎዳን ኡፋይቴስ፤ ታ ካጨይ ጎዳን ꬎቁ ግስ። ታ ሞርከታ ቦላ ታኒ ጬቀታይስ፤ ነ አሾይ ታና ኡፋይሴስ።
1SA 2:2 ጎዳ መላ ጌሽ ባዋ፤ ነ መል ኦንካ ባዋ። ኑ ፆሳፈ አትሽን፥ ሀራ ዛል ባዋ።
1SA 2:3 ኦቶሮ ሃሳያ አግተ፤ ኦቶሮ ቃል ህንተ ዶናፐ ከዮፖ። ጎዳ ፆሳይ ኡባ ኤሬስ፤ አሳ ኦሶ ይግድ ፄሌስ።
1SA 2:4 ኦላንቾታ ዶንገይ መቅስ፤ ሽን ዳቡራንቾት ዎልቃ ደምዶሶና።
1SA 2:5 ካልዳይሳት ኮሻትድ ኡነትዶሶና፤ ሽን ኮሻትዳይሳት ሀእ ካልዶሶና። ማይንꬅያ ላፑን ናይታ የላሱ፤ ሽን ዳሮ ናይታ የልዳራ ባርካ አታሱ
1SA 2:6 ጎዳይ ዎꬌስ፥ ፓꬄስ፤ ስኦለን የጌስ፥ ያፐ ከሴስ።
1SA 2:7 ጎዳይ ዱረዬስ፤ ጎዳይ ማንቀꬄስ፤ ካዉሼስ፤ ꬎቁ ኦꬄስ።
1SA 2:8 እ ማንቆታ ባናፐ ደንꬄስ፤ መቶታንቾታ ብዶፐ ደንꬄስ። ኤንታ ቦንቾ አሳራ ኡትሴስ፤ ቦንቾ አራታ ላትሴስ። ቢታ ባሶት ጎዳሳ፤ ኤንታ ቦላ አላምያ ኤስስ።
1SA 2:9 “እ ጌሻታ ቶሁዋ ናጌስ፤ ሽን ኢታታ ꬉማን ስእ ኦꬃና፤ አስ ባ ዎልቃን ፆነና፤
1SA 2:10 ጎዳራ ኤቀተይሳት ሊቃና፤ ጎዳይ ሳሎፐ ኤንታ ቦላ ዳዳዳ ደቻና። ጎዳይ ሳአን ደእያ ኡባ ፕርዳና፤ እ ባ ካዋስ ምኖተꬅ እማና፤ እ ባ ትይዳይሳስ ፆኖ እማና።”
1SA 2:11 ሄሳፈ ጉየ፥ ህልቃን ራማን ደእያ ባ ሶ ብስ፤ ሽን ናአይ ሳሜል ካህንያ ኤልፐ ጋርሳራ ጎዳስ ኦꬄስ።
1SA 2:12 ኤል አደ ናይት ኢታ፤ ኤንቲ ጎዳ ቦንቾኮና።
1SA 2:13 ሄ ዎደ ካህነት አሳራ ደእያ ጋሄተꬃን ኦꬅያ ዎግ ደኤስ። ሄስካ አሳይ ያርሾ ያርሽያ ዎደ ካህንያ ኦሳንቾይ ሄꬑ አቻራ ደእያ ቃጰ ኤክድ ቡሮ አሾይ ካፅሽን ዬስ።
1SA 2:14 ዶይስያ ኦቱዋን ዎይኮ ድስትያን ዎይኮ ፃሩዋን ባ ቃጵያ የድድ፥ አይ ቆሞ አሾ ግድኮካ ከስ ኤፍድ ካህንያስ እሜስ። ያርሾ ያርሻናዉ ሴሎ ያ እስራኤለ አሳ ኡባ ቦላ ኤንቲ ሀይሳዳ ኦꬆሶና።
1SA 2:15 ቃስ ሞꬉዋ ያርሾ በሳን ፁጋናፐ ስን ካህንያ ኦሳንቾይ ያርሾ ያርሽያ አድያኮ ብድ፥ “ካህነይ ቃየ አሾፐ አትሽን፥ ካፅዳ አሾ ኔፐ ኤኮና ግሾ፥ እያዉ ጫጫናዉ አሾ ሀማ” ያጌስ።
1SA 2:16 አደይ ዛሪድ፥ “ኮይሮትድ ሞꬎይ ፁገቶ፤ ሄሳፈ ጉየ፥ ነ ኮየይሳ ኤካ” ያጌስ፤ ሽን ካህንያ አይለይ፥ “አካይ፥ ታዉ ሀእ እማ፥ ነ ድግኮ፥ ታኒ ዎልቃን ኤካና” ያጌስ።
1SA 2:17 ጎዳስ እምያ ያርሹዋ ኤል ናይት ካꬍዳ ግሾ፥ ኤንታ ናጋራይ ጎዳ ስንꬃን አꬍድ ዳርስ።
1SA 2:18 ሽን ሳሜል ናአ ደእሸ ሊኖፐ ኦሰትዳ ኤፉደ ማኦ ማእድ ጎዳ ስንꬃን ኦꬄስ።
1SA 2:19 ሳሜላ አይያ ላይꬃን ላይꬃን ጉꬃ ቆለ ጊግሳዳ፥ ላይꬃ ያርሾ ያርሻናዉ ባ አዝናራ ባሸ እያዉ ኤካዳ ባዉሱ።
1SA 2:20 ኤል ህልቃናነ እያ ማችዉ፥ “ህንተ ጎዳስ ዱማይድ እምዳ ሀ ናኣ በሳን ጎዳይ ነዉ ሀ ማቸፈ ሀራ ናይታ እሞ” ያግድ አንጄስ፤ ያትን፥ ኤንቲ ባንታ ሶ ስሞሶና።
1SA 2:21 ጎዳይ ሃና አንጅን፥ ቃንꬃታዳ ሄꬑ አደ ናይታነ ናምኡ ማጫ ናይታ የላሱ። ናአይ ሳሜል ጎዳ ስንꬃን ድጭስ።
1SA 2:22 ኤል ዳሮ ጭምስ። እያ ናይት እስራኤለ አሳ ኡባ ቦላ ኦꬅዳ ኢታባነ ጌሻ ዱንካንያ ፐንገን ጎዳስ ኦꬅያ ማጫሳታራ ቱንዳይሳ ስእስ።
1SA 2:23 ሄሳ ግሾ ኤንታኮ፥ “ህንተ ሀይሳ መላባ አይስ ኦቲ? ህንተ ኢታ ኦሱዋ ታኒ አሳ ኡባፈ ስአስ።
1SA 2:24 ታ ናይቶ፥ ሄሳ አግተ፤ ጎዳ አሳይ ህንተና ግያባይ ሎኦ ግደና።
1SA 2:25 እስ አስ አሰ ናቅኮ፥ ፆሳይ እያዉ ጋናታና፤ ሽን አስ ጎዳ ናቅኮ፥ እያዉ ጋናታናይ ኦኔ?” ያግስ። ጎዳይ ኤንታና ዎꬋናዉ ኮይዳ ግሾ ኤንቲ ባንታ አዋ ዞርያ ስኦና እፅዶሶና።
1SA 2:26 ናአይ ሳሜል ጎዳ ስንꬃንነ አሳ ስንꬃን ድጭስነ ሳበትስ።
1SA 2:27 እስ ጋላስ ናበይ ኤልኮ ይድ፥ “ጎዳይ ሀይሳዳ ያጌስ። ‘ነ አዋ ሶ አሳይ ግብፀ ቢታን ፓሮና ኩሸን ደእያ ዎደ ታ ኤንታዉ ቆንጫብክና?
1SA 2:28 ነ አዋይ ካህነ ግድድ ታ ያርሾ በሳ ከያና መላ፥ እፃነ ጩይሳና መላነ ታ ስንꬃን ኤፉደ ማእድ ኦꬃና መላ እስራኤለ ዛረ ኡባፈ እያ ዶራስ። እስራኤለ አሳይ ታማን ያርሽያ ያርሾ ኡባ ታኒ ነ አዋ ኮቻስ እማስ።
1SA 2:29 ታኒ ታ ደእያ በሳን ሺቃና መላ ኪትዳ ታ ያርሹዋነ እሙዋ ህንተ አይስ ካꬍደቲ? ታ አሳ እስራኤለ፥ ታዉ ሺሽዳ ያርሾ ኡባፈ ዶረትዳይሳ ምድ ሞꬋና መላ ኦꬃዳ ነ ናይታ ታፐ አꬃዳ አይስ ቦንቻዲ?’
1SA 2:30 “ሄሳ ግሾ፥ ጎዳይ፥ እስራኤለ ፆሳይ ሀይሳዳ ያጌስ። ነ ኮቻይነ ነ አዋ ኮቻይ መርናዉ ታዉ ኦꬃና። ሽን ሀእ ሄስ ታፐ ሃኮ፤ ታና ቦንቸይሳታ ቦንቻና፤ ታና ካይሳት ካታና።
1SA 2:31 ነ ኮቻን አስ ጬጎና መላ ታኒ ነ ዎልቃነ ነ አዋ ሶ አሳ ዎልቃ ꬋይስያ ዎደይ ያና።
1SA 2:32 ኔኒ ታ ኬꬃን መቶ በአና፤ ታኒ እስራኤለ አሳስ እምያ አንጁዋ ኔኒ በአዳ ቃናታና፤ ሽን ነ ሶ አሳን ጬጋና አስ ኦንካ ባዋ።
1SA 2:33 ታኒ ታ ያርሾ በሳፈ ꬋይሶና አስ ደእኮ፥ እያ ጋሶን ነ አይፈይ አፉፅሸ ቆቃና፤ ነ ዎዛናይ አዛኖን ፁገታና፤ ነ ኮቻ ኡባይ ናአተꬃን ሀይቃና።
1SA 2:34 ነ ናይት ናምአይ፥ አፍናንነ ፍንሃስ እስ ጋላስ ሀይቃና፤ ሄሳ ነዉ ማላ ግዳና።
1SA 2:35 ታ ዎዛናዳነ ታ ቆፋዳ ኦꬅያ ታዉ አማነትያ ካህነ ደንꬃና። ታኒ እያዉ አማነትዳ ሶ አስ እማና፤ ታኒ ትይዳ ካዋ ስንꬃን ኤንቲ ኡባ ዎደ ኦꬃና።
1SA 2:36 ነ ኮቻ ግዶፈ አትዳ ኡባይ ጉꬃ ሚሸ ዎይኮ ባሶ ኡይꬅ ዎሳናዉ ይድ፥ እያ ስንꬃን ጉፋንድ፥ ‘ታኒ ምያባ ደማና መላ ካህነ ኦꬃዳ ታና ሹማርክ’ ያጋና” ያግስ።
1SA 3:1 ናአይ ሳሜል ኤልፐ ጋርሳራ ጎዳስ ኦꬄስ፤ ጎዳ ቃላይ ሄ ዎደ ዳሮ አልኦ፤ ቆንጨꬅካ ባዋ።
1SA 3:2 አይፈይ ዳቡርን ዋየትድ ፄልያ ኤል እስ ቃማ ባ በሳን ዝንእስ።
1SA 3:3 ሄ ዎደ ፆሳ ፆምፐይ ቡሮ ቶእቤና፤ ጎዳ ታቦተይ ደእያ ኬꬃን ሳሜል ꬍስክስ።
1SA 3:4 ጎዳይ ሳሜላ ፄግስ፤ ሳሜል፥ “ዬ” ግድ ኮይስ።
1SA 3:5 እ ኤልኮ ዎፅ ብድ፥ “ኔኒ ፄግን ሄኮ ያስ” ያግስ። ሽን ኤል፥ “ታ ነና ፄጋብከ፤ ባዳ ዝንአ” ያግን፥ ሳሜል ብድ ዝንእስ።
1SA 3:6 ቃስ ጎዳይ፥ “ሳሜላ” ያግድ ናምአንꬆ ፄግን፥ ሳሜል ደንድድ፥ ኤልኮ ብድ፥ “ኔኒ ፄግን ሄኮ ያስ” ያግስ። ሽን ኤል፥ “ታ ናአዉ፥ ታ ነና ፄጋብከ፤ ባዳ ዝንአ” ያግስ።
1SA 3:7 ጎዳ ቃላይ ቡሮ እያዉ ቆንጭቦና ግሾ፥ ሳሜል ጎዳ ግደይሳ ኤርቤና።
1SA 3:8 ጎዳይ ሳሜላ ሄꬓንꬆ ፄግን ደንድድ፥ ኤልኮ ብድ፥ “ኔኒ ፄግን ሄኮ ያስ” ያግስ። ሄሳን ጎዳይ ናኣ ፄግዳይሳ ኤል አኬክድ፥
1SA 3:9 “ባዳ ዝንአ፤ እ ነና ፄግያባ ግድኮ፥ ‘ጎዳዉ፥ ኦዳ፤ ታ ነ አይለይ ስአይስ’ ያጋ” ግድ፥ ኤል እያዉ ኦድን፥ ሳሜል ባ በሳ ብድ ዝንእስ።
1SA 3:10 ሄሳፈ ጉየ፥ ጎዳይ ይድ እያ ማታን ኤቅድ፥ ካሰይሳዳ፥ “ሳሜላ፥ ሳሜላ” ያግድ ፄግስ። ሳሜል፥ “ነ አይለይ ስኤስ፥ ኦዳ” ያግስ።
1SA 3:11 ጎዳይ ሳሜላ፥ “ሄኮ፥ ታኒ አሳ ሀይꬃስ ኢትያ እስባ እስራኤለ ቦላ ኦꬃና ሀናይስ።
1SA 3:12 ሄ ጋላስ ታኒ ኤል ሶ አሳ ቦላ ኦꬃና ጋዳ ኦድዳ ኡባ ኮይሮፐ ዉርሰꬅ ጋካናዉ ፖላና።
1SA 3:13 ኤል ኤርድ ሴሮና አግዳ እያ ናይታ ናጋራ ግሾ፥ ታኒ እያ ሶ አሳ ቦላ መርናዉ ፕርዳናይሳ እያዉ ካሰ ኦዳ ዎꬃስ።
1SA 3:14 ሄሳ ግሾ፥ ‘ኤል ሶ አሳ ናጋራይ ያርሾንነ እሞን ፖሎ አቶ ጌተተና’ ያጋዳ ታኒ እያ ሶ አሳስ ካሰ ጫቃስ” ያግስ።
1SA 3:15 ሳሜል ዎንታና ጋካናዉ ꬍስክስ፤ ዎንትን ደንድድ፥ ፆሳ ኬꬃ ፐንግያ ዶይስ። ሳሜል ቆንጭዳባ ኤልስ ኦዳናዉ ያይስ።
1SA 3:16 ኤል፥ “ታ ናአዉ፥ ሳሜላ” ያግድ ፄግስ። ሳሜል፥ “ዬ” ግድ ኮይስ።
1SA 3:17 ኤል፥ “ጎዳይ ነዉ ኦድዳይ አይቤ? ታፐ አይኮካ ቆሶፓ፤ ኔኒ ፆሳይ ነዉ ኦድዳባፐ እስባካ ታፐ ቆስኮ፥ ፆሲ ነና ፕርዶ” ያግድ ኦይችስ።
1SA 3:18 ሳሜል አይኮካ ቆሶና ኡባ ኤልስ ኦድስ። ኤል፥ “እ ጎዳ፤ ባና ሎእዳባ ኦꬆ” ያግስ።
1SA 3:19 ሳሜል ድጭሸ ብስ፤ ጎዳይ እያራ ደኤስ። ሳሜል ኦድዳባፐ እስ ቃልካ ሳአን ዎና።
1SA 3:20 ዳነፐ በርሳበ ጋካናዉ፥ ሳሜል ቱማ ጎዳ ናበ ግደይሳ እስራኤለ አሳ ኡባይ ኤርስ።
1SA 3:21 ጎዳይ ሴሎን ቆንጬስ፤ ያን ባ ቃላን ባናተꬃ ሳሜላስ ቆንጭሴስ።
1SA 4:1 ሳሜል ኦድዳ ቃላይ እስራኤለ ኡባ ጋክስ። እስራኤለት ፍልስፄማታራ ኦለታናዉ ከይዶሶና፤ እስራኤለት አበንኤዘራን ዱንካንን፥ ፍልስፄመት አፌቃን ዱንካንዶሶና።
1SA 4:2 ፍልስፄመት ጩጋን ጩጋን ግድድ፥ እስራኤለታራ ኦለታናዉ ደንድዶሶና፤ ኦላይ ምንዳ ዎደ ፍልስፄመት እስራኤለታ ፆንድ ኦይዱ ሙኩሉ ግድያ አሳ ዎꬍዶሶና።
1SA 4:3 ኦላንቾት ዱንካንዳ ጉታ ስምዳ ዎደ እስራኤለ ጭማት፥ “ሀች ጎዳይ ኑና ፍልስፄመታ ኩሸን አይስ አꬅድ እምዴ? ኑራ ባና መላነ ኑ ሞርከታ ኩሸፐ ኑና አሻና መላ ጎዳ ታቦትያ ሴሎፐ አነ ኤሆስ” ያግዶሶና።
1SA 4:4 ሄሳ ግሾ፥ አሳይ ሴሎ ኪትን፥ ክሩበታ ግዶን አራታን ኡትያ ኡባፈ ዎልቃማ ጎዳ ታቦትያ ኤህዶሶና። ኤል ናይት ናምአይ አፍናንነ ፍንሃስ ጫቆ ታቦትያራ ያን ደኦሶና።
1SA 4:5 ጎዳ ጫቆ ታቦተይ አሳይ ዱንካንዳ ጉታ ጋክዳ ዎደ እስራኤለ ኡባይ ቢት ቃፃና ጋካናዉ ባንታ ቃላ ꬎቁ ኦꬅድ፥ “ጎዳ ጫቆ ታቦተይ ጋክስ” ያግድ ዋስዶሶና።
1SA 4:6 እስራኤለታ ዋሱዋ ፍልስፄመት ስእድ፥ “እብራወታ ጉታን ስኤትያ ዎልቃማ ዋሶይ አይቤ?” ያግዶሶና። ጎዳ ታቦተይ ኤንታ ጉታ ይዳይሳ ፍልስፄመት ኤርዳ ዎደ፥
1SA 4:7 ያይድ ሀይሳዳ ያግዶሶና፤ “ፆሳይ ኤንታ ጉታ ይስ፤ ኑና አየ! ሀይሳ መላባይ ሀይሳፈ ካሰ ሀን ኤረና።
1SA 4:8 ኑና አየ! ሀ ዎልቃማ ፆሳ ኩሸፐ ኑና አሻናይ ኦኔ? ሀ ፆሳይ ግብፀታ መላ ቢታን ዱማ ዱማ ጋዶን ሾጭስ።
1SA 4:9 ህንተኖ ፍልስፄመቶ፥ ምንተ! አደ ግድተ! ሄስ ሀኖና እፅኮ፥ ህንተ ኤንታ ካሰ አይለተꬃን ሃርዳይሳዳ ኤንቲ ህንተና ሃራና። አደ ግድተ፤ ኦለትተ” ያግዶሶና።
1SA 4:10 ፍልስፄመት ኦለትድ፥ እስራኤለታ ፆንን እስራኤለት ባንታ ሶ ሶ ባቃትዶሶና። ሄ ኦላን ዳሮ አሳይ ሀይቅዶሶና፤ እስራኤለ ቶሆ ኦላንቾታፐ ሀስታሙ ሙኩሉ አሳይ ሀይቅዶሶና።
1SA 4:11 ፆሳ ታቦተይ ድኤትስ፤ ኤል ናይት ናምአይ፥ አፍናንነ ፍንሃስ ሀይቅዶሶና።
1SA 4:12 ሄ ጋላስ ብንያመ ኮቸ ግድዳ እስ አደይ ኦላ ደምባፈ ዎፅሸ ይድ ሴሎ ጋክስ። ባ አዛኑዋ ኤርሳናዉ እ ባ ማኡዋ ዳክድ፥ ባ ሁጰን ቢታ ቆልስ።
1SA 4:13 ሄ አደይ ጋክያ ዎደ ኤል ባ ዎዛናን ፆሳ ታቦትያስ ህርግዳ ግሾ ናግሸ ኦገ ዶናን ደእያ ባ ኦይድያን ኡትስ። አደይ ካታማ ገልድ፥ ሀንዳባ ኦድን፥ ካታማ ኡባይ ዋሶ ጎች አግስ።
1SA 4:14 ኤል ሄ ዋሱዋ ስእድ፥ “ሀይስ አይብ ዋሶ?” ያግስ። አደይ ኤለስ ብድ ኤልስ ኦድስ።
1SA 4:15 ኤል ኡዱፉን ታማነ ሆስፑን ላይꬅ ግድዳ ጭማ፤ እያ አይፈይ ዳቡርድ ፄሎ አግስ።
1SA 4:16 አደይ ኤልኮ፥ “ኦላ ደምባፈ ይዳይ ታና፤ ታኒ ሀች ያፐ ባቃታዳ ያስ” ያግስ። ኤል፥ “ታ ናአዉ፥ ያትን ዋንዴ?” ያግድ ኦይችስ።
1SA 4:17 አደይ፥ “እስራኤለት ፍልስፄመታ ስንꬃፈ ባቃትዶሶና፤ ዳሮ አስ ዉርስ፤ ነ ናይት ናምአይ አፍናንነ ፍንሃስ ሀይቅዶሶና፤ ፆሳ ታቦተይ ድኤትስ” ያግስ።
1SA 4:18 አደይ ፆሳ ታቦትያባ ኦድዳ ዎደ ፐንግያ ማታን ደእያ ባ ኦይድያፐ ኤል ጉየ ኩንድስ። እ ጭማነ ሞሎ ግድያ ግሾ ሞርገይ መቅን ሀይቅስ። ኤል እስራኤለ ቢታ ኦይታሙ ላይꬅ ሃርስ።
1SA 4:19 ኤል ናኣ ፕንሃሳ ማችያ የላናዉ ዎደይ ዉርዳ ቃን። ፆሳ ታቦተይ ድኤተꬃ፥ ባ ቦሉዋነ ባ አዝና ሀይቁዋ ስእዳ ዎደ ቆፖና እቀꬅ እዮ ኦይክን የላሱ።
1SA 4:20 እ ሸምፖይ ከይያ ዎደ የልሰይሳት፥ “አደ ናአ የላዳሳ፤ ያዮፋ” ያግዶሶና። ሽን ኤንታዉ አይኮካ ዛራቡኩ፤ ኤንቲ ግያባካ ስአቡኩ።
1SA 4:21 እያ ባ ናኣ እካቦዳ ጋዳ ሱንꬃሱ፤ ፆሳ ታቦተይ ድኤትዳ ግሾነ ባ ቦሎይነ ባ አዝናይ ሀይቅዳ ግሾ፥ “ቦንቾይ እስራኤለፐ ሻከትስ” ያጋሱ።
1SA 4:22 እያ፥ “ፆሳ ታቦተይ ድኤትዳ ግሾ ቦንቾይ እስራኤለፐ ሻከትስ” ያጋሱ።
1SA 5:1 ፍልስፄመት ፆሳ ታቦትያ ድእዳፐ ጉየ አበንኤዘራፐ አሽዶዳ ኤፍዶሶና።
1SA 5:2 ፆሳ ታቦትያ ኤፍድ፥ ዳጎነ ኤቃ ኬꬃን ገልስድ፥ ዳጎነ ምስልያ ማታን ዎꬅዶሶና።
1SA 5:3 አሽዶዳ አሳይ ዎንተꬃ ጋላስ ጉራ ደንድድ በእያ ዎደ ጎዳ ታቦትያ ስንꬃን ዳጎን ጉፋንዳይሳ በእዶሶና። ዳጎነ ደንꬅድ፥ ካሰ በሳን ኤስዶሶና።
1SA 5:4 ቃስ ዎንተꬃ ጋላስ ጉራ ደንድድ በእያ ዎደ ጎዳ ታቦትያ ስንꬃን ዳጎን ሳአን ጉፋንዳይሳ በእዶሶና። ሄ ዎደ ዳጎነ ሁጰይነ እያ ናምኡ ኩሸይ መቅድ ፐንግያ ቦላ ደኤስ፤ ሀንኮ አሳተꬃይ ዱማ አትስ።
1SA 5:5 ሀች ጋካናዉ ዳጎነ ካህነትነ አሽዶዳን ደእያ ዳጎነ ኬꬃ ገልያ አሳት ኡባይ ዳጎነ ፐንግያ የꬎና ፃምባል አይ ሄሳ ግሾሳ።
1SA 5:6 አሽዶዳ ካታማ ቦላነ እያ ሄራን ደእያ አሳ ቦላ ጎዳ ኩሸይ ዴፅስ፤ ጎዳይ ክፃ ሀርገ የድድ ኤንታ ሴርስ።
1SA 5:7 አሽዶዳ ካታማ አሳይ ሀንዳባ በእዳ ዎደ፥ “እስራኤለ ፆሳ ኩሸይ ኑ ቦላነ ኑ ፆሳ ዳጎነ ቦላ ዴፅዳ ግሾ፥ እስራኤለ ፆሳ ታቦተይ ኑ ማታን ጋምኦፎ” ያግዶሶና።
1SA 5:8 ሄሳ ግሾ፥ እቻሹ ፍልስፄመ ሀላቃታ ኡባ ፄግድ፥ “እስራኤለ ፆሳ ታቦትያ ዋትኖ?” ያግድ ኦይችዶሶና። ሀላቃት፥ “እስራኤለ ፆሳ ታቦተይ ጋተ ካታማ ቦ” ያግድ ዛርዶሶና። እስራኤለ ፆሳ ታቦትያ ጋተ ኤፍዶሶና።
1SA 5:9 ሽን ታቦተይ ጋተ ጋክዳፐ ጉየ፥ ጎዳ ኩሸይ ሄ ካታማ ቦላ ዴፅድ፥ ዳሮ ዳጋንꬅስ። ካታማን ደእያ አሳ ናአፐ ጭማ ጋካናዉ ክፃ ሀርገን ሾጭስ።
1SA 5:10 ሄሳ ግሾ፥ ፆሳ ታቦትያ ኤቅሮና ካታማ የድዶሶና። ፆሳ ታቦተይ ኤቅሮና ገልያ ዎደ፥ ኤቅሮና አሳይ፥ “ኑናነ ኑ አሳ ꬋይሳናዉ እስራኤለ ፆሳ ታቦትያ ኑኮ ኤህዶሶና” ያግድ ዋስዶሶና።
1SA 5:11 ሄሳ ግሾ፥ ኤንቲ ፍልስፄመ ሀላቃታ ፄግድ፥ “ኑናነ ኑ አሳ ꬋይሳናፐ ስን እስራኤለ ፆሳ ታቦትያ ሀይሳፈ ድግተ፤ እያ እያ በሳ ጉየ ዛርተ” ያግዶሶና። ጎዳ ኩሸይ ካታማ ቦላ ዴፅዳ ግሾ ካታማ ኡባይ ሀይቆ ዳጋማን ኦይከትስ።
1SA 5:12 ሀይቆፐ አትዳ አሳ ክፃ ሀርገይ ኡንኤꬅዳ ግሾ ሄ ካታማ አሳ ዬሆይ ሳሎ ጋክስ።
1SA 6:1 ጎዳ ታቦተይ ፍልስፄመ ቢታን ላፑን አጌና ኡትስ።
1SA 6:2 ሄ ዎደ ፍልስፄመ አሳይ ባንታ ካህነታነ ማሮታ ፄግድ፥ “ጎዳ ታቦትያ ኑኒ ዋትኖ? ኑኒ ጉየ እያ በሳ እያ ዋት የዳኔኮ ኑስ ኦድተ” ያግዶሶና።
1SA 6:3 ኤንቲ ዛሪድ፥ “እስራኤለ ፆሳ ታቦትያ ጉየ የድሸ መላ ኩሸ የዶፍተ። አይ ሀንድካ ናጋራ ያርሾራ የድተ። ሄሳ ኦꬅኮ ህንተ ፓፃና፤ እያ ኩሸይ ህንተ ቦላፈ አይስ ክችቦናኮ ህንተ ኤራና” ያግዶሶና።
1SA 6:4 ፍልስፄመ አሳይ፥ “ኑኒ የዳናዉ በሲያ ናጋራ ያርሾይ አይቤ?” ያግድ ኦይችዶሶና። ኤንቲ፥ “ህንተናነ ህንተ ሀላቃታ ጋክዳ ጋዶይ እስኖ ግድያ ግሾ፥ ፍልስፄመ ሀላቃታ ታይቦን እቻሹ ዎርቃ ክፃታነ እቻሹ ዎርቃ ኤጨረታ የድተ።
1SA 6:5 ህንተ ሄ ክፃታነ ህንተ ቢታ ꬋይስያ ሄ ኤጨረታ ምስለታ መꬍድ፥ እስራኤለ ፆሳስ ቦንቾ እምተ። ኦን ኤር እ ህንተ ቦላፈ፥ ህንተ ፆሳታ ቦላፈነ ህንተ ቢታ ቦላፈ ባ ኩሽያ ደንꬃና።
1SA 6:6 ግብፀ አሳይነ ኤንታ ካዎይ ዞረ ኤኮና እፅዳይሳዳ ህንተ አይስ ዞረ ኤከከቲ? ጎዳይ ኤንታ ዳሮ ሴርን እስራኤለት ባንታ ኦግያ ባና መላ የድቦኮና?
1SA 6:7 ሀእ እስ ኦራꬃ ጋረ ጊግስተ፤ ቃምባራ ዎꬅቦና ናምኡ ꬋንꬅያ ሚዛታ ሄ ጋርያን ዋፅተ፤ ሽን ማራታ ኤንታፈ ዱꬅድ ሶን አሽተ።
1SA 6:8 ጎዳ ታቦትያ ጋርያ ቦላ ዎꬅተ፤ ናጋራ ያርሾስ ጊግስዳ ዎርቃ ክፃታነ ዎርቃ ኤጨረታ ሳፅነን የግድ ጎዳ ታቦትያ ማታን ዎꬅድ እ ባና መላ የድተ።
1SA 6:9 ሽን እ ብያ በሳ በእተ፤ እ ባ ዛዋ ኦይክድ፥ ቤት-ሳሜሳ ስሚድ ብያባ ግድኮ፥ ሀ ጋዱዋ ኑ ቦላ ኤህዳይ ጎዳ ግደይሳ በሴስ። ሽን እ ሀራ ሶ ቢኮ ሀይስ ኑ ቦላ ጮ ጋክስፐ አትሽን፥ ኑና ደችዳይ ጎዳ ኩሸ ግዶናይሳ ኤራና” ያግድ ዛርዶሶና።
1SA 6:10 ኤንቲ ጌተትዳይሳዳ ኦꬅዶሶና፤ ናምኡ ꬋንꬅያ ሚዛታ ኤክድ፥ ጋረን ዋፅዶሶና፤ ማራታ ሶ ዛሪድ ጎርድዶሶና።
1SA 6:11 ኤንቲ ጎዳ ታቦትያ፥ ዎርቃ ክፃነ ኤጨረ ምስለት ደእያ ሳፅንያ ጋረን ዎꬅዶሶና።
1SA 6:12 ሄሳፈ ጉየ፥ ሚዛት ቤት-ሳሜሳ ኤፍያ ኦግያ ኦይክድ ገደ ሃ ጎና “ህምባ” ግድ ዋስሸ ብዶሶና። ፍልስፄመ ሀላቃት ሚዛታ ጌዶ ካልድ፥ ቤት-ሳሜሳ ዛዋ ጋካናዉ ብዶሶና።
1SA 6:13 ቤት-ሳሜሳ አሳይ ሄ ዎደ ዛንጋራን ግስተ ጫኮሶና፤ ኤንቲ ꬎቁ ግድ ፄልድ፥ ታቦትያ በእድ ኡፋይትዶሶና።
1SA 6:14 ጋረይ ቤት-ሳሜሳን ደእያ እያሱ ጌተትያ ኡራ ጋደ ጋክድ፥ እስ ግታ ሹቻ ማታን ኤቅስ። ኤንቲ ጋርያ ምꬃ ቀርድ፥ ፁሳ ያርሾ ኦꬅድ ሄ ሚዛታ ጎዳስ ያርሽዶሶና።
1SA 6:15 ሌወት ጎዳ ታቦትያነ ዎርቃ ሚሸት ደእያ ሳፅንያ ጋርያፐ ዎꬍስድ፥ ግታ ሹቻ ቦላ ዎꬅዶሶና። ሄ ጋላስ ቤት-ሳሜሳ አሳይ ጎዳስ ፁሳ ያርሾነ ሀራ ያርሾታ ያርሽዶሶና።
1SA 6:16 እቻሹ ፍልስፄመ ሀላቃት ሀንዳባ ኡባ በእድ ሄ ጋላስ ኤቅሮና ስምዶሶና።
1SA 6:17 ዎርቃ ክፃት ፍልስፄመ ሀላቃት ናጋራ ያርሾ ኦꬅድ ጎዳስ ኪትዳ አሽዶዳ፥ ጋዛ፥ አስቃሎና፥ ጋተነ ኤቅሮና ጌተትያ እቻሹ ካታማታ ሱንꬃን እሱዋ እሱዋ እምዶሶና።
1SA 6:18 ዎርቃ ኤጨረታ ታይቦይ ፍልስፄመ ሀላቃታ እቻሻይ ደእያ ግምበትዳ ካታማታነ ሄራን ደእያ ጉታታ ታይቡዋ መላ። ቤት-ሳሜሳን ደእያ እያሱ ጌተትያ ኡራ ጋደን ጎዳ ታቦትያ ዎꬅዳ ግታ ሹቻይ ሀች ጋካናዉ ማርካ ግድድ ደኤስ።
1SA 6:19 ሽን ኤንቲ ጎዳ ታቦትያስ ግዶ ባጋ በእዳ ግሾ ጎዳይ ቤት-ሳሜሳ አሳፐ ላፑን ታሙ አሳታ ዎꬍስ። ጎዳይ ኤንታፈ ዳሮ አሳ ዎꬍዳ ግሾ አሳይ ዬክዶሶና።
1SA 6:20 ሄሳ ግሾ፥ ቤት-ሳሜሳ አሳይ፥ “ጎዳ ስንꬃን፥ ሀ ጌሻ ፆሳ ስንꬃን ኦን ኤቃናዉ ዳንዳኢ? ታቦተይ ኑፐ ከይድ ኦደኮ ባኔ?” ያግዶሶና።
1SA 6:21 ቅርያት-ይኣርማን ደእያ አሳኮ ኪታ የድድ፥ “ፍልስፄመ አሳይ ጎዳ ታቦትያ ዛርዶሶና፤ ይድ እያ ህንተኮ ኤክተ” ያግዶሶና።
1SA 7:1 ቅርያት-ይኣርማ አሳይ ይድ፥ ጎዳ ታቦትያ ኤፍድ ደረ ሁጰን ደእያ አምናዳበ ሶን ዎꬅዶሶና። ጎዳ ታቦትያ ናጋና መላ አምናዳበ ናኣ አላዛራ ዱማይድ ሱንꬅዶሶና።
1SA 7:2 ታቦተይ ቅርያት-ይኣርማን ዳሮ ዎደ ጋምእስ፤ ያን ላታሙ ላይꬅ ኡትስ። እስራኤለ አሳ ኡባይ አዛንድ ጎዳ ኮይዶሶና።
1SA 7:3 ሳሜል እስራኤለ አሳኮ፥ “ኩመꬃ ዎዛናፐ ህንተ ጎዳኮ ስምዳባ ግድኮ፥ አላጋ ፆሳታነ አስታሮተ ኤቃ ህንተ ግዶፈ ድግተ። ህንተናተꬃ ጎዳስ ሼꬍተ፤ እያ ፃላላስ ኪተትተ፤ እ ህንተና ፍልስፄመታ ኩሸፐ አሻና” ያግስ።
1SA 7:4 ሄሳ ግሾ፥ እስራኤለ አሳይ ባኣለነ አስታሮተ ኤቃ ባንታ ግዶፈ ድግድ፥ ጎዳ ፃላላ ጎይንዶሶና።
1SA 7:5 ሄሳፈ ጉየ፥ ሳሜል፥ “እስራኤለታ፥ ኡባይ ምፅጳ ሺቅተ፤ ታኒ ያን ህንተዉ ጎዳ ዎሳና” ያግስ።
1SA 7:6 ኤንቲ ምፅጳ ሺቅድ ሃ ዱቅድ፥ ጎዳ ስንꬃን ጉስዶሶና፤ ሄ ጋላስ ፆምዶሶና፤ ሄ በሳን፥ “ኑኒ ጎዳ ቦላ ናጋራ ኦꬅዳ” ያግድ ፓፅዶሶና። ምፅጳን ሳሜል እስራኤለ አሳ ቦላ ዳይናትስ።
1SA 7:7 እስራኤለት ምፅጳን ሺቅዳይሳ ፍልስፄመ አሳይ ስእዳ ዎደ ኤንታ ኦላናዉ ከይዶሶና። እስራኤለት ሄሳ ስእድ፥ ፍልስፄመታስ ያይዶሶና።
1SA 7:8 እስራኤለ አሳይ ሳሜላኮ፥ “ፍልስፄመ አሳ ኩሸፐ ኑና አሻና መላ ኔኒ ጎዳ፥ ኑ ፆሳ ዎሳ አጎፋ” ያግዶሶና።
1SA 7:9 ሳሜል እስ ꬋምያ ዶርሳ ናአ ኤክድ፥ ኩመꬅ ፁሳ ያርሾ ኦꬅድ ጎዳስ ያርሽስ፤ እስራኤለ አሳ ግሾ ጎዳ ዎስስ፤ ጎዳይ እያ ዎሳ ስእስ።
1SA 7:10 ሳሜል ፁሳ ያርሾ ያርሽያ ዎደ ፍልስፄመት እስራኤለታ ኦላናዉ ሺቅዶሶና። ሽን ሄ ጋላስ ፍልስፄመታ ቦላ ጎዳይ ግታ ዳዳ ጉንꬅድ ዳጋንꬅን፥ ኤንቲ እስራኤለታ ስንꬃፈ ባቃትዶሶና።
1SA 7:11 እስራኤለት ምፅጳፈ ከይድ፥ ፍልስፄመታ የደꬅድ፥ ቤት-ካራፐ ጋርሳ ባጋራ ደእያ በሳ ጋካናዉ ኦገ ቦላ ዎꬍዶሶና።
1SA 7:12 ሄሳፈ ጉየ፥ ሳሜል እስ ሹቹ ኤክድ፥ ምፅጳፈነ ሸናፐ ግዶን ኤስስ፤ “ሀእ ጋካናዉ ጎዳይ ኑና ማድስ” ያግድ ሄ በሳ አበንኤዘራ ግድ ሱንꬅስ።
1SA 7:13 ፍልስፄመ አሳይ ፆነትዶሶና፤ ኤንቲ እስራኤለ ቢታ ቦላ ናምአንꬆ ደንድቦኮና። ሳሜል ደእዳ ላይꬃ ኡባን ጎዳ ኩሸይ ፍልስፄመ አሳ ቦላ ዴፅስ።
1SA 7:14 ፍልስፄመ አሳይ ኤቅሮናፐ ጋተ ጋካናዉ እስራኤለፐ ድእዳ ካታማት እስራኤለስ ስምዶሶና። እስራኤለ አሳይ ባንታ ካሰ ዛዋ ፍልስፄመ አሳ ኩሸፐ ዎꬅ ኤክዶሶና። እስራኤለ አሳይነ አሞረ አሳይ ሳሮ ደእስ።
1SA 7:15 ሳሜል ባ ደኦ ላይꬃ ኡባን እስራኤለ ቦላ ፕርዴስ።
1SA 7:16 ሳሜል ላይꬃን ላይꬃን ቤተለ፥ ጋልጋላነ ምፅጳ ዩይድ እስራኤለ ቦላ ፕርዴስ።
1SA 7:17 እያ ኬꬃይ ራማን ደእያ ግሾ ያ ስሚድ ሄ በሳንካ እስራኤለ ቦላ ፕርዴስ። እ ራማን ጎዳስ ያርሾ በሲ ኬፅስ።
1SA 8:1 ሳሜል ጭምዳ ዎደ ባ ናይታ እስራኤለ ቦላ ዳይና ኦꬅድ ሹምስ።
1SA 8:2 እያ ባይራ ናኣ ሱንꬃይ እዩኤላ፤ ካሎ ናአ ሱንꬃይ አብያ፤ ኤንቲ በርሳበን ፕርዶሶና።
1SA 8:3 ሽን እያ ናይት ባንታ አዋ ኦግያ ካልቦኮና። ኤንቲ በሶና ጎአ ደማናዉ ጉየ ስምዶሶና፤ ዎꬋፈ ኤክዶሶና፥ ሱረ ፕርዳ ዎቢስዶሶና።
1SA 8:4 ሄሳ ግሾ፥ እስራኤለ ጭማት እስፈ ሺቅድ፥ ሳሜላኮ ራማ ይድ፥
1SA 8:5 “ሄኮ ኔኒ ጭማዳሳ፤ ነ ናይት ነ ኦግያ ካሎኮና፤ ሀራ ካዎተꬃት ኦይሳዳ ኑና አይስያ ካዎ ሀእ ኑስ ሹማ” ያግዶሶና።
1SA 8:6 ኤንቲ፥ “ኑና አይስያ ካዎ ኑስ እማ” ግድ ኦይችዳይስ ሳሜላ ኡፋይስቤና። ሄሳ ግሾ፥ ሳሜል ጎዳ ዎስስ።
1SA 8:7 ጎዳይ ሳሜላ፥ “ታኒ ኤንታ ቦላ ካዎቶናዳ ነና ግዶናሽን ታና እፅዳ ግሾ አሳይ ኔኮ ግያባ ኡባ ስአ።
1SA 8:8 ኤንታ ታኒ ግብፀፈ ከስዳ ዎድያፐ ዶምድ ሀች ጋካናዉ ታና አግድ፥ ሀራ ፆሳታ ጎይንሸ ደእዶሶና። ሀእ ኤንቲ ታ ቦላ ኦꬅዳ ኡባ ነ ቦላ ኦꬆሶና።
1SA 8:9 ሀእ ኤንቲ ግያባ ስአ፤ ሽን ኤንታ ቦላ ካዎታና ካዋ ዎጋ ኤንታዉ ምንꬃዳ ኦዳ” ያግስ።
1SA 8:10 ካዎ ኦይችዳ ደርያስ ጎዳይ ኦድዳ ቃላ ኡባ ሳሜል ያግድ ኦድስ።
1SA 8:11 “ህንተ ቦላ ካዎታና ካዎይ ኦꬃናባይ ሀይሳ፤ እ ህንተ አደ ናይታ ኤክድ፥ ፓራ ጋረ አሳታነ ፓራ አሳታ ኦꬃና፤ ኤንቲ እያ ጋርያ ስንꬃን ዎፃና።
1SA 8:12 ኤንታፈ አትዳይሳታ ሻላቃታነ ሀምሳላቃታ፥ ሀራታ እያ ቢታ ጎየይሳታ እያ ካꬃ ጫከይሳታ፥ ቃስ ሀራታ እያ ኦላ ሚሸነ ፓራ ጋረ ሚሸ ኦይሳታ ከሳና።
1SA 8:13 ህንተ ማጫ ናይታካ ኤፍድ፥ ባዉ ሽቶ ጊግሰይሳታ፥ ካይሳታነ ኡከይሳታ ኦꬃና።
1SA 8:14 ህንተ ጎሻፈ፥ ዎይነ ጋደፐነ ሻማሆ ጋደፐ ሎኦ በሳታ ኤክድ፥ ባ ሞርናታስ እማና።
1SA 8:15 ካꬃፈነ ዎይንያፐ ታማፈ እስ ኩሽያ ኤክድ ባ ሹማታስነ ባ ሞርናታስ እማና።
1SA 8:16 ህንተ አደ አይለታፐ፥ ማጫ አይለታፐ፥ ህንተ ናአተꬃታፈነ ህንተ ሀርያፐ ሎኤይሳ ባዉ ጎኤታናዉ ኤካና።
1SA 8:17 ህንተ ዶርሳፈነ ዴሻፐ ታማፈ እስ ኩሸ ኤካና፤ ህንተ እያ ኦሳንቾ ግዳና።
1SA 8:18 ሄ ጋላሳይ ጋክዳ ዎደ ህንተ ዶርዳ ካዎይ ጋꬅያ ቆሁዋ ግሾ ዋሳና፤ ሽን ሄ ጋላስ ጎዳይ ህንተ ዋሱዋ ስኤና” ያግስ።
1SA 8:19 ግዶሽን፥ አሳይ ሳሜላ ቃላ ስኦና እፅድ፥ “አካይ፥ ኑስ ካዎይ ደኦ።
1SA 8:20 ሀራ ካዎተꬃታ መላ ኑና ካለꬅያ፥ ኑ ስንꬃን ብያነ ኑ ኦላ ኦለትያ ካዎይ ደኦ።”
1SA 8:21 ሳሜል አሳ ቃላ ኡባ ስእድ፥ ጎዳስ ኦድስ።
1SA 8:22 ጎዳይ ሳሜላኮ፥ “ኤንታ ቃላ ስአ፤ ኤንታ ቦላ ካዎ ካዎꬃ” ያግስ። ሳሜል እስራኤለ አሳኮ፥ “ህንተ ሶ ሶ ስምተ” ያግስ።
1SA 9:1 ብንያመ ኮቸ ግድዳ እስ ቂሳ ጌተትያ አደይ ደኤስ፤ እ ኤረትዳ አስ። እ አብኤላ ናአ፤ አቤል ፃሮራ ናአ፤ ፃሮር ባኮራተ ናአ፤ ባኮራት ብንያመ ኮቸ ግድዳ አፌቃ ናአ።
1SA 9:2 እያዉ ሳኦላ ጌተትያ እስ ማላ ሎኦ ግድዳ ፓንꬃ ናእ ደኤስ። እስራኤለታ ግዶን እያ መላ ማላ ሎኦይ ባዋ፤ እ አስ ኡባይ እያ ሀሸፐ ጋርሳን አትያ አዱሳ አስ።
1SA 9:3 እስ ጋላስ ሳኦላ አዋ ቂሳ ሀረት ꬋይዶሶና፤ ቂስ ባ ናኣ ሳኦላኮ፥ “ኦሳንቾታፐ እሱዋ ኤካዳ ሀረታ ኮያናዉ ባ” ያግስ።
1SA 9:4 ኤንቲ ደረይ ዳርያ ኤፍሬማ ቢታራነ ሻልሻ ቢታራ ኮይሸ አꬍዶሶና፥ ሽን ሀረታ ደምቦኮና። ቃስ ሻአልማ ቢታራ ኮይሸ አꬍዶሶና፥ ሽን ያንካ ሀረት ዶኮና። ብንያመ ቢታራ አꬍዶሶና፥ ሽን ያንካ ደምቦኮና።
1SA 9:5 ኤንቲ ዙፋ ቢታ ጋክዳ ዎደ ሳኦል ባራ ደእያ ኦሳንቹዋኮ፥ “ሃያ፤ አነ ጉየ ስሞስ፤ አዋይ ሀረታባ ቆፐይሳ አግድ፥ ኑስ ህርጋና” ያግስ።
1SA 9:6 ሽን ኦሳንቾይ፥ “ሄኮ፥ እስ ቦንቸትዳ ፆሳ አስ ሀ ካታማን ደኤስ፤ እ ኦድያ ኡባይ ፖለቴስ። አነ ሀእ ያ ቦስ፤ ኦን ኤር ኑ ባና ኦግያ እ ኑስ ኦዳነኮ” ያግስ።
1SA 9:7 ሳኦል፥ “ኑ ብያባ ግድኮ እያዉ አይ እማኔ? ኑ ኦይክዳ ካꬃይ ዉርስ፤ ኑ ፆሳ አሳስ እምያባይ ባዋ። ኑስ አይብ ደኢ?” ያግስ።
1SA 9:8 ኦሳንቾይ ዛሪድ፥ “ታ ኩሸን ጉꬃ ብራ ሳንትመይ ደኤስ፤ ኑ ባና ኦግያ ኑስ ኦዳና መላ ፆሳ ኡራስ ሀኖ እማና” ያግስ።
1SA 9:9 (በን ዎደ እስራኤለ ቢታን እስ አስ ፆሰ ኦይቻናዉ ብሸ፥ “አነ ቆንጨꬅ በእያ አሳኮ ቦስ” ያጌስ። ሀእ ናበ ጌተተይስ ሄ ዎደ ቆንጨꬅ በእያ አስ ጌተቴስ።)
1SA 9:10 ሳኦል ዛሪድ፥ “ሎኦ፤ የꬋ” ያግን፥ ፆሳ ኡራይ ደእያ ካታማ ብዶሶና።
1SA 9:11 ኤንቲ ፑደ ካታማ ከይሽን፥ ሃ ትካናዉ ያ ጌላኦታራ ኦገን ጋሄትድ፥ “ቆንጨꬅ በእያ አስ ሀይሳን ደኢ?” ያግድ ኦይችዶሶና።
1SA 9:12 ኤንቲ፥ “ኤ ደኤስ፤ እ ህንተፈ ስንꬃን ደኤስ፤ ኤለስድ ቢተ። ሀች አሳይ ꬎቃ ጎይኖ በሳን ያርሾ ያርሽያ ግሾ፥ እ ኑ ካታማ ይስ።
1SA 9:13 ህንተ ካታማ ገልያ ዎደ እ ማናዉ ꬎቃ ጎይኖ በሳ ከዮና ደእሽን ህንተ እያ ደማና። እ ያርሹዋ አንጃናዉ ኮሽያ ግሾ እ ጋኮና ደእሽን አሳይ ካꬃ ሜና። እ አንጅዳፐ ጉየ ፄገትዳይሳት ማና። ኤለ ከይተ፤ ህንተ እያ ሀእ ደማና” ያግዶሶና።
1SA 9:14 ኤንቲ ካታማ ገልያ ዎደ ሳሜል ጎይኖ በሳ ከያናዉ ብሸ ኤንታራ ጋሄትስ።
1SA 9:15 ሳኦል ያናፐ ካሰ ጋላስ ሳሜላስ ጎዳይ ሀይሳዳ ያግድ ቆንጭስስ፤
1SA 9:16 “ዎንቶ ሀኖደ ብንያመ ቢታፈ እስ አስ ታ ኔኮ የዳና፤ እ ታ አሳ እስራኤለ ካለꬃና መላ ትያ። እ ታ አሳ ፍልስፄመ ኩሸፐ አሻና፤ ታ አሳ ዋሶይ ታኮ ጋክዳ ግሾ ታ ኤንታ በአስ” ያግስ።
1SA 9:17 ሳሜል ሳኦላ በእዳ ዎደ ጎዳይ፥ “ታኒ ነዉ ኦድዳ ኡራይ ሀይሳ፤ እ ታ አሳ ካለꬃና” ያግስ።
1SA 9:18 ሳኦል ግምበ ድርሳ ፐንግያ ማታን ደእያ ሳሜላኮ ሺቅድ፥ “ቆንጨꬅ በእያ ኡራ ሶይ አዉነኮ ታዉ ኦዳርኪ?” ያግስ።
1SA 9:19 ሳሜል ዛሪድ፥ “ቆንጨꬅ በኤይ ታና። ሀች ህንተ ታራ ምያ ግሾ ታፐ ስንꬃትድ ጎይኖ በሳ ቢተ። ታኒ ነና ዎንቶ ጉራ የዳና፤ ነ ዎዛናን ደእያ ኡባ ታ ነዉ ኦዳና።
1SA 9:20 ሄꬑ ጋላሳፐ ስን ꬋይዳ ሀረታባ ግድኮ ኤንቲ በንትዳ ግሾ ህርጎፋ። እስራኤለ አሳ ኡባ አሞይ ኦኔ? ነናነ ነ አዋ ሶ አሳ ግደኔ?” ያግስ።
1SA 9:21 ሳኦል ዛሪድ፥ “ሽን ታኒ እስራኤለ ዛረ ኡባፈ ላፋ ግድዳ ብንያመ ኮቸ ግድክና? ታ ሶ አሳይ ብንያመ ኮቻ ግዶን ጉꬃ ግደኔ? ኔኒ አይስ ታዉ ሀይሳ መላባ ኦዳይ?” ያግስ።
1SA 9:22 ሄሳፈ ጉየ፥ ሳሜል ሳኦላነ እያ ኦሳንቾይ ኤፍድ፥ ዳልጋ ኬꬅ ገልስድ ሄ በሳ ፄገትዳ ሀስታሙ ግድያ አሳ ግዶን ቦንቾ በሳን ኡትስስ።
1SA 9:23 ሳሜል ካꬅ ካይሳኮ፥ “ነ ማታን ዱማ ዎꬃሻ ጋዳ ታኒ ነዉ እምዳ አሹዋ ሀማ” ያግስ።
1SA 9:24 ካꬅ ካይስ ምሳ አሹዋ ኤህድ፥ ሳኦላ ስንꬃን ዎꬅስ። ሳሜል ሳኦላኮ፥ “ታ ነዉ ዱማ ሻካዳ ዎꬅዳ አሾይ ሀይሳ፤ ኤካዳ ማ። ታኒ እማꬃታ ፄግዳ ዎደፐ ዶማዳ ሀይሳ ነዉ አሻስ” ያግስ። ሄ ጋላስ ሳኦል ሳሜላራ ምስ።
1SA 9:25 ኤንቲ ጎይኖ በሳፈ ዱገ ካታማ ዎꬍን፥ ኬꬃ ቦላ ደእያ በሳን ሳሜል ሳኦላራ ኦደትስ።
1SA 9:26 ሳእ ዎንትን፥ ሳሜል ሳኦላ ኬꬃ ቦላፈ ፄግድ፥ “ደንዳ፤ ታ ነና ሞይዛና” ያግስ። ሳኦል ደንድን፥ ናምአይ ኦገ ቦላ ከይዶሶና።
1SA 9:27 ኤንቲ ካታማ ጋፃ ጋክሽን፥ ሳሜል ሳኦላኮ፥ “ነ ኦሳንቾይ ስን ባና መላ ኦዳ” ያግስ። ኦሳንቾይ ስን አꬍድ ብን፥ ሳሜል ሳኦላኮ፥ “ፆሲ ግዳባ ታ ነዉ ኦዳና መላ ሀይሳን ጉꬁ ጋምአ” ያግስ።
1SA 10:1 ሄ ዎደ ሳሜል ትግያባራ ዛይተ ኤክድ፥ ሳኦላ ሁጰን ትይስ። ሳኦላ ዬርድ፥ ሀይሳዳ ያግስ፤ “ባ አሳ እስራኤለ ካለꬃና መላ ጎዳይ ነና ትይስ።
1SA 10:2 ኔኒ ሀች ታፐ ሻከታዳ ብያ ዎደ ራሄል ዱፉዋ ማታን ብንያመ ዛዋን ደእያ ፃልፃሀ ጌተትያ በሳን ናምኡ አሳታራ ጋሄታና። ኤንቲ ነና፥ ‘ነ ኮያናዉ ብዳ ሀረት በንትዶሶና፤ ሀእ ነ አዋይ ሀረታ ቆፐይሳ አግድ፥ ታ ናአይ ዋንደሻ?’ ያግድ ነዉ ህርጌስ” ያግድ ኦዳና።
1SA 10:3 ኔኒ ሄ በሳፈ ደንዳዳ፥ ታቦረ ግታ ምꬃ ጋካናዉ ባና። ፆሳኮ ቤተለ ብያ ሄꬑ አሳት ያን ኔራ ጋሄታና። ኤንታፈ እሶይ ሄꬑ ዴሻ ማር ቶክስ፤ ናምአንꬆይ ሄꬑ ኡይꬅ ቶክስ፤ ሄꬓንꬆይ ኦጎሮ ኩምꬃ ዎይነ ቶክስ።
1SA 10:4 ኤንቲ ነና ሳሮꬃና፤ ነዉ ናምኡ ኡይꬁ እማና፤ ነ ኤንታ ኩሸፐ ሄ ኡይꬃ ኤካናዉ ኮሼስ።
1SA 10:5 “ሄሳፈ ጉየ፥ ኔኒ ፍልስፄመ ኦላንቾታ ጩጋይ ደእያ ፆሳ ደርያ ግብአ ባና። ኔኒ ሄ ካታማ ጋክያ ዎደ ዲꬃራ ካራቦራ፥ ሱሱልኤነ ዛየ ፑንድ ካእሸነ ትንብተ ኦድሸ፥ ጎይኖ በሳፈ ዎꬍያ ናበ ጩጋራ ጋሄታና።
1SA 10:6 ጎዳ አያናይ ነ ቦላ ዎልቃን ዎꬋና፤ ኔኒ ኤንታራ ትንብተ ኦዳና፤ ኔኒ ላመታዳ ሀራ አስ ግዳና።
1SA 10:7 ሀ ማላት ፖለትያ ዎደ ፆሳይ ኔራ ደእያ ግሾ ነ ኦꬃናዉ ዳንዳእያባ ኡባ ኦꬃ።
1SA 10:8 “ኔኒ ታፐ ስንꬃታዳ ጋልጋላ ዎꬋ። ታኒ ፁሳ ያርሾነ ሳሮተꬃ ያርሾ ያርሻናዉ ኔኮ ባና። ታ ኔኮ ባዳ ነ ኦꬃናባ ኦዳና ጋካናዉ ላፑን ጋላስ ጋምአ” ያግስ።
1SA 10:9 ሳኦል ሳሜላፐ ሻከትዳ ዎደ ፆሳይ ሳኦላ ዎዛና ላምስ፤ ሳሜል ኦድዳ ማላት ኡባይ ሄ ጋላስ ሀንዶሶና።
1SA 10:10 ሳኦልነ እያ አይለይ ግብአ ጋክያ ዎደ ናበ ጩጋይ እያራ ጋሄትስ። ፆሳ አያናይ እያ ቦላ ዎልቃራ ዎꬍን እ ኤንታ ግዶን ትንብተ ኦደትስ።
1SA 10:11 ሳኦላ ካሰ ኤርያ ኡባይ እ ናበታራ ትንብተ ኦደተይሳ በእዳ ዎደ፥ “ቂሳ ናአይ ዋንዴ? ሳኦል ናበ ያሬ?” ያግዶሶና።
1SA 10:12 ሄ በሳን ደእያ እስ ኡራይ፥ “ኑ ኤንታ አዋይ ኦነኮ ኤርዉ?” ያግድ ኦይችስ። ሄሳ ግሾ፥ “ሳኦል ናበ ኮቼ?” ገይስ ሀይሰ ግድስ።
1SA 10:13 ሳኦል ትንብተ ኦደይሳ ዉርስዳፐ ጉየ ጎይኖ ዙማ ቦላ ከይስ።
1SA 10:14 ሳኦላ አዋ እሻይ ሳኦላነ እያ አይልያ፥ “አዉ ብደቲ?” ያግስ። ሳኦል፥ “ሀረታ ኮያናዉ ብዳ፤ ሀረት በንቶና እፅን ሳሜላ ኦይቻናዉ ብዳ” ያግስ።
1SA 10:15 ሳኦላ አዋ እሻይ፥ “ሀያና ሳሜል ነዉ ግዳባ ታዉ ኦዳርኪ” ያግስ።
1SA 10:16 ሳኦል፥ “ሀረት በንትዳይሳ ናበይ ሳሜል ኑስ ጌሽድ ኦድስ” ያግስ። ሽን “ነ ካዎ ግዳና” ግድ ሳሜል እያዉ ኦድዳይሳ ባ አዋ እሻስ ኦድቤና።
1SA 10:17 ሄሳፈ ጉየ፥ ሳሜል ምፅጳን እስራኤለ አሳ ጎዳ ስንꬃን ሺሽስ።
1SA 10:18 ኤንታ፥ “ጎዳይ፥ እስራኤለ ፆሳይ ሀይሳዳ ያጌስ፤ ‘ታኒ እስራኤለ ግብፀፈ ከሳስ፤ ግብፀ አሳ ኩሸፐነ ህንተና ኡንኤꬅያ ካዎተꬃታ ኡባ ኩሸፐ አሻስ።’
1SA 10:19 ሽን ሀች ህንተና ህንተ መቱዋፐነ ዋያፐ አሽያ ታና ህንተ ፆሳ እፅደታ። ‘አካይ፥ ኑስ ካዎ ካዎꬃ’ ያግደታ። ሄሳ ግሾ፥ ሀእ ህንተ፥ ህንተ ኮቻን ኮቻን ግድድ ጎዳ ስን ሺቅተ” ያግስ።
1SA 10:20 ሳሜል እስራኤለ ዛረ ሺሽን፥ ብንያመ ኮቻይ ዶረትስ።
1SA 10:21 ብንያመ ኮቻ ሺሽን፥ ማፅራ ኮቻይ ዶረትስ። ዉርሰꬃን ቂሳ ናአይ ሳኦል ዶረትስ፤ ኤንቲ እያ ኮይዶሶና፥ ሽን እ በንትቤና።
1SA 10:22 ሄሳ ግሾ ኤንቲ፥ “አደይ ሀ በሳ ይዴ?” ያግድ ጎዳ ኦይችዶሶና። ጎዳይ፥ “ኤ፥ ሳኦል ሚሸ ግዶን ቆሰትድ ኡትስ” ያግስ።
1SA 10:23 ኤንቲ ዎፅ ብድ፥ ቆሰትዳ በሳፈ ከስ ኤህዶሶና። አሳ ግዶን እ ኤቅያ ዎደ አስ ኡባይ እያ ሀሸፐ ጋርሳራ አትያ አዱሳ አስ።
1SA 10:24 ሳሜል አሳኮ፥ “ጎዳይ ዶርዳ አድያ በእቴ? እያ ዳንያ አስ ሀ አሳ ግዶን ኦንካ ባዋ” ያግስ። አሳ ኡባይ ባንታ ቃላ ꬎቁ ኦꬅድ፥ “ካዎይ ብራታ ቱስ ግዶ” ያግስ።
1SA 10:25 ሄሳፈ ጉየ፥ ሳሜል ካዎተꬃ ዎጋ አሳስ ኦድስ፤ ፃꬃ ማፃፋን ሄ ዎጋ ፃፍድ ጎዳ ስንꬃን ዎꬅስ። ያትድ ሳሜል አሳ ኡባ ባ ሶ ሶ ሞይዝስ።
1SA 10:26 ሳኦል ባ ሶ ግብአ ብስ፤ ፆሳይ ኤንታ ዎዛና ቦችዳ ምኖ አሳት ሳኦላራ ብዶሶና።
1SA 10:27 ሽን እስ እስ ፓꬆና አሳት፥ “ሀ አደይ ኑና ዋትድ አሻኔ?” ያግዶሶና። ኤንቲ እያ ካꬍድ፥ እያዉ አይ እሞታካ እምቦኮና። ሽን ሳኦል ስእ ግስ።
1SA 11:1 እስ አጌናፐ ጉየ፥ አሞነ ካዎይ ናኦስ ደንድድ፥ ጋላዳን ደእያ ያበሳ ካታማ ተቅስ። ያበሳ አሳይ፥ “ኔኒ ኑራ ጫቃ፤ ኑኒ ነዉ ሃረታና” ያግዶሶና።
1SA 11:2 ናኦስ፥ “ታኒ ህንተራ ጫቃናይ ህንተ ኡሻቻ አይፍያ ዎጫ ከሳዳ እስራኤለ ካዉሽዳፐ ጉየና” ያግስ።
1SA 11:3 ያበሳ ጭማት ናኦሳኮ፥ “እስራኤለ ቢታ ኡባ ኑኒ ኪታ የዳና መላ ላፑን ጋላስ ታካ፤ ኑና አሽያ አስ ꬋይኮ ኑኒ ነዉ ኩሸ እማና” ያግዶሶና።
1SA 11:4 ኪተትዳ አሳይ ሳኦል ደእያ በሳ ግብአ ጋክድ ሀ ኦዳ አሳስ ኦድዶሶና፤ አሳ ኡባይ ባንታ ቃላ ꬎቁ ኦꬅድ ዬክዶሶና።
1SA 11:5 ሄ ዎደ ሳኦል ባ ቦራታ ላግድ ጎሻፈ ይሸ፥ “አሳይ ዋንዴ? አይስ ዬኮና?” ያግድ ኦይችስ። ኤንቲ ያበሳ አሳይ ግዳባ እያዉ ኦድዶሶና።
1SA 11:6 ሀ ቃላ ሳኦል ስእዳ ዎደ ፆሳ አያናይ እያ ቦላ ዎልቃን ዎꬍስ፤ ሳኦል ሸነ ኤፅስ።
1SA 11:7 ሳኦል ዋፃ ቦራታ ሙፀረꬅድ፥ “ሳኦላነ ሳሜላ ካልድ፥ ከዮና አሳ ቦራት ሀይሳዳ ሙፀታና” ያግድ ኪተትዳ አሳታ ቦላ እስራኤለ ቢታ ኡባ የድስ። ሄ ዎደ አሳ ኡባይ ጎዳስ ያይዶሶና፤ ኤንቲ እስ አሳዳ ሀንድ ከይዶሶና።
1SA 11:8 ሳኦል ቤዘቃን ኤንታ ሺሽድ ታይብዳ ዎደ እስራኤለ አሳይ ሄꬑ ፄቱ ሙኩሉ፤ ይሁዳ አሳይ ሀስታሙ ሙኩሉ ግድስ።
1SA 11:9 ኪተትዳ አሳይ፥ “ብድ ያበሳ ጋላዳ አሳስ፥ ‘ዎንቶ ፃልቀይ ምችያ ዎደ ኑኒ ህንተና አሻና ያግድ ኦድተ’ ” ያግዶሶና። ኪተትዳ አሳይ ብድ፥ ያበሳ አሳስ ሄሳ ኦድን፥ ኤንቲ ዳሮ ኡፋይትዶሶና።
1SA 11:10 ያበሳ አሳይ አሞነታኮ፥ “ኑኒ ዎንቶ ህንተዉ ኩሸ እማና፤ ህንተ ኑ ቦላ ዶስዳባ ኦꬅተ” ያግዶሶና።
1SA 11:11 ዎንተꬃ ጋላስ ሳኦል ባ አሳ ሄꬑ ጩጋን ሻክስ። ኤንቲ ሳእ ዎንትያ ዎደ አሞነ አሳይ ዱንካንዳ ጉታ ገልድ፥ ፃልቀይ ምቻና ጋካናዉ አሞነታ ጎይርዶሶና። ጎይረተꬃፈ አትዳይሳት ናምኡ አስ እስፈ ዶናዳ ባዉ ባዉ ባቃቲስ።
1SA 11:12 እስራኤለ አሳይ ሳሜላኮ፥ “ሳኦል ኑ ቦላ ካዎታነ ያግዳ አሳት ኦናንቴ? ኤንቲ ኦነኮ ከስተ፤ ኑ ኤንታ ዎꬋና” ያግስ።
1SA 11:13 ሽን ሳኦል፥ “ሀች ጎዳይ እስራኤለ አሽዳ ግሾ እስ አስካ ሀይቀና” ያግድ ዛርስ።
1SA 11:14 ሳሜል፥ “ሃይተ፤ ጋልጋላ ብድ፥ ያን ሳኦል ካዎ ግደይሳ ዛሪድ ኤርሶስ” ያግስ።
1SA 11:15 ሄሳ ግሾ፥ አሳ ኡባይ ጋልጋላ ብድ፥ ጎዳ ስንꬃን ሳኦል ካዎ ግደይሳ ኤርስዶሶና። ያን እስፈተꬃ ያርሾ ጎዳ ስንꬃን ያርሽዶሶና። ሳኦልነ እስራኤለ አሳ ኡባይ ሄ በሳን ባኣለ ኡፋይሳን ቦንችዶሶና።
1SA 12:1 ሳሜል እስራኤለ ኡባኮ፥ “ህንተ ታዉ ኦድዳ ኡባ ስአዳ፥ ህንተ ቦላ ካዎ ካዎꬃስ።
1SA 12:2 ሀእ ህንተና ካለꬃናዉ ካዎይ ደኤስ። ታኒ ዳሮ ጭማዳ ፑሉማስ፤ ታ ናይት ህንተራ ደኦሶና። ታኒ ታ ናአተꬃፈ ዶማዳ ሀች ጋካናዉ ህንተና ካለꬃስ።
1SA 12:3 ሄኮ፥ ታኒ ህንተ ስንꬃን ኤቃስ፤ ጎዳ ስንꬃንነ እ ትይዳ ካዋ ስንꬃን ታ ቦላ ማርካትተ። ታኒ ኦደ ቦሩ ኤካድና? ኦደ ሀረ ኤካድና? ኦና ጭማድና? ኦና ኡንኤꬃድና? በአሸ በኦናዳ ሀናናዉ ኦደፈ ዎꬋፈ ኤካድና? ሀይሳታፐ እሱዋ ታኒ ኦꬅዳባ ግድኮ ታዉ ኦድተ፤ ታ ቃንፃና” ያግስ።
1SA 12:4 ኤንቲ ዛሪድ፥ “ኔኒ ኑና ጭማባካ፤ ዎይኮ ኑና ኡንኤꬃባካ፤ ነ ኦደ ኩሸፐ አይባካ ኤካባካ” ያግዶሶና።
1SA 12:5 ሳሜል፥ “ህንተ ታ ኩሸን አይ ባላካ ደምቦናይሳ ጎዳይነ እ ትይዳ ካዎይ ሀች ህንተ ቦላ ማርካ” ያግስ። አሳይ፥ “ኤ፥ ፆሳይ ማርካ” ያግዶሶና።
1SA 12:6 ቃስካ ሳሜል፥ “ሙሰነ አሮና ዶርዳይነ ህንተ ማይዛታ ግብፀፈ ከስዳይ ጎዳ።
1SA 12:7 ሀእ ህንተዉነ ህንተ ማይዛታስ ጎዳይ ኦꬅዳ ፅሎ ኦሶ ኡባስ ታኒ ህንተነራ ጎዳ ስንꬃን ሞተታና መላ ሀይሳን ኤቅተ።
1SA 12:8 ያይቆብነ እያ ሶ አሳይ ግብፀን ደእሽን፥ ግብፀ አሳይ ኤንታ ኡንኤꬅዳ ዎደ ህንተ ማይዛት ጎዳኮ ዋስዶሶና። ጎዳይ ሙሰነ አሮና ኪትስ፤ ኤንቲ ህንተ ማይዛታ ግብፀፈ ከስድ ሀይሳን ዎꬅዶሶና።
1SA 12:9 “ሽን እስራኤለ አሳይ ጎዳ ባንታ ፆሳ ዶግዶሶና። ጎዳይ ኤንታ ሀፆራ ቶራ ሞጮና ስሳራ ኩሸን፥ ፍልስፄመ አሳ ኩሸንነ ሞአበ ካዋ ኩሸን አꬅድ እምን ኤንታ ኦልዶሶና።
1SA 12:10 ኤንቲ፥ ‘ኑኒ ናጋራ ኦꬅዳ፤ ጎዳ አግድ፥ ባኣለነ አስታሮታ ጎይንዳ። ሽን ሀእ ነ ኑና ኑ ሞርከታ ኩሸፐ አሻ፤ ኑኒ ነና ጎይናና’ ያግድ ጎዳኮ ዋስዶሶና።
1SA 12:11 ጎዳይ ገድዮና፥ ባራቃ፥ ዮፍታሄነ ሳሜላ ኪትድ፥ ህንተ ዩሾ ኡባን ደእያ ሞርከታ ኩሸፐ ህንተና አሽስ። ያትን፥ ህንተ ሳሮ ደእደታ።
1SA 12:12 “አሞነ ካዎይ ናኦስ ህንተኮ ይዳይሳ በእዳ ዎደ ጎዳይ ህንተ ፆሳይ ህንተ ካዎ ግድኮካ፥ ህንተ፥ ‘አካይ፥ ኑኒ ካዎ ኮዮስ’ ያግደታ።
1SA 12:13 ሀእ ህንተ ዶርዳነ ኦይችዳ ካዎይ ሀይስሽ። ሄኮ፥ ጎዳይ ህንተ ቦላ ካዎꬅስ።
1SA 12:14 ህንተ ጎዳስ ያይኮ፥ እያዉ ኪተትኮ፥ እያ ቃላ ስእኮ፥ እያ ኪታ ቦላ ማካሎና እፅኮ፥ ህንተነ ህንተ ቦላ ካዎትያ ካዎይ ጎዳ ህንተ ፆሳ ካልኮ ኡባባይ ሱራና።
1SA 12:15 ሽን ህንተ ጎዳ ቃላስ ኪተቶና እፅኮነ እያ ኪታ ቦላ ማካልኮ፥ ጎዳ ፕርዳይ ካሰ ህንተ አዋታ ቦላ ይዳይሳዳ ህንተ ቦላካ ያና።
1SA 12:16 “ህዛ ምንድ ኤቅተ፤ ጎዳይ ህንተ አይፍያ ስንꬃን ኦꬃና ግታባ በእተ።
1SA 12:17 ሀእ ግስተ ጫካ ዎደ ግደኔ? ጎዳይ ዳዳነ እራ የዳና መላ ታኒ ጎዳ ዎሳና። ህንተ ካዎ ኦይችድ፥ ጎዳ ስንꬃን አይ መላ ኢታባ ኦꬅዳኮ ህንተ አኬካና” ያግስ።
1SA 12:18 ሳሜል ጎዳ ዎስስ፤ ጎዳይ ሄ ጋላስ ዳዳነ እራ የድስ፤ ሄሳ ግሾ፥ አሳይ ጎዳነ ሳሜላ ዳሮ ያይዶሶና።
1SA 12:19 አሳይ፥ “ኑኒ ካዎ ኦይችድ፥ ኑ ናጋራ ኡባ ቦላ ሀ ኢታተꬃ ጉጅዳ ግሾ ኑኒ ነ አይለት ሀይቆና መላ ኑስ ጎዳ ነ ፆሳ ዎሳርክ” ያግስ።
1SA 12:20 ሳሜል አሳኮ፥ “ያዮፍተ፤ ህንተ ሀ ኢታተꬃ ኡባ ኦꬅደታ፤ ሽን ህንተ ኩመꬃ ዎዛናን ጎዳስ ኪተትተ፤ እያ ካሎ አጎፍተ።
1SA 12:21 ፓꬆናባ ግድያ ግሾ ማዶናነ አሾና ኤቃታ ካሎፍተ።
1SA 12:22 ጎዳይ ባ ግታ ሱንꬃ ግሾ ባ አሳ አገና፤ እ ህንተና ባ አሰ ኦꬃናዉ ኡፋይቴስ።
1SA 12:23 ህንተ ግሾ ዎሳ አጋዳ ጎዳ ቆሆይ ታፐ ሃኮ፤ ታኒ ህንተና ሎኦነ ሱረ ኦግያ ታማርሳና።
1SA 12:24 ጎዳ ያይተ፤ ህንተ ኩመꬃ ዎዛናን አማነትድ፥ እያዉ ኪተትተ፤ ህንተዉ እ ኦꬅዳ ግታባ ሀሳይተ።
1SA 12:25 ሽን ህንተ ዛር ዛር ናጋራ ኦꬅኮ፥ ህንተነ ህንተ ካዎይ ꬋያና” ያግስ።
1SA 13:1 ሳኦል ካዎትያ ዎደ እያዉ ላይꬅ ሀስታማ፤ እ እስራኤለ ቦላ ናምኡ ላይꬅ ካዎትዳፐ ጉየ፥
1SA 13:2 እስራኤለታ ግዶፈ ሄꬑ ሙኩሉ አስ ዶርስ። ኤንታፈ ናምኡ ሙኩሉ አሳይ ምክማሳንነ ደረይ ዳርያ ቤተለ ቢታን ሳኦላራ ደኤስ። እስ ሙኩሉ አሳይ ቃስ ብንያመን ደእያ ግብአን ዮናታናራ ደኤስ፤ አትዳ አሳ ሳኦል ኤንታ ሶ ሶ የድስ።
1SA 13:3 ዮናታን ግብአን ደእያ ፍልስፄመ ኦላንቾታ ኦልስ፤ ፍልስፄመ አሳይ ሄሳ ስእዶሶና። ሄሳፈ ጉየ፥ ሳኦል፥ “እብራወት ሀይሳ ስኦ” ግድ ቢታ ኡባን ሞይዘ ፑንስስ።
1SA 13:4 ሳኦል ፍልስፄመ አሳ ኦልድ ፆንዳይሳ እስራኤለ አሳይ ስእዶሶና፤ እስራኤለ አሳይ ፍልስፄመ አሳ ማታን እፀትዳይሳታ ግደይሳ ኤርዶሶና። እስራኤለ አሳይ ሳኦላ ካላናዉ ፄገትድ ጋልጋላን ሺቅዶሶና።
1SA 13:5 ፍልስፄመ አሳይ እስራኤለ አሳ ኦላናዉ ሄꬑ ሙኩሉ ፓራ ጋረታራ፥ ኡሱፑን ሙኩሉ ፓራ አሳታራነ አባ ዶናን ደእያ ሻፈዳ ዳርዳ ኦላንቾታራ ሺቅዶሶና። ኤንቲ ብድ፥ ቤት-አዌናፐ ዶሎሀ ባጋራ ደእያ ምክማሳን ዙግድ ኡትዶሶና።
1SA 13:6 እስራኤለ አሳይ ሳእ ኤንታዉ ኢታ ግደይሳነ ኦላንቾት ዳጋምዳይሳ በእዳ ዎደ ጎንጎሎን፥ ቡረን፥ ዛላ ግዶን፥ ካካን፥ ሃꬃ ኦላን ቆሰትዶሶና።
1SA 13:7 እብራወታፐ ጉꬃት ዮርዳኖሰ ሻፋ ፕንድ፥ ጋደነ ጋላዳ ቢታ ብዶሶና። ሽን ሳኦል ጋልጋላን አትስ፤ እያራ ደእያ ኦላንቾት ኡባይ ያሻን ኮኮርዶሶና።
1SA 13:8 ሳኦል ሳሜል ኬርዳ ላፑን ጋላስ ጋካናዉ ጋምእስ፤ ሽን ሳሜል ጋልጋላ ይቤና፤ ያትን፥ ሳኦላራ ደእያ ኦላንቾት ላለተꬅ ዶምዶሶና።
1SA 13:9 ሄሳ ግሾ፥ ሳኦል፥ “ፁሳ ያርሾነ እስፈተꬃ ያርሾታ ታዉ ኤህተ” ያግድ፥ ፁሳ ያርሾ ያርሽስ።
1SA 13:10 ሳኦል ፁሳ ያርሹዋ ያርሽድ ፖልዳፐ ጉየ ሳሜል ይስ። ያትን፥ ሳኦል ሳሜላ ሞካናዉ ካረ ከይስ።
1SA 13:11 ሳሜል፥ “ሀ ኔኒ ኦꬅዳባይ አይቤ?” ያግድ ሳኦላ ኦይችስ። ሳኦል፥ “አሳይ ላለታናዉ ማትዳይሳ፥ ነካ ግዳ ዎድያን ያናዉ ጋምእዳይሳነ ፍልስፄመት ምክማሳን ሺቅዳይሳ ታኒ በአስ።
1SA 13:12 ሄሳ ግሾ፥ ‘ፍልስፄመት ታራ ኦለታናዉ ጋልጋላ ዎꬋና ሀኖሶና፤ ታኒ ጎዳ ማዶ ኦይቻብከ’ ጋዳ ቆፓስ። ያትን፥ ፁሳ ያርሾ ያርሻናይስ ታዉ አቶናባ ግድስ” ያግድ ዛርስ።
1SA 13:13 ሳሜል፥ “ኔኒ ቦዛባ ኦꬃዳሳ፤ ጎዳይ፥ ነ ፆሳይ ነዉ እምዳ ኪታ ናጋባካ። ኔኒ ናግዳኮ ጎዳይ ሀች ነ ካዎተꬃ እስራኤለ ቦላ መርናዉ ምንꬃናሽን።
1SA 13:14 ሽን ሀእ ነ ካዎተꬃይ ጋምኤና፤ ኔኒ ጎዳ ኪታ ናጋቦና ግሾ፥ ጎዳይ ባ ዎዛናዳ ኦꬅያ አስ ደምስ፤ ባ አሳ ካለꬃና መላ እያ ዶርስ” ያግስ።
1SA 13:15 ሳሜል ጋልጋላፐ ደንድድ፥ ብንያመን ደእያ ግብአ ብስ። ሳኦል ባራ ደእያ አሳ ታይብን፥ አሳይ ኡሱፑን ፄቱ ግድስ።
1SA 13:16 ሳኦል፥ እያ ናኣ ዮናታንነ ኤንታራ ደእያ አሳይ ብንያመን ደእያ ግብአን ጋምእዶሶና፤ ፍልስፄመ አሳይ ምክማሳን ዱንካንዶሶና።
1SA 13:17 ፍልስፄመ ኦላንቾት ሄꬑ ጩጋን ሻከትድ ከይዶሶና። ኤንታፈ እስ ጩጋይ ሹኣላ ቢታን ደእያ ኦፍራኮ ስሚድ ብስ፤
1SA 13:18 ናምአንꬆይ ቤት-ሆሮናኮ ብስ፤ ሄꬓንꬆ ጩጋይ መላ ቢታ ስንꬃን ደእያ ሳቦይማ ዛንጋራ ዱገ ፄልያ ዛዋ ኦግያ ኦይክድ ብስ።
1SA 13:19 ፍልስፄመ አሳይ፥ “እብራወት ማሸነ ቶራ ቆፆፎ” ግዳ ግሾ፥ እስራኤለ ቢታን ብራታ ቆፅያ አስ ባዋ።
1SA 13:20 ሄሳ ግሾ፥ እስራኤለ አሳይ ባንታ ማራሻ፥ ኮንተ፥ ካልታነ ባጫ ፖሽሳናዉ ፍልስፄመ ቦሶና።
1SA 13:21 ማራሻነ ኮንተ ፖሽሳናዉ ሆስፑን ግራመ ዴፅያ ብራ ቃንፆሶና፤ ካልታነ ፆፀ ፖሽሳናዉ ኦይዱ ግራመ ቃንፆሶና።
1SA 13:22 ሄሳ ግሾ፥ ኦላ ጋላስ ሳኦልነ እያ ናኣ ዮናታን አትሽን፥ ሀራታ ኩሸን ቶርነ ማሽ ባዋ።
1SA 13:23 ፍልስፄመ ጩጋይ ምክማሳ ፕንꬅ ባናዉ ከይስ።
1SA 14:1 እስ ጋላስ ሳኦላ ናአይ ዮናታን ባ ኦላ ሚሽያ ቶክያ ፓንꬃኮ ሀይሳዳ ያግስ፤ “ሃያ፤ ሄፍንꬃን ደእያ ፍልስፄመት ዱንካንዳ ጉታ አነ ቦስ” ያግስ። ሽን ባ አዋስ ሄሳ ኦድቤና።
1SA 14:2 ሄ ዎደ ሳኦል ግብአ ማታን ምግሮናን፥ ኦሮማነ ምꬃ ጋርሳን ደኤስ። እያራ ኡሱፑን ፄቱ አሳት ደኦሶና።
1SA 14:3 ሴሎን ጎዳ ካህነ ግድዳ ኤል ናአይ፥ ካህነይ ፍንሃስ የልዳ እካቦዳ እሻይ፥ አክፁባ ናአይ፥ አክይ ኤፉደ ማእድ፥ ኤንታ ግዶን ደኤስ። ዮናታን ኤንታ ግዶን ባይናይሳ ኦንካ ኤርቤና።
1SA 14:4 ዮናታን ፍልስፄመት ዱንካንዳ ጉታ ፕናናዉ ብያ ኦግያ ቦላ ኡሻቻ ባጋንነ ሀድርሳ ባጋን፥ እሶይ ቦፀፃ፥ ሀንኮይ ሳና ጌተትያ ናምኡ ፖፀትዳ ግታ ዛላት ደኦሶና።
1SA 14:5 ዛላታፐ እሶይ ፑደሀ ባጋን ምክማሳ ስንꬃን ደእያ ዎደ፥ እሶይ ቃስ ዱገሀ ባጋን ግብአ ስንꬃን ደኤስ።
1SA 14:6 ዮናታን ባ ኦላ ሚሽያ ቶክያ ፓንꬃኮ፥ “ሃያ፤ ሀ ቃፃረትቦና አሳይ ዱንካንዳ ጉታ አነ ቦስ። ጎዳይ ኑ ግሾ ኦለቶና አገና፤ ዳሮ አሳን ግድን ጉꬃ አሳን፥ አሻናይስ ጎዳ ፆነና” ያግስ።
1SA 14:7 እያ ኦላ ሚሽያ ቶከይስ፥ “ኔኒ ቆፕዳባ ኡባ ኦꬃ፤ ጉየ ጎፓ፤ ታ ዎዛናይ ኔራ ደኤስ” ያግስ።
1SA 14:8 ዮናታን፥ “ያኮ ሃያ፤ ሄፍንꬅ ፕንድ አሳስ በንቶስ።
1SA 14:9 ኤንቲ፥ ‘ኑኒ ህንተኮ ያና ጋካናዉ ያን ናግተ’ ጊኮ፥ ኑኒ ደእያ በሳን ናጋናፐ አትሽን፥ ኤንታኮ ቦኮ።
1SA 14:10 ሽን ኤንቲ፥ ‘ኑኮ ሃ ዪተ’ ጊኮ፥ ኑኒ ኤንታኮ ከያና። ሄስ ጎዳይ ኤንታ ኑ ኩሸን አꬅድ እምዳይሳስ ማላ ግዳና” ያግስ።
1SA 14:11 ኤንቲ ናምአይ ከይድ ፍልስፄመታስ በንትዳ ዎደ ፍልስፄመት፥ “ሄኮ፥ እብራወት ባንታ ቆሰትዳ ኦላፈ ዙምድ ከዮሶና” ያግዶሶና።
1SA 14:12 ፍልስፄመ ኦላንቾት፥ ዮናታናነ ኦላ ሚሽያ ቶከይሳ ፄግድ፥ “ሃ ኑኮ ከይተ፤ ኑኒ ህንተና እስባ በሳና” ያግዶሶና። ሄሳ ግሾ፥ ዮናታን ባ ኦላ ሚሽያ ቶከይሳኮ፥ “ታና ካላዳ ሀ ከያ። ጎዳይ ኤንታ እስራኤለ ኩሸን አꬅድ እሚስ” ያግስ።
1SA 14:13 ዮናታን ባ ኦላ ሚሽያ ቶከይሳ ካለꬅድ፥ ቶሆንነ ኩሸን ዙምድ ከይስ። ፍልስፄመታ ዮናታን ሾጭድ የግን፥ እያ ኦላ ሚሽያ ቶከይስ ካልድ ኤንታ ዎꬍስ።
1SA 14:14 ሄ ኮይሮ ኦላን ዮናታንነ እያ ኦላ ሚሽያ ቶከይስ ባጋ ቦራ ሶ ጋደን ላታሙ ግድያ አስ ዎꬍዶሶና።
1SA 14:15 ሄሳፈ ጉየ፥ ጉታንንን ጎሻን፥ ኦላስ ከይዳ አሳትነ ናጎን ደእያ ፍልስፄመት ዳጋምዶሶና። ቢት ቃፅስ፤ ሄ ዳጋማይ ፆሳፈ ኪተትስ።
1SA 14:16 ሳኦል ብንያመ ቢታን፥ ግብአን ዎꬅዳ ዎችያ አሳት፥ ፍልስፄመ ኦላንቾት ያራ ሃራ ፕስክ ግድ ላለተይሳ በእዶሶና።
1SA 14:17 ያትን፥ ሳኦል ባራ ደእያ አሳኮ፥ “አነ ኦላንቾታ ሺሽድ ኑ ግዶፈ ኦን ብዳኮ በእተ” ያግስ። ኤንቲ ሺሽድ ታይብያ ዎደ ዮናታንነ እያ ኦላ ሚሽያ ቶከይስ ባይናይሳ በእዶሶና።
1SA 14:18 ሳኦል ካህንያ አክያ፥ “ፆሳ ታቦትያ ሃ ኤካዳ ያ” ያግስ። ሄ ዎደ ታቦተይ እስራኤለራ ደኤስ
1SA 14:19 ሳኦል ካህንያራ ሃሳይሽን፥ ፍልስፄመት ዱንካንዳ ጉታን ዎጫማይ ዳር ዳር ብስ። ሄሳ ግሾ፥ ሳኦል ካህንያ፥ “ታቦትያፐ ነ ኩሽያ ከሳ” ያግስ።
1SA 14:20 ሄሳፈ ጉየ፥ ሳኦልነ እያ ኦላንቾት ሺቅድ ኦላ ብዶሶና። ፍልስፄመ አሳ ኡባይ ሀናና ባ ꬋይድ፥ ባንታ ማሻን እሶይ እሱዋ ቡꬅዶሶና።
1SA 14:21 ካሰ ፍልስፄመ አሳራ ዎላ ኦላ በሳ ብዳ እብራወት ኤንታ አግድ፥ ሳኦላራነ ዮናታናራ ደእያ እስራኤለ አሳራ ዋላከትዶሶና።
1SA 14:22 ደረይ ዳርያ ኤፍሬማ ቢታን ቆሰትዳ ሀራ እስራኤለትካ ፍልስፄመት ባቃተይሳ ስእዶሶና። ኤንትካ እስራኤለታራ ዋላከትድ የደꬆ ኦይክዶሶና።
1SA 14:23 ጎዳይ ሄ ጋላስ እስራኤለ አሳ አሽስ። ቤት-አዌናፐ ሄፍንꬅ ጋካናዉ ኦላይ ካንꬅስ።
1SA 14:24 ሄ ጋላስ እስራኤለ አሳይ ኮሻን ላባንዶሶና። ሳኦል፥ “ሳእ ቃማናፐ ስን ታኒ ታ ሞርከታ ሀሎ ከዮና ደእሽን፥ ካꬅ ምያ ኦንካ ባደትዳይሳ ግዶ” ያግድ አሳ ጫቅስድ ዎꬅስ። ሄሳ ግሾ፥ ኦላንቾታፐ ካꬅ ዶናኮ ሺሽዳ አስ ኦንካ ባዋ።
1SA 14:25 ኦላንቾት ኡባይ ዎራ ግዶ ገልያ ዎደ ምꬃ ቦላ ኤስ ደኤስ።
1SA 14:26 ኤንቲ ዎራ ግዶን ኤስ ፆከይሳ በእዶሶና፤ ሽን ጫቁዋ ያይዳ ግሾ፥ እስ አስካ ባ ኩሽያ ዶናኮ ሺሽበና።
1SA 14:27 ሽን ዮናታን እያ አዋይ አሳራ ኦዳ ቃችዳይሳ ስእቤና። ሄሳ ግሾ፥ ባ ኩሸን ደእያ ፃምአ ፄራ እልሎ ኤሳን የድ ከስድ፥ ላጭን እያ አይፈይ ፄልስ።
1SA 14:28 ሄሳፈ ጉየ፥ ኦላንቾታፐ እሶይ፥ “ነ አዋይ ኦላንቾታ ኡባ፥ ‘ሀች ካꬅ ምያ አስ ባደትዳይሳ ግዶ’ ያግድ፥ ጫቅስድ ዎꬅስ፤ አሳ ኡባይ ላባንዳይ ሄሳሳ” ያግስ።
1SA 14:29 ዮናታን፥ “ታ አዋይ ቢታስ መቶ መꬍስ። ታኒ ሀ ኤሳፈ ጉꬃራ ላጭዳ አይ መላ ምንዳኮ በአ።
1SA 14:30 አሳይ ባ ሞርከታፐ ድእዳ ካꬃፈ ሀች ምዳባ ግድያኮ ሎኦሽን፤ ኤንቲ ዎꬋና ፍልስፄመታ ታይቦይካ አይ መላ ዳራነሽን” ያግስ።
1SA 14:31 ሄ ጋላስ እስራኤለ አሳይ ምክማሳፐ ኤሎና ጋካናዉ ፍልስፄመታ ሾጭ ስሚድ ዳቡርዶሶና።
1SA 14:32 ኤንቲ ድእዳ ዶርሳታ፥ ሚዛታነ ማራታ ሹክድ ሱꬃ ጉሶና ምዶሶና።
1SA 14:33 እስ አስ ሳኦላኮ፥ “ሄኮ፥ አሳይ ሱꬃራ ደእያ አሾ ምድ፥ ጎዳ ስንꬃን ናጋራ ኦꬆሶና” ያግስ። ሳኦል፥ “ህንተ ናጋራ ኦꬅደታ፤ ግታ ሹቹ ጎንዶርስድ ኤለ ታኮ ሃ ሺሽተ” ያግስ።
1SA 14:34 ሄሳፈ ጉየ፥ “አሳ ግዶ ብድ፥ ‘ህንተ እሶይ እሶይ ህንተ መሄታነ ዶርሳታ ታኮ ሃ ኤህተ፤ ሀይሳን ዎጋዳ ሹክድ ሚተ። ሱꬃራ ደእያ አሾ ምድ፥ ጎዳ ስንꬃን ናጋራ ኦꬆፕተ’ ያጋ” ያግስ። ሄሳ ግሾ፥ ሄ ቃማ እሶይ እሶይ ባ ቦራ ኤህድ ያን ሹክዶሶና።
1SA 14:35 ሳኦል ሄ በሳን ጎዳስ ያርሾ በሲ ግምብስ፤ ጎዳስ ያርሾ በሲ ግምብሽን ሀይስ እያዉ ኮይሮ።
1SA 14:36 ሳኦል፥ “ሀች ቃማ ፍልስፄመታ ካል፥ ብድ ሳእ ዎንታና ጋካናዉ ኤንታባ ኡባ ቦንቆስ፤ ኤንታፈ እሱዋካ አሾና ዎꬎኦስ” ያግስ። ኤንቲ፥ “ኤሮ፥ ነና ሎእዳባ ኦꬃ” ያግድ ዛርዶሶና። ሽን ካህነይ፥ “አነ ፆሳ ሸነይ አይበኮ ኦይቾስ” ያግስ።
1SA 14:37 ሄሳ ግሾ፥ ሳኦል፥ “ፍልስፄመ አሳ ካላዳ ቦ? ኔኒ ኤንታ እስራኤለ ኩሸን አꬃዳ እማኔ?” ያግድ ፆሳ ኦይችስ። ሽን ሄ ጋላስ ፆሳይ እያዉ ዛሮ እምቤና።
1SA 14:38 ሳኦል፥ “ካለይሳታ ፄግድ፥ ኡባይ ሃይተ፤ ሀች አይባ ናጋር ኦሰትዳኮ አነ ቆርድ ደሞስ።
1SA 14:39 እስራኤለ አሽያ ደኦ ጎዳይ ኤርያ መላ። ታ ናአ ዮናታና ግድኮካ፥ ሀይቃናዉ በሴስ” ያግስ። ሽን አሳፐ እስ አስካ ዶና ፖግቤና።
1SA 14:40 ሄሳፈ ጉየ፥ ሳኦል እስራኤለ አሳኮ፥ “ህንተ ኡባይ ያ ባጋን ኤቅተ፤ ታንነ ታ ናኣ ዮናታን ሀ ባጋን ኤቃና” ያግስ። አሳይ፥ “ኤሮ፥ ነና ሎእዳባ ኦꬃ” ያግዶሶና።
1SA 14:41 ሄሳፈ ጉየ፥ ሳኦል፥ “ታዉ ልከ ዛሮ እማ” ያግድ ጎዳ እስራኤለ ፆሳ ዎስስ። ሳማይ ሳኦላ ቦላነ ዮናታና ቦላ ዎꬍን አሳይ ጌይስ።
1SA 14:42 ቃስ ሳኦል፥ “ታ ቦላነ ታ ናኣ ዮናታና ቦላ ሳማ የግተ” ያግስ። ሳማይ ዮናታና ቦላ ዎꬍስ።
1SA 14:43 ሳኦል ዮናታና፥ “አነ ኔኒ ኦꬅዳባ ኦዳ” ያግስ። ዮናታን፥ “ታኒ ጉꬃ ኤሳ እልሎ ታ ፃምኣ ፄራን ቦቻዳ ላጫስ። ሄኮ ታኒ ሀይሳን ደአይስ፤ ሀይቆስ ጊገታስ” ያግስ።
1SA 14:44 ሳኦል፥ “ዮናታና፥ ኔኒ ሀይቆና እፅኮ፥ ፆሲ ታና ፕርዶ” ያግስ።
1SA 14:45 ሽን አሳይ ሳኦላኮ፥ “ዮናታን፥ እስራኤለስ ሄሳ መላ ግታ ፆኑዋ ኤህዳይስ ሀይቃኔ? ሄስ ፖሎ ሀነና! ደኦ ፆሲ ኤርያ መላ! እያ ሁጵያፐ እስ ብናንካ ቢታን ዎና። እ ሀች ሀይሳ ፆሳ ማዶን ኦꬅስ” ያግዶሶና። ያትድ አሳይ ዮናታና አሽን፥ እ ሀይቆፐ አትስ።
1SA 14:46 ሄሳፈ ጉየ፥ ሳኦል ፍልስፄመ አሳ የደይሳ አግን ኤንቲ ባንታ ቢታ ስምዶሶና።
1SA 14:47 ሳኦል እስራኤለ ቦላ ካዎትዳፐ ጉየ፥ ኡባ ባጋራ ደእያ ባ ሞርከታ ኦልስ። ሄሳትካ፥ ሞአበታ፥ አሞነታ፥ ኤዶመታ፥ ሱባ ካዎታነ ፍልስፄመታ። ኦላናዉ ብዳ በሳ ኡባን ፆንስ።
1SA 14:48 እ ምንድ ኦለትስ፤ አማለቃታ ፆንስ፤ እስራኤለ አሳ ቦንቀይሳታ ኩሸፐ አሽስ።
1SA 14:49 ሳኦላ አደ ናይት ዮናታና፥ የሱዋነ ማልክሳ፤ እያዉ ባይራ ናኤ ሱንꬃይ መራቦ፤ ካሎ ናኤ ሱንꬃይ መልኮሎ።
1SA 14:50 እያ ማችያ፥ አክማሳ ናእያ አክናሆሞ። እያ ቶራ ሞጮናይ እያ አዋ እሻ ኔራ ናኣ አበኔራ።
1SA 14:51 ሳኦላ አዋ ቂስነ አበኔራ አዋ ኔር አብኤላ ናይታ።
1SA 14:52 ሳኦል ደእዳ ላይꬃ ኡባን ፍልስፄመታራ ሞርከተꬃን ኦለትዳ መላ ደእስ። ምኖ አስ ዎይኮ ፃላ አስ ደምዳ ዎደ ኡባን እ ሄ ኡራ ባ ኦላንቾታን ጉጄስ።
1SA 15:1 ሳሜል ሳኦላኮ፥ “ባ አሳ እስራኤለ ቦላ ኔኒ ካዎታናዳ ትያና መላ ጎዳይ ኪትዳይ ታና። ሄሳ ግሾ፥ ጎዳ ቃላ ስአ።
1SA 15:2 ኡባፈ ዎልቃማ ጎዳይ ሀይሳዳ ያጌስ፤ ‘እስራኤለት ግብፀፈ ከይድ ያ ዎደ አማለቃት ኦገን ኤንታራ ኤቀትዳ ግሾ ታኒ አማለቃታ ሴራና።
1SA 15:3 ሀእ ባዳ አማለቃታ ሾጫ፤ ኤንታዉ ደእያባ ኡባ ፖሎ ꬋይሳ። ኤንታ አሾፋ፤ ማጫነ አደ፥ ናይታነ ዮጋ ናይታ፥ ሚዝነ ዶርሰ፥ ግማለነ ሀረ ኡባ ዎꬋ’ ” ያግስ።
1SA 15:4 ሳኦል አሳ ፄግድ፥ ፀላመ ጌተትያ በሳን ታይብስ። ታይብያ ዎደ እስራኤለፐ ናምኡ ፄቱ ሙኩሉ ቶሆ ኦላንቾታ፤ ይሁዳፐ ታሙ ሙኩሉ አስ ደምስ።
1SA 15:5 ሳኦል አማለቃታ ካታማ ብድ እስ ሻፋን ቆሰትድ ኡትስ።
1SA 15:6 ሳኦል፥ “እስራኤለት ግብፀፈ ከይያ ዎደ ህንተ ኤንታዉ ኬህዳ ግሾ ታኒ ህንተና አማለቃታራ እስፈ ꬋይሶና መላ ደንድድ ኤንታ ግዶፈ ከይተ” ያግድ ቄና አሳስ ኦድስ። ያትን ቄና አሳይ አማለቃታ ግዶፈ ከይድ ብዶሶና።
1SA 15:7 ሳኦል አማለቃታ ሀውላፐ ዶምድ፥ ግብፀፈ ዶሎሀ ባጋን ደእያ ሹራ ጋካናዉ ሾጭስ።
1SA 15:8 አማለቃታ ካዋ አጋጋ ፓፃ ድእስ፤ እያ አሳ ኡባ ማሻን ዎꬍድ ዉርስስ።
1SA 15:9 ሽን ሳኦልነ እያ ኦላንቾት፥ አጋጋነ ሎኦ ዶርሳታ፥ ሚዛታ፥ አንቃራ ማራታነ ማራዘታ፥ ሄሳዳካ ሀራ ሎኦባታ ኡባ አሽዶሶና። ኤንቲ ሀይሳታ ፖሎ ዎꬋናዉ ኮይቦኮና፤ ሽን ኤንቲ ላፋታነ ፓꬆናይሳታ ꬋይስዶሶና።
1SA 15:10 ጎዳይ ሳሜላኮ፥
1SA 15:11 “ሳኦል ታና ካለይሳ አግድ፥ ታ ኪታ ናግቦና ግሾ፥ ታኒ ሳኦላ ካዎꬅዳይሳን ቂሮታስ” ያግስ። ሳሜል ሄሳ ስእዳ ዎደ ኡንኤትድ ቃማ ኩመꬅ ጎዳኮ ዋስስ።
1SA 15:12 ሳሜል ዎንታ ጉራ ደንድድ፥ ሳኦላራ ጋሄታናዉ ብስ። ሽን አሳይ፥ “ሳኦል ቃርመሎሳ ካታማ ብድ፥ ያን ባና ሀሳይስያ ሀዉልተ ኤስዳፐ ጉየ፥ ጋልጋላ ዎꬍስ” ያግድ ኦድዶሶና።
1SA 15:13 ሳሜል ሳኦላ ደምዳ ዎደ ሳኦል ሳሜላኮ፥ “ጎዳይ ነና አንጆ፤ ታኒ ጎዳ ኪታ ፖላስ” ያግስ።
1SA 15:14 ሽን ሳሜል ሳኦላኮ፥ “ያትን፥ ሀ ታኒ ስእያ ዶርሳ ዋሶይነ መሄ ዋሶይ አይቤ?” ያግስ።
1SA 15:15 ሳኦል፥ “ኦላንቾት ሀይሳታ አማለቃታፐ ኤህዶሶና፤ ኤንቲ ጎዳስ፥ ነ ፆሳስ ያርሻናዉ፥ ኡባፈ ሎእያ ዶርሳታነ መሄታ አሽዶሶና፥ ሽን ሀራታ ኡባ ꬋይስዳ” ያግስ።
1SA 15:16 ሳሜል፥ “አነ አጋጋ፤ ጎዳይ ዝነ ቃማ ታዉ ኦድዳባ ታ ነዉ ኦዳና” ያግስ። ሳኦል፥ “ኤሮ ኦዳ” ያግስ።
1SA 15:17 ሳሜል ዛሪድ፥ “ነ አይፈ ስንꬃን ነ ጉꬃ ግድኮካ፥ እስራኤለ ዘረꬃስ ካዎ ግዳብኪ? እስራኤለ ቦላ ካዎታና መላ ጎዳይ ነና ትይስ።
1SA 15:18 ጎዳይ፥ ‘ኔኒ ባዳ ኢታ ግድዳ አማለቃታ ኩመꬅ ꬋይሳ፤ ኤንቲ ዉራና ጋካናዉ ዎꬋ’ ያግድ ኪትስ።
1SA 15:19 ያትን፥ አይስ ጎዳስ ኪተታብኪ? ድኦስ ያረታዳ ጎዳ ስንꬃን አይስ ኢታባ ኦꬃዲ?” ያግስ።
1SA 15:20 ሳኦል፥ “ታኒ ጎዳስ ኪተታስ፤ እ ታና ኪትዳይሳዳ ባዳ አማለቃታ ዎꬋ ዉርሳስ፤ ኤንታ ካዋ አጋጋ ኤሀስ።
1SA 15:21 ሽን ኦላንቾት ድኡዋፐ ሎእያ ዶርሰነ መህያ ጎዳስ፥ ነ ፆሳስ፥ ጋልጋላን ያርሻናዉ ኤህዶሶና” ያግስ።
1SA 15:22 ሳሜል፥ “ጎዳይ ባ ቃላስ ኪተተይሳን ኡፋይተይሳ መላ ፁሳ ያርሾንነ ሀራ ያርሾን ኡፋይቲ? ሄኮ፥ ኪተተꬅ ያርሾፈ አꬌስ፤ እያ ስስ ዶርሳ ሞꬎ ያርሸይሳፈ አꬌስ።
1SA 15:23 ጌላተꬅ ማሮꬆ ናጋራ መላ፤ ቃስ ኦቶሮይ ኢታ ኤቃ ጎይኖ መላ። ኔኒ ጎዳ ቃላ እፅዳ ግሾ ጎዳይ ነ ካዎ ግዶና መላ እፅስ” ያግስ።
1SA 15:24 ሳኦል፥ “ታኒ ናጋራ ኦꬃስ፤ ጎዳ ኪታነ ነ ቃላ ቶቻስ። ታኒ አሳስ ያይዳ ግሾ ኤንቲ ግዳባ ኦꬃስ።
1SA 15:25 ሀእ ታ ናጋራ አቶ ጋርክ፤ ታኒ ጎዳ ጎይናና መላ ታራ የꬋርክ” ያግስ።
1SA 15:26 ሳሜል፥ “ታኒ ኔራ ስማዳ ቢከ፤ ኔኒ ጎዳ ቃላ እፅዳ ግሾ ነ እስራኤለ ቦላ ካዎ ግዶና መላ ጎዳይ እፅስ” ያግስ።
1SA 15:27 ሳሜል ባናዉ ደንድን፥ ሳኦል እያ ማኡዋ ማጫራ ኦይክን፥ ማኦይ ዳከትስ።
1SA 15:28 ሳሜል፥ “ጎዳይ ሀች እስራኤለ ካዎተꬃ ኔፐ ዳክድ ኔፐ ሎእያ ሀራ አሳስ እሚስ።
1SA 15:29 እስራኤለ ቦንቾይ፥ ፆሳይ ዎርዶተና ዎይኮ ባ ቆፋ ላመና፤ ባ ቃላ ላማናዉ እ አስ ግደና” ያግስ።
1SA 15:30 ሳኦል፥ “ታኒ ናጋራ ኦꬃስ፤ ሽን ታ ቢታ ጭማታ ስንꬃንነ እስራኤለ አሳ ስንꬃን ታና ቦንቻ። ታኒ ጎዳ፥ ነ ፆሳ ጎይናና መላ ታራ የꬋርክ” ያግድ ዎስስ።
1SA 15:31 ሄሳ ግሾ፥ ሳሜል እያራ እስፈ ብን፥ ሳኦል ጎዳ ጎይንስ።
1SA 15:32 ሳሜል፥ “አማለቃታ ካዋ አጋጋ ታኮ ኤህተ” ያግስ። አጋግ ኮኮርሸ ሳሜላኮ ይድ፥ “ቱማ ሀይቆይ ሀይሳዳ ጫሚ?” ያግስ።
1SA 15:33 ሳሜል አጋጋኮ፥ “ነ ማሻይ ማጫሳ ናይታፐ መላ አሽዳይሳዳ ነ አያካ ማጫሳ ግዶን ናይታፐ መላ አታና” ያግስ። ሳሜል አጋጋ ጎዳ ስንꬃን ጋልጋላን ቃንፀረꬅስ።
1SA 15:34 ሳሜል ደንድድ፥ ራማ ብስ፤ ሳኦልካ ባ ሶ ግብአ ብስ።
1SA 15:35 ሳሜል ሀይቃና ጋካናዉ ሳኦላ በአናዉ ስሚድ ብቤና፥ ሽን ሳሜል ሳኦላ ግሾ ዬክስ። ሳኦላ እስራኤለ ቦላ ካዎ ኦꬅዳይሳስ ጎዳይ አዛንስ።
1SA 16:1 ጎዳይ ሳሜላኮ፥ “እስራኤለ ቦላ እ ካዎ ግዶና መላ ታኒ እፅዳ ሳኦላስ ኔኒ አዉደ ጋካናዉ ዬካይ? አነ ካጨን ዛይተ ኩንꬃዳ ቤተለመ አድያ እሰየኮ ባ፤ ካዎ ግዳና መላ ታኒ እያ ናይታ ግዶፈ እሱዋ ዶራ ዎꬃስ” ያግስ።
1SA 16:2 ሳሜል፥ “ታኒ ዋናዳ ቦ? ሳኦል ስእድ ታና ዎꬋና” ያግስ። ጎዳይ፥ “እስ ኡስ ኤካ ባዳ፥ ‘ታኒ ጎዳስ ያርሻናዉ ያስ’ ያጋ።
1SA 16:3 እሰየካ ያርሾስ ፄጋ። ነ ኦꬃናባ ታ ነና በሳና፤ ታ ነና በሰይሳ ትያ” ያግስ።
1SA 16:4 ሳሜል ጎዳይ ኦድዳይሳ ኦꬅስ፤ ቤተለመ ብድ ካታማ ጭማታራ ጋሄትዳ ዎደ ኤንቲ ኮኮርሸ እያኮ ይድ፥ “ነ ሳሮ ያዲ?” ያግድ ኦይችዶሶና።
1SA 16:5 ሳሜል፥ “ኤ፥ ሳሮ ያስ፤ ታ ጎዳስ ያርሻናዉ ያስ፤ ህንተካ ጌይድ ታራ ያርሾስ የꬍተ” ያግስ። ቃስ እሰየነ እያ ናይታ ጌሽድ ኤንታ ያርሾስ ፄግስ።
1SA 16:6 ኤንቲ ያ ጋክያ ዎደ ሳሜል እሰየ ናኣ ኤልያባ በእድ፥ “ቱማ እያ ስንꬃን ኤቅዳ፥ ጎዳይ ትያ ኡራይ ሀይሳ” ያግድ ቆፕስ።
1SA 16:7 ሽን ጎዳይ ሳሜላ፥ “እያ ማላ ዎይኮ እያ አዱሳተꬃ ፄሎፋ፤ ታኒ እያ ካꬋስ። ታኒ ጎዳይ አስ በኤይሳዳ በእከ፤ አስ ሶምኦ በኤስ፥ ሽን ጎዳይ ዎዛና በኤስ” ያግስ።
1SA 16:8 እሰየይ አብናዳበ ፄግድ፥ ሳሜላ ስን አꬅን፥ ሳሜል፥ “ጎዳይ ሀይሳካ ዶርቤና” ያግስ።
1SA 16:9 እሰየይ ሳማ አꬅን፥ ሳሜል፥ “ጎዳይ ሀይሳካ ዶርቤና” ያግስ።
1SA 16:10 ሄሳዳ ኦꬅድ፥ እሰየይ ባ ናይታ ላፑናታ ሳሜላ ስን አꬅስ፤ ሽን ሳሜል እሰየኮ፥ “ጎዳይ ሀይሳታ ዶርቤና” ያግስ።
1SA 16:11 ሳሜል፥ “ነዉ ደእያ አደ ናይት ሀይሳታ ፃላሌ?” ያግድ እሰየ ኦይችስ። እሰየይ፥ “ኡባፈ ካሎ ናአይ አትስ፤ ሽን እ ዶርሰ ሄማናዉ ብስ” ያግስ። ሳሜል፥ “ኪታዳ እያ ኤህሳ፤ እ ያና ጋካናዉ ኑ ማናዉ ኡቶኮ” ያግስ።
1SA 16:12 እሰየይ ኪትድ ናኣ ኤህስስ፤ ሄ ናአይ አርሰ፤ አይፈይ ሎኦነ ማላ ሎኦ ናአ። ጎዳይ ሳሜላ፥ “ታ ዶርዳይ ሀይሳ ግድያ ግሾ ደንዳ ኤቃዳ ትያ” ያግስ።
1SA 16:13 ሳሜል ካጨን ኩምዳ ዛይተ ኤክድ፥ እያ እሻታ ስንꬃን ዳዊታ ትይስ። ሄ ጋላሳፐ ዶምድ፥ ጎዳ አያናይ ዳዊታ ቦላ ዎልቃን ዎꬍስ። ሄሳፈ ጉየ፥ ሳሜል ደንድድ፥ ራማ ብስ።
1SA 16:14 ጎዳ አያናይ ሳኦላፐ ሻከትን ጎዳፐ ኪተትዳ ኢታ አያናይ ሳኦላ ዋይሴስ።
1SA 16:15 ሳኦላ አይለት፥ “ፆሳፈ ኪተትዳ ኢታ አያናይ ነና ዋይሴስ።
1SA 16:16 ኑኒ ዲꬅ ዲፅያ አስ ኮይድ ኤሀና መላ ኑ ጎዳይ ባ አይለታ ኪቶ። ፆሳፈ ኪተትዳ ኢታ አያናይ ነና ኦይክያ ዎደ ሄ ኡራይ ዲꬅ ዲፅኮ ነዉ ሎኦ ግዳና” ያግዶሶና።
1SA 16:17 ሳኦል ባ አይለታ፥ “ዲꬅ ዲፅያ አስ ኮይድ ታዉ ኤህተ” ያግስ።
1SA 16:18 አይለታፐ እሶይ፥ “ቤተለመን እሰየስ ዲꬅ ዲፅያ እስ ናእ ደኤስ። ሄ ናአይ ፃላነ ቶራንቾ። እ ማላ ሎኦነ ጭንጫ፤ ጎዳይ እያራ ደኤስ” ያግስ።
1SA 16:19 ሳኦል እሰየኮ ኪትድ፥ “ዶርሰ ሄምያ ነ ናኣ ዳዊታ ታዉ የዳ” ያግስ።
1SA 16:20 እሰየይ ኡይꬁነ ኦጎሮ ዎይነ ኡሹ ሀረን ጫንድ፥ እስ ኮለ ጎሽስድ ባ ናኣ ዳዊታራ ሳኦላስ የድስ።
1SA 16:21 ዳዊቲ ሳኦላኮ ይድ ኦሶ ዶምስ። ሳኦል ዳዊታ ዳሮ ዶስስ፤ ዳዊቲ ሳኦላስ ኦላ ሚሸ ቶከይሳ ግድስ።
1SA 16:22 ሳኦል፥ “ዳዊቲ ታዉ ኦꬅሸ ታ ማታን ጋምኦ፤ ታኒ እያ ዶሳስ” ያግድ እሰየኮ ኪትስ።
1SA 16:23 ሄሳፈ ስምን፥ ፆሳፈ ኪተትዳ ኢታ አያናይ ሳኦላ ኦይክያ ዎደ ኡባን ዳዊቲ ዲꬅ ኤክድ ዲፄስ። እ ዲፅያ ዎደ ኢታ አያናይ ሳኦላ የዴስነ እያዉ ሎኤስ።
1SA 17:1 ፍልስፄመት ባንታ ኦላንቾታ ይሁዳን ደእያ ሶኮ ጌተትያ በሳን ኦላስ ሺሽዶሶና። ኤንቲ ሶኮፐነ አዜቃፐ ግዶን ደእያ ኤፌስ-ዳምማ ጌተትያ በሳን ሺቅድ ኡትዶሶና።
1SA 17:2 ሳኦልነ እስራኤለት ኤላ ዛንጋራን ሺቅድ፥ ፍልስፄመታራ ኦለታናዉ ከይዶሶና።
1SA 17:3 ፍልስፄመ ኦላንቾት እስ ባጋ ዙማ ቦላ ሳልፕን፥ እስራኤለት ሀንኮ ባጋ ዙማን ሳልፕዶሶና፤ ዛንጋራይ ኤንታዉ ግዶን ደኤስ።
1SA 17:4 ጋተ ካታማን ደእያ ጎልያዳ ጌተትያ እስ ቶራ ቃራ አደይ ፍልስፄመት ዱንካንዳ ጉታፐ ከይስ፤ እያ ጌሳይ ኡሱፑን ዋꬋነ ታካꬎ።
1SA 17:5 እ እሻታማነ ላፑን ክሎ ግራመ ዴፅያ ናሰ ብራታ ፁሩረ ማእስ፤ ቃስ ናሰ ብራታ ባርኔፃ ባ ሁጰን ዎꬅስ።
1SA 17:6 ናሰ ብራታ ጋምባለ ባ ቶሆን አꬅስ፤ ባ ሀሽያን ናሰ ብራታ ቶራ ቶክስ።
1SA 17:7 እያ ቶራ ቶማይ ዋንዳራሸ መላ ኦርደ፤ እያ ቶራ አይፈይ ላፑን ክሎ ግራመ ዴፄስ፤ እያ ጎንዳልያ ቶክያ እስ አደይ እያ ስንꬃን ሄመቴስ።
1SA 17:8 ጎልያድ ኤቅድ ባ ቃላ ꬎቁ ኦꬅድ፥ “እስራኤለ ኦላንቾታ ቦላ ሀይሳዳ ያግድ ጋይሬስ፤ ህንተ ዋናና ግድ ኦላስ ከይደቲ? ታኒ ፍልስፄመ አስ፤ ህንተ ቃስ ሳኦላ አይለታ ግደከቲ? አነ ህንተ ግዶፈ እስ አስ ዶርተ፤ ሄ አደይ ታኮ ዱገ ዎꬎ።
1SA 17:9 ሄ አደይ ታራ ኦለትድ ታና ዎꬍኮ፥ ኑኒ ህንተ አይለ ግዳና፤ ሽን ታኒ እያ ፆናዳ ዎꬍኮ ህንተ ኑ አይለ ግዳናነ ኑስ ሃረታና” ያግስ።
1SA 17:10 ቃስካ ሄ ፍልስፄመ አደይ፥ “ታኒ ሀች እስራኤለ ኦላንቾታ ማንዳይስ፤ ታዉ እስ አስ እምተ፤ አነ ናምአይ ኦለታና” ያግስ።
1SA 17:11 ሳኦልነ እስራኤለት ፍልስፄመ አድያ ቃላ ስእድ ዳጋምዶሶና፥ ዳሮ ያይዶሶና።
1SA 17:12 ዳዊቲ ይሁዳ ቢታን ቤተለመን ደእያ ኤፍራታ አድያ እሰየ ናአ። እሰየስ ሆስፑን አደ ናይት ደኦሶና፤ ሳኦላ ካዎተꬃ ላይꬃን እሰየይ ዳሮ ላይꬅ ደእዳ ጭማ።
1SA 17:13 እሰየ ሄꬑ ባይራ አደ ናይት ሳኦላ ካልድ ኦላ ብዶሶና። ኤንታ ሱንꬃይ:- ባይራይ ኤልያባ፤ ካሎይ አምናዳበ፤ ሄꬓንꬆይ ሳማ።
1SA 17:14 ዳዊቲ ናይታ ኡባፈ ካሎ፤ ባይራ ሄꬑ ናይት ሳኦላ ካልዶሶና።
1SA 17:15 ሽን ዳዊቲ ባ አዋ ዶርሳታ ሄማናዉ ሳኦላ ማታፐ ቤተለመ ስመረቴስ።
1SA 17:16 ሄ ፍልስፄመ አደይ ኦይታሙ ጋላስ ዎንታነ ኦማርስ ይድ እስራኤለታ ማንዴስ።
1SA 17:17 እስ ጋላስ እሰየይ ባ ናኣ ዳዊታ ሀይሳዳ ያግስ፤ “ሀ ጫጨትዳ ትያፐ ላታሙ ክሎ ግራመነ ሀ ታሙ ኡይꬃታ ኤካዳ ነ እሻታስ ኤፋዳ ነ እሻት ዱንካንዳ ጉታ ኤለ ጋꬃ።
1SA 17:18 ሀ ታሙ ኑካ ፕላ ኤንታ ሻላቃስ ኤፋ፤ ነ እሻት ዋን ደእያኮ በአዳ፥ ኤንቲ ሳሮ ደኤይሳስ ማላታ ኤንታፈ ኤካዳ ያ።
1SA 17:19 ካዎይ ሳኦል፥ ነ እሻትነ እስራኤለ አሳ ኡባይ ፍልስፄመታራ ኦለትሸ ኤላ ዛንጋራን ደኦሶና” ያግስ።
1SA 17:20 ዳዊቲ ጉራ ደንድድ ዶርሳታ ሀራ አስ ሄንꬅድ፥ እሰየይ ኪትዳባ ጫን ኤክድ ብስ። እስራኤለ ኦላንቾት ባንታ ቃላ ꬎቁ ኦꬅድ ጋይርሸ ኦላስ ከይሽን ዳዊቲ ጋክስ።
1SA 17:21 እስራኤለትነ ፍልስፄመት እሶይ እሱዋኮ ስሚድ ሳልፕዶሶና።
1SA 17:22 ዳዊቲ ባ ኤህዳባ ሽንቀ ናገይሳ ኩሸን ዎꬅድ፥ ኦላ ሳልፕያ ግዶ ዎፅ ብድ፥ ባ እሻታ ሳሮꬅስ።
1SA 17:23 ዳዊቲ ባ እሻታራ ሃሳይሽን፥ ጋተፐ ይዳ ቶራ ቃራይ፥ ፍልስፄመ ጎልያድ ባ ሳልፕያፈ ጋፃ ከይድ ካሰይሳዳ እስራኤለታ ማንድሽን ዳዊቲ ስእስ።
1SA 17:24 እስራኤለ አሳ ኡባይ ሄ አድያ በእዳ ዎደ ዳሮ ያይድ ባቃትዶሶና።
1SA 17:25 እስራኤለ አሳይ እሶይ እሱዋኮ፥ “ሀ ከይያ አድያ በእደቲ? እ ቱማ እስራኤለ ማንዳናዉ ከይስ። ሀ አድያ ዎꬍያ ኡራስ ካዎይ ሳኦል ዳሮ ሻሎ እማና፤ ባ ናእዉካ እያዉ እማና፤ እያ አዋ ኬꬃ አሳይ እስራኤለን ካዎ ጊራ ጊረና” ያግዶሶና።
1SA 17:26 ዳዊቲ ባ ማታን ኤቅዳ አሳ፥ “ሀ ፍልስፄመ አድያ ዎꬍድ፥ ሀ ዬላ እስራኤለፐ ደንꬅያ ኡራስ አይበ ኦሰታናይ? ሀ ቃፃረትቦና ፍልስፄመይ ደኦ ፆሳ ኦላንቾታ ማንደይ እ ኦኔ?” ያግድ ኦይችስ።
1SA 17:27 ኤንቲ፥ “ሀ አድያ ዎꬍያ ኡራስ ሀይስ ሀይስ ኦሰታና” ያግድ ካሰይሳዳ ዛርዶሶና።
1SA 17:28 ዳዊቲ አሳራ ኦደተይሳ እያ ባይራ እሻይ ኤልያብ ስእድ፥ ዳዊታ ቦላ ሸነ ኤፅስ። “ኔኒ ሀ በሳ አይስ ያዲ? ሄ ጉꬃ ዶርሳታ ባዞን ኦደስ የጋዲ? ነ ኦቶሩዋነ ነ ዎዛና ኢታተꬃ ታ ኤራይስ፤ ኔኒ ኦላ በአናዉ ያዳሳ” ያግስ።
1SA 17:29 ዳዊቲ፥ “ታኒ ሀእ አይ ኦꬃድና? ሀር አቶሽን ኦደታናዉካ ዳንዳእክና?” ያግስ።
1SA 17:30 ዳዊቲ ባ እሻ አግድ፥ ሀራ አሳኮ ስሚድ፥ ካሰይሳዳ ኦይችን አሳይ እያዉ ካሰይሳዳ ዛርዶሶና።
1SA 17:31 ዳዊቲ ኦድዳይሳ ስእዳ አሳይ ሳኦላስ ኦድን፥ ሳኦል ዳዊታ ፄግስስ።
1SA 17:32 ዳዊቲ ሳኦላኮ፥ “ሀ አድያ ጋሶን ኦደ ዎዛንካ ትልኦፎ፤ ታኒ ነ አይለይ ባዳ፥ ሀ ፍልስፄመ አድያራ ኦለታና” ያግስ።
1SA 17:33 ሳኦል ዳዊታኮ፥ “ኔኒ ናአ፤ እ ባ ናአተꬃፈ ዶምድ ኦላ ሜዘትድ ድጭዳ ግሾ፥ ሀ ፍልስፄመ አድያራ ኔኒ ኦለታናዉ ዳንዳአካ” ያግስ።
1SA 17:34 ሽን ዳዊቲ፥ “ታኒ፥ ነ አይለይ ታ አዋ ዶርሳታ ሄምያ ዎደ ጋሞይ ዎይኮ ጋርማፌለይ ከይድ ዶርሰ ኦይክያ ዎደ፥
1SA 17:35 እያ ካላ ባዳ እያ ዶናፐ ዎꬃ ኤካይስ። ታኮ ስምያ ዎደ ቆꬍያ ጩላዳ ዎꬋይስ።
1SA 17:36 ታኒ ነ አይለይ ጋሞነ ጋርማፌለ ዎꬋስ፤ ሀ ቃፃረትቦና ፍልስፄመ አደይ ደኦ ፆሳ ኦላንቾታ ጉꬅዳ ግሾ እ ኤንታፈ እሱዋዳ ሀናና።
1SA 17:37 ጋሞፈነ ጋርማፌለፐ ታና አሽዳ ጎዳይ፥ ሀ ፍልስፄመ አድያ ኩሸፐ ታና አሻና” ያግስ። ሳኦል ዳዊታኮ፥ “ባ፥ ጎዳይ ኔራ ግዶ” ያግስ።
1SA 17:38 ሳኦል ባ ማኡዋ ዳዊታ ማይዝስ፤ ዳዊታ ሁጰን ናሰ ብራታ ባርኔፃ ዎꬅስ፤ ናሰ ብራታ ፁሩርያ ዳዊታ ማይዝስ።
1SA 17:39 ዳዊቲ ባ ኦላ ማኡዋ ቦላ ማሻ ዳንጭድ ሄመትድ በእስ። ሽን ሄሳ መላ ማኦ ማእድ ኤሮና ግሾ ሄመታናዉ ዳንዳእቤና። ሄሳ ግሾ፥ ዳዊቲ ሳኦላኮ፥ “ታኒ ሀይሳ መላ ማኦ ማአዳ ሜዘታቦና ግሾ ሀይሳራ ባናዉ ዳንዳእከ” ያግድ ኦላ ማኡዋ ቃርስ።
1SA 17:40 ዳዊቲ ባ ሄንꬃ ፃምአ ኦይክድ፥ ሻፋፐ እቻሹ ሙሉሙቀ ሹቹ ዶር ኤክድ፥ ባ ሄንꬃ ቃርፂታን የግድ፥ ባ ያምባርሻ ኦይክድ፥ ጎልያዳኮ ሺቅስ።
1SA 17:41 ጎልያድ ባ ጎንዳልያ ቶክያ አድያራ እስፈ ሄመትሸ ዳዊታኮ ማትስ።
1SA 17:42 እ ዳዊታ ትሽ ኦꬅ ፄልድ፥ ዳዊቲ አርሰ፥ ማላ ሎኦነ ናአ ግደይሳ በእድ ካꬍስ።
1SA 17:43 እ ዳዊታኮ፥ “ኔኒ ፃምአ ኦይካዳ ታኮ ያናዉ ታና ካና ጋዲ?” ያግስ። ባ ፆሳታ ሱንꬃን ዳዊታ ባድስ።
1SA 17:44 ካልድ ዳዊታኮ፥ “ሃያ፤ ታኒ ነ አሹዋ ሳሎ ካፎታስነ ሳአ ዶአታስ እማና” ያግስ።
1SA 17:45 ዳዊቲ፥ “ኔኒ ማሻ፥ ቶራነ ጉምባ ኦይካዳ ታኮ ያሳ፤ ሽን ታኒ ኡባፈ ዎልቃማ ጎዳ ሱንꬃን፥ ኔኒ ጉꬅዳ እስራኤለ ኦላንቾታ ፆሳ ሱንꬃን ነ ቦላ ያይስ።
1SA 17:46 ሀች ጎዳይ ነና ታ ኩሸን አꬅድ እማና፤ ታኒ ነና ሾጫና፤ ነ ቆꬍያ ሙጫ ሆላና። ፍልስፄመ ኦላንቾታ አሀ ሳሎ ካፎታስነ ሳአ ዶአታስ ሀች እማና። ሄ ዎደ እስራኤለን ፆሲ ደኤይሳ ሳአን ደእያ አሳ ኡባይ ኤራና።
1SA 17:47 ጎዳይ ባ አሳ አሻናዉ ቶራ ዎይኮ ማሸ ኮዮናይሳ ሀይሳን ሺቅዳ አሳ ኡባይ ኤራና። ኦላይ ጎዳባ ግድያ ግሾ፥ እ ህንተና ኡባ ኑ ኩሸን አꬅድ እማና” ያግስ።
1SA 17:48 ፍልስፄመ አደይ ደንድድ፥ ዳዊታራ ኦላ ጋሄታናዉ ሺቅዳ ዎደ ዳዊቲ እያራ ጋሄታናዉ ኦላ ደምባ ዎፅድ ብስ።
1SA 17:49 ዳዊቲ ባ ቃርፂታን ኩሸ የድድ፥ እስ ሹቹ ኤክ ያምባርድ፥ ፍልስፄመ አድያ ሶምኡዋን ጫድስ። ሹቻይ እያ ሶምኡዋ ሉክድ ገልስ፤ ያትን፥ አደይ ባ ሶምኡዋራ ሳአን ኩንድስ።
1SA 17:50 ዳዊቲ ፍልስፄመ አድያ ያምባርሻንነ ሹቻን ፆንስ። ዳዊቲ ባ ኩሸን ማሽ ባይና ፍልስፄመ አድያ ጫድድ ዎꬍስ።
1SA 17:51 ዳዊቲ ዎፅ ብድ፥ እያ ቦላ ከይ ኤቅድ፥ እያ ዎꬍድ፥ ፍልስፄመ አድያ ማሻ ሾሁዋፐ ሾድድ፥ እያ ቆꬍያ ሙጭ የግስ። ፍልስፄመት ባንታ ቶራ ቃራይ ሀይቅዳይሳ በእዳ ዎደ ባቃትዶሶና።
1SA 17:52 እስራኤለ አሳይነ ይሁዳ አሳይ ደንድድ ገሬርሸ፥ ፍልስፄመታ ጋተነ ኤቅሮና ፐንገታ ጋካናዉ የደꬅዶሶና። ፍልስፄመ አሳ አሀይ ጋተነ ኤቅሮና ጋካናዉ ሻእራይማ ኤፍያ ኦግያ ኡባን ኩንድስ።
1SA 17:53 እስራኤለ አሳይ ፍልስፄመታ የደꬅ ስሚድ፥ ኤንቲ ዱንካንዳ ጉታ ቦንቅዶሶና።
1SA 17:54 ዳዊቲ ፍልስፄመ አድያ ሁጵያ የሩሳላመ ኤህስ፤ ሽን ፍልስፄመ አድያ ኦላ ሚሽያ ባ ዱንካንያ ግዶን ዎꬅስ።
1SA 17:55 ዳዊቲ ፍልስፄመ አድያራ ኦለታናዉ ብሽን፥ ሳኦል በእድ፥ ቶራ ሞጮና አበኔራ፥ “ሀ ናአይ ኦደ ናኤ?” ያግድ ኦይችስ። አበኔር ዛሪድ፥ “ካዋዉ፥ ቱማ ነ አሾ ታኒ እያ ኤርከ” ያግስ።
1SA 17:56 ካዎይ ዛሪድ፥ “ሀ ናአይ ኦደ ናኤኮ አነ ኦይቻ” ያግስ።
1SA 17:57 ዳዊቲ ፍልስፄመ አድያ ዎꬍድ ስምዳ ዎደ አበኔር እያ ሳኦላ ስን ኤህስ። ሄ ዎደ ዳዊቲ ሙጭዳ ፍልስፄመ አድያ ሁጵያ ባ ኩሸን ኦይክድ ኡትስስ።
1SA 17:58 ሳኦል፥ “ታ ናአዉ፥ ነ ኦደ ናኤ?” ያግድ ኦይችስ። ዳዊቲ ዛሪድ፥ “ታኒ ቤተለመን ደእያ ነ ኦሳንቹዋ፥ እሰየ ናአ” ያግስ።
1SA 18:1 ዳዊቲ ሳኦላራ ሃሳያ ዉርስዳፐ ጉየ፥ ሳኦላ ናአይ ዮናታን ዳዊታራ ዳሮ ማታ ዳቦተꬅ መꬍስ፤ ዮናታን ዳዊታ ባ ሸምፑዋዳ ዶስስ።
1SA 18:2 ሄ ጋላሳፐ ዶምድ፥ ሳኦል ዳዊታ ባራ ዎꬅስ፤ ባ አዋ ሶ ጉየ ስሞና መላ ድግስ።
1SA 18:3 ዮናታን ዳዊታ ባ ሁጰዳ ዶስያ ግሾ እያራ ጫቅስ።
1SA 18:4 ዮናታን ባ ማእዳ ካባ፥ ባ ኦላ ማኡዋ፥ ባ ማሻ፥ ባ ዶንግያነ ባ ሳቅያ ከስድ ዳዊታስ እሚስ።
1SA 18:5 ሳኦል ኪትዳ ኡባ ዳዊቲ ናገትድ ኦꬅያ ግሾ፥ ሳኦል ዳዊታ ባ ኦላንቾታ ግዶን ሀላቃ ኦꬅድ ሹምስ። ሄስ አሳ ኡባነ እያ ሞርናታ ኡፋይስስ።
1SA 18:6 ዳዉተ ፍልስፄመ አድያ ጎልያዳ ዎꬍን፥ አሳይ ሶ ስምያ ዎደ ማጫሳይ ኡፋይሳ የꬅ የፅሸነ ዱርሸ፥ ካራቦ ባቅሸነ ዲꬅ ዲፅሸ፥ ካዋ ሳኦላ ሞካናዉ እስራኤለ ካታማታ ኡባፈ ከይዶሶና።
1SA 18:7 ማጫሳት ዱርሸ፥ “ሳኦል ሙኩላታ ዎꬍስ፤ ዳዊቲ ታሙ ሙኩላታ ዎꬍስ” ያግድ የፅዶሶና።
1SA 18:8 ሳኦላ ሀ የꬃይ ሻትን፥ ዳሮ ሀንቀትስ። ሳኦል ባ ቆፋን፥ “ዳዊቲ፥ ‘ታሙ ሙኩላታ ዎꬋዳሳ ግድ፥ ታና ሙኩላታ ዎꬋዳሳ’ ግዶሶና። ያትን፥ ካዎተꬃፈ አትሽን ሀር አይብ አትዴ?” ያግስ።
1SA 18:9 ሄ ዎደፐ ዶምድ ሳኦል ዳዊታ ቃናተ አይፈን ፄሌስ።
1SA 18:10 ዎንተꬃ ጋላስ ኢታ አያን ፆሳፈ ኪተትድ ሳኦላ ኦይክን፥ ሳኦል ባ ሶን ኤልሞቴስ። ዳዊቲ ካሰይሳዳ ዲꬅ ዲፅሽን ሳኦል ቶራ ባ ኩሸን ኦይክድ ኡትስ።
1SA 18:11 እ፥ “ዳዊታ ጎዳራ ጋꬃዳ ስካና” ያግ ቆፕድ ቶራ ፆንግስ። ሽን ዳዊቲ ናምኡ ቶሆ እያፐ አትስ።
1SA 18:12 ጎዳይ ሳኦላ አግድ ዳዊታራ ደእያ ግሾ ሳኦል ዳዊታ ያይስ።
1SA 18:13 ሳኦል ዳዊታ ባ ስንꬃፈ ሃሳናዉ ኮይድ ሙኩሉ ኦላንቾታስ ሀላቃ ኦꬅስ። ያትን፥ ዳዊቲ ባ ጩጋ ኦላስ ካለꬅስ።
1SA 18:14 ጎዳይ ዳዊታራ ደእያ ግሾ እ ኦꬅያባይ ኡባይ እያዉ እንጀቴስ።
1SA 18:15 ዳዊቲ ኦꬅያባ ኡባይ እንጀተይሳ ሳኦል በእድ እያዉ ዳሮ ያይስ።
1SA 18:16 ሽን ዳዊቲ ኤንታ ኦላን ካለꬅያ ግሾ እስራኤለ አሳይነ ይሁዳ አሳ ኡባይ እያ ዶሶሶና።
1SA 18:17 ሳኦል ዳዊታኮ፥ “ታ ናአ ባይርያ መራባ ሀናሹ፤ ታኒ እዮ ነዉ ማቾ እማና፤ ኔኒ ምኖ አስ ግዳ፤ ጎዳ ኦላ ኦለታ” ያግስ። ሳኦል ባ ዎዛናን፥ “ታኒ እያ ቦችከ፤ ፍልስፄመት እያ ዎꬎ” ያግድ ቆፕስ።
1SA 18:18 ሽን ዳዊቲ፥ “ካዎራ ቦሎታናዉ ታኒ ኦኔ? ታ ሶ አሳይ አይቤ? ዎይኮ ታ አዋ ያራይ እስራኤለ አሳ ግዶን አይቤ?” ያግስ።
1SA 18:19 ሽን ሳኦላ ናእያ መራባ ዳዊታስ እመትያ ዎደይ ጋክን፥ ማሆላ አድያ አድርኤላስ እመታሱ።
1SA 18:20 ግዶሽን፥ ሳኦላ ናእያ መልኮላ ዳዊታ ዶሳሱ፤ ሳኦል ሄሳ ስእድ ኡፋይትስ።
1SA 18:21 እ ባ ዎዛናን፥ “እያዉ ፅሄ ግዳና መላነ ፍልስፄመት እያ ዎꬋና መላ ታኒ ምልኮሎ ዳዊታስ እማና” ያግድ ቆፕስ። ሄሳ ግሾ፥ ሳኦል ዳዊታ፥ “ኔኒ ታራ ቦሎታናዉ ናምአንꬆ ቃዳ ነዉ እማስ” ያግስ።
1SA 18:22 ሳኦል ባ ኦሳንቾታ ፄግድ፥ “ ‘ካዎይ ነናን ኡፋይትስ፤ እያ አይለት ኡባይ ነና ዶሶሶና፤ ሀእ ኔኒ ካዉዋራ ቦሎታ’ ያግድ ዱማ ዳዊታስ ኦድተ” ያግድ ኪትስ።
1SA 18:23 ሳኦል ግዳይሳዳ ኤንቲ ዳዊታስ ኦድዶሶና። ሽን ዳዊቲ፥ “ካዎራ ቦሎታናይስ ህንተዉ ላፋባ ዳንዬ? ታኒ ማንቆነ ኤረቶና አስ” ያግድ ዛርስ።
1SA 18:24 ሳኦላ ሞርናት ዳዊቲ ግዳባ ሳኦላስ ኦድዶሶና።
1SA 18:25 ሳኦል ባ አይለታኮ፥ “ዳዊታስ ሀይሳዳ ያግድ ኦድተ፤ ‘ካዎይ ባ ሞርከታ ሀሎ ከያናዉ ፄቱ ፍልስፄመ አሳታ ቃራትድ ኤሀና መላፐ አትሽን፥ ኔፐ ሀራ ኮይታ ኮየና’ ያግተ” ያግስ። ሳኦል ሄሳ ግዳይ ዳዊቲ ፍልስፄመታ ኩሸን ሀይቃና መላ ቆፕዳ ግሾሳ።
1SA 18:26 ሳኦላ አይለት ሳኦል ግዳባ ዳዊታስ ኦድዶሶና፤ ካዋራ ቦሎታናይስ ዳዊታ ኡፋይስስ። ዎደይ አꬋናፐ ስን፥
1SA 18:27 ዳዊቲነ እያ አሳይ ደንድ ብድ ፍልስፄመታፐ ናምኡ ፄቱ አሳ ዎꬍዶሶና። ዳዊቲ ካዋራ ቦሎታናዉ ሄ አሳታ ቃራት ኤህድ፥ ካዋስ ኩመꬅ ታይብድ ሼꬍስ። ሳኦል ባ ናእዉ መልኮሎ ዳዊታስ እሚስ።
1SA 18:28 ሳኦል ጎዳይ ዳዊታራ ደኤይሳነ እያ ናእያ ምልኮላ ዳዊታ ዶሰይሳ ኤርስ።
1SA 18:29 ሳኦል ዳዊታስ ካሰይሳፈ አꬅድ ያይስ። ሳኦል ባ ደኦ ላይꬃ ኡባን ዳዊታስ ሞርከ ግድስ።
1SA 18:30 ፍልስፄመ ኦላንቾት ኦላስ ከስ አግቦኮና። ሽን ኦላስ ከይዳ ዎደ ኡባን ሳኦላ ቶራ ሞጮናታፐ አꬅድ ፆኖይ ሀነይ ዳዊታሳ፤ ሄሳ ግሾ እ ኤረትዳ አስ ግድስ።
1SA 19:1 ዳዊታ ዎꬋና መላ ሳኦል ባ ናኣ ዮናታናስነ ባ ኦሳንቾታስ ኦድስ። ሽን ሳኦላ ናአይ ዮናታን ዳዊታ ዳሮ ዶሴስ።
1SA 19:2 ሄሳ ግሾ፥ ዮናታን ዳዊታኮ፥ “ታ አዋይ ሳኦል ነና ዎꬋናዉ ኮይያ ግሾ ዎንቶ ዎንታ ነና ናጋ፤ እስ በሳን ቆሰታዳ ደኣሻ።
1SA 19:3 ታኒ ታ አዋራ ባዳ፥ ኔኒ ቆሰትዳ ጋድያን ኤቃና፤ ታኒ ነባ እያዉ ኦዳዳ፥ እያፐ ስእያባ ነዉ ኦዳና” ያግድ ኪትስ።
1SA 19:4 ዮናታን ዳዊታ ናሽድ፥ ባ አዋ ሳኦላኮ ሀይሳዳ ያግስ፤ “ካዎይ ባ አይልያ ዳዊታ ቆህድ ናጋራ ኦꬆፎ፤ እ ነና ቆህቤና፤ እ ኦꬅዳባይ ነና ዳሮ ጎእስ።
1SA 19:5 እ ፍልስፄመ አድያ ዎꬍዳ ዎደ ባ ሸምፑዋስ ቃትቤና። ጎዳይ እስራኤለ ኡባስ ግታ ፆኖ እሚስ፤ ሄሳ በአዳ ነካ ኡፋይታዳሳ። ያትን፥ ኔኒ ጌሻ አስ ቆሀናዉ አይስ ቆፓይ? ጋሶይ ባይና ዳዊታ ዎꬋናዉ አይስ ኮያይ?” ያግስ።
1SA 19:6 ሳኦል ዮናታን ኦድዳባ ስእድ፥ “ደኦ ፆሲ ኤርያ መላ፥ ታኒ ዳዊታ ዎꬍከ” ያግድ ጫቅስ።
1SA 19:7 ዮናታን ዳዊታ ፄግድ ኤንቲ ኦደትዳባ ኡባ እያዉ ኦድስ። ያትድ ዳዊታ ሳኦላኮ ኤህን ዳዊቲ ካሰይሳዳ ሳኦላራ ደእስ።
1SA 19:8 ፍልስፄመታራ ዛሪድ ሀራ ኦል ደንድስ፤ ዳዊቲ ከይድ ፍልስፄመታራ ኦለትድ፥ ኤንታ ግታ ሾቹ ሾጭን፥ ኤንቲ እያ ስንꬃፈ ባቃትዶሶና።
1SA 19:9 ሄሳፈ ስምን፥ ሳኦል ቶራ ኦይክድ ባ ሶን ኡትዳሽን፥ ኢታ አያን ጎዳፐ ኪተትድ እያ ኦይክስ። ያትን፥ ዳዊቲ ዲꬅ ዲፅሽን፥
1SA 19:10 ሳኦል ዳዊታ ጎዳራ ጋꬅድ ስካናዉ ቶራ ፆንግስ፤ ሽን ዳዊቲ እያፐ ደሽ ግድ አትን፥ ቶራይ ጎዳን ቶከትስ። ሄ ቃማ ዳዊቲ ከስ ኤክድ ባቃትስ።
1SA 19:11 ዳዊታ ኬꬃን ናግድ ዎንታ ዎꬋና መላ ሳኦል አሰ ኪትስ። ዳዊታ ማችያ መልኮላ፥ “ሀች ቃማ ኔኒ ነ ሸምፑዋ አሾና እፅኮ፥ ዎንቶ ሀይቃሳ” ያጋዳ ዳዊታስ ኦዳሱ።
1SA 19:12 ምልኮላ ዳዊታ ማስኮተራ ከስን፥ ዳዊቲ ከስ ኤክድ ባቃትስ።
1SA 19:13 ሄሳፈ ጉየ መልኮላ ኤቃ ምስለ ኤካዳ አርሳን ዝንእሳሱ፤ ሁጰሶን ዴሻ እክሰ ዎꬃዳ አፍላ ማይዛሱ።
1SA 19:14 ዳዊታ ኦይክድ ኤሀና መላ ሳኦል አሰ ኪትን ምልኮላ፥ “ዳዊቲ ሳከትስ” ያጋሱ።
1SA 19:15 ዳዊታ በአና መላ ሳኦል ሄ አሳታ ጉየ ኪትድ፥ “ታኒ ዳዊታ ዎꬋና መላ እያ አልጋራ ቶክድ ኤክ ዪተ” ያግስ።
1SA 19:16 ሽን አሳት ሶ ገልያ ዎደ ኤቃ ምስለይ አርሳን ዝንእዳይሳነ እያ ሁጰሶን ዴሻ እክሰይ ደኤይሳ ደምዶሶና።
1SA 19:17 ሳኦል መልኮሎ፥ “ኔኒ አይስ ሀይሳዳ ኦꬃዳ ታና ጭማዲ? ታ ሞርከይ ከስ ኤካና መላ አይስ ኦꬃዲ?” ያግስ። ምልኮላ ዛራዳ፥ “እ ታኮ፥ ‘ታና ከሳዳ የዳ፤ እፅኮ ታ ነና ዎꬋና’ ያግስ” ያጋሱ።
1SA 19:18 ዳዊቲ ከስ ኤክድ ራማን ደእያ ሳሜላኮ ብድ ሳኦል ባና ኦꬅዳ ኡባ እያዉ ኦድስ። ዳዊትነ ሳሜል ናዮታ ብድ ያን ኡትዶሶና።
1SA 19:19 ሳኦል ዳዊቲ ራማን ደእያ ናዮታን ደኤይሳ ስእስ።
1SA 19:20 ዳዊታ ኦይክድ ኤሀና መላ አሰ ያ ኪትስ። ሽን ናበ ጩጋይ ሳሜላ ካለꬁዋን ትንብተ ኦድሽን በእዳ ዎደ ሳኦል የድዳ አሳታ ቦላ ፆሳ አያናይ ዎꬍን፥ ኤንትካ ትንብተ ኦድዶሶና።
1SA 19:21 ሳኦል ሄሳ ስእዳ ዎደ ሀራ አስ የድስ፤ ኤንትካ ቃስ ትንብተ ኦድዶሶና። ሳኦል ሄꬓንꬆ አሰ የድን ኤንትካ ትንብተ ኦድዶሶና።
1SA 19:22 ዉርሰꬃን፥ ሳኦል ባ ሁጰን ራማ ብድ፥ ሴኩን ደእያ ግታ ኦላ ጋክድ፥ “ሳሜልነ ዳዊቲ አዉን ደኦና?” ያግድ ኦይችስ። ኤንቲ፥ “ህንን ራማን ደእያ ናዮታን ደኦሶና” ያግድ ዛርዶሶና።
1SA 19:23 ሄሳ ግሾ፥ ሳኦል ራማን ደእያ ናዮታ ብስ፤ ቃስ ፆሳ አያናይ እያ ቦላካ ዎꬍን፥ ራማን ደእያ ናዮታ ጋካናዉ ትንብተ ኦድሸ ብስ።
1SA 19:24 እ ባ ማኡዋ ቃርድ፥ ሳሜላ ስንꬃን ትንብተ ኦድስ፤ ጋላስነ ቃማ ኩመꬅ ካሎ ዝንእስ። አሳይ፥ “ሳኦልካ ናበታፐ እሱዋ ግድደየ” ገይስ ሄሳሳ።
1SA 20:1 ዳዊቲ ራማን ደእያ ናዮታፐ ባቃትድ፥ ዮናታናኮ ብድ፥ “ታኒ አይ ኦꬃድና? ታ ባላይ አይቤ? ነ አዋይ ታና ዎꬋናዉ ኮየይ ታኒ እያ አይ ቆህኔ?” ያግድ ኦይችስ።
1SA 20:2 ዮናታን፥ “ሄስ ኔፐ ሃኮ፤ ኔኒ ሀይቃካ። ጉꬃባ ግድን፥ ግታባ ግድን፥ ታ አዋይ ታፐ ቆስድ አይኮካ ኦና። ታ አዋይ ታፐ አይስ ሄሳ ቆስዴ? ሄስ ሀነና” ያግድ ዛርስ።
1SA 20:3 ሽን ዳዊቲ፥ “ነ ታና ዶሰይሳ ነ አዋይ ሎይꬅ ኤሬስ። እ ባ ዎዛናን፥ ዮናታን ሀ ኦዳ ኤሮፖ፤ እ ኤርኮ አዛናና” ያግስ። ሽን፥ “ደኦ ፆሲ ኤርያ መላ፥ ነ ሸምፖይ ኤሮ፤ ታፐነ ሀይቆፐ ግዶን እስ ታንጎ ፃላል አትስ” ያግድ ጫቅስ።
1SA 20:4 ዮናታን፥ “ኔኒ ኦꬃ ግዳባ አይባካ ታኒ ነዉ ኦꬃና” ያግስ።
1SA 20:5 ዳዊቲ ዛሪድ፥ “ዎንቶ አጌና ፄሮ ባኣለ ቦንችያ ጋላስ፤ ታኒ ካዉዋራ ካꬅ ማናዉ ኮሼስ። ሽን ዎንት ፔእን ኦማርስ ጋካናዉ ታኒ ጋደን ቆሰታና።
1SA 20:6 ነ አዋይ ታና ኮይኮ፥ ኔኒ፥ ‘ዳዊቲ ባ አሳራ ላይꬃ ያርሾ ያርሽያ ዎደ ግድያ ግሾ ባ ሶ ቤተለመ ባናዉ ታና ኦይችድ ብስ’ ያጋ።
1SA 20:7 እ፥ ‘ያኮ ሎኦ’ ጊኮ፥ ታዉ ነ አይልያስ ሳሮ፤ ሽን እ ሀንቀትኮ፥ እ ታና ቆሀናዉ ባ ዎዛናን ቆፕዳይሳ ሄሳን ኤራ።
1SA 20:8 ሽን ኔኒ ታዉ ነ አይልያስ ሎኦባ ኦꬃ፤ ኔኒ ታራ ነ አይልያራ ጎዳ ስንꬃን ጫቃዳሳ። ታኒ ባላ ግድኮ፥ ታና ነ ዎꬋ፤ ነ አዋስ ታና አꬃዳ እሞፋ” ያግስ።
1SA 20:9 ዮናታን፥ “ሄስ ኔፐ ሃኮ፤ ታ አዋይ ነና ቆሀናዉ ቆፕዳባ ታ ኤርዳኮ፥ ነዉ ኦድክና?” ያግስ።
1SA 20:10 ዳዊቲ “ነ አዋይ ነዉ ኢታ ዛሮ ዛርኮ፥ ታዉ ኦዳናይ ኦኔ?” ያግድ ኦይችስ።
1SA 20:11 ዮናታን፥ “ሃያ፤ ጋደ ቦስ” ያግን፥ ናምአይ ጋደ ብዶሶና።
1SA 20:12 ዮናታን ዳዊታኮ፥ “ጎዳይ እስራኤለ ፆሳይ ኤሮ፥ ታኒ ዎንት ፔእን ታ አዋይ ነባ ግያባ ስአዳ ነዉ እ ቆፕያ ቆፋይ ሎኦ ግድኮ ታኒ ኪታዳ ነና ኤርሳና።
1SA 20:13 ሽን ታ አዋይ ነና ቆሀናዉ ኮያባ ግድኮ፥ ሄሳ ታኒ ነና ኤርሶናነ ኔኒ ሳሮን ከሳ ኤካና መላ ኦꬆና እፅኮ፥ ጎዳይ ታና ፕርዶ፤ ጎዳይ ታ አዋራ ግድዳይሳዳ ኔራ ግዶ።
1SA 20:14 ታ ደኦ ላይꬃ ኡባን ታ ሀይቆና መላ ጎዳ ሲቁዋ ታና በሳ።
1SA 20:15 ጎዳይ ዳዊታ ሞርከታ ኡባ ቢታፈ ꬋይስያ ዎደካ ነ ሲቁዋ ታ ሶ አሳስ በሳ” ያግስ።
1SA 20:16 ሄሳ ግሾ፥ ዮናታን፥ “ጎዳይ ዳዊታ ሞርከታ ፕርዶ” ያግድ ዳዊታ ሶ አሳራ ጫቅስ።
1SA 20:17 ዮናታን ዳዊታ ባ ሁጰዳ ዶስያ ግሾ፥ “ኔኒ ታና ቱማ ዶሰይሳ ቆንጭሳናዉ ታዉ አነ ናምአንꬆ ጫቃ” ያግስ።
1SA 20:18 ሄሳፈ ጉየ፥ ዮናታን፥ “ዎንቶ አጌና ፄሮ ባኣለ ቦንችያ ጋላስ፤ ኔኒ ኡትያ በሳይ መላ አትኮ ነ ባይናይስ ኤረታና።
1SA 20:19 ዎንት ፔእን ኦማርስ ባዳ፥ ሀ መቶይ ዶምዳ ጋላስ ኔኒ ቆሰትዳ በሳን፥ ኤፀላ ዛላፈ ጉየራ ቆሰታ።
1SA 20:20 ታኒ እስባ ቦላ ፆንግያ አሳዳ ሀናዳ ሄꬑ ዶንገ ቶራታ ሄ ዛላ ምየ የዳና።
1SA 20:21 ሄሳፈ ጉየ፥ ‘ባዳ ዶንገ ቶራታ ኮያ’ ያጋዳ እስ ናአ ኪታና። ታኒ እያኮ፥ ‘ዶንገ ቶራት ኔፐ ሀ ባጋራ ደኦሶና፤ ሃ ኤካዳ ያ’ ግያባ ግድኮ፥ ሃያ፤ ደኦ ጎዳይ ኤርያ መላ፥ ነዉ ሳእ ሳሮ፤ ነና አይኮይካ ቦቸና።
1SA 20:22 ሽን ታኒ ናኣኮ፥ ‘ዶንገ ቶራት ኔፐ ህን ባጋራ ደኦሶና’ ግያባ ግድኮ፥ ኔኒ አጋዳ ባ፤ ጎዳይ ነ ባና መላ ኮይያ ግሾ ባ።
1SA 20:23 ኔራ ታራ ኦደትዳ ኦዳስ ጎዳይ ኑ ግዶን መርናዉ ማርካ” ያግስ።
1SA 20:24 ሄሳ ግሾ፥ ዳዊቲ ጋደን ቆሰትስ። አጌና ፄሮ ባኣለ ቦንችያ ጋላስ ጋክዳ ዎደ ካዎይ ሳኦል ግብራ ቦላ ኡትስ።
1SA 20:25 ካዎይ ባ ኡትያ በሳን ጎዳ ማታን ኡትስ፤ ዮናታን እያፐ ስንꬃ ባጋን፥ አበኔር ሳኦላ ማታን ኡትስ፤ ሽን ዳዊታ በሳይ መላ ደኤስ።
1SA 20:26 ሳኦል ሄ ጋላስ አይኮካ ግቤና። ሳኦል ባ ዎዛናን፥ “ዳዊቲ ዎጋዳ ጌዮና መላ እስባይ እያ ጋክስ፤ እ ጌይቤና” ያግድ ቆፕስ።
1SA 20:27 ሽን ዎንተꬃ ጋላስ፥ አጌናይ ፄርን ናምአንꬆ ጋላስ ዳዊታ በሳይ መላ ደኤስ። ሳኦል ባ ናኣ ዮናታና ፄግድ፥ “እሰየ ናአይ ዝነካ ሀችካ ግብራ ማናዉ አይስ ይበኔ?” ያግድ ኦይችስ።
1SA 20:28 ዮናታን፥ “ዳዊቲ ቤተለመ ባና ግድ ታና ምንꬅድ ኦይችስ።
1SA 20:29 እ ታኮ፥ ‘ኑ ሶ አሳይ ካታማን ያርሾ ያርሽያ ግሾነ ታ ያን በንታና መላ ታ እሻይ ታና ኪትዳ ግሾ ታና የዳርክ። ታ ነ ስንꬃን ሳባ ደምዳባ ግድኮ ታኒ ታ እሻታ በአና መላ ታና የዳ’ ያግድ ኦይችስ። ካዋ ግብራፐ ማናዉ እ ዮናይ ሄሳ ግሾሳ” ያግድ ዛርስ።
1SA 20:30 ሳኦል ዮናታና ቦላ ሸነ ኤፅ ከይድ፥ “ላ፥ ጌላነ ማካላንቾ ማጫሰ ናአዉ፥ ኔኒ ነዉ ካዉሸ፥ ነ አየስ ዬላ ኤሀናዉ እሰየ ናኣራ ላገተይሳ ታ ኤርክናዬ?
1SA 20:31 እሰየ ናአይ ሀ ሳአ ቦላ ደእዳ ፔሻን ነ ዎይኮ ነ ካዎተꬃይ ኤቀና። ሀእ ኪታዳ ኤለ ኤህሳ፤ እ ሀይቃናዉ በሴስ” ያግስ።
1SA 20:32 ዮናታን ባ አዋ፥ “እ አይስ ሀይቂ? እ አይ ኢታባ ኦꬅዴ?” ያግድ ኦይችስ።
1SA 20:33 ሳኦል ዮናታና ዎꬋናዉ ቶራ እያ ቦላ ፆንግስ። ሄሳ ግሾ፥ ዮናታን ባ አዋ ሳኦል፥ ዳዊታ ዎꬋናዉ ቆፕዳይሳ ጌሽድ ኤርስ።
1SA 20:34 ዮናታን ሸነትድ ግብራ ቦላፈ ደንድስ፤ ባ አዋይ፥ ዳዊታ ካዉሽዳ ግሾ ዮናታን አዛንድ፥ አጌና ፄሮ ባኣለ ቦንችያ ናምአንꬆ ጋላስ ካꬅ ምቤና።
1SA 20:35 ዮናታን ባራ እስ ናአ ኤክድ ዎንታ ጉራ ዳዊታራ ጋሄታናዉ ጋደ ብስ።
1SA 20:36 ዮናታን፥ “ታኒ ዱክያ ዶንገ ቶራታ ዎፃ ባዳ ኤካዳ ያ” ያግስ። ናአይ ዎፅያ ዎደ እስ ዶንገ ቶራ ሄፍንꬅ ዱክስ።
1SA 20:37 ናአይ ዮናታና ዶንገ ቶራይ ዎꬍዳ በሳ ጋክያ ዎደ ዮናታን ናኣ ፄግድ፥ “ዶንገ ቶራይ ኔፐ ህን ባጋራ ደኤኔ?”
1SA 20:38 ዮናታን ናኣ፥ “ኤለሳ፤ ባ፤ ኤቆፋ” ያግድ ባ ቃላ ꬎቁ ኦꬅድ ኦድስ። ናአይ ዶንገ ቶራ ማፅድ ባ ጎዳስ ኤህስ።
1SA 20:39 ዮናታናፐነ ዳዊቲፐ አትሽን፥ ናአይ ሄ ፁራ ኤረና።
1SA 20:40 ዮናታን ባ ኦላ ሚሽያ ናኣስ እምድ፥ “ሀይሳ ካታማ ኤካዳ ባ” ያግስ።
1SA 20:41 ናአይ ብዳፐ ጉየ፥ ዳዊቲ ሄ ዛላ ጉየፐ ከይድ ዮናታና ስንꬃን ጉልባትድ፥ ባ ሶምኡዋ ሳአ ጋꬅድ ሄꬑ ቶሆ ዝግስ። ሄሳፈ ጉየ፥ እሶይ እሱዋራ ዬረትድ ዬክዶሶና፥ ሽን ዳዊቲ ዮናታናፐ አꬎ ዬክስ።
1SA 20:42 ዮናታን፥ “ሳሮ ባ፤ ‘ነ ግዶንነ ታ ግዶን፥ ነ ኮቻ ግዶንነ ታ ኮቻ ግዶን፥ ጎዳይ መርናዉ ማርካ ግዶ’ ያግድ ኑ ናምአይ ጎዳ ሱንꬃን ጫቅዳ” ያግስ። ሄሳፈ ጉየ፥ ዳዊቲ ደንድድ ብስ፤ ዮናታንካ ካታማ ጉየ ስምስ።
1SA 21:1 ዳዊቲ ካህንያ አብመለከኮ ኖባ ብስ። አብመለከይ ዳዊታራ ጋሄታናዉ ኮኮርሸ ይድ፥ “ኔኒ ነርካ ዋናዳ ያዲ? ኔራ አስ ዋንድ ባዌ?” ያግድ ኦይችስ።
1SA 21:2 ዳዊቲ ካህንያ አብመለከ፥ “ካዎይ ታኮ፥ ‘ታኒ ነና ኪትዳ ኪታነ ታ ነዉ ኦድዳባ ኦንካ ኤሮፖ’ ያግድ ታና ኪትስ። ታ አሳት እስ በሳን ታራ ጋሄታና መላ ኦዳ ዎꬃስ።
1SA 21:3 ሀእ ነ ኩሸን አይብ ደኢ? እቻሹ ኡይꬅ ዎይኮ ነዉ ደእያባ ታዉ እማ” ያግስ።
1SA 21:4 ካህነይ ዛሪድ፥ “ጮ አስ ምያ ኡይꬅ ታዉ ባዋ፤ ሽን ነ አሳት ባንታና ማጫሳፐ ናግዳባ ግድኮ፥ ኤንቲ ማናዉ ዳንዳእያ ጌሻ ኡይꬅ ደኤስ” ያግስ።
1SA 21:5 ዳዊተይ ዛሪድ፥ “ቱማ ኑኒ ሀ ኪታ ኤክድ ከይዳፐ ዶምድ፥ ማጫሳፐ ናገትዳ፤ ሀር አቶሽን ሀራ ኪታካ ኤክድ ከይያ ዎደ ኤንቲ ባንታ ጌሻተꬃ ናጎሶና። ሽን ሀች ዋንድ ጌያናዉ ኮሸኔ?” ያግስ።
1SA 21:6 ሄሳ ግሾ፥ ካህነይ ዳዊታስ ጌሻ ኡይꬃ እሚስ። ካህንያስ ደእያ ኡይꬃይ፥ ጎዳ ስንꬃን ዎꬃናዉ ሄ ጋላስ ሆኦ ኡይꬃራ ላመትዳ ኡይꬃፈ አትሽን፥ ሀር ባዋ።
1SA 21:7 ሳኦላ አይለታፐ እሶይ፥ እያ መህያ ሄመይሳታ ሀላቃይ፥ ዶይቃ ጌተትያ ኤዶመ አደይ፥ ሄ ጋላስ ጎዳ ስንꬃን ናግሸ ደኤስ።
1SA 21:8 ዳዊቲ አብመለከኮ፥ “ቶር ዎይኮ ማሽ ነዉ ዳንዴሻ? ካዋ ኪታይ ኤሶያ ግሾ ታኒ ታ ማሻ ዎይኮ ሀራ ኦላ ሚሸ ኤሀብከ” ያግድ ኦይችስ።
1SA 21:9 አብመለከይ፥ “ኔኒ ኤላ ዛንጋራን ዎꬍዳ ፍልስፄመ አድያ ጎልያዳ ማሻይ ሀይሳን ደኤስ፤ ጩርቃራ ፃፀትድ፥ ኤፉደ ማኡዋፐ ጉየ ባጋራ ደኤስ። ኔኒ ኮያባ ግድኮ እያ ኤካ፤ እያፐ አትሽን፥ ሀራ ማሽ ሀይሳን ባዋ” ያግስ። ዳዊቲ፥ “እያ መላ ማሽ ባዋ፤ እያ ታዉ ሀማ” ያግስ።
1SA 21:10 ሄ ጋላስ ዳዊቲ ሳኦላፐ ባቃትድ፥ ጋተ ካዋ አንኩሳኮ ብስ።
1SA 21:11 ሽን አንኩሳ ሞርናት፥ “ሀይስ ዳዊቲ ባ ቢታን ካዎ ግደኔ? ማጫሳይ የፅሸነ ዱርሸ፥ ‘ሳኦል ሙኩሉ ዎꬍስ፤ ዳዊቲ ታሙ ሙኩሉ ዎꬍስ’ ያግድ ሳቢዳ አድያ ግደኔ?” ያግዶሶና።
1SA 21:12 ዳዊቲ ኤንታ ሃሳያ ባ ዎዛናን ስእድ፥ ጋተ ካዋ አንኩሳ ዳሮ ያይስ።
1SA 21:13 ሄሳ ግሾ፥ ዳዊቲ ኤንታ ስንꬃን ጎሹ ዳንስ። ኤንቲ እያ ኦይካና ሀንያ ዎደ ጎሻዳ ፐንገ እብꬃ ቃጨꬅ ኦይክስ፤ ቡቻራ ሳሶ ቆልስ።
1SA 21:14 አንኩስ ባ ኦሳንቾታኮ፥ “ሄኮ፥ ሀ አደይ ጎዬስ፤ ህንተ አይስ እያ ታኮ ኤህደቲ?
1SA 21:15 ሀ አደይ ታ ስንꬃን ጎያናዳ ህንተ ኤህዳይ፥ ታ ማታን ሀር ጎየይ ꬋይነዬ? ሀ አደይ ታ ሶ ገላናዉ በሲ?” ያግስ።
1SA 22:1 ዳዊቲ ጋተፐ ባቃትድ፥ አዱላማ ማታን ደእያ ጎንጎሉዋ ብስ። እያ እሻትነ እያ አዋ ሶ አሳ ኡባይ ሄሳ ስእዳ ዎደ ያ እያኮ ብዶሶና።
1SA 22:2 መቶትዳይ፥ አጮትዳይነ ሳእ ኢትዳ ኡባይ ዳዊታኮ ሺቅን፥ ኤንታ ታይቦይ ኦይዱ ፄቱ ግድስ፤ እ ኤንታ ሀላቃ ግድስ።
1SA 22:3 ዳዊቲ ያፐ ደንድድ ሞአበን ደእያ ምፅጳ ብድ ሞአበ ካዋ፥ “ፆሳይ ታዉ ኦꬃናባ ታ ኤራና ጋካናዉ ታ አዋነ አይዉ ነ ማታን ዎꬃርክ” ያግድ ዎስስ።
1SA 22:4 ዳዊቲ ኤንታ ሞአበ ካዋ ማታን ዎꬅስ፤ ዳዊቲ ቆሰትዳ በሳን ደእያ ዎደ ኡባን ኤንቲ ካዋ ማታን ደእዶሶና።
1SA 22:5 ሄሳፈ ጉየ፥ ናበይ ጋድ ዳዊታኮ ይድ፥ “ቆሰትዳ በሳን ጋምኦፋ፤ ሀይሳፈ ደንዳዳ ይሁዳ ቢታ ባ” ያግስ፤ ዳዊቲ ያፐ ከይድ ሄረታ ዎራ ብስ።
1SA 22:6 ዳዊቲነ እያ አሳይ በንትዳይሳ ሳኦል ስእስ። ሳኦል ግብአ ማታን ደእያ ደረ ቦላ፥ ታማርስከ ምꬃ ጋርሳን ቶራ ኦይክድ ኡትስ፤ እያ ሞርናት እያ ዩሹዋን ኤቅዶሶና።
1SA 22:7 ሳኦል ኤንታኮ፥ “ህንተኖ፥ ብንያመ አሳዉ፥ ስእተ፤ እሰየ ናአይ ጋደነ ዎይነ ቶክያ በሲ ህንተ ኡባስ እማኔ? ሻላቃታነ ማቶ ሀላቃታ ኦꬅድ ህንተና ሹማኔ?
1SA 22:8 ህንተ ኡባይ ታ ቦላ ማቀትደታ፤ ታ ናአይ እሰየ ናኣራ ጫቅዳባ ታዉ ኦንካ ኦድቤና። ህንተፈ እስ አስካ ታዉ ቃተና፤ ሀች ሀንዳይሳዳ ታ ናአይ ታ አይልያን ታና ዎꬍሳናዉ ደንꬅዳይሳ ታዉ ኦንካ ኦድቤና” ያግስ።
1SA 22:9 ሳኦላ ሞርናታራ ኤቅዳ ኤዶመ አደይ ዶይቅ፥ “እሰየ ናአይ አክፁባ ናኣ አብመለከኮ ኖባ ብዳይሳ ታኒ በአስ።
1SA 22:10 ዳዊቲ አይ ኦꬃነኮ አብመለከይ ጎዳ ኦይችስ፤ ያትድ ዳዊታስ ሽንቀነ ፍልስፄመ አድያ ጎልያዳ ማሻ እያዉ እሚስ” ያግድ ሳኦላስ ኦድስ።
1SA 22:11 ሄሳፈ ጉየ፥ አክፁባ ናኣ ካህንያ አብመለከነ ኖባን ካህነ ግድድ ደእያ እያ አዋ ሶ አሳ ኡባ ካዎይ ፄግስን፥ ኤንቲ ካዋኮ ይዶሶና።
1SA 22:12 ሳኦል፥ “አክፁባ ናአዉ፥ ስአ” ያግስ። አብመለከይ፥ “ኤሮ ታ ጎዳዉ” ያግስ።
1SA 22:13 ሳኦል፥ “ኔራ እሰየ ናኣራ ታ ቦላ አይስ ማቀትደቲ? ኔኒ እያዉ ኡይꬅነ ማሸ እማዳ፥ እ ታና ዎꬋናዉ ደንዳና መላ እያ ግሾ ፆሳ አይስ ኦይቻዲ?” ያግስ።
1SA 22:14 አብመለከይ፥ “ነ ኦሳንቾታ ኡባ ግዶን ዳዊቲ መላ አማነተይ፥ ካዋ ቦሎይ፥ ነና ናገይሳታ ኪተይነ ነ ሶ አሳ ግዶን ዳሮ ቦንቸተይ እያ መል ኦኔ?
1SA 22:15 ታኒ እያ ግሾ ፆሳ ኦይችሽን፥ ሀይስ ታዉ ኮይሮ? ግደና፥ ካዋዉ፥ ታና ነ አይልያ ዎይኮ ታ አዋ ሶ አሳ ኡባ አይኮካ ሞቶፓ። ታኒ ነ አይለይ ሀ ኦዳባ ጉꬃ ግድን ዎይኮ ግታ ግድን ኤርከ” ያግስ።
1SA 22:16 ካዎይ፥ “አብመለከ፥ ነነ ነ አዋ ሶ አሳ ኡባይ ሀይቃና” ያግስ።
1SA 22:17 ሳኦል ባ ማታን ኤቅድ ናገይሳታ፥ “ጎዳ ካህነታ ዎꬍተ፤ ኤንቲ ዳዊታ ማድዶሶና። ዳዊቲ ባቃትዳይሳ ኤርሸ ታዉ ኦድቦኮና” ያግስ። ሽን ካዋ ናገይሳት ጎዳ ካህነታ ቦላ ባንታ ኩሽያ ደንꬆና እፅዶሶና።
1SA 22:18 ካዎይ ዶይቃ፥ “ኤንታ ነ ዎꬋ” ያግድ ኪትስ። ኤዶመ አደይ ዶይቅ ካህነታ ሾጭድ፥ ሄ ጋላስ ኤፉደ ማእዳ ሆስፑን ታማነ እቻሹ ካህነታ ዎꬍስ።
1SA 22:19 ቃስ ዶይቅ ካህነታ ካታማ፥ ኖባ ማሻን ዉርስስ፤ ሄ ካታማን ደእያ አደነ ማጫ፥ ናይታነ ዮጋ ናይታ፥ መሄታ፥ ሀረታነ ዶርሳታ ማሻን ዎꬍስ።
1SA 22:20 ሽን አክፁባ ናኣ አብመለከ ናይታፐ አብያታራ ጌተትያ እስ ናአይ ከስ ኤክድ፥ ዳዊታኮ ባቃትስ።
1SA 22:21 እ፥ ሳኦል ጎዳ ካህነታ ዎꬍዳይሳ ዳዊታስ ኦድስ።
1SA 22:22 ዳዊቲ አብያታራ፥ “ኤዶመ አደይ ዶይቅ ሄ በሳን ደኤይሳ ታኒ በእዳ ዎደ እ ሳኦላስ ኦዳናይሳ ሄ ጋላስ ኤራስ። ነ አዋ ሶ አሳ ኡባ ሀይቆስ ጋꬅዳይ ታና።
1SA 22:23 ህዛ ኔኒ ታራ ደአ፤ ያዮፋ። ነና ዎꬋናዉ ኮይያ ኡራይ ታና ዎꬋናዉ ኮዬስ፤ ኔኒ ታ ማታን ሳሮ ዳና” ያግስ።
1SA 23:1 ፍልስፄመት ቃእላ ኦልድ፥ ዉዱማን ደእያ ካꬃ ቦንቅዳይሳ ዳዊቲ ስእስ።
1SA 23:2 ዳዊቲ፥ “ታኒ ባዳ ፍልስፄመታ ኦሎ?” ያግድ ጎዳ ኦይችስ። ጎዳይ፥ “ባ፤ ፍልስፄመታ ኦላ፤ ቃእላ አሻ” ያግስ።
1SA 23:3 ሽን ዳዊታ ካለይሳት፥ “ኑኒ ሀይሳን ይሁዳ ቢታን ደእሸ ዳሮባን ያዮስ። ፍልስፄመታራ ኦለታናዉ ቃእላ ኑ ቢኮ ኑና ኡባ ሳእ መታና” ያግዶሶና።
1SA 23:4 ዳዊቲ ዛሪድ ጎዳ ኦይችን ጎዳይ፥ “ፍልስፄመታ ታኒ ነዉ አꬃ እማና፤ ደንዳዳ ቃእላ ባ” ያግስ።
1SA 23:5 ዳዊቲነ እያ ካለይሳት ቃእላ ብድ፥ ፍልስፄመታራ ኦለትድ ኤንታ መህያ ድእዶሶና። ኤንታፈ ዳሮ አሳ ዎꬍድ፥ ዳዊቲ ቃእላ አሳ አሽስ።
1SA 23:6 አብመለከ ናአይ አብያታር ዳዊታኮ ቃእላ ባቃትዳ ዎደ ኤፉደ ማኡዋ ኤክድ ብስ።
1SA 23:7 ዳዊቲ ቃእላ ብዳይሳ ሳኦል ስእድ፥ “ፆሳይ ዳዊታ ታ ኩሸን አꬅድ እሚስ፤ ዳዊቲ ግምበን ድረትዳ ካታማ ገልድ ባና ባዉ ቃችስ” ያግስ።
1SA 23:8 ቃእላ ብድ፥ ዳዊቲነ እያ አሳ ተቃና መላ ሳኦል ባ ኦላንቾታ ኡባ ፄግስ።
1SA 23:9 ሳኦል ባ ቦላ ኢታባ ኦꬃናዉ ማቅዳይሳ ዳዊቲ ኤርድ ካህንያ አብያታራኮ፥ “ኤፉድያ ሃ ኤካ ያ” ያግስ።
1SA 23:10 ዳዊቲ፥ “አቤት ጎዳዉ፥ እስራኤለ ፆሳዉ፥ ታ ጋሶን ሳኦል ቃእላ ꬋይሳናዉ ማቅዳይሳ ታኒ ነ አይለይ ስአስ።
1SA 23:11 ቃእላ አሳይ ታና ሳኦላስ አꬅድ እማነሻ? ታኒ ነ አይለይ ስእዳይሳዳ ሳኦል ቱማካ ሃ ያነሻ? አቤት ጎዳዉ፥ እስራኤለ ፆሳዉ፥ ታዉ ነ አይልያስ ኦዳ” ያግስ። ጎዳይ ዳዊታኮ፥ “ኤ፤ ሳኦል ያና” ያግድ ዛርስ።
1SA 23:12 ዳዊቲ፥ “ቃእላ አሳይ ታናነ ታ አሳ ሳኦላስ አꬅድ እማነሻ?” ያግድ ዛሪድ ጎዳ ኦይችስ። ጎዳይ፥ “ኤ፤ ኤንቲ ህንተና አꬅድ እማና” ያግስ።
1SA 23:13 ዳዊቲነ ኡሱፑን ፄቱ ግድያ አደት ቃእላፐ ከይድ፥ እስ በሳፈ ሀራ በሲ ዩይዶሶና። ዳዊቲ ቃእላፐ ባቃትዳይሳ ሳኦል ስእዳ ዎደ ባናዉ ቆፕዳይሳ አጋግስ።
1SA 23:14 ዳዊቲ ባዞ ሚፃታንነ ዚፋ መላ ቢታን ደእያ ዙማታ ቦላ ደእስ። ሳኦል እያ ደማናዉ ኡባ ጋላስ ኮዬስ፥ ሽን ፆሳይ እያ ሳኦላ ኩሸን አꬅድ እምቤና።
1SA 23:15 ዳዊቲ ዚፋ መላ ቢታን ደእያ ሆረሳን ደእሽን፥ ሳኦል እያ ዎꬋናዉ ከይዳይሳ ዳዊቲ ኤርስ።
1SA 23:16 ሳኦላ ናኣ ዮናታን ደንድድ፥ ዳዊታኮ ሆረሳ ብድ ዳዊቲ ጎዳ ዎልቃን ምናናዳ ዞርድ፥
1SA 23:17 “ያዮፋ፤ ታ አዋ ሳኦል ነና ኩሸራካ ቦቸና፤ ኔኒ እስራኤለ ቦላ ካዎታና፤ ታንካ ኔፐ ጋርሳራ ሃራና፤ ታ አዋይ ሳኦል ሄሳ ሎይꬅድ ኤሬስ” ያግስ።
1SA 23:18 ኤንቲ ናምአይ ጎዳ ስንꬃን እሶይ እሱዋራ ጫቅዶሶና፤ ዳዊቲ ሆረሳን ጋምእን ዮናታን ባ ሶ ብስ።
1SA 23:19 ዚፋ አሳይ ሳኦላኮ ግብአ ብድ፥ “ዳዊቲ ያስሞናፐ ዱገሀ ባጋን፥ ሀክላ ዙማ ቦላ ሆረሳ ሚፃታን ኑ ማታን ቆሰትድ ደኤስ።
1SA 23:20 ካዋዉ፥ ሀእካ ነ ዶስዳ ዎደ ዱገ ዎꬋ፤ ኑኒ እያ ነ ኩሸን አꬅድ እማና” ያግዶሶና።
1SA 23:21 ሳኦል፥ “ህንተ ታዉ ቆፕዳ ግሾ ህንተና ጎዳይ አንጆ።
1SA 23:22 ብድ አነ ጉጅድካ ጌሽተ፤ ዳዊቲ ዳሮ ቶሆ አዉ ብያኮካ ኦን እያ በእዳኮ፥ ሻክድ ኤርተ፤ እ ገነ አስ ግደይሳ ታ ስአስ።
1SA 23:23 ዳዊቲ ቆሰትያ በሳታ ኡባ በእድ፥ ሙሩታ ኦዳ ኤክድ ታኮ ስሚድ ዪተ። ሄሳፈ ጉየ፥ ታኒ ህንተራ ባና፤ እ ሄ ሄራን ደእኮ፥ ታኒ እያ ይሁዳ ቢታ ኡባን ደማና ጋካናዉ ኮያና” ያግስ።
1SA 23:24 ሄሳ ግሾ፥ ኤንቲ ሳኦላፐ ስንꬃትድ ዚፋ ብዶሶና። ሄ ዎደ ዳዊቲነ እያ አሳይ ያስሞናፐ ዱገሀ ባጋራ ደእያ ማኦና መላ ቢታን አራባ ጋꬋን ደኦሶና።
1SA 23:25 ሳኦልነ እያ አሳይ ዳዊታ ኮያናዉ ብዶሶና። ዳዊቲ ሄሳ ስእዳ ዎደ ዛላኮ ዎꬍድ፥ ማኦና ባዙዋን ኡትስ። ሳኦል ሄሳ ስእዳ ዎደ ማኦና ባዙዋን ዳዊታ ኮይሸ ብስ።
1SA 23:26 ሳኦል ዙማፐ እስ ባጋ ምይያራ ቤስ፤ ዳዊቲነ እያ አሳይ ሀንኮ ባጋ ምይያራ ቦሶና። ኤንቲ ሳኦላፐ ባቃታናዉ ኤሶቶሶና፤ ሳኦልነ እያ አሳት፥ ዳዊቲነ እያ አሳታ ኦይካናዉ ማት ኡትዶሶና።
1SA 23:27 ሽን፥ “ኤለሳዳ ሃያ፤ ፍልስፄመት ኑ ቢታ ኦላናዉ ይዶሶና” ግያ ሀራ ኪት ሳኦላ ጋክስ።
1SA 23:28 ሳኦል ዳዊታ ኮየይሳ አግድ፥ ፍልስፄመታራ ኦለታናዉ ብስ። ሄሳ ግሾ፥ ሄ በሳይ “ከስ ኤክድ አትያ ዛላ” ጌተትስ።
1SA 23:29 ዳዊቲ ሄ በሳፈ ከይድ፥ ኤንጋዳ ማታን ደእያ ሚፃታን ኡትስ።
1SA 24:1 ሳኦል ፍልስፄመታ ኦልድ ስምዳፐ ጉየ፥ ዳዊቲ ኤንጋዳ ባዙዋን ደኤስ ገይሳ ስእስ።
1SA 24:2 ሳኦል እስራኤለ ግዶፈ ዶረትዳ ሄꬑ ሙኩሉ አሳ ኤክድ፥ ዳዊታነ እያ አሳ ኮያናዉ፥ “ባዞ ዴሻታ ዛላ” ጌተትያ በሳ ማታ ብስ።
1SA 24:3 ሳኦል ኦግያ ዶናን ዶርሳ ግርብያ ማታን ደእያ ጎንጎሉዋ ግዶ ገልድ ሼአናዉ ኡትስ። ዳዊቲነ እያ አሳይ ጎንጎሉዋስ ጉየ ባጋራ ሺቅድ ኡትዶሶና።
1SA 24:4 ዳዊታ አሳይ፥ “ ‘ሄኮ፥ ታኒ ነ ሞርክያ ነ ኩሸን አꬃ እማና፤ ኔኒ እያ ቦላ ኮይዳባ ኦꬃና’ ያግድ ጎዳይ ነዉ ኦድዳ ጋላሳይ ሀች” ያግዶሶና። ዳዊቲ ሳኦላ ኤርሶና ሺቅድ ሳኦላ ማኡዋ ማጫራፐ ቃንፅ ኤክስ።
1SA 24:5 ዳዊቲ ሳኦላ ማኡዋ ማጫራ ቃንፅዳ ግሾ እያ ዎዛናይ ቂሮትስ።
1SA 24:6 ዳዊቲ ባ አሳኮ፥ “ጎዳይ ትይዳ ካዋ፥ ታ ጎዳ ቦላ ታኒ ሄሳ ኦꬃናይስ ዎይኮ እያ ቦላ ታ ኩሽያ ደንꬃናይስ ታፐ ሃኮ፤ ጎዳይ ትይድ እያ ካዎꬅስ” ያግስ።
1SA 24:7 ዳዊቲ ሀይሳዳ ግድ፥ ሳኦላ ባ አሳን ቦሽሶና ድግስ። ሳኦል ጎንጎሉዋ ግዶፈ ከይድ ባ ኦግያ ብስ።
1SA 24:8 ሳኦል ብዳፐ ጉየ፥ ዳዊቲ ጎንጎሉዋ ግዶፈ ከይድ፥ “ታ ጎዳዉ፥ ካዋዉ” ያግድ ሳኦላ ፄግን፥ ሳኦል ጉየ ስሚድ ፄልስ። ዳዊቲ ሳአን ጉፋንድ ሳኦላስ ዝግስ።
1SA 24:9 ዳዊቲ ሳኦላኮ፥ “ዳዊቲ ነና ቆሀናዉ ኮዬስ” ግያ አሳ ኔኒ አይስ ስአይ?
1SA 24:10 ሀች ሀ ጎንጎሉዋን ጎዳይ ነና ታዉ አꬅድ እምዳይሳ ኔኒ ነ አይፈን በአዳሳ። ታኒ ነና ዎꬋና መላ ጉꬃ አሳት ታና ደንꬅዶሶና። ሽን፥ “እ፥ ጎዳይ ትይድ ካዎꬅዳይሳ ግድያ ግሾ ታኒ ታ ጎዳ ቦላ ታ ኩሽያ ደንꬅከ” ያጋዳ ነና አጋስ።
1SA 24:11 ታ አዋዉ፥ ታ ኩሸን ደእያ ነ ማኡዋ ማጫራ ሀይሳ ፄላ። ነ ማኡዋ ማጫራፐ ቃንፃ ኤካስ፥ ሽን ነና ዎꬋብከ። ታኒ ነና ቆሆናይሳነ ነ ቦላ ማካሎናይሳ አኬካ፤ ታኒ ነና ቆሀብከ፥ ሽን ኔኒ ታና ዎꬋናዉ ሻንካታሳ።
1SA 24:12 ነባነ ታባ ጎዳይ ፕርዶ፤ ጎዳይ ኔኒ ታና ቆህዳይሳ ሃሉዋ ከሶ፥ ሽን ታኒ ነ ቦላ ታ ኩሽያ ደንꬅከ።
1SA 24:13 “ኢታ ኦይሳታፐ ኢት ከዬስ” ግያ በን ሌምሶይ ደኤስ። ሄሳ ግሾ፥ ታኒ ነና ኩሸንካ ቦችከ።
1SA 24:14 “እስራኤለ ካዎይ ኦደ ቦላ ደንዲ? ኦና ኦይካናዉ ካሊ? ሀይቅዳ ካና ዎይኮ ካስቶለ ጎድዬ?
1SA 24:15 ጎዳይ ኑ ቦላ ዳናቶ፤ ነባነ ታባ እ ፕርዶ፤ ታ ግሾ እ ሞተቶ፤ ነ ኩሸፐ ታና እ አሾ” ያግስ።
1SA 24:16 ዳዊቲ ሃሳያ ዉርስዳ ዎደ ሳኦል ዳዊታኮ፥ “ታ ናአ ዳዊታ፥ ሄስ ነ ቃሌ?” ያግድ ሳኦል ባ ቃላ ꬎቁ ኦꬅድ ዬክስ።
1SA 24:17 “ኔኒ ታፐ አꬍዳ ፅሎ፤ ታኒ ነዉ ኢታባ ኦꬅን፥ ኔኒ ታዉ ሎኦባ ኦꬃዳሳ።
1SA 24:18 ጎዳይ ታና ሀች ነዉ አꬅድ እምን ኔኒ ታና ዎꬋቦና ግሾ ኔኒ ታዉ ሎኦባ ኦꬃዳ በሳዳሳ።
1SA 24:19 አስ ባ ሞርከ ደምድ ቆሆና የድዬ? ኔኒ ታዉ ሀች ኦꬅዳ ኬሀተꬃ ግሾ፥ ጎዳይ ነና አንጆ።
1SA 24:20 ኔኒ እስራኤሌ ካዎ ግዳናይሳነ እስራኤለ ካዎተꬃይ ነ ማታ ጋርሳን ኤቃናይሳ ታ ኤራይስ።
1SA 24:21 ህዛ ታ ኮቻ ꬋይሶና መላነ ታ ሱንꬃ ታ አዋ ሶ አሳ ግዶፈ ቁቾና መላ ጎዳ ሱንꬃን ታዉ ጫቃ” ያግስ።
1SA 24:22 ዳዊቲ ሳኦላስ ጫቅስ። ሄሳፈ ጉየ፥ ሳኦል ባ ሶ ስሚድ ብስ፤ ዳዊቲነ እያ አሳይ ባንታ ሚፃ ብዶሶና።
1SA 25:1 ሳሜል ሀይቅን፥ እስራኤለ አሳ ኡባይ ሺቅድ፥ እያዉ ዬክዶሶና፤ ራማ ካታማን እያ ሞግዶሶና። ሄሳፈ ጉየ፥ ዳዊቲ ማኦና መላ ቢታ ብስ።
1SA 25:2 ማኦና መላ ቢታን፥ ቃርመሎሳን ሻሎይ ደእያ እስ ዱረ አደይ ደኤስ። እያዉ እስ ሙኩሉ ዴሻትነ ሄꬑ ሙኩሉ ዶርሳት ደኦሶና። እ ኤንታ እክስያ ቃርመሎሳን ሜዴስ።
1SA 25:3 ሄ አድያ ሱንꬃይ ናባላ፥ እ ካለባ ያራ፤ እያ ማቸ ሱንꬃይ አብግያ። እያ አኬካንቾነ ማላ ሎኦ ማጫስ፥ ሽን እ አዝናይ ዎዛን ባይና ኢታ አስ።
1SA 25:4 ዳዊቲ መላ ቢታን ደእሸ፥ ናባል ዶርሳ እክሰ ሜደይሳ ስእስ።
1SA 25:5 ዳዊቲ ታሙ ፓንꬃታ ሀይሳዳ ያግድ ኪትስ፤ “ናባላኮ ቃርመሎሳ ብድ፥ ታ ሱንꬃን እያ ሳሮꬅተ።
1SA 25:6 ‘ነ ባረይ አዱቆ! ሳሮይ ነዉነ ነ ሶ አሳስ ግዶ፤ ነዉ ደእያ ኡባስ ሳሮይ ግዶ!
1SA 25:7 ነ ዶርሳ እክሰ ሜደይሳ ታኒ ስአስ፤ ነ ዶርሳ ሄመይሳት ኑራ ደእዳ ዎደ ኑኒ ኤንታ ገንቦኮ፤ ኤንቲ ቃርመሎሳን ደእዳ ዎደ ኡባን ኤንታባፐ አይብካ ፓጭቤና።
1SA 25:8 ሄሳ ኔኒ ነ አይለታ ኦይችኮ ኤንቲ ነዉ ኦዳና። ኑኒ ሀች ግብራ ጋላስ ኔኮ ይዳ ግሾ፥ ታ ፓንꬃታስ ሀያና ኬሀ። ነ ኩሸን ደእያባፐ ነ አይለታስነ ነ ናኣ ዳዊታስ ሀያና እማ’ ያግተ” ያግድ ኪትስ።
1SA 25:9 ዳዊታ አሳት ናባላኮ ጋክድ፥ ዳዊታ ሱንꬃነ ኪታ እያዉ ኦድድ፥ እ ጋናባ ናግሸ ያን ኡትዶሶና።
1SA 25:10 ናባል፥ “ዳዊቲ ኦኔ? እሰየ ናአይ ኦኔ? ሀ ዎድያን ዳሮ አይለት ባንታ ጎዳታፐ ባቃቶሶና።
1SA 25:11 ታ ካꬃ፥ ታ ሃꬃነ ታ ዶርሳታ ሜደይሳታስ ሹከትዳ አሹዋ ኤካዳ፥ ጉዬይ ኤረቶና አሳስ አይስ እሞ?” ያግስ።
1SA 25:12 ዳዊቲ አሳት ጉየ ስም ብድ ናባል ግዳባ ኡባ ዳዊታስ ኦድዶሶና።
1SA 25:13 ዳዊቲ፥ “ህንተ ማሻ ዳንጭተ” ያግን፥ ኡባይ ባንታ ማሻ ዳንጭዶሶና፤ ዳዊቲካ ባ ማሻ ዳንጭስ። ዳዊቲ ኦይዱ ፄቱ ግድያ አሳታራ ደንድድ ብስ፤ ናምኡ ፄቱ አሳይ ኤንታባ ናግድ አትስ።
1SA 25:14 ናባላ አይለታፐ እሶይ ናባላ ማቸ አብግያኮ ሀይሳዳ ያግስ፤ “ዳዊቲ መላ ቢታን ደእሸ ኑ ጎዳ ሳሮ ጋናዉ አሰ ኪትስ፥ ሽን እ ኤንታ ጫይድ የድስ።
1SA 25:15 ግዶሽን፥ ሀ አሳት ኑስ ዳሮ ሎኦ፤ ኤንቲ ኑና ገንቦኮና፤ ኑኒ ኤንታራ ባዞን ፔእዳ ዎደ ኡባን ኑባፐ አይኮይካ ፓጭቤና።
1SA 25:16 ኑኒ ኑ ዶርሳ ዉድያ ኤንታ ማታን ሄምያ ዎደ፥ ቃማነ ጋላስ ኤንቲ ኑስ ድርስ ግድዶሶና።
1SA 25:17 ኑ ጎዳ ቦላነ እያ ሶ አሳ ቦላ ኢታባይ ጋካና ሀንያ ግሾ፥ ሀያና ሀ ኦዳ ዋታነኮ ቆፓ። ኑ ጎዳይ አሳ ዞረ ስኦና ኢታ አስ ግድያ ግሾ፥ ኦንካ እያ ሃሳይሳናዉ ዳንዳኤና” ያግስ።
1SA 25:18 አብግያ ኤሶን ናምኡ ፄቱ ኡይꬁ፥ ናምኡ ኦጎሮ ዎይነ ኡሹ፥ እቻሹ ጫጨትዳ ዶርሳታ፥ እሻታሙ ክሎ ግራመ ጫጨትዳ ትያ፥ እስ ፄቱ ኡከትዳ ዎይነ ሞርኤነ ናምኡ ፄቱ ባላሰ ኑካ ኤካዳ ሀረታ ቦላ ጫናሱ።
1SA 25:19 ባ አይለታኮ፥ “ህንተ ስንꬃትድ ቢተ፤ ታ ህንተና ካላና” ያጋሱ፤ ሽን ባ አዝና ናባላስ አይኮካ ኦዳቡኩ።
1SA 25:20 ባ ሀርያ ቶጋዳ ዙማ ሎቡዋ ዱገ ዎꬍያ ዎደ ዳዊቲነ እያ አሳይ ይሸ ኢራ ጋሄትዶሶና።
1SA 25:21 ዳዊቲ፥ “እያባፐ አይኮይካ ፓጮና መላ ታኒ ሀ አድያ ሻሉዋ ናግዳይ ጮ መላ፤ ታኒ ኦꬅዳ ሎኦ ኦሱዋስ እ ታዉ ኢታ ኩሸ ዛርስ።
1SA 25:22 ዎንቶ ዎንታ ጋካናዉ፥ እያባ ግድዳ አደታፐ እሱዋ ታ ፓፃ አግኮ፥ ፆሲ ታና ፕርዶ” ያግስ።
1SA 25:23 አብግያ ዳዊታ በእዳ ዎደ ሀርያፐ ኤሶታ ዎꬋዳ፥ ዳዊታ ስንꬃን ጉፋናዳ ዝጋሱ።
1SA 25:24 እያ ቶሁዋ ቦላ ኩንዳዳ፥ “ታ ጎዳዉ፥ ታ ባላይ ታ ቦላ ግዶ! ታ እስባ ኦዳና፤ ታ ነ አይልያ ግያባ ስአ።
1SA 25:25 ሀ ዎዛን ባይና አደይ፥ ናባል ግያባ ስኦፓ፤ እ ባ ሱንꬃዳ ኤያ። ታ ጎዳዉ፥ ነ ኪትዳ አሳታ ታ ነ አይልያ በአብከ።
1SA 25:26 ደኦ ጎዳይ ኤርያ መላ፥ ነ ሸምፖይ ኤርን፥ ነ ሱꬁ ጉሶናዳነ ሀሎ ከዮናዳ ነና ተቅዳይ ጎዳ። ነ ሞርከትነ ነና ቆሀናዉ ኮየይሳት ናባላዳ ሀኖ።
1SA 25:27 ሀ እሞታይ ታኒ ነ አይልያ ነዉ፥ ታ ጎዳስ ኤህዳይስ ነና ካልያ አሳታስ እመቶ።
1SA 25:28 ታ ጎዳዉ፥ ነ አይለ ናጋራ አቶ ያጋ! ኔኒ ጎዳ ኦላ ኦለትያ ግሾ፥ ጎዳይ ነናነ ነ ሼሻ ካዎያና። ነ ደኦ ላይꬃ ኡባን ኢታተꬅ ነ ቦላ በንቶፎ።
1SA 25:29 አይ አስካ ነና ዎꬋናዉ ኮይኮ፥ እስ አስ ባ አልኦ ሻሉዋ ናገይሳዳ ጎዳይ፥ ነ ፆሳይ ነና ሳሮ ናጋና። ሽን ያምባርሻን ሹቹ ሆለይሳዳ እ ነ ሞርከታ ሆላና።
1SA 25:30 ጎዳይ፥ ታ ጎዳስ ኦꬃናዉ ቃላ ገልዳ ኬሀተꬃ ኡባ ኦꬅያ ዎደነ እስራኤለ ቦላ ካዎꬅያ ዎደ፥
1SA 25:31 ታ ጎዳይ አዛንያ ጋሶይ ዎይኮ ቂሮያባይ ባዋ። ጋሶይ ባይና ሱꬁ ጉስዳባይ ዎይኮ ሀሎ ከይዳባይ ባይና ግሾ ነ ዎዛናይ ዳጋመና። ጎዳይ ነዉ ሎኦባ ኦꬅዳ ዎደ ታና ነ አይልዉ ዶጎፓ” ያጋሱ።
1SA 25:32 ዳዊቲ አብግያኮ፥ “ታራ ጋሄታና መላ ሀች ነና ኪትዳ ጎዳይ፥ እስራኤለ ፆሳይ ጋላተቶ።
1SA 25:33 ታኒ አሳ ሱꬁ ጉሶናዳነ ሀሎ ከዮናዳ ነ ሎኦ ቆፋይ ታና ተቅዳ ግሾ ኔኒ አንጀታ።
1SA 25:34 ታ ነና ቆሆናዳ ተቅዳ ደኦ ጎዳይ፥ እስራኤለ ፆሳይ ኤርያ መላ ነ ታራ ጋሄታናዉ ኤለሳዳ ዮናኮ፥ ሳእ ዎንታና ጋካናዉ ናባላ አሳፐ እስ አደይካ ፓፃ አተና” ያግስ።
1SA 25:35 አብግያ እያዉ ኤህዳ እሞታ እ ኩሸፐ ዳዊቲ ኤክድ፥ “ነ ሶ ሳሮ ባ፤ ታኒ ነ ግዳባ ስአስ፤ ነ ኦይሻካ ኤካስ” ያግስ።
1SA 25:36 አብግያ ስማዳ ናባላኮ ያ ዎደ፥ ካዎ ሶን ጊግያ ግብራ መላ ግብራ ሙዝሸ ሶን ኡትስ። ናባል ዳሮ ማꬆትድ፥ ባ ዎዛናን ኡፋይትያ ግሾ ሳእ ዎንታና ጋካናዉ አብግያ እያዉ አይኮካ ኦዳቡኩ።
1SA 25:37 ዎንታ ናባላ ማꬆይ ስምዳፐ ጉየ፥ እያ ማችያ ሀንዳባ ኡባ እያዉ ኦዳሱ፤ ናባላ ዎዛናይ ዎꬍን፥ እ ዳቡርስ።
1SA 25:38 ታሙ ጋላሳፐ ጉዬ ጎዳይ ናባላ ሾጭን፥ እ ሀይቅስ።
1SA 25:39 ናባል ሀይቅዳይሳ ዳዊቲ ስእዳ ዎደ፥ “ጎዳይ ጋላተቶ! ናባል ታና ጫይዳይሳ ሀሎ ጎዳይ ከስስ። ታኒ እያ አይለይ ኢታባ ኦꬆና መላ ታና ተቅስ። ናባል ኦꬅዳ ኢታባ ጎዳይ እያ ቦላ ዛርስ” ያግስ። ሄሳፈ ጉየ፥ ዳዊቲ አብግያ ኤካናዉ ኮይድ ኪታ የድስ።
1SA 25:40 ዳዊታ አይለት ቃርመሎሳን ደእያ አብግያኮ ብድ፥ “ዳዊቲ ነና ማቻናዉ ዶስዳ ግሾ ኑኒ ነና ኤካናዉ ይዳ” ያግዶሶና።
1SA 25:41 አብግያ ጉፋና ዝጋዳ፥ “ታኒ ነ አይልያ ነዉ ኪተታናዉነ ነ አይለታ ቶሁዋ ሜጫናዉ ጊገታ ኡታስ” ያጋሱ።
1SA 25:42 አብግያ ኤለሳ ደንዳዳ ባ ሀርያ ቶጋሱ፥ እያ ባ እቻሹ ማጫ አይለታራነ ዳዊታ ኪትዳ ኣሳራ ባዳ ዳዊታ ገላሱ።
1SA 25:43 ዳዊቲ ካሰ እዝራኤለ ማጫስዉ አክናሆሞ ኤክድ ደኤስ፤ ኤንቲ ናምአይ እያ ማቸታ።
1SA 25:44 ሳኦል ዳዊታ ማችዉ፥ ባ ናእዉ መልኮሎ ጋልማ አድያ ሌሳ ናኣ ፋልፃስ እሚስ።
1SA 26:1 ዚፋ አሳይ ሳኦላኮ ግብአ ብድ፥ “ዳዊቲ ያስሞና ስንꬃን ደእያ ሀክላ ዙማን ቆሰትስ?” ያግዶሶና።
1SA 26:2 ሳኦል፥ እስራኤለታፐ ዶረትዳ ሄꬑ ሙኩሉ አስ ኤክድ፥ ዳዊታ ኮያናዉ ዚፋ መላ ቢታ ብስ።
1SA 26:3 ሳኦል ያስሞና ስንꬃን ደእያ ሀክላ ዙማ ቦላ ደእያ ኦግያ ማታን ዱንካንስ፤ ሽን ዳዊቲ ሄ መላ ቢታን ኡትስ። ሳኦል እያ ካልድ ይዳይሳ ዳዊቲ ኤርዳ ዎደ፥
1SA 26:4 ዎችያ አስ የድድ፥ ሳኦል ቱማ ሄ በሳ ጋክዳይሳ ሻክድ ኤርስ።
1SA 26:5 ዳዊቲ ደንድድ፥ ሳኦል ዱንካንዳ በሳ ብድ ሳኦልነ ቶራ ሞጮናይ ኔራ ናአይ አበኔር ዝንእዳ በሳ በእስ። ሳኦል ዱንካንዳ ጉታን ኦላንቾት እያ ዩሹዋ ተቅን እ ꬍስክስ።
1SA 26:6 ዳዊቲ ህተ አድያ አብመለከነ ፃሩያ ናኣ እዮኣባ እሻ አብሳያ፥ “ሳኦል ዱንካንዳ በሳ ታራ ባናይ ኦኔ?” ያግድ ኦይችስ። አብሳይ፥ “ታኒ ኔራ ባና” ያግስ።
1SA 26:7 ሄሳ ግሾ፥ ዳዊቲነ አብሳይ ሄ ቃማ ኦላንቾታኮ ያ ዎደ ሳኦል ባ ሁጰ ሶን ቶራ ኤስድ፥ ዱንካንያ ግዶን ዝንእዳይሳ ደምዶሶና። አበኔርነ ኦላንቾት እያ ዩሹዋን ዝንእዶሶና።
1SA 26:8 አብሳይ፥ “ፆሳይ ነ ሞርክያ ሀች ነ ኩሸን አꬅድ እሚስ፤ ታኒ ቶራን እያ እስ ቶሆ ሳአራ ኦይꬃዳ ጫዳና፤ እያ ዛራ ጫዳናዉ ኮሸና” ያግስ።
1SA 26:9 ሽን ዳዊቲ አብሳያኮ፥ “ኔኒ እያ ዎꬎፓ፤ ጎዳይ ትይዳ ካዋ ቦላ ባ ኩሽያ ደንꬅያ ኦናካ ጎዳይ ሴራና።
1SA 26:10 ደኦ ጎዳይ ኤርያ መላ፥ ፆሳይ እያ ዎꬋና፤ እ ባ ጋላሳን ዎይኮ ኦላን ሀይቃና።
1SA 26:11 ጎዳይ ትይዳ ካዋ ቦላ ታ ኩሽያ ደንꬆናዳ ታና ጎዳይ ተቆ። አነ እያ ሁጰ ሶን ደእያ ቶራነ ሃꬃ ኦይክያ ሚሽያ ኤክድ ቦስ” ያግስ።
1SA 26:12 ዳዊቲ ሳኦላ ሁጰ ሶን ደእያ ቶራነ ሃ ኦይክያ ሚሽያ ኤክን፥ ኤንቲ ብዶሶና። ኤንታ ኦንካ በእቤና ዎይኮ ኦንካ ኤርቤና ዎይኮ ኦንካ ባርክቤና። ጎዳይ ኤንታ ቦላ ዎልቃማ ꬍስኮ የድዳ ግሾ ኡባይ ꬍስኮ ሀይቅ አግዶሶና።
1SA 26:13 ዳዊቲ ሄፍንꬅ ፕንድ፥ ኤንታፈ ሃክድ ሀራ ደረ ቦላ ከይድ ኤቅስ።
1SA 26:14 ዳዊቲ ሳኦላ ኦላንቾታነ ኔራ ናኣ አበኔራ ፄግድ፥ “አበኔራ፥ ታኒ ፄግያ ዎደ ስእኪ?” ያግድ ዋስስ። አበኔር፥ “ቃላ ꬎቁ ኦꬅ ፄግድ ካዋ ꬍስኮ ድገይ ኦኔ?” ያግስ።
1SA 26:15 ዳዊቲ፥ “ኔኒ ዎዛናማ አስ ግድኪ? እስራኤለ ግዶን ነ መላ አስ ኦኔ? ያትን፥ ካዋ፥ ነ ጎዳ አይስ ናግኪ? እስ አስ ካዋ፥ ነ ጎዳ ዎꬋናዉ ብስ።
1SA 26:16 ነ ኦꬅዳባይ ሎኦ ግደና። ደኦ ጎዳይ ኤርያ መላ፥ ነነ ነ ኦላንቾት ፆሳይ ትይዳ ህንተ ጎዳ ናግቦና ግሾ ህንተ ሀይቃናዉ በሴስ። ካዋ ቶራይነ እያ ሁጰ ሶን ደእያ ሃ ኦይክያ ሚሸይ አዉን ደእያኮ በአ” ያግስ።
1SA 26:17 ዳዊታ ቃላ ግደይሳ ሳኦል ኤርድ፥ “ታ ናአዉ ዳዊታ፥ ሄስ ነ ቃሌ?” ያግስ። ዳዊትቲ፥ “ኤ፥ ታ ጎዳዉ፥ ካዋዉ፥ ሄስ ታ ቃላ።
1SA 26:18 ታ ጎዳዉ፥ ታና ነ አይልያ ኔኒ አይስ ካላይ? ታኒ አይ ኦꬃድና? ታ ባላይ አይቤ?
1SA 26:19 ታ ጎዳዉ፥ ካዋዉ፥ ኔኒ ነ አይልያ ቃላ ስአና መላ ታ ነና ዎሳይስ። ጎዳይ ነና ታ ቦላ ደንꬅዳባ ግድኮ፥ እ ያርሾ ኤኮ። ሽን አስ ነና ደንꬅዳባ ግድኮ፥ ‘ባዳ ሀራ ፆሳታ ጎይና’ ያግዶሶና። ጎዳ ቢታን ታዉ ደእያ ላታፐ ኤንቲ ታና ጎድዳ ግሾ ኤንቲ ጎዳ ስንꬃን ባደትዳባ ግዶ!
1SA 26:20 ሀእ ጎዳ ስንꬃፈ ሃክድ፥ አላጋ ቢታን ደእያ ኡራ ሱꬃ ጉሶፋ። እስ አስ ኩራቾ ሻንካታናዉ ደረ ቦላ ከየይሳዳ፥ እስራኤለ ካዎይ ካስቶለ ኮያናዉ ከይስ” ያግስ።
1SA 26:21 ሳኦል፥ “ታኒ ነና ቆሀስ። ታ ናአዉ፥ ዳዊታ፥ ሃ ስማ! ሀች ነ ታ ሸምፕዉ ሀይቆፐ አሽዳ ግሾ ታኒ ነና ዛራዳ ገንከ። ቱማ ታኒ ኤያባ ሀናስ፤ ግታ ባላ ባላስ” ያግስ።
1SA 26:22 ዳዊቲ ዛሪድ፥ “ካዋዉ፥ ነ ቶራይ ሀይስሽ፥ ነ አሳፐ እስ አስ ይድ ኤኮ።
1SA 26:23 እስ እስ አሳስ እያ ፅሎተꬃ መላነ እያ አማነተꬃ መላ ጎዳይ ጋተ ቃንፄስ። ሀች ጎዳይ ነና ታ ኩሸን አꬅድ እሚስ፤ ሽን ጎዳይ ትይዳ ካዋ ቦላ ታኒ ታ ኩሽያ ዎꬃናዉ ኮያብከ።
1SA 26:24 ሀች ነ ሸምፑዋ ታ አሽዳይሳዳ ጎዳይ ታና መቶ ኡባፈ አሽድ ቦንቾ” ያግስ።
1SA 26:25 ሳኦል፥ “ታ ናአዉ፥ ዳዊታ፥ ኔኒ አንጀታ። ኔኒ ግታባ ኦꬃና፤ ነዉ እንጀታና” ያግስ። ዳዊቲ ባ ኦግያ ብስ፤ ሳኦልካ ባ ሶ ስምስ።
1SA 27:1 ዳዊቲ ባ ዎዛናን፥ “እስ ጋላስ ታኒ ሳኦላ ኩሸን ዳፋታና፤ ታኒ ፍልስፄመ ቢታ ባቃታናፐ አትሽን፥ ሀራባይ ታዉ ሎኤና። ያንኮ፥ ሳኦል እስራኤለ ቢታ ኡባን ታና ኮየይሳ አጋና፤ ታኒ እያ ኩሸፐ ከሳ ኤካና” ያግድ ቆፕስ።
1SA 27:2 ሄሳ ግሾ፥ ዳዊቲነ እያራ ደእያ ኡሱፑን ፄቱ አሳት ደንድድ፥ ጋተ ካዋ ማኦካ ናኣ አንኩሳኮ ብዶሶና።
1SA 27:3 ዳዊቲነ እያ አሳይ አንኩሳራ ጋተን ኡትዶሶና። አሳ ኡባይ ባ ሶ አሳ አሳ ኤክድ ብስ፤ ዳዊቲካ ባ ማቸታ፥ እዝራኤለ አክናሆሞነ ናባላ አምእዉ፥ ቃርመሎሳ ማጫስዉ፥ አብግያ ኤክድ ብስ።
1SA 27:4 ዳዊቲ ጋተ ባቃትስ ገይሳ ስእድ፥ ሳኦል ዛሪድ እያ ኮየይሳ አግስ።
1SA 27:5 ዳዊቲ ካዋ አንኩሳኮ፥ “ኔኒ ታናን ኡፋይትኮ፥ ታኒ ያን ዳና መላ ነ ካዎተꬃን ደእያ ካታማታፐ እሱዋ ታዉ እማ። ታኒ ነ አይለይ ካዎይ ደእያ ካታማን ኔራ አይስ ኡታኔ?” ያግስ።
1SA 27:6 ሄ ጋላስ አንኩስ ፅቅላጋ ካታማ ዳዊታስ እሚስ፤ ሀች ጋካናዉ ፅቅላጋ ካታማይ ይሁዳ ካዎታባ ግድድ አትስ።
1SA 27:7 ዳዊቲ ፍልስፄመ ቢታን እስ ላይꬅነ ኦይዱ አጌና ደእስ።
1SA 27:8 ዳዊቲነ እያ አሳት ፑደ ከይድ፥ ጌሹረታ፥ ጋርዘታነ አማለቃታ ኦሎሶና። በንፐ ዶምድ፥ ሄ አሳት ሹራፐ ብድ ግብፀ ጋካናዉ ደእያ ቢታን ደእዶሶና።
1SA 27:9 ዳዊቲ ሄ ቢታ ኦልያ ዎደ ኡባን ሄ ቢታን ደእያ ማጫ ግድን፥ አደ ግድን፥ ፓፃ አግቤና። ዶርሰነ መሄ፥ ሀረነ ግማለ ማኦ ድኤስ፤ ያትድ አንኩሳኮ ስሜስ።
1SA 27:10 አንኩስ፥ “ሀች አዉን ኦልደቲ?” ግድ ዳዊታ ኦይቼስ። ዳዊቲ፥ “ይሁዳ ዱገሀ ባጋ ዎይኮ ይራማኤላ ዱገሀ ባጋ ዎይኮ ቄና ዱገሀ ባጋ ኦልዳ” ያጌስ።
1SA 27:11 ኤንታፈ እስ አስ ጋተ ብድ፥ “ዳዊቲ ሀይሳ ኦꬅስ” ግድ ኦዶና መላ ዳዊቲነ እያ አሳት ማጫ አደ አሾና ዎꬍዶሶና። ዳዊቲ ፍልስፄመ ቢታን ደእዳ ዎደ ኡባን ሀይሳዳ ኦꬅስ።
1SA 27:12 አንኩስ ዳዊታን አማነትድ፥ “ዳዊቲ ባ አሳን፥ እስራኤለን ዳሮ እፀትስ፤ ሄሳ ግሾ፥ እ ታዉ መርናዉ አይለ ግዳና” ያግድ ቆፕስ።
1SA 28:1 ሄ ዎደ ፍልስፄመ አሳት እስራኤለታ ኦላናዉ ባንታ ኦላንቾታ ሺሽዶሶና። አንኩስ ዳዊታኮ፥ “ነነ ነ አሳት ታራ ኦላስ ባናይሳ ቱማ ኤራ ኡታ” ያግስ።
1SA 28:2 ዳዊቲ፥ “ሄሳ ግድኮ፥ ታ ነ አይለይ ኦꬃናባ ነ በአና” ያግስ። አንኩስ፥ “ዳሮ ሎኦ፤ ታኒ ነና ታ ደኦ ላይꬃ ኡባን ታና ናገይሳ ኦꬃና” ያግስ።
1SA 28:3 ሀይሳፈ ካሰ ሳሜል ሀይቅን፥ እስራኤለ አሳ ኡባይ እያዉ ዬክድ፥ እያ ካታማን ራማን እያ ሞግዶሶና። ሳኦል ሞይትለ ፄገይሳታነ ማሮታ እስራኤለ ቢታፈ የደꬅድ ከስስ።
1SA 28:4 ፍልስፄመ ኦላንቾት ሺቅድ፥ ሱኔማ ካታማን ዱንካንዶሶና፤ ሳኦል እስራኤለ አሳ ኡባ ሺሽድ፥ ግልቦአ ዙማን ዱንካንስ።
1SA 28:5 ሳኦል ፍልስፄመ ኦላንቾታ በእድ ያይስ፤ እያ ዎዛናይ ዳሮ ዳጋምስ።
1SA 28:6 ሄሳ ግሾ፥ አይ ኦꬃነኮ ጎዳ ኦይችስ፤ ሽን ጎዳይ አሙሆን ዎይኮ ኡሪመን ዎይኮ ናበታ ባጋራ እያዉ ኦድቤና።
1SA 28:7 ሄሳፈ ጉየ፥ ሳኦል ባ አይለታ፥ “ሞይትለ ፄግያ ማሮ ታዉ ኮይተ፤ ታኒ ኢኮ ባዳ እዮ ኦይቻና” ያግድ ኪትስ። ሳኦላ አይለት፥ “ሞይትለ ፄግያ እስ ማሮይ ኤንዶራን ደአኡሱ” ያግዶሶና።
1SA 28:8 ያግን ሳኦል ባና ኤርሶና መላ ሀራ ማኦ ማእድ፥ ናምኡ አሳታ ኤክድ፥ ቃማ ሄ ማሬኮ ብድ፥ ማጫስዉ፥ “ሀያና፥ ታዉ እስ ሞይትለ ፄጋርክ፤ ታኒ ሱንꬃ ኦድያ አሳ ታዉ ደንꬃርክ” ያግስ።
1SA 28:9 ያግን ማጫስያ፥ “ሞይትለ ፄገይሳታነ ማሮታ እስራኤለ ቢታፈ ሳኦል ዋት የደꬅ ከስዳኮ፥ ቱማ ኔኒ ኤራሳ። ታና ዎꬍሳናዉ ኔኒ ታዉ አይስ ፅሄ የጋይ?” ያጋሱ።
1SA 28:10 ያግን ሳኦል ማጫስዉ፥ “ደኦ ፆሳይ ኤርያ መላ፥ ኔኒ ሀይሳ ግሾ ሴረታካ” ያግድ ጎዳን ጫቅስ።
1SA 28:11 ማጫስያ፥ “ታኒ ነዉ ኦና ደንꬆ?” ያጋዳ ኦይቻሱ። ሳኦል፥ “ሳሜላ ታዉ ደንꬃ” ያግስ።
1SA 28:12 ማጫስያ ሳሜላ በአዳ፥ ዋሶ ጎቻዳ፥ ሳኦላኮ፥ “ኔኒ ታና አይስ ጭማዲ? ኔኒ ሳኦላ ግድክ!” ያጋሱ።
1SA 28:13 ካዎይ፥ “ያዮፋ! ነዉ አይበ በንተይ?” ያግስ። ማጫስያ፥ “እስ ሞይትለይ ቢታ ግዶፈ ከይሽን በአስ” ያጋሱ።
1SA 28:14 ሳኦል ማጫስዉ፥ “እ አይ ዳኒ?” ያግስ። ማጫስያ፥ “ካባ ማእዳ እስ ጭማ አደይ ከይስ” ያጋሱ። ሳኦል ሄ አደይ ሳሜላ ግደይሳ ኤርድ፥ እያ ስንꬃን ሳአን ጉፋንስ።
1SA 28:15 ሳሜል ሳኦላኮ፥ “ታና ደንꬃዳ አይስ ዋይሳይ?” ያግስ። ሳኦል፥ “ታኒ ዳሮ ኡንኤታስ፤ ፍልስፄመ አሳት ታና ኦሎሶና፤ ፆሳይ ታፐ ሻከትስ፤ ናበታ ባጋራ ዎይኮ አሙሆን እ ታኒ ኦይችያባ ኦደና። ሄሳ ግሾ፥ ታኒ ኦꬃናባ ነ ታዉ ኦዳና መላ ነና ፄጋስ” ያግስ።
1SA 28:16 ሳሜል፥ “ጎዳይ ሻከትድ ነዉ ሞርከ ግድኮ ታና አይስ ዞረ ኦይቻይ?
1SA 28:17 ጎዳይ ታ ባጋራ ካሰት ኦድዳባ ኦꬅስ፤ ጎዳይ ካዎተꬃ ኔፐ ኤክድ፥ ነ ሾሩዋ ዳዊታስ እሚስ።
1SA 28:18 ኔኒ ጎዳስ ኪተታቦና ግሾነ እያ ኤፅያ እያ ሸንያ አማለቃ ቦላ ፖላቦና ግሾ ጎዳይ ሀች ሀይሳ ነ ቦላ ኤህስ።
1SA 28:19 ነናነ እስራኤለ፥ ጎዳይ ፍልስፄመታስ አꬅድ እማና፤ ነነ ነ አደ ናይት ዎንቶ ታናን ጋሄታና፤ ጎዳይ እስራኤለ ኦላንቾታ ፍልስፄመታስ አꬅድ እማና” ያግስ።
1SA 28:20 ሳኦል ሳሜላ ኦዳ ስእድ ያይዳ ግሾ ዳቡርድ፥ ባና ዶግድ ሳአን ኩንድስ። ሳኦል ቃማነ ጋላስ ካꬅ ምቦና ግሾ እያዉ ዎልቅ እፅስ።
1SA 28:21 ሄ ማጫስያ ሳኦላኮ ያዳ፥ እ ዳሮ ኮኮረይሳ በአዳ፥ “ታኒ ነ አይልያ ነዉ ኪተታስ፤ ኔኒ ታና ኦይችዳባ ታ ሸምፑዋ ዶጋዳ ኦꬃስ።
1SA 28:22 ሀእ ታኒ ነ አይልያ ግያባ ሀያና ስአ፤ ኔኒ ማዳ ጋሽታዳ ነ ኦግያ ባና መላ ታኒ ነዉ ጉꬃ ካꬅ ጊግሳስ” ያጋሱ።
1SA 28:23 ሳኦል፥ “ሚከ” ያግስ። ሽን እያ አሳት ሄ ማጫሴራ ግድድ እያ ዎስዶሶና፤ ኤንታ ዎሳ ስእስ፤ ቢታፈ ደንድድ ሂፃን ኡትስ።
1SA 28:24 ሄ ማጫስያ ባ ሶን ደእያ አንቃራ ማራ ሹካሱ፤ ꬊለ ኤካ ሙኑቃዳ፥ ኡይꬅ ኡካሱ።
1SA 28:25 ያታዳ ካꬃ ሳኦላስነ እያ አሳታስ አꬅን፥ ኤንቲ ምዶሶና። ሄ ቃማ ደንድድ ብዶሶና።
1SA 29:1 ፍልስፄመት ባንታ ኦላንቾታ ኡባ አፌቃን ሺሽዶሶና። እስራኤለት እዝራኤለን ደእያ ፑልቶ ሃꬃ ማታን ዱንካንዶሶና።
1SA 29:2 ፍልስፄመ ሀላቃት ባንታ ኦላንቾታ ፄታንነ ሙኩሉ ጩጋን ሳልፕስዶሶና፤ ዳዊቲነ እያ አሳይ አንኩሳራ እስፈ ግድድ ጉየ ባጋራ ሳልፕዶሶና።
1SA 29:3 ፍልስፄመ ሀላቃት ኤንታ በእድ፥ “ሀ እብራወት ሀይሳን አይ ኦꬆና?” ያግዶሶና። አንኩስ፥ “ሀይስ እስራኤለ ካዋ ሳኦላ አይልያ ዳዊታ ግደኔ? እ ዳሮ ዎደ ታራ አꬅስ፤ እ ሳኦላ ካድድ ከዮደፐ ሀች ጋካናዉ ታኒ እያፐ ባላ ደማብከ” ያግስ።
1SA 29:4 ሽን ፍልስፄመ ሀላቃት አንኩሳ ቦላ ሀንቀትድ፥ “ሀ አድያ ኔኒ እያዉ እምዳ ካታማ ጉየ ዛራ። ኦላይ ጎብያ ዎደ እ ኑ ቦላ ስሚድ ደንዶና መላ እ ኑራ ኦላ ቦፖ። እ ባ ጎዳራ ስገታናዉ ኑ አሳታ ቆꬍያ ቃንፆፈ አትሽን፥ ሀራ አይ ኦꬃኔ?
1SA 29:5 ሀይሳፈ ካሰ ማጫሳይ፥ ‘ሳኦል ሙኩላታ ዎꬍስ፤ ዳዊቲ ታሙ ሙኩላታ ዎꬍስ’ ያግድ ዱርሸነ የፅሸ ሳቢዳይ ዳዊታ ግደኔ?” ያግዶሶና።
1SA 29:6 ሄሳ ግሾ፥ አንኩስ ዳዊታ ፄግድ፥ “ደኦ ጎዳይ ኤርያ መላ፥ ኔኒ አማንꬅያ አስ፤ ኔኒ ታራ ኦላስ በይሳ ታ ዶሳይስ። ኔኒ ታኮ ዮሳፐ ሀች ጋካናዉ ታኒ ነ ቦላ ባላ ደማብከ። ሽን ሀላቃት ኔኒ ኦላስ በይሳ ዶሶኮና።
1SA 29:7 ኔኒ ጉየ ስማዳ ሳሮ ባ፤ ፍልስፄመ ሀላቃታ ኡፋይሶናባ አይኮካ ኦꬆፋ” ያግስ።
1SA 29:8 ዳዊቲ፥ “ታኒ አይ ኦꬃድና? ታኒ ኔራ ደኦደፐ ሀች ጋካናዉ ነ ታፐ አይ ባላ ደማዲ? ያትን፥ ካዋ፥ ታ ጎዳ ሞርከታራ አይስ ኦለትክና?” ያግስ።
1SA 29:9 አንኩስ፥ “ፆሳ ኪታንቾዳ ኔኒ ታዉ ሎኦ ግደይሳ ታኒ ኤራይስ። ሽን ፍልስፄመ ሀላቃት፥ ‘እ ኑራ ኦላ ቦፖ’ ያግዶሶና።
1SA 29:10 ነነ ኔራ ይዳ ነ ጎዳ አይለታራ ዎንቶ ጉራ ደንድድ ቢተ” ያግስ።
1SA 29:11 ሄሳ ግሾ ዳዊቲነ እያ አሳት ፍልስፄመ ስማናዉ ዎንታ ጉራ ደንድዶሶና፤ ፍልስፄመት እዝራኤለ ብዶሶና።
1SA 30:1 ዳዊቲነ እያ አሳት ሄꬓንꬆ ጋላስ ፅቅላጋ ጋክዶሶና። አማለቃት ነገባነ ፅቅላጋ ኦልድ፥ ፅቅላጋ ታማን ፁግዶሶና።
1SA 30:2 ፅቅላጋን ደእያ ማጫሳነ ናአፐ ጭማ ጋካናዉ ደእያ ኡባ ድእዶሶና፤ ኤንታፈ እስ አስካ ዎꬎና ኤንታ ኡባ ድእድ ኤፍዶሶና።
1SA 30:3 ዳዊቲነ እያ አሳት ፅቅላጋ ጋክያ ዎደ ካታማይ ታማን ፁገትዳይሳነ ኤንታ ማቸት፥ አደ ናይትነ ማጫ ናይት ድኤትዳይሳ በእዶሶና።
1SA 30:4 ዳዊቲነ እያራ ደእያ አሳይ ባንታ ዎልቃይ እፃና ጋካናዉ ዋስድ ዬክዶሶና።
1SA 30:5 ዳዊታ ማቸት እዝራኤለ አክናሆማነ ካሰ ናባላ ማችያ ቃርመሎሳ አብግያ ናምአይካ ድኤትዶሶና።
1SA 30:6 እያ አሳይ ባንታ አደ ናይትነ ማጫ ናይት ድኤትዳ ግሾ ይሎትድ ዳዊታ ሹቻን ጫዳናዉ ኦደትን፥ ዳዊቲ ዳሮ ኡንኤትስ። ግዶሽን፥ ዳዊቲ ጎዳን ባ ፆሳን ምነትስ።
1SA 30:7 ዳዊቲ አብመለከ ናኣ ካህንያ አብያታራኮ፥ “ኤፉድያ ኤካዳ ያ” ያግን፥ አብያታር ኤፉድያ ዳዊታስ ኤህስ።
1SA 30:8 ዳዊቲ፥ “ታኒ፥ ታና ኦልያ አሳታ ካላዳ ጋካኔ?” ያግድ ጎዳ ኦይችስ። ጎዳይ፥ “ኤ፤ ኤንታ ካላዳ ባ፤ ቱማ ኤንታ ነ ጋካና፤ ቱማ ድኡዋ ዛራና” ያግስ።
1SA 30:9 ዳዊቲነ እያራ ደእያ ኡሱፑን ፄቱ አሳት ደንድድ ቦሶራ ሻፋ ጋክያ ዎደ ኤንታፈ ጉꬃ አሳት ያን አትዶሶና።
1SA 30:10 ናምኡ ፄቱ አሳይ ሻፋ ፕናናዉ ዳሮ ዳቡርዶሶና። ሽን ዳዊቲነ ኦይዱ ፄቱ አሳይ ካልዶሶና።
1SA 30:11 ኤንቲ እስ ግብፀ አስ ደንባን ደምድ፥ ዳዊታኮ ኤህድ፥ እያዉ ሃነ ካꬅ እምዶሶና።
1SA 30:12 ባላሰ ኦንጎቾነ ናምኡ ዎይነ ኑካ እያዉ እምን ምድ ጋሽትስስ። እ ሄꬑ ጋላስነ ሄꬑ ቃማ ካꬅ ሞና ሃ ኡዮና ጋምእስ።
1SA 30:13 ዳዊቲ፥ “ኔኒ ኦደ አይሌ? አዉፐ ያዲ?” ያግድ አድያ ኦይችስ። አደይ፥ “ታኒ አማለቃ አድያስ አይለትዳ ግብፀ አስ፤ ሄꬑ ጋላሳፐ ካሰ ታ ሳከትን፥ ታ ጎዳይ ታና የግ አግድ ብስ።
1SA 30:14 ኑኒ ይሁዳ ዛዋ፥ ከልታወታ ዱገሀ ባጋነ ካለባ ዱገሀ ባጋ ኦልድ ፅቅላጋ ታማን ፁግዳ” ያግስ።
1SA 30:15 ዳዊቲ፥ “ኔኒ ታና ሄ ኦልዳ ጩጋታኮ ካለꬃናዉ ዳንዳአይ?” ያግድ ኦይችስ። እ ዛሪድ፥ “ኔኒ ታና ዎꬎና መላነ ታ ጎዳስ አꬃዳ እምከ ጋዳ ታዉ ፆሳን ጫቃ፤ ታኒ ነና ኤንታኮ ካለꬃና” ያግስ።
1SA 30:16 ዳዊቲ ካለꬅድ ኤንታኮ ጋꬅስ። ኤንቲ ፍልስፄመፐነ ይሁዳፐ ዳሮ ድኦ ድእዳ ግሾ ኡፋይትድ ምሸነ ኡይሸ ላለትድ ኡትዶሶና።
1SA 30:17 ሄ ጋላስ ኦማርሳፈ ዶምድ ዎንተꬃ ጋላስ ኦማርስ ጋካናዉ ዳዊቲ ኤንታ ሾጭስ። ግማለ ቶግድ ባቃትዳ ኦይዱ ፄቱ ፓንꬃታፐ አትሽን፥ ሀር እስ አስካ አትቤና።
1SA 30:18 አማለቃ አሳት ኤፍዳ ኡባ፥ ባ ናምኡ ማቸታራ እስፈ ዳዊቲ ዎስስድ ኤክስ።
1SA 30:19 አሳት ድእድ ኤፍዳባፐ እስባይካ ፓጭቤና፤ ናእ ዎይኮ ጭም፥ አደይ ዎይኮ ማጭ፥ ሄሳዳካ ኤንቲ ድእድ ኤፍዳ ሀራባ ኡባይ ፓጮና ደእሽን ዳዊቲ ኡባ ዛርስ።
1SA 30:20 ዳዊቲ ዶርሰ፥ ዴሸነ መሄ ኡባ ድእስ፤ ዳዊቲ አሳይ እ ድእዳ መህያ ሀንኮ መህያፐ ስንꬃራ ላግሸ፥ “ሀይስ ዳዊታ ድኦ” ያግዶሶና።
1SA 30:21 ዳዊቲ ዳቡርድ ቦሶራ ሻፋ አቻን አትዳ ናምኡ ፄቱ አሳኮ ይስ። ኤንቲ ዳዊታነ እያራ ደእያ አሳ ሞካናዉ ከይዶሶና። ዳዊቲ ባ አሳራ ሺቅድ ኤንታ ሳሮꬅስ።
1SA 30:22 ሽን ዳዊታራ ብዳ አሳታ ግዶፈ ፓꬆና ኢታ አሳት፥ “ኤንቲ ኑራ ቦና ግሾ ኑኒ ዛሪድ ኤህዳባፐ አይኮካ ኤንታዉ ሻኮኮ፤ ኤንቲ ባንታ ናይታነ ባንታ ማቸታ ኤክድ ቦና” ያግዶሶና።
1SA 30:23 ዳዊቲ ዛሪድ፥ “ታ እሻቶ፥ ጎዳይ ኑስ እምዳባን ህንተ ሀይሳዳ ኦꬃናዉ በሰና። እ ኑና ናግድ፥ ኑና ኦልዳ ጩጋታ ኑስ አꬅድ እሚስ።
1SA 30:24 ህንተ ግያባ ኦንካ ኤከና። ኦለታናዉ ብዳይሳታነ ኑባ ናግሸ ሀይሳን ጋምእዳይሳታ ግሾይ እስኖ፤ ኡባይ ግና ሻከታና” ያግስ።
1SA 30:25 ሄ ጋላሳፐ ዶምድ ሀች ጋካናዉ እስራኤለ ቢታን ሄስ ህገነ ዎጋ ግድስ።
1SA 30:26 ዳዊቲ ፅቅላጋ ጋክዳ ዎደ ባ ላገ ግድዳ ይሁዳ ጭማታኮ፥ “ጎዳ ሞርከታፐ ድኤትዳባፐ ታኒ ህንተዉ እመይሳ ኤክተ” ያግድ ጉꬃራ የድስ።
1SA 30:27 እ ሄሳ ቤተለን፥ ራሞታ ነገባንነ ያትራን ደኤይሳታስ፥
1SA 30:28 አሮኤራን፥ ስፍሞታን፥ ኤሽታሞአንነ
1SA 30:29 ራካላን፥ ይራህማኤላን፥ ቄና ካታማታን፥
1SA 30:30 ሆርማና፥ ቦራሳና፥ አታካንነ
1SA 30:31 ከብሮናን ደኤይሳታስ የድስ። እነ እያ አሳት ዩይዳ በሳ ኡባን ደእያ አሳስ የድስ።
1SA 31:1 ፍልስፄመት እስራኤለታራ ኦለትዶሶና፤ እስራኤለት ፍልስፄመታ ስንꬃፈ ባቃትዶሶና፤ ዳሮ እስራኤለት ግልቦአ ደርያ ቦላ ሀይቅዶሶና።
1SA 31:2 ፍልስፄመት ሳኦላነ እያ አደ ናይታ የደꬅድ፥ እያ አደ ናይታ ዮናታና፥ አምናዳበነ ማልክሳ ዎꬍዶሶና።
1SA 31:3 ኦላይ ተቅድ ሳኦላ ኡንኤꬅስ፤ ዶንገን ዱከይሳት እያ ጫድድ ዳሮ ማዱንፅስዶሶና።
1SA 31:4 ሳኦል ባ ኦላ ሚሽያ ቶከይሳኮ፥ “ሀ ቃፃረትቦናይሳት ይድ፥ ታና ጫድድ ካኦና መላ ነ ማሻን ታና ጫዳዳ ዎꬋ” ያግስ። ሽን እያ ኦላ ሚሽያ ቶከይስ ያይድ እፅን፥ ሳኦል ባ ማሻ ሳአን ኤስድ፥ እያ ቦላ ኩንድስ።
1SA 31:5 እያ ኦላ ሚሽያ ቶከይስ ሳኦል ሀይቅዳይሳ በእድ፥ እካ ባ ማሻ ሳአን ኤስድ፥ እያ ቦላ ኩንድድ እያራ እስፈ ሀይቅስ።
1SA 31:6 ሀይሳዳ ሀንድ፥ ሳኦልነ እያ ሄꬑ አደ ናይት፥ እያ ኦላ ሚሽያ ቶከይስነ እያ አሳት ኡባይ ሄ ጋላስ ሀይቅዶሶና።
1SA 31:7 ዛንጋራንነ ዮርዳኖሰ ሻፋፐ ሄፍንꬃ ባጋራ ደእያ እስራኤለ አሳይ፥ እስራኤለ ኦላንቾት ባቃትዳይሳ፥ ሳኦልነ እያ ናይት ሀይቅዳይሳ በእድ ባንታ ካታማ አግድ ባቃትዶሶና። ፍልስፄመት ይድ፥ ሄ ካታማታ ኦይክዶሶና።
1SA 31:8 ዎንተꬃ ጋላስ ፍልስፄመት አሀ ቦላፈ ኦላ ሚሸታ ቃርድ ኤካናዉ ይድ፥ ሳኦልነ እያ ሄꬑ አደ ናይት ግልቦአ ደርያ ቦላ ሀይቅድ ዝንእዳይሳታ ደምዶሶና።
1SA 31:9 ኤንቲ ሳኦላ ቆꬍያ ቃንፅድ እያ ኦላ ሚሽያ ቃር ኤክዶሶና። ያትድ ባንታ ኤቃ ኬꬃንነ ባንታ አሳ ግዶን ፆኑዋ አዋጃና መላ ፍልስፄመ ቢታ ኡባስ ኪታ የድዶሶና።
1SA 31:10 ሳኦላ ኦላ ሚሽያ አስታሮተ ጌተትያ ኤንታ ማጫ ፆሰ ኬꬃን ዎꬅዶሶና። ሳኦላ አሀ ቤት-ሳና ካታማ ግምብያ ቦላ ምስማረን ꬍሽድ ካቅዶሶና።
1SA 31:11 ፍልስፄመት ሳኦላ ኦꬅዳባ ጋላዳን ደእያ ያበሳ አሳይ ስእዳ ዎደ፥
1SA 31:12 ምኖ አሳት ቃማ ደንድ ብድ፥ ሳኦላ አሃነ እያ ናይታ አሀ ቤት-ሳና ካታማ ግምብያ ቦላፈ ዎꬍስድ ያበሳ ካታማ ኤህድ፥ ያን ፁግዶሶና።
1SA 31:13 ሄሳፈ ጉየ፥ ኤንታ መቀꬃ ማፅ ኤክድ፥ ያበሳን ደእያ ታማርስከ ምꬃ ጋርሳን ሞግዶሶና፤ ያትድ ላፑን ጋላስ ፆምዶሶና።
2SA 1:1 ሳኦል ሀይቅዳፐ ጉየ፥ ዳዊቲ አማለቃታ ፆን ስሚድ ፅቅላጋን ናምኡ ጋላስ ጋምእስ።
2SA 1:2 ሄꬓንꬆ ጋላስ እስ አደይ ባ ማኡዋ ዳክድ፥ ባ ሁጰን ባና ቆልድ፥ ሳኦል ዱንካንዳ ጉታፐ ይስ። እ ዳዊታኮ ይድ ሳአን ጉፋንድ ዝግስ።
2SA 1:3 ዳዊቲ፥ “ኔኒ አዋፐ ያዲ?” ያግድ ኦይችስ። እ ዛሪድ፥ “ታኒ እስራኤለት ዱንካንዳ ጉታፐ ከሳ ኤካዳ ያስ” ያግስ።
2SA 1:4 ዳዊቲ፥ “አነ ሀንዳባ ታዉ ኦዳ” ያግስ። እ ዛሪድ፥ “ኑ ኦላንቾት ኦላፐ ባቃትዶሶና፤ ኑ አሳፐ ዳሮት ሀይቅዶሶና፤ ሳኦልነ እያ ናአይ ዮናታን ሀይቅዶሶና” ያግስ።
2SA 1:5 ዳዊቲ እያዉ ኦድዳ ፓንꬃ፥ “ሳኦልነ እያ ናኣ ዮናታን ሀይቅዳይሳ ኔኒ አይብን ኤራይ?” ያግድ ኦይችስ።
2SA 1:6 ፓንꬃይ፥ “ታኒ ግልቦአ ደርያ ቦላ ደእሽን፥ ሳኦል ባ ቶራ ጉፈትድ ኤቅዳይሳ በአስ፤ ፓራ ጋረትነ ፓራ አሳት ሳኦላኮ ማታትዶሶና።
2SA 1:7 ሄ ዎደ ሳኦል ጉየ ስሚድ ታና ደምድ ፄግስ። ታኒ፥ ‘ዬ’ ያጋዳ ኮያስ።
2SA 1:8 ሳኦል፥ ‘ኔኒ ኦኔ?’ ያግድ ኦይችን፥ ‘ታኒ አማለቃ አስ’ ያጋዳ ዛራስ።
2SA 1:9 ሄሳፈ ጉየ ሳኦል፥ ‘ታኒ ማዱንፃዳ፥ ሀይቆስ ጋካስ፤ ኔኒ ታ ቦላ ከይያ ኤቃዳ ታና ዎꬋ’ ያግስ።
2SA 1:10 እ ኩንድዳፐ ጉየ ሀይቆፐ አቶናይሳ ኤርዳ ግሾ ታኒ እያ ቦላ ከያ ኤቃዳ እያ ዎꬋስ። እያ ሁጰን ደእያ ካላቻነ እያ ቀሰን ደእያ አምባርያ ኤካዳ ኔኮ ታ ጎዳኮ ያስ” ያግስ።
2SA 1:11 ዳዊቲነ ዳዊታ አሳይ ካዮትድ፥ ባንታ ማኡዋ ዳክዶሶና።
2SA 1:12 ኤንቲ ሳኦል፥ ዮናታን፥ ጎዳ ኦላንቾትነ እስራኤለ አሳይ ኦላን ዉርዳ ግሾ ኦማርስ ጋካናዉ ካዮትዶሶና፤ ዬክዶሶና፤ ፆምዶሶና።
2SA 1:13 ዳዊቲ ሄሳ ኤንታዉ ኤህዳ ፓንꬃ፥ “ነ አዉፐ ያዲ?” ያግድ ኦይችስ። እ ዛሪድ፥ “ታኒ በተ አስ ግድድ ደእያ አማለቃ አድያ ናአ” ያግስ።
2SA 1:14 ዳዊቲ፥ “ጎዳይ ትይዳ ካዋ ዎꬋናዉ ነ ኩሽያ ደንꬃሸ ዋናዳ ያያብኪ?” ያግስ።
2SA 1:15 ዳዊቲ ባ አሳታፐ እሱዋ ፄግድ፥ “እያ ዎꬋ” ያግን፥ እ አማለቃ ፓንꬃ ጫድድ ዎꬍስ።
2SA 1:16 ዳዊቲ አማለቃ አድያኮ፥ “ጎዳይ ትይዳ ካዋ ታኒ ዎꬋስ” ያጋዳ “ኔኒ ነ ዶናን ማርካትዳ ግሾ ነ ሱꬃ ጎመይ ነና ኦይኮ” ያግስ።
2SA 1:17 ዳዊቲ ሳኦላስነ እያ ናኣ ዮናታናስ ሀይሳዳ ያግድ ዘሌልስ።
2SA 1:18 ይሁዳ አሳይ፥ “ዶንገ ዬሆ” ጌተትያ ሀ ዘለልሳ ታማራና መላ ኪትስ፤ ሀ ዘለልሳይ ያሻራ ማፃፋን ፃፈትስ።
2SA 1:19 “ነኖ እስራኤለ፥ ነ ሀላቃት፥ ꬎቃ በሳን ሀይቅዶሶና። ዎልቃማት ዋንድ ኩንድዶና!
2SA 1:20 ፍልስፄመ ማጫ ናይት ሄሳ ስእድ ኡፋይቶና መላ፥ ቃፃረትቦና አሳ ማጫ ናይት ሀሹ ጎና መላ፥ ሀይሳ ጋተ ካታማን ኦዶፕተ አስቃሎና ኦገታን አዋጆፍተ።
2SA 1:21 ህንተኖ ግልቦአ ደረቶ፥ ህንተ ቦላ እር ቡኮፎ፤ አክ ዎꬎፎ። ሄ በሳን ዎልቃማታ ጎንዳለይ ቱንዳ ግሾ፥ ሳኦላ ጎንዳለይ ዛይተን ቁሸትቦና ግሾ፥ ሄ ጋድያን ካꬅ ዶሎፖ።
2SA 1:22 ጎይረትዳይሳታ ሱꬃፈ፥ ዎልቃማታ ሞꬉዋፈ፥ ዮናታና ዶንገይ ጉየ ግቤና፤ ሳኦላ ማሻይ ካሎና ስምቤና።
2SA 1:23 ሳኦልነ ዮናታን ዶሰተይሳታ፤ ሀይቆንነ ፓፃን ሻከትቦኮና። ኤንቲ አርጋንꬃፈ አꬍድ ኤሶ፤ ጋሞፈ አꬍድ ምኖ።
2SA 1:24 ህንተኖ እስራኤለ ማጫሳዉ፥ ዞኦነ አሌቆ ማኦ ማይዝዳይሳስ፥ ህንተ ማኡዋ ዎርቃን አሌቅስዳ ሳኦላስ ዬክተ።
2SA 1:25 ዎልቃማት ኦላን ዋንድ ኩንድዶና? ዮናታን ꬎቃ በሳን ሀይቅስ።
2SA 1:26 ታ እሻ ዮናታና፥ ታ ነዉ አዛናይስ፤ ነ ታዉ ዳሮ አልኦ። ኔኒ ታና ዶስያ ዶሶይ ማላልሴስ፤ ማጫ ሲቆፐካ አꬌስ።
2SA 1:27 ዎልቃማት ዋንድ ኩንድዶና? ኦላ ሚሸይካ ዋንድ ꬋይዴ?” ያግድ ዳዊቲ ዘሌልስ።
2SA 2:1 ሄሳፈ ጉየ፥ ዳዊቲ፥ “ይሁዳ ካታማታፐ እሱዋ ቦ?” ያግድ ጎዳ ኦይችስ። ጎዳይ፥ “ኤ፥ ባ” ያግስ። ዳዊቲ፥ “አዉ ቦ” ያግድ ኦይችስ። ጎዳይ፥ “ከብሮና ባ” ያግድ ዛርስ።
2SA 2:2 ዳዊቲ ባ ናምኡ ማቸታ፥ እዝራኤለ አክናሆማነ ካሰ ናባላ ማችዉ ቃርመሎሳ አብግያ ኤክድ ከብሮና ካታማ ብስ።
2SA 2:3 ዳዊቲ ባራ ደእያ አሳታነ ኤንታ ሶ አሳ ኡባ ኤህን፥ ከብሮናንነ እያ ሄራን ደእያ ካታማታን ደእዶሶና።
2SA 2:4 ይሁዳ አሳት ከብሮና ካታማ ይድ፥ ዳዊታ ትይድ ይሁዳ ቦላ ካዎꬅዶሶና። ዳዊቲ ያበሳ ጋላዳ አሳይ ሳኦላ ሞግዳይሳ ስእዳ ዎደ፥
2SA 2:5 እ አሰ ኪትድ፥ “ህንተ ህንተ ጎዳ ሳኦላ ሞግዳ ግሾ ሄ ኬሀተꬃስ ጎዳይ ህንተና አንጆ።
2SA 2:6 ጎዳይ ሲቁዋነ ቱማተꬃ ህንተዉ ቆንጭሶ፤ ታንካ ሀ ኬሀተꬃ ግሾ ህንተዉ ሎኦ ኩሸ ዛራና።
2SA 2:7 ህዛ ምንተ፤ ፃልተ፤ ህንተ ጎዳይ ሳኦል ሀይቅስ። ይሁዳ አሳይ ታና ትይድ፥ ባንታ ቦላ ካዎꬅዶሶና” ያግስ።
2SA 2:8 ሳኦላ ቶራ ሞጮናይ ኔራ ናአይ አበኔር ሳኦላ ናኣ እያቡስተ ኤክድ፥ ማህናይማ ጌተትያ በሳ ኤፍስ።
2SA 2:9 እያ ጋላዳን፥ አሴራን፥ እዝራኤላን፥ ኤፍሬማን፥ ብንያመንነ እስራኤለ ቢታ ኡባን ካዎꬅስ።
2SA 2:10 ሳኦላ ናአይ፥ እያቡስተይ እስራኤለ ቦላ ካዎትያ ዎደ እያዉ ኦይታሙ ላይꬅ፤ እ ናምኡ ላይꬅ ካዎትስ። ግዶሽን፥ ይሁዳ አሳይ ዳዊታ ካልዶሶና።
2SA 2:11 ዳዊቲ ከብሮናን ይሁዳ ቦላ ላፑን ላይꬅነ ባጋ ካዎትስ።
2SA 2:12 ኔራ ናአይ አበኔርነ ሳኦላ ናአይ እያቡስተ አሳይ ማህናይማፐ ጋባኦና ብዶሶና።
2SA 2:13 ፃሩያ ናአይ እዮኣብነ ዳዊታ አሳይ ጋባኦና ኦላ ሃꬃ ማታን ኤንታራ ጋሄትዶሶና። እስ ጩጋይ ኦላ ሃꬃፈ ሄፍንꬃን ኡትን፥ እስ ጩጋይ ሀፍንꬃን ኡትስ።
2SA 2:14 አበኔር እዮኣባኮ፥ “አነ ህንተፈነ ኑፐ ፓንꬃት ደንድድ፥ ኑ ስንꬃን ኦለቶ” ያግስ። እዮኣብ፥ “ኤሮ፥ ደንድድ ኦለቶ” ያግስ።
2SA 2:15 ሄሳ ግሾ፥ ብንያመፐ ሳኦላ ናኣ እያቡስተስ ታማነ ናምኡ አሳት ከይድ፥ ዳዊታስ ኤቅዳ ታማነ ናምኡ አሳታራ ኦላ ጋሄትዶሶና።
2SA 2:16 እሶይ እሶይ ባ ሞርክያ ሁጵያ ኦይክድ፥ ማሻን ምየን ጫድስ፤ ሄሳዳ ሀንድ ላታማነ ኦይዳይ ሀይቅዶሶና። ሄሳ ግሾ ጋባኦናን ደእያ ሄ በሳይ ማሻ ቢታ ጌተትስ።
2SA 2:17 ሄ ጋላስ ዎልቃማ ኦላ ኦለትድ፥ ዳዊታ አሳይ አበኔራነ እስራኤለ አሳ ፆንስ።
2SA 2:18 ፃሩያ ናይት ሄꬓይ እዮኣብ፥ አብስነ አሳሄል ሄ በሳን ደኦሶና፤ አሳሄል ዎሽኤዳ ኤሶን ዎፅድ፥
2SA 2:19 አሳሄል አበኔራ ኡሻች ዎይኮ ሀድርስ ጎና የደꬅስ።
2SA 2:20 አበኔር ጉየ ስሚድ፥ “አሳሄላ፥ ነኔ?” ያግድ ኦይችስ። አሳሄል፥ “ኤ ታና” ያግስ።
2SA 2:21 አበኔር፥ “ኡሻች ዎይኮ ሀድርስ ስማዳ፥ አሳታፐ እሱዋ ኦይካዳ እያ ኦላ ሚሽያ ኤካ” ያግስ። ሽን አሳሄል እያ የደይሳ አጎና እፅስ።
2SA 2:22 ቃስካ አበኔር፥ “ታኒ ነና ሳአራ ጋꬃዳ ኦይꬆና ደእሽን፥ ታና የደይሳ አጋ! ነና ዎꬋዳ ታኒ ነ እሻ እዮኣባ ሶምኡዋ ዋታዳ ፄላኔ?” ያግድ ዋስስ።
2SA 2:23 ሽን አሳሄል እያ የደይሳ አጎና እፅስ። ሄሳ ግሾ፥ አበኔር ቶራ ጉየ የድድ፥ አሳሄላ ኡሉዋ ጫድን ቶራይ ዞኮራ ካንꬅድ ከይስ። አሳሄል ሄ በሳን ኩንድድ ሀይቅስ፤ አሳሄል ሀይቅዳ በሳ ጋክዳ አሳ ኡባይ ያን ኤቅስ።
2SA 2:24 ሽን እዮኣብነ አብስ አበኔራ ጎድዶሶና፤ አው ዉልያ ዎደ ጋባኦና መላ ቢታኮ ኤፍያ ኦግያን ጋዳፐ ስንꬃ ባጋራ ደእያ አማ ዙማኮ ጋክዶሶና።
2SA 2:25 ብንያመ አሳይ አበኔራኮ ሺቅዶሶና፤ እስ ጩጋ መꬍድ እስ ዙማ ቦላ ኤቅዶሶና።
2SA 2:26 አበኔር እዮኣባ ፄግድ፥ “መርናዉ ኦለትሸ ዳነዬ? ሀይሳ ዉርሰꬃይ ጫሞ ግዳናይሳ ኔኒ ኤርኪ? ነ አሳይ፥ ባንታ እሻታ ጎደይሳ አጋና መላ አይስ ኦድኪ?” ያግስ።
2SA 2:27 እዮኣብ፥ “ደኦ ፆሳይ ኤሮ! ኔኒ ኦዶናባ ግድያኮ ታ አሳይ ባ እሻታ ሳእ ዎንታና ጋካናዉ ጎዳ አጎኮና” ያግስ።
2SA 2:28 እዮኣብ ሞይዘ ፑንን አሳ ኡባይ ኤስስ። እስራኤለታ ዛር ጎድቦኮና ዎይኮ ኦልቦኮና።
2SA 2:29 አበኔርነ እያ አሳይ ሄ ቃማ ኩመꬅ ሄመትድ አራባ ጋꬋ ጋክዶሶና። ዮርዳኖሰ ሻፋ ፕንድ፥ በትሮና ካንꬅድ ማህናይመ ይዶሶና።
2SA 2:30 እዮኣብ አበኔራ ጎደይሳ አግድ፥ ባ አሳ ኡባ እስ በሲ ሺሽድ ፄልያ ዎደ፥ አሳሄላ ጉጆና ዳዊታ አሳፐ ታማነ ኡዱፉን አስ ፓጭስ።
2SA 2:31 ሽን ዳዊታ አሳይ አበኔራራ ደእያ ብንያመ ኮቻታፐ ሄꬑ ፄታነ ኡሱፑን ታሙ አስ ዎꬍዶሶና።
2SA 2:32 አሳሄላ አሀ ኤክድ፥ ቤተለመ ካታማን ደእያ እያ አዋ ዱፎን ሞግዶሶና። እዮኣብነ እያ አሳይ ቃማ ኩመꬅ ሄመትድ ሳእ ዎንትያ ዎደ ከብሮና ጋክዶሶና።
2SA 3:1 ሳኦላ ሶ አሳይነ ዳዊታ አሳይ ዳሮ ዎደ ኦለትዶሶና፤ ዳዊቲ ኦላን ምን ምን ብያ ዎደ ሳኦላ አሳይ ዳቡር ዳቡር ብስ።
2SA 3:2 ከብሮናን ዳዊታስ ናይት የለትዶሶና፤ እዝራኤለ አክናሆማ የልዳ ባይራ ናአይ አምኖና፤
2SA 3:3 ቃርመሎሳ አብግያ ካሰ ናባላ ማችያ የልዳ ክልኣብ ናምአንꬆ ናአ። ጋሹራ ካዋ ታልማያ ናእያ ማእካ የልዳ አበሰሎመይ ሄꬓንꬆ ናአ።
2SA 3:4 ኦይዳንꬆይ ሃግታ ናኣ አዶና፤ እቻሻንꬆይ አብፃላ ናኣ ሳፋፃ።
2SA 3:5 ኡሱፑንꬆይ ዳዊታ ማቸ ኤግል ናኣ ይትራኣማ፤ ሀ ናይት ኡባይ ከብሮናን የለትዶሶና።
2SA 3:6 ሳኦላ ሶ አሳራነ ዳዊታ ሶ አሳራ ኦለትያ ዎደ አበኔር ሳኦላ አሳ ቦላ ምን ምን ብስ።
2SA 3:7 ሳኦላስ እዮሄላ ናአ ግድዳ እርፅፎ ጌተትያ እስ ላገꬅያ ደአዉሱ፤ እያቡስተይ አበኔራኮ፥ “ታ አዋ ላገራ አይስ አቃዲ?” ያግድ ኦይችስ።
2SA 3:8 አበኔር እያ ኦዳን ዳሮ ይሎትድ፥ “ታና ኔኒ ይሁዳኮ ስምዳ ጋታ ካና ጋድዬ? ታኒ ነ አዋ ሳኦላስ፥ እያ እሻታስነ እያ ዳቦታስ አማነታዳ ደአስ፤ ነናካ ዳዊታስ አꬃዳ እማብከ። ሽን ሀእ ኔኒ ታና ሀ ማጫሰ ግሾ ሞታሳ!
2SA 3:9 ፆሳይ ዳዊታስ ኦꬃና ግድ ጫቅዳ ቃላ ታኒ ፖሎና እፅኮ፥ ፆሲ ታና ፕርዶ።
2SA 3:10 ሳኦላ ኮቻፈ ካዎተꬃ ዎስስድ፥ ዳነፐ በርሳበ ጋካናዉ እስራኤለ ቦላነ ይሁዳ ቦላ፥ ዳዊታ አራታ ምንꬃናዉ ጎዳይ ጫቅስ” ያግስ።
2SA 3:11 እያቡስተይ አበኔራስ ያይዳ ግሾ ሀራ ቃላ ፖግቤና።
2SA 3:12 አበኔር ዳዊታኮ፥ “ቢታይ ኦሴ? ኔኒ ታራ ጫቃ፤ እስራኤለ አሳ ኡባይ ኔኮ ስማና መላ ታ ነና ማዳና” ያግድ አሰ ኪትስ።
2SA 3:13 ዳዊቲ፥ “ሎኦ! ታ ኔራ ጫቃና። ሽን ታኒ ነና እስባ ኦይቻይስ፤ ኔኒ ታና በአናዉ ያ ዎደ ሳኦላ ናእዉ መልኮሎ ኤኮና ዮፓ” ያግስ።
2SA 3:14 ሄሳፈ ጉየ፥ ዳዊቲ ሳኦላ ናአ እያቡስተኮ፥ “ፄቱ ፍልስፄመታ ቃራታዳ ኮይታ ኦꬃዳ እምዳ ታ ማችዉ መልኮሎ ታዉ እማ” ያግድ አሰ ኪትስ።
2SA 3:15 እያቡስተይ አሰ ኪትድ እ አዝና ላዉሻ ናአ ፓልፅኤላፐ ከስ ኤክስ።
2SA 3:16 እ አዝናይ ብራቅማ ካታማ ጋካናዉ ዬክሸ እ ጌዶ ካልስ። አበኔር እያኮ፥ “ጉየ ሶ ባ” ያግን አደይ ጉየ ስሚድ ብስ።
2SA 3:17 አበኔር እስራኤለ ጭማታኮ ብድ፥ “ዳዊቲ ህንተ ቦላ ካዎታና መላ ዳሮ ዎደ አሞትደታ።
2SA 3:18 ሀእ ፖልተ! ጎዳይ፥ ‘ታ አሳ እስራኤለ፥ ፍልስፄመታ ኩሸፐነ ኤንታ ሞርከታ ኡባ ኩሸፐ ታ አይልያ ዳዊታ ባጋራ አሻና’ ግዳይሳ ሀሳይተ” ያግስ።
2SA 3:19 አበኔር ብንያመ ኮቻታስ ሄሳ ኦድስ። እስራኤለ አሳይነ ብንያመ አሳ ኡባይ ኦꬃናዉ ኮይዳ ኡባ ዳዊታስ ኦዳናዉ አበኔር ከብሮና ብስ።
2SA 3:20 አበኔር ባራ ላታሙ አስ ኤክድ፥ ከብሮና ብን፥ ዳዊቲ እያዉነ እያ አሳስ ግብራ ጊግስስ።
2SA 3:21 አበኔር ዳዊታኮ፥ “ኤንቲ ኔራ ጫቃና መላነ ነ ዎዛናይ አሞትያ ኡባ ነ ሃራና መላ ታ ባዳ እስራኤለ አሳ ካዋስ ታ ጎዳስ ሺሻና” ያግስ። ያግን ዳዊቲ አበኔራ ሞይዝድ ሳሮ የድስ።
2SA 3:22 ሄ ዎደ ዳዊታ አሳይነ እዮኣብ ኦላፐ ዳሮባ ድእድ ስምዶሶና። ሽን ዳዊቲ እያ ሳሮ ባ ግድ የድዳ ግሾ፥ አበኔር ከብሮናን ዳዊታራ ዴና።
2SA 3:23 እዮኣብነ እያራ ደእያ ኦላንቾት ጋክያ ዎደ አሳይ፥ “ኔራ ናኣ አበኔር ካዋ ዳዊታኮ ይን፥ ካዎይ እያ የድን ሳሮ ብስ” ያግድ ኦድዶሶና።
2SA 3:24 ሄሳ ግሾ፥ እዮኣብ ካዋኮ ብድ፥ “ሄስ ዋንድ ሀንዴ? አበኔር ኔኮ ይን፥ አይስ የዳዲ? ሄኮ እ ብክችስ!
2SA 3:25 ኔራ ናአይ አበኔር ነና ጭማናዉ፥ ኔኒ ገልያሶነ ከያሶ በአናዉነ ኔኒ ኦꬅያ ኡባ ኤራናዉ ይስ” ያግስ።
2SA 3:26 እዮኣብ ዳዊታ ስንꬃፈ ከይድ፥ አበኔራ ጌዶ ኪታ የድን፥ ኤንቲ እያ ሲራ ኦላ ሃꬃ ማታፐ ጉየ ዛርዶሶና፤ ሽን ዳዊቲ ሄሳ ኤረና።
2SA 3:27 አበኔር ከብሮና ስሚድ ይዳ ዎደ እዮኣብ እያራ ዱማ ኦደታናዉ ኮይዳ ዳንስድ ድርሳ ፐንግያኮ ደእያ ክፍልያነ እያ ኤፍስ። ባ እሻ አሳሄላ ሱꬃ ዛራናዉ አበኔራ ኡሎን ጫድን አበኔር ሄ በሳን ሀይቅስ።
2SA 3:28 ዳዊቲ ጉየፐ ሄሳ ስእዳ ዎደ፥ “ታንነ ታ ካዎተꬃይ ኔራ ናኣ አበኔራ ሱꬃ ግሾ ጎዳ ስንꬃን መርናዉ ኦይሸቶኮ።
2SA 3:29 እያ ሱꬃይ እዮኣባነ እያ አዋ ሶ አሳ አቾ፤ ማዱንꬅ ደእያ አስ ዎይኮ ጎጋ ሀርገይ ደእያ አስ ዎይኮ ዎበ አስ ዎይኮ ማሻን ሀይቅያ አስ ዎይኮ ኮሻትያ አስ እዮኣባ ኮቻን ꬋዮፖ” ያግስ።
2SA 3:30 ጋባኦናን ከይዳ ኦላን ባንታ እሻ አሳሄላ አበኔር ዎꬍዳ ግሾ፥ እዮኣብነ እያ እሻ አብስ አበኔራ ዎꬍዶሶና።
2SA 3:31 ዳዊቲ እዮኣባነ እያራ ደእያ አሳ፥ “ህንተ ማኡዋ ዳክተ፤ ባና ቆልተ፤ አበኔራ ሀላ ስንꬃን ዬክተ” ያግስ። ካዎ ዳዊቲ ሀላ ካልድ ዱፎ ብስ።
2SA 3:32 አበኔር ከብሮናን ሞገትስ፤ ካዎይ ባ ቃላ ꬎቁ ኦꬅድ ዱፎን ዬክስ፤ አሳ ኡባይ ዬክዶሶና።
2SA 3:33 ካዎይ አበኔራስ፥ “አበኔር ኤያ አሳዳ ሀይቃናዉ በሲ?
2SA 3:34 ነ ኩሸይ ቃሸትቤና፤ ነ ቶሆይ ሳንꬃላታን ኦይከትቤና። አስ ኢታ አሳ ኩሸን ሀይቀይሳዳ ሀይቅስ” ያግድ ዘሌልስ። አሳ ኡባይ አበኔራስ ዛሪድ ዬክዶሶና።
2SA 3:35 ሄ ጋላስ ዳዊቲ ካꬅ ማና መላ አሳይ እያ ሾቢዶሶና። ሽን ዳዊቲ፥ “አዋ አይፈይ ደእሽን፥ ካꬅ ዎይኮ ሀራባ ባርኮ ፆሲ ታና ፕርዶ” ያግድ ጫቅስ።
2SA 3:36 ካዎይ ኦꬅዳባ አሳ ኡባይ በእድ ኡፋይትዶሶና፤ ቱማካ ካዎይ ኦꬅዳባ ኡባይ አሳ ኡፋይስስ።
2SA 3:37 ሄሳ ግሾ፥ ሄ ጋላስ ዳዊታ አሳይነ እስራኤለ አሳ ኡባይ ካዎይ ኔራ ናኣ አበኔራ ዎꬍስቦናይሳ ኤርዶሶና።
2SA 3:38 ካዎይ ባ አይለታኮ፥ “እስራኤለ ቢታን ግታ አስነ ሀላቅ ሀይቅዳይሳ ህንተ አኬከከቲ?
2SA 3:39 ታኒ ፆሳይ ትይዳ ካዎ ግድኮካ፥ ታኒ ዳቡራንቾ፤ ሀይሳቲ ፃሩያ ናይት ታ ቦላ ምንዶሶና፤ ኢታ ኦꬅዳይሳታስ ጎዳይ ኤንታ ኦሱዋዳ ዛሮ” ያግስ።
2SA 4:1 ሳኦላ ናአይ እያቡስተይ አበኔር ከብሮናን ሀይቅዳይሳ ስእዳ ዎደ እያ ዎዛናይ ትልእስ፤ እስራኤለ አሳ ኡባይካ ዳጋምስ።
2SA 4:2 ሳኦላ ናኣ እያቡስተስ ኦላ ካለꬅያ ናምኡ ሀላቃት ደኦሶና፤ እሱዋ ሱንꬃይ ባአና፤ ሀንኮይ ቃስ ራካባ። ኤንቲ ብንያመ ኮቸ ግድዳ ባኣሮተ አድያ እርሞና ናይታ። ባኣሮተይ ብንያመ ባጋዳ ታይበቴስ።
2SA 4:3 ባኣሮታን ደእዳ ኮይሮ አሳት ግታይማ ቢታ ባቃትድ፥ ሀች ጋካናዉ በተ አሳዳ ያን ደእዶሶና።
2SA 4:4 ሳኦላ ናኣ ዮናታናስ ናምኡ ቶሆይ ስልዳ ናእ ደኤስ፤ ሳኦላነ ዮናታና ሀይቁዋ ዎረይ እዝራኤለፐ ስኤትያ ዎደ እ እቻሹ ላይꬃ ናአ። ሄ ናኣ ድችያራ እያ ኤካዳ ባቃትሽን ናአይ ኩንድን እያ ቶሆይ ስልስ፤ ሄ ናኣ ሱንꬃይ መምፕቦስተ።
2SA 4:5 ባኣሮተ አድያ እርሞና ናይት ረካብነ ባኣን እያቡስተ ሶ ብድ ሴታ ጋላስ ጋክዶሶና። ኤንቲ ጋክያ ዎደ እ ሸምፓናዉ አልጋ ቦላ ዝንእስ።
2SA 4:6 ኤንቲ ግስተ ኮይያ አሳዳ ሀንድ ሶ ገልድ፥ እያ ኡሉዋን ጫድዶሶና። ረካብነ እያ እሻ ባኣን ለፓራ ከይድ ብዶሶና።
2SA 4:7 እያቡስተይ ቆልአን አርሳን ዝንእዳይሳ ደምድ፥ እያዉ ኡሉዋን ጫድድ ዎꬍዶሶና፤ እያ ሁጵያ ቃንፅ ኤክድ፥ አራባ ጋꬋ ኤፍያ ኦግያ ኦይክድ፥ ቃማራ ብዶሶና።
2SA 4:8 እያቡስተ ሁጵያ ከብሮናን ደእያ ዳዊታስ ኤህዶሶና። ካዋ፥ “ነና ዎꬋናዉ ኮይያ ነ ሞርክያ ሳኦላ ናኣ እያቡስተ ሁጵያ ሀይሳ በአ። ሳኦላ ቦላነ እያ ናይታ ቦላ ካዋ ኑ ጎዳ ግሾ ፆሳይ ሀች ሀሎ ከይስ” ያግዶሶና።
2SA 4:9 ሽን ባኣሮተ አድያ እርሞና ናይታ ረካባነ እያ እሻ ባአና ዳዊቲ ሀይሳዳ ያግስ፤ “መቶ ኡባፈ ታና አሽዳ ደኦ ጎዳይ ኤርያ መላ።
2SA 4:10 ታዉ ምሽራቾ ኦድያ አሳዳ፥ ‘ሳኦል ሀይቅስ’ ያግድ ታዉ ኦድን፥ ታኒ እያ ፅቅላጋን ኦይካዳ ዎꬋስ፤ ታኒ እያ ምሽራቹዋስ እምዳ ዎይቶይ ሀይሳ።
2SA 4:11 ባ ሶን ባ አርሳን ዝንእዳ ፅሎ አድያ ዎꬍዳ ኢታ አሳታስ እያ ሃሉዋ ከየይስ አይ መላ ኢታንደሻ! እያ ሱꬃ ታኒ ህንተ ኩሸፐ አቻና፤ ህንተና ታኒ ቢታ ቦላፈ ꬋይሳና!” ያግስ።
2SA 4:12 ረካባነ ባአና ዎꬋና መላ ዳዊቲ ባ ኦላንቾታ ኪትን፥ ኦላንቾት ኤንታ ዎꬍዶሶና። ኤንታ ኩሽያነ ቶሁዋ ቃንፅድ፥ ከብሮናን ኦላ ሃꬃ ማታን ካቅዶሶና። እያቡስተ ሁጵያ ኤፍድ፥ አበኔራ ዱፎን ከብሮናን ሞግዶሶና።
2SA 5:1 እስራኤለ ዛረ ኡባይ ዳዊታኮ ከብሮና ይድ፥ “ኑኒ ነ አሾነ ነ ሱꬁ።
2SA 5:2 ካሰ ሳኦል ኑስ ካዎ ግድድ ደእያ ዎደካ እስራኤለ አሳ ኦላስ ካለꬅዳይ ነና። ጎዳይ ነና፥ ‘ኔኒ ታ አሳ እስራኤለ ሄማና፤ ኤንታ ቦላ ካዎታና’ ያግድ ቃላ ገልስ” ያግዶሶና።
2SA 5:3 እስራኤለ ጭማት ኡባይ ካዋ ዳዊታኮ ከብሮና ይዶሶና፤ እ ኤንታራ ከብሮናን ጎዳ ስንꬃን ጫቅስ፤ እስራኤለ ቦላ ካዎታና መላ ዳዊታ ትይዶሶና።
2SA 5:4 ዳዊቲ ካዎትያ ዎደ እያዉ ሀስታሙ ላይꬅ፤ እ ኦይታሙ ላይꬅ ካዎትስ።
2SA 5:5 ከብሮናን ይሁዳ ቦላ ላፑን ላይꬅነ ኡሱፑን አጌና ካዎትስ፤ የሩሳላመን እስራኤለ ቦላነ ይሁዳ ቦላ ሀስታማነ ሄꬑ ላይꬅ ካዎትስ።
2SA 5:6 የሩሳላመን ደእያ ያቡሰ አሳ ኦላናዉ ዳዊቲነ እያ አሳይ ብዶሶና። ያቡሰ አሳይ፥ “ዳዊቲ ሀ ካታማ ገላናዉ ዳንዳኤና” ግድ ቆፕዳ ግሾ ሀር አቶሽን፥ “ቆቀትነ ዎበት ነና ተቃናዉ ዳንዳኦሶና፤ ነ ሀ ካታማ ገላካ” ያግዶሶና።
2SA 5:7 ግዶሽን፥ ዳዊቲ ፅዮነን ደእያ ኤንታ ሚፃ ኦይክን፥ እያ ዳዊታ ካታማ ግዳሱ።
2SA 5:8 ሄ ጋላስ ዳዊቲ፥ “ያቡሰ አሳ ኦልድ ኦይክያ ኦንካ ዳዊታ ሞርከ ግድዳ ዎበትነ ቆቀት ደእያ በሳ ጋካናዉ ሻፋራ ፑደ ከያናዉ ኮሼስ” ያግስ። ሄሳ ግሾ፥ “ቆቀትነ ዎበት ጋꬎ ገሎኮና” ጌተትስ።
2SA 5:9 ዳዊቲ ሄ ሚፃ ኦይክድ፥ ያን ደእስ፤ ሄ ሚፃ ዳዊታ ካታማ ያግድ ሱንꬅስ። ዳዊቲ ሚሎፐ ዶምድ ሄ ካታማ ዩሽድ ግምብስ።
2SA 5:10 ኡባፈ ዎልቃማ ጎዳይ ፆሳይ እያራ ደእያ ግሾ ዳዊቲ ምን ምን ብስ።
2SA 5:11 ፅሮሳ ካዎይ ክራም ዳዊታስ ካዎ ጋꬎ ኬፃና መላ ዝጋ ምꬅ፥ አናፀታነ ሹቹ ማሰይሳታ የድን፥ ኤንቲ እያዉ ኬ ኬፅዶሶና።
2SA 5:12 ጎዳይ እስራኤለ ቦላ እያ ካዎ ኦꬅድ ምንꬅዳይሳነ ባ አሳ እስራኤለ ግሾ እያ ካዎተꬃ ꬎቁ ኦꬅድ ቦንችዳይሳ ዳዊቲ ኤርስ።
2SA 5:13 ዳዊቲ ከብሮናፐ የሩሳላመ ይዳፐ ጉየ፥ ሀራ ላገꬆታነ ማቸታ ጉጅድ ኤክን፥ ሀራ ማጫ ናይትነ አደ ናይት እያዉ የለትዶሶና።
2SA 5:14 የሩሳላመን እያዉ የለትዳ አደ ናይታ ሱንꬃይ ሳሙአ፥ ሾባባ፥ ናታና፥ ሶሎሞነ፥
2SA 5:15 ይብሃራ፥ ኤልሹአ፥ ነፈጋ፥ ያፍአ፥
2SA 5:16 ኤልሻማአ፥ ኤልያዳነ ኤልፋላፃ።
2SA 5:17 ዳዊቲ እስራኤለ ቦላ ካዎ ግድድ ትየትዳይሳ ፍልስፄመት ስእዳ ዎደ ኤንቲ ኡባይ ዳዊታ ኮያናዉ ከይዶሶና፤ ሽን ዳዊቲ ሄሳ ስእድ ሚፃን ብድ ገልስ።
2SA 5:18 ፍልስፄመት ብድ፥ ራፋይመ ዛንጋራን ላለትድ ኡትዶሶና።
2SA 5:19 ሄሳ ግሾ፥ ዳዊቲ፥ “ታኒ ባዳ ፍልስፄመታ ኦሎ? ኔኒ ኤንታ ታዉ አꬃዳ እማኔ?” ያግድ ጎዳ ኦይችስ። ጎዳይ፥ “ኤ ኦላ፤ ቱማ ታ ኤንታ ነዉ አꬃዳ እማና” ያግስ።
2SA 5:20 ዳዊቲ ባአል-ፓራስመ ጌተትያ በሳ ብድ፥ ያን ኤንታ ፆንስ። እ፥ “ድኦ ሃꬅ መንꬅድ ከየይሳዳ ጎዳይ ታ ሞርከታ ታ ስንꬃን መንረꬅስ” ያግስ። ሄሳ ግሾ፥ ሄ በሳ ሱንꬃይ ባአል-ፓራስመ ጌተትስ።
2SA 5:21 ፍልስፄመት ባንታ ኤቃታ ሄ በሳን የግድ ብን፥ ዳዊቲነ እያ አሳይ ሄ ኤቃታ ኤክድ ብዶሶና።
2SA 5:22 ፍልስፄመት ጉየ ብድ፥ ናምአንꬆ ራፋይመ ዛንጋራን ላለትድ ኡትዶሶና።
2SA 5:23 ዳዊቲ ጎዳ ናምአንꬆ ኦይችን፥ ጎዳይ፥ “ኤንታ ጉየ ባጋራ ተቃዳ ዎላ ስንꬃን ኤንታ ኦላ፥ ሽን ኤንታዉ ሶምኦን ከዮፓ።
2SA 5:24 ዎላ ምꬃ ፄራን ሳልፐ ቃላ ኔኒ ስእያ ዎደ ፍልስፄመ ኦላንቾታ ሾጫናዉ ጎዳይ ኔፐ ስን አꬍዳይሳ ኤራዳ ኤለሳ” ያግስ።
2SA 5:25 ዳዊቲ ጎዳይ ኪትዳይሳዳ ኦꬅስ፤ ጌባፐ ገዘራ ጋካናዉ ፍልስፄመ ኦላንቾታ ዎꬍስ።
2SA 6:1 እስራኤለ ግዶፈ ዶረትዳ ሀስታሙ ሙኩሉ አሳታ ዳዊቲ ዛሪድ ሺሽስ።
2SA 6:2 ዳዊቲነ እያ አሳ ኡባይ ይሁዳ ባላ ካታማፐ ደንድድ፥ ክሩበታፐ ግዶን ባ ካዎተꬃ አራታ ቦላ ኡትዳ ኡባፈ ዎልቃማ ጎዳ ሱንꬃን ፄገትዳ ፆሳ ታቦትያ ኤሀናዉ ብዶሶና።
2SA 6:3 ኤንቲ ፆሳ ታቦትያ ኦራꬃ ጋረን ዎꬅድ፥ ደረ ሁጰን ደእያ አምናዳበ ሶፐ ኤህዶሶና። አምናዳበ ናይት ኦዝነ አህዮይ ኦራꬃ ጋርያ ካለꬆሶና።
2SA 6:4 ደረ ሁጰን ደእያ አምናዳበ ሶፐ ፆሳ ታቦትያ ኤህያ ዎደ አህዮይ ታቦትያፐ ስንꬃራ ሄመቴስ።
2SA 6:5 ዳዊቲነ እስራኤለ አሳ ኡባይ ዲꬃን፥ ማስንቆን፥ ካራቦን ዳላንነ ሻሾተን ካእሸ ባንታ ኩመꬃ ዎልቃን ጎዳ ስንꬃን ኡፋይትድ ቦንቾሶና።
2SA 6:6 ናኮን ካꬃ ቡክያ ዉዱማ ጋክያ ዎደ ቦራት ꬉበትን፥ ኦዝ ባ ኩሽያ የድድ፥ ፆሳ ታቦትያ ኦይክስ።
2SA 6:7 ኦዝ ታቦትያ ቦችዳ ግሾ ጎዳ ሀንቆይ እያ ቦላ ኤፅስ። ፆሳይ እያ ሾጭን ሄ በሳን ፆሳ ታቦትያ ማታን ሀይቅስ።
2SA 6:8 ጎዳ ሀንቆይ ኦዛ ሾጭዳ ግሾ ዳዊቲ አዛንስ። ሄ በሳይ ሀች ጋካናዉ ኦዝ ሾጨትዳ በሳ ጌተቴስ።
2SA 6:9 ሄ ጋላስ ዳዊቲ ጎዳ ያይዳ ግሾ “ጎዳ ታቦተይ ታኮ ዋንድ ያኔ?” ያግስ።
2SA 6:10 ሄሳ ግሾ፥ እ ጎዳ ታቦትያ ባራ ዳዊታ ካታማ ኤሀናዉ ኮይቤና። ሄሳ አግድ ጋተ አድያ አብዳራ ሶ ኤፍስ።
2SA 6:11 ጎዳ ታቦተይ አብዳራ ሶን ሄꬑ አጌና ጋምእስ፤ ጎዳይ አብዳራነ እያ ሶ አሳ ኡባ አንጅስ።
2SA 6:12 ፆሳ ታቦትያ ግሾ ጎዳይ አብዳራ ሶ አሳነ እያዉ ደእያ ኡባ አንጅዳይሳ ካዎይ ዳዊቲ ስእስ። ሄሳ ግሾ፥ ዳዊቲ አብዳራ ሶ ብድ፥ ፆሳ ታቦትያ ዳዊታ ካታማ ኡፋይሳን ኤህስ።
2SA 6:13 ዳዊቲ ጎዳ ታቦትያ ቶክዳ አሳት ኡሱፑና ታንጎ ታንግዳ ዎደ ኤንታ ኤስድ፥ እስ ኮርማነ እስ አንቃራ ማር ያርሽስ።
2SA 6:14 ዳዊቲ ሊኖፐ ኦሰትዳ ኤፉደ ማእድ፥ ባዉ ደእያ ዎልቃ ኡባን ጎዳ ስንꬃን ዱርስ።
2SA 6:15 ዳዊቲነ እስራኤለ አሳ ኡባይ ኡፋይሳን እልልሸነ ሞይዘ ፑንሸ ጎዳ ታቦትያ ዳዊታ ካታማ ኤህዶሶና።
2SA 6:16 ጎዳ ታቦተይ ዳዊታ ካታማ ገልያ ዎደ ሳኦላ ናእያ መልኮላ ማስኮተራ ፄላዳ፥ ካዎይ ዳዊቲ ጎዳ ስንꬃን ጉፕሽንነ ዱርሽን በአዳ ባ ዎዛናን ካꬋሱ።
2SA 6:17 ዳዊቲ ጎዳ ታቦትያ ዎꬃናዉ ቶልዳ ዱንካንያ ግዶን ታቦትያ ዎꬅን፥ ዳዊቲ ፁሳ ያርሾነ እስፈተꬃ ያርሾ ጎዳስ ያርሽስ።
2SA 6:18 ዳዊቲ ፁሳ ያርሾነ እስፈተꬃ ያርሾ ያርሽዳፐ ጉየ ኡባፈ ዎልቃማ ጎዳ ሱንꬃን አሳ አንጅስ።
2SA 6:19 እስራኤለ አሳ ኡባስ፥ ማጫስ አደስ ሁጰን ሁጰን እስ እስ ኡይꬅ፥ እስ እስ ቃንፆ አሾነ እስ እስ ዎይነ ኑካ ግሽስ። ሄሳፈ ጉየ አሳ ኡባይ ባ ሶ ሶ ስምስ።
2SA 6:20 ዳዊቲ ባ ሶ አሳ አንጃናዉ ሶ ስምዳ ዎደ ሳኦላ ናእያ መልኮላ እያ ሞካናዉ ከያዳ፥ “ፓꬆና አሳት ካሎ ሄመተይሳዳ ሀች እስራኤለ ካዎይ ባ ማጫ አይለታ ስንꬃን ካሎትድ አይ መላ ቦንቸትደ!” ያጋሱ።
2SA 6:21 ዳዊቲ፥ “ነ አዋፐነ እያ ሶ አሳፐ አꬅድ ባ አሳ እስራኤለ ካለꬃና መላ ታና ዶርዳ ጎዳ ስንꬃን ዱራስ። ታኒ ጎዳ ቦንቾስ ዱርሳ አግከ።
2SA 6:22 ታኒ ሀይሳፈ አꬃዳ ቡሮ ታና ቶቻና፤ ታናተꬃ ዝቅ ኦꬃና። ሽን ኔኒ ግዳ ማጫ አይለታ ስንꬃን ታ ቦንቸታና” ያግስ።
2SA 6:23 ሳኦላ ናእያ መልኮላ ሀይቃና ጋካናዉ ናአ የላቡኩ።
2SA 7:1 ካዎይ ባ ጋꬎን ዎፑ ግድ ኡትዳፐነ ጎዳይ እያ ዩሹዋን ደእያ እያ ሞርከታፐ ሸምፕስዳፐ ጉየ፥
2SA 7:2 ናብያ ናታናኮ፥ “ታኒ ዝጋፐ ኬፀትዳ ኬꬃን ደአይስ፥ ሽን ፆሳ ታቦተይ ዱንካነን ደኤስ” ያግስ።
2SA 7:3 ናታን፥ “ኦꬃናዉ ነ ዎዛናን ቆፕዳባ ኡባ ኦꬃ፤ ጎዳይ ኔራ ደኤስ” ያግስ።
2SA 7:4 ሽን ሄ ቃማ ጎዳ ቃላይ ናታናኮ ይድ፥
2SA 7:5 “ባዳ ታ አይልያ ዳዊታ ሀይሳዳ ያጋ፤ ‘ታኒ ዳና ኬꬃ ኬፃናይ ነና ግዳካ።
2SA 7:6 ታኒ እስራኤለታ ግብፀ ቢታፈ ከስዳ ዎደፐ ዶማዳ ሀች ጋካናዉ ኬꬃን ደአብከ፤ ታኒ ዱንካነን ያነ ሃነ ዩያሸ ደአስ።
2SA 7:7 ታኒ እስራኤለ አሳራ ዩይዳ በሳ ኡባን ታ አስ እስራኤለ ሄማና መላ ታኒ ሹምዳ፥ “ታዉ ዝጋ ምꬃን አይስ ኬ ኬፃብኪ?” ጋዳ ኦይቻብከ’ ያግስ።
2SA 7:8 “ህዛ፥ ታ አይልያ ዳዊታስ ኦዳ፤ ‘ኡባፈ ዎልቃማ ጎዳይ ኔኮ ሀይሳዳ ያጌስ፤ ታኒ ነና ሄንꬃ በሳፈ፥ ዶርሰ ሄምያ ሶፐ ደንꬃዳ ታ አሳ እስራኤለ ካለꬃና መላ ኦꬃስ።
2SA 7:9 ኔኒ ብዳ በሳ ኡባን ታኒ ኔራ ግዳስ፤ ነ ሞርከታ ኡባ ነ ስንꬃፈ ꬋይሳስ። ሀእ ዛራዳ ታኒ ሀ ሳአን ኤረትዳ ግታ አሳታዳ ነ ሱንꬃ ግታያና።
2SA 7:10 ታኒ ታ አሳ እስራኤለስ በሰ እማዳ፥ ኤንታ ሄ በሳን ቶካና። ኤንቲ ባንታ በሳን ዳና፤ ናምአንꬆ ዳጋሞኮና። ካሰ ዳይናታ ዎደፐ ዶምድ ሀንዳይሳዳ ህዛፐ ጉየ ኤንታ ኢታ አስ ሃረና።
2SA 7:11 ታኒ ነና ነ ሞርከታ ኡባፈ ሸምፕሳና። “ ‘ሄሳ ቦላ ጉጅድ ጎዳይ ባ ሁጰን ታኒ ነዉ ኬ ኬፃና ያግድ ኦድስ።
2SA 7:12 ነ ባረይ ዉርን፥ ሀይቃዳ ነ ማይዛታ ነ ጋክያ ዎደ ነ ጉልባታፐ ከይዳ ናአ ታኒ ደንꬃና፤ እያ ካዎተꬃ ምንꬃና።
2SA 7:13 ታ ሱንꬃስ ኬ ኬፃናይ እያ፤ ታኒ እያ አራታ መርናዉ ምንꬃ ኤሳና።
2SA 7:14 ታኒ እያዉ አዋ ግዳና፤ እካ ታዉ ናአ ግዳና። እ ባልያ ዎደ ታኒ እያ አሳ ፃምአን፥ አስ ሾጭያ ልሶን ሴራና።
2SA 7:15 ሽን ታኒ ነ ስንꬃፈ ድግዳ ሳኦላፐ ታ ኬሀተꬃይ ኤከትዳይሳዳ እያፐ ኩምꬅ ኤከተና።
2SA 7:16 ነ ኮቻትነ ነ ካዎተꬃይ ታ ስንꬃን መርናዉ ዳና፤ ነ አራታይ መርናዉ ምንድ ኤቃና’ ” ያጋ።
2SA 7:17 ናታን ጎዳይ እያዉ ቆንጨꬃን በስዳ ቃላ ኡባ ዳዊታስ ኦድስ።
2SA 7:18 ሄሳፈ ጉየ፥ ካዎይ ዳዊቲ ግዶ ገልድ ጎዳ ስንꬃን ኡትድ ሀይሳዳ ያግድ ዎስስ። “አቤት ታ ጎዳ ፆሳዉ፥ ሀች ጋካናዉ ኔኒ ሀይሳ ኡባ ኦꬃናዉ ታ ኦኔ? ታ ሶ አሳይካ አይቤ?
2SA 7:19 አቤት ታ ጎዳዉ፥ ፆሳዉ፥ ሀይስ ነ አይፈ ስንꬃን ጉꬃ ዳንን፥ ስንꬃፈ ነ አይልያ ኮቻታስ ኦꬃናባ ኦዳዳሳ። ታ ጎዳ ፆሳዉ፥ ኔኒ አሳራ ኦደትያ ኦገይ ሀይሴ?
2SA 7:20 “ሀይሳፈ አꬍያባ ታኒ፥ ዳዊቲ አይ ጋናዉ ዳንዳእያና? ታ ጎዳ ፆሳዉ፥ ኔኒ ታና ነ አይልያ ኤራሳ።
2SA 7:21 ኔኒ ነ ቃላ ግሾ፥ ነ ዎዛና ቆፋዳ ሀ ግታባ ኦꬃዳ ታና ነ አይልያ በሳዳሳ።
2SA 7:22 “አቤት ታ ጎዳ ፆሳዉ፥ ኔኒ ግታ። ነ መል ባዋ፤ ኑኒ ኑ ሀይꬃን ስእዳይሳዳ ኔፐ አትሽን፥ ሀራ ፆሲ ባዋ።
2SA 7:23 ነ አሰ ኦꬃናዉ ግብፀፈ ዎዝዳ ነ አሳ እስራኤለ ዳንያ ሀራ ካዎተꬅ ሳአ ቦላ ባዋ። ኔኒ ኤንታዉ ኦꬅዳ ግታነ ማላልስያ ኦሶታ ጋሶን ነ ሱንꬃይ ቢታን ኤረትስ። ኔኒ ነ አሳ ስንꬃፈ ሀራ ካዎተꬃታነ ኤንታ ፆሳታ ጎዳ ከሳዳሳ።
2SA 7:24 ነ አሳ እስራኤለ መርናዉ ነባ ኦꬃዳሳ፤ ምንꬃዳሳ። አቤት ጎዳዉ፥ ነ ኤንታ ፆሳ ግዳዳሳ።
2SA 7:25 “አቤት ታ ጎዳዉ፥ ፆሳዉ፥ ኔኒ ነ አይልያስነ እያ ኬꬃስ ኦꬃና ጋዳ ገልዳ ቃላ መርናዉ ናጋ፤ ነ ቃላꬆ ኦꬃ።
2SA 7:26 ሄሳን ነ ሱንꬃይ መርናዉ ግታ ግዳና። አሳይ ነና፥ ‘ኡባፈ ዎልቃማ ጎዳይ እስራኤለ ፆሳ’ ያጋና። ነ አይልያ ዳዊታ ኮቻትካ ነ ስንꬃን ምንድ ኤቃና።
2SA 7:27 “አቤት ኡባፈ ዎልቃማ ጎዳዉ፥ እስራኤለ ፆሳዉ፥ ኔኒ፥ ‘ነ ኮቻት መርናዉ ካዎታና’ ያጋዳ ታዉ ነ አይልያስ ጫቃዳሳ። ሄሳ ግሾ፥ ታኒ ነ አይለይ ሀ ዎሳ ዎሳናዉ ፃላስ።
2SA 7:28 አቤት ታ ጎዳ ፆሳዉ፥ ኔኒ ፆሰ! ነ ቃላይ ቱማ፤ ኔኒ ሀ ሎኦባታ ኦꬃና ጋዳ ታዉ ነ አይልያስ ኦዳዳሳ።
2SA 7:29 ነ ስንꬃን መርናዉ ዳና መላ ነ አይልያ ኮቻ አንጃ። አቤት ታ ጎዳ ፆሳዉ ነ ግዳይሳዳ ነ አንጅኮ ነ አይልያ ኬꬃይ መርናዉ አንጀታና” ያግድ ዎስስ።
2SA 8:1 ሄሳፈ ጉየ፥ ካዎይ ዳዊቲ ፍልስፄመታ ፆንድ ሃርስ፤ ያትድ መተግ-አማ ካታማ ፍልስፄመታ ኩሸፐ ኤክስ።
2SA 8:2 ዳዊቲ ቃስ ሞአበታ ፆንስ። እ ኤንታ ቢታን ዝንእስድ ኩሸን ዋꬍስ፤ ኤንታፈ ናምኡ ኩሽያ ዎꬍድ፥ ሄꬓንꬆ ኩሽያ ፓፃ አግስ። ያትን ሞአበት ዳዊታስ ሃረትድ ጊርዶሶና።
2SA 8:3 ረሆባ ናአይ፥ ሱባ ካዎይ፥ አድራዛር ኤፍራፂሳ ሻፋ ማታን ደእያ ባ ዛዋ ዛራናዉ ብዳ ዎደ ዳዊቲ እያ ኦልድ ፆንስ።
2SA 8:4 ዳዊቲ እያ አሳፐ እስ ሙኩሉነ ላፑን ፄቱ ፓራ አሳታነ ላታሙ ሙኩሉ ቶሆ አሳታ ድእስ። ዳዊቲ ጋረታ ጎቻናዉ ፄቱ ፓራታ አሽድ ሀራ ፓራታ ኡባስ ጋድያ ግልዳይስ።
2SA 8:5 ዳማስቆን ደእያ ሶረ ኦላንቾት ሱባ ካዋ አድራዛራ ማዳናዉ ይዳ ዎደ ዳዊቲ ኤንታፈ ላታማነ ናምኡ ሙኩሉ አሳ ዎꬍስ።
2SA 8:6 ዳዊቲ ሶረ ካዎተꬃን፥ ዳማስቆን፥ ኦላንቾታስ ሚፃ መꬍስ። ያትን ሶረ አሳይ ዳዊታስ ሃረትድ ጊርዶሶና። ዳዊቲ ብዳ በሳ ኡባን ጎዳይ እያዉ ፆኖ እሚስ።
2SA 8:7 አድራዛራ ቶራ ሞጮናት ኦይክያ ዎርቃ ጎንዳልያ ዳዊቲ ኤክድ የሩሳላመ ኤህስ።
2SA 8:8 በፃሀነ በሮታ ጌተትያ አድራዛራ ካታማታፐ ካዎይ ዳዊቲ ዳሮ ናሰ ብራታ ኤክስ።
2SA 8:9 አድራዛራ ኦላንቾታ ኡባ ዳዊቲ ፆንዳይሳ ሀማታ ካዎይ ቶእ ስእስ።
2SA 8:10 ዳዊቲ አድራዛራ ኦልድ ፆንዳ ዎደ ሀዳድዘር ቶአራራ ኦለትሸ ጋምእዳ ግሾ እያ ሀሹ ጋናዉነ ሳሮꬃናዉ ባ ናኣ ዮራማ ዳዊታኮ ኪትስ። ዮራም ዎርቃፈ፥ ብራፐነ ናሰ ብራታፐ ኦሰትዳ እሞታታ ዳዊታስ ኤህስ።
2SA 8:11 ካዎይ ዳዊቲ ካሰ ጊርስያ ካዎተꬃታ ኡባፈ ኤክዳ ዎርቃነ ብራ ኦꬅዳይሳዳ ሀ እሞታታካ ጎዳስ ዱማይስ።
2SA 8:12 እ ፆንዳ ካዎተꬃት ኤዶመ፥ ሞአበ፥ አሞነ፥ ፍልስፄመነ አማለቃ። ሄሳዳካ ረሆባ ናኣ፥ ሱባ ካዋ አድራዛራ ኤክዳ ዲኡዋ ጎዳስ ዱማይስ።
2SA 8:13 ማፅነ ዛንጋራን ታማነ ሆስፑን ሙኩሉ ኤዶመ አሳታ ዳዊቲ ዎꬍድ ስምዳፐ ጉየ እያ ሱንꬃይ ከይስ።
2SA 8:14 ዳዊቲ ኤዶመ ቢታን ኦላንቾታ ሚፃ መꬍስ፤ ሄ ቢታይ ዳዊታስ ሃረትስ። ዳዊቲ ብዳ በሳ ኡባን ጎዳይ እያዉ ፆኖ እሚስ።
2SA 8:15 ዳዊቲ እስራኤለ ኡባ ቦላ ካዎትስ፤ ባ አሳ ኡባ ፅሎተꬃንነ ሱረ ፕርዳን አይስስ።
2SA 8:16 ፃሩያ ናአይ እዮኣብ ቶራ ሞጮና ግድሽን፥ አህሉዳ ናአይ እዮሳፈፅ ታርከ ፃፈ።
2SA 8:17 አህፁባ ናአይ ሳዶቅነ አብያታራ ናአይ አብመለከ ካህነ ግድሽን፥ ሳራይ ቃስ ፃፈ።
2SA 8:18 ዮዳሄ ናአይ ባናያስ ካዋ ናገይሳታ ሀላቃ ግድሽን፥ ዳዊታ አደ ናይት ካዋ ዞረይሳታ።
2SA 9:1 ዳዊቲ፥ “ዮናታና ግሾ ታኒ እያዉ ኬሀተꬅ ኦꬃናዉ ሳኦላ ኬꬃፈ አትዳ አስ ደእሻ?” ያግድ ኦይችስ።
2SA 9:2 ሄ ዎደ ሲባ ጌተትያ እስ አይለይ ሳኦላ ሶን ደኤስ። እ ዳዊታ ስን ያና መላ ፄግን፥ ካዎይ፥ “ኔኒ ሲቤ?” ያግድ ኦይችስ። ሲብ፥ “ኤ፥ ታኒ ነ አይልያ ሲባ” ያግስ።
2SA 9:3 ካዎይ፥ “ፆሳ ኬሀተꬅ ታኒ በሳና መላ ሳኦላ ኬꬃፈ አትዳ አስ ባዌ?” ያግስ። ሲብ፥ “ናምኡ ቶሆይ ስልዳ ዮናታና ናይታፐ እሶይ ሀኖ ጋካናዉ ፓፃ ደኤስ” ያግስ።
2SA 9:4 ካዎይ፥ “እ አዉን ደኢ?” ያግስ። ሲብ፥ “ሎዶባራ ጌተትያ በሳን አምኤላ ናኣ ማክራ ሶን ደኤስ” ያግስ።
2SA 9:5 ካዎይ ዳዊቲ ሎዶባራፐ አምኤላ ናኣ ማክራ ሶፐ መምፕቦስተ ኤህስስ።
2SA 9:6 ሳኦላ ናኣ ዮናታና ናአይ መምፕቦስተይ ዳዊታኮ ይድ፥ ዳዊታ ስንꬃን ዝግድ ቦንችስ። ዳዊቲ፥ “መምፕቦስተ” ያግድ ፄግስ። እ፥ “አበ ታ ጎዳዉ፥ ታ ነ አይልያ” ያግስ።
2SA 9:7 ዳዊቲ፥ “ያዮፋ፤ ነ አዋ ዮናታና ግሾ ታኒ ነዉ ኬሀና። ነ አዋ አዋ ሳኦላ ጋድያ ኡባ ታኒ ነዉ ዛራና፤ ቃስ ኔኒ ኡባ ዎደ ታ ጋይታፐ ማና” ያግስ።
2SA 9:8 መምፕቦስተይ ዝግድ፥ “ሀይቅዳ ካና ዳንያ ታና ኔኒ ዉዳዳ ፄላናዉ ነ አይለይ ታኒ ኦኔ?” ያግስ።
2SA 9:9 ካዎይ ሳኦላ አይልያ ሲባ ፄግድ፥ “ሳኦላባነ እያ ሶ አሳባ ግድዳባ ኡባ ታኒ ነ ጎዳ ናኣ ናኣስ እማስ።
2SA 9:10 ነ ጎዳ ናኣ ናአይ ማና መላ ኔኒ፥ ነ ናይትነ ነ አይለት እያ ጋድያ ጎይድ፥ ካፅዳ ካꬃ እያዉ ኤህተ። ግዶሽን፥ ነ ጎዳ ናኣ ናአይ መምፕቦስተይ ኡባ ዎደ ታ ጋይታፐ ማና” ያግስ። ሲባስ ታማነ እቻሹ አደ ናይትነ ላታሙ አይለት ደኦሶና።
2SA 9:11 ሲብ፥ “ኔኒ ታ ጎዳይ፥ ካዎይ ነ አይልያ ኪትዳ ኡባ ታኒ ነ አይለይ ኦꬃና” ያግስ። ሄሳ ግሾ፥ መምፕቦስተይ ካዋ ናይታፐ እሱዋ መላ ካዎ ጋይታፐ ሜስ።
2SA 9:12 መምፕቦስተስ ምካ ጌተትያ ጉꬃ ናእ ደኤስ። ሲባ ሶን ደእያ አሳ ኡባይ መምፕቦስተስ አይለ ግድዶሶና።
2SA 9:13 ናምኡ ቶሆት ስልዳ መምፕቦስተይ ኡባ ዎደ ካዋ ጋይታፐ ምሸ የሩሳላመን ደእስ።
2SA 10:1 ሄሳፈ ጉየ፥ አሞነታ ካዎይ ሀይቅን እያ ናአይ ሀኑኒ እያ በሳን ካዎትስ።
2SA 10:2 ዳዊቲ፥ “እያ አዋይ ታዉ ኬህዳይሳዳ ናኦሳ ናኣ ሀኑናስ ታካ ኬሀና” ያግስ። ሄሳ ግሾ፥ እያ ምንꬃናዉ ዳዊቲ አሰ እያኮ ኪትስ። ዳዊቲ ኪትዳ አሳይ አሞነ ቢታ ጋክዳ ዎደ፥
2SA 10:3 አሞነ ሀላቃት ባንታ ጎዳ ሀኑናኮ፥ “ዳዊቲ ሀ አሳ ኪትዳይ ነ አዋ ቦንችድ ነና ምንꬃናዉ ኮይዳ ግሾ ዳኒ? እ አሰ ኪትዳይ ሀ ካታማ ዎች በእድ ኦላናሳ” ያግዶሶና።
2SA 10:4 ሀኑኒ ዳዊቲ ኪትዳ አሳታ ኦይክድ፥ ኤንታ ቡቻፈ ባጋ ሜድስ፤ ኤንታ ማኡዋ ጋርሳፈ ዱለ ጋካናዉ ቃንፅድ ኤንታ የድስ።
2SA 10:5 ዳዊቲ ሄሳ ስእድ፥ ኤንቲ ዬላትዳ ግሾ፥ “ህንተ ቡቻይ ድጫና ጋካናዉ እያርኮን ደእሽተ፤ ሄሳፈ ጉየ ሃ ዪተ” ያግድ አሰ ኪትስ።
2SA 10:6 አሞነት ዳዊቲ ኤንታ ሞርክዳይሳ ኤርዳ ዎደ ቤት-ረሆባነ ሱባን ደእያ አራመ አሳፐ ላታሙ ሙኩሉ ቶሆ ኦላንቾታ፥ ፆባፐ ታማነ ናምኡ ሙኩሉ አሳታነ ማካ ካዉዋፐ እስ ሙኩሉ አሳታ ሻምዶሶና።
2SA 10:7 ዳዊቲ ሄሳ ስእዳ ዎደ እዮኣባ ኩመꬃ ኦላንቾታራ ኤንታ ቦላ የድስ።
2SA 10:8 አሞነት ከይድ፥ ካታማ ፐንግያን ኦላስ ሳልፕዶሶና፤ ሱባፈነ ረሆባፐ ይዳ አራመ አሳት፥ ፆባ አሳትነ ማካ አሳት ደንባን ዱማ ሳልፕዶሶና።
2SA 10:9 እዮኣብ ባና ኦል ስንꬃራነ ጉየራ ተቅዳይሳ በእድ፥ እስራኤለ ኦላንቾታፐ ምኖታ ዶርድ ሶረ አሳታ ስንꬃን ኤስስ።
2SA 10:10 አትዳ አሳታ ባ እሻ አብስ ኪታና መላ ኦꬅድ አሞነታ ስንꬃን ሳልፕስስ።
2SA 10:11 እዮኣብ አብሳኮ፥ “ሶረ አሳት ታ ቦላ ዎልቃምኮ ነ ያዳ ታና ማዳ፤ አሞነ አሳት ነ ቦላ ዎልቃምኮ ታ ባዳ ነና ማዳና።
2SA 10:12 ህዛ ምና! ኑ አሳ ግሾነ ኑ ፆሳ ካታማታ ግሾ፥ አነ ምን ኦለቶስ። ጎዳይ ባና ሎእያባ ኦꬆ” ያግስ።
2SA 10:13 እዮኣብነ እያራ ደእያ ኦላንቾት ሶረ አሳታ ኦላናዉ ከይዶሶና፤ ሶረ አሳት እያ ስንꬃፈ ባቃትዶሶና።
2SA 10:14 ሶረ አሳት ባቃትዳይሳ አሞነ አሳት በእዳ ዎደ ኤንትካ አብሳ ስንꬃፈ ባቃትድ፥ ካታማ ገልዶሶና። እዮኣብ አሞነታ ኦለይሳ አግድ፥ የሩሳላመ ስምስ።
2SA 10:15 ሶረ አሳት እስራኤለ አሳይ ኤንታ ፆንዳይሳ ኤርዳ ዎደ ባንታ ኦላንቾታ ኡባ ሺሽዶሶና።
2SA 10:16 ካዎይ ሀዳድዘር ሶረ አሳታ ኤፍራፂሳ ሻፋ ሄፍንꬃፈ ኪትድ ኤህስን፥ ኤላማ ብዶሶና። አድራዛራ ቶራ ሞጮናይ ሾባክ ኤንታ ካለꬄስ።
2SA 10:17 ዳዊቲ ሄሳ ስእዳ ዎደ፥ እስራኤለ ኦላንቾታ ሺሽድ፥ ዮርዳኖሰ ሻፋ ፕንድ ኤላማ ጋክስ። ሶረ አሳት በሰ ኦይክድ፥ ጊግድ፥ ዳዊታራ ኦለትዶሶና።
2SA 10:18 ሽን ሶረ አሳት እስራኤለታ ስንꬃፈ ባቃትዶሶና። ዳዊቲይ ሶረ ኦላንቾታፐ ፓራ ጋረ ላግያ ላፑን ፄቱ አሳታነ ኦይታሙ ሙኩሉ ቶሆ ኦላንቾታ ዎꬍስ። ኤንታ ቶራ ሞጮና ሾባክካ ሄ በሳን ሾጨትድ ሀይቅስ።
2SA 10:19 አድራዛራስ ሃረትድ ደእያ ካዎት እስራኤለት ኤንታ ፆንዳይሳ ኤርዳ ዎደ እስራኤለታራ ስገትድ፥ ኤንታዉ ሃረትዶሶና። ሄሳፈ ስምን፥ ሶረ አሳት አሞነ አሳታ ማዳናዉ ያይዶሶና።
2SA 11:1 ላይꬃ ላመን ካዎት ኦላስ ከይያ ዎደ ዳዊቲ ባ አሳራነ እስራኤለ ኦላንቾታራ እስፈ እዮኣባ ኦላስ የድስ። ኤንቲ አሞነ ኦልድ፥ ራባ ካታማ ተቅዶሶና። ሽን ዳዊቲ የሩሳላመን አትስ።
2SA 11:2 እስ ጋላስ ኦማርስ ዳዊቲ ባ ሂፃፐ ደንድድ፥ ኬꬃ ቦላ ደእያ በሳ ከይድ ሄመትሸ ቦላ ሜጨትያ እስ ማጫስ በእስ፤ ሄ ማጫስያ ዳሮ ማላ ሎኦ።
2SA 11:3 ዳዊቲ እያ ኦነኮ ኤራናዉ ኮይድ አሰ ኪትስ። ኪተትዳ አደይ፥ “እያ ኤልያባ ናእዉ፥ ህተ አድያ ኦርዮና ማችዉ በርሳቦ” ያግስ።
2SA 11:4 ዳዊቲ አሰ ኪትድ፥ እዮ ኤህስስ፤ ኢራ አቅስ። ሄ ዎደ እያ ኩሸ መቶይ አꬍን፥ ጌያዳ ደአዉሱ። እያ ባ ሶ ስማዳ ባሱ።
2SA 11:5 ጉየፐ እያ ቃንꬃትዳይሳ ኤርዳ ዎደ ዳዊታኮ፥ “ነዉ ቃንꬃታስ” ያጋሱ።
2SA 11:6 ዳዊቲ፥ “ህተ አድያ ኦርዮና ሃ የዳ” ያግድ እዮኣባኮ ኪትስ። እዮኣብ ኦርዮና ዳዊታኮ የድስ።
2SA 11:7 ኦርዮን ይን ዳዊቲ፥ “እዮኣብ አይ መሌ? ኦላንቾት አይ መሌ? ኦላይ ዋኒ?” ያግድ ኦይችስ።
2SA 11:8 ዳዊቲ ኦርዮናኮ፥ “ሶ ባዳ ሸምፓ” ያግን፥ ኦርዮን ካዎ ጋꬎፐ ከይድ ብስ። ካዎይ ኦርዮና ጉየራ ካꬅ የድስ።
2SA 11:9 ሽን ኦርዮን ሶ ቦና ካዎ ጋꬎ ድርሳ ፐንግያን ባ ጎዳ አይለታራ አቅስ።
2SA 11:10 ኦርዮን ባ ሶ ቦናይሳ ዳዊቲ ስእድ፥ “ኔኒ ሃሆሶፐ ያዳሳ ግድኪ? ነ ሶ አይስ ባብኪ?” ያግድ ኦይችስ።
2SA 11:11 ኦርዮን ዳዊታኮ፥ “ታቦተይ፥ እስራኤለ አሳይ፥ ይሁዳ አሳይ፥ ታ ሀላቃይ እዮኣብነ ካዋ አሳይ ደንባን ዱንካነን ደኦሶና። ያትን ታ ዋናዳ ሶ ባዳ ሞ፥ ኡዮ፥ ቃስ ታ ማቸራ ዋናዳ አቆ? ነ ሸምፖይ ኤሮ! ታኒ ሀይሳ መላባ ኦꬅከ” ያግድ ዛርስ።
2SA 11:12 ዳዊቲ፥ “እስ ጋላስ ሀይሳን ጋምአ፤ ዎንቶ ነና ጉየ የዳና” ያግስ። ኦርዮን ሄ ጋላስነ ዎንተꬃ ጋላስ የሩሳላመን ጋምእስ።
2SA 11:13 ዳዊቲ ሾቢን ኦርዮን እያራ ምስ፤ እ ማꬆታና ጋካናዉ ዳዊቲ እያ ኡሽስ። ሽን ሄ ዎደ ኦማርስ ኦርዮን ባ ሶ ቦና፥ ባ ሂፃ ሂፅድ ባ ጎዳ አይለታራ አቅስ።
2SA 11:14 ዎንተ ዳዊቲ እዮኣባስ ዳብዳበ ፃፍድ፥ ኦርዮና ቦላ የድስ።
2SA 11:15 ዳዊቲ ባ ዳብዳብያን፥ “ኦርዮና ኦላይ ጎብያ በሳን ስንꬃ ባጋ አꬃ። እ ሾጨትድ ሀይቃና መላ እያ ማታፐ ሃክተ” ያግስ።
2SA 11:16 እዮኣብ ሄ ካታማ ተቅዳ ዎደ እ ኤርያ ምኖ ሞርከ ኦላንቾት ደእያ በሳን ኦርዮና ኤስስ።
2SA 11:17 ካታማ አሳት ከይድ እዮኣባራ ኦለትዶሶና። ዳዊታ ኦላንቾታፐ ጉꬃ አሳት ሀይቅዶሶና፤ ኦርዮን ህተ አደይካ ሀይቅስ።
2SA 11:18 እዮኣብ ኦላን ሀንዳባ ኡባ ዳዊታስ ኪትስ።
2SA 11:19 እዮኣብ ኪተትድ ብያ አድያኮ፥ “ኦላን ሀንዳባ ነ ካዋስ ኦዳ ዉርስዳ ዎደ፥
2SA 11:20 ካዎይ ሸነትድ፥ ‘ህንተ ኤንታራ ኦለታናዉ ካታማኮ አይስ ሺቅደቲ? ኤንቲ ግምብያ ቦላ ኤቅድ ዶንገን ዱካናይሳ ኤረከቲ?
2SA 11:21 ገድዮና ናአይ አብመለከይ ዋንድ ሀይቅዳኮ አኬከከቲ? ማይደ ግምብያ ቦላራ ዱገ ሆላዳ ተበሳ ጌተትያ በሳን ዎꬍዳይ እስ ማጫስ ግደኬ? ያትን፥ ህንተ ግምብያኮ አይስ ሺቅደቲ?’ ያግድ ኦይችኮ፥ ኔኒ፥ ‘ነ አይለይ፥ ህተ አደይ ኦርዮንካ ሀይቅስ’ ” ያጋ።
2SA 11:22 ኪተትዳይስ ብድ እዮኣብ ኪትዳባ ኡባ ዳዊታስ ኦድስ።
2SA 11:23 አደይ፥ “ኑ ሞርከት ኑፐ ዎልቃምዶሶና፤ ኑራ ኦለታናዉ ካታማ ጋፃን ደእያ ደምባ በሳ ከይዶሶና። ሽን ኑ ኤንታ ካታማ ፐንግያ ጋካናዉ ጉየ ዛሪድ የደꬅዳ።
2SA 11:24 ሄሳፈ ጉየ፥ ዶንገን ዱከይሳት ግምብያ ቦላ ግድድ ነ አይለታ ዶንገን ዱክዶሶና። ካዋዉ፥ ነ አሳታፐ ጉꬃት ሀይቅዶሶና፤ ነ አይለይ፥ ህተ አደይ ኦርዮንካ ሀይቅስ” ያግስ።
2SA 11:25 ዳዊቲ ኪተትዳይሳኮ፥ “ኔኒ እዮኣባኮ ሀይሳዳ ያጋ፤ ‘ቶሪ ገደካ ሃካ ምያ ግሾ ሀይሳስ አዛኖፓ፤ ካታማ ኦላዳ ኦይካናዉ ምና’ ያጋዳ እያ ምንꬃ” ያግስ።
2SA 11:26 ኦርዮና ማችያ ባ አዝናይ ሀይቅዳይሳ ስእዳ ዎደ እያዉ ዬካሱ።
2SA 11:27 እያ ካዮ ዎꬃ ስምን፥ ዳዊቲ ኪትድ እዮ ባ ሶ ኤህስ። እያ እያዉ ማቾ ግዳዳ አደ ናአ የላሱ። ሽን ዳዊቲ ኦꬅዳ ኦሶይ ኢታ ግድያ ግሾ ጎዳይ ኡፋይትቤና።
2SA 12:1 ጎዳይ ናብያ ናታና ዳዊታኮ ኪትን፥ ናታን እያኮ ይድ፥ “እስ ካታማን ናምኡ አሳት ደኦሶና፤ ኤንታፈ እሶይ ዱረ፤ ቃስ ሀንኮይ ማንቆ።
2SA 12:2 ዱረ አድያስ ዳሮ ዶርስነ መሄይ ደኤስ።
2SA 12:3 ሽን ማንቆ አድያስ ሻምድ ሄምያ እስ ዶርሳ ማሬፐ አትሽን፥ ሀር ባዋ። ሄ ዶርስያ እያ ሶን እያ ናይታራ እስፈ ድጫሱ። እ ባ ምያ ካꬃፈ ሙዜስ፤ ባ ኡያ ኡሻፈ ኡሼስ፤ እያ እያ ክኦነ ዝንአዉሱ። ሄ ዶርስያ እያዉ ማጫ ናአ መላ።
2SA 12:4 “እስ ጋላስ እስ እማꬅ ዱርያ ሶ ይስ። ዱረይ ባ ዶርሳፈ ዎይኮ ባ መሄፐ ሹክድ፥ እማ ሞካናዉ ኮይቤና። ሽን እ ሄ ማንቆ አድያ ዶርስዉ ኤክድ፥ ሄ እማꬃስ ምያባ ጊግስስ” ያግስ።
2SA 12:5 ዳዊቲ ሄ ዱረ አድያ ቦላ ሸነ ኤፅድ፥ “ደኦ ጎዳይ ኤርያ መላ፥ ሀይሳ ኦꬅዳ አደይ ሀይቃናዉ በሴስ።
2SA 12:6 ቃስ ቃይ ባይና እ ሄሳ ኦꬅዳ ግሾ፥ ሄ ዶርሳ ማረ ግሾ ኦይዱ ኩሸ ዛራናዉ ኮሼስ” ያግስ።
2SA 12:7 ናታን ዳዊታኮ፥ “ሄ አደይ ነና! ጎዳይ እስራኤለ ፆሳይ ሀይሳዳ ያጌስ፤ ‘ታኒ ነና እስራኤለ ቦላ ትያዳ ካዎꬃስ፤ ሳኦላ ኩሽያፐ ነና አሻስ።
2SA 12:8 ታኒ ነ ጎዳ፥ ሳኦላ ኬꬃ ነዉ እማስ፤ ነ ጎዳ ማቸታ ነ ክኦን የጋስ። እስራኤለ አሳነ ይሁዳ አሳ ታኒ ነዉ እማስ። ሀ ኡባይ ጉፅስ ጊኮ፥ ታኒ ነዉ ሀራ ጉጃ እማናሽን።
2SA 12:9 ሀይሳ መላ ኢታባ ጎዳ ስንꬃን ኦꬃዳ፥ አይስ ጎዳ ቃላ ካꬋዲ? ህተ አድያ ኦርዮና ማሻን ዎꬋዳሳ፤ እያ ማችዉ ነው ኤካዳሳ። አሞነ አሳታ ማሻን እያ ዎꬋዳሳ።
2SA 12:10 ኔኒ ታና ካꬋዳ፥ ህተ አድያ ኦርዮና ማችዉ ኤክዳ ግሾ ነ ሶ አሳፐ ማሽ ሻከተና’ ” ያጌስ።
2SA 12:11 ጎዳይ ሀይሳዳ ያጌስ፤ “ታኒ ነ ሶ አሳ ግዶፈ ነ ቦላ ኢታ ኤሀና፤ ነ ማቸታ ኔኒ ፄልሽን ደንꬃዳ፥ ነዉ ማትያ አድያስ እማና፤ ሴታ ጋላስ ሄ አደይ ነ ማቸታራ ዝንአና።
2SA 12:12 ኔኒ ሄሳ ጌማን ኦꬃዳሳ፤ ሽን ታኒ ሴታ ጋላስ እስራኤለ አሳ ኡባ ስንꬃን ኦꬃና” ያግስ።
2SA 12:13 ያትን፥ ዳዊቲ፥ “ታኒ ጎዳ ቦላ ናጋራ ኦꬃስ” ያግስ። ናታን፥ “ጎዳይ ነ ናጋራ አቶ ግስ፤ ኔኒ ሀይቃካ።
2SA 12:14 ሽን ነ ሀይሳ ኦꬃዳ፥ ጎዳ ሞርከት እያ ካꬋና መላ ኦꬅዳ ግሾ የለትዳ ናአይ ቱማ ሀይቃና” ያግስ።
2SA 12:15 ናታን ባ ሶ ብዳፐ ጉየ፥ ኦርዮና ማችያ ዳዊታስ የልዳ ናኣ ጎዳይ ሾጭን እ ሀርግስ።
2SA 12:16 ዳዊቲ ባ ናኣ ግሾ ፆሳ ዎስስ፤ ዳዊቲ ፆምስ፤ ባ ክፍልያ ገልድ ቃማ ቃማ ሳአን ዝንእ አቄስ።
2SA 12:17 እያ ሶ ጭማት እያ ሳአፐ ደንዳና መላ እያ ማታን ኤቅድ ዎስዶሶና፤ ሽን እ ደንዶና እፅስ፤ እ ኤንታራ ካꬅ ምቤና።
2SA 12:18 ላፑንꬃ ጋላስ ናአይ ሀይቅስ። ዳዊታ አይለት ናኣ ሀይቁዋ ኦዳናዉ ያይድ፥ “ናአይ ፓፃ ደእሽን ኑኒ ዳዊታስ ኦድን፥ ስኦና እፅስ። ያትን፥ ናአይ ሀይቅዳይሳ ኑኒ ዋትድ እያዉ ኦዳኔ? ኦን ኤር፥ እ ባና ቆሀነኮሺ?” ያግዶሶና።
2SA 12:19 ባ አይለት እሶይ እሱዋራ ካልካሸይሳ ዳዊቲ ስእዳ ዎደ ናአይ ሀይቅዳይሳ ኤርስ። ዳዊቲ፥ “ናአይ ሀይቅዴ?” ያግድ ኦይችስ። ኤንቲ፥ “ኤ ሀይቅስ” ያግዶሶና።
2SA 12:20 ያትን፥ ዳዊቲ ሳአፐ ደንድድ ሜጨትስ፤ ቅባተ ትየትስ፤ ባ ማኡዋ ላምድ፥ ጎዳ ኬꬅ ገልድ ጎይንስ። ሄሳፈ ጉየ ባ ሶ ብድ፥ ካꬅ ኦይችን፥ ኤንቲ እያ ስን አꬅን ምስ።
2SA 12:21 እያ አይለት፥ “ኔኒ ሀይሳዳ አይስ ሀናዲ? ናአይ ፓፃ ደእሽን ፆማዳሳነ ዬካዳሳ፤ ሽን ናአይ ሀይቅን ደንዳዳ፥ ካꬅ ማዳሳ” ያግዶሶና።
2SA 12:22 ዳዊቲ፥ “ናአይ ፓፃ ደእሽን ታኒ ፆማስነ ዬካስ፤ ጎዳይ ታና ማርን፥ ናአይ ፓፃነኮነ” ጋዳ ቆፓስ።
2SA 12:23 ሽን፥ “ናአይ ሀይቅን፥ ታኒ አይስ ፆሞ? ታኒ ናኣ ጉየ ዛራናዉ ዳንዳእያና? ታኒ እያኮ ባናፐ አትን፥ እ ታኮ ዬና” ያግስ።
2SA 12:24 ሄሳፈ ጉየ፥ ዳዊቲ ባ ማችዉ በርሳቦ ምንꬅስ። ዳዊቲ ኢኮ ገልድ ኢራ አቅስ፤ እያ እያዉ አደ ናአ የላሱ። ናኣ ሶሎሞነ ግድ ሱንꬅስ፤ ጎዳይ ሄ ናኣ ዶስስ።
2SA 12:25 ጎዳይ ናኣ ዶስዳ ግሾ፥ እያ ሱንꬃ “ይድድያ” ግድ ሱንꬃና መላ ናብያ ናታና ኪትስ።
2SA 12:26 ሄ ዎደ እዮኣብ አሞነታ ካታማ ራባ ኦልድ ካዎ ሚፃ ኦይክስ።
2SA 12:27 እዮኣብ ዳዊታኮ፥ “ታኒ ራባ ካታማ ኦላዳ፥ ሃ ዱቅያ በሳ ኦይካስ።
2SA 12:28 ሀእ አትዳ ኦላንቾታ ሺሻዳ ካታማ ኦላዳ ኦይካ። ሄስ ሀኖና እፅኮ፥ ታኒ ካታማ ኦይካዳ ታ ሱንꬃን ፄገታና መላ ኦꬃና” ያግስ።
2SA 12:29 ዳዊቲ ባ ኦላንቾታ ኡባ ሺሽድ፥ ራባ ካታማ ብድ፥ ኦልድ ኦይክስ።
2SA 12:30 ኤንታ ካዋ ካላቻ እያ ሁጰፐ ኤክስ። ሄ ዎርቃ ካላቻይ ሀስታማነ እቻሹ ክሎ ግራመ ዴፄስ። እያ ግዶን እንቆ ጌተትያ አልኦ ሹች ደኤስ። ሄ ካላቻ ዳዊቲ ባ ሁጰን ዎꬅስ። ዳዊቲ ካታማፐ ዳሮ ድኦ ድእስ።
2SA 12:31 ሄ ካታማን ደእያ አሳ ከስድ፥ ማጋዘን፥ ብራታ ኮንተንነ ብራታ ካልታን ኦꬃና መላ ኦꬅስ። ቃስ ኤንቲ ፁበ መꬋና መላ ኦꬅስ። አሞነ ካታማ ኡባን ደእያ አሳ እ ሀይሳዳ ኦꬅስ። ሄሳፈ ጉየ፥ ዳዊቲነ እያ ኦላንቾት የሩሳላመ ስምዶሶና።
2SA 13:1 እስ ዎደ ሀይሳዳ ሀንስ። ዳዊታ ናኣ አበሰሎመስ ትማሮ ጌተትያ እስ ማላ ሎኦ ምቻ ደአዉሱ። ዳዊታ ናአይ አምኖን ትማሮ ዶስስ።
2SA 13:2 አምኖን ባ ምችዉ ትማሮ ዶስዳ ግሾ እዮ ቆፕሸ ዳሮ ግልቅስ። እያ ጌላኦ ግድዳ ግሾ እዮ አይኮካ ኦꬃናዉ ዳንዳኤቶናባ እያዉ ዳንስ።
2SA 13:3 ሽን አምኖናስ ዳዊታ እሻ ሳማ ናኣ እዮናዳባ ጌተትያ ላገይ ደኤስ፤ እዮናዳብ ዳሮ ኤጫ አስ።
2SA 13:4 እዮናዳብ፥ “ኔኒ ካዎ ናአ ግዳሸ ዎንታ ዎንታ አይስ ግልቃይ? ኔኒ ታዉ አይስ ኦድኪ?” ያግድ አምኖና ኦይችስ። አምኖን፥ “ታ እሻ አበሰሎመ ምችዉ ትማሮ ታኒ ዶሳስ” ያግስ።
2SA 13:5 እዮናዳብ፥ “ሀርገትያ አሳዳ ሀናዳ ሂፃን ዝንአ። ነ አዋይ ነና በአናዉ ያ ዎደ፥ ‘ታ ምችያ ትማራ ያዳ ታዉ ምያባ እሞ፤ ታኒ እዮ በእሽን ታ ስንꬃን ካꬃዳ ታና ባርሶ’ ያጋዳ ኦይቻ” ያግስ።
2SA 13:6 አምኖን ሀርገትዳ አሳዳ ሀንድ ሂፃን ዝንእስ። ካዎይ እያ በአናዉ ያ ዎደ አምኖን፥ “ታ ምችያ ትማራ ያዳ፥ ታ በእሽን ታ ስንꬃን ኡይꬅ ኡካዳ ታና ባ ኩሸራ ባርሶ” ያግስ።
2SA 13:7 ዳዊቲ፥ ካዎ ጋꬎን ደእያ ትማርኮ ኪትድ፥ “ነ እሻ አምኖና ሶ ባዳ እያዉ ካꬅ ካꬃ” ያግስ።
2SA 13:8 ትማራ ባ እሻ አምኖና ሶ ባሱ፤ ሄ ዎደ እ ሂፃን ዝንእስ። ትማራ ጉꬃ ꬊለ ሙኑቃዳ አምኖን በእሽን ኡይꬅ ኡካሱ።
2SA 13:9 ትማራ ኡይꬃ ባሸፐ ከሳዳ እያዉ አꬃሱ፤ ሽን እ ሞና እፅስ። አምኖን፥ “አሳ ኡባ ካረ ከስተ” ያግን፥ አሳ ኡባይ እያ ማታፐ ከይስ።
2SA 13:10 ሄሳፈ ጉየ አምኖን፥ “ታኒ ነ ኩሸፐ ማና መላ ካꬃ ሃ ቆልአ ኤካዳ ያ” ያግስ። ትማራ ባ ኡክዳ ኡይꬃ ኤካዳ፥ ባ እሻ አምኖና ስን ሺሻሱ።
2SA 13:11 ትማራ ካꬃ እያኮ ሺሽያ ዎደ እዮ ኦይክድ፥ “ታ ምቸ፥ ሃያ! ታራ ዝንአ” ያግስ።
2SA 13:12 እያ፥ “ታ እሻዉ፥ አካይ ሀነና! ታና ዎልቃንꬆፋ! ሀይሳ መላባይ እስራኤለን ሀን ኤረና፤ ሀይሳ መላ ቦርሶባ ኦꬆፋ።
2SA 13:13 ታ ፖኩዋ ታኒ ዋታዳ ገንꬃናዉ ዳንዳእያና? ቃስ ነካ እስራኤለ ግዶን ካዉሻ አስ ግዳና። ሀያና ካዋ ኦይቻ፤ ታኒ ነና ገላናይሳ እ ድገና” ያጋሱ።
2SA 13:14 ሽን እ እዮ ስኦና እፅስ። እ ዎልቃማ ግድያ ግሾ፥ እዮ ዎልቃን ኦይክድ ኢስስ።
2SA 13:15 ሄሳፈ ጉየ፥ አምኖን እዮ ዳሮ እፅስ፤ ካሰ እዮ ዶስዳይሳፈ አꬅድ እፅስ። አምኖን፥ ደንዳ፥ “ከያ! ከያዳ ባ!” ያግስ።
2SA 13:16 እያ፥ “ኔኒ ታና ከያዳ ባ ገይስ ካሰ ነ ታ ቦላ ኦꬅዳ ኢታፐ አꬌስ” ያጋሱ። ሽን እ እዮ ስኦና እፅስ።
2SA 13:17 አምኖን ባ አይልያ ፄግድ፥ “ሀ ማጫስዉ ታ ስንꬃፈ ከሳ፤ እዮ ካረ ከሳዳ ዉላ ጎርዳ” ያግስ።
2SA 13:18 አይለይ እዮ ካረ ከስድ ዉላ ጎርድስ። ጌላኦ ግድዳ ካዎ ማጫ ናይት ማእያ አሌቆ ማኦ ማአሱ።
2SA 13:19 ትማራ ብዶ ባ ሁጰን ቆላዳ፥ ባ ማእዳ አሌቆ ማኡዋ ዳካዳ፤ ባ ሁጵያ ኦይካዳ፥ ዋሶ ጎቻሸ ባሱ።
2SA 13:20 እ እሻ አበሰሎመይ እዮ በእዳ ዎደ፥ “ነ እሻይ አምኖን ነና ኢስዴ? ታ ምቸ፥ ኔኒ ሀእ ስእ ጋ። እ ነ እሻ፤ ሀ ኦዳ ነ ኡሎን ኦይኮፋ” ያግስ። ያትን፥ ትማራ አዛናሸ፥ አሳን ከዮና ባ እሻ አበሰሎመ ሶን ደአሱ።
2SA 13:21 ካዎይ ዳዊቲ ሀ ኦዳ ስእዳ ዎደ ዳሮ ይሎትስ።
2SA 13:22 አበሰሎመይ አምኖናኮ ጫማ ማልአ ፖግቤና። ባ ምችዉ ትማሮ ኢስዳ ግሾ አምኖና ሞርክስ።
2SA 13:23 ናምኡ ላይꬃፈ ጉየ፥ ኤፍሬማ ዛዋ ማታን ሀፆራ ጌተትያ በሳነ አበሰሎመይ ዶርሳ እክሰ ሜዴስ። ካዋ አደ ናይት ኡባይ ሄ በሳ ያና መላ አበሰሎመ ኤንታ ፄግስ።
2SA 13:24 አበሰሎመይ ካዋኮ ብድ፥ “ታኒ ነ አይለይ ታ ዶርሳታ እክስያ ሜድሳይስ፤ ነነ ነ ሞርናት ኑራ የርከቲ?” ያግስ።
2SA 13:25 ካዎይ፥ “አካይ፥ ታ ናአዉ! ኑ ኡባይ ቢኮ፥ ነዉ ቶሆ ግዳና” ያግስ። አበሰሎመይ ካዋ ዳሮ ሾቢንካ ካዎይ ቦና እፅስ፤ ሽን አበሰሎመ አንጅስ።
2SA 13:26 አበሰሎመይ፥ “ኔኒ ቦና እፅኮ፥ ታ እሻ አምኖን ኑራ ቦ” ያግስ። ካዎይ፥ “እ ኔራ አይስ ቢ?” ያግስ።
2SA 13:27 ሽን አበሰሎመይ ሾቢድ አጎና እፅን፥ ዳዊቲ አምኖናነ ባ አደ ናይታ እያራ የድስ።
2SA 13:28 አበሰሎመይ ባ አይለታኮ፥ “አምኖን ዎይነ ኡይድ ማꬆትያ ዎደ ታኒ ህንተና፥ ‘አምኖና ሾጭተ’ ያጋዳ ኪትያ ዎደ እያ ዎꬍተ። ያዮፍተ! ህንተና ኪተይ ታና። ምንተ! ፃልተ!” ያግድ ኪትስ።
2SA 13:29 አበሰሎመ አይለት እ ኪትዳይሳዳ አምኖና ዎꬍዶሶና። ሄሳፈ ጉየ፥ ካዋ አደ ናይት ኡባይ ደንድድ፥ ባንታ ባቁሉዋ ባቁሉዋ ቶግድ ባቃትዶሶና።
2SA 13:30 ኤንቲ ቡሮ ኦገ ቦላ ደእሽን፥ “አበሰሎመየ ካዋ ናይታ ኡባ ዉርስስ፤ ኤንታፈ እሶይካ አትቤና” ጌተትያ ዎረይ ዳዊታ ጋክስ።
2SA 13:31 ካዎይ ደንድ ኤቅድ፥ አዛንድ፥ ባ ማኡዋ ዳክድ ቢታን ዝንእስ። እያ አይለት ኡባይ ባንታ ማኡዋ ዳክድ፥ እያ ማታን ኤቅዶሶና።
2SA 13:32 ዳዊታ እሻ ሳማ ናአይ እዮናዳብ፥ “ታ ጎዳዉ፥ ካዎ ናይት ኡባይ ሀይቅዶሶና ጋዳ ቆፖፋ፤ አምኖና ፃላል ሀይቅስ። አምኖን ባ ምችዉ ትማሮ ኢስዳ ጋላሳፐ ዶምን፥ አበሰሎመይ እያ ቦላ ኦꬃናዉ ቆፕዳባይ ሀንስ።
2SA 13:33 ህዛ ሀይቅዳይ አምኖና ፃላላ ግድያ ግሾ፥ ‘ካዋ አደ ናይት ኡባይ ሀይቅዶሶና’ ግያ ዎርያ ካዎይ ቱማ ጎፖ” ያግስ።
2SA 13:34 ሄ ዎደ አበሰሎመይ ባቃትስ። ናግያ አደይ ꬎቁ ግድ ፄልያ ዎደ ዉሎሀ ባጋራ ደእያ ኦግያራ ደረ ላንቅያ ኦይክድ ዳሮ አሳይ የይሳ በእድ ካዋስ ኦድስ።
2SA 13:35 ሄ ዎደ እዮናዳብ፥ “ሄኮ፥ ታኒ ነ አይለይ ኦድዳይሳዳ ካዋ አደ ናይት ይዶሶና” ያግስ።
2SA 13:36 እ ኦድ ዉርስያ ዎደ ካዋ አደ ናይት ገልድ ባንታ ቃላ ꬎቁ ኦꬅድ ዋስዶሶና። ቃስ ካዎይነ እያ ሞርናት ኡባይ ይባታ ዬሆ ዬክዶሶና።
2SA 13:37 አበሰሎመይ ባቃትድ፥ ገሹራ ካዎ ግድዳ አምሁዳ ናኣ ታልማያኮ ብስ። ሽን ካዎይ ዳዊቲ ባ ናኣስ ዳሮ ጋላስ ዬክስ።
2SA 13:38 አበሰሎመይ ባቃትድ ገሹራ ቢታ ብዳፐ ጉየ ያን ሄꬑ ላይꬅ ደእስ።
2SA 13:39 ካዎይ ዳዊቲ አምኖና ሀይቁዋን ጋክዳ አዛንያፐ ምንዳ ግሾ፥ አበሰሎመ በአናዉ ላሞትስ።
2SA 14:1 ፃሩያ ናአይ እዮኣብ ካዎይ ዳዊቲ አበሰሎመ ላሞትዳይሳ ኤርስ።
2SA 14:2 ሄሳ ግሾ፥ እዮኣብ ተቁሄ ካታማ ኪትድ፥ እስ ጭንጫ ማጫስ ኤህስስ። ኢኮ፥ “ኔኒ ካዮትያ አሳዳ ሀና፤ ካዮ ማኦ ማአ፤ ቅባተ ትየቶፋ፤ ዳሮ ዎደፐ ዶምድ፥ ሀይቅዳ አሳስ ካዮትያ ማጫሳዳ ሀና።
2SA 14:3 ካዋኮ ባዳ ሀ ቃላ እያዉ ኦዳ” ያግስ። እዮኣብ እያ ካዋስ ኦዳናባ እዉ ኦድስ።
2SA 14:4 ተቁሄ ማጫስያ ካዋኮ ባዳ ቢታን ጉፋናዳ፥ “ካዋዉ፥ ታና ማዳርክ!” ያጋሱ።
2SA 14:5 ካዎይ፥ “ነና አይበ መትዳይ?” ያግድ ኦይችስ። እያ፥ “ታኒ አዝን ሀይቅዳ ማጫስ።
2SA 14:6 ታዉ ነ አይሌስ ናምኡ አደ ናይት ደኦሶና። ኤንቲ እሶይ እሱዋራ ደንባን ዋትዶሶና፤ ኤንታ ሻካናዉ አስ ꬋይን፥ እሶይ እሱዋ ሾጭድ ዎꬍስ።
2SA 14:7 ታ ዳቦት ኡባይ ታ ቦላ ደንድድ፥ ‘ባ እሻ እ ዎꬍዳ ግሾ ኑኒ እያ ዎꬋና መላ ባ እሻ ዎꬍዳ ኡራ ኑስ ሀማ፤ ያትድ ኑኒ ላትያ አስ ꬋይሳና’ ያግዶሶና። ኤንቲ ታዉ ላታስ አትዳ እስ ዱንቻ ቶይሶሶና፤ ታ አዝና ሱንꬃነ እያ ኮቻ ቢታፈ ꬋይሶሶና” ያጋሱ።
2SA 14:8 ካዎይ ማጫሴኮ፥ “ነ ሶ ባ፤ ታ ነ ግሾ ኪታና” ያግስ።
2SA 14:9 ሽን ተቁሄ ማጫስያ፥ “ታ ጎዳዉ፥ ካዋዉ፥ ጎመይ ታናነ ታ አዋ ሶ አሳ ኦይኮ፤ ሽን ካዎይነ እያ አራታይ ጌሽ ግዶ” ያጋሱ።
2SA 14:10 ካዎይ፥ “ነ ቦላ ዶና ፖግያ ኦናካ ታኮ ኤሀ፤ እ ነና ናምአንꬆ ቦቸና” ያግስ።
2SA 14:11 ማጫስያ፥ “ሱꬁ ዛርያ ኡራይ ቆሆ ቦላ ቆሆ ኤሆናዳነ ታ ናኣካ ዎꬎናዳ ካዎይ ጎዳ፥ ባ ፆሳ ሱንꬃን ታዉ ጫቆ” ያጋሱ። ካዎይ፥ “ደኦ ጎዳይ ኤርያ መላ፥ ነ ናኣ ብናናፐ እሶይካ ሳአን ዎና” ያግስ።
2SA 14:12 ማጫስያ ዛራዳ፥ “ታ ጎዳዉ፥ ታ ካዋዉ፥ ታ እስባ ኦደቶ” ያጋሱ። ካዎይ፥ “ሃሳያ” ያግስ።
2SA 14:13 ማጫስያ፥ “ያትን፥ ኔኒ ፆሳ ደርያ ቦላ ሀይሳ መላ ቆሆ አይስ ኦꬃዲ? ካዎይ ꬋይዳ ባ ናኣ ጉየ ዛርቤና። ባ ኦድዳ ቃላን ካዎይ ባላ ግደኔ?
2SA 14:14 ኑ ኡባይ ሀይቃና፤ ጉክዳ ሃꬅ ስሞናይሳዳ ኑ ስሞኮ። ሽን ፆሳይ ሸምፖ ꬋዮ ዶሰና፤ ዶገትዳ አስ ኩመꬅ ꬋዮና መላ እያዉ ኦገ ጊግሴስ።
2SA 14:15 “ታና አሳይ ያሽስያ ግሾ ታ ጎዳ፥ ካዋስ፥ ሀይሳ ኦዳናዉ ሀእ ያስ። ‘ታኒ ነ አይልያ፥ ታኒ ካዋስ ኦዳና፤ ኦን ኤር፥ ታኒ እያ አይልያ ኦይችዳባ ካዎይ ኦꬆና አገና።
2SA 14:16 ካዎይ ስእድ፥ ፆሳይ ኑስ እምዳ ላታፐ ታናነ ታ ናኣ ꬋይሳናዉ ኮይያ አሳ ኩሸፐ አሻና’ ጋዳ ቆፓስ።
2SA 14:17 ሄሳዳካ ካዎይ ሎኦነ ኢታ ሻካናዉ ፆሳ ኪታንቾ መላ ግድያ ግሾ፥ ታ ጎዳ ካዋ ነ ቃላይ ታና ሸምፕሶ። ጎዳይ፥ ነ ፆሳይ ኔራ ግዶ” ያጋሱ።
2SA 14:18 ካዎይ፥ “ታኒ ነና ኦይቻና፤ ኔኒ ታፐ ቆቶፋ” ያግስ። ማጫስያ፥ “ታ ጎዳይ፥ ካዎይ ኦደቶ” ያጋሱ።
2SA 14:19 ካዎይ ማጫስዉ፥ “ሀይሳ ኡባን እዮኣባ ኩሸይ ኔራ ደኢ?” ያግድ ኦይችስ። ማጫስያ፥ “ታ ጎዳዉ፥ ካዋዉ፥ ነ ሸምፖይ ኤሮ! ኔኒ ታ ጎዳይ፥ ካዎይ፥ ኦድዳ ኡባፈ ኡሻች ዎይኮ ሀድርስ ጋናዉ ዳንዳእያ አስ ባዋ። ኤ፥ ሀይሳ ታና ኪትዳይ፥ ነ አይለ ዶናን ሀይሳ ዎꬅዳይ ነ አይልያ እዮኣባ።
2SA 14:20 ነ አይለይ እዮኣብ ሀይሳ ኦꬅዳይ ሀእ ደእያ ሀኖታ ላማናሳ። ካዋዉ፥ ነ ፆሳ ኪታንቾ መላ ጭንጫ ግድያ ግሾ ቢታን ሀንያባ ኡባ ኤራሳ” ያጋሱ።
2SA 14:21 ካዎይ እዮኣባኮ፥ “ሎኦ! ታኒ ሀይሳ ኦꬃና! ባዳ ሄ ናአተꬃ አበሰሎመ ኤካዳ ያ” ያግስ።
2SA 14:22 እዮኣብ ካዋ ስንꬃን ጉፋንድ፥ “ታ ጎዳዉ፥ ካዋዉ፥ ባ አይለይ ኦይችዳባ ኦꬃናዉ ኤሮ ግዳ ግሾ፥ ነ ስንꬃን ሳባ ደምዳይሳ ነ አይለይ ሀች ኤርስ” ያግስ።
2SA 14:23 ሄሳፈ ጉየ፥ እዮኣብ ደንድድ ገሹራ ብድ አበሰሎመ የሩሳላመ ኤክድ ይስ።
2SA 14:24 ሽን ካዎይ፥ “አበሰሎመይ ባ ሶ ባናዉ በሴስ፤ እ ታ ሶምኦን ከዮፖ” ያግስ። አበሰሎመይ ባ ሶ ብስ፤ ካዋ ሶምኡዋ በእቤና።
2SA 14:25 እስራኤለ ግዶን ማላ ሎኦተꬃን አበሰሎመ መላ ሳበትዳ አስ ባዋ። ሁጰፐ ቶሆ ጋካናዉ እያን ቦርያባይ ባዋ።
2SA 14:26 እ ባና ዴፅያ ዎደ ባ ሁጵያ ቃንፅሴስ። ባ ሁጵያ ቃንፅስያ ዎደ ኡባን ምዛነን ማዛኔስ፤ እያ ብናናይ ካዎ ምዛነ ልከን ናምኡ ክሎ ግራመፐ አꬌስ።
2SA 14:27 አበሰሎመስ ሄꬑ አደ ናእነ እስ ማጫ ናእ የለትዶሶና፤ ማጫ ናኤ ሱንꬃይ ትማሮ፤ እያ ማላ ሎኦ ናአ።
2SA 14:28 አበሰሎመይ ናምኡ ላይꬅ ኩመꬅ ካዋ ሶምኦ በኦና የሩሳላመን ደእስ።
2SA 14:29 አበሰሎመይ፥ “ታኒ ነና ካዋኮ ኪታናዉ ኮይያ ግሾ ታኮ ሃያ” ያግድ እዮኣባኮ ኪትስ፤ ሽን እዮኣብ ዮና እፅስ። ናምአንꬆ ኪትስ፤ ሽን እዮኣብ ሀእካ ዮና እፅስ።
2SA 14:30 አበሰሎመይ ባ አይለታኮ፥ “ሄኮ፥ ታ ጋድያ ማታን እዮኣባስ ጋደይ ደኤስ፤ እያን ባንግ ደኤስ። ብድ እያን ታማ የድተ” ያግስ። አበሰሎመ አይለት እዮኣባ ባንጋን ታማ የድዶሶና።
2SA 14:31 እዮኣብ አበሰሎመ ሶ ብድ፥ “ነ አይለት ታ ባንጋን አይስ ታማ የድዶና?” ያግድ ኦይችስ።
2SA 14:32 አበሰሎመይ፥ “ታ ፄግን ነ ዮና እፅዳ ግሾሳ። ኔኒ ካዋኮ ባዳ፥ ‘ታኒ ገሹራፐ አይስ ያድና? ታኒ ሀኖ ጋካናዉ ያን ደእዳኮ ሎኦሽን’ ያጌስ ጋዳ ታዉ ኦይቻና መላ ኮያስ። ሀእ ታኒ ካዋ ሶምኦ በአናዉ ኮያይስ፤ ታኒ ባላ ግድኮ፥ እ ታና ዎꬎ” ያግስ።
2SA 14:33 እዮኣብ ካዋኮ ብድ፥ አበሰሎመይ ግዳይሳ ኦድስ። ካዎይ አበሰሎመ ፄግስስ፤ አበሰሎመይ ሶ ገልድ፥ ካዋ ስንꬃን ጉፋንድ ዝግስ፤ ካዎይ አበሰሎመ ዬርስ።
2SA 15:1 ሄሳፈ ጉየ፥ አበሰሎመይ እስ ፓራ ጋረ፥ ፓራታነ ባ ስንꬃን ዎፃናዉ እሻታሙ አሳታ ጊግስስ።
2SA 15:2 አበሰሎመይ ጉራ ደንድድ፥ ካታማ ፐንግያን ኤቄስ። ሞቶይ ደእያ አይ አስካ ካዋ ስን ፕርዳስ ብያ ዎደ አበሰሎመይ ፄግድ፥ “ኔኒ አዉ ካታማፐ ያይ?” ያግድ ኦይቼስ። ሄ ኡራይ፥ “ታ ነ አይለይ እስራኤለ ዛረ እሱዋፈ ያስ” ያግድ እያዉ ዛሬስ።
2SA 15:3 አበሰሎመይ፥ “ሄኮ፥ ነ ኦዳይ ሎኦነ ሱረ፤ ሽን ካዋ ባጋፈ ነና ስአናይ ባዋ” ያጌስ።
2SA 15:4 አበሰሎመይ ጉጅድ፥ “ታ እስራኤለ ቦላ ፕርዳናዉ ሹመትዳባ ግዳርክናሽን። ሄስ ሀንዳኮ፥ ሞቶይ ዎይኮ ኦድ ደእያ ኦንካ ታኮ ይን፥ ታኒ እያዉ ሱረ ፕርዳ ፕርዳናሽን” ያጌስ።
2SA 15:5 ኦንካ እያኮ ይድ እያዉ ዝግያ ዎደ አበሰሎመይ ባ ኩሽያ የድድ ሄ አድያ ኦይክድ ዬሬስ።
2SA 15:6 ፕርደታናዉ ካዋኮ ያ እስራኤለ ኡባስ አበሰሎመይ ሄሳዳ ሀንድ እስራኤለ አሳ ዎዛና ኤክስ።
2SA 15:7 ኦይዱ ላይꬃፈ ጉየ፥ አበሰሎመይ፥ “ታኒ ጎዳስ ቃንግዳ ቃንገꬃ ጋꬃናዉ ከብሮና ባና።
2SA 15:8 ታኒ ነ አይለይ ሶረ ቢታን ገሹራ ካታማን ደአሸ፥ ‘ታና ጎዳይ የሩሳላመ ጉየ ዛርኮ፥ ጎዳስ ጎይናና’ ያጋዳ ቃንጋስ” ያግስ።
2SA 15:9 ካዎይ፥ “ሳሮ ባ” ግን፥ እ ደንድድ ከብሮና ካታማ ብስ።
2SA 15:10 ሽን አበሰሎመይ እስራኤለ ዛረ ኡባስ ቆሳን ኪታ የድድ፥ “ሞይዘ ፑኖ ህንተ ስእዳ ዎደ፥ ‘አበሰሎመይ ከብሮናን ካዎትስ’ ያግተ” ያግስ።
2SA 15:11 አበሰሎመይ ፄግን፥ የሩሳላመፐ እያራ ብዳ አሳታ ታይቦይ ናምኡ ፄታ። ኤንቲ ሄ ሀኖታባ አይኮካ ኤሮና አሽከተꬃን ብዶሶና።
2SA 15:12 አበሰሎመይ ያርሾ ያርሽያ ዎደ ዳዊታ ዞርያ አሳፐ እሱዋ አክፆፈላ ግሎ ካታማፐ ፄግስስ። ካዋ ቦላ ደንድዳ ማቆይ ጎብስ፤ አበሰሎመ ካልያ አሳ ታይቦይ ጉጅ ጉጅ ብስ።
2SA 15:13 እስ ኪተትዳ አስ ይድ ዳዊታኮ፥ “እስራኤለ አሳ ዎዛናይ አበሰሎመራ ደኤስ” ያግስ።
2SA 15:14 ዳዊቲ ባራ የሩሳላመን ደእያ ባ ሞርናታኮ፥ “ደንድተ! ኑኒ ባቃቶስ! ያኖና እፅኮ፥ ኑ ግዶፈ አይ አስካ አበሰሎመፐ ከስ ኤከና። ኑኒ ኤለስድ ባናዉ ኮሼስ፤ ሀንኮደ፥ እ ኤለስ ይድ ኑና ꬋይሳና፤ ኑ ካታማ ማሻን ቡꬃና” ያግስ።
2SA 15:15 ካዋ ሞርናት፥ “ኑ ጎዳይ፥ ካዎይ ዶርዳ ኡባ ኑኒ ነ አይለት ኦꬃናዉ ጊግድ ኡትዳ” ያግዶሶና።
2SA 15:16 ካዎይ ከይድ ቶሆራ ብስ፤ እያ ሶ አሳይነ እያ ሞርናት ኡባይ እያራ ብስ፤ ሽን ባ ጋꬉዋ ናጋና መላ ታሙ ላገꬆታ ሶን አሽስ።
2SA 15:17 ካዎይ ከይን አሳ ኡባይ እያራ ሃሆን ደእያ እስ ኬꬃ ማታን ኤቅዶሶና።
2SA 15:18 እያ አሳት ኡባይ እያፐ ስንꬃራ ሳልፕድ አꬍዶሶና፤ ኤንታ ካልድ ካዋ ናገይሳት ሳልፕዶሶና። ቃስ ኤንታ ካልድ ጋተ ካታማፐ ይዳ ኡሱፑን ፄቱ አሳት፥ ካዋ ስንꬃራ ሳልፕድ አꬍዶሶና።
2SA 15:19 ካዎይ ጋተ አድያ እታያኮ፥ “ኔኒ ኑራ አይስ ያይ? ጉየ ስማዳ፥ ካዋ አበሰሎመራ ደኣሻ። ኔኒ አሳ ቢታ አስ፤ ነ ድኤታዳ ይዳ አስ።
2SA 15:20 ኔኒ ዝነ ያዳሳ፤ ታኒ ታ ሁጰን ብያ ሶ ኤሮና ደአሸ፥ ነና ዋታዳ ዳቡርሶ? ጉየ ስማ፤ ነ ቢታ አስ ኔራ ኤፋ። ጎዳይ ነዉ ኬሆነ አማነቶ!” ያግስ።
2SA 15:21 ሽን እታይ፥ “ደኦ ጎዳይ ኤርያ መላ፥ ታ ጎዳይ ካዎይ ኤርያ መላ፥ ታ ጎዳይ ካዎይ ደእያ አዉንካ፥ ፓፃን ግድን ሀይቆን ታኒ ነ አይለይ ኔፐ ሻከትከ” ያግስ።
2SA 15:22 ዳዊቲ፥ “ሎኦ! ባ፥ አꬋ” ያግስ። ጋተ አደይ እታይ አሳራነ ናይታራ አሳ ኡባራ ብስ።
2SA 15:23 ሄ አሳ ኡባይ ብያ ዎደ ሄ ቢታ አሳይ ባንታ ቃላ ꬎቁ ኦꬅድ ዬክዶሶና። ካዎይ ቀድሮና ዛንጋራ ፕንስ፤ አሳ ኡባይ መላ ቢታኮ ስሚድ ብስ።
2SA 15:24 ካህነይ ሳዶቅ ሄ በሳን ደኤስ፤ ፆሳ ጫቆ ታቦትያ ቶክያ ሌወትነ ካህንያ አብያታር ያን ደኦሶና። አሳ ኡባይ ካታማፐ ከይድ ዉራና ጋካናዉ ፆሳ ታቦትያ ሳአን ሸምፕስዶሶና።
2SA 15:25 ሄሳፈ ጉየ ካዎይ ሳዶቃኮ፥ “ፆሳ ታቦትያ ካታማ ጉየ ዛራ። ጎዳይ ታናን ኡፋይትያባ ግድኮ፥ እስ ጋላስ ጉየ ዛሪድ ባ ታቦትያነ ባ ኬꬃ በሳና።
2SA 15:26 ሽን እ፥ ‘ነናን ኡፋይትከ’ ጊኮ፥ እ ባና ሎእያባ ኦꬆ፤ ታኒ ጊገታ ኡታስ” ያግስ።
2SA 15:27 ቃስ ካዎይ ካህንያ ሳዶቃኮ፥ አነ አኬካ “ኔኒ ነ ናኣ አክማሳነ አብያታራ ናኣ ዮናታና ኤክዳ ካታማ ሳሮ ባ።
2SA 15:28 ህንተ ታዉ ኪታና ጋካናዉ ታኒ መላ ቢታን ደእያ ሻፋ ፕኑዋን ደአሻና” ያግስ።
2SA 15:29 ሄሳ ግሾ፥ ሳዶቅነ አብያታር ፆሳ ታቦትያ የሩሳላመ ጉየ ኤፍድ ያን ደእዶሶና።
2SA 15:30 ሽን ዳዊቲ ዬክሸ ሻማሆ ደርያ ቦላ ከይስ። እ አዛኖን ባ ሁጵያ ጉሉንትድ መላ ቶሆን ሄመትስ፤ እያራ ደእያ አሳት ጉሉንትድ ዬክሸ ፑደ ከይዶሶና።
2SA 15:31 አክፆፈል አበሰሎመራ ማቀትዳይሳ ዳዊቲ ስእዳ ዎደ “ጎዳዉ፥ አክፆፈላ ዞርያ ኤያተꬅ ላማ” ያግድ ዎስስ።
2SA 15:32 ዳዊቲ አሳይ ፆሳ ጎይንያ ዙማ ሁጰ ጋክዳ ዎደ፥ አርካያ አድያ ኩስ ባ ማኡዋ ዳክድ፥ ባ ሁጵያን ባና ቆልድ፥ ዳዊታራ ጋሄታናዉ ይስ።
2SA 15:33 ዳዊቲ፥ “ኔኒ ታራ ቢኮ ታዉ ቶሆ ግዳና።
2SA 15:34 ሽን ኔኒ ካታማ ጉየ ስማዳ አበሰሎመኮ፥ ‘ካዋዉ፥ ሀይሳፈ ካሰ ታኒ ነ አዋ አይለ ግድዳይሳዳ ሀእ ነዉካ አይለ ግዳና’ ያግኮ፥ አክፆፈላ ዞርያ ላላዳ ታና ማዳና።
2SA 15:35 ካህነት ሳዶቅነ አብያታር ኔራ ያን ደኦሶና ግዶኮና? ኔኒ ካዎ ጋꬎን ስእያባ ኡባ ኤንታዉ ኦዳ።
2SA 15:36 ሳዶቃ ናኣ አክማስነ አብያታራ ናኣ ዮናታን ያን ኤንታራ ደኦሶና፤ ኔኒ ስእያባ ኡባ ኤንታ ቦላ ታዉ ኪታ” ያግስ።
2SA 15:37 አበሰሎመይ የሩሳላመ ገልሽን፥ ዳዊታ ላገይ ኩስ ካታማ ጋክስ።
2SA 16:1 ዳዊቲ ደርያ ሁጵያራ ሄፍንꬅ አꬍሽን፥ ሲባ ጌተትያ መምፕቦስተ አይለይ እያራ ጋሄትስ። ናምኡ ፄቱ ኡይꬁ፥ እስ ፄቱ ዛብበ ኑካ፥ እስ ፄቱ ትያ አይፈ፥ እስ ኦጎሮ ዎይነ ኡሹ ናምኡ ሀረታን ጫንስ።
2SA 16:2 ካዎይ፥ “ሀይሳ አይስ ኤሀዲ?” ያግድ ኦይችስ። ሲብ፥ “ሀረታ፥ ካዋ ሶ አሳይ ቶጋና መላ፥ ኡይꬃነ ትይያ አይፍያ አሳይ ማና መላነ ዎይነ ኡሻይ ባዞን ዳቡርያ አሳት ኡያና መላሳ” ያግስ።
2SA 16:3 ካዎይ፥ “ነ ጎዳ ናኣ ናአይ አዉን ደኢ?” ያግድ ኦይችስ። ሲብ፥ “ ‘እስራኤለ አሳይ ታ አዋ ካዎተꬃ ሀች ታዉ ዛር እማና’ ያግድ የሩሳላመን ኡትስ” ያግስ።
2SA 16:4 ካዎይ፥ “መምፕቦስተስ ደእያባ ኡባይ ነዉ ግዶ” ያግስ። ሲብ፥ “አቤት ጎዳዉ፥ ካዋዉ! ታኒ ነ ስንꬃን ቴሞ ደማይስ” ያግድ ቢታን ጉፋንዳ ዝጋይስ።
2SA 16:5 ካዎይ ዳዊቲ ብራቅማ ካታማ ያ ዎደ ሳኦላ ዳቦ ግድዳ እስ አደይ ያፐ ከይስ። እያ ሱንꬃይ ጌራ ናኣ ሳም። እ ዳዊታ ባድሸ ከይስ።
2SA 16:6 ኦላንቾትነ ካዋ ናገይሳት ኡሻቻራነ ሀድርሳራ ዳዊታ ተቅድ ደእሽን፥ ሳም ዳዊታ ቦላነ ካዋ ሞርናታ ቦላ ሹቹ ሆልስ።
2SA 16:7 ሳም ዳዊታ ባድሸ፥ “ክቻ፤ ሀ ኢታይ ክቻ! አሳ ሱꬁ ጉስያ ሀ ፓꬆናይስ ክቻ።
2SA 16:8 ኔኒ ሳኦላ በሳን ካዎታዳሳ፤ ኔኒ ጉስዳ ሳኦላ ሶ አሳ ሱꬃ ኡባ ጎዳይ ነ ቦላ ዛርስ። ጎዳይ ካዎተꬃ ነ ናኣ አበሰሎመስ እሚስ፤ ኔኒ ሱꬁ ጉስዳ አስ ግድያ ግሾ፥ ነዉ ꬋዮ ዎደይ ጋክስ” ያግስ።
2SA 16:9 ሄሳፈ ጉየ፥ ፃሩያ ናአይ አብስ፥ ካዋኮ፥ “ሀ ባዉታ ካናይ፥ ታ ጎዳ ካዋ አይስ ባዲ? ታኒ ባዳ እያ ቆꬍያ ቃንፃና” ያግስ።
2SA 16:10 ካዎይ፥ “ህንተኖ፥ ፃሩያ ናይቶ፥ ህንተራ ታራ አይብ ጋꬂ? ጎዳይ፥ ‘ዳዊታ ባዳ’ ያግዳ ግሾ እ ባድያባ ግድኮ፥ ‘ኔኒ አይስ ሄሳ ኦꬃይ?’ ያግድ ኦይቻናዉ ዳንዳኤይ ኦኔ?” ያግስ።
2SA 16:11 ሄሳፈ ጉየ፥ ዳዊቲ አብሳነ ባ ሞርናታ፥ “ታ ናአይ፥ ታ አሾይ፥ ታና ዎꬋናዉ ኮዬስ፤ ያትን፥ ሀ ብንያመ አደይ ዋት አጋነ! ጎዳይ እያ ኪትዳ ግሾ እ ባዴስ፥ እያ ቦቾፍተ።
2SA 16:12 ኦን ኤር፥ ጎዳይ ታ መቱዋ በእድ፥ ታኒ ሀች ኤክያ ባደꬃ ግሾ ታዉ ኬሀ ቆፓኔኮ” ያግስ።
2SA 16:13 ሄሳፈ ጉየ፥ ዳዊቲነ እያ አሳይ ኦግያ ኦይክድ ቦሶና። ሳም ዙማ ምያራ ብሸ ዳዊታ ባዴስ፤ ሹቹ ሆሌስ፤ እያ ቦላ ቢታ ላሌስ።
2SA 16:14 ካዎይነ እያራ ደእያ አሳት ባንታ ብያ በሳ ዳቡርድ ጋክን ካዎይ ያን ሸምፕስ።
2SA 16:15 አበሰሎመይነ እስራኤለ አሳ ኡባይ የሩሳላመ ገልዶሶና፤ አክፆፈል ኤንታራ ደኤስ።
2SA 16:16 ዳዊታ ላገይ አርካያ ኮቻይ ኩስ አበሰሎመኮ ይድ፥ “ካዎይ ብራታ ቱሱ ግዶ! ካዎይ ሙኩሉ ላይꬅ ካዎቶ!” ያግስ።
2SA 16:17 አበሰሎመይ፥ “ኔኒ ነ ላግያ ዶስያ ዶሶይ ሀይሴ? ነ ላግያራ አይስ ባብኪ?” ያግስ።
2SA 16:18 ኩስ፥ “አካይ! ጎዳይ፥ ሀ አሳይነ እስራኤለ አሳይ ዶርዳይሳስ ታኒ አቃና፤ ታኒ እያራ አታና።
2SA 16:19 ህዛ ታኒ ታ ጎዳ ናኣስ ኦꬆና ኦደስ ኦꬃኔ? ታኒ ነ አዋስ ኦꬅዳይሳዳ ሀእ ነዉካ ኦꬃና” ያግስ።
2SA 16:20 አበሰሎመይ አክፆፈላኮ፥ “ኔኒ አነ ኑና ዞራ፤ ኑኒ አይ ኦꬅኖ?” ያግስ።
2SA 16:21 አክፆፈል፥ “ካዎ ጋꬎ ናጋናዉ ሶን አትዳ ነ አዋ ላገꬆታራ ባዳ ዝንአ። ኔኒ ነ አዋ ካዉሽዳይሳ እስራኤለ አሳ ኡባይ ስአና፤ ኔራ ደእያ ኡባ ኩሸይ ምናና” ያግስ።
2SA 16:22 ካዎ ኬꬃ ፖቅያ ቦላ አበሰሎመስ ዱንካነ ቶክዶሶና፤ አሳ ኡባይ ፄልሽን አበሰሎመይ ገልድ ባ አዋ ላገꬆታራ ዝንእስ።
2SA 16:23 ሄ ዎደ አክፆፈል ዞርያ ዞረይ እስ አስ ጎዳ ኦይችድ ኤክያ ዞረ መላ። ዳዊቲነ አበሰሎመይ አክፆፈላ ዞርያ ሄሳዳ ኦꬅድ ኤክዶሶና።
2SA 17:1 ሄሳፈ ጉየ አክፆፈል፥ “ሀች ቃማ ታኒ ታማነ ናምኡ ሙኩሉ አሳታ ዶራዳ ዳዊታ የደꬃዳ ኦይካና።
2SA 17:2 እ ዳቡርድ ዎልቃ ꬋይድ ደእሽን ታኒ እያ ቦላ ዎꬋና። ታኒ እያ ዳጋንꬃና፤ ያን እያራ ደእያ አሳ ኡባይ ባቃትያ ዎደ ታኒ ካዋ ፃላላ ሾጫና።
2SA 17:3 ያታዳ ታኒ አሳ ኡባ ኔኮ ዛራና። ኔኒ እስ አሳ ፃላላ ዎꬋናዉ ኮያሳ፤ ሀንኮ አሳይ ሳሮ አታና” ያግስ።
2SA 17:4 አክፆፈላ ዞረይ አበሰሎመነ እስራኤለ ጭማታ ኡባ ኡፋይስስ።
2SA 17:5 አበሰሎመይ፥ “ቃስ አርካያ ኮቻ ኩሳ ፄግተ፤ እ ግያባ አነ ስኦስ” ያግስ።
2SA 17:6 ኩስ እያኮ ይዳ ዎደ አበሰሎመይ፥ “አክፆፈል ዞርዳ ዞረይ ሀይሳ፤ ኑኒ እ ግያባ ኦꬃናዉ በሲ? በሶናባ ግድኮ፥ ነ ቆፋይ አይቤ?” ያግስ።
2SA 17:7 ኩስ፥ “አክፆፈል ዞርዳ ዞረይ ሀ ዎድያን ሎኦ ግደና።
2SA 17:8 ነ አዋይነ ነ አዋ አሳት ምኖ ኦላንቾታ ግደይሳነ ባ ማራታ ቦንቀትዳ ማሄ መላ ያሸይሳታ ግደይሳ ኔኒ ኤራሳ። ነ አዋይ ኦላ ሜዘትዳ አስ፤ እ ቃማ ባ ኦላንቾታራ አቀና።
2SA 17:9 እ ሀኖደ ጎንጎሎ ግዶን ዎይኮ ሀራ በሳን ቆሰትድ ኡትስ። እ ህንተ ጩጋታ ኮይሮትድ ቆህኮ፥ ሄሳ ስእዳ ኦንካ፥ ‘አበሰሎመ ካልድ ብዳ አሳይ ሾጨትዶሶና’ ያጋና።
2SA 17:10 ነ አዋይ ቶራ ቃራ ግደይሳነ እያራ ደእያ አሳይ ምኖ ግደይሳ እስራኤለ አሳ ኡባይ ኤርያ ግሾ፥ ሀር አቶሽን ጋሞዳ ምኖታ ዎዛናይ ትልአና።
2SA 17:11 “ሽን ታኒ ነና ዞረይ ሀይሳ፤ አባ ጋፃን ደእያ ሻፈ መላ ዳርዳ፥ ዳነፐ በርሳበ ጋካናዉ ደእያ እስራኤለ ኡባ ኔኮ ሺሻ፤ ያታዳ ኔኒ ኤንታ ኦላስ ካለꬃ።
2SA 17:12 ኑኒ እያ ደምዳ በሳ አዉንካ ሾጫና፤ አክ ሳአን ዎꬍያዳ ኑኒ እያ ቦላ ዎꬋና። እያ ግድን ዎይኮ እያራ ደእያ አሳ ግድን እሶይካ ፓፃ አተና።
2SA 17:13 እ ካታማ ገልኮካ፥ እስራኤለ አሳ ኡባይ ዎዶሮ ኤህድ፥ ካታማ ግዶን እስ ሹች አጎና ሄ ካታማ ጎችድ ዛንጋራን የጋና” ያግስ።
2SA 17:14 አበሰሎመይነ እስራኤለ አሳ ኡባይ፥ “አርካያ ኮቻ ኩሳ ዞረይ አክፆፈላ ዞርያፐ ሎኦ” ያግዶሶና። ጎዳይ አበሰሎመ ቦላ ኢታባ ኤሀናዉ ቆፕዳ ግሾ አክፆፈላ ዞርያ ኤኮናዳ ኦꬅስ።
2SA 17:15 ኩስ ካህነታ ሳዶቃነ አብያታራ፥ “አክፆፈል አበሰሎመነ እስራኤለ ጭማታ ሀይሳ ሀይሳ ግድ ዞርስ፤ ታንካ ኤንታ ሀይሳ ሀይሳ ጋዳ ዞራስ።
2SA 17:16 ሀእ ዳዊታኮ ኤሶን ኪትድ፥ ‘ባዞን ደእያ ሻፋ ጋፃን ሀች ቃማ አቆፓ፤ ሄፍንꬅ ፕና ክቻ! ሄስ ሀኖና እፅኮ፥ ካዎይነ እያራ ደእያ አሳ ኡባይ ꬋያና’ ያግድ ኦድተ” ያግስ።
2SA 17:17 ዮናታንነ አክማስ ቆንጨን ካታማ ገልሽን ኤንታ አስ በኦና መላ አይኖጌላ ጌተትያ በሳን ኡትድ ናጎሶና። እስ ማጫ አይልያ ያዳ ኤንታዉ ኦድን፥ ኤንቲ ብድ ካዋ ዳዊታስ ኦዶሶና።
2SA 17:18 ሽን እስ ፓንꬃይ ኤንታ በእድ አበሰሎመስ ኦድስ። ሄሳ ግሾ፥ ኤንቲ ናምአይ ሄ በሳፈ ኤሶን ክችድ ብራቅማ ካታማን እስ አድያ ሶ ጋክዶሶና። ሄ አድያ ሶ ማታን ሃꬃ ኦል ደኤስ፤ ኤንቲ ሄ ኦላን ገልዶሶና።
2SA 17:19 ሄ አድያ ማችያ ኦንካ ኤሮናዳ ኦላ ዶና ካማዳ እያ ቦላ ካꬅ ምጫሱ።
2SA 17:20 አበሰሎመ አይለት አድያ ሶ ይድ ማችዉ፥ “አክማስነ ዮናታን አዉን ደኦና?” ያግድ ኦይችዶሶና። ማችያ፥ “ኤንቲ ሻፋ ፕንድ ብዶሶና” ያጋሱ። ኤንቲ ኮይን፥ በንቶና እፅን፥ የሩሳላመ ስምዶሶና።
2SA 17:21 ሄ አሳት ብዳፐ ጉየ፥ ናምኡ አሳት ኦላፈ ከይድ፥ ካዋ ዳዊታስ ኦዳናዉ ብዶሶና። ዳዊታኮ፥ “አክፆፈል ህንተ ቦላ ሀይሳ ሀይሳ ኦꬃና ግድ ዞር ዎꬅዳ ግሾ ኤሶን ደንድድ፥ ሻፋ ፕንተ” ያግዶሶና።
2SA 17:22 ዳዊቲነ እያራ ደእያ አሳ ኡባይ ዮርዳኖሰ ፕንድ ብዶሶና። ሳእ ዎንትያ ዎደ ኡባይ ፕንድ ዉርዶሶና።
2SA 17:23 አክፆፈል ባ ዞረይ ኤከትቦናይሳ ኤርዳ ዎደ ባ ሀርያ ኮርድ ባ ደእያ ካታማ ብስ። አክፆፈል ባ ሶ ጊግስድ ሱለትድ፥ ሀይቅድ ባ አዋ ዱፎን ሞገትስ።
2SA 17:24 አበሰሎመይነ እያራ ደእያ አሳ ኡባይ ዮርዳኖሰ ፕንያ ዎደ ዳዊቲ ማሀናይማ ካታማ ጋክስ።
2SA 17:25 አበሰሎመይ ባ ኦላንቾታ ቦላ እዮኣባ በሳን አማሳያ ሹምስ። አማሳይ እስራኤለ አድያ ዮቶራ ናአ። ዮቶር ናኦሳ ናእዉ፥ እዮኣባ አይዉ ፃሩያ ምችዉ አብግያ ኤክስ።
2SA 17:26 እስራኤለትነ አበሰሎመይ ጋላዳ ቢታን ዱንካንዶሶና።
2SA 17:27 ዳዊቲ ማሀናይማ ካታማ ጋክያ ዎደ አሞነ ቢታን ራባፐ ይዳ ናኦሳ ናአይ ሾብ፥ ሎዶባራ ካታማፐ ይዳ አምኤላ ናአይ ማክርነ ኦሮጋልማ ካታማፐ ይዳ ጋላዳ አደይ ባርዝለይ፥
2SA 17:28 ሂፅያባታ፥ ከረታነ ሻተታ ኤህዶሶና። ቃስ ኤንቲ ግስተ፥ ባንጋ፥ ꬊለ፥ ሻሽ፥ ቆምኦሎነ ምስረ፥
2SA 17:29 ኤስ፥ ፕላ፥ መቃ ማꬅነ ዶርሰ ዳዊታነ እያ አሳይ ማና መላ ኤክድ ይዶሶና። ሄሳ ኤንቲ ኤህዳይ፥ “አሳይ ባዞን ኮሻትስ፥ ዳቡርስ፥ ሳሞትስ” ግድ ቆፕዳ ግሾሳ።
2SA 18:1 ዳዊቲ ባራ ደእያ አሳ ታይብድ ሻላቃታነ ማቶ ሀላቃታ ኤንታ ቦላ ሹምስ።
2SA 18:2 ዳዊቲ አሳ ሄꬑ ጩጋን ሻክስ፤ እስ ጩጋ እዮኣብ፥ ናምአንꬆ ጩጋ እዮኣባ እሻይ፥ ፃሩያ ናአይ አብስ፥ ሄꬓንꬆ ጩጋ ጋተ አደይ እታይ ኪቴስ። ካዎይ አሳኮ፥ “ቱማ ታ ህንተራ እስፈ ባና” ያግስ።
2SA 18:3 ሽን አሳይ፥ “ኔኒ ባናዉ በሰና! ኑኒ ባቃትያኮ ኤንቲ ኑና ኮዮኮና፤ ሀር አቶሽን ኑፐ ባጋይ ሀይቅያኮካ ኑባ ዉዳ ጎኮና። ሽን ኔኒ ነ ፃላላ ታሙ ሙኩሉፐ ዳራሳ። ሄሳ ግሾ፥ ኔኒ ካታማን ኡታዳ ኑስ ማዶ ኪትኮ ሎኦ” ያግስ።
2SA 18:4 ካዎይ፥ “ህንተና ሎእያባ ታ ኦꬃና” ያግስ። ዳዊቲ ድርሳ ፐንግያ ማታን ኤቅድ፥ አሳ ኡባይ ፄታንነ ሙኩላን ሳልፕድ ከይሽን በእስ።
2SA 18:5 ካዎይ እዮኣባ፥ አብሳነ እታያ፥ “ታ ግሾ ግድ፥ ሄ ናአተꬃ አድያ አበሰሎመ ቆሆፕተ” ያግድ ኪትስ። ካዎይ ሄሳ ሀላቃታስ ኦድያ ዎደ ኦላንቾት ኡባይ ስእዶሶና።
2SA 18:6 ዳዊታ ኦላንቾት እስራኤለታራ ኦለታናዉ ኤፍሬማ ዎራን ሳልፕዶሶና።
2SA 18:7 ሄ በሳን ዳዊታ ኦላንቾት እስራኤለ ኦላንቾታ ፆንዶሶና። ሄ ጋላስ ዳሮ አስ ዉርስ፥ ላታሙ ሙኩሉ አስ ሀይቅስ።
2SA 18:8 ኦላይ ጋፃረ ኡባ ጋክስ፤ ሄ ጋላስ ዎር ዉርስዳ አሳይ ማሽ ዉርስዳ አሳፐ ዳሮ።
2SA 18:9 አበሰሎመይ ቆፖና ደእሸ ዳዊታ አሳራ ጋሄትስ። አበሰሎመይ ባ ባቁሉዋ ቶግዳሽን ዳሻ ዎላ ጋርስ ባቁሎይ ገልን፥ አበሰሎመ ሁጰይ ምꬃን ኦይከትስ። እ ቶግዳ ባቁሎይ እያ ቶሁዋ ጋርሳፈ ብን፥ አበሰሎመይ ጫርኮ ቦላ ካቃትድ አትስ።
2SA 18:10 አሳፐ እሶይ ሄሳ በእድ፥ “አበሰሎመይ እስ ዎላ ቦላ ካቀትዳይሳ ታ በአስ” ያግድ እዮኣባስ ኦድስ።
2SA 18:11 እዮኣብ ባዉ ኦድዳ አድያ፥ “ዬ፥ በአስ ጋይ? ያትን አይስ እያ ዎꬋብኪ? ነ ሄሳ ኦꬅዳባ ግድያኮ፥ ታኒ ነዉ ታሙ ብራ ሳንትመነ እስ ሳቀ እማናሽን” ያግስ።
2SA 18:12 አደይ ዛሪድ፥ “ኔኒ ሙኩሉ ብራ ሳንትመ ታ ኩሸን ዎꬅያኮካ ታኒ ካዋ ናኣ ቦላ ታ ኩሽያ ደንꬅከ! ኑኒ ኡባይ ስእሽን፥ ካዎይ ነና፥ አብሳነ እታያ፥ ‘ታ ግሾ ግድ፥ ናአተꬃ አበሰሎመ ቆሆፕተ’ ያግድ ኪትስ።
2SA 18:13 ታኒ ካዋ እፃዳ አበሰሎመ ዎꬍዳባ ግድያኮ፥ ካዎይ ኡባ ስኤይሳዳ ሄሳ ስአናይስ አተና። ሄ ዎደ ኔኒ ሃክ ኤቅያ አሳፐ እሱዋ ግዳና” ያግስ።
2SA 18:14 እዮኣብ፥ “ታኒ ኔራ ኦደታሸ ዎደ ዉርስከ” ያግድ ሄꬑ ቶራ ኤክድ፥ አበሰሎመይ ዎላ ቦላ ካቀትድ፥ ፓፃ ደእሽን ዎዛና አይፈን ጫድስ።
2SA 18:15 እዮኣባ ኦላ ሚሽያ ቶክያ ታሙ አሳት አበሰሎመ ዩሹዋ ተቅድ እያ ሾጭድ ዎꬍዶሶና።
2SA 18:16 ሄሳፈ ጉየ፥ እዮኣብ ኦላ ኤሳናዉ ሞይዘ ፑንን አሳይ እስራኤለታ የደይሳ አግስ።
2SA 18:17 ኤንቲ አበሰሎመ ኤፍድ ዎራን ደእያ ግታ ኦላን የግድ፥ ግታ ሹቹ እያ ቦላ ዶርዶሶና። ሄ ዎደ እስራኤለ አሳ ኡባይ ባ ሶ ሶ ባቃትስ።
2SA 18:18 አበሰሎመይ ፓፃ ደእሸ፥ “ታ ሱንꬃን ፄገትያ አደ ናእ ታዉ ባዋ” ያግድ፥ ባና ቆፍስያ ሹቹ ማስዳ ሀዉልተ ካዎ ዛንጋራን ኤስድ ሄ ሀዉልትያ ባ ሱንꬃን ፄግስ። ሀች ጋካናዉ ሄ ሀዉልተይ “አበሰሎመ ሀዉልትያ” ጌተቴስ።
2SA 18:19 ሄሳፈ ጉየ፥ ሳዶቃ ናኣ አክማስ እዮኣባኮ፥ “እያ ሞርከታ ኩሸፐ ጎዳይ እያ አሽዳ ምሽራቹዋ ስሳናዉ ታኒ ካዋኮ ዎፃ ባዳ ኦዳና” ያግስ።
2SA 18:20 እዮኣብ፥ “አካይ! ሀች ኔኒ ምሽራቾ ኦድያ ጋላስ ግደና፤ ሀራ ጋላስ ኦዳናዉ ዳንዳኣሳ። ካዋ ናአይ ሀይቅዳ ግሾ ሀች ኦዳናዉ ኮሸና” ያግስ።
2SA 18:21 እዮኣብ ቶጰ አስ ግድዳ እስ አድያ ፄግድ፥ “ባዳ፥ ነ በእዳባ ካዋስ ኦዳ” ያግስ። ሄ አደይ እዮኣባስ ጉፋን ዝግድ ዎፅስ።
2SA 18:22 ሳዶቃ ናአይ አክማስ ናምአንꬆ እዮኣባኮ፥ “አይብካ ሀኖ፤ ታኒ ሀ ቶጰ አድያ ጌዶ ዎፃና” ያግስ። እዮኣብ፥ “ታ ናአዉ፥ ነዉ ዎይቶይ ባይናባን አይስ ዎፃናዉ ኮያይ?” ያግስ።
2SA 18:23 አክማስ፥ “አይብካ ሀኖ፤ ታኒ ዎፃናዉ ኮያይስ” ያግስ። እዮኣብ፥ “ያኮ ዎፃ” ያግስ። ሄሳ ግሾ፥ አክማስ ደምባ ኦግያ ኦይክድ ዎፅሸ ብድ ቶጰ አድያ የግድ አꬍስ።
2SA 18:24 ዳዊቲ ሶ ፐንግያፈነ ካረ ፐንግያፈ ግዶን ኡትዳሽን፥ ናግያ ኡራይ ኬꬃ ቦላ ከይድ፥ እስ አደይ ባርካ ዎፅሸ የይሳ በእስ።
2SA 18:25 ናግያ ኡራይ ካዋ ፄግድ ኦድስ። ካዎይ፥ “እ ባርካ ደእኮ፥ ምሽራቾ ኤክድ ዬስ” ያግስ። ዎፅያ አደይ ኤንታኮ ማትሸ ይስ።
2SA 18:26 ናገይስ ሀራ ዎፅያ አስ በእድ ፐንግያ ናግያ አድያኮ፥ “ሀራ አስካ ባርካ ዎፅሸ ዬስ” ያግስ። ካዎይ፥ “ሀ አደይካ ቃስ ምሽራቾ ኤክድ ዬስ” ያግስ።
2SA 18:27 ናገይስ፥ “ኮይሮ አድያ ዎꬃይ ሳዶቃ ናኣ አክማሳ ዎꬃ ታዉ ዳኔስ” ያግስ። ካዎይ፥ “እ ሎኦ አስ፤ እ ሎኦ ኦዳራ ዬስ” ያግስ።
2SA 18:28 አክማስ ካዋ ፄግድ፥ “ኡባባይ ሎኦ!” ያግስ። ካዋ ስንꬃን ጉፋን ዝግድ፥ “ታ ጎዳ፥ ካዋ ቦላ ባንታ ኩሽያ ደንꬅዳ አሳታ ነዉ አꬅድ እምዳ ጎዳይ፥ ነ ፆሳይ ጋላተቶ” ያግስ።
2SA 18:29 ካዎይ፥ “ናአተꬃይ፥ አበሰሎመይ ሳሮ?” ያግድ ኦይችስ። አክማስ፥ “እዮኣብ ታና ኪታና ሀንያ ዎደ ዎልቃማ ዋሶ ስአስ፥ ሽን እ አይበኮ ታኒ ኤራብከ” ያግስ።
2SA 18:30 ካዎይ፥ “ያ ሺቃ ኤቃ” ያግን እ ሃክድ ኤቅስ።
2SA 18:31 ሄሳፈ ጉየ፥ ቶጰ አደይ ጋክድ፥ “ታ ጎዳዉ፥ ካዋዉ፥ ታ ነዉ ምሽራቾ ኦዳይስ! ነ ቦላ ደንድያ ኡባ ኩሸፐ ጎዳይ ሀች ነና አሽስ” ያግስ።
2SA 18:32 ካዎይ ቶጰ አድያኮ፥ “ናአተꬃ አደይ አበሰሎመይ ሳሮ?” ያግድ ኦይችስ። ቶጰ አደይ፥ “ታ ጎዳዉ፥ ካዋዉ፥ ነ ሞርከትነ ነ ቦላ ኢታባ ኦꬃናዉ ደንደይሳት ኡባይ ሄ ናአተꬃ አድያዳ ሀኖና” ያግስ።
2SA 18:33 ካዎይ ዳሮ አዛንስ፤ ፐንግያፈ ቆሞ ባጋን ደእያ ኬꬃ ገልድ ዬክስ። ካዎይ፥ “ዪ፥ ታ ናአዉ አበሰሎመ ታሳ! ታ ናአዉ ታሳ! ነ ግሾ ታ ሀይቃርክና! ዪ፥ ታ ናአዉ አበሰሎመ ታሳ!” ያግድ ዬክስ።
2SA 19:1 ካዎይ፥ “ባ ናኣ አበሰሎመስ ዬከስነ ዘሌለስ” ያግድ እዮኣባስ ኦድዶሶና።
2SA 19:2 ካዎይ ባ ናኣስ ዬከይሳ ስእዳ ግሾ፥ ሄ ጋላስ ኤንቲ ኡባይ ፆንዳ ፆኖይ ዬሆን ላመትስ።
2SA 19:3 ኦላፐ ባቃትድ ዬላን ጉየ ስምዳ ኦላንቾዳ ሄ ጋላስ አሳይ ዶና ፖጎና ካታማ ገልዶሶና።
2SA 19:4 ካዎይ ጉሉንትድ፥ ባ ቃላ ꬎቁ ኦꬅድ፥ “ዪ፥ ታ ናአዉ አበሰሎመ! ዪ፥ ታ ናአዉ! አበሰሎመ ዪ!” ያግድ ዘሌልስ።
2SA 19:5 ሄሳፈ ጉየ፥ እዮኣብ ካዋ ሶ ብድ፥ “ነና፥ ነ አደ ናይታ፥ ነ ማጫ ናይታ፥ ነ ማቸታነ ነ ላገꬆታ አሽዳ ነ አሳ ኡባ ሀች ኔኒ ካዉሻዳሳ።
2SA 19:6 ነና እፀይሳታ ኔኒ ዶሳሳ፤ ነና ዶሰይሳታ ኔኒ እፃሳ። ነ ኦላንቾትነ ኤንታ ሀላቃት ነዉ አይኮካ ግዶናይሳ ኔኒ ሀች ቆንጭሳዳሳ። ኑኒ ኡባይ ሀይቅን፥ አበሰሎመይ ሀች ፓፃ አትዳኮ ኔኒ ኡፋይታናይሳ ታ በአስ።
2SA 19:7 ሀእ ደንዳ! ካረ ከያዳ ነ አሳ ምንꬃ። ታ ጎዳ ሱንꬃን ጫቃይስ፤ ኔኒ ከዮና እፅኮ፥ ሀች ቃማ ኔራ እስ አስካ አተና። ናአተꬃፈ ሀች ጋካናዉ ነና ጋክዳ ኢታ ኡባፈ ሀይስ ነዉ አꬍዳ ኢታ ግዳና” ያግስ።
2SA 19:8 ሄሳ ግሾ፥ ካዎይ ደንድድ ፐንግያ ማታን ኡትስ። ካዎይ ፐንገን ኡትዳይሳ አሳ ኡባይ ስእዳ ዎደ ካዋኮ ይዶሶና። ሄ ዎደ እስራኤለ አሳ ኡባይ ባንታ ሶ ሶ ባቃትዶሶና።
2SA 19:9 እስራኤለ ኮቻት ኡባይ እሶይ እሱዋራ ሀይሳዳ ያግድ ፓላምዶሶና፤ “ካዎይ ዳዊቲ ኑና ኑ ሞርከታ ኩሸፐ አሽስ፤ ኑና ፍልስፄመታ ኩሸፐ ዎስስስ፤ ሽን እ ሀእ አበሰሎመ ጋሶን ቢታ አግድ ባቃትስ።
2SA 19:10 ኑ ቦላ ካዎታናዳ ኑኒ ትይዳ አበሰሎመይ ኦላን ሀይቅስ። ያትን፥ ካዋ ጉየ ኤሀናባ ህንተ አይስ ስእ ግደቲ?” ያግዶሶና።
2SA 19:11 ካዎይ ዳዊቲ ካህነታ ሳዶቃነ አብያታራ ኪትድ፥ ይሁዳ ጭማታኮ ሀይሳዳ ያግስ፤ “እስራኤለ አሳ ኡባይ ኦደትያ ኦዳይ ካዋ ጋክስ። ያትን፥ ካዋ እያ ጋꬎ ዛር ኤሀናዉ ህንተ አይስ ጉየ አቴቲ?
2SA 19:12 ህንተ ታ እሻታ፤ ህንተ ታ አሾነ ታ ሱꬁ። ያትን፥ ካዋ ጉየ ዛር ኤሀናዉ ህንተ አይስ ሀራታፐ ጉየ አቴቲ?” ያግስ።
2SA 19:13 ቃስ ዳዊቲ አማሳኮ፥ “ኔኒ ታ አሾነ ታ ሱꬁ ግድኪ? ሀችፈ ዶምን፥ ታኒ ነና እዮኣባ በሳን ታ ቶራ ሞጮና ኦꬆና እፅኮ፥ ፆሲ ታና ፕርዶ” ያግስ።
2SA 19:14 እ ይሁዳ አሳ ኡባ ዎዛና እስኖ ኦꬅድ ሻምስ። ሄሳ ግሾ፥ ኤንቲ ካዋኮ ኪትድ፥ “ኔራ ነ አሳራ ኡባይ ሃ ስምተ” ያግዶሶና።
2SA 19:15 ካዎይ ስሚድ፥ ዮርዳኖሰ ሻፋ ጋካናዉ ይስ። ይሁዳ አሳይ ካዋ ዮርዳኖሰ ሻፋ ፕንꬃናዉ ጋልጋላ ብዶሶና።
2SA 19:16 ብራቅማ አደይ፥ ብንያመ ኮቻይ፥ ጌራ ናአይ ሳም ዳዊታ ሞካናዉ ኤለስድ ይሁዳ አሳራ ብስ።
2SA 19:17 እያራ ብንያመ ኮቸ ግድዳ ሙኩሉ አሳይ፥ ሳኦላ አይለይ ሲብ፥ ታማነ እቻሹ እያ ናይትነ ላታሙ አይለት እያራ ደኦሶና። ኤንቲ ካዎይ ደእያ በሳ ዮርዳኖሰ ሻፋ ድርግሸ ብዶሶና።
2SA 19:18 ካዋ ሶ አሳ ኤሀናዉነ ካዋ ኡፋይስያባ ኦꬃናዉ ፕንያ በሳራ ፕንዶሶና። ጌራ ናአይ ሳም ዮርዳኖሰ ሻፋ ፕንዳ ዎደ ካዋ ስንꬃን ጉፋንድ፥
2SA 19:19 “ካዋዉ ታ ናጋራ ታይቦፓ። ታ ጎዳይ፥ ካዎይ፥ የሩሳላመፐ ከይያ ዎደ ታኒ ነ አይለይ ቆህዳ ቆሁዋ ሀሳዮፓ። ሄሳ ነ ኡሎን ኦይኮፋ።
2SA 19:20 ነ አይለይ ታኒ ናጋራ ኦꬅዳይሳ ኤራይስ፤ ሽን ታ ጎዳ፥ ካዋ ሞካናዉ ዮሰፋ ሶ አሳ ኡባፈ ኮይሮታዳ ታኒ ሀች ያስ” ያግስ።
2SA 19:21 ፃሩያ ናአይ አብስ፥ “ሳም ጎዳይ ትይዳ ካዋ ባድዳ ግሾ ሀይቃናዉ በሰነዬ?” ያግስ።
2SA 19:22 ዳዊቲ አብሳኮ፥ “ህንተኖ፥ ፃሩያ ናይቶ፥ ህንተና ጋꬅያባይ አይቤ? ህንተ ሀች ታዉ ሞርከ ግዴት! ሀች እስራኤለን አይ አስካ ሀይቀና! ሀች እስራኤለ ካዎይ ታና!” ያግስ።
2SA 19:23 ካዎይ ሳም፥ “ነ ሀይቃካ” ያግድ ጫቅስ።
2SA 19:24 ቃስ ሳኦላ ናአይ መምፕቦስተይ ካዋ ሞካናዉ ዱገ ዎꬍስ። ካዎይ ብዳ ጋላሳፐ ዶምድ እ ሳሮን ጉየ ስምያ ጋላስ ጋካናዉ መምፕቦስተይ ባ ቶሁዋነ ባ ማኡዋ ሜጭቤና፤ ባ ቡቻ ሜድቤና።
2SA 19:25 መምፕቦስተይ ካዉዋራ ጋሄታናዉ የሩሳላመፐ ይዳ ዎደ ካዎይ፥ “መምፕቦስተ፥ ኔኒ ታራ አይስ ባብኪ?” ያግድ ኦይችስ።
2SA 19:26 መምፕቦስተይ፥ “ታ ጎዳዉ ካዋዉ፥ ታኒ ነ አይለይ ስላ ግድያ ግሾ ‘ታኒ ቶጋዳ ካዉዋራ ባና መላ ታ ሀርያ ኮራ’ ያጋስ። ሽን ታ አይለይ ሲብ ታና ጭምስ።
2SA 19:27 ታ ጎዳ፥ ካዋስ ዎርዶ ኦድድ ታ ሱንꬃ ኢስስ። ኔኒ ታ ጎዳይ፥ ካዎይ ፆሳ ኪታንቾ መላ ግድያ ግሾ ነና ሎእዳባ ኦꬃ።
2SA 19:28 ታ አዋ ሶ አሳ ኡባይ ሀይቃናዉ በሴስ፥ ሽን ታኒ ነ አይለይ ነ ጋይታፐ መይሳታራ ማና መላ ታዉ በሰ እማዳሳ። ያትን፥ ሄሳፈ አꬍያባ ካዋ ኦይቻናዉ ታዉ አይ ማት ደኢ?” ያግስ።
2SA 19:29 ካዎይ ዛሪድ፥ “ኔኒ ዳሮባ ኦደታናዉ ኮሸና። ኔራ ሲባራ ጋድያ ሻከትድ ኤካና መላ ኪታስ” ያግስ።
2SA 19:30 መምፕቦስተይ፥ “ታ ጎዳይ፥ ካዎይ ሳሮ ሶ ስማፈ አትሽን፥ ኡባይ ሲባስ ግዶ” ያግስ።
2SA 19:31 ጋላዳ አደይ ባርዝለይ ካዉዋራ እስፈ ዮርዳኖሰ ፕንድ እያ ሞይዛናዉ ሮጋልማፐ ይስ።
2SA 19:32 ባርዝለይ ላይꬅ ሆስፑን ታሙ ግድዳ ጭማ አስ። እ ዳሮ ዱረ ግድያ ግሾ ካዎይ ማሀናይማ ካታማን ደእያ ዎደ ካዋስ ኮሽያባ እሚስ።
2SA 19:33 ካዎይ እያኮ፥ “ኔኒ ታራ የሩሳላመ የꬋ፤ ታኒ ነዉ ኮሽያባ እማና” ያግስ።
2SA 19:34 ሽን ባርዝለይ፥ “ታኒ ህዛፐ ዳሮ ላይꬅ ደእከ፤ ታኒ ካዉዋራ የሩሳላመ አይስ ቦ?
2SA 19:35 ታኒ ሀእ ሆስፑን ታሙ ላይꬃ አስ፤ ታኒ ኢታነ ሎኦ ሻካዳ ኤራናዉ ዳንዳእያና? ታኒ ነ አይለይ ታ ምያባነ ኡያባ ማልኡዋ ሻካዳ ኤራናዉ ዳንዳእያና? ታኒ አደነ ማጫ የꬅ ሻካዳ ስአናዉ ዳንዳእያና? ያትን፥ ታኒ ነ አይለይ፥ ታ ጎዳዉ ካዋዉ አይስ ቶሆ ግዶ?
2SA 19:36 ታኒ ነ አይለይ ነና ዮርዳኖሰ ፕንꬃና። ሽን ካዎይ ታዉ ኩሸ ዛራናዉ አይስ ኮሺ?
2SA 19:37 ታኒ ታ አዋነ ታ አየ ዱፉዋ ማታን ታ ካታማን ሀይቃና መላ ስማይስ። ነ አይለይ ክምሃም ሀይስሽ፤ ታ ጎዳ፥ ካዉዋራ እ ቦ፤ ነና ኡፋይስያባ እያዉ ኦꬃ” ያግስ።
2SA 19:38 ካዎይ፥ “ክምሃም ታራ ፕኖ፤ ነና ኡፋይስያባ ታኒ እያዉ ኦꬃና። ቃስ ኔኒ ታና ኦይችያባ አይባ ግድኮካ ታኒ ነዉ ኦꬃና” ያግስ።
2SA 19:39 ሄሳፈ ጉየ፥ አሳ ኡባይ ዮርዳኖሰ ፕንዶሶና፤ ካዎይካ ፕንስ። ካዎይ ባርዝለ ዬርድ አንጅስ፤ ባርዝለይ ባ ሶ ስምስ።
2SA 19:40 ካዎይ ዮርዳኖሰ ፕንድ ጋልጋላ ብያ ዎደ ክምሃም እያራ እስፈ ብስ። ይሁዳ ኦላንቾት ኡባይነ እስራኤለ ኦላንቾታፐ ባጋት ካዉዋራ ብዶሶና።
2SA 19:41 እስራኤለ ኡባይ ካዋኮ ብድ፥ “ኑ እሻት፥ ይሁዳ አሳይ ካዋነ እያ ሶ አሳ ቆስድ፥ እያ አሳራ እስፈ ዮርዳኖሰ አይስ ፕንꬅዶና?” ያግዶሶና።
2SA 19:42 ይሁዳ አሳይ፥ “ኑኒ ሄሳ ኦꬅዳይ ካዎይ ኑስ ማታ ዳቦ ግድያ ግሾሳ። ያትን፥ ህንተ ሄሳስ አይስ ይሎተቲ? ኑኒ ካዉዋፐ አይኮ ምዶ? ዎይኮ ኑኒ እያፐ አይኮ ኤክዶ?” ያግዶሶና።
2SA 19:43 እስራኤለ አሳይ፥ “ካዉዋፐ ታሙ ኩሸይ ኑሳ፤ ዳዊታ ማታን ኑስ ህንተፈ አꬎ ማት ደኤስ! ያትን፥ ህንተ ኑና አይስ ካꬍደቲ? ካዋ ጉየ ዛሪድ ኤሀናዉ ኮይሮትድ ኦድዳይ ኑና ግዶኮ?” ያግዶሶና። ሽን እስራኤለ አሳፐ ይሁዳ አሳይ ዳሮ ዎልቃንꬅድ ሃሳይዶሶና።
2SA 20:1 ብንያመ ኮቸ ግድዳ ብክራ ናአይ ሳበአ ጌተትያ መቶ መꬍያ አደይ ያን ደኤስ። ሄ አደይ ሞይዘ ፑንድ፥ “ኑስ ዳዊታራ ግሾይ ባዋ! እሰየ ናኣራ ኑስ ላት ባዋ! እስራኤለ አሳዉ፥ ኡባይ ህንተ ሶ ሶ ገልተ!” ያግስ።
2SA 20:2 እስራኤለ አሳ ኡባይ ዳዊታ አግድ፥ ብክራ ናኣ ሳበኤራራ ብዶሶና። ሽን ይሁዳ አሳይ ዮርዳኖሰፐ የሩሳላመ ጋካናዉ አጎና ባንታ ካዋ ካልዶሶና።
2SA 20:3 ዳዊቲ የሩሳላመን ደእያ ባ ጋꬎ ስምዳ ዎደ፥ ካዎ ጋꬎ ናጋና መላ አሽዳ ታሙ ላገꬆታ ኤፍድ እስ ኬꬃን ናግስድ ዎꬅስ። ኤንታዉ ኮሽያባ እሚስ፥ ሽን ኤንታራ አቅቤና። ኤንቲ ሄ ኬꬃን ናገትድ፥ ሀይቃና ጋካናዉ አምኦ ግድድ ደእዶሶና።
2SA 20:4 ካዎይ አማሳኮ፥ “ይሁዳ አሳ ኡባ ሄꬑ ጋላሳን ታዉ ፄጋዳ ሺሻ፤ ነካ ኤንታራ ሺቃ” ያግስ።
2SA 20:5 አማስ ይሁዳ አሳ ፄጋናዉ ብስ፤ ሽን ካዎይ ግዳ ጋላሳን ስማናዉ ዳንዳእቤና።
2SA 20:6 ዳዊቲ አብሳኮ፥ “ሀእ ብክራ ናኣ ሳበእ አበሰሎመፐ አꬅድ ኑና ቆሀና። ነ ጎዳ ኦላንቾታ ኤካዳ ኔኒ እያ ጌዶ ካላ። ሄስ ሀኖና እፅኮ እ ግምበትዳ ካታማታ ደምድ ኑፐ ከስ ኤካና” ያግስ።
2SA 20:7 እዮኣባ አሳይ፥ ካዋ ናገይሳትነ ምኖ ኦላንቾት ኡባይ አብሳራ ብክራ ናኣ ሳበአ ጌዶ ካላናዉ የሩሳላመፐ ከይድ ብዶሶና።
2SA 20:8 ኤንቲ ብድ ጋባኦናን ደእያ ዎጋ ዛላ ጋክያ ዎደ አማስ ኤንታራ ጋሄታናዉ ይስ። እዮኣብ ኦላ ማኡዋ ማእ ኡትስ፤ ባ ፄሳን ማሻ ዳንጭስ። እ ታንግሽን እያ ማሻይ ሾሁዋፐ ከስ ኤክድ ዎꬍስ።
2SA 20:9 እዮኣብ፥ “ታ እሻዉ፥ ነ ሳሮ ደአይ?” ያግድ፥ አማሳ ዬራናዉ ባ ኡሻቻ ኩሽያን እያ ቡቻ ኦይክስ።
2SA 20:10 ሽን አማስ እዮኣባ ሀድርሳ ኩሽያን ደእያ ማሻ በእቦና ግሾ፥ እያፐ ናገትቤና። እዮኣብ እያ ኡሉዋን ጫድድ ማራጭያ ቢታን ዛዝስ። አማስ እስ ጫቻን ሀይቅዳ ግሾ ዛር ጫድቤና። እዮኣብነ እያ እሻ አብስ ብክራ ናኣ ሳበአ ጌዶ ካልዶሶና።
2SA 20:11 እዮኣባ አሳፐ እሶይ አማሳ አሀ ማታን ኤቅድ፥ “እዮኣባ ዶሰይነ ዳዊታባ ግድያ ኦንካ እዮኣባ ካሎ” ያግስ።
2SA 20:12 አማስ ሱꬃን ኢትድ ኦግያስ ግዶን ኩንድድ ዝንእስ። ኦላንቾት ኡባይ ይድ፥ ሄ በሳን ኤቅዳይሳ ሄ አደይ በእድ፥ አማሳ አሀ ኦግያፐ ሾቃን ጎች ከስድ፥ እያ ቦላ ማኦ የግስ።
2SA 20:13 አማሳ ኦገፐ ድግዳፐ ጉየ፥ ብክራ ናኣ ሳበአ ጌዶ ካላናዉ ኦላንቾት ኡባይ እዮኣባራ ብዶሶና።
2SA 20:14 ሳበእ እስራኤለ ኮቻታ ቢታራ ካንꬅድ፥ አቤል-ቤት-ማእካ ካታማ ጋክስ። በራታ ቢታራ ካንꬅሽን፥ አሳ ኡባይ ሺቅድ እያ ካልዶሶና።
2SA 20:15 እዮኣባራ ደእያ አሳይ ጋክድ፥ ሳበእ ደእያ አቤል-ቤት-ማእካ ካታማ ተቅዶሶና። ኤንቲ ካታማ ግምብያስ ጉየ ባጋራ ቢታ ዶርዶሶና። እዮኣባራ ደእያ አሳይ ግምብያ ላላናዉ ቆፆሶና። ኤንቲ ቆፅሽን፥
2SA 20:16 ካታማፐ እስ ጭንጫ ማጫስ ኤንታ ፄጋዳ፥ “ስእተ! ስእተ! ብድ፥ እዮኣባ ፄግተ። ታኒ እያዉ ኦዳናባይ ደኤስ” ያጋሱ።
2SA 20:17 እ ማጫሴኮ ይን፥ እያ፥ “ኔኒ እዮኣቤ?” ያጋዳ ኦይቻሱ። እዮኣብ፥ “ኤ፥ ታና” ያግስ። ማጫስያ፥ “ታኒ ነ አይልያ ግያባ ስአ” ያጋሱ። እዮኣብ፥ “ታኒ ስአይስ” ያግስ።
2SA 20:18 ማጫስያ፥ “በን ዎደ አሳይ፥ ‘ነ ኦይሻስ አብኤላ ካታማ ባ’ ጊኮ ኦድ ዉሬስ።
2SA 20:19 እስራኤለ ግዶን ሳሮነ አማንꬅያ አስ ኑና። እስራኤለ ቢታን አዮ ግድዳ ካታምዉ ኔኒ ꬋይሳናዉ ቆፓሳ። ኔኒ ጎዳ ላታ ቢታ አይስ ꬋይሳናዉ ኮያይ?” ያጋሱ።
2SA 20:20 እዮኣብ፥ “ሄስ ታፐ ሃኮ! ካታማ ꬋይሶይ ዎይኮ ላለꬅ ታፐ ሃኮ!
2SA 20:21 ኑ ቆፋይ ሄሳ ግደና። ደረይ ዳርያ ኤፍሬማ ቢታን ብክራ ናኣ ሳበአ ጌተትያ አደይ ካዋ ዳዊታ ቦላ ደንድስ። ሄ አድያ ታዉ እምተ፤ ታኒ ካታማ የዳዳ ባና” ያግስ። ማጫስያ፥ “እያ ሁጵያ ግምብያ ቦላራ ነዉ ሆላና” ያጋሱ።
2SA 20:22 ሄሳፈ ጉየ፥ ማጫስያ ባ ጭንጫ ዞርያራ አሳኮ ባሱ። አሳይ ብክራ ናኣ ሳበአ ቆፐ ቃንፅድ ሁጵያ እዮኣባስ ሆልዶሶና። ያትን፥ እዮኣብ ሞይዘ ፑንን አሳ ኡባይ ካታማፐ ከይድ፥ ባ ሶ ሶ ብን፥ እዮኣብ ካዋኮ የሩሳላመ ስምስ።
2SA 20:23 እዮኣብ እስራኤለ ኦላንቾታ ኡባ ሀላቃ ግድሽን፥ ዮዳሄ ናአይ ባናያስ ዳዊታ ናገይሳታ ሀላቃ።
2SA 20:24 አዶንራም ዎልቃ ኦሶ ኦይሳታ ሀላቃ ግድሽን፥ አህሉዳ ናአይ እዮሳፍፅ ሀንዳባ ፃፈይሳ።
2SA 20:25 ሱስ ዋና ፃፈ ግድሽን፥ ሳዶቅነ አብያታር ካህነ።
2SA 20:26 ቃስ ያእራ አደይ እርክ ዳዊታ ካህነታፔ እሱዋ።
2SA 21:1 ዳዊታ ካዎተꬃ ላይꬃን ቢታይ ሄꬑ ላይꬅ ኩመꬅ ኮሻትስ። ሄሳ ግሾ፥ ዳዊታ ጎዳ ኦይችን፥ ጎዳይ፥ “ሄስ ሀንዳይ ሳኦልነ እያ ሶ አሳይ ጋባኦና አሳ ዎꬍዳ ግሾ ሱꬃ ጎመይ ኤንታ ጋክስ” ያግስ።
2SA 21:2 ያትን ካዎይ ጋባኦና አሳ ፄግድ ኦድስስ። ጋባኦና አሳት እስራኤለ ዛረ ግዶናሽን፥ ኤንቲ አሞረ አሳፐ አትዳይሳታ። እስራኤለት ኤንታ አሻናዉ ኤንታራ ጫቅዶሶና፤ ሽን ሳኦል እስራኤለስነ ይሁዳስ ምሸትዳ ግሾ፥ ኤንታ ኩመꬅ ꬋይሳናዉ ኮይስ።
2SA 21:3 ዳዊቲ ጋባኦና አሳ፥ “ታኒ ህንተዉ አይ ኦꬆ? ጎዳ ላታ ህንተ አንጃና መላ ታኒ ህንተና አይ አጮ?” ያግስ።
2SA 21:4 ኤንቲ ዛሪድ፥ “ኑኒ ሳኦላፐ ዎይኮ እያ ሶ አሳፐ ዎርቃ ዎይኮ ብራ ኦይቾኮ። ቃስ እስራኤለ ግዶፈ እስ አስካ ዎꬋናዉ ኑስ ማት ባዋ” ያግዶሶና። ዳዊቲ፥ “ያትን፥ ታኒ ህንተዉ አይ ኦꬃና መላ ኮዬቲ?” ያግድ ኦይችስ።
2SA 21:5 ኤንቲ፥ “ሳኦል ኑና ꬋይስስ፤ ኑፐ አይ አስካ እስራኤለ ቢታን አዉንካ ፓፃ ዶና መላ ማቀትስ።
2SA 21:6 ሄሳ ግሾ፥ ሳኦላ ኮቻፈ ላፑን አደታ ኑስ እማ። ጎዳይ ዶርድ እያ ካዎꬅዳ ሳኦላ ካታማን፥ ግብአን፥ ጎዳ ስንꬃን ኑኒ ኤንታ ካቃና” ያግዶሶና። ካዎይ፥ “ታኒ ኤንታ ህንተዉ አꬃዳ እማና” ያግስ።
2SA 21:7 ሳኦላ ናአይ ዮናታንነ ዳዊቲ ጎዳ ስንꬃን ጫቅዳ ጫቁዋ ግሾ፥ ሳኦላ ናኣ፥ ዮናታና ናኣ መምፕቦስተ ካዎይ አሽስ።
2SA 21:8 ሽን ካዎይ ዳዊቲ እዮሄላ ናእያ ራፅፋ ሳኦላስ የልዳ ናምኡ አደ ናይታ፥ አርሞናነ መምፕቦስተ፥ ቃስ ሳኦላ ናእያ መሮባ፥ ማሆላ አድያ ባርዝለ ናኣ አድርኤላስ የልዳ እቻሹ አደ ናይታ ኤክስ።
2SA 21:9 ጋባኦና አሳስ አꬅድ እምን፥ ኤንቲ ጎዳ ስንꬃን ዙማ ሁጰን ካቅዶሶና፤ ላፑናይ እስፈ ሀይቅዶሶና። ኤንቲ ባንጋ ጫካ ዶምያ ዎደ ሀይቅዶሶና።
2SA 21:10 እዮሄላ ናእያ ራፅፋ ካዮ አፍላ ኤካዳ ዛላ ቦላ ባዉ ሂፃዳ፥ ካꬅ ጫክያ ዎድያፐ ብድ አሀታ ቦላ እር ቡካና ጋካናዉ ጋላስ ካፎይ፥ ቃማ ዶእ ቦቾናዳ ናጋሱ።
2SA 21:11 ሳኦላ ላገꬅያ፥ እዮሄላ ናእያ ራፅፋ ኦꬅዳይሳ ዳዊቲ ስእስ።
2SA 21:12 ዳዊቲ ብድ፥ ሳኦላ መቀꬃነ እያ ናኣ ዮናታና መቀꬃ ጋላዳን ደእያ ያበሳ አሳፐ ኤክስ። ፍልስፄመት ሳኦላነ እያ ናይታ ግልቦአ ደርያ ቦላ ዎꬍድ፥ ቤት-ሳና ጉታራፐ ያበሳ አሳይ ካይሶትድ ኤክዶሶና።
2SA 21:13 ዳዊቲ ሳኦላ መቀꬃነ እያ ናኣ ዮናታና መቀꬃ ሄ በሳፈ ኤህስ። ቃስ ካቀትዳ ላፑን አሳታ መቀꬃካ ሺሽስ።
2SA 21:14 ሳኦላ መቀꬃነ እያ ናኣ ዮናታና መቀꬃ ብንያመ ቢታን ፀላ ካታማን እያ አዋ ቂሳ ዱፉዋን ሞግዶሶና። ካዎይ ኪትዳባ ኡባ ኤንቲ ፖልዶሶና። ሄሳፈ ጉየ፥ ኤንቲ ሄ ቢታ ግሾ ዎስዳ ዎሳ ፆሳይ ስእስ።
2SA 21:15 ፍልስፄመታ ግዶንነ እስራኤለ አሳ ግዶን ዛሪድ ኦል ደንድን፥ ዳዊቲ ባ አሳራ ብስ። ፍልስፄመታራ ኦለትድ ዳዊቲ ዳቡርስ።
2SA 21:16 ራፋያ ያራፐ ይሽብብኖባ ጌተትያ አደይ ደኤስ። ናሰ ብራታፐ ኦሰትዳ እ ኦይክያ ቶራይ ሄꬑ ክሎ ግራመነ ባጋ፤ እ ኦራꬃ ማሽ ዳንጭድ፥ ዳዊታ ዎꬋናዉ ቆፕድ ደኤስ።
2SA 21:17 ሽን ፃሩያ ናአይ አብስ ዳዊታ አሽስ፤ እ ፍልስፄመ አድያ ዎꬍስ። ሄሳፈ ጉየ፥ ዳዊታ አሳይ፥ “እስራኤለ ፆምፐይ ቶኦናዳ ኔኒ ዛራዳ ኑራ ኦላ ባካ” ያግድ ጫቅዶሶና።
2SA 21:18 ጎባ ጌተትያ በሳን ፍልስፄመታራ ሀራ ኦል ደንድስ። ሄ ዎደ ኩሳታ አደይ ሳባክ፥ ራፋ ያራ ግድዳ ሳፋ ጌተትያ ኡራ ዎꬍስ።
2SA 21:19 ቃስካ ሄ በሳን ፍልስፄመታራ ሀራ ኦል ደንድን፥ ቤተለመፐ ይዳ ያእራ ናኣ፥ ኤልሀናን፥ ቶራ ቶማይ ዋንዳራሸ መላ ግድዳ ጋተ አድያ ጎልያዳ ዎꬍስ።
2SA 21:20 ቃስካ ጋተን ሀራ ኦል ደንድስ። ሄ በሳን እስ አዱሳ አደይ ደኤስ። ሄ አድያስ እስ እስ ኩሽያንነ እስ እስ ቶሁዋን ኡሱፑን፥ ዎል ቦላ ላታማነ ኦይዱ ብራት ደኦሶና። እካ ራፋያ ያራፐ ግድዳ አስ።
2SA 21:21 ሄ አደይ እስራኤለ ቡሻይዳ ዎደ ዳዊታ እሻ ሳማ ናአይ ዮናታን እያ ዎꬍስ።
2SA 21:22 ሀ ኦይዳት ጋተን ደእያ ራፋያ ያራታ። ኤንታ ዳዊቲነ እያ አሳይ ዎꬍዶሶና።
2SA 22:1 ጎዳይ ሳኦላ ኩሸፐነ እያ ሞርከታ ኡባ ኩሸፐ አሽዳ ጋላስ ዳዊቲ ጎዳስ ሀ ማዝሙርያ የፅስ።
2SA 22:2 ጎዳይ ታ ዛላ፤ ታዉ ሚፃ፤ እ ታና አሸይሳ።
2SA 22:3 ታ ፆሳይ ታኒ ባቃታዳ አትያ ዛላ፤ እ ታ ጎንዳልያ፤ እ ታ አቶተꬃ ዎልቃ። እ ታኒ ባቃታዳ አትያ በሲ፤ ነ ታና ማካላንቾታ ኩሸፐ አሻሳ።
2SA 22:4 ጋላት በሲያ ጎዳ ታኒ ፄጋና፤ ታኒ ታ ሞርከታፐ አታና።
2SA 22:5 ሀይቆ ዙለይ ታና ተቅስ፤ ꬋዮ ድኦይ ታና ዳጋንꬅስ።
2SA 22:6 ስኦለ ዎዶሮይ ታና ቃቻና ሀኔስ፤ ሀይቆይ ፅሄዳ ታና ኦይክስ።
2SA 22:7 ታና መቶይ ኡንኤꬅን ጎዳ ፄጋስ፤ ታና ማዳና መላ ታ ፆሳኮ ዋሳስ። እ ባ ኬꬃን ታ ቃላ ስእስ፤ ታ ዋስዳ ዋሶይ እያ ሀይꬃን ዎꬍስ።
2SA 22:8 ፆሳይ ሀንቀትዳ ግሾ፥ ቢት ቃፅስ፤ ቡቀትስ፤ ሳሎታ ፃጶይ ኮኮርስ፤ ቃፅስ
2SA 22:9 እያ ሲꬍያፐ ጩያይ ከይስ፤ እያ ዶናፐ ታማ ላጮይነ ፁግያ ቦንቆይ ከይስ።
2SA 22:10 ሳሉዋ ጳልቅድ ዱገ ዎꬍስ፤ እያ ቶሁዋፐ ጋርሳራ ሳካና ꬉም ደኤስ።
2SA 22:11 ክሩበታን ኡትድ ፓልስ፤ ጫርኮ ቀፍያ ቦላ ኡትድ ብስ።
2SA 22:12 ባና ꬉማን ተቅስ፤ እያ ዱንካነይ እራራ ስከትዳ ሻራ።
2SA 22:13 እያ ስንꬃን ደእያ ፖኡዋፐ ታማ ቦንቆይ ከዬስ።
2SA 22:14 ጎዳይ ሳሎፐ ጉምስ፤ ኡባፈ ꬎቃ ፆሳይ ባ ቃላ ስስስ።
2SA 22:15 ባ ዶንግያ ዱክድ፥ ባ ሞርከታ ላልስ፤ ዎልአንꬃ ፖኦ ኪትድ፥ ኤንታ የደꬅስ።
2SA 22:16 ጎዳይ ሴርዳ ዎደነ ሀንቀትድ ፔኑቅዳ ዎደ፥ አባ ግዶን ቢታይ በንትስ፤ ሳኣ ባሶይካ ቆንጭስ።
2SA 22:17 ጎዳይ ቦላፈ ኩሸ የድድ፥ ታና ኦይክስ፤ ጪሞ ሃꬃፈ ታና ከስስ።
2SA 22:18 እ ታና ታ ዎልቃማ ሞርከታፐ፥ ታ ዎልቃፈ ቦላ ግድዳ ታና እፀይሳታፐ አሽስ።
2SA 22:19 ታ መቱዋ ጋላስ ኤንቲ ታ ቦላ ደንድዶሶና፤ ሽን ጎዳይ ታና ዘምፕሰይሳ።
2SA 22:20 እ ታና ዳልጋ በሲ ከስስ፤ ታናን ኡፋይትዳ ግሾ ታና አሽስ።
2SA 22:21 ታ ፅሎተꬃዳ ጎዳይ ታዉ ቃንፅስ፤ ታ ኩሸ ጌሻተꬃዳ ታዉ ዛርስ።
2SA 22:22 አይስ ጊኮ ታኒ ጎዳ ኦግያ ካላስ፤ ቃስ ታ ፆሳ አጋዳ ኢታ ኦꬃብከ።
2SA 22:23 ታኒ እያ ህግያ ኡባ ናጋስ፤ እያ ዎጋ ፖላናይሳ አጋብከ።
2SA 22:24 ታኒ እያ ስንꬃን ሱረ ደአስ፤ ታና ናጋራፐ ናጋስ።
2SA 22:25 ጎዳይ ታዉ ታ ፅሎተꬃዳነ ታ ጌሻተꬃዳ ዛርስ።
2SA 22:26 ኔኒ ኬሀታስ ኬሀ፤ ሱረታስ ኔኒ ሱረ።
2SA 22:27 ጌሻታስ ኔኒ ጌሽ፤ ሽን ጌላታስ ኔኒ ሞርከ።
2SA 22:28 ባንታና ካዉሸይሳታ አሻሳ፤ ሽን ኦቶራንቾታ ካዉሻሳ።
2SA 22:29 አቤት ጎዳዉ፥ ታ ፆምፐይ ነና፤ ጎዳይ ታ ꬉማ ፖእስስ።
2SA 22:30 ነ ማዱዋን ታ ሞርከታ የꬋዳ ባና፤ ታ ፆሳን ግምበ ድርሳ ጉፓ አꬋና።
2SA 22:31 ፆሳ ኦገይ ሱረ፤ ጎዳ ቃላይ ጌሽ፤ እያኮ ባቃትያ ኡባስ እ ጎንዳለ።
2SA 22:32 ጎዳይ አትሽን፥ ሀራ ፆሲ ኦኔ? ኑ ፆሳይ አትሽን፥ ሀራ ዛል ኦኔ?
2SA 22:33 ፆሳይ ታዉ ምኖ ሚፃ፤ እ ታ ኦግያ ፖሎ ኦꬄስ።
2SA 22:34 እ ታ ቶሁዋ ገንኤ ቶሆዳ ምንꬄስ፤ ታና ꬎቃ በሳን ምንꬅድ ኤሴስ።
2SA 22:35 እ ታ ኩሽያ ኦላስ ሎህሴስ፤ ታ ቀሰይ ናሰ ብራታ ዶንገ ዱኬስ።
2SA 22:36 ታና አሽያ ነ ጎንዳልያ ታዉ እማዳሳ፤ ነ ካትሶይ ታና ግታዬስ።
2SA 22:37 ታ ሄመꬃ ዳልግሳሳ፤ ታ ጋድያ ምንꬃሳ።
2SA 22:38 ታ ሞርከታ የደꬃዳ መንረꬃስ፤ ኤንቲ ꬋዮና ደእሽን ጉየ ስምከ።
2SA 22:39 ኤንቲ ዛሪድ ደንዶና መላ ሾጫስ፤ ታ ቶሁዋፐ ጋርሳን ኩንድዶሶና።
2SA 22:40 ኦላስ ታዉ ዎልቃ ዳንጭሳዳሳ፤ ታ ሞርከታ ታዉ ጉልባትሳዳሳ።
2SA 22:41 ታ ሞርከታ ታ ስንꬃፈ ባቃትሳዳሳ፤ ታና እፀይሳታ ꬋይሳስ።
2SA 22:42 ማደ ኮይድ ዋስዶሶና፤ ሽን ኦንካ ኤንታ አሽቤና። ጎዳ ኤንቲ ፄግዶሶና፤ ሽን እ ኤንታዉ ኮይቤና።
2SA 22:43 ታኒ ኤንታ ባናዳ ሊቅሳስ፤ ኦገ ኡርቃዳ ኤንታ የꬋስ።
2SA 22:44 ማካላ ታ አሳፐ ታና አሻዳሳ፤ ካዎተꬃታ ቦላ ታና ሹማዳሳ፤ ታ ኤሮና አሳይ ታዉ ሃረትስ።
2SA 22:45 አላጋ ደረይ ታና አዳሼስ፤ ታ ዎርያ ስእድ ታዉ ኪተቶሶና።
2SA 22:46 ኤንቲ ዎልቃ ꬋይዶሶና፤ ባንታ ሚፃፐ ኮኮርሸ ከይድ ዮሶና።
2SA 22:47 ጎዳይ ደኦን ደኤስ! ታ ዛላይ አንጀቶ። ታና አሽያ ዛላይ ꬎቁ ꬎቁ ጎ።
2SA 22:48 እ ታ ሃሉዋ ከይያ ፆሳ፤ ካዎተꬃታ ታፐ ጋርሳን ሃርሴስ።
2SA 22:49 ታ ሞርከታፐ ታና አሼስ፤ ታ ሞርከታ ቦላ ታና ꬎቁ ꬎቁ ኦꬃሳ፤ ኦዳ መꬍያ አሳፐ ታና አሻሳ።
2SA 22:50 አቤት ጎዳዉ ታኒ ካዎተꬃታ ግዶን ነና ጋላታና፤ ነ ሱንꬃ የፃና።
2SA 22:51 ፆሳይ ባ ካዋስ ግታ ፆኖ እሜስ፤ ባ ትይዳ ዳዊታስነ እያ ኮቻስ፥ መርና ሲቁዋ በሴስ።
2SA 23:1 ሀይስ ዳዊታ ዉርሰꬃ ሃሳያ። እሰየ ናኣ ዳዊታ ዉረሰꬃይ ሀይሳ፤ እ ያይቆባ ፆሳን ትየትዳይሳ፤ ፆሳይ እያ ꬎቁ ꬎቁ ኦꬅዳይሳ፤ እስራኤለን ሎኦ ማዝሙረ የፀይሳ።
2SA 23:2 “ጎዳ አያናይ ታ ባጋራ ኦዴስ፤ እያ ቃላይ ታ እንፃርሳን ደኤስ።
2SA 23:3 እስራኤለ ፆሳይ ታዉ ኦድስ፤ እስራኤለ ዛላይ ሀይሳዳ ያግስ። ‘ፅሎተꬃን ሃርያ ካዎይ፥ ፆሳ ያሻን አይስያ ካዎይ፥
2SA 23:4 እ ሻር ባይና ጉራ ዶልያ ፃልቀ ፖኦ መላ። እ እር ቡክድ አꬍን፥ ቢታፈ ማታ ዶልስያ ቦቃልሳ መላ።’
2SA 23:5 ቱማ ታ ኬꬃ አሳይ ፆሳ ስንꬃን ሱረ፤ እ ታራ መርናዉ ጫቅስ፤ ሀ ጫቆይ ጊግድ፥ ምንድነ ናገትድ ደኤስ። ፆሳይ ታዉ ፆኖ እማና፤ ታ አሞትዳባ ኡባ እ ቱማ ፖላና።
2SA 23:6 ሽን ኢታ አሳት ኡባይ ኩሸን ሺሻናዉ ሀኖና አጉንꬃዳ ዎራ ሆለታና።
2SA 23:7 አጉንꬁ ቦችያ ኦንካ ዋለ ዎይኮ ፃምአ ባ ኩሸን ኦይካናዉ ኮሼስ፤ ሄስ ባ ደእያ በሳን ኤፃና” ያግስ።
2SA 23:8 ምኖ ዳዊታ አሳታ ሱንꬃይ ሀይሳፈ ካልድ ደኤይሳታ። ኮይሮይ፥ ታክሞና የለታ ግድዳ ዮሴብ-በስትቤተ ጌተቴስ፤ እ ሄꬓታ ሀላቃ፤ እስ ቶሆ ኦላን ባ ቶራን ሆስፑን ፄቱ አስ ዎꬍስ።
2SA 23:9 ሄꬓታፐ እሶይ፥ እያ ካልያ ናምአንꬆይ፥ አሆሀ ሼሽ ግድዳ ዶዶ ናኣ አላዛራ። እስ ጋላስ እነ ዳዊቲ ኦላስ ሺቅዳ ፍልስፄመታ ማንድዶሶና፤ እስራኤለ አሳይ ጉየ ስምስ።
2SA 23:10 ሽን እ ባ በሳን ምን ኤቅድ፥ እያ ኩሸይ አርጋጭድ ማሻራ ኦይከታና ጋካናዉ ፍልስፄመታ ሾጭስ። ሄ ጋላስ ጎዳይ ግታ ፆኖ እሚስ። ኦላይ ኤቅን፥ ኦላንቾት አላዛራኮ ስሚድ ይዶሶና፤ ሽን ኤንቲ ሀይቅዳ ፍልስፄመታፐ ኦላ ማኦ ቃርዶሶናፐ አትሽን፥ ሀራባ ኦꬅቦኮና።
2SA 23:11 እያፐ ካለይ ቃስ አሮዳ የለታ ግድዳ አጋ ናኣ ሳማ። እስ ጋላስ ፍልስፄመት ምስረይ ኩምዳ ሾቃን፥ ሌህ ጌተትያ በሳን ሺቅን፥ እስራኤለት ኤንታ ስንꬃፈ ባቃትዶሶና።
2SA 23:12 ሽን ሳም ሾቃ ግዶን ሙርት ኤቅድ ኦለትስ። ፍልስፄመታ ዎꬍስ፤ ሄ ጋላስ ጎዳይ ዎልቃማ ፆኖ እሚስ።
2SA 23:13 ካꬃ ጫካ ዎደ ሀስታሙ ምኖ አሳታፐ ሄꬓት አዱላማ ጎንጎሉዋ ዳዊታኮ ብዶሶና። ሄ ዎደ ፍልስፄመ ኦላንቾት ራፋይመ ዛንጋራን ዱንካንዶሶና።
2SA 23:14 ሄ ዎደ ዳዊቲ ሚፃን ደኤስ፤ ፍልስፄመ ኦላንቾታ ጩጋይ ቃስ ቤተለመን ኦላ ካምበ ደኤስ።
2SA 23:15 ዳዊቲ ሃ ኡያናዉ አሞትድ፥ “ቤተለመ ካታማ ፐንግያ ማታን ደእያ ኦላፐ ሃ ታና ኦነ ኡሻናይ” ያግስ።
2SA 23:16 ሀ ሄꬑ ምኖ አሳት ፍልስፄመ ኦላንቾታ ጉታ ካንꬅድ፥ ቤተለመ ካታማ ፐንገን ደእያ ኦላፈ ሃ ዱቅድ ዳዊታስ ኤህዶሶና። ሽን እ ኡዮና እፅድ፥ ጎዳ ስንꬃን ትግድ፥
2SA 23:17 “አቤት ጎዳዉ፥ ሀይሳ ኡያናይስ ታፐ ሃኮ! ሀ ሃꬃ ባንታ ሸምፑዋ ባይዝድ ኤህዳ አሳታ ሱꬁ ግደኔ?” ያግድ ኡዮና እፅስ። ሀ ሄꬑ ምኖ አሳት ሀይሳ ኦꬅዶሶና።
2SA 23:18 ፃሩያ ናኣ እዮኣባ እሻይ አብስ ሀስታማታ ሀላቃ፤ እ ሄꬑ ፄቱ አሳታ ባ ቶራን ኦልድ ዎꬍስ፤ እካ ሄꬓታዳ ኤረትስ።
2SA 23:19 እ ሀስታማታፐ አꬍድ ቦንቸትዳ አስ፤ እ ሄꬓታ መላ ኤረትዳ አስ ግዶና እፅኮካ ሀስታማታስ ሀላቃ።
2SA 23:20 ቃብፅኤላ የለታ ግድዳ ዮዳሄ ናአይ ባናያስ ምኖ ኦሶ ኦꬅዳ ግታ አስ። እ ናምኡ ኤረትዳ ሞአበ አሳታ ዎꬍስ። እስ ዎደ ሻች ዎꬍያ ጋላስ ኦላን ዎꬍድ ጋሞ ዎꬍስ።
2SA 23:21 ቃስ እስ ግታ ግብፀ አድያ ዎꬍስ፤ ግብፀ አደይ ቶራ ኦይክስ፤ ሽን እ ፃምአ ኦይክድ እያኮ ብድ፥ እያ ኩሸፐ ቶራ ዳፍ ኤክድ፥ እያ ቶራራ እያ ዎꬍስ።
2SA 23:22 ዮዳሄ ናአይ ባናያስ ሀይሳ ኦꬅስ፤ እያ ሱንꬃይ ሄꬓታይሳዳ ኤረትስ።
2SA 23:23 እ ሀስታማታ ግዶን ዳሮ ቦንቸትዳ አስ፥ ሽን እ ሄꬓታ ታይቡዋን ዴና። ዳዊቲ እያ ባና ናግያ ዎታዳረታስ ቶራ ሞጮና ኦꬅስ።
2SA 23:24 ሄ ሀስታማታ ግዶን ደኤይሳት፥ እዮኣባ እሻ አሳሄላ፥ ቤተለመ የለታ ግድዳ ዶዳ ናኣ ኤልያና፥
2SA 23:25 አሮዳ የለታ ግድዳ ሳማነ ኤልቃ፥
2SA 23:26 ፋልፃ ያራ ግድዳ ሰለሳ፥ ታቆሀ አድያ ኤስካ ናኣ እራሳ፥
2SA 23:27 አናቶተ የለታ ግድዳ አብኤዘራ፥ ኩሳ የለታ ግድዳ ማቡናያ፥
2SA 23:28 አሆሀ ያራ ግድዳ ፃልሞና፥
2SA 23:29 ናፆፋ የለታ ግድዳ ማህራያነ ባአና ናኣ ሄለባ። ብንያመ ቢታን፥ ግብአ የለታ ግድዳ ርባያ ናኣ እታያ፥
2SA 23:30 ጵርአቶና የለታ ግድዳ ባናያ፥ ጋኣሳ ዛንጋራ ማታፐ ይዳ ህዳያ፥
2SA 23:31 አራባ የለታ ግድዳ አባልቦና፥ ባርሁማ አድያ አዝሞታ፥
2SA 23:32 ሻአልቦና የለታ ግድዳ ኤልያባ፥ አሳና ናይታ፥ ዮናታና፥
2SA 23:33 አሮዳ የለታ ግድዳ ሳማነ ሻራ ናኣ አህኣማ፥
2SA 23:34 ማእካ የለታ ግድዳ አሀስባያ ናኣ ኤልፋላፃ፥ ግሎ የለታ ግድዳ አክፆፈላ ናኣ ኤልኣማ፥
2SA 23:35 ቃርመሎሳ የለታ ግድዳ ሄፅራ፥ አራባ የለታ ግድዳ ፓኣራ፥
2SA 23:36 ሱባ የለታ ግድዳ ናታና ናኣ ይግኣላ፥ ጋደ የለታ ግድዳ ባና፥
2SA 23:37 አሞነ የለታ ግድዳ ሰለቃ፥ ፃሩያ ናኣ እዮኣባ ኦላ ሚሽያ ቶክያ ባኤሮታ የለታ ግድዳ ናህራያ፥
2SA 23:38 ያትራ ያራ ግድያ እራያነ ጋሬባ፥
2SA 23:39 ህተ አድያ ኦርዮና። ኤንቲ ኩመꬅ ሀስታማነ ላፑና።
2SA 24:1 ጎዳ ሀንቆይ ቃስካ እስራኤለ ቦላ ኤፅስ፤ ጎዳይ ዳዊታ ኤንታ ቦላ ደንꬅድ፥ “ባዳ እስራኤለነ ይሁዳ አሳ ታይባ” ያግስ።
2SA 24:2 ሄሳ ግሾ፥ ካዎይ ቶራ ሞጮናታ እዮኣባነ ባራ ደኤይሳታኮ ሀይሳዳ ያግስ፤ “እስራኤለ ኮቻታ ዳነፐ በርሳበ ጋካናዉ ታኒ ኤራና መላ እስራኤለ አሳ ብድ ታይብተ” ያግስ።
2SA 24:3 ሽን እዮኣብ፥ “ጎዳይ ነ ፆሳይ ሀ ደእያ አሳ ቦላ ፄቱ ኩሸ ጉጆ! ሄሳ ታ ጎዳ፥ ካዋ አይፈይ በኦ! ሽን ታ ጎዳይ፥ ካዎይ አይስ ሄሳ መላባ ኦꬃናዉ ኮዪ?” ያግስ።
2SA 24:4 ሽን ካዋ ቃላይ እዮኣባነ ቶራ ሞጮናታ ፆንን፥ ኤንቲ ካዋ ስንꬃፈ ከይድ፥ እስራኤለ አሳ ታይባናዉ ብዶሶና።
2SA 24:5 ኤንቲ ዮርዳኖሰ ፕንድ ዱገሀ ባጋን ደእያ፥ ዛንጋራ ግዶን ደእያ አሮኤራ ካታማን ዱንካንዶሶና፤ ያፐ ጋደ ካንꬅድ እያዜራ ጋክዶሶና።
2SA 24:6 ያፐ ኤንቲ ጋላዳነ ህተታ ቢታን ደእያ ቃደሳ ብዶሶና፤ ያፐ ቃስ ዳነ ብዶሶና፤ ያራ ስዶና ጋክዶሶና።
2SA 24:7 ያፐ ደንድድ፥ ፅሮሳ ሚፃነ ህወታነ ካናነታ ካታማ ኡባ ብዶሶና። ዉርሰꬃን ይሁዳ ነገባን ደእያ በርሳበ ብዶሶና።
2SA 24:8 ኤንቲ ቢታ ኡባ ዩይሸ ኡዱፉን አጌናነ ላታሙ ጋላስ ጋምእድ፥ የሩሳላመ ስምዶሶና።
2SA 24:9 እዮኣብ አሳ ታይቡዋ ካዋ ኤርስስ፤ እስራኤለን ማሻን ኦለታናዉ ዳንዳእያ ሆስፑን ፄቱ ሙኩሉ ምኖ ኦላንቾት፥ ይሁዳን ቃስ እቻሹ ፄቱ ሙኩሉ ኦላንቾት ደኦሶና።
2SA 24:10 አሳ ታይብዳፐ ጉየ፥ ዳዊታ ዎዛናይ ህርግን፥ ዳዊቲ፥ “ታኒ ሀ ኦሱዋን ግታ ናጋራ ኦꬃስ። ሽን ሀእ አቤት ጎዳዉ፥ ታኒ ነና ዎሳይስ፤ ታ ናጋራ፥ ነ አይልያ ናጋራ አቶ ጋ። ታኒ ዳሮ ቦዛባ ሀናስ” ያግስ።
2SA 24:11 ዎንተꬃ ጋላስ ዳዊቲ ሂፃፐ ደንድያ ዎደ ዳዊታስ ቆንጨꬅ በእያ፥ ናብያ ጋደኮ ጎዳ ቃል ይስ።
2SA 24:12 “ባዳ፥ ዳዊታኮ፥ ‘ታኒ ነና ሄꬑባፐ እሱዋ ዶራና መላ በሳይስ፤ ታኒ ነ ቦላ ፖላናዉ ኤንታፈ እሱዋ ዶራ’ ያጌስ ጎዳይ” ያግስ።
2SA 24:13 ጋድ ዳዊታኮ ብድ፥ “ሄꬑ ላይꬅ ነ ቢታ ቦላ ኮሻ ኤሆዬ? ዎይኮ ነ ሞርከት ነና የደꬅን፥ ሄꬑ አጌና ኤንታ ስንꬃፈ ባቃታነዬ? ዎይኮ ነ ቢታ ቦላ ሄꬑ ጋላስ ጋዶይ ያናይሳ ዶራይ? አነ ሀእ ቆፓዳ ታኒ ታና ኪትዳይሳስ ዛራናባ ኦዳ” ያግስ።
2SA 24:14 ዳዊቲ ጋደኮ፥ “ታኒ ዳሮ ኡንኤታስ። ጎዳ ማሮታይ ግታ ግድያ ግሾ፥ ኑኒ እያ ኩሸን ኩንዳና፤ ታና አሳ ኩሸን የጎፎ” ያግስ።
2SA 24:15 ሄሳ ግሾ፥ ዎንታፈ ብድ እ ግዳ ጋላሳይ ጋካናዉ ጎዳይ እስራኤለ ቢታን ጋዶ ኪትስ። እስራኤለ ቢታን ዳነፐ ብድ በርሳበ ጋካናዉ ላፑን ታሙ ሙኩሉ አስ ሀይቅስ።
2SA 24:16 የሩሳላመ ꬋይሳናዉ ኪታንቾይ ባ ኩሽያ ምጭዳ ዎደ አሳ ቦላ ጋክዳ ጋዶይ ጎዳ አዛንꬅዳ ግሾ፥ አሳ ሾጭያ ኪታንቹዋኮ፥ “ግዳና! ነ ኩሽያ ዛራ” ያግስ። ጎዳ ኪታንቾይ ሄ ዎደ ያቡሰ አድያ ኦርና ዉዱማን ደኤስ።
2SA 24:17 አሳ ሾጭያ ኪታንቹዋ ዳዊቲ በእዳ ዎደ ጎዳኮ፥ “ናጋራ ኦꬅዳይ ታና፤ ታ ባላስ! ሀ ዶርሳት አይ ኦꬅዶና? ሀያና፥ ታናነ ታ አዋ ሶ አሳ ነ ሴራና መላ ታኒ ዎሳይስ” ያግስ።
2SA 24:18 ሄ ጋላስ ጋድ ዳዊታኮ ይድ፥ “ባዳ፥ ያቡሰ አድያ ኦርና ዉዱማን ጎዳስ ያርሾ በሲ ጊግሳ” ያግስ።
2SA 24:19 ዳዊቲ፥ ጎዳይ ጋደ ባጋራ ኪትዳይሳዳ ኦꬃናዉ ፑደ ብስ።
2SA 24:20 ኦርን ዱገ ፄልያ ዎደ፥ ካዎይነ እያ አሳት ባኮ የይሳ በእስ። እ ጋፃ ከይድ፥ ጉፋንድ ካዋስ ዝግስ።
2SA 24:21 ኦርን፥ “ታ ጎዳይ ካዎይ ባ አይልያኮ፥ አይስ ይዴ?” ያግስ። ዳዊቲ፥ “አሳ ቦላፈ ጋዶይ ስማና መላ ታኒ ጎዳስ ያርሾ በሲ ጊግሳናዉ ነ ዉዱማ ሻማናዉ ያስ” ያግስ።
2SA 24:22 ኦርን፥ “ታ ጎዳይ፥ ካዎይ ባ ኮይዳባ ኤክድ ያርሾ! ፁሳ ያርሾስ ቦራት ደኦሶና፤ ኤሶ ምꬃስ ቃስ ካꬅ ቡክያ ሚሸይነ ቦራ ቃምባር ደኤስ።
2SA 24:23 ካዋዉ፥ ሀይሳ ኡባ ኦርን ካዋስ እምስ” ያግስ። ጉጅድ ኦርን፥ “ጎዳይ ነ ፆሳይ ነ ያርሹዋ ኤኮ” ያግስ።
2SA 24:24 ሽን ካዎይ፥ “አካይ፥ ታኒ ታ ሚሸን ሻማና። ታ ጎዳ፥ ፆሳስ ፁሳ ያርሾ ጋተይ ባይና ያርሽከ” ያግስ። ሄሳ ግሾ፥ ካዎይ ዉዱማነ ቦራታ ኦርናፈ እሻታሙ ብራ ሳንትመን ሻምስ።
2SA 24:25 ዳዊቲ ሄ በሳን ያርሾ በሲ ጊግስድ ፁሳ ያርሾነ እስፈተꬃ ያርሾ ጎዳስ ያርሽስ። ጎዳይ ቢታ ግሾ ዎሰትዳ ዎሳ ስእድ፥ ጋዱዋ እስራኤለፐ ድግስ።
1KI 1:1 ካዎይ ዳዊቲ ዳሮ ጭምድ ዎደ ሱግስ። እያ አይለት ማኦ እያ ቦላ ዶርንካ እያ ሆኦና እፅስ።
1KI 1:2 ሄሳ ግሾ፥ እያ ሞርናት፥ “ካዋ ማታን ዳና መላነ እያ ሄማና መላ እስ ጌላኦ ኑ ነዉ ኮያና። ኑ ጎዳ ካዋ ሆኤꬃናዉ እያ ማታን ዝንአናዉ ዳንዳአዉሱ” ያግዶሶና።
1KI 1:3 ኤንቲ እስራኤለ ቢታ ኡባን ኮይድ አብሳ ጌተትያ እስ ማላ ሎኦ ጌላኦ ሱናማ ካታማፐ ደምድ፥ ካዋስ ኤህዶሶና።
1KI 1:4 ሄ ጌላእያ ዳሮ ማላ ሎኦ። እያ ካዋ ሄማሱነ እያዉ ኦꬃሱ፤ ሽን ካዎይ ኢራ አቅ ኤረና።
1KI 1:5 ሃግታ ናአይ አዶንያስ፥ “ታ ካዎታናዉ ኮያይስ” ያግድ ደንድስ፤ ፓራ ጋረታ፥ ፓራታነ ባ ስንꬃን ዎፅያ እሻታሙ አሳታ ጊግስስ።
1KI 1:6 እያ አዋይ፥ “ነ ሀይሳ አይስ ኦꬃይ?” ግድ እያ ኦይች ኤረና። አዶንያስ ዳሮ ማላ ሎኦ፤ እ አበሰሎመ ካልድ የለትስ።
1KI 1:7 አዶንያስ ፃሩያ ናኣ እዮአባራነ ካህንያ አብያታራራ ዞረትን፥ ኤንቲ እያ ማዳናዉ ጊግዶሶና።
1KI 1:8 ሽን ካህንያ ሳዶቅ፥ ዮዳሄ ናአይ ባናይ፥ ናብያ ናታን፥ ሳም፥ ረስምነ ዳዊቲ ናገይሳት አዶንያሳራ ዶኮና።
1KI 1:9 እስ ጋላስ አዶንያስ ኤንሮጌላ ፑልቱዋ ማታን ዞሄለታ ዛላ ጌተትያ በሳን ዶርሳታ፥ መሄታነ ማራታ ያርሽስ። ካዎ ናይታ ባ እሻታ ኡባነ ካዋስ ኦꬅያ ይሁዳ አሳታ ኡባ ባ ያርሾ በሳ ፄግስ።
1KI 1:10 ሽን ናበይ ናታና፥ ባናያ፥ ካዋ ናገይሳታነ ባ እሻ ሶሎሞነ ፄግቤና።
1KI 1:11 ሄሳፈ ጉየ፥ ናታን ሶሎሞነ አይዉ በርሳበኮ ብድ፥ “ኑ ጎዳይ፥ ዳዊቲ ኤሮና ደእሽን፥ ሃግታ ናአይ አዶንያስ ካዎትዳይሳ ነ ስአብኪ?
1KI 1:12 ነ ነ ሸምፑዋነ ነ ናኣ ሶሎሞነ ሸምፑዋ ዋታዳ አሻነኮ ታ ነና ዞራይስ።
1KI 1:13 ካዋ ዳዊታኮ ገላዳ፥ ‘ታ ጎዳዉ፥ ካዋዉ ቱማ፥ ታፐ ጉየ ነ ናአይ ሶሎሞነይ ካዎታና፤ እ ታ አራታን ኡታና’ ያጋዳ ታዉ ነ አይሌስ ጫቃብኪ? ያትን፥ አዶንያስ ዋንድ ካዎትዴ?
1KI 1:14 ኔኒ ካዉዋራ ሃሳይሽን ታ ገላዳ፥ ነ ኦዳይ ቱማ ግደይሳ ኦዳና” ያግስ።
1KI 1:15 በርሳባ ካዋ ሃሳይሳናዉ እ ደእያ ኬꬃ ገላሱ፤ ሱናማፐ ይዳ አብሳ ካዋ ሄማዉሱ።
1KI 1:16 በርሳባ ካዋ ስንꬃን ቦንቾን ሶምኡዋ ሳአ ጋꬃዳ ዝጋሱ። ካዎይ፥ “አይ ኮያዲ?” ያግድ ኦይችስ።
1KI 1:17 እያ፥ “ታ ጎዳዉ፥ ታዉ ነ አይሌስ፥ ‘ታፐ ጉየ ነ ናአይ ሶሎሞነይ ካዎታና፤ እ ታ አራታን ኡታና’ ጋዳ ጎዳን፥ ነ ፆሳን፥ ታዉ ጫቃዳሳ።
1KI 1:18 ሄኮ፥ ሀእ አዶንያስ ካዎትስ፤ ነ ታ ጎዳይ፥ ካዎይ ሄሳ ኤራካ።
1KI 1:19 እ ዳሮ መሄታ፥ ማራታነ ዶርሳታ ያርሽድ፥ ካዋ ናይታ ኡባ፥ ካህንያ አብያታራነ ቶራ ሞጮና እዮኣባ ፄግስ፤ ሽን ነ አይልያ ሶሎሞነ ፄግቤና።
1KI 1:20 ታ ጎዳዉ ካዋዉ፥ ታ ጎዳፐ ካዉዋፐ ጉየ ኦን ነ አራታን ኡታኔኮ ኤራናዉ እስራኤለ አሳ ኡባ አይፈይ ነና ፄሌስ።
1KI 1:21 ሄስ ሀኖና እፅኮ ታ ጎዳይ ካዎይ ሀይቅድ ባ ማይዛታን ጋሄትያ ዎደ ታነ ታ ናአይ ሶሎሞነይ ዳፋባ ኦꬅዳ አሳዳ ታይበታና” ያጋሱ።
1KI 1:22 በርሳባ ቡሮ ካዉዋራ ሃሳይሽን፥ ናበይ ናታን ካዎ ኬꬅ ጋክስ።
1KI 1:23 ናበይ ይዳይሳ አሳይ ካዋስ ኦድዶሶና። ናታን ካዋ ስን አꬍድ፥ ባ ሶምኡዋ ሳአ ጋꬅድ ዝግስ።
1KI 1:24 ናታን፥ “ታ ጎዳዉ ካዋዉ፥ ኔፐ ጉየ አዶንያስ ካዎታናይሳነ ነ አራታን ኡታናይሳ ኦዳዲ?
1KI 1:25 ሀች እ ዳሮ መሄታ፥ ማራታነ ዶርሳታ ያርሽድ፥ ካዋ ናይታ ኡባ፥ ቶራ ሞጮናታነ ካህንያ አብያታራ ፄግስ። ኤንቲ ሀእ እያራ ምሸነ ኡይሸ፥ ‘ካዎይ አዶንያስ ብራታ ቱስ ግዶ’ ያግሸ ደኦሶና።
1KI 1:26 ሽን ታና ነ አይልያ፥ ካህንያ ሳዶቃ፥ ዮዳሄ ናኣ ባናያነ ነ አይልያ ሶሎሞነ ፄግቤና።
1KI 1:27 ሀይስ ታ ጎዳ ካዉዋፐ ጉየ እያ አራታን ኦን ኡታኔኮ ባ አይለታ ኤርሶና ደእሸ ታ ጎዳይ ካዎይ ኦꬅዳባዬ?” ያግስ።
1KI 1:28 ካዎይ ዳዊቲ፥ “በርሳቦ ታዉ ፄግተ” ያግን ካዎይ ደእያ በሳ ገላዳ እያ ስንꬃን ኤቃሱ።
1KI 1:29 ሄ ዎደ ካዎይ፥ “ታና መቶ ኡባፈ አሽዳ ጎዳይ ኤርያ መላ።
1KI 1:30 ጎዳን፥ እስራኤለ ፆሳን ታ ነዉ ጫቅዳ ጫቁዋ ቱማ ሀች ፖላና፤ ታፐ ጉየ ነ ናአይ ሶሎሞነይ ካዎታና፤ ታ አራታን፥ እ ታ በሳን ኡታና” ያግድ ጫቅስ።
1KI 1:31 በርሳባ ካዋ ስንꬃን ባ ሶምኡዋ ሳአ ጋꬃዳ ዝጋዳ፥ “ታ ጎዳይ፥ ካዎይ ዳዊቲ መርናዉ ካዎቶ!” ያጋሱ።
1KI 1:32 ሄሳፈ ጉየ ካዎይ ዳዊቲ፥ “ታዉ ካህንያ ሳዶቃ፥ ናብያ ናታናነ ዮዳሄ ናኣ ባናያ ፄግተ” ያግን፥ ኤንቲ ገልድ፥ ካዋ ስንꬃን ኤቅዶሶና።
1KI 1:33 ካዎይ “ታ አይለታ ህንተራ ኤክድ ብድ፥ ታ ናኣ ሶሎሞነ ታ ቶግያ ባቁሉዋ ቶግስድ፥ ግዮነ ፑልቱዋኮ ኤፍተ።
1KI 1:34 ያን ካህንያ ሳዶቅነ ናብያ ናታን እያ ትይድ እስራኤለ ቦላ ካዎዮ። ሞይዘ ፑንሸ፥ ህንተ ቃላ ꬎቁ ኦꬅድ፥ ‘ካዎይ ሶሎሞነይ ብራታ ቱሱ ግዶ’ ያግተ።
1KI 1:35 ህንተ እያ አጃብድ እያራ ቢተ፤ እ ታ አራታን ኡትድ፥ ታ በሳን ካዎቶ። ታኒ እስራኤለነ ይሁዳ ሃርያ አስ ኦꬃዳ እያ ሹማስ” ያግስ።
1KI 1:36 ዮዳሄ ናኣ ባናይ ዛሪድ፥ “አምንእ! ጎዳይ፥ ታ ጎዳ ካዋ ፆሳይ ሄሳ ፖሎ!
1KI 1:37 ጎዳይ ታ ጎዳራ ካዉዋራ ግድዳይሳዳ ሶሎሞነራ ግዶ፤ እያ አራታ ታ ጎዳ ካዋ ዳዊቲ አራታፐ አꬅድ ግታዮ” ያግስ።
1KI 1:38 ሄሳ ግሾ፥ ካህነይ ሳዶቅ፥ ናበይ ናታን፥ ዮዳሄ ናአይ ባናይነ ካዋ ናገይሳት ሶሎሞነ ካዎይ ዳዊቲ ቶግያ ባቁሉዋ ቶግስድ፥ ግዮነ ኤፍዶሶና።
1KI 1:39 ካህነይ ሳዶቅ ጌሻ ዱንካንያፐ ዛይተ ካጨን ትግ ኤክድ፥ ሶሎሞነ ትይድ ካዎꬅስ። ኤንቲ ሞይዘ ፑንን፥ አሳ ኡባይ ባ ቃላ ꬎቁ ኦꬅድ፥ “ካዎይ ሶሎሞነይ መርናዉ ካዎቶ!” ያግዶሶና።
1KI 1:40 አሳ ኡባይ እያ ካልድ ብዶሶና፤ ኤንቲ ቢት ቃፃና ጋካናዉ ሱሱልኤ ፑንሸነ ዱርሸ ዳሮ ኡፋይትዶሶና።
1KI 1:41 አዶንያስነ እያራ ደእያ እማꬃት ግብራ ምድ ዉርስሸ ሄሳ ስእዶሶና። እዮኣብ ሞይዘ ፑኖ ስእድ፥ “ሀ ካታማን ስኤትያ ዎጫማ ግርሳይ አይቤ?” ያግድ ኦይችስ።
1KI 1:42 እ ቡሮ ኦደትሽን፥ ካህንያ አብያታራ ናአይ ዮናታን ጋክ ዎꬍስ። አዶንያስ፥ “አነ ሃ ገላ። ነ መላ ሎኦ አስ ሎኦ ዎረ ኤሆና አገና” ያግስ።
1KI 1:43 ዮናታን፥ “አካይ፥ ታኒ ሎኦ ዎረ ኤሀብከ! ኑ ጎዳይ ካዎይ ዳዊቲ ሶሎሞነ ካዎꬅስ።
1KI 1:44 እያ አጃባና መላ ካዎይ ካህንያ ሳዶቃ፥ ናብያ ናታና፥ ዮዳሄ ናኣ ባናያነ ካዋ ናገይሳታ እያራ የድስ፤ ኤንቲ ካዎይ ቶግያ ባቁሉዋ እያ ቶግስዶሶና።
1KI 1:45 ካህነይ ሳዶቅነ ናበይ ናታን፥ ግዮነ ፑልቱዋ ማታን እያ ትይድ ካዎꬅዶሶና፤ ኤንቲ እልልሸነ ዱርሸ ብዶሶና፤ ካታማን ስኤትያ ግርሳይ ሄሳ።
1KI 1:46 ሶሎሞነይ አራታን ኡትስ።
1KI 1:47 ሄሳ ቦላካ፥ ካዋ ሞርናት ኑ ጎዳ ካዋ ዳዊታኮ ሺቅድ፥ ‘ነ ፆሳይ ሶሎሞነ ሱንꬃ ነይሳፈ አꬅድ ከሶ፤ እያ አራታ ነይሳፈ አꬅድ ግታዮ!’ ያግድ አንጅዶሶና። ካዎይ ባ አልጋን ደእሸ ሆክድ ፆሳ ጎይንስ።
1KI 1:48 ጉጅድካ፥ ‘ታ በሳን ካዎꬅድ፥ ታ አራታን ኡትስድ፥ ታና ሀች ታ አይፈን በሲያ ጎዳይ፥ እስራኤለ ፆሳይ ጋላተቶ!’ ” ያግስ።
1KI 1:49 አዶንያሳ እማꬃት ኡባይ ሄሳ ስእዳ ዎደ ዳጋምድ፥ ላለትዶሶና።
1KI 1:50 አዶንያስ ሶሎሞነ ያይድ፥ ያርሾ በሳ ካጨታ ኦይክድ ዎስስ።
1KI 1:51 አሳይ ሶሎሞነ፥ “አዶንያስ ካዋ ሶሎሞነ ያይድ፥ ያርሾ በሳ ካጨታ ኦይክድ፥ ‘ካዎይ ሶሎሞነይ ታና ባ አይልያ ማሻን ዎꬍከ ግድ ሀች ታዉ ጫቆ’ ” ያጌስ ግድ ኦድዶሶና።
1KI 1:52 ሶሎሞነይ ዛሪድ፥ “እ ባ ሀኑዋ ሎይꬅኮ፥ ሀር አቶሽን እያ ሁጰ ብናናፐ እሶይካ ቦሸተና፤ ሽን እያን ኢታተꬅ በንትኮ እ ሀይቃና” ያግስ።
1KI 1:53 ካዎይ ሶሎሞነይ፥ አዶንያሳ ያርሾ በሳፈ ኤሀና መላ አሰ ኪትስ። አዶንያስ ይድ፥ ሶሎሞነስ ዝግስ፤ ሶሎሞነይ እያኮ፥ “ነ ሶ ባ” ያግስ።
1KI 2:1 ዳዊታስ ሀይቅያ ዎደይ ማትን፥ ባ ናኣ ሶሎሞነ ሀይሳዳ ያግድ ኪትስ፤
1KI 2:2 “ታ ሀይቅያ ዎደይ ማትስ። ሄሳ ግሾ፥ ምና፤ አሰ ግዳ።
1KI 2:3 ጎዳይ ነ ፆሳይ ኪትዳባ ናጋ፤ እያ ኦግያን ሄመታ፤ ሙሰ ማፃፋን ፃፈትዳ እያ አዋጁዋ፥ እያ ኪታ፥ እያ ህግያነ እያ ዎጋ ናጋ። ሄሳ ነ ኦꬅኮ፥ ነ ኦꬅያባ ኡባይነ ነ ብያ በሳ ኡባይ ነዉ እንጀታና።
1KI 2:4 ጎዳይ፥ ‘ነ ኮቻት ባንታ ደኡዋን ናገትድ ደእኮ፥ ኤንቲ ታ ስንꬃን ባንታ ኩመꬃ ዎዛናፐነ ባንታ ኩመꬃ ሸምፑዋፈ አማነትድ ሄመትኮ፥ እስራኤለ አራታን ኡትያ አስ ነዉ ꬋየና’ ” ያግዳ ኡፋይሳ ቃላ ታዉ ፖላና።
1KI 2:5 ጉጅድካ፥ “ፃሩያ ናአይ እዮኣብ እስራኤለ ናምኡ ቶራ ሞጮናታ ኔራ ናኣ አበኔራነ የተራ ናኣ አማሳ ዎꬍድ፥ እ ኦꬅዳባ ነ ኤራሳ። ሄስካ፥ ኦል ባይናሽን ሳሮ ዎደ ኤንታ ዎꬍድ፥ ሄ ሱꬃን ባ ፄሳ ሳቅያነ ባ ቶሁዋ ጫማ ትይስ።
1KI 2:6 ነ እያ ነ ጭንጫተꬃዳ ኦꬃ፤ እ ጬግድ ሳሮ ሀይቃናዳ ኦꬆፋ።
1KI 2:7 “ሽን ታኒ ነ እሻ አበሰሎመፐ ባቃትያ ዎደ ኤንቲ ታዉ ምየ ግድዳ ግሾ፥ ጋላዳ ቢታን ደእያ ባርዝለ ናይታስ ኬሀባ ኦꬃ፤ ኤንቲ ነ ጋይታፐ ምያ አሳራ ሞ።
1KI 2:8 “ታኒ ማሀናይማ ካታማ ብዳ ዎደ ታና ኢታ ባደꬅ ባድዳ ብንያመ ቢታን ብራቅማ ካታማፐ ይዳ ጌራ ናኣ ሳም ኔራ ደኤይሳ ቆፓ። እ ታራ ጋሄታናዉ ዮርዳኖሰ ሻፋ ይዳ ዎደ፥ ‘ታ ነና ዎꬍከ’ ጋዳ ጎዳን እያዉ ጫቃስ።
1KI 2:9 ሽን ሀእ ኔኒ እያ ፅሎ አሳዳ ታይቦፓ። ነ ጭንጫ አስ ግድያ ግሾ አይ ኦꬃነኮ ኤራሳ። ነ ሄ ጭማ አድያ ሱꬃራ ሞጋ” ያግስ።
1KI 2:10 ዳዊቲ ሀይቅድ፥ ባ ማይዛታን ጋሄትስ፤ ባ ካታማን ሞገትስ።
1KI 2:11 ዳዊቲ እስራኤለ ቦላ ኦይታሙ ላይꬅ ካዎትስ፤ ከብሮናን ላፑን ላይꬅ፥ የሩሳላመን ሀስታማነ ሄꬑ ላይꬅ ካዎትስ።
1KI 2:12 ሶሎሞነይ ባ አዋ ዳዊታ አራታን ኡትስ፤ እያ ካዎተꬃይ ዳሮ ምንስ።
1KI 2:13 ሃግታ ናአይ አዶንያስ፥ ሶሎሞነ አየ በርሳብኮ ብን በርሳባ፥ “ነ ታኮ ሳሮ ያዲ?” ያጋዳ እያ ኦይቻሱ። እ፥ “ኤ፤ ሳሮ ያስ” ያግድ ዛርስ።
1KI 2:14 ጉጅድካ፥ “ታኒ ነና ኦይችያባይ ደኤስ” ያግስ። እያ፥ “ኦይቻ” ያጋሱ።
1KI 2:15 አዶንያስ፥ “ካዎታናዉ በሰይ ታና ግደይሳነ እስራኤለ አሳ ኡባይ ታና ባንታዉ ካዎዳ ፄለይሳ ኔኒ፥ ነ ሁጰን ኤራሳ። ሽን ሀኖይ ፆሳፈ ግድዳ ግሾ ኦዳይ ላመትን ካዎተꬃይ ታ እሻኮ ዩይስ።
1KI 2:16 ሀእ ታኒ ነና እስባ ኦይቻና። ሀያና ታና ዬላዮፓ” ያግስ። እያ፥ “ኦይቻ” ያጋሱ።
1KI 2:17 እ፥ “ካዎይ ሶሎሞነይ ነና እፃስ ጌና፤ ሄሳ ግሾ፥ ሱናማ ማጫስዉ አብሶ ታዉ ማቾ ኦꬃዳ ኤካና መላ ሀያና ታዉ እያ ኦይቻርክ” ያግስ።
1KI 2:18 በርሳባ፥ “ዳሮ ሎኦ፤ ታ ሄሳ ካዋስ ኦዳና” ያጋሱ።
1KI 2:19 ሄሳ ግሾ፥ በርሳበይ አዶንያሳ ኪታ ኦዳናዉ ሶሎሞነኮ ገልን፥ ካዎይ ደንድ ኤቅድ፥ እዉ ዝግስ። ባ አራታን ኡትስ፤ ባ አየስ ሀራ አራታ ኤህስድ፥ ባፐ ኡሻቻ ባጋን ኡትስስ።
1KI 2:20 በርሳባ፥ “ታ ነና እስ ጉꬃባ ኦይችያባይ ደኤስ፤ ሀያና ታና ዬላዮፓ” ያጋሱ። ካዎይ ዛሪድ፥ “ታ አየ፥ ኦይቻ። ታ ነና ዬላይከ” ያግስ።
1KI 2:21 እያ፥ “ሱናማ ማጫስዉ አብሶ ነ እሻይ አዶንያስ ማቾ ኦꬅድ ኤካናዉ ኮይያ ግሾ እያዉ እማርክ” ያጋሱ።
1KI 2:22 ካዎይ ሶሎሞነይ ዛሪድ፥ “ሱናማ ማጫስዉ አብሶ ነ አዶንያስ አይስ ኦይቻይ? እ ታ ባይራ ግደኔ? ኔኒ እያዉ ካዎተꬅ አይስ ኦይችኪ? ቃስ ካህንያ አብያታርነ ፃሩያ ናአይ እዮኣብ እያራ ደኦሶና ግዶኮና?”
1KI 2:23 ካዎይ ሶሎሞነይ ጎዳን ጫቅድ፥ “አዶንያስ ሀይሳ ኦይችዳ ግሾ ታኒ እያ ዎꬎና እፅኮ፥ ጎዳይ ታና ፕርዶ!
1KI 2:24 ታና፥ ታ አዋ ዳዊቲ አራታን ኡትስድ፥ ታ ካዎተꬃ ምንꬅ ኤስድ፥ ታ ኮቻታስ ባ ቃላ ፖልዳ ጎዳይ ኤርያ መላ፥ አዶንያስ ሀች ሀይቃና!” ያግስ።
1KI 2:25 ካዎይ ሶሎሞነይ ዮዳሄ ናአ ባናያ ኪትን፥ እ ብድ አዶንያሳ ሾጭድ ዎꬍስ።
1KI 2:26 ሄሳፈ ጉየ፥ ካዎይ ሶሎሞነይ፥ ካህንያ አብያታራኮ፥ “ኔኒ ነ ቢታ አናቶታ ባ። ኔኒ ሀይቃናዉ በሳሳ፥ ሽን ታ ነና ዎꬍከ። ኔኒ ታ አዋ ዳዊቲ ስንꬃን ኡባ ሃርያ ጎዳ ታቦትያ ቶካዳሳ፤ ቃስ ታ አዋ መቱዋ ኡባ እያራ ኤካዳሳ” ያግስ።
1KI 2:27 ሶሎሞነይ፥ አብያታር ጎዳ ካህነ ግድዳ በሳፈ ድግድ፥ ጎዳይ ሴሎን ኤለ ሶ አሳስ ኦድዳ ቃላ ፖልስ።
1KI 2:28 አበሰሎመ እፅድ፥ አዶንያሳ ማድዳ እዮኣባ ሀ ኦዳይ ጋክን፥ ባቃትድ ጎዳ ዱንካንያኮ ብድ፥ ያርሾ በሳ ካጨታ ኦይክስ።
1KI 2:29 እዮኣብ ባቃትድ ጎዳ ዱንካንያኮ ብድ፥ ያርሾ በሳ ማታን ደኤይሳ ካዋ ሶሎሞነይ ስእዳ ዎደ፥ ዮዳሄ ናኣ ባናያ፥ “ባዳ እያ ዎꬋ” ግድ ኪትስ።
1KI 2:30 ባናይ ጎዳ ዱንካንያ ግዶ ገልድ እዮኣባኮ፥ “ካዎይ ነና ሀ በሳፈ ከያ ጌስ” ያግስ። ሽን እ ዛሪድ፥ “ከይከ! ታ ሀይሳን ሀይቃና” ያግስ። ባናይ፥ ብድ እዮኣብ ግዳይሳ ካዋስ ኦድስ።
1KI 2:31 ካዎይ፥ “እ ግዳይሳዳ እያ ኦꬃ፤ እያ ዎꬋዳ ሞጋ! እዮኣብ ፅሎ አሳ ሱꬁ ጉስዳ ዳፋፐ ታናነ ታ አዋ ሶ አሳ ጌሻሳ።
1KI 2:32 እ ጉስዳ ሱꬃ አጩዋ ጎዳይ እያዉ ቃንፃና። እ፥ ታ አዋ ዳዊቲ ኤሮናሽን፥ ባፐ ፅሎ ግድዳ ናምኡ አሳታ ማሻን ዎꬍስ። እስራኤለ ቶራ ሞጮናይ፥ ኔራ ናአይ አበኔርነ ይሁዳ ቶራ ሞጮናይ የተራ ናአይ አማስ፥ ሱረ አስ ሽን ዎꬍስ።
1KI 2:33 እዮኣብ ሀ አሳታ ዎꬍዳ ግሾ፥ ኤንታ ሱꬃ አጮይ መርናዉ እዮኣባ ቦላነ እያ ኮቻ ቦላ ዎꬎ። ዳዊቲ ቦላነ እያ ሶ አሳ ቦላ፥ እያ ኮቻ ቦላነ እያ አራታ ቦላ መርናዉ ጎዳ ሳሮይ ግዶ” ያግስ።
1KI 2:34 ሄሳ ግሾ፥ ዮዳሄ ናአይ ባናይ ከይድ፥ እዮኣባ ሾጭድ ዎꬍን፥ እ መላ ቢታን ደእያ ባ ጋደን ሞገትስ።
1KI 2:35 ካዎይ ዮዳሄ ናኣ ባናያ እዮኣባ በሳን ቶራ ሞጮና ኦꬅድ ሹምስ፤ ቃስ አብያታራ በሳን ካህንያ ሳዶቃ ሹምስ።
1KI 2:36 ሄሳፈ ጉየ፥ ካዎይ ሶሎሞነይ ሳማ ፄግድ፥ “ነዉ የሩሳላመን ኬ ኬፃዳ፥ ያን ደአ፤ ሀራ ሶ አዉካ ቦፓ።
1KI 2:37 ነ ካታማፐ ከያዳ፥ ቀድሮና ዛንጋራ ፕንዳ ጋላስ ሀይቃናይሳ ኤራ። ነ ሱꬃ ጎመይ ነና ኦይካና” ያግስ።
1KI 2:38 ሳሚ ዛሪድ፥ “ኔኒ ገይስ ሎኦ፤ ታኒ ነ አይለይ ነ ታ ጎዳይ ካዎይ ግዳይሳዳ ኦꬃና” ያግስ። ሳም የሩሳላመን ዳሮ ዎደ ደእስ።
1KI 2:39 ሽን ሄꬑ ላይꬃፈ ጉየ፥ ሳማ አይለታፐ ናምአት ማእካ ናኣ፥ ጋተ ካዋ አንኩሳኮ ብድ፥ “ነ አይለት ጋተን ደኦሶና” ግድ ሳማስ ኦድዶሶና።
1KI 2:40 እ ባ ሀርያ ኮርድ፥ ባ አይለታ ኮያናዉ አንኩሳኮ ጋተ ብድ፥ ያፐ ባ አይለታ ዛሪድ ኤህስ።
1KI 2:41 ሳሚ የሩሳላመፐ ጋተ ብድ ስምዳይሳ ሶሎሞነይ ስእዳ ዎደ፥
1KI 2:42 ሳማ ፄግድ፥ “ኔኒ የሩሳላመፐ ሀራ ሶ ብዳ ዎደ ሀይቃናይሳ ኤራ” ጋዳ ታ ነና ጎዳን ጫቅሳብክና? ሄ ዎደ ኔኒ፥ “ነ ገይስ ሎኦ፤ ኤሮ፥ ታ ኪተታና” ጋዳሳ።
1KI 2:43 ያትን፥ “ጎዳን ጫቅዳ ጫቁዋነ ታ ኪታ አይስ ናጋብኪ?
1KI 2:44 ታ አዋ ዳዊታ ቦላ ነ ኦꬅዳ ኢታ ኦሶ ኡባ ነ ዎዛናይ ኤሬስ። ነ ኦꬅዳ ኢታ ኦሱዋ ጎዳይ ነዉ ዛራና።
1KI 2:45 ሽን ካዎይ ሶሎሞነይ አንጀታና፤ ዳዊታ አራታይ ጎዳ ስንꬃን መርናዉ ሳሮ ዳና” ያግስ።
1KI 2:46 ካዎይ፥ ዮዳሄ ናኣ ባናያ ኪትን፥ እ ብድ፥ ሳም ሾጭድ ዎꬍስ። ያትን፥ ካዎተꬃይ ሶሎሞነ ኩሸን ምንድ አትስ።
1KI 3:1 ሶሎሞነይ ግብፀ ካዋራ ቦሎትድ፥ እያ ናእዉ ባዉ ማቾ ኤክስ። ባ ካዎ ጋꬎ፥ ፆሳ ኬꬃነ የሩሳላመ ዩሹዋ ድርሳ ግምብድ ኦንጋና ጋካናዉ እዮ ዳዊታ ካታማን ዎꬅስ።
1KI 3:2 ጎዳ ሱንꬃን ፆሳ ኬꬃይ ቡሮ ኬፀትቦና ግሾ አሳይ ሄ ዎደ ꬎቃ ጎይኖ በሳን ያርሽሸ ጋምእስ።
1KI 3:3 ሶሎሞነይ ጎዳ ዶስያ ባ አዋ ዳዊቲ ዎጋን ሄመትስ። ሽን ꬎቃ ጎይኖ በሳን ያርሽሸነ እፃነ ጩይስሸ ጋምእስ።
1KI 3:4 ካዎይ ያርሾ ያርሻናዉ ጋባኦና ብስ፤ ሄ በሳይ ሀራ ኡባፈ አꬍድ ኮሽያ ꬎቃ ጎይኖ በሲ። ሶሎሞነይ ሙኩሉ መሄ ኤህድ፥ ሄ ያርሾ በሳን ፁሳ ያርሾ ያርሽስ።
1KI 3:5 ጎዳይ ሶሎሞነስ ጋባኦናን ቃማ አሙሆን ቆንጭድ፥ “ታ ነዉ አይ እማና መላ ኮያይ?” ያግስ።
1KI 3:6 ሶሎሞነይ፥ “ነ አይለይ፥ ታ አዋይ ዳዊቲ ነዉ አማነትዳ፥ ፅሎነ ሱረ አስ ግድዳ ግሾ፥ ኔኒ እያ ዶሳዳሳ። ኔኒ ሀ ኬሀተꬃን፥ ሀች እያ አራታን ኡትያ አደ ናኣ እያዉ እማዳሳ።
1KI 3:7 “አቤት ጎዳዉ፥ ታ ፆሳዉ፥ ኔኒ ታና ነ አይልያ፥ ታ አዋ ዳዊታ በሳን ካዎꬃዳሳ። ሽን ታኒ ጉꬃ ናአ ግድያ ግሾ፥ አሳ ዋታዳ ካለꬃኔኮ ኤርከ።
1KI 3:8 ታኒ፥ ነ አይለይ ነ ዶርዳ አሳ ግዶንነ ታይቦይ ባይና አሳ ግዶን ደአይስ።
1KI 3:9 ሄሳ ግሾ፥ ታኒ ነ አሳ አይሳናዉ ሎኦነ ኢታ ሻካዳ ኤራና መላ ታዉ ነ አይልያስ አኬካ ዎዛና እማ። ሄስ ሀኖና እፅኮ፥ ሀ ነ ግታ አሳ ኦን ካለꬃናዉ ዳንዳኢ?” ያግስ።
1KI 3:10 ሶሎሞነይ ሄሳ ኦይችዳ ግሾ፥ ጎዳይ ኡፋይትስ።
1KI 3:11 ፆሳይ እያኮ፥ “ኔኒ ነዉ ላይꬅ አዱቃና መላ ዎይኮ ዱረ ግዳናዉ ዎይኮ ነ ሞርከት ሀይቃና መላ ኦይቾናሽን፥ ሀ አሳ ሱረ ፕርዳን አይስያ ጭንጫተꬅ ኦይችዳ ግሾ፥
1KI 3:12 ሄኮ፥ ነ ኦይችዳይሳ ታ ነዉ እማና። ሀይሳፈ ካሰ ነ መል ባይናይሳዳ ህዛፐ ጉየ ነ ማል ደንዶናዳ ጭንጫተꬅነ አኬካ ዎዛና ነዉ እማና።
1KI 3:13 ቃስ ነ ኦይቾናባካ ታ ነዉ እማና፤ ኔኒ ደእዳ ላይꬃ ኡባን ሀራ ካዎይ ደሞና ዱረተꬃነ ቦንቹዋ ታ ነዉ እማና።
1KI 3:14 ነ አዋይ ዳዊቲ ሄመትዳይሳዳ ታ ኦግያን ነ ሄመትኮ፥ ታ ዎጋነ ታ ኪታ ናግኮ፥ ታ ነ ላይꬃ አዱሳና” ያግስ።
1KI 3:15 ሶሎሞነይ ꬍስኮፈ ባርክድ፥ ሄኮ፥ ፆሳይ እያዉ አሙሆን ኦድዳይሳ አኬክስ። እ፥ የሩሳላመ ስሚድ፥ ጎዳ ጫቆ ታቦትያ ስንꬃን ኤቅድ፥ ፁሳ ያርሾነ እስፈተꬃ ያርሾ ያርሽስ። ያትድ፥ ባ ሞርናታስ ግብራ ጊግስስ።
1KI 3:16 እስ ጋላስ ናምኡ ላይማ ማጫሳት ካዋ ሶሎሞነኮ ይድ፥ እያ ስንꬃን ኤቅዶሶና።
1KI 3:17 ኤንታፈ እስንያ፥ “ታ ጎዳዉ፥ ታንነ ሀ አስያ እስ ኬꬃን ደኦስ። ያን እያ ታራ እስፈ ደእሽን፥ ታ እስ ናአ የላስ።
1KI 3:18 ታ ናአይ የለትዳ ሄꬓንꬆ ጋላስ ሀ ማጫስያካ እስ ናአ የላሱ። ሄ ኬꬃን ኑፐ፥ ናምኣፈ ሀራ አስ ኦንካ ባዋ።
1KI 3:19 “እስ ቃማ እያ ባና ናኣ ቦላ ዝንእዳ ግሾ፥ ሀ ማጫሰ ናአይ ሀይቅስ።
1KI 3:20 እያ ቃማ ደንዳዳ፥ ታኒ፥ ነ አይልያ ꬍስክዳሽን፥ ታ ናኣ ታ ምየፐ ኤካዳ፥ ባ ክኦን ዎꬃዳ፥ ባ ሀይቅዳ ናኣ ታ ክኦን ዎꬃሱ።
1KI 3:21 ዎንታ ታኒ ታ ናኣ ꬋንꬃናዉ ደንድያ ዎደ፥ ሄኮ ሀይቅስ። ሽን ታኒ ዎንታ ፖኦን ትሽ ኦꬃዳ ፄልያ ዎደ፥ ሄኮ፥ ታ ናኣ ግደና” ያጋሱ።
1KI 3:22 ሀንኮ ማጫስያ፥ “አካይ፥ ፓፃ ደኤይስ ታ ናኣ፤ ሀይቅዳይስ ነ ናኣ” ያጋሱ። ሽን ኮይሮ ማጫስያ ዛራዳ፥ “አካይ፥ ሀይቅዳይስ ነ ናኣ፤ ፓፃ ደኤይስ ታ ናኣ” ያጋሱ። ሄሳዳ ግድ ኤንቲ ካዋ ስንꬃን ፓላምዶሶና።
1KI 3:23 ካዎይ ሶሎሞነይ፥ “ሀ ማጫስያ፥ ‘ፓፃ ደእያ ናአይ ታይሳ፤ ሀይቅዳይስ ነይሳ’ ያጋዉሱ፤ ሀንክያካ፥ ‘አካይ፥ ነ ናአይ ሀይቅዳይሳ፤ ታ ናአይ ፓፃ ደኤይሳ’ ያጋዉሱ” ያግስ።
1KI 3:24 ካዎይ፥ “ታዉ ማሻ ኤክድ ዪተ” ያግን፥ ኤንቲ እያዉ ማሻ ኤህዶሶና።
1KI 3:25 ካዎይ፥ “ፓፃ ደእያ ናኣ ናምኡ ከስድ ቃንፅድ፤ እስ ባጋ ሀንስ እምተ፤ እስ ባጋ ህንስ እምተ” ያግስ።
1KI 3:26 ፓፃ ደእያ ናአይ እባ ግድዳ ማጫስያ ባ ናኣስ ምሸታዳ፥ “ታ ጎዳዉ፥ ፓፃ ደእያ ናኣ እዉ እማ! እያ ዎꬎፓ” ያጋሱ። ሽን ሀንክያ፥ “ታዉካ ነዉካ ግዶፖ፤ ናምኡ ከይድ ቃንፀቶ” ያጋሱ።
1KI 3:27 ካዎይ፥ “ናኣ ዎꬎፕተ፤ ሀ ፓፃ ደእያ ናኣ ሀ ኮይሮ ማጫሴስ እምተ፤ ናኣ አይያ እዮ” ያግድ ፕርድስ።
1KI 3:28 እስራኤለ አሳ ኡባይ ካዎይ ፕርድዳ ፕርዳ ስእዳ ዎደ፥ ኤንቲ ካዋ ዳሮ ቦንችዶሶና። አሳስ ፅሎተꬃን ፕርዳናዉ እያዉ ጭንጫተꬅ ፆሳፈ እመትዳይሳ በእዶሶና።
1KI 4:1 ካዎይ ሶሎሞነይ እስራኤለ ቢታ ኡባ ቦላ ካዎትስ።
1KI 4:2 እ ሹምዳ አሳይ ሀይሳፈ ካልድ ፃፈትዳይሳታ፤ ሳዶቃ ናአይ አዛርያስ ካህነ፤
1KI 4:3 ሺሻ ናይት ኤልሆረፍነ አክይ ዋና ፃፈታ፤ አህሉዳ ናአይ እዮሳፈፅ ታርከ ፃፈ፤
1KI 4:4 ዮዳሄ ናአይ ባናይ ቶራ ሞጮና፤ ሳዶቅነ አብያታር ካህነታ።
1KI 4:5 ናታና ናአይ አዛርያስ ደርያ አይሰይሳታ ሀላቃ፤ ናታና ናአይ ካህነይ፥ ዛቡድ ካዋ ዞረይሳ፤
1KI 4:6 አህሳር ካዎ ጋꬎ ሀላቃ፤ አብዳ ናአይ አዶንራም ማዳ ኦይሳታ ሀላቃ።
1KI 4:7 ቃስ ሶሎሞነስ እስራኤለ ቢታን ታማነ ናምኡ ደረ አይስያ ሀላቃት ደኦሶና፤ ኤንቲ ካዋስነ ካዋ ሶን ደእያ አሳ ኡባስ ምያ ካꬃ ኤሄይሳታ። ኤንታፈ እሶይ እሶይ ላይꬃ ግዶን እስ እስ አጌና ካꬅ ኤሄስ።
1KI 4:8 ኤንታ ሱንꬃይ ሀይሳፈ ካልድ ፃፈትስ። በንሁር ደረይ ዳርያ ኤፍሬማ ቢታ አይሰይሳ።
1KI 4:9 ባንፀቃር ማቃፃ፥ ሻአልብማ፥ ቤት-ሳሜሳነ ኤሎን-ቤት-ሀና ካታማታ አይሰይሳታ።
1KI 4:10 በንሄሰድ አሩቦታ ቢታ አይሰይሳ፤ ሶኮ ቢታይነ ሄፌራ ቢታይ ኡባይ እያባ።
1KI 4:11 በን-አምናዳብ፥ በናፎታ ዶራ ቢታ አይሰይሳ፤ እ ሶሎሞነ ናእዉ ፃፋቶ ኤክስ።
1KI 4:12 አህሉዳ ናአይ ባአና፥ ታናካነ ማግዶ ካታማታ፥ እዝራኤለፐ ጋርሳን ፃርታና ማታን ደእያ ቤት-ሳና ቢታ ኡባ፥ ቤት-ሳናፐ ብድ አቤል-ማሆላራ ካንꬅድ፥ ዮቅማኣማ ፕንꬅ ጋካናዉ ደእያ ካታማታ አይሴስ።
1KI 4:13 በንግቤር ጋላዳን ራሞታ ካታማ፥ ጋላዳን ምናሰ ናኣ ያእራ ካታማታ፥ ባሳነን አርጎባ ቢታነ ዩሾን ግምበይነ ግምበ ፐንገታስ ናሰ ብራታ ልዮት ደእያ ኡሱፑን ታሙ ካታማታ አይሴስ።
1KI 4:14 እዶ ናአይ አህናዳብ ማሀናይማ ቢታ አይሴስ።
1KI 4:15 አክማስ ንፍታለመ ቢታ አይሴስ፤ እ ሶሎሞነ ናእዉ ባስማቶ ኤክስ።
1KI 4:16 ኩሳ ናአይ ባኣን አሴራ ቢታነ ባሎታ ካታማ አይሴስ።
1KI 4:17 ፓሩሀ ናአይ እዮሳፈፅ ይሳኮራ ቢታ አይሴስ።
1KI 4:18 ኤላ ናአይ ሳም ብንያመ ቢታ አይሴስ።
1KI 4:19 ኡረ ናአይ ጋቤር፥ ጋላዳ ቢታን አሞረ ካዎይ ስሆንነ ባሳነ ካዎይ ኦገይ ካዎትዳ ቢታ አይሴስ፤ ሄ ቢታታ አይሰይ እያ ፃላላ።
1KI 4:20 ይሁዳ አሳይነ እስራኤለ አሳይ አባ ጋፃን ደእያ ሻፈዳ ዳርዶሶና፤ ኤንቲ ምሸነ ኡይሸ ኡፋይትድ ደእዶሶና።
1KI 4:21 ሶሎሞነይ ኤፍራፂሳ ሻፋፐ ዶምድ ፍልስፄመ ቢታ ጋካናዉ፥ ያፐ ካንꬅድ ግብፀ ዛዋ ጋካናዉ ደእያ ካዎተꬃታ ኡባ ሃርስ። ሄ ቢታ አሳት እያዉ ጊራ ጊርዶሶና፤ እያ ደኦ ላይꬃ ኡባን እያዉ ሃረትዶሶና።
1KI 4:22 ሶሎሞነስ ጋላስ ጋላስ ሺቅያ ካꬅ፤ እሻታሙ ኩንታለ ሎኦ ꬊለ፥ ፄቱ ኩንታለ ጮ ꬊለ፥
1KI 4:23 ꬊከትዳ ታሙ ሳንጋታ፥ የዳን ምዳ ላታሙ መሄነ ፄቱ ዶርሳታ፤ ቃስ ጮፎሾታ፥ ጋራታ፥ ገንኤታነ ኦርደ ኩቶታ ኮሼስ።
1KI 4:24 ሶሎሞነይ ኤፍራፂሳ ሻፋፐ ዶሎሀ ባጋራ ደእያ ካዎተꬃታ ኡባ ትፍሳ ካታማፐ ዶምድ ጋዛ ካታማ ጋካናዉ ሃርስ፤ ባ ዩሹዋን ደእያ ቢታ ኡባራ ሳሮ ደእስ።
1KI 4:25 እያ ደኦ ላይꬃ ኡባን ይሁዳ አሳይነ እስራኤለ አሳይ ዳነፐ በርሳበ ጋካናዉ፥ ኡባይ ባ ዎይነ ጋርሳንነ ባላሰ ጋርሳን ሳሮ ደእዶሶና።
1KI 4:26 ሶሎሞነስ ኦላ ፓራ ጋረታ ጎችያ ኦይታሙ ሙኩሉ ጋፃታ ፓራትነ ታማነ ናምኡ ሙኩሉ ፓራ አሳት ደኦሶና።
1KI 4:27 ሄ ደርያ አይሰይሳት አጌናን አጌናን ካዎይ ሶሎሞነይነ እያ ግብራ ማናዉ ይዳ አሳ ኡባይ ምያባ ሺሾሶና። ኤንቲ እያፐ አይባካ ፓጭሶኮና።
1KI 4:28 ኤንቲ ጋረ ፓራትነ ሀንኮ ፓራት ማናዉ ባንጋነ ፔን ኤንታ ጋክዳ ዳላ ኤህድ እያ ምንጃ ኬꬃን ዎꬅዶሶና።
1KI 4:29 ፆሳይ ሶሎሞነስ ጭንጫተꬅ፥ አኬካነ ዳልጋ ዎዛና እሚስ።
1KI 4:30 ሶሎሞነ ጭንጫተꬃይ ዶሎሀ ባጋራ ደእያ አሳ ጭንጫተꬃፈነ ግብፀታ ጭንጫተꬃፈ አꬌስ።
1KI 4:31 እ አሳ ኡባፈ አꬍያ ጭንጫ፤ እያ ጭንጫተꬃይ፥ ኤዝራሄ አድያ ኤታናፐ፥ ማሆላ ናይታ ሄማናፐ፥ ካልኮላፐነ ዳርዳአፐ አꬌስ። እያ ሱንꬃይ ዩሹዋን ደእያ ካዎተꬃታ ኡባ ጋክስ።
1KI 4:32 እ ሄꬑ ሙኩሉ ሌምሶታ ኦድስ፤ እያ ማዝሙረት እስ ሙኩሉነ እቻሻ።
1KI 4:33 ሶሎሞነይ ልባኖሰ ዝጋፐ ዶምድ፥ ግምበ ኬꬃ ቦላ ዶልያ ህሶጰ ምꬃ ጋካናዉ ሌምስድ ኦድስ። ሄሳዳካ፥ መሄታባ፥ ዶአታባ፥ ካፎታባ፥ ሳአራ ጎሸትያ መተꬃታባ ሞሎታባ ታማርስስ።
1KI 4:34 እያ ጭንጫተꬃ ስእዳ ሳአን ደእያ ካዎት ኡባይ ኪትን፥ ካዎተꬃ ኡባፈ አሳይ ሶሎሞነ ጭንጫተꬃ ስአናዉ ዮሶና።
1KI 5:1 ፅሮሳ ካዎይ ክራም ዳዊታራ ስጋን ጋምእዳ ግሾ፥ ሶሎሞነይ ባ አዋ ዳዊታ በሳን ካዎታናዉ ትየትዳይሳ ስእድ፥ አሰ ሶሎሞነኮ ኪትስ።
1KI 5:2 ሶሎሞነይ ዛሪድ፥
1KI 5:3 “ጎዳይ እያ ሞርከታ እያ ቶሁዋፐ ጋርሳን ሃርሳና ጋካናዉ፥ ታ አዋ ዳዊታ ቦላ ደንድዳ ኦላ ጋሶን፥ ጎዳ ባ ፆሳ ሱንꬃስ ፆሳ ኬꬅ ኬፅቦናይሳ ነ ኤራሳ።
1KI 5:4 ሽን ሀእ ጎዳይ ታ ፆሳይ ታዉ ሸምፖ እሚስ፤ ታዉ አይባ ሞርከይ ዎይኮ ኢታባ ኦይ ባዋ።
1KI 5:5 ጎዳይ ታ አዋ ዳዊታስ፥ ‘ታኒ ነ በሳን፥ ነ አራታን ካዎꬅያ ነ ናአይ ታ ሱንꬃስ ኬ ኬፃና’ ግዳይሳዳ ታኒ ጎዳ ታ ፆሳ ሱንꬃስ ኬꬅ ኬፃናዉ ሀልቻስ።
1KI 5:6 ሄሳ ግሾ፥ ልባኖሰፐ ዝጋ ማስያ አሳታ የዳ፤ ታ አሳት ነ አሳታራ ኦꬃና። ነ አሳታስ ነ ቃንፃ ግዳባ ታ ቃንፃና። ስዶና አሳታዳ ምꬃ ማሰꬃ ሂላ ኑ አሳይ ኤሮናይሳ ነ ኤራሳ” ያግስ።
1KI 5:7 ክራም ሶሎሞነ ኪታ ስእድ ዳሮ ኡፋይትስ፤ “ሀ ግታ ካዎተꬃ ሃራና መላ ዳዊታስ ሀ ጭንጫ ናኣ እምዳ ጎዳይ ጋላተቶ” ያግስ።
1KI 5:8 ሄሳፈ ጉየ ክራም ሶሎሞነኮ ሀይሳዳ ያግድ ኪትስ፤ “ነ ኪትዳ ኪታይ ታና ጋክስ። ኔኒ ኮይዳባ ታኒ ኦꬃና፤ ዝጋነ ፂዳ ታ ነዉ ሺሻና።
1KI 5:9 ታ አሳይ ዱሩማ ጪነꬃ ልባኖሰፐ አባኮ ጋዛና። ታኒ ቃሽሳዳ፥ አባ ቦላራ ቶከትድ ነ ኮይያ በሲ ጋꬃናዳ ኦꬃና፤ ያን ኤንቲ ብርሽድ ነ አሳስ እማና። ሄሳፈ ጉየ፥ ኔኒ ነ ባጋራ ታ ካዎ ኬꬃን ደእያ አሳስ ምያባ ኪታዳ ታ አሙዋ ፖላና” ያግስ።
1KI 5:10 ሄሳዳ ኦꬅድ ክራም ሶሎሞነይ ኮይዳ ኬና ዝጋነ ፂዳ እሚስ።
1KI 5:11 ሶሎሞነይ ካዎ ኬꬃን ደእያ አሳይ ማና መላ 20,000 ኩንታለ ግስተነ 400,000 ልትሮ ሻማሆ ዛይተ ላይꬃን ላይꬃን ፓጮና ክራማስ እሚስ።
1KI 5:12 ጎዳይ ሶሎሞነስ እማና ግዳይሳዳ፥ እያዉ ጭንጫተꬅ እሚስ። ክራምነ ሶሎሞነይ ባንታ ግዶን ሳሮ ደእዶሶና፤ ኤንቲ ናምአይ ባንታ ግዶን ጫቅዶሶና።
1KI 5:13 ካዎይ ሶሎሞነይ እስራኤለ 30,000 ማዳ ኦይሳታ ዶርድ ከስስ።
1KI 5:14 አዶንራማ ጌተትያ አድያ ኤንታ ቦላ ሀላቃ ኦꬅድ ሹምስ። ሄ ኦሳንቾታ ታሙ ታሙ ሙኩላን ሻክድ፥ ሄꬑ ጩጋ ከስስ፤ እስ እስ ጩጋይ ታራን ታራን ብድ፥ እስ አጌና ልባኖሰን ኦꬃናዳነ ናምኡ አጌና ባንታ ሶን ዳናዳ ኦꬅስ።
1KI 5:15 ሶሎሞነስ ቶሆ ቶክያ 70,000 አሳትነ ሹቹ ቆእያ 80,000 አሳት ገዘ ቢታን ደኦሶና።
1KI 5:16 ኤንታ ቦላ ሀላቃ ግድድ ኦስስያ 3,300 አሳታ ሹምስ።
1KI 5:17 ካዋ ሶሎሞነ ኪታን፥ ፆሳ ኬꬃ ባሱዋስ ግዳና መላ ግታ ሹቻታ ቆእድ ጊግስዶሶና።
1KI 5:18 ሶሎሞነ አሳይነ ክራማ አሳይ ኩሸ ሂላ ኤረይሳት፥ ገባላ አሳራ ግድድ፥ ፆሳ ኬꬃ ኬፃናዉ ምꬅ ቃንፅድ፥ ሹቻ ቆእድነ ማስድ ጊግስዶሶና።
1KI 6:1 እስራኤለ አሳይ ግብፀ ቢታፈ ከይዳ 480 ላይꬃን፥ ሶሎሞነይ እስራኤለ ቦላ ካዎትዳ ኦይዳንꬆ ላይꬃን፥ ዚፋ ጌተትያ ናምአንꬆ አጌናን፥ ሶሎሞነይ ጎዳ ፆሳ ኬꬅ ኬፃናዉ ዶምስ።
1KI 6:2 ሶሎሞነይ ኬፅዳ ፆሳ ኬꬃይ አዱሳተꬃይ ኡሱፑን ታሙ ዋꬋ፤ ጎምፓይ ላታሙ ዋꬋ፤ ጌሳይ ሀስታሙ ዋꬋ።
1KI 6:3 ፆሳ ኬꬅ ገልያ በሳን ደእያ ባራንዳ ጎምፓይ ፆሳ ኬꬃ ጎምፓ መላ ላታሙ ዋꬋ፤ ኬꬃ አዱሳተꬃይ ፆሳ ኬꬃ ገልያ በሳ ጋካናዉ ታሙ ዋꬋ።
1KI 6:4 ፆሳ ኬꬃስ ሶ ባጋራ ዳልጋ፥ ካረ ባጋራ ፁንꬃ ማስኮተት ደኦሶና።
1KI 6:5 ፆሳ ኬꬃ ማታን፥ ጌሻ በሳነ ኡባፋ ጌሻ በሳ ዩሹዋን ሀራ ፖቀ ኬፅስ፤ ሄ ዩሹዋን ክፍለታ ኬፅስ።
1KI 6:6 ኮይሮ ፖቅያ ጎምፓይ እቻሹ ዋꬋ፤ ናምአንꬆ ፖቅያ ጎምፓይ ኡሱፑን ዋꬋ፤ ሄꬓንꬆ ፖቅያ ጎምፓይ ላፑን ዋꬋ። እስ እስ ፖቅያ ጎዳይ ጋርሳ ባጋራ ደእያ ጎዳፐ ሌኦ። ጌሻ በሳ ካንꬅድ ገሎና መላ ፆሳ ኬꬃ ጎዳስ ካረ ባጋራ ተቀ ዎꬅስ።
1KI 6:7 ፆሳ ኬꬃይ ሹቻ ቆእያ በሳን ማሰትዳ ሹቻ ፃላላን ግምበትስ፤ ፆሳ ኬꬃይ ግምበትያ ዎደ ናርቃ፥ ካልታ፥ ዎይኮ ሀራ አይ ብራታ ግርስ ፆሳ ኬꬃን ስኤትቤና።
1KI 6:8 ጋርሳራ ደእያ ፖቅያ ገልያ ፐንገይ ፆሳ ኬꬃፈ ዱገሀ ባጋራ ደኤስ፤ ሄ በሳፈ ናምአንꬆ ፖቅያነ ሄꬓንꬆ ፖቅያ ባናዉ የꬍድ ከይያ ደꬃት ደኦሶና።
1KI 6:9 ሄሳዳ ኦꬅድ፥ ሶሎሞነይ ኬꬃ ኬፅድ ዉርስስ፤ ኮርንስያ ማሰትዳ ዝጋ ምꬃን ካምስ።
1KI 6:10 ፆሳ ኬꬃ ዩሹዋን ፖቀታ ኬፅድ ኦንግስ፤ ኤንታ እሱዋ እሱዋ ጌሳይ እቻሹ ዋꬋ ግድድ፥ ጎዳራ ዝጋ ምꬃን ኦይከትስ።
1KI 6:11 ጎዳይ ሶሎሞነኮ፥
1KI 6:12 “ሀ ኔኒ ኬፅያ ፆሳ ኬꬃን፥ ኔኒ ታ አዋጁዋ ካልኮ፥ ታ ዎጋ ኦꬅኮ፥ ታ ኪታ ናግኮነ ታ ኪታ ኪተትኮ፥ ታኒ ነ አዋ ዳዊታስ እምዳ ኡፋይሳ ቃላ ነ ባጋራ ፖላና።
1KI 6:13 ታኒ እስራኤለ አሳ ግዶን ዳና፤ ታኒ ታ አሳ እስራኤለ አግከ” ያግስ።
1KI 6:14 ሶሎሞነይ ፆሳ ኬꬃ ኬፅድ ኦንግስ።
1KI 6:15 ፆሳ ኬꬃ ጋꬃ ባጋ ጎዳ፥ ዉይገፐ ብድ ካራ ጋካናዉ ማሰትዳ ዝጋ ምꬃን ካምስ፤ ዉይግያን ማሰትዳ ፂዳ ምꬅ ሂፅስ።
1KI 6:16 ፆሳ ኬꬃ ግዶን ኡባፈ ጌሻ በሳ መꬋናዉ ጉየ ባጋራ ላታሙ ዋꬋ ግድያ በሰ ሻክድ፥ ዉይገፐ ካራ ጋካናዉ ማሰትዳ ዝጋ ጎዳ ኤስስ።
1KI 6:17 ሄ ኡባፈ ጌሻ በሳፈ ስንꬃ ባጋራ ደእያ ዉይግያ አዱሳተꬃይ ኦይታሙ ዋꬋ።
1KI 6:18 ፆሳ ኬꬃ ሶ ባጋይ ጎሰነ ጪሻ ምስልያ መꬍዳ ማሰትዳ ዝጋ ምꬃን ካመትስ፤ ኡባይ ዝጋፐ ኦሰትስ፤ አይ ሹችካ በንተና።
1KI 6:19 ሶሎሞነይ ጎዳ ጫቆ ታቦትያ ዎꬃናዉ ፆሳ ኬꬃ ግዶን ኡባፈ ጌሻ በሳ ጊግስስ።
1KI 6:20 ኡባፈ ጌሻ በሳይ ላታሙ ዋꬋ አዱሰ፥ ላታሙ ዋꬋ ዳልጋነ ላታሙ ዋꬋ ꬎቃ። ሶሎሞነይ ሄ ኡባፈ ገሻ በሳ ጋꬃ ባጋ ዋላህ ባይና ዎርቀን ላንፅስ፤ ያርሾ በሳይ ማሰትዳ ዝጋ ምꬃን ካመትስ።
1KI 6:21 ሶሎሞነይ ፆሳ ኬꬃ ግዱዋ ዋላህ ባይና ዎርቀን ላንፅስ፤ ዎርቃን ላንፀትዳ ቆልአ ገልያ ፐንግያ ቦላ ያነ ሃነ ጋክያ ዎርቃ ሳንꬃላታ ቶልድ አሌቅስስ።
1KI 6:22 ኬꬃ ግዶ ባጋ ዎርቃን ላንፅስ፤ ኡባፈ ጌሻ በሳ ስንꬃን ደእያ ያርሾ በሳ ዎርቃን ላንፅስ።
1KI 6:23 ኡባፈ ጌሻ በሳን ዎꬃናዉ እሶይ እሶይ ታሙ ዋꬋ አዱቅያ ሻማሆፐ ኦሰትዳ ናምኡ ክሩበ ምስለታ ማስድ ጊግስስ።
1KI 6:24 ኮይሮ ክሩብያ ቀፈይ፥ እሶይ እቻሹ ዋꬋ፤ ናምአንꬆይ እቻሹ ዋꬋ፤ ኮይሮ ቀፍያ ፄራፐ ብድ ናምአንꬆ ቀፍያ ፄራ ጋካናዉ ታሙ ዋꬋ።
1KI 6:25 ናምአንꬆ ክሩበይ ታሙ ዋꬋ፤ ናምኡ ክሩበታ ሀኖታይነ መꬎይ እስ መላ።
1KI 6:26 እስ ክሩብያ ጌሳይ ታሙ ዋꬋ፤ ናምአንꬆ ክሩብያ ጌሳይ ሄሳ መላ።
1KI 6:27 ሶሎሞነይ ፆሳ ኬꬃን ደእያ ኡባፈ ጌሻ በሳን ክሩበታ ዎꬅስ። ኤንታ ቀፈይ ምጨትድ ኡትስ፤ እስ ክሩብያ ቀፈይ እስ ባጋ ጎዳ ቦችያ ዎደ፥ ሀንኮ ክሩብያ ቀፈይ ሀንኮ ባጋ ጎዳ ቦቼስ፤ ኤንታ ናምኣ ቀፈይ ሶ ግዶን እሶይ እሱዋ ቦቾሶና።
1KI 6:28 ሶሎሞነይ ክሩበታ ዎርቃን ላንፅስ።
1KI 6:29 ቆልአነ ዉይገ ጎዳ ኡባ ክሩበታ፥ ዛምባነ ጪሻ ምስለን አሌቅስስ።
1KI 6:30 ፆሳ ኬꬃ ግዶ ክፍልያ ዉይግያ ካረ ባጋ ክፍልያ ዉይግያ ዎርቃን ላንፅስ።
1KI 6:31 ኡባፈ ጌሻ በሳ ገልያ ፐንግያን ሻማሆ ምꬃፈ ሳንቃ ጊግስስ። ፐንገ ጎባነታስ እቻሹ ባጋራ ማዛነይ ደኤስ።
1KI 6:32 ሻማሆ ምꬃፈ ኦሰትዳ ናምኡ ሳንቃታ ቦላ ክሩበታ፥ ዛምባነ ጪሻ ምስለ ጊግስድ ሳንቃታ፥ ክሩበታነ ዛምባ ዎርቃን ላንፅስ።
1KI 6:33 ሄሳዳካ፥ ፆሳ ኬꬃ ገልያ ፐንግያ ሻማሆፐ ኦሰትዳ ኦይዱ ማዛነራ ደእያ ሳንቃ ጊግስስ።
1KI 6:34 እ ሄ ፐንግያ እስ እስ ሳንቃይ ግዶን ዳኮትድ ዶየትያ ናምኡ ሳንቃታ ከስስ።
1KI 6:35 ክሩበታ፥ ዛምባነ ጪሻ ምስለታ ኤንታ ቦላ ዎꬅስ፤ ኤንታ ቦላ ዎርቃ እስ ግና ኦꬅድ ላንፅስ።
1KI 6:36 ሶ ባጋራ ደእያ ዳባባ ግምብስ፤ ሄ ግምብያ ቦላ ማሰትዳ ሄꬑ ሹቹ፥ እሱዋ እሱዋ ቦላ ዎꬅድ፥ እስ ማሰትዳ ዝጋ ኤንታ ቦላ ዎꬅድ ግምብስ።
1KI 6:37 ፆሳ ኬꬃ ባሶይ ሶሎሞነይ ካዎትዳ ኦይዳንꬆ ላይꬃን፥ ዚፋ ጌተትያ ናምአንꬆ አጌናን ባሰትስ።
1KI 6:38 ሶሎሞነይ ካዎትዳ ታማነ እስንꬆ ላይꬃን፥ ቡላ ጌተትያ ሆስፑንꬆ አጌናን ፆሳ ኬꬃይ ሀልችዳይሳ መላ ኬፀትድ ዉርስ። ሶሎሞነይ ፆሳ ኬꬃ ላፑን ላይꬃን ኬፅድ ዉርስስ።
1KI 7:1 ሶሎሞነይ ባ ጋꬉዋ ታማነ ሄꬑ ላይꬃን ኬፅድ ዉርስስ።
1KI 7:2 “ልባኖሰ ዎራ ኬꬃ” ጌተትያ ኬꬃ ሶሎሞነይ ኬፅስ፤ ሄ ኬꬃ አዱሳተꬃይ ፄቱ ዋꬋ፤ ጎምፓይ እሻታሙ ዋꬋ፤ ጌሳይ ሀስታሙ ዋꬋ። ዝጋ ቱቀት ኦይዱ ማራን ኤቅዶሶና፤ ማሰትዳ ዝጋ ምꬃት ኤንታ ቦላ ዎꬍዶሶና፤
1KI 7:3 ዝጋ ምꬃት ሄꬑ ማራን፥ እስ እስ ማራን ታማነ እቻሹ ምꬃት ደኦሶና፤ ኤንቲ ኩመꬅ ኦይታማነ እቻሻ።
1KI 7:4 ሄ ኬꬃስ ማስኮተት ሄꬑ ማራን ደኦሶና፤ ኤንቲ እሶይ እሱዋ ስንꬃን ደኦሶና።
1KI 7:5 ፐንገትነ ማስኮተት ኦይዱ ማዛነራ ደኦሶና፤ ማስኮተት ሄꬑ ማራን ግድድ፥ እሶይ እሱዋ ስንꬃን ደኦሶና።
1KI 7:6 ሶሎሞነይ፥ “ቱኡቀይ ኩምዳ ኬꬅ” ጌተትያ ኬꬅ ኬፅስ፤ ሄ ኬꬃ አዱሳተꬃይ እሻታሙ ዋꬋ፤ ጎምፓይ ሀስታሙ ዋꬋ። ሄ ኬꬃ ስንꬃን ዳሮ ቱቀን ዘምፕዳነ ቦላራ ካራን ካመትዳ ባራንድ ደኤስ።
1KI 7:7 ሶሎሞነይ ፕርዳ አራታይ ደእያ “ፕርዳ ኬꬅ” ኬፅስ፤ ሄ ኬꬃይ ዉይገፐ ብድ ካራ ጋካናዉ ዝጋን ካመትድ ኡትስ።
1KI 7:8 ፕርዳ ኬꬃፈ ጉየ ባጋራ ደእያ ሀራ ዳባባን ባዉ ዳናዉ ካዎ ጋꬎ ሀንኮ ኬꬃታዳ ኦꬅድ ኬፅስ። ባ ማቸ፥ ግብፀ ካዋ ናኤስ፥ ሄ ኬꬃ መላ ሀራ ኬ ኬፅስ።
1KI 7:9 ሀ ኬꬃት ኡባይ፥ ካረፐ ዶምድ ድርሳፈ ሶራ ደእያ ግታ ጉታራ ጋካናዉ፥ ባሱዋፐ ዶምድ ካራ ጋካናዉ፥ ልክድ ማስዳነ ሶራነ ካረራ ጊግስዳ ሎኦ ሹቻን ኦሰትዶሶና።
1KI 7:10 ግምበይ ሂፀትዳይ ታሙ ዋꬋ ዎይኮ ሆስፑን ዋꬋ ግድያ ሎኦ ማሰትዳ ግታ ሹቻና።
1KI 7:11 ቦላ ባጋራ ልከትድ ማሰትዳ ሎኦ ሹችነ ዝጋ ምꬅ ደኤስ።
1KI 7:12 ግታ ዳባባ ዩሹዋን ደእያ ግምበይ ፆሳ ኬꬃዳነ ባራንዳዳ ማሰትዳ ሄꬑ ሹቹ፥ እሱዋ እሱዋ ቦላ ዎꬅድ፥ እስ ማሰትዳ ዝጋ ኤንታ ቦላ ዎꬅድ ግምብስ።
1KI 7:13 ካዎይ ሶሎሞነይ፥ ክራማ ጌተትያ አድያ ፅሮሳፐ ኤህስ።
1KI 7:14 ክራማ አይያ አምኦ፤ እያ ንፍታለመ ኮቸ። እያ አዋይ ፅሮሳ አስ። ክራም ናሰ ብራታ ቆፅያ ሂል ደእያ አሰ፤ እ ናሰ ብራታ ቆፅድ ኦꬅያባን ዳሮ ሎህዳ አስ፤ እ ሶሎሞነኮ ይድ እያ ኦሶ ኡባ ኦꬅስ።
1KI 7:15 ክራም እሱዋ እሱዋ ጌሳይ ታማነ ሆስፑን ዋꬋ አዱቅድ፥ ዩሾይ ታማነ ናምኡ ዋꬋ ዳልግዳ ናምኡ ቱሳታ ናሰ ብራታ ሴርስድ ከስስ። ሄ ቱሳ ኦርደተꬃይ ኦይዱ ብራ። ናምአንꬆ ቱቀይካ ሄሳ መላ።
1KI 7:16 ሄሳዳካ፥ ቱሳታ ሁጰን ዎꬃናዉ ናምኡ ጉምቦታ ናሰ ብራታ ሼሽድ፥ መꬍስ፤ እስ እስ ጉምቦይ እቻሹ ዋꬋ አዱቄስ።
1KI 7:17 ቱኡሳ ሁጰን ደእያ እስ እስ ጉምቦታ ግተዳ ኦꬅዳ ላፑን ሳንꬃላታ ኦꬅስ።
1KI 7:18 ቱሳታ ፄራን ደእያ ጉምቦታ አሌቅሳናዉ ናምኡ ማራን ኦሮማነ ምስለ አሌቅስስ።
1KI 7:19 ባራንዳን ኤቅዳ ቱሳታ ቦላ ደእያ ጉምቦት ጪሻ መꬎን አሌቀትዶሶና፤ ኤንታ ጌሳይ ኦይዱ ዋꬋ።
1KI 7:20 ናምኡ ቱቀታ ሁጰን ደእያ ጉምቦታን ገርቶ ግድድ ኡትዳ በሳፈ ቦላ ባጋራ፥ ሳንꬃላታ ግትያ ካልድ፥ ናምኡ ፄቱ ኦሮማነ ምስለት ናምኡ ማራን ዩይ አꬍድ ደኦሶና።
1KI 7:21 ክራም ሄ ናምኡ ቱሳታ ፆሳ ኬꬃ ባራንዳ ማታን ኤስስ። ኡሻቻ ባጋራ ኤቅዳ ቱሳ ያክና ግድ ሱንꬅስ፤ ሀድርሳ ባጋራ ኤቅዳ ቱሳ ቦኤዛ ግድ ሱንꬅስ።
1KI 7:22 ቱሳታ ሁጰን ደእያ ጉምቦት ጪሸ ዳንድ መትዶሶና። ሄሳዳ ሀንድ ቱሳታ ኦሶይ ፖለትስ።
1KI 7:23 ክራም አባ ሳንያ ጌተትያ እስ ዳሮ ግታ ሳንያ ናሰ ብራታ ሼሽድ መꬍስ። ሄ አባ ሳንያ ዶናይ ሀ ጋፃፐ ያ ጋፃ ጋካናዉ ታሙ ዋꬋ፤ ጌሳይ እቻሹ ዋꬋ፤ ዩሾይ ሀስታሙ ዋꬋ።
1KI 7:24 አባ ሳንያ ዶናን ካረ ባጋራ ዝቅ ግድ፥ እያራ ኦይከትድ መትዳ ጎሰ ምስለት ደኦሶና፤ ሄ ጎሰታ ምስለት ናምኡ ማራን፥ እስ እስ ዋꬋን ታማይ ታማይ ዩይ አꬍድ ሹየትዶሶና።
1KI 7:25 አባ ሳነይ ናሰ ብራታፐ መትዳ ታማነ ናምኡ ቦራታ ምስለታ ዞኩዋን ኡትስ። ቦራ ምስለታፐ ሄꬓት ፑደሀ ባጋ፥ ሄꬓት ዶሎሀ ባጋ፥ ሄꬓት ዱገሀ ባጋ፥ ሄꬓት ዉሎሀ ባጋ ስሚድ ፄሎሶና። አባ ሳነይ ኤንታ ቦላ ኡትስ።
1KI 7:26 አባ ሳነይ ኦይዱ ብራ ኦርደ፤ እያ ዶናይ ዋንጫ ዶና መላ፤ ጪሸ ዳኔስ። አባ ሳነይ ኦይታማነ እቻሹ ሙኩሉ ልትሮ ግድያ ሃ ኦይኬስ።
1KI 7:27 ክራም ታሙ ጋረታ ናሰ ብራታፐ መꬍስ። ሄ ጋረት እሶይ እሶይ ኦይዱ ዋꬋ አዱሰ፤ ኦይዱ ዋꬋ ዳልጋነ ሄꬑ ዋꬋ ꬎቃ።
1KI 7:28 ሄ ጋረት ሀይሳዳ ኦሰትዶሶና፤ ፑደ ኤቅዳ ኦይዱ ብራታ ቦላ ፕድ ግዳ ሎቸ ናሰ ብራታት ኦይከትድ ኡትዶሶና።
1KI 7:29 ሄ ብራታ ቦላ ጋሞ፥ ቦርነ ክሩበ ምስለት ደኦሶና፤ ጋሞነ ቦራ ምስለታፐ ሁጰራነ ቶሆራ ደእያ ብራታታ ቦላ ቆፅድ መꬍዳ ጪሻ ኤንጩርሳ ምስለት ደኦሶና።
1KI 7:30 እስ እስ ጋርያስ ናሰ ብራታፐ ኦꬅዳ ኦይዱ ገርቶትነ ገርቶታ ጋꬅድ ዋፅያ ናሰ ብራታ ካሶት ደኦሶና። ሄሳዳካ፥ ኦይዱ ማዛነን ከርያ ዘምፕስያባት ደኦሶና። ሄ ዘምፕስያባት ጪሻ ኤንጩርሳ ምስለታን አሌቀትድ ኡትዶሶና።
1KI 7:31 ጋርያ ዘምፕስያ ሚሸታ ሁጰን ገርቶት ኡትዳ ዶያ በሲ ደኤስ፤ ሄ ዶያይ ጋርያ ፄራፐ ፑደ እስ ዋꬋ ꬎቁ ግድ፥ ዱገ ታካꬎ ዝቅ ግድ መትስ። ሄ ዶያ በሳ ዶና ዩሾይ ምስለን አሌቀትስ።
1KI 7:32 ገርቶታ ጌሳይ እስ ዋꬋነ ታካꬎ፤ ገርቶት ሎቸ ናሰ ብራታታስ ጋርሳ ባጋራ ደኦሶና። ገርቶት ኦይከትድ ኡትዳ ካሶት ጋርያራ ኦይከትድ ኡትዶሶና።
1KI 7:33 ገርቶት ኦላ ፓራ ጋረ ገርቶታ መላ መትዶሶና፤ ገርቶታ ጋꬅድ ኦይክያ ካሶት፥ ማጫራትነ ኤንታ ኦይክያ ሚሸት ኡባይ ናሰ ብራታፐ ኦሰትዶሶና።
1KI 7:34 ሄ ጋረታ ኡባ ማዛነታስ ኤንታ ቶሆሶራ ቶሆሶራ ኤንታራ እሶ ግድድ ኦይከትዳ ናሰ ብራታፐ ኦሰትዳ ዘምፖት ደኦሶና።
1KI 7:35 እስ እስ ጋርያ ሁጰ ባጋ ዩሹዋን ታካꬎ አዱቅያ ክርክሮይ ደኤስ፤ ዘምፖትነ ሎቸ ናሰ ብራታት ጋርያራ ኦይከትድ፥ እሶ ግድድ ኦሰትዶሶና።
1KI 7:36 ሀ ዘምፖታፐነ ሎቸ ናሰ ብራታታፐ ግዶን ደእያ ዶያ በሳ ኡባይ ክሩበን፥ ጋሞንነ ዛምባ ምስለተን አሌቀትድ ኡትዶሶና፤ ኤንታ ዩሾይ ጪሻ ኤንጩርሳ ምስለን አሌቀትድ ኡትስ።
1KI 7:37 ህዛ ታሙ ጋረት ሀይሳዳ ኦሰትዶሶና፤ ኤንታ ላንፅዳ ሚሸይ እስኖ ግድያ ግሾ ኤንታ ጌሳይነ ኤንታ መꬎይ እስ መላ።
1KI 7:38 ክራም ሜጨትያ ታሙ ከረታ ናሰ ብራታፐ መꬍስ፤ እስ እስ ከርያ ጎምፓይ ኦይዱ ዋꬋ ዳልጋ ግድድ፥ ሆስፑን ፄቱ ልትሮ ሃ ኦይኬስ፤ ታሙ ጋረታስ ሁጰን ሁጰን እስ እስ ሜጨትያ ከረይ ደኤስ።
1KI 7:39 ክራም እቻሹ ጋረታ ፆሳ ኬꬃፈ ፑደሀ ባጋራ፥ እቻሹ ጋረታ ፆሳ ኬꬃፈ ዱገሀ ባጋራ ዎꬅስ፤ ናሰ ብራታፐ ኦሰትዳ አባ ሳንያ ፆሳ ኬꬃፈ ዱገሀ ዶሎሀ ባጋ ዛሪድ ኤስስ።
1KI 7:40 ክራም ቃጰታ፥ አካፋታነ ፃሮታ መꬍስ፤ ያትድ ካዋ ሶሎሞነስ ፆሳ ኬꬃ ኦሱዋ ኦꬅድ ፖልስ።
1KI 7:41 እ ኦꬅዳ ኦሶት፥ ናምኡ ቱሳታ፥ ቱሳታ ሁጰን ደእያ ሳነ ዳንያ ናምኡ ጉምቦታ፥ ቱሳታ ቦላ ደእያ ናምኡ ጉምቦታ አሌቅስያ ናምኡ ሳንꬃላታታ፥
1KI 7:42 እስ እስ ጉምቡዋ ቦላ ናምኡ ማራን ናሰ ብራታፐ ኦሰትዳ እስ እስ ፄቱ ኦሮማነ ምስለታ፥ ኩምꬅ ኦይዱ ፄቱ ኦሮማነ ምስለታ፥
1KI 7:43 ታሙ ጋረታ፥ ጋረታ ቦላ ኡትያ ታሙ ሜቻ ከረታ፥
1KI 7:44 አባነ እያ ካትስያ ታማነ ናምኡ ቦራ ምስለታ፥
1KI 7:45 ከረታ፥ አካፋታነ ፃሮታ። ክራም ካዋ ሶሎሞነስ ፆሳ ኬꬃ ኦሱዋስ መꬍዳ ሚሸታ ኡባ ቁሸትዳ ናሰ ብራታፐ መꬍስ።
1KI 7:46 ካዎይ ሶሎሞነይ ሱኮታፐነ ፃርታናፐ ግዶን፥ ዮርዳኖሰ ደንባን ደእያ፥ ናሰ ብራታ ሼሽያ በሳን ሀይሳታ ኦስስስ።
1KI 7:47 ናሰ ብራታፐ ኦሰትዳ ሚሸይ ዳሮ ግድዳ ግሾ፥ ሶሎሞነይ እያ ማዛንስቤና፤ ሄሳ ግሾ፥ አይ መላ ዴፅያኮ ልከይ ኤረትቤና።
1KI 7:48 ሶሎሞነይ ፆሳ ኬꬃ ግዶን ደእያ ሚሸታ ኡባ ዎርቃፈ መꬍስስ። ሄሳትካ፥ ዎርቃፈ ኦሰትዳ ያርሾ በሳ፥ ጎዳ ስንꬃን ዎꬅያ ኡይꬃይ ኡትያ ፃርጴዛ፥
1KI 7:49 ኡባፈ ጌሻ በሳፈ ስንꬃን ኡሻቻ ባጋራነ ሀድርሳ ባጋራ ኤቅዳ እቻሹ እቻሹ ፆምፐ ዎꬅያ ኮጫታ፥ ጪሻታ፥ ፆምፐታነ ቃጰታ፥
1KI 7:50 ፁአታ፥ ፆምፐ ቶይስያባታ፥ ፃሮታ፥ እፃነ ጩይስያባታ፥ ታማ ኤክያ ሚሸታ፥ ኡባፈ ጌሻ በሳ ቆልአ ፐንገታነ ፆሳ ኬꬃ ካረ ባጋ ፐንገታ ኦይክዳ ማፃፈታ። ሀ ሚሸት ኡባይ ዋላህ ባይና ዎርቃፈ ኦሰትዶሶና።
1KI 7:51 ካዎይ ሶሎሞነይ ፆሳ ኬꬃ ኦሱዋ ኡባ ፖልዳፐ ጉየ፥ እያ አዋይ ዳዊቲ ጎዳስ ዱማይድ ዎꬅዳ ብራ፥ ዎርቃነ ሀራ ሚሸታ ኡባ ኤህድ፥ ፆሳ ኬꬃ ሻሎ ምንጅያ ኬꬃን ዎꬅስ።
1KI 8:1 ሄሳፈ ጉየ፥ ካዎይ ሶሎሞነይ ጎዳ ታቦትያ ዳዊታ ካታማፐ፥ ፅዮነፐ ከስድ፥ ፆሳ ኬꬅ ኤሀናዉ እስራኤለ ጭማታ፥ ኮቻታ ሀላቃታነ እስራኤለ ሶ አሳታ ካለይሳታ የሩሳላመ ካታማን ሺሽስ።
1KI 8:2 ኤታንማ ጌተትያ ላፑንꬃ አጌናን፥ ሻቃራ ባለይ ቦንቸትያ ዎደ እስራኤለ አሳ ኡባይ ካዋ ሶሎሞነኮ ሺቅዶሶና።
1KI 8:3 እስራኤለ ጭማት ኡባይ ሺቅን፥ ካህነት ታቦትያ ደንꬅዶሶና።
1KI 8:4 ሌወትነ ካህነት፥ ጎዳ ታቦትያ፥ ዱንካንያነ እያ ግዶን ደእያ ጌሻ ሚሸታ ኡባ ቶክድ ኤህዶሶና።
1KI 8:5 ካዎይ ሶሎሞነይነ እያራ ደእያ እስራኤለ አሳይ ታቦትያ ስንꬃን ሺቅድ፥ ታይባናዉ ዳንዳኤቶና ዳሮ ዶርሰነ መሄ ያርሽዶሶና።
1KI 8:6 ሄሳፈ ጉየ፥ ካህነት ጎዳ ጫቆ ታቦትያ ፆሳ ኬꬃን ኡባፈ ጌሻ በሳ ኤህድ፥ ክሩበታ ቀፈታፐ ጋርሳ ባጋራ ዎꬅዶሶና።
1KI 8:7 ምጨትድ ኡትዳ ክሩበታ ቀፈት ታቦትያነ ታቦትያ ቶክያ ካሶታ ካምዶሶና።
1KI 8:8 ካሶት ዳሮ አዱሰ ግድያ ግሾ ኤንታ ፄራይ ኡባፈ ጌሻ በሳ ስንꬃን ቆንጨን በንቶሶና። ሽን ጌሻ በሳፈ ካረራ በንታናዉ ዳንዳኤና። ኤንቲ ሀች ጋካናዉ ሄ በሳን ደኦሶና።
1KI 8:9 እስራኤለ አሳይ ግብፀ ቢታፈ ከይዳ ዎደ ጎዳይ ኤንታራ ጫቅዳ ኮሬባ ዙማን ሙሰይ ዎꬅዳ ናምኡ ሎቸ ሹቻታ ፃላላፐ አትሽን፥ ታቦትያ ግዶን ሀራባይ አይብካ ባዋ።
1KI 8:10 ካህነት ፆሳ ኬꬃፈ ከይዳ ዎደ ፆሳ ኬꬃይ ሻራን ኩምስ።
1KI 8:11 ሄ ሻራ ጋሶን ካህነት ባንታ ኦሱዋ ኦꬃናዉ ዳንዳእቦኮና፤ ጎዳ ቦንቾይ ፆሳ ኬꬃ ኩምስ።
1KI 8:12 ሄሳፈ ጉየ፥ ሶሎሞነይ፥ “አቤት ጎዳዉ፥ ኔኒ፥ ‘ታኒ ꬉማ ሻራን ዳና’ ያጋዳሳ።
1KI 8:13 ታኒ ነዉ ቦንቾ ኬꬅ፥ መርናዉ ኔኒ ያን ዳና በሲ ኬፃስ” ያግስ።
1KI 8:14 እስራኤለ ማባራይ ኩመꬅ ያን ኤቅዳሽን፥ ካዎይ ኤንታኮ ስሚድ፥ ሀይሳዳ ያግድ ኤንታዉ ዎስስ።
1KI 8:15 “ጎዳይ እስራኤለ ፆሳይ ጋላተቶ! ታ አዋ ዳዊታስ ባ ዶናን ኦድዳ ኡፋይሳ ቃላ ባ ኩሸን ፖልስ። እ ኦድዳ ኡፋይሳ ቃላይ፥
1KI 8:16 ‘ታኒ ታ አሳ፥ እስራኤለ ግብፀፈ ከስዳ ጋላሳፐ ዶምን፥ ታ ሱንꬃይ እያን ዳና መላ ኬ ኬፃናዉ እስራኤለ ኮቻታ ግዶን እስ ካታማካ ዶራብከ። ሽን ታ አሳ እስራኤለ ካለꬃና መላ ታኒ ዳዊታ ዶራስ’ ያግስ።
1KI 8:17 “ታ አዋይ ዳዊቲ፥ ጎዳ እስራኤለ ፆሳ ሱንꬃስ ኬ ኬፃናዉ ባ ዎዛናን ቆፕስ።
1KI 8:18 ሽን ጎዳይ፥ ታ አዋ ዳዊታኮ፥ ‘ኔኒ ታ ሱንꬃስ ኬ ኬፃናዉ ነ ዎዛናን ቆፕዳ ግሾ ሎኦባ ኦꬃዳሳ።
1KI 8:19 ግዶሽን፥ ኬ ኬፃናይ ነና ግዳካ፤ ታ ሱንꬃስ ኬ ኬፃናይ ነ ጉልባታፐ የለታና ነ ናኣ’ ያግስ።
1KI 8:20 “ጎዳይ ገልዳ ባ ኡፋይሳ ቃላ ፖልስ። ጎዳይ ካሰ ገልዳ ኡፋይሳ ቃላዳ ታኒ ታ አዋ ዳዊታ በሳን ካዎታስ፤ እስራኤለ ካዎተꬃ አራታን ኡታስ። ጎዳ እስራኤለ ፆሳ ሱንꬃስ ኬ ኬፃስ።
1KI 8:21 ጎዳይ ኑ አዋታ ግብፀፈ ከስዳ ዎደ ኤንታራ ጫቅዳ ጫቆ ታቦትያ ዎꬃና በሲ ጊግሳስ” ያግስ።
1KI 8:22 ሄሳፈ ጉየ፥ ሶሎሞነይ ጎዳ ያርሾ በሳ ስንꬃን፥ ኩመꬃ እስራኤለ ማባራ ግዶን ኤቅድ፥ ባ ኩሽያ ምጭድ፥
1KI 8:23 ሀይሳዳ ያግድ ዎስስ፤ “አቤት ጎዳዉ፥ እስራኤለ ፆሳዉ፥ ቦላ ሳሉዋን ጋርሳ ሳአን ነ መላ ፆሲ ባዋ። ኔኒ ነ ጫቁዋ ናጋሳ። ባ ኩመꬃ ዎዛናን ነ ስንꬃን ሄመትያ ነ አይለታ ነ መርና ሲቁዋን ዶሳዳሳ።
1KI 8:24 ነ አይልያስ፥ ታ አዋ ዳዊታስ፥ ኔኒ ኦꬃና ጋዳ ገልዳ ቃላ ናጋዳሳ። ኔኒ ካሰ ነ ዶናን ኦድዳይሳ ሀች ነ ኩሸን ፖላዳሳ።
1KI 8:25 “ሀእካ ጎዳዉ፥ እስራኤለ ፆሳዉ፥ ኔኒ ነ አይልያስ፥ ታ አዋ ዳዊታስ፥ ‘ኔኒ ታ ስንꬃን ሄመትዳይሳዳ ነ ናይትካ ታ ስንꬃን ሄመትድ ባንታ ኦግያ ናግኮ፥ ታ ስንꬃን እስራኤለ ካዎተꬃ አራታን ኡትያ አስ ኔኒ ꬋያካ’ ያግዳ ቃላ ፖላ።
1KI 8:26 አቤት እስራኤለ ፆሳዉ፥ ኔኒ ነ አይልያስ፥ ታ አዋ ዳዊታስ ገልዳ ነ ቃላ ሀእካ ፖላ።
1KI 8:27 “ሽን ፆሳይ ቱማ ሳአን ዳነዬ? ሄኮ፥ ሳሎት፥ ኡባፈ ꬎቃ ሳሎይካ ነና ኦይካናዉ ዳንዳኤና። ያትን፥ ታኒ ኬፅዳ ኬꬃይ ነዉ አይ መላ ጉፃንደሻ!
1KI 8:28 ግዶሽን፥ አቤት ጎዳዉ፥ ታ ፆሳዉ፥ ታኒ ነ አይለይ ሀች ዎስያ ዎሳነ ዋሱዋ ስአ።
1KI 8:29 ‘ታ ሱንꬃይ ሄ በሳን ዳና’ ግዳ ሀ ኬꬃ ነ አይፈይ ቃማነ ጋላስ ፄሎ። ታኒ ነ አይለይ ሀ በሳኮ ስማዳ ዎስያ ዎሳ ስአ።
1KI 8:30 ታኒ ነ አይለይነ ነ አሳይ እስራኤለይ፥ ሀ ፆሳ ኬꬃኮ ስሚድ፥ ዎስያ ዎሳ ስአ። ነ ደእያ በሳን ሳሎን ስአዳ ኑስ አቶ ያጋ።
1KI 8:31 “እስ አስ ባ ላግያ ቆህድ፥ ቆሀብከ ግድ ካድን፥ እያ ጫቅሳናዉ ፆሳ ኬꬅ ኤህን፥ እያ ግዶን ደእያ ያርሾ በሳ ስንꬃን እ ጫቅኮ፥
1KI 8:32 ኔኒ ሳሎን ስአዳ ኦꬃ። ነ አይለታ ግዶን ፕርዳ። ናቅዳ ኡራ ቦላ ፕርዳዳ፥ እ ኦꬅዳባ እያ ቦላ ዛራ፤ ፅሉዋስ ፕርዳዳ እያ ፅሎተꬃ ቆንጭሳ።
1KI 8:33 “ነ አሳይ እስራኤለይ ነ ቦላ ናጋራ ኦꬅዳ ግሾ ባንታ ሞርከታን ፆነትድ፥ ኔኮ ስሚድ ነ ሱንꬃ ፄግኮ፥ ሀ ኬꬃን ነና ዎስኮነ ኔኮ ዋስኮ፥
1KI 8:34 ኔኒ ሳሎን ስአ። ነ አሳ እስራኤለ ናጋራ አቶ ጋ፤ ያታዳ ኔኒ ካሰ ኤንታ ማይዛታስ እምዳ ቢታ ኤንታ ጉየ ዛራ።
1KI 8:35 “ነ አሳይ ነ ቦላ ናጋራ ኦꬅዳ ግሾ ሳሎይ ጎርደትን፥ እር ቡኮና እፅን፥ ኤንቲ ሀ በሳ ስሚድ፥ ዎስኮነ ኔኒ ኤንታ ኡንኤꬅዳ ግሾ ነ ሱንꬃ ፄግድ፥ ባንታ ናጋራፐ ስምኮ ኔኒ ሳሎን ስአ።
1KI 8:36 ነ አይለታ፥ እስራኤለ ናጋራ አቶ ጋ። ኤንቲ ሄመታናዉ በሲያ ሎኦ ኦግያ ኤንታ ታማርሳ፤ ነ አሳ ላትስዳ ቢታን እራ ቡክሳ።
1KI 8:37 “ቢታ ቦላ ኮሽ ዎይኮ ጋዶይ ያ ዎደ፥ ጫርኮይ ካꬃ ሾጭድ ዎይኮ ሀርመይ ꬋይስያ ዎደ፥ ቦለይ ዎይኮ ጉምቡሮይ ቢታ ቦላ ያ ዎደ፥ ሞርከይ ኤንታ ካታማታ ተቅያ ዎደ፥ ጋዶይነ ሀርገይ ያ ዎደ፥
1KI 8:38 ነ አሳ እስራኤለፐ ኦንካ ነና ዎስኮነ ኔኮ ዋስኮ ቃስ አይ አስካ ባ ዎዛናን ኡንኤትድ ሀ ፆሳ ኬꬃኮ ስሚድ ባ ኩሽያ ምጭኮ፥
1KI 8:39 ነ ደእያ በሳን ሳሎን ስአ። ኤንታ ናጋራ አቶ ጋ፤ ኤንታ ማዳ። ኔኒ አሳ ዎዛና ኤረይሳዳ አሳ ኡባስ እያ ኦሱዋዳ ኦሱዋዳ እማ። አሳ ኡባ ዎዛና ኤረይ ነ ፃላላ።
1KI 8:40 ያንኮ፥ ኔኒ ኑ ማይዛታስ እምዳ ቢታን ደእያ ዎደ ኡባን ኤንቲ ነዉ ያያና።
1KI 8:41 “ነ አሳ እስራኤለፐ ግዶናሽን፥ አላጋ ቢታ አሳይ፥ ነ ግታ ሱንꬃ ግሾ ሃሆ ቢታፈ ይዳ አስ ደእኮ፥
1KI 8:42 ነ ግታ ሱንꬃ ስእድ፥ ሃሆ ቢታፈ ይድ፥ ሀ ፆሳ ኬꬃኮ ስሚድ ነና ዎስኮ፥
1KI 8:43 ኔኒ ደእያ በሳን ሳሎን ስአ። ነ አሳት፥ እስራኤለት ኤረይሳዳ ሳአን ደእያ አሳ ኡባይ ነ ሱንꬃ ኤራና መላነ ነዉ ያያና መላ፥ ታኒ ኬፅዳ ሀ ፆሳ ኬꬃይ ነና ጎይንያ በሲ ግደይሳ ኤንቲ ኤራና መላ አላጋ ቢታ አሳይ ዎስያባ ኤንታዉ ፖላ።
1KI 8:44 “ነ አሳት ባንታ ሞርከታ ኦላና መላ ነ ኪትዳ በሳ ብድ፥ ኤንቲ ኔኒ ዶርዳ ሀ ካታማኮነ ታኒ ነ ሱንꬃስ ኬፅዳ ኬꬃኮ ስሚድ ጎዳ ነና ዎስኮ፥
1KI 8:45 ኤንታ ዎሳነ ዋሱዋ ሳሎን ስአዳ ኤንታዉ ፆኖ እማ።
1KI 8:46 “ናጋራ ኦꬆና አስ ባይና ግሾ ኤንቲ ነ ቦላ ናጋራ ኦꬅን፥ ኔኒ ኤንታ ሀንቀታዳ ሞርከታስ አꬃዳ እምን፥ ሞርከት ኤንታ ድእድ፥ ሃሆ ግድን ማታ በሲ ኤፍኮካ፥
1KI 8:47 ኤንቲ ሄ ድኤትዳ ቢታን ደእሸ፥ ባንታ ዎዛናን ናጋራፐ ስምኮ፥ ሄ ድኤትዳ ቢታን ደእሸ፥ ‘ኑኒ ናጋራ ኦꬅዳ፤ ኑኒ ባልዳ፤ ኑኒ ኢታ ሀንዳ’ ያግድ ኔኮ ዋስኮ፥
1KI 8:48 ኤንታና ድእድ ኤፍዳ ሞርከታ ቢታን ደእሸ፥ ባንታ ኩመꬃ ዎዛናንነ ባንታ ኩመꬃ ቆፋን ኔኮ ስምኮ፥ ኔኒ ኤንታ ማይዛታስ እምዳ ኤንታ ቢታኮ፥ ነ ዶርዳ ካታማኮነ ታኒ ነ ሱንꬃስ ኬፅዳ ኬꬃኮ ስሚድ፥ ነና ዎስኮ፥
1KI 8:49 ኤንታ ዎሳነ ኤንታ ዋሱዋ ነ ደእያ በሳን ሳሎን ስአዳ ኤንታዉ ፕርዳ።
1KI 8:50 ነ አሳይ ነ ቦላ ኦꬅዳ ናጋራነ ቆህዳ ቆሁዋ አቶ ጋ፤ ኤንታ ድእድ ኤፍዳ አሳት ኤንታዉ ቃታና መላ ኦꬃ።
1KI 8:51 ኤንቲ፥ ብራታ ሴርስያ ጮጨ ታማዳ ፁግያ ግብፀ ቢታፈ ኔኒ ከስዳ ነ አሳታነ ነ ቡዞ ላታታ።
1KI 8:52 “ታኒ ነ አይለይነ ነ አሳይ እስራኤለይ ዎስያ ዎሳ ነ አይፈይ ፄሎ። ኤንቲ ዋስያ ዎደ አዉደካ ኔኒ ኤንታ አላ።
1KI 8:53 አቤት ጎዳዉ፥ ፆሳዉ፥ ኔኒ ካሰ ኑ አዋታ ግብፀፈ ከስያ ዎደ ነ አይልያ ሙሰ ባጋራ ኦድዳይሳዳ ኤንታ ሳአን ደእያ ካዎተꬃታ ኡባ ግዶፈ ነዉ ቡዞ ኦꬃናዉ ዱማይዳ ደረ” ያግድ ዎስስ።
1KI 8:54 ሶሎሞነይ ዎሳ ፖልዳፐ ጉየ፥ ባ ኩሽያ ምጭድ ያርሾ በሳ ስንꬃን ጉልባትዳ በሳፈ ደንድ ኤቅስ።
1KI 8:55 እስራኤለ ማባራ ኡባ ባ ቃላ ꬎቁ ኦꬅድ ሀይሳዳ ያግድ አንጅስ፤
1KI 8:56 “ባ ገልዳ ቃላዳ ባ አሳ እስራኤለ ሸምፕስዳ ጎዳይ ጋላተቶ፤ እ ባ አይልያ ሙሰ ባጋራ እምዳ ሎኦ ኡፋይሳ ቃላ ኡባይ ፖለትስ።
1KI 8:57 ጎዳይ ኑ ፆሳይ ካሰ ኑ አዋታራ ደእዳይሳዳ ኑራካ ደኦ፤ እ ኑና ኩመꬅ አገና፤ የገና።
1KI 8:58 ኑኒ እያ ኦገታን ሄመታና መላነ እ ኑ አዋታስ እምዳ ኪታነ ዎጋ ናጋና መላ ኑ ዎዛና ባኮ ዛሮ።
1KI 8:59 ጋላስ ጋላስ ኑስ ኮሽያባ እማናዉ ጎዳይ ታና ባ አይልያነ ባ አሳ እስራኤለ ማዳና መላ፥ ታኒ ጎዳ ስንꬃን ዎስዳ ዎሳት ቃማነ ጋላስ ጎዳኮ፥ ኑ ፆሳኮ፥ ሺቆ።
1KI 8:60 ሄሳን፥ ሳአን ደእያ አሳ ኡባይ ጎዳይ ፆሰ ግደይሳነ እያፐ አትሽን፥ ሀራ ፆሲ ባይናይሳ ኤራና።
1KI 8:61 ሀች ህንተ ኦꬅዳይሳዳ ህንተ እያ ዎጋዳ እያዉ ኪተታናዉ ህንተ ዎዛናይ ጎዳስ፥ ኑ ፆሳስ አማነተይሳ ግዶ” ያግድ አንጅስ።
1KI 8:62 ሄሳፈ ጉየ ካዎይነ እስራኤለ አሳ ኡባይ እስፈ ጎዳ ስንꬃን ያርሾ ያርሽዶሶና።
1KI 8:63 ሶሎሞነይ ጎዳስ እስፈተꬃ ያርሾ ያርሻናዉ 22,000 ቦራታነ 120,000 ዶርሳታ ሺሽስ። ሄሳዳ ኦꬅድ ካዎይነ እስራኤለ አሳ ኡባይ ጎዳ ኬꬃ አንጅስዶሶና።
1KI 8:64 ካዎይ ሶሎሞነይ ፆሳ ኬꬃ ስንꬃን ደእያ ዳባባ ግዶ ክፍልያ ሄ ጋላስ ዱማይስ። ሄ በሳን ፁሳ ያርሾ፥ ካꬃ ያርሾነ እስፈተꬃ ያርሹዋፈ ሞꬉዋ ያርሽስ። እ ሄሳ ኦꬅዳይ ጎዳ ስንꬃን ደእያ ናሰ ብራታፐ ኦሰትዳ ያርሾ በሳይ ፁሳ ያርሾ፥ ካꬃ ያርሾነ እስፈተꬃ ያርሹዋፈ ሞꬉዋ ያርሻናዉ ጉፅዳ ግሾሳ።
1KI 8:65 ሄ ዎደ ሶሎሞነይነ እስራኤለ አሳ ኡባይ ላፑን ጋላስ ሻቃራ ባኣለ ቦንችዶሶና፤ እስራኤለ ዛዋን ሀማታ ፕኑዋፐ ብድ ግብፀ ሻፋ ጋካናዉ ደእያ ዳሮ አሳይ ጎዳ ስንꬃን ባኣለ ቦንቻናዉ ሺቅስ።
1KI 8:66 ዎንተꬃ ጋላስ ካዎይ አሳ ሞይዝስ፤ አሳይ ካዋ አንጅድ፥ ጎዳይ ባ አይልያ ዳዊታስነ ባ አሳ እስራኤለስ ኦꬅዳ ኬሀተꬃን ዎዛናፐ ኡፋይትሸ ባ ሶ ባ ሶ ብስ።
1KI 9:1 ሶሎሞነይ ፆሳ ኬꬃነ ካዎ ጋꬎ ኬፅድ ዉርስዳ ዎደ ባ ዎዛናን ኦꬃናዉ አሞትዳ ኡባ ፖልዳፐ ጉየ፥
1KI 9:2 ጋባኦናን ካሰ ቆንጭዳይሳዳ ጎዳይ ዛሪድ እያዉ ቆንጭስ።
1KI 9:3 ጎዳይ፥ “ኔኒ ታ ስንꬃን ዎስዳ ዎሳነ ዋሱዋ ታኒ ስአስ። ኔኒ ኬፅዳ ኬꬃይ መርናዉ ታ ሱንꬃይ እያን ፄገታና መላ ኦꬃዳ ጌሻስ። ታ አይፈይነ ታ ዎዛናይ ኡባ ዎደ ያን ዳና።
1KI 9:4 ሽን ኔኒ ነ አዋይ ዳዊቲ ሄመትዳይሳዳ ቦረይ ባይና ሱረተꬃን ታ ስንꬃን ሄመትኮ፥ ታ ኪታ ኡባ ኦꬅኮነ ታ ዎጋነ ታ ህግያ ናግኮ፥
1KI 9:5 ታኒ ነ አዋ ዳዊታስ፥ ‘እስራኤለ ካዎተꬃ አራታን ኡትያ አስ ኔኒ ኩመꬅ ꬋያካ’ ” ግዳይሳዳ ነ አራታ እስራኤለ ቦላ መርናዉ ምንꬃዳ ኤሳና።
1KI 9:6 “ሽን ነ ዎይኮ ነ ናይት ታና ካሎ አግድ ጉየ ስምኮ፥ ታኒ ህንተና ኪትዳ ታ ኪታነ ታ ዎጋ ናጎና እፅድ አላጋ ፆሳታ ጎይንኮ፥
1KI 9:7 እስራኤለ አሳ ታኒ ካሰ ኤንታዉ እምዳ ቢታፈ ሾዳና፤ ታኒ ታ ሱንꬃስ ጌሽዳ ሀ ኬꬃ አጋና። እስራኤለት አሳ ኡባ ግዶን ካስነ ሚቻስ አታና።
1KI 9:8 ሀ ማላልስያ ፆሳ ኬꬃይ ላለትድ ላለꬃ ዶረ ግዳና። ማታራ አꬍያ አሳ ኡባይ ዳጋምድ፥ ‘ጎዳይ ሀ ቢታነ ሀ ፆሳ ኬꬃ አይስ ሀይሳዳ ኦꬅዴ?’ ያጋና።
1KI 9:9 አሳይ ዛሪድ፥ ‘ኤንታ ማይዛታ ግብፀፈ ከስዳ፥ ጎዳ ባንታ ፆሳ ኤንቲ አግድ፥ አላጋ ፆሳታ ካልዳ ግሾነ ኤንታ ጎይንዳ ግሾ ጎዳይ ኤንታ ቦላ ሀ ኢታባ ኡባ ኤህስ’ ” ያግድ ዛራና።
1KI 9:10 ሶሎሞነይ ሀ ናምኡ ኬꬃታ፥ ፆሳ ኬꬃነ ባ ካዎ ጋꬎ ኬፅዳ ላታማንꬆ ላይꬃ ዉርሰꬃን፥
1KI 9:11 ፅሮሳ ካዎይ ክራም ፂዳ፥ ዝጋነ ዎርቃ ኡባ እምዳ ግሾ፥ ጋልላን ደእያ ላታሙ ካታማታ ሶሎሞነይ እያዉ እሚስ።
1KI 9:12 ሽን ክራም ፅሮሳፐ ከይድ፥ ሶሎሞነይ እያዉ እምዳ ካታማታ በአናዉ ብዳ ዎደ ካታማት እያ ኡፋይስቦኮና።
1KI 9:13 ክራም ሶሎሞነኮ፥ “ታ እሻዉ፥ ሀይሳቲ ነ ታዉ እምዳ ካታማት አይባ ካታሜ?” ያግስ። ሄሳ ግሾ፥ እ ሄ ካታማታ፥ “ፓꬆና ቢታ” ያግድ ሱንꬅስ። ሄ ሄራይ ሀች ጋካናዉ ሄ ሱንꬃን ፄገቴስ።
1KI 9:14 ክራም 4,000 ክሎ ግራመ ዎርቃ ካዋ ሶሎሞነስ ካሰ የድስ።
1KI 9:15 ፆሳ ኬꬃ፥ ካዎ ጋꬎ፥ ሚሎ፥ የሩሳላመ ካታማ ግምብያ፥ ሀፆራ፥ ማግዶነ ገዘራ ግምባናዉ ካዋ ሶሎሞነስ ኦሳንቾት ደኦሶና።
1KI 9:16 ግብፀ ካዎይ ካሰ ገዘራ ኦይክድ ታማን ፁግስ። ካታማን ደእያ ካናነ አሳታ ዎꬍስ፤ ሶሎሞነይ ኤክዳ ባ ናእዉ ዎይቶ ኦꬅድ እሚስ።
1KI 9:17 ሶሎሞነይ ገዘራነ ጋርሳ ቤት-ሀሮና ዛሪድ ኬፅስ።
1KI 9:18 ባእላታ፥ ይሁዳ መላ ደእያ ታማራ፥
1KI 9:19 ቡቁራ ምንጅያ ካታማታ ኡባ፥ ባ ፓራታነ ፓራ ጋረታ ናግያ ካታማታ፥ የሩሳላመን፥ ልባኖሰንነ እ ሃርያ ቢታ ኡባን ኬፃናዉ ኮይዳ ኡባ ኬፅስ።
1KI 9:20 አሞረታፐ፥ ህተታፐ፥ ፓርዘታፐ፥ ህወታፐነ ያቡሰታፐ አትዳ አሳት ኡባይ እስራኤለ አሰ ግዶኮና።
1KI 9:21 ኤንቲ እስራኤለ አሳይ ቢታፈ ዉርስድ ꬋይሳናዉ ዳንዳኦና እፅን ሄ ቢታን አትዳ አሳ ኮቻታ። ሶሎሞነይ ኤንታ አይለ ኦꬅን፥ ኤንቲ ሀች ጋካናዉ አይለተꬃን ኦꬆሶና።
1KI 9:22 ሽን ሶሎሞነይ እስራኤለ አሳፐ ኦናካ አይለ ኦꬅቤና። ኤንቲ እያዉ ሞርናታ፥ ኦላንቾታ፥ ቶራ ሞጮና፥ ፓራ ጋረ ላግያ አሳስ ሀላቃነ ፓራ አስ ግድድ ኦꬅዶሶና።
1KI 9:23 ኤንቲ ሶሎሞነይ ኦስስያ ኬꬃ ኬፀይሳታ ሀላቃታ፤ ኤንቲ እቻሹ ፄታነ እሻታማ።
1KI 9:24 ግብፀ ካዋ ናእያ ዳዊታ ካታማፐ ሶሎሞነይ እዉ ኬፅስዳ ኬꬃ ይዳፐ ጉየ፥ እ ሚሎ ካታማ ግምብስ።
1KI 9:25 ሶሎሞነይ ጎዳስ ግምብዳ ያርሾ በሳን ፁሳነ እስፈተꬃ ያርሾ ላይꬃን ሄꬑ ቶሆ ያርሼስ። ጎዳ ስንꬃን እፃነ ጩይሴስ፤ ሄሳን ፆሳ ኬꬃይ ፖለትስ።
1KI 9:26 ሄሳፈ ጉየ፥ ካዎይ ሶሎሞነይ ኤዶመ ቢታን ዞኦ አባ ጋፃን፥ ኤሎታ ማታን ደእያ ኤፅዮን-ጋብራን ማርካበታ ኦꬅስ።
1KI 9:27 ካዎይ ክራም ሶሎሞነ አሳራ ኦꬃና መላ ማርካበ ላጎን ሎህዳ ባ አሳታ ኪትስ።
1KI 9:28 ኤንቲ ኦፍራ ቢታ ብድ 14,000 ክሎ ግራመ ዎርቃ ካዋ ሶሎሞነስ ኤክድ ይዶሶና።
1KI 10:1 ሳባ ካውያ ጎዳይ ሶሎሞነስ ቆንጭስዳ ማላልስያ ጭንጫተꬃ ዎርያ ስአዳ፥ ዴፆ ኦይሻታ ኤካዳ እያ ፓጫናዉ ባሱ።
1KI 10:2 ሳዉዋ፥ ዳሮ ዎርቃነ አልኦ ሹቹ ጫንዳ ዳሮ ግማለ ጩጋራ ዳሮ አጃባን የሩሳላመ ጋካዳ ሶሎሞነ ስን ሺቃሱ። ባ ዎዛናን ደእያ ኡባ ሶሎሞነ ኦይቻሱ።
1KI 10:3 ሶሎሞነይ እያ ኦይችዳባ ኡባ ዛርስ፤ እዉ ብርሾናሽን፥ እያፐ ጌምድ አትዳባይ አይብካ ባዋ።
1KI 10:4 ሳባ ካውያ ሶሎሞነ ጭንጫተꬃ፥ እ ኬፅዳ ካዎ ጋꬉዋ፥
1KI 10:5 እያ ጋይታን ሺቅያ ካꬃ፥ እያ ሞርናት ኡትያ ኡተꬃ፥ እያ አይለት ኦꬅያ ኦሱዋ፥ ኤንቲ ማእያ ማኡዋ፥ ኤስ ዱቀይሳታነ ፆሳ ኬꬃን ሺሽያ ፁሳ ያርሹዋ በእዳ ዎደ እ ዎዛናይ ዳሮ ማላለትስ።
1KI 10:6 እያ፥ ካዋ ሶሎሞነኮ፥ “ነባነ ነ ጭንጫꬃባ ታኒ ታ ቢታን ደአሸ ስእዳይስ ቱማ።
1KI 10:7 ሽን ታኒ ያዳ፥ ታ አይፈን በአና ጋካናዉ ኤንቲ ታዉ ኦድዳባ አማናብከ። ሄኮ፥ አሳይ ታዉ ኦድዳይስ ባጋ ጋከና፤ ነ ጭንጫተꬃይነ ነ ዱረተꬃይ ታኒ ስእዳይሳፈ ዳሮ አꬌስ።
1KI 10:8 ኡባ ዎደ ነ ስንꬃን ኤቅድ፥ ነ ጭንጫተꬃ ስእያ ነ አሳትነ ነ ሞርናት አይ መላ ቃዳራ ደእያ አሰ!
1KI 10:9 ነናን ኡፋይትድ፥ ነና እስራኤለ ካዎተꬃ አራታን ኡትስዳ ጎዳይ ነ ፆሳይ ጋላተቶ! ጎዳይ እስራኤለ አሳ መርናዉ ሲቅዳ ግሾ ኔኒ ሱረ ፕርዳነ ፅሎተꬅ ኦꬃና መላ እ ነና ካዎꬅስ” ያጋሱ።
1KI 10:10 ሳባ ካውያ 4,000 ክሎ ግራመ ዎርቃ፥ ዳሮ ሳዎነ አልኦ ሹቹ ካዋ ሶሎሞነስ እማሱ። ሳባ ካውያ ካዋ ሶሎሞነስ እምዳይሳ መላ ዳሮ ሳዎ ሄሳፈ ስምን ኦንካ ኤህቤና።
1KI 10:11 (ካዋ ክራማ ማርካበት፥ ኦፍራፐ ዎርቃ ኤህዳይሳት ያፐ ዳሮ ሳንዳለ ምꬅነ አልኦ ሹቹ ኤህዶሶና።
1KI 10:12 ካዎይ ሶሎሞነይ ሄ ሳንዳለፐ ፆሳ ኬꬃነ ካዎ ጋꬎ ቱቀታ፥ ዛማረታስ ዲꬅነ ማስንቆ ኦስስስ። ሄሳ መላ ሳንዳለይ ሄ ዎደፐ ስምን ይድ ኤረና፤ በንት ኤረና።)
1KI 10:13 ካዎይ ሶሎሞነይ እማናዉ በሲያ እሞታታፐ ሀራ፥ ሳባ ካውያ አሞታዳ እያ ኦይችዳባ ኡባ እዉ እሚስ። ሄሳፈ ጉየ፥ ሳባ ካውያ ባ አጃባራ ደንዳዳ ባ ቢታ ስማሱ።
1KI 10:14 ሶሎሞነይ ላይꬃን ላይꬃን ኤክያ ዎርቃይ 23,000 ክሎ ግራመ።
1KI 10:15 ሄስ ዛልአንቾታፐ ኤክያ ቃራፃ፥ አራበ ካዎታፐነ እስራኤለ ቢታን ሃረይሳታፐ ኤክያ ጊራ ጉጀና።
1KI 10:16 ሶሎሞነይ ናምኡ ፄቱ ግታ ጎንዳለታ ዎርቃፈ ቆፅድ ኦስስስ። እስ እስ ጎንዳልያን ኡሱፑን ክሎ ግራመ ግድያ ዎርቀይ ገልስ።
1KI 10:17 ቃስ ሄꬑ ፄቱ ጉꬃ ጎንዳለታ ዎርቃፈ ቆፅድ ኦስስስ። እስ እስ ጉꬃ ጎንዳልያን ናምኡ ክሎ ግራመ ግድያ ዎርቀይ ገልስ። ካዎይ ሄ ጎንዳለታ “ልባኖሰ ዎራ” ጌተትያ ባ ካዎ ጋꬎን ዎꬅስ።
1KI 10:18 ቃስ ካዎይ እስ ግታ አራታ ዳንጋርሳ ዛለፐ ኦስስድ ጌሻ ዎርቃን ላንፅስስ።
1KI 10:19 አራታይ ደእያ በሳ ፑደ ከያናዉ የꬍያ ኡሱፑን ደꬃት ደኦሶና። ሄ አራታስ ጉየ ባጋራ ሁጵያ ቦላ ገርቶይ ደኤስ። አራታስ ናምኡ ባጋራ ቀሰ ዘምፕስያ በሳት ደኦሶና፤ ሄ ናምኡ በሳታ ምየን ኤቅዳ እስ እስ ጋሞ ምስለይ ደኤስ።
1KI 10:20 ሄ አራታ ቦላ ከይያ ኡሱፑን ደꬃታስ ያ ባጋራነ ሀ ባጋራ እስ እስ ጋሞ ምስለይ፥ ኩመꬅ ታማነ ናምኡ ምስለት ደኦሶና። ሄሳ መላ አራት ሀራ ካዎተꬃን አዉንካ ኦሰትቤና።
1KI 10:21 ካዎይ ሶሎሞነይ ኡሹ ኡያ ሚሸ ኡባይ ዎርቃፈ ኦሰትስ፤ “ልባኖሰ ዎራ” ጌተትያ ካዎ ጋꬎን ደእያ ሚሸ ኡባይ ዋላህ ባይና ዎርቃፈ ኦሰትስ። ሶሎሞነ ዎደ ብራስ ጎእ ባይና ግሾ ብራፐ ኦሰትዳባይ ባዋ።
1KI 10:22 ካዋ ክራማ ማርካበታራ ዛልእያ ግታ ማርካበት አባን ደኦሶና። ሄ ማርካበት ዎርቃ፥ ብራ፥ ዳንጋርሳ ዛለ፥ ገለሾ፥ ቃረነ አያና ካፎ ጫንድ ሄꬑ ላይꬃፈ እስ ቶሆ ስሞሶና።
1KI 10:23 ካዎይ ሶሎሞነይ ዱረተꬃንነ ጭንጫተꬃን ሳአን ደእያ ካዎታ ኡባፈ አꬌስ።
1KI 10:24 ሳአን ደእያ አስ ኡባይ እያኮ ያናዉነ ፆሳይ እያ ዎዛናን ዎꬅዳ ጭንጫተꬃ ስአናዉ ኮዬስ።
1KI 10:25 ላይꬃን ላይꬃን ያ ኡባይ እያዉ ዎርቃ፥ ብራ፥ ማኦ፥ ኦላ ሚሸ፥ ሳዎ፥ ፓራነ ባቁሎ እሞታ ኤክድ ዮሶና።
1KI 10:26 ሶሎሞነይ ፓራ ጋረታነ ፓራታ ሺሽስ፤ እያዉ 1,400 ፓራ ጋረትነ 12,000 ፓራት ደኦሶና። እ ኤንታ ፓራ ጋረታ ካታማታንነ ባራ የሩሳላመን ዎꬅስ።
1KI 10:27 ካዎይ የሩሳላመን ብር ሹቻዳ፥ ዝግ ዙማ ፃጶን ድጭያ ቦባዳ ዳራናዳ ኦꬅስ።
1KI 10:28 ሶሎሞነ ፓራት ግብፀፈነ ቃወ ቢታፈ ዮሶና። ካዋ ዛልአንቾት ኤንታ ቃወፐ ሻምድ ኤሆሶና።
1KI 10:29 ኤንቲ እስ እስ ፓራ ጋረ ኡሱፑን ፄቱ ብራ ሳንትመን፥ እስ እስ ፓራ ፄታነ እሻታሙ ብራ ሳንትመን ግብፀፈ ሻምድ ኤሆሶና። ኤንቲ ህተታ ካዎታስነ ሶረ ካዎታስ ባይዞሶና።
1KI 11:1 ካዎይ ሶሎሞነ ዳሮ አላጋ ቢታ ማጫሳታ ዶስስ። ሄሳት ግብፀ ካዋ ናኤፐ ሀራ ሞአበታ፥ አሞነታ፥ ኤዶመታ፥ ስዶናታነ ህተታ ማጫሳታ።
1KI 11:2 ጎዳይ እስራኤለ አሳስ፥ “ኤንቲ ህንተ ዎዛና ባለꬅድ ባንታ ኤቃታኮ ዛርያ ግሾ ሀ አሳታራ ኤኮንነ ገሎን ዋላከቶፍተ” ያግድ ካሰ ኦድስ። ሽን ሶሎሞነ ኤንታ ሲቁዋን ቃሸትስ።
1KI 11:3 ሶሎሞነስ ካዎ ናአ ግድዳ ላፑን ፄቱ ማቸትነ ሄꬑ ፄቱ ላገꬆት (ቁባተት) ደኦሶና። ሄ ማቸት እያ ፆሳፈ ሃስዶሶና።
1KI 11:4 ሶሎሞነይ ጭምሸ ብያ ዎደ እያ ማቸት እያ ዎዛና ሀራ ፆሳታኮ ዛርዶሶና። እያ አዋ ዳዊቲ ኩመꬃ ዎዛናን ጎዳስ ሃረትዳይሳዳ እ ባ ጎዳ ፆሳስ ሃረትቤና።
1KI 11:5 ሶሎሞነይ አስታሮቶ ጌተትያ ስዶናታ ፆሴስነ ሞሎካ ጌተትያ እፀትዳ አሞነታ ኤቃ ጎይንስ።
1KI 11:6 ሶሎሞነይ ጎዳ ስንꬃን ኢታባ ኦꬅስ፤ እያ አዋ ዳዊቲ ካልዳይሳዳ ጎዳ ፖሎ ካልቤና።
1KI 11:7 ሶሎሞነይ ካሞሻ እፀትዳ ኤቃስነ ሞሎካ ጌተትያ አሞነታ ኤቃስ የሩሳላመፐ ዉሎሀ ባጋን ደእያ ደረ ሁጰን ꬎቃ ጎይኖ በሳታ ኬፅስ።
1KI 11:8 አላጋ ቢታፈ ኤክዳ ባ ማቸታስ ሄሳዳ ጊግስን፥ ኤንቲ ባንታ ኤቃታስ ያን እፃነ ጩይዶሶናነ ያርሾ ያርሽዶሶና።
1KI 11:9 እያዉ ናምኡ ቶሆ ቆንጭዳ ጎዳ እስራኤለ ፆሳፈ ሶሎሞነ ዎዛናይ ሃክዳ ግሾ፥ ጎዳይ እያ ሀንቀትስ።
1KI 11:10 ሀራ ፆሳታ ካሎናዳ ጎዳይ ሶሎሞነ ኪትስ፥ ሽን ሶሎሞነይ ጎዳ ኪታ ናግቤና።
1KI 11:11 ሄሳ ግሾ፥ ጎዳይ ሶሎሞነኮ፥ “ኔኒ ሀይሳዳ ሀንዳ ግሾነ ታ ጫቁዋነ ታ ዎጋ ነ ናጎና ግሾ ታኒ ነ ካዎተꬃ ኔፐ ኤካዳ ነ አይለታፐ እሱዋስ እማና።
1KI 11:12 ግዶሽን፥ ነ አዋ ዳዊታ ግሾ ታኒ ሀይሳ ነ ደኦ ላይꬃን ኦꬅከ፥ ነ ናኣ ኩሸፐ ኤካና።
1KI 11:13 ሄስ ሀንኮካ፥ ካዎተꬃ ነ ናኣ ኩሸፐ ኡባ ኤክከ፤ ታ አይልያ ዳዊታ ግሾነ ታኒ ዶርዳ የሩሳላመ ግሾ እስ ኮቸ እያዉ እማና” ያግስ።
1KI 11:14 ሄሳፈ ጉየ፥ ጎዳይ ኤዶመ ቢታ ካዎታ ኮቸ ግድዳ፥ ኤዶመ አድያ ሀዳዳ ሶሎሞነ ቦላ ሞርከ ኦꬅድ ደንꬅስ።
1KI 11:15 ካሰ ዳዊቲ ኤዶመ አሳታራ ኦለትዳ ዎደ ሀይቅዳይሳታ ሞጋናዉ ብዳ ቶራ ሞጮናይ እዮኣብ ኤዶመን ደእያ አደታ ኡባ ዎꬍድ ዉርስስ።
1KI 11:16 ኤዶመን ደእያ አደታ ኡባ ꬋይሳና ጋካናዉ እዮኣብነ እስራኤለ አሳ ኡባይ ያን ኡሱፑን አጌና ኡትዶሶና።
1KI 11:17 ሽን ሄ ዎደ ጉꬃ ናአ ግድዳ ሀዳድ፥ ባ አዋስ ኦꬅዳ ኤዶመ ሞርናታፐ ጉꬃታራ ግብፀ ባቃትስ።
1KI 11:18 ኤንቲ ምድያመፐ ደንድድ ፓራና ብዶሶና፤ ፓራነፐ ባንታራ አሰ ኤክድ ግብፀ ካዋኮ ብዶሶና። ካዎይ ሀዳዳስ እስ ኬꬅነ ጋደ እምድ ካꬅ እያዉ የድስ።
1KI 11:19 ሀዳድ ካዋ ዳሮ ኡፋይስን፥ ካዎይ ባ ማቸ፥ ፃፍናስ ምችዉ እያዉ ማቾ ኦꬅድ እሚስ።
1KI 11:20 እያ ጋኑባታ ጌተትያ ናአ እያዉ የላሱ። ፃፍናሳ እያ ካዎ ጋꬎን ድቻሱ፤ ጋኑባት ያን ካዋ ናይታራ እስፈ ደእስ።
1KI 11:21 ሀዳድ ግብፀን ደእሸ ዳዊቲነ ኢያ ቶራ ሞጮናይ እዮኣብ ሀይቅዳይሳ ስእድ፥ ካዋኮ፥ “ታኒ ታ ቢታ ስማና መላ ታና የዳ” ያግስ።
1KI 11:22 ካዎይ እያ፥ “ነዉ ሀይሳን አይብ ፓጭን፥ ነ ቢታ ባናዉ ኮያይ?” ያግድ ኦይችስ። ሀዳድ፥ “ታዉ አይብካ ፓጭቤና፥ ሽን ታኒ ባና” ያግስ።
1KI 11:23 ቃስካ ፆሳይ ኤልያዳ ናኣ ራዞና ሶሎሞነ ቦላ ሞርከ ኦꬅድ ደንꬅስ። ራዞን ሱባ ካዋ አድራዛራፐ ባቃትስ።
1KI 11:24 ዳዊቲ ሱባ ኦላንቾታ ꬋይስዳ ዎደ ራዞን ባዉ አሰ ሺሽድ ፓኖታ ሀላቃ ግድስ። ፓኖት ዳማስቆ ብድ፥ ኦይክድ ያን ኡትድ ራዞና ካዎꬅዶሶና።
1KI 11:25 ሀዳድ መꬍዳ መቱዋ ቦላ ጉጅድ፥ ሶሎሞነይ ደእዳ ላይꬃ ኡባን ራዞን እስራኤለታስ ሞርከ ግድስ። ራዞን ሶረን ካዎትድ እስራኤለ አሳስ ሞርከ ግድስ።
1KI 11:26 ሄሳዳካ ናባፃ ናአይ እዮርባም ሶሎሞነ ቦላ ማካልድ ደንድስ። እ ሶሎሞነ አይለታፐ እሱዋ። እ ኤፍሬማ ቢታን ደእያ ፃሬዳፐ ይዳ አስ፤ እያ አየ ሱንꬃይ ፅሩአ፤ እያ አምኦ።
1KI 11:27 ካዋ ቦላ እ ማካልድ ደንድዳ ታርከይ ሀይሳፈ ካልድ ፃፈትዳይሳ። ሄ ዎደ ሶሎሞነይ ሚሎ ግምቤስነ ባ አዋ ዳዊታ ካታማ ግምበ ድርሳ ዩሹዋን ደእያ ኦላ ኩንꬄስ።
1KI 11:28 እዮርባም ምኖ አስ፤ ሶሎሞነይ ሀ ናአተꬃይ ባ ኦሱዋ ዋትድ ሎይꬅ ኦꬅያኮ በእድ፥ ዮሰፋ ቢታን ኦꬅያ ማዳ ኦꬅያ አሳ ቦላ ሀላቃ ኦꬅድ ሹምስ።
1KI 11:29 እስ ጋላስ እዮርባም የሩሳላመፐ ከይድ ብሽን፥ ሴሎፐ ይዳ ናበይ አክይ ኦራꬃ ማኦ ማእድ እያራ ኦገን ጋሄትስ። ደንባን ኤንታ ናምኣ ፃላል ደኦሶና።
1KI 11:30 አክይ ባ ማእዳ ኦራꬃ ማኡዋ ኦይክድ፥ ታማነ ናምአ ከስድ ዳክስ።
1KI 11:31 እዮርባማኮ፥ “ታሙ ዳከꬃ ነዉ ኤካ። ጎዳይ እስራኤለ ፆሳይ ሀይሳዳ ያጌስ፤ ‘ሄኮ፥ ታኒ ካዎተꬃ ሶሎሞነ ኩሸፐ ኤካዳ ታሙ ኮቻታ ነዉ እማና።
1KI 11:32 ሽን ታ አይልያ ዳዊታ ግሾነ እስራኤለ ዛረ ኡባ ግዶፈ ታኒ ዶርዳ የሩሳላመ ግሾ እስ ኮቸ እያዉ አጋና።
1KI 11:33 ታኒ ሄሳ ኦꬅያ ጋሶይ፥ ሶሎሞነይ ታና አግድ ስዶና ፆስዉ አስታሮቶ፥ ሞአበ ፆሳ ካሞሻነ አሞነ ፆሳ ሞሎካ ጎይንዳ ግሾሳ። ቃስ ታ ኦግያን ሄመቶና እፅዳ ግሾነ እያ አዋይ ዳዊቲ ኪተትዳይሳዳ ታ ዎጋነ ታ ህግያ ናጎና እፅዳ ግሾሳ።
1KI 11:34 “ ‘ግዶሽን፥ ታኒ ካዎተꬃ ሶሎሞነ ኩሸፐ ዉርሳ ኤክከ። ታኒ ዶርዳይሳ ግሾነ ታ ኪታነ ታ ዎጋ ናግዳ ታ አይልያ ዳዊታ ግሾ ሶሎሞነይ ደኦን ደእሽን ሄሳ ኦꬅከ።
1KI 11:35 ታኒ ካዎተꬃ እያ ናኣ ኩሸፐ ኤካዳ ታሙ ኮቻታ ነዉ እማና።
1KI 11:36 ታ ሱንꬃይ ያን ፄገታና መላ ታኒ ዶርዳ የሩሳላመን፥ ኡባ ዎደ ታ አይልያ ዳዊታ ኮቻይ ካዎታና መላ ታኒ እስ ኮቸ እያ ናኣስ እማና።
1KI 11:37 ታኒ ነና ኤካና፤ ነ ዎዛናይ ዶስዳ ኡባ ኔኒ ሃራና፤ ኔኒ እስራኤለ ቦላ ካዎታና።
1KI 11:38 ታኒ ነና ኪትያባ ኔኒ ኦꬅኮ፥ ታ ኦግያን ሄመትኮነ ታ አይለይ ዳዊቲ ናግዳይሳዳ ታ ዎጋነ ታ ኪታ ናጋዳ፥ ታ ስንꬃን ሱረባ ኦꬅኮ፥ ታ ኔራ ግዳና። ዳዊታስ ኦꬅዳይሳዳ ነ ኮቻት ካዎተꬃን ምናናዳ ኦꬃና፤ እስራኤለ ነዉ እማና።
1KI 11:39 ሶሎሞነ ናጋራ ግሾ ታኒ ዳዊታ ኮቻ ሴራና፤ ሽን መርናዉ ሴርከ’ ” ያግስ።
1KI 11:40 ሶሎሞነይ ኢዮርባማ ዎꬋናዉ ኮይስ፤ ሽን እዮርባም ግብፀ ካዋ ሽሻቃኮ ባቃትድ፥ ሶሎሞነይ ሀይቃና ጋካናዉ ግብፀን ጋምእስ።
1KI 11:41 ሶሎሞነ ሀንዳ ሀራባይ፥ እ ኦꬅዳባይ፥ እያ ጭንጫተꬃይ ሶሎሞነ ታርከ ማፃፋን ፃፈትስ።
1KI 11:42 ሶሎሞነይ እስራኤለ ቦላ የሩሳላመን ኦይታሙ ላይꬅ ካዎትስ።
1KI 11:43 ሄሳፈ ጉየ፥ ሶሎሞነይ ሀይቅድ፥ ባ ማይዛን ጋሄትስ፤ ባ አዋ ዳዊታ ካታማን ሞገትስ። እያ ናአይ ሮብኣም እያ በሳን ካዎትስ።
1KI 12:1 እስራኤለ አሳ ኡባይ ሮብኣማ ካዎያናዉ ሴከማ ብዳ ግሾ እካ ያ ብስ።
1KI 12:2 ካዋ ሶሎሞነፐ ባቃትድ፥ ግብፀን ደእያ ናባፃ ናአይ እዮርባም ሄሳ ስእዳ ዎደ ግብፀፈ ስሚድ ይስ።
1KI 12:3 እስራኤለ አሳይ እዮርባማ ኪትድ ፄግስን፥ እነ እስራኤለ ማባራ ኡባይ ሮብኣማኮ ብድ፥
1KI 12:4 “ነ አዋይ ኑና ዴፆ ቃምባራ ቶስስ፤ ሽን ሀእ እ ኑና ኦስስያ ዎልቃማ ኦሱዋነ ዴፆ ቃምባራ ኑስ ካዉሻርክ። ያትኮ፥ ኑኒ ነዉ ሃረታና” ያግዶሶና።
1KI 12:5 ሮብኣም ኤንታኮ፥ “ብድ ሄꬓንꬆ ጋላስ ስሚድ ታኮ ዪተ” ያግን አሳይ ብዶሶና።
1KI 12:6 ሄሳፈ ጉየ፥ ካዎይ ሮብኣም፥ እያ አዋይ ሶሎሞነይ ደኦን ደእያ ዎደ፥ ሶሎሞነ ዞርያ ጭማታ፥ “ሀ አሳስ ዎይጋዳ ዛራ ጌቲ?” ያግድ ዞረ ኦይችስ።
1KI 12:7 ጭማት ዛሪድ፥ “ሀች ኔኒ ሀ አሳስ አይለ ግዳዳ ኦꬅኮነ ኤንታ ኦይሻስ ሎኦ ቃላ ዛርኮ፥ ኡባ ዎደ ኤንቲ ነዉ አይለ ግዳና” ያግዶሶና።
1KI 12:8 ሽን ሮብኣም ጭማት ዞርዳ ዞርያ አግድ፥ እያራ ድጭድ እያዉ ኦꬅያ ናአተꬃታ ዞረ ኦይችስ።
1KI 12:9 እ ኤንታኮ፥ “ህንተ ታና አይ ዞረቲ? ‘ነ አዋይ ኑና ቶስዳ ዴፆ ቃምባራ ኑስ ካዉሻርክ’ ግያ ሀ አሳስ ዎይጋዳ ዛሮ?” ያግድ ኦይችስ።
1KI 12:10 ናአተꬃት ዛሪድ፥ “ ‘ነ አዋይ ኑና ዴፆ ቃምባራ ቶስስ፤ ሽን ኔኒ ኑስ ካዉሻርክ’ ግያ አሳስ፥ ‘ታ ጉꬃ ብራይ ታ አዋ ፄሳፈ ኦርዴስ።
1KI 12:11 ታ አዋይ ህንተዉ ቃምባራ ዴፀꬅስ፤ ሽን ታኒ እያፐ አꬃዳ ዴፀꬃና። ታ አዋይ ህንተና ልሶን ጋራፍስ፤ ሽን ታኒ ህንተና ኮርነዳ ዱክያ ልሶን ጋራፋና’ ያጋዳ ዛራ” ያግዶሶና።
1KI 12:12 ካዎይ፥ “ሄꬓንꬆ ጋላስ ስሚድ ታኮ ዪተ” ግዳይሳዳ እዮርባምነ አሳ ኡባይ ሄꬓንꬆ ጋላስ ሮብኣማኮ ስሚድ ይዶሶና።
1KI 12:13 ካዎይ ጭማታ ዞርያ አግድ ኤንታዉ ሀንቆን ዛርስ።
1KI 12:14 ናአተꬃት ዞርዳ ዞርያ ካልስ። እ ኤንታኮ፥ “ታ አዋይ ህንተ ቃምባራ ዴፀꬅስ፤ ሽን ታኒ እያፐ አꬃዳ ዴፀꬃና። ታ አዋይ ህንተና ልሶን ጋራፍስ፤ ሽን ታኒ ህንተና ኮርነዳ ዱክያ ልሶን ጋራፋና” ያግድ ዛርስ።
1KI 12:15 ጎዳይ ሴሎፐ ይዳ አክያ ባጋራ ካሰ ናባፃ ናኣ እዮርባማስ ኦድዳ ቃላይ ፖለታና መላ ሄስ ጎዳፐ ሀንዳ ግሾ ካዎይ አሳይ ግያባ ስኦና እፅስ።
1KI 12:16 እስራኤለ አሳ ኡባይ ካዎይ ኤንቲ ገይሳ ስኦና እፅዳይሳ በእድ ሀይሳዳ ያግዶሶና፤ “ዳዊታፐ ኑና ጋክያ ግሾይ አይቤ? እሰየ ናኣፐ ኑኒ ላትያባይ አይቤ? እስራኤለ አሳዉ፥ ህንተ ሶ ህንተ ሶ ስምተ። ዳዊታ፥ ነ ኬꬃ ናጋ” ያግድ፥ እስራኤለ አሳ ኡባይ ባንታ ሶ ባንታ ሶ ስምዶሶና።
1KI 12:17 ሽን ሮብኣም ይሁዳን ደእያ እስራኤለ አሳ ቦላ ካዎትስ።
1KI 12:18 ካዎይ ሮብኣም ማዳ ኦይሳታ ሀላቃ አዶንራማ እስራኤለ አሳኮ ኪትን፥ ኤንቲ ሹቻን ጫድድ ዎꬍዶሶና። ያትን፥ ካዎይ ሮብኣም ባ ፓራ ጋርያን ገልድ የሩሳላመ ባቃትስ።
1KI 12:19 ሄ ዎደፐ ዶምድ ሀች ጋካናዉ ታሙ እስራኤለ ኮቻት ዳዊታ ኮቻፈ ካዎትዳ ካዎታ ቦላ ማካልዶሶና።
1KI 12:20 እዮርባም ግብፀፈ ስምዳይሳ እስራኤለ አሳ ኡባይ ስእዳ ዎደ እያ ባንታ ማባራኮ ፄግድ እስራኤለ ቦላ ካዎꬅዶሶና። ዳዊታ ኮቻፈ ካዎትዳ ካዎታስ አማነትዳይ ይሁዳ ኮቻ ፃላላ።
1KI 12:21 ሶሎሞነ ናአይ ሮብኣም የሩሳላመ ጋክዳ ዎደ፥ እስራኤለ አሳራ ኦለትድ፥ ካዎተꬃ ባዉ ዛራና መላ ሮብኣም ይሁዳፐነ ብንያመፐ ዶረትዳ 180,000 ኦላንቾታ ሺሽስ።
1KI 12:22 ሽን ፆሳ ቃላይ ፆሳ አስ ግድዳ ሳማየኮ ሀይሳዳ ያግድ ይስ።
1KI 12:23 “ሶሎሞነ ናኣ፥ ይሁዳ ካዋ ሮብኣማስ፥ ይሁዳስ፥ ብንያመስነ አትዳ አሳ ኡባስ ሀይሳዳ ያጋ፤
1KI 12:24 ጎዳይ ህንተኮ፥ ‘ህንተ ዳቦታራ፥ እስራኤለታራ ኦለታናዉ ቦፕተ። ሀይሳ ታኒ ኦꬅዳ ግሾ ህንተ ኡባይ ህንተ ሶ ህንተ ሶ ስምተ’ ያጋዳ ኦዳ” ያግስ። ኤንቲ ጎዳ ቃላ ስእድ ሶ ብዶሶና።
1KI 12:25 ሄሳፈ ጉየ እዮርባም ደረይ ዳርያ ኤፍሬማ ቢታን ደእያ ሴከማ ሚፃ ኦꬅ ግምብድ፥ ያን ደእስ፤ ያፐ ከይድ ብድ ጵንኤላ ግምብስ።
1KI 12:26 እዮርባም ባ ዎዛናን፥ “ካዎተꬃይ ዳዊታ ኮቻስ ስማና።
1KI 12:27 ሀ አሳይ ፆሳ ኬꬃን ያርሾ ያርሻናዉ የሩሳላመ ብያባ ግድኮ፥ ኤንቲ ባንታ ጎዳኮ፥ ካዋ ሮብኣማኮ ስማና። ኤንቲ ታና ዎꬍድ፥ ይሁዳ ካዋ ሮብኣማኮ ስማና” ያግድ ቆፕስ።
1KI 12:28 ካዎይ ዞረትዳፐ ጉየ ዎርቃፈ ናምኡ ማራ ምስለታ መꬍድ፥ አሳኮ፥ “ህንተ ህዛፐ የሩሳላመ ቡሳይ ግዳና። ህንተኖ እስራኤለ አሳዉ፥ ሄኮ፥ ህንተና ግብፀፈ ከስዳ ህንተ ፆሳት ሀይሳታ!” ያግስ።
1KI 12:29 ኤንታፈ እሱዋ ቤተለን፥ እሱዋ ዳነን ዎꬅስ።
1KI 12:30 ሀ ሀኖታይ ኤንታዉ ናጋራ ግድስ፤ አሳይ ሄ ማራ ምስልያ ጎይናናዉ ዳነ ጋካናዉ ብዶሶና።
1KI 12:31 እዮርባም ደረ ሁጰን ꬎቃ ጎይኖ በሳታ ጊግስድ ሌወ ኮቸ ግዶና እፅኮካ ኦናካ ካህነ ኦꬅድ ሹምስ።
1KI 12:32 ይሁዳን ቦንቸይሳዳ ሆስፑንꬆ አጌናን ታማነ እቻሻንꬆ ጋላሳን ባኣለ ቦንቻናዳ እዮርባም ቃማ ቃችድ ያርሾ ያርሽስ። እ ሀይሳዳ ሀንድ ቤተለ ብድ፥ ባ መꬍዳ ማራ ምስልያስ ያርሾ ያርሽስ። ባ መꬍዳ ꬎቃ ጎይኖ በሳታን ካህነታ ቤተለን ሹምስ።
1KI 12:33 እ ባ ሁጰን ዶርዳ ሆስፑንꬆ አጌናን፥ ታማነ እቻሻንꬆ ጋላስ ቤተለ ብድ ሄ ጋላሳይ እስራኤለ አሳስ ባኣለ ግዳና መላ አዋጅስ። እፃነ ጩይሳናዉ ያርሾ በሳ ከይስ።
1KI 13:1 ሄኮ፥ እዮርባም ያርሾ ሺሻናዉ ያርሾ በሳ ማታን ኤቅዳሽን፥ ጎዳይ ኪትዳ፥ ፆሳ አስ ግድዳ እስ ናበይ ይሁዳፐ ይስ።
1KI 13:2 ጎዳይ ኪትን ሄ ያርሾ በሳ ቦላ ሀይሳዳ ያግድ ዋስስ፤ “ያርሾ በሳዉ፥ ያርሾ በሳዉ፥ ጎዳይ ኔኮ ያጌስ። ሄኮ፥ ዳዊታ ኬꬃስ እዮስያሳ ጌተትያ እስ ናእ የለታና። ሄ ናአይ ሀእ ሀይሳን ꬎቃ ያርሾ በሳን ያርሽሸ ደእያ ካህነታ ነ ቦላ ያርሻና፤ አሳ መቀꬃ ነ ቦላ ፁጋና” ያግስ።
1KI 13:3 ሄ ጋላስ ፆሳ አደይ ሀይሳዳ ያግድ ማላታ እሚስ፤ “ጎዳይ ኦድዳ ማላታይ ሀይሳ፤ ሄኮ፥ ሀ ያርሾ በሳይ ጳልቀታና፤ እያ ቦላ ደእያ ብዶይ ላለታና” ያግስ።
1KI 13:4 ካዎይ እዮርባም ፆሳ አደይ ቤተለን ደእያ ያርሾ በሳ ቦላ ዋስዳ ዋሱዋ ስእዳ ዎደ ያርሾ በሳፈ ባ ኩሽያ ማልድ፥ “ሄ አድያ ኦይክተ!” ያግስ። ሽን እ፥ አድያ ማልዳ ኩሸይ በሳን መልድ አትን፥ ባ ኩሽያ ጉየ ዛሪድ ኤካናዉ ዳንዳእቤና።
1KI 13:5 ፆሳ አደይ ጎዳ ቃላን እምዳ ማላታን ያርሾ በሳይ ጳልቀትድ ዎꬍን፥ እያ ቦላ ደእያ ብዶይካ ላለትስ።
1KI 13:6 ካዎይ እዮርባም ፆሳ አድያ፥ “ታ ኩሸይ ካሰይሳዳ ሀናና መላ ታዉ ጋናታ፤ ጎዳ ነ ፆሳ ዎሳ” ያግስ። ፆሳ አደይ ካዋስ ጋናትድ ጎዳ ዎስን፥ ካዋ ኩሸይ ስሚድ ካሰይሳዳ ሀንስ።
1KI 13:7 ካዎይ ናብያኮ፥ “ታራ ታ ሶ የꬋ፤ ካꬅ ማ፤ ታ ነዉ እሞታ እማና” ያግስ።
1KI 13:8 ሽን ፆሳ አደይ፥ “ሀር አቶሽን ኔኒ ነ አቁዋፐ ባጋ ታዉ እምያኮካ፥ ታኒ ኔራ ቢከ፤ ሀይሳን ካꬅ ሚከ፥ ሃ ኡይከ።
1KI 13:9 ጎዳ ቃላይ፥ ‘ኔኒ ካꬅ ሞፓ፥ ሃ ኡዮፓ፥ ነ ይዳ ኦግያራ ስማዳ ቦፓ’ ያግስ ግድ ካዋስ ዛርስ።”
1KI 13:10 ሄሳ ግሾ፥ እ ሀራ ኦገራ ብስ፤ እ ቤተለ ይዳ ኦግያራ ስሚድ ብቤና።
1KI 13:11 ሄ ዎደ ቤተለን እስ ጭማ ናበይ ደኤስ። ሄ ጋላስ ፆሳ አደይ ቤተለን ኦꬅዳባ ኡባ ሄ ጭማ አድያ ናይት ይድ እያዉ ኦድዶሶና። ቃስ ሄ አደይ ካዋስ ኦድዳ ቃላ ኤንቲ ባንታ አዋስ ኦድዶሶና።
1KI 13:12 አዋይ፥ “እ አዉ ባጋራ ብዴ?” ያግን፥ ይሁዳፐ ይዳ ፆሳ አደይ ብዳ ኦግያ ማልዶሶና።
1KI 13:13 እ ባ ናይታኮ “ታዉ ኤለ ሀረ ኮርተ” ያግን፥ ኤንቲ እያዉ ሀረ ኮርን ቶግስ።
1KI 13:14 ፆሳ አድያ ጌዶ ካልድ ብስ። እስ ዎላ ኩያን ኡትዳይሳ ደምድ፥ “ይሁዳፐ ይዳ ፆሳ አደይ ነኔ?” ያግድ ኦይችስ። አደይ፥ “ኤ ታና” ያግስ።
1KI 13:15 ጭማ ናበይ፥ “ካꬅ ማናዉ ታራ ታ ሶ የꬋ” ያግስ።
1KI 13:16 ፆሳ አደይ ዛሪድ፥ “ታኒ ጉየ ስማዳ ኔራ ባናዉ ዎይኮ ሀ በሳን ኔራ ካꬅ ማናዉ ዎይኮ ሃ ኡያናዉ ዳንዳእከ።
1KI 13:17 ጎዳ ቃላይ ታኮ ‘ኔኒ ሄ በሳን ካꬅ ሞፓ፥ ሃ ኡዮፓ፥ ነ ይዳ ኦግያራ ስማዳ ቦፓ’ ያግስ” ያግስ።
1KI 13:18 ጭማ ናበይ፥ “ታካ ኔዳ ናበ። ጎዳይ ኪትዳ ኪታንቾይ ታኮ፥ ‘ካꬅ ማና መላነ ሃ ኡያና መላ እያ ዛራዳ ኔራ ነ ሶ ኤካዳ ያ’ ” ያግስ። ሽን ጭማ አደይ እያዉ ዎርዶ ኦድስ።
1KI 13:19 ሄሳ ግሾ፥ ፆሳ አደይ ስሚድ እያራ እያ ሶ ብድ ምስነ ኡይስ።
1KI 13:20 ኤንቲ ጋይታ ቦላ ኡትዳሽን፥ ጎዳ ቃላይ እያ ጉየ ዛርዳ ኤህዳ ጭማ ናብያኮ ይስ።
1KI 13:21 ይሁዳፐ ይዳ ፆሳ አድያስ ባ ቃላ ꬎቁ ኦꬅድ፥ “ጎዳይ ሀይሳዳ ያጌስ፤ ‘ኔኒ ጎዳ ቃላ ኪተታባካ፤ ጎዳይ ነ ፆሳይ ነና ኪትዳ ኪታ ናጋባካ።
1KI 13:22 ሄ በሳን ሞፓ ዎይኮ ኡዮፓ’ ግዳ በሳ ጉየ ስማዳ ያን ካꬅ ማዳሳ፤ ሃ ኡያዳሳ። ህዛ ነ አሀይ ነ አዋታ ዱፎን ሞገተና” ያግስ።
1KI 13:23 ፆሳ አደይ ምድ ኡይድ ስምን እያ ጉየ ዛሪድ ኤህዳ ጭማ ናበይ ባ ሀርያ እያዉ ኮርስ።
1KI 13:24 እ ኦግያ ብሽን ጋሞይ ከይድ እያ ዎꬍን፥ አሀይ ኦግያን ኩንድስ፤ ሀረይነ ጋሞይ ናምአይ አሀ ማታን ኤቅዶሶና።
1KI 13:25 ሄኮ፥ ሄ ኦግያራ አꬍያ አሳይ አህ ኦገን ኩንድዳይሳነ ጋሞይ አሀ ማታን ኤቅድይሳ በእድ፥ ብድ ጭማ ናበይ ደእያ ካታማን ኦድዶሶና።
1KI 13:26 እያ ጉየ ዛርዳ ጭማ ናበይ ሄሳ ስእዳ ዎደ ሀይሳዳ ያግስ፤ “ሄስ ጎዳ ቃላስ ኪተቶና እፅዳ ፆሳ አድያ። ጎዳ ቃላይ እያዉ ኮይሮትድ ኦድዳይሳዳ ጎዳይ ጋሞን እያ ጋꬅስ፤ ያትን፥ ጋሞይ እያ መንረꬅድ ዎꬍስ” ያግስ።
1KI 13:27 ሄሳፈ ጉየ፥ ጭማ ናበይ ባ ናይታ፥ “ታዉ ሀረ ኮርተ” ያግን ኤንቲ እያዉ ሀረ ኮርዶሶና።
1KI 13:28 እ ከይድ ብያ ዎደ ኦግያን ኩንድዳ አሀ፥ አሀ ማታን ኤቅዳ ሀርያነ ጋሙዋ ደምስ። ጋሞይ አሀ ምቤና ዎይኮ ሀርያ መንꬅቤና።
1KI 13:29 ጭማ ናበይ ፆሳ አድያ አሀ ደንꬅድ፥ ሀርያ ዞኮን ዎꬅድ፥ ዬካናዉነ ሞጋናዉ ጉየ ባ ካታማ ኤክድ ብስ።
1KI 13:30 ባዉ ጊግስድ ዎꬅዳ ዱፎን አሀ ሞግስ። እያዉ፥ “ታ እሻዉ ታሳ! ታ እሻዉ ታሳ!” ያግድ ዬክስ።
1KI 13:31 እያ ሞግ ስሚድ ባ ናይታኮ ሀይሳዳ ያግስ፤ “ታ ሀይቅያ ዎደ ፆሳ አደይ ሞገትዳ ዱፎን ታና ሞግተ። ታ መቀꬃ እያ መቀꬃ ማታን ዎꬅተ።
1KI 13:32 ቤተለ ካታማን ደእያ ያርሾ በሳ ቦላነ ሳማረ ካታማን ደእያ ꬎቃ ጎይኖ በሳታ ቦላ ጎዳይ ኪትን፥ ሄ አደይ ዋስድ ኦድዳ ትንብተይ ቱማ ፖለታና” ያግስ።
1KI 13:33 ሄስ ሀንንካ እዮርባም ባ ኢታ ኦግያፐ ስምቤና። ꬎቃ ጎይኖ በሳታስ ሌወ ኮቸ ግዶና ኦናካ ካህነ ኦꬅድ ሹምስ። ካህነ ግዳናዉ ኮይያ ኦናካ ꬎቃ ጎይኖ በሳን ሹሜስ።
1KI 13:34 እዮርባማ ኬꬃ አሳ ꬋይሳናዉነ ቢታ ቦላፈ ቁቻናዉ ጋꬅዳ ናጋራይ ሄሳ።
1KI 14:1 ሄ ዎደ እዮርባማ ናአይ አብይ ሀርገትስ።
1KI 14:2 እዮርባም ባ ማችዉ፥ “ደንዳ፤ ኔኒ እዮርባማ ማቾ ግደይሳ ኦንካ ኤሮና መላ ነ ማኡዋ ላማዳ ሴሎ ባ። ሄኮ፥ ታኒ ሀ አሳ ቦላ ካዎታናይሳ ታዉ ኦድዳ ናበይ አክይ ያን ደኤስ።
1KI 14:3 ታሙ ኡይꬁ፥ ጉꬃ ዳቦነ እስ ኦቶ ኤስ እያዉ ኤካዳ ባ። ሀ ሀርግዳ ናአባ እ ነዉ ኦዳና” ያግስ።
1KI 14:4 እዮርባማ ማችያ እ ግዳይሳዳ ኦꬃዳ አክያ ሶ ሴሎ ባሱ። አክይ ጭምዳ ግሾ እያ አይፈይ ፄላናዉ ዳንዳኤና።
1KI 14:5 ሽን ጎዳይ አክያኮ፥ “ሄኮ፥ እዮርባማ ማችያ ሀርገትዳ ባ ናአባ ኦይቻናዉ ኔኮ ያዉሱ። ኔኒ እዉ ሀይሳ ሀይሳ ያጋዳ ኦዳ። እያ ኔኮ ጋክያ ዎደ ሀራ ማጫስ ዳናና” ያግስ።
1KI 14:6 አክይ ፐንገን ቶሆ ግርስ ስእድ ሀይሳዳ ያግስ፤ “እዮርባማ ማቸ፥ አነ ሃ ገላ። ኔኒ አይስ ሀይሳ መላ ሀራ አስ ዳናዲ? ታኒ ኢታ ኪታ ነዉ ኦዳና።
1KI 14:7 ኔኒ እዮርባማኮ ባዳ፥ ጎዳይ እስራኤለ ፆሳይ ሀይሳዳ ያጌስ ያጋ፤ ‘ታኒ ነና አሳ ግዶፈ ꬎቁ ኦꬃስ፤ ታ አሳ እስራኤለ ቦላ ነና ካዎꬃስ።
1KI 14:8 ዳዊታ ኮቻፈ ካዎተꬃ ኤካዳ ነዉ እማስ፤ ሽን ኔኒ ታ አይልያ ዳዊታ መላ ግዳካ። እ ታ ኪታ ናግስ፤ ታ ስንꬃን ሱረባ ፃላላ ኦꬅሸ ባ ኩመꬃ ዎዛናን ታና ካልስ።
1KI 14:9 ኔፐ ካሰ ደእያ ኡባይ ኦꬅዳይሳፈ አꬍያ ኢታባ ኔኒ ኦꬃዳሳ። ኔኒ ነዉ ሀራ ፆሳታነ ብራፐ መꬍዳ ኤቃታ መꬋዳሳ። ያታዳ ታና ሀንቀꬃዳሳ፤ ታዉ ዞኮ ዛራዳሳ።
1KI 14:10 ሄሳ ግሾ፥ ታኒ እዮርባማ ኬꬃ አሳ ቦላ ኢታባ ኤሀና። እስራኤለ ቢታን እዮርባማ ኬꬃ አሳፐ አይለ ግድን ዎማኖ እስ አደካ አሾና ꬋይሳና። ከምኤለይ ታማን ፁገትድ ዉረይሳዳ ታኒ እዮርባማ ኬꬃ ፁጋዳ ዉርሳና።
1KI 14:11 እዮርባማ ኮቸ ግድድ ካታማን ሀይቅያ ኦናካ ካናት ማና፤ ጋፃረን ሀይቀይሳታ ሳሎ ካፎት ማና። ታኒ ጎዳይ ሀይሳ ኦዳስ!’ ” ያግስ።
1KI 14:12 እዮርባማ ማቸኮ፥ “ኔኒ ደንዳዳ ነ ሶ ባ። ነ ቶሆይ ካታማ ገልያ ዎደ ናአይ ሀይቃና።
1KI 14:13 እስራኤለ ኡባይ ናኣስ ዬክድ ሞጋና። እዮርባማ ኬꬃን ጎዳ እስራኤለ ፆሳ ስንꬃን እያን ሎኦባይ በንትዳ ግሾ፥ እዮርባማ ኬꬃፈ እያ ፃላል ሞገታና።
1KI 14:14 ቃስ እዮርባማ ኬꬃ ꬋይስያ ካዎ ጎዳይ ባዉ እስራኤለ ቦላ ደንꬃና።
1KI 14:15 ጎዳይ እስራኤለ ሾጫና፤ ሃꬃ ግዶን ማይረይ ቃፀይሳዳ ጎዳይ ሄ ዎደ እስራኤለ ቃꬃና። አሼራ ጌተትያ ፆሰ ምስለ ኤስድ፥ ጎዳ ሀንቀꬅዳ ግሾ፥ ኤንታ አዋታስ እ እምዳ ሎኦ ቢታፈ ኤንታ ሾዳና፤ ኤንታ ኤፍራፂሳ ሻፋፐ ሄፍንꬃን ላላና።
1KI 14:16 እዮርባም ኦꬅዳ ናጋራ ግሾነ እስራኤለ አሳ ናጋራ ኦስስዳ ግሾ ጎዳይ እስራኤለ አጋና” ያግስ።
1KI 14:17 እዮርባማ ማችያ ባዳ ትርሳ ጋካዳ፥ ፐንገ የꬍያ ዎደ ናአይ ሀይቅስ።
1KI 14:18 ባ አይልያ ናብያ አክያ ባጋራ ጎዳይ ኦድዳይሳዳ እያ ሞግዶሶና፤ እስራኤለ አሳ ኡባይ እያዉ ዬክዶሶና።
1KI 14:19 እዮርባም ኦꬅዳ ሀራባይ፥ እ ኦለትዳ ኦላይነ እያ አይሶ ማራይ፥ ሄኮ፥ እስራኤለ ካዎታ ታርከ ማፃፋን ፃፈትድ ደኤስ።
1KI 14:20 እዮርባም ላታማነ ናምኡ ላይꬅ ካዎትድ ሀይቅስ። እያ በሳን እያ ናአይ ናዳብ ካዎትስ።
1KI 14:21 ሶሎሞነ ናአይ ሮብኣም ይሁዳን ካዎትስ፤ ሮብኣም ካዎትያ ዎደ እያዉ ላይꬅ ኦይታማነ እስኖ። ጎዳይ ባ ሱንꬃይ ፄገታና መላ እስራኤለ ኮቻታ ቢታ ኡባ ግዶፈ ዶርዳ የሩሳላመ ካታማን፥ ሮብኣም ታማነ ላፑን ላይꬅ ካዎትስ። እያ አየ ሱንꬃይ ናእሞ፤ እያ አሞነ ቢታ አስ።
1KI 14:22 ይሁዳ አሳይ ጎዳ ስንꬃን ኢታባ ኦꬅዶሶና። ባንታ ኦꬅዳ ናጋራን ባንታ አዋታፐ አꬍድ ጎዳ ሀንቀꬅዶሶና።
1KI 14:23 ቃስ ኤንቲ ꬎቃ ጎይኖ በሳታ፥ ኤቃ ሹቻታነ አሼሮ ጌተትያ ፆሰ ምስለታ ደረ ቦላነ እርፃ ምꬃታ ጋርሳን ኤስዶሶና።
1KI 14:24 ሀር አቶሽን፥ ኤንታ ꬎቃ ጎይኖ በሳን፥ ጎይኖ ዎጋ ኦꬅድ አደይ አደራ ጋሄቴስ። ጎዳይ እስራኤለ ስንꬃፈ ከስዳ ካዎተꬃት ኦꬅያ እፀትዳ ኦሶታ ኡባ እስራኤለ አሳይ ኦꬅዶሶና።
1KI 14:25 ሮብኣም ካዎትዳ እቻሻንꬆ ላይꬃን ግብፀ ካዎይ ሽሻቅ የሩሳላመ ካታማ ቦላ ኦላ ደንꬅስ።
1KI 14:26 ፆሳ ኬꬃነ ካዎ ጋꬎን ደእያ ሻሉዋ፥ ሶሎሞነይ ቆፅስዳ ዎርቃ ጎንዳለታ ኡባ ቦንቅድ ኤክስ።
1KI 14:27 ያትን፥ ካዎይ ሮብኣም ሄ ጎንዳለታ ግሾ ናሰ ብራታፐ ሀራ ጎንዳለታ ኦስስስ። ኤንቲ ናገታና መላ ካዎ ጋꬎ ፐንግያ ናገይሳታ ሀላቃታስ እሚስ።
1KI 14:28 ካዎይ ፆሳ ኬꬅ ብያ ዎደ ናገይሳት ጎንዳለታ ኦይኮሶና፤ እ ስሚድ ብያ ዎደ ኤንቲ ዛሪድ ናገይሳታ ኬꬃን ዎꬆሶና።
1KI 14:29 ሮብኣም ሀንዳ ሀራባይነ እ ኦꬅዳ ኡባይ ይሁዳ ካዎታ ታርከ ማፃፋን ፃፈትስ።
1KI 14:30 ሮብኣምነ እዮርባም ኡባ ዎደ ኦላን ደእዶሶና።
1KI 14:31 ሮብኣም ሀይቅድ ባ ማይዛታን ጋሄትስ፤ ዳዊታ ካታማን ደእያ ባ አዋታ ዱፎን ሞገትስ። እያ አየ ሱንꬃይ ናእሞ፤ እያ አሞነ ቢታ አስ፤ ሮብኣማ በሳን እያ ናአይ አብይ ካዎትስ።
1KI 15:1 ናባፃ ናአይ እዮርባም ካዎትዳ ታማነ ሆስፑንꬆ ላይꬃን አብይ ይሁዳን ካዎትስ።
1KI 15:2 አብይ የሩሳላመን ሄꬑ ላይꬅ ካዎትስ። እያ አይያ አበሰሎመ ናአ፤ እ ሱንꬃይ ማእኮ።
1KI 15:3 እያፐ ካሰ፥ እያ አዋይ ኦꬅዳ ናጋራ ኡባ ኦꬅስ። እያ ዎዛናይ እያ አዋ አዋይ ዳዊታ ዎዛናይ ፖሎ ግድዳይሳዳ ጎዳ፥ ባ ፆሳ ስንꬃን ፖሎ ግደና።
1KI 15:4 ግዶሽን፥ እያፐ ጉየ የሩሳላመን ካዎታና መላነ የሩሳላመ ሳሮተꬃ ናጋና መላ ጎዳይ እያ ፆሳይ፥ ዳዊታ ግሾ አብያስ እስ አደ ናኣ እሚስ።
1KI 15:5 ጎዳይ ሄሳ ኦꬅዳይ፥ ዳዊቲ ህተ አድያ ኦርዮና ቦላ ናጋራ ኦꬅዳይሳፈ አትሽን፥ ባ ደኦ ላይꬃ ኡባን ጎዳ ኪታፐ እስባካ ባልቤና።
1KI 15:6 አብይ ደእዳ ላይꬃ ኡባን ሮብኣምነ እዮርባም ኦለትሸ ደእዶሶና።
1KI 15:7 አብይ ሀንዳ ሀራባይነ እ ኦꬅዳባ ኡባይ ይሁዳ ካዎታ ታርከ ማፃፋን ፃፈትስ። አብይነ እዮርባም ኦለትሸ ደእዶሶና።
1KI 15:8 አብይ ሀይቅድ ባ ማይዛታን ጋሄትስ፤ እ ዳዊታ ካታማን ሞገትስ፤ እያ በሳን እያ ናአይ አስ ካዎትስ።
1KI 15:9 እስራኤለ ካዎይ እዮርባም ካዎትዳ ላታማንꬆ ላይꬃን አስ ይሁዳን ካዎትስ።
1KI 15:10 አስ የሩሳላመን ኦይታማነ እስ ላይꬅ ካዎትስ። እያ ዎጋ አየ ሱንꬃይ ማእኮ፤ እያ አበሰሎመ ናአ።
1KI 15:11 አስ ባ ማይዛይ ዳዊቲ ኦꬅዳይሳዳ፥ ጎዳ ስንꬃን ሱረባ ኦꬅስ።
1KI 15:12 ጎይኖ ዎጋ ኦꬅድ አደይ አደራ ላይማተሳታ አስ ቢታፈ ꬋይስስ። እያፐ ካሰ ደእያ ካዎት መꬍዳ ኤቃ ምስለታ ኡባ መንረꬅስ።
1KI 15:13 እያ ዎጋ አይያ ማእካ አሼራ ጌተትያ ፆሴስ ቱና ኤቃ ምስለ መꬍዳ ግሾ፥ ካዎ አዮ ጌተትያ ቦንቾ በሳፈ እዮ ድግስ። አስ ሄ ኤቃ ምስልያ ቃንፀረꬅድ ቀድሮና ዛንጋራን ፁግስ።
1KI 15:14 አስ ꬎቃ ጎይኖ በሳታ ኡባ ꬋይሶና አግኮካ፥ እ ባ ደእዳ ላይꬃ ኡባን ፆሳስ አማነትያ አስ ግድድ ደእስ።
1KI 15:15 እነ እያ አዋይ ፆሳስ ዱማይድ ዎꬅዳ ብራ፥ ዎርቃነ ሀራ ሚሸታ ኤህድ፥ ፆሳ ኬꬃን ዎꬅስ።
1KI 15:16 ይሁዳ ካዎይ አስነ እስራኤለ ካዎይ ባኦስ፥ ባንታ ላይꬃ ኡባን ኦላን ደእዶሶና።
1KI 15:17 እስራኤለ ካዎይ ባኦስ ይሁዳ ቦላ ደንድድ፥ ይሁዳ ካዋ አሳ ቢታፈ ኦንካ ገሎና መላነ ከዮና መላ ተቃናዉ ራማ ዩሹዋ ግምብስ።
1KI 15:18 ሄሳ ጋሶን ካዎይ አስ ፆሳ ኬꬃንነ ካዎ ጋꬎን ደእያ ዎርቃነ ብራ ኡባ ከስድ ባ ሞርናታ ኩሸን ዎꬅስ። ሄዝዮና ናኣ ናኣ፥ ፃብርሞና ናኣስ፥ ዳማስቆን ደእያ አራመ ካዋ በን-ሀዳዳ እሞታ ኦꬅድ የድሸ ሀይሳዳ ያግስ፤
1KI 15:19 “ካሰ ታ አዋራነ ነ አዋራ ጫቅዳይሳዳ፥ አነ ታራነ ኔራ ጫቆስ። ሄኮ፥ ታኒ ሀ ብራነ ዎርቃ ታኒ ነዉ እሞታ ኦꬃዳ የዳስ። እስራኤለ ካዎይ ባኦስ ባ ኦላንቾታ ታ ቢታፈ ከሳና መላ ኔኒ ካሰ እያራ ጫቅዳ ጫቁዋ መንꬃ” ያግስ።
1KI 15:20 በን-ሀዳድ ካዎይ አስ ግዳይሳ ኤክድ፥ ባ ቶራ ሞጮናታ እስራኤለ ካታማታ ኦላናዉ የድስ። ኤንቲ እዮና፥ ዳነነ አቤል-ቤት-ማእካ ካታማታ፥ ጋልላ አባ ማታን ደእያ ቢታነ ንፍታለመ ቢታራ ጋꬅድ ኦይክዶሶና።
1KI 15:21 ካዎይ ባኦስ ሄሳ ስእድ፥ ራማ ግምበይሳ አግድ ትርሳ ብስ።
1KI 15:22 ሄሳፈ ጉየ ካዎይ አስ ይሁዳን ደእያ አሳ ኡባ ኪትን፥ እሶይካ አቶና ደንድድ፥ ባኦስ ያን ጎኤትያ ሹቻነ ምꬃ ራማፐ ጋዝዶሶና። ካዎይ አስ ምፅጳንነ ብንያመን ደእያ ግብአ ግምብስ።
1KI 15:23 አስ ሀንዳ ሀራባይ፥ እያ ምኖተꬃይ ኡባይ፥ እ ኦꬅዳባ ኡባይነ እ ኬፅዳ ካታማት ይሁዳ ካዎታ ታርከ ማፃፋን ፃፈትስ። ሽን እ ጭምዳ ዎደ ባ ቶሁዋ ሳከትስ።
1KI 15:24 አስ ሀይቅድ፥ ባ ማይዛታን ጋሄትድ ባ ማይዛ ዳዊታ ካታማን ሞገትስ። እያ ናአይ እዮሳፈፅ እያ በሳን ካዎትስ።
1KI 15:25 ይሁዳ ካዎይ አስ ካዎትዳ ናምአንꬆ ላይꬃን እዮርባማ ናአይ ናዳብ እስራኤለን ካዎትስ፤ እ እስራኤለ ቢታን ናምኡ ላይꬅ ካዎትስ።
1KI 15:26 ናዳብ ካሰ ባ አዋ ኦግያንነ እስራኤለ አሳ ኦስስዳ እያ ናጋራ ኦግያን ሄመትድ ጎዳ ስንꬃን ኢታባ ኦꬅስ።
1KI 15:27 ይሳኮራ ኮቸ ግድዳ አክያ ናአይ ባኦስ ናዳባ ቦላ ማቀትስ። ሄ ዎደ ናዳበይነ እያ ኦላንቾት ፍልስፄመን ደእያ ግባቶና ካታማ ዩሾን ደኦሶና።
1KI 15:28 ይሁዳ ካዎይ አስ ካዎትዳ ሄꬓንꬆ ላይꬃን ባኦስ ናዳባ ዎꬍድ እያ በሳን እ ባዉ ካዎትስ።
1KI 15:29 ባኦስ ካዎቶ ዶምዳ መላ እዮርባማ ሶ አሳ ኡባ ዎꬍድ ዉርስስ። ጎዳይ ሴሎፐ ይዳ ባ አይልያ፥ ናብያ አክያ ባጋራ ኦድዳይሳዳ እዮርባማ ኬꬃ አሳ ኡባይ ሀይቅ ዉርስ።
1KI 15:30 ሄስ ሀንዳይ፥ እዮርባም ባ ሁጰን ኦꬅዳ ናጋራንነ እስራኤለ አሳ እ ኦስስዳ ናጋራን ጎዳ እስራኤለ ፆሳ ሀንቀꬅዳ ግሾሳ።
1KI 15:31 ናዳብ ሀንዳ ሀራባይነ እ ኦꬅዳባ ኡባይ እስራኤለ ካዎታ ታርከ ማፃፋን ፃፈትስ።
1KI 15:32 ይሁዳ ካዎይ አስነ እስራኤለ ካዎይ ባኦስ ባንታ ካዎተꬃ ላይꬃ ኡባን ኦለትዳ መላ ደእዶሶና።
1KI 15:33 ይሁዳ ካዎይ አስ ካዎትዳ ሄꬓንꬆ ላይꬃን አክያ ናአይ ባኦስ እስራኤለ ቦላ ካዎትስ፤ እ ትርሳ ካታማን ኡትድ ላታማነ ኦይዱ ላይꬅ ካዎትስ።
1KI 15:34 እዮርባም እስራኤለ አሳ ናጋራ ኦስስዳይሳዳ እካ ሄ ኦግያን ሄመትድ ጎዳ ስንꬃን ኢታባ ኦꬅስ።
1KI 16:1 ሀናና ናኣ ግድዳ፥ እዩ ባጋራ ጎዳ ቃላይ ባኦሳባ ሀይሳዳ ያግስ፤
1KI 16:2 “ታኒ ነና ባናፐ ደንꬃዳ ታ አሳ እስራኤለ ቦላ ሀላቃ ኦꬃስ፤ ሽን ኔኒ እዮርባማ ኦግያን ሄመታዳሳ። ቃስ ታ አሳ እስራኤለ ናጋራ ኦስሳዳ ኤንታ ናጋራን ታና ሀንቀꬃዳሳ።
1KI 16:3 ሄኮ፥ ታኒ ባኦሳነ እያ ሶ አሳ ፕታና ሀናይስ። ባኦሳ፥ ታኒ ነ ሶ አሳ ናባፃ ናኣ እዮርባማ ሶ አሳዳ ኦꬃና።
1KI 16:4 ባኦሳ ኮቸ ግድድ ካታማን ሀይቅያ ኦናካ ካን ማና፤ ቃስ ጋፃረን ሀይቅያ ኦናካ ሳሎ ካፎት ማና” ያግስ።
1KI 16:5 ባኦስ ሀንዳ ሀራባይ፥ እ ኦꬅዳባይነ እያ ምኖተꬃይ እስራኤለ ካዎታ ታርከ ማፃፋን ፃፈትስ።
1KI 16:6 ባኦስ ሀይቅድ ባ ማይዛታን ጋሄትድ፥ ትርሳ ካታማን ሞገትስ። እያ ናአይ ኤል እያ በሳን ካዎትስ።
1KI 16:7 ጉጅድካ፥ ጎዳይ፥ ናብያ እዩ ባጋራ ባኦሳ ቦላነ እያ ሶ አሳ ቦላ ትንብተ ኦድዳ ጋሶይ፥ ባኦስ ኦꬅዳ ናጋራ ግሾነ እዮርባምነ እያ ሶ አሳይ ኦꬅዳይሳዳ ኢታባ ኦꬅድ፥ ጎዳ ሀንቀꬅዳ ግሾሳ። ቃስ እ እዮርባማ ሶ አሳ ኡባ ዎꬍድ ዉርስዳ ግሾሳ።
1KI 16:8 ይሁዳ ካዎይ አስ ካዎትዳ ላታማነ ኡሱፑንꬆ ላይꬃን፥ ባኦሳ ናአይ ኤል እስራኤለን ካዎትስ። ትርሳ ካታማን ኡትድ ናምኡ ላይꬅ ካዎትስ።
1KI 16:9 ካዋ ቶራ ሞጮናታፐ እሱዋ ግድድ፥ እያ ፓራ ጋረታፐ ባጋ ኪትያ ዝምር ካዋ ቦላ ማቀትስ። ካዎይ ኤል ሄ ዎደ ትርሳን ደእያ ካዎ ጋꬎ አዋተꬃን አይስያ አርፃ ሶን ማꬆትድ ኡትስ።
1KI 16:10 ይሁዳ ካዎይ አስ ካዎትዳ ላታማነ ላፑንꬃ ላይꬃን ዝምር፥ አርፃ ሶ ገልድ ካዋ ዎꬍድ እያ በሳን ባዉ ካዎትስ።
1KI 16:11 ዝምራ ካዎትዳ መላ ባኦሳ ሶ አሳ ኡባ ዎꬍስ። ባኦስ ዳቦ ግድን ላገ ግድን እስ አደካ ፓፃ አሽቤና።
1KI 16:12 ናብያ እዩ ባጋራ ጎዳይ ባኦሳ ቦላ ኦድዳ ቃላዳ ዝምር ባኦሳ ሶ አሳ ኡባ ዎꬍድ ꬋይስስ።
1KI 16:13 ሄስ ሀንዳይ ባኦስነ እያ ናአይ ኤል ባንታ ኤቃ ጎይንድ ኦꬅዳ ናጋራ ጋሶንነ እስራኤለ አሳ ኦስስዳ ናጋራ ጋሶን፥ ጎዳ እስራኤለ ፆሳ ሀንቀꬅዳ ግሾሳ።
1KI 16:14 ኤል ሀንዳ ሀራባይነ እ ኦꬅዳባይ እስራኤለ ካዎታ ታርከ ማፃፋን ፃፈትስ።
1KI 16:15 ይሁዳ ካዎይ አስ ካዎትዳ ላታማነ ላፑንꬃ ላይꬃን ዝምር ትርሳን ላፑን ጋላሳ ፃላላ ካዎትስ። ሄ ዎደ እስራኤለ ኦላንቾት ግባቶና ጌተትያ ፍልስፄመ ካታማ ዩሹዋ ተቅዶሶና።
1KI 16:16 እስራኤለ አሳይ ዝምሪ ካዋ ቦላ ማቀትድ እያ ዎꬍዳይሳ ስእዳ ዎደ ቶራ ሞጮና ኦምራ ሄ ጋላስ ሄ በሳን እስራኤለ ካዎ ኦꬅድ ካዎꬅዶሶና።
1KI 16:17 ኦምርነ እስራኤለ አሳይ ግባቶናፐ ከይድ ትርሳ ካታማ ተቅዶሶና።
1KI 16:18 ካታማይ ኦይከትዳይሳ በእዳ ዎደ ዝምር ካዎ ጋꬎ ግዶን ደእያ ግምብያ ገልድ ካዎ ጋꬎ ታማን ኦይꬅስ፤ እካ ሀይቅስ።
1KI 16:19 ሄስ ሀንዳይ እዮርባም ኦꬅዳ ናጋራነ እስራኤለ አሳ ኦስስዳ ናጋራ ካልድ ዝምር ጎዳ ስንꬃን ኢታባ ኦꬅዳ ግሾሳ።
1KI 16:20 ዝምር ሀንዳ ሀራባይነ እ ማቅዳ ማቆይ እስራኤለ ካዎታ ታርከ ማፃፋን ፃፈትስ።
1KI 16:21 ሄ ዎደ እስራኤለ አሳይ ናምኡ ከይድ ሻከትስ። አሳፐ ባጋይ ግናታ ናኣ ትብና ካዎꬃናዉ ኮይን፥ ባጋይ ቃስ ኦምራ ካዎꬃናዉ ኮይስ።
1KI 16:22 ሽን ኦምራ ማድያ አሳይ ግናታ ናኣ ትብና ማድያ አሳፐ ምንዳ ግሾ ትብን ሀይቅን ኦምር ካዎትስ።
1KI 16:23 ይሁዳ ካዎይ አስ ካዎትዳ ሀስታማነ እስንꬆ ላይꬃን፥ ኦምር እስራኤለ ቦላ ካዎትድ ታማነ ናምኡ ላይꬅ ሃርስ፤ እያፐ ኡሱፑን ላይꬃ ትርሳን ሃርስ።
1KI 16:24 ኦምር ሳማርያ ዙማ ሳምራ ጌተትያ አድያፈ 6,000 ብራ ሳንትመን ሻምድ፥ ያን ካታማ ኬፅስ። ሄ ካታማ ሄ ዙማ ጎዳ ሱንꬃን ሳማረ ግድ ሱንꬅስ።
1KI 16:25 ሽን ኦምር ጎዳ ስንꬃን ኢታባ ኦꬅስ፤ እ ካሰ ደእዳ ካዎታ ኡባፈ አꬅድ ናጋራ ኦꬅስ።
1KI 16:26 ኦምር ናባፃ ናአይ እዮርባም ኦꬅዳ ናጋራነ እስራኤለ አሳ ኦስስዳ ናጋራ ካልስ፤ ሄ ፓꬆና ኤቃ ጋሶን ጎዳ፥ እስራኤለ ፆሳ ሀንቀꬅስ።
1KI 16:27 ኦምር ሀንዳ ሀራባይ፥ እ ኦꬅዳባይነ እያ ምኖተꬃይ እስራኤለ ካዎታ ታርከ ማፃፋን ፃፈትስ።
1KI 16:28 ኦምር ሀይቅድ ባ ማይዛታን ጋሄትድ፥ ሳማረን ሞገትስ። እያ ናአይ አካብ እያ በሳን ካዎትስ።
1KI 16:29 ይሁዳ ካዎይ አስ ካዎትዳ ሀስታማነ ሆስፑንꬆ ላይꬃን፥ ኦምራ ናአይ አካብ እስራኤለን ካዎትስ። ኦምራ ናአይ አካብ ሳማረን እስራኤለ ቦላ ላታማነ ናምኡ ላይꬅ ካዎትስ።
1KI 16:30 ኦምራ ናአይ አካብ ባፐ ስን ካዎትዳ ካዎታ ኡባፈ አꬍያ ኢታባ ጎዳ ስንꬃን ኦꬅስ።
1KI 16:31 ናባፃ ናአይ እዮርባም ኦꬅዳ ናጋራ ላፋባ ግድ ቆፎ ፃላላ ግዶናሽን፥ ስዶና ካዋ ኤትባላ ናእዉ ኤልዛቤሎ ባዉ ማቾ ኤክድ፥ ባኣለ ኤቃስ ኦሶነ ጎይኖ ዶምስ።
1KI 16:32 ሳማረን እ ኬፅስዳ ባኣለ ኤቃ ኬꬃን ያርሾ በሲ ኬፅስ።
1KI 16:33 ቃስ አካብ አሼራ ጌተትያ ፆሰ ምስልያ ኤስድ፥ ባፐ ስን ደእዳ ካዎታ ኡባፈ አꬅድ ጎዳ እስራኤለ ፆሳ ሀንቀꬅያ ናጋራ ኦꬅስ።
1KI 16:34 አካባ ካዎተꬃ ዎደ ቤተለፐ ይዳ፥ ህኤላ አደይ እያርኮ ዛሪድ ኬፅስ። ናወ ናኣ እያሱ ባጋራ ጎዳይ ኦድዳይሳዳ፥ ህኤል እያርኮ ኬፃናዉ ባስያ ዎደ አቤሮ ጌተትያ ባይራ ናአይ ሀይቅስ። ቃስ ሳንቃ አꬅያ ዎደ ሳጉባ ጌተትያ ካሎ ናአይ ሀይቅስ።
1KI 17:1 ጋላዳን ተስባፐ ይዳ ናበይ፥ ኤልያስ ካዋ አካባ ሀይሳዳ ያግስ፤ “ታኒ እያዉ ኦꬅያ ጎዳይ፥ እስራኤለ ፆሳይ ኤሮ! ካልድ ያና ላይꬃታን፥ ታኒ ኦዶና ደእሽን፥ ሳአን እር ቡከና ዎይኮ ፃሳተና” ያግስ።
1KI 17:2 ሄሳፈ ጉየ፥ ጎዳ ቃላይ ኤልያሳኮ ይድ ሀይሳዳ ያግስ፤
1KI 17:3 “ሀይሳፈ ደንዳዳ ዶሎሀ ባጋ ባ፤ ያን ዮርዳኖሰ ሻፋፐ ዶሎሀ ባጋራ ደእያ ኮራታ ዛንጋራን ቆሰታ።
1KI 17:4 ኔኒ ሄ ሻፋፐ ሃ ኡያና፤ ቁሮት ነና ሄ በሳን ካꬅ ሙዛናዳ ታ ኤንታ ኪታስ” ያግስ።
1KI 17:5 ኤልያስ ጎዳይ ግዳይሳዳ ኦꬅስ፤ ዮርዳኖሰ ሻፋፐ ዶሎሀ ባጋራ ደእያ ኮራታ ዛንጋራ ብድ ያን ኡትስ።
1KI 17:6 ዎንታነ ኦማርስ ቁሮት ኡይꬅነ አሾ ኤልያሳስ ኤሆሶና፤ እ ሻፋፐ ሃ ኡይስ።
1KI 17:7 ቢታን እር ቡኮና ግሾ፥ ጉꬃ ዎደፐ ጉየ ሻፋይ መልስ።
1KI 17:8 ሄሳፈ ጉየ፥ ጎዳ ቃላይ ኤልያሳኮ ሀይሳዳ ያግስ፤
1KI 17:9 “ሀ በሳፈ ደንዳዳ፥ ስዶና ማታን ደእያ ሳራፕታ ባዳ ያን ደኣሻ። ሄኮ፥ እስ አምእያ ካꬅ ነና ሙዛና መላ ታኒ ኪታስ” ያግስ።
1KI 17:10 ኤልያስ ደንድድ ሳራፕታ ብድ ካታማ ፐንግያ ጋክያ ዎደ፥ ሄኮ፥ እስ አምእያ ምꬅ ምፃዉሱ። ኤልያስ ማጫስዉ ፄግድ፥ “ሀያና፥ ታዉ ሃ ኡያናዉ ቡለራ ኤካዳ ያ” ያግስ።
1KI 17:11 ማጫስያ ሃ ኤሀናዉ ብሽን እ ፄግድ፥ “ሀያና ጉꬃ ባሶ ኡይꬅካ ኤካዳ ያ” ያግስ።
1KI 17:12 ማጫስያ ዛራዳ፥ “ጎዳይ፥ ነ ደኦ ፆሳይ ኤሮ! ታዉ ኡይꬅ ባዋ። ታዉ ኦቶን እስ ኩጫ ꬊለይነ ጉꬃ ዛይተ ፃላል ፃሮን ደኤስ። ታኒ ሀይሳ ይዳይ ጉꬃ ምꬅ ምፃዳ፥ ሶ ስማዳ፥ ህኖ ታዉነ ታ ናኣስ እስ ቶሆ ኡክድ ምድ ሀይቃና” ያጋሱ።
1KI 17:13 ኤልያስ ዛሪድ፥ “አይኮይ ባዋ፥ ያዮፋ፤ ባዳ ነ ካꬃ ካꬃ። ሽን ኮይሮ ነ ꬊልያፈ ጉꬃ ኡይꬅ ላቃዳ ታዉ ኤካዳ ያ፤ ሄሳፈ ጉየ፥ ነዉነ ነ ናኣስ ኡካ።
1KI 17:14 ጎዳይ፥ እስራኤለ ፆሳይ፥ ‘ሳኣ ቦላ እር ቡካና ጋካናዉ ꬊለይ ኦቱዋፐ ዛይተይ ፃሩዋፐ ዉረና’ ያጌስ” ያግስ።
1KI 17:15 ሄሳ ግሾ፥ ማጫስያ ባዳ፥ ኤልያስ ግዳይሳዳ ኦꬃሱ፤ ሄሳዳ ሀንን፥ ኤልያስ፥ ማጫስያነ እ ሶ አሳይ ዳሮ ዎደስ ግድያ ካꬅ ደምዶሶና።
1KI 17:16 ጎዳይ ኤልያሳ ባጋራ ኦድዳ ቃላ ናግድ፥ ኦቱዋፐ ꬊለይ ፃሩዋፐ ዛይተይ ዉርቤና።
1KI 17:17 ጉꬃ ዎደፐ ጉየ ሄ ማጫሰ ናአይ ሀርግስ፤ ሀርገይ ጎብሸ ብን፥ ዉርሰꬃን ናአይ ሀይቅስ።
1KI 17:18 ማጫስያ ኤልያሳኮ፥ “ፆሳ አድያዉ፥ ነ ታ ቦላ ሀይሳዳ አይስ ኦꬃዲ? ነ ታ ናጋራ ሀሳይሳዳ ታ ናኣ ዎꬋናዉ ያዲ?” ያጋሱ።
1KI 17:19 ኤልያስ፥ “ነ ናኣ ሃ ኤካዳ ያ” ያግስ። ናኣ እ ክኡዋፐ ኤክድ፥ ፑደ ባ ደእያ ፖቅያ ኤፍድ ባ አርሳን ዝንእስስ።
1KI 17:20 ያትድ ጎዳኮ ሀይሳዳ ያግድ ዋስስ፤ “አቤት ጎዳዉ፥ ታ ፆሳዉ፥ ሀ ታኒ ደእያ አምኤ ናኣ ዎꬋዳ፥ ሀይሳ መላ መቶ እ ቦላ አይስ ኤሀይ?” ያግስ።
1KI 17:21 ሄሳፈ ጉየ ናኣ ቦላ ሄꬑ ቶሆ ዛቁልድ፥ “አቤት ጎዳው፥ ታ ፆሳዉ፥ ሀ ናኣ ፓꬃ” ያግድ ዎስስ።
1KI 17:22 ጎዳይ ኤልያሳ ዎሳ ስእስ። ናኣ ሸምፖይ ስምን፥ ናአይ ፓፅስ።
1KI 17:23 ኤልያስ ናኣ ኤክድ ፖቅያፐ ዱገ ዎꬍስ፤ ናኣ አየስ እምድ፥ “ሄኮ ነ ናአይ ፓፅስ” ያግስ።
1KI 17:24 ማጫስያ፥ “ኔኒ ፆሳ አስ ግደይሳነ ነ ዶናፐ ከይያ ጎዳ ቃላይ ቱማ ግደይሳ ታኒ ሀእ ኤራስ” ያጋሱ።
1KI 18:1 እር ቡኮና አግን ሄꬓንꬆ ላይꬃን፥ ጎዳይ ኤልያሳኮ፥ “ባዳ ካዋ አካባስ ቆንጫ። ታ ቢታን እራ ቡክሳና” ያግስ።
1KI 18:2 ኤልያስ አካባስ ቆንጫናዉ ደንድድ ብስ። ሄ ዎደ ሳማረን ዎልቃማ ኮሽ ከይስ።
1KI 18:3 አካብ ባ ካዎ ጋꬉዋ አዋተꬃን አይስያ አብድዩ ፄግስ። አብድዩይ ጎዳ ምንꬅድ አማንያ አስ።
1KI 18:4 ኤልዛቤላ ጎዳ ሱንꬃን ናበታ ዎꬍዳ ዎደ አብድዩይ ኤንታፈ ፄታታ ኤክድ፥ እሻታማን እሻታማን ሻክድ፥ ጎንጎሎ ግዶን ቆስድ፥ ካꬅነ ሃ እምሸ ጋምእስ።
1KI 18:5 አካብ አብድዩ ፄግድ፥ “ማታ ደምድ ፓራታነ ባቁሎታ ሀይቆፐ አሻናዉ ቢታን ፑልቶይ ደእያ በስነ ሻፋ ጋፃን ኡባ ባ” ያግስ።
1KI 18:6 ኤንቲ ቢታን አዉ ባጋ ባነኮ ሻከትድ ኤክን፥ አካብ እስ ኦግያ ኦይክድ ባርካ ብስ፤ አብድዩይ ሀራ ኦገ ኦይክድ ባርካ ብስ።
1KI 18:7 አብድዩይ ባ ኦግያ ኦይክድ ብሽን፥ ሄኮ፥ ኤልያስ እያራ ጋሄትስ። አብድዩይ ኤልያሳ ኤርድ ባ ሶምኡዋን ጉፋንድ፥ “ታ ጎዳዉ ኤልያሳ፥ ሀይስ ነኔ?” ያግስ።
1KI 18:8 ኤልያስ፥ “ኤ ታና፤ ኔኒ ባዳ፥ ሄኮ፥ ኤልያስ ሀይሳን ደኤስ ያጋዳ ነ ጎዳስ ኦዳ” ያግስ።
1KI 18:9 አብድዩይ ዛሪድ፥ “ታ ነና አይ ቆህን ነ ታና ነ አይልያ ሀይቆ ጋዳ አካባ ኩሸን አꬃዳ እማይ?
1KI 18:10 ጎዳይ፥ ነ ደኦ ፆሳይ ኤሮ! ታ ጎዳይ ነና ኮያና መላ ኪትቦና ቢት ዎይኮ ካዎተꬅ ባዋ። ኤንቲ፥ ‘ኤልያስ ሀይሳን ባዋ’ ግያ ዎደ ነ ያን ባይናይስ ቱማ ግደይሳ ኤራናዉ አካብ ደርያ አይሰይሳታ ጫቅሴስ።
1KI 18:11 ሀእ ኔኒ፥ ‘ባዳ፥ ኤልያስ ሀይሳን ደኤስ’ ያጋዳ ኦዳ” ያጋሳ።
1KI 18:12 “ታ ነና አጋዳ ብያ ዎደ ጎዳ አያናይ ነና ደንꬅድ፥ ታ ኤሮና በሲ ኤፋና። ታ አካባስ ኦድን፥ እ ነና ደሞና እፅኮ፥ ታና ዎꬋና። ታኒ ነ አይለይ ናአተꬃፈ ዶማዳ ጎዳ ያይያ አስ።
1KI 18:13 ኤልዛቤላ ጎዳ ናበታ ዎꬍዳ ዎደ፥ ታኒ ኤንታፈ ፄታ ኤካዳ፥ እሻታማን እሻታማን ሻካዳ እስ ጎንጎሎን ቆሳዳ፥ ካꬅነ ሃ እማስ። ያትን፥ ታኒ ኦꬅዳባይ ነዉ ታ ጎዳስ ኦደትቤኔ?
1KI 18:14 ሀእ ኔኒ፥ ‘ባዳ፥ ሄኮ፥ ኤልያስ ሀይሳን ደኤስ’ ያጋዳ ኦዳ ያጋሳ። ታ ኦድኮ እ ታና ዎꬋና” ያግስ።
1KI 18:15 ኤልያስ፥ “ታኒ እያዉ ኪተትያ፥ ኡባፈ ዎልቃማ ጎዳይ ኤሮ! ቱማ ታኒ ሀች አካባስ ቆንጫና” ያግስ።
1KI 18:16 አብድዩይ አካባኮ ብድ አካባስ ኦድን፥ አካብ ኤልያሳራ ጋሄታናዉ ብስ።
1KI 18:17 አካብ ኤልያሳ በእዳ ዎደ፥ “እስራኤለ ቢታ ቡቀይ ነኔ?” ያግስ።
1KI 18:18 ኤልያስ ዛሪድ፥ “እስራኤለ ቢታ ቡቀይ ታና ግዶናሽን፥ ጎዳ ኪታ አግድ፥ ባኣለ ኤቃታ ጎይንድ፥ ቢታ ቡቀይ ነናነ ነ አዋ ሶ አሳ።
1KI 18:19 ሀእ፥ እስራኤለ አሳ ኡባ ቃርመሎሳ ዙማ ቦላ ታኮ ሺሻ። ኤልዛቤል ግብራ ምያ ኦይዱ ፄታነ እሻታሙ ባኣለ ናበታነ ኦይዱ ፄቱ አሼራ ናበታ እስፈ ሀ በሳ ሺሻ” ያግስ።
1KI 18:20 ሄሳ ግሾ፥ አካብ ኪትድ፥ እስራኤለ አሳ ኡባነ ናበታ ቃርመሎሳ ዙማ ቦላ ሺሽስ።
1KI 18:21 ኤልያስ ሺቅዳ አሳኮ ብድ፥ “አዉደ ጋካናዉ ናምኡ ዎዛናን ዳኔ? ጎዳይ ፆሰ ግድኮ እያ ጎይንተ፤ ባኣለይ ፆሰ ግድኮ እያ ጎይንተ” ያግስ። ግዶሽን፥ አሳይ እያዉ እስ ቃላካ ዛርቤና።
1KI 18:22 ሄሳፈ ጉየ፥ ኤልያስ፥ “ጎዳ ናበታፐ ታ ፃላል አታስ፤ ሽን ባኣለ ናበት ኦይዱ ፄታነ እሻታማ።
1KI 18:23 አነ ኑስ ናምኡ ኮርማታ እመቶ። ሄ ኮርማታፐ እሱዋ ኤንቲ ዶሮ፤ ኮርማ ሹክድ ቃንፀረꬆ፤ አሹዋ ምꬃ ቦላ ዎꬆ፤ ሽን ታማ ኤꬆፎ። ታኒ ናምአንꬆ ኮርማ ጊግሳዳ፥ ምꬃ ቦላ ዎꬃና፤ ታካ ታማ ኤꬅከ።
1KI 18:24 ህንተ፥ ህንተ ፆሳ ሱንꬃ ፄግተ፤ ታካ ጎዳ ሱንꬃ ፄጋና። ስእድ ያርሹዋ ምያ ታማ ኪትያ ፆሳይ፥ እ፥ ፆሰ ግዶ” ያግስ። አሳይ፥ “ነ ግያ ቆፋይ ሎኦ” ያግዶሶና።
1KI 18:25 ሄሳ ግሾ፥ ኤልያስ ባኣለ ናበታኮ፥ “ህንተ ዳሮ ግድያ ግሾ፥ እስ ኮርማ ዶርድ ኮይሮትድ ጊግስተ። ህንተ ፆሳ ሱንꬃ ፄግተ፤ ሽን እያን ታማ ኤꬆፍተ” ያግስ።
1KI 18:26 ኤንቲ ባንታዉ እመትዳ ኮርማ ኤክድ ጊግስዶሶና። ዎንታፈ ሴታ ጋላስ ጋካናዉ ባኣለ ሱንꬃ ፄግድ፥ “ባኣለ፥ ኑና ስአ” ያግድ ዎስዶሶና። ሽን ስኤትያ ግርስ ባዋ፤ ዛርያ አስ በንትቤና። ባንታ ጊግስዳ ያርሾ በሳ ዩሹዋን ዱርዶሶና።
1KI 18:27 ሳእ ሴታ ጋላሳ ግድን፥ ኤልያስ፥ “ህንተ ቃላ ꬎቁ ኦꬅድ ዎስተ! እ ፆሰ ግደነ! ኦን ኤር፥ እ ቆፋን ገልዳኮ ዎይኮ እያዉ ኦሶይ ዳርዳኮ ዎይኮ ማንዳርዳኮ ዎይኮ ꬍስክዳባ ግድኮ ደንꬃናዉ ኮሼስ” ያግድ ቀልቅስስ።
1KI 18:28 ኤንቲ ባንታ ቃላ ꬎቁ ኦꬅድ ዎስዶሶና። ካሰ ባንታ ጎይንያ ዎጋዳ ባንታ አሳተꬃራ ሱꬅ ጎጋና ጋካናዉ ቶራንነ ማሻን ባንታና ጫድዶሶና።
1KI 18:29 ኦማርስ ያርሾ ሺሽያ ዎደይ ጋካናዉ ኤንቲ ትንብተ ኦድዶሶና፤ ሽን ስኤትያ ግርስ ባዋ፤ ኤንታና ሀይዝድ ዛሮ እምያ አስ ꬋይስ።
1KI 18:30 ሄሳፈ ጉየ፥ ኤልያስ፥ “ሃ ታኮ ሺቅተ” ያግስ። አሳይ እያኮ ሺቅን፥ ላለትዳ ጎዳ ያርሾ በሳ ዛሪድ ግምብስ።
1KI 18:31 ጎዳ ቃላይ ያይቆባኮ፥ “ነ ሱንꬃይ እስራኤለ ግዳና” ያግድ ኦድዳ፥ ያይቆባ ናይታ ኮቻታ ታይቡዋን ታማነ ናምኡ ሹቻታ ኤክስ።
1KI 18:32 ጎዳ ሱንꬃን ሄ ሹቻታ ኬልድ፥ ያርሾ በሲ ግምብድ፥ ታማነ ኦይዱ ልትሮ ሃ ኦይክያ ኦላ ያርሾ በሳ ዩሾን ቦክስ።
1KI 18:33 ሄሳፈ ጉየ፥ ያርሾ በሳን ምꬅ ዎꬅድ፥ ኮርማ አሹዋ እያ ቆሙዋን ቆሙዋን ቃንፀረꬅድ፥ ምꬃ ቦላ ዎꬅስ። አሳኮ፥ “ኦይዱ ባ ሃ ኩንꬅድ፥ ያርሹዋ ቦላነ ምꬃ ቦላ ጉስተ” ያግስ፤ ኤንቲ ጉስዶሶና።
1KI 18:34 ቃስካ፥ ኤልያስ፥ “ናምአንꬆ ጉጅተ” ያግስ፤ ኤንቲ ናምአንꬆ ጉጅዶሶና። ቃስካ፥ ኤልያስ፥ “ሄꬓንꬆ ጉጅተ” ያግስ፤ ሄꬓንꬆ ጉጅዶሶና።
1KI 18:35 ሃꬃይ ያርሾ በሳ ዩሹዋን ጎግድ፥ ኦላን ኩምስ።
1KI 18:36 ኦማርሳ ያርሾ ሺሽያ ዎደ ናበይ ኤልያስ ያርሾ በሳኮ ሺቅድ ሀይሳዳ ያግድ ዎስስ፤ “አቤት ጎዳዉ፥ አብራሃመ ፆሳዉ፥ ይሳቃ ፆሳዉ፥ እስራኤለ ፆሳዉ፥ ኔኒ እስራኤለ ቢታን ፆሰ ግደይሳ፥ ታኒ ነ አይለ ግደይሳነ ታኒ ሀይሳ ኡባ ነ ቃላን ኦꬅዳይስ ሀች ኤረቶ።
1KI 18:37 አቤት ጎዳዉ፥ ታዉ ኮያ። ኔኒ፥ ጎዳይ ፆሰ ግደይሳነ ኤንታ ዎዛና ኔኮ ዛረይ ነና ግደይሳ ሀ አሳይ ኤራና መላ ታዉ ኮያ!” ያግስ።
1KI 18:38 ጎዳ ታማይ ሳሎፐ ዎꬍድ፥ ፁሳ ያርሹዋ፥ ምꬃ፥ ሹቻነ ቢታ ምስ፤ ኦላን ደእያ ሃꬃ ላጭስ።
1KI 18:39 አሳ ኡባይ ሄሳ በእዳ ዎደ፥ ባንታ ሶምኦራ ሳአን ጉፋንድ፥ “ጎዳይ ፆሰ! ጎዳ ፃላል ፆሰ!” ያግዶሶና።
1KI 18:40 ኤልያስ፥ “ባኣለ ናበታ ኦይክተ፤ ኤንታፈ እስ አስካ ከስ ኤኮፎ” ያግስ። አሳይ ኤንታ ኦይክዶሶና፤ ኤልያስ ኤንታ ቅሶና ሻፋ ኤፍድ ዎꬍስ።
1KI 18:41 ኤልያስ አካባኮ፥ “ከያዳ ባ፤ ማ፤ ኡያ፤ ታኒ፥ ዎልቃማ እራ ጉንꬅ ስአይስ” ያግስ።
1KI 18:42 ሄሳ ግሾ፥ አካብ ማናዉነ ኡያናዉ ብስ። ሽን ኤልያስ ቃርመሎሳ ዙማ ቦላ ከይድ፥ ባ ሶምኡዋ ባ ጉልባታ ግዶ ገልስድ ሆክስ።
1KI 18:43 ኤልያስ ባ አይልያኮ፥ “አነ ባዳ፥ አባኮ ስማዳ ፄላ” ያግስ። እያ አይለይ ብድ ፄልድ፥ “አይብካ በንተና” ያግስ። ኤልያስ ባ አይልያ ላፑን ቶሆ፥ “ቃስካ ባዳ ፄላ” ያግስ። እያ አይለይ ላፑን ቶሆ ፄልስ።
1KI 18:44 ላፑንꬆን፥ “ኩሸ ቃቃፐ ዳሮና ጉꬃ ሻር አባፈ ከይሽን በአስ” ያግስ። ኤልያስ፥ “ባዳ፥ ‘እር ነና ቡሱ ድጎና መላ ነ ፓራ ጋርያን ኡታዳ ነ ሶ ባ’ ያጋዳ አካባስ ኦዳ” ያግስ።
1KI 18:45 ጉꬃ ዎደፐ ጉየ ሳሎይ ካሬꬃ ሻራን ዱልክስ፤ ጫርኮይ ጫርክስ፤ ዎልቃማ እር ቡክስ። አካብ ፓራ ጋርያን ኡትድ እዝራኤላ ካታማ ብስ።
1KI 18:46 ጎዳ ዎልቃይ ኤልያሳ ቦላ ዎꬍስ። ኤልያስ ባ ማኡዋ ፄሳን ፑደ ስቅድ፥ እዝራኤላ ካታማ ጋካናዉ አካባ ስንꬃን ዎፅስ።
1KI 19:1 ኤልያስ ኦꬅዳባ ኡባነ ባኣለ ናበታ ኡባ ማሻን ዎꬍዳይሳ አካብ ኤልዛቤልስ ኦድስ።
1KI 19:2 ኤልዛቤላ፥ “ኔኒ ሄ ናበታ ቦላ ኦꬅዳይሳዳ ዎንቶ ሀኖደ ታኒ ነ ቦላ ኦꬆና እፅኮ፥ ፆሳት ታና ፕርዶ” ያጋዳ ኤልያሳኮ ኪታሱ።
1KI 19:3 ኤልያስ ባ ሸምፑዋስ ያይድ፥ ባ አይልያ ኤክድ፥ ይሁዳ ቢታን ደእያ በርሳበ ብስ።
1KI 19:4 እስ ጋላሳ ኦገ መላ ቢታን ሄመትስ። እ ሄመꬃ አግድ እስ ሳንካራ ኩያ ጋርሳን ኡትድ፥ “አቤት ጎዳዉ፥ ታዉ ግዳና፤ ታኒ ታ ማይዛታፐ አꬍድከ፤ ታ ሸምፑዋ ኤካ” ያግድ ሀይቆ ዎስስ።
1KI 19:5 ሄሳፈ ጉየ፥ ሳንካራ ኩያ ጋርሳን ዛቁልድ ꬍስክስ። እ ꬍስክዳሽን፥ ሄኮ፥ እስ ኪታንቾይ እያ ቦችድ፥ “ደንዳ፤ ማ” ያግስ።
1KI 19:6 እ ደንድድ ፄልያ ዎደ፥ ሄኮ፥ ሹቻ ምሻን ኡከትድ፥ ካፅዳ ኡይꬅነ ኦቶ ሃꬅ እያ ሁጰሶን በእስ። እ ምድ ኡይዳፐ ጉየ ስሚድ ꬍስክስ።
1KI 19:7 ጎዳ ኪታንቾይ ናምአንꬆ ይድ፥ “ኤልያሳ፥ ኔኒ ባና ኦገይ ዳሮ አዱሰ ግድያ ግሾ፥ ደንዳዳ ማ” ያግስ።
1KI 19:8 ኤልያስ ደንድድ ምስ፥ ኡይስ። ሄ እ ምዳ ካꬃ ዎልቃን ፆሳ ዙማ ኮሬባ ጋካናዉ ኦይታሙ ጋላስነ ኦይታሙ ቃማ ሄመትስ።
1KI 19:9 እ ያ ጋክድ፥ ጎንጎሎ ግዶ ገልድ አቅስ። ጎዳይ፥ “ኤልያሳ፥ ሀይሳን አይ ኦꬃይ?” ግያ ፆሳ ቃላይ እያኮ ይስ።
1KI 19:10 ኤልያስ፥ “ኡባፈ ዎልቃማ ጎዳ ፆሳስ ታኒ ዳሮ ምሸታስ። እስራኤለ አሳይ ኔራ ጫቅዳ ጫቁዋ መንꬅስ፤ ነ ያርሾ በሳ ላልዶሶና፤ ነ ናበታ ማሻን ዎꬍዶሶና። ታኒ ታርካ አታስ፤ ሀእ ኤንቲ ታ ሸምፑዋ ዎꬋናዉ ኮዮሶና” ያግስ።
1KI 19:11 ጎዳይ፥ “ሀይሳፈ ከያዳ ደርያ ሁጰን ታ ስንꬃን ኤቃ” ያግስ። ኤልያስ ኤቅዳሽን፥ ሄኮ፥ ጎዳይ እያ ማታራ አꬍስ። ሄ ዎደ ዎልቃማ ጫርኮይ ዙማ ጳልቀረꬅስ፤ ዛላታ ትንቸረꬅስ፤ ሽን ጎዳይ ሄ ጫርኩዋ ግዶን ባዋ። ጫርኩዋፈ ጉየ ቢት ቃፅስ፤ ሽን ጎዳይ ሄ ቢታ ቃፁዋን ባዋ።
1KI 19:12 ቢታ ቃፁዋፐ ጉየ ታም ከይስ፤ ሽን ጎዳይ ታማ ግዶን ባዋ። ታማፐ ጉየ ካልካሽ ስኤትስ።
1KI 19:13 ኤልያስ ሄ ካልካሻ ስእዳ ዎደ ባ ሶምኡዋ አፍላን ካምድ፥ ካረ ከይድ ጎንጎሉዋ ፐንገን ኤቅስ። ሄኮ፥ እስ ግርስ ኤልያሳኮ፥ “ኤልያሳ፥ ሀይሳን አይ ኦꬃይ?” ያግስ።
1KI 19:14 ኤልያስ፥ “ኡባፈ ዎልቃማ ጎዳ ፆሳስ ታኒ ምሸታስ። እስራኤለ አሳይ ኔራ ጫቅዳ ጫቁዋ መንꬅዶሶና፤ ነ ያርሾ በሳ ላልዶሶና፤ ነ ናበታ ማሻን ዎꬍዶሶና። ታኒ ታርካ አታስ፤ ኤንቲ ታ ሸምፑዋ ኤካናዉ ኮዮሶና” ያግስ።
1KI 19:15 ጎዳይ እያኮ፥ “ኔኒ ይዳ ኦግያራ ጉየ ስማዳ ዳማስቆ መላ ቢታ ባ። ኔኒ ያ ጋክያ ዎደ አዛሄላ፥ ሶረ ቦላ ካዎ ኦꬃዳ ትያ።
1KI 19:16 ናምሳ ናኣ፥ እዩ እስራኤለ ቦላ ካዎ ኦꬃዳ ትያ። ነ በሳን ናበ ኦꬃዳ አቤል-ማሆላ አድያ ሳፋፃ ናኣ ኤልሳ ትያ።
1KI 19:17 አዛሄላ ማሻፈ ከስ ኤክያ ኡባ እዩይ ዎꬋና፤ እዩ ማሻፈ ከስ ኤክያ ኡባ ኤልስ ዎꬋና።
1KI 19:18 ሽን ባኣለ ኤቃ ጎይኖና ዎይኮ ባንታ ዶናን ባኣለ ኤቃ ዬሮና 7,000 አሳ ታኒ እስራኤለን ታዉ አሻና” ያግስ።
1KI 19:19 ኤልያስ ሄ በሳፈ ደንድድ ብሸ ሳፋፃ ናአይ ኤልስ ታማነ ናምኡ ዋፃ ቦራን ጋደ ጎይሽን ደምስ፤ ኤልስ ታማነ ናምአንꬆ ዋፃን ጎዬስ። ኤልያስ እያ ማታራ አꬍሸ ባ አፍላ እያ ቦላ የግስ።
1KI 19:20 ኤልስ ቦራታ ኤስድ፥ ኤልያሳ ጌዶ ዎፅ ብድ፥ “ታኒ ታ አዋነ ታ አይዉ ዬራ ሳሮꬃዳ ያና፤ ያፐ ስማዳ ነና ካላና” ያግስ። ኤልያስ፥ “ኤሮ ባ፤ ታ ነና ድግከ” ያግስ።
1KI 19:21 ሄሳ ግሾ፥ ኤልስ ጉየ ስሚድ ዋꬃ ቦራታ ሹክስ፤ ቦራ ሚሽያ ቀርድ አሹዋ ካꬅድ፥ አሳስ አꬅን አሳይ ምዶሶና። ሄሳፈ ጉየ፥ ደንድ ብድ፥ ኤልያሳስ ኪተትስ።
1KI 20:1 ሶረ ካዎይ በን-ሀዳድ ባ ኦላንቾታ ኡባ ሺሽስ። ሀስታማነ ናምኡ ካዎታን፥ ኤንታ ፓራታንነ ፓራ ጋረታን ማደትድ፥ ሳማረ ካታማ ተቅድ፤ እያ ኦልስ።
1KI 20:2 እስራኤለ ካዋ አካባኮ አሰ ኪትድ ሀይሳዳ ያግስ፤
1KI 20:3 “ነ ብራይነ ነ ዎርቃይ ታባ፤ ነ ማቸትነ ነ ናይታፐ ሎኦት ታባ” ያግስ።
1KI 20:4 እስራኤለ ካዎይ ዛሪድ፥ “ኤ፥ ታ ጎዳዉ ካዋዉ፥ ነ ግዳይሳ መላ፤ ታካ ታዉ ደእያባ ኡባይ ነባ” ያግስ።
1KI 20:5 ቃስካ፥ ኪተትዳ አሳት ናምአንꬆ ብድ፥ “በን-ሀዳድ ሀይሳዳ ያጌስ፤ ‘ነ ብራነ ነ ዎርቃ፥ ነ ማቸታነ ነ ናይታ ታዉ ሼꬋ’ ጋዳ ኪታስ።
1KI 20:6 ሽን ዎንቶ ሀኖደ ነ ካዎ ጋꬉዋነ ነ ሞርናታ ኬꬃ ፕልጋና መላ ታ ኦሳንቾታ የዳና። ኤንቲ ነ ሎኦባ ጋዳ ዎꬅዳባ ኡባ ኤፋና” ያግዶሶና።
1KI 20:7 እስራኤለ ካዎይ ቢታ ጭማታ ኡባ ሺሽድ፥ “ሀ አደይ ኑና ꬋይሳናዉ ኮየይሳ በእተ። እ ታ ማቸታነ ታ ናይታ፥ ታ ብራነ ታ ዎርቃ ኤካናዉ ኪትን፥ ታ እፃብከ” ያግስ።
1KI 20:8 ጭማትነ አሳ ኡባይ፥ “እ ኦድያባ ስኦፓ! ዎይኮ እያዉ ኤሮ ጎፓ” ያግዶሶና።
1KI 20:9 ሄሳ ግሾ፥ አካብ በን-ሀዳድ ኪትዳ አሳታኮ፥ “ህንተ ታ ጎዳ ካዋ፥ ‘ኔኒ ኮይሮ ኪትዳ ኪታ ታ ፖላና፤ ሽን ሀ ናምአንꬆ ኪታ ፖላናዉ ዳንዳእከ’ ያጌስ ግድ ኦድተ” ያግስ። ኪተትዳ አሳት ብድ ሄሳ በን-ሀዳዳስ ኦድዶሶና።
1KI 20:10 በን-ሀዳድ፥ “ታና ካልያ አሳስ ሳማረ ካታማን እስ ኩጫ ቢት ጋክኮ ፆሳት ታና ፕርዶ” ያግስ።
1KI 20:11 እስራኤለ ካዎይ ኪተትድ ይዳይሳታኮ፥ “ ‘ቱማ ኦላንቾይ ኦላፐ ስምሸ ጋይረስፐ አትሽን፥ ቡሮ ብሸ ጋይረና’ ያግድ ኦድተ” ያግስ።
1KI 20:12 በን-ሀዳድነ ካዎት፥ ባንታ ዱንካንያ ግዶን ኡሹ ኡይሸ ሄሳ ስእዳ ዎደ ካዎይ ባ ኦላንቾታኮ፥ “ኦላናዉ ሳልፕተ” ያግድ ኪትን፥ ኤንቲ ካታማ ኦላናዉ ሳልፕዶሶና።
1KI 20:13 ሄኮ፥ እስ ናበይ እስራኤለ ካዋ አካባኮ፥ “ጎዳይ ‘ሀ ዳሮ ኦላንቾታ ኡባ በአ? ታኒ ሀች ኤንታ ነ ኩሸን አꬃዳ እማና፤ ታ ጎዳ ግደይሳ ኔኒ ሄ ዎደ ኤራና’ ያጌስ” ያግስ።
1KI 20:14 አካብ፥ “ኦላ ዶማናይ ኦኔ?” ያግስ። ናበይ፥ “አዉራጃ ሃረይሳት ኪትያ ናአተꬃ ኦላንቾት ዶሞ” ያግስ። ካዎይ፥ “አትያ ኦላንቾታ ኦን ኪታኔ?” ያግስ። ናበይ፥ “ኔኒ ኪታ” ያግስ።
1KI 20:15 ሄሳ ግሾ፥ አካብ አዉራጃ ሃረይሳት ኪትያ ናአተꬃ ኦላንቾታ፥ 232 ሺሽስ። ቃስ 7,000 አትዳ እስራኤለ አሳ ሺሽስ።
1KI 20:16 በን-ሀዳድ ባና ማድዳ ሀስታማነ ናምኡ ካዎታራ እስፈ ዱንካንያን ኡትድ ኡሻን ማꬆትዳሽን፥ ሴታ ጋላስ እስራኤለ ኦላንቾት ኦላስ ከይዶሶና።
1KI 20:17 አዉራጃ ሃረይሳት ኪትያ ናአተꬃ ኦላንቾት ኮይሮ ከይድ ብዶሶና። በን-ሀዳድ ፆሞሳና መላ ኪትዳ አሳት፥ “ሳማረፐ አሳይ ከይድ ዩሳ ቦላ ደኤስ” ያግድ ኦድስ።
1KI 20:18 በን-ሀዳድ፥ “ኤንቲ ስገታናዉ ይን፥ ዎይኮ ኦለታናዉ ይን፥ ኤንታ ፓፃ ኦይክተ” ያግስ።
1KI 20:19 አዉራጃ ሃረይሳት ኪትያ ናአተꬃ ኦላንቾት ሳልፕድ፥ ካታማፐ ጋፃ ከይዶሶና፤ እስራኤለ ኦላንቾት ኤንታ ካልድ ከይዶሶና።
1KI 20:20 እሶይ እሶይ ባራ ኦላ ጋሄትዳ ሞርክያ ዎꬍዶሶና። ሶረ አሳይ ባቃትን፥ እስራኤለ አሳት ካልድ የደꬅዶሶና። ቃስ ሶረ ካዎይ በን-ሀዳድ ባ ፓራ አሳታራ ባ ፓራን ከስ ኤክድ ብስ።
1KI 20:21 እስራኤለ ካዎይ ኦላስ ከይድ፥ ፓራታነ ፓራ ጋረታ ድእስ፤ ሶረ አሳካ ዎꬎ ቡꬅስ።
1KI 20:22 ሄሳፈ ጉየ፥ ናበይ እስራኤለ ካዋኮ ብድ፥ “ባዳ ነና ምንꬃ። ኦꬃናዉ በሲያባ አኬካዳ ኦꬃ። ዎንቶ ላይꬅ ቦነ ሶረ ካዎይ ነና ናምአንꬆ ኦላናዉ ያና” ያግስ።
1KI 20:23 ሶረ ካዋ ሞርናት እያ ሀይሳዳ ያግድ ዞርዶሶና፤ “ኤንታ ፆሳት ደረ ፆሳታ፤ ኤንቲ ኑና ፆንዳይ ሄሳ ግሾሳ። ሽን ኑ ኤንታራ ደንባን ኦለትያኮ ቱማ ኑ ኤንታ ፆናና።
1KI 20:24 ኔኒ እስባ ኦꬃ፤ ሀስታማነ ናምኡ ካዎታ ኪትያ ሀላቃተꬃፈ ደንꬃዳ ኤንታ በሳን ሀራ ሀላቃታ ሹማ።
1KI 20:25 ኑኒ እስራኤለታራ ደንባን ኦለትድ ፆናናዉ ዳንዳአና መላ ነዉ ካሰ ዉርዳ ኦላንቾታ በሳን ኦላንቾታ፥ ፓራታ በሳን ፓራታ፥ ፓራ ጋረታ በሳን ፓራ ጋረታ ዎꬃዳ ጊግሳ” ያግዶሶና። ካዎይ በን-ሀዳድ ኤንታ ዞርያ ኤክድ ሄሳዳ ኦꬅስ።
1KI 20:26 ካልያ ላይꬅ ቦነ በን-ሀዳድ ሶረ ኦላንቾታ ሺሽድ፥ እስራኤለታራ ኦለታናዉ አፌቃ ብስ።
1KI 20:27 እስራኤለ ኦላንቾት ሺቅድ፥ ሽንቀነ ኦላ ሚሸ ኤክድ፥ ኤንታራ ኦለታናዉ ናምኡ ጩጋ ግድድ ከይዶሶና። እስራኤለት ናምኡ ጉꬃ ዴሻ ዉደ ዳንድ፥ ኤንታኮ ስሚድ ኡትዶሶና፤ ሽን ሶረት ጋፃርያ ኡባ ማእዶሶና።
1KI 20:28 እስ ፆሳ ናበይ እስራኤለ ካዋኮ ብድ፥ “ጎዳይ ሀይሳዳ ያጌስ፤ ‘ሶረ አሳይ፥ ፆሳይ ደረ ፆሰፈ አትሽን፥ ደምባ ፆሲ ግደና ያግዳ ግሾ፥ ሀ ዳሮ ኦላንቾታ ታኒ ነ ኩሸን አꬃዳ እማና። ሄ ዎደ ታኒ ጎዳ ግደይሳ ኔንነ ነ አሳይ ኤራና’ ” ያግስ።
1KI 20:29 ሶረትነ እስራኤለት ዎልኮ ስም ሳልፕድ፥ ላፑን ጋላስ ታክዶሶና። ላፑንꬃ ጋላሳን ኦላ ጋሄትዶሶና። እስራኤለት እስ ጋላሳን ሶረ አሳፐ 100,000 ቶሆ አሳ ዎꬍዶሶና።
1KI 20:30 ኤንታፈ አትዳይሳት ከስ ኤክድ፥ አፌቃ ካታማ ገልዶሶና። ገልዳይሳታፐ 27,000 አሳ ቦላ ካታማ ድርሳ ግምበይ ኩንድድ ዎꬍስ። በን-ሀዳድ ካታማ ግዶ ባቃትድ፥ እስ ኬꬃ ቆልአን ቆሰትስ።
1KI 20:31 እያ ሞርናት፥ “ሄኮ፥ እስራኤለ ካዎት፥ ማርያ ካዎታ ግደይሳ ኑ ስእዳ። ኑኒ ካዮ ማኦ ማእድ፥ ኑ ፄሳን ዎዶሮ ዳንጭድ፥ እስራኤለ ካዋኮ ቦስ፤ ኦን ኤር፥ እ ነና ፓፃ አሾና አገና” ያግዶሶና።
1KI 20:32 ኤንቲ ካዮ ማኦ ማእድ፥ ዎዶሮ ባንታ ፄሳን ዳንጭድ፥ እስራኤለ ካዋኮ ብዶሶና። እያኮ “ነ አይለይ በንሀዳድ፥ ታና ዎꬎፓ ያግድ ዎሴስ” ያግዶሶና። ካዎይ፥ “እ ሀኖ ጋካናዉ ፓፃ ደኢ? እ ታ እሻ” ያግስ።
1KI 20:33 አካብ ሎኦ ማላ ሃሳያ ዳንን፥ አሳት እያ ኦዳ ኤለስ ኤክድ፥ “ኤ፥ ነ እሻይ በንሀዳድ ፓፃ ደኤስ” ያግዶሶና። እ ኤንታኮ፥ “ብድ እያ ሃ ኤክድ ዪተ” ያግስ። በንሀዳድ ይን፥ አካብ እያ ባ ፓራ ጋርያ ቦላ ከስድ ኡትስስ።
1KI 20:34 በንሀዳድ አካባኮ፥ “ታ አዋይ ነ አዋፐ ኤክዳ ካታማታ ታ ነዉ ዛራና። ታ አዋይ ሳማረን ግያ ኤስዳይሳዳ ነካ ዳማስቆን ግያ ኤሳ” ያግስ። አካብ ዛሪድ፥ “ታኒ ሀ ጫቁዋ ጋሶያዳ ነና የዳና” ያግስ። እያራ ጫቅድ እያ የድስ።
1KI 20:35 ናበታ ጩጋፐ እስ አደይ፥ ጎዳይ ኪትን፥ እስ ባ ላገ ናብያኮ፥ “ታና ሾጫ” ያግስ፤ ሽን ሄ ናበይ ሾጮና እፅስ።
1KI 20:36 ሄ ናበይ እያኮ፥ “ኔኒ ጎዳ ኪታ እፅዳ ግሾ፥ ሄኮ፥ ነ ታፐ ሻከታዳ ብያ ዎደ ነና ጋሞይ ዎꬋና” ያግስ። ናበይ እያፐ ሻከትድ ብያ ዎደ ጋሞይ ከይድ እያ ዎꬍስ።
1KI 20:37 ናበይ ሀራ እስ አደ ደምድ፥ “ታና ሾጫ” ያግስ። አደይ እያ ሾጭን፥ ናበይ ማዱንፅስ።
1KI 20:38 ናበይ እያ ኦናተꬃይ ኤረቶና መላ ጉሉንትድ ካዋ ናግሸ ኦገ ዶናን ኤቅስ።
1KI 20:39 ካዎይ አꬍያ ዎደ፥ ናበይ ካዋ ፄግድ፥ “ታኒ ነ አይለይ ኦላን ደእሽን፥ ሄኮ፥ እስ አደይ ታኮ ይድ፥ ‘ሀ ድኤትዳ አድያ ናጋ። ሀ አደይ ꬋይያባ ግድኮ፥ ነ ሸምፖይ እያ ሸምፑዋራ ጋደ ዎይኮ 3,000 ብራ ሳንትመ ቃንፃሳ’ ያግስ።
1KI 20:40 ታኒ ነ አይለይ ኦሶይ ዳርን፥ ያ ሃ ግሽን፥ አደይ ከስ ኤክድ ꬋይስ” ያግስ። እስራኤለ ካዎይ፥ “ኔኒ ነ ቦላ ፕርዳዳሳ” ያግስ።
1KI 20:41 ናበይ ባ ጉሉንꬃ ቃር የግያ ዎደ ናበታፐ እሱዋ ግደይሳ ካዎይ ኤርስ።
1KI 20:42 ናበይ ካዋኮ፥ “ጎዳይ፥ ‘ታኒ፥ እ ሀይቃናዉ በሴስ ያግዳ አድያ ነ የድዳ ግሾ፥ ነ ሸምፖይ እያ ሸምፑዋ በሳን፥ ነ አሳይ እያ አሳ በሳን ግዳና’ ” ያግስ።
1KI 20:43 እስራኤለ ካዎይ ይሎትሸነ አዛንሸ ሳማረን ደእያ ባ ጋꬎ ስምስ።
1KI 21:1 ሳማረ ካዋ አካባ ጋꬎ ማታን ናቡተስ እዝራኤለን ዎይነ ጋደይ ደኤስ።
1KI 21:2 አካብ ናቡተኮ፥ “ታ ጋꬉዋ ማታን ደእያ ግሾ፥ ታ አታክልተ ቶክያ በሲ ኦꬃናዉ ነ ዎይነ ጋድያ ታዉ እማ። እያ ግሾ ነዉ ታ ሀራ ሎኦ ዎይነ ጋደ እማና፤ ዎይኮ ነ ዶስኮ እያ ጋትያ ታ ነዉ ቃንፃና” ያግስ።
1KI 21:3 ናቡተይ ዛሪድ፥ “ታኒ ታ አዋታፐ ላትዳ ጋደ ነዉ እሚስያባፐ ጎዳይ ታና አሾ” ያግስ።
1KI 21:4 እዝራኤለ አደይ ናቡተይ፥ “ታኒ ታ አዋታፐ ላትዳ ጋደ ነዉ እምከ” ግዳ ግሾ፥ አካብ ይሎትሸነ አዛንሸ ባ ሶ ብድ፥ ጎዳኮ ስም ዝንእድ፥ ካꬅካ ሞና እፅስ።
1KI 21:5 እያ ማችያ ኤልዛቤላ እያኮ ገላዳ፥ “ነና ሀይሳዳ ይሎይዳይ አይቤ? አይስ ካꬅ ሞና እፃይ?” ያጋዳ ኦይቻሱ።
1KI 21:6 አካብ፥ “እዝራኤለ አደይ ናቡተይ፥ ‘ነ ዎይነ ጋድያ ታዉ ባይዛ ዎይኮ ነ ዶስኮ እያ ግሾ ታ ነዉ ሀራ ዎይነ ጋደ እማና’ ያግን፥ እ፥ ‘ታ ዎይነ ጋድያ ነዉ እምከ’ ያግን፥ ታ ሄሳ ግሾ ይሎትስ” ያግስ።
1KI 21:7 ኤልዛቤላ፥ “ነ እስራኤለ ቦላ ካዎ ግዳ ኡታዳ ሀይሳዳ ሀናይ? ደንዳዳ ማ! ዎዛናፐ ኡፋይታ! እዝራኤለ አድያ ናቡተ ዎይነ ጋድያ ታኒ ነዉ እምሳና” ያጋሱ።
1KI 21:8 ሄሳ ግሾ፥ እያ አካባ ሱንꬃን ዳብዳበ ፃፋዳ፥ እያ ቦላ ማታመ ዎꬃሱ። ናቡተራ እስፈ ካታማን ደእያ ጭማታስነ ግታ አሳታስ ኪታሱ።
1KI 21:9 ዳብዳበ ሀይሳዳ ያጋዳ ፃፋሱ፤ “እስ ጋላስ ፆማ አዋጅተ፤ አሳ እስፈ ሺሽተ፤ ናቡተ ቦንቾ በሳን ኡትስተ።
1KI 21:10 ናቡተይ፥ ‘ፆሳነ ካዋ ጫይስ’ ያግድ ማርካትያ ናምኡ ማርካታ ሺሽድ፥ ማርካታናዳ ኦꬅተ። ሄሳፈ ጉየ፥ ካታማፐ ጋፃ ከስድ፥ ሹቻን ጫድድ ዎꬍተ” ያጋዳ ፃፋሱ።
1KI 21:11 ሄሳ ግሾ፥ ናቡተራ እስፈ ካታማን ደእያ ጭማትነ ግታ አሳት ኤልዛቤላ ኤንታዉ ፃፍዳ ዳብዳብያን ግዳይሳዳ ኦꬅዶሶና።
1KI 21:12 ኤንቲ ፆማ አዋጅድ፥ ናቡተ አሳ ግዶን ቦንቾ በሳን ኡትስዶሶና።
1KI 21:13 ናምኡ ዎርዶ ማርካት ይድ፥ እያኮ ስም ኡትድ፥ አሳ ስንꬃን፥ “ናቡተይ ፆሳነ ካዋ ጫይስ” ያግድ ዎርዶ ማርካትዶሶና። ናቡተ ካታማፐ ጋፃ ከስድ፥ ሹቻን ጫድድ ዎꬍዶሶና።
1KI 21:14 ጭማት ኤልዛቤልኮ፥ “ናቡተይ ሹቻን ጫደትድ ሀይቅስ” ያግድ ኪትዶሶና።
1KI 21:15 ናቡተይ ሹቻን ጫደትድ ሀይቅዳይሳ ኤልዛቤላ ስእዳ ዎደ፥ “እዝራኤለ አድያ ናቡተይ ነዉ ሚሸን ባይዛናዉ እፅዳ ዎይነ ጋድያ ባዳ ኤካ። እ ሀእ ሀይቅስ” ያጋሱ።
1KI 21:16 እዝራኤለ አደይ ናቡተይ ሀይቅዳይሳ አካብ ስእድ፥ ናቡተ ዎይነ ጋድያ ባዉ ኤካናዉ ደንድድ ብስ።
1KI 21:17 ሄሳፈ ጉየ፥ ተስባ አድያ ኤልያሳኮ ጎዳ ቃላይ ይድ፥
1KI 21:18 “ሳማረን ካዎትዳ እስራኤለ ካዋ አካባራ ጋሄታናዉ ባ። ሄኮ፥ እ ናቡተ ዎይነ ጋድያ ኤካናዉ ብድ፥ ያን ደኤስ።
1KI 21:19 ጎዳይ ሀይሳዳ ያጌስ ጋዳ እያዉ ኦዳ፤ ‘አድያ ዎꬋዳ እያ ጋድያ ነዉ ኤካዳሳ ግድኪ?’ ያጋ። ቃስ ጎዳይ፥ ‘ናቡተ ሱꬃ ካናት ላጭዳ በሳን ነ ሱꬃካ ካናት ላጫና’ ” ያግስ።
1KI 21:20 አካብ ኤልያሳ በእዳ ዎደ፥ “ታ ሞርክያዉ፥ ታና ደማዲ?” ያግስ። ኤልያስ፥ “ኤ፥ ነና ደማስ። ኔኒ ጎዳ ስንꬃን ኢታባ ኦꬃናዉ ነና ናጋራስ ባይዛዳሳ።
1KI 21:21 ጎዳይ ኔኮ ሀይሳዳ ያጌስ፤ ‘ሄኮ፥ ታኒ ነ ቦላ ኢታባ ኤሀና። ታኒ ነ ኮቻታ ꬋይሳና፤ ታኒ እስራኤለ ቢታን አካባ ሶ አሳፐ አይለ ግድን ዎማኖ ግድን፥ እስ አደይ አቶና ꬋይሳና።
1KI 21:22 ኔኒ እስራኤለ አሳ ናጋራ ኦስሳዳ ታና ሀንቀꬅዳ ግሾ፥ ታ ነ ሶ አሳ ናባፃ ናኣ እዮርባማ ሶ አሳዳነ አክያ ናኣ ባኦሳ ሶ አሳዳ ኦꬃና።’
1KI 21:23 ቃስ ጎዳይ ኤልዛቤልባ ኦድሸ፥ ‘እዝራኤለ ካታማ ግምበ ድርሳ ላንቀን ካናት ኤልዛቤሎ ማና’ ያጌስ።
1KI 21:24 አካባ ኮቸ ግድድ ካታማን ሀይቅያ ኦናካ ካን ማና፤ ጋፃርያን ሀይቅያ ኦናካ ሳሎ ካፎት ማና” ያግስ።
1KI 21:25 ባ ማችያ ኤልዛቤላ ደንꬅን፥ ጎዳ ስንꬃን ኢታባ ኦꬃናዉ ባና ናጋራስ ባይዝዳ አካባ መላ አስ ባዋ።
1KI 21:26 አካብ፥ ጎዳይ እስራኤለ አሳ ስንꬃፈ ጎድድ ከስዳ አሞረታ ኤቃ ጎይንድ ዳሮ እፀትዳባ ሀንስ።
1KI 21:27 አካብ ሄሳ ስእዳ ዎደ ባ ማኡዋ ዳክድ፥ ካዮ ማኦ ማእድ ፆምስ። ካዮ ማኦ ማእድ ꬍስኬስ፤ አዛንሸ ሄመቴስ።
1KI 21:28 ሄሳፈ ጉየ ጎዳ ቃላይ ተስባ አድያ ኤልያሳኮ ይድ፥
1KI 21:29 “አካብ ባና ታ ስንꬃን ዋትድ ካዉሽዳኮ በአዲ? እ ታ ስንꬃን ባና ካዉሽዳ ግሾ፥ ታኒ ꬋዩዋ እያ ዎደ ኤህከ። ሽን ታኒ እያ ናኣ ዎደን እያ ሶ አሳ ቦላ ሀ ꬋዩዋ ኤሀና” ያግስ።
1KI 22:1 ሶረይነ እስራኤለይ ኦለቶና ሄꬑ ላይꬅ ሳሮ ደእዶሶና።
1KI 22:2 ሄꬓንꬆ ላይꬃን፥ ይሁዳ ካዎይ እዮሳፈፅ እስራኤለ ካዋ በአናዉ ብስ።
1KI 22:3 እስራኤለ ካዎይ ባ ሞርናታኮ፥ “ጋላዳን ደእያ ራሞታ ካታማይ ኑባ ግደይሳነ ኑኒ ሀኖ ጋካናዉ ሄ ካታማ ሶረ ካዉዋፐ ኤካናዉ አይኮካ ኦꬆናይሳ ኤረከቲ?” ያግስ።
1KI 22:4 እ፥ እዮሳፈፃ፥ “ጋላዳን ደእያ ራሞታ ካታማ ኦላናዉ ታራ ባኔ?” ያግድ ኦይችስ። እዮሳፈፅ ዛሪድ፥ “ኤ፥ ኔኒ ኦላ ባናዉ ጊግያ ዎደ ታ ኔራ ባና። ታ ኦላንቾት ነ ኦላንቾታ፤ ታ ፓራት ነ ፓራታ” ያግስ።
1KI 22:5 ቃስ፥ እዮሳፈፅ እስራኤለ ካዋ፥ “ግዶሽን፥ ስንꬃታዳ ጎዳ ኦይቻ” ያግስ።
1KI 22:6 እስራኤለ ካዎይ ኦይዱ ፄቱ ናበታ እስፈ ሺሽድ፥ “ጋላዳን ደእያ ራሞታ ካታማ ኦላናዉ ቦየ ቦፖ” ያግድ ኦይችስ። ኤንቲ፥ “ባ፤ ጎዳይ ሄ ካታማ ካዋ ኩሸን አꬅድ እማና” ያግዶሶና።
1KI 22:7 ሽን እዮሳፈፅ፥ “ኑኒ ጎዳ ኦይቻናዉ ዳንዳእያ ሀራ ናበይ ሀይሳን ባዌ?” ያግስ።
1KI 22:8 እስራኤለ ካዎይ ዛሪድ፥ “ኑኒ እያ ባጋራ ጎዳ ኦይቻናዉ ዳንዳእያ እስ አደይ ደኤስ። እ፥ ይምላ ናኣ ምክያሳ። ሽን እ ኡባ ዎደ ታባ ኢታባፐ አትሽን፥ ሎኦባ ኦዶና ግሾ ታ እያ እፃይስ።” እዮሳፈፅ፥ “ካዎይ ሄሳ ጎፖ!” ያግስ።
1KI 22:9 ሄሳ ግሾ፥ እስራኤለ ካዎይ ባ ሞርናታፐ እሱዋ ፄግድ፥ “ይምላ ናኣ ምክያሳ ኤለ ኤካዳ ያ” ያግስ።
1KI 22:10 እስራኤለ ካዎይነ ይሁዳ ካዎይ እዮሳፈፅ ባንታ ካዎተꬃ ማኡዋ ማእድ፥ ሳማረ ካታማ ገልያ ፐንግያ ማታን ደእያ ዉዱማን ባንታ ካዎተꬃ አራታን ኡትዶሶና፤ ናበት ኡባይ ኤንታ ስንꬃን ትንብተ ኦዶሶና።
1KI 22:11 ኤንታፈ እሶይ፥ ካናነ ናአይ ሰደቅያስ ብራታ ካጨታ ጊግስድ፥ “ጎዳይ ሀይሳዳ ያጌስ፤ ‘ሶረት ꬋያና ጋካናዉ ነ ኤንታ ሀ ካጨታን ቃይጫና’ ” ያግስ።
1KI 22:12 ሀራ ናበት ኡባይ፥ “ጋላዳን ደእያ ራሞታ ካታማ ባዳ ኦላ፤ ፆና። ጎዳይ ሄ ካታማ፥ ካዋ ኩሸን አꬅድ እማና” ያግድ ኦድዶሶና።
1KI 22:13 ምክያሳ ፄጋናዉ ኪተትድ ብዳ አደይ፥ “ሄኮ፥ ናበት ኡባይ እስ ዶና ግድድ፥ ‘ካዎይ ሀ ኦላ ፆናና’ ያግድ ኦድዶሶና። ሄሳ ግሾ፥ ሀያና ነ ኦዳይካ ኤንታይሳ መላ ግዶ፤ ነ ሎኦባ ኦዳ” ያግስ።
1KI 22:14 ሽን ምክያስ፥ “ጎዳይ ኤርያ መላ፥ ጎዳይ ታዉ ኦድያባ ታ ኦዳና” ያግስ።
1KI 22:15 ምክያስ ካዋኮ ይዳ ዎደ፥ ካዎይ፥ “ምክያሳ፥ ኑ ጋላዳን ደእያ ራሞታ ካታማ ኦላናዉ ቢኖ ቦፖ” ያግድ ኦይችስ። ምክያስ፥ “ባዳ ኦላ፤ ነ ፆናና። ጎዳይ ሄ ካታማ ካዋ ኩሸን አꬅድ እማና” ያግስ።
1KI 22:16 ካዎይ፥ “ነ ጎዳ ሱንꬃን ታዉ ቱማ ኦዳና መላ ታ ነና አፑን ቶሆ ጫቀꬆ?” ያግስ።
1KI 22:17 ምክያስ፥ “እስራኤለ ኦላንቾት ኡባይ ሄንꬃንቾይ ባይና ዶርሳዳ ደርያ ቦላ ላለትዳይሳ ታ በአስ። ጎዳይ፥ ‘ሀይሳታስ ጎድ ባዋ። ኤንቲ ኡባይ ባንታ ሶ ሶ ሳሮ ቦ’ ” ያግስ።
1KI 22:18 እስራኤለ ካዎይ እዮሳፈፃኮ፥ “እ ታባ ኢታባ ኦዴስፐ አትሽን፥ ሎኦባ ኦድ ኤረና ጋዳ፥ ታ ነዉ ኦዳብክና?” ያግስ።
1KI 22:19 ምክያስ ጉጅድ፥ “ህዛ ጎዳይ ግያባ ስአ! ጎዳይ ባ አራታን ኡትን፥ ሳሎ ኪታንቾት ኡባይ እያ ኡሻቻንነ ሀድርሳን ኤቅዳሽን በአስ።
1KI 22:20 ጎዳይ፥ ‘አካብ ጋላዳን ደእያ ራሞታ ካታማ ብድ፥ ያን ሀይቃና መላ ባለꬃናይ ኦኔ?’ ያግስ። እሶይ ሀይሳዳ ግያ ዎደ ሀንኮይ ቃስ ሄሳዳ ጌስ።
1KI 22:21 ዉርሰꬃን እስ አያን ከይድ ጎዳ ስንꬃን ኤቅድ፥ ‘ታ እያ ባለꬃና’ ” ያግስ።
1KI 22:22 ጎዳይ፥ “ነ ዋታ ባለꬃኔ?” ያግስ። አያናይ፥ “ታ ባዳ፥ እያ ናበታ ኡባ ዶናን ዎርዶ አያና ግዳና” ያግስ። ጎዳይ፥ “ነ እያ ባለꬃና፤ ነዉ ሄስ ሀናና። ባዳ ባለꬃ” ያግስ።
1KI 22:23 ምክያስ ጉጅድካ፥ “ሄኮ፥ ጎዳይ ነ ቦላ ꬋዮ ኤሀናዉ ቃችዳ ግሾ ነ ናበታ ኡባ ዶናን ዎርዶ አያና ዎꬅስ” ያግስ።
1KI 22:24 ሄሳፈ ጉየ፥ ከናና ናአይ ሰደቅያስ ሺቅድ፥ ምክያሳ ባቅድ፥ “ጎዳ አያናይ ታና አግድ ዋንድ ነዉ ኦዳናዉ ብዴ?” ያግስ።
1KI 22:25 ምክያስ፥ “ሄኮ፥ ኔኒ ቆሰታናዉ ቆልአ ገልያ ጋላስ ሄሳ ደማና” ያግስ።
1KI 22:26 እስራኤለ ካዎይ ባ ኦላንቾታፐ እሱዋ፥ “ምክያሳ ኦይካዳ ካታማ ሃርያ አሞነስነ ታ ናኣ እዮኣሳስ ኤፋዳ እማ።
1KI 22:27 ካዎይ ስማና ጋካናዉ ሀ አድያ ቃሾ ኬꬃን ዎꬅተ። ታኒ ሳሮ ስማና ጋካናዉ፥ ጉꬃ ኡይꬃፈነ ሃꬃፈ ሀራባ አይኮካ እያዉ እሞፕተ” ያግስ።
1KI 22:28 ምክያስ፥ “ቱማ ነ ሳሮ ስምያባ ግድኮ፥ ጎዳይ ታዉ ኦድቤና” ያግስ። ቃስካ፥ ምክያስ፥ “አሳ ኡባይ ታ ኦድዳይሳ አኬክተ” ያግስ።
1KI 22:29 ሄሳፈ ጉየ፥ እስራኤለ ካዎይነ ይሁዳ ካዎይ እዮሳፈፅ ጋላዳን ደእያ ራሞታ ካታማ ብዶሶና።
1KI 22:30 እስራኤለ ካዎይ እዮሳፈፅ፥ “ታ ማኡዋ ላማዳ፥ ሀራ አስ ዳናዳ ኦላ ገላና፤ ሽን ኔኒ ነ ካዎ ማኡዋ ማአ” ያግስ። እስራኤለ ካዎይ ማኡዋ ላምድ፥ ሀራ አስ ዳንድ ኦላ ገልስ።
1KI 22:31 ሶረ ካዎይ ባ ፓራ ጋረታ ኪትያ ሀስታማነ ናምኡ አሳታኮ፥ “ካዋ ፃላል አትሽን፥ ሀራ ኦደራካ ኦለቶፍተ” ያግድ ኪትስ።
1KI 22:32 ፓራ ጋርያ ኪተይሳት እዮሳፈፃ በእዳ ዎደ፥ “ቱማ ሀይስ እስራኤለ ካዋ” ያግዶሶና። እያራ ኦለታናዉ ስምን እዮሳፈፅ ዋስስ።
1KI 22:33 ፓራ ጋረታ ኪተይሳት፥ እ እስራኤለ ካዋ ግዶናይሳ በእድ፥ እያ የደይሳ አጋግዶሶና።
1KI 22:34 ግዶሽን፥ እስ አደይ ጮ ባ ዶንግያ ዱክድ፥ እስራኤለ ካዋ ኦላ ማኦይ ጋሄትያ በሳራ ጫድን፥ እስራኤለ ካዎይ ባ ጋርያ ላግያ አድያኮ፥ “ጋርያ ጉየ ዛራዳ፥ ታና ኦላ ግዶፈ ከሳ፤ ታኒ ኢታ ጫቸ ጫደታስ” ያግስ።
1KI 22:35 ሄ ጋላስ ኦላይ ጎብያ ዎደ፥ እስራኤለ ካዎይ አካብ ባ ፓራ ጋርያ ግዶን ዘምፕድ፥ ሶረታ ስንꬃን ታክስ። እያ ሱꬃይ ፓራ ጋርያ ግዶ ጉክን፥ እ ኦማርስ ሀይቅስ።
1KI 22:36 አዋይ ዉላናዉ ማትሽን፥ “አሳ ኡባይ ባ ካታማ ካታማ ቦ! አሳ ኡባይ ባ ቢታ ቢታ ቦ!” ግያ ኪት ስኤትስ።
1KI 22:37 ኤንቲ ካዋ ሳማረ ካታማ ኤፍድ ያን ሞግዶሶና።
1KI 22:38 ላይማ ማጫሳት ሜጨትያ፥ ተቀትድ ኡትዳ ሳማረ ሃꬃን ጋርያ ሜጭዶሶና። ጎዳይ ካሰ ኦድዳ ቃላዳ እያ ሱꬃ ካናት ላጭዶሶና።
1KI 22:39 አካብ ሀንዳ ሀራባይ፥ እ ኦꬅዳባ ኡባይ፥ ዳንጋርሳ ዛለን ካዎ ጋꬎ ኬፅዳባነ ግምብዳ ካታማታባይ ኡባይ እስራኤለ ካዎታ ታርከ ማፃፋን ፃፈትስ።
1KI 22:40 አካብ ሀይቅድ ባ ማይዛታን ጋሄትስ፤ እያ በሳን እያ ናአይ አካዝያስ ካዎትስ።
1KI 22:41 እስራኤለ ካዎይ አካብ ካዎትዳ ኦይዳንꬆ ላይꬃን አሳ ናአይ እዮሳፈፅ ይሁዳን ካዎትስ።
1KI 22:42 እ ካዎትያ ዎደ ላይꬅ እያዉ ሀስታማነ እቻሻ፤ እ የሩሳላመን ላታማነ እቻሹ ላይꬅ ካዎትስ። እያ አይያ ሽልሀ ናእዉ አዙቦ።
1KI 22:43 እዮሳፈፅ ባ አዋ አሳ ኦግያን ሄመትስ፤ እ ሄ ኦግያፐ ገደ ሃ ግቤና፤ ጎዳ ስንꬃን ሱረባ ኦꬅስ። ግዶሽን፥ ꬎቃ ጎይኖ በሳታ ꬋይስቤና፤ አሳይ ሄ በሳን ያርሾነ እፃነ ጩይሰꬅ አግቤና።
1KI 22:44 እዮሳፈፅ እስራኤለ ካዉዋራ ስገትስ።
1KI 22:45 እዮሳፈፅ ሀንዳ ሀራባይ፥ እያ ምኖተꬃይነ እ ኦለትዳ ኦላይ ይሁዳ ካዎታ ታርከ ማፃፋን ፃፈትስ።
1KI 22:46 እያ አዋይ አስ ካዎትዳ ዎድያፐ ዶምን፥ አትዳ አደራ አደራ ላይማተይሳታ ቢታፈ ድግስ።
1KI 22:47 ሄ ዎደ ኤዶመ ቢታን ካዎይ ባዋ፤ ሄ ቢታን ሹመትዳ ሀላቅ ሃርስ።
1KI 22:48 ኦፍራ ቢታፈ ዎርቃ ኤሀና መላ እዮሳፈፅ ግታ ማርካበታ ኦስስስ፤ ሽን ሄ ማርካበት ኤፅዮን-ጋብራን መቀረትዶሶናፐ አትሽን፥ ኩምꬅ ብቦኮና።
1KI 22:49 ሄ ዎደ አካባ ናአይ አካዝያስ፥ “ታ ኦሳንቾት ነ ኦሳንቾታራ እስፈ ማርካብያን ቦ” ያግስ፤ ሽን እዮሳፈፅ እፅስ።
1KI 22:50 እዮሳፈፅ ሀይቅድ ባ ማይዛታን ጋሄትስ። ባ ማይዛ ዳዊታ ካታማን ሞገትስ። እያ በሳን እያ ናአይ እዮራም ካዎትስ።
1KI 22:51 ይሁዳ ካዎይ እዮሳፈፅ ካዎትዳ ታማነ ላፑንꬆ ላይꬃን፥ አካባ ናአይ አካዝያስ እስራኤለ ቦላ ሳማረን ካዎትስ፤ እስራኤለ ቦላ ናምኡ ላይꬅ ካዎትስ።
1KI 22:52 አካዝያስ ጎዳ ስንꬃን ኢታባ ኦꬅስ፤ ባ አዋነ ባ አየ ኦግያንነ እስራኤለ አሳ ናጋራ ኦስስዳ፥ ናባፃ ናኣ እዮርባማ ኦግያን ሄመትስ።
1KI 22:53 አካዝያስ ባኣለ ኤቃስ ኦꬅስ፤ እያ ጎይንስ። እያ አዋይ ካሰ ኦꬅዳይሳዳ፥ ጎዳ እስራኤለ ፆሳ ሀንቀꬅስ።
2KI 1:1 አካብ ሀይቅዳፐ ጉየ፥ ሞአበ አሳይ እስራኤለ ቦላ ደንድዶሶና።
2KI 1:2 ሄ ዎደ ካዎይ አካዝያስ ሳማረ ካታማ ቦላ ደእያ ፖቅያ ባራንዳፈ ኩንድድ ደሸትስ። ሄሳ ግሾ አሳታኮ፥ “ብድ፥ ታኒ ሀ ሀርግያፈ ፓፃነኮ ፓፆናኮ ኤቅሮና ፆሳ ብኤል-ዘቡላ አነ ኦይችተ” ያግድ ኪትስ።
2KI 1:3 ሽን ጎዳ ኪታንቾይ ተስባ አድያ ኤልያሳ ሀይሳዳ ያግስ፤ “ፑደ ባዳ፥ ሳማረ ካዎይ ኪትዳ አሳታራ ጋሄታዳ፥ ‘ህንተ ኤቅሮና ፆሳ ብኤል-ዘቡላ ኦይቻናዉ ብዳይ፥ እስራኤለን ፆሲ ꬋይነዬ?’
2KI 1:4 ጎዳይ ሀይሳዳ ያጌስ፤ ‘ካዋዉ፥ ኔኒ ሀይቃናፐ አትሽን፥ ሀ ዝንእዳ ሂፃፐ ደንዳካ’ ያጌስ” ያጋ። ሄሳ ግሾ፥ ኤልያስ ብድ ኤንታዉ ኦድስ።
2KI 1:5 ኪተትዳ አሳት ካዋኮ ጉየ ስምን፥ “አይስ ስምደቲ?” ያግድ ኤንታ ኦይችስ።
2KI 1:6 ኤንቲ፥ “እስ አደይ ኑራ ጋሄታናዉ ይድ፥ ህንተና ኪትዳ ካዋኮ ስሚድ፥ ሀይሳዳ ያግድ ኦድተ። ጎዳይ ኔኮ፥ ‘ኤቅሮና ፆሳ ብኤል-ዘቡላ ኦይቻናዉ ኔኒ አሰ ኪተይ፥ እስራኤለን ፆሲ ꬋይነዬ? ሄሳ ግሾ፥ ኔኒ ሀይቃናፐ አትሽን፥ ሀ ዝንእዳ ሂፃፐ ደንዳካ’ ያጌስ” ያግዶሶና።
2KI 1:7 ካዎይ፥ “ህንተራ ጋሄታናዉ ይድ፥ ሀይሳ ህንተዉ ኦድዳ አደይ አይ መላ አሴ?” ያግድ ኦይችስ።
2KI 1:8 ኤንቲ፥ “እክሰፐ ኦሰትዳ ማኦ ማእድ፥ ባ ፄሳን ዳፎ ዳንጬስ” ያግድ ዛርዶሶና። ካዎይ፥ “ሄስ ተስባ አድያ ኤልያሳ” ያግስ።
2KI 1:9 ሄሳፈ ጉየ፥ ካዎይ እስ ቶራ ሞጮና እሻታሙ ዎታዳረታራ ኪትስ። ቶራ ሞጭናይ ደረ ሁጰን ኡትዳ ኤልያሳኮ ከይድ፥ “ፆሳ አሶ፥ ካዎይ ነና፥ ዱገ ዎꬋዳ ሃያ” ያጌስ።
2KI 1:10 ሽን ኤልያስ ቶራ ሞጮናኮ፥ “ታኒ ፆሳ አስ ግድኮ፥ ታም ሳሎፐ ዎꬍድ፥ ነናነ ነ ዎታዳረታ ሞ” ያግድ ዛርስ። ታም ሳሎፐ ዎꬍድ፥ እያነ እያ ዎታዳረታ ምስ።
2KI 1:11 ካዎይ ሀራ ቶራ ሞጮና እሻታሙ ዎታዳረታራ ኤልያሳኮ ኪትስ። ቶራ ሞጮናይ ኤልያሳኮ፥ “ፆሳ አሶ፥ ካዎይ ነና ዱገ ዎꬋዳ ሃያ” ያጌስ።
2KI 1:12 ኤልያስ፥ “ታኒ ፆሳ አስ ግድኮ፥ ታም ሳሎፐ ዎꬍድ፥ ነናነ ነ ዎታዳረታ ሞ” ያግስ። ፆሳ ታም ሳሎፐ ዎꬍድ፥ እያነ እያ ዎታዳረታ ምስ።
2KI 1:13 ካዎይ ሄꬓንꬆ ሀራ ቶራ ሞጮና እሻታሙ ዎታዳረታራ ኤልያሳኮ ኪትስ። ቶራ ሞጮናይ ኤልያሳኮ ብድ፥ እያ ስንꬃን ጉልባትድ፥ “ፆሳ አሶ፥ ሀያና ታውነ ታራ ደእያ አሳስ ቃታ፤ ኑ ሸምፑዋ ሀይቆፐ አሻ።
2KI 1:14 ሄኮ፥ ታም ሳሎፐ ዎꬍድ፥ ካሰ ናምኡ ቶራ ሞጮናታነ ኤንታ ዎታዳረታ ምስ። ሽን ሀእ ታዉ ቃታ!” ያግድ ዎስስ።
2KI 1:15 ጎዳ ኪታንቾይ ኤልያሳኮ፥ “ያዮፋ! እያራ ዱገ ዎꬋ” ያግስ። ኤልያስ ደንድድ፥ እያራ ካዋኮ ዱገ ብስ።
2KI 1:16 “ጎዳይ ሀይሳዳ ያጌስ፤ ‘እስራኤለን ፆሲ ꬋይነ፥ ኔኒ ኤቅሮና ፆሳ ብኤል-ዘቡላ ኦይቻናዉ አሰ ኪትዳይ? ኔኒ ሀይሳ ኦꬅዳ ግሾ፥ ሀይቃና! ነ ዝንእዳ ሂፃፐ ደንዳካ’ ” ያጌስ።
2KI 1:17 ኤልያስ ኦድዳ ፆሳ ቃላዳ አካዝያስ ሀይቅስ፤ አካዝያሳስ አደ ናእ ባይና ግሾ፥ እያ እሻይ እዮራም እያ በሳን ካዎትስ። ሄስ ሀንዳይ እዮሳፈፃ ናአይ እዮራም ይሁዳን ካዎትዳ ናምአንꬆ ላይꬃና።
2KI 1:18 አካዝያስ ኦꬅዳ ሀራባ ኡባይ እስራኤለ ካዎታ ታርከ ማፃፋን ፃፈትድ ደኤስ።
2KI 2:1 ጎዳይ ኤልያሳ ጎተን ሳሎ ኤፋናዉ ሀንያ ዎደ፥ ኤልያስነ ኤልስ ጋልጋላፐ ደንድድ ብዶሶና።
2KI 2:2 ኤልያስ ኤልሳኮ፥ “ጎዳይ ታና ቤተለ ኪትዳ ግሾ፥ ሀያና ኔኒ ሀይሳን ጋምኣሻ” ያግስ። ሽን ኤልስ፥ “ጎዳይ ኤርያ መላ፥ ነ ሸምፖይ ኤሮ! ታኒ ኔፐ ሻከትከ” ያግስ። ኤንቲ ዱገ ቤተለ ዎꬍዶሶና።
2KI 2:3 ቤተለን ደእያ ናበታ ጩጋይ ኤልሳኮ ከይድ፥ “ጎዳይ ሀች ነ ጎዳ ኔፐ ሻክድ ኤፋና ሀነይሳ ኤራይ?” ያግድ ኦይችዶሶና። ኤልስ፥ “ኤ ኤራይስ፤ ሽን ህንተ ስእ ጊተ” ያግድ ዛርስ።
2KI 2:4 ኤልያስ ኤልሳኮ፥ “ጎዳይ ታና እያርኮ ኪትዳ ግሾ፥ ሀያና ኔኒ ሀይሳን ጋምኣሻ” ያግስ። ሽን ኤልስ፥ “ጎዳይ ኤርያ መላ፥ ነ ሸምፖይ ኤሮ! ታኒ ኔፐ ሻከትከ” ያግድ ዛርስ። ሄሳ ግሾ፥ ኤንቲ እያርኮ ብዶሶና።
2KI 2:5 እያርኮን ደእያ ናበታ ጩጋይ ኤልሳኮ ከይድ፥ “ጎዳይ ሀች ነ ጎዳ ኔፐ ሻክድ ኤፋና ሀነይሳ ኤራይ?” ያግድ ኦይችዶሶና። እ፥ “ኤ ኤራይስ፤ ሽን ህንተ ስእ ጊተ” ያግድ ዛርስ።
2KI 2:6 ኤልያስ ኤልሳኮ፥ “ጎዳይ ታና ዮርዳኖሰ ሻፋ ኪትዳ ግሾ፥ ሀያና ኔኒ ሀይሳን ጋምኣሻ” ያግስ። ኤልስ፥ “ጎዳይ ኤርያ መላ፥ ነ ሸምፖይ ኤሮ! ታኒ ኔፐ ሻከትከ” ያግስ። ኤንቲ ናምአይ እስፈ ብዶሶና።
2KI 2:7 ናበታፐ እሻታሙ አሳት ኤንታ ካልድ፥ ዮርዳኖሰ ሻፋ ጋካናዉ ብዶሶና። ኤልያስነ ኤልስ ሻፋ ዶናን ኤቅዳሽን፥ ናበት ኤንታፈ ጉꬁ ሃክድ ኤቅዶሶና።
2KI 2:8 ሄ ዎደ ኤልያስ ባ አፍላ ኤክድ ፃፅድ፥ እያራ ሃꬃ ሾጭን፥ ሃꬃይ ያነ ሃነ ሻከትን መላ ቢታራ ፕንዶሶና።
2KI 2:9 ኤልያስ ኤልሳኮ፥ “ታኒ ኔፐ ኤከታናፐ ስን፥ ነዉ አይ ኦꬃና መላ ኮያይ?” ያግስ። ኤልስ፥ “ነ አያናይ ታ ቦላ ናምኡ ኩሸ ግዳና መላ፥ ታኒ ነና ዎሳይስ” ያግድ ዛርስ።
2KI 2:10 ኤልያስ፥ “ኔኒ ዋይስያ ኦይሾ ኦይቻዳሳ። ሽን ታኒ ኔፐ ኤከትያ ዎደ ኔኒ ታና ፄልያባ ግድኮ፥ ሄስ ነዉ ሀናና። ነ በኦና እፅኮ ሀነና” ያግስ።
2KI 2:11 ኤንቲ እስፈ ኦደትሸ ሄመትሽን፥ ታማ ፓራትነ ታማ ጋረት ኤንታ ናምኣፈ ግዶን ገልድ፥ ሻክስ። ኤልያስ ጎተን ሳሎ ከይስ።
2KI 2:12 ኤልስ ሄሳ በእድ፥ “ታ አዋዉ፥ ታ አዋዉ! እስራኤለ ፓራቶነ ፓራ ጋረቶ!” ያግድ ዋስስ። ሄሳፈ ስምን፥ እ ኤልያሳ ዛሪድ በእቤና። ኤልስ አዛንድ፥ ባ ማኡዋ ናምአ ከስድ፥ ዳክስ።
2KI 2:13 ኤልያሳፐ ዎꬍዳ ማኡዋ ደንꬅድ፥ ጉየ ስሚድ፥ ዮርዳኖሰ ሻፋ ዶናን ኤቅስ።
2KI 2:14 ኤልያሳፐ ዎꬍዳ ማኡዋ ኤክድ፥ እያራ ሃꬃ ሾጭድ፥ “ጎዳይ ኤልያሳ ፆሳይ አዉን ደኢ?” ያግስ። ኤልስ ሃꬃ ሾጭዳ ዎደ፥ ሃꬃይ ያነ ሃነ ሻከትን፥ ሻፋ ፕንስ።
2KI 2:15 እያርኮ ይዳ ናበታ ጩጋይ ኤልሳ በእዳ ዎደ፥ “ኤልያሳ አያናይ ኤልሳ ቦላ ሸምፕስ” ያግዶሶና። ኤንቲ እያራ ጋሄታናዉ ይድ፥ እያ ስንꬃን ጉፋንዶሶና።
2KI 2:16 ኤንቲ፥ “ኑኒ ነ አይለት እሻታሙ ምኖ አሳት ሀይሳን ደኦስ። ሀያና ኑኒ ነ ጎዳ ኮያናዉ ባና። ኦን ኤር፥ ጎዳ አያናይ እያ ኤክድ፥ እስ ዙማ ሁጰን ዎይኮ ዛንጋራ ግዶን የጎና አገና” ያግዶሶና። ኤልስ፥ “አካይ፥ ቦፕተ” ያግስ።
2KI 2:17 ሽን አካይ ጉሳይ እያ ዬላያና ጋካናዉ፥ ኤንቲ እያ ዎስድ አጎና እፅን፥ “ቢተ” ያግስ። ኤንቲ እሻታማይ ብድ ሄꬑ ጋላስ ኩመꬅ ኮይድ፥ እያ ደምቦኮና።
2KI 2:18 ኤልስ እያርኮን ደእሽን፥ ኤንቲ እያኮ ስሚድ ይዶሶና። እ፥ “ታኒ ህንተና ‘ቦፕተ’ ያጋብክና?” ያግስ።
2KI 2:19 ሄሳፈ ጉየ፥ እያርኮን ደእያ አሳት ኤልሳ፥ “ኔኒ ኑ ጎዳይ በኤይሳዳ ሀ ካታማይ ዱሳስ ሎኦ። ሽን ሃꬃይ ኢታ፤ ቃስ ቢታይካ አይፈና” ያግዶሶና።
2KI 2:20 እ፥ “አነ ኦራꬃ ከረን ማፅነ የግድ፥ ኤክ ዪተ” ያግድ ኪትን፥ እያዉ ኤህዶሶና።
2KI 2:21 ኤልስ ፑልቱዋኮ ብድ፥ ማፅንያ እያን የግድ፥ “ጎዳይ፥ ‘ታኒ ሀ ሃꬃ ፓꬃስ፤ ህዛፐ ሀ ሃꬃይ ሀይቆስ ጋሶ ግደና፤ ቢታይካ አይፋና’ ያጌስ” ያግስ።
2KI 2:22 ኤልስ ኦድዳይሳዳ ሀች ጋካናዉ፥ ሄ ሃꬃይ ፅሎ ግድስ።
2KI 2:23 ኤልስ ያፐ ደንድድ፥ ፑደ ቤተለ ከይስ። እ ኦገ ቦላ ደእሽን፥ ያላጋ አደ ናይት ካታማፐ ከይድ፥ “ላ ሀ ቦአዉ፥ ከያ! ላ ሀ ቦአዉ፥ ከያ” ያግድ እያ ቀልቅስዶሶና።
2KI 2:24 ኤልስ ጉየ ስም ፄልድ፥ ኤንታ ጎዳ ሱንꬃን ባድስ። ያትን፥ ናምኡ ማጫ ባባንꬃት ከይድ፥ ናይታፐ ኦይታማነ ናምኡ ያላጋታ ፑዘረꬅድ ዎꬍዶሶና።
2KI 2:25 ኤልስ ያፐ ደንድድ፥ ቃርመሎሳ ዙማ ቦላ ከይስ፤ ያፐ ቃስ ሳማረ ስምስ።
2KI 3:1 ይሁዳ ካዎይ እዮሳፈፅ ካዎትዳ ታማነ ሆስፑንꬆ ላይꬃን፥ አካባ ናአይ እዮራም ሳማረን እስራኤለ ቦላ ካዎትስ፤ እ ታማነ ናምኡ ላይꬅ ካዎትስ።
2KI 3:2 እ፥ ጎዳ ስንꬃን ኢታባ ኦꬅስ። ሽን ባ አዋነ ባ አየ ኤልዛቤል መላ ኢታ ግደና፤ እያ አዋይ ኦꬅዳ ባኣለ ኤቃ ድግስ።
2KI 3:3 ናባፃ ናአይ እዮርባም እስራኤለ አሳ ኦስስዳ ናጋራን ኦይከትስ፤ እያፐ ሃክቤና።
2KI 3:4 ሞአበ ካዎይ ሞስ ዶርሰ ሄምያ አስ። እ እስራኤለ ካዋስ 100,000 አንቃራ ዶርሳታነ 100,000 ኡርገ ዶርሳታ እክስያ ላይꬃን ላይꬃን ጊሬስ።
2KI 3:5 ሽን እስራኤለ ካዎይ አካብ ሀይቅዳፐ ጉየ፥ ሞአበ ካዎይ ሞስ እስራኤለ ቦላ ማካልስ።
2KI 3:6 ሄ ዎደ ካዎይ እዮራም ሳማረ ከይድ፥ እስራኤለ ኡባ ሺሽስ።
2KI 3:7 ይሁዳ ካዋ እዮሳፈፅ ኪታ የድድ፥ “ሞአበ ካዎይ ታ ቦላ ማካልስ፤ ሞአበራ ኦለታናዉ ኔኒ ታራ ባኔ?” ያግስ። እዮሳፈፅ፥ “ኤ ባና፤ ታኒ ነና፤ ታ አሳይ ነ አሰ፤ ታ ፓራይ ነ ፓራ ያግድ” ዛርስ።
2KI 3:8 እዮሳፈፅ፥ “ኑኒ አዉራ ብድ ኤንታ ኦላኔ?” ያግድ ኦይችስ። ካዋ እዮራም፥ “ኤዶመ መላ ቢታ ኦግያራ ካንꬅ ብድ ኦላና” ያግድ ዛርስ።
2KI 3:9 ሄሳ ግሾ፥ እስራኤለ ካዎይ፥ ይሁዳ ካዎይነ ኤዶመ ካዎይ ኦላስ ከይዶሶና። ኤንቲ ላፑን ጋላሳ ኦገ ዩይድ ብዳፐ ጉየ፥ ኦላንቾታስነ ኤንታ መህያስ አይብ ሃꬅ አትቤና።
2KI 3:10 ሄ ዎደ እስራኤለ ካዎይ፥ “ጎዳይ ኑና ሀ ሄꬑ ካዎታ እስፈ ሞአበ ካዋስ አꬅድ እማናዉ ፄግዳ ግሾ ኑና አየ!” ያግስ።
2KI 3:11 ሽን እዮሳፈፅ፥ “ኑኒ እያ ባጋራ ጎዳ ኦይቻናዉ ሀይሳን ናበይ ባዌ?” ያግድ ኦይችስ። እስራኤለ ካዋ ቶራ ሞጮናታፐ እሶይ፥ “ኤልያሳ ኩሸን ሃ ቆልያ ሳፋፃ ናአይ ኤልስ ሀይሳን ደኤስ” ያግድ ዛርስ።
2KI 3:12 እዮሳፈፅ፥ “ኤ፥ እ ቱማ ናበ” ያግስ። እስራኤለ ካዎይ፥ እዮሳፈፅ፥ ኤዶመ ካዎይነ ኤልሳኮ ብዶሶና።
2KI 3:13 ኤልስ እስራኤለ ካዋኮ፥ “ታናነ ነና ጋይ አይቤ? ባዳ ነ አዋይነ ነ አይያ ኦይችዳ ናበታ ኦይቻ” ያግስ። እስራኤለ ካዎይ ዛሪድ፥ “አካይ፥ ሀ ሄꬑ ካዎታ እስፈ ሞአበ ካዋስ አꬅድ እማናዉ ኑና ፄግዳይ ጎዳባይ!” ያግስ።
2KI 3:14 ኤልስ፥ “ታኒ እያዉ ኦꬅያ ደኦ ጎዳይ ኤሮ! ይሁዳ ካዋ እዮሳፈፃ ግሾ ጎናኮ ታኒ ነና አይፈንካ ፄልከሽን።
2KI 3:15 አነ ሀእ ታዉ ዲꬅ ዲፅያ አስ ኤህተ” ያግስ። ዲፀይስ ዲፅሽን፥ ጎዳ ዎልቃይ እያ ቦላ ዎꬍስ።
2KI 3:16 ኤልስ፥ “ሀ መላ ዛንጋራ ኡባን ኦላ ቦክተ።
2KI 3:17 ጎዳይ፥ ‘ጫርኮ ዎይኮ እራ በኤከታ፥ ሽን ሀ ቦክዳ ዛንጋራን ሃꬅ ኩማና፤ ህንተ፥ ህንተ መሄይነ ህንተ ጫና መሄይ ኡያና’ ያጌስ።
2KI 3:18 ሀይስ ፆሳ ስንꬃን ላፋባ፤ ቃስ እ ሞአበ ህንተዉ አꬅድ እማና።
2KI 3:19 ግምበትዳ ካታማታነ ግታ ካታማታ ኡባ ህንተ ፆናና። ሎኦ ምꬃታ ኡባ ቃንፃና፤ ሃꬃ ፑልቶታ ኡባ ህንተ ባራና፤ አራዳ ሾቃታ ኡባ ኢስድ ሹች ኩምዳ ቢታ ኦꬃና” ያግስ።
2KI 3:20 ዎንተꬃ ጋላስ ዎንታ ያርሾ ያርሽያ ዎደይ ጋክን፥ ኤዶመ ባጋራ ሃꬅ ጎግድ፥ ቢታን ኤልስ።
2KI 3:21 ሞአበ አሳይ፥ ሄꬑ ካዎት ኤንታ ኦላናዉ ይዳይሳ ስእድ፥ ናአተꬅ፥ ጭም፥ ኦላ ሚሸ ቶካናዉ ዳንዳእያ አሳ ኡባይ ፄገትድ፥ ባንታ ቢታ ዛዋ ናግዶሶና።
2KI 3:22 ኤንቲ ጉራ ደንድያ ዎደ ሃꬃ ቦላ ዎꬍዳ ፃልቀይ ዞእድ፥ ኤንታዉ ሱꬁ ዳንድ በንትስ።
2KI 3:23 ኤንቲ፥ “ሀይሳ ሱꬃ በእተ! ካዎት ባንታ ግዶን እሶይ እሱዋራ ኦለትድ፥ ሀይቅ ዉርዶሶና። ሞአበ ብድ፥ አነ ኤንታ ሚፃ ቆጭሮስ” ያግዶሶና።
2KI 3:24 ሞአበ አሳይ እስራኤለ ሚፃ ብን፥ እስራኤለት ደንድድ፥ ኤንታ ሾጭዶሶና። ሾጭድ ኤንታ ቢታ ኦይክድ፥ ሞአበ አሳ ዎꬍዶሶና።
2KI 3:25 ካታማታ ኦልድ ꬋይስዶስና። አሳ ኡባይ ሁጰን ሁጰን እስ እስ ሹቹ ኤክድ፥ አራዳ ሾቃት ኡባይ ካመታና ጋካናዉ፥ ኤንታ ቦላ ሆልዶሶና። ፑልቶ ኡባ ባርድ፥ ሎኦ ምꬃ ኡባ ቃንፅዶሶና። ቅር-ሄሬሰራ ካታማ ግምብያ ፃላል አትስ፤ ሽን ያምባርሻን ኦልያ አሳት ሄ ካታማ ሾጭዶሶና።
2KI 3:26 ሞአበ ካዎይ ኦላይ ባ ቦላ ጎብዳይሳ በእዳ ዎደ ማሻ ዳንጭዳ ላፑን ፄቱ አሳታ ኤክስ። ኦላ ግዱዋ ዳክድ፥ ኤዶመ ካዋኮ ፕናናዉ ደንድስ፤ ሽን እያዉ ሀኖና እፅስ።
2KI 3:27 ሄሳፈ ጉየ፥ ባ በሳን ካዎታናዉ ደእያ ባ ባይራ ናኣ ኤክድ፥ ካታማ ግምብያ ቦላ ታማን ፁግድ ያርሽስ። ሞአበት እስራኤለታ ቦላ ሀንቆ ሱልዶሶና። እስራኤለት ሄ ካታማ አግድ፥ ባንታ ቢታ ስምዶሶና።
2KI 4:1 ናበታፐ እሱዋ ማችያ ኤልሳኮ ባዳ፥ “ነ አይለይ፥ ታ አዝናይ ሀይቅስ። እ ጎዳ ያይያ አስ ግደይሳ ኔኒ ኤራሳ። ሽን ሀእ እያ አጮ አዋይ ታ ናይታ ናምአ ባዉ አይለ ኦꬃናዉ ኮዬስ” ያጋዳ እያዉ ኦዳሱ።
2KI 4:2 ኤልስ፥ “ያትን ታኒ ነዉ አይ ኦꬆ? ነ ሶን አይበ ደኤይ? አነ ታዉ ኦዳ” ያግስ። ማጫስያ፥ “ታዉ፥ ነ አይሌስ ጉꬃ ፃሮን ደእያ ዛይተፐ አትሽን፥ ሀራባይ አይብካ ባዋ” ያጋሱ።
2KI 4:3 ኤልስ፥ “ባዳ ነ ሾሮታ ኡባፈ ካይሳ ኦቶታ ጋርፃ። ጋርፃሸ ጉꬁ ጋርፆፋ።
2KI 4:4 ሄሳፈ ጉየ፥ ሶ ገላዳ፥ ነ ቦላነ ነ ናይታ ቦላ ካርያ ጎርዳ። ኦቶ ኡባን ዛይተ ትጋ፤ ዛይተይ ኩምዳ ኦቶታ እስ ባጋ አꬃ” ያግስ።
2KI 4:5 ማጫስያ ባዳ፥ ካርያ ባ ቦላነ ባ ናይታ ቦላ ጎርዳሱ። ኤንቲ እዉ ኦቶታ ሺሽን፥ እያ ዛይትያ ትገꬅ ኦይካሱ።
2KI 4:6 ኦቶ ኡባይ ኩምዳ ዎደ፥ ማጫስያ ባ ናኣኮ፥ “አነ ታዉ ሀራ ኦቶ ኤካዳ ያ” ያጋሱ። ሽን ናአይ ዛሪድ፥ “ሀር እስ ኦቶይካ ዴና” ያግስ። ሄሳፈ ጉየ፥ ዛይተይ ጎገይሳ አጋግስ።
2KI 4:7 ማጫስያ ስማ ባዳ ኤልሳስ ኦዳሱ። እ፥ “ባዳ ዛይትያ ባይዛዳ፥ ነ አጩዋ ቃንፃ። አትዳይሳ ኔንነ ነ ናይት ጎኤትድ ዳናዉ ዳንዳኤታ” ያግስ።
2KI 4:8 እስ ጋላስ ኤልስ እስ ዱረ ማጫስያ ደእያ ሱኔማ ካታማ ብን፥ ማጫስያ ሾባዳ፥ እያ ካꬅ ሙዛሱ። ሄ ጋላሳፐ ዶምን፥ እ ያራ አꬍያ ዎደ ኡባን ካꬅ ማናዉ እ ሶ ገሌስ።
2KI 4:9 እያ ባ አዝናኮ፥ “ሄኮ፥ ኡባ ዎደ ኑ ማታራ አꬍያ አደይ ፆሳ አስ ግደይሳ ታኒ ኤራይስ።
2KI 4:10 አነ እስ ጉꬃ ክፍለ ፖቅያ ቦላ እያዉ ኬፆስ፤ እያ ግዶን አርስ፥ ኦይደ፥ ፃርጴዛነ ፆምፐ ዎꬆስ። እ ኑኮ ይዳ ዎደ ኡባን ያ ገላናዉ ዳንዳኤስ” ያጋሱ።
2KI 4:11 እስ ጋላስ ኤልስ ሱናማ ካታማ ይድ፥ ባ ክፍልያ ፑደ ከይድ ያን ሸምፕስ።
2KI 4:12 ባ አይልያ ግያዛኮ፥ “ባዳ ማጫስዉ ፄጋ” ያግን፥ ግያዝ ፄግን፥ እያ ያዳ ኤልሳ ስንꬃን ኤቃሱ።
2KI 4:13 ኤልስ ግያዛኮ፥ “ሀ ማጫስያ ሀ ኡባ ኑስ ኦꬃሱ። ኑኒ ነዉ አይ ኦꬅኖ? ኑኒ ብድ፥ ካዋ ዎይኮ ቶራ ሞጮና ኦድሳናባይ አይብ ደእያኮ እዮ ኦይቻ” ያግስ። ማጫስያ፥ “ታኒ ሀይሳን ታ አሳ ግዶን ደአይስ” ያጋሱ።
2KI 4:14 ኤልስ ግያዛ፥ “ያትን፥ ታኒ እዉ አይ ኦꬆ?” ያግድ ኦይችስ። ግያዝ፥ “እዉ ናእ ባዋ፤ እ አዝናይ ጭምስ” ያግስ።
2KI 4:15 ኤልስ፥ “ማጫስዉ ፄጋ” ያግስ። ግያዝ እዮ ፄግስ፤ እያ ያዳ፥ ፐንገን ኤቃሱ።
2KI 4:16 ኤልስ፥ “ዎንቶ ላይꬅ ሀኖደ ኔኒ አደ ናአ እድማና” ያግስ። ማጫስያ፥ “አካይ፥ ታ ጎዳዉ፥ ኔኒ ፆሳ አስ ግድክ፥ ታዉ ዎርዶቶፓ” ያጋሱ።
2KI 4:17 ሽን ማጫስያ ቃንꬃታሱ፤ ኤልስ እዉ ኦድዳይሳዳ፥ ካልያ ላይꬅ አደ ናአ የላሱ።
2KI 4:18 ናአይ ድጭስ፤ እስ ጋላስ ካꬃ ጫክያ አሳታራ ደእያ ባ አዋኮ ብስ።
2KI 4:19 ባ አዋኮ፥ “ዎ ታና ሁጰይ ዎꬌስ! ዎ ታና ሁጰይ ዎꬌስ!” ያግስ። እያ አዋይ እስ አይልያ፥ “ቶካዳ አየኮ ኤፋ” ያግድ ኪትስ።
2KI 4:20 አይለይ ናኣ ኤክድ፥ አየኮ ኤፍስ። ሴታ ጋላስ ግዳና ጋካናዉ፥ ናአይ ባ አየ ክኦን ኡትስ፤ ሄሳፈ ጉየ፥ ናአይ ሀይቅ አግስ።
2KI 4:21 ማጫስያ ናኣ ፑደ ኤፋዳ፥ ፆሳ አድያ አርሳን ዝንእሳሱ። ያታዳ እያ ቦላ ካረ ጎርዳዳ ባሱ።
2KI 4:22 ባ አዝና ፄጋዳ፥ “ታኒ ፆሳ አድያኮ ኤለ ባዳ ያና መላ፥ አይለታፐ እሱዋነ ሀረታፐ እሱዋ ታዉ የዳ” ያጋሱ።
2KI 4:23 እ፥ “ሀች አጌና ፄሮ ጋላስ ዎይኮ ሳምባታ ግደና፤ ነና እያኮ ኤፈይ አይቤ?” ያግስ። እያ ዛራዳ፥ “አይብካ ባዋ” ያጋሱ።
2KI 4:24 እያ ሀረ ጫናዳ፥ ባ አይልያ፥ “ሀርያ ላጋ! ታኒ ነዉ ኦዳና ጋካናዉ፥ ለፕ ኦꬃዳ ላጎፋ” ያጋሱ።
2KI 4:25 ማጫስያ ያፐ ደንዳዳ፥ ቃርመሎሳ ዙማን ደእያ ፆሳ አድያኮ ባሱ። ኤልስ ማጫስው ሃሆን በእድ፥ ባ አይልያ ግያዛ፥ “በአ፥ ሱናማን ደእያ ማጫስያ ያዉሱ።
2KI 4:26 እዮ ሞካናዉ ዎፃ ባዳ፥ ‘ኔኒ ሳሮ? ነ አዝናይ ሳሮ? ነ ናአይ ሳሮ?’ ያጋዳ ኦይቻ” ያግስ። ማጫስያ፥ “ኑኒ ኡባይካ ሳሮ” ያጋሱ።
2KI 4:27 ማጫስያ ዙማ ቦላ ደእያ ፆሳ አድያኮ ጋክዳ ዎደ፥ ሆካዳ እያ ቶሁዋ ኦይካሱ። ግያዝ ማጫስዉ ድጋናዉ ሺቅስ፤ ሽን ፆሳ አደይ፥ “አጋ! እያ ግታ መቶን ደአዉሱ፤ ሽን ጎዳይ ታፐ ሄሳ ገንꬅስ። እ መቱዋ ታዉ ኦድቤና” ያግስ።
2KI 4:28 ማጫስያ፥ “ታ ጎዳዉ፥ ኔኒ ታዉ ናአ እማና መላ ታኒ ነና ኦይቻድና? ታኒ ነና፥ ‘ታና ጮ ጭሞፋ ያጋብክና?’ ” ያጋሱ።
2KI 4:29 ኤልስ ግያዛኮ፥ “ነ አዱሳ ማኡዋ ነ ሳቅያን ስርቃ፤ ታ ፃምአ ኤካዳ ኤለሳ። ኦገን ኦደራካ ጋሄትኮ፥ ሳሮꬆፋ፤ ኦንካ ነና ሳሮትኮ፥ ዛራዳ ሳሮ ጎፓ። ታ ፃምአ ናኣ ሶምኡዋ ቦላ ዎꬃ” ያግስ።
2KI 4:30 ሽን ናኣ አይያ፥ “ደኦ ጎዳይ ኤርያ መላ፥ ነ ሸምፖይ ኤሮ! ታኒ ነና የጋዳ ቢከ” ያጋሱ። ኤልስ ደንድድ፥ እዮ ካልስ።
2KI 4:31 ግያዝ ኤንታፈ ስንꬃትድ ብድ፥ ፃምአ ናኣ ሶምኡዋ ቦላ ዎꬅስ። ሽን ግርስ ዎይኮ ሸምፖይ ባዋ። ያትን ግያዝ ኤልሳራ ጋሄታናዉ ስም ይድ፥ “ናአይ ባርክቤና” ያግድ ኦድስ።
2KI 4:32 ኤልስ ሶ ገልድ፥ ሄኮ፥ ናኣ አሀይ እያ አርሳን ዝንእዳይሳ በእስ።
2KI 4:33 ባ ቦላነ ናኣ ቦላነ ካርያ ጎርድድ፥ ጎዳ ዎስስ።
2KI 4:34 ናኣ አሀ ቦላ ከይድ፥ ባ ዶና እያ ዶናን፥ ባ አይፍያ እያ አይፍያን፥ ባ ኩሸታ እያ ኩሸታራ ጋꬅድ ዝንእስ፤ ናኣ አሳተꬃይ ሆእስ።
2KI 4:35 ኤልስ ደንድድ፥ ሶ ግዶን ያ ሃ ስመረትስ። ናምአንꬆ ስሚድ፥ ናኣ ቦላ ዝንእስ፤ ናአይ ላፑን ቶሆ ሀꬍሽዳፐ ጉየ ፄልስ።
2KI 4:36 ኤልስ ግያዛ ፄግድ፥ “ሱናማ ማጫስዉ ፄጋ” ያግስ። ግያዝ እዮ ፄግን፥ እያ ይዳ ዎደ፥ ኤልስ፥ “ነ ናኣ ኤካ” ያግስ።
2KI 4:37 ማጫስያ ኤልሳ ቶሁዋ ቦላ ኩንዳዳ፥ ሳአን ጉፋናሱ፤ ባ ናኣ ኤካዳ ካረ ከያሱ።
2KI 4:38 ኤልስ ጋልጋላ ስሚድ ይዳ ዎደ፥ ቢታን ኮሽ ደኤስ። ናበታ ጩጋይ እያ ስንꬃን ኡትድ ደእሽን፥ እ ባ አይልያ፥ “ዎጋ ኦቶ ታማ ቦላ ዎꬃዳ፥ ናበታስ ዎፀ ካꬃ” ያግስ።
2KI 4:39 ኤንታፈ እሶይ ቦንጮ ማፅድ ኤሀናዉ ዎራ ብድ፥ ኤጨረ ሌሄ ዳንያባ ደምስ። ቶካናዉ ዳንዳኤይሳ ኬና ዳሮ ኤጨረ ሌሄ ኤክድ ይስ፤ እ አይበኮ ኤሮና አንጭድ፥ ኦቱዋን የግስ።
2KI 4:40 አሳይ ማና መላ ዎፅያ ከስዶሶና፤ ኤንቲ ዎፅያ ቱሽ ባሪ በእድ፥ “ናብያዉ፥ ሀ ኦቱዋን ዎꬍያባይ ደኤስ” ያግድ ዋስዶሶና። አሳይ ማናዉ ዳንዳእቦኮና።
2KI 4:41 ኤልስ፥ “አነ ታዉ ꬊለ ኤክድ ዪተ” ያግስ። ሄ ꬊልያ ኦቱዋን ቆልድ፥ “አሳይ ማናዳ ዎፅያ ትግተ” ያግስ። ሄሳፈ ጉየ፥ ኦቱዋን ኢታባይ በንትቤና።
2KI 4:42 ኮይሮ ጋክዳ ካꬃፈ ኡከትዳ ላታሙ ባንጋ ዳቡዋ፥ ትያ ካꬃራ እስፈ ባ ኦጎሩዋን የግድ፥ ፆሳ አድያስ ኤህያ እስ አደይ ባኣል-ሻልሻፔ ይስ። ኤልስ ባ አይልያ፥ “ማና መላ አሳስ አꬃ” ያግስ።
2KI 4:43 እያ አይለይ፥ “ታኒ ፄቱ አሳ ስን ሀይሳ ዋታዳ አꬆ?” ያግድ ኦይችስ። ሽን ኤልስ፥ “ማና መላ አሳስ አꬃ፤ ጎዳይ ‘ኤንቲ ምድ ካልን፥ ቲፈይ አታና’ ” ያግስ።
2KI 4:44 ሄሳ ግሾ፥ አይለይ ኤንታ ስን አꬅን፥ ኤንቲ ምዶሶና፤ ጎዳይ ግዳይሳዳ ቲፈይ አትስ።
2KI 5:1 አራመ ካዋስ ምኖ ቶራ ሞጮና ግድዳ ንእማን፥ ባ ጎዳን ዳሮ ዶሰትዳነ ቦንቸትዳ አስ። እያ ባጋራ ጎዳይ አራመ ኦላንቾታስ ፆኖ እሚስ። ንእማኔይ ቶራ ቃራ፤ ሽን ጎጋ ሀርገይ እያ ቦላ ደኤስ።
2KI 5:2 እስ ዎደ አራመ ቢታፈ ፓኖት እስራኤለ ቢታ ብድ፥ እስ ማጫ ናአ እስራኤለፐ ድእዶሶና። ሄ ናእያ ንእማነ ማቼስ አይለ ግዳሱ።
2KI 5:3 ሄ ናእያ ባ ጎዳተኮ፥ “ታ ጎዳይ ሳማረን ደእያ ናብያኮ ብዳ ግድያኮ፥ እ ፓፃናሽን” ያጋሱ።
2KI 5:4 ንእማን ባ ጎዳኮ ብድ፥ እስራኤለፐ ይዳ ናእያ ግዳይሳ እያዉ ኦድስ።
2KI 5:5 አራመ ካዎይ ንእማነኮ፥ “ባ፥ ታኒ እስራኤለ ካዋስ ዳብዳበ ፃፋና” ያግስ። ንእማን 3,000 ብራ ሳንትመ፥ 6,000 ዎርቃ ሳንትመ ታሙ ኩመꬃ ማኦ ኤክድ ብስ።
2KI 5:6 እ፥ ኤክድ ብዳ ዳብዳበይ፥ “ሀ ጎጋ ሀርግያፈ ኔኒ ታ አይልያ፥ ንእማነ ፓꬃና መላ ሀ ዳብዳብያራ ታኒ እያ ኔኮ የዳስ” ያግስ።
2KI 5:7 እስራኤለ ካዎይ ዳብዳብያ ናባብዳ ዎደ፥ ባ ማኡዋ ዳክድ፥ “ታኒ እያ ዎꬋናዉነ ፓꬃናዉ ፆሰዬ? ታኒ እስ አስ እያ ጎጋ ሀርገፈ ፓꬃና መላ ሀ አደይ ታኮ አይስ ኪትዴ? እ ታራ ኦየታናዉ ጋሶ ኮየይሳ በእተ” ያግስ።
2KI 5:8 ፆሳ አስ ግድዳ ኤልስ እስራኤለ ካዎይ ባ ማኡዋ ዳክዳይሳ ስእዳ ዎደ አሰ ኪትድ፥ “ነ ማኡዋ አይስ ዳካዲ? እያ ሃ ታኮ የዳ፤ እስራኤለን ናበይ ደኤይሳ ታኒ እያ ኤርሳና” ያግስ።
2KI 5:9 ንእማን ባ ፓራታነ ፓራ ጋረታራ ብድ፥ ኤልሳ ካረን ኤቅስ።
2KI 5:10 ኤልስ፥ “ባዳ ዮርዳኖሰ ሻፋን ላፑን ቶሆ ሜጨታ፤ ነ ሀርግያፈ ኔኒ ፓፃናነ ጌያና” ያግድ ኦዳና መላ ባ አይልያ እያኮ ኪትስ።
2KI 5:11 ሽን ንእማን ሀንቀትድ፥ “እ ታኮ ይድ፥ ጎዳ ባ ፆሳ ሱንꬃ ፄግድ፥ ባ ኩሽያ ታ ማዱንꬃ ቦላ ዎꬅድ፥ ታና ሀ ጎጋ ሀርግያፈ ፓꬄስ ጋዳ ቆፓስ።
2KI 5:12 ዳማስቆ ሻፋት፥ አባንነ ፋርፋር እስራኤለን ደእያ ሻፋታፐ አꬎኮናዬ? ያትን ታኒ ኤንታን ሜጨታዳ ጌይክና?” ያግድ ሀንቀትድ፥ ጉየ ስምስ።
2KI 5:13 እያ አይለት እያኮ ሺቅድ፥ “ኑ ጎዳዉ፥ ናበይ ግታባ ኦꬃና መላ ነዉ ኦድዳኮ፥ ኔኒ ኦꬅክዬ? እ ነና፥ ‘ባዳ ሜጨታዳ ጌይያ’ ግዳይስ አይስ ዴፅዴ?” ያግዶሶና።
2KI 5:14 እ ዱገ ዎꬍድ፥ ፆሳ አደይ እያዉ ኦድዳይሳዳ ዮርዳኖሰ ሻፋን ላፑን ቶሆ ሙከትድ ሜጨትስ። እያ አሳተꬃይ ናአ አሳተꬃዳ ሀንስ፤ ፓፅድ ጌይስ።
2KI 5:15 ሄሳፈ ጉየ፥ ንእማንነ እያራ ይዳ አሳ ኡባይ ኤልሳኮ ጉየ ብዶሶና። ንእማን እያ ስንꬃን ኤቅድ፥ “ሄኮ፥ እስራኤለ ፆሳፈ አትሽን፥ ሀራ ፆሲ ባይናይሳ ታኒ ሀእ ኤራስ። ሀያና ሀእ ታኒ፥ ነ አይለይ እምያ እሞታ ኤካ” ያግስ።
2KI 5:16 ኤልስ፥ “ታኒ እያዉ ኦꬅያ ጎዳይ ኤርያ መላ፥ ታኒ ኔፐ አይባካ ኤክከ” ያግስ። ኤልስ እሞታ ኤካናዳ ንእማን ዎስን እፅስ።
2KI 5:17 ንእማን፥ “ኔኒ ኤኮና እፅኮ፥ ታዉ ናምኡ ባቁሎ ጫና ቢታ እማና መላ ታኒ ነና ዎሳይስ። ታኒ ነ አይለይ ሀችፈ ዶማዳ ፁሳ ያርሾ ነ ፆሳ ያርሻናፐ አትሽን፥ ሀራ ፆሳታስ ያርሽከ።
2KI 5:18 ሽን ጎዳይ ታዉ ነ አይልያስ እስባ አቶ ጎ። ታ ካዎይ እርሞና ኤቃ ጎይናናዉ ገልያ ዎደ፥ ታንካ እያ አጃባዳ ገላዳ ጎይናናዉ ኮሼስ። ጎዳይ ታዉ ነ አይልያስ ሄሳ አቶ ጎ” ያግስ።
2KI 5:19 ኤልስ፥ “ሳሮ ጋካ!” ያግስ። ንእማን ደንድድ ብስ። እ ጉꬁ ሃክድ ብሽን፥
2KI 5:20 ፆሳ አስ ግድዳ ኤልሳ አይለይ ግያዝ፥ “ታ ጎዳይ፥ ኤልስ ሶረ ንእማን ኤህዳባፐ አይባካ ኤኮና ጮ የድስ። ጎዳይ ኤርያ መላ፥ ታኒ እያ ጌዶ ዎፃ ባዳ፥ እያፐ እስባ ኤካና” ያግድ ቆፕስ።
2KI 5:21 ሄሳ ግሾ፥ ግያዝ ንእማነ ካልስ። ባ ጌዶ ዎፅያ ንእማነ በእድ፥ እያራ ጋሄታናዉ ፓራ ጋርያፐ ዎꬍድ፥ “አይበ፥ ሳሮ ግደኔ?” ያግድ ኦይችስ።
2KI 5:22 ግያዝ፥ “አይኮይ ባዋ፤ ሳሮ! ሽን ታና ታ ጎዳይ፥ ‘ደረይ ዳርያ ኤፍሬማ ቢታፈ ናበታ ባጋ ግድዳ ናምኡ ፓንꬃት ታኮ ይዶሶና። ሀያና ኤንታዉ ሄꬑ ሙኩሉ ብራ ሳንትመነ ናምኡ ኩመꬃ ማኦ እማ’ ያግድ ኪትስ” ያግስ።
2KI 5:23 ንእማን፥ “ህዛ ሀያና ኡሱፑን ሙኩሉ ብራ ሳንትመ ኤካ” ያግስ። ንእማን ግያዛ ሾቢድ፥ ብራ ናምኡ ካርፂታን የግድ፥ ናምኡ ኩመꬃ ማኦነ ናምኡ አይለታ ቶስድ፥ ግያዛፐ ስን የድስ።
2KI 5:24 ግያዝ ደእያ ዙማ ኤንቲ ጋክዳ ዎደ፥ ብራነ ማኡዋ ኤንታፈ ኤክድ፥ ሶ ገልስስ። ያትድ ኤንታ ሞይዝን፥ ኤንቲ ብዶሶና።
2KI 5:25 ሄሳፈ ጉየ፥ ሶ ገልድ፥ ባ ጎዳ ኤልሳ ስንꬃን ኤቅስ። ኤልስ፥ “አዉ ባዲ?” ያግድ ኦይችስ። ግያዝ፥ “ታኒ ነ አይለይ አዉካ ባብከ” ያግድ ዛርስ።
2KI 5:26 ሽን ኤልስ፥ “አደይ ኔራ ጋሄታናዉ ፓራ ጋርያፐ ዎꬍያ ዎደ፥ ታ አያናይ ኔራ ደኤስ ግደኔ? ሀ ዎደይ፥ ሚሸነ ማኦ፥ ዎይኮ ሻማሆነ ዎይነ ጋደ፥ ዎይኮ ዶርሳ ዉደነ ሚዛ ዉደ፥ ዎይኮ አደነ ማጫ አይለ ኤክያ ዎዴ?
2KI 5:27 ሄሳ ግሾ፥ ንእማነ ኦይክዳ ጎጋ ሀርገይ ነናነ ነ ኮቻ ኡባ መርናዉ ኦይካና” ያግስ። ግያዝ ኤልሳ ስንꬃፈ ከይድ ብሽን፥ ሄ ሀርገይ እያ ኦይክን፥ እያ ጎጋይ ሻቻዳ ቦፅስ።
2KI 6:1 ናበታ ጩጋይ፥ ኤልሳኮ፥ “ሄኮ፥ ኑኒ ደእያ በሳይ ኑስ ዳሮ ፁምስ።
2KI 6:2 ኑኒ ኡባይ ምꬅ ቃንፃናዉ ዮርዳኖሰ ሻፋ ቦስ። ያን ኑስ ዱሳ በሲ ኬፆስ” ያግዶሶና። ኤልስ፥ “ቢተ” ያግስ።
2KI 6:3 ናበታፐ እሶይ፥ “ሀያና ኔንካ ኑራ ነ አይለታራ የꬋርኪ?” ያግስ። ኤልስ፥ “ኤሮ ባና” ያግድ ዛርስ፤
2KI 6:4 ኤንታራ እስፈ ብስ። ኤንቲ ዮርዳኖሰ ጋክዳ ዎደ ምꬅ ቃንፆ ዶምዶሶና።
2KI 6:5 ሽን ኤንታፈ እሶይ ምꬅ ቃንፅሽን፥ ቤፅያ አይፈይ ከስ ኤክድ፥ ሃꬃን ዎꬍስ። ሄ አደይ፥ “ታ ጎዳዉ፥ ታኒ ጋርፃ ኤክዳ ቤፀ፤ ታኒ ህዛ ዋኖ!” ያግድ ዋስስ።
2KI 6:6 ኤልስ፥ “አዉን ገልዴ?” ያግድ ኦይችስ፤ አደይ ገልዳ በሳ በስስ። ኤልስ ፃምአ ቃንፅድ፥ ሃꬃን ሆልስ፤ ቤፅያ አይፈይ ሃꬃ ቦላ ቶከትስ።
2KI 6:7 ኤልስ አድያ፥ “ከሳዳ ኤካ” ያግስ። አደይ ባ ኩሽያ የድድ ኤክስ።
2KI 6:8 አራመ ካዎይ እስራኤለታራ ኦለትሸ ደኤስ። እ ባ ቶራ ሞጮናታራ፥ “ታኒ ዱማ ዱማ በሳን ሚፃ መꬋና” ያግስ።
2KI 6:9 ኤልስ፥ “አራመ አሳይ ሄ በሳን ቆሰትዳ ግሾ፥ ሄ በሳራ ያ ቦፓ” ያግድ እስራኤለ ካዋስ ኪታ የድስ።
2KI 6:10 ሄሳ ግሾ፥ እስራኤለ ካዎይ ፆሳ አስ ማልዳ በሳ አሰ ኪትድ፥ ያን ደእያ አሳይ ናገታና መላ ኦድስ። ካዎይ ናገታና መላ ኤልስ ዎደን ዎደን ኦዴስ።
2KI 6:11 ሀ ሀኖታይ አራመ ካዋ ዳሮ ሀንቀꬅን፥ ባ ቶራ ሞጮናታ ፄግድ፥ “ኑ ግዶን እስራኤለ ካዋ ባጋ ግድድ ደኤይ ኦነኮ አነ ታዉ ኦድተ” ያግድ ኦይችስ።
2KI 6:12 እያ ቶራ ሞጮናታፐ እሶይ፥ “ታ ጎዳዉ፥ ካዋዉ፥ ኑ ግዶን ሄሳ ኦꬅያ ኦንካ ባዋ። ሽን ኔኒ ነ ቆልአን ኦደትያባ ኡባ እስራኤለን ደእያ ናበይ ኤልስ እስራኤለ ካዋስ ኦዴስ” ያግስ።
2KI 6:13 ካዎይ፥ “ታኒ አሰ ኪታዳ እያ ድአና መላ ብድ አዉን ደእያኮ ኮይተ” ያግስ። ኤንቲ፥ “ሄኮ፥ እ፥ ዶታነን ደኤስ” ያግድ ኦድዶሶና።
2KI 6:14 ካዎይ ዳሮ ኦላንቾታ ፓራታራነ ፓራ ጋረታራ ያ የድስ። እ የድዳ አሳት ቃማ ይድ፥ ካታማ ተቅዶሶና።
2KI 6:15 ኤልሳ አይለይ ዎንተꬃ ጋላስ ጉራ ደንድድ፥ ካረ ከይያ ዎደ፥ ኦላንቾት ፓራታራነ ፓራ ጋረታራ ካታማ ተቅዶሶና። ሄ አይለይ፥ “ሄኮ፥ ኑኒ ꬋይዳ! ታ ጎዳዉ፥ ኑ ዋንኖ?” ያግድ ኦይችስ።
2KI 6:16 ኤልስ፥ “ያዮፋ! ኑራ ደኤይሳት ኤንታራ ደኤይሳታፐ አꬎሶና” ያግድ ዛርስ።
2KI 6:17 ሄሳፈ ጉየ፥ ኤልስ፥ “አቤት ጎዳዉ፥ እ በአና መላ እያ አይፍያ ዶያ” ያግድ ዎስስ። ጎዳይ ኤልሳ አይልያ አይፍያ ዶይን፥ ሄኮ፥ ኤልሳ ዩሾ ኡባን ደእያ ታማ ፓራትነ ፓራ ጋረት ዙማ ማእስ።
2KI 6:18 ሶረት እያ ተቅዳ ዎደ ኤልስ፥ “ሀ አሳታ አይፍያ ቆቅሳርክ” ያግድ ጎዳ ዎስስ። ኤልስ ዎስዳይሳዳ ጎዳይ ኤንታ አይፍያ ቆቅስስ።
2KI 6:19 ሄሳፈ ጉየ፥ ኤልስ፥ “ኦገይ ሀይሳራ ዴና፤ ካታማይ ሀይሳ ግደና። ህንተ ኮይያ ኡራ ታ ህንተና በሳና፤ ታና ካልተ” ያግድ፥ ኤንታ ካለꬅድ፥ ሳማረ ካታማ ኤፍስ።
2KI 6:20 ኤንቲ ሳማረ ካታማ ገልዳ ዎደ ኤልስ፥ “አቤት ጎዳዉ፥ ሀ አሳት ፄላና መላ ኤንታ አይፍያ ዶያ” ያግስ። ጎዳይ ኤንታ አይፍያ ዶይን፥ ሄኮ፥ ኤንቲ ሳማረ ግዶን ደኤይሳ በእዶሶና።
2KI 6:21 እስራኤለ ካዎይ ኤንታ በእዳ ዎደ፥ “ታ አዋዉ፥ ታኒ ኤንታ ዎꬎ? ታኒ ኤንታ ዎꬎ?” ያግድ ኦይችስ።
2KI 6:22 ኤልስ፥ “አካይ፥ ዎꬎፓ! ሀር አቶሽን፥ ኔኒ ነ ማሻንነ ነ ዶንግያን ድእዳይሳታካ ዎꬋናዉ በሰና። ኤንቲ ምድ ኡይድ ባንታ ጎዳኮ ባና መላ ካꬅ ኤንታ ሙዛ” ያግስ።
2KI 6:23 ሄሳ ግሾ፥ እስራኤለ ካዎይ ኤንታዉ ግብራ ጊግስን፥ ኤንቲ ምዳፐነ ኡይዳፐ ጉየ፥ ኤንታ የድን፥ ባንታ ጎዳኮ ስምዶሶና። ሄ ዎደፐ ዶምን፥ አራመት እስራኤለታ ቦላ ደንደይሳ አጋግዶሶና።
2KI 6:24 ሄሳፈ ጉየ፥ አራመ ካዎይ ዎልደ-አዳር ባ ኦላንቾታ ኡባ ሺሽድ፥ ሳማረ ካታማ ተቅስ።
2KI 6:25 ሄሳ ጋሶን ሳማረ ካታማን ግታ ኮሽ ገልን፥ እስ ሀረ ሁጰይ ሆስፑን ታሙ ብራ ሳንትመን፥ ናምኡ ፄቱ ግራመ ግድያ ሆለ ሽእ እቻሹ ብራ ሳንትመን ባይዘትስ።
2KI 6:26 እስራኤለ ካዎይ ካታማ ድርሳ ግምብያ ቦላራ አꬍሽን፥ እስ ማጫስያ፥ “ታ ጎዳዉ፥ ካዋዉ፥ ታና ማዳርክ” ያጋዳ ዋሳሱ።
2KI 6:27 ካዎይ፥ “ነና ጎዳይ ማዶና እፅኮ፥ ታኒ ነዉ ማዶ አዉፐ ኤሀኔ? ካꬃ ቡክያ ዉዱማፈየ፥ ዎይነ አይፍያ ጉምእያ በሳፌ?” ያግስ።
2KI 6:28 ካዎይ፥ “ነ መቶይ አይቤ?” ያግድ ኦይችስ። ማጫስያ ዛራዳ፥ “ሀ ማጫስያ፥ ‘ሀች ማናዉ ነ ናአ ኤካዳ ያ፤ ቃስ ዎንቶ ታ ናኣ ማና’ ያጋሱ።
2KI 6:29 ያትን፥ ታ ናኣ ካꬅድ ምዳ፤ ዎንተꬃ ጋላስ ታኒ፥ ‘ኑኒ ማናዉ ነ ናኣ ኤካዳ ያ’ ያጋስ። ሽን እያ ባ ናኣ ቆሳሱ” ያጋሱ።
2KI 6:30 ካዎይ ማጫስያ ኦድዳይሳ ስእድ፥ ባ ማኡዋ ዳክስ። እ ግምብያ ቦላራ አꬍሽን፥ አሳይ ጋርሳ ባጋራ እ ማእዳ ካዮ ማኡዋ በእዶሶና።
2KI 6:31 ካዎይ፥ “ሳፋፃ ናኣ ኤልሳ ጉገይ እያ ቦላ ሀች ፔእኮ፥ ፆሲ ታና ፕርዶ!” ያግስ።
2KI 6:32 ሄ ዎደ ኤልስ ባ ሶን ኡትስ፤ ጭማትካ እያራ እስፈ ደኦሶና። ካዎይ ባፐ ስን አሰ ኪትስ፤ ሽን ሄ አደይ ጋካናፐ ስን፥ ኤልስ ጭማታኮ፥ “ሀ ሸምፖ ዎይስ ታ ቆꬍያ ሙጭሳናዉ አሰ ኪትዳይሳ ህንተ በኤቲ? ሄ ኪተትዳይስ ይዳ ዎደ እብ ጎርድድ ገልሶፍተ፤ እያ ጎዳይካ እያ ካልድ ይሸ ደኤስ” ያግስ።
2KI 6:33 እ ጭማታራ ኦደትሽን፥ ሄኮ፥ ኪተትዳይስ ጋክ ዎꬍስ፤ እ፥ “ሀ መቶይ ጎዳፐ ይስ። ያትን፥ ታኒ ጎዳ አይስ ናግያና?” ያግስ።
2KI 7:1 ኤልስ፥ “ጎዳ ቃላ ስአ! ጎዳይ ሀይሳዳ ያጌስ። ዎንቶ ሀኖደ ሄꬑ ክሎ ግራመ ግስተ ꬊለይ ዎይኮ ኡሱፑን ክሎ ግራመ ባንግ ሳማረ ካታማ ፐንገን እስ ብራ ሳንትመን ባይዘታና” ያግስ።
2KI 7:2 ካዋስ ማታትያ ሀላቃይ ፆሳ አድያኮ፥ “ጎዳይ ሳሎ ማስኮተታ ዶያኮካ ሄስ ሀነና” ያግስ። ሽን ኤልስ ዛሪድ፥ “ኔኒ ሄሳ ነ አይፍያን በአና፤ ሽን እያፐ ማካ” ያግስ።
2KI 7:3 ካታማ ገልያ ፐንግያን ግታ ጎጋ ሀርገይ ኦይክዳ ኦይዱ አሳት ደኦሶና። ኤንቲ እሶይ እሱዋኮ፥ “ኑኒ ሀይቃና ጋካናዉ፥ ሀይሳን አይስ ጋምአኔ?
2KI 7:4 ኑኒ ካታማ ገልኮ፥ ኮሽ ደእያ ግሾ፥ ኑኒ ያን ሀይቃና። ቃስ ሀይሳን ጋምእኮካ ሀይቃና። ሄሳ ግሾ፥ አራመታ ሚፃ አነ ቦስ። ኤንቲ ኑና አሽኮ አታና፤ ኤንቲ ዎꬍኮ ሀይቃና” ያግዶሶና።
2KI 7:5 ሳእ ꬉምያ ዎደ ደንድድ፥ አራመታ ሚፃ ብዶሶና። ኤንቲ ብድ ሚፃ ጋክያ ዎደ፥ ሄኮ፥ እስ አስካ ያን ባዋ።
2KI 7:6 ሄስ ሀንዳይ፥ ጎዳይ ፓራ ጋረታ፥ ፓራታነ ዳሮ ኦላንቾታ ቃላ አራመ አሳ ስስስ። ያትን ኤንቲ እሶይ እሱዋኮ፥ “ሄኮ፥ እስራኤለ ካዎይ ኑና ኦልሳናዉ፥ ህተነ ግብፀ ካዎታ ኡነይድ ኤህስ” ያግዶሶና።
2KI 7:7 ሄሳ ግሾ፥ ኤንቲ ደንድድ፥ ባንታ ሚፃ፥ ባንታ ዱንካንያ፥ ባንታ ፓራታነ ባንታ ሀረታ ኩመꬅ የግ አግድ፥ ሳእ ꬉማ ደእሽን፥ ባንታ ሸምፑዋ አሻናዉ ባቃትዶሶና።
2KI 7:8 ሄ ግታ ጎጋ ሀርገይ ኦይክዳ አሳት አራመታ ሚፃ ጋክድ፥ ኤንታ ዱንካነታፐ እሱዋ ገልድ፥ ምዶሶናነ ኡይዶሶና፤ ብራ፥ ዎርቃነ ማኦ ኤክድ ቆትዶሶና። ናምአንꬆ ስሚድ፥ ሀራ ዱንካንያ፥ ገልድ እያፐ ኤክዳይሳ ቆትዶሶና።
2KI 7:9 ሄሳፈ ጉየ፥ ኤንቲ እሶይ እሱዋ፥ “ኑኒ ሎኦባ ኦꬅቦኮ። ሀች ምሽራቾ ጋላስ፤ ሽን ኑኒ ስእ ግዳ። ሳእ ዎንታና ጋካናዉ፥ ስእ ግድ ኡትኮ፥ ኑኒ ሴረታና። አነ፥ ሀእ ብድ፥ ካዎ ጋꬎን ደእያ አሳስ ኦዳና” ያግዶሶና።
2KI 7:10 ሄሳ ግሾ፥ ኤንቲ ብድ፥ ካታማ ፐንግያ ናገይሳታ ፄግድ፥ “ኑኒ አራመ ሚፃ ብዳ፤ ሽን፥ ሄኮ፥ እስ አስ ዎይኮ አሳ ግርስ ሄ በሳን ባዋ። ቃሸትዳ ፓራታ ፃላልነ ሀረት ደኦሶና፤ ቃስ ኤንቲ አግድ ብዳ ዱንካነት ደኦሶና” ያግዶሶና።
2KI 7:11 ፐንግያ ናገይሳት ፄግድ፥ ካዎ ጋꬎን ደእያ አሳስ ኦድዶሶና።
2KI 7:12 ካዎይ ቃማ ደንድድ፥ “አራመት ኑና ኦꬅዳባ ታኒ ህንተዉ ኦዳና። ኑኒ ኮሻትዳይሳ ኤንቲ ኤሮሶና። ሄሳ ግሾ፥ ባንታ ሄራፐ ከይድ፥ ጋፃርያን ቆሰትድ፥ ኤንቲ ካታማፐ ካረ ከይን፥ ኑኒ ኤንታ ፓፃ ኦይክድ፥ ካታማ ገላና ያግድ ቆፕዶሶና” ያግድ ባ ሹማታስ ኦድስ።
2KI 7:13 ካዋ ሀላቃታፐ እሶይ፥ “ሀ ካታማን አትዳ አሳይ ካሰ ሀይቅዳ አሳ መላ ሀይቆፐ አተና። ሄሳ ግሾ፥ ሀንዳባ ኤራናዉ አነ አሳ ዶሮስ። አትዳ እቻሹ ፓራታራ አነ ኤንታ ሶረታ ሚፃ የዶስ” ያግስ።
2KI 7:14 ጉꬃ አሳታነ ናምኡ ፓራ ጋረታ ዶርዶሶና። ካዎይ ኤንታ ሶረ ኦላንቾታ ጌዶ የድድ፥ “ብድ ሀንያባ በእተ” ያግድ ኪትስ።
2KI 7:15 አሳት ኤንታ ጌዶ ካልድ፥ ዮርዳኖሰ ሻፋ ጋካናዉ ብዶሶና። አራመ አሳት ባቃትሸ የግዳ ማኦይነ ኦላ ሚሸይ ኦግያን ኩምስ። ኪተትዳ አሳት ጉየ ስሚድ፥ ካዋስ ኦድዶሶና።
2KI 7:16 አሳይ ብድ፥ አራመታ ሚፃ ቦንቅዶሶና። ጎዳይ ግዳይሳዳ ሄꬑ ክሎ ግራመ ግስተ ꬊለይ ዎይኮ ኡሱፑን ክሎ ግራመ ባንግ እስ ብራ ሳንትመን ባይዘትስ።
2KI 7:17 ካዎይ ባዉ ማትያ ሀላቃ ፐንገ ናገይሳታ ሀላቃ ኦꬅድ ሹምስ፤ ሽን አሳይ እያ ፐንገን የꬍስ። ካዎይ ኤልሳኮ ብዳ ዎደ፥ ኤልስ ሀ ሀላቃ ቦላ ኦድዳይሳዳ አደይ ሀይቅስ።
2KI 7:18 ፆሳ አስ ግድዳ ኤልስ ካሰ ካዋስ፥ “ዎንቶ ሀኖደ ሄꬑ ክሎ ግራመ ግስተ ꬊለይ ዎይኮ ኡሱፑን ክሎ ግራመ ባንግ ሳማረ ካታማን እስ ብራ ሳንትመን ባይዘታና” ያግስ።
2KI 7:19 ሄ ዎደ ሀላቃይ ኤልሳኮ፥ “ጎዳይ ሳሎ ማስኮተታ ዶያኮካ ሄስ ሀነና” ያግስ። ኤልስ፥ “ሄኮ፥ ኔኒ ሄሳ ነ አይፈን በአና፤ ሽን እያፐ ማካ” ያግድ ዛርስ።
2KI 7:20 ኤልስ ኦድዳይሳዳ፥ ሄ አደይ፥ አሳይ ፐንገን የꬍን ሀይቅስ።
2KI 8:1 ኤልስ፥ ሀይቅዳ እ ናኣ ፓꬅዳ ማጫስዉ፥ “ነ ሶ አሳ ኤካዳ ሀይሳፈ ባዳ ኔኒ ዳንዳእያ በሳን አዉንካ ደአ። ጎዳይ ላፑን ላይꬃ ኮሻ ሀ ቢታ ቦላ የድስ” ያግስ።
2KI 8:2 ማጫስያ ኤልስ ኦድዳይሳዳ ባ ሶ አሳራ ባዳ፥ ፍልስፄመ ቢታን ላፑን ላይꬅ ደአሱ።
2KI 8:3 ላፑንꬃ ላይꬃ ዉርሰꬃን ማጫስያ ፍልስፄመ ቢታፈ ስማሱ። ባ ኬꬃነ ባ ጋድያ ኦይቻናዉ ካዋኮ ባሱ።
2KI 8:4 ሄ ዎደ ካዎይ ፆሳ አስ ግድዳ ኤልሳ አይልያ ግያዛራ ኦደትሸ፥ “ኤልስ ኦꬅዳ ግታ ኦሶ ኡባ አነ ታዉ ኦዳ” ያግስ።
2KI 8:5 ኤልስ ሀይቅዳ ናኣ ዋትድ ፓꬅዳኮ፥ ግያዝ ካዋስ ኦድሽን፥ ሄኮ፥ ኤልስ እ ናኣ ፓꬅዳ ማጫስያ ባ ኬꬃነ ባ ጋድያ ኦይቻናዉ ያሱ። ግያዝ፥ “ታ ጎዳዉ፥ ካዋዉ፥ ማጫስያ ሀናሹ፤ ኤልስ ሀይቆፐ ፓꬅዳ እ ናአይካ ሀይስሽ” ያግስ።
2KI 8:6 ካዎይ ማጫስዉ ኦይችን፥ እያዉ ኦዳሱ። ሄሳ ግሾ፥ ካዎይ ሀላቃ ፄግድ፥ “ሀ ማጫሴባ ግድዳ ኡባነ እያ አጋ ብዳ ዎድያፐ ሀች ጋካናዉ እ ጋደን ሞክዳ ኡባ እዉ ዛራ” ያግድ ኪትስ።
2KI 8:7 ኤልስ ዳማስቆ ካታማ ብድ ጋክያ ዎደ፥ ሶረ ካዎይ ዎልደ-አዳር ሳከቴስ። እ፥ “ፆሳ አስ ሀይሳ ይስ” ግያ ዎረ ስእስ።
2KI 8:8 ካዎይ አዛሄላኮ፥ “እምያባ ኤካዳ ፆሳ አድያራ ጋሄታናዉ ባዳ፥ ‘ታኒ ሀ ሀርግያፈ ፓፃኔ?’ ያጋዳ ጎዳ ኦይቻ” ያግስ።
2KI 8:9 ሄሳ ግሾ፥ አዛሄል ዳማስቆን ደእያ ዱማ ዱማ ቆሞ ሙሩታፐ ኦይታሙ ግማለን ጫንድ፥ ኤልሳራ ጋሄታናዉ ብስ። ኤልሳ ስንꬃን ኤቅድ፥ “ነ ናአይ አራመ ካዎይ ዎልደ-አዳር፥ ‘ታኒ ሀ ሀርግያፈ ፓፃኔ?’ ያግድ፥ ነና ኦይቻናዳ ታና ኔኮ ኪትስ” ያግስ።
2KI 8:10 ኤልስ አዛሄላኮ፥ “ኔኒ ባዳ እያኮ፥ ‘ቱማ ኔኒ ፓፃና’ ያጋ። ሽን እ ቱማ ሀይቃናይሳ ታና ጎዳይ በስስ” ያግስ።
2KI 8:11 አዛሄል ዬላታና ጋካናዉ፥ ኤልስ እያ ትሽ ኦꬅድ ፄልድ ዬክስ።
2KI 8:12 ያትን፥ አዛሄል፥ “ታ ጎዳይ አይስ ዬኪ?” ያግድ ኦይችስ። ኤልስ፥ “ኔኒ እስራኤለ አሳ ቦላ ኦꬃና ኢታባ ታኒ ኤርያ ግሾ ዬካይስ። ኤንታ ሚፃ ኔኒ ታማን ፁጋና፤ ኤንታ ፓንꬃታ ኔኒ ማሻን ዎꬋና። ቃስ ኤንታ ዮጋ ናይታካ ኔኒ ሹቻን መንረꬃና፤ ኤንታ ቃንꬃ ማጫሳታ ኡሉዋ ኔኒ ዳካና” ያግድ ዛርስ።
2KI 8:13 አዛሄል ዛሪድ፥ “ታኒ ነ አይለይ፥ ፓና ካናይ፥ ሀይሳ መላ ግታባ ዋታዳ ኦꬃናዉ ዳንዳእያና?” ያግስ። ኤልስ ዛሪድ፥ “ኔኒ አራመ ቢታን ካዎታናይሳ ታና ጎዳይ በስስ” ያግስ።
2KI 8:14 ሄሳፈ ጉየ፥ አዛሄል ኤልሳፈ ሻከትድ፥ ባ ጎዳኮ ስምስ። ዎልደ-አዳር፥ “ኤልስ ነና ዎይግዴ?” ያግድ ኦይችስ። አዛሄል፥ “ኔኒ ቱማ ፓፃና” ያግስ።
2KI 8:15 ሽን ዎንተꬃ ጋላስ አዛሄል ቡሉኮ ኤክድ፥ ሃꬃን ሙክድ፥ ካዋ እያራ ቱጭን፥ ካዎይ ሀይቅስ። አዛሄል እያ በሳን ባዉ ካዎትስ።
2KI 8:16 አካባ ናአይ፥ እስራኤለ ካዎይ እዮራም ካዎትዳ እቻሻንꬆ ላይꬃን፥ ይሁዳ ካዋ እዮሳፈፃ ናአይ እዮራም ይሁዳን ካዎትስ።
2KI 8:17 እዮራም ካዎትያ ዎደ እያዉ ላይꬃይ ሀስታማነ ናምአ፤ እ የሩሳላመን ሆስፑን ላይꬅ ካዎትስ።
2KI 8:18 እዮራም አካባ ናእዉ ማቾ ኤክዳ ግሾ፥ አካባ ሶ አሳይ ሄመትዳይሳዳ ካሰ እስራኤለ ካዎታ ኦግያን ሄመትስ፤ ጎዳ ስንꬃን ኢታባ ኦꬅስ።
2KI 8:19 ግዶሽን፥ ባ አይልያ ዳዊታ ግሾ፥ ጎዳይ ይሁዳ ꬋይሳናዉ ኮይቤና፤ ዳዊታ ኮቻይ መርናዉ ካዎታናዉ ደኤይሳ ጎዳይ ኡፋይሳ ቃላ እሚስ።
2KI 8:20 እዮራም ካዎትዳ ዎደ፥ ኤዶመ አሳይ ይሁዳ ካዋ ቦላ ማካልድ፥ ባንታዉ ካዎ ካዎይዶሶና።
2KI 8:21 ሄሳ ግሾ፥ እዮራም ባ ፓራ ጋረታ ኡባራ ፃእራ ጌተትያ በሳ ብስ። ኤዶመ አሳት እያነ እያ ፓራ ጋረታ ሀላቃታ ተቅዶሶና፤ ሽን እዮራም ቃማ ደንድድ፥ ከስ ኤክድ ብስ። እያ ኦላንቾት ባቃትድ፥ ጉየ ሶ ስምዶሶና።
2KI 8:22 ሄ ዎደፐ ዶምድ ሀች ጋካናዉ፥ ኤዶመ አሳይ ይሁዳ አሳስ ሃረትቦኮና። ልብና አሳይ ቃስ ሄ ዎደ ማካልስ።
2KI 8:23 እዮራም ሀንዳ ሀራባይነ እ ኦꬅዳባ ኡባይ ይሁዳ ካዎታ ታርከ ማፃፋን ፃፈትስ።
2KI 8:24 እዮራም ሀይቅድ፥ ባ ማይዛታን ጋሄትስ። ባ ማይዛ ዳዊታ ካታማን ሞገትስ፤ እያ በሳን እያ ናአይ አካዝያስ ካዎትስ።
2KI 8:25 አካባ ናአይ፥ እስራኤለ ካዎይ እዮራም ካዎትዳ ታማነ ናምአንꬆ ላይꬃን፥ ይሁዳ ካዋ፥ እዮራማ ናአይ አካዝያስ ይሁዳን ካዎትስ።
2KI 8:26 አካዝያስ ካዎትዳ ዎደ፥ እያዉ ላይꬅ ላታማነ ናምአ፤ እ የሩሳላመን እስ ላይꬅ ካዎትስ። እያ አየ ሱንꬃይ ጎቶሎ፤ እያ እስራኤለ ካዋ ኦምራ ናኣ ናእዉ።
2KI 8:27 እ ኤንታዉ ቦሎ ግድዳ ግሾ፥ አካባ ሶ አሳ ኦግያን ሄመትስ፤ አካባ ሶ አሳይ ኦꬅዳይሳዳ፥ እ ጎዳ ስንꬃን ኢታባ ኦꬅስ።
2KI 8:28 አካዝያስ አራመ ካዋ አዛሄላራ ጋላዳን ደእያ ራሞታ ካታማን ኦለታናዉ ብድ፥ አካባ ናኣ እዮራማራ እስፈ ብን፥ አራመ አሳት እዮራማ ጫድዶሶና።
2KI 8:29 እዮራም አራመ ካዋ አዛሄላራ ኦለትያ ዎደ፥ አራመ አሳት ጫድዳ ጫቻፈ ፓፃናዉ እዝራኤለ ስምስ። እዮራማ ናአይ፥ ይሁዳ ካዎይ አካዝያስ፥ ጫደትዳ አካባ ናኣ እዮራማ ኦይቻናዉ ዱገ እዝራኤለ ብስ።
2KI 9:1 ናበይ ኤልስ ናበታ ጩጋፐ እስ አስ ፄግድ፥ “ነ ማኡዋ ማአዳ፥ ፃሮ ዛይትያ ነ ኩሸን ኦይካዳ፥ ጋላዳን ደእያ ራሞታ ባ።
2KI 9:2 ያ ጋካዳ፥ እዮሳፈፃ ናኣ፥ ናምሳ ናኣ ናኣ እዩ ኮያ። እያ ደማዳ፥ እያ ላገታፐ እያ ሻካዳ ቆልአ ገልሳ።
2KI 9:3 ሄሳፈ ጉየ፥ ፃሮ ዛይትያ ኤካዳ፥ እያ ሁጵያን ትጋዳ፥ ‘ነና እስራኤለ ቦላ ካዎ ኦꬃ ትያና መላ ጎዳይ ታና ኪትስ’ ያጋ። ያታዳ ፐንግያ ዶያዳ፥ ኤለሳዳ ባቃታ” ያግስ።
2KI 9:4 ሄሳ ግሾ፥ ፓንꬃ ናበይ ጋላዳን ደእያ ራሞታ ብስ።
2KI 9:5 እ ያ ጋክዳ ዎደ ቶራ ሞጮናይ እስፈ ዞረትሽን ደምድ፥ “ጎዳዉ፥ ታኒ ነዉ ኦድያባይ ደኤስ” ያግስ። እዩይ፥ “ኑ ግዶፈ ኦደስ ኦዳኔ?” ያግድ ኦይችስ። ናበይ፥ “ጎዳዉ፥ ነዉ ኦዳና” ያግድ ዛርስ።
2KI 9:6 እዩይ ደንድድ ሶ ገልን፥ ናበይ እያ ሁጰን ዛይተ ትግድ፥ “ጎዳይ እስራኤለ ፆሳይ፥ ነና ሀይሳዳ ያጌስ፥ ‘ኔኒ ጎዳ ደርያ፥ እስራኤለ ቦላ ካዎታና መላ ታኒ ነና ትያስ።
2KI 9:7 ኔኒ ነ ጎዳ አካባ ኮቻ ꬋይሳና። ታኒ ኤልዛቤላ ጉስዳ ናበታ፥ ታ አይለታ ሱꬃነ ታ ሀራ አይለታ ሱꬃ ሃሉዋ ከሳና።
2KI 9:8 አካባ ኮቻ ኡባይ ꬋያና፤ ታኒ እስራኤለን አካባ ኮቻፈ አይለ ግድን፥ ዎማኖ ግድን፥ አደ ኡባ ꬋይሳና።
2KI 9:9 አካባ ኮቻ ናባፃ ናኣ እዮርባማ ኮቻዳነ አክያ ናኣ ባኦሳ ኮቻዳ ኦꬃና።
2KI 9:10 ኤልዛቤሎ፥ እዝራኤላ ጎሻን ካናት ማና፤ ኦንካ እዮ ሞገና’ ” ያግስ። ሄሳ ኦድዳፐ ጉየ፥ ፐንግያ ዶይድ ባቃትስ።
2KI 9:11 እዩይ ባ ላገ ግድዳ ቶራ ሞጮናታኮ ብዳ ዎደ፥ ኤንቲ፥ “ሳእ ሳሮ? ሀ ጎሻይ ኔኮ አይስ ይዴ?” ያግድ ኦይችስ። እዩይ፥ “ሀ አድያባነ እያ ኦዳ ህንተ ኤሬታ” ያግስ።
2KI 9:12 ኤንቲ፥ “ሀይስ ዎርዶ። አነ ኔኒ ኑስ ኦዳ” ያግዶሶና። እዩይ፥ “ኔኒ እስራኤለ ቦላ ካዎ ግዳና መላ ታኒ ነና ትያናዳ ጎዳይ ታና ኪትስ” ያግስ።
2KI 9:13 ሄ ዎደ ኤንቲ ባንታ ማኡዋ ቃርድ፥ እዩይ የꬍድ ከይያ ደꬃን ሂፅድ፥ ሞይዘ ፑንዶሶና። ባንታ ቃላ ꬎቁ ኦꬅድ፥ “እዩይ ካዎትስ” ያግዶሶና።
2KI 9:14 እዮሳፈፃ ናአይ፥ ናምሳ ናኣ ናአይ እዩይ፥ እዮራማ ቦላ ማቀትስ። ሄስ ሀንያ ዎደ፥ እስራኤለ አሳ ኡባይ አራመ ካዋ አዛሄላ ጋላዳን ደእያ ራሞታን ናጋናዉ ብዶሶና።
2KI 9:15 ሽን ኤንታፈ ካዎይ እዮራም ሶረ ካዋ አዛሄላራ ኦለትዳ ዎደ፥ አራመ ቢታ አሳይ እያ ጫድዳ ጫቻስ እዝራኤለ ይስ። እዩይ ሀላቃታ፥ “ህንተ ቆፋይ ሄሳ ግድኮ፥ ሀ ካታማፐ እስ አስካ ከይድ፥ እዝራኤለ ካታማን ሀ ኦዳ ኦዶናዳ ተቅተ” ያግስ።
2KI 9:16 ሄሳፈ ጉየ፥ እዩይ ፓራ ጋርያን ከይድ፥ እዝራኤለ ብስ። እዮራም ፓፅቦናይስ ያን ሸምፔስ። ቃስ ይሁዳ ካዎይ አካዝያስ እያ ኦይቻናዉ ያ ዱገ ብስ።
2KI 9:17 እዝራኤላ ግምብያ ቦላ ኤቅድ ዎቸይሳ ፄግድ፥ “እስ ጩጋ የይሳ ታዉ በንቴስ” ያግስ። እዮራም፥ “ኤንታራ ጋሄታናዳ እስ ፓራ የዳ። ፓራዋይ ብድ፥ ‘ሳእ ሳሮ?’ ያጎ” ያግስ።
2KI 9:18 ፓራዋይ እዩራ ጋሄታናዉ ብድ፥ “ካዎይ ነና፥ ‘ሳአይ ሳሮ?’ ያጌስ” ያግስ። እዩይ፥ “ሳሮባን ነና ጋꬅያባይ ባዋ። ታ ጉየ አꬋዳ ታና ካላ” ያግድ ዛርስ። ዎቸይስ ካዋ፥ “ኪተትዳይስ ኤንታኮ፥ ጋክስ፤ ሽን ጉየ ስምቤና” ያግድ ኦድስ።
2KI 9:19 ሄሳ ግሾ፥ ካዎይ ናምአንꬆ ፓራዋ ኤንታኮ ኪትስ። እ ኤንታኮ ይድ፥ “ካዎይ ህንተና፥ ‘ሳእ ሳሮ?’ ያጌስ” ያግስ። እዩይ፥ “ነዉ ሳሮራ አይ ጋሄተꬅ ደኢ? ታ ጉየ አꬋዳ ታና ካላ” ያግስ።
2KI 9:20 ዎቸይስ፥ “ናምአንꬆ ፓራዋይ ኤንታኮ ጋክስ፤ ሽን ጉየ ስሚድ ይቤና። ቃስ ጋርያ ላጎይ ናምሳ ናኣ ናኣ እዩ ላጉዋ መላ፤ እ ጎያ አሳዳ ላጌስ” ያግድ ኦድስ።
2KI 9:21 ካዎይ እዮራም፥ “ታዉ ፓራ ጋረ ጊግስተ” ያግድ ኪትስ። ኤንቲ ፓራ ጋረ ጊግስዶሶና፤ እስራኤለ ካዎይ እዮራም ይሁዳ ካዎይ አካዝያስ ባንታ ጋርያን ጋርያን ኡትድ፥ እዩራ ጋሄታናዉ ብድ፥ እዝራኤለ ናቡተ ጋደን እያ ደምዶሶና።
2KI 9:22 እዮራም እዩ በእዳ ዎደ፥ “እዩ፥ ሳእ ሳሮ?” ያግድ ኦይችስ። እዩይ፥ “ነ አየ ኤልዛቤል ላይማተꬃይነ ብታይ ደእሽን፥ ሳሮይ አዉን ደኢ?” ያግድ ዛርስ።
2KI 9:23 እዮራም ባ ፓራ ጋርያ ጉየ ዛሪድ ባቃትድ፥ አካዝያሳ ፄግድ፥ “አካዝያሳ፥ ሀይስ ማካላ” ያግስ።
2KI 9:24 እዩይ፥ ባ ዶንግያ ባ ኩመꬃ ዎልቃን ዳፍድ፥ እዮራማ ናምኡ ካትሶታፐ ግዶን ዱክስ። ዶንገ ቶራይ እያ ዎዛናራ ካንꬅድ ከይን፥ ባ ጋርያ ግዶን ኩንድስ።
2KI 9:25 እዩይ ቶራ ሞጮና ብድቃራኮ፥ “እዮራማ ደንꬃዳ፥ ናቡተ ጋደን ኦላ። ኔራ ታራ እስፈ እዮራማ አዋ አካባ ካልድ ቶግድ ብሽን፥ ጎዳይ እያ ቦላ ትንብተ ኦድዳይስ አኬካ።
2KI 9:26 ሄ ዎደ ጎዳይ፥ ‘ናቡተ ሱꬃነ እያ አደ ናይታ ሱꬃ ታኒ ዝነ በአስ፤ ሄሳ አጩዋ ታኒ ነና ቱማ ሀ ጋደን ቃንፅሳና’ ያግስ። ሀእ ስሚድ ጎዳይ ግዳይሳዳ፥ እዮራማ ደንꬃዳ፥ ሀ ጋደን ሆላ” ያግስ።
2KI 9:27 ይሁዳ ካዎይ አካዝያስ ሄሳ በእዳ ዎደ፥ ቤት-ሀጋና ባቃትስ። እዩይ እያ ካልድ የደꬅድ፥ “እያካ ዎꬍተ” ያግስ። ኤንቲ እያ ካልድ፥ ይብላማ ማታን ደእያ ጉራ ፑደꬃን እያ ጋርያ ቦላ ጫድዶሶና። እ ማግዶ ባቃትድ፥ ያን ሀይቅስ።
2KI 9:28 እያ አይለት ጋርያን እያ ኤክድ፥ የሩሳላመ ኤፍዶሶና፤ እያ ማይዛታ ማታን ዳዊታ ካታማን ሞግዶሶና።
2KI 9:29 አካባ ናአይ እዮራም ካዎትዳ ታማነ እስንꬆ ላይꬃን አካዝያስ ይሁዳን ካዎትስ።
2KI 9:30 ሄሳፈ ጉየ፥ እዩይ እዝራኤላ ብስ። ኤልዛቤላ ሄሳ ስእዳ ዎደ፥ ባ አይፍያ ትያዳ፥ ባ ሁጵያ ፕፃዳ፥ ማስኮትያራ ዱገ ኦግያ ፄላሱ።
2KI 9:31 እዩይ ፐንገራ ገልሽን፥ “ላ ነ ጎዳ ዎꬍዳ ዘምራ ሀይሳ ሳሮ ያዲ?” ያጋሱ።
2KI 9:32 እዩይ ፑደ ማስኮትያኮ ፄልድ፥ “ታ ባጋ ግዳናይ ኦኔ? ኦኔ?” ያግስ። ናምኡ ዎይኮ ሄꬑ ሹፋት እያ ፄልዶሶና።
2KI 9:33 እዩይ፥ “እዮ ዱገ ሆልተ” ያግስ። ኤንቲ እዮ ዱገ ሆልዶሶና። እ ሱꬃይ ጎዳ ቦላነ ፓራታ ቦላ ꬋርጨትስ፤ ፓራት ባንታ ቶሁዋን እዮ የꬍዶሶና።
2KI 9:34 እዩይ ካዋ ኬꬅ ገልድ፥ ምስነ ኡይስ። እ፥ “ሀ ባደትዳ ማጫስዉ ኤፍድ ሞግተ፤ አይ ግድኮካ እያ ካዎ ናአ” ያግስ።
2KI 9:35 ሽን ኤንቲ እዮ ሞጋናዉ ብድ፥ እ ጉግያፈ፥ ቶሆታፐነ ኩሸታፐ አትሽን፥ ሀራባ ደምቦኮና።
2KI 9:36 ኤንቲ ስሚድ፥ እያዉ ኦድዶሶና፤ እ፥ “ጎዳይ ባ አይልያ ትስባ ኤልያሳ ባጋራ፥ ‘እዝራኤለ ጋደን ኤልዛቤል አሹዋ ካናት ማና።
2KI 9:37 አትዳይስ እዝራኤላን ፕቶ መላ የገታና። ሄሳ ግሾ ኦንካ፥ “ሀና ኤልዛቤሎ” ጋናዉ ዳንዳኤና’ ያግድ ኦድዳ ቃላይ ሀይሳ” ያግስ።
2KI 10:1 አካባስ ሳማረ ካታማን ላፑን ታሙ አደ ናይት ደኦሶና። እዩይ ሳማረ ካታማ ሀላቃታስ፥ ጭማታስነ አካባ ኮቻታ ድቸይሳታስ ሀይሳዳ ያግድ ዳብዳበ ፃፍስ።
2KI 10:2 “ህዛ ህንተ ጎዳ ኮቻት፥ ፓራት፥ ፓራ ጋረት፥ ዩሾይ ግምበትዳ ካታማትነ ኦላ ሚሸት ህንተዉ ደእያ ግሾ፥ ሀ ዳብዳበይ ህንተና ጋክዳ መላ፥
2KI 10:3 ህንተ ጎዳ ናይታፐ ሎኦ ግድዳይሳ ዶርድ፥ እያ አዋ አራታን ኡትስተ፤ ህንተ ጎዳ ኬꬃስ ኦለትተ” ያግስ።
2KI 10:4 ሽን ኤንቲ ዳሮ ያይድ፥ “ሄኮ፥ ናምኡ ካዎት እያ ስንꬃን ኤቃናዉ ዳንዳእቦኮና፥ ሽን ኑኒ ዋንድ ኤቃኔ?” ያግዶሶና።
2KI 10:5 ሄሳ ግሾ፥ ካዎ ጋꬎ አዋተꬃን አይሰይስ፥ ካታማ ሀላቃይ፥ ጭማትነ አካባ ኮቻታ ድቸይሳት፥ እዩኮ ሀይሳዳ ያግድ ኪትዶሶና፤ “ኑኒ ነ አይለታ፤ ኔኒ ግያባ ኡባ ኑኒ ኦꬃና። ኑ ቦላ ኦናካ ካዎዮኮ። ነና ሎእዳባ አይባካ ኦꬃ” ያግድ ኪትዶሶና።
2KI 10:6 እዩይ ኤንታዉ ናምአንꬆ ዳብዳበ ፃፍሸ፥ “ህንተ ታ ባጋ ግድድ፥ ታዉ ኪተታናዉ ጊግዳባ ግድኮ፥ ህንተ ጎዳ ናይታ ቆꬍያ ሙጭተ፤ ኤንታ ጉግያ ኤክድ፥ ዎንቶ ሀኖደ እዝራኤለ ዪተ” ያግስ። ላፑን ታሙ ካዋ ኮቻት ባንታና ድችያ፥ ካታማን ኤረትዳ አሳታራ ደኦሶና።
2KI 10:7 ሄ ካዋ ኮቻታ ድችያ አሳታኮ ዳብዳበይ ጋክዳ ዎደ፥ ላፑን ታሙ ካዋ ኮቻታ ዎꬍዶሶና። ኤንታ ቆꬍያ ሙጭድ፥ ኤንታ ጉግያ ኬሸን ኤክድ፥ እዝራኤላን ደእያ እዩስ የድዶሶና።
2KI 10:8 ኪተትዳ አሳይ፥ “ኤንቲ ካዋ ኮቻታ ጉግያ ኤክድ ይዶሶና” ያግድ እዩስ ኦድዶሶና። እዩይ፥ “ዎንቶ ዎንታ ጋካናዉ፥ ካታማ ገልያ ፐንግያን ኤንታ ናምኡ በሳን ዶርድ ዎꬅተ” ያግድ ኪትስ።
2KI 10:9 ዎንተꬃ ጋላስ ዎንታ እዩይ ካረ ከይድ፥ አሳ ኡባ ስንꬃን ኤቅድ፥ “ህንተ ፅሎ፤ ሄኮ፥ ታ ጎዳ ቦላ ማቀታዳ ዎꬍዳይ ታና። ሽን ሀይሳታ ኡባ ዎꬍዳይ ኦኔ?
2KI 10:10 ጎዳይ አካባ ኮቻታ ቦላ ኦድዳ ቃላፐ እሶይካ ሳአን ዎꬎናይሳ ህንተ ኤርተ። ጎዳይ ባ አይልያ ኤልያሳ ባጋራ ኦድዳባ ፖልስ” ያግስ።
2KI 10:11 ሄሳ ግሾ፥ እዩይ እዝራኤላን አትዳ አካባ ኮቻታ፥ እያ ግታ አሳታ፥ እያ ላገታነ እያ ካህነታ ኡባ፥ እሶይካ አቶና ዎꬍስ።
2KI 10:12 ሄሳፈ ጉየ፥ እዩይ ደንድድ፥ ሳማረ ብድ ሄንꬃንቾታ ሞꬁ ጋክድ፥
2KI 10:13 ይሁዳ ካዋ አካዝያሳ ዳቦታራ ጋሄትድ፥ “ህንተ ኦኔ?” ያግድ ኦይችስ። ኤንቲ፥ “ኑኒ አካዝያሳ ዳቦታ፤ ካዋ ኮቻታነ ካወ ኤልዛቤል ናይታ ሳሮꬃናዉ ቦስ” ያግዶሶና።
2KI 10:14 እዩይ ባ አሳታ፥ “ኤንታ ፓፃ ኦይክተ” ያግድ ኪትን፥ ኤንታ ፓፃ ኦይክድ፥ ሄንꬃንቾታ ሞꬃን ደእያ ሃꬃ ኦላ ማታን ኤንታ ኦይታማነ ናምአታ ዎꬍዶሶና፤ እ ኤንታፈ እሱዋካ አሽቤና።
2KI 10:15 እዩይ ሄ በሳፈ ደንድድ፥ ራካባ ናኣ እዮናዳባራ ጋሄትድ፥ እያ ሳሮꬅድ፥ “ታ ቆፋይነ ነ ቆፋይ እስኖ። ኔኒ ታ ባጋ ግዳኔ?” ያግስ። እዮናዳብ፥ “ኤ ግዳና” ያግድ ዛርስ። እ “አነ ታ ኩሽያ ኦይካ” ያግስ። እያ ኩሽያ ኦይክን ፑደ ጋርያ ቦላ ከስስ።
2KI 10:16 “ታራ የꬋ፤ ታኒ ጎዳስ ዋናዳ ምሸትያኮ በአ” ያግስ፤ እያ ባ ጋርያ ቦላ ኡትስስ።
2KI 10:17 እዩይ ሳማረ ይዳ ዎደ፥ አካባ ኮቻፈ አትዳ ኡባ ዎꬍስ፤ ጎዳይ ኤልያሳስ ኦድዳ ቃላዳ ኤንታ ꬋይስስ።
2KI 10:18 ሄሳፈ ጉየ፥ እዩይ አሳ ኡባ እስፈ ሺሽድ፥ “አካብ ባኣለ ኤቃ ጉꬃራ ጎይንስ፤ ሽን ታኒ እያፐ ዳሮ ጎይናና።
2KI 10:19 ሀእ ባኣለ ናበታ፥ እያ ጎይነይሳታ፥ እያ ካህነታ ኡባ ፄግድ ሺሽተ። ኤንታፈ እስ አስካ ፓጮናዳ ናግተ። ታኒ ባኣለ ኤቃስ ዳሮ ያርሾ ያርሻና ሀናይስ። ሄ በሳ ዮና አስ ፓፃ አተና” ያግስ። ሽን እዩይ ባኣለ ኤቃ ጎይነይሳታ ጭምድ ꬋይሳናዉ ሄሳ ኦꬅስ።
2KI 10:20 እዩይ፥ “ባኣለ ኤቃ ጎይናና ጋላሳ አዋጅተ” ያግን፥ ኤንቲ አዋጅዶሶና።
2KI 10:21 ሄሳፈ ጉየ፥ እዩይ እስራኤለ ቢታ ኡባ ኪትን፥ ባኣለ ኤቃ ጎይነይሳታፐ እስ አስካ አቶና ኡባይ ይዶሶና። ኡባይ ባኣለ ኤቃ ኬꬃ ጋፃፐ ጋፃ ጋካናዉ ቅልፅ ግድ ኩምስ።
2KI 10:22 እዩይ፥ ማኦ ኬꬃ ናግያ አድያኮ፥ “ባኣለ ጎይነይሳታ ኡባስ ማኦ ከሳ” ያግስ። አደይ ኤንታዉ ማኦ ኤህስ።
2KI 10:23 ሄሳፈ ጉየ፥ “እዩይነ ራካባ ናአይ እዮናዳብ ባኣለ ኤቃ ኬꬃ ገልዶሶና። እዩይ፥ ባኣለ ኤቃ ጎይነይሳታፐ አትሽን፥ ጎዳ አይለታፐ እስ አስካ ህንተ ግዶን ዶናዳ ፄልተ” ያግስ።
2KI 10:24 ሄሳፈ ጉየ፥ ኤንቲ ፁሳ ያርሾታነ ሀራ ያርሾታ ያርሻናዉ ግዶ ገልዶሶና። እዩይ ባኣለ ኤቃ ኬꬃፈ ካረራ ሆስፑን ታሙ አሳታ ጊግስድ ዎꬅስ። ኤንታኮ፥ “ህንተፈ እስ አደይ ታኒ ህንተ ኩሸን እምያ አሳፐ እሱዋ የድኮ፥ እያ ሸምፖይ ሄ አድያ ሸምፑዋ በሳን ገላና” ያግስ።
2KI 10:25 እዩይ ፁሳ ያርሹዋ ፖልዳፐ ጉየ፥ ናገይሳታነ ሀላቃታ፥ “ግዶ ገልድ፥ ኤንታ ዎꬍተ። ኤንታፈ እስ አስካ ከስ ኤኮና መላ” ያግድ ኪትን፥ ኤንታ ማሻን ዉርስዶሶና። ኤንታ አሀ ካረ ጎችድ ከስዶሶና፤ ባኣለ ኤቃ ኬꬃ ቆልአ ገልዶሶና።
2KI 10:26 ባኣለ ኤቃ ኬꬃፈ ኤቃ ቱሳታ ከስድ ፁግዶሶና።
2KI 10:27 ባኣለ ኤቃ ሹቻታ ትንቸረꬅዶሶና፤ ባኣለ ኤቃ ኬꬃካ ላልዶሶና። ሄ በሳ ሼሻ ኬꬅ ከስዶሶና፤ ሀች ጋካናዉ ሄ በሳይ ሼሻ ኬꬅ ግድድ አትስ።
2KI 10:28 ሄሳዳ ኦꬅድ፥ እዩይ ባኣለ ኤቃ እስራኤለፐ ꬋይስስ።
2KI 10:29 ግዶሽን፥ ናባፃ ናአይ እዮርባም እስራኤለ አሳ ኦስስዳ ናጋራ ኦሶ አግቤና። ቤተለንነ ዳነን እዮርባም ኤስዳ ዎርቃ ማራ ምስለታ ጎይንስ።
2KI 10:30 ጎዳይ እዩኮ፥ “ኔኒ ታ ስንꬃን ሱረባ ኦꬅዳ ግሾነ ታ ቆፋን ደእያባ ኡባ ኔኒ አካባ ኮቻታ ቦላ ፖልዳ ግሾ፥ ነ ኮቻት ኦይዳንꬆ የለታ ጋካናዉ፥ እስራኤለ አራታን ኡታና” ያግስ።
2KI 10:31 እዩይ ጎዳ እስራኤለ ፆሳ ህግያ ባ ኩመꬃ ዎዛናፐ ምንꬅድ ናግቤና፤ ቃስ እስራኤለ አሳ ናጋራ ኦስስዳ እዮርባማ ናጋራፐ ሃክቤና።
2KI 10:32 ሄ ዎደ ጎዳይ እስራኤለ ቢታፈ ባጋ ሻኮ ዶምስ። አራመ ካዎይ አዛሄል እስራኤለ ቢታፈ ዳሮ በሳታ ፆንድ ኦይክስ።
2KI 10:33 ዮርዳኖሰ ሻፋፐ ዶሎሀ ባጋራ ደእያ ጋላዳነ ባሳነ ቢታ ኡባ ኦይክስ። ሄ ቢታይ አርኖና ሻፋ ማታን ደእያ አሮኤራ ካታማፐ ዶምድ፥ ሮቤላ ቢታ፥ ጋደ ቢታነ ምናሰ ቢታ ጋኬስ።
2KI 10:34 እዩይ ሀንዳ ሀራባይ፥ ኦꬅዳባ ኡባይነ እያ ምኖተꬃይ ኡባይ እስራኤለ ካዎታ ታርከ ማፃፋን ፃፈትስ።
2KI 10:35 ሄሳፈ ጉየ፥ እዩይ ሀይቅድ፥ ባ ማይዛታን ጋሄትስ፤ እ ሳማረን ሞገትስ። እያ በሳን እያ ናአይ እዮአካዝ ካዎትስ።
2KI 10:36 እዩይ ሳማረን ኡትድ እስራኤለ ቦላ ላታማነ ሆስፑን ላይꬅ ካዎትስ።
2KI 11:1 አካዝያሳ አይያ ጎቶላ ባ ናአይ ሀይቅዳይሳ በእዳ ዎደ፥ ደንዳዳ ካዋ ኮቻ ኡባ ꬋይሳሱ።
2KI 11:2 ሽን ካዋ እዮራማ ናእያ፥ አካዝያሳ ምችያ ዮሳቤታ፥ ሀይቃናዉ ደእያ ካዋ ናይታ ግዶፈ አካዝያሳ ናኣ እዮኣሳ ካይሳዳ ኤካሱ። እያነ እያ ድችያሮ ኤፋዳ ኬꬃን ቆሳዳ፥ ጎቶላ ዎꬎናዳ አሻሱ።
2KI 11:3 ጎቶላ ቢታ ሃርያ ዎደ ኡባን፥ ናአይ ዮሳቤት ማታን፥ ፆሳ ኬꬃን ኡሱፑን ላይꬅ ቆሰትድ ደእስ።
2KI 11:4 ላፑንꬃ ላይꬃን ዮዳሄይ ካዋ ናገይሳታነ ካዎ ጋꬎ ናገይሳታ ሀላቃታስ ኪትድ፥ ባኮ ፆሳ ኬꬅ ኤህስ። ኤንታራ ጫቅድ፥ ኤንታ ፆሳ ኬꬃን ጫቅስስ፤ ኤንታ ካዋ ናኣ እዮኣሳ በስስ።
2KI 11:5 እ ኤንታ፥ “ህንተ ኦꬃናባይ ሀይሳ፤ ሳምባታን ናጋናዉ ገልያ ማራይ ጋክዳ ህንተ ሄꬑ ጩጋፐ እስ ጩጋ ካዋ ኬꬃ ናጎ።
2KI 11:6 እስ ጩጋይ ሱራ ፐንግያ ናጎ፤ እስ ጩጋ ናገይሳታፐ ጉየ ባጋራ ደእያ ፐንግያ ናጎ።
2KI 11:7 ሳምባታ ጋላስ ናጎፐ ከይያ ሀንኮ ናምኡ ጩጋይ ኩመꬅ ካዋ ቦላ መቶይ ጋኮና መላ ፆሳ ኬꬃ ናጎ።
2KI 11:8 ኦላ ሚሸ ኦይክድ፥ ካዋ ግዶን ዎꬅድ፥ ካዎይ ከይያ ዎደነ ገልያ ዎደ ኡባን እያራ እስፈ ደኦ። ህንተኮ ሺቅያ ኦናካ ዎꬍተ” ያግስ።
2KI 11:9 ሄ ሀላቃት፥ ካህነይ ዮዳሄ ኪትዳባ ኡባ ኦꬅዶሶና። ኤንቲ ኡባይ ሳምባታ ጋላሳን ናጎ ማራይ ጋክዳይሳታነ ናጉዋ ማራ ፖልዳይሳታ ኤክድ፥ ካህንያ ዮዳሄኮ ይዶሶና።
2KI 11:10 ካህነይ ፆሳ ኬꬃን ደእያ፥ በን ካዋ ዳዊታ ጎንዳለታነ ቶራታ ኡባ ሀላቃታስ እሚስ።
2KI 11:11 ናገይሳት እሶይ እሶይ ኦላ ሚሸታ ባንታ ኩሸን ኦይክድ፥ ፆሳ ኬꬃፈ ሀድርሳ ባጋፈ ዶምድ፥ ኡሻቻ ባጋ ጋካናዉ፥ ያርሾ በሳ ማታንነ ፆሳ ኬꬃ ማታን ካዋ ዩሹዋን ኤቅዶሶና።
2KI 11:12 ዮዳሄይ ካዋ ናኣ ካረ ከስድ፥ እያ ሁጰን ካላቻ ዎꬅስ። ህገ ማፃፋ እያዉ እምድ፥ ትይድ፥ እያ ካዎꬅስ። አሳይ ኩሸ ባቅድ፥ ባ ቃላ ꬎቁ ኦꬅድ፥ “ካዎይ ብራታ ቱሱ ግዶ!” ያግስ።
2KI 11:13 ካውያ ጎቶላ ናገይሳታ ዎጫማነ አሳ ዎጫማ ስእዳ ዎደ፥ አሳኮ ፆሳ ኬꬅ ባሱ።
2KI 11:14 ካዎይ ካሰ ካዎት ሀነይሳዳ ቱሳ ማታን ኤቅድይሳ በአሱ። ሀላቃትነ ሞይዘ ፑነይሳት ካዋ ማታን ደኦሶና። ሄ ቢታ አሳ ኡባይ ኡፋይትድ፥ ሞይዘ ፑንን፥ ጎቶላ ባ ማኡዋ ዳካዳ፥ “ሄኮ፥ ሀይስ ማካላ! ሀይስ ማካላ!” ያጋዳ ዋሳሱ።
2KI 11:15 ካህነይ ዮዳሄይ ቶራ ሞጮናታኮ፥ “ጎቶሎ ፆሳ ኬꬃን ዎꬎፕተ! ኢፐ ያራነ ሃራ ሳልፕዳ ሳልፐታ ግዶን ዎꬅተ፤ እዮ አሻናዉ ቆፕያ አስ ደእኮ ዎꬍተ!” ያግስ።
2KI 11:16 ኤንቲ እዮ ኦይክድ፥ ካዎ ጋꬎ ኤፍድ፥ ፓራ ፐንግያን እዮ ዎꬍዶሶና።
2KI 11:17 አሳይ ጎዳ አስ ግዳና መላ፥ ካዎይ ዮዳሄይነ አሳይ ጎዳራ ጫቃና መላ ኦꬅስ። ቃስ ካዋፐነ አሳፐ ግዱዋን ጫቅስስ።
2KI 11:18 ሄ ዎደ ይሁዳ አሳ ኡባይ ባኣለ ኤቃ ኬꬅ ብድ፥ ሄ ኬꬃ ላልስ፤ ያርሾ በሳታነ እያ ምስለታ ትንቸረꬅስ። ባኣለ ኤቃ ካህንያ ማታና ያርሾ በሳታ ስንꬃን ዎꬍዶሶና። ሄሳፈ ጉየ፥ ካህንያ ዮዳሄይ ፆሳ ኬꬃን ናገይሳታ ዎꬅስ።
2KI 11:19 ባራ ቶራ ሞጮናታ፥ ካዋ ናገይሳታ፥ ካዎ ጋꬎ ናገይሳታነ ይሁዳ አሳ ኡባ ኤክን፥ ኤንቲ ካዋ ፆሳ ኬꬃፈ ዱገ ኤህስ። ናገይሳታ ፐንግያ ባጋራ ካዎ ኬꬅ እስፈ ገልድ፥ ካዎይ ባ አራታን ኡትስ።
2KI 11:20 ይሁዳ አሳ ኡባይ ኡፋይትዶሶና፤ ጎቶላ ካዎ ጋꬎን ማሻን ሀይቅዳፐ ጉየ ካታማይ ዎፑ ግስ።
2KI 11:21 እዮኣስ ካዎትያ ዎደ ላፑን ላይꬃ ናአ።
2KI 12:1 እዩይ፥ እስራኤለ ቢታን ካዎትዳ ላፑንꬆ ላይꬃን፥ እዮኣስ ይሁዳን ካዎትስ፤ እ የሩሳላመን ኦይታሙ ላይꬅ ካዎትስ። እያ አየ ሱንꬃይ ሳቦ፤ እያ በርሳበ ማጫስ።
2KI 12:2 ካህነይ ዮዳሄይ፥ እያ ታማርስዳነ ዞርዳ ግሾ፥ እ ደእዳ ላይꬃ ኡባን እዮኣስ ጎዳ ስንꬃን ሱረባ ኦꬅስ።
2KI 12:3 አሳይ ሄ በሳን ያርሾነ እፃነ ጩይሰꬅ አግቦና ግሾ፥ ꬎቃ ጎይኖ በሳታ ꬋይስቤና።
2KI 12:4 እዮኣስ ካህነታ ፄግድ፥ “ፆሳ ኬꬃ ያ ጌሻ ሚሸ ኡባ ሺሽተ። ሄስካ ሁጰ ታይቡዋ ዎደ እመትያ ሚሽያነ አሳይ ባ ሸነን ፆሳ ኬꬅ ኤህያ ሚሽያ።
2KI 12:5 ካህነት ኡባይ ሄ ሚሽያ ኤህያ አሳፐ ባንታ ግሹዋ ግሹዋ ኤክድ፥ ፆሳ ኬꬃ ግዶን ኢትዳ ኡባ ሎይꬃና” ያግስ።
2KI 12:6 ሽን ካዎይ እዮኣስ ካዎትዳ ላታማነ ሄꬓንꬆ ላይꬅ ጋካናዉ፥ ካህነት ፆሳ ኬꬃ ኦራꬅቦኮና።
2KI 12:7 ካዎይ እዮኣስ ካህንያ ዮዳሄነ ሀራ ካህነታ ፄግድ፥ “ፆሳ ኬꬃ ግዶን ኢትዳ በሳታ አይስ ኦራከቲ? ሚሸ ፆሳ ኬꬃ ኦራꬃናዉ እምተፐ አትሽን፥ ህንተዉ እመትያ ሚሽያ ህንተ ኩሸን ኦይኮፍተ” ያግስ።
2KI 12:8 ካህነት፥ “አሳፐ ሀራ ሚሸ ኤኮኮ፤ ፆሳ ኬꬃ ግዶን ኢትዳ በሳ ኦራꬃና” ያግድ ዛርዶሶና።
2KI 12:9 ያትን፥ ካህንያ ዮዳሄይ እስ ሳፅነ ኤክድ፥ እያ ካማ ሉክድ፥ ያርሾ በሳ ማታን ፆሳ ኬꬅ ገልያ ፐንግያ ኡሻቻ ባጋራ ዎꬅስ። ፐንግያ ናግያ ካህነት ፆሳ ኬꬃ ይዳ ሚሽያ ኡባ ሳፅንያን የጎሶና።
2KI 12:10 ኤንቲ ሳፅንያን ዳሮ ሚሸይ ዳጋየትዳይሳ በእዳ ዎደ ኡባን፥ ካዎ ፃፈይነ ካህነ ሀላቃይ ይድ፥ ሚሽያ ታይብድ፥ ካርፂታን ቆሎሶና።
2KI 12:11 ታይበትዳ ሚሽያ ሳላእዳፐ ጉየ፥ ፆሳ ኬꬃ ኦሱዋ ፄላና መላ ሱንትዳ አሳስ እሞሶና። ኤንቲ ሚሽያ ኤክድ፥ ፆሳ ኬꬃን አናፀታስነ ግምበይሳት እሞሶና።
2KI 12:12 ሚሽያ ሹቹ ማሰይሳታስነ ቆኤይሳታስ ቃንፃናዉ፥ ፆሳ ኬꬃ ኦራꬃናዉ፥ ሳንቃ፥ ሹቹነ ኮሽያ ሀራባታ ሻማናዉ ጎኤቶሶና።
2KI 12:13 ፆሳ ኬꬃ ይዳ ሚሽያፐ ፆሳ ኬꬃ ብራ ቡርጩኮታ፥ ቃጰታ፥ ከረታነ ሞይዘታ ዎይኮ ዎርቃነ ብራ ሚሸታ ኦꬃናዉ ከስቦኮና።
2KI 12:14 ሄ ሚሸ ኡባይ ፆሳ ኬꬃ ኦራꬅያ አሳስ ቃንፀትስ።
2KI 12:15 ፆሳ ኬꬃ ኦሱዋ ፄላናዉ ሱንትዳ አሳት አማነትዳ አስ ግድዳ ግሾ፥ “ሚሽያን አይ አይ ኦꬅደቲ?” ያግድ ኦይችዳ አስ ኦንካ ባዋ።
2KI 12:16 ናቆ ያርሾነ ናጋራ ያርሾስ ቃንፀትያ ሚሸይ ካህነታስ ገለስፐ አትሽን፥ ፆሳ ኬꬃ ኦራꬅያ ሚሸ ሳፅንያን ገለና።
2KI 12:17 ሄ ዎደ አራመ ካዎይ አዛሄል ብድ፥ ጋተ ካታማ ኦልድ ኦይክስ። ካልድ የሩሳላመ ኦላናዉ ስምስ።
2KI 12:18 ሽን ይሁዳ ካዎይ እዮኣስ እያፐ ካሰ ካዎትዳ ይሁዳ ካዎት እዮሳፈፅ፥ እዮራምነ አካዝያስ ጎዳስ ዱማይዳ ሚሸታ፥ ባ እሞታ፥ ፆሳ ኬꬃ እሞታነ ካዎ ጋꬎ ሻሎ ምንጅያ በሳን ደእያ ዎርቃ ኡባ ኤክስ። አራመ ካዋስ አዛሄላስ የድን፥ አዛሄል የሩሳላመ ኦላናዉ ደንዶይሳ አጋግስ።
2KI 12:19 ካዎይ እዮኣስ ሀንዳ ሀራባይነ እ ኦꬅዳባ ኡባይ ይሁዳ ካዎታ ታርከ ማፃፋን ፃፈትስ።
2KI 12:20 ሄሳፈ ጉየ፥ እያ ሞርናት እያ ቦላ ማቀትድ፥ ሲላ ኤፍያ ኦግያን ሚሎ ጌተትያ ኬꬃን ዎꬍዶሶና።
2KI 12:21 እያ ዎꬍዳ ኦሳንቾት ስምአታ ናኣ ዮዛካራነ ሾሜራ ናኣ ዮዛባታ። እዮኣስ ዳዊቲ ካታማን ባ ማይዛታ ዱፎን ሞገትስ፤ እያ በሳን እያ ናአይ አማስያስ ካዎትስ።
2KI 13:1 አካዝያሳ ናአይ፥ ይሁዳ ካዎይ እዮኣስ ካዎትዳ ላታማነ ሄꬓንꬆ ላይꬃን፥ እዩ ናአይ እዮአካዝ እስራኤለ ቦላ ካዎትስ፤ እ ሳማረን ኡትድ ታማነ ላፑን ላይꬅ ካዎትስ።
2KI 13:2 እ፥ እስራኤለ አሳ ባለꬅዳ እዮርባማ ሶ አሳ ናጋራ ካልድ፥ ጎዳ ስንꬃን ኢታባ ኦꬅስ፤ እ ሄ ናጋራ ኦሶ አግቤና።
2KI 13:3 ሄሳ ግሾ፥ ጎዳ ሀንቆይ እስራኤለ ቦላ ሱልስ፤ ጎዳይ ኤንታ ዳሮ ዎደ አራመ ካዋ አዛሄላ፥ ሄሳዳካ እያ ናኣ ዎልደ-አዳራ ኩሸን አꬅድ እሚስ።
2KI 13:4 ሄሳፈ ጉየ፥ እዮአካዝ ጎዳ ዎስስ። ጎዳይ እያ ዎሳ ስእስ፤ ሶረ ካዎይ እስራኤለ አይ መላ ኢታ መቶን ኡንኤꬅዳኮ ጎዳይ በእስ።
2KI 13:5 እስራኤለ አሳ አሽያ አስ እምን፥ ኤንታ አራመ ኩሸፐ ከስ ኤክዶሶና። እስራኤለ አሳይ ካሰይሳዳ ባንታ ሶን ሳሮን ደእዶሶና።
2KI 13:6 ሄስ ሀንንካ እስራኤለ አሳ ባለꬅዳ እዮርባማ ሶ አሳ ናጋራፐ ስምቦኮና፤ ኤንቲ ሄ ናጋራ ኦሶ አግቦኮና። ቃስ አሼራ ጌተትያ ፆሰ ኤቃ ምስለይ ሳማረን ኤቅድ ደኤስ።
2KI 13:7 እዮአካዛስ እሻታሙ ፓራ አሳታ፥ ታሙ ጋረታ፥ 10,000 ቶሆ ኦላንቾታ፥ ሀራ ኦላንቾታ ፃላል አትዶሶና። አራመ ካዎይ ኤንታ ꬋይስስ፤ እ ኤንታ ዉዱማን ደእያ ሱላዳ ኦꬅስ።
2KI 13:8 እዮአካዝ ሀንዳ ሀራባይ፥ እ ኦꬅዳባ ኡባይነ እያ ምኖተꬃይ እስራኤለ ካዎታ ታርከ ማፃፋን ፃፈትስ።
2KI 13:9 እዮአካዝ ሀይቅድ፥ ባ ማይዛታ ጋክስ፤ እያ በሳን እያ ናአይ ዮኣስ ካዎትስ።
2KI 13:10 ይሁዳ ካዎይ እዮኣስ ካዎትዳ ሀስታማነ ላፑንꬆ ላይꬃን፥ እዮአካዛ ናአይ ዮኣስ ሳማረን እስራኤለ ቦላ ካዎትስ፤ እ ታማነ ኡሱፑን ላይꬅ ካዎትስ።
2KI 13:11 ዮኣስ ጎዳ ስንꬃን ኢታባ ኦꬅስ። እስራኤለ አሳ ባለꬅዳ ናባፃ ናኣ እዮርባማ ናጋራፐ እሱዋካ አሾና ኦꬅስ፤ እ ሄ ናጋራ ኦሶ አግቤና።
2KI 13:12 ዮኣስ ሀንዳ ሀራባይ፥ እ ኦꬅዳባ ኡባይነ ይሁዳ ካዋ አማስያሳራ ኦለትዳ ኦላይ እስራኤለ ካዎታ ታርከ ማፃፋን ፃፈትስ።
2KI 13:13 ዮኣስ ሀይቅድ፥ ባ ማይዛታ ጋክስ፤ ሳማረን እስራኤለ ካዎታራ ሞገትስ። እያ በሳን እያ ናአይ እዮርባም ካዎትስ።
2KI 13:14 ኤልስ ሀይቆስ ጋꬅያ ሀርገ ሀርገትስ፤ እስራኤለ ካዎይ ዮኣስ እያ በአናዉ ብድ፥ “ታ አዋዉ፤ ታ አዋዉ፥ ኔኒ እስራኤለ አሳስ ዎልቃነ ጎንዳለ!” ያግድ ዬክስ።
2KI 13:15 ኤልስ፥ “ዶንገነ ዶንገ ቶራ ኤካዳ ያ” ያግን፥ ዮኣስ ኤህስ።
2KI 13:16 ኤልስ ካዋኮ፥ “ዶንግያ ጊግሳ ኦይካ” ያግስ፤ እ ዶንግያ ጊግስድ ኦይክዳሽን፥ ኤልስ ባ ኩሽያ ካዋ ኩሽያ ቦላ ዎꬅስ።
2KI 13:17 ኤልስ፥ “ዶሎሀ ባጋ ማስኮትያ ዶያ” ያግስ። እ ዶይን፥ ኤልስ፥ “ዶንገ ቶራን ዱካ” ያግስ። እ ዱክን ኤልስ፥ “ሀይስ ጎዳ ዶንገ! ሀይስ አራመ አሳ ፆንያ ዶንገ! ኔኒ አራመ አሳ አፌቃን ፆናና ጋካናዉ ኦላና” ያግስ።
2KI 13:18 ሄሳፈ ጉየ፥ ኤልስ ካዋኮ፥ “ዶንገ ቶራታ ኤካ” ያግስ። እ ኤክን፥ ኤልስ፥ “ቢታ ጫዳ” ያግስ። እ ሄꬑ ቶሆ ቢታ ጫድድ አጋግስ።
2KI 13:19 ፆሳ አደይ፥ ካዋ ቦላ ሀንቀትድ፥ “እቻሹ ቶሆ ዎይኮ ኡሱፑን ቶሆ ቢታ ጫድዳባ ግድያኮ፥ ኔኒ አራመ አሳ ፆናዳ ኩመꬅ ꬋይሳናሽን! ኔኒ ሀእ ኤንታ ሄꬑ ቶሆ ፃላላ ፆናና” ያግስ።
2KI 13:20 ኤልስ ሀይቅድ ሞገትስ። ሞአበ ፓኖት እስራኤለ ቢታ ቦላ ላይꬃን ላይꬃን ደንዶሶና።
2KI 13:21 እስ ጋላስ ጉꬃ እስራኤለ አሳት እስ ኡራ አሀ ሞግሸ፥ ሄኮ፥ ሞአበ ፓኖታ በእዶሶና። ኡራ አሀ ኤልሳ ዱፉዋ ግዶ ሆልድ ባቃትዶሶና። አሀይ ኤልሳ መቀꬃ ቦላ ዎꬍድ፥ ፓፅድ ደንድ ኤቅስ።
2KI 13:22 እዮአካዝ ካዎትዳ ላይꬃ ኡባን ሶረ ካዎይ አዛሄል እስራኤለ ኡንኤꬅስ።
2KI 13:23 ሽን ጎዳይ አብራሃመራ፥ ይሳቃራነ ያይቆባራ ጫቅዳ ጫቁዋ ግሾ፥ ኤንታዉ ኬህስ፥ ቃትስ፥ ቆፕስ። ሀች ጋካናዉ እ ኤንታ ꬋይስቤና ዎይኮ ባ ስንꬃፈ ድግቤና።
2KI 13:24 አራመ ካዎይ አዛሄል ሀይቅን፥ እያ በሳን እያ ናአይ ዎልደ-አዳር ካዎትስ።
2KI 13:25 አዛሄል እያ አዋ እዮአካዝ ኦላን ኦይክዳ ካታማታ፥ እዮአካዛ ናአይ ዮኣስ አዛሄላ ናኣ ዎልደ-አዳራፐ ኤክስ። ዮኣስ እያ ሄꬑ ቶሆ ፆንድ፥ እስራኤለ ካታማታ ዛርስ።
2KI 14:1 እዮአካዛ ናአይ፥ እስራኤለ ካዎይ ዮኣስ ካዎትዳ ናምአንꬆ ላይꬃን፥ ይሁዳ ካዋ እዮኣሳ ናአይ አማስያስ ካዎትስ።
2KI 14:2 እ ካዎትያ ዎደ ላይꬅ እያዉ ላታማነ እቻሻ፤ እ የሩሳላመን ላታማነ ኡዱፉን ላይꬅ ካዎትስ። እያ አየ ሱንꬃይ ዮዳኖ፤ እያ የሩሳላመ ማጫስ።
2KI 14:3 አማስያስ ጎዳ ስንꬃን ሱረባ ኦꬅስ፤ ሽን እያ ማይዛይ ዳዊቲ ኦꬅዳይሳዳ ግዶናሽን፥ ባ አዋ እዮኣሳ ኦግያ ካልስ።
2KI 14:4 አሳይ ꬎቃ ጎይኖ በሳታ ꬋይስቤና፤ አሳይ ሄ በሳን ያርሾ ያርሸይሳነ እፃነ ጩይሰይሳ አግቦኮና።
2KI 14:5 አማስያስ ካዎተꬃ ምንꬅድ ኦይክዳፐ ጉየ፥ ካሰ ካዋ፥ ባ አዋ እዮኣሳ ዎꬍዳ ሹማታ ዎꬍስ።
2KI 14:6 ሙሰ ህገ ማፃፋን ፃፈትዳይሳዳ፥ ጎዳይ፥ “ናይት ኦꬅዳ ናጋራ ግሾ፥ አዋታ ዎꬋናዉ በሰና፤ ቃስ አዋት ኦꬅዳ ናጋራ ግሾ፥ ናይታ ዎꬋናዉ በሰና። አስ ኡባይ ባ ኦꬅዳ ናጋራን ናጋራን ሀይቃናዉ በሴስ” ያግድ ኪትዳይሳዳ ባ አዋ ዎꬍዳ አሳ ናይታ ዎꬍቤና።
2KI 14:7 አማስያስ ማፅነ ዛንጋራን ታሙ ሙኩሉ ኤዶመ አሳ ዎꬍድ፥ ሴላ ካታማ ኦላን ኦይክድ፥ ሄ በሳ ዮቅትኤላ ግድ ሱንꬅስ፤ ሀች ጋካናዉ ሄ ሱንꬃን ፄገቴስ።
2KI 14:8 ሄሳፈ ጉየ፥ አማስያስ እዩ ናኣ ናኣ፥ እዮአካዛ ናኣ፥ ዮኣሳኮ፥ “ሃያ፤ አነ ናምአይ ኦላ ጋሄቶስ” ያግድ አሰ ኪትድ ማንድስ።
2KI 14:9 ሽን እስራኤለ ካዎይ ዮኣስ፥ ይሁዳ ካዋ አማስያሳኮ፥ “ልባኖሰን ደእያ ክንቾተይ፥ ልባኖሰን ደእያ ዝጋኮ፥ ‘ነ ናእዉ ታ ናኣስ እማ’ ያግስ። ሽን ልባኖሰን ደእያ እስ ዶአይ ያራ ካንꬅድ፥ ሄ ክንቾትያ የꬍስ።
2KI 14:10 ኤ፥ ኔኒ ቱማ ኤዶመ ቢታ ፆናዳሳ፤ ሀእ ኦቶርታዳሳ። ኔኒ ነ ፆኑዋን ኡፋይታዳ፥ ነ ሶን ዎፑ ጋዳ ኡታ። ነ ቦላነ ነ ቢታ ይሁዳ ቦላ መቶነ ꬋዮ ኤህያባ አይስ ደንꬃይ?” ያግድ ዛርስ።
2KI 14:11 ሽን አማስያስ እያ ስእቤና። እስራኤለ ካዎይ ዮኣስ ኦላስ ከይን፥ እነ ይሁዳ ካዎይ አማስያስ ይሁዳን ደእያ ቤት-ሳሜሳ ካታማን ኦላ ጋሄትዶሶና።
2KI 14:12 እስራኤለይ ይሁዳ ፆንን፥ ይሁዳ አሳ ኡባይ ባቃትድ፥ ባንታ ሶ ባንታ ሶ ብዶሶና።
2KI 14:13 እስራኤለ ካዎይ ዮኣስ አካዝያሳ ናኣ ናኣ፥ እዮኣሳ ናኣ፥ ይሁዳ ካዋ አማስያሳ ቤት-ሳሜሳ ካታማን ድእስ። የሩሳላመ ድርሳ ግምብያ፥ ኤፍሬማ ፐንግያፈ ብድ፥ ማዛነ ፐንግያ ጋካናዉ ደእያ ኦይዱ ፄቱ ዋꬋ ግድያ በሳ ላልስ።
2KI 14:14 ፆሳ ኬꬃንነ ካዎ ጋꬎን ሻሎ ምንጅያ ኬꬃን ደእያ ዎርቃ፥ ብራነ ሚሸ ኡባ ኤክስ፤ ቃስ ኦይꬅ ግድድ ድኤትዳ አሳካ ኤክድ፥ ሳማረ ስምስ።
2KI 14:15 ዮኣስ ሀንዳ ሀራባይ፥ እ ኦꬅዳባይ፥ እያ ምኖተꬃይነ ይሁዳ ካዋ አማስያሳራ ኦለትዳባይ እስራኤለ ካዎታ ታርከ ማፃፋን ፃፈትስ።
2KI 14:16 ዮኣስ ሀይቅድ፥ ባ ማይዛታ ጋክስ፤ ሳማረን እስራኤለ ካዎታራ ሞገትስ። እያ በሳን እያ ናአይ እዮርባም ካዎትስ።
2KI 14:17 እዮአካዛ ናአይ፥ እስራኤለ ካዎይ ዮኣስ ሀይቅዳፐ ጉየ፥ ዮኣሳ ናአይ፥ ይሁዳ ካዎይ አማስያስ ታማነ እቻሹ ላይꬅ ደእስ።
2KI 14:18 አማስያስ ሀንዳ ሀራባይ ይሁዳ ካዎታ ታርከ ማፃፋን ፃፈትስ።
2KI 14:19 አማስያሳ ዎꬋናዉ አሳይ የሩሳላመን ማቀትስ፤ ያትን እ ላክሶ ካታማ ባቃትስ። ሽን ኤንቲ እያ ጌዶ ላክሶ ካታማ አሰ ኪትን፥ እያ ያን ዎꬍዶሶና።
2KI 14:20 ዎꬍድ እያ አሀ ፓራን ጫን ኤህድ፥ ዳዊታ ካታማን የሩሳላመን እያ ማይዛታራ ሞግዶሶና።
2KI 14:21 ሄሳፈ ጉየ፥ ይሁዳ አሳ ኡባይ ታማነ ኡሱፑን ላይꬃ ናኣ አዛርያሳ እያ አዋ አማስያሳ በሳን ካዎꬅዶሶና።
2KI 14:22 እያ አዋይ አማስያስ ሀይቅዳፐ ጉየ፥ አዛርያስ ኤላታ ካታማ ዛር ኬፅድ፥ ይሁዳን ጋꬅስ።
2KI 14:23 እዮኣሳ ናአይ፥ ይሁዳ ካዎይ አማስያስ ካዎትዳ ታማነ እቻሻንꬆ ላይꬃን፥ እስራኤለ ካዋ ዮኣሳ ናአይ እዮርባም ሳማረን ካዎትስ፤ እ ኦይታማነ እስ ላይꬅ ካዎትስ።
2KI 14:24 ናምአንꬆ እዮርባም ጎዳ ስንꬃን ኢታባ ኦꬅስ፤ እስራኤለ አሳ ናጋራ ኦስስዳ ናባፃ ናኣ እዮርባም ኦግያፐ ሃክቤና።
2KI 14:25 ጋት-ሄፈራ አድያ አማተ ናኣ ናብያ፥ ባ አይልያ ዮናሳ ባጋራ ጎዳይ እስራኤለ ፆሳይ ባ ቃላን ኦድዳይሳዳ፥ ሀማታ ፕኑዋ ጌተትያ በሳፈ ዶምድ፥ ማፅነ አባ ጋካናዉ ደእያ እስራኤለ ዛዋ ዮኣሳ ናአይ እዮርባም ፆንድ ዛርስ።
2KI 14:26 እስራኤለን አሳ ኡባይ አይለ ግድን፥ ዎማኖ ግድን፥ አይ መላ ኡንኤትዳኮ፥ ጎዳይ በእስ፤ ኤንታ ማድያ ኦንካ ባዋ።
2KI 14:27 ጎዳይ እስራኤለ አሳ ሱንꬃ ሳሎፐ ጋርሳን ቁቻና ግቤና። ሄሳ ግሾ፥ ጎዳይ ኤንታ ዮኣሳ ናኣ እዮርባማ ባጋራ አሽስ።
2KI 14:28 እዮርባም ሀንዳ ሀራባይ፥ እ ኦꬅዳባ ኡባይ፥ ኦለትዳባይነ ይሁዳ ባጋ ግድዳ ዳማስቆነ ሀማታ ካታማታ እስራኤለስ ዛርዳባይ እስራኤለ ካዎታ ታርከ ማፃፋን ፃፈትስ።
2KI 14:29 እዮርባም ሀይቅድ፥ ባ ማይዛታ፥ እስራኤለ ካዎታ ጋክስ፤ እያ በሳን እያ ናአይ ዛካርያስ ካዎትስ።
2KI 15:1 እስራኤለ ካዎይ እዮርባም ካዎትዳ ላታማነ ላፑንꬃ ላይꬃን፥ ይሁዳ ካዋ አማስያሳ ናአይ አዛርያስ ካዎትስ።
2KI 15:2 እ ካዎትዳ ዎደ፥ እያዉ ላይꬅ ታማነ ኡሱፑና፤ እ የሩሳላመን እሻታማነ ናምኡ ላይꬅ ካዎትስ። እያ አየ ሱንꬃይ ይኮሎ፤ እያ የሩሳላመ ማጫስ።
2KI 15:3 እያ አዋይ አማስያስ ኦꬅዳይሳዳ፥ እካ ጎዳ ስንꬃን ሱረባ ኦꬅስ።
2KI 15:4 ግዶሽን፥ ሄ በሳን ያርሾ ያርሸይሳነ እፃነ ጩይሰይሳ አሳይ አግቦና ግሾ፥ ꬎቃ ጎይኖ በሳታ ꬋይስቤና፤
2KI 15:5 ጎዳይ አዛርያሳ ጉꬃ ጎጋ ሀርገን ኦይꬅስ፤ ሀይቃና ጋካናዉ ሄ ሀርገይ እያ የድቦና ግሾ፥ ዱማ ኬꬃን ባርካ ደእስ። ሄ ዎደ ካዋ ናአይ እዮአታም ካዎ ጋꬎን ደእድ፥ ቢታ ሃርስ።
2KI 15:6 አዛርያስ ሀንዳ ሀራባይነ እ ኦꬅዳባ ኡባይ ይሁዳ ካዎታ ታርከ ማፃፋን ፃፈትስ።
2KI 15:7 አዛርያስ ሀይቅድ፥ ባ ማይዛታ ጋክስ፤ ዳዊታ ካታማን ባ ማይዛታራ ሞገትስ። እያ በሳን እያ ናአይ እዮአታም ካዎትስ።
2KI 15:8 ይሁዳ ካዎይ አዛርያስ ካዎትዳ ሀስታማነ ሆስፑንꬆ ላይꬃን፥ እዮርባማ ናአይ ዛካርያስ እስራኤለ ቦላ ሳማረን ካዎትስ፤ እ ኡሱፑን አጌና ካዎትስ።
2KI 15:9 እያ ማይዛት ኦꬅዳይሳዳ፥ እካ ጎዳ ስንꬃን ኢታባ ኦꬅስ፤ ናባፃ ናአይ እዮርባም እስራኤለ አሳ ኦስስዳ ናጋራ ኦሶ አግቤና።
2KI 15:10 እያቤሳ ናአይ ሳሎም ዛካርያሳ ቦላ ማቀትድ፥ ይብላማ ጌተትያ በሳን ዎꬍድ እያ በሳን ባዉ ካዎትስ።
2KI 15:11 ዛካርያስ ሀንዳ ሀራባይነ እ ኦꬅዳባ ኡባይ እስራኤለ ካዎታ ታርከ ማፃፋን ፃፈትስ።
2KI 15:12 ሄሳዳ ሀንድ፥ ጎዳይ እዩስ፥ “ነ ኮቻይ ኦይዳንꬆ የለታ ጋካናዉ፥ እስራኤለ ካዎተꬃ አራታን ኡታና” ያግድ ኦድዳ ቃላይ ፖለትስ።
2KI 15:13 ይሁዳ ካዎይ ኦዝያን ካዎትዳ ሀስታማነ ኡዱፉንꬆ ላይꬃን፥ ያበሳ ናአይ ሳሉም ካዎትስ፤ እ ሳማረን እስ አጌና ካዎትስ።
2KI 15:14 ጋደ ናአይ ምናሄም ትርሳ ካታማፐ ሳማረ ብስ። ሳማረን ደእያ ያበሳ ናኣ ሳሉማ ዎꬍድ እያ በሳን ባዉ ካዎትስ።
2KI 15:15 ሳሉም ሀንዳ ሀራባይነ እ ማቀትዳ ማቆይ እስራኤለ ካዎታ ታርከ ማፃፋን ፃፈትስ።
2KI 15:16 ሄ ዎደ ምናሄም ትርሳፈ ደንድድ፥ ትፍሳነ፥ ያን ደእያ አሳነ ካታማ ሄራን ደእያ ቢታታ ኡባ ኦልስ። ኤንቲ ባንታ ካታማ ድርሳ ፐንግያ እያዉ ዶዮና እፅዳ ግሾ፥ ትፍሳ ኦልድ ꬋይስስ፤ ቃስ ያን ደእያ ቃንꬃ ማጫሳ ኡባ ኡሉዋ ዳክስ።
2KI 15:17 ይሁዳ ካዎይ አዛርያስ ካዎትዳ ሀስታማነ ኡዱፉንꬆ ላይꬃን፥ ጋደ ናአይ ምናሄም እስራኤለ ቦላ ካዎትስ፤ እ ሳማረን ታሙ ላይꬅ ካዎትስ።
2KI 15:18 እ ጎዳ ስንꬃን ኢታባ ኦꬅስ፤ ናባፃ ናአይ እዮርባም እስራኤለ አሳ ኦስስዳ ናጋራፐ ሃክቤና።
2KI 15:19 ሄሳፈ ጉየ፥ አሶረ ካዎይ ተልገልተልፈልሶር እስራኤለ ቦላ ደንድስ። ካዎተꬃን ባና ምንꬃና መላነ ማዳና መላ፥ ምናሄም ተልገልተልፈልሶራስ 34,000 ክሎ ግራመ ብራ ሳንትመ እሚስ።
2KI 15:20 ምናሄም ሄ ሚሽያ እስራኤለ አሳ ዎልቃን ከስስ፤ አሶረ ካዋስ እማናዉ ዱረ አስ ኡባይ እሶይ እሶይ እሻታሙ ብራ ሳንትመ ከስዶሶና። ሄሳዳ ኦꬅን፥ አሶረ ካዎይ እስራኤለ ቢታ አግድ፥ ባ ቢታ ስምስ።
2KI 15:21 ምናሄም ሀንዳ ሀራባይነ እ ኦꬅዳባ ኡባይ እስራኤለ ካዎታ ታርከ ማፃፋን ፃፈትስ።
2KI 15:22 ምናሄም ሀይቅድ፥ ባ ማይዛታን ጋሄትስ፤ እያ በሳን እያ ናአይ ፓቅስያስ ካዎትስ።
2KI 15:23 ይሁዳ ካዎይ አዛርያስ ካዎትዳ እሻታማንꬆ ላይꬃን፥ ምናሄማ ናአይ ፓቅስያስ እስራኤለ ቦላ ሳማረን ካዎትስ፤ እ ናምኡ ላይꬅ ካዎትስ።
2KI 15:24 ፓቅስያስ ጎዳ ስንꬃን ኢታባ ኦꬅስ፤ ናባፃ ናአይ እዮርባም እስራኤለ አሳ ኦስስዳ ናጋራ ኦሶ አግቤና።
2KI 15:25 እያ ቶራ ሞጮናታፐ እሶይ፥ ራማላ ናአይ ፓቁሄይ እያ ቦላ ማቀትድ ደንድስ። ጋላዳ አሳፐ እሻታሙ አደታ ባራ ኤክድ፥ ሳማረን ካዎ ጋꬎን ደእያ ሚፃ ገልስ። ፓቁሄይ፥ ፓቅስያሳ፥ አርጎባነ አርያ እስፈ ዎꬍድ እያ በሳን ባዉ ካዎትስ።
2KI 15:26 ፓቅስያስ ሀንዳ ሀራባይነ ኦꬅዳባ ኡባይ እስራኤለ ካዎታ ታርከ ማፃፋን ፃፈትስ።
2KI 15:27 ይሁዳ ካዎይ አዛርያስ ካዎትዳ እሻታማነ ናምአንꬆ ላይꬃን፥ ራማላ ናአይ ፓቁሄይ እስራኤለ ቦላ ሳማረን ካዎትስ፤ እ ላታሙ ላይꬅ ካዎትስ።
2KI 15:28 ፓቁሄይ ጎዳ ስንꬃን ኢታባ ኦꬅስ፤ ናባፃ ናአይ እዮርባም እስራኤለ አሳ ኦስስዳ ናጋራፐ ሃክቤና።
2KI 15:29 እስራኤለ ካዋ ፓቁሄ ዎድያን አሶረ ካዎይ ተልገልተልፈልሶር ይድ፥ እዮና፥ አቤል-ቤት-ማእካ፥ ያኖሀ፥ ቃደሳነ ሀፆራ ኦልድ ኦይክስ፤ ቃስ ጋላዳ፥ ጋልላነ ንፍታለመ ቢታ ኡባ ኦልድ፥ አሳ ድእድ አሶረ ቢታ ኤፍስ።
2KI 15:30 አዛርያሳ ናአይ እዮአታም ካዎትዳ ላታማንꬆ ላይꬃን፥ ኤላ ናአይ ሆሰይ ራማላ ናኣ ፓቁሄ ቦላ ማቀትድ ዎꬍድ፥ እያ በሳን ባዉ ካዎትስ።
2KI 15:31 ፓቁሄይ ሀንዳ ሀራባይነ ኦꬅዳባ ኡባይ እስራኤለ ካዎታ ታርከ ማፃፋን ፃፈትስ።
2KI 15:32 ራማላ ናአይ፥ እስራኤለ ካዎይ ፓቁሄይ ካዎትዳ ናምአንꬆ ላይꬃን፥ ይሁዳ ካዋ አዛርያስ ናአይ እዮአታም ካዎትስ።
2KI 15:33 እዮአታም ካዎትያ ዎደ እያዉ ላይꬅ ላታማነ እቻሻ፤ እ የሩሳላመን ታማነ ኡሱፑን ላይꬅ ካዎትስ። እያ አየ ሱንꬃይ ያሩሾ፤ ያሩሻ ሳዶቃ ናእዉ።
2KI 15:34 ባ አዋይ አዛርያስ ኦꬅዳይሳዳ፥ እዮአታም ጎዳ ስንꬃን ሱረባ ኦꬅስ።
2KI 15:35 ግዶሽን፥ ሄ በሳን ያርሾነ እፃነ ጩይሰꬅ አግቦና ግሾ፥ አሳይ ꬎቃ ጎይኖ በሳታ ꬋይስቤና። እዮአታም ፆሳ ኬꬃ ገልያ ቆሞ ባጋ ፐንግያ ዛሪድ ኬፅስ።
2KI 15:36 እዮአታም ሀንዳ ሀራባይነ ኦꬅዳባ ኡባይ ይሁዳ ካዎታ ታርከ ማፃፋን ፃፈትስ።
2KI 15:37 ሄ ዎደ ጎዳይ አራመ ካዋ ራአሶናነ ራማላ ናኣ፥ እስራኤለ ካዋ ፓቁሄ ይሁዳ ቢታ ኦላና መላ ደንꬅስ።
2KI 15:38 እዮአታም ሀይቅድ፥ ባ አዋ ዳዊታ ካታማን ባ ማይዛታራ ሞገትስ፤ እያ በሳን እያ ናአይ አካዝ ካዎትስ።
2KI 16:1 ራማላ ናአይ ፓቁሄይ ካዎትዳ ታማነ ላፑንꬆ ላይꬃን፥ እዮአታማ ናአይ አካዝ ይሁዳን ካዎትስ።
2KI 16:2 እ ካዎትያ ዎደ ላይꬅ እያዉ ላታማ፤ የሩሳላመን ታማነ ኡሱፑን ላይꬅ ካዎትስ። እያ ማይዛይ ዳዊቲ ሱረባ ኦꬅዳይሳዳ፥ ጎዳ ባ ፆሳ ስንꬃን ሱረባ ኦꬅቤና።
2KI 16:3 እ ካሰ ደእዳ እስራኤለ ካዎታ ኦግያን ሄመትስ። ቃስ ጎዳይ እስራኤለ አሳ ስንꬃፈ ጎድድ ከስዳ አሳታ ዎጋ፥ እፀትዳ ኦግያ ካልድ፥ ባ አደ ናኣ ታማራ አꬅድ ያርሽስ።
2KI 16:4 አካዝ ꬎቃ ጎይኖ በሳታን፥ ዙማታ ቦላነ ዳሻ ምꬃታ ኡባ ጋርሳን ያርሾ ያርሽስ፤ እፃነ ጩይስስ።
2KI 16:5 ሄሳፈ ጉየ፥ አራመ ካዎይ ራአሶንነ ራማላ ናአይ፥ እስራኤለ ካዎይ ፓቁሄይ የሩሳላመ ኦላናዉ ይድ ተቅዶሶና፤ ሽን አካዛ ፆናናዉ ዳንዳእቦኮና።
2KI 16:6 ሄ ዎደ አራመ ካዎይ ራአሶን ኤላታ ካታማ ዛር ኤክድ፥ ይሁዳ አሳ ጎድድ ከስስ። ያትን ኤዶመ አሳት ኤላታ ካታማ ይድ፥ ሀች ጋካናዉ ያን ደኦሶና።
2KI 16:7 ሄሳ ግሾ፥ አካዝ አሶረ ካዋ ተልገልተልፈልሶራኮ ኪታ የድድ፥ “ታኒ ነ ናአነ ነ አይለ። ሀያና ሃያ፤ ታና ኦልያ አራመ ካዋ ኩሸፐነ እስራኤለ ካዋ ኩሸፐ አሻ” ያግስ።
2KI 16:8 ቃስ አካዝ ፆሳ ኬꬃነ ካዎ ጋꬎን ሻሎ ምንጅያ በሳን ደእያ ብራነ ዎርቃ ኤክድ፥ አሶረ ካዋስ እሞታ ኦꬅድ የድስ።
2KI 16:9 አካዛ ኦይሻ ኤክድ፥ አሶረ ካዎይ ዳማስቆ ካታማ ኦል ኦይክድ፥ አሳ ድእድ፥ ቂራ ኤፍስ፤ ካዋ ራአሶናካ ዎꬍስ።
2KI 16:10 ካዎይ አካዝ አሶረ ካዋ ተልገልተልፈልሶራራ ጋሄታናዉ ዳማስቆ ብስ። ዳማስቆን ደእያ ያርሾ በሳ በእድ፥ እያ ዳንያ ያርሾ በሲ ኬፃና መላ፥ ሄ ያርሾ በሳ ምስልያነ ኬፅያ ሀኖታ ካህንያ ኡራያ ኪትስ።
2KI 16:11 ካዎይ አካዝ ዳማስቆፈ ስሚድ ያናስ፥ ካህነይ ኡራይ እያ ዳንያ ያርሾ በሲ ጊግስስ።
2KI 16:12 ካዎይ ዳማስቆፈ ስምዳ ዎደ፥ ያርሾ በሳይ ኦሰትድ ፖለትዳይሳ በእድ፥ ያርሾ በሳኮ ሺቅድ፥
2KI 16:13 ፁሳ ያርሾነ ካꬃ ያርሾ ያርሽስ። ቃስ ኡሻ ያርሹዋ ጉስስ፤ እስፈተꬃ ያርሾ ሱꬃካ ያርሾ በሳ ቦላ ꬋርጭስ።
2KI 16:14 ናሰ ብራታፐ ኦሰትድ፥ ጎዳስ ዱማትድ ኡትዳ ያርሾ በሳይ፥ ኦራꬃ ያርሾ በሳፈነ ፆሳ ኬꬃፈ ግዶን ደኤስ። አካዝ ሄ ጋልአ ያርሾ በሳ ደንꬅድ፥ ባ ኦስስዳ ኦራꬃ ያርሾ በሳፈ ፑደሀ ባጋን ዎꬅስ።
2KI 16:15 ካዎይ አካዝ ካህንያ ኡራያ ሀይሳዳ ያግድ ኪትስ፤ “ሀ ግታ ያርሾ በሳን ዎንታ ፁሳ ያርሾ፥ ኦማርስ ሺሽያ ካꬃ ያርሾ፥ ካዎይ ሺሽያ ፁሳ ያርሾነ ካꬃ ያርሾ፥ አሳ ኡባይ ሺሽያ ፁሳ ያርሾ፥ ካꬃ ያርሹዋነ ኡሻ ያርሹዋ ያርሾ በሳን ሺሻ። ናሰፐ ኦሰትዳ ሀንኮ ያርሾ በሳ ታኒ ታዉ ኦይችያ በሲ ኦꬃና” ያግስ።
2KI 16:16 ኡራይ ካዎይ አካዝ ኪትዳይሳዳ ኦꬅስ።
2KI 16:17 ካዎይ አካዝ ፆሳ ኬꬃ ግዶን ጎኤትያ፥ ናሰ ብራታፐ ኦሰትዳ ጋረታ ሎቸ ብራታ ቃንፅድ፥ ምየፐ ድግድ ሜጨትያ ከረታ ጋረታ ቦላፈ ደንꬅስ። ቃስ ግታ ከረታ፥ እያ ዘምፕስዳ ናሰ ብራታ ቦራ ምስለታ ቦላፈ ደንꬅድ፥ ሹቻ ባሱዋ ቦላ ዎꬅስ።
2KI 16:18 አሶረ ካዋ ግሾ፥ አካዝ ሳምባታ ጋላስ ፆሳ ኬꬃ ግዶን ካዋ አራታይ ምጨትያ ꬎቁ ግዳ በሳነ ካዎይ ፆሳ ኬꬅ ገልያ ካረ ኦግያ ጎርድድ፥ ዩይ አꬍድ ገላና መላ ኦꬅስ።
2KI 16:19 ካዎይ አካዝ ሀንዳ ሀራባይነ እ ኦꬅዳባ ኡባይ ይሁዳ ካዎታ ታርከ ማፃፋን ፃፈትስ።
2KI 16:20 አካዝ ሀይቅድ፥ ባ ማይዛታን ጋሄትስ፤ ዳዊታ ካታማን ባ ማይዛታራ ሞገትስ፤ እያ በሳን እያ ናአይ ህዝቅያስ ካዎትስ።
2KI 17:1 ይሁዳ ካዎይ አካዝ ካዎትዳ ታማነ ናምአንꬆ ላይꬃን፥ ኤላ ናአይ ሆሰይ እስራኤለ ቦላ ሳማረን ካዎትስ፤ እ ኡዱፉን ላይꬅ ካዎትስ።
2KI 17:2 እ፥ ጎዳ ስንꬃን ኢታባ ኦꬅስ፤ ግድኮካ፥ እያፐ ካሰ ደእዳ እስራኤለ ካዎት ኦꬅዳይሳ መላ ኢታባ ኦꬅቤና።
2KI 17:3 አሶረ ካዎይ ሳልምናሶር ይድ፥ እያራ ኦላ ጋሄትን፥ ሆሰይ ፆነትድ፥ እያዉ ጊርስ።
2KI 17:4 ሽን ጉꬃ ላይꬃፈ ጉየ፥ ካዎይ ሆሰይ፥ ግብፀ ካዋ ሰጎራስ ኪታ የድድ፥ ባና ማዳና መላ ኦይችስ። ካሰይሳዳ አሶረ ካዋስ ጊራ እመይሳ አጋግስ። ካዎይ ሳልምናሶር ሄሳ ስእዳ ዎደ እያ ኦይꬅድ፥ ቃሾ ኬꬅ ገልስስ።
2KI 17:5 አሶረ ካዎይ እስራኤለ ቢታ ኡባ ቦላ ደንድድ፥ ሄꬑ ላይꬅ ጋካናዉ ሳማረ ካታማ ተቅስ።
2KI 17:6 ሆሰይ ካዎትዳ ኡዱፉንꬆ ላይꬃን አሶረ ካዎይ ሳማረ ካታማ ኦይክስ፤ እስራኤለ አሳ ኤክድ፥ አሶረ ቢታ ኤፍስ። ኤንታፈ ባጋ አላሀንነ አቦራን፥ ባጋ ቃስ ጎዛና ሻፋ ማታን፥ አትዳይሳታ ሜዶና ካታማታን ዎꬅስ።
2KI 17:7 ሀይስ ኡባይ ሀንዳይ፥ እስራኤለ አሳይ ጎዳ ባንታ ፆሳ ቦላ፥ ኤንታ ግብፀፈ፥ ግብፀ ካዋ ኩሸፐ ከስዳይሳ ቦላ ናጋራ ኦꬅዳ ግሾሳ። ቃስ ኤንቲ ሀራ ፆሳታስ ጎይንድ፥
2KI 17:8 ጎዳይ ኤንታ ስንꬃፈ ጎድድ ከስዳ ሀራ ካዎተꬃታ ዎጋ ካልዳ ግሾሳ። ሄሳ ቦላ ቃስ እስራኤለ ካዎት ዶምዳ ኢታ ዎጋ ካልዳ ግሾሳ።
2KI 17:9 እስራኤለ አሳይ ጎዳ ባንታ ፆሳ ቦላ ጌማን ኢታባ ኦꬅዶሶና፤ ጉꬃ ሞꬃፈ ብድ፥ ግታ ካታማ ጋካናዉ ደእያ በሳ ኡባን ባንታዉ ꬎቃ ጎይኖ በሳታ መꬍዶሶና።
2KI 17:10 ቃስ ኤንቲ ኤቃ ሹቻታነ አሼራ ጌተትያ ፆሰ ምስለታ ዙማ ሁጰ ኡባንነ ዳሻ ምꬃ ኡባ ጋርሳን ኤስዶሶና።
2KI 17:11 ጎዳይ በን ኤንታ ስንꬃፈ ጎድድ ከስዳ አላጋ አሳይ ኦꬅዳይሳዳ፥ ꬎቃ በሳ ኡባን እፃነ ጩይስዶሶና። ኤንቲ ኢታባ ኦꬅድ ጎዳ ሀንቀꬅዶሶና።
2KI 17:12 ጎዳይ ኤንታ፥ “ጎይኖፍተ” ያግዳ ኤቃ ጎይንዶሶና።
2KI 17:13 ጎዳይ እስራኤለ አሳነ ይሁዳ አሳ ባ ናበታ ባጋራነ ቆንጨꬅ በእያ ኡባ ባጋራ፥ “ህንተ ኢታ ኦግያፐ ስምተ፤ ታኒ ናበታ፥ ታ አይለታ ባጋራ፥ ህንተ አዋት ኪተታናዳ እምዳ ህግያን ፃፈትዳ ዎጋነ አዋጁዋ ናግተ” ያግስ።
2KI 17:14 ሽን ኤንቲ ስኦና እፅዶሶና። ጎዳ ባንታ ፆሳ አማነትቦና ባንታ አዋታዳ ሞርገ ምንꬅዶሶና።
2KI 17:15 ኤንቲ እያ ዎጋ፥ እ ኤንታ አዋታራ ጫቅዳ ጫቁዋነ እያ ናግሱዋ ካꬍዶሶና። ኤንቲ ላፋ ኤቃታ ጎይንድ፥ ባንታ ሁጰንካ ላፋ ግድዶሶና። ጎዳይ ኤንታ፥ “ህንተ ዩሹዋን ደእያ አላጋ አሳይ ኦይሳዳ ኦꬆፍተ” ያግዳ ኪታ እፅድ፥ ኤንታ ደኡዋ ዎጋ ካልዶሶና።
2KI 17:16 ጎዳ ባንታ ፆሳ ኪታ ኡባ አጋግዶሶና። ማር ዳንያ፥ ናምኡ ጎይኖ ምስለታነ አሼራ ጌተትያ ኤቃ ምስልያ መꬍዶሶና። ሳሎን ደእያ ፆልንቶ ኡባ ጎይንዶሶናነ ባኣለ ኤቃ ሀጋዝዶሶና።
2KI 17:17 ኤንቲ ባንታ አደ ናይታነ ማጫ ናይታ ታማ ግዶራ አꬅዶሶና። ማሮታነ ሞይትለ ፄገይሳታ ዞረ ኦይችዶሶና። ሄሳ መላ ኢታባ ኦꬃናዉ ባንታና ባይዝድ፥ ጎዳ ሀንቀꬅዶሶና።
2KI 17:18 ሄሳ ግሾ፥ ጎዳይ እስራኤለ ቦላ ሀንቀትድ ኤንታ ባ ስንꬃፈ ድግን፥ ይሁዳ ኮቻ ፃላል አትስ።
2KI 17:19 ቃስ ይሁዳ አሳይካ፥ ጎዳ ባንታ ፆሳ ኪታ ናግቦኮና፤ ኤንቲ እስራኤለ አሳ ዎጋ ካልዶሶና።
2KI 17:20 ሄሳ ጋሶን፥ ጎዳይ እስራኤለ ኮቻታ ኡባ አጋግስ። እ ኤንታ ኡንኤꬅድ፥ ባ ስንꬃፈ ድጋና ጋካናዉ፥ ቦንቅያ አሳ ኩሸን የግስ።
2KI 17:21 ጎዳይ እስራኤለ አሳ ዳዊታ ኮቻ ካዎተꬃፈ በን ሻክዳ ዎደ፥ እስራኤለ አሳይ ናባፃ ናኣ እዮርባማ ባንታዉ ካዎꬅዶሶና። ሄሳፈ ጉየ፥ እስራኤለ አሳይ ጎዳ ካሎናዳ እዮርባም ድግስ፤ እ ኤንታ ግታ ናጋራ ኦስስስ።
2KI 17:22 እስራኤለ አሳይ እዮርባም ኦꬅዳ ናጋራ ኡባ ኦꬅዶሶና፤ እያፐ ስምቦኮና።
2KI 17:23 ጎዳይ ናበታ፥ ባ አይለታ ኡባ ባጋራ ካሰ ኦድዳይሳዳ ኤንታ ባ ስንꬃፈ ድግስ። እስራኤለ አሳይ ባንታ የለትዳ ቢታፈ ድኤትድ፥ አሶረ ቢታ ብድ፥ ሀች ጋካናዉ ያን ደእዶሶና።
2KI 17:24 አሶረ ካዎይ ባብሎነ ቢታን ደእያ ኩታ፥ አዋና፥ ሀማታነ ሳፋርዋይማ ካታማታን ደእያ አሳ ኤህድ፥ እስራኤለ አሳ በሳን፥ ሳማረ ካታማታን ዎꬅስ። ኤንቲ ሄ ካታማታ ኦይክድ፥ ያን ደእዶሶና።
2KI 17:25 ኤንቲ ኮይሮ ያን ዱሱ ዶምዳ ዎደ፥ ጎዳ ጎይንቦኮና። ሄሳ ጋሶን፥ ጎዳይ ኤንታ ግዶ ጋሞታ የድን፥ ጋሞት ኤንታ ግዶፈ ባጋታ መንረꬅድ ዎꬍዶሶና።
2KI 17:26 ያትን፥ አሶረ ካዋስ፥ “ኔኒ ኤሀዳ ሳማረ ካታማታን ዎꬅዳ አሳይ፥ ሀ ቢታ ፆሳ ዎጋ ኤሮኮና። ሄኮ፥ ያትን፥ ኤንታ መንረꬅ ዎꬍያ ጋሞታ ኤንታ ቦላ የድስ” ያግድ ኦድዶሶና።
2KI 17:27 አሶረ ካዎይ፥ “ህንተ ሳማረፐ ድእድ ኤህዳ ካህነታፐ እሱዋ ዛሪድ፥ ያ የድተ። እ ያ ብድ፥ ሄ ቢታ ፆሳ ዎጋ ኤንታ ታማርሶ” ያግድ ኪትስ።
2KI 17:28 ሄሳ ግሾ፥ ሳማረፐ ድእድ ኤህዳ ካህነታፐ እሶይ ቤተለን ዳናዉ ይድ፥ ጎዳ ጎይኖ ዎጋ ኤንታ ታማርስስ።
2KI 17:29 ግዶሽን፥ ሳማረን ኡትዳ አሳይ ባንታዉ ጎይንያ ኤቃ ምስለታ ባ ደእያ በሳን በሳን መꬍዶሶና። ኤንቲ ደእያ ካታማታን፥ ካሰ ባንታዉ ኬፅዳ ꬎቃ ጎይኖ በሳታን ኤፍድ ዎꬅዶሶና።
2KI 17:30 ሄሳዳ ኦꬅድ፥ ባብሎነ አሳይ ሱኮት-ባኖባ ጌተትያ ኤቃ ምስለታ መꬍዶሶና። ኩታ አሳይ አርጋላ ጌተትያ ኤቃ ምስለታ መꬍዶሶና። ሀማታ አሳይ እስማታ ጌተትያ ኤቃ ምስለታ መꬍዶሶና።
2KI 17:31 አዋዋ አሳይ አልባዛራነ ታርታቃ ጌተትያ ኤቃ ምስለታ መꬍዶሶና። ሳፋርዋይማ አሳይ ቃስ አድራመለክነ አናመለካ ጌተትያ ባንታ ፆሳታስ ባንታ ናይታ ታማን ፁግድ ያርሽዶሶና።
2KI 17:32 ኤንቲ ጎዳ ጎይንዶሶና፤ ሽን ባንታ ግዶፈ ዱማ ዱማ አሳ ዶርድ፥ ꬎቃ ጎይኖ በሳታን ካህነ ኦꬅድ ሹምዶሶና።
2KI 17:33 ኤንቲ ጎዳ ጎይንዶሶና፤ ግድኮካ፥ ባንታ ይዳ ቢታ ቢታ አሳ ሜዝያ ካልድ፥ ባንታ ፆሳታካ ጎይንዶሶና።
2KI 17:34 ኤንቲ ሀች ጋካናዉ ካሰ ሜዘትዳይሳዳ ኦꬆሶና። ኤንቲ ቱማ ጎዳ ጎይኖኮና ዎይኮ ጎዳይ እስራኤለ ግድ ሱንꬅዳ ያይቆባ ዘረꬃስ እምዳ አዋጁዋነ ዎጋ፥ ህግያነ ኪታ ናጎኮና።
2KI 17:35 ጎዳይ እስራኤለ አሳራ በን ጫቅዳ ዎደ፥ ኤንታ ሀይሳዳ ያግድ ኪትስ፤ “ሀራ ፆሳታ ጎይኖፍተ፤ ኤንታዉ ጉልባቶፕተ፤ ኤንታዉ ኦꬆፍተ ዎይኮ ኤንታዉ ያርሾፍተ።
2KI 17:36 ሽን ግብፀፈ ህንተና ባ ግታ ዎልቃንነ ባ ምጨትዳ ኩሸን ከስዳ ጎዳስ ኦꬅተ፤ እያዉ ጉልባትተ፤ እያዉ ያርሾ ያርሽተ።
2KI 17:37 ጎዳይ ህንተዉ ፃፍዳ አዋጁዋነ ዎጋ፥ ህግያነ ኪታ ኡባ ዎደ ናግተ፤ ሀራ ፆሳታ ጎይኖፍተ።
2KI 17:38 ታኒ ህንተራ ጫቅዳ ጫቁዋ ዶጎፕተ፤ ሀራ ፆሳታ ጎይኖፍተ።
2KI 17:39 ሄሳ አግድ፥ ጎዳ ህንተ ፆሳ ጎይንተ። ህንተ ሞርከታ ኡባፈ ህንተና አሻናይ ታና” ያግድ ኪትስ።
2KI 17:40 ሽን ኤንቲ እያዉ ኤሮ ጎና እፅድ፥ ካሰ ባንታ ሜዝያ ካልዶሶና።
2KI 17:41 ሄ አሳት ጎዳ ጎይንሸካ፥ እስ ባጋራ ባንታ ኤቃ ምስለታ ጎይኖሶና። ሀች ጋካናዉ ኤንታ ኮቻይ ኤንታ አዋት ጎይነይሳዳ ጎይንሸ ደኦሶና።
2KI 18:1 ኤላ ናአይ ሆሰይ እስራኤለን ካዎትዳ ሄꬓንꬆ ላይꬃን፥ ይሁዳ ካዋ አካዛ ናአይ ህዝቅያስ ይሁዳን ካዎትስ።
2KI 18:2 እ ካዎትያ ዎደ ላይꬅ እያዉ ላታማነ እቻሻ፤ የሩሳላመን ላታማነ ኡዱፉን ላይꬅ ካዎትስ። እያ አየ ሱንꬃይ አብያ ጌተቴስ፤ እያ ዛካርያሳ ናእዉ።
2KI 18:3 እያ ማይዛይ ዳዊቲ ኦꬅዳይሳዳ፥ ህዝቅያስ ጎዳ ስንꬃን ሱረባ ኦꬅስ።
2KI 18:4 አሳይ ꬎቃ ጎይኖ በሳታ ድግስ። ኤቃ ቱሳታ መንረꬅስ። አሼራ ጌተትያ ፆሰ ምስልያ ቃንፅ የግስ። ቃስ ሙሰይ ናሰ ብራታፐ መꬍዳ፥ ናሁሽታና ጌተትያ ሾሻ ምስልያ መንረꬅስ። ሄ ዎደይ ጋካናዉ እስራኤለ አሳይ እያዉ እፃነ ጩይስሸ ጋምእስ።
2KI 18:5 ህዝቅያስ ጎዳ እስራኤለ ፆሳ አማንስ፤ ይሁዳ ካዎታ ኡባ ግዶን እያ መላ ካዎይ እያፐ ካሰ ግድን፥ እያፐ ጉየ ግድን በንትቤና።
2KI 18:6 እ ጎዳራ ኦይከትስ፤ ጎዳ ካሎ አግቤና፤ ጎዳይ ሙሰ ኪትዳ ኪታታ ናግስ።
2KI 18:7 ጎዳይ እያራ ግድስ፤ እ ኦꬅያባ ኡባይ እያዉ እንጀትስ። እ አሶረ ካዋ ቦላ ማካልድ፥ እያዉ ሃረቶና እፅስ።
2KI 18:8 እ፥ ፍልስፄመ አሳ ኦልድ ጉꬃ ሞꬃታፐ ብድ፥ ግታ ካታማ ጋካናዉ፥ ጋዛነ እያ ዩሾን ደእያ ቢታት አቶና ኤንቲ ደእያ በሳታ ኡባ ፆንስ።
2KI 18:9 ካዎይ ህዝቅያስ ካዎትዳ ኦይዳንꬆ ላይꬃን፥ ኤላ ናአይ እስራኤለ ካዎይ፥ ሆሰይ ካዎትዳ ላፑንꬆ ላይꬃን፥ አሶረ ካዎይ ሳልምናሶር እስራኤለ ቦላ ደንድድ፥ ሳማረ ካታማ ተቅስ።
2KI 18:10 ሄꬓንꬆ ላይꬅ ሳማረ ካታማ ፆንስ። ያትን፥ ህዝቅያስ ካዎትዳ ኡሱፑንꬆ ላይꬃን፥ እስራኤለ ካዎይ ሆሰይ ካዎትዳ ኡዱፉንꬆ ላይꬃን፥ ሳማረ ካታማይ ፆነትስ።
2KI 18:11 አሶረ ካዎይ እስራኤለ አሳ አሶረ ቢታ ኤፍድ፥ ኤንታፈ ባጋ አላሀንነ አቦራ ካታማታን፥ ባጋ አጎዛ ሻፋ ማታን ባጋ ቃስ ሜዶና ካታማታን ዎꬅስ።
2KI 18:12 ሄስካ ኤንቲ ጎዳስ ባንታ ፆሳስ ኪተቶና እፅድ፥ ጎዳ ጫቁዋ፥ ጎዳ አይለይ፥ ሙሰይ ኪትዳ ኪታ ኡባ መንꬅዳ ግሾሳ። ኤንቲ እያ ኪታ ስአናዉነ ኪተታናዉ ኮይቦኮና።
2KI 18:13 ካዎይ ህዝቅያስ ካዎትዳ ታማነ ኦይዳንꬆ ላይꬃን፥ አሶረ ካዎይ ሳናክሬም ግምበትዳ ይሁዳ ካታማታ ኡባ ኦልድ ኦይክስ።
2KI 18:14 ያትን፥ ይሁዳ ካዎይ ህዝቅያስ ላክሶ ካታማን ደእያ አሶረ ካዋ ሳናክሬማስ ኪታ የድድ፥ “ታኒ ባላስ፤ ሀያና ታ ቢታ የዳዳ ከያ። ኔኒ ታና ኦይችዳባ አይባካ ታ ነዉ እማና” ያግስ። አሶረ ካዎይ፥ ይሁዳ ካዋ ህዝቅያሳኮ፥ “ኔኒ 10,000 ክሎ ግራመ ብራነ 1,000 ክሎ ግራመ ዎርቃ ታዉ የዳ” ያግስ።
2KI 18:15 ህዝቅያስ ፆሳ ኬꬃን፥ ካዎ ጋꬎን ሻሎ ምንጅያ በሳን ደእያ ብራ ኡባ እያዉ የድስ።
2KI 18:16 ሄ ዎደ ይሁዳ ካዎይ ህዝቅያስ፥ ፆሳ ኬꬃ ፐንግያ ሳንቃታ ትይዳ ዎርቃነ እ ባ ሁጰን ፐንገ ቱቀታ ትይዳ ዎርቃ ቃርድ፥ አሶረ ካዋስ የድስ።
2KI 18:17 አሶረ ካዎይ፥ ታርታና፥ ራፌሳነ ራስፋቅሳ ጌተትያ ሄꬑ ቶራ ሞጮናታ፥ ዳሮ ኦላንቾታራ ላክሶ ካታማፐ ካዋ ህዝቅያሳኮ የሩሳላመ የድስ። ኤንቲ ብድ፥ የሩሳላመ ጋክድ፥ ማኦ ሜጭያ አድያ ጋደ ኤፍያ ኦግያፐ ቆሞ ባጋራ ደእያ፥ ዳጋትዳ ሃꬃይ ጎግያ ዛራ ላንቀን ኤቅዶሶና።
2KI 18:18 ኤንቲ ካዋ ፄግን፥ ካዎ ጋꬎ አዋተꬃን አይስያ ካልቀ ናአይ ኤልያቄም፥ ዋና ፃፈይ ሳምናስነ አሳፋ ናአይ ታርከ ፃፈይ ዮኣስ እያኮ ካረ ከይዶሶና።
2KI 18:19 አሶረታ ሀላቃይ፥ “ህዝቅያሳስ ሀይሳዳ ያግድ ኦድተ። አሶረ ካዎይ፥ ዎልቃማይ ነና ሀይሳዳ ያጌስ፤ ‘ኔኒ አይብን አማነታዲ?
2KI 18:20 ኦላ ኦለታናዉ ነዉ ጭንጫተꬅነ ዎልቅ ደኤስ ያጋሳ። ሽን ኔኒ አይብን አማነታዳ ታ ቦላ ሀይሳ ማካላዲ?
2KI 18:21 ሄኮ፥ ኔኒ ግብፀ ካዎይ ማዳና ጋዳ ቆፕያባ ግድኮ፥ መቅዳ ማይረ ፃምአን ካትያ አሳ መላ። ፃምአይ መቅን፥ ፕንጮይ ኩሸ ጫደስነ ማዱንፅሴስ። ግብፀ ካዎይ ባናን አማነትያ አሳ ኡባስ ሄሳ መላ’ ” ያግስ።
2KI 18:22 ሽን ኔኒ፥ “ኑኒ ጎዳን ኑ ፆሳን አማነቶስ” ያግኮ፥ ህዝቅያስ፥ ይሁዳ አሳነ የሩሳላመ አሳ፥ “ህንተ የሩሳላመን ደእያ ያርሾ በሳን ጎይናናዉ ኮሼስ” ግድ፥ ꬎቃ ጎይኖ በሳታነ ያርሾ በሳታ ድግዳይ እያ ግደኔ?
2KI 18:23 ሀእ ሃያ፤ ታ ጎዳ አሶረ ካዉዋራ ማንደታ። ኔኒ ቶጋናዉ ዳንዳእያ፥ ግድያ አስ ደምኮ፥ ናምኡ ሙኩሉ ፓራታ ታኒ ነዉ እማና።
2KI 18:24 ኔኒ፥ “ግብፀት ፓራ አሳታነ ፓራ ጋረታ ታዉ የዳና” ጋዳ አማንኮ፥ ታ ጎዳ ቶራ ሞጮናታፐ እስ ጉꬃካ ዛራናዉ ዳንዳአካ።
2KI 18:25 ሄሳ ቦላ ቃስ፥ ታኒ ሀእ ቱማ ጎዳ ኪት ባይና ሀ ቢታ ꬋይሳናዉ ኮያድና? ጎዳይ ባ ሁጰን ታና፥ “ሄ ቢታ ባዳ፥ ኦላዳ ꬋይሳ” ያግስ።
2KI 18:26 ሄሳፈ ጉየ፥ ካልቀ ናአይ ኤልያቄም፥ ሳምናስነ ዮኣስ አሶረታ ቶራ ሞጮናኮ ሀይሳዳ ያግዶሶና፤ “ኑኒ ብርሸꬅ ኤርያ ግሾ፥ ሀያና ኑስ ነ አይለታስ አራምከ ዶናን ኦዳ። ድርሳ ግምብያ ሁጰ ሶን ደእያ አሳይ ስኦና መላ፥ እብራወꬆ ዶናን ኦዶፓ” ያግዶሶና።
2KI 18:27 ሽን ቶራ ሞጮናይ ዛሪድ፥ “ሀ ቃላ ታኒ ህንተዉነ ህንተ ጎዳ ፃላላስ ኦዳናዉ ታ ጎዳይ ታና ኪትደዬ? ህንተራ እስፈ ባንታ ሽአ ማናዉነ ባንታ ሼሻ ኡያናዉ ደእያ፥ ሀ ድርሳ ግምብያ ቦላ ኡትዳ አሳ ኡባሳ ግደነዬ?” ያግስ።
2KI 18:28 አሶረ ቶራ ሞጮናይ ደንድ ኤቅድ፥ ባ ቃላ ꬎቁ ኦꬅድ፥ እብራወꬆ ዶናን ሀይሳዳ ያግስ፤ “አሶረ ካዎይ ዎልቃማይ ህንተና ግያባ ስእተ!
2KI 18:29 ካዎይ ህንተኮ ሀይሳዳ ያጌስ፤ ‘ህዝቅያስ ህንተና ጭሞፎ፤ እ ህንተና ታ ኩሸፐ ከስ ኤካናዉ ዳንዳኤና።
2KI 18:30 ጎዳይ ቱማ ኑና አሻና፤ ሀ ካታማይካ አሶረ ካዋ ኩሸን ገለና’ ያግድ ህንተ ጎዳን አማነታና መላ ኦꬆፎ” ያጌስ።
2KI 18:31 ህንተ ህዝቅያስ ኦድያባ ስኦፕተ። አሶረ ካዎይ፥ “ታራ ስገትተ፤ ሃ ታኮ ከይተ። ህንተ ኡባይ ህንተ ዎይንያፐነ ህንተ ባላስያፐ ማና፤ ህንተ ቦክዳ ኦላፈ ሃ ኡያና።
2KI 18:32 ታኒ ያዳ፥ ህንተና ህንተ ቢታ ዳንያ ቢታ ኤፋና። ሄ ቢታይ ካꬅነ ዎይነይ፥ ኡይꬅነ ዎይነ ጋደይ ኩምዳ ቢታ፤ ሻማሆ ዛይተይነ ኤስ ኩምዳ ቢታ። ህንተ ታዉ ኪተትኮ፥ ደኦን ዳና፤ ሀይቀከታ። ህዝቅያስ፥ ‘ጎዳይ ኑና አሻና’ ያግድ ህንተና ጭመይሳ ስኦፕተ።
2KI 18:33 ሀራ ካዎተꬃታ ፆሳታፐ ባ ቢታ አሶረ ካዋ ኩሸፐ አሽዳ ፆሲ ደኢ?
2KI 18:34 ሀማታ ፆሳትነ አርፋዳ ፆሳት አዉን ደኦና? ሳፋርዋይማ፥ ሄናነ እዋ ፆሳት አዉን ደኦና? ኤንቲ ሳማረ ታ ኩሸፐ ከስ ኤክዶና?
2KI 18:35 ሀ ቢታታ ፆሳታ ኡባ ግዶን፥ ባ ቢታ ታ ኩሸፐ አይ ፆሲ አሽዳሽን፥ ጎዳይ የሩሳላመ ታ ኩሸፐ አሻኔ?” ያግስ።
2KI 18:36 ካዎይ ካሰ፥ “ኤንታዉ አይኮካ ዛሮፕተ” ያግድ ኦድዳ ግሾ፥ አሳይ እስ ቃላካ ዛሮና ስእ ግዶሶና።
2KI 18:37 ካልቀ ናአይ ካዎ ጋꬎ አዋተꬃን አይስያ ኤልያቄም፥ ዋና ፃፈይ ሳምናስነ ታርከ ፃፈይ አሳፋ ናአይ ዮኣስ ባንታ ማኡዋ ዳክድ፥ ህዝቅያሳኮ ብድ፥ አሶረታ ቶራ ሞጮናይ ግዳባ ኡባ እያዉ ኦድዶሶና።
2KI 19:1 ካዎይ ህዝቅያስ ሄሳ ስእዳ ዎደ፥ ባ ማኡዋ ዳክድ፥ ካዮ ማኦ ማእድ፥ ፆሳ ኬꬅ ገልስ።
2KI 19:2 ካዎ ጋꬎ አዋተꬃን አይስያ ኤልያቄም፥ ዋና ፃፈይ ሳምናስነ ጭማ ካህነት ካዮ ማኦ ማእድ፥ አሞፀ ናኣ ናብያ እሳያሳኮ ባና መላ ኪትስ።
2KI 19:3 ኤንቲ እሳያሳኮ ብድ፥ “ህዝቅያስ ሀይሳዳ ያጌስ፤ ‘ሀች ጋላሳይ መቶ ጋላስ፥ ሴራ ጋላስነ ዬላ ጋላስ። ሄስካ ናእ የለታናዉ ዎደይ ጋክን፥ ባናካዳ የላናዉ ዎልቅ ꬋይዳ ማጫሳ መላ።
2KI 19:4 ደኦ ፆሳ ጫያና መላ፥ እያ ጎዳይ፥ አሶረ ካዎይ፥ ኪትዳ ቶራ ሞጮና ቃላ ኡባ፥ ጎዳይ ነ ፆሳይ ስኦና አገና። ቃስ ጎዳይ፥ ነ ፆሳይ ሄ ስእዳ ቃላ ጋሶን እያ ሴሮና አገና። ሄሳ ግሾ፥ ኑ አሳ ግዶፈ ፓላህድ አትዳይሳታስ ዎሳ’ ” ያግዶሶና።
2KI 19:5 ካዋ ህዝቅያሳ አይለት እሳያሳኮ ብዳ ዎደ፥
2KI 19:6 እሳያስ ኤንታ ሀይሳዳ ያግስ፤ “ህንተ ጎዳስ ሀይሳዳ ያግድ ኦድተ፤ ‘አሶረ ካዋ አይለት ታና ጫይሽን፥ ኔኒ ስእዳ ጫሻ ቃላስ ያዮፋ።
2KI 19:7 ሄኮ፥ ታኒ እያ ግዶ እስ አያና የዳና፤ እ ሄ ዎርያ ስእድ ባ ቢታ ስማና። እ ባ ቢታ ብድ፥ ያን ማሻን ሀይቃናዳ ኦꬃና’ ” ያግስ።
2KI 19:8 አሶረ ካዎይ ላክሶ ካታማፐ ደንድድ ብዳይሳ አሶረታ ቶራ ሞጮናይ ስእድ፥ ጉየ ስሚድ ካዎይ ልብና ካታማን ኦለተይሳ ደምስ።
2KI 19:9 ካዎይ ሳናክሬም፥ “ሄኮ፥ ቶጰ ካዎይ ትርሃቅ ነና ኦላናዉ ይስ” ግያ ዎርያ ስእድ፥ ህዝቅያሳስ ሀይሳዳ ያግድ ኪትስ።
2KI 19:10 “ይሁዳ ካዋዉ ህዝቅያሳ፥ ኔኒ አማነትያ ፆሳይ፥ ‘የሩሳላመይ አሶረ ካዋ ኩሸን ገለና’ ያግድ ጭሞፎ።
2KI 19:11 አሶረ ካዎት ቢታ ኡባ ꬋይስድ፥ ኦꬅዳባ ኔኒ ስአዳሳ። ያትን፥ ኔኒ አታና ዳኒ?
2KI 19:12 በን ታ ማይዛት ꬋይስዳ ቢታ ፆሳት፥ ሄሳትካ፥ ጎዛና፥ ካራነነ ራፌሳ ቢታ ፆሳትነ ታላሳራን ደእያ ኤደነ ፆሳት ሄ ቢታ ꬋዮፐ አሽዶና?
2KI 19:13 ሀማታ ካዎይ፥ አርፋዳ ካዎይ፥ ሳፋርዋይማ ካዎይ፥ ሄና ካዎይነ እዋ ካዎይ አዉን ደኦና?” ያግድ ኪትስ።
2KI 19:14 ህዝቅያስ ዳብዳብያ ኪተትዳ አሳፐ ኤክድ ናባብስ። ዳብዳብያ ፆሳ ኬꬅ ኤፍድ፥ ጎዳ ስንꬃን ምጭስ።
2KI 19:15 ያትድ፥ ጎዳ ሀይሳዳ ያግድ ዎስስ፤ “አቤት ጎዳዉ፥ ክሩበታፐ ግዶን ኡትያ እስራኤለ ፆሳዉ፥ ሳኣ ካዎተꬃታ ኡባ ቦላ ነ ፃላል ፆሰ፤ ሳሉዋነ ሳኣ ኔኒ መꬋዳሳ።
2KI 19:16 አቤት ጎዳዉ፥ ነ ሀይꬃ ሃ ዛራዳ ስአ። አቤት ጎዳዉ፥ ነ አይፍያ ዶያዳ ፄላ። ነና፥ ደኦ ፆሳ ጫያናዉ ሳናክሬም የድዳ ቃላ ስአ።
2KI 19:17 አቤት ጎዳዉ፥ አሶረ ቢታ ካዎት ካዎተꬃታነ ኤንታ ቢታ ꬋይሰይስ ቱማ።
2KI 19:18 ኤንታ ፆሳታ ታማን ፁግድ ꬋይስዶሶና፤ ኤንታ ፆሳት ካሰካ አሳ ኩሸይ ማስድ ከስዳ ምꬅነ ሹቹ ግድያ ግሾ፥ ቱማ ፆሳታ ግዶኮና፤ ሄሳ ግሾ፥ ኤንቲ ኤንታ ꬋይስዶሶና።
2KI 19:19 አቤት ጎዳዉ፥ ነ ፃላል ፆሰ ግደይሳ ሳኣ ካዎተꬃት ኡባይ ኤራና መላ፥ ሀእ ዛራዳ፥ ጎዳዉ፥ ኑ ፆሳዉ፥ ኔኒ ኑና እያ ኩሸፐ አሻ” ያግድ ዎስስ።
2KI 19:20 ሄሳፈ ጉየ፥ አሞፀ ናአይ እሳያስ ህዝቅያሳኮ ሀይሳዳ ያግድ ኪትስ፤ “ጎዳይ እስራኤለ ፆሳይ ሀይሳዳ ያጌስ። ኔኒ አሶረ ካዋ ሳናክሬማ ጋሶን ታና ዎስዳ ዎሳ ስአስ።”
2KI 19:21 ጎዳይ ሳናክሬማባ ሀይሳዳ ያጌስ። “ፅዮነ ጌላእያ ነና ካꬋዉሱ፤ ነና ቦራዉሱ፤ የሩሳላመ ማጫ ናእያ ባ ሁጵያ ቃꬅዳ ነና ቀልቅሳዉሱ።
2KI 19:22 ኔኒ ጫይዳይነ ቶችዳይ ኦኔ? ኔኒ ነ ቃላ ኦደ ቦላ ꬎቁ ኦꬃዲ? ኦቶሮን ꬎቁ ጋዳ ኦና ፄላዲ? ሄሳ ኔኒ ኦꬅዳይ ታ ቦላ፥ እስራኤለ ጌሻ ቦላ ግደነ!
2KI 19:23 ኔኒ ኪትዳ አሳ ባጋራ ጎዳ ጫያዳሳ። ቃስ ሀይሳዳ ያጋዳሳ፤ ታኒ ታዉ ደእያ ዳሮ ፓራ ጋረታን ꬎቃ ደረታ ሁጰ፥ ልባኖሰ ዙማ ሁጵያ ከያስ። ከያዳ ኡባፈ አዱቅያ ዝጋታነ ኡባፈ ሎእያ ፂዳታ ቃንፃስ። ታኒ እያዉ ዉርሰꬃ ጋፃነ ስክዳ ዎራ ጋካስ።
2KI 19:24 ታኒ አላጋ ቢታታን ሃꬃ ኦላ ቦካዳ፥ ሃꬃ ያፐ ኡያስ። ግብፀ ቢታን ጎግያ ሃ ኡባ ታኒ ታ ቶሁዋን የꬋዳ መልሳስ” ያጋዳሳ።
2KI 19:25 “ዳሮ ዎደፐ ካሰ ኔኒ ግምበትዳ ካታማታ ላላዳ፥ ላለꬃ ዶረ ከሳና መላ፥ ታኒ ቆፋ ቃችዳይሳ ኔኒ ስአብኪ? ታኒ ሀእ ፖልያ ሀልቾታ በን ሀልቻ ዎꬃስ።
2KI 19:26 ሄሳ ግሾ፥ ኤንታ አሳስ ዎልቅ እፅን፥ ኤንቲ ካዉይዶሶናነ ዬላትዶሶና። ኤንቲ ጋደ ማታ መላ፤ ጎሻን ሞክዳ ጫርሻ መላ። ኤንቲ ኬꬃ ሁጰን ዶልያ ሻራፋ መላ ካፆና ደእሽን፥ ሌገይ ምዳ ካꬃዳ ሀንዶሶና።
2KI 19:27 ሽን ኔኒ ኡትያ በሳ፥ ከይያነ ገልያ በሳ፥ ታ ቦላ ኔኒ ሸነትዳ ሸንያ ታኒ ኤራይስ።
2KI 19:28 ኔኒ ታ ቦላ ይሎትዳ ግሾነ ነ ኦቶሩዋካ ታኒ ስእዳ ግሾ፥ ታኒ ነ ሲꬍያን ዳፎ አꬃና፤ ነ ዶናን ብፃላ ባርሳና። ያታዳ ነ ይዳ ኦግያራ ታኒ ነና ጉየ ዛራና” ያግስ።
2KI 19:29 እሳያስ ካዋ ህዝቅያሳኮ ሀይሳዳ ያግስ፤ “ሀይስ ፖለታናይሳስ ማላታይ ሀይሳ፤ ሀ ላይꬅ ህንተ አሰቦ ካፅዳ ካꬅ ማና፤ ላይꬅ ቃስ ሀ ላይꬅ ካፅዳ አሰቦ ማና። ሽን ካልያ ላይꬅ ህንተ፥ ህንተዉ ዘርተነ ጫክተ፤ ዎይነ ቶክተነ እያ ሚተ።
2KI 19:30 ይሁዳ አሳፐ አትዳይሳት ፃጶ የድድ፥ አይፈ አይፍያ ምꬃ መላ ግዳና።
2KI 19:31 አትዳይሳት የሩሳላመፐ ከያና፥ ፓላህዳይሳት ፅዮነፐ ያና። ኡባፈ ዎልቃማ ጎዳ ምሻይ ሄሳ ኦꬃና።
2KI 19:32 “ሄሳ ግሾ፥ አሶረ ካዉዋባ ጎዳይ ሀይሳዳ ያጌስ፤ ‘አሶረ ካዎይ ሀ ካታማ ገለና፤ ዎይኮ ሀይሳን ባ ዶንገ ዱከና። እ ባ ጎንዳልያ ኦይክድ፥ ሀ ካታማ ስን አና፤ ዎይኮ ካታማ ዩሹዋ ቢታ ዶረን ተቀተና።
2KI 19:33 አሶረ ካዎይ ባ ይዳ ኦግያራ ጉየ ስማና፤ እ ሀ ካታማ ገለና። ታኒ ጎዳይ ሀይሳ ኦዳስ።’
2KI 19:34 ታኒ ታ ቦንቹዋ ግሾነ ታ አይልያ ዳዊታ ግሾ፥ ሀ ካታማ ተቃዳ አሻና” ያግስ።
2KI 19:35 ሄ ቃማ ጎዳ ኪታንቾይ ከይድ፥ አሶረ አሳይ ዱንካንዳ በሳን እስ ፄታነ ሆስፑን ታማነ እቻሹ ሙኩሉ አደታ ዎꬍስ። ያትን አሳይ ዎንታ ደንድድ በእያ ዎደ፥ ሄኮ፥ አህ ሄራን ኩምስ።
2KI 19:36 አሶረ ካዎይ ሳናክሬም ደንድድ፥ ጉየ ስም ብድ፥ ናናወ ካታማን ኡትስ።
2KI 19:37 እስ ጋላስ ሳናክሬም ባ ፆሳ ናሳራካ ኤቃ ኬꬃን ጎይንሽን፥ እያ ናይት አድራመለክነ ሳርሳር ማሻን እያ ዎꬍድ፥ አራራተ ቢታ ባቃትዶሶና። እያ ናአይ አስራዶን እያ በሳን ካዎትስ።
2KI 20:1 ሄ ዎደ ካዎይ ህዝቅያስ ሀርግድ፥ ሀይቃናዉ ማትስ። አሞፀ ናአይ ናበይ እሳያስ እያኮ ብድ፥ “ጎዳይ፥ ‘ኔኒ ነ ሀርግያፈ ፓፃካ፤ ነ ሀይቃና፤ ሄሳ ግሾ፥ ነ ኬꬃ ጊግሳ’ ” ያግስ።
2KI 20:2 ህዝቅያስ ጎዳኮ ስሚድ፥ ፆሳ ዎስስ።
2KI 20:3 “አቤት ጎዳዉ፥ ታኒ ነ ስንꬃን ቱማተꬃን፥ ኩመꬃ ዎዛናን ሄመትዳይሳነ ነና ኡፋይስያባ ኦꬅዳይሳ ኔኒ ቆፓና መላ ታኒ ነና ዎሳይስ” ያግድ፥ ዳሮ ጫመትድ፥ ዬክድ ዎስስ።
2KI 20:4 እሳያስ ካዋ ስንꬃፈ ከይድ፥ ካዎ ጋꬎ ዳባባ ካንꬅድ ቦና ደእሽን፥ ጎዳ ቃላይ ሀይሳዳ ያግሸ እያኮ ይስ።
2KI 20:5 “ጉየ ስማዳ ባዳ ታ አሳ ካለꬅያ ህዝቅያሳስ ሀይሳዳ ያጋዳ ኦዳ። ጎዳይ፥ ነ ማይዛ ዳዊታ ፆሳይ ሀይሳዳ ያጌስ፤ ‘ታኒ ነ ዎሳ ስአስ፤ ነ አፉꬃ በአስ። ሄኮ፥ ታኒ ነና ፓꬃና፤ ሄꬑ ጋላሳፐ ጉየ፥ ኔኒ ፆሳ ኬꬅ ባና።
2KI 20:6 ነ ላይꬃ ቦላ ታኒ ነዉ ታማነ እቻሹ ላይꬅ ጉጃና። ታኒ ነናነ ሀ ካታማ አሶረ ካዋ ኩሸፐ አሻና። ታኒ ታ ቦንቹዋ ግሾነ ታ አይልያ ዳዊታ ግሾ፥ ሀ ካታማስ ኦለታዳ አሻና’ ያጌስ” ያግስ።
2KI 20:7 እሳያስ፥ “ባላሰ ቴራ ዳፅድ፥ እያ ክፃ ቦላ ዎꬅተ፤ እ ፓፃና” ያግስ።
2KI 20:8 ህዝቅያስ እሳያሳ፥ “ጎዳይ ታና ፓꬃናይሳነ ታኒ ሄꬓንꬆ ጋላስ ፆሳ ኬꬃ ባናይሳስ ማላታይ አይቤ?” ያግድ ኦይችስ።
2KI 20:9 እሳያስ፥ “ጎዳይ ባ ግዳ ቃላ ፖላናዉ ነዉ ማላታ እማና። ህዛ ኔኒ ሀይሳታፐ አዉሳ ዶራይ? ኩያይ ታሙ ደꬃ ስንꬃ ባና መላ ኮያዬ? ታሙ ደꬃታ ጉየ ባና መላ ኮያይ?” ያግድ ኦይችስ።
2KI 20:10 ህዝቅያስ፥ “ኩያይ ስን ባናይስ መተና፤ ኩያይ ጉየ ስማናዳ ኦꬃ” ያግስ።
2KI 20:11 ናበይ እሳያስ ጎዳ ዎስን፥ ጎዳይ ካዎይ አካዝ ግምብስዳ ደꬃ ቦላ ሸምፕዳ ኩያይ ታሙ ደꬃ ጉየ ዛርስ።
2KI 20:12 ሄ ዎደ ባልዳና ናአይ፥ ባብሎነ ካዎይ፥ ማሮዳክ ባልዳን ህዝቅያስ ሀርግዳይሳ ስእዳ ግሾ፥ ዳብዳበነ እሞታ ህዝቅያሳስ የድስ።
2KI 20:13 ህዝቅያስ ኪተትድ ይዳ አሳታ ሞክስ። ባ ሻሎ ምንጅያ ኬꬃን ደእያ ብራ፥ ዎርቃ፥ ሳዉዋ፥ አልኦ ዛይትያ፥ ባ ኦላ ሚሽያነ ባ ሻሎ ምንጅያ ኬꬃን ደእያባ ኡባ ኤንታ በስስ። ባ ሶን ዎይኮ ባ ጋꬎን ደእያባ ኡባፈ ህዝቅያስ ኤንታ በሶና አግዳባይ አይብካ ባዋ።
2KI 20:14 ናበይ እሳያስ ካዋ ህዝቅያሳኮ ብድ፥ “ሀ አሳት ዎይግዶና? ኤንቲ አዉፐ ይዶና?” ያግድ ኦይችስ። ህዝቅያስ፥ “ኤንቲ ታኮ ሃሆ ቢታፈ፥ ባብሎነፐ ይዶሶና” ያግስ።
2KI 20:15 እሳያስ፥ “ኤንቲ ነ ሶን አይ አይ በእዶና?” ያግስ። ህዝቅያስ፥ “ኤንቲ ታ ጋꬎን ደእያ ኡባ በእዶሶና፤ ታ ሻሎ ምንጅያ ኬꬃን ደእያባፐ ታኒ ኤንታ በሳቦናባይ ባዋ” ያግስ።
2KI 20:16 እሳያስ ህዝቅያሳኮ፥ “ጎዳይ ግያባ ስአ።
2KI 20:17 ‘ሄኮ፥ ነ ጋꬎን ደእያባ ኡባይነ ነ ማይዛት ሀች ጋካናዉ ሺሽዳባ ኡባይ ድኤትድ፥ ባብሎነ ቢታ ባና ጋላስ ያና፤ እያፐ አይብካ አተና።
2KI 20:18 ቃስ ነዉ የለታና፥ ነ አሾነ ነ ሱꬁ ግድዳ ነ አደ ናይት ድኤትድ ብድ፥ ባብሎነ ካዎ ጋꬎን ሹፋ ግድድ ኦꬃና’ ” ያግስ።
2KI 20:19 ህዝቅያስ ዛሪድ፥ “ኔኒ ኦድዳ ጎዳ ቃላይ ሎኦ” ያግስ። ህዝቅያስ፥ “ታኒ ደእዳ ላይꬃን ሳሮይነ ዎፓተꬅ ዳና ግደነ” ያግድ ቆፕስ።
2KI 20:20 ህዝቅያስ ሀንዳ ሀራባይ፥ እያ ምኖተꬃይነ ሃꬃ ዜርድ፥ ቢታ ግዶራ ሃ ካታማ ገልስዳባይ ይሁዳ ካዎታ ታርከ ማፃፋን ፃፈትስ።
2KI 20:21 ህዝቅያስ ሀይቅድ፥ ባ ማይዛታን ጋሄትስ፤ እያ በሳን እያ ናአይ ምናሰይ ካዎትስ።
2KI 21:1 ምናሰይ ካዎትያ ዎደ እያዉ ላይꬅ ታማነ ናምአ፤ እ የሩሳላመን እሻታማነ እቻሹ ላይꬅ ካዎትስ፤ እያ አየ ሱንꬃይ ሄፍሴቦ።
2KI 21:2 ጎዳይ እስራኤለ አሳ ስንꬃፈ ጎድድ ከስዳ አሳታ ደኡዋ ዎጋ ካልድ፥ ምናሰይ ጎዳ ስንꬃን ኢታባ ኦꬅስ።
2KI 21:3 እያ አዋይ ህዝቅያስ ላልዳ፥ ꬎቃ ጎይኖ በሳታ እ ዛረድ ኬፅስ፤ እስራኤለ ካዎይ አካብ ኦꬅዳይሳዳ፥ ባኣለ ፆሳስ ያርሾ በሳታነ አሼራ ፆሰ ምስለታ መꬍስ። ቃስ ሳሎ ፆልንቶታ ኡባ ጎይንስ፤ ኤንታና ሀጋዝስ።
2KI 21:4 ጎዳይ፥ “ታኒ ታ ሱንꬃ የሩሳላመን ፄግሳና” ያግድ ኦድዳ ፆሳ ኬꬃን ሀራ ፆሳታስ ያርሾ በሳታ ጊግስስ።
2KI 21:5 ፆሳ ኬꬃን ደእያ ናምኡ ዳባባታን ሳሎ ፆልንቶታ ኡባስ ያርሾ በሳታ ጊግስስ።
2KI 21:6 ባ ናኣ ታማ ግዶራ አꬅስ። እ ባ ሁጰን ብታንቾነ ሙሩንያ አስ ግድድ፥ ማሮታነ ሞይትለታ ዞረ ኦይችስ። ጎዳ ስንꬃን ዳሮ ኢታባ ኦꬅድ፥ እያ ሀንቀꬅስ።
2KI 21:7 ማሰትድ ከይዳ አሼራ ፆሰ ምስልያ ኤህድ፥ ፆሳ ኬꬃ ግዶን ኤስስ። ሄ ፆሳ ኬꬃይ፥ ጎዳይ ዳዊታነ እያ ናኣ ሶሎሞነ፥ “እስራኤለ ዛረ ኡባ ግዶፈ ታኒ ዶርዳ ሀ ፆሳ ኬꬃን የሩሳላመን ታኒ ታ ሱንꬃ መርናዉ ፄግሳና።
2KI 21:8 እስራኤለ አሳ ታኒ ኪትዳ ኪታ ኡባነ ታ አይለይ ሙሰይ ኤንታዉ እምዳ ህግያ ኡባ ናግድ ኦꬅኮ፥ ታኒ ኤንታ ማይዛታስ እምዳ ቢታፈ ኤንታ ደንꬃዳ ꬋይስከ” ያግዳ ፆሳ ኬꬃ።
2KI 21:9 ሽን አሳይ ስኦናን እፅስ፤ ጎዳይ እስራኤለ አሳ ስንꬃፈ ꬋይስዳ ሀራ ካዎተꬃታፐ አꬍድ ኢታ ኦꬃና መላ ምናሰይ ኤንታ ባለꬅስ።
2KI 21:10 ጎዳይ ባ አይለ ግድዳ ናበታ ባጋራ ሀይሳዳ ያግስ፤
2KI 21:11 “ይሁዳ ካዎይ ምናሰይ ሀ ቱና ኦሱዋ ኦꬅስ፤ ባፐ ካሰ ደእዳ አሞረ አሳ ኡባ ናጋራፐ አꬍያ ኢታ ናጋራ ኦꬅስ። ይሁዳ አሳ ባ መꬍዳ ኤቃ ምስልያ ጎይንስድ፥ ናጋራ ኦስስስ።
2KI 21:12 ጎዳይ፥ እስራኤለ ፆሳይ ሀይሳዳ ያጌስ፤ ‘ሄኮ፥ ስእያ አሳ ኡባ ሀይꬃስ ኢትያ ꬋዮ የሩሳላመ ቦላነ ይሁዳ ቦላ ኤሀና ሀናይስ።
2KI 21:13 ሳማረ ቦላ የግዳ ዋꬋ ዎዶሩዋ፥ የሩሳላመ ቦላ የጋና፤ አካባ ሶ አሳ ቦላ የድዳ ቱምብያ፥ የሩሳላመ ቦላ የዳና። እስ አስ ከረ ሜጭድ ጉፋንꬅድ መልሰይሳዳ፥ ታኒ የሩሳላመ ቁቻዳ ጉፋንꬃና።
2KI 21:14 ታ አሳፐ አትዳይሳታ ታኒ የጋ አጋና፤ ታኒ ኤንታ ኤንታ ሞርከታ ኩሸን አꬃዳ እማና። ኤንታ ሞርከት ኡባይ ኤንታ ኦይካናነ ቦንቃና።
2KI 21:15 ኤንታ ማይዛት ግብፀፈ ከዮሶፐ ሀች ጋካናዉ፥ ኤንቲ ታ ስንꬃን ኢታባ ኦꬅዳ ግሾነ ታና ሀንቀꬅዳ ግሾ፥ ታኒ ሀይሳ ኦꬃና’ ” ያግስ።
2KI 21:16 ምናሰይ ይሁዳ አሳ፥ ጎዳ ስንꬃን ናጋራ ኦስስዳይሳ ቦላ ጉጅድ፥ ፅሎ አሳ ዎꬍስ፤ የሩሳላመ ጋፃፐ ጋፃ ጋካናዉ፥ ሱꬃን ኩንꬅስ።
2KI 21:17 ምናሰይ ሀንዳ ሀራባይ፥ እ ኦꬅዳባይ፥ እ ኦꬅዳ ናጋራይ ይሁዳ ካዎታ ታርከ ማፃፋን ፃፈትስ።
2KI 21:18 ምናሰይ ሀይቅድ፥ ባ ማይዛታን ጋሄትስ፤ ባ ጋꬉዋ ማታን ደእያ ኦዛ ጋደን ሞገትስ፤ እያ በሳን እያ ናአይ አሞን ካዎትስ።
2KI 21:19 አሞን ካዎትያ ዎደ፥ እያዉ ላይꬅ ላታማነ ናምአ፤ እ የሩሳላመን ናምኡ ላይꬅ ካዎትስ። እያ አየ ሱንꬃይ ማሱላሞ፤ እያ ዮፅባ አድያ ሀሩሰ ናአ።
2KI 21:20 እያ አዋይ፥ ምናሰይ ኦꬅዳይሳዳ፥ አሞነይካ ጎዳ ስንꬃን ኢታባ ኦꬅስ።
2KI 21:21 እ ባ አዋይ ሄመትዳ ኦግያን ሄመትስ፤ ባ አዋይ ኦꬅዳ ኤቃታስ እካ ኦꬅስ፤ ኤንታ ጎይንስ።
2KI 21:22 ጎዳ፥ ባ ማይዛታ ፆሳ አግስ፤ ጎዳ ኦግያን እ ሄመትቤና።
2KI 21:23 አሞነ ሹማት እያ ቦላ ማቀትድ፥ ካዎ ጋꬎን እያ ዎꬍዶሶና።
2KI 21:24 ሄሳፈ ጉየ፥ ይሁዳ አሳይ ካዋ አሞነ ቦላ ማቀትዳ ኡባታ ዎꬍዶሶና። አሞነ በሳን እያ ናኣ እዮስያሳ ካዎꬅዶሶና።
2KI 21:25 አሞን ሀንዳ ሀራባይነ እ ኦꬅዳባ ኡባይ ይሁዳ ካዎታ ታርከ ማፃፋን ፃፈትስ።
2KI 21:26 አሞን ኦዛ ጋደን ባ ዱፉዋን ሞገትስ፤ እያ በሳን እያ ናአይ እዮስያስ ካዎትስ።
2KI 22:1 እዮስያስ ካዎትያ ዎደ፥ እያዉ ላይꬅ ሆስፑና፤ እ የሩሳላመን ሀስታማነ እስ ላይꬅ ካዎትስ። እያ አየ ሱንꬃይ ይድዳ፤ እያ ባፁሮታ አድያ አዳያ ናአ።
2KI 22:2 እዮስያስ ጎዳ ስንꬃን ሱረባ ኦꬅስ፤ ኡሻች ሀድርስ ጎና ባ ማይዛ ዳዊታ ኦግያን ሄመትስ።
2KI 22:3 ካዎይ እዮስያስ ባ ካዎትዳ ታማነ ሆስፑንꬆ ላይꬃን፥ ማሱላማ ናኣ ናኣ፥ ኤዛላሳ ናኣ፥ ዋና ፃፍያ ሳፋና፥ ፆሳ ኬꬃን ሀይሳዳ ያግድ ኪትስ።
2KI 22:4 “አሳይ ፆሳ ኬꬅ ኤህን፥ ፆሳ ኬꬃ ፐንግያ ናገይሳት አሳፐ ሺሽዳ ሚሽያ ታይባናዳ፥ ካህነ ሀላቃ ካልቀኮ ባ።
2KI 22:5 ካህነ ሀላቃይ ሚሽያ ፆሳ ኬꬃ ኦራꬃናዉ ሀላቃታስ እማና መላ ኦዳ። ኤንትካ ፆሳ ኬꬃ ኦራꬅያ ኦሳንቾታስ፥
2KI 22:6 አናፀታስ፥ ግምበይሳትስነ ሹቹ ማሰይሳታስ ቃንፆ። ቃስ ፆሳ ኬꬃ ኦራꬃናዉ፥ ምꬅነ ቆኤትዳ ሹቹ ሻመይሳታስ ቃንፆ።
2KI 22:7 ኦሱዋ አዋተꬃን ፄለይሳት አማንꬅያ አስ ግድያ ግሾ፥ ኤንታ ኩሸን ገልዳ ሚሽያን አይ አይ ኦꬅዳኮ፥ ኤንታ ኦይቻናዉ ኮሸና” ያግስ።
2KI 22:8 ሄሳፈ ጉየ፥ ካህነ ሀላቃይ ካልቀይ ዋና ፃፍያ ሳፋናኮ፥ “ህገ ማፃፋ ፆሳ ኬꬃን ደማስ” ያግስ። ማፃፋ ሳፋናስ እምን ሳፋን ኤክድ ናባብስ።
2KI 22:9 ዋና ፃፈይ ሳፋን ካዋኮ ብድ፥ “ፆሳ ኬꬃን ደእያ ሚሽያ ነ ሹማት ኤክድ፥ ፆሳ ኬꬃ ኦራꬃናዉ ሀላቃታስ እምዶሶና” ያግስ።
2KI 22:10 ካልድ፥ ዋና ፃፈይ ሳፋን፥ “ካህነይ ካልቀይ ታዉ እምዳ ማፃፋ ሀይሳ በአ” ያግድ ካዋ ስንꬃን ማፃፋ ናባብስ።
2KI 22:11 ናባብን ካዎይ ህገ ማፃፋን ደእያ ቃላ ስእዳ ዎደ፥ አዛንድ ባ ማኡዋ ዳክስ።
2KI 22:12 ካዎይ፥ ካህንያ ካልቀ፥ ሳፋና ናኣ አክቃማ፥ ምክያሳ ናኣ አክቦራ፥ ዋና ፃፍያ ሳፋናነ ካዋ ኦሳንቹዋ አሳያ ሀይሳዳ ያግድ ኪትስ።
2KI 22:13 “ብድ፥ ታ ግሾ፥ ሀ አሳ ግሾነ ይሁዳ ኡባ ግሾ፥ ሀ በንትዳ ማፃፋ ቃላባ አነ ጎዳ ኦይችተ። ኑኒ ፃፈትዳ ኡባባ ኦꬃናዉ፥ ኑ ማይዛት ሀ ማፃፋ ቃላስ ኪተትቦና ግሾ፥ ኑ ቦላ ሱልዳ ጎዳ ሀንቆይ ዳሮ” ያግስ።
2KI 22:14 ያግን ካህነይ ካልቅያስ፥ አክቃም፥ አክቦር፥ ሳፋንነ አሳይ ማጫ ናብዉ ህልዳና ኦይቻናዉ ብዶሶና። ህልዳና ሀርሃሳ ናኣ ትቅዋ ናአ፥ ፆሳ ኬꬃ ማኡዋ ናግያ ሳሌማ ማቾ። እያ የሩሳላመን ናምአንꬆ ጉታን ደአውሱ። ሄ ብዳ አሳት ኢራ ኦደትዶሶና።
2KI 22:15 ህልዳና፥ “ጎዳይ እስራኤለ ፆሳይ ሀይሳዳ ያጌስ፤ ህንተና ታኮ ኪትዳ አድያስ ኦድተ።
2KI 22:16 ጎዳይ ሀይሳዳ ያጌስ፤ ‘ይሁዳ ካዎይ ናባብዳ ማፃፋን ፃፈትዳ ኢታ ቃላ ኡባ ታኒ ሀ በሳኒኔ ኢያን ደእያ አሳ ቦላ ኤሀና ሀናይስ።
2KI 22:17 ኤንቲ ታና አግድ፥ ሀራ ፆሳታስ እፃነ ጩይስዶሶና፤ ኤንቲ ባንታ ኩሸን ኦꬅዳባ ኡባን ታና ሀንቀꬅዶሶና። ሄሳ ግሾ፥ ታ ሀንቆይ ሀ በሳ ቦላ ኤፅስ፤ ቶአናዉ ዳንዳኤና’ ያጌስ።
2KI 22:18 ጎዳ ኦይቻናዉ ህንተና ኪትዳ ካዋኮ ሀይሳዳ ያግተ፤ ‘ጎዳይ እስራኤለ ፆሳይ ኔኒ ስእዳ ቃላባ ሀይሳዳ ያጌስ።
2KI 22:19 ታኒ ሀ በሳኒኔ ኢያን ደእያ አሳ ባደꬃስነ ꬋዮስ አꬃዳ እማና ግዳ ቃላ ስእዳ ዎደ፥ ነ ዎዛናይ ሹግን፥ ታ ስንꬃን ነና ካዉሽዳ ግሾነ ነ ማኡዋ ዳካዳ፥ ታ ስንꬃን ዬክዳ ግሾ፥ ታኒ ነ ዎሳ ስአስ።
2KI 22:20 ሄሳ ግሾ፥ ታኒ ነና ሳሮን ነ ማይዛታን ጋꬃና፤ ኔኒ ሳሮ ሞገታና። ታኒ ሀ በሳኒኔ ኢያን ደእያ አሳ ቦላ ኤሀና ኢታባ ነ አይፈይ በኤና’ ያጌስ” ያጋሱ። ኤንቲ ብድ፥ ሀ ኦደትዳባ ካዋስ ኦድዶሶና።
2KI 23:1 ካዎይ እዮስያስ ይሁዳ ጭማታነ የሩሳላመ ጭማታ ኡባ ሺሽስ።
2KI 23:2 ካዎይ ፑደ ፆሳ ኬꬅ ከይስ፤ ይሁዳ አሳይ፥ የሩሳላመን ደእያ አሳይ፥ ካህነትነ ናበት፥ ጉꬃፈ ግታ ጋካናዉ ኡባይ እያራ እስፈ ፑደ ፆሳ ኬꬅ ከይዶሶና። ፆሳ ኬꬃፈ በንትዳ ጫቆ ቃላ ማፃፋ ኡባ ካዎይ ኤንታዉ ናባብስ።
2KI 23:3 ካዎይ ቱሳ ማታን ኤቅድ፥ ኤንቲ ጎዳ ኦግያን ሄመታናነ፥ እያ ህግያ፥ እያ ዎጋነ እያ ኪታ ኩመꬃ ዎዛናንነ ኩመꬃ ቆፋን ናጋናዉ፥ ቃስ ሀ ማፃፋን ፃፈትዳ ጫቁዋ ኦꬃናዉ ጎዳ ስንꬃን ጫቅስ። አሳ ኡባይካ እያራ ጫቅዶሶና።
2KI 23:4 ካዎይ ካህነ ሀላቃ ካልቀ፥ እያፐ ጋርሳራ ደእያ ካህነታነ ፐንገ ናገይሳታ ባኣለ፥ አሼራነ ሳሎ ፆልንቶታ ጎይናናዉ ጊግስዳ ሚሸታ ኡባ ፆሳ ኬꬃፈ ከሳናዳ ኪትስ። ካዎይ ሄሳታ የሩሳላመፐ ጋፃ ከስድ፥ ቀድሮና ዛንጋራን ፁግድ፥ ብዱዋ ቤተለ ኤፍስ።
2KI 23:5 ይሁዳ ካታማታንነ የሩሳላመ ዩሹዋን ደእያ ꬎቃ ጎይኖ በሳ ኡባን እፃነ ጩይሳናዉ ይሁዳ ካዎት ሱንꬅዳ ኤቃታ ካህነታ ኡባ ኦሶፐ ከስስ። ባኣለስ፥ አዋስ፥ አጌናስ፥ ፆልንቶታስነ ሳሎን ደእያ ሀራ መተꬃታስ እፃነ ጩይሰይሳታ ኡባ ድግስ።
2KI 23:6 አሼራ ፆሰ ምስልያ ፆሳ ኬꬃፈ ከስድ፥ የሩሳላመ ካታማፐ ጋፃ ኤፍድ፥ ቀድሮና ዛንጋራ ኤፍድ፥ ያን ፁግስ። ፁገትዳይስ ጋጭድ፥ ꬊለ ከስስ፤ ባና ደርያ ዱፎ ቦላ ላልስ።
2KI 23:7 ፆሳ ኬꬃ ግዶን ጎይኖ ዎጋ ኦꬅድ፥ አደይ አደራ ላይማትያ ኬꬃታ ላልስ፤ ሄ ኬꬃታን ማጫሳት አሼራ ኤቄስ ገሸ ሱቆሶና።
2KI 23:8 እዮስያስ ካህነታ ኡባ ይሁዳ ካታማታፐ ኤህድ፥ ካሰ ካህነት እፃነ ጩይስያ ꬎቃ ጎይኖ በሳታ፥ ግብአፐ ብድ በርሳበ ጋካናዉ ደኤይሳታ ቱንስስ። ካታማ ሃርያ እያሱ ፐንግያፈ ሀድርሳ ባጋራ ደእያ ꬎቃ ጎይኖ በሳካ ላልስ።
2KI 23:9 ꬎቃ ጎይኖ በሳ ካህነት የሩሳላመን ጎዳ ያርሾ በሳ ፑደ ዮኮና፤ ሽን ኤንቲ ሀራ ካህነታራ እስፈ እርሾይ ገልቦና ዳቦ ሞሶና።
2KI 23:10 ካዎይ እዮስያስ ሄኖማ ዛንጋራን ደእያ ቶፈታ ያርሾ በሳ ቱንስስ። ሞሎካ ፆሳስ እስ አስካ ባ አደ ናኣ ዎይካ ማጫ ናአ ታማ ግዶራ አꬆና መላ ድግስ።
2KI 23:11 ይሁዳ ካዎት ፆሳ ኬꬃ ገልያ ፐንግያን አዋስ ዱማይድ ዎꬅዳ ፓራታ ድግስ። አዋ ፓራት ናታን-መለካ ሀላቃ ክፍልያ ማታን ደእያ ዳባባን ደኦሶና። ሄሳፈ ጉየ፥ አዋስ ዱማይድ ዎꬅዳ ፓራ ጋረታ እዮስያስ ታማን ፁግስ።
2KI 23:12 አካዛ ኬꬃ ፖቅያ ቦላ ይሁዳ ካዎት ጊግስዳ ያርሾ በሳታን ምናሰይ ፆሳ ኬꬃን ደእያ ናምኡ ዳባባታ ግዶን ጊግስዳ ያርሾ በሳታ ካዎይ እዮስያስ ላልስ። ኤንታ ሄ በሳፈ ድግድ ትንቸረꬅድ፥ ቀድሮና ዛንጋራን ሆልስ።
2KI 23:13 ካዎይ የሩሳላመ ካታማፐ ዶሎሀ ባጋራ፥ ቱናተꬃ ዙማፐ ዱገሀ ባጋን ደእያ ꬎቃ ጎይኖ በሳታ ቱንስስ። ሄ ꬎቃ በሳት እስራኤለ ካዎይ ሶሎሞነይ፥ ቱና ፆሳታ፥ ስዶና ፆሰ አስታሮቶ፥ ሞአበ ፆሳ ካሞሻነ አሞነ ፆሳ ሞሎካ ጎይናናዉ ጊግስዳ ꬎቃ በሳታ።
2KI 23:14 ካዎይ እዮስያስ ጎይኖ ሹቻ ቱሳታካ መንረꬅድ፥ አሼራ ፆሰ ምስለታካ ቃንፀረꬅስ። ኤንቲ ኤቅዳ በሳን ሀይቅዳ አሳ መቀꬅ ኩንꬅስ።
2KI 23:15 እስራኤለ አሳ፥ ናጋራ ኦስስዳ ናባፃ ናአይ እዮርባም ቤተለን ꬎቃ በሳን ጊግስዳ ያርሾ በሳ ካዎይ እዮስያስ ላልስ። ላልድ ሄ ያርሾ በሳ ሹቻታካ መንረꬅድ፥ ꬊለ ከስስ፤ አሼር ምስልያካ ፁግስ።
2KI 23:16 ሄሳፈ ጉየ፥ እዮስያስ ዩሹዋ ፄልድ፥ ዙማ ላንቀን ደእያ ዱፎታ በእስ፤ መቀꬃታ ዱፎታፐ ከስድ፥ ያርሾ በሳ ቦላ ዎꬅድ፥ ታማን ፁግስ። ያትድ ያርሾ በሳ ቱንስስ። ሄስ ሀንዳይ ፆሳ አስ ካሰ አዋጅዳ ጎዳ ቃላ ማራና።
2KI 23:17 ሄሳፈ ጉየ ካዎይ፥ “ሀ በንተይስ ኦደ ዱፎ?” ያግድ ኦይችስ። ቤተለ አሳይ፥ “ይሁዳፐ ይድ፥ ቤተለ ያርሾ በሳ ቦላ ሀእ ኔኒ ኦꬅዳባይ ፖለታናይሳ ካሰትድ ኦድዳ ናብያ ዱፎ” ያግዶሶና።
2KI 23:18 ካዎይ፥ “ደኦ ጊተ፤ ኦንካ እያ መቀꬃ ሀይሳፈ ቃꬆፎ” ያግስ። ሄሳ ግሾ፥ ሳማረፐ ይዳ ናበት አድያ መቀꬃራ እስፈ እያ መቀꬃ ቦቾና አጋግዶሶና።
2KI 23:19 እስራኤለ ካዎት ሳማረ ካታማታን ኦስስድ፥ ጎዳ ሀንቀꬅዳ፥ ꬎቃ ጎይኖ በሳታ እዮስያስ ድግስ፤ ቤተለን ኦꬅዳይሳዳ፥ ኤንታ ቦላካ ኦꬅስ።
2KI 23:20 እ ጎይኖ ꬎቃ በሳን ኦꬅያ ካህነታ ኡባ ያርሾ በሳ ቦላ ዎꬍስ፤ ቃስ ሄ ያርሾ በሳ ቦላ አሳ መቀꬃ ፁግስ። ሄሳ ኡባ ኦꬅድ፥ የሩሳላመ ስምስ።
2KI 23:21 ካዎይ አሳ ኡባ፥ “ሀ ጫቆ ማፃፋን ፃፈትዳይሳዳ ጎዳስ፥ ህንተ ፆሳስ ፓስካ ባኣለ ቦንችተ” ያግድ ኪትስ።
2KI 23:22 እስራኤለ ሃርያ ዳይናታ ዎደፐ ዶምድ፥ እስራኤለ ካዎታ ዎደነ ይሁዳ ካዎታ ዎደ ኡባን ሀይሳ መላ ፓስካ ባኣለ ኩመꬅ ቦንቸት ኤረና።
2KI 23:23 ሽን ካዎይ እዮስያስ ካዎትዳ ታማነ ሆስፑንꬆ ላይꬃን የሩሳላመ ካታማን ጎዳ ቦንቻናዉ ፓስካ ባለይ ቦንቸትስ።
2KI 23:24 ካህነ ሀላቃይ ካልቅያስ ፆሳ ኬꬃን በንትዳ ማፃፋን ፃፈትዳ ህግያ ቃላ ምንꬃናዳ፥ ቱና አያና ፄገይሳታነ ማሮታ፥ ሶ ግዶ ኤቃ ምስለታ፥ ኤቃ ሚሸታነ ይሁዳ ቢታንነ የሩሳላመ ካታማን በንትዳ ሀራ እፀትዳባታ ኡባ እዮስያስ ꬋይስስ።
2KI 23:25 ሙሰ ህግያዳ ባ ኩመꬃ ዎዛናን፥ ባ ኩመꬃ ሸምፑዋንነ፥ ባ ኩመꬃ ዎልቃን ጎዳኮ ስምዳ እዮስያሳ መላ ካዎይ፥ እያፐ ካሰ ግድን፥ እያፐ ጉየ ደንድቤና።
2KI 23:26 ምናሰይ ጎዳ ሀንቀꬃናዉ ኦꬅዳ ኢታ ኦሶ ኡባ ግሾ፥ ጎዳይ ይሁዳ ቦላ ሀንቀትዳ ባ ሸንያፐ ስምቤና።
2KI 23:27 ጎዳይ፥ “ታኒ እስራኤለ ታ ስንꬃፈ ድግዳይሳዳ፥ ይሁዳካ ታ ስንꬃፈ ድጋና፤ ታኒ ዶርዳ ካታማ፥ የሩሳላመነ ‘ታ ሱንꬃይ ሀይሳን ዳና’ ግዳ ሀ ኬꬃ ድጋና” ያግስ።
2KI 23:28 እዮስያስ ሀንዳ ሀራባይነ እ ኦꬅዳባይ ኡባይ ይሁዳ ካዎታ ታርከ ማፃፋን ፃፈትስ።
2KI 23:29 እዮስያሳ ዎደ ግብፀ ካዎይ ናኮይ፥ አሶረ ካዋ ኦላን ማዳናዉ ኤፍራፂሳ ሻፋ ብስ። ካዎይ እዮስያስ እያራ ኦለታናዉ ባ ኦላንቾታ ኤክድ ከይስ። ሽን ካዎይ ናኮይ እያራ ማግዶን ጋሄትድ፥ እያ ዎꬍስ።
2KI 23:30 አይለት እያ አሀ ፓራ ጋረ ቦላ ዎꬅድ፥ ማግዶፐ የሩሳላመ ኤህድ፥ እያ ቡዞ ዱፉዋን ሞግዶሶና። ሄ ቢታ አሳይ እዮስያሳ ናኣ እዮአካዛ ዶርድ፥ እያ አዋ በሳን እያ ትይድ ካዎꬅዶሶና።
2KI 23:31 እዮአካዝ ካዎትያ ዎደ፥ ላይꬅ እያዉ ላታማነ ሄꬓ፤ እ የሩሳላመን ሄꬑ አጌና ካዎትስ። እያ አየ ሱንꬃይ ሀሙፃሎ፤ እያ ልብና ካታማ ደእያ ኤርምያሳ ናአ።
2KI 23:32 እያ ማይዛት ኦꬅዳይሳዳ፥ እዮአካዝ ጎዳ ስንꬃን ኢታባ ኦꬅስ።
2KI 23:33 እዮአካዝ የሩሳላመን ካዎተናዳ ግብፀ ካዎይ ናኮይ ሀማታ ቢታን እርብላን እያ ቃችድ ሄꬑ ሙኩሉነ ኦይዱ ፄቱ ክሎ ግራመ ዴፅያ ብራነ ሀስታማነ ኦይዱ ክሎ ግራመ ዴፅያ ዎርቃ ይሁዳ አሳ ጊርስስ።
2KI 23:34 ካዎይ ናኮይ እዮስያሳ ናኣ ኤልያቄመ እያ አዋ በሳን ካዎꬅስ፤ እያ ሱንꬃ እዮአቄማ ያግድ ላምስ። ሽን እዮአካዛ ግብፀ ኤፍን፥ እ ያን ሀይቅስ።
2KI 23:35 እዮአቄም፥ ካዎይ ናኮይ ኦይችዳ ብራነ ዎርቃ ጊራ እያዉ እሚስ። ሄ ጊራ ቃንፃናዉ እዮአቄም ሄ ቢታ አሳይ ደምያ ኬና ብራፐነ ዎርቃፈ ጊራ ሺሽስ።
2KI 23:36 እዮአቄም ካዎትያ ዎደ ላይꬅ እያዉ ላታማነ እቻሻ፤ እ የሩሳላመን ታማነ እስ ላይꬅ ካዎትስ። እያ አየ ሱንꬃይ ዛብዶ፤ እያ ሩማ ካታማን ደእያ ፓዳያ ናአ።
2KI 23:37 እዮአቄም ባ ማይዛት ኦꬅዳይሳዳ፥ ጎዳ ስንꬃን ኢታባ ኦꬅስ።
2KI 24:1 እዮአቄማ ዎደ ባብሎነ ካዎይ ናቡካዳናፆር ይሁዳ ቦላ ደንድስ። እዮአቄም እያዉ ሄꬑ ላይꬃ ሃረትዳፐ ጉየ፥ ናቡካዳናፆራ ቦላ ማካልስ።
2KI 24:2 ጎዳይ ካልዳወታ ፓኖታ፥ ሶረ ፓኖታ፥ ሞአበ ፓኖታነ አሞነ ፓኖታ እዮአቄማ ቦላ የድስ፤ ባ አይለታ ናበታ ባጋራ ጎዳይ ካሰ ኦድዳይሳዳ፥ ይሁዳ ቢታ ꬋይሳናዳ ሀይሳታ የድስ።
2KI 24:3 ካዎይ ምናሰይ ኦꬅዳ ናጋራ ጋሶን ጎዳይ ይሁዳ አሳ ባ ስንꬃፈ ድጋናዉ ሀ ꬋዩዋ የድስ።
2KI 24:4 እ ፅሎ አሳ ሱꬁ ጉስድ፥ የሩሳላመን ኩንꬅዳ ግሾ፥ ጎዳይ ምናሰስ ሄ ናጋራ አቶ ጋናዉ ኮይቤና።
2KI 24:5 እዮአቄም ሀንዳ ሀራባይነ እ ኦꬅዳባ ኡባይ ይሁዳ ካዎታ ታርከ ማፃፋን ፃፈትስ።
2KI 24:6 እዮአቄም ሀይቅድ፥ ባ ማይዛታ ጋክስ፤ እያ በሳን እያ ናአይ ዮአክን ካዎትስ።
2KI 24:7 ግብፀ ካዎይ ናምአንꬆ ባ ቢታፈ ደንድድ፥ ኦላስ ይቤና፤ ግብፀ ሻፋፐ ዶምድ፥ ብድ ኤፍራፂሳ ሻፋ ጋካናዉ፥ ግብፀ ካዎይ ሃርዳ ቢታ ኡባ ባብሎነ ካዎይ ኤክስ።
2KI 24:8 ዮአክን ካዎትያ ዎደ ላይꬅ እያዉ ታማነ ሆስፑና፤ ዮአክን፥ የሩሳላመን ሄꬑ አጌና ካዎትስ። እያ አየ ሱንꬃይ ናስታ፤ እያ የሩሳላመ አድያ ኤልናታና ናአ።
2KI 24:9 ዮአክን ባ አዋይ ኦꬅዳይሳዳ፥ ጎዳ ስንꬃን ኢታባ ኦꬅስ።
2KI 24:10 ሄ ዎደ ባብሎነ ካዋ ናቡካዳናፆራ ኦላንቾት የሩሳላመ ይድ፥ ካታማ ተቅዶሶና።
2KI 24:11 ባብሎነ ካዎይ ናቡካዳናፆር ሄ ካታማ ይስ።
2KI 24:12 ይሁዳ ካዎይ እዮአክና፥ እያ አይያ፥ እያ አይለት፥ እያ ሀላቃትነ ካዎ ጋꬎ ሹማት ኡባይ ባብሎነ ካዋስ ኩሸ እምዶሶና። ዮአክን ካዎትዳ ሆስፑንꬆ ላይꬃን፥ ባብሎነ ካዎይ ዮአክና ቃችስ።
2KI 24:13 ፆሳ ኬꬃነ ካዎ ጋꬎን ደእያ ሻሉዋ ኡባ ሄ በሳፈ ደንꬅድ ኤፍስ። ጎዳይ ካሰ ኦድዳይሳዳ ካዎይ ሶሎሞነይ ፆሳ ኬꬃን ጊግስዳ ዎርቃ ሚሸታ ኡባ ባብሎነ ካዎይ ቃንፀረꬅስ።
2KI 24:14 ናቡካዳናፆር የሩሳላመ አሳ፥ ሀላቃታ ኡባ፥ ኦላንቾታ ኡባ፥ ኩሸ ሂላንቾታነ ብራታ ቆፀይሳታ ኡባ፥ 10,000 አሳ የሩሳላመፐ ድእድ ኤፍን፥ ቢታን ማንቆ አሳ ፃላል አትስ።
2KI 24:15 ናቡካዳናፆር እዮአክና ድእድ፥ እያ አይዉ፥ እያ ማቸታ፥ እያ ሞርናትነ ቢታን ደእያ ግታ አሳ ኡባ ባብሎነ ኤፍስ።
2KI 24:16 ሄ አሳፐ 7,000 አሳት ኦላንቾታ፤ 1,000 አሳት ዱማ ዱማ ኩሸ ሂላንቾታ፤ ኤንቲ ኡባይ ምኖነ ኦላ ኦለታናዉ ዳንዳኤይሳታ።
2KI 24:17 ሄሳፈ ጉየ፥ ባብሎነ ካዎይ ዮአክና በሳን እያ አዋ እሻ ማታና ካዎꬅስ፤ እያ ሱንꬃ ሰደቅያሳ ያግድ ላምስ።
2KI 24:18 ሰደቅያስ ካዎትያ ዎደ፥ ላይꬅ እያዉ ላታማነ እስኖ፤ እ ታማነ እስ ላይꬅ የሩሳላመን ካዎትስ። እያ አየ ሱንꬃይ አምፃሎ፤ እያ ልባና ካታማን ደእያ ኤርምያሳ ናአ።
2KI 24:19 እዮአቄም ኦꬅዳይሳዳ፥ ሰደቅያስ ጎዳ ስንꬃን ኢታባ ኦꬅስ።
2KI 24:20 ጎዳይ ሀንቀትዳ ግሾ፥ የሩሳላመ አሳ ቦላነ ይሁዳ አሳ ቦላ ሀይስ ሀንስ፤ ዉርሰꬃን ኤንታ እ ባ ስንꬃፈ ድግስ። ሰደቅያስ ባብሎነ ካዋ ቦላ ማካልስ።
2KI 25:1 ሰደቅያስ ካዎትዳ ኡዱፉንꬆ ላይꬅ፥ ታማንꬆ አጌናን፥ ታማንꬆ ጋላስ፥ ባብሎነ ካዎይ ናቡካዳናፆር ባ ኦላንቾታ ኡባ ኤክድ፥ የሩሳላመ ተቅስ፤ እያ ዩሹዋን ቢታ ዶርድ ተቅስ።
2KI 25:2 ሰደቅያስ ካዎትዳ ታማነ እስንꬆ ላይꬅ ጋካናዉ፥ ካታማይ ተቀትድ ጋምእስ።
2KI 25:3 ሄሳ ጋሶን ቢታን ኮሽ ሱልን፥ ሄ ላይꬅ ኦይዳንꬆ አጌናን፥ ኡዱፉንꬆ ጋላሳን አሳስ ምያባይ ꬋይስ።
2KI 25:4 ካታማ ዩሾ ግምበይ እስ ባጋራ መቅን፥ ካልዳወት ዩይ አꬍድ ናግኮካ፥ ይሁዳ ካዋ ኦላንቾት ኩመꬅ ቃማ ካዎ ጋደ ኤፍያ ኦግያ ኦይክድ፥ ናምኡ ድርሳ ግምበት ጋሄትያ ፐንግያራ ከይድ ባቃትዶሶና። ኤንቲ ዮርዳኖሰ ድልባኮ ስሚድ ባቃትዶሶና።
2KI 25:5 ሽን ባብሎነ ኦላንቾት ካዋ የደꬅድ፥ እያርኮ ደምባ ጋꬅሸ ኦይክዶሶና። እያ ኦላንቾት ኡባይ እያፐ ሻከትድ ላለትዶሶና።
2KI 25:6 ሄሳፈ ጉየ፥ ኤንቲ እያ ራብላ ካታማን ደእያ ናቡካዳናፆራኮ ኤፍዶሶና። ባብሎነ ካዎይ ሰደቅያሳ ቦላ ፕርድስ።
2KI 25:7 ሰደቅያሳ ናይታ፥ ሰደቅያስ ፄልሽን ዎꬍዶሶና። እያ አይፈታ ዎጭ ከስድ፥ ሳንꬃላታን ቃችድ፥ ባብሎነ ቢታ ኤፍዶሶና።
2KI 25:8 ናቡካዳናፆር ባብሎነን ካዎትዳ ታማነ ኡዱፉንꬆ ላይꬃን፥ እቻሻንꬆ አጌናን፥ ላፑንꬆ ጋላሳን፥ ካዋ ሞርናታፐ እሶይ፥ ካዋ ናገይሳታ ሀላቃይ ናቡዛርዳን የሩሳላመ ገልስ።
2KI 25:9 ፆሳ ኬꬃ፥ ካዎ ጋꬎነ የሩሳላመን ደእያ ኬꬃ ኡባ፥ ግታ ኬꬅ ጌተትያ ኡባ ፁግስ።
2KI 25:10 ባብሎነ ኦላንቾት ኡባይ ካዋ ናገይሳታ ሀላቃ ኪታን የሩሳላመ ካታማ ዩሹዋን ደእያ ድርሳ ግምብያ ኡባ ላልዶሶና።
2KI 25:11 ናቡዛርዳን ካታማንነ ይሁዳን አትዳ አሳታ፥ ካድድ ባብሎነ ኦላንቾታን ጋሄትዳ አሳታ ኡባ ኦይክድ፥ ድእድ ኤፍስ።
2KI 25:12 ሽን ናቡዛርዳን ዉርሰꬃ ማንቆታፐ ጉꬃታ ዎይነ ቶካናዳነ ጋደ ጎያናዳ ይሁዳን አሽስ።
2KI 25:13 ባብሎነ አሳት ፆሳ ኬꬃን ደእያ ናሰ ብራታፐ መꬍዳ ቱሳታ፥ ጫና ጋረታነ ግታ ከረታ መንረꬅዶሶና፤ ናሰ ብራታ ኡባ ባብሎነ ኤፍዶሶና።
2KI 25:14 ከረታ፥ አካፋታ፥ ፆምፐ ፄራ ፕትያባታ፥ ጭልፓታነ ያርሾ ዎደ ጎኤትያ ናሰ ብራታ ሚሸታ ኡባ ኤፍዶሶና።
2KI 25:15 ካዋ ናገይሳታ ሀላቃይ ናቡዛርዳን ዎርቃፈ ኦሰትዳ ሚሸታ ዎርቃꬆ፥ ብራፐ ኦሰትዳ ሚሸታ ብራꬆ ኦꬅ ኤክድ፥ እፃነ ጩይስያ ሻተታነ ፃሮታ ኡባ ኤፍስ።
2KI 25:16 ካዎይ ሶሎሞነይ ፆሳ ኬꬃ ኦሶስ ጊግስዳ ናምኡ ቱሳታ፥ ግታ ከረታነ ጫና ጋረታ፥ ናሰ ብራታ ምዛነን ልካናዉ ዳንዳኤትቤና።
2KI 25:17 ናምኡ ቱሳት እስ መላ ግድድ፥ እሱዋ እሱዋ ጌሳይ ታማነ ሆስፑን ዋꬋ፤ ቃስ እስ እስ ቱሳ ሁጰን ደእያ ጉምቦት ሄꬑ ዋꬋ አዱሰ። ሄ ጉምቦታ ዩሾይ ናሰ ብራታ ግተንነ ኦሮማነ ቴራ ምስለን አሌቀትስ።
2KI 25:18 ካዋ ናገይሳታ ሀላቃይ ናቡዛርዳን፥ ካህነ ሀላቃ ሳራያ፥ እያ ካልያ ካህንያ ሶፎንያሳነ ፐንገ ናግያ ሀራ ሄꬑ አሳታ ኦይክስ።
2KI 25:19 ሄ ዎደይ ጋካናዉ፥ ካታማን ደእያ አሳፐ ይሁዳ ቶራ ሞጮና፥ ካዋ ዞረይሳታፐ እቻሹ አሳታ፥ ቶራ ሞጮናታ ፃፍያ፥ ኦላንቾታ ዶርያ ሀራ ኡሱፑን ታሙ አሳታ ኤፍስ።
2KI 25:20 ሀላቃይ ናቡዛርዳን ኤንታ ኡባ፥ ባብሎነ ካዋኮ ራብላ ካታማ ኤፍስ።
2KI 25:21 ባብሎነ ካዎይ ኤንታ ኡባ ሀማታ ቢታን ራብላ ካታማን ዎꬍስ። ሄሳዳ ሀንድ፥ ይሁዳ አሳይ ባንታ ቢታፈ ድኤትድ ብዶሶና።
2KI 25:22 ካዎይ ናቡካዳናፆር ሳፋና ናኣ ናኣ፥ አክቃማ ናኣ ጎዶልያ ይሁዳን አትዳ አሳ ቦላ ሹምስ።
2KI 25:23 ኩሸ እምቦና ይሁዳ ቶራ ሞጮናትነ ኦላንቾት ሄሳ ስእዳ ዎደ፥ ምፅጳን ደእያ ጎዶልያራ ጋሄትዶሶና። ሄ ሀላቃት ናታና ናኣ እስማኤላ፥ ቃረያ ናኣ ዮሃና፥ ናፆፋ አድያ ታንሁመታ ናኣ ሳራያነ ማካታ አድያ ያዛና ናኣ።
2KI 25:24 ጎዶልያ ኤንታዉነ ኤንታ ኦላንቾታስ “ሀይሳታስነ ኤንታ ሀላቃታስ ያዮፍተ። ሀ ቢታን ደእተ፤ ባብሎነ ካዋስ ሃረትተ፤ ሄሳ ህንተ ኦꬅኮ ኡባባይ ህንተዉ እንጀታና” ያግድ ኤንታዉ ጫቅስ።
2KI 25:25 ሽን ላፑንꬆ አጌናን፥ ካዎ ኮች ግድዳ ኤልሳማ ናኣ ናታና ናአይ እስማኤል ታሙ አሳራ ምፅጳ ብድ፥ ጎዶልያ፥ ይሁዳ አሳነ እያራ ደእያ ባብሎነ አሳ ኡባ ዎꬍስ።
2KI 25:26 ሄሳፈ ጉየ፥ ባብሎነ አሳስ ያይድ፥ ይሁዳ አሳይ፥ ጉꬅ ግት አቶናሽን፥ ቶራ ሞጮናት ኡባይ ግብፀ ቢታ ባቃትዶሶና።
2KI 25:27 ዮአክን ድኤትድ ብዳ ሀስታማነ ላፑንꬆ ላይꬃን፥ ታማነ ናምአንꬆ አጌናን፥ ላታማነ ላፑንꬆ ጋላሳን፥ ዮር-ማሮዳክ ካዎትዳ ላይꬅ፥ ይሁዳ ካዋ ዮአክና ማርድ ቃሾፐ ብልስ።
2KI 25:28 ዮር-ማሮዳክ፥ ዮአክናራ ሎኦ ቃላ ኦደትድ፥ ባብሎነን ድኦን ደእያ ሀራ ካዎታ ኡባፈ አꬅድ፥ እያ ቦንችስ።
2KI 25:29 ሄሳ ግሾ፥ ዮአክን ቃሾ ኬꬃን ማእዳ ማኡዋ ላምድ፥ አትዳ ባ ደኦ ላይꬃ ኡባን ካዎ ጋይታፐ ምስ።
2KI 25:30 ጋላስ ጋላስ እያዉ ኮሽያባ ኡባ ባብሎነ ካዎይ እሚስ።
1CH 1:1 አዳመይ ሴታ የልስ፤ ሴት ሄኖሳ የልስ፤ ሄኖስ ቃይናና የልስ፤
1CH 1:2 ቃይናን ማላልኤላ የልስ፤ ማላልኤል ያረዳ የልስ፤
1CH 1:3 ያረድ ሄኖከ የልስ፤ ሄኖከይ ማቱሳላ የልስ፤ ማቱሳል ላመሀ የልስ፤
1CH 1:4 ላመህ ኖሄ የልስ፤ ኖሄይ ሴማ፥ ካማነ ያፈታ የልስ።
1CH 1:5 ያፈታ አደ ናይት ጋመራ፥ ማጎገ፥ ማዳያ፥ ያዋና፥ ቶቤላ፥ ሞሳሀነ ትራሳ።
1CH 1:6 ጋመራ አደ ናይት አስካናዛ፥ እርፋታነ ተጋርማ።
1CH 1:7 ያዋና አደ ናይት ኤልሳ፥ ታርሰሳ፥ ክፅማነ ሮዳ።
1CH 1:8 ካማ አደ ናይት ኩሻ፥ ምፅራይማ፥ ፉፃነ ካናነ።
1CH 1:9 ኩሻ አደ ናይት ሳባ፥ ኤዉላፀ፥ ሳብታ፥ ራእማነ ሳብቃታ። ራእማ አደ ናይት ሳባነ ድዳና።
1CH 1:10 ኩሽ ናምሩደ የልስ። ናምሩደይ ቢታ ቦላ ዎልቃማ ኦላንቾ ግድስ።
1CH 1:11 ምፅራይም ሉደታ፥ አናምመታ፥ ላሀበታ፥ ናፍቱሄታ፥
1CH 1:12 ፓትሮሳታ፥ ፍልስፄመታ፥ ማይዛ ግድዳ ካስሉሄማታነ ቃፍቶረታ ኮቻታ ማይዛ።
1CH 1:13 ካናነይ ባይራ ናኣ ስዶናነ እያ ካሉዋ ሄታ የልስ።
1CH 1:14 ካናነይ ያቡሰታ፥ አሞረታ፥ ገርገሰታ፥
1CH 1:15 ህወታ፥ አርከታ፥ ሲናታ፥
1CH 1:16 አርዳወታ፥ ሳማረታነ ሀማተታ የልስ።
1CH 1:17 ሴማ አደ ናይት ኤላማ፥ አሶረ፥ አርፋክሳደ፥ ሉደ፥ አራማ፥ ኡፅ፥ ሁላ፥ ገተራነ ሞሳሀ።
1CH 1:18 አርፋክሳድ ሳላ የልስ፤ ሳል ኤቦራ የልስ።
1CH 1:19 ኤቦሪ ናምኡ ናይታ የልስ፤ እሶይ የለትዳ ዎደ ሳእ ሻከትዳ ግሾ እያ ሱንꬃይ ፋለቃ ጌተትስ፤ እያ እሻ ሱንꬃይ ዮቅፃና።
1CH 1:20 ዮቅፃን አልሞዳዳ፥ ሳለፋ፥ ሀዛርሞታ፥ ያራሀ፥
1CH 1:21 ሀዶራማ፥ ኡዛላ፥ ድቅላ፥
1CH 1:22 ኦባላ፥ አብማላ፥ ሳባ፥
1CH 1:23 ኦፍራ፥ አዉላፃነ ዮባባ የልስ። ሀይሳቲ ዮቅፃና ኮቻታ።
1CH 1:24 ሴማፐ አብራሃመ ጋካናዉ ደእያ የለታይ ሀይሳፈ ካልድ ፃፈትዳይሳታ፤ ሴማ፥ አርፋክሳደ፥ ሳላ፥
1CH 1:25 ኤቦራ፥ ፋለቃ፥ ራጋ፥
1CH 1:26 ሳሩጋ፥ ናኮራ፥ ታራነ
1CH 1:27 አብራሃመ ጌተትያ አብራመ።
1CH 1:28 አብራሃመ አደ ናይት ይሳቃነ እስማኤላ።
1CH 1:29 ኤንታ የለታይ ሀይሳፈ ካልድ ፃፈትስ። እስማኤላ ባይራ ናአይ ናባዮታ፤ ሄሳፈ ካልድ፥ ቀዳረ፥ አድቤላ፥ ምብሳማ፥
1CH 1:30 ምስማ፥ ዱማ፥ ማሳ፥ ኩዳነ፥ ቴማ፥
1CH 1:31 እፁራ፥ ናፍሳነ ቀድማ የልስ። ሀይሳቲ እስማኤላ ናይታ።
1CH 1:32 አብራሃመይ ኬፁራፐ የልዳ አደ ናይት ዝምራና፥ ዮቅሳና፥ ማዳነ፥ ምድያመ፥ ያስቦቃነ ስዋ። ዮቅሳና አደ ናይት ሳባነ ድዳና።
1CH 1:33 ምድያመ አደ ናይት ገፈራ፥ ኤፈራ፥ ሄኖሀ፥ አብዳነ ኤልዳ። ሀይሳቲ ኬፁራ ኮቻታ።
1CH 1:34 አብራሃመይ ይሳቃ የልስ። ይሳቃ አደ ናይት ኤሳዌነ እስራኤለ።
1CH 1:35 ኤሳዌ አደ ናይት ኤልፋዛ፥ ራጉኤላ፥ የኡሳ፥ ያእላማነ ቆረ።
1CH 1:36 ኤልፋዛ አደ ናይት ተማና፥ ኦማራ፥ ስፎ፥ ጎቶማ፥ ቀነዛ፥ ትምናነ አማለቃ።
1CH 1:37 ራጉኤላ አደ ናይት ናሆታ፥ ዛራ፥ ሳማነ ምዛ።
1CH 1:38 ኤዶመን ኮይሮ ደእዳ ሳይረ አደ ናይት ሎፃነ፥ ሶባላ፥ ዝባኦና፥ አና፥ ድሶና፥ ኤፀራነ ድሳና።
1CH 1:39 ሎፃነ አደ ናይት ሆራነ ሄማማ፤ ሎፃነ ምችያ ትምናኦ።
1CH 1:40 ሶባላ አደ ናይት አልዋ፥ ማናሆታ፥ ኤባላ፥ ስፋነ ኦናማ። ፅባኦና አደ ናይት አያነ አና።
1CH 1:41 አና ናአይ ድሶና። ድሶና አደ ናይት ሄምዳና፥ ኤስባና፥ ይትራናነ ካራና።
1CH 1:42 ኤፀራ አደ ናይት ብልሃና፥ ዛዋናነ አቃና። ድሳና አደ ናይት ኡፃነ አራና።
1CH 1:43 እስራኤለን ካዎይ ካዎታናፐ ካሰ ኤዶመ ቢታን ካዎትዳ ካዎት ሀይሳፈ ካልድ ፃፈትዳይሳታ። ብኦራ ናአይ ባላቅ ካዎትስ፤ እያ ካታማ ሱንꬃይ ድናባ።
1CH 1:44 ባላቅ ሀይቅን፥ ባሶራ አደይ ዛራ ናአይ ዮባብ እያ በሳን ካዎትስ።
1CH 1:45 ዮባብ ሀይቅን፥ ተማና አደይ ሁሳም እያ በሳን ካዎትስ።
1CH 1:46 ሁሳም ሀይቅን፥ ሞአበ ቢታን ምድያመታ ፆንዳ ባዳዳ ናአይ ሀዳድ እያ በሳን ካዎትስ፤ እያ ካታማ ሱንꬃይ አዊታ።
1CH 1:47 ሀዳድ ሀይቅን፥ ማስሬቃ አደይ ሳምል እያ በሳን ካዎትስ።
1CH 1:48 ሳምል ሀይቅን፥ ሻፋ ማታን ደእያ ረሆቦታ አደይ ሳኡሊ እያ በሳን ካዎትስ።
1CH 1:49 ሳኡሊ ሀይቅን፥ አክቦራ ናአይ ባአል-ሀናን እያ በሳን ካዎትስ።
1CH 1:50 ባአል-ሀናን ሀይቅን፥ ሀዳድ እያ በሳን ካዎትስ፤ እያ ካታማ ሱንꬃይ ፓኡ። እያ ማችያ መዛሃባ ናኤ ማፅሬድ ናእዉ ማሄፃቤሎ። ሄሳፈ ጉየ፥ ሀዳድ ሀይቅስ።
1CH 1:51 ኤዶመ ኮቻታ ሀላቃት ሀይሳታ፤ ትምናአ፥ አልዋ፥ የተታ፥
1CH 1:52 ኦሆልባማ፥ ኤላ፥ ፕኖና፥
1CH 1:53 ቃናዛ፥ ተማና፥ ምብሳራ፥
1CH 1:54 ማግደላነ እራማ። ሀይሳቲ ኤዶመ ሀላቃታ።
1CH 2:1 እስራኤለ አደ ናይት ሀይሳታ፤ ሮቤላ፥ ስሞና፥ ሌወ፥ ይሁዳ፥ ይሳኮራ፥ ዛብሎና፥
1CH 2:2 ዳነ፥ ዮሰፋ፥ ብንያመ፥ ንፍታለመ፥ ጋደነ አሴራ።
1CH 2:3 ካናነ ማጫሰ ሰዋፐ ይሁድ የልዳ ሄꬑ አደ ናይት ኤራ፥ ኦናናነ ሴላ። ይሁዳ ባይራ ናአይ ኤር ጎዳ ስንꬃን ኢታባ ኦꬅዳ ግሾ ጎዳይ እያ ዎꬍስ።
1CH 2:4 ይሁድ ባ ናኣ ማቸ ትማርፐ ፋረሳነ ዛራ የልስ። ይሁዳስ እቻሹ አደ ናይት ደኦሶና።
1CH 2:5 ፋረሳ አደ ናይት ሄስሮማነ ሀሙላ።
1CH 2:6 ዛራ አደ ናይት ዝምራ፥ ኤታና፥ ሄማና፥ ካልኮላነ ዳራ፤ ኤንቲ ኩመꬅ እቻሻ።
1CH 2:7 ዛራ ኮቸ ግድዳ ካርማ ናአይ አካን ፆሳስ ዱማትዳ ድኡዋፐ ካይሶትድ እስራኤለ አሳ ኡንኤꬅዳይሳ።
1CH 2:8 ኤታና ናአይ አዛራ።
1CH 2:9 ሄስሮን የልዳ ናይት ይራምኤላ፥ አራመነ ካለባ።
1CH 2:10 አራም አምናዳበ የልስ። አምናዳበይ ይሁዳ ኮቻታ ሀላቃ ናአሶና የልስ።
1CH 2:11 ናአሶን ሳልሞና የልስ፤ ሳልሞን ቦኤዛ የልስ፤
1CH 2:12 ቦኤዝ እዮበዳ የልስ፤ እዮበድ እሰየ የልስ።
1CH 2:13 እሰየይ ባ ባይራ ናኣ ኤልያባ፥ ካሎ ናኣ አምናዳበ፥ ሄꬓንꬆ ናኣ ሳማ፥
1CH 2:14 ኦይዳንꬆ ናኣ ናትናኤላ፥ እቻሻንꬆ ናኣ ራዳያ፥
1CH 2:15 ኡሱፑንꬆ ናኣ አሳማ፥ ላፑንꬆ ናኣ ዳዊታ የልስ።
1CH 2:16 እሰየ ማጫ ናይት ፃሩዮነ አብግያ። ፃሩይ ናይት ሄꬓት አብሳያ፥ እዮኣባነ አሳሄላ።
1CH 2:17 አብግያ አማሳ የላሱ፤ አማሳ አዋይ እስማኤላ አድያ የተራ።
1CH 2:18 ሄስሮና ናኣ ካለባስ አዙቦነ ይርኦቶ ጌተትያ ናምኡ ማቸት ደኦሶና። እ አዙብፐ የሳራ፥ ሶባባነ አርዶና የልስ።
1CH 2:19 አዙብ ሀይቅን፥ ካለብ ኤፍራቶ ኤክስ፤ ኤፍራታ ሁራ የላሱ።
1CH 2:20 ሁር ኡረ የልስ፤ ኡረይ ባስልኤላ የልስ።
1CH 2:21 ሄስሮናስ ላይꬅ ኡሱፑን ታሙ ግድን፥ ጋላዳ አዋ ማክራ ናእዉ ኤክድ ሳጉባ የልስ።
1CH 2:22 ሳጉብ ያእራ የልስ። ያእር ጋላዳ ቢታን ደእያ ላታማነ ሄꬑ ካታማታ ሃርስ።
1CH 2:23 ሽን ገሹራነ ሶረ ካዎት ያእራ ካታማታ ቃናታነ እያ ዩሹዋን ደእያ ኡሱፑን ታሙ ካታማታ ኦልድ ኦይክዶሶና፤ ያን ደእያ አሳ ኡባይ ጋላዳ አዋ ማክራ ኮቸ።
1CH 2:24 ሄስሮን ካለባ ኤፍራታ ጌተትያ በሳን ሀይቅዳፐ ጉየ፥ ሄስሮና ማችያ አብያ ተቁሄ አዋ አሽሁራ የላሱ።
1CH 2:25 ሄስሮና ባይራ ናኣ ይራማኤላ ባይራ ናአይ ራማ፤ ካሎት ቡና፥ ኦረና፥ ኦፄማነ አክያ።
1CH 2:26 ይራህምኤላስ አታሮ ጌተትያ ሀራ ማቻ ደአዉሱ፤ አታራ ኦናማ አይዉ።
1CH 2:27 ይራማኤላ ባይራ ናኣ ራማ ናይት ማአሳ፥ ያምናነ ኤቀራ።
1CH 2:28 ኦናማ ናይት ሻማያነ ያዳ። ሳማየ ናይት ናዳበነ አብሱራ።
1CH 2:29 አብሱራ ማችያ አብካላ አህባናነ ሞልዳ የላሱ።
1CH 2:30 ናዳባ አደ ናይት ሰልዳነ አፋይማ፤ ሰልድ ናአ የሎና ሀይቅስ።
1CH 2:31 አፋይማ ናአይ ይሽአ፤ ይሽአ ናአይ ሶሳና፤ ሶሳና ናአይ አህላያ።
1CH 2:32 ሻማያ እሻ ያዳ ናይት የተራነ ዮናታና፤ የተር ናአ የሎና ሀይቅስ።
1CH 2:33 ዮናታና ናይት ፈልታነ ዛዛ። ሀይሳቲ ይራማኤላ ኮቻታ።
1CH 2:34 ሶሳናስ ማጫ ናአፐ አትሽን፥ አደ ናእ ባዋ። ሶሳናስ እዮሄላ ጌተትያ ግብፀፈ አይለይ ደኤስ።
1CH 2:35 ሶሳን ባ ናእዉ ባ አይልያ እዮሄላስ እምን፥ አታያ ናአ የላሱ።
1CH 2:36 አታይ ናታና የልስ፤ ናታን ዛባዳ የልስ፤
1CH 2:37 ዛባድ ኤፍላላ የልስ፤ ኤፍላል ኦቤዳ የልስ፤
1CH 2:38 ኦቤድ እዩ የልስ፤ እዩይ አዛራ የልስ፤
1CH 2:39 አዛርያስ ከለሳ የልስ፤ ከለስ ኤልኣሳ የልስ፤
1CH 2:40 ኤልኣስ ስስማያ የልስ፤
1CH 2:41 ስስማይ ሳሎማ የልስ፤ ሳሎም ይቃማ የልስ፤ ይቃም ኤልሳማ የልስ።
1CH 2:42 ይራማኤላ እሻ ካለባ ባይራ ናአይ ሞሳ። ሞሳ ናአይ ዚፋ፤ ዚፋ ናአይ መሬሳ፤ መሬሳ ናአይ ከብሮና።
1CH 2:43 ከብሮና ናይት ቆራሀ፥ ተፉዋ፥ ረቄማነ ሻማያ።
1CH 2:44 ሻማየይ ዮርቃኣማ አዋ ራሃማ የልስ። ረቄም ሻማያ የልስ።
1CH 2:45 ሻማያ ናአይ ማኦና። ማኦን ቤት-ፁራ የልስ።
1CH 2:46 ካለባ ላገꬅያ ኤፋ፥ ሀራና፥ ሞዳነ ጋዜዛ የላሱ፤ ሀራን ጋዜዛ ጌተትያ ሀራ አደ ናአ የልስ።
1CH 2:47 ያህዳያ ናይት ረገማ፥ እዮአታማ፥ ገሻና፥ ፋለፃ፥ ኤፋነ ሻፋ።
1CH 2:48 ካለባ ላገꬅያ ማእካ ሸበራነ ትርሃና የላሱ።
1CH 2:49 ቃስካ መድማና አዋ ሻፋነ ማክቤናነ ግብአ አዋ ሱሳና የላሱ። ካለባ ማጫ ናኤ ሱንꬃይ አክሶ።
1CH 2:50 ካለባ ናይት ሀራት ሀይሳፈ ካልድ ፃፈትዶሶና። ካለብ ባ ባይራ ናኣ ሁራ ባ ማቸ ኤፍራታፐ የልስ። ሁራ ናይት ቅርያት-ይኣርማ አዋ ሶባላ፥
1CH 2:51 ቤተለመ አዋ ሳልሞናነ ቤት-ጋደራ አዋ ሀሬፋ።
1CH 2:52 ቅርያት-ይኣርማ አዋ ሶባላ ያራት ሀሮኤታታነ ማኑሆታ ያራታፐ ባጋታ።
1CH 2:53 ቅርያት-ይኣርማ ያራት ያትረታ፥ ፑተታ፥ ሹማተታነ ምሽረታ። ፆርአትነ ኤሽታኦለት ሀይሳታፐ የለትዶሶና።
1CH 2:54 ቤተለመ አዋ ሳልሞና ያራት ናፆፋታ፥ አፅሮት-ቤተዮአበታ፥ ማኑሆታ ያራታፐ ባጋታነ ፆርአታ።
1CH 2:55 ያበፃ ካታማን ደእያ ፃፈታ ያራት ትርኤታ፥ ሽምአታነ ሱካታ። ሀይሳቲ ረካባታ አዋ ሀማታፐ የለትዳ ቄናታ።
1CH 3:1 ከብሮና ካታማን ዳዊቲ የልዳ ናይት ሀይሳፈ ካልድ ፃፈትዳይሳታ፤ እዝራኤለ ማጫሰ አክናሆምፐ የልዳ ባይራ ናአይ አምኖና። ቃርመሎሳ ማጫሰ አብግያፐ የልዳ ናምአንꬆ ናአይ ዳነላ።
1CH 3:2 ገሹራ ካዋ ታልማያ ናእያ ማእካ የልዳ ሄꬓንꬆ ናአይ አበሰሎመ። አግታ የልዳ ኦይዳንꬆ ናአይ አዶንያሳ።
1CH 3:3 አብፃላ የልዳ እቻሻንꬆ ናአይ ሳፋፃ። ኤግላ የልዳ ኡሱፑንꬆ ናአይ ይትርሃማ።
1CH 3:4 ዳዊቲ ሀ ኡሱፑን ናይታ ከብሮናን የልስ። ዳዊቲ ከብሮናን ላፑን ላይꬅነ ኡሱፑን አጌና ካዎትስ። የሩሳላመን ሀስታማነ ሄꬑ ላይꬅ ካዎትስ።
1CH 3:5 ዳዊቲ የሩሳላመን አምኤላ ናኤ በርሳበፐ የልዳ ኦይዱ ናይት ሳሙሳ፥ ሶባባ፥ ናታነነ ሶሎሞነ።
1CH 3:6 ቃስ ሀራ ኡዱፉን አደ ናይት እያብሃራ፥ ኤልሹአ፥ ኤልፋላፃ፥
1CH 3:7 ኖጋ፥ ነፈቃ፥ ያፋያ፥
1CH 3:8 ኤልሳማ፥ ኤልዳሄነ ኤልፋላፃ።
1CH 3:9 ሀ አደ ናይታ ኡባ ቦላ ዳዊታስ ላገꬆታፐ የለትዳ ሀራ አደ ናይት ደኦሶና፤ ትማሮ ጌተትያ ምቻ ኤንታዉ ደአዉሱ።
1CH 3:10 ካዋ ሶሎሞነ የለታይ ሀይሳፈ ካልድ ፃፈትዳይሳ። ሶሎሞነ ናአይ ሮብኣማ፤ ሮብኣማ ናአይ አብያ፤ አብያ ናአይ አሳ፤ አሳ ናአይ እዮሳፈፃ፤
1CH 3:11 እዮሳፈፃ ናአይ እዮራማ፤ እዮራማ ናአይ አካዝያሳ፤ አካዝያሳ ናአይ እዮኣሳ፤
1CH 3:12 እዮኣሳ ናአይ አማስያሳ፤ አማስያሳ ናአይ አዛርያሳ፤ አዛርያሳ ናአይ እዮአታማ፤
1CH 3:13 እዮአታማ ናአይ አካዛ፤ አካዛ ናአይ ህዝቅያሳ፤ ህዝቅያሳ ናአይ ምናሰ፤
1CH 3:14 ምናሰ ናአይ አሞፀ፤ አሞፀ ናአይ እዮስያሳ።
1CH 3:15 እዮስያሳ ናአይ ባይራይ ዮሃናና፤ ናምአንꬆይ እዮኣቀመ፤ ሄꬓንꬆይ ሰደቅያሳ፤ ኦይዳንꬆይ ሳሎማ።
1CH 3:16 እዮኣቀመ ናይት እኮንያናነ ሰደቅያሳ።
1CH 3:17 ድኤትድ ባብሎነ ብዳ እኮንያና አደ ናይት ሳላትያላ፥
1CH 3:18 ማልክራማ፥ ፓዳያ፥ ሸናፃራ፥ ይቃማ፥ ሆሻማነ ናዳባ።
1CH 3:19 ፓዳያ አደ ናይት ዛሩባበላነ ሳመአ። ዛሩባበላ አደ ናይት ማሱላማነ ሀናና፤ ኤንታ ምችያ ሳሎምቶ።
1CH 3:20 ሀይሳታ ቦላ ሀራ እቻሹ አደ ናይት ዛሩባበላስ ደኦሶና፤ ኤንትካ ሀሹባ፥ ኦሄላ፥ ባራካ፥ ሀሳድያነ ዮሻብ-ሄሰዳ።
1CH 3:21 ሀናና አደ ናይት ፓላፃነ የሻያ። የሻያ ናአይ ራፋያ፤ ራፋያ ናአይ አርናና፤ አርናና ናአይ አብድዩ፤ አብድዩ ናአይ ሳካና፤
1CH 3:22 ሳካና ናአይ ሻማያ። ሻማያ ናይት እቻሻት ሀፁሳ፥ ይግኣላ፥ ባርሀ፥ ናአራነ ሻፋፃ።
1CH 3:23 ናአራ ናይት ሄꬓት ኤልዮአና፥ ህዝቅያሳነ አዝርቃማ።
1CH 3:24 ኤልዮአና ናይት ላፑናት ሆዳዋ፥ ኤልያሴባ፥ ፓላያ፥ አቁባ፥ ዮሃናና፥ ዳላያነ አኔና።
1CH 4:1 ይሁዳ ኮቻት ፓረሳ፥ ሄስሮና፥ ካርማ፥ ሆራነ ሶባላ።
1CH 4:2 ሶባላ ናአይ ራይ ያሃታ የልስ፤ ያሃት አሁማያነ ላሀዳ የልስ። ሀይሳቲ ፆርአታ ያራታ።
1CH 4:3 ኤፃማ አደ ናይት እዝራኤለ፥ ይሽማነ ይድባሻ፤ ኤንታ ምችያ ሀፅለልፖኖ።
1CH 4:4 ፓኑኤል ጋዶራ የልስ። ኤፀር ሁሻ የልስ። ሁር ባ አየ ኤፍራታስ ባይራ ናአ፤ ሁር ቤተለመ አዋ። ሀይሳቲ ሁራ ያራታ።
1CH 4:5 ተቁሄ አዋ አሽሁራስ ሄሎነ ናእራ ጌተትያ ናምኡ ማቸት ደኦሶና።
1CH 4:6 ናእራ አሁዛማ፥ ሄፌራ፥ ተምናነ አሽታራ አሽሁራስ የላሱ፤ ሀይሳቲ ናእር ናይታ።
1CH 4:7 ሄላ አደ ናይት ደረታ፥ ይፅሃራነ ኤትናና።
1CH 4:8 ቆፀ አደ ናይት አኑባ፥ ፆበባነ አሀርሄላ።
1CH 4:9 ያበፅ ባ እሻታፐ አꬍድ ቦንቸትዳ አስ። እያ አይያ፥ “ታኒ እያ ኢታ እቀꬃን የልዳ ግሾ፥ እያ ሱንꬃይ ያበፃ” ጋዳ ፄጋሱ።
1CH 4:10 ያበፅ እስራኤለ ፆሳ ፄግድ፥ “አቤት ፆሳዉ፥ ታና አንጃ፤ ታ ዛዋ ዳልግሳ። ነ ኩሸይ ታራ ግዶ፤ ታና አዛንꬆና መላ ቆህያባፐ ናጋ” ያግድ ዎስን ፆሳይ እያ ዎሳ ስእስ።
1CH 4:11 ሹሀ እሻይ ካሉባ ማህራ የልስ፤ ማህር ኤሽቶና የልስ።
1CH 4:12 ኤሽቶን ቤት-ራፋ፥ ፓሰሀነ እርናሀሻ አዋ ታህና የልስ። ታህን ናሃሳ ካታማ አሳ የልስ። ሀይሳቲ ረካ ቢታን ደእዶሶና።
1CH 4:13 ቀነዛ አደ ናይት ጎቶንያላነ ሳራያ፤ ጎቶንያላ አደ ናይት ሀታታነ ማኦኖታያ።
1CH 4:14 ማኦኖታይ ኦፍራ የልስ። ሳራይ እዮኣባ የልስ። እዮኣብ ኩሸ ሂላታ ዛንጋራ ጌተትያ በሳን ደእያ አሳ የልስ።
1CH 4:15 ዮፎነ ናኣ ካለባ ናይት እራ፥ ኤላነ ናኣማ። ኤላ ናአይ ቀነዛ።
1CH 4:16 ይሀልኤላ ናይት ዚፋ፥ ዝፋሀ፥ ትራያነ አሳርኤላ።
1CH 4:17 ኤዝራ አደ ናይት የተራ፥ መሬዳ፥ ኤፈራነ ያሎና። መሬድ ግብፀ ካዋ ናእዉ ብትያ ኤክን እያ ማይራሞ፥ ሻማያነ ይሽባ የላሱ። ይሽብ ኤሽታሞአ የልስ።
1CH 4:18 ይሁዳ ቢታፈ ኤክዳ ማችያ ጋዶራ አዋ የረዳ፥ ሶኮ አዋ ሄቤራነ ዛኖሀ አዋ ያቅትኤላ የላሱ።
1CH 4:19 ናሀማ ምቸ፥ ሆድያ ማቸ ናይት ጋርማን ደእያ ቃእላ አዋነ ማእካን ደእያ ኤሽታሞአ አዋ።
1CH 4:20 ሽሞና ናይት አምኖና፥ እርና፥ በንሀናነ ትሎና። ይሽአ ናይት ዞሄታነ በንዞሄታ።
1CH 4:21 ይሁዳ ናኣ ሴላ ኮቻት ሌካ አዋ ኤራ፥ ማሬሳ አዋ ለአዳነ ቤት-አሽበአ ካታማን ደእያ ሊኖ ማኦ ዳደይሳታ ያራታ።
1CH 4:22 ሀራት ቃስ ዮቅማ፥ እዮኣሳ፥ ያሹብለሄማ፥ ሞአበ ሃርዳ ሳራፋነ ኮዘባ ካታማን ደእያ አሳታ። ሀ የለታ ማዝጋበይ በንፐ ዶምድ ደኤስ።
1CH 4:23 ሀይሳቲ ናፃእማንነ ጋዴራን ደእያ መቃ ሚሸ መꬍያ አሳታ። ኤንቲ ካዋ ኦሶ ኦꬃናዉ እያራ እስፈ ደእዶሶና።
1CH 4:24 ስሞና ናይት ነሙኤላ፥ ያምና፥ ያርባ፥ ዛራነ ሳኡላ።
1CH 4:25 ሳኡላ ናአይ ሳሉማ፤ ሳሉማ ናአይ ምብሳማ፤ ምብሳማ ናአይ ማስማአ፤
1CH 4:26 ማስማአ ናአይ ሀሙኤላ፤ ሀሙኤላ ናአይ ዛኩራ፤ ዛኩራ ናአይ ሳመአ።
1CH 4:27 ሳመእ ታማነ ኡሱፑን አደ ናይታነ ኡሱፑን ማጫ ናይታ የልስ። ሽን እያ እሻቲ ዳሮ ናአ የልቦኮና። ይሁዳ ኮቻዳ ስሞና ኮቻይ ዳርቦኮና።
1CH 4:28 ስሞና ኮቻት በርሳበ ካታማንነ ሞላዳ፥ ሀፃር-ሹኣላ፥
1CH 4:29 ባላ፥ ኤፀማ፥ ቶላዳ፥
1CH 4:30 ባቱኤላ፥ ሆርማ፥ ፅቅላጋ፥
1CH 4:31 ቤት-ማርካቦታ፥ ሆፃር-ሱስማ፥ ቤት-ብራነ ሻኣርማ ካታማታን ደእዶሶና። ዳዊቲ ካዎታና ጋካናዉ ሀይሳቲ ካታማታ ግድድ ደእዶሶና።
1CH 4:32 ቃስ ኤንታ ጉታት ኤፃማ፥ አይና፥ እርሞና፥ ቶከናነ አሻና። ኤንቲ ኩመꬅ እቻሹ ካታማታ።
1CH 4:33 ባኣለ ጋካናዉ ሀ ካታማታ ዩሹዋን ደእያ ጉታት ኡባይ ኤንታን ጉጀቶሶና። ሀይሳቲ ኤንቲ ደእያ በሳታነ ባንታ የለታ ማራ ማዝጋበን ፃፍድ ኦይክዶሶና።
1CH 4:34 ስሞና ያራታ ሀላቃት ሀይሳፈ ካልድ ፃፈትዳይሳታ። ኤንቲ ማሾባባ፥ ያምለካ፥ አማስያሳ ናኣ እዮስያ፥
1CH 4:35 እዩኤላነ ዮሽባ ናኣ እዩ። እዩ አዋ አዋይ አሳኤላ ናአ ሳራያ።
1CH 4:36 ሀራ ሀላቃት ቃስ ኤልዮአና፥ ያይቆባ፥ ያሾሀያ፥ አሳያ፥ አድኤላ፥ ያስምኤላ፥ ባናያነ
1CH 4:37 ዚዛ። ዚዝ ሽፋ ናአ፤ ሽፍ አሎና ናአ፤ አሎን ያዳያ ናአ፤ ያዳይ ሽምራ ናአ፤ ሽምር ሻማያ ናአ።
1CH 4:38 ስሞና ያራታ ሀላቃት ሀይሳታ። ኤንታ አዋታ ኮቻይ ዳርሸ ብስ።
1CH 4:39 ኤንቲ ባንታ መህያስ ሄምያ በሲ ኮይሸ ጋዶራ ገልያ በሳ ማታን ደእያ ዛንጋራፐ ዶሎሀ ባጋራ ደእያ በሳ ጋካናዉ ብዶሶና።
1CH 4:40 ያን አራዳነ ሎኦ ሄምያ በሲ ደምዶሶና፤ ሄ ቢታይ ዎፓተꬅነ ሳሮይ ኩምዳ ዳልጋ ቢታ። በን ዎደ ሄ ቢታን ደእዳይሳት ካማ ኮቻ።
1CH 4:41 ሀይሳፈ ቆሞን ሱንꬃይ ፃፈትዳ ስሞና ኮቻት ይሁዳ ካዋ ህዝቅያሳ ዎደ ጋዶራ ቢታ ብድ ያን ደእያ ካማ ኮቻነ ማኡና አሳታ ኦልድ ꬋይስዶሶና። ሄ ቢታን ኤንታ መህያስ ሄምያ በሲ ደእያ ግሾ፥ ስሞና ኮቻት ሀች ጋካናዉ ያን ኡትዶሶና።
1CH 4:42 ስሞና ኮቻፈ እቻሹ ፄቱ አሳይ ሳይረ ዙማ ብዶሶና። ኤንታ ሀላቃት ይሽአ ናይታ ፓላፃ፥ ናራ፥ ራፋያነ ኡዝኤላ።
1CH 4:43 ባቃትድ አትዳ አማለቃ አሳ ꬋይስድ ኤንቲ ሀች ጋካናዉ ሄ ቢታን ደኦሶና።
1CH 5:1 እስራኤለ ባይራ ናኣ ሮቤላ የለታይ ሀይሳፈ ካልድ ፃፈትዳይሳ። ሮቤል ባይራ ናአ፤ ሽን ባ አዋ ሂፃ ቱንስዳ ግሾ፥ ባይራተꬃ ማታይ እስራኤለ ናኣ ዮሰፋ ናይታስ እመትስ። ሄሳ ግሾ፥ እያ የለታይ ባይራተꬃ ማራ ናግድ ፃፈትቤና።
1CH 5:2 ይሁድ ባ እሻታፐ አꬍድ ምኖ፤ ባይራተꬃይ ዮሰፋስ እመትዳባ ግድኮካ፥ እስራኤለ አሳ ሃረይስ ይሁዳፐ ከይስ።
1CH 5:3 እስራኤለ ባይራ ናኣ ሮቤላ አደ ናይት ሄኖሀ፥ ፓላ፥ ሄስሮናነ ካርማ።
1CH 5:4 እዩኤላ ናአይ ሻማያ፤ ሻማያ ናአይ ጎጋ፤ ጎጋ ናአይ ሳመአ፤
1CH 5:5 ሳማአ ናአይ ምካ፤ ምካ ናአይ ራያ፤ ራያ ናአይ ብኤላ።
1CH 5:6 ብኤላ ናአይ አሶረ ካዎይ ተልገልተልፈልሶሪ ድእድ ኤፍዳ ብኤራ፤ ብኤር ሮቤላ ኮቻታ ሀላቃ።
1CH 5:7 ብኤራ ዳቦት፥ ባንታ የለታ ማዝጋበን ፃፍዳ ሮቤላ ያራታ ሀላቃት እዩኤላነ፥ ዛካርያሳ።
1CH 5:8 ብኤል አዛዛ ናአ፤ አዛዝ ሻማአ ናአ፤ ሻማእ እዩኤላ ኮቸ። እዩኤላ ኮቻት አሮኤራ ካታማን፥ ነቦ ቢታንነ ባኣል-ማኦና ቢታን ደእዶሶና።
1CH 5:9 ሮቤላ ኮቻታስ መሄይ ጋላዳን ዳርዳ ግሾ፥ ኤንቲ ያፐ ዶሎሀ ባጋ ብድ፥ ኤፍራፂሳ ሻፋ ጋካናዉ ደእያ መላ ቢታን ኡትዶሶና።
1CH 5:10 ሳኦላ ላይꬃን አጋራ ያራታራ ሮቤላ ያራት ኦለትድ ፆንዶሶና። ጋላዳፐ ዶሎሀ ባጋራ ደእያ አጋራ ያራታ ቢታን ኡትዶሶና።
1CH 5:11 ጋደ ኮቻት ሮቤላ ኮቻታፐ ፑደሀ ባጋን፥ ሳልካ ጋካናዉ ደእያ ባሳነ ቢታን ኡትዶሶና።
1CH 5:12 እዩኤል ኮይሮ ያራታስ ሀላቃ፤ ሳፋም ናምአንꬆ ያራታስ ሀላቃ። ያናይነ ሳፋም ባሳነን ኡትዳ ያራታስ ሀላቃ።
1CH 5:13 ኤንታ ዳቦት፥ ባንታ ሶ አሳን አሳን፥ ምካኤላ፥ ማሱላማ፥ ሳባ፥ ዮራያ፥ ያቅካና፥ ዙኤነ ኤቤራ። ኤንቲ ኩመꬅ ላፑና።
1CH 5:14 ሀይሳቲ አብካላ ናይት ቡዛ ኮቻታ። ቡዝ የዳያ የልስ፤ የዳየይ እየሳያ የልስ፤ እየሳይ ምካኤላ የልስ፤ ምካኤል ጋላዳ የልስ፤ ጋላድ እዳያ የልስ፤ እዳይ ሁራ የልስ፤ ሁር አብሃላ የልስ።
1CH 5:15 ኤንታ ሶ አሳ ሀላቃይ ጉና ናኣ ናኣ አብድኤላ ናኣ አካ።
1CH 5:16 ኤንቲ ጋላዳንነ ባሳነን፥ ያን ደእያ ካታማታንነ ሳሮና ቢታን መሄይ ሄመትያ በሳታን ኡትዶሶና።
1CH 5:17 ሀይሳታ የለታይ ይሁዳ ካዋ እዮአታማ ዎደ እስራኤለ ካዋ እዮርባማ ዎደ ማዝጋበን ፃፈትስ።
1CH 5:18 ሮቤላ ኮቻፈ፥ ጋደ ኮቻፈነ ምናሰ ኮቻ ባጋፈ ጎንዳለ ኦይከይሳት፥ ማሸ ዳንጨይሳትነ ዶንገ ዱከይሳት ምኖነ ኦላን ሎህዳይሳት 44፥ 760.
1CH 5:19 ኤንቲ አጋራ ያራራ፥ እፁራ ያራራ፥ ናፈሳራነ ኖዳባራ ኦለትዶሶና።
1CH 5:20 ኤንቲ ሄ አሳራ ኦለትሸ ፆሳኮ ዋስዳ ግሾ፥ ማዶ ደምዶሶና። ኤንቲ ፆሳን አማነትዳ ግሾ፥ እ ኤንታዉ ዎሰትስ። ሄሳ ግሾ፥ አጋራ ያራትነ ኤንታራ ደእያ ሀራት ኤንታ ኩሸን ገልዶሶና።
1CH 5:21 ባንታ ሞርከታፐ እሻታሙ ሙኩሉ ግማለታ፥ ናምኡ ፄታነ እሻታሙ ሙኩሉ ዶርሳታ፥ ናምኡ ሙኩሉ ሀረታነ ፄቱ ሙኩሉ አሳ ድእድ ኤፍዶሶና።
1CH 5:22 ኦላይ ፆሳባ ግድዳ ግሾ ዳሮት ሀይቅዶሶና። ድኤተꬃ ዎደይ ጋካናዉ ሄ ቢታን ደእዶሶና።
1CH 5:23 ምናሰ ኮቻፈ ባጋ ያራይ ባሳነፐ ዶምድ፥ ባኣል-አርሞና፥ ሳንራነ አርሞና ዙማ ጋካናዉ ደእያ ቢታን ኡትዶሶና፤ ኤንቲ ሄ ቢታን ዳርዶሶና።
1CH 5:24 ኤንታ ሶ ሀላቃት ኤፈራ፥ ይሽአ፥ ኤልኤላ፥ አዝርኤላ፥ ኤርምያሳ፥ ሆዳዋነ እዮድኤላ። ሀይሳቲ ኤንታ ሶ አሳን ኤረትዳይሳታ፥ ፃላነ ዎልቃማ።
1CH 5:25 ሽን ባንታ ማይዛታ ፆሳስ አማነትቦኮና፤ ፆሳይ ኤንታ ስንꬃፈ ꬋይስዳ ሄ ቢታ ፆሳታ ጎይንዶሶና።
1CH 5:26 ሄሳ ግሾ፥ እስራኤለ ፆሳይ አሶረ ካዋ ፖሀ (ሄስካ ተልገልተልፈልሶራ) አያና ደንꬅድ ሮቤላ ኮቻ፥ ጋደ ኮቻነ ምናሰ ኮቻፈ ባጋ ድእድ፥ ሀላሀ፥ ሀቦራነ ሃራ ቢታነ ጎዛና ሻፋ ኤፍስ። ኤንቲ ሀች ጋካናዉ ያን ደኦሶና።
1CH 6:1 ሌወ አደ ናይት ገድሶና፥ ቃሃታነ ማራራ።
1CH 6:2 ቃሃታ አደ ናይት አምራማ፥ ይስሃራ፥ ከብሮናነ ኡዝኤላ።
1CH 6:3 አምራማ አደ ናይት አሮና፥ ሙሰነ ማይራሞ። አሮና አደ ናይት ናዳባ፥ አብዮዳ፥ አላዛራነ እታማራ።
1CH 6:4 አላዛር ፕንሃሳ የልስ፤ ፕንሃስ አብሱ የልስ፤ አብሱይ ቡቃ የልስ፤
1CH 6:5 ቡቅ ኦዛ የልስ፤
1CH 6:6 ኦዝ ዛራ የልስ፤ ዛራህ ማራዮታ የልስ፤
1CH 6:7 ማራዮት አማረ የልስ፤ አማረይ አክፆባ የልስ፤
1CH 6:8 አክፆብ ሳዶቃ የልስ፤ ሳዶቅ አክማሳ የልስ፤
1CH 6:9 አክማስ አዛርያሳ የልስ፤ አዛርያስ ዮሃና የልስ፤
1CH 6:10 ዮሃን አዛርያሳ የልስ። ሶሎሞነይ የሩሳላመን ኬፅስዳ ፆሳ ኬꬃን ኦꬅዳ ካህነይ አዛርያሳ።
1CH 6:11 አዛርያስ አማረ የልስ፤ አማረይ አክፆባ የልስ፤
1CH 6:12 አክፆብ ሳዶቃ የልስ፤ ሳዶቅ ሳሉማ የልስ፤
1CH 6:13 ሳሉም ካልቀ የልስ፤ ካልቀይ አዛርያሳ የልስ፤
1CH 6:14 አዛርያስ ሳራያ የልስ፤ ሳራይ እዮሳደቃ የልስ።
1CH 6:15 ጎዳይ ይሁዳነ የሩሳላመ ናቡካዳናፆራን ድኤታና መላ ኦꬅዳ ዎደ እዮሳደቅ ድኤትድ ብስ።
1CH 6:16 ሌወ አደ ናይት ገድሶና፥ ቃሃታነ ማራራ።
1CH 6:17 ገድሶና አደ ናይታ ሱንꬃይ ልብናነ ሳመአ።
1CH 6:18 ቃሃታ አደ ናይት አምራማ፥ ይስሃራ፥ ከብሮናነ ኡዝኤላ።
1CH 6:19 ማራራ አደ ናይት ማህላነ ሙሰ። ባንታ ሶ አሳን አሳን ፃፈትዳ ሌወ ያራይ ሀይሳ።
1CH 6:20 ገድሶና ናአይ ልብና፤ ልብና ናአይ ያሃታ፤ ያሃታ ናአይ ዛማታ።
1CH 6:21 ዛማታ ናአይ ዮኣካ፤ ዮኣካ ናአይ አዶ፤ አዶ ናአይ ዛራ፤ ዛራ ናአይ ያትራ።
1CH 6:22 ቃሃታ ናአይ አምናዳበ፤ አምናዳበ ናአይ ቆረ፤ ቆረ ናአይ አሴራ፤
1CH 6:23 አሴራ ናአይ ሄልቃና፤ ሄልቃና ናአይ አብሳፋ፤ አብሳፋ ናአይ አሴራ፤
1CH 6:24 አሴራ ናአይ ታሀታ፤ ታሀታ ናአይ ኡርኤላ፤ ኡርኤላ ናአይ ኦዝያና፤ ኦዝያና ናአይ ሳዉላ።
1CH 6:25 ሄልቃና አደ ናይት አማሳነ አክሞታ።
1CH 6:26 አክሞታ ናአይ ሄልቃና፤ ሄልቃና ናአይ ፆፋያ፤ ፆፋያ ናአይ ናሃታ፤
1CH 6:27 ናሃታ ናአይ ኤልያባ፤ ኤልያባ ናአይ ይሮሃማ፤ ይሮሃማ ናአይ ህልቃና።
1CH 6:28 ሳሜላ ባይራ ናአይ እዩኤላ፤ ካሎይ አብያ።
1CH 6:29 ማራራ አደ ናይት ማህላ፤ ማህላ ናአይ ልብና፤ ልብና ናአይ ሳመአ፤ ሳመአ ናአይ ኦዛ፤
1CH 6:30 ኦዛ ናአይ ሳምአ፤ ሳምአ ናአይ ሀግያ፤ ሀግያ ናአይ አሳያ።
1CH 6:31 ዳዊቲ ታቦትያ የሩሳላመ ኤህዳፐ ጉየ፥ ጎዳ ኬꬃን ሹምዳ ዛማረታ ሀላቃት ሀይሳፈ ካልድ ፃፈትዳይሳታ።
1CH 6:32 ሶሎሞነይ የሩሳላመን ጎዳ ፆሳ ኬꬃ ኬፃና ጋካናዉ፥ ጎዳ ታቦተይ ደእያ ዱንካንያ ስንꬃን እሶይ እሶይ ባ ማራን ማራን ማዝሙረ የፅሸ ጎዳስ ኦꬅዶሶና።
1CH 6:33 ባንታ አደ ናይታራ የፅዳይሳት ሀይሳፈ ካልድ ፃፈትዳይሳታ። ቃሃታ ያራፐ ዛማርያ ሄማና፤ ሄማን እዩኤላ ናአ፤ እዩኤላ ሳሜላ ናአ፤
1CH 6:34 ሳሜል ሄልቃና ናኣ፤ ህልቃን ይሮሃማ ናአ፤ ይሮሃም ኤልኤላ ናአ፤ ኤልኤል ቶሀ ናአ፤
1CH 6:35 ቶህ ፆፋያ ናአ፤ ፆፋያ ሄልቃና ናአ፤ ህልቃን ማሃታ ናአ፤ ማሃት አማሳያ ናአ፤
1CH 6:36 አማሳይ ሄልቃና ናአ፤ ሄልቃን እዩኤላ ናአ፤ እዩኤላ አዛርያሳ ናአ፤ አዛርያስ ሶፎንያሳ ናአ፤
1CH 6:37 ሶፎንያስ ታሀታ ናአ፤ ታሀት አሴራ ናአ፤ አሴር አብሳፋ ናአ፤ አብሳፍ ቆረ ናአ፤
1CH 6:38 ቆረይ ይሳራ ናአ፤ ይሳር ቃሃታ ናአ፤ ቃሃት ሌወ ናአ፤ ሌወይ እስራኤለ ናአ።
1CH 6:39 ሄማና ዳቦይ አሳፍ እያ ኡሻቻ ባጋራ ኤቅድ ኦꬄስ። አሳፍ ባራካ ናአ፤ ባራካ ስምአ ናአ፤
1CH 6:40 ሽምእ ምካኤላ ናአ፤ ምካኤል ባአሳያ ናአ፤ ባኣስ ማልክያ ናአ፤
1CH 6:41 ማልከይ ኤታና ናአ፤ ኤታን ዛራ ናአ፤ ዛር አዳያ ናአ፤
1CH 6:42 አዳይ ኤታና ናአ፤ ኤታን ዛማታ ናአ፤ ዛማት ሳመአ ናአ፤
1CH 6:43 ሳመእ ያሃታ ናአ፤ ያሃት ገድሶና ናአ፤ ገድሶን ሌወ ናአ።
1CH 6:44 ኤንታፈ ሀድርሳ ባጋራ ኤንታ ዳቦት፥ ማራራ ያራት ኤቆሶና። ኤታን ቂሳ ናአ፤ ቂስ አብድ ናአ፤ አብድ ማሉካ ናአ፤
1CH 6:45 ማሉክ ሀሻባያ ናአ፤ ሀሻባያ አማስያሳ ናአ፤ አማስያስ ካልቀ ናአ፤
1CH 6:46 ክልቀይ አሜሳ ናአ፤ አሜስ ባና ናአ፤ ባን ሳማራ ናአ፤
1CH 6:47 ሳማር ማህላ ናአ፤ ማህል ሙሰ ናአ፤ ሙስ ማራራ ናአ፤ ማራር ሌወ ናአ።
1CH 6:48 ኤንታ ዳቦ ግድዳ ሌወት ፆሳ ዱንካንያን ኦꬃናዉ ሱንትዶሶና።
1CH 6:49 ሽን አሮንነ እያ ኮቻት እፃነ ጩይሶሶና፤ ያርሾ በሳን ፁሳ ያርሾ ያርሾሶና። ፆሳ አይለይ ሙሰይ ኪትዳይሳዳ ኡባፈ ጌሻ በሳን ጎይንያ ጎይኖ ኡባስነ ፆሳይ እስራኤለ ናጋራ አቶ ያግስያ ያርሹዋ ያርሻናዉ አዋተꬅ ኤንታዉ ደኤስ።
1CH 6:50 አሮና የለታይ ሀይሳፈ ካልድ ፃፈትዳይሳታ። አሮና ናአይ አላዛራ፤ አላዛራ ናአይ ፕንሃሳ፤ ፕንሃሳ ናአይ አብሱ፤
1CH 6:51 አብሱ ናአይ ቡቃ፤ ቡቃ ናአይ ኦዛ፤ ኦዛ ናአይ ዛራሀ።
1CH 6:52 ዛራሀ ናአይ ማራዮታ፤ ማራዮታ ናአይ አማረ፤ አማረ ናአይ አክፁባ፤
1CH 6:53 አክፁባ ናአይ ሳዶቃ፤ ሳዶቃ ናአይ አክማሳ።
1CH 6:54 አሮና ኮቻት ዳና መላ ኤንታዉ እመትዳ በሳት ሀይሳፈ ካልድ ፃፈትዳይሳ። ኮይሮ ሳማይ ቃሃታ ያራስ ከይዳ ግሾ
1CH 6:55 ይሁዳን ደእያ ከብሮና ካታማነ እያ ዩሹዋን ደእያ ሄንꬃ በሳታ ኤንታዉ እምዶሶና።
1CH 6:56 ሽን ከብሮና ጎሻ ጋደታነ እያ ዩሹዋን ደእያ ጉታታ ዮፎነ ናኣ ካለባስ እምዶሶና።
1CH 6:57 አሮና ናይታስ ባቃትድ አትያ ካታማታ፥ ከብሮና፥ ያትራ፥ ልብና፥ ኤሽታሞአነ ኤንታ ሄራን ደእያ ሄንꬃ በሳታ።
1CH 6:58 ሆሎና፥ ዳብራነ ኤንታ ሄራን ደእያ ሄንꬃ በሳታ፥
1CH 6:59 አሳና፥ ቤት-ሳሜሳነ ኤንታ ሄራን ደእያ ሄንꬃ በሳታ እምዶሶና።
1CH 6:60 ቃስ ብንያመ ቢታ ዛዋፐ ግብአ፥ ጋለማታ፥ አናቶተነ ኤንታ ሄራን ደእያ ሄንꬃ በሳታ ኤንታዉ እምዶሶና። አሮና ናይታስ እመትዳ ካታማት ኩመꬅ ታማነ ሄꬓ።
1CH 6:61 ምናሰ ያራ ባጋ ቢታፈ ታሙ ካታማታ አትዳ ቃሃታ ያራስ እምዶሶና።
1CH 6:62 ይሳኮራ፥ አሴራ፥ ንፍታለመነ ባሳነን ደእያ ምናሰ ያራ ቢታ ዛዋፐ ታማነ ሄꬑ ካታማታ ገድሶና ያራስ እምዶሶና።
1CH 6:63 ሮቤላ፥ ጋደነ ዛብሎና ቢታ ዛዋፐ ታማነ ናምኡ ካታማታ ማራራ ያራስ እምዶሶና።
1CH 6:64 ሄሳዳ ኦꬅድ፥ እስራኤለ አሳይ ሌወታስ ሀ ካታማታነ ኤንታ ሄራን ደእያ ሄንꬃ ቢታ እምዶሶና።
1CH 6:65 ይሁዳፐ፥ ስሞናፐነ ብንያመ ቢታ ዛዋፐ ሀይሳፈ ቆሞን ፃፈትዳ ካታማታ ኤንታዉ እምዶሶና።
1CH 6:66 ቃሃታ ያራፐ ጉꬃት ኤፍሬማ ቢታ ዛዋፐ ካታማታነ ኤንታ ሄራን ደእያ ሄንꬃ በሳታ ኤክዶሶና።
1CH 6:67 ኤንታዉ አሳይ ባቃትድ አትያ ካታማታ፥ ደረይ ዳርያ ኤፍሬማ ቢታን ደእያ ሴከማ፥ ገዘራ፥
1CH 6:68 ዮቅምኣማ፥ ቤት-ሆሮና፥
1CH 6:69 ኤሎና፥ ጋት-ርሞናነ ኤንታ ሄራን ደእያ ሄንꬃ በሳታ እምዶሶና።
1CH 6:70 ምናሰ ኮቻ ባጋፈ አኔራ፥ ብልኣማነ ኤንታ ሄራን ደእያ ሄንꬃ በሳታ፥ አትዳ ቃሃታ ያራስ እምዶሶና።
1CH 6:71 ምናሰ ኮቻ ባጋፈ ባሳነን ደእያ ጎላና፥ አስታሮታነ ኤንታ ሄራን ደእያ ሄንꬃ በሳታ ገድሶና ያራስ እምዶሶና።
1CH 6:72 ይሳኮራ ኮቻፈ ቃደሳ፥ ዳብራተነ ኤንታ ሄራን ደእያ ሄንꬃ በሳታ፥
1CH 6:73 ራሞታ፥ አነማናነ ኤንታ ሄራን ደእያ ሄንꬃ በሳታ እምዶሶና።
1CH 6:74 አሴራ ኮቻፈ ማሻላ፥ አብዶና፥
1CH 6:75 ሁቆቃ፥ ረሆባነ ኤንታ ሄራን ደእያ ሄንꬃ በሳታ እምዶሶና።
1CH 6:76 ንፍታለመ ኮቻፈ ጋልላን ደእያ ቃደሳ፥ ሀሞና፥ ቅራታይማነ ኤንታ ሄራን ደእያ ሄንꬃ በሳታ እምዶሶና።
1CH 6:77 አትዳ ማራራ ያራስ ዛብሎና ኮቻፈ እርሞና፥ ታቦረነ ኤንታ ሄራን ደእያ ሄንꬃ በሳታ እምዶሶና።
1CH 6:78 ሮቤላ ኮቻፈ እያርኮፈ ሄፍንꬃን ዮርዳኖሰፐ ዶሎሀ ባጋራ፥ ꬎቃ ደንባን ደእያ ቦሶራ፥ ያሳነ፥
1CH 6:79 ቅድሞታ፥ መፋታነ ኤንታ ሄራን ደእያ ሄንꬃ በሳታ እምዶሶና።
1CH 6:80 ጋደ ኮቻፈ ጋላዳን ደእያ ራሞታ፥ ማሀናይማ፥
1CH 6:81 ሀሰቦና፥ እያዜራነ ኤንታ ሄራን ደእያ ሄንꬃ በሳታ እምዶሶና።
1CH 7:1 ይሳኮራ ኦይዱ አደ ናይት ቶላ፥ ፑዋ፥ ያሱባነ ሽምሮና።
1CH 7:2 ቶላ አደ ናይት ኦዛ፥ ራፋያ፥ ይርኤላ፥ ህማያ፥ ይብሳማነ ሽሙኤላ፤ ሀይሳቲ ቶላ ሶ አሳ ሀላቃታ። ኤንቲ ዎልቃማነ ምኖ አስ። ዳዊታ ዎደ ኤንታ ታይቦይ 22,600.
1CH 7:3 ኦዛ ናአይ ይዝራሀ፣ ይዝራሀ ናይት ምካኤላ፥ አብድዩ፥ እዩኤላነ ይሽያ፤ ሀ እቻሻት ሶ አሳ ሀላቃታ።
1CH 7:4 ባንታ ሶ አሳ የለታዳ ኦዛ ያራፐ ኦላንቾት 36,000፤ ኤንታዉ ዳሮ ማቸትነ ናይት ደኦሶና።
1CH 7:5 ይሳኮራ ኮቻፈ ኦላንቾት ባንታ የለታ ማዝጋበን ታይበትድ፥ ኩመꬅ 87,000 ግድዶሶና።
1CH 7:6 ብንያመ ሄꬑ አደ ናይት ቤላ፥ በከራነ ይድኤላ።
1CH 7:7 ቤላ አደ ናይት ኤሰቦና፥ ኦዛ፥ ኡዝኤላ፥ እያርሞታነ እራ፤ ሀ እቻሻት ሶ አሳ ሀላቃታ። ኤንቲ ዎልቃማነ ምኖ አስ። ባንታ የለታን ታይበትዳ ኦላንቾት 22,034 ግድዶሶና።
1CH 7:8 በከራ አደ ናይት ዛምራ፥ እዮኣሳ፥ አላዛራ፥ ኤልዮአና፥ ኦምራ፥ እያርሞታ፥ አብያ፥ አናቶታነ አለሜታ።
1CH 7:9 ባንታ የለታ ማዝጋበን ታይበትዳ ዎልቃማነ ምኖ አሳት 20,200 ግድዶሶና።
1CH 7:10 ይድኤላ ናአይ ብልሃና። ብልሃና አደ ናይት ይኡሳ፥ ብንያመ፥ ኤሁዳ፥ ክንአና፥ ዘታና፥ ታርሰሳነ አክሳራ፤
1CH 7:11 ሀይሳቲ ባንታ ሶ አሳ ሀላቃ፤ ዎልቃማነ ምኖ አስ። ባንታ የለታዳ ታይበትዳ ኦላንቾት 17,200.
1CH 7:12 ሱፍምነ ሁፍም እራ ናይታ። ሁሽም አሄረ ናአ።
1CH 7:13 ንፍታለመ ናይት ያህፅኤላ፥ ጉና፥ የፀራነ ሽለማ፤ ሀይሳቲ ባላ ኮቻታ።
1CH 7:14 ምናሰ ኮቻት ሀይሳፈ ካልድ ፃፈትዳይሳታ። ምናሰ ሶረ ላገፈ የልዳ አደ ናይት አስርኤላነ ጋላዳ አዋ ማክራ።
1CH 7:15 ማክር ሁፍማፐነ ሳፍማፐ እስ እስ ማቾ ኤክስ። ማክራ ምቸ ሱንꬃይ ማእኮ። ማክራ ናአይ ካሎይ ሰሎጳዳ፤ ሰሎጳድ ማጫ ናአ ፃላላ የልስ።
1CH 7:16 ማክራ ማችያ ማእካ ፓሬሳነ ሱሮሳ ጌተትያ ናምኡ አደ ናይታ የላሱ። ፓረሳ ናይት ኡላማነ ራቄማ።
1CH 7:17 ኡላማ ናአይ ባዳና። ሀይሳቲ ምናሰ ናኣ ናአ ማክራ ናኣ ጋላዳ ኮቻታ።
1CH 7:18 ጋላዳ ምችያ ሀሞለከታ፥ እሱደ፥ አብኤዘራነ ማህላ የላሱ።
1CH 7:19 ሻምዳ አደ ናይት አህያ፥ ሴከማ፥ ልቃነ አንኣማ።
1CH 7:20 ኤፍሬማ ናአይ ሹቱላ፤ ሹቱላ ናአይ ባረዳ፤ ባረዳ ናአይ ታሀታ፤ ታሀታ ናአይ ኤላዳ፤ ኤላዳ ናአይ ታሀታ፤
1CH 7:21 ታሀታ ናአይ ዛባዳ፤ ዛባዳ ናአይ ሹቱላ። ኤፍሬማስ ኤደራነ ኤላዳ ጌተትያ ሀራ ናምኡ ናይት ደኦሶና። ኤንቲ ጌተ አሳ መሄ ካይስን አሳይ ኤንታ ዎꬍስ።
1CH 7:22 ሄሳ ግሾ፥ ኤንታ አዋይ ኤፍሬም ዳሮ ዎደ አዛንን እያ እሻት እያ ምንꬃናዉ ይዶሶና።
1CH 7:23 ሄሳፈ ጉየ፥ እ ባ ማቸራ አቅስ፤ እያ ቃንꬃታዳ አደ ናአ የላሱ። ኤፍሬማ ሶ ጋክዳ ኢታ መቱዋ ግሾ እ ባ ናኣ ባርአ ግድ ሱንꬅስ።
1CH 7:24 ሸእራ ጌተትያ ኤፍሬማ ናእያ ደአዉሱ፤ ጋርሳን ቤት-ሆሮና፥ ቆሞን ኡዘን-ሼራ ጌተትያ ካታማታ ኬፃሱ።
1CH 7:25 ኤፍሬማ አደ ናአይ ራፋ፤ ራፋ ናአይ ረሼፋ፤ ረሼፋ ናአይ ቴላ፤ ቴላ ናአይ ታሀና፤
1CH 7:26 ታሀና ናአይ ላዳና፤ ላዳና ናአይ አምሁዳ፤ አምሁዳ ናአይ ኤልሳማ፤
1CH 7:27 ኤልሳማ ናአይ ናወ፤ ናወ ናአይ እያሱ።
1CH 7:28 ኤፍሬማ ኮቻት ኤክድ ባንታዉ ዳና በሲ ኦꬅዳ ቢታይ፥ ቤተለነ እያ ዩሹዋን ደእያ ጉታታ፤ ዶሎሀ ባጋን ናአራ፥ ዉሎሀ ባጋን ገዘራነ ኤንታ ዩሹዋን ደእያ ጉታታ፥ ሴከማ፥ አያነ ኤንታ ዩሹዋን ደኢያ ጉታታ ኡባ ኦይኬስ።
1CH 7:29 ምናሰ ቢታ ዛዋን ደእያ ቤት-ሳናነ እያ ዩሹዋን ደእያ ጉታታ፥ ታናካነ እያ ዩሹዋን ደእያ ጉታታ፥ ማግዶነ እያ ዩሹዋን ደእያ ጉታታ፥ ዶራነ እያ ዩሹዋን ደእያ ጉታታ። እስራኤለ ናኣ ዮሰፋ ኮቻት ሀ ካታማታን ደእዶሶና።
1CH 7:30 አሴራ አደ ናይት ይምና፥ የሱዋ፥ ይስዋነ በርአ፤ ኤንታ ምችያ ሳራሆ።
1CH 7:31 በርአ አደ ናይት ሄቤራነ በርዛወታ አዋ ማልካኤላ።
1CH 7:32 ሄቤር ያፍለፃ፥ ሳሜራ፥ ሆታማ የልስ፤ ኤንታ ምቸ ሱንꬃይ ሶሳኖ።
1CH 7:33 ያፍለፃ አደ ናይት ፓሳካ፥ ብምሃላነ አስታ።
1CH 7:34 ሳሜራ አደ ናይት አካ፥ ሮጋ፥ ያሁባነ አራመ።
1CH 7:35 ሆታማ አደ ናይት ፆፋ፥ ይምና፥ ሰለሳነ አማላ።
1CH 7:36 ፆፋ አደ ናይት ሱሀ፥ ሀርነፈራ፥ ሶጋላ፥ ቤራ፥ ይምራ፥
1CH 7:37 በፀራ፥ ሆዳ፥ ሳማ፥ ሰልሳ፥ ይትራናነ ብኤራ።
1CH 7:38 የተራ አደ ናይት ዮሮና፥ ፕስፓነ አራ።
1CH 7:39 ኡላ አደ ናይት ኤራ፥ ሀንኤላነ እርፃ።
1CH 7:40 ሀይሳቲ ኡባት አሴራ ኮቻታ። ኤንቲ ባንታ ሶ አሳ ሀላቃታነ ዶረትዳ ዎልቃማነ ምኖ አስ። ባንታ የለታዳ ታይበትዳ ኦላንቾት 26,000 ግድዶሶና።
1CH 8:1 ብንያመ ባይራ ናአይ ቤላ፤ ካሎይ አስቤላ፤ ሄꬓንꬆይ አህራ፤
1CH 8:2 ኦይዳንꬆይ ኖሄ፤ እቻሻንꬆይ ራፋ።
1CH 8:3 ቤላ አደ ናይት አዳረ፥ ጌራ፥ አብሁዳ፥
1CH 8:4 አብሱ ናእማነ፥ አሆሀ፥
1CH 8:5 ጌራ፥ ሳፉፋማነ ክራማ።
1CH 8:6 ኤሁዳ አደ ናይት ናእማነ፥ አክያነ ጌራ። ኤንቲ ግብአን ደእዳነ ጉየፐ ማናሃታ ቢታ ድኤትድ ብዳ ባንታ ሶ አሳ ሀላቃታ። ኤንታ ያ ካለꬅድ ኤፍዳይ ኦዛነ አሁዳ አዋ ጌራ።
1CH 8:8 ሻሀራም ባ ማቸታ ሁሽሞነ ባኢራ የድዳፐ ጉየ ሞአበ ቢታን አደ ናይታ የልስ።
1CH 8:9 ሻሀራም ባ ማቸ ሆድሽፐ ዮባባ፥ ድባያ፥ ሜሳ፥ ማልካማ፥
1CH 8:10 የኡፃ፥ ሳክያነ ምርማ የልስ። እያ ናይት ኡባይ ባንታ ሶ አሳ ሀላቃታ ግድዶሶና።
1CH 8:11 እ ባ ማቸ ሁሽምፐ፥ አብፁባነ ኤልፋኣላ የልስ።
1CH 8:12 ኤልፋኣላ አደ ናይት ኤቤራ፥ ማሸማነ ሻመዳ። ሻመድ ኦኖነ ሎዳ ካታማታነ ኤንታ ሄራን ደእያ ጉታታ ኬፅስ።
1CH 8:13 ሻሀራም በርአነ ሸምአ የልስ። ኤንቲ ኤሎና ካታማን ደእያ ባንታ ሶ አሳ ሀላቃታ። ኤንቲ ጌተ ካታማን ደእያ አሳ ጎድዶሶና።
1CH 8:14 በርአ አደ ናይት ሻሀራማ፥ አህያ፥ ሻሻቃ፥ ይረሞታ።
1CH 8:15 ዛባዳ፥ አራዳ፥ ኤደራ፥
1CH 8:16 ምካኤላ፥ ይሽጳነ ዮሀ።
1CH 8:17 ኤልፋላአ አደ ናይት ዛባዳ፥ ማሱላማ፥ ህዝቃ፥ ሄቤራ፥
1CH 8:18 ይሽማራያ፥ ዩዝላነ ዮባባ።
1CH 8:19 ሳመአ አደ ናይት ያቅማ፥ ዝክራ፥ ዝባዳ
1CH 8:20 ኤላናያ፥ ፅልታያ፥ ኤለላ፥
1CH 8:21 አዳያ፥ ብራያነ ሽምራታ።
1CH 8:22 ሻሻቃ አደ ናይት ይሽጳና፥ ኤቤራ፥ ኤልኤላ፥
1CH 8:23 አብዶና፥ ዝክራ፥ ሀናና፥
1CH 8:24 ሀናንያ፥ ኤላማ፥ አንቶታ፥
1CH 8:25 ይፍዳያነ ፓኑኤላ።
1CH 8:26 ይሮሃማ አደ ናይት ሸምሽራያ፥ ሸሃራ፥ አታላ፥
1CH 8:27 ያረሻ፥ ኤልይአሳነ ዝክራ።
1CH 8:28 ሀይሳቲ ባንታ የለታን የሩሳላመን ኡትዳ ባንታ ሶ አሳ ሀላቃታ።
1CH 8:29 ጋባኦና አዋይ ይኤል ጋባኦና ካታማን ደእስ፤ እያ ማቸ ሱንꬃይ ማእኮ።
1CH 8:30 እያ ናኣ ባይራይ አብዶና፤ ሀራ እያ አደ ናይት ፁራያ፥ ቂሳ፥ ባኣላ፥ ኔራነ ናዳባ፥
1CH 8:31 ገዶራ፥ አህያ፥ ዘከራነ
1CH 8:32 ማቅሎታ። ማቅሎት ሽምአ የልስ። ሀይሳቲ የሩሳላመን ደእያ ባንታ ዳቦታ ማታን ደእዶሶና።
1CH 8:33 ኔር ቂሳ የልስ፤ ቂስ ሳኦላ የልስ። ሳኦል ዮናታና፥ ማልክሳ፥ አብናዳበነ አስባኤላ የልስ።
1CH 8:34 ዮናታና ናአይ ማርባኣላ የልስ፤ ማርባኣል ምክያሳ የልስ።
1CH 8:35 ምክያሳ አደ ናይት ፕቶና፥ መለካ፥ ታረአነ አካዛ።
1CH 8:36 አካዝ ያሆአዳ የልስ። ያሆኣድ አለሜታ፥ አዝማወታነ ዝምራ የልስ። ዝምር ሞፃ የልስ፤
1CH 8:37 ሞፅ ብንአ የልስ፤ ብንእ ራፋ የልስ፤ ራፍ ኤልኣሳ የልስ፤ ኤልኣስ አፄላ የልስ።
1CH 8:38 አፄላስ ኡሱፑን አደ ናይት ደኦሶና። ኤንታ ሱንꬃይ አዝርቃማ፥ ቦኬራ፥ እስማኤላ፥ ሻኣራ፥ አብድዩነ ሀናና።
1CH 8:39 አፄላ እሻ ኤሸቃስ ሄꬑ ናይት ደኦሶና። እያ ናአይ ባይራይ ኡላማ፤ ካሎይ ይኡሳ፤ ሄꬓንꬆይ ኤልፋላፃ።
1CH 8:40 ኡላማ ናይት ዎልቃማነ ምኖ አስ፤ ኤንቲ ዶንገን ዱከይሳታ። ኡላማስ ፄታነ እሻታሙ ግድያ ናይትነ ናይታ ናይት ደኦሶና። ሀይሳቲ ኡባይ ብንያመ ኮቻታ።
1CH 9:1 እስራኤለ አሳ ኡባይ ባ የለታን የለታን፥ እስራኤለ ካዎታ ማፃፋን ፃፈትድ ደኤስ። ይሁዳ አሳይ ጎዳስ አማነትቦና ግሾ ባብሎነ ቢታ ድኤትድ ብዶሶና።
1CH 9:2 ኮይሮ ስሚድ ባንታ ቢታንነ ባንታ ካታማታን ኡትዳይ ጉꬃ እስራኤለ አሳታ፥ ካህነታ፥ ሌወታነ ፆሳ ኬꬃ ኦሳንቾታ።
1CH 9:3 ይሁዳፐ፥ ብንያመፐ፥ ኤፍሬማፐነ ምናሰፐ ጉꬃ አሳት ይድ የሩሳላመን ደእዶሶና።
1CH 9:4 ይሁዳ ናኣ ፓረሳ ያራፐ ኡታይ የሩሳላመን ደኤይሳታስ ሀላቃ። ኡታይ አምሁዳ ናአ፤ አምሁድ ኦምራ ናአ፤ ኦምር እምራ ናአ፤ እምር ባና ናአ።
1CH 9:5 ይሁዳ ናኣ ሴላ ያራፐ አሳይነ እያ ናይት የሩሳላመን ደኤይሳታስ ሀላቃ።
1CH 9:6 ይሁዳ ናኣ ዛራ ያራፐ ይኡኤል የሩሳላመን ደኤይሳታስ ሀላቃ። ይሁዳ ኮቻ ታይቦይ ኡሱፑን ፄታነ ኡዱፉን ታማ።
1CH 9:7 ብንያመ ያራ ሀላቃት ሀይሳፈ ካልድ ፃፈትዳይሳታ። ማሱላማ ናኣ ሳሉ፥ ሆዳዋ ናኣ ማሱላማ፥ ሀሰናኡ ናኣ ሆዳዋ፥
1CH 9:8 ይሮሃማ ናኣ ይብናያ፥ ኦዛ ናኣ ኤላ፥ ምክራ ናኣ ኦዛ፥ ሳፋፃ ማሱላማ፥ ራኡላ ናኣ ሳፋፃ፥ ይብና ናኣ ራጉኤላ።
1CH 9:9 ብንያመ ኮቻ ታይቦይ ኡዱፉን ፄታነ እሻታማነ ኡሱፑና። ሀይሳቲ ኡባይ ባንታ ሶ አሳ ሀላቃታ።
1CH 9:10 የሩሳላመን ደእዳ ካህነት ሀይሳፈ ካልድ ፃፈትዳይሳታ። ኤንቲ ዮዳሀ፥ ዮራባ፥ ያክናነ
1CH 9:11 ፆሳ ኬꬃን አዋትያ አዛርያሳ። አዛርያስ ካልቀ ናአ፤ ካልቀይ ማሱላማ ናአ፤ ማሱላም ሳዶቃ ናአ፤ ሳዶቅ ማርዮታ ናአ፤ ማርዮት አክፆባ ናአ።
1CH 9:12 ሀራት ቃስ ይሮሃማ ናኣ አዳያነ አድኤላ ናኣ ማእሰያ። ይሮሃም ፓስኮራ ናአ፤ ፓስኮር ማልክያ ናአ። አድኤል ያህዜራ ናአ፤ ያህዜር ማሱላማ ናአ፤ ማሱላም ማሽልሞታ ናአ፤ ማሽልሞት እመራ ናአ።
1CH 9:13 ባንታ ሶ አሳስ ሀላቃ ግድዳ ካህነታ ታይቦይ 1,760. ሀይሳቲ ፆሳ ኬꬃን ኦꬃናዉ ዳንዳእያ አሳታ።
1CH 9:14 የሩሳላመን ደእያ ሌወት ሀይሳፈ ካልድ ፃፈትዳይሳታ። ሀሹባ ናአይ ሻማየይ ማራራ ያራ። ሀሹብ አዝርቃማ ናአ፤ አዝርቃም ሀሳባያ ናአ።
1CH 9:15 ሀራት ቃስ ባቅባቃራ፥ ሄሬሳ፥ ጋላላነ ማታና። ማታን ምካ ናአ፤ ምክ ዝክራ ናአ፤ ዝክር አሳፋ ናአ።
1CH 9:16 ሀራት ቃስ ናፆፋታ ጉታን ኡትዳይ አብድዩነ ባራካ። አብድዩይ ሻማእያ ናአ፤ ሻማኤይ ጋላላ ናአ፤ ጋላል የዱቱና ናአ፤ ባራክ አሳ ናአ፤ አስ ኤልቃና ናአ።
1CH 9:17 ካዎ ፐንግያ ናገይሳት፥ ሳሉማ፥ አቁባ፥ ታልሞና፥ አህማናነ ኤንታ እሻታ፤ ሳሉም ኤንታ ሀላቃ።
1CH 9:18 ኤንቲ ዉሎሀ ባጋራ ደእያ፥ ካዎ ፐንግያ ናግዶሶና። ሀይሳፈ ካሰ ኤንቲ ሌወት ዱንካንዳ ጉታ ናጎሶና።
1CH 9:19 አብሳፋ ናኣ ናአይ ቆረ ናአይ ሳሉም ቆረ ያራ። ቆረ ያራይ ካሰ ጎዳ ዱንካንያ ናግዳይሳዳ ሳሉምነ ቆረ ኮቸ ግድዳ እያ ዳቦት ፆሳ ኬꬃ ፐንግያ ናጎሶና።
1CH 9:20 አላዛራ ናአይ ፕንሃስ ካሰ ቆረ ያራ ሀላቃ፤ ጎዳይ እያራ ደኤስ።
1CH 9:21 ማሱላማ ናአይ ዛካርያስ ዱንካንያ ግዶ ገልያ ፐንግያ ናጌስ።
1CH 9:22 ፐንግያ ናጋናዉ ዶረትዳይሳት ኩመꬅ ናምኡ ፄታነ ታማነ ናምአ፤ ሄሳት ባንታ ጉታን ጉታን ታይበትድ ፃፈትዶሶና። ኤንታ ያራስ ሀ አዋተꬃ እምዳይ ካዋ ዳዊታነ ናብያ ሳሜላ።
1CH 9:23 ሄሳ ግሾ፥ ኤንትነ ኤንታ ናይት ፆሳ ኬꬃ ፐንግያ ናጎሶና።
1CH 9:24 ኦይዱ ባጋራ ዶሎሀን፥ ዉሎሀን፥ ፑደሀን ዱገሀን እስ እስ ፐንገይ ደኤስ፤ ሄ ፐንገታ ናገይሳት ደኦሶና።
1CH 9:25 ሄ ጉታን ደእያ ኤንታ ዳቦት ላፑንꬃ ጋላሳን ጋላሳን ላመትድ፥ ናግድ ኤንታ ማዶሶና።
1CH 9:26 ፐንግያ ናግያ ኦይዱ ሌወት ሀላቃ፤ ኤንቲ ፆሳ ኬꬃ ክፍለታነ ክፍለታ ግዶን ደእያ ሚሸታ አዋተꬃን አይሶሶና።
1CH 9:27 ፆሳ ኬꬃ ናገይነ ዎንታ ጉራ ካርያ ዶየይ ኤንታ ግድያ ግሾ ያን አቆሶና።
1CH 9:28 ሌወታፐ ጉꬃት ጎይኖ ዎደ ጎኤትያ ሚሸታ ናጎሶና፤ ሄ ሚሸታ ካረ ከሰይነ ሶ ገልሰይ ኤንታ።
1CH 9:29 ኤንታፈ እሶት እሶት ፆሳ ኬꬃን ጎኤትያ ሀራ ሚሸታ፥ ꬊለ፥ ዎይነ ኡሹ፥ ዛይተ፥ እፃነነ ሳዎታ አዋተꬃን አይሶሶና።
1CH 9:30 ሽን ካህነታ ናይታፐ ባጋት ሳዉዋ ዋላኮሶና።
1CH 9:31 ቆረ ኮቻፈ ሳሉማ ባይራ ናአይ ማታታስ ያርሾ ኡይꬃ ኡክስያ አዋተꬅ ደኤስ።
1CH 9:32 ቃሃታ ያራ ግድያ ኤንታ ዳቦታፐ ባጋት ሳምባታን ሳምባታን ፃርጴዛ ቦላ ዎꬅያ ኡይꬃ ጊግስያ አዋተꬅ ኤክዶሶና።
1CH 9:33 ሌወ ኮቻፈ ጉꬃ ሀላቃት ፆሳ ኬꬃን የፀይሳታ። ቃማነ ጋላስ ኤንቲ ኦꬅያ ግሾ ሀራ ኦሶ ኦꬆና ፆሳ ኬꬃ ድርሳ ግዶን ደእያ ኬꬃታን ደኦሶና።
1CH 9:34 ሀይሳቲ ኡባይ ሌወ ሶ አሳ ሀላቃታ፤ ኤንቲ የሩሳላመን ደእዶሶና።
1CH 9:35 ጋባኦና አዋይ ይኤል ጋባኦና ካታማን ደእስ፤ እያ ማቸ ሱንꬃይ ማእኮ።
1CH 9:36 እያ ናአይ ባይራይ አብዶና፤ እያ ናይት ሀራት ፁራያ፥ ቂሳ፥ ባኣላ፥ ኔራ፥ ናዳባ፥
1CH 9:37 ጋዶራ፥ አህያ፥ ዛካርያሳነ ምክሎታ።
1CH 9:38 ምክሎት ስምአ የልስ። ሀይሳቲ የሩሳላመን ደእያ ባንታ ዳቦታ ማታን ደእዶሶና።
1CH 9:39 ኔር ቂሳ የልስ፤ ቂስ ሳኦላ የልስ። ሳኦል ዮናታና፥ ማልክሳ፥ አብናዳበነ ኤሽባኣላ የልስ።
1CH 9:40 ዮናታና ናአይ ማርባኣላ የልስ፤ ማርባኣል ምክያሳ የልስ።
1CH 9:41 ምክያሳ ናይት ፕቶና፥ መለካ፥ ታረአነ አካዛ።
1CH 9:42 አካዝ ያእራ የልስ። ያእር አለሜታ፥ አዝማወታነ ዝምራ የልስ። ዝምር ሞፃ የልስ፤
1CH 9:43 ሞፅ ብንአ የልስ፤ ብንእ ራፋያ የልስ፤ ራፋይ ኤልኣሳ የልስ፤ ኤልኣስ አፄላ የልስ።
1CH 9:44 አፄላስ ኡሱፑን አደ ናይት ደኦሶና። ኤንታ ሱንꬃይ አዝርቃማ፥ ቦኬራ፥ እስማኤላ፥ ሻኣራ፥ አብድዩነ ሀናና።
1CH 10:1 ፍልስፄመት እስራኤለ አሳራ ኦለትዶሶና። እስራኤለት ፍልስፄመታ ስንꬃፈ ባቃትዶሶና። ሄ ዎደ ዳሮ እስራኤለ አሳይ ግልቦአ ደርያ ቦላ ሀይቅዶሶና።
1CH 10:2 ፍልስፄመት ሳኦላነ እያ አደ ናይታ ጎድ ኤፍድ ሳኦላ ናይታ ዮናታና፥ አብናዳባነ ማልክሳ ዎꬍዶሶና።
1CH 10:3 ኦላይ ሳኦላ ተቅድ ኡንኤꬅስ፤ ዶንገን ዱከይሳት ሳኦላ ደምድ ማዱንፅስዶሶና።
1CH 10:4 ሳኦል ባ ኦላ ሚሽያ ቶከይሳኮ፥ “ሀ ቃፃረትቦና ፍልስፄመት ታና ካኦና መላ ነ ማሻን ታና ዎꬋ” ያግስ። ሽን እያ ኦላ ሚሽያ ቶከይስ ዳሮ ያይዳ ግሾ እፅስ፤ ሄሳ ግሾ፥ ሳኦል ባ ማሻ ሳአን ኤስድ እያ ቦላ ኩንድድ ሀይቅስ።
1CH 10:5 እያ ኦላ ሚሽያ ቶከይስ ሳኦል ሀይቅዳይሳ በእድ፥ እካ ባ ማሻ ሳአን ኤስድ እያ ቦላ ኩንድድ ሀይቅስ።
1CH 10:6 ሄሳዳ ሀንድ ሳኦል፥ እያ ሄꬑ ናይትነ እያ ሶ አሳ ኡባይ ሄ ጋላስ ሀይቅዶሶና።
1CH 10:7 ዛንጋራን ደእያ እስራኤለት ኡባይ ባንታ ኦላንቾት ባቃትዳይሳ፥ ሳኦልነ እያ ናይት ሀይቅዳይሳ በእዳ ዎደ ባንታ ካታማታ አግድ ባቃትዶሶና። ፍልስፄመት ይድ ሄ ካታማታን ደእዶሶና።
1CH 10:8 ዎንተꬃ ጋላስ ፍልስፄመት አሀታ ቦላፈ ኦላ ሚሸታ ቃር ኤካናዉ ይድ፥ ሳኦልነ እያ ናይት ግልቦአ ደርያን ሀይቅድ፥ ዝንእዳይሳታ ደምዶሶና።
1CH 10:9 ኤንቲ ሳኦላ ቆꬍያ ቃንፅድ እያ ኦላ ሚሽያ ቃር ኤክዶሶና። ያትድ ባንታ ኤቃታ ኬꬃንነ ባንታ አሳ ግዶን ፆኑዋ አዋጃና መላ ፍልስፄመ ቢታ ኡባስ አሰ ኪትዶሶና።
1CH 10:10 ኤንቲ ሳኦላ ኦላ ሚሽያ ባንታ ፆሳታ ኬꬃታፐ እሱዋን ዎꬅዶሶና፤ እያ ሁጵያ ባንታ ፆሳ ዳጎና ኤቃ ኬꬃን ካቅዶሶና።
1CH 10:11 ፍልስፄመት ሳኦላ ቦላ ኦꬅዳባ ኡባ ጋላዳን ደእያ ያበሳ ካታማ አሳይ ስእዳ ዎደ፥
1CH 10:12 ምኖ አሳት ኡባይ ብድ፥ ሳኦላ አሃነ እያ ናይታ አሀ ኤክድ ያበሳ ካታማ ኤህዶሶና። ያበሳን ደእያ ዎላ ጋርሳን ኤንታ ሞግዶሶና፤ ያትድ ላፑን ጋላስ ፆምዶሶና።
1CH 10:13 ሳኦል ጎዳስ አማነትቦና ግሾ ሀይቅስ። ጎዳ ቃላ እ ናግቤና፤ ጎዳ ዞረ ኦይቸይሳ አግድ፥
1CH 10:14 ሞይትለ ፄግያ አስ ዞረ ኦይችስ። ሄሳ ግሾ፥ ጎዳይ እያ ዎꬍድ እያ ካዎተꬃ እሰየ ናኣ ዳዊታስ አꬅድ እሚስ።
1CH 11:1 ሄሳፈ ጉየ፥ እስራኤለ አሳ ኡባይ እስፈ ከብሮናን ደእያ ዳዊታኮ ብድ፥ “ኑኒ ነ ሱꬁነ ነ አሾ።
1CH 11:2 ካሰ ሳኦል ካዎ ግድድ ደእያ ዎደካ፥ እስራኤለ አሳ ኦላስ ካለꬅዳይ ነና። ጎዳይ ነ ፆሳይ፥ ‘ታ አሳ እስራኤለ ኔኒ ሄማና፤ ኤንታ ቦላ ኔኒ ካዎታና’ ” ያግስ።
1CH 11:3 እስራኤለ ጭማት ኡባይ ካዋ ዳዊታኮ ይዳ ዎደ እ ኤንታራ ከብሮናን ጎዳ ስንꬃን ጫቅስ። ጎዳይ ሳሜላ ባጋራ ኦድዳ ቃላዳ ዳዊቲ እስራኤለ ቦላ ካዎታናዳ ኤንቲ እያ ትይዶሶና።
1CH 11:4 ዳዊቲነ እስራኤለ አሳ ኡባይ የሩሳላመ ካታማ ብዶሶና። ሄ ዎደ ያቡሰ አሳይ ሄ በሳን ደእያ ግሾ ሄ ካታማይ ያቡሰ ጌተቴስ።
1CH 11:5 ያቡሰት ዳዊታኮ፥ “ኔኒ ሀ ካታማ ገላናዉ ዳንዳአካ” ያግዶሶና። ግዶሽን፥ ዳዊቲ ፅዮነን ደእያ ኤንታ ሚፃ ኦይክን፥ ፅዮነይ ዳዊቲ ካታማ ጌተትስ።
1CH 11:6 ዳዊቲ ባ ኦላንቾታ፥ “ያቡሰታ ኮይሮትድ ኦልያ ኦንካ ቶራ ሞጮና ግዳና” ያግስ። ፃሩያ ናአይ እዮኣብ ኮይሮትድ ኦልድ ሀላቃ ግድስ።
1CH 11:7 ዳዊቲ ሄ ሚፃን ደእዳ ግሾ ሄ ካታማይ ዳዊታ ካታማ ጌተትስ።
1CH 11:8 ዳዊቲ ሚሎፐ ዶምድ ሄ ካታማ ዛሪድ ኬፅስ፤ አትዳ ባጋ እዮኣብ ዛሪድ ኬፅስ።
1CH 11:9 ኡባፈ ዎልቃማ ጎዳይ እያራ ደእያ ግሾ ዳዊቲ ምን ምን ብስ።
1CH 11:10 ምኖ ግድዳ ዳዊታ አሳት ሀይሳፈ ካልድ ፃፈትዶሶና። ጎዳይ እስራኤለስ ግዳ ቃላዳ ዳዊቲ ካዎታና መላ ሀ አሳት እስራኤለ አሳራ ዳሮ ማድዶሶና። ቃስ እያ ካዎተꬃ ምንꬅዶሶና።
1CH 11:11 ምኖ ግድዳ ዳዊተ አሳት ሀይሳፈ ካልድ ደኤይሳታ። ኤንታፈ ሄꬓት ዳሮ ኤረትዳይሳታ። ሄꬓታፐ ኮይሮይ ሀክሞና አድያ ያሾብኣማ፤ እ እስ ቶሆ ኦላን ሄꬑ ፄቱ አሳ ባ ቶራን ዎꬍስ።
1CH 11:12 እያ ካለይ፥ ሄꬑ ምኖ አሳታፐ እሶይ አሆሀ አድያ ዶዳ ናአ አላዛራ።
1CH 11:13 ፍልስፄመ አሳይ ኦለታናዉ ፓስዳምማ ጌተትያ በሳ ሺቅዳ ዎደ አላዛር ዳዊታራ ደኤስ። እስራኤለ ኦላንቾት ፍልስፄመ አሳታ ስንꬃፈ ባቃትያ ዎደ አላዛር ባንጋ ጋደን ደኤስ።
1CH 11:14 እነ እያ አሳት ጋድያ ግዶን ፍልስፄመ አሳራ ኦለትን፥ ጎዳይ ግታ ፆኖ እምድ ኤንታ አሽስ።
1CH 11:15 ፍልስፄመ ኦላንቾት ራፋይመ ዛንጋራን ዱንካንዳ ዎደ ሀስታሙ ሀላቃታፐ ሄꬓት ዳዊቲ ደእያ አዱላማ ጎንጎሉዋን ደእያ ዛላኮ ብዶሶና።
1CH 11:16 ሄ ዎደ ዳዊቲ ሚፃን ደኤስ፤ ፍልስፄመ ኦላንቾታፐ እስ ጩጋይ ቤተለመ ኦልድ ኦይክስ።
1CH 11:17 ዳዊቲ ሃ ኡያናዉ አሞትድ፥ “ቤተለመ ፐንግያ ማታን ደእያ ፑልቶ ሃꬃፈ ታና ኡሻናይ ኦነ!” ያግስ።
1CH 11:18 ሄꬑ ምኖ አሳት ፍልስፄመት ዱንካንዳ በሳ ካንꬅ ብድ ቤተለመ ፐንግያ ማታን ደእያ ፑልቶ ሃꬃፈ ዱቅድ ዳዊታስ ኤህዶሶና። ሽን ዳዊቲ ኡዮና እፅድ ሃꬃ ጎዳ ስንꬃን ትግስ።
1CH 11:19 “ሀ ሃꬃ ኡሽ ታፐ ሃኮ! ባንታ ሸምፑዋ ባይዝድ ኤህዳ ሀ አሳታ ሱꬃ ታኒ ኡዮ? ኤንቲ ባንታ ሸምፑዋ አꬅድ እምድ ኤህዶሶና” ያግስ። ሄሳ ግሾ፥ ዳዊቲ ሃꬃ ኡይቤና። ሄꬑ ምኖ አሳት ሄሳ ኦꬅዶሶና።
1CH 11:20 እዮኣባ እሻይ አብስ ሀስታሙ ኦላንቾታስ ሀላቃ። እ ባ ቶራን ሄꬑ ፄቱ አሳ ዎꬍድ፥ እካ ሀ ሄꬓታዳ ኤረትዳ አስ ግድስ።
1CH 11:21 አብስ ሄꬓታራ ታይበቶና እፅኮካ፥ እ ሄꬓታፐ አꬍድ ቦንቸትዳ አስ፤ እ ኤንታዉ ሀላቃ ግድስ።
1CH 11:22 ቃብፄላ አደይ ዮዳሄ ናአይ ባናይ ምኖ አስ፤ እ ምኖ ኦሶ ኦꬅስ። እ ናምኡ ኤረትዳ ሞአበ አሳታ ዎꬍስ። ቃስ ሻች ዎꬍዳ እስ ጋላስ ኦላ ግዶ ገልድ ጋሞ ዎꬍስ።
1CH 11:23 ባናይ እቻሹ ዋꬋ ግድያ ግብፀ አድያ ዎꬍስ። ግብፀ አድያ ኩሸን ዋንዳራሸ መላ ቶር ደኤስ፤ ሽን ባናይ ፃምአ ኦይክድ አድያኮ ብድ እያ ኩሽያን ደእያ ቶራ ዳፍ ኤክድ እያ ቶራን እያ ዎꬍስ።
1CH 11:24 ዮዳሄ ናአይ ባናይ ሀይሳ ኦꬅስ። እያ ሱንꬃይ ሄ ሄꬓታይሳዳ ኤረትስ።
1CH 11:25 እ ሀስታማታ ግዶን ዳሮ ቦንቸትስ፤ ሽን እ ሄꬓታ ታይቡዋን ዴና። ዳዊቲ እያ ባና ናገይሳታ ሀላቃ ኦꬅስ።
1CH 11:26 ምኖ አሳት እዮኣባ እሻ አሳሄላ፥ ቤተለመ አድያ ዶዳ ናኣ ኤልያና፥
1CH 11:27 ሀሮዳ አድያ ሳሞታ፥ ፕሎና አድያ ሰለሳ፥
1CH 11:28 ተቁሄ አድያ ኤስካ ናኣ እራ፥ አናቶታ አድያ አብኤዘራ፥
1CH 11:29 ኩሳታ አድያ ሳባካ፥ አሆሀ አድያ ኤላያ፥
1CH 11:30 ናፆፋ አድያ ኖኤራነ ባናሀ ናኣ ሄለዳ፥
1CH 11:31 ብንያመን ደእያ ግብአ አድያ ራባያ ናአ ኤታያ፥ ፕርአቶና አድያ ባናያሳ፥
1CH 11:32 ጋኣሳ ዛንጋራ ማታፐ ይዳ ኡራያ፥ አራባ አድያ አብኤላ፥
1CH 11:33 ባርሁማ አድያ አዝሞታ፥ ሳአልቦና አድያ አብኤላ፥
1CH 11:34 ግዞና አድያ ሀሰማ፥ ሀራራ አድያ ሻገ ናአ ዮናታና፥
1CH 11:35 ሀራራ አድያ ሳካራ ናአ አህኣማ፥ ኡረ ናኣ ኤልፋላ፥
1CH 11:36 ማኬራ አድያ ሄፌራ፥ ፕሎና አድያ አክያ፥
1CH 11:37 ቃርመሎሳ አድያ ሄፅራ፥ ኤዝባያ ናኣ ናእራያ፥
1CH 11:38 ናታና እሻ እዩኤላ፥ ሀግራ ናኣ ምብሃራ፥
1CH 11:39 አሞነ አድያ ፀለቃ፥ ፃሩያ ናኣ እዮኣባ ኦላ ሚሽያ ቶክያ ባኤሮታ አድያ ናህራያ፥
1CH 11:40 ያትራ አድያ እራነ ጋሬባ፥
1CH 11:41 ህተ አድያ ኦርዮና፥ አህላያ ናኣ ዛባዳ፥
1CH 11:42 ሮቤላ ኮቸ ግድዳ ሺዛ ናኣ አድና። እ ሮቤላ ኮቻታ ሀላቃ፤ ሀስታማት እያራ እስፈ ደኦሶና።
1CH 11:43 ሀራ ምኖ አሳት ማእካ ናኣ ሀናና፥ ምታነ አድያ እዮሳፈፃ፥
1CH 11:44 አስታሮታ አድያ ኦዝያና፥ አሮኤራ አድያ ሆታማ ናይታ ሻማአነ ይኤላ፥
1CH 11:45 ሽምራ ናኣ ይድኤላነ እያ እሻ ቲፃ አድያ ዮሀ፥
1CH 11:46 ማሃዋ አድያ ኤልኤላ፥ ኤልናማ ናይታ ይርባያነ ዮሻዋ፥ ሞአበ አድያ ይትማ፥
1CH 11:47 ፆባ አድያ ኤልኤላ፥ ኦቤዳነ ያእስኤላ።
1CH 12:1 ዳዊቲ ቂሳ ናኣ ሳኦላፐ ባቃትድ ፅቅላጋን ኡትዳ ዎደ እያኮ ይዳ አሳት ሀይሳፈ ካልድ ፃፈትዳይሳታ። ኤንታ ካሰ ዳዊታ ኦላን ማድዳ ምኖ አሳታ ግዶን ደኦሶና።
1CH 12:2 ኤንቲ ዶንገን ዱከይሳታ፤ ቃስ ኡሻቻ ኩሸንነ ሀድርሳ ኩሸን ያምባራናዉነ ዶንገ ዱካናዉ ዳንዳኦሶና። ኤንቲ ብንያመ ኮቸ ግድዳ ሳኦላ ኮቻታ።
1CH 12:3 ኤንታ ሀላቃይ አህኤዘራ፤ እያፐ ካልድ እዮኣሳ፤ ኤንቲ ግብአ አድያ ሻማአ ናአ። ሀራት ቃስ አዝማወ ናይታ ግድዳ ይዝኤላነ ፓላፃ፥ ባራካ፥ አናቶተ አድያ እዩ፥
1CH 12:4 ሀስታማታ ግዶን ዎልቃማ ግድድ፥ ኤንታ ካለꬅያ ጋባኦና አድያ ይሽማእያ፥ ኤርምያሳ፥ ያሀዝኤላ፥ ዮሃና፥ ገዳራ አድያ ዮዛባታ፥
1CH 12:5 ኤሉዛያ፥ ያርሞታ፥ ባላያ፥ ሳማራ፥ ሀርፋ አድያ ሳፋፃ፥
1CH 12:6 ቆረ ኮቸ ግድዳ ኤልቃና፥ ይሽያ፥ አዛርኤላ፥ ዮኤዘራነ ያሾብኣማ፥
1CH 12:7 ጋዶራ አድያ ይሮሃማ ናይታ ዮኤላነ ዛባዳ።
1CH 12:8 ዳዊቲ ባዞን ደእያ ሚፃን ደእሽን፥ ጋደ ኮቻፈ ጉꬃ አሳት እያኮ ይዶሶና። ኤንቲ ምኖነ ኦላስ ጊግዳይሳታ፤ ጎንዳለነ ቶራ ኦይካናዉ ዳንዳኤይሳታ። ኤንታ ሶምኦይ ጋሞ ሶምኦ መላ፤ ኤንቲ ደረ ሁጰራ ጉፕያ ገንኤ መላ ኤሶቶሶና።
1CH 12:9 ኤንታ ሀላቃይ ኤፀራ፤ ናምአንꬆይ አብድዩ፤ ሄꬓንꬆይ ኤልኣባ፤
1CH 12:10 ኦይዳንꬆይ ምስማና፤ እቻሻንꬆይ ኤርምያሳ፤
1CH 12:11 ኡሱፑንꬆይ አታያ፤ ላፑንꬆይ ኤልኤላ፤
1CH 12:12 ሆስፑንꬆይ ዮሃና፤ ኡዱፉንꬆይ ኤልዛባዳ፤
1CH 12:13 ታማንꬆይ ኤርምያሳ፤ ታማነ እሳንꬆይ ማክባናያ።
1CH 12:14 ሀይሳቲ ጋደ ኮቻ ኦላንቾታስ ሀላቃታ። ኤንታፈ ዝቃይ ማቶ ሀላቃ፤ ꬎቃይ ቃስ ሻላቃ ግድስ።
1CH 12:15 ዮርዳኖሰ ሻፋይ፥ ጋፃፐ ጋፃ ጋክድ ክፅዳ ኮይሮ አጌናን ፕንዳይሳት ሀይሳታ። ኤንቲ ዛንጋራን ዶሎሀነ ዉሎሀ ባጋን ደእያ አሳ ኡባ የደꬅዶሶና።
1CH 12:16 ብንያመ ኮቻፈነ ይሁዳ ኮቻፈ ጉꬃ አሳት ዳዊቲ ደእያ ሚፃ ብዶሶና።
1CH 12:17 ዳዊቲ ኤንታራ ጋሄታናዉ ከይድ፥ “ህንተ ታና ማዳናዉ ሳሮ ታኮ ይዳባ ግድኮ ታ ዎዛናይ ህንተራ ግዳና። ሽን ህንተ ታና ታ ሞርከታስ አꬅድ እማናዉ ይዳባ ግድኮ፥ ህንተና ኤርተ! ታኒ ኦꬅዳ ኢታባይ ባይና ግሾ ኑ አዋታ ፆሳይ ሄሳ በኦ፤ እ ህንተና ፕርዶ!” ያግስ።
1CH 12:18 ሄሳፈ ጉየ፥ ሀስታማታ ሀላቃ አማሳያ ቦላ ፆሳ አያናይ ዎꬍን፥ “ዳዊታ፥ ኑኒ ነይሳታ! እሰየ ናአዉ፥ ኑኒ ኔራ ደኦስ! ሳሮይ ነዉ ግዶ! ነና ማደይሳታስ ሳሮይ ግዶ! ነ ፆሳይ ነና ማዳና” ያግስ። ዳዊቲ ኤንታ ኤክድ ባ ኦላንቾታስ ሀላቃ ኦꬅስ።
1CH 12:19 ዳዊቲ ፍልስፄመታራ ግድድ ሳኦላ ኦላናዉ ብዳ ዎደ፥ ምናሰ ኮቻፈ ጉꬃ አሳት ዳዊታራ ጋሄትዶሶና። ሽን ፍልስፄመታ ሀላቃት ዳዊቲነ ዳዊታ አሳይ ባንታራ ቦናዳ ድግዶሶና። ዳዊቲነ ዳዊታ አሳይ፥ ኤንታ ካዋ ሳኦላስ አꬅድ እማነኮ ግድ ያይዳ ግሾ ፍልስፄመት ዞረትዳፐ ጉየ ኤንታ ጉየ ዛርዶሶና።
1CH 12:20 ዳዊቲ ፅቅላጋ ስምዳ ዎደ ምናሰ ኮቻፈ ዳዊታ ማዳናዉ ከይዳ አሳት አድና፥ ዮዛባታ፥ ይድኤላ፥ ምካኤላ፥ ዮዛባታ፥ ኤልሀነ ፅልታያ። ሀይሳቲ ካሰ ምናሰ ቢታን ሻላቃ።
1CH 12:21 ኤንቲ ኡባይ ምኖነ ዎልቃማ አስ ግድያ ግሾ ዳዊቲ ዙግድ ኦልያ አሳ ኦልድ እያ ማድዶሶና።
1CH 12:22 ዳዊቲ ኦላንቾት፥ ፆሳ ኦላንቾዳ ዳራና ጋካናዉ እያ ማድያ አሳይ ጋላስ ጋላስ ጉዠቴስ።
1CH 12:23 ጎዳይ እያዉ ግዳይሳዳ ሳኦላ ካዎተꬃ ዳዊታኮ ዛራናዉ ዳንጨትድ ዳዊታኮ ከብሮና ብዳ ኦላንቾታ ታይቦይ ሀይሳፈ ካልድ ፃፈትዳይሳታ።
1CH 12:24 ጎንዳለነ ቶራ ኦይክድ ኦላስ ጊግዳ ይሁዳ ኮቻይ 6,800.
1CH 12:25 ስሞና ኮቻፈ ኦላስ ጊግዳ ምኖነ ዎልቃማ ኦላንቾት 7,100.
1CH 12:26 ሌወ ኮቻፈ 4,600.
1CH 12:27 አሮና ኮቻ ሀላቃይ ዮዳሄ፤ ዮዳሄራ እስፈ 3,700 አሳት ደኦሶና።
1CH 12:28 ሳዶቅ ናአተꬅ፥ ምኖነ ዎልቃማ አስ፤ ሳዶቃ ሶ አሳፐ ላታማነ ናምኡ ሀላቃት እያራ ደኦሶና።
1CH 12:29 ብንያመ ኮቸ ግድዳ ሳኦላ ዳቦት 3,000. ሽን ብንያመ ኮቻፈ ዳርያ ባጋይ ሳኦላ ሶ አሳስ ሄ ዎደ ጋካናዉ አማነትዶሶና።
1CH 12:30 ኤፍሬማ ኮቻፈ ባንታ ሶ አሳን ኤረትዳ ምኖነ ዎልቃማ አሳት 20,800.
1CH 12:31 ዳዊታ ካዎያናዉ ባናዉ ዶረትዳ ምናሰ ኮቻፈ ባጋት 18,000.
1CH 12:32 እስራኤለ አሳይ አይ ኦꬃናዉ በሲያኮ ዎድያባ ሻክድ ኤርያ አኬካንቾ አሳት፥ ይሳኮራ ኮቻ ሀላቃት፥ ናምኡ ፄታ፤ ኤንታ ዳቦት ኡባይ ኤንታዉ ኪተቶሶና።
1CH 12:33 ኦላ ሚሸ ኡባ ኦይክድ ባንታ ኩመꬃ ዎዛናን ዳዊታ ማዳናዉ ጊግዳ ኦላንቾታን ዛብሎና ኮቻይ 50,000.
1CH 12:34 ንፍታለመ ኮቻፈ 1,000 ሀላቃትነ ጎንዳለነ ቶራ ኦይክያ 37,000 አሳት ኤንታራ ደኦሶና።
1CH 12:35 ዳነ ኮቻፈ ኦላስ ጊግዳ አሳት 28,600.
1CH 12:36 ኦላስ ከያናዉ አሴራ ኮቻፈ ጊግዳ አሳት 40,000.
1CH 12:37 ዮርዳኖሰ ሻፋፐ ሄፍንꬃ ዶሎሀ ባጋን ደእያ ሮቤላ ኮቻፈ ጋደ ኮቻፈነ ምናሰ ኮቸ ባጋፈ ኦላ ሚሸ ኡባ ኦይክድ ይዳ አሳት 120,000.
1CH 12:38 ሀ ኡባ ኦላንቾት ዳዊታ እስራኤለ ቦላ ካዎꬃናዉ ባንታ ቆፋ ቃችድ፥ ከብሮና ካታማ ይዶሶና። ቃስ እስራኤለፐ አትዳይሳት ዳዊታ ካዎꬃናዉ እስ ዎዛናን ግድዶሶና።
1CH 12:39 ኤንታ ዳቦት ኤንታዉ ኮሽያባ ጊግስዳ ግሾ ምሸነ ኡይሸ ዳዊታራ ሄꬑ ጋላስ ኡትዶሶና።
1CH 12:40 እስራኤለ አሳስ ኡፋይስ ግድያ ግሾ፥ ፑደሀ ባጋን ደእያ ይሳኮራፐ፥ ዛብሎናፐነ ንፍታለመፐ ዳሮ አሳይ ꬊለ፥ ባላሰ ኑካ፥ ዎይነ ቴራ፥ ዎይነ ኡሹነ ዛይተ ሀረን፥ ባቁሎን፥ ግማለንነ ቦራን ጫንድ ኤህዶሶና፤ ቃስ ኤንቲ መሄነ ዶርሰ ሹክድ ማናዉ ኤህዶሶና።
1CH 13:1 ዳዊቲ ሻላቃታራነ ማቶ ሀላቃታራ ዞረትስ።
1CH 13:2 እስራኤለ አሳ ኡባ፥ “ህንተዉ ሎኦ ዳንያባ ግድኮነ ጎዳ ኑ ፆሳ ሸነ ግድኮ፥ እስራኤለ ቢታ ጋፃን ደእያ ኑ ዳቦት፥ ሄሳዳካ ባንታ ካታማታንነ ሄንꬃ በሳታን ደእያ ካህነትነ ሌወት ኑኮ ሺቃና መላ አሰ ኪቶስ።
1CH 13:3 ሳኦላ ካዎተꬃ ዎደ ቀል ጌተትዳ ኑ ፆሳ ታቦትያ አነ ዛሪድ ኤሆስ” ያግስ።
1CH 13:4 ዳዊታ ኦዳይ ሎኦ ግድዳ ግሾ አሳ ኡባይ ማእስ።
1CH 13:5 ሄሳ ግሾ፥ ዳዊቲ ፆሳ ታቦትያ ቅርያት-ይኣርመፐ ኤሀና መላ ግብፀ ዛዋፐ ዶምድ ሀማታ ፕኖ ጋካናዉ ደእያ እስራኤለ አሳ ኡባ ሺሽስ።
1CH 13:6 ዳዊቲነ እስራኤለ አሳ ኡባይ ክሩበታፐ ግዶን ባ አራታ ቦላ ኡትዳ ጎዳ ሱንꬃይ ፄገትዳ ፆሳ ታቦትያ ኤሀናዉ ይሁዳ ቢታን ደእያ ባላ ጌተትያ ቅርያት-ይኣርማ ብዶሶና።
1CH 13:7 ፆሳ ታቦትያ ኦራꬃ ፓራ ጋረን ዎꬅድ፥ አምናዳበ ሶፐ ኤህዶሶና፤ ኦዝነ አህዮይ ጋርያ ላጎሶና።
1CH 13:8 ዳዊቲነ እስራኤለ አሳ ኡባይ ዲꬅነ ማስንቆ ካእሸ፥ ካራቦ ባቅሸ፥ ዳላ ጊርስሸ፥ ዛየ ፑንሸ ባንታ ኩመꬃ ዎልቃን ፆሳ ስንꬃን ኡፋይትድ፥ የፅሸ ፆሳ ቦንችዶሶና።
1CH 13:9 ኤንቲ ክዶና ዉዱማ ጋክያ ዎደ ቦራት ꬉበትዳ ግሾ ኦዝ ታቦትያ ኦይካናዉ ባ ኩሽያ የድስ።
1CH 13:10 ኦዛ ኩሸይ ታቦትያ ቦችዳ ግሾ፥ ጎዳ ሀንቆይ ኦዛ ቦላ ኤፅስ። ሄሳ ግሾ፥ ጎዳይ እያ ፃድክን፥ እ ሄ በሳን ፆሳ ስንꬃን ሀይቅስ።
1CH 13:11 ጎዳይ ሀንቀትድ ኦዛ ዎꬍዳ ግሾ፥ ዳዊቲ ይሎትስ። ሀች ጋካናዉ ሄ በሳይ ኦዝ ꬉከትዳ በሳ ጌተቴስ።
1CH 13:12 ሄ ጋላስ ዳዊቲ ፆሳ ያይዳ ግሾ፥ “ፆሳ ታቦትያ ታኮ ዋታ ኤሀናዉ ዳንዳእያና?” ያግስ።
1CH 13:13 ዳዊቲ ታቦትያ የሩሳላመ ኤፋናፐ ግድ ጋተ አድያ አብዳራ ሶ ኤፍስ።
1CH 13:14 ፆሳ ታቦተይ አብዳራ ሶን እያ ሶ አሳራ ሄꬑ አጌና ጋምእስ። ጎዳይ እያ ሶ አሳነ እያዉ ደእያ ኡባ አንጅስ።
1CH 14:1 ፅሮሳ ካዎይ ክራም ዳዊታስ ጋꬎ ኬፃና መላ ኪተትያ አሳታ፥ ሹቹ ማሰይሳታነ አናፀታ ዝጋ ምꬃራ የድስ።
1CH 14:2 ጎዳይ እስራኤለ ቦላ እያ ካዎ ኦꬅድ ምንꬅዳይሳነ ባ አሳ እስራኤለ ግሾ እያ ካዎተꬃ ቦንችዳይሳ ዳዊቲ ኤርስ።
1CH 14:3 ሄሳፈ ጉየ፥ ዳዊቲ የሩሳላመን ሀራ ማቾ ኤክድ አደ ናይታነ ማጫ ናይታ የልስ።
1CH 14:4 ዳዊቲ የሩሳላመን የልዳ አደ ናይት ሳሙሳ፥ ሶባባ፥ ናታና፥ ሶሎሞነ፥
1CH 14:5 ይብሃራ፥ ኤልሱአ፥ ኤልፋላፃ፥
1CH 14:6 ኖጋ፥ ናፈጋ፥ ያፋያ፥
1CH 14:7 ኤልሳማ፥ ኤልዳና፥ ኤልፋላፃ።
1CH 14:8 ዳዊቲ እስራኤለ ኡባ ቦላ ካዎ ግድድ ትየትዳይሳ ፍልስፄመት ስእዳ ዎደ ኡባይ ዳዊታ ኦልድ ኦይካናዉ ከይዶሶና። ዳዊቲ ሄሳ ስእድ ኤንታራ ኦለታናዉ ከይስ።
1CH 14:9 ፍልስፄመት ራፋይመ ዛንጋራ ይድ ኦይክዶሶና።
1CH 14:10 ዳዊቲ፥ “ታኒ ፍልስፄመታ ኦሎ? ኔኒ ኤንታ ታዉ አꬃ እማኔ?” ያግድ ፆሳ ኦይችስ። ጎዳይ፥ “ባዳ ኦላ፤ ታኒ ኤንታ ነዉ አꬃ እማና” ያግስ።
1CH 14:11 ዳዊቲነ እያ አሳይ ባአል-ፓራስመ ጌተትያ በሳ ብድ ያን ኤንታ ፆንዶሶና። ዳዊቲ፥ “ሃꬅ ꬉስድ ከየይሳዳ ፆሳይ ታ ሞርከታ ግዶራ ታና ካንꬅስስ” ያግስ። ሄ በሳ ሱንꬃይ ባአል-ፓራስመ ጌተትስ።
1CH 14:12 ፍልስፄመት ባንታ ኤቃታ ሄ በሳን የግድ ብን፥ ዳዊቲ ኪትድ ኤንታ ኤቃታ ፁግስስ።
1CH 14:13 ፍልስፄመት ዛር ሄ ዛንጋራ ይድ ኦልዶሶና።
1CH 14:14 ዳዊቲ ፆሳ ዛሪድ ኦይችስ። ፆሳይ፥ “ኤንታ ጉየራ ዩያ አꬋዳ ዎላ ማታን ኤቃዳ ኦላፐ አትሽን፥ ስንꬃ ባጋራ ከዮፓ።
1CH 14:15 ዎላ ሁጰን ሳልፐ ግርስ ኔኒ ስእያ ዎደ ኦላናዉ ከያ። ሄስ ፍልስፄመ ኦላንቾታ ሾጫናዉ ፆሳይ ኔፐ ስን አꬍዳይሳስ ማላ” ያግስ።
1CH 14:16 ፆሳይ ኪትዳይሳዳ ዳዊቲ ኦꬅስ። ጋባኦናፐ ገዘራ ጋካናዉ እስራኤለ አሳይ ፍልስፄመ ኦላንቾታ ዎꬍዶሶና።
1CH 14:17 ዳዊታ ሱንꬃይ ቢታ ኡባ ጋክስ። ካዎተꬃ ኡባይ ዳዊታስ ያያና መላ ጎዳይ ኦꬅስ።
1CH 15:1 ዳዊቲ ባ ካታማን ባዉ ኬ ኬፅስ፤ ፆሳ ታቦትያስ በሰ ጊግስድ፥ ዱንካነ ኤስስ።
1CH 15:2 ዳዊቲ፥ “ፆሳ ታቦትያ ቶካናዳነ መርናዉ ፆሳስ ኦꬃናዳ ጎዳይ ዶርዳይ ሌወታ ግድያ ግሾ ሀር ኦንካ ፆሳ ታቦትያ ቶካናዉ በሰና” ያግስ።
1CH 15:3 ዳዊቲ ጎዳ ታቦትያስ ጊግስዳ በሳ ታቦትያ ኤሀና መላ እስራኤለ አሳ ኡባ የሩሳላመ ሺሽስ።
1CH 15:4 ካልድ ዳዊቲ አሮና ኮቻታነ ሌወታ ፄግድ ሺሽስ።
1CH 15:5 ቃሃታ ያራፐ ሀላቃይ ኡርኤልነ እስ ፄታነ ላታሙ እያ ዳቦት ይዶሶና።
1CH 15:6 ማራራ ያራፐ ሀላቃይ አሳይነ ናምኡ ፄታነ ላታሙ እያ ዳቦት ይዶሶና።
1CH 15:7 ገድሶና ያራፐ ሀላቃይ እዩኤልነ ፄታነ ሀስታሙ እያ ዳቦት ይዶሶና።
1CH 15:8 ኤልዛፋና ያራፐ ሀላቃይ ሻማእነ ናምኡ ፄቱ እያ ዳቦት ይዶሶና።
1CH 15:9 ከብሮና ያራፐ ሀላቃይ ኤልኤልነ ሆስፑን ታሙ እያ ዳቦት ይዶሶና።
1CH 15:10 ኡዝኤላ ያራፐ ሀላቃይ አምናዳበይነ ፄታነ ታማነ ናምኡ እያ ዳቦት ይዶሶና።
1CH 15:11 ዳዊቲ ካህነታ ሳዶቃነ አብያታራ፥ ሌወታ ኡርኤላ፥ አሳያ፥ እዩኤላ፥ ሻማአ፥ ኤልኤላነ አምናዳበ ፄግስ።
1CH 15:12 ኤንታኮ፥ “ህንተ ሌወ ኮቻስ ሀላቃታ። ጎዳ እስራኤለ ፆሳ ታቦትያ ታኒ ጊግስዳ በሳ ኤሀናዉ ህንተነ ህንተ ዳቦት ጌይተ።
1CH 15:13 ህንተ ሌወት ኮይሮ ፆሳ ታቦትያ ቶክቦና ግሾነ ኑኒ እያ ዎጋ መላ ዋት ኤፋነኮ ፆሳ ኦይችቦና ግሾ፥ ጎዳይ ኑ ፆሳይ ኑና ሴርስ” ያግስ።
1CH 15:14 ጎዳ እስራኤለ ፆሳ ታቦትያ ኤሀናዉ ካህነትነ ሌወት ባንታና ጌሽዶሶና።
1CH 15:15 ጎዳይ ሙሰ ባጋራ ካሰ ኪትዳይሳዳ ሌወት ፆሳ ታቦትያ ባንታ ሀሽያን ካሶራ ቶክዶሶና።
1CH 15:16 ዲꬅ፥ ማስንቆነ ዳላ ካእሸ ኡፋይሳ የꬅ የፃና መላ ባንታ ዳቦ ግድዳ ሌወታፐ ዛማረታ ሹማና መላ ዳዊቲ ኪትስ።
1CH 15:17 ሌወት እዩኤላ ናኣ ሄማና፥ እያ ዳቦታፐ ባራካ ናኣ አሳፋነ ኤንታ ዳቦታፐ ማራራ ያራ ቁሳያ ናኣ ኤታና ሹምዶሶና።
1CH 15:18 ቃስ ናምአንꬆ ደꬃን ዛካርያሳ፥ ያዝኤላ፥ ሻምራሞታ፥ ይኤላ፥ ኡና፥ ኤልኣባ፥ ባናያ፥ ማእሰያ፥ ማትታ፥ ኤልፋላ፥ ምቅነያነ ፐንገ ናግያ አብድዩነ ይኤላ ሹምዶሶና።
1CH 15:19 ናሰ ዳላ ቃꬃና መላ ሄማን አሳፍነ ኤታን ሹመትዶሶና።
1CH 15:20 ቃስ ዛካርያስ፥ ያእዝኤል፥ ሻምራሞት፥ ይኤል፥ ኡን፥ ኤልኣብ፥ ማእሰይነ ባናይ ማስንቆ ካኦሶና።
1CH 15:21 ማትታ፥ ኤልፋል፥ ምቅነይ፥ አብድዩይ ይኤልነ አዛዘይ ዲꬅ ዲፆሶና።
1CH 15:22 ሌወታ ሀላቃይ ካናነይ ማዝሙረ ኤርያ ግሾ ኤንታ ካለꬃናዉ ሹመትስ።
1CH 15:23 ባራክነ ኤልቃን ታቦትያ ዱንካንያ ፐንግያ ናጋናዉ ዶረትዶሶና።
1CH 15:24 ካህነት ሳባን፥ እዮሳፈፅ፥ ናትናኤል፥ አማሳይ፥ ዛካርያስ፥ ባናይነ አላዛር ፆሳ ታቦትያ ስንꬃን ሞይዘ ፑናናዉ ዶረትዶሶና። ኦቤድ-ኤዶመይነ ይሄይ ታቦትያ ናጋናዉ ዶረትዶሶና።
1CH 15:25 ዳዊቲ፥ እስራኤለ ጭማትነ ሻላቃት ጎዳ ጫቆ ታቦትያ አብዳራ ሶፐ ኤሀናዉ ኡፋይትሸ ብዶሶና።
1CH 15:26 ጎዳ ጫቆ ታቦትያ ቶክዳ ሌወታ ፆሳይ ማድዳ ግሾ ኤንቲ ላፑን ኮርማነ ላፑን ማራዘ ያርሽዶሶና።
1CH 15:27 ዳዊቲ፥ ታቦትያ ቶክዳ ሌወት፥ ማዝሙረ የፀይሳትነ ኤንታ ሀላቃይ ካናነይ ሊኖፐ ኦሰትዳ ማኦ ማእዶሶና። ዳዊቲካ ሊኖፐ ኦሰትዳ ኤፉደ ማእስ።
1CH 15:28 ሄሳዳ ኦꬅድ፥ እስራኤለ ኡባይ ኡፋይትድ ሞይዘነ ዛየ ፑንሸ፥ ዳላ ቃꬅሸ፥ ዲꬅነ ማስንቆ ካእሸ ጎዳ ጫቆ ታቦትያ ኤህዶሶና።
1CH 15:29 ጎዳ ጫቆ ታቦተይ ዳዊታ ካታማ ገልዳ ዎደ ሳኦላ ናእያ መልኮላ ካዎይ ዳዊቲ ኡፋይትድ ዱርሽንነ ካእሽን ማስኮተራ በአዳ ባ ዎዛናን ካꬋሱ።
1CH 16:1 ኤንቲ ፆሳ ታቦትያ ኤህድ ዳዊቲ ታቦትያ ዎꬃናዉ ኤስዳ ዱንካንያ ግዶን ዎꬅድ፥ ፁሳ ያርሾነ እስፈተꬃ ያርሾ ፆሳስ ያርሽዶሶና።
1CH 16:2 ዳዊቲ ፁሳ ያርሾነ እስፈተꬃ ያርሾ ያርሽድ ፖልዳፐ ጉየ ጎዳ ሱንꬃን አሳ አንጅስ።
1CH 16:3 እስራኤለ አሳ ኡባስ ማጫስነ አደስ፥ ሁጰን ሁጰን እስ ሙመ ኡይꬅ፥ እስ ቃንፆ አሾነ እስ ዎይነ ኑካ ግሽስ።
1CH 16:4 ጎዳ ታቦትያ ስንꬃን ኦꬃና መላነ ጎዳ እስራኤለ ፆሳ ሳባና መላ፥ ጋላታና መላነ ቦንቻና መላ ጉꬃ ሌወታ ዳዊቲ ሹምስ።
1CH 16:5 ሌወታ ሀላቃይ አሳፋ፤ አሳፋ ካልድ ዛካርያሳ። ዛካርያሳ ካልድ ደኤይ ይኤላ፥ ሻምራሞታ፥ ይኤላ፥ ማትታ፥ ኤልኣባ፥ ባናያነ ኦቤድ-ኤዶመ። ኤንቲ ማስንቆነ ዲꬅ ዲፃናዉ ሹመትዶሶና፤ ሽን አሳፍ ዳላ ግርሳናዉ ሹመትስ።
1CH 16:6 ካህነይ ባናይነ ያሀዝኤል ፆሳ ጫቆ ታቦትያ ስንꬃን ኡባ ዎደ ሞይዘ ፑናናዉ ሹመትዶሶና።
1CH 16:7 ሄ ጋላስ ዳዊቲ አሳፍነ እያ ዳቦት ጎዳ ሳባና መላ ሀ ማዝሙርያ ኮይሮ ኪትስ።
1CH 16:8 ጎዳ ጋላትተ፤ እያ ሱንꬃ ፄግተ፤ እያ ኦሱዋ ካዎተꬃታ ግዶን ኦድተ።
1CH 16:9 እያ ሳቢተ፤ ጋላታ ማዝሙርያ እያዉ የፅተ፤ ማላልስያ እያ ኦሶ ኡባ ኦድተ።
1CH 16:10 እያ ጌሻ ሱንꬃን ጬቀትተ፤ ጎዳ ኮየይሳታ ዎዛናይ ኡፋይቶ።
1CH 16:11 ጎዳነ እያ ዎልቃ በእተ፤ ኡባ ዎደ እያ ስንꬃ ኮይተ።
1CH 16:12 ህንተኖ፥ እስራኤለ ኮቻቶ፥ ዶረትዳ ያይቆባ ናይቶ፥ እያ ማላታ፥ እ እምዳ ፕርዳነ ማላልስያባታ ሀሳይተ።
1CH 16:14 እ ጎዳ ኑ ፆሳ፤ እያ ፕርዳይ ቢታ ኡባ ቦላና።
1CH 16:15 እያ ጫቁዋ መርናዉ ሙኩሉ የለተꬃ ጋካናዉ፥ እያ ቃላ ናግተ።
1CH 16:16 አብራሃመራ ጫቅዳ ጫቁዋ ናጌስ፤ ይሳቃስ ገልዳ ቃላ ምንꬄስ።
1CH 16:17 ያይቆባስ ዎጋ፥ እስራኤለስ መርና ጫቁዋ፥ ኦꬅድ ምንꬅስ።
1CH 16:18 “ታኒ ነዉ ካናነ ቢታ እማና፤ እ ነ ኮቻስ ላታ ግዳና” ያግስ።
1CH 16:19 ሄስ ህንተ ታይቦን ጉꬃነ ካናነን በተ ግድድ ደእያ ዎደ ሀንስ።
1CH 16:20 እስ ደርያፐ ሀራ ደረ ፕንዶሶና፤ እስ ካዎተꬃፈ ሀራ ካዎተꬅ ዩይዶሶና።
1CH 16:21 ፆሳይ ኤንታ ኦንካ ናቃና መላ እምቤና፤ ኤንታ ግሾ ካዎታ ሴርስ።
1CH 16:22 “ታኒ ትይዳይሳታ ቦቾፍተ፤ ታ ናበታ ቆሆፕተ” ያግስ።
1CH 16:23 ሳአን ደእያ አሳ ኡባይ ጎዳስ የፅተ፤ እያ አሹዋ ጋላስ ጋላስ ኦድተ።
1CH 16:24 ካዎተꬃታ ግዶን እያ ቦንቹዋ፥ ማላልስያ እያ ኦሱዋ አሳ ኡባ ግዶን አዋጅተ።
1CH 16:25 ጎዳይ ግታ፤ አꬎ ጋላታይ እያዉ በሴስ፤ ፆሳታ ኡባፈ አꬍድ ቦንቸታናዉ በሴስ።
1CH 16:26 ሀራ ካዎተꬃታ ፆሳት ኡባይ ኤቃታ፤ ሽን ጎዳይ ሳሎታ መꬍዳ ፆሳ።
1CH 16:27 እያ ስንꬃን ቦንቾይነ ቴም ደኤስ፤ ምኖተꬅነ ኡፋይስ እ ደእያ በሳን ደኤስ።
1CH 16:28 ህንተኖ፥ ቢታ ካዎተꬃቶ፥ ጎዳ ቦንቾነ ዎልቃ እምተ።
1CH 16:29 እያ ሱንꬃስ በሲያ ቦንቾ እምተ፤ ያርሾ ኤክድ እያ ስን ዪተ፤ እያ ጌሻተꬃ ቴማን ጎዳ ጎይንተ።
1CH 16:30 ቢታን ደእያ አሳ ኡባይ እያ ስንꬃን ኮኮርተ፤ ሳአይ ምን ኤቅዳ ግሾ ቃፀና።
1CH 16:31 ሳሎት ኡፋይቶ፤ ሳእ ሀሹ ጎ! ካዎተꬃታ ግዶን ኤንቲ “ጎዳይ ካዎትስ!” ያጎ።
1CH 16:32 አባይነ እያ ግዶን ደእያ ኡባይ ጉሞ፤ ጋደይነ እያን ደእያ ካꬃ ኡባይ ኡፋይቶ።
1CH 16:33 ሄ ዎደ ዎራን ደእያ ምꬃ ኡባይ ኡፋይሳን ጎዳ ስንꬃን የፃና። እ ሳኣ ቦላ ፕርዳናዉ ዬስ።
1CH 16:34 ጎዳይ ኬሀ ግድያ ግሾነ እያ ሲቆይ መርናሳ ግድያ ግሾ፥ ጎዳ ጋላትተ።
1CH 16:35 “አቤት ኑና አሽያ ፆሳዉ ኑና አሻ፤ ኑኒ ነ ጌሻ ሱንꬃ ጋላታና መላነ ነ ቦንቹዋን ኑ ቦንቸታና መላ፥ ካዎተꬃታ ግዶፈ ሺሻዳ ኑና አሻ” ያግተ።
1CH 16:36 ጎዳይ እስራኤለ ፆሳይ፥ መርናፐ መርና ጋካናዉ ጋላተቶ! አሳ ኡባይ፥ “አምንእ” ግድ፥ ጎዳ ጋላትዶሶና።
1CH 16:37 ጎዳ ጫቆ ታቦትያ ስንꬃን ጋላስ ጋላስ ጎይኖስ ኮሽያባ ኡባ ዎደ ኤንቲ ኦꬃና መላ ዳዊቲ አሳፋነ እያ ዳቦታ ዎꬅስ።
1CH 16:38 ቃስ ኦቤድ-ኤዶመነ ኡሱፑን ታማነ ሆስፑን እያ ዳቦታ ኤንታራ ኦꬃና መላ ዎꬅስ፤ የዱቱና ናኣ ኦቤድ-ኤዶመነ ሆሳ ፐንግያ ናጋና መላ ዎꬅስ።
1CH 16:39 ካህነይ ሳዶቅነ እያራ ኦꬅያ ካህነት ጋባኦናን ደእያ ꬎቃ በሳን፥ ዱንካንያ ስንꬃን ኦꬃና መላ ኤንታ ያን አግስ።
1CH 16:40 ጎዳይ እስራኤለስ እምዳ ህግያን ፃፈትዳይሳዳ ኤንቲ ዎንታነ ኦማርስ ኡባ ዎደ ፁሳ ያርሾ ያርሻና መላ ኦꬅስ።
1CH 16:41 እያ ሲቆይ መርናሳ ግድያ ግሾ ጎዳ ማዝሙረን ጋላታና መላ ሄማና፥ የዱቱናነ ዶረትዳ ሀራታ ዳዊቲ ኤንታራ እስፈ ዎꬅስ።
1CH 16:42 ሄማንነ የዱቱን ሞይዘ ፑኖሶና፥ ዳላ ጊርሶሶና ጋላታ ማዝሙረ የፅሸ ካእያ ሀራ ሚሸታ ካኦሶና። የዱቱና አደ ናይት ፐንግያ ናጋናዉ ሹመትዶሶና።
1CH 16:43 ሄሳፈ ጉየ አሳ ኡባይ ባ ሶ ሶ ብስ። ዳዊቲካ ባ ሶ አሳ አንጃናዉ ስምስ።
1CH 17:1 ዳዊቲ ባ ጋꬎን ኡትዳፐ ጉየ ናብያ ናታናኮ፥ “ታኒ ዝጋፐ ኬፀትዳ ኬꬃን ደአይስ፤ ሽን ጎዳ ጫቆ ታቦተይ ዱንካነ ግዶን ደኤስ” ያግስ።
1CH 17:2 ናታን ዳዊታኮ፥ “ጎዳይ ኔራ ደእያ ግሾ ነ ዎዛናይ ቆፕዳባ ኡባ ኦꬃ” ያግስ።
1CH 17:3 ሽን ሄ ቃማ ጎዳ ቃላይ ናታናኮ ሀይሳዳ ያግሸ ይስ፤
1CH 17:4 “ባዳ ታ አይልያ ዳዊታኮ ሀይሳዳ ያጋ፤ ‘ታኒ ዳና ኬ ኬፃናይ ነና ግዳካ።
1CH 17:5 ታኒ እስራኤለ ግብፀፈ ከስዳ ዎደፐ ዶማዳ ሀች ጋካናዉ ኬꬃን ደአብከ፤ ታኒ ዱንካነፐ ዱንካነ፥ በሳፈ በሲ ዩያሸ ደአስ።
1CH 17:6 ታኒ እስራኤለ አሳ ኡባራ ዩይዳ በሳ ኡባን፥ ታ አሳ ሄማና መላ ታኒ ሹምዳ አሳፐ ኦና ታዉ ዝጋ ኬꬅ አይስ ኬፃብኪ?’ ጋዳ ኦይቻብከ” ያጌስ።
1CH 17:7 “ሄሳ ግሾ፥ ታ አይልያ ዳዊታኮ ባዳ ኡባፈ ዎልቃማ ጎዳይ ሀይሳዳ ያጌስ፤ ‘ታኒ ነና ዶርሰ ሄምያ በሳፔ ደንꬃዳ ታ አሳ እስራኤለ ካለꬃና መላ ኤሀስ።
1CH 17:8 ኔኒ ብዳ በሰ ኡባን ታኒ ኔራ ግዳስ፤ ነ ሞርከታ ኡባ ነ ስንꬃፈ ድጋስ። ህዛ ታኒ ሀ ሳአን ኤረትዳ ግታ አሳዳ ነ ሱንꬃ ግታያና።
1CH 17:9 ታኒ ታ አሳ እስራኤለስ በሰ እማዳ፥ ኤንታ ሄ በሳን ቶካና። ሄሳ ግሾ፥ ኤንቲ ባንታ በሳን ደአና፤ ኤንቲ ዛሪድ ዋባቆኮና። ካሰ ታኒ ታ አሳ እስራኤለ ቦላ ዳይናታ ሹማዳ ዎደ ሞርከት ናቅዳይሳዳ፥
1CH 17:10 ዛሪድ ኢታ አሳት ኤንታ ናቆኮና። ታኒ ነ ሞርከታ ኡባ ነዉ ሃርሳና። “ ‘ሄሳ ቦላ ጎዳይ ባ ሁጰን ነዉ ኬ ኬፃናይሳ ኦዴስ።
1CH 17:11 ነ ሀይቃዳ ነ ማይዛታን ጋሄትያ ዎደ ታኒ ኔፐ ጉየ ነ ናይታፐ እሱዋ ደንꬃዳ እያ ካዎተꬃ ምንꬃና።
1CH 17:12 ታዉ ኬ ኬፃናይ እያ፤ ታኒ እያ አራታ መርናዉ ምንꬃ ኤሳና።
1CH 17:13 ታኒ እያዉ አዋ ግዳና፤ እካ ታዉ ናአ ግዳና። ኔፐ ስን ካዎትዳ ሳኦላፐ ታ ማሮተꬃ ኤክዳይሳዳ ታኒ እያፐ ኤክከ።
1CH 17:14 ታኒ እያ ታ አሳ ቦላነ ታ ካዎተꬃ ቦላ መርናዉ ሹማና፤ እያ አራታይ መርናዉ ምን ኤቃና’ ” ያግስ።
1CH 17:15 ናታን ፆሳይ እያዉ ቆንጭስዳ ቃላ ኡባ ዳዊታስ ኦድስ።
1CH 17:16 ሄሳፈ ጉየ፥ ካዎይ ዳዊቲ ዱንካንያ ግዶ ገልድ፥ ጎዳ ስንꬃን ኡትድ፥ ሀይሳዳ ያግድ ዎስስ፤ “አቤት ጎዳዉ፥ ፆሳዉ ኔኒ ሀይሳ ኡባ ታዉ ኦꬃናዉ ታኒ ኦኔ? ታ ሶ አሳይካ አይቤ?
1CH 17:17 አቤት ጎዳዉ፥ ሄስ ነ አይፍያ ስንꬃን ጉꬃ ዳንን፥ ነ አይልያ ሶ አሳስ ስንꬃፈ ሀናናባ ኦዳዳሳ። ኔኒ ታና ግታ አስ ኦꬃዳ ፄላዳሳ።
1CH 17:18 ኔኒ ታና ነ አይልያ ቦንችዳ ግሾ፥ ዳዊቲ አይ ጋናዉ ዳንዳኢ? ኔኒ ታና ነ አይልያ ኤራሳ።
1CH 17:19 አቤት ጎዳዉ፥ ነ አይልያ ግሾነ ነ ዎዛና ቆፋዳ ሀ ግታባ ኡባ ኦꬃዳ፥ ሀ ግታ ኡፋይሳ ቃላ ኡባ ታና ኤርሳዳሳ።
1CH 17:20 አቤት ጎዳዉ፥ ነ መል ኦንካ ባዋ። ኑኒ ኑ ሀይꬃን ስእዳይሳዳ ኔፐ አትሽን፥ ሀራ ፆሲ ባዋ።
1CH 17:21 ኔኒ ነ አሰ ኦꬃናዉ ዎዝዳ ነ አሳ እስራኤለ ዳንያ ሀራ ካዎተꬅ ሳአ ቦላ ባዋ። ኔኒ ኦꬅዳ ግታነ ማላልስያ ኦሶታ ጋሶን ነ ሱንꬃይ ቢታን ኤረትስ። ኔኒ ግብፀፈ ዎዝዳ ነ አሳ ስንꬃፈ ካዎተꬃታ ጎዳ ከሳዳሳ።
1CH 17:22 ኔኒ ነ አሳ እስራኤለ መርናዉ ነባ ኦꬃዳሳ። አቤት ጎዳዉ፥ ኔኒ ኤንታ ፆሰ ግዳዳሳ።
1CH 17:23 “አቤት ጎዳዉ፥ ኔኒ ነ አይልያስነ እያ ሶ አሳስ ኦድዳባይ መርናዉ ምንድ ደኦ፤ ኔኒ ኦꬃና ግዳይሳዳ ኦꬃ።
1CH 17:24 ‘ኡባፈ ዎልቃማ ጎዳይ፥ እስራኤለ ፆሳይ ቱማ እስራኤለ ፆሰ’ አሳይ ጋናዳ ነ ሱንꬃይ መርናዉ ምንድ ዳናነ ግታ ግዳና። ነ አይልያ ዳዊታ ሶ አሳይ ነ ስንꬃን ምንድ ዳና።
1CH 17:25 “አቤት ታ ፆሳዉ፥ ኔኒ ነ አይልያስ ኬ ኬፃና ጋዳ ቆንጭሳዳሳ። ሄሳ ግሾ፥ ታኒ ነ አይለይ ሀ ዎሳ ዎሳናዉ ምናስ።
1CH 17:26 አቤት ጎዳዉ፥ ኔኒ ፆሰ! ኔኒ ሀ ሎኦ ኡፋይሳ ቃላ ታዉ ነ አይልያስ ኦꬃና ጋዳሳ።
1CH 17:27 ነ ስንꬃን መርናዉ ዳና መላ ነ አይልያ ሶ አሳ አንጃናዉ ኮያዳሳ። አቤት ጎዳዉ፥ ነ አንጅዳይስ መርናዉ አንጀትዳይሳ ግዳና” ያግድ ዎስስ።
1CH 18:1 ሄሳፈ ጉየ፥ ዳዊቲ ፍልስፄመታ ፆንድ ሃርስ፤ ጌተ ካታማነ እያ ጉታታ ፍልስፄመታ ኩሸፐ ኤክስ።
1CH 18:2 ዳዊቲ ሞአበ አሳ ፆንን፥ ኤንቲ እያዉ ሃረትድ ጊርዶሶና።
1CH 18:3 ሀማታ ካታማ ማታን ደእያ ሱባ ካዎይ አድራዛር፥ ባ ካዎተꬃ ኤፍራፂሳ ሻፋ ጋካናዉ አሳናዉ ብሽን ዳዊቲ እያ ኦልስ።
1CH 18:4 ዳዊቲ አድራዛራፐ እስ ሙኩሉ ፓራ ጋረታ፥ ላፑን ሙኩሉ ፓራ አሳታነ ላታሙ ሙኩሉ ቶሆ አሳታ ድእስ። ዳዊቲ ፄቱ ጋረታስ ግድያ ፓራታ አሽድ ሀራ ፓራታ ኡባስ ገዳ ፃጱዋ ቃንፅስ።
1CH 18:5 ዳማስቆ ካታማን ደእያ ሶረት ሱባ ካዋ አድራዛራ ማዳናዉ ይዳ ዎደ ዳዊቲ ኤንታፈ 22,000 አሳ ዎꬍስ።
1CH 18:6 ሄሳፈ ጉየ፥ ሶረ ቢታን ዳማስቆ ካታማን ኦላ ሚፃ መꬍስ። ሶረ አሳት ዳዊታስ ሃረትድ ጊርዶሶና። ዳዊቲ ብዳ በሳ ኡባን ጎዳይ እያዉ ፆኖ እሚስ።
1CH 18:7 ዳዊቲ አድራዛራ ኦሳንቾት ቶክዳ ዎርቃ ጎንዳለታ ኤክድ የሩሳላመ ኤፍስ።
1CH 18:8 ቃስ ዳዊቲ አድራዛር ሃርያ ፀባሀነ ኩና ካታማታፐ ዳሮ ናሰ ብራታ ኤክስ። ሄሳፈ ጉየ፥ ሶሎሞነይ ሄ ናሰ ብራታፐ ኦሰትዳ ከረታ፥ ቱሳታነ ዱማ ዱማ ሚሸታ ኦꬅስ።
1CH 18:9 ዳዊቲ ሱባ ካዋ አድራዛራ ኦላንቾታ ኡባ ፆንዳይሳ ሀማታ ካዎይ ቶይ ስእስ።
1CH 18:10 ቶይ አድራዛራራ ኦለትሸ ጋምእዳ ግሾ ዳዊቲ አድራዛራ ኦልድ ፆንዳ ግሾ እያ ሀሹ ጋናዉነ ሳሮꬃናዉ ባ ናኣ ሀዶራማ ካዋ ዳዊታኮ ኪትስ። ሀዶራም ዎርቃፈ፥ ብራፐነ ናሰ ብራታፐ ኦሰትዳ ሚሸታ እሞታ ኤክድ ብስ።
1CH 18:11 ካዎይ ዳዊቲ ኤዶመፐ፥ ሞአበፐ፥ አሞነፐ፥ ፍልስፄመታፐነ አማለቃታፐ ድእድ ኤክዳ ብራነ ዎርቃ ሀ ሚሸታራ ጋꬅድ ጎዳስ ዱማይድ ዎꬅስ።
1CH 18:12 ፃሩያ ናአይ አብስ ኤዶመ አሳፐ 18,000 አሳ፥ ማፅነ ዛንጋራን ዎꬍስ።
1CH 18:13 ዳዊቲ ኤዶመን ኦላ ሚፃ መꬍስ፤ ያትን፥ ሄ ቢታ አሳ ኡባይ ዳዊታስ ሃረትስ። ዳዊቲ ብዳ በሳ ኡባን ጎዳይ እያዉ ፆኖ እሚስ።
1CH 18:14 ሄሳዳ ኦꬅድ፥ ዳዊቲ እስራኤለ ኡባ ቦላ ካዎትድ ባ አሳ ኡባ ፅሎተꬃንነ ሱረ ፕርዳን አይስስ።
1CH 18:15 ፃሩያ ናአይ እዮኣብ ቶራ ሞጮና፤ አህሉዳ ናአይ እዮሳፈፅ ታርከ ፃፈ።
1CH 18:16 አህፁባ ናአይ ሳዶቅነ አብያታራ ናአይ አብመለከይ ካህነ፤ ሳራይ ዋና ፃፈ።
1CH 18:17 ዮዳሄ ናአይ ባናይ ዳዊቲ ናግያ አሳ ሀላቃ፤ ዳዊታ አደ ናይት እያ ካዎተꬃን ꬎቃ በሳ ኦይክዳ ሀላቃታ።
1CH 19:1 ሄሳፈ ጉየ፥ አሞነ ካዎይ ናኦስ ሀይቅን እያ ናአይ እያ በሳን ካዎትስ።
1CH 19:2 ዳዊቲ፥ “እያ አዋይ ናኦስ ታዉ ኬህዳ ግሾ ታኒ እያ ናኣ ሀኑናስ ኬሀና” ያግስ። ሀኑና አዋይ ሀይቅዳ ግሾ ዳዊቲ እያ ምንꬃናዉ አሰ ኪትስ። ዳዊቲ ኪትዳ አሳት ሀኑና ምንꬃናዉ አሞነ ጋክዳ ዎደ፥
1CH 19:3 አሞነ ሞርናት ሀኑናኮ፥ “ዳዊቲ ነ አዋ ቦንችድ ነና ምንꬃናዉ ሀ አሳታ ኪትስ ጋዳ ኔ ቆፓይ? እ ሀ አሳ ኪትዳይ ሀ ካታማ ዎችድ፥ ኦላናሳ” ያግዶሶና።
1CH 19:4 ሀኑኒ ዳዊቲ ኪትዳ አሳታ ኦይክድ፥ ኤንታ ቡቻ ሜድስ፤ ኤንታ ማኡዋ ጋርሳፈ ዱለ ጋካናዉ ቃንፅድ ኤንታ የድስ።
1CH 19:5 ሄሳ ግሾ፥ አሳት ዳሮ ዬላትዶሶና። ዳዊቲ ሄሳ ስእድ፥ ኤንታኮራ አስ ኪትድ፥ “ህንተ ቡቻይ ድጫና ጋካናዉ እያርኮ ካታማን ደእተ፤ ሄሳፈ ጉየ ሃ ዪተ” ያግስ።
1CH 19:6 አሞነት ባንታ ኩሸን ዳዊቲ ኤንታ ሞርካና መላ ኦꬅዳይሳ ኤርዳ ዎደ ማሰጰፆመንነ ሶረን ደእያ ማእካነ ሱባ ካታማታፐ ፓራ ጋረታነ ፓራታ ጋርፃናዉ 34,000 ክሎ ግራመ ብራ ሳንትመ የድዶሶና።
1CH 19:7 32,000 ፓራ ጋረታ፥ ፓራታ፥ ማእካ ካዋነ እያ ኦላንቾታ ሚሸን ጋርፅን ይድ መዳባን ዱንካንዶሶና። ቃስ አሞነት ባንታ ካታማፐ ከይድ ኦላስ ጊገትዶሶና።
1CH 19:8 ዳዊቲ ሄሳ ስእዳ ዎደ እዮኣባነ ኦላንቾታ የድስ።
1CH 19:9 አሞነት ከይድ ካታማ ፐንገን ኦላስ ሳልፕዶሶና። ኤንታ ማዳናዉ ይዳ ካዎት ባንታ በሳ ኦይክድ ደንባን ሺቅዶሶና።
1CH 19:10 እዮኣብ ኦል ስንꬃራነ ጉየራ ተቅዳይሳ በእዳ ዎደ እስራኤለታ ግዶፈ ምኖ ኦላንቾታ ዶርድ፥ ሶረ ኦላንቾታ ስንꬃን ሳልፕስስ።
1CH 19:11 አትዳ አሳ ባ እሻ አብሳ አዋተꬃ ጋርሳን ዎꬅስ፤ ኤንቲ አሞነታ ስንꬃን ሳልፕዶሶና።
1CH 19:12 እዮኣብ ባ እሻ አብሳኮ፥ “ሶረ አሳት ታ ቦላ ዎልቃምኮ፥ ኔኒ ያዳ ታና ማዳ። አሞነ አሳት ነ ቦላ ዎልቃምኮ፥ ታኒ ያዳ ነና ማዳና።
1CH 19:13 ህዛ ምና! ኑ አሳ ግሾነ ኑ ፆሳ ካታማታ ግሾ አነ ምንድ ኦለቶስ። ጎዳይ ባና ሎእያባ ኦꬆ” ያግስ።
1CH 19:14 ሄሳፈ ጉየ፥ እዮኣብነ እያራ ደእያ አሳይ ሶረ ኦላንቾታራ ኦለታናዉ ከይዶሶና። ያትን፥ ሶረ አሳይ እያ ስንꬃፈ ባቃትዶሶና።
1CH 19:15 ሶረ አሳይ ባቃትዳይሳ አሞነ አሳይ በእዳ ዎደ ኤንትካ እያ እሻ አብሳያ ስንꬃፈ ባቃትድ ካታማ ገልዶሶና። ሄሳፈ ጉየ፥ እዮኣብ የሩሳላመ ስምስ።
1CH 19:16 ሶረ አሳይ እስራኤለ አሳይ ኤንታ ፆንዳይሳ ኤርዳ ዎደ አሰ ኪትድ ኤፍራፂሳ ሻፋፐ ሄፍንꬃራ ደእያ ሶረ አሳ ኤህዶሶና። ቶራ ሞጮናይ አድራዛር፥ ሾፋክ ኤንታ ካለꬄስ።
1CH 19:17 ዳዊቲ ሄሳ ስእዳ ዎደ እስራኤለ ኦላንቾታ ሺሽድ፥ ዮርዳኖሰ ሻፋ ፕንድ ሶረ አሳራ ኦለታናዉ ኤንታ ስንꬃን ሳልፕዶሶና። ዳዊቲ ኤንታራ ኦለታናዉ ሳልፕን ኤንትካ እያራ ኦለትዶሶና።
1CH 19:18 ሶረ አሳይ እስራኤለታ ስንꬃፈ ባቃትዶሶና፤ ዳዊቲ ሶረ አሳፐ ፓራ ጋረ ላግያ 7,000 አሳነ 40,000 ቶሆ አሳነ ኤንታ ቶራ ሞጮና ሾፋካ ዎꬍስ።
1CH 19:19 አድራዛራ ኦላንቾት እስራኤለታን ፆነትዳይሳ ኤርዳ ዎደ ዳዊታራ ስገትድ፥ እያዉ ሃረትዶሶና። ሄሳፈ ጉየ፥ ሶረ አሳይ አሞነ አሳ ማዳናዉ ዶስቦኮና።
1CH 20:1 ላይꬃ ላመን ካዎት ኦላስ ከይያ ዎደ እዮኣብ ኦላንቾታ ካለꬅድ አሞነ ቢታ ኦልድ ራባ ካታማ ኦይክስ። ሽን ዳዊቲ የሩሳላመን አትስ፤ እዮኣብ ራባ ካታማ ኦልድ ꬋይስስ።
1CH 20:2 ሄሳፈ ጉየ ዳዊቲ ይድ ኤንታ ካዋ ዎርቃ ካላቻ እያ ሁጰፐ ኤክስ። ካላቻ ዴፆይ ሀስታማነ ኦይዱ ክሎ ግራመ ግድስ፤ እያ ግዶን አልኦ ሹች ደኤስ። ሄ ካላቻ ኤክድ ዳዊቲ ባ ሁጰን ዎꬅስ። ቃስ ዳዊቲ ሄ ካታማፐ ዳሮ ድኦ ድእስ።
1CH 20:3 ካታማን ደእያ አሳ ከስድ ማጋዘን፥ ኮንተንነ ካልታን ኦስስስ። አሞነን ደእያ አሳ ኡባ ሄሳዳ ኦስስስ። ሄሳፈ ጉየ፥ ዳዊቲነ እያ አሳ ኡባይ የሩሳላመ ስምስ።
1CH 20:4 ሄሳፈ ጉየ፥ ፍልስፄመራ ገዘራን ኦል ደንድን፥ ኩሳታ አደይ ሳባክ፥ ራፋይመ ያራ ግድዳ ስፋያ ዎꬍስ። ያትን፥ ፍልስፄመት ፆነትዶሶና።
1CH 20:5 ፍልስፄመታራ ደንድዳ ሀራ ኦላን ቃስ ያእራ ናአይ ኤልያን፥ ቶራ ቶማይ ዋንዳራሸ መላ ግድዳ፥ ጌተ አድያ ጎልያዳ እሻ፥ ላህማ ዎꬍስ።
1CH 20:6 ቃስ ሀራ ኦል ጌተን ደንድስ። ሄ በሳን እስ ዎጋ አዱሳ አደይ ደኤስ። ሄ አድያስ እስ እስ ኩሽያንነ እስ እስ ቶሁዋን ኡሱፑን፥ ዎል ቦላ ላታማነ ኦይዱ ብራት ደኦሶና። እካ ራፋ ያራ።
1CH 20:7 ሄ ኡራይ እስራኤለታራ ቄለትዳ ዎደ ዳዊታ እሻ ሳምአ ናአይ ዮናታን እያ ዎꬍስ።
1CH 20:8 ሀይሳቲ ጌተን ደእያ ራፋ ያራታ፤ ኤንቲ ዳዊቲ ኩሸንነ እያ አሳ ኩሸን ሀይቅዶሶና።
1CH 21:1 ፃለሄይ እስራኤለ ቦላ መቶ ኤሀናዉ ኮይድ፥ ዳዊቲ እስራኤለ አሳ ታይባና መላ ደንꬅስ።
1CH 21:2 ዳዊቲ እዮኣባኮነ ቶራ ሞጮናታኮ፥ “ዳነፐ በርሳበ ጋካናዉ ብድ፥ እስራኤለ አሳ ታይብተ። ያትድ፥ አሳ ታይቦይ አፑነኮ ታና ኤርስተ” ያግስ።
1CH 21:3 ሽን እዮኣብ፥ “ጎዳይ፥ ሀ ደእያ ባ አሳ ቦላ ፄቱ ኩሸ ጉጆ! ታ ጎዳዉ፥ ካዋዉ፥ ኤንቲ ኡባይ ታ ጎዳ አይለታ ግዶኮናዬ? ታ ጎዳይ ሄሳ መላባ ኦꬃናዉ አይስ ኮዪ? እስራኤለ ቦላ አይስ ባላ ኦꬃይ?” ያግስ።
1CH 21:4 ሽን ካዋ ቃላይ እዮኣባ ፆንን፥ እዮኣብ ከይድ እስራኤለ ቢታ ኡባ ዩይድ የሩሳላመ ስምስ።
1CH 21:5 እዮኣብ ታይብዳ አሳ ታይቡዋ ዳዊታስ እሚስ። እስራኤለ ቢታ ኡባን ማሻን ኦለታናዉ ዳንዳእያ እስ 1,100,000 አሳት ደኦሶና። ቃስ ይሁዳ ቢታን ማሻን ኦለታናዉ ዳንዳእያ 470,000 አሳት ደኦሶና።
1CH 21:6 እዮኣብ ካዋ ኪታ ዶስቦና ግሾ ሌወታነ ብንያመ ኮቻታ ታይቤና።
1CH 21:7 ፆሳይ ሄሳን ኡፋይትቦና ግሾ እስራኤለ ሴርስ።
1CH 21:8 ዳዊቲ ፆሳኮ፥ “ታኒ ሀይሳን ግታ ናጋራ ኦꬃስ። ሽን ሀእ ነና ዎሳይስ፤ ነ አይልያ ናጋራ አቶ ጋ፤ ታኒ ዳሮ ኤያባ ሀናስ” ያግስ።
1CH 21:9 ጎዳይ ዳዊታ ቆንጨꬅ በእያ ጋደኮ ሀይሳዳ ያግስ፤
1CH 21:10 “ባዳ ዳዊታኮ፥ ጎዳይ፥ ‘ታኒ ነና ሄꬑ ዶሮ በሳይስ፤ ታኒ ነ ቦላ ኦꬃና መላ ኤንታፈ ታዉ እሱዋ ዶራ’ ያጌስ” ያጋ።
1CH 21:11 ጋድ ዳዊታኮ ብድ፥ “ጎዳይ ሀይሳታፐ እሱዋ ዶራ ያጌስ፤
1CH 21:12 ሄꬑ ላይꬃ ኮሻ ዎይኮ ሄꬑ አጌና ነ ሞርከታ ኩሸን አꬋዳ እመታናይሳ ዎይኮ ሄꬑ ጋላስ ጎዳ ማሻይ ነ ቢታ ሾጫናይሳነ ጋዶ እስራኤለ ቦላ ኤህያ ሀይቆ ኪታንቾ ኪተይሳፈ አዉሳ ዶራይ? ታና ኪትዳይሳስ ኦዳናባ ታዉ ኦዳ” ያግስ።
1CH 21:13 ዳዊቲ ጋደኮ፥ “ታኒ ዳሮ ኡንኤታስ። ጎዳ ማሮታይ ግታ ግድያ ግሾ ታኒ እያ ኩሸን ኩንዳና፤ አሳ ኩሸን ኩንድከ” ያግስ።
1CH 21:14 ሄሳ ግሾ፥ ጎዳይ እስራኤለ ቦላ ጋዶ የድን፥ 70,000 እስራኤለ አሳት ሀይቅዶሶና።
1CH 21:15 ፆሳይ የሩሳላመ ꬋይሳናዉ ኪታንቾ ኪትስ። ሽን ኪታንቾይ የሩሳላመ ꬋይሳናዉ ዶምዳ ዎደ ጎዳይ አዛንስ። ꬋይስያ ኪታንቹዋኮ፥ “አጋ! ህዛ ግዳና!” ያግስ። ሄ ዎደ ጎዳ ኪታንቾይ ያቡሰ አድያ ኦርና ዉዱማ ማታን ኤቅስ።
1CH 21:16 ኪታንቾይ ባ ማሻ ባ ኩሸን ኦይክድ የሩሳላመ ꬋይሳናዉ ሳአፐነ ሳሎፐ ግዶን ኤቅዳይሳ ዳዊቲ በእስ። ሄ ዎደ ዳዊቲነ ጭማት ካዮ ማኦ ማእድ፥ ሳአን ጉፋንዶሶና።
1CH 21:17 ዳዊቲ፥ “አሳይ ታይበታና መላ ኦꬅዳይ ታና ግድክና? ናቅዳይነ ኢታባ ኦꬅዳይ ታና። ሽን ሀ ዶርሳት አይ ኦꬅዶና? አቤት ጎዳዉ፥ ታ ፆሳዉ፥ ሀያና ነ ኩሸይ ታናነ ታ ሶ አሳ ሴሮ። ነ ኩሸይ ነ አሳ ሴሮፖ!” ያግስ።
1CH 21:18 ጎዳ ኪታንቾይ ጋደኮ ሀይሳዳ ያግስ፤ “ዳዊቲ ያቡሰ አድያ ኦርና ዉዱማ ብድ ጎዳስ ያርሾ በሲ ግምባና መላ ኦዳ” ያግስ።
1CH 21:19 ጎዳ ሱንꬃን ጋድ ኦድዳይሳ ስእድ ዳዊቲ ብስ።
1CH 21:20 ሄ ዎደ ኦርንነ እያ ኦይዱ አደ ናይት ዉዱማን ግስተ ቆፆሶና። እ ጉየ ስሚድ ኪታንቾ በእስ፤ እያራ ደእያ ኦይዱ ናይት በእድ ቆሰትዶሶና።
1CH 21:21 ዳዊቲ ኦርናኮ ይዳ ዎደ ኦርን እያ በእድ፥ ዉዱማፈ ጋፃ ከይድ ዝግድ ሳሮꬅስ።
1CH 21:22 ዳዊቲ፥ “ጋዶይ አሳ ቦላፈ ክቻና መላ ታኒ ጎዳስ ያርሾ በሲ ኬፃና መላ ነ ዉዱማ ታዉ ባይዛ። ታኒ ነዉ ኩመꬃ ጋትያ ቃንፃና” ያግስ።
1CH 21:23 ኦርን፥ “ኤካ፤ ታ ጎዳይ ካዎይ ባና ኡፋይስያባ ኦꬆ። ሄኮ፥ ቦራት ፁሳ ያርሾስ፥ ካꬃ ቡክያ ሚሽያ ኤꬃናዉ፥ ግስተ ካꬃ ያርሾስ እማና። ታኒ ሀ ኡባ ነዉ እማና” ያግስ።
1CH 21:24 ሽን ካዎይ ዳዊቲ፥ “አካይ፥ ታኒ ኩመꬃ ጋተ ቃንፃዳ ሻማና። ታኒ ነባነ ታ ሚሸን ሻሞናባ ኤካዳ ፁሳ ያርሾ ኦꬃዳ ጎዳስ ያርሽከ” ያግስ።
1CH 21:25 ዳዊቲ ዉዱማ ኡሱፑን ፄቱ ዎርቃ ሳንትመን ሻምስ።
1CH 21:26 ዳዊቲ ያን ጎዳስ ያርሾ በሲ ኬፅስ። ያትድ ፁሳ ያርሾነ እስፈተꬃ ያርሾ ያርሽስ። ጎዳ ዎስን፥ ጎዳይ ፁሳ ያርሹዋ ቦላ ሳሎፐ ታማ የድድ እያዉ ዛርስ።
1CH 21:27 ጎዳይ ኪታንቹዋ ኪትን፥ ኪታንቾይ ባ ማሻ ሾሁዋን ዛርስ።
1CH 21:28 ዳዊቲ፥ ጎዳይ እያ ዎሳ ዛርዳይሳ በእድ፥ ያቡሰ አድያ ኦርና ዉዱማን ዛሪድ ያርሽስ።
1CH 21:29 ሙሰይ መላ ቢታን ጊግስዳ፥ ጎዳ ዱንካነይነ ፁሳ ያርሾ በሳይ ሄ ዎደ ጋባኦናን ጎይንያ ꬎቃ በሳን ደኤስ።
1CH 21:30 ሽን ዳዊቲ ጎዳ ኪታንቹዋ ማሻ ያይዳ ግሾ ፆሳ ኦይቻናዉ ሄ በሳ ባናዉ ዳንዳእቤና።
1CH 22:1 ሄሳፈ ጉየ፥ ዳዊቲ፥ “ጎዳ ፆሳ ኬꬃይነ እስራኤለ አሳይ ፁሳ ያርሾ በሳይ ሀይሳን ግዳና” ያግስ።
1CH 22:2 ዳዊቲ እስራኤለ ቢታን ደእያ በተ አሳታ ሺሻና መላ ኪትስ። ፆሳ ኬꬃ ኬፃናዉ ሹቹ ማሰይሳት ማስድ ሎይꬃና መላ ኤንታ ግዶፈ ዶርስ።
1CH 22:3 ዳዊቲ፥ ድርሳ ፐንግያ ጊግሳናዉ ምስማረነ ማፃፈ ቆፃናዉ ዳሮ ብራታነ ዛው ባይና ናሰ ብራታ ጊግስስ።
1CH 22:4 ስዶናነ ፅሮሳ አሳት ዳዊታስ ዝጋ ኤህያ ግሾ ዳዊቲ፥ ታይቦይ ባይና ዝጋ ጊግስስ።
1CH 22:5 ዳዊቲ፥ “ታ ናአይ ሶሎሞነይ ዮጋነ ኤራተꬃን ሎህቤና። ጎዳስ ኬፀትያ ኬꬃይ ቢታ ኡባን ኤረትዳነ ቦንቸትዳ ሎኦ ኬ ግዳናዉ በሴስ። ሄሳ ግሾ፥ እያዉ ኮሽያባ ታኒ ጊግሳና” ያግስ። ዳዊቲ ሀይቃናፐ ስን ዳሮባ ጊግስድ ዎꬅስ።
1CH 22:6 ሄሳፈ ጉየ፥ ዳዊቲ ባ ናኣ ሶሎሞነ ፄግድ፥ ጎዳስ እስራኤለ ፆሳስ ኬ ኬፃና መላ ኪትስ።
1CH 22:7 ዳዊቲ ሶሎሞነኮ፥ “ታ ናአዉ፥ ታኒ ጎዳ ታ ፆሳ ሱንꬃስ ኬꬅ ኬፃናዉ ታ ዎዛናን ቆፓስ።
1CH 22:8 ግዶሽን፥ ጎዳ ቃላይ፥ ‘ኔኒ ዳሮ ሱꬅ ጉሳዳሳ፤ ዳሮ ኦላ ኦለታዳሳ። ኔኒ ሀ ሳኣ ቦላ ታ ስንꬃን ዳሮ ሱꬅ ጉስዳ ግሾ ታ ሱንꬃስ ኬ ኬፃካ።
1CH 22:9 ግዶሽን፥ ሳሮነ ሸምፖ ግድዳ ናእ የለታና፤ እያ ዩሹዋን ደእያ ሞርከታፐ ታኒ እያ ሸምፕሳና። እያ ሱንꬃይ ሶሎሞነ፤ ታኒ እያ ካዎተꬃ ላይꬃን እስራኤለ አሳስ ሳሮተꬅነ ዎፓ እማና።
1CH 22:10 እ ታ ሱንꬃስ ኬ ኬፃና። እ ታ ናአ ግዳና፤ ታኒ እያዉ አዋ ግዳና። እያ አራታ እስራኤለን መርናዉ ምንꬃዳ ኤሳና’ ” ያግስ።
1CH 22:11 “ህዛ ታ ናአዉ፥ ጎዳይ ኔራ ግዶ። ጎዳ ነ ፆሳ ኬꬃ ኬፃና መላ ጎዳይ ካሰ ኦድዳይሳዳ ነና ፖልሶ።
1CH 22:12 ጎዳይ ነና እስራኤለ አሳ ቦላ ካዎ ኦꬅያ ዎደ፥ ጎዳ ነ ፆሳ ህግያ ናጋና መላ ጎዳይ ነዉ ጭንጫተꬅነ አኬካ እሞ።
1CH 22:13 ጎዳይ ሙሰ ባጋራ እስራኤለስ እምዳ ዎጋነ ኪታ ኔኒ ናግኮ ኡባይ ነዉ ሀናና። ምና፤ ያዮፋ፤ ዳጋሞፋ፥ ኡፋይስ ቃንፆፋ!
1CH 22:14 ታኒ ታዉ ዳንዳኤትዳ መላ ጎዳ ኬꬃ ኬፃናዉ 3,400 ክሎ ግራመ ዎርቃ፥ 34,000 ክሎ ግራመ ብራ፥ ዛው ባይና ናሰነ ብራታ ሺሻስ፤ ሄሳዳካ ምꬅነ ሹቹ ጊግሳስ። ነካ ነ ባጋራ ሄሳ ቦላ ሀራ ጉጃናዉ ኮሼስ።
1CH 22:15 ነ ማታን ዳሮ ኦሳንቾት ሹቹ ቆኤይሳትነ ማሰይሳት፥ አናፀትነ ኡባ ኦሶ ኦꬃናዉ ዳንዳእያ ሂላንቾት ደኦሶና።
1CH 22:16 ዎርቃ፥ ብራ፥ ናሰነ ብራታ ኦꬅያ አሳስ ዛው ባዋ። ህዛ ኔኒ ኦሱዋ ዶማ፤ ጎዳይ ኔራ ግዶ” ያግስ።
1CH 22:17 እስራኤለ ካለይሳት ኡባይ ባ ናኣ ሶሎሞነ ማዳና መላ ዳዊቲ ሀይሳዳ ያግድ ኪትስ፤
1CH 22:18 “ጎዳይ፥ ህንተ ፆሳይ ሀእ ጋካናዉ ህንተራ ደኤነዬ? እ ህንተና ኡባ ባጋራ ሸምፕስበነዬ? ሀ ቢታን ደእያ አሳ እ ታ ኩሸን አꬅድ እምዳ ግሾ ሀ ቢታይ ጎዳስነ እያ አሳስ ሃረትስ።
1CH 22:19 ህዛ ጎዳ ህንተ ፆሳ ኮያናዉ ህንተ ዎዛናነ ህንተ ሸምፑዋ እምተ። ጎዳ ሱንꬃስ ኬፀትዳ ኬꬃ ግዶን ጎዳ ጫቆ ታቦትያነ ፆሳ ጌሻ ሚሸታ ኤህድ ዎꬃና መላ ደንድድ ጎዳ ፆሳ ኬꬃ ኬፅተ” ያግስ።
1CH 23:1 ዳዊቲ ጭምዳ ዎደ ባ ናኣ ሶሎሞነ እስራኤለ ቦላ ካዎꬅስ።
1CH 23:2 ዳዊቲ እስራኤለ ካለይሳታ ኡባ፥ ካህነታነ ሌወታ እስፈ ሺሽስ።
1CH 23:3 ላይꬅ ሀስታማነ እያፐ ቦላ ግድዳ ሌወት ታይበትድ ኩመꬅ 38,000 ግድዶሶና።
1CH 23:4 ኤንታፈ ጎዳ ኬꬃ አዋተꬃን አይስያ 24,000 ሌወታ ካዎይ ዎꬅስ፤ 6,000 ሌወታ ሀላቃታነ ፕርዳ ዳይናታ ኦꬅድ ዎꬅስ።
1CH 23:5 4,000 ሌወታ ፐንገ ናገይሳታ ኦꬅድ ዎꬅስ። ቃስ ጎዳ ጋላታናዉ ዳዊቲ ጊግስዳ የꬃ ሚሸን ጎዳ ጋላትያ 4,000 ሌወታ ዎꬅስ።
1CH 23:6 ዳዊቲ ሌወ አደ ናይታ ገድሶና፥ ቃሃታነ ማራራ ኤንታ ያራን ያራን ሄꬑ ጩጋን ሻክስ።
1CH 23:7 ገድሶና አደ ናይት ላእዳነነ ሳምአ።
1CH 23:8 ላእዳነ ሄꬑ አደ ናይት ይኤላ፥ ዘታማነ እዩኤላ።
1CH 23:9 ሳመአ ሄꬑ አደ ናይት ሳሎሞታ፥ ሀዝኤላነ ሀራና፤ ሀይሳቲ ላእዳነ ያራ ሀላቃታ።
1CH 23:10 ሳማአ ኦይዱ አደ ናይት ያሃታ፥ ዚዛ፥ ኡሳነ ባርአ።
1CH 23:11 ኡስ ባይራ፥ ዚዝ ካሎ። ሽን ኡሳስነ ባርአስ ናይት ዳሮና ግሾ ኤንቲ እስ ያራዳ ታይበትዶሶና።
1CH 23:12 ቃሃታ ኦይዱ አደ ናይት አንባራማ፥ ይስሃራ፥ ከብሮናነ ኡዝኤላ።
1CH 23:13 አንባራማ አደ ናይት አሮናነ ሙሰ። አሮንነ እያ ኮቻይ ኡባፈ ጌሽ ግዳና መላ ዱማትዶሶና። ኤንቲ ጎዳ ስንꬃን እፃነ ጩይሳናዉ፥ ጎዳስ ኦꬃናዉነ ጎዳ ሱንꬃን አሳ አንጃናዉ መርናዉ ዱማትዶሶና።
1CH 23:14 ፆሳ አሰ ግድዳ ሙሰ ናይታ ሌወ ኮቻታራ ጋꬅድ ታይብዶሶና።
1CH 23:15 ሙሰ ናይት ገድሶና አላዛራ።
1CH 23:16 ገድሶና ናይታ ግዶፈ ሀላቃይ ሳቡኤላ።
1CH 23:17 አላዛራ ናአይ ራሃባ። አላዛራስ ሀራ ናእ ባዋ፤ ሽን ራሃባስ ናይት ዳሮ።
1CH 23:18 ይስሃራ ናይታ ሀላቃይ ሳሎምታ።
1CH 23:19 ከብሮና ናአይ ባይራይ ይርያ፤ ካሎይ አማረ፤ ሄꬓንꬆይ ያሀዝኤላ፤ ኦይዳንꬆይ ያቅምኣማ።
1CH 23:20 ኡዝኤላ ባይራ ናአይ ምክያሳ፤ ካሎይ ይሽያ።
1CH 23:21 ማራራ ናይት ማህላነ ሙሳ። ማህላ ናይት አላዛራነ ቂሳ።
1CH 23:22 አላዛር ማጫ ናአፐ አትሽን፥ አደ ናአ የሎና ሀይቅስ። ሄሳ ግሾ፥ ኤንታ አዋ እሻ ቂሳ ናይት ኤንታ ማችዶሶና።
1CH 23:23 ሙሳ ሄꬑ ናይት ማህላ፥ ኤደራነ ይረሞታ።
1CH 23:24 ሌወ የለታን ባንታ ኮቻንነ ሶ አሳን ባንታ ሱንꬃን ማዝጋበትዳ ሌወ ኮቻት ሀይሳታ። ላይꬅ ላታማነ እያፐ ቦላ ግድዳ ሌወ ኮቻት ኡባይ ጎዳ ፆሳ ኬꬃን ኦꬅዶሶና።
1CH 23:25 ዳዊቲ፥ “ጎዳይ፥ እስራኤለ ፆሳይ ባ አሳ ሸምፕስስ። ጎዳይ የሩሳላመን መርናዉ ዳና።
1CH 23:26 ሌወት ዱንካንያነ እያ ግዶን ጎኤትያ ሚሸታ ህዛፐ ጉየ ቶካናዉ በሰና” ያግስ።
1CH 23:27 ዳዊቲ ዉርሰꬃ ኪታን፥ ላይꬅ ላታማነ እያፐ ቦላ ግድዳ ሌወት ታይበትዶሶና።
1CH 23:28 ኤንቲ ጎዳ ፆሳ ኬꬃን ኦꬅያ አሮና ኮቻታ ማዶሶና። ጎዳ ፆሳ ኬꬃን ካረራነ ሶራ ኦꬆሶና፤ ጌሻ ሚሸ ኡባ ቱኖና መላ ናጎሶና።
1CH 23:29 ኤንቲ ፆሳ ስንꬃን ዎꬅያ ኡይꬃ፥ ካꬃ ያርሾስ ሺሽያ ꬊልያ፥ እርሾይ ባይና ኡይꬃነ ዛይተራ ሙኑቀትያ ꬊልያ አዋተꬃን አይሶሶና፤ ፆሳ ኬꬃን ማከትያባነ ልከያባ ኡባ አዋተꬃን ፄሎሶና።
1CH 23:30 ቃስ ኤንቲ ኡባ ጋላስ ዎንታነ ኦማርስ ጎዳ ጋላታናዉነ ሳባናዉ ኤቆሶና።
1CH 23:31 ሳምባታ ጋላስ፥ አጌና ፄሮን፥ ዎጋይ ኪትያ ሀራ ባኣለ ጋላሳይ ጋክያ ዎደ ጎዳስ ፁሳ ያርሾ ያርሾሶና። ኤንታዉ እመትዳ ታይቡዋዳነ ኪታዳ ኡባ ዎደ ጎዳ ስንꬃን ኦꬆሶና።
1CH 23:32 ዱንካንያነ ጎዳ ፆሳ ኬꬃ ናጋና መላነ ባንታ እሻ ግድዳ፥ አሮና አደ ናይታ፥ ማዳና መላ አዋተꬅ ሌወታስ እመትስ።
1CH 24:1 አሮና ኮቻት ባንታ ኦሶ ማራን ሀይሳፈ ካልድ ፃፈትዳይሳታ። አሮና አደ ናይት ናዳባ፥ አብዮዳ፥ አላዛራነ እታማራ።
1CH 24:2 ሽን ናዳበይነ አብዮዳ ናአ የሎና ባንታ አዋፐ ስን ሀይቅዶሶና። ሄሳ ግሾ፥ አላዛርነ እታማር ካህነ ግድዶሶና።
1CH 24:3 ዳዊቲ አላዛራ ያራፐ ሳዶቃ፥ እታማራ ያራፐ አብመለከ ኤክድ አሮና ኮቻታ ኤንታ ኦሱዋ ማራን ጩጋን ጩጋን ሻክስ።
1CH 24:4 አላዛራ ያራታ ሀላቃት እታማራ ያራታ ሀላቃታፐ ዳር በንትዳ ግሾ አላዛራ ያራት ታማነ ኡሱፑን ጩጋን ሻከትን እታማራ ያራት ሆስፑን ጩጋን ሻከትዶሶና።
1CH 24:5 አላዛራ ያራታ ግዶንነ እታማራ ያራታ ግዶን ፆሳ ኬꬃ ሀላቃትነ ፆሳ ኦሱዋስ በሲያ ሀላቃት ደእያ ግሾ ኦሶይ ኤንታዉ ሳማን ሻከቴስ።
1CH 24:6 አላዛራ ያራትነ እታማራ ያራት ባንታ ማራን ማራን ሳማ ከስዶሶና። ሌወ ኮቸ ግድዳ ናትናኤላ ናአይ ፃፈይ ሻማየይ ኤንታ ማዝጋቤስ። ካዎይነ እያ ሞርናት፥ ካህነይ ሳዶቅነ አብያታራ ናአይ አብመለከይ፥ ካህነታነ ሌወታ ያራታ ሀላቃት ኡባይ ሄሳስ ማርካ።
1CH 24:7 ኮይሮ ሳማይ ዮኣርባስ ከይስ፤ ናምአንꬆይ ያዳያስ ከይስ።
1CH 24:8 ሄꬓንꬆይ ሀርማስ ከይስ። ኦይዳንꬆይ ሳኦርማስ ከይስ።
1CH 24:9 እቻሻንꬆይ ማልክያስ ከይስ። ኡሱፑንꬆይ ምያምናስ ከይስ።
1CH 24:10 ላፑንꬆይ አቆሳስ ከይስ፤ ሆስፑንꬆይ አብያስ ከይስ።
1CH 24:11 ኡዱፉንꬆይ እያሱስ ከይስ። ታማንꬆይ ሳካናስ ከይስ።
1CH 24:12 ታማነ እስንꬆይ ኤልያሴባስ ከይስ። ታማነ ናምአንꬆይ ያቅናስ ከይስ።
1CH 24:13 ታማነ ሄꬓንꬆይ ሁፓስ ከይስ። ታማነ ኦይዳንꬆይ የሸባስ ከይስ።
1CH 24:14 ታማነ እቻሻንꬆይ ብልጋስ ከይስ። ታማነ ኡሱፑንꬆይ እመራስ ከይስ።
1CH 24:15 ታማነ ላፑንꬆይ ሄዝራስ ከይስ። ታማነ ሆስፑንꬆይ ሀፍፄፃስ ከይስ።
1CH 24:16 ታማነ ኡዱፉንꬆይ ፓታሀስ ከይስ። ላታማንꬆይ የዘከላስ ከይስ።
1CH 24:17 ላታማነ እስንꬆይ ያክናስ ከይስ። ላታማነ ናምአንꬆይ ጋሙላስ ከይስ።
1CH 24:18 ላታማነ ሄꬓንꬆይ ዳላያስ ከይስ። ላታማነ ኦይዳንꬆይ ማዛስ ከይስ።
1CH 24:19 ጎዳይ እስራኤለ ፆሳይ ኤንታ ማይዛ አሮና ኪትን፥ እ ኤንታዉ ዎꬅዳ ዎጋꬆ፥ ባንታ ፆሳ ኬꬃ ገልያ ዎደ፥ ኤንቲ ኦꬃና ማራይ ሀይሳ።
1CH 24:20 ሀራ ሌወ ኮቻታ ሀላቃት፥ ሀይሳፈ ካልድ ፃፈትዳይሳታ። የህዳይ ሳቡኤላ ባጋራ አምራማ ኮቸ።
1CH 24:21 ይሸይ ራሃባ ኮቸ።
1CH 24:22 ያሃት ሳሎምታ ባጋራ ይስሃራ ኮቸ።
1CH 24:23 ይርየይ፥ አማረይ፥ ያሀዝኤልነ ይቃምኣም ከብሮና ኮቸ።
1CH 24:24 ሻምር ምክያሳ ባጋራ ኡዝኤላ ኮቸ።
1CH 24:25 ዛካርያስ ምክያሳ እሻ ይሽያ ባጋራ ኡዝኤላ ኮቸ።
1CH 24:26 ማህል፥ ሙስነ ያእዝ ማራራ ኮቻታ።
1CH 24:27 ያእዛ ሄꬑ አደ ናይት ሾሃማ፥ ዛኩራነ እባራ።
1CH 24:28 ማህላ ናምኡ አደ ናይት አላዛራነ ቂሳ። አላዛራስ አደ ናእ ባዋ።
1CH 24:29 ቂሳ ይራህማኤላ ጌተትያ አደ ናእ ደኤስ።
1CH 24:30 ሙሳ ሄꬑ አደ ናይት ማህላ፥ ኤደራነ ይረሞታ። ሀይሳቲ ሌወ ኮቻታ ሀላቃታ።
1CH 24:31 ካሰ ኤንታ ዳቦት አሮና ኮቸ ግድዳ ካህነት ኦꬅዳይሳዳ ሀይሳቲካ ካዎይ ዳዊቲ፥ ሳዶቅ፥ አብመለከይ፥ ካህነታነ ሌወታ ሀላቃት ደእያ በሳን ሳማ የግዶሶና። ባይራ እሻ ሶ አሳስነ ካሎ እሻ ሶ አሳስ እስ ግና ሳም ዎꬍስ።
1CH 25:1 ዳዊቲነ ሌወታ ሀላቃት፥ አሳፋ፥ ሄማናነ የዱቱና ናይታፐ ሱሱልኤን፥ ዲꬃንነ ዳላን ትንብተ ኦዳና መላ ዱማይዶሶና። ሀ ኦሱዋስ ዱማትዳ አሳ ሱንꬃይ ሀይሳፈ ካልድ ፃፈትዳይሳ።
1CH 25:2 አሳፋ ናይት ዛኩራ፥ ዮሰፋ፥ ናታናነ አሳርኤላ። አሳፋ ናይት አሳፋፐ ጋርሳራ ኦꬆሶና፤ አሳፍ ካዋ ኪታን ትንብተ ኦዴስ።
1CH 25:3 የዱቱና ናይት ጋዳልያ፥ ፃራ፥ ያሻያ፥ ሳምአ፥ ሀሳባያነ ማትታ። ሀ ኡሱፑናት ማስንቆን ጎዳ ጋላትሸነ ቦንችሸ ባንታ አዋ፥ ናብያ የዱቱናፐ ጋርሳራ ኪተቶሶና።
1CH 25:4 ሄማና ናይት ቡቃያ፥ ማታና፥ ኡዝኤላ፥ ሳቡኤላ፥ ያርሞታ፥ ሀናንያ፥ ሀናና፥ ኤልኣታ፥ ግዳልታ፥ ኦሮማንትኤዘራ፥ ዮሽባቃሻ፥ ማሎታ፥ ሆትራነ ማዝኣታ።
1CH 25:5 ሀይሳቲ ኡባይ ካዋስ ቆንጨꬅ በእያ ሄማና ናይታ። ፆሳይ እማና ግዳይሳዳ ሄማና ꬎቁ ꬎቁ ኦꬃና መላ ሀ ታማነ ኦይዱ አደ ናይታነ ሄꬑ ማጫ ናይታ እያዉ እሚስ።
1CH 25:6 ሀይሳቲ ኡባይ ፆሳ ኬꬃን ዳላ ቃꬃናዉ፥ ዲꬅነ ማስንቆ ካእድ ጎይናናዉ ባንታ አዋፐ ጋርሳራ ደኦሶና። አሳፍ፥ የዱቱንነ ሄማን ካዉዋፐ ጋርሳራ ደኦሶና።
1CH 25:7 ሄሳት ባንታ ዳቦታራ ግድድ ፆሳስ ሺቅያ ማዝሙረን ሎህዳይሳታ፤ ኤንቲ ኩመꬅ 288.
1CH 25:8 ኤንቲ ባንታ ኦሱዋ ሻክድ ኤራናዉ ናእ ጭም፥ አስታማረይ ታማረይ ሻሆይ ባይና ሳማ የግዶሶና።
1CH 25:9 ኮይሮ ሳማይ አሳፋ ናኣ ዮሰፋስ ከይስ። ናምአንꬆ ሳማይ ጋዳላስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:10 ሄꬓንꬆ ሳማይ ዛኩራስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:11 ኦይዳንꬆ ሳማይ ፃራስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:12 እቻሻንꬆ ሳማይ ናታናስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:13 ኡሱፑንꬆ ሳማይ ቡቃያስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:14 ላፑንꬃ ሳማይ ይሽራኤላስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:15 ሆስፑንꬆ ሳማይ ያሻያስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:16 ኡዱፉንꬆ ሳማይ ማታናስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:17 ታማንꬆ ሳማይ ሳምአስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:18 ታማነ እስንꬆ ሳማይ ኡዝኤላስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:19 ታማነ ናምአንꬆ ሳማይ ሀሳባያስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:20 ታማነ ሄꬓንꬆ ሳማይ ሳቡኤላስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:21 ታማነ ኦይዳንꬆ ሳማይ ማትታስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:22 ታማነ እቻሻንꬆ ሳማይ ያርሞታስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:23 ታማነ ኡሱፑንꬆ ሳማይ ሀናና ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:24 ታማነ ላፑንꬆ ሳማይ ዮሽባቃሻስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:25 ታማነ ሆስፑንꬆ ሳማይ ሀናንያስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:26 ታማነ ኡዱፉንꬆ ሳማይ ማሎታስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:27 ላታማንꬆ ሳማይ ኤልኣታስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:28 ላታማነ እስንꬆ ሳማይ ሆትራስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:29 ላታማነ ናምአንꬆ ሳማይ ግዳልታስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:30 ላታማነ ሄꬓንꬆ ሳማይ ማህዝኣታ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 25:31 ላታማነ ኦይዳንꬆ ሳማይ ኦሮማንትኤዘራስ ከይስ፤ እ፥ እያ ናይትነ እያ ዳቦት ኩመꬅ ታማነ ናምአ።
1CH 26:1 ፆሳ ኬꬃ ፐንግያ ናገይሳት ሀይሳፈ ካልድ ፃፈትዳይሳታ። ኮይሮይ ቆረ ኮቻፈ አሳፋ አደ ናይታፐ ቆረ ናአ ማሱላማ።
1CH 26:2 ማሱላም ላፑን አደ ናይታ የልስ፤ ኤንቲ ባንታ የለታ ማራን ዛካርያሳ፥ ይድኤላ፥ ዮዞባታ፥ ያትንኤላ፥
1CH 26:3 ኤላማ፥ ይሆናነ ኤልሆና።
1CH 26:4 ፆሳይ ኦቤድ-ኤዶማ አንጅዳ ግሾ፥ እ ሆስፑን አደ ናይታ የልስ። ኤንቲ ባንታ የለታ ማራን ሻማያ፥ ዮዛባታ፥ እዮኣሳ፥ ሳካራ፥ ናትናኤላ፥
1CH 26:5 አምኤላ፥ ይሳኮራነ ፑላታ።
1CH 26:6 ኦቤድ-ኤዶማ ናአይ ሻማየይ ኡሱፑን አደ ናይታ የልስ፤ ኤንቲ ምኖ አስ ግድዳ ግሾ፥ ባንታ አዋ ሶ አሳስ ሀላቃ ግድዶሶና።
1CH 26:7 ሻማያ ናይት ኦትና፥ ራፋኤላ፥ ዮቤዳነ ኤልዛባዳ፤ ኤንታ እሻት ኤልሁይነ ሳማክ ቃራ አሳታ።
1CH 26:8 ሀይሳቲ ኡባይ ኦቤድ-ኤዶማ ኮቻታ፤ ኤንቲ፥ ኤንታ ናይታነ ኤንታ ዳቦት ኦሶስ ምኖ። ኦቤድ-ኤዶማ ኮቻት ኩመꬅ ኡሱፑን ታማነ ናምአ።
1CH 26:9 ማሱላማስ ምኖ ናይትነ ምኖ ዳቦት ደኦሶና፤ ኤንቲ ኩመꬅ ታማነ ሆስፑና።
1CH 26:10 ማራራ ያራፐ ሆሳ ጌተትያ አድያስ ኦይዱ አደ ናይት ደኦሶና። ሽምር ባይራ ናአ ግደና፥ ሽን እያ አዋይ እያ ሀላቃ ኦꬅስ።
1CH 26:11 እያ እሻት ካልቀ፥ ዛባላነ ዛካርያሳ። ሆሳ ናይትነ እያ ዳቦት ኩመꬅ ታማነ ሄꬓ።
1CH 26:12 ፆሳ ኬꬃ ፐንግያ ናገይሳት ባንታ ሶ አሳ ሀላቃታ ጩጋን ጩጋን ሻከትዶሶና። ሀራ ሌወታዳ ኤንታካ ፆሳ ኬꬃ ኦሶይ ሻሆን ጋክስ።
1CH 26:13 እስ እስ ፐንግያ ናጋናዉ ባንታ ሶ አሳን አሳን ናአ ጭማ ጎና ሳማ የግዶሶና።
1CH 26:14 ዶሎሀ ፐንግያ ናጋናዉ ሳማይ ሳላማስ ከይስ። ሎኦ ዞረ ዞርያ እያ ናኣ ዛካርያሳ ፑደሀ ፐንግያ ናጋናዉ ሳም ከይስ።
1CH 26:15 ኦቤድ-ኤዶማስ ዱገሀ ፐንግያ ናጋናዉ ሳም ከይስ። እያ ናይታስ ቡቁራ ምንጅያ ኬꬃ ናጋናዉ ሳም ከይስ።
1CH 26:16 ዉሎሀ ፐንግያነ ቆሞ ባጋራ ደእያ ሻለኮታ ፐንግያ ናጋናዉ ሳም ሱፍማስነ ሆሳስ ከይስ። ናጎይ ማራን ማራን ጋኬስ።
1CH 26:17 ጋላስ ጋላስ ዶሎሀ ባጋራ ኡሱፑን፥ ፑደሀ ባጋራ ኦይዳ፥ ዱገሀ ባጋራ ኦይዱ ሌወት ናጎሶና። ቃስ ቡቁራ ምንጅያ ኬꬃ ናምኡ ናምኡ ሌወት ናጎሶና።
1CH 26:18 ዉሎሀ ባጋራ ዳባባኮ ኤፍያ ኦግያ ኦይዱ፥ ቃስ ዳባባ ናምኡ ሌወት ናጎሶና።
1CH 26:19 ህዛ ቆረስነ ማራራ ኮቻስ እመትዳ ፐንገ ናጎ ኦሶይ ሀይሳ።
1CH 26:20 አክያ ጌተትያ ሌወይ ፆሳ ኬꬃን ደእያ ቡቁራነ ፆሳስ ዱማይ ዎꬅዳ እሞታታ ናጋናዉ ሹመትስ።
1CH 26:21 ገድሶና ናኣ ላዳና ያራፐ ይኤል ዱማ ዱማ ሶ አሳስ አዋተስ።
1CH 26:22 ይኤላ ናይት ዘታማነ እያ እሻ እዩኤላ፤ ኤንቲ ፆሳ ኬꬃን ደእያ ቡቁራ ናጋናዉ ሹመትዶሶና።
1CH 26:23 አምራማ፥ ይስሃራ፥ ከብሮናነ ኡዝኤላ ያራታስ ኦሶይ ሻከትድ እመትስ።
1CH 26:24 ሙሰ ናኣ ገድሶና ያራ ግድዳ ሳቡኤል ፆሳ ኬꬃን ደእያ ቡቁራ ናገይሳታ ሀላቃታ ቦላ ሹመትስ።
1CH 26:25 እ ገድሶና እሻ አላዛራ ባጋራ ሳሎሞታስ ዳቦ። አልአዛር ራሃብያ የልስ፤ ራሃብ የሻያ የልስ፤ የሻይ ዮራማ የልስ፤ ዮራም ዝክራ የልስ፤ ዝክር ሳሎምታ የልስ።
1CH 26:26 ሳሎሞትነ እያ ዳቦት ካዎይ ዳዊቲ፥ እያ ሶ አሳ ሀላቃት፥ ሻላቃት፥ ማቶ ሀላቃትነ ቶራ ሞጮናታ ፆሳስ ዱማይዳ ሚሸ ኡባ ቦላ ሹመትዶሶና።
1CH 26:27 ሀ አሳት ኦላን ድኤትድ ይዳ ሚሸታፐ ባጋ ፆሳ ኬꬃን ዱማይድ ዎꬅዶሶና።
1CH 26:28 ቆንጨꬅ በእያ ሳሜል፥ ቂሳ ናአይ ሳኦል፥ ኔራ ናአይ አበኔርነ ፃሩያ ናአይ እዮኣብ ካሰ ዱማይድ ዎꬅዳ እሞታ ኡባ ሳሎሞትነ እያ ዳቦት ናጎሶና።
1CH 26:29 ይስሃራ ያራታፐ ካናነይነ እያ ናይት ፆሳ ኬꬃፈ ካረራ ደእያ ኦሶን እስራኤለ አሳ አይሳናዉነ ዳይናታናዉ ሹመትዶሶና።
1CH 26:30 ከብሮና ያራታፐ ሀሻብነ እያ ዳቦት 1,700 ምኖ አሳት፥ ጎዳ ኦሱዋስነ ካዋ ኦሱዋስ ዮርዳኖሰፐ ዉሎሀ ባጋራ ደእያ እስራኤለ አሳ ቦላ ሹመትዶሶና።
1CH 26:31 ከብሮና ያራታ ማዝጋብያ ማራን ይርይ ኤንታ ሀላቃ። ዳዊቲ ካዎትዳ ኦይታማንꬆ ላይꬃን ማዝጋበን ኮይን ኤንታ አሳ ግዶፈ ምኖ አሳት ጋላዳ ቢታን ያእዜራ ጌተትያ በሳን በንትዶሶና።
1CH 26:32 ኤንታ ሶ አሳስ ሀላቃ ግድዳ ይርያ ዳቦት ምኖት 2,700. ካዎይ ዳዊቲ ፆሳ ኦሱዋስነ ካዋ ኦሱዋስ ሮቤላ፥ ጋደነ ምናሰ ኮቻታፐ ባጋታ ቦላ ኤንታ ሹምስ።
1CH 27:1 ባንታ ጩጋን ጩጋን ካዎተꬃ አይስያ እስራኤለ ሶ አሳ ሀላቃት፥ ሻላቃትነ ማቶ ሀላቃት ሀይሳፈ ካልድ ፃፈትዳይሳታ። እስ እስ ጩጋን 24,000 አሳት ደኦሶና። እስ እስ ጩጋይ ላይꬃን እስ አጌና ማራን ማራን ካዎተꬃ ኦሶ ኦꬃናዉ ከዬስ።
1CH 27:2 ኮይሮ አጌናን ከያ ጩጋ ካለይ ዛብድኤላ ናኣ ያሾብኣማ፤ እያ ጩጋን 24,000 አስ ደኤስ።
1CH 27:3 ያሾብኣም ፓረሳ ኮቸ፤ እ ኮይሮ አጌናስ ቶራ ሞጮናታ።
1CH 27:4 ናምአንꬆ አጌናን ከይያ ጩጋ ካለይ አሆሀ አድያ ዶዳያ፤ እያ ጩጋን 24,000 አስ ደኤስ። ሄ ጩጋ ካለꬅያ ናምአንꬆ ሀላቃይ ምክሎታ።
1CH 27:5 ሄꬓንꬆ አጌናን ከይያ ጩጋ ካለይ ካህንያ ዮዳሄ ናኣ ባናያ፤ እያ ጩጋን 24,000 አስ ደኤስ።
1CH 27:6 ባናይ ሀስታሙ ኤረትዳ አሳታ ግዶን ምኖ አስ፤ ቃስ ሀስታማታ ሀላቃ። እያ በሳን እያ ናአይ አምዛባድ ሀላቃ ግድስ።
1CH 27:7 ኦይዳንꬆ አጌናን ከይያ ጩጋ ካለይ እዮኣባ እሻ አሳሄላ፤ እያ ጩጋን 24,000 አስ ደኤስ። እያ በሳን እያ ናአይ ዛባድ ሀላቃ ግድስ።
1CH 27:8 እቻሻንꬆ አጌናን ከይያ ጩጋ ካለይ ይስሃራ ያራፐ ሻምሁታ፤ እያ ጩጋን 24,000 አስ ደኤስ።
1CH 27:9 ኡሱፑንꬆ አጌናን ከይያ ጩጋ ካለይ ተቁሄ አድያ እስካ ናኣ እራ፤ እያ ጩጋን 24,000 አስ ደኤስ።
1CH 27:10 ላፑንꬃ አጌናን ከይያ ጩጋ ካለይ ኤፍሬማ ኮቸ ግድዳ ፕሎና አድያ ሰለሳ፤ እያ ጩጋን 24,000 አስ ደኤስ።
1CH 27:11 ሆስፑንꬃ አጌናን ከይያ ጩጋ ካለይ ሁሻ አድያ ስባካያ፤ እያ ጩጋን 24,000 አስ ደኤስ። ስባካይ ይሁዳ ኮቸነ ዛራ ያራ።
1CH 27:12 ኡዱፉንꬆ አጌናን ከይያ ጩጋ ካለይ ብንያመ ኮቸ ግድዳ አናቶተ አድያ አብኤዘራ፤ እያ ጩጋን 24,000 አስ ደኤስ።
1CH 27:13 ታማንꬆ አጌናን ከይያ ጩጋ ካለይ ናፆፋ አድያ ዛራ ያራ ግድዳ ማህራ፤ እያ ጩጋን 24,000 አስ ደኤስ።
1CH 27:14 ታማነ እስንꬆ አጌናን ከይያ ጩጋ ካለይ ኤፍሬማ ኮቸ ግድዳ ፕርአቶና አድያ ባናያ፤ እያ ጩጋን 24,000 አስ ደኤስ።
1CH 27:15 ታማነ ናምአንꬆ አጌናን ከይያ ጩጋ ካለይ ጎቶንያላ ያራፐ ግድዳ ናፆፋ ሄልዳያ፤ እያ ጩጋን 24,000 አስ ደኤስ።
1CH 27:16 እስራኤለ ኮቻታ አይሳናዉ ሹመትዳይሳት ሀይሳፈ ካልድ ፃፈትዳይሳታ። ሮቤላ ኮቻ አይሰይ ዝክራ ናኣ አላዛራ። ስሞና ኮቻ አይሰይ ማእካ ናኣ ሳፋፃ።
1CH 27:17 ሌወ ኮቻ አይሰይ ቃሙኤላ ናኣ ሀሳባያ። አሮና ኮቻ አይሰይ ሳዶቃ።
1CH 27:18 ይሁዳ ኮቻ አይሰይ ዳዊታ እሻ ኤልሁ። ይሳኮራ ኮቻ አይሰይ ምካኤላ ናኣ ኦምራ።
1CH 27:19 ዛብሎና ኮቻ አይሰይ አብድዩ ናኣ ያሽማያ። ንፍታለመ ኮቻ አይሰይ አዝርኤላ ናኣ ያርሞታ።
1CH 27:20 ኤፍሬማ ኮቻ አይሰይ አዛዛ ናኣ ሆሰአ። ምናሰ ኮቻፈ ባጋ አይሰይ ፓዳያ ናኣ እዩኤላ።
1CH 27:21 ጋላዳን ደእያ ምናሰ ኮቻፈ ባጋ አይሰይ ዛካርያሳ ናኣ እዶ። ብንያመ ኮቻ አይሰይ አበኔራ ናኣ የእስኤላ።
1CH 27:22 ዳነ ኮቻ አይሰይ ይሮሃማ ናኣ አዛርኤላ። ሀይሳቲ እስራኤለ ኮቻ አይሰይሳታ።
1CH 27:23 ጎዳይ እስራኤለ አሳ ሳሎ ፆልንቶዳ ዳርሳና ግዳ ግሾ ዳዊቲ ላታሙ ላይꬅነ እያፐ ጋርሳራ ደኤይሳታ ታይቦን ገልስቤና።
1CH 27:24 ፃሩያ ናአይ እዮኣብ አሳ ታይቦ ዶምድ ዉርሶና አግስ። አሳ ታይብዳ ግሾ ጎዳይ እስራኤለ አሳ ቦላ ሀንቀትዳ ግሾ ኤንታ ታይቦይ ካዋ ዳዊታ ታርከ ማዝጋበን ፃፈትቤና።
1CH 27:25 ካዎ ቡቁራ ምንጅያ በሳ አዋተꬃን አይስያ አሳ ሱንꬃይ ሀይሳፈ ካልድ ፃፈትዳይሳታ። አድኤላ ናኣ አዝሞት ካዎ ኬꬃ ቡቁራ አዋተꬃን አይሴስ። ኦዝያና ናአይ ዮናታን ጋፃረን፥ ካታማንነ ጉታን ደእያ ካዎ ኬꬃ ሚሸታ አዋተꬃን አይሴስ።
1CH 27:26 ካሉባ ናአይ እዝር ጎሻንቾታ አዋተꬃን አይሴስ።
1CH 27:27 ራማ አደይ ሳመእ ዎይነ ጋደታ አዋተꬃን አይሴስ። ሳፋማ አደይ ዛብድ ዎይነ ኡሻ ምንጅያ ኬꬃ አዋተꬃን አይሴስ።
1CH 27:28 ጋዳራ አደይ ባአል-ሀናን ዙማ ቦላ ደእያ ዛይተ ሻማሁዋነ ቦባ አዋተꬃን አይሴስ። ዛይተ ዎꬅያ ኬꬃ አዋተꬃን አይሰይ እዮኣሳ።
1CH 27:29 ሳሮና ደንባን ሄመትያ መህያ አዋተꬃን አይሰይ ሳሮና አድያ ሳፅራ። ዛንጋራን ሄመትያ መህያ አዋተꬃን አይሰይ አድላያ ናኣ ሻፋፃ።
1CH 27:30 ግማለታ አዋተꬃን አይሰይ እስማኤላ አድያ ኡብሳ። ሀረታ አዋተꬃን አይሰይ መሮኖታ አድያ የህዳያ።
1CH 27:31 ዶርሳታነ ዴሻታ አዋተꬃን አይሰይ አጋራ አደይ ያዝዛ። ሀይሳቲ ኡባይ ዳዊታ ሻሉዋ ቦላ አዋተይሳታ።
1CH 27:32 ዳዊታ አዋ እሻይ፥ ፃፈይ ዮናታን አኬካነ ካዋ ዞርያ አስ። ሀክሞና ናአይ ይኤል ካዋ ናይታ ታማርሴስ።
1CH 27:33 አክፆፈል ካዋ ዞረይሳ። አርካ አደይ ኩስ ካዋ ላገ።
1CH 27:34 አክፆፈል ሀይቅን፥ እያ በሳን ባናያ ናአይ ዮዳሄይነ አብያታር ካዋ ዞርያ አስ ግድዶሶና፤ እዮኣብ ካዋ ቶራ ሞጮና።
1CH 28:1 እስራኤለ ሀላቃት ኡባይ የሩሳላመን ሺቃና መላ ካዎይ ዳዊቲ ኪትስ። ሄሳ ግሾ፥ እስ እስ ኮቻ ሀላቃት፥ ካዎ ሞርናት፥ ሻላቃት፥ ማቶ ሀላቃት፥ ካዋስነ ካዋ ናይታስ ደእያ ሻሉዋነ መህያ አይሰይሳት፥ ካዎ ጋꬎን ኦይሳት፥ ኤረትዳነ ምኖ አሳት ኡባይ የሩሳላመን ሺቅዶሶና።
1CH 28:2 ካዎይ ዳዊቲ ደንድ ኤቅድ ሀይሳዳ ያግስ፤ “ታ እሻቶ፥ ታ አሳዉ፥ ስእተ! ጎዳ ጫቆ ታቦትያ ዎꬅያነ ኑ ፆሳ ቶሆይ ሸምፕያ ኬꬃ ኬፃናዉ ታ ዎዛናን ቆፓስ፤ ኮሽያባ ኡባ ጊግሳስ።
1CH 28:3 ሽን ፆሳይ፥ ‘ኔኒ ኦላንቾነ ሱꬅ ጉስዳ አስ ግድያ ግሾ ታ ሱንꬃስ ኬ ኬፃካ’ ያግስ።
1CH 28:4 ታኒ እስራኤለ ቦላ መርናዉ ካዎታናዳ፥ ጎዳይ እስራኤለ ፆሳይ ታ አዋ ሶፐ ታና ዶርስ። ካለꬃናዳ ኮይሮ ይሁዳ ኮቻ ዶርስ፤ ይሁዳ ኮቻፈ ታ አዋ ሶ አሳ ዶርስ፤ ታ አዋ ናይታ ግዶፈ ታና ዶርድ እስራኤለ ኡባ ቦላ ካዎያናዉ ዶስስ።
1CH 28:5 ጎዳይ ታዉ ዳሮ ናይታ እሚስ፤ ታ ናይታ ኡባፈ ጎዳ ካዎተꬃ አራታን ኡትድ እስራኤለ ቦላ ካዎታናዳ ታ ናኣ ሶሎሞነ ዶርስ።
1CH 28:6 “ጎዳይ፥ ‘ታ ኬꬃነ ታ ዳባባ ኬፃናይ ነ ናኣ ሶሎሞነ። እ ታዉ ናአ ግዳና መላ ታኒ እያ ዶራስ፤ ታኒ እያዉ አዋ ግዳና።
1CH 28:7 እ ሀእ ኦይሳዳ ታ ኪታነ ታ ህግያ ምንድ ናግኮ ታኒ እያ ካዎተꬃ መርናዉ ምንꬃና’ ያግስ።
1CH 28:8 ህዛ ጎዳ ሺቆ ግድዳ እስራኤለ አሳ ኡባይ በእሽን፥ ኑ ፆሳይ ስእሽን፥ ጎዳ ህንተ ፆሳ ኪታ ኡባ ህንተ ምንꬅድ ናጋና መላ ታኒ ህንተዉ ኦዳይስ። ያትኮ፥ ህንተ ሀ ሎኦ ቢታ ላታና፤ ህንተ ናይታካ መርናዉ ላትሳና።
1CH 28:9 “ሶሎሞነ፥ ታ ናአዉ፥ ፆሳይ አሳ ዎዛናነ ቆፋ ኡባ ኤርያ ግሾ ነ አዋ ፆሳ ኤራ፤ ኩመꬃ ዎዛናንነ ሸነን እያዉ ኦꬃ። ኔኒ እያ ኮይኮ እ ነዉ በንታና፤ ሽን ኔኒ እያ አግኮ እ ነና መርናዉ አጋና።
1CH 28:10 ፆሳ ኬꬃ ኬፃና መላ ጎዳይ ነና ዶርዳይሳ ዶጎፓ፤ ኦሶ ኡባ ምናዳ ኦꬃ” ያግስ።
1CH 28:11 ሄሳፈ ጉየ፥ ዳዊቲ ባ ናኣ ሶሎሞነስ ፆሳ ኬꬃ፥ ባራንዳ፥ ቡቁራ ምንጅያ ኬꬃ፥ ፖቅያነ ግዶ ክፍለታ፥ ሄሳዳካ ናጋራ አቶተꬃ ካማ ዎꬅያ ክፍልያ ሀልቹዋነ ቆፋ እሚስ።
1CH 28:12 ዳዊቲ ጎዳ ኬꬃ ዳባባ ኬፃናዉ ባ ዎዛናን ደእያ ቆፋ፥ እያ ዩሹዋን ደእያ ኡባ ክፍለታ ሀልቹዋነ ፆሳ ኬꬃ ቡቁራ ዎꬅያ ክፍልያነ ጎዳስ ዱማትዳ እሞታታ ዎꬅያ ክፍለታ ኦሱዋ ቆፋ እሚስ።
1CH 28:13 ሄሳዳካ ዳዊቲ ካህነታነ ሌወታ ኦሶ ማራ፥ ፆሳ ኬꬃ ኦሶ ማራነ ፆሳ ኬꬃ ሚሸታ ናግያ ማራ ኦድያ ቆፋ እያዉ እሚስ።
1CH 28:14 ዱማ ዱማ ኦሶስ ጎኤትያ ሚሸታ ኦꬃናዉ ማድያ ዎርቃነ ብራ ምዛነን ልክስድ ሶሎሞነስ እሚስ።
1CH 28:15 ሄስካ ፆምፐ ዎꬅያ ዎርቃ ኮጫታነ እያ ፆምፐታ፥ ፆምፐ ዎꬅያ ብራ ኮጫታነ እያ ፆምፐታ፥
1CH 28:16 ጎዳ ስንꬃን ኡይꬁ ዎꬅያ ዎርቃ ፃርጴዛታ፥ ብራ ፃርጴዛታ፥
1CH 28:17 ዎርቃ ቃጰታ፥ ዎርቃ ከረታ፥ ዎርቃ ዋንጫታ፥ ዎርቃ ፃሮታ፥ ብራ ፃሮታ
1CH 28:18 እፃነ ጩይስያ ጌሻ ዎርቃ ሳፅነ፥ ጎዳ ጫቆ ታቦትያ ቦላ ባንታ ቀፍያ ምጭድ ካምያ ክሩበታ ዎꬅያ ዎርቃ ጋርያ ጊግስያ ሀልቹዋ እያዉ እሚስ።
1CH 28:19 ዳዊቲ፥ “ጎዳይ ባ ኩሽያ ታ ቦላ ዎꬅድ ሀ ፃፈትዳ ቆፋ ኡባ ታና ኤርስስ” ያግስ።
1CH 28:20 ዳዊቲ ባ ናኣ ሶሎሞነኮ፥ “ህዛ ምና! ኦሱዋ ኦꬃ! ጎዳይ ታ ፆሳይ ኔራ ደእያ ግሾ ያዮፋ፤ ዳጋሞፋ! ፆሳ ኬꬃ ኦሶይ ፖለታና ጋካናዉ ፆሳይ ነና የገናነ አገና።
1CH 28:21 ፆሳ ኬꬃን ደእያ ኦሶ ኡባስ ካህነትነ ሌወት ሹመትዶሶና። ኩሸ ሂል ደእያ አሳ ኡባይ ነና ኦሶ ኡባን ማዳና። ሀላቃትነ አሳ ኡባይ ነዉ ኪተታና” ያግስ።
1CH 29:1 ሄሳፈ ጉየ፥ ካዎይ ዳዊቲ ሺቅዳ አሳ ኡባ ሀይሳዳ ያግስ፤ “ፆሳይ ዶርዳ ታ ናኣ ሶሎሞነይ ዮጋነ ኤራተꬃን ሎህቤና። ሀ ኬፀታና ኬꬃይ አሳ ኬꬅ ግዶናሽን ጎዳ ፆሳ ኬꬅ ግድያ ግሾ ኦሶይ ግታ።
1CH 29:2 ታኒ ታዉ ደእያ ዎልቃ መላ ታ ፆሳ ኬꬃስ ዎርቃን ኦሰትያባስ ዎርቃ፥ ብራን ኦሰትያባስ ብራ፥ ናሰ ብራታን ኦሰትያባስ፥ ናሰ ብራታ፥ ብራታን ኦሰትያባ ብራታነ ምꬃን ኦሰትያባስ ምꬅ ጊግሳ ዎꬃስ። ቃስ ማርግደ፥ እብነባራደ፥ ዱማ ዱማ ማል ደእያ አሌቆ ሹቻታ፥ አልኦ ሹቻታነ ሀራ ሹቻታ ጊግሳዳ ዎꬃስ።
1CH 29:3 ፆሳ ኬꬃ ታኒ ዳሮ ዶስያ ግሾ፥ ታኒ ታ ፆሳ ኬꬃስ ጊግስዳይሳፈ ሀራ ታ ቡዞ ሻሉዋፐ ዎርቃነ ብራ እማስ።
1CH 29:4 ኬꬃ ጎዳ ላንፃናዉ 100,000 ክሎ ግራመ ኦፍራ ዎርቃነ 240,000 ክሎ ግራመ ዋላህ ባይና ብራ እማስ።
1CH 29:5 ኩሸ ሂላንቾት ኦꬃና ኦሶ ኡባስ ዎርቃን ኦሰትያባስ ዎርቃ፥ ብራን ኦሰትያባስ ብራ እማስ። ያትን፥ ሀች ህንተፈ ባ ሸነን ባና ጎዳስ ዱማየይ ኦኔ?” ያግስ።
1CH 29:6 እስራኤለ ኮቻታ ሶ አሳ ሀላቃት፥ ኮቻታ ሀላቃት፥ ሻላቃት፥ ማቶ ሀላቃትነ ካዎ ሞርናት ባንታ ሸነን ባንታዉ ደእያባ ዶሳን እምዶሶና።
1CH 29:7 ኤንቲ ፆሳ ኬꬃ ኦሱዋስ 170,000 ክሎ ግራመ ዎርቃ፥ 340,000 ክሎ ግራመ ብራ፥ 620,000 ክሎ ግራመ ናሰ ብራታነ 3,000,000 ክሎ ግራመ ብራታ እምዶሶና።
1CH 29:8 አልኦ ሹች ደእያ አሳ ኡባይ ቡቁራ አይስያ ገድሶና ያራ ግድዳ ይኤላ ባጋራ ጎዳ ፆሳ ኬꬃ ቡቁራ ምንጅያ ኬꬃስ እሚስ።
1CH 29:9 አሳይ ባ ሸነን ባ ኩመꬃ ዎዛናን ጎዳስ እምዳ ግሾ ኡፋይትስ፤ ካዎይ ዳዊቲካ ዳሮ ኡፋይትስ።
1CH 29:10 ሄሳ ግሾ፥ ዳዊቲ ደርያ ኡባ ስንꬃን ሀይሳዳ ያግድ ጎዳ ጋላትስ፤ “አቤት ጎዳዉ፥ ኑ አዋ እስራኤለ ፆሳዉ ኔኒ መርናፐ መርናዉ ጋላተታ።
1CH 29:11 አቤት ጎዳዉ፥ ሳሎንነ ሳአን ደእያ ኡባይ ነባ! ግታተꬅ፥ ዎልቅ፥ ቦንቾይ፥ ፆኖይነ አንግ ነባ! አቤት ጎዳዉ፥ ማት ነባ፤ ኔኒ ኡባፈ ቦላነ ሁጰ።
1CH 29:12 ዱረተꬅነ ቦንቾይ ኔፐ ዬስ፤ ኔኒ ኡባባ ሃራሳ። ዎልቅነ ምኖተꬅ ነ ኩሸና፤ ኔኒ አሳ ኡባ ግታነ ምኖ ኦꬃናዉ ዳንዳኣሳ።
1CH 29:13 ሀእካ ኑ ፆሳዉ፥ ኑኒ ነና ጋላቶስ፤ ነ ቦንቾ ሱንꬃ ሳቦስ።
1CH 29:14 “ኑኒ ሀይሳ መላ እማናዉ ታነ ታ አሳይ ኦኔ? ኡባይ ኔፐ ዬስ፤ ኑኒ ነ ኩሸፐ ኤክዳባ ነዉ ዛሪድ እምዳ።
1CH 29:15 ካሰ ኑ አዋታዳ ኑካ ነ ስንꬃን በተ አስነ እማ። ሀ ሳአን ኑ ደኦ ላይꬃይ ኡፋይስ ባይና ኩያ መላ።
1CH 29:16 አቤት ጎዳዉ፥ ኑ ፆሳዉ፥ ነ ጌሻ ሱንꬃስ ኑኒ ኬ ኬፃናዉ ሺሽዳ ኡባይ ነ ኩሸፐ ይዳባ፤ ኡባይ ነባ።
1CH 29:17 “ታ ፆሳዉ ኔኒ ዎዛና ፓጨይሳነ ሱረተꬅ ዶሰይሳ ታኒ ኤራይስ። ታኒ ታ ዎዛና ሱረተꬃን ታ ሸነን ሄሳ ኡባ እማስ። ሀ በሳን ደእያ ነ አሳይ ነዉ ባ ሸነን ኡፋይሳን እምዳይሳ ታኒ በአስ።
1CH 29:18 አቤት ጎዳዉ፥ ኑ ማይዛታ አብራሃመ፥ ይሳቃነ እስራኤለ ፆሳዉ፥ ነ አሳ ዎዛናን ሀ ግታ ሲቁዋ መርናዉ ናጋ፤ ኤንታ ዎዛና ኔኮ ዛራ።
1CH 29:19 ነ ዎጋ፥ ነ ኪታነ ነ ህግያ ናጋና መላነ ታኒ ቆፓዳ ጊግሳዳባን ፆሳ ኬꬃ ኬፃና መላ ታ ናኣ ሶሎሞነስ ኩመꬃ ዎዛና እማ” ያግድ ዎስስ።
1CH 29:20 ሄሳፈ ጉየ፥ ዳዊቲ ደርያኮ፥ “ጎዳ ህንተ ፆሳ ጋላትተ” ያግስ። ደረ ኡባይ ጎዳ ባንታ አዋታ ፆሳ ጋላትዶሶና። ሳአን ጉፋንድ ጎዳ ጎይንዶሶና፤ ካዋስካ ቦንቾ እምዶሶና።
1CH 29:21 ዎንተꬃ ጋላስ አሳይ ያርሾነ ፁሳ ያርሾ ጎዳስ ያርሽዶሶና። ሄስካ እስ ሙኩሉ ኮርማ፥ እስ ሙኩሉ ማራዘ፥ እስ ሙኩሉ ዶርሳ ኡርገ፥ ኡሻ ያርሾነ ሀራ ዳሮ ያርሾ ያርሽዶሶና።
1CH 29:22 አሳይ ሄ ጋላስ ጎዳ ስንꬃን ዳሮ ኡፋይትድ ምስነ ኡይስ። ያትድ አሳይ ካዋ ዳዊታ ናኣ ሶሎሞነ ናምአንꬆ ዛይተ ትይድ እያ ካዎተꬃን ምንꬅስ። ሳዶቃ ካህነ ግዳና መላ ጎዳ ስንꬃን ትይዶሶና።
1CH 29:23 ሄሳፈ ጉየ፥ ሶሎሞነይ ባ አዋ ዳዊታ በሳን ጎዳ ካዎተꬃ አራታን ኡትስ። እያዉ ኡባባይ እንጀትስ፤ እስራኤለ ኡባይ እያዉ ኪተትዶሶና።
1CH 29:24 ሀላቃት፥ ምኖ አሳትነ ካዋ ዳዊታ ናይት ካዋ ሶሎሞነስ ኪተታናዉ ቃላ ገልዶሶና።
1CH 29:25 ጎዳይ ሶሎሞነ እስራኤለ አሳ ኡባ ስንꬃን ꬎቁ ꬎቁ ኦꬅስ፤ ካሰ እስራኤለ ካዎታስ እመትቦና ቦንቾ ሶሎሞነስ እሚስ።
1CH 29:26 እሰየ ናአይ ዳዊቲ እስራኤለ ኡባ ቦላ ካዎትስ።
1CH 29:27 ዳዊቲ እስራኤለ ቦላ ኦይታሙ ላይꬅ ካዎትስ፤ ከብሮናን ላፑን ላይꬅ፥ የሩሳላመን ሀስታማነ ሄꬑ ላይꬅ ካዎትስ።
1CH 29:28 ዳዊቲ ዳሮ ላይꬅ ደእድ፥ ዱረትድ፥ ቦንቸትድ፥ ሎኦ ጭምድ ሀይቅስ። እያ በሳን እያ ናአይ ሶሎሞነይ ካዎትስ።
1CH 29:29 ዳዊቲ ኮይሮፐ ዶምድ ዉርሰꬅ ጋካናዉ ኦꬅዳባይ፥ ቆንጨꬅ በእያ ሳሜላ፥ ናብያ ናታናነ ቆንጨꬅ በእያ ጋደ ታርከ ማፃፋን ፃፈትስ።
1CH 29:30 እ ዋት ሃርዳኮ፥ ዋንዳ ዎልቃማ አሴኮ፥ እ ኦꬅዳባይ፥ እስራኤለ አሳይነ ሄራን ደእያ ካዎተꬃት ኡባይ ሀንዳባይ ሄ ማፃፋታን ፃፈትስ።
2CH 1:1 ጎዳይ እያ ፆሳይ እያራ ደእያ ግሾነ እያ ዳሮ ግታይዳ ግሾ ዳዊታ ናአይ ካዎይ ሶሎሞነይ ባ ካዎተꬃ ምንꬅስ።
2CH 1:2 ሶሎሞነይ እስራኤለ ኡባ፥ ሻላቃታ፥ ማቶ ሀላቃታ፥ ዳናታ፥ እስራኤለ አሳ ካለꬅያ ኡባነ ሶ አሳ ሀላቃታ ፄግድ ሺሽስ።
2CH 1:3 ሄሳፈ ጉየ፥ ሶሎሞነይነ ሺቅዳ አሳ ኡባይ ጋባኦናን ደእያ ꬎቃ ጎይኖ በሳ ብዶሶና። ጎዳ አይለይ ሙሰይ መላ ቢታን ኦꬅዳ ዱንካነይ ያን ደኤስ።
2CH 1:4 ካሰ ዳዊቲ ታቦትያስ የሩሳላመን ዱንካነ ቶክድ፥ ቅርያት-ይኣርመፐ እ ጊግስድ ዎꬅዳ በሳ ኤህስ።
2CH 1:5 ሁራ ናኣ ኡረ ናአይ ባፃልኤል ናሰ ብራታፐ ኦꬅዳ ያርሾ በሳይ፥ ጋባኦናን ጎዳ ዱንካንያ ስንꬃን ደኤስ። ሶሎሞነይነ ሺቅዳ አሳይ ጎዳስ ያን ጎይንዶሶና።
2CH 1:6 ሶሎሞነይ ዱንካንያ ስንꬃን ደእያ ናሰ ብራታፐ ኦሰትዳ ያርሾ በሳኮ፥ ጎዳ ስን ብድ፥ እስ ሙኩሉ ፁሳ ያርሾ ያርሽስ።
2CH 1:7 ሄ ጋላስ ቃማ ፆሳይ ሶሎሞነስ ቆንጭድ፥ “ታ ነዉ አይ እማና መላ ኮያይ?” ያግስ።
2CH 1:8 ሶሎሞነይ፥ “ነ ታ አዋ ዳዊታ ግታ ሲቆን ዶሳዳሳ፤ ታና እያ በሳን ካዎꬃዳሳ።
2CH 1:9 አቤት ጎዳዉ፥ ፆሳዉ፥ ነ ታ አዋ ዳዊታስ ካሰ ግዳ ቃላይ ፖለቶ። ነ ታና ሳአን ደእያ ባናዳ ዳርዳ አሳ ቦላ ካዎꬅዳ ግሾ፥
2CH 1:10 ታ ሀ አሳ ካለꬃና መላ ታዉ ጭንጫተꬅነ አኬካ እማ። ሄስ ሀኖና እፅኮ፥ ሀ ግታ አሳ ኦን አይሳናዉ ዳንዳኢ?” ያግስ።
2CH 1:11 ፆሳይ ሶሎሞነኮ፥ “ነ ዱረተꬅ ዎይኮ ሻሎ ደማናዉ ዎይኮ ቦንቸታናዉ ዎይኮ ነ ሞርከት ሀይቃና መላ ዎይኮ ነ ላይꬃይ አዱቃና መላ ኦይቾናሽን ታ ነና ካዎꬅዳ ታ አሳ አይሳናዉ ጭንጫተꬅነ አኬካ ኦይችዳ ግሾ፥
2CH 1:12 ነዉ ጭንጫተꬅነ አኬካ እማና። ቃስ ኔፐ ካሰ ደእዳ ካዎታስ ዎይኮ ኔፐ ጉየ ደንዳና ካዎታስ ባይና ዱረተꬅ፥ ሻሎነ ቦንቾ ነዉ እማና” ያግስ።
2CH 1:13 ሶሎሞነይ ዱንካነይ ጋባኦናን ደእያ፥ ꬎቃ ጎይኖ በሳፈ ስሚድ፥ የሩሳላመ ብድ እስራኤለ ቦላ ካዎትስ።
2CH 1:14 ሶሎሞነይ ፓራ ጋረታነ ፓራታ ሺሽስ። እያዉ እስ ሙኩሉነ ኦይዱ ፄቱ ፓራ ጋረትነ ታማነ ናምኡ ሙኩሉ ፓራት ደኦሶና። እ ኤንታ ፓራ ጋረታ ካታማታንነ ባራ የሩሳላመን ዎꬅስ።
2CH 1:15 ካዎይ ዎርቃይነ ብራይ የሩሳላመን ሹቻዳ ዶረታናዳ፥ ጋꬋን ቦቢ ድጭያ መላ ዝጋ ምꬅ ዳራና መላ ኦꬅስ።
2CH 1:16 ሶሎሞነ ፓራት ግብፀፈነ ቃወ ቢታፈ ይዶሶና። ካዋ ዛልአንቾት ኤንታ ቃወፐ ሚሸን ሻምድ ኤሆሶና።
2CH 1:17 ኤንቲ እስ እስ ፓራ ጋርያ ኡሱፑን ፄቱ ብራ ሳንትመን፥ እስ እስ ፓራ እስ ፄታነ እሻታሙ ብራ ሳንትመን ግብፀፈ ሻምድ፥ ህተታ ካዎታ ኡባስነ ሶረ ካዎታስ ባይዞሶና።
2CH 2:1 ሶሎሞነይ ጎዳ ሱንꬃስ ኬነ ባዉ ጋꬎ ኬፃናዉ ሀልችስ።
2CH 2:2 ሶሎሞነይ ቶሆስ ላፑን ታሙ ሙኩሉ አሳነ ገዘ ቢታን ሹቹ ቆአናዉ ሆስፑን ታሙ ሙኩሉ አሳ ዶርስ። ቃስ ኤንታ ዎችያ ሄꬑ ሙኩሉነ ኡሱፑን ፄቱ አሳታ ኤንታ ቦላ ሹምስ።
2CH 2:3 ሶሎሞነይ ፅሮሳ ካዋ ክራማስ ኪታ ኪትድ፥ “ታ አዋይ ዳዊቲ ባ ጋꬎ ኬፃና መላ ኔኒ ዝጋ የድዳይሳዳ ታዉካ የዳ።
2CH 2:4 ሄኮ፥ ሀእ ታ ጎዳ፥ ታ ፆሳ ሱንꬃስ ኬ ኬፃናዉ ሀናይስ። ታ ያን ሳዎ ቶንኩ ግያ እፃነ ጩይሳናዉ፥ ኡባ ዎደ ጎዳ ስንꬃን ኡይꬃ ዎꬃናዉነ ዎንታነ ኦማርስ፥ ሳምባታ ጋላሳን፥ አጌን ፄርያ ዎደነ ጎዳ ኑ ፆሳ ባኣለ ጋላሳታን ፁሳ ያርሾ ያርሻናዉ፥ ፆሳ ኬꬃ ዱማያና። እስራኤለ አሳይ መርናዉ ኦꬃና መላ ኪተትዳ ኦሶት ሀይሳታ።
2CH 2:5 “ኑ ፆሳይ ሀራ ፆሳታ ኡባፈ ግታ ግድያ ግሾ፥ ታ ኬፃናዉ ሀንያ ፆሳ ኬꬃይ ግታ።
2CH 2:6 ሽን እያዉ ኬ ኬፃናዉ ዳንዳኤይ ኦኔ? ሳሎፐ ꬎቃ ሳሎይ እያዉ ግደና! ያትን፥ ታ እያ ስንꬃን እፃነ ጩይሳናዉነ ታ እያዉ ኬ ኬፃናዉ ኦኔ?
2CH 2:7 “ህዛ አሌቆ ኦሶ፥ ዎርቃ፥ ብራ፥ ናሰነ ብራታ ሴርስያ ኦሱዋነ ዞኦ ማኡዋ፥ ኦቻ ቴራ ዳንያ ማኡዋነ ካሎሰ ማኡዋ ጊግስያ ኤራተꬅ ደእያ አሰ ታዉ የዳ። ታ አዋይ ዳዊቲ ይሁዳንነ የሩሳላመን ደእያ ኩሸ ሂላንቾታ ዶር ዎꬅስ፤ እ ኤንታራ እስፈ ኦꬃና።
2CH 2:8 ልባኖሰን ደእያ ነ አሳት ምꬃ ዋት ቃንፅያኮ ኤረይሳ ታ ኤራይስ። ሄሳ ግሾ፥ ኔኒ ታዉ ልባኖሰፐ ዝጋ፥ ፂዳነ ፃይꬃ ምꬅ የዳ። ታ አሳት ነ አሳታራ ግድድ፥
2CH 2:9 ዳሮ ምꬃ ጊግሳና። ታኒ ኬፅያ ፆሳ ኬꬃይ ግታነ ማላልስያባ።
2CH 2:10 ምꬅ ቃንፅያ ነ አይለታ ታኒ ላታሙ ሙኩሉ ኩንታለ ግስተነ ላታሙ ሙኩሉ ኩንታለ ባንጋ፥ ኦይዱ ፄቱ ሙኩሉ ልትሮ ዎይነነ ኦይዱ ፄቱ ሙኩሉ ልትሮ ሻማሆ ዛይተ እማና” ያግስ።
2CH 2:11 ፅሮሳ ካዎይ ክራም ሶሎሞነኮ ዳብዳበ የድሸ፥ “ጎዳይ ባ አሳ ዶስያ ግሾ፥ እ ነና ኤንታ ቦላ ካዎꬅስ።”
2CH 2:12 ክራም ጉጅድ፥ “ፆሳ ኬꬃነ ባዉ ጋꬎ ኬፃና መላ ጭንጫ፥ አኬካነ ሂላ ናኣ ካዋ ዳዊታስ እምዳ፥ ሳሎ ሳኣ መꬍዳ ጎዳይ፥ እስራኤለ ፆሳይ ጋላተቶ።
2CH 2:13 “ታኒ ክራም-አብ ጌተትያ ሂላንቾነ አኬካ አድያ ነዉ የዳስ።
2CH 2:14 እያ አይያ ዳነ ኮቸ፤ እያ አዋይ ፅሮሳ ቢታ አሳ። እ ዎርቃ፥ ብራ፥ ናሰ ብራታ፥ ብራታ፥ ሹቹነ ምꬅ ኦꬅያ አስ፤ ኦቻ ቴራ ዳንያ ማኦ፥ ካሎሰ ማኦ፥ ዞኦ ማኦነ ሊኖ ማኦ ጊግስያ ኦሶ ኤሬስ። እ ዱማ ዱማ አሌቆታ ከስድ፥ ኦደይሳዳ ኡባ ኦꬃናዉ ዳንዳኤስ። እ ኩሸ ሂላን ሎህዳ ነ አሳራነ ካሰ ነ አዋ፥ ዳዊታስ ኦꬅዳ አሳራ እያ ኦስሳ።
2CH 2:15 ህዛ ነ ታ ጎዳይ እማና ግዳ ግስትያነ ባንጋ፥ ዛይትያነ ዎይንያ የዳ።
2CH 2:16 ኔኒ ልባኖሰፐ ኮይዳ ምꬅ ኑ ቃንፅድ ቃችድ፥ አባ ቦላራ ቶከትድ፥ ኔኮ ዮጰ ባናዳ ኦꬃና። ያፐ ኔኒ የሩሳላመ ጋካናዉ ኤፍሳና” ያግስ።
2CH 2:17 እያ አዋይ ዳዊቲ ካሰ ታይብዳይሳዳ፥ ሶሎሞነይ እስራኤለ ቢታን ደእያ ካረ ቢታ አሳ ኡባ ታይብስ። ኤንቲ ፄታነ እሻታማነ ሄꬑ ሙኩሉነ ኡሱፑን ፄታ ግድዶሶና።
2CH 2:18 ሶሎሞነይ ሄ አሳፐ ላፑን ታሙ ሙኩሉ አሳ ቶሆስ፥ ሆስፑን ታሙ ሙኩሉ አሳ ገዘ ቢታን ሹቻ ቆአናዉ ዶርስ፤ ኤንታ ዎቻናው ሄꬑ ሙኩሉነ ኡሱፑን ፄቱ አሳ ሹምስ።
2CH 3:1 ሶሎሞነ አዋይ ዳዊቲ ፆሳ ኬꬃይ ኬፀታና በሳ ሞረ ደርያን የሩሳላመን ጊግስስ። ሄ በሳይ ጎዳይ ዳዊታስ ቆንጭዳ ያቡሰ አድያ ኦርና ዉዱማ።
2CH 3:2 ሶሎሞነይ ባ ካዎትዳ ኦይዳንꬆ ላይꬃን፥ ናምአንꬆ አጌናን ፆሳ ኬꬃ ኬፃናዉ ዶምስ።
2CH 3:3 ሶሎሞነይ ፆሳ ኬꬃ ኬፃናዉ ባስዳ ባሱዋ አዱሳተꬃይ ኡሱፑን ታሙ ዋꬋ፤ ጎምፓይ ላታሙ ዋꬋ።
2CH 3:4 ፆሳ ኬꬃ ገልያ በሳን ደእያ ባራንዳ ጎምፓይ ፆሳ ኬꬃ ጎምፓዳ ላታሙ ዋꬋ፤ አዱሳተꬃይ ላታሙ ዋꬋ።
2CH 3:5 ፐንገ ጎዳ ፂዳ ፃላላን ልጭድ ካምስ፤ ጌሻ ዎርቃን ትይስ፤ ዛምባ ምስለነ ሳንꬃላታ ምስለን አሌቅስስ።
2CH 3:6 ፆሳ ኬꬃ አልኦ ሹቻን አሌቅስስ፤ እ አሌቅስዳ ዎርቃይ ፓርዋይማ ቢታፈ ይዳ ዎርቃ።
2CH 3:7 ጎዳታ፥ ቱቀታ፥ ጎባነታነ ፐንገታ ዎርቃን ትይስ፤ ጎዳ ቦላ ክሩበ ምስለ መꬍስ።
2CH 3:8 ሶሎሞነይ ኡባፈ ጌሻ በሳ ኬፅስ። ሄ በሳ አዱሳተꬃ ፆሳ ኬꬃ ጎምፓዳ ላታሙ ዋꬋ፤ ጎምፓይ ላታሙ ዋꬋ። ሄ በሳ ጎዳ ላታሙ ሙኩሉ ክሎ ግራመ ሙሩቶ ዎርቃን ትይስ።
2CH 3:9 ኤንቲ ጎኤትዳ ምስማረይ እቻሹ ፄታነ ላፑን ታሙ ግራመ ዎርቃፈ መትስ። ፖቀን ደእያ ክፍለታካ ዎርቃን ትይስ።
2CH 3:10 ሶሎሞነይ ኡባፈ ጌሻ በሳን ናምኡ ክሩበ ምስለታ ጊግስድ ዎርቃን ትይስ።
2CH 3:11 ሄ ክሩበታ ቀፈይ ምጨትድ፥ ላታሙ ዋꬋ፤ ኮይሮ ክሩብያ ኮይሮ ቀፈይ እቻሹ ዋꬋ ግድድ፥ ፆሳ ኬꬃ ጎዳ ቦቼስ፤ ናምአንꬆ ቀፈይ እቻሹ ዋꬋ ግድድ፥ ሀራ ክሩብያ ቀፍያ ቦቼስ።
2CH 3:12 ናምአንꬆ ክሩብያ ኮይሮ ቀፈይ እቻሹ ዋꬋ ግድድ፥ ፆሳ ኬꬃ ጎዳ ቦቼስ፤ ናምአንꬆ ቀፈይ እቻሹ ዋꬋ ግድድ፥ ኮይሮ ክሩብያ ቀፍያ ቦቼስ።
2CH 3:13 ሀ ናምኡ ክሩበታ ቀፈይ ምጨትድ፥ ላታሙ ዋꬋ ግድስ፤ ኤንቲ ባንታ ሶምኡዋ ጌሻ በሳኮ ዛሪድ፥ ባንታ ቶሆን ኤቅዶሶና።
2CH 3:14 ሶሎሞነይ ካሎሰ ማኡዋ፥ ኦቻ ቴራ ዳንያ ማኡዋፐነ፥ ዞኦ ማኡዋፐ ሊኖፐ ዳደትዳ ማኡዋፐ ማጋራጆ ኦꬅድ፥ እያ ቦላ ክሩበታ ምስለ መꬍስ።
2CH 3:15 ሶሎሞነይ ፆሳ ኬꬃ ስንꬃን እሱዋ እሱዋ አዱሳተꬃይ ሀስታማነ እቻሹ ዋꬋ ግድዳ ናምኡ ቱሳታ ኦስስድ፥ ኤንታ ሁጰን እቻሹ ዋꬋ ጉምቦታ ዎꬅስ።
2CH 3:16 ቃስ ሳንꬃላታ ግተዳ መꬍስድ፥ ቱሳታ ሁጰን ዎꬅስ፤ ፄቱ ኦሮማነ ቴራ ምስለታ መꬍስድ፥ ሳንꬃላታ ቦላ ዎꬅስ።
2CH 3:17 ቱሳታፐ እሱዋ ፆሳ ኬꬃ ስንꬃን ኡሻቻ ባጋራ፥ ናምአንꬁዋ ቃስ ሀድርሳ ባጋራ ኤስስ። ኡሻቻ ባጋራ ደእያ ቱሳ ያክና ሱንꬅድ፥ ሀድርሳ ባጋራ ደእያ ቱሳ ቦኤዛ ሱንꬅስ።
2CH 4:1 ሄሳፈ ጉየ፥ ሶሎሞነይ አዱሳተꬃ ላታሙ ዋꬋ፥ ጎምፓይ ላታሙ ዋꬋ፥ ꬎቃተꬃይ ታሙ ዋꬋ ግድያ ያርሾ በሳ ናሰ ብራታፐ ኦስስስ።
2CH 4:2 ቃስ ናሰ ብራታ ሴርስድ፥ ዶናይ ያ ጋፃፐ ሀ ጋፃ ጋካናዉ ታሙ ዋꬋ፥ አዱሳተꬃይ እቻሹ ዋꬋነ ዩሾይ ሀስታሙ ዋꬋ ግድያ አባ ሳነ መꬍስስ።
2CH 4:3 አባ ሳነ ዶናን ካረ ባጋራ ዩይ አꬍድ፥ እያራ ኦይከትድ መትዳ ምስለት ደኦሶና፤ ሄ ምስለት ናምኡ ማራን ደእያ ቦራታ ምስለታ።
2CH 4:4 ሄ አባ ሳነ ናሰ ብራታፐ መትዳ ታማነ ናምኡ ቦራታ ምስለታስ ዞኩዋን ኡትስ። ቦራታፐ ሄꬓት ፑደሀ ባጋ፥ ሄꬓት ዉሎሀ ባጋ፥ ሄꬓት ዱገሀ ባጋ፥ ሄꬓት ቃስ ዶሎሀ ባጋ ስሚድ ፄልያባ ዳኖሶና። አባ ሳነ ኤንታ ቦላ ኡትስ፤ ኤንታስ ጉየ ባጋይ ግዶኮ ስም ኡትስ።
2CH 4:5 አባ ሳነይ እስ ታካꬎ መላ ኦርደ፤ እያ ዶናይ ዋንጫ ዶና መላ፤ ሱፈ ጪሽ ዳኔስ። ሄ አባ ሳነይ ኡሱፑን ታሙ ሙኩሉ ልትሮ ግድያ ሃꬃ ኦይከይሳ።
2CH 4:6 ሶሎሞነይ ሜጨትያ ታሙ ከረታ፤ ኦስስድ፥ እቻሻ ኡሻቻ ጋርሳ ባጋራ፥ እቻሻ ሀድርሳ ባጋራ ዎꬅስ። ኤንታን ፁሳ ያርሾ አሾይ ሜጨቴስ፤ ሽን አባ ሳነ ሃꬃን ካህነት ሜጨቶሶና።
2CH 4:7 ሄሳፈ ጉየ፥ ሶሎሞነይ ኤንታዉ እመትዳ ሀልቹዋዳ ፆምፐ ዎꬅያ ታሙ ኮጫታ ዎርቃፈ ኦꬅድ፥ እቻሻ ኡሻቻ ባጋራ፥ እቻሻ ሀድርሳ ባጋራ ፆሳ ኬꬃን ዎꬅስ።
2CH 4:8 ታሙ ፃርጴዛታ ኦꬅድ፥ እቻሻ ኡሻቻ ባጋራ፥ እቻሻ ሀድርሳ ባጋራ ፆሳ ኬꬃ ግዶን ዎꬅስ። ቃስ ፄቱ ድስተታ ዎርቃፈ ኦꬅስ።
2CH 4:9 ሶሎሞነይ ካህነታስ ግዶ ዳባባ፥ ካረ ባጋ ግታ ዳባባ ጊግስስ፤ ዳባባስ ፐንገታ ጊግስድ፥ ፐንገታ ናሰ ብራታን ላንፅስ።
2CH 4:10 አባ ሳንያ ፆሳ ኬꬃፈ ጋርሳን ዶሎሀ ባጋን ዎꬅስ።
2CH 4:11 ክራም ከረታ፥ አካፋታነ ፃሮታ መꬍስ፤ ክራም ካዋ ሶሎሞነስ ፆሳ ኬꬃን ኦሶ ኦꬅድ ፖልስ።
2CH 4:12 እ ኦꬅዳ ኦሶትካ ናምኡ ቱሳታ፥ ቱሳታ ሁጰን ዎꬅያ ሳነ መላ ናምኡ ጉምቦታ፥ ቱሳታ ቦላ ደእያ ናምኡ ጉምቦታ አሌቅስያ ናምኡ ግተ ዳንያ ሳንꬃላታ፥
2CH 4:13 እስ እስ ቱቅያ ቦላ ናምኡ ማራን ናሰ ብራታፐ ኦሰትዳ እስ እስ ፄቱ ኦሮማነ ቴራ ምስለታ፥ ኩመꬅ ኦይዱ ፄቱ ኦሮማነ ቴራ ምስለታ፥
2CH 4:14 ኦይደታነ ኦይደታ ቦላ ኡትያ ሜቻ ታሙ ከረታ፥
2CH 4:15 አባ ሳነይነ እያፐ ጋርሳን ደእያ ታማነ ናምኡ ቦራ ምስለታ፥
2CH 4:16 ከረታ፥ አካፋታ፥ ቃጰታነ ሀራ ሚሸታ ኡባ። ክራም-አብ ካዋ ሶሎሞነስ ፆሳ ኬꬃ ኦሱዋስ መꬍዳ ሀ ሚሸታ ኡባ ጌሻ ናሰ ብራታፐ መꬍስ።
2CH 4:17 ካዎይ ሶሎሞነይ ሱኮታፐነ ፃሬዳፐ ግዶን፥ ዮርዳኖሰ ደንባን ደእያ ናሰ ብራታ ሼሽያ በሳን ሀ ኡባ ኦስስስ።
2CH 4:18 ናሰፐ መትዳ ሀ ሚሸ ኡባይ ዳሮ ግድዳ ግሾ፥ አይ መላ ዴፅያኮ ልከይ ኤረትቤና።
2CH 4:19 ሶሎሞነይ ፆሳ ኬꬃን ደእያ ሚሸታ ኡባ ዎርቃፈ ኦስስስ። ሄስካ ዎርቃፈ ኦሰትዳ ያርሾ በሳ፥ ጎዳ ስንꬃን ዎꬅያ ኡይꬃይ ኡትያ ፃርጴዛ፥
2CH 4:20 ዎጋ መላ ኡባፈ ጌሻ በሳ ስንꬃን ፖአና መላ ፆምፐ ዎꬅያ ዎርቃ ኮጫ፥ ዎርቃ ፆምፐታ፥
2CH 4:21 ዋላህ ባይና ዎርቃፈ ኦሰትዳ ጪሻ ምስለታ፥ ፆምፐታነ ቃጰታ፥
2CH 4:22 ፆምፐ ቶይስያባታ፥ ፃሮታ፥ እፃነ ጩይስያባታነ ታማ ኤክያ ቃጰታ። ሀ ሚሸት ኡባይ ጌሻ ዎርቃፈ ኦሰትዶሶና። ፆሳ ኬꬃስ ካረ ባጋ ፐንገታነ ኡባፈ ጌሻ በሳ ገልያ ፐንገታ ዎርቃን ትይስ።
2CH 5:1 ሶሎሞነይ ፆሳ ኬꬃ ኦሶ ኡባ ፖልዳፐ ጉየ እያ አዋይ ዳዊቲ ጎዳስ ዱማይድ ዎꬅዳ ብራ፥ ዎርቃነ ሀራ ሚሸታ ኡባ ኤህድ፥ ፆሳ ኬꬃ ቡቁራ ምንጅያ በሳን ዎꬅስ።
2CH 5:2 ሄሳፈ ጉየ፥ ካዎይ ሶሎሞነይ ጎዳ ቃላ ጫቆ ታቦትያ ዳዊታ ካታማ ግድዳ ፅዮነፐ ኤሀና መላ እስራኤለ ጭማታ፥ እስራኤለ ኮቻታነ ሶ አሳ ሀላቃታ የሩሳላመ ሺሽስ።
2CH 5:3 እስራኤለ አሳ ኡባይ ላፑንꬆ አጌናን፥ ሻቃራ ባለይ ቦንቸትያ ዎደ ካዋኮ ሺቅዶሶና።
2CH 5:4 እስራኤለ ጭማት ኡባይ ጋክን፥ ሌወት ታቦትያ ደንꬅዶሶና።
2CH 5:5 ሌወትነ ካህነት ታቦትያ፥ ዱንካንያነ እያ ግዶን ደእያ ጌሻ ሚሸታ ኡባ ቶክድ ኤህዶሶና።
2CH 5:6 ካዎይ ሶሎሞነይነ እያራ ደእያ እስራኤለ ማባራ ኡባይ ታቦትያ ስንꬃን ሺቅድ፥ ታይባናዉ ዳንዳኤቶና ዳሮ ዶርሰነ መሄ ያርሽዶሶና።
2CH 5:7 ካህነት ጫቆ ታቦተይ ፆሳ ኬꬃ ኡባፈ ጌሻ በሳ ኤህድ፥ ክሩበታ ምስለታ ቀፈታፐ ጋርሳራ ዎꬅዶሶና።
2CH 5:8 ምጨትድ ኡትዳ ክሩበታ ቀፈት ታቦትያነ ታቦትያ ቶክያ ካሶታ ካምዶሶና።
2CH 5:9 ካሶት ዳሮ አዱሰ ግድያ ግሾ፥ ኤንታ ፄራይ ኡባፈ ጌሻ በሳ ስንꬃን ደእያ ጌሻ በሳን ኤቅዳ አስ በአናዉ ዳንዳኤስ፤ ሽን ጌሻ በሳፈ ካረራ በንተና። ኤንቲ ሀች ጋካናዉ ሄ በሳን ደኦሶና።
2CH 5:10 እስራኤለ አሳይ ግብፀ ቢታፈ ከይዳ ዎደ ጎዳይ ኤንታራ ጫቅዳ ኮሬባ ዙማን ሙሰይ ዎꬅዳ ናምኡ ሎቸ ሹቻታፐ አትሽን፥ ታቦትያ ግዶን ሀራባይ ባዋ።
2CH 5:11 ሄ በሳን ደእያ ካህነት ኡባይ ባንታ ኦꬅያ በሳን በሳን ሻከቶና ደእሸ ባንታና ጎዳስ ዱማይዶሶና።
2CH 5:12 ማዝሙረ ዛማርያ ሌወት ኡባይ፥ አሳፍ፥ ሄማንነ ኤዶታፐ፥ ኤንታ ናይትነ ኤንታ ዳቦት ሊኖ ጌተትያ ማኦ ማእዶሶና። ሄ ማኡዋ ማእድ፥ ዳላ፥ ዲꬅነ ማስንቆ ኦይክድ፥ ያርሾ በሳፈ ዶሎሀ ባጋራ ኤቅዶሶና።
2CH 5:13 ፄታነ ላታሙ ካህነት ሞይዘ ፑናናዉ ኤንታራ ኤቅዶሶና። ኤንቲ ኡባይ ሞይዘ ፑንሸ፥ ዳላ ቃꬅሸ፥ ዲꬅ ዲፅሸነ ሀራ ሚሸታ ካእሸ፥ “ጎዳይ ኬሀ! እያ ሲቆይ መርናሳ” ያግድ ጎዳ ሳቦሶና።
2CH 5:14 ጎዳ ቦንቾይ ፆሳ ኬꬃ ኩምዳ ግሾ፥ ሻራ ጋሶን ካህነት ባንታ ኦሱዋ ኦꬃናዉ ዳንዳእቦኮና።
2CH 6:1 ሶሎሞነይ፥ “አቤት ጎዳዉ፥ ‘ታ ꬉማ ሻራን ዳና’ ያጋዳሳ።
2CH 6:2 ሽን ታኒ ኔኒ ያን መርናዉ ዳና ሎኦ ኬ ነዉ ኬፃስ” ያግስ።
2CH 6:3 እስራኤለ ሺቆይ ያን ኤቅዳሽን፥ ካዎይ ኤንታኮ ስሚድ፥ ኤንታ ሀይሳዳ ያግድ አንጅስ፤
2CH 6:4 “ጎዳይ እስራኤለ ፆሳይ ጋላተቶ! ታ አዋ ዳዊታስ ባ ዶናን ኦድዳ ኡፋይሳ ቃላ ባ ኩሸን ፖልስ። ሄ እ ኦድዳ ኡፋይሳይ፥
2CH 6:5 ‘ታኒ ታ አሳ እስራኤለ ግብፀፈ ከሳዳ ኤህዳ ዎደፐ ዶምን፥ ታ ሱንꬃይ እያን ፄገታና መላ ታዉ ኬ ኬፃናዉ እስራኤለ ኮቻታ ግዶን አይ ካታማካ ዶራብከ፤ ዎይኮ እ ታ አሳ እስራኤለ ካለꬃና መላ ኦናካ ዶራብከ።
2CH 6:6 ሽን ሀእ ታ ሱንꬃይ የሩሳላመን ፄገታና መላ ታኒ የሩሳላመ ዶራስ፤ ቃስ ታ አሳ እስራኤለ ካለꬃና መላ ዳዊታ ዶራስ።’
2CH 6:7 “ታ አዋይ ዳዊቲ ጎዳ እስራኤለ ፆሳ ሱንꬃስ ኬ ኬፃናዉ ባ ዎዛናን ቆፕስ።
2CH 6:8 ሽን ጎዳይ ታ አዋ ዳዊታኮ፥ ‘ኔኒ ታ ሱንꬃስ ኬ ኬፃናዉ ነ ዎዛናን ቆፕዳ ግሾ ሎኦ ኦꬃዳሳ።
2CH 6:9 ግዶሽን፥ ታዉ ኬ ኬፃናይ ነና ግዳካ፤ ታ ሱንꬃስ ኬ ኬፃናይ ነ ጉልባታፐ ከያና ነ ናኣ።’
2CH 6:10 “ጎዳይ ባ ግዳ ኡፋይሳ ቃላ ፖልስ። ጎዳይ ካሰ እምዳ ኡፋይሳዳ ታኒ ታ አዋ ዳዊታ በሳን ካዎታዳ እስራኤለ ካዎተꬃ አራታን ኡታስ። ቃስ ጎዳ እስራኤለ ፆሳ ሱንꬃስ ኬ ኬፃስ።
2CH 6:11 ጎዳይ እስራኤለራ ጫቅዳ ጫቆይ ፃፈትዳ ሎቸ ሹቻት ደእያ ታቦትያ እያ ግዶን ዎꬃስ” ያግስ።
2CH 6:12 ሶሎሞነይ አዱሳተꬃይ እቻሹ ዋꬋ፥ ጎምፓይ እቻሹ ዋꬋነ ꬎቃተꬃይ ሄꬑ ዋꬋ ግድዳ ማድራከ ናሰ ብራታፐ ኦꬅድ ዳባባ ግዶን ዎꬅስ። ሶሎሞነይ ጎዳ ያርሾ በሳ ስንꬃን፥ እስራኤለ ማባራይ ደእያ በሳን ኤቅድ፥ ባ ኩሽያ ምጭድ እስራኤለ ሺቁዋ ስንꬃን ጉልባትስ።
2CH 6:14 እ ሀይሳዳ ያግድ ዎስስ፦ “አቤት ጎዳዉ፥ እስራኤለ ፆሳዉ፥ ሳሎን ዎይኮ ሳአን ነ መላ ፆሲ ባዋ። ኔኒ ነ ኡፋይሳ ቃላ ናጋሳ፤ ባንታ ኩመꬃ ዎዛናፐ ነ ስንꬃን ሄመትዳ ነ አይለታ መርና ሲቁዋን ዶሳዳሳ።
2CH 6:15 ነ አይልያ፥ ታ አዋ ዳዊታስ ኔኒ ኦꬃና ጋዳ ኦድዳ ቃላ ናጋዳሳ። ኔኒ ካሰ ነ ዶናን ኦድዳይሳ ነ ኩሸን ሀች ፖላዳሳ።
2CH 6:16 አቤት ጎዳዉ፥ እስራኤለ ፆሳዉ ኔኒ ነ አይልያ፥ ታ አዋ ዳዊታስ፥ ‘ኔኒ ታ ስንꬃን ሄመትዳይሳዳ ነ ናይትካ ታ ህግያን ሄመታናዉ ባንታ ኦግያ ናግኮ፥ እስራኤለ አራታን ኡትያ አሰ ꬋያካ’ ያግዳ ቃላ ፖላ።
2CH 6:17 አቤት ጎዳዉ፥ እስራኤለ ፆሳዉ፥ ኔኒ ነ አይልያ ዳዊታስ ኦድዳ ነ ኡፋይሳ ቃላይ ፖለቶ።
2CH 6:18 “ሽን ፆሲ ቱማ፥ አሳራ ሳአን ደእዬ? ሄኮ፥ ሳሎይ፥ ኡባፈ ꬎቃ ሳሎይ ነና ኦይካናዉ ዳንዳኤና። ያትን፥ ሀ ታ ኬፅዳ ኬꬃይ ነዉ አይ መላ ጉፃንደሻ!
2CH 6:19 ግዶሽን፥ አቤት ጎዳዉ፥ ታ ፆሳዉ፥ ታ ዎሳ፥ ነ አይልያ ዎሳነ ፄሳ ስአ። ታኒ ነ አይለይ ነ ስንꬃን ዎስያ ዎሳነ ዋሱዋ ስአ።
2CH 6:20 ኔኒ፥ ‘ታ ሱንꬃይ ሄ በሳን ፄገታና’ ግዳ ሀ ፆሳ ኬꬃኮ፥ ነ አይፈይ ቃማ ጋላስ ፄሎ። ታኒ ነ አይለይ ሀ ኬꬃኮ ስማዳ ዎስያ ዎሳ ስአ።
2CH 6:21 ታኒ ነ አይለይነ ነ አሳይ እስራኤለይ ሀ ነ ኬꬃኮ ስሚድ ዎስያ ዎሳ ስአ። ነ ደእያ በሳን ሳሎን ስአዳ ኑስ አቶ ያጋ።
2CH 6:22 “እስ አስ ባ ሾሩዋ ቆህድ አካይ ግን፥ እያ ጫቀꬃናዉ ሀ ነ ኬꬃ ኤህን፥ እያ ግዶን ደእያ ያርሾ በሳ ስንꬃን እ ጫቅኮ፥
2CH 6:23 ኔኒ ሳሎን ስአዳ ኦꬃ። ነ አይለታ ግዶን ፕርዳ። ቆህዳ ኡራ ቦላ ፕርዳዳ፥ እ ኦꬅዳባ እያ ቦላ ዛራ፤ ፅሉዋ ፆንሳዳ እያዉ እያ ፅሎተꬃዳ ዛራ።
2CH 6:24 “ነ አሳይ እስራኤለይ ነ ቦላ ናጋራ ኦꬅድ፥ ሞርከን ፆነትድ፥ ኔኮ ስሚድ፥ ነ ሱንꬃ ፄግድ፥ ሀ ኬꬃን ነና ዎስኮ፥
2CH 6:25 ነ ሳሎን ስአ። ነ አሳ እስራኤለ ናጋራ አቶ ያጋ፤ ነ ካሰ ኤንታዉነ ኤንታ ማይዛታስ እምዳ ቢታ ኤንታ ዛራ።
2CH 6:26 “ነ አሳይ ነ ቦላ ናጋራ ኦꬅን፥ ሳሎይ ጎርደትኮ፥ እር ቡኮና እፅን፥ ኤንቲ ሀ በሳ ስሚድ፥ ዎስኮ ነ ኤንታ ኡንኤꬅዳ ግሾ፥ ነ ሱንꬃ ፄግድ፥ ባንታ ናጋራፐ ስምኮ፥
2CH 6:27 ነ ሳሎን ስአ። ነ አይለታ ናጋራ፥ ነ አሳ እስራኤለ ናጋራ አቶ ያጋ። ኤንቲ ሄመታናዉ በሲያ ሎኦ ኦግያ ኤንታ ታማርሳ፤ ኔኒ ነ አሳስ እምዳ ቢታን እራ ቡክሳ።
2CH 6:28 “ቢታ ቦላ ኮሽ ዎይኮ ቦሽ ዎይኮ ሌገይ ዎይኮ ቦለይ ዎይኮ ጎንዶይ ꬋይስን ዎይኮ ሞርከይ ኤንታ ካታማታ ተቅን ዎይኮ ꬋዮይ ዎይኮ ሀርገይ ይን፥
2CH 6:29 ነ አሳ እስራኤለፐ ኦንካ ዎይኮ ነ አሳ ኡባይ ነና ዎስኮ፥ አይ አስካ ባ ዎዛናን ኡንኤትያባነ አዛንያባ ኤርድ፥ ሀ ፆሳ ኬꬃኮ ስሚድ፥ ባ ኩሽያ ምጭኮ፥
2CH 6:30 ነ ደእያ በሳን ሳሎን ስአ። ኤንታ ናጋራ አቶ ያጋ፤ ኤንታዉ ኦꬃ። ኔኒ አሳ ዎዛና ኤረይሳዳ አሳ ኡባስ እያ ኦሱዋዳ ኦሱዋዳ እማ። አሳ ኡባ ዎዛና ኤረይ ነ ፃላላ።
2CH 6:31 ሄስካ ነ ኑ ማይዛታስ እምዳ ቢታን ባንታ ደኦ ላይꬃ ኡባን ነዉ ያያና መላነ ነ ኦግያን ሄመታና መላሳ።
2CH 6:32 “እስራኤለ ግዶና ሀራ ቢታ አስ ነ ግታ ሱንꬃ ግሾነ ኔኒ ነ አሳስ ኦꬅዳ ማላልስያ ኦሶታ ግሾ ሃሆ ቢታፈ ይድ፥ ሀ ፆሳ ኬꬃኮ ስሚድ ዎስኮ፥
2CH 6:33 ነ ደእያ በሳን ሳሎን ስአ። ሀራ ቢታ አሳይ ኦይችያባ ኡባ ኦꬃ። ሀ አላምያን ደእያ አሳ ኡባይ ነ ሱንꬃ ኤራናዳነ ነ አሰ ግድዳ እስራኤለዳ ነዉ ያያናዳ ታ ኬፅዳ ሀ ኬꬃይ ነ ጎይነትያ በሲ ግደይሳ ኤንቲ ኤራናዳ ሀራ ቢታ አሳይ ነና ዎስያባ ኡባ ኦꬃ።
2CH 6:34 “ኤንቲ ባንታ ሞርከታ ኦላና መላ ነ ኪትያ ዎደ ነ ዶርዳ ሀ ካታማኮነ ታ ነ ሱንꬃ ግሾ ኬፅዳ ሀ ኬꬃኮ ስሚድ ነና ዎስኮ፥
2CH 6:35 ኤንታ ዎሳነ ኤንታ ኦይሻ ሳሎን ስአ፤ ኤንታ ኦይሻ ዛራ።
2CH 6:36 “ናጋራ ኦꬆና አስ ባይና ግሾ ነ አሰ ግድዳ እስራኤለይ ናጋራ ኦꬅድ ነና ቆህኮ ኔኒ ሸነታዳ ሞርከታስ አꬃ እምን ሞርከት ኤንታ ድእድ ሃሆ ዎይኮ ማታ ቢታ ኤንታ ኤፍን፥
2CH 6:37 ኤንቲ ሄ ድኤትዳ ቢታን ደእሸ ባንታ ዎዛናን ናጋራፐ ስምኮ፥ ‘ኑኒ ናጋራ ኦꬅዳ፤ ኑኒ ቆህዳ፤ ኑኒ ኢታባ ሀንዳ’ ያግድ ነና ዎስኮ፥
2CH 6:38 ባንታና ድእድ ኤፍዳ ሞርከታ ቢታን ደእሸ ኤንቲ ባንታ ኩመꬃ ዎዛናንነ ኩመꬃ ቆፋን ኔኮ ስምኮ፥ ኔኒ ኤንታ ማይዛታስ እምዳ ቢታኮ፥ ኔኒ ዶርዳ ካታማኮነ ታኒ ነ ሱንꬃ ግሾ ኬፅዳ ኬꬃኮ ስሚድ ነና ዎስኮ፥
2CH 6:39 ኤንታ ዎሳነ ኦይሻ ነ ደእያ በሳን ሳሎን ስአ፤ ኤንታዉ ፕርዳ፤ ኤንታ ናጋራ አቶ” ያጋ።
2CH 6:40 “አቤት ታ ፆሳዉ፥ ሀ በሳን ዎስያ ዎሳ ነ አይፈይ ፄሎ፤ ነ ሀይꬃይ ስኦ።
2CH 6:41 “አቤት ጎዳዉ፥ ፆሳዉ፥ ደንዳ፤ ዎልቃማ ነ ታቦትያራ ነ ሸምፖ በሳ ገላ። አቤት ጎዳዉ፥ ፆሳዉ፥ ነ ካህነት አቶተꬅ ኤኮ፤ ነ ጌሻ አሳት ነ ኬሀተꬃን ኡፋይቶ።
2CH 6:42 አቤት ጎዳዉ፥ ፆሳዉ፥ ኔኒ ትይዳ ካዋ አጎፋ፤ ነ አይልያ ዳዊታስ ነ ጫቅዳ መርና ሲቁዋ ቆፓ” ያግስ።
2CH 7:1 ሶሎሞነይ ዎሳ ፖልዳ ዎደ ሳሎፐ ታም ዎꬍድ ፁሳ ያርሹዋነ ሀራ ያርሹዋ ምስ። ጎዳ ቦንቾይ ፆሳ ኬꬃ ኩምስ።
2CH 7:2 ጎዳ ቦንቾይ ፆሳ ኬꬃ ኩምዳ ግሾ ካህነት ፆሳ ኬꬃ ገላናዉ ዳንዳእቦኮና።
2CH 7:3 እስራኤለ አሳ ኡባይ ታም ሳሎፐ ዎꬍሽንነ ጎዳ ቦንቾይ ፆሳ ኬꬃ ኩምሽን በእዳ ዎደ ባንታ ሶምኡዋ ሳአ ጋꬅድ ጎይንዶሶና። “ጎዳይ ኬሀ! እያ ሲቆይ መርናሳ” ያግድ ጎዳ ጋላትዶሶና።
2CH 7:4 ካዎይነ አሳ ኡባይ ጎዳ ስንꬃን ያርሾ ያርሽዶሶና።
2CH 7:5 ካዎይ ሶሎሞነይ ላታማነ ናምኡ ሙኩሉ ኮርማታነ ፄታነ ላታሙ ሙኩሉ ዶርሳታ ያርሽስ። ሄሳዳ ኦꬅድ፥ ካዎይነ አሳ ኡባይ ፆሳ ኬꬃ ጎዳስ ዱማይዶሶና።
2CH 7:6 ካህነት ባንታዉ ጊግዳ በሳን ኤቅን፥ ሌወት ካዎይ ዳዊቲ ጎዳ ሳባናዉ ካሰ ኦꬅዳ ማዝሙረ የፅያ ሚሸታ ኦይክድ ኤንታ ስንꬃን ኤቅድ፥ “እያ ሲቆይ መርናሳ” ያግድ የፅሸ ጎዳ ጋላትዶሶና። ካህነት ሌወታ ስንꬃን ኤቅድ ሞይዘ ፑንን እስራኤለ አሳ ኡባይ ኤቅስ።
2CH 7:7 ሶሎሞነይ ፆሳ ኬꬃ ስንꬃን ደእያ ግዶ ዳባባ ዱማይስ። ሄ በሳን ፁሳ ያርሾነ እስፈተꬃ ያርሹዋፈ ሞꬉዋ ያርሽስ። እ ሄሳ ኦꬅዳይ፥ ጎዳ ስንꬃን ደእያ ናሰ ብራታፐ ኦሰትዳ ያርሾ በሳይ፥ ፁሳ ያርሹዋ፥ ካꬃ ያርሹዋነ እስፈተꬃ ያርሹዋፈ ሞꬉዋ ያርሻናዉ ጉፅዳ ግሾሳ።
2CH 7:8 ሄ ዎደ ሶሎሞነይነ እስራኤለ አሳ ኡባይ ላፑን ጋላስ ባኣለ ቦንችዶሶና። እስራኤለ አሳይ ሀማታፐ ብድ ግብፀ ሻፋ ጋካናዉ ደእያ ዳሮ አሳይ ሄ በሳን ሺቅዶሶና።
2CH 7:9 አሳይ ያርሾ በሳ አንጅስያ ባኣለ ላፑን ጋላስ ቃስ ሻቃራ ባኣለ ሀራ ላፑን ጋላስ ቦንችዶሶና። ሆስፑንꬃ ጋላስ ዉርሰꬃ ሺቆ ሺቅዶሶና።
2CH 7:10 ሶሎሞነይ ላፑንꬃ አጌናን፥ ላታማነ ሄꬓንꬆ ጋላሳን አሳ ሞይዝስ። አሳይ፥ ጎዳይ ዳዊታስ፥ ሶሎሞነስነ ባ አሳ እስራኤለስ ኦꬅዳ ኬሀተꬃን ኡፋይትሸ ባ ሶ ሶ ብዶሶና።
2CH 7:11 ሶሎሞነይ ፆሳ ኬꬃነ ካዎ ጋꬎ ኬፅድ ዉርስስ። ሶሎሞነይ ፆሳ ኬꬃንነ ባ ጋꬎን ኦꬃናዉ ባ ዎዛናን ቆፕዳባ ኡባ ፖልስ።
2CH 7:12 ጎዳይ ሶሎሞነስ ቃማ ቆንጭድ፥ “ታኒ ነ ዎሳ ስአስ፤ ታኒ ሀ ፆሳ ኬꬃ ያርሾ በሲ ግዳና መላ ዶራስ።
2CH 7:13 እር ቡኮና መላ ታ ሳሉዋ ጎርድያ ዎደ ዎይኮ ካꬅ ማና መላ ቦለ ኪትያ ዎደ ዎይኮ ታ አሳ ቦላ ጋዶ የድያ ዎደ
2CH 7:14 ታ ሱንꬃን ፄገትዳ ታ አሳይ ባንታ አሳተꬃ ካዉሽድ ዎስኮ፥ ታና ኮይኮ፥ ባንታ ኢታ ኦግያፐ ስምኮ፥ ታ ሳሎን ኤንታ ዎሳ ስአና፤ ኤንታ ናጋራ አቶ ጋና፤ ኤንታ ቢታ ፓꬃና።
2CH 7:15 ሀእ ሀ በሳን ዎሰትያ ዎሳ ታ አይፈይ ፄላና፤ ታ ሀይꬃይ ስአና።
2CH 7:16 ሀእ ታ ሱንꬃይ መርናዉ እያን ዳና መላ ሀ ኬꬃ ዶራስነ ጌሻስ። ታ አይፈይነ ታ ዎዛናይ ኡባ ዎደ ሀ ኬꬃን ዳና።
2CH 7:17 “ነ አዋይ ዳዊቲ ኦꬅዳይሳዳ ኔኒ ታ ስንꬃን ሄመትኮ፥ ታ ኪታ ኡባ ኦꬅኮ፥ ታ ዎጋነ ታ ህግያ ናግኮ፥
2CH 7:18 ታኒ ነ አዋ ዳዊታራ፥ ‘ነ ኮቻፈ እስራኤለ ቦላ ካዎ ግድያ አስ ꬋያካ’ ያጋዳ ጫቅዳይሳዳ ነ አራታ ምንꬃዳ ኤሳና።
2CH 7:19 “ሽን ህንተ ታና አግድ ታ ህንተዉ እምዳ ዎጋነ ህግያ አግኮ፥ ሀራ ፆሳታ ጎይንኮነ ኤንታዉ ኦꬅኮ፥
2CH 7:20 ታኒ ካሰ ህንተዉ እምዳ ቢታፈ ህንተና ꬎቆላና፤ ታ ሱንꬃስ ዱማይዳ ሀ ኬꬃካ አጋጋና። ታ ሀ ኬꬃ ካዎተꬃ ኡባ ግዶን ሚቻስነ ቀልቅሰꬃስ ኦꬃና።
2CH 7:21 ሀ ፆሳ ኬꬃይ ዳሮ ማላልስያባ ግድኮካ፥ እያ ማታራ አꬍያ ኡባይ ማላለትድ፥ ‘ጎዳይ ሀ ቢታነ ሀ ፆሳ ኬꬃ አይስ ሀይሳዳ ኦꬅዴ?’ ” ያጋና።
2CH 7:22 አሳይ ዛሪድ፥ “ሀይሳ ኡባ ኤንታ ቦላ ኤህዳይ፥ ኤንታና ግብፀፈ ከስዳ ኤንታ ማይዛታ ፆሳ አግድ ሀራ ፆሳታ ካልዳ ግሾነ ኤንታ ጎይንዳ ግሾሳ” ያጋና።
2CH 8:1 ሶሎሞነይ ፆሳ ኬꬃነ ባዉ ጋꬎ ኬፅዳ ላታማንꬆ ላይꬃ ዉርሰꬃን፥
2CH 8:2 ካዎይ ክራም እምዳ ካታማታ ሶሎሞነይ ዛር ኬፅድ እስራኤለ አሳ ሄ ካታማታን ዎꬅስ።
2CH 8:3 ሶሎሞነይ ሀማታነ ሱባ ጌተትያ ቢታ ብድ ኦይክስ።
2CH 8:4 ያትድ መላ ቢታን ደእያ ታድሞራ ካታማነ ሻሎ ምንጅያ ካታማታ ሀማታ ቢታን ኬፅስ።
2CH 8:5 ሄሳዳካ፥ ሶሎሞነይ ቆሞ ቤት-ሆሮናነ ጋርሳ ቤት-ሆሮና ጌተትያ ካታማታ ዛሪድ ኬፅስ። ሄ ካታማት ድርስ፥ ፐንገይነ ኮበይ ደእያ ድረትድ ኡትዳ ካታማታ።
2CH 8:6 ባላታ ካታማ፥ ቡቁራ ምንጅያ ካታማታ ኡባ፥ ባ ፓራታነ ፓራ ጋረታ ዎꬅያ ካታማታ ኡባነ እ ኬፃናዉ አሞትዳ ኡባ የሩሳላመን፥ ልባኖሰንነ ባ ሃርያ ቢታ ኡባን ኬፅስ።
2CH 8:7 እስራኤለ ግዶናሽን ሀራ ቢታ አሳታፐ አትዳ ህተታ፥ አሞረታ፥ ፓርዘታ፥ ህወታነ ያቡሰታ፥
2CH 8:8 እስራኤለ አሳይ ዉርስድ ꬋይሶና አግዳ አሳ ዎልቃ ኦሶ ኦꬃና መላ ሶሎሞነይ ዶርስ፤ ሀች ጋካናዉ ኤንቲ ኦꬆሶና።
2CH 8:9 ሽን ሶሎሞነይ እስራኤለ አሳፐ ኦናካ አይለ ኦꬅድ ኦስስቤና። ኤንቲ እያ ኦላንቾታ፥ ቶራ ሞጮናታ፥ ፓራ ጋረ ላገይሳታ ሀላቃታነ ፓራ አሳታ ግድድ ኦꬅዶሶና።
2CH 8:10 ኤንታ ግዶፈ ናምኡ ፄታነ እሻታሙ አሳት ካዋ ሶሎሞነ ኦሱዋ አዋተꬃን ኦስሶሶና።
2CH 8:11 ሶሎሞነይ፥ “ጎዳ ታቦተይ ገልዳ በሳይ ጌሽ ግድያ ግሾ፥ ታ ማችያ፥ ፋሮና ናእያ፥ እስራኤለ ካዋ ዳዊታ ጋꬎን ዳናዉ በሱኩ” ያግድ፥ ግብፀ ካዋ ናእዉ ዳዊታ ካታማፐ ደንꬅድ እዉ ኬፀትዳ ኬꬃን ዎꬅስ።
2CH 8:12 ሶሎሞነይ ሄ ዎደ ፆሳ ኬꬃ ስንꬃን ጎዳስ ኬፅዳ ያርሾ በሳን ፁሳ ያርሾ ጎዳስ ያርሽስ።
2CH 8:13 ሙሰ ህገይ ኪተይሳዳ ጋላስ ጋላስ ፁሳ ያርሾ ያርሼስ። ሶሎሞነይ ሳምባታ ጋላሳን፥ አጌና ፄሮንነ ላይꬃን ሄꬑ ቶሆ ቦንቸትያ ባለታን፥ ሄስካ ኡይꬃ ባለን፥ ሳምንታ ባለንነ ሻቃራ ባለን ጎዳስ ያርሾ ያርሼስ።
2CH 8:14 እያ አዋይ ዳዊቲ ካሰ ኪትዳይሳዳ ካህነታ ኤንታ ኦሶን ኦሶን ሻክድ ሹምስ፤ ጋላስ ጋላስ ማዝሙረን ሳባና መላነ ካህነታ ማዳና መላ ሌወታ ሻክድ ሹምስ። ፆሳ አስ ግድዳ ዳዊቲ ኪትዳይሳዳ ፐንገ ናግያ አሳታ እስ እስ ፐንግያ ናጋና መላ ሹምስ።
2CH 8:15 ሄሳዳካ፥ ካሰ ዳዊቲ ቡቁራ ምንጅያ በሳነ ሀራ አላለታባ ካህነታነ ሌወታ ኪትዳይሳዳ እሶይካ አቶና ኡባይ ፖለትስ።
2CH 8:16 ሶሎሞነይ ቆፕዳ ኦሶ ኡባይ ኦሰትድ ዉርስ፤ ፆሳ ኬꬃይ ባሰትዳ ዎድያፐ ዶምድ ፖለታና ጋካናዉ ኦሶ ኡባይ ሎኦ ኦሰትስ።
2CH 8:17 ሄ ዎደ ካዎይ ሶሎሞነይ ኤዶመ ቢታን ዞኦ አባ ዶናን ደእያ ኤፅዮን-ጋብራነ ኤሎታ ብስ።
2CH 8:18 ካዎይ ክራም ማርካበታነ ማርካብያ ላጎን ሎህዳ አሳታ ሶሎሞነስ የድስ። ኤንቲ ሶሎሞነ አሳታራ እስፈ ኦፍራ ቢታ ብድ ያፐ 15,000 ክሎ ግራመ ዎርቃ ካዋ ሶሎሞነስ ኤህዶሶና።
2CH 9:1 ሳባ ካውያ ሶሎሞነ ዎርያ ስአዳ፥ ሰመንከን እያ ፓጫናዉ ሳዎ፥ ዳሮ ዎርቃነ አልኦ ሹቹ ጫነትዳ ዳሮ ግማለራ፥ ዳሮ አዣባን የሩሳላመ ባሱ። ባ ዎዛናን ደእያባ ኡባ ሶሎሞነስ ኦዳሱ።
2CH 9:2 ሶሎሞነይ እያ ኦይችዳባ ኡባስ ዛሮ እሚስ፤ እ እዉ ብርሾና እያፐ ጌምድ አትዳባይ አይብካ ባዋ።
2CH 9:3 ሳባ ካውያ ሶሎሞነ ጭንጫተꬃ፥ እ ኬፅዳ ጋꬉዋ፥
2CH 9:4 እያ ጋይታን ሺቅያ ካꬃ፥ እያ ሞርናት ኡትያ ኡተꬃ፥ እያ ኦሳንቾት ኦꬅያ ኦሱዋነ ማእያ ማኡዋ፥ እያ ኡሻ ትግያ አሳት ማእያ ማኡዋነ ጎዳ ኬꬃን እ ያርሽያ ፁሳ ያርሹዋ በእዳ ዎደ እ ዎዛናይ ዳሮ ማላለትስ።
2CH 9:5 እያ ካዋኮ፥ “ነባነ ነ ጭንጫተꬃ ታኒ ታ ቢታን ደአሸ ስእዳይስ ቱማ።
2CH 9:6 ሽን ታ ያዳ ታ አይፈን በአና ጋካናዉ ኤንቲ ታዉ ኦድዳባ አማናብከ። ነ ጭንጫተꬃ ግታተꬃስ ባጋካ ታዉ ኦድቦኮና፤ ታ ስእዳይሳፈ ነ ዳሮ ግታታሳ።
2CH 9:7 ኡባ ዎደ ነ ስንꬃን ኤቅድ ነ ጭንጫተꬃ ስእያ ነ አሳትነ ነ ሞርናት አይ መላ አንጀትዶና!
2CH 9:8 ነናን ኡፋይትድ፥ ነና ባ ካዎተꬃ አራታን ኡትስዳ ጎዳይ ነ ፆሳይ ጋላተቶ! ነ ፆሳይ እስራኤለ ሲቅዳ ግሾነ መርናዉ ምንꬅ ኤሳናዉ ኮይዳ ግሾ ኔኒ ሱረ ፕርዳነ ፅሎተꬃ ኦꬃና መላ እ ነና ኤንታ ቦላ ካዎ ኦꬅስ” ያጋሱ።
2CH 9:9 ካውያ ኦይዱ ሙኩሉ ክሎ ግራመ ዎርቃ፥ ዳሮ ሳዎነ አልኦ ሹቹ ካዋ ሶሎሞነስ እማሱ፤ ሳባ ካውያ ካዋ ሶሎሞነስ እምዳ ሽቱዋ መላ ሽቶይ ባዋ።
2CH 9:10 ቃስ ኦፍራፐ ዎርቃ ኤህዳ ክራማነ ሶሎሞነ አሳት ያፐ ሰንዳለ ምꬅነ አልኦ ሹቹ ኤህዶሶና።
2CH 9:11 ካዎይ ሳንዳለ ምꬃ ፆሳ ኬꬃስነ ካዎ ጋꬎስ ደ መꬋናዉ፥ ሄሳዳካ ዛማረታስ ማስንቆነ ዲꬅ ኦꬃናዉ ጎኤትስ። ሄሳ መላ የꬃ ሚሸት ሃይሳፈ ካሴ ይሁዳ ቢታን በንትቤና።
2CH 9:12 ካዎይ ሶሎሞነይ ሳባ ካውያ ኮይዳባነ ኦይችዳባ ኡባ እዉ እሚስ። እያ፥ እያዉ ኤህዳይሳፈ አꬅድ እዉ እሚስ። ሄሳፈ ጉየ፥ ሳባ ካውያ ባ አዣባራ ደንዳዳ ባ ቢታ ስማሱ።
2CH 9:13 ሶሎሞነይ ላይꬃን ላይꬃን ኤክያ ዎርቃይ ላታማነ ሄꬑ ሙኩሉ ክሎ ግራመ።
2CH 9:14 ሄስካ ዛልአንቾታፐ ኤክያ ቃራፃ፥ አራበ ቢታ ካዎታፐነ እስራኤለ ቢታን ሃረይሳታፐ ኤክያ ዎርቃነ ብራ ጉጆናሽና።
2CH 9:15 ካዎይ ሶሎሞነይ እስ እስ ጎንዳለይ ላፑን ክሎ ግራመ ግድያ ናምኡ ፄቱ ዎጋ ጎንዳለታ ዎርቃፈ ኦስስስ።
2CH 9:16 እሶይ እሶይ ሄꬑ ክሎ ግራመ ግድያ ሄꬑ ፄቱ ጉꬃ ጎንዳለታ ዎርቃፈ ኦስስስ። ካዎይ ሄ ጎንዳለታ “ልባኖሰ ዎራ” ጌተትያ ካዎ ጋꬎን ዎꬅስ።
2CH 9:17 ካዎይ ዳንጋርሳ ዛለፐ እስ ግታ አራታ ኦስስድ ዋላህ ባይና ዎርቃን ላንፅስ።
2CH 9:18 አራታይ ደእያ በሳ ከያናዉ የꬍያ ኡሱፑን ደꬃት ደኦሶና። አራታራ ኦይከትድ ኡትዳ ዎርቃፈ ኦሰትዳ ቶሆ የꬍያ በሲ ደኤስ። አራታስ ናምኡ ባጋራ ኩሸ ሸምፕስያ ዘምፖት ደኦሶና፤ ሄ ዘምፖታ ማታራ ያ ባጋንነ ሀ ባጋን ኤቅዳ እስ እስ ጋሞ ምስለይ ደኤስ።
2CH 9:19 ሄ አራታይ ደእያ በሳ ከይያ ኡሱፑን ደꬃታ ቦላ ያ ባጋራነ ሀ ባጋራ ኤቅዳ ታማነ ናምኡ ጋሞ ምስለት ደኦሶና። ሄሳ መላ አራት ሀራ ካዎተꬃን አዉንካ ኦሰትቤና።
2CH 9:20 ካዎይ ሶሎሞነይ ኡሹ ኡያ ሚሸ ኡባይ ዎርቃፈ ኦሰትስ፤ “ልባኖሰ ዎራ” ጌተትያ ካዎ ጋꬎን ደእያ ሚሸ ኡባይ ዋላህ ባይና ዎርቃፈ ኦሰትስ። ሶሎሞነ ዎደ ብር ዳርዳ ግሾ ታይቦን ገለና።
2CH 9:21 ካዋስ ክራማ አሳት ላግያ ዛልኤ ማርካበታ ደኦሶና። ሄ ማርካበት ዎርቃነ ብራ፥ ዳንጋርሳ ዛለ፥ ቃረታነ ገለሾታ ጫንድ ሄꬑ ላይꬃፈ እስ ቶሆ ኤሆሶና።
2CH 9:22 ካዎይ ሶሎሞነይ ዱረተꬃንነ ጭንጫተꬃን ሳአን ደእያ ካዎታ ኡባፈ አꬌስ።
2CH 9:23 ሳአን ደእያ ካዎት ኡባይ ፆሳይ እያ ዎዛናን ዎꬅዳ ጭንጫተꬃ ስአናዉ ኮዮሶና።
2CH 9:24 ላይꬃን ላይꬃን እያኮ ያ ኡባይ እያዉ ዎርቃነ ብራ፥ ማኦታ፥ ኦላ ሚሸ፥ ሽቶ፥ ፓራነ ባቁሎታ እሞታ ኤሆሶና።
2CH 9:25 ሶሎሞነ ፓራታስነ ጋረታስ ኦይዱ ሙኩሉ ዛዳሎት ደኤስ፤ ታማነ ናምኡ ሙኩሉ ፓራ አሳት ደኦሶና። ሶሎሞነይ ሄሳታ ዱማ ዱማ ካታማታንነ የሩሳላመን ዎꬅስ።
2CH 9:26 ሶሎሞነይ ኤፍራፂሳ ሻፋፐ ዶምድ፥ ፍልስፄመ ቢታነ ግብፀ ዛዋ ጋካናዉ ደእያ ካዎታ ኡባ ሃርስ።
2CH 9:27 ካዎይ የሩሳላመን ብር ሹቻዳ ኬለታናዳ ዝጋ ምꬅ ይሁዳ ዙማታ ፃጶን ድጭያ ቦባዳ ዳራና መላ ኦꬅስ።
2CH 9:28 ሶሎሞነይ ፓራታ ግብፀፈነ ሀራ ቢታ ኡባፈ ኤህሴስ።
2CH 9:29 ኮይሮፐ ዉርሰꬅ ጋካናዉ ሶሎሞነ ታርከይ ናብያ ናታና ታርከ ማፃፋን፥ ሴሎ አድያ ናብያ አክያ ማፃፋንነ ናባፃ ናኣ እዮርባማ ዎደ ጋካናዉ ደእያ ናብያ እዶ ቆንጨꬃ ማፃፋን ፃፈትስ ግደኔ?
2CH 9:30 ሶሎሞነይ እስራኤለ ቦላ የሩሳላመን ኦይታሙ ላይꬅ ካዎትስ።
2CH 9:31 ሄሳፈ ጉየ፥ ሶሎሞነይ ሀይቅድ ባ ማይዛታን ጋሄትስ፤ ባ አዋ ዳዊታ ካታማን ሞገትስ። እያ ናአይ ሮብኣም እያ በሳን ካዎትስ።
2CH 10:1 እስራኤለ አሳ ኡባይ ኦሮብኣማ ካዎያናዉ ሴከማ ብዳ ግሾ እካ ያ ብስ።
2CH 10:2 ናባፃ ናአይ እዮርባም ካዋ ሶሎሞነፐ ባቃትድ ግብፀን ደኤይስ፥ ሄሳ ስእዳ ዎደ ግብፀፈ ይስ።
2CH 10:3 እስራኤለ አሳ ኡባይ እዮርባማስ ኪትድ ፄግስን፥ እነ ሺቅዳ እስራኤለ አሳ ኡባይ ሮብኣማኮ ብድ፥
2CH 10:4 “ነ አዋይ ኑና ዴፆ ቃምባራ ቶስስ፤ ሽን ሀእ እ ኑና ኦስስያ ዎልቃማ ኦሱዋነ ዴፆ ቃምባራ ኑስ ካዉሽሳ፤ ያትኮ፥ ኑ ነዉ ሃረታና” ያግዶሶና።
2CH 10:5 ሮብኣም፥ “ሄꬓንꬆ ጋላስ ስሚድ፥ ታኮ ዪተ” ያግስ። አሳይ ስሚድ ብዶሶና።
2CH 10:6 ሄሳፈ ጉየ፥ ካዎይ ሮብኣም እያ አዋይ ሶሎሞነይ ፓፃ ደእያ ዎደ ሶሎሞነ ዞርዳ ጭማታ፥ “ሀ አሳስ ዎይጋዳ ዛራ ጌቲ?” ያግድ ኤንታና ዞረ ኦይችስ።
2CH 10:7 ጭማት ሮብኣማኮ፥ “ነ ሀ አሳስ ኬህኮ፥ ኤንታ ኡፋይስኮነ ኤንታዉ ሎኦ ቃላ ዛርኮ ኤንቲ ኡባ ዎደ ነዉ ሃረታና” ያግዶሶና።
2CH 10:8 ሽን ሮብኣም ጭማት ዞርዳ ዞርያ አግድ እያራ ድጭድ፥ እያራ ኦꬅያ ያላጋታ ዞረ ኦይችስ።
2CH 10:9 እ ኤንታኮ፥ “ህንተ ታና ዞርያባይ አይቤ? ‘ነ አዋይ ኑና ቶስዳ ዴፆ ቃምባራ ኑስ ካዉሽሳ’ ግያ ሀ አሳስ ዎይጋዳ ዛሮ?” ያግድ ኦይችስ።
2CH 10:10 እያ ላገት ዛሪድ፥ “ ‘ነ አዋይ ኑና ዴፆ ቃምባራ ቶስስ፤ ሽን ነ ኑስ ካዉሻርክ’ ግያ አሳስ፥ ‘ታ ግልአ ብራይ ታ አዋ ፄሳፈ ኦርደ።
2CH 10:11 ታ አዋይ ህንተና ዴፆ ቃምባራ ቶስስ፤ ሽን ታ እያፐ አꬃዳ ዴፀꬃና። ታ አዋይ ህንተና ልሶን ዋꬍስ፤ ሽን ታ ህንተና ኮርነዳ ዱክያ ልሶን ዋꬋና’ ያጋዳ ዛራ” ያግዶሶና።
2CH 10:12 ካዎይ፥ “ሄꬑ ጋላሳፐ ጉየ ስሚድ ታኮ ዪተ” ግዳይሳዳ እዮርባምነ አሳይ ስሚድ ይዶሶና።
2CH 10:13 ካዎይ ሮብኣም ጭማት ዞርዳ ዞርያ አግድ ኤንታዉ ኢታ ዛሮ ዛርስ።
2CH 10:14 እያ ላገት ዞርዳ ዞርያ ካልድ፥ “ታ አዋይ ህንተና ቃምባራ ቶስስ፤ ሽን ታኒ እያፐ አꬃዳ ዴፀꬃና። ታ አዋይ ህንተና ልሶን ዋꬍስ፤ ሽን ታኒ ህንተና ኮርነዳ ዱክያ ልሶን ዋꬋና” ያግድ ዛርስ።
2CH 10:15 ጎዳይ ሴሎ አድያ ናብያ አክያ ባጋራ ናባፃ ናኣ እዮርባማስ ኦድዳ ቃላይ ፖለታና መላ ፆሳፈ ሀንዳ ግሾ ካዎይ አሳይ ገይሳ ስኦና እፅስ።
2CH 10:16 እስራኤለ አሳ ኡባይ ካዎይ ኤንቲ ገይሳ ስኦና እፅዳይሳ በእድ ካዋኮ፥ “ዳዊታፐ ኑና ጋክያባይ አይቤ? እሰየ ናኣፐ ኑኒ ላታናባይ ባዋ! እስራኤለ አሳዉ፥ ህንተ ሶ ሶ ቢተ! ዳዊታ፥ ኔኒ ነ ኬꬃ ናጋ!” ያግዶሶና። ሄሳ ግሾ፥ እስራኤለ አሳይ ባንታ ሶ ሶ ብዶሶና።
2CH 10:17 ሽን ሮብኣም ይሁዳ ቢታን ደእያ እስራኤለ አሳ ቦላ ካዎትስ።
2CH 10:18 ካዎይ ሮብኣም ባ ኦሳንቾታ ሀላቃ አዶራማ እስራኤለ አሳኮ ኪትስ፤ ኤንቲ እያ ሹቻን ጫድድ ዎꬍዶሶና። ሄ ዎደ ካዎይ ሮብኣም ባ ፓራ ጋረን ኡትድ የሩሳላመ ባቃትስ።
2CH 10:19 ሄ ዎደፐ ዶምድ ሀች ጋካናዉ ታሙ እስራኤለ ዛረት ዳዊታ ኮቻፈ ካዎትዳ ካዎታ ቦላ ማካልዶሶና።
2CH 11:1 ሮብኣም የሩሳላመ ካታማ ጋክዳ ዎደ እስራኤለ ቢታ አሳራ ኦለትድ ካዎተꬃ ባዉ ዛራና መላ ይሁዳፐነ ብንያመ ኮቻፈ ዶረትዳ 180,000 ኦላንቾታ ሺሽስ።
2CH 11:2 ሽን ጎዳ ቃላይ ፆሳ አስ ግድዳ ሻማያኮ ይስ።
2CH 11:3 “ሶሎሞነ ናኣ፥ ይሁዳ ካዋ ሮብኣማ፥ ይሁዳንነ ብንያመን ደእያ እስራኤለ አሳ ኡባ ሀይሳዳ ያጋ፤
2CH 11:4 ‘ህንተ እሻ ግድዳ እስራኤለታራ ኦለታናዉ ቦፕተ። ሄሳ ታኒ ኦꬅዳ ግሾ ህንተ ኡባይ ህንተ ሶ ሶ ስምተ’ ያጌስ” ያጋ። ኤንቲ ጎዳ ቃላ ስእድ እዮርባማ ኦላናዉ በይሳ አግድ ስምዶሶና።
2CH 11:5 ሮብኣም የሩሳላመን ኡትድ ሀይሳፈ ካልድ ፃፈትዳ ይሁዳነ ብንያመ ካታማታን ሚፃታ ኬፅስ።
2CH 11:6 ሄ ካታማት ቤተለመ፥ ኤፃማ፥ ተቁሄ፥
2CH 11:7 ቤት-ፁራ፥ ሶኮ፥ አዱላማ፥
2CH 11:8 ጌተ፥ ማሬሳ፥ ዚፋ፥
2CH 11:9 አዶራይማ፥ ላክሶ፥ አዜቃ፥
2CH 11:10 ፆርአ፥ ኤሎናነ ከብሮና።
2CH 11:11 ሮብኣም ካታማታ ምንꬅድ ኤንታዉ ሀላቃታ ሹምስ፤ ካꬅ፥ ዛይተነ ዎይነ ኡሻ ያን ዎꬅስ።
2CH 11:12 ሄ ኬፀትዳ ካታማታ ኡባን ጎንዳለነ ቶራ ዎꬅስ፤ ያትድ ኤንታ ዳሮ ምንꬅስ። ሄሳዳ ኦꬅድ ይሁዳነ ብንያመ ሃርስ።
2CH 11:13 እስራኤለ ኡባን ደእያ ካህነትነ ሌወት ኡባይ ባንታ ደእያ በሳፈ ሮብኣማኮ ይዶሶና።
2CH 11:14 ሌወት ባንታ ሄንꬃ ቢታነ ባንታ ሻሉዋ አግድ ይሁዳነ የሩሳላመ ይዶሶና። ኤንቲ ካህነ ግድድ ጎዳስ ኦꬆና መላ እዮርባምነ እያ ናይት ድግዶሶና።
2CH 11:15 እዮርባም ꬎቃ ጎይኖ በሳንነ እ ኤስዳ ዴሸነ ማራ ምስለታስ ኦꬅያ ሀራ ካህነታ ሹምስ።
2CH 11:16 እስራኤለ ፆሳ ባንታ ዎዛናፐ ጎይናናዉ ኮይዳይሳት ጎዳስ ባንታ አዋታ ፆሳስ ያርሾ ያርሻናዉ ኩመꬃ እስራኤለፐ ሌወታ ካልድ የሩሳላመ ይዶሶና።
2CH 11:17 ኤንታ ዩሳይ ይሁዳ ካዎተꬃ ምንꬅስ፤ ኤንቲ ሄꬑ ላይꬅ ኩመꬅ ሶሎሞነ ናኣ ሮብኣማ ማድዶሶና። ኤንቲ ካዋ ዳዊታ ኦግያነ ካዋ ሶሎሞነ ኦግያ ካልድ፥ ሄꬑ ላይꬅ ሳሮ ደእዶሶና።
2CH 11:18 ሮብኣም ማህላቶ ጌተትያ ማቾ ኤክስ። ማህላት አዋይ ዳዊታ ናኣ ያርሞታ፤ እ አይያ እሰየ ናኣ ኤልያባ ናእዉ አብካሎ።
2CH 11:19 ማህላታ ኦሮብኣመስ የኡሳ፥ ሳማረነ ዛሃማ ጌተትያ አደ ናይታ የላሱ።
2CH 11:20 ሄሳፈ ጉየ፥ አበሰሎመ ናእዉ ማእኮ ኤክስ፤ ማእካ አብያ፥ አታያ፥ ዚዛነ ሳሎምታ ጌተትያ አደ ናይታ የላሱ።
2CH 11:21 ሮብኣም ባ ማቸታፐ ባ ላገꬆታፐ አꬅድ አበሰሎመ ናእዉ ማእኮ ዶስስ። እያዉ ታማነ ሆስፑን ማቸትነ ኡሱፑን ታሙ ላገꬆት ደኦሶና። እ ላታማነ ሆስፑን አደ ናይታነ ኡሱፑን ታሙ ማጫ ናይታ የልስ።
2CH 11:22 ሮብኣም ማእክ ናኣ አብያ ባ በሳን ካዎያናዉ ቆፕዳ ግሾ እያ እሻታ ቦላ እያ ሀላቃ ኦꬅድ ሹምስ።
2CH 11:23 ሮብኣም ጭንጭድ ባ አደ ናይታ ይሁዳን፥ ብንያመ ቢታንነ ግምበትዳ ካታማታን ሻክ ሻክ ሹምስ፤ ኤንታዉ ዳሮ ካꬅነ ዳሮ ማቾ ደምስ።
2CH 12:1 ሮብኣማ ካዎተꬃይ ምንድ ኤቅዳ ዎደ እነ እስራኤለ አሳ ኡባይ ጎዳ ህግያ አጋግዶሶና።
2CH 12:2 ኤንቲ ጎዳስ አማነቶና እፅዳ ግሾ ሮብኣም ካዎትዳ እቻሻንꬆ ላይꬃን ግብፀ ካዎይ ሽሻቅ የሩሳላመ ቦላ ደንድስ።
2CH 12:3 እያዉ እስ ሙኩሉነ ናምኡ ፄቱ ፓራ ጋረት፥ ኡሱፑን ታሙ ሙኩሉ ፓራ አሳትነ ታይቦይ ባይና ሊበ፥ ሱካነ ቶጰ ኦላንቾት ደኦሶና።
2CH 12:4 ካዎይ ሽሻቅ ግምበትዳ ይሁዳ ካታማታ ኦይክድ የሩሳላመ ጋካናዉ ይስ።
2CH 12:5 ሄሳፈ ጉየ፥ ናበይ ሻማየይ ሮብኣማነ ሽሻቃ ያይድ የሩሳላመን ሺቅድ ደእያ ይሁዳ ሀላቃታኮ ይድ፥ “ጎዳይ፥ ‘ህንተ ታና አግዳ ግሾ፥ ታ ህንተና ሽሻቃ ኩሸን የጋስ’ ” ያግስ።
2CH 12:6 እስራኤለ ሀላቃትነ ካዎይ ሮብኣም፥ ባንታና ካዉሽድ፥ “ጎዳይ ፅሎ” ያግዶሶና።
2CH 12:7 ኤንቲ ባንታና ካዉሽዳይሳ ጎዳይ በእዳ ዎደ ሻማያኮ ሀይሳዳ ያግስ፤ “ኤንቲ ባንታና ካዉሽዳ ግሾ ታ ኤንታ ꬋይስከ፤ ታ ኤንታ አሻና። ታ ሀንቆይ ሽሻቃ ባጋራ የሩሳላመ ቦላ ጉከና።
2CH 12:8 ግዶሽን፥ ታዉ ሃረተይሳንነ ሀራ ካዎታስ ሃረተይሳን ደእያ ዱማተꬃ ኤንቲ ኤራና መላ ሽሻቃስ ሃረታና” ያግስ።
2CH 12:9 ግብፀ ካዎይ ሽሻቅ የሩሳላመ ኦልድ፥ ፆሳ ኬꬃንነ ካዎ ጋꬎን ደእያ ሻሎ ኡባ ኤክስ። ሶሎሞነይ ዎርቃፈ ኦስስዳ ጎንዳለታ ቦንቅስ።
2CH 12:10 እ ኤፍዳ ዎርቃ ጎንዳለታ ግሾ ካዎይ ሮብኣም ናሰ ብራታፐ ሀራ ጎንዳለታ ኦስስድ ካዎ ጋꬎ ፐንገ ናገይሳታ ሀላቃታ ኩሸን ዎꬅስ።
2CH 12:11 ካዎይ ፆሳ ኬꬅ ገልያ ዎደ ኡባን ፐንግያ ናገይሳት ሄ ጎንዳለታ ኦይክድ እያ ካሎሶና። ካዎይ ስምኮ ኤንቲ ዛሪድ ናገይሳታ ኬꬃን ዎꬆሶና።
2CH 12:12 ሮብኣም ባና ካዉሽዳ ግሾ እ ꬋዮና መላ ጎዳ ሀንቆይ እያፐ ስምስ። ይሁዳ ቢታ ኡባን ቃስ ሳእ እንጀትስ።
2CH 12:13 ካዎይ ሮብኣም ባና ምንꬅድ የሩሳላመን ካዎትስ፤ ሮብኣም ካዎትዳ ዎደ እያዉ ላይꬅ ኦይታማነ እስኖ። ጎዳይ ባ ሱንꬃይ ያን ፄገታና መላ እስራኤለ ቢታ ኡባን ዶርዳ፥ የሩሳላመን ታማነ ላፑን ላይꬅ ካዎትስ። ሮብኣማ አይያ አሞነ ማጫስ ናእሞ።
2CH 12:14 ሮብኣም ጎዳ ዎዛናፐ ጎይናናዉ ኮይቦና ግሾ ኢታባ ኦꬅስ።
2CH 12:15 ሮብኣም ባ ካዎተꬃ ዎድያን ኦꬅዳባይ ኮይሮፐ ዉርሰꬅ ጋካናዉነ እያ የለታ ማራይ፥ ናብያ ሻማያ ታርከ ማፃፋንነ ቆንጨꬅ በእያ እዶ ታርከ ማፃፋን ፃፈትስ ግደኔ? ሮብኣም ነ እዮርባም ኡባ ዎደ ኦለትሸ ደእዶሶና።
2CH 12:16 ሮብኣም ሀይቅድ ባ ማይዛታ ጋክስ፤ እ ዳዊታ ካታማን ሞገትስ። እያ በሳን እያ ናአይ አብይ ካዎትስ።
2CH 13:1 ካዎይ እዮርባም ካዎትዳ ታማነ ሆስፑንꬆ ላይꬃን አብይ ይሁዳን ካዎትስ።
2CH 13:2 አብይ የሩሳላመን ሄꬑ ላይꬅ ካዎትስ። እያ አየ ሱንꬃይ ምካዮ፤ እያ ግብአ አድያ ኡርኤላ ናአ። አብይነ እዮርባም ኦለትሸ ደእዶሶና።
2CH 13:3 አብይ ዶረትዳ ኦይዱ ፄቱ ሙኩሉ ምኖ ኦላንቾታ ኤክድ ኦላስ ከይስ። እዮርባም ዶረትዳ ሆስፑን ፄቱ ሙኩሉ ምኖ ኦላንቾታ ኤክድ አብያራ ኦለታናዉ ከይስ።
2CH 13:4 ሄሳፈ ጉየ፥ አብይ ደረይ ዳርያ ኤፍሬማ ቢታን ደእያ ፃማራይማ ደርያ ሁጰን ኤቅድ፥ ሀይሳዳ ያግስ፤ “ነኖ፥ እዮርባማ፥ ህንተኖ፥ እስራኤለ አሳዉ፥ ኡባይ ታ ግያባ ስእተ!
2CH 13:5 ጎዳይ እስራኤለ ፆሳይ ዳዊታነ እያ ኮቻይ እስራኤለ ቦላ መርናዉ ካዎታና መላ ዳዊታራ ማፅነን ጫቅዳይሳ ኤረከትዬ?
2CH 13:6 ግዶሽን፥ ዳዊታ ናኣ ሶሎሞነ አይለይ፥ ናባፃ ናአይ እዮርባም ደንድድ ባ ጎዳ ቦላ ማካልስ።
2CH 13:7 ሮብኣም ዮጋ፥ ኤር ባይናይሳነ ኤንታራ ኤቀታናዉ ዳንዳኦና ዎደ ፓꬆና ላፋ አሳት እዮርባማኮ ሺቅድ ሶሎሞነ ናኣ ሮብኣማ ቦላ ደንድዶሶና።
2CH 13:8 “ጎዳይ ዳዊታ ኮቻስ እምዳ ካዎተꬃራ ህንተ ኤቀታናዉ ቆፔታ። ህንተ ሄሳ ቆፕዳይ ህንተ ዳሮ ግድያ ግሾነ ፆሳታ ግዳና መላ እዮርባም ዎርቃፈ መꬍዳ ማራት ህንተራ ደእያ ግሾሳ።
2CH 13:9 ጎዳስ ኦꬅያ አሮና ኮቸ ግድዳ ኦꬅያ ካህነታነ ሌወታ ህንተ የደꬅደታ። ሀራ ቢታ አሳይ ኦይሳዳ ህንተዉ ሀራ ካህነታ ሹምደታ። ባና ዱማያናዉ እስ ዎፋኖነ ላፑን ማራዘ ኤክድ ያ ኦናካ ዎርዶ ፆሳታስ ካህነ ኦꬅድ ሹማታ።
2CH 13:10 “ግዶሽን፥ ኑስ ጎዳይ ኑ ፆሳ፤ ኑኒ እያ አግቦኮ። ካህነ ግድድ ኦꬅያ አሮና ኮቻት ኑስ ደኦሶና፤ ሌወት ኤንታ ማዶሶና።
2CH 13:11 ኤንቲ ኡባ ጋላስ ዎንታነ ኦማርስ ጎዳስ ፁሳ ያርሾ ያርሾሶናነ ሳውያ እፃነ ጩይሶሶና። ጎዳ ስንꬃን ዎꬅያ ኡይꬃ ጌሻ ፃርጴዛ ቦላ ዎꬆሶና። ኦማርስ ኦማርስ ፆምፐ ዎꬅያ ኮጫ ቦላ ታማ ኦይꬆሶና። ኑኒ ጎዳ ኑ ፆሳ ኪታ ናጎስ፤ ሽን ህንተ እያ አግደታ።
2CH 13:12 ፆሳይ ኑራ ደኤስ፤ እ ኑና ካለꬄስ። ኦላ ሞይዘ ፑንያ እያ ካህነት ኑራ ደኦሶና፤ ኑኒ ህንተራ ኦላ ዶማናዉ ሞይዘ ፑናና። እስራኤለ አሳዉ፥ ጎዳራ ህንተ አዋታ ፆሳራ ኦለቶፍተ! ህንተ እያ ፆናናዉ ዳንዳኤከታ” ያግስ።
2CH 13:13 ሄ ዎደ እዮርባም ባ ኦላንቾታፐ እስ ጩጋ ኤንታፈ ጉየራ ዙግድ ናጋና መላ የድስ። አትዳ እስራኤለ ኦላንቾት ይሁዳ ኦላንቾታ ስንꬃን ደእያ ዎደ ዙግድ ናግያ ኦላንቾት ኤንታፈ ጉየራ ደኦሶና።
2CH 13:14 ይሁዳ ኦላንቾት ጉየ ስሚድ ፄልያ ዎደ ኤንታ ኦላናዉ ይዳይሳት ጉየራነ ስንꬃራ ደኤይሳ በእዳ ዎደ ጎዳኮ ዋስዶሶና፤ ካህነት ሞይዘ ፑንዶሶና።
2CH 13:15 ይሁዳ ኦላንቾት ኦላ ዋሶ ዋስዳ ዎደ ጎዳይ እዮርባማነ እስራኤለ አሳ ኡባ አብያ ስንꬃንነ ይሁዳ ስንꬃን ፆንስ።
2CH 13:16 እስራኤለ ኦላንቾት ይሁዳ ኦላንቾታ ስንꬃፈ ባቃትን ፆሳይ ኤንታ ይሁዳ ኦላንቾታ ኩሸን አꬅድ እሚስ።
2CH 13:17 አብይነ እያ ኦላንቾት ኤንታ ዲፍ ኦꬅድ ዉርስዶሶና። ሄ ኦላን 500,000 ዶረትዳ እስራኤለ ኦላንቾት ሀይቅዶሶና።
2CH 13:18 እስራኤለ አሳይ ሄ ዎደ ፆነትዶሶና፤ ይሁዳ አሳይ ጎዳን ባንታ አዋታ ፆሳን አማነትዳ ግሾ ኤንታ ፆንዶሶና።
2CH 13:19 አብይ እዮርባማ የደꬅድ እያፐ ቤተለ፥ ይሻናነ ኤፍሮና ኤንታ ጉታታራ ኦይክስ።
2CH 13:20 አብይ ደእዳ ላይꬃን እዮርባም ስሚድ ምንቤና። ጎዳይ እዮርባማ ሾጭን ሀይቅስ።
2CH 13:21 ግዶሽን፥ አብይ ምን ምን ብስ። አብይ ታማነ ኦይዱ ማቾ ኤክድ ላታማነ ናምኡ አደ ናይታነ ታማነ ኡሱፑን ማጫ ናይታ የልስ።
2CH 13:22 አትዳ አብይ ታርከይ፥ እ ኦꬅዳባይነ እ ኦድዳባይ ናብያ እዶ ታርከ ማፃፋን ፃፈትስ።
2CH 14:1 አብይ ሀይቅድ ባ ማይዛታ ጋክስ፤ እ ዳዊታ ካታማን ሞገትስ። እያ በሳን እያ ናአይ አስ ካዎትስ። እ ካዎትዳ ዎደ ቢታይ ታሙ ላይꬅ ዎፑ ግድ ደእስ።
2CH 14:2 አስ ጎዳ ባ ፆሳ ስንꬃን ሎኦባነ ሱረባ ኦꬅስ።
2CH 14:3 አስ አላጋ ፆሳታስ ያርሽያ በሳታነ ꬎቃ ጎይኖ በሳታ ꬋይስስ። ጎይናናዉ ሹቻፈ ኦሰትዳ ቱሳታ መንረꬅስ። አሼራ ጌተትያ ፆሳ ምስለታ ቃንፀረꬅድ የግስ።
2CH 14:4 ይሁዳ አሳይ ጎዳ ባንታ አዋታ ፆሳ ኮያና መላ፥ እያ ህግያነ እያ ዎጋ ናጋና መላ አስ ኪትስ።
2CH 14:5 ꬎቃ ጎይኖ በሳታነ እፃነ ጩይስያ በሳታ ይሁዳ ካታማታፐ ꬋይስዳ ግሾ እያ ካዎተꬃ ላይꬃን ቢታይ ዎፑ ግድ ደእስ።
2CH 14:6 ካዎይ አስ ይሁዳ ካታማታስ ሚፃታ ኬፅስ። ጎዳይ እያ ሸምፕስዳ ግሾ ቢታይ ሸምፕስ፤ እያ ላይꬃን እያራ ኦንካ ኦለትቤና።
2CH 14:7 አስ ይሁዳ አሳኮ፥ “አነ ኑኒ ሀ ካታማታ ኤሶስ፤ ኤንታ ዩሾን ሚፃታ ኬፆስ፤ አዱሳ ሻኮ፥ ፐንገታነ ጎርደታ ጊግሶስ። ኑኒ ጎዳ ኑ ፆሳ ኮይዳ ግሾ ቢታይ ሀእካ ኑባ። ኑኒ እያ ኮይዳ፤ እ ኑስ ኡባ ባጋራ ሸምፖ እሚስ” ያግስ። ሄሳ ግሾ፥ ኤንቲ ካታማታ ኬፅድ ፖልዶሶና።
2CH 14:8 አሳስ ይሁዳ ኮቻፈ ዎጋ ጎንዳለታነ ቶራታ ዳንጭዳ ሄꬑ ፄቱ ሙኩሉ ኦላንቾት ደኦሶና። ብንያመ ኮቻፈ ጉꬃ ጎንዳለታ ዳንጭዳነ ዶንገን ዱከይሳት ናምኡ ፄታነ ሆስፑን ታሙ ሙኩሉ ኦላንቾት ደኦሶና። ሄሳት ኡባይ ምኖ ኦላንቾታ።
2CH 14:9 ዛራሀ ጌተትያ እስ ቶጰ አደይ እስ ምሎነ ኦላንቾታነ ሄꬑ ፄቱ ፓራ ጋረታ ኤክድ ይሁዳ ኦላናዉ ይድ ማርሳ ጋክስ።
2CH 14:10 አስ እያራ ኦለታናዉ ከይድ ባ ኦላንቾታ ማርሳ ማታን ደእያ ፃፋታ ዛንጋራን ሳልፕስስ።
2CH 14:11 አስ ጎዳ ባ ፆሳ ሀይሳዳ ያግድ ዎስስ፤ “አቤት ጎዳዉ፥ ዎልቅ ባይና ኦላንቾታ ዎልቃማ ኦላንቾታፐ አሸይ ነ መል ባዋ። አቤት ጎዳዉ፥ ኑ ፆሳዉ፥ ኑኒ ነናን አማነትድ፥ ሀ ዎልቃማ ኦላንቾታራ ኦለታናዉ ነ ሱንꬃን ይዳ ግሾ ነ ኑና ማዳ። አቤት ጎዳዉ፥ ነ ኑ ፆሳ፤ ነና አስ ፆነና” ያግስ።
2CH 14:12 ጎዳይ ቶጰ ኦላንቾታ አሳ ስንꬃንነ ይሁዳ ኦላንቾታ ስንꬃን ሾጭን ቶጰ ኦላንቾት ባቃትዶሶና።
2CH 14:13 አስነ እያራ ደእያ አሳይ ኤንታ ገራራ ጋካናዉ የደꬅዶሶና። ቶጰ ኦላንቾታፐ ዳሮይ ሀይቅዳ ግሾ ኤንቲ ስሚድ ምናናዉነ ኦለታናዉ ዳንዳእቦኮና። ሄሳዳ ሀንድ፥ ቶጰ ኦላንቾት ጎዳንነ እያ ኦላንቾታን ፆነትዶሶና። ካዋ አሳ ኦላንቾት ዳሮ ድኦ ድእዶሶና።
2CH 14:14 ሄ ሄራን ደእያ አሳይ ጎዳይ ኦꬅዳባ በእድ ዳሮ ዳጋምስ። አሳ ኦላንቾት ገራራ ዩሹዋን ደእያ ካታማታ ኡባ ቦንቅድ ꬋይስዶሶና።
2CH 14:15 ቃስ መሄ ሞꬃታ ኦልድ፥ ዳሮ ዶርሳነ ግማለታ ድእድ፥ የሩሳላመ ስምዶሶና።
2CH 15:1 ኦዴዳ ናኣ አዛርያሳ ቦላ ፆሳ አያናይ ዎꬍስ።
2CH 15:2 ካዋ አሳራ ጋሄታናዉ አዛርያስ ብድ፥ “አሳ፥ ይሁዳ አሳዉነ ብንያመ አሳዉ ስእተ! ህንተ ጎዳራ ግድኮ እካ ህንተራ ግዳና። ህንተ እያ ኮይኮ እ ህንተዉ በንታና፤ ሽን ህንተ እያ አግኮ እ ህንተና አጋና።
2CH 15:3 እስራኤለ አሳይ ቱማ ፆሲ ባይና፥ ታማርስያ ካህነይነ ህገይ ባይና ዳሮ ዎደ ደእዶሶና።
2CH 15:4 ሽን ባንታና መቶይ ጋክዳ ዎደ ኤንቲ ጎዳኮ፥ እስራኤለ ፆሳኮ ስሚድ እያ ኮይን እ ኤንታዉ በንትስ።
2CH 15:5 ሄ ዎደ ቢታን ደእያ አሳ ኡባይ ዳጋማን ደእያ ግሾ ሳሮተꬃን ከይድ ገልያ ኦንካ ባዋ።
2CH 15:6 ፆሳይ ኤንታ ዱማ ዱማ መቶን የግዳ ግሾ ደረይ ደርያ፥ ካታማይ ካታማ ኡንኤꬄስ።
2CH 15:7 ግዶሽን፥ ህንተ፥ ህንተ ኦሱዋስ ዎይቶይ ደእያ ግሾ ምንተ፤ ጉየ ጎፕተ!” ያግስ።
2CH 15:8 ካዎይ አስ ሀ ቃላነ ኦዴዳ ናአይ ናበይ አዛርያስ ኦድዳ ቃላ ስእዳ ዎደ ምንስ። አስ ይሁዳነ ብንያመ ቢታ ኡባፈነ እ ኦይክዳ ደረይ ዳርያ ኤፍሬማ ቢታን ደእያ እፀትዳ ኤቃ ምስለታ ꬋይስስ። ፆሳ ኬꬃ ስንꬃን ደእያ ጎዳ ያርሾ በሳ ኦራꬅስ።
2CH 15:9 እያ ጎዳይ ፆሳይ እያራ ደኤይሳ በእዳ ግሾ ዳሮ አሳይ እስራኤለፐ እያኮ ይዶሶና። ይሁዳ አሳነ ብንያመ አሳ ኡባ፥ ኤንታራ ደእያ ኤፍሬማ ኮቻታ፥ ምናሰ ኮቻታነ ስሞና ኮቻታ አስ ሺሽስ።
2CH 15:10 አስ ካዎትዳ ታማነ እቻሻንꬆ ላይꬃን፥ ሄꬓንꬆ አጌናን አሳይ የሩሳላመን ሺቅዶሶና።
2CH 15:11 ሄ ጋላስ ኤንቲ ድእድ ኤህዳባፐ ላፑን ፄቱ ኮርማታነ ላፑን ሙኩሉ ዶርሳታ ጎዳስ ያርሽዶሶና።
2CH 15:12 ጎዳ ባንታ አዋታ ፆሳ ባንታ ኩመꬃ ዎዛናንነ ባንታ ኩመꬃ ሸምፑዋን ኮያናዉ ጫቅዶሶና።
2CH 15:13 ጎዳ እስራኤለ ፆሳ ኮዮና አስ፥ ናአ ግድን ጭም፥ አደ ግድን ማጭ ሀይቆ።
2CH 15:14 ሄሳ ግታ ዋሶን፥ እልልሳን፥ ሞይዘንነ ዛየን ባንታ ጎዳስ ጫቅዶሶና።
2CH 15:15 ይሁዳ አሳ ኡባይ ባንታ ኩመꬃ ዎዛናን ሀ ጫቁዋ ጫቅዳ ግሾ ኡፋይትዶሶና። ጎዳ ኤንቲ ምንꬅድ ኮይን እ ኤንታዉ በንትስ። ጎዳይ ኤንታዉ ኡባ ባጋራ ዎፓ እሚስ።
2CH 15:16 ቃስ፥ ካዎይ አስ ባ አዋ አይያ ማእካ አሼራ ጌተትያ ማጫ ፆሴ ኤቃ ምስለ ኦꬅዳ ግሾ ካዋ አይዉ ጌተትያ ቦንቹዋፈ እዮ ድግስ። አስ ሄ ኤቃ ምስልያ ቃንፀረꬅድ ቀድሮና ዛንጋራን ፁግስ።
2CH 15:17 ꬎቃ ጎይኖ በሳታ እስራኤለ ቢታፈ ꬋይሶና እፅኮካ አስ ባ ደእዳ ላይꬃ ኡባን ጎዳስ አማነትዳ አስ ግድድ ደእስ።
2CH 15:18 እነ እያ አዋይ ጎዳስ ዱማይዳ ብራ፥ ዎርቃነ ሀራ ሚሸታ ኤህድ ፆሳ ኬꬃን ዎꬅስ።
2CH 15:19 አስ ካዎትዳ ሀስታማነ እቻሻንꬆ ላይꬅ ጋካናዉ ኦል ባዋ።
2CH 16:1 አስ ካዎትዳ ሀስታማነ ኡሱፑንꬆ ላይꬃን እስራኤለ ካዎይ ባኦስ ይሁዳ ቦላ ደንድስ። ይሁዳ ካዋ አሳኮ ኦንካ ገሎና መላነ ከዮና መላ ተቃናዉ ራማን ሚፃ ኬፅስ።
2CH 16:2 ካዎይ አስ ፆሳ ኬꬃንነ ባ ካዎ ጋꬎን ደእያ ቡቁራ ምንጅያ ኬꬃፈ ዎርቃነ ብራ ኤክድ ዳማስቆን ደእያ ሶረ ካዋ ዎልደ-አዳራስ ሀይሳዳ ያግድ የድስ።
2CH 16:3 “ካሰ ታ አዋራነ ነ አዋራ ጫቅዳይሳዳ ታራነ ኔራ ጫቆስ። ሄኮ፥ ታ ነዉ ብራነ ዎርቃ የዳስ። እስራኤለ ካዎይ ባኦስ ባ ኦላንቾታ ታ ቢታፈ ከሳና መላ ነ ካሰ እያራ ጫቅዳ ጫቁዋ ላላ” ያግስ።
2CH 16:4 ካዎይ ዎልደ-አዳር፥ አስ ግዳይሳ ኤክድ ባ ቶራ ሞጮናታ እስራኤለ ኦላና መላ የድስ። ኤንቲ እዮና፥ ዳነነ አቤል-ማይማ ጌተትያ ካታማታነ ንፍታለመ ቢታን ደእያ ቡቁራ ምንጅያ ካታማታ ኡባ ፆንዶሶና።
2CH 16:5 ባኦስ ሄሳ ስእድ ራማን ኦꬅያ ሚፃ አጋግስ።
2CH 16:6 ካዎይ አስ ይሁዳ አሳ ኡባ ሺሽስ፤ አሳይ ባኦስ ካሰ ያን ጎኤትያ ሹቻነ ምꬃ ራማፐ ኤክድ ግብአነ ምፅጳ ካታማታን ሚፃ ኬፅስ።
2CH 16:7 ሄ ዎደ ቆንጨꬅ በእያ አናን ይሁዳ ካዋ አሳኮ ይድ፥ “ኔኒ ሶረ ካዋን አማነታዳ፥ ጎዳን ነ ፆሳን፥ አማነታቦና ግሾ ሶረ ካዋ ኦላንቾት ነ ኩሸፐ ከስ ኤክዶሶና።
2CH 16:8 ቶጰነ ሊበ አሳት ዳሮ ፓራ ጋረትነ ፓራት ደእያ ዳሮ ኦላንቾታ ግዶኮናዬ? ሽን ኔኒ ጎዳን አማነትዳ ግሾ ጎዳይ ኤንታ ነ ኩሸን አꬅድ እሚስ።
2CH 16:9 ባ ኩመꬃ ዎዛናን ጎዳን አማነትያ አስ ምንꬃናዉ ጎዳ አይፈይ ሳኣ ኡባ ፄሌስ። ኔኒ ኤያተꬃ ኦሶ ኦꬅዳ ግሾ ህዛፐ ኦል ኔፐ ሻከተና” ያግስ።
2CH 16:10 አስ ቆንጨꬅ በእያ ኡራ ቦላ ዳሮ ሀንቀትዳ ግሾ እያ ሳንꬃላታን ቃችድ ቃሾ ኬꬃን የግስ። አስ ሄ ዎደ እስ እስ አሳታ ዳሮ ኡንኤꬅስ።
2CH 16:11 ሄኮ፥ አስ ኦꬅዳባይ ኮይሮፐ ዉርሰꬅ ጋካናዉ ይሁዳ ካዎታነ እስራኤለ ካዎታ ታርከ ማፃፋን ፃፈትስ።
2CH 16:12 አስ ካዎትዳ ሀስታማነ ኡዱፉንꬆ ላይꬃን ቶሆ ሳከትስ፤ ሳሆይ ዳርኮካ፥ እ አክመታ ኮይስፐ አትሽን፥ ጎዳ ኮይቤና።
2CH 16:13 አስ ካዎትዳ ኦይታማነ እስንꬆ ላይꬃን ሀይቅድ ባ ማይዛታ ጋክስ።
2CH 16:14 ኤንቲ እያ ዳዊታ ካታማን ዛላ ዎጭድ ከስዳ ዱፎን ሞግዶሶና። እያ አሀ ዱማ ዱማ ሽቶን ትየትዳ አርሳ ቦላ ዎꬅዶሶና። ኤንቲ እያ ቦንቹዋስ ዳሮ ምꬅ ዶር ኤꬅድ ዬክዶሶና።
2CH 17:1 አሳ ናአይ እዮሳፈፅ ባ አዋ በሳን ካዎትስ፤ እዮሳፈፅ እስራኤለ ኦላናዉ ባና ጊግስስ።
2CH 17:2 ሚፅ ኦሰትዳ ይሁዳ ካታማታን ኦላንቾታ ዎꬅስ፤ ይሁዳ ቢታንነ እያ አዋይ አስ ኦልድ ኦይክዳ ኤፍሬማ ቢታን ኦላንቾታ ዎꬅስ።
2CH 17:3 እዮሳፈፅ፥ እያ አዋይ ዳዊቲ ኮይሮ ሄመትዳ ኦግያን ሄመትዳ ግሾነ ባኣለ ኤቃ ጎይኖና እፅዳ ግሾ ጎዳይ እያ አንጅስ።
2CH 17:4 እዮሳፈፅ ባ አዋ ኦገን ሄመትድ ጎዳ ኪታ ፖልስ። እስራኤለ ካዎት ኦꬅዳ ኢታ ኦሶታ ኦꬅቤና።
2CH 17:5 ጎዳይ እያ ይሁዳ ካዎተꬃን ምንꬅድ ኤስስ። ይሁዳ አሳ ኡባይ እያዉ እሞታ ኤህዶሶና፤ እ ዳሮ ዱረትስነ ቦንቸትስ።
2CH 17:6 እዮሳፈፅ ጎዳስ ኩመꬃ ዎዛናን ኦꬅያ አስ። ꬎቃ ጎይኖ በሳታነ አሼራ ጌተትያ ፆሰ ኤቃ ምስለታ ይሁዳ ቢታፈ ꬋይስስ።
2CH 17:7 እዮሳፈፅ ካዎትዳ ሄꬓንꬆ ላይꬃን ይሁዳ ካታማታን ታማርሳና መላ ባ ሞርናታ በንሃላ፥ አብድዩ፥ ዛካርያሳ፥ ናትናኤላነ ምክያሳ የድስ።
2CH 17:8 ኤንታራ ጉꬃ ሌወታ ሻማያ፥ ናታና፥ ዛባዳ፥ አሳሄላ፥ ሳምራሞታ፥ ዮናታና፥ አዶንያሳ፥ ፆባነ ፆባዶና የድስ፤ ቃስ ኤንታራ ካህነታ ኤልሳማናነ እዮራማ የድስ።
2CH 17:9 ኤንቲ ጎዳ ህገ ማፃፋ ኤክድ ይሁዳ ቢታን ደእያ ካታማታ ኡባ ብድ ያን አሳ ታማርስዶሶና።
2CH 17:10 ይሁዳ ዩሾን ደእያ ካዎተꬃታ ኡባ ጎዳይ ያሽስን፥ ኤንቲ እዮሳፈፃራ ኦለትቦኮና።
2CH 17:11 ፍልስፄመፐ ጉꬃ አሳት እዮሳፈፃስ እሞታነ ብራ ጊራ ኤህዶሶና፤ አራባት እያዉ ላፑን ሙኩሉነ ላፑን ፄቱ ዶርሳ ኡርገታነ ላፑን ሙኩሉነ ላፑን ፄቱ ኮለታ ኤህዶሶና።
2CH 17:12 እዮሳፈፅ ምን ምን ብስ። ይሁዳን ሚፃታነ ሻሎ ምንጅያ ካታማታ ኬፅስ።
2CH 17:13 ይሁዳ ካታማታን ዳሮባ ምንጅስ። የሩሳላመን እያዉ ምኖ ኦላንቾት ደኦሶና።
2CH 17:14 ኤንቲ ባንታ አዋታ ሶ አሳን አሳን ሀይሳፈ ካልድ ፃፈትዶሶና። ይሁዳ ኮቻፈ ሻላቃይ አድና፤ እያራ ሄꬑ ፄቱ ሙኩሉ ምኖ ኦላንቾት ደኦሶና።
2CH 17:15 አድና ካልድ ደእያ ሀላቃይ ዮሃና፤ እያራ ናምኡ ፄታነ ሆስፑን ታሙ ሙኩሉ ምኖ ኦላንቾት ደኦሶና።
2CH 17:16 ጎዳስ ባ ሸነን ባና ዱማይዳ ዝክራ ናአይ አማሳይ እያ ካልድ ደእያ ሄꬓንꬆ ሀላቃ፤ እያራ ናምኡ ፄቱ ሙኩሉ ምኖ ኦላንቾት ደኦሶና።
2CH 17:17 ብንያመ ኮቻፈ ሀላቃይ ምኖ ኦላንቹዋ ኤልያዳ፤ እያራ ዶንገነ ጎንዳለ ኦይክያ ናምኡ ፄቱ ሙኩሉ ኦላንቾት ደኦሶና።
2CH 17:18 ኤልያዳ ካልድ ደእያ ሀላቃይ ዮዛባታ፤ እያራ ኦላ ባናዉ ዳንጭዳ እስ ፄታነ ሆስፑን ታሙ ሙኩሉ ኦላንቾት ደኦሶና።
2CH 17:19 ሀይሳቲ ካዋስ የሩሳላመን ኦꬅዳይሳታ፤ ሀይሳቲ ይሁዳን ግምበትዳ ካታማታን ደእያ ካዎይ ዎꬅዳ ኦላንቾታፐ ሀራ።
2CH 18:1 እዮሳፈፅ ዳሮ ዱረተꬅነ ቦንቾ ደምዳፐ ጉየ አካባራ ቦሎትስ።
2CH 18:2 ጉꬃ ላይꬃፈ ጉየ እዮሳፈፅ አካባ በአናዉ ሳማረ ብስ። አካብ እያዉነ እያራ ደእያ አሳስ ዳሮ ዶርስነ ቦሩ ሹክስ። ያትድ እዮሳፈፃ ጋላዳን ደእያ ራሞታ ኦላናዉ ባራ ባና መላ ማቅስ።
2CH 18:3 እስራኤለ ካዎይ አካብ ይሁዳ ካዋ እዮሳፈፃኮ፥ “ጋላዳን ደእያ ራሞታ ኦላናዉ ታራ ባኔ?” ያግድ ኦይችስ። እዮሳፈፅ፥ “ኤ፥ ታ ኔራ ባና፤ ታ ኦላንቾት ነ ኦላንቾታ፤ ኑ ኔራ ባና” ያግስ።
2CH 18:4 እዮሳፈፅ እስራኤለ ካዋኮ፥ “ግዶሽን፥ ነ ኮይሮታዳ ጎዳ ኦይቻ” ያግስ።
2CH 18:5 እስራኤለ ካዎይ ኦይዱ ፄቱ ናበታ ሺሽድ፥ “ታ ጋላዳን ደእያ ራሞታ ኦላናዉ ቦየ ቦፖ?” ያግድ ኦይችስ። ኤንቲ፥ “ባ፤ ፆሳይ ነ ኩሸን አꬅድ እማና” ያግዶሶና።
2CH 18:6 ሽን እዮሳፈፅ፥ “ኑ ጎዳ ኦይቻናዉ ዳንዳእያ ሀራ ናበይ ሀይሳን ባዌ?” ያግስ።
2CH 18:7 እስራኤለ ካዎይ እዮሳፈፃኮ፥ “ኑ እያ ባጋራ ጎዳ ኦይቻናዉ ዳንዳእያ ሀራ ናበይ ይምላ ናአይ ምክያስ ደኤስ። ሽን እ ኡባ ዎደ ታዉ ኢታባ ኦዴስፐ አትሽን፥ ሎኦባ ኦድ ኤሮና ግሾ ታ እያ ዶስከ” ያግስ። እዮሳፈፅ፥ “ካዎይ ሀይሳዳ ጋናዉ በሰና” ያግስ።
2CH 18:8 እስራኤለ ካዎይ ባ ሞርናታፐ እሱዋ ፄግድ፥ “ይምላ ናኣ ምክያሳ ኤለ ኤካዳ ያ” ያግስ።
2CH 18:9 እስራኤለ ካዎይነ ይሁዳ ካዎይ እዮሳፈፅ ካዎ ማኦ ማእድ፥ ሳማረ ካታማ ገልያ ፐንገን ባንታ አራታን ኡትን ናበት ኡባይ ኤንታ ስንꬃን ትንብተ ኦዶሶና።
2CH 18:10 ኤንታፈ እሶይ፥ ክንአና ናአይ ሰደቅያስ ብራታፐ ካጨታ ጊግስድ አካባኮ፥ “ጎዳይ፥ ‘ሶረት ꬋያና ጋካናዉ ነ ኤንታ ሀ ካጨታን ቃይጫና’ ያጌስ” ያግስ።
2CH 18:11 ሀራ ናበት ኡባይ፥ “ጎዳይ ራሞታ ነ ኩሸን አꬅድ እማና ግሾ ባ፤ ኦላዳ ፆና” ያግዶሶና።
2CH 18:12 ምክያሳ ፄጋናዉ ኪተትድ ብዳ ኡራይ፥ “ሄኮ፥ ሀራ ናበት ኡባይ እስ ዶና ግድድ ካዎይ ፆናናይሳ ኦድዶሶና። ነ ኦዳይካ ኤንታ ኦዳ መላ ግዶ፤ ሎኦባ ኦዳ” ያግስ።
2CH 18:13 ሽን ምክያስ፥ “ደኦ ጎዳይ ኤርያ መላ፥ ፆሳይ ታዉ ቆንጭስዳባ ኦዳና” ያግስ።
2CH 18:14 ምክያስ ካዋኮ ይዳ ዎደ ካዎይ፥ “ምክያሳ ኑኒ ጋላዳን ደእያ ራሞታ ኦላናዉ ቢኖየ ቦፕኖ?” ያግድ ኦይችስ። ምክያስ ካዋኮ፥ “ኤንቲ ነ ኩሸን አꬍድ እመታና ግሾ ባዳ ኦላ” ያግስ።
2CH 18:15 ካዎይ፥ “ጎዳ ሱንꬃን ቱማ ኦዳ፤ ሀራባ ታዉ ኦዶና መላ ታኒ ነና አፑን ቶሆ ጫቅሶ” ያግስ።
2CH 18:16 ምክያስ፥ “ታ እስራኤለ ኦላንቾት ኡባይ ሄንꬃንቾይ ባይና ዶርሳዳ ደርያ ቦላ ላለትዳይሳ በአስ። ጎዳይ፥ ‘ሀይሳታ ካለꬅያ አስ ባዋ፤ ኤንቲ ኡባይ ባንታ ሶ ሶ ሳሮ ቦ’ ያጌስ” ያግስ።
2CH 18:17 እስራኤለ ካዎይ እዮሳፈፃኮ፥ “እ ታዉ ኢታፐ አትሽን፥ ሎኦ ኦድ ኤረና ጋዳ ታኒ ነዉ ኦዳብክና?” ያግስ።
2CH 18:18 ምክያስ ጉጅድ ሀይሳዳ ያግስ፤ “ሀእ፥ ጎዳይ ግያባ ስአ! ጎዳይ ባ አራታን ኡትን ሳሎ ኦላንቾት እያ ኡሻቻ ባጋንነ እያ ሀድርሳ ባጋን ኤቅዳይሳታ በአስ።
2CH 18:19 ጎዳይ፥ ‘እስራኤለ ካዎይ አካብ ጋላዳን ደእያ ራሞታ ብድ ያን ሀይቃናዳ እያ ባለꬃናይ ኦኔ?’ ” ያግስ። እሶይ፥ “ሀይሳዳ ግያ ዎደ ሀንኮይ ሄሳዳ” ግስ።
2CH 18:20 ዉርሰꬃን እስ አያን ከይድ ጎዳ ስንꬃን ኤቅድ፥ “ታኒ እያ ባለꬃና” ያግስ። ጎዳይ፥ “ዋታዳ ባለꬃኔ?” ያግስ።
2CH 18:21 አያናይ፥ “ታ ባዳ፥ እያ ናበታ ኡባ ዶናን ዎርዶ አያና ግዳና” ያግስ። ጎዳይ፥ “ኤ፥ ነ እያ ባለꬃና፤ ነዉ ሀናና፤ ባዳ ባለꬃ” ያግስ።
2CH 18:22 ምክያስ፥ “ሄኮ፥ ጎዳይ ነና ꬋይሳናዉ ቆፕዳ ግሾ ነ ናበታ ዶናን ዎርዶ አያና ዎꬅስ” ያግስ።
2CH 18:23 ክንአና ናአይ ሰደቅያስ ሺቅድ፥ ምክያሳ ባቅድ፥ “ጎዳ አያናይ ታና አግድ ነዉ ኦዳናዉ አዉራ አꬍዴ?” ያግስ።
2CH 18:24 ምክያስ፥ “ሄኮ፥ ነ ቆሰታናዉ ቆልአ ገልያ ዎደ ሄሳ ደማና” ያግስ።
2CH 18:25 እስራኤለ ካዎይ ባ ኦላንቾታፐ እሱዋ ፄግድ፥ “ምክያሳ ኦይካ ኤፋዳ ካታማ ሃርያ አሞነስነ ታ ናኣ እዮኣሳስ እማ።
2CH 18:26 ካዎይ ኤንታኮ፥ ‘ሀ አድያ ቃሾ ኬꬃን የግተ፤ ታ ሳሮ ስማና ጋካናዉ ጉꬃ ኡይꬃፈነ ሃꬃፈ አትሽን፥ ሀራባ አይባካ እያዉ እሞፕተ’ ” ያግድ ኪትስ።
2CH 18:27 ምክያስ፥ “ቱማ፥ ነ ሳሮ ስማናባ ግድኮ፥ ጎዳይ ታዉ ኦድቤና። ቃስ፥ አሳዉ፥ ታ ኦድያባ አኬክተ” ያግስ።
2CH 18:28 ሄሳፈ ጉየ፥ እስራኤለ ካዎይነ ይሁዳ ካዎይ እዮሳፈፅ ጋላዳን ደእያ ራሞታ ብዶሶና።
2CH 18:29 እስራኤለ ካዎይ እዮሳፈፃኮ፥ “ታኒ ታ ማኡዋ ላማዳ ሀራ አስ ዳናዳ ኦላ ገላና፤ ሽን ኔኒ ነ ካዎ ማኡዋ ማአ” ያግስ። እስራኤለ ካዎይ ባ ማኡዋ ላምድ ሀራ አስ ዳንድ ኦላ ገልስ።
2CH 18:30 ሶረ ካዎይ ባ ፓራ ጋረታ ኪትያ አሳታኮ፥ “ግታ ግድን ጉꬅ፥ ሀራ ኦደራካ ኦለቶፍተ፤ እስራኤለ ካዋ ፃላላ ኮይድ ዎꬍተ” ያግድ ኪትስ።
2CH 18:31 ፓራ ጋረታ ኪተይሳት እዮሳፈፃ በእዳ ዎደ፥ “ሀይስ እስራኤለ ካዋ” ያግድ እያራ ኦለታናዉ ስምዶሶና። እዮሳፈፅ ዋስን ጎዳይ እያ ማድድ ኤንታ ኩሸፐ አሽስ።
2CH 18:32 ፓራ ጋረታ ኪተይሳት እ እስራኤለ ካዋ ግዶናይሳ በእድ እያ ጎደይሳ አጋግዶሶና።
2CH 18:33 እስ ኡራይ ጮ ባ ዶንግያ ዱክያ ዎደ እስራኤለ ካዋ ኦላ ማኦይ ጋሄትያ ሀሽያን ጫድስ። ካዎይ ባ ጋርያ ላግያ አድያኮ፥ “ጋርያ ጉየ ዛራዳ ታና ኦላ ግዶፈ ከሳ፤ ታኒ ኢታ ጫቸ ጫደታስ” ያግስ።
2CH 18:34 ኦላይ ጎብያ ዎደ እስራኤለ ካዎይ አካብ ባ ፓራ ጋርያ ግዶን ዘምፕድ፥ ኦማርስ ጋካናዉ ሶረታ ስንꬃን ጋምእስ። አው ዉልያ ዎደ እ ሀይቅስ።
2CH 19:1 ሄሳፈ ጉየ፥ ካዎይ እዮሳፈፅ የሩሳላመን ደእያ ባ ጋꬎ ሳሮ ስምስ።
2CH 19:2 ቆንጨꬅ በእያ፥ አናና ናአይ እዩይ ካዋ እዮሳፈፃራ ጋሄታናዉ ከይድ፥ “ኔኒ ኢታታ ማዳናዉ ዎይኮ ጎዳ እፀይሳታ ዶሳናው በሲ? ሄሳ ግሾ፥ ጎዳ ሀንቆይ ነ ቦላ ይስ።
2CH 19:3 ግዶሽን፥ አሼራ ኤቃ ምስለታ ቢታፈ ድግዳ ግሾነ ፆሳ ኮያናዉ ነ ዎዛና ጊግስዳ ግሾ ኔኒ ሎኦባ ኦꬃዳሳ” ያግስ።
2CH 19:4 እዮሳፈፅ የሩሳላመን ደእስ። በርሳበፐ ዶምድ ደረይ ዳርያ ኤፍሬማ ቢታ ጋካናዉ አሳ ግዶን ዩይድ፥ ጎዳኮ፥ ኤንታ አዋታ ፆሳኮ ኤንታ ዛርስ።
2CH 19:5 ይሁዳ ቢታን ደእያ ግምበትዳ ካታማታ ኡባን ዳይናታ ሹምስ።
2CH 19:6 ኤንታኮ፥ “ህንተ ፕርደይ አሳሳ ግዶናሽን፥ ህንተ ፕርድያ ዎደ ጎዳይ ህንተራ ደእያ ግሾ ህንተ ፕርድያ ዎደ ናገትተ።
2CH 19:7 ሀእካ ጎዳስ ያይተ፤ ጎዳ ኑ ፆሳ ማታን ናቆይ፥ ሶምኦ ፄልድ ማደይነ ዎꬋፈ ኤኮይ ባይና ግሾ አኬክድ ፕርድተ” ያግስ።
2CH 19:8 ቃስ፥ ጎዳ ህግያ ፖልሳና መላነ አሳ ግዶን ደንድያ ሞቱዋ ፕርዳና መላ ሌወታፐ፥ ካህነታፐነ እስራኤለ አሳ ሶ ሀላቃታፐ ጉꬃ አሳታ እዮሳፈፅ የሩሳላመን ሹምስ።
2CH 19:9 እዮሳፈፅ ኤንታ ሀይሳዳ ያግድ ኪትስ፤ “ጎዳስ ያሻን፥ አማነተꬃንነ ኩመꬃ ዎዛናን ኦꬅተ።
2CH 19:10 ባንታ ካታማን ደእያ ህንተ እሻት ሸምፖ ዎꬎን፥ ህገ ዎይኮ ኪታ ዎይኮ አዋጆ መንꬆን ህንተኮ ዪኮ፥ ኤንቲ ጎዳ ስንꬃን ባላ ግዶናዳ፥ እያ ሀንቆይ ህንተ ቦላነ ህንተ እሻታ ቦላ ዮናዳ ኤንታ ሴርተ። ህንተ ኤንታ ሴርኮ ህንተ ህንተ ሁጰን ባላ ግደከታ።
2CH 19:11 ጎዳባ ግድዳ ኡባን ካህነታ ሀላቃ አማረ፤ ካዎባ ግድዳ ኡባን ይሁዳ ኮቻስ ሀላቃ ግድዳ እስማኤላ ናኣ ዛባዳ ሹማስ። ሌወት ህንተ ቦላ ሀላቃ ግዳና። ህንተ ምንድ ኦꬅተ፤ ሱረባ ኦይሳራ ጎዳይ ግዶ” ያግስ።
2CH 20:1 ሄሳፈ ጉየ፥ ሞአበትነ አሞነት ማኡናት እዮሳፈፃ ቦላ ደንድዶሶና።
2CH 20:2 ጉꬃ አሳት እዮሳፈፃኮ ይድ፥ “ማፅነ አባፈ ሄፍንꬃን ደእያ ኤዶመፐ ዳሮ ኦላንቾት ነና ኦላናዉ ይዶሶና። ኤንቲ ሀሳሶን-ታማራን ደኦሶና” ያግድ ኦድዶሶና። (ሀሳሶን-ታማር ኤንጋዳስ ሀራ ሱንꬁ።)
2CH 20:3 እዮሳፈፅ ያይዳ ግሾ ጎዳ ኦይቻናዉ ቆፋ ቃችስ፤ ይሁዳ ቢታ ኡባን ፆማ አዋጅስ።
2CH 20:4 ይሁዳ አሳ ኡባይ ጎዳፐ ማዶ ኮያናዉ ሺቅዶሶና፤ ኤንቲ ጎዳፐ ማዶ ኮያናዉ ይሁዳ ካታማ ኡባፈ ይዶሶና።
2CH 20:5 እዮሳፈፅ፥ ይሁዳነ የሩሳላመ ሺቁዋ ግዶን፥ ፆሳ ኬꬃን ደእያ ኦራꬃ ዳባባ ስንꬃን ኤቅስ።
2CH 20:6 ባ ቃላ ꬎቁ ኦꬅድ፥ “አቤት ጎዳዉ፥ ኑ አዋታ ፆሳዉ፥ ሳሎን ደእያ ፆሳይ ነና ግድኪ? ሳአን ደእያ ካዎተꬃታ ኡባ ሃረይ ነና። ግታተꬅነ ዎልቅ ነ ኩሸን ደእያ ግሾ ኔራ ኤቀታናዉ ዳንዳኤይ ባዋ።
2CH 20:7 አቤት ኑ ፆሳዉ፥ ካሰ ሀ ቢታን ደእያ አሳ፥ እስራኤለ ስንꬃፈ የደꬃዳ ነ ላግያ አብራሃመ ዘረꬃስ መርናዉ እምዳይ ነና ግድኪ?
2CH 20:8 ኤንቲ ሀ ቢታን ደእዶሶና፤ ያን ነ ሱንꬃስ ኬ ኬፅድ፥
2CH 20:9 ‘ኑ ቦላ ኢታ መቶይ ዎይኮ ኦል ዎይኮ ጋዶይ ዎይኮ ኮሽ ጋክኮ፥ ነ ሱንꬃይ ደእያ ነ ኬꬃ ስንꬃንነ ነ ስንꬃን ኤቅድ፥ ኑ መቱዋን ኔኮ ዋሳና። ነ ኑ ዋሱዋ ስአዳ ኑና አሻና’ ያግዶሶና።
2CH 20:10 “ሄኮ፥ ሀእካ፥ እስራኤለ አሳይ ግብፀፈ ከይዳ ዎደ፥ ኤንታ ቢታ ኦሎና መላ ኦꬃዳ ኤንታ ꬋይሶና መላ ድግዳ አሞነት፥ ሞአበትነ ሳይረት ሀ ቢታን ደኦሶና።
2CH 20:11 ኑ ኦꬅዶባስ ኤንቲ ኑስ ዛርዳባ በአ። ነ ኑስ እምዳ ላታ ቢታፈ ኤንቲ ኑና የደꬃናዉ ይዶሶና።
2CH 20:12 አቤት ኑ ፆሳዉ፥ ነ ኤንታ ፕርድኪ? ኑና ኦላናዉ ይዳ ሀ ዳሮ ኦላንቾታራ ኦለታናዉ ኑስ ዎልቅ ባዋ። ኑኒ ኦꬃናባ ኤሮኮ፤ ሽን ኑ አይፈት ነና ፄሎሶና” ያግስ።
2CH 20:13 ይሁዳ አሳ ኡባይ ባንታ ናይታራነ ባንታ ማቸታራ ሺቅድ ጎዳ ስንꬃን ኤቅዶሶና።
2CH 20:14 ሄ ዎደ ዛካርያሳ ናአይ ያሀዝኤል ሺቁዋ ግዶን ኤቅዳሽን ጎዳ አያናይ እያ ቦላ ዎꬍስ። ዛካርያስ ባናያ ናአ፤ ባናይ ይኤላ ናአ፤ ይኤል ማታና ናአ፤ ማታን ሌወ ኮቸነ አሳፋ ያራ።
2CH 20:15 ጎዳ አያናይ ያሀዝኤላ ቦላ ዎꬍን፥ “ካዋዉ እዮሳፈፃ፥ ይሁዳንነ የሩሳላመን ደእያ አሳዉ፥ ኡባይ ስእተ! ጎዳይ ህንተና ያጌስ። ‘ሀ ዳሮ ኦላንቾታ ጋሶን ያዮፍተነ ዳጋሞፕተ። ኦላይ ህንተባ ግዶናሽን ፆሳባ።
2CH 20:16 ዎንቶ ኤንታ ቦላ ከይድ ፂፃ ጌተትያ በሳ ፑደ ከይሽን ይሩኤላ መላ ቢታን ደእያ ዛንጋራ ዉርሰꬃን ህንተ ኤንታ ደማና።
2CH 20:17 ሀ ኦላ ኦለተይ ህንተና ግደከታ። ይሁዳነ የሩሳላመ አሳዉ፥ ህንተ በሳ በሳ ኦይክድ ምንድ ኤቅተ። ጎዳይ ህንተና አሽያ አሹዋ በእተ። ያዮፍተ፤ ዳጋሞፍተ፤ ዎንቶ ኤንታ ቦላ ከይተ፤ ጎዳይ ህንተራ ግዳና’ ” ያግስ።
2CH 20:18 እዮሳፈፅ ሶምኦ ሳአ ጋꬅድ ጎይንስ፤ ይሁዳ አሳ ኡባይ የሩሳላመን ደእያ አሳ ኡባይ ጎዳ ስንꬃን ኩንድድ ጎይንዶሶና።
2CH 20:19 ቃሃታነ ቆረ ኮቻፈ ጉꬃ ሌወት ኤቅድ ባንታ ቃላ ꬎቁ ኦꬅድ፥ ጎዳ እስራኤለ ፆሳ ጋላትዶሶና።
2CH 20:20 ኤንቲ ዎንታ ጉራ ደንድድ ተቁሄ መላ ቢታ ብዶሶና። ኤንቲ ከይዳ ዎደ እዮሳፈፅ ደንድ፥ “ይሁዳንነ የሩሳላመን ደእያ አሳዉ ታኒ ገይሳ ስእተ። ጎዳን፥ ህንተ ፆሳን አማነትተ፤ ህንተ ምናና፤ ናበታ አማንተ ኡባይ ህንተዉ እንጀታና” ያግስ።
2CH 20:21 እዮሳፈፅ አሳራ ዞረትዳፐ ጉየ፥ “ጎዳ ጋላትተ፥ እያ ሲቆይ መርናሳ” ያግድ የፅሸነ እያ ጌሻ ቦንቹዋ ሳቢሸ ኦላንቾታ ስንꬃራ ብያ አሳታ ሹምስ።
2CH 20:22 ኤንቲ ማዝሙረ የꬅነ ጋላታ ዶምዳ ዎደ ይሁዳ ኦላናዉ ይዳ አሞነታ ቦላ፥ ሞአበታ ቦላነ ሳይረታ ቦላ ጎዳይ ዳጋማ የድስ።
2CH 20:23 አሞነትነ ሞአበት ሳይረታ ቦላ ደንድድ፥ ኤንታ ኩመꬅ ꬋይስዶሶና። ኤንቲ ሳይረታ ꬋይስዳፐ ጉየ ባንታ ግዶን እሶይ እሱዋ ꬋይስዶሶና።
2CH 20:24 ይሁዳ አሳይ መላ ቢታን ደእያ ኦላንቾታ በአናዉ ይዳ ዎደ ባንታ ሞርከት ደእያ በሳ በእዶሶና። ኤንታ አሀይ ቢታን ዝንእዳይሳ ደምዶሶና፤ ኤንታፈ እስ አስካ ከስ ኤክቤና።
2CH 20:25 ሄሳፈ ጉየ፥ እዮሳፈፅነ እያ አሳይ ድኦ ኤካናዉ ብድ ሽንቀ፥ ኦላ ሚሸ፥ ማኦታነ ሀራ አልኦ ሚሸታ ደምዶሶና። ሽን ድኦ ኡባ ኤፋናዉ ዳንዳእቦኮና፤ ድእዳባይ ዳሮ ግድዳ ግሾ ሺሻናዉ ሄꬑ ጋላስ ኤክስ።
2CH 20:26 ኤንቲ ኦይዳንꬆ ጋላሳን ባራካ ዛንጋራን ሺቅድ ጎዳ ጋላትዶሶና። ሄሳ ግሾ ሄ በሳ “አንጆ ዛንጋራ” ያግድ ሱንꬅዶሶና።
2CH 20:27 ሄሳፈ ጉየ፥ ይሁዳ አሳይነ የሩሳላመ አሳ ኡባይ እዮሳፈፅ ካለꬅን፥ ኡፋይሳን የሩሳላመ ስምዶሶና።
2CH 20:28 ኤንቲ የሩሳላመ ጋክድ ዲꬃራ፥ ማስንቆራነ ዛየራ ፆሳ ኬꬅ ገልዶሶና።
2CH 20:29 እስራኤለ ሞርከታ ጎዳይ ኦልዳይሳ ቢታን ደእያ ካዎተꬃት ኡባይ ስእዳ ዎደ ያይዶሶና።
2CH 20:30 ያትድ ፆሳይ እዮሳፈፃስ ኡባ ባጋራ ሸምፖ እምዳ ግሾ እያ ካዎተꬃይ ሳሮተꬅ ደምስ።
2CH 20:31 እዮሳፈፅ ይሁዳን ካዎትያ ዎደ እያ ላይꬅ ሀስታማነ እቻሻ፤ እ የሩሳላመን ላታማነ እቻሹ ላይꬅ ካዎትስ። እያ አይያ ሽልሀ ናእዉ አዙቦ።
2CH 20:32 እዮሳፈፅ ባ አዋ አሳ ኦግያን ሄመትስ፤ እ ሄ ኦግያፐ ሀድርስ ኡሻች ግቤና፤ ጎዳ ስንꬃን ሱረባ ኦꬅስ።
2CH 20:33 ግዶሽን፥ ꬎቃ ጎይኖ በሳታ ꬋይስቤና፤ አሳይ ቡሮ ባ ኩመꬃ ዎዛናን ባንታ አዋታ ፆሳኮ ስምቤና።
2CH 20:34 እዮሳፈፅ ኦꬅዳባይ ኮይሮፐ ዉርሰꬅ ጋካናዉ እስራኤለ ካዎታ ታርከ ማፃፋን፥ ሀናና ናኣ እዩ ታርከ ማፃፋን ፃፈትስ።
2CH 20:35 እስ ዎደ ይሁዳ ካዎይ እዮሳፈፅ ኢታባ ኦꬅዳ እስራኤለ ካዋ አካዝያሳራ እስፈተꬅ ኦꬅስ።
2CH 20:36 ናምአይ ዛልኤ ማርካበ መꬋናዉ ዞረትዶሶና፤ ኤፅዮን-ጋብራን ማርካበታ መꬍዶሶና።
2CH 20:37 ግዶሽን ማሬሳ አደይ ዶዳ ናአይ አላዛር፥ “ኔኒ አካዝያሳራ እስፈተꬅ መꬍዳ ግሾ ነ ኦꬅዳባ ጎዳይ ꬋይሳና” ያግድ እዮሳፈፃ ቦላ ትንብተ ኦድስ። ሄሳ ግሾ፥ ማርካበት መቅዶሶና፤ ኤንቲ ዛልኤ ኦሱዋ ኦꬃናዉ ዳንዳእቦኮና።
2CH 21:1 ሄሳፈ ጉየ፥ እዮሳፈፅ ሀይቅድ ባ ማይዛታራ ጋሄትስ። ዳዊታ ካታማን ባ ማይዛታ ዱፎን ሞገትስ። እያ በሳን እያ ናአይ እዮራም ካዎትስ።
2CH 21:2 እዮራማ እሻት አዛርያሳ፥ ይኤላ፥ ዛካርያሳ፥ አ ዛርያሳ፥ ምካኤላነ ሳፋፃ፤ ሀይሳቲ ይሁዳ ካዋ እዮሳፈፃ ናይታ።
2CH 21:3 ኤንታ አዋይ እዮሳፈፅ ኤንታዉ ዳሮ ብራ፥ ዎርቃ፥ አልኦ ሚሸነ ግምበትዳ ካታማታ እሚስ። ሽን እዮራም እያዉ ባይራ ናአ ግድያ ግሾ ካዎተꬃ እያዉ እሚስ።
2CH 21:4 እዮራም ባ አዋ ካዎተꬃ ኤክድ ምንዳ ዎደ ባ እሻታ ኡባነ እስ እስ እስራኤለ ሀላቃታ ማሻን ዎꬍስ።
2CH 21:5 እዮራም ካዎትያ ዎደ እያዉ ላይꬅ ሀስታማነ ናምአ፤ የሩሳላመን ሆስፑን ላይꬅ ካዎትስ።
2CH 21:6 እዮራም አካባ ናእዉ ኤክዳ ግሾ አካባ ሶ አሳይ ሄመትዳይሳዳ ካሰ እስራኤለ ካዎታ ኦግያን ሄመትስ፤ ጎዳ ስንꬃን ኢታባ ኦꬅስ።
2CH 21:7 ግዶሽን፥ ጎዳይ ካሰ ዳዊታራ ጫቅዳ ጫቁዋ ግሾ ዳዊታ ኮቻ ꬋይሳናዉ ኮይቤና። ዳዊታ ኮቻይ መርናዉ ካዎታና መላ ጎዳይ እያዉ ጫቅስ።
2CH 21:8 እዮራማ ካዎተꬃ ላይꬃን፥ ኤዶመ አሳይ ይሁዳ ካዋ ቦላ ማካልድ ባንታዉ ካዎ ካዎꬅዶሶና።
2CH 21:9 ሄሳ ግሾ፥ እዮራም ቶራ ሞጮናታነ ፓራ ጋረታ ኤክድ ኤዶመ ኦላናዉ ብስ። ኤዶመ አሳይ እያነ እያ ፓራ ጋረታ ሀላቃታ ኦልዶሶና። ሽን እዮራምነ እያ አሳይ ቃማ ደንድድ ባቃትዶሶና።
2CH 21:10 ሄ ዎደፐ ዶምድ ሀች ጋካናዉ ኤዶመ አሳይ ይሁዳ አሳስ ሃረትቦኮና። እዮራም ጎዳ፥ ባ አዋታ ፆሳ አግዳ ግሾ ልብና አሳይ ሄ ዎደ ይሁዳ ካዋ ቦላ ማካልዶሶና።
2CH 21:11 እዮራም ይሁዳ ገዘ ቢታን ꬎቃ ጎይኖ በሳታ ጊግስስ፤ የሩሳላመን አሳ ላይማታና መላ ኦꬅስ፤ ይሁዳ አሳካ ባለꬅስ።
2CH 21:12 ናበይ ኤልያስ እዮራማስ ዳብዳበ ሀይሳዳ ያግድ ፃፍስ፤ “ጎዳይ፥ ነ አዋ ዳዊታ ፆሳይ፥ ‘ኔኒ ነ አዋ እዮሳፈፃ ዎይኮ ይሁዳ ካዋ አሳ ኦግያን ሄመታናይሳ አጋዳ፥
2CH 21:13 እስራኤለ ካዎታ ኦግያን ሄመታዳሳ። አካባ ሶ አሳይ ኦꬅዳይሳዳ ይሁዳንነ የሩሳላመን ደእያ አሳይ ኤቃ ጎይናና መላ ኦꬃዳሳ። ቃስ ኔፐ ሎእያ፥ ነ አዋ ሶ አሳ፥ ነ እሻታ ዎꬋዳሳ።
2CH 21:14 ሄሳ ግሾ፥ ጎዳይ ነ አሳ፥ ነ ናይታ፥ ነ ማቸታነ ነዉ ደእያ ኡባ ዎልቃማ ጋዶን ሾጫና።
2CH 21:15 ነና ማራጨ ሀርገይ ኦይክን፥ ማራጨይ ካረ ከያና ጋካናዉ ነ ኢታ ሳከታና።’ ”
2CH 21:16 ጎዳይ ፍልስፄመታነ ቶጰ ማታን ደእያ አራበታ እዮራማ ኦላና መላ ደንꬅስ።
2CH 21:17 ኤንቲ ይሁዳ ቦላ ደንድድ ካዎ ጋꬎን ደእያ ሚሸ ኡባ፥ ካዋ አደ ናይታነ እያ ማቸታ ድእዶሶና። ቃስ፥ እያ ናይታ ኡባፈ ካሎ ግድዳ አካዝያሳፐ አትሽን፥ ሀራ እስ ናእካ አትቤና።
2CH 21:18 ሄሳፈ ጉየ፥ ጎዳይ ፓፃናዉ ዳንዳኦና ማራጨ ሀርገን እዮራማ ሾጭስ።
2CH 21:19 ናምኡ ላይꬃ ግዶን ሀርገይ እያ ቦላ ጎብስ፤ እያ ማራጨይ ካረ ከይስ፤ እ ኢታ ሳከትድ ሀይቅስ። እያ ሞግያ ዎደ አሳይ ካሰ ማይዛታስ ኦꬅዳይሳዳ እያ ቦንቾስ ምꬅ ዶርድ ታማ ኤꬅቦኮና።
2CH 21:20 እዮራም ካዎትያ ዎደ እያዉ ላይꬅ ሀስታማነ ናምአ፤ እ የሩሳላመን ሆስፑን ላይꬅ ካዎትስ። እ ሀይቅያ ዎደ ኦንካ አዛንቤና። እዮራም ዳዊታ ካታማን ሞገትስፐ አትሽን፥ ካዎታ ዱፎን ሞገትቤና።
2CH 22:1 አራበታራ ይዳ ፓንጋት፥ እዮራማ ባይራ ናይታ ኡባ ዎꬍዳ ግሾ የሩሳላመ አሳይ እዮራማ ናኣ፥ ኡባፈ ካሉዋ፥ አካዝያሳ እያ በሳን ካዎꬅዶሶና። ሄሳ ግሾ፥ እዮራማ ናአይ አካዝያስ ኤንታ ቦላ ካዎ ግድስ።
2CH 22:2 አካዝያስ ካዎትያ ዎደ እያዉ ላይꬅ ላታማነ ናምአ። እ የሩሳላመን እስ ላይꬅ ካዎትስ፤ እያ አይያ ጎቶላ፥ ዛንብራ ናኣ ናአ።
2CH 22:3 አካዝያስ ኢታተꬃን ባናዳ እያ አይያ ዞርዳ ግሾ እ አካባ ሶ አሳ ኦግያን ሄመትስ።
2CH 22:4 እያ አዋይ ሀይቅዳፐ ጉየ አካባ ሶ አሳይ እያ ዞርያ ግሾ ꬋያና ጋካናዉ አካባ ሶ አሳዳ እካ ጎዳ ስንꬃን ኢታባ ኦꬅስ።
2CH 22:5 አካዝያስ አካባ ሶ አሳ ዞርያ ካልድ፥ አካባ ናኣ፥ እስራኤለ ካዋ እዮራማራ እስፈ ሶረ ካዋ አዛሄላ ኦላናዉ ጋላዳን ደእያ ራሞታ ብስ። ያን ሶረ አሳት እዮራማ ጫድዶሶና።
2CH 22:6 እዮራም፥ ሶረ ካዋ አዛሄላራ ኦለትዳ ኦላን ጫደትዳ ግሾ ፓፃናዉ እዝራኤለ ብስ። እዮራማ ናአይ፥ ይሁዳ ካዎይ፥ አካዝያስ፥ ጫደትዳ አካባ ናኣ እዮራማ፥ ኦይቻናዉ እዝራኤለ ብስ።
2CH 22:7 አካዝያስ እዮራማ ኦይቻናዉ ብዳ ቡሳ፥ ፆሳይ አካዝያሳስ ሀይቆ ጋሶ ኦꬅስ። አካዝያስ እዮራማ ሶ ጋክዳ ዎደ አካባ ኮቻ ꬋይሳና መላ ጎዳይ ዶርዳ፥ ናምሳ ናኣ እዩ፥ ሞካናዉ ናምአይ ከይዶሶና።
2CH 22:8 እዩይ አካባ ኮቻ ቦላ ፕርዳ ፖልያ ዎደ ይሁዳ ሀላቃታነ አካዝያሳ ማድያ እያ ዳቦታ ናይታ ደምድ ዎꬍስ።
2CH 22:9 እዩይ አካዝያሳ ኮይሽን ሳማረን ቆሰትድ ደእያ በሳፈ እዩ አሳት ደምድ እያኮ ኤህድ ዎꬍዶሶና። “ባ ኩመꬃ ዎዛናን ጎዳ ኮይዳ እዮሳፈፃ ናአ” ያግድ ሞግዶሶና። ሄሳ ግሾ፥ አካዝያሳ ሶ አሳፐ ካዎታናዉ ዳንዳእያ አስ ኦንካ አትቤና።
2CH 22:10 አካዝያሳ አይያ ጎቶላ ባ ናአይ ሀይቅዳይሳ ስእዳ ዎደ ደንዳዳ ይሁዳ ካዋ ኮቸ ኡባ ꬋይሳሱ።
2CH 22:11 ሽን ካዋ እዮራማ ናእያ ዮሳቤታ ሀይቃናዉ ደእያ ካዎ ናይታ ግዶፈ አካዝያሳ ናኣ እዮኣሳ ካይሳዳ ኤካሱ። እያነ እያ ድችያሮ ቆልአን ቆሳሱ። ሄሳዳ ኦꬃዳ ጎቶላ ዎꬎናዳ ካዋ እዮራማ ናእያ አካዝያሳ ምችያ ካህንያ ዮዳሄ ማችያ ዮሳቤታ እያ ቆሳሱ።
2CH 22:12 ጎቶላ ሃርያ ዎደ ኡባን ናአይ ኤንታ ማታን ፆሳ ኬꬃን ኡሱፑን ላይꬅ ቆሰትድ ደእስ።
2CH 23:1 ላፑንꬃ ላይꬃን ዮዳሄይ ምንድ ማቶ ሀላቃታ ይሮሃማ ናኣ አዛርያሳ፥ ይሆና ናኣ ይስማኤላ፥ ኦቤዳ ናኣ አዛርያሳ፥ አዳያ ናኣ ማእሰያነ ዝክራ ናኣ ኤልሳፋፃ ሺሽድ ኤንታራ ጫቅስ።
2CH 23:2 ኤንቲ ይሁዳ ኡባ ብድ ያን ደእያ ሌወታነ እስራኤለ ያራታ ሀላቃታ ኡባ ኤክድ የሩሳላመ ይዶሶና።
2CH 23:3 ሄ ሺቅዳ አሳ ኡባይ ፆሳ ኬꬃን ካዉዋራ ጫቅዶሶና። ዮዳሄይ፥ “ካዋ ናኣ ሀይሳ በእተ! ጎዳይ ካሰ ዳዊታ ኮቻስ ቃላ ገልዳይሳዳ እ ካዎቶ።
2CH 23:4 ህንተ ኦꬃናዉ በሲያባይ ሀይሳ፤ ሳምባታ ጋላስ ፆሳ ኬꬅ ገልያ ካህነታፐነ ሌወታፐ ስኮይ ፐንግያ ናግተ።
2CH 23:5 ቃስ ስኮይ ካዎ ጋꬎ ናግተ፤ ስኮይ ቃስ ባሶ ፐንግያ ናግተ። አሳ ኡባይ ፆሳ ኬꬃ ዳባባን ሺቆ።
2CH 23:6 ኦꬅያ ካህነታፐነ ሌወታፐ አትሽን፥ ኦንካ ፆሳ ኬꬅ ገሎፖ። ኤንቲ ጌሽ ግድያ ግሾ ገሎና፤ ሽን ሀራ አሳ ኡባይ ጎዳ ኪታ ናግሸ ፆሳ ኬꬃፈ ካረራ ደኦ።
2CH 23:7 “ሌወት ኦላ ሚሸ ባንታ ኩሸን ኩሸን ኦይክድ ካዋ ግዶይድ እ ከይያ ዎደነ ገልያ ዎደ እያራ ግዶ። ፆሳ ኬꬅ ገልያ ኦንካ ሀይቆ” ያግስ።
2CH 23:8 ሌወትነ ይሁዳ አሳ ኡባይ ካህነይ ዮዳሄይ ኪትዳ ኡባ ኦꬅዶሶና። ካህነይ ዮዳሄይ ኦሶፐ ከያናዉ በሲያ ሌወታ ከስድ የድቦና ግሾ፥ እሶይ እሶይ ሳምባታ ጋላስ ኦሶ ገለይሳታነ ኦሶፐ ከይያ ባ አሳ ኤክስ።
2CH 23:9 ካህነይ ዮዳሄይ ፆሳ ኬꬃን ደእያ፥ ካዋ ዳዊታ ቶራ፥ ግታነ ጉꬃ ጎንዳለታ ቶራ ሞጮናታስ እሚስ።
2CH 23:10 ካህነይ ዮዳሄይ አሳ ኡባይ ኦላ ሚሸ ባ ኩሸን ኩሸን ኦይክድ ፆሳ ኬꬃ ዱገሀፐ ፑደሀ ጋካናዉ ያርሾ በሳ ማታንነ ፆሳ ኬꬃ ማታን ካዋ ዩሾን ኤቃናዳ ኦꬅስ።
2CH 23:11 ዮዳሄ ካዋ ናኣ እዮኣሳ ካረ ከስድ፥ እያ ሁጰን ካላቻ ዎꬅስ፤ ካዎታ ህገ ማፃፋ እያዉ እምድ ካዎይስ። ዮዳሄይነ እያ ናይት እዮኣሳ ትይድ፥ “ካዎይ ብራታ ቱሱ ግዶ” ያግዶሶና።
2CH 23:12 አሳይ የፅሸነ ካዋ ሳቢሸ ኡፋይተይሳ ጎቶላ ስእዳ ዎደ አሳኮ ፆሳ ኬꬅ ባሱ።
2CH 23:13 ካዎይ ፐንገን ቱሳ ማታን ኤቅዳይሳ በአሱ። ሀላቃትነ ዛየ ፑነይሳት ካዋ ማታን ደኦሶና፤ ይሁዳ አሳ ኡባይ ኡፋይትሸ ዛየ ፑኖሶና፤ ማዝሙረ የፀይሳት ስን አꬍድ ባንታ የꬃ ሚሸን ጋላቶሶና። ጎቶላ ባ ማኡዋ ፔꬋዳ፥ “ሀይስ ጌላተꬅ! ሀይስ ጌላተꬅ!” ያጋዳ ዋሳሱ።
2CH 23:14 ካህነይ ዮዳሄይ ቶራ ሞጮናታኮ፥ “ጎቶላ ፆሳ ኬꬃን ዎꬎፕተ፤ እዮ ሳልፕያ ግዶራ አꬅድ ካረ ከስተ፤ እዮ አሻናዉ ኮይያ አስ ደእኮ ዎꬍተ!” ያግስ።
2CH 23:15 ሄሳ ግሾ፥ ኤንቲ እዮ ኦይክድ ካዎ ጋꬎ ኤፍድ ፓራ ፐንገን እዮ ዎꬍዶሶና።
2CH 23:16 ካህነይ ዮዳሄይ ባ ሁጰን፥ አሳ ኡባይነ ካዎይ፥ ጎዳ አስ ግዳናዉ ጫቅዶሶና።
2CH 23:17 ሄ ዎደ አሳ ኡባይ ባኣለ ኤቃ ኬꬅ ብድ፥ ኬꬃ ላልድ፤ ያርሾ በሳታነ ምስለታ ትንቸረꬅዶሶና። ማታና ጌተትያ ባኣላ ካህንያ ያርሾ በሳታ ስንꬃን ዎꬍዶሶና።
2CH 23:18 ዮዳሄይ ካህነታነ ሌወታ ፆሳ ኬꬃ ኦሱዋስ ሀላቃ ኦꬅድ ሹምስ። ኤንታ ኦሶይ ሙሰ ህግያን ፃፈትዳይሳዳነ ካዎይ ዳዊቲ ኦድዳይሳዳ ያርሾ ያርሻናይሳ። ቃስ ካዎይ ዳዊቲ ኦድዳይሳዳ ማዝሙረ የፅሸ ቦንቻናይሳ።
2CH 23:19 ህግያን ፃፈትዳይሳዳ ቱና አስ ገሎና መላ ዮዳሄይ ፆሳ ኬꬃ ፐንገን ናገይሳታ ዎꬅስ።
2CH 23:20 ዮዳሄይ ቶራ ሞጮናታ፥ ግታ አሳታ፥ ደርያ ሃረይሳታነ ሄ ቢታ አሳ ኡባ ኤክድ ካዋ ፆሳ ኬꬃፈ ዱገ ኤህስ። ቆሞ ባጋ ፐንገራ ካዎ ጋꬎ ገልድ ካዋ አራታ ቦላ ኡትስዶሶና።
2CH 23:21 ይሁዳ አሳ ኡባይ ኡፋይትስ። ጎቶላ ማሻን ሀይቅዳፐ ጉየ ካታማይ ዎፑ ግስ።
2CH 24:1 እዮኣስ ካዎትያ ዎደ እያዉ ላይꬅ ላፑና፤ እ የሩሳላመን ኦይታሙ ላይꬅ ካዎትስ። እያ አየ ሱንꬃይ ሳቦ፤ እያ በርሳበ ማጫስ።
2CH 24:2 ካህነይ ዮዳሄይ ደእዳ ላይꬃ ኡባን እዮኣስ ጎዳ ስንꬃን ሱረባ ኦꬅስ።
2CH 24:3 ዮዳሄይ ካዋ እዮኣሳስ ናምኡ ማቾ እምን ኤንቲ እያዉ አደ ናይታነ ማጫ ናይታ የልዶሶና።
2CH 24:4 ጉꬃ ዎደፐ ጉየ እዮኣስ ፆሳ ኬꬃ ኦራꬃናዉ ቆፕስ።
2CH 24:5 እዮኣስ ካህነታነ ሌወታ ሺሽድ፥ “ይሁዳ ብድ ህንተ ፆሳ ኬꬃ ላይꬃን ላይꬃን ኦራꬃናዉ እስራኤለ ኡባፈ ሚሸ ሺሽተ፤ ሄሳ ሀእ ኤለስድ ኦꬅተ” ያግስ። ሽን ሌወት ኤለስድ ኦꬅቦኮና።
2CH 24:6 ሄሳ ግሾ፥ ካዎይ ካህነ ሀላቃ ዮዳሄ ፄግድ፥ “ጎዳ አይለይ ሙሰይነ የሩሳላመ አሳይ ፆሳ ዱንካንያ ኦሱዋስ ከሳና መላ ኪትዳ ጊራ የሩሳላመፐነ ይሁዳፐ ሺሻና መላ ሌወታ አይስ ኪታብኪ?” ያግስ።
2CH 24:7 ሄ ዎደ ኢታ ማጫሰ ጎቶላ ናይት ፆሳ ኬꬃ መንꬅዶሶና። ኤንቲ ጎዳ ኬꬃን ደእያ ጌሻ ሚሸ ኡባ ኤክድ ባኣለ ጎይናናዉ ጎኤትዶሶና።
2CH 24:8 ካዎይ ሌወታ ኪትን፥ ኤንቲ ሳፅነ ጊግስድ፥ ፆሳ ኬꬃ ፐንግያፈ ካረ ባጋራ ዎꬆሶና።
2CH 24:9 ፆሳ አይለይ ሙሰይ መላ ቢታን ደእሸ፥ እስራኤለ አሳፐ ሺሻና መላ ኪትዳ ጊራ ጎዳስ ኤሀና መላ ይሁዳንነ የሩሳላመን ሌወት አዋጅዶሶና።
2CH 24:10 ሀላቃትነ አሳ ኡባይ ኡፋይትድ ሳፅነይ ኩማና ጋካናዉ ጊራ የግዶሶና።
2CH 24:11 ሳፅነይ ሌወታ ባጋራ ካዎ ሞርናታኮ ጋክን ሳፅንያ ግዶን ዳሮ ሚሸይ ዳጋየትዳይሳ በእዳ ዎደ ኡባን ካዎ ፃፈይነ ካህነ ሀላቃይ ይድ ሳፅንያፐ ሚሸ ከስድ ሳፅንያ በሳን ዛር ዎꬆሶና። ኤንቲ ኡባ ዎደ ሄሳ ኦꬅድ ዳሮ ሚሸ ዳጋይዶሶና።
2CH 24:12 ሄ ሚሽያ ካዎይነ ዮዳሄይ ፆሳ ኬꬃ ኦሱዋ ኦꬃና መላ ሹመትዳ አሳታስ እሞሶና። ኤንቲ ፆሳ ኬꬃ ኦራꬃናዉ ሹቹ ማሰይሳታ፥ አናፀታ፥ ብራታነ ናሰ ብራታ ኦሳንቾታ ቃፃርዶሶና።
2CH 24:13 ኦሳንቾት ፆሳ ኬꬃ ምን ኦꬅድ ካሰይሳዳ ኦራꬅዶሶና።
2CH 24:14 ፆሳ ኬꬃ ኦራꬆ ኦሶይ ዉርዳ ዎደ ፓላህዳ ዎርቃነ ብራ ካዋኮነ ዮዳሄኮ ኤህዶሶና። ኤንቲ ሄ ዎርቃነ ብራ ፆሳ ኬꬃ ጋꬃ ኦሱዋስ ጎኤትያ ሚሸታ፥ ፁሳ ያርሾስ ሀንያ ሳነታነ ሀራ ዱማ ዱማ ሚሸታ ኦꬅዶሶና። ዮዳሄይ ደእዳ ላይꬃን ኡባን ፆሳ ኬꬃን ፁሳ ያርሾይ ያርሸቴስ።
2CH 24:15 ዮዳሄይ ዳሮ ጭምድ ሀይቅስ፤ እ ሀይቅያ ዎደ እያዉ ላይꬅ ፄታነ ሀስታማ።
2CH 24:16 ዮዳሄይ እስራኤለን ፆሳስነ ፆሳ ኬꬃስ ሎኦባ ኦꬅዳ ግሾ ዳዊታ ካታማን ካዎታ ዱፎን እያ ሞግዶሶና።
2CH 24:17 ዮዳሄይ ሀይቅዳፐ ጉየ ይሁዳ ሀላቃት ይድ ካዋ ስንꬃን ጉፋንዶሶና፤ ካዎይ ኤንታ ኦይሻ ስእስ።
2CH 24:18 ኤንቲ ጎዳ ባንታ ማይዛታ ፆሳ ኬꬃ አግድ፥ አሼር ምስለታነ ኤቃታ ጎይንዶሶና። ኤንቲ ቆሁዋ ግሾ ይሁዳ ቦላነ የሩሳላመ ቦላ ጎዳ ሀንቆይ ዎꬍስ።
2CH 24:19 ኤንታ ዛራና መላ ጎዳይ ናበታ ኤንታኮ ኪትስ። ናበት ኤንታዉ ማርካትዶሶና፤ ሽን ኤንቲ ስኦና እፅዶሶና።
2CH 24:20 ሄሳፈ ጉየ፥ ካህንያ ዮዳሄ ናኣ ዛካርያሳ ቦላ ፆሳ አያናይ ዎꬍን ዛካርያስ አሳ ስንꬃን ኤቅድ፥ “ፆሳይ፥ ‘ህንተ ጎዳ ኪታ አይስ መንቲ? ሄስ ህንተዉ ኢታ። ህንተ ጎዳ አግዳ ግሾ እካ ህንተና አግስ’ ” ያጌስ።
2CH 24:21 ኤንቲ እያ ቦላ ማቀትዶሶና። ካዎይ ኤንታ ኪትን፥ ፆሳ ኬꬃ ዳባባን፥ እያ ሹቻን ጫድድ ዎꬍዶሶና።
2CH 24:22 ካዎይ እዮኣስ ዛካርያሳ አዋይ ዮዳሄይ እያዉ ኦꬅዳ ኬሀተꬃ ሀሳዮና አግድ እያ ናኣ ዛካርያሳ ዎꬍስስ። ዛካርያስ ሀይቅሸ፥ “ጎዳይ ሀይሳ በኦ፤ እ ሀሎ ከዮ” ያግስ።
2CH 24:23 ላይꬃ ላመን፥ ሶረ ኦላንቾት እዮኣሳ ኦላናዉ ይዶሶና። ይሁዳነ የሩሳላመ ኦልድ ሀላቃታ ኡባ ዎꬍድ፥ ድኡዋ ኤክድ ዳማስቆን ደእያ ባንታ ካዋስ የድዶሶና።
2CH 24:24 ሶረ ኦላንቾት ታይቦን ጉꬃ፤ ሽን ይሁዳ አሳይ ጎዳ ባንታ አዋታ ፆሳ አግዳ ግሾ፥ ጎዳይ ዳሮ ግድዳ ኤንታ ኦላንቾታ ሶረ ኦላንቾታ ኩሸን አꬅድ እሚስ። ኤንቲ ሀይሳዳ ኦꬅድ እዮኣሳ ቦላ ፕርድዶሶና።
2CH 24:25 ሶረ ኦላንቾት እያፐ ሻከትያ ዎደ እዮኣስ ዳሮ ማዱንፅድ ደኤስ። ካህንያ ዮዳሄ ናኣ ሱꬃ ግሾ እያ ሹማት እያ ቦላ ማቀትድ፥ እ ባ ሂፃን ዝንእዳሽን ዎꬍዶሶና። እ ሀይቅን ዳዊታ ካታማን ሞግዶሶና፤ ሽን ካዎታ ዱፎን እያ ሞግቦኮና።
2CH 24:26 እዮኣሳ ቦላ ማቀትዳይሳት አሞነ ማጫሰ ስማት ናኣ ዛባዳነ ሞአበ ማጫሰ ስማርት ናኣ ዮዛባታ።
2CH 24:27 ሄኮ፥ እዮኣሳ አደ ናይታ ታርከይ፥ እያዉ ኦደትዳ ትንብተይነ እ ፆሳ ኬꬃ ኦራꬅዳባይ ካዎታ ታርከ ማፃፋን ፃፈትድ ደኤስ። እዮኣስ ሀይቅን እያ በሳን እያ ናአይ አማስያስ ካዎትስ።
2CH 25:1 አማስያስ ካዎትያ ዎደ እያዉ ላይꬅ ላታማነ እቻሻ፤ እ የሩሳላመን ላታማነ ኡዱፉን ላይꬅ ካዎትስ። እያ አየ ሱንꬃይ ዮኣዶ፤ እያ የሩሳላመ ማጫስ።
2CH 25:2 አማስያስ ጎዳ ስንꬃን ሱረባ ኦꬅስ፤ ግዶሽን፥ ኩመꬃ ዎዛናፐ ግደና።
2CH 25:3 አማስያስ ካዎተꬃ ምንꬅዳፐ ጉየ ባ አዋ ዎꬍዳ አሳታ ዎꬍስ።
2CH 25:4 ግዶሽን፥ ኤንታ ናይታ ዎꬍቤና። ኤንታ ናይታ ዎꬎና አግዳ ጋሶይ፥ ጎዳይ፥ ሙሰ ህገ ማፃፋን ኪትዳይሳዳ፥ “ናይት ኦꬅዳ ናጋራ ግሾ አዋታ ዎꬋናዉ በሰና፤ አዋት ኦꬅዳ ናጋራ ግሾ ናይታ ዎꬋናዉ በሰና። አስ ኡባይ ባ ኦꬅዳ ናጋራን ናጋራን ሀይቃናዉ በሴስ” ያግዳ ግሾሳ።
2CH 25:5 አማስያስ ይሁዳ አሳ ሺሽድ ባንታ አዋታ ኬꬃን ኬꬃን ሻላቃታነ ማቶ ሀላቃታ ሹምስ። እ ላታሙ ላይꬅነ እያፐ ቦላ ግድዳ ይሁዳ ኮቻታነ ብንያመ ኮቻታ ኡባ ታይብድ ጎንዳለነ ቶራ ኦይክድ ኦላስ ጊግዳ ሄꬑ ፄቱ ሙኩሉ ዶረትዳ አሳታ ደምስ።
2CH 25:6 እስራኤለፐ እስ ፄቱ ሙኩሉ ምኖ አሳታ ሄꬑ ሙኩሉነ ኦይዱ ፄቱ ክሎ ግራመ ብራን አማስያስ ሻምስ።
2CH 25:7 ሽን እስ ፆሳ አስ እያኮ ይድ፥ “ካዋዉ፥ ጎዳይ እስራኤለራነ ኤፍሬማራ ዶና ግሾ፥ እስራኤለ ኦላንቾት ኔራ ቦፖ።
2CH 25:8 ኤንቲ ታና ምንꬃና ጋዳ ነ ቆፕኮ፥ ፆኖይነ ፆነተꬅ ፆሳባ ግድያ ግሾ ፆሳይ ነና ነ ሞርከታ ስንꬃን ካዉሻና። ግዶሽን፥ ነ ፃላላ ባ፤ ምናዳ ኦለታ” ያግስ።
2CH 25:9 አማስያስ ፆሳ አድያኮ፥ “ታኒ እስራኤለ ኦላንቾታስ ቃንፅዳ ብራይ ኡባይ ዋናኔ?” ያግስ። ፆሳ አደይ፥ “ጎዳይ ነዉ ሄሳፈ አꬅድ እማናዉ ዳንዳኤስ” ያግስ።
2CH 25:10 ሄሳ ግሾ፥ አማስያስ ኤፍሬማፐ ይዳ ኦላንቾት ባንታ ሶ ሶ ባና መላ ኦꬅስ። ኤንቲ ይሁዳ አሳ ቦላ ዳሮ ሀንቀትሸ ባንታ ሶ ሶ ስምዶሶና።
2CH 25:11 ሄሳፈ ጉየ፥ አማስያስ ባና ምንꬅድ፥ ባ ኦላንቾታ ካለꬅድ፥ ማፅነ ዛንጋራ ብን እያ ኦላንቾት ሳይረፐ ታሙ ሙኩሉ አሳ ዎꬍዶሶና።
2CH 25:12 ሀራ ታሙ ሙኩሉ ኦላንቾታ ፓፃ ድእድ፥ ኤንታ አፎ ዶና ኤፍድ፥ አፉዋን ዱገ ሆልን፥ ጋርሳን ደእያ ሹቻን አሳ ኡባይ መቀረትድ ዉርዶሶና።
2CH 25:13 ሽን ሄ ዎደ አማስያስ ባራ ኦላስ ቦና መላ ጉየ ዛርዳ እስራኤለ ኦላንቾት ሳማረፐ ቤት-ሆሮና ጋካናዉ ደእያ ይሁዳ ካታማታ ኦልዶሶና። ኤንቲ ይሁዳ አሳፐ ሄꬑ ሙኩሉ ዎꬍድ ዳሮ ድኦ ኤክዶሶና።
2CH 25:14 አማስያስ ኤዶመታ ዎꬍድ ስምያ ዎደ ኤንታ ኤቃታ ኤክድ ይስ። ኤንታ ፆሰ ኦꬅ ኤስድ ኤንታ ጎይንስ፤ እፃነ ጩይስስ።
2CH 25:15 ጎዳ ሀንቆይ አማስያሳ ቦላ ኤፅን፥ ጎዳይ አማስያሳኮ ናበ ኪትስ። ሄ ናበይ ብድ፥ “ባንታ አሳ ነ ኩሸፐ አሻናዉ ዳንዳእቦና ፆሳታ አይስ ዞረ ኦይቻዲ?” ያግስ።
2CH 25:16 ናበይ ቡሮ ኦዳ ቦላ ደእሽን ካዎይ፥ “ነና ካዎ ዞርያ አስ ኦꬅዳይ ኦኔ? ስእ ጋ! ነ አይስ ሀይቃናዉ ኮያይ?” ያግስ። ናበይ ኦዳ ኤስድ፥ “ነ ሀይሳ ኦꬅዳ ግሾነ ታ ዞርያ ስኦና እፅዳ ግሾ ፆሳይ ነና ꬋይሳናዉ ቆፕዳይሳ ሀእ ኤራስ” ያግስ።
2CH 25:17 ሄሳፈ ጉየ፥ ይሁዳ ካዎይ አማስያስ ባና ዞርያ አሳታራ ዞረትድ፥ እስራኤለ ካዋ እዩ ናኣ ናኣ፥ እዮአካዛ ናኣ፥ እዮኣሳኮ አሰ ኪትድ፥ “ሃያ፤ አነ ናምአይ ኦላ ጋሄቶስ” ያግድ ማንድስ።
2CH 25:18 እስራኤለ ካዎይ እዮኣስ ይሁዳ ካዋ አማስያሳኮ ሀይሳዳ ያግስ፤ “ልባኖሰን ደእያ ክንቾተይ ልባኖሰን ደእያ ዝጋኮ ኪታ የድድ፥ ‘ነ ናእዉ ታ ናኣስ እማ’ ያግስ። ሽን ልባኖሰን ደእያ እስ ዶእ ያራ አꬍሸ ክንቾትያ የꬍስ።
2CH 25:19 ‘ታኒ ኤዶመ ፆናስ’ ጋዳ ነ ዎዛናን ኦቶሮን ኩማዳሳ። ሽን ሀእ ነ ሶን ዎፑ ጋዳ ኡታ፤ ነ ቦላነ ይሁዳ ቦላ መቶነ ꬋዮ ኤሀናዉ አይስ ደንꬃይ?” ያግድ ዛርስ።
2CH 25:20 ሽን አማስያስ ስኦና እፅስ። ኤንቲ ኤዶመ ፆሳታ ጎይንዳ ግሾ ፆሳይ ኤንታ፥ ኤንታ ሞርከታ ኩሸን አꬅድ እማናዉ ኮይስ።
2CH 25:21 ሄሳ ግሾ፥ እስራኤለ ካዎይ እዮኣስ ኦላናዉ ከይን እነ ይሁዳ ካዎይ አማስያስ ይሁዳን ደእያ ቤት-ሳሜሳን ኦላ ጋሄትዶሶና።
2CH 25:22 ይሁዳ አሳይ ፆነትዶሶና፤ ይሁዳ አሳ ኡባይ ባቃትድ ባንታ ሶ ሶ ብዶሶና።
2CH 25:23 ካዎይ እዮኣስ አካዝያሳ ናኣ ናኣ፥ እዮኣሳ ናኣ፥ ይሁዳ ካዋ አማስያሳ ቤት-ሳሜሳን ድእድ፥ የሩሳላመ ኤህስ። ኤፍሬማ ድርሳ ፐንግያፈ ብድ ማዛነ ፐንግያ ጋካናዉ ደእያ ኦይዱ ፄቱ ዋꬋ ግድያ የሩሳላመ ድርሳ ግምብያ ላልስ።
2CH 25:24 ፆሳ ኬꬃን ደእያ ዎርቃነ ብራ ኡባ፥ ኦቤድ-ኤዶመይ ናግያ ሚሽያነ ካዎ ጋꬎን ደእያ ሚሽያ ኡባ ኤክስ፤ ቃስ ኦይꬁ ኦꬅድ ኦይክዳ አሳታ ኤክድ ሳማረ ስምስ።
2CH 25:25 እዮአካዛ ናአይ፥ እስራኤለ ካዎይ እዮኣስ ሀይቅዳፐ ጉየ እዮኣሳ ናአይ፥ ይሁዳ ካዎይ አማስያስ ታማነ እቻሹ ላይꬅ ደእስ።
2CH 25:26 አማስያስ ኦꬅዳባ ኡባይ ኮይሮፐ ዉርሰꬅ ጋካናዉ ይሁዳ ካዎታነ እስራኤለ ካዎታ ታርከ ማፃፋን ፃፈትድ ደኤስ ግደኔ?
2CH 25:27 አማስያስ ጎዳ ካሎ አግዳፐ ጉየ ኤንቲ እያ ቦላ የሩሳላመን ማቀትዶሶና። እ ላክሶ ባቃትስ። ሽን ኤንቲ እያ ጌዶ አሰ ኪትን ኤንቲ እያ ያን ዎꬍዶሶና።
2CH 25:28 እያ አሀ ፓራን ጫን ኤህድ፥ ዳዊታ ካታማን እያ ማይዛታራ ሞግዶሶና።
2CH 26:1 ሄሳፈ ጉየ፥ ይሁዳ አሳ ኡባይ ታማነ ኡሱፑን ላይꬅ ግድዳ ኦዝያና እያ አዋ አማስያሳ በሳን ካዎꬅዶሶና።
2CH 26:2 እያ አዋይ አማስያስ ሀይቅዳፐ ጉየ እ ኤሎታ ካታማ ዛር ኬፅስ።
2CH 26:3 ኦዝያን ካዎትያ ዎደ እያዉ ላይꬅ ታማነ ኡሱፑና፤ እ የሩሳላመን እሻታማነ ናምኡ ላይꬅ ካዎትስ። እያ አየ ሱንꬃይ ይኮሎ፤ እያ የሩሳላመ ማጫስ።
2CH 26:4 እያ አዋይ አማስያስ ኦꬅዳይሳዳ እካ ጎዳ ስንꬃን ሱረባ ኦꬅስ።
2CH 26:5 ፆሳስ ያሽ ታማርስዳ ዛካርያሳ ዎደ እ ፆሳስ አማነትድ ኦꬅስ። ጎዳ እ ኮይዳ ዎደ ኡባን ፆሳይ እያ አንጅስ።
2CH 26:6 ኦዝያን ፍልስፄመታራ ኦለታናዉ ከይድ ጋተ ካታማነ እያ ሄራ፥ ያብና ካታማነ እያ ሄራነ አሽዶዳ ካታማነ እያ ሄራ ላልስ። ያትድ አሽዶዳ ካታማ ማታንነ ፍልስፄመ ግዶን ካታማታ ኬፅስ።
2CH 26:7 ፆሳይ ኦዝያናስ ፍልስፄመታ፥ ጉርባላን ደእያ አራበታነ ማኡነታ ቦላ ፆኖ እሚስ።
2CH 26:8 አሞነት ኦዝያናስ ጊርዶሶና። ኦዝያን ዳሮ ምንዳ ግሾ እያ ሱንꬃይ ግብፀ ዛዋ ጋካናዉ ከይስ።
2CH 26:9 ኦዝያን ማዛነ ፐንግያ ማታን፥ ዛንጋራ ፐንግያ ማታንነ ድርሳ ማዛንያ ማታን አዱሳ ግምበ ሻኮታ ኤስድ፥ የሩሳላመ ባሱዋ ምንꬅስ።
2CH 26:10 እያዉ ዙማ ፃጶንነ ደንባን ዳሮ መሄይ ደእያ ግሾ ሄ በሳታን አዱሳ ግምበ ሻኮታ ግምብድ ዳሮ ሃꬃ ኦላታ ቦክስ። እ ጎሸ ዶስያ ግሾ ደረ ቦላነ አራዳ ቢታን እያዉ ዳሮ ጎሻንቾትነ ዎይነይ ቶከይሳት ደኦሶና።
2CH 26:11 ኦዝያናስ ኦላስ ጊግዳ ዳሮ ኦላንቾት ደኦሶና። ኦላንቾታ ፃፈይ ይኤልነ ሀላቃይ ማእሰይ ኦላንቾታ ሱንꬃ ማዝጋበን ፃፍዶሶና። ኤንታ ሀላቃይ ሀናና።
2CH 26:12 ባንታ አዋታ ሶ አሳ ቦላ ሀላቃትያ ምኖ አሳት ናምኡ ሙኩሉነ ኡሱፑን ፄታ።
2CH 26:13 ካዋ ሞርከታራ ኦለትድ፥ ባንታ ኩመꬃ ዎልቃን ካዋ ማዳናዉ ከይያ ሄꬑ ፄታነ ላፑን ሙኩሉነ እቻሹ ፄቱ ኦላንቾት ኤንታ ጋርሳን ደኦሶና።
2CH 26:14 ኦዝያን ኦላንቾታ ኡባስ ጎንዳለ፥ ቶራ፥ ብራታ ባርኔፃ፥ ትራን ማእያ ፁሩረ፥ ዶንገነ ያምባርሻ ሹቹ ጊግስስ።
2CH 26:15 ኦዝያን የሩሳላመን ደእያ ሂላንቾት ዎችያ አዱሳ ግምበ ሻኮታነ ካታማ ድርሳ ግምበ ማዛነታ ቦላ ዶንገ ዱክያ ሚሸታነ ግታ ግታ ሹቻታ ፕፅርድ ሆልያ ሚሸታ ኦስስስ። ፆሳይ እያ ማድን እ ዳሮ ምንስ፤ እያ ሱንꬃይ ኡባ በሳን ከይስ።
2CH 26:16 ሽን ኦዝያን ምንዳ ዎደ ኦቶርትስ፤ ኦቶሮይ እያ ኩንደꬃስ ጋꬅስ። ኦዝያን ጎዳ ባ ፆሳ አማነቶና እፅድ እፃነ ጩይስያ በሳን እፃነ ጩይሳናዉ ፆሳ ኬꬅ ገልስ።
2CH 26:17 ካህነይ አዛርያስነ ምኖ ግድዳ ሆስፑን ታሙ ጎዳ ካህነት እያ ካልድ ገልዶሶና።
2CH 26:18 ካህነት እያኮ፥ “ኦዝያና፥ ኔኒ ጎዳስ እፃነ ጩይሳናዉ በሳካ። እፃነ ጩይሳናዉ በሰይ፥ ጌይድ ደእያ አሮና ኮቸ ግድዳ ካህነት ፃላላ። ሀ ጌሻ በሳፈ ከያ! ኔኒ ጎዳ ፆሳ ቦላ ናጋራ ኦꬃዳሳ፤ ኔኒ እያፐ ቦንቾ ደማካ” ያግዶሶና።
2CH 26:19 ግዶሽን፥ እፃነ ጩይሳናዉ ባ ኩሸን እፃነ ጩይስያ ሚሸ ኦይክድ ደእሸ ሀንቀትስ። ኦዝያን ካህነታ ሀንቀትሸ ፆሳ ኬꬃን እፃነ ጩይስያ በሳ ማታን ካህነታ ስንꬃን ኤቅዳሽን፥ እያ ሶምኦን ባሮ ሀርገይ በንትስ።
2CH 26:20 ካህነ ሀላቃይ አዛርያስነ ሀራ ካህነት ኡባይ እያ ፄልያ ዎደ እያ ሶምኦን ባሮ ሀርገይ በንትዳይሳ በእድ፥ ኤለስድ እያ ፆሳ ኬꬃፈ ከስዶሶና። እካ ጎዳይ እያ ሴርዳይሳ ኤርዳ ግሾ ኤለስድ ያፐ ከይድ ብስ።
2CH 26:21 ካዎይ ኦዝያን ሀይቃና ጋካናዉ ሄ ሀርግያራ ደእስ፤ ፆሳ ኬꬅ ገሎና መላ ድገትስ። ሄ ሀርግያ ጋሶን ዱማ ኬꬃን ባርካ ደእስ። ሄ ዎደ እያ ናአይ እዮአታም፥ ካዎ ጋꬎ አዋተꬃን ኦይክድ ቢታ ሃሬስ።
2CH 26:22 ካዎይ ኦዝያን ኦꬅዳ ሀራባ ኡባ ኮይሮፐ ዉርሰꬅ ጋካናዉ አሞፀ ናአይ፥ ናበይ እሳያስ ፃፍስ።
2CH 26:23 ኦዝያን ሀይቅድ ባ ማይዛታ ጋክስ። አሳይ እያ፥ “ባሮ ሀርገን ኦይከትዳይሳ” ያግድ፥ ካዎታ ዱፉዋ ማታን ሞግዶሶና። እ ሀይቅን እያ በሳን እያ ናአይ እዮአታም ካዎትስ።
2CH 27:1 እዮአታም ካዎትያ ዎደ እያዉ ላይꬅ ላታማነ እቻሻ፤ እ የሩሳላመን ታማነ ኡሱፑን ላይꬅ ካዎትስ። እያ አየ ሱንꬃይ ያሩሾ፤ እያ ሳዶቃ ናአ።
2CH 27:2 እያ አዋይ ኦዝያን ኦꬅዳይሳዳ እዮአታም ጎዳ ስንꬃን ሱረባ ኦꬅስ። እያ አዋይ ፆሳ ኬꬅ ገልዳይሳዳ እ ገልበና፤ ግዶሽን፥ አሳይ ናጋራ ኦሶ አግቤና።
2CH 27:3 እዮአታም ፆሳ ኬꬅ ገልያ ቆሞ ፐንግያ ዛሪድ ኦꬅስ፤ የሩሳላመ ኦፌላ ደርያ ቦላ ዳሮ ኦሶ ኦꬅስ።
2CH 27:4 ደረይ ዳርያ ይሁዳ ቢታን ካታማታ ኬፅስ፤ ዎር ዳርያ ዙማ ቦላ ሚፃነ አዱሳ ግምበ ሻኮታ ግምብስ።
2CH 27:5 እዮአታም አሞነ ካዉዋራ ኦለትድ ፆንስ። አሞነት ሄ ላይꬅ ሄꬑ ሙኩሉነ ኦይዱ ፄቱ ክሎ ግራመ ብራ፥ ታሙ ሙኩሉ ኩንታለ ግድያ ግስተነ ታሙ ሙኩሉ ኩንታለ ግድያ ባንጋ እያዉ ጊርዶሶና። አሞነት ናምአንꬆ ላይꬅነ ሄꬓንꬆ ላይꬅ ሄሳዳ እያዉ ጊርዶሶና።
2CH 27:6 እዮአታም ጎዳ ባ ፆሳ ስንꬃን ሱረ ሄመትዳ ግሾ ዳሮ ምንስ።
2CH 27:7 እዮአታማ ዎደ ኦሰትዳ ኦሶት፥ እ ኦለትዳ ኦላይነ እ ኦꬅዳባ ኡባይ እስራኤለ ካዎታነ ይሁዳ ካዎታ ታርከ ማፃፋን ፃፈትስ።
2CH 27:8 እዮአታም ካዎትያ ዎደ እያዉ ላይꬅ ላታማነ እቻሻ፤ እ የሩሳላመን ታማነ ኡሱፑን ላይꬅ ካዎትስ።
2CH 27:9 እዮአታም ሀይቅድ ባ ማይዛታ ጋክስ። ኤንቲ እያ ዳዊታ ካታማን ሞግዶሶና። እያ በሳን እያ ናአይ አካዝ ካዎትስ።
2CH 28:1 አካዝ ካዎትያ ዎደ እያዉ ላይꬅ ላታማ፤ እ የሩሳላመን ታማነ ኡሱፑን ላይꬅ ካዎትስ። አካዝ ባ ማይዛይ ዳዊቲ ሱረባ ኦꬅዳይሳዳ ጎዳ ስንꬃን ሱረባ ኦꬅቤና፤
2CH 28:2 እ ካሰ ደእዳ እስራኤለ ካዎታ ኦግያን ሄመትስ። ጉጅድ፥ ባኣለ ኤቃ ጎይናናዉ ምስለታ መꬍስ።
2CH 28:3 ህኖማ ዛንጋራን እፃነ ጩይስስ፤ ጎዳይ እስራኤለ አሳ ስንꬃፈ ጎድድ ከስዳ አሳ፥ እፀትዳ ኦግያ ካልድ ባ አደ ናይታ ታማን ፁግድ ኤቃስ ያርሽስ።
2CH 28:4 አካዝ ꬎቃ ጎይኖ በሳታን፥ ደረ ሁጰነ ምꬃ ኩያ ጋርሳን ያርሾ ያርሽስነ እፃነ ጩይስስ።
2CH 28:5 ሄሳ ግሾ፥ ጎዳይ እያ ፆሳይ እያ ሶረ ካዋ ኩሸን አꬅድ እሚስ። ኤንቲ እያ ፆንድ፥ እያ አሳፐ ዳሮታ ድእድ፥ ዳማስቆ ኤፍዶሶና። ቃስ፥ ጎዳይ እያ እስራኤለ ካዋ ኩሸን አꬅድ እምን፥ ካዎይ ኢታ ሾች ሾጭስ።
2CH 28:6 ይሁዳ አሳይ ጎዳ፥ ባንታ ማይዛታ ፆሳ አግዳ ግሾ ራማላ ናአይ ፓቁሄይ ይሁዳ ኦላንቾታፐ እስ ፄታነ ላታሙ ሙኩሉ ምኖ አሳታ እስ ጋላስ ዎꬍስ።
2CH 28:7 ኤፍሬማ ኮቸ ግድዳ ምኖ ኦላንቾይ ዝክር፥ ካዋ ናኣ ማእሰያ፥ ካዎ ጋꬎ ሹማ አዝርቃማነ ካዋ ካልድ ደእያ ኤልቃና ዎꬍስ።
2CH 28:8 እስራኤለ አሳይ ባንታ ዳቦታፐ ናምኡ ፄቱ ሙኩሉ ማጫሳ፥ አደ ናይታነ ማጫ ናይታ ድእዶሶና፤ ኤንቲ ዳሮ ድኡዋ ኤክድ ሳማረ ብዶሶና።
2CH 28:9 ጎዳ ናበይ ኦዴዳ ጌተትያ አደይ ሳማረን ደኤስ። ኦዴድ ሳማረ ብያ ኦላንቾታራ ጋሄታናዉ ከይድ፥ “ጎዳይ፥ ህንተ አዋታ ፆሳይ ይሁዳ ሀንቀትዳ ግሾ ህንተ ኩሸን አꬅድ እሚስ። ሽን ህንተ ኤንታ ሳሎ ጋክዳ ሀንቆን ዎꬍደታ።
2CH 28:10 ሄስ ግዶና እፅን ይሁዳነ የሩሳላመ ማጫነ አድያ ህንተ አይለ ኦꬃናዉ ቆፔታ። ያትን፥ ህንተ ኤንታዳ ሀንድ ጎዳ፥ ህንተ ፆሳ ቦላ ናጋራ ኦꬅደታ ግደከቲ?
2CH 28:11 ሀእ ታ ህንተዉ ኦደይሳ ስእተ። ጎዳ ሀንቆይ ህንተ ቦላ ዎꬍዳ ግሾ ህንተ ድእድ፥ ቃችዳ ህንተ ዳቦታ የድተ” ያግስ።
2CH 28:12 ሄሳፈ ጉየ፥ ኤፍሬማ ኮቻ ሀላቃታፐ ዮሃናና ናአይ አዛርያስ፥ ማሽልሞታ ናአይ ባራክ፥ ሳሎማ ናአይ ይዝቃነ ሀድላያ ናአይ አማስ ኦላፐ ስምዳይሳታ ቦላ ደንድዶሶና።
2CH 28:13 ኤንቲ “ሄ ድኤትዳ አሳታ ኑኮ ኤሆፕተ! ካሰ ኑኒ ጎዳ ቦላ ኦꬅዳ ናጋራነ ናቁዋ ቦላ ሀራ ጉጄታ። ኮይሮካ ኑ ናጋራይ ዳሮ ግድያ ግሾ እስራኤለ ቦላ ጎዳ ሀንቆይ ዎꬍስ” ያግዶሶና።
2CH 28:14 ሄሳ ግሾ፥ ኦላንቾት ድኤትዳ አሳታነ ሚሽያ ሀላቃታ ስንꬃንነ ደሪያ ስንꬃን እምዶሶና።
2CH 28:15 ሱንꬃይ ሀይሳፈ ቆሞን ፃፈትዳ አሳት ደንድ ኤቅድ፥ ድኤትዳ አሳ ኤክዶሶና። ኤንታ ግዶን ካሎ ደኤይሳታስ ድኡዋፐ ማኦነ ጫማ እምዶሶና። ኤንታ ሙዝዶሶናነ ኡሽዶሶና፤ ኤንታ ማዱንꬃ ቦላ ዛይተ ትይዶሶና። ዳቡርዳይሳታ ሀረ ቶግስድ ኤንታ እሻታኮ ዛምብ ደእያ እያርኮ ካታማ ኤፍዶሶና። ሄሳፈ ጉየ፥ ኤንቲ ሳማረ ስምዶሶና።
2CH 28:16 ሄ ዎደ ካዎይ አካዝ አሶረ ካዎይ ባና ማዳና መላ ኪታ የድስ።
2CH 28:17 ኤዶመ አሳት ናምአንꬆ ይሁዳ ቦላ ደንድድ፥ ዳሮ አሳ ድእድ ኤፍዶሶና።
2CH 28:18 ፍልስፄመት ዙማ ፃጶንነ ይሁዳ ጋꬋን፥ ነገበ መላ ቢታን ደእያ ካታማታ ኦልድ ቤት-ሳሜሳ፥ ኤሎና፥ ጋደሮታ፥ ሶኮ፥ ትምና፥ ግምዞነ ኤንታ ሄራን ደእያ ጉታታ ኦይክድ ያን ደእዶሶና።
2CH 28:19 ይሁዳ ካዎይ አካዝ ይሁዳ አሳ ናጋራ ኦስስዳ ግሾነ ጎዳስ አማነትቦና ግሾ ጎዳይ ይሁዳ ካዉሽስ።
2CH 28:20 አሶረ ካዎይ ተልገልተልፈልሶር አካዛኮ ይድ እያ መቶ በስስፐ አትሽን፥ ማድቤና።
2CH 28:21 አካዝ ፆሳ ኬꬃፈ፥ ካዎ ጋꬎፐነ ሀላቃታፐ ዳሮባ ኤክድ፥ አሶረ ካዋስ እሚስ። ሽን ሄስ እያ አይኮካ ማድቤና።
2CH 28:22 ካዎይ አካዝ ኡንኤትዳ ዎደ ጎዳስ አማነቶና እፅድ መቶ ቦላ መቶ ጉጅስ።
2CH 28:23 ባና ፆንዳ ዳማስቆ ፆሳታስ ያርሽሸ፥ “ሶረ ካዎታ ፆሳት ኤንታ ማድዳ ግሾ ታናካ ኤንቲ ማዳና መላ ታኒ ኤንታዉ ያርሻና” ያግስ። ሽን ሄ ፆሳት እያዉነ እስራኤለ አሳ ኡባስ ꬋዮ ኤህዶሶና።
2CH 28:24 አካዝ ፆሳ ኬꬃ ሚሸታ ኡባ ሺሽድ ትንቸረꬅስ። ፆሳ ኬꬃ ፐንገታ ጎርድስ። የሩሳላመን ዱማ ዱማ በሳን ባዉ ያርሾ በሲ ኬፅስ።
2CH 28:25 አካዝ ሀራ ፆሳታስ እፃነ ጩይሳናዉ ይሁዳን ደእያ ካታማታ ኡባን ꬎቃ ጎይኖ በሳታ መꬍስ። ያትድ ጎዳ፥ ባ አዋታ ፆሳ ሀንቀꬅስ።
2CH 28:26 ሄኮ፥ አካዛ ዎደን ኦሰትዳ ሀራ ኦሶት ኮይሮፐ ዉርሰꬅ ጋካናዉ ይሁዳ ካዎታነ እስራኤለ ካዎታ ታርከ ማፃፋን ፃፈትስ።
2CH 28:27 አካዝ ሀይቅድ፥ ባ ማይዛታ ጋክስ። የሩሳላመ ካታማን እያ ሞግዶሶና፤ ሽን እያ እስራኤለ ካዎታ ዱፉዋን ሞግቦኮና። እያ በሳን እያ ናአይ ህዝቅያስ ካዎትስ።
2CH 29:1 ህዝቅያስ ካዎትያ ዎደ እያዉ ላይꬅ ላታማነ እቻሻ፤ እ የሩሳላመን ላታማነ ኡዱፉን ላይꬅ ካዎትስ። እያ አየ ሱንꬃይ አቡ፤ እያ ዛካርያሳ ናአ።
2CH 29:2 እያ ማይዛይ ዳዊቲ ኦꬅዳይሳዳ ህዝቅያስ ጎዳ ስንꬃን ሱረባ ኦꬅስ።
2CH 29:3 ህዝቅያስ ባ ካዎትዳ ኮይሮ ላይꬃን፥ ኮይሮ አጌናን፥ ፆሳ ኬꬃ ፐንገታ ዶይድ ኦራꬅስ።
2CH 29:4 ካህነታነ ሌወታ ፆሳ ኬꬃ ዶሎሀ ባጋራ ደእያ ዳባባን ሺሽስ።
2CH 29:5 ኤንታኮ፥ “ሌወቶ፥ ታ ኦደይሳ ስእተ! ህንተናተꬃ ጌሽተ፤ ጎዳ ህንተ አዋታ ፆሳ ኬꬃ ጌሽተ፤ ፆሳ ኬꬃ ቱንስያባ ኡባ ድግተ።
2CH 29:6 ኑ አዋት አማነትቦኮና፤ ጎዳ፥ ኑ ፆሳ ስንꬃን ኢታባ ኦꬅዶሶና። ኤንቲ ጎዳ አግድ፥ ጎዳይ ደእያ በሳፈ ባንታ ሶምኦ ሀራ ሶ ዛሪድ፥ እያዉ ባንታ ዞኩዋ ዛርዶሶና።
2CH 29:7 ቃስ፥ ኤንቲ ፆሳ ኬꬃ ፐንገታ ጎርድዶሶና፤ ፆምፐታ ቶይስዶሶና። ፆሳ ኬꬃን እስራኤለ ፆሳስ እፃነ ጩይስቦኮና ዎይኮ ፁሳ ያርሾ ያርሽቦኮና።
2CH 29:8 ሄሳ ግሾ፥ ጎዳ ሀንቆይ ይሁዳ ቦላነ የሩሳላመ ቦላ ዎꬍስ። ህንተ፥ ህንተ አይፈን በኤይሳዳ ጎዳይ ኤንታ ቦላ ያሽ፥ ዳጋማነ ህርጋ የድስ።
2CH 29:9 ሄሳ ጋሶን፥ ኑ አዋት ማሻን ሀይቅዶሶና፤ ኑ ናይትነ ኑ ማቸት ድኤትዶሶና።
2CH 29:10 ጎዳ ሀንቆይ ኑ ቦላፈ ክቻና መላ ታኒ ጎዳራ፥ እስራኤለ ፆሳራ ጫቃናዉ ታ ዎዛናን ቆፓስ።
2CH 29:11 ታ ናይቶ፥ ህንተ ጎዳ ስንꬃን ኤቃና መላ፥ እያዉ ኦꬃና መላ፥ እያ ኦሳንቾ ግዳና መላነ እፃነ ጩይሳና መላ ጎዳይ ህንተና ዶርዳ ግሾ ቀል ጎፕተ” ያግስ።
2CH 29:12 ሄ በሳን ደእያ ሌወት ሀይሳፈ ካልድ ፃፈትዳይሳታ። ቃሃታ ያራፐ አማሳያ ናኣ ማሃታነ አዛርያሳ ናኣ እዩኤላ። ማራራ ያራፐ አብዳ ናኣ ቂሳነ ይሀልኤላ ናኣ አዛርያሳ። ገድሶና ያራፐ ዚማ ናኣ እዮአክናነ ዮኣሀ ናኣ ኤደና።
2CH 29:13 ኤልፃፋና ያራፐ ሽምራነ ኡዝኤላ። አሳፋ ያራፐ ዛካርያሳነ ማታና።
2CH 29:14 አማና ያራፐ ይኤላነ ሳመአ። ኤዶታመ ያራፐ ሻማያነ ኡዝኤላ።
2CH 29:15 ኤንቲ ባንታ ዳቦታ ሺሽድ ባንታና ጌሽዳፐ ጉየ ካዎይ ኤንታ ኪትዳይሳዳ ጎዳ ህግያዳ ፆሳ ኬꬅ ጌሾ ዶምዶሶና።
2CH 29:16 ሄሳ ግሾ፥ ካህነት ጎዳ ኬꬃ ጌሻናዉ ገልዶሶና፤ ፆሳ ኬꬃ ግዶን ደእያ ቱናባ ኡባ ከስድ፥ ፆሳ ኬꬃ ዳባባ ኤህዶሶና። ያትን ሌወት ኤክድ ቀድሮና ዛንጋራን ሆልዶሶና።
2CH 29:17 ኤንቲ ኮይሮ አጌናን፥ ኮይሮ ጋላስ ፆሳ ኬꬃ ጌሾ ዶምዶሶና፤ ሄ አጌናን ሆስፑንꬆ ጋላስ ባራንዳ ጋክዶሶና። ሀራ ሆስፑን ጋላስ ፆሳ ኬꬃ ጎይኖስ ጊግስዶሶና። ኮይሮ አጌናን ታማነ ኡሱፑንꬆ ጋላስ ኤንቲ ኦሱዋ ፖልዶሶና።
2CH 29:18 ሌወት ካዋ ህዝቅያሳኮ ገልድ፥ “ኑኒ ፆሳ ኬꬃ፥ ፁሳ ያርሾ በሳነ ያርሾ በሳን ጎኤትያ ሚሸ ኡባ፥ ጎዳ ስንꬃን ዎꬅያ ኡይꬃ ፃርጴዛነ ሄ ፃርጴዛን ደእያ ሚሸታ ኡባ ጌሽዳ።
2CH 29:19 ካዎይ አካዝ ካዎትድ ደእያ ዎደ ፆሳስ አማነቶና እፅድ ኤፍዳ ሚሸ ኡባ ኑ ዛሪድ ጌሽዳ። ሄኮ፥ ኑ ጌሽዳ ሚሸ ኡባይ ጎዳ ያርሾ በሳ ስንꬃን ደኤስ” ያግዶሶና።
2CH 29:20 ካዎይ ህዝቅያስ ዎንተꬃ ጋላስ ዎንታ ጉራ ደንድድ ካታማ ሀላቃታ ሺሽድ፥ ኤንታራ እስፈ ፆሳ ኬꬅ ብስ።
2CH 29:21 ኤንቲ ካዎተꬃ ግሾ፥ ፆሳ ኬꬃ ግሾነ ይሁዳ አሳ ግሾ፥ ላፑን ኮርማታ፥ ላፑን ማራዘታ፥ ላፑን ዶርሳ ኡርገታነ ላፑን ኮለታ ናጋራ ያርሾስ ኤህዶሶና። አሮና ኮቸ ግድያ ካህነት፥ ጎዳ ያርሾ በሳን ሀይሳታ ያርሻና መላ ካዎይ ኪትስ።
2CH 29:22 ካህነት ኮርማታ ሹክድ ሱꬃ ያርሾ በሳ ቦላ ꬋርጭዶሶና። ማራዘታ ሹክድ ሱꬃ ያርሾ በሳ ቦላ ꬋርጭዶሶና። ዶርሳ ኡርገታ ሹክድ ሱꬃ ያርሾ በሳ ቦላ ꬋርጭዶሶና።
2CH 29:23 ናጋራ ያርሾስ ሀንያ ኮለታ ካዋ ስንነ አሳ ስን ኤህዶሶና፤ ኤንቲ ኡባይ ባንታ ኩሽያ ዴሻታ ቦላ ዎꬅዶሶና።
2CH 29:24 ካዎይ ፁሳ ያርሾነ ናጋራ ያርሾ ያርሻና መላ ኤንታ ኪትዳ ግሾ ካህነት ዴሻታ ሹክድ እስራኤለ አሳ ኡባ ናጋራይ አቶ ጌተታና መላ ኤንታ ሱꬃ ያርሾ በሳን ያርሽዶሶና።
2CH 29:25 ጎዳይ ካዋስ ቆንጨꬅ በእያ ጋደነ ናብያ ናታና ባጋራ ካዋ ዳዊቲ ኪትዳ ኪታ ህዝቅያስ ካልድ፥ ሌወታ፥ ዳላ፥ ዲꬅነ ማስንቆ ኦይꬅድ ፆሳ ኬꬃን ኤስስ።
2CH 29:26 ሌወት ዳዊቲ ጎኤትያ የꬃ ሚሸታ ኦይክን፥ ካህነት ዛየ ኦይክድ ኤቅዶሶና።
2CH 29:27 ኤንቲ ፁሳ ያርሾ ያርሻና መላ ህዝቅያስ ኪትስ። ፁሳ ያርሾይ ያርሸትያ ዎደ ዛየይነ እስራኤለ ካዋ ዳዊታ የꬃ ሚሸታን ጎዳስ የꬅ ዶመቴስ።
2CH 29:28 ፁሳ ያርሾይ ፖለታና ጋካናዉ ሺቆ ኡባይ ጎዳ ጎይኔስ፤ የፀይሳት የፆሶና፤ ዛየ ፑነይሳት ፑኖሶና።
2CH 29:29 ካህነት ያርሹዋ ፖልዳ ዎደ ካዎይነ እያራ ደእያ አሳ ኡባይ ጉልባትድ ጎይንዶሶና።
2CH 29:30 ካዎይ ዳዊቲነ ቆንጨꬅ በእያ አሳፍ ፃፍዳ ጋላታ ማዝሙረ ጎዳስ የፃና መላ ካዎይ ህዝቅያስነ ሀላቃት ሌወታ ኪትዶሶና፤ ኤንቲ ኡባይ ኡፋይሳን ጋላትሸ ጉልባትድ ጎይንዶሶና።
2CH 29:31 ሄሳፈ ጉየ፥ ህዝቅያስ፥ “ሀእ ህንተ ህንተና ጎዳስ ዱማይደታ። ያርሾነ ጋላታ ያርሾ ፆሳ ኬꬅ ኤህተ” ያግስ። ሺቅዳ አሳይ ያርሾነ ጋላታ ያርሾ ኤህዶሶና፤ ዎዛን ዶስዳ አሳይ ፁሳ ያርሾ ኤህዶሶና።
2CH 29:32 ሄ ሺቅዳ አሳይ ኤህዳ ፁሳ ያርሾ ታይቦይ ላፑን ታሙ ኮርማታ፥ ፄቱ ማራዘታነ ናምኡ ፄቱ ዶርሳ ኡርገታ፤ ሄ ኡባይ ጎዳስ ፁሳ ያርሾ።
2CH 29:33 እስፈተꬃ ያርሾስ ኡሱፑን ፄቱ ኮርማታነ ሄꬑ ሙኩሉ ዶርሳት ሺቅዶሶና።
2CH 29:34 ግዶሽን፥ ፁሳ ያርሾ ኡባ ሹክድ፥ ጋልባ ቃራናዉ ደእያ ካህነት ታይቦን ጉꬃ ግድያ ግሾ ኦሶይ ዉራና ጋካናዉነ ሀራ ካህነት ባንታና ጌሻና ጋካናዉ ኤንታ ዳቦ ግድዳ ሌወት ማድዶሶና። ባንታና ጌሾን ሌወት ካህነታፐ አꬍድ አማነቶሶና።
2CH 29:35 ፁሳ ያርሾራ ሺቅያ እስፈተꬃ ያርሹዋ፥ ሞꬉዋነ ኡሻ ያርሹዋ ጉጅያ ዎደ ፁሳ ያርሾይ ዳሮ። ሄሳዳ ሀንድ ፆሳ ኬꬃ ኦሶይ ዛሪድ ዶምስ።
2CH 29:36 ህዝቅያስነ አሳ ኡባይ ኦሱዋ ኤለስድ ፖላና መላ ፆሳይ ኤንታ ማድዳ ግሾ ዳሮ ኡፋይትዶሶና።
2CH 30:1 ህዝቅያስ ጎዳ እስራኤለ ፆሳ ፓስካ ባኣለ ቦንቻናዉ የሩሳላመን ደእያ ፆሳ ኬꬃ እስራኤለ አሳይነ ይሁዳ አሳይ ያና መላ ኪትስ። ቃስ፥ ኤፍሬማ አሳስነ ምናሰ አሳስ ዳብዳበ ፃፍስ።
2CH 30:2 ካዎይ፥ ሀላቃትነ የሩሳላመን ሺቅዳ አሳ ኡባይ ፓስካ ባኣለ ናምአንꬆ አጌናን ቦንቻናዉ ቆፋ ቃችዶሶና።
2CH 30:3 ግድያ ካህነት ባንታና ጌሽቦና ግሾነ ዳሮ አሳይ የሩሳላመን ሺቅቦና ግሾ አሳይ ፓስካ እያ ዎደን ቦንቻናዉ ዳንዳእቦኮና።
2CH 30:4 ሄ ቆፋይ ካዋነ ሺቅዳ አሳ ኡፋይስስ።
2CH 30:5 ሄሳ ግሾ፥ ጎዳ እስራኤለ ፆሳ ፓስካ የሩሳላመን ቦንቻናዉ በርሳበፐ ዶምድ ዳነ ጋካናዉ ደእያ እስራኤለ አሳ ኡባይ ያና መላ አዋጃናዉ ቆፋ ቃችዶሶና። ሀ ፓስካ ባልያ ካሰ ህግያን ፃፈትዳይሳዳ ዳሮ አስ ቦንችቤና።
2CH 30:6 ካዎይ ኪታን፥ ኪተትዳይሳት፥ ካዋነ ሹማታ ዳብዳብያ ኤክድ እስራኤለነ ይሁዳ ኡባ ብዶሶና። ዳብዳበይ ሀይሳዳ ያጌስ፤ “እስራኤለ አሳዉ፥ አሶረ ካዋ ኩሸፐ አትዳ ህንተኮ ስማና መላ ህንተካ ጎዳኮ፥ አብራሃመ፥ ይሳቃነ እስራኤለ ፆሳኮ ስምተ!
2CH 30:7 ህንተ ካሰ በእዳይሳዳ ኤንታ ቦረስ አꬅድ እማና ጋካናዉ ባንታ ጎዳስ፥ ባንታ አዋታ ፆሳስ አማነትቦና ህንተ አዋታዳነ ህንተ እሻታዳ ሀኖፕተ።
2CH 30:8 ህንተ ጎዳስ ኪተትተ፤ ካሰ ህንተ አዋታዳ ስእሸ እፃስ ጎፕተ! ህንተናተꬃ ፆሳስ እምተ። ጎዳይ መርናዉ ጌሽዳ ፆሳ ኬꬃ ዪተ። ጎዳ ሀንቆይ ህንተፈ ስማና መላ ጎዳ ህንተ ፆሳ ጎይንተ።
2CH 30:9 ህንተ ጎዳኮ ስምኮ ህንተ እሻትነ ህንተ ናይት ባንታና ድእዳይሳታ ስንꬃን ማሮታ ደምድ ሀ ቢታ ስማና። ጎዳይ ህንተ ፆሳይ ቃተይሳነ ማረይሳ ግድያ ግሾ ህንተ እያኮ ስምኮ ባ ሶምኡዋ ህንተፈ ቆሰና” ያግስ።
2CH 30:10 ኪተትዳይሳት ኤፍሬማነ ምናሰ ቢታ ካንꬅድ ዛብሎና ቢታ ጋካናዉ ካታማፐ ካታማ ብዶሶና። ሽን ሄ ካታማታን ደእያ አሳይ ኤንታ ካꬍድ ኤንታ ቦላ ሚጭዶሶና።
2CH 30:11 ግዶሽን፥ አሴራፐ፥ ምናሰፐነ ዛብሎና ጉꬃ አሳት ባንታና ካዉሽድ የሩሳላመ ይዶሶና።
2CH 30:12 ካዎይነ ካዋ ሹማት ጎዳ ቃላ ማራን ኪትዳይሳ ፖላናዉ እስ ዎዛናን ግዳና መላ ፆሳ ኩሸይ ይሁዳ ቦላ ደኤስ።
2CH 30:13 ናምአንꬆ አጌናን ኡይꬃ ባኣለ ቦንቻናዉ ዳሮ አስ የሩሳላመን ሺቅስ።
2CH 30:14 ኤንቲ ደንድድ፥ የሩሳላመን ደእያ ያርሾ በሳታ ላልድ፥ እፃነ ጩይስያ ሚሸ ኡባ ድግድ፥ ቀድሮና ዛንጋራን የግዶሶና።
2CH 30:15 ናምአንꬆ አጌናን፥ ታማነ ኦይዳንꬆ ጋላሳን ፓስካ ዶርሳ ሹክዶሶና። ባንታና ጌሽቦና ካህነትነ ሌወት ዬላትድ፥ ባንታና ጌሽዶሶና፤ ፁሳ ያርሾ ፆሳ ኬꬅ ኤህዶሶና።
2CH 30:16 ፆሳ አስ ግድዳ ሙሰ ዎጋዳ ፆሳ ኬꬃ ግዶን ባንታ በሳን በሳን ኤቅዶሶና፤ ካህነት ሌወታ ኩሸፐ ኤክዳ ሱꬃ ꬋርጭዶሶና።
2CH 30:17 አሳ ግዶፈ ዳሮት ባንታና ጌሽቦና ግሾነ ዶርሳታ ሹኮና መላ ድገትዳ ግሾ ሌወት ኤንታዉ ፓስካ ዶርሳታ ሹክዶሶና።
2CH 30:18 ኤፍሬማፐ፥ ምናሰፐ፥ ይሳኮራፐነ ዛብሎና ኮቻፈ ዳሮ አሳይ ህገይ ኪተይሳዳ ባንታና ጌሽቦናባ ግድኮካ ፓስካ ባኣለ ግብራ ምዶሶና። ግዶሽን፥ ካዎይ ህዝቅያስ፥ “አቤት ኬሀ ጎዳዉ፥
2CH 30:19 ህገይ ኪተይሳዳ ሀይሳቲ ባንታና ጌሾናባ ግድኮካ ኤንቲ ነና ጎዳ፥ ባንታ አዋታ ፆሳ ኮያናዉ ባንታ ዎዛና ጊግስዳ ግሾ ነ ኤንታዉ አቶ ያጋ” ያግድ ዎስስ።
2CH 30:20 ጎዳይ ህዝቅያሳ ዎሳ ስእድ ኤንታዉ አቶ ግስ።
2CH 30:21 የሩሳላመን ሺቅዳ እስራኤለ አሳይ ላፑን ጋላስ ኩመꬅ ኡይꬃ ባልያ ግታ ኡፋይሳን ቦንችዶሶና። ሌወትነ ካህነት የꬃ ሚሸን የፅሸ ጋላስ ጋላስ ጎዳ ጋላቶሶና።
2CH 30:22 ህዝቅያስ ጎዳ ጎይኖ ዎጋ ካለሶን ኤረትዳ ሌወታ ምንꬅስ። አሳ ኡባይ እስፈተꬃ ያርሾ ያርሽሸ፥ ጎዳ ባንታ አዋታ ፆሳ ጋላትሸ፥ ምሸነ ኡይሸ ባኣለ ላፑን ጋላስ ቦንችዶሶና።
2CH 30:23 ሺቆይ ሀራ ላፑን ጋላስ ጉጅድ ባኣለ ቦንቻናዉ ዞረ ቃችድ ላፑን ጋላስ ኡፋይትድ ቦንችዶሶና።
2CH 30:24 ይሁዳ ካዎይ ህዝቅያስ ያርሾ ያርሻናዉ እስ ሙኩሉ ኮርማታ፥ ላፑን ሙኩሉ ዶርሳታነ ዴሻታ አሳስ እሚስ፤ ቃስ ሀላቃት እስ ሙኩሉ ኮርማታነ ታሙ ሙኩሉ ዶርሳታ አሳስ እምዶሶና፤ ዳሮ ካህነት ባንታና ጌሽዶሶና።
2CH 30:25 ይሁዳ አሳይ፥ ካህነት፥ ሌወት፥ እስራኤለፐ ይዳ አሳይ፥ ባኣለ ቦንቻናዉ ይዳ በተ አሳይነ ይሁዳ ቢታን ደእዳ አሳ ኡባይ ኡፋይትዶሶና።
2CH 30:26 ዳዊታ ናኣ፥ እስራኤለ ካዋ ሶሎሞነ ዎድያፐ ዶምን ሀች ጋካናዉ የሩሳላመን ሄሳ መላ ባለይ ቦንቸትድ ኤሮና ግሾ የሩሳላመን አሳይ ዳሮ ኡፋይትዶሶና።
2CH 30:27 ካህነትነ ሌወት ደንድድ፥ ጎዳይ አሳ አንጃና መላ ዎስን ፆሳይ ሳሎን፥ ባ ደእያ ጌሻ በሳን ኤንታ ዎሳ ስእስ።
2CH 31:1 ባለይ ፖለትዳ ዎደ ሄ በሳን ደእያ እስራኤለ ኡባይ ይሁዳ ካታማታ ብድ ኤቃ ሹቻታ ትንቸረꬅዶሶና፤ አሼራ ኤቃ ምስለታ ቃንፀረꬅዶሶና። ይሁዳን፥ ብንያመን ኤፍሬማንነ ምናሰ ቢታን ደእያ ꬎቃ ጎይኖ በሳታነ ያርሾ በሳታ ላልዶሶና። ኤንቲ ሄ ኡባ ꬋይስዳፐ ጉየ እስራኤለ አሳ ኡባይ ባንታ ካታማነ ባንታ ሶ ሶ ስምዶሶና።
2CH 31:2 ህዝቅያስ ካህነታነ ሌወታ ኤንታ ኦሶ ማራን ጩጋን ጩጋን ሻክድ ኤስስ። ኤንቲ ፁሳ ያርሾነ እስፈተꬃ ያርሾ ጎዳስ ያርሻና መላነ ፆሳ ኬꬃ ፐንገን ጎዳ ጋላታናነ ሳባና መላ ኦꬅስ።
2CH 31:3 ጎዳ ህግያን ፃፈትዳይሳዳ ዎንታነ ኦማርስ ፁሳ ያርሾነ ሳምባታን፥ አጌና ፄሮንነ ሀራ ባኣለ ጋላሳታን ሺቅያ ያርሹዋስ ኮሽያ መሄታ ካዎይ ባፐ እሜስ።
2CH 31:4 ጎዳ ህግያን ፃፈትዳይሳዳ ካህነትነ ሌወት ባንታ ኩመꬃ ዎድያ ጎዳ ኦሶስ ፔሻና መላ ኤንታዉ በሲያባ እማና መላ የሩሳላመ አሳ ካዎይ ኪትስ።
2CH 31:5 እስራኤለ አሳይ ካዋ ኪታ ስእዳ ዎደ ካꬃፈ፥ ዎይነ ኡሻፈ፥ ዛይትያፐ፥ ኤሳፈነ ጋደን ካፅዳባፐ ባይራ ጎዳስ እምዶሶና፤ ባንታዉ ደእያባ ኡባፈ አስራታ ከስዶሶና።
2CH 31:6 ይሁዳ ካታማታን ደእያ እስራኤለ አሳይነ ይሁዳ አሳይ ባንታ መሄታፐ፥ ዶርሳታፐ አስራታ እምዶሶና፤ ጎዳ፥ ባንታ ፆሳስ፥ ዱማይድ ዎꬅዳባ ኤህድ ዶርዶሶና።
2CH 31:7 ኤንቲ ሄꬓንꬆ አጌናን ኤሆ ዶምድ ላፑንꬃ አጌናን ፖልዶሶና።
2CH 31:8 ህዝቅያስነ ሀላቃት ዶረትዳይሳ ይድ በእዳ ዎደ ኤንቲ ጎዳነ ጎዳ አስ ግድዳ እስራኤለ አንጅዶሶና።
2CH 31:9 ህዝቅያስ ዶረትዳ እሞታባ ካህነታነ ሌወታ ኦይችስ።
2CH 31:10 ሳዶቃ ያራ ግድዳ ካህነ ሀላቃይ አዛርያስ፥ “ባንታ እሙዋ ፆሳ ኬꬅ ኤሆ ዶምን ኑ ምድ ካልዳ። ጎዳይ ባ አሳ አንጅዳ ግሾ ዳሮ ፓላህስ” ያግስ።
2CH 31:11 ህዝቅያስ ፆሳ ኬꬃን ምንጃ ክፍለታ ጊግሳና መላ ኪትን አሳይ ጊግስዶሶና።
2CH 31:12 አስራታ፥ ባይራባነ ዱማትዳ እሞታታ አማነተꬃን ክፍለታ ገልስዶሶና። ሌወ ግድዳ ኮናነይ ምንጃ ኬꬃ ቦላ ዋና ግድድ ሹመትስ። እያ እሻይ ሳመእ እያዉ ናምአንꬆ ግድድ ሹመትስ።
2CH 31:13 ካዎይ ህዝቅያስነ ካህነ ሀላቃይ አዛርያስ ሹምን ኮናነፐነ ሳመአፐ ጋርሳራ ኦꬅያ ሌወት፥ ይኤላ፥ አዛዛ፥ ናሃታ፥ አሳሄላ፥ ያርሞታ፥ ዮዛባታ፥ ኤልኤላ፥ ይስማካ፥ ማሃታነ ባናያ።
2CH 31:14 ዶሎሀ ባጋ ፐንግያ ናገይሳታ ሀላቃይ ሌወይ፥ ይምና ናአይ፥ ቆረይ፥ አሳይ ዶሳን ፆሳስ ኤህዳ እሙዋ ኤካናዉነ ግሻናዉ ሹመትስ።
2CH 31:15 ካህነት ደእያ ካታማታን ግታፐ ጉꬁ ጋካናዉ ደእያ ባንታ እሻታስ አማነትድ፥ ኤንታ ኦሱዋዳ ኦሱዋዳ ሻክድ እማና መላ ኤደን፥ ምንያምን፥ እያሱይ፥ ሻማኤይ፥ አማረይነ ሳካን ቆረፐ ጋርሳራ ሹመትዶሶና።
2CH 31:16 ባንታ ጩጋን ጩጋን ባንታ ኦሱዋ ጋላስ ጋላስ ፆሳ ኬꬃን ኦይሳታስ ላይꬅ፥ ሄꬓነ እያፐ ቦላ ግድዳ አደ ኡባስ ኤንታ ግሹዋ ሻክድ እምዶሶና።
2CH 31:17 ባንታ አዋታ ሶ አሳን አሳን ታይበትዳ ካህነታስነ ላይꬅ፥ ላታማነ እያፐ ቦላ ግድዳ ሌወታስ ባንታ ኦሱዋዳ ኦሱዋዳ ባንታ ጩጋን ጩጋን ደኤይሳታስ ግሽዶሶና።
2CH 31:18 ኤንቲ አማነትድ ባንታና ጌሽዳ ግሾ ኤንቲ ባንታ የለታ ማራን ታይበትያ ዎደ ባንታ ናይታራነ ማቸታራ እስፈ ፃፈትዶሶና።
2CH 31:19 ባንታ ካታማታ ዩሾን ደእያ ሄንꬃ ጋደታን ዎይኮ ሀራ ካታማታን ደእያ ካህነ ግድዳ አሮና ሼሻስ፥ ኤንታ ግዶን ደእያ አደ ኡባስነ ሌወታ የለታ ማዝጋበን ፃፈትዳይሳታስ ካꬅ ግሻናዉ ሹመትዶሶና።
2CH 31:20 ካዎይ ህዝቅያስ ጎዳ ባ ፆሳ ስንꬃን ሎኦ፥ ሱረነ ቱማ ግድዳባ ይሁዳ ቢታ ኡባን ኦꬅስ።
2CH 31:21 ህዝቅያስ ፆሳ ኬꬃስ ኦꬅዳ ኦሶ ኡባን፥ ፆሳ ህግያነ ዎጋ ናግድ ፆሳ ባ ኩመꬃ ዎዛናን ኮይዳ ግሾ እያዉ ኡባይ እንጀትስ።
2CH 32:1 ካዎይ ህዝቅያስ አማነተꬃን ጎዳስ ኦꬅዳፐ ጉየ አሶረ ካዎይ ሳናክሬም ይሁዳ ቢታ ቦላ ደንድስ፤ ፆንድ ባዉ ኤካናዉ ቆፕድ ግምበትዳ ካታማታ ተቅስ።
2CH 32:2 ሳናክሬም የሩሳላመ ኦላናዉ ይዳይሳ ህዝቅያስ በእዳ ዎደ፥
2CH 32:3 ካታማፐ ካረራ ጎግያ ፑልቶ ሃꬃታ ተቃናዉ ባ ሹማታነ ቶራ ሞጮናታ ዞረ ኦይችስ፤ ኤንቲ እያ ማድዶሶና።
2CH 32:4 ዳሮ አሳይ ሺቅድ፥ “አሶረ ካዎት ይድ አይስ ሃ ደማኔ?” ያግድ ፑልቶታነ ጎግያ ሃꬃታ ተቅዶሶና።
2CH 32:5 ሄሳፈ ጉየ፥ ህዝቅያስ ምን ኦꬅድ፥ ላለትዳ ድርሳ ግምበ ኡባ ዛሪድ ግምብስ፤ እያ ቦላ አዱሳ ሻኮ ሻክስ። ሄ ድርሳ ግምብያፈ ካረ ባጋራ ሀራ ድርሳ ግምበ ግምብስ። ዳዊታ ካታማን ደእያ ሚሎ ጌተትያ በሳ ምንꬅስ፤ ዳሮ ኦላ ሚሸነ ጎንዳለ ጊግስስ።
2CH 32:6 ኦላ ሀላቃታ አሳ ቦላ ሹምስ፤ ኤንታ ኡባ ካታማ ፐንግያ ማታን ደእያ ዳባባን ሺሽድ፥
2CH 32:7 “ምንተ፤ ገንጭተ፤ ኑራ ደኤይስ ኤንታራ ደኤይሳፈ አꬍያ ግሾ አሶረ ካዋነ እያ ኦላንቾታ በእድ ያዮፍተ፥ ዳጋሞፕተ።
2CH 32:8 እያራ አሳ ዎልቅ ደኤስ፤ ሽን ኑራ ጎዳይ ኑ ፆሳይ ኑና ማዳናዉነ ኑስ ኦለታናዉ ደኤስ” ያግድ ኤንታ ምንꬅስ። ይሁዳ ካዎይ ህዝቅያስ ኦዳን አሳይ ምነትስ።
2CH 32:9 ሄሳፈ ጉየ፥ አሶረ ካዎይ ሳናክሬም ባ ኦላንቾታራ ላክሶ ካታማ ተቅድ ደእሽን፥ ይሁዳ ካዋ ህዝቅያሳኮነ የሩሳላመን ደእያ ይሁዳ አሳ ኡባኮ ባ ሹማታ ኪትስ።
2CH 32:10 አሶረ ካዎይ ሳናክሬም፥ “ተቀትዳ የሩሳላመ ካታማን ህንተ ኦናን አማነትድ ኡትደቲ?
2CH 32:11 ህዝቅያስ፥ ‘ጎዳይ፥ ኑ ፆሳይ ኑና፥ አሶረ ካዋ ኩሸፐ አሻና’ ያግድ ጭምድ ህንተና ኮሻንነ ሳሞን ዎꬋናዉ ሀኔስ።
2CH 32:12 ꬎቃ ጎይኖ በሳታነ ያርሾ በሳታ ድግድ፥ ይሁዳነ የሩሳላመ አሳ፥ ‘እስ ያርሾ በሳ ስንꬃን ጎይንተ፤ ያርሹዋ እያ ቦላ ፁግተ’ ያገይ ህዝቅያሳ ግደኔ?
2CH 32:13 “ታነ ታ አዋት ሀራ ካዎተꬃታ ቦላ ኦꬅዳባ ህንተ ኤረከቲ? ኤንታ ፆሳት ባንታ ቢታ ታ ኩሸፐ አሻናዉ ዳንዳእዶና?
2CH 32:14 ታ አዋት ꬋይስዳ ሀ ካዎተꬃታ ፆሳታ ኡባ ግዶን ባ አሳ ታ ኩሸፐ አሻናዉ ዳንዳእዳይ ኦኔ? ያትን፥ ህንተ ፆሳይ ህንተና ታ ኩሸፐ ዋት አሻናዉ ዳንዳኢ?
2CH 32:15 ህዛ ህዝቅያስ ህንተና ባለꬆፎ ዎይኮ ሄሳዳ ጭሞፎ። ህንተ ህዝቅያሳ አማኖፕተ። እያ አሳ ታ ኩሸፐ ዎይኮ ታ አዋታ ኩሸፐ አሻናዉ ዳንዳእዳ ሀራ ቢታ ፆሳት ዎይኮ ካዎተꬃታ ፆሳት ባዋ። ያትን፥ ሄስ ህንተ ፆሳይ ህንተና ታ ኩሸፐ አሻናዉ ዋንድ ዳንዳኢ?” ያግዶሶና።
2CH 32:16 ሳናክሬማ ሹማት ጎዳ ፆሳ ቦላነ እያ አይልያ ህዝቅያሳ ቦላ ሀራ ዳሮባ ሃሳይዶሶና።
2CH 32:17 ሳናክሬም ጎዳ እስራኤለ ፆሳ ጫይድ፥ “ሳአ ቦላ ደእያ ካዎተꬃታ ፆሳት ባንታ አሳ ታ ኩሸፐ አሾናይሳዳ ህዝቅያሳ ፆሳይካ ባ አሳ ታ ኩሸፐ አሻናዉ ዳንዳኤና” ያግድ ዳብዳበ ፃፍስ።
2CH 32:18 ሳናክሬማ ሹማት ካታማ ኦይካናዉ ኮይድ፥ ድርሳ ግምበ ቦላ ኡትዳ የሩሳላመ አሳ ያሽሳናዉነ ዳጋንꬃናዉ ባንታ ቃላ ꬎቁ ኦꬅድ፥ እብራወꬆ ዶናን ኤንታ ቦላ ዋስዶሶና።
2CH 32:19 አሳ ኩሸን ኦሰትዳ፥ ሀ ሳአን ደእያ ሀራ ካዎተꬃታ ፆሳታ ቦላ ኦደትዳይሳዳ የሩሳላመ ፆሳ ቦላካ ኦደትዶሶና።
2CH 32:20 ካዎይ ህዝቅያስነ አሞፀ ናአይ፥ ናበይ እሳያስ ሄሳ ግሾ ዎሳን ሳሎ ፆሳኮ ፑደ ዋስዶሶና።
2CH 32:21 ፆሳይ ባ ኪታንቹዋ ኪትድ አሶረ ኦላንቾታነ ቶራ ሞጮናታ ꬋይስስ። ሄሳ ግሾ፥ አሶረ ካዎይ ካዉይድ፥ ባ ቢታ ስምስ፤ እ ባ ፆሳ ኬꬃ ገልዳ ዎደ እያ ናይት እያ ሄ በሳን ማሻን ዎꬍዶሶና።
2CH 32:22 ሄሳዳ ኦꬅድ፥ ጎዳይ ህዝቅያሳነ የሩሳላመ አሳ አሶረ ካዋ ሳናክሬማ ኩሸፐነ ሀራ ሞርከታ ኩሸፐ አሽስ፤ ኤንታ ሾሮ ቢታታ ኡባፈ ኤንታ ሸምፕስስ።
2CH 32:23 ዳሮ አሳይ ጎዳስ እሞታ፥ ይሁዳ ካዋ ህዝቅያሳስ አልኦ ሚሸ ኤህዶሶና። ሄ ዎደፐ ዶምድ ካዎተꬃ ኡባይ ህዝቅያሳ ዳሮ ቦንችዶሶና።
2CH 32:24 ሄ ዎደ ህዝቅያስ ሀርግድ፥ ሀይቃናዉ ማትድ ጎዳ ዎስስ። ጎዳይ ዎሰትድ እያ ፓꬃናዉ ማላ እሚስ።
2CH 32:25 ሽን ህዝቅያስ ኦቶርትዳ ግሾ ጎዳይ እያዉ ኬህዳ ኬሀስ በሲያ ዛሮ እምቤና። ሄሳ ጋሶን፥ እያ ቦላ፥ ይሁዳ ቦላነ የሩሳላመ ቦላ ጎዳ ሀንቆይ ይስ።
2CH 32:26 ግዶሽን፥ ዉርሰꬃን ህዝቅያስ ባ ኦቶሩዋ አግድ የሩሳላመ አሳታራ ባናተꬃ ካዉሽስ። ህዝቅያስ ካዎ ግድድ ደእያ ዎደ ጎዳ ሀንቆይ ኤንታ ቦላ ይቤና።
2CH 32:27 ህዝቅያሳስ ዳሮ ዱረተꬅነ ቦንቾይ ደኤስ። ህዝቅያስ ባ ብራ፥ ዎርቃ፥ አልኦ ሹቻ፥ ሳዎ፥ ጎንዳለነ ሀራ አልኦ ሚሸ ኡባ ምንጅያ ኬꬅ ኬፅስ።
2CH 32:28 ካꬃ፥ ዎይነ ኡሻነ ዛይተ ዎꬅያ ኬ ኬፅስ። መሄ ዳራነ ዶርስነ ዴሽ ኤቅያ ግርበ ኦꬅስ።
2CH 32:29 ፆሳይ እያዉ ዳሮ አቆ እምዳ ግሾ ባዉ ካታማታ ኬፅስ፤ ዳሮ ዶርሰነ መሄ ሺሽስ።
2CH 32:30 ቆሞ ባጋን ደእያ ግዮነ ፑልቶ ሃꬃ ዜርድ፥ ሃꬃይ ዉሎሀ ባጋን ደእያ ዳዊታ ካታማኮ ዱገ ጎጋና መላ ኦꬅዳይ ህዝቅያሳ። ህዝቅያስ ኦꬅዳባ ኡባን እንጀትዳ አስ።
2CH 32:31 ሽን ይሁዳ ቢታን ሀንዳ ማላልስያ ኦሶታባ ኦይቻናዉ ባብሎነፐ ኪተትዳ አሳት ህዝቅያሳኮ ይዳ ዎደ ጎዳይ እያ ፓጫናዉነ እያ ዎዛናን ደእያባ ኤራናዉ እያ የድ በስስ።
2CH 32:32 ህዝቅያስ ኦꬅዳ ሀራባይነ እያ ኬሀተꬃይ አሞፀ ናኣ፥ ናብያ እሳያሳ ቆንጨꬃ ማፃፋንነ ይሁዳነ እስራኤለ ካዎታ ታርከ ማፃፋን ፃፈትስ።
2CH 32:33 ህዝቅያስ ሀይቅድ፥ ባ ማይዛታን ጋሄትን ቆሞ ባጋራ ደእያ ዳዊታ ኮቻታ ዱፎን እያ ሞግዶሶና። እ ሀይቅን፥ ይሁዳ አሳይነ የሩሳላመ አሳይ እያ ቦንችዶሶና። እያ በሳን እያ ናአይ ምናሰይ ካዎትስ።
2CH 33:1 ምናሰይ ካዎትያ ዎደ እያዉ ላይꬅ ታማነ ናምአ፤ እ የሩሳላመን እሻታማነ እቻሹ ላይꬅ ካዎትስ።
2CH 33:2 ጎዳይ እስራኤለ አሳ ስንꬃፈ ጎድድ ከስዳ አሳ፥ እፀትዳ ኦግያ ካልድ ጎዳ ስንꬃን ኢታባ ኦꬅስ።
2CH 33:3 ምናሰይ ባ አዋይ ህዝቅያስ ላልዳ፥ ꬎቃ ጎይኖ በሳታ ዛሪድ ኬፅስ። ባኣለ ያርሾ በሳታነ አሼራ ጌተትያ ኤቃ ምስለታ መꬍስ፤ ሳሎ ፆልንቶታ ጎይንስ፤ ኤንታዉ ጉፋንስ።
2CH 33:4 ጎዳይ፥ “ታ ሱንꬃይ መርናዉ የሩሳላመን ዳና” ያግድ ዎꬅዳ ፆሳ ኬꬃን ምናሰይ ሀራ ፆሳታስ ያርሾ በሲ ጊግስስ።
2CH 33:5 ፆሳ ኬꬃን ደእያ ናምኡ ዳባባታን ሳሎ ፆልንቶት ጎይነትያ ያርሾ በሲ ጊግስስ።
2CH 33:6 ህኖማ ዛንጋራን ባ አደ ናይታ ታማን ፁግድ ያርሽስ። እ ብታነ ሙሩኖ ኦꬅስ፤ ማሮꬅስ፤ ሞይትለነ ቱና አያና ዞረ ኦይችስ። ጎዳ ስንꬃን ዳሮ ኢታባ ኦꬅድ ፆሳ ይሎይስ።
2CH 33:7 ባ ኦꬅዳ ኤቃ ምስልያ ኤፍድ ፆሳ ኬꬃን ኤስስ። ሄ ፆሳ ኬꬃይ፥ ፆሳይ ዳዊታስነ እያ ናኣ ሶሎሞነስ፥ “እስራኤለ ዛረ ኡባ ግዶፈ ታኒ ዶርዳ ፆሳ ኬꬃንነ የሩሳላመን ታ ሱንꬃ መርናዉ ፄግሳና።
2CH 33:8 ሙሰ ባጋራ ታ እስራኤለ አሳ ኪትዳ ኪታ፥ ህግያነ ዎጋ ኡባ ኤንቲ ናግኮ፥ ታኒ ኤንታ ማይዛታስ እምዳ ቢታፈ ኤንታ ሾድከ” ያግስ።
2CH 33:9 ሽን ምናሰይ ይሁዳ አሳነ የሩሳላመ አሳ ባለꬅድ፥ ጎዳይ እስራኤለ አሳ ስንꬃፈ ꬋይስዳ ሀራ ካዎተꬃታፐ አꬍያ ኢታ ኦꬃና መላ ኦꬅስ።
2CH 33:10 ጎዳይ ምናሰስነ እያ አሳስ ኦድስ፤ ሽን ኤንቲ እያ ስኦና እፅዶሶና።
2CH 33:11 ሄሳ ግሾ፥ ጎዳይ አሶረ ኦላንቾታ ኤንታ ቦላ ደንꬅስ። ኤንቲ ምናሰ ስን ዳፎ አꬅድ ኦይክዶሶና፤ ናሰ ብራታ ሳንꬃላታን ቃችድ፥ ባብሎነ ኤፍዶሶና።
2CH 33:12 ምናሰይ ኡንኤትዳ ዎደ ጎዳ ባ ፆሳ ማዶ ዎስስ፤ ባ አዋታ ፆሳ ስንꬃን ባናተꬃ ዳሮ ካዉሽስ።
2CH 33:13 ፆሳይ ምናሰ ዎሳ ስእስ፤ የሩሳላመ ስሚድ ዛሪድ ካዎታና መላ ኦꬅስ። ጎዳይ ቱማ ፆሲ ግደይሳ ምናሰይ ሄሳን ኤርስ።
2CH 33:14 ሄሳፈ ጉየ፥ ምናሰይ ግዮነ ፑልቱዋ ማታን ደእያ በሳፈ ዶምድ ኦፌላ ደርያራ ካንꬅድ ሞሎ ፐንገ ጋካናዉ ካረ ባጋራ ሀራ ድርሳ ግምበ ግምብስ። ሄ ግምበይ ዳዊታ ካታማፐ ዶሎሀ ባጋራ ደእያ ዛንጋራን ደኤስ። ይሁዳ ካታማታ ኡባን ቶራ ሞጮናታ ዎꬅስ።
2CH 33:15 አላጋ ፆሳታነ ኤቃ ምስለታ ፆሳ ኬꬃፈ ድግስ፤ ፆሳ ኬꬃይ ደእያ ዙማ ቦላነ የሩሳላመን ደእያ ያርሾ በሳታ ላልድ ሄ ካታማፐ ካረ ከስድ የግስ።
2CH 33:16 ምናሰይ ጎዳ ያርሾ በሲ ኦራꬅድ እስፈተꬃ ያርሾነ ጋላታ ያርሾ ያን ያርሽስ። ይሁዳ አሳይ ጎዳ እስራኤለ ፆሳ ጎይናና መላ ኪትስ።
2CH 33:17 አሳይ ꬎቃ ጎይኖ በሳታን ያርሾ ያርሸይሳ አጎና እፅኮካ፥ ኤንቲ ያርሸይ ጎዳ ባንታ ፆሳ ፃላላሳ።
2CH 33:18 ምናሰ ኦꬅዳ ሀራባይ፥ ባ ፆሳ ዎስዳ ዎሳይነ ጎዳ እስራኤለ ፆሳ ሱንꬃን ናበት እያዉ ኦድዳ ቃላይ እስራኤለ ካዎታ ታርከ ማፃፋን ፃፈትስ።
2CH 33:19 ሄኮ፥ ምናሰ ዎሳይነ ፆሳይ እያዉ ዛርዳ ዛሮይ፥ እ ኦꬅዳ ናጋራይነ ምናሰይ ባና ካዉሻናፐ ስን ኦꬅዳ ꬎቃ ጎይኖ በሳታባይ፥ አሼር ኤቃ ምስለታባይነ ኤቃታባ ኡባይ ናበታ ታርከ ማፃፋን ፃፈትስ።
2CH 33:20 ምናሰይ ሀይቅድ ባ ማይዛታ ጋክስ፤ እያ ካዎ ጋꬎን ሞግዶሶና። እያ በሳን እያ ናአይ አሞፀይ ካዎትስ።
2CH 33:21 አሞፀይ ካዎትያ ዎደ እያዉ ላይꬅ ላታማነ ናምአ፤ እ የሩሳላመን ናምኡ ላይꬅ ካዎትስ።
2CH 33:22 እያ አዋይ ምናሰይ ኦꬅዳይሳዳ እካ ጎዳ ስንꬃን ኢታባ ኦꬅስ። እያ አዋይ ምናሰይ ጎይንዳ ኤቃታ ጎይንስ፤ ኤንታዉ ያርሽስ።
2CH 33:23 ሽን እያ አዋይ ምናሰይ ባናተꬃ ካዉሽዳይሳዳ እ ባናተꬃ ጎዳ ስንꬃን ካዉሽቤና፤ አሞፀይ ጉጅ ጉጅ ናጋራ ኦꬅስ።
2CH 33:24 አሞፀ ሹማት እያ ቦላ ማቀትድ፥ ካዎ ጋꬎን እያ ዎꬍዶሶና።
2CH 33:25 ይሁዳ አሳይ ካዋ አሞፀ ቦላ ማቀትዳ ኡባ ዎꬍድ፥ አሞፀ በሳን እያ ናኣ እዮስያሳ ካዎꬅዶሶና።
2CH 34:1 እዮስያስ ካዎትያ ዎደ እያዉ ላይꬅ ሆስፑና፤ እ የሩሳላመን ሀስታማነ እስ ላይꬅ ካዎትስ።
2CH 34:2 እዮስያስ ጎዳ ስንꬃን ሱረባ ኦꬅስ፤ ኡሻች ሀድርስ ጎና ባ ማይዛ ዳዊታ ኦገን ሄመትስ።
2CH 34:3 እ ካዎትዳ ሆስፑንꬆ ላይꬃን ቡሮ ዮጋ ደእሸ ባ ማይዛ ዳዊታ ፆሳ ኮይስ። እ ካዎትዳ ታማነ ናምአንꬆ ላይꬃን ይሁዳንነ የሩሳላመን ደእያ ꬎቃ ጎይኖ በሳታ፥ አሼራ ኤቃ ምስለታ፥ ማስድ ጊግስዳ ኤቃታነ ሴርስድ ኦꬅዳ ምስለታ ꬋይስስ።
2CH 34:4 እያ ኪታን፥ ባኣለ ያርሾ በሳታ ላልዶሶና፤ ኤንታፈ ቦላራ ደእያ እፃነ ጩይስያ ሚሸታ ትንችዶሶና። አሼራ ኤቃ ምስለታ፥ ማስድ ጊግስዳ ኤቃታነ ሴርስድ ኦꬅዳ ምስለታ ጋጭድ ꬊለ ከስዶሶና፤ ሄ ꬊልያ ኤንታ ጎይንያ አሳታ ዱፎን ላልዶሶና።
2CH 34:5 እዮስያስ ኤንታ ካህነታ መቀꬃ ሄ ያርሾ በሳታ ቦላ ፁግስ፤ ያትድ፥ ይሁዳነ የሩሳላመ ጌሽስ።
2CH 34:6 ምናሰ፥ ኤፍሬማነ ስሞና ቢታፈ ብድ ንፍታለመ ቢታ ጋካናዉ ደእያ ካታማታነ ላለትዳ በሳታ ኡባ ሄሳዳ ኦꬅድ ጌሽስ።
2CH 34:7 እዮስያስ ያርሾ በሳታ ላልስ፤ አሼራ ኤቃ ምስለታነ ሀራ ኤቃ ምስለታ ትንቸረꬅስ፤ እስራኤለን ደእያ እፃነ ጩይስያ በሳታ ቃንፀረꬅስ። ሄሳፈ ጉየ፥ እዮስያስ የሩሳላመ ስምስ።
2CH 34:8 እዮስያስ ካዎትዳ ታማነ ሆስፑንꬆ ላይꬃን ቢታነ ፆሳ ኬꬃ ጌሽዳፐ ጉየ፥ ፆሳ ኬꬃ ኦራꬃና መላ አፃላ ናኣ ሳፋና፥ የሩሳላመ ካታማ ሃርያ ማእሰያነ እዮአካዛ ናኣ ዋና ፃፍያ እዮአክና ኪትስ።
2CH 34:9 ኤንቲ ካህነ ሀላቃ ካልቅያሳኮ ብዶሶና። ፐንገ ናግያ ሌወት ምናሰፐ፥ ኤፍሬማፐ፥ አትዳ እስራኤለ አሳ ኡባፈ ይሁዳፐ፥ ብንያመፐነ የሩሳላመን ደእያ አሳፐ ካሰ ሺሽድ ፆሳ ኬꬅ ኤህዳ ሚሽያ ካልቀስ እምዶሶና።
2CH 34:10 ኤንቲ ፆሳ ኬꬃ ኦራꬅያ ሀላቃታስ እምን ኤንቲ ፆሳ ኬꬃ ኦራꬃናዳነ ዛሪድ ኬፃና መላ ኦሳንቾታስ እምዶሶና።
2CH 34:11 ይሁዳ ካዎት ላልዳ ፆሳ ኬꬃ ሎይꬃናዉ ምꬅነ ማሰትዳ ሹቹ ሻማና መላ አናፀታስነ ግምበይሳታስ ሚሸ እምዶሶና።
2CH 34:12 አሳይ አማነትድ ኦሱዋ ፖልዶሶና። ኤንታ ቦላ ሹመትዳ ኦይዱ ሌወት፥ ማራራ ያራፐ ያሃታነ አብድዩ፥ ቃሃታ ያራፐ ማሱላማነ ዛካርያሳ። የꬃ ሚሸ ካእ ኤርያ ሌወት ኡባይ፥
2CH 34:13 ዎልቃ ኦሶ ኦꬅያ አሳታ ቦላነ ዱማ ዱማ ኦሶ ኦይሳታ ቦላ ሹመትዶሶና። ቃስ ሀራ ሌወት ፃፈ፥ ሀላቃነ ፐንገ ናገይሳታ ግድዶሶና።
2CH 34:14 ኤንቲ ፆሳ ኬꬃ ይዳ ሚሽያ ከስያ ዎደ ካህነይ ካልቀይ ጎዳይ ሙሰ ባጋራ እምዳ ህገ ማፃፋ ደምስ።
2CH 34:15 ካልቀይ ዋና ፃፍያ ሳፋናኮ፥ “ታኒ ፆሳ ኬꬃፈ ህገ ማፃፋ ደማስ” ያግስ። ሄ ማፃፋ ሳፋናስ እሚስ።
2CH 34:16 ሳፋን ማፃፋ ካዋኮ ኤፍድ፥ “ነ ሹማት ነ ኪታ ኡባ ኦꬅዶሶና።
2CH 34:17 ፆሳ ኬꬃን ደእያ ሚሽያ ኤክድ፥ ኦሱዋ ካልያ ሀላቃታስነ ኦꬅያ አሳስ እምዶሶና” ያግስ።
2CH 34:18 ዋና ፃፈይ ሳፋን ካዋኮ፥ “ካህነይ ካልቀይ ታዉ ማፃፋ እሚስ” ያግድ ማፃፋ ካዋ ስንꬃን ናባብስ።
2CH 34:19 ካዎይ ህገ ቃላ ስእዳ ዎደ አዛንድ ባ ማኡዋ ፔꬍስ።
2CH 34:20 ካዎይ፥ ካልቀ፥ ሳፋና ናኣ አክቃማ፥ ምክያሳ ናኣ አብዶና፥ ዋና ፃፍያ ሳፋናነ ካዎ ሹማ አሳያ ሀይሳዳ ያግድ ኪትስ፤
2CH 34:21 “ብድ ታ ግሾነ እስራኤለንነ ይሁዳን አትዳ አሳታ ግሾ ሀ በንትዳ ማፃፋን ፃፈትዳባ ጎዳ ኦይችተ። ሀ ማፃፋን ፃፈትዳ ኡባ ኦꬃናዉ ኑ ማይዛት ጎዳ ቃላ ናግቦና ግሾ ጎዳይ ኑ ቦላ ባ ሀንቁዋ ጉስስ” ያግስ።
2CH 34:22 ካልቀይነ ካዎይ ኪትዳ አሳት ፆሳ ኬꬃን ማኦ ናግያ ሀስራ ናአ፥ ትቁዋ ናአ፥ ሰለማ ማቾ ግድዳ ሁልዳ ጌተትያ ናበኮ ብድ እዮ ኦይችዶሶና። እያ የሩሳላመን ናምአንꬆ ካታማን ደአዉሱ።
2CH 34:23 ሁልዳ ኤንታኮ፥ “ጎዳይ እስራኤለ ፆሳይ፥ ‘ህንተና ታኮ ኪትዳ ኡራስ ሀይሳዳ ያግድ ኦድተ’ ያጋሱ።
2CH 34:24 ጎዳይ ሀይሳዳ ያጌስ፤ ‘ይሁዳ ካዋ ስንꬃን ናባበትዳ ማፃፋን ፃፈትዳ ኢታ ባደꬃ ኡባ ሀ በሳን ደእያ አሳ ቦላ ኤሀና ሀናይስ።
2CH 34:25 ኤንቲ ታና አግድ ሀራ ፆሳታስ እፃነ ጩይስዶሶና፤ ኤንቲ ባንታ ኩሸን ኦꬅዳባን ታና ሀንቀꬅዶሶና። ሄሳ ግሾ፥ ታ ሀንቆይ ሀ በሳን ትገታና፤ ተቀተና።’
2CH 34:26 ጎዳ ኦይቻናዉ ህንተና ኪትዳ ይሁዳ ካዋኮ፥ ‘ጎዳይ እስራኤለ ፆሳይ ኔኒ ስእዳ ቃላባ ሀይሳዳ ያጌስ፤
2CH 34:27 ሀ በሳንነ ሀ በሳን ደእያ አሳ ቦላ ፆሳይ ኦደትዳባ ኔኒ ስእዳ ዎደ ነ ዎዛናይ ቦሸትን፥ ታ ስንꬃን ነናተꬃ ካዉሽዳ ግሾነ ነ ማኡዋ ፔꬋዳ ታ ስንꬃን ዬክዳ ግሾ ታኒ ነ ዎሳ ስአስ።
2CH 34:28 ሄኮ፥ ታ ነና ነ ማይዛታ ጋꬃና፤ ነ ሳሮ ሞገታና። ታ ሀ በሳንነ ሀ በሳን ደእያ አሳ ቦላ ኤሀና ኢታባ ነ አይፈይ በኤና’ ያግተ” ያጋሱ። ኤንቲ ብድ ሀ ቃላ ካዋስ ኦድዶሶና።
2CH 34:29 ሄሳፈ ጉየ፥ ካዎይ እዮስያስ ይሁዳ ጭማታነ የሩሳላመ ጭማታ ኡባ ሺሽስ።
2CH 34:30 ካዎይ ፆሳ ኬꬅ ከይስ፤ ይሁዳ አሳይ፥ የሩሳላመ አሳይ፥ ካህነትነ ሌወት፥ ጉꬃፈ ግታ ጋካናዉ ኡባይ እያራ እስፈ ከይዶሶና። ፆሳ ኬꬃን በንትዳ ጫቆ ማፃፋ ቃላ ኡባ ካዎይ ኤንታዉ ናባብስ።
2CH 34:31 ካዎይ ባ በሳን ኤቅድ፥ ጎዳ ኦገን ሄመታናዉነ እያ ህግያ፥ እያ ዎጋነ እያ ኪታ ባ ኩመꬃ ዎዛናንነ ባ ኩመꬃ ሸምፑዋን ናጋናዉ፥ ቃስ ሀ ማፃፋን ፃፈትዳ ጫቁዋ ኦꬃናዉ ጎዳ ስንꬃን ጫቅስ።
2CH 34:32 የሩሳላመንነ ብንያመን ደእያ አሳ ኡባይ ኤቅድ ጫቃና መላ ኦꬅስ፤ የሩሳላመን ደእያ አሳይ ፆሳ፥ ባንታ ማይዛታ ፆሳ ጫቆይ ገይሳዳ ኦꬅዶሶና።
2CH 34:33 እዮስያስ እስራኤለ ዛዋን ደእያ እፀትዳባ ኡባ ድግስ። እስራኤለን ደእያ ኡባይ ጎዳ፥ ባንታ ፆሳ ጎይናና መላ ኦꬅስ። እዮስያስ ደእዳ ላይꬃ ኡባን ኤንቲ ጎዳ፥ ባንታ ማይዛታ ፆሳ ካሎ አግቦኮና።
2CH 35:1 እዮስያስ የሩሳላመን ጎዳ ፓስካ ባኣለ ቦንችስ። ኮይሮ አጌናን ታማነ ኦይዳንꬆ ጋላስ ፓስካ ዶርሳ ሹክዶሶና።
2CH 35:2 እዮስያስ ካህነታ ኦሶን ሹምድ፥ ኤንታ ፆሳ ኬꬃ ኦሶን ምንꬅስ።
2CH 35:3 ባንታና ጎዳስ ዱማይዳ፥ እስራኤለ ኡባ ታማርስያ ሌወታ ሀይሳዳ ያግስ፤ “ጌሻ ታቦትያ ዳዊታ ናአይ፥ እስራኤለ ካዎይ ሶሎሞነይ ኬፅዳ ፆሳ ኬꬃን ዎꬅተ። ህዛፐ ጉየ ታቦትያ ህንተ ሀሸን ቶካናዉ ኮሸና። ሀእ ጎዳስ፥ ህንተ ፆሳስነ፥ እያ አሳ እስራኤለስ ኦꬅተ።
2CH 35:4 እስራኤለ ካዎይ ዳዊቲነ እያ ናአይ ሶሎሞነይ ፃፍዳይሳዳ ህንተ ጩጋን ጩጋንነ ህንተ ሶ አሳን አሳን ህንተና ጊግስተ።
2CH 35:5 ሌወት ህንተ ዳቦታ፥ እስራኤለ ኮቻታ ማዳናዉ ህንተ ያራን ያራን ፆሳ ኬꬃን ኤቅተ።
2CH 35:6 ጎዳይ ሙሰ ባጋራ ኦድዳ ቃላ እስራኤለ አሳይ፥ ህንተ ዳቦት ናጋና መላ ግግስተ፤ ህንተካ ህንተናተꬃ ጌሽተ ፓስካ ዶርሳ ሹክተ” ያግስ።
2CH 35:7 እዮስያስ ሄ በሳን ደእያ አሳስ፥ ፓስካ ያርሾ ግዳና መላ 30,000 ዶርሰነ ዴሸ እሚስ፤ ቃስ 3,000 ኮርማታ እሚስ። ሄ ኡባ ካዎይ ባ ሻሉዋፐ እሚስ።
2CH 35:8 ካዎ ሹማት ባንታ ሸነን አሳስ፥ ካህነታስነ ሌወታስ ያርሾ መሄ እምዶሶና። ፆሳ ኬꬃ ሀላቃት ካልቀይ፥ ዛካርያስነ ይኤል ፓስካ ያርሾስ ግድያ ናምኡ ሙኩሉነ ኡሱፑን ፄቱ ማራዘታ፥ ሄꬑ ፄቱ ኮርማታ እምዶሶና።
2CH 35:9 ሌወታ ሀላቃት ኮናነይነ እያ እሻት፥ ሻማየይነ ናትናኤል፥ ቃስ ሀሻብ፥ ይኤልነ ዮዛባት ፓስካ ያርሾስ ሀንያ እቻሹ ሙኩሉ ማራዘታነ ኮለታ፥ እቻሹ ፄቱ ኮርማታ እምዶሶና።
2CH 35:10 ፓስካ ባልያስ ኡባባይ ጊግስ፤ ካዋ ኪታን፥ ካህነት ባንታ በሳን በሳን፥ ሌወት ባንታ ጩጋን ጩጋን ኤቅዶሶና።
2CH 35:11 ፓስካ ዶርሳት ሹከትዶሶና፤ ሌወት ጋልባ ቃርዶሶና፤ ካህነት ሱꬃ ያርሾ በሳ ቦላ ꬋርጮሶና።
2CH 35:12 ሙሰ ማፃፋን ፃፈትዳይሳዳ አሳይ ጎዳስ ያርሻና መላ ፁሳ ያርሾስ ጊግዳ ዶርሳታ አሹዋ ሌወት ባንታ ሶ አሳን አሳን ሻከትድ ኡትዳ እስራኤለ ያራታስ እምዶሶና፤ ኮርማታካ ሄሳዳ ኦꬅዶሶና።
2CH 35:13 ሌወት ዎጋይ ኪተይሳዳ ሹከትዳ ፓስካ ዶርሳ አሹዋ ታማን ጫጭዶሶና፤ ጌሻ ያርሾታ ፃሮን፥ ኦቶንነ ድስተን ዶይስድ፥ እስራኤለ አሳ ኡባስ ኤሶን ሻክድ ሻክድ እምዶሶና።
2CH 35:14 ሄሳፈ ጉየ፥ ሌወት ባንታዉነ አሮና ኮቸ ግድዳ ካህነታስ ፓስካ ያርሾ ጊግስዶሶና። ሄሳ ኤንቲ ኦꬅዳይ፥ ካህነት ፁሳ ያርሾነ ሞꬉዋ ያርሽሸ ቃማ ጋካናዉ ኦꬅያ ግሾሳ።
2CH 35:15 ዳዊቲ፥ አሳፍ፥ ሄማንነ ካዋ ናበይ ኤድታም ካሰ ኪትዳይሳዳ አሳፋ ያራት፥ ማዝሙረ የፀይሳት ባንታ በሳን ደኦሶና። ፐንገ ናገይሳት ባንታ በሳን ደኦሶና። ኤንታ ዳቦት፥ ሌወት ኤንታዉ ጊግስዳ ግሾ ኤንቲ ባንታ ኦሱዋ አግቦኮና።
2CH 35:16 ጎዳስ ኦꬅያ ኦሶ ኡባይ፥ ፓስካ ባኣለ ቦንቾይነ ፁሳ ያርሾይ፥ ካዎይ እዮስያስ ኪትዳይሳዳ ሀንድ ሄ ጋላስ ጊግስ።
2CH 35:17 ያን ሺቅዳ እስራኤለ አሳይ ሄ ጋላስ ፓስካ ባልያ ቦንችዶሶና፤ ኤንቲ ኡይꬃ ባኣለ ላፑን ጋላስ ቦንችዶሶና።
2CH 35:18 ናብያ ሳሜላ ዎድያፐ ዶምን፥ ሄሳ መላ ፓስካ ባለይ እስራኤለን ቦንቸትቤና። እዮስያስ፥ ካህነት፥ ሌወት፥ ይሁዳ አሳይ፥ እስራኤለ አሳይነ የሩሳላመ አሳይ ቦንችዳይሳዳ ፓስካ ባኣለ ካሰ እስራኤለ ካዎታፐ ቦንችዳ እሶይካ ባዋ።
2CH 35:19 ፓስካ ባለይ እዮስያስ ካዎትዳ ታማነ ሆስፑንꬆ ላይꬃን ቦንቸትስ።
2CH 35:20 እዮስያስ ፆሳ ኬꬃ ጊግስዳፐ ጉየ ግብፀ ካዎይ ናኮይ ኤፍራፂሳ ሻፋ ማታን ደእያ ካርካምሻን ኦለታናዉ ብስ። እዮስያስ እያ ተቃናዉ ከይስ።
2CH 35:21 ሽን ናኮይ እዮስያሳኮ አሰ ኪትድ፥ “ይሁዳ ካዋዉ፥ ታናነ ነና ካችያባይ አይቤ? ታኒ ይዳይ ታ ሞርከታ ኦላናሳፈ አትሽን፥ ነና ኦላናሳ ግደና። ታ ሞርከታ ታኒ ኤሶን ኦላናዳ ፆሳይ ታና ኪትስ። ፆሳይ ነና ꬋይሶናዳ ታራ ደእያ ፆሳራ ኤቀተይሳ አጋ” ያግስ።
2CH 35:22 ግዶሽን፥ እዮስያስ ጎዳይ ናኮ ባጋራ ኦድዳይሳ ስኦናነ ጉየ ስሞና እፅስ። ባ ካዎ ማኡዋ ላምድ ማግዶ ደንባን ኦለታናዉ ብስ።
2CH 35:23 ዶንገን ዱከይሳት ካዋ እዮስያሳ ጫድን፥ ካዎይ ባ አይለታኮ፥ “ታኒ ኢታ ጫደትዳ ግሾ ታና ኦላ ግዶፈ ከስተ” ያግስ።
2CH 35:24 እዮስያሳ ፓራ ጋርያፐ ዎꬍስድ፥ እያ ፓራ ጋርያን ዎꬅድ፥ እያ የሩሳላመ ኤህዶሶና። እ ያን ሀይቅድ ባ ማይዛታ ዱፎን ሞገትስ። ይሁዳ አሳይነ የሩሳላመ አሳ ኡባይ እያዉ ዬክዶሶና።
2CH 35:25 ናበይ ኤርምያስ እዮስያሳስ ዘለልስ ከስድ ፃፍስ። ዘሌልድ ዬክያ ማጫሳይነ አደ ኡባይ ሀች ጋካናዉ እዮስያሳስ ቆፖሶና። ሄ ዘለልሳይ እስራኤለ ዬሆ ዘለልሳ ማፃፋን ፃፈትስ።
2CH 35:26 እዮስያስ ኦꬅዳ ሀራባይ፥ ጎዳ ህገን ማፃፋን ፃፈትዳይሳ መላ እ ኦꬅዳ ሎኦ ኦሶይነ
2CH 35:27 ኮይሮፐ ዉርሰꬅ ጋካናዉ እ ኦꬅዳ ኡባይ፥ ሄኮ፥ እስራኤለ ካዎታነ ይሁዳ ካዎታ ታርከ ማፃፋን ፃፈትስ።
2CH 36:1 ሄ ቢታ አሳይ እዮስያሳ ናኣ እዮአካዛ ዶርድ እያ አዋ በሳን የሩሳላመን ካዎꬅዶሶና።
2CH 36:2 እዮአካዝ ካዎትያ ዎደ እያዉ ላይꬅ ላታማነ ሄꬓ፤ እ የሩሳላመን ሄꬑ አጌና ካዎትስ።
2CH 36:3 ግብፀ ካዎይ እዮአካዛ ካዎተꬃፈ ዎꬅስ፤ ሄꬑ ሙኩሉነ ኦይዱ ፄቱ ክሎ ግራመ ብራነ ሀስታማነ ኦይዱ ክሎ ግራመ ዎርቃ ይሁዳ አሳይ ጊራና መላ ኦꬅስ።
2CH 36:4 ግብፀ ካዎይ፥ ናኮይ፥ እዮአካዛ እሻ ኤልያቄመ ይሁዳ ቦላነ የሩሳላመ ቦላ ካዎꬅድ እያ ሱንꬃ እዮአቄማ ያግድ ላምስ። ያትድ እዮአቄማ እሻ እዮአካዛ ግብፀ ኤፍስ።
2CH 36:5 እዮአቄም ካዎትያ ዎደ እያዉ ላይꬅ ላታማነ እቻሻ፤ እ የሩሳላመን ታማነ እስ ላይꬅ ካዎትስ። ባ ጎዳ ፆሳ ስንꬃን ኢታባ ኦꬅስ።
2CH 36:6 ባብሎነ ካዎይ ናቡካዳናፆር እያ ኦልድ፥ ባብሎነ ኤፋናዉ ናሰ ብራታ ሳንꬃላታን ቃችስ።
2CH 36:7 ቃስ ናቡካዳናፆር ፆሳ ኬꬃ ሚሽያ ኤክድ ባብሎነ ኤፍድ፥ ባ ካዎ ጋꬎን ዎꬅስ።
2CH 36:8 እዮአቄም ኦꬅዳ ሀራባይ፥ ኦꬅዳ ቱናባይነ ኦꬅዳ ኢታባ ኡባይ፥ ሄኮ፥ እስራኤለ ካዎታነ ይሁዳ ካዎታ ታርከ ማፃፋን ፃፈትስ። እ ሀይቅን፥ እያ በሳን እያ ናአይ ዮአክን ካዎትስ።
2CH 36:9 ዮአክን ካዎትያ ዎደ እያዉ ላይꬅ ሆስፑና፤ እ የሩሳላመን ሄꬑ አጌናነ ታሙ ጋላስ ካዎትስ። እ ጎዳ ስንꬃን ኢታባ ኦꬅስ።
2CH 36:10 ላይꬃ ላመን፥ ካዎይ ናቡካዳናፆር አሰ ኪትድ፥ ዮአክናነ ፆሳ ኬꬃን ደእያ አልኦ ሚሸታ እያራ እስፈ ባብሎነ ኤህስ። ያትድ እያ አዋ እሻ ሰደቅያሳ ይሁዳነ የሩሳላመ ቦላ ካዎꬅስ።
2CH 36:11 ሰደቅያስ ካዎትያ ዎደ እያዉ ላይꬅ ላታማነ እስኖ፤ እ የሩሳላመን ታማነ እስ ላይꬅ ካዎትስ።
2CH 36:12 ባ ጎዳ ፆሳ ስንꬃን ኢታባ ኦꬅስ፤ ቃስ ጎዳ ቃላ ኦድያ ናብያ ኤርምያሳ ስንꬃን ባና ካዉሽቤና።
2CH 36:13 ሰደቅያስ፥ አማነታና መላ ባና ፆሳ ሱንꬃን ጫቅስዳ ናቡካዳናፆራ ቦላ ማካልስ። ጎዳ፥ እስራኤለ ፆሳኮ ስሞና እፅስ፤ ባ ዎዛና ፆሳ ቦላ ምንꬅስ።
2CH 36:14 ቃስ፥ ይሁዳ አሳይነ ኤንታ ካለꬅያ ካህነት፥ አማነቶና እፅዶሶና። ኤንቲ ሀራ ካዎተꬃት ኦꬅያ እፀትዳ ኦሶታ ካልድ፥ ጎዳይ የሩሳላመን ጌሽዳ ፆሳ ኬꬃ ቱንስዶሶና።
2CH 36:15 ጎዳይ፥ ኤንታ ማይዛታ ፆሳይ ባ አሳስነ ባ ኬꬃስ ቃትያ ግሾ፥ ባ ናበታ ኤንታዉ ዛር ዛር ኪትስ።
2CH 36:16 ሽን ጎዳ ሀንቆይ ኤንታ ቦላ ዎꬋና ጋካናዉነ ኤንቲ ከስ ኤክያሶ ꬋያና ጋካናዉ ፆሳ ኪታንቾታ ቀልቅስዶሶና፤ እያ ቃላ ካꬍዶሶና፤ ናበታ ቦላ ሚጭዶሶና።
2CH 36:17 ሄሳ ግሾ፥ ጎዳይ ካልዳወታ ካዋ ኤንታ ቦላ ደንꬅን፥ እ ኤንታ ያላጋ አደታ ፆሳ ኬꬃን ማሻን ዎꬍስ። እ ያላጋ አደታስ ዎይኮ ጌላኦታስ ዎይኮ ጭማታስ ዎይኮ ጬጋታስ ቃቶና ዉርስስ። ፆሳይ ኤንታ ኡባ ናቡካዳናፆራ ኩሸን አꬅድ እሚስ።
2CH 36:18 ባብሎነ ካዎይ ፆሳ ኬꬃን ደእያ ሚሸታ ኡባ፥ ግታነ ጉꬃ፥ ፆሳ ኬꬃን ደእያ ቡቁራ፥ ካዎ ቡቁራነ እያ ሞርናታ ቡቁራ ኡባ ኤክድ ባብሎነ ኤፍስ።
2CH 36:19 ኤንቲ ፆሳ ኬꬃ ታማን ፁግድ፥ የሩሳላመ ግምበ ድርሳ ላልዶሶና። ካዎ ጋꬉዋ ታማን ፁግድ፥ ያን ደእያ አልኦ ሚሸ ኡባ ꬋይስዶሶና።
2CH 36:20 ማሻፈ አትዳይሳታ ካዎይ ድእድ ባብሎነ ኤፍስ። ፋርሰ ካዎተꬃይ ደንዳና ጋካናዉ ኤንቲ እያዉነ እያ ናይታስ አይለ ግድዶሶና።
2CH 36:21 ጎዳይ ናብያ ኤርምያሳ ባጋራ ኦድዳ ቃላይ ፖለትስ። ዉርሰꬃን ቢታይ ላፑን ታሙ ላይꬅ አስ ባይና በሲ ግድድ ሸምፕስ። ቢታይ ሳምባታ ሸምፖ ደምስ።
2CH 36:22 ፋርሰ ካዎይ ቅሮስ ካዎትዳ ኮይሮ ላይꬃን ናብያ ኤርምያሳ ባጋራ ጎዳይ ኦድዳይሳ ፖልስ። ፋርሰ ካዎይ ቅሮስ ባ ካዎተꬃን ኡባን ሀይሳዳ ያግድ አዋጃና መላነ ፃፍድ ዎꬃና መላ ጎዳይ እያ አያና ደንꬅስ።
2CH 36:23 ፋርሰ ካዎይ ቅሮስ፥ “ጎዳይ፥ ሳሎ ፆሳይ ሀ ሳኣ ካዎተꬃታ ኡባ ታዉ እሚስ። ቃስ ይሁዳን ደእያ የሩሳላመን ታ እያዉ ፆሳ ኬꬅ ኬፃና መላ ታና ሹምስ። ፆሳ አስ ግድዳ ኦንካ ያ ቦ። ጎዳይ እያ ፆሳይ እያራ ግዶ” ያግስ።
EZR 1:1 ፋርሰ ካዎይ ቅሮስ ካዎትዳ ኮይሮ ላይꬃን፥ ናብያ ኤርምያሳ ባጋራ ጎዳይ ኦድዳባ ፖልስ። ፋርሰ ካዎይ ቅሮስ ባ ካዎተꬃ ግዶን ሀይሳዳ ያግድ አዋጃና መላነ ሄ አዋጁዋ ፃፍድ ዎꬃና መላ ጎዳይ እያ ዎዛና ደንꬅስ።
EZR 1:2 ፋርሰ ካዎይ ቅሮስ ሀይሳዳ ያጌስ፤ “ጎዳይ፥ ሳሎ ፆሳይ ሀ ሳኣ ካዎተꬃታ ኡባ ታዉ እሚስ። ቃስ ይሁዳን ደእያ የሩሳላመን እያዉ ኬ ኬፃና መላ ታና ሹምስ።
EZR 1:3 ፆሳ አስ ግድዳ ኦንካ ያ ቦ፤ እያ ፆሳይ እያራ ግዶ! ህንተ ይሁዳን ደእያ የሩሳላመ ብድ፥ ያን የሩሳላመን ጎዳ፥ እስራኤለ ፆሳ ኬꬃ ዛሪድ ኬፆ።
EZR 1:4 ዱማ ዱማ ቢታን ደእያ አሳ ኡባይ አይሁደታፐ አትዳይሳት ብራ፥ ዎርቃ፥ ዱማ ዱማ ሚሸታነ መሄ እምድ ማዶ፤ ቃስ የሩሳላመን ደእያ ፆሳ ኬꬃ ባንታ ዶሳን እምያ እሞታ ቦላ ጉጅድ እሞ” ያጌስ።
EZR 1:5 ሄሳፈ ጉየ፥ ይሁዳነ ብንያመ ኮቸ ሀላቃት፥ ካህነትነ ሌወት፥ ቃስ ፆሳይ ኤንታ ዎዛና ደንꬅዳ ኡባይ የሩሳላመን ጎዳ ፆሳ ኬꬃ ኬፃናዉ ባናዉ ደንድዶሶና።
EZR 1:6 ቃስ ኤንታ ሾሮን ደኤይሳትካ ባንታ ዶሳን እምዳባ ቦላ ጉጅድ፥ ብራፐነ ዎርቃፈ ኦሰትዳ ሚሸታ፥ ሀራ ዱማ ዱማ ሚሸታነ መሄ እምድ፥ ኤንታ ማድዶሶና።
EZR 1:7 ሄሳ ቦላ ካዎይ ቅሮስ ናቡካዳናፆር የሩሳላመፐ ኤፍድ ባ ኤቃ ኬꬃን ዎꬅዳ ጎዳ ኬꬃ ሚሸታ እሚስ።
EZR 1:8 ፋርሰ ካዎይ ቅሮስ ሚሸታ ዎꬅያ ኬꬃ ሀላቃ ምትርዳፁ ታይብስድ፥ ይሁዳ ሃርያ ሰሳብሳራ ኩሸን ዎꬅስ።
EZR 1:9 ስምዳ ሚሸታ ታይቦይ ሀይሳ፤ ሀስታሙ ዎርቃ ሻተ፥ ሙኩሉ ብራ ሻተ፥ ላታማነ ኡዱፉን ፕልኦ፥
EZR 1:10 ሀስታሙ ዎርቃ ከረ፥ ኦይዱ ፄታነ ታሙ ብራ ከረ ሙኩሉ ሀራ ዱማ ዱማ ሚሸ።
EZR 1:11 ዎርቃ ሚሸታነ ብራ ሚሸታ ታይቦይ ኩመꬅ እቻሹ ሙኩሉነ ኦይዱ ፄታ፤ ሴሳብሳር ባብሎነፐ የሩሳላመ ስምያ ዎደ ድኦፐ ስምዳ አሳራ ኤክድ ይስ።
EZR 2:1 ባብሎነ ካዎይ ናቡካዳናፆር ድእድ፥ ባ ቢታ ኤፍዳ አሳፐ ጉየ፥ የሩሳላመነ ይሁዳ ባንታ ካታማ ካታማ ስምዳ አሳይ ሀይሳፈ ካልድ ፃፈትዳይሳታ።
EZR 2:2 ኤንታ ሀላቃት ዛሩባበላ፥ እያሱ፥ ናህመ፥ ሳራያ፥ ራእላ፥ ማርድክዮሳ፥ ብልሳና፥ ማሰፋራ፥ ባጉዋያ፥ ረሁማነ ባአና። ድኦፐ ስምዳ አሳ ታይቦይ ሀይሳ።
EZR 2:3 ፋሮሳ ያራይ 2,172፤
EZR 2:4 ሳፋፃ ያራይ 372፤
EZR 2:5 ኤራ ያራይ 775፤
EZR 2:6 እያሱነ ዮኣባ ኮቸ ግድዳ ፋሀት-ሞአበ ያራይ 2,812፤
EZR 2:7 ኤላማ ያራይ 1,254፤
EZR 2:8 ዛታ ያራይ 945፤
EZR 2:9 ዛካያ ያራይ 760፤
EZR 2:10 ባና ያራይ 642፤
EZR 2:11 በባያ ያራይ 623፤
EZR 2:12 አዝጋዳ ያራይ 1,222፤
EZR 2:13 አዶንቃማ ያራይ 666፤
EZR 2:14 በጉዋያ ያራይ 2,056፤
EZR 2:15 አድና ያራይ 454፤
EZR 2:16 ህዝቅያሳ ኮቸ ግድዳ አፄራ ያራይ 98፤
EZR 2:17 ባሳያ ያራይ 323፤
EZR 2:18 ዮራ ያራይ 112፤
EZR 2:19 ሀሱማ ያራይ 223፤
EZR 2:20 ግባራ ያራይ 95፤
EZR 2:21 ቤተለመ አሳይ 123፤
EZR 2:22 ናፆፋ አሳይ 56፤
EZR 2:23 አናቶታ አሳይ 128፤
EZR 2:24 አዝሞታ አሳይ 42፤
EZR 2:25 ቅርያት-ይኣርማ፥ ካፍራነ ብኤሮታ አሳይ 743፤
EZR 2:26 ራማነ ግብአ አሳይ 621፤
EZR 2:27 ምክማሳ አሳይ 122፤
EZR 2:28 ቤተለነ ጋየ አሳይ 223፤
EZR 2:29 ናቦ አሳይ 52፤
EZR 2:30 ማግብሳ አሳይ 156፤
EZR 2:31 ናምአንꬆ ኤላማ አሳይ 1,254፤
EZR 2:32 ካርማ አሳይ 320፤
EZR 2:33 ሎዳ፥ ሀድዳነ ኦኖ አሳይ 725፤
EZR 2:34 እያርኮ አሳይ 345፤
EZR 2:35 ሳናአ አሳይ 3,630፤
EZR 2:36 ድኦፐ ስምዳ ካህነታ ሶ አሳ ታይቦይ ሀይሳ። እያሱ ኮቸ ግድዳ ያዳያ ያራይ 973፤
EZR 2:37 እመራ ያራይ 1,052፤
EZR 2:38 ፓስኮራ ያራይ 1,247፤
EZR 2:39 ካርማ ያራይ 1,017.
EZR 2:40 ድኦፐ ስምዳ ሌወታ ታይቦይ ሀይሳ፤ ሆዳዋ ኮቸ ግድዳ እያሱነ ቃድሜላ ያራይ 74፤
EZR 2:41 አሳፋ ኮቸ ግድዳ ዛማረት 128፤
EZR 2:42 ፆሳ ኬꬃ ፐንገ ናግያ ሳሎማ፥ አፄራ፥ ፃልሞና፥ አቁባ፥ ሀፅፃነ ሶባያ ያራይ 139.
EZR 2:43 ሀይሳቲ ድኦፐ ስሚድ፥ ፆሳ ኬꬃን ኦꬅያ አሳ ያራታ፤ ፅሀ ያራ፥ ሀሱፋ ያራ፥ ፃባኦታ ያራ፥
EZR 2:44 ከራሳ ያራ፥ ስሀ ያራ፥ ፋዶና ያራ፥
EZR 2:45 ልባና ያራ፥ አጋባ ያራ፥ አቁባ ያራ፥
EZR 2:46 አጋባ ያራ፥ ሳምላ ያራ፥ ሀናና ያራ፥
EZR 2:47 ጋዳላ ያራ፥ ጋሃራ ያራ፥ ራያ ያራ፥
EZR 2:48 ራአሶና ያራ፥ ናቆዳ ያራ፥ ጋሳማ ያራ፥
EZR 2:49 ኦዛ ያራ፥ ፋሴሀ ያራ፥ በሳያ ያራ፥
EZR 2:50 አስና ያራ፥ መኡንማ ያራ፥ ንፉሴስማ ያራ፥
EZR 2:51 ባቅቡቃ ያራ፥ ሀቁፋ ያራ፥ ሀርሁራ ያራ፥
EZR 2:52 ባስሉታ ያራ፥ ማህዳ ያራ፥ ሀርሳ ያራ፥
EZR 2:53 ባርቆሳ ያራ፥ ስሳራ ያራ፥ ቴማ ያራ፥
EZR 2:54 ናስያ ያራነ ሀፅፋ ያራ።
EZR 2:55 ሀይሳቲ ድኦፐ ስምዳ ሶሎሞነ ኦሳንቾታ ያራታ፤ ሶፃያ ያራ፥ ሶፌረታ ያራ፥ ፋሩዳ ያራ፥
EZR 2:56 ያእላ ያራ፥ ዳርቆና ያራ፥ ጋዳላ ያራ፥
EZR 2:57 ሳፋፃ ያራ፥ ሀፄላ ያራ፥ ፋክራታ ያራ፥ ሀፃቦይማ ያራነ አማ ያራ።
EZR 2:58 ድኦፐ ስሚድ፥ ፆሳ ኬꬃን ኦꬅያ አሳ ያራትነ ሶሎሞነ አይለታ ያራታ ታይቦይ 392.
EZR 2:59 ሀይሳፈ ካለይሳት ቃስ ታልመላ፥ ተላረሳ፥ ካሩባ፥ አዳናነ እመራ ካታማታፐ የሩሳላመ ስምዶሶና። ሽን ኤንቲ ዎይኮ ኤንታ አዋት እስራኤለ ሼሽ ግደይሳ ኤርሳናዉ ኤንቲ ዳንዳእቦኮና።
EZR 2:60 ዳላያ፥ ፆቢያነ ናቆዳ ያራት 652.
EZR 2:61 ካህነታፐ አባያ ያራይ፥ አቆሳ ያራይነ ባርዝለ ያራይ ስምዶሶና። ባርዝለይ ሀ ሱንꬃን ፄገታናዉ ዳንዳእዳይ ጋላዳ ቢታ አስ ግድዳ ባርዝለ ናእዉ ማቾ ኤክዳ ግሾሳ።
EZR 2:62 ሀይሳቲ ባንታ የለታ ፃጱዋ ኤራናዉ የለታ ማፃፋን ኮይዶሶና፥ ሽን ደምቦኮና። ሄሳ ግሾ፥ ኤንቲ ቱና ጌተትድ ካህነተꬃን ኦꬆና መላ ድገትዶሶና።
EZR 2:63 ኡሪመንነ ቱሚመን ሻክድ ፕርድያ ካህነይ ደንዳና ጋካናዉ፥ ኤንቲ ጌሻ ካꬃፈ ማናዉ ዳንዳኦናይሳ አይሁደታ አይሰይስ ኤንታዉ ኦድስ።
EZR 2:64 ድኦፐ ይሁዳ ስምዳ አሳ ታይቦይ ኩመꬅ 42,360.
EZR 2:65 ሄስካ 7,337 አደነ ማጫ አይለታ ጉጁና ደእሽና። ኤንታ ግዶን 200 አደነ ማጫ ዛማረት ደኦሶና።
EZR 2:66 ድኦፐ ስምዳ አሳ ፓራት 736፤ ባቁሎት 245፤
EZR 2:67 ግማለት 435፤ ሀረት 6,720.
EZR 2:68 ኤንቲ የሩሳላመን ደእያ ፆሳ ኬꬃ ጋክዳ ዎደ እስ እስ ሶ አሳ ሀላቃት ፆሳ ኬꬃይ ካሰ ባ በሳን ኬፀታና መላ ባንታ ዶሳን እሞታ እምዶሶና።
EZR 2:69 እሶይ እሶይ ባዉ ዳንዳእዳ መላ ፆሳ ኬꬃ ኦሱዋስ እሞታ እሚስ፤ እሞታይ 500 ክሎ ግራመ ዎርቃ፥ 2,800 ክሎ ግራመ ብራነ 100 ካህነታ ማኦ እምዶሶና።
EZR 2:70 ሄሳፈ ጉየ፥ ካህነት፥ ሌወትነ ጉꬃ አሳይ የሩሳላመን ኡትዶሶና፤ ዛማረት፥ ፆሳ ኬꬃ ፐንገ ናገይሳትነ ፆሳ ኬꬃን ኦꬅያ ኦሳንቾት የሩሳላመ ዩሾን ደእያ ካታማታን ኡትዶሶና፤ አትዳ አሳ ኡባይ ባንታ ካታማታን ካታማታን ኡትዶሶና።
EZR 3:1 ላፑንꬃ አጌናን እስራኤለ አሳይ ባንታ ደእያ ካታማታፐ እስ አስ ግድድ የሩሳላመ ሺቅዶሶና።
EZR 3:2 እዮሳደቃ ናኣ እያሱነ፥ እያራ ኦꬅያ ካህነት፥ ሳላትያላ ናኣ ዛሩባበልነ እያ ዳቦት ፆሳ አስ ግድዳ ሙሰ ህግያን ፃፈትዳይሳዳ ፁሳ ያርሾ ያርሻናዉ፥ እስራኤለ ፆሳስ ያርሾ በሲ ጊግስዶሶና።
EZR 3:3 ሄ ቢታን ደእያ አሳ እፁዋፐ ደንዶይሳን ያይኮካ፥ ያርሾ በሲ ካሰ በሳን ኬፅድ፥ ፁሳ ያርሾ ጎዳስ ኡባ ዎደ ዎንታነ ኦማርስ ሺሽዶሶና።
EZR 3:4 ካሰ ፃፈትዳይሳዳ ሻቃራ ባኣለ ቦንችዶሶና፤ ፁሳ ያርሾ እስ እስ ጋላስ ኮሸይሳዳ ፓጭሶና ያርሽዶሶና።
EZR 3:5 ቃስ ኡባ ዎደ ሺቅያ ፁሳ ያርሾ፥ አጌና ፄሮ ያርሾነ ጎዳ ጌሻ ባለታን ያርሽያ ያርሾ ኡባ ያርሽዶሶና። ሄሳ ቦላካ አሳይ ባ ዶሳን ጎዳስ እምዳ እሞታ ኡባ ያርሽዶሶና።
EZR 3:6 ፆሳ ኬꬃ ባሶይ ቡሮ ዶመቶናባ ግድኮካ ላፑንꬃ አጌናን ኮይሮ ጋላስ ኤንቲ ጎዳስ ፁሳ ያርሾ ሺሾ ዶምዶሶና።
EZR 3:7 ሄሳፈ ጉየ፥ ሹቹ ማሰይሳታስነ አናፀታስ ሚሸ እምድ ኦሶ ኦይክዶሶና። ፋርሰ ካዎይ ቅሮስ ኤንታዉ ኪትዳ ግሾ፥ ልባኖሳፐ ዝጋ አባ ፕንꬅድ፥ ዮጰ ኤሀናዉ ስዶናነ ፅሮሳ አሳስ ካꬅ፥ ኡሽነ ዛይተ እምዶሶና።
EZR 3:8 ኤንቲ የሩሳላመ ስምዳ ናምአንꬆ ላይꬃን ናምአንꬆ አጌናን፥ ሳላትያላ ናአይ ዛሩባበል፥ እዮሳደቃ ናኣ እያሱይነ ኤንታ ዳቦት፥ ካህነት፥ ሌወትነ ድኦፐ ስምዳ አሳ ኡባይ ፆሳ ኬꬃ ካሰ በሳን ኬፆ ዶምዶሶና። ቃስ ፆሳ ኬꬃ ኦሱዋ አዋተꬃን ፄላና መላ ላታሙ ላይꬅ ግድዳይሳታነ ላታሙ ላይꬃፈ አꬍዳ ሌወታ ሹምዶሶና።
EZR 3:9 ሌወ ኮቸ ግድዳ እያሱ፥ እያ ናይታነ እያ ዳቦት፥ ሆዳዋ ሶ አስ ግድዳ ቃድምኤልነ እያ ናይት እስፈ ግድድ፥ ፆሳ ኦሱዋ ኦስሳና መላ አዋተꬅ ኤክዶሶና፤ ኤንሀዳዳ ኮቸ ግድዳ ሌወት ኤንታ ማድዶሶና።
EZR 3:10 አናፀት ፆሳ ኬꬃ ባሱዋ የገꬅ ኦይክያ ዎደ፥ ካህነት ባንታ ማኦ ማእድ ሞይዘ ኦይክድ፥ አሳፋ ኮቸ ግድዳ፥ ሌወት ዳላ ኦይክድ፥ እስራኤለ ካዋ ዳዊታ ዎጋ መላ ጎዳ ጋላታናዉ ኤቅዶሶና።
EZR 3:11 ኤንቲ ጎዳ ጋላትሸነ እሶይ እሱዋ ካል ካል ማዝሙረን ሳቢሸ፥ ሀይሳዳ ያግድ ዛማርዶሶና። “ጎዳይ ኬሀ፤ እስራኤለስ ደእያ እያ ሲቆይ መርናሳ” ያግዶሶና። ፆሳ ኬꬃ ባሶይ የገትያ ግሾ፥ አሳ ኡባይ ባንታ ቃላ ꬎቁ ኦꬅድ እልልሸ ጎዳ ጋላትዶሶና።
EZR 3:12 ሽን ካሰ ፆሳ ኬꬃ በእዳ ጭማ ካህነታፐ፥ ሌወታፐነ ኮቻታ ሀላቃታፐ ዳሮት ሀእ ፆሳ ኬꬃ ኬፃናዉ የገትዳ ባሱዋ በእዳ ዎደ ባንታ ቃላ ꬎቁ ኦꬅድ ዬክዶሶና፤ ሀራት ቃስ ኡፋይትሸ ቦንችዶሶና።
EZR 3:13 ኦንካ ኡፋይሳ እልልሳነ ዬሆ ዋሱዋ ሻካናዉ ዳንዳእቤና፤ አሳይ ዋስያ ዋሶይ ዎልቃማ ግድያ ግሾ ዋሶይ ሃሆን ስኤቴስ።
EZR 4:1 ይሁዳስነ ብንያመስ ሞርከ ግድዳ አሳይ፥ ድኦፐ ስምዳይሳት ጎዳስ፥ እስራኤለ ፆሳስ ኬ ኬፀይሳ ስእዶሶና።
EZR 4:2 ዛሩባበላኮነ እስራኤለ ያራ ሀላቃታኮ ይድ፥ “አሶረ ካዎይ አስራዶን ኑና ሀ በሳ ኤህዳ ጋላሳፐ ዶምድ፥ ኑካ ህንተ ፆሳ ጎይኖስ፥ እያዉ ያርሾስ። ሄሳ ግሾ፥ ኑካ ህንተራ ኬፃና” ያግዶሶና።
EZR 4:3 ሽን ዛሩባበል፥ እያሱይነ እስራኤለ ያራ ሀላቃት፥ “ኑ ፆሳ ኬꬃ ኬፃናዉ ኑስነ ህንተዉ ግሾይ ባዋ። ሽን ፋርሰ ካዎይ ቅሮስ ኪትዳይሳዳ ጎዳ፥ እስራኤለ ፆሳ ኬꬃ ኑኒ ኑ ፃላላ ኬፃና” ያግዶሶና።
EZR 4:4 ሄሳፈ ጉየ፥ ሄ ቢታን ደእያ አሳይ፥ ይሁዳ አሳይ ፆሳ ኬꬃ ኬፆና መላ ኡፋይስ ቃንፅሳናዉነ ያሽሳናዉ ደንድዶሶና።
EZR 4:5 ፋርሰ ካዋ ቅሮሳ ላይꬃፈ ብድ ዳርዮሳ ካዎተꬃ ጋካናዉ ኤንቲ ይሁዳ አሳ ዞረታ ላላና መላ አሰ ሻምዶሶና።
EZR 4:6 አርፀክስስ ካዎትዳ ዎደ ይሁዳነ የሩሳላመ አሳ ሞታናዉ ፓይለ ዶይዶሶና።
EZR 4:7 አርፀክስሳ ካዎተꬃ ላይꬃን፥ ብሽላም፥ ምትርዳት፥ ፃቤልነ ኤንታ ባጋ ግድድ፥ ፋርሰ ካዋ አርፀክስሳስ ዳብዳበ ፃፍዶሶና፤ ሄ ዳብዳበይ አራምከ ፕዳለንነ ዶናን ፃፈትስ።
EZR 4:8 ቢታ አይስያ ረሁምነ ፃፈይ ስምሳይ የሩሳላመባ ሀይሳዳ ያግድ፥ ካዋ አርፀክስሳስ ዳብዳበ ፃፍዶሶና፤
EZR 4:9 “ሀ ዳብዳበይ ቢታ አይስያ ረሁማፐ፥ ፃፍያ ስምሳያፐ፥ በተራፕለሳፐ፥ ፋርሰፐ፥ አርካፈ፥ ባብሎነፐ ሱሳፐነ ኤላማ ቢታን ደእያ ዳይናታፐነ ቢታ አይሰይሳፈ፥
EZR 4:10 ቃስ ግታነ ቦንቸትዳ ካዋ አስናፋር ድእድ ሳማረንነ ኤፍራፂሳ ሻፋፐ ሄፍንꬃን ዎꬅዳ አሳ ኡባፈ ፃፈትስ” ያግዶሶና።
EZR 4:11 ኤንታ ዳብዳበይ ሀይሳዳ ያጌስ፤ “ካዋ አርፀክስሳስ፥ ኤፍራፂሳ ሻፋፐ ሄፍንꬃን ደእያ ነ ሞርናታፐ የደትዳ ዳብዳበ።
EZR 4:12 “ካዋዉ፥ ነ ማታፐ ኑኮ ይዳ አይሁደት የሩሳላመ ይድ፥ ሀ ማካላነ ኢታ ካታምዉ ዛሪድ ኬፆ ቦላ ደኤይሳ ኤራ። እ ግምበ ድርሳ ኦራꬆሶና፤ እ ባሱዋ የጎሶና፤ እ ፃጱዋ ምንꬆሶና።
EZR 4:13 ሄሳ ቦላ ቃስ፥ ሀ ካታምያ ኬፀትኮነ እ ድርሳ ግምበይ ኦራፅኮ ኤንቲ ጊራነ ቃራፃ ቃንፆናይሳ ኤራ፤ ካዎ ኬꬅ ገልያ ሚሸይ ጉፃናይሳ አኬካ።
EZR 4:14 ኑኒ ካዎይ ሹምን ኦይሳታ ግድያ ግሾነ ካዎይ ካዉይሽን በአናዉ ኮዮና ግሾ ሀይሳ ነ ኤራና መላ ግድ ኦዶስ።
EZR 4:15 ሄሳ ግሾ፥ ካሰ ነ አዋታ ታርከ ማፃፋይ ኮየትድ ፄለቶ፤ ሄ ፃፈትዳባፐ ሀ ካታምያ ማካላነ ካዎታስነ ቢታታስ መቶ መꬋሸ ደእዳይሳ ኤራናዉ ዳንዳኣሳ፤ ሄሳ ጋሶን እያ ላለታሱ።
EZR 4:16 ሀ ካታምያ ኬፀትያነ እ ድርሳ ግምበይ ኦራፅያባ ግድኮ፥ ኤፍራፂሳ ሻፋፐ ሄፍንꬃን ደእያ ቢታይ ነ ኩሸፐ ከይዳይሳ ኤራ” ያግዶሶና።
EZR 4:17 ካዎይ ሀይሳዳ ግያ ዛሮ ኤንታዉ የድስ፤ “ቢታ አይስያ ረሁማ፥ ፃፍያ ስምሳያ፥ ሳማረንነ ኤፍራፂሳ ሻፋፐ ሄፍንꬃን ደእያ ኤንታራ እስፍዳ አሳ ሳሮ ጋይስ።
EZR 4:18 ህንተ ታዉ የድዳ ዳብዳበይ ብርሸትድ ናባበትን ስአስ።
EZR 4:19 ታ ኪታን፥ ካሰ ታርከይ ኮየትድ ፄለትያ ዎደ፥ ሀ ካታምያ በንፐካ ካዎታስ ማካላነ መቶ መꬋሸ ደእያ ቢታ ግደይስ ኤረትስ።
EZR 4:20 የሩሳላመን ዎልቃማ ካዎት ካዎትዶሶና፤ ኤፍራፂሳ ሻፋፐ ሄፍንꬃን ደእያ ቢታፈካ ሄ ካዎት ጊራነ ቃራፃ ኤክዶሶና።
EZR 4:21 ሄሳ ግሾ፥ ታኒ ኤንታዉ ሀ ኪታ እማና ጋካናዉ፥ ሀ አሳት ሄ ካታምዉ ኬፀይሳ ኤሳና መላ ኦድተ።
EZR 4:22 ህንተ ሀ ኦዳ ቀል ጎና መላ ናገትተ፤ ካዎታስ መቶ ዳርሳናዉ ኮሸና” ያግድ ኪትስ።
EZR 4:23 ካዋ አርፀክስሳ ዳብዳበይ ረሁማስ፥ ፃፍያ ስምሳያስነ ኤንታራ ደእያ ኡባስ ናባበትዳ ዎደ የሩሳላመን ደእያ አይሁደታኮ ኤለስ ብድ፥ ኤንቲ ኬፀይሳ ዎልቃን ኤስዶሶና።
EZR 4:24 ሄ ዎደፐ ዶምድ የሩሳላመን ደእያ ፆሳ ኬꬃ ኦሶይ ዳርዮስ ካዎትዳ ናምአንꬆ ላይꬅ ጋካናዉ ኤቅስ።
EZR 5:1 ሄ ዎደ ናምኡ ናበት ሀገይነ ዛካርያስ ይሁዳንነ የሩሳላመን ደእያ አይሁደ አሳስ እስራኤለ ፆሳ ሱንꬃን ትንብተ ኦድዶሶና።
EZR 5:2 ሳላትያላ ናአይ ዛሩባበልነ እዮሳደቃ ናአይ እያሱይ ደንድድ፥ የሩሳላመን ደእያ ጎዳ ኬꬃ ዛሪድ ኬፃናዉ ዶምዶሶና። ፆሳ ናበትካ ኤንታ ማድሸ ኤንታራ ደእዶሶና።
EZR 5:3 ሄ ዎደ ኤፍራፂሳ ሻፋፐ ሄፍንꬃን ደእያ ቢታ አይስያ ታንታን፥ ሳታርቡዛንነ ኤንታራ ደኤይሳት የሩሳላመ ይድ፥ “ሀ ኬꬃ ህንተ ኬፃና ማላ ህንተዉ ማታ እምዳይ ኦኔ?” ያግድ ኦይችዶሶና።
EZR 5:4 ቃስ፥ “ሀ ኬꬃ ኬፅያ አሳታ ሱንꬃይ ኦኔ?” ያግድ ኦይችዶሶና።
EZR 5:5 ሽን ፆሳ አይፈይ ይሁዳ ጭማታ ቦላ ደእያ ግሾ፥ ሀ ኦዳይ ዳርዮሳኮ ጋክን፥ ዳብዳበይ ያና ጋካናዉ ኤንታ ኦንካ ኦሶ ድግበና።
EZR 5:6 ኤፍራፂሳ ሻፋፐ ሄፍንꬃ ቢታ አይስያ ታንታናያ፥ ሳታርቡዛንነ ኤንታራ ኦꬅያ ካዋ ዳርዮሳስ ፃፍዳ ዳብዳበይ ሀይሳ።
EZR 5:7 ኤንቲ እያዉ የድዳ ዳብዳበይ ሀይሳዳ ያግድ ናባበቴስ። ካዋ ዳርዮሳ፥ ሳሮይ ነዉ ግዶ።
EZR 5:8 ኑኒ ይሁዳ ቢታን ደእያ ግታ ፆሳ ኬꬃ ብድ በእዳይሳ ካዎይ ኤሮ። ሄ ፆሳ ኬꬃይ ግታ ሹቻን ኬፀትስ፤ ግምበ ቱሳት ከይዶሶና፤ ኦሶይካ ግታ አኬካንነ ኤሶን ኦሰትሸ ደኤስ።
EZR 5:9 “ኑኒ፥ ሀ ኬꬃ ኬፃና ማላ ህንተዉ ማታ እምዳይ ኦኔ?” ያግድ ጭማታ ኦይችዳ።
EZR 5:10 ቃስ ኤንታና ካለꬅያ አሳታ ሱንꬃይ ኦነኮ ፃፍድ ነና ኤርሳናዉ ኤንታ ኦይችዳ።
EZR 5:11 ኤንቲ ሀይሳዳ ያግድ ዛርዶሶና፦ “ኑኒ ሳሎነ ሳአ ፆሳ አይለታ፤ ኑኒ ዳሮ ላይꬃፈ ካሰ ግታ እስራኤለ ካዎይ ኬፅድ ፖልዳ ኬꬃ ዛሪድ ኬፆስ።
EZR 5:12 ኑ አዋት ሳሎ ፆሳ ሀንቀꬅዳ ግሾ፥ እ ኤንታ ባብሎነ ካዋ ናቡካዳናፆራ ኩሸን አꬅድ እሚስ። እ ሀ ኬꬃ ላልስ፤ አሳ ድእድ ባብሎነ ቢታ ኤፍስ።”
EZR 5:13 “ሽን ባብሎነ ካዎይ ቅሮስ ባ ካዎትዳ ኮይሮ ላይꬃን፥ ፆሳ ኬꬃ ዛር ኬፃና መላ አዋጆ ከስስ።
EZR 5:14 ናቡካዳናፆር የሩሳላመን ደእያ ፆሳ ኬꬃፈ ኤክ ኤፍድ፥ ባብሎነ ቢታን ደእያ ባ ካዎ ጋꬎን ዎꬅዳ ዎርቃነ ብራ ሚሸታካ ቅሮስ ዛሪድ የድስ። ሄ ሚሸት ካዎይ ቅሮስ ይሁዳ ቢታ አይሳና መላ ዶርዳ ሰሳብሳራ ኩሸን እመትስ።
EZR 5:15 ካዎይ፥ ‘ሀ ሚሸታ ኤካ ኤፋዳ የሩሳላመን ደእያ ፆሳ ኬꬃን ዎꬃ፤ ፆሳ ኬꬃይካ ካሰ ደእያ በሳን ኬፀቶ’ ያግን፥
EZR 5:16 ሰሳብሳር ይድ፥ ‘ፆሳ ኬꬃ ኬፅያ በሳን የሩሳላመን ባስስ። እ ሀእ ጋካናዉ ዉርቤና፤ ሄ ዎደፐ ዶምድ፥ ኬፀትሸ ደኤስ’ ” ያግዶሶና።
EZR 5:17 “ህዛ ሀ ኦዳይ ካዋ ኡፋይስያባ ግድኮ፥ አነ ካዎይ ቅሮስ ሀ ፆሳ ኬꬃ የሩሳላመን ኬፃና መላ፥ ቱማካ አዋጁዋ ከስዳኮ ኤራናዉ ካሰ አꬍዳ ባብሎነ ካዎታ ታርከ ማዝጋበይ ኮየትድ ፄለቶ። ሄሳፈ ጉየ፥ ካዎይ ሀ ኦዳ ዋታናዉ ቆፕዳኮ ኑና ኤርሶ” ያግድ ፃፍዶሶና።
EZR 6:1 ሄሳ ግሾ፥ ካዎይ ዳርዮሳ ኪታን፥ ባብሎነ ደእያ ሚሸ ዎꬅያ ኬꬃን ደእያ ታርከ ማዝጋበታ ኮይዶሶና።
EZR 6:2 ሜዶና አዉራጃን አህማታ ካታማን እስ ፃꬃ ማፃፍ በንትስ፤ ሄ ማፃፋን ፃፈትዳባይ ሀይሳዳ ያጌስ፦
EZR 6:3 “ካዎይ ቅሮስ ባ ካዎትዳ ኮይሮ ላይꬃን፥ የሩሳላመን ደእያ ፆሳ ኬꬃ ግሾ፥ ሀይሳዳ ግያ አዋጆ ከስስ። ፆሳ ኬꬃይ ያርሾ ሺሽያ በሲ ግድድ ዛር ኬፀቶ፤ እያ ባሶይካ የገቶ። ሄ ኬꬃ አዱሳተꬃይ ኡሱፑን ታሙ ዋꬋ፥ ዳልጋተꬃይ ኡሱፑን ታሙ ዋꬋ ግዶ።
EZR 6:4 ሄꬑ ቶሆ ግታ ሹቻን ዩሾ፥ እስ ቶሆ ምꬃ ቱሳት ዩዮ። ሄሳስ ኮሽያ ሚሸ ኡባይ ካዎ ሻሎ ምንጅያ ኬꬃፈ እመቶ።
EZR 6:5 ናቡካዳናፆር የሩሳላመን ደእያ ፆሳ ኬꬃፈ ኤክድ፥ ባብሎነ ኤህዳ ፆሳ ኬꬃ ዎርቃነ ብራ ሚሸት ባንታ በሳ ጉየ የሩሳላመ ስሚድ፤ ፆሳ ኬꬃን ደኦ” ያግስ።
EZR 6:6 ሄሳፈ ጉየ፥ ዳርዮስ ፃፍዳ ዳብዳበይ ሀይሳዳ ያጌስ። “ህንተኖ ኤፍራፂሳ ሻፋፐ ሄፍንꬃ ቢታ አይስያ ታታናያ፥ ሳታርቦዝንያነ ኤንታራ ኦይሳቶ፥ ሀ ፆሳ ኬꬃኮ ሺቆፕተ።
EZR 6:7 ሀ ፆሳ ኬꬃ ኦሱዋስ ꬉበ ግዶፕተ። አይሁደታ ሀላቃትነ አይሁደ ጭማት ፆሳ ኬꬃ ካሰ በሳን ዛሪድ ኬፆ።”
EZR 6:8 ሄሳ ቦላ ቃስ፥ “ሀ አይሁደ ጭማት ፆሳ ኬꬃ ኬፅያ ዎደ፥ ኤንቲ ኦꬅያ ኦሶይ ኤቆና መላ ኤንታዉ ኮሽያ ሚሸ ኡባ ኤፍራፂሳ ሻፋፐ ሄፍንꬃ ቢታፈ ሺሽዳ ካዋ ጊራ ሚሽያፐ ኤንታዉ እማና መላ ታኒ ኪታስ።
EZR 6:9 የሩሳላመን ደእያ ካህነት ሳሎ ፆሳስ ፁሳ ያርሾ ያርሻናዉ ኮሽያ ዎፋኖ ግድን፥ ማራዘ ግድን ዎይኮ ዶርሳ ኡርገ ግድን ኤንታዉ እምተ። ቃስ አይባካ ፓጭሶና ኤንቲ ኮይያ ግስተ፥ ማፅነ፥ ዎይነነ ዛይተ ኤንታዉ ጋላስ ጋላስ እምተ።
EZR 6:10 ሄሳ ህንተ እመይ ኤንቲ ሳሎ ፆሳ ኡፋይስያ ያርሾ ያርሻናሳነ ካዋስነ እያ ናይታስ ዎሳናሳ።
EZR 6:11 ሀ አዋጁዋ ላምያ ኦንካ ደእኮ፥ እያ ኬꬃ ቱሳ ሾድድ፥ ሄ ቱሳ ቦላ እያ ካቆ፤ እያ ኬꬃይካ ፕቶ የግያ በሰ ግዶ።
EZR 6:12 ሀ ኪታ ላማናዉ ዎይኮ የሩሳላመን ደእያ ፆሳ ኬꬃ ላላናዉ ኩሸ ደንꬅያ አይ ካዎይ ዎይኮ አስ ግድን፥ ባ ሱንꬃይ ፄገታና መላ የሩሳላመ ዶርዳ ፆሳይ እያ ꬋይሶ። ታኒ ዳርዮስ ሀይሳ ኪታስ። ሀ ኡባይ ምኖተꬃን ፖለቶ” ያግስ።
EZR 6:13 ሄሳፈ ጉየ፥ ኤፍራፂሳ ሻፋፐ ሄፍንꬃ ቢታ አይስያ ታታናያ፥ ሳታርቡዛንነ ኤንታራ ኦꬅያ ኡባይ ካዎይ ዳርዮስ ኪትዳይሳዳ ምኖተꬃን ኦꬅድ ፖልዶሶና።
EZR 6:14 አይሁደ ጭማት ባንታ ኦሱዋ አጎና ኦꬅዶሶና፤ ቃስ ናበይ ሀገይነ እዶ ናአይ ዛካርያስ ኦድዳ ቃላን ምነትዶሶና። እስራኤለ ፆሳይ ኪትዳይሳዳ ፋርሰ ካዎት ቅሮስ፥ ዳርዮስነ አርፀክስስ አዋጅዳይሳዳ ፆሳ ኬꬃ ኬፅድ ዉርስዶሶና።
EZR 6:15 ዳርዮስ ካዎትዳ ኡሱፑንꬆ ላይꬃን አዳረ ጌተትያ አጌናን ሄꬓንꬆ ጋላሳን፥ ፆሳ ኬꬃ ኦሶይ ፖለትስ።
EZR 6:16 እስራኤለ አሳይ፥ ካህነት፥ ሌወትነ ድኦፐ ስምዳ አሳ ኡባይ ፆሳ ኬꬃ አንጅስያ ባኣለ ኡፋይሳን ቦንችዶሶና።
EZR 6:17 ሄ ባለይ ቦንቸትያ ዎደ ኤንቲ እስ ፄቱ ኮርማ፥ ናምኡ ፄቱ ማራዘ፥ ኦይዱ ፄቱ ዶርሳ ኡርገታ ያርሽዶሶና። ቃስ ናጋራ ያርሾስ ታማነ ናምኡ እስራኤለ ኮቻታ ታይቦን ታማነ ናምኡ ኮለ ያርሽዶሶና።
EZR 6:18 ሙሰ ማፃፋን ፃፈትዳይሳዳ፥ የሩሳላመን ደእያ ፆሳ ኬꬃን ኦꬃና መላ ካህነትነ ሌወት ኤንታ ማራዳ ማራዳ ዎꬅዶሶና።
EZR 6:19 ድኦፐ ስምዳ አሳይ ኮይሮ አጌናን ታማነ ኦይዳንꬆ ጋላስ ፓስካ ባኣለ ቦንችዶሶና።
EZR 6:20 ካህነትነ ሌወት ባንታና ጌሽዶሶና፤ ኤንቲ ኡባይ ዎጋዳ ጌይዶሶና። ሌወት ድኦፐ ስምዳ ኡባስ፥ ካህነታስነ ባንታዉ ፓስካ ዶርሰ ሹክዶሶና።
EZR 6:21 ድኦፐ ስምዳ እስራኤለ አሳይነ አይሁደ ግዶና አሳይ ኦꬅያ ቱናተꬃፈ ባንታና ሻክድ፥ ጎዳኮ፥ እስራኤለ ፆሳኮ ስምዳ አሳ ኡባይ ፓስካ ምዶሶና።
EZR 6:22 ጎዳይ አሶረ ካዋ ቆፋ ላምድ እስራኤለ ጎዳ፥ ፆሳ ኬꬃ ኬፅድ ፖላና መላ ማድዳ ግሾ፥ ኤንቲ ላፑን ጋላስ ኡይꬃ ባኣለ ኡፋይሳን ቦንችዶሶና።
EZR 7:1 ዳሮ ዎደፐ ጉየ፥ ፋርሰ ካዉአ አርፀክስስ ካዎትዳ ዎደ እዝራ ጌተትያ እስ አስ ደእስ። እዝር ሳራያ ናአ፤ አዛራ ናአ፤ ካልቀ ናአ፤
EZR 7:2 ሳሉማ ናአ፤ ሳዶቃ ናአ፤ አክፁባ ናአ፤
EZR 7:3 አማረ ናአ፤ አዛራ ናአ፤ ማራዮታ ናአ፤
EZR 7:4 ዛራሀ ናአ፤ ኦዛ ናአ፤ ቡቃ ናአ፤
EZR 7:5 አብሱ ናአ፤ ፍንሃሳ ናአ፤ ፍንሃስ አላዛራ ናአ፤ ካህነ ሀላቃ አሮና ናአ።
EZR 7:6 ሀይስ እዝር ባብሎነፐ ብስ። ጎዳይ፥ እስራኤለ ፆሳይ እምዳ ሙሰ ህግያ ኤርያ አስ። ጎዳ፥ ፆሳ ኩሸይ እያ ቦላ ደእያ ግሾ፥ እ ኦይችዳባ ኡባ ካዎይ እያዉ እሚስ።
EZR 7:7 ካዎይ አርፀክስስ ካዎትዳ ላፑንꬃ ላይꬃን እስራኤለ አሳፐ ጉꬃታራ፥ ካህነት፥ ሌወት፥ ዛማረት፥ ፐንገ ናገይሳትነ ፆሳ ኬꬃ ኦሳንቾት እዝራራ እስፈ የሩሳላመ ብዶሶና።
EZR 7:8 ካዎይ ካዎትዳ ላፑንꬃ ላይꬃን እቻሻንꬆ አጌናን እዝር የሩሳላመ ጋክስ።
EZR 7:9 ፆሳ ሎኦ ኩሸይ እያ ቦላ ደእያ ግሾ ኮይሮ አጌናን ኮይሮ ጋላስ ባብሎነፐ ከይድ፥ እቻሻንꬆ አጌናን ኮይሮ ጋላስ የሩሳላመ ጋክስ።
EZR 7:10 እዝር ጎዳ ህግያ ፃናኦን፥ ኦሶ ቦላ ፔሾንነ እስራኤለ አሳ እያ ዎጋነ እያ ህግያ ታማርሳናዉ ባ ዎዛና ጊግስስ።
EZR 7:11 ጎዳይ እስራኤለስ እምዳ ህግያነ ዎጋ፥ ሎይꬅ ኤርያ ካህነነ ፃፈ ግድዳ እዝራስ ካዎይ አርፀክስስ ፃፍዳ ዳብዳበይ ሀይሳ።
EZR 7:12 “ካዎታ ካዋ አርፀክስሳፐ፥ ካህነነ ሳሎ ፆሳ ህገ ሎይꬅ ኤርያ እዝራስ፥ ሳሮይ ነዉ ግዶ!
EZR 7:13 “ታ ካዎተꬃ ግዶን ደእያ እስራኤለ አሳፐ ኦንካ፥ ካህነ ዎይኮ ሌወ ግድን፥ የሩሳላመ ባናዉ ኮይያ አሳይ ኔራ ባና መላ ታኒ ኪታስ።
EZR 7:14 ታንነ ታራ ዞረትያ ላፑን አሳት እስፈ ግድድ፥ ነ ኩሸን ደእያ ፆሳ ህግያዳ፥ ባዳ ይሁዳንነ የሩሳላመን ደእያ ሀኖተꬃይ አይ መለኮ ኦይቻና መላ ነና ኪቶስ።
EZR 7:15 የሩሳላመን ደእያ እስራኤለ ፆሳስ፥ ታንነ ታራ ዞረትያ አሳት ኑ ዶሳን እምዳ ዎርቃነ ብራ እሞታ ኤካዳ ባ።
EZR 7:16 ሄሳ ቦላ ቃስ ኔኒ ባብሎነ ቢታ ኩመꬃፈ ደምዳ ብራነ ዎርቃ ኡባ፥ ቃስ እስራኤለ አሳይነ ካህነት የሩሳላመን ደእያ ባንታ ፆሳ ኬꬃስ ዶሳን እምዳ እሞታ ኤካዳ ባ።
EZR 7:17 ሀ ሚሽያን ኮርማታ፥ ማራዘታ፥ ዶርሳ ኡርገታነ፥ ካꬃ ያርሾስነ ኡሻ ያርሾስ ኮሽያባ ሻማዳ፥ የሩሳላመን ደእያ ህንተ ፆሳ ኬꬃን ያርሾ በሳን ያርሻ።
EZR 7:18 “ሄሳፈ ፓላህዳ ብራነ ዎርቃ ኔንነ ኔራ ደእያ አይሁደ ግድዳ ነ እሻት ህንተ ፆሳ ሸነን፥ ህንተ ኦꬃናዉ ኮያባ ኦꬅተ።
EZR 7:19 ቃስ ኑኒ ህንተ ፆሳ ኬꬃስ፥ እምዳ ሚሸታ ኡባ የሩሳላመ ፆሳ ስንꬃን ሺሻ።
EZR 7:20 ሄሳፈ ሀራባይ ፆሳ ኬꬃስ ኮሽያባይ አይብካ ደእኮ፥ ካዎ ሚሸ ምንጅያ ኬꬃፈ ኤካናዉ ዳንዳኣሳ።
EZR 7:21 “ታኒ ካዎይ አርፀክስስ ኤፍራፂሳ ሻፋፐ ሄፍንꬃን ቢታን ደእያ ሚሸ ኬꬃን አዋተꬃይ ደእያ ኡባታስ ሀ ኪታ እማስ። ካህነነ ሳሎ ፆሳ ህግያ ሎይꬅ ኤርያ እዝር ህንተና ኦይችያባይ አይባ ግድኮካ እያዉ እምተ።
EZR 7:22 ሄꬑ ሙኩሉነ ኦይዱ ፄቱ ክሎ ግራመ ብራ፥ እስ ፄቱ ኩንታለ ግስተ፥ ናምኡ ሙኩሉ ልትሮ ዎይነ ኡሽ፥ ናምኡ ሙኩሉ ልትሮ ሻማሆ ዛይተነ ኮሽያ መላ ማፅነ እያዉ እምተ።
EZR 7:23 ካዋ ቦላነ ካዋ ናይታ ካዎተꬃ ቦላ ሀንቆይ ዮና መላ ሳሎ ፆሳይ ባ ኬꬃስ ኮይያባ ኡባ እምተ።
EZR 7:24 ካህነታፐ፥ ሌወታፐ፥ ዛማረታፐ ፐንገ ናገይሳታፐ፥ ፆሳ ኬꬃ ኦሳንቾታፐነ ፆሳ ኬꬃ ግዶን ዱማ ዱማ ኦሶ ኦꬅያ አሳፐ ህንተ ጊራነ ቃራፃ ኤካናዉ ህንተዉ ማት ባዋ።
EZR 7:25 “ላ እዝራ፥ ኔኒ፥ ነዉ ፆሳይ እምዳ ጭንጫተꬃን ኤፍራፂሳ ሻፋፐ ሄፍንꬃ ቢታን ደእያ ነ ፆሳ ህግያ ኤርያ አሳ ቦላ ፕርዳና መላ ዳይናታነ አይሰይሳታ ሹማ። ህግያ ኤሮና አስ ደእኮ ኔኒ ኤንታ ታማርሳ።
EZR 7:26 ነ ፆሳ ህግያነ ካዋ ህግያ ኪተቶና ኦንካ ደእኮ፥ እ ቃይ ባይና ሀይቆ ዎይኮ ጋደፐ ጎደቶ ዎይኮ እያ ሻሎይ ቦንቀቶ ዎይኮ ቃሾን ሴረቶ” ያግስ።
EZR 7:27 የሩሳላመን ደእያ ፆሳ ኬꬃ ሀይሳዳ ቦንቸታና መላ ካዋ ዎዛናን ሀ ቆፋ ዎꬅዳ ጎዳ፥ ኑ አዋታ ፆሳ ጋላት ጋኮ!
EZR 7:28 ካዋ፥ ካዉዋራ ዞረተይሳታነ እያራ ኦꬅያ ዎልቃማ ሀላቃታ ስንꬃን ባ ቴማ ታዉ እምዳ ፆሳስ ጋላት ግዶ! ጎዳ፥ ታ ፆሳ ኩሸይ ታራ ደእያ ግሾ፥ እስራኤለ ሀላቃታፐ ኤረትዳይሳታ ዶራዳ የሩሳላመ ኤካ ባና መላ እ ታዉ ምኖተꬅ ግድስ።
EZR 8:1 ካዎይ አርፀክስስ ካዎትዳ ዎደ ታራ እስፈ ባብሎነ ቢታፈ ስምዳ ሶ አሳ ሀላቃት ሀይሳታ፤
EZR 8:2 ፍንሃሳ ያራፐ ገርሶና፥ እታማራ ያራፐ ዳነላ፥ ዳዊታ ያራፐ ሳካና ናኣ ሀፁሳ፥
EZR 8:3 ፓሮሳ ያራፐ ዛካርያሳነ ኤንታ የለታ ማራን ፃፈትዳ ሀራ እስ ፄታነ እሻታሙ አደታ።
EZR 8:4 ፓሀት-ሞአበ ያራፐ ዛራሀ ናኣ ኤልሆኤናያነ እያራ ደእያ ናምኡ ፄቱ አደታ።
EZR 8:5 ዛታ ያራፐ ያሀዝኤላ ናአ ሳካናነ እያራ ደእያ ሄꬑ ፄቱ አደታ።
EZR 8:6 አድና ያራፐ ዮናታና ናኣ ኤቤዳነ እሻታሙ አደታ።
EZR 8:7 ኤላማ ያራፐ ጎቶላ ናአ ይሻያነ እያራ ደእያ ላፑን ታሙ አደታ።
EZR 8:8 ሳፋፃ ያራፐ ምካኤላ ናአ ዝባዳነ እያራ ደእያ ሆስፑን ታሙ አደታ።
EZR 8:9 እዮኣባ ያራፐ ይኤላ ናአ አብድዩነ እያራ ደእያ ናምኡ ፄታነ ታማነ ሆስፑን አደታ።
EZR 8:10 ባና ያራፐ ዮስፍያ ናአ ሳሎምታነ እያራ ደእያ እስ ፄታነ ኡሱፑን ታሙ አደታ።
EZR 8:11 በባያ ያራፐ በባያ ናኣ ዛካርያሳነ እያራ ደእያ ላታማነ ሆስፑን አደታ፥
EZR 8:12 አዝጋዳ ያራፐ ሀቃፃና ናአ ዮሃናነ እያራ ደእያ እስ ፄታነ ታሙ አደታ።
EZR 8:13 አዶንቃማ ያራፐ ዉርሰꬃን ስምዳይሳት፥ ኤልፋላፃ፥ ይኡኤላ፥ ሻማያነ ኤንታራ ደእያ ኡሱፑን ታሙ አደታ።
EZR 8:14 ብግዋያ ያራፐ ኡታያ፥ ዛኩራነ ኤንታራ እስፈ ሀራ ላፑን ታሙ አደታ።
EZR 8:15 ታኒ አሀዋኮ ጎግያ ሻፋ ማታን ኤንታ ሺሻስ። ኑኒ ሄ በሳን ዱንካንድ፥ ሄꬑ ጋላስ ታክዳ። ታኒ ሄ በሳን ደእያ አሳነ ካህነታ ታይብያ ዎደ ሌወ ያራፐ እስ አስካ ደማብከ።
EZR 8:16 ሄሳ ግሾ፥ አላዛራ፥ አርኤላ፥ ሻማያ፥ ኤልናታና፥ ያርባ፥ ኤልናታና፥ ናታና፥ ዛካርያሳነ ማሱላማ ጌተተይሳታነ ጭንጫ አስ ግድዳ ዮያርባነ ኤልናታና ፄጋስ።
EZR 8:17 ኤንታ ካስፍያ ጌተትያ በሳን ሌወታስ ሀላቃነ ፆሳ ኬꬃ ኦሳንቾ ግድዳ አዶስነ እያ ዳቦታስ ኦዳናባ አኬክሳዳ ኑ ፆሳ ኬꬃን ኦꬅያ አሰ ኤሀና መላ ኪታስ።
EZR 8:18 ኑ ፆሳ ሎኦ ኩሸይ ኑ ቦላ ደእያ ግሾ፥ እስራኤለ ናአ ሌወ ያራ ማህላ ያራነ ዳሮ ጭንጫ አስ ግድዳ ሳረባያ ጌተትያ አድያ ታማነ ሆስፑን እያ ናይታነ እያ እሻታ፥ ኑስ የድዶሶና።
EZR 8:19 ሄሳዳካ፥ ሀሻባ፥ ማራራ ያራ ግድዳ ያሻያ፥ እያ ናይታነ ላታሙ ግድያ እያ እሻታራ የድዶሶና።
EZR 8:20 ሄሳ ቦላ ካሰ አዋት ሌወታ ማዳና መላ ዳዊቲነ እያራ ኦꬅያ ሀላቃት ሹምዳ ፆሳ ኬꬃ ኦሳንቾታፐ ናምኡ ፄታነ ላታሙ አሳታ የድዶሶና። ሄሳት ኡባይ ባንታ ሱንꬃን ፃፈትዶሶና።
EZR 8:21 ኑ ፆሳ ስንꬃን ኑ ሁጵያ ካዉሽድ፥ ኦገይ ኑስ፥ ኑ ናይታስነ ኑ ሻሎ ኡባስ ሳሮ ግዳና መላ ዎሳና መላ ያን አሀዋ ሻፋ ማታን ፆማ አዋጃስ።
EZR 8:22 ካሰ ኑኒ ካዋስ፥ “ኑ ፆሳ ሎኦ ኩሸይ እያ ኮየይሳታ ቦላ ደኤስ፤ ሽን እያ ዎልቃማ ሀንቆይ እያ አገይሳታ ቦላ ደኤስ” ያግድ ኦድዳ ግሾ፥ ኑኒ ብያ ኦግያን ደእያ ሞርከታፐ ኑና ናጋና መላ ዎታዳረነ ፓራታ እማናዳ ካዋ ኦይቻናዉ ዬላታስ።
EZR 8:23 ሄሳ ግሾ፥ ኑኒ ፆምድ፥ ፆሳ ዎስዳ፤ እካ ኑ ዎሳ ስእስ።
EZR 8:24 ካህነ ሀላቃታፐ ሳረባያ፥ ሀሳባያነ ሀራ ኤንታ ዳቦ ግድዳ ታሙ አሳታ ዶራስ።
EZR 8:25 ካዎይ፥ እያራ ዞረተይሳት፥ እያ ሹማትነ እስራኤለ ኡባይ ኑ ፆሳ ኬꬃስ እምዳ ብራ፥ ዎርቃነ፥ ሀራ ሚሸታ ኡባ ልካዳ ኤንታ ኩሸን ዎꬃስ።
EZR 8:26 ታኒ ኤንታዉ እምዳባይ ሀይሳ፤ ላታማነ ናምኡ ሙኩሉ ክሎ ግራመ ብራ፥ ሄꬑ ሙኩሉነ ኦይዱ ፄቱ ክሎ ግራመ ብራፐ ኦሰትዳ ሚሸታ፥ ሄꬑ ሙኩሉነ ኦይዱ ፄቱ ክሎ ግራመ ዎርቃ፥
EZR 8:27 ሆስፑን ክሎ ግራመነ ኦይዱ ፄቱ ግራመ ዎርቃፈ ኦሰትዳ ላታሙ ሳነታነ ዎርቃዳ አልኦነ ሙሩቶ ግድዳ ናሰ ብራታፐ ኦሰትዳ ናምኡ ሳነታ።
EZR 8:28 ሄሳፈ ጉየ፥ ታኒ ኤንታኮ ሀይሳዳ ያጋስ፤ “ህንተነ ሀ ሚሸት ጎዳስ ዱማትደታ፤ ሀ ብራይነ ዎርቃይ፥ አሳይ ባ ዶሳን ጎዳስ፥ ህንተ አዋታ ፆሳስ እምዳ እሞታ።
EZR 8:29 የሩሳላመን ደእያ ፆሳ ኬꬃን ሚሸ ምንጅያ ኬꬃ ጋክድ፥ ካህነ ሀላቃታ ስንꬃን፥ ሌወታ ስንꬃንነ እስራኤለ ያራታ ሀላቃታ ስንꬃን እማና ጋካናዉ፥ ሀ ሚሸታ ሎይꬅድ ናግተ” ያጋስ።
EZR 8:30 ሄሳ ግሾ፥ ካህነትነ ሌወት የሩሳላመን ደእያ ፆሳ ኬꬅ ኤፋናዉ ብራ፥ ዎርቃነ ሀራ ሚሸታ ኡባ ምዛነን ልክድ አዋተꬃን ኤክዶሶና።
EZR 8:31 ኮይሮ አጌናን ታማነ ናምአንꬆ ጋላሳን የሩሳላመ ባናዉ አሀዋ ሻፋ ማታፐ ደንድዳ። ኑ ቦላ ደእያ ኑ ፆሳ ሎኦ ኩሸይ ኑ ብያ ኦገን ደእያ ሞርከታፐነ ፓንጋታፐ ኑና አሽስ።
EZR 8:32 ኑኒ የሩሳላመ ጋክድ፥ ያን ሄꬑ ጋላስ ሸምፕዳ።
EZR 8:33 ኦይዳንꬆ ጋላስ ብራ፥ ዎርቃነ ሀራ ሚሸታ ኡባ ልክድ፥ ኡራያ ናኣ ካህንያ ማረሞታስ እምዳ። ፍንሃሳ ናኣ አላዛር፥ ሌወ ግድዳ እያሱ ናኣ ዮዛባትነ ብንያ ናአ ኖኣድ እያራ እስፈ ደኦሶና።
EZR 8:34 ኡባባይ ሄ ዎደ ታይበት ልከትድ ፃፈትስ።
EZR 8:35 ሄሳፈ ጉየ፥ ድኦፐ ስምዳ አሳይ፥ እስራኤለ ፆሳስ፥ ታማነ ናምኡ ኮርማ፥ ኡዱፉን ታማነ ኡሱፑን ማራዘነ ላፑን ታማነ ላፑን ዶርሳ ኡርገታ ፁሳ ያርሾ ኦꬅድ፥ ቃስ ታማነ ናምኡ ኮለ ናጋራ ያርሾ ኦꬅድ ጎዳስ ያርሽዶሶና። ሄስ ኡባይ ፁሳ ያርሾ ግድድ ጎዳስ ሺቅስ።
EZR 8:36 ካዎይ ኪትዳ ኪታካ ካዉዋፐ ጋርሳራ ቢታ አይሰይሳታስነ ኤፍራፂሳ ሻፋፐ ሄፍንꬃ ቢታ አይሰይሳታስ እምዶሶና፤ ኤንቲ እስራኤለ አሳነ ፆሳ ኬꬃ ኦሱዋ ማድዶሶና።
EZR 9:1 ሀ ኡባይ ሀንዳፐ ጉየ፥ ደርያ ካለይሳት ታኮ ይድ፥ ሀይሳዳ ያግዶሶና፤ “እስራኤለ አሳይ፥ ሀር አቶሽን፥ ካህነት፥ ሌወት፥ ባንታ ሄራን ደእያ፥ ካናነታ፥ ህተታ፥ ፓርዘታ፥ ያቡሰታ፥ አሞነታ፥ ሞአበታ፥ ግብፀታነ አሞረታ ቱናፐ ባንታና ሻክቦኮና።
EZR 9:2 ባንታዉነ ባንታ ናይታስ አይሁደ ግዶና ማጫ ናይታፐ ማቾ ኤክዶሶና፤ ሄሳ ጋሶን ጌሻ ዘረꬃ አይሁደ ግዶና አሳራ ዋላክዶሶና። ሀ ባላን ኮይሮ ግድዳይ ካለይሳታነ ሀላቃታ” ያግዶሶና።
EZR 9:3 ታኒ ሀ ኦዳ ስእዳ ዎደ ታ ማኡዋነ ታ ቃምስያ ዳካስ፤ ታ ሁጵያነ ታ ቡቻ ስካስ፤ ዳሮ ዳጋማዳ ኡታ አጋስ።
EZR 9:4 ድኦፐ ስምዳ አሳይ ኦꬅዳ ናጋራ ግሾ፥ እስራኤለ ፆሳይ ኦድዳ ቃላስ ያይዳ አሳ ኡባይ ታኒ ደእያ በሳ ታኮ ሺቅዶሶና። ኦማርሳ ያርሾ ያርሽያ ዎደ ጋካናዉ ዳጋማዳ ኡትዳ በሳፈ ደንዳብከ።
EZR 9:5 ሽን ኦማርሳ ያርሾይ ሺቅያ ዎደ፥ ታ ማኦይነ ታ ቃምሰይ ዳከትድ ደእሽን፥ ታኒ አዛናዳ ኡትዳ በሳፈ ደንዳስ። ጉልባታዳ ጎዳኮ፥ ታ ፆሳኮ፥ ታ ኩሽያ ደንꬃዳ፥ ሀይሳዳ ያጋዳ ዎሳስ።
EZR 9:6 “አቤት ታ ፆሳዉ፥ ኑ ናጋራይ ዶረትድ ኑ ሁጵያፐ አꬍዳ ግሾነ ኑ ናቆይ ሳሎ ጋክዳ ግሾ ታኒ ታ ሶምኡዋ ኔኮ ደንꬃናዉ ያያይስነ ዬላታይስ።
EZR 9:7 ኑኒ ኑ ማይዛታ ዎደፐ ዶምን፥ ሀች ጋካናዉ፥ ነና ዳሮ ናቅዳ። ኑ ናጋራ ጋሶን ኑኒ፥ ኑ ካዎትነ ኑ ካህነት ሀእይሳዳ አላጋ ካዎታ ኩሸን ኩንድዳ፤ ማሻስ፥ ዶኦስ፥ ቦንቄስነ ዬላስ አꬍድ እመትዳ።
EZR 9:8 “ሽን ሀእ ጎዳይ ኑ ፆሳይ ኑፐ ጉꬃ አስ አሻናዉነ ባ ኬꬃን ኑስ በሰ እማናዉ ኮይድ ጉꬃ ዎደስ ማሮተꬅ እሚስ። ሄሳ ግሾ ፆሳይ ኑ አይፊያ ዶይስ፤ ኑ አይለተꬃን ደእሽን ጉꬃ ዎደስ ሸምፖ እሚስ።
EZR 9:9 ኑኒ አይለ ግድኮካ፥ ኑ ፆሳይ ኑና አይለተꬃን አግቤና፤ ኑ ደኡዋ ኦራꬅስ። ኑ ፆሳ ኬꬃ ኬፃና መላ፥ ላለትዳይሳ ኦራꬃና መላነ ይሁዳንነ የሩሳላመን ሳሮ ዳና መላ ፋርሰ ካዎታ ስንꬃን ኑስ ቴሞ እሚስ።
EZR 9:10 “ሽን ኑ ፆሳዉ፥ ሀእ ያትን፥ ኑኒ ዎይጋኔ? ሄኮ ሀእካ ነ ኪታ ቶችዳ።
EZR 9:11 ኑ ቶችዳይ ነ አይለ ግድዳ ናበታ ባጋራ ‘ህንተ ላታናዉ ገልያ ቢታይ፥ እን ደእያ አሳን ቱንዳሮ፤ ሀ ጋፃፐ ህን ጋፃ ጋካናዉ ኤንታ ኢታ ኦሱዋንነ ቱናተꬃን ኩማሱ።
EZR 9:12 ሄሳ ግሾ፥ ህንተ ምኖ ግዳና መላ፥ ሄ ቢታ አይፍያ ማና መላነ መርናዉ ህንተ ናይታስ ላትሳና መላ፥ ህንተ ማጫ ናይታ ኤንታ አደ ናይታስ እሞፍተ፤ ኤንታ ማጫ ናይታ ህንተ አደ ናይታስ ኤኮፍተ። ኤንቲ ሳሮተꬃንነ ዱረተꬃን ዳና መላ አሞቶፍተ’ ያጋዳሳ።
EZR 9:13 “ኑ ቦላ ጋክዳ ኢታባ ኡባይ ኑ ኢታ ኦሱዋነ ኑ ግታ ናጋራ ጋሶና። ግዶሽን፥ ኔኒ ኑ ፆሳይ ኑ ናጋራ ዳሮተꬃ መላ ኑና ፕርዳባካ፤ ሽን ኑፐ ጉꬃታ አሻዳሳ።
EZR 9:14 ኑኒ ሀይሳ መላ ቱናባ ኦꬅያ አሳራ ኤኮንነ ገሎን ዋላከትድ፥ ዋንድ ነ ኪታ እፃስ ጋኔ? ሀ አትዳ ጉꬃ ኮቻይ ꬋያና ጋካናዉ ነ ሀንቆይ ኑ ቦላ ዳረነዬ?
EZR 9:15 አቤት ጎዳዉ፥ እስራኤለ ፆሳዉ፥ ኔኒ ፅሎ፤ ኑኒ ሀእ ጋካናዉ አትድ ደኦን ደኦስ። ኑ ናጋራ ጋሶን ኑፐ እሶይካ ነ ስንꬃን ኤቃናዉ ዳንዳኤይ ባዋ፤ አትዳይሳት ሀች ሀይሳን ነ ስንꬃን ደኦስ” ያጋስ።
EZR 10:1 እዝር ፆሳ ኬꬃ ስንꬃን ኩንድድ ዬክሸ ዎስያ ዎደነ ናጋራ ፓፅያ ዎደ ማጭ፥ አደይነ ናእ ደእያ እስራኤለ አሳይ እያኮ ሺቅድ፥ ይባታ ዬሆ እያራ ዬክዶሶና።
EZR 10:2 ኤላማ ያራ ግድዳ ይኤላ ናአይ ሳካን ሀይሳዳ ያግስ፤ “ኑኒ ኑ ዩሾን ደእያ አላጋ ማጫሳታ ኤክድ፥ ኑ ፆሳስ አማነትቦኮ። ግዶሽን፥ ሀእካ እስራኤለስ ኡፋይስ ደኤስ።
EZR 10:3 ታ ጎዳዉ፥ ኔንነ ኑ ፆሳ ኪታ ናገይሳት ዞርዳይሳዳ ኑኒ ሀ ማጫሳነ ኤንታፈ የለትዳ ናይታ ኡባ የዳናዉ ቃላ ገሎስ። ሄስ ኡባይ ጎዳ ህገይ ገይሳዳ ፖለቶ።
EZR 10:4 እዝራ፥ ሀ ኦሶይ ነ ኩሸን ደኤስ፥ ደንዳ፤ ኑኒ ነና ማዳና፤ ምና!” ያግስ።
EZR 10:5 እዝር ደንድ ኤቅድ፥ ካህነታ፥ ሌወታነ እስራኤለ አሳ ኡባ ሀ ጌተትዳይሳታ ኦꬃና መላ ጫቅስስ፤ ኤንትካ ጫቅዶሶና።
EZR 10:6 እዝር ፆሳ ኬꬃ ስንꬃፈ ደንድድ፥ ኤልያሴባ ናአይ ዮሃን ደእያ ክፍለ ገልስ። ያን ድኦፐ ስምዳ አሳይ ናጋራስ ዬክሸ አቅዳ ግሾ፥ ሄ በሳን ካꬅ ምቤና፤ ሃካ ኡይቤና።
EZR 10:7 ድኦፐ ስምዳ አሳይ የሩሳላመ ሺቃና መላ፥ ይሁዳንነ የሩሳላመን አዋጅዶሶና።
EZR 10:8 ሀ ሄꬑ ጋላሳታ ግዶን ሄ በሳን ሺቆና ኦንካ ደእኮ፥ እያዉ ደእያባይ ኡባይ ኤከታና መላነ እካ ድኦፐ ስምዳ አሳ ሺቁዋፐ ኩረታና መላ ሀላቃትነ ጭማት ኦዳ ኩይዶሶና።
EZR 10:9 ሄ ጌተትዳ ሄꬑ ጋላሳታ ግዶን፥ ኡዱፉንꬆ አጌናን ላታማንꬆ ጋላሳን ይሁዳነ ብንያመ አሳ ኡባይ የሩሳላመ ሺቅዶሶና። ሀ ዴፆ ኦዳነ ዎልቃማ እራ ጋሶን፥ ኮኮርሸ፥ ፆሳ ኬꬃ ስንꬃን ደእያ ዳባባን ኡትዶሶና።
EZR 10:10 ካህነ እዝር ደንዲድ ሀይሳዳ ያግስ፤ “ህንተ አማነቶና እፅደታ፤ አላጋ ማጫሳታ ማቾ ኤክድ፥ እስራኤለ ናቁዋ ቦላ ናቆ ጉጅደታ።
EZR 10:11 ህንተ ናጋራ ጎዳስ፥ ህንተ አዋታ ፆሳስ ፓፅተ፤ እያ ኡፋይስያባ ኦꬅተ። ሄ ቢታን ደእያ አይሁደ ግዶና አሳፐነ ህንተ ኤክዳ አይሁደ ግዶና ህንተ ማቸታፐ ሻከትተ” ያግስ።
EZR 10:12 ሺቅዳ አሳይ ባንታ ቃላ ꬎቁ ኦꬅድ፥ ሀይሳዳ ያግዶሶና። “ነ ግያባ ኡባ ኑኒ ኦꬃና!
EZR 10:13 ሽን ሀይሳን ሺቅዳ አሳይ ዳሮ፤ ሄሳ ቦላ ዎልቃማ እር ቡኬስ። ኑኒ እራፐ አትያ በሲ ሀይሳን ባዋ። ሀ ናጋራን ቆህዳ አሳይ ዳሮ ግድዳ ግሾ፥ እስ ጋላሳን ዎይኮ ናምኡ ጋላሳን ሀ ኦዳ ፖላናዉ ዳንዳኦኮ።
EZR 10:14 ሀ ሺቅዳ አሳ ሱንꬃን ኑ ሀላቃት የሩሳላመን ጋምእድ፥ ኮሽያባ ኦꬆ። ሄሳ ጋሶን ደንዳዳ ፆሳ ዎልቃማ ሀንቆይ ኑፐ ስማና ጋካናዉ፥ ኑ ካታማታን ደእያ አይሁደ ግዶና ማጫሳታ ኤክዳ ኡባይ ኬርዳ ቃማን ካታማታ ጭማትነ ዳይናታራ እስፈ የሩሳላመ ዮ።
EZR 10:15 አሳሄላ ናአይ ዮናታንነ ተቁዋ ናአይ ያህዝ ኤንታ ቆፋ ጳልቅዶሶና፤ ማሱላምነ ሌወ ግድዳ ሳባት ኤንታና ማድዶሶና” ያግዶሶና።
EZR 10:16 ድኦፐ ስምዳ አሳይ ግዳይሳዳ ኦꬅዶሶና። ካህነይ እዝር ኡባ ኮቻታፐ ሀላቃታ ዶርድ፥ ኡባ ኤንታ ሱንꬃን ሱንꬃን ፃፍስ። ታማንꬆ አጌናን ኮይሮ ጋላሳን ሀላቃት ኦዳ ፕልግድ በኦ ዶምዶሶና።
EZR 10:17 ኮይሮ አጌናን ኮይሮ ጋላሳይ ጋካናዉ፥ አይሁደ ግዶና ማጫሳታ ኤክዳ አሳታ ኡባ ፕልግድ ዉርስዶሶና።
EZR 10:18 ካህነ ኮቻታ ግዶፈ አላጋ ማጫሳታ ኤክዳይሳት ሀይሳታ፤ እዮሳደቃ ናአ እያሱ ኮቻታፐነ እያ እሻታ ግዶፈ ማእሰያ፥ አላዛራ፥ ያርባነ ጎዶልያ።
EZR 10:19 ኤንቲ ባንታ ማቸታ የዳናዉ ቃላ ገልዶሶና፤ ባንታ ናጋራ ግሾ፥ ዉድያፐ እስ እስ ማራዘ ናቆ ያርሾ ኦꬅድ ያርሽዶሶና።
EZR 10:20 እመራ ያራፐ አላጋ ማቸታ ኤክዳይሳት ሀናናነ ዛባዳ።
EZR 10:21 ሀርማ ያራፐ ማእሰያ፥ ኤልያሳ፥ ሻማያ፥ ይኤላነ ኦዝያ።
EZR 10:22 ፓስኮራ ያራፐ ኤልዮአናያ፥ ማእሰያ፥ እስማኤላ፥ ናትናኤላ፥ ዮዛባታነ ኤልስ።
EZR 10:23 ሌወታፐ፥ ዮዛባታ፥ ሳመአ፥ ቃልፃ ጌተትያ ቀላያ፥ ፋታያ፥ ይሁዳነ አላዛራ።
EZR 10:24 ዛማረታፐ፥ ኤልያሴባ። ፐንገ ናገይሳታፐ፥ ሳሉማ፥ ፀለማነ ኡረ።
EZR 10:25 እስራኤለታፐ፥ ፋሮሳ ያራፐ ራምያ፥ ይዛያ፥ ማልክያ፥ ማያምና፥ አላዛራ፥ ማልክያነ ባናያ።
EZR 10:26 ኤላማ ያራፐ ማታና፥ ዛካርያሳ፥ ይኤላ፥ አብዳ፥ ይረሞታነ ኤላ።
EZR 10:27 ዛታ ያራፐ ኤልዮአና፥ ኤልያሴባ፥ ማታና፥ ይረሞታ፥ ዛባዳነ አዚዛ።
EZR 10:28 ባባያ ያራፐ ዮሃና፥ ሀናና፥ ዛባያነ አትላያ።
EZR 10:29 ባና ያራፐ ማሱላማ፥ ማሉካ፥ አዳያ፥ ያሱባ፥ ሻላነ ይረሞታ።
EZR 10:30 ፓሀት-ሞአባ ያራፐ አድና፥ ካላላ፥ ባናያ፥ ማእሰያ፥ ማታና፥ ባስልኤላ፥ ብኑያነ ምናሰ።
EZR 10:31 ካርማ ያራፐ አላዛራ፥ ይሸያ፥ ማልክያ፥ ሻማያ፥ ስሞና፥
EZR 10:32 ብንያመ፥ ማሉካነ ሳማራያ።
EZR 10:33 ሀሱማ ያራፐ ማታና፥ ማታታ፥ ዛባዳ፥ ኤልፋላፃ፥ የረማያ፥ ምናሰነ ሳመአ።
EZR 10:34 ባና ያራፐ ማዳያ፥ አምራማ፥ ኡላ፥
EZR 10:35 ባናያ፥ በዳያ፥ ካልቀ፥
EZR 10:36 ዋንያ፥ ማረሞታ፥ ኤልያሴባ፥
EZR 10:37 ማታና ማትናያነ ያእሳ።
EZR 10:38 ብኑያ ያራፐ ሳማአ፥
EZR 10:39 ሰለማ፥ ናታና፥ አዳያ፥
EZR 10:40 ማክናዳባያ፥ ሳሳያ፥ ሳራያ፥
EZR 10:41 አዛርኤላ፥ ሰለማ፥ ሳማራ፥
EZR 10:42 ሳሉማ፥ አማረነ ዮሰፋ።
EZR 10:43 ናቦ ያራፐ ይኤላ፥ ማትታ፥ ዛባዳ፥ ዛብና፥ ያዳያ፥ እዩኤላነ ባናያ።
EZR 10:44 ሀ ኡባይ አይሁደ ግዶና ማቸታ ኤክዳይሳታ፤ እሶት እሶት ናአካ የልዶሶና።
NEH 1:1 ሀካልያ ናኣ ናህመ ቃላይ ሀይሳ። አርፀክስስ ፋርሰ ቢታን ካዎትን ላታማንꬆ ላይꬃን፥ ክስለ ጌተትያ አጌናን፥ ታኒ ናህመይ ዋና ካታማ ግድያ ሱሳን ደአይስ።
NEH 1:2 ታ እሻታፐ እሶይ፥ ሀናን፥ ሀራ አሳታራ እስፈ ይሁዳፐ ታኮ ይን፥ ታኒ የሩሳላመባነ ባብሎነ ድኤቶና አትዳ አይሁደታባ ኤንታ ኦይቻስ።
NEH 1:3 ኤንቲ ዛሪድ፥ “ባብሎነ ድኤቶና አትዳ አሳይነ ድኤትድ ስምዳ አይሁደት ግታ መቶንነ ካዉሻን ደኦሶና። የሩሳላመ ግምበ ድርሳይ ላለትስ ቃስ ግምብያ ፐንገት ታማን ፁገትዶሶና” ያግዶሶና።
NEH 1:4 ታ ሀይሳ ኡባ ስእዳ ዎደ ኡታዳ ዬካስ። ዳሮ ጋላስ አዛኖንነ ፆማን ሳሎ ፆሳ ሀይሳዳ ያጋዳ ዎሳስ።
NEH 1:5 “አቤት ጎዳዉ፥ ሳሎ ፆሳዉ፥ ግታዉ፥ ቦንቸትዳይሶ፥ ነና ዶሰይሳታስነ ነ ኪታ ናገይሳታስ ነ መርና ሲቆ ጫቁዋ ናጋሳ።
NEH 1:6 ታኒ ነ አይለይ፥ ነ አይለ ግድዳ እስራኤለ አሳ ግሾ ቃማነ ጋላስ ዎስያ ዎሳ ስአናዉ ነ ሀይꬃይ ሀይዞ፤ ነ አይፈይ ታና ፄሎ። ኑ እስራኤለ አሳይ ኦꬅዳ ናጋራ ኡባ ነዉ ፓፃይስ፤ ቱማ ታንነ ታ ማይዛት ነና ናቅዳ።
NEH 1:7 ኑኒ ነ ቦላ ዳሮ ኢታ ናጋራ ኦꬅዳ፤ ኔኒ ነ አይልያ ሙሰ ባጋራ ኑስ እምዳ ኪታ፥ ዎጋነ ህግያ ናግቦኮ።
NEH 1:8 ነ አይልያ ሙሰስ ነ ኦድዳ ቃላ ሀያና ቆፓ፤ ኔኒ፥ ‘ህንተ ታዉ አማነቶና እፅኮ፥ ታኒ ህንተና አይሁደ ግዶና ቢታታን ላላና።
NEH 1:9 ሽን ህንተ ታኮ ስሚድ፥ ታ ኪታ ናግኮ፥ ህንተ ሀር አቶሽን ሳኣ ጋፃ ጋካናዉ ላለትኮካ፥ ታ ሱንꬃይ ፄገታና መላ ዶርዳ በሳ ዛራዳ ኤሀና’ ግዳይሳ ቆፓ።
NEH 1:10 “ኔኒ ነ ግታ ዎልቃንነ ነ ምኖ ቀስያን ዎዛ ኤክዳ ነ አይለታነ ነ አሳታ።
NEH 1:11 አቤት ጎዳዉ፥ ታኒ ነ አይለይ ዎስያ ዎሳነ ነና ቦንቻናዉ ዶስያ፥ ነ አይለታ ዎሳ ነ ሀይꬃይ ስኦ። ታ ነ አይለይ ሀች ኦꬃናዉ ኮይዳባይ ታዉ ኡሻጫናዳ፥ ካዋ ስንꬃን ታዉ ሳባ እማ” ያጋስ። ታኒ ሄ ዎደ ካዋስ ዎይነ ኡሻ ትግያ አስ።
NEH 2:1 አርፀክስስ ካዎትዳ ላታማንꬆ ላይꬃን፥ ንሳነ ጌተትያ አጌናን፥ እስ ጋላስ ካዋ ስንꬃን ዎይነ ኡሻ ሺሻስ። ሄ ጋላሰፐ አትሽን፥ ካሰ ካዋ ስንꬃን አዛና ኤርከ።
NEH 2:2 ሄሳ ግሾ፥ ካዎይ፥ “ነና ሳክያባይ ባዋ፥ ሽን ሀይሳ መላ አይስ አዛናዲ? ሄስ ነ ዎዛናይ እስባን አዛንዳይሳ በሴስ” ያግስ። ያግን፥ ታኒ ዳሮ ያያዳ፥ ካዋኮ፥
NEH 2:3 “ካዎይ መርናዉ ካዎቶ! ታ ማይዛት ሞገትዳ ካታማይ ላለትድ ꬋይን፥ ቃስ ሄ ካታማ ድርሳ ፐንገት ታማን ፁገትን አይስ አዛንክና?” ያጋስ።
NEH 2:4 ካዎይ ዛሪድ፥ “ያትን፥ ሀእ ታ ነዉ አይ ኦꬃና መላ ኮያይ?” ያግስ። ታኒ ሳሎ ፆሳ ዎሳ ስማዳ፥
NEH 2:5 ካዋኮ፥ “ካዋዉ፥ ታ ነ ስንꬃን ሳባ ደምዳባ ግድኮነ ታ ኦይሻይ ኡፋይስያባ ግድኮ፥ ይሁዳ ቢታ፥ ታ ማይዛት ሞገትዳ ካታማ ባዳ ዛራ ኬፃና መላ ታና የዳርክ” ያጋስ።
NEH 2:6 ሄ ዎደ ካውያ፥ ካዋ አርፀክስሳ ማታን ኡትዳ ደእሽን፥ ካዎይ ዛሪድ፥ “ነ ኦገይ አይ መላ ዎደ ኤካኔ? ነ አዉደ ስማኔ?” ያግድ ታና ኦይችስ። ታኒ ታ ስማና ዎድያ እያዉ ኦድን፥ ካዎይ ኡፋይትድ ታና የድስ።
NEH 2:7 ቃስ፥ “ካዋ፥ ነና ኡፋይስያባ ግድኮ፥ ታ ይሁዳ ጋካናዉ ሄ ቢታራ ካንꬃዳ አꬋና መላ ኤፍራፂሳ ሻፋፐ ዉሎሀ ባጋራ ደእያ ቢታ ሃረይሳታስ ዳብዳበይ ፃፈቶ” ያጋዳ ካዋ ዎሳስ።
NEH 2:8 ሄሳዳካ፥ “ፆሳ ኬꬃ ፐንግያ ጊግሳናዉ፥ ካታማ ግምበ ድርሳ ድራናዉነ ታ ዳና ኬꬃ ኬፃናዉ ታዉ ምꬅ እማና መላ ካዎ ዎራ ናግያ አሳፋስ ዳብዳበይ ፃፈቶ” ያጋዳ ኦይቻስ። ፆሳ ሎኦ ኩሸይ ታራ ደእያ ግሾ ካዎይ ታኒ ኦይችዳባ ኡባ እሚስ።
NEH 2:9 ካዎይ ታራ ጉꬃ ቶራ ሞጮናታነ ፓራ ቶገይሳታ የድስ። ታኒ ኤንታራ እስፈ ኤፍራፂሳ ሻፋፐ ዉሎሀ ባጋ ቢታ ጋካዳ ካዎይ የድዳ ዳብዳብያ ሄ ቢታ ሃረይሳታስ እማስ።
NEH 2:10 ሽን ሆሮና ካታማ አስ ግድዳ ሳንባላፅነ አሞነ ቢታ ሀላቃ ግድዳ ፆበይ፥ “እስራኤለ አሳስ ሎኦባ ኦꬅያ አስ ይስ” ጌተትዳይሳ ስእዳ ዎደ ዳሮ ይሎትዶሶና።
NEH 2:11 ታኒ የሩሳላመ ጋካዳ ሄꬑ ጋላስ ያን ጋምአስ።
NEH 2:12 የሩሳላመስ ታኒ ኦꬃና መላ ፆሳይ ታ ዎዛናን ዎꬅዳ ቆፋ ኦደስካ ኦዳብከ። ሄሳፈ ጉየ፥ ታራ ደእያ አሳፐ ጉꬃታ ኤካዳ ቃማ ደንዳዳ ባስ። ሄ ዎደ ታኒ ቶግዳ መህያፐ ሀራ ቶጋ መሄይ ኑስ ባዋ።
NEH 2:13 ታኒ ብላሄ ደንዳዳ ዛንጋራ ፐንግያራ ካንꬃዳ፥ ዳወ ፑልቶ ጌተትያ በሳራ አꬋዳ፥ ፕቶ ፐንገ ጌተትያ በሳ ጋካናዉ ባስ። ያራ አꬋሸ ላለትዳ የሩሳላመ ግምብያነ ታማን ፁገትዳ ግምበ ፐንገታ በአስ።
NEH 2:14 ሄሳፈ ስማዳ ፑልቶ ፐንግያኮነ ካዋ ተቀ ሃꬃይ ደእያ በሳ ባስ። ግዶሽን፥ ታ ቶግዳ መሄይ አꬍያ ኦገ ደማብከ።
NEH 2:15 ሄሳ ግሾ፥ ቃማ ቀድሮና ዛንጋራ ግዶራ አꬋዳ ግምብያ በአስ። ዉርሰꬃን፥ ጉየ ስማዳ ዛንጋራ ፐንግያራ ካታማ ገላስ።
NEH 2:16 ያን ደእያ ሀላቃታፐ ኦንካ ታኒ አዉ ብዳኮ፥ ዎይኮ አይ ኦꬅዳኮ ኤርቤና። አይስ ጊኮ፥ ታኒ አይሁደታስ፥ ካህነታስ፥ ቦንቸትዳ አሳታስ፥ ሀላቃታስነ ኦሱዋ ኦꬃናዉ ደእያ አሳፐ ኦደስካ ታ ቆፋ ኦዳብከ።
NEH 2:17 ሄሰፈ ጉየ፥ ኤንታኮ፥ “ኑኒ አይ መላ መቶን ደእያኮ በኤታ፤ የሩሳላመ ካታማይ ላለትስ፤ ግምበ ፐንገት ታማን ፁገትዶሶና። ሀ ዪተ፥ የሩሳላመ ግምብያ ዛሪድ ግምቦስ፤ ኑና ጋክዳ ዬላ አነ ድጎስ” ያጋስ።
NEH 2:18 ቃስ ፆሳ ሎኦ ኩሸይ ታራ ደኤይሳነ ካዎይ ታዉ ኦድዳባ ኡባ ኤንታዉ ኦዳስ። ኤንቲ ዛሪድ፥ “አነ ደንዶስ፤ ዛሪድ ግምቦስ” ያግድ ባንታ ኩሽያ ሎኦ ኦሶስ ምንꬅዶሶና።
NEH 2:19 ሽን ሆሮና ካታማ አስ ግድዳ ሳንባላፅ፥ አሞነ ቢታ አስ ግድዳ ፆበይነ አራባ ቢታ አስ ግድዳ ጌሳመይ ሄሳ ስእዳ ዎደ፥ ኑ ቦላ ቀልቅስድ ሚጭዶሶና። “ሀይስ ህንተ ኦꬅያባይ አይቤ? ዎይኮ ካዋ ቦላ ማካላናዉ ኮዬቲ?” ያግድ ኦይችዶሶና።
NEH 2:20 ታኒ ዛራዳ፥ “ሳሎ ፆሳይ ኑና ፖልሳና፤ ኑኒ እያ አይለት ደንድድ ኦꬃና። ሽን የሩሳላመን ህንተዉ ግሾይ ዎይኮ ህንተና ጋꬅያባይ ዎይኮ ህንተና ቆፍስያባይ ባዋ” ያጋስ።
NEH 3:1 ካህነ ሀላቃይ ኤልያሴብነ ሀራ ካህነት ዶርሳ ፐንግያ ዛር ግምብድ ፆሳስ ዱማይዶሶና፤ ሳንቃ አꬅዶሶና። ኤንቲ ፄታ ጌተትያ ግምበ ሻኩዋፈ ብድ ሀናንኤላ ጌተትያ ግምበ ሻኩዋ ጋካናዉ ግምብድ ፆሳስ ዱማይዶሶና።
NEH 3:2 ኤንታ ላንቀን ደእያ በሳ እያርኮ አሳይ ግምብን፥ ካልድ ደኤይሳ እምራ ናአይ ዛኩር ግምብስ።
NEH 3:3 ሀስናአ ናይት ሞሎ ፐንግያ ግምብዶሶና። ኤንቲ ጎባነ ኤስድ፥ ሳንቃ አꬅዶሶና፤ ሳንቃ ጎርድያ ካሱዋነ ካሱዋ ገልስያ ሳጋዩዋ ጊግስዶሶና።
NEH 3:4 ኤንታ ካልድ ደእያ በሳ ሀቆፃ ናአ ግድዳ ኡራያ ናአይ ማረሞት ግምብስ። እያፐ ካልድ ደእያ በሳ ማሰዛቤላ ናአ ባራካ ናአይ ማሱላም ግምብስ። እያፐ ካልድ ደእያ በሳ ባአና ናአይ ሳዶቅ ግምብስ።
NEH 3:5 እያ ማታን ደእያ በሳ ታቆሀ ካታማ አሳት ግምብዶሶና። ሽን ሄ ካታማ ሀላቃት ባንታዉ እመትዳ ኦሱዋ ኦꬆና እፅዶሶና።
NEH 3:6 ፓሰሀ ናአይ ዮዳሄይነ ባሶድያ ናአይ ማሱላም ጋልአ ፐንግያ ግምብዶሶና። ኤንቲ ጎባነ ኤስድ፥ ሳንቃ አꬅዶሶና፤ ሳንቃ ጎርድያ ካሱዋነ ካሱዋ ገልስያ ሳጋዩዋ ጊግስዶሶና።
NEH 3:7 ኤንታ ላንቀን ደእያ በሳ ጋባኦና ካታማ አስ ግድዳ ማላፅነ መሮኖታ ካታማ አስ ግድዳ ያዶን ግምብዶሶና። ጋባኦናነ ምፅጳ ካታማ አሳይ ኤንታራ እስፈ ግድድ፥ ኤፍራፂሳ ሻፋፐ ዉሎሀ ባጋ ቢታ ሃረይስ ደእያ ኬꬃ ጋካናዉ ደእያ በሳ ግምብዶሶና።
NEH 3:8 ዎርቃ ሼሽያ ሀርሀያ ናአይ ኡዝኤል ኤንታ ማታን ደእያ በሳ ግምብስ። ቃስ እያ ማታን ደእያ በሳ ሽቶ ኦꬅያ ሀናን ግምብስ። ኤንቲ ናምአይ እስፈ የሩሳላመ ዳልጋ ግምብያ ጌተትያ በሳ ጋካናዉ ደእያ በሳ ግምብዶሶና።
NEH 3:9 ኤንታ ማታን ደእያ በሳ ሁራ ናአይ፥ የሩሳላመ ዎራዳስ ባጋ ሃርያ ራፋይ ግምብስ።
NEH 3:10 ሀሩማ ናአይ ያዳይ ባ ኬꬃፈ ስንꬃ ባጋራ ደእያ በሳ ግምብስ። እያ ማታን ደእያ በሳ አሰባና ናአይ ሀቱሽ ግምብስ።
NEH 3:11 ሀርማ ናአይ ማልከይነ ፓሀት-ሞአባ ናአይ ሀሹብ እያ ማታን ደእያ በሳነ እቶነ ሻኮ ግምብያ ግምብዶሶና።
NEH 3:12 ኤንታ ማታን ደእያ በሳ ሀሎሄሳ ናአይ፥ የሩሳላመ ዎራዳስ ናምአንꬆ ባጋ ሃርያ ሳሉምነ እያ ማጫ ናይት ግምብዶሶና።
NEH 3:13 ሀኑንነ ዛኖሀ ካታማን ደእያ አሳይ እስፈ ዛንጋራ ፐንግያ ግምብዶሶና። ኤንቲ ጎባነ ኤስድ፥ ሳንቃ አꬅዶሶና፤ ሳንቃ ጎርድያ ምꬃነ ምꬃ ገልስያ ሳጋዩዋ ጊግስዶሶና። ፕቶ ፐንግያ ጋካናዉ እስ ሙኩሉ ዋꬋ አዱሳ ግምብያ ጉጅድ ግምብዶሶና።
NEH 3:14 ራካባ ናአይ፥ ቤት-ሀካሬማ ዎራዳ ሃርያ ማልከይ ፕቶ ፐንግያ ግምብስ። ኤንቲ ጎባነ ኤስድ፥ ሳንቃ አꬅዶሶና፤ ሳንቃ ጎርድያ ካሱዋነ ካሱዋ ገልስያ ሳጋዩዋ ጊግስዶሶና።
NEH 3:15 ኮልሃዛ ናአይ፥ ምፅጳ ዎራዳ ሃርያ ሳሉም ፑልቶ ፐንግያ ዛሪድ ግምብስ። እ ፐንግያስ ካማ ጊግስድ ሳንቃ አꬅስ፤ ሳንቃ ጎርድያ ካሱዋነ ካሱዋ ገልስያ ሳጋዩዋ ጊግስስ። ቃስ፥ ሰላሀ ተቀ ሃꬃይ ደእያ ባጋራ ካዋ አታክልተ በሳፈ ዶምድ፥ ዳዊታ ካታማፐ ዱገ ዎꬍስያ ደꬃ ጋካናዉ ደእያ ግምብያ ግምብስ።
NEH 3:16 ቤት-ፁራ ዎራዳስ ባጋ ሃርያ አዝቡቀ ናአይ ናህመይ ግምብስ። እ ዳዊታ ዱፉዋፐ ስንꬃ ባጋራ ደእያ በሳ ጋካናዉ፥ አስ ኦꬅዳ ተቀ ሃꬃይ ደእያ በሳ ጋካናዉ፥ ኦላንቾታ ኬꬃ ጋካናዉ ደእያ በሳ ግምብስ።
NEH 3:17 ሀይሳፈ ካለይሳ ባና ናኣ ረሁማ አዋተꬃ ጋርሳን ደእያ ሌወት ግምብዶሶና። ኤንታ ማታን ደእያ በሳ ቅኣላ ዎራዳስ ባጋ ሃርያ ሀሻብ ባ ዎራዳ ሱንꬃን ግምብስ።
NEH 3:18 እያፐ ካልድ ሄናዳዳ ናአይ፥ ቅኣላ ዎራዳስ ናምአንꬆ ባጋ ሃርያ ባው ግምብዶሶና።
NEH 3:19 ኤንታ ማታን ደእያ በሳ እያሱ ናአይ፥ ምፅጳ ዎራዳ ሃርያ ኤዘር ግምብስ። እ ኦላ ሚሸ ዎꬅያ ኬꬃፈ ስንꬃ ባጋራ ግምብያ ማዛንያ ጋካናዉ ደእያ በሳ ግምብስ።
NEH 3:20 እያፐ ካለይሳ ዛባያ ናአይ ባሮክ፥ ግምብያ ማዛንያፐ ብድ፥ ካህነ ሀላቃ ኤልያሴባ ኬꬃ ፐንግያ ጋካናዉ ደእያ በሳ ግምብስ።
NEH 3:21 እያፐ ካለይሳ ሀቆፃ ናኣ ግድዳ ኡራያ ናአይ ማረሞት ኤልያሴባ ኬꬃ ፐንግያፈ ዶምድ፥ ዉርሰꬅ ጋካናዉ ደእያ በሳ ግምብስ።
NEH 3:22 እያፐ ካልድ ደኤይሳ ሄራን ደእያ ካህነት ግምብዶሶና።
NEH 3:23 ኤንታፈ ካልድ ብንያመይነ ሀሹብ ባንታ ኬꬃ ስንꬃን ደእያ በሳ ግምብዶሶና። ኤንታፈ ካልድ አናንያ ናአ ግድዳ ማእሰያ ናአይ አዛር ባ ኬꬃ ስንꬃን ደእያ በሳ ግምብስ።
NEH 3:24 እያፐ ካልድ አዛራ ኬꬃፈ ብድ፥ ግምብያ ማዛንያ ጋካናዉ ደእያ በሳ ሄናዳዳ ናአይ በኑይ ግምብስ።
NEH 3:25 ኡዛያ ናአይ ፓላል ግምብያ ማዛንያፐ ዶምድ፥ እ ናገይሳታ ዳባባ ማታን ደእያ ቆሞ ባጋ ካዎ ጋꬎ ናጎ ግምብያ ጋካናዉ ደእያ በሳ ግምብስ። እያፐ ካልድ ደኤይሳ ፓኖሰ ናአይ ፓዳይነ
NEH 3:26 ኦፌላ ደርያ ቦላ ደእያ ፆሳ ኬꬃ አይለት ግምብዶሶና። ኤንቲ ሃꬃ ፐንግያ ማታን ዶሎሀ ባጋን ደእያ በሳነ ናጎ ግምብያ ጋካናዉ ደእያ በሳ ግምብዶሶና።
NEH 3:27 ኤንታፈ ካልድ ታቆሀ ካታማ አሳይ ግምብያ ስንꬃን ደእያ በሳፈ ብድ፥ ኦፌላ ማታን ደእያ ግምብያ ጋካናዉ ደእያ በሳ ግምብዶሶና።
NEH 3:28 ፓራ ፐንግያፈ ቆሞ ባጋን፥ ባንታ ኬꬃ ስንꬃን ደእያ በሳ ካህነት ግምብዶሶና።
NEH 3:29 ኤንታፈ ካልድ እመራ ናአይ ሳዶቅ ባ ኬꬃ ስንꬃን ደእያ በሳ ግምብስ። እያፐ ካልድ ዶሎሀ ፐንግያ ናግያ ሳካና ናአይ ሻማየይ ግምብስ።
NEH 3:30 እያፐ ካልድ ሳላማ ናአይ ሀናንነ ዛላፋ ኡሱፑንꬆ ናአ ግድዳ ሀኑኒራ ግምብዶሶና። ኤንታፈ ካልድ ባራካ ናአይ ማሱላም ባ ክፍልያፐ ስንꬃን ደእያ በሳ ግምብስ።
NEH 3:31 እያፐ ካልድ ፆሞሶ ፐንግያ ስንꬃን ደእያ ፆሳ ኬꬃ ኦሳንቾታነ ዛልአንቾታ ኬꬃ ጋካናዉ ደእያ በሳ ዎርቃ ሼሽያ ማልከይ ግምብስ። ቃስ እ ግምበ ማዛንያስ ቦላ ባጋራ ደእያ በሳካ ግምብስ።
NEH 3:32 ማዛንያስ ቆሞ ባጋ ክፍልያፐነ ዶርሳ ፐንግያፈ ግዶን ደእያ በሳ ዎርቃ ሼሸይሳትነ ዛልአንቾት ግምብዶሶና።
NEH 4:1 ኑኒ ድርሳ ግምበ ኦሱዋ ዶምዳይሳ ሳንባላፅ ስእዳ ዎደ ይሎ ኤፅድ ኑና ለቅስ።
NEH 4:2 ባ ላገታነ ሳማረ ኦላንቾታ ስንꬃን፥ “ሀ ፓꬆና አይሁደት አይ ኦꬃናዉ ቆፖና? ድርሳ ግምብያ ዛር ግምባናዉ ኮዮናዬ? ያርሾ ያርሻናዉ ኮዮናዬ? ኤንቲ እስ ጋላሳን ኦሱዋ ኦꬅድ ዉርሳና ዳኒ? ኤንቲ ግምቤስ ሀንያ ሹቻታ ፁገትድ ዶረትዳይሳ ግዶፈ ከሳናዉ ዳንዳኦና?” ያግስ።
NEH 4:3 እያ ማታን ኤቅዳ አሞነ ቢታ አስ ግድዳ ፆበይ፥ “ኤንቲ ዋንዳ ግምበ ግምባናዉ ዳንዳኦና? ኤንቲ ግምብያ ቦላ ዎርካን ከያኮ ላለታና” ያግድ ለቅስ።
NEH 4:4 ታኒ ሀይሳዳ ያጋዳ ዎሳስ፤ “ኑ ፆሳዉ፥ ኤንቲ ኑና ዋት ለቅስያኮ፥ ሀይሳ በአ! ኤንቲ ኑና ጫይያ ጫሻይ ኤንታዉ ግዶ። ባንታ አቁዋ ቦንቀትድ አላጋ ቢታን ድኤትዳ አስ ግዶ።
NEH 4:5 ኤንቲ ግምበይሳታ ጫሻን ካዉሽዳ ግሾ፥ ኤንታ ናቆይ ጌሞፎ፤ ኤንታ ናጋራ ነ ስንꬃፈ ቁቾፋ” ያጋስ።
NEH 4:6 ኑኒ ግምብያ ኦሱዋ ቃንፆና ኦꬅዳ። አሳይ ኦሱዋ ምን ኦꬅዳ ግሾ ግምብያ ኦሶይ ኤለስድ ባጋ ጋክስ።
NEH 4:7 ሳንባላፅ፥ ፆበይ፥ አራበ አሳይ፥ አሞነ አሳይነ አሽዶዳ አሳይ የሩሳላመ ግምበ ኦሶይ ሎኦ ኦሰትሸ ደኤይሳነ ዶያ በሳት ጎርደትዳይሳ ስእዳ ዎደ ዳሮ ይሎትዶሶና።
NEH 4:8 ሄሳ ግሾ ኤንቲ እስፈ የሩሳላመ ይድ ኑና ኦላናዉነ መቶ መꬋናዉ ማቀትዶሶና።
NEH 4:9 ሽን ኑኒ ኑ ፆሳ ዎስዳ፤ ኤንታ ተቃናዉ ቃማነ ጋላስ ናገይሳታ ዎꬅዳ።
NEH 4:10 ሄ ዎደ ይሁዳ አሳይ፥ “ቶሆይ ኑና ዳቡርስስ፤ ቡሮ ደንዳናዉ ኮሽያ ዶረትዳ ዳሮ ሹች ደኤስ፤ ያንያ ግሾ፥ ኑኒ ግምብያ ግምባናዉ ዳንዳኦኮ” ያግዶሶና።
NEH 4:11 ኑ ሞርከት፥ “ኤንቲ ኑ ኦꬅያባ ኤራናፐነ በአናፐ ስን ኑ ኤንታ ግዶ ገልድ ኤንታ ዎꬋና፤ ኤንታ ኦሱዋካ ኤሳና” ያግዶሶና።
NEH 4:12 ኑ ሞርከታ ሄራን ደእያ አይሁደት ታማ ስሚድ ኑ ሞርከት ኑና ኡባ ባጋራ ኦላናዉ ጊገቶይሳ ኑስ ኦድዶሶና።
NEH 4:13 ሄሳ ግሾ፥ ኑ አሳፐ ማሸ፥ ቶራነ ዶንገ ኦይክዳ አሳ ኤንታ ሶ አሳን አሳን ጊግሳዳ ኦሶይ ዉርቦና ሄራን ግምብያስ ጉየራ ጋርሳ ባጋን ናጋና መላ ኦꬃስ።
NEH 4:14 አሳይ ዳጋምዳይሳ ታኒ በእዳ ዎደ ደንዳ ኤቃዳ፥ አሳኮ፥ ኤንታ ካለይሳታኮነ ሀላቃታኮ፥ “ኑ ሞርከታ ያዮፍተ! ግታነ ያሽያ ፆሳ ቆፕተ። ህንተ እሻታስ፥ ህንተ አደ ናይታስነ ማጫ ናይታስ፥ ህንተ ማቸታስነ ህንተ ኬꬃስ ኦለትተ” ያጋስ።
NEH 4:15 ኑ ሞርከት ኑና ቆሀናዉ ማቀትዳይሳ ኑኒ ኤርዳይሳ ኤንቲ ስእዶሶና። ቃስ ፆሳይ ኤንታ ማቁዋ ሀዳ ከስዳይሳ አኬክዶሶና። ሄሳፈ ጉየ፥ ኑ ኡባይ ስሚድ፥ ግምበ ኦሱዋ ዶምዳ።
NEH 4:16 ሄ ዎደፐ ዶምድ ታ አሳፐ ባጋይ ኦሱዋ ኦꬅያ ዎደ፥ ባጋይ ፁሩረ ማእድ፥ ቶራ፥ ጎንዳለነ ዶንገ ኦይክድ ናጋና መላ ኦꬃስ። ቃስ ሀላቃት ይሁዳ አሳ ኡባፈ ጉየራ ኤቅድ ምንꬆሶና፤
NEH 4:17 ግምብያ ግምበይሳትነ ኮሽያባ ቶከይሳት እስ ኩሸን ኦላ ሚሸ ኦይክድ፥ እስ ኩሸን ኦሶ ኦꬆሶና።
NEH 4:18 ግምብያ ኦꬅያ እሶይ እሶይ ማሸ ባ ፄሳን ዳንጭድ ደኤስ። ሞይዘ ፑነይስ ኡባ ዎደ ታፐ ሻከትድ ኤረና።
NEH 4:19 ካለይሳታኮ፥ ሀላቃታኮነ አሳ ኡባኮ፥ “ግምብያ ኦሶይ ግታነ ዳልጋ ግድያ ግሾ ኑኒ እሶይ እሱዋፈ ሃክድ ደኦስ።
NEH 4:20 ሄሳ ግሾ፥ ህንተ ሞይዘ ፑኖ ስእያ ዎደ ሄ በሳ ታኮ ሃ ሺቅተ። ኑ ፆሳይ ኑ ግሾ ኦለታና” ያጋስ።
NEH 4:21 ሄሳ ግሾ፥ ዎንታ ጎንተይ ዞኦ ዋꬍያ ዎደፐ ዶምድ ኦማርስ ፆልንቶይ ከያና ጋካናዉ ባጋይ ኦꬅያ ዎደ ባጋይ ቶራ ኦይክድ ናጌስ።
NEH 4:22 ሄ ዎደ ታኒ አሳኮ፥ “ቃማ ኑና ናጋናዉነ ጋላስ ኦሱዋ ኦꬃናዉ ህንተ ኡባይ ህንተና ማደይሳታራ የሩሳላመን አቅተ” ያጋስ።
NEH 4:23 ታና ግድን፥ ታ እሻታ ግድን፥ ታ አሳ ግድን፥ ዎይኮ ታና ናገይሳታ ግድን፥ ኑ ኡባይ ኑ ማኡዋ ከሶና አቆስ፤ ኑ ኦላ ሚሸይ ኑፐ ሻከተና።
NEH 5:1 እስ ዎደ አደትነ ኤንታ ማቸት ባንታ ኮቸ ግድዳ አይሁደታ ቦላ ዋስዶሶና።
NEH 5:2 ኤንታፈ እሶት እሶት፥ “ኑስ፥ ዳሮ አደ ናይትነ ማጫ ናይት ደእያ ግሾ ኑ ሸምፑዋ አሻናዉ ኑስ ካꬅ ኮሼስ” ያግዶሶና።
NEH 5:3 ሀራት ቃስ፥ “ኑና ጋክዳ ኢታ ኮሻፐ ደንዶይሳን ካꬅ ደማና ግድ፥ ኑ ጎሻ ጋድያ፥ ኑ ዎይነ ጋድያነ ኑ ኬꬃ ኦይꬅዳ” ያግዶሶና።
NEH 5:4 ቃስ አትዳይሳት፥ “ካዎ ጊራ ጊራናዉ ሚሸ ꬋይድ ኑ ጎሻ ጋድያነ ኑ ዎይነ በሳ ኦይꬅድ ሚሸ ታልእዳ።
NEH 5:5 አይሁደ ኮቻታራ ኑኒ እስ አሾነ እስ ሱꬅ፤ ኑ ናይት ኤንታ ናይታ መላ። ሽን ኑኒ ኑ የልዳ ናይታ አይለተꬃስ አꬅድ እማናዉ ኡንኤትዳ፤ ኑ ማጫ ናይታፐ እሶት እሶት አይለተꬃስ ባይዘትዶሶና። ኑ ጎሻነ ኑ ዎይነ ጋድያ ኑፐ ኤከትዳ ግሾ ኑ ዎልቃ ꬋይዳ” ያግዶሶና።
NEH 5:6 ታኒ ኤንታ ዋሱዋነ ኦይሻ ስእዳ ዎደ ዳሮ ይሎታስ።
NEH 5:7 ታ ዎዛናን ኦꬃናባ ቆፕዳፐ ጉየ፥ ካለይሳታነ ሀላቃታ ፄጋዳ፥ “ህንተ፥ ህንተ እሻታስ የሎራ ታልእሸ ኡንኤꬄታ” ያጋዳ ኤንታ ካጫስ። ሄ መቱዋባ ኤንታራ ኦደታናዉ ደርያ ሺሻዳ፥
NEH 5:8 “አይሁደ ግዶናይሳታስ ባይዘትዳ አይሁደ ኮቸ ግድዳ ኑ እሻታ ዎዛናዉ ኑስ ዳንዳኤትዳባ ኡባ ኦꬅዳ። ሽን ህንተ እሻ ግድዳ አይሁደት ባንታ ኮቸ ግድዳ ህንተዉ፥ ባንታና ባይዛና መላ ኦꬄታ፤ ኑ ኤንታ ዛር ዎዛናዉ ኮሼስ” ያጋስ። ካለይሳት ዛራናባ ꬋይድ ስእ ግዶሶና።
NEH 5:9 ታኒ ካላዳ፥ “ህንተ ኦꬅያባይ ዎጋ ግደና፤ አይሁደ ግዶና ኑ ሞርከት ኑና ቀልቅሶና መላ ህንተ ኑ ፆሳስ ያያናዉነ ሱረባ ኦꬃናዉ በሰኔ?
NEH 5:10 ታኒ፥ ታ እሻትነ ታ ኦሳንቾት አሳስ ሚሸነ ካꬅ ታልእዳ፤ ግዶሽን፥ ኤንታፈ የሎ ኤከይስ አቶ።
NEH 5:11 ኤንታ ጎሻ፥ ዎይነነ ሻማሆ ዛይተ ጋድያነ ኬꬃ ኡባ ኤንታዉ ዛርተ። ቃስ ሚሸፐ፥ ካꬃፈ፥ ዎይነፐነ ዛይተፐ ህንተ ኤንታፈ ኤክዳ ፄታፐ እስ ኩሸ የሎ ኤክዳይሳ ኤለ ዛርተ” ያጋስ።
NEH 5:12 ኤንቲ ዛሪድ፥ “ኑኒ ኤክዳባ ኡባ ኤንታዉ ጉየ ዛራና፤ ኤንቲ ኑፐ ታልእዳይሳ ዛሮ ግድ አቾኮ፤ ነ ኑና ኪትዳይሳዳ ኦꬃና” ያግዶሶና። ታኒ ካህነታ ታኮ ፄጋዳ ካለይሳት ባንታ ግዳ ቃላ ፖላና መላ ጫቅሳናዳ ኦꬃስ።
NEH 5:13 ታኒ ታ ማኡዋ ቃራዳ ቆቆፋሸ፥ “ህንተፈ ኦንካ ባ ግዳ ቃላ ፖሎና እፅኮ፥ ፆሳይ እያ፥ እያ ኬꬃፈነ እያ አቁዋፐ ሀይሳዳ ቆቆፍድ መላ ኩሸ አሾ” ያጋስ። ሺቅዳ አሳ ኡባይ እስ ቃላን፥ “አምንእ” ያግድ ጎዳ ጋላትዶሶና። አሳ ኡባይ ጫቅዳይሳዳ ኦꬅዶሶና።
NEH 5:14 አርፀክስስ ካዎትዳ ላታማንꬆ ላይꬃፈ ዶምድ ሀስታማነ ናምአንꬆ ላይꬅ ጋካናዉ ታኒ ይሁዳ ቢታ ሃራስ። ሄ ታማነ ናምኡ ላይꬃ ግዶን ታና ግድን ዎይኮ ታ እሻት ሹማስ በሲያ ካꬃ ዳሞዘ ኤክቦኮ።
NEH 5:15 ሽን ታፐ ካሰ ሹመትዳይሳት አሳስ ዴፆ ቶሆ ግድድ፥ ጋላስ ጋላስ ካꬃስነ ዎይነ ኡሻስ ኦይታሙ ብራ ቃንፅስዶሶና። ሀር አቶሽን ሹማታ አይለት አሳ ቦላ ጎዳ ግድድ ኡንኤꬅድ ጋምእዶሶና። ሽን ታኒ ፆሳስ ያይዳ ግሾ፥ ሄሳዳ ኦꬃብከ።
NEH 5:16 ታዉ ደእያ ዎልቃ ኡባ የሩሳላመ ግምበ ኦሱዋስ እማስ፤ ታ ኦሳንቾትካ ታራ እስፈ ሄ ኦሱዋ ቦላ ጋምእዶሶና፤ ኑ አይብ ቢታካ ሻምቦኮ።
NEH 5:17 ኑ ሄራን ደእያ ካዎተꬃታፐ ይዳ አሳይ አትሽን፥ ጋላስ ጋላስ ታራ ምያ አይሁደትነ ካለይሳት ፄታነ እሻታማ።
NEH 5:18 ጋላስ ጋላስ እስ ቦር፥ ኡሱፑን ሞꬎ ዶርሳታነ ዳሮ ኩቶታ ሹክድ አሳስ ሺሾሶና፤ ቃስ ታሙ ጋላሳፐ እስ ቶሆ ዳሮ ባꬃ ዎይነ ኡሻ አጎሶና። ሽን አሳ ቦላ ደእያ ዴፆ ቶሁዋ ታ ኤርያ ግሾ ቢታ ሹማስ በሲያ ካꬃ ዳሞዘ ኦይቻብከ።
NEH 5:19 ታ ፆሳዉ፥ ታ ሀ አሳስ ኦꬅዳ ኬሀተꬃ ኡባ ቆፓዳ ታዉ ኬሀ።
NEH 6:1 ሳንባላፅ፥ ፆበይ፥ አራበ ቢታ አስ ግድዳ ጌሳመይነ ሀንኮ ኑ ሞርከት ኑኒ ግምብያ ኦꬅድ ፖልዳይሳነ ዶያ በሲ ባይናይሳ ስእዶሶና። ግዶሽን፥ ታ ግምበ ፐንገታስ ሳንቃ አꬃብከ።
NEH 6:2 ሳንባላፅነ ጌሳመይ፥ “ኦኖ ደምባን ደእያ ጉታታፐ እሱዋን ያዳ ኑራ ጋሄታ” ያግድ ኪታ የድዶሶና። ሄስ ኤንቲ ታና ቆሀናዉ ማቅዳ ማቆ።
NEH 6:3 ታኒ ኤንታዉ፥ “ታዉ ግታ ኦሶይ ደእያ ግሾ ሄሳ አጋዳ ህንተ ግዳ በሳ ባናዉ ዳንዳእከ። ታኒ ያ ብን፥ ኦሶይ አይስ ꬉበቲ?” ያጋዳ ዛራስ።
NEH 6:4 ሄ ኪታ ዛር ዛር ኦይዱ ቶሆ ኪትዶሶና፤ ሽን ታኒ እስ ቆሞ ዛሮ ኤንታዉ እማስ።
NEH 6:5 እቻሻንꬆ ሳንባላፅ ባ አይለታፐ እሱዋ ዶያ ደእያ ዳብዳበ ኦይꬅድ ታኮ ኪትስ። ዳብዳበይ ሀይሳዳ ያግድ ፃፈትስ፤
NEH 6:6 “ኔንነ ነ ኮቸ ግድዳ አይሁደት ማካላናዉ ቆፕዳይሳነ ሄሳ ጋሶን ግምብያ ግምበይሳ ሾሮ ቢታን ደእያ አሳ ኡባይ ኦደተይሳ ጌሳመይ ታዉ ኦድስ። ቃስ ኔኒ ነና ካዎ ከሳናዉ ኮየይሳነ
NEH 6:7 ኔኒ ይሁዳ ካዎ ግደይሳ የሩሳላመን አዋጃና መላ ናበ ዎꬅዳይሳ ታዉ ኦድስ። ሀ ዎርያ ካዎይ ስአናይስ አተና። ሄሳ ግሾ፥ ታራ ጋሄታዳ ዞረታናዉ ሃያ” ያጌስ።
NEH 6:8 ታኒ፥ “ሀ ኔኒ ግያ ኦዳ ኡባይ ቱማ ግዶናባነ ነ ኔፐ መꬍዳባ” ያጋዳ ዛራስ።
NEH 6:9 ኑ ኦꬅያ ኦሶይ ፖለቶና መላ፥ “ኤንታ ኩሸይ አርጋጫና፤ ኦሶይካ ፖለቶና ኤቅ አታና” ያግድ ኑና ያሽሳናዉ ቆፕዶሶና። ሽን ታኒ፥ “ፆሳዉ፥ ሀእ ታ ኩሽያ ምንꬃ” ያጋዳ ዎሳስ።
NEH 6:10 ታኒ እስ ጋላስ ሶፐ ከዮና መላ ጎርድ ዎꬅዳ ማሄፃቤላ ናኣ ናኣ ዳላያ ናኣ ሻማያኮ ባስ። እ ታኮ፥ “ቃማ ይድ ኤንቲ ነና ዎꬋናዉ ዳንዳእያ ግሾ ኔራ ታራ ፆሳ ኬꬅ ገልድ፥ ፐንግያ ጎርድድ ቆሰታና” ያግስ።
NEH 6:11 ሽን ታኒ፥ “ታ መላ አስ ያይድ ቆሰቲ? ዎይኮ ታና ዳንያ አስ ባ ሸምፑዋ አሻናዉ ፆሳ ኬꬅ ገሊ? ታ ሄሳ ሀንከ” ያጋስ።
NEH 6:12 ታ ቆፓ በእያ ዎደ ሻማየይ ፆሳይ ኪትዳ ናበ ግዶናሽን ፆበይነ ሳንባላፅ እያ ሚሸን ሻምድ የድን ታ ቦላ ዎርዶ ትንብተ ኦደይሳ አኬካስ።
NEH 6:13 እ ሚሸን ሻመትዳ ጋሶይ ታና ያሽሳናሳ፤ ታ ሄሳ ኦꬃዳ ናጋራን ገላና መላነ ታና ቦርስያባ ደምድ ታና ካዉሻናሳ።
NEH 6:14 ታኒ፥ “ታ ፆሳዉ፥ ፆበይነ ሳንባላፅ ኦꬅዳባ ኡባ በአ። ኖኣዶ ጌተትያ ማጫ ናብያነ ሀራ ዎርዶ ናበት ታና ያሽሳናዉ ኦꬅዳባ ኡባ በአ” ያጋዳ ዎሳስ።
NEH 6:15 ግምበ ኦሶይ ዶመትን እሻታማነ ናምኡ ጋላሳፐ ጉየ ኤሉለ ጌተትያ አጌናን ላታማነ እቻሻንꬆ ጋላሳን ኦሶይ ፖለትስ።
NEH 6:16 ኑ ዩሹዋን ደእያ ካዎተꬃታን ደእያ ኑ ሞርከት ሄሳ ስእዳ ዎደ ያይዶሶናነ ዬላትዶሶና። አይስ ጊኮ፥ ኦሶይ ኑ ፆሳ ማደን ፖለትዳይሳ አኬክዶሶና።
NEH 6:17 ሄ ዎደ ይሁዳ ሹማት ፆቢያስ ዳብዳበ ፃፍሸ ጋምእዶሶና፤ እካ ኤንታዉ ዛርሸ ጋምእስ።
NEH 6:18 ኤራ ናአይ ሳካን፥ ፆቢያ ቦሎ ግድያ ግሾነ እያ ናአይ ዮሃናን ባራካ ናኣ ማሱላማ ናእዉ ኤክዳ ግሾ፥ አይሁደታፐ ዳሮት እያራ ጫቅድ ደኦሶና።
NEH 6:19 ሄ አሳት ፆበይ ኦꬅዳ ሎኦባ ኡባ ታ ስንꬃን ናሽድ ሃሳዮሶና፤ ታኒ ግያባ እያዉ ኦዶሶና። ሄሳ ግሾ፥ ፆበይ ኡባ ዎደ ታና ያሽሳናዉ ዳብዳበ ፃፎ አግቤና።
NEH 7:1 ግምብያ ኦሶይ ዉርን፥ ሳንቃይካ ገልስ፤ ፐንግያ ናገይሳት፥ ዛማረትነ ሌወት ባንታ ኦሱዋ ኦይክዶሶና።
NEH 7:2 ታኒ የሩሳላመ ካታማ አይስያ ማታ ታ እሻ ሀናነስነ ሚፃ ናገይሳታ ሀላቃ አናናስ እማስ። ሀናን ሀራታፐ አꬍዳ ቱማንቾነ ፆሰ ያይያ አስ።
NEH 7:3 ታኒ ኤንታኮ፥ “ዎንታ አዋይ ከይድ ሆአና ጋካናዉ የሩሳላመ ግምበ ፐንገታ ዶዮፕተ። ቃስ ኦማርስ ናገይሳት ባንታ ኦሱዋ ኦንግድ ባናፐ ስን ፐንገታ ምንꬅ ጎርዳናዳ ኦꬅተ። ሄሳዳካ፥ የሩሳላመን ደእያ አሳፐ ዶርድ ባጋት ባንታ ኦሶ በሳን፥ ሀራት ቃስ ባንታ ኬꬃ ሄራን ናጋና መላ ኦꬅተ” ያጋስ።
NEH 7:4 ሄ ዎደ የሩሳላመ ካታማይ ዳሮ ዳልጋነ ግታ፤ ሽን እያ ግዶን ደእያ አሳ ታይቦይ ዳሮ ጉꬃ፤ ቃስ ዳሮ ኬꬃት ቡሮ ኬፀትቤና።
NEH 7:5 ሄሳፈ ጉየ፥ አሳ ካለይሳታ፥ ሀላቃታነ አሳ ኡባ ሺሻዳ ኤንታ ሶ አሳን አሳን ማዝጋባና መላ ፆሳይ ታና ቆፍስስ። ድኤተꬃፈ ስን ስምዳ አሳ ኤንታ ሶ አሳን አሳን ፃፈትዳ ማፃፋካ ደማስ፤ ሄ ማፃፋን ፃፈትዳይ ሀይሳ።
NEH 7:6 ባብሎነ ካዎይ ናቡካዳናፆር ድእድ፥ ባ ቢታ ኤፍዳ አሳፐ ጉየ ባንታ ካታማ የሩሳላመነ ይሁዳን ደእያ ባንታ ካታማታ ስምዳ አሳይ ሀይሳፈ ካልድ ደኤይሳታ።
NEH 7:7 ኤንታ ሀላቃት ዛሩባበላ፥ እያሱ፥ ናህመ፥ አዛራ፥ ራማ፥ ናሀማነ፥ ማርድክዮሳ፥ ብልሻና፥ ምስፐረታ፥ ብግዋያ፥ ናሁማነ ባና። ድኦፐ ስምዳ እስራኤለ አሳ ታይቦይ ሀይሳ፤
NEH 7:8 ፓሮሳ ያራት 2,172፤
NEH 7:9 ሳፋፃ ያራት 372፤
NEH 7:10 ኤራ ያራት 652፤
NEH 7:11 እያሱነ እዮኣባ ኮቸ ግድዳ ፓሀት-ሞአባ ያራት 2,818፤
NEH 7:12 ኤላማ ያራት 1,254፤
NEH 7:13 ዛቱ ያራት 845፤
NEH 7:14 ዛካያ ያራት 760፤
NEH 7:15 ብኑያ ያራት 648፤
NEH 7:16 በባያ ያራት 628፤
NEH 7:17 አዝጋዳ ያራት 2,322፤
NEH 7:18 አዶንቃማ ያራት 667፤
NEH 7:19 ብግዋያ ያራት 2,067
NEH 7:20 አድና ያራት 655፤
NEH 7:21 ህዝቅያሳ ያራ ግድዳ አፄራ ያራት 98፤
NEH 7:22 ሀሹማ ያራት 328፤
NEH 7:23 በሳያ ያራት 324፤
NEH 7:24 ሀርፋ ያራት 112፤
NEH 7:25 ጋባኦና ያራት 95፤
NEH 7:26 ቤተለመንነ ናፆፋን ደእያ አሳይ 188፤
NEH 7:27 አናቶታ ካታማ አሳይ 128፤
NEH 7:28 ቤት-አዝሞታን ደእያ አሳይ 42፤
NEH 7:29 ቅርያት-አርማን፥ ካፍራንነ ባኤሮታን ደእያ አሳይ 743፤
NEH 7:30 ራማነ ግብአን ደእያ አሳይ 621፤
NEH 7:31 ምክማሳን ደእያ አሳይ 122፤
NEH 7:32 ቤተለንነ ጋየን ደእያ አሳይ 123፤
NEH 7:33 ናምአንꬆ ናቦን ደእያ አሳይ 52፤
NEH 7:34 ናምአንꬆ ኤላማ ያራት 1,254፤
NEH 7:35 ሀርማን ደእያ አሳይ 320፤
NEH 7:36 እያርኮን ደእያ አሳይ 345፤
NEH 7:37 ሎዳን፥ ሀድዳንነ ኦኖን ደእያ አሳይ 721፤
NEH 7:38 ሳናአን ደእያ አሳይ 3,930።
NEH 7:39 ሀይሳፈ ካልድ ደኤይሳት ድኤተꬃፈ ስምዳ ካህነታ። እያሱ ያራ ግድዳ ያዳያ ያራት 973፤
NEH 7:40 እመራ ያራት 1,052፤
NEH 7:41 ፓስኮራ ያራት 1,247፤
NEH 7:42 ሀርማ ያራት 1,017.
NEH 7:43 ሀይሳፈ ካልድ ደኤይሳት ድኤተꬃፈ ስምዳ ሌወታ፤ ሆዳዋ ያራ ግድያ እያሱነ ቃድምኤላ ያራት 74፤
NEH 7:44 አሳፋ ያራ ግድዳ ዛማረት 148።
NEH 7:45 ፐንግያ ናግያ ሳሉማ፥ አፄራ፥ ታልሞና፥ አቁባ፥ ሀትታነ ሾባያ ያራት 138፤
NEH 7:46 ሀይሳፈ ካልድ ደኤይሳት ፆሳ ኬꬃን ኦꬅያ ኦሳንቾታ ያራታ፤ ፅሀ ያራታ፥ ሀሱፋ ያራታ፥ ፃባኦታ ያራታ፥
NEH 7:47 ከሮሳ ያራታ፥ ሲአ ያራታ፥ ፓዶና ያራታ፥
NEH 7:48 ልባና ያራታ፥ ሀጋባ ያራታ፥ ሳማላ ያራታ፥
NEH 7:49 ሀናና ያራታ፥ ግደላ ያራታ፥ ጋሃራ ያራታ፥
NEH 7:50 ራያ ያራታ፥ ራፅና ያራታ፥ ናቆዳ ያራታ፥
NEH 7:51 ጋዛማ ያራታ፥ ኦዛ ያራታ፥ ፓሳ ያራታ፥
NEH 7:52 በሳያ ያራታ፥ ማኡንማ ያራታ፥ ናፉሰስማ ያራታ፥
NEH 7:53 ባቅቡቃ ያራታ፥ ሀቁፋ ያራታ፥ ሀርሁራ ያራታ፥
NEH 7:54 ባስሎታ ያራታ፥ ማህዳ ያራታ፥ ሀርሻ ያራታ፥
NEH 7:55 ባርቆሳ ያራታ፥ ስሳራ ያራታ፥ ቴማ ያራታ፥
NEH 7:56 ናስያ ያራታነ ሀፅፋ ያራታ።
NEH 7:57 ሀይሳፈ ካልድ ደኤይሳት ሶሎሞነ አይለታ ያራታ፤ ሶፃያ ያራታ፥ ሶፌረታ ያራታ፥ ፓርዳ ያራታ፥
NEH 7:58 ያእላ ያራታ፥ ዳርቆና ያራታ፥ ግደላ ያራታ፥
NEH 7:59 ሳፋፃ ያራታ፥ ሀፅላ ያራታ፥ ፖከሬት-ሀፃባይማ ያራታነ አሞነ ያራታ።
NEH 7:60 ድኤተꬃፈ ስምዳ ፆሳ ኬꬃን ኦይሳትነ ሶሎሞነ አይለታ ታይቦይ 392.
NEH 7:61 ታልመላ፥ ተልሀርሻ፥ ካሩባ፥ አዳናነ እመራ ካታማታፐ የሩሳላመ ስምዶሶና። ሽን ኤንቲ ዎይኮ ኤንታ አዋት እስራኤለ ሼሽ ግደይሳ ኤርሳናዉ ዳንዳእቦኮና።
NEH 7:62 ኤንቲ ዳላያ፥ ፆቢያነ ናቆዳ ያራታ፤ ኤንታ ታይቦይ 642.
NEH 7:63 ካህነታፐ ሆባያ ያራት፥ ሀቆፃ ያራትነ ባርዝለ ያራት የሩሳላመ ስምዶሶና። ባርዝለ ገይስ ጋላዳ ቢታ አስ ግድዳ ባርዝለ ናእዉ ኤክድ፥ ባ ቦሉዋ ሱንꬃ ኤክስ።
NEH 7:64 ኤንቲ ባንታ የለታ ሱሳ ኤራናዉ የለታ ማፃፋን ኮይዶሶና፥ ሽን ደምቦኮና። ሄሳ ግሾ፥ ኤንቲ ቱናዳ ታይበትድ ካህነተꬃን ኦꬆና መላ ድገትዶሶና።
NEH 7:65 ኡሪመንነ ቱሚመን ሻክድ ፕርድያ ካህነይ ደንዳና ጋካናዉ ኤንቲ ጌሻ ካꬃፈ ማናዉ ዳንዳኦናይሳ ይሁዳ ሃረይስ ኤንታዉ ኦድስ።
NEH 7:66 ድኤተꬃፈ ይሁዳ ቢታ ስምዳ 7,337 አደነ ማጫ አይለታ ጉጆና ደእሽን፥ ኩመꬃ አሳ ታይቦይ 42,360. ቃስ ኤንታራ 245 አደነ ማጫ ዛማረት ስምዶሶና።
NEH 7:68 ፓራታ ታይቦይ 736፤ ባቁሎታ ታይቦይ 245፤
NEH 7:69 ግማለታ ታይቦይ 435፤ ሀረታ ታይቦይ 6,720.
NEH 7:70 ያራታ ሀላቃታፐ ጉꬃት ኦሱዋስ እሞታ እምዶሶና። ቢታ ሃረይስ 8 ክሎ ግራመ ዎርቃ፥ 50 ድስተነ 530 ካህነ ማኦታ እሚስ።
NEH 7:71 ያራታ ሀላቃት 168 ክሎ ግራመ ዎርቃነ 1,250 ክሎ ግራመ ብራ እምዶሶና።
NEH 7:72 አትዳ አሳይ 168 ክሎ ግራመ ዎርቃ፥ 140 ክሎ ግራመ ብራነ 67 ካህነ ማኦታ እምዶሶና።
NEH 7:73 ሄሳፈ ጉየ ካህነት፥ ሌወት፥ ናገይሳት፥ ዛማረት፥ አሳፐ እሶት እሶት፥ ፆሳ ኬꬃ ኦሳንቾትነ ሀራ እስራኤለ አሳይ ባንታ ካታማን ካታማን ኡትዶሶና።
NEH 8:1 ላፑንꬆ አጌናይ ገልያ ዎደ እስራኤለ አሳይ ባንታ ካታማን ካታማን ኡትዶሶና። ሄ አጌናን ኤንቲ ኡባይ እስፈ ሃꬃ ፐንገ ስንꬃን ደእያ ዳባባን ሺቅዶሶና። ኤንቲ ጎዳይ ሙሰ ባጋራ እስራኤለ አሳስ እምዳ ህገ ማፃፋ ኤሀና መላ ፃፍያ እዝራ ኦይችዶሶና።
NEH 8:2 ያትን፥ ካህነይ እዝር፥ ላፑንꬆ አጌናን ኮይሮ ጋላሳን፥ አደይ፥ ማጭነ አኬካናዉ ዳንዳእያ አስ ኡባይ ሺቅዳ በሳ ህገ ማፃፋ ኤህስ።
NEH 8:3 ሃꬃ ፐንገ ስንꬃን ደእያ ዳባባን ኤቅድ፥ አደስ፥ ማጫስነ አኬካናዉ ዳንዳእያ አሰ ኡባስ ህገ ማፃፋ ዎንታፈ ጋላስ ጋካናዉ ናባብስ። አሳይካ ሀይዝድ ስእዶሶና።
NEH 8:4 ፃፈይ እዝር፥ ናባባናዉ ምꬃፈ ኦሰትዳ ꬎቃ በሳን ከይድ ኤቅስ። እያፐ ኡሻቻ ባጋራ ማትታ፥ ሻማያ፥ አናያ፥ ኡራያ፥ ካልቀነ ማእሰያ ጌተትያ አሳት ኤቅዶሶና። ሀድርሳ ባጋራ ፓዳያ፥ ምሳኤላ፥ ማልክያ፥ ሀሱማ፥ ሀሽባዳ፥ ዛካርያሳነ ማሱላማ ጌተትያ አሳት ኤቅዶሶና።
NEH 8:5 እዝር አሳ ኡባፈ ꬎቅያ በሳን ኤቅያ ዎደ ኡባይ እያ ሎይꬅድ ፄልሽን፥ ኤንታ ስንꬃን ህገ ማፃፋ ዶይስ። እ ዶይያ ዎደ ኤንቲ ኡባይ ኡትዳ በሳፈ ደንድ ኤቅዶሶና።
NEH 8:6 እዝር ጎዳ፥ ግታ ፆሳ ጋላትስ። አሳ ኡባይ ባንታ ኩሽያ ደንꬅድ፥ “አምንእ! አምንእ!” ያግዶሶና። ኤንታ ሶምኦይ ሳአ ቦቻና ጋካናዉ ጉፋንድ ጎዳ ጎይንዶሶና።
NEH 8:7 ኤንቲ ባንታ ኤቅዳ በሳን ደእሽን፥ ሌወት፥ እያሱይ፥ ባን፥ ሳራባ፥ ያምና፥ አቁባ፥ ሳባታ፥ ሆዳ፥ ማሰያ፥ ቃልፃ፥ አዛራ፥ ዮዛባታ፥ ሀናንነ ፓላህ ህግያ አሳይ አኬካናዳ ብርሸꬃ ቆንጭስዶሶና።
NEH 8:8 ኤንቲ ፆሳ ህገ ማፃፋ ናባብዶሶና፤ ቃስ ናባበተይስ ዎይግያኮ አሳይ ኤራና መላ ብርሸꬃ ቆንጭስዶሶና።
NEH 8:9 አሳይ ህገ ቃላ ስእዳ ዎደ ዬክዳ ግሾ፥ ቢታ ሃርያ ናህመይ፥ ካህነነ ፃፈ ግድዳ እዝርነ አሳስ ማፃፋ ብርሽያ ሌወት፥ “ሀ ጋላሳይ ጎዳስ፥ ህንተ ፆሳስ ጌሻ ጋላስ ግድያ ግሾ፥ ዬኮፍተ ዎይኮ አፉፆፍተ” ያግዶሶና።
NEH 8:10 ናህመይ፥ “ብድ ዶረትዳ ካꬃ ሚተ፤ ማልእያ ኡሽ ኡይተ፤ ቃስ አይኮይ ባይናይሳታስ ህንተይሳፈ ሻክድ እምተ። ሀች ጋላሳይ ኑ ጎዳስ ጌሻ ጋላስ። ጎዳ ኡፋይሳይ ህንተዉ ዎልቃ ግድያ ግሾ አዛኖፕተ” ያግስ።
NEH 8:11 ሌወት፥ “ሀች ጋላሳይ ጌሻ ጋላስ ግድያ ግሾ፥ አዛኖፕተ፤ ስእ ጊተ” ያግድ አሳ ስእ ኦꬅዶሶና።
NEH 8:12 ናበበትዳ ቃላ ብርሸꬃይ ኤንታዉ ገልዳ ግሾ፥ አሳይ ኡፋይሳን ማናዉ፥ ኡያናዉነ አይኮይ ባይናይሳታስ ሻክድ እማናዉ ሶ ብዶሶና።
NEH 8:13 ሄ አጌና ናምአንꬆ ጋላሳን ኮቻታ ሀላቃት፥ ካህነትነ ሌወት ህገ ቃላ ኤንታዉ ብርሻና መላ እዝራኮ ይዶሶና።
NEH 8:14 ኤንቲ ታማርያ ዎደ ላፑንꬃ አጌናን ሻቃራ ባኣለ ቦንችያ ዎደ እስራኤለ አሳይ ሻቃራ ጋርሳን ኡትድ ቦንቻና መላ ፆሳይ ሙሰ ባጋራ ኪትዳይሳ ደምዶሶና።
NEH 8:15 ሻቃራ ባኣለ ቦንቻናዉ ካታማታንነ የሩሳላመን ሀይሳዳ ያግድ አዋጅዶሶና፤ “ሻቃራ ሻቃራናዉ ደረ ቦላ ከይድ ዛይተ ሻማሆ፥ ዎራ ሻማሆ፥ ባርሰኔተ ምꬃ፥ ዛምባ ሀይꬅነ ምꬃ ኡባፈ ህገን ፃፈትዳይሳዳ ታሸ ኤህተ” ያግዶሶና።
NEH 8:16 ሄሳ ግሾ፥ አሳይ ብድ ምꬃ ታሸ ኤህድ ባንታ ፖቀ ኬꬃ ቦላ ደእያ ደንባን፥ ባንታ ዛባን፥ ፆሳ ኬꬃ ዳባባን፥ ሃꬃ ፐንግያ ዳባባንነ ኤፍሬማ ፐንግያ ዳባባን ሻቃራ ሻቃርዶሶና።
NEH 8:17 ድኤተꬃፈ ስምዳ አሳ ኡባይ ሻቃራ ሻቃርድ እያ ጋርሳን ኡትዶሶና። ናወ ናኣ እያሱ ዎደፐ ሃ ስምን ኤንቲ ሀይሳ መላ ባኣለ ቦንች ኤሮኮና። ሄሳ ግሾ፥ ኤንቲ ኡባይ ዳሮ ኡፋይትዶሶና።
NEH 8:18 ባለይ ዶመትድ ዉራና ጋካናዉ ጋላስ ጋላስ እዝር ፆሳ ህገ ማፃፋፐ አሳስ ናባቤስ። ባልያ ላፑን ጋላስ ቦንችዳፐ ጉየ ሆስፑንꬆ ጋላሳን ህገይ ኪተይሳዳ ጌሻ ዱላታ ኦꬅዶሶና።
NEH 9:1 ሄ አጌናን ላታማነ ኦይዳንꬆ ጋላሳን እስራኤለ አሳይ እስፈ ሺቅድ፥ ካዮ ማኦ ማእድ፥ ባንታ ሁጰን ባና ቆልድ ፆምዶሶና።
NEH 9:2 ባንታና አላጋ ደረ አሳፐ ሻክዶሶና። ሄሰፈ ጉየ ደንድ ኤቅድ ኤንትነ ኤንታ አዋት ኦꬅዳ ናጋራ ኡባ ፓፅዶሶና።
NEH 9:3 ኤንቲ ያን ኤቅድ ደእሽን ሄꬑ ሳተ ኩመꬅ ጎዳ ኤንታ ፆሳ ህገ ማፃፋይ ኤንታዉ ናባበትስ። ቃስ ሀራ ሄꬑ ሳተ ባንታ ናጋራ ፓፅሸ ጎዳ ባንታ ፆሳ ጎይንዶሶና።
NEH 9:4 ሌወት፥ እያሱይ፥ ባን፥ ቃድምኤል፥ ሳባና፥ ቡን፥ ሳራባ፥ ባናን፥ ከናን ማድራከ ቦላ ከይድ ባንታ ቃላ ꬎቁ ኦꬅድ ጎዳ፥ ባንታ ፆሳ ዎስዶሶና።
NEH 9:5 ሌወት፥ እያሱይ፥ ቃድምኤል፥ ባን፥ አሳባን፥ ሳራብ ሆድ፥ ሳባንነ ፓታህ፥ “ደንድ ኤቅድ፥ መርናፐ መርና ጋካናዉ ደእያ ጎዳ ህንተ ፆሳ ጋላትተ!” “እያ ቦንቾ ሱንꬃ አንጅተ፤ ጋላታፐነ አንጆፈ አꬍያ እያ ሱንꬃ ሳቢተ።”
NEH 9:6 ፆሳዉ፥ ነ ፃላል ጎዳ! ኔኒ ሳሎታነ ꬎቃ ሳሎታን ደእያ መተꬃታ፥ ሳኣነ እያ ቦላ ደእያ መተꬃታ፥ አባታነ ኤንታ ግዶን ደእያ መተꬃታ ኡባ መꬋዳሳ። ኡባስ ደኦ እማዳሳ፤ ሳሎ መተꬃት ነዉ ጎይኖሶና።
NEH 9:7 ጎዳዉ፥ ኔኒ ፆሰ! ኔኒ ካልዳወታ ቢታ ኡረፐ አብራመ ዶራዳ ከሳዳሳ። እያ ሱንꬃ ላማዳ አብራሃመ ጋዳ ሱንꬃዳሳ።
NEH 9:8 እ ነዉ አማንꬅያ አስ ግደይሳ በአዳ፥ ካናነታ፥ ህተታ፥ አሞረታ፥ ፓርዘታ፥ ያቡሰታነ ገርገሰታ ቢታ እያ ኮቻስ ላታ ቢታ ኦꬃዳ እማናዉ እያዉ ጫቃዳሳ። ኔኒ ፅሎ ግድያ ግሾ ነ ግዳ ቃላ ፖላዳሳ።
NEH 9:9 ኔኒ ኑ ማይዛታ ግብፀ ቢታን ጋክዳ ኡንኣ በአዳሳ፤ ቃስ ዞኦ አባ ማታን ደእሸ ኤንቲ ዋስዳ ዋሱዋ ስአዳሳ።
NEH 9:10 ግብፀ ካዎይ፥ እያ ሹማትነ ሄ ቢታ አሳ ኡባይ እስራኤለ አሳ ቦላ ኦቶርትዳ ግሾ ኤንታ ቦላ ማላታነ ማላልስያባታ ኦꬃዳሳ። ሄሳ ኦꬃዳ ሀች ጋካናዉ ነ ሱንꬃይ ቦንቾን ፄገታናዳ ኦꬃዳሳ።
NEH 9:11 አባ ሻካዳ ነ አሳ መላ ቢታራ ፕንꬃዳሳ። ሽን ሹች ጪሞ ሃꬃን ሆልን፥ ምተተይሳዳ ኤንታ ጎድያ ሞርከታ አባን ምትሳዳ ꬋይሳዳሳ።
NEH 9:12 እስራኤለ አሳ ጋላስ ሻራ ቱሳን፥ ቃማ ታማ ቱሳን ኤንታ ኦግያ ፖእሳዳ ካለꬃዳሳ።
NEH 9:13 ኔኒ ሳሎፐ ዎꬋዳ ነ አሳ ሲና ዙማ ቦላ ኦድሳዳሳ። ሱረ ፕርዳነ ቱማ ግድዳ ህግያ፥ ሎኦ ዎጋነ ኪታ ኤንታዉ እማዳሳ።
NEH 9:14 ጌሻ ነ ሳምባታ ኤንቲ ቦንቻና መላ ኤንታ ታማርሳዳሳ። ነ አይልያ ሙሰ ባጋራ ኤንታዉ ኪታ፥ ዎጋነ ህገ እማዳሳ።
NEH 9:15 ኤንቲ ኮሻትዳ ዎደ ሳሎፐ ካꬅ እማዳሳ፤ ቃስ ኤንቲ ሳሞትዳ ዎደ ዛላፈ ሃ ፑልትሳዳሳ። ኔኒ ኤንታዉ እማና ጋዳ ጫቅዳ ቢታ ኤንቲ ገልድ ላታና መላ ኪታዳሳ።
NEH 9:16 ሽን ኑ ማይዛት ኦቶርትዶሶና፤ ስኦና እፅድ ነዉ ኪተትቦኮና።
NEH 9:17 ኪተቶና እፅዶሶና፤ ኔኒ ኤንታዉ ኦꬅዳ ማላልስያባ ኡባ ሀሳይቦኮና። ኤንቲ ስኦና አስ ግድዶሶና፤ ባንታ ጌላተꬃን አይለተꬃስ ግብፀ ቢታ ጉየ ካለꬃና መላ ሀላቃ ባንታዉ ዶርዶሶና። ግዶሽን፥ ኔኒ አቶ ግያ ፆሲ፥ ኬሀነ ማርያ ፆሲ፤ ሲቆን ኩምዳይሳነ ሀንቆስ ኤለሶና ፆሲ ግድያ ግሾ ኤንታ አጋባካ።
NEH 9:18 ኤንቲ ማራ ማላን ኤቃ መꬍድ፥ “ህንተና ግብፀ ቢታፈ ከስዳ ህንተ ፆሳይ ሀይሳ” ያግድ ነና ግታ ጫሸ ጫይዶሶና።
NEH 9:19 ነ ዳሮ ማሮተꬃን ኔኒ ኤንታ መላ ቢታን አጋባካ። ኤንቲ ብያ ኦግያ ፖእሳና መላ ጋላስ ሻራ ቱሳን፥ ቃማ ታማ ቱሳን ኤንታ ካለꬃዳሳ።
NEH 9:20 ኤንታ ታማርሳና መላ ነ ሎኦ አያና ኤንታዉ እማዳሳ። ማናዉ ማና፥ ኡያናዉ ሃ ኤንታዉ እማዳሳ።
NEH 9:21 ኦይታሙ ላይꬅ ኩመꬅ መላ ቢታን ሄመትያ ዎደ ኤንታዉ ኮሽያባፐ እስባካ ፓጭሳባካ። ኤንታ ማኦይ ዉርቤና፤ ኤንታ ቶሆይ ክፅቤና።
NEH 9:22 ነ ኤንታ ካዎተꬃታነ ደረታ ሀር አቶሽን ሃሆን ደእያ ቢታታ ፆንድ ኦይካና መላ ኦꬃዳሳ። ካዎይ ስሆነይ ሃርያ ሀሰቦና ቢታነ ካዎይ ኦገይ ሃርያ ባሳነ ቢታ ኤንታና ላትሳዳሳ።
NEH 9:23 ኤንታ ኮቻ ታይቡዋ ሳሎ ፆልንቶዳ ዳርሳዳሳ። ኤንታ ማይዛታስ እማና ጋዳ ጫቅዳ ቢታ ኤንታ ላትሳዳሳ።
NEH 9:24 ኤንታ ናይት ካናነ ቢታ ላትዶሶና። ሄ ቢታን ደእያ ካናነ አሳ ኤንታ ስንꬃን ኔኒ ካዉሻዳሳ። ኤንቲ ካናነ አሳ ቦላ፥ ኤንታ ካዎታ ቦላነ ቢታን ደእያ አሳ ቦላ ዶስዳባ ኦꬃና መላ ኤንታ ኩሸን አꬃ እማዳሳ።
NEH 9:25 ኤንቲ ዩሾይ ግምበትዳ ካታማታነ አራዳ ቢታ ፆንድ ኤክዶሶና። ሎኦባ ኡባይ ኩምዳ ኬꬃታ፥ ቦከትዳ ሃꬃ ኦላታ፥ ዎይነ በሳታ፥ ሻማሆነ ሀራ አይፈ አይፍያ ዳሮ ምꬃታ ላትዶሶና። እያፐ ምድ ካልድ ኦርድዶሶና፤ ነ ግታ ኬሀተꬃን ኡፋይትዶሶና።
NEH 9:26 ግዶሽን፥ ኤንቲ ኪተቶና እፅድ፥ ነ ቦላ ማካልዶሶና፤ ነ ህግያ ቦላ ዞኮ ዛርዶሶና። ኔኮ ስማናዳ ኤንታዉ ምንꬅድ ኦድዳ ነ ናበታ ዎꬍዶሶና። ዳሮ ኢታ ጫሽ ነና ጫይዶሶና።
NEH 9:27 ሄሳ ግሾ፥ ኤንታ ኡንኤꬅያ ሞርከታ ኩሸን አꬃ እምን፥ ሞርከት ኤንታ ኡንኤꬅዳ ዎደ ኔኮ ዋስዶሶና። ኤንታ ዋሱዋ ሳሎን ግዳዳ ስአዳሳ፤ ነ ማሮተꬃ ዳሩዋን ኤንታ፥ ኤንታ ሞርከታ ኩሸፐ አሽያ አሳታ ኪታዳሳ።
NEH 9:28 ሽን ኤንቲ ሸምፖ ደም ስሚድ ዛሪድ ነ ስንꬃን ናጋራ ኦꬅዶሶና። ነ ዛራዳ ኤንታ ሞርከታ ኩሸን አꬃዳ እምን፥ ኤንታ ሞርከት ኤንታ ሃርዶሶና። ሽን ሀእካ ኤንቲ ኔኮ ዋስን፥ ኤንታ ዋሱዋ ሳሎን ግዳዳ ስአዳሳ። ነ ማሮተꬃን ኤንታ ዛራ ዛራዳካ አሻ ኤካዳሳ።
NEH 9:29 ነ ህግያኮ ኤንቲ ስማና መላ ኤንታዉ ምንꬃዳ ኦዳዳሳ፥ ሽን ኤንቲ ኦቶርትዶሶና፤ ነዉ ኪተቶና እፅዶሶና። አስ ኪተትድ ደኦ ደምያ ነ ህግያ መንꬅዶሶና። ነዉ ዞኮ ዛሪድ ስኦና እፅዶሶና፤ ኪተቶና እፅዶሶና።
NEH 9:30 ግድኮካ ነ ኤንታ ዳሮ ላይꬅ ዳንዳአዳሳ፤ ነ አያናን ናበታ ባጋራ ኤንታዉ ኦዳዳሳ፥ ሽን ኤንቲ ስእቦኮና። ሄሳ ግሾ፥ ሾሮ ካዎተꬃት ኤንታ ሃራና መላ አꬃ እማዳሳ።
NEH 9:31 ሽን ኔኒ ኬሀነ ማርያ ፆሲ ግድያ ግሾ፥ ነ ግታ ማሮተꬃን ኤንታ አጋባካ፤ ቡርፆራ ꬋይሳባካ።
NEH 9:32 ህዛ ኑ ፆሳዉ፥ ግታዉ፥ ዎልቃማነ ያየትዳ ፆሳዉ፥ ነ መርና ሲቆ ጫቁዋ ናገይሶ፥ በን አሶረ ካዎተꬃፈ ሀች ጋካናዉ ኑ ቦላ፥ ኑ ካዎታ ቦላ፥ ኑ ሀላቃታ ቦላ፥ ኑ ካህነታ ቦላ፥ ኑ ናበታ ቦላ፥ ኑ ማይዛታ ቦላነ ነ አሳ ኡባ ቦላ ጋክዳ መቶይ ነ ስንꬃን ላፋባ ዳኖፖ።
NEH 9:33 ኑና ጋክዳባ ኡባን ኔኒ ፅሎ። ኑኒ ነና ናቅኮካ ነ አማነተꬃ አጋባካ።
NEH 9:34 ኑ ካዎት፥ ኑ ሀላቃት፥ ኑ ካህነትነ ኑ ማይዛት ነ ህግያ ናግቦኮና። ቃስ ነ ኤንታዉ እምዳ ኪታነ ናግሱዋ ስእቦኮና።
NEH 9:35 ነ ኤንታ ካዎተꬃን ኤንታዉ ግታ አንጁዋ እማዳሳ፤ ዳልጋነ አራዳ ቢታ ኤንታዉ እማዳሳ። ሽን ኤንቲ ነና ጎይንቦኮና፤ ባንታ ኢታ ኦሱዋፐ ስምቦኮና።
NEH 9:36 “ህዛ፥ ሀች ኑኒ አይለ ግደይሳ በአ። ኑ ማይዛት ሄ ቢተ አይፍያነ እያ እምያ አንጁዋ ኡባ ማና መላ ነ እምዳ ቢታን ኑ ሀች አይለ ግድዳ።
NEH 9:37 ኑ ናጋራ ግሾ፥ ነ ኑ ቦላ ደንꬅዳ ካዎት ቢታይ እምያ አይፍያ ኡባ ጎኤቶሶና። ኑ ቦላነ ኑ መህያ ቦላ ባንታ ኮይዳባ ኦꬆሶና፤ ኑኒ ግታ መቶ ግዶን ደኦስ” ያግዶሶና።
NEH 9:38 ሀንዳባ ኡባ ግሾ፥ ኑኒ ሃሳይድ፥ ሄ ሃሳያ ፃፍድ ቆንጭሳናዉ ቆፋ ቃችዳ። ፃፈትዳ ፁፍያ ቦላ ኑ ሀላቃት፥ ኑ ሌወትነ ኑ ካህነት ባንታ ማታመ ዎꬅዶሶና።
NEH 10:1 ማታመ ዎꬅዳ አሳ ሱንꬃይ፥ ቢታ አይስያ ናህመይ፥ ሀካልያ ናአይ፥ ካህነታፐ፥ ሰደቅያሳ፥
NEH 10:2 ሳራያ፥ አዛራ፥ ኤርምያሳ፥
NEH 10:3 ፓስኮራ፥ አማረ፥ ማልካ፥
NEH 10:4 ሀፁሳ፥ ሳባና፥ ማሉካ፥
NEH 10:5 ሀርማ፥ ማረሞታ፥ ኦባዳ፥
NEH 10:6 ዳነላ፥ ግነቶና፥ ባሮካ፥
NEH 10:7 ማሱላማ፥ አብያ፥ ምያምና፥
NEH 10:8 ማኣዛ፥ በልጋያነ ሻማያ።
NEH 10:9 ሌወታፐ፥ አዝናታ ናኣ እያሱ፥ ሄናዳዳ ኮች ግድዳ ብኑያ፥ ቃድምኤላነ
NEH 10:10 ኤንታራ ኦꬅያ ሳባና፥ ሆድያ፥ ቃልፃ፥ ፓላያ፥ ሀናና፥
NEH 10:11 ምካ፥ ራሆባ፥ ሀሳባያ፥
NEH 10:12 ዛኩራ፥ ሳራባ፥ ሳባና፥
NEH 10:13 ሆድያ፥ ባናነ ባንና።
NEH 10:14 ሀላቃታፐ፥ ፓሮሳ፥ ፓሀት-ሞአባ፥ ኤላማ፥ ዛታ፥ ባና፥
NEH 10:15 ቡና፥ አዝጋዳ፥ በባያ፥
NEH 10:16 አዶና፥ ብግዋያ፥ አድና፥
NEH 10:17 አፄራ፥ ህዝቅያሳ፥ አዙራ፥
NEH 10:18 ሆድያ፥ ሀሱማ፥ በሳያ፥
NEH 10:19 ሀርፋ፥ አናቶታ፥ ነባያ፥
NEH 10:20 ማግጳሳ፥ ማሱላማ፥ ኤዝራ፥
NEH 10:21 ማሰዛቤላ፥ ሳዶቃ፥ ያዱአ፥
NEH 10:22 ፓላፃ፥ ሀናና፥ አናያ፥
NEH 10:23 ሆሰ፥ ሀናና፥ ሀሱባ፥
NEH 10:24 ሀሎሄሳ፥ ፕልሀ፥ ሶበቃ፥
NEH 10:25 ረሁማ፥ ሀሳብና፥ ማሰያ፥
NEH 10:26 አክያ፥ ሀናና፥ አናና፥
NEH 10:27 ማሉካ፥ ሀርማነ ባአና።
NEH 10:28 አትዳ አሳይ፥ ካህነት፥ ሌወት፥ ፐንግያ ናገይሳት፥ ዛማረት፥ ፆሳ ኬꬃ ኦሳንቾት፥ ፆሳ ህግያስ ኪተታናዉ ባንታና አይሁደ ግዶና ደረታፐ ሻክዳ ኡባይ፥ ኤንታ ማቸት፥ አኬካናዉ ዳንዳእያ ኤንታ አደ ናይትነ ማጫ ናይት፥
NEH 10:29 ባንታና ካለይሳታራ እስፈ ጫቅዶሶና። ኤንቲ ፆሳ አይልያ ሙሰ ባጋራ ፆሳይ እምዳ ኑ ጎዳ፥ ፆሳ ኪታ፥ ህግያነ ዎጋ ናጋናዉ ቃንገꬃንነ ጫቆን ቃላ ገልዶሶና።
NEH 10:30 ኤንቲ ሀይሳዳ ያግድ ጫቅዶሶና፤ “ኑ ማጫ ናይታ አይሁደ ግዶና አደ ናይታስ እሞኮ፤ ኤንታ ማጫ ናይታ ኑ አደ ናይታስ ማቾ ኦꬅድ ኤኮኮ።
NEH 10:31 “አይሁደ ግዶና አሳት ካꬅ ግድን ዎይኮ ሀራባ ሳምባታ ጋላስ ዎይኮ ሀራ ባኣለ ጋላስ ባይዛናዉ ኤህኮ ኤንታፈ ሻሞኮ። ላፑንꬃ ላይꬅ ጋክያ ዎደ ዎደ ኑ ቢታ ጎዮኮ፤ ኑኒ ታልእዳ አጩዋ አቾኮ።
NEH 10:32 “ፆሳ ኬꬃ ኦሱዋስ ኦይዱ ግራመ ብራ ላይꬃን ላይꬃን ቃንፆና እማና።
NEH 10:33 ሄስካ፥ ጎዳ ስንꬃን ዎꬅያ ኡይꬃስ፥ ጋላስ ጋላስ ያርሸትያ ካꬃ ያርሹዋስ፥ ፁሳ ያርሹዋስ፥ ሳምባታ ጋላሳን፥ አጌና ፄሮን፥ ላይꬃን ደእያ ሀራ ባለታን፥ ጌሻ ያርሾታስ፥ እስራኤለ አሳ ናጋራ አቶተꬃስ ያርሸትያ ያርሹዋስነ ኑ ፆሳ ኬꬃ ኦሱዋስ ኮሽያ ኡባ ኩንꬃናሳ።
NEH 10:34 “ኑ፥ ካህነት፥ ሌወትነ ሀራ አሳ ኡባይ፥ ላይꬃን ላይꬃን ኦሰትያ ጋላሳን፥ ህግያን ፃፈትዳይሳዳ ጎዳ፥ ኑ ፆሳ ያርሾ በሳን ኤፅያ ምꬃ እስ እስ ኮቻይ አዉደ ኤሀናዉ በሲያኮ ኤራናዉ ሳማ የግዳ።
NEH 10:35 “ካꬃ ኑ ሺሽያ ዎደነ ዱማ ዱማ ምꬃ አይፍያ ኑ ማፅያ ዎደ ባይራ ፆሳ ኬꬅ ኤሀና።
NEH 10:36 “ህግያን ፃፈትዳይሳዳ ኑኒ ኮይሮ የለትያ ኑ አደ ናይታ፥ ቃስ ኑ ሚዛት፥ ኑ ዶርሳትነ ኑ ዴሻት የልያ ኮይሮ ማራታ ፆሳ ኬꬃን ኦꬅያ ካህነታኮ ኤህድ ፆሳስ ዱማያና።
NEH 10:37 “ኑኒ ኑ ቢታን ካፅዳ ካꬃፈ ኮይሩዋ፥ ኑ ምꬃ ኡባ አይፍያ፥ ዎይንያነ ዛይትያ እሞታ ኦꬅድ፥ ፆሳ ኬꬃን ኦꬅያ ካህነታኮ ኤሀና። ሌወት ኑ ደእያ ካታማታ ጎሻን አይፍያባፐ አስራታ ኤክያ ግሾ፥ ኑ ቢታይ አይፍያባፐ አስራታ ኤሀና።
NEH 10:38 ሌወት አስራታ ሺሽያ ዎደ፥ አሮና ያራ ግድዳ ካህነት ኤንታራ እስፈ ግዳናዉ በሴስ። ሌወት አስራታ ሺሽዳፐ ጉየ፥ አስራታፐ አስራታ ከስድ ኑ ፆሳ ኬꬅ ኤህድ፥ ሚሸ ዎꬅያ ክፍልያን ዎꬆ።
NEH 10:39 እስራኤለ አሳይነ ሌወት ካꬃ፥ ዎይንያነ ሻማሆ ዛይተ እሞታ ጌሻ ሚሸት ኡትያ በሳነ ካህነት፥ ፐንግያ ናገይሳትነ ዛማረት ሸምፕያ ክፍልያ ኤሆ። “ኑኒ ፆሳ ኬꬃ ኡባካ አጎኮ” ያግድ ጫቅዶሶና።
NEH 11:1 አሳ ካለይሳት የሩሳላመን ደእዶሶና። ሀንኮ አሳይ ታማፈ እሶይ ጌሻ ካታማን የሩሳላመን ደአና መላ ሳማ የግድ ዶርዶሶና። ሽን ሀራ ኡዱፉን ኩሸ አሳይ ባንታ ካታማን ካታማን ደእዶሶና።
NEH 11:2 ባ ሸነን የሩሳላመን ደአናዉ ዶስዳ አሳ ኡባ አሳይ አንጅዶሶና።
NEH 11:3 ሀራ ካታማታን ደእያ እስራኤለ አሳይ፥ ካህነት፥ ሌወት፥ ፆሳ ኬꬃ ኦሳንቾት፥ ሶሎሞነ አይለታ ሼሻት ኡባይ ባንታ ካታማን ካታማን ደእያ ጋድያ ኦይክድ ደእዶሶና። ሀይሳፈ ካልድ ፃፈትዳይሳት፥ የሩሳላመን ደአናዉ ይዳ ቢታ ሹማታ፤
NEH 11:4 ይሁዳ ኮቻፈ ይዳ አሳይ ፓረሳ ያራ ግድዳ አታያነ ሴላ ያራ ግድዳ ማእሰያ። አታይ ኦዝያና ናአ፤ ኦዝያን ዛካርያሳ ናአ፤ ዛካርያስ አማረ ናአ፤ አማረይ ሳፋፃ ናአ፤ ሳፋፅ ማላልኤላ ናአ።
NEH 11:5 ማእሰይ ባሮካ ናአ፤ ባሮክ ኮልሆዛ ናአ፤ ኮልሆዝ ኦዛ ናአ፤ ኦዝ አዳያ ናአ፤ አዳይ ዮያርባ ናአ፤ ዮያርብ ዛካርያሳ ናአ። ሀይሳቲ ሴላ ኮቻታ።
NEH 11:6 ፓረሳ ያራፐ ዎልቃማ ግድዳ 468 አሳት የሩሳላመን ደእዶሶና።
NEH 11:7 ብንያመ ኮቻፈ ይዳ አሳይ ሳላ፥ ጋባያነ ሳላያ። ሳሉ ማሱላማ ናአ፤ ማሱላም ዮኤዳ ናአ፤ ዮኤድ ፓዳያ ናአ፤ ፓዳየይ ቆላያ ናአ፤ ቆላይ ማእሰያ ናአ፤ ማእሰይ እትኤላ ናአ፤ እትኤል የሻያ ናአ። ብንያመ ዛርያፐ 928 አሳይ የሩሳላመን ደእዶሶና።
NEH 11:9 ዝክራ ናአይ እዩኤል ኤንታ ሀላቃ፤ ቃስ ሀሳኑአ ናአይ ይሁድ ካታማን ናምአንꬆ ሀላቃ።
NEH 11:10 ካህነታፐ ይዳ አሳይ ዮያርባ ናኣ ያዳያ፥ ያክና ናኣ፤
NEH 11:11 ሳራያ፤ ሳራይ ክልቅያ ናአ፤ ክልቀይ ማሱላማ ናአ፤ ማሱላም ሳዶቃ ናአ፤ ሳዶቅ ማራዮታ ናአ፤ ማራዮት ፆሳ ኬꬃ ሀላቃ ግድዳ አህፁባ ናአ።
NEH 11:12 ኤንታራ እስፈ ፆሳ ኬꬃን ኦꬅያ ኦሳንቾት ኩመꬅ 822. አዳይ ይሮሃማ ናአ፤ ይሮሃም ፓላላ ናአ፥ ፓላል አሞፀ ናአ፤ አሞፀይ ዛካርያሳ ናአ፤ ዛካርያስ ፓስኮራ ናአ፤ ፓስኮራ ማልክያ ናአ።
NEH 11:13 አዳያራ እስፈ ደእያ አሳይነ ኤንታ ሶ አሳ ሀላቃት ኩመꬅ 242. አማሳሳይ አዛርኤላ ናአ፤ አዛርኤል አህዛያ ናአ፤ አህዛይ ማሽልሞታ ናአ፤ ማሽልሞት እመራ ናአ።
NEH 11:14 አማሳያራ እስፈ ደእያ ኦላንቾት ኩምꬅ 128. ሀግዶልማ ናአይ ዛብድኤል ካህነታ አይሰይሳ።
NEH 11:15 ሌወታፐ ይዳ አሳይ ሻማያ፤ ሻማየይ ሀሹባ ናአ፤ ሀሹብ አዝርቃማ ናአ፤ አዝርቃም ሀሳባያ ናአ፤ ሀሻበይ ቡና ናአ።
NEH 11:16 ሌወት ሳባትነ ዮዛባታ ፆሳ ኬꬃፈ ካረራ ኦሰትያ ኦሱዋስ ሀላቃ።
NEH 11:17 ማታን ምካ ናአ፤ ምክ ዛብዳ ናአ፤ ዛብድ ጋላታ ዎሳ ካለꬅያ አሳፋ ናአ፤ አሳፍ እያ ናምአንꬆ ሀላቃ ግድዳ ባቅቡቃ ናአ፤ ባቅቡቅ ሳሙሳ ናአ፤ ሳሙስ ጋላላ ናአ፤ ጋላል የዱቱና ናአ።
NEH 11:18 ሌወታፐ 284 አሳይ ጌሻ ካታማን የሩሳላመን ደእዶሶና።
NEH 11:19 ፐንግያ ናገይሳታፐ፥ አቁባ፥ ታልሞናነ ኤንታራ እስፈ ኦꬅያ ኦሳንቾታ ታይቦይ 172.
NEH 11:20 አትዳ ካህነት፥ ሌወትነ እስራኤለ አሳ ኡባይ ባንታ ላታ ቢታን ይሁዳ ካታማታን ደእዶሶና።
NEH 11:21 ሽን ፆሳ ኬꬃ ኦሳንቾት የሩሳላመ ካታማን ደእያ ኦፌላ ደርያ ቦላ ደእዶሶና። ስሀነ ግሽፓ ጌተትያ ናምኡ አሳት ኤንታ ሀላቃታ።
NEH 11:22 የሩሳላመን ደእያ ሌወታ ሀላቃይ ኦዛ። ኦዝ ባና ናአ፤ ባን ሀሳባያ ናአ፤ ሀሻበይ ማታና ናአ፤ ማታን ምካ ናአ። ኦዝ ፆሳ ኬꬃ ዛማረታ ሀላቃ ግድዳ አሳፋ ናአ።
NEH 11:23 ዛማረት ጋላስ ጋላስ የፃና ማዝሙርያ ካዎይ ኤንታ ኪቴስ።
NEH 11:24 ይሁዳ ናኣ ዛራሀ ያራፐ የለትዳ ማሰዛቤላ ናኣ ፓታሀ እስራኤለ አሳስ ዶና ግድድ፥ ካዋ ማታን ደኤስ።
NEH 11:25 ይሁዳ አሳፐ ጉꬃት ጎሻ ጋደታንነ ጉታታን፥ ቅርያት-አርባንነ እያ ጉታታን፥ ድቦናንነ እያ ጉታታን፥ ያቃብፅኤላንነ እያ ጉታታን ደእዶሶና።
NEH 11:26 ቃስ እያሱን፥ ሞላዳን፥ ቤት-ጳለፃን፥
NEH 11:27 ሀፃር-ሹኣላንነ እያ ጉታታን፥ በርሳበንነ እያ ጉታታን፥
NEH 11:28 ፅቅላጋን፥ ማኮናንነ ኤንታ ጉታታን፥
NEH 11:29 ኤንርሞናን፥ ፆርአንነ ያርሙታን፥
NEH 11:30 ዛኖሀን፥ አዱላማንነ ኤንታ ጉታታን፥ ላክሶንነ እያ ሄራን ደእያ ጎሻ ጋድያን፥ አዜቃንነ እያ ጉታታን ደእዶሶና። ሄሳዳ ሀንድ ይሁዳ አሳይ በርሳበፐ ብድ ህኖማ ዛንጋራ ጋካናዉ ደእያ በሳን ደእዶሶና።
NEH 11:31 ብንያመ ኮቻት ግብአን፥ ምክማሳን፥ አያን፥ ቤተለንነ ኤንታ ጉታታን፥
NEH 11:32 አናቶታን፥ ኖባን፥ አናንያን፥
NEH 11:33 ሀፆራን፥ ራማን፥ ግታማን፥
NEH 11:34 ሀድዳን፥ ፃቦእማን፥ ናባላፃን
NEH 11:35 ሎዳን፥ ኦኖንነ ኩሸ ሂላታ ዛንጋራ ጌተትያ በሳን ደእዶሶና።
NEH 11:36 ይሁዳን ደእዳ ሌወታፐ ባጋት ብንያመ አሳራ ዳናዳ ኦሰትዶሶና።
NEH 12:1 ሳላትያላ ናኣ ዛሩባበላራነ ካህነ ሀላቃ እያሱራ ድኦፔ ስምዳ ካህነትነ ሌወት ሀይሳታ፦ ሳራያ፥ ኤርምያሳ፥ እዝራ፥
NEH 12:2 አማረ፥ ማሉካ፥ ሀፁሳ፥
NEH 12:3 ሳካና፥ ረሁማ፥ ማረሞታ፥
NEH 12:4 እዳ፥ ግነቶና፥ አብያ፥
NEH 12:5 ምያምና፥ ማአዳ፥ በልጋ፥
NEH 12:6 ሻማአ፥ ዮያርባ፥ ያዳያ፥
NEH 12:7 ሳላ፥ አሞካ፥ ህልቅያነ ያዳያ። ሀይሳቲ እያሱ ላይꬃን ካህነታስነ ያራታስ ሀላቃ ግድዳይሳታ።
NEH 12:8 ኤንታራ እስፈ ስምዳ ሌወት እያሱ፥ ብኑያ፥ ቃድምኤላ፥ ሳራባ፥ ይሁዳነ ጋላታ ማዝሙረ ዛማረይሳታ ሀላቃ ግድዳ ማታና።
NEH 12:9 ኤንታራ እስፈ ዛማርያ ባቅቡቀይነ ኡኖይ ኤንታፈ ስንꬃራ ሃ ስም ኤቅድ የፆሶና።
NEH 12:10 እያሱይ ዮያቅማ የልስ፤ ዮያቅም ኤልያሴባ የልስ፤ ኤልያሴብ ዮያዳ የልስ፤
NEH 12:11 ዮያድ ዮናታና የልስ፤ ዮናታን ያዱአ የልስ።
NEH 12:12 ዮያቅም ካህነ ሀላቃ ግድድ ደእያ ላይꬅ፥ ሀይሳፈ ካልድ ፃፈትዳይሳት ካህነታ ያራታ ሀላቃታ። ሳራያ ያራ ሀላቃይ ማራያ። ኤርምያሳ ያራ ሀላቃይ ሀናንያ።
NEH 12:13 እዝራ ያራ ሀላቃይ ማሱላማ። አማረ ያራ ሀላቃይ የሆሀናና።
NEH 12:14 ማሉካ ያራ ሀላቃይ ዮናታና። ሳባና ያራ ሀላቃይ ዮሰፋ።
NEH 12:15 ሀርማ ያራ ሀላቃይ አድና። ማራዮታ ያራ ሀላቃይ ህልቃያ።
NEH 12:16 እዶ ያራ ሀላቃይ ዛካርያሳ። ግነቶና ያራ ሀላቃይ ማሱላማ።
NEH 12:17 አብያ ያራ ሀላቃይ ዝክራ። ምንያምናነ ማአዳ ያራ ሀላቃይ ፕልፃያ።
NEH 12:18 ብልጋ ያራ ሀላቃይ ሳሙአ። ሻማያ ያራ ሀላቃይ ዮናታና።
NEH 12:19 ዮያርባ ያራ ሀላቃይ ማታናያ። ያዳያ ያራ ሀላቃይ ኦዛ።
NEH 12:20 ሳላያ ያራ ሀላቃይ ቃላያ። አሞካ ያራ ሀላቃይ ኤቤራ።
NEH 12:21 ከልቀ ያራ ሀላቃይ ሀሳባያ። ያዳያ ያራ ሀላቃይ ናትናኤላ።
NEH 12:22 ሌወታ ሀላቃት ኤልያሴብ፥ ዮያዳ፥ ዮሃንነ ያዱእ ካህነ ሀላቃ ግድዳ ዱማ ዱማ ላይꬃን ኤንቲ ፃፈትዶሶና። ሄ ማዝጋበይ ጊግዳይ ፋርሰ ቢታ ካዋ ዳርዮሳ ላይꬃና።
NEH 12:23 ግዶሽን፥ ሌወታ ያራታ ሀላቃት ማዝጋበን ፃፈትዳይ ኤልያሴባ ናኣ ናአ ግድዳ ዮሃን ሀይቃና ጋካናዉ ደእያ ዎደ ፃላላና።
NEH 12:24 ሌወታ ሀላቃት ሀሳባያ፥ ሳራባነ ቃድምኤላ ናኣ እያሱ። ኤንቲ ፆሳ አስ ግድዳ ካዎይ ዳዊቲ ኪትዳይሳዳ፥ ናምአን ሻከት ኤቅድ፥ ታራን ታራን ፆሳ ቦንቾሶናነ ጋላታ ማዝሙረ የፆሶና።
NEH 12:25 ፆሳ ኬꬃ ግምበ ድርሳ ፐንግያ ማታን ኬፀትዳ ዱማ ዱማ ሚሸ ዎꬅያ ኬꬃ ናገይሳት ማታና፥ ባቅቡቃ፥ አብድዩ፥ ማሱላማ፥ ፃልሞናነ አቁባ።
NEH 12:26 ሀይሳቲ ዮፀደቃ ናኣ ናኣ ግዳዳ እያሱ ናኣ ዮያቅመይ፥ ቢታ አይስያ ናህመይነ ካህነነ ፃፈ ግድዳ እዝር ደእዳ ላይꬃን ኦꬅዶሶና።
NEH 12:27 የሩሳላመ ግምበ ድርሳይ ግምበትድ ዉርዳ ባኣለ ቦንችያ ዎደ ሌወት ባንታ ደእያ በሳፈ ኮየትድ፥ ዳላን፥ ዲꬃን፥ ማስንቆን፥ ጋላታ ማዝሙረ የፅሸ ኡፋይሳን ባኣለ ቦንቻናዉ የሩሳላመ ይዶሶና።
NEH 12:28 ሀ ባልያ ቦንቻናዉ ዛማረት የሩሳላመ ሄራን ደእያ ናፆፋታ ጉታታፐ፥
NEH 12:29 ቤት-ገልጋላፐ፥ ግብአፐነ አዝማወታፐ ሺቅዶሶና። ኤንቲ የሩሳላመ ሄራን ባንታዉ ጉታታ ኬፅዶሶና።
NEH 12:30 ካህነትነ ሌወት ባንታና ዎጋዳ ጌሽዳፐ ጉየ አሳ፥ ፐንገታነ ግምበ ድርሳ ጌሽዶሶና።
NEH 12:31 ታኒ ይሁዳ ሀላቃታ ግምበ ድርሳ ቦላ ከሳስ። ናምኡ ግታ ማዝሙረ ኮይረታ ጋላታ ማዝሙረ የፃና መላ ኦꬃስ። እስ ኮይረይ ግምብያ ሁጰሶራ ኡሻች ስሚድ፥ ፕቶ ፐንገ ባጋ ብስ።
NEH 12:32 ሆሻያነ ይሁዳ ሀላቃታፐ ባጋት ኤንታና ካልዶሶና።
NEH 12:33 ኤንታራ ደእያ ሀራት አዛራ፥ እዝራ፥ ማሱላማ፥
NEH 12:34 ይሁዳ፥ ብንያመ፥ ሻማእያ፥ ኤርምያስነ
NEH 12:35 ሞይዘ ፑንያ ጉꬃ ካህነት ካልዶሶና። ኤንታና ካልድ ይዳይ ዛካርያሳ፤ ዛካርያስ ዮናታና ናአ፤ ዮናታን ሻማአ ናአ፤ ሻማእ ማታና ናአ፤ ማታን ምካያ ናአ፤ ምካየይ ዛኩራ ናአ፤ ዛኩር አሳፋ ናአ።
NEH 12:36 ዛካርያሳ ያራ ግድዳ ሻማኤይ፥ አዛርኤል፥ ምላላ፥ ግላላይ፥ ማአየይ፥ ናትናኤል፥ ይሁድነ ሀናን ፆሳ አስ ግድዳ ዳዊቲ ዛማርያ ዎደ ጎኤትያ ማዝሙረ ሚሽያ ኡባ ኤክድ፥ ዛካርያሳ ካልዶሶና። ኤንታ ካለይ ፃፍያ እዝራ።
NEH 12:37 ፑልቶ ፐንግያ ጋክዳፐ ጉየ ዳዊታ ካታማኮ ስሚድ፥ ግምብያ ቦላ ከይድ፥ ዳዊታ ኬꬃፈ ፑደ ባጋራ አꬍድ፥ ዶሎሀ ባጋራ ደእያ ሃꬃ ፐንግያኮ ብዶሶና።
NEH 12:38 ናምአንꬆ ኮይረይ ግምብያ ሁጵያ ኦይክድ ሀድርስ ስሚድ ብስ። ታኒ አሳፐ ባጋራ ግዳዳ ኤንታፈ ጉየራ ካላስ። እቶነ አዱሳ ግምብያ አꬍድ፥ ዳልጋ ግምብያ በሳ ጋክዳ።
NEH 12:39 ያፐ ስሚድ፥ ኤፍሬማ ፐንግያ፥ የሻና ፐንግያ፥ ሞሎ ፐንግያ፥ ሀናንኤላ አዱሳ ግምብያነ ፄታታ አዱሳ ግምብያ ጋካናዉ ብዳ። ዉርሰꬃን ዶርሳ ፐንግያ ማታራ አꬍድ ናገይሳታ ፐንግያ ጋክድ ኤቅዳ።
NEH 12:40 ጋላታ ማዝሙረ የፅያ ናምኡ ኮይረት ፆሳ ኬꬃን ባንታ በሰ በሰ ኦይክዶሶና። ቃስ ታካ ታራ ደእያ ሀላቃታራ ያ ጋካስ።
NEH 12:41 ሄሳዳካ፥ ካህነት ኤልያቄም፥ ማእሰይ፥ ምንያምን፥ ምካየይ፥ ኤልዮአን፥ ዛካርያስነ ሀናን ባንታ ሞይዝያ ኦይክድ፥
NEH 12:42 ማእሰይ፥ ሻማየይ፥ አላዛር፥ ኡዝ፥ የሆሀናን፥ ማልክየይ፥ ኤላምነ ኤፀር ባንታ በሳ በሳ ኦይክዶሶና። ይዝራ ኤንታ ካለꬅን ባንታ ቃላ ꬎቁ ኦꬅድ ማዝሙረ የፅዶሶና።
NEH 12:43 ሄ ጋላስ ዳሮ ያርሾ ያርሽዶሶና። ፆሳይ ኤንታዉ ግታ ኡፋይስ እምዳ ግሾ ዳሮ ኡፋይትዶሶና። ማጫሳይ ናይት ኡባይ ኡፋይትዶሶና። የሩሳላመን አሳይ ኡፋይትያ ኡፋይሳ ኮሽንቻይ ሃሆን ስኤቴስ።
NEH 12:44 ሄ ጋላስ አሳይ እምያ እሞታታ፥ አስራታነ ላይꬃን ካፅያ ካꬃ አይፍያፐ ኮይሩዋ ሺሽድ ዎꬅያ ኬꬃ ናግያ ሀላቃታ ዶርዶሶና። ሀ ዶረትዳ አሳት ዱማ ዱማ ካታማታን ደእያ ጎሻታፐ ህገይ ኪተይሳዳ ካህነታስነ ሌወታስ በሲያ ካꬃ ሺሾሶና። አይስ ጊኮ፥ ይሁዳ አሳይ ካህነትነ ሌወት ኦꬅያ ኦሱዋን ዳሮ ኡፋይትዶሶና።
NEH 12:45 ኤንቲ ፆሳይ ኪትዳይሳ ኦꬅዶሶና፤ ጌሾ ዎጋ ፖልዶሶና። ኤንታ ፃላላ ግዶናሽን ዛማረትነ ናገይሳት ዳዊቲነ እያ ናኣ ሶሎሞነይ ኪትዳ ኦሱዋ ፖልዶሶና።
NEH 12:46 በን ዳዊታ ዎደነ አሳፋ ዎደ ዛማረትነ ፆሳስ ሺቅያ ጋላታ ማዝሙረታ ካለꬅያ ሀላቃት ደኦሶና።
NEH 12:47 ዛሩባበላ ላይꬃንነ ናህመ ላይꬃን እስራኤለ አሳ ኡባይ ዛማረታስነ ናገይሳታስ በሲያ ካꬃ ጋላስ ጋላስ እሞሶና። ሌወታስካ በሲያ ካꬃ እሞሶና። ሌወት ቃስ አሮና ያራ ግድዳ ካህነታስ በሲያ ካꬃ እሞሶና።
NEH 13:1 ሄ ጋላስ አሳ ኡባይ ስእሽን፥ ሙሰ ማፃፋይ ናባበትስ፤ ሄ ዎደ ኤንቲ፥ “ሞአበ አሳይነ አሞነ አሳይ ፆሳ አሳራ መርናዉ ጋሄታናዉ በሰና” ግያ በሳ ማፃፋን ደምዶሶና።
NEH 13:2 አይስ ጊኮ፥ እስራኤለ አሳይ ግብፀፈ ከይድ፥ ካናነ ብያ ዎደ ሞአበነ አሞነ ቢታ አሳይ ኤንታዉ ካꬅነ ሃ እምድ ሞካናይሳ አግድ፥ እስራኤለ አሳ ባዳና መላ ባላማስ ሚሸ እምድ ሻምዶሶና። ግዶሽን፥ ኑ ፆሳይ ባደꬃ አንጆን ላምስ።
NEH 13:3 ሄ ህግያ እስራኤለ አሳይ ስእዳ ዎደ አላጋ አሳ ባንታ ግዶፈ ሻክዶሶና።
NEH 13:4 ሄሳፈ ካሰ ፆሳ ኬꬃ ሚሸታ ዎꬅያ ኬꬃስ ሀላቃ ግድዳ ካህነይ፥ ኤልያሴብ ፆባራ ዳቦተꬅ መꬍስ።
NEH 13:5 ሄሳፈ ጋሶን ኤልያሴብ፥ ካꬃ እሞታታ፥ እፃነ፥ ፆሳ ኬꬃ ጌሻ ሚሸታ፥ ካꬃ ዎይንያነ ዛይትያ፥ ሌወታስ፥ ዛማረታስነ ናገይሳታስ እምያ አስራታነ ካህነታስ እምያ ካꬃ ዎꬅያ ዎጋ ክፍልያን ፆበይ ዳና መላ እሚስ።
NEH 13:6 ሀ ኡባይ ሀንያ ዎደ ታ የሩሳላመን ደእከ። አርፀክስሰይ ባብሎነ ቢታን ካዎትዳ ሀስታማነ ናምአንꬆ ላይꬃን ታኒ ስማዳ ባብሎነ ቢታ ካዋኮ ባስ። ግዶሽን፥ ጉꬃ ዎደፐ ጉየ ካዋ ኦይቻዳ፥
NEH 13:7 የሩሳላመ ስማዳ ያስ። ፆሳ ኬꬃ ዛባን ኤልያሴብ ፆቢያስ ዳና ክፍለ ጊግስድ ዎꬅዳ ኢታባ ስአስ።
NEH 13:8 ዳሮ ይሎታዳ፥ ፆቢያ ሶ ሚሸ ኡባ ክፍልያፐ ከሳዳ ካረ ሆላስ።
NEH 13:9 ክፍልያ ዎጋዳ ጌሻና መላ ኪታስ። ፆሳ ኬꬃ ሚሸታ፥ ካꬃ፥ እሞታታነ እፃንያ ዛራዳ ኬꬃ ገልሳስ።
NEH 13:10 ቃስ አሳይ ሌወታስ በሲያ ካꬃ እምቦና ግሾ ሌወትነ ዛማረት ባንታ ፆሳ ኬꬃ ኦሱዋ አግድ ጎሻስ ጉየ ብዳይሳ በአስ።
NEH 13:11 ሄሳ ግሾ፥ ታኒ ሀላቃታኮ፥ “ፆሳ ኬꬃ ኦሱዋ አይስ የግ አግደቲ?” ያጋዳ ሀንቀታስ። ሄሳፈ ጉየ፥ ሌወታ ፄጋዳ ኡባ ኤንታ ኦሱዋን ኦሱዋን ዛራስ።
NEH 13:12 ያትን ይሁዳ አሳይ ካꬃፈ፥ ዎይንያፐ፥ ዛይትያፐ እምያ አስራታ ዎꬅያ ኬꬃ ዛሪድ ኤሆ ዶምስ።
NEH 13:13 ታኒ ካህንያ ሳላማ፥ ፃፍያ ሳዶቃነ ሌውያ ፓዳያ ሚሸ ዎꬅያ ኬꬃስ ሀላቃ ኦꬃዳ ሹማስ። ቃስ ማታና ናኣ ናኣ ዛኩራ ናአይ ሀናን ኤንታ ማደይሳ። ሀይሳቲ ኡባይ ኮሽያባ ኡባ ባንታ እሻታስ ሻክ ሻክ እሞን አማነትዳይሳታ ግድዶሶና።
NEH 13:14 “ታ ፆሳዉ ታና ቆፓ፤ ቃስ ነ ኬꬃ ኦሶይ ጊጋና መላ ታኒ ኦꬅዳ ሎኦ ኦሱዋ ዶጎፓ” ያጋስ።
NEH 13:15 ሄ ዎደ ታኒ ይሁዳን ደእያ አሳይ ሳምባታ ጋላስ ዎይነ ጉምእሽን በአስ፤ ሀራት ካꬅ፥ ዎይነ ኡሻ፥ ዎይነ አይፍያ፥ ባላሰ አይፍያነ ሀራባታ ባንታ ሀረን ጫንድ፥ ሳምባታ ጋላስ የሩሳላመ ኤህሽን በአስ። ሄሳ ግሾ፥ ኤንቲ ሳምባታ ጋላሳ ዛልኦናዳ ታኒ ኤንታዉ ምንꬃዳ ኦዳስ።
NEH 13:16 ሄሳ ቦላ ቃስ የሩሳላመን ደእያ ፅሮሳ አሳይ ሞሎነ ሀራ እስ እስ ዛልኤ ሚሸታ ኤህድ ሳምባታ ጋላስ ይሁዳ አሳስነ የሩሳላመን ባይዞሶና።
NEH 13:17 ታኒ ይሁዳ ሀላቃታ፥ “ሀይሳ መላ ኢታ ኦሶ ኦꬅድ ሳምባታ አይስ ቱንሴቲ?
NEH 13:18 ፆሳይ ኑ ቦላነ ኑ ካታማ ቦላ ሀይሳ መላ መቶ ኤህዳይ፥ ካሰ ህንተ አዋት ሄሳ መላ ኢታባ ኦꬅዳ ግሾ ግደኔ? ሀእ ህንተ ሳምባታ ቱንስድ፥ እስራኤለ አሳ ቦላ ሀራ ሀንቆ ኤሀናዉ ሀኔታ” ያጋዳ ሀንቀታስ።
NEH 13:19 ሄሳፈ ጉየ፥ ሳምባት ገላናፐ ስን የሩሳላመ ግምብያ ፐንገት ጎርደታናዳነ ሳምባት አꬎናሽን ዶየቶና መላ ኪታስ። ቃስ ሳምባታ ጋላሳን አይባ ቶሆይካ ገሎናዳ ናጋና መላ ታ ኦሳንቾታፐ እሶታ እሶታ ግምበ ፐንግያ ቦላ ኤሳስ።
NEH 13:20 ሄሳ ግሾ፥ ዱማ ዱማ ዛልኤ ሚሸታ ኤህያ ዛልአንቾት እስ ቶሆ ዎይኮ ናምኡ ቶሆ የሩሳላመ ግምብያፈ ካረ ባጋራ አቅዶሶና።
NEH 13:21 ሽን ታኒ ኤንታኮ፥ “ግምብያፈ ካረራ ዋናናዉ አቄቲ? ህንተ ናምአንꬆ ሀይሳዳ ኦꬅኮ ታኒ ዎልቃን ህንተና ተቃና” ያጋዳ ሀንቀታስ። ሄ ጋላሳፐ ስምን ናምአንꬆ ሳምባታ ጋላስ ይቦኮና።
NEH 13:22 ታኒ ሌወት ባንታ ሁጵያ ጌሻና መላ፥ ፐንገታ ናጋና መላነ ሳምባታ ጋላሳ ጌሽ ኦꬃና መላ ኪታስ። “ታ ፆሳዉ፥ ሀ ኡባ ግሾ ታና ቆፓ፤ ነ መርና ሲቁዋ ግሾ ታዉ ቃታ” ያጋዳ ዎሳስ።
NEH 13:23 ሄ ዎደ ታኒ ይሁዳ አደ አሳፐ እሶት እሶት አሽዶዳ፥ አሞነነ ሞአበ ቢታፈ ማቾ ኤክዳይሳ በአስ።
NEH 13:24 ኤንታ ናይታፐ ባጋይ አሽዶዳ ቢታ ዎይኮ ሀራ ቢታ ዶና ሃሳዮሶና፤ ባንታ ቢታ፥ ይሁዳ ዶና ኦደታናዉ ዳንዳኦኮና።
NEH 13:25 ታኒ ኤንታራ ኦየታስ፤ ኤንታ ባዳስ፤ ኤንታፈ እሶታ እሶታ ደቻዳ፥ ኤንታ ሁጵያ ብናና ሾዳስ። ሄሳ ፃላላ ግዶናሽን፥ ኤንቲ ባንታ ማጫ ናይታ ኤንታ አደ ናይታስ እሞናዳ፥ ኤንታ ማጫ ናይታ ባንታዉነ ባንታ አደ ናይታስ ኤኮናዳ ፆሳ ሱንꬃን ጫቅሳስ።
NEH 13:26 ቃስ ኤንታኮ፥ “ካዎይ ሶሎሞነይ ናጋራ ኦꬅዳይ አላጋ ቢታ ማጫሳታ ኤኮይሳና ግደኔ? ሶሎሞነ መላ ካዎይ ሀራ ቢታ ካዎታ ግዶን ባዋ፤ ፆሳይ እያ ዶስዳ ግሾ፥ እስራኤለ አሳ ኡባ ቦላ ካዎይስ። ሽን፥ ሀራ አቶሽን እያካ አላጋ ቢታ ማጫሳት ሀይሳ መላ ናጋራ ኦስስዶሶና።
NEH 13:27 ያትን፥ ኑካ ህንተና ስእድ፥ አላጋ ማጫሳ ኤክድ ሄሳ መላ ኢታባ ኦꬅድ ፆሳ ናቃነዬ?” ያጋስ።
NEH 13:28 ካህነ ሀላቃ ኤልያሴባ ናይታፐ እሶይ ዮያዳ። ሽን እያ ናይታፐ እሶይ ቤት-ሆሮና ካታማ አስ ግድዳ ሳንባላፃ ናእዉ ማቾ ኤክስ። ያትን፥ ታኒ ዮያዳ የሩሳላመ ካታማፐ ጎዳስ።
NEH 13:29 “ታ ፆሳዉ፥ ሀይሳቲ ካህነተꬃ ዎጋነ ካህነታራነ ሌወታራ ጫቅዳ ጫቁዋ ዋት ቱንስዳኮ በአ” ያጋዳ ዎሳስ።
NEH 13:30 ኤንታ አላጋ ቢታ ቱናተꬃፈ ጌሽዳፐ ጉየ ካህነታስነ ሌወታስ ኤንታ ኦሱዋ ኦሱዋ እማስ።
NEH 13:31 ያርሾስ ኤꬅያ ምꬃይ ዎደን ዎደን ያና መላነ አሳይ ባዉ አይፍዳባፐ ኮይሮ አይፍያ እሞታ ኦꬅድ ኤሀና መላ ዎጋ ዎꬃስ። “ታ ፆሳዉ፥ ነ ኬሀተꬃን ታና ቆፓ” ያጋዳ ዎሳስ።
EST 1:1 ካዎይ አርፀክስስ ህንደ ቢታፈ ቶጰ ቢታ ጋካናዉ ደእያ፥ ፄታነ ላታማነ ላፑን ቢታ አይስያ ዎደ ሀንዳባ።
EST 1:2 ካዎይ ባ አራታን ኡትድ አይስያ ዋና ካታማይ ሱሳ ጌተቴስ።
EST 1:3 እ ካዎትዳ ሄꬓንꬆ ላይꬃን፥ ባፐ ጋርሳራ ዳይናታስነ ቢታ አይሰይሳታስ ግታ ግብራ ጊግስስ። ሄ ግብራ በሳን ሜዶናነ ፋርሰ ቶራ ሞጮናት፥ ቢታ ሃረይሳትነ አይሰይሳት በንትዶሶና።
EST 1:4 ካዎይ እስ ፄታነ ሆስፑን ታሙ ጋላስ ኩመꬅ ባ ካዎተꬃ ዱረተꬃነ ባ ያሽያ ቦንቹዋ ኡባ ኤንታ በስስ።
EST 1:5 ሄ ጋላሳታፐ ጉየ፥ ካዎይ ቃስ ሀራ ላፑን ጋላስ ጋምእያ ግብራ፥ ሱሳ ካታማን፥ ዱረፐ ማንቆ ጋካናዉ ደእያ አሳ ኡባስ ጊግስስ። ሄ ግብራይ ካዎ ጋꬎይ ደእያ አታክልተ በሳን ጊግስ።
EST 1:6 ሄ በሳን ደእያ ዳባባይ፥ ሊኖፐ ኦሰትዳ ቦꬅነ ካሎሰ ገሸታን አሌቅስ። ገሸት ኦቻ ቴራ ዳንያ አልኦ ሊኖ ክረን አꬅን፥ እብነባራደ ጌተትያ ሹቻፈ ኦሰትዳ ቱቅያ ቦላ ደእያ ብራ ምግዶታን ካቀትድ ኡትዶሶና። ቃስ ዎርቃፈነ ብራፐ ኦሰትዳ አርሳት፥ ዱማ ዱማ ማል ደእያ አልኦ ሹቻታፐ ኦሰትዳ ባሱዋን ማራን የገትዶሶና።
EST 1:7 እሶይ እሱዋፈ ዱማ ግድዳ ዎርቃ ቡርጩኮን ዎይነ ኡሽ አሳ ኡባስ እመትስ። ካዎይ ዳሮ ኬሀ ግድዳ ግሾ፥ ዎይነ ኡሻስ ዛው ባዋ።
EST 1:8 እስ እስ አስ ባ ኮይዳ መላ ኡዬስ፤ ሄሳ ካዎይ ኮይሮትድ ባ አይለታስ ኦድስ።
EST 1:9 ሄ ዎደ ካውያ አስፂና ማጫሳ ኡባስ ግብራ ካዎ ጋꬎን ጊግሳሱ።
EST 1:10 ግብራይ ዶመትዳ ላፑንꬃ ጋላስ፥ ካዎይ አርፀክስስ ዎይነ ኡሻ አልድ ኡፋይትዳ ዎደ፥ ባ አይለታ መሁማና፥ ብዝታ፥ ሀርቦና፥ ብግታ፥ አባግታ፥ ዛታራነ ካርካሳ ጌተትያ ላፑን ሹፋታ ፄግድ፥
EST 1:11 “ካውዉ አስፂኖ ካዎተꬃ ካላቻ ዎꬅድ ሃ ኤክድ ዪተ” ያግድ ኪትስ። እያ ዳሮ ማላ ሎኦ ግድያ ግሾ፥ ሀላቃትነ አሳ ኡባይ እዮ በአና መላ ካዎይ ኮይስ።
EST 1:12 ሽን ካዋ ኪታ እዉ ኦድን፥ ካውያ አስፂና ካዋ ስን ዮና እፃሱ። ሄስ ካዋ ዳሮ ሀንቀꬅስ።
EST 1:13 ሄ ቢታ ህግያነ ደኦ ዎጋ ኤርያ አሳ ዞረ ኦይሾይ ካዋ ማታን ሜዘትዳባ ግድያ ግሾ፥ ዎድያባ ሻክድ ኤርያ ጭንጫ አሳታራ ኦደትስ።
EST 1:14 ካዎይ ግታ ማት ደእያ ላፑን ፋርሰነ ሜዶና ሹማታ፥ አርቀስዮሳ፥ ሸታራ፥ አድማታ፥ ታርሸሻ፥ ማሬሳ፥ ማርሳናነ መሙካና ፄግስስ።
EST 1:15 ካዎይ ኤንታ፥ “ታኒ፥ ካዎይ አርፀክስስ፥ ታ ሹፋታ ኪትን፥ ካውያ አስፂና ታ ኪታ ፖሎና እፃሱ። ሄሳ ግሾ፥ ህገይ ኦድያ ማራን እዮ ዋታናዉ በሲ?” ያግድ ኦይችስ።
EST 1:16 ኤንታፈ እሶይ፥ መሙካን ካዋ ስንꬃንነ ሀላቃታ ስንꬃን ሀይሳዳ ያግስ፤ “ካውያ አስፂና ካዋ ፃላላ ግዶናሽን፥ እያ ሀላቃታ ኡባነ እያ ካዎተꬃ ግዶን ደእያ አሳ ኡባ ናቃሱ።
EST 1:17 ሀ ካዎተꬃ ግዶን ደእያ ማጫስ ኡባይ ካውያ አስፂና ኦꬅዳይሳ ስእድ፥ ባንታ አዝናታ ካꬎ ዶማና። ኤንቲ፥ ‘ካዎይ አርፀክስስ ባኮ ያና መላ ፄግስን፥ ካውያ አስፂና እፃበከዬ?’ ያጋና።
EST 1:18 ሄሳ ፃላላ ግዶናሽን፥ ፋርሰነ ሜዶና ሀላቃታ ማጫሳይ ሄሳ ስእዳ ዎደ፥ ሀች አው ዉላና ጋካናዉ ባንታ አዝናታ ሄሳዳ ግድ ካꬋና። ሄሳ ጋሶን ማቸታ ግዶንነ አዝናታ ግዶን ኦሽ ከያና።
EST 1:19 ሄሳ ግሾ ካዋዉ፥ ኔኒ ዶስኮ፥ ካውያ አስፂና ናምአንꬆ ነ ስን አꬎና መላ ተቅያ አዋጆ ከሳ። ሄ አዋጆይ ናምአንꬆ ላመቶና መላ ፋርሰነ ሜዶና ህግያ ግዶን ፃፈቶ። ሄሳፈ ጉየ፥ ካዎተꬃ ቦንቹዋ ኢፐ ኤካዳ ሀራ ሎኦ ማጫሳስ እማ።
EST 1:20 ሀ ኔኒ አꬅዳ አዋጆይ ሀ ግታ ካዎተꬃ ኡባን ኦደትያ ዎደ እስ እስ ማጫስ ዱረ ግድን ማንቆ ግድን፥ ሻኮና ባ አዝና ቦንቻና” ያግስ።
EST 1:21 ካዎይነ እያ ሀላቃት ሀ ዞርያን ኡፋይትዶሶና። ሄሳ ግሾ፥ መሙካን ግዳይሳዳ ካዎይ ኦꬅስ።
EST 1:22 እ ባ ካዎተꬃ ግዶን ደእያ ዱማ ዱማ ቢታታስ ኤንታ ፕዳለንነ ኤንታ ዶናን ፃፍድ፥ ዳብዳበ የድስ። ሄ አዋጆይ፥ እስ እስ አዝን ባ ኬꬃ ኬꬃ አይስያ ሀላቃ ግደይሳ ኦዴስ።
EST 2:1 ሄሳፈ ጉየ፥ ካዋ አርፀክስሳ ሀንቆይ ዶችን፥ ካውያ አስፂና ኦꬅዳባነ እ ቦላ ከይዳ አዋጁዋባ ቆፕስ።
EST 2:2 ሄ ዎደ ካዋ ማታን ሀጋዝያ ናአተꬃታ አደት ሀይሳዳ ያግዶሶና፤ “ማላ ሎኦ ጌላኦታ ኮይድ፥ ካዋስ ኤሀና መላ፥
EST 2:3 ነ ካዎተꬃ ግዶን ደእያ ቢታ ኡባን ሀላቃታ ሹማ። ኤንቲ ማላ ሎኦ ጌላኦ ዶርድ፥ ሱሳ ካታማ ኤህድ፥ ማጫሳስ ጊግዳ ኬꬃን ዎꬆ። ያን ሄ ማጫሳ ኬꬃስ ካፖ ግድዳ ካዎ ሹፋ ሄጋያ ኩሸን ኤንቲ ደእሽን፥ ኤንታ ማላ ሎይꬅያባ ኡባይ ኤንታዉ እመቶ።
EST 2:4 ሄሳፈ ጉየ፥ ኡባፈ አꬋዳ ካዋ ኡፋይስያ ጌላእያ አስፂን በሳን ካዎ ማቾ ግዶ” ያግዶሶና። ሀ ዞረይ ካዋ ኡፋይስዳ ግሾ፥ ካዎይ ሄሳዳ ኦꬅስ።
EST 2:5 ያን ሱሳ ካታማን እስ ማርድክዮሳ ጌተትያ አይሁደ አስ ደኤስ። እ ያእራ ናአ፤ ያእር ሳመአ ናአ፤ ሳመእ ብንያመ ኮቸ ግድዳ ቂሳ ናአ።
EST 2:6 ባብሎነ ካዎይ ናቡካዳናፆር ይሁዳ ካዋ ዮአክናነ ሀራ አይሁደ አሳ ኦላን ድእድ ኤፍዳ ዎደ ማርድክዮስ ኤንታራ ብስ።
EST 2:7 እ ባ አዋ እሻ ናእዉ፥ እብራወꬆ ዶናን ሀዳሶ ጌተትያ አስትሮ ባራ ዎꬅድ ድቼስ። አስትራ መꬎንነ ጌሳን ዳሮ ማላ ሎኦ። እ አዋይነ አይያ ሀይቅዳፐ ጉየ፥ ማርድክዮስ እዮ ኤፍድ፥ ባ ናአ ኦꬅድ ድችስ።
EST 2:8 ካዎይ ከስዳ አዋጁዋነ ኪታ ማራን፥ ሱሳ ካታማ ይዳ ዶረትዳ ዳሮ ጌላኦታፐ እስንያ አስትሮ። እያ ያዳ፥ ማጫሳስ ጊግዳ ኬꬃ ካፖ ግድዳ ሄጋ አዋተꬃ ጋርሳን ደአሱ።
EST 2:9 ሄግ አስትሮ በእዳ ዎደ እን ዳሮ ኡፋይትስ፤ እዮ ዱማ ፄልስ። ኤለስድ ማናዉ ዱማ ካꬅነ ቦላ ትየትያባ እዉ እሚስ። ቃስ እዮ ማታን ሀጋዛና መላ ካዎ ጋꬎፐ ዶረትዳ ላፑን ናአተꬅ፥ ማጫሳታ ጊግዳ ኬꬃን፥ ክፍለ ኡባፈ አꬍድ ሎእያ ክፍለን እዮነ ኤንታና ዎꬅስ።
EST 2:10 ማርድክዮስ እዉ ኮይሮትድ ኦድዳይሳዳ፥ አስትራ አይሁደ አስ ግደይሳ ኦደስካ ኦዳቡኩ።
EST 2:11 ቃስ ማርድክዮስ አስትራ ዋና ደእያኮነ እዉ ሀንያባ በአናዉ፥ ማጫሳ ኬꬃ ስንꬃራ ጋላስ ጋላስ ገደነ ሃ ሄመቴስ።
EST 2:12 ጌላኦት ካዋኮ ገላናፐ ኮይሮትድ፥ እስ ላይꬅ ኩመꬅ ባንታ ማላ ሎይꬅሸ ጋምኦሶና። ሄስካ፥ ኮይሮ ኡሱፑን አጌና ካርበ ዛይተን ጎርፐትሸ ጋምእድ፥ ናምአንꬆ ኡሱፑን አጌና ቃስ፥ ሎኦ ሳውያ ሽቶን ጎርፐቶሶና።
EST 2:13 ሄሳፈ ጉየ፥ እስ ጌላእያ ካዋኮ ገልያ ዎደይ ጋክያ ዎደ፥ ባ ኮይዳ ማኡዋ ማአ ሎአዳ፥ ማጫሳ ኬꬃፈ ከያዳ፥ ካዎይ ደእያ በሳ ገላዉሱ።
EST 2:14 ቃማ ገላዳ፥ ካዉዋራ አቅዳፐ ጉየ፥ ዎንታ ጉራ ከይኮ፥ ማጫሳት ደእያ ሀራ ኬꬅ እዮ ኤፎሶና። ሄ ኬꬃስ ካፖ ግድዳ ካዎ ሹፋይ ሻሻጋዝ እዮ ናጌስ። ካዎይ ዶስድ እ ሱንꬃ ፄግድ፥ “ኤበልቶ ኤህተ” ጎና እፅኮ፥ እያ ናምአንꬆ ካዋኮ ገላናዉ ዳንዳኡኩ።
EST 2:15 ሄስ ሀንሽን፥ ካዋኮ ገልያ ታር አስትሮ ጋክስ። አስትራ ማርድክዮሳ አዋ እሻ አብካላ ናእዉ፤ ማርድክዮስ ባ ናአ ኦꬅድ ድችዳሮ። እያ ማጫሳስ ጊግዳ ኬꬃስ ካፖ ግድዳ ካዎ ሹፋ ሄጋይ ዞርዳይሳዳ ማኦ ማአሱ። እዮ በእዳ ኡባይ እ ማላ ናሽስ።
EST 2:16 አርፀክስስ ካዎትዳ ላፑንꬃ ላይꬃን፥ ተቤታ ጌተትያ ታማንꬆ አጌናን አስትራ ካዎይ ደእያ በሳ ገላሱ።
EST 2:17 እያ ገልዳ ዎደ፥ ካዎይ ሀራ ማጫሳ ኡባፈ አꬅድ፥ እዮ ዶስስ፤ ቃስ ሀራ ጌላኦታ ኡባፈ እን ኡፋይትስ። ሄሳ ግሾ፥ ካዎተꬃ ካላቻ እ ሁጰን ዎꬅድ፥ እዮ አስፂን በሳን ካዎ ማቾ ኦꬅስ።
EST 2:18 ሄሳፈ ጉየ፥ ካዎይ አስትር ቦንቹዋስ ግታ ግብራ ጊግስድ፥ ሀላቃታነ ቢታ አይሰይሳታ ፄግስ። ቃስ ባ ካዎተꬃ ግዶን ኡፋይሳ ባለይ ቦንቸታና መላ አዋጅስ። ቢታ ኡባስ እስ ላይꬃ ጊራ ማርስ። እሞታካ ባ ኬሀተꬃ መላ ሁጰን ሁጰን እሚስ።
EST 2:19 ጌላኦት ናምአንꬆ ሺቅድ ደእሽን፥ ማርድክዮስ ካዋ ዳባባን ኡትያ አሳፐ እሱዋ ግድስ።
EST 2:20 ማርድክዮስ፥ “ኔኒ አይሁደ ግደይሳ ኦደስካ ኦዶፓ” ግዳ ግሾ፥ አስትራ ሀእ ጋካናዉ ኦደስካ ኦዳቡኩ። ካሰ ናአተꬃን ኪተተይሳዳ፥ ሀእካ እያዉ ኪተታዉሱ።
EST 2:21 ማርድክዮስ ካዎ ኬꬃን ኦꬅሸ ደእያ ዎደ፥ ካዎይ ደእያ ክፍለታ ገልያ ፐንግያ ናግያ ካዎ ሹፋታፐ ናምአት፥ ጋባትነ ታር ካዋ አርፀክስሳ እፅድ፥ ዎꬋናዉ ማቀትዶሶና።
EST 2:22 ኤንታ ማቁዋ ማርድክዮስ ስእድ፥ ካወ አስትርስ ኦድን፥ እያካ ማርድክዮሳ ሱንꬃን ካዋስ ኦዳሱ።
EST 2:23 ካዎይ ሀንዳባ ፕልግድ ፄልያ ዎደ፥ ኦዳይ ቱማ ግድድ በንትን፥ ሄ ናምኡ አሳታ ካቅድ ዎꬍስ። ሀ ሀኖታይ ካዋ አርፀክስሳ ታርከ ፃፍያ ማፃፋን ፃፈትስ።
EST 3:1 ሄሳፈ ጉየ፥ ካዎይ አርፀክስስ ሃማ ጌተትያ ባራ ኦይሳ ሹማተꬃ ꬎቅስድ፥ ባ ሀላቃታ ሀላቃ ኦꬅድ ሹምስ። ሃማ አዋይ ሀማዳት አጋጋ ኮቸ።
EST 3:2 ካዎይ ኪትድ ዎꬅዳ ግሾ፥ ካዎ ጋꬎ ፐንገን ኦꬅያ ሀላቃት ኡባይ ሃም አꬍያ ዎደ ጉልባትድ እያ ቦንቾሶና። ግዶሽን፥ ማርድክዮስ ሃማስ ጉልባቶናነ እያ ቦንቾና እፅስ።
EST 3:3 ሄ ዎደ ካዎ ጋꬎ ፐንገን ኦꬅያ ሀላቃት ማርድክዮሳ፥ “አይስ ካዋ ኪታ ፖሎና እፃይ?” ያግድ፥
EST 3:4 ጋላስ ጋላስ እያዉ ኦዶሶና። ሽን እ ኤንቲ ኦደይሳ ስአናዉ ኮይቤና። ኡባ ቃስ፥ “ታኒ አይሁደ አስ ግድያ ግሾ፥ ሃማስ ጉልባታናዉነ እያ ቦንቻናዉ ዳንዳእከ” ያግስ። ሄሳፈ ጉየ፥ “ማርድክዮስ ኦድያ ጋሱዋ ስእድ፥ ሃም ዋናንዴሻ!” ያግድ እያዉ ኦድዶሶና።
EST 3:5 ማርድክዮስ ባዉ ጉልባቶናይሳነ ባና ቦንቾናይሳ ሃም ኤርዳ ዎደ ሀንቆ ኤፅስ።
EST 3:6 ሄሳ ቦላ ቃስ፥ ማርድክዮስ አይሁደ አስ ግደይሳ ኤርድ፥ እያ ፃላላ ዎꬎይ ላፋባ ግድ ቆፕዳ ግሾ፥ አርፀክስሳ ካዎተꬃን ደእያ አይሁደ ኮቻ ኡባ ꬋይሳናዉ ቆፕስ።
EST 3:7 አርፀክስስ ካዎትዳ ታማነ ናምአንꬆ ላይꬃን፥ ንሳነ ጌተትያ ኮይሮ አጌናን፥ አይሁደታ ዎꬍያ አጌናነ ጋላሳ ኤራናዉ፥ ፑርማ ጌተትያ ሳማ እያ ስንꬃን የጋና መላ ሃም ኪትስ። ሄ ሳማይ ዎꬍዳ ማራን፥ አዳረ ጌተትያ ታማነ ናምአንꬆ አጌናን፥ ታማነ ሄꬓንꬆ ጋላስ አይሁደት ዉርያ ጋላስ ግደይስ ቃሸትስ።
EST 3:8 ሄሳፈ ጉየ፥ ሃም ካዋ አርፀክስሳኮ ሀይሳዳ ያግስ፤ “ነ ካዎተꬃ ግዶን ኡባ በሳን ላለትድ ደእያ እስ ኮቻይ ደኤስ። ኤንታ ደኦ ማራይ ሀራ አሳይሳፈ ዱማ፤ ሄሳ ፃላላ ግዶናሽን፥ ኤንቲ ካዎ ህግያስ ሃረቶኮና። ሄሳ ግሾ፥ ኔኒ ኤንታ ደኦ ጋዳ ስእ ጊኮ፥ ሄስ ሎኦ ግደና።
EST 3:9 ሄሳ ግሾ ካዋዉ፥ ሀ ቆፋይ ነና ኡፋይስኮ፥ ሀ አሳታ ዎꬍድ ꬋይሳና መላ አዋጆ ከሳ። ሄሳ ነ ኦꬅኮ፥ ታኒ ሄꬑ ፄታነ ኦይታሙ ሙኩሉ ክሎ ግራመ ብራ ካዎ ቡቁራ ምንጅያ ኬꬃ ገልሳናዳ፥ ነ ካዎተꬃ አይሰይሳታስ እማና” ያግስ።
EST 3:10 ካዎይ ባ ማታ ኤርሳናዉ አዋጁዋ ቦላ ዎꬅያ ምግዶ ማታመ ባ ብራꬍያፈ ከስድ፥ አይሁደታ ሞርከ ግድዳ፥ አጋጋ ኮቻስ፥ ሀማዳታ ናኣ ሃማስ እሚስ።
EST 3:11 ካዎይ ሃማ፥ “ኔኒ እማና ግዳ ብራይ ነ ማታን ደኦ፤ ሽን ሀ አሳታ ቦላ ነ ዶስዳባ ኦꬃ” ያግስ።
EST 3:12 ሄሳ ግሾ፥ ኮይሮ አጌናን፥ ታማነ ሄꬓንꬆ ጋላሳን፥ ሃም ካዋ ፃፈታ ኡባ ፄግድ፥ ሄ አዋጆይ ቢታ ኡባን ደእያ አሳስ ዱማ ዱማ ዶናንነ ዱማ ዱማ ፕዳለን ፃፈትድ፥ ካዎፐ ጋርሳራ ቢታ ሃረይሳታስ፥ አዉራጃ ሃረይሳታስነ ደረ ሀላቃታ ኡባስ ኪተታናዳ ኪትስ። አዋጆይ ካዋ አርፀክስሳ ሱንꬃን ፃፈትድ፥ ምግዶ ማታመይ እያ ቦላ ዎሰትን፥
EST 3:13 ኪተትዳይሳት እያ ካዎተꬃ ኡባ ጋꬃናዳ ኪተትዶሶና። ሄ አዋጆይ፥ “አዳረ ጌተትያ ታማነ ናምአንꬆ አጌናን ታማነ ሄꬓንꬆ ጋላሳን፥ አይሁደ ኡባ፥ ያላጋ፥ ጭማ፥ ማጫ፥ አድያነ፥ ናይታ አሾና እስ ጋላስ ዉርስድ ዎꬍድ፤ ኤንታ ሻሉዋካ ቦንቅተ” ያጌስ።
EST 3:14 ሄሳ ግሾ፥ ሄ ቃሸትዳ ጋላሳይ ጋክያ ዎደ አስ ኡባይ ጊገታናዳ፥ ሄ አዋጆይ ቢታ ኡባ ኪተትስነ አሳ ኡባስ አዋጀትስ።
EST 3:15 ካዎይ ኪትዳይሳት ቢታ ኡባ ኪታ ጋꬅዶሶና። ቃስ ሱሳ ካታማንካ ኦደትስ። ያትን፥ ሱሳ ካታማ አሳ ኡባይ ዳጋምስ። ሽን ካዉዋራነ ሃማራ እስፈ ኡትድ፥ ዎይነ ኡሻ ኡዮሶና።
EST 4:1 ማርድክዮስ ሀ ሀንዳባ ኡባ ስእዳ ዎደ፥ አዛንድ ባ ማኡዋ ፔꬍድ፥ ካዮ ማኦ ማእድ፥ ባ ሁጰን ብዶ ቆልስ። ባ ቃላ ꬎቁ ኦꬅድ፥ ይባታ ዬሆ ዬክሸ፥ ካታማ ግዶን ዩይስ።
EST 4:2 ካዮ ማኦ ማእድ ካዎ ኬꬅ ገላናዉ ኦንካ ዳንዳኦና ግሾ፥ እ ካዎ ኬꬅ ገልያ ፐንግያ ጋካናዉ ብስ።
EST 4:3 ካዋ አዋጆይ ስኤትዳ ቢታ ኡባን አይሁደታ ግዶን ግታ ካዮይ፥ ፆም፥ ዬሆይነ ዘለልስ ዶመትስ። ኤንታፈ ዳሮት ቃስ ካዮ ማኦ ማእድ፥ ካዮታናዉ ብዶ ቦላ ኡትዶሶና።
EST 4:4 አስትር ዳንግርፀትነ እዮ ናግያ ሹፋት ይድ፥ ማርድክዮሳባ እዉ ኦድዳ ዎደ እያ ዳሮ አዛናሱ። ማርድክዮስ ካዮ ማኡዋ ቃርድ፥ ሀራ ማኦ ማአና መላ እያዉ ማኦ የዳሱ፤ ሽን እ ኤኮና እፅስ።
EST 4:5 ሄሳፈ ጉየ አስትራ፥ ካዎይ እዉ ኪተታና መላ ዎꬅዳ ሀታካ ጌተትያ ሹፋ ፄጋዳ፥ ማርድክዮሳ መቶይ አይበኮ ቃስ እ አይስ ካዮትያኮ ኤራና መላ እያኮ ኪታሱ።
EST 4:6 ሀታክ ካዎ ኬꬅ ገልያ ፐንግያ ማታን ካታማ ዳባባን ደእያ ማርድክዮሳኮ ብስ።
EST 4:7 ማርድክዮስ፥ ባ ቦላ ጋክዳባ ኡባ ቆንጭስድ፥ እያዉ ኦድስ። ቃስ አይሁደታ ኩመꬅ ዉርሳናዉ ሃም ካዎ ቡቁራ ምንጅያ ኬꬃስ እማናዉ ቆፕዳ ሚሽያ ልክያራ ኡባ አሾና ጌሽድ ኦድስ።
EST 4:8 ሄሳ ፃላላ ግዶናሽን፥ አይሁደታ ዉርሳናዉ ሱሳ ካታማን ከይዳ አዋጆይ ፃፈትዳ ዎርቃትያ አስትርስ እማና መላነ ሀንያባ ኡባ እዉ ኦዳና መላ ኦድስ። ቃስ አስትራ ካዋኮ ገላዳ፥ ባ አሳይ ዉሮናዳ ጋናታና መላ ሀታካስ ኦድስ።
EST 4:9 ሀታክ ይድ፥ ማርድክዮስ ግዳባ ኡባ አስትርስ ኦድስ።
EST 4:10 አስትራ፥ ሀታካ ዛራዳ፥ ማርድክዮሳኮ ሀይሳዳ ያጋዳ ኪታሱ።
EST 4:11 “ማጫ ግድን፥ አደ ግድን፥ ኦንካ ፄገቶና ደእሸ፥ ካዉዋራ ጋሄታናዉ ካዎ ጋꬎስ ግዶ ዳባባ ገልኮ፥ ሀይቆ። ሽን እ ፄገቶና ካዋኮ ገልያ ዎደ ካዎይ ባ ዎርቃ ፃምኣ ፄራ እያኮ ዛሪድ በስኮ፥ ሄ ኡራ ፃላል ፓፃ አቴስ። ሀ ህግያ ካዋ ዞረይሳታፐ ብድ፥ ጮ አሳ ጋካናዉ ደእያ አስ ኡባይ ኤሬስ። ሽን ታኒ ሀስታሙ ጋላስ ግዶሳፐ ካዋኮ ገላናዉ ፄገታ ኤርከ” ያጋሱ።
EST 4:12 ማርድክዮስ አስትራ ኪትዳ ኪታ ስእዳፐ ጉየ፥
EST 4:13 ሀይሳዳ ያግድ ኢኮ ኪትስ፤ “ታኒ ካዎ ጋꬎን ደእያ ግሾ፥ ሀራ አይሁደታፐ አትሽን፥ ታና ቦችያባይ ባዋ ጋዳ ቆፖፋ!
EST 4:14 ኔኒ ሀይሳ መላ ዎደን ስእ ጊኮ፥ አይሁደታስ ማዶይ ሀራሶፐ ያና። ኤንቲ ቱማ አታና፤ ሽን ኔንነ ነ አዋ ኬꬃ አሳይ ሀይቃና። ኔኒ ካዎ ማቾ ግዳዳ ይዳይ ሀይሳ መላ ዎደሰኮ ኦን ኤሪ?” ያግስ።
EST 4:15 አስትራ ማርድክዮሳኮ ሀይሳዳ ያጋዳ ዛራዳ ኪታሱ፤
EST 4:16 “ባዳ ሱሳ ካታማን ደእያ አይሁደታ ኡባ ሺሻ፤ ፆምድ ታዉ ዎስተ። ሄꬑ ጋላስነ ሄꬑ ቃም ዉራና ጋካናዉ፥ ካꬅ ሞፕተ፤ ሃ ኡዮፕተ። ታኒ ታና ሀጋዝያ ማጫታራ ሄሳዳ ፆማና። ሄሳፈ ጉየ፥ ህግያን ድገትዳባ ግድኮካ፥ ካዎይ ደእያ በሳ ታኒ ገላና። ታኒ ሀይቅኮካ ሀይቃና” ያጋሱ።
EST 4:17 ማርድክዮስ ብድ፥ አስትራ እያ ኪትዳይሳዳ ኡባ ኦꬅስ።
EST 5:1 ፆማይ ዶመትን ሄꬓንꬆ ጋላስ አስትራ ካዎተꬃ ማኦ ማአዳ፥ ካዎ ጋꬎን ግዶ ዳባባ ገላዳ ኤቃሱ። ካዎይ ካዎ ኬꬅ ገልያ ፐንግያን ደእያ ባ አራታን ኡትስ።
EST 5:2 አስትራ ገላዳ፥ ግዶ ዳባባን ኤቅዳሮ ካዎይ በእድ እን ኡፋይትዳ ግሾ፥ ባ ዎርቃ ፃምኣ ኢኮ ምጭስ። እያ ሺቃዳ ፃምኣ ፄራ ቦቻሱ።
EST 5:3 ካዎይ ኢኮ፥ “ካወ አስትረ፥ ኔኒ ታኮ አይስ ያዲ? ቃስ ኔኒ ታና ኦይችያባይ አይቤ? ሀር አቶሽን ታ ካዎተꬃፈ ባጋ ግድኮካ፥ ታ ነዉ እማና” ያግስ።
EST 5:4 አስትራ ዛራዳ፥ “ካዋዉ፥ ነና ኡፋይስያባ ግድኮ፥ ታኒ ነዉ ጊግስዳ ግብራ ማናዉ ኔራ ሃማራ ናምአይ ሀች ኦማርስ ያኮ ዶሳይስ” ያጋሱ።
EST 5:5 ሄሳፈ ጉየ ካዎይ፥ “ኑኒ አስትራ ጊግስዳ ግብራስ ባናዉ ሃማ ኤለስድ ኤህተ” ያግስ። ሄሳ ግሾ ናምአይ ሄ በሳ ብዶሶና።
EST 5:6 ኤንቲ እስፈ ዎይነ ኡሻ ኡይሽን፥ ካዎይ ናምአንꬆ አስትሮ፥ “ኔኒ ታና ዎስያባይ አይቤ? ታኒ ነዉ እማና። ቃስ ኔኒ ታና ኦይችያባይ አይቤ? ሀር አቶሽን ታ ካዎተꬃፈ ባጋ ግድኮካ፥ ታ ነ ኦይሻ ፖላና” ያግስ።
EST 5:7 አስትራ ዛራዳ ታ ኦይቸይነ ታ ዎሰይ ሀይሳ፤
EST 5:8 “ካዋዉ፥ ኔኒ ታናን ኡፋይትያባ ግድኮ፥ ቃስ ታኒ ዎስያባ እማናዉነ ታ ኦይሻ ፖላናዉ ኔኒ ዶስያባ ግድኮ፥ ዎንቶ ታ ጊግስያ ሀራ ግብራስ ኔራ ሃማራ ያና መላ ኦይቻይስ። ታኒ አይ ኮያኮ ሄ ዎደ ነዉ ቆንጭሳና” ያጋሱ።
EST 5:9 ሃም ግብራ በሳፈ ከይድ ብያ ዎደ፥ ዳሮ ኡፋይትዳ ግሾ፥ ባ ዎዛናን ኡፋይስ ኖጩ ግሸ ብስ። ሽን እ ካዎ ኬꬅ ገልያ ፐንግያ ማታራ አꬍድ ብያ ዎደ ያን ኡትዳ ማርድክዮሳ በእስ። እያዉ ደንድቦናይሳነ ያይድ ኮኮርቦናይሳ በእድ ሃም ይሎ ኤፅስ።
EST 5:10 ግዶሽን፥ ባ ይሉዋ ዳንዳእድ ብድ ባ ሶ ጋክስ። ሄሳፈ ጉየ፥ ባ ላገታነ ባ ማችዉ ዞሳራ ፄግስድ፥
EST 5:11 ሃም ባ ዱረተꬃ ልክያ፥ ባ አደ ናይታ ታይቡዋ፥ ካዎይ ባና ቦንችዳ ቦንቹዋነ ሀራ ሀላቃታፐነ ካዎ ሞርናታፐ አꬍያ ሹማተꬅ እምድ፥ ዋትድ እያ ቦንችዳኮ ናሸትስ።
EST 5:12 ጉጅድካ ሃም፥ “ሀር አቶሽን ካውያ አስትራካ ባ ጊግስዳ ግብራስ ካዉዋራ ባና መላ ታፐ አትሽን፥ ሀራ ኦናካ ፄጋቡኩ። ቃስ ዎንቶካ ካዉዋራ ባና መላ ታና ፄጋሱ።
EST 5:13 ሽን አይሁደ ግድዳ ማርድክዮስ ካዎ ኬꬅ ገልያ ፐንገን ኡትዳይሳ በእያ ዎደ ሀ ኡባይካ ታና ኡፋይሰና” ያግስ።
EST 5:14 ሄ ዎደ እያ ማችያ ዞሳራነ እያ ላገት ኡባይ ሀይሳዳ ያግዶሶና፤ “ኔኒ እሻታሙ ዋꬋ ምꬅ ኤስሳዳ ዎንቶ ጉራ ማርድክዮስ ካቀታና መላ ካዋ ኦይቻ። ሄሳፈ ጉየ፥ ኡፋይታሸ ግብራ ማናዉ ባ” ያግዶሶና። ሃማ ሀ ቆፋይ ኡፋይስዳ ግሾ፥ ኤንቲ ግዳይሳዳ ካቃ ምꬅ ጊግስስ።
EST 6:1 ሄ ዎደ ቃማ ካዋ ꬍስኮይ ኤኮና እፅስ። ሄሳ ግሾ፥ ካዎይ ካዎ ታርከ ፃፍያ ማፃፋ ኤህድ፥ ካሰ ሀንዳ ታርከታ እያዉ ናባባና መላ ኪትስ።
EST 6:2 ናባበትዳ ታርከታፐ እሶይ ማርድክዮስ ኦꬅዳባ። ሄስካ፥ ካዎይ ደእያ ክፍልያ ናግያ፥ ጋባታነ ታራ ጌተትያ ናምኡ ሹፋት ካዋ ዎꬋናዉ ማቅዳ ማቁዋ ማርድክዮስ ቆንጭስስ።
EST 6:3 ካዎይ፥ “ያትን፥ እ ሄሳ ኦꬅዳ ግሾ እያዉ እመትዳ ሹማተꬃይ ዎይኮ ዎይቶይ አይቤ?” ያግስ። ካዋ አይለት ዛሪድ፥ “እያዉ አይኮይ ኦሰትቤና” ያግዶሶና።
EST 6:4 ካዎይ ዛሪድ፥ “ካረ ዳባባን ደኤይ ኦኔ?” ያግስ። ሄ ዎደ ባ ጊግስዳ ምꬃን ማርድክዮሳ ካቃናዉ፥ ካዋ ኦይቻናዉ፥ ሃም ካረ ዳባባ ገልሸ ደኤስ።
EST 6:5 ካዋ አይለት፥ “ሃም ካረ ዳባባን ኤቅስ” ያግዶሶና። ካዎይ ዛሪድ፥ “ሃ ገላ ጊተ” ያግስ።
EST 6:6 ሃም ገልዳፐ ጉየ ካዎይ፥ “ካዎይ ቦንቻናዉ ዶስያ አሳስ አይ ኦꬃናዉ ኮሺ?” ያግድ ኦይችስ። ሃም፥ “ካዎይ ታፐ ሀራ ኦና ቦንቻናዉ ዶሲ?” ያግድ ባ ዎዛናን ቆፕስ።
EST 6:7 ሄሳ ግሾ፥ ሃም ካዋስ ያግድ ዛርስ፤ “ካዎይ ቦንቻናዉ ዶስያ አሳስ፥
EST 6:8 ካዎይ ባ ካዎተꬃ ማኡዋ ኤህሶ፤ ባ ቶግያ ፓራ ሁጰን ጉቸ ዎꬆ።
EST 6:9 ሄሳፈ ጉየ፥ ካዎይ ባ ሞርናታፐ እስ ዳሮ ቦንቸትዳይሳ ፄግስድ፥ ካዎተꬃ ማኦ እያ ማይዛናዳነ ካዋ ፓራ ቦላ እያ ኡትስድ፥ ካታማ ዳባባ ከሳናዳ ኪቶ። ያትኮ ሄ ዳሮ ቦንቸትዳ ሞርናይ እያ ስንꬃን ሄመትሸ፥ ‘ካዎይ ቦንቻናዉ ዶስያ ኡራስ ሀይሳዳ ኦꬄስ’ ያግድ አዋጆ” ያግስ።
EST 6:10 ካዎይ ዛሪድ፥ ሃማ ሀይሳዳ ያግድ ኪትስ፤ “ህዛ ኤለሳ ደንዳዳ ካዎተꬃ ማኡዋነ ታ ፓራ ኤካዳ፥ ነ ግዳይሳዳ አይሁደ ግድዳ ማርድክዮሳስ ኦꬃ። እ ካዎ ኬꬅ ገልያ ፐንገን ደኤስ። ነ ግዳይሳፈ እስባካ አሾፋ” ያግስ።
EST 6:11 ሄሳ ግሾ፥ ሃም ማርድክዮሳ ካዎተꬃ ማኦ ማይዝድ፥ ካዋ ፓራ ቦላ ኡትስስ። ቃስ ካታማ ዳባባን እያፐ ስንꬃራ ሄመትሸ፥ “ካዎይ ቦንቻናዉ ዶስያ ኡራስ ሀይሳዳ ኦꬄስ” ያግድ አዋጅስ።
EST 6:12 ሄሳፈ ጉየ፥ ማርድክዮስ ካዎ ኬꬅ ፐንገ ጉየ ስሚድ ብስ። ሽን ሃም ዳሮ አዛንዳ ግሾ፥ ጉሉንትድ፥ ኤለስሸ ባ ሶ ብስ።
EST 6:13 ባና ጋክዳባ ኡባ ባ ማቸ ዞሳርስነ ባ ላገታስ ኦድስ። ኤንቲ እያኮ፥ “እያ ስንꬃን ኔኒ ካዉያናዉ ዶምዳ ሀ አደይ፥ ማርድክዮስ፥ አይሁደ አስ ግድኮ፥ ነ እያራ ኤቀታዳ፥ እያ ፆናናዉ ዳንዳአካ፤ ቱማ እ ነና ꬋይሳና” ያግዶሶና።
EST 6:14 ኤንቲ ቡሮ ሄሳ ኦደትሽን፥ ካዋ ሹፋት ጋክድ፥ ሃማ አስትራ ጊግስዳ ግብራስ ኤለስድ ኤፍዶሶና።
EST 7:1 ካዎይነ ሃም አስትር ግብራ ማናዉ ብዶሶና።
EST 7:2 ሄ ናምአንꬆ ጋላስ ግብራስ ብድ፥ ኤንቲ ዎይነ ኡሻ ኡይሽን፥ ካዎይ፥ “ካወ አስትረ፥ ኔኒ ዎስያባይ አይቤ? ታኒ ነዉ እማና። ኔኒ ታና ኦይችያባይ አይቤ? ሀር አቶሽን ታ ካዎተꬃፈ ባጋ ግድኮካ፥ ታኒ ነ ኦይሻ ፖላና” ያግድ ኦይችስ።
EST 7:3 ካውያ አስትራ ዛራዳ፥ “ካዋዉ፥ ኔኒ ታናን ኡፋይትዳባ ግድኮ፥ ቃስ ታ ኦይሻካ ፖላናዉ ዶስያባ ግድኮ፥ ታ ዎሳይነ ታ ኦይሻይ ታነ ታ አሳይ ሀይቆና አታና መላሳ።
EST 7:4 ታነ ታ አሳይ እሶይካ አቶና ኡባይ ሀይቆስ ባይዘትዳ። ኑኒ ባይዘትዳይ ማጫ አይለነ አደ አይለ ግድድ ደአናሳ ግድያኮ፥ ታኒ ስእ ጋና። ሄሳ መላ መቶይ ካዋ ዋይሳናዉ በሲያባ ግደና” ያጋሱ።
EST 7:5 ካዎይ አርፀክስስ ዛሪድ፥ “ሄሳ ኦꬃናዉ ፃልታምዳይ ኦኔ? እ ሄ አደይ አዉን ደኢ?” ያግድ ካውዉ አስትሮ ኦይችስ።
EST 7:6 አስትራ፥ “ኑ ሞርከይ፥ ኑና ꬋይሳናዉ ኮየይ፥ ሀ ኢታ አድያ ሃማ” ያጋሱ። ሄ ዎደ ሃም ካዋ ስንꬃንነ ካወ ስንꬃን ዳሮ ዳጋምስ።
EST 7:7 ካዎይ ዳሮ ሀንቀትድ፥ ባ ኡትዳ በሳፈ ደንድ፥ ካዎ ጋꬎ አታክልተ በሳ ብስ። ሽን ሃም ካዎይ እያ ቦላ ኢታባ ኤሀናዉ ቆፕዳይሳ ኤርዳ ግሾ፥ አስትራ እያ ሀይቆፐ አሻና መላ ዎሳናዉ ጉየ አትስ።
EST 7:8 ካዎይ አታክልተ በሳፈ ስሚድ ገልያ ዎደ፥ ሃም ካዊዉ አስትሮ ማሮታ ዎሳናዉ፥ እያ ኡትዳ አርሳ ቦላ ጉፋንዳይሳ በእስ። ካዎይ ይሎ ኤፅድ፥ ባ ቃላ ꬎቁ ኦꬅድ፥ “ላ ሀ አደይ ሀይሳን ካዎ ኬꬃን፥ ታ ስንꬃን፥ ካውዉ ካዉሻናዉ ኮይዬ?” ያግስ። ካዎይ ቡሮ ሄሳ ሃሳይሽን፥ ካዎ ሹፋት ይድ፥ ሃማ ሶምኡዋ ጎዝዶሶና።
EST 7:9 ኤንታፈ እሶይ፥ ሀርቦና ጌተትያ ሹፋይ፥ “ካዋዉ፥ ሃም ነና ሀይቆፐ አሽዳ ማርድክዮሳ ካቃናዉ ኤስዳ እሻታሙ ዋꬋ ምꬅ እያ ሶን ደኤስ” ያግስ። ካዎይ ዛሪድ፥ “ሃማ ኤፍድ፥ ሄ ምꬃን ካቅተ” ያግድ ኪትስ።
EST 7:10 ሄሳ ግሾ፥ ማርድክዮሳ ካቃና ግድ ጊግስዳ ምꬃን ሃም ካቀትስ። ሄሳፈ ጉየ፥ ካዋ ሀንቆይ ዶችስ።
EST 8:1 አይሁደታ ሞርከይ ሃም ካቀትዳ ጋላስ ካዎይ አርፀክስስ ሃማ ሻሉዋ ኡባ ካወ አስትርስ እሚስ። ቃስ ማርድክዮስ እዉ ማታ ዳቦ ግደይሳ አስትራ ካዋስ ኦዳሱ። ሄሳ ግሾ፥ ሄ ዎደፐ ዶምድ፥ ማርድክዮስ ካዋኮ ገላናዉ ዳንዳእስ።
EST 8:2 ካዎይ ሃማፐ ጉየ ኤክዳ ባ ምግዶ ማታምያ ከስድ፥ ማርድክዮሳስ እሚስ። አስትራ ማርድክዮሳ ሃማ ሻሉዋ ቦላ አዋያዳ ሹማሱ።
EST 8:3 ሄሳፈ ጉየ፥ አስትራ ዬካሸ፥ ካዋ ቶሆ ቦላ ኩንዳዳ፥ አጋጋ ኮቸ ግድዳ ሃም አይሁደታ ቦላ ቱክዳ ኢታ ማቆይ ኦሶን ፔኦና መላ ካዋ ዎሳሱ።
EST 8:4 ያትን፥ ካዎይ ባ ዎርቃ ፃምኣ እዉ ምጭን፥ እያ ደንዳ ኤቃዳ፥
EST 8:5 “ካዋዉ፥ ኔኒ ታናን ኡፋይትዳባ ግድኮ፥ ቃስ ታ ኦይሻካ ፖላናዉ ኔኒ ዶስዳባ ግድኮ፥ ነ ካዎተꬃ ግዶን ደእያ አይሁደ ኡባ ኩመꬅ ዎꬋና መላ፥ አጋጋ ኮቸ ግድዳ ሀማዳታ ናአይ ሃም ከስዳ አዋጁዋ ሻርያ ሀራ አዋጆ ከሳናዳ ዎሳይስ።
EST 8:6 ሀ ኡባ ꬋዮይ ታ አሳ ቦላነ ታ ዳቦታ ቦላ ጋክያ ዎደ ታኒ ስእ ጋዳ ዋና ፄሎ?” ያጋሱ።
EST 8:7 ሄሳፈ ጉየ፥ ካዎይ አርፀክስስ፥ ካውዉ አስትሮነ አይሁደ ግድዳ ማርድክዮሳ ሀይሳዳ ያግስ፤ “ሃም አይሁደታ ዎꬋናዉ አዋጆ ከስዳ ግሾ፥ ታኒ ምꬃን እያ ካቅስዳይሳነ እያ ሻሉዋ ኡባ ካወ አስትርስ እምዳይሳ ህንተ ኤሬታ።
EST 8:8 ግዶሽን፥ ካዎ ጋꬎ ማታመ ዎꬅን፥ ካዋ ሱንꬃን ከይዳ አዋጆይ ላመታናዉ ዳንዳኤና። ሄሳ ግሾ፥ ህንተ ህንተ ባጋራ አይሁደታ ማዳናዉ ኮይዳባ ፃፍተ። ሄሳ ታ ሱንꬃን ፃፍድ፥ ካዎ ማታምያ እያ ቦላ ዎꬅተ” ያግስ።
EST 8:9 ንሳነ ጌተትያ ሄꬓንꬆ አጌናን፥ ላታማነ ሄꬓንꬆ ጋላሳን፥ ማርድክዮስ ካዋ ፃፈታ ኡባ ፄግድ፥ ህንደፈ ብድ ቶጰ ጋካናዉ ደእያ ፄታነ ላታማነ ላፑን ቢታታን ካዎፐ ጋርሳራ ሃረይሳታስ፥ አዉራጃ አይሰይሳታስነ ቢታ ሀላቃታስ የድያ አዋጆ ፃፍስስ። አዋጆይ ዱማ ዱማ ዶናንነ ዱማ ዱማ ፕዳለን ፃፈትስ፤ ቃስ አይሁደታስካ ኤንታ ዶናንነ ኤንታ ፕዳለን ፃፈትስ።
EST 8:10 ማርድክዮስ ሄ አዋጁዋ ኡባ ካዋ አርፀክስሳ ሱንꬃን ፃፍስድ፥ ካዎ ማታመ ዎꬅድ፥ ካዎ ጋፃታን ꬊከትዳ፥ ኤሶትያ ፓራታ ቶግያ አሳታ ቦላ ቢታ ኡባ የድስ።
EST 8:11 ካዎይ ከስዳ አዋጆይ፥ ካታማታን ደእያ አይሁደት እስፈ ሺቃናዉነ ባንታ ቦላ ያባ ኦለትድ ዛራናዉ ዳንዳአና መላ ማታ እሜስ። ቃስ ኦላ ሚሽያ ኦይክድ፥ አይ ቢታፈካ፥ ኤንታ ኦላናዉ የይሳታ፥ ኤንታ ናይታራነ ኤንታ ማቸታራ ኡባ እሱዋካ አሾና ዎꬋናዉነ ኤንታ ሻሉዋ ቦንቅድ ኤካናዉ ማታ እሜስ።
EST 8:12 አይሁደት ካዋ አርፀክስሳ ካዎተꬃን ሄሳ ኦꬃናዉ ቃችዳ ጋላሳይ፥ አዳረ ጌተትያ ታማነ ናምአንꬆ አጌናን፥ ታማነ ሄꬓንꬆ ጋላሳና።
EST 8:13 ካዋ አዋጁዋ ቢታታ ኡባን ደእያ አሳይ ኤራናዳ፥ ህገ ግድድ አዋጀትስ። ሄስካ አይሁደት ባንታ ሞርከታ ቦላ ሀሎ ከያናዉ ባንታና ጊግሳናዉ ዳንዳእሴስ።
EST 8:14 ኪተተይሳት ካዎ ኬꬃ ፓራታ ቶግድ፥ ካዋ ኪታ ጋꬃናዉ ኤለስድ ብዶሶና። ቃስ ሱሳ ካታማን ሀ አዋጆይ አሳ ኡባስ ኦደትስ።
EST 8:15 ማርድክዮስ ካሎሰነ ቦꬃ ካዎተꬃ ማኦ ማእድ፥ ኦቻ ቴራ ዳንያነ ሊኖፐ ኦሰትዳ ካባ ቦላራ ማእስ፤ ቃስ ግታ ዎርቃ ካላቻ ዎꬅድ፥ ካዋ ስንꬃፈ ከይስ። ሱሳ ካታማይ እልልሳንነ ኡፋይሳን ኖጩ ግስ።
EST 8:16 ሄስ አይሁደታስ ግታ ኡፋይስ፥ እልልስነ ቦንቾ ዎደ ግድስ።
EST 8:17 ሄሳ ግሾ፥ ካዋ አዋጆይ ናባበትዳ ቢታንነ ካታማ ኡባን ደእያ አይሁደት ግታ ባኣለ ከስድ፥ ኡፋይትሸነ ግብራ ምሸ ፔእዶሶና። ሄሳ ጋሶን አይሁደታስ ያይድ፥ ያን ደእያ ሀራ ዛረ አሳፐ ዳሮት አይሁደ ግድዶሶና።
EST 9:1 አዳረ ጌተትያ ታማነ ናምአንꬆ አጌናን ታማነ ሄꬓንꬆ ጋላሳይ ጋክስ። ሄ ጋላስ፥ ካዎይ ኮይሮ ከስዳ አዋጁዋ ማራን ሞርከት አይሁደታ ፆናና ግዳ ቆፕዳ ጋላሳ። ሽን ኦዳይ ሽረት ዎꬍን፥ አይሁደት ባንታ ሞርከታ ፆንዶሶና።
EST 9:2 ካዋ አርፀክስሳ ካዎተꬃን ደእያ አይሁደት ኡባይ ባንታና ቆሀናዉ ኮይያ ኡባ ꬋይሳናዉ ባንታ ካታማን ካታማን እስፈ ሺቅዶሶና። ሀራ ዛረ ግድዳ አሳይ ኤንታዉ ያይዳ ግሾ፥ ኤንታራ አይ አስካ ኤቀታናዉ ዳንዳእቤና።
EST 9:3 ኤንቲ ማርድክዮሳስ ያይዳ ግሾ፥ ካዎፐ ጋርሳራ ቢታ ሃረይሳት፥ አዉራጃ አይሰይሳትነ ቢታ ሀላቃት ኡባይ አይሁደታ ማድዶሶና።
EST 9:4 ማርድክዮስ ካዎ ጋꬎን ግታ ማት እመትዳነ ዎልቃን ጉጅ ጉጅ ብያ አስ ግደይስ ሄ ካዎተꬃን ደእያ ቢታ ኡባን ኤረትስ።
EST 9:5 ሄ ጋላስ አይሁደት ባንታ ሞርከታ ኡባ ማሻን ጎይርድ ዉርስዶሶና፤ ባንታና እፅያ ኡባ ቦላ ኮይዳባ ኦꬅዶሶና።
EST 9:6 ዋና ካታማ ግድዳ ሱሳ ፃላላን እቻሹ ፄቱ አሳ ዎꬍዶሶና።
EST 9:7 ኤንቲ ፓርሻንዳታ፥ ዳልፎና፥ አስፓታ፥
EST 9:8 ፖራታ፥ አዳላ፥ አርዳታ፥
EST 9:9 ፓርማሽታ፥ አርሳያ፥ አርዳያነ ዋይዛታ ዎꬍዶሶና።
EST 9:10 ኤንቲ አይሁደታ ሞርከ ግድዳ ሃማ ናይታ። ሽን ኤንቲ ኤንታ ሻሉዋ ቦንቅቦኮና።
EST 9:11 አይሁደት ሱሳ ካታማን ዎꬍዳ አሳ ታይቦይ አፑነኮ ሄ ጋላስ ካዋስ ኦደትስ።
EST 9:12 ያትን፥ ካዎይ ካውዉ አስትሮ፥ “አይሁደት ዋና ካታማ ግድዳ ሱሳ ፃላላን እቻሹ ፄቱ አሳነ ታሙ ሃማ ናይታ ዎꬍዶሶና። ሄስ ሄሳ ግድኮ፥ ካዋ ቢታታን ኤንቲ ዎꬍዳይ አፑና ግዳንደሻ! ቃስ ሀእ ኔኒ ዎስያባይ አይቤ? ታኒ ነዉ እማና። ኔኒ ታና ኦይችያባይ ሀራባይ አይቤ? ታኒ ነዉ ፖላና” ያግስ።
EST 9:13 አስትራ ዛራዳ፥ “ካዋ ሀ ቆፋይ ኡፋይስኮ፥ ሱሳ ካታማን ደእያ አይሁደት ሀች ኦꬅዳይሳዳ ዎንቶካ ኦꬆ። ቃስ ታሙ ሃማ ናይታ አሃ ምꬃ ቦላ ካቃናዳ ኪታ” ያጋሱ።
EST 9:14 ካዎይ ሄሳ ኦꬃና መላ ኪትስ። አዋጆይ ሱሳ ካታማን ናምአንꬆ አዋጀትን፥ ታሙ ሃማ ናይታ አሀይ ኮጫ ቦላ ካቀትስ።
EST 9:15 አዳረ ጌተትያ አጌናን ታማነ ኦይዳንꬆ ጋላሳን፥ ሱሳ ካታማን ደእያ አይሁደት እስፈ ሺቅድ፥ ሀራ ሄꬑ ፄቱ አሳ ዎꬍዶሶና፤ ሽን ሀእካ ኤንታ ሻሉዋ ቦንቅቦኮና።
EST 9:16 ሄ ዎደ ሱሳ ካታማፐ ጋፃራ ደእያ ካዋ ቢታታን ደእያ አይሁደት እስፈ ሺቅድ፥ ባንታ ሞርከታ ኡባ ኦልዶሶና። ኤንቲ ላፑን ታማነ እቻሹ ሙኩሉ አሳ ዎꬍዳፐ ጉየ ባንታ ሞርከታፐ ሸምፕዶሶና። ሽን ኤንታ ሻሉዋ ቦንቅቦኮና።
EST 9:17 ሀይስ ኡባይ ሀንዳይ አዳረ ጌተትያ አጌናን ታማነ ሄꬓንꬆ ጋላሳና። ታማነ ኦይዳንꬆ ጋላሳን ኤንቲ ሸምፕዶሶና፤ ግብራ ምሸ፥ ኡይሸነ ኡፋይትሸ ፔእያ ጋላስ ኦꬅዶሶና።
EST 9:18 ሽን ሱሳ ካታማን ደእያ አይሁደት ታማነ ሄꬓንꬆነ ታማነ ኦይዳንꬆ ጋላሳን ዎꬍሸ ፔእድ፥ ታማነ እቻሻንꬆ ጋላሳን ሸምፕዶሶና። ኤንቲ ሄ ጋላሳ ምሸ፥ ኡይሸነ ኡፋይትሸ ፔእያ ጋላስ ኦꬅዶሶና።
EST 9:19 ሄሳ ግሾ፥ ጉꬃ ካታማታን ደእያ አይሁደት ሀች ጋካናዉ አዳረ ጌተትያ አጌናን ታማነ ኦይዳንꬆ ጋላሳ ባኣለ ጋላስ ኦꬅድ ቦንቾሶና። ሄ ጋላሳን ሞሶናነ ኡዮሶና፤ ቃስ እሶይ እሱዋስ እሞታ እሞሶና።
EST 9:20 ማርድክዮስ ሀ ሀንዳ ታርከ ኡባ ፃፍድ፥ ካዋ አርፀክስሳ ቢታ ኡባን፥ ሃሆንነ ማታን ደእያ አይሁደ ኡባስ የድስ።
EST 9:21 ሄ ዳብዳብያን ማርድክዮስ አዳረ አጌናን ታማነ ኦይዳንꬆነ ታማነ እቻሻንꬆ ጋላሳታ፥ አይሁደት ላይꬃን ላይꬃን ባኣለ ጋላስ ኦꬅድ ቦንቻና መላ ኤንታዉ ኦድስ።
EST 9:22 ሄ ጋላሳት አይሁደት ባንታ ሞርከታፐ ሸምፖ ደምዳ ጋላሳታ። ቃስ ሄ አጌናይ ኤንታ አዛኖይነ ዬሆይ ኡፋይሳንነ ግብራ ሙሳን ላመትዳ አጌና። ሄሳ ግሾ፥ ኤንቲ ሙሳንነ ኡሻን ኡፋይትሸ፥ እሶይ እሱዋስነ ማንቆታስ ካꬃ እሞታ እምሸ ቦንቻና መላ ኤንታዉ ኦድስ።
EST 9:23 አይሁደት ማርድክዮስ እምዳ ኪታ ኤክድ፥ ኤንቲ ቦንቻናዉ ዶምዳ ባልያ፥ ላይꬃን ላይꬃን አጎና ቦንቻናዉ ማእዶሶና።
EST 9:24 አጋጋ ኮቻይ፥ ሀማዳታ ናአይ ሃም፥ አይሁደታ ኡባ ሞርከይ፥ ኤንታ ꬋይሳናዉ ካሰ ማቀትድ ኤንታ ዎꬍያ አጌናነ ጋላሳ ኤራናዉ ፑርማ ጌተትያ ሳማ የግስስ።
EST 9:25 ሽን አስትራ ካዋኮ ገልዳፐ ጉየ፥ ሃም አይሁደታ ቦላ ማቅዳ ኢታ ማቆይ ኡባይ ጉየ ስሚድ፥ እያ ቦላ ፖለታናዳ ካዎይ ፁፈን ኪትስ። ያትን፥ ሃምነ እያ ታሙ ናይት አሀይ ምꬃን ካቀትስ
EST 9:26 ሄሳ ግሾ፥ ሀ ናምኡ ጋላሳት ፑርማ ባኣለ ጌተቶሶና። ሀ ዳብዳብያን ኤንታዉ ፃፈትዳባ ኡባ ጋሶን፥ ኤንቲ ባንታ አይፈን በእዳባ ጋሶንነ ኤንታ ቦላ ጋክዳባ ጋሶን
EST 9:27 አይሁደት ባንታዉ፥ ባንታ ኮቻታስነ አይሁደ ግዳናዉ ኮይያ ኡባስ፥ ሀ ባልያ ዎጋ ኦꬅድ ቦንችዶሶና። ሄስካ ላይꬃን ላይꬃን አጎና ሀ ናምኡ ጋላሳታ ቦንቻና መላሳ።
EST 9:28 ሄ ጋላሳት የለታ ኡባን፥ ካታማታ ኡባን፥ አይሁደታ ኬꬃ ኡባንነ ቢታ ኡባን ቦንቸታና መላ ቃሸትስ። ሄስካ፥ አይሁደት አዉደ ግድኮካ፥ ሀ ፑርማ ጋላሳታ ቦንቻናዉነ ሄ ጋላሳታን ሀንዳባይ ኤንታ ኮቻን ዶገቶና መላ ቆፓናዉ በሴስ።
EST 9:29 ሄሳፈ ጉየ፥ አብካላ ናእያ፥ ካውያ አስትራነ አይሁደ አደይ ማርድክዮስ፥ ፑርማ ባልያባ ካሰ ፃፍዳ ዳብዳብያ ምንꬃናዉ ሀይሳ ናምአንꬆ ዳብዳብያ ኩመꬃ ማታን ፃፍዶሶና።
EST 9:30 ሄ ዳብዳበት አርፀክስሳ ካዎተꬃን፥ ፄታነ ላታማነ ላፑን ቢታን ደእያ አይሁደታ ኡባስ ሳሮይነ ዎፓተꬅ ግዶ ግያ ሳሮታራ ፃፈትድ ኪተትዶሶና።
EST 9:31 ቃስ ኤንቲ ካሰ ፆማናዉነ ካዮታናዉ ዎጋ ከስዳይሳዳ፥ ሀእ ኤንታ ግድን፥ ስንꬃፈ ያና ኤንታ ኮቻታ ግድን፥ ሀ ፑርማ ጋላሳታ ላይꬃን ላይꬃን ዎጋ ኦꬅድ ቦንቻና መላ ሄ ዳብዳበት ቆንጭሶሶና። ሄስ አይሁደ አደይ ማርድክዮስነ ካውያ አስትራ እስፈ ዞረትድ ከስዳ ኪታ።
EST 9:32 ካወ አስትር ኪታይ ፑርማ ባኣለ ዎጋ ምንꬅስ፤ እካ ማፃፋን ፃፈትስ።
EST 10:1 ካዎይ አርፀክስስ ባ ካዎተꬃን ጋፃፐ ጋፃ ጋካናዉ ደእያ አሳ ኡባይ ጊራ ቃንፃና መላ ዎልቃን ኪትስ።
EST 10:2 እ ኦꬅዳ ግታነ ማላልስያ ኦሶት ኡባይ፥ ማርድክዮሳካ ꬎቁ ኦꬅድ ዋት ቦንችዳኮ ቆንጭስያ ታርከይ ሜዶናነ ፋርሰ ካዎተꬃ ታርከ ማፃፋን ፃፈትስ።
EST 10:3 ማታን ግድኮ፥ ማርድክዮስ ካዋ አርፀክስሳፐ ናምአንꬆ። እ አይሁደታንካ ዳሮ ቦንቸትዳነ ዶሰትዳ አስ። እ ባ አሰ ግድዳ አይሁደት፥ ሳሮተꬃንነ ህርግ ባይና ዳና መላ ዳሮ ዳቡርዳ አስ።
JOB 1:1 ኡፀ ቢታን እዮባ ጌተትያ እስ አስ ደኤስ፤ እ ቦረይ ባይና አስ፥ ሱረ አስ፥ ፆሰ ያይያነ ኢታባፐ ሃክዳ አስ።
JOB 1:2 እያዉ ላፑን አደ ናይትነ ሄꬑ ማጫ ናይት ደኦሶና።
JOB 1:3 እያዉ ላፑን ሙኩሉ ዶርሳት፥ ሄꬑ ሙኩሉ ግማለት፥ እቻሹ ፄቱ ዋꬃ ቦራት፥ እቻሹ ፄቱ ማጫ ሀረትነ ዳሮ አይለት ደኦሶና። ዶሎሀ ባጋ ቢታን ደእያ አሳ ኡባፈ እ አꬍዳ ዱረ አስ።
JOB 1:4 እያ አደ ናይት ባንታ ሶን ሶን ግብራ ጊግስድ፥ ባንታ ሄꬑ ምቸታ ፄግድ እስፈ ሞሶናነ ኡዮሶና።
JOB 1:5 ግብራ ጋላሳት ፖለትያ ዎደ እዮብ ባ ናይታ ፄግስድ፥ “ኦን ኤር ታ ናይት ባንታ ዎዛናን ፆሰ ባድድ ናጋራ ኦꬆና አጎኮና” ግድ ዎንታ ጉራ ደንድድ፥ ኤንታና ጌሻናዉ ባ ናይታ እሱዋ እሱዋ ሱንꬃ ፄግድ ፁሳ ያርሾ ያርሼስ። እዮብ ሄሳ ኡባ ዎደ ኦꬄስ።
JOB 1:6 እስ ጋላስ ኪታንቾት ጎዳ ስንꬃን በንታናዉ ይዶሶና፤ ፃላሄይካ ቃስ ኤንታራ ይስ።
JOB 1:7 ጎዳይ ፃላህያኮ፥ “ኔኒ አዉፐ ያዲ?” ያግስ። ፃላሄይ፥ “ታኒ ሳአ ኡባን ያነ ሃነ ዩያሸ ጋምአስ” ያግድ ዛርስ።
JOB 1:8 ጎዳይ ፃላህያኮ፥ “ያትን፥ ኔኒ ታ አይልያ እዮባ ሎይꬃ በአዲ? ሳአ ቦላ እያ መላ ቦረይ ባይና አስ፥ ሱረ አስ፥ ፆሰ ያይያነ ኢታባፐ ሃክዳ አስ ባዋ” ያግስ።
JOB 1:9 ፃላሄይ ዛሪድ፥ “ቱማ እዮብ ፆሳስ ጮ ያዪ?
JOB 1:10 እያነ እያ ሶ አሳ፥ እያዉ ደእያባ ኡባ ኔኒ ድራዳ ናጋብኪ? እ ኦꬅያ ኦሶ ኡባ ኔኒ አንጅዳ ግሾ እያ መሄ ዉደይ ቢታ ኡባ ቦላ ዳርስ።
JOB 1:11 ሽን ኔኒ ነ ኩሽያ የዳዳ፥ እያዉ ደእያ አቁዋ ኡባ ሾጭያኮ፥ ቱማ እ ነና ሶምኦን ባዳና” ያግስ።
JOB 1:12 ጎዳይ ፃላህያኮ፥ “ኤሮ ሎኦ፥ እያዉ ደእያባ ኡባይ ነ ኩሸና፥ ሽን እያ ቦቾፋ” ያግስ። ሄሳፈ ጉየ፥ ፃላሄይ ጎዳ ስንꬃፈ ከይድ ብስ።
JOB 1:13 እስ ጋላስ እዮባ አደ ናይትነ ማጫ ናይት ባንታ ባይራ እሻ ሶን ሞሶናነ ዎይነ ኡሽ ኡዮሶና።
JOB 1:14 እስ ኪተትዳ አስ እዮባኮ ይድ፥ “ኑኒ ቦራታ ዋፅድ ጎይሽን፥ ሀረትካ ኑ ማታን ምሽን፥
JOB 1:15 ሳባ ቢታ አሳት አኬኮና ይድ ኦላ ከስድ፥ ኡባ ቦንቅድ ኤክዶሶና፤ ቃስ አይለታካ ማሻን ዎꬍዶሶና። ያትን፥ ታኒ ታ ፃላላ አታዳ ሀ ሀንዳባ ነዉ ኦዳናዉ ያስ” ያግስ።
JOB 1:16 እ ቡሮ ኦድሽን ሀራ አስ ይድ፥ “ሳሎፐ ታም ዎꬍድ ዶርሳታነ ሄመይሳታ ምስ። ያትን፥ ታኒ ታ ፃላላ አታዳ ሀ ሀንዳባ ነዉ ኦዳናዉ ያስ” ያግስ።
JOB 1:17 እ ቡሮ ኦድሽን ሀራ አስ ይድ፥ “ካልዳወት ሄꬑ ጩጋን ሻከትድ ይድ፥ ኑና ኦልድ ግማለታ ኡባ ኤክ ብዶሶና፤ አይለታካ ማሻን ዎꬍዶሶና። ያትን፥ ታኒ ታ ፃላላ አታዳ ሀ ሀንዳባ ነዉ ኦዳናዉ ያስ” ያግስ።
JOB 1:18 እ ቡሮ ኦድሽን፥ ሀራ አስ ይድ፥ “ነ አደ ናይትነ ማጫ ናይት ባንታ ባይራ እሻ ሶን ምሼነ ዎይነ ኡሽ ኡይሼ ደእሽን፥
JOB 1:19 ዎልቃማ ጎተይ አኬኮና መላ ቢታፈ ደንድድ፥ ኬꬃ ሾጭን፥ ኬꬃይ ኤንታ ቦላ ኩንድድ ናይታ ዎꬍስ። ያትን፥ ታኒ ታ ፃላላ አታዳ ሀ ሀንዳባ ነዉ ኦዳናዉ ያስ” ያግስ።
JOB 1:20 ሄሳፈ ጉየ፥ እዮብ ደንድድ፥ ካዮስ ባ ማኡዋ ፔꬍስ፤ ባ ሁጵያ ቡሉስስ፤ ቢታን ጉፋንድ ጎይንሸ፥
JOB 1:21 “ታኒ ታ አየ ኡሎፐ ካሎ የለታስ፤ ሀይቃሸካ ታኒ ካሎ ባና፤ ጎዳይ እሚስ፤ ጎዳይ ዛሪድ ኤክስ፤ ጎዳ ሱንꬃይ ጋላተቶ” ያግስ።
JOB 1:22 ሀ ኡባንካ እዮብ ናጋራ ኦꬅቤና፤ ፆሳ ቦላ ኢታባ ኦደትቤና።
JOB 2:1 ሀራ ጋላስ ኪታንቾት ጎዳ ስንꬃን በንታናዉ ይዶሶና፤ ፃላሄይካ ቃስ ኤንታራ እስፈ እያ ስንꬃን በንታናዉ ይስ።
JOB 2:2 ጎዳይ ፃላህያኮ፥ “ኔኒ አዉፐ ያዲ?” ያግስ። ፃላሄይ ጎዳኮ፥ “ታኒ ሳአ ኡባን ያነ ሃነ ዩያሸ ጋምአስ” ያግስ።
JOB 2:3 ጎዳይ ፃላህያኮ፥ “ኔኒ ታ አይልያ እዮባ ሎይꬃዳ በአዲ? ሳአ ቦላ እያ መላ ቦረይ ባይና አስ፥ ሱረ አስ፥ ፆሰ ያይያነ ኢታባፐ ሃክዳ አስ ባዋ። ጋሶይ ባይና ታኒ እያ ꬋይሳና መላ ነ ታና ደንꬅንካ ሀእ ጋካናዉ እ ባ ሱረተꬃን ምንድ ኤቅስ” ያግስ።
JOB 2:4 ፃላሄይ ዛሪድ፥ “ነ ሸምፖይ አቶ” አስ ገይሳዳ አስ ባ ሸምፑዋ ግሾ ባዉ ደእያባ ኡባ እሜስ።
JOB 2:5 ሽን፥ “ኔኒ ነ ኩሽያ የዳዳ እያ አሳተꬃ ቦችያኮ፥ እ ነና ቱማ ሶምኦን ባዳና” ያግስ።
JOB 2:6 ጎዳይ ፃላህያኮ፥ “ኤሮ ሎኦ፥ እያ ዎꬎፓፈ አትሽን፥ እያ ቦላ ነ ኮይዳባ ኦꬃናዉ ዳንዳኣሳ” ያግስ።
JOB 2:7 ሄሳፈ ጉየ፥ ፃላሄይ ጎዳ ስንꬃፈ ከይድ፥ እዮባ ቶሆፐ ሁጰ ጋካናዉ ኢታ ማዱንꬃን ካኤታና መላ ኦꬅስ።
JOB 2:8 እዮብ ብዶ ቦላ ኡትድ ኮንአን ባና ጎድስ።
JOB 2:9 እያ ማችያ፥ “ሀእ ጋካናዉካ ኔኒ ነ ሱረተꬃ ምንꬃ ኦይካዲ? ፆሳ ባዳዳ ሀይቃጋ” ያጋሱ።
JOB 2:10 እዮብ ዛሪድ፥ “ኔኒ ኤያ ማጫሳዳ ዋናዳ ኦደታይ? ኑኒ ፆሳፈ ሎኦባ ኤክ ጋምእድ፥ ኢታባይ ጋክያ ዎደ ኤኮኮዬ?” ያግስ። ሀ ዋየ ኡባን እዮብ ፆሳ ቦላ ኢታባ ኦደትቤና።
JOB 2:11 ሄꬑ እዮባ ላገት፥ ተማና ቢታፈ ኤልፋዝ፥ ሹሀ ቢታፈ በልዳዶስነ ናእማ ቢታ አስ ግድዳ ሶፋር እዮባ ቦላ ጋክዳ መቱዋ ስእዳ ዎደ እያዉ ቃታናዉነ ምንꬃናዉ እስፈ እያኮ ይዶሶና።
JOB 2:12 ኤንቲ እያ ሃሆን ኤቅድ ፄልያ ዎደ እ እዮባ ግደይሳ ኤርቦኮና። ጉየፐ እያ ግደይሳ ኤርዳ ዎደ ባንታ ቃላ ꬎቁ ኦꬅድ ዬክዶሶና፤ ባንታ ማኡዋ ፔꬍድ፥ ባንታ ሁጰን ባና ቆልዶሶና።
JOB 2:13 ኤንቲ እያራ ላፑን ጋላስነ ላፑን ቃማ ቢታን ኡትዶሶና። ኤንቲ እያ ዋየይ ኬህ ዳሮ ግደይሳ በእዳ ግሾ ኦንካ እያ ኦድስቤና።
JOB 3:1 ሄሳፈ ጉየ፥ እዮብ ባ ዶና ዶይድ፥ ባ የለትዳ ጋላሳ ሀይሳዳ ያግድ ባድስ።
JOB 3:3 “ታኒ ቃንꬃትዳ ቃማይነ የለትዳ ጋላሳይ ባደትዳባ ግዶ!
JOB 3:4 ሄ ጋላሳይ ꬉማን ላመቶ! ሳሎ ፆሳይ ሄ ጋላሳ ቆፖፎ፤ እያ ቦላ ፖኦይካ ፖኦፖ።
JOB 3:5 ሳካና ꬉምነ ጫጋን እያ ጎዞ፤ እያ ሻሪ ካሞ፤ እያ ፖኡዋ ꬉም ቆሶ።
JOB 3:6 ሄ ጋላሳ ቃማ ሳካና ꬉም ኦይኮ። ላይꬃ ግዶን ደእያ ጋላሳታን ታይበቶፎ፤ አጌናታ ታይቦንካ ገሎፖ።
JOB 3:7 ሄ ቃማይ ማይኖ፤ ኡፋይሳ እልልስ እያን ስኤቶፎ።
JOB 3:8 ሌዋታነ ደንꬃናዉ ዳንዳኤይሳትነ ጋላሳታ ባደይሳት ሄ ጋላሳ ባዶ።
JOB 3:9 ሄ ቃማን ባካል ፖኦፖ፤ ፖኦ ናግድ ደሞፎ፤ ዎንታ ፃልቀይ እያዉ ዶሎፖ።
JOB 3:10 ሄ ጋላሳይ ታኒ ታ አየ ኡሎን ቃንꬃቶና መላነ ሀ ዋይያ በኦና መላ አሽቦና ግሾ ባደትዳይሳ ግዶ።
JOB 3:11 “ታኒ ታ አየ ኡሎን ሃꬃ ግድዳ ግዳርክና! ታ አየ ኡሎፐ የለታ ዎꬍዳ መላ ሀይቅዳ ግዳርክና!
JOB 3:12 ታ አይያ ታና አይስ ባ ክኦን ኤካደሻ? ባ ꬋንꬃካ ታና አይስ ꬋንꬃደሻ?
JOB 3:13 ሄ ዎደ ታኒ ሀይቅዳባ ግድያኮ፥ ሀእ ታኒ ሸምፓዳ ꬍስካና ሽን!
JOB 3:14 ሀእ ላለትዳ በሳታ ባንታዉ ኬፅዳ፥ ሀ ሳኣ ካዎታራነ ዞረይሳታራ፥
JOB 3:15 ኤንታ ኬꬃን ዎርቃይነ ብራይ ኩምዳ ሀላቃታራ እስፈ ዱፎን ዝንአናሽን!
JOB 3:16 ዎይኮ ቦሻ ግድድ የለትዳ ናአዳ፥ ጋላሳ ፖኦ በእቦና ዮጋ ናአዳ ቢታ ግዶን አይስ ቆሰታብክና?
JOB 3:17 ዱፎን ኢታት ባንታ ኢታ ኦሶ አጎሶና፤ ያን ዳቡራንቾት ሸምፖሶና።
JOB 3:18 ሄ በሳን ቃሾ አሳት ሸምፕድ ኡፋይቶሶና፤ ኤንታ ኡንኤይሳታ ዋሱዋ ያን ስኦኮና።
JOB 3:19 ግትነ ጉꬅ ያን ደኤስ፤ አይለትካ አይለተꬃፈ ያን ላአ ከዮሶና።
JOB 3:20 “መቶን ደኤይሳታስ፥ ሸምፖይ ጫመትዳይሳታስ፥ ፖኦይ አይስ እመትዴ?
JOB 3:21 ሀይቆ አሞትድ ደሞናይሳታስ፥ ቆትድ ዎꬅዳ ሻሎፐ አꬅድ ኮየይሳታስ፥ ደኦይ አይስ እመትዴ?
JOB 3:22 ዱፎ ጋክያ ዎደ ኡፋይተይሳታስ፥ ደኦይ አይስ እመትዴ?
JOB 3:23 ኦገይ ꬋይዳ ኡራስ፥ ፆሳይ እያ ዩሹዋ ድርዳ ኡራስ፥ ፖኦይ አይስ እመትዴ?
JOB 3:24 ኦለይ ታዉ ካꬅ ግድስ፤ ታ ዋሶይ ጎግያ ሃꬅ ግድስ።
JOB 3:25 ታኒ ያይዳባይ ታ ቦላ ጋክስ፤ ታኒ ዳጋምዳባይ ታዉ ሀንስ።
JOB 3:26 ታዉ መቶፐ አትሽን፥ ሳሮይ፥ ዎፕነ ሸምፖይ ባዋ” ያግስ።
JOB 4:1 ተማናፐ ይዳ ኤልፋዝ ዛሪድ፥
JOB 4:2 “እስ አስ ፃልታምድ ኔራ ኦደትኮ ኔኒ ላንጫኔ? ሽን ሃሳዮና አጋናይ ኦኔ?
JOB 4:3 ሄኮ፥ ኔኒ ዳሮታ ታማርሳዳሳ፤ አርጋጭዳ ኩሸታ ምንꬃዳሳ።
JOB 4:4 ነ ቃላይ ꬉበትዳይሳታ ኮልድ ኤስስ፤ ዳቡርዳ ጉልባታታ ምንꬅስ።
JOB 4:5 ሽን ሀእ መቶይ ነና ጋክን ኡፋይስ ቃንፃዳሳ፤ ኡንእ ነና ተቅን ዳጋማዳሳ።
JOB 4:6 ነ ፆሳስ ያየይስ ነና አማንꬅድ ዎꬅቤኔ? ነ ሱረ ሄመꬃይ ነዉ ኡፋይስ ግድቤኔ?
JOB 4:7 “አነ ቆፓ፤ ጌሻ አስ ግድድ ꬋይዳይ ኦኔ? ሱረ አስ ግድድ ሾደትድ ꬋይዳይ ኦኔ?
JOB 4:8 ታ በእዳይሳዳ፥ ኢታተꬅ ጎይድ መቶ ዘረይሳት፥ እያ ዛሪድ ቡጫና።
JOB 4:9 ኤንቲ ፆሳፈ ከያ ሸምፖን ፑነትድ ꬋያና፤ እያ ሀንቁዋ ላጩዋን ሜተታና።
JOB 4:10 ኢታት ጉድያ ጋሞ መላ ፃጎሶና፤ ሽን ኤንታ አቻይ መቀረትስ።
JOB 4:11 ሻንካትድ ምያባ ꬋይዳ ጋሞይ ሀይቀይሳዳ፥ ኤንታ ናይትካ ላለተይሳዳ ኢታታ ናይት ላለታና።
JOB 4:12 “እስ ጋላስ እስ ፁራይ ታኮ ይስ፤ ሄ ፁራ ካልካሻን ታ ስአስ።
JOB 4:13 ዎልቃማ ꬍስኮይ አሰ ኦይክዳ ዎደ ኡንኤꬅያ ቃማ አሙሆ ግዶን፥
JOB 4:14 ያሽነ ኮኮርስ ታና ኦይክስ፤ ታ መቀꬃት ኮኮርዶሶና።
JOB 4:15 ጫርኮይ ታ ሶምኡዋ ባቅድ አꬍስ፤ ታ ዳጋምን ታ አሳተꬃ እክሰይ ኤቅስ።
JOB 4:16 እ ታ ስንꬃን ኤቅስ፤ ሽን እ አይበኮ ሻካዳ ኤራብከ። ሄሳፈ ጉየ፥ ስእ ግዳ በሳፈ ሀይሳዳ ግያ ግርሳ ስአስ።
JOB 4:17 ‘ሀይቅያ አስ ፆሳ ስንꬃን ፅሎ ግዳናዉ ዳንዳኢ? ዎይኮ አስ ባና መꬍዳይሳ ስንꬃን ጌሽ ግዳናዉ ዳንዳኢ?
JOB 4:18 ፆሳይ ባ አይለታን አማነቶናባ ግድኮ፥ ባ ኪታንቾታንካ ባላ ደምያባ ግድኮ፥
JOB 4:19 ያትን፥ ኡርቃ ኬꬃን ደኤይሳት፥ ኤንታ ደኡዋ ባሶይ ቢታ ግድዳይሳት፥ ጉፁነፐ ኤሶን ሀይቀይሳት ዋናኔ?
JOB 4:20 ዎንታ በንትድ ኦማርስ ሀይቆሶና፤ ኦንካ ሀሳዮና መርናዉ ꬋዮሶና።
JOB 4:21 ꬍሸይ ሾደትዳ ዱንካነ መላ ጭንጫተꬅ ባይና ሀይቆሶና።’ ”
JOB 5:1 “እዮባ፥ ነዉ ኮያና አስ ደእኮ አነ ፄጋ! ኪታንቾታፐ ኦደኮ ነ ፄላኔ?”
JOB 5:2 ኤያ ኡራ ላንጨይ ዎꬌስ፤ አኬክ ባይና ኡራ ቃናተይ ꬋይሴስ።
JOB 5:3 ኤያ ኡራይ ምንድ ደእሽን በአስ፤ ሽን ቆፖና እያ ኬꬃይ ባደትስ።
JOB 5:4 እያ ናይት ሳሮይ ባይና ዳና፤ ፕርዳ ዳባባን ኤንታዉ ኤቅያ አስ ባይና ግሾ ኤንቲ ቆሄታና።
JOB 5:5 እ ሺሽዳ ካꬃ ኮሻትዳ አሳይ ማና፤ ሀር አቶሽን አጉንꬃ ግዶን ዶልዳይሳካ አጎኮና። ሳሞትዳይሳት እያ ሻሉዋ ኤካናዉ አሞቶሶና።
JOB 5:6 መቶይ ሳአፐ ከየና፤ ዋየይ ቢታፈ ዶለና።
JOB 5:7 ታም ፕንፅድ ዎይሳዳ፥ አስ መቶስ የለትስ።
JOB 5:8 “ታ ነና ግድያኮ ታ ፆሳኮ ሺቃና፤ ታ ሞቱዋካ እያ ስንꬃን ዎꬃና።
JOB 5:9 እ ታይበቶና ማላታታ፥ ፕልገቶና ዎልቃማባታ ኦꬄስ።
JOB 5:10 እራ ቢታን ቡክሴስ፤ ጎሻ ጋድያስ ሃ የዴስ።
JOB 5:11 ካዉሻታ ꬎቁ ꬎቁ ኦꬄስ፤ ካዮተይሳታ ምንꬅድ ኡፋይሴስ።
JOB 5:12 ኤንታ ቆፋይ ፖለቶና መላ፥ ገናንቾታ ሀልቹዋ ሀዳ ኦꬄስ።
JOB 5:13 ጭንጫታ ኤንታ ገነ ኦሱዋን ኦይኬስ፤ ገናንቾታ ማቁዋ አꬅድ የጌስ።
JOB 5:14 ጋላሳይ ኤንታዉ ꬉማ ግዳና፤ ሴታ ጋላስ ꬉማን ሄመትያ አሳዳ ታታፋና።
JOB 5:15 ማንቆታ ኤንታ ሞርከታ ማሻፈ አሼስ፤ ኤንታ ዎልቃማታ ኩሽያፐ ዎꬅ ኤኬስ።
JOB 5:16 ሄሳ ግሾ፥ ማንቆታስ ኡፋይስ ደኤስ፤ ጌላተꬅ ስእ ኦꬄስ።”
JOB 5:17 “ፆሳይ ሴርያ አስ አንጀትዳይሳ፤ ሄሳ ግሾ፥ ኡባ ዳንዳእያ ፆሳ ሴራ ካꬎፓ።
JOB 5:18 እ መንꬄስ፥ ሽን ዛሪድ ኮሌስ፤ እ ማዱንፅሴስ፥ ሽን እያ ኩሸይ ꬋሌስ።
JOB 5:19 ኡሱፑን ቆሞ ቆሆታፐ እ ነና አሻና፤ ላፑንꬆይ ነና ቦቸና።
JOB 5:20 ኮሻ ላይꬅ ሀይቆፐ፥ ኦላ ዎደ ማሻፈ ነና አሼስ።
JOB 5:21 እ ነና ኢታ እንፃርሳፈ ናጋና፤ ቦሽ ጋክያ ዎደ ያያካ።
JOB 5:22 ቦሻ ቦላነ ኮሻ ቦላ ነ ሚጫና፤ ባዞ ዶአታስ ያያካ።
JOB 5:23 ነ ጎሻ ቢታን ሹች ዴና፤ ባዞ ዶአታራ ነ ሳሮን ዳና።
JOB 5:24 ነ ዱንካነይ ሳሮ ግደይሳ ነ ኤራና፤ ነ ዳራ ነ ፆሞስያ ዎደ አይብካ ፓጨና።
JOB 5:25 ነ የለታይ ዳራናይሳነ ነ ኮቻይ ማታ መላ ግዳናይሳ ነ ኤራና።
JOB 5:26 ካꬅ ዎደ ናግድ ጫከተይሳዳ፥ ኔኒ ጭማተꬅ ካላዳ ዱፎ ባና።
JOB 5:27 “እዮባ፥ ኑኒ ሄሳ ኡባ ፕልግድ ፄልዳ። ሄስ ቱማ ግድያ ግሾ አኬካዳ ኤካ” ያግስ።
JOB 6:1 ሄሳፈ ጉየ እዮብ ዛሪድ፥
JOB 6:2 ታ ዋየይነ ታ አዛኖይ ኡባይ ምዛነን ልከትድ በኤትያኮ፥
JOB 6:3 አባ ጋፃን ደእያ ሻፍያፐ አꬍድ ዴፃና፤ ሄሳ ግሾ፥ ታ ቃላይ ነና ማላልሰናሽን።
JOB 6:4 ኡባ ዳንዳእያ ፆሳ ዶንገት ታና ጫድዶሶና፤ ታ አሳተꬃይ ኤንታ ዪሻ ኡዬስ፤ ፆሳ ዳጋንꬆይ ታ ቦላ ሳልፕስ።
JOB 6:5 ሀረይ ዎይኮ ቦር ማት ደእሽን ዋስዬ?
JOB 6:6 ማልኦና ካꬅ ማፅነይ ገሎና ሜተትዬ? ዎይኮ ጱጱለ ሃꬅ ማልእዬ?
JOB 6:7 ሄሳ መላ ካꬅ ታና ሱከየና፤ ሄሳ መላ ካꬅ ታ ሚኮ ታና ሳኬስ።
JOB 6:8 ታ ዎሳ ፆሲ ስእያኮ አይቤ? ታ አሙዋካ ታዉ ኩንꬅያኮ አይቤ?
JOB 6:9 ፆሳ ሸነ ግድን እ ታና መንረꬅያኮ፥ እ ባ ኩሽያ የድድ ታና ꬋይስያኮ፥
JOB 6:10 ታ ጌሻ ፆሳ ቃላ ካዳቦና ግሾ፥ ዋየይ ዳርኮካ ኡፋይሳን ታ ጉፓና።
JOB 6:11 ታ ፓፃ ዳናዉ ታዉ አይባ ዎልቅ ደኢ? ታዉ አይባ ኡፋይስ ደእሽን ዳንዳእያና?
JOB 6:12 ታ ዎልቃይ ሹቻ መለዬ? ዎይኮ ታ አሾይ ናሰ ብራታ መለዬ?
JOB 6:13 ታኒ ታና ማዳናዉ አይባ ዎልቅ ታዉ ደኢ? ማዶ ደማናዉ ፄልያ በስካ ባዋ።
JOB 6:14 መቶን ደእያ አስ ኡባ ዳንዳእያ ፆሳስ ያየይሳ አግኮካ፥ እያ ላገት እያዉ ኬሀተꬅ በሳናዉ ኮሼስ።
JOB 6:15 ሽን ታ እሻት ህንተ እር ቡኮና ዎደ መልያ ሻፋ መላ ታና ጭሜታ።
JOB 6:16 ባልጎ አጌናን ሀ ሻፋይ ሻቻን ኩሜስ።
JOB 6:17 ሽን ቦነይ ጋክያ ዎደ ሻቻይ ትልኤስ፤ ሻፋይካ መሌስ።
JOB 6:18 ጫና መሄ ላግሸ ብያ ዛልአንቾት፥ ሃ ኮያናዉ ባንታ ኦግያፐ ጋፃ ከይድ፥ መላ ቢታን ቶይላትሸ ꬋዮሶና።
JOB 6:19 ቴማ ቢታ ዛልአንቾት ሃ ኮዮሶና፤ ሳባ ቢታ ኦገ አሳት ኡፋይስ ቃንፆኮና።
JOB 6:20 ኤንቲ አማነትድ ኮይድ ꬋይዳ ግሾ ይሎትዶሶና፥ ሄ በሳ ጋክድ ዬላትዶሶና።
JOB 6:21 ህንተካ ታዉ ሄ ሻፋታ መላ ግድደታ፤ ታና ጋክዳ መቱዋ በእድ ያይደታ።
JOB 6:22 ሀኖሽን ታ ህንተና፥ “ታዉ እስባ እምተ” ዎይኮ፥ “ህንተ ሻሉዋራ ታና ዎዝተ” ጋድና?
JOB 6:23 “ታና ታ ሞርከታ ኩሸፐ አሽተ” ዎይኮ፥ “ቃይ ባይና አሳ ኩሸፐ ታና ዎዝተ” ጋድና?
JOB 6:24 “ታ ስእ ጋና፤ ህንተ ታና ታማርስተ፤ ታ አይ ባልዳኮ አነ ታና በስተ።
JOB 6:25 ቱማ ኦድ ጫምኮካ ኤከቴስ! ሽን ህንተ ኦዳይ አይብስካ ማደና።
JOB 6:26 ህንተ ታ ሃሳያ ጫርኮ መላ ሀዳ ኦꬄታ፤ ያትን፥ ኡፋይስ ቃንፅዳይሳስ ታዉ አይ ዛሮ እማናዉ ኮዬቲ?
JOB 6:27 አው ባይና ናአ ቦላ ሳማ የጌታ፤ ህንተ ላግያ ባይዛናዉ ዋሽሴታ።
JOB 6:28 አነ ሻማ አይፈን ታና ፄልተ፤ ታ ህንተ ስንꬃን ዎርዶትያና?
JOB 6:29 ሀያና፥ አነ ዛረꬅድ ቆፕተ፤ ታኒ ፅሎ ታ ቦላ ጮ ፕርዶፍተ።
JOB 6:30 ታ እንፃርሳን ዎርዶይ ደኢ? ታ ዶናይ ዎርዶነ ቱማ ሻካናዉ ዳንዳኤኔ?”
JOB 7:1 አሳ ደኦይ ሳአ ቦላ ዎልቃማ ባፀ ግደነዬ? እያ ላይꬃይ ኡነ ኦꬅያ አሳ ደኦ መላ ግደነዬ?
JOB 7:2 ዉልያ አዋ አሞትያ ጋቻ መላ፥ ዎይኮ ባ ዳሞዝያ ኤካናዉ ናግያ ኦሳንቾዳ፥
JOB 7:3 ሄሳዳ ታዉ መላ አጌናት መቶ ቃማት እመትዶሶና።
JOB 7:4 ታኒ ዝንእያ ዎደ አዉደ ባርካንድናሻ ጋይስ፤ ሽን ቃማይ ታዉ አዱቄስ፤ ሳእ ዎንታና ጋካናዉ ሂፃን ሽረታ ሽረታ ዎꬋይስ።
JOB 7:5 ታ አሳተꬃይ ጉፁንትስ፤ ታ ማዱንꬃይ ጊሽ ጎጌስ።
JOB 7:6 ታ ላይꬃይ ዶርዘ ሞቀፐ አꬍድ ኤለሴስ፤ ኡፋይስ ባይናሽን ታ ላይꬃይ ዉሬስ።
JOB 7:7 አቤት ፆሳዉ፥ ታ ላይꬃይ እስ ሸምፖ መላ ግደይሳ ቆፓ! ታ አይፈይ ዛሪድ ኬሀባ በኤና።
JOB 7:8 ሀእ በኤይ ዛሪድ በኤና፤ ታና ኮያና ሽን ዛር ደመና።
JOB 7:9 ሻር ላለትድ ꬋየይሳዳ፥ ዱፎ ዎꬍያ አስ ስሚድ ከየና።
JOB 7:10 ባ ሶ ስሚድ ዬና፤ እያ ኤርያ አሳይካ ዶጌስ።
JOB 7:11 “ሄሳ ግሾ፥ ታ ስእ ጊከ፤ ታ አያና ኡንኤተꬃ ኦዳና፤ ታ ሸምፑዋ ጫመተꬃ ግሾ ዙዙማና።
JOB 7:12 ሄሳ መላ ኔኒ ታና አይስ ናጋይ? ታ ነዉ አባ ዎይኮ አባን ደእያ ኢታ ዶአ ጋድዬ?
JOB 7:13 ‘ታ ሂፃይ ታና ምንꬃና፤ ታ አርሳይ ታና ዙዙንꬃፈ ሸምፕሳና!’ ጋዳ ቆፓስ፤
JOB 7:14 ሽን ኔኒ ታና አሙሆን ያሽሳሳ፤ ቆንጨꬃን ታና ዳጋንꬃሳ።
JOB 7:15 ታኒ ሀ ዋየይ ኩምዳ አሳተꬃ ቶካዳ ዳናፐ፥ ሱለታዳ ሀይቅያኮ ዶሳይስ።
JOB 7:16 ታኒ ታ ደኡዋ ሻተታስ፤ ዳናዉ ኮይከ፤ ታ ላይꬃይ እስ ሸምፖ መላ ግድያ ግሾ ታና አጋርክ።
JOB 7:17 ነ እያ ግታያዳ ፄላናዉ አስ አይቤ? ነ እያዉ ቆፓናዉ አስ አይቤ?
JOB 7:18 ዎንታ ዎንታ ነ እያ ፆሞሳሳ፤ ዎደን ዎደን ነ እያ ፓጫሳ።
JOB 7:19 ነ ታ ቦላ አይፈ ዎይሳ አግኪ? ጩቹ ምትያ ዎደ ታዉ እምኪ?
JOB 7:20 አቤት አሰ ካለይሶ፥ ታ ናጋራ ኦꬅን ነና አይ ቆህዴ? ነ አይስ ታና ጫዳ ኦይካይ? ነዉ ታ ቶሆ ግዳድናዬ?
JOB 7:21 ታ ናቁዋ አይስ አግኪ? ታ ናጋራ አይስ አቶ ጊኪ? ታ ዱፎ ገልያ ዎደይ ጋክስ፤ ነ ታና ኮያና፥ ሽን ህዛፐ ደማካ” ያግስ።
JOB 8:1 ሹሀ ቢታፈ ይዳ በልዳዶስ ዛሪድ፥
JOB 8:2 “ኔኒ ሄሳ አዉደ ጋካናዉ ኦደታይ? ነ ዶናፐ ከያ ቃላይ ዎልቃማ ጎተ መላ።
JOB 8:3 ኡባ ዳንዳእያ ፆሳይ ፅሎ ፕርደኔ?
JOB 8:4 ነ ናይት ፆሳ ቦላ ናጋራ ኦꬅዳ ግሾ፥ እ ኤንታ ኤንታ ናጋራ ግሾ ሴርስ።
JOB 8:5 ሽን ኔኒ ፆሳኮ ስምኮ፥ ኡባ ዳንዳእያ ፆሳ ዎስኮ፥
JOB 8:6 ኔኒ ጌሽነ ሱረ ግድኮ፥ እ ነ ግሾ ደንድድ ነና ማዳና፤ እ ካሰ ነ ደኡዋ ዛሪድ ዎይታና።
JOB 8:7 ነ ዶመꬃይ ጉꬃ ዳንኮካ፥ ነ ዉርሰꬃይ ዳሮ አꬍድ ዳራና።
JOB 8:8 ካሰ የለታ አነ ኦይቻ፤ ኑ ማይዛት አይ ታማርዳኮ ፕልጋዳ ደማ።
JOB 8:9 ኑኒ ዝነ ናይታ አይባካ ኤሮኮ፤ ኑ ሀ ሳአን ደእያ ላይꬃይ ኩያ መላ።
JOB 8:10 ኤንቲ ነና ታማርሰይነ ነዉ ኦደይ፥ ባንታ ዎዛናን ዎꬅዳባፐ ግደነዬ?
JOB 8:11 ጫረይ ባይና በሳን ፓልክ ዶላናዉ ዳንዳኢ? ሃꬅ ባይና በሳን ማይረይ ጭልአናዉ ዳንዳኢ?
JOB 8:12 ቡሮ ድጭድ ቃንፀቶና ደእሸ፥ ጭልኦ ማታፐካ ኤሶን መሌስ።
JOB 8:13 ፆሳ ዶግያ አሳ ኡባ ዉርሰꬃይ ሄሳ መላ፤ ፆሰ ኤሮና አሳ ኡፋይሳይ ꬋያና።
JOB 8:14 እ አማነትያባይ መቅያባ፤ እ ጬቀትያባይካ ሻንጎ ሃዳ መላ።
JOB 8:15 እ ባ ሻንጎ ሃዳ ቦላ ዘምፓና፥ ሽን ኤቀና፤ እ እያ ኦይካና፥ ሽን ዱፅ ዎꬋና።
JOB 8:16 እ አዋ ዎደ ሃ ኡይድ ጭልእያ አታክልተ መላ፤ ባ ፃጱዋ ቢታ ኡባን የድዳ ምꬃ መላ።
JOB 8:17 ባ ፃጱዋ ኬላን የዴስ፤ ግታ ሹቻ ቦላ ባ ፃጱዋ ፃፄስ።
JOB 8:18 ሽን እ ባ በሳፈ ሾደትኮ፥ ሄ በሳይ፥ ‘ታ ነና በአብከ’ ያጋና።
JOB 8:19 ኢታ አሳታ ኡፋይሳይ ሄሳ መላ፤ ሀራት ይድ ኤንታ በሳ ኦይካና።
JOB 8:20 “ፆሳይ ቦረይ ባይና አሳ የግ አገና፤ ኢታ ኦይሳታ ማደና።
JOB 8:21 እ ዛሪድ ነና ሚቻናነ እልልሳና።
JOB 8:22 ነና እፀይሳት ዬላ ማአና፤ ኢታታ ኬꬃይ ꬋያና” ያግስ።
JOB 9:1 እዮብ ዛሪድ፥
JOB 9:2 “ኤ፥ ህንተ ገይስ ቱማ ግደይሳ ታ ኤራይስ፤ ሽን አስ ፆሳ ስንꬃን ዋንድ ፅሎ ግዳናዉ ዳንዳኢ?
JOB 9:3 እያራ ኦን ፓላማናዉ ዳንዳኢ? እ ኦይችያ ሙኩሉ ኦይሻታፐ እሱዋካ ዛራናዉ ዳንዳኤና።
JOB 9:4 ፆሳይ ጭንጫነ ዎልቃማ፤ እያራ ኤቀታናዉ ዳንዳኤይ ኦንካ ባዋ።
JOB 9:5 ቆፖና ደእሽን ደረታ ኤንታ በሳፈ ድጌስ፤ ባ ሀንቁዋን አꬅድ የጌስ።
JOB 9:6 እ ቢታ እያ በሳፈ ቃꬄስ፤ ቢታ ቱቀታካ ይጌስ።
JOB 9:7 አዋይ ከዮና መላ ኦꬄስ፤ ፆልንቶት ፖኦና መላ ድጌስ።
JOB 9:8 እ ባርካ ሳሎታ ምጭስ፤ አባ ሆቢያ ቦላ ሄመቴስ።
JOB 9:9 ፆሳይ ቢረ፥ ኦርዮና፥ ፕላድሳ ጌተትያ ፆልንቶታነ፥ ዱገሀ ባጋራ ደእያ ፆልንቶ ኮጬታ መꬍስ።
JOB 9:10 እ አስ ፕልግድ ኤራናዉ ዳንዳኦና ግታባታ፥ ታይበቶና ማላልስያባታ ኦꬄስ።
JOB 9:11 እ ታ ማታራ አꬍያ ዎደ ታ በአናዉ ዳንዳእከ፤ እ ታኮ ሺቅያ ዎደ ኤራናዉ ዳንዳእከ።
JOB 9:12 እ ቦንቅኮ ድጋናዉ ዳንዳኤይ ኦኔ? ‘ዋታይ?’ ያግድ እያ ኦይቻናይ ኦኔ?
JOB 9:13 ፆሳይ ባ ሀንቁዋ ተቀና፤ ራኣባ ጌተትያ ዶአ ማደይሳት እያ ቶሁዋ ጋርሳን ኩንዶሶና።
JOB 9:14 ያትን፥ እያ ኦይሻ ዛራናዉ፥ እያራ ሞተታናዉ ታኒ ኦኔ?
JOB 9:15 ታኒ ፅሎ ግድኮካ፥ ፕርድያ ፆሳይ ታና ማራናዳ ዎሳናፐ አትሽን፥ ታኒ እያዉ ዛሮ እምከ።
JOB 9:16 ታ እያ ፄግን፥ እ ታዉ ኮያኮካ፥ ታና ስኤስ ጋዳ አማንከ።
JOB 9:17 ታና ጎተን መንረꬄስ፤ ጋሶይ ባይና ታ ማዱንꬃ ዳርሴስ።
JOB 9:18 ታና ሸምፖ ድጌስ፤ ታ ደኡዋ ጫመꬄስ።
JOB 9:19 ዎልቃባ ግድኮ፥ እ ዎልቃማ። ፅሎ ፕርዳባ ግድኮ፥ እያ ፕርዳ ኬꬅ ሺሻናይ ኦኔ?
JOB 9:20 ታኒ ታና ፅሎ ጊኮካ ታ ዶናይ ታና ባላ ከሴስ፤ ታናን ቦረይ ባዋ ታ ጊኮካ ታ እንፃርሳይ ታና ጌላ ከሴስ።
JOB 9:21 ታኒ ቦረይ ባይና አስ ግድኮካ ታባ ቆፕከ፤ ታኒ ታ ደኡዋ ካꬋይስ።
JOB 9:22 ፆሳይ ቦረይ ባይናይሳነ ኢታ እስፈ ꬋይሴስ፤ ታ ዱማተꬅ ባዋ ገይ ሄሳ ግሾሳ።
JOB 9:23 ጋዶይ ገልድ አሳ ቆፖና ዎꬍያ ዎደ፥ እ ፅሎ አሳ ዋያን ሚጬስ።
JOB 9:24 ሀ ሳአይ ኢታ አሳ ኩሸን ዎꬍያ ዎደ፥ እ ፕርደይሳታ አይፍያ ጎዜስ። ሄሳ ኡባ ኦይ እያ ግዶና እፅኮ፥ ሀር ኦኔ?
JOB 9:25 ታ ደኦ ላይꬃት ዎፅያ ኡራፐ አꬍድ ኤለሶሶና፤ ኤንቲ ሎኦባ በኦና ፕራꬍድ ꬋዮሶና።
JOB 9:26 ታ ደኦ ላይꬃይ ፓልካ ዎጎሎዳ ዎፄስ፤ አርጋንꬅ ምያባ ኦይካናዉ ሳሎፐ ዱገ ፓለይሳዳ ፓለስ።
JOB 9:27 ‘ታ ዙዙንꬃ ዶጋና፤ ሶምኦ ቱከይሳ አጋዳ ፖእሳና ግያኮ፥’
JOB 9:28 ኔኒ ታና ጌሽ ጎናይሳ ታኒ ኤርያ ግሾ፥ ታና ጋካና ዋየ ኡባ ታኒ ያያይስ።
JOB 9:29 ያትን፥ ታኒ ባላ ግደይስ አቶና እፅኮ፥ ጮ መላ አይስ ዳቡራይና?
JOB 9:30 ታኒ ታ አሳተꬃ ሀር አቶሽን ሳሙናን ሜጨትያኮካ፥ ታ ኩሽያ ዱማባራ ሜጨትያኮካ፥
JOB 9:31 ታ ማኦይካ ታና ሻተታና ጋካናዉ፥ ኔኒ ታና ኡርቃ ኦላን ሆላና።
JOB 9:32 ታ እያዉ ዛሮ እማናዉ ፆሳይ ታ መላ አሰ ግደና፤ ግድያኮ ኑ ናምአይ ዳይና ስንꬃን ኤቃና።
JOB 9:33 ሽን ኑ ናምኣ ቦላ ባ ኩሸ ዎꬅድ፥ ኑና ስገꬅያ አስ ኑ ግዶን ደኤረነ!
JOB 9:34 እያ ቴሞይ ታና ዳጋንꬆና መላ፥ እስ አስ ፆሳ ፃምኣ ታፐ ድገረነሽን!
JOB 9:35 ያንኮ፥ ታኒ እያዉ ያዮና ኦደታና፤ ሽን ሀእ ታኒ ዳንዳእከ።
JOB 10:1 ታና ዱስ ሻትስ! ሄሳ ግሾ፥ ታ ዙዙማናፐ አትሽን፥ ስእ ጊከ፤ ታ ሸምፑዋ ሴላ ከሳና።
JOB 10:2 ታኒ ፆሳኮ ሀይሳዳ ጋና፤ ታ ባላ ታዉ ኦዳፐ አትሽን፥ ታ ቦላ ፕርዶፋ።
JOB 10:3 ኔኒ ኢታታ ቆፋ ኡፋይሳን ኤካሸ፥ ታና ኡንኤꬃናዉ በሲ? ነ ኩሸን መꬍዳ ኡራ ካይስ ዎጌ?
JOB 10:4 ነ አይፈይ አሳ አይፈ መለዬ? ኔኒ አስ ፄለይሳዳ ፄላዬ?
JOB 10:5 ነ ደኦ ላይꬃይ አሳ ደኦ ላይꬃ መለዬ?
JOB 10:6 ያትን፥ ታ ባላ አይስ ኮያይ? ታ ናጋራ አይስ ካላይ?
JOB 10:7 ታኒ ባላ ግዶናይሳነ ነ ኩሸፐ ታና ኦንካ አሻናዉ ዳንዳኦናይሳ ነ ኤራሳ።
JOB 10:8 ታና ነ ኩሸይ ጊግስድ መꬍስ፤ ሽን ሀእ ሄ ኩሸይ ስሚድ ታና መንꬄስ።
JOB 10:9 ኔኒ ታና ቢታፈ መꬍዳይሳ ሀሳያ ያትን፥ ሀእ ታና ዛራዳ ባና ኦꬃናዉ ኮያይ?
JOB 10:10 ታና ማꬃዳ ታ አየ ኡሎን ትግዳይነ መቃ ማꬃዳ እርክስዳይ ነና ግድኪ?
JOB 10:11 ኔኒ ታና አሾነ ጎጋ ማይዛዳሳ፤ ሻያንነ መቀꬃን ዋፃዳሳ።
JOB 10:12 ኔኒ ታዉ ደኦነ መርና ሲቆ እማዳሳ፤ ነ ናጎይ ታና ፓፃ ዎꬅስ።
JOB 10:13 ሽን ኔኒ ሄ ዎደፐ ዶማዳ ነ ዎዛናን ታና ቆሀናዉ ቆፓዳ ደኤይሳ ታ ኤራይስ።
JOB 10:14 ታ ናቁዋ ነ በኣሳ፤ ታ ናጋራ ኦꬅኮ ሴሮና አꬋካ።
JOB 10:15 ታኒ ባልኮካ ታና አየ! ታ ፅሎ ግድኮካ ጬቀታናዉ ዳንዳእከ። ነ ታና ዬላ ማይዛዳሳ፤ ዋየን ዎꬃዳሳ።
JOB 10:16 ታ ኦቶርኮ ታና ጋሞዳ ሻንካታዳ ኦይካሳ፤ ታና ቆሀናዉ ነ ማላልስያ ዎልቃ ዛራ ዛራ በሳሳ።
JOB 10:17 ኔኒ ታ ቦላ ኦራꬃ ማርካታ ኤሃሳ፤ ነ ሀንቁዋ ታ ቦላ ዳርሳሳ፤ ታና ኦላናዉ ኦራꬃ ኦላንቾታ ጊግሳሳ።
JOB 10:18 ያትን፥ ታና ታ አየ ኡሎፐ አይስ ከሳዲ? ኦንካ ታና በኦና ሀይቅዳኮ ታው ሎኦሽን!
JOB 10:19 ታኒ መቶና አትዳኮ፥ ዎይኮ ታ አየ ኡሎፐ ከያሸ ዱፎ ገልዳኮ ሎኦሽን!
JOB 10:20 ታ ጉꬃ ደኦ ላይꬃይ ዉሬስ ግደነዬ? ሀ ጉꬃ ላይꬃን ኡፋይታና መላ ታና አጋርክ!
JOB 10:21 ታ ስሞና በሳ ቦና ደእሽን፥ ሌልዳ ꬉማ ቢታ ጋኮና ደእሽን፥
JOB 10:22 እያ ፖኦይ ꬉማ ግድዳ በሳነ ሀይቆይ ካዎትዳ በሳ፥ ማር ባይና በሳነ ሌልዳ ꬉማ ቢታ ቦና ደእሽን፥ ታና አጋርክ!”
JOB 11:1 ናእማ ቢታፈ ይዳ ሶፋር ዛሪድ፥
JOB 11:2 “ሀ ሀዳ ሃሳያ ኡባስ ዛሮ እምያ አስ ባዌ? ዎይኮ ሄሳ ኦድዳ ኡራይ ቱማ ግዳናዉ ዳንዳኢ?
JOB 11:3 ነ ሀዳ ኦዳይ አሰ ስእ ኦꬅያ ዳኒ? ነ ቀልቅስያ ዎደ ነና ሴርያ አስ ባዌ?
JOB 11:4 ኔኒ፥ ‘ታ ትምርተይ ቱማ፤ ታኒ ፆሳ ስንꬃን ጌሽ’ ” ጋሳ።
JOB 11:5 ፆሳይ ነዉ ኦድያኮ፥ ባ ዶና ዶይድ ኦደትያኮ አይበ!
JOB 11:6 ጭንጫተꬃስ ዳሮ ኦገይ ደእያ ግሾ፥ ፆሳይ ነዉ ጭንጫተꬃ ፁራ ቆንጭስያኮ አይበ! ሄ ዎደ ነ ሴረትዳ ሴራይ፥ በሰይሳፈ ጉꬃ ግደይሳ ኤራናሽን።
JOB 11:7 “ጪሞ ግድዳ ፆሳ ፁራ ኤራናዉ ዳንዳአይ? ዎይኮ ኡባ ዳንዳእያ ፆሳባ ፕልጋዳ ጋካናዉ ዳንዳአይ?
JOB 11:8 ኤንቲ ሳሎታፐ ꬎቃ፤ ነ አይ ኦꬃናዉ ዳንዳአይ? ኤንቲ ስኦለፐካ አꬍዳ ጪሞ፤ ነ ኤራናዉ ዳንዳአካ።
JOB 11:9 ፆሳ ጭንጫተꬃይ ቢታፈ ዳልጌስ፤ አባፈካ አꬍድ ጪሞቴስ።
JOB 11:10 እ ይድ ነና ቃሾ ኬꬃን የግያኮ፥ ፕርዳ ኬꬅ ሺሽኮ፥ እያ ድጋናይ ኦኔ?
JOB 11:11 ፆሳይ ፓꬆና አሳ ኤሬስ፤ ኢታባ በእያ ዎደ ስእ ግድ አገና።
JOB 11:12 ኤያ አስ ጭንጫ ግደይሳፈ፥ ዎራ ሀረይ አሰ ግድድ የለታናይስ ማታ።
JOB 11:13 ኔኒ ነ ዎዛና ሱረ ኦꬅኮ፥ ነ ኩሽያ እያኮ ምጭኮ፥
JOB 11:14 ናጋራ ነ ኩሸፐ ሃስኮ፥ ነ ኬꬃን ኢታባይ ዶና መላ ኦꬅኮ፥
JOB 11:15 ሄ ዎደ ኔኒ ꬎቁ ጋዳ ዬል ባይና ኡባባ በአን፤ ያሽ ባይና ምናዳ ኤቃና።
JOB 11:16 ኔኒ ነ መቱዋ ኡባ ዶጋና፤ ጎግድ አꬍዳ ድኦዳ ዛራ ሀሳያካ።
JOB 11:17 ነ ደኦይ ሴታ ጋላሳ አዋፐ አꬍድ ፖአና፤ ነ ደኡዋ ꬉማይ ዎንታ ፃልቀዳ ፖአና።
JOB 11:18 ነዉ ኡፋይስ ደእያ ግሾ ኔኒ ህርጎና ዳና፤ ፆሳይ ነና ናግያ ግሾ ዎፑ ጋዳ ዳና።
JOB 11:19 ኔኒ ያሽ ባይና ꬍስካና፤ ዳሮ አሳይ ነናን ናሸታናዉ ኮያና።
JOB 11:20 ሽን ኢታት መቶ በእሸ አኬኮኮና፤ እያፐ ባቃትድ አታናዉ ዳንዳኦኮና፤ ኤንታ ኡፋይሳይ ሀይቆ” ያግስ።
JOB 12:1 እዮብ ሀይሳዳ ያግድ ዛርስ።
JOB 12:2 ኤ፥ ህንተ ቱማካ አሰ፤ ጭንጫተꬅ ህንተራ ሀይቃና!
JOB 12:3 ሽን ታካ ህንተዳ አኬክ ደእያ አስ፤ ታኒ ህንተፈ ጉፅከ፤ ሀ ህንተ ኦደትዳባ ኤሮናይ ኦኔ?
JOB 12:4 ታኒ ፆሳ ዎስን እ ታና ስእዳ አስ ግድኮካ፥ ሀእ ታ ላገታስ ሚቻስ አታስ፤ ታኒ ፅሎነ ቦረይ ባይና አስ ግድኮካ ቀልቅሰꬃስ አታስ።
JOB 12:5 መቶትድ በእቦና አስ ሀራ አሳ መቶን ሚጬስ፤ ህንተ ኩንዳናዉ ጋንድጋርያ አስ ሱጌታ።
JOB 12:6 ቦንቀይሳታ ኬꬃይ ሳሮ ደኤስ፤ ፆሳ ይሎየይሳት ህርግ ባይና ደኦሶና፤ ባንታ ዎልቃ ባንታዉ ፆሰ ኦꬆሶና።
JOB 12:7 አነ መሄታ ኦይቻ፤ ኤንቲ ነና ታማርሳና፤ ዎይኮ ሳሎ ካፎታ ኦይቻ፤ ኤንቲ ነዉ ኦዳና።
JOB 12:8 ዎይኮ ሳአ መተꬃታስ ኦዳ፤ ኤንቲ ነና ታማርሳና፤ አባ ሞሎትካ ነዉ ኦዳና።
JOB 12:9 ጎዳ ኩሸይ ሄሳ ኦꬅዳይሳ ኤሮናይ ኦኔ?
JOB 12:10 ደኦይ ደእያ መተꬅ ኡባይነ አሳ ሸምፖይ እያ ኩሸና።
JOB 12:11 እንፃርስ ካꬅ ሻክድ ኤረይሳዳ፥ ሀይꬅ ኦዳ ሻክድ ኤረነዬ?
JOB 12:12 ጭንጫተꬅ ዶንꬒዳ አሳ ማታን ደነዬ? ዳሮ ላይꬅ ደእዳ አሳ ማታን አኬክ በንተነዬ?
JOB 12:13 ጭንጫተꬅነ ዎልቅ ፆሳሳ፤ ዞረይነ አኬክ እያ ማታን በንቴስ።
JOB 12:14 ፆሳይ ላልዳባ ዛር ኬፃናይ ኦኔ? እ ቃችዳ ኡራ ብርሻናይ ኦኔ?
JOB 12:15 ፆሳይ እራ ተቅኮ ቢታይ መሌስ፤ እራ ቡክስኮ ድኦይ ቢታ ꬋይሴስ።
JOB 12:16 ምኖተꬅነ ፆኖይ ፆሳሳ፤ ጭመተይስነ ጭመይስ ናምአይካ እያፐ ጋርሳን ደኤስ።
JOB 12:17 ዞረይሳታፐ ጭንጫተꬃ ቃር ኤኬስ፤ ሀላቃታካ ኤያ ከሴስ።
JOB 12:18 እ ካዎታ አራታፐ ዎꬅድ አይለ ከሴስ።
JOB 12:19 ካህነታፐ ቦንቹዋ ቃር ኤኬስ፤ አዱሳ ዎደ ፃጶ የድዳ ዎልቃማታ ሽር የጌስ።
JOB 12:20 አማነትዳ ዞረይሳታ ስእ ኦꬄስ፤ ጭማታፐካ አኬካ የግሴስ።
JOB 12:21 ቦንቸትዳይሳታ ካዉሼስ፤ ምኖታ ዳንጮ ብልሴስ።
JOB 12:22 ꬉማን ደእያ ፁራ ቆንጨ ከሴስ፤ ሌልዳ ꬉማ ፖኦ ከሴስ።
JOB 12:23 ፆሳይ ካዎተꬃታ ግታዬስ፤ ዛሪድ ꬋይሴስ፤ ካዎተꬃታ ዳልግሴስ፤ ዛሪድ ላሌስ።
JOB 12:24 አላምያ ካዎታ አኬካ ድጌስ፤ ኦገይ ባይና መላ ቢታን ቶይላታና መላ ኦꬄስ።
JOB 12:25 ፖኦይ ባይና ꬉማን ታታፎሶና፤ ማꬆትዳ አሳዳ ጋንድጋሮሶና።
JOB 13:1 ሀ ኡባ ታ አይፈይ በእስ፤ ታ ሀይꬃይ ስእድ አኬክስ።
JOB 13:2 ህንተ ኤረይሳ ታካ ኤራይስ፤ ታኒ ህንተፈ ጉፅከ።
JOB 13:3 ሽን ታኒ ኡባ ዳንዳእያ ፆሳራ ኦደታናዉ ኮያይስ፤ ታኒ ታ መቱዋባ እያራ ሞተታናዉ አሞታይስ።
JOB 13:4 ሽን ህንተ ዎርዶን ካመይሳታ፤ ህንተ ኡባይካ ፓꬆና አክመታ።
JOB 13:5 ህንተ ስእ ግዳባ ግድያኮ፥ ጭንጫ ግድ በንታናሽን!
JOB 13:6 ሀእ ታ ሞቱዋ ስእተ፤ ታ ዶናፐ ከያ ፓላማ ሀይዝተ።
JOB 13:7 ህንተ ፆሳ ግሾ ዎርዶ ኦደቴቲ? እያ ግሾ ግድ ጭሞን ኦደቴቲ?
JOB 13:8 ህንተ እያ ማድያባይ ደኢ? ዎይኮ እያዉ ፃባቃ ኤቅድ ሞተተቲ?
JOB 13:9 እ ህንተና ፕልግ ፄልያኮ ህንተፈ ሎኦባ ደማኔ? ህንተ አሰ ጭመይሳዳ እያ ጭማናዉ ዳንዳኤቲ?
JOB 13:10 ህንተ ጌማን አሳ ሶምኦ በእድ ማድኮ፥ እ ቱማ ህንተና ሴራና።
JOB 13:11 እያ ቦንቾይ ህንተና ዳጋንኔ? እያ ቴማይ ህንተና ያሸኔ?
JOB 13:12 ህንተ ኦድዳ ሌምሶይ ብድንꬃ መላ ፓꬆናባ፤ ህንተ ሞቶይ ቢታፈ መትዳ ጎንዳለ መላ።
JOB 13:13 አነ ስእ ጊተ፤ ታ ኦደታና፤ ህዛፐ ሀንዳባይ ሀኖ።
JOB 13:14 ታኒ ታናተꬃ አይስ መቶን የግያና? ታ ደኡዋ አይስ ታ ኩሸን ኦይክያና?
JOB 13:15 ፆሳይ ታና ዎꬍኮካ ታኒ እያ ዳንዳአን ናጋና፤ ታኒ ታ መቱዋ እያ ስን ሺሻና።
JOB 13:16 ናጋራንቾ አስ እያ ስን ሺቃናዉ ዳንዳኦና ግሾ፤ ኦን ኤር ታ ፃላተꬃይ አቶተꬃስ ጋሶ ግዳናዉ ዳንዳኤስ።
JOB 13:17 ታ ሃሳያ አኬክድ ስእተ፤ ታ ኦዳይ ህንተ ሀይꬃን ገሎ።
JOB 13:18 ሀእ ታኒ ታ መቱዋ ኤካ ሺቃስ፤ እ ታዉ ፕርዳናይሳ ኤራይስ።
JOB 13:19 ታና ሞታና አስ ደኢ? ደእኮ ታኒ ስእ ጋዳ ሀይቃና።
JOB 13:20 ፆሳዉ ነ ታዉ ሀ ናምኡባታ ኦꬃ፤ ያትኮ ታ ነ ስንꬃፈ ጌምከ።
JOB 13:21 ነ ሴራ ኩሽያ ታፐ ደንꬃ፤ ታና ዳጋንይሳ አጋ።
JOB 13:22 ሄሳፈ ጉየ፥ ታና ፄጋ፤ ታ ኮያና፤ ዎይኮ ታ ኦዳና፥ ነ ታዉ ዛራ።
JOB 13:23 ታ ባላይነ ናጋራይ አፑኔ? አነ ታ ናቁዋነ ታ ናጋራ ታና በሳ።
JOB 13:24 ኔኒ አይስ ነ ሶምኡዋ ታፐ ገንꬃይ? ነ ሞርከዳ አይስ ታና ታይባይ?
JOB 13:25 ጫርኮይ ኤፍያ ካልያ አይስ ኡንኤꬃይ? መልዳ ፑኑዋ አይስ የደꬃይ?
JOB 13:26 ኔኒ ታ ቦላ ፃፍዳ ሞቶይ ጫሞ፤ ታ ናአተꬃ ባላካ አጋባካ።
JOB 13:27 ኔኒ ታ ቶሁዋ ዱፃዳሳ፤ ታ ታንጉዋ ኡባ ዎቻሳ፤ ታ ቶሆይ የꬍያሱዋ ካላሳ።
JOB 13:28 ሄሳ ግሾ፥ ታኒ ዎቅዳ ምꬃዳ፤ ብል ምዳ አፍላዳ ዉራይስ።
JOB 14:1 “ማጫሳፐ የለትዳ አሳስ ላይꬅ ቃንꬅ፤ እካ ቃስ መቶን ኩምስ።
JOB 14:2 ጪሻዳ በንትድ ኤለስድ ቆቆፈቴስ፤ ኩያዳ ጋምኦና ኤሶን አꬌስ።
JOB 14:3 ያትን፥ ኔኒ ሄሳ መላ አስ ካላዬ? ፕርዳስ ነ ስን ሺሻዬ?
JOB 14:4 ቱናባፐ ጌሻባ ከሳናዉ ዳንዳኤይ ኦኔ? ኦንካ ባዋ።
JOB 14:5 አስ ዳና ላይꬃስ ዛው ደኤስ፤ እ ዳና አጌና ኔኒ ታይባ ዎꬃዳሳ፤ ኔኒ ዎꬅዳ ዛዋፐ አይ ኦንካ ባዋ።
JOB 14:6 ኡነ ኦꬅያ አስ ባ ኦሱዋ ፖልድ ሸምፐይሳዳ፥ እ ሸምፓና መላ ነ አይፍያ እያፐ ደንꬃዳ እያ አጋጋ።
JOB 14:7 ቃንፀትዳ ምꬃስ ኡፋይስ ደኤስ፤ ዛሪድ አጬስ፤ ኦራꬃ ታሸ ከስድ ድጬስ።
JOB 14:8 ምꬃ ፃጶይ ቢታ ጋርሳን ጭምኮካ፥ ዱሩማይ ቢታን ዎቅኮካ፥
JOB 14:9 ሃ ደምድ አጬስ፤ ኦራꬃ ዶላዳ ታሸ ከሴስ።
JOB 14:10 ሽን አስ ሀይቄስ፤ ሄስ እያዉ ዉርሰꬅ፤ እያ ሸምፖይ ከያፐ ጉየ እ አዉን ደኢ?
JOB 14:11 አባ ሃꬅ መለይሳዳ፥ ሻፋ ሃꬅ ዉረይሳዳ፥
JOB 14:12 ሄሳዳ አስካ ሀይቄስ፤ ስሚድ ደንደና፤ ሳሎት አꬋና ጋካናዉ አስ ባርከና፤ ባ ꬍስኩዋፈካ ደንደና።
JOB 14:13 ኔኒ ታና ዱፎን ገንꬅዳኮ አይበ! ነ ሀንቆይ አꬋና ጋካናዉ ቆትዳኮ አይበ! ነ ታዉ ቃሚዳ ሄ ጋላስ ታና ሀሳይዳኮ አይበ!
JOB 14:14 አስ ሀይቅኮ ስሚድ ደኦን ዳኔ? ታ ሸምፕያ ዎደይ ያና ጋካናዉ፥ ሀ መቶ ዎደ ኡባ ዳንዳአን ናጋና።
JOB 14:15 ሄ ዎደ ነ ታና ፄጋና ታካ ኮያና፤ ነ መꬍዳ ታና በአናዉ ላሞትያ ዎደይ ያና።
JOB 14:16 ሄ ዎደ ኔኒ ቱማ ታ ታንጉዋ ዎቻና፤ ሽን ታ ናጋራ ካላካ።
JOB 14:17 ታ ባላይ ኦጎሮን ዪጨታና፤ ታ ናጋራ ኔኒ ካማና።
JOB 14:18 ዙም ዎደይሳዳ፥ ዛል ꬎቃለተይሳዳ፥
JOB 14:19 ሃꬅ ሹቻ ፃጶ ቦከይሳዳ፥ ድኦይ ቢታ ሜጭድ ኤፈይሳዳ፥ ኔኒ አሳ ኡፋይስ ꬋይሳሳ።
JOB 14:20 ኔኒ እያ መርናዉ ፆናሳ፤ እ ስመና፤ እያ ማላ ላማዳ ነ ስንꬃፈ ድጋሳ።
JOB 14:21 እያ ናይት ቦንቸትኮ እ ኤረና፤ ኤንቲ ካዉይኮ እ በኤና።
JOB 14:22 ሽን እያ አሳተꬃ ሴላይ እያ ፃላላስ ስኤቴስ፤ እ ባ ፃላላስ ዬኬስ” ያግስ።
JOB 15:1 ተማና ቢታፈ ይዳ ኤልፋዝ ሀይሳዳ ያግስ፤
JOB 15:2 “ጭንጫ አስ ጫርኮዳ ኦይከቶናባ ኦዴቲ? ዎይኮ ዶሎሀ ባጋ ጫርኩዋን ባ ኡሉዋ ጮ ኩንꬂ?
JOB 15:3 ፓꬆና ቃላን ዙዙሚ? ዎይኮ ጋተይ ባይና ኦዳን ሞተቲ?
JOB 15:4 ኔኒ ፆሳስ ያየይሳ አጋዳሳ፤ ሀራት ፆሳ ጎይኖና መላ ꬉባዳሳ።
JOB 15:5 ነ ኢታተꬃይ ነ ኦዳን ኤረቴስ፤ ሽን ነ ጭንጫ ኦዳይ ነና ገንꬄስ።
JOB 15:6 ነ ዶናይ ነ ቦላ ፕርዴስ ታና ግድከ፤ ነ እንፃርሳይ ነ ቦላ ማርካቴስ።
JOB 15:7 “አሳፐ ኮይሮ የለትዳይ ነኔ? ኔኒ ደረት መታናፐ ካሰ የለታዲ?
JOB 15:8 ኔኒ ፆሳ ፁራ ዱላታን ደአይ? አሳ ጭንጫተꬅ ነ ፃላላስ ደእዬ?
JOB 15:9 ኑኒ ኤሮናባይ ኔኒ ኤርያባይ አይቤ? ኑስ ጌምዳ ነዉ ቆንጭዳ አይባ ጭንጫተꬅ ደኢ?
JOB 15:10 ነ አዋፐ ባይራትያ አሳት፥ ጭምድ ፑሉምዳ አሳት ኑራ ደኦሶና።
JOB 15:11 “ፆሳይ ነዉ እምዳ ምንꬆይ ግደነዬ? ኑኒ ካሃማተꬃባ ኦድዳ ቃላይ ጉዬ?
JOB 15:12 ነ ዎዛናይ ነና አይስ ዎራ ኤፊ? ነ አይፈይ አይስ ደሬቅድ ፄሊ?
JOB 15:13 ያታዳ ኔኒ ፆሳ ቦላ ሀንቀታዳሳ፤ ኢታ ቃላ ነ ዶናፐ ከሳዳሳ።
JOB 15:14 አስ ፆሳ ስንꬃን ጌሽ ግዳናዉ ዳንዳኢ? ዎይኮ ማጫፈ የለትዳ አስ ፅሎ ግዳናዉ ዳንዳኢ?
JOB 15:15 ፆሳይ ባ ኪታንቾታን አማነተና፤ ሀር አቶሽን ሳሎት እያ ስንꬃን ጌሽ ግዶኮና።
JOB 15:16 ኢታነ ቱና ግድዳ አስ፥ ናጋራ ሃꬃዳ ኡያ አስ ዋንድ አማነታኔ?
JOB 15:17 “አነ ስአ፥ ቆንጭሳዳ ታ ነዉ ኦዳና፥ ታኒ በእዳባ ኡባ ነዉ ኦዳና።
JOB 15:18 ጭንጫት ባንታ አዋታፐ ኤክዳይሳ፥ ታ ነዉ ገንꬆና ኦዳና።
JOB 15:19 ቢታይ ኤንታ ፃላላስ እመትስ፤ ሀራ ቢታ አስ ኤንታራ ዋላከትቤና።
JOB 15:20 አሰ ኡንኤꬅሸ ደእያ ኢታ አስ፥ ባ ደኦ ላይꬃ ኡባን ዋየትሸ ደኤስ።
JOB 15:21 ዳጋንꬅያባይ እያ ሀይꬃን ስኤቴስ፤ እ ሳሮ ደአይስ ግሽን ꬋይሰይሳት እያ ቦላ ከያና።
JOB 15:22 ꬉማፐ ከስ ኤኮይ እያዉ ሀነና፤ እያ ቃዳይ ማሻን ꬋዮ።
JOB 15:23 እያ አሀይ አንኮ ቁማ ግዳና፤ ባዉ ꬉማ ጋላስ ማታትዳይሳ እ ኤሬስ።
JOB 15:24 መቶይነ ኡንእ እያ ቦላ ያና፤ ኦላናዉ ከይዳ ካዎ መላ እያ ቦላ ጎባና።
JOB 15:25 ሄስካ እ ባ ኩሽያ ፆሳ ቦላ ደንꬅዳ ግሾሳ፤ ኡባ ዳንዳእያ ፆሳ ቦላ ፃልዳ ግሾሳ።
JOB 15:26 እ ኤቀታናዉ ምኖነ ዳልጋ ጎንዳለ ኦይክስ፤ ኦቶሮን ፆሳኮ ሆርዶፌስ።
JOB 15:27 “እያ ክላሆይ ሙምዳ ግሾ፥ እያ ፄሳይ ኩምዳ ግሾ፥
JOB 15:28 እ ላለትዳ ካታማታን፥ ካይሳ ኬꬃንነ፥ ኩንዳናዉ ጋክዳ ኬꬃን ደኤስ።
JOB 15:29 እ ባ ዱረተꬃን ዳሮ ጋምኤና፤ እያ ዛዋይ አከና።
JOB 15:30 ꬉማፐ ከስ ኤከናዉ ዳንዳኤና፤ ታሽያ ታም ላብዳ ምꬃዳነ ጫርኮይ ጪሻ ቆቆፍዳ ምꬃዳ ግዳና።
JOB 15:31 ፓꬆናባን አማነትድ ባና ጭሞፎ፤ እያፐ አይኮካ ደሞና አታና።
JOB 15:32 ዎደይ ጋኮና እያ ኡባይ መልድ ታሸይካ አጮና ምꬃ መላ ግዳና።
JOB 15:33 እ ቴሮና ቃዉኤ ደእሸ ቆቆፈትያ ዎይነ መላ፤ ጪሻን ደእሸ ቆቆፈትያ ሻማሆ መላ።
JOB 15:34 ፆሳስ ያዮና አሳ ኮቻይ ꬋያና፤ ዎꬋፈን ኬፀትዳ ኬꬃይ ታማን ሜተታና።
JOB 15:35 ኤንቲ ኢታተꬅ ቃንꬃትድ መቶ የሎሶና፤ ኤንታ ኡሉዋን ገነይ ኩምስ” ያግስ።
JOB 16:1 እዮብ ሀይሳዳ ያግድ ዛርስ፤
JOB 16:2 “ታኒ ሄሳ መላ ሃሳያ ዳሮ ስአስ፤ ህንተ ምንꬆይ ታና ሳለꬅስ።
JOB 16:3 ጎእ ባይና ህንተ ኦዳስ ዉርሰꬅ ባዌ? ታራ ህንተና ሄሳዳ ፓላንꬅያ ጋሶይ አይቤ?
JOB 16:4 ህንተ ታ በሳን፥ ታኒ ህንተ በሳን ግድዳባ ግድያኮ፥ ታኒ ታ ሁጵያ ቃꬃሸ፥ ሀእ ህንተ ግያባ ኡባ ህንተ ቦላ ሎይꬃዳ ጋናሽን!
JOB 16:5 ታ ዞርያን ታ ህንተና ምንꬃናሽን! ታ ዶናፐ ከይያ ኦዳይ ህንተና ምንꬃናሽን!
JOB 16:6 “ሽን ታ ሃሳይኮካ ታ ሳሆይ ደጨና፤ ታ ስእ ጋዳ ዳንዳእኮካ ታፐ ክቸና።
JOB 16:7 አቤት ፆሳዉ፥ ነ ታና ታ አሳተꬃፈ ከሳዳሳ፤ ታ ኬꬃ አሳ ኡባ ꬋይሳዳሳ።
JOB 16:8 ሹቅዳ ታ ጎጋይ ታዉ ማርካ ግድስ፤ ታ ግልቃተꬃይ ታና ናጋራንቾ ከስስ።
JOB 16:9 ፆሳይ ሀንቀትድ ታ አሳተꬃ ቃንፀረꬅስ፤ ታና እፅድ ባ አቻ ታ ቦላ ጋርጭስ፤ ታ ሞርከይ ባ አይፍያ ታ ቦላ ከስስ።
JOB 16:10 አሳይ ታ ዩሾን ሺቅድ ታና ቀልቅስዶሶና፤ ታና ለቅድ ባቅዶሶና።
JOB 16:11 ፆሳይ ታና ናጋራቾታስ አꬅድ እሚስ፤ ኢታታ ኩሸን ታና የግስ።
JOB 16:12 ታኒ ካሰ ሳሮ ደአስ፤ ሽን ፆሳይ ታና ትንቸረꬅስ፤ ታ ምርጋጭያ ኦይክድ ታና መንረꬅስ፤ ጫቸ ሎህስያ ማላ ኦꬅስ።
JOB 16:13 እያ ቶራንቾት ባንታ ዶንገን ታና ተቅዶሶና፤ ቃይ ባይና ታ ክላሁዋ ሙፀረꬅዶሶና፤ ታ ጭያ ሳአን ጉስዶሶና።
JOB 16:14 እ ታና ዛር ዛር ማዱንፅስስ፤ ኦላንቾዳ ቶልድ ጫድስ።
JOB 16:15 ታኒ ካዮ ማኦ ማአስ፤ ታ ዎልቃይ ዉርን ባናን ኡታስ።
JOB 16:16 ዬሆን ታ ሶምኦይ ጋቢስ፤ ታ አይፈይ ዞእስ።
JOB 16:17 ሽን ሄ ኡባን ታ ባልዳባይ ባዋ፤ ታ ጌሻ ዎዛናን ዎሳይስ።
JOB 16:18 ቢታዉ፥ ታና ጋክዳ ቆሁዋ ካሞፋ፤ ታ ዋሶይ ሸምፕያ ሶ ደሞፎ።
JOB 16:19 ሄኮ ታ ማርካይ ሳሎና፤ ታ ፃባቃይ ቦላና።
JOB 16:20 ታ ላገት ታና ካꬍድ ፄሎሶና፤ ታ አይፈይ ፆሳ ስንꬃን አፉꬅ ትጌስ።
JOB 16:21 አሰ አሳራ ስገꬅያ አስ ደኤይሳዳ፥ ታና ፆሳራ ስገꬅያ አስ ደእዳባ ግድረነሽን።
JOB 16:22 ታ ላይꬃይ ዉራና ሀኔስ፤ ጉꬃ ዎደፐ ጉየ ታ ስሞና ሶ ባና።
JOB 17:1 ታ ሸምፖይ ከዬስ፤ ታ ላይꬃይ ቃምስ፤ ታዉ ዱፎይ ጊግስ።
JOB 17:2 ታ ቦላ ቀልቅሰይሳት ታ ዩሹዋን ደኦሶና፤ ኤንቲ ታና ይሎይዳ መላ አይስዶሶና።
JOB 17:3 አቤት ፆሳዉ፥ ኔፐ ሀር ታና ማደይ ባይና ግሾ፥ ነ ታዉ ዋሰ ግዳ።
JOB 17:4 ኤንቲ አኬኮና መላ ኤንታ ቆፋ ጎርዳዳሳ፤ ሄሳ ግሾ፥ ነ ኤንታዉ ፆኖ እሞፋ።
JOB 17:5 ሚሸ ደማና ግድ፥ ባ ላገታ አꬅድ እምያ ኡራ ናይታ አይፈይ ቆቃና።
JOB 17:6 ፆሳይ ታና አሳስ ሚቻስ አግስ፤ አስ ጩትሸ አꬍያ አስ ግዳስ።
JOB 17:7 ታ ዳሮ ካዮትዳ ግሾ ታ አይፈይ ኤይስ፤ ታ አሳተꬃይ ላፍድ ኤሾ ግድስ።
JOB 17:8 ኬሀ አሳት ታና በእድ ዳጋምዶሶና፤ ሱረት ፆሳ አማኖናይሳታ ቦላ ይሎትዶሶና።
JOB 17:9 ግዶሽን ፅሎት ባንታ ኦግያፐ ደሾኮና፤ ሱረት ዎልቃ ጉጅ ጉጅ ቦሶና።
JOB 17:10 ሽን ዛሪድ ኡባይ ታኮ ሃ ዪተ! ታ ህንተ ግዶፈ እስ ጭንጫ አስ ደምከ።
JOB 17:11 ታ ደኦ ላይꬃይ ዉርስ፤ ታ ሀልቾይ ሀዳ ግድስ፤ ታ ዎዛና አሞይ ጮ አትስ።
JOB 17:12 ታ ላገት ቃማ ጋላስ ጎሶና፤ ꬉማ በእሸ ‘ፖአና ሀኔስ’ ያጎሶና።
JOB 17:13 ታ ኡፋይሳን ናግያ ኬꬃይ ዱፎ፤ ታ ሂፃ ꬉማን ሂፃይስ።
JOB 17:14 ዱፎኮ፥ ‘ነ ታ አዋ’ ያጋና፤ ጉፁነኮ፥ ‘ነ ታ አዮ ዎይኮ ታ ምቾ’ ያጋና።
JOB 17:15 ያትን፥ ታዉ አይ ኡፋይስ ደኢ? ታዉ ኡፋይስ ግድያባ ኦን ደማናይ?
JOB 17:16 ታ ኡፋይሳይ ታራ ዱፎ ባንዴ? ኑ እስፈ ቢታን ዱገ ገላኔ?” ያግስ።
JOB 18:1 ሄሳፈ ጉየ፥ ሹሀ ቢታፈ ይዳ በልዳዶስ ዛሪድ፥
JOB 18:2 “እዮባ፥ ነ ኦዳስ ዉርሰꬅ ባዌ? አነ አኬካ፤ ኑ ኦድያባ ስአ።
JOB 18:3 ነ ኑና አይስ ሚዝ ኦꬃይ? አይስ ኑና ቱለ ከሳይ?
JOB 18:4 ነ ሀንቀታዳ ነና ቆሃሳ፤ ነ ሀንቁዋን ቢታይ ካሎ አታኔ? ዎይኮ ዛላይ ባ በሳፈ ቃፀኔ?
JOB 18:5 ናጋራንቾታ ፆምፐይ ቶአና፤ እያ ታማ ላጮይ ꬋያና።
JOB 18:6 ኤንታ ኬꬃን ደእያ ፆምፐይ ꬋያና፤ ኤንታ ፖኦይካ ꬉማና።
JOB 18:7 እ ታንግያ ታንጎይ ቃሜስ፤ እያ ኢታ ቆፋይ እያ ዛሪድ ሜስ።
JOB 18:8 እያ ሄመꬃይ እያ ፅሄን ገልሴስ፤ እያ ቶሆት ግተታና።
JOB 18:9 ፅሄይ እያ ግንደ ኦይካና፤ ዲዝ እያ ቃፆ ድጋና።
JOB 18:10 ዩርደ ዎዶሮይ ሳአን እያዉ ጌም ኡቴስ፤ እ ሄመትያ ኦግያን ግተይ ደኤስ።
JOB 18:11 ዳጋም እያ ተቅድ ኦይኬስ፤ እያ ጉየራ ካልድ እያ የደꬄስ።
JOB 18:12 እያ ዎልቃ ኮሽ ዉርስስ፤ ꬋዮይ እያ ምየን ናጌስ።
JOB 18:13 ሀርገይ እያ ላፈꬄስ፤ ሀይቆይ እያ ሞክድ ኤኬስ።
JOB 18:14 ህርግ ባይና ደእያ ባ ኬꬃፈ ጎደቴስ፤ ኤንቲ እያ ሀይቆ ጌተትያ ካዋኮ ኤፎሶና።
JOB 18:15 እያ ኬꬃይ ታማን ኦይከታና፤ እ ደእያሱዋን ዲነይ ላለታና።
JOB 18:16 ጋርሳራ ፃጶይ መላና፤ ቦላራ ሀይꬅ ቆቆፈታና።
JOB 18:17 እያ ቆፕያ አስ ቢታፈ ꬋያና፤ እያ ሱንꬃይ ሳአን ሀሳየቶና አታና።
JOB 18:18 እ ፖኦፐ ꬉማን ጎደታና፤ አላምያፐ ꬋያና።
JOB 18:19 እያዉ ናእ ዎይኮ ኮች ꬋያና፤ እ ደእዳ በሳን እስ አስ ፓፃ አተና።
JOB 18:20 ዉሎሀ ባጋ አሳይ እያ ጋክዳ መቱዋን ዳጋምዶሶና፤ ዶሎሀ ባጋ አሳይ ያሻን ኮኮርዶሶና።
JOB 18:21 ኢታ አሳ ዉርሰꬃይ አዉደካ ሄሳ መላ፤ ፆሳ ኤሮና አሳ ቃዳይ ሄሳ መላ” ያግስ።
JOB 19:1 እዮብ ዛሪድ ሀይሳዳ ያግስ፤
JOB 19:2 ህንተ ታና አዉደ ጋካናዉ ማዱንፅሴቲ? አዉደ ጋካናዉ ህንተ ቃላን ታና ጫደቲ?
JOB 19:3 ህንተ ታና ታሙ ቶሆ ጫይደታ፤ ታና ካዉሽሸ ዬላተከታ።
JOB 19:4 ቱማ ታ ባልዳባ ግድኮ፥ ታ ባላይ ታና ኦይቻና።
JOB 19:5 ህንተ ህንተና ꬎቁ ꬎቁ ኦꬅድ፥ ታ ካዉሻ ታና ሞታናዉ ጎኤትኮ፥
JOB 19:6 ሀ መቱዋ ታ ቦላ ኤህዳይ ፆሰ ግደይሳነ ባ ግትያን ታና ገልስዳይ እያ ግደይሳ ኤርተ።
JOB 19:7 ታ ቆሄታስ ጋዳ ዋስን፥ ታና አለይ ባዋ፤ ታ ቃላ ꬎቁ ኦꬃዳ ዋስንካ ታና ስኤይ ባዋ።
JOB 19:8 ታ ካንꬃዳ ቦናዳ ፆሳይ ታ ኦግያ ድርስ፤ ታ ሄመትያ ኦግያ ꬉማን ጎርድስ።
JOB 19:9 ታ ቦንቹዋ ታፐ ቃርስ፤ ታ ካላቻ ታ ሁጰፐ ኤክስ።
JOB 19:10 እ ታና መንረꬅ የግስ፤ ታ ኡፋይሳ ፃጶራ ሾደትዳ ምꬃ መላ ኦꬅስ።
JOB 19:11 እያ ሀንቆይ ታ ቦላ ኤፅ ከይስ፤ እ ታና ሞርከዳ ታይቤስ።
JOB 19:12 ታና ኦላናዉ ባ ቶራንቾታ ኪቴስ፤ ኤንቲ ታና ኦላናዉ ሚፃ ኬፅድ፥ ታ ዱንካንያ ዩሹዋን ኡትዶሶና።
JOB 19:13 ፆሳይ ታ እሻታ ታፐ ሃስስ፤ ታና ኤረይሳት ታዉ አላጋ ግድዶሶና።
JOB 19:14 ታ ዳቦት ታፐ ሃክዶሶና፤ ታ ላገት ታና ዶግዶሶና።
JOB 19:15 ታ ሶን ሞከትያ እማꬃት ታና ዶግዶሶና፤ ታ ማጫ አይለት ታና ኦገ አሳዳ ፄልዶሶና።
JOB 19:16 ታ አይልያ ታ ፄግን ታዉ ኮየና፤ ታ ዎስን ታዉ ኤሮ ጌና።
JOB 19:17 ታ ማችያ ታ ዶና ፔኑዋ ሻተታሱ፤ ታ እሻት ታና ኡፍዶሶና።
JOB 19:18 ሀር አቶሽን ጉꬃ ናይት ታና ካꬎኦሶና፤ ታና በእድ ለቆሶና።
JOB 19:19 ታ ማታ ላገት ኡባይ ታና ኡፎሶና፤ ታ ዶሰይሳት ታዉ ዞኮ ዛርዶሶና።
JOB 19:20 ታ መቀꬃይ ታ ጎጋራ ኦይከትስ፤ ታኒ ሀይቃ ክቻዳ አታስ።
JOB 19:21 ታ ላገቶ፥ ፆሳ ኩሸይ ታና ደችዳ ግሾ፥ ታዉ ቃተርከት።
JOB 19:22 ፆሳይ ታና የደይሳዳ፥ ህንተ ታና አይስ የደꬄቲ? ሀእ ጋካናዉ ህንተ ታና ዋይስዳይስ ግደኔ?
JOB 19:23 “ሀእ ጋካናዉ ታ ኦደትዳ ቃላይ ማዝጋበትዳኮ፥ ማፃፋን ፃፈትዳኮ ታ ዶሳይስ ሽን።
JOB 19:24 መርናዉ ዳና መላ ማርሳንነ እርሳሰን ዛላ ቦላ ዎጨትድ ፃፈትዳ ግዴረነ!
JOB 19:25 ታና ዎዝዳይስ ደኦን ደኤይሳነ ዉርሰꬃን ቢታ ቦላ እ ኤቃናይሳ ታ ኤራይስ።
JOB 19:26 ታ ጎጋይ ሜተትድ ዉርኮካ፥ ታኒ ታ አሹዋፐ ሻከታዳ ፆሳ በአናይሳ ኤራይስ።
JOB 19:27 ሀራ አስ ግዶና ታኒ ታ ሁጰን፥ ታ አይፈን እያ በአና፤ ታ ዎዛናይ ሄ ቃማ ላሞቴስ።
JOB 19:28 “ሀ መቱዋስ ጋሶይ እያ፥ ኑ እያ ዋት የደꬅኖ ግድ ህንተ ቆፕያባ ግድኮ፥
JOB 19:29 ማሻስ ያይተ! ፆሳ ሀንቆይ ማሻራ ያና፤ ፕርድ ደኤይሳ ኤርተ” ያግስ።
JOB 20:1 ናእማ ቢታ አስ ግድዳ ሶፋር ሀይሳዳ ያግድ ዛርስ፤
JOB 20:2 “ነ ኦዳይ ታና ላንጭስዳ ግሾ፥ ታ ኤለሳዳ ነ ኦዳስ ዛሮ እማና።
JOB 20:3 ነ ኦዳይ ታ ቦንቹዋ ቃርያ ግሾ፥ ታ አኬካይ ነዉ ዛሮ እማና መላ ታና ደንꬄስ።
JOB 20:4 አስ ቢታ ቦላ ደእዳ ዎደፐ ዶምድ፥ በንፐ ሀንዳባ ኤራሳ።
JOB 20:5 ኢታ አሳ ጬቆይ ቃንꬃ ዎደሳ፤ ፆሳ ኤሮና አሳ ኡፋይሳይ ጉꬃ ዎደሳ።
JOB 20:6 ኢታ አሳ ኦቶሮይ ሳሎ ጋካናዉ ꬎቁ ጊኮካ፥ እያ ሁጰይ ሻራ ጋክድ ቦችኮካ፥
JOB 20:7 እ ባና መላ ፕተትድ ꬋያና፤ እያ ካሰ ኤርያ አሳይ ‘እ አዉን ደኢ?’ ያጋና።
JOB 20:8 ኤልሞዳ ፓልድ ꬋያና፤ ስሚድ በንተና፤ ቃማ አሙሆዳ ጮ ꬋያና።
JOB 20:9 እያ ካሰ በእዳ አይፈት ዛሪድ እያ በኦኮና፤ እ ባ ደእያ በሳፈ ትምእ ግድ ꬋያና።
JOB 20:10 አዋይ ቦንቅ ኤክዳ ሚሸ፥ እያ ናይት ባንታ ኩሸን ጉየ ዛራና።
JOB 20:11 እያ መቀꬃ ኩምዳ ናአተꬃ ዎልቃይ እያራ እስፈ ቢታን ዝንአና።
JOB 20:12 “ኢታተꬅ እያ ዶናን ማልእኮ፥ እ ባ እንፃርሳፈ ጋርሳን ቆስኮ፥
JOB 20:13 ዉሮናዳ ባ ዶናን ኦይክድ፥ ዎꬅ አግኮ፥
JOB 20:14 እያ ኡሉዋን ጫሞ ግዳና፤ ዎꬍያ ሾሻ ማርዘ ግዳና።
JOB 20:15 ኢታ አስ ምትዳ ሻሉዋ ዛር ጩታና፤ እያ ኡሉዋን ደእያ ኡባ ፆሳይ ጮሻና።
JOB 20:16 ኢታ አስ ምያባይ እያዉ ማርዘ ግድድ፥ እያ ዎꬋና።
JOB 20:17 ኤስነ ማꬅ ሃꬃዳ ጎግሽን፥ እ በኦና አታና።
JOB 20:18 ባ ዳቡራ አይፍያ ሞና ሀራስ እማና፤ ዛልእድ ዎꬍስዳ ዎꬍያን ኡፋይተና።
JOB 20:19 ሄስ ሀንዳይ እ ማንቆታ ኡንኤꬅዳ ግሾነ ሀራ አስ ኬፅዳ ኬꬃ ቦንቅዳ ግሾሳ።
JOB 20:20 “እያ ኢታ አሞይ ሸምፖ ድግስ፤ ሺሽዳ ሻሎይ እያ አሻናዉ ዳንዳኤና።
JOB 20:21 እያ ሻሎይ ዉርያ ግሾ፥ እያ ዱረተꬃይ ጋምኤና።
JOB 20:22 እያዉ አቆይ ኩምድ ደእሽን፥ መቶይ አኬኮና እያ ቦላ ጋክ ዎꬋና።
JOB 20:23 እያ ኡሎይ ካልያ ዎደ፥ ፆሳይ ዎልቃማ ሀንቁዋ እያ ቦላ ጉሳና።
JOB 20:24 ብራታ ማሻፈ እ ባቃታና፤ ሽን ናሰ ብራታ ዶንገይ እያ ጫዳና።
JOB 20:25 ሄ ዶንገይ እያ ዞኮራ ካንꬅ ከያና፤ ጶልያ ፄራይ እያ ትርያ ካንꬅ አꬋና፤ ዳጋም እያ ዎዛና ዋባቅሳና።
JOB 20:26 እ ሺሽዳ አቆይ ሳካና ꬉማን ꬋያና፤ አስ ኦይꬅቦና ታም እያ ማና፤ እያ ኬꬃን አትዳ ሻሎ ኡባ ፁጋና።
JOB 20:27 ሳሎት እያ ናጋራ ቆንጭሳና፤ ሳእካ እያዉ ሞርከ ግዳና።
JOB 20:28 ፆሳ ሀንቆ ጋላሳን፥ እያ ኬꬃነ እያዉ ደእያባ ድኦይ ኤፋና።
JOB 20:29 ፆሳይ ጌላታስ ዎꬅዳ ቃዳይ፥ ኢታ አሳስ ጊግስዳ ጋተይ ሀይሳ” ያግስ።
JOB 21:1 ያትን እዮብ ሀይሳዳ ያግድ ዛርስ፤
JOB 21:2 አነ ታ ኦዳ አኬክድ ስእተ፤ ሄስ ህንተ ታና ምንꬅዳ መላ ግዶ።
JOB 21:3 ታኒ እስ ቶሆ ኦደታና መላ ታዉ ዎደ እምተ፤ ታኒ ሃሳያ ስምኮ ታና ቀልቅስተ።
JOB 21:4 ታኒ ሞተተይ አሳራ ግደና። ያትን፥ ዳንዳአይ ዉርኮ ሄስ ማላልስዬ?
JOB 21:5 አነ ታና ፄልድ ማላለትተ፤ ህንተ ኩሽያ ህንተ ዶና ቦላ ዎꬅተ።
JOB 21:6 ታ ሄሳ ቆፕያ ዎደ ታና ዳጋንꬄስ፤ ታ አሳተꬃይ ኮኮሬስ።
JOB 21:7 ኢታ አሳት አይስ ፓፃ ደኦና? ኤንታ ላይꬃይ አይስ አዱቂ? ኤንታ ዎልቃይ አይስ ዳር ዳር ብዴ?
JOB 21:8 ኤንታ ናይትነ ናይታ ናይት፥ ድጭሽንነ እንጀን ደእሽን ኤንቲ አይስ በኦና?
JOB 21:9 ኤንታ ሶይ ህርግ ባይና ሳሮ ደኤስ፤ ፆሳ ፃምአይ ኤንታ ጋከና።
JOB 21:10 ኤንታ ሚዛት ብራይስ ኤክድ ኮፆኮና፤ የልሸ አዉጫዮኮና።
JOB 21:11 ባንታ ናይታ ዶርሳ ዉደዳ ከሶሶና፤ ኤንታ ናይት ዱሮሶና።
JOB 21:12 ካራቦ ባቅሸ ዲꬅ ዲፅሸ፥ ሱሱልኤ ፑንሸ ኡፋይሳን የፆሶና።
JOB 21:13 ኤንቲ ባንታ ደኦ ላይꬃ እንጀን ደእድ፥ ዱፎ ሳሮራ ቦሶና።
JOB 21:14 ግዶሽን፥ ኤንቲ ፆሳኮ “ኑፐ ሃካ! ኑኒ ነ ኦግያ ኤራናዉ ኮዮኮ” ያጎሶና።
JOB 21:15 “ኑ እያ ጎይናናዉ ኡባ ዳንዳእያ ፆሳይ ኦኔ? ኑ እያ ዎስድ አይ ጎኤታኔ?” ያጎሶና።
JOB 21:16 ኤንቲ ዱረተꬃ ባንታ ምኖተꬃን ደምዳ ጎሶና፤ ሽን ታኒ ኤንታ ቆፋ ኤክከ።
JOB 21:17 “ሀኖሽን፥ ኢታ አሳ ፆምፐይ ቶኢ? ኤንታና ቦሽ ጋክ ኤሪ? ፆሳይ ባ ሀንቁዋን ኤንታ ሴር ኤሪ?
JOB 21:18 ጫርኮይ ኤንታ ካለዳ ኤፍዳ ዎደይ፥ ጎተይ ኤንታ ባናዳ ደንꬅዳ ዎደይ ደኢ?
JOB 21:19 ህንተ፥ ‘ፆሲ አዋታ ባላ ግሾ ኤንታ ናይታ ሴሬስ’ ያጌታ። አነ ፆሳይ ናጋራንቾታ ኤንታ ሁጰን ሴሮ፤ ያትኮ ኤንቲ ባንታ ናቁዋ ኤራና።
JOB 21:20 ናጋራንቾት ባንታ ሴራ ባንታዉ ኤኮ፤ ኡባ ዳንዳእያ ፆሳ ሀንቆይ ኤንታ ቦላ ዎꬎ።
JOB 21:21 አስ ሀይቅዳፐ ጉየ፥ ባ ናይታባ አይ ኤሪ?
JOB 21:22 “ꬎቃ በሳን ደኤይሳታ ፕርድያ ፆሳ፥ ኤራተꬅ ታማርሳናዉ ዳንዳእያ አስ ደኢ?
JOB 21:23 እስ እስ አስ ኩመꬃ ዎልቃይነ ሳሮይ ደእሽን፥ እንጀ ዱሱ ደእሸ ሀይቆሶና።
JOB 21:24 ኤንታ አሳተꬃይ ኦርደ ሽን፥ ኤንታ መቀꬃ ኮልዘይ ሽጫ ደእሽን ሀይቆሶና።
JOB 21:25 ሽን ሀራት ሎኦባ በኦና፥ መቶን ኡንኤትድ ካዮትዳ መላ ሀይቆሶና።
JOB 21:26 ናምአይካ ሀይቅድ ቢታን ሞገቶሶና፤ ኤንቲ ጉፁንቶሶና።
JOB 21:27 “ህንተ ታና ቆሀናዉ ቆፕድ፥ ህንተ ዎዛናን ቆፕዳ ቆፋ ታ ሎይꬃዳ ኤራይስ።
JOB 21:28 ህንተ፥ ‘ሄ ግታ ኡራ ኬꬃይ አዉኔ? ኢታ ኦꬅያ ኡራይ ደእያ ሶይ አዉኔ?’ ያጌታ።
JOB 21:29 ኦገ አሳታ ኦይችቤከቲ? ኤንታ ማርካተꬃ አማንበከቲ?
JOB 21:30 ኤንቲ፥ ‘ኢታ አሳይ ꬋዮ ጋላስ ቆሄቶኮና፤ ፆሳ ሀንቆይ ቆንጭያ ጋላስ ኤንቲ አታና’ ያጎሶና።
JOB 21:31 ኢታ አስ እያ ኢታተꬃ ግሾ ካጫናይ ኦኔ? እያ ኦሱዋ ግሾ እያ ሴራናይ ኦኔ?
JOB 21:32 እ ሀይቅን፥ እያ አሀ ዱፎ ኤፎሶና፤ እያ ዱፎይ ቦንቾን ናገቴስ።
JOB 21:33 ዛንጋራ ቢታይ እያዉ እንጀቴስ፤ ዳሮ አሳይ እያ ስንꬃን ቦሶና፤ ታይቦይ ባይና አሳይ እያ ካሎሶና።
JOB 21:34 ያትን፥ ህንተ ታና ፓꬆና ቃላን ዋት ምንꬃኔ? ህንተ ታ ኦይሻስ ዛርያ ዛሮ ኡባይ ዎርዶ” ያግስ።
JOB 22:1 ሄሳፈ ጉየ፥ ተማና ቢታፈ ይዳ ኤልፋዝ ሀይሳዳ ያግድ ዛርስ፤
JOB 22:2 “አስ ፆሰ ጎአናዉ ዳንዳኢ? ሀር አቶሽን ጭንጫ ግድኮካ፥ ባና ጎአናፐ አትሽን፥ ፆሰ ጎኤና።
JOB 22:3 ኔኒ ፅሎ ግድኮ ሄስ ኡባ ዳንዳእያ ፆሳ ኡፋይስዬ? ነ ኦገይ ቦረይ ባይናባ ግድኮ ሄሳን እ አይ ዎ ደሚ?
JOB 22:4 “እ ነና ሴረይነ ፕርደይ፥ ኔኒ እያዉ ያይያ ግሾዬ?
JOB 22:5 ነ ኢታተꬃይ ዳሮ ግደነዬ? ነ ናጋራስ ዛው ባዋ ግደኔ?
JOB 22:6 ጋሶይ ባይና ነ እሻታ ዋሰ ፄግሳዳሳ፤ አሳ ማኡዋ ቃራ ኤካዳ ኤንታ ካሎ የዳዳሳ።
JOB 22:7 ሳሞትዳይሳታ ሃ ኡሻባካ፤ ኮሻትዳይሳታ ካꬅ ሙዛባካ።
JOB 22:8 ኔኒ ዎልቃማ፥ ዱረነ ቦንቸትዳ አስ ግዳዳ ደአሸ፥
JOB 22:9 አምኤታ መላ ኩሸ የዳዳሳ፤ ይኦታስ ዎልቃ ꬋይሳዳሳ።
JOB 22:10 ነ ዩሾይ ግተትዳይ፥ አኬኮና ያሽ ነና ኮኮርሰይ ሄሳሳ።
JOB 22:11 ነ በኦና መላ ꬉምዳይ፥ ቃስ ክፃ ሃꬃን ነ ሙከትዳይ ሄሳሳ።
JOB 22:12 “ፆሳይ ꬎቃ ሳሉዋን ኡትድ፥ ꬎቃን ደእያ ፆልንቶታ ዱገ ፄሌስ።
JOB 22:13 ሽን ኔኒ፥ ‘ፆሲ አይ ኤሪ? ሳካና ꬉማ ግዶራ ካንꬅድ፥ ፕርዳናዉ ዳንዳኢ?
JOB 22:14 ሳሎ ጉፋንꬆ ቦላ እ ስመረትያ ዎደ፥ እ በኦና መላ ስከትዳ ሻራይ እያ ጎዜስ’ ያጋሳ።
JOB 22:15 ናጋራንቾት ሄመትዳ በን ኦግያራ ባናዉ ቆፋ ቃቻዲ?
JOB 22:16 ኤንታዉ ዎደይ ጋኮና ደእሽን ሀይቅዶሶና፤ ኤንታ ደኦ ባሶይ ድኦን ሜጨትድ ꬋይስ።
JOB 22:17 ኤንቲ ፆሳኮ፥ ‘ኑፐ ሃካ! ኡባ ዳንዳእያ ፆሳይ ኑስ አይ ኦꬃናዉ ዳንዳኢ?’ ያግዶሶና።
JOB 22:18 ግድኮካ፥ ኤንታ ኬꬃ ሎኦባን ኩንꬅዳይ ፆሳ፤ ሄሳ ግሾ፥ ኢታ አሳ ቆፋ ታ ኤክከ።
JOB 22:19 “ኢታ አሳት ሴረትያ ዎደ፥ ፅሎት ኡፋይቶሶና፤ ሱረ አሳት ሀይሳዳ ያግድ፥ ኤንታ ቦላ ቀልቅሶሶና።
JOB 22:20 ‘ኑ ሞርከት ꬋይዶሶና፤ ኤንታ ዱረተꬃይ ታማስ አትስ’ ያጎሶና።
JOB 22:21 “እዮባ፥ ሀእካ ፆሳራ ጊጋ፤ እያራ ሳሮ ደአ፤ ያትኮ ኔኒ አንጀታና።
JOB 22:22 እያ ትምርትያ ስአ፤ እያ ቃላ ነ ዎዛናን ዎꬃ።
JOB 22:23 ኔኒ ኡባ ዳንዳእያ ፆሳኮ ስምኮ፤ ነዉ ሳእ ስማና፤ ኢታ ኦሶ ኡባ ነ ሶፐ ድጋ፤
JOB 22:24 ነ ዎርቃ ሳአን ሆላ፤ ነ ኦፍራ ዎርቃ ሻፋን የጋ።
JOB 22:25 ያትኮ ኡባ ዳንዳእያ ፆሳይ፥ ነዉ ዎርቃነ ዶረትዳ ብራ ግዳና።
JOB 22:26 ሄ ዎደ ነ ኡባ ዳንዳእያ ፆሳን ኡፋይታና፤ ዬላቶና ፆሳኮ ፑደ ፄላና።
JOB 22:27 ኔኒ እያ ዎሳና፥ እ ነና ስአና፤ ነ ቃንገꬃ እያዉ ጋꬃና።
JOB 22:28 ነ ቆፕዳባይ ፖለታና፤ ነ ሄመትያ ኦገይ ፖኦ ግዳና።
JOB 22:29 ፆሳይ ኦቶረይሳታ ካዉሼስ፤ ሽን አሽከታ አሼስ።
JOB 22:30 ነ ኩሸይ ጌሽ ግድኮ፥ ባላ አሳይ ነ ጋሶን ማሮታ ኤካናነ አታና” ያግስ።
JOB 23:1 እዮብ ሀይሳዳ ያግድ ዛርስ፤
JOB 23:2 ሀችካ ታ ጫመታዳ ዙዙማይስ፤ ታ ኦለይ ምኖ ግድኮካ እያ ኩሸይ ታ ቦላ ዴፀይሳ አግቤና።
JOB 23:3 እያ ደማና በሳ ታ ኤርዳ ግዳርክና፤ እ ደእያ በሳ ታ ጋካርክና!
JOB 23:4 ታኒ ታ መቱዋ እያ ስንꬃን ዎꬃናሽን! ታ ዶና ሞቶን ኩንꬃናሽን!
JOB 23:5 እ ታዉ ዛራናይ አይበኮ ኤራናሽን፥ እ አይ ግያኮ በአናሽን!
JOB 23:6 እ ባ ግታ ዎልቃን ታራ ኤቀታነሻ? አካይ፥ እ ታና ስአና።
JOB 23:7 ያን ሱረ አስ እያራ ሞተታናዉ ዳንዳኤስ፤ ታ ዳይናይ ታና መርናዉ ሻትንꬃና።
JOB 23:8 ሽን ታኒ ዶሎሀ ቢኮ እ ያን ዴና፤ ታኒ ዉሎሀ ቢኮ እያ ያን ደምከ።
JOB 23:9 እ ፑደሀን ኦꬅያ ዎደ ታኒ እያ በእከ፤ ዱገሀ ባጋ ስምያ ዎደ ታኒ እያ ደምከ።
JOB 23:10 ሽን እ ታ ታንጉዋ ኡባ ኤሬስ፤ እ ታና ፓጭያ ዎደ ታኒ ዎርቃዳ ጌያዳ ከያና።
JOB 23:11 ታ ቶሆይ እያ ታንጉዋ ካልድ ቤስ፤ እያ ኦግያፐ ሀድርስ ኡሻች ስማብከ።
JOB 23:12 እያ ዶናፐ ከይያ ኪታፐ ታኒ ሻከታብከ፤ እያ ቃላ ታ ዎዛናን ዎꬃስ።
JOB 23:13 ፆሳይ ላመተና፤ እያራ ኤቀታናይ ባዋ፥ እ ኮይዳባ ኦꬄስ።
JOB 23:14 እ ታ ቦላ ቆፕዳይሳ ፖልስ፤ ሄሳ መላ ሀራ ዳሮ ሀልቾት እያዉ ደኦሶና።
JOB 23:15 ሄሳ ግሾ፥ እያ ስንꬃን ኤቃናዉ ዳሮ ያሼስ፤ ሄሳ ኡባ ቆፕያ ዎደ ኮኮራይስ።
JOB 23:16 ፆሳይ ታ ዎዛናይ ዶጫና መላ ኦꬅስ፤ ኡባ ዳንዳእያ ፆሳይ ታና ዳጋንꬅስ።
JOB 23:17 ሳካና ꬉማይ ታ ሶምኡዋ ጎዝኮካ፥ ታና ሄ ꬉማይ ሃሳያ ድግቤና።
JOB 24:1 ኡባ ዳንዳእያ ፆሳይ ፕርዳ ዎደ አይስ ቃንፀኔ? እያ ኤረይሳት ሄ ዎድያ አይስ ጮ ናጎና?
JOB 24:2 ኢታ አሳት ዛዋን ደእያ ሹቻ ደንꬆሶና፤ ካይስ ኤህዳ ዶርሳታ ያን ሄሞሶና።
JOB 24:3 ይኦ ናይታ ሀረታ ቦንቆሶና፤ አምኤ ቦራ አጮስ ኦይክድ ኤኮሶና።
JOB 24:4 ማንቆታ ሻተትድ ኦገፐ ጎዶሶና፤ ባንታ ስንꬃፈ ቆሰታና መላ ኦꬆሶና።
JOB 24:5 ባዞን ደእያ ዎራ ሀረ መላ፥ ማንቆት ባንታ ናይታስ ምያባ ኮይሸ ዳቡሮሶና።
JOB 24:6 ኤንቲ ሀራ አሳ ጋደን ካꬅ ጫኮሶና፤ ኢታ አሳ ዎይነ ጋደን ቡ ማፆሶና።
JOB 24:7 ኤንቲ ቃማ ካሎ አቆሶና፤ ሜጎስ ቦላን የግያባይ ኤንታዉ ባዋ።
JOB 24:8 ዙማ ቦላ ቡክያ እራን ኤንቲ ሱሩፆሶና፤ ገልያ በሲ ꬋይድ ሹቻ ሆምኦን አቆሶና።
JOB 24:9 አው ባይና ናአ አየ ክኦፐ ዳፍ ኤኮሶና፤ ማንቁዋ ናአ አጮስ ኦይኮሶና።
JOB 24:10 ማንቆት ማኦ ꬋይድ ካሎ ሄመቶሶና፤ ኤንቲ ባንታዉ ኮሻትሸ ሀራ አሳ ምርቀ ቶኮሶና።
JOB 24:11 ኤንቲ ባንታዉ ሳሞትሸ፥ ዛይተ ከሳናዉ ሀራ አሳ ጋደን ሻማሆ አይፈ ማፆሶና፤ ዎይነ ኡሻ ጉሙአናዉ ዎይነ አይፈ ቆሮሶና።
JOB 24:12 ካታማን ካታማን ሀይቃና ሀንያ አሳይ ኦሎሶና፤ ደሸትድ ማዱንፅዳ አሳይ ማዶ ኮይድ ዋሶሶና፤ ሽን ፆሳይ ኤንታ መቱዋ ፄለና።
JOB 24:13 ፖኦ እፅያ አሳት፥ እያ ኦግያ ኤሮና አሳትነ፤ እያን ኤቆና አሳት ደኦሶና።
JOB 24:14 ሳእ ቃምያ ዎደ ሸምፖ ዎይስ ደንድድ፥ ማንቆታነ መቶታንቾታ ዎꬌስ፤ ቃም ቃስ ካይሶስ ቦሶና።
JOB 24:15 ላይማትያ አስ ሳእ ለምአናይሳ ናጌስ፤ ኦንካ በኦና መላ ባ ሶምኡዋ ካሜስ።
JOB 24:16 ካይሶት ቃማ ኬ ቦክድ ካይሶታናዉ ገሎሶና፤ ሽን ጋላስ ቆሰትድ ፔኦሶና።
JOB 24:17 ዳጋንꬅያ ꬉማራ ኤንቲ ዳቦትያ ግሾ፥ ሳካና ꬉማይ ኤንታዉ ሴታ ጋላሳ መላ።
JOB 24:18 “ሽን ኢታ አሳት ሃꬃ ጎፖንቶ መላ፤ ኤንታ ላታ ቢታይ ባደትዳይሳ፤ ኦንካ ኤንታ ዎይነ ጋደ ቤና።
JOB 24:19 ሻች ማይን፥ ሃꬅ መልድ ꬋየይሳዳ፥ ናጋራንቾት ሀይቅድ ቢታፈ ꬋዮሶና።
JOB 24:20 የልዳ አየት ኤንታ ዶጋና፤ ጉፁነይ ኤንታ አሹዋ ማና፤ ኢታ አሳይ ሀሳየቶኮና፤ ምꬃዳ መቃና።
JOB 24:21 ኤንቲ ናእ ባይና ማይንꬃ ማጫሳ ናቅዶሶና፤ አምኤታ ቃቶና እፅዶሶና።
JOB 24:22 ፆሳይ ባ ዎልቃን ምኖታ ꬋይስስ፤ ኤንታዉ ሳእ እንጀትዳ ዳንኮካ፥ ኩንዶና አቶኮና።
JOB 24:23 ፆሳይ ኤንቲ ሳሮ ዳናዳ ኦꬅኮካ፥ ኤንታ ኦግያ ዎቼስ።
JOB 24:24 ኢታ አሳት ጉꬃ ዎደስ ꬎቁ ꬎቁ ጎሶና፤ ሽን ኤለስድ ሻራፋዳ ሹልድ ꬋዮሶና፤ ካꬃዳ ጫከቶሶና።
JOB 24:25 ሄስ ሀነና ግድ ካድያ አስ ደኢ? ታኒ ኦድዳ ቃላ ዎርዶ ጋና አስ ደኢ?” ያግስ።
JOB 25:1 ሄሳፈ ጉየ፥ ሹሀ ቢታፈ ይዳ በልዳዶስ ሀይሳዳ ያግድ ዛርስ፤
JOB 25:2 “ፆሳይ ሃረይሳነ ያሸይሳ፤ እ ꬎቃ ሳሉዋ ሳሮተꬃን ሃሬስ።
JOB 25:3 እያ ኦላንቾታ ታይባናዉ ዳንዳእያ አስ ደኢ? ፆሳ ፖኦይ ጋኮና በሲ ደኢ?
JOB 25:4 ያትን፥ አስ ፆሳ ስንꬃን ፅሎ ግዳናዉ ዳንዳኢ? ማጫሳፐ የለትዳ አስ ጌሽ ግዳናዉ ዳንዳኢ?
JOB 25:5 ፆሳ ስንꬃን አጌንካ ኩመꬃ ፖኦ ግደና፤ እያ ስንꬃን ፆልንቶትካ ጌሽ ግዶኮና።
JOB 25:6 ያትን፥ ፆሳ ስንꬃን ዎቃነ ጉፁነ ግድዳ አስ አይ መላ ላፌ?” ያግስ።
JOB 26:1 እዮብ ሀይሳዳ ያግድ ዛርስ፤
JOB 26:2 “ኔኒ ዎልቅ ባይናይሳ አይባ ማዳዲ? ዳቡራንቹዋ ዋታ አሻዲ?
JOB 26:3 ጭንጫተꬅ ፓጭዳይሳስ አይ ዞረ እማዲ? አይ መላ ኤራተꬅ ቆንጭሳዲ?
JOB 26:4 ኔኒ ሀ ቃላ ኦደታና መላ ነና ማድዳይ ኦኔ? ነ ኦዳን መላ ነና ደንꬅዳይ ኦደ አያኔ?” ያግስ።
JOB 26:5 በልዳዶስ ዛሪድ፥ “ሀይቅዳ አሳ አያናት፥ ጋርሳን ሃꬃ ግዶን ደኤይሳት ኮኮሮሶና።
JOB 26:6 ፆሳ ስንꬃን ስኦለይ ቆንጨ፤ አይብካ እያ ገንꬃናዉ ዳንዳኤና።
JOB 26:7 ፆሳይ ፑደሀ ሳሎታ ጮ ምጭስ፤ ሳኣ ካቆይ ባይና በሳን ካቅስ።
JOB 26:8 እ ሻራታን ሃ ኩንꬄስ፤ ሃꬃ ዴፁዋን ሻራት ዳከቶኮና።
JOB 26:9 እ ባ ሻራ ምጭድ፥ ኩምꬃ አጌና ካሜስ።
JOB 26:10 ፖኦ ꬉማፐ ሻካናዉ፥ አባ ጋፃን ፆሳይ ዛዋ ዎꬅስ።
JOB 26:11 እ ሀንቀትያ ዎደ፥ ሳሎ ቱቀት ዳጋማን ኮኮሮሶና።
JOB 26:12 ባ ዎልቃን አባ ስእ ኦꬄስ፤ ባ ጭንጫተꬃን ራኣባ ጌተትያ ዶኣ ꬋይሴስ።
JOB 26:13 እ ባ ሸምፑዋን ሳሎታ ጌሼስ፤ እያ ኩሸይ ፆንገትያ ሾሻ ጫዴስ።
JOB 26:14 ሀይሳቲ ፆሳይ ኦꬅያ ኦሶታፐ ጉꬃታ፤ ኑ እያ ካልካሻ ፃላላ ስኦስ፤ እያ ዎልቃ ደሹዋ አኬካናዉ ዳንዳኤይ ኦኔ?” ያግስ።
JOB 27:1 እዮብ ካልድ ሀይሳዳ ያግስ፤
JOB 27:2 “ሱረ ፕርዳ ታና ድግድ፥ ታ ደኡዋ ጫሞ ኦꬅዳ፥ ኡባ ዳንዳእያ ፆሳን ታኒ ጫቃይስ።
JOB 27:3 ታ ሸምፖይ ደእሽን፥ ታ ሲይ ሸምፕሽን
JOB 27:4 ታ ዶናይ ዎርዶ ኦደተና፤ ታ እንፃርሳይ ጭሞ ኦደተና።
JOB 27:5 ህንተ ኦዳይ ልከ ጋዳ ታ ኤክከ፤ ሀይቃና ጋካናዉ ታ ታና ሱረ ገይሳ አግከ።
JOB 27:6 ታ ፅሎተꬃ ምንꬃ ኦይካናፐ አትሽን፥ አግከ፤ ታ ደእዳ ላይꬃ ኡባን ታ ካሀይ ታና ሞተና።
JOB 27:7 “ታ ሞርከት ናጋራንቾዳ፥ ታራ ኤቀተይሳት ባላ ግዶ።
JOB 27:8 ፆሳይ ኤንታ ሸምፑዋ ኤንታፈ ኤክያ ዎደ፥ ኤንታ ላይꬃ ቃምስያ ዎደ፥ ኢታታስ ደእያ ኡፋይሳይ አይቤ?
JOB 27:9 ኤንታ ቦላ መቶይ ጋክያ ዎደ፥ ፆሳይ ኤንታ ዋሱዋ ስኢ?
JOB 27:10 ኡባ ዳንዳእያ ፆሳን ኤንቲ ኡፋይታኔ? ኤንቲ ኡባ ዎደ ፆሳ ፄጋኔ?
JOB 27:11 “ታኒ ህንተና ፆሳ ዎልቃባ ታማርሳና፤ ኡባ ዳንዳእያ ፆሳ ቆፋ ታ ህንተፈ ቆትከ።
JOB 27:12 ህንተ ኡባይ ሄሳ በእደታ፤ ያትን፥ ሀይሳ መላ ጮ ሃሳያ አይስ ኦደቴቲ?
JOB 27:13 ፆሳይ ኢታ አሳታስ ጊግስዳ ቃዳይ፥ ኡባ ዳንዳእያ ፆሳፈ ኤክያ ዎይቶይ ሀይሳ።
JOB 27:14 ኤንታ ናይት አይ ዳርኮካ ኦላን ዉራና፤ ኤንታ ኮቻይ ምያባ ꬋይድ ኮሻታና።
JOB 27:15 ሄሳፈ አትዳይሳት ጋዶን ዉራና፤ ኤንታ አምኤት ኤንታዉ ዬኮኮና።
JOB 27:16 ኢታ አሳት ብራ ቢታዳ ሺሽኮካ፥ ማኦ ኡርቃዳ ሺሽድ ዶርኮካ፥
JOB 27:17 ኤንታ ብራ ፅሎ አሳት ሻክ ኤካና፤ ኤንታ ማኡዋ ጌሻት ማአና።
JOB 27:18 ኤንቲ ኬፅያ ኬꬃት ሻንጎ ሃዳ መላነ ጋባ መላ ላለታና።
JOB 27:19 ኢታ አሳት ዱረ ግድድ ሂፃን ዝንኦሶና፤ ሽን ኤንቲ ꬍስኮፈ ባርክያ ዎደ አይኮይካ ባዋ።
JOB 27:20 ዳጋም ድኦ ሃꬃዳ ቆፖና ኤንታ ቦላ ያና፤ ቃማ ጎተይ ኤንታ ደንꬅድ ኤፋና።
JOB 27:21 ዶሎሀ ጫርኮይ ኤንቲ ደእያሱዋፐ ፕትድ ኤፋና።
JOB 27:22 ኤንቲ ከስ ኤካናዉ ባቃትሽን፥ ቃይ ባይና ኤንታ ቦላ ዎꬋና።
JOB 27:23 ባ ኩሽያ ባቅድ ኤንታ ቦላ ቀልቅሳና ባ ሱይቀꬃን ኤንታ ሱግ የዳና።
JOB 28:1 “ብራ ቦክድ ከስያ በስነ ዎርቃ ሴርስያ በሲ ደኤስ።
JOB 28:2 ብራት ቢታፈ ከዬስ፤ ናሰ ብራት ሹቹ ሴርስን ከዬስ።
JOB 28:3 አሳይ ፆምፐ ኤክድ ꬉማ ፖእሴስ፤ ቢታ ጋꬅ ጋካናዉ ገሌስ፤ ሳካና ꬉማን ሄ ሹቻ ኮዬስ።
JOB 28:4 አሳይ ደእያ በሳፈ ሃክድ፥ አሳ ቶሆይ የꬍ ኤሮና ሶ ጋክድ፥ ያን ግታ ኦላ ቦኬስ። ዎዶሮን ያነ ሃነ ኩሎትሸ፥ አሳፐ ኮፀትድ ደኤስ።
JOB 28:5 ካꬅ ቢታፈ ሞኬስ፤ ሽን እያ ግዶይ ታማን ሴርድ፥ ሽረት ሽረት ዎꬌስ።
JOB 28:6 ሄ ዛላፈ ሳንፓረ ጌተትያ አልኦ ሹቻይ ከዬስ፤ እያ ቢታፈ ዎርቃይ በንቴስ።
JOB 28:7 ሄ ሹቻ ቦክያ በሳ ፅሎይ ኤረና፤ ጵርጮይካ በእቤና።
JOB 28:8 ኢታ ዶአት ሄ በሳ የꬍ ኤሮኮና፤ ጋሞይ ያራ አꬍቤና።
JOB 28:9 አስ ምኖ ዛላ መንረꬄስ፤ ደርያ ቦክድ ፃጱዋፐ አꬅድ የጌስ።
JOB 28:10 ዛላ ሉክድ ካንꬅያ ኦገ ከሴስ፤ ሄ አልኦ ሹቻ ደሜስ።
JOB 28:11 ሃꬅ ሄ በሳራ ጎጎና መላ ዜረስ፤ ጌምዳባታ ፖኦ ከሴስ።
JOB 28:12 “ሽን ጭንጫተꬅ አዉፐ በንታናዉ ዳንዳኢ? አኬክ ደእያ አዌ?
JOB 28:13 አስ እያ ጋትያ ኤረና፤ እ ደኦን ደእያ መተꬃት ደእያ ቢታን በንተና።
JOB 28:14 አባ ጪሞይ፥ ‘ጭንጫተꬅ ታ ግዶን ባዋ’ ያጌስ።
JOB 28:15 ጭንጫተꬅ ዎርቃን ሻመተና ዎይኮ ብራን በንተና።
JOB 28:16 ጭንጫተꬅ ኦፍራ ዎርቃን፥ ማርግደነ ሳንፓረ ጌተትያ አልኦ ሹቻን ሻመተና።
JOB 28:17 ዎርቅነ ማስቶተይ እያራ ልከተና፤ ዎርቃፈ ኦሰትዳ አልኦ ሚሸን ላመተና።
JOB 28:18 ጭንጫተꬃ ጋተይ ዛጎለፐ፥ አልማዘፐነ አልኦ ሹቻ ኡባፈ አꬌስ።
JOB 28:19 ቶጳዘ ጌተትያ ቶጰ እንቆይ እያራ ልከተና፤ ዋላህ ባይና ዎርቃን እ ሻመተና።
JOB 28:20 “ያትን፥ ጭንጫተꬅ አዉፐ ዪ? አኬክ አዉፐ በንቲ?
JOB 28:21 ደኦን ደእያ መተꬃ ኡባፈ ጌምድ ደኤስ፤ ሳሎ ካፎት እያ ደሞኮና።
JOB 28:22 ጋዶይነ ሀይቆይ፥ ‘ኑኒ ጭንጫተꬃባ ሀይꬃን ስእዳ’ ያጎሶና።
JOB 28:23 “ጭንጫተꬃኮ ኤፍያ ኦግያነ እ ደእያ በሳ ኤረይ ፆሳ ፃላላ።
JOB 28:24 ፆሳይ ሳኣ ጋፃ ኡባ ፄሌስ፤ ሳሎፐ ጋርሳን ደእያባ ኡባ በኤስ።
JOB 28:25 ፆሳይ ጫርኮስ ዎልቃ እምዳ ዎደ፥ ሃꬃ ማክዳ ዎደ፥
JOB 28:26 እር ቡካና ዎጋ እምዳ ዎደ፥ ዳዳስ ኦገ ዎꬅዳ ዎደ፥
JOB 28:27 ፆሳይ ጭንጫተꬃ በእስ፤ በእድ ቦንችስ፤ ፓጭድ ኤስስ።
JOB 28:28 ሄ ዎደ ፆሳይ አሳኮ፥ ‘ጭንጫተꬅ ፆሳስ ያየይሳ፤ አኬክ ኢታፐ ሃከይሳ’ ያጌስ” ያግስ።
JOB 29:1 እዮብ ካልድ ሀይሳዳ ያግስ፤
JOB 29:2 ሀእ ታ ደእያ ዱሳይ፥ ፆሳይ በን ታና ናግዳ ዎድያꬆ ግዴረነ!
JOB 29:3 ሄ ዎደ እያ ፆምፐይ ታ ቦላ ፖኤስ፤ እያ ፖኡዋን ꬉማ ካንꬃዳ ባይስ።
JOB 29:4 ሄ ዎደይ ፆሳይ ታ ኬꬃ አንጅን፥ ታኒ ታ ናአተꬃ ዎልቃራ ደእዳ ዎደ።
JOB 29:5 ሄ ዎደ ኡባ ዳንዳእያ ፆሳይ ታፐ ሻከትቤና፤ ታ ናይት ታ ዩሾን ደኦሶና።
JOB 29:6 ሄ ዎደ ታኒ ታ ኩሽያ ማꬃን ሜጫይስ፤ ሹቻ ቢታን ቶከትዳ ሻማሆይ፥ ሻፋ ሃꬃዳ ጎግያ ዛይተ እሜስ።
JOB 29:7 ታኒ ካታማ ፕርዳ ኬꬃ ብዳ ዎደ፥ ሻንጎታራ እስፈ ኡታይስ።
JOB 29:8 ሄ ዎደ ናአተꬃት ታና በእድ ኦገ የዶሶና፤ ጭማት ታና ቦንቻናዉ ደንድ ኤቅዶሶና።
JOB 29:9 ሀላቃት ኦዳ አጋግዶሶና፤ ባንታ ኩሽያ ባንታ ዶና ቦላ ዎꬅዶሶና።
JOB 29:10 ሄ ካታማን ደእያ ግታ አሳት ስእ ግዶሶና፤ ኤንታ እንፃርሳይ ኤንታ ኮቶኑዋ ባቅድ ኦይክስ።
JOB 29:11 ታባ ስእዳ ኡባይ ናሼስ፤ ታና በእዳ ኡባይ ቦንቼስ።
JOB 29:12 ሄስ ሀንዳይ፥ ታኒ ማንቆታ ዋሱዋ ስአዳ አሽዳ ግሾነ፥ ይኦ ናይታ ማድዳ ግሾሳ።
JOB 29:13 ሀይቃና ሀንያ አሳት ታና አንጅዶሶና፤ አምኤት ታ ማዱዋን ኡፋይትዶሶና።
JOB 29:14 ፅሎተꬃ ማኦዳ ማአስ፤ ሱረ ፕርዳ አፍላዳ ማአስ፤ ባርኔፃዳ ዎꬃስ።
JOB 29:15 ታኒ ቆቀታስ አይፈ፥ ዎበታስ ቶሆ ግዳስ።
JOB 29:16 ማንቆታስ አዋ ግዳስ፤ ኦገ አሳስ ፃባቃ ግዳስ።
JOB 29:17 ታኒ ኢታታ ጋጩዋ መንꬃስ፤ ኤንቲ ቦንቅዳይሳ ኤንታ ዶናፐ የግሳስ።
JOB 29:18 ታኒ ታ ዎዛናን፥ “ታ ላይꬃይ ሻፈዳ ዳርን፥ ታ ሶን ቦንቾን ሀይቃና” ጋዳ ቆፓስ።
JOB 29:19 ታኒ ፃጱዋ ሃꬃን የድዳ፥ ታሽያ ቦላ አክ ኩምዳ ምꬃ መላሽን!
JOB 29:20 ታ ቦንቸትዳ መላ ደአስ፤ ታ ዎልቃይ ኡባ ዎደ ኦራꬅሽን!
JOB 29:21 ታ ሃሳያ ዎደ ስእ ግድ ስኤስ፤ ታ ዞርያ ኡፋይሳን ኤኮሶና።
JOB 29:22 ታ ኤንታና አልያ ግሾ፥ ታ ኦዳ ስምን ታፐ ጉየራ ኦድያ አስ ባዋ።
JOB 29:23 ጎሻንቾይ እራ ናገይሳዳ፥ ኤንቲ ታ ሃሳያ ስአናዉ ሀካንክድ ናጎሶና።
JOB 29:24 ኤንቲ ህርጋን ደእሽን ታ ሶምኡዋ ፓሽክሳይስ፤ ታ ሚቻይ ኤንታ ምንꬄስ።
JOB 29:25 ታኒ ኤንቲ ዳና ኦግያ ዶራዳ ኤንታዉ ሀላቃ ግዳስ። ባ ኦላንቾታ ግዶን ደእያ ካዎዳ ታ ኤንታ ግዶን ደአስ፤ ኤንቲ አዛንያ ዎደ ምንꬃስ።
JOB 30:1 ሽን ሀእ ታፐ ናአትያ አሳት ታና ቀልቅሶሶና። ኤንቲ ታ ዶርሳ ዉድያ ሄምያ ካናታራ ፔኦና መላ ታኒ ድግዳ አዋታ ናይታ።
JOB 30:2 ኤንታ አዋት ዎልቅ እፅዳይሳታነ ግልቃታ ግድያ ግሾ ታና አይኮካ ማድቦኮና።
JOB 30:3 መቶይነ ኮሽ ኡንኤꬅን፥ ቢታ ባዞ ብድ ፃጶ ጮሞሶና።
JOB 30:4 ጩማነ ቦንጮ ማፅዶሶና፤ ማልኦና ሳንካራ ፃጶ ምዶሶና።
JOB 30:5 አስ ዋስሸ ካይሶ ጎደይሳዳ፥ ኤንታና አሳ ግዶፈ ጎድዶሶና።
JOB 30:6 ኤንቲ ዛንጋራን፥ ጎንጎሎንነ ዛላ ቆጶን ደእዶሶና።
JOB 30:7 ኤንቲ ዎራን ዶአዳ ዋስሸ ዩይዶሶና፤ አጉንꬃ ግዶን ሺቅድ እስፈ ደእዶሶና።
JOB 30:8 ኤንቲ ቢታፈ ጎደትዶሶና፤ ሱንꬅ ባይና ኤያታ ግድድ ደእዶሶና።
JOB 30:9 ሀእ ኤንታ ናይት ታና የꬃን ጫዶሶና፤ ታኒ ኤንታ ግዶን ሀይሰስ አታስ።
JOB 30:10 ኤንቲ ታና ሻተትድ ታፐ ሃኮሶና፤ ዬላቶና ታ ሶምኦን ጩቶሶና።
JOB 30:11 ፆሳይ ታ ዎልቃ ላፈꬅድ ታና ካዉሽዳ ግሾ፥ ኤንቲ ታና ቆሀናዉ የዳ ፓራ ግድዶሶና።
JOB 30:12 ሴር ባይና ድጭዳ ናይት ታ ቦላ ደንድዶሶና፤ ታ ቶሁዋስ ፅሄ ዎꬅዶሶና፤ ኤንቲ ታና ꬋይሳናዉ ተቅዶሶና።
JOB 30:13 ኤንቲ ታ ኦግያ ጎርድድ ታና ꬋይሳናዉ ኮዮሶና፤ ኤንቲ ሄሳ ኦꬆና መላ ተቅያ ኦንካ ባዋ።
JOB 30:14 ኦላንቾት ካታማ ድርሳ መንꬅድ ገለይሳዳ፥ ኤንቲ ታ ቦላ ይዶሶና።
JOB 30:15 ታኒ ግታ ዳጋማ ዳጋማስ፤ ታ ቦንቾይ ጫርኮይ ኤፍያዳ ብስ፤ ታ ሳሮ ዱሳይ ሻራዳ ꬋይስ።
JOB 30:16 ታ ሸምፕያ ዳሮ ኡንኤታሱ፤ መቶይ ታና ጩጩምድ ኦይክስ።
JOB 30:17 ቃማ ቃማ ሳሆይ ታ መቀꬃ ጮሜስ፤ ሴላይ ታዉ ሸምፖ እመና።
JOB 30:18 ፆሳይ ባ ግታ ዎልቃን ታ ማኡዋ ሺሽድ ኦይክስ፤ ቆ ኦይክያ ማኦዳ ታና ጩልስ።
JOB 30:19 ፆሳይ ታና ኡርቃን ሆልስ፤ ታኒ ባናነ ብድን ግዳስ።
JOB 30:20 አቤት ፆሳዉ፥ ታኒ ኔኮ ዋሳይስ፤ ሽን ኔኒ ታና አላባካ። ኤቃዳ ነና ዎሳስ፤ ሽን ኔኒ ታ ዎሳ ስአባካ።
JOB 30:21 ኔኒ ታዉ ዎዛና ምኖ ግዳዳሳ፤ ነ ግታ ዎልቃን ታና የደꬃሳ።
JOB 30:22 ኔኒ ታና ጫርኮራ ደንꬃዳ ጎዳዳሳ፤ ጎተን ታና ሀርቃዳሳ።
JOB 30:23 አሳ ኡባስ ዉርሰꬅ ግድዳ፥ ሀይቆስ ነ ታና አꬃ እማናይሳ ኤራይስ።
JOB 30:24 መቅዳ አስ፥ “ታና ማዳርክ” ግድ ዋስን፥ እያዉ ቃቶና አስ ደኢ?
JOB 30:25 ዋየን ደኤይሳታስ ታ ዬካብክና? ማንቆታስ ታ ቃታብክና?
JOB 30:26 ሎኦባ ደማና ጋዳ አሞታስ ሽን ኢታባይ ጋክስ፤ ታዉ ሳእ ኬሀና ጋዳ ናግስ ሽን ጋላስ ታዉ ꬉምስ።
JOB 30:27 ታ ዎዛናይ ህርጋ አግቤና፤ ታኒ ዎፓ ደማብከ፤ ኡንአ ቃም ታ ቦላ ጋክስ።
JOB 30:28 ታ አሳተꬃይ አዋ ሱሎን ግዶናሽን አዛኖን ካሬፅስ፤ ታኒ ደርያ ሺቁዋን ኤቃዳ ማደ ኮያይስ።
JOB 30:29 ታኒ ዎራካናታስ እሻ፥ ዲድንꬃስ ላገ ግዳስ።
JOB 30:30 ታ ጎጋይ ካሬፅድ ፖቀት ፖቀት ዎꬌስ፤ ታ አሳተꬃይ ምሻን ፁገቴስ።
JOB 30:31 ታ ኡፋይስ ቆንጭስያ ዲꬅነ ሱሱልኤይ፥ ሀእ ታ ዘለልሳስ ግድስ።
JOB 31:1 “ጌላኦ ፄላዳ አሞቶና መላ፥ ታኒ ታ አይፍያራ ጫቀታስ።
JOB 31:2 ቦላን ደእያ ፆሳ ማታፐ አሳስ እመትዳ ቃዳይ አይቤ? ሳሎን ደእያ ኡባ ዳንዳእያ ፆሳይ አሳስ እምያ ግሾይ አይቤ?
JOB 31:3 ኢታታ ቦላ ቦሽ፥ ባላ ኦይሳታ ቦላ ጋዶይ ጋካናይስ ኤረትዳባ ግደነዬ?
JOB 31:4 ፆሳይ ታ ኦግያ ኡባ በኤነዬ? ታ ታንጉዋ ኡባ ታይበነዬ?
JOB 31:5 “ታኒ ዎርዶን ደእዳባ ግድኮ፥ አሰ ጭምዳባ ግድኮ፥
JOB 31:6 ፆሳይ ታና ልከ ምዛነን ማዛኖ፤ ያትድ ታ ፅሎ ግደይሳ በኦ።
JOB 31:7 ታ ሄመꬃይ ኦገፐ ከይዳባ ግድኮ፥ ታ ዎዛናይ ታ አይፈይ ፄልዳባ አሞትዳባ ግድኮ፥ ታ ኩሸይ ናጋራን ቱንዳባ ግድኮ፥
JOB 31:8 ታ ዶላይ ሾደትድ ꬋዮ፤ ታ ዘርዳይሳ ሀር ሞ።
JOB 31:9 “ታ ዎዛናይ ሀራ ማጫስ አሞትዳባ ግድኮ፥ ዎይኮ ታኒ ታ ሾሩዋ ማችዉ ጌድዳባ ግድኮ፥
JOB 31:10 ታ ማችያ ሀራ አሳስ ጋጮ፤ ኢራ ሀራ አደይ አቆ።
JOB 31:11 ሄስ ዬላይያ ናጋራስ ኮሽያ ግታ ፕርዳ።
JOB 31:12 ሀ ናጋራይ ታማዳ ፁግያባ ግድያ ግሾ፥ ታ አቁዋ ኡባ ꬋይሳናሽን።
JOB 31:13 “ታ አደ ዎይኮ ታ ማጫ አይለት አቤት ግን፥ ኤንታዉ ፕርዶና እፅዳባ ግድኮ፥
JOB 31:14 ፆሳ ስንꬃን ታ ፕርዳስ ሺቅያ ዎደ ዋናኔ? እ ታና ኦይችያ ዎደ ታኒ ዎይጋ ዛራኔ?
JOB 31:15 ታና መꬍዳ ፆሳይ ኤንታ እ መꬍበነዬ? ኑና ኡባ ኑ አየ ኡሎን መꬍዳይ እስ እያ ግደነዬ?
JOB 31:16 “ታኒ ማንቆት ዎስዳባ ድግዳባ ግድኮ፥ ዎይኮ አምኤታ ምንꬆና አግዳባ ግድኮ፥
JOB 31:17 ይኦ ናይት መላ አቅያ ዎደ በአሸ፥ ታኒ ታርካ ምዳባ ግድኮ፥
JOB 31:18 ታኒ ኤንታ ታ ናአተꬃፈ ዶማዳ ኤንታ አዋዳ ድቻስ፤ ታ የለቶሶፐ ዶማዳ አምኤታ ማዳስ።
JOB 31:19 ማኦይ ꬋይን ሜጎይ ዎꬍያ ኡራ፥ ዎይኮ ካሎ ደእያ መቶታንቹዋ በአዳ፥
JOB 31:20 ታ ዶርሳታ እክሰፐ ኦሰትዳ ማኦ ማይዝን፥ ታና አንጆና ብዳይ ደእኮ፥
JOB 31:21 ታኒ ሞቶን ኤንታ ሻትማናይሳ ኤራዳ፥ ይኦ ናይታ ናቅዳባ ግድኮ፥
JOB 31:22 ታ ቀሰይ ኩርያፐ መኦ፤ ታ ኩሸይ ሀሽያፐ ካረት ዎꬎ።
JOB 31:23 ፆሳ ሀንቁዋ ያይዳ ግሾ ሄሳ ኦꬃናዉ ዳንዳእከ።
JOB 31:24 “ታኒ ዎርቃን አማነትዳባ ግድኮ፥ ዎይኮ ዋላህ ባይና ዎርቃ ‘ታ ጬቆይ ነና’ ግዳባ ግድኮ፥
JOB 31:25 ታ ዱረተꬃ ዳሮተꬃን፥ ታ ኩሸይ ደምዳ ዎን ኡፋይትዳባ ግድኮ፥
JOB 31:26 አዋ ጶለꬅ በአዳ፥ ዎይኮ አጌና ሎኦተꬅ ፄላዳ፥
JOB 31:27 ታ ዎዛናይ ጌማን ኤንታ ናሽቤና፥ ዎይኮ ታ ኤንታ ዬራዳ ጎይናብከ።
JOB 31:28 ሄስ ፕርዳ ኤህያ ናጋራ ግድያ ግሾ ፆሳ ካዳስ ጉሱ።
JOB 31:29 “ታ ሞርከታ ኩንደꬃን ኡፋይታብከ፤ ኤንታ ጋክዳ መቱዋን ሀሹ ጋብከ።
JOB 31:30 ‘ታ ሞርከይ ꬋዮ’ ያጋ ባዳዳ፥ ናጋራ ኦꬃብከ።
JOB 31:31 ታ ሶ አሳይ፥ ‘እያ ሶን ካꬅ ምድ ካሎናይ ኦኔ?’ ያግድ ማርካቶሶና።
JOB 31:32 ታ ሶይ ኡባ ዎደ ዶያ ግድያ ግሾ፥ ኦገ አስ ካረን አቅ ኤረና።
JOB 31:33 ሀራት ኦይሳዳ፥ ታ ናጋራ ታ ዎዛናን ገንꬃብከ።
JOB 31:34 አሳ ፖኮስ ያያዳ፥ ኤንታ ቦርያስ ዳጋማዳ፥ ሶ ገላዳ ቆሰትዳ ዎደይ ዴና።
JOB 31:35 “ታና ስእያ አስ ደኤረነሽን፥ ታ ኦዳይ ቱማ ግደይሳ ፓራማይስ፤ ኡባ ዳንዳእያ ፆሳይ ታዉ ዛሮ እሞ ታ ሞርከይ ባ ሞቱዋ ፃፍድ ሺሽን ታ በአርክናሽን።
JOB 31:36 በእያኮ ዎይቶዳ ቆን አꬃዳ ማአናሽን፥ ካላቻዳ ታ ሁጰን ዎꬃናሽን!
JOB 31:37 ታኒ ማት ደእያ አሳዳ ፆሳኮ ሺቃዳ፥ ታ ኦꬅዳባ ኡባ እያዉ ቆንጭሳናሽን!
JOB 31:38 “ታ ጎሻ ቢታይ ታ ቦላ ዋስዳባ ግድኮ፥ ዳሳትካ አፉꬃን ላክዳባ ግድኮ፥
JOB 31:39 ሄ ቢታን ካፅዳባ ሚሸ ቃንፆና ኤክዳባ ግድኮ፥ ዎይኮ ሄ ቢታ ኦይሳታ ኮሻን ዎꬍዳባ ግድኮ፥
JOB 31:40 ታዉ ሄ ቢታን ግስተ ግሾ አጉንꬅ፥ ባንጋ ግሾ ሻራፍ ዶሎ” ያግስ። እዮባ ኦዳይ ሄሳን ፖለትስ።
JOB 32:1 እዮብ፥ “ታኒ ፅሎ አስ” ግዳ ግሾ፥ ሀ ሄꬑ አሳት እያዉ ዛሮ እሞ አጋግዶሶና።
JOB 32:2 እዮብ ፆሳፈ አꬅድ ባና ፅሎ ኦꬅዳ ግሾ፥ ራማ ያራፐ ግድዳ ቡዛ ቢታፈ ይዳ ባርከላ ናአይ ኤልሁይ እዮባ ቦላ ሀንቀትስ።
JOB 32:3 ኤንቲ እያ ጮ ባላ ግድ ፕርድድ፥ እያዉ በሲያ ዛሮ እማናዉ ዳንዳእቦና ግሾ ኤልሁይ ሀ ሄꬑ ላገታ ቦላካ ሀንቀትስ።
JOB 32:4 ኤልሁይ ኤንታፈ ካሎትያ ግሾ ኤንቲ ኡባይ ሃሳያ ዉርሳና ጋካናዉ ናግስ።
JOB 32:5 ሀ ሄꬑ አሳት እዮባስ በሲያ ዛሮ እማናዉ ዳንዳእቦናይሳ በእድ እ ዳሮ ይሎትስ።
JOB 32:6 ቡዛ ቢታፈ ይዳ ባርከላ ናአይ ኤልሁይ ሀይሳዳ ያግድ ሃሳያ ዶምስ። “ታኒ ህንተፈ ናአታይስ፤ ህንተ ታፐ ባይራተታ፤ ሄሳ ግሾ፥ ታኒ ታ ቆፋ ህንተዉ ኦዳናዉ ያያስ።
JOB 32:7 ታኒ፥ ‘ጭማት ኦደቶ፤ ባንታ ዳሮ ላይꬃን ደምዳ ጭንጫተꬃ ታማርሶና’ ” ጋዳ ቆፓስ።
JOB 32:8 ሽን አሳ ግዶን አቅድ ጭንጫተꬅ እመይ፥ ኡባ ዳንዳእያ ፆሳ አያና።
JOB 32:9 አሰ ጭንጫ ኦይ ጭማተꬅ ግደና፥ ዎይኮ አሳስ አኬካ እመይ ላይꬃ ዳሮተꬅ ግደና።
JOB 32:10 ሄሳ ግሾ፥ ስእተ፤ ታካ ታ ቆፋ ህንተዉ ኦዳና።
JOB 32:11 ህንተ ሃሳያ ዎደ፥ ታኒ ስእ ጋዳ ሀይዛስ፤ ህንተ ኦዳና ቃላ ኮይሽን ናጋስ።
JOB 32:12 ህንተ ገይሳ ኡባ ዉርሳዳ ስአስ፤ ሽን ህንተፈ ኦንካ እዮባ ባላ ግድ አማንꬅበና፤ ህንተፈ ኦንካ እያ ፓላማስ በሲያ ዛሮ እምቤና።
JOB 32:13 እዮባ ኦዳስ ካልስያ ዛሮ እማናዉ ዳንዳኤይ፥ ፆሰፈ አትሽን፥ አሰ ግዶና ግሾ፥ ህንተ፥ “ኑስ ጭንጫተꬅ ደኤስ” ጎፕተ።
JOB 32:14 እዮብ ፓላምዳይ ታራ ግዶናሽን ህንተራ፤ ታኒ ህንተ ኦዳዳ እያዉ ዛሮ እምከ።
JOB 32:15 ኤንቲ ዳጋምድ፥ ጋናባ ꬋይዳ ግሾ፥ ዛሮ እማናዉ ዳንዳእቦኮና።
JOB 32:16 ያትን ኤንቲ ኦደትያባ ꬋይድ ስእ ግድ ኤቅኮ፥ ታኒ ናጋናዉ ኮሺ?
JOB 32:17 ግደና፥ ታኒ ኦድያባይ ደኤስ፤ ታካ ታ ቆፋ ቆንጭሳና።
JOB 32:18 ታ ኦዳናባይ ዳሮይ ደእያ ግሾ፥ ታ ግዶን ደእያ አያናይ ታና ኦዳ ግድ ሱጌስ።
JOB 32:19 ታ ጋꬃይ ጎዘትዳ ማናጨዳ፥ ዎይኮ ማልአንቶ ዎይነ ኡሽ ኩምዳ ኦጎሮዳ ꬉቃና ሀኔስ።
JOB 32:20 ታ ኦዳዳ ከሳናዉ በሴስ፤ ታ ዶና ዶያዳ ዛሮ እማናዉ ኮሼስ።
JOB 32:21 ሀ ኦዳን ታኒ ኦናካ ማድከ፥ ዎይኮ ኦናካ ጮ ሳቢከ።
JOB 32:22 አሰ ጮ ሳቢያባይ ታዉ ኤረተና፤ ታ ሄሳ ኦꬅያኮ ታና መꬍዳይስ ፕርዳናሽን።
JOB 33:1 እዮባ፥ ሀእ ታ ኦዳ ስአ፤ ታ ግያባ ኡባ ሀይዛ።
JOB 33:2 ታኒ ታ ዶና ዶያስ፤ ታ ቃላት ታ እንፃርሳ ፄራን ደኦሶና።
JOB 33:3 ታ ቃላት ታ ዎዛና ሱረተꬃ ቆንጭሶሶና፤ ታ ኤረይሳ ታ እንፃርሳይ ቱማተꬃን ኦዴስ።
JOB 33:4 ታና መꬍዳይ ፆሳ አያና፤ ኡባ ዳንዳእያ ፆሳ ሸምፖይ ታዉ ደኦ እሚስ።
JOB 33:5 ነ ዳንዳእኮ ታዉ ዛሮ እማ፤ ነና ጊግሳዳ ታራ ፓላማ።
JOB 33:6 ታኒ ፆሳ ስንꬃን ነ መላ፤ ታንካ ኡርቃፈ መታስ።
JOB 33:7 ኔኒ ታዉ ያይያ ጋሶይ ባዋ፤ ታኒ ነና ናቅከ።
JOB 33:8 “ነ ሃሳያ ኡባ ታኒ ስአሸ ጋምአስ፤ ኔ ዶናፐ ከይዳ ቃላታ ሀይዛስ።
JOB 33:9 ታኒ ጌሽነ ቦረይ ባይና አስ፤ ታኒ ፅሎነ ናጋራ ኦꬃቦና አስ።
JOB 33:10 ሽን ፆሳይ ታና ሴራናዉ ጋሶ ኮዬስ፤ እ ታና ባ ሞርከዳ ታይቤስ።
JOB 33:11 ታ ቶሁዋ ዱፅስ፤ ታ ታንጎ ኡባ እ ዎቼስ” ያጋዳሳ።
JOB 33:12 “እዮባ፥ ነ ኦዳይ ልከ ግደና፤ ታ ነዉ ኦዳይስ፥ ፆሳይ አሳፐ አꬌስ።
JOB 33:13 ‘ፆሳይ አሳ ኦዳስ ዛሮ እመና’ ጋዳ፥ አይስ እያራ ፓላማይ?
JOB 33:14 አስ አኬከናፈ አትሽን፥ ፆሳይ ዱማ ዱማ ኦገራ ኦዴስ።
JOB 33:15 አስ ቃማ ሂፃን ዝንእድ፥ ꬍስኮ ኤይድ ደእያ ዎደ፥ ፆሲ አሙሆንነ ቆንጨꬃን ኦዴስ።
JOB 33:16 ሄ ዎደ አሳይ ስአናዳ ሀይ ዶዬስ፤ ባ ሴራን ኤንታ ዳጋንꬄስ።
JOB 33:17 ያትድ አስ ናጋራ ኦꬆና መላ ተቄስ፤ ኦቶሮ አሳፐ ድጌስ።
JOB 33:18 ፆሲ አሰ ꬋዮፐ አሼስ፤ ሀይቆፐካ ናጌስ።
JOB 33:19 አስ ሀርገትድ ሂፃን ደእሽን፥ እያ መቀꬃ ጋርሳን ቃንፆና ሳሆ የድድ ሴሬስ።
JOB 33:20 ሄሳዳ ሀንድ ሀርግዳ ኡራይ ካꬅ እፄስ፤ ዳሮ ማልኦ ካꬅ እያ ሻቴስ።
JOB 33:21 እያ አሾይ ግልቅድ ዉሬስ፤ እያ አሳተꬃይ መልን መቀꬅ ታይበቴስ።
JOB 33:22 እያ ሸምፖይ ዱፎኮ፥ እያ ደኦይ ሀይቆ ኪታንቾታኮ ማቴስ።
JOB 33:23 “አሳስ ሱረ ኦግያ በሲያ ሙኩሉን ታይበትያ ኪታንቾታፐ እሶይ እያ ማዳናዉ ዳንዳኤስ።
JOB 33:24 እያዉ ቃትድ፥ ‘እ ዱፎ ገሎና መላ እያ አሻ፤ ታኒ እያ ዎዝያባ ደማስ፤ እያ አጋጋ’ ያግድ ሀይቆስ ኦዴስ።
JOB 33:25 ሄሳ ግሾ፥ እያ አሳተꬃይ ናአ አሳተꬅ ግዳና፤ እያ ያላጋተꬃ ዎልቃይ እያዉ ስማና።
JOB 33:26 ሄ ዎደ እ ፆሳ ዎሳና፤ ፆሳይ እያ ዎሳ ስአና፤ ፆሳይ እያዉ እያ ፅሎተꬃ ዛርያ ግሾ፥ እ ኡፋይሳን ፆሳ ጎይናና።
JOB 33:27 ሄ ዎደ አሳ ስንꬃን እ ሀይሳዳ ያግድ የፃና፤ ‘ታኒ ናጋራ ኦꬃስ፤ ሱረባ ጌላያስ፤ ሽን ፆሳይ ታ ሀኑዋ ታዉ ቃንፅቤና።
JOB 33:28 ታ ዱፎን ገሎና መላ ታና አሽስ፤ ሀእ ፓፃ ደአዳ ፖኦ በአይስ’ ያጋና።
JOB 33:29 “ሄኮ፥ ፆሲ አሳስ ሄሳ ኡባ ዛር ዛር ኦꬄስ።
JOB 33:30 እ ደኦ ፖኦ በአና መላ፥ እያ ሸምፑዋ ዱፎፐ አሼስ።
JOB 33:31 “እዮባ፥ ታኒ ኦደይሳ ሀይዛዳ ስአ፤ አነ ነ ስእ ጋ፤ ታኒ ኦደታና።
JOB 33:32 ነ ኦዳናዉ ኮያባይ ደእኮ ኦዳ፤ ታኒ ነ ፅሎ ግደይሳ በአናዉ ኮያይስ።
JOB 33:33 አቶ ጊኮ ስእ ጋዳ፥ ታ ሃሳያ ስአ፤ ታ ነና ጭንጫተꬅ ታማርሳና” ያግስ።
JOB 34:1 ቃስካ ኤልሁይ ሀይሳዳ ያግስ፤
JOB 34:2 “ህንተኖ፥ ጭንጫቶ ታ ሃሳያ ስእተ፤ ህንተኖ፥ ኤራንቾቶ ታና ሀይዝተ።
JOB 34:3 እንፃርስ ማልኦ ካꬅ ሻክ ኤረይሳዳ፥ ሀይꬅ ኦዳ ሻክድ ኤሬስ።
JOB 34:4 አነ ኑኒ ሱረባ ሻክድ፥ ሎኦባ ታማርድ ኤሮስ።
JOB 34:5 “እዮብ፥ ‘ታኒ ፅሎ፤ ሽን ፆሲ ታና ሱረ ፕርዳ ድግስ።
JOB 34:6 ታኒ ቱማ ሽን ዎርዳንቾ ግዳስ፤ ታናን ባል ባዋ ሽን፥ ፓፆና ማዱንꬅ ማዱንፅስስ’ ያግስ።
JOB 34:7 እዮባዳ ፆሳ ቦላ፥ ቀልቅስያ አስ ደኢ?
JOB 34:8 እ ኢታ ኦይሳታራ ላገቴስ፤ ናጋራንቾታራ ሄመቴስ።
JOB 34:9 እ፥ ‘አስ ፆሰ ኡፋይሳና ግድ ኦꬅያባይ አይኮካ ማደና’ ያጌስ።
JOB 34:10 “ሄሳ ግሾ፥ ህንተኖ፥ አኬካንቾ አሳቶ ስእተ፥ ኢታ ኦሶይ ፆሳፈ፥ ኡባ ዳንዳእያ ፆሳፈ ባላ ኦሶይ ሃኮ።
JOB 34:11 ፆሳይ አሳስ እያ ኦሱዋዳ እሜስ፤ እያ ኦግያዳ እያዉ ቃንፄስ።
JOB 34:12 ፆሳይ ቱማ ኢታ ኦና፤ ኡባ ዳንዳእያ ፆሳይ ሱረ ፕርዳ ጌላየና።
JOB 34:13 ሳአ ቦላ እያዉ ማታ እምዳይ ኦኔ? ቢታ ኡባ ቦላ እያ ሹምዳይ ኦኔ?
JOB 34:14 ፆሳይ ባ አያናነ ባ ደኦ ሸምፑዋ ዛሪድ ባኮ ኤክያኮ፥
JOB 34:15 አሾ ማእዳ ኡባይ እስፈ ꬋያና፤ አስ ቢታ ስማናሽን።
JOB 34:16 “ነዉ አኬክ ደእኮ ሀይሳ ስአ፤ ታ ሃሳያ ሀይዛ።
JOB 34:17 ሱረ ፕርዳ እፀይ ሃራናዉ ዳንዳኢ? ኔኒ ፅሎነ ዎልቃማ ፆሳ ፕርዳይ?
JOB 34:18 ፆሳይ ካዎታኮ፥ ‘ህንተ ፓꬆናይሳታ’፤ ቃስ ቢታ ሃረይሳታኮ፥ ‘ህንተ ኢታ’ ያጌስ።
JOB 34:19 ኤንቲ ኡባይ እያ ኩሸ ኦሶታ ግድያ ግሾ፥ ሀላቃታ ሶምኦ ፄልድ ማደና፤ ዱረታ ማንቆታፐ አꬅድ ፄለና።
JOB 34:20 ኤንቲ ግድ ብላሄ አኬኮና ሀይቃና፤ ኡባይ ኮኮርሸ ꬋያና፤ ዎልቃማት አሳ ኩሸይ ቦቾና ክቻና።
JOB 34:21 “ፆሳይ አሳ ሄመꬃ ፄሌስ፤ እያ ታንጎ ኡባ ዎቼስ።
JOB 34:22 ኢታ ኦይሳታ፥ ገንꬃናዉ ዳንዳእያ ሳካና ꬉም ባዋ።
JOB 34:23 አሳይ እያ ስን ፕርዳስ ሺቃና መላ፥ ፆሳይ ቃፃሮ እመና።
JOB 34:24 ኦይሽ ባይና ዎልቃማታ መንረꬄስ፤ ኤንታ በሳን ሀራታ ሹሜስ።
JOB 34:25 እ ኤንታ ኦሱዋ ኤርያ ግሾ፥ ኤንታ እስ ቃማን ማታፐ ዎꬅድ ꬋይሴስ።
JOB 34:26 ኤንታ ኢታተꬃ ግሾ፥ ናጋራንቾታ አሳ ስንꬃን ሴሬስ።
JOB 34:27 ሄሳ እ ኦይ፥ ኤንቲ እያ ካሎና እፅዳ ግሾነ እያ ኪታ አግዳ ግሾሳ።
JOB 34:28 ኤንቲ ማንቆታ ኡንኤꬅድ ፆሳኮ ዋሳና መላ ኦꬅዶሶና፤ ፆሳይ ማንቆታ ዋሱዋ ስእስ።
JOB 34:29 ፆሳይ ስእ ጊኮ እያ ኦነ ሞታናይ? እ ባ ሶምኡዋ ቆስኮ እያ በአናይ ኦኔ? እ አሳፐነ ካዎተꬃፈ ቦላ።
JOB 34:30 ሄስ ሀንዳይ ጌላይ ደርያ ሃሮና መላነ ኤንታ ስንꬃን ፅሄ ዎꬆና መላሳ።
JOB 34:31 “አስ ፆሳኮ ያግያኮ ሎኦ፤ ካሰ ታ ናጋራ ኦꬅዳባ ግድኮ ዛራዳ ኦꬅከ።
JOB 34:32 ታ በኦናይሳ ታና ታማርሳ፤ ናጋራ ኦꬅዳባ ግድኮ ዛራዳ ኦꬅከ።
JOB 34:33 ያትን ኔኒ ፓፅከ ጋሸ፥ ነ ዶሰይሳ መላ ፆሳይ ነዉ ዎይታነዬ? ህዛ ቆፋ ቃቻናይ ነናፐ አትሽን፥ ታና ግድከ፤ ሄሳ ግሾ፥ ነ ኤረይሳ ታዉ ኦዳ።
JOB 34:34 አኬካ አሳይ ሀይሳዳ ያጎሶና፤ ጭንጫት ያጎሶና፤
JOB 34:35 ‘እዮብ ኤር ባይና ኦደቴስ፤ ኢያ ኦዳን አይፈይ ባዋ።’
JOB 34:36 እዮብ ኢታ አሳዳ ዛሮ እምዳ ግሾ፥ ዉርሰꬅ ጋካናዉ ፓጨትዳ ግዴረነ!
JOB 34:37 እ ባ ናጋራ ቦላ ጌላተꬅ ጉጅስ፤ ኑ ስንꬃን ፆሳ ቦላ ቀልቅስስ፤ ፆሳ ቦላ ዳሮ ኦደትስ” ያግስ።
JOB 35:1 ኤልሁይ ቃስ ሀይሳዳ ያግስ፤
JOB 35:2 “እዮባ፥ ኔኒ፥ ‘ታኒ ፆሳ ስንꬃን ፅሎ’ ገይስ ልኬ?
JOB 35:3 ‘ታኒ ናጋራ ኦꬆና አጋዳ አይ ጎኤትያና? አይ ዎ ደማኔ?’ ያጋዳ ነ ፆሳ ኦይቻናዉ ዳንዳኣሳ።
JOB 35:4 ታኒ ነዉነ ነ ላገታስ ዛሮ እማና።
JOB 35:5 ꬎቁ ጋዳ ሳሎታ ፄላ፤ ኔፐ ቦላራ ደእያ ሻራ አኬካዳ በአ።
JOB 35:6 ነ ናጋራ ኦꬅኮ ፆሳ አይብን ቆሀኔ? ነ ባላይ ዳርኮ ሄስ እያዉ አይ ኦꬂ?
JOB 35:7 ነ ፅሎ ግድኮ እያዉ አይ እማኔ? ዎይኮ ነ ኩሸፐ እ አይ ኤካኔ?
JOB 35:8 ነ ናጋራ ኦꬅኮ ነ መላ አሰ ቆሃሳ፤ ቃስ ፅልኮካ አሰ ጎኣሳ።
JOB 35:9 “ኡንእ ዳርያ ዎደ አሳይ ዋሴስ፤ ዎልቃማታ ኩሸፐ ከስ ኤክያ አስ ኮይድ ዎባቶሶና።
JOB 35:10 ሽን ኦንካ፥ ‘ቃማ ማዝሙረ እምያ፥ ታና መꬍዳ ፆሳይ አዉን ደኢ?
JOB 35:11 ዶአታፐ አꬅድ ታማርሰይስ፥ ካፎታፐ አꬅድ ጭንጫ ኦይስ አዉን ደእ’ ያገና።
JOB 35:12 ኤንቲ ዋሶሶና፤ ሽን ፆሳይ ኤንታ ኦቶሩዋ ጋሶን፥ ኤንታዉ ዛሮ እመና።
JOB 35:13 ጮ ዋሱዋ ፆሲ ቱማ ስኤና፤ ኡባ ዳንዳእያ ፆሳይ ሄሳ ሀይዘና።
JOB 35:14 ኔኒ ታ ፆሳ በአናዉ ዳንዳእከ ያግኮካ፥ ነ ሞቶይ እያ ስንꬃን ደእያ ግሾ፥ ነ እያ ዳንዳአን ናጋናዉ በሴስ።
JOB 35:15 ፆሳይ አሰ ፕርዶናባነ ናጋራ አግድ አꬋና ጋዳ ቆፓይ?
JOB 35:16 ሄሳ ግሾ፥ ኔኒ ነ ዶና ጮ ዶያሳ፤ ኤር ባይና ሃሳያ ዳርሳሳ” ያግስ።
JOB 36:1 ኤልሁይ ጉጅድ ሀይሳዳ ያግስ፤
JOB 36:2 “ፆሳ ዶና ግዳዳ ታ ነዉ ኦድያባይ ደእያ ግሾ፥ ጉꬁ ዳንዳአዳ ስአ።
JOB 36:3 ታኒ ታ ኤራ ሃሆ ሶፐ ኤሀና፤ ታና መꬍዳይስ ፅሎ ግደይሳ ቆንጭሳና።
JOB 36:4 ታኒ ዎርዶ ሃሳይከ፤ ኩመꬃ ኤር ደእያ አስ ኔራ ደኤይሳ አማና።
JOB 36:5 “ፆሳይ ቱማ ዎልቃማ፤ ሽን እ ኦናካ ካና። እ ባ አኬካን ምኖ።
JOB 36:6 እ ኢታት ደኦን ዳና መላ ኦና፤ ሽን ኡንኤትዳይሳታስ ሱረ ፕርዴስ።
JOB 36:7 ፆሳይ ባ አይፍያ ፅሎታ ቦላፈ ደንና፤ ኤንታ ካዎታራ ኡትስድ፥ መርናዉ ꬎቁ ꬎቁ ኦꬄስ።
JOB 36:8 ሽን አሳይ ሳንꬃላታን ቃሸትኮ፥ ዎይኮ መቶ ዎዶሮን ኦይከትኮ፥
JOB 36:9 እ ኤንታ ኦሱዋነ ኦቶሮን ኦꬅዳ ናጋራ ኤንታ ቦላ ቆንጭሴስ።
JOB 36:10 ሴራ ስአናዳ ኤንታ ሀይꬃ ዶዬስ፤ ናጋራፐ ስማና መላ ኤንታ ኪቴስ።
JOB 36:11 ኤንቲ ስእድ እያዉ ኪተትኮ፥ ባንታ ላይꬃ ሳሮንነ ኡፋይሳን ዉርሳና።
JOB 36:12 ሽን ኤንቲ ስኦና እፅኮ ማሻን ዉራና፤ ኤንቲ ኤራ ꬋይዳ ግሾ ሀይቃና።
JOB 36:13 “ፆሳ አማኖና አሳት ባንታ ዎዛናን ይሎትዳ መላ ደኦሶና፤ እ ኤንታ ፕርድያ ዎደ ማደ ኮይድ ዎሶኮና።
JOB 36:14 ኤንቲ ኦꬅያ ቱና ኦሱዋን ꬋያና፤ ባንታ ናአተꬃን ሀይቃና።
JOB 36:15 ሽን ዋየተይሳታ ኤንታ ዋያፐ አሼስ፤ ኤንታ መቱዋ ባጋራ ኤንታዉ ኦዴስ።
JOB 36:16 “ፆሳይ ነና መቶ ዎዶሮፐ፥ ኡንእ ባይና ዳልጋ በሲ፥ ዶረትዳ ካꬅ ኩምዳ ጋይታኮ ከሳና።
JOB 36:17 ሽን ሀእ ኢታታ ቦላ ጋክያ ፕርዳይ ነ ቦላ ጋክን፤ ፅሎ ፕርዳን ኦይከታዳሳ።
JOB 36:18 ኦንካ ነና ዱረተꬅ በስድ ጭሞና መላ፥ ዎꬋፈ ዳሮይ ባለꬆና መላ ናገታ።
JOB 36:19 ነ ዱረተꬃይ ዎይኮ ነ ዳፈተꬃይ ነና መቶፐ አሻኔ?
JOB 36:20 አሳይ ባንታ በሳፈ ꬋይያ ቃማይ፥ ያና መላ አሞቶፋ።
JOB 36:21 ሀ መቶ ኡባይ ነና ጋክዳይ ሄሳ ጋሶና፤ ሄሳ ግሾ፥ ኢታ ኦꬆና መላ ናገታ።
JOB 36:22 “ፆሳይ ባ ዎልቃን ꬎቁ ꬎቁ ግስ፤ እያ መላ አስታማረይ ኦኔ?
JOB 36:23 ፆሳ፥ ‘ሀይሳ ኦꬃ’ ግድ ኪተይ፥ ዎይኮ፥ ‘ኔኒ ኢታ ኦሶ ኦꬃዳሳ’ ያጋናዉ ዳንዳኤይ ኦኔ?
JOB 36:24 አሳይ ማዝሙረን ሳቢዳ እያ ኦሱዋ፥ ነካ ማዝሙረን ሳባ።
JOB 36:25 አሳ ኮቸ ኡባይ ፆሳ ኦሱዋ በእስ፤ አሳይ ሃሆን ኤቅድ ፄልዶሶና።
JOB 36:26 ፆሳይ ግታ! እያ ግታተꬃ ኑ አኬካናዉ ዳንዳኦኮ፤ እያ ላይꬃ ዳሮተꬃስ ዛው ባዋ።
JOB 36:27 “ፆሳይ ሃ አባፈ ፑደ ሳሎ ኤፌስ፤ ዱገ ዛሪድ እራ ኦꬅድ ቡክሴስ።
JOB 36:28 ሄ እራይ ሻራፐ ከይድ፥ አሳ ቦላ ቡካና መላ ኦꬄስ።
JOB 36:29 ፆሲ ሻራ ዋትድ ምጭያኮ፥ ፆሳይ ደእያ ሳሉዋን ዋንድ ጉምያኮ፥ ኦንካ ኤረና።
JOB 36:30 እ ባ ዩሾን ዎልአንꬃ ፖኡዋ ላሌስ፤ አባ ጪሙዋ ዋትድ ካምያኮ በአ።
JOB 36:31 ያትድ ፆሳይ ደርያ አይሴስ፤ ካꬃ ዳርስድ እሜስ።
JOB 36:32 እ ዎልአንꬅ ባ ኩሸን ኦይኬስ፤ ባ ማልዳ በሳ ጫዳና መላ ኪቴስ።
JOB 36:33 ዳድ ꬉቅድ ኡሾይ ያናይሳ በሴስ፤ መሄይካ ኡሾይ ያናይሳ ኤሬስ።
JOB 37:1 “እያ ኡሹዋን ታ ዎዛናይ ድርጌስ፤ ባ በሳን ቃፄስ።
JOB 37:2 እያ ዶናፐ ከይያ ቃላ ስእተ፤ ዳዳዳ ጉምያ እያ ግርሳ ሀይዝተ።
JOB 37:3 እ ሳሎ ጋርሳን ባ ዎልአንꬃ ላሌስ፤ ቢታ ጋፃፐ ጋፃ ጋካናዉ ኪቴስ።
JOB 37:4 ሄሳፈ ጉየ፥ እያ ጉንꬃይ ስኤቴስ፤ ባ ያሽያ ግርሳ ስሴስ። እያ ግርሳይ ስኤትያ ዎደ፥ ባ ዎልአንꬃ ተቀና።
JOB 37:5 ፆሳ ማላልስያ ኦገን ባ ጉንꬃ ስሴስ፤ ኑኒ አኬካናዉ ዳንዳኦና ግታባ እ ኦꬄስ።
JOB 37:6 እ ሻቻኮ፥ ‘ሳአን ዎꬋ’ ያጌስ፤ ዎልቃማ እራኮ፥ ‘ቡካ’ ያግድ ኪቴስ።
JOB 37:7 እ መꬍዳ አሳ ኡባይ እያ ኦሱዋ ኤራና መላ፥ አሳይ ባንታ ኦሱዋ አጋና መላ ኦꬄስ።
JOB 37:8 ሄ ዎደ ዶአት ባንታ በሳ ገሎሶና፤ ባንታ ጎንጎሉዋን ቆሰቶሶና።
JOB 37:9 ዎልቃማ ጎተይ ዱገሀፐ ደንዴስ፤ እርፃ ጫርኮይ ፑደሀፐ ዬስ።
JOB 37:10 ፆሳ ደኦ ሸምፖይ ሻች መꬌስ፤ ዳልጋ ሃꬃታ ሹቻዳ ምንꬄስ።
JOB 37:11 ሻር ሃ ቶካና መላ ኦꬄስ፤ ባ ዎልአንꬃ ሻራ ግዶን ላሌስ።
JOB 37:12 ሻራት እያ ኪታን ቢታ ጋፃ ዩዮሶና፤ እ ኪትያ ኪታ ኡባ ፖሎሶና።
JOB 37:13 ፆሳይ እራ ቡክሰይ ቢታ እርፅሳናሳ፥ ዎይኮ አሳ ሴራናሳ፥ ዎይኮ ባ ሲቁዋ በሳናሳ።
JOB 37:14 “እዮባ፥ ሄሳ ስአ፤ ፆሳይ ኦꬅያ ማላልስያ ኦሱዋ ታክ ጋዳ አኬካ።
JOB 37:15 ፆሳይ ሻራታ ዋትድ ኪትያኮ፥ ባ ዎልአንꬃ ዋትድ ዎልአምስያኮ ኤራይ?
JOB 37:16 ሻራት ሳሎን ዋንድ ኡትያኮ፥ ኤራን ፖሎ ግድዳ ፆሳይ ኦꬅያ ማላልስያ ኦሱዋ ኔኒ ኤራይ?
JOB 37:17 ዱገሀ ጫርኮይ ጫርክድ ቢታ ምሽስያ ዎደ፥ ኔኒ ዎልቃማ ባዞ ሴላን ትልአና።
JOB 37:18 ፆሳይ ሳሉዋ ትልእዳ ማስቶተዳ ምጭያ ዎደ፥ ኔኒ እያ ማዳናዉ ዳንዳአይ?
JOB 37:19 ኑኒ ኤራ ፓጫ ግድያ ግሾ፥ ፆሳስ ዎይግድ ኦደታነኮ ነ ኑና ታማርሳ።
JOB 37:20 ፆሳራ ኦደታና ጋዳ ታኒ ኦይቻናዉ ኮሺ? ታና ꬋይሳና መላ ታ አይስ እያ ደንꬃኔ?
JOB 37:21 ጫርኮይ ሳሎፐ ሻራ ጌሽያ ዎደ፥ ሳሎን ጶልያ አዋ ኦንካ በአናዉ ዳንዳኤና።
JOB 37:22 ፑደሀ ባጋራ ዎርቃ ዳንያ ፖኦይ በንቴስ፤ ፆሳይ ያሽያ ቴማን ቆንጬስ።
JOB 37:23 ኡባ ዳንዳእያ ፆሳኮ ሺቃናዉ ዳንዳኦኮ፤ እያ ዎልቃይ ግታ። እ ባ ቱማ ፕርዳንነ ባ ግታ ፅሎተꬃን አሰ ቆሄና።
JOB 37:24 ሄሳ ግሾ፥ አሳይ እያዉ ያዬስ፤ ባንታና ጭንጫ ገይሳታ እ ካꬌስ” ያግስ።
JOB 38:1 ሄሳፈ ጉየ፥ ጎዳይ ጎተ ግዶን ግድድ እዮባስ ሀይሳዳ ያግድ ዛርስ።
JOB 38:2 ኤር ባይና ኦዳን ታ ዞርያ ꬉምሰይ እ ሄስ ኦኔ?
JOB 38:3 አነ አደዳ ዳንጨታ፤ ታ ነና ኦይቻና፥ ታዉ ዛራ።
JOB 38:4 ታኒ አላምያ መꬍያ ዎደ ኔኒ አዉን ደአይ? አነ ነ አኬክያኮ ታዉ ኦዳ።
JOB 38:5 ነ ኤርኮ፥ ሀ ሳኣ ዳልጋተꬃስ ዛዋ ዎꬅዳይ ኦኔ? ዋꬋ ዎዶሩዋ ሳአ ቦላ የግዳይ ኦኔ?
JOB 38:6 ሀ ሳኣ ቱሳታ ኩንዶና መላ ምንꬅድ ኦይክዳይ አይቤ? ሀ ሳኣ ባሱዋስ ኮይሮ ሹቻ ዎꬅዳይ ኦኔ?
JOB 38:7 ዎንታ ባካላት እስፈ የፅያ ዎደ፥ ኪታንቾት ኡባይ ኡፋይሳን እልል ግያ ዎደ ነ ኤራይ?
JOB 38:8 አባ ሃꬅ ቢታፈ ꬉቅድ ከይያ ዎደ፥ እያ ፐንገታ ጎርድዳይ ኦኔ?
JOB 38:9 አባ ሻራ ማይዛስ፤ ሳካና ꬉማን ጎዝዳይ ታና።
JOB 38:10 አባይ ካንꬆና መላ ዛዋ መꬍዳይ፥ እያዉ ፐንገነ ተቀ ዎꬅዳይ ታና።
JOB 38:11 “ሀይሳ ጋካናዉ ያ፤ ሽን ሀይሳፈ አꬎፋ፤ ነ ዎልቃማ ሆበይ ሄሳን ኤቆ” ያግዳይ ታና።
JOB 38:12 እዮባ፥ ነ የለቶሶፐ ዎንት ዎንታና መላ ኪታ ኤራይ፥ አዋይ ዶላና በሳ ማላ ኤራይ?
JOB 38:13 ዎንታ ፖኦይ ቢታ ኡባን ፖአና መላ፥ ኢታ አሳታ ቆሰትዳ በሳፈ ቆንጨ ከሳና መላ፥ ኔኒ ዎንታ ኪታ ኤራይ?
JOB 38:14 ዎንታ ፖኦይ ዙማታነ ዛንጋራታ፥ ዳኮይድ ዎꬅዳ ማኦይ ኤቅድ በንተይሳዳ በሴስ፤ ኦቶ ቦላ ዎꬅዳ ማታመዳ ቆንጬስ።
JOB 38:15 ኢታታ ፖኦይ ኤከታና፤ ኤንታ ማካላ ቀሰይ መቃና።
JOB 38:16 ጪሞ አባ ግዶ ገላዳ ፑልቱዋ በአዲ? ዎይኮ እያ ባሱዋ ጋካዳ እያ ኦላ ስመረታዲ?
JOB 38:17 ነዉ ሀይቆ ፐንገት በንትዶና? ዎይኮ ሳካና ꬉማ ፐንገታ በአዲ?
JOB 38:18 ሳአይ አይ መላ ግቴኮ ነ ኤራይ? ሄሳ ኡባ ነ ኤርያ ግድኮ ታው ኦዳ።
JOB 38:19 ፖኦኮ ኤፍያ ኦገይ አዉኔ? ꬉም አዉን ደእያኮ ኤራይ?
JOB 38:20 ፖኦነ ꬉማ ኤንታ በሳ በሳ ኤፋናዉ ዳንዳአይ? ኤንቲ ደእያ በሳ ኤፍያ ኦግያ ኤራይ?
JOB 38:21 ኔኒ ሳእ መትያ ዎደ የለትዳ ግሾነ ዳሮ ላይꬅ ደእዳ ግሾ ሄሳ ኤሮና አጋካ!
JOB 38:22 ሻች ምንጀትያ ኬꬃ ገላዲ? ዎይኮ ሻች ዶረትዳ በሳ በአዲ?
JOB 38:23 ታኒ ኤንታ መቶ ዎደስ፥ ኦላ ዎደስነ ቶራ ጋላሳስ ምንጃ ዎꬃስ።
JOB 38:24 ዎልአንꬅ ከያ በሳ ኤፍያ ኦገይ አዉን ደኢ? ዎይኮ ዶሎሀ ጫርኮይ አዉፐ ከይድ ጫርኪ?
JOB 38:25 እር ዎꬍያ በሳ ጊግስዳይ፥ ዳዳስ ኦገ ከስዳይ ኦኔ?
JOB 38:26 አስ ዶና መላ ቢታን እራ ቡክሰይ ኦኔ?
JOB 38:27 መልዳ መላ ቢታይ እራን ላክድ፥ ፑርጮ ማታይ ዶላና መላ ኦꬅዳይ ኦኔ?
JOB 38:28 እራስ አው ደኢ? ዎይኮ አካ የልዳይ ኦኔ?
JOB 38:29 ሻቻስ አይያ ደአይ?
JOB 38:30 ሃꬃይ ሹቻዳ ምንꬄስ፤ አባ ባሶይ ሻቻዳ ኡከቴስ።
JOB 38:31 ፕላድሳ ጌተትያ ፆልንቶታ እስፈ ጋꬃዳ ቃቻናዉ ዳንዳአይ? ኦርዮና ጌተትያ ፆልንቶት ቃሸትዳ ዎዶሩዋ ብላናዉ ዳንዳአይ?
JOB 38:32 ጩጋን ጩጋን ደእያ ፆልንቶታ ኤንታ ዎደን ዎደን ከሳናዉ ዳንዳአይ? ቢረ ጌተትያ ፆልንቶታ ኤንታ ናይታራ ካለꬃናዉ ዳንዳአይ?
JOB 38:33 ሳሎት አይ ህገን አቅያኮ ነ ኤራይ? ሄ ህገይ ሳኣ ሃራና መላ ኦꬃናዉ ዳንዳአይ?
JOB 38:34 ድኦይ ነና ሙካና መላ እራ ቡክሳናዉ፥ ነ ቃላ ꬎቁ ኦꬃዳ ሻራታ ስሳናዉ ዳንዳአይ?
JOB 38:35 ዎልአንꬅ ኪታናዉ ዳንዳአይ? ኤንቲ ኔኮ ይድ፥ “ሄኮ፥ አይ ኦꬅኖ?” ጎና?
JOB 38:36 ዎዛናስ ጭንጫተꬅ፥ ካሀስ አኬካ እምዳይ ኦኔ?
JOB 38:37 ባ ጭንጫተꬃን ሻራታ ታይባናዉ ዳንዳኤይ ኦኔ? ባና ሙኑቅድ፥ ኡርቃ ከስድ ምንꬃናዉ፥ ሳሎ ኦቶታ ገድ ኦꬅድ ሃ ትጋናዉ ዳንዳኤይ ኦኔ?
JOB 38:39 ሻንካታዳ ማጫ ጋሞስ ምያባ ኤሀ ኤራይ? ኮሻትዳ ጋሞ ማራታ ሙዛ ኤራይ?
JOB 38:40 ኤንቲ ጎንጎሎን ቆሰት ናጎሶና፤ ባዞን ዝንእድ ፔኦሶና።
JOB 38:41 ቁሮት ኮሻትድ ዳቡርያ ዎደ፥ ኤንታ ናይት ምያባ ደማናዉ ታኮ ዋስያ ዎደ፥ ኤንታዉ ምያባ እመይ ኦኔ?
JOB 39:1 “ዎሽኤይ አዉደ የልያኮ ኔኒ ኤራይ? ባቾት ባናክድ ባንታ ማራታ የልያ ዎደ በአዲ?
JOB 39:2 ኤንቲ አይ መላ አጌና ጋምእያኮ፥ አዉደ የልያኮ ነ ኤራይ?
JOB 39:3 ኤንቲ ጉልባት ኤቀትድ፥ ባንታ ማራታ የለይ አዉደኮ ኤራይ?
JOB 39:4 ኤንታ ማራት ባዞን ድጭድ ምኖሶና፤ ባንታ አየታ አግድ ቦሶና፤ ናምአንꬆ ጉየ ስሞኮና።
JOB 39:5 “ዎራ ሀረት የዳ ዳናዳ ኦꬅዳይ ኦኔ? ቃሾፐ ኤንታ ብርሽድ የድዳይ ኦኔ?
JOB 39:6 ኤንታዉ ባዙዋ ደእያ በሲ ኦꬃዳ እማስ፤ ማፅነ ቢታን ኤንቲ ዳናዳ ኦꬃስ።
JOB 39:7 ካታማ ዋሱዋፐ ሃክድ ደኦሶና፤ ላገይስታ ቆደꬅ ስኦኮና።
JOB 39:8 ኤንቲ ደረታ ቦላ ባንታና ሄሞሶና፤ ያን ምያ ፑርጮ ማታ ቆሮሶና።
JOB 39:9 “መንꬅ ነዉ ኦꬃናዉ ኤሮ ጋንዴ? ዎይኮ ነ ዛዳሎን ቃማ አቃንዴ?
JOB 39:10 ጎያና መላ ነ እያ ዋፃኔ? ዎይኮ ዋፃዳ ጎያናዉ ዳንዳአይ?
JOB 39:11 ኔኒ እያ ዎልቃ ምኖተꬃን አማነታኔ? ዴፆ ኦሶ እ ኦꬃና መላ እያዉ የጋ አጋኔ?
JOB 39:12 ኔኒ ካꬃ ሻለን ቆላና መላ፥ ዎይኮ ዉዱማን ሺሻና መላ እያ አማናይ?
JOB 39:13 “ያንቾይ ባ ቀፍያ ኤለሳዳ ቃꬃዉሱ፤ ሽን ሃꬃ ካፎዳ ፕራꬋናዉ ዳንዳኡኩ።
JOB 39:14 ያንቾይ ባ ጱጱልያ ቢታን ጱጱላዉሱ፤ ሻፈን ሆአና መላ አጋጋዉሱ።
JOB 39:15 ‘ቶሆይ መንꬃና፥ ባዞ ዶአት የꬋና’ ጋዳ ቆፑኩ።
JOB 39:16 ናይት ባባ ግዶናዳ ኦꬃዳ ኤንታዉ ዳሮ ኢታዉሱ። እ ዳቡራ ኡባይ መላ አተይስ እዉ አይኮካ ዳነና።
JOB 39:17 ሄሳዳ ኦꬃዳ እዮ ጭንጫተꬅ ድግዳይነ አኬካ ꬋይስዳይ ታና።
JOB 39:18 ሽን ደንዳዳ እያ ዎፅያ ዎደ፥ ባራ ጋደትያ ፓራ ቦላነ ፓራዋ ቦላ ሚጫዉሱ።
JOB 39:19 “እዮባ፥ ፓራታስ ዎልቃ እምዳይ፥ ዎይኮ ፓራታ ሞርገን ጭምባ ማይዝዳይ ነኔ?
JOB 39:20 ፓራት ቦለዳ ጉፓናዳነ ጋርማምድ ዳጋንꬃናዳ ኦꬅዳይ ነኔ?
JOB 39:21 ፓራት ባንታ ዎልቃን አማነትድ ꬍስኮሶና፤ ኦለታናዉ ኦላ ደምባ ጋላቦሶና።
JOB 39:22 ያሽ ኤሮኮና፤ ኤንታ አይብካ ዳጋንና፤ ኤንታ ቦላ ማሻ ሾድኮካ ጉየ ስሞኮና።
JOB 39:23 ኤንታ ቶግያ ኦላንቾት ኦይክዳ ኦላ ሚሸት፥ ጶልሸ እሶይ እሱዋራ ጋሄትድ ጊሮሶና።
JOB 39:24 ሽን ፓራት ቢታ ካሽሸነ ያሽስሸ ጋላቦሶና፤ ሞይዘ ግርስ ስእያ ዎደ ስእ ግድ ኤቃናዉ ዳንዳኦኮና።
JOB 39:25 ሞይዘይ ፑነትያ ዎደ ኡፋይሳን ጋርማሞሶና፤ ኦላ ፔኖ ሃሆን ኤኮሶና፤ ቶራ ሞጮና ኪታነ ኦላንቾታ ጬቁዋ ስኦሶና።
JOB 39:26 “ፅሎይ ባ ቀፍያ ዱገሀ ባጋ ምጭድ፥ ፓላናዉ ዳንዳኤይ ነ ጭንጫተꬃኔ?
JOB 39:27 አርጋንꬅ ፑደ ከይድ፥ ባ ኬꬃ ꬎቃ ደረታ ቦላ ኬፀይ ነ ኪታኔ?
JOB 39:28 አርጋንꬅ አፎ ዶናን ባ ኬꬃ ኬፅድ ደኤስ፤ ዛላ ቆጶት እያዉ ቆልአ ግድዶሶና።
JOB 39:29 ያን ኡትድ ባዉ ምያባ ዎቼስ፤ እያ አይፈይ ሃሆን ጌሽድ ደሜስ።
JOB 39:30 አርጋንꬃ ናይት ሱꬅ ኡዮሶና፤ ጋዉፅ ደእያ በሳን ሺቆሶና” ያግስ።
JOB 40:1 ጎዳይ እዮባኮ ዛሪድ ያግስ፤
JOB 40:2 “እዮባ፥ አስ ኡባ ዳንዳእያ ጎዳራ ሞተትድ፥ ላꬃናዉ ዳንዳኢ? አነ ፆሳራ ሞተትያ ኡራይ እያዉ ዛሮ” ያግስ።
JOB 40:3 ሄሳፈ ጉየ፥ እዮብ ዛሪድ፥ ሀይሳዳ ያግስ፤
JOB 40:4 “ጎዳዉ፥ ታኒ ፓꬆና ላፋ አስ፤ ታ ዶና ቦላ ኩሸ ዎꬃዳ ስእ ጋናፐ አትሽን፥ ነዉ አይ ዛሮ እማናዉ ዳንዳእያና?
JOB 40:5 ታኒ እስ ቶሆ ኦዳስ፤ ሽን ታዉ ዛርያባይ ባዋ፤ ናምአንꬆ ኦዳስ ሀራ ጉጅከ” ያግስ።
JOB 40:6 ሄሳፈ ጉየ፥ ጎዳይ ጎተ ግዶን ግድድ እዮባኮ ሀይሳዳ ያግስ።
JOB 40:7 አደዳ ነ ፄሳ ዳንጫዳ ደንዳዳ፥ ታ ኦይሻስ ዛሮ እማ።
JOB 40:8 ነ ታና ባላ አስ ከሳና ሀናዬ? ነዉ ፅሎ ግዳናዉ ታና ዎርዳንቾ ከሳዬ?
JOB 40:9 ፆሳ ዎልቃ መላ ዎልቅ ነዉ ደኢ? ፆሳይ ጉመይሳዳ ነ ጉማናዉ ዳንዳአይ?
JOB 40:10 ሄሳ ግድኮ፥ ነ ቦንቹዋነ ግታተꬃ ማአ፤ ነ ዎልቃነ ቴሙዋ ግፃ።
JOB 40:11 ነ ሀንቁዋ ጉሳ፤ አነ ኦቶራንቾታ ፄላዳ ካዉሻ።
JOB 40:12 አነ ሎይꬃ ፄላዳ ኦቶርትያ ኡባ ዬላያ፤ ኢታታ ኡባ ኤንቲ ደእያ በሳፈ ꬋይሳ።
JOB 40:13 ኤንታ ኡባ ቢታን ሞጋ፤ ዱፎን የጋዳ ኤንታ ቦላ ጎርዳ።
JOB 40:14 ሄ ዎደ ነ ዎልቃይ ነና አሻናዉ ዳንዳኤይሳ ታ ማርካታና።
JOB 40:15 ታኒ ነና መꬍዳዳ መꬍዳ ብሄሞታ ጌተትያ ዶአ በአ፤ እ ቦራዳ ማታ ሜስ።
JOB 40:16 እያ ፄሳን ደእያ ዎልቃይነ እያ ኡሉዋ ካምዳ ሻያ ምኖተꬃይ ዳሮ።
JOB 40:17 እያ ጎይናይ ዝጋዳ ቦላን ቃፄስ፤ እያ ገዳ ፃጶት ምኖን ዶቀትዶሶና።
JOB 40:18 እያ መቀꬃይ ናሰ ብራታ መላ፤ እያ ገዳይ ብራታ ኩረ መላ።
JOB 40:19 ፆሳይ መꬍዳ መታ ኡባ ጋርሳን እ አꬌስ፤ ታፐ አትሽን፥ ሀር እያ ፆናናዉ ዳንዳኤይ ባዋ።
JOB 40:20 ዶእ ጉፕያ ደረይ፥ እያዉ ምያባ ዶልሴስ።
JOB 40:21 ምꬃ ኩያ ጋርሳን ዝንኤስ፤ ጫረን ማቃ ግዶን ቆሰቴስ።
JOB 40:22 ምꬃት ባንታ ኩያን እያ ገንꬆሶና፤ ሻፋ ጋፃን ድጭያ ምꬃት እያ ካሞሶና።
JOB 40:23 ሻፋይ ክፅድ ጎገይ ዎደ ዳጋመና፤ ዮርዳኖሰ ሻፋይ ቆ ጋካናዉ ኩምኮካ እ ህርገና።
JOB 40:24 እያ አይፍያ ቶይስድ፥ እያ ኦይካናዉ ዳንዳእያ አስ ደኢ? እያ ሲꬍያ ሉክድ ኦይካናዉ ዳንዳኤይ ኦኔ?
JOB 41:1 “ኔኒ ሌዋታነ ጌተትያ አባ ዶኣ ማንፃቆን ኦይካናዉ፥ ዎይኮ እያ እንፃርሳ ዎዶሮን አንጫፋናዉ ዳንዳአይ?
JOB 41:2 እያ ሲꬍያ ሉካዳ ዳፎ አꬃናዉ ዳንዳአይ? ዎይኮ እያ ጋጩዋ ዎስፐን ሉካናዉ ዳንዳአይ?
JOB 41:3 እ ነና፥ ‘ሀያና ታና አጋርክ’ ያግድ ዎሲ? ዎይኮ ነዉ ማልኦ ቃላ ኦዲ?
JOB 41:4 ነ እያ መርናዉ አይለ ኦꬃዳ ሃራና መላ፥ እ ነዉ ኤሮ ግድ ጫቃኔ?
JOB 41:5 አስ ካፎ ሎህሰይሳዳ ነ እያ ሎህሳናዉ ዳንዳአይ? ዎይኮ እያ ቃቻዳ ነ ማጫ ናይታራ ካአና መላ ኦꬃኔ?
JOB 41:6 ሞሎ ዛልአንቾት እያ ጋትያ ቦላ ፓላሞና? ዎይኮ እያ ቃንፀረꬅድ ባይዞና?
JOB 41:7 ኔኒ እያ ጋልባ ቶራን፥ ዎይኮ እያ ሁጵያ ማሻን ጫዳናዉ ዳንዳአይ?
JOB 41:8 አነ እያ ነ ኩሸን ቦቻ፤ ነ እያራ ቡተትዳ ቡትያ ዶጋካ፤ ናምአንꬆ እያራ ቡተታናዉ ቆፓካ።
JOB 41:9 ሄ ዶኣ ኦይካናዉ ፓጨይ መላ ዋየ፤ ሀር አቶሽን እያ በእዳ ኡባይ ያሻን ኮኮሬስ።
JOB 41:10 እ ዝንእዳ በሳፈ እያ ደንꬃናዉ ኦንካ ፃለና፤ ያትን፥ ታ ስንꬃን ኤቃናዉ ዳንዳኤይ ኦኔ?
JOB 41:11 ታ እያዉ ዛራና መላ ኮይሮ ታዉ ታልእዳይ ኦኔ? ሳሎፐ ጋርሳን ደእያባ ኡባይ ታባ።
JOB 41:12 “ታኒ ሌዋታነ ቶሆታባ፥ እያ ግታ ዎልቃባነ ሎእያ እያ አሳተꬃባ ቆንጭሶና አግከ።
JOB 41:13 እያ ጋልባ ቃራናዉ ዳንዳኤይ ኦኔ? እያ ጋጩዋ ፖቅድ ብፃላ ባርሳናይ ኦኔ?
JOB 41:14 ያሽያ አቻይ ደእያ እያ ጋጩዋ ፖቃናዉ ዳንዳኤይ ኦኔ?
JOB 41:15 እያ ዞኮ ጋልባይ እሶይ እሱዋ ቦላ ዶረትድ፤ ሹቻዳ ምንዳ ጎንዳለ ዳኔስ።
JOB 41:16 ኤንቲ እሶይ እሱዋስ ዳሮ ማታትዳ ግሾ፥ ኤንታ ግዶራ ሀር አቶሽን ጫርኮይ ካንꬃናዉ ዳንዳኤና።
JOB 41:17 እሶይ እሱዋራ ጋሄትድ ደእያ ግሾ፥ ኤንታ አይብካ ሻከና።
JOB 41:18 እ ሀꬍሽያ ዎደ ፖኦይ ፖልኡ ጌስ፤ እያ አይፈት ዎንታ ፃልቀዳ ጫዴስ።
JOB 41:19 እያ ዶናፐ ታማ ላጮይ ከዬስ፤ ፕንፅያ ታም በንቴስ።
JOB 41:20 እያ ሲꬍያፐ ጩያይ፥ ታማ ቦላ ደእያ ኦቶፐ ከያ ፐንቶ መላ።
JOB 41:21 እያ ሲራ ከያ ሸምፖይ ከንችከሎ ቦንቅሴስ፤ ታማ ላጮይ እያ ዶናፐ ከዬስ።
JOB 41:22 እያ ሞርግያን ዎልቃይ ደእያ ግሾ፥ እ ዳሮ ያሼስ።
JOB 41:23 እያ አሾይ እስፈ ኦይከትድ ደእያ ግሾ፥ እያ አሳተꬃይ ብራታዳ ምኔስ።
JOB 41:24 እያ ዎዛናይ ሹቻዳ ምኖ፤ ጋቻ ዎፃ መላ ምኖ።
JOB 41:25 እ ደንድያ ዎደ ምኖት ያዮሶና፤ ዳጋምድ ባቃቶሶና።
JOB 41:26 እያ ጋክያ ማሻይ አይኮካ ኦና፤ ቶር ዎይኮ ዶንገይ ዎይኮ ማሽ እያ ቆሄና።
JOB 41:27 እ ብራታ ፅንቃ ማታዳ፥ ናሰ ብራታ ዎቅዳ ምꬃዳ መንረꬄስ።
JOB 41:28 ዶንገይ እያ በትሰና፤ ያምባርሻ ሹች እያዉ ሱላ መላ።
JOB 41:29 ጉምባ ፃምእ እያዉ ፅንቆ መላ፤ ቶራ ፆንግያ ዎደ ቀልቅስድ ሚጬስ።
JOB 41:30 እያ ኡሉዋ ቦላ ደእያ ጋልባይ መቅዳ ኩንአ መላ ቃራ፤ ኡርቃራ እ ብያ ዎደ ማራሻ መላ ቢታ ጳልቄስ።
JOB 41:31 አባ ፐንትዳ ሃꬃ መላ ቱምቡል ቱምቡል ኦꬄስ፤ ፃሮን ፐንትያ ዛይተ መላ ሽር ሽር የጌስ።
JOB 41:32 እያ ብያ ኦገይ ፖኤስ፤ አባ ሃꬃ ጎፖንቶ ላሜስ።
JOB 41:33 እ ያሽ ኤሮና ግሾ፥ ቢታ ቦላ እያ መላ መተꬅ ሀር ባዋ።
JOB 41:34 እ ዳሮ ግታ መተꬃታ ኡባ ካꬌስ፤ ዶአ ኡባስ እ ካዎ” ያግስ።
JOB 42:1 ሄሳፈ ጉየ፥ እዮብ ጎዳኮ ሀይሳዳ ያግድ ዛርስ፤
JOB 42:2 “ነ ኡባባ ኦꬃናዉ ዳንዳኤይሳነ ነ ቆፋ ተቃናዉ ዳንዳኤይ ባይናይሳ ታኒ ኤራስ።
JOB 42:3 ነ፥ ‘ኤር ባይና ታ ዞርያ ቆሰይ ኦኔ?’ ያጋዳ ታና ኦይቻዳሳ፤ ቱማ ታኒ ታዉ ገልቦናባ፥ ታ ኤራፐ ቦላ ግድዳ ማላልስያባ ኦደታስ።
JOB 42:4 “ኔኒ ታኮ፥ ‘ታኒ ኦድያ ዎደ ሀይዛ፤ ታኒ ኦይችያ ዎደ ዛራ’ ያጋዳሳ።
JOB 42:5 ታኒ ካሰ ነባ ሀይꬃን ስአስ፤ ሽን ሀእ ታ ነና አይፈን በአስ።
JOB 42:6 ሄሳ ግሾ፥ ታ ኦዳን የላታዳ፥ ብዶ ቦላነ ባና ቦላ ኡታዳ ፓፃይስ” ያግስ።
JOB 42:7 ጎዳይ ሄሳ እዮባስ ኦድዳፐ ጉየ፥ ተማናፐ ይዳ ኤልፋዛኮ ሀይሳዳ ያግስ። “ታ አይልያ እዮባዳ ህንተ ታባ ልከ ኦደትቦና ግሾ፥ ነ ቦላነ ነ ናምኡ ላገታ ቦላ ታ ሀንቆይ ኤፅስ።
JOB 42:8 ሄሳ ግሾ፥ ሀእ ላፑን ኮርማታነ ላፑን ማራዘታ ኤክድ ታ አይልያ እዮባኮ ብድ፥ ፁሳ ያርሾ ህንተ ባላስ ያርሽተ። ታ አይልያ እዮብ ህንተዉ ዎሳና፤ ታኒ እያ ዎሳ ስአዳ ህንተ ሀኑዋ መላ ህንተና ሴርከ። ህንተ ታ አይልያ እዮባዳ ታባ ልከ ኦድበከታ” ያግስ።
JOB 42:9 ሄሳፈ ጉየ፥ ተማናፐ ይዳ ኤልፋዝ፥ ሹሀፐ ይዳ በልዳዶስነ ናእማፐ ይዳ ሶፋር ብድ፥ ጎዳይ ኤንታ ኪትዳይሳዳ ኦꬅዶሶና። ጎዳይ እዮባ ዎሳ ስእስ።
JOB 42:10 እዮብ ባ ላገታስ ዎስዳፐ ጉየ፥ ጎዳይ እያ ዛሪድ ዱረይስ፤ እያዉ ካሰይሳ ግሾ ናምኡ ኩሸ እሚስ።
JOB 42:11 ሄሳፈ ጉየ፥ እያ እሻት፥ እያ ምቸትነ ካሰ እያ ኤረይሳት ኡባይ እያኮ ይድ፥ እያ ሶን እያራ ግብራ ምዶሶና። እያዉ አዛንዶሶና፤ ጎዳይ እያ ቦላ ኤህዳ መቶ ኡባን እያ ምንꬅዶሶና፤ ቃስ እያዉ ብራነ ዎርቃ ሳጋዮ እምዶሶና።
JOB 42:12 ጎዳይ እዮባ ዉርሰꬃ ላይꬃ ኮይሮ ላይꬃፈ አꬅድ አንጅስ። እዮባስ ታማነ ኦይዱ ሙኩሉ ዶርሳት፥ ኡሱፑን ሙኩሉ ግማለት፥ እስ ሙኩሉ ዋፃ ቦራትነ እስ ሙኩሉ ማጫ ሀረት ደኦሶና።
JOB 42:13 ቃስ እያዉ ላፑን አደ ናይታነ ሄꬑ ማጫ ናይት የለትዶሶና።
JOB 42:14 ባይራ ማጫ ናእዉ ይምሞ፥ ናምአንꬅዉ ቃፅኦ፥ ሄꬓንꬅዉ ቀረንሀፉኮ ያግድ ሱንꬅስ።
JOB 42:15 እዮባ ማጫ ናይታዳ ማላ ሎኦ ማጫ ናእ አዉ ቢታን በንትቤና። ኤንታ አዋ ኤንታዉ ኤንታ እሻታራ ላታ ቢታ እሚስ።
JOB 42:16 ሄሳፈ ስምን፥ እዮብ ፄታነ ኦይታሙ ላይꬅ ደእስ። ባ ናይታነ ባ ናይታ ናይታ ኦይዳንꬆ የለተꬃ ጋካናዉ በእስ።
JOB 42:17 እዮብ ዳሮ ዎደ ደእድ፥ ሎኦ ጭማ ጭምድ ሀይቅስ።
PSA 1:1 ኢታታ ዞርያን ቦናይ፥ ናጋራንቾታ ኦገን ኤቆናይ፥ ቀልቅሰይሳታ ሺቆን ኡቶናይ፥ እ አንጀትዳይሳ።
PSA 1:2 ሽን እ ጎዳ ህግያን ኡፋይቴስ፤ እያ ህግያ ጋላስነ ቃማ ቆፔስ።
PSA 1:3 እ ጎግያ ሃꬃ ፃጶን ቶከትድ፥ ዎደን ዎደን አይፈ እምያ፥ እያ ሀይꬃይ ቆለቶና ምꬃ መላ። እ ኦꬅያ ኡባይ እያዉ ፖለቴስ።
PSA 1:4 ሽን ኢታት ሄሳ መላ ግዶኮና፤ ጫርኮይ ፕትድ ኤፍያ ሱላ መላ።
PSA 1:5 ኢታት ፅሎ ፕርዳ በሳን ኤቆኮና፤ ናጋራንቾት ፅሎታ ዱላታን በንቶኮና።
PSA 1:6 ጎዳይ ፅሎታ ኦግያ ኤሬስ፤ ሽን ኢታታ ኦገይ ꬋያና።
PSA 2:1 ካዎተꬃት አይስ ደንዶና? አሳይ አይስ ጮ ማቀቶና?
PSA 2:2 ካዎት ጎዳ ቦላነ እ ትይዳይሳ ቦላ ደንድዶሶና፤ ደርያ ሃረይሳት ኤንታ ቦላ ሺቅዶሶና።
PSA 2:3 “ኤንታ ሳንꬃላታ ዱꬆስ፤ ኤንታ ቃሾ ዎዶሩዋ ሆሎስ” ያግዶሶና።
PSA 2:4 ሳሎን ኡትዳይስ ኤንታ ቦላ ሚጬስ፤ ጎዳይ ኤንታ ቀልቅሴስ።
PSA 2:5 እ ባ ሀንቁዋን ኤንታ ዳጋንꬄስ፤ ባ ይሉዋን ኤንታ ያሽሴስ።
PSA 2:6 “ታ ጌሻ ዙማ ፅዮነ ቦላ ታ ካዋ ካዎꬃስ” ያጌስ ጎዳይ።
PSA 2:7 ታኒ ጎዳ ህግያ አዋጃና፤ ጎዳይ ታና፥ “ኔኒ ታ ናኣ፤ ታኒ ሀች ነዉ አዋ ግዳስ።
PSA 2:8 ነ ታና ኦይቻ፤ ታ ነዉ ካዎተꬃታ እማና፤ ሳአ ኡባይ ነባ ግዳና።
PSA 2:9 ኔኒ ብራታ ፃምአን ኤንታ መንꬃና፤ መቃ ሚሸዳ ኤንታ ትንቸረꬃና” ያግስ።
PSA 2:10 ህዛ፥ ካዎቶ ኤዮፕተ፤ ሀ ሳኣ ሃረይሳቶ አኬክተ።
PSA 2:11 ጎዳ ያሻን ጎይንተ፤ ኮኮርድ ኪተትተ።
PSA 2:12 ጎዳይ ሀንቀትን ኦገን ህንተ ꬋዮናዳ እያ ቱማተꬃን ጎይንተ። እያ ሀንቆይ ኤሶን ኤፅ ከያና፤ እያን ቆሰትድ አትዳ ኡባይ አንጀትዳይሳታ።
PSA 3:1 ዳዊቲ ባ ናአ አበሰሎመፐ ባቃትዳ ዎደ ፃፍዳ ማዝሙረ አቤት ጎዳዉ፥ ታ ሞርከት አይ መላ ዳርዶና! ታ ቦላ ደንደይሳት አፑነ!
PSA 3:2 ዳሮት፥ “ፆሳይ እያ አሸና” ያግድ፥ ታባ ሃሳዮሶና። ሳላህ
PSA 3:3 ሽን አቤት ጎዳዉ፥ ነ ታዉ ጎንዳለ፤ ታ ቦንቾይነ ታና ꬎቁ ኦይ ነና።
PSA 3:4 ታ ቃላ ꬎቁ ኦꬃዳ ጎዳኮ ዋሳይስ። እ ባ ጌሻ ዙማፐ ታዉ ዛሬስ። ሳላህ
PSA 3:5 ጎዳይ ታና ናግያ ግሾ፥ ታ ዝንአስነ ꬍስካስ ህርግ ባይና ባርካስ።
PSA 3:6 ኡባ በሳራ ታ ቦላ ደንድዳ፥ ዳሮ ሙኩሉ አሳስ ያይከ።
PSA 3:7 አቤት ጎዳዉ፥ ደንዳ! አቤት ታ ፆሳዉ ታና አሻ! ታ ሞርከታ ጋጩዋ ሾጫ፤ ኢታታ አቻ መንꬃ።
PSA 3:8 ፆኖይ ጎዳሳ፤ ጎዳዉ፥ ኔኒ ነ አሳ አንጃ። ሳላህ
PSA 4:1 ዛማረታ ሀላቃስ ፃፈትዳ ዳዊታ ማዝሙረ ዲꬃን የፀትያ ማዝሙረ አቤት ታና ፅልስያ ፆሳዉ፥ ታኒ ነና ፄግያ ዎደ ታዉ ኮያ። ታኒ ኡንኤትዳ ዎደ ነ ታና ላአ ከሳዳሳ፤ ታዉ ቃታ፤ ታ ዎሳ ስአ።
PSA 4:2 ህንተኖ አሳዉ፥ ህንተ አዉደ ጋካናዉ ታ ቦንቹዋ ካዉሼቲ? አዉደ ጋካናዉ ፓꬆናባ ዶሴቲ? አዉደ ጋካናዉ ዎርዶ ካሌቲ? ሳላህ
PSA 4:3 ጎዳይ አማነትያ አሳታ ባዉ ዱማይድ ዎꬅዳይሳ ኤርተ፤ ታኒ ጎዳ ፄግያ ዎደ እ ታና ስኤስ።
PSA 4:4 ሀንቀትተ፥ ሽን ናጋራ ኦꬆፕተ፤ ህንተ ዝንእያ ዎደ ህንተ ዎዛና ቆርተ፤ ስእ ጊተ። ሳላህ
PSA 4:5 ጎዳስ ልከ ያርሾ ያርሽተ፤ እያን አማነትተ።
PSA 4:6 “ኑና ሎኦባ በሳናይ ኦኔ?” ያግድ ዳሮት ኦይቾሶና፤ አቤት ጎዳዉ፥ ነ ኑና ኬሀ አይፈን ፄላ።
PSA 4:7 ዳሮ ግስተፈነ ዎይነ ኡሻፈ ነ ታ ዎዛናን ዎꬅዳ ግታ ኡፋይሳይ አꬌስ።
PSA 4:8 አቤት ጎዳዉ፥ ነ ፃላል ታና ሳሮ ዎꬅያ ግሾ፥ ታኒ ዝንአዳ ዎፑ ጋዳ ꬍስካይስ።
PSA 5:1 ዛማረታ ሀላቃስ ፃፈትዳ ዳዊታ ማዝሙረ ሱሱልኤን የፀትያ ማዝሙረ አቤት ጎዳዉ፥ ታ ቃላ ስአ፤ ታ ኦልያ ቆፓ።
PSA 5:2 ታ ካዋዉ፥ ታ ፆሳዉ ታ ዋሱዋ ስአ፤ ታ ማደ ኮያዳ ዎስያ ዎሳ ሀይዛ።
PSA 5:3 አቤት ጎዳዉ፥ ዎንታ ዎንታ ታ ቃላ ስኣሳ። ዎንታ ዎንታ ታ ዎሳ ነ ስን ሺሻይስ፤ ታ ነ ዛሩዋ ናጋይስ።
PSA 5:4 ኔኒ ኢታተꬃን ኡፋይቶና ፆሰ፤ ኢታባይ ኔራ ዴና።
PSA 5:5 ኦቶራንቾት ነ ስንꬃን ኤቆኮና፤ ኢታባ ኦꬅያ ኡባ ነ እፃሳ።
PSA 5:6 ዎርዶ ኦደተይሳታ ነ ꬋይሳሳ፤ ጎዳይ ሱꬁ ጉሰይሳታነ ጭመይሳታ እፄስ።
PSA 5:7 ሽን ታ ነ ግታ ማሮተꬃን ነ ኬꬃ ገላና፤ ነ ጌሻ በሳኮ ስማዳ ነና ቦንቾን ጎይናና።
PSA 5:8 አቤት ጎዳዉ፥ ታ ሞርከታ ግሾ ጋዳ፥ ታና ነ ፅሎተꬃን ካለꬃ፤ ነ ኦግያ ታ ስንꬃን ሱርሳ።
PSA 5:9 ኤንታ መተርሻን ቱም ባዋ፤ ኤንታ ዎዛናን ꬋይሶይ ኩምስ። ኤንታ ዶናይ ዶየትዳ ዱፎ መላ፤ ኤንቲ ባንታ እንፃርሳን ጭሞሶና።
PSA 5:10 ኤንቲ ነ ቦላ ማካልዳ ግሾ፥ አቤት ፆሳዉ፥ ኤንታ ፕርዳ፤ ኤንታ ቶባይ ኤንታ ኤክድ ቦ፤ ኤንታ ዳሮ ናጋራ ግሾ ኤንታ የደꬃ።
PSA 5:11 ሽን ኔኮ ባቃትድ አትዳ ኡባይ ኡፋይቶ፤ ኤንቲ መርናዉ ኡፋይሳን የፆ። ነ ሱንꬃ ዶስያ ኡባይ ነናን ኡፋይታና መላ፤ ኔኒ ኤንታ መርናዉ ናጋ።
PSA 5:12 አቤት ጎዳዉ፥ ኔኒ ፅሎታ አንጃሳ፤ ጎንዳለን አሸይሳዳ ነ ኬሀተꬃን እያ አሻ።
PSA 6:1 ዛማረታ ሀላቃስ ፃፈትዳ ዳዊታ ማዝሙረ ሆስፑን ሻያን የፀትያ ማዝሙረ አቤት ጎዳዉ፥ ነ ይሉዋን ታና ሴሮፓ፤ ነ ሸንያን ታና ሀንቆፋ።
PSA 6:2 አቤት ጎዳዉ፥ ታኒ ዳቡራንቾ ግድዳ ግሾ ታና ማራ፤ አቤት ጎዳዉ፥ ታ ዎዛናይ አርጋጭዳ ግሾ ታና ምንꬃ።
PSA 6:3 ታ ሸምፕያ ዳሮ ኡንኤታሱ፤ ታና ማዳናዉ አዉደ ጋካናዉ ጋምአይ?
PSA 6:4 አቤት ጎዳዉ፥ ኔኒ ስማዳ ታና አሻ፤ ነ ኬሀተꬃ ዳሩዋን ታና ከሳ ኤካ።
PSA 6:5 ሀይቅዳ አሳ ግዶፈ ነና ሀሳየይ ባዋ፤ ዱፎን ግድድ ነና ጋላተይ ኦኔ?
PSA 6:6 ታኒ ኦለን ዳቡራስ፤ ቃማ ኩመꬅ ዬካሸ ታ ሂፃ እርፅሳስ፤ ታ አርሳ አፉꬃን ዎቅሳስ።
PSA 6:7 ታ ሞርከታ ጋሶን ታ አይፈይ ሙልጫትስ፤ ታኒ አፉፅዳ ግሾ ደሞና እፅስ።
PSA 6:8 ጎዳይ ታ ዬሁዋ ስእዳ ግሾ፥ ህንተኖ፥ ኢታ ኦይሳቶ ታፐ ሃክተ።
PSA 6:9 ጎዳይ ታ ዋሱዋ ስእስ፤ ታ ዎሳ ኤክስ።
PSA 6:10 ታ ሞርከት ኡባይ ዬላትዶሶና፤ ዳጋምዶሶና፤ ቆፖና ጉየ ስሚድ ካዉይዶሶና።
PSA 7:1 ብንያመ ኮቻ ኩዛባ ዳዊታ ጎዳስ የፅዳ ማዝሙረ አቤት ጎዳዉ ታ ፆሳዉ፥ ታ ነናን ቆሰታይስ፤ ታና የደꬅያ ኡባፈ ታና አሻ።
PSA 7:2 ኔኒ ታና አሾናባ ግድያኮ፥ ኤንቲ ታና ጋሞዳ ዛዛና፤ አሽያ አስ ባይና መንረꬃናሽን።
PSA 7:3 አቤት ጎዳዉ ታ ፆሳዉ፥ ታ ሀይሳ መላባ ኦꬅዳባ ግድኮ፥ ታኒ አሰ ናቅዳባ ግድኮ፥
PSA 7:4 ታ ላገታስ ሎኦ ግሾ ኢታ ዛርዳባ ግድኮ፥ ጋሶይ ባይና ታ ሞርክያ ቦንቅዳባ ግድኮ፥
PSA 7:5 ታ ሞርከይ ታና የደꬅድ ኦይኮ፤ ታና ሳአን የግድ የꬎ፤ ታና ባናን ጎንዶርስድ ካዉሾ። ሳላህ
PSA 7:6 አቤት ጎዳዉ፥ ነ ሀንቁዋን ደንዳዳ፥ ኤፅያ ታ ሞርከታ ሀንቁዋ ቦላ ኤቃ፤ ታ ፆሳዉ፥ ታ ግሾ ባርካ፤ ኔኒ ፅሎ ፕርዳ ኮያሳ።
PSA 7:7 አሳይ ነ ዩሾን ሺቆ፤ ኔኒ ኤንታፈ ቦላራ ሃራ።
PSA 7:8 ጎዳይ ካዎተꬃታ ቦላ ፕርዴስ፤ አቤት ጎዳዉ፥ ታ ፅሎተꬃዳነ ታ ሱረተꬃዳ ፕርዳ።
PSA 7:9 ቆፋነ ዎዛና ሻካዳ ኤርያ ፅሎ ፆሳዉ፥ ኢታታ ጌላ ሀኖታ ኔኒ ተቃ፤ ሽን ፅሉዋ ሳሮን ናጋ።
PSA 7:10 ዎዛና ሱረታ አሽያ፥ ፆሳይ ታዉ ጎንዳለ።
PSA 7:11 ፆሳይ ፅሎ ፕርደይሳ፤ እ ኡባ ዎደ ኢታታ ቦላ ሀንቀትያ ፆሳ።
PSA 7:12 ኢታት ባንታ ኢታተꬃፈ ስሞና እፅኮ፥ ፆሳይ ባ ማሻ ሌፈስ፤ ባ ዶንግያ ጊግሴስ።
PSA 7:13 እ ባ ዎꬍያ ኦላ ሚሸታ ጊግሴስ፤ ላፅያ ባ ዶንገ ቶራ ፕቴስ።
PSA 7:14 ኢታት ቆሆ ቃንꬃትድ፥ ገነ ዎደፅድ፥ ዎርዶ የሎሶና።
PSA 7:15 ሀራ አሳስ ኦላ ቦክዳ አስ ባ ቦክዳ ኦላን ባዉ ኩንዴስ።
PSA 7:16 እያ ገነይ እያ ሁጰን ስሜስ። እያ ጌላተꬃይ እያ ሜስ።
PSA 7:17 እያ ፅሎተꬃ ግሾ ታኒ ጎዳ ሳባና፤ ኡባፈ ꬎቃ ጎዳ ሱንꬃስ ታኒ ጋላታ ማዝሙረ የፃና።
PSA 8:1 ዛማረታ ሀላቃስ ፃፈትዳ ዳዊታ ማዝሙረ ሱሱልኤን የፀትያ ማዝሙረ አቤት ጎዳዉ ኑ ፆሳዉ፥ ነ ሱንꬃይ ቢታ ኡባን ዋንድ ቦንቸትደ! ኔኒ ነ ቦንቹዋ ሳሎፐ ቦላራ ꬎቁ ꬎቁ ኦꬃዳሳ።
PSA 8:2 ኔኒ ነ ሞርከታ ግሾ ነ ሞርክያነ ነና ማንደይሳ ስእ ኦꬃናዉ፥ ጉꬃ ናይታ ዶናን ꬋምያ ናይታ ዶናን ጋላታ ኩንꬃዳሳ።
PSA 8:3 ኔኒ ነ ብራን መꬍዳ ነ ሳሎታ፥ እያ በሳን በሳን ኔኒ ዎꬅዳ አጌናነ ፆልንቶታ ታኒ በእያ ዎደ፥
PSA 8:4 ኔኒ አሳባ ቆፓናዉ አስ አይቤ? ዎይኮ ኔኒ እያ ፆሞሳናዉ እ አይቤ?
PSA 8:5 እያ ነ ኔፐ ጉꬃራ ጉꬃዳሳ፤ ቦንቾነ ግታተꬃ ካላቻ እያ ሁጰን ዎꬃዳሳ።
PSA 8:6 ነ መꬍዳ መተꬃ ኡባ፥ ሃራና መላ ነ እያ ሹማዳሳ፤ ኡባ እያ ቶሁዋፐ ጋርሳራ ዎꬃዳሳ።
PSA 8:7 ዶርሳታነ መሄታ፥ ዎራ ዶአታ ኡባ፥
PSA 8:8 ሳሎ ካፎታ፥ አባ ሞሎታነ ሃꬃ ጋርሳን ቃፅያ ኡባ እያዉ ሃርሳዳሳ።
PSA 8:9 አቤት ጎዳዉ ኑ ፆሳዉ፥ ነ ሱንꬃይ ቢታ ኡባን ዋንድ ቦንቸትደ!
PSA 9:1 ዛማረታ ሀላቃስ ፃፈትዳ ዳዊታ ማዝሙረ “ናአ ሀይቆን” ጌተትያ ጩꬃን የፀትያ ማዝሙረ አቤት ጎዳዉ፥ ታ ነና ታ ኩመꬃ ዎዛናፐ ጋላታና፤ ኔኒ ኦꬅዳ ማላልስያ ኦሶ ኡባ ኦዳና።
PSA 9:2 ታኒ ነናን ኡፋይታና ሀሹ ጋና። ኡባፈ ꬎቃ ፆሳዉ፥ ታኒ ነ ሱንꬃስ ጋላታ ማዝሙረ የፃና።
PSA 9:3 ታ ሞርከት ጉየ ስምያ ዎደ፥ ነ ስንꬃፈ ꬉበትድ ꬋያና።
PSA 9:4 ነ አራታን ኡታዳ ታዉ ፅሎ ፕርዳሳ፤ ታ ሞቱዋ ነ ፅሎተꬃን ኦይካዳሳ።
PSA 9:5 ኔኒ ካዎተꬃታ ሴራዳሳ፤ ኢታታ ꬋይሳዳሳ። ኔኒ ኤንታ ሱንꬃ መርናዉ ቁቻዳሳ።
PSA 9:6 ሞርከት መርናዉ ꬋይዶሶና፤ ኤንታ ካታማታ ኩመꬅ ላላዳሳ፤ ኤንቲ ኩመꬅ ዶገትዶሶና።
PSA 9:7 ሽን ጎዳይ መርናዉ ካዎትድ ደኤስ፤ እ ባ አራታ ፕርዳስ ጊግስስ።
PSA 9:8 ሀ ሳኣ ፅሎተꬃን ፕርዳና፤ ደረታ ሱረተꬃን አይሳና።
PSA 9:9 ጎዳይ ኡንኤትዳይሳታስ አትያ በሲ፤ መቶ ዎደ ገልድ አትያ ቆታ።
PSA 9:10 ነና ኤረይሳት ነናን አማነቶሶና፤ ጎዳዉ፥ ነና ኮየይሳታ የጋ አጋካ።
PSA 9:11 ፅዮነን ካዎትዳ ጎዳ ጋላትተ፤ እ ኦꬅዳ ኦሱዋ አሳ ኡባስ ኦድተ።
PSA 9:12 ሀሎ ከይያ ፆሳይ ጉክዳ ፅሎ ሱꬃ ዶገና፤ ቦረትዳይሳታ ዋሱዋ ቀል ጌና።
PSA 9:13 አቤት ጎዳዉ፥ ታዉ ቃታ፤ ታ ሞርከት ታ ቦላ ኤህያ መቱዋ በአ፤ ሀይቆፐ ታና አሻ።
PSA 9:14 ፅዮነ አሳ ግዶን ታኒ ኤቃዳ፥ ነ ጋላታ ኦዳና፤ ነ አቶተꬃን ኡፋይታና።
PSA 9:15 ካዎተꬃት ባንታ ቦክዳ ኦላን ባንታዉ ኩንድዶሶና፤ ኤንቲ ዎꬅዳ ፅሄይ ኤንታ ቶሁዋ ኦይክስ።
PSA 9:16 ጎዳይ ባ ፅሎ ፕርዳን ኤረትስ፤ ኢታ አሳይ ባንታ ኢታ ኦሱዋን ኦይከትዶሶና። ሳላህ
PSA 9:17 ኢታት ዱፎ ባና፤ ፆሳ ዶግያ ካዎተꬃት ኡባይ ኤንታዳ ሀናና።
PSA 9:18 ማንቆይ ኡባ ዎደ ዶገትድ አተና፤ መቶታንቹዋ ኡፋይሳይ መርናዉ ꬋየና።
PSA 9:19 አቤት ጎዳዉ ደንዳ፤ አስ ፆኖፖ! ካዎተꬃት ነ ስንꬃን ፕርደቶ።
PSA 9:20 አቤት ጎዳዉ ኤንታ ኔኒ ያሽሳ፤ ካዎተꬃት አሰ ግደይሳ ኤሮ። ሳላሀ።
PSA 10:1 ዳዊታ ማዝሙረ አቤት ጎዳዉ፥ አይስ ሃካዳ ኤቃይ? መቶ ዎደ አይስ ኔኒ ጌማይ?
PSA 10:2 ባ ኦቶሩዋን ኢታ አስ ማንቁዋ የደꬄስ፤ ኤንቲ ባንታ ማቁዋን ባንታዉ ኦይከትዶሶና።
PSA 10:3 ኢታ አስ ባ ኢታ አሙዋን ጬቀቴስ፤ ባ ኡዝያን ጎዳ ጫዬስነ ካꬌስ።
PSA 10:4 ኢታት ባንታ ኦቶሩዋን ፆሳ ኮዮኮና፤ ባንታ ቆፋን ፆሳስ በሰ እሞኮና።
PSA 10:5 እያዉ ኡባ ዎደ እንጀቴስ፤ ነ ህገይ እያዉ ገለና፤ ባ ሞርከታ እ ቀልቅሴስ።
PSA 10:6 ባ ዎዛናን፥ “ታና አይብካ ቃና ታና መቶይ ጋከና” ያግድ ቆፔስ።
PSA 10:7 እያ ዶናን ባደꬅ፥ ዎርዶይነ ማንደꬅ ኩምስ። ገነይነ ኢታተꬅ እያን እንፃርሳን ደኤስ።
PSA 10:8 ጉታታን ዙግድ ኡቴስ፤ ሱረ አሳታ ዎꬋናዉ ቆሰትድ ናጌስ፤ ዎልቅ ባይና ዳቡራንቾታ ዎቼስ።
PSA 10:9 ባ ቆሰትዳ በሳን ጌምድ፥ ማንቁዋ ኦይካናዉ ጋሞዳ ዙጌስ፤ እያ ኦይክድ ባ ፅህያን ጎችድ ኤፌስ።
PSA 10:10 ዎልቅ ባይና ማንቁዋ ሾጭድ የጌስ፤ እያ ቶሁዋ ጋርሳን እ ኩንዴስ።
PSA 10:11 እ ባ ዎዛናን፥ “ፆሳይ ዶግስ። ባ ሶምኡዋ ገንꬅድ በኤና” ያጌስ።
PSA 10:12 አቤት ጎዳዉ፥ ደንዳ! ፆሳዉ፥ ነ ዎልቃማ ኩሽያ ደንꬃ፤ ማንቆታ ዶጎፓ።
PSA 10:13 ኢታ አሳት ፆሰ አይስ ካꬎኦና? ባንታ ዎዛናን፥ “ፆሳይ ኑና ሴረና” አይስ ያጎና?
PSA 10:14 ሽን ፆሳዉ፥ ነ መቱዋነ ኡንኣ በኣሳ፤ ኔኒ ማዳናዉ ጊጋ ኡታዳሳ። ኔኒ ይኦታስ ማደ፥ ቆሄትዳይ ነ ማዳና መላ ባና ነዉ አꬅድ እሜስ።
PSA 10:15 ገነ አሳታ ዎልቃ መንꬃ፤ ኢታ አሳታ ሴራ፤ ዛሪድ ኤንታ ግዶን ኢታተꬅ በንቶፎ።
PSA 10:16 ጎዳይ መርናዉ ካዎትድ ደኤስ፤ ሀራ ካዎተꬃት እያ ቢታፈ ꬋያና።
PSA 10:17 አቤት ጎዳዉ፥ ኔኒ አሽከታ አሙዋ ኩንꬃሳ፤ ኤንታ ምንꬃ፤ ኤንታ ዎሳ ስአ።
PSA 10:18 ይኦታነ ኡንኤትዳይሳታ ቆሆና መላ፥ ሳአን ደእያ ኦንካ ኤንታ ያሽሶና መላ፥ ኔኒ ኤንታዉ ፕርዳ።
PSA 11:1 ዛማረታ ሀላቃስ ፃፈትዳ ዳዊታ ማዝሙረ ጎዳይ ታኒ ቆሰታዳ አትያ በሲ፤ ያትን አይስ “ካፎዳ ዙማኮ ባቃታ” ያገቲ?
PSA 11:2 ናጋራንቾት ፅሎታ ꬉማን ጫዳናዉ፥ ባንታ ዶንግያ ዋፅድ ኡትዶሶና።
PSA 11:3 ባሶይ ዎድዳ ዎደ፥ ፅሎ አስ አይ ኦꬃናዉ ዳንዳኢ?
PSA 11:4 ጎዳይ ባ ጌሻ በሳን ደኤስ፤ ሳሎን ባ አራታን ኡትድ አሳ ፄሌስ፤ ጎዳ አይፈይ አሳ ፕልጌስ፤ ዎቼስ።
PSA 11:5 ጎዳይ ፅሉዋነ ዎርዱዋ ፕልጌስ፤ ኢታተꬅ ዶሰይሳታ እፄስ።
PSA 11:6 ጎዳይ ኢታታ ቦላ ኤፅያ ታማ ቦንቆነ ዲነ ቡክሳና፤ ꬋይስያ ጎተን ኤንታ ሴራና።
PSA 11:7 ጎዳይ ፅሎ ግድዳ ግሾ፥ ፅሎተꬅ ዶሴስ፤ ሱረ አሳት እያ ሶምኡዋ በአና።
PSA 12:1 ዛማረታ ሀላቃስ ፃፈትዳ ዳዊታ ማዝሙረ ፆሳ አስ ቢታፈ ዉርዳ ግሾ፥ አሳ ግዶን አማነተꬅ ባይና ግሾ፥ ጎዳዉ ኑና ማዳርኪ?
PSA 12:2 ኡባይ ዎርዶ ሃሳዮሶና፤ እሶይ እሱዋ ጭምያ እንፃርሳን ናምኡ ዎዛናን ኦደቶሶና።
PSA 12:3 አቤት ጎዳዉ፥ ጭምያ ዶና ጎርዳ፤ ኦቶሮን ጬቀትያ እንፃርሳ ተቃ።
PSA 12:4 ኤንቲ፥ “ኑ እንፃርሳን ኑ ፆናና፤ ኑ ዶናይ ኑሳ፤ ኑስ ጎድ ኦኔ?” ያጎሶና።
PSA 12:5 “ማንቆታ ኡንኣ ግሾነ፥ መቶታንቾታ ኦልያ ግሾ፥ ሀእ ታኒ ደንዳና፤ ኤንቲ አሞትያ ሳሮተꬃ ኤንታዉ እማና” ያጌስ ጎዳይ።
PSA 12:6 ጎዳ ቃላይ ጌሽ፤ ታማን ላፑን ቶሆ ሴርዳ ብራዳ ጌሽ።
PSA 12:7 አቤት ጎዳዉ ኔኒ ኤንታ ናጋ፤ ሀይሳ መላ አሳፐ መርናዉ ኤንታ አሻ።
PSA 12:8 ኢት አሳ ግዶን ቦንቸትያ ዎደ፥ ጌላ አሳት ጬቀትሸ ስመረቶሶና።
PSA 13:1 ዛማረታ ሀላቃስ ፃፈትዳ ዳዊታ ማዝሙረ አቤት ጎዳዉ አዉደ ጋካናዉ ታና ዶጋይ? አዉደ ጋካናዉ ኔኒ ታፐ ጌማይ?
PSA 13:2 ታ ሸምፕያ አዉደ ጋካናዉ ኡንኤታኔ? ታ ዎዛናይ አዛኖን አዉደ ጋካናዉ ዳኔ? ታ ሞርከይ ታ ቦላ አዉደ ጋካናዉ ጎባኔ?
PSA 13:3 ጎዳዉ ታ ፆሳዉ፥ ሀእ ታና ፄላዳ ታዉ ዛራ። ታ አይፍያ ፖእሳዳ፥ ታና ሀይቆፐ አሻ።
PSA 13:4 ታ ሞርከት፥ “ኑኒ እያ ፆንዳ”፥ ያግድ ጬቀቶናዳ ተቃ፤ ታ ኩንደꬃን ኤንቲ ኡፋይቶናዳ ድጋ።
PSA 13:5 ሽን ታኒ ነ ማሮተꬃን አማነታይስ፤ ኔኒ ታና አሽያ ግሾ ኡፋይታይስ።
PSA 13:6 ነ ታዉ ኬህዳ ግሾ፥ ጎዳዉ፥ ታ ነዉ የፃና።
PSA 14:1 ዛማረታ ሀላቃስ ፃፈትዳ ዳዊታ ማዝሙረ ኤያት ባንታ ዎዛናን፥ “ፆሲ ባዋ” ያጎሶና፤ ኤንታ ደኦይ ኢትስ። ኤንቲ እፀትዳባ ኦꬆሶና፤ ሎኦባ ኦꬅያ አስ ባዋ።
PSA 14:2 አኬከይነ ፆሰ ኮየይ ደእያኮ በአናዉ፥ ጎዳይ ሳሎፐ ዱገ አሰ ፄሌስ።
PSA 14:3 ሽን ኡባይ ዞኮ ዛርዶሶና፤ ኡባይ ጎኦናባ ግድዶሶና። ሎኦባ ኦꬅያ ኦንካ ባዋ፤ ሀር አቶሽን እስ አስካ ባዋ።
PSA 14:4 አስ ካꬅ መይሳዳ፥ ኤንቲ ታ አሳ ቦንቅድ ሞሶና፤ ሀ ኢታ አሳት አይባካ ኤሮኮና፤ ኤንቲ ፆሳ ዎሶኮና።
PSA 14:5 ሽን ፆሳይ ፅሎ አሳራ ደእያ ግሾ፥ ኢታ አሳት ያሻን ኮኮሮሶና።
PSA 14:6 ህንተ ማንቆታ ቆፋ ላሌታ፤ ሽን ጎዳይ ማንቆት ቆሰትድ አትያ በሰ።
PSA 14:7 እስራኤለስ አቶተꬅ ፅዮነፐ ዬረነ! ጎዳይ ኤንታ ዱሳ ዛርያ ዎደ፥ ያይቆባ ኮቻይ ኡፋይታና፤ እስራኤለ አሳይ ሀሹ ጋና።
PSA 15:1 ዳዊታ ማዝሙረ አቤት ጎዳዉ፥ ነ ዱንካንያን ጋምአናይ ኦኔ? ነ ጌሻ ዙማ ቦላ ዳናይ ኦኔ?
PSA 15:2 ሱረ ደኦ ደኤይ፥ ፅሎባ ኦይ፥ ባ ዎዛናፐ ቱማ ኦደተይ፥
PSA 15:3 ሀራ አሳ ሱንꬅ ኢሶናይ፥ ባ ላግያ ቦላ ኢታባ ኦꬆናይ፥ ባ ላግያ ዝግሮናይ፥
PSA 15:4 ኢታ አሳታ ካይ፥ ጎዳ ያይያ አሳታ ቦንቸይ፥ ቆሄትድካ ባ ጫቁዋ ፖለይ፥
PSA 15:5 ባ ሚሽያ የሎን ታልኦናይ፥ ፅሎ አስ ቆሀናዉ ዎꬋፈ ኤኮናይ፥ ሀይሳታ ኦꬅያ ኡራይ መርናዉ ቃፀና።
PSA 16:1 ዳዊታ ዎሳ አቤት ፆሳዉ፥ ታ ኔኮ ባቃትያ ግሾ ታና ናጋ።
PSA 16:2 ታኒ ፆሳ፥ “ኔኒ ታ ጎዳ፤ ኔፐ አትሽን፥ ሀር ሎኦባይ ታዉ ባዋ” ያጋስ።
PSA 16:3 ሳአን ደእያ ጌሻት አይ መላ ቦንቸትዶና! ታ ኤንታራ እስፈ ኡፋይታይስ።
PSA 16:4 ሀራ ፆሳታ ካለይሳት ባንታ ቦላ መቶ ዳርሶሶና። ሽን ታኒ ሀራ ፆሳታስ ሱꬅ ያርሽከ፤ ታኒ ኤንታ ሱንꬃ ፄግከ።
PSA 16:5 ታ ጎዳዉ ታ ላታይ ነና፤ ታዉ ኮሽያ ኡባ ታዉ እማሳ፤ ታ ደኡዋ ሳማይ ነና።
PSA 16:6 ታና ጋክዳ ሳማይ አይ መላ ሎኦ! ኤ ታ ላታይ ቱማ ሎኦ!
PSA 16:7 ታና ዞርዳ ጎዳ ጋላታይስ፤ ቃማ ታ ዎዛናይ ታና ታማርሴስ።
PSA 16:8 ታኒ ኡባ ዎደ ጎዳ ታ ስንꬃን በአይስ፤ እ ታ ኡሻቻን ደእያ ግሾ ዳጋምከ።
PSA 16:9 ሄሳ ግሾ፥ ታ ዎዛናይ ኡፋይቴስ፤ ታ እንፃርሳይ ጋላቴስ፤ ታ አሳተꬃይ ህርግ ባይና ደኤስ።
PSA 16:10 ታ ሸምፕዉ ስኦለን አጋካ፤ ነ ጌሻ ዎቃና መላ ኦꬃካ።
PSA 16:11 ታና ደኦ ኦግያ በሳሳ፤ ነ ስንꬃን ኩመꬃ ኡፋይስ ደኤስ፤ ነ ኡሻቻን መርና እንጀይ ደኤስ።
PSA 17:1 ዳዊታ ዎሳ አቤት ጎዳዉ፥ ታ ፅሎ ማጋኑዋ ስአ፤ ታኒ ኔኮ ዋስያ ዋሱዋ ሀይዛ። ጭሞን ግዶናሽን ቱማን፥ ዎስያ ዎሳ ዛራ።
PSA 17:2 ነ ፅሎ ፕርዳይ ታዉ ቆንጮ፤ ነ አይፈይ ቱማ ፄሎ።
PSA 17:3 ኔኒ ቃማ ታና ፆሞሳዳሳ፤ ታ ዎዛና ፓጫዳሳ። ሽን ፓጫዳካ ታ ቦላ አይኮካ ደማባካ፤ ታ እንፃርሳይካ ባለትቤና።
PSA 17:4 ታኒ ሀራ አሳታዳ ኢታባ ሃሳይከ፤ ታኒ ነ ቃላ ናግያ ግሾ፥ ገነ ኦግያ ካላብከ።
PSA 17:5 ታ ቶሆይ ꬉበቶና መላ፥ ታ ታንጎይ ነ ኦግያፐ ጋፃ ከይቤና።
PSA 17:6 አቤት ፆሳዉ ታ ዎሳ ነ ስእያ ግሾ፥ ታኒ ነና ዎሳይስ። ነ ሀይꬃ ታኮ ዛራዳ፥ ታ ቃላ ስአ።
PSA 17:7 ባንታ ሞርከታፐ ባቃተይሳታ፥ ነ ኡሻቻ ኩሸን ቆታዳ አሸይሶ፥ ነ ኬሀተꬃ ማላልስያ ኦገን በሳ።
PSA 17:8 ነ አይፈ ናኤ መላ ታና ናጋ፤ ነ ቀፍያ ጋርሳን ታና ቆሳ።
PSA 17:9 ታና ኡንኤꬅያ ኢታታፐ፤ ተቅድ ኦይክዳ ሞርከታፐ አሻ።
PSA 17:10 ኤንታዉ ቃይ ባዋ፤ ኦቶሮን ሃሳዮሶና።
PSA 17:11 ታና ጎድድ ኦይክዶሶና፤ ተቅዶሶና፤ ታና ቢታን ሆልድ የጋናዉ ፄሎሶና።
PSA 17:12 ኤንቲ ምያባ ኮይያ ጋሞ መላ፤ ቆሰትድ ናግያ ዎዳላ ጋሞ መላ።
PSA 17:13 ጎዳዉ፥ ደንዳ፤ ታ ሞርከታራ ኤቀታዳ ኤንታ ሳአን የጋ፤ ነ ማሻን ኢታታ ኩሸፐ ታና አሻ።
PSA 17:14 ጎዳዉ፥ ሀይሳ መላ አሳፐ ታና ቆሳ፤ ኤንታ ቃዳይ ሳአባ ግድዳ አሳፐ ነ ኩሸን ታና አሻ። ነ ምንጅዳ ሴራን ኤንታ ካልሳ፤ ሄ ሴራይ ኤንታ ናይታስ ግድድ፥ ኤንታ ናይታ ናይታስ ፓላሆ።
PSA 17:15 ሽን ታኒ ፅሎተꬃን ነ ሶምኡዋ በአና፤ ታ ባርክያ ዎደ ነ ማላ በአዳ ኡፋይታና።
PSA 18:1 ዛማረታ ሀላቃስ ፃፈትዳ ዳዊታ ማዝሙረ ጎዳይ እያ ሞርከታፐነ ሳኦላ ኩሸፐ አሽዳ ዎደ ዳዊታ ጎዳስ የፅዳ ማዝሙረ አቤት ጎዳዉ፥ ታ ዎልቃዉ፥ ታኒ ነና ዶሳይስ።
PSA 18:2 ጎዳይ ታ ዛላ፤ ታ ሚፃ፤ ታና አሸይሳ፤ ታ ፆሳይ ታ እያኮ ባቃትያ ታ ዛላ። እ ታዉ ጎንዳለ፤ ታና አሽያ ዎልቃ፤ ታኒ ቆሰታዳ አትያ በሰ።
PSA 18:3 ጋላታ በሲያ ጎዳ ታ ፄጋይስ፤ ታ ሞርከታፐ ታኒ አታና።
PSA 18:4 ሀይቆ ዎዶሮይ ታና ጩልስ፤ ꬋዮ ድኦይ ታና ዳጋንꬅስ።
PSA 18:5 ዱፎ ዎዶሮይ ታ ቦላ ፃፀትስ፤ ሀይቆ ፅሄይ ታና ኦይክስ።
PSA 18:6 ታ ኡንአን ጎዳ ፄጋስ፤ ታና ማዳና መላ ታ ፆሳኮ ዋሳስ። ባ ኬꬃን ግድድ ታ ግርሳ ስእስ፤ ታ ዋሶይ እያ ሀይꬃን ዎꬍስ።
PSA 18:7 ፆሳይ ሀንቀትዳ ግሾ፥ ቢታይ ቃፅስ፤ ደረታ ፃጶይ ኮኮርስ።
PSA 18:8 እያ ሲꬍያፐ ሀንቆ ጩያይ ከይስ፤ እያ ዶናፐ ምያ ታማ ላጮይ ከይስ፤ እ ፁግያ ቦንቆ ጩትስ።
PSA 18:9 ሳሉዋ ጳልቅድ ዎꬍስ፤ እያ ቶሁዋፐ ጋርሳን ꬉማ ሻር ደኤስ።
PSA 18:10 ክሩበታ ቦላ ኡትድ ፓልስ፤ ጫርኮ ቀፈን ፑደ ደንድስ።
PSA 18:11 ባና ꬉማን ካምስ፤ እያ ዱንካነይ እራን ኩምዳ ሻራ።
PSA 18:12 እያ ስንꬃን ደእያ ግታ ፖኡዋፐ ሻችነ ታማ ላጮይ ከይድ ꬉማ ሻራ ካንꬅድ ብስ።
PSA 18:13 ጎዳይ ዳዳዳ ሳሎፐ ጉምስ፤ ኡባፈ ꬎቃ ፆሳይ ባ ግርሳ ስስስ፤ ዎልአንꬃንነ ታማ ላጮን ቆንጭስ።
PSA 18:14 ባ ዶንግያ ዱክድ ባ ሞርከታ ላልስ፤ ዎልአንꬃ ፖኦ ኪትድ ኤንታ የደꬅስ።
PSA 18:15 አቤት ጎዳዉ፥ ኔኒ ሴርዳ ዎደ፥ ሸነታዳ ፔኑቅዳ ዎደ፥ አባይ ዝንእዳ ቢታይ በንትስ፤ ሳአ ባሶይ ቆንጭስ።
PSA 18:16 ጎዳይ ቦላፈ ኩሽያ የድድ ታና ኦይክስ፤ ጪሞ ሃꬃፈ ታና ዳፍድ ከስስ።
PSA 18:17 ታ ቦላ ዳሮ ዎልቃምዳ ታ ሞርከታፐነ ታና እፀይሳታፐ አሽስ።
PSA 18:18 ታ መቶትዳ ዎደ ኤንቲ ታ ቦላ ደንድዶሶና፤ ሽን ጎዳይ ታና ካትስስ።
PSA 18:19 እ ታና ዳልጋ በሲ ከስስ፤ ታናን ኡፋይትዳ ግሾ ታና አሽስ።
PSA 18:20 ታ ፅሎተꬃዳ ጎዳይ ታዉ ቃንፅስ፤ ታ ኩሸ ጌሻተꬃዳ እ ታዉ ዛርስ።
PSA 18:21 ታኒ ጎዳ ኦግያ ካላስ፤ ታ ፆሳ አጋዳ ካረ ከያብከ።
PSA 18:22 ታኒ እያ ህግያ ኡባ ናጋስ፤ እያ ኪታ ፖሎ አጋብከ።
PSA 18:23 ታኒ እያ ስንꬃን ሱረ ደአስ፤ ታና ናጋራፐ ናጋስ።
PSA 18:24 ጎዳይ ታ ፅሎተꬃዳነ ታ ኩሸ ጌሻተꬃዳ ታዉ ዛርስ።
PSA 18:25 አማነተይሳታስ ነ አማነታሳ፤ ሱረታስ ነ ሱረ።
PSA 18:26 ጌሻታስ ነ ጌሽ፤ ሽን ጌላታስ ነ ጌላ።
PSA 18:27 አሽከታ አሻሳ፤ ሽን ኦቶራንቾታ ካዉሻሳ።
PSA 18:28 አቤት ጎዳዉ፥ ነ ታዉ ፆምፓሳ፤ ታ ፆሳይ ታ ꬉማ ፖእሳሳ።
PSA 18:29 ነ ማዱዋን ታ ሞርከ ቶራ ቦላ ደንዳይስ፤ ታ ፆሳን ሚፃ ፄራራ ጉፓዳ አꬋይስ።
PSA 18:30 ፆሳ ኦገይ ፖሎ፤ ጎዳ ቃላይ ጌሽ፤ እያኮ ባቃትያ ኡባስ እ ጎንዳለ።
PSA 18:31 ጎዳፐ አትሽን፥ ሀራ ፆሲ ኦኔ? ኑ ፆሳፈ አትሽን፥ ሀራ ዛል ኦኔ?
PSA 18:32 ታዉ ዎልቃ እመይነ ታ ኦግያ ሳሮ ኦይ ፆሳ።
PSA 18:33 እ ታ ቶሁዋ ገንኤ ቶሆዳ ምንꬄስ፤ ꬎቃ በሳን ህርግ ባይና ኤሴስ።
PSA 18:34 ታ ኩሽያ ኦላ ታማርሴስ፤ ናሰ ብራታ ዶንግያ ዱካና መላ ታ ቀስያ ምንꬄስ።
PSA 18:35 ታና አሽያ ነ ጎንዳልያ ታዉ እማዳሳ፤ ነ ኡሻቻ ኩሸይ ታና ዘምፕሴስ፤ ነ ሎኦ ኦይከꬃይ ታና ግታዬስ።
PSA 18:36 ታ ሄመትያ በሳ ዳልግሳዳሳ፤ ታ ቶሁዋ ሀርቹች ኤክቤና።
PSA 18:37 ታ ሞርከታ የደꬃዳ ኦይካስ፤ ኤንታ ꬋይሶና ጉየ ስምከ።
PSA 18:38 ኤንቲ ዛር ደንዶናዳ ሾጫስ፤ ኤንቲ ታ ቶሁዋ ጋርሳን ኩንድዶሶና።
PSA 18:39 ኦላስ ታና ዳንጭሳዳሳ፤ ታራ ጋደተይሳታ ታዉ ጉልባትሳዳሳ።
PSA 18:40 ታ ሞርከታ ታ ስንꬃፈ ጉየ ዛራዳሳ፤ ታና እፀይሳታ ꬋይሳስ።
PSA 18:41 ማደ ኮይድ ዋስዶሶና፥ ሽን ኦንካ ኤንታ አሽቤና። ጎዳ ኤንቲ ፄግዶሶና፥ ሽን እ ኤንታዉ ኮይቤና።
PSA 18:42 ጫርኮይ ፕትድ ኤፍያ ባናዳ ኤንታ ሊቅሳስ፤ ኦገ ኡርቃዳ ኤንታ የꬋስ።
PSA 18:43 ገነ አሳፐ ታና አሻዳሳ፤ ታና ካዎተꬃታ ቦላ ሹማዳሳ፤ ታ ኤሮና አሳይ ታዉ ሃረትዶሶና።
PSA 18:44 ኤንቲ ታባ ስእድ ታዉ ኪተቶሶና፤ አላጋ ደረይ ታ ስንꬃን ዝጌስ።
PSA 18:45 ኤንቲ ካሀ ꬋይዶሶና፤ ባንታ ሚፃፐ ኮኮርሸ ዮሶና።
PSA 18:46 ጎዳይ ደኤስ! ፆሳይ፥ ታ ዛላይ ጋላተቶ! ታና አሽያ ፆሳይ ꬎቁ ꬎቁ ጎ!
PSA 18:47 እ ታዉ ሀሎ ከስያ ፆሳ፤ ካዎተꬃታ ታ ጋርሳን ሃርሰይሳ።
PSA 18:48 ታ ሞርከታፐ ታና አሸይሳ፤ ታና እፀይሳታ ቦላ ꬎቁ ꬎቁ ኦꬃሳ፤ ኢታታፐ ታና አሻሳ።
PSA 18:49 ሄሳ ግሾ፥ ጎዳዉ ካዎተꬃታ ግዶን ታኒ ነና ጋላታና፤ ነ ሱንꬃ ሳባና።
PSA 18:50 እ ባ ካዋስ ፆኖ እሜስ፤ ባ ትይዳይሳስ፥ ዳዊታስነ እያ ኮቻስ፥ ባ ኬሀተꬃ በሴስ።
PSA 19:1 ዛማረታ ሀላቃስ ፃፈትዳ ዳዊታ ማዝሙረ ሳሎት ፆሳ ቦንቹዋ ሃሳዮሶና፤ ሳሎ ጉፋንꬆይ እያ ኩሸ ኦሱዋ አዋጄስ።
PSA 19:2 እስ ጋላስ ሀራ ጋላሳስ ሄሳ ኦዴስ፤ እስ ቃም ሀራ ቃማስ ኤራተꬅ ቆንጭሴስ።
PSA 19:3 ኦድ ዎይኮ ቃል ባዋ፤ ኤንታ ግርሳይ ስኤተና።
PSA 19:4 ግዶሽን ኤንታ ኦዳይ ሳአ ኡባን ላለትስ፤ ኤንታ ቃላይ ቢታ ጋፃ ጋክስ። አው ደእያ በሲ ፆሳይ ሳሎን ጊግስስ።
PSA 19:5 ባ ሶፐ ከይያ ምሽራዳ፥ ጋደ ዎፃናዉ ኡፋይትድ ጊግዳ አሳዳ፥ አዋይ ዎንታ ዎንታ ከዬስ።
PSA 19:6 እስ ባጋ ሳሎ ጋፃፐ ከይድ፥ ሀራ ባጋ ሳሎ ጋፃ ጋካናዉ ቤስ፤ እያ ሱላፐ ጌምያባይ ባዋ።
PSA 19:7 ጎዳ ህገይ ሱረ፤ ሸምፖ ዛሬስ። ጎዳ ኪታይ አማነትዳይሳ፤ አኬክ ፓጭዳይሳታ ጭንጫ ኦꬄስ።
PSA 19:8 ጎዳ ዎጋይ ልከ፤ ዎዛና ኡፋይሴስ። ጎዳ ኪታይ ጌሽ፤ አይፈ ፖእሴስ።
PSA 19:9 ጎዳስ ያሽ ጌሽ፤ መርናዉ ኤቅድ ደኤስ። ጎዳ ፕርዳይ ኩመꬅ ቱማነ ፅሎ።
PSA 19:10 ዎርቃፈ አꬍድ ኮየቴስ፤ ዋላህ ባይና ዎርቃፈ አꬍድ ሎኦ። ኤሳፈ አꬍድ ሎኦ እልሎ ኤሳፈ አꬍድ ማልኦ።
PSA 19:11 ነ አይለይ ናገታና መላ ዞሬስ፤ ነ ህግያ ናጎይ ዳሮ ጎኤስ።
PSA 19:12 ባ ቆሁዋ ደመይ ኦኔ? አቤት ጎዳዉ፥ ጌምዳ ናጋራፐ ታና ጌሻ።
PSA 19:13 ታና ነ አይልያ፥ ኤርሸ ኦꬅያ ናጋራፐ ናጋ። ናጋር ታና ሃሮና መላ ማዳ፤ ሄ ዎደ ታኒ ሱረ ግዳና፥ ግታ ባላፐ ጌያና።
PSA 19:14 አቤት ጎዳዉ፥ ታ ዛላዉ፥ ታና ዎዘይሶ፤ ታ ዶናፐ ከይያ ቃላይነ ታ ዎዛና ቆፋይ ነና ኡፋይስያባ ግዶ።
PSA 20:1 ዛማረታ ሀላቃስ ፃፈትዳ ዳዊታ ማዝሙረ መቶ ዎደ ጎዳይ ነና ስኦ፤ ያይቆባ ፆሳ ሱንꬃይ ነና ናጎ።
PSA 20:2 ባ ኬꬃፈ ነዉ ማዶ ኪቶ፤ ፅዮነፐ ነና ካትሶ።
PSA 20:3 እ ነ ያርሾ ኡባ ሀሳዮ፤ ነ ፁሳ ያርሹዋን ኡፋይቶ። ሳላሀ
PSA 20:4 ነ ዎዛና አሙዋ ነዉ እሞ፤ ነ ቆፋ ኡባ ፖሎ።
PSA 20:5 ነ ፆኑዋን ኑና ኡፋይሶ፤ ኑ ፆሳ ሱንꬃን ኑ ባንድራ ꬎቁ ኦꬃና፤ ነ ዎሳ ኡባ ጎዳይ ነዉ ዛሮ።
PSA 20:6 ጎዳይ ባ ዶርዳ ካዋስ፥ ፆኖ እምዳይሳ ታኒ ቡሮ ኤራይስ። እ ባ ጌሻ ሳሉዋን ስአና፤ ባ ኡሻቻ ኩሸን ግታ ፆኖ እያዉ እማና።
PSA 20:7 እሶት እሶት ባንታ ኦላ ፓራ ጋርያን፥ ሀራት ባንታ ፓራን ጬቀቶሶና፤ ሽን ኑኒ ጎዳ ኑ ፆሳ ዎልቃን ጬቀቶስ።
PSA 20:8 ኤንቲ ꬉበትድ ኩንዳና፤ ሽን ኑኒ ደንድድ ምን ኤቃና።
PSA 20:9 አቤት ጎዳዉ፥ ካዋስ ፆኖ እማ፤ ኑኒ ነና ፄግያ ዎደ ስአ።
PSA 21:1 ዛማረታ ሀላቃስ ፃፈትዳ ዳዊታ ማዝሙረ ጎዳዉ፥ ካዎይ ነ ዎልቃን ኡፋይቴስ፤ ነ እምዳ ፆኑዋን ሀሹ ጌስ።
PSA 21:2 እያ ዎዛና አሙዋ እያዉ እማዳሳ፤ እያ መተርሻ ዎሳ እያ ድጋባካ። ሳላሀ
PSA 21:3 ሎኦ አንጆራ እያ ሞካሳ፤ ዋላህ ባይና ዎርቃ ካላቻ እያ ሁጰን ዎꬃሳ።
PSA 21:4 እ ነና ደኦ ኦይችስ፤ ዳሮ ላይꬅነ አዱሳ ደኦ እማዳሳ።
PSA 21:5 ኔኒ እያዉ ፆኖ እምዳ ግሾ፥ እያ ቦንቾይ ዳርስ፤ ግታተꬅነ ቴማ እያዉ እማዳሳ።
PSA 21:6 መርና አንጁዋ እያዉ እማዳሳ፤ ነ በንቱዋን እያ ኡፋይሳሳ።
PSA 21:7 ካዎይ ጎዳን አማነቴስ፤ ኡባፈ ꬎቃ ፆሳ ማሮታይ፥ እያራ ደእያ ግሾ እ ዳጋመና።
PSA 21:8 ነ ኩሸይ ነ ሞርከታ፥ ነ ኡሻቻ ኩሸይ ነና እፀይሳታ ደማና።
PSA 21:9 ነ ቆንጭያ ዎደ ጮጨ ታማዳ ኤንታ ፁጋና፤ ጎዳይ ባ ሀንቆ ሱሎን ኤንታ ምታና፤ እያ ታማይ ኤንታ ማና።
PSA 21:10 ኔኒ ኤንታ ናይታ ቢታፈ፥ ኤንታ ኮቻ አሳ ግዶፈ ꬋይሳና።
PSA 21:11 ነ ሞርከት ነ ቦላ ቶቦሶና፤ ኢታባ ማቀቶሶና፥ ሽን ፖሎኮና።
PSA 21:12 ኔኒ ኤንታ ነ ዶንግያን ዱካና፤ ኤንታ ጉየ ዛራዳ ጎዳና።
PSA 21:13 ጎዳዉ፥ ነ ምኖተꬃን ꬎቁ ꬎቁ ጋ፤ ነ ዎልቃ ግሾ ጋላታ ማዝሙረ የፆስ።
PSA 22:1 ዛማረታ ሀላቃስ ፃፈትዳ ዳዊታ ማዝሙረ “ጉራ ገንኤ” ጌተትያ ዲꬃ ጩꬃን የፀትዳ ማዝሙረ ታ ፆሳዉ፥ ታ ፆሳዉ፥ ታና አይስ አጋዲ? ታና ማዳ ጋዳ ታ ነና ዎስያ ዎደ፥ አይስ ታፐ ሃካይ?
PSA 22:2 ታ ፆሳዉ፥ ጋላስ ኩመꬅ ታ ኔኮ ዋሳስ፤ ሽን ነ ታና አላካ። ቃማ ኡባን ኔኮ ዋሳይስ፥ ሽን ዎፓተꬅ ደምከ።
PSA 22:3 ግዶሽን ኔኒ ጌሽ፤ እስራኤለ ጋላታይ ነ አራታ ዩሾን ደኤስ።
PSA 22:4 ኑ አዋት ነናን አማነትዶሶና፤ ነናን አማነትን፥ ነ ኤንታ አሻዳሳ።
PSA 22:5 ኔኮ ዋስድ አትዶሶና፤ ነናን አማነትድ ዬላትቦኮና።
PSA 22:6 ሽን ታ አሰ ግድከ፤ ጉፁነ፤ ታ አሳን ካትዳይሳነ ቦረትዳይሳ።
PSA 22:7 ታና በእያ ኡባይ ቀልቅሶሶና፤ ባንታ ሁጵያ ቃꬅሸ ደሬቆሶና።
PSA 22:8 “እ ጎዳን አማነትስ፤ አነ እያ አሾ፤ ጎዳይ እያ ዶስኮ፥ አነ እያ አሾ” ያጎሶና።
PSA 22:9 ግዶሽን ታኒ ታ አየ ኡሎፐ ሱረ የለታናዳ ኦꬅዳይ ነና። ታ አየ ꬋንꬃ ꬋምያ ዎደካ ታና ናግዳይ ነና።
PSA 22:10 ታ የለቶሶፐ ዶማዳ ነናን ድጫስ፤ ታ አየ ኡሎፐ ዶምን ነ ታ ፆሳ።
PSA 22:11 መቶይ ታኮ ማትያ ግሾነ ታና ማድያ አስ ባይና ግሾ፥ ሀእ ኔኒ ታፐ ሃኮፋ።
PSA 22:12 ዳሮ ሞርከት ቃይጭያ ቦራዳ ታና ተቅዶሶና፤ ቃይጭያ ባሳነ ኮርማታዳ ታና ኦይክዶሶና።
PSA 22:13 መንረꬅድ ጉድያ ጋሞዳ ባንታ ዶና ታ ቦላ ዶዮሶና።
PSA 22:14 ታኒ ሃꬃዳ ጎጋስ፤ ታ መቀꬃይ ባ ከሱዋፐ ከይስ፤ ታ ዎዛናይ ኦይሳዳ ታ ጋꬃን ትልእስ።
PSA 22:15 ታ ቆይ ኩንአዳ መልስ፤ ታ እንፃርሳይ ኮቶኑዋራ ኦይከትስ፤ ነ ታና ሀይቅዳ አሳዳ ባናን የጋዳሳ።
PSA 22:16 ካናት ታና ተቅዶሶና፤ ኢታ አሳት ታ ዩሹዋ ኦይክዶሶና፤ ታ ኩሸታነ ታ ቶሆታ ጫዶሶና።
PSA 22:17 ታ መቀꬃት ታይበቶሶና፤ ታ ሞርከት ታና ደሬቆሶና።
PSA 22:18 ታ ማኡዋ ሻክድ ኤኮሶና፤ ታ አዱሳ ማኡዋ ቦላ ሳማ የጎሶና።
PSA 22:19 ታ ጎዳዉ፥ ነ ታ ማታይ ታፐ ሃኮፋ፤ ታ ዎልቃዉ፥ ታና ማዳናዉ ኤለሳዳ ሃያ።
PSA 22:20 ታና ማሻፈ ከሳ ኤካ፤ ታ አልኦ ደኡዋ ካናታፐ አሻ።
PSA 22:21 ጋሞታ ዶናፐ ታና አሻ፤ ቃይጭያ ባዞ ቦራታ ካጨፐ ታና ናጋ።
PSA 22:22 ታኒ ነ ሱንꬃ ታ እሻታስ ኦዳና፤ ኤንታ ሺቁዋን ነና ጋላታና።
PSA 22:23 ህንተኖ፥ ጎዳ ያየሳቶ፥ እያ ጋላትተ፤ ህንተኖ፥ ያይቆባ ዛረቶ፥ እያ ቦንችተ። ህንተኖ፥ እስራኤለ ኮቻቶ፥ ያሻን እያ ꬎቁ ꬎቁ ኦꬅተ።
PSA 22:24 እ ኡንኤትዳይሳ ካና፤ ኤንታ ቆሁዋ በእሸ ቀል ጌና። ባ ሶምኡዋ ኤንታፈ ገንና፤ ኤንቲ እያኮ ዋስያ ዎደ፥ ኤንታዉ ዞኮ ዛርቤና።
PSA 22:25 ታ ነ ሎኦ ኦሱዋ ግሾ ግታ ሺቆን ጋላታና፤ ታ ቃንገꬃ ነዉ ያይያ አሳ ስንꬃን ጋꬃና።
PSA 22:26 ማንቆት ምድ ካላና፤ ጎዳ ኮየይሳት እያ ጋላታና፤ ኤንቲ መርናዉ ኡፋይሳን ዳና።
PSA 22:27 ሳአ ጋፃ ጋካናዉ ደእያ አሳ ኡባይ፥ አኬካን ጎዳኮ ስማና፤ አሳ ዛረ ኡባይ እያ ጎይናና።
PSA 22:28 ማት ኡባይ ጎዳሳ፤ እ ካዎተꬃታ ሃሬስ።
PSA 22:29 ሳአን ደእያ ዱረ ኡባይ እያ ጎይናና፤ ባንታና ሀይቆፐ አሻናዉ ዳንዳኦናይሳትነ ቢታን ስምያ ኡባይ እያዉ ጉልባታና።
PSA 22:30 ያና የለታይ እያዉ ኪተታና፤ ስንꬃ የለታስ ጎዳባ ኦዳና።
PSA 22:31 ቡሮ የለትቦና አሳስካ፥ እያ ጌሻተꬃ ኦዳና።
PSA 23:1 ዳዊታ ማዝሙረ ጎዳይ ታ ሄንꬃንቹዋ፤ ታዉ አይብካ ፓጨና።
PSA 23:2 ታና አጫ ቆሮን ሸምፕሴስ፤ ዎፑ ግዳ ሃꬃኮ ላጌስ።
PSA 23:3 ታ ደኡዋ ኦራፅሴስ፤ ባ ሱንꬃ ግሾ ግድ፥ ታና ፅሎተꬃ ኦግያ ካለꬄስ።
PSA 23:4 ነ ታ ጎዳይ ታራ ደእያ ግሾ፥ ታ ሳካና ꬉማ ግዶራ ቢኮካ፥ ኢታባ ያይከ። ነ ፃምአይነ ነ ጉፈይ ታና ምንꬆሶና።
PSA 23:5 ታ ሞርከታ ስንꬃን ታዉ ግብራ ጊግሳሳ፤ ታና ሞካሸ፥ ታ ሁጰን ዛይተ ትያሳ፤ ታ ዋንጫይ ኩምድ ጎጋና ጋካናዉ ኩንꬃሳ።
PSA 23:6 ነ ኬሀተꬃይነ ነ ማሮተꬃይ ታ ደኦ ላይꬃ ኡባን ታና ካላና፤ ታኒ ጎዳ ኬꬃን መርናዉ ዳና።
PSA 24:1 ዳዊታ ማዝሙረ ሳአይነ ሳአን ደእያ ኡባይ ጎዳባ፤ አላመይነ እያን ደእያ አሳ ኡባይ እያሳ።
PSA 24:2 እ ሳኣ ግታ አባ ቦላ ሂፅስ፤ ጪሞ ሃꬃ ቦላ ምንꬅድ ኤስስ።
PSA 24:3 ጎዳ ዙማ ቦላ ከያናዉ ዳንዳኤይ ኦኔ? እያ ጌሻ በሳን ኤቃናይ ኦኔ?
PSA 24:4 እያ ኩሸይነ እያ ዎዛናይ ጌሽ ግድዳይሳ፤ ኤቃ ጎይኖናይሳ፥ ዎርዶ ጫቆናይሳ።
PSA 24:5 እ ጎዳፐ አንጆ ኤካና፤ አሽያ ፆሳፈ ፅሎ ፕርዳ ደማና።
PSA 24:6 ፆሳኮ ፄልያ አስነ ያይቆባ ፆሳ ሶምኡዋ ኮይያ አስ ሄሳ መላ አሰ። ሳላሀ
PSA 24:7 ቦንቾ ካዎይ ገላና መላ፥ ህንተኖ ፐንገቶ ዶየትተ፤ በን ፐንገት እያ ኡፋይሳን ሞክተ።
PSA 24:8 ሄ ቦንቾ ካዎይ ኦኔ? ምኖነ ዎልቃማ ግድዳ ጎዳ፤ ኦላን ዎልቃማ ግድዳ ጎዳ።
PSA 24:9 ቦንቾ ካዎይ ገላና መላ፥ ህንተኖ ፐንገቶ ዶየትተ፤ በን ፐንገት እያ ኡፋይሳን ሞክተ።
PSA 24:10 ሀ ቦንቾ ካዎይ ኦኔ? ሀ ቦንቾ ካዎይ ሳሎ መተꬃታ ጎዳ! ሳላሀ።
PSA 25:1 ዳዊታ ማዝሙረ አቤት ጎዳዉ፥ ሸምፖፈ ታ ነና ዎሳይስ።
PSA 25:2 አቤት ታ ፆሳዉ፥ ታ ነናን አማነታይስ፤ ታና ዬላዮፓ፤ ታ ሞርከታስ ታና አꬃዳ እሞፋ።
PSA 25:3 ነናን ኡፋይስ ኦይሳት ዬላቶኮና፤ ሽን ጋሶይ ባይና ገነይሳት ዬላታና።
PSA 25:4 አቤት ጎዳዉ፥ ታና ነ ኦግያ በሳ፤ ነ ጌዶ ታና ካለꬃ።
PSA 25:5 ታና አሽያ ፆሳይ ነና ግድያ ግሾ፥ ነ ቱማተꬃ ታና ካለꬃነ ታማርሳ፤ ጋላስ ኩመꬃ ታ ነናን ኡፋይስ ኦꬃይስ።
PSA 25:6 አቤት ጎዳዉ፥ በንፐ ደእያ ነ ቃꬍያነ ነ ኬሀተꬃ ሀሳያ።
PSA 25:7 ታ ናአተꬃ ናጋራነ ኢታባ ሀሳዮፓ፤ አቤት ጎዳዉ፥ ነ ኬሀተꬃነ ሎኦተꬃ ሀሳያ።
PSA 25:8 ጎዳይ ኬሀነ ሱረ ግድያ ግሾ፤ ናጋራንቾታ ባ ኦግያ ታማርሴስ።
PSA 25:9 አሽከታ ሱረተꬃን ካለꬄስ፤ ኤንታና ባ ኦግያ ታማርሴስ።
PSA 25:10 ጎዳ ጫቁዋነ እያ ኪታ ናገይሳታስ እያ ኦገ ኡባይ ቱማነ ኬሀ።
PSA 25:11 አቤት ጎዳዉ፥ ታ ናጋራይ ዳሮ፤ ግዶሽን ነ ሱንꬃ ግሾ ታው አቶ ጋ።
PSA 25:12 ጎዳ ያይያ አስ ኦኔ? እ ካላናዉ በሲያ ኦግያ ጎዳይ እያ ታማርሳና።
PSA 25:13 እ ኡባ ዎደ ዱረተꬃን ዳና፤ እያ ናይት ቢታ ላታና።
PSA 25:14 ጎዳይ ያየይሳታስ ባ ፁራ ገንና፤ እ ኤንታዉ ባ ጫቁዋ ኤርሴስ።
PSA 25:15 ጎዳይ ታ ቶሁዋ ፅሄፐ ናግያ ግሾ፥ ታ አይፈይ ማዶ ኤካናዉ ኡባ ዎደ እያኮ ፄሌስ።
PSA 25:16 ጎዳዉ፥ ታኒ ብዛነ መቶትዳ አስ ግድያ ግሾ፥ ታኮ ስማ፤ ነ ማሮተꬃ ታና በሳ።
PSA 25:17 ታዉ ህርግ ዳርስ፤ ታ መቱዋፐ ታና ነ አሻ።
PSA 25:18 ታ መቱዋነ ታ ዋይያ በአ፤ ታ ናጋራ ኡባ አቶ ጋ።
PSA 25:19 ታ ሞርከት አይ መላ ዳርዳኮ በአ፤ ኤንቲ ታና አይ መላ እፅያኮ ፄላ።
PSA 25:20 ነ ታና ናጋ፤ ነ ታና አሻ፤ ታ ኔኮ ባቃትያ ግሾ ታና ዬላዮፓ።
PSA 25:21 ታ ነናን ኡፋይስ ኦꬅዳ ግሾ፥ ሱረተꬅነ ቱማተꬅ ታና ናጎ።
PSA 25:22 አቤት ፆሳዉ፥ እስራኤለ አሳ ኤንታ መቶ ኡባፈ ነ ዎዛ።
PSA 26:1 ዳዊታ ማዝሙረ አቤት ጎዳዉ፥ ታ ሱረተꬃን ሄመትዳ ግሾነ ስይ ባይና ነናን አማነትዳ ግሾ፥ ታዉ ፕርዳ።
PSA 26:2 አቤት ጎዳዉ፥ ታና ፓጫ፤ ታና ፕልጋዳ በአ፤ ታ ዎዛና ፆሞሳ።
PSA 26:3 ነ ሲቆይ ታ ስንꬃን ደእያ ግሾ፥ ታ ኡባ ዎደ ነ ቱማ ኦግያን ሄመታይስ።
PSA 26:4 ጭምያ አሳራ ታ ኡትከ፤ ጩቦታ ማባራን ገልከ።
PSA 26:5 ኢታታ ዱላታ ታ እፃይስ፤ ማካላቾታራ እስፈ ኡትከ።
PSA 26:6 አቤት ጎዳዉ፥ ታ ፅሎተꬃ በሳናዉ ታ ኩሽያ ሜጫይስ፤ ነ ያርሾ በሳ ዩያይስ።
PSA 26:7 ጋላታ ማዝሙረ የፃሸ ነ ማላልስያ ኦሶ ኡባ ኦዳና።
PSA 26:8 አቤት ጎዳዉ፥ ነ ኬꬃነ፥ ነ ቦንቾይ አቅያ በሳ ታ ዶሳይስ።
PSA 26:9 ታና ናጋራንቾታራ እስፈ ፕቶፋ፤ አሳ ሱꬁ ጉሰይሳታራ ታ ሸምፑዋ ꬋይሶፋ።
PSA 26:10 ኤንታ ኩሸን ኢታ ሀልቾይ ደኤስ፤ ኤንታ ኡሻቻ ኩሸን ዎꬋፈይ ኩምስ።
PSA 26:11 ሽን ታ ሱረተꬃን ሄመታና፤ ታና ዎዛ፤ ታዉ ቃታ።
PSA 26:12 ታ ቶሆይ ደምባ በሳን ኤቅስ፤ ግታ ሺቁዋን ጎዳ ጋላታና።
PSA 27:1 ዳዊታ ማዝሙረ ጎዳይ ታዉ ፖኦነ ታና አሸይሳ፤ ያትን፥ ታ ኦና ያያኔ? ጎዳይ፥ ታ ደኦይ ናገትያ ሚፃ፤ ያትን፥ ታ አይስ ዳጋማኔ?
PSA 27:2 ኢታ አሳት፥ ታና እፀይሳትነ ታ ሞርከት ታና ዎꬋናዉ ሆርዶፍያ ዎደ፥ ባንታዉ ꬉበትድ ኩንዳና።
PSA 27:3 ሞርከ ቶር ታና ተቅኮ ታ ዎዛናይ ያየና። ኦል ታ ቦላ ደንድያኮካ፥ ታኒ ጎዳን አማነታይስ።
PSA 27:4 ታ ጎዳ እስባ ኦይቻስ፤ ሄስካ፥ ታ ደኦ ላይꬃ ኡባን ጎዳ ኬꬃን ደአናሳ፤ ጎዳ ሎኦተꬃ በአናሳነ እያ ኬꬃን እያ ኮያናሳ።
PSA 27:5 መቶ ጋላስ ታና ባ ደእያ በሳን ገንꬃና፤ ባ ዱንካንያን ታና ቆሳና፤ ታና ꬎቃ ዛላ ቦላ ኤሳና።
PSA 27:6 ሄ ዎደ ታኒ ታና ተቅዳ ታ ሞርከታፐ አꬋዳ፥ ꬎቁ ꬎቁ ጋና። ታኒ እያ ዱንካንያን ኡፋይታሸ ያርሾ ያርሻና፤ ጎዳ ማዝሙረን ጋላታና።
PSA 27:7 አቤት ጎዳዉ፥ ታ ነና ፄግያ ዎደ ነ ታዉ ኮያ፤ ታዉ ቃታ፤ ታና ስአ።
PSA 27:8 ኔኒ፥ “ታ ሶምኡዋ ኮይተ” ጋዳሳ፥ ታ ዎዛናይ አቤት ጎዳዉ፥ “ታ ነ ሶምኡዋ ኮያና” ያግስ።
PSA 27:9 ነ ሶምኡዋ ታፐ ገንꬆፋ፤ ታና ማደይሶ፤ ነ ሸነታዳ ታና ነ አይልያ ጉየ ዛሮፓ። አቤት ታና አሽያ ፆሳዉ፥ ታና የጎፋ፤ አጎፋ።
PSA 27:10 ታ አዋይነ ታ አይያ ታና አግኮካ ጎዳይ ታና ሺሽድ ኤካና።
PSA 27:11 አቤት ጎዳዉ፥ ታና ነ ኦግያ ታማርሳ፤ ታ ሞርከታ ግሾ ታና ሱረ ኦገ ካለꬃ።
PSA 27:12 ታና ማንድያ ዎርዶ ማርካት ታ ቦላ ዎልቃን ደንድዳ ግሾ፥ ታና ታ ሞርከታ አሙዋስ አꬃዳ እሞፋ።
PSA 27:13 ታኒ ደኦን ደአሸ፥ ጎዳ ኬሀተꬃ በአናይሳ አማናይስ።
PSA 27:14 ጎዳን ኡፋይስ ኦꬃ፤ ምና፥ ያዮፋ፤ ጎዳን ኡፋይስ ኦꬃ።
PSA 28:1 ዳዊታ ማዝሙረ አቤት ጎዳዉ፥ ታ ዛላዉ፥ ታ ነና ፄጋይስ፤ ነ ታዉ ስእ ጎፓ። ነ ስእ ጊኮ፥ ታ ዱፎ ገልዳ አስ ግዳይስ።
PSA 28:2 ማደ ኮያዳ ታ ዋስያ ዎደ፤ ኡባፈ ጌሻ ዱንካንያኮ፥ ታ ኩሽያ ምጭያ ዎደ ታ ዎሳ ስአ።
PSA 28:3 ኢታ ኦꬅያ ኢታ አሳታራ ታና ጋꬃዳ ኦይኮፋ፤ ኤንቲ ባንታ ዎዛናን ገነ ቆፕሸ፥ ባንታ ዶናን ሳሮተꬅ ሃሳዮሶና።
PSA 28:4 ኤንታ ኦሱዋዳ ኤንታ ሴራ፤ ኤንታ ኢታተꬃዳ ኤንታዉ ቃንፃ። ኤንታ ኩሸ ኦሱዋዳ ኤንታ ፕርዳ፤ ኤንታዉ በሲያ ኢታ ኤንታዉ ዛራ።
PSA 28:5 ኤንቲ ጎዳ ኦሱዋነ እያ ኩሸ መꬉዋስ፥ በሰ እሞና ግሾ ጎዳይ ኤንታ ላላና፤ ዛሪድ ኤንታ ኬፀና።
PSA 28:6 ታ ዎሳ ስእዳ ግሾ ጎዳይ ጋላተቶ።
PSA 28:7 ጎዳይ ታዉ ዎልቃነ ጎንዳለ፤ ታ ዎዛናይ እያን አማነቴስ፤ ታ እያን ማደታስ። ታ ዎዛናይ እያን ኡፋይቴስ፤ ታ እያ ማዝሙረን ሳባና።
PSA 28:8 ጎዳይ ባ አሳስ ዎልቃ፤ ባ ዶርድ ካዋ አሽያ ሚፃ።
PSA 28:9 ጎዳዉ፥ ነ አሳ አሻ፤ ነባ ግድዳይሳታ አንጃ። ኤንታ ሄመይ ነና ግዳ፤ ኤንታ መርናዉ ቶካ።
PSA 29:1 ዳዊታ ማዝሙረ ህንተኖ ሳሎ መተꬃቶ፥ ቦንቾይነ ዎልቃይ ጎዳሳ ጊተ።
PSA 29:2 ጎዳ ቦንቾ ሱንꬃ ጋላትተ፤ እያ ጌሻተꬃ ቴማ ግሾ ጎዳ ጎይንተ።
PSA 29:3 ጎዳ ጉንꬃይ ሃꬃታ ቦላ ስኤቴስ፤ ቦንቾ ፆሳይ ዳዳዳ ደቼስ፤ ጎዳይ ግታ ሃꬃታ ቦላ ጉሜስ።
PSA 29:4 ጎዳ ኮሽንቻይ ዎልቃማ፤ ጎዳ ግርሳይ ቴማራ ደኤስ።
PSA 29:5 ጎዳ ግርሳይ ዝጋ መንꬄስ፤ ልባኖሰን ደእያ ዝጋ መንꬄስ።
PSA 29:6 ልባኖሰ ደረታ ጋሎ ማራዳ ቡራቅሴስ፤ ስርዮና ደርያ መንꬃዳ ጉፍሴስ።
PSA 29:7 ጎዳ ግርሳይ ዎልአሜስ።
PSA 29:8 ጎዳ ግርሳይ መላ ብታ ቃꬄስ፤ ጎዳይ ቃደሳ መላ ብታ ኮኮርሴስ።
PSA 29:9 ጎዳ ግርሳይ ዎላ ቃꬄስ፤ ምꬃ ሀይꬃ ቆቆፌስ። እያ ኬꬃን ደእያ ኡባይ፥ “ቦንቾይ ጎዳስ ግዶ” ያጌስ።
PSA 29:10 ጎዳይ ድኦ ሃꬃ ቦላ ባ አራታ ዎꬅድ ኡትስ፤ ጎዳይ ባ አራታን ኡትድ መርናዉ ካዎትስ።
PSA 29:11 ጎዳይ ባ አሳስ ዎልቃ እሜስ። ጎዳይ ባ አሳ ሳሮተꬃን አንጄስ።
PSA 30:1 ኬ አንጅሶስ ዳዊቲ የፅዳ ማዝሙረ አቤት ጎዳዉ፥ ነ ታና ኦላፈ ከስዳ ግሾነ ታ ሞርከት ኡፋይቶና መላ ኦꬅዳ ግሾ፥ ታ ነና ꬎቁ ꬎቁ ኦꬃና።
PSA 30:2 አቤት ጎዳዉ፥ ታ ፆሳዉ ታና ማዳና መላ፥ ታ ነና ፄግን ነ ታና ፓꬃዳሳ።
PSA 30:3 አቤት ጎዳዉ፥ ዱፎ ገሎናዳ ታና ናጋዳሳ፤ ኦላን ዎꬎናዳ ታና ፓፃ አሻዳሳ።
PSA 30:4 ህንተኖ ፆሳ አሳዉ፥ ጎዳስ የፅተ፤ እያ ጌሻ ሱንꬃ ሳቢተ።
PSA 30:5 እያ ሀንቆይ ጉꬃ ዎደሳ፥ ሽን እያ ኬሀተꬃይ ደኦ ላይꬃ ኡባሳ። ቃማ ዬክሸ አቅኮ፥ ዎንታ ዛው ባይና ኡፋይስ ግዴስ።
PSA 30:6 ታ ናገታዳ ደኤይሳ ኤርዳ ዎደ “ህዛ ታ ቃፅከ” ያጋስ።
PSA 30:7 አቤት ጎዳዉ፥ ነ ታዉ ኬህዳ ዎደ፥ ዙማዳ ታና ምንꬃዳ ኤሳዳሳ። ሽን ነ ሶምኡዋ ሀራ ሶ ዛርዳ ዎደ፥ ታ ዳጋማስ።
PSA 30:8 አቤት ጎዳዉ፥ ታ ነና ፄጋስ፤ ነና ማሮታ ዎሳስ፤
PSA 30:9 “ታ ዱፎ ገልኮ ነና አይ ጎኢ? ቢታ ግዶ ገልዳ አስ ዋትድ ነና ጋላታናዉ ዳንዳኢ? ነ አማነተꬃ ዋትድ ማርካታኔ?
PSA 30:10 አቤት ጎዳዉ፥ ነ ታና ስአ፤ ታዉ ቃታ። አቤት ጎዳዉ፥ ነ ታዉ ማዶ ግዳ” ያጋስ።
PSA 30:11 ታ ዬሁዋ የꬃን ላማዳሳ፤ ካዮ ማኡዋ ታፐ ቃራዳ፥ ታና ኡፋይስ ማይዛዳሳ።
PSA 30:12 ሄሳ ግሾ፥ ታ ነና ሳባና፤ ስእ ጊከ። አቤት ጎዳዉ፥ ታ ፆሳዉ፥ ታ ነና መርናዉ ጋላታና።
PSA 31:1 ዛማረታ ሀላቃስ ፃፈትዳ ዳዊታ ማዝሙረ አቤት ጎዳዉ፥ ታ ኔኮ ባቃታይስ፤ አዉደካ ታና ዬላዮፓ፤ ነ ፅሎተꬃን ታና አሻ።
PSA 31:2 ነ ሀይꬃ ታኮ ዛራ፤ ኤለሳዳ ታና አሻ። ኔኒ ታዉ ጌምያ ዛላ፤ ታና አሽያ ምኖ ሚፃ ግዳ።
PSA 31:3 ኤ፥ ነ ታዉ ዛላነ ሚፃ፤ ነ ሱንꬃ ግሾ ታና ካለꬃ፤ ኦግያ በሳ።
PSA 31:4 ነ ታዉ ጌምያ በሰ ግድያ ግሾ፥ ኤንቲ ቆትድ ዎꬅዳ ፅሄፐ ታና ናጋ።
PSA 31:5 አቤት ጎዳዉ፥ ቱማ ፆሳዉ፥ ታ ሸምፑዋ ነ ኩሸን ዎꬃይስ፤ ነ ታና ዎዛ።
PSA 31:6 ፓꬆና ኤቃታ ጎይነይሳታ ታ እፃይስ፤ ግዶሽን ታኒ ጎዳን አማነታይስ።
PSA 31:7 ታ መቱዋነ ታ ኡንአ ነ በእዳ ግሾ ታኒ መርናዉ ነ ሲቁዋን ኡፋይታና።
PSA 31:8 ነ ታና ሞርከ ኩሸን አꬃዳ እማባካ፤ ታ ቶሆታ ዳልጋ በሳን ኤሳዳሳ።
PSA 31:9 አቤት ጎዳዉ፥ ታኒ መቶን ገልዳ ግሾ ታዉ ቃታ፤ ታ ዳሮ አዛንዳ ግሾ ታ አይፈይ ሙልጫትስ፤ ታ አሾይነ ታ ሸምፖይ ዳቡርስ።
PSA 31:10 ታ ደኦይ አዛኖን፥ ታ ላይꬃይ ኦለን ዉርስ፤ ዋየ ዳሮተꬃን ታ ዎልቃይ ዉርስ፤ ታ መቀꬃት አርጋጭዶሶና።
PSA 31:11 ታ ሞርከታ ኡባስ ቅስ አታስ፤ ታ ሾሮታስ ዬላ ግዳስ። ታ ላገታስ ዳጋንꬅያባ ግዳስ፤ ታና በኤይሳት ታፐ ሃክዶሶና።
PSA 31:12 ታ ሀይቅዳ አሳዳ ዶገታስ፤ መቃ ሚሸዳ ዎራ የገታስ።
PSA 31:13 ታኒ ዳሮታ ካልካሻ ስአስ፤ ኡባ በሳራ ዳጋም ደኤስ። ኤንቲ ታ ቦላ ቶቦሶና፤ ታና ዎꬋናዉ ማቀቶሶና።
PSA 31:14 ሽን ጎዳዉ፥ ታ ነናን አማነታና፤ ኔኒ ታ ፆሳ።
PSA 31:15 ታ ደኦ ላይꬃይ ነ ኩሽያና፤ ታና የደꬅያ ታ ሞርከታ ኩሸፐ አሻ።
PSA 31:16 ነ አይልያ ቦላ ነ ሶምኡዋ ፖእሳ፤ ነ ማሮተꬃን ታና አሻ።
PSA 31:17 አቤት ጎዳዉ፥ ታ ነና ፄግያ ግሾ፥ ታና ዬላዮፓ። ሽን ኢታት ዬላቶ፤ ዱፎን ገልድ ስእ ጎ።
PSA 31:18 ኦቶሮንነ ቦረን ፅሎታ ቦላ ምንድ ሃሳያ ግሾ፥ ኤንታ ዎርዶ እንፃርሳ ስእ ኦꬃ።
PSA 31:19 ነና ያየይሳታስ ነ ምንጅዳ፥ ኔኮ ባቃተይሳታስ ነ ጊግስዳ፥ ኬሀተꬃይ አይ መላ ዳሮ!
PSA 31:20 ኔኒ ኤንታ ነ ስንꬃን፥ ጌማ በሳን ገንꬃ ዎꬃዳሳ፤ አሳ ኢታ ማቁዋፈ አሻሳ፤ ኢታ እንፃርሳፈ ነ ዱንካንያን ቆሳዳሳ።
PSA 31:21 ሞርከይ ተቅዳ ካታማ ግዶን፥ ማላልስያ ባ ማሮተꬃ ታና በስዳ፥ ጎዳይ ጋላተቶ።
PSA 31:22 ታ ዳጋማዳ፥ “ነ ስንꬃፈ ሃካስ” ጋስ፤ ሽን ታ ማዶ ኮያዳ ኔኮ ዋስዳ ዎደ፥ ታ ዋሱዋ ነ ስአዳሳ።
PSA 31:23 ህንተኖ፥ ፆሳ አሳዉ፥ ጎዳ ዶስተ፤ ጎዳይ አማነተይሳታ ናጌስ፤ ሽን ኦቶራንቾታስ ኤንታ ጋትያ ቃንፄስ።
PSA 31:24 ህንተኖ፥ ጎዳን ኡፋይስ ኦይሳቶ፥ ምንተ፤ ገንጭተ።
PSA 32:1 ዳዊታ ትምርተ አኬካን ፃፈትዳ ግንፆ እያ ናጋራይ አቶ ጌተትዳይነ እያ ናጋራይ ካመትዳ ኡራይ አንጀትዳይሳ።
PSA 32:2 ጎዳይ እያ ኢታተꬃ ታይቦና አስ፥ እያ ቆፋን ጭሞይ ባይና አስ አንጀትዳይሳ።
PSA 32:3 ታኒ ታ ናጋራ ፓፆና አጋዳ፥ ኩመꬃ ጋላስ ኦልዳይስ፥ ታ አሳተꬃ ዳቡርስስ።
PSA 32:4 ጋላስነ ቃማ ነ ኩሸይ ታና ዴፅስ፤ ሃꬅ ꬋይን ቦነ አዋን መልድባዳ፥ ታ ዎልቃይ ዉርስ። ሳላሀ
PSA 32:5 ታኒ ታ ናጋራ ነዉ ፓፃስ፤ ታ ናቁዋ ኔፐ ገንꬃብከ። “ታ ናጋራ ጎዳስ ፓፃና” ያጋስ፤ ታና ዴፅዳ ናጋራ አቶ ጋዳሳ። ሳላሀ
PSA 32:6 ሄሳ ግሾ፥ ፅሎ አስ ኦንካ፥ ነ በንትያ ዎደ ነና ዎሶ፤ ኢታ ድኦይ ያ ዎደ ሄ ኡራ ጋከና።
PSA 32:7 ነ ታዉ ቆሰትያ በሲ፤ ነ ታና መቶፐ ናጋሳ። አቶተꬃ የꬅ የፅያ አሳ ታ ዩሹዋን ዎꬃዳሳ። ሳላሀ
PSA 32:8 ፆሳይ፥ “ታ ነና ታማርሳና፤ ነ ባና ኦግያ በሳና፤ ታ ነና ዞራናነ ናጋና” ያጌስ።
PSA 32:9 ብፃላንነ ፑሎን ኦይከቶና፤ ኪተቶና ዎዛን ባይና ባቁሎዳ ዎይኮ ፓራዳ ሀኖፕተ።
PSA 32:10 ኢታታስ ዋየይ ዳራና፤ ሽን ጎዳን አማነተይሳታ ሲቆይ ካማና።
PSA 32:11 ህንተኖ፥ ፅሎቶ፥ ጎዳን ኡፋይትተነ ሀሹ ጊተ፤ ህንተኖ፥ ዎዛና ሱረቶ፥ እልልተ።
PSA 33:1 ህንተኖ፥ ፅሎቶ ጎዳስ ኡፋይሳን እልልተ፤ ሱረ አሳት እያ ጋላታናዉ በሴስ።
PSA 33:2 ማስንቆን ጎዳ ጋላትተ፤ ታሙ ሻያን ዋፀትዳ ዲꬃን የፅተ።
PSA 33:3 ኦራꬃ የꬅ እያዉ የፅተ፤ ዲꬅ ሎይꬅድ ዲፅሸ እልልተ።
PSA 33:4 ጎዳ ቃላይ ቱማ፤ እያ ኦሶ ኡባይ አማነተይሳ።
PSA 33:5 ጎዳይ ፅሎተꬅነ ቱማ ፕርዳ ዶሴስ፤ እያ ማሮታይ ሳኣ ኩምስ።
PSA 33:6 ጎዳ ቃላን ሳሎት መትዶሶና፤ እያ ዶናፐ ከይያ ሸምፑዋን ሳሎን ደእያ መተꬃት የለትዶሶና።
PSA 33:7 አባ ሃꬃ እስ በሳን ኤልስስ፤ ጪሞ ሃꬃ ምንጃ ኬꬃን ዎꬅስ።
PSA 33:8 ሳአ ኡባይ ጎዳ ያዮ፤ አሳ ኡባይ ጎዳ ቦንቾ።
PSA 33:9 እያ ኦዳን ኡባይ ሀንስ፤ እ ኪትን ምንድ ኤቅስ።
PSA 33:10 ጎዳይ ካዎተꬃታ ሀልቹዋ ሀዳ ኦꬄስ፤ ኤንታ ቆፋ ላሌስ።
PSA 33:11 ጎዳ ሀልቾይ መርናዉ ኤቅድ ደኤስ፤ እያ ዎዛና ቆፋይ የለተꬃ ኡባሳ።
PSA 33:12 ፆሳይ ኤንታዉ ጎዳ ግድዳ ካዎተꬃይ፥ እ ባባ ኦꬅድ ዶርዳ አሳይ አንጀትዳይሳታ።
PSA 33:13 ጎዳይ ሳሎን ኡትድ ፄሌስ፤ አሳ ኮቸ ኡባ በኤስ።
PSA 33:14 ጎዳይ ባ አራታን ኡትድ፥ ሳአን ደእያ ኡባ በኤስ።
PSA 33:15 ኤንታ ዎዛና መꬍዳይ እያ፤ ኤንቲ ኦꬅያባ ኡባ እ ኤሬስ።
PSA 33:16 ካዎይ ባ ዎታዳረ ዳሮተꬃን አተና፤ ኦላንቾይ ባ ዎልቃ ምኖተꬃን ከስ ኤከና።
PSA 33:17 ፓራን ፆናና ግድ ናጎይ ሀዳ፤ እ ባ ምኖተꬃን አሻናዉ ዳንዳኤና።
PSA 33:18 ጎዳ አይፈት እያዉ ያያነ እያ ማሮታን ኡፋይስ ኦꬅያ አሳ በኦሶና።
PSA 33:19 ሄስካ ኤንታ ሀይቆፐ አሻናሳነ ኮሻ ዎደ ኤንታ ናጋናሳ።
PSA 33:20 ኑኒ ጎዳ ኡፋይሳን ናጎስ፤ ኑና ማደይነ ኑ ጎንዳለይ እያ።
PSA 33:21 እያ ጌሻ ሱንꬃን ኑኒ አማነትያ ግሾ፥ ኑ ዎዛናይ እያን ኡፋይቴስ።
PSA 33:22 ጎዳዉ፥ ኑኒ ነናን ኡፋይስ ኦꬅዳይሳዳ፥ ነ ማሮታይ ኑ ቦላ ግዶ።
PSA 34:1 ዳዊቲ ጎሹ ዳንድ ሺቅዳ ግሾ፥ አብመለከ ስንꬃፈ ጎደትድ ከይዳ ዎደ የፅዳ ማዝሙረ ታኒ ኡባ ዎደ ጎዳ ጋላታና፤ እያ ጋላታይ ታ ዶናፐ ፓጨና።
PSA 34:2 ታኒ ጎዳን ጬቀታይስ፤ አዳት ሄሳ ስእድ ኡፋይቶ።
PSA 34:3 ታራ ጎዳ ቦንችተ፤ እያ ሱንꬃ እስፈ ꬎቁ ꬎቁ ኦꬆስ።
PSA 34:4 ታኒ ጎዳ ኮይን፥ እ ታዉ ዛርስ፤ ታ ያይያባ ኡባፈ ታና አሽስ።
PSA 34:5 እያኮ ፄልያ ኡባይ ፖኦሶና፤ ኤንታ ሶምኦይ ዬላተና።
PSA 34:6 ሀ ማንቆይ ዋስስ፤ ጎዳይ እያ ዋሱዋ ስእስ፤ እያ መቶ ኡባፈ እያ አሽስ።
PSA 34:7 ጎዳ ኪታንቾይ እያዉ ያየይሳታ ናጌስ፤ ኤንታ ዩሾን ግድድ ኤንታ አሼስ።
PSA 34:8 ጎዳይ ኬሀ ግደይሳ ላጭድ በእተ፤ እያኮ ባቃትያ አስ አንጀትዳይሳ።
PSA 34:9 ህንተኖ፥ ጌሻ አሳዉ፥ ጎዳስ ያይተ፤ እያዉ ያየይሳታስ አይኮይካ ፓጨና።
PSA 34:10 ጋሞት ምያባ ꬋይድ ኮሻቶሶና፤ ሽን ጎዳ ኮየይሳታስ ሎኦባይ ፓጨና።
PSA 34:11 ናይቶ፥ ሃ ዪተ፤ ስእተ፤ ታ ህንተና ጎዳ ያሽ ታማርሳና።
PSA 34:12 ሎኦ ደኦ ዳናዉነ ኬሀባ በአናዉ አዱሳ ላይꬅ ዳናዉ፥ አሞተይ ኦኔ?
PSA 34:13 ነ እንፃርሳይ ኢታባ ኦደቶናዳ፥ ነ ዶናይ ጭሞናዳ ተቃ።
PSA 34:14 ኢታፐ ሃካ፤ ሎኦባ ኦꬃ፤ ሳሮተꬅ ኮያ፤ ካላ።
PSA 34:15 ጎዳ አይፈይ ፅሎታ ፄሌስ፤ እያ ሀይꬃይ ኤንታ ዋሱዋ ስኤስ።
PSA 34:16 ኤንታ ቆፍስያባ ቢታፈ ꬋይሳናዉ፥ ጎዳይ ኢታ ኦይሳታ ባ ሀንቆ አይፈን ፄሌስ።
PSA 34:17 ፅሎት ዋሶሶና፤ ጎዳይ ኤንታ ዋሱዋ ስኤስ፤ እ ኤንታ መቶ ኡባፈ አሼስ።
PSA 34:18 ዎዛን መቅዳይሳታስ ጎዳይ ማታና፤ እ ኡፋይስ ቃንፅዳይሳታ አሼስ።
PSA 34:19 ፅሎ አሳስ መቶይ ዳሮ፤ ሽን ጎዳይ እያ ሄ ኡባፈ አሼስ።
PSA 34:20 ጎዳይ እያ መቀꬃታ ናግያ ግሾ፥ ኤንታፈ እሶይካ መቀና።
PSA 34:21 ኢታታ ኤንታ ኢታተꬃይ ዎꬋና፤ ፅሎታ እፀይሳት ፕርደታና።
PSA 34:22 ጎዳይ ባ አይለታ ዎዜስ፤ እያኮ ባቃትያ ኦንካ ፕርደተና።
PSA 35:1 ዳዊታ ማዝሙረ ጎዳዉ፥ ታራ ባፀተይሳታራ ነ ባፀታ፤ ታና ኦለይሳታ ነ ኦላ።
PSA 35:2 ጎንዳለነ ቶራ ኦይካዳ፥ ታና ማዳናዉ ደንዳ።
PSA 35:3 ታና ጎደይሳታ ቦላ ነ ቶራነ ማሻ ደንꬃ፤ ታኮ “ታ ነና አሸይሳ” ያጋ።
PSA 35:4 ታ ሸምፑዋ ዎꬋናዉ ኮየይሳት፥ ዬላቶ፤ ካዉዮ። ታ ቦላ ኢታባ ማቀተይሳት፥ ካዉይድ ጉየ ስሞ።
PSA 35:5 ጎዳ ኪታንቾይ ኤንታ የደꬅያ ዎደ፥ ኤንቲ ጫርኮን ላለትያ ሱላዳ ሀኖ።
PSA 35:6 ጎዳ ኪታንቾይ ኤንታ ጎድያ ዎደ፥ ኤንታ ኦገይ ꬉማነ ሀልꬅ ግዶ።
PSA 35:7 ጋሶይ ባይና ታና ኦይካናዉ ፅሄ ዎꬆሶና፤ ታና ኩንድሳናዉ ኦላ ቦኮሶና።
PSA 35:8 ኤሮና ደእሽን ኤንታ ቦላ ꬋዮይ ዮ፤ ኤንቲ ዎꬅዳ ፅሄይ ኤንታ ኦይኮ፤ ኤንቲ ቦክዳ ኦላን ኩንድድ ꬋዮ።
PSA 35:9 ሄ ዎደ ታኒ ጎዳን ኡፋይታና፤ እ አሽዳ ግሾ ሀሹ ጋና።
PSA 35:10 ታ ኩመꬃ አሳተꬃይ ነና፥ “ጎዳዉ፥ ነ መል ኦኔ? ማንቁዋ ዎልቃማ ኩሽያፐ ከሳ ኤካሳ፤ መቶታንቹዋነ ኡንኤትዳይሳ፥ ቦንቀይሳታ ኩሸፐ አሻሳ” ያጋና።
PSA 35:11 ዎርዶ ማርካተይሳት ታ ቦላ ደንዶሶና፤ ታ ኤሮናባን ታና ሞቶሶና።
PSA 35:12 ታ ሎኦ ኦꬅዳ ግሾ ኢታ ዛርዶሶና፤ ታና ብዛ ኦꬅዶሶና።
PSA 35:13 ሽን ኤንቲ ሀርግዳ ዎደ ታኒ ካዮ ማኦ ማአስ፤ ታ አሳተꬃ ፆማን ዳቡርሳስ፤ ታ ዎሳይ ዛሮ ደሞና አትስ።
PSA 35:14 ታና ካዉሻዳ ዳቦስ ዎይኮ እሻስ ዬከይሳዳ ዬካስ። እስ አስ ባ አየስ ካዮተይሳዳ ታ ሁጵያ ኦይካዳ ዬካስ።
PSA 35:15 ሽን ታኒ ꬉበትዳ ዎደ ኡፋይትድ ሺቅዶሶና፤ ጋሶይ ባይና ታና ዋꬍድ፥ አጎና እፅዶሶና።
PSA 35:16 ኢታ አሳት ኦይሳዳ ኤንቲ ታና ቀልቅስዶሶና፤ ይሎትድ ባንታ አቻ ጋርጭዶሶና።
PSA 35:17 ጎዳዉ፥ ኔኒ አዉደ ጋካናዉ፥ ስእ ጋዳ ፄላይ? ኤንታ ኢታ ኦሱዋፐ ታና አሻ፤ ታ አልኦ ሸምፑዋ ሀ ጋሞታፐ ዎስሳ ኤካ።
PSA 35:18 ሄ ዎደ ግታ ሺቆን ታ ነና ጋላታና፤ ዳሮ አሳይ ደእያ በሳን ነና ቦንቻና።
PSA 35:19 ጋሶይ ባይና ታና ሞርከይሳት ኡፋይቶፎ፤ ታና ጮ እፀይሳት ታ ቦላ ቃምኦቶፖ።
PSA 35:20 ኤንቲ ሳሮባ ሃሳዮኮና፤ ስእ ግድ ደእያ አሳ ቦላ ኦዳ ፃፆሶና።
PSA 35:21 ኤንቲ ባንታ ዶና ታ ቦላ ዶይድ፥ “ሀይሳ በአ፥ ነ ኦꬅዳይሳ ኑኒ ኑ አይፈን በእዳ” ያጎሶና።
PSA 35:22 ጎዳዉ፥ ኔኒ ሄሳ በአዳሳ፤ ስእ ጎፓ። ጎዳዉ፥ ታፐ ሃኮፋ።
PSA 35:23 ታ ፆሳዉ፥ ታ ጎዳዉ ታ ግሾ፥ ደንዳ፤ ባርካ፤ ታ ዶና ግዳዳ ሞተታ።
PSA 35:24 ታ ጎዳዉ፥ ታ ፆሳዉ፥ ፅሎተꬃን ታዉ ፕርዳ፤ ታ ሞርከታ ኡፋይሶፋ።
PSA 35:25 ኤንቲ ባንታ ዎዛናን፥ “ሀሹ፥ ኑ አሞይ ፖለትስ፤ ኑኒ እያ ምትዳ” ጋና መላ ኦꬆፋ።
PSA 35:26 ታ ዋያን ኡፋይተይሳት፥ ዬላቶ፥ ካዉዮ፤ ታ ቦላ ጬቀተይሳት ዬላነ ካዉሸ ማኦ።
PSA 35:27 ታ ፆኑዋ ዶሰይሳት ኡፋይቶ፤ እልሎ፤ ሀሹ ያጎ። “ኡባ ዎደ ባ አይልያ ሳሮተꬃን፥ ኡፋይትያ ጎዳይ ꬎቁ ꬎቁ ጎ” ያጎ።
PSA 35:28 ታ እንፃርሳይ ነ ፅሎተꬃነ ነ ጋላታ፥ ጋላሳ ኩመꬃን ኦዴስ።
PSA 36:1 ጎዳ አይለይ፥ ዳዊቲ ዛማረታ ሀላቃስ ፃፍዳ ማዝሙረ ኢታ አስ ባ ዎዛናን ኢታባ ቆፔስ፤ እ ባ ዎዛናን ፆሳስ ያየና።
PSA 36:2 እ ባና ዳሮ ናሽያ ግሾ፤ ባ ናጋራ በአናዉ ዎይኮ እፃናዉ ዳንዳኤና።
PSA 36:3 እያ ዶናን ገነይነ ዎርዶይ ኩምስ፤ ጭንጫተꬅነ ሎኦባ ኦሶ አግስ።
PSA 36:4 ባ ሂፃን ዝንእድ ገነ ቆፔስ፤ ባና ሎኦ ግዶና ኦገን ካለꬄስ፤ ኢታባ እፀና።
PSA 36:5 ጎዳዉ፥ ነ ሲቆይ ሳሎታ ጋኬስ፤ ነ ቱማተꬃይ ሻራፐ አꬌስ።
PSA 36:6 ነ ፅሎተꬃይ ꬎቃ ደረታፐ አꬌስ፤ ነ ፕርዳይ አባ ጪሙዋፈ ዝቃ፤ ጎዳዉ፥ ኔኒ አሰነ ዶአ ናጋሳ።
PSA 36:7 ፆሳዉ፥ ነ ሲቆይ አይ መላ አልኦ! አሳይ ነ ቀፍያ ጋርሳን ቆሰትድ አቴስ።
PSA 36:8 ኤንቲ ነ ግብራፐ ምድ ካሎሶና፤ ነ ኬሀተꬃ ሻፋፐ ኡይድ አሎሶና።
PSA 36:9 ደኦ ፑልቶይ ኔፐ ከዬስ፤ ነ ፖኡዋን ኑኒ ፖኦ በኦስ።
PSA 36:10 ነና ኤረይሳታስ ነ ሲቆይ፥ ዎዛና ሱረታስ ነ ፅሎተꬃይ ቃንፀተና።
PSA 36:11 ኦቶራንቾታ ቶሆይ ታና የꬎፎ፤ ናጋራንቾታ ኩሸይ ታና የደꬆፎ።
PSA 36:12 ኢታ አሳታ ኩንደꬃ በእተ፤ ኤንቲ ኩንድዶሶና፤ ደንዳናዉ ዳንዳኦኮና።
PSA 37:1 ዳዊታ ማዝሙረ ኢታ ኦይሳታ ጋሶን ይሎቶፓ፤ ናጋራ ኦይሳታ ቃናቶፓ።
PSA 37:2 ኤንቲ ማታዳ ኤሶን መላና፤ ቦንጮዳ ሹልድ ቆቆፈታና።
PSA 37:3 ጎዳን አማነታ፤ ሎኦባ ኦꬃ፤ ቢታ ቦላ ኡታ፤ ፓላህን ደአ።
PSA 37:4 ጎዳን ኡፋይታ፤ እ ነ ዎዛና አሙዋ እማና።
PSA 37:5 ነ ኦግያ ሀዳራ ጎዳስ እማ፤ እያን አማነታ፤ እ ነዉ ኦꬃና።
PSA 37:6 እ ነ ፅሎተꬃ ዎንታ ፃልቀዳ፥ ነ ፕርዳ ሴታ ጋላሳ አዋዳ ፖእሳና።
PSA 37:7 ጎዳ ስንꬃን ስእ ጋዳ ደአ፤ ዳንዳአን ናጋ፤ ኢታ አሳታ ሀልቾይ ፖለትን በአዳ ይሎቶፓ።
PSA 37:8 ሀንቆ አጋ፤ ይሎ ተቃ፤ ሄስ መቶን የጌስ።
PSA 37:9 ኢታ ኦይሳት ꬎቆለትድ ꬋያና፤ ሽን ጎዳን ኡፋይስ ዎይሳት ቢታ ላታና።
PSA 37:10 ኢታ ኦይሳት ጉꬃ ዎደፐ ጉየ ደኦኮና፤ ነ ኤንታ ኮያዳ ደማካ።
PSA 37:11 ሽን አዳት ቢታ ላታና፤ ሳሮተꬃን ኡፋይትድ ዳና።
PSA 37:12 ኢታ አስ ሎኦ አስ ꬋይሳናዉ ማቀቴስ፤ ባ አቻ ኤንታ ቦላ ጋርጬስ።
PSA 37:13 ሽን ጎዳይ ኢታታ ቦላ ሚጬስ፤ ኤንታዉ ꬋዮ ጋላስ የይሳ ኤሬስ።
PSA 37:14 ኢታ አሳት ማንቆታነ መቶታንቾታ ዎꬋናዉ፥ ሱረ ሄመተይሳታ ሹካናዉ፥ ባንታ ማሻ ሾዶሶና፤ ባንታ ዶንግያ ዋፆሶና።
PSA 37:15 ሽን ኤንታ ማሻይ ኤንታ ዎዛናን ገላና፤ ኤንታ ዶንገይ መቃና።
PSA 37:16 ፅሎ አሳስ ደእያ ጉꬃባይ፥ ኢታ አሳስ ደእያ ዳሮባፐ ሎኦ።
PSA 37:17 አይስ ጊኮ፥ ኢታታ ዎልቃይ መቃና፤ ሽን ጎዳይ ፅሎታ ዘምፕሴስ።
PSA 37:18 ሱረ አሳታ ኦግያ ጎዳይ ኤሬስ፤ ኤንታ ላታይ መርናዉ ኤንታባ ግዳና።
PSA 37:19 ኢታ ዎደ ሱረ አሳት ዬላቶኮና፤ ኮሻ ዎደ ኤንቲ ካልድ ማና።
PSA 37:20 ሽን ኢታ አሳት ሀይቃና፤ ጎዳ ሞርከት ጪሻዳ ቆቆፈታና፤ ጩያዳ አይፈፐ ጌማና።
PSA 37:21 ኢታ አስ ታልእድ ዛረና፤ ሽን ፅሎ አስ ኬሀተꬃን እሜስ።
PSA 37:22 ጎዳን አንጀትዳይሳት ቢታ ላታና፤ ሽን እ ባድዳይሳት ꬋያና።
PSA 37:23 አሳ ኦገይ ጎዳ ኡፋይስኮ፥ ጎዳይ እያ ታንጉዋ ካለꬄስ፤ ምንꬄስ።
PSA 37:24 እ ꬉበትኮካ ኩንደና፤ ጎዳይ እያ ኩሽያ ኦይክድ ካትሴስ።
PSA 37:25 ታኒ ፓማስ፤ ሀእ ጭማስ፤ ሽን ፅሎ አስ የገትን፥ እያ ናይት ካꬅ ዎስሽን በአብከ።
PSA 37:26 እ ኡባ ዎደ ኬሀተꬃን እሜስ፤ ጮ ታልኤስ፤ እያ ናይት ሀራታስ አንጆ ግዳና።
PSA 37:27 ኢታፐ ሃካ፤ ሎኦ ኦꬃ፤ ነ አዱሳ ላይꬅ ዳና።
PSA 37:28 ጎዳይ ፅሎ ፕርዳ ዶሴስ፤ አማነተይሳታ እ የገና። ኤንቲ መርናዉ ናገቶሶና፤ ሽን ኢታታ ኮቻይ ꬋያና።
PSA 37:29 ፅሎት ቢታ ላታና፤ ያን መርናዉ ዳና።
PSA 37:30 ፅሎ አሳ ዶናፐ ጭንጫተꬅ ከዬስ፤ እያ እንፃርሳይ ፅሎ ኦደቴስ።
PSA 37:31 ፆሳ ህገይ እያ ዎዛናን ደኤስ፤ እያ ቶሆይ ꬉበተና።
PSA 37:32 ኢታ አስ ፅሎ አስ ጌዴስ፤ እያ ዎꬋናዉ ኮዬስ።
PSA 37:33 ሽን ጎዳይ እያ ኩሸን አꬅድ እመና፤ ፕርደታናዉ ኤቅያ ዎደ እያ ቦላ ፕርድሰና።
PSA 37:34 ጎዳን ኡፋይስ ኦꬃ፥ እያ ኪታ ናጋ፤ ነና ቢታ ላትስድ ግታያና፤ ኢታ አሳት ꬋይሽን ነ በአና።
PSA 37:35 ናጋራንቾይ ልባኖሰ ዝጋዳ፥ ድጭድ ꬎቁ ꬎቁ ግን ታ በአስ።
PSA 37:36 ሽን ታ ስማዳ ያን ደማብከ፤ ኮይንካ በንትቤና።
PSA 37:37 ቦረይ ባይና አስ በአ፤ ሱረ አስ አኬካ፤ ሳሮ አሳስ ዉርሰꬃይ ሎኦ ግዳና።
PSA 37:38 ሽን ናጋራንቾት ꬋያና፤ ኤንታ ዉርሰꬃይ ꬎኦማና።
PSA 37:39 ፅሎታ አቶተꬃይ ጎዳፐ ዬስ፤ እ መቶ ዎደ ኤንቲ ናገትድ አትያ በሰ።
PSA 37:40 ጎዳይ ፅሎታ ማዴስ፤ አሼስ፤ ኤንቲ እያኮ ባቃትዳ ግሾ፥ እ ኤንታ ኢታታፐ አሼስ፤ ናጌስ።
PSA 38:1 ዳዊቲ ፃፍዳ ቆፍሶ ማዝሙረ አቤት ጎዳዉ፥ ነ ሸንያን ታና ሴሮፓ፤ ነ ይሉዋን ታና ሀንቆፋ።
PSA 38:2 ነ ዶንገ ቶራይ ታና ጫድስ፤ ነ ኩሸይ ታና ዴፅስ።
PSA 38:3 ነ ሀንቅዳ ግሾ ታ አሳተꬃይ ቆሄትስ፤ ታ ናጋራ ጋሶን ታ መቀꬃይ ሊቅስ።
PSA 38:4 ታ ባላይ ታና ሙክስ፤ ደንዶና ግታ ቶሆዳ ታና ዴፄስ።
PSA 38:5 ታ ኤያተꬃን ኦꬅዳ ናጋራ ግሾ፥ ታ ማዱንꬃይ ፅንቅስ።
PSA 38:6 ታ ሳአ ፄላስ፤ ሆካስ፤ ጋላስ ኩመꬅ አዛናሸ ፔአስ።
PSA 38:7 ታ አሾይ ፁጌስ፤ ታ አሳተꬃይ ፓፃ ግደና።
PSA 38:8 ታ ዳቡራስ፤ ሊቃስ፤ ታ ዎዛናይ ድርግያ ግሾ ኦላስ።
PSA 38:9 አቤት ጎዳዉ፥ ታ ዎዛና አሞ ኡባ ኤራሳ፤ ታ ኦለይ ኔፐ ጌምቤና።
PSA 38:10 ታ ዎዛናይ ድርጌስ፤ ታ ዎልቃይ ህት ግስ፤ ታ አይፍያ ፖኦይ ꬋይስ።
PSA 38:11 ታ ማዱንꬃ ጋሶን ታ ሾሮትነ ታ ላገት ሃክድ ኤቅዶሶና፤ ታ ዳቦት ታፐ ሃክዶሶና።
PSA 38:12 ታና ዎꬋናዉ ኮየይሳት ባንታ ፅህያ ታዉ የጎሶና። ታና ቆሀናዉ ኮየይሳት፥ “ኑ ነና ደማና” ያግድ ማንዶሶና ጋላስ ኩመꬅ ታ ቦላ ቶቦሶና።
PSA 38:13 ታ ቱለ አሳ መላ ስእከ፤ ሙመ አሳ መላ ዶና ፖግከ።
PSA 38:14 ቱማ ሀይꬅ ስኦና አስ፥ እንፃርስ ኦድድ ዛሮና አስ ግዳስ።
PSA 38:15 ጎዳዉ፥ ታ ነና ኡፋይሳን ናጋይስ፤ ታ ጎዳዉ፥ ፆሳዉ ነ ታዉ ዛሮ እማ።
PSA 38:16 ታኒ፥ “ታ ቶሆይ ꬉበትን፥ ኤንቲ ሀሹ ጋናዳነ ታ ቦላ ጬቀታናዳ ኦꬆፋ” ያጋስ።
PSA 38:17 ታ ኩንዳና ሀናይስ፥ ታ ሳኮይ ታና አጎና እፅስ።
PSA 38:18 ታ ናጋራ ፓፃይስ፤ ታ ናቁዋ ጋሶን አዛናይስ።
PSA 38:19 ታ ሞርከት ግታነ ዎልቃማ፤ ታና ጮ እፀይሳት ዳሮ።
PSA 38:20 ታኒ ሎኦባ ኦꬅን ኢታ ዛረይሳት፥ ታ ሎኦባ ካልያ ግሾ ታራ ኤቀቶሶና።
PSA 38:21 ጎዳዉ፥ ታና የጎፋ፤ ታ ፆሳዉ፥ ታፐ ሃኮፋ።
PSA 38:22 ታና አሽያ ታ ጎዳዉ፥ ታና ማዳናዉ ኤለሳ።
PSA 39:1 ዳዊቲ ዛማረታ ሀላቃ፥ ኤዶታመስ ፃፍዳ ማዝሙረ ታኒ፥ “ታ እንፃርሳን ናጋራ ኦꬆና መላ፥ ታ ኦግያ ናጋና። ኢታ አሳት ታ ደእያ ዎደ፥ ታ ዶና ባራና” ያጋስ።
PSA 39:2 ሽን ዶና ሙመዳ ስእ ጋስ፤ ሀር አቶሽን ሎኦባ ኦደተይሳ አጋስ፤ ሽን ታ ዋየይ ሃ ዳርስ።
PSA 39:3 ታ ዎዛናይ ታ ጋꬃን ቴልስ፤ ታ ቆፋይ ታማዳ ኤፅስ፤ ያትን ታ እንፃርሳን ሃሳያ ዶማስ።
PSA 39:4 ጎዳዉ፥ ታ ደኡዋ ዉርሰꬃነ ታ ዳናዉ አትዳ ጋላሳ ታና በሳ፤ ታ ደኦይ አይ መላ ቃንኮ ታና ኤርሳ።
PSA 39:5 ኔኒ ታ ላይꬃ ታካꬋዳ ዎꬃዳሳ፤ ታ ላይꬃይ ነ ስንꬃን ባይናባ መላ፤ ቱማ አስ ኡባይ እስ ሸምፖ መላ። ሳላሀ
PSA 39:6 ቱማ አስ አꬍያ ኤሾ መላ፤ እ ጮ ዳቡሬስ፤ ሻሎ ሺሼስ፤ ሽን ኦን ጎኤታነኮ ኤረና።
PSA 39:7 ጎዳዉ፥ ሀእ ታ ናገይ ኦኔ? ታኒ ነናን ኡፋይስ ኦꬃይስ።
PSA 39:8 ታ ባላ ኡባፈ ታና አሻ፤ ኤያታን ታና ቶሽሶፓ።
PSA 39:9 ሄሳ ኡባ ኦꬅዳይ ነና ግድያ ግሾ ታኒ ሙማስ፤ ዶናካ ፖጋብከ።
PSA 39:10 ነ ፃምአ ታ ቦላፈ ደንꬃ፤ ምኖ ነ ኩሽያ ጋሶን ታ ዳቡራስ።
PSA 39:11 አሰ እያ ናጋራ ግሾ ሴራሳ፤ እያ አልኦ ደኡዋ ብላዳ ዉርሳሳ፤ ቱማ አስ ኡባይ እስ ሸምፖ መላ። ሳላሀ
PSA 39:12 ጎዳዉ፥ ታ ዎሳ ስአ፤ ታና ማዳናዉ ታ ዋሱዋ ሀይዛ። ታ አፉꬃ በአዳ ስእ ጎፓ፤ ታኒ ታ አዋታዳ በተ አስነ እማ ግዳዳ ኔራ ደአይስ።
PSA 39:13 ታ ሻከታናፐነ ባናፐ ስን ታኒ ኡፋይታና መላ ታና አጋ።
PSA 40:1 ዛማረታ ሀላቃስ ዳዊቲ ፃፍዳ ማዝሙረ ታኒ ጎዳ ዳንዳአን ናጋስ፤ እ ታኮ ስሚድ ታ ዋሱዋ ስእስ።
PSA 40:2 ꬋዮ ኦላፈ፥ ስልሞ ኡርቃፈ ታና ከስስ፤ ታ ቶሁዋ ዛላ ቦላ ኤስስ፤ ታ ሄመꬃ ምንꬅስ።
PSA 40:3 ታ ዶናን ኦራꬃ የꬅ ዎꬅስ፤ ሄስካ ኑ ፆሳይ ጋላተቶ ያገይሳ፤ ዳሮት በእድ ያያና፤ ጎዳን አማነታና።
PSA 40:4 ጎዳን አማነትያ፥ ኦቶራንቾታ ፄሎናይ፥ ዎርዶታራ ሄመቶናይ፥ አንጀትዳ አስ።
PSA 40:5 ጎዳዉ፥ ታ ፆሳዉ፥ ኔኒ ዳሮ ማላልስያባ ኦꬃዳሳ፤ ኔራ ልከተይ ኦንካ ባዋ! ኔኒ ኑስ ቆፕዳ ሎኦ ቆፋ፥ ኦንካ ታይባናዉ ዳንዳኦና፤ ሄስ ታኒ ኦድን ዉርያባ ግደና።
PSA 40:6 ኔኒ ያርሾነ እሞ ኮያባካ፤ ሽን ነና ስአና መላ ታ ሀይꬃ ዶያዳሳ፤ ፁሳ ያርሾነ ናጋራ ያርሾ ኮያባካ።
PSA 40:7 ሄሳ ግሾ ታኒ፥ “ፃꬃ ማፃፋን ታባይ ፃፈትዳይሳዳ ታኒ ያስ።
PSA 40:8 ታ ፆሳዉ፥ ታኒ ነ ሸንያ ኦꬃናዉ ዶሳይስ፤ ነ ህገይ ታ ዎዛናን ደኤስ” ያጋስ።
PSA 40:9 ግታ ሺቆን፥ ነ ፅሎተꬃ ኦዳና፤ ጎዳዉ ኔኒ ኤረይሳዳ፥ ታኒ ማርካተይሳ አግከ።
PSA 40:10 ታ ነ ፅሎተꬃ ታ ዎዛናን ቆሳብከ፤ ነ አማነተꬃነ ነ አሹዋ ኦዳስ። ነ ሲቁዋነ ነ ቱማተꬃ፥ ግታ ሺቁዋን ገንꬃብከ።
PSA 40:11 ጎዳዉ፥ ነ ማሮተꬃ ታፐ ሃሶፋ፤ ነ ሲቆይነ ነ ቱማተꬃይ፥ ታና ኡባ ዎደ ናጎ።
PSA 40:12 ታይቦይ ባይና ኢታባይ ታና ተቅስ፤ ታ ባላይ ታና ጎዝስ፤ ታ ፄላናዉ ዳንዳእከ ታ ናጋራይ ታ ሁጰ ብናናፐ ዳርስ፤ ታ ዎዛናይ ታ ግዶን ትልእስ።
PSA 40:13 ጎዳዉ፥ ታና አሻናዉ ኤሮ ጋ፤ ታ ጎዳዉ፥ ታና ማዳናዉ ኤለሳ።
PSA 40:14 ታና ዎꬋናዉ ኮየይሳት ዬላቶ፥ ካዉዮ፤ ታ ቆሄተꬃ አሞተይሳት ካዉይድ ጉየ ስሞ።
PSA 40:15 ታኮ፥ “እያዉ ሀሹ፥ ሀሹ” ገይሳት ፆነትድ ዬላቶ።
PSA 40:16 ሽን ነና ኮይያ ኡባይ፥ ነናን ኡፋይቶ፤ ሀሹ ጎ። ነ አቶተꬃ ዶስያ ኡባይ፥ “ጎዳይ ግታ” ያጎ።
PSA 40:17 ታኒ ማንቆነ መቶታንቾ፤ ሽን ጎዳይ ታባ ቆፖ! ታና ማደይ አሸይ ነና፤ ታ ፆሳዉ፥ ጋምኦፋ።
PSA 41:1 ዛማረታ ሀላቃስ ፃፈትዳ ዳዊታ ማዝሙረ ማንቁዋስ ቆፕያ አስ አንጀትዳይሳ፤ መቶ ጋላስ ጎዳይ እያ አሼስ።
PSA 41:2 ጎዳይ እያ ናጌስ፥ ደኦን ዎꬄስ፤ ቢታ ቦላ ጎዳይ እያ አንጄስ፤ ጎዳይ እያ፥ እያ ሞርከታ አሙዋስ አꬅድ እመና።
PSA 41:3 እ ሳከትድ ሂꬃን ደእሽን ጎዳይ ማዴስ፤ ሀርግያፈ እያ ፓꬄስ።
PSA 41:4 ታኒ፥ “ጎዳዉ፥ ታ ነና ናቅዳ ግሾ፥ ታና ማራ፤ ታ ሀርግያፈ ታና ፓꬃ” ያጋስ።
PSA 41:5 ታ ሞርከት ኢታባ ታ ቦላ ሃሳይድ፥ “እ አዉደ ሀይቃንዴ? እያ ሱንꬃይ አዉደ ዶገታንዴ?” ያጎሶና።
PSA 41:6 ታና በአናዉ ያ ኦንካ ዎርዶ ኦዴስ፤ ባ ዎዛናን ታና ዝግርያባ ሺሼስ፤ ካረ ከይድ ታ ሱንꬃ ኢሴስ።
PSA 41:7 ታና እፅያ ኡባይ እስፈ ታና ዝግሮሶና፤ ኢታባይ እያ ጋኬስ ግድ ቆፖሶና።
PSA 41:8 “እያ ኢታ ሀርገይ ኦይክስ፤ እ ህዛ ሂፃፐ ደንደና” ያጎሶና።
PSA 41:9 ሀር አቶሽን ታ አማነትያ ላገይ፥ ታራ ምዳይስ ታዉ ዞኮ ዛርስ።
PSA 41:10 ሽን ጎዳዉ ታና ማራ፤ ታ ኤንታዉ ኩሸ ዛራና መላ፥ ሀርገ ሂፃፐ ታና ደንꬃ።
PSA 41:11 ታ ሞርከይ ታና ፆኖና ግሾ፥ ነ ታናን ኡፋይታናይሳ ታ ኤራይስ።
PSA 41:12 ነ ታና ታ ሱረተꬃ ግሾ ካትሳሳ፤ ነ ስንꬃን ታና መርናዉ ዎꬃሳ።
PSA 41:13 ጎዳይ፥ እስራኤለ ፆሳይ፥ መርናፐ መርና ጋካናዉ ጋላተቶ።
PSA 42:1 ቆረ ናይታ ትምርተ አኬካን ፃፍዳ ማዝሙረ ጋር ፑልቶ ሃꬅ ላሞተይሳዳ፥ ፆሳዉ፥ ታ ሸምፕያ ነና ላሞታዉሱ።
PSA 42:2 “ታ ሸምፕያ ፆሳ፥ ደኦ ፆሳ በአናዉ ሳሞታዉሱ፤ አዉደ ጋካዳ እያ ሶምኡዋ በኦ” ያጋዉሱ።
PSA 42:3 አሳይ፥ “ነ ፆሳይ አዉን ደኢ?” ግያ ዎደ፥ ጋላስነ ቃም ታዉ አፉꬅ ካꬅ ግድስ።
PSA 42:4 ታኒ ኤንታ ባኣለ ቦንቻናዉ ሺቅዳ፥ ዳሮ አሳ ካለꬃዳ፥ ጋላታ የꬃንነ እልልሳን ፆሳ ኬꬅ በይሳ ቆፕያ ዎደ፥ ታ ዎዛናይ አዛኖን መቄስ።
PSA 42:5 ታ ሸምፐ፥ አይስ አዛናይ? አይስ ኡንኤታይ? ነ ፆሳን ኡፋይስ ዎꬃ፤ ታና አሽያ፥ ታ ፆሳ ታኒ ቡሮ ጋላታና።
PSA 42:6 ታ ዎዛናይ አዛንስ፤ ሄሳ ግሾ ታኒ ዮርዳኖሰ ቢታን፥ አርሞና ꬎቃን፥ ምዛረ ዙማን፥ ኤቃዳ ነና ቆፓና።
PSA 42:7 ነ ሶሱዋ ጉንꬃን ጪሞይ ጪሙዋ ፄጌስ፤ ነ ቤታይነ ነ ዙለይ ታ ቦላራ አꬍስ።
PSA 42:8 ጎዳይ ባ ሲቁዋ ጋላስ ታዉ ኪቴስ፤ ቃማ ጋላታ የꬃይ ታራ ደኤስ፤ ታ ደኦ ፆሳ ዎሳና።
PSA 42:9 ፆሳ፥ ታ ዛላኮ፥ “ታና አይስ ዶጋዲ? ታ ሞርከት ታና ኡንኤꬅን፥ ዬካሸ አይስ ሄመቶ” ያጋና።
PSA 42:10 ታ ሞርከት፥ “ነ ፆሳይ አዉን ደኢ?” ያግድ ጫይያ ዎደ ታ መቀꬃይ መቄስ።
PSA 42:11 ታ ሸምፐ አይስ አዛናይ? አይስ ኡንኤታይ? ፆሳን ኡፋይስ ዎꬃ፤ ታና አሽያ፥ ታ ፆሳ ታ ቡሮ ጋላታና።
PSA 43:1 ፆሳዉ ታዉ ፕርዳ፤ ነና ኤሮና ደረታራ ታ ግሾ ሞተታ፤ ጭምያ ኢታ አሳታፐ ታና አሻ።
PSA 43:2 ፆሳዉ፥ ኔኒ ታኒ ቆሰታዳ አትያ ሚፃ፤ ነ ታና አይስ አጋዲ? ታ ሞርከይ ታና ኡንኤꬅን፥ አይስ ዬካሸ ቦ?
PSA 43:3 ነ ፖኡዋነ ነ ቱማ ታዉ ኪታ፤ ኤንቲ ታና ካለꬅድ ነ ጌሻ ደርያ፥ ነ ደእያ በሳ ታና ጋꬆ።
PSA 43:4 ሄ ዎደ ታኒ ፆሳ ያርሾ በሳኮ፤ ታና ኡፋይስያ ፆሳኮ ባና። ፆሳዉ ታ ጎዳዉ፥ ታኒ ዲꬃን ነና ሳባና።
PSA 43:5 ታ ሸምፐ አይስ አዛናይ? አይስ ኡንኤታይ? ፆሳን ኡፋይስ ዎꬃ፤ ታና አሽያ፥ ታ ፆሳ ታ ቡሮ ጋላታና።
PSA 44:1 ቆረ ናይት ዛማረ ሀላቃስ ፃፍዳ ማዝሙረ አኬካን ፃፍዳ ግንፆ ፆሳዉ፥ በን ዎደ ነ ኦꬅዳባ ኑ ስእዳ፤ ኑ አዋታ ዎደ ነ ኦꬅዳባ ኑስ ኦድዶሶና።
PSA 44:2 ካዎተꬃታ ነ ኩሸን ጎዳ ከሳዳሳ፤ ኑ አዋታ ኤንታ ቢታን ቶካዳሳ። ሀራ ካዎተꬃታ ሴራዳሳ፤ ሽን ኑ አዋታ አክሳዳሳ።
PSA 44:3 ኤንቲ ባንታ ማሻን ኦልድ ሄ ቢታ ላትቦኮና፤ ኤንቲ ባንታ ምኖተꬃን ፆንቦኮና። ሽን ኔኒ ኤንታ ዶስዳ ግሾ፥ ኤንታ ነ ኡሻቻ ኩሸይ፥ ነ ቀሰይነ ነ ሶምኡዋ ፖኦይ ፆንስስ።
PSA 44:4 ያይቆባ ኮቻስ ፆኖ ኪትያ፥ ታ ካዎይነ ታ ፆሳይ ነና።
PSA 44:5 ነናን ግድድ ኑ ሞርከታ ፆናና፤ ነ ሱንꬃን ኑና እፀይሳታ የꬋና።
PSA 44:6 ታኒ ታ ቶራን አማነትከ፤ ታ ማሻይ ታና አሸና።
PSA 44:7 ሽን ነ ኑና ኑ ሞርከታፐ አሻሳ፤ ኑና እፀይሳታ ኔኒ ካዉሻሳ።
PSA 44:8 ኑኒ ኡባ ዎደ ፆሳን ጬቀታና፤ ነ ሱንꬃ መርናዉ ጋላታና። ሳላሀ።
PSA 44:9 ሽን ሀእ ኑና አጋዳሳ፤ ካዉሻዳሳ፤ ኑ ኦላንቾታራ እስፈ ኦላስ ከያካ።
PSA 44:10 ኑ ሞርከታ ስንꬃፈ ኑና ባቃትሳዳሳ፤ ኑ እፀይሳት ኑና ቦንቅዶሶና።
PSA 44:11 ኑና ዶርሳዳ ሹሀስ አꬃ እማዳሳ፤ ካዎተꬃታ ግዶን ኑና ላላዳሳ።
PSA 44:12 ኔኒ ነ አሳ ላፋ ጋተን ባይዛዳሳ፤ አይ ዎካ ደማባካ።
PSA 44:13 ኑ ሾሮት ኑና ቦራናዳ ኦꬃዳሳ፤ ኑ ሄራን ደኤይሳት ኑና ቅልቅሳናዳነ ኑ ቦላ ሚጫናዳ ኦꬃዳሳ።
PSA 44:14 ኑና ካዎተꬃታ ግዶን ሀይሰስ አጋዳሳ፤ ኤንቲ ባንታ ሁጵያ ኑ ቦላ ቃꬃና መላ ኦꬃዳሳ።
PSA 44:15 ጋላስ ኩመꬅ ታኒ ቶሸታስ፤ ታ ሶምኡዋ ዬል ካምስ።
PSA 44:16 ሄስ ሀንዳይ ታና ጫየይሳታነ ቦረይሳታ ጋሶንነ፥ ታ ሞርከታነ ታና ማንደይሳታ ጋሶና።
PSA 44:17 ኑኒ ነና ዶጎና ደእሽን፥ ነ ጫቁዋ መንꬆና ደእሽን፥ ሀ ኡባይ ኑና ጋክስ።
PSA 44:18 ኑ ዎዛናይ ነና አግቤና፤ ኑ ቶሆይ ነ ኦግያፐ ካረ ከይቤና።
PSA 44:19 ሽን ኔኒ ኑና መንረꬃዳ ዶአ ኦላን የጋዳሳ፤ ሳካና ꬉማን ካማዳሳ።
PSA 44:20 ኑ፥ ፆሳ ሱንꬃ ዶግዳባ ግድያኮ፥ ሀራ ፆሳታኮ ኑ ኩሽያ ምጭዳባ ግድያኮ፥
PSA 44:21 ዎዛና ፁራ ፆሳይ ኤርያ ግሾ፥ እ ሀይሳ ፄልድ ደመኔ?
PSA 44:22 ግዶሽን፥ ነ ግሾ ኡባ ጋላስ ሀይቆስ፤ ሹካናዉ ኤፍያ ዶርሳዳ ታይበትዳ።
PSA 44:23 ጎዳዉ፥ ደንዳ፥ አይስ ꬍስካይ? ደንዳ፥ መርናዉ ኑና አጎፋ።
PSA 44:24 ነ ሶምኡዋ ኑፐ አይስ ገንꬃይ? ኑ ቆሁዋነ ኑ ኡንኣ አይስ ዶጋይ?
PSA 44:25 ኑኒ ባናን የገትዳ፤ ኑ አሳተꬃይ ቢታራ ኦይከትስ።
PSA 44:26 ጎዳዉ፥ ደንዳ፥ ኑና ማዳ፤ ነ ሲቁዋ ግሾ ጋዳ ኑና ዎዛ።
PSA 45:1 ቆረ ናይት “ጪሸ” ጌተትያ ጩꬃን ዛማረታ ሀላቃስ ፃፍዳ ማዝሙረ አኬካን ፃፍዳ ሲቆ ማዝሙረ ታኒ ታ የꬃ ካዋስ ስሳና፤ ታ ዎዛናይ ሎኦ ቆፋ ፑልቴስ፤ ታ እንፃርሳይ ሎኦ ፃፍያ አሳ ብእረ መላ።
PSA 45:2 አሳ ኡባፈ ኔኒ ማላ ሎኦ፤ ነ መተርሻይ አꬎ ኬሀተꬃ ቃላን ኩምስ፤ ፆሳይ ነና መርናዉ አንጅስ።
PSA 45:3 ዎልቃማ ካዋዉ፥ ነ ማሻ ዳንጫ፤ ቦንቾነ ቴማ ማአ።
PSA 45:4 ነ ቱማተꬃ፥ ነ አዳተꬃነ ነ ፅሎተꬃ ግሾ፥ ነ ቴማ ማአዳ ፆናናዉ ደንዳ፤ ነ ኡሻቻ ኩሸይ ማላልስያባ በሶ።
PSA 45:5 ነ ቶራት ቃራ፤ ኤንቲ ካዋ ሞርከታ ዎዛና ጫዶ፤ ካዎተꬃት ነ ቶሁዋ ጋርሳን ኩንዶ።
PSA 45:6 ፆሳዉ፥ ነ አራታይ መርናዉ ደኤስ፤ ነ ካዎተꬃ ፃምአይ ፅሎተꬃ ፃምኣ።
PSA 45:7 ኔኒ ፅሎተꬅ ዶሳዳ ጌላተꬅ እፃሳ፤ ሄሳ ግሾ፥ ፆሳይ፥ ነ ፆሳይ፥ ነ ላገታፐ አꬅድ፥ ነና ኡፋይሳ ዛይተን ትይስ።
PSA 45:8 ጎዳረ ኡꬃን፥ ካርበንነ ቡርጉደን ዋላከትዳ ሽቶን፥ ነ ማኦይ ፑከትስ። ዳንጋርሳ ዛለን አሌቀትዳ፥ ነ ካዎ ጋꬎን ዲፀትያ ዲꬃይ ነና ኡፋይሴስ።
PSA 45:9 ካዎ ኬꬃን ደእያ ማጫሳታ ግዶን፤ ካዎታ ማጫ ናይት ደኦሶና። ካውያ ኦፍራ ዎርቃን አሌቀታዳ፥ ኔፐ ኡሻቻ ባጋን ኤቃሱ።
PSA 45:10 ታ ናተ፥ ስአ፤ ዎዛናን ዎꬃ፤ ነ ሀይꬃ ሃ ዛራ፤ ነ ደርያነ ነ አዋ ኬꬃ ዶጋ።
PSA 45:11 ካዎይ ነ ማላን ኡፋይትስ፤ ነ ጎዳ ግድያ ግሾ እያ ቦንቻ።
PSA 45:12 ፅሮሳ አሳይ ነዉ ዎይቶ ኤክድ ያና፤ ዱረት ነና አዳሻና።
PSA 45:13 ካዋ ናእያ፥ ካዎ ኬꬃን ዋና ሎአይ! እ ያጋኖ ማኦይ ዎርቃን አሌቀትስ።
PSA 45:14 ባ አሌቆ ማኡዋ ማአዳ፥ ካዋኮ ሞይዘታሱ። እ ጌላኦ ላገት እዮ ካልድ፥ እያ ስን ኤክድ ይዶሶና።
PSA 45:15 ኤንቲ ኡፋይትሸ ይድ፥ ካዎ ጋꬎ ገሎሶና።
PSA 45:16 ካዋዉ፥ ነ አዋታ በሳ ነ ናይት ላታና፤ ቢታ ኡባን ነ ኤንታ ሹማና።
PSA 45:17 ታ ነ ሱንꬃ የለታ ኡባን፥ ሀሳየታናዳ ኦꬃና። ሄሳ ግሾ፥ አሳይ መርናዉ ነና ጋላታና።
PSA 46:1 ቆረ ናይት ዛማረታ ሀላቃስ ፃፍዳ ማዝሙረ “ጌላኦ ናይታ የꬅ” ጌተትያ ጩꬃን የፀትዳ ማዝሙረ ፆሳይ ኑ ቆሰትድ አትያ፥ በሰነ ኑ ዎልቃ። ኑና መቶይ ጋክያ ዎደ፥ እ ኑና ማዳናዉ ኡባ ዎደ ኑ ማታን ደኤስ።
PSA 46:2 ሄሳ ግሾ፥ ቢታይ ቃፅያኮካ፥ ደረት አባን ኩንድያኮካ፥ ኑኒ ያዮኮ።
PSA 46:3 አባይ ጉምድ ጎፖንትኮካ፥ እያ ዎልቃማ ዙልያን ደረት ኮኮርያኮካ፥ ኑኒ ዳጋሞኮ። ሳላሀ።
PSA 46:4 ኡባፈ ꬎቃ ፆሳይ ደእያ፥ ፆሳ ካታማ፥ ጌሻ በሳ፥ ኡፋይስያ እስ ሻፍ ደኤስ።
PSA 46:5 ፆሳይ እያ ግዶን ደእያ ግሾ፥ ሄ ካታማይ ቃፀና፤ ዎንታ ጉራ ፆሳይ እያ ማዳና።
PSA 46:6 ደረይ ዳጋምስ፤ ካዎተꬃት ቃፆሶና፤ ፆሳይ ባ ቃላ ስስስ፤ ቢታይ ትልእስ።
PSA 46:7 ኡባፈ ዎልቃማ ጎዳይ ኑራ ደኤስ፤ ያይቆባ ፆሳይ ኑ ቆሰትድ አትያ በሰ። ሳላሀ
PSA 46:8 ሃ ዪተ፤ ጎዳ ኦሱዋ ፄልተ፤ ቢታ ዋትድ ꬋይስዳኮ በእተ።
PSA 46:9 እ ቢታ ቦላ ደእያ ኦላ ኡባ ተቄስ፤ ዶንገነ ቶራ መንꬄስ፤ ጎንዳልያ ታማን ፁጌስ።
PSA 46:10 ዎፑ ጊተ፤ ታኒ ፆሰ ግደይሳ ኤርተ፤ ታኒ ካዎተꬃታ ግዶን ꬎቁ ꬎቁ ጋና፤ ቢታ ቦላካ ꬎቁ ꬎቁ ጋና።
PSA 46:11 ኡባፈ ዎልቃማ ጎዳይ ኑራ ደኤስ፤ ያይቆባ ፆሳይ ኑ ቆሰትድ አትያ በሰ። ሳላሀ።
PSA 47:1 ቆረ ናይታ ማዝሙረ ደረ ኡባይ ህንተ ኩሽያ ባቅተ፤ ቃላ ꬎቁ ኦꬅድ ፆሳ ጋላትተ።
PSA 47:2 ኡባፈ ꬎቃ ጎዳይ ዋን ያሺ? ቢታ ኡባን እ ግታ ካዎ።
PSA 47:3 ደረታ ኑፐ ጋርሳራ፥ ካዎተꬃታ ኑ ቶሁዋፐ ጋርሳን ሃርሴስ።
PSA 47:4 እ ኑስ ላታ ቢታ ዶርስ፤ እ ዶስያ ያይቆብ ሄ ቢታን ጬቀቴስ። ሳላሀ።
PSA 47:5 ፆሳይ ኡፋይሳንነ እልልሳን ፑደ ደንድስ፥ ጎዳይ ሞይዘ ፑኖን ባ አራታን ከይስ።
PSA 47:6 ፆሳስ ዛማርት፤ ኤ፥ እያዉ ዛማርተ፤ እያዉ ካዋስ ዛማርተ፤ ኤ፥ እያዉ ዛማርተ።
PSA 47:7 ፆሳይ ቢታ ኡባ ካዎ ግድያ ግሾ፥ ጋላታን ሳቢተ።
PSA 47:8 ፆሳይ ባ ጌሻ አራታን ኡትስ፥ ፆሳይ ካዎተꬃታ ሃሬስ።
PSA 47:9 ካዎተꬃታ ሀላቃት፥ አብራሃመ ፆሳ አሳራ ሺቆሶና። ቢታን ደእያ ዎልቃማ ኡባይ ፆሳባ ግድያ ግሾ እ ኡባፈ ꬎቁ ꬎቁ ግስ።
PSA 48:1 ቆረ ናይታ ማዝሙረ ጎዳይ ግታ፤ ኑ ፆሳ ካታማን እያ ጌሻ ዙማ ቦላ ግታ ጋላት እያዉ በሴስ።
PSA 48:2 ቢታ ኡባ ኡፋይስ ግድዳ፥ ፑደሀ ባጋራ ደእያ ፅዮነ ደረይ፥ ꬎቃነ ሎኦ፤ እ ግታ ካዋ ካታማ።
PSA 48:3 ፆሳይ ሄ ግምብያ ግዶና፤ እካ እያዉ ገሸ ግደይሳ ኤርስስ።
PSA 48:4 ካዎት ባንታ ቶራንቾታራ ሺቅዶሶና፤ ፅዮነ ኦላናዉ ይዶሶና።
PSA 48:5 እያ በእድ ዳጋምዶሶና፤ ጉየ ስሚድ ባቃትዶሶና።
PSA 48:6 ኤንቲ ያን ደእሸ ያሻን ኮኮርዶሶና፤ እቀꬅ ኦይክዳ ማጫሳዳ እንፃፅዶሶና።
PSA 48:7 ዶሎሀ ባጋ ዎልቃማ ጫርኮን መቅያ ታርሰሳ ማርካበታ መላ ግድዶሶና።
PSA 48:8 ኑ ስእዳይሳዳ፥ ኡባፈ ዎልቃማ ጎዳ ካታማን፥ ኑ ፆሳ ካታማን እ ኦꬅዳባ በእዳ፤ ፆሳይ ሄ ካታማ መርናዉ ምንꬅድ ናጌስ። ሳላሀ
PSA 48:9 አቤት ፆሳዉ፥ ነ ኬꬃን መርና ነ ሲቁዋ ቆፖስ።
PSA 48:10 አቤት ፆሳዉ፥ ነ ሱንꬃዳ ነ ጋላታይ ሳኣ ጋፃ ጋክስ፤ ነ ኡሻቻ ኩሸይ ፅሎተꬃን ኩምዳይሳ።
PSA 48:11 ነ ፕርዳ ጋሶን ፅዮነ አሳይ ኡፋይቶ፤ ይሁዳ ኩመꬃይ ኡፋይሳን እልሎ።
PSA 48:12 ፅዮነ ዩሹዋን ሄመትተ፤ እ ድርሳ ዩይተ እ ሻኮታ ታይብተ።
PSA 48:13 ያ የለታስ ኦዳና መላ እያ ግምብያ አኬክተ፤ ሚፃታ ዎችተ።
PSA 48:14 ህንተ፥ “መርናዉ ፆሳይ ኑ ፆሳ፤ እ ኑና ሀይቃና ጋካናዉ ካለꬃና” ያግድ ኦድተ።
PSA 49:1 ቆረ ናይት ዛማረታ ሀላቃስ ፃፍዳ ማዝሙረ አሳ ኡባይ ሀይሳ ስእተ፤ ቢታ ቦላ ደኤይሳቶ፥ ኡባይ ሀይሳ ሀይዝተ።
PSA 49:2 ꬎቃይ ዝቃይ፥ ዱረይ ማንቆይ ስእተ።
PSA 49:3 ታ ዎዛና ቆፋይ አኬካ እሜስ፤ ታ ዶናይ ጭንጫተꬃ ቃላ ኦደቴስ።
PSA 49:4 ታ ሀይꬃ ሌምሶኮ ዛራና፤ ዲꬅ ዲፃሸ፥ ታ ቃንእሽያ ብርሻና።
PSA 49:5 መቶ ጋላሳይ ያ ዎደነ ጭምያ ሞርከት፤ ታና ተቅያ ዎደ ታ አይስ ባባይና?
PSA 49:6 ባንታ ሻሉዋን አማነተይሳታነ ባንታ ዱረተꬃን ጬቀትያ ታ ሞርከታ አይስ ባባይና?
PSA 49:7 አይ አስካ ባና ዎዛናዉ፥ ዎይኮ ባ ሸምፑዋ ጋትያ ፆሳስ ቃንፃናዉ ዳንዳኤና።
PSA 49:8 አሳ ሸምፖ ጋተይ ዳሮ አልኦ፤ አይ ጋተ ቃንፅንካ ግደና።
PSA 49:9 እ ሀይቆናዳነ ዱፎ ገሎናዳ፥ ዎይኮ እ ሀይቆናዳ ኦꬃናዉ ጋከና።
PSA 49:10 ኤያትነ ፓꬆና አሳት ሀይቀይሳዳ፥ ጭንጫት ባንታ ሻሉዋ ሀራታስ የግድ በይሳ አሳ ኡባይ በኤስ።
PSA 49:11 ኤንቲ ባንታ ቢታ ባንታባ ጊኮካ፥ ዱፎይ መርናዉ ኤንታዉ ኬ ግዳና።
PSA 49:12 አስ አይ ግታትኮካ ባ ግታተꬃራ ካንና፤ እ ዶአዳ ሀይቄስ።
PSA 49:13 ባንታርካ ባንታ ሁጰን አማነተይሳታ ቃዳይነ ኤንቲ ግዳባ ቱማ ግያ ኤያታ ዉርሰꬃይ ሀይሳ። ሳላሀ
PSA 49:14 ሹካስ ጊገትዳ ዶርሳታዳ፥ ሀይቆይ ኤንታ ዱፎ ካለꬄስ። ሱረት ኤንታ ዱፉዋ ቦላራ ሄመታና፤ ኤንታ አሳተꬃይ ዱፎን ዎቃና፤ ኬꬃፈ ከይድ ሃክድ ስኦለን አታና።
PSA 49:15 ሽን ፆሳይ ታ ሸምፑዋ ዎዛና፤ እ ታና ሀይቆ ዎልቃፈ አሻና። ሳላሀ
PSA 49:16 አስ ዱረትያ ዎደነ እያ ቦንቾይ ዳርያ ዎደ ያዮፋ።
PSA 49:17 እ ሀይቅያ ዎደ አይኮካ ኤክድ ቤና፤ እያ ሻሎይ እያራ እስፈ ዱፎ ገለና።
PSA 49:18 አስ ፓፃ ደእያ ዎደ ታዉ ኩምስ ጊኮ፥ ኡባባይ እያዉ እንጀትዳ ግሾ ጋላተትኮካ፥
PSA 49:19 ስሚድ ፖኦ በኦና፥ ባ ማይዛታን ጋሄቴስ።
PSA 49:20 ኤራተꬅ ባይና ዱረትዳ አስ ዶአዳ ጮ ꬋያና።
PSA 50:1 አሳፋ ማዝሙረ ዎልቃማ ጎዳይ፥ ፆሳይ ኦዴስ፤ ዶሎሀፐ ዉሎሀ ጋካናዉ ቢታ ኡባ ፄጌስ።
PSA 50:2 መꬎን ፖሎ የገልስ ግድዳ ፅዮነፐ ፆሳይ ፖኤስ።
PSA 50:3 ኑ ፆሳይ ያና፤ ስእ ጌና፤ ኤፅያ ታማይ እያ ስንꬃና፤ ዎልቃማ ጎተይ እያ ዩሹዋና።
PSA 50:4 ፆሳይ ባ አሳ ፕርድያ ዎደ፥ ሳሎታነ ሳኣ ፄጌስ።
PSA 50:5 “ያርሾን ታራ ጫቅዳ፥ ታ ጌሻታ ታኮ ሺሽተ” ያግስ።
PSA 50:6 ፆሳይ ፕርድያ ግሾ፥ ሳሎት እያ ፅሎተꬃ አዋጆሶና። ሳላሀ
PSA 50:7 “ታ አሳዉ፥ ስእተ፤ ታ ህንተዉ ኦዳይስ፤ እስራኤለ አሳዉ፥ ታ ነ ቦላ ማርካታና፤ ታኒ ፆሳይ፥ ነ ፆሳ።
PSA 50:8 ነ ያርሹዋ ግሾነ ነ ፁሳ ያርሹዋ ግሾ፥ ነና ቦርከ።
PSA 50:9 ነ ዳራፐ ኮርማታ፥ ነ ግርብያፈ ኮለ ኤካናዉ ኮይከ።
PSA 50:10 ዎራን ደእያ ዶአት ኡባይ ታባ፤ ሙኩሉ ዙማ ቦላ ደእያ መሄትካ ታሳ።
PSA 50:11 ታኒ ꬎቃ ደርያን ደእያ ካፎታ ኡባ ኤራይስ፤ ደንባን ደእያ መተꬃት ታይሳታ።
PSA 50:12 ታና ኮሻይኮካ ነና ኦይችከ፤ ሳእነ ሳአን ኩምዳባ ኡባይ ታባ።
PSA 50:13 ታኒ ኮርማታ አሹዋ ማይናዬ? ዎይኮ ዴሻታ ሱꬃ ኡያናዬ?
PSA 50:14 ፆሳስ ጋላታ ያርሾ እማ፤ ኡባፈ ꬎቃ ፆሳስ ነ ቃንገꬃ ጋꬃ።
PSA 50:15 መቶ ጋላስ ታና ፄጋ፤ ታ ነና አሻና፤ ነካ ታና ቦንቻና” ያጌስ።
PSA 50:16 ሽን ፆሳይ ኢታ አሳ ሀይሳዳ ያጌስ፤ “ታ ህግያ ነ ናባባናዉ ነዉ አይ ማት ደኢ? ዎይኮ ታ ጫቁዋ ነ ዶናን ቆንጭሳናዉ ነዉ አይ ማት ደኢ?
PSA 50:17 ኔኒ ታ ትምርትያ እፃዳሳ፤ ታ ቃላ ጉየ የጋዳሳ።
PSA 50:18 ካይሱዋ በእዳ ዎደ ኔኒ እያራ ዳቦታዳሳ፤ ላይማተይሳታ ማባራን ገላዳሳ።
PSA 50:19 ነ ዶና ኢታባ ኦደታናዉ ብላ የዳዳሳ፤ ነ እንፃርሳይ ዎርዶ ሃሳያ ሜዘትስ።
PSA 50:20 ኡታዳ ነ እሻ ዝግራዳሳ፤ ነ አየ ናኣ ቦላ ኢታባ ኦደታዳሳ።
PSA 50:21 ነ ሀይሳ ኡባ ኦꬅያ ዎደ፥ ታኒ ስእ ግዳ ግሾ ታና ነ መላ ጋዳ ቆፓዳሳ። ሽን ሀእ ታ ነና ሀንቃና፤ ነ ናጋራ ነ ስንꬃን ታይባና።
PSA 50:22 ህንተኖ፥ ፆሳ ዶገይሳቶ፥ ሀይሳ አኬክተ፤ ሄስ ሀኖና እፅኮ ታ ህንተና መንረꬃና፤ ሄ ዎደ ህንተና አሻናይ ባዋ።
PSA 50:23 ታዉ ጋላታ ያርሸይ ታና ቦንቼስ፤ ባ ኦግያ ሱርስዳ አሳስ ታኒ ፆሳ አቶተꬃ በሳና” ያጌስ።
PSA 51:1 ዳዊቲ ዛማረታ ሀላቃስ ፃፍዳ ማዝሙረ ዳዊቲ በርሳበራ ላይማትዳ ዎደ ናብያ ናታን እያዉ ኦድ ስምን ዳዊቲ የፅዳ ማዝሙረ አቤት ፆሳዉ፥ ነ መርና ሲቁዋዳ ታና ማራ፤ ነ ቃታ ዳሩዋ መላ ታ ናጋራ ቁቻ።
PSA 51:2 ታ ኢታተꬃፈ ታና ሜጫ፤ ታ ናጋራፐ ታና ጌሻ።
PSA 51:3 ታኒ ታ ቆሁዋ ኤራይስ፤ ታ ናጋራይ ኡባ ዎደ ታ ስንꬃና።
PSA 51:4 ታኒ ነና፥ ነ ፃላላ ቆሀስ፤ ነ ስንꬃን ኢታባ ኦꬃስ። ሄሳ ግሾ፥ ነ ሀንቁዋን ነ ልከ፤ ነ ፕርዳንካ ነ ፅሎ።
PSA 51:5 ሄኮ ታ የለትያ ዎደ ናጋራንቾ፤ ታ አየ ኡሎን ቡሮ አትያ፥ ዎደፐ ዶማዳ ታኒ ናጋራንቾ።
PSA 51:6 ኔኒ አሳ ዎዛናፐ ቱማተꬅ ኮያሳ፤ ታ ጋꬃ አሳተꬃ ጭንጫተꬅ ታማርሳ።
PSA 51:7 ህሶጰ ቦንጮን ታና ዉርፃ፤ ታ ጌያና፤ ታና ሜጫ፤ ታ ሻቻፈ አꬋዳ ቦፃና።
PSA 51:8 ነ ታና ኡፋይስነ ሎኦባ ስሳ፤ ነ መንረꬅዳ ታ መቀꬃ ዛራዳ ኡፋይሳ።
PSA 51:9 ነ ሶምኡዋ ታ ናጋራፐ ሀራ ሶ ዛራ፤ ታ ባላ ኡባ ቁቻ።
PSA 51:10 አቤት ፆሳዉ፥ ጌሻ ዎዛና ታናን መꬋ፤ ቃፆና አያና ታ ግዶን ኦራꬃ።
PSA 51:11 ታና ነ ስንꬃፈ የጎፋ፤ ነ ጌሻ አያና ታፐ ኤኮፋ።
PSA 51:12 ነ አቶተꬃ ኡፋይሳ ታዉ ዛራ፤ ታ ነዉ ኪተታና መላ ታና ዘምፕሳ።
PSA 51:13 ታ ሄ ዎደ ህገ መንይሳታ ነ ኦግያ ታማርሳና፤ ናጋራንቾትካ ኔኮ ስማና።
PSA 51:14 አቤት ፆሳዉ፥ ታና አሽያ ፆሳዉ፥ ሱꬁ ጉስያ ናጋራፐ ታና አሻ፤ ሄ ዎደ ታ እንፃርሳይ ነ ፅሎተꬃ የፃና።
PSA 51:15 አቤት ጎዳዉ፥ ታ ዶና ዶያ፤ ታ እንፃርሳይ ነ ጋላታ አዋጃና።
PSA 51:16 ነ ያርሾን ኡፋይትያኮ፥ ታ ነዉ ያርሻናሽን፥ ነ ፁሳ ያርሾን ኡፋይታካ።
PSA 51:17 ፆሳ ያርሾይ አዳ አያና፤ ፆሳዉ፥ ነ መቅዳነ ካዉይዳ ዎዛና ካꬋካ።
PSA 51:18 አቤት ፆሳዉ፥ ዶሳን ፅዮነስ ኬሀ፤ የሩሳላመ ግምበታ ግምባ።
PSA 51:19 ሄ ዎደ ነ ፅሎተꬃ ያርሾንነ ፁሳ ያርሾን ኡፋይታና። ፖሎ ሽቂያ መሄ ያርሾን ኡፋይታና፤ ኮርማት ነ ያርሾ በሳን ያርሸታና።
PSA 52:1 ዳዊቲ ዛማረታ ሀላቃስ አኬካን ፃፍዳ ግንፆ ኤዶመ ቢታ አስ ግድዳ ዶይቅ ሳኦላኮ ብድ፥ “ዳዊቲ አብመለከ ሶ ብስ” ያግድ ኦድ ስምን፥ ዳዊቲ ፃፍዳ ማዝሙረ ነኖ፥ ዎልቃማ ኡራዉ፥ ኢታተꬃን አይስ ኦቶርታይ? ነኖ ፆሳን ካትዳይሶ ኡባ ዎደ አይስ ጬቀታይ?
PSA 52:2 ነኖ፥ ዎርዶ ኦደተይሶ፥ ነ ሀራታ ꬋይሳናዉ ማቀታሳ፤ ነ እንፃርሳይ ቃራ ማቅላ መላ።
PSA 52:3 ነ ሎኦ አጋዳ ኢታ ዶሳሳ፤ ቱማ አጋዳ ዎርዶ ኦደታሳ። ሳላሀ
PSA 52:4 ነኖ፥ ዎርዳንቹዋዉ፥ ነ ቦሻ ቃላ ኡባ ዶሳሳ።
PSA 52:5 ፆሳይ ነና መርናዉ መንꬃና፤ ፆሳይ ነና መንረꬃናነ ነ ኬꬃፈ ዳፍድ ከሳና፤ ነና ደኦን ደኤይሳታ ግዶፈ ሾድድ የጋና። ሳላሀ
PSA 52:6 ፅሎት ሄሳ በእድ ያያና፤ ኤንቲ ሀይሳዳ ያግድ፥ ነ ቦላ ሚጫና፤
PSA 52:7 “ፆሳ ባዉ ገሸ ኦꬅቦና፥ ባ ዱረተꬃን አማነትዳ፥ ኢታ ኦሶን ምንዳ፥ አድያ ሀይሳ በእተ” ያጋና።
PSA 52:8 ሽን ታኒ ፆሳ ኬꬃን አጭያ ሻማሆ መላ፤ እያ ሲቁዋን ታኒ መርናዉ አማነታይስ።
PSA 52:9 ነ ኦꬅዳ ግሾ መርናዉ ታ ነና ጋላታና፤ ኔኒ ሎኦ ግድያ ግሾ ነ ሱንꬃን ኡፋይስ ኦꬃና፤ ጌሻታ ስንꬃን ታ ነና ሳባና።
PSA 53:1 ዳዊቲ ዛማረታ ሀላቃስ ፃፍዳ ትምርተ አኬካን ፃፈትዳ ግንፆ ኤያት ባንታ ዎዛናን፥ “ፆሲ ባዋ” ያጎሶና፤ ኤንታ ደኦይ ኢትስ፤ ኤንቲ ቱናባ ኦꬆሶና፤ ሎኦባ ኦꬅያ አስ እሶይካ ባዋ።
PSA 53:2 ፆሳ ኮይያ ጭንጫ አስ ደእያኮ በአናዉ፥ ጎዳይ ሳሎፐ አሳ ፄሌስ።
PSA 53:3 ኤንቲ ኡባይ ፆሳፈ ሃክዶሶና፤ ኡባይ እስፈ ቱንዶሶና። ሎኦ ኦꬅያ አስ ዴና፤ ሀር አቶሽን እስ አስካ ባዋ።
PSA 53:4 አስ ካꬅ መይሳዳ ታ አሳ መይሳት፥ ሀ ኢታ ኦꬅያ አሳት ኤሮኮና? ኤንቲ ፆሳ ፄጎኮና?
PSA 53:5 ኤንቲ ዳጋም ኤሮና ዳጋማ ዳጋማና፤ ፆሳይ ባ አሳ ሞርከታ መቀꬃ ላላና፤ ፆሳይ ኤንታ ካꬍዳ ግሾ ኤንቲ ዬላታና።
PSA 53:6 እስራኤለ አቶተꬃይ ፅዮነፐ ዬረነ! ፆሳይ ባ አሳ ድኡዋ ዛርያ ዎደ፥ ያይቆባ ዛረት ኡፋይቶ፤ እስራኤለ አሳይ ኡፋይሳን ሀሹ ጎ።
PSA 54:1 ዳዊቲ ዛማረታ ሀላቃስ ዲꬃን የፅዳ አኬካ ግንፆ ዚፋ አሳት ሳኦላኮ ብድ፥ “ዳዊቲ ኑ ቢታን ቆሰትስ” ያግድ ኦድን፥ ዳዊቲ ፃፍዳ ማዝሙረ አቤት ፆሳዉ፥ ነ ሱንꬃን ታና አሻ፤ ነ ዎልቃን ታዉ ፕርዳ።
PSA 54:2 አቤት ፆሳዉ፥ ታ ዎሳ ስአ፤ ታ ዶና ቃላ ሀይዛ።
PSA 54:3 አላጋ አሳት ታ ቦላ ደንድዶሶና፤ ዳጋንꬅያ አሳት ታና ዎꬋናዉ ኮዮሶና፤ ኤንቲ ፆሳ ቆፖኮና። ሳላሀ
PSA 54:4 ፆሳይ ታዉ ማደ፤ ጎዳይ ታዉ ዘምፖ።
PSA 54:5 አቤት ፆሳዉ፥ ታ ሞርከታ ኢታተꬃ ኤንታ ቦላ ዛራ፤ ነ ቱማተꬃ ግሾ ኤንታ ꬋይሳ።
PSA 54:6 አቤት ጎዳዉ፥ ታኒ ታ ዶሳን ነዉ ያርሻና፤ ነ ኬሀ ግድያ ግሾ ነ ሱንꬃ ጋላታና።
PSA 54:7 ነ ታና፥ ታ መቶ ኡባፈ አሻዳሳ፤ ታ ሞርከታ ፆነተꬃ ታ አይፈን በአስ።
PSA 55:1 ዳዊቲ ዛማረታ ሀላቃስ ዲꬃን የፅዳ አኬካ ማዝሙረ አቤት ፆሳዉ፥ ታ ዎሳ ስአ፤ ታ ማጋኑዋ ቀል ጎፓ።
PSA 55:2 ታና ስአ፤ ታ ዎሳስ ዛሮ እማ፤ ታ ቆፋይ ታና ዋይስን፥ ታ ኡንኤታስ።
PSA 55:3 ታ ሞርከታ ግርሳ ስአዳ ዳጋማስ፤ ኢታታ ማንድያ ጋሶን ኮኮራስ። ኤንቲ ታ ቦላ መቶ ኤሆሶና፤ ይሎን ደንድድ ታና ሞርኮሶና።
PSA 55:4 ታ ዎዛናይ ድርጌስ፤ ሀይቆ ህርጋይ ታና ዎꬌስ።
PSA 55:5 ታና ያሽነ ኮኮርስ ኦይክስ፤ ኢታ ዳጋም ታ ቦላ ዎꬍስ።
PSA 55:6 ሆለዳ ታዉ ቀፈይ ደእያኮ፥ ፓላዳ ሸምፖይ ደእያ በሲ ጋካናሽን።
PSA 55:7 ታኒ ሃካዳ ባናሽን፤ ባዞን አቃናሽን። ሳላሀ
PSA 55:8 ታኒ ጎተፐነ ጫርኮፈ ባቃታዳ፥ ታ ቆሰትያ በሲ ደማናሽን።
PSA 55:9 አቤት ጎዳዉ፥ ካታማ ግዶን ኦሽነ ገነ በእዳ ግሾ ኢታታ ኦዳ ላላ።
PSA 55:10 ኢታት ጋላስነ ቃማ ካታማ ግምበ ድርሳ ዩዮሶና፤ ዋየይነ መቶይ ካታማ ግዶን ደኤስ።
PSA 55:11 ꬋዮይ እያ ግዶን ደኤስ፤ ናቆይነ ጭሞይ እያ ዳባባፐ ሻከተና።
PSA 55:12 ታና ጫየይ ታ ሞርክያ ግደና፤ እያ ግድያኮ ታ ዳንዳአናሽን። ታ ቦላ ጬቀተይ ታና እፀይሳ ግደና፤ እያ ግድያኮ ታ እያፐ ቆሰታናሽን።
PSA 55:13 ሽን ሄሳ ኦይ ነና፥ ታ ላግያ፤ ታ ዳቡዋነ ታ ሲቁዋ።
PSA 55:14 ኑ እሶይ እሱዋራ ኡሎ ኦዳ ኦደትዳ፤ ፆሳ ኬꬃን ዳባባን አሳራ እስፈ ስመረትዳ።
PSA 55:15 ኤንታ ዎዛናን ኢታተꬅ ደእያ ግሾ፥ ታ ሞርከት ቆፖና ሀይቆ፤ ኤንቲ ፓፃ ደእሸ ዱፎ ገሎ።
PSA 55:16 ሽን ታኒ ፆሳ ፄጋና፤ ጎዳይ ታና አሻና።
PSA 55:17 ዎንታ፥ ጋላስነ ኦማርስ ዋሳና፤ ታ መቱዋ እያዉ ኦዳና፤ እ ታና ስአና።
PSA 55:18 ዳሮት ታና ሞርክኮካ፥ እ ታና ቶራፐ አሼስ።
PSA 55:19 በንፐ ባ አራታን ኡትዳ ፆሳይ፥ ባንታ ኦግያ ላሞና ግሾነ እያዉ ያዮና ግሾ ታና ስእድ ኤንታ ካዉሻና። ሳላሀ
PSA 55:20 ታ ላገይ ባ ዳቦታ ቆህስ፤ ኤንታራ ጫቅዳ ጫቁዋ መንꬅስ።
PSA 55:21 እያ ዶናይ ኦይሳፐ ሊቆ፤ ሽን ባ ዎዛናን ኦላ ደንꬄስ። እያ እንፃርሳይ ዛይተፐ አꬍዳ ሹጎ፤ ሽን ቃንፃናዉ ጊግዳ ቃራ ማሻ መላ።
PSA 55:22 ነ ቶሁዋ ፆሳ ቦላ የጋ፤ እ ነና ካትሳና። ፆሳይ ፅሎት፥ ዳጋማና መላ ኦና።
PSA 55:23 ሽን አቤት ፆሳዉ፥ ኢታ አሳታ ዎልቃማ ኦላን ሆላና። ሱꬁ ጉሰይሳትነ ጭመይሳት፥ ባንታ ላይꬃፈ ባጋካ ደኦኮና፤ ሽን ታኒ ነናን አማነታና።
PSA 56:1 ፍልስፄመ አሳይ ጌተ ካታማን ዳዊታ ኦይክዳ ዎደ ዳዊቲ ዛማረታ ሀላቃስ ፃፍዳ ዎሳ “ሃሆ በሳን ዎላ ቦላ ኡትዳ ሆሌስ” ጌተትያ ዲꬃ ጩꬃን የፀትዳ ዎሳ አቤት ፆሳዉ፥ አሳይ ታና ኡንኤꬅያ ግሾነ ኡባ ዎደ ታ ሞርከት ታና የደꬅያ ግሾ ታዉ ቃታ።
PSA 56:2 ታ ሞርከት ኩመꬃ ጋላስ ታና የꬎኦሶና፤ ኦቶሮን ታና ኦልያ አሳይ ዳሮ።
PSA 56:3 ታና ያሽያ ዎደ ታ ነናን አማነታይስ።
PSA 56:4 ታኒ ፆሳን አማነታይስ፤ ያይከ፤ እያ ቃላ ጋላትያ ፆሳን አማነታይስ፤ አስ ታና አይ ኦꬃኔ?
PSA 56:5 ኩመꬃ ጋላሳን ታ ሞርከት ባላ ኮዮሶና፤ ታና ቆሀናዉ ኡባ ዎደ ቶቦሶና።
PSA 56:6 ኤንቲ ታ ቦላ ማቀቶሶና፤ ታና ቆሀናዉ ጌዶሶና። ታ ታንጎ ኡባ ካሎሶና፤ ታና ዎꬋናዉ ኮዮሶና።
PSA 56:7 ኤንቲ አይ ኦገራካ ከስ ኤካና መላ ኦꬆፋ፤ ነ ሀንቁዋን ሄ ካዎተꬃታ ካዉሻ።
PSA 56:8 ታ ዋይያ ታይባ፤ ነ ታ አፉꬃ ማካዳሳ፤ ኤንቲ ነ ማዝጋብያን ደኦኮና?
PSA 56:9 ታ ነና ፄግያ ዎደ፥ ታ ሞርከት ጉየ ስማና፤ ፆሳይ ታ ባጋ ግደይሳ ታ ሄሳን ኤራይስ።
PSA 56:10 ታ እያ ቃላ ጋላትያ ፆሳን፥ ታ እያ ቃላ ጋላትያ ጎዳን፥
PSA 56:11 ታ ሄ ፆሳን አማነታይስ፤ ያይከ። አስ ታና አይ ኦꬃኔ?
PSA 56:12 አቤት ፆሳዉ ታ ነዉ ቃንግዳባይ ደኤስ፤ ሄሳ ጋላታ ያርሾ ኦꬃዳ ታ ነዉ እማና።
PSA 56:13 ደኦን ደኤይሳታ ቦላ ፖእያ ፖኡዋን ፆሳ ስንꬃን ስመረታና መላ፥ ታ ሸምፑዋ ሀይቆፐ፥ ታ ቶሁዋ ꬉበፐ አሻዳሳ።
PSA 57:1 ዳዊቲ ሳኦላፐ ባቃትድ ጎንጎሎን ቆሰትዳ ዎደ ዛማረታ ሀላቃስ ፃፍዳ ዎሳ “ꬋይሶፋ” ጌተትያ ዲꬃ ጩꬃን የፀትዳ ዎሳ ታና ማራ፤ አቤት ፆሳዉ፥ ታና ማራ፤ ታ ኔኮ ባቃታይስ። ꬋዮይ አꬋና ጋካናዉ፥ ነ ቀፍያ ጋርሳን ቆሰታይስ።
PSA 57:2 ታኒ ኡባፈ ꬎቃ ፆሳኮ፥ ባ ቆፋꬆ ኦꬅያ ፆሳኮ ዋሳይስ።
PSA 57:3 ፆሳይ ሳሎፐ ማዶ ኪትድ ታና አሻና፤ ታና የይሳታ ካዉሻና፤ ፆሳይ ባ ሲቁዋነ ባ አማነተꬃ ታዉ ኪታና። ሳላሀ
PSA 57:4 ታኒ ታ ሞርከታፐ ግዶን፥ አሰ ምያ ጋሞታፐ ግዶን ደአይስ። ኤንታ አቻይ ቶራነ ዶንገ ቶራ መላ፤ ኤንታ እንፃርሳይ ቃራ ማሻ መላ።
PSA 57:5 አቤት ፆሳዉ፥ ነ ሳሎፐ አꬋዳ ꬎቁ ꬎቁ ጋ፤ ነ ቦንቾይ ሳአ ኡባ ካሞ።
PSA 57:6 ኤንቲ ታ ቶሁዋስ ፅሄ ዎꬅዶሶና፤ ታኒ ኡንኤታዳ ሆካስ። ኤንቲ ታ ኦግያን ኦላ ቦክዶሶና፤ ሽን ሄ ኦላን ባንታዉ ኩንድዶሶና። ሳላሀ
PSA 57:7 ታ ዎዛናይ ምኖ፤ አቤት ፆሳዉ፥ ታ ዎዛናይ ምኖ፤ ታኒ ነና ማዝሙረን ሳባና።
PSA 57:8 ታ ሸምፐ፥ ባርካ፤ ዲꬅነ ማስንቆይ ደንድተ፤ ታኒ ጉራ ባርካና።
PSA 57:9 አቤት ጎዳዉ፥ ታ ነና አሳ ግዶን ጋላታና፤ ካዎተꬃታ ግዶን ነና ሳባና።
PSA 57:10 ነ ሲቆይ ሳሎታፐ ꬎቃ፤ ነ አማነተꬃይ ሻራፐ ቦላ።
PSA 57:11 አቤት ፆሳዉ፥ ነ ሳሎፐ አꬋዳ ꬎቁ ꬎቁ ጋ፤ ነ ቦንቾይ ሳአ ኡባ ካሞ።
PSA 58:1 ዳዊቲ ዛማረታ ሀላቃስ ፃፍዳ ዎሳ “ꬋይሶፋ” ጌተትያ ዲꬃ ጩꬃን የፀትዳ ዎሳ ደርያ ሃረይሳቶ፥ ቱማ ህንተ ልከ ኦደቴቲ? አሳ ኡባስ ፅሎ ፕርዴቲ?
PSA 58:2 ግደና፥ ህንተ ዎዛናን ኢታባ ሀልቼታ፤ ህንተ ኩሸይ ቢታ ቦላ ጌላባ ኦꬄስ።
PSA 58:3 ኢታ አስ አየ ኡሎፐ ዶምድ ሀሌስ፤ የለትዳ ጋላሳፐ ዶምድ፥ ባሌስነ ዎርዶ ኦደቴስ።
PSA 58:4 ኤንቲ ሾሻዳ ዪሻራ ደኦሶና፤ ኤንቲ ቱለ ጎፐዳ ስኦኮና።
PSA 58:5 ብተይስ አይ ጭንጫ ግድኮካ፥ ጎፐይ እያ ፄስ ስኤና።
PSA 58:6 አቤት ፆሳዉ፥ ጋሞ አች ዳንያ ኤንታ አቻ መንꬃ፤ ጎዳዉ ኤንታ ሳክልያ ꬉካ።
PSA 58:7 ኤንቲ ጉክዳ ሃꬅ ግዶ፤ ባንታ ዶንግያ ዱክያ ዎደ፥ ዶንገ ቶራ አይፈይ ꬋዮ።
PSA 58:8 ኤንቲ ማይድ ꬋይያ ꬋ ሳሶዳ ሀኖ፤ አየ ኡሎፐ ሀይቅድ ዎꬍያ፥ አዋ ፖኦ በኦና ቦሻዳ ሀኖ።
PSA 58:9 ኤንቲ አጉንꬅ ግድድ ዳያናፐ ካሰ፥ ኤንቲ ቡሮ ፑቶ ግድድ ደእሽን፥ ኤንታ ባ ሀንቁዋን ꬋይሳና።
PSA 58:10 ናጋራንቾታ ቦላ ሀሎ ከይያ ዎደ ፅሎት ኡፋይታና፤ ኢታታ ሱꬃን ባንታ ቶሁዋ ሜጨታና።
PSA 58:11 ሄ ዎደ አሳይ፥ “ቱማ ፅሎታስ ዎይቶይ ደኤስ፤ ሳአ ቦላ ፕርድያ ፆሲ ደኤስ” ያጋና።
PSA 59:1 ዳዊቲ ዎꬋናዉ እያ ኬꬃ ናጋና መላ ሳኦል አሰ ኪትን፥ ዳዊቲ ዛማረታ ሀላቃስ ፃፍዳ ዎሳ “ꬋይሶፋ” ጌተትያ ዲꬃ ጩꬃን የፀትዳ ዎሳ አቤት ታ ፆሳዉ፥ ታ ሞርከታፐ ታና አሻ፤ ታ ቦላ ደንደይሳታፐ ታና ናጋ።
PSA 59:2 ኢታ ኦይሳታፐ ታና አሻ፤ ሱꬁ ጉስያ አሳታፐ ታና አሻ።
PSA 59:3 አቤት ጎዳዉ፥ ኤንቲ ታና ዎꬋናዉ ዙግድ ናገይሳ በአ። አቤት ጎዳዉ፥ ታ ናቁዋ ግሾ ዎይኮ ታ ናጋራ ግሾ ግዶናሽን ጮ ታ ቦላ ቶቦሶና።
PSA 59:4 ታ አይ ባላካ ኦꬆና ታና ቆሀናዉ ጊግዶሶና፤ ሄሳ በአ፤ ታና ማዳናዉ ደንዳ።
PSA 59:5 አቤት ኡባፈ ዎልቃማ ፆሳዉ፥ ጎዳዉ፥ እስራኤለ ፆሳዉ፥ ካዎተꬃታ ኡባ ፕርዳናዉ ባርካ፤ ኢታ ኦይሳታ ማሮፓ። ሳላሀ
PSA 59:6 ኤንቲ ካታማ ግዶን ዩይሸ ፔእድ፥ ካናꬆ ላውሸ ስሞሶና።
PSA 59:7 ኤንታ ዶናፐ ከየይሳ በአ፤ ኤንታ እንፃርሳይ ማሻ መላ፤ አስ ኤንታና ስኤይሳ ቆፖኮና።
PSA 59:8 ሽን አቤት ጎዳዉ፥ ነ ኤንታ ቦላ ሚጫሳ፤ ካዎተꬃታ ኡባ ለቅሳሳ።
PSA 59:9 ፆሳዉ፥ ነ ታ ሚፃ ግድያ ግሾ፥ ታ ነ ዎልቃን አማነታይስ።
PSA 59:10 ታ ፆሳይ ባ ሲቁዋን ታኮ ያና፤ ታ ፆሳይ ታ ሞርከታ ፆነተꬃ ታና በሳና።
PSA 59:11 ታ አሳት ዶጎና መላ ነ ኤንታ ዎꬎፓ። አቤት ጎዳዉ፥ ኑ ጎንዳልያዉ፥ ነ ዎልቃን ኤንታ ላላነ ካዉሻ።
PSA 59:12 ኤንታ ዶናፐ ከይያ ናጋራ ግሾ ኤንታ እንፃርሳፈ ፑልትያ ቃላ ግሾ፥ ባንታ ኦቶሩዋን ኦይከቶ፤ ኤንታ ባደꬃነ ዎርዱዋ ግሾ፥
PSA 59:13 ነ ሀንቁዋን ኤንታ ꬋይሳ፤ ኤንታ ኩመꬅ ድጋ። ሄሳን ፆሳይ ያይቆባ ዘረꬃ ሃረይሳነ ሳኣ ጋፃ ጋካናዉ ሃረይስ ኤረታና። ሳላሀ
PSA 59:14 ኤንቲ ካታማ ግዶን ዩይሸ ፔእድ፥ ካናꬆ ላውሸ ስሞሶና።
PSA 59:15 ኤንቲ ምያባ ደማናዉ ቶይላቶሶና፤ ካሎና አትዳ ላውያ ካና ግዶሶና።
PSA 59:16 ሽን ታኒ ነ ዎልቃ ሳባና፤ ዎንታ ነ ሲቁዋ የፃና። ኔኒ ታዉ ታ ዋይያ ጋላስ፥ ታ ባቃታ አትያ በሰነ ሚፃ።
PSA 59:17 አቤት ታዉ ዎልቃ ግድዳ ፆሳዉ፥ ታ ነና ሳባና። ታ ቆሰታዳ አትያ በሳይነ ሲቁዋ ታና በሲያ ፆሳይ ነና።
PSA 60:1 ማሰጰፆመንነ ሶባላን ደእዳ አራመ አሳራ ኦለትዳ ዎደነ እዮኣብ ጉየ ስሚድ ማፅነ ዛንጋራን ታማነ ናምኡ ሙኩሉ ኤዶመ አሳ ዎꬍዳ ዎደ ዳዊቲ ዛማረታ ሀላቃስ ፃፍዳ ዎሳ “ጪሻ ጩ” ጌተትያ ማርካተꬃ ዎሳ አቤት ፆሳዉ፥ ነ ኑና አጋዳሳ፤ ኑና መንርꬃዳሳ። ነ ኑና ሀንቀታዳሳ፤ ሽን ሀእ ኑና ዛራ፥ ምንꬃ ኤሳ።
PSA 60:2 ነ ቢታ ቃꬃዳሳነ ዛእሳዳሳ፤ ቢታይ ኮኮርያ ግሾ፥ ነ እያ ዛኡዋ ኩንꬃ።
PSA 60:3 ኔኒ ነ አሳ መቶ በሳዳሳ፤ ኑና ጋንድጋርስያ ዎይነ ኡሻዳሳ።
PSA 60:4 ነዉ ያየይሳት ባንታ ሞርከ ዶንገፈ አታና መላ ማላ እማዳሳ። ሳላሀ
PSA 60:5 ነ ሲቀይሳት አታና መላ፥ ነ ኡሻቻ ኩሸን ኑና አሻ፤ ኑና አላ።
PSA 60:6 ፆሳይ ባ ጌሻ በሳን ሀይሳዳ ያግስ፤ “ታኒ ፆናዳ ሴከማ ቢታ ሻካና፤ ሱኮታ ዛንጋራ ዋꬋና።
PSA 60:7 ጋላድ ታባ፤ ምናሰይካ ታሳ፤ ኤፍሬም ታ ሁጰ አሽያ ብራታ ቆቤ፤ ይሁድ ታ ካዎታ ፃምኣ።
PSA 60:8 ሞአበይ ታ ሜጨትያ ከረ፤ ኤዶመይ ታባ ግደይሳ ኤርሳናዉ፥ ታ ጫማ እያ ቦላ ዎꬃይስ፤ ታኒ ፍልስፄመ ፆናዳ ገሬራይስ” ያግስ።
PSA 60:9 ግምበትዳ ካታማኮ ታና ኦነ ኤፋናይ? ኤዶመ ጋካናዉ ታና ኦነ ካለꬃናይ?
PSA 60:10 አቤት ፆሳዉ፥ ኑና አግዳይ ነና ግድኪ? አቤት ፆሳዉ ኔኒ ኑ ኦላንቾታራ ኦላስ ከያካ።
PSA 60:11 አሳ ማዶይ ፓꬆና ግሾ፥ ሞርከታራ ኦለታናዉ ነ ኑና ማዳ።
PSA 60:12 ፆሳ ዎልቃን ኑ ሞርከታ ፆናና፤ እ ኑ ሞርከታ የꬋና።
PSA 61:1 ዳዊታ ማዝሙረ አቤት ፆሳዉ፥ ነ ታ ዎሳ ስአ፤ ታ ዎሳ ሀይዛ።
PSA 61:2 ታኒ ቢታ ጋፃን ደእሽን፥ ታ ዎዛናይ ኡፋይስ ቃንፅዳ ዎደ፥ ታ ነና ፄጋይስ። ታፐ ꬎቃ ዛላኮ፥ ታና ካለꬃ።
PSA 61:3 ነ ታዉ ቆታነ ታ ሞርከታፐ ናገትያ ምኖ ሚፃ።
PSA 61:4 ታኒ ነ ዱንካንያን መርናዉ ዳርክናሽን! ታኒ ነ ቀፍያ ሀጳ ጋርሳን ሳሮ አታርክናሽን! ሳላሀ
PSA 61:5 አቤት ፆሳዉ፥ ነ ታ ቃንገꬃ ስአዳሳ፤ ነ ሱንꬃ ያየይሳታራ እስፈ ታዉ ላታ እማዳሳ።
PSA 61:6 ካዋ ላይꬃ አዱሳ፤ እ የለተꬃፈ የለተꬃ ጋካናዉ ደኦ።
PSA 61:7 እ ፆሳ ስንꬃን መርናዉ ካዎቶ፤ ነ ሲቁዋንነ ነ ቱማን እያ ናጋ።
PSA 61:8 ሄሳ ግሾ ታ ቃንገꬃ ጋላስ ጋላስ ጋꬃና፤ ነ ሱንꬃ ኡባ ዎደ ሳባና።
PSA 62:1 ዳዊቲ ዛማረታ ሀላቃ ኤዶታመስ ፃፍዳ ማዝሙረ ፆሳ ፃላላን ታ ሸምፖ ደማስ፤ ታ አቶተꬃይ እያፐ ዬስ።
PSA 62:2 እያ ፃላል ታ ዛላነ ታ አቶተꬃ፤ እ ታ ቆሰትያ አትያ በሲ ግድያ ግሾ ዳጋምከ።
PSA 62:3 ዎዳና ሀንያ ጎዳነ ቃፅያ ድርስ ዳንያ ኡራ ዎꬋናዉ፥ ህንተ አዉደ ጋካናዉ ደንደቲ?
PSA 62:4 ኤንቲ እያ ቦንቾ በሳፈ ደንꬃናዉ ኮዮሶና፤ ኤንቲ ዎርዶን ኡፋይቶሶና። ባንታ ዶናን አንጆሶና፤ ሽን ባንታ ዎዛናን ባዶሶና። ሳላሀ
PSA 62:5 ታ ሸምፐተ! ፆሳ ፃላላ ስእ ጋዳ ናጋ፤ ታ ኡፋይሳይ እያፐ ዬስ።
PSA 62:6 እያ ፃላል ታ ዛላነ ታ አቶተꬃ፤ ታኒ ቆሰትያ በሲ ግድያ ግሾ ዳጋምከ።
PSA 62:7 ታ አቶተꬃይነ ታ ቦንቾይ ፆሳና፤ እ ታ ምኖ ዛላነ ታ ሚፃ።
PSA 62:8 አሳዉ፥ ኡባ ዎደ ፆሳን አማነትተ፤ እ ህንተዉ ገሸ ግድያ ግሾ፥ ህንተ ቆፋ እያዉ ኦድተ። ሳላሀ
PSA 62:9 አስ፥ እስ ቶሆ ሸምፕያ ጫርኮ መላ፤ ጎባ አስ ኡባይ ማዶና ሀዳ። ምዛነን ዎꬅን ኤንቲ ጫርኮ መላ፤ ኤንቲ እስ ቶሆ ሸምፕያ ጫርኮፈ ካዉዮሶና።
PSA 62:10 ቦንቀን አማነቶፍተ፤ ካይሶት ሺሽድ ዱረተꬃን ኦቶርቶፍተ። ህንተ ዱረተꬃይ ዳርኮካ፥ ህንተ ዎዛና እያ ቦላ ዎꬆፍተ።
PSA 62:11 ፆሳይ እስ ቶሆ ኦድስ፤ ታኒ ናምኡ ኦዳ ስአስ፤ ዎልቅ ፆሳሳ።
PSA 62:12 መርና ሲቆይ ፆሳባ፤ አቤት ጎዳዉ፥ ነ አሳ ኡባስ እያ ኦሱዋዳ ኦሱዋዳ እማና።
PSA 63:1 ይሁዳ መላ ቢታን ደእያ ዎደ ዳዊታ ማዝሙረ አቤት ፆሳዉ፥ ነ ታ ፆሳ፤ ታ ዎዛናይ ነና ላሞቴስ፤ ታ አሾይካ ነና አሞቴስ። ሃꬅ ꬋይድ ጳልቀትዳ ቢታዳ፥ ታ አሳተꬃይ ነና ሳሞቴስ።
PSA 63:2 ታ ነና ጌሻ በሳን ፄላስ፤ ነ ዎልቃነ ነ ቦንቹዋ ታኒ በአስ።
PSA 63:3 ነ ሲቆይ ደኦፐ ሎእያ ግሾ፥ ታ እንፃርሳይ ነና ቦንቻና።
PSA 63:4 ታ ደኦ ላይꬃን ነና ጋላታና፤ ነ ሱንꬃን ታ ኩሽያ ፑደ ምጫና።
PSA 63:5 አስ ሎኦ ካꬅ ምድ ካለይሳዳ ታ ነናን ካላና። ታኒ ታ እንፃርሳን ኡፋይሳ የꬃን ነና ጋላታና።
PSA 63:6 ታኒ ታ ሂፃን ነና ሀሳያይስ፤ ቃማ ኩመꬃን ነባ ቆፓይስ፤
PSA 63:7 ነ ታና ማድያ ግሾ፥ ታ ነ ቀፍያ ኩያን ኡታዳ ኡፋይሳን የፃና።
PSA 63:8 ታ ሸምፕያ ኔራ ኦይከታሱ፤ ነ ኡሻቻ ኩሸይ ታና ኦይክድ ናጌስ።
PSA 63:9 ሽን ታና ዎꬋናዉ ኮየይሳት፥ ቢታ ጋርሳን ሞገታና።
PSA 63:10 ኤንቲ ማሻስ አꬍድ እመታና፤ ኤንቲ ሱꬉመስ ካሆ ግዳና።
PSA 63:11 ሽን ካዎይ ፆሳን ኡፋይታና። ፆሳ ሱንꬃን ጫቅያ ኡባይ እያ ጋላታና፤ ሽን ዎርዳንቾታ ዶናይ ጎርደታና።
PSA 64:1 ዛማረታ ሀላቃስ የፀትዳ ዳዊታ ማዝሙረ አቤት ፆሳዉ፥ ታ ኡንአ ዎሳ ስአ፤ ታ ሞርከታ ማንደꬃፈ፤ ታና አሻ።
PSA 64:2 ናጋራንቾታ ማቆፈነ ኢታታ ዱላታፐ ታና ገንꬃ።
PSA 64:3 ኤንቲ ባንታ እንፃርሳ ማሻ መላ ሌፍዶሶና፤ ኢታ ቃላታ ዶንገ ቶራዳ ማልድ የዶሶና።
PSA 64:4 ኤንቲ ቆሰትድ ፅሎ አስ ባንታ ዶንግያን ቆሆሶና፤ አኬክ ባይና ዱኮሶና፤ ያዮኮና።
PSA 64:5 ኤንቲ ባንታ ኢታ ማቁዋስ እሶይ እሱዋ ምንꬆሶና። ባንታ ፅህያ ዎꬃና በሳ ኮዮሶና፤ ኤንቲ፥ “ኑና ኦን በአኔ?” ያጎሶና።
PSA 64:6 ኤንቲ ኢታባ ማቀትሸ፥ “ኑኒ ሎኦ ማቆ ማቀትዳ” ያጎሶና፤ ሄስ አሳ ዎዛና ቆፍ ጪሞ ግደይሳ በሴስ።
PSA 64:7 ሽን ፆሳይ ኤንታ ባ ዶንግያን ዱካና፤ ኤንቲ አኬኮና ማዱንፃና።
PSA 64:8 ኤንታ ማቁዋ እ ኤንታ ቦላ ዛራና፤ ኤንታ በእያ ኡባይ ሁጰ ቃꬃና።
PSA 64:9 ሄ ዎደ አሳ ኡባይ ፆሳስ ያያና፤ እያ ኦሱዋ ኦዳናነ ዛር ዛር ቆፓና።
PSA 64:10 ፅሎት ጎዳን ኡፋይቶ፤ እያኮ ባቃትድ አቶ፤ ዎዛና ሱረት ኡባይ እያ ጋላቶ።
PSA 65:1 ዛማረታ ሀላቃስ የፀትዳ ዳዊታ ማዝሙረ አቤት ፆሳዉ፥ ፅዮነን ነዉ ጋላት በሴስ፤ ኑኒ ኑ ቃንገꬃ ነዉ ጋꬃና።
PSA 65:2 ኔኒ ዎሳ ስእያ ግሾ፥ አሳ ኡባይ ኔኮ ዮሶና።
PSA 65:3 ኑ ናጋራይ ኑና ሙክዳ ዎደ፥ ነ ኑስ አቶተꬅ እማዳሳ።
PSA 65:4 ነ ዶርዳይሳትነ ነ ዳባባን ዳና መላ ኔኮ ሺሽዳ አስ አንጀትዳይሳ። ኑኒ ነ ሶን፥ ነ ጌሻ ዱንካንያን ደእያ ሎኦባን ካሎስ።
PSA 65:5 አቤት ኑ አቶተꬃዉ፥ ማላልስያ ነ ፅሎ ኦሱዋን ኑስ ዛራ። ሳኣ ጋፃፐ ጋፃ ጋካናዉ፥ ሃሆን ደእያ ኡባስ ነ ኡፋይስ።
PSA 65:6 ኔኒ ነ ዎልቃን ደረታ ምንꬃዳሳ፤ ነ ዎልቃ ዳንጫዳሳ።
PSA 65:7 ኔኒ አባ ግርሳነ ቤታ ጉንꬃ ስእ ኦꬃሳ፤ ያርክያ አሳ ዋሱዋ እርፅሳሳ።
PSA 65:8 ነ ኦꬅዳ ማላታ ግሾ፥ ሳኣ ጋፃ ጋካናዉ ደእያ አሳ ኡባይ ነዉ ያያና፤ ዶሎሀፐ ዉሎሀ ጋካናዉ ደእያ አሳ ኡባ ኡፋይሳዳሳ።
PSA 65:9 ነ እራ እማዳ ቢታ ናጋሳ፤ ዳሮ ዱረያሳ፤ አሳስ ካꬃይ ዶላና መላ ፆሳ ሻፋይ ሃꬃን ኩምዳይሳ፤ ሄሳዳ ኦꬃዳ ነ ጊግሳዳሳ።
PSA 65:10 ጎሻስ ሃ እማሳ፤ ቢታ ሹግሳዳ ኦላ ኩንꬃሳ። ነ እራን ዛራዳ እርፅሳሳ፤ ካꬃይ ዶላና ድጫና መላ አንጃሳ።
PSA 65:11 ላይꬃ ካሎ ላይꬅ ኦꬃሳ፤ ነ አꬍያ በሳ ኡባይ ኩምድ ፓላሀና።
PSA 65:12 ሄንꬃ በሳታ ማታን ኩንꬃሳ፤ ዙማታ ኡፋይስ ማይዛሳ።
PSA 65:13 ነ ሄንꬃ በሳታ ዶርሳታ ኩንꬃሳ፤ ዛንጋራ ቢታን ካꬅ ኩንꬃሳ፤ ኤንቲ ኡፋይሳን እልልሸ የፆሶና።
PSA 66:1 ዛማረታ ሀላቃስ የፀትያ ሳባ ማዝሙረ ቢታ ኡባይ ህንተ ቃላ ꬎቁ ኦꬅድ፥ ኡፋይሳን ፆሳ ጋላትተ።
PSA 66:2 ፆሳ ሱንꬃስ ቦንቾን የፅተ፤ ቦንቾ ጋላታ እያዉ እምተ።
PSA 66:3 ፆሳስ ሀይሳዳ ያግተ፤ “ነ ኦሶት ዋንድ ማላልሲ? ነ ዎልቃይ ዳርዳ ግሾ፥ ነ ሞርከት ያሻን ነ ስንꬃን ኮኮሮሶና።
PSA 66:4 ቢታ ኡባይ ነና ጎይኔስ፤ ነና ሳቤስ፤ ነ ሱንꬃስ ጋላታን የፆሶና” ያግተ። ሳላሀ
PSA 66:5 ሃይተ፤ ፆሳይ ኦꬅዳባ በእተ፤ አሳ ግዶን ማላልስያ ኦሶ ኦꬅስ።
PSA 66:6 እ አባ ሃꬃ ሻክድ፥ ካሰ ኑ አዋት ዮርዳኖሰ ሻፋ ባንታ ቶሆን የꬍድ መላ ቢታራ ፕንዶሶና። ሄሳን እ ኦꬅዳባን ኑኒ ኡፋይትዳ።
PSA 66:7 እ ባ ዎልቃን መርናዉ ሃሬስ። ካዎተꬃታ ባ አይፈን ፄሌስ፤ ሄሳ ግሾ፥ ማካለይሳት እያ ቦላ ደንዶፎ። ሳላሀ
PSA 66:8 አሳዉ፥ ኑ ፆሳ ጋላትተ፤ ህንተ እያ ጋላትያ ጋላታይ ስኤቶ።
PSA 66:9 እ ኑና ፓፃ ዎꬅስ፤ ኑ ኩንዶና መላ ናግስ።
PSA 66:10 አቤት ፆሳዉ ነ ኑና ፓጫዳሳ፤ ብር ታማን ፓጨትድ ጌየይሳዳ ነ ኑና ጌሻዳሳ።
PSA 66:11 ነ ኑና ፅሄን ገልሳዳሳ፤ ኑ ዞኮን ዴፆ ቶሆ ዎꬃዳሳ።
PSA 66:12 ሞርከት ኑ ሁጰራ ቶግድ አꬋናዳ ኦꬃዳሳ፤ ኑ ሃꬃ ግዶራነ ታማ ግዶራ አꬍዳ፤ ሽን ሀእ ኑና እንጀ በሲ ኤሀዳሳ።
PSA 66:13 ታ ፁሳ ያርሾ ኤካዳ ነ ኬꬃ ገላና፥ ታ ቃንገꬃ ጋꬃና።
PSA 66:14 ታ መቶትዳ ዎደ ታ ዶናይ ግዳ ቃላ፥ ታ እንፃርሳፈ ከይዳ ቃንገꬃ ጋꬃና።
PSA 66:15 ታ ነዉ ሞꬉዋ፥ ፁሳ ያርሾ ኦꬃዳ ሺሻና። ማራዘታ ሳዎ ቶንኩ ግያ ያርሾ ኦꬃዳ ሺሻና፤ ኮርማነ ኮለታ ነዉ ያርሻና። ሳላሀ
PSA 66:16 ህንተኖ፥ ፆሳስ ያየይሳቶ፥ ኡባይ ሃ ይድ፥ ስእተ፤ ፆሳይ ታዉ ኦꬅዳባ ታ ህንተዉ ኦዳና።
PSA 66:17 ታ ቃላ ꬎቁ ኦꬃዳ ዎሳስ፤ ታ እንፃርሳን እያ ጋላታስ።
PSA 66:18 ታኒ ዎዛን ኤርሽን ናጋራ ገንꬅዳባ ግድያኮ፥ ጎዳይ ታና ስኤና።
PSA 66:19 ሽን ፆሳይ ቱማ ታና ስእስ፤ ታ ኦይሻ ዛርስ።
PSA 66:20 ፆሳይ ታ ዎሳ እፅቦና ግሾ፥ ባ መርና ሲቁዋ ታና ድግቦና ግሾ ጋላተቶ።
PSA 67:1 ዛማረታ ሀላቃስ ዲꬃን የፀትዳ ሳባ ማዝሙረ ፆሳይ ኑስ ቃቶ፤ ኑና አንጆ፤ እያ ሶምኦይ ኑ ቦላ ፖኦ። ሳላሀ
PSA 67:2 ነ ኦገይ ቢታ ቦላ፥ ነ አቶተꬃ ዎልቃይ፥ ካዎተꬃታ ኡባን ኤረቶ።
PSA 67:3 አቤት ፆሳዉ፥ አሳይ ነና ጋላቶ፤ አሳ ኡባይ ነና ጋላቶ።
PSA 67:4 ካዎተꬃይ ማላለትድ ኡፋይሳን የፆ፤ አይስ ጊኮ፥ ኔኒ አሳስ ፅሎተꬃን ፕርዳሳ፤ ሳአን ደእያ ካዎተꬃታ ካለꬃሳ። ሳላሀ
PSA 67:5 አቤት ፆሳዉ፥ አሳይ ነና ጋላቶ፤ ካዎተꬃት ኡባይ ነና ጋላቶ።
PSA 67:6 ቢታይ ካꬅ እማና፤ ፆሳይ፥ ኑ ፆሳይ ኑና አንጅስ።
PSA 67:7 ፆሳይ ኑና አንጅዳ ግሾ፥ ቢታ ጋፃ ጋካናዉ ደእያ አሳይ እያ ያዮ።
PSA 68:1 ዛማረታ ሀላቃስ የፀትዳ ዳዊታ ማዝሙረ ፆሳይ ደንዶ፤ እያ ሞርከት ላለቶ፤ እያ እፀይሳት እያ ስንꬃፈ ባቃቶ።
PSA 68:2 ጩያይ ጫርኮራ ደንድድ ꬋይስያ መላ፥ ሙቃድ ታማን ትልኤይሳዳ፥ ኢታት ፆሳ ስንꬃፈ ꬋዮ።
PSA 68:3 ሽን ፅሎት ሀሹ ጎ፤ ፆሳ ስንꬃን ኡፋይቶ፤ ኡፋይሳን እልሎ።
PSA 68:4 ፆሳስ የፅተ፤ እያ ሱንꬃ ሳቢተ፤ ሻራን በይሳስ ኦገ ከስተ፤ እያ ሱንꬃይ ጎዳ፤ እያ ስንꬃን ኡፋይትተ።
PSA 68:5 ፆሳይ ባ ደእያ ጌሻ በሳን፥ ይኦታስ አዋ፤ አምኤታስ ዳይና።
PSA 68:6 ፆሳይ ብዛታስ ሶ አስ እሜስ፤ ቃሾ ኬꬃን ደኤይሳታ ብርሽድ፥ ዱረተꬃን ዎꬄስ፤ ሽን ማካላንቾት ቃቃ ቢታን ደኦሶና።
PSA 68:7 አቤት ፆሳዉ፥ ኔኒ ነ አሳ ካለꬅዳ ዎደ፥ ነ ኤንታራ መላ ቢታ ካንꬅዳ ዎደ፥ ሳላሀ
PSA 68:8 ሲና ፆሳ ዩሳንነ፥ እስራኤለ ፆሳ ቆንጨꬃን ቢታይ ቃፅስ፤ ሳሎይ እራ እሚስ።
PSA 68:9 አቤት ፆሳዉ ኔኒ እራ ዳርሳዳ ቡክሳዳሳ፤ ላድዳ ቢታ ዛራዳ ኦራꬃሳ።
PSA 68:10 ነ አሳይ ያን ዱሱ ኦይክስ፤ አቤት ፆሳዉ፥ ነ ኬሀተꬃን ማንቆታስ ኮሽያባ ጊግሳዳ እማዳሳ።
PSA 68:11 ጎዳይ ኪትስ፤ ዳሮ ማጫሳት ሄ ኪታ ማርካትዶሶና።
PSA 68:12 ካዎትነ ኤንታ ኦላንቾት ባቃትድ ጉየ ስምዶሶና፤ ሶን አትዳ ማጫሳት ድኦ ሻከትዶሶና።
PSA 68:13 ጶልያ ዎርቃ ቀፈራ ደእያ፥ ብራፐ መትዳ ሆለ ምስለ ድእድ ደምያ ዎደ ህንተ ዶርሳ ከለን አይስ ዝንእደት?
PSA 68:14 ኡባ ዳንዳእያ ፆሳይ ካዎታ ላልዳ ዎደ፥ ፃልሞና ዙማ ቦላ ሻቻ ቡክስስ።
PSA 68:15 ባሳነ ዙማዉ፥ ዳሮ ፄር ደእያ ባሳነ ዙማዉ፥
PSA 68:16 ዳሮ ፄራት ደእያ ዙማቶ፥ ፆሳይ ዶርዳ ዙማ ህንተ አይስ ቃናትድ ፄሌቲ? ጎዳይ እያን መርናዉ ዳና።
PSA 68:17 ፆሳ ኦላ ፓራ ጋረት ታሙ ሙኩሉ ቶሆ ታሙ ሙኩላን ታይበቴስ፤ ጎዳይ ሲና ዙማፐ ባ ጌሻ በሳ ይስ።
PSA 68:18 ድኤትዳ ዳሮታ ኤክድ፥ ꬎቃ ከይስ፤ አሳፐ፥ ሀር አቶሽን ማካላንቾታፐ እሞ ኤክስ፤ ጎዳይ ፆሳይ ያን ዳና።
PSA 68:19 ጋላስ ጋላስ ኑ ቶሁዋ ቶክያ ጎዳይ ጋላተቶ፤ ፆሳይ ኑና አሸይሳ። ሳላሀ
PSA 68:20 ኑ ፆሳይ ኑና አሽያ ፆሳ ግደኔ? ሀይቆፐ አሽያ ፆሳይ እያ።
PSA 68:21 ፆሳይ ቱማ ባ ሞርከታ ሁጵያ ትንቻና፤ ናጋራ ኦገን ሄመትያ አሳ፥ ብናናን ካመትዳ ኤንታ ሊጵያ መንꬃና።
PSA 68:22 “ታኒ ህንተ ሞርከታ ባሳነፐ ዛራዳ ኤሀና፤ ታ ኤንታ ጪሞ አባፈ ከሳዳ ጉየ ኤሀና።
PSA 68:23 ሄስካ፥ ነ ሞርከታ ሱꬃ ነ ቶሆይ የꬋና መላነ ነ ካናትካ ሞርከ ሱꬃፈ ባንታ ግሹዋ ላጫና መላሳ” ያጌስ ጎዳይ።
PSA 68:24 አቤት ፆሳዉ፥ ነ ሳልፐይ፥ ታ ፆሳይ ታ ካዎይ ሳልፐይ፥ ፆሳ ኬꬅ ገልያ ዎደ ኡባስ በንቴስ።
PSA 68:25 የፀይሳት ስንꬃና፤ ዲፀይሳት ጉየና፤ ቃስ ካራቦ ባቅያ ጌላኦት ግዶና።
PSA 68:26 ህንተ “ፆሳ ግታ ሺቆን ጋላትተ፤ ህንተኖ፥ እስራኤለ አሳዉ፥ ጎዳ ጋላትተ” ያጎሶና።
PSA 68:27 ሄ ሳልፕያን ኡባፈ ካሎ ግድዳ ብንያመ ኮቻይ ኮይሮ ታይበቶሶና። ካልድ ይሁዳ ሀላቃት ባንታ ጩጋን ደኦሶና፤ ዉርሰꬃን ዛብሎና ሀላቃትነ ንፍታለመ ሀላቃት ታይበቶሶና።
PSA 68:28 አቤት ፆሳዉ፥ ነ ዎልቃ ቆንጭሳ፤ ካሰ ነ ኑስ ኦꬅዳይሳዳ፥ ነ ምኖተꬃ በሳ።
PSA 68:29 ሄሳ ግሾ፥ የሩሳላመን ደእያ ነ ኬꬃ ካዎት ይድ፥ ነዉ እሞታ እማና።
PSA 68:30 ዶአዳ ማቃ ግዶን ደእያ ግብፀ አሳታ ኔኒ ሴራ፤ ቦሩነ ማራ ዉደ ዳንያ ካዎተꬃታ ነ ሀንቀታ። ኤንቲ ጉልባትድ፥ ባንታ ብራ ነዉ እማና ጋካናዉ፥ ኔኒ ኤንታ ሴራ፤ ኦለታናዉ ዬሞትያ አሳታ ላላ።
PSA 68:31 ኪተትዳ ሀላቃት ግብፀፈ ያና፤ ቶጰይ ባ ኩሽያ ፆሳኮ ምጫና።
PSA 68:32 ህንተኖ፥ ሳኣ ካዎተꬃቶ፥ ፆሳስ የፅተ። ሳላሀ
PSA 68:33 በንፐ ደእያ ሳሎታፐ ቦላራ በይሳስ፤ ባ ዎልቃማ ግርሳን ባ ጉንꬃ ስሰይሳስ የፅተ።
PSA 68:34 ፆሳ ዎልቃባ አዋጅተ፤ እያ ግታተꬃይ እስራኤለ ቦላና፤ እያ ዎልቃይካ ሳሎና።
PSA 68:35 ፆሳይ ባ ጌሻ አሳ ቦላ ማላልሴስ፤ እስራኤለ ፆሳይ ባ አሳስ ምኖተꬅነ ዎልቃ እሜስ። ፆሳይ ጋላተቶ።
PSA 69:1 ዳዊታ ማዝሙረ ሃꬅ ታዉ ቆ ጋክዳ ግሾ፥ አቤት ፆሳዉ፥ ታና አሻ።
PSA 69:2 ኤቅያ በሲ ባይና ጪሞን ምተታስ፤ ጪሞ ሃꬃ ግዶ ገላስ፤ ሃꬃ ዙለይ ታ ቦላራ አꬍስ።
PSA 69:3 ማዶ ደማናዉ ዋሳሸ ዳቡራስ፤ ታ ኮቶኖይ መልስ። ታ ፆሳ ፄልሽን፥ ታ አይፈይ ተልጁምስ።
PSA 69:4 ታና ጮ እፀይሳት ታ ሁጰ ብናናፐ ዳሮ፤ ዎርዶን ታና ሞርከይሳትነ ꬋይሳናዉ ኮየይሳት ዳሮ፤ ታ ካይሶቶናባ ዛራ ግዶሶና።
PSA 69:5 አቤት ፆሳዉ፥ ታ ኤያተꬃ ነ ኤራሳ፤ ታ ባላይ ኔፐ ጌምቤና።
PSA 69:6 አቤት ኡባፈ ዎልቃማ ጎዳዉ፥ ነና ኡፋይሳን ናገይሳት ታ ጋሶን ዬላቶፖ። አቤት እስራኤለ ፆሳዉ፥ ነና ምንꬅድ ኮየይሳት ታ ጋሶን ካዉዮፎ።
PSA 69:7 ታ ነ ግሾ ጫሸ ዳንዳአስ፤ ታ ሶምኦይ ዬላ ማእዳይ ነ ግሾሳ።
PSA 69:8 ታኒ ታ እሻታስ እማ፥ ታ አየ ናይታስ አላጋ ግዳስ።
PSA 69:9 ታኒ ነ ኬꬃስ ምሸትያ ምሻይ ታና ታማዳ ፁጌስ፤ ነና ጫይያ ጫሻይ ታ ቦላ ዎꬍስ።
PSA 69:10 ታኒ ፆማን ታና ካዉሽዳ ዎደ፥ ታና ጫይዶሶና።
PSA 69:11 ታኒ ካዮ ማኦ ማእዳ ዎደ፥ ኤንታዉ ካሳስ አታስ።
PSA 69:12 ካታማ ፐንገን ኡተይሳታስ ዝግርሳስ አታስ፤ ማꬆተይሳት ታባ የꬅ ከስዶሶና።
PSA 69:13 ሽን ጎዳዉ፥ ታ ነና ዎሳይስ፤ አቤት ፆሳዉ፥ ነ ዶስያ ዎደ፥ ነ መርና ሲቁዋን፥ ነ አቶተꬃን ታዉ ዛሮ እማ።
PSA 69:14 ስልሞን ምተቶናዳ ታና አሻ፤ ታ ሞርከታፐ ታና አሻ፥ ጪሞ ሃꬃን ምተተꬃፈ ታና አሻ።
PSA 69:15 ድኦ ሃꬃይ ታና ሙኮፎ፤ ጪሞ ሃꬃይ ታና ምቶፎ፤ ዝቃ ኦላይ ባ ዶና ታ ቦላ ጎርዶፎ።
PSA 69:16 አቤት ጎዳዉ፥ ነ መርና ሲቁዋ ሎኦተꬃን፥ ታዉ ዛሮ እማ፤ ነ ግታ ማሮታን ታኮ ስማ።
PSA 69:17 ነ አይልያፈ ነ ሶምኡዋ ገንꬆፋ፤ ታኒ ኡንአን ደእያ ግሾ ታዉ ኤለ ዛሮ እማ።
PSA 69:18 ታኮ ሺቃ፤ ታና ዎዛ፤ ታ ሞርከታፐ ታና ላአ ከሳ።
PSA 69:19 ታ ጫሻ፥ ዬላነ ካዉሻተꬃ ነ ኤራሳ፤ ታ ሞርከታ ኡባ ነ በኣሳ።
PSA 69:20 ጫሻይ ታና ሀርጋንቾ ኦꬅስ፤ ታዉ ቃትያ አስ ኮያስ። ሽን እስ አስካ ደማብከ፤ ታና ምንꬅያ አስ ፄላስ፤ ሽን በንትቤና።
PSA 69:21 ታ ካꬃን ጪየ ዋላክዶሶና፤ ታ ሳሙዋስ ጫላ ኡሽ እምዶሶና።
PSA 69:22 ኤንታ ጋይታይ ኤንታዉ ፅሄ ግዶ፤ ኤንታ ያርሾይ ኤንታዉ ፅሄ ግዶ።
PSA 69:23 ፄሎናዳ ኤንታ አይፈይ ጎዘቶ፤ ኤንታ ዞኮይ ኩኖ።
PSA 69:24 ነ ሀንቁዋ ኤንታ ቦላ ትጋ፤ ሱልያ ነ ሸነይ ኤንታ የደꬆ።
PSA 69:25 ኤንታ ካምበይ ካይስ ግዶ፤ ኤንታ ዱንካንያን ደእያ አስ ꬋዮ።
PSA 69:26 ነ ሴርዳይሳታ ኤንቲ የደꬅዶሶና፤ ነ ማዱንፅስዳይሳታ ኤንቲ ዬሶሶና።
PSA 69:27 ኤንቲ ናጋራ ቦላ ናጋራ ጉጃና መላ አጋጋ፤ ነ ማሮተꬃፈ ኤንታ አይብካ ጋኮፎ።
PSA 69:28 ኤንቲ ደኦ ማፃፋፐ ቁሸቶ፤ ፅሎ አሳራ ማዝጋበቶፎ።
PSA 69:29 ታ ዋየንነ ኡንአን ደአይስ፤ አቤት ፆሳዉ፥ ታና አሻዳ፥ ሳሮ በሳን ዎꬃ።
PSA 69:30 ታኒ ፆሳ ሱንꬃ ማዝሙረን ጋላታና፤ ጋላታ እሞን እያ ግታያና።
PSA 69:31 ሄስ ቦራ ያርሾፈ፥ ዎይኮ ካጫማ ኮርማ ያርሾፈ፥ አꬍድ፥ ጎዳ ኡፋይሴስ።
PSA 69:32 ናቀትዳይሳት ሄሳ በአና፤ ኡፋይታና፤ ህንተኖ፥ ፆሳ ኮየይሳቶ፥ ህንተ ዎዛናይ ምነቶ።
PSA 69:33 ጎዳይ ማንቆታ ስኤስ፤ ቃሾ ኬꬃን ደእያ ባ አሳ ካና።
PSA 69:34 ሳሎይ፥ ሳእነ አባይ፥ እያ ግዶን ደእያ ዎፅ ቃፅያ ኡባይ ጎዳ ጋላቶ።
PSA 69:35 ፆሳይ ፅዮነ አሻና፤ ይሁዳ ካታማ ዛሪድ ኬፃና፤ አሳይ ያን ዳናነ ቢታይካ ኤንታባ ግዳና።
PSA 69:36 እያ አይለታ ናይት ሄ ቢታ ላታና፤ እያ ሱንꬃ ዶሰይሳት ያን ዳና።
PSA 70:1 ዳዊታ ቆፍሶ ማዝሙረ አቤት ፆሳዉ ታና አሻናዉ ሃ ስማ፤ አቤት ጎዳዉ፥ ታና ማዳናዉ ኤለሳ።
PSA 70:2 ታና ዎꬋናዉ ኮየይሳት፥ ዬላቶናነ ሀንያባ ꬋዮ። ታ ቆሄተꬃ አሞተይሳት፥ ካዉይድ ጉየ ስሞ።
PSA 70:3 ታኮ እያዉ “ሀሹ! ሀሹ!” ግዳይሳት ፆነትዳ ግሾ ዬላቶ።
PSA 70:4 ነና ኮይያ ኡባይ ነናን ኡፋይቶነ ማላለቶ። ቃስ ነ አቶተꬃ ዶስያ ኡባይ፥ “ፆሳይ ግታቶ” ያጎ።
PSA 70:5 ታኒ ማንቆነ መቶታንቾ፤ አቤት ፆሳዉ፥ ኤለሳዳ ታኮ ሃያ። ታ ማደይነ ታና አሸይ ነና ግድያ ግሾ፤ አቤት ጎዳዉ፥ ጋምኦፋ።
PSA 71:1 ጎዳዉ፥ ታኒ ኔኮ ባቃታዳ አትያ ግሾ፥ አዉደካ ታና ዬላዮፓ።
PSA 71:2 ነ ፅሎተꬃን ታና ናጋ፤ ነ ሀይꬃ ታኮ ዛራ፤ ታና አሻ።
PSA 71:3 ኔኒ ታ ኡባ ዎደ ጌማዳ አትያ ዛላ ታኒ ጌማዳ አታና መላ ምኖ ሚፃ ግዳ፤ ኤ፥ ኔኒ ታ ዛላነ ታ ሚፃ።
PSA 71:4 ታ ፆሳዉ፥ ኢታታ ኩሸፐነ፥ ቃይ ባይና አሳታፐ ታና አሻ።
PSA 71:5 አቤት ጎዳዉ፥ ታ ናአተꬃፈ ዶማዳ፥ ኔኒ ታ ኡፋይሳነ ታ አማነተꬃ።
PSA 71:6 ታ የለትዳ ዎደፐ ዶማዳ ነናን ዘምፓስ፤ ታ አየ ኡሎፐ ታና ከስዳይ ነና፤ ታኒ ኡባ ዎደ ነና ጋላታና።
PSA 71:7 ኔኒ ታ ቆሰታዳ አትያ በሲ ግድዳ ግሾ፥ ታ ደኦይ ዳሮ አሳስ ሌምሶ ግድስ።
PSA 71:8 ጋላሳ ኡባን ታ ዶናይ ነ ጋላታንነ ነ ቦንቹዋን ኩምስ።
PSA 71:9 ታኒ ጭምዳ ዎደ ታና የጎፋ፤ ታ ዎልቃይ እፅዳ ዎደ ታና አጎፋ።
PSA 71:10 ታ ሞርከት ታ ቦላ ቶቦሶና፤ ታና ዎꬋናዉ ኮየይሳት ታ ቦላ ማቀቶሶና።
PSA 71:11 ኤንቲ፥ “ፆሳይ እያ አግስ፤ የደꬅድ ኦይኮስ፤ እያ አሻናይ ኦንካ ባዋ” ያጎሶና።
PSA 71:12 ፆሳዉ፥ ታፐ ሃኮፋ ታ ፆሳዉ፥ ታና ማዳናዉ ኤለሳ።
PSA 71:13 ታና ሞተይሳት ዬላትድ ꬋዮ፤ ታና ቆሀናዉ ኮየይሳት፥ ዬላነ ካዉሸ ማኦ።
PSA 71:14 ሽን ታኒ ኡባ ዎደ ኡፋይሳን ነና ናጋና፤ ዛራ ዛራዳካ ነና ጋላታና።
PSA 71:15 ነ ኦꬅዳባ ታ ታይባናዉ ፆነትኮካ፥ ታ ዶናይ ጋላስ ኡባን ነ ፅሎተꬃነ ነ አቶተꬃባ ኦዳና።
PSA 71:16 ታኒ ኡባ ሃርያ ጎዳ ዎልቃን ያዳ፤ ነ ፃላላ ፅሎ ግደይሳ አዋጃና።
PSA 71:17 ፆሳዉ፥ ኔኒ ታ ናአተꬃፈ ዶማዳ ታና ታማርሳዳሳ፤ ሀእካ ነ ማላልስያ ኦሱዋ ታ ኦዳና።
PSA 71:18 ፆሳዉ ነ ዎልቃነ ነ ምኖተꬃን ያ የለታ ኡባስ ኦዳና ጋካናዉ፥ ታኒ ጭማዳ ፑሉምኮካ ታና አጎፋ።
PSA 71:19 ፆሳዉ፥ ነ ፅሎተꬃይ ሳሎ ጋክስ፤ ግታባ ኦꬅዳ ፆሲ፥ ነ መል ኦኔ?
PSA 71:20 ኔኒ ታ ቦላ ዳሮ መቶ ኤሀዳሳ፤ ግዶሽን ታ ደኡዋ ዛራዳ ኦራፅሳዳሳ፤ ኔኒ ታና ቢታ ጋርሳፈ ከሳዳሳ።
PSA 71:21 ኔኒ ታ ቦንቹዋ ዳርሳዳሳ፤ ታና ዛራዳ ምንꬃዳሳ።
PSA 71:22 ታ ፆሳዉ፥ ነ ቱማተꬃ ግሾ፥ ታ ነና ዲꬃን ጋላታና። አቤት እስራኤለ ጌሻዉ፥ ታ ነና ማስንቆን ሳባና።
PSA 71:23 ታ መተርሻይ ኡፋይሳን ꬎቁ ኦꬅድ የፄስ፤ ኔኒ ታና አሽዳ ግሾ ታኒ ነና ሳባና።
PSA 71:24 ታና ቆሀናዉ ኮየይሳት ዬላትዳ ግሾነ ካዉይዳ ግሾ ታ እንፃርሳይ ነ ፅሎ ማዱዋባ ጋላስ ኡባን ኦዳና።
PSA 72:1 ሶሎሞነ ማዝሙረ ፆሳዉ፥ ነ ሱረ ፕርዳ ካዋስ፥ ነ ፅሎተꬃ ካዋ ናኣስ እማ።
PSA 72:2 እ ነ አሳስ ፅሎተꬃን ፕርዳና፤ ቆሄትዳይሳታስ ሱረን ዳይናታና።
PSA 72:3 ደረት ዱረተꬅ፥ ዙማት ፅሎተꬃ አይፈ ነ አሳስ አይፎ።
PSA 72:4 ካዎይ ቆሄትዳይሳታ ግሾ ሞተቶ፤ ማንቆታ አሾ፤ ኡንኤይሳታ መንꬆ።
PSA 72:5 ፆሳዉ፥ እ አዋዳነ አጌናዳ ደኦ፤ የለተꬃፈ የለተꬃ ጋካናዉ ደኦ።
PSA 72:6 ካዎይ ጎሻን ቡክያ እራ መላነ ቢታ ካልስያ ፑሰ እራ መላ ግዶ።
PSA 72:7 እያ ላይꬃ ኡባን ፅሎ አሳት ዳዮ፤ አጌን ꬋያና ጋካናዉ ሳሮተꬅ ዳሮ።
PSA 72:8 አባፈ አባ ጋካናዉ፥ ኤፍራፂሳ ሻፋፐ ሳኣ ጋፃ ጋካናዉ እ ሃሮ።
PSA 72:9 ባዞን ደእያ አሳት እያ ጎይኖ፤ እያ ሞርከት ባና ላጮ።
PSA 72:10 ታርሰሳነ ዩሾይ አባን ተቀትዳ ቢታታ፥ ካዎት እያዉ ጊራ ጊሮ፤ አራበነ ቶጰ ካዎት እያዉ እሞታ ኤሆ።
PSA 72:11 ካዎት ኡባይ እያዉ ጉልባቶ፤ ካዎተꬃት ኡባይ እያዉ ኪተቶ።
PSA 72:12 እያኮ ዋስያ ማንቆታ፥ ቆሄትዳይሳታነ ማዶይ ባይናይሳታ እ አሻና።
PSA 72:13 ማንቆታስነ ዳቡራንቾታስ እ ቃቴስ፤ ማንቆታ ሸምፑዋ ሀይቆፐ አሼስ።
PSA 72:14 ኤንታ ሱꬃይ እያ ስንꬃን አልኦ ግድያ ግሾ፥ እ፥ ኤንታ ቆሆፐነ ኢታፐ ዎዛና።
PSA 72:15 ካዎይ ዳሮ ላይꬅ ጋምኦ፤ አራበ ቢታ ዎርቃይ እያዉ ዮ። አሳይ እያ ግሾ ኡባ ዎደ ዎሶ፤ ጋላስ ኡባን እ አንጀቶ።
PSA 72:16 ቢታን ካꬅ ፓላሆ፤ ደረት ካꬃን ካመቶ። ልባኖሰ ደርያ ቦላ ካꬅ አይፍያዳ አይፎ፤ ደንብ ማታን ኩምያዳ አሳይ ካታማ ኩሞ።
PSA 72:17 ካዋ ሱንꬃይ መርናዉ ደኦ፤ አዋዳ ኡባ ዎደ ፄገትሸ ጋምኦ። አሳ ኡባይ እያ ባጋራ አንጀታና፤ ካዎተꬃት እያ “አንጀትዳይሳ” ያጋና።
PSA 72:18 ማላልስያባ ባርካ ኦꬅያ ጎዳይ፥ ፆሳይ እስራኤለ ፆሳይ ጋላተቶ።
PSA 72:19 እያ ቦንቾ ሱንꬃይ መርናዉ ጋላተቶ፤ እያ ቦንቾይ ሳአ ኡባ ኩሞ።
PSA 72:20 እሰየ ናኣ ዳዊታ ዎሳይ ሀይሳን ፖለትስ።
PSA 73:1 አሳፋ ማዝሙረ ቱማ ፆሳይ እስራኤለስ ሎኦ፤ ዎዛና ጌሻታስ እ ኬሀ።
PSA 73:2 ሽን ታ ቶሆይ ꬉበታናዉ ጉꬁ አትስ፤ ታ ታንጎይ ሀልፃናዉ ማትስ።
PSA 73:3 ሄስ ሀንዳይ ኢታ አሳትነ ኦቶራንቾት፥ ዱረትሽን ታኒ በአዳ ቃናትዳ ግሾሳ።
PSA 73:4 ኤንታ ዋየይ ጋኮና ግሾ፥ ኤንታ አሳተꬃይ ፓያነ ምኖ።
PSA 73:5 ኤንቲ ሀራ አሳዳ ዋየቶኮና፤ ሀራ አሳዳ መቶን ሾጨቶኮና።
PSA 73:6 ሄሳ ግሾ፥ ኦቶሮይ ኤንታዉ ቆ አሌቆ መላ፤ ቡቀꬅ አፍላዳ ማእዶሶና።
PSA 73:7 ኤንታ ዎዛናይ ኢታባ ፑልቴስ፤ ኤንታ ቆፋይ ኢታ ሀልቾን ኩምስ።
PSA 73:8 ኤንቲ ቀልቅሶሶና፤ ኢታባ ሃሳዮሶና፤ ባንታ ኦቶሩዋን ሀራታ ኡንኤꬆሶና።
PSA 73:9 ባንታ ዶና ፆሳ ቦላ ዶዮሶና፤ ባንታ እንፃርሳ አሳ ቦላ አዱሶሶና።
PSA 73:10 ሀር አቶሽን፥ ፆሳ አሳይ ኤንታኮ ስማና፤ ኤንቲ ኦድያባ ኤሶን አማናና።
PSA 73:11 ኤንቲ፥ “ፆሲ አይኮ ኤሪ? ኡባፈ ꬎቃ ፆሳስ ኤራተꬅ ደኢ?” ያጎሶና።
PSA 73:12 ህዛ ኢታት ሀይሳ መላ፤ ኡባ ዎደ እንጀትን ደኦሶና፤ ኤንቲ ጉጅ ጉጅ ዱረቶሶና።
PSA 73:13 ህዛ ታኒ ታ ዎዛና ጌሻተꬃን ናግዳይ፥ ፅሎተꬅ በሳናዉ ታ ኩሽያ ሜጨትዳይ መላ።
PSA 73:14 ጋላሳ ኩመꬅ ታኒ መቶን ሾጨታስ፤ ዎንታ ዎንታ ሴረታስ።
PSA 73:15 ታኒ ኢታ አሳታዳ ኦደትዳኮ፥ ነ አሳስ አማነቶና አታናሽን።
PSA 73:16 ታኒ ሀ ኡባ ኤራናዉ ቆፕያ ዎደ፥ ታዉ ዴፆ ግድስ።
PSA 73:17 ሄስካ ታኒ ፆሳ ኬꬃ ገላና ጋካናዉነ ኢታ አሳታ ዉርሰꬃ ቃዳ አኬካና ጋካናሳ።
PSA 73:18 ቱማ ኔኒ ኤንታ ሀልፅያ በሳን ኡትሳዳሳ፤ ኤንቲ ኩንድድ ꬋያና መላ ኦꬃሳ።
PSA 73:19 ኤንቲ ኤለስድ ꬋይዶሶና፤ ዳጋማን እሶይ አቶና ዉርዶሶና።
PSA 73:20 አሙሆይ ባርክያ ዎደ ባለተይሳዳ፥ አቤት ጎዳዉ፥ ኔኒ ደንድያ ዎደ፥ ኤንቲ ዶገታና።
PSA 73:21 ታኒ ይሎትዳ ዎደነ ታ ዎዛናን ጫመትዳ ዎደ፥
PSA 73:22 አኬኮና ኤያ አስ ግዳስ፤ ነ ስንꬃን መሄ ግዳስ።
PSA 73:23 ሽን ታኒ ኡባ ዎደ ኔራ ደአይስ፤ ታ ኡሻቻ ኩሽያ ኔኒ ኦይካዳሳ።
PSA 73:24 ነ ዞርያን ታና ካለꬃሳ፤ ዉርሰꬃን ታና ቦንቾን ኤካሳ።
PSA 73:25 ታዉ ሳሎን ኔፐ አትሽን፥ ሀር ኦን ደኢ? ታኒ ኔፐ አትሽን፥ ሳአን ሀራ አሞትከ።
PSA 73:26 ታ ዎልቃይነ ታ ዎዛናይ ዳቡራናዉ ዳንዳኤስ፤ ሽን ፆሳይ ታ ዎዛና ምኖተꬃነ መርናዉ ታና ጋክዳ ሳማ።
PSA 73:27 ኔፐ ሃከይሳት ꬋያና፤ ነና ካደይሳታ ኡባ ነ ዉርሳና።
PSA 73:28 ሽን ታዉ ፆሳኮ ሺቆይ ሎኦ፤ እያ ኦሶ ኡባ ታኒ ኦዳና መላ፥ ኡባ ሃርያ ጎዳ ቆሰትድ አትያ በሰ ኦꬃስ።
PSA 74:1 አሳፋ ትምርተ አኬካን ፃፍዳ ግንፆ ፆሳዉ ኔኒ ኑና አይስ መርናዉ አጋዲ? ነ ቆሩዋን ደእያ ነ ዶርሳታ ቦላ ነ ሀንቆይ አይስ ኤፅዴ?
PSA 74:2 ኔኒ በን ዶርዳ አሳ፥ ነዉ ቡዞ ኦꬃዳ ዎዝዳ ኮቻታ ሀሳያ፤ ኔኒ ደእዳ ፅዮነ ዙማ ቆፓ።
PSA 74:3 ላለትዳ ነ ኬꬃ ያዳ ፄላ፤ ሞርከት ያን ደእያባ ኡባ ꬋይስዶሶና።
PSA 74:4 ነ ሞርከት ነ ኬꬃን፥ “ኑ ፆንዳ” ያግድ ገሬርዶሶና። ፆኖ ማላታ ግድዳ ባንታ ባንድራ ኤስዶሶና።
PSA 74:5 ኤንቲ ምꬅ ቃንፃናዉ ዎራ ግዶን ኤቅድ፥ ባንታ ካልታ ደንꬅዳ አሳታ ዳኖሶና።
PSA 74:6 ኤንቲ ኩሸ ሂላን አሌቅዳ ኦሶታ ኡባ፥ ባንታ ካልታንነ ናርቃን መንረꬅዶሶና።
PSA 74:7 ነ ኬꬃ ታማን ፁግድ ꬋይስዶሶና፤ ነ ሱንꬃይ ፄገትያ በሳ ቱንስዶሶና።
PSA 74:8 ባንታ ዎዛናን፥ “ኑ ኩመꬅ ꬋይሳና” ያግዶሶና፤ ቢታን ደእያ አስ ፆሰ ጎይንያ በሳታ ታማን ፁግዶሶና።
PSA 74:9 ሄ ዎደ ማላት ኑስ እመተና፤ ናበይካ ዴና። ሄስ አዉደ ጋካናዉ ጋምአነኮ፥ ኤርያ አስ ኑ ግዶን ባዋ።
PSA 74:10 ፆሳዉ፥ ነ ሞርከት አዉደ ጋካናዉ፥ ነ ቦላ ቀልቅሳኔ? ኤንቲ ነ ሱንꬃ መርናዉ ጫያኔ?
PSA 74:11 ነ ኡሻቻ ኩሽያ አይስ ሺሻ ኤካይ? ነ ኡሻቻ ኩሽያ ነ አፍላ ግዶፈ ከሳዳ ኤንታ ꬋይሳ።
PSA 74:12 ግዶሽን፥ አቤት ፆሳዉ፥ ኔኒ በንፐ ታ ካዋ፤ ነ ዳሮ ዎደ አሻዳሳ።
PSA 74:13 ነ ግታ ዎልቃን አባ ሻካዳሳ፤ እያ ግዶን ደእያ ዶኣ ሁጰታ ዶንጫዳሳ።
PSA 74:14 ሌዋታነ ጌተትያ ዳውያ ሁጰታ ዶንጫዳ፥ እያ አሹዋ ባዞን ደእያ መተꬃታስ ካꬅ ኦꬃዳ እምዳይ ነና።
PSA 74:15 ኔኒ ፑልቶታ ዶያ የዳዳሳ፤ ኡባ ዎደ ጎግያ ሻፋታ መልሳዳሳ።
PSA 74:16 ጋላሳይ ነባ፤ ቃማይካ ነባ፤ አዋነ አጌና ኤንታ በሳን ዎꬅዳይ ነና።
PSA 74:17 ቢታስ ዛዋ ዎꬅዳይ፥ ባልጎነ ቦነ መꬍዳይ ነና።
PSA 74:18 አቤት ጎዳዉ፥ ነ ሞርከት ነና ዋት ቀልቅስዳኮ፥ ኤያ አሳት ነ ሱንꬃ ዋት ጫይዳኮ ሀሳያ።
PSA 74:19 ነ ሆልያ ሸምፑዋ ዶኣስ አꬃዳ እሞፋ፤ መቶታንቾታ መርናዉ ዶጎፓ።
PSA 74:20 ኑ ቢታን ደእያ ꬉማ በሲ ኡባይ ማካላንቾታን ኩምዳ ግሾ፥ ነ ኑስ ጫቅዳ ጫቁዋ ቆፓ።
PSA 74:21 ቆሄትዳይሳታ ዬላዮፓ፤ ማንቆትነ መቶታንቾት ነ ሱንꬃ ጋላቶ።
PSA 74:22 አቤት ፆሳዉ፥ ደንዳ፤ ሞተታ፤ ጋላስ ኩመꬅ ኤያት ነና ቀልቅሰይሳ ሀሳያ።
PSA 74:23 ነ ሞርከት ነ ቦላ ዋስያ ዋሱዋነ ነና እፀይሳት ጬቀትያ ጬቁዋ አኬካ።
PSA 75:1 አሳፍ ዛማረታ ሀላቃስ፥ “ꬋይሶፋ” ጌተትያ ዲꬃ ጩꬃን የፅዳ ማዝሙረ አቤት ፆሳዉ፥ ነዉ ጋላታ እሞስ፤ ነ ሱንꬃይ ማታ ግድያ ግሾ ነና ጋላቶስ፤ አሳይ ነ ማላልስያ ኦሱዋ ኦዶሶና።
PSA 75:2 ፆሳይ ሀይሳዳ ያጌስ፤ “ታኒ ፕርዳ እምያ ዎደ ዶራስ፤ ሱረ ፕርደይ ታና።
PSA 75:3 ቢታይነ እያን ደእያ ኡባይ ቃፅኮካ፥ እያ ቱሳ ምንꬃ ኤሰይ ታና። ሳላሀ
PSA 75:4 ታኒ ኦቶራንቾታ፥ ‘ኦቶርቶፍተ’፤ ኢታታ፥ ‘ህንተ ካጭያ በሶፍተ።’
PSA 75:5 ‘ህንተ ካጭያ ሳሎ ደንꬆፍተ፤ ቆ ቃꬅድ ሃሳዮፕተ’ ” ያጋና።
PSA 75:6 ቦንቾይ ዶሎሀፐ ዎይኮ ዉሎሀፐ ዎይኮ መላ ቢታፈ ዬና።
PSA 75:7 ሽን ሱረ ፕርደይ ፆሳ፤ እ እሱዋ ቦላ ፕርዴስ፤ ሀንኩዋ ሻትንꬄስ።
PSA 75:8 ፆሳ ኩሸን እስ ዋንጭ ደኤስ፤ ሄ ዋንጫይ ፆሳ ሀንቆ ዎይነ ኡሻን ኩምድ ኡትስ። እ ሄ ኡሻፈ ትግን፥ ሳአን ደእያ ኢታ አሳት ሄሳ ኡያና፤ ኤንቲ ኦርጩዋ አሾና ፂጵድ ኡያና።
PSA 75:9 ሽን ታኒ ያይቆባ ፆሳባ ኦዳና፤ እያ መርናዉ ሳባና።
PSA 75:10 እ፥ ኢታ አሳታ ካጭያ መንꬃና፤ ሽን ፅሎታ ካጨይ ꬎቁ ꬎቁ ጋና።
PSA 76:1 አሳፍ ዛማረታ ሀላቃስ ዲꬃን የፅዳ ማዝሙረ ፆሳይ ይሁዳን ኤረትስ፤ እያ ሱንꬃይ እስራኤለን ግታ።
PSA 76:2 እያ ዱንካነይ ሳለማና፤ እ ደእያ በሳይ ፅዮነና።
PSA 76:3 ያን ፆንገትያ ሞርከ ዶንግያ፥ ጎንዳለ፥ ማሸነ ኦላ ሚሸታ መንረꬅስ። ሳላሀ
PSA 76:4 አቤት ፆሳዉ፥ ነ ቦንቾይ አይ መላ ግተ! ኔኒ ነ ሞርከታ ፆናዳ ዙማፐ ስምያ ዎደ፥ ነ ቴማይ አይ መላ ያሽ!
PSA 76:5 ጎባ ቶራንቾት ቦንቀትዶሶና፤ ኤንቲ ዎልቃማ ꬍስኮ ꬍስክዶሶና፤ ኤንታፈ እሶይካ ባ ኩሽያ ደንꬅቤና።
PSA 76:6 አቤት ያይቆባ ፆሳዉ፥ ነ ሴርዳ ዎደ፥ ፓራ አሳትነ ፓራት ኩንድድ አትዶሶና።
PSA 76:7 ሽን አቤት ፆሳዉ፥ ኔኒ ያሻሳ፤ ነ ሀንቆይ ሱልያ ዎደ፥ ነ ስንꬃን ኦነ ኤቃናይ?
PSA 76:8 ኔኒ ፕርዳ ሳሎፐ ስስዳ ዎደ፥ ቢታይ ዳጋማን ስእ ግስ።
PSA 76:9 ኔኒ ቢታን ቆሄትዳ አሳ አሻናዉነ ኤንታዉ ፕርዳናዉ ደንድያ ዎደ ሄስ ሀንስ። ሳላሀ
PSA 76:10 ነ አሰ ሀንቅኮካ ነዉ ቦንቾ ግዴስ፤ ኦላፐ አትዳ አሳት ነ ባኣለ ቦንቻና።
PSA 76:11 ጎዳስ ህንተ ፆሳስ ቃንገꬅ ጋꬅተ፤ ህንተኖ እያ ማታን ደእያ ካዎተꬃቶ፥ ያሽያ እያዉ እሞታ ኤህተ።
PSA 76:12 እ ሀላቃታ አያና ካዉሼስ፤ ዎልቃማ ካዎታካ ዳጋንꬄስ።
PSA 77:1 አሳፍ ዛማረታ ሀላቃ ኤዶታመስ ፃፍዳ ማዝሙረ ታኒ ፆሳ ማጋናይስ፤ ታና ስአ ጋዳ እያኮ ዋሳይስ።
PSA 77:2 ታ መቱዋ ጋላሳን ጎዳ ኮያስ፤ ቃማ ኩመꬅ ሸምፖይ ባይና ታ ኩሽያ ምጫስ፤ ግዶሽን፥ ታ ሸምፕያ ምናናዉ ዳንዳአቡኩ።
PSA 77:3 ታኒ ፆሳባ ቆፕያ ዎደ ኦላይስ፤ ታኒ ዎꬃ ደንꬅዳ ዎደ ታ ሸምፖይ ዳቡሬስ። ሳላሀ
PSA 77:4 ቃማ ኩመꬅ ታና ꬍስኮ ድጋዳ አይሳዳሳ፤ ታ ኡንኤትዳ ግሾ ኦደታናዉ ዳንዳአብከ።
PSA 77:5 ታኒ አꬍዳ ጋላሳታ ቆፓስ፤ ካሰ ላይꬃታ ሀሳያስ።
PSA 77:6 ታኒ ቃማ ግታ ቆፋን አቃስ፤ ታ ዎዛናን ዎꬃ ደንꬃሸ፥ ሀይሳዳ ያጋዳ ታና ኦይቻስ፤
PSA 77:7 “ፆሳይ ኑና መርናዉ አግደዬ? ህዛፐ ጉየ እ ኑስ ኬሄነዬ?
PSA 77:8 እያ ሲቆይ አትደዬ? እ ኦድዳ ቃላ መርናዉ ፖለነዬ?
PSA 77:9 ፆሳይ ባ ማሮታ ዶግደዬ? ባ ቃꬍያ ሀንቆን ላምደዬ?” ያጋዳ ኦይቻስ። ሳላሀ
PSA 77:10 ኡባፈ ꬎቃ ፆሳዉ፥ ታና ኡንኤꬅዳይ፥ ነ ኡሻቻ ኩሽያን ኑና ማዶ አግዳይሳ።
PSA 77:11 ጎዳ ኦሶታ ታኒ ቆፓና፤ እ በን ኦꬅዳ ማላልስያ ኦሶታ ሀሳያና።
PSA 77:12 ነ ኦሶታ ታኒ ዛራ ዛራዳ ቆፓና፤ ነ ዎልቃማ ኦሶታ ታኒ ዎꬃ ደንꬃና።
PSA 77:13 አቤት ፆሳዉ፥ ነ ኦገይ ጌሽ፤ ነ መላ ግታ ፆሲ ኦኔ?
PSA 77:14 ኔኒ ማላልስያባ ኦꬅያ ፆሳ፤ አሳ ግዶን ነ ዎልቃ ቆንጭሳሳ።
PSA 77:15 ነ አሳ፥ ያይቆባነ ዮሰፋ ኮቻ ነ ቀስያን ዎዛዳሳ። ሳላሀ
PSA 77:16 አቤት ፆሳዉ፥ ሃꬃት ነና በእድ ያይዶሶና፤ አባ ጪሞትካ ኮኮርዶሶና።
PSA 77:17 ሻራት ሃ ዱገ ትግዶሶና፤ ዳዳይ ሳሎን ጉምስ፤ ነ ዎልአንꬃይ ያን ሀን ዎልአምስ።
PSA 77:18 ነ ዳዳ ጉንꬃይ ኡሹዋ ግዶን ጉምስ፤ ነ ዎልአንꬃይ ሳኣ ፖእስስ፤ ቢታይ ቃፅስ፤ ኮኮርስ።
PSA 77:19 ኔኒ አባ ግዶራ ሄመታሳ፤ ጪሞ አባ ግዶራ ካንꬃሳ፤ ሽን ነ ቶሆይ የꬍዳ በሳይ በንተና።
PSA 77:20 ሙሰ ኩሸንነ አሮና ኩሸን ነ አሳ ዶርሳ ዉደዳ ካለꬃዳሳ።
PSA 78:1 አሳፍ አኬካን ፃፍዳ ግንፆ ታ አሳዉ፥ ታ ትምርትያ ስእተ፤ ታ ዶናፐ ከይያ ቃላ ሀይዝድ ስእተ።
PSA 78:2 ታኒ ታ ዶና ሌምሶን ዶያና፤ በንፐ ጌምዳ ፁራ ቆንጭሳና።
PSA 78:3 ኑኒ ስእዳይሳነ ኤርዳይሳ፥ ኑ አዋት ኑስ ኦድዳይሳታ ኦዳና።
PSA 78:4 ሄሳታ ኑኒ ኤንታ ናይታፐ ቆሶኮ፤ ጎዳስ በሲያ ጋላታ፥ እያ ዎልቃነ ማላልስያ እያ ኦሱዋ፥ ያና የለታስ ኦዳና።
PSA 78:5 እ ያይቆባ ዘረꬃስ ኪታ፥ እስራኤለ አሳስ ህግያ እሚስ። ካሰ ኑ አዋት ባንታ ናይታ ሄ ህግያ ታማርሳና መላ ኪትስ።
PSA 78:6 ካልያ የለታይ ሄሳ ኤራና መላ፥ ኤንታ ናይትካ ባንታ ናይታስ ቡሮ የለታና ናይታስ ኤርሳናሳ።
PSA 78:7 ሄ ዎደ ኤንቲ ፆሳን አማነተና፤ እ ኦꬅዳባ ባሎኮና፤ እያ ኪታ ናጋና።
PSA 78:8 ኤንቲ ካሰ ባንታ አዋታዳ ዎዛና ሙመ የለታ፥ ጌላነ አማነቶና የለታ፥ ፆሳን ምንድ ኤቀና የለታ ግዶኮና።
PSA 78:9 ኤፍሬማ አሳይ ዶንገ ዳንጭኮካ፥ ኦላ ጋላስ ጉየ ስምዶሶና።
PSA 78:10 ኤንቲ ፆሳ ጫቁዋ ናግቦኮና፤ እያ ህግያን ሄመቶና እፅዶሶና።
PSA 78:11 ኤንቲ እ ኦꬅዳ ኦሱዋነ እ በስዳ ማላታ ዶግዶሶና።
PSA 78:12 እ ኤንታ አዋታ ስንꬃን ግብፀ ቢታን፥ ፆኣነ ደንባን ማላታ ኦꬅስ።
PSA 78:13 አባ ሻክድ ግዶራ ኤንታ ፕንꬅስ፤ ሃꬃ ሻክድ ያን ሀን ጎዳዳ ኤስስ።
PSA 78:14 እ ኤንታ ጋላስ ሻራን፥ ቃማ ታማ ፖኦን ካለꬅስ።
PSA 78:15 እ መላ ቢታን ዛላ ጳልቅድ፥ አባዳ ዳሮ ሃꬅ ኤንታ ኡሽስ።
PSA 78:16 ዛላፈ ሃ ፑልትስድ፥ ሻፋ ሃꬃዳ ጎግስስ።
PSA 78:17 ሽን ኤንቲ እያ ቦላ ናጋራ ጉጅድ ኦꬅዶሶና፤ ኡባፈ ꬎቃ ፆሳ ቦላ መላ ቢታን ማካልዶሶና።
PSA 78:18 ባንታ አሞትዳ ካꬃ ኦይችድ፥ ፆሳ ኤርሸ ፓጭዶሶና።
PSA 78:19 ኤንቲ ፆሳ ቦላ ሀይሳዳ ያግድ ሃሳይዶሶና፤ “መላ ቢታን ፆሳይ ኑስ ካꬅ ጊግሳናዉ ዳንዳኢ?
PSA 78:20 ዛላ ሾጭን ፑልቶይ ከይድ ሻፋ ሃꬅ ጎግስ፤ ሽን እ ኑስ ካꬅ እማናዉ ዳንዳኢ? ዎይኮ ባ አሳስ አሾ እማናዉ ዳንዳኢ?” ያግዶሶና።
PSA 78:21 ጎዳይ ሄሳ ስእዳ ዎደ ዳሮ ሀንቀትስ፤ ያይቆባ ኮቻታ ቦላ ታም ኤፅስ፤ እስራኤለ ቦላ እያ ሀንቆይ ዳርስ።
PSA 78:22 ሄስካ ኤንቲ ፆሳን አማንቦኮና፤ ዎይኮ እያ አሹዋን አማነትቦኮና።
PSA 78:23 ግዶሽን፥ ꬎቃ ሳሉዋ ኪትስ፤ ሳሎ ፐንግያ ዶይስ።
PSA 78:24 ኤንታ ሙዛናዉ ማና ቡክስስ፤ ሳሎ ካꬃ ኤንታዉ እሚስ።
PSA 78:25 ኪታንቾታ ካꬅ አሳይ ምስ፤ ፆሳይ ኤንታዉ ምያባ ዳርስድ እሚስ።
PSA 78:26 ዶሎሀ ጫርኮይ ጫርካና መላ ኦꬅስ፤ ባ ዎልቃን ዱገሀ ጫርኩዋ ደንꬅስ።
PSA 78:27 እ አሳስ አሾ ቢታ ከስስ፤ ፓልያ ካፎታ አባ ጋፃ ሻፈዳ ቡክስስ።
PSA 78:28 ኤንቲ ደእያ በሳን፥ ዱንካንያ ዩሾን ዎꬍስስ።
PSA 78:29 ኤንቲ አሞትዳይሳ ኤንታዉ እሚስ፤ ምድ ባንታ ጋንጅያ ጋꬅዶሶና።
PSA 78:30 ሽን ኤንቲ ባንታ አሙዋ አꬆና ደእሽን፥ አሾይ ኤንታ ዶናን ቡሮ ደእሽን፥
PSA 78:31 ፆሳ ሀንቆይ ኤንታ ቦላ ዎꬍስ፤ ኤንታ ግዶፈ ዎልቃማ አሳታ ዎꬍስ፤ እስራኤለፐ ናአተꬃታ ꬉክስ።
PSA 78:32 ሄ ኡባይ ሀንንካ ናጋራ ኦሶ አግቦኮና፤ ዳሮ ማላታ ኦꬅንካ አማንቦኮና።
PSA 78:33 ሄሳ ግሾ፥ እ ኤንታ ጋላሳታ ሀዳ ኦꬅስ፤ ኤንታ ላይꬃታ ዳጋማን ኦንግስ።
PSA 78:34 ፆሳይ ኤንታፈ ባጋ ዎꬍያ ዎደ እያ ኮይዶሶና፥ ባንታ ናጋራ ፓፅድ እያኮ ስምዶሶና።
PSA 78:35 ፆሳይ ኤንታ ዛላ ግደይሳ፥ ኡባፈ ꬎቃ ፆሳይ ኤንታ ዎዘይሳ፥ ግደይሳ ሀሳይዶሶና።
PSA 78:36 ሽን ኤንቲ ባንታ እንፃርሳን ዎርዶትዶሶና፤ ባንታ ዶናን ጭምዶሶና።
PSA 78:37 ኤንታ ዎዛናይ ፆሳን ምንድ ኤቀና፤ እያ ጫቁዋስ አማነቶኮና።
PSA 78:38 ሽን እ ኤንታ ማርስ ኤንታ ናጋራ አቶ ግስ፤ ኤንታ ꬋይስቤና። ዳሮ ዎደ ባ ሀንቁዋ ተቅስ፤ ባ ጋዱዋ ኩመꬅ ኤንታ ቦላ የድቤና።
PSA 78:39 ኤንቲ ሀይቅያ አሾ ግደይሳነ ከይድ ስሞና ሸምፖ ግደይሳ አኬክስ።
PSA 78:40 ኤንቲ መላ ቢታን እያ ቦላ አፑን ቶሆ ማካልዶና! መላ ቢታን እያ አፑን ቶሆ ላንጭስዶና!
PSA 78:41 ኤንቲ ዛር ዛሪድ ፆሳ ፓጭዶሶና፤ እስራኤለ ጌሻ ይሎይዶሶና።
PSA 78:42 ኤንታና ሞርከታ ኩሸፐ አሽዳ ጋላሳ፥ ኡንኤꬅያ አሳፐ ዎዝዳ ዎልቃ ዶግዶሶና።
PSA 78:43 እ ግብፀን ኦꬅዳ ማላታ፥ ፆኣነ ደንባን ኦꬅዳ ማላልስያ ኦሱዋ ሀሳይቦኮና።
PSA 78:44 ኤንታ ሻፋ ሃꬃታ ሱꬁ ላምስ፤ ሄሳ ግሾ፥ ግብፀ አሳይ ሻፋታፐ ኡያናዉ ዳንዳእቦኮና።
PSA 78:45 ኤንታ ዋይስያ ኡዱንፀታነ ኤንታ ቢታ ꬋይስያ ሾታ ኪትስ።
PSA 78:46 ዶልዳ ካꬃ ዱጎስ፥ ኤንቲ ዳቡርዳ አይፍያ ቦለስ እሚስ።
PSA 78:47 ኤንታ ዎይንያ ሻቻን፥ ኤንታ ባላስያ ጫርኮን ꬋይስስ።
PSA 78:48 ኤንታ መሄታ ሻቻን ዎꬍስ፤ ኤንታ ዶርሳታ ዳዳን ዉርስስ።
PSA 78:49 ꬋይስያ ኪታንቾ ጩጋራ፥ ባ ሱልያ ሀንቁዋ፥ ይሉዋ፥ እፁዋነ ጋዱዋ ኤንታ ቦላ የድስ።
PSA 78:50 ባ ሀንቁዋስ ኦገ ጊግስስ፤ ኤንታ ꬋዮስ አꬅድ እሚስ፤ ኤንታ ሀይቆፐ አሽቤና።
PSA 78:51 ግብፀ ባይራ ናይታ ኡባ ሾጭስ፤ ካማ ዱንካነን ኮይሮ ናይታ ዎꬍስ፤
PSA 78:52 ሽን ባ አሳ ዶርሳዳ ከስስ፤ ዉደዳ መላ ቢታን ሄምስ።
PSA 78:53 እ ኤንታ ሳሮ ካለꬅዳ ግሾ ባብቦኮና፤ ሽን ኤንታ ሞርከታ አባይ ምትስ።
PSA 78:54 እ ኤንታ ባ ጌሻ ቢታ፥ ባ ኡሻቻ ኩሸን ፆንድ ኦይክዳ ዙማ ቦላ ኤህስ።
PSA 78:55 እ ኤንታ ስንꬃፈ ካዎተꬃታ ጎድስ፤ ኤንታ ቢታ እስራኤለ ኮቻታስ ላታ ኦꬅድ ሻክስ፤ ባ አሳስ ኤንታ ኬꬃ እሚስ።
PSA 78:56 ግዶሽን፥ ኡባፈ ꬎቃ ፆሳ ቦላ ማካልዶሶና፤ እያ ፓጭዶሶና፤ እያ ህግያ ኪተትቦኮና።
PSA 78:57 ኤንቲ ባንታ አዋታዳ ጌላታነ ምንድ ኤቆና አስ ግድዶሶና፤ ዎበ ቶራዳ ዎራ ዎꬍዶሶና።
PSA 78:58 ꬎቃ ጎይኖ በሳታን እያ ይሎይዶሶና፤ ባንታ ኤቃታራ እያ ቃናትስዶሶና።
PSA 78:59 ፆሳይ ሄሳ ስእዳ ዎደ ሸነትስ፤ እስራኤለ ኡባ ካꬍስ።
PSA 78:60 ሴሎን እ ደእያ ባ በሳ፥ አሳ ግዶን እ ደእያ ባ ዱንካንያ አግስ።
PSA 78:61 ፆሳ ዎልቃስነ ቦንቹዋስ ማላታ ግድዳ ታቦትያ ሞርከታ ኩሸን አꬅድ እሚስ።
PSA 78:62 እ ባ አሳ ቦላ ሸነትስ፤ ኤንታ ማሻስ አꬅድ እሚስ።
PSA 78:63 ናአተꬃት ኡባይ ታማን ሜተትዶሶና፤ ጌላኦት አዝና ገሎና አትዶሶና።
PSA 78:64 ኤንታ ካህነት ማሻን ዉርዶሶና፤ ኤንታ ማቸት ዬኮና መላ ድገትዶሶና።
PSA 78:65 ጎዳይ ꬍስኮፈ ባርክያ አሳዳ ደንድስ፤ ዎይነ ኡሻ ማꬆይ አꬍዳ አሳዳ ሀንስ።
PSA 78:66 እ ባ ሞርከታ ጉየ ዛሪድ ሾጭስ፤ ኤንታ መርናዉ ዬላይስ።
PSA 78:67 ዮሰፋ ዱንካንያ ካꬍስ፤ ኤፍሬማ ኮቻ ዶርቤና።
PSA 78:68 ሽን ይሁዳ ኮቻነ እ ዶስያ ፅዮነ ደርያ ዶርስ።
PSA 78:69 ባ ኬꬃ ሳሎዳ ꬎቁ ኦꬅድ ኬፅስ፤ ሳአዳ መርናዉ ኤስስ።
PSA 78:70 ባ አይልያ ዳዊታ ዶርድ፥ ዶርሰ ሄምያ በሳፈ ኤክስ።
PSA 78:71 ዶርሰ ሄምያ በሳፈ ደንꬅድ፥ ባ አሳ ያይቆባ፥ ባ ላታ እስራኤለ ሄንꬃናዉ ኤህስ።
PSA 78:72 ዳዊቲ ኤንታ ሱረ ዎዛናን ሄምስ፤ ባ ጭንጫተꬃን ካለꬅስ።
PSA 79:1 አሳፋ ማዝሙረ ፆሳዉ፥ አይሁደ ግዶና አሳይ፥ ነ ቢታ ቦላ ደንድዶሶና፤ ነ ጌሻ ኬꬃ ቱንስዶሶና፤ የሩሳላመ ላልዶሶና።
PSA 79:2 ነ አይለታ አሀ ሳሎ ካፎታስ፥ ነ ጌሻታ አሹዋ ሳአ ዶአታስ እምዶሶና።
PSA 79:3 ኤንታ ሱꬃ የሩሳላመ ዩሾን ሃꬃዳ ጉስዶሶና፤ ኤንታ አሀ ሞግያ አስ ꬋይስ።
PSA 79:4 ኑ ሾሮታስ ኑኒ ሚቻስ፥ ኑ ሄራን ደእያ አሳስ ቀልቅሰꬃስ አትዳ።
PSA 79:5 ጎዳዉ፥ ሄስ አዉደ ጋካናዉ ሀናኔ? ኔኒ ኑ ቦላ መርናዉ ሀንቀታዲ? ነ ሀንቆይ ታማዳ ኤፅሸ ዳነዬ?
PSA 79:6 ነና ኤሮና ደረታ ቦላ፥ ነ ሱንꬃ ፄጎና ካዎተꬃታ ቦላ ነ ሀንቁዋ ዛራ።
PSA 79:7 ሄስካ ኤንቲ ያይቆባ ምዳ ግሾነ ኤንቲ ደእያ በሳ ꬋይስዳ ግሾሳ።
PSA 79:8 ኑኒ ዳሮ መቶትዳ ግሾ፥ ኑ ማይዛታ ኢታተꬃ ኑ ቦላ ታይቦፓ፤ ኤሶን ነ ማሮታ ኑስ ኪታ።
PSA 79:9 አቤት ኑና አሽያ ፆሳዉ፥ ነ ቦንቾ ሱንꬃ ግሾ ኑና ማዳ። ነ ሱንꬃ ግሾ ኑና አሻ፤ ኑ ናጋራ አቶ ጋ።
PSA 79:10 ደረት፥ “ኤንታ ፆሳይ አዉን ደኢ?” አይስ ጋኔ? ነ አይለታ ሱꬃ ኤንቲ ጉስዳ ግሾ፤ ኔኒ ሀሎ ከየይሳ ኑ ፄልሽን፥ ኤንታ ግዶን ቆንጭሳ።
PSA 79:11 ቃሾ አሳ ኦለይ ነ ስን ጋኮ፤ ሀይቆ ፕርደትዳይሳታ ነ ዎልቃ ግታተꬃን አሻ።
PSA 79:12 ጎዳዉ፥ ኑ ሾሮት ነና ቶችዳ ግሾ፥ ላፑን ኩሸ ሀሎ ከያዳ ኤንታ ክኦን እድንꬃ።
PSA 79:13 ሄ ዎደ ኑኒ ነ አሳይ፥ ነ ዶርሳት፥ መርናዉ ነና ጋላታና። የለተꬃፈ የለተꬃ ጋካናዉ፥ ነ ፔሻ ኦዳና።
PSA 80:1 አሳፍ ዛማረታ ሀላቃስ ፃፍዳ ማዝሙረ “ጪሻ ጩꬅ” ጌተትያ ማርካተꬃ ማዝሙረ ዮሰፋ ዶርሳ ዉደዳ ካለይሶ፥ እስራኤለ ሄንꬃንቹዋዉ ኑና ስአ። ክሩበታ ቦላ ደእያ አራታን ኡትዳይሶ፥ ነ ፖኡዋን ቆንጫ።
PSA 80:2 ኤፍሬማ፥ ብንያመነ ምናሰ ስንꬃን በንታ፤ ነ ዎልቃ ቃꬃዳ ኑና አሻናዉ ሃያ።
PSA 80:3 ፆሳዉ ኑና ዛራ፤ ኑ አታናዳ ነ ሶምኡዋ ኑስ ፖእሳ።
PSA 80:4 ኡባፈ ዎልቃማ ጎዳዉ ፆሳዉ፥ ነ አሳ ዎሳ ቦላ አዉደ ጋካናዉ ሸነታይ?
PSA 80:5 ኔኒ ኤንታ ዬሆ ካꬃዳ ሙዛዳሳ፤ አፉꬁ ሃꬃዳ ኡሻዳሳ።
PSA 80:6 ኑ ሾሮት ኑ ቢታ ኤካናዉ ባንታ ግዶን ኦያና መላ ኦꬃዳሳ፤ ኑ ሞርከት ኑ ቦላ ሚጭዶሶና።
PSA 80:7 ኡባፈ ዎልቃማ ፆሳዉ ኑና ዛራ፤ ኑ አታናዳ ነ ሶምኡዋ ኑስ ፖእሳ።
PSA 80:8 ግብፀፈ ዎይነ ኤሀዳሳ፤ ካዎተꬃታ የደꬃዳ፥ ኤንታ ቢታን እያ ቶካዳሳ።
PSA 80:9 ኔኒ ቢታ ቄፃዳሳ፤ እ ፃጶ የድድ፥ ዳይድ ቢታ ጋክስ።
PSA 80:10 ደረት እያ ኩያን፥ ልባኖሰ ዝጋት እያ ታሽያን ካመትዶሶና።
PSA 80:11 ባ ታሸታ መደትራነ አባ ጋካናዉ፥ ባ ፄራታ ኤፍራፂሳ ሻፋ ጋካናዉ የድስ።
PSA 80:12 ያትን፥ ኦገራ አꬍያ ኡባይ እያ አይፍያ ዱꬃናዳ፥ እያ ዩሾን ደእያ ግምብያ አይስ ላላዲ?
PSA 80:13 ባዞ ጉዱንꬆይ እያ ቦላ ጉፕስ፤ ዎራ ዶአት እያ ምዶሶና።
PSA 80:14 ኡባፈ ዎልቃማ ፆሳዉ ኑኮ ስማ፤ ሳሎራ ዱገ ፄላዳ፤ ሀ ዎይንያ ናጋ።
PSA 80:15 እ ነ ኡሻቻ ኩሸይ ቶክዳ ፃጶ፤ ኔኒ ነዉ ድችዳ ፑተ።
PSA 80:16 ነ ሞርከት ነ ዎይንያ ቃንፅዶሶና፤ ታማን ፁግዶሶና፤ ኤንታ ነ ሀንቁዋን ꬋይሳ።
PSA 80:17 ነ ኩሸይ ነ ኡሻቻን ደእያ አሳ፥ ኔኒ ነዉ ድችዳ አሳ ናጎ።
PSA 80:18 ህዛ ኑኒ ጉየ ስሞኮ፤ ኑና ፓፃ ዎꬃ፤ ነ ሱንꬃ ጋላታና።
PSA 80:19 ኡባፈ ዎልቃማ ጎዳዉ ፆሳዉ፥ ኑና ዛራ፤ ኑ አታናዳ ነ ሶምኡዋ ኑስ ፖእሳ።
PSA 81:1 ዛማረታ ሀላቃስ ፃፈትዳ ሱሱልኤን የፀትያ አሳፋ ማዝሙረ ኑስ ዎልቃ ግድዳ ፆሳስ ኡፋይሳን የፅተ፤ ያይቆባ ፆሳስ እልልተ።
PSA 81:2 የꬅ ዶምተ፤ ካራቦ ባቅተ፤ ዲꬃንነ ማስንቆን የፅተ።
PSA 81:3 አጌን ፄርያ ዎደ፥ ቃስ ꬉማ ኡትያ ዎደ፥ ባኣለ ጋላሳን ሞይዘ ፑንተ።
PSA 81:4 ሄስ እስራኤለ ቢታን ህገ፤ ያይቆባ ፆሳይ እምዳ ዎጋ።
PSA 81:5 እ ግብፀ ቢታ ሾጭዳ ዎደ፥ ዮሰፋ ኮቻስ ሀ ዎጋ አዋጅስ። ኤሮና ዶናን ሀይሳዳ ያግሽን ስአስ፤
PSA 81:6 “ህንተ ሀሽያ ቶሆፐ፥ ህንተ ኩሽያ ኬሸፐ ሸምፕሳስ።
PSA 81:7 ህንተ መቱዋን ታና ፄግደታ፤ ታ ህንተና አሻስ፤ ታኒ ደችያ ሻራ ግዶፈ ህንተና አላስ፤ ማርባ ፑልቱዋ ማታን ታ ህንተና ፓጫስ።” ሳላሀ
PSA 81:8 “ታ አሳዉ፥ ታ ህንተና ሴረይሳ ስእተ፤ እስራኤለ አሳዉ ህንተ ታና ስእኮ አይቤ?
PSA 81:9 ህንተ ግዶን አላጋ ፆሲ ደኦፖ፤ ሀራ ፆሰ ጎይኖፍተ።
PSA 81:10 ግብፀ ቢታፈ ህንተና ከስዳ፥ ታኒ ጎዳ ህንተ ፆሳ፤ ነ ዶና ሎይꬃዳ ሀካንካ፤ ታኒ እያን ኩንꬃና።
PSA 81:11 “ሽን ታ አሳይ ታና ስእቦኮና፤ እስራኤለይ ታዉ ኪተትቤና።
PSA 81:12 ሄሳ ግሾ፥ ኤንቲ ባንታ ቆፋ ካላና መላ፥ ስሞና ኤንታ ዎዛናስ አꬃዳ እማስ።
PSA 81:13 ታ አሳይ ታና ስእዳኮ አይበ፤ እስራኤለይ ታ ኦግያ ካልዳኮ አይብ ደእ፤
PSA 81:14 ታኒ ኤንታ ሞርከታ ኤሶን ፆናናሽን፤ ኤንታ እፀይሳታ ቦላ ታ ኩሽያ ደንꬃናሽን።
PSA 81:15 ጎዳ እፀይሳት እያ ስንꬃን ሆካና፤ ኤንታ ሴራይ መርናዉ ግዳና።
PSA 81:16 ታኒ ህንተና ሎኦ ግስተ ሙዛና፤ ዛላፈ ከይያ ኤሳን ህንተና ካልሳና።”
PSA 82:1 አሳፋ ማዝሙረ ፆሳይ ሳሎ ሺቁዋ ግዶን፥ ፆሳት ሺቅዳ በሳን ሀይሳዳ ያግድ ፕርዴስ።
PSA 82:2 “ህንተ አዉደ ጋካናዉ ዎበ ፕርዳኔ? አዉደ ጋካናዉ ኢታታ ባጋ ግዳኔ?” ሳላሀ
PSA 82:3 መቶታንቾታስነ አው ባይናይሳታስ ሞተትተ፤ ማንቆታነ ቆሄትዳ አሳ ማታ ናግስተ።
PSA 82:4 ዳቡራንቾታነ መቶታንቾታ አሽተ፤ ኢታታ ኩሸፐ ኤንታ የግስተ።
PSA 82:5 ህንተዉ ኤራተꬅነ አኬክ ባዋ፤ ኤንቲ ꬉማን ስመረቶሶና፤ ቢታ ባሶት ቃፅዶሶና።
PSA 82:6 ታኒ፥ “ህንተ ፆሳታ፤ ኡባይ ኡባፈ ꬎቃ ፆሳ ናይታ።
PSA 82:7 ግዶሽን ህንተ አስ ሀይቀይሳዳ ሀይቃና፤ ሀራ ሀላቃት ኩንደይሳዳ ኩንዳና” ያጋስ።
PSA 82:8 ፆሳዉ፥ ደንዳ፤ ቢታ ቦላ ፕርዳ፤ ካዎተꬃት ኡባይ ነባ።
PSA 83:1 አሳፋ ማዝሙረ አቤት ፆሳዉ፥ ስእ ጎፓ፤ ፆሳዉ ስርጵ ጎፓ፤ ሙሞፓ።
PSA 83:2 ነ ሞርከት ነ ቦላ ደንደይሳ፥ ነና እፀይሳት ነ ቦላ ማካለይሳ በአ።
PSA 83:3 ኤንቲ ነ አሳ ቦላ ጌማን ዱላቶሶና፤ ኔኒ ዶስያ አሳ ቦላ ማቀቶሶና።
PSA 83:4 “ሃይተ፥ ኤንታ ካዎተꬃ ꬋይሶስ፤ እስራኤለ ጌተትያ ሱንꬃይ መርናዉ ሀሳየቶና መላ ኦꬆስ” ያጎሶና።
PSA 83:5 ኤንቲ እስ ዎዛናን ግድድ ማቀቶሶና፤ ነ ቦላ ደንዳናዉ ጫቅዶሶና።
PSA 83:6 ኤንቲ፥ ኤዶመነ እስማኤላ አሳ፥ ሞአበነ አጋር ኮቻታ፤
PSA 83:7 ገባላነ አሞነ አሳ፥ አማለቃ፥ ፍልስፄመነ ፅሮሳ አሳ።
PSA 83:8 አሶረት ኤንታራ ጋሄትዶሶና፤ አሶረት ሎፀ አሳስ ዎልቃማ ማዶ ግድዶሶና። ሳላሀ
PSA 83:9 ኔኒ፥ ምድያመ፥ ስሳራነ ያብና ቦላ ቅሶና ሻፋን ኦꬅዳይሳዳ ኤንታ ቦላ ኦꬃ።
PSA 83:10 ኤንቲ ኤንዶራን ꬋይዶሶና፤ ኤንታ አሀይ ደንባን ዎቅድ አትስ።
PSA 83:11 ኤንታ ሀላቃታ ኦሬባነ ዘባዳ ኦꬃ፤ ኤንታ ሃረይሳታ ዛብሄላነ ስልማናዳ ꬋይሳ።
PSA 83:12 ኤንቲ፥ “ኑኒ ፆሳ አሳ ላታ ኑስ ቡዞ ኦꬃና” ያግዶሶና።
PSA 83:13 ታ ፆሳዉ፥ ኤንታ ባናዳ ላላ፤ ጫርኮይ ኤፍያ ሱላዳ ኦꬃ።
PSA 83:14 ታም ዎራ መይሳዳ፥ ታማ ላጮይ ደርያ ፁገይሳዳ፥
PSA 83:15 ነ ኡሹዋን ኤንታ የደꬃ፤ ነ ጎትያን ኤንታ ዳጋንꬃ።
PSA 83:16 ጎዳዉ፥ አሳይ ነ ሱንꬃ ኮያና መላ፥ ኤንታ ሶምኡዋ ዬላ ማይዛ።
PSA 83:17 ኤንቲ መርናዉ ዬላቶ፤ ህርጎ፤ ካዉይድ ꬋዮ።
PSA 83:18 ነ ሱንꬃይ ጎዳ ግድዳ ነ ፃላል፥ ኡባፈ ꬎቃ ፆሳይ፥ ሳአ ኡባ ሃረይሳ ኤንቲ ኤሮ።
PSA 84:1 ዛማረታ ሀላቃስ ቆረ ናይት ፃፍዳ ሱሱልኤን የፀትያ ማዝሙረ ኡባፈ ዎልቃማ ጎዳዉ፥ ነ ደእያ በሳይ ዋን ሎእ!
PSA 84:2 ታኒ ጎዳ ኬꬃ ዳባባ ላሞታይስ፤ ታ ኩመꬃ አሳተꬃይ ደኦ ፆሳስ ኡፋይሳን የፄስ።
PSA 84:3 ኡባፈ ዎልቃማ ጎዳዉ፥ ታ ካዋዉ፥ ታ ፆሳዉ፥ ነ ያርሾ በሳ ማታን ቡበ ካፎይ ባዉ ደእያ በሲ ደማሱ፤ ሆለይካ ባ ናይታ ዎꬅያ ኬ ኬፃሱ።
PSA 84:4 ነ ኬꬃን ደኤይሳትነ መርናዉ ነና ሳበይሳት አንጀትዳይሳታ። ሳላሀ
PSA 84:5 ነና ባንታ ምኖተꬅ ኦይሳት፥ ባንታ ዎዛና ፅዮነ ኦግያ ቦላ፥ ዎይሳት አንጀትዳይሳታ።
PSA 84:6 ኤንቲ ዬሆ ዛንጋራራ አꬍያ ዎደ፥ ሄ በሳይ ፑልቶይ ከይያ በሲ ግድስ፤ ቶርቸ እራይ ቡክድ ኦላ ኩንꬄስ።
PSA 84:7 ኤንቲ ዎልቃ ቦላ ዎልቃ ጉጅ ጉጅ ባና፤ እሶይ እሶይ ፆሳ ስንꬃን ፅዮነን በንታና።
PSA 84:8 ኡባፈ ዎልቃማ ጎዳዉ ፆሳዉ፥ ታ ዎሳ ኔኒ ስአ፤ ያይቆባ ፆሳዉ ሀይዛ። ሳላሀ
PSA 84:9 ፆሳዉ፥ ኑ ጎንዳልያ በአ፤ ነ ዶርዳ ካዋ ኬሀ አይፈን ፄላ።
PSA 84:10 ታኒ ሀራ በሳን ሙኩሉ ጋላስ ዳናፐ፥ ነ ዳባባን እስ ጋላስ ደኤይስ ታዉ ሎኦ። ኢታታ ዱንካንያን ዳናፐ፥ ፆሳ ኬꬃ ፐንገ ናጎይ ታዉ ሎኦ።
PSA 84:11 ጎዳ ፆሳይ ኑስ ጎንዳለነ ፖኦ፤ ኑስ ቦንቾነ ኬሀተꬅ እሜስ፤ ሱረተꬃን ሄመተይሳታ ሎኦባ ድገና።
PSA 84:12 ኡባፈ ዎልቃማ ጎዳዉ፥ ነናን አማነተይሳት አንጀትዳይሳታ።
PSA 85:1 ዛማረታ ሀላቃስ ፃፈትዳ ቆረ ናይታ ማዝሙረ ጎዳዉ፥ ኔኒ ነ ቢታስ ኬሀዳሳ፤ ያይቆባ ኮቻ ድኦፐ ጉየ ዛራዳሳ።
PSA 85:2 ነ አሳ ናቁዋ አቶ ጋዳሳ፤ ኤንታ ናጋራ ኡባ ካማዳሳ። ሳላሀ
PSA 85:3 ነ ይሉዋ አጋዳሳ፤ ሱልያ ነ ሀንቁዋፈ ስማዳሳ።
PSA 85:4 አቤት ኑና አሽያ ፆሳዉ፥ ኑና ጉየ ዛራ፤ ኑ ቦላ ላንጭዳይሳ አጋ።
PSA 85:5 ኔኒ ኑ ቦላ መርናዉ ሸነታዬ? ነ ሀንቁዋፈ ስምክዬ?
PSA 85:6 ኑኒ ነናን ኡፋይታና መላ፥ ኑና ዛራዳ ኦራꬅክዬ?
PSA 85:7 አቤት ጎዳዉ፥ ነ መርና ሲቁዋ ኑና በሳ፤ ኑና አሻ።
PSA 85:8 ጎዳ ፆሳይ ኦድያባ ታኒ ስአና፤ ኤንቲ ባንታ ኤያ ኦግያኮ ስሞና እፅኮ፥ እ ባ ጌሻ ደርያስ ሳሮተꬅ ኦዴስ።
PSA 85:9 እያ ቦንቾይ ኑ ቢታን ዳና መላ፥ ፆሳ ያየይሳታ አሻናዉ እ ማታን ደኤስ።
PSA 85:10 ሲቆይነ ቱማተꬅ ጋሄትዶሶና፤ ፅሎተꬅነ ሳሮተꬅ እድመትዶሶና።
PSA 85:11 ቱማተꬅ ሳኣፐ ፑደ ከዬስ፤ ፅሎተꬅ ሳሎፐ ዱገ ፄሌስ።
PSA 85:12 ፆሳይ ሎኦባ ኑስ እማና፤ ኑ ቢታይ ዳሮ ካꬅ አይፋና።
PSA 85:13 ፅሎተꬅ ጎዳ ስንꬃን ሄመታና፤ እያ ኦግያ ጊግሳና።
PSA 86:1 ዳዊታ ዎሳ ጎዳዉ፥ ታኒ ማንቆነ መቶታንቾ ግድያ ግሾ፥ ታ ዎሳ ስአዳ ታና አላ።
PSA 86:2 ታ ነዉ ዱማትዳ አስ ግድያ ግሾ፥ ታና ደኦን ዎꬃ፤ ነናን አማነትያ ታና፥ ነ አይልያ አሻ፤ ኔኒ ታ ፆሳ።
PSA 86:3 ጎዳዉ፥ ጋላስ ኩመꬅ ታ ኔኮ ዋስያ ግሾ፥ ታዉ ቃታ።
PSA 86:4 ጎዳዉ፥ ታ ሸምፖይ ኔኮ ዋስያ ግሾ፥ ታና፥ ነ አይልያ ኡፋይሳ።
PSA 86:5 ጎዳዉ፥ ኔኒ ኬሀነ አቶ ገይሳ፤ ነና ፄግያ ኡባስ ነ ሲቆይ ዳሮ።
PSA 86:6 አቤት ጎዳዉ፥ ታ ዎሳ ስአ፤ ታ ዋሱዋ ሀይዛ።
PSA 86:7 ነ ታ ዎሳስ ዛሮ እምያ ግሾ፥ ታ መቱዋ ጋላሳን ታ ኔኮ ዋሳና።
PSA 86:8 ጎዳዉ፥ ፆሳታ ግዶን ነ መል ባዋ፤ ነ ኦሱዋራ ግነይ ባዋ።
PSA 86:9 ጎዳዉ፥ ኔኒ መꬍዳ ካዎተꬃት ይድ፥ ነ ስንꬃን ጉልባታና፤ ነ ሱንꬃ ቦንቻና።
PSA 86:10 ኔኒ ግታ፤ ነ ማላልስያ ኦሶ ኦꬅያ ግሾ ፆሲ ነ ፃላላ።
PSA 86:11 ጎዳዉ፥ ታ ነ ቱማን ሄመታና መላ፥ ታና ነ ኦግያ ታማርሳ። ታኒ ነ ሱንꬃስ ያያና መላ፥ ታዉ እስ ዎዛና እማ።
PSA 86:12 ጎዳዉ ታ ፆሳዉ፥ ታኒ ነና ታ ኩመꬃ ዎዛናን ጋላታና፤ ነ ሱንꬃ መርናዉ ቦንቻና።
PSA 86:13 ነ ሲቆይ ታዉ ዳሮ፤ ታና ዱፎፐ አሻዳሳ።
PSA 86:14 ፆሳዉ፥ ኦቶራንቾት ታ ቦላ ደንድዶሶና፤ ኢታ አሳታ ጩጋይ ታና ዎꬋናዉ ኮዬስ፤ ኤንቲ ነና ዉዳ ጎኮና።
PSA 86:15 ሽን አቤት ጎዳዉ፥ ኔኒ ቃትያነ ማርያ ፆሰ። ኔኒ ሀንቀታናዉ ጋምኣሳ፤ ሲቆይነ አማነተꬅ ዳርዳይሳ።
PSA 86:16 ታኮ ስማዳ ታዉ ቃታ፤ ነ አይልያስ ዎልቃ እማ፤ ነ ጋꬍንደ ናኣ ታና አሻ።
PSA 86:17 ጎዳዉ፥ ነ ኬሀተꬃ ማላታ ታና በሳ፤ ነ ታና ማደይሳነ ምንይሳ በእያ ዎደ፥ ታ ሞርከት ዬላታና።
PSA 87:1 ቆረ ናይታ ማዝሙረ ጎዳ ካታማይ፥ ጌሻ ደርያ ቦላ ኬፀትስ።
PSA 87:2 ጎዳይ ፅዮነ ፐንገታ፥ ያይቆብ ደእያ ሀራ በሳታፐ አꬅድ ዶሴስ።
PSA 87:3 ነኖ ፆሳ ካታማዉ፥ ነ ግሾ ማላልስያባታ ሀይሳዳ ያግድ ኦድስ። ሳላሀ
PSA 87:4 “ታና ኤርያ ካዎተꬃታ ግዶፈ፥ ታኒ ራባነ ባብሎነ ማዝጋባና። ፍልስፄመይ፥ ፅሮስነ ቶጰይ፥ ያን የለትዶሶና።”
PSA 87:5 ፆሳይ ፅዮነስ፥ “ያ ደረይ ሀ ደረይ ፅዮነን የለትስ፤ ኡባፈ ꬎቃ ፆሳይ እዮ ምንꬃና” ያጌስ።
PSA 87:6 ጎዳይ አሳ ማዝጋበን ፃፍያ ዎደ፥ “ሀይስ ፅዮነን የለትስ” ያጋና። ሳላሀ
PSA 87:7 ኤንቲ የፅሸነ ዱርሸ፥ “ኑ አንጆ ኡባይ ፅዮነፐ ፑልቴስ” ያጋና።
PSA 88:1 ዛማረታ ሀላቃስ ፃፈትዳ ቆረ ናይታ ማዝሙረ አኬካን ፃፍዳ ግንፆ፤ አረꬆ ማዝሙረ እዝራኤላ አድያ ኤማና ማዝሙረ ጎዳዉ፥ ታና አሽያ ፆሳዉ፥ ታኒ ጋላስ ኔኮ ዋሳይስ፤ ቃማ ነ ስንꬃን ዬካይስ።
PSA 88:2 ታ ዎሳይ ነ ስን ጋኮ፤ ነ ሀይꬃይ ታ ዋሱዋ ስኦ።
PSA 88:3 ታ ሸምፖይ መቶ ካልዳ ግሾ፥ ታ ደኦይ ዱፎኮ ማትስ።
PSA 88:4 ዱፎ ገልያ አሳራ ታይበታስ፤ ዎልቅ ባይና አስ ግዳስ።
PSA 88:5 ታኒ አሀታ ግዶን የገትዳ አሳ መላ፤ ሀይቅድ ዱፎን ዝንእዳ አሳ መላ። ህዛፐ ኔኒ ሀሳዮና አስነ ኔፐ ዱፅዳ አሳ መላ ግዳስ።
PSA 88:6 ኔኒ ታና ጪሞን፥ ꬉማ ኦላን የጋዳሳ።
PSA 88:7 ነ ሀንቆይ ታና ዴፄስ፤ ነ ሀንቁዋ ቤታይ ታና ሙክስ። ሳላሀ
PSA 88:8 ኔኒ ታ ዳቦታ ታፐ ሃሳዳሳ፤ ኤንቲ ታና ሻተታና መላ ኦꬃዳሳ። ታና ተቅዶሶና፤ ከሳ ኤካናዉ ዳንዳእከ።
PSA 88:9 ጎዳዉ፥ አዛኖን ታ አይፈይ ተልጁምስ፤ ኡባ ጋላስ ታኒ ኔኮ ዋሳይስ፤ ታ ኩሽያ ኔኮ ምጫስ።
PSA 88:10 ሀይቅዳይሳታስ ነ ማላልስያባ ኦꬃዬ? ኤንቲ ደንድድ ነና ጋላቶናዬ? ሳላሀ
PSA 88:11 መርና ነ ሲቆይ ዱፎን፥ ነ አማነተꬃይ ꬋዮ በሳን ኦደትዬ?
PSA 88:12 ነ ማላልስያ ኦሶይ ꬉማን፥ ነ ፅሎተꬃይ ዶገትዳ ቢታን ኤረትዬ?
PSA 88:13 ጎዳዉ፥ ታ ኔኮ ዋሳይስ፤ ዎንታ ዎንታ ታ ዎሳይ ነ ስን ጋኬስ።
PSA 88:14 ጎዳዉ፥ ነ ታና አይስ እፃይ? ነ ሶምኡዋ ታፐ አይስ ገንꬃይ?
PSA 88:15 ናአተꬃፈ ዶማዳ ታኒ ኡንኤታስ፤ ሀይቆስ ማታስ፤ ነ ታና ዳጋንꬅን ኡፋይስ ቃንፃስ።
PSA 88:16 ነ ሱልያ ሀንቆይ ታ ቦላ ኡሽስ፤ ነ ዳጋንꬆይ ታና ꬋይስስ።
PSA 88:17 ኤንቲ ጋላስ ኩመꬅ ድኦዳ ታና ተቅዶሶና፤ እስፈ ሺቅድ ታና ኦይክዶሶና።
PSA 88:18 ታ ላገታነ ታዉ ማታ አሳታ ታፐ ሃሳዳሳ፤ ታዉ ዳቦይ ꬉማ ፃላላ።
PSA 89:1 እዝራኤላ አድያ ኤታና ማዝሙረ አኬካን ፃፍዳ ግንፆ ጎዳዉ፥ ነ ሲቁዋባ ታኒ መርናዉ የፃና፤ ነ አማነተꬃ የለታ ኡባስ አዋጃና።
PSA 89:2 ነ ሲቆይ መርናዉ ኤቅዳይሳነ ቱማተꬃ ኔኒ ሳሎን ምንꬃዳ ኤስዳይሳ ኦዳና።
PSA 89:3 ኔኒ፥ “ታ ዶርዳይሳራ ቃላ ገላስ፤ ታ አይልያ ዳዊታስ ሀይሳዳ ያጋዳ ጫቃስ፤
PSA 89:4 ‘ታኒ ነ ኮቻ መርናዉ ካዎꬃና፤ ነ አራታ የለታ ኡባን ምንꬃና’ ” ያጋዳሳ። ሳላሀ
PSA 89:5 ጎዳዉ፥ ሳሎት ነ ማላልስያ ኦሱዋ አዋጆ፤ ጌሻታ ሺቆይ ነ አማነተꬃ ኦዶ።
PSA 89:6 ሳሎን ጎዳራ ልከታናዉ ዳንዳኤይ ኦኔ? ሳሎ መተꬃታ ግዶን ጎዳ መል ኦኔ?
PSA 89:7 ጌሻታ ሺቁዋን ፆሳይ ያሽሴስ፤ እያ ዩሹዋን ደእያ ኡባፈ አꬍድ ዳጋንꬄስ።
PSA 89:8 ኡባፈ ዎልቃማ ጎዳዉ ፆሳዉ፥ ነ መላ ዎልቃም ኦኔ? ጎዳዉ፥ ኔኒ ኡባባን አማነታሳ።
PSA 89:9 ኔኒ ጉምያ አባ ዎልቃ ኪታሳ፤ ደንድያ ዙልያ ስእ ኦꬃሳ።
PSA 89:10 ራኣባ ጌተትያ ዶአ መንረꬃዳሳ፤ ነ ሞርከታ ነ ዎልቃማ ቀስያን ላላዳሳ።
PSA 89:11 ሳሎይነ ሳእ ነባ፤ አላምያነ እያን ደእያ ኡባ መꬍዳይ ነና።
PSA 89:12 ፑደሀነ ዱገሀ ነ መꬋዳሳ፤ ታቦረነ አርሞና ዙማት፥ ኡፋይሳን ነ ሱንꬃ ሳቦሶና።
PSA 89:13 ነዉ ዎልቃማ ቀሰይ ደኤስ፤ ነ ኩሸይ ምኖ፤ ነ ኡሻቻ ኩሸይ ꬎቁ ግስ።
PSA 89:14 ፅሎተꬅነ ሱረ ፕርድ ነ አራታስ ባሶ፤ ሲቆይነ ቱማተꬅ ነ ስንꬃን ቦሶና።
PSA 89:15 ጎዳዉ፥ ኡፋይሳን እልለይሳትነ ነ ሶምኡዋ ፖኡዋን ሄመተይሳት አንጀትዳይሳታ።
PSA 89:16 ነ ሱንꬃን ጋላስ ኩመꬅ ኡፋይቶሶና፤ ኤንቲ ነ ፅሎተꬃ ꬎቁ ꬎቁ ኦꬆሶና።
PSA 89:17 ኤንቲ ጬቀትያ ዎልቃይ ነና፤ ነ ቴማን ኑ ካጨይ ꬎቁ ꬎቁ ግስ።
PSA 89:18 ኑ ጎንዳለይ ኑ ጎዳ ኩሸና፤ ኑ ካዎይካ እስራኤለ ጌሻ ኩሸና።
PSA 89:19 በን ኔኒ፥ ነ አማነትዳ አሳስ ቆንጨꬃን ሀይሳዳ ያጋዳሳ። “ታኒ እስ ኦላንቹዋ ማዳስ፤ አሳ ግዶፈ ዶረትዳይሳ ꬎቁ ꬎቁ ኦꬃስ።
PSA 89:20 ታ አይልያ ዳዊታ ደማስ፤ ታ ጌሻ ዛይትያ ትያዳ እያ ካዎꬃስ።
PSA 89:21 ታ ኩሸ እያራ ዳና፤ ታ ቀሰይ እያ ምንꬃና።
PSA 89:22 እያ አይ ሞርከይካ ጊርሰና፤ አይ ኢታ አስካ እያ ሃረና።
PSA 89:23 እያ ሞርከታ ታ እያ ስንꬃን ትንቸረꬃና፤ እያ እፀይሳታ ሾጫ የጋና።
PSA 89:24 ታ ቱማተꬃይነ ታ ሲቆይ እያራ ግዳና፤ ታ ሱንꬃን እያ ካጨይ ꬎቁ ꬎቁ ጋና።
PSA 89:25 ታኒ እያ ካዎተꬃ መደትራነ አባ፥ እያ ዛዋ ሻፋታ ጋካናዉ አሳና።
PSA 89:26 እ ታና፥ ‘ኔኒ ታ አዋ፥ ታ ፆሳ፤ ታና አሽያ ዛላ’ ያግድ ፄጋና።
PSA 89:27 ታኒ እያ ባይራ ናአ ኦꬃና፤ ሳአን ደእያ ካዎታ ኡባፈ እያ ግታያና።
PSA 89:28 ታኒ ታ ሲቁዋ መርናዉ እያዉ ናጋና፤ ታኒ እያራ ጫቅዳ ጫቁዋ ምንꬃና።
PSA 89:29 ታኒ እያ ኮቻ መርናዉ ምንꬃዳ ኤሳና፤ እያ አራታ ሳሎዳ ጋምእሳና።”
PSA 89:30 “ሽን እያ ኮቻት ታ ህግያ አግኮ፥ ኤንቲ ታ ዎጋዳ ሄመቶና እፅኮ፥
PSA 89:31 ታ አዋጁዋ ሻርኮ፥ ታ ኪታ ናጎና እፅኮ፥
PSA 89:32 ታኒ ኤንታ ናጋራ ግሾ ፃምአን፥ ኤንታ ኢታተꬃ ግሾ ልሶን ሴራና።
PSA 89:33 ሽን ታኒ ታ ሲቁዋ እያፐ ኤክከ፤ ታኒ እያዉ መርናዉ አማነታና።
PSA 89:34 ታኒ ኤንታራ ጫቅዳ ጫቁዋ መንꬅከ፤ ታ ዶናፐ ከይዳ ቃላ ላምከ።
PSA 89:35 ታኒ እስ ቶሆ ታ ጌሻተꬃን ጫቅዳ ግሾ፥ ዳዊታስ ዎርዶትከ።
PSA 89:36 እያ ኮቻይ መርናዉ ዳና፤ እያ አራታይ ታ ስንꬃን አዋዳ ጋምአና።
PSA 89:37 ሳሎን አማነትያ ማርካ ግድዳ አጌናዳ፥ እያ ካዎተꬃይ መርናዉ ምንድ ዳና” ያጋዳሳ። ሳላሀ
PSA 89:38 ሽን ሀእ ነ ትይዳ ካዋ ቦላ ሀንቀታዳሳ፤ እያ እፃዳሳ፤ አጋዳሳ።
PSA 89:39 ነ አይልያራ ጫቅዳ ጫቁዋ መንꬃዳሳ፤ እያ ካላቻ ባናን ሆላዳ ቱንሳዳሳ።
PSA 89:40 እያ ካታማ ግምበ ድርሳ ላላዳሳ፤ እያ ሚፃ ꬋይሳዳሳ።
PSA 89:41 ኦገራ አꬍያ ኡባይ እያ ቦንቅዶሶና፤ እ ባ ሾሮታስ ሚቻስ አትስ።
PSA 89:42 እያ ሞርከታስ ፆኖ እማዳሳ፥ ኤንታ ኡባ ኡፋይሳዳሳ።
PSA 89:43 እያ ማሻ ፄራ ቃላምአዳሳ፤ እያ ኦላን ማዳባካ።
PSA 89:44 እያ ካዎታ ፃምኣ እያ ኩሸፐ ኤካዳሳ፤ እያ አራታ ቢታን ሆላዳሳ።
PSA 89:45 እያ ያላጋተꬃ ዎድያ ቃምሳዳሳ፤ እያ ዬላ ማይዛዳሳ። ሳላሀ
PSA 89:46 ጎዳዉ፥ ኔኒ አዉደ ጋካናዉ ጋምአይ? ኔኒ መርናዉ ጌማኔ? ነ ሀንቆይ ታማዳ አዉደ ጋካናዉ ኤፃኔ?
PSA 89:47 ታ ላይꬃይ አይ መላ ቃንኮ ቆፓ፤ አሳ ኡባ ጮ መላ መꬋድ!
PSA 89:48 ሀይቆፐ አታናዉ ዳንዳእያ አስ ደኢ? ዱፎ ገሎና ዳናዉ ዳንዳኤይ ኦኔ? ሳላሀ
PSA 89:49 ጎዳዉ፥ ኔኒ ነ ቱማተꬃን ዳዊታስ ጫቅዳ፥ ነ ሲቆይ አዉን ደኢ?
PSA 89:50 ጎዳዉ፥ ነ አይለይ አይ መላ ቦረትዳኮ በአ፤ አሳ ኡባ ቦርያ ዋታ ዳንዳእዳኮ ሀሳያ።
PSA 89:51 ጎዳዉ፥ ነ ሞርከት ቀልቅስዳይሳ፥ ነ ትይዳ ካዋ ታንጎን ታንጎን ቦረይሳ በአ።
PSA 89:52 ጎዳይ መርናዉ ጋላተቶ!
PSA 90:1 ፆሳ አስ ግድዳ ሙሰ ዎሳ ጎዳዉ፥ ኔኒ የለታፐ የለታ ጋካናዉ፥ ኑኒ ደእያ በሲ ግዳዳሳ።
PSA 90:2 ደረት መታናፐ ካሰ፥ ሳእ ኦሰታናፐ ካሰ፥ መርናፐ መርና ጋካናዉ ነ ፆሰ።
PSA 90:3 ኔኒ፥ “አሳ ናይቶ፥ ጉየ ቢታኮ ስምተ” ያጋዳ፥ ኤንታ መትዳ ቢታኮ ጉየ ዛራሳ።
PSA 90:4 ሙኩሉ ላይꬅ ዝነ አꬍዳ ጋላሳ መላ፤ ዎይኮ እስ ቃማ ግዶን እስ ሳተ መላ።
PSA 90:5 ኔኒ አሳ ቆፖና ድኦዳ ኤፋሳ፤ ኤንቲ አሙሆ መላ፤ ዎንታ ዎንታ ዶልያ ማታ መላ።
PSA 90:6 ማት ዎንታ ድጭድ ጭዬስ፤ ኦማርስያ ዎደ ሹልድ መሌስ።
PSA 90:7 ኑኒ ነ ይሉዋን ዉርዳ፤ ነ ሀንቁዋ ሱሎን ዳጋምዳ።
PSA 90:8 ኑ ኢታ ኦሱዋ ነ ስንꬃን ዎꬃዳሳ፤ ኑ ጌምዳ ናጋራ ነ ሶምኡዋ ፖኡዋን ዎꬃዳሳ።
PSA 90:9 ኑ ጋላሳ ኡባይ ነ ሀንቁዋን አꬍስ፤ ኑ ላይꬃ ኦለን ዉርሶስ።
PSA 90:10 ኑ ደኦ ላይꬃይ ላፑን ታማ፤ ዎይኮ ዳርኮ ሆስፑን ታማ። ሄስካ መቶይነ ዋየይ ኩምዳይሳ፤ ኑ ላይꬃይ ኤሶን ዉሬስ፤ ኑካ ኤሶን አꬎኦስ።
PSA 90:11 ነ ሀንቁዋ ዎልቃ ኤረይ ኦኔ? ነ ሀንቁዋ ሱሎይ ዎልቃማ።
PSA 90:12 ኑ ላይꬃ ማራ ኦገን ኑ ጎኤታና መላ፥ ኑና ጭንጫተꬅ ታማርሳ።
PSA 90:13 ጎዳዉ፥ ነ ሀንቆይ አዉደ ጋካናሴ? ሀያና ነ አይለታስ ቃታ።
PSA 90:14 ኑ ላይꬃ ኡባን ኑ ኡፋይታናዳነ የፃናዳ፥ ዎንታ ዎንታ ነ ሲቁዋ ኑና ካልሳ።
PSA 90:15 ነ ኑና መቶꬅዳ ጋላሳታ ኬና፥ ኑኒ ኡንኤትዳ ላይꬃታ ኬና ኑና ኡፋይሳ።
PSA 90:16 ኑስ ነ አይለታስ ነ ኦሶይ ቆንጮ፤ ነ ቦንቾይ ኤንታ ናይታስ በንቶ።
PSA 90:17 ጎዳ ኑ ፆሳ ኬሀተꬃይ ኑ ቦላ ግዶ፤ ኑ ኩሸ ኦሶ ኡባ ኑስ አይፍሳ፤ ኤ፥ ኑ ኩሸ ኦሶ ኡባ አይፍሳ።
PSA 91:1 ኡባፈ ꬎቃ ፆሳን ናገትድ ደኤይ፥ ኡባፈ ዎልቃማ ፆሳ ኩያን አቄስ።
PSA 91:2 እ ጎዳ፥ “ኔኒ ታዉ ሚፃነ ቆሰታ አትያ በሲ፥ ኔኒ ታና አማንꬅያ ታ ፆሳ” ያጋና።
PSA 91:3 እ ነና ሻንካንቾታ ፅሄፐ፥ ዎꬍድ ኦንግያ ጋዶፐ አሻና።
PSA 91:4 እ ባ ባለታን ነና ካማና፤ እያ ቀፍያ ጋርሳን ኔኒ ቆሰታዳ አታና፤ እያ አማነተꬃይ ነዉ ጎንዳለነ ካተ።
PSA 91:5 ኔኒ ቃማ ዳጋንꬅያባስ፥ ዎይኮ ጋላስ ፆንገትያ ቶራስ ያያካ።
PSA 91:6 ኔኒ ꬉማን ኦይክያ ሀርገ፥ ዎይኮ ጋላሳ ሴታን ኦንግያ ጋዶ ህርጋካ።
PSA 91:7 ሙኩላይ ነ ምየን፥ ታሙ ሙኩላይ ነ ኡሻቻን ኩንዳና፤ ሽን ነና አይብካ ቦቸና።
PSA 91:8 ኢታት ሴረትሽን፥ ኔኒ ነ አይፈ ፃላላን በአና።
PSA 91:9 ኔኒ ጎዳ ነዉ ቆሰታዳ አትያ በሲ ኦꬅዳ ግሾነ፥ ኡባፈ ꬎቃ ፆሳ ነ ደእያ በሲ ኦꬅዳ ግሾ፥
PSA 91:10 ኢታባይ ነና ቦቸና፤ ጋዶይ ነ ኬꬃኮ ሺቀና።
PSA 91:11 ነ ኦገ ኡባን ነና ናጋና መላ፥ ፆሳይ ባ ኪታንቾታ ኪታና።
PSA 91:12 ነ ቶሆይ ሹቻን ꬉበቶና መላ፥ ኪታንቾት ባንታ ኩሸን ነና ደንꬃና።
PSA 91:13 ኔኒ ጋሞነ ሾሻ ቦላ ሄመታና፤ ዎዳላ ጋሞነ ኢታ ሾሻ የꬋና።
PSA 91:14 ፆሳይ፥ “እ ታና ሲቅዳ ግሾ ታኒ እያ አሻና፤ ታ ሱንꬃ ኤርያ ግሾ ታኒ እያ ናጋና።
PSA 91:15 እ ታና ፄግያ ዎደ ታኒ እያዉ ኮያና፤ መቶ ዎደ ታኒ እያራ ግዳና፤ ታኒ እያ አሻናነ ቦንቻና።
PSA 91:16 ታኒ እያ ላይꬃ አዱሳና፤ ታ አቶተꬃ እያ በሳና” ያጌስ።
PSA 92:1 ሳምባታ ጋላሳ ማዝሙረ ጎዳ ጋላቶይ ሎኦ፤ ኡባፈ ꬎቃ ፆሳዉ፥ ነ ሱንꬃ ሳቦይ ሎኦ።
PSA 92:2 ዎንታ ዎንታ ነ ሲቁዋ ኦዶይ፥ ቃማ ነ አማነተꬃ አዋጆይ ሎኦ።
PSA 92:3 ታሙ ሻያን ዋፀትዳ ዲꬃን ማስንቆ ካእሸ ነና ጋላቶይ ሎኦ።
PSA 92:4 ታኒ ነ ኦሱዋን ኡፋይትዳ ግሾ፥ ነ ኩሸ ኦሱዋ ግሾ ነና ጋላታይስ።
PSA 92:5 ጎዳዉ፥ ነ ኦሶይ አይ መላ ግተ! ነ ቆፋይ አይ መላ ጪሞ!
PSA 92:6 ኤያ አስ ኤራናዉ ዳንዳኤና፤ ዎዛን ባይና አስ አኬካናዉ ዳንዳኤና።
PSA 92:7 ኢታት ማታዳ ድጭኮካ፥ ኢታ ኦይሳት ዳይኮካ፥ ኤንቲ መርናዉ ꬋያና።
PSA 92:8 ሽን አቤት ጎዳዉ፥ ኔኒ መርናዉ ኡባፈ ꬎቃ።
PSA 92:9 አቤት ጎዳዉ፥ ቱማ ነ ሞርከት ꬋያና፤ ኢታ ኦꬅያ ኡባይ ፕስክ ጋና።
PSA 92:10 ታ ካጭያ መንꬃ ካጨዳ ꬎቁ ኦꬃዳሳ፤ ሎኦ ዛይተ ታ ሁጰን ትያዳሳ።
PSA 92:11 ታ ሞርከት ፆነትሽን ታ አይፈን በአስ፤ ታና ኡንኤይሳት ዋስሽን ታ ሀይꬃን ስአስ።
PSA 92:12 ፅሎት ዛምባዳ ድጫና፤ ልባኖሰ ዝጋዳ ዳያና።
PSA 92:13 ኤንቲ ጎዳ ኬꬃን ቶከትዳ ምꬃ መላ፤ ኤንቲ ኑ ፆሳ ዳባባን ዳና።
PSA 92:14 ኤንቲ ጬግድካ አይፋና፤ ኤንቲ እርፃነ ጭልኦ ግድድ ዳና።
PSA 92:15 ኤንቲ፥ “ጎዳይ ሱረ፤ እ ታ ዛላ፤ እያን ኢታተꬅ ባዋ” ያጋና።
PSA 93:1 ጎዳይ ካዎትስ! ፆሳይ ቦንቾ ማእስ፤ ዎልቃ ዳንጭስ፤ ሳእ ምንድ ኤቅስ፤ ቃፀና።
PSA 93:2 ነ አራታይ በንፐ ኤቅድ ደኤስ፤ ኔኒ መርናዉ ደኣሳ።
PSA 93:3 ጎዳዉ፥ ሻፋይ ጉምስ፤ ሃꬃይ ባ ጉንꬃ ꬎቁ ኦꬅስ ሃꬃ ዙልያ ግርሳይ ስኤትስ።
PSA 93:4 ሳሎን ደእያ ጎዳይ፥ ዳሮ ሃꬃ ጉንꬃፈ፥ አባ ዙልያፐ አꬍድ ዎልቃማ።
PSA 93:5 አቤት ጎዳዉ፥ ነ ህገይ አማነትዳይሳ፤ ነ ኬꬃይ መርናዉ ጌሻተꬃን አሌቃና።
PSA 94:1 ጎዳዉ፥ ኔኒ ሀሎ ከይያ ፆሲ፤ ኩሸ ዛርያ ፆሳዉ፥ ነ ቦንቹዋ በሳ።
PSA 94:2 አቤት ሳኣ ፕርድያ ፆሳዉ ደንዳ፤ ኦቶራንቾታስ በሲያ ሴራ እማ።
PSA 94:3 ጎዳዉ፥ አዉደ ጋካናዉ ጋምአይ? ኢታት አዉደ ጋካናዉ ኡፋይታኔ?
PSA 94:4 ኢታ ኦይሳት ኦቶሮ ቃላ ሃሳዮሶና፤ ኤንቲ ጮ ጬቀቶሶና።
PSA 94:5 ጎዳዉ፥ ኤንቲ ነ አሳ ሊቅሶሶና፤ ኤንቲ ነ ላታ ናቆሶና።
PSA 94:6 አምኤታነ በታንቾታ ዎꬎኦሶና፤ አው ባይና ናይታ ሙጮሶና።
PSA 94:7 ኤንቲ፥ “ጎዳይ ኑና በኤና፤ ያይቆባ ፆሳይ አኬከና” ያጎሶና።
PSA 94:8 ህንተኖ፥ አሳ ግዶፈ ኤያቶ፥ አኬክተ! ህንተኖ፥ ኤያቶ ህንተ ጭንጫ ግዳናይ አዉዴ?
PSA 94:9 ሀይ ኦꬅዳ ፆሳይ ስኤኔ? አይፈ መꬍዳ ጎዳይ በኤኔ?
PSA 94:10 ካዎተꬃታ ሴርያ ፆሳይ ሴረኔ? አሰ ኤራተꬅ ታማርስያ እ፥ ኤረኔ?
PSA 94:11 ጎዳይ አሳ ቆፍ ፓꬆናባነ ሀዳ ግደይሳ ኤሬስ።
PSA 94:12 አቤት ጎዳዉ፥ ኔኒ ሴርያ አስነ ነ ህግያ ታማርስያ አስ አንጀትዳይሳ።
PSA 94:13 ኢታት ኩንድያ ኦላይ ቦከታና ጋካናዉ፥ መቶ ጋላስ ኔኒ እያ ሸምፕሳሳ።
PSA 94:14 ፆሳይ ባ አሳ የገና፤ እ ባ ላታ አገና።
PSA 94:15 ፕርድ ስሚድ ፅሎተꬃ ቦላ ኤቃና፤ ዎዛና ሱረት ኡባይ ፅሎ ፕርዳ ካላና።
PSA 94:16 ማካላንቾታ ቦላ ታ ግሾ ደንደይ ኦኔ? ኢታ ኦይሳታራ ታ ግሾ ኤቀተይ ኦኔ?
PSA 94:17 ጎዳይ ታና ማዶናኮ፥ ታኒ ኤሶን ዱፎ ገላዳ አታናሽን።
PSA 94:18 ታኒ፥ “ታ ቶሆይ ሀልፅስ” ግዳ ዎደ፥ ነ ሲቆይ ታና ካትስስ።
PSA 94:19 ታ ዎዛናን ኡንኤተꬅ ኩምዳ ዎደ፥ ኔኒ ታና ዎፑ ኦꬃዳ ኡፋይሳሳ።
PSA 94:20 ህገ ሻርያ ጌላ ዳይናታራ ጌላ አሳራ ኔኒ ሃሼታይ?
PSA 94:21 ፅሎታ ዎꬋናዉ ኤንቲ ቶቦሶና፤ ሱረታ ቦላ ሀይቆ ፕርዶሶና።
PSA 94:22 ግዶሽን ጎዳይ ታ ሚፃ፤ ታ ፆሳይ ታኒ ቆሰታዳ አትያ ዛላ።
PSA 94:23 ኤንታ ኢታተꬃ ግሾ እ ኤንታ ሴራና፤ ኤንታ ናጋራ ግሾ እ ኤንታ ꬋይሳና፤ ጎዳይ ኑ ፆሳይ ኤንታ ꬋይሳና።
PSA 95:1 ሃይተ፤ አነ ጎዳ ሳቦስ፤ ኑና አሽያ ዛላስ ኡፋይሳን እልሎስ።
PSA 95:2 እያ ስን ጋላታራ ሺቆስ። ጋላታ ማዝሙረ ኡፋይሳን የፆስ።
PSA 95:3 ጎዳይ ዎልቃማ ፆሰ፤ ፆሳታ ኡባ ቦላ ግታ ካዎ።
PSA 95:4 ቢታ ጪሞት እያ ቃቃን ደኦሶና፤ ደርያ ፄራት እያባ።
PSA 95:5 እ መꬍዳ ግሾ አባይ እያባ፤ መላ ቢታ እያ ኩሸይ ኦꬅስ።
PSA 95:6 ሃይተ፤ አነ ጉፋንድ እያ ጎይኖስ፤ ኑና መꬍዳ ጎዳ ስንꬃን ጉልባቶስ።
PSA 95:7 እ ኑ ፆሳ፤ ኑኒ እያ ቆሮን ደእያ ደረታ፤ ኑኒ እ ሄምያ እያ ዶርሳታ። ጎዳይ ገይሳ ሀች ህንተ ስእኮ፥
PSA 95:8 ካሰ ህንተ ማይዛት ማርባን ሀንዳይሳዳ፥ ሄ ጋላስ ማሳን ባንታ ዎዛና ምንꬅዳይሳዳ፥ ህንተ፥ ህንተ ዎዛና ምንꬆፍተ።
PSA 95:9 ኤንቲ ታ ማላልስያ ኦሱዋ በእድካ፥ ታና ፓጭዶሶና፤ ታራ ኤቀትዶሶና።
PSA 95:10 ታኒ ሄ የለታ ቦላ ኦይታሙ ላይꬅ ሻተታስ፤ “ኤንቲ ኡባ ዎደ ባንታ ዎዛናን ባልያ አሳታ፤ ኤንቲ ታ ኦግያ ኤሮኮና” ያጋስ።
PSA 95:11 ሄሳ ግሾ፥ “ኤንቲ ታ ሸምፖ በሳ ገሎኮና” ያጋዳ ታ ሀንቁዋን ጫቃስ።
PSA 96:1 ጎዳስ ኦራꬃ ማዝሙረ የፅተ፤ ሳአን ደእያ አሳ ኡባይ ጎዳስ የፅተ።
PSA 96:2 ጎዳስ የፅተ፤ እያ ሱንꬃ ሳቢተ፤ እያ አሹዋ ጋላስ ጋላስ ኦድተ።
PSA 96:3 ካዎተꬃታ ግዶን እያ ቦንቹዋ፥ አሳ ኡባ ግዶን እያ ማላልስያ ኦሱዋ አዋጅተ።
PSA 96:4 ጎዳይ ግታ ግድያ ግሾ እያዉ ግታ ጋላቲ በሴስ፤ ፆሳታ ኡባፈ አꬍድ ያየታናዉ በሴስ።
PSA 96:5 ሀራ ካዎተꬃታ ፆሳት ኡባይ ኤቃታ፤ ሽን ጎዳይ ሳሎታ መꬍዳ ፆሳ።
PSA 96:6 ቦንቾይነ ሳብ እያ ዩሾን ደኤስ፤ ምኖተꬅነ ፑላተꬅ እያ ኬꬃን ደኤስ።
PSA 96:7 ቢታን ደእያ አሳ ዛረ ኡባይ ጎዳባ ኦድተ፤ ቦንቾይነ ዎልቅ ጎዳባ ጊተ።
PSA 96:8 እያ ሱንꬃስ በሲያ ቦንቹዋ ጎዳስ ኤህተ፤ ያርሾ ኤክድ እያ ዳባባ ገልተ።
PSA 96:9 እያ ጌሻተꬃ ቴሙዋን ጎዳ ጎይንተ፤ ቢታን ደእያ አሳዉ ኡባይ እያ ስንꬃን ኮኮርተ።
PSA 96:10 ካዎተꬃታ ግዶን፥ “ጎዳይ ካዎትስ! ሳአይ ምንድ ኤቅስ፤ ቃፀና፤ እ አሳ ቦላ ሱረ ፕርዳና” ያግተ።
PSA 96:11 ሳሎት ኡፋይቶ፤ ሳእካ ሀሹ ጎ፤ አባይነ እያ ግዶን ደእያ ኡባይ ጉሞ።
PSA 96:12 ጎሻይነ እያን ደእያ ኡባይ ኡፋይቶ! ዎራን ደእያ ምꬃ ኡባይ ኡፋይሳን የፆ።
PSA 96:13 ጎዳይ ያ ግሾ እያ ስንꬃን የፆ፤ እ ሳአ ቦላ ፕርዳናዉ ዬስ። እ ሀ ሳኣ ቦላ ፅሎተꬃን፥ አሳ ቦላ ቱማተꬃን ፕርዳና።
PSA 97:1 ጎዳይ ካዎትዳ ግሾ ሳአን ደእያ አሳይ ኡፋይቶ፤ ዩሾይ አባን ተቀትዳ ቢታት ኡፋይቶ።
PSA 97:2 ሻርነ ሳካና ꬉም እያ ዩሹዋን ደኤስ፤ ፅሎተꬅነ ቱማተꬅ እያ አራታ ባሶ።
PSA 97:3 ታም እያ ስንꬃራ ቤስ፤ እያ ዩሹዋን ደእያ ሞርከታ ፁጌስ።
PSA 97:4 እያ ዎልአንꬃይ ብታ ኡባ ፖእሴስ፤ ቢታይ ሄሳ በእድ ኮኮሬስ።
PSA 97:5 ደረት ጎዳ ስንꬃን፥ ሳኣ ኡባ ጎዳ ስንꬃን ሙቃዳዳ ትልእዶሶና።
PSA 97:6 ሳሎት እያ ፅሎተꬃ አዋጆሶና፤ አሳ ኡባይ እያ ቦንቹዋ በኦሶና።
PSA 97:7 ኤቃታ ጎይነይሳትነ ኤንታን ጬቀተይሳት ኡባይ ዬላቶ፤ ኤቃት ኡባይ ጎዳስ ጉልባቶ።
PSA 97:8 አቤት ጎዳዉ፥ ፅዮነይ ነ ፅሎ ፕርዳ ስእድ ኡፋይቴስ፤ ይሁዳ ማጫ ናይትካ ሀሹ ጎሶና።
PSA 97:9 አቤት ጎዳዉ፥ ኔኒ ሳአ ኡባ ቦላ ꬎቃ፤ ፆሳታ ኡባፈ ኔኒ ꬎቁ ጋዳሳ።
PSA 97:10 ጎዳ ዶሰይሳቶ፥ ኢታ እፅተ፤ እያን አማነተይሳታ ሸምፑዋ እ ናጌስ፤ ኢታታ ኩሸፐ ኤንታ አሼስ።
PSA 97:11 ፅሎታ ቦላ ፖኦይ ፖኤስ፤ ዎዛና ሱረታስ ኡፋይስ ደኤስ።
PSA 97:12 ህንተኖ ፅሎቶ፥ ጎዳን ኡፋይትተ፤ እያ ጌሻ ሱንꬃ ጋላትተ።
PSA 98:1 ማዝሙረ ጎዳይ ማላልስያባ ኦꬅዳ ግሾ፥ እያዉ ኦራꬃ ማዝሙረ የፅተ። እያ ኡሻቻ ኩሸይ፥ እያ ጌሻ ቀሰይ እያዉ ፆኖ እሚስ።
PSA 98:2 ጎዳይ ባ ፆኑዋ ኤርስስ፤ ባ ፅሎተꬃ ካዎተꬃታስ ቆንጭስስ።
PSA 98:3 እ እስራኤለ አሳ ሲቀይሳነ ኤንታዉ አማነተይሳ ሀሳይስ። ሳኣ ጋፃ ጋካናዉ ደእያ አሳ ኡባይ ኑ ፆሳ አቶተꬃ በእዶሶና።
PSA 98:4 ሳአ ቦላ ደእያ አሳዉ፥ ጎዳስ ኡፋይሳን የፅተ፤ ኡፋይሳን እልልሸ ሳቢተ።
PSA 98:5 ጎዳስ ዲꬅ ዲፅተ፤ ዲꬃንነ ማዝሙረን ጎዳ ሳቢተ።
PSA 98:6 ሱሱልኤነ ሞይዘ ፑንሸ፥ ኡፋይሳን ጎዳ ኑ ካዋ ስንꬃን የፅተ።
PSA 98:7 አባይነ አባ ግዶን ኩምዳ ኡባይ ጉሞ፤ ሳአይነ ሳኣ ቦላ ደእያ ኡባይ የፆ።
PSA 98:8 ሻፋት ባንታ ኩሽያ ባቆ፤ ዙማት እስፈ ጎዳ ስንꬃን ኡፋይሳን የፆ።
PSA 98:9 ጎዳይ ሳኣ ቦላ ፕርዳናዉ ዬስ፤ እ ሀ ሳኣ ቦላ ፅሎተꬃን አሳ ቦላ ሱረተꬃን ፕርዳና።
PSA 99:1 ጎዳይ ካዎትዳ ግሾ ካዎተꬃት ኮኮሮ፤ አራታ ቦላ ክሩበታ ግዶን ኡትዳ ግሾ፤ ቢታይ ቃፆ።
PSA 99:2 ጎዳይ ፅዮነን ግታ፤ ካዎተꬃ ኡባፈ እ ꬎቁ ꬎቁ ግስ።
PSA 99:3 ያሽያ እያ ግታ ሱንꬃ ኡባይ ጋላቶ፤ እ ጌሽ።
PSA 99:4 ኔኒ፥ ዎልቃማ ካዎይ ሱረ ፕርዳ ዶሳሳ። ኔኒ ያይቆባ ሱረተꬃን ምንꬃዳሳ። ፅሎተꬅ ኤሳዳሳ።
PSA 99:5 ጎዳ፥ ኑ ፆሳ ꬎቁ ꬎቁ ኦꬅተ፤ እያ ቶሆይ የꬍያ በሳን እያ ጎይንተ፤ እ ጌሽ።
PSA 99:6 ሙሰይነ አሮን እያ ካህነታ ግዶፈ ኮይሮታ፤ ሳሜል እያ ዎስዳይሳታፐ እሱዋ። ኤንቲ ጎዳኮ ዋስዶሶና፤ እ ኤንታ ስእስ።
PSA 99:7 እ ሻራ ቱሳ ግዶራ ኤንታዉ ሃሳይስ፤ እ እምዳ ህግያነ ዎጋ ናግዶሶና።
PSA 99:8 አቤት ጎዳዉ፥ ኑ ፆሳዉ፥ ነ ኤንታ ዎሳ ስአዳሳ። ነ ኤንታና ማራዳሳ፤ ግዶሽን፥ ኤንታ ናጋራ ግሾ ኤንታ ሴራዳሳ።
PSA 99:9 ጎዳይ ኑ ፆሳይ፥ ጌሽ ግድያ ግሾ፥ እያ ꬎቁ ꬎቁ ኦꬅተ፤ እያ ጌሻ ዙማ ቦላ እያ ጎይንተ።
PSA 100:1 ጋላታ ማዝሙረ ቢታን ደእያ አሳ ኡባይ፥ ጎዳስ ኡፋይሳን እልልተ።
PSA 100:2 ጎዳስ ኡፋይሳን ሀጋዝተ፤ ኡፋይሳ የꬃራ እያ ስን ሺቅተ።
PSA 100:3 ጎዳይ ፆሰ ግደይሳ ኤርተ፤ ኑና መꬍዳይ እያ፤ ኑ እያባ፤ ኑኒ እያ አሰነ እያ ቆሮን ሄመትያ ዶርሳታ።
PSA 100:4 እያ ፐንግያ ጋላታራ ገልተ፥ እያ ዳባባ ሳባራ ቢተ፤ እያ ጋላትተነ እያ ሱንꬃ አንጅተ።
PSA 100:5 ጎዳይ ኬሀ፤ እያ ሲቆይ መርናሳ፤ እያ አማነተꬃይ የለታፐ የለታ ጋካናሳ።
PSA 101:1 ዳዊታ ማዝሙረ ታ ነ ሲቁዋባነ ነ ፅሎ ፕርዳባ የፃና፤ ጎዳዉ፥ ታ ነና ማዝሙረን ጋላታና።
PSA 101:2 ታኒ ሱረ ኦግያን ዳና፤ ኔኒ ታኮ አዉደ ያኔ? ታኒ ታ ኬꬃን ሱረተꬃን ሄመታና።
PSA 101:3 ታኒ ታ አይፈይ ኢታባ ፄለና፤ ፆሳፈ ሃክዳ አሳ ኦሱዋ እፃይስ፤ ኤንቲ ታራ ጋሄቶኮና።
PSA 101:4 ዎዛና ጌላተꬅ ታፐ ሃኮ፤ ኢታተꬃስ በሰ እምከ።
PSA 101:5 ጌማን ባ ላግያ ዝግርያ ኡራ ስእ ኦꬃና፤ ኦቶርትያነ ጬቀትያ አስ ታኒ ዳንዳእከ።
PSA 101:6 ኤንቲ ታራ ዳና መላ፥ ቢታ ቦላ ደእያ አማነትያ አሳታ ታኒ ኬሀ አይፈን ፄላይስ፤ ሱረተꬃን ሄመትያ አስ ታዉ ኪተቴስ።
PSA 101:7 ጭምያ አስ ታ ኬꬃን ዴና፤ ዎርዶ ሃሳያ አስ ታ ስንꬃን ኤቀና።
PSA 101:8 ቢታን ደእያ ኢታ አሳ፥ ታኒ ጋላስ ጋላስ ስእ ኦꬃና። ኢታ ኦይሳታ ኡባ ታኒ ጎዳ ካታማፐ ሾዳና።
PSA 102:1 ኡንኤትዳ ዎደ ፆሳ ስንꬃን ዎስዳ አሳ ዎሳ ጎዳዉ፥ ታ ዎሳ ስአ፤ ታ ዋሶይ ኔኮ ጋኮ።
PSA 102:2 ታ ዋይያ ጋላስ ነ ሶምኡዋ ታፐ ገንꬆፋ፤ ነ ሀይꬃ ታኮ ዛራ፤ ታኒ ኔኮ ዋስያ ዎደ፥ ታና ኤሶን አላ።
PSA 102:3 ታ ላይꬃይ ጩያዳ ꬋዬስ፤ ታ መቀꬃይ ታማዳ ኤፄስ።
PSA 102:4 ታ ዎዛናይ ቡጭድ የግዳ ማታዳ መልስ፤ ካꬅካ ታዉ ሜተተና።
PSA 102:5 ታኒ ታ ቃላ ꬎቁ ኦꬃዳ ኦልዳ ግሾ፤ ታ ጎጋይ መቀꬃራ ኦይከትስ።
PSA 102:6 ታኒ ዎራን ደእያ ሶሎ መላ፥ ካይሳ ኬꬃን ደእያ ጉቶ መላ።
PSA 102:7 ታኒ ዝንእን ꬍስኮይ ዬና፤ ታኒ ኬꬃ ሁጰን ባርካ ኡትዳ ካፎ ግዳስ።
PSA 102:8 ታ ሞርከት ጋላስ ኩመꬅ ታና ጫዮሶና፤ ታና ቀልቅሰይሳት ታ ሱንꬃን ባዶሶና።
PSA 102:9 ብዶይ ታዉ ካꬅ ግድስ፤ ታ አፉꬃይ ታ ኡሻራ ዋላከትስ።
PSA 102:10 ሄስ ሀንዳይ ነ ሀንቆይነ ነ ይሎይ፥ ታና ደንꬃድ ዎራ ሆልዳ ግሾሳ።
PSA 102:11 ታ ላይꬃይ ኦማርሳ ኩያ መላ ኤለስድ አꬌስ፤ ታኒ ማታዳ ሹላይስ።
PSA 102:12 ሽን ጎዳዉ፥ ኔኒ ነ አራታን መርናዉ ኡታዳሳ፤ ነ ሱንꬃይ የለታፐ የለታ ጋካናዉ ሀሳየታና።
PSA 102:13 ኔኒ እዮ ማርያ ዎደይ ጋክዳ ግሾ፤ ደንዳዳ ፅዮነስ ቃታ፤ ኔኒ ዶርዳ ዎደይ ጋክስ።
PSA 102:14 እ ሹቻት ነ ኦሳንቾታስ አልኦ፤ እ ቢታይካ ኤንታ ቃꬄስ።
PSA 102:15 ካዎተꬃት ጎዳ ሱንꬃስ ያያና፤ ሳኣ ካዎት እያ ቦንቹዋስ ዳጋማና።
PSA 102:16 ጎዳይ ፅዮነ ዛሪድ ኬፃና፤ ባ ግታተꬃ በሳና።
PSA 102:17 እ ማንቆታ ዎሳ ስአና፤ ኤንታ ኦይሻ ካና።
PSA 102:18 ቡሮ የለታና አሳይ ጎዳ ጋላታና መላ፥ ሀይስ ያ የለታስ ፃፈቶ።
PSA 102:19 ጎዳይ ꬎቃን ደእያ ባ ጌሻ በሳፈ ፄልስ፤ ሳሎን ግድድ ሳኣ ፆሞሴስ።
PSA 102:20 ሄስካ ቃሸትዳ አሳ ዋሱዋ ስአናዉነ ሀይቆ ፕርደትዳ አሳ ብርሻናሳ።
PSA 102:21 ሄሳ ግሾ፥ ጎዳ ሱንꬃይ ፅዮነን ኦደታና፤ እያ ጋላታይ የሩሳላመን አዋጀታና።
PSA 102:22 ደረይነ ካዎተꬃይ ሺቅድ፥ ጎዳስ ሄ ዎደ ጎይናና።
PSA 102:23 ታኒ ናአተꬃን ደእሽን፥ ታ ዎልቃ እፅስስ፤ ታ ላይꬃ ቃምስስ።
PSA 102:24 ታኒ፥ “ታ ፆሳዉ፥ ታ ላይꬃ ግዶ ዛዋን ታና ꬉኮፋ” ያጋይስ። ጎዳዉ፥ ኔኒ የለታፐ የለታ ጋካናዉ ደኣሳ።
PSA 102:25 ኔኒ በን ሳኣ መꬋዳሳ፤ ሳሎይካ ነ ኩሸ ኦሶ።
PSA 102:26 ሀይሳቲ ኡባይ ꬋያና፤ ሽን ኔኒ ዳና፤ ኤንቲ ኡባይ አፍላዳ ዉራና። ኔኒ ኤንታ ጩርቃ አፍላዳ ላማና፤ ኤንትካ አꬋና።
PSA 102:27 ሽን ኔኒ ነና፤ ነ ላይꬃይ ዉረና።
PSA 102:28 ነ አይለታ ናይታ ኔኒ ሳሮ ዎꬃሳ፤ ኤንታ ኮቻይ ነ ስንꬃን ምንድ ዳና።
PSA 103:1 ዳዊታ ማዝሙረ ታ ሸምፐ ጎዳ ጋላታ! ታ ኩመꬃ አሳተꬃዉ፥ እያ ጌሻ ሱንꬃ ጋላታ።
PSA 103:2 ታ ሸምፐ ጎዳ ጋላታ! እ ነዉ ኦꬅዳ ኬሀተꬃ ኡባ ዶጎፓ።
PSA 103:3 እ ነ ናጋራ ኡባ አቶ ጌስ፤ ነ ሀርገ ኡባፈ ነና ፓꬄስ።
PSA 103:4 እ ነና ሀይቆፐ አሼስ፤ ሲቆንነ ማሮታን ነና አንጄስ።
PSA 103:5 ነ ያላጋተꬃይ አርጋንꬃዳ ኦራፃና መላ፥ ነ ደኡዋ ሎኦባን ካልሴስ።
PSA 103:6 ጎዳይ ቆሄትዳይሳታስ ፅሎተꬃንነ ሱረን ፕርዴስ።
PSA 103:7 እ ባ ኦግያ ሙሰ፥ ባ ኦሱዋ እስራኤለ አሳ ኤርስስ።
PSA 103:8 ጎዳይ ቃተይሳነ ማረይሳ፤ ሀንቀታናዉ ኤሶተና፤ እያ ሲቆይ ዳሮ።
PSA 103:9 እ ኡባ ዎደ ሴረና፤ መርናዉ ሀንቀተና።
PSA 103:10 እ ኑስ ኑ ናጋራዳ ኦና፤ ኑ ኢታተꬃ መላ ዛረና።
PSA 103:11 ሳሎይ ሳአፐ ꬎቀይሳዳ፥ ጎዳ ያየይሳታስ እያ ሲቆይ ግታ።
PSA 103:12 ዶሎሀፐ ዉሎህ ሃከይሳዳ፥ ጎዳይ ኑ ናጋራ ኑፐ ሃሴስ።
PSA 103:13 አው ባ ናይታስ ቃተይሳዳ፥ ጎዳይ ባዉ ያየይሳታስ ቃቴስ።
PSA 103:14 ኑኒ አይብፐ መትዳኮ እ ኤሬስ፤ ኑኒ ቢታ ግደይሳ እ አኬከስ።
PSA 103:15 አስ ባዉ ማታ መላ፤ እ ባዞ ጪሻዳ ጭዬስ።
PSA 103:16 ጫርኮይ እያ ቦላ ጫርክያ ዎደ ꬋዬስ፤ እ ዶልዳ በሳይ ዛሪድ ኤረተና።
PSA 103:17 ሽን ጎዳስ ያየይሳታስ እያ ሲቆይ መርናፐ መርና ጋካናሳ፤ እያ ፅሎተꬃይ ናአ ናአ ጋካናሳ።
PSA 103:18 ሄስ ሀነይ እያ ጫቁዋ ናገይሳታነ እያ ኪታ ፖላናዉ ምነይሳታሳ።
PSA 103:19 ጎዳይ ሳሎታን ባ አራታ ኤስስ፤ እያ ካዎተꬃይ ኡባ ሃሬስ።
PSA 103:20 ህንተኖ፥ እያ ኪታንቻቶ፥ እያ ኪታ ናግያ ዎልቃማቶ፥ እ ኦድያባ ስኤይሳቶ፥ ጎዳ ጋላትተ!
PSA 103:21 ህንተኖ ሳሎን ደእያ ምኖቶ፥ እያ ሸንያ ፖለይሳቶ፥ ጎዳ ጋላትተ!
PSA 103:22 ህንተኖ፥ እ ሃርያ በሳ ኡባን፥ ደእያ መተꬃቶ፥ ጎዳ ጋላትተ! ታ ሸምፐ ጎዳ ጋላታ!
PSA 104:1 ታ ሸምፐ፥ ጎዳ ጋላታ፤ አቤት ጎዳዉ፥ ታ ፆሳዉ ነ ግታ፤ ኔኒ ቦንቾነ ቴማ ማአዳሳ።
PSA 104:2 ፖኦ አፍላዳ ጉሉንታዳሳ፤ ኔኒ ሳሉዋ ዱንካነዳ ቶላዳሳ።
PSA 104:3 ነ ኬꬃ ሳሎ ቦላ ኬፃሳ፤ ሻራ ፓራ ጋረ ከሳሳ፤ ጫርኮ ቀፈ ቦላ ኡታዳ ባሳ።
PSA 104:4 ጫርኮይ ነዉ ኪታንቾ፥ ታማ ላጮ ነዉ ኦሳንቾ ኦꬃሳ።
PSA 104:5 ነ፥ ሳኣ እያ ባሱዋ ቦላ ኤሳዳሳ፤ ሄሳ ግሾ መርናዉ ቃፀና።
PSA 104:6 ጪሞ አባይ አፍላዳ ቢታ ካምስ፤ ሃꬃይ ግታ ደረታ ካምስ።
PSA 104:7 ነ ሀንቀትን ሃꬃት ባቃትዶሶና፤ ነ ደሹዋ ስእዳ ዎደ ቆሰትዶሶና።
PSA 104:8 ኤንቲ ደረታ ቦላነ ዛንጋራታ ግዶ፥ ነ ኤንታዉ ጊግስዳ በሳ ጎግዶሶና።
PSA 104:9 ሃꬃት ስሚድ ቢታ ካሞናዳ፥ ኤንቲ አꬋናዉ ዳንዳኦና ዛዋ ዎꬃዳሳ።
PSA 104:10 ኔኒ፥ ፑልቶት ዛንጋራን ጎጋናዳ ኦꬃዳሳ፤ ሻፋ ሃꬃት ደረታ ግዶራ ጎጎሶና።
PSA 104:11 ባዞ ዶአት ኡባይ እያፐ ኡዮሶና፤ ባዞ ሀረት እያፐ ሳሞ አሎሶና።
PSA 104:12 ሳሎ ካፎት ሄ ሃꬃ ማታን ባንታ ኬꬃ ኬፅድ፥ ታሽያ ግዶን የፆሶና።
PSA 104:13 ነ ግታ ደረታ ቦላ ሳሎፐ እራ ቡክሳሳ፤ እያ ኩሸ ኦሶ አይፈን ቢትያ ካላሱ።
PSA 104:14 ኔኒ መሄስ ማታ፥ አሳስ ካꬅ ዶልሳሳ፤ ሄሳን አሳይ ቢታ ኦꬅድ፥ ካꬅ ሺሼስ።
PSA 104:15 አሳ ዎዛና ኡፋይስያ ዎይነ፥ ሶምኦ ጭልእስያ ዛይተነ ዎልቃ እምያ ካꬅ ዶልሳሳ።
PSA 104:16 ጎዳ ምꬃት፥ እ ቶክዳ ልባኖሰ ዝጋት፥ ዳሮ እራ ደሞሶና።
PSA 104:17 ካፎት ባንታ ኬꬃ ያን ኬፆሶና፤ ፅሎት ፂዳ ቦላ ኬፅድ ደኦሶና።
PSA 104:18 ꬎቃ ደረታ ቦላ ጋራት ደኦሶና፤ ጉፓለት ሹቻ ቆጶን ቆሰቶሶና።
PSA 104:19 ዎደ ታይቡዋ ኤርሳና መላ፥ ነ አጌና መꬋዳሳ፤ አዋይ ባ ዉልያ ዎድያ ኤሬስ።
PSA 104:20 ኔኒ ꬉማ መꬋዳሳ፤ ቃማ ኦꬃዳሳ፤ ሄ ꬉማን ዎራ ዶእ ኡባይ ከዬስ።
PSA 104:21 ዎዳላ ጋሞት ሻንካትሸ ጉዶሶና፤ ኤንቲ ባንታዉ ምያባ ፆሳፈ ኮዮሶና።
PSA 104:22 አው ዶልያ ዎደ ጉየ ስሞሶና፤ ባንታ በሳ ገልድ ዝንኦሶና።
PSA 104:23 ሄ ዎደ አስ ባ ኦሶስ ከዬስ፤ ሳእ ቃማና ጋካናዉ ኦꬄስ።
PSA 104:24 አቤት ጎዳዉ፥ ነ ኦሶይ አይ መላ ዳሮ፤ ነ ጭንጫተꬃን ነ ኤንታ ኡባ መꬋዳሳ፤ ሳእ ነ መꬍዳባን ኩምስ።
PSA 104:25 ሄኮ፥ አባይ ግታነ ዳልጋ፤ ታይቦይ ባይና ቃፅያ መተꬃን፥ ግታታነ ጉꬃ መተꬃን ኩምድ ደኤስ።
PSA 104:26 እያ ቦላ ማርካበት ቦሶና፤ ነ መꬍዳ ሌዋታነ ጌተትያ ዳወይ እያን ካኤስ።
PSA 104:27 ነ ኤንታዉ ኮሽያ ዎድያን ምያባ እማና መላ፥ ኤንቲ ኡባይ ነና ፄሎሶና።
PSA 104:28 ነ ኤንታዉ እምን ኤንቲ ማፆሶና፤ ኔኒ ነ ኩሽያ ምጭን፥ ኤንቲ ሎኦባ ካሎሶና።
PSA 104:29 ኔኒ ነ ሶምኡዋ ገንꬅያ ዎደ ዳጋሞሶና፤ ኔኒ ሸምፑዋ ኤክያ ዎደ ሀይቅድ፥ ባንታ ቢታ ስሞሶና።
PSA 104:30 ሽን ኔኒ ነ ሸምፑዋ እምያ ዎደ፥ ኤንቲ መቶሶና፤ ቢታ ኦራፅሳሳ።
PSA 104:31 ጎዳ ቦንቾይ መርናዉ ደኦ፤ ጎዳይ ባ ኦሱዋን ኡፋይቶ።
PSA 104:32 እ ቢታ ፄልያ ዎደ ቢታይ ቃፄስ፤ እ ደረታ ቦችያ ዎደ ደረት ጩዮሶና።
PSA 104:33 ታ ደኦ ላይꬃ ኡባን ጎዳስ የፃና፤ ታ ፓፃ ደእያ ዎደ ኡባን ታ ፆሳ ዛማራና።
PSA 104:34 ታኒ ጎዳን ኡፋይትያ ግሾ፥ ታ ቆፋይ እያ ኡፋይሶ።
PSA 104:35 ናጋራንቾት ቢታፈ ꬋዮ፤ ኢታ ኦይሳት ደኦፖ። ታ ሸምፐ፥ ጎዳ ጋላታ፤ ጎዳይ ጋላተቶ።
PSA 105:1 ጎዳ ጋላትተ፤ እያ ሱንꬃ ፄግተ፤ እ ኦꬅዳባ ካዎተꬃታስ ኦድተ።
PSA 105:2 እያ ሳቢተ፤ ጋላታ ማዝሙረ የፅተ፤ ማላልስያ እያ ኦሶ ኡባ ኦድተ።
PSA 105:3 እያ ጌሻ ሱንꬃን ጬቅተ፤ ጎዳ ኮየይሳታ ዎዛናይ ኡፋይቶ።
PSA 105:4 ጎዳነ እያ ዎልቃን አማነትተ፤ ኡባ ዎደ እያ ኮይተ።
PSA 105:5 ህንተኖ፥ እያ አይልያ አብራሃመ ዛረቶ፥ ዶረትዳ ያይቆባ ናይቶ፥ እ ኦꬅዳ ማላልስያባታ፥ እያ ማላታነ ሱረ ፕርዳ ሀሳይተ።
PSA 105:7 እ ጎዳ፥ ኑ ፆሳ፤ እያ ፕርዳይ ቢታ ኡባ ቦላና።
PSA 105:8 እ ባ ጫቁዋ መርናዉ፥ ባ ገልዳ ቃላ ሙኩሉ የለታ ጋካናዉ ናጌስ።
PSA 105:9 እ አብራሃመራ ጫቅዳ ኡፋይሳ ቃላ፥ ይሳቃስ ገልዳ ኡፋይሳ ቃላ፥
PSA 105:10 ያይቆባስ ዎጋ፥ እስራኤለስ መርና ጫቁዋ ኦꬅድ ምንꬅስ።
PSA 105:11 እ፥ “ካናነ ቢታ ነዉ እማና፤ እ ነ ኮቻ ጋክዳ ላታ ግዳና” ያግስ።
PSA 105:12 ፆሳ አሳት ታይቦን ጉꬃነ ካናነ ቢታን በተ አስ ግድድ ደእያ ዎደ፥
PSA 105:13 እስ ደርያፐ ሀራ ደርያ፥ እስ ካዎተꬃፈ ሀራ ካዎተꬅ ዩይዶሶና።
PSA 105:14 ፆሳይ ኦንካ ኤንታ ኡንኤꬃና መላ ኦꬅቤና፤ ኤንታ ግሾ ካዎታ ሴርስ።
PSA 105:15 “ታ ትይዳይሳታ ቦቾፍተ፤ ታ ናበታ ቆሆፕተ” ያግስ።
PSA 105:16 ጎዳይ ቢታን ኮሻ የድድ፥ ኤንታ ካꬃ ኡባ ꬋይስስ።
PSA 105:17 ሽን እ ባ አሳ አሻናዉ፥ እስ አድያ ግብፀ ኪትስ፤ ሄ ኡራይ አይለ ግድድ ባይዘትዳ ዮሰፋ።
PSA 105:18 እያ ቶሆት ብራታን ዱፀትዶሶና፤ እ ሳንꬃላታን ቃሸትስ።
PSA 105:19 እ ካሰ ኦድዳይስ ቱማታና ጋካናዉ፥ ጎዳ ቃላይ እያ ፓጭስ።
PSA 105:20 ሄሳፈ ጉየ ግብፀ ካዎይ አሰ የድድ፥ እያ ቃሾ ኬꬃፈ ከስስ።
PSA 105:21 እያ ባ ኬꬃ ቦላ ጎዳ ኦꬅስ፤ ባዉ ደእያ ኡባ ቦላ ሹምስ።
PSA 105:22 ባ ሞርናታ ዞራና መላ፥ ባ ጭማታ ጭንጫተꬅ ታማርሳና መላ ሹምስ።
PSA 105:23 እስራኤለይ ግብፀ ብስ፤ ያይቆብ ካማ ቢታን ኡትስ።
PSA 105:24 ጎዳይ ባ አሳ ዳርስስ፤ ኤንታ ሞርከታፐ አꬅድ ኤንታ ምንꬅስ።
PSA 105:25 ባ አሳ እፃና መላ ግብፀ አሳ ዎዛና ላምስ፤ ባ አይለታ ጭማና መላ ኦꬅስ።
PSA 105:26 ባ አይልያ ሙሰነ ባ ዶርዳ አሮና ኤንታኮ ኪትስ።
PSA 105:27 ኤንቲ ግብፀ አሳ ስንꬃን ማላታ፥ ካማ ቢታን ማላልስያባ ኦꬅዶሶና።
PSA 105:28 ጎዳይ ꬉማ ኪትድ፥ ቢታ ꬉምስስ፤ ሽን ግብፀ አሳይ እያ ኪታ ፖልቦኮና።
PSA 105:29 ኤንታ ሃꬃ ሱꬅ ላምድ፥ ሞሎታ ዎꬍስ።
PSA 105:30 ኤንታ ቢታ ኡባ፥ ካዎ ጋꬎካ ሾ ኩንꬅስ።
PSA 105:31 እ ኪትን፥ ኡዱንፀነ ቢነ ኤንታ ቢታ ኡባ ቦላ ቢነይ ዎꬍስ።
PSA 105:32 እራ ግሾ ኤንታ ቢታ ቦላ ሻች፥ ዳዳነ ዎልአንꬅ ቡክስስ።
PSA 105:33 እ ኤንታ ዎይንያነ ባላስያ ሾጭስ፤ ኤንታ ቢታን ደእያ ምꬃ መንረꬅስ።
PSA 105:34 እ ኪትን፥ ቦለይነ ታይቦይ ባይና ዱጎይ ከይስ።
PSA 105:35 ኤንታ ቢታን ዶልዳ ካꬃ ኡባ ምስ፤ ጋደን ደእያ ጭልኦባ ኡባ ꬋይስስ።
PSA 105:36 ጎዳይ ግብፀ አሳ ባይራ ናይታ ኡባ ዎꬍስ፤ ኮይሮ የለትዳ ኡባ ꬋይስስ።
PSA 105:37 ሄሳፈ ጉየ፥ እስራኤለ አሳ ዎርቃነ ብራ አሌቆራ ከስስ፤ ኤንታ ኮቻ ግዶፈ ጉየ አትዳይ ኦንካ ባዋ።
PSA 105:38 ግብፀ አሳይ ኤንታዉ ያይዳ ግሾ፥ ኤንታ ከሳን ኡፋይትዶሶና።
PSA 105:39 ጎዳይ ኤንታ ካማናዉ ሻራ ምጭስ፤ ቃማ ኤንታዉ ፖእሳናዉ ታማ ጊግስስ።
PSA 105:40 ኤንቲ ምያባ ኦይችዳ ዎደ፥ ኩራቾ ዳንያ ካፎታ ኤንታዉ የድስ፤ ኤንታ ሳሎ ካꬅ ካልስስ።
PSA 105:41 እ ሹቻ ጳልቅን፥ ሃꬅ ፑልትስ፤ መላ ቢታን ሻፋዳ ጎግስ።
PSA 105:42 እ ባ አይልያ አብራሃመስ፥ ገልዳ ጌሻ ቃላ ሀሳይስ።
PSA 105:43 እ ባ አሳ ኡፋይሳን፥ ባ ዶርዳይሳታ እልልሳን ከስስ።
PSA 105:44 እ ኤንታዉ አላጋ ካዎተꬃታ ቢታ እሚስ፤ ሀራት ዳቡርዳ ጎሻ ላትዶሶና።
PSA 105:45 እ ሄሳ ኦꬅዳይ ኤንቲ እያ ዎጋ እያ ህግያ ናጋናነ ኦꬃና መላሳ። ጎዳ ጋላተቶ!
PSA 106:1 ጎዳ ጋላትተ! እ ኬሀ ግድያ ግሾነ እያ ሲቆይ መርናሳ ግድያ ግሾ፥ ጎዳ ጋላትተ።
PSA 106:2 ጎዳይ ኦꬅዳ ዎልቃማ ኦሶ ኦዳናዉ፥ ዎይኮ እያ ጋላታ ኡባ ቆንጭሳናዉ ዳንዳኤይ ኦኔ?
PSA 106:3 ፕርዳ ናገይሳትነ ኡባ ቶሆ ፅሎባ ኦይሳት አንጀትዳሳታ።
PSA 106:4 አቤት ጎዳዉ፥ ኔኒ ነ አሳስ ኬህያ ዎደ ታና ቆፓ፤ ኤንታ ኔኒ አሽያ ዎደ ታና አላ።
PSA 106:5 ሄስካ ነ ዶርዳ አሳ ድቻ ታ በአና መላ፥ ነ አሳ ኡፋይሳን ታኒ ኡፋይታና መላነ ነ አሳራ እስፈ ታኒ ጋላታና መላሳ።
PSA 106:6 ኑኒ ኑ አዋታዳ ናጋራ ኦꬅዳ፤ ኑ ባልዳ፤ ኢታባ ኦꬅዳ።
PSA 106:7 ኑ አዋት ግብፀን ደእያ ዎደ፥ ማላልስያ ነ ኦሱዋ ቆፕቦኮና። ነ ሲቁዋ ዳሮተꬃ ኤንቲ ሀሳይቦኮና፤ ዞኦ አባ ማታን እያ ቦላ ማካልዶሶና።
PSA 106:8 ግዶሽን፥ እ ባ ሱንꬃ ግሾ፥ ባ ግታ ዎልቃ ኤርሳናዉ ኤንታ አሽስ።
PSA 106:9 እ ዞኦ አባ ኪትን፥ አባይ መልስ፤ መላ ቢታራ ካንꬅድ አꬍያዳ፥ ጪሞ ግዶራ ኤንታ ካለꬅድ ፕንꬅስ።
PSA 106:10 እ ኤንታ እፀይሳታ ኩሸፐ አሽስ፤ ሞርከታ ኩሸፐ ኤንታ ዎዝስ።
PSA 106:11 ኤንታ ሞርከታ ሃꬃይ ምትስ፤ ኤንታፈ እሶይካ አትቤና።
PSA 106:12 ሄ ዎደ ኤንቲ እያ ኡፋይሳ ቃላ አማንዶሶና፤ እያ ማዝሙረን ሳቦሶና።
PSA 106:13 ግዶሽን፥ ኤንቲ እ ኦꬅዳባ ዶግዶሶና፤ እ ዞርያ ኦግያ ናግድ ባናዉ ዶስቦኮና።
PSA 106:14 መላ ቢታን ደእሸ ዳሮ አሞትዶሶና፤ መላ ቢታን ፆሳ ፓጭዶሶና።
PSA 106:15 ኤንቲ ዎስዳይሳ እ እሚስ፤ ሽን ኢታ ሀርገ ኤንታ ግዶ ኪትስ።
PSA 106:16 መላ ቢታን ዱንካነን ደእሸ ሙሰነ ጎዳስ ዱማትዳ አሮና ቃናትዶሶና።
PSA 106:17 ቢታይ ዶየትድ ዳታነ ምትስ፤ አቤሮ እያ ኬꬃ አሳራ ሞግስ።
PSA 106:18 ኤንታ ማባራ ግዶን ታም ኤፅስ፤ ላጮይ ሄ ኢታ አሳታ ፁግስ።
PSA 106:19 ኮሬባ ዙማን ዎርቃፈ ማራ ምስለ መꬍዶሶና፤ ሄ ምስልያ ጎይንዶሶና።
PSA 106:20 ኤንቲ፥ ባንታ ቦንቾ ፆሳ ማታ ምያ መሄ ምስለን ላምዶሶና።
PSA 106:21 ኤንቲ ግብፀን ግታ ኦሶ ኦꬅዳነ ኤንታና አሽዳ ፆሳ ዶግዶሶና።
PSA 106:22 ካማ ቢታን ኦሰትዳ ማላልስያባነ ዞኦ አባን ሀንዳ ማላታ ኦꬅዳሳ።
PSA 106:23 ሄሳ ግሾ፥ ፆሳይ ኤንታ ꬋይሳና ግስ፤ ሽን ꬋይሶና መላ እያ ሀንቆ ዛራናዉ፥ ፆሳይ ዶርዳ ሙሰይ ግዶን ኤቅስ።
PSA 106:24 ሄሳፈ ጉየ፥ ኤንቲ እያ ቃላ አማኖና ግሾ፥ ሄ ሎኦ ቢታ ካꬍዶሶና።
PSA 106:25 ኤንቲ ባንታ ዱንካንያ ግዶን ዙዙምዶሶና ጎዳ ቃላስ ኪተትቦኮና።
PSA 106:26 ሄሳ ግሾ፥ እ ኤንታ ባዞን የጋናዉ፥ ባ ኩሽያ ደንꬅድ ጫቅስ።
PSA 106:27 ኤንታ ኮቻ ካዎተꬃታ ግዶን የጋናዉነ ቢታ ቦላ ላላናዉ ጫቅስ።
PSA 106:28 ሄሳፈ ጉየ፥ ኤንቲ ብኤል-ፋጎራ ኤቃ ጎይነይሳታራ እስፈ ጋሄትዶሶና፤ ሸምፖይ ባይና ኤቃታስ ያርሸትዳ ያርሹዋ ምዶሶና።
PSA 106:29 ባንታ ኦሱዋን ጎዳ ሀንቀꬅዶሶና፤ ሄሳ ጋሶን ኤንታ ግዶን ኢታ ሀርገይ ዎꬍስ።
PSA 106:30 ሽን ፕንሃስ ደንድድ፥ ኤንታ ናጋራ ፕርድን፥ ኢታ ሀርገይ ኤንታ ቦላፈ ክችስ።
PSA 106:31 ሄስካ፥ እያዉ፥ የለተꬃፈ የለተꬃ ጋካናዉ መርናዉ ፅሎተꬅ ግድድ ታይበትስ።
PSA 106:32 ማርባ ፑልቱዋ ማታን ጎዳ ሀንቀꬅዶሶና፤ ኤንታ ጋሶን ሙሰ ቦላ መቶይ ጋክስ።
PSA 106:33 ኤንቲ እያ ይሎይዶሶና፤ ሙሰ ዶናፐ በሰና ቃላይ ከይስ።
PSA 106:34 ጎዳይ ꬋይስተ ግን፥ ኤንቲ ካናነ አሳታ ꬋይስቦኮና።
PSA 106:35 ሄ ፓላባፐ፥ ኤንቲ ሄ አሳታራ ዋላከትዶሶና፤ ኤንታ ደኦ ዎጋ ካልዶሶና።
PSA 106:36 ፆሳ አሳት ኤንታ ኤቃ ጎይንዶሶና፤ ሄስ ኤንታዉ ፅሄ ግድስ።
PSA 106:37 ኤንቲ ባንታ አደነ ማጫ ናይታ ቱና አያናታስ ያርሽዶሶና።
PSA 106:38 ኤንቲ ፅሎ ሱꬁ ካናነ ኤቃታስ ያርሽድ፥ ባንታ አደነ ማጫ ናይታ ሱꬃ ጉስዶሶና፤ ሄ ሱꬃን ቢታይ ቱንስ።
PSA 106:39 ሄሳዳ ኤንቲ ባንታ ኦሶን ቱንዶሶና፤ ባንታ ሀኖታን ባንታ ላይማ ከስዶሶና።
PSA 106:40 ሄሳ ግሾ፥ ጎዳ ሀንቆይ እያ አሳ ቦላ ኤፅስ፤ እ ባ ላታ ሻተትስ።
PSA 106:41 እ ኤንታ አላጋ ኩሸን አꬅድ እሚስ፤ ኤንታ ሞርከት ኤንታ ሃርዶሶና።
PSA 106:42 ኤንታ ሞርከት ኤንታ ኡንኤꬅዶሶና ባንታ ሸነን ኤንታ አይስዶሶና።
PSA 106:43 እ ኤንታ ዳሮ ዎደ አሽስ፤ ሽን ኤንቲ ባንታ ማካላ አጎና እፅዶሶና፤ ባንታ ናጋራ ጋሶን ꬋይዶሶና።
PSA 106:44 ግዶሽን፥ እ ኤንታ ዋሱዋ ስእስ፤ ኤንታ ዋይያ ቆፕስ።
PSA 106:45 እ ኤንታ ግሾ፥ ባ ኡፋይሳ ቃላ ሀሳይስ፤ ባ ሲቁዋ ዳሩዋን ኤንታ ማርስ።
PSA 106:46 ኤንታ ድእዳ ኡባይ፥ ኤንታዉ ቃታና መላ ኦꬅስ።
PSA 106:47 ኑኒ ነ ጌሻ ሱንꬃ ጋላታና መላ አቤት ጎዳዉ፥ ኑ ፆሳዉ፥ ኑና አሻ። ነ ቦንቹዋን ኑ ጬቀታና መላ፥ ካዎተꬃታ ግዶፈ ኑና ሺሻ።
PSA 106:48 እስራኤለ ጎዳይ፥ ፆሳይ፥ መርናፐ መርና ጋካናዉ ጋላተቶ! አሳ ኡባይ፥ “አምንእ” ያጎ። ጎዳ ጋላትተ!
PSA 107:1 እ ኬሀ ግድያ ግሾነ እያ ሲቆይ መርናስ ግዲያ ግሾ፤ ጎዳ ጋላትተ
PSA 107:2 ጎዳይ አሽዳይሳት፥ ሞርከ ኩሸፐ ከስ ኤክዳይሳት ሀይሳዳ ያግድ ኦደቶ።
PSA 107:3 ኤንቲ ዶሎሀፐነ ዉሎሀፐ፥ ፑደሀፐነ ዱገሀፐ ቢታ ኡባፈ ሺቅዳይሳታ።
PSA 107:4 ኤንታፈ እሶት እሶት መላ ቢታን ዩይዶሶና። ባንታ ደእያ ካታማ ብያ ኦግያ ደማናዉ ዳንዳእቦኮና።
PSA 107:5 ኤንቲ ኮሻትዶሶና፤ ሳሞትዶሶና፤ ኤንቲ ኡንኤትዶሶና።
PSA 107:6 ኤንቲ መቶትዳ ዎደ፥ ጎዳኮ ዋስዶሶና፤ እ ኤንታ ዋይያፐ ኤንታ አሽስ።
PSA 107:7 ኤንቲ ዳና ካታማ ጋካናዉ፥ ኤንታ ሱረ ኦገን ካለꬅስ።
PSA 107:8 መርና እያ ሲቁዋ ግሾነ እ ኤንታዉ ኦꬅዳ ማላልስያ ኦሱዋ ግሾ ኤንቲ ጎዳ ጋላቶ።
PSA 107:9 እ ሳሞትዳይሳታ አልሴስ፤ ኮሻትዳይሳታ ሎኦባ ካልሴስ።
PSA 107:10 እሶት እሶት ሳካና ꬉማን ኡትዶሶና፤ ብራታ ሳንꬃላታን ዋይዶሶና።
PSA 107:11 ሄስ ሀንዳይ ኤንቲ ኡባፈ ꬎቃ ፆሳ፥ ኪታ ቦላ ማካልዳ ግሾነ እያ ዞርያ ካꬍዳ ግሾሳ።
PSA 107:12 እ ኤንታ ዋየ ኦሶን ዳቡርስስ፤ ኤንታ ማድያ አስ ꬋይን ኩንድዶሶና፤
PSA 107:13 ኤንቲ መቶትዳ ዎደ፥ ጎዳኮ ዋስዶሶና፤ እ ኤንታ ዋያፐ ኤንታ አሽስ።
PSA 107:14 እ ኤንታ ሳካና ꬉማፐ ከስስ፤ ኤንቲ ቃሸትዳ ሳንꬃላታ ዱꬅስ።
PSA 107:15 እያ ሲቁዋ ግሾነ እ ኤንታዉ ኦꬅዳ ማላልስያ ኦሱዋ ግሾ ኤንቲ ጎዳ ጋላቶ።
PSA 107:16 እ ናሰ ብራታ ፐንገታ መንꬅስ፤ ብራታ ካሶታ ቃንፅስ።
PSA 107:17 እሶት እሶት ኤያ ግድዶሶና፤ ባንታ ኦꬅዳ ናጋራ ጋሶን ባንታ ኢታተꬃ ጋሶን መቶትዶሶና።
PSA 107:18 ኤንቲ ካꬅ እፅዳ ግሾ ሀይቆስ ጋክዶሶና።
PSA 107:19 ኤንቲ መቶትዳ ዎደ፥ ጎዳኮ ዋስዶሶና፤ እ ኤንታ ዋያፐ ኤንታ አሽስ።
PSA 107:20 እ ባ ቃላ ኪትድ ኤንታ ፓꬅስ፤ ዱፎፐ ኤንታ አሽስ።
PSA 107:21 እያ ሲቁዋ ግሾነ እ ኤንታዉ ኦꬅዳ ማላልስያ ኦሱዋ ግሾ ኤንቲ ጎዳ ጋላቶ።
PSA 107:22 ኤንቲ እያዉ ጋላታ ያርሾ ሺሾ፤ ኡፋይሳ የꬃን እያ ኦሱዋ ኦዶ።
PSA 107:23 እሶት እሶት ማርካበን አባ ቦላራ ብዶሶና፤ አባ ቦላ ባንታ ኦሱዋ ኦꬅዶሶና።
PSA 107:24 ኤንቲ ጎዳ ኦሱዋ በእዶሶና፤ ጪሞ አባን ኦꬅዳ ማላልስያባ ፄልዶሶና።
PSA 107:25 እ ኪትዳ ዎደ ጎተይ ደንድስ፤ አባ ዙለይ ቃፅስ።
PSA 107:26 ኤንቲ ፑደ ደንድዶሶና፤ ዱገ ጪሞን ዎꬍዶሶና፤ ኢታ መቶይ ጋክን ኤንታ ዎዛናይ ትልእስ።
PSA 107:27 ኤንቲ ማꬆትዳ አሳዳ ꬉበትድ ጋንድጋርዶሶና፤ ኤንታ ኤራይ ማይስ።
PSA 107:28 ኤንቲ መቶትዳ ዎደ፥ ጎዳኮ ዋስዶሶና፤ እ ኤንታ ዋያፐ ኤንታ አሽስ።
PSA 107:29 እ ጎትያ ስእ ኦꬅስ፤ አባ ቤታ ስርጵ ኦꬅስ።
PSA 107:30 ስእ ግዳ ግሾ ኡፋይትዶሶና፤ ኤንቲ ኮይዳ ካታማ ጎዳይ ጋꬅስ።
PSA 107:31 እያ ሲቁዋ ግሾነ እ ኤንታዉ ኦꬅዳ ማላልስያ ኦሱዋ ግሾ ኤንቲ ጎዳ ጋላቶ።
PSA 107:32 ደርያ ሺቁዋን እያ ግታተꬃ አዋጆ፤ ጭማታ ዱላታን እያ ጋላቶ።
PSA 107:33 ጎዳይ ሻፋታ መልስስ፤ ፑልቶት ጎጎናዳ ተቅስ።
PSA 107:34 ሄ በሳን ደእያ አሳ ኢታተꬃ ግሾ፥ አራዳ ቢታ ቁኤ ከስስ።
PSA 107:35 እ መላ ቢታን ሃ ኤልስስ፤ መላ ቢታን ፑልቶይ ꬉቃናዳ ኦꬅስ።
PSA 107:36 ኮሻትዳ አሳ ሄ በሳን ዎꬅስ፤ ባንታዉ ዳና ካታማ ያን ኬፅዶሶና።
PSA 107:37 ኤንቲ ባንታ ጎሻን ዘርዶሶና፤ ዎይነ ቶክዶሶና፤ ዳሮ ሙሩቶ ሺሽዶሶና።
PSA 107:38 እ ኤንታ አንጅን ኤንቲ ዳርዶሶና፤ ኤንታ መህያ ታይቡዋ ጉꬅቤና።
PSA 107:39 ኤንቲ ፆነትያ ዎደነ ኡንኤትያ ዎደ፥ መቶንነ አዛኖን ካዉይያ ዎደ፥
PSA 107:40 ጎዳይ ኤንታ ሀላቃታ ካዉሽስ፤ መላ ቢታን ቶይላታና መላ ኦꬅስ።
PSA 107:41 ሽን ማንቆታ መቶፐ ከስስ፤ ኤንታ ሶ አሳ ዶርሳ ዉደዳ ዳርስስ።
PSA 107:42 ሱረ አሳይ ሄሳ በእድ ኡፋይቶሶና፤ ሽን ኢታ አሳይ ዬላትድ ስእ ጎሶና።
PSA 107:43 ጭንጫት ሀይሳ ኡባ አኬኮ፤ ጎዳ ሲቁዋ ቆፖ።
PSA 108:1 ዳዊታ ማዝሙረ ታ ዎዛናይ ምንድ ደኤስ፤ አቤት ፆሳዉ፥ ታ ዎዛናይ ምንድ ደኤስ። ታ ነዉ የፃና፤ ነና ሳባና።
PSA 108:2 ታ ሸምፐ፥ ባርካ፤ ዲꬅነ ማስንቆይ ደንዳ፤ ታ ዎንታ ጉራ ደንዳና።
PSA 108:3 አቤት ጎዳዉ፥ ታ ነና አሳ ግዶን ጋላታና፤ ካዎተꬃ ግዶን ነና ሳባና።
PSA 108:4 ነ መርና ሲቆይ ሳሎፐ ꬎቃ፤ ነ አማነተꬃይ ሻራፐ ꬎቃ።
PSA 108:5 አቤት ፆሳዉ፥ ሳሎፐ ቦላራ ነ ꬎቁ ꬎቁ ጋ፤ ነ ቦንቾይ ሳአ ኡባ ቦላ ግዶ።
PSA 108:6 ነ ዶሰይሳት አታና መላ፥ ነ ኡሻቻ ኩሸን ኑና አሻ፤ ኔኒ ታ ዎሳ ስአ።
PSA 108:7 ፆሳይ ባ ጌሻ በሳን ሀይሳዳ ያግስ፤ “ታ ፆናዳ ሴከማ ሻካና፤ ሱኮታ ዛንጋራ ግሻና።
PSA 108:8 ጋላድነ ምናሰይ ታባ፤ ኤፍሬም ታ ሁጰን ዎꬅያ ኡከ፤ ይሁድ ታ ካዎታ ፃምኣ።
PSA 108:9 ሞአበይ ታ ሜጨትያ ጋባተ፤ ኤዶመይ ታባ ግደይሳ ኤርሳናዉ ታ ጫማ እያ ቦላ ዎꬃና። ፍልስፄመ ፆናዳ ገሬራና” ያግስ።
PSA 108:10 ጎዳዉ፥ ግምበትዳ ካታማኮ፥ ታና ኤፋናይ ኦኔ? ኤዶመ ጋካናዉ ታና ካለꬃናይ ኦኔ?
PSA 108:11 አቤት ፆሳዉ፥ ኑና አግዳይ ነና ግድኪ? አቤት ፆሳዉ፥ ነ ኑ ቶራንቾታራ ኦላስ ከያካ።
PSA 108:12 አሳ ማዶይ ፓና ግሾ፥ ሞርክያ ኦላናዉ ነ ኑና ማዳ።
PSA 108:13 ፆሳ ዎልቃን ኑ ሞርከታ ፆናና፤ ኑ ሞርከታ ካዉሻናይ እያ።
PSA 109:1 ዳዊታ ማዝሙረ አቤት ታ ነና ጋላትያ ፆሳዉ፥ ነ ታዉ ስእ ጎፓ።
PSA 109:2 ኢታ አሳትነ ዎርዳንቾት፥ ባንታ ዶና ታ ቦላ ዶይዶሶና፤ ባንታ ዎርዶ እንፃርሳን ታ ቦላ ሃሳዮሶና።
PSA 109:3 እፆን ታ ዩሹዋ ተቅዶሶና፤ ጋሶይ ባይና ታና ኦልዶሶና።
PSA 109:4 ታ ኤንታ ዶሳይስነ ኤንታዉ ዎሳይስ፤ ግዶሽን፥ ኤንቲ ታና ሞቶሶና።
PSA 109:5 ታ ሎኦ ኦꬅን፥ ታዉ ኢታ ዛሮሶና፤ ታ ኤንታ ዶስን፥ ኤንቲ ታና እፆሶና።
PSA 109:6 ታ ሞርክያ ቦላ ኢታ ዳይና ሹማ፤ ሞታንቾይ እያ ኡሻቻን ኤቆ።
PSA 109:7 እያ ፕልግያ ዎደ እ ባላ ግድድ በንቶ፤ እያ ዎሳይ እያዉ ጎመ ግዶ።
PSA 109:8 እያ ላይꬃይ ቃሞ፤ እያ ሹማተꬃ ሀር ኤኮ።
PSA 109:9 እያ ናይት ይኦ ግዶ፤ እያ ማችያ አምኦ ግዶ።
PSA 109:10 እያ ናይት ዎሳንቾ ግድድ ቶይላቶ፤ ባንታ ደእያ ሁምፓ ኬꬃፈ ጎደቶ።
PSA 109:11 እያ ሻሎ ኡባ አጮይ ኦይኮ፤ እ ዳቡርድ ከስዳባ ኡባ አላግ ቦንቆ።
PSA 109:12 ኦንካ እያዉ ኬሆፖ፤ እያ ናይታስ ቃትያ አስ በንቶፎ።
PSA 109:13 እያ ናይት ኡባይ ሀይቅድ ዉሮ፤ ካልያ የለተꬃን እያ ሱንꬃይ ዶገቶ።
PSA 109:14 እያ አዋታ ናጋራይ ጎዳ ስንꬃን ቆፈቶ፤ እያ አየ ናጋራይ ቁሸቶፎ።
PSA 109:15 ጎዳይ ኤንታ ናጋራ ኡባ ዎደ ቆፖ፤ ኤንቲ ሳአ ቦላ ሀሳየቶፎ።
PSA 109:16 እ ኬሀ ኦꬃናዉ ፖሎ ቆፕቤና፤ ማንቆታ፥ መቶታንቾታ፥ ቆሄትዳይሳታ ጎድድ ዎꬍስ።
PSA 109:17 እ ባዳናዉ ዶስዳ ግሾ፥ እ ባደትዳይሳ ግዶ። እ አንጃናዉ ዶሶና ግሾ፥ እያ አንጆይ እያፐ ሃክስ።
PSA 109:18 ባደꬅ እያ አፍላዳ ማእስ፤ እያ ባደꬅ ሃꬃዳ እያ ቦላ ላክስስ፤ ዛይተዳ እያ መቀꬃ ግዶ ገሎ።
PSA 109:19 አፍላዳ እያ ካሞ፤ ዳንጮዳ ኡባ ዎደ እያ ፄሳን ደኦ።
PSA 109:20 ሀ ታና ሞተይሳነ ታ ቦላ ኢታ ኦደተይሳታ ጎዳይ ሄሳዳ ኦꬅድ ሴሮ።
PSA 109:21 ሽን አቤት ኡባ ሃርያ ጎዳዉ፥ ነ ሱንꬃ ግሾ ታና ማዳ። ነ መርና ሲቁዋነ ነ ኬሀተꬃ ግሾ ታና አሻ።
PSA 109:22 ታኒ ማንቆነ መቶታንቾ አስ፤ ታ ዎዛናይ ማዱንፅስ።
PSA 109:23 ታ ኦማርሳ ኩያዳ ꬋያና ሀናይስ፤ ታ ቦለዳ ቆቆፈታስ።
PSA 109:24 ፆማን ታ ጉልባታይ ዳቡርስ፤ ታ አሳተꬃይ ላፍን መቀꬅ አትስ።
PSA 109:25 ታና ሞተይሳታስ ቀልቅሰꬃስ አታስ፤ ታና በእድ፥ ባንታ ሁጵያ ቃꬆሶና።
PSA 109:26 አቤት ጎዳዉ ታ ፆሳዉ፥ ታና ማዳ፤ መርና ነ ሲቁዋዳ ታና አሻ።
PSA 109:27 ነ ኩሸይ ሀይሳ ኦꬅዳይሳነ፥ ነ ሀይሳ ኦꬅዳይሳ ታ ሞርከት ኤሮ።
PSA 109:28 ኤንቲ ታና ባዶሶና፥ ሽን ነ ታና አንጃና፤ ታና ጎደይሳት ዬላቶ፤ ሽን ነ ታና ኡፋይሳ።
PSA 109:29 ታና ሞተይሳት ዬላ ማኦ፤ ባንታ ካዉሻ አፍላዳ ማኦ።
PSA 109:30 ታኒ ታ እንፃርሳን ጎዳ ጋላታና፤ ደርያ ሺቁዋን እያ ሳባና።
PSA 109:31 እ ማንቆታ ግሾ ሞተቴስ፤ ሀይቆስ ፕርደትዳይሳታ አሼስ።
PSA 110:1 ዳዊታ ማዝሙረ ጎዳይ ታ ጎዳ፥ “ታ ነ ሞርከታ ነ ቶሆይ የꬍያ በሲ ኦꬃና ጋካናዉ፥ ሀይሳን ታፐ ኡሻቻ ባጋን ኡታ” ያግስ።
PSA 110:2 ጎዳዉ ነ ምኖተꬃ ፃምአ ፅዮነፐ የዳ፤ “ነ ሞርከታ ሃራ” ያጋና።
PSA 110:3 ነ ሃርያ ጋላስ ነ ደረይ ዶስድ ነዉ ሃረታና፤ ነ ጌሻ ማኡዋ ማአዳ፥ ዎንታ ፃልቀዳ ነ ኩመꬃ ዎልቃን ጶላና።
PSA 110:4 ጎዳይ፥ “ማልከፃደቅ ካህነ ግድዳይሳዳ፥ ነ መርናዉ ካህነ ግዳና” ያግድ ጫቅስ፤ እያ ጫቆይ ላመተና።
PSA 110:5 ጎዳይ ነ ኡሻቻን ደኤስ፤ ባ ሀንቁዋ ጋላስ ካዎታ ትንቸረꬃና።
PSA 110:6 እ ካዎተꬃታ ቦላ ፕርዳና፤ ኦላ ደንባታ አሀ ፃላላ ኦꬃና፤ ቢታ ኡባን ደእያ ካዎታ ꬋይሳና።
PSA 110:7 ካዎይ ኦገ ላንቀን ደእያ ፑልቱዋፈ ኡይድ፥ እ ባ ሁጵያ ꬎቁ ኦꬃና።
PSA 111:1 ጎዳ ጋላትተ፤ ሱረታ ሺቆን ታ ኩመꬃ ዎዛናን ጎዳ ጋላታና።
PSA 111:2 ጎዳ ኦሶት አይ መላ ግተ! ኤንታን ኡፋይትያ ኡባይ ኤንታ ቆፔስ።
PSA 111:3 እያ ኦሶት ቦንቾንነ ቴማን ኩምስ፤ እያ ፅሎተꬃይ መርናዉ ደኤስ።
PSA 111:4 እያ ማላልስያ ኦሶይ ሀሳየትሸ ዳናዳ ኦꬅስ፤ እ ኬሀነ ቃትያ ጎዳ።
PSA 111:5 ባዉ ያየይሳታስ ካꬅ እሜስ፤ ባ ጫቆ ቃላ መርናዉ ባለተና።
PSA 111:6 አላጋታ ቢታ ባ አሳስ አꬅድ እምድ፥ ባ ግታ ዎልቃ ባ አሳ በስስ።
PSA 111:7 እያ ኩሸ ኦሶት ቱማነ ሱረ፤ እያ ዎጋ ኡባይ አማነትዳይሳ።
PSA 111:8 ኤንቲ መርናዉ ኤቅድ ደኦሶና፤ ቱማተꬃንነ ሱረተꬃን እመትዶሶና።
PSA 111:9 እ ባ አሳ ዎዝስ፤ ጫቁዋ ኤንታራ መርናዉ ኤስስ፤ እያ ሱንꬃይ ጌሽነ ያሸይሳ።
PSA 111:10 ጭንጫተꬃስ ኮይሮይ ጎዳስ ያሽ፤ እያ ዎጋ ናገይሳታስ ሎኦ አኬክ ደኤስ። ጎዳይ መርናዉ ጋላተቶ!
PSA 112:1 ጎዳ ጋላትተ፤ ጎዳስ ያየይስነ እያ ኪታ ናገይስ አንጀትዳይሳ።
PSA 112:2 እያ ናይት ቢታን ዎልቃማ ግዳና፤ ሱረ አሳ የለታይ አንጀታና።
PSA 112:3 ሻሎይነ ዱረተꬅ እያ ኬꬃን ደኤስ፤ እያ ፅሎተꬃይ መርናዉ ዳና።
PSA 112:4 ኬሀ፥ ፅሎነ ቃትያ አሳስ፥ ꬉማ ግዶን ፖኦይ ፖኤስ።
PSA 112:5 ኬሀተꬃን ጮ ታልእያ ኡራስ፥ ባ ኦሱዋ ሱረተꬃን ኦꬅያ ኡራስ ኬሀባይ ያና።
PSA 112:6 ፅሎ አስ አዉደካ ኩንደና፤ እ መርናዉ ሀሳየታና።
PSA 112:7 እያ ዎዛናይ ህርጎና ግሾነ እ ጎዳን አማነትያ ግሾ፥ ኢታባ ስእኮካ እ ዳጋመና፤
PSA 112:8 እያ ዎዛናይ ምኖ ግድያ ግሾ ያየና፤ ዉርሰꬃን እያ ሞርከት ፆነትን በአና።
PSA 112:9 እ ማንቁዋስ ዳርስድ እሜስ፤ እያ ፅሎተꬃይ መርናዉ ደኤስ፤ እያ ካጨይ ቦንቾን ꬎቁ ꬎቁ ጋና።
PSA 112:10 ኢታ አስ ሄሳ በእድ ይሎቴስ፤ መተርሸ ሳፅሸ ጮ ꬋዬስ፤ ኢታ አሳ አሞይ ጮ አታና።
PSA 113:1 ጎዳ ጋላትተ፤ ህንተኖ፥ ጎዳ አይለቶ፥ ጎዳ ሱንꬃ ጋላትተ።
PSA 113:2 ጎዳ ሱንꬃይ፥ ሀችፈ መርና ጋካናዉ ጋላተቶ።
PSA 113:3 አዋይ ዶልያሱዋፐ ዉልያሱዋ ጋካናዉ፥ ጎዳ ሱንꬃይ ጋላተቶ።
PSA 113:4 ጎዳይ ካዎተꬃ ኡባ ሃሬስ፤ እያ ቦንቾይ ሳሉዋፐ ꬎቃ።
PSA 113:5 ጎዳ ኑ ፆሳ መል ኦኔ? እ ቦላ ꬎቃን ባ አራታን ኡትስ።
PSA 113:6 እ ሳሎታነ ሳኣ በአናዉ ዱገ ሆኬስ።
PSA 113:7 እ ማንቁዋ ባናፐ ꬎቁ ኦꬄስ፤ መቶታንቹዋ ብዶፐ ደንꬄስ።
PSA 113:8 ሞርናታራ ላገ ኦꬄስ፤ ሀላቃታራ ꬎቃ በሳን ኡትሴስ።
PSA 113:9 ማይንꬃ ማጫስዉ ናይታ አዮ ኦꬅድ፥ ኡፋይስድ እ ኬꬃን እዮ ቦንችሴስ። ጎዳ ጋላትተ!
PSA 114:1 እስራኤለ አሳይ ግብፀ ቢታፈ ከይዳ ዎደ፥ ያይቆባ ሼሻይ አላጋ ቃላን፥ ሃሳያ አሳ አግድ ብዳ ዎደ፥
PSA 114:2 ይሁዳ አሳይ ጎዳስ ጌሻ አስ ግድስ፤ እስራኤለ አሳይ እያዉ ሃረትስ።
PSA 114:3 አባይ ሄሳ በእድ ባቃትስ፤ ዮርዳኖሰ ሻፋይ ጉየ ስምስ።
PSA 114:4 ደረት ዴሻዳ ጉፕዶሶና፤ ዙማት ዶርሳ ማራዳ ዶዝግዶሶና።
PSA 114:5 አባዉ፥ ነ አይስ ባቃታዲ? ዮርዳኖሰ፥ ነ አይስ ጉየ ስማዲ?
PSA 114:6 ደረቶ፥ ዴሻዳ አይስ ጉፕደቲ? ዙማቶ፥ ዶርሳዳ አይስ ዶዝግደቲ?
PSA 114:7 ነኖ ቢታዉ፥ ጎዳ ስንꬃን፥ ያይቆባ ፆሳ ስንꬃን ኮኮራ።
PSA 114:8 እ ዛላ ኤለ ሃꬅ ከሴስ፤ ምኖ ዛላ ሃꬃ ፑልቶ ኦꬄስ።
PSA 115:1 አቤት ጎዳዉ፥ ኑ ግሾ ግዶናሽን፥ ነ ሲቁዋነ ነ አማነተꬃ ግሾ፥ ነ ሱንꬃ ቦንቻ።
PSA 115:2 አይስ ካዎተꬃት፥ “ኤንታ ፆሳይ አዉኔ?” ያጋኔ?
PSA 115:3 ኑ ፆሳይ ሳሎን ደኤስ፤ ባ ዶስዳባ ኡባ ኦꬄስ።
PSA 115:4 ሽን ኤንታ ኤቃት አሰ ኩሸን ኦሰትዶሶና፤ ኤንቲ ብራፐነ ዎርቃፈ መትዶሶና።
PSA 115:5 ኤንታዉ ዶን ደኤስ፥ ሽን ሃሳዮኮና፤ አይፈይ ደኤስ፥ ሽን ፄሎኮና።
PSA 115:6 ኤንታዉ ሀይꬅ ደኤስ፥ ሽን ስኦኮና፤ ሲይ ደኤስ፥ ሽን ስንጎኮና።
PSA 115:7 ኤንታዉ ኩሸይ ደኤስ፥ ሽን ቦች ኤሮኮና፤ ቶሆይ ደኤስ፥ ሽን ሄመቶኮና፤ ኤንታ ሲፅናꬃራ ኮሽንች ከየና።
PSA 115:8 ኤንታ መይሳትነ ኤንታ አማነተይሳት ኤንታ መላ ግዶ።
PSA 115:9 እስራኤለ አሳዉ፥ ጎዳን አማነትተ፤ ህንተና ማደይነ ህንተ ጎንዳለይ እያ።
PSA 115:10 አሮና ኬꬃ አሳዉ፥ ጎዳን አማነትተ፤ ህንተና ማደይነ ህንተ ጎንዳለይ እያ።
PSA 115:11 ጎዳስ ያየይሳቶ፥ ጎዳን አማነትተ፤ ህንተና ማደይነ ህንተ ጎንዳለይ እያ።
PSA 115:12 ጎዳይ ኑና ቆፔስ፤ እ ኑና አንጃና፤ እ እስራኤለ አሳ አንጃና፤ እ አሮና ኬꬃ አሳ አንጃና።
PSA 115:13 ጎዳስ ያየይሳታ፥ እ ጉꬃ ግታ አንጃና።
PSA 115:14 ጎዳይ ህንተና ዳርሶ፤ ህንተናነ ህንተ ናይታ አንጆ።
PSA 115:15 ሳሉዋነ ሳኣ መꬍዳ ጎዳይ ህንተና አንጆ።
PSA 115:16 ሳሎይ ፆሳባ፤ ሽን ሳአ አሳስ እሚስ።
PSA 115:17 ሀይቅዳይሳት ጎዳ ጋላቶኮና፤ ዱፎን ዝንእዳይሳት እያ ሳቦኮና።
PSA 115:18 ሽን ኑኒ፥ ደኦን ደኤይሳት፥ ሀችፈ መርና ጋካናዉ፥ ጎዳ ጋላቶስ። ጎዳ ጋላትተ።
PSA 116:1 ጎዳይ ታ ዋሱዋነ ታ ዎሳ ስእዳ ግሾ፥ ታኒ እያ ዶሳይስ።
PSA 116:2 እ ባ ሀይꬃ ታኮ ዛርዳ ግሾ፥ ታ ደኦ ላይꬃ ኡባን እያ ፄጋና።
PSA 116:3 ሀይቆይ ፅሄዳ ታና ተቅስ፤ ዱፎ ህርጋይ ታና ኦይክስ፤ ኡንእነ መቶይ ታና ቃችስ።
PSA 116:4 ሄ ዎደ፥ “አቤት ጎዳዉ፥ ታና አሻ” ያጋዳ ጎዳ ሱንꬃ ፄጋስ።
PSA 116:5 ጎዳይ ኬሀነ ፅሎ፤ ኑ ፆሳይ ቃቴስ።
PSA 116:6 ጎዳይ አሽከታ ናጌስ፤ ታ መቶትዳ ዎደ ታና አሽስ።
PSA 116:7 ጎዳይ ነዉ ኬሀ ግድያ ግሾ፥ ህዛ ታ ሸምፐ፥ ዎፑ ጋ።
PSA 116:8 ጎዳይ ታ ሸምፑዋ ሀይቆፐ፥ ታ አይፍያ አፉꬃፈ፥ ታ ቶሁዋ ꬉበፐ አሽስ።
PSA 116:9 ታኒ ደኦን ደኤይሳታ ግዶን፥ ጎዳ ስንꬃን ሄመታይስ።
PSA 116:10 ታኒ፥ “ዳሮ ዋየታስ” ግዳ ዎደ፥ ታ አማኑዋ አጋብከ።
PSA 116:11 ታዉ ሳእ ሀድርዳ ዎደ፥ “አስ ኡባይ ዎርዳንቾ” ያጋስ።
PSA 116:12 እ ታዉ ኬህዳ ኬሀተꬃ ግሾ ጎዳስ አይ ቃንፃናዉ ዳንዳእያና?
PSA 116:13 ጎዳይ ታና አሽዳ ግሾ ጋላታና፥ ፁአ ዎይነ ኡሻ ያርሾ ኦꬃዳ ሺሻና።
PSA 116:14 እያ አሳ ኡባ ስንꬃን ታ ቃንገꬃ ጎዳስ ጋꬃና።
PSA 116:15 ጌሻታ ሀይቆይ ጎዳ ስንꬃን፥ ዳሮ አልኦ።
PSA 116:16 አቤት ጎዳዉ፥ ታኒ ነ አይለ፤ ታኒ ነ አይለ፥ ነ ጋꬍንደ ናኣ፤ ታና ቃሾፐ ነ ብርሻዳሳ።
PSA 116:17 ጎዳዉ፥ ታ ጋላታ ያርሾ ነዉ ያርሻና፤ ነ ሱንꬃ ፄጋና።
PSA 116:18 አሳ ኡባ ስንꬃን ታ ቃንገꬃ ጎዳስ ጋꬃና።
PSA 116:19 የሩሳላመን ደእያ ፆሳ ኬꬃ ዳባባን፥ ታ ቃንገꬃ ጋꬃና። ጎዳ ጋላትተ።
PSA 117:1 ካዎተꬃት ኡባይ ጎዳ ጋላትተ፤ አሳ ኡባይ እያ ሳቢተ።
PSA 117:2 እያ ሲቆይ ኑስ ምኖ፤ እያ አማነተꬃይ መርናሳ። ጎዳ ጋላትተ።
PSA 118:1 ጎዳይ ኬሀ ግድያ ግሾ ጋላትተ፤ እያ ሲቆይ መርናሳ።
PSA 118:2 እስራኤለ አሳይ፥ “እያ ሲቆይ መርናሳ” ያጎ።
PSA 118:3 አሮና ኬꬃ አሳይ፥ “እያ ሲቆይ መርናሳ” ያጎ።
PSA 118:4 ጎዳስ ያይያ ኡባይ፥ “እያ ሲቆይ መርናሳ” ያጎ።
PSA 118:5 ታ ኡንኤትዳ ዎደ ጎዳኮ ዋሳስ፤ እ ታ ዋሱዋ ስእድ ታና ላአ ከስስ።
PSA 118:6 ጎዳይ ታራ ደእያ ግሾ ታ ያይከ፤ አስ ታና አይ ኦꬃኔ?
PSA 118:7 ጎዳይ ታና ማዳናዉ ታራ ደኤስ፤ ታ ሞርከታ ፆነተꬃ ታ በአና።
PSA 118:8 አሳን አማነታናፐ ጎዳን ጌምድ አተይስ ሎኦ።
PSA 118:9 ግታ አሳን አማነታናፐ ጎዳን ጌምድ አተይስ ሎኦ።
PSA 118:10 ካዎተꬃት ኡባይ ታና ተቅድ ኦይክዶሶና፤ ሽን ጎዳ ሱንꬃን ታ ኤንታ ፆናስ።
PSA 118:11 ኤንቲ ታ ዩሹዋ ተቅዶሶና፤ ሽን ጎዳ ሱንꬃን ታ ኤንታ ፆናስ።
PSA 118:12 ኤንቲ ታ ዩሹዋ ማꬃዳ ተቅዶሶና፤ ሽን ቡረይ ታማን ኤፀይሳዳ ኤፅድ ꬋይዶሶና፤ ጎዳ ሱንꬃን ታ ኤንታ ꬋይሳስ።
PSA 118:13 ታኒ ሱገታዳ ኩንዳናዉ ጋካስ፤ ሽን ጎዳይ ታና ማድስ።
PSA 118:14 ጎዳይ ታ ምኖተꬃነ የꬃ፤ እ ታና አሸይሳ ግድስ።
PSA 118:15 ፅሎታ ዱንካንያን ኦላ ፆንድ፥ ስምያ አሳ ኡፋይሳስ ግያባ ስእተ፤ ጎዳ ኡሻቻ ኩሸይ ግታባ ኦꬅስ።
PSA 118:16 ጎዳ ኡሻቻ ኩሸይ ፆኖ እሚስ፤ ጎዳ ኡሻቻ ኩሸይ ግታባ ኦꬅስ።
PSA 118:17 ታኒ ሀይቅከ፤ ደኦን ዳና፤ ጎዳይ ኦꬅዳባ አዋጃና።
PSA 118:18 ጎዳይ ታና ኢታ ሴራ ሴርስ፤ ሽን ሀይቆስ አꬅድ እምቤና።
PSA 118:19 ታኒ ግዶ ገላዳ ጎዳ ጋላታና መላ፥ ፅሎተꬃ ፐንገታ ታዉ ዶይተ።
PSA 118:20 ሀይስ ጎዳ ፐንገ፤ ፅሎት እያራ ገሎሶና።
PSA 118:21 ጎዳዉ፥ ነ ታና ስእዳ ግሾነ ታዉ ፆኖ እምዳ ግሾ ታ ነና ጋላታይስ።
PSA 118:22 ግምበይሳት ካꬍድ የግዳ ሹቻይ፥ ጎዳ ፃጱዋ ምንꬅያ ሹቹ ግድስ።
PSA 118:23 ሀይስ ጎዳ ኦሶ፤ ኑ አይፍያስ ማላልስያባ።
PSA 118:24 ሀይስ ጋላሳይ ጎዳይ ኦꬅዳ ጋላስ፤ አነ ኑኒ እያን ኡፋይቶስነ እልሎስ።
PSA 118:25 ጎዳዉ፥ ሀእ ኑና አሻ፤ ጎዳዉ፥ ሀእ ኑስ እንጀያ።
PSA 118:26 ጎዳ ሱንꬃን ያ አስ አንጀትዳይሳ ግዶ፤ ኑኒ ፆሳ ኬꬃፈ ህንተና አንጆስ።
PSA 118:27 ጎዳይ ፆሳ፤ እ ኑ ቦላ ፖእስስ፤ ያርሾ በሳን ደእያ ካጭያኮ ከይተ፤ እርፃ ታሸ ኦይክድ ባኣለ ቦንችተ።
PSA 118:28 ኔኒ ታ ፆሳ፤ ታ ነና ጋላታና፤ ኔኒ ታ ፆሳ፤ ታ ነና ሳባና።
PSA 118:29 ጎዳይ ኬሀ ግድያ ግሾ እያ ጋላትተ፤ እያ ሲቆይ መርናሳ።
PSA 119:1 ባንታ ኦግያን ቦረይ ባይናይሳትነ ጎዳ ዎጋዳ ሄመተይሳት አንጀትዳይሳታ።
PSA 119:2 እያ ኪታ ናገይሳትነ ባንታ ኩመꬃ ዎዛናን እያ ኮየይሳት አንጀትዳይሳታ።
PSA 119:3 ኤንቲ ባላ ኦꬅድ ኤሮኮና፤ ጎዳ ኦግያን ሄመቶሶና።
PSA 119:4 ነ ኪታ አማነትድ ናጋና መላ፥ ኔኒ ኑና ኪታዳሳ።
PSA 119:5 ነ ዎጋ ናጋዳ ታ ኦገይ ምናና መላ ኮያይስ።
PSA 119:6 ነ ኪታ ኡባ አኬካዳ፥ ታ ፖሎ ዬላትከ።
PSA 119:7 ነ ፅሎ ፕርዳ ታ ታማርዳ ዎደ፥ ታ ነና ሱረ ዎዛናን ጋላታና።
PSA 119:8 ታ ነ ህግያ ናጋና፤ ታና ፖሎ የጎፋ።
PSA 119:9 ያላጋይ ባ ኦግያ ዋትድ፥ ጌሻተꬃን ናጋናዉ ዳንዳኢ? ነ ቃላ ኪተትኮ ዳንዳኤስ።
PSA 119:10 ታ ኩመꬃ ዎዛናን ነና ኮያስ፤ ነ ኪታፐ ካረ ከዮናዳ ታና ናጋ።
PSA 119:11 ታኒ ነ ቦላ ናጋራ ኦꬆና መላ ነ ቃላ ታ ዎዛናን ቆሳስ።
PSA 119:12 አቤት ጎዳዉ፥ ነ ጋላተታ፤ ነ አዋጁዋ ታና ታማርሳ።
PSA 119:13 ነ ዶናፐ ከይያ ፕርዳ ኡባ ታኒ ታ እንፃርሳን ኦዳና።
PSA 119:14 ዱረተꬃን ኡፋይተይሳፈ አꬃዳ፥ ታ ነ ህግያን ኡፋይታይስ።
PSA 119:15 ነ ዎጋታ ዛራ ዛራዳ ቆፓይስ ነ ኦግያ ሎይꬃዳ አኬካይስ።
PSA 119:16 ታኒ ነ ህግያን ኡፋይታይስ፤ ነ ቃላ ዶግከ።
PSA 119:17 ታኒ ደኦን ዳና መላነ ነ ቃላ ኪተታና መላ ታዉ ነ አይልያስ ሎኦባ ኦꬃ።
PSA 119:18 ነ ህግያን ደእያ ማላልስያ ቱማተꬃ ታ በአና መላ ታ አይፍያ ዶያ።
PSA 119:19 ታኒ ሀ ሳአን እማ፤ ነ ኪታ ታፐ ገንꬆፋ።
PSA 119:20 ታ ሸምፕያ ኡባ ዎደ ነ ፕርዳ ላሞታሸ ሀይቃሱ።
PSA 119:21 ኦቶረይሳታ፥ ባደትዳይሳታነ፥ ነ ኪታፐ ካረ ከየይሳታ ነ ሴራሳ።
PSA 119:22 ታኒ ኔኒ ኦድዳይሳ ኦꬅዳ ግሾ፥ ኤንታ ጫሻነ ቦርያ ታ ቦላፈ ድጋ።
PSA 119:23 ሀር አቶሽን ሀላቃት ሺቅድ፥ ታ ቦላ ማቀትኮካ፥ ታኒ፥ ነ ኦሳንቾይ፥ ነ አዋጁዋ ዛራ ዛራዳ ቆፓና።
PSA 119:24 ነ ማርካተꬃይ ታና ኡፋይሴስ፤ እ ታና ዞሬስ።
PSA 119:25 ታኒ ሀይቃና ሀናይስ፤ ነ ግዳ ቃላዳ ታና አሻ።
PSA 119:26 ታኒ ታ ኦግያባ ነዉ ኦድን፥ ነ ታና ስአዳሳ፤ ህዛ ነ አዋጁዋ ታና ታማርሳ።
PSA 119:27 ነ ዎጋ ታና አኬክሳ፤ ማላልስያ ኦሱዋ ታኒ ዛራ ዛራዳ ቆፓና።
PSA 119:28 አዛኖይ ዳርዳ ግሾ ታ ሸምፖይ ዳቡርስ፤ ኔኒ ግዳ ቃላዳ ታና ምንꬃ።
PSA 119:29 ዎርዶ ኦገ ታፐ ሃሳ፤ ነ ኬሀተꬃን ነ ህግያ ታና ታማርሳ።
PSA 119:30 ታኒ ቱማ ኦገ ዶራስ፤ ነ ፕርዳ ሀይዛስ።
PSA 119:31 አቤት ጎዳዉ፥ ታ ነ ህግያ ምንꬃዳ ኦይካስ፤ ህዛ ታና ዬላዮፓ!
PSA 119:32 ታ ዎዛና ላአ ከስዳ ግሾ፥ ታኒ ነ ህግያ ኦግያን ዎፃይስ።
PSA 119:33 አቤት ጎዳዉ፥ ነ አዋጁዋ ብርሸꬃ ታና ታማርሳ፤ ታኒ ዉርሰꬅ ጋካናዉ እያ ናጋና።
PSA 119:34 ታኒ ነ ህግያ ናጋና መላነ ታ ኩመꬃ ዎዛናፐ እያዉ ክተታና መላ፥ ነ ታዉ አኬካ እማ።
PSA 119:35 ታኒ እያን ኡፋይትያ ግሾ፥ ነ ኪታ ኦግያን ታና ካለꬃ፤
PSA 119:36 ታ ዎዛና አሙዋኮ ግዶናሽን፥ ነ ህግያኮ ታና ዛራ።
PSA 119:37 ፓꬆናባ ፄሎና መላ፥ ታ አይፈታ ተቃ፤ ነ ኦግያን ታ ደኡዋ ኦራፅሳ።
PSA 119:38 ነዉ ያያና መላ፥ ነ ገልዳ ቃላ፥ ታዉ ነ አይልያስ፥ ፖላ።
PSA 119:39 ታና ያሽያ ጫሻ ታፐ ድጋ፤ ነ ፕርዳይ አይ መላ ሎኦ!
PSA 119:40 ታኒ ነ ዎጋ ናጋናዉ አሞታይስ፤ ኔኒ ፅሎ ግድያ ግሾ፥ ታ ደኡዋ ኦራፅሳ።
PSA 119:41 አቤት ጎዳዉ፥ ነ ሲቁዋ ታና በሳ፤ ኔኒ ገልዳ ቃላዳ ታና አሻ።
PSA 119:42 ታኒ ነ ቃላን አማነትያ ግሾ፥ ታና ጫየይሳታ ዛራናዉ ዳንዳአይስ።
PSA 119:43 ታኒ ነ ፕርዳ ኡፋይስ ኦꬅዳ ግሾ፥ ታ እንፃርሳፈ ቱማተꬃ ቃላ ꬋይሶፋ።
PSA 119:44 ታኒ መሪ መርናዉ ነ ህግያ ኪተታና።
PSA 119:45 ታኒ ነ ዎጋ ፖልያ ግሾ፥ አሆን ሄመታና።
PSA 119:46 ታኒ ካዎታ ስንꬃን ኤቃዳ፥ ኔኒ ግዳባ ኦዳሸ ዬላትከ።
PSA 119:47 ታኒ ነ ኪታታ ዶሳይስ፥ ኤንታን ኡፋይታይስ።
PSA 119:48 ታኒ ዶስያ ነ ኪታ ቦንቻይስ፤ ነ አዋጁዋ ዛራ ዛራዳ ቆፓና።
PSA 119:49 ኔኒ ታዉ፥ ነ አይልያስ፥ እምዳ ቃላ ቆፓ፤ ነ ቃላን ታኒ ኡፋይስ ኦꬃይስ።
PSA 119:50 ነ ቃላይ ታና ደኦን ዎꬄስ፤ እ መቶ ዎደ ታና ምንꬄስ።
PSA 119:51 ኦቶራንቾት ታና ልከፈ አꬅድ ጫዮሶና፤ ሽን ታኒ ነ ህግያፈ ሸርእ ጊከ።
PSA 119:52 አቤት ጎዳዉ፥ በንፐ ደእያ ነ ፕርዳ ታኒ ሀሳያይስ፤ ሄሳን ታኒ ምነታይስ።
PSA 119:53 ኢታት ነ ህግያ ኪተቶናይሳ በእን፥ ታና ይሎይ ዎꬍስ።
PSA 119:54 ታኒ ደእያ አላጋ ቢታን ነ አዋጆይ ታዉ የꬅ ግድስ።
PSA 119:55 አቤት ጎዳዉ፥ ታኒ ቃማ ነ ሱንꬃ ቆፓይስ፤ ነ ህግያ ናጋይስ።
PSA 119:56 ታ ነ ዎጋ ናጋና፤ እ ታዉ ኦሶ ግድስ።
PSA 119:57 አቤት ጎዳዉ፥ ታ ሳማይ ነና፤ ታ ነ ህግያ ናጋናዉ ቃንፃስ።
PSA 119:58 ታ ኩመꬃ ዎዛናን ነና ዎሳይስ፤ ነ ገልዳ ቃላዳ ታዉ ቃታ።
PSA 119:59 ታኒ ታ ኦግያ አኬካ ፄላዳ፥ ነ ህግያ ካላናዉ ስማስ።
PSA 119:60 ታኒ ነ ኪታ ናጋናዉ፥ ኤሶታናፐ አትሽን፥ ጋምእከ።
PSA 119:61 ኢታት ታዉ ፅሄ የግኮካ፥ ታኒ ነ ህግያ ዶግከ።
PSA 119:62 ነ ፅሎ ፕርዳ ግሾ፥ ነና ጋላታናዉ፥ ታኒ ግድ ብላሄ ደንዳይስ።
PSA 119:63 ታኒ ነዉ ያየይሳታ ኡባስነ ነ ዎጋ ናገይሳታ ዳቦ።
PSA 119:64 አቤት ጎዳዉ፥ ሳእ ነ ሲቁዋን ኩምስ፤ ነ አዋጁዋ ታና ታማርሳ።
PSA 119:65 አቤት ጎዳዉ፥ ነ ገልዳ ቃላዳ ታዉ ነ አይልያስ ኬሀባ ኦꬃዳሳ።
PSA 119:66 ታኒ ነ ኪታታን አማነትያ ግሾ፥ ሎኦ ፕርዳነ ኤራተꬅ ታና ታማርሳ።
PSA 119:67 ታኒ ሴረታናፐ ካሰ ካረ ሄመታስ፤ ሽን ሀእ ነ ቃላስ ኪተታይስ።
PSA 119:68 ኔኒ ኬሀ፤ ኔኒ ኬሀባ ኦꬃሳ፤ ነ አዋጁዋ ታና ታማርሳ።
PSA 119:69 ኦቶራንቾት ታ ሱንꬃ ዎርዶን ኢሶሶና፤ ሽን ታ ነ ዎጋ ታ ኩመꬃ ዎዛናን ናጋና።
PSA 119:70 ኤንታ ዎዛናይ ኩምꬅ ዶጭስ፤ ሽን ታኒ ነ ህግያን ኡፋይታይስ።
PSA 119:71 ነ ህግያ ታማራና መላ ነ ታና ሴርዳይስ ታዉ ሎኦ ግድስ።
PSA 119:72 ዳሮ ዎርቃፈነ ብራፐ፥ ነ ዶናፐ ከይያ ህገይ ታዉ አꬌስ።
PSA 119:73 ታና ነ ኩሸይ መꬍስ፤ ነ ኩሸይ ጊግስስ፤ ነ ኪታ ታማራና መላ ታዉ አኬካ እማ።
PSA 119:74 ታኒ ነ ቃላን ኡፋይስ ኦꬅዳ ግሾ፥ ነና ቦንቸይሳት ታና በእድ ኡፋይቶ።
PSA 119:75 አቤት ጎዳዉ፥ ነ ፕርዳይ ፅሎ ግደይሳ ኤራስ፤ ነ ታና ሴርዳይ አማነተꬃን ግደይሳ ታ አኬካስ።
PSA 119:76 ታዉ ነ አይልያስ ግዳ ቃላዳ፥ ነ ሲቆይ ታና ምንꬆ።
PSA 119:77 ነ ህገይ ታና ኡፋይስያ ግሾ፥ ታኒ ደኦን ዳና መላ ታዉ ቃታ።
PSA 119:78 ኦቶራንቾት ታና ዎርዶን ሞትያ ግሾ ዬላቶ፤ ታኒ ነ ዎጋ ዛራ ዛራዳ ቆፓይስ።
PSA 119:79 ነዉ ያየይሳትነ ነ ማርካተꬃ ኤረይሳት ታኮ ዮ።
PSA 119:80 ታ ዬላቶና መላ፥ ታ ዎዛናይ ነ ህግያን ቦረይ ባይናይሳ ግዶ።
PSA 119:81 ኔኒ ታና አሻና መላ፥ ታኒ ናጋሸ ዳቡራስ፤ ታኒ ነ ቃላን ኡፋይስ ኦꬃይስ።
PSA 119:82 ኔኒ ግዳ ቃላይ ፖለትን በአናዉ ናግሽን ታ አይፈይ ተልጁምስ። “ነ ታና አዉደ ምንꬃነ” ያጋስ።
PSA 119:83 ጩያን ካቀትዳ ኦጎሮዳ ጉንዳስ፤ ግዶሽን ነ አዋጁዋ ባላቢከ።
PSA 119:84 ታኒ ነ አይለይ አዉደ ጋካናዉ ናጎ? ታና የደይሳታ ነ አዉደ ፕርዳኔ?
PSA 119:85 ነ ህግያ ናጎና ኦቶራንቾት ታና ኦይካናዉ ኦላ ቦኮሶና።
PSA 119:86 ነ ኪታ ኡባይ አማንይሳታ፤ ጋሶይ ባይና አሳይ ታና የደꬅያ ግሾ ታና ማዳ።
PSA 119:87 ኤንቲ ታና ዎꬍ ድግድ አግዶሶና፤ ሽን ታ ነ ዎጋ አጋብከ።
PSA 119:88 ነ ሲቁዋን ታ ደኡዋ ናጋ፤ ታ ነ ኪታ ናጋና።
PSA 119:89 አቤት ጎዳዉ፥ ነ ቃላይ መርናሳ፤ እ ሳሎን ምንድ ደኤስ።
PSA 119:90 የለታፐ የለታ ጋካናዉ ነ አማነታሳ፤ ነ ሀ ሳኣ ምንꬃዳ ኤሳዳሳ፤ እካ ምንድ ደኤስ።
PSA 119:91 ኡባይ ነ አይለ ግድያ ግሾ፥ ሀች ጋካናዉ ኡባይ ነ ኪታዳ ምንድ ደኤስ፤
PSA 119:92 ነ ህገይ ታና ኡፋይሶናባ ግድያኮ፥ ታ ዋያን ታ ꬋያናሽን።
PSA 119:93 ታኒ ነ ዎጋ ኩመꬅ ዶግከ፤ ኔኒ እያን ታና ደኦን ዎꬃዳሳ።
PSA 119:94 ታኒ ነባ ግድያ ግሾ ታና አሻ፤ ታኒ ነ ዎጋ ናጋናዉ ኮያይስ።
PSA 119:95 ኢታት ታና ꬋይሳናዉ ዙግድ ናጎሶና፤ ሽን ታኒ ኔና ቆፓይስ።
PSA 119:96 ፖሎ ጌተትዳባ ኡባስ ዛው ደኤይሳ ታ በአስ፤ ሽን ፖሎ ግድዳ ህግያስ ዛው ባዋ።
PSA 119:97 ታኒ ነ ህግያ ዋናዳ ዶስያና! ኩመꬃ ጋላስ ታኒ እያ ቆፓይስ።
PSA 119:98 ነ ኪታይ ኡባ ዎደ ታራ ደእያ ግሾ፥ ታ ሞርከታፐ አꬅድ ታና አኬካ ከሶሶና።
PSA 119:99 ታኒ ኔ ህግያ ቆፕያ ግሾ፥ ታ አስታማረታፐ አꬍዳ ጭንጫተꬅ ታዉ ደኤስ።
PSA 119:100 ታኒ ነ ዎጋ ኪተትያ ግሾ፥ ጭማታፐ አꬃዳ አኬካይስ።
PSA 119:101 ታኒ ነ ቃላ ኪተታናዉ ኮይያ ግሾ፥ ታ ቶሁዋ ኢታ ኦገ ኡባፈ ናጋስ።
PSA 119:102 ኔኒ ታና ታማርስዳ ግሾ፥ ታ ነ ህግያፈ ጋፃ ከይከ።
PSA 119:103 ነ ቃላይ ዋንድ ማልእ! እልሎ ኤሳፈ አꬍድ ማልኤስ።
PSA 119:104 ነ ዎጋፐ አኬካ ደማስ፤ ሄሳ ግሾ፥ ጌላ ኦገ ኡባ እፃስ።
PSA 119:105 ነ ቃላይ ታ ቶሁዋስ ፆምፐ፥ ታ ኦግያስ ፖኦ።
PSA 119:106 ነ ፅሎ ፕርዳዳ ዳናዉ፥ ታ ጫቅዳ ጫቁዋ ምንꬃና።
PSA 119:107 አቤት ጎዳዉ፥ ታ ዋየይ ዳሮ፤ ነ ኡፋይሳ ቃላዳ ታና ደኦን ዎꬃ።
PSA 119:108 አቤት ጎዳዉ፥ ታ ጋላታ ያርሹዋ ኤካ፤ ታና ነ ፕርዳ ታማርሳ።
PSA 119:109 ታ ሸምፖይ ኡባ ዎደ መቶን ደኤስ፤ ሽን ታኒ ነ ህግያ ዶግከ።
PSA 119:110 ኢታት ታዉ ግተ የግዶሶና፤ ሽን ታኒ ነ ዎጋፐ ካረ ከያብከ።
PSA 119:111 ነ ህገይ ታዉ መርና ሻሎ፤ እ ታ ዎዛናስ ኡፋይስ እሜስ።
PSA 119:112 ታ ሀይቃና ጋካናዉ ነ አዋጁዋዳ ኦꬃናዉ ቆፋ ቃቻስ።
PSA 119:113 ታኒ ናምኡ ቆፍ ደእያ አሳ እፃይስ፤ ሽን ነ ህግያ ዶሳይስ።
PSA 119:114 ነ ታዉ ጎንዳለነ ቆሰታዳ አትያ በሰ ታኒ ነ ቃላን ኡፋይስ ኦꬃይስ።
PSA 119:115 ታኒ ታ ፆሳ ኪታ ናጋና መላ፥ ህንተኖ፥ ኢታ ኦꬅያ ኡባይ ታፐ ሃክተ።
PSA 119:116 ታኒ ደኦን ዳና መላ ነ ኡፋይሳ ቃላዳ ታና ምንꬃ፤ ታ ኡፋይሳ ꬉምሶፓ።
PSA 119:117 ታ ሳሮ ዳና መላ ታና ዘምፕሳ፤ ታ ኡባ ዎደ ነ አዋጁዋ ስአና።
PSA 119:118 ነ አዋጁዋፈ ሃከይሳታ ነ ኮያካ፤ ኤንታ ጭሞይ ሀዳ።
PSA 119:119 ኢታታ ኡባ ነ ፕቶዳ ታይባሳ፤ ሄሳ ግሾ፥ ታኒ ነ ኪታ ዶሳይስ።
PSA 119:120 ታ አሳተꬃይ ያሻን ነዉ ኮኮሬስ፤ ታ ነ ህግያ ዳሮ ያያይስ።
PSA 119:121 ታ ሱረነ ፅሎ ኦꬃስ፤ ታና ታ ሞርከታስ አꬃዳ እሞፋ።
PSA 119:122 ታና ነ አይልያ ማዳናዉ ጫቃ፤ ታና ኦቶራንቾት ኡንኤꬃና መላ ኦꬆፋ።
PSA 119:123 ነ ታና አሻና ጋዳ ታ ፄልሽን፥ ነ ፅሎ ቃላ ታ ናግሽን፥ ታ አይፈይ ተልጁምስ።
PSA 119:124 ታዉ ነ አይልያስ፥ ነ ሲቁዋዳ ኦꬃ፤ ነ ህግያ ታና ታማርሳ።
PSA 119:125 ታና ነ አይልያ ነ ሲቁዋ በሳ፤ ነ ዎጋ ኤራና መላ ታዉ አኬካ እማ።
PSA 119:126 አቤት ጎዳዉ፥ አሳይ ነ ህግያ መንꬅዳ ግሾ፥ ነ ፕርዳና ዎደይ ሀእ ጋክስ።
PSA 119:127 ታኒ ነ ኪታ ዎርቃፈ አꬃዳ ዶሳይስ፤ ኤ፥ ዋላህ ባይና ዎርቃፈ አꬃዳ ዶሳይስ።
PSA 119:128 ሄሳ ግሾ፥ ታ ነ ዎጋታ ኡባ ካላይስ፤ ጌላ ኦገ ኡባ እፃስ።
PSA 119:129 ነ ዎጋ ኡባይ ማላልስያባ፤ ሄሳ ግሾ፥ ታ እያ ኪተታይስ።
PSA 119:130 ነ ቃላ ብርሸꬃይ ፖኦ እሜስ፤ ጭንጫተꬅ ፓጭዳይሳታስ አኬካ እሜስ።
PSA 119:131 ታኒ ነ ኪታ ሳሞታዳ፥ ታ ዶና ዶያስ።
PSA 119:132 ሃ ታኮ ስማ፤ ነና ዶሰይሳታስ ነ ኦይሳዳ ታዉ ቃታ።
PSA 119:133 ነ ኡፋይሳ ቃላዳ ታ ሄመꬃ ሱርሳ፤ ናጋር ታና ሃራና መላ ኦꬆፋ።
PSA 119:134 ታ ነ ዎጋ ኪተታና መላ ታና ኡንኤይሳታ ኩሸፐ ዎዛ።
PSA 119:135 ነ አይልያ ታ ቦላ ነ ሶምኡዋ ፖእሳ፤ ነ ህግያ ታማርሳ።
PSA 119:136 አሳይ ነ ህግያ መንꬅዳ ግሾ፥ ታ አፉꬃይ ሃꬃዳ ጎጌስ።
PSA 119:137 አቤት ጎዳዉ፥ ነ ፅሎ፤ ነ ፕርዳይ ሱረ።
PSA 119:138 ነ ህገይ ፅሎ፤ አይ ዎደካ አማነቴስ።
PSA 119:139 ታ ሞርከት ነ ቃላ ቶችዳ ግሾ፥ ታ ምሻይ ታማዳ ኤፅድ ከይስ።
PSA 119:140 ነ ኡፋይሳ ቃላይ ዳሮ አማነቴስ፤ ታ ነ አይለይ ዳሮ ዶሳይስ።
PSA 119:141 ታኒ ፓꬆናነ ካትዳ አስ፤ ግዶሽን ታ ነ ዎጋ ዶግከ።
PSA 119:142 ነ ፅሎተꬃይ መርናዉ ደኤስ፤ ነ ህገይ ቱማ።
PSA 119:143 መቶይነ ኡንእ ታና ጋክስ፤ ሽን ነ ኪታት ታና ኡፋይሶሶና።
PSA 119:144 ነ ዎጋይ መርናዉ ፅሎ፤ ታ ደኦን ዳና መላ ታዉ አኬካ እማ።
PSA 119:145 አቤት ጎዳዉ፥ ታ ኩመꬃ ዎዛናፐ ኔኮ ዋሳስ፤ ታና አላ፤ ታ ነ አዋጁዋ ናጋና።
PSA 119:146 ታ ኔኮ ዋሳስ፤ ታና አሻ፤ ታ ነ ህግያ ናጋና።
PSA 119:147 ፃልቀይ ጫሮና ዎንታ ደንዳዳ፥ ታና ማዳ ጋዳ ኔኮ ዋሳይስ፤ ነ ገልዳ ቃላን ኡፋይስ ዎꬃይስ።
PSA 119:148 ነ ቃላባ ዛራ ዛራ ቆፓናዉ፥ ቃማ ኡታ አቃይስ።
PSA 119:149 አቤት ጎዳዉ፥ ነ ሲቁዋ ግሾ፥ ታና ስአ፤ ነ ፅሎ ፕርዳዳ ታና ደኦን ዎꬃ።
PSA 119:150 ታና የደꬅያ ኢታት ታኮ ማቶሶና፤ ሽን ኤንቲ ነ ህግያፈ ሃኮሶና።
PSA 119:151 ሽን አቤት ጎዳዉ፥ ነ ታዉ ማታን ደኣሳ፤ ነ ኪታ ኡባይ ቱማ።
PSA 119:152 ታኒ በንፐ ዶማዳ፥ ነ ህግያ ታማራስ፤ ነ እያ መርናዉ ምንꬃዳ ኤሳዳሳ።
PSA 119:153 ታ ነ ህግያ ዶጎና ግሾ፥ ታ መቱዋ በአዳ ታና አሻ፤
PSA 119:154 ታ ግሾ ሞተታዳ ታና ዎዛ፤ ነ ኡፋይሳ ቃላዳ ታና ደኦን ዎꬃ።
PSA 119:155 ነ ህግያ ኤንቲ ኤኮና ግሾ፥ ኢታት አቶተꬅ ደሞኮና።
PSA 119:156 አቤት ጎዳዉ፥ ነ ቃይ ዳሮ፤ ነ ፅሎ ፕርዳዳ ታና ደኦን ዎꬃ።
PSA 119:157 ታና እፀይሳትነ የደይሳት ዳሮ፤ ሽን ታ ነ ህግያፈ ጋፃ ከይከ።
PSA 119:158 ኤንቲ ነ ኪታ ናጎና ግሾ፥ ታ ነና ካደይሳታ በአዳ ሻተታስ።
PSA 119:159 አቤት ጎዳዉ፥ ታ ነ ዎጋ ዶሰይሳ በአ፤ ነ ሲቁዋዳ ታና ደኦን ዎꬃ።
PSA 119:160 ነ ቃላይ ቱማ፤ ነ ፅሎ ፕርዳይ መርናዉ ደኤስ።
PSA 119:161 ሀላቃት ታና ጮ የደꬆሶና፤ ሽን ታ ዎዛናይ ነ ቃላ ያዬስ።
PSA 119:162 ዳሮባ ድእዳ አስ ኡፋይተይሳዳ፥ ነ ኡፋይሳ ቃላን ታ ኡፋይታይስ።
PSA 119:163 ታኒ ዎርዶ እፃይስ፤ ሻተታይስ፤ ሽን ነ ህግያ ዶሳይስ።
PSA 119:164 ነ ፅሎ ፕርዳ ግሾ፥ ታ ነና ጋላስ ላፑን ቶሆ ጋላታይስ።
PSA 119:165 ነ ህግያ ዶሰይሳታስ ፖሎ ሳሮተꬅ ደኤስ፤ ኤንታ አይብካ ꬉበꬃናዉ ዳንዳኤና።
PSA 119:166 አቤት ጎዳዉ፥ ታ ነ አቶተꬃ ኡፋይሳን ናጋይስ፤ ነ ኪታ ካላይስ።
PSA 119:167 ታኒ ነ ህግያ ናጋይስ፤ ታ ኩመꬃ ዎዛናፐ ዶሳይስ።
PSA 119:168 ታ ኦገ ኡባ ነ በእያ ግሾ፥ ታኒ ነ ህግያነ ነ ዎጋ ናጋና፤
PSA 119:169 አቤት ጎዳዉ፥ ታ ዋሶይ ነ ስን ጋኮ፤ ነ ኡፋይሳ ቃላዳ ታዉ አኬካ እማ።
PSA 119:170 ታ ዎሳይ ነ ስን ጋኮ፤ ነ ኡፋይሳ ቃላዳ ታና አሻ።
PSA 119:171 ኔኒ ነ አዋጁዋ ታና ታማርስያ ግሾ፥ ታ ዶናፐ ጋላት ፑልታና።
PSA 119:172 ነ ኪታ ኡባይ ፅሎ ግድያ ግሾ፥ ታ እንፃርሳይ ነ ቃላባ የፃና።
PSA 119:173 ታኒ ነ ዎጋ ዶርዳ ግሾ፥ ነ ኩሸይ ታና ማዳናዉ ጊግዳይሳ ግዶ።
PSA 119:174 አቤት ጎዳዉ፥ ነ አሻና መላ ታ ላሞታይስ፤ ነ ህገይ ታና ኡፋይሴስ።
PSA 119:175 ታኒ ነና ጋላታና መላ፥ ታና ደኦን ዎꬃ፤ ነ ፕርዳይ ታና ማዶ።
PSA 119:176 ታኒ ꬋይዳ ዶርሳዳ ቶይላታስ፤ ታና ነ አይልያ ኮያ፤ ታ ነ ኪታ ዶግከ።
PSA 120:1 ፑደ ከይሸ የፅያ ማዝሙረ መቶ ዎደ ታኒ ጎዳ ፄግን እ ታዉ ኮይስ።
PSA 120:2 ጎዳዉ፥ ዎርዶ ዶናፐነ ጭምያ እንፃርሳፈ ታና አሻ።
PSA 120:3 ህንተኖ፥ ዎርዳንቾቶ፥ ጎዳይ ህንተና ዋትኮ ሎኦ? እ ህንተና ዋትድ ሴርኮ ሎኦ?
PSA 120:4 እ ህንተና ሌፈትዳ ኦላ ቶራን ጫዳና፤ ፂፋ ቦንቆን ህንተና ፁጋና።
PSA 120:5 ታ ሞሳሀን ደእያ ግሾነ ቀዳረ ዱንካነን ኡትዳ ግሾ ታና አየ!
PSA 120:6 ሳሮተꬅ እፅያ አሳራ ታኒ ዳሮ ዎደ ደአስ።
PSA 120:7 ታኒ ሳሮ አስ፤ ሽን ታ ሳሮተꬃባ ሃሳያ ዎደ፥ ኤንቲ ኦላባ ሃሳዮሶና።
PSA 121:1 ፑደ ከይሸ የፅያ ማዝሙረ ታዉ ማዶይ አዉፐ ያነ ጋዳ፥ ታኒ ደረታኮ ፄላስ።
PSA 121:2 ታዉ ማዶይ ሳሎነ ሳኣ መꬍዳ ጎዳፐ ዬስ።
PSA 121:3 እ ነ ቶሁዋ ሀርችሰና፤ ነና ናገይስ ꬍስከና።
PSA 121:4 እስራኤለ ናገይስ ዝንኤናነ ꬍስከና።
PSA 121:5 ጎዳይ ነና ናገይሳ፤ ነ ኡሻቻን ግድድ፥ ነዉ ኩያ ግዳና።
PSA 121:6 ጋላስ አው ነና ሜና፤ ቃማ አጌን ነና ቆሄና።
PSA 121:7 ጎዳይ ቆህያባ ኡባፈ ነና ናጋና፤ እ ነና ሳሮ ዎꬃና።
PSA 121:8 ጎዳይ ነ ከሳነ ነ ገሉዋ፥ ሀችፈ መርናዉ ናጋና።
PSA 122:1 ዳዊቲ ፑደ ከይሸ የፅያ ማዝሙረ ኤንቲ ታና፥ “አነ ፆሳ ኬꬅ ቦስ” ያግን፥ ታና ኡፋይስስ።
PSA 122:2 የሩሳላመ፥ ኑኒ ነ ፐንገታራ ገልድ ኤቅዳ።
PSA 122:3 የሩሳላመይ ዳንታዳ ምና ኬፀትዳ ሎኦ ካታማ።
PSA 122:4 ጎዳ ኪታ ማራን እስራኤለ ዛረት፥ ጎዳ ጋላታናዉ ሄ ካታማ ዮሶና።
PSA 122:5 ዳዊታ ኮቻፈ ካዎትዳ ኡባይ፥ ባንታ አሳስ ፕርዳናዉ ያን ኡቶሶና።
PSA 122:6 የሩሳላመ ሳሮተꬃስ ሀይሳዳ ያግድ ዎስተ፤ “ነና ዶስያ ኡባይ አንጀቶ።
PSA 122:7 ነ ግምበታ ግዶን ሳሮይ ግዶ፤ ነ ካዎ ኬꬃን ዎፓተꬅ ደኦ” ያግተ።
PSA 122:8 ታ እሻታነ ታ ዳቦታ ግሾ፥ “ነ ግዶን ሳሮይ ደኦ” ያጋና።
PSA 122:9 ጎዳ ኑ ፆሳ ኬꬃ ግሾ፥ ነዉ ሎኦባ አሞታይስ።
PSA 123:1 ፑደ ከይሸ የፅያ ማዝሙረ ሳሎን፥ ነ አራታ ቦላ ኡትዳይሶ፥ ታኒ ፑደ ኔኮ ፄላይስ።
PSA 123:2 አደ አይለይ ባ ጎዳ ኩሸ ፄለይሳዳ፥ ማጫ አይልያ ባ ጎዳተ ኩሸ በኤይሳዳ፥ ኔኒ ኑና ማራና ጋካናዉ፥ ኑ አይፈይ ጎዳኮ፥ ኑ ፆሳኮ ፄሌስ።
PSA 123:3 ኑስ ካይ ዳርዳ ግሾ፥ ኑና ማራ፤ አቤት ጎዳዉ፥ ኑና ማራ።
PSA 123:4 ኑኒ ኦቶራንቾታ ጫሻነ ሳጶታ ካꬍያ ካልዳ።
PSA 124:1 ዳዊቲ ፑደ ከይሸ የፅያ ማዝሙረ ጎዳይ ኑራ ግዶናኮ፥ ኑ ዋናኔ? እስራኤለይ ሀይሳዳ ያግድ ዛሮ፤
PSA 124:2 “ጎዳይ ኑራ ግዶናኮ፥ ኑ ቦላ አሳይ ደንድዳ ዎደ፥
PSA 124:3 ኤንታ ሀንቆይ ኑ ቦላ ሱልን፥ ኑና ፓፃ ምታናሽን።
PSA 124:4 ድኦይ ኑና ኤፋናሽን፤ ሻፋ ሃꬃይ ኑና ምታናሽን።
PSA 124:5 ክፃ ሃꬃይ ኑና ማናሽን” ያጎ።
PSA 124:6 ኑና ኑ ሞርከታ አቻስ አꬅድ እምቦና ጎዳይ ጋላተቶ።
PSA 124:7 ካፎይ ሻንካ ግተፐ ከስ ኤከይሳዳ፥ ኑኒ ከስ ኤክዳ፤ ፅሄይ መቅስ፥ ኑኒ ከስ ኤክዳ።
PSA 124:8 ሳሎነ ሳኣ መꬍዳ፥ ጎዳ ሱንꬃን ኑስ ማዶይ ዬስ።
PSA 125:1 ፑደ ከይሸ የፅያ ማዝሙረ ጎዳን አማነተይሳት ቃፃናዉ ዳንዳኦና፥ መርናዉ ደእያ ፅዮነ ዙማ መላ።
PSA 125:2 ደረት የሩሳላመ ዩሾን ደኤይሳዳ፥ ሀችፈ መርና ጋካናዉ፥ ጎዳይ ባ አሳ ዩሾን ደኤስ።
PSA 125:3 ፅሎት ባንታ ኩሽያ ኢታባስ ደንꬆና መላ ኢታታ አይሶ ፃምአይ ፅሎታ ቢታን ጋምኤና።
PSA 125:4 አቤት ጎዳዉ፥ ኬሀ አሳታስነ ዎዛና ሱረ አሳታስ ሎኦባ ኦꬃ።
PSA 125:5 ሽን ኔኒ ኢታ አሳታ ሴርያ ዎደ፥ ነ ኦግያ አግዳ አሳካ ሴራ። እስራኤለስ ሳሮይ ግዶ።
PSA 126:1 ፑደ ከይሸ የፅያ ማዝሙረ ጎዳይ ድኦፐ ዛሪድ ኑና ፅዮነ ኤህዳ ዎደ ኑስ አሙሆ ዳንስ።
PSA 126:2 ኑ ዶናይ ሚቻን፥ ኑ እንፃርሳይ ኡፋይሳ የꬃን ኩምስ። ሄ ዎደ ካዎተꬃት ባንታ ግዶን፥ “ጎዳይ ኤንታዉ ግታባ ኦꬅስ” ያግዶሶና።
PSA 126:3 ቱማ ጎዳይ ኑስ ግታባ ኦꬅስ፤ ኑካ ዳሮ ኡፋይትዳ።
PSA 126:4 ጎዳዉ፥ ነገበ መላ ቢታን እራ ቡክሳዳ፥ ሻፋ ዛራዳ ኩንይሳዳ፥ ኑ ዱሳ ኦራꬃ።
PSA 126:5 ዬክሸ ዘርዳይሳት፥ ኡፋይሳን የፅሸ ጫካና።
PSA 126:6 ዘረꬅ ቶክድ ዬክሸ ብዳይሳት፥ ኡፋይሳ የ የፅሸ፥ ምርቀ ቶክድ ስማና።
PSA 127:1 ሶሎሞነይ ፑደ ከይሸ የፅያ ማዝሙረ ጎዳይ ኬ ኬፆና እፅኮ፥ ኬፀይሳት ጮ ዳቡሮሶና። ጎዳይ ካታማ ናጎና እፅኮ፥ ናገይሳት ጮ ዳቡሮሶና።
PSA 127:2 ዱሳስ ኮሽያባ ደማናዉ፥ ዎንታ ጉራ ደንዶይ፥ ኦማርስ ዳሮ ቃምስድ ገሎይ ሀዳ። ጎዳይ ባ ዶሰይሳታስ ሸምፖ እሜስ።
PSA 127:3 ናይት ጎዳ እሞታ፤ የሎት ቱማ ዎይቶ።
PSA 127:4 እስ አስ ናአተꬃን የልዳ አደ ናይት፥ ኦላንቾ ኩሸን ደእያ ቶራ መላ።
PSA 127:5 እያ ኮሮጆት ሀ ዪሻታን ኩምዳ አስ አንጀትዳይሳ፤ እ ባ ሞርከታራ ካታማ ፐንገን፥ ሞተትያ ዎደ ሻትመና።
PSA 128:1 ፑደ ከይሸ የፅያ ማዝሙረ ጎዳስ ያየይሳትነ እያ ኦግያን ሄመተይሳት ኡባይ አንጀትዳይሳታ።
PSA 128:2 ኔኒ ነ ዳቡራ አይፈ ማና፤ ኡፋይታናነ ዱረታና።
PSA 128:3 ነ ማችያ ነ ሶን አይፈ ዱርኩክዳ ዎይነ መላ ግዳና። ነ ናይት ነ ጋይታ ዩሾን ሻማሆ አጫ መላ ግዳና።
PSA 128:4 ጎዳስ ያይያ አስ ቱማ ሄሳዳ አንጀታና።
PSA 128:5 ጎዳይ ነና ፅዮነፐ አንጆ! ኔኒ ደእዳ ላይꬃ ኡባን የሩሳላመ ሎኦተꬃ ነና በሶ!
PSA 128:6 ነ ናይታ ናይታ በአ! እስራኤለስ ሳሮይ ግዶ!
PSA 129:1 ፑደ ከይሸ የፅያ ማዝሙረ እስራኤለይ ሀይሳዳ ያጎ፤ “ታ ናአተꬃፈ ዶምድ፥ ታ ሞርከት ታና ኡንኤꬅዶሶና።
PSA 129:2 ኤ፥ ኤንቲ ታ ናአተꬃፈ ዶምድ፥ ታና ኡንኤꬅዶሶና፤ ሽን ኤንቲ ታና ፆንቦኮና።
PSA 129:3 ታ ዞኩዋ ፁርቃፈን ሾጭድ፥ ጎሻ ጋደ ዳንስዶሶና”።
PSA 129:4 ሽን ጎዳይ ፅሎ ግድያ ግሾ ኢታታ ዎዶሩዋ ዱሰረꬅ የግስ።
PSA 129:5 ፅዮነ እፅያ ኡባይ ዬላትድ ጉየ ስሞ።
PSA 129:6 ኬꬃ ሁጰን ዶልዳ፥ ድጮና መልዳ ማታ መላ ግዶ።
PSA 129:7 ሄ ማታ ቡጫናዉ ኩሸን ዳንከይ ዎይኮ ምርቃናዉ ኦይከይ ባዋ።
PSA 129:8 ኦገራ አይሳት፥ “ጎዳይ ዎልቃ እሞ” ግን፥ ጫከይሳት “ጎድ አንጆ” ግያባይ ዴና።
PSA 130:1 ፑደ ከይሸ የፅያ ማዝሙረ ጎዳዉ፥ ታኒ መቶ ጪሞን ደአሸ፥ ኔኮ ዋሳይስ።
PSA 130:2 ጎዳዉ፥ ታ ዋሱዋ ስአ፤ ታ ዎሳ ነ ሀይꬃይ ሀይዞ።
PSA 130:3 ፆሳዉ፥ ኑ ናጋራ ነ ፃፋ ኦይክዳኮ፥ ጎዳዉ፥ ኦን ፕርዳፈ አታናዉ ዳንዳኢ?
PSA 130:4 ሽን ኑኒ ነዉ ያያና መላ፥ ኑ ናጋራ አቶ ያጋሳ።
PSA 130:5 ታኒ ጎዳ ላሞታን ናጋይስ፤ ታ ሸምፕያ ላሞታን ናጋዉሱ፤ ታኒ እያ ቃላን ኡፋይስ ዎꬃይስ።
PSA 130:6 ሳእ አዉደ ዎንታነ ግድ፥ ናግያ ዎታዳረፐ አꬃዳ፥ ታኒ ጎዳ ላሞታን ናጋይስ።
PSA 130:7 እያ ሲቆይ መርናሳ ግድያ ግሾነ እያን ኩመꬃ አቶተꬅ ደእያ ግሾ እስራኤለ፥ ጎዳን ኡፋይስ ኦꬃ፤
PSA 130:8 ጎዳይ እስራኤለ፥ እያ ናጋራ ኡባፈ አሻና።
PSA 131:1 ፑደ ከይሸ ዳዊቲ የፅያ ማዝሙረ ጎዳዉ፥ ታ ዎዛናይ ኦቶርተና፤ ታ አይፈይካ ኦቶሮን ፄለና። ታ ቆፋን ግታታና ጋዳ ኮያብከ፤ ጋሄቶናባ ኤካና ጋዳ ዛቱራብከ።
PSA 131:2 ꬋንꬅ ዱፅዳ ናእ ባ አየ ክኦን ስእ ገይሳዳ ታ ስእ ጋስ። ዋየꬆ አግዳ ናአዳ፥ ታ ሸምፖይ ታ ጋꬃን ዎፑ ግስ።
PSA 131:3 እስራኤለ፥ ሀችፈ መርና ጋካናዉ ጎዳን ኡፋይስ ኦꬃ።
PSA 132:1 ፑደ ከይሸ የፅያ ማዝሙረ ጎዳዉ፥ ዳዊታነ እ ዳንዳእዳ መቱዋ ኡባ ቆፓ።
PSA 132:2 ጎዳስ እ ጫቅዳይሳ፥ ዎልቃማ ግድዳ ያይቆባ ፆሳስ፥ እ ኦድዳይሳ ሀሳያ።
PSA 132:3 ጎዳስ በሰ ጊግሳና ጋካናዉ፥ ዎልቃማ ግድዳ ያይቆባ ፆሳስ፥ ኬ ኬፃና ጋካናዉ፥ ታ ሶ ገልከ፤ ታ ሂፃን ዝንእከ። ታ አይፈይ ቅልምኤና፥ ዎይኮ ታና ꬍስኮይ ኤከና።
PSA 132:6 ኑኒ ታቦትያባ ኤፍራታን ስእዳ፤ ይኣርመ ቢታን እያ ደምዳ።
PSA 132:7 “አነ እ ደእያ በሳ ቦስ፤ እያ ቶሆይ የꬍያ በሳን እያ ጎይኖስ።”
PSA 132:8 ጎዳዉ፥ ደንዳ! ነ ምኖተꬃ ማላ ግድዳ ነ ታቦትያራ ነ ኬꬃ ገላ።
PSA 132:9 ነ ካህነት ፅሎተꬅ ማኦ፤ ነ አሳይ ኡፋይሳን የፆ።
PSA 132:10 ነ አይልያ ዳዊታ ግሾ፥ ኔኒ ትይዳ ካዋ አጎፋ።
PSA 132:11 ጎዳይ ዳዊታስ ላመቶና ጫቆ ሀይሳዳ ያግድ ጫቅስ፤ “ነ ጉልባታፐ ከይዳ፥ ነ ናይታፐ እሱዋ ነ አራታን ኡትሳና።
PSA 132:12 ነ ናይት ታ ጫቁዋነ ታ ታማርስያ ትምርትያ ናግኮ፥ ኤንታ ናይት ነ አራታን መርናዉ ኡታና” ያግስ።
PSA 132:13 ጎዳይ ፅዮነ ዶርስ፤ ባዉ ደእያ በሲ ኦꬃናዉ አሞትድ፥ ሀይሳዳ ያግስ፤
PSA 132:14 “ሀይስ ታ መርናዉ ደእያ በሰ፤ ታኒ አሞትዳ ግሾ ሀይሳን ዳና።
PSA 132:15 ታኒ ዳሮ ካꬅ እማዳ ፅዮነ አንጃና፤ እያን ደእያ ማንቆታካ ካꬅ ካልሳና።
PSA 132:16 እያን ደእያ ካህነታ አቶተꬅ ማይዛና፤ እያን ደእያ ፅሎት ኡፋይሳን የፃና።
PSA 132:17 ሄ በሳን ዳዊታ ዘርያፐ ካዎ ከሳና፤ ታኒ ትይዳ ካዋ ካዎተꬃን ጋምእሳና።
PSA 132:18 ታኒ እያ ሞርከታ ዬላ ማይዛና፤ ሽን እያ ሁጰን ደእያ ካላቻይ ጶላና” ያጋስ።
PSA 133:1 ዳዊቲ ፑደ ከይሸ የፅያ ማዝሙረ እሻት እስፈተꬃን ደኤይስ፥ ዋን ሎእ ዋን ኡፋይስ!
PSA 133:2 ሄስ ሁጰን ትግን፥ ቡቻራ ጎግያ፥ አሮና ቡቻራ ጎግድ እያ ሀሽያ ጋክያ አልኦ ዛይተ መላ።
PSA 133:3 ሄስ አርሞና ዙማፐ ፅዮነ ደረታ ጋካናዉ ዎꬍያ አካ መላ። ጎዳይ ያን አንጁዋነ፥ ደኡዋ መርናዉ እሚስ።
PSA 134:1 ፑደ ከይሸ የፅያ ማዝሙረ ህንተኖ፥ ጎዳ አይለቶ፥ ጎዳ ኬꬃን ቃማ ኦይሳቶ፥ ኡባይ ይድ ጎዳ ጋላትተ።
PSA 134:2 ፆሳ ኬꬃን ህንተ ኩሽያ ምጭድ፥ ጎዳ ጋላትተ።
PSA 134:3 ሳሉዋነ ሳኣ መꬍዳ ጎዳይ ህንተና ፅዮነፐ አንጆ።
PSA 135:1 ጎዳ ጋላትተ! ህንተኖ፥ ጎዳ አይለቶ፥ ጎዳ ሱንꬃ ጋላትተ!
PSA 135:2 ህንተኖ፥ ጎዳ ኬꬃን፥ ኑ ፆሳ ኬꬃ ዳባባን ኤቀይሳቶ፥ ጎዳ ጋላትተ!
PSA 135:3 እ ኬሀ ግድያ ግሾ ጎዳ ጋላትተ! እ ሎኦ ግድያ ግሾ እያ ሱንꬃ ሳቢተ!
PSA 135:4 ጎዳይ ያይቆባ ባባ፥ እስራኤለ ባዉ ቡዞ ኦꬅድ ዶርስ።
PSA 135:5 ጎዳይ ግታ ግደይሳነ ኑ ጎዳይ፥ ፆሳታ ኡባፈ አይሳ ታኒ ኤራይስ።
PSA 135:6 ሳሎን ሳአን፥ አባንነ እያ ግዶን ጎዳይ ባ ዶስዳባ ኡባ ኦꬄስ።
PSA 135:7 ሻራ ሳኣ ጋፃፐ ደንꬄስ፤ ዎልአንꬅ እራራ ኪቴስ፤ ጫርኮ ባ ምንጃ ኬꬃፈ ከሴስ።
PSA 135:8 ግብፀ ቢታን አሳፐ መሄ ጋካናዉ፥ ባይራ የለትዳ ኡባ ዎꬍስ።
PSA 135:9 ነኖ ግብፀ፥ ፓሮናነ እያ አይለታ ኡባ ሴራናዉ ማላታታነ ማላልስያባታ ኪትስ።
PSA 135:10 እ ዳሮ ካዎተꬃታ ꬋይስስ፤ ዎልቃማ ካዎታ ዎꬍስ።
PSA 135:11 አሞረ ካዋ ስሆና ባሳነ ካዋ ኦገነ ካናነ ካዎታ ኡባ ዎꬍስ።
PSA 135:12 ኤንታ ቢታ ባ አሳ፥ እስራኤለ ላትስስ።
PSA 135:13 ጎዳዉ፥ ነ ሱንꬃይ መርናዉ ዳና፤ የለታፐ የለታ ጋካናዉ ነ ሀሳየታና።
PSA 135:14 ጎዳይ ባ አሳስ ፕርዳና፤ እ ባ አይለታስ ቃታና።
PSA 135:15 ካዎተꬃታ ኤቃት አሳ ኩሸ ኦሶታ፤ ብራፐነ ዎርቃፈ መትዳይሳታ።
PSA 135:16 ኤንታዉ ዶን ደኤስ፥ ሽን ሃሳዮኮና፤ አይፈይ ደኤስ፥ ሽን ፄሎኮና።
PSA 135:17 ሀይꬅ ደኤስ፥ ሽን ስኦኮና፤ ኤንታ ሲን ሸምፖይ ባዋ።
PSA 135:18 ኤንታ መꬍዳይሳትነ ኤንታን አማነተይሳት ኡባይ ኤንታዳ ሀኖ።
PSA 135:19 እስራኤለ አሳዉ ጎዳ ጋላትተ፤ አሮና ሶ አሳዉ ጎዳ ጋላትተ።
PSA 135:20 ሌወ ሶ አሳዉ ጎዳ ጋላትተ፤ ጎዳ ያየይሳቶ ኡባይ ጎዳ ጋላትተ።
PSA 135:21 የሩሳላመን ደእያ ጎዳይ ፅዮነን ጋላተቶ! ጎዳ ጋላትተ!
PSA 136:1 ጎዳ ጋላትተ!
PSA 136:2 ፆሳታ ፆሳ ጋላትተ!
PSA 136:3 ጎዳታ ጎዳ ጋላትተ!
PSA 136:4 እያ ፃላል ግታ ማላልስያባ ኦꬄስ፤
PSA 136:5 ባ ጭንጫተꬃን ሳሎታ መꬍስ፤
PSA 136:6 ሃꬃ ቦላ ቢታ ምጭስ፤
PSA 136:7 ግታ ፖኦታ መꬍስ፤ እያ ሲቆይ መርናሳ።
PSA 136:8 አው ጋላስ ሃራና መላ ኦꬅስ፤
PSA 136:9 አጌንነ ፆልንቶት ቃማ ሃራና መላ ኦꬅስ፤
PSA 136:10 ግብፀ ቢታን ባይራታ ዎꬍስ፤
PSA 136:11 እስራኤለ አሳ ግብፀፈ ካለꬅድ ከስስ፤
PSA 136:12 ባ ምኖ ኩሽያን፥ ባ ዎልቃማ ቀስያን ሀይሳ ኦꬅስ፤
PSA 136:13 ዞኦ አባ ሻክስ፤
PSA 136:14 እስራኤለ አሳ ሄ አባ ግዶራ ፕንꬅስ፤
PSA 136:15 ግብፀ ካዋነ እያ ኦላንቾታ ዞኦ አባን ሙክስስ፤
PSA 136:16 እ ባ አሳ መላ ቢታራ ካለꬅስ፤
PSA 136:17 ግታ ካዎታ ሾጭስ፤
PSA 136:18 ዎልቃማ ካዎታ ዎꬍስ፤
PSA 136:19 አሞረ ካዋ ስሆና ዎꬍስ፤
PSA 136:20 ባሳነ ካዋ ኦገ ዎꬍስ፤
PSA 136:21 ኤንታ ቢታ ባ አሳ ላትስስ፤
PSA 136:22 ባ አይልያ እስራኤለ ላትስስ፤
PSA 136:23 ኑ ካዉይዳ ዎደ ኑና ቆፕስ፤
PSA 136:24 ኑና ኑ ሞርከታፐ አሽስ፤
PSA 136:25 መተꬃ ኡባስ ካꬅ እሜስ፤
PSA 136:26 ሳሎ ፆሳ ጋላትተ!
PSA 137:1 ባብሎነ ሻፋታ ማታን ኡትድ፥ ፅዮነ ቆፕዳ ዎደ ዬክዳ።
PSA 137:2 ሄ በሳን ኑኒ ኑ ዲꬃ ሃꬃ ጋፃን ድጭያ፥ ምꬃታ ቦላ ካቅዳ።
PSA 137:3 ኑና ድእዳ አሳት ኑኒ የፅድ፥ ኤንታ ኡፋይሳና መላ “ፅዮነ የꬃታፐ እሱዋ አነ ኑስ የፅተ” ያግዶሶና።
PSA 137:4 ጎዳ የꬃ ኑኒ አላጋ ቢታን ዋት የፃኔ?
PSA 137:5 የሩሳላመ ታኒ ነና ዶግኮ፥ ታ ኡሻቻ ኩሸይ ታና ባሎ።
PSA 137:6 ታኒ ነና ሀሳዮና አግኮ፥ ታ ግታ ኡፋይስ ግድዳ የሩሳላመ ዶሶና እፅኮ፥ ታ እንፃርሳይ ኮቶኑዋራ ኦይከቶ።
PSA 137:7 ጎዳዉ፥ የሩሳላመ ድኤትያ ጋላስ ኤዶመ አሳይ ኦꬅዳይሳ ሀሳያ፤ ኤንቲ፥ “ላልተ! ላልተ! ህርክ ፃጱዋ ጋካናዉ ላልተ!” ያግዳይሳ ዶጎፓ።
PSA 137:8 ባብሎነ፥ ኔኒ ꬋያና! ኔኒ ኑ ቦላ ኦꬅዳ ኢታ ኦሱዋስ ሀሎ ከሰይስ አንጀትዳይሳ።
PSA 137:9 ነ ጉꬃ ናይታ ኦይክድ፥ ዛላ ቦላ ሾጨይስ አንጀትዳይሳ።
PSA 138:1 ዳዊታ ማዝሙረ ጎዳዉ፥ ታ ኩመꬃ ዎዛናን ነና ጋላታና፤ ፆሳታ ስንꬃን ነና ሳባና።
PSA 138:2 ነ ጌሻ ኬꬃኮ ስማዳ ነና ጎይናና፤ ነ ሲቁዋ ግሾነ ነ ቱማተꬃ ግሾ ጋላታና። ነ ሱንꬃ ግሾነ ነ ቃላ ꬎቃተꬃ ግሾ ጋላታና።
PSA 138:3 ታኒ ፄግዳ ዎደ ነ ታዉ ኮያዳሳ፤ ነ ምኖተꬃን ታና ምንꬃዳሳ።
PSA 138:4 ጎዳዉ፥ ነ ዶናፐ ከይያ ቃላ ስእያ ዎደ፥ ሳአን ደእያ ካዎት ኡባይ ነና ጋላቶ።
PSA 138:5 ጎዳ ቦንቾይ ግታ ግድያ ግሾ፥ ኤንቲ ጎዳ ኦግያባ የፆ።
PSA 138:6 ጎዳይ ቦላ ꬎቃን ደእኮካ፥ ማንቆታ ኬሀ አይፈን ፄሌስ፤ ሽን ኦቶራንቾታ ሃሆን ኤሬስ።
PSA 138:7 ታኒ መቶ ግዶራ ሄመትኮካ፥ ኔኒ ታና ናጋሳ። ታ ሞርከታ ሀንቁዋ ቦላ ነ ኩሽያ ምጫሳ፤ ነ ኡሻቻ ኩሽያን ታና አሻሳ።
PSA 138:8 ጎዳይ ታዉ ገልዳ ቃላ ፖላና፤ ጎዳዉ፥ ነ ሲቆይ መርናሳ፤ ነ ኩሸ ኦሱዋ የጋ አጎፋ።
PSA 139:1 ዳዊታ ማዝሙረ ጎዳዉ፥ ኔኒ ታና ፕልጋዳ ኤራዳሳ።
PSA 139:2 ኔኒ ታ ኡተꬃነ ታ ኤቁዋ ኤራሳ፤ ታ ቆፋ ኡባ ሃሆን አኬካሳ።
PSA 139:3 ታኒ ብያ በሳነ ሸምፕያ በሳ ፆሞሳሳ፤ ታ ኦገታ ኡባ ኤራሳ።
PSA 139:4 ጎዳዉ፥ ታኒ ታ እንፃርሳን እስ ቃላ ኦደታናፐ ስን፥ ታ ቆፋ ኡባ ኤራሳ።
PSA 139:5 ኔኒ ታ ዩሹዋን ደኣሳ፤ ነ ኩሽያ ታ ቦላ ዎꬃሳ።
PSA 139:6 ነ ኤራተꬃይ ታና ዳሮ ማላልሴስ፤ ታ አኬካፐ ꬎቃ።
PSA 139:7 ታ ነ አያናፐ አዉ ባቃታኔ? ነ ስንꬃፈ አዉ ባኔ?
PSA 139:8 ፑደ ሳሎ ከይኮ ነ ያን ደኣሳ! ዱገ ስኦለ ዎꬍኮካ ነ ያን ደኣሳ።
PSA 139:9 ዶሎሀ ባጋ ፓላዳ ቢኮ፥ ዎይኮ ዉሎሀ ባጋን ሃካዳ ደእኮ፥
PSA 139:10 ያን ነ ኩሸይ ታና ካለꬄስ፤ ነ ኡሻቻ ኩሸይ ታና ዘምፕሴስ።
PSA 139:11 “ꬉማዉ ታና ገንꬃ፤ ጋላሳዉ ቃማ ላመታ” ግያኮካ፥
PSA 139:12 ሳካና ꬉም ነዉ ꬉመና፤ ቃም ጋላሳዳ ፖኤስ፤ ነዉ ꬉም ፖኦ መላ።
PSA 139:13 ኔኒ ታ ግዶ አሳተꬃ መꬋዳሳ፤ ታ አየ ኡሎን ታና ኔኒ ትላዳሳ።
PSA 139:14 ኔኒ ታና ማላልስያባነ የገልስ ኦꬃዳ መꬍዳ ግሾ፥ ታኒ ነና ጋላታይስ። ነ ኦሶት ማላልሴስ! ታኒ ሄሳ ሎይꬃዳ ኤራይስ።
PSA 139:15 ታኒ ጌማ በሳን መትያ ዎደ፥ ታ መቀꬃይ ኔፐ ጌምቤና። ታ አሳተꬃይ ታ አየ ኡሎን ጪሞ ግዶን ሂላን አሌቀትድ ኦሰትያ ዎደ፥
PSA 139:16 ነ አይፈት ጊጎና ታ አሳተꬃ በእዶሶና። ቡሮ እሶይካ ዶመቶና ደእሽን፥ ነ ታዉ ቡዞይዳ ጋላሳ ኡባይ ነ ማዝጋበን ፃፈትዶሶና።
PSA 139:17 ፆሳዉ፥ ነ ታዉ ቆፕያ ቆፋይ ዋንዳ ቦንቾ! ኤንታ ታይቦይ ዋንድ ዳርደ!
PSA 139:18 ታኒ ኤንታ ታይብያኮ ሻፈፐ ዳሮ፤ ታኒ ባርክያ ዎደ ሀእካ ኔራ ደአስ።
PSA 139:19 ፆሳዉ፥ ኔኒ ኢታታ ዎꬍያኮ አይበ! ሱꬁ ጉስያ አሳት ታፐ ሃኮ!
PSA 139:20 ኤንቲ ነ ቦላ ኢታባ ሃሳዮሶና፤ ነ ሞርከት ነ ሱንꬃ ኢሶሶና።
PSA 139:21 ጎዳዉ፥ ነና እፀይሳታ ታ እፅክና? ነ ቦላ ደንደይሳታ ታ ሻተትክና?
PSA 139:22 ታኒ ኤንታ ኩመꬅ እፃይስ፤ ኤንታ ታኒ ታ ሞርከዳ ታይባይስ።
PSA 139:23 ፆሳዉ፥ ታና ፕልጋዳ ታ ዎዛና ኤራ፤ ታና ኡንኤꬅዳ ታ ቆፋ በአ።
PSA 139:24 ታናን ኢታባይ ደእኮ ፄላ፤ መርና ኦግያን ታና ካለꬃ።
PSA 140:1 ዳዊታ ማዝሙረ ጎዳዉ፥ ኢታታፐ ታና አሻ፤ ማካላንቾታፐ ታና ናጋ።
PSA 140:2 ኤንቲ ኢታ ኦꬃናዉ ማቀቶሶና፤ ጋላስ ጋላስ ኦላ ደንꬆሶና።
PSA 140:3 ባንታ እንፃርሳ ሾሻ እንፃርሳዳ ቃራዮሶና፤ ኤንታ ዶናን ዎꬍያ ማርዘይ ደኤስ። ሳላሀ
PSA 140:4 ጎዳዉ፥ ኢታታ ኩሸፐ ታና አሻ፤ ታ ቶሁዋ ቃፃናዉ ቆፕያ ማካላንቾታፐ ታና ናጋ።
PSA 140:5 ኦቶራንቾ አሳት ታዉ ፅሄ ዎꬆሶና፤ ግተ ሂፆሶና፤ ታና ኦይካናዉ ግተ የጎሶና። ሳላሀ
PSA 140:6 ጎዳ፥ “ኔኒ ታ ፆሳ” ጋና፤ ጎዳዉ፥ ታ ዎሳ ስአ።
PSA 140:7 ኡባ ሃርያ ጎዳዉ፥ ታና አሽያ ምኑዋዉ፥ ኦላ ጋላስ ታዉ ጎንዳለ ግዳዳሳ።
PSA 140:8 ጎዳዉ፥ ኢታታስ ኤንታ አሙዋ እሞፋ፤ ኤንቲ ኦቶርቶና መላ ኤንታ ማቁዋ ፖልሶፓ። ሳላሀ
PSA 140:9 ታ ሞርከታን ታና ፆንሶፓ፤ ኤንታ ዶናፐ ከይያ ኢታይ ኤንታ ቦላ ስሞ።
PSA 140:10 ኤንታ ቦላ ፁግያ ታማ ቦንቆይ ቆለቶ፤ ኤንቲ ታማ ኦላን የገቶ፤ ከያናዉ ዳንዳኦና ኦላ ሆለቶ።
PSA 140:11 ዮያማት ቢታ ቦላ ደኦፖ፤ ቡቀይሳታ ኢታባይ የደꬅድ ኦይኮ።
PSA 140:12 ጎዳይ ማንቆታስ ፕርደይሳነ መቶታንቾታስ ሞተተይሳ ኤራይስ።
PSA 140:13 ፅሎት ቱማ ነ ሱንꬃ ጋላታና፤ ሱረ አሳት ነ ስንꬃን ዳና።
PSA 141:1 ዳዊታ ማዝሙረ ጎዳዉ፥ ታኒ ነና ፄጋይስ፤ ታና ማዳናዉ ኤለሳ፤ ታ ኔኮ ዋስያ ዎደ ታና ስአ!
PSA 141:2 ታ ዎሳይ እፃነዳ ነ ስን ሺቆ፤ ታ ኩሸ ምጨꬃይ ኦማርሳ ያርሾ መላ ግዶ።
PSA 141:3 ጎዳዉ፥ ታ ዶና ናግያ አስ ዎꬃ፤ ታ መተርሻ ፐንግያ ናጋ።
PSA 141:4 ኢታ ኦꬅያ አሳታራ ኢታ ኦꬆና መላ፥ ታ ዎዛና ኢታኮ ዛሮፓ፤ ኤንታ ግብራ ታና ሙዞፓ።
PSA 141:5 ፅሎ አስ ታና ሴሮ፥ ሄስ ታዉ ኬሀተꬅ፥ እ ታና ሀንቀቶ፥ ሄስ ታ ሁጰን ዛይተ ትዮ መላ። ታ ዎዛናይ ሄሳ እፀና፤ ታ ዎሳይ ኡባ ዎደ ኤንታ ኢታ ኦሱዋ ቦላና።
PSA 141:6 ኤንታ ዳይናት አፎ ሆለትያ ዎደ፥ ታ ቃላይ ቱማ ግደይሳ ኤንቲ ኤራና።
PSA 141:7 ኤንቲ፥ “አስ ቢታ ጎየይሳዳነ ጳሻ ላለይሳዳ፥ ኑ መቀꬃይ ዱፎ ዶናን ላለታና” ያጎሶና።
PSA 141:8 ኡባ ሃርያ ጎዳዉ፥ ታ አይፈይ ነና ፄሌስ። ታኒ ኔኮ ባቃታይስ፤ ታና ሀይቆስ አꬃዳ እሞፋ።
PSA 141:9 ኤንቲ ታዉ የግዳ ግትያፐነ ኢታ ኦይሳታ ፅህያፐ ታና ናጋ።
PSA 141:10 ታኒ ሳሮ አꬍን፥ ኢታት ባንታ ዎꬅዳ ግትያን ኦይከቶ።
PSA 142:1 ዳዊቲ ጎንጎሎን ደእያ ዎደ ፃፍዳ ትምርተ ታ ቃላ ꬎቁ ኦꬃዳ ጎዳኮ ዋሳይስ፤ ማሮታ ደማናዉ እያ ዎሳይስ።
PSA 142:2 ታ ኦይሻ ኡባ እያ በሳይስ፤ ታ መቱዋ ኡባ እያዉ ኦዳይስ።
PSA 142:3 ታኒ ሄትዳ ዎደ ነ ታ ኦግያ ኤራሳ፤ ታ ኦግያን ግተ የግድ ዎꬅዶሶና።
PSA 142:4 ታኒ ታ ዩሹዋ ፄልያ ዎደ፥ ታና ማደይ እሶይካ ባዋ። ታኒ ቆሰታዳ አትያ በሲ ባዋ፤ ታና ናግያ ኦንካ ባዋ።
PSA 142:5 ጎዳዉ፥ ታኒ ኔኮ ዋሳይስ፤ ታኒ፥ “ነ ታዉ ባቃታዳ አትያ በሲ፤ ደኦን ደኤይሳታ ቢታን ታ ሳማይ ነና” ያጋስ።
PSA 142:6 ታኒ ዳሮ መቶትያ ግሾ፥ ታ ዋሱዋ ስአ። ታና የደይሳት ዎልቃምዳ ግሾ፥ ታና ኤንታፈ አሻ።
PSA 142:7 ታ ነ ሱንꬃ ጋላታና መላ፥ ታና ቃሾፐ ብርሻ። ኔኒ ታዉ ኬሀ ግድያ ግሾ፥ ፅሎት ታ ዩሾን ሺቃና።
PSA 143:1 ዳዊታ ማዝሙረ ጎዳዉ፥ ታ ዎሳ ስአ፤ ማሮታ ደማናዉ ታ ዋሰይሳ ሀይዛ። ኔኒ ፅሎተꬃንነ ነ አማነተꬃን ታዉ ዛሮ እማ።
PSA 143:2 ነ ስንꬃን ፅሎ አስ ባይና ግሾ ታና ነ አይልያ ፕርዳስ ሺሾፓ።
PSA 143:3 ታና ታ ሞርከይ የደꬅድ፥ ትንቸረꬅድ ሳአን የግስ። በን ሀይቅዳ አሳዳ ታና ꬉማን ዎꬅስ።
PSA 143:4 ሄሳ ግሾ ታኒ ሄታስ፤ ታ ዎዛናይካ ትልእስ።
PSA 143:5 ታኒ በን ዎደታ ሀሳያይስ፤ ነ ኦꬅዳ ኦሶ ኡባ ቆፓይስ፤ ነ ኩሸ ኦሶ ኡባ አኬካይስ።
PSA 143:6 ታኒ ታ ኩሽያ ኔኮ ምጫስ፤ መላ ቢት ሃ ኮየይሳዳ፥ ታ ሸምፖይ ነና ሳሞቴስ። ሳላሀ
PSA 143:7 ጎዳዉ፥ ታ ዎዛናይ ሄትዳ ግሾ ታዉ ዛሮ እማናዉ ኤለሳ። ታኒ ዱፎን ገልያ አሳዳ ሀኖና መላ ነ ሶምኡዋ ታፐ ገንꬆፋ።
PSA 143:8 ታኒ ነናን አማነትያ ግሾ፥ ዎንታ ዎንታ ነ ሲቁዋባ ታና በሳ። ታኒ ታ ሸምፑዋፈ ነና ዎስያ ግሾ፥ ታ ባና ኦግያ ታና በሳ።
PSA 143:9 ጎዳዉ፥ ታኒ ነዉ ማጋንዳ ግሾ፥ ታ ሞርከታፐ ታና አሻ።
PSA 143:10 ኔኒ ታ ፆሳ ግድያ ግሾ፥ ታ ነ ሸንያ ኦꬃና መላ ታና ታማርሳ፤ ነ ሎኦ አያናይ ሱረ ኦግያን ታና ካለꬆ።
PSA 143:11 ጎዳዉ፥ ነ ሱንꬃ ግሾ ታና አሻ፤ ነ ፅሎተꬃን ታና መቶፐ ከሳ።
PSA 143:12 ነ ሲቁዋን ታ ሞርከታ ዎꬋ፤ ታ ነ አይለ ግድያ ግሾ ታና ኡንኤይሳታ ኡባ ꬋይሳ።
PSA 144:1 ዳዊታ ማዝሙረ ጎዳይ፥ ታ ዛላይ፥ ጋላተቶ! ታ ኩሽያ ኦላ ታማርሴስ፤ ታ ብራታ ቶራስ ጊግሴስ።
PSA 144:2 እ ታ ሲቆ ፆሳነ ታ ቆሰታ አትያ በሰ፤ ታ ሚፃነ ታና አሸይሳ። ታ ጎንዳለነ ታኒ ባቃታዳ አትያ በሰ፤ እ ካዎተꬃት ታዉ ሃረታና መላ ኦꬅስ።
PSA 144:3 ጎዳዉ፥ ኔኒ እያዉ ቆፓናዉ አስ አይቤ? ነ ዎዛናን እያዉ በሰ እማናዉ አሳ ናእ አይቤ?
PSA 144:4 አስ እስ ቶሆ ጫርክያ ጫርኮ መላ፤ እያ ጋላሳት አꬍያ ኩያ መላ።
PSA 144:5 ጎዳዉ፥ ሳሉዋ ጳልቃዳ ዱገ ዎꬋ! ደረታ ቦቻ፤ ኤንቲ ጩዮ!
PSA 144:6 ዎልአንꬅ የዳዳ ነ ሞርከታ ላላ፤ ነ ዶንግያ ዪሻን ዱካዳ ኤንታ የደꬃ።
PSA 144:7 ቦላራ ነ ኩሽያ የዳዳ፥ ታና ዎልቃማ ሃꬃፈ ጎቻዳ ከሳ፤ አላጋ አሳታ ኩሸፐ ታና ዎስሳ።
PSA 144:8 ኤንቲ ቱማ ሃሳይድ ኤሮኮና፤ ባንታ ኡሻቻ ኩሽያ ደንꬅድ ዎርዶን ጫቆሶና።
PSA 144:9 ፆሳዉ ታኒ ነዉ ኦራꬃ ማዝሙረ የፃና፤ ታሙ ሻያን ዋፀትዳ ዲꬃን የፃና።
PSA 144:10 ካዎታስ ፆኖ እማሳ፤ ነ አይልያ ዳዊታ አሻሳ።
PSA 144:11 ታና ኢታ ማሻፈ አሻ፤ አላጋ አሳታ ኩሸፐ ታና ዎስሳ። ኤንታ ዶናይ ዎርዶን፥ ኤንታ ኡሻቻ ኩሸይ ጭሞን ኩምስ።
PSA 144:12 ኑ አደ ናይት ባንታ ናአተꬃን፥ ሎኦ ድጭያ ምꬃ መላ ግዶ። ኑ ማጫ ናይት ካዎ ጋꬎ አሌቅሳናዉ፥ ኦሰትዳ ቱቀ መላ ግዶ።
PSA 144:13 ኑ ሻለት ዱማ ዱማ ካꬃ ቆሞን ኩሞ፤ ሄመትያ በሳን ደእያ ኑ ዶርሳት ሙኩላንነ ታሙ ሙኩላን የሎ።
PSA 144:14 ኑ ሚዛት ብራይሶ፤ አዉጫዮና የለትድ ዳሮ፤ ኑ ኦገታን ዋሶይ ስኤቶፎ።
PSA 144:15 ሀ አንጆት ጋክያ አሳት ቱማ አንጀትዳይሳታ፤ ፆሳይ ኤንታዉ ጎዳ ግድዳ አሳት አንጀትዳይሳታ።
PSA 145:1 ዳዊታ ጋላታ ማዝሙረ ታ ፆሳዉ፥ ታ ካዋዉ፥ ታ ነና ግታያና፤ ነ ሱንꬃ መርናዉ ጋላታና።
PSA 145:2 ታኒ ነና ኡባ ጋላስ ሳባና፤ ነ ሱንꬃ መርናዉ ጋላታና።
PSA 145:3 ጎዳይ ግታ፤ አꬎ ጋላት እያዉ በሴስ፤ እያ ግታተꬃይ አሳ ቆፋፐ አꬌስ።
PSA 145:4 እስ የለታይ ሀራ የለታስ ነ ኦሱዋ ኦዳና፤ ነ ማላልስያ ኦሶታ አዋጃና።
PSA 145:5 ኤንቲ ነ ቦንቹዋ፥ ነ ቴማነ ነ ግታተꬃ ኦዳና። ታኒ ነ ማላልስያ ኦሱዋ ዛራ ዛራዳ ቆፓና።
PSA 145:6 ማላልስያ ግታ ነ ኦሱዋባ ኦዳና፤ ታኒ ነ ግታተꬃ አዋጃና።
PSA 145:7 ኤንቲ ነ ኬሀተꬃ ዳሮተꬃ ኦዳና፤ ነ ፅሎተꬃባ ኡፋይሳን የፃና።
PSA 145:8 ጎዳይ ኬሀነ ቃተይሳ፤ ሀንቀታናዉ ኤለሰና፤ ሲቆን ኩምዳይሳ።
PSA 145:9 ጎዳይ ኡባስ ኬሀ፤ እ ባ መተꬃ ኡባስ ቃቴስ።
PSA 145:10 ጎዳዉ፥ መተꬃ ኡባይ ነና ጋላታና፤ ነ አሳ ኡባይ ነና ሳባና።
PSA 145:11 ኤንቲ ነ ካዎተꬃ ቦንቹዋባ ኦዳና፤ ነ ዎልቃባ ኦዳና።
PSA 145:12 ሄሳን ኤንቲ ነ ዎልቃማ ኦሱዋባነ ነ ካዎተꬃ ቦንቾ ቴማባ ኤርሳና።
PSA 145:13 ነ ካዎተꬃይ መርና ካዎተꬅ፤ ነ ማታይ የለታ ኡባ ሃሬስ። ጎዳይ ባ ግዳ ቃላ ኡባን አማነቴስ፤ ባ ኦሶ ኡባን ኬሀ።
PSA 145:14 ጎዳይ ኩንዳናዉ ገድጋደይሳታ ካትሴስ፤ ኩንድዳይሳታ ደንꬄስ።
PSA 145:15 ኡባ አይፈይ ነና ፄሌስ፤ ኤንታዉ ኮሽያ ዎደን ካꬅ እማሳ።
PSA 145:16 ኔኒ ነ ኩሽያ ምጫዳ፥ መተꬃ ኡባ አሞ አላሳ።
PSA 145:17 ፆሳይ ባ ኦገ ኡባን ፅሎ፤ ባ ኦሶ ኡባን ኬሀ።
PSA 145:18 ጎዳይ ባና ፄግያ ኡባስ፥ ቱማን ባና ፄግያ ኡባስ ማታን ደኤስ።
PSA 145:19 እ ባዉ ያየይሳታ አሙዋ ኩንꬄስ፤ ኤንታ ዋሱዋ ስእድ አሼስ።
PSA 145:20 ጎዳይ ባና ዶሰይሳታ ኡባ ናጌስ፤ ሽን ኢታታ ኡባ ꬋይሳና።
PSA 145:21 ታኒ ታ ዶናን ጎዳ ጋላታና፤ መተꬃ ኡባይ እያ ጌሻ ሱንꬃ መርናዉ ጋላቶ!
PSA 146:1 ጎዳ ጋላትተ! ታ ሸምፐ ጎዳ ጋላታ!
PSA 146:2 ታ ደኦ ላይꬃ ኡባን ጎዳ ጋላታና፤ ታ ደእዳ ዎደ ኡባን ታ ፆሳ ሳባና።
PSA 146:3 ሀላቃታን አማነቶፍተ፤ አሻናዉ ዳንዳኦና አሳ ናአን ጬቀቶፍተ።
PSA 146:4 ኤንታ ሸምፖይ ከይያ ዎደ ቢታኮ ስሞሶና፤ ኤንታ ሀልቾይ ኡባይ ሄ ጋላስ አꬌስ።
PSA 146:5 ያይቆባ ፆሳይ ማድያ አስነ ጎዳ፥ ባ ፆሳን ኡፋይስ ኦꬅያ አስ አንጀትዳይሳ።
PSA 146:6 ጎዳይ ሳሎነ ሳኣ፥ አባነ እያ ግዶን ደእያ ኡባ መꬍስ፤ ፆሳይ መርናዉ አማነቴስ።
PSA 146:7 ጎዳይ ኡንኤትዳይሳታስ ፕርዴስ፤ ኮሻትዳይሳታስ ካꬅ እሜስ፤ ጎዳይ ቃሸትዳይሳታ ብርሼስ፤
PSA 146:8 ጎዳይ ቆቀታ ፄልሴስ። ጎዳይ ኩንድዳይሳታ ደንꬄስ፤ ጎዳይ ፅሎታ ዶሴስ።
PSA 146:9 ጎዳይ በተ አሳታ ናጌስ፤ አምኤታነ ይኦ ናይታ ማዴስ፤ ሽን ኢታታ ኦግያ ꬋይሴስ።
PSA 146:10 ጎዳይ መርናዉ ካዎታና፤ ፅዮነ፥ ነ ፆሳይ፥ የለተꬃፈ የለተꬅ ጋካናዉ ካዎታና። ጎዳ ጋላትተ!
PSA 147:1 ጎዳ ጋላትተ! ኑ ፆሳ ሳቦይ ሎኦ፤ እያ ሳቦይ ኡፋይስያባነ በሲያባ።
PSA 147:2 ጎዳይ የሩሳላመ ኦራꬃና፤ እስራኤለፐ ድኤትዳይሳታ ሺሻና።
PSA 147:3 ዎዛን መቅዳይሳታ ኮሌስ፤ ኤንታ ማዱንꬃ ፓꬄስ።
PSA 147:4 እ ፆልንቶታ ታይቡዋ ኤሬስ፤ ኤንታ ኡባ ኤንታ ሱንꬃን ሱንꬃን ፄጌስ።
PSA 147:5 ኑ ጎዳይ ግታ፤ እ ዎልቃማ፤ እያ አኬካስ ዛው ባዋ።
PSA 147:6 ጎዳይ አዳታ ዘምፕሴስ፤ ሽን ኢታታ ሳአን የጌስ።
PSA 147:7 ጎዳስ ጋላታ የꬅ የፅተ፤ ኑ ፆሳስ ዲꬃን የፅተ።
PSA 147:8 እ ሳሉዋ ሻራ ማይዜስ፤ ቢታስ እራ እሜስ፤ ዙማታ ቦላ ማታ ዶልሴስ።
PSA 147:9 መሄታስ ካꬅ፥ ኮሻትድ ዋስያ ቁሮ ናይታስ ምያባ እሜስ።
PSA 147:10 እ ፓራታ ዎልቃንነ ቶራንቾታ ምኖተꬃን ኡፋይተና።
PSA 147:11 ሽን ጎዳይ ባዉ ያየይሳታንነ እያ ማሮታን አማነተይሳታን ኡፋይቴስ።
PSA 147:12 የሩሳላመ፥ ጎዳ ጋላታ! ፅዮነ፥ ነ ፆሳ ጋላታ!
PSA 147:13 እ ነ ፐንግያ ኮበታ ምንꬃና፤ ነ ግዶን ደእያ ነ አሳ አንጃና።
PSA 147:14 እ ነ ዛዋ ሳሮተꬃን ናጋና፤ ነና ሎኦ ግስተን ካልሳና።
PSA 147:15 እ ባ ኪታ ቢታስ የዴስ፤ እያ ቃላይ ኤሶን ጋኬስ።
PSA 147:16 እ ሻች ቡሉኮዳ ምጬስ፤ ጫጋና ብዶዳ ላሌስ።
PSA 147:17 እ ሻቻ ሹቻዳ ሆሌስ፤ እያ ሜጉዋን ኦንካ ኤቃናዉ ዳንዳኤና።
PSA 147:18 እ ባ ቃላ ኪትድ ሻቻ ማይሴስ። እ ጫርኩዋ ኪትን ሃꬅ ጎጌስ።
PSA 147:19 እ ባ ቃላ ያይቆባስ፥ ባ ህግያነ ዎጋ እስራኤለስ አዋጄስ።
PSA 147:20 እ ሀራ ካዎተꬃታስ ሄሳ ኦꬅቤና፤ ኤንቲ እያ ህግያ ኤሮኮና። ጎዳ ጋላትተ!
PSA 148:1 ጎዳ ጋላትተ! ሳሎፐ ጎዳ ጋላትተ፤ ቦላ ꬎቃን እያ ጋላትተ።
PSA 148:2 እያ ኪታንቾት ኡባይ እያ ጋላትተ፤ ሳሎን ደእያ እያ ኦላንቾት ኡባይ እያ ጋላትተ።
PSA 148:3 አዋይ፥ አጌናይ እያ ጋላትተ፤ ፖእያ ፆልንቶት ኡባይ እያ ጋላትተ።
PSA 148:4 ꬎቃ ሳሎት እያ ጋላትተ፤ ሳሎፐ ቦላራ ደእያ ሃꬃት እያ ጋላትተ።
PSA 148:5 ኤንቲ ኡባይ ጎዳ ሱንꬃ ጋላቶ፤ እ ኪትን ኤንቲ መትዶሶና።
PSA 148:6 እ ኤንታ መርናዉ ኤንታ በሳን በሳን ዎꬅስ፤ ሻረቶና ህገ ኤንታዉ እሚስ።
PSA 148:7 ሳአፐ ጎዳ ጋላትተ! አባን ደእያ ግታ መተꬃቶ፤ አባ ጪሞቶ ኡባይ እያ ጋላትተ።
PSA 148:8 ዎልአንꬃዉ፥ ሻቻዉ፥ ሻራዉ፥ ጫጋናዉ፥ እያ ኪታ ፖልያ ጫርኩዋዉ፥ ኡባይ እያ ጋላትተ።
PSA 148:9 ደረቶ፥ ዙማቶ፥ ሜተትያ አይፈ አይፍያ ምꬃቶ፥ ዝጋቶ፥ ኡባይ እያ ጋላትተ።
PSA 148:10 መሄቶ፥ ዶአቶ፥ ሳአራ ጎሸትያ መተꬃቶ፥ ፓልያ ካፎቶ ኡባይ እያ ጋላትተ።
PSA 148:11 ካዎቶ፥ ካዎተꬃቶ፥ ሀላቃቶ፥ ደርያ ሃረይሳቶ፥ ኡባይ እያ ጋላትተ።
PSA 148:12 ፓንꬃቶ፥ ጌላኦቶ፥ ጭማቶ፥ ናይቶ፥ ኡባይ እያ ጋላትተ።
PSA 148:13 እያ ሱንꬃይ ኡባፈ ꬎቃ ግድያ ግሾነ እያ ቦንቾይ ሳሎታፐነ ሳአፐ ꬎቃ ግድያ ግሾ፥ ኤንቲ ኡባይ ጎዳ ሱንꬃ ጋላቶ።
PSA 148:14 እያዉ ማታ ግድዳ እስራኤለ፥ እ ꬎቁ ꬎቁ ኦꬅስ፤ እያ ጋላታና መላ ኤንታ ምንꬅስ። ጎዳ ጋላትተ!
PSA 149:1 ጎዳ ጋላትተ! ጎዳስ ኦራꬃ የꬅ የፅተ! ፅሎታ ሺቁዋን እያ ሳቢተ!
PSA 149:2 እስራኤለይ ባንታና መꬍዳይሳን ኡፋይቶ፤ ፅዮነይ ባንታ ካዋን ሀሹ ጎ።
PSA 149:3 ዱርሸ፥ ካራቦ ባቅሸ፥ ዲꬅ ዲፅሸ እያ ሱንꬃ ሳቦ።
PSA 149:4 ጎዳይ ባ አሳን ኡፋይቴስ፤ አዳታስ ፆኖ እምድ ኤንታ ቦንቼስ።
PSA 149:5 ነ አሳይ ባንታ ፆኑዋን ኡፋይቶ፤ ቃማ ኩመꬅ ኡፋይሳን የፆ።
PSA 149:6 ኤንታ ዶናን ፆሳ ጋላታይ፥ ኤንታ ኩሽያን ናምኡ ባጋ ቃራ ማሽ ደኦ።
PSA 149:7 ሄሳን ኤንቲ ካዎተꬃታ ቦላ ሀሎ ከያና፤ አሳ ሴራና።
PSA 149:8 ኤንታ ካዎታ ሳንꬃላታን፥ ኤንታ ሞርናታ ብራታን ቃቻና።
PSA 149:9 ኤንታ ቦላ ፃፈትዳ ፕርዳ ፖላና፤ ሄስ ፆሳ አሳታ ኡባስ ፆኖ። ጎዳ ጋላትተ!
PSA 150:1 ጎዳ ጋላትተ! እያ ጌሻ ኬꬃን ፆሳ ጋላትተ፤ ꬎቃ ሳሎን እያ ጋላትተ።
PSA 150:2 እያ ዎልቃማ ኦሶታ ግሾ እያ ጋላትተ፤ ኡባፈ አꬍያ እያ ግታተꬃስ እያ ጋላትተ።
PSA 150:3 ሞይዘ ፑንሸ እያ ጋላትተ፤ ዲꬃንነ ማስንቆን እያ ጋላትተ።
PSA 150:4 ካራቦ ባቅሸነ ዱርሸ እያ ጋላትተ፤ ዲꬅ ዲፅሸ፥ ሱሱልኤ ፑንሸ እያ ጋላትተ።
PSA 150:5 ዳላ ቃꬅሸ እያ ጋላትተ፤ ዎልቃማ ዳላ ግርሳን እያ ጋላትተ።
PSA 150:6 ሸምፖራ ደእያ ኡባይ ጎዳ ጋላትተ! ጎዳይ ጋላተቶ!
PRO 1:1 ሀይሳቲ እስራኤለ ካዋ ዳዊታ ናኣ ሶሎሞነ ሌምሶታ።
PRO 1:2 ሌምሶት አሳይ ጭንጫተꬅ፥ ሴራነ ኤራ ሃሳያ አኬካናዉ ማዶሶና።
PRO 1:3 ኤንቲ ጭንጫተꬅ፥ ፅሎተꬅ፥ ሱረ ፕርድነ ሱረ ዎዛን ዳና መላ ታማርሶሶና።
PRO 1:4 ኤያታስ አኬካ እሜስ፤ ናአተꬃታስ ኤራተꬅነ ካሃማተꬅ እሜስ።
PRO 1:5 ጭንጫት ሀ ሌምሶታ ስእድ፥ ኤራ ጉጆሶና፤ አኬካንቾት ሎኦ ዞረ ኤኮሶና።
PRO 1:6 ሄሳን ሌምሶታነ ኤንታ ብርሸꬃ፥ ጭንጫተꬃ ኦዳነ ኤንታ ቃንእሸታ አኬካናዉ ዳንዳኤቴስ።
PRO 1:7 ጎዳስ ያሽ ጭንጫተꬃስ ዶመꬅ፤ ሽን ኤያት ጭንጫተꬅነ ሴራ ካꬎኦሶና።
PRO 1:8 ታ ናአዉ፥ ነ አዋ ዞርያ ስአ፤ ነ አየ ትምርትያ ካꬎፓ።
PRO 1:9 ሄስ ነ ሁጵያስ ቦንቾ ካላቻ፤ ነ ቆꬍያስ ጎዝዳ ግዳና።
PRO 1:10 ታ ናአዉ፥ ነና ናጋራንቾት ጭምኮ ኤሮ ጎፓ።
PRO 1:11 ኤንቲ፥ “ኑራ የꬋ፤ አሰ ዎꬋናዉ ሆክድ ናጎስ፤ ፅሎታ ዎꬋናዉ ቆሰቶስ።
PRO 1:12 ስኦለይ ምተይሳዳ ኑካ ኤንታ ፓፃ ምቶስ፤ ኑ ኤንታ ኦላን የገትያ አሳዳ ኦꬃና።
PRO 1:13 ኑኒ አልኦ ሚሸ ኡባ ደማና፤ ኑ ኬꬃ ቦንቀ ሚሸን ኩንꬃና።
PRO 1:14 ኑራ ላገታ፤ ኑ ደምዳባ እስፈ ሻከታና” ያጋና።
PRO 1:15 ታ ናአዉ፥ ኤንታራ ሄመቶፋ፤ ኤንታ ኦግያራ ባናዉ ነ ቶሁዋ ደንꬆፋ።
PRO 1:16 ኤንቲ ኢታባ ኦꬃናዉ ዎፆሶና፤ አሳ ሱꬅ ጉሳናዉ ያ ሃ ጎሶና።
PRO 1:17 ካፎይ ፄልሽን፥ እያ ኦይካናዉ ግተ የገꬅ ማደና።
PRO 1:18 ሽን ኤንቲ ባንታ ሱꬅ ጉሳናዉ ሆኮሶና፤ ባንታ ሸምፑዋ ዎꬋናዉ ቆሰቶሶና።
PRO 1:19 ገነን ጎአ ደምያ አሳ ዉርሰꬅ ሄሳ መላ፤ ኤንቲ ሺሽዳ ሻሎይ ኤንታ ሸምፑዋ ኤኬስ።
PRO 1:20 ጭንጫተꬅ ዳጋላ ቦላ ኤቃዳ ፄጋዉሱ፤ ዳባባን ባ ቃላ ꬎቁ ኦꬃዳ ስሳዉሱ።
PRO 1:21 ጭንጫተꬅ አስ ሺቅያ በሳን ኤቃዳ ፄጋዉሱ፤ ካታማ ገልያ ፐንገን ኤቃዳ ሀይሳዳ ያጋዉሱ።
PRO 1:22 “ህንተኖ፥ አኬክ ፓጭዳይሳቶ፥ ህንተ አዉደ ጋካናዉ ኤያ ግድድ ዳኔ? ቀልቅሰይሳቶ፥ አዉደ ጋካናዉ ኡፋይታኔ? ኤያቶ፥ አዉደ ጋካናዉ ኤራተꬅ እፃኔ?
PRO 1:23 ታ ሴራ ህንተ ስእዳባ ግድያኮ፥ ታኒ ታ ኤራ ህንተ ቦላ ጉሳና፤ ታ ቃላካ ህንተና ታማርሳና።
PRO 1:24 ሽን ታ ፄግዳ ዎደ ህንተ ኮዮና እፅዳ ግሾ፤ ታኒ ኩሸ ምጭን ኦንካ አኬክቦና ግሾ፤
PRO 1:25 ታ ዞርያ ህንተ ካꬍዳ ግሾ፤ ታ ሴራካ ኤክቦና ግሾ፤
PRO 1:26 ህንተና መቶይ ጋክያ ዎደ ታ ሚጫና፤ ህንተ ዳጋማን ኮኮርያ ዎደ ታ ቀልቅሳና።
PRO 1:27 ጋዶይ ኡሾዳ ህንተ ቦላ ያ ዎደ፥ መቶይ ጎተዳ ህንተ ቦላ ኤቅያ ዎደ፥ ኡንእነ ዋየይ ህንተ ቦላ ጋክያ ዎደ፥ ታኒ ህንተና ቀልቅሳና።
PRO 1:28 “ሄ ዎደ ኤንቲ ታና ፄጋና፤ ሽን ታ ኮይከ፤ ኤንቲ ታና ምንꬅድ ኮያና፤ ሽን ደሞኮና።
PRO 1:29 ኤንቲ ኤራተꬅ እፅዳ ግሾ፤ ጎዳ ያሽ ዶርቦና ግሾ፥
PRO 1:30 ታ ዞርያ ኤክቦና ግሾ፤ ታ ሴራ ካꬍዳ ግሾ፤
PRO 1:31 ኤንቲ ባንታ ኦሱዋ አይፍያ ማና፤ ባንታ ቆፋ አይፍያ ካላና።
PRO 1:32 አኬክ ፓጭዳይሳታ ጭንጫተꬃፈ ሃከይስ ዎꬌስ፤ ኤያታ ቀል ጉስ ꬋይሴስ።
PRO 1:33 ሽን ታ ኦድያባ ስእያ ኡባይ ሳሮ ዳና፤ መቶ ህርጋፈካ ሸምፓና።”
PRO 2:1 ታ ናአዉ፥ ታ ትምርትያ ነ ኤክኮ፤ ታ ኪታ ነ ዎዛናን ዎꬅኮ፤
PRO 2:2 ነ ሀይꬃ ጭንጫተꬃኮ ዛርኮ፤ ነ ዎዛና አኬካኮ ዛርኮ፤
PRO 2:3 ኤራተꬅ ፄግኮ፤ አኬካ ꬎቁ ኦꬃዳ ፄግኮ፤
PRO 2:4 ብራ ዎይኮ ጌምዳ ሚሸ ኮየይሳዳ፥ ኔኒ ኤራተꬅ ኮይኮ፥
PRO 2:5 ሄ ዎደ ኔኒ ጎዳስ ያሽ ጉስ አይበኮ ኤራና፤ ፆሳ ሎይꬃዳ ኤራና።
PRO 2:6 ጎዳይ ጭንጫተꬅ እሜስ፤ እያፐ ኤራተꬅነ አኬክ በንቴስ።
PRO 2:7 እ ሱረታስ ማድያ ዞረ ምንጄስ፤ ቦረይ ባይናይሳታስ ጎንዳለ ግዴስ።
PRO 2:8 ሱረ ፕርዳ ኦግያ ናጌስ፤ እያዉ አማነተይሳታ ኦግያ ምንꬄስ።
PRO 2:9 ሄ ዎደ ኔኒ ፅሎተꬅ፥ ሱረ ፕርዳ፥ ሱረ ኦገነ ሎኦ ኦሶይ አይበኮ አኬካና።
PRO 2:10 ጭንጫተꬅ ነ ዎዛና ግዶ ገላና፤ ኤራተꬅ ነዉ ኡፋይስ ግዳና።
PRO 2:11 ሻክድ ኤሮይ ነና ናጋና፤ አኬክ ነና ካማና።
PRO 2:12 ጭንጫተꬅ ነና ኢታ አሳታ ኦግያፐ ናጋና፤ ጌላ ኦዳፐ ነና አሻና።
PRO 2:13 ኤንቲ ናጋራ ꬉማን ዳናዉ፥ ፅሎተꬃ ኦግያ አግዶሶና።
PRO 2:14 ኢታ ኦሶን ኡፋይቶሶና፤ ጌላተꬃን ሀሹ ጎሶና።
PRO 2:15 ኤንታ ኦሶይ ምርቀꬅ፤ ኤንታ ደኦይ ጌላ።
PRO 2:16 ጭንጫተꬅ ላይማ ማጫሳፐ፥ ቃላን ጭምያ ላገꬆፈ ነና አሻና።
PRO 2:17 እያ ባ ናአተꬃ አዝና አጋጋሱ፤ ፆሳ ስንꬃን ጫቅዳ ጫቁዋ ዶጋሱ።
PRO 2:18 እ ሶ ኦገይ ሀይቆኮ ጋꬄስ፤ ኢኮ ቡስ ሞይትለታኮ ጋꬄስ።
PRO 2:19 ኢኮ ብያ ኦንካ ጉየ ስመና፤ ደኦ ኦገ ደመና።
PRO 2:20 ሄሳ አጋዳ፥ ሎኦ አሳታ ሌምሱዋ ካላ፤ ፅሎ አሳታ ሄመꬃ ናጋ።
PRO 2:21 ሱረ አሳትነ ቦረይ ባይናይሳት፥ ቢታን አዱሳ ላይꬅ ዳና።
PRO 2:22 ሽን ኢታት ቢታፈ ሾደታና፤ አማነቶናይሳት ꬋያና።
PRO 3:1 ታ ናአዉ፥ ታ ትምርትያ ዶጎፓ፤ ታ ኪታ ነ ዎዛናን ዎꬃ።
PRO 3:2 ኤንቲ ነ ላይꬃ አዱሳና፤ እንጀነ ሳሮተꬅ ነዉ ጉጃና።
PRO 3:3 ሲቆይነ ቱማተꬅ ኔፐ ሃኮፎ፤ ኤንታ ነ ቆን ቃቻ፤ ነ ዎዛናን ፃፋ።
PRO 3:4 ሄሳ ኦꬅኮ ነ ፆሳነ አሳ ስንꬃን ሳበታናነ ናሸታና።
PRO 3:5 ነ ኩመꬃ ዎዛናን ጎዳ አማነታ፤ ነ አኬካን ዘምፖፋ።
PRO 3:6 ነ ኦሶ ኡባን እያ ስንꬃያ፤ እ ነና ሱረ ኦገ ካለꬃና።
PRO 3:7 ነና ነ ሁጰን ጭንጫ ኦꬆፋ፤ ጎዳ ያያ፤ ኢታፐ ሃካ።
PRO 3:8 ሄስ ነ አሳተꬃስ ፓያተꬅ ኤሀና፤ ነ መቀꬃካ ፃልሳና።
PRO 3:9 ነ ሻሉዋን ጎዳ ቦንቻ፤ ኮይሮ አይፍዳ ካꬃፈ ባይራ እማዳ እያ ቦንቻ።
PRO 3:10 ሄሳ ነ ኦꬅኮ፥ ነ ሻልያን ካꬅ ኩማና፤ ነ ዳሎይ ዎይነ ኡሻን ኩምድ ፓላሀና።
PRO 3:11 ታ ናአዉ፥ ጎዳ ሴራ ካꬎፓ፤ እ ነና ሴርያ ዎደ ላንጮፋ።
PRO 3:12 አዋይ ባ ዶስያ ናአ ሴረይሳዳ፥ ጎዳይ ባ ዶስያ ኡራ ሴሬስ።
PRO 3:13 ጭንጫተꬅ ደመይነ፥ አኬካ ባዉ ሚሸ ኦꬅያ ኡራይ አንጀትዳይሳ።
PRO 3:14 ጭንጫተꬅ ብራፐ አꬍድ ጎኤስ፤ ዎርቃፈ አꬍድ ማዴስ።
PRO 3:15 ጭንጫተꬅ ዎርቃፈ አꬍድ አልኦ፤ ነ ደማናዉ አሞትያ ኡባይ ጭንጫተꬃራ ግነና።
PRO 3:16 ጭንጫተꬅ ኡሻቻ ኩሸን አዱሳ ላይꬅ፥ ሀድርሳ ኩሸን ዱረተꬅነ ቦንቾ ኦይካሱ።
PRO 3:17 እ ኦገት ኡፋይስያ ኦገታ፤ እ ሆሮጋይ ሳሮ ሆሮጋ።
PRO 3:18 እያ ባና ኦይከይሳታስ ደኦ ምꬅ፤ እዮ ምንꬅድ ኦይክያ ኡባይ አንጀትዳይሳታ።
PRO 3:19 ጎዳይ ባ ጭንጫተꬃን ሳኣ መꬍስ፤ ባ አኬካን ሳሎታ ምንꬅስ።
PRO 3:20 እያ ኤራተꬃን ሻፋት ጎጎሶና፤ ሻራታፐ እር ቡኬስ።
PRO 3:21 ታ ናአዉ፥ ሱረ ፕርዳነ ሻክድ ኤሮ ምንꬃዳ ኦይካ ኤንቲ ኔፐ ሻከቶፎ።
PRO 3:22 ኤንቲ ነዉ ደኦ ግዳና፤ እንጀነ ኡፋይስ እማና።
PRO 3:23 ሄ ዎደ ነ ህርግ ባይና ሄመታና፤ ነ ቶሆይ ꬉበተና።
PRO 3:24 ኔኒ ዝንእያ ዎደ ያያካ፤ ቃማ ኩመꬅ ማልኦ ꬍስኮ ꬍስካና።
PRO 3:25 አኬኮና ጋክያ ጋዶስ ያያካ፤ ኢታት ꬋይያ ꬋዩዋን ዳጋማካ።
PRO 3:26 ጎዳይ ነዉ ዘምፖ ግዳና፤ ነ ቶሆይ ፅሄን ኦይከቶናዳ እ ናጋና።
PRO 3:27 ነዉ ዎልቅ ደእሽን፥ መቶትዳ ኡራስ ሎኦባ ኦሶ አጎፋ።
PRO 3:28 ሀእ ማዳናዉ ዳንዳአሸ ነ ሾሩዋ፥ “ስማዳ ያ፤ ታ ነዉ ዎንቶ እማና” ያጎፓ።
PRO 3:29 ነና አማነትድ፥ ነ ማታን ደእያ፥ ነ ሾሩዋ ቦላ ገነ ኦꬆፋ።
PRO 3:30 ነና ቆሆና ደእሽን፥ አሰ ጮ ሞቶፓ።
PRO 3:31 ገነ ኦꬅያ አሳታ ቃናቶፓ፤ ኤንታ ኢታ ኦሱዋ ካሎፋ።
PRO 3:32 ጎዳይ ኢታ ኦꬅያ አሳታ እፄስ፤ ሽን ሱረታ ዶሴስ።
PRO 3:33 ጎዳይ ኢታ ኦꬅያ አሳ ኬꬃ ባዴስ፤ ሽን ሱረባ ኦꬅያ አሳ ኬꬃ አንጄስ።
PRO 3:34 ኦቶሮን ቀልቅሰይሳታ ጎዳይ ቀልቅሴስ፤ ሽን ባንታና ካዉሸይሳታ ሳቤስ።
PRO 3:35 ጭንጫት ቦንቾ ደማና፤ ሽን ኤያት ካዉያና።
PRO 4:1 ታ ናይቶ፥ ህንተ አዋ ዞርያ ስእተ፤ ሎይꬅ ስእተ፤ ህንተ አኬካ ደማና።
PRO 4:2 ታ ህንተዉ ሎኦ ትምርተ እምያ ግሾ፥ ታ ትምርትያ ካꬎፕተ።
PRO 4:3 ታካ ታ አዋስ ናአ፤ ታ አየስ እያ ዶስያ እስ ናአ።
PRO 4:4 ታ አዋይ ታና ሀይሳዳ ያግድ ታማርስስ፤ “ታ ኦዳይ ነዉ ገሎ፤ ታ ኪታ ናጋ፤ ኔኒ ሄሳ ኦꬅኮ ደኦን ዳና።
PRO 4:5 ጭንጫተꬅነ አኬካ ደማናዉ ምና፤ ታ ነዉ ኦድያባ ዶጎፓ፤ እያፐ ካረ ከዮፓ።
PRO 4:6 ጭንጫተꬃስ ዞኮ ዛሮፓ፤ እያ ነና አሻና፤ እዮ ዶሳ፤ እያ ነና ናጋና።
PRO 4:7 ጭንጫተꬅ አꬍያ ግሾ እዮ ደማ፤ ነዉ ደእያባ ዉርስድ ኤክኮካ አኬካ ደማ።
PRO 4:8 ነ እዮ ቦንቻ፤ እያ ነና ꬎቁ ꬎቁ ኦꬃና፤ ነ እዮ ኦይክኮ፥ እያ ነና ቦንቻና።
PRO 4:9 እያ ነ ሁጵያስ ሳባ ግዳና፤ ቦንቾ ካላቻ እማና” ያግስ።
PRO 4:10 ታ ናአዉ፥ ስአ፤ ታ ኦደይሳ ኤካ፤ ነ ላይꬃይ አዱቃና።
PRO 4:11 ታኒ ነና ጭንጫተꬃ ኦገ ካለꬃና፤ ሱረ ሆሮጋ በሳና።
PRO 4:12 ነ ሄመትያ ዎደ ꬉብያባይ ዴና፤ ዎፅያኮካ ꬉበታካ።
PRO 4:13 ታ ትምርትያ ሎይꬃ ናጋ፤ የዶፋ፤ ትምርተይ ነዉ ደኦ እምያ ግሾ ሎይꬃ ናጋ።
PRO 4:14 ናጋራንቾታ ኦግያራ ቦፓ፤ ኢታ አሳታ ኦግያን ሄመቶፋ።
PRO 4:15 እያፐ ሃካ፤ እያን ሄመቶፋ፤ ጉየ ስማ፤ ነ ኦግያን ባ።
PRO 4:16 ኤንቲ ኢታባ ኦꬆና ደእሽን ꬍስኮይ ኤከና፤ ኤንቲ አሰ ꬉቦና ደእሽን ꬍስኮይ ኤፈና።
PRO 4:17 ኤንቲ ናጋራ ካꬃዳ ሞሶና፤ ጌላተꬅ ኡሻዳ ኡዮሶና።
PRO 4:18 ፅሎታ ኦገይ ሴታ ጋላስ ጋካናዉ፥ ጉጅ ጉጅ ፖእያ ዎንታ ፃልቀ መላ።
PRO 4:19 ሽን ጌላታ ኦገይ ሳካና ꬉማ መላ፤ ኤንቲ አይብን ꬉበትያኮካ ኤሮኮና።
PRO 4:20 ታ ናአዉ፥ ታ ኦደይሳ ስአ፤ ነ ሀይꬃ ታኮ ዛራ።
PRO 4:21 ነ አይፍያ ስንꬃፈ ሃሶፋ፤ ነ ዎዛናን ናጋ።
PRO 4:22 ኤንታ ደምያ ኡባስ ኤንቲ ደኦ፤ ኤንቲ አሳተꬃስ ፓያተꬅ እሞሶና።
PRO 4:23 ደኦይ እያፐ ፑልትያ ግሾ፥ ኡባፈ አꬃዳ ነ ዎዛና ምንꬃዳ ናጋ።
PRO 4:24 ነ ዶናፐ ኢታ ሃሳያ ድጋ፤ ዎርዶ ሃሳያ ነ ማታፐ ሃሳ።
PRO 4:25 ስት ጋዳ ስን ፄላ፤ ነ አይፈይ ነ ስንꬃን ደእያባ ትሽ ኦꬅድ ፄሎ።
PRO 4:26 ነ ቶሁዋ ኦግያ ጊግሳ፤ ሱረ ኦገ ፃላላን ሄመታ።
PRO 4:27 ሱረ ኦገፐ ኡሻች ሀድርስ ጎፓ፤ ነ ቶሆይ ኢታ ኦገ ቦናዳ ናጋ።
PRO 5:1 ታ ናአዉ፥ ታ ጭንጫተꬃ ሀይዛ ስአ፤ ነ ሀይꬃ ታ ትምርትያኮ ዛራ።
PRO 5:2 ሄስ ነና ዎዛናማ ኦꬃና፤ ነ ኦዳይ ነ ኤራተꬃ ቆንጭሳና።
PRO 5:3 ላይማ ማጫሳ እንፃርሳፈ እልሎ ኤስ ፆኬስ፤ እ ኦዳይ ኦይሳፐ አꬍድ ሎፅኬስ።
PRO 5:4 ሽን ዉርሰꬃን እያ ጎዳረ ኡꬃዳ ጫማዉሱ፤ ናምኡ ባጋራ ቃንፅያ ማሻዳ ቃራ።
PRO 5:5 እ ቶሆይ ሀይቆኮ ቤስ፤ እ ታንጎይ ዱፎ ጋꬄስ።
PRO 5:6 እያ ደኦ ኦገ ቆፑኩ፤ እ ኦገይ ጌላ፤ ሽን ጌላ ግደይሳ እያ ኤሩኩ።
PRO 5:7 ታ ናአዉ፥ ታና ስአ፤ ታ ኦደይሳፈ ከዮፓ።
PRO 5:8 ላይማ ማጫሳ ሄራ ቦፕተ፤ እ ኬꬃ ፐንግያኮ ሺቆፕተ።
PRO 5:9 ሄስ ሀኖና እፅኮ ህንተ ቦንቹዋ ሀራት ኤካና፤ ናአተꬃን ዎዛና ምኖ አሳ ኩሸን ህንተ ሀይቃና።
PRO 5:10 ህንተ አቁዋ አላጋት ኤካና፤ ህንተ ዳቡራድ ሺሽዳባይ ሀራ አሳስ ግዳና።
PRO 5:11 ዉርሰꬃን ህንተ አሾይነ ህንተ አሳተꬃይ ዉርን ህንተ ዬካና።
PRO 5:12 ህንተ ያጋና፤ “ታ አይስ ትምርተ እፃድና? ታ ዎዛናይ ሴራ አይስ ካꬍዴ?
PRO 5:13 ታኒ ታ አስታማረታ ስአብከ፤ ታና ዞረይሳታ ዞርያ ኤካብከ።
PRO 5:14 ሄሳ ግሾ፥ ታ አሳይ ሺቅዳ ሺቁዋን፥ ካዉያናዉ ማታስ” ያጋና።
PRO 5:15 ኔኒ ነ ፑልቱዋፈ ሃ ኡያ፤ ነ ማቸ ፃላላ ሲቃ።
PRO 5:16 ነ ፑልቱዋ ዳባባን፥ ነ ኦላ ሃꬃ ደንባን አይስ ጉሳይ?
PRO 5:17 ኤንታ ነዉ ቡዞ ኦꬃ፤ ሀራ አላጋ ኡራራ ኮፆፋ።
PRO 5:18 ነ ፑልቶይ ነዉ አንጀቶ፤ ነ ናአተꬃ ማቸራ ኡፋይታ።
PRO 5:19 ሎእያ ጋረዳንነ ኡፋይስያ ገንኤዳ እ ꬋንꬃይ ኡባ ዎደ ነና አሎ፤ ኡባ ዎደ እ ሲቆይ ነና ድኦ።
PRO 5:20 ታ ናአዉ፥ ላይማ ማጫሳን አይስ ድኤታይ? ሀራ አሳ ማቾ አይስ ቆማይ?
PRO 5:21 አስ ኦꬅያባ ኡባ ጎዳይ በኤስ፤ እ ሄመትያ ሆሮጋ ኡባ ፄሌስ።
PRO 5:22 ናጋራንቹዋ እ ኦꬅዳ ናጋራይ ኦይኬስ፤ እያ ናጋራ ግተይ እያ ቃቼስ።
PRO 5:23 እ ባ ኤያተꬃን ꬋይስ፤ ባና ናግቦና ግሾ ሀይቅስ።
PRO 6:1 ታ ናአዉ፥ ሚሸ ታልእዳ ነ ሾሩዋስ ዋሰ ገልዳባ ግድኮ፥ ሀራ አሳስ ኩሸ ባቃዳ ጫቅዳባ ግድኮ፥
PRO 6:2 ነ ጫቅዳ ነ ጫቁዋን ፅሄን ገልዳባ ግድኮ፥ ነ ዶናፐ ከይዳ ቃላን ኦይከትዳባ ግድኮ፥
PRO 6:3 ህዛ ነ ሾሩዋ ኩሸን ገላዳሳ። ሄሳ ግሾ፥ ታ ናአዉ፥ እያፐ ከያናዉ ኮይኮ፥ ነ ሾሩዋ ሶ ባዳ ዋሰተꬃ ነ ቦላፈ ዎꬃና መላ አዳሻዳ እያ ዎሳ።
PRO 6:4 ሄሳ ኦꬆና ደአሸ ዝንኦፋ፤ ꬍስኮይካ ነና ኤኮፎ።
PRO 6:5 ሻንካፈ ገንኤይ ከስ ኤክያዳ፥ ግተፐ ካፎይ አትያዳ ነና አሻ።
PRO 6:6 ነኖ አዛላዉ፥ ዝማዶኮ ባ፤ እያፐ ጭንጫተꬅ ታማራ።
PRO 6:7 ዝማዶታ ኪተይ ባዋ፥ ሀላቅ ዎይኮ ኤንታ ሃረይ ባዋ።
PRO 6:8 ሽን ባንታዉ ማናባ ቦነ ምንጆሶና፤ ካꬅ ጫክያ ዎደ ባንታዉ ኮሽያ ካꬃ ሺሾሶና።
PRO 6:9 ነኖ አዛላዉ፥ ነ አዉደ ጋካናዉ ꬍስካይ? ነ ꬍስኮፈ አዉደ ባርካኔ?
PRO 6:10 ኔኒ “ጉꬁ ዝንአና፤ ጉꬁ ꬍስካና፤ ኩሸ ሺሻ ኤካዳ ጉꬁ ሸምፓና” ያጋሳ።
PRO 6:11 ሄ ዎደ ማንቆተꬅ ፓንጋዳ፥ ፓጭ ኦላ ሚሸ ኦይክዳ አሳዳ ነ ቦላ ያና።
PRO 6:12 ላፋነ ኢታ አስ ዩይድ ኦዳ ምርቄስ፤
PRO 6:13 እ ባ አይፈን ቃምኦቴስ፤ ባ ቶሆን በሴስ፤ ባ ብራን ማሌስ።
PRO 6:14 እያ ኡሎን ጌላተꬅ ደኤስ፤ ኢታባ ቆፔስ፤ ኡባ ዎደ ኦሹ መꬌስ።
PRO 6:15 ሄሳ ግሾ ꬋዮይ አኬኮና እያ ቦላ ያና፤ እ ሀሳዮና መቃና፤ ዛሪድ ፓፀና።
PRO 6:16 ጎዳይ እፅያ ኡሱፑን ቆሞት ደኦሶና፤ እ ሻተትያ ቆሞት ላፑና፤
PRO 6:17 ካꬍድ ፄልያ አይፈ፥ ዎርዶትያ እንፃርስ፥ ፅሎ አሳታ ዎꬍያ ኩሸ፥
PRO 6:18 ኢታባ ማቅያ ዎዛና፥ ኢታባኮ ዎፃናዉ ኤሶትያ ቶሆ፥
PRO 6:19 ዎርዶ ቦላ ዎርዶ ጉጅያ ዎርዶ ማርካ፥ እሻታ ግዶን ኦሽ መꬍያ አስ።
PRO 6:20 ታ ናአዉ፥ ነ አዋ ኪታ ፖላ፤ ነ አየ ትምርትያ አጎፋ።
PRO 6:21 ኤንታ ኡባ ዎደ ነ ዎዛናን ኦይካ፤ ነ ቆꬍያን ቃቻ።
PRO 6:22 ነ ሄመትያ ዎደ ኤንቲ ነና ካለꬃና፤ ነ ዝንእያ ዎደ፥ ኤንቲ ነና ናጋና፤ ነ ባርክያ ዎደ ኤንቲ ነና ዞራና።
PRO 6:23 ጎዳ ኪታይ ፆምፐ፤ እያ ትምርተይ ፖኦ፤ እያ ሴራይ ደኦኮ ኤፍያ ኦገ።
PRO 6:24 ሀ ትምርተት ኢታ ማጫፈነ ሀራ ጭምያ ማጫሳ እንፃርሳፈ ነና ናጋና።
PRO 6:25 እ ማላ ሎኦተꬃይ ነና ቃꬆፎ፤ እ ቃምኦቶይ ነና ድኦፎ።
PRO 6:26 እስ አደይ ጉꬃ ሚሸን ላይማ ማጫስ ደማናዉ ዳንዳኤስ፤ ሽን ሀራ አሳ ማቾ ላገꬆይ ሸምፖ ኤኬስ።
PRO 6:27 ታማ እድምን እያ ማኦይ ሜተቶና አተይ ደኢ?
PRO 6:28 ታማ ቦንቆ የꬍን፥ እያ ቶሆይ ፁገቶና አተይ ደኢ?
PRO 6:29 አሳ ማቾ ላገꬅያ ኡራይ ሄሳ መላ፤ እዮ ቦችያ ኡባይ ሴረቶና አተና።
PRO 6:30 ካይሶይ ኮሻትድ ማናዉ ካይስኮ፥ አስ እያ ቦረና።
PRO 6:31 ሽን እ ኦይከትያባ ግድኮ፥ ላፑን ኩሸ ቃንፃና፤ ባ ሶን ደእያ ሚሸ ኡባ እማና።
PRO 6:32 ሽን ማጫሳራ ላይማትያ አስ ዎዛን ባይና አስ፤ ሄ ኡራይ ባ ሸምፑዋ ꬋይሴስ።
PRO 6:33 ደሸꬅነ ካዉሽ እያ ቃዳ፤ ዬል እያፐ ቁሸተና።
PRO 6:34 ቃናተይ አዝናስ ይሎ ደንꬄስ፤ ሀሎ ከስያ ዎደ እዉ ቃተና።
PRO 6:35 እ አይ አጫካ ኤከና፤ አይ መላ እሞትካ እያ ሀንቁዋ ዶሽሰና።
PRO 7:1 ታ ናአዉ፥ ታ ቃላ ናጋ፤ ታ ኪታ ነ ዎዛናን ዎꬃ።
PRO 7:2 ደኦን ዳናዉ ታ ኪታ ኦꬃ፤ ታ ትምርትያ ነ አይፈ ናኤዳ ናጋ።
PRO 7:3 ነ ኩሸን ኤንታ ቃቻ፤ ነ ዎዛናን ኤንታ ፃፋ።
PRO 7:4 ጭንጫተꬅ ነ ምችዳ፥ አኬካ ነ ማታ ዳቦዳ ፄላ።
PRO 7:5 ኤንቲ ነና ላይማ ማጫሳፐነ ባ ቃላን ጭምያ ሀራ ማጫሳፐ ናጋና።
PRO 7:6 እስ ጋላስ ታ ማስኮተራ ካረ ፄላስ።
PRO 7:7 ኤራተꬅ ፓጭዳ ናአተꬃታ በአስ፤ ኤንታ ግዶፈ እሶይ ዳሮ ኤያ።
PRO 7:8 ሄ ናአተꬃይ ኦገራ ብሸ፥ እስ ላይማ ማጫሰ ኬꬃ ማታራ አꬌስ፤ እ ሶ ኤፍያ ኦግያ ስሚድ እ ሶኮ ብስ።
PRO 7:9 ሄ ዎደ ሳእ ላዴስ።
PRO 7:10 ማጫስያ እያ ደማሱ፤ እያ ላይማ ግደይሳ እ ማኦይ ኤርሴስ፤ እያ አሳ ጭማናዉ ሀልቻዳ ከያሱ።
PRO 7:11 እያ ፃልታማነ ዬል ባይና ማጫስ፤ ሶን ዎፑ ጋዳ ኡቱኩ።
PRO 7:12 እያ እስ ቶሆ ኦገን፥ እስ ቶሆ ግያን፥ እስ ቶሆ ዳባባን ኤቃዳ ናጋዉሱ።
PRO 7:13 እያ ሄ ናአተꬃ ቆማዳ ዬራሱ፤ እያ ትሽ ኦꬃዳ ፄላሸ ሀይሳዳ ያጋሱ፤
PRO 7:14 “ታኒ ታ ያርሹዋ ያርሻዳ፥ ታ ቃንገꬃ ሀች ጋꬃስ።
PRO 7:15 ያታዳ ነና ሞካናዉ ከያስ፤ ነና ዳሮ ኮያስ፤ ህዛ ነና ደማስ።
PRO 7:16 ታኒ ግብፀፈ ይዳ፥ አሌቀትዳ አፍላ ሂፃስ።
PRO 7:17 ታኒ ታ ሂፃ፥ ካርበፈ፥ አልሙነፐነ ቃራፋፐ፥ ኦሰትዳ ሽቱዋ ፑካስ።
PRO 7:18 ሃያ፤ ዎንታና ጋካናዉ ሲቆ አሎስ፤ ቆመትድ ኡፋይቶስ።
PRO 7:19 ታ አዝናይ ሶን ዴና፤ ሃሆ ቢታ ብስ።
PRO 7:20 ሚሸ ካርፂታ ኩንꬅድ ብዳ ግሾ፥ አጌና ኩሞና ሶ ስመና” ያጋሱ።
PRO 7:21 ባ ማልኦ ኦዳን እያ ባለꬃሱ፤ ባ ሊቆ እንፃርሳን እያ ጭማሱ።
PRO 7:22 ቦር ሹከታናዉ በይሳዳ፥ ጋር ኤሶትድ ፅሄን ገለይሳዳ፥ እ እዮ ካልድ ብስ።
PRO 7:23 ቶር እያ ዎዛና ጫድዳዳ ሀንስ፤ ግተ ግዶ ገልዳ ካፎ ዳንስ፤ ሄስ ኡባይ እያ ሸምፑዋ ꬋይሳናዉ ሀነይሳ ኤርቤና።
PRO 7:24 ህዛ ታ ናአዉ፥ ታና ስአ፤ ታ ዶናፐ ከይያ ቃላ ሀይዛ።
PRO 7:25 ነ ዎዛናይ ማጫሳ ጌዶ ቦፖ፤ እ ኦግያን ገላዳ ꬋዮፓ።
PRO 7:26 እያ ጫዳ የግዳይሳት ዳሮ፤ እያ ዎꬍዳይሳት ጉꬃ ግዶኮና።
PRO 7:27 እ ሶይ ዱፎኮ ኤፍያ ኦገ፤ ሀይቆኮ ካለꬅያ ሆሮጋ።
PRO 8:1 ጭንጫተꬅ ፄጋዉሱ፤ ስእተ፤ አኬክ ባ ቃላ ꬎቁ ኦꬅዳ ስሳዉሱ።
PRO 8:2 ኦገ ዶናን ደእያ ዙማታ ቦላነ ዳጋላ ኦግያን እያ ኤቃዉሱ።
PRO 8:3 ድርሳ ፐንገ ማታን፥ ካታማ ገልያ ፐንገን ኤቃዳ፥ ባ ቃላ ꬎቁ ኦꬃዳ ሀይሳዳ ያጋዉሱ።
PRO 8:4 አሳዉ፥ ታ ህንተና ፄጋይስ፤ አሳ ኮቸ ኡባ ፄጋይስ።
PRO 8:5 ህንተኖ ኤራተꬅህ ባይናይሳቶ ኤራተꬅ ታማርተ፤ ህንተኖ ኤያቶ፥ አኬካ ደምተ።
PRO 8:6 ታኒ ሎኦባ ኦድያ ግሾ ስእተ፤ ታ ዶናፐ ሱረባይ ከዬስ።
PRO 8:7 ታኒ ቱማ ኦደታይስ፤ ዎርዶይ ታ ማታን እፀትዳባ።
PRO 8:8 ታ ኦዳይ ቱማ፤ ጌላ ዎይኮ ምርቀꬅ ግደና።
PRO 8:9 አኬክ ደእያ ኡራስ ታ ኦዳይ ልከ፤ ኤር ደእያ ኡራስ ታ ኦዳይ ቆንጨ።
PRO 8:10 ብራፐ አꬅድ ታ ዞርያ ዶርተ፤ ጌሻ ዎርቃፈ አꬅድ ኤራተꬅ ዶርተ።
PRO 8:11 ጭንጫተꬅ ዞኦ አልኦ ሹቻፈ አꬌስ፤ ነ አሞትያ ኡባይ ኢራ ልከተና።
PRO 8:12 ታዉ፥ ጭንጫተꬃስ አኬክ ደኤስ፤ ኤራተꬅነ ሻክድ ኤሮይ ታባ።
PRO 8:13 ጎዳስ ያሽ ኢታተꬅ እፆ፤ ታኒ ኦቶሮነ ጬቀተꬅ እፃይስ፤ ኢታ ኦገነ ዎርዶ ኦዳ ዶስከ።
PRO 8:14 ዞረይነ ሎኦ ኤራይ ታባ፤ አኬክነ ዎልቅ ታዉ ደኤስ።
PRO 8:15 ካዎት ታ ባጋራ ካዎቶሶና፤ ሃረይሳት ሱረ ህገ ታ ባጋራ ከሶሶና።
PRO 8:16 ሀላቃት ታ ማድን ደርያ ሃሮሶና፤ ቢታ አይስያ ግታ አሳታ ታ ማዳይስ።
PRO 8:17 ታና ዶሰይሳታ ታ ዶሳይስ፤ ታና ምንꬅድ ኮየይሳት ደማና።
PRO 8:18 ዱረተꬅነ ቦንቾይ ታራ ደኦሶና፤ ዉሮና ሻሎይነ እንጀይ ታ ማታና።
PRO 8:19 ህንተ ታፐ ደምያ ጎአይ፥ ጌሻ ዎርቃፈነ ብራፐ አꬌስ።
PRO 8:20 ታ ፅሎተꬃ ኦገን ሄመታይስ፤ ሱረ ፕርዳ ኦግያራ ካንꬃይስ።
PRO 8:21 ታና ዶሰይሳታስ ታ ሻሎ እማና፤ ኤንታ ኬꬃ ዱረተꬃን ኩንꬃና።
PRO 8:22 “ጎዳይ ታና ኡባፈ ኮይሮ መꬍስ፤ በንፐካ እያ ኦሱዋስ ዶመꬃይ ታና።
PRO 8:23 አላመይ መታናፐ ካሰ ታኒ ሹመታስ።
PRO 8:24 አባይ ባይና ዎደ፥ ፑልቶት ꬉቆና ደእሽን ታ የለታስ።
PRO 8:25 ደረትነ ዙማት መታናፐ ስን ታ የለታስ።
PRO 8:26 ጎዳይ ሳኣነ ሳአን ደእያ ኡባ መꬋናፐ ስን ዎይኮ ኮይሮ ኮጰ ቢታይ ኦሰታናፐ ስን ታ የለታስ።
PRO 8:27 ጎዳይ ሳሎታ ምጭዳ ዎደ፥ አባታፐ ቦላራ ሳሎ ጉፋንꬆ ጊግስዳ ዎደ፥ ታኒ ያን ደአይስ።
PRO 8:28 ጎዳይ ሻራታ ቦላራ ዎꬅዳ ዎደ፥ አባ ፑልቶታ ꬉስዳ ዎደ፥
PRO 8:29 አባ ሃꬃት እመትዳ ዛዋፐ ፕንድ፥ ቦላ አꬎናዳ፥ እ ኤንታ ኪትዳ ዎደ ሳኣ ባሱዋ ምንꬅዳ ዎደ፥ ታኒ ያን ደአይስ።
PRO 8:30 ሄ ዎደ ታ እያ ማታን ዋና ኦሳንቾ፤ ኡባ ዎደ ታ እያ ኡፋይሳይስ፤ ታዉካ እያ ስንꬃን ኡፋይታይስ።
PRO 8:31 እ መꬍዳ አላምያን ኡፋይታይስ፤ አሳ ናይትካ ታና ኡፋይሶሶና።
PRO 8:32 “ህዛ ታ ናይቶ፥ ስእተ፤ ታ ኦደይሳዳ ኦይሳት አንጀትዳይሳታ።
PRO 8:33 ታ ትምርትያ ስእተ፤ ጭንጫ ግድተ፤ ስእዳባ ዶጎፕተ።
PRO 8:34 ታኒ ኦድዳባ ስእያ ኡራይ፥ ጋላስ ጋላስ ታ ፐንግያን በንትያ ኡራይ፥ ታ ፐንግያን ናግያ ኡራይ አንጀትዳይሳ።
PRO 8:35 ታና ደምዳይ ደኦ ደሜስ፤ ጎዳፐ ሳባ ኤኬስ።
PRO 8:36 ሽን ታና ደሞና ኡራይ ባና ቆሄስ፤ ታና እፅያ ኡባይ ሀይቆ ዶሴስ።”
PRO 9:1 ጭንጫተꬅ ባ ኬꬃ ኬፃሱ፤ ላፑን ቱሳታ ባ ኬꬃስ ኤሳሱ።
PRO 9:2 እያ ባ ጊግስያ ግብራስ ሞꬎ መሄ ሹካሱ፤ ዎይነ አጋሱ፤ ጋይታ አሳ ስን አꬃሱ።
PRO 9:3 አሳ ፄጋናዉ ባ አይለታ ኪታሱ፤ ኦሳንቾት ካታማ ꬎቃ በሳን ኤቅድ፥
PRO 9:4 ህንተኖ፥ ኤር ፓጭዳይሳቶ ሃ ገልተ! ኤያታኮ ሀይሳዳ ያጋሱ።
PRO 9:5 “ሃ ዪተ፤ ታ ካꬃ ሚተ፤ ታ አግዳ ዎይንያ ኡይተ።
PRO 9:6 ህንተ ኤያተꬅ አግድ ደኦን ደእተ፤ አኬክድ ሄመትተ” ያጋሱ።
PRO 9:7 ቀልቅስያ ኡራ ሴርያ አስ ጫሸ ኤኬስ፤ ኢታ ኡራ ዞርያ አስ ባዉ ቆሄቴስ።
PRO 9:8 ቀልቅስያ ኡራ ዞሮፓ፤ እ ነና እፃና፤ ጭንጫ ኡራ ዞራ፤ እ ነና ዶሳና።
PRO 9:9 ጭንጫተꬅ ኡራ ታማርሳ፤ እ ጭንጫ ግዳና፤ ፅሎ ኡራ ታማርሳ፤ እ ኤራ ጉጃና።
PRO 9:10 ጎዳስ ያሽ ጭንጫተꬃስ ዶመꬅ፥ ጌሻ ጎዳ ኤሮይ አኬካ።
PRO 9:11 ታ ጋሶን ነ ላይꬃይ ዳራና፤ ነ ደኦ ላይꬃይ አዱቃና።
PRO 9:12 ነ ጭንጫ ግድኮ፥ ጎኤተይ ነና፤ ነ ቀልቅስያ አስ ግድኮ ነና ቆሃሳ።
PRO 9:13 ኤያ ማጫስ ዋሶ ዳራዉሱ፤ እዉ ዬል ባዋ፤ እያ አይኮካ ኤሩኩ።
PRO 9:14 እያ ባ ካረን ዎይኮ ካታማ ꬎቃ በሳን ኡታዉሱ።
PRO 9:15 ባንታ ኦግያ ብያ አሳ ፄጋዳ፥
PRO 9:16 “ህንተኖ፥ ኤር ፓጭዳይሳቶ ታኮ ሃ ዪተ” ያጋሱ። ኤር ባይናይሳታኮ፥
PRO 9:17 “ካይስድ ኡያ ሃꬅ ማልኤስ፤ ጌማን ምያ ካꬅ ሎኤስ” ያጋሱ።
PRO 9:18 ሽን ሀይቅዳ አሳይ ያን ደኤይሳ፥ እ እማꬃትካ ዱፎን ደኤይሳ እ ኤረና።
PRO 10:1 ሀይሳቲ ሶሎሞነ ሌምሶታ። ጭንጫ ናእ ባ አዋ ኡፋይሴስ፤ ሽን ኤያ ናእ ባ አይዉ አዛንꬄስ።
PRO 10:2 ናጋራን ደምዳ ሚሸይ ጎኤና፤ ሽን ፅሎተꬅ ሀይቆፐ አሼስ።
PRO 10:3 ጎዳይ ፅሎታ ኮሻይሰና፤ ሽን ናጋራንቾታ አሙዋ ፖልሰና።
PRO 10:4 አዛላተꬅ ማንቅሴስ፤ ሽን ምንድ ኦሶይ ዱረዬስ።
PRO 10:5 ጭንጫ አስ ባ ካꬃ ቦነ ሺሼስ፤ ሽን ካꬅ ጫክያ ዎደ ꬍስክያ አስ ካዉዬስ።
PRO 10:6 ፅሎ አስ አንጀቴስ፤ ሽን ናጋራንቾ አስ ባ ማካላተꬃ ዶናን ገንꬄስ።
PRO 10:7 ፅሉዋ ሱንꬃይ አንጆን ፄገትሸ ደኤስ፤ ሽን ናጋራንቾታ ሱንꬃይ ኤለ ዶገቴስ።
PRO 10:8 ጭንጫ አስ ኪትዳባ ኦꬄስ፤ ሽን ኤያ አስ ꬋዮኮ ቤስ።
PRO 10:9 ሱረ አስ ሳሮ ደኤስ፤ ሽን ጌላ አስ ባ ጎመን ኦይከቴስ።
PRO 10:10 ገነ አይፈን ቃምኦትያ አስ መቶ ኤሄስ፤ ሽን ያዮና ሴርያ አስ ሳሮተꬅ መꬌስ።
PRO 10:11 ፅሎ አሳ ኦድ ደኦ ፑልቶ፤ ሽን ናጋራንቾ አሳ ኦድ ማካላ ገንꬄስ።
PRO 10:12 እፆይ ፓላማ ደንꬄስ፤ ሽን ሲቆይ ባላ ኡባ ካሜስ።
PRO 10:13 ዎዛናማ አስ ጭንጫተꬃን ኦዴስ፤ ሽን ኤያ አሳ ዞኮይ ፃምአስ አቴስ።
PRO 10:14 ጭንጫት ኤራተꬅ ዳጋዮሶና፤ ሽን ኤያታ ዶናይ ꬋዮ ዳፌስ።
PRO 10:15 ዱረ አሳ ሚሸይ ድረትዳ ካታማዳ ናጌስ፤ ሽን ማንቆተꬅ ማንቆታ ꬋይሴስ።
PRO 10:16 ፅሎ አሳ ኦሶይ እያ ደኦ፤ ሽን ኢታ አሳ ዉርሰꬃይ ꬋዮ።
PRO 10:17 ሴርን ስምያ አስ ደኦ ኦገን ሄመቴስ፤ ሽን ሴርን እፅያ አስ ባሌስ።
PRO 10:18 እፆ ካምያ አስ ዎርዳንቾ፤ ዝግርስ ላልያ አስ ኤያ።
PRO 10:19 ዳሮ ሃሳያ ግዶን ናጋር ꬋየና፤ ሽን ባ ዶና ሺሽያ አስ ጭንጫ።
PRO 10:20 ፅሎ አሳ እንፃርስ ጌሻ ብራ መላ፤ ሽን ኢታ አሳ ዎዛን ኢታባን ኩምስ።
PRO 10:21 ፅሎ አሳ ኦድ ዳሮ አሳ ጎኤስ፤ ሽን ኤያት ባንታ ፓጫ ዎዛናን ሀይቆሶና።
PRO 10:22 ጎዳ አንጆይ ዱረ ከሴስ፤ ሄ ዱረተꬃ ቦላ መቶ ጉጀና።
PRO 10:23 ኤያ ኡራስ ኢታባ ኦሶይ ካሳ መላ፤ ሽን ዎዛናማ አስ ጭንጫተꬃን ኡፋይቴስ።
PRO 10:24 ኢታ አስ ህርግዳባይ እያ ቦላ ጋካና፤ ሽን ፅሎይ አሞትዳባይ እመታና።
PRO 10:25 ጎተይ አꬍያ ዎደ ናጋራንቾይ በንተና፤ ሽን ፅሎት መርናዉ ምንድ ዳና።
PRO 10:26 ጫላባይ አቸ፥ ጩይ አይፈ ቆሄይሳዳ፥ አዛላ አስ ኪትዳይሳ ይሎዬስ።
PRO 10:27 ጎዳስ ያሽ ላይꬅ አዱሴስ፤ ሽን ናጋራንቾታ ላይꬃይ ቃሜስ።
PRO 10:28 ፅሎ አስ ኡፋይስ ያና ግድ ናጌስ፤ ሽን ናጋራንቾታ ኡፋይሳይ ꬋያና።
PRO 10:29 ጎዳ ኦገይ ፅሎታስ ባቃትድ አትያ በሰ፤ ሽን ኢታ ኦꬅያ አሳስ ꬋዮ።
PRO 10:30 ፅሎት ኡባ ዎደ ቃፆኮና፤ ሽን ኢታት ቢታ ቦላ ዶኮና።
PRO 10:31 ፅሎ አስ ጭንጫተꬃን ኦዴስ፤ ሽን ጌላባ ኦደትያ እንፃርስ ቃንፀታና
PRO 10:32 ፅሎ አሳ እንፃርስ በሲያ ሃሳያ ኤሬስ፤ ሽን ኢታ አሳ ኦዳይ ዎበ።
PRO 11:1 ጎዳይ ዎርዶ ምዛነ እፄስ፤ ሽን ልከ ምዛነን ኡፋይቴስ።
PRO 11:2 ኦቶሮይ ያ ዎደ ካዉሻተꬅ ዬስ፤ ሽን አሽከተꬃን ጭንጫተꬅ ዬስ።
PRO 11:3 ፅሎታ ኤንታ ሱረተꬃይ ካለꬄስ፤ ሽን ኢታ አሳታ ኤንታ ጌላተꬃይ ꬋይስስ።
PRO 11:4 ሀንቆ ጋላስ ዱረተꬅ ጎኤና፤ ሽን ፅሎተꬅ ሀይቆፐ አሼስ።
PRO 11:5 ቦረይ ባይና ኡራ ኦግያ ፅሎተꬃይ ሱርሴስ፤ ሽን ኢታ ኡራይ ባ ኢታተꬃን ኩንዴስ።
PRO 11:6 ሱረታ ኤንታ ፅሎተꬃይ አሼስ፤ ሽን አማነቶናይሳታ ኤንታ አሞይ ፅሄ ግድድ ኦይካና።
PRO 11:7 ኢታ አስ ሀይቅያ ዎደ፥ እ ናግያ ኡፋይሳይ እያራ እስፈ ሀይቄስ፤ እ ባ ዎልቃን ጬቀትያባይ ኡባይካ ꬋዬስ።
PRO 11:8 ፅሎይ መቶፐ አቴስ፤ እያ ግሾ ኢታ ቦላ መቶይ ዬስ።
PRO 11:9 ፆሳ ካድዳ አስ ባ ዶናን አሳ ꬋይስስ፤ ሽን ፅሎት ኤራን ከስ ኤኮሶና።
PRO 11:10 ፅሎት ቦንቸትያ ዎደ፥ ካታማይ ኡፋይቴስ፤ ቃስ ኢታት ሀይቅያ ዎደ፥ ሀሹ ጌስ።
PRO 11:11 ፅሎታ አንጁዋ ጋሶን ካታማይ ድጬስ፤ ሽን ኢታ ኡራ ኦድ ካታማ ꬋይስስ።
PRO 11:12 ባ ሾሩዋ ካꬍያ ኡራስ ዎዛን ባዋ፤ ሽን አኬካንቾ ኡራይ ስእ ጌስ።
PRO 11:13 ዝግርያ አስ ፁራ ላሌስ፤ ሽን አማነትያ አስ ፁራ ገንꬄስ።
PRO 11:14 ካለꬅያባይ ꬋይኮ፥ ካዎተꬃይ ኩንዴስ፤ ሽን ዳሮ ዞረይሳት ደእኮ፥ ሳሮይ ደኤስ።
PRO 11:15 ኤረና ኡራስ ዋሰ ግድያ አስ ቱማፐ መቶታና፤ ሄሳፈ ዋሰ ግዶና እፀይስ ሎኦ።
PRO 11:16 ኡሎ ኬሀ ማጫስ ቦንቸታዉሱ፤ ሽን ኢታ አስ ዱረተꬃ ፃላላ ዱረቴስ።
PRO 11:17 ኬሀ አስ ባዉ ሎኦባ ኦꬄስ፤ ሽን ዎዛና ምኖ አስ ባና ቆሄስ።
PRO 11:18 ኢታ አስ ደምያ ሚሸይ ጭሞ፤ ሽን ፅሎተꬃ ዘርያ ኡራይ ቱማ ዎይቶ ጫካና።
PRO 11:19 ፅሎተꬃን ምንድ ደእያ ኡራይ ፓፃ ደአና፤ ሽን ኢታተꬃ ካልያ ኡራይ ሀይቃና።
PRO 11:20 ጎዳይ ኢታ ቆፋይ ደእያ አሳታ እፄስ፤ ሽን ሱረ ሄመተይሳታን ኡፋይቴስ።
PRO 11:21 ኢታ አስ ሴረቶና አተና፤ ሽን ፅሎታ ኮቻይ አታና።
PRO 11:22 ቆፍ ባይና ማላ ሎኦ ማጫ ፑላተꬃይ ጉዱንꬆ ስን አꬅዳ ዎርቃ መላ።
PRO 11:23 ፅሎታ አሙዋስ ፖሎይ ሎኦ ፃላላ፤ ሽን ኢታታ አሙዋስ ፖሎይ ሀንቆ ፃላላ።
PRO 11:24 እስ እስ አሳት ባንታ ሚሸ አሳስ ጮ ኬሆሶና፤ ሽን ኤንታ አቆይ ሃ ዳሬስ። ሀራ አሳት ቃስ ባንታ ሚሻስ ፓላ ኡዘቶሶና፤ ሽን ኤንታ አቆይ ያ ፓጬስ።
PRO 11:25 ኬሀ አስ ዱረታና፤ ሀራታ ማድያ አስ ማደታና።
PRO 11:26 ካꬅ አልእን ባይዛናዉ ምንጅያ ኡራ አሳይ ባዴስ። ሽን ባ ካꬃ አሳይ ኮይያ ዎደ ባይዝያ ኡራ አንጄስ።
PRO 11:27 ሎኦባ ምንꬅድ ኮይያ ኡራይ ኡፋይሳ ደሜስ፤ ሽን ኢታባ ኮይያ ኡራ ኢታባይ ደሜስ።
PRO 11:28 ባ ዱረተꬃ አማነትያ አስ ኩንዳና፤ ሽን ፅሎት ባልጎ ምꬃዳ።
PRO 11:29 ባ ሶ አሳ ቦላ ቡቀꬅ ደንꬅያ ኡራይ ጎኤትያባይ አይብካ ባዋ። ኤያትካ ጭንጫታስ አይለ ግዳና።
PRO 11:30 ፅሎ አስ ደኦ አይፈ አይፍያ ምꬃ መላ፤ ሸምፖ አሸይሳት ጭንጫታ።
PRO 11:31 ፅሎት ሳአን ባንታ ኦሶ ጋተ ኤክያባ ግድኮ፥ ኢታትነ ናጋራንቻት ባንታ ኦሱዋስ ኤካና ጋተይ ዋንድ ዳራንዴሻ!
PRO 12:1 ሴራ ዶስያ ኡራይ ኤራተꬅ ዶሴስ፤ ሽን ሴራ እፅያ ኡራይ ኤያ።
PRO 12:2 ሎኦ አስ ጎዳፐ ሳባ ደሜስ፤ ሽን ጎዳይ ገናንቾታ ፕርዴስ።
PRO 12:3 አስ ኢታተꬃን ምንድ ኤቀና፤ ሽን ፅሎታ ፃጶይ ቃፀና።
PRO 12:4 ዎዛናማ ማችያ ባ አዝናስ ካላቻ መላ፤ ሽን ባ አዝና ካዉሽያ ማችያ መቀꬅ ምያ አጃጀ መላ።
PRO 12:5 ፅሉዋ ቆፋይ ሱረ፤ ሽን ኢታታ ዞረይ ጭሞ።
PRO 12:6 ኢታታ ዞረታይ አሳ ቆሀናሳ፤ ሽን ፅሎታ ዞረታይ ኤንታ አሻናሳ።
PRO 12:7 ኢታ አሳት ኩንዳና፤ ኤንታዉ ዘረꬅካ አተና፤ ሽን ፅሎታ ኮቻይ ምንድ ደአና።
PRO 12:8 አስ ባ ጭንጫተꬃ መላ ጋላተቴስ፤ ሽን ጌላ ቆፋይ ደእያ አስ ካቴስ።
PRO 12:9 ዱረ አስ ዳንድ፥ መቶን ደእያ አሳፐ ጮ አሳ ዳንድ፥ ኦꬂድ ባ ደኦ ሱግያ አስ ኬሀ።
PRO 12:10 ፅሎ አስ ባ መሄስ ቃቴስ፥ ሽን ዎዛና ምኖ አሳስ ቃይ ባዋ።
PRO 12:11 ባ ቢታ ምንꬅ ኦꬅያ ኡራይ ካꬅ ካሌስ፤ ሽን ፓꬆናባ የደꬅያ ኡራይ አኬክ ፓጭዳይሳ።
PRO 12:12 ኢታት ናጋራንቾ አሳታ ድአናዉ አሞቶሶና፤ ሽን ፅሎታ ፃጶይ ዳይድ ደአና።
PRO 12:13 ኢታ አሳ እያ ዶናፐ ከይዳ ኦድ ፅሄ ግድድ ኦይኬስ፤ ሽን ፅሎይ መቶፐ ከስ ኤኬስ።
PRO 12:14 አስ ባ ዶናፐ ከይያ ቃላን ሎኦባ ካሌስ፤ ባ ኦꬅዳ ኦሶ ጋትያ ኤኬስ።
PRO 12:15 ኤያ አስ ብያ ቡሳይ አዉ እያ ሁጰን ልከ ዳኔስ፤ ሽን ጭንጫ አስ ዞረ ስኤስ።
PRO 12:16 ኤያ ኡራ ሀንቆይ ኤለስድ ኤረቴስ፤ ሽን ጭንጫ አስ ጫሸ ዉዳ ጌና።
PRO 12:17 ቱማ ሃሳይያ አስ ሱረባ ኦዴስ፤ ሽን ዎርዶ ማርካይ ዎርዶ ኦዴስ።
PRO 12:18 አኬኮና ኦደትያ ኦድ ማሻዳ ጫዴስ፤ ሽን ጭንጫ እንፃርሳይ ፓꬄስ።
PRO 12:19 ዎርዶ ኦድ ጉꬃ ዎደሳ፤ ሽን ቱማ ኦድ መርናዉ ደአና።
PRO 12:20 ኢታ ቆፕያ አሳ ዎዛናን ጭሞይ ደኤስ፤ ሽን ሳሮባ ዞረተይሳታ ዎዛናን ኡፋይሳይ ኩሜስ።
PRO 12:21 ፅሎታ መቶይ ጋከና፤ ሽን ኢታታስ መቶይ ዳራና።
PRO 12:22 ጎዳይ ዎርዳንቾታ እፄስ፤ ሽን ቱማንቾ አሳታን እ ኡፋይቴስ።
PRO 12:23 ጭንጫ አስ ባ ኤራ ቆቴስ፤ ሽን ኤያት ባንታ ኤያተꬃ ኦዶሶና።
PRO 12:24 ምንድ ኦꬅያ ኡራይ ደረ ሃሬስ፤ ሽን አዛላ አስ ሃረቴስ።
PRO 12:25 ኡንአን ኩምዳ ዎዛን አዛኖ ኤሄስ፤ ሽን ኬሀ ኦድ እያ ኡፋይሴስ።
PRO 12:26 ፅሎ አስ ባ ሾሩዋ ዞርድ፥ ሱረ ኦገ ካለꬄስ፤ ሽን ኢታት ኦገ ቱማፐ ሃሴስ።
PRO 12:27 አዛላ አስ ሻንካትድ ኤህዳ አሾ ካና፤ ሽን ምንድ ኦꬅያ ኡራይ ባ ሚሽያስ ምሸቴስ።
PRO 12:28 ፅሎተꬃ ኦገን ደኦይ ደኤስ፤ ሄ ኦገን ሀይቆይ ባዋ።
PRO 13:1 ኤራንቾ ናአይ ባ አዋ ሴራ ስኤስ፤ ሽን ቀልቅሰይስ ሴራ ኤከና።
PRO 13:2 አስ ባ ዶናፐ ከይያ ቃላን ሎኦባ ኤኬስ፤ ሽን አማነቶናይሳት ማካላባ አሞቶሶና።
PRO 13:3 ባ ዶና ናግያ ኡራይ ባ ሸምፑዋ ናጌስ፤ ሽን ኤሶን ሃሳያ ኡራይ ባና ꬋይሴስ።
PRO 13:4 አዛላይ አሞቴስ፤ አሞትኮነ አይባካ ደመና፤ ሽን ምንድ ኦይሳት ካላና።
PRO 13:5 ፅሎ አሳት ዎርዶ ኦዳ እፆሶና። ሽን ኢታ አሳታ ኦድ ዬላዬስነ ካዉሼስ።
PRO 13:6 ሱረ ደኡዋ ደእያ ኡራ እያ ፅሎተꬃይ ናጌስ፤ ሽን ናጋራንቾ እያ ናጋራይ ኦንጌስ።
PRO 13:7 ባና ዱረ ዳንስያ አስ ደኤስ፤ ሽን እያዉ አይብነ ባዋ፤ ቃስ ባና ማንቆ ዳንስያ አስ ደኤስ፤ ሽን እያዉ ዳሮ አቆይ ደኤስ።
PRO 13:8 አስ ባ ሚሸን ባ ሸምፖ ዎዛናዉ ዳንዳኤስ፤ ሽን ማንቁዋ ያሽስያባይ ባዋ።
PRO 13:9 ፅሎታ ፖኦይ ጶሌስ፤ ሽን ኢታታ ፆምፐይ ቶአና።
PRO 13:10 ኦቶሮይ ኦሽ የሌስ፤ ሽን ዞረ ኤከይሳት ጭንጫታ።
PRO 13:11 ዳቡር ባይና ደምዳ ሚሸይ ኤሶን ꬋዬስ፤ ሽን ምን ኦꬅድ ደምዳ አቆይ፥ ዳር ዳርድ ቤስ።
PRO 13:12 ኮይያባይ ፖለቶና ጋምኤይስ አዛንꬄስ፤ ሽን አሞትዳባይ ፖለተይስ ኡፋይሴስ።
PRO 13:13 ዞረ ካꬍያ ኡራይ መቶን ገሌስ፤ ሽን ኪታ ቦንችያ ኡራይ ሳሮ ደአና።
PRO 13:14 ጭንጫተꬅ እምያ ትምርተይ ደኦ ፑልቶ፤ ህገይ አሰ ሀይቆ ፅሄፐ ከስ ኤካናዉ ማዴስ።
PRO 13:15 አኬክ ደእያ ኡራይ ቦንቸቴስ፤ ሽን አማነቶና እፆይ ቆሆስ ጋꬄስ።
PRO 13:16 ጭንጫ አስ ኡባይ ኤራን ኦꬄስ፤ ሽን ኤይ ባ ኤያተꬃ ቆንጭሴስ።
PRO 13:17 ኢታ አሳት ኪተትድ፥ መቶን ገሎሶና፤ ሽን አማንꬅያ አሳት ኪተትድ፥ ሳሮተꬅ ኤሆሶና።
PRO 13:18 ሴራ እፅያ አስ ማንቄስነ ዬላቴስ፤ ሽን ሴራ ኤክያ ኡራይ ቦንቸቴስ።
PRO 13:19 አሞትዳባይ ፖለተይስ ዳሮ ኡፋይሴስ፤ ሽን ኢታት ኢታባፐ ሃካናዉ ኮዮኮና።
PRO 13:20 ጭንጫ አሳራ ሄመትያ አስ ጭንጫ ግዴስ፤ ሽን ኤያ አሳራ ሄመትያ አስ መቶን ገሌስ።
PRO 13:21 ናጋራንቾታ ኢታ ቃዳይ ካሌስ፤ ሽን ዱረተꬅ ፅሎታ ዎይቶ።
PRO 13:22 ሎኦ አስ ባ ናይታ ናይታ ላትሴስ፤ ሽን ናጋራንቹዋ አቆይ ፅሉዋስ ዳጋየቴስ።
PRO 13:23 ማንቁዋ ጎሻይ ዳሮ ካꬅ አይፈናዉ ዳንዳኤስ፤ ሽን ሱረ ፕርዳ ፓጫን ꬋዬስ።
PRO 13:24 ፕርጮን ሴራናዉ ዶሶና አስ ባ ናኣ እፄስ፤ ሽን ባ ናኣ ሲቅያ ኡራይ ምንድ ሴሬስ።
PRO 13:25 ፅሎይ፥ ኡሎይ ካላና ጋካናዉ ሜስ፤ ሽን ናጋራንቾይ ኡባ ዎደ ኮሻታና።
PRO 14:1 ጭንጫ ማጫስ ባ ኬꬃ ኬፃዉሱ፤ ሽን ኤያ ማጫስያ ባ ኬꬃ ባ ኩሸን ላላዉሱ።
PRO 14:2 ሱረ ሄመትያ አስ ጎዳ ያዬስ፤ ሽን ባ ኦገ ጌላይያ አስ ጎዳ ካꬌስ።
PRO 14:3 ኤያ ኦድ እያ ዞኩዋስ ፃምአ ኤሄስ፤ ሽን ጭንጫታ እንፃርሳይ ኤንታ ናጌስ።
PRO 14:4 ቦር ባይና እፅኮ ሻለይ ካይስ ግዴስ፤ ሽን ጎሻ ቦር ደእኮ፥ ነ ሻለይ ካꬃን ኩሜስ።
PRO 14:5 አማነትያ ማርክ ኡባ ዎደ ቱማ ኦዴስ፤ ሽን ዎርዶ ማርክ ዎርዶ ፃላላ ኦደቴስ።
PRO 14:6 ቀልቅስያ አስ ጭንጫተꬅ ኮዬስ፥ ሽን ደመና፤ አኬክ ደእያ አስ ኤራተꬅ ደሞይ ዋይሰና።
PRO 14:7 ኤያ አሳፐ ሃካ፤ ኔኒ እያ ኦዳፐ ኤራተꬅ ደማካ።
PRO 14:8 ጭንጫ አስ ጭንጫ ግድያ ባ ኦꬅያባ ኤሬስ፤ ሽን ኤያ አሳ ኤያተꬃይ እያ ባለꬄስ።
PRO 14:9 ኤያት ናጋራ ኦꬅሸ፥ ቂሮታናይሳ አግድ ቀልቅሶሶና፤ ሽን ሱረት ባንታ ናጋራይ አቶ ጌተታናዉ ኮዮሶና።
PRO 14:10 እስ እስ ዎዛን ባ አዛኑዋ ኤሬስ፤ እያ ኡፋይሳ ኦንካ እያራ ኮፀና።
PRO 14:11 ኢታታ ኬꬃይ ላለታና፤ ሽን ሱረታ ኬꬃይ ምንድ ዳና።
PRO 14:12 አሳስ ልከ ዳንያ ኦገይ ደኤስ፤ ሽን እያ ዉርሰꬃይ ሀይቆኮ ጋꬄስ።
PRO 14:13 ሚቻ ዎደካ ዎዛናን አዛኖይ ደኤስ፤ ኡፋይሳ ዉርሰꬃይ አዛኖ ግዳናዉ ዳንዳኤስ።
PRO 14:14 ኢታ አስ ባ ኢታ ኦሱዋ ጋተ ኤካና፤ ሎኦ አስካ ባ ሎኦ ኦሱዋ ጋተ ኤካና።
PRO 14:15 ኤያ አስ ኡባባ አማኔስ፤ ሽን ጭንጫ አስ አኬክድ ታንጌስ።
PRO 14:16 ጭንጫ አስ ጎዳ ያዬስ፤ ኢታፐ ሃኬስ፤ ሽን ኤያ አስ ኤሶተስነ ኢታፐ ናገተና።
PRO 14:17 ኤለ ሀንቀትያ አስ ኤያ ኦሶ ኦꬄስ፤ ሽን ጭንጫ አስ ዳንዳአንቾ።
PRO 14:18 አኬክ ባይና አስ ባ ኤያተꬃ ጋትያ ኤኮሶና፤ ሽን ጭንጫ አስ ኤራተꬅ ካላቻዳ ጎፆሶና።
PRO 14:19 ኢታት ሎኦታ ስንꬃን ጉልባታና፤ ናጋራንቻት ፅሎታ ፐንገን ሆካና።
PRO 14:20 ማንቆይ ባ ሾሩዋን እፀቴስ፤ ሽን ዱረታስ ዳሮ ላገት ደኦሶና።
PRO 14:21 ባ ሾሩዋ ካꬍያ አስ ናጋራ ኦꬄስ፤ ሽን ማንቁዋ ማድያ አስ አንጀትዳይሳ።
PRO 14:22 ኢታባ ማቀተይሳት ባሎሶና ግዶኮና? ሽን ሎኦባ ኦꬃናዉ ሀልቸይሳት አማነተꬅነ ሲቆ ደሞሶና።
PRO 14:23 ምንድ ኦꬅያ ኦሶ ኡባን ዎይ ደኤስ፤ ሽን ጮ ኦድ ማንቆተꬅ ኤሄስ።
PRO 14:24 ጭንጫታስ ኤንታ ዱረተꬃይ ኤንታዉ ካላቻ፤ ሽን ኤያት ጉጅ ጉጅ ኤዮሶና።
PRO 14:25 ቱማ ማርክ ሸምፖ አሼስ፤ ሽን ዎርዶ ማርክ ባለꬄስ።
PRO 14:26 ጎዳ ያይያ አሳስ ምኖ ሚፃይ ደኤስ፤ እያ ናይታስ ባቃትድ አትያ በሲ ደኤስ።
PRO 14:27 ጎዳ ያሽ ደኦ ፑልቶ፤ ሀይቆ ፅሄፐ አሰ አሼስ።
PRO 14:28 ካዎ ግታተꬅ እ ሃርያ አሳ ዳሮተꬃና፤ ሽን ሃረትያ አስ ꬋይኮ እካ ፓና።
PRO 14:29 ዳንዳአንቾ አሳስ ግታ አኬክ ደኤስ፤ ሽን ኤለ ሀንቀትያ አስ ባ ኤያተꬃ ቆንጭሴስ።
PRO 14:30 ሳሮ ዎዛን አሳተꬃስ ፓያተꬅ እሜስ፤ ሽን ቃናተይ አሳተꬃስ አጃጀ ሀርገ መላ።
PRO 14:31 ማንቆታ ናቅያ አስ ኤንታ መꬍዳይሳ ጫዬስ፤ ሽን መቶታንቾታስ ኬህያ አስ ፆሳ ቦንቼስ።
PRO 14:32 ኢታት ባንታ ኢታ ኦሶን ኩንዳና፤ ሽን ፅሎታስ ሀይቆፐ አትያ ሚፅ ደኤስ።
PRO 14:33 አኬካንቾ አሳ ዎዛናን ጭንጫተꬅ ኩምስ፤ ሽን ኤያት ጭንጫተꬅ አይበኮ ኤሮኮና።
PRO 14:34 ፅሎተꬅ እስ ካዎተꬃ ꬎቁ ꬎቁ ኦꬄስ፤ ሽን ናጋር አይ አስካ ካዉሼስ።
PRO 14:35 ኤራንቾ አይለታን ካዎይ ኡፋይቴስ፤ ሽን ዬላያ አይለይ ካዋ ሀንቀꬄስ።
PRO 15:1 ሊቆ እንፃርስ ሀንቆ ዛርብሴስ፤ ሽን ዶምኤꬅያ ቃል ሀንቆ ደንꬄስ።
PRO 15:2 ጭንጫታ እንፃርሳይ ኤራ ፑላዬስ፤ ሽን ኤያታ ዶናይ ኤያተꬅ ፑልትሴስ።
PRO 15:3 ጎዳ አይፈት ኡባ በሲ ፄሎሶና፤ ኢታታነ ሎኦታ ሻክድ በኦሶና።
PRO 15:4 ሎኦ ኦድ ደኦ ምꬃ መላ፤ ሽን ጌላ ኦድ አያና መንꬄስ።
PRO 15:5 ኤይ ባ አዋ ሴራ ካꬌስ፤ ሽን ባ አዋ ሴራ ኤክያ አስ ጭንጫ።
PRO 15:6 ፅሎ ኡራ ኬꬃን ዳሮ ሚሸይ ደኤስ፤ ሽን ኢታታ ሶ ገልያ ሚሸይ መቶ ኤሄስ።
PRO 15:7 ጭንጫታ ዶናይ ኤራ ዘሬስ፤ ሽን ኤያታ ዎዛናይ ሄሳ መላ ግደና።
PRO 15:8 ጎዳይ ኢታታ ያርሹዋ እፄስ፤ ሽን ሱረታ ዎሳን እ ኡፋይቴስ።
PRO 15:9 ጎዳይ ኢታ አሳታ ኦግያ እፄስ፤ ሽን ፅሎተꬅ ካለይሳታ እ ዶሴስ።
PRO 15:10 ልከ ኦግያ አግዳ አስ ፕርድ ናጌስ፤ ሴራ እፅያ አስ ሀይቄስ።
PRO 15:11 ዱፎይነ ꬋዮይ ጎዳ ስንꬃን ቆንጨ፤ ያትን፥ አሳ ዎዛና ቆፋይ ዋን እያፐ ጌማኔ?
PRO 15:12 ቀልቅስያ አስ ሴራ ዶሰና፤ ጭንጫታፐ ዞረ ኦይቸና።
PRO 15:13 ዎዛን ኡፋይትን፥ ሶምኦይ ፖኤስ፤ ሽን ዎዛን አዛንኮ፥ አያን መቄስ።
PRO 15:14 አኬካ ዎዛን ደእያ አስ ኤራተꬅ ኮዬስ፤ ሽን ኤያት ባንታ ኤያተꬃን ኡፋይቶሶና።
PRO 15:15 ማንቆታ ደኦይ ኡባ ዎደ ባፀ፤ ሽን ኡፋይትያ አስ ኡባ ዎደ አለስ።
PRO 15:16 ኦሻራ ደእያ ግታ አቆፐ ጎዳ ያሻራ ደእያ ጉꬃባይ ኬሀ።
PRO 15:17 ኦሽ ደእያ በሳን ሞꬎ አሾ ማናፐ ሲቆይ ደእያ በሳን ሳንꬅ ኬሀ።
PRO 15:18 ሀንቆይ ኦሽ ከሴስ፤ ሽን ዳንዳእ ኦሽ እርፅሴስ።
PRO 15:19 አዛላ አሳ ኦገይ አጉንꬃን ድረትስ፤ ሽን ሱረ አሳ ኦገይ ጊጋ።
PRO 15:20 ጭንጫ ናእ ባ አዋ ኡፋይሴስ፤ ሽን ኤያ ናእ ባ አይዉ ካꬌስ።
PRO 15:21 ዎዛን ባይና አስ ባ ኤያተꬃን ኡፋይቴስ፤ ሽን ዎዛናማ አስ በሲያ ባ ኦꬄስ።
PRO 15:22 ዞረይ ꬋይኮ፥ ቆፕዳባይ ሀድሬስ፤ ዳሮ ዞረይ ደእያ በሳን ቆፕዳባይ ፖለቴስ።
PRO 15:23 ኦይሻስ በሲያ ዛሮ እሞይ ሄ ኡራ ኡፋይሴስ፤ ባ ዎደን ኦደትያ ኦድ አይ መላ ኡፋይስ!
PRO 15:24 ጋርሳን ደእያ ስኦለፐ አታና መላ ደኦ ኦገይ አኬካ ኡራ ፑደ ካለꬄስ።
PRO 15:25 ጎዳይ ኦቶራንቾታ ኬꬃ ላላና፤ ሽን አምኤ ዛዋ ናጌስ።
PRO 15:26 ጎዳይ ኢታታ ቆፋ እፄስ፤ ሽን ጌሻ ቃላን እ ኡፋይቴስ።
PRO 15:27 ዎርዶን ዎ ደማናዉ አልያ አስ ባ ሶ አሳ ቦላ መቶ ኤሄስ፤ ሽን ዎꬋፈ እፅያ አስ ደኦን ዳና።
PRO 15:28 ፅሎ አስ ኦደታናፔ ስንꬃትድ ቆፔስ፤ ሽን ኢታታ እንፃርሳፐ ኢታባይ ፑልቴስ።
PRO 15:29 ጎዳይ ኢታታፐ ሃኬስ፤ ሽን ፅሎታ ዎሳ ስኤስ።
PRO 15:30 ሶምኦይ ፓሽክን ዎዛን ኡፋይቴስ፤ ምሽራቾይ መቀꬅ ምንꬄስ።
PRO 15:31 ደኦ እምያ ዞረ ስእያ አስ ጭንጫተꬃራ እስፈ ዳና።
PRO 15:32 ሴራ እፅያ አስ ባና ቆሄስ፤ ሽን ሴራ ኤክያ አስ አኬካ ደሜስ።
PRO 15:33 ጎዳስ ያሽ ጭንጫተꬅ ታማርሴስ፤ አሽከተꬅ ቦንቾፈ ስንꬃቴስ።
PRO 16:1 አስ ባ ዎዛናን ሀልቼስ፤ ሽን ልከ ዛሮይ ጎዳፐ በንቴስ።
PRO 16:2 አስ ኦꬅያ ኦሶ ኡባይ እያዉ ልከ ዳኔስ፤ ሽን ጎዳይ ደንዶ ቆፋ በኤስ።
PRO 16:3 ነ ኦሶ ኡባ ጎዳስ ሀዳራ እማ፤ ኔኒ ቆፕዳባይ ፖለታና።
PRO 16:4 ጎዳይ ኡባባይ ቆፕዳይሳꬆ ባና መላ ኦꬄስ፤ ሀንኮካ፥ ማካላንቾታ ዉርሰꬃይ ꬋዮ።
PRO 16:5 ጎዳይ ኦቶራንቾታ እፄስ፤ ኤንቲ ሴረቶና አቶኮና።
PRO 16:6 ሲቆንነ አማነተꬃን ናጋር አቶ ጌተቴስ፤ ጎዳስ ያይድ አስ ኢታባፐ አቴስ።
PRO 16:7 አሳ ሄመꬅ ጎዳ ኡፋይስያባ ግድኮ፥ እ ባ ሞርከታራ ሳሮ ዳናዳ ኦꬄስ።
PRO 16:8 ፅሎተꬃን በንትያ ጉꬃባይ፥ ዎርዶን ደምያ ዳሮ ዎፐ ሎኦ።
PRO 16:9 አስ ዎዛናን ባ ኦꬃናባ ሀልቼስ፤ ሽን ሀልቾይ ጎዳ ማደን ፖለቴስ።
PRO 16:10 ካዎይ ፆሳፈ ኤክዳ ማታን ፕርዴስ፤ እያ እንፃርሳይ ሱረ ፕርዴስ።
PRO 16:11 ግና ምዛነትነ ማካ ሚሸት ጎዳባ፤ ባይዝያባ ኡባን ገነይ ዶና መላ ጎዳይ ኮዬስ።
PRO 16:12 ካዎት ኢታ ኦሶ እፆሶና፤ ኤንታ አራታይ ፅሎተꬃን ኤቄስ።
PRO 16:13 ካዎት ፅሎ እንፃርሳን ኡፋይቶሶና፤ ቱማ ሃሳያ ኡራ ዶሶሶና።
PRO 16:14 ካዋ ሀንቆይ ሀይቆ ኪታንቾ መላ፤ ሽን ጭንጫ አስ ሀንቁዋ እርፅሴስ።
PRO 16:15 ካዋ ሶምኦይ ፖእኮ ደኦይ ደኤስ፤ እያ ሎኦተꬃይ እራ ኤህያ ሻራ መላ።
PRO 16:16 ጭንጫተꬅ ደሞይ ዎርቃ ደሞፐ አꬌስ፤ አኬካ ደሞይ ብራ ደሞፐ ሎኦ።
PRO 16:17 ሱረታ ኦገይ ኢታፐ ሃኮ፤ ባ ሄመꬃ ናግያ ኡራይ ባ ሸምፑዋ ናጌስ።
PRO 16:18 ኦቶሮይ ꬋዮ ካለꬄስ፤ ጬቀተꬅ ኩንደꬅ ኤሄስ።
PRO 16:19 ኦቶራንቾታራ ድኦ ሻከታናፐ፥ አሽከ ግድድ ማንቅድ ደኤይስ ሎኦ።
PRO 16:20 ዞረ ስእያ ኡራስ እ ኦꬅያባ ኡባይ እንጀታና፤ ጎዳን አማነትያ ኡራይ አንጀታና።
PRO 16:21 ባ ቆፋን ጭንጫ ግድዳ አስ አኬካንቾ ጌተቴስ፤ ሎኦ ቃል ኤራተꬅ ጉጄስ።
PRO 16:22 ጭንጫ አሳስ ኤራተꬅ ደኦ ፑልቶ መላ፤ ሽን ኤያታ ሴሮይ ጮ ዎደ ዉርሴስ።
PRO 16:23 ጭንጫ አስ ኦደታናፐ ስን ቆፔስ፤ እያ መተርሻይ ኤራተꬅ ጉጄስ።
PRO 16:24 ሎኦ ቃል ኤሳ እልሎዳ ማልኤስ፤ ሸምፖስ ማልኦ፤ መቀꬃስ ፓፆ ግዴስ።
PRO 16:25 አሳስ ሱረ ዳንያ ኦገይ ደኤስ፤ ሽን ዉርሰꬃን ሀይቆኮ ጋꬄስ።
PRO 16:26 አስ ምንድ ኦꬃና መላ ኦይ ካꬃ አሞ፤ ኮሽ ምንድ ኦꬃና መላ ደንꬄስ።
PRO 16:27 ካዉሻ አስ ኢታባ ሀልቼስ፤ እያ ኦዳይ ታማዳ ፁጌስ።
PRO 16:28 ዎበ አስ ኦሽ ደንꬄስ፤ ዝግርስ አማነትያ ላገታ ሻኬስ።
PRO 16:29 ገነ አስ ባ ሾሩዋ ጭሜስ፤ ሎኦ ግዶና ኦገ ካለꬄስ።
PRO 16:30 ባ አይፈን ቃምኦትያ አስ ጌላባ ቆፔስ፤ ባ መተርሻ ሳፅድ ማንድያ አስ ኢታባ ኦꬄስ።
PRO 16:31 ፑሉምዳ ሁጰይ ቦንቾ ካላቻ፤ ሄስካ በንተይ ፅሎ ደኦ ደእና።
PRO 16:32 ዎልቃማ አስ ግዳናፐ ዳንዳአ አስ ግዶይ ሎኦ፥ ዳሮ ካታማታ ኦልድ ኦይካናፐ ባና ሃሮይ አꬌስ።
PRO 16:33 አስ ሳማ የጌስ፤ ሽን ዉርሰꬃ ዛሮይ ጎዳፐ በንቴስ።
PRO 17:1 ኦሽ ደእያ በሳን ደእያ ግታ ግብራፐ ሳሮይነ ዎፕ ደእያ በሳን ኡይꬃ ፖቆይ ሎኦ።
PRO 17:2 ጭንጫ አይለይ ፓꬆና ባ ጎዳ ናኣ ሃሬስ፤ እያ እሻታራ እስፈ ላታ ሻከቴስ።
PRO 17:3 ዎርቅነ ብር ታማን ፓጨተይሳዳ፤ ጎዳይ አሳ ዎዛና ፓጬስ።
PRO 17:4 ኢታ አስ ኢታ ሃሳያ ስኤስ፤ ዎርዳንቾይ ዎርዶ ሃሳያ ሀይዜስ።
PRO 17:5 ማንቆታ ቦላ ቀልቅስያ አስ ኤንታ መꬍዳ ፆሳ ጫዬስ፤ ሀራ አስ ጋክያ መቶን ኡፋይትያ አስ ሴረቶና አተና።
PRO 17:6 ናአ ናእ ጭማ አሳስ ካላቻ፤ አዋት ባንታ ናይታስ ቦንቾ።
PRO 17:7 ሎኦ ኦድ ኤያ አሳስ ጊገና፤ ሄሳዳካ ዎርዶ ኦድ አይሰይሳስ ጊገና።
PRO 17:8 ዎꬋፈ እመይሳስ ዎꬋፈይ ብታ መላ፤ እ ብያ በሳ ኡባይ እያዉ እንጀቴስ።
PRO 17:9 ቆሆ ገንꬅያ ኡራይ ሲቆ ኮዬስ፤ ሽን ኦዳ ዛሪድ ዛሪድ ዎጭያ ኡራይ፥ አማነትያ ላገታ ሻኬስ።
PRO 17:10 ኤያይ ፄቱ ቶሆ ልሶን ሾጭን ኤረይሳፈ፤ አኬክ ደእያ አሳስ ጮ ሀንቆይ ኤራ እሜስ።
PRO 17:11 ኢታ አስ ኡባ ዎደ ጌላ፤ ቃይ ባይና አስ እያ ቦላ ኪተታና።
PRO 17:12 ኤያራ እያ ኤያተꬃን ጋሄታናፐ ማራት ኤከትዳ ማሄራ ጋሄተꬅ ሎኦ።
PRO 17:13 ሎኦ ኦꬅዳይሳስ ኢታ ኩሸ ዛርያ ኡራ ሶፐ ኢታባይ ክቸና።
PRO 17:14 ኦሽ ዶምሸ ሃꬅ ꬋዋ መንይሳ መላ፤ ሄሳ ግሾ ኦሽ ዶማናፐ ኮይሮታዳ ፓላማ አጋ።
PRO 17:15 ናጋራንቹዋ ፅልሶይነ ፅሉዋ ቦላ ፕርዶይ፥ ናምአይካ ጎዳይ እፅያ ኦሶ።
PRO 17:16 ጭንጫተꬅ ደማናዉ አሞይ ባይና ደእሽን፥ ኤያ ኩሸን ደእያ ሚሸይ አይ እያ ማዲ?
PRO 17:17 ላገይ ኡባ ዎደካ ላገ፤ እሽ መቶ ዎደ ማዳናዉ የለቴስ።
PRO 17:18 አኬክ ባይና አስ ኤሮና ኡራ አጩዋ ቃንፃናዉ ዋሰ ግዴስ።
PRO 17:19 ኦሹ ዶስያ አስ ናጋራ ዶሴስ፤ ኡባ ዎደ ጬቀትያ አስ ባ ቦላ ꬋዮ ፄጌስ።
PRO 17:20 ዎበ ቆፍ ደእያ አስ ሎኦባ ደመና፤ ባ እንፃርሳን ጭምያ አስ መቶን ገሌስ።
PRO 17:21 ኤያ ናአ የልዳ አው አዛኔስ፤ ኤያ ናአ አዋስ ኡፋይስ ዴና።
PRO 17:22 ኡፋይትያ ዎዛን አሳስ ሎኦ ꬋለ፤ ሽን መቅዳ ዎዛን አሳስ ዎልቃ ꬋይሴስ።
PRO 17:23 ኢታ አስ ፕርዳ ጌላያናዉ ጌማን ዎꬋፈ ኤኬስ።
PRO 17:24 አኬካ አስ ጭንጫተꬅ ባ ስንꬃፈ ሃሰና፤ ሽን ኤያ አሳ አይፈይ ሳአ ጋፃ ዩዬስ።
PRO 17:25 ኤያ ናእ ባ አዋ አዛንꬄስ፤ ባ አይዉካ ጫምሴስ።
PRO 17:26 ፅሎ አስ ሴሮይ በሰና፤ ሱረ አስ ሾጮይ ሎኦ ግደና።
PRO 17:27 ጉꬃ ቃላ ሃሳያ አስ ኤራንቾ፤ ዎፓ አያን ደእያ አስ አኬካንቾ።
PRO 17:28 ኤያ አስ ስእ ጊኮ ጭንጫ ዳኔስ፤ ባ ዶና ዶዮና እፅኮ ኤራንቾ ዳኔስ።
PRO 18:1 ሻሄተꬅ ኮይያ አስ ባ አሙዋ ካሌስ፤ ሱረ ቆፋ ኡባ እፄስ።
PRO 18:2 ኤያ አስ ባ ቆፋ ፃላላ ቆንጭሳናዉ ዶሴስ፤ ሀራ አሳፐ ኤራ ኤካናዉ ዶሰና።
PRO 18:3 ኢታተꬅ ያ ዎደ ካይ ዬስ፤ ካዉሻተꬅ ያ ዎደ ዬል ዬስ።
PRO 18:4 አሳ ዶናፐ ከያ ኦድ፥ ጪሞ ሃꬃ መላ፤ ጭንጫተꬅ ጎግያ ፑልቶ መላ።
PRO 18:5 ናቅዳ ኡራ ማድድ፥ ፅሉዋ ፕርዳ ጌላየይስ ሎኦ ግደና።
PRO 18:6 ኤያ አሳ ኦድ ኦሹ ደንꬄስ፤ እያ ዶናይ ዋꬎ ፄጌስ።
PRO 18:7 ኤያ አሳ ኦድ ባና ቆሄስ፤ እያ ኦዳይ ፅሄ ግድድ እያ ኦይኬስ።
PRO 18:8 ዝግርስ ማልኦ ካꬃ መላ፤ ኡፋይስሸ ዱገ ጋንጀ ጋኬስ።
PRO 18:9 አዛላ አስ ꬋይስያ አሳፐ አይባካ ዱማተና።
PRO 18:10 ጎዳ ሱንꬃይ ምኖ ግምበ መላ፤ ፅሎ አስ ያ ዎፅድ ሳሮ አቴስ።
PRO 18:11 ዱረ አሳታ ዱረተꬃይ ግምበትዳ ካታማ መላ፤ ኤንታ ቆፋን ኤንታ ዱረተꬃይ ምኖ ድርሳዳ ኤንታ ናግያባ ዳኔስ።
PRO 18:12 ኦቶሮይ ኩንደꬃፈ ስንꬃቴስ፤ አሽከተꬅ ቦንቾ ኤሄስ።
PRO 18:13 ስኦና ደእሸ ዛሮ እሞይ፥ ሄ ኡራስ ኤያተꬅነ ዬላ።
PRO 18:14 ዳና ግድ ቆፕኮ፥ እያ አያናይ ሀርገ ዳንዳእሴስ፤ ሽን ኡፋይስ ቃንፅኮ እያ ማደይ ባዋ።
PRO 18:15 አኬካ አስ ኤራተꬅ ኮዬስ፤ ጭንጫ አሳ ሀይꬅ ጭንጫተꬅ ስኤስ።
PRO 18:16 እሞት እመይሳስ ኦገ ዶዬስ፤ ግታ አሳታራ ኤርሴስ።
PRO 18:17 ዳይና ስንꬃን ኮይሮ ሺቅድ ሞትያ ኡራይ፥ እያ ሞርከይ ይን፥ እያ ኦይቻና ጋካናዉ፥ ኡባ ዎደ ባና ፅሎ ግድ ቆፔስ።
PRO 18:18 ሳማ የገꬅ ፓላማ ተቄስ፤ ናምኡ ፓላምያ አሳታ ሻኬስ።
PRO 18:19 ቆሄትዳ እሻይ ግምበትዳ ካታማፐ አꬍድ ምኔስ፤ እያ ፓላማይ ብራታ ጎርደ መላ።
PRO 18:20 አስ ባ ዶና ኦዳን ባ ኡሎ ኩንꬄስ፤ ባ እንፃርሳ አይፈን ካሌስ።
PRO 18:21 ሀይቆይነ ደኦይ እንፃርሳና፤ ኔኒ ነ እንፃርሳ አይፍያ ማና።
PRO 18:22 ማቾ ደምዳይ ሎኦባ ደምስ፤ እ፥ ጎዳፐ ቴማ ደሜስ።
PRO 18:23 ማንቆ አስ አዳሽድ ኦደቴስ፤ ሽን ዱረ አስ ኦቶሮን ዛሬስ።
PRO 18:24 ዳሮ ላገይ ደእያ አስ ባ ቦላ መቶ ኤሄስ፤ ሽን እሻፐ አꬍድ ማታትያ ላገይ ደኤስ።
PRO 19:1 ባ ዶናን ዎርዶትያ ኤያ አሳፐ ባ ደኡዋን ቦረይ ባይና ማንቆይ ሎኦ።
PRO 19:2 ኤር ባይና ዳፈተꬅ ሎኦ ግደና፤ ኤሶ ዳሮይ ኦገ ባለꬄስ።
PRO 19:3 አስ ባ ኤያተꬃን ባ ደኡዋ ኢሴስ፤ ያትድ ጎዳ ቦላ ይሎቴስ።
PRO 19:4 ዱረተꬅ ዳሮ ላገ ሺሼስ፤ ሽን ማንቆተꬅ ደእያ ላገታ ዱꬄስ።
PRO 19:5 ዎርዶ ማርክ ሴረቶና አተና፤ ዎርዶ ኦደተይ ከስ ኤከና።
PRO 19:6 ዳሮ አሳይ ሹማ ሶምኦ ኮዮሶና፤ እሞታ እምያ አሳራ አስ ኡባይ ዳቦቴስ።
PRO 19:7 ማንቆ አስ ሀር አቶሽን እያ እሻት እፆሶና፤ እያ ላገት እያፐ ሃኮሶና፤ እ ኤንታ አዳሽንካ ኤንቲ እያ ኮዮኮና።
PRO 19:8 ጭንጫተꬅ ደምያ አስ ባ ሸምፑዋ ዶሴስ፤ ኤራተꬅ ምንꬅድ ኦይክያ ኡራስ እንጀቴስ።
PRO 19:9 ዎርዶ ማርክ ሴረቶና አተና፤ ዎርዶ ኦደተይ ꬋያና።
PRO 19:10 ኤያ አሳስ እንጀ ደኦይ በሰና፤ አይለይ ሀላቃታ ሃሮይ ዳሮ ኢታ።
PRO 19:11 ጭንጫተꬅ አሰ ዳንዳአ ታማርሴስ፤ ቆሆ ካꬍድ አꬅ ቦንችሴስ።
PRO 19:12 ካዋ ሀንቆይ ጋሞ ጉደꬃ መላ፤ ሽን እያ ናሾይ ማታ አጭስያ አካ መላ።
PRO 19:13 ኤያ ናእ ባ አዋ ꬋይሴስ፤ ዶናማ ማቻ ፆክያ ኬꬃ መላ።
PRO 19:14 አስ ኬነ ሻሎ አዉፐ ላቴስ፤ ሽን አኬካ ማቾ ጎዳይ እሜስ።
PRO 19:15 አዛላተꬅ ꬍስኮ ኤሄስ፤ ኦሶ ኦꬆና አስ ኮሻቴስ።
PRO 19:16 ኪታ ናግያ አስ ባ ሸምፑዋ ናጌስ፤ ሽን ቀል ግያ አስ ሀይቄስ።
PRO 19:17 ማንቆስ ኬህያ አስ ጎዳስ ታልኤስ፤ ጎዳይ ሄ ሎኦ ኦሱዋ ግሾ ዎይቴስ።
PRO 19:18 ስሞ ኡፋይስ ደእሽን ነ ናይታ ሴራ፤ ሴሮና እፅኮ፥ ነ ኤንታ ꬋይሳሳ።
PRO 19:19 ኤለ ሸነትያ አስ ባ ጋትያ ኤካናዉ በሴስ፤ ኔኒ እያ እስ ቶሆ አሽያባ ግድኮ፥ ሀራ ዎደካ ነ እያ ሄሳዳ አሻናይስ አተና።
PRO 19:20 ዞረ ስአ፤ ታማራናዉ ኮያ፤ ኔኒ ዉርሰꬅ ጋካናዉ ጭንጫ ግዳና።
PRO 19:21 አስ ዳሮባ ሀልቼስ፤ ሽን ጎዳይ ግዳባይ ፖለቴስ።
PRO 19:22 አሳፐ ኮየተይ አማነተꬅ፤ ዎርዶ ግዳናፐ ማንቆ ግደይስ ሎኦ።
PRO 19:23 ጎዳስ ያሽ ደኦኮ ካለꬄስ፤ እያ ያይያ አስ ካልድ ደኤስ፤ ኢት እያ ቦቸና።
PRO 19:24 እስ እስ አስ ዳሮ አዛላ፤ ሀር አቶሽን ዎፀን ቱሽክዳ ኡይꬃ ፑደ ባራናዉ ዋየቴስ።
PRO 19:25 ኔኒ ቀልቅስያ አስ ሾጭኮ፥ አኬክ ፓጭዳይስ ጭንጫተꬅ ታማራና፤ አኬካ አስ ነ ሀንቀትኮ፥ እ ኤራተꬅ ደማና።
PRO 19:26 ባ አዋ ቦንቅያ ናአይ፥ ባ አይዉ የደꬅያ ናአይ፥ ዬላነ ካዉሻተꬅ ኤህያ ናአ።
PRO 19:27 ታ ናአዉ፥ ነ ዞረ ስኦና እፅኮ፥ ኤራ ኦግያፐ ሃካሳ።
PRO 19:28 ዎርዶ ማርክ ሱረ ፕርዳ ቦላ ቀልቅሴስ፤ ኢታ አሳ ዶን ኢታተꬅ ምቴስ።
PRO 19:29 ቀልቅስያ አሳስ ፕርዳ ኤያታስ ዋꬎ ኮሼስ።
PRO 20:1 ማꬆያ ኡሽ ኤያነ ኦሻንቾ ኦꬄስ፤ ኡሻን ባለትያ አስ ጭንጫ ግዳናዉ ዳንዳኤና።
PRO 20:2 ካዎ ሀንቆይ ጋሞ ጉደꬃ መላ፤ እያ ይሎይያ አስ ባ ሸምፑዋ ቦላ ፕርዴስ።
PRO 20:3 ፓላማፐ ሃከይስ ቦንቾ፤ ሽን ኤያ አስ ኦየታናዉ ኤለሴስ።
PRO 20:4 አዛላ ጎሻንቾይ ዎደ ናግድ ጎየና፤ ካꬅ ጫክያ ዎደ እ ዎሳናዉ ኮዬስ፤ ሽን አይባካ ደመና።
PRO 20:5 አሳ ዎዛና ሀልቾይ ጪሞ ሃꬃ መላ፤ ሽን ዎዛናማ አስ ዱቅድ ከሴስ።
PRO 20:6 ዳሮ አሳት ባንታ ሎኦተꬃ ኦዶሶና፤ ሽን ቱማ አማነትያ አስ ደማናይ ኦኔ?
PRO 20:7 ፅሎ አስ ቦረይ ባይና ደኦ ደኤስ፤ እያ ካልያ እያ ናይት አንጀትዳይሳታ።
PRO 20:8 ካዎይ ፕርዳናዉ ባ አራታን ኡትያ ዎደ፥ ኢታ ኡባ ባ አይፈን ሀርቅድ ከሴስ።
PRO 20:9 “ታ ዎዛናይ ጌሽ፤ ታናን ናጋር ባዋ” ጋናዉ ዳንዳእያ አስ ዳነሻ?
PRO 20:10 ጎዳይ ዎርዶ ምዛነነ ግና ግዶና ማካ ሚሸን ጎኤተይሳታ እፄስ።
PRO 20:11 ናእ ጌሽነ ሱረ ግደይስ እ ኦꬅያ ኦሶን ኤረቴስ።
PRO 20:12 ስእያ ሀይꬅነ ፄልያ አይፈ፥ ጎዳይ መꬍስ።
PRO 20:13 ꬍስኮን ነ ዎደ ዉርስኮ ነ ማንቃና፤ ምናዳ ኦꬅኮ ነ ካꬅ ካላና።
PRO 20:14 ሻምያ አስ፥ “ቆሄስ! ቆሄስ!” ያጌስ፤ ሽን ብዳፐ ጉየ፥ “ገላን ሻማስ” ያግድ ጬቀቴስ።
PRO 20:15 ዎርቀይ ኩምስ፤ አልኦ ሹችካ በንቴስ፤ ሽን ኤር ኩምዳ እንፃርስ ኡባፈ አꬍዳ አሌቆ።
PRO 20:16 ኤሮና አሳስ ዋሰ ገልያ ኡራ ማኡዋ ቃር ኤክተ፤ እማꬃ አሳስ ዋሰ ገልያ ኡራ ማኦ ኦይክተ።
PRO 20:17 ዎርዶን ደምዳ ካꬅ ማልኤስ፤ ሽን አቅድ ፔእሸ ዶናን አጨዳ ሀኔስ።
PRO 20:18 ዞረ ኤካዳ ነ ቆፋ ቃቻ፤ ዞረ ኤኮና ደአሸ ኦላ ቦፓ።
PRO 20:19 ዝግርያ አስ ፁራ ገንና፤ ሄሳ ግሾ ጮ ሃሳያ አሳፐ ሃካ።
PRO 20:20 ባ አዋ ዎይኮ ባ አይዉ ባድያ አሳ፥ ደኦ ፆምፐይ ሳካና ꬉማን ቶአና።
PRO 20:21 ኮይሮራ ኤሶን ሺቅዳ ሻሎይ ዉርሰꬃን አንጀተና።
PRO 20:22 ነና ቆህዳ ኡራ ቆሀዳ ዛራና ጎፓ፤ ጎዳን አማነታ፤ እ ነና አሻና።
PRO 20:23 ጎዳይ ናምኡ ቆሞ ምዛነ እፄስ፤ ዎርዶ ምዛነይ እያ ኡፋይሰና።
PRO 20:24 አሳይ ባና ኦግያ ጎዳይ ካለꬄስ፤ ያትን፥ አስ ባ ደኦን ባና ኦግያ ዋትድ አኬካናዉ ዳንዳኢ?
PRO 20:25 ኤሶን፥ “ሀይሳ ታኒ ፆሳስ እማስ” ጉስነ ጉየፐ ቂሮተꬅ አሳስ ፅሄ።
PRO 20:26 ጭንጫ ካዎይ ጌላታ ሻክድ ኤሬስ፤ እ ኤንታ ቃቶና ሴሬስ።
PRO 20:27 አሳ አያን ጎዳስ ፆምፐ፤ እያ ጋꬃ አሳተꬃ ኡባ ፕልግድ ፄሌስ።
PRO 20:28 ሲቆይነ አማነተꬅ ካዋ ናጎሶና፤ እያ አራታይ ቱማ ፕርዳን ምኔስ።
PRO 20:29 ያላጋታ ቦንቾይ ኤንታ ዎልቃ፤ ጭማታ ቦንቾይ ኤንታ ፑሉንꬃ።
PRO 20:30 ምኖ ሴር ኢታተꬅ ሾዴስ፤ ዋꬎይ ኢታ ዎዛና ላሜስ።
PRO 21:1 ካዎ ዎዛን ጎዳ ኩሸና፤ እያ ዎዛና ꬋዋ ሃꬃዳ ባ ኮይዳ ሶ ዛሬስ።
PRO 21:2 አስ ኦꬅያባ ኡባይ እያዉ ልከ ዳኔስ፤ ሽን ጎዳይ እያ ዎዛና ቆፋ ፓጬስ።
PRO 21:3 ያርሾ ያርሻናፐ አꬅድ፥ ፅሎነ ሱረ ኦይሳ ጎዳይ ዶሴስ።
PRO 21:4 ኢታት ኦቶሮንነ ጬቀተꬃን ኤረቶሶና፤ ሄስ ቃስ ናጋራ።
PRO 21:5 ምኖ ኦꬅያ አሳ ሀልቾይ ዱረዬስ፤ ሽን ኤሶትያ ኡባይ ማንቄስ።
PRO 21:6 ዎርዶን ዳጋይዳ ሻሎይ ፐንቶዳ ꬋዬስ፤ ሄሳ ኮየይሳት ሀይቆ ኮዮሶና።
PRO 21:7 ኢታት ሱረባ ኦꬃናዉ ኮዮና ግሾ፥ ኤንታ ጌላ ኦሶይ ኤንታ ኤክድ ቤስ።
PRO 21:8 ናጋራንቾት ጌላ ኦገን ሄመቶሶና፤ ሽን ጌሻት ሱረባ ኦꬆሶና።
PRO 21:9 ዶናትያ ማችራ እስ ኬꬃን ዳናፐ ካረ ዳርማቻን ዱስ ሎኦ።
PRO 21:10 ኢታት ኢታባ ኦꬃናዉ አሞቶሶና፤ ባንታ ሾሮታስ ቃቶኮና።
PRO 21:11 ቀልቅስያ አስ ሴረትያ ዎደ ዎዛን ባይና ኡራይ ጭንጫተꬅ ታማሬስ፤ ዎዛናማ ኡራይ ኤራ ደሜስ።
PRO 21:12 ፅሎ ፆሳይ ኢታታ ሶን ኦሰትያባ ኡባ በኤስ፤ ኤንታ ሽር የግድ ꬋይሴስ።
PRO 21:13 ማንቆታ ዋሱዋ ስአናፐ ግድ፥ ባ ሀይꬃ ቱጭያ ኡራይ፥ እካ ዋሳና፤ እ ዋስን አልያ አስ ꬋያና።
PRO 21:14 ጌማን እምያ እሞይ ሀንቆ ዶሽሴስ፤ ቆሳን እምዳ ዎꬋፈይ ሀንቆ እርፅሴስ።
PRO 21:15 ሱረ ፕርድ ፕርደትያ ዎደ፥ ፅሎት ኡፋይቶሶና፤ ሽን ኢታ ኦይሳታ ዳጋንꬄስ።
PRO 21:16 አኬካ ኦግያ ሃክያ ኡራ ሀይቆይ ናጌስ።
PRO 21:17 እንጀትን ዳና ግያ ኡራይ ማንቄስ፤ ዎይነነ ዛይተ ዶስያ ኡራይ ዱረተና።
PRO 21:18 ፆሳ አሳታ አሻናዉ ኢታ አሳት ሴረቶሶና፤ አማነቶና አሳት ሱረ አሳታ ግሾ ሴረቶሶና።
PRO 21:19 ዶናትያነ ይሎትያ ማችራ ዳናፐ ባዞን ደኦይ ሎኦ።
PRO 21:20 ዎዛናማ ኡራ ሶን ማልኦ ቁምነ ኦይስ ምንጀቴስ፤ ሽን ኤያ አስ ደእያባ ኡባ ምድጌስ።
PRO 21:21 ፅሎተꬅነ ሲቆ ኮይያ ኡራ ላይꬃይ አዱቄስ፤ ሄ ኡራይ ፅሎተꬅነ ቦንቾ ደሜስ።
PRO 21:22 ዎዛናማ አስ ዎልቃማ ኦላንቾታ ካታማ ኦልድ ኦይኬስ፤ ኤንቲ አማነትያ ምኖ ሚፃ ላሌስ።
PRO 21:23 ባ ዶናነ ባ እንፃርሳ ናግያ አስ ባና መቶፐ ናጌስ።
PRO 21:24 ኦቶረይነ ጬቀተይ ቀልቅስያ አስ፤ እ ኦቶራንቾ ግድዳ ግሾ አሳስ ቆፐና።
PRO 21:25 ኦꬃናዉ ኮዮና ግሾ አዛላ አሞይ ዎꬌስ።
PRO 21:26 አዛላ አስ ኡባ ዎደ ዳሮባ ደማናዉ አሞቴስ፤ ሽን ፅሎይ ባዉ አሾና እሜስ።
PRO 21:27 ጎዳይ ኢታታ ያርሹዋ እፄስ፤ ኤንቲ እያዉ ኢታ ቆፋን ሺሽያ ያርሹዋ አꬅድ እፄስ።
PRO 21:28 ዎርዶ ማርክ ꬋያና፤ ሽን ቱማ ማርክ ኤቅድ ዳና።
PRO 21:29 ኢታ አስ በሶና ፃላ ፃሌስ፤ ሽን ሱረ አስ ዩሽ ቆፔስ።
PRO 21:30 አስ ባ ጭንጫተꬃን፥ አኬካንነ ዞረን ጎዳራ ኤቀታናዉ ዳንዳኤና።
PRO 21:31 ኦላስ ፓራ ኮራናዉ ዳንዳኤቴስ፤ ሽን ፆኖይ ጎዳባ።
PRO 22:1 ሎኦ ሱንꬅ ዳሮ ዱረተꬃፈ አꬌስ፤ ቦንቾይ ብራፐነ ዎርቃፈ አꬌስ።
PRO 22:2 ዱረነ ማንቆ ጎዳይ መꬍስ፤ ሄሳን ኤንቲ ናምአይ እስኖ።
PRO 22:3 ጭንጫ አስ ኢታ በእድ ቆሰትድ አቴስ፤ ሽን አኬክ ባይና አስ መቶን ገልድ ቆሄቴስ።
PRO 22:4 አሽከተꬅነ ጎዳ ያሽ፥ ዱረተꬅ፥ ቦንቾነ ደኦ እሜስ።
PRO 22:5 ኢታታ ኦገን አጉንꬅነ ፅሄይ ደኤስ፤ ሽን ባና ናግያ አስ ኤንታፈ ሃኬስ።
PRO 22:6 ናእ ዋንድ ዳናዉ በሲያኮ ታማርሳ፤ እ ጭምያ ዎደካ እያፐ ሃከና።
PRO 22:7 ዱረይ ማንቁዋ ሃሬስ፤ ታልኤ ኤክዳይ ታልኤ እምዳይሳስ አይለ ግዴስ።
PRO 22:8 ናጋራ ዘርያ ኡራይ ዋየ ጫኬስ፤ እያ ሀንቆ ፃምአይ መቃና።
PRO 22:9 ባ ካꬃ ማንቆታስ ሻክያ ግሾ ኬሀ አስ አንጀታና።
PRO 22:10 ቀልቅስያ አስ ድግኮ፥ ፓላም፥ ኦሽነ ጫሽ አታና።
PRO 22:11 ዎዛን ጌሽ ግድዳ አስነ ሎኦ ኦዳ ዶስያ አስ ካዎራ ዳቦቴስ።
PRO 22:12 ጎዳ አይፈይ ኤራተꬅ ናጌስ፤ ሽን ዎርዳንቾታ ቃላ ሽር የጌስ።
PRO 22:13 አዛላ አስ፥ “ካረን ጋሞይ ደኤስ፤ ታና ኦገን ማና” ያጌስ።
PRO 22:14 ላይማ ማጫሳ ዶን ዎልቃማ ኦላ መላ፤ ጎዳይ ሀንቀትዳይሳት እያን ኩንዶሶና።
PRO 22:15 ኤያተꬅ ናአ ዎዛናን ደኤስ፤ ሽን ፕርጮይ እያፐ ሃሴስ።
PRO 22:16 ሻሎ ሺሻናዉ ማንቁዋ ናቀይነ ዱረ አሳስ እሞታ እምያ ናምአይ ማንቃና።
PRO 22:17 ነ ሀይꬃ ዛራዳ ጭንጫታ ቃላ ስአ፤ ነ ዎዛና ታ ትምርትያኮ ዛራ።
PRO 22:18 ኤንታ ነ ዎዛናን ዎꬅኮነ ነ ዶናን ኤንታ ሃሳይኮ፥ ነ ኡፋይታና።
PRO 22:19 ነ አማኖይ ጎዳን ግዳና መላ፥ ታኒ ነና ሀች ታማርሳይስ።
PRO 22:20 ታኒ ነዉ ዞረነ ኤራተꬅ ኩምዳ ሀስታሙ ሌምሶታ ፃፋስ።
PRO 22:21 ነና ኪትዳይሳስ ልከ ዛሮ ዛራና መላ፥ ታኒ ነና ቱማተꬅ ታማርሳስ።
PRO 22:22 ማንቆታስ አይብካ ባይና ግሾ፥ ኤንታ ቦንቆፋ፤ ፕርዳን ኤንታ ማታ ꬋይሶፋ።
PRO 22:23 ጎዳይ ኤንታ ግሾ ሞተታና፤ ኤንታ ቦንቅዳይሳታ እ ቦንቃና።
PRO 22:24 ይሎትያ ኡራራ ላገቶፓ፤ ኤለ ሸነትያ ኡራራ ሄመቶፋ።
PRO 22:25 ኔኒ እያ ይሉዋራ ሜዘትኮ፥ ጉየፐ አጋናዉ ዳንዳአካ።
PRO 22:26 አሳ አጮ ታ ቃንፃና ጋዳ ዋሰ ግዶፓ።
PRO 22:27 ነ ቃንፅያባ ꬋይኮ፥ ነ ዝንእያ ሂፃይ አቶና፥ ነዉ ደእያባ ኡባይ ኤከታና።
PRO 22:28 ነ ማይዛት ቶክዳ በን ዛዋ ሾዶፋ።
PRO 22:29 ባ ኦሱዋን ሎህዳ አስ በአዲ? እ ጮ አሳታስ ግዶናሽን ካዎታስ ኦꬄስ።
PRO 23:1 ሀላቃራ ካꬅ ማናዉ ኡትያ ዎደ፥ ኔራ ደኤይሳ አኬካ።
PRO 23:2 ኔኒ ዳሮ ያራምባ አስ ግድኮ ናገታ።
PRO 23:3 እ ነና ፓጫናዉ ዳንዳእያ ግሾ፥ ማልኦ ካꬃስ ያረቶፓ።
PRO 23:4 ዱረታና ጋዳ ዳቡሮፓ፤ ነ ቆፋ ሃራናዉ ጭንጫ ግዳ።
PRO 23:5 ሄሳ መላ ዱረተꬅ ነ ፄልሽን ꬋያና፤ ቀፈ ከስድ አርጋንꬃዳ ሳሎ ፓላና።
PRO 23:6 ኡዘ አሳ ካꬅ ሞፓ፤ እያ ማልኦ ካꬃይ ነና አሞዮፖ።
PRO 23:7 ቆፐ ቆሞን “ማ፤ ኡያ” ጌስ፤ ሽን እያ ዎዛናይ ኔራ ግደና።
PRO 23:8 ነ ምዳ ጉꬃ ካꬃካ ጮያና፤ ነ ጋላታይ መላ ግዳና።
PRO 23:9 ነ ጭንጫተꬃ ሃሳያ ካꬍያ ግሾ፥ ኤያ አሳስ ፓፃባ ሃሳዮፓ።
PRO 23:10 በን ዛዋ ሾዶፋ፤ ይኦ ናይታ ዛዋ ሱጎፓ።
PRO 23:11 ኤንታ አሽያ ጎዳይ ምኖ ግድያ ግሾ፤ እ፥ ኤንታ ግሾ ኔራ ሞተታና።
PRO 23:12 ነ ዎዛና ዞረ ቃላኮ፥ ነ ሀይꬃ ትምርተኮ ዛራ።
PRO 23:13 ናአ ሴሮና አጎፋ፤ ነ እያ ፕርጮን ሾጭኮ እ ሀይቀና።
PRO 23:14 ነ እያ ፕርጮን ሾጭኮ፥ እያ ሸምፑዋ ሀይቆፐ አሻሳ።
PRO 23:15 ታ ናአዉ፥ ነ ዎዛናይ ጭንጫ ግድኮ፥ ታ ዎዛናይ ኡፋይታና።
PRO 23:16 ነ እንፃርሳይ ሱረባ ሃሳያ ዎደ፥ ታ ጋꬃ አሳተꬃይ ኡፋይቴስ።
PRO 23:17 ናጋራንቾታ ቃናቶፓ፤ ሽን ኡባ ዎደ ጎዳ ያያ።
PRO 23:18 ያትኮ ነዉ ስንꬃ ደኦይ ሱራና፤ ነ ኡፋይሳይ ꬋየና።
PRO 23:19 ታ ናአዉ፥ ስአ፤ ጭንጫ ግዳ፤ ነ ዎዛና ሱረ ኦግያን ናጋ።
PRO 23:20 ዳሮ ዎይነ ኡሹ ኡየይሳታራነ አሾ ማናዉ ያረተይሳታራ ሄመቶፋ።
PRO 23:21 ማꬆተይሳትነ ያራምባት ማንቃና፤ ꬍስኮ ዳሮይ ጩርቃ ማይዜስ።
PRO 23:22 ነና የልዳ ነ አዋይ ኦድያባ ስአ፤ ነ አይያ ጭምዳ ዎደ ካꬎፓ።
PRO 23:23 ቱማ፥ ጭንጫ፥ ሴራነ አኬካ ሻማፈ አትሽን፥ ባይዞፓ።
PRO 23:24 ፅሎ ናአ አው ዳሮ ኡፋይቴስ፤ ዎዛናማ ናአ የልዳ አስ እያን ጬቀቴስ።
PRO 23:25 ነ አዋይነ ነ አይያ ነናን ኡፋይቶ፤ ነና የልዳራ ሀሹ ጎ።
PRO 23:26 ታ ናአዉ፥ ነ ዎዛና ታዉ እማ፤ ነ አይፈት ታ ኦግያ ካሎ።
PRO 23:27 ላይማ ማጫስ ጪሞ ሃꬃ መላ፤ ላገꬆ ማጫስ ፁንꬃ ኦላ መላ።
PRO 23:28 እያ ፓኖዳ ዙጋዳ ናጋዉሱ፤ አማነቶና አደታ ዳርሳዉሱ።
PRO 23:29 ዋሶይ ኦሴ? አዛኖይ ኦሴ? ኦሽ ኦሴ? ዙዙንꬅ ኦሴ? ጋሶይ ባይና ማዱንፀꬅ ኦሴ? አይፈ ዞኦይ ኦሴ?
PRO 23:30 ዎይነ ኡሹ ኡይሸ ዎደ ኦንገይሳታሳ ግደኔ? ዋላሄትዳ ዎይነ ኡሻ ጋንፅድ በኤይሳታሳ ግደኔ?
PRO 23:31 ዎይነ ኡሽ ዞእዳ ዎደ፥ እያ ማላይ ብርለ ግዶን ጶልያ ዎደ፥ ኡይን ማልእሸ ገልያ ዎደ እያ ፄሎፋ።
PRO 23:32 ዉርሰꬃን ሾሻዳ እ ዱኬስ፤ ኢታ ሾሻዳ ባ ማርዝያ ፑኬስ።
PRO 23:33 ነ አይፈይ በእ ኤሮናባ በአና፤ ነ ዎዛናይ ሱረ ቆፓናዉ ዳንዳኤና።
PRO 23:34 ኔኒ አባ ግዶን ዝንእዳ፥ ማርካብያ ቱሳ ቦላ ካትዳ አሰ ዳናሳ።
PRO 23:35 ኔኒ፥ “ኤንቲ ታና ደችዶሶና፤ ሽን ታ ቆሄታብከ። ኤንቲ ታና ዋꬍዶሶና፤ ሽን ታዉ ኤረትቤና። ሀራ ኡሹ ኡያናዉ ታኒ አዉደ ደንዳኔ?” ያጋና።
PRO 24:1 ታ ናአዉ፥ ኢታ አሳታ ቃናቶፓ፤ ኤንታራ ላገታናዉ አሞቶፋ።
PRO 24:2 ኤንቲ ኡባ ዎደ ኢታባ ማቀቶሶና፤ ባንታ እንፃርሳን ገነ ሃሳዮሶና።
PRO 24:3 ኬꬅ ጭንጫተꬃን ኬፀቴስ፤ አኬካን ምኔስ።
PRO 24:4 ኤር ደእኮ፥ ቆልእ አልኦባንነ ሎኦባን ኩሜስ።
PRO 24:5 ጭንጫ አስ ዎልቃማ አሳፐ አꬌስ፤ ኤራ አስ ምኖ አሳፐ ሎኦ።
PRO 24:6 ኦላስ ከያናፐ ኮይሮ ሀልቻናዉ ኮሼስ፤ ዳሮ ዞረ ዞርያ አሳታን ፆኖይ በንቴስ።
PRO 24:7 ኤያ አስ ጭንጫተꬅ አኬካናዉ ዳንዳኤና፤ ሺቆ በሳን እ ኦድያባይ አይብካ ባዋ።
PRO 24:8 ኢታ ኦꬃናዉ ቆፕያ አስ ገነ አስ ጌተቴስ።
PRO 24:9 ኤያ አሳ ቆፍ ናጋራ፤ ቀልቅስያ አስ እፀቴስ።
PRO 24:10 መቶ ዎደ ነ ዶልእኮ፥ ነ ዎልቃይ ጉꬃ።
PRO 24:11 ፕርድ ባይና ሀይቆስ በይሳታ አሻ፤ ሹከታናዉ ብያ ዎደ ስእ ጋዳ ፄሎፋ።
PRO 24:12 ነ፥ “ታ ሄሳ ኤርከ” ግኮ፥ ዎዛና ኤርያ እ፥ በኤኔ? ነ ደኡዋ ናገይስ ኤረኔ? አሳ ኡባስ እያ ኦሱዋዳ ኦሱዋዳ ዛረኔ?
PRO 24:13 ታ ናአዉ፥ ኤስ ሎኦ ግድያ ግሾ፥ ኤስ ማ፤ እልሎ ኤስ ማልኤስ።
PRO 24:14 ጭንጫተꬅካ ሄሳዳ ነ ሸምፑዋስ ማልኦ ግደይሳ ኤራ። ኔኒ እያ ደምያባ ግድኮ፥ ስንꬃራ ያና ኬሀይ ነባ፤ ነ ኡፋይሳይ ꬋየና።
PRO 24:15 ፅሎ አሳ ኬꬅ ቦንቃናዉ ናጎፓ፤ እያ አቁዋ ꬋይሳናዉ ደንዶፋ።
PRO 24:16 ፅሎ አስ ላፑን ቶሆ ኩንድኮካ ደንዴስ፤ ሽን ኢታት ጋዶን ꬋያና።
PRO 24:17 ነ ሞርከይ ኩንድያ ዎደ ኡፋይቶፋ፤ እ ꬉበትያ ዎደ ሀሹ ጎፓ።
PRO 24:18 ጎዳይ ሄሳ በእድ ኡፋይተና፤ እያ ሀንቀቶና አጋጋና።
PRO 24:19 ኢታ ኦይሳታ ጋሶን ህርጎፋ፤ ኤንታ መላ ግዳርክና ጋዳ ቆፖፋ።
PRO 24:20 ኢታ አሳስ ስንꬃራ ያና ኬህ ባዋ፤ ኢታታ ፆምፐይ ቶአና።
PRO 24:21 ታ ናአዉ፥ ጎዳነ ካዋ ያያ፤ ኤንታ ቦላ ማካለይሳታራ ሄመቶፋ።
PRO 24:22 ሄሳ መላ አሳታ ቆፖና መቶይ ጋኬስ፤ ካዋፐነ ጎዳፐ ያና መቶ ኦነ ኤረይ?
PRO 24:23 ጭንጫት ጉጅድ ሀይሳዳ ያግዶሶና፤ ሶምኦ በእድ ፕርዶይ ሎኦ ግደና።
PRO 24:24 ቆህዳይሳ ሎኦ ኦꬃዳሳ ግያ ዳይና፥ አስ ባዳና፤ ካዎተꬃት እያ እፃና።
PRO 24:25 ቆህዳይሳ ነ ባላ ግያ ዳይናት ሎኦባ ኤካና ዳሮ አንጆ ደማና።
PRO 24:26 ቱማ ዛሮ ዛርያ አስ፥ ቱማ ላገ መላ።
PRO 24:27 ካሰታዳ ነ ጋድያ ጎያ፤ ካꬅ ዘራ፤ ሄሳፈ ጉየ፥ ነ ኬꬃ ኬፃ።
PRO 24:28 ነ ሾሩዋ ቦላ ጋሶይ ባይና ማርካቶፋ፤ ነ ዶናን ጭሞፋ።
PRO 24:29 “እ ታዉ ኦꬅዳይሳዳ ታ እያዉ ኦꬃና፤ ታ እያዉ ኩሸ ዛራና” ያጎፓ።
PRO 24:30 ታኒ ቦዛ አሳ ጎሻራ አꬋስ፤ አዛላ አድያ ዎይነ ጋደራ ካንꬃስ።
PRO 24:31 አጉንꬅነ ሻራፍ ጎዝ ዎꬅስ፤ ዩሾን ደእያ ድርሳይካ ላለትስ።
PRO 24:32 ታኒ እያ በእዳ ዎደ ቆፓስ፤ እያፐ ትምርተ ኤካስ።
PRO 24:33 ኔኒ ጉꬁ ሊጳ፤ ጉꬁ ꬍስካ፤ ነ ኩሽያ ሺሻዳ ጉꬁ ሸምፓ።
PRO 24:34 ሽን ማንቆተꬅ ፓኖዳ ያና፤ ዱሳ ዋየይ ኦላ ሚሸ ኦይክዳ አሳዳ ፑቱ ጋና።
PRO 25:1 ሀይሳቲ ይሁዳ ካዋ ህዝቅያሳ አሳት ዱቅድ ፃፍዳ ሶሎሞነ ሌምሶታ።
PRO 25:2 ፁራ ገንꬆይ ፆሳስ ቦንቾ፤ ፁራ ፕልግድ ከሶይ ካዎታስ ቦንቾ።
PRO 25:3 ሳሎይ ꬎቁ ግዳይሳዳነ ሳእ ዝቃ ግድዳይሳዳ ካዎታ ቆፋ አስ ኤራናዉ ዳንዳኤና።
PRO 25:4 ብራፐ ቅታ ድጋ፤ ሄሳፈ ጉየ፥ ሂላንቾይ ሎይꬃና።
PRO 25:5 ካዎ ስንꬃፈ ኢታ አሳታ ድጋ፤ እያ አራታይ ፅሎተꬃን ምንድ ኤቃና።
PRO 25:6 ካዎ ስንꬃን ኤቅያ ዎደ ጬቀቶፋ፤ ግታ አሳታ ግዶን ነዉ በሰ ኮዮፓ።
PRO 25:7 ኔፐ ግታትያ አሳስ በሰ እማናዉ ሀላቃይ ነና ደንꬅን፥ ካዉየይሳፈ፥ እ ነና፥ “ሀ ꬎቃ በሳን ኡታ” ገይስ ሎኦ።
PRO 25:8 ነ አይፈን በእዳባ ማርካታናዉ ዳይና ስን ባናዉ ኤለሶፓ። ነ ማርካታ ስምን ሀራ አስ ነ ማርካተꬃይ ባላ ግደይሳ ቆንጭስኮ፥ ነ ዬላታና።
PRO 25:9 ነ ግዶንነ ነ ሾሩዋ ግዶን ፓላም መትኮ፥ እያራ ኦደታዳ ነ ፓላማ ዉርሳ፤ ሀራ አሳ ፁራ ቆንጭሶፓ።
PRO 25:10 ሄስ ሀኖና እፅኮ ነ ኦደይሳ ስእዳ አስ ነና ካዉሻና፤ ነ ሱንꬃይ ዛሪድ ስሞናዳ ኢታና።
PRO 25:11 በሲያ ዎደ ኦደትዳ ልከ ቃል፥ ብራ ሚሸ ቦላ ትገትዳ ዎርቃ አሌቆ መላ።
PRO 25:12 ኤራ አስ ዞርያ ዞረ ስእያ ሀይꬃስ፥ ሄስ ዎርቃፈ ዎይኮ ጌሻ ዎርቃፈ ኦሰትዳ አሌቆ መላ።
PRO 25:13 ካꬃ ጫክያ ዎደ እርፃ ሃꬅ ኡይን አለይሳዳ፥ አማንꬅያ ኪታንቾይ ባና ኪቶይሳ ኡፋይሴስ።
PRO 25:14 እሞናባ እማና ግድ ጬቀትያ አስ እር ባይና ሻራነ ጫርኮ መላ።
PRO 25:15 ዳንዳአ አስ ሀላቃ ኦድድ ማይዜስ፤ ሊቆ ቃል መቀꬅ ካንꬅ ገሌስ።
PRO 25:16 ኤስ ደምኮ ካላና ጋካናዉ ማ፤ ሽን ዳርስኮ ነና ጮሻና።
PRO 25:17 ነና ኡፍሸ እፆናዳ፥ ነ ሾሩዋ ሶ ኡባ ዎደ ቦፓ።
PRO 25:18 ባ ሾሩዋ ቦላ ዎርዶን ማርካትያ አስ፥ ፃምእ፥ ማሽነ ቶር ቆሄይሳዳ ቆሄስ።
PRO 25:19 መቶ ዎደ አማነቶና አሳን ዘምፖይ፥ ቃፅያ አቻን ጮምያነ ስልዳ ቶሆን ሄመተይሳ መላ።
PRO 25:20 አዛንዳ አሳስ የꬅ የፅያ አስ፥ ሜጎ ዎደ ማኦ ቃርያነ ማዱንꬃ ቦላ ጫላባ ትግያ አሳ መላ።
PRO 25:21 ነ ሞርከይ ኮሻትኮ ሙዛ፤ ሳሞትኮ ኡሻ።
PRO 25:22 ነ ሄሳ ኦꬅኮ እያ ሁጰን ታማ ቦንቆ ካሽድ ቆለይሳ መላ፤ ጎዳይ ነና ዎይታና።
PRO 25:23 ዶሎሀ ባጋ ጫርኮይ እራ ኤሄይሳዳ፥ ዝግርስ ሀንቆ ኤሄስ።
PRO 25:24 ዶናትያ ማችራ እስ ኬꬃን ዳናፐ ካረ ባራንዳን ዱስ ሎኦ።
PRO 25:25 ዳቡርዳ አስ እርፃ ሃꬅ ኡይድ አለይሳዳ፥ ሃሆ ቢታፈ ያ ሎኦ ኦድ ኡፋይሴስ።
PRO 25:26 ኢታ አሳ ስንꬃን ጉልባትያ ፅሎ አስ፥ ቡሎትዳ ፑልቶነ ኢትዳ ኦላ ሃꬃ መላ።
PRO 25:27 ዳሮ ኤስ ሙስ ሎኦ ግደና፤ ሄሳዳካ፥ ባ ቦንቾ ኮሽ ቦንችሰና።
PRO 25:28 ባና ሃሮና አስ ድርስ ላለትዳ ካታማ መላ።
PRO 26:1 ቦነ ሻች፥ ካꬅ ጫክያ ዎደ እር ኮሾናይሳዳ፥ ኤያስ ቦንቾ ኮሸና።
PRO 26:2 ካፎት ያነ ሃነ ፕራꬍሸ አሰ ቆሆናይሳዳ፥ ጋሶይ ባይና ባድያ ባደꬅ አሰ ጋከና።
PRO 26:3 ፓራስ ልሶ፥ ሀረስ ብፃላ ኮሸይሳዳ ኤያ አሳ ዞኮስ ፃምአ ኮሼስ።
PRO 26:4 ኤያ አሳስ እያ ኤያተꬃዳ ዛሮፓ፤ ዛርኮ ነ እያ መላ ግዳና።
PRO 26:5 ኤያ አሳስ እያ ኤያተꬃ ቆንጭሳዳ ዛራ፤ ሄስ ሀኖና እፅኮ እ ባና ጭንጫ ግድ ቆፓና።
PRO 26:6 ኤያ አሳ ቦላ ኪታ የዶይ፥ ባ ቶሆ ቃንፅ የገይሳ መላ ዎይኮ ዎꬍያባ ኡየይሳ መላ።
PRO 26:7 ኤያ አሳ ሌምሶይ፥ ስልዳ ቶሆ መላ ማደና።
PRO 26:8 ኤያ አሳስ ቦንቾ እሞይ፥ ሹቹ ያምባርሻን ቃች ዎꬅድ ያምባራናዉ ፓጭያ አሳ መላ።
PRO 26:9 ኤያ አሳ ሌምሶይ ማꬆትዳ አስ ባ ኩሸ ጫድዳ አጉንꬁ ከሳናዉ ባፀተይሳ መላ።
PRO 26:10 ኤያ አሳ ዎይኮ ባ ኦገ ብያ አስ ኡነ ኦስሳናዉ ቃፃርያ አስ ባ ቶራ ሻራን ፆንግያ አሳ መላ።
PRO 26:11 ካን ባ ጮሻኮ ጉየ ስሚድ ላጨይሳዳ፥ ኤያ አስ ባ ኤያተꬃ ዛር ዛር ቆንጭሴስ።
PRO 26:12 ባና ጭንጫ ኦꬅድ ፄልያ አሳፐ ኤያ አሳስ ሎኦ ቃድ ደኤስ።
PRO 26:13 “አዛላ አስ ኦገን ጋሞይ ደኤስ፤ ያሽያ ጋሞይ ኦገን ዩዬስ” ያጌስ።
PRO 26:14 ሳንቅ ማፃፈ ቦላ ያነ ሃነ ቃፀይሳዳ፥ አዛላ አስ ባ ሂፃን ያነ ሃነ ሽረቴስ።
PRO 26:15 እስ እስ አዛላ አስ ሀር አቶሽን፥ ዎፀን ቱሽድ ባራናዉ ዋየቴስ።
PRO 26:16 አዛላ አስ ማርካራ ኦድያ ላፑን ጭንጫታፐ ባና አꬍዳ ጭንጫ ግድ ቆፔስ።
PRO 26:17 ባና ጋꬅያባይ ባይናባን ፓላምያ አስ ኦገራ ብያ ካና ሀይꬅ ኦይክያ አሳ መላ።
PRO 26:18 ባ ሾሩዋ፥ “ታኒ ካሰ ጋይስ” ያግድ ጭምያ አስ፥ ጎይድ ቦንቆ ታማ ሆልያ፥ ዎይኮ ዎꬍያ ዶንገ ቶራ ዱክያ አሳ መላ።
PRO 26:20 ምꬅ ዉርኮ ታም ቶኤስ፤ ዝግርስ ꬋይኮ ኦሽ አቴስ።
PRO 26:21 ፂፍ ቦንቆ ዳርሰይሳዳነ ምꬅ ታማ ዳርሰይሳዳ ፓላማ ዳርስያ አስ ኦሹ ዳርሴስ።
PRO 26:22 ዝግርሳ ቃል ማልኦ ካꬃ መላ ኡፋይስሸ ዱገ ጋንጀ ቤስ።
PRO 26:23 ዎዛናን ኢታባይ ደእሽን፥ ባ እንፃርሳን ጭሞ ቃላ ሃሳያ አስ ብራን ላንፀትዳ ኡርቃ ሚሸ መላ።
PRO 26:24 ገነ አስ ባ ዎዛናን ደእያ ኢታተꬃ ባ እንፃርሳን ገንꬄስ።
PRO 26:25 እያ ዎዛናን ላፑን ቱናት ኩምዳ ግሾ፥ እ ሎኦ ቃላ ሃሳይኮካ እያ አማኖፓ።
PRO 26:26 ባ ሞርከተꬃ እ ገንꬅኮካ፥ እ ኦꬅያ ኢታይ ዳባባን ቆንጫና።
PRO 26:27 ሀራታስ ኦላ ቦክያ አስ ሄ ኦላን ባዉ ኩንዳና፤ ሀራታ ቦላ ሹቹ ጎንዶርስያ አሳ ቦላ ሄ ሹቻይ ስሚድ ጎንዶረታና።
PRO 26:28 ዎርዶትያ እንፃርስ ባ ቆህዳ አሳታ እፄስ፤ ጭሞ ኦድ ኩንደꬅ ካለꬄስ።
PRO 27:1 ዎንቶይ ኤሀናባ ነ ኤሮና ግሾ ዎንቶባን ጬቀቶፋ።
PRO 27:2 ሀራ አስ ነና ጋላቶፐ አትሽን ኔኒ ነና ጋላቶፓ፤ አስ ነ ግሾ ማርካቶፈ አትሽን፥ ኔኒ ነ ኬሀተꬃባ ኦዶፓ።
PRO 27:3 ሹች ግታ ቶሆ፤ ሻፈይ ዴፆ፤ ሽን ኤያ አስ መꬍያ ኦሽ ናምኣፈካ ዴፄስ።
PRO 27:4 ሀንቆስ ቃይ ባዋ፤ ይሎይ ꬋይስያ ድኦ መላ፤ ሽን ቃናተይ ኡባፈ ኢታ።
PRO 27:5 ጌምዳ ሲቆፐ ባልያ ዎደ ቆንጨን ሀንቀተꬅ ሎኦ።
PRO 27:6 ሞርከይ ነና ታሙ ቶሆ ዬራናፐ ሲቆይ ነና ማዱንፅሰይስ ሎኦ።
PRO 27:7 ካልዳ አስ እልሎ ኤስ ሻቴስ፤ ሽን ኮሻትዳ ኡራ ጫምያባይ ማልኤስ።
PRO 27:8 ባ ሶ አግድ ዩይያ አስ፥ ባ ኬꬃ አጋዳ ፓልያ ካፎ መላ።
PRO 27:9 ሽቶይነ ሳውያ እፃነይ አሰ ኡፋይሰይሳዳ ሲቆ ላገ ዞረይ ሄሳዳ ኡፋይሴስ።
PRO 27:10 ነ ላገታነ ነ አዋ ላገታ አጎፋ፤ ነ መቶትዳ ዎደ ነ እሻ ሶ ቦፓ፤ ሃሆን ደእያ እሻፐ ማታን ደእያ ሾሮይ ሎኦ።
PRO 27:11 ታ ናአዉ፥ ጭንጫ ግዳ፤ ታና ኡፋይሳ፤ ታና ካꬍያ አሳስ ታ ዛሮ እማና።
PRO 27:12 ጭንጫ አስ መቶይ ያ ዎደ በእድ ቆሰቴስ፤ ሽን አኬክ ባይና አስ ብድ መቶን ገሌስ፤ ያትድ ጉየፐ ቂሮቴስ።
PRO 27:13 ኤሮና አሳስ ዋሰ ገልያ ኡራ ማኡዋ ቃር ኤክተ፤ እማꬃ አሳስ ዋሰ ገልዳ ኡራ ማኡዋ ኦይክተ።
PRO 27:14 ዎንታ ጉራ ባ ቃላ ꬎቁ ኦꬅድ፥ ባ ሾሩዋ ሳሮተይ እያ ባድያ አሳ መላ።
PRO 27:15 ዶናትያ ማቻነ አꬅያ ኬꬅ እስኖ።
PRO 27:16 ጫርኮ ተቃናዉ፥ ዛይተ ኩጭድ ኦይካናዉ ዳንዳኤቶናይሳዳ፥ እዮ ስእ ኦꬃናዉ ዳንዳኤተና።
PRO 27:17 ብራት ብራታ ፖሸይሳዳ፥ አስ እሶይ እሱዋፈ ታማሬስ።
PRO 27:18 ባላሰ ምꬅ ሎይꬅድ ናግያ አስ እያ አይፈ ማና፤ ባ ሀላቃ ካቦያ ኦሳንቾይ ቦንቸታና።
PRO 27:19 ሃꬅ ማስቶተዳ ሶምኦ በሰይሳዳ፥ አሳ ዎዛን እያ ኦናተꬃ በሴስ።
PRO 27:20 ሀይቆይነ ዱፎይ ካል ኤሮናይሳዳ፥ አሳ አይፈይ ካልድ ኤረና።
PRO 27:21 ብርነ ዎርቀይ ታማን ፓጨትድ ጌየይሳዳ፥ አስ ባ ኤክያ ጋላታን ፓጨቴስ።
PRO 27:22 ካꬅ ኡዱላን ጫደይሳዳ፥ ኤያ አስ ኡዱላን ጫድያኮካ እያፐ ኤያተꬃይ ክቸና።
PRO 27:23 ነ ዶርሳታ ሀኖታ ሎይꬃዳ ኤራ፤ ነ ዉድያካ አኬካዳ ሄማ።
PRO 27:24 አይስ ጊኮ፥ ዱረተꬅ መርናዉ ዴና፤ ካላችካ የለተꬃፈ የለተꬃስ አና።
PRO 27:25 መላ ማታይ ቡጨትን፥ አጫ ማት ከያ ዎደ፥ ደርያ ቦላ ደእያ ማታይ ሺቅዳፐ ጉየ፥
PRO 27:26 ዶርሳታ እክሰፐ ነ ነዉ ማኦ ከሳና፤ ዴሻታ ባይዛዳ ጋደ ሻማና።
PRO 27:27 አትዳ ዴሻታ ማꬃይ ነዉ፥ ነ ሶ አሳስነ ነ ማጫ አይለታስ ካꬅ ግዳና።
PRO 28:1 ኢታት ኦንካ የደꬆና ባቃቶሶና፤ ሽን ፅሎት ጋሞ መላ ያዮና ደኦሶና።
PRO 28:2 እስ ካዎተꬃይ ማካልኮ፥ ሃረይሳት ዳሮሶና፤ ሽን ካለይስ ጭንጫነ አኬካንቾ ግድኮ፥ ሳሮተꬅነ ዎፕ ደኤስ።
PRO 28:3 ማንቆታ ኡንኤꬅያ ካዎይ ካꬅ ꬋይስያ ዎልቃማ እራ መላ።
PRO 28:4 ህገ ቦንቾና አስ ኢታ አሳ ሳቤስ፤ ሽን ህገ ቦንችያ አስ ኢታ አሳ እፄስ።
PRO 28:5 ኢታ አሳታስ ሱረ ፕርድ ገለና፤ ሽን ጎዳ ጎይንያ አስ ኡባ አኬከስ።
PRO 28:6 ዱረ ግድድ ጭምያ አስ ግዳናፐ፥ ማንቆ ግድድ ሱረ ግደይስ ሎኦ።
PRO 28:7 ህገ ናግያ ናአይ አኬካ ናአ፤ ሽን ፓꬆና አሳራ ሄመተይ ባ አዋ ዬላዬስ።
PRO 28:8 ምሸ የሎን ታልኤይነ አሰ ቦንቅድ ዱረትያ አስ ሄ አቁዋ ማንቆታስ ኬህያ አሳስ ሺሼስ።
PRO 28:9 ህገ ስአናፐ ግድ ባ ሀይꬃ ቱጭያ፥ ኡራ ዎሳይ ጎዳ ስንꬃን እፀትዳባ።
PRO 28:10 ሱረታ ኢታ ኦገን ካለꬅያ ኡራይ ባ ቦክዳ ኦላን ኩንዳና፤ ሽን ጌሻት ሎኦባ ላታና።
PRO 28:11 ዱረ አስ ባና ጭንጫ ግድ ቆፔስ፤ ሽን አኬክ ደእያ ማንቆይ እያ ፓጬስ።
PRO 28:12 ፅሎት ፆንያ ዎደ አሳ ኡባይ ኡፋይቴስ፤ ሽን ኢታት ማታ ኦይክያ ዎደ አሳይ ቆሰቴስ።
PRO 28:13 ባ ናጋራ ገንꬅያ አስ አጨና፤ ሽን ፓፀይነ ናጋራ አገይ ማሮታ ኤካና።
PRO 28:14 ጎዳ ኡባ ዎደ ያይያ አስ አንጀትዳይሳ፤ ሽን ባ ዎዛና ምንꬅያ አስ መቶን ገላና።
PRO 28:15 ማንቆ አሳ ሃርያ ኢታ ሀላቃይ፥ ጉድያ ጋሞነ ኮሻትዳ ባባንꬃ መላ።
PRO 28:16 አኬክ ባይና ካዎይ ባ ደርያ ቆሄስ፤ ሽን አሰ ቆሆና ሀላቅ ዳሮ ላይꬅ ሃራና።
PRO 28:17 አሰ ዎꬍያ አስ ሀይቃና ጋካናዉ ባቃትሸ ደኤስ፤ እያ ኦንካ ማደና።
PRO 28:18 ቦረይ ባይና ሄመትያ አስ ቆሄተና፤ ሽን ጌላ አስ አኬኮና ኩንዳና።
PRO 28:19 ምንድ ኦꬅያ አስ ካꬅ ካሌስ፤ ሽን ፓꬆና አሞ ካልያ አስ ማንቆተꬅ ላታና።
PRO 28:20 አማነትያ ኡራይ ዳሮ አንጀታና፤ ሽን ዱረታናዉ ዎፅያ አስ መቶ በአና።
PRO 28:21 ሶምኦ በእድ ፕርዶይ ሎኦ ግደና፤ ሽን አስ ባሶ ኡይꬃ ግሾ ግድ ቆሄስ።
PRO 28:22 ያረ አስ ዱረታናዉ ባቀቴስ፤ ማንቆተꬅ አኬኮና ኦይካናይሳ ኤረና።
PRO 28:23 አሰ ጮ ሳቢያ አሳፐ ሀንቀትያ አስ ጉየፐ ጋላተቴስ።
PRO 28:24 ባ አዋነ ባ አይዉ ካይሶትድ፥ “ናጋራ ኦꬃብከ” ግያ አስነ ደምዳባ ꬋይስያ አስ እስኖ።
PRO 28:25 ኡዘ አስ ኦሽ ደንꬄስ፤ ሽን ጎዳን አማነትያ አስ ካሌስ።
PRO 28:26 ባናን አማነትያ አስ ኤያ፤ ሽን ጭንጫተꬃን ሄመተያ አስ ሳሮ ደኤስ።
PRO 28:27 ማንቆስ እምያ አስ መቶተና፤ ሽን ኤንታ በአናፐ ግድ ቅልምኤይ ባደታና።
PRO 28:28 ኢታ አሳት ሹመትያ ዎደ አሳይ ቆሰቴስ፤ ሽን ኤንቲ ꬋይያ ዎደ ፅሎት ዳሮሶና።
PRO 29:1 ዳሮ ዎደ ሴረትድ ስሞና አስ ሀሳዮና መቃና፤ ሄ ኡራስ ፓፆይ ባዋ።
PRO 29:2 ፅሎ አሳት ሹመትያ ዎደ አሳይ ኡፋይቴስ፤ ሽን ኢታት ቢታ ሃርያ ዎደ አሳይ ኡንኤቴስ።
PRO 29:3 ጭንጫተꬅ ዶስያ አስ ባ አዋ ኡፋይሴስ፤ ሽን ላይማ ማጫሳ ሄራን ዩይያ አስ ባ ሚሽያ ዉርሴስ።
PRO 29:4 ቱማ ፕርዳን ካዎይ ባ ካዎተꬃ ዎፑ ኦꬄስ፤ ሽን ዎꬋፈ ኤክያ ካዎይ ባ ካዎተꬃ ꬋይሴስ።
PRO 29:5 ባ ሾሩዋ ጭሞን ሳቢያ አስ፥ ባ ቶሆስ ፅሄ የጌስ።
PRO 29:6 ኢታ አስ ባ ናጋራን ኦይከቴስ፤ ሽን ፅሎ አስ ኡፋይቴስ፥ የፄስ።
PRO 29:7 ፅሎ አስ ማንቆታስ ሱረ ፕርዴስ፤ ሽን ኢታ አሳት ሄሳ ኤሮኮና።
PRO 29:8 ጫይያ አሳት ካታማን ኦሹ ደንꬆሶና፤ ሽን ጭንጫ አሳት ሀንቆ እርፅሶሶና።
PRO 29:9 ጭንጫ አስ ኤያ አሳ ፕርደ ኬꬅ ኤፍኮ፥ ኤያይ ሀንቀቴስ፤ ቅꬌስ፤ እያዉ ሳሮይ ባዋ።
PRO 29:10 ሱꬁ ጉሳናዉ ሳሞትያ አሳት ሱረ አስ እፆሶና፤ ፅሎ አሳ ዎꬋናዉ ኮዮሶና።
PRO 29:11 ኤያ አስ ባ ሀንቁዋ የድ በሴስ፤ ሽን ጭንጫ አስ ባና ሃሬስ።
PRO 29:12 ሹማይ ዎርዶ ኦዳ ስእያባ ግድኮ፥ እያ ሞርናት ኡባይ ኢታ ግዶሶና።
PRO 29:13 ማንቆይነ አሰ ናቅያ አስ እስባ ኮፆሶና፤ ኤንታ ናምኣስ አይፈ እምዳይ ጎዳ።
PRO 29:14 ካዎይ ማንቆታስ ሱረ ፕርድኮ፥ እ ባ አራታን ጋምአና።
PRO 29:15 ፕርጮን ሴር ናይታስ ጭንጫተꬅ እሜስ፤ ሽን የዳን ድጭዳ ናእ ባ አይዉ ካዉሼስ።
PRO 29:16 ኢታ አሳት ዳርያ ዎደ ናጋር ዳሬስ፤ ሽን ፅሎት ኤንታ ኩንደꬃ በአና።
PRO 29:17 ነ ናኣ ሴራ፤ እ ነዉ ሳሮ እማና፤ እ ነና ኡፋይሳና።
PRO 29:18 ቆንጨꬅ ባይና እፅኮ ደረይ የዳ ግዴስ፤ ሽን ህገ ናግያ አስ አንጀትዳይሳ።
PRO 29:19 አይለይ ጮ ኦዳ ፃላላን ሴረተና፤ እያዉ ገልያኮካ እ ኪተተና።
PRO 29:20 ኤሶን ሃሳያ አስ በአ ኤራይ? እያፐ ኤያ አሳስ ኡፋይስ ደኤስ።
PRO 29:21 ነ አይልያ ናአ የዳ ድችኮ፥ እያ ዉርሰꬃይ አዛኖ ግዳና።
PRO 29:22 ሀንቀትያ አስ ኦሹ ደንꬄስ፤ ኤለ ይሎትያ አስ ዳሮ ናጋራ ኦꬄስ።
PRO 29:23 ኦቶሮይ አሰ ካዉሼስ፤ ሽን አሽከ አያን ደእያ አስ ቦንቸቴስ።
PRO 29:24 ካይሶራ ላገትያ አስ ባና እፅያ አስ፤ እ ዳባባን ቱማ ኦድኮ ሴረቴስ፤ እ ቱማ ኦዶና እፅኮ ጎዳን ባደታና።
PRO 29:25 አሳስ ያሽ ሄ ኡራስ ፅሄ ግዴስ፤ ሽን ጎዳን አማነትያ አስ ሳሮ ደኤስ።
PRO 29:26 ዳሮት ማት ደእያ አሳፐ ማደ ኮዮሶና፤ ሽን ሱረ ፕርድ ጎዳፐ በንቴስ።
PRO 29:27 ፅሎት ናጋራንቾታ ሻተቶሶና፤ ኢታት ሱረ አሳ እፆሶና።
PRO 30:1 ያቀ ናኣ አጉራ ሌምሶት ሀይሳፈ ካልድ ፃፈትዳይሳታ። አጉር እትኤላስነ ኡካላስ ሀይሳ ሃሳይስ።
PRO 30:2 ታኒ አሳ ኡባፈ አꬍዳ ኤያ፤ አሳስ ደእያ አኬክ ታዉ ዴና።
PRO 30:3 ታኒ ጭንጫተꬅ ታማራብከ፤ ጌሻ ፆሳባካ ኤርከ።
PRO 30:4 ሳሎ ፑደ ከይድ ዱገ ዎꬍዳይ ኦኔ? ጫርኮ ባ ኩሸን ኦይክዳይ፥ ሃ ባ አፍላን ዪጭዳይ፥ ሳኣ ጋፃ ምንꬅድ ኤስዳይ ኦኔ? እያ ሱንꬃይ ኦኔ? እያ ናኣ ሱንꬃይ ኦኔ? እያ ኤርያ ግድኮ አነ ታዉ ኦዳ?
PRO 30:5 ፆሳ ቃላን ቦረይ ባዋ፤ ኡባይ ቱማ እያን አማነትያ ኡባስ እ ጎንዳለ።
PRO 30:6 እያ ቃላ ቦላ አይባካ ጉጆፋ፤ ጉጅኮ እ ነና ሴራና፤ ነ ዎርዳንቾ ግደይሳ እ ቆንጭሳና።
PRO 30:7 ጎዳዉ፥ ታ ነና ናምኡባ ኦይቻይስ፤ ታ ሀይቃና ጋካናዉ ኤንታ ታና ድጎፋ።
PRO 30:8 ታ አሰ ጭሞና መላነ ዎርዶ ሃሳዮና መላ ታና ናጋ፤ ታዉ ኮሽያ ካꬅ እማፈ አትሽን፥ ታና ዱረ ዎይኮ ማንቆ ኦꬆፋ።
PRO 30:9 ዱረ ግዳዳ፥ “ጎዳይ ኦኔ?” ጋዳ ነና ካዳና፤ ማንቆ ግዳዳ፥ ካይሳዳ ታ ፆሳ ሱንꬃ ጫይሳና።
PRO 30:10 ነና ባዶና መላነ እያ ባደꬃይ ነዉ ጎመ ግዶና መላ፥ አይልያ እያ ጎዳራ ዝግሮፓ።
PRO 30:11 ባ አዋ ባድያነ ባ አይዉ አንጆና የለተꬅ ደኤስ።
PRO 30:12 ዳሮ ቱና ግድ ኡትድ ባንታና ጌሽ ኦꬅያ አሳት ደኦሶና።
PRO 30:13 ኦቶሮን ኩምዳ አሳትነ አሰ ካꬍድ ፄልያ አሳት ደኦሶና።
PRO 30:14 ኤንታ አቻይ ማሸ ግድን፥ ኤንታ ጋጮይ ቶራ ግድን፥ ማንቆታነ መቶታንቾታ ናቅድ፥ ኤንታባ ቦንቅያ አሳት ደኦሶና።
PRO 30:15 ኡላꬃስ ናምኡ ማጫ ናይት ደኦሶና፤ ኤንቲ፥ “ሀማ! ሀማ!” ያግድ ዋሶሶና። ካልድ ኤሮና ሄꬑባት ደኦሶና፤ ኦይዳንꬆይ ቃስ “ግዳና” ግድ ኤረና።
PRO 30:16 ሄሳት፥ ዱፎ፥ ማይንዳ ማጫስ፥ ሃ ካልድ ኤሮና መላ ቢታነ፥ “ግዳና!” ግድ ኤሮና ታማ።
PRO 30:17 ባ አዋ ለቅያ ናኣ አይፍያ፥ ባ አይያ ጭምን ካꬍያ ናኣ አይፍያ፥ ዛንጋራን ደእያ ቁሮት ዎጫና፤ እያ አሹዋ አንኮት ማና።
PRO 30:18 ታና ሄꬑባት ማላልሶሶና፤ ኦይዳንꬆይ ኡባ ታዉ ገለና።
PRO 30:19 ሄሳት፥ ሳሎራ ፓልያ አርጋንꬅ፥ ዛላ ቦላራ ኮልፅያ ሾሽ አባ ቦላራ ብያ ማርካበነ ጌላኦራ ስቆ ኦይከትዳ አደ።
PRO 30:20 ላይማ ማጫስ ሀንያ ሀኖይካ ሄሳ መላ፤ እያ ማሱ፤ ሽን ባ ዶና ቁቻዳ፥ “ታኒ አይኮካ ባላቢከ” ያጋዉሱ።
PRO 30:21 ሄꬑባን ቢት ቃፄስ፤ ኦይዳንꬁዋ ኡባ ቶካናዉ ዳንዳኤተና።
PRO 30:22 ሄሳትካ፥ አይለይ ካዎትዳ ዎደ፥ ኤያ አስ ካꬅ ካልዳ ዎደ፥
PRO 30:23 አስ እፅዳ ማጫስ አዝና ገልዳ ዎደነ ማጫ አይልያ ባ ጎዳትዉ ላትዳ ዎደ መትያ ሀኖታ።
PRO 30:24 ሳአ ቦላ ኦይዱ ጉꬃ መተꬃት ደኦሶና፤ ሽን ኤንቲ አꬍዳ ጭንጫ።
PRO 30:25 ሄሳትካ፥ ጩንጫለይ ዎልቅ ባይና መተꬅ፤ ሽን ባንታዉ ምያባ ቦነ ሺሽድ፥ ምንጆሶና።
PRO 30:26 ጉፓለት ዎልቅ ባይናይሳታ፤ ሽን ባንታ ኬꬃ ዛላ ቆጶን ኬፆሶና።
PRO 30:27 ቦለታስ ካዎይ ባዋ፤ ሽን ኤንቲ ኡባይ ማራን ዛቶሶና።
PRO 30:28 ዛረት ኩሸን ኦይከቶሶና፤ ሽን ካዎ ጋꬎን ደኦሶና።
PRO 30:29 ባንታ ማታ በስሸ ሄመትያ ሄꬑ መተꬃት ደኦሶና፤ ኦይዳንꬆይ ሎኦ ሄመꬅ ሄመቴስ።
PRO 30:30 ሄስካ፥ ዶአ ኡባፈ ምኖነ ያሽ ኤሮና ጋሞ።
PRO 30:31 ማጫ ኩቶታ ግዶን ሄመትያ አደ ኩቶ፥ ዉደ ካለꬅያ ዴሻ ኮለ፤ ባ ኦላንቾታ ግዶን ቆንጨን ኤቅያ ካዋ።
PRO 30:32 ኔኒ ኤያዳ ኦቶርትዳባ ግድኮካ፥ ኢታ ኦꬃናዉ ሀልችዳባ ግድኮ፥ አነ ታክ ጋዳ ቆፓ።
PRO 30:33 ማꬅ ቡከይ ኦይሱ ከሰይሳዳ፥ ሲ ድችን ሱꬅ የይሳዳ፥ ሀንቆ ደንꬆይ ኦሹ ኤሄስ።
PRO 31:1 ሀይሳፈ ካልድ ፃፈትዳ ሌምሶይ፥ ካዋ ልሙኤላ አይያ ካዋ ልሙኤላ ታማርስዳይሳ።
PRO 31:2 ታ ናአዉ፥ ታ ኡሎፐ ዎꬍዳይሶ፥ ታኒ ቃንገታዳ የልዳይሶ፥
PRO 31:3 ማጫሳን ነ ዎልቃ ዉርሶፋ፤ ካዎታ ꬋይስያ ማጫሳታን ነ ምኖተꬃ ꬋይሶፋ።
PRO 31:4 “ልሙኤላ፥ ዎይነ ኡሽ ካዎታስ በሰና፤ ማꬆይያ ኡሽ ሹማታስ በሰና።
PRO 31:5 ኤንቲ ኡያ ዎደ ህገ ባሎሶና፤ ናቀትዳ አሳ ማታ ቀል ጎሶና።
PRO 31:6 ማꬆያ ኡሹ ሀይቃና ሀንያ ኡራስነ ሳእ ኢትዳ ኡራስ እምተ።
PRO 31:7 ኤንቲ ባንታ ማንቆተꬃነ ባንታ ዋይያ ዶጋናዉ ኡዮ።
PRO 31:8 ባንታ ግሾ ኦደታናዉ ዳንዳኦና አሳ ግሾ ነ ኦዴታ፤ ማድያ አስ ባይናይሳታ ግሾ ነ ኤቃ።
PRO 31:9 ኤንታ ምየን ኤቃዳ ኤንታዉ ሱረ ፕርዳ፤ ማንቆታነ መቶታንቾታ ማታ ናጋ” ያጋዳ ታማርሳሱ።
PRO 31:10 “ዎዛናማ ማቾ ኦን ደማናዉ ዳንዳኢ? እ ጋተይ ዞኦ አልኦ ሹቻፈ አꬌስ።
PRO 31:11 እ አዝናይ እዮ አማነቴስ፤ እያዉ ኮሽያባፐ አይብካ ፓጨና።
PRO 31:12 እያ ባ ደኦ ላይꬃ ኡባን፥ እያዉ ሎኦባፐ አትሽን፥ ኢታባ ኦꬁኩ።
PRO 31:13 ሱፈነ ሊኖ ኮያዳ፥ ኡፋይታሸ ባ ኩሸን ኦꬃዉሱ።
PRO 31:14 እያ ዛልአንቾታ ማርካበ መላ፤ ባ ካꬃ ሃሆ ቢታፈ ሺሻዉሱ።
PRO 31:15 እያ ባ ሶ አሳስ ካꬅ ጊግሳናዉነ ባ ማጫ አይለታስ ኦሶ እማናዉ፥ ሳእ ዎንቶና ደእሽን ደንዳዉሱ።
PRO 31:16 ሎኦ ጋደ ኮያዳ ሻማዉሱ፤ ባ ኩሸን ኦꬃዳ ደምዳ ሚሸን ዎይነ ቶካዉሱ።
PRO 31:17 እያ ባ ፄሳ ምንꬃዳ ዳንጫዉሱ፤ ባ ቀስያ ኦሶስ ምንꬃዉሱ።
PRO 31:18 እያ ዎ ደማናዉ ምናዳ ዛልአዉሱ፤ እያ ኦꬃሸ ቃምስያ ግሾ እ ፆምፐይ ቶኤና።
PRO 31:19 እያ ባ ህንꬒርትያ ኦይካዉሱ፤ ባ ብራን ሎይꬃዳ ሱቃዉሱ።
PRO 31:20 እያ ማንቆታስነ መቶታንቾታስ እማዉሱ።
PRO 31:21 እ ሶ አሳ ኡባይ ሆእያ ማኦ ማእያ ግሾ፥ ሻች ቡክኮካ እያ ህርጉኩ።
PRO 31:22 አልጋ ቦላ ሂፅያ ማኦ ስካዉሱ፤ ሊኖፐ ኦሰትዳ ኦቻ ቴራ ዳንያ ማኦ ማአዉሱ።
PRO 31:23 ቢታ ጭማት ሺቅያ ዱቡሻን እ አዝናይ ቦንቸትዳ አስ።
PRO 31:24 ሊኖፐ ማኦነ ዳንጮ ኦꬃዳ፥ ዛልአንቾታስ ባይዛዉሱ።
PRO 31:25 እያ ምኖነ ቦንቾ አስ፤ ያና ላይꬃ ኡባን ኡፋይታዳ ደአዉሱ።
PRO 31:26 ጭንጫተꬃን ባ ዶና ዶያዉሱ፤ አማንꬅያ ዞረይ እ እንፃርሳን ደኤስ።
PRO 31:27 እያ ባ ሶ አሳ ደኡዋ እንጀያናዉ ኡባ ዎደ ኦꬃዉሱ፤ አዛላተꬅ እ ቦላ በንትድ ኤረና።
PRO 31:28 እ ናይት ደንድድ፥ እዮ ናሾሶና፤ እ አዝናይ እዮ ያግድ ጋላቴስ፤
PRO 31:29 ሎኦባ ኦꬅያ ዳሮ ማጫሳት ደኦሶና፤ ሽን ነ ኤንታ ኡባፈ አꬋሳ” ያጌስ።
PRO 31:30 ማል ጭሜስ፤ የገልሳተꬅ ꬋያና። ሽን ጎዳ ያይያ ማጫስያ፥ እያ አንጀትዳሮ።
PRO 31:31 እያ ኦꬅዳባ ኡባስ እዮ ዎይትተ፤ እ ኦሶ ኡባይ ዳባባን እዮ ጋላትሶ።
ECC 1:1 ሀይስ፥ ዳዊታ ናኣ፥ የሩሳላመን ካዎትዳ ጭንጫ ኡራ ቃላ።
ECC 1:2 ሄ ጭንጫይ፥ “ኡባባይ ሀዳ፤ ኡባባይ ሀዳፐ ሀዳ፤ ኡባባይ ኩመꬅ ሀዳ” ያግስ።
ECC 1:3 ባ ደእያ በሳን ኡባን፥ አስ ዳቡርድ ኦꬅያባ ኡባን እያዉ ዎይ አይቤ?
ECC 1:4 እስ የለተꬅ አꬍያ ዎደ፥ ሀራ የለተꬅ በሳ ኦይኬስ። ሽን ሀ ቢታይ መርናዉካ ላመቶና ደኤስ።
ECC 1:5 አው ዶሌስ ዉሌስ፤ ናምአንꬆ ዶላናዉ ያ ዶልያ በሳ ኤለሴስ።
ECC 1:6 ጫርኮይ እስ ቶሆ ዱገ እስ ቶሆ ፑደ ጫርኬስ፤ ቃስ ዩይ ዩይ አꬍድ፥ ስመረትድ ዬስ።
ECC 1:7 ጎግያ ሃꬅ ኡባይ አባን ገሌስ፤ ሽን አባይ ኩም ኤረና። ሄ ሃꬃይ ስሚድ ጎጋናዉ፥ ጉየ ባ ፑልትያ በሳ ቤስ።
ECC 1:8 ኡባባይ ሳለꬅያባ፤ እ አይ መላ ሳለꬅያኮ ኦድ ዉርሳናዉ ዳንዳኤተና። አይፈይ ፄልድ ካል ኤረና፤ ሀይꬅ ስእድ፥ ታዉ ግድስ ጌና።
ECC 1:9 ካሰ ሀንዳባይ ዎንቶካ ስሚድ እ ሀናና፤ ቃስ ሀእ ሀንሸ ደኤይስ ካሰ ሀንዳባ። ሄሳ ግሾ፥ ሳሎ ጉፋንꬆን ኦራꬃባይ አይብካ ባዋ።
ECC 1:10 ኦንካ፥ “ሄኮ፥ ሀይስ ኦራꬃባ” ጊኮ፥ ሄስ ኦራꬅ ግደና፤ ሄስ ኑኒ የለታናፐ ካሰ ሀንዳባ።
ECC 1:11 ካሰ አꬍዳ ዎደታን ሀንዳባታ ዛሪድ ሀሳያባይ ባዋ፤ ጉየፐ ሀናናባታ ኤንታፈ ጉየ ኦንካ ሀሳየና።
ECC 1:12 ታኒ ጭንጫይ፥ የሩሳላመን እስራኤለስ ካዎ ግዳዳ ደአስ።
ECC 1:13 ታኒ ሳአን ደእያባ ኡባ ሻካዳ ኤራናዉነ ጭንጫተꬃን ፕልጋዳ ፄላናዉ ቆፋ ቃቻስ። ያታዳ አሳ ኡባስ ፆሳይ እምዳ ደኦይ ዳሮ ዳቡርስያባነ ኡፋይሶናባ ግደይሳ አኬካስ።
ECC 1:14 ሳሎፐ ጋርሳን ሀንዳባ ኡባ ታኒ በአስ፤ ሽን ኡባይካ ሀዳ፤ ጫርኮ ኦይካናዉ የደይሳ መላ።
ECC 1:15 ጌል ሱራናዉ ዳንዳኤና፤ ባይናባ ታይባናዉ ዳንዳኤተና።
ECC 1:16 ታኒ ታ ዎዛናን ሀይሳዳ ያጋዳ ቆፓስ፤ “ታፐ ካሰ የሩሳላመ ሃርዳ ኡባታፐ ታኒ ግታነ ጭንጫ ግዳስ። ጭንጫተꬅነ ኤራ ጉስ እ አይበኮ ፓጫዳ ኤራስ” ያጋስ።
ECC 1:17 ታኒ ጭንጫተꬃፈ፥ ጎሻተꬃፈነ ኤያተꬃፈ ግዶን ደእያ ዱማተꬅ አይበኮ ኤራናዉ ዳሮ ዳቡራስ። ሽን ዉርሰꬃን ሄስካ ጫርኮ ኦይካናዉ የደይሳ መላ ሀዳ ግደይሳ ኤራስ።
ECC 1:18 ጭንጫተꬅ ዳርያ ዎደ አዛንꬅያባይ ዳሬስ፤ ኤር ዳርያ ዎደ ቃስ መቶይ ዳሬስ።
ECC 2:1 ታኒ ታኮ፥ “ሃያ፥ ታ ነና ኡፋይስ አይበኮ ኤርሳናዉ ሎኦባ በሳና” ያጋስ፤ ሽን ሄስካ ሀዳ።
ECC 2:2 ሚች ኤያተꬅ ግደይሳ፥ ቃስ ሚኮይነ ኡፋይስ አይኮካ ጎኦናይሳ አኬካስ።
ECC 2:3 ሀእካ ታ ዎዛናይ ጭንጫተꬃን ታና ካለꬅሽን፥ ታና ዎይነ ኡሻን ኡፋይሳናዉ፥ ኤያካ ግዳናዉ ፓጫስ። አስ ባ ቃንꬃ ዎደን ሳሎፐ ጋርሳን ደእያባ ቦላ አይ ኦꬅኮ ጎአነኮ ኤራናዉ ኮያስ።
ECC 2:4 እስ ግታባ ኦꬃስ፤ ታ ዳና ኬꬃታ ኬፃስ፤ ዎይነ ቶካስ።
ECC 2:5 ዱማ ዱማ አታክልትያነ አይፈ አይፍያ ምꬃታ ቶካስ፤ አስ ሸምፕያ በሳ ጊግሳስ። ሄ በሳን ዱማ ዱማ አይፈ አይፍያ ምꬃታ ቶካስ።
ECC 2:6 ሄ ምꬃታ ኡሻናዉ፥ ሃ ዳጋያ በሲ ዜራዳ ጊግሳስ።
ECC 2:7 አደነ ማጫ አይለታ ሻማስ፤ ቃስ ታ ሶን የለትዳ ሀራ አይለትካ ታዉ ደኦሶና። ታፐ ካሰ የሩሳላመን ደእዳ አሳፐ አꬍያ መሄ፥ ዴሸነ ዶርሰ ሃራስ።
ECC 2:8 ታ ሃርያ ዱማ ዱማ ቢታታፐነ ካዎታፐ ቦንቸትዳ ቡቁራ ኤህሳዳ፥ ዳሮ ዎርቃነ ብራ ታዉ ዳጋያስ። ቃስ፥ ታና ሳቢድ የፅያ አደነ ማጫ ሺሻስ፤ ሄሳ ቦላ፥ አሳስ ኡፋይስ እምያ ዳሮ ማጫሳታ ሺሻስ።
ECC 2:9 ታኒ ካሰ የሩሳላመን ደእዳ ኦደፈካ አꬋዳ ግታ አስ ግዳስ። ታ ጭንጫተꬃይካ ታራ ዉርሰꬅ ጋካናዉ ደእስ።
ECC 2:10 ታ አይፈይ ፄልዳባነ ታ ዎዛናይ አሞትዳባ ኡባ ደማስ፤ ታ አሳተꬃይ ኮይያ ኡፋይስ ኡባ ድጋብከ። ታኒ ኦꬅዳ ኦሶ ኡባን ኡፋይታስ፤ ታ ዳቡራ ዎይ ሄሳ።
ECC 2:11 ግዶሽን፥ ሄሳ ኡባ ኦꬃ ስማዳ ታኒ አኬክያ ዎደ፥ ዳሮ ታኒ እያዉ ዳቡርዳ ኡባይ ሀዳ ግደይሳ በአስ። ሳሎፐ ጋርሳን ጎእያባይ አይኮይ ባዋ፤ ኡባይ ጫርኮ ኦይካናዉ የደꬅያ መላ።
ECC 2:12 ሄሳፈ ጉየ፥ ታኒ ጭንጫተꬅ፥ ኤያተꬅነ ጎሻተꬅ አይበኮ ፓጫዳ ኤራናዉ ቆፋ ዶማስ። አዉደ ግድንካ ካዎይ ኦꬃናዉ ዳንዳኤይ እያፐ ካሰ ካዎትዳ ካዎይ ኦꬅዳይሳፈ ሀራባይ አይብ ደኢ?
ECC 2:13 ፖኦይ ꬉማፐ፥ ጭንጫተꬅ ኤያተꬃፈ ሎኦ ግደይሳ ታኒ በአስ።
ECC 2:14 ጭንጫ አሳ አይፈት እያ ሁጵያ ግዶን ደኦሶና፤ ሽን ኤያት ꬉማን ሄመቶሶና። ግዶሽን፥ ኤንታ ናምኣ ዉርሰꬃይ እስኖ ግደይሳ አኬካስ።
ECC 2:15 ታኒ ታኮ፥ “ኤያ ጋከያ ቃዳይ ታናካ ጋኬስ፤ ያትን፥ ታኒ ጭንጫ ግደይስ ታና አይ ማዲ?” ያጋዳ ቆፓስ። ቃስ ታኒ ታ ዎዛናን፥ “ሀይስካ ሀዳ” ያጋስ።
ECC 2:16 ኤያ ግድን ጭንጫ፥ ሀይቆፐ ጉየ፥ እያ ሀሳየይ ባዋ፤ ስንꬃፈ ያ ላይꬃን ኑኒ ኡባይ ዶገትድ አታና። ኤያይ ሀይቀይሳዳ፥ ጭንጫይካ ሀይቄስ።
ECC 2:17 መቶፐ አትሽን፥ ጎእያባይ ባይና ግሾ፥ ሀ ደኦይ ታና ሻትስ። ሄስካ ሀዳ፤ ጫርኮ ኦይካናዉ የደꬅያ መላ።
ECC 2:18 ሳሎፐ ጋርሳን ታኒ ዳሮ ዳቡራዳ ደምዳ ታ ሻሉዋ ኡባ ታፐ ጉየራ ያ ኡራስ አጋዳ ብያ ግሾ፥ ታኒ ዳቡርዳ ኡባይ ታና ሻትስ።
ECC 2:19 ታፐ ጉየራ ያ አደይ ጭንጨኮ ኤየኮ ኦን ኤሪ? ሽን እ ኦና ግድንካ፥ ታኒ ዳሮ ዳቡርዳባነ ታ ጭንጫተꬃን ደምዳባ ኡባ ባዉ ኤክድ፥ ጎዳ ግዳና፤ ሄስካ ሀዳ።
ECC 2:20 ሄሳ ግሾ፥ ሳሎፐ ጋርሳን ታ ዳቡርዳባ ቦላ ታ ዎዛናይ ኡፋይስ ቃንፅስ።
ECC 2:21 አስ ባ ደእዳ ላይꬃን ባዉ ደእዳ ጭንጫተꬃን፥ ኤራንነ ሂላን ዳቡርድ ደምዳባ ኡባ አይኮካ ዳቡሮናይሳስ የግድ ቤስ። ሄስካ ሀዳነ ግታ ቆሆ።
ECC 2:22 ያትን፥ ሳሎፐ ጋርሳን አስ ዳሮ ዳቡርድ ኦꬅዳባ ኡባፈ አይ ጎአ ደሚ?
ECC 2:23 እ ባ ደኦ ላይꬃን ዳቡርያ ዳቡር ኡባይ አዛኖፐነ ሙደꬃፈ አትሽን፥ ሀር አይብካ እያዉ ጉጀና፤ ሀር አቶሽን ቃማካ እያ ሁጰይ ቆፋፐ ሸምፐና፤ ሄ ኡባይካ ሀዳ።
ECC 2:24 ህዛ አሳስ ጎአ ግድያባይ አይበ ጊኮ፥ አስ ምድ ኡይድ ባ ዳቡራን ኡፋይታናይሳ። ሄ ኡፋይሳይ ቃስ ፆሳ ኩሽያፐ እመትዳባ ግደይሳ ታኒ አኬካስ።
ECC 2:25 እያ ሸነ ግዶና፥ ምን ኡይን አሳስ ኡፋይስ አዉን ደኢ?
ECC 2:26 ፆሳ ኡፋይስያ ኡራስ ፆሳይ ጭንጫተꬅ፥ ኤራተꬅነ ኡፋይስ እሜስ፤ ናጋራንቹዋስ እ ዳቡርድ ሺሻና መላ፥ ዳቡራ እሜስ። ሽን እ ሺሽዳይሳ ፆሳይ ኤክድ፥ ባዉ ያይያ ሀራስ እሜስ። ሄሳ ግሾ፥ ሀ ኡባይ ሀዳነ ጫርኮ ኦይካናዉ የደꬆ መላ።
ECC 3:1 ኡባባስ ዎደይ ደኤስ፤ ሳሎፐ ጋርሳን ኦሰትያባ ኡባስ ዎደይነ ቃም ደኤስ።
ECC 3:2 የለታናዉ ዎደይ ደኤስ፤ ሀይቃናዉ ዎደይ ደኤስ። ቶካናዉ ዎደይ ደኤስ፤ ሾዳናዉ ዎደይ ደኤስ።
ECC 3:3 ዎꬋናዉ ዎደይ ደኤስ፤ ፓꬃናዉ ዎደይ ደኤስ። ላላናዉ ዎደይ ደኤስ፤ ኬፃናዉ ዎደይ ደኤስ።
ECC 3:4 ዬካናዉ ዎደይ ደኤስ፤ ሚጫናዉ ዎደይ ደኤስ። ካዮታናዉ ዎደይ ደኤስ፤ የፃናዉ ዎደይ ደኤስ።
ECC 3:5 ሹቹ ላላናዉ ዎደይ ደኤስ፤ ሹቹ ሺሻናዉ ዎደይ ደኤስ። ቆመታናዉ ዎደይ ደኤስ፤ ዱፃናዉ ዎደይ ደኤስ።
ECC 3:6 ኮያናዉ ዎደይ ደኤስ፤ ኮሽ አጋናዉ ዎደይ ደኤስ። ሺሽ ኦይካናዉ ዎደይ ደኤስ፤ ላላናዉ ዎደይ ደኤስ።
ECC 3:7 ፔꬋናዉ ዎደይ ደኤስ፤ ስካናዉ ዎደይ ደኤስ። ስእ ጋናዉ ዎደይ ደኤስ፤ ኦደታናዉ ዎደይ ደኤስ።
ECC 3:8 ዶሳናዉ ዎደይ ደኤስ፤ እፃናዉ ዎደይ ደኤስ። ኦላስ ዎደይ ደኤስ፤ ሳሮ ዳናዉ ዎደይ ደኤስ።
ECC 3:9 ያትን፥ ኦሳንቾይ ባ ዳቡርዳ ዳቡራፐ አይ ዎ ደሚ?
ECC 3:10 ታኒ ቃስ፥ አሳ ናእ ዳቡርድ ኦꬃና መላ፥ ፆሳይ እምዳ ቶሆይ ዳሮ ዴፆ ግደይሳ በአስ።
ECC 3:11 ፆሳይ ኡባባ እያ ዎድያን ዎድያን ሎይꬅድ ኦꬅስ። ፆሳይ አሳ ዎዛናን መርናተꬅ ዎꬅስ፤ ግድኮካ፥ ፆሳይ ኦꬅዳባ ኡባ ኮይሮፐ ዉርሰꬅ ጋካናዉ፥ አስ ኩመꬅ ኤራናዉ ዳንዳኤና።
ECC 3:12 አስ ባ ደእዳ ላይꬃን ሎእያባ ኦይሳፈነ፥ ኡፋይተይሳፈ አꬍያባይ አይብካ ባይናይሳ ታኒ አኬካስ።
ECC 3:13 ቃስ፥ አሳስ ኦꬅ ዳቡርድ ደምያ ዳቡራስ ጋተይ፥ ምድነ ኡይድ ኡፋይተይስ ፆሳፈ እያዉ እመትዳ እሞታ።
ECC 3:14 ፆሳይ ኦꬅዳባ ኡባይ መርናዉ ደኤይሳ ታኒ ኤራስ፤ እ ኦꬅዳባ ቦላ ጉጃናዉ ዎይኮ እያፐ ደንꬃናዉ ኦደስካ ዳንዳኤተና። ፆሲ ሄሳ ኦይ፥ አስ እያ ያይድ ቦንቻና መላሳ።
ECC 3:15 ሀእ ሀንሸ ደእያባይ ዎይኮ ስንꬃፈ ሀናናዉ ደእያባ ኡባይ ካሰ ሀንዳባ፤ ፆሳይ ካሰ ሀንዳባይ ዛር ሀናናዳ ኮዬስ።
ECC 3:16 ቃስ ታኒ፥ ሳሎፐ ጋርሳን ፅሎ ፕርዳ በሳን ኢታተꬅ፥ ፅሎተꬃ በሳን ገነይ ደኤይሳ በአስ።
ECC 3:17 ታ ዎዛናን፥ “ፆሳይ ፅሉዋነ ዎርዱዋ ናምኣካ ፕርዳስ ሺሻና፤ ፆሳይ ሀንዳባ ኡባስነ ኦሶ ኡባስ ዎደ ቃንፅ ዎꬅስ” ያጋዳ ቆፓስ።
ECC 3:18 ታኒ ታኮ፥ “አስ ዶአፐ ዱማቶናይሳ ኤንቲ አኬካና መላ ፆሳይ ኤንታ ፓጬስ” ያጋስ።
ECC 3:19 አሰ ግድን፥ ዶአ ግድን፥ ኤንታ ቃዳይ እስኖ፤ እሶይ ሀይቀይሳዳ፥ ሀንኮይካ ሀይቄስ። ናምአይ እስ ጫርኮ ሸምፖሶና፤ ሄሳ ግሾ፥ አስ ዶአፐ ዱማተና፤ ሄስካ ሀዳ።
ECC 3:20 ኤንቲ ናምአይ እስ በሲ ቦሶና፤ ናምአይ ቢታፈ መትዳ ግሾ፥ ቢታ ስሞሶና።
ECC 3:21 ያትን፥ አሳ ሸምፖይ ሳሎ ፑደ ከየይሳነ ዶአ ሸምፖይ ቢታ ዱገ ዎይሳ ሻክድ ኤረይ ኦኔ?
ECC 3:22 አስ ባ ኦꬅዳ ኦሶን ኡፋይተይሳፈ ሎእያ ሀራባይ እያዉ ባይናይሳ በአስ። እያዉ ደእያ ሎኦ ቃዳይ ሄሳ ፃላላ። አስ ሀይቅ ስምን እያፐ ጉየ ሀንያባ በሳናዉ፥ እያ ጉየ ኤሀናዉ ዳንዳኤይ ኦኔ?
ECC 4:1 ታኒ ዛራዳ፥ ሳሎፐ ጋርሳን አይ መላ ናቆይ ደእያኮ በአስ። ናቀተይሳት ምንꬆ ꬋይድ ዬኮሶና። ናቀይሳታ ኩሸን ማት ደእያ ግሾ ናቀተይሳታ ማደይ ባዋ።
ECC 4:2 ታኒ፥ “ሀእ ፓፃ ደኤይሳታፐ ካሰ ሀይቅዳይሳት ሎኦ” ያጋስ።
ECC 4:3 ግዶሽን፥ ሀ ናምአታፐ አꬍድ የለትቦናይሳታነ ሳሎፐ ጋርሳን ኦሰትያ ናቁዋ በኦናይሳታ ቃዳይ ሎኦ።
ECC 4:4 አሳ ዳቡርነ አሞትዳባ ደሞይ፥ አሳስ ባ ላግያ ቦላ ደእያ ቃናተፐ ፑልተይሳ በአስ። ሄስካ ሀዳ፤ ጫርኮ ኦይካናዉ ካሎ መላ።
ECC 4:5 ባ ኩሸ እድምድ ኡትያ አዛላይ ኮሻን ሀይቄስ።
ECC 4:6 ዳቡራንነ ጫርኮ ካሎን ደምያ ዳኮባፐ ዎፓን ደምያ እስ ኩሸይ ሎኦ።
ECC 4:7 ሳሎፐ ጋርሳን ሀዳ ግድዳባ ሀራባ በአስ።
ECC 4:8 ሄስካ ናእ ዎይኮ እሽ ባይና እስ ብዛ አደይ ደኤስ። ሽን እያ ዳቡራስ ዛው ባዋ፤ ባዉ ደእያባን አለና። እ ባና፥ “ታ ሀይሳ ኦደስ ዳቡራይና? ታኒ ታና አይስ ኡፋይስ ድጋድና?” ያግድ ኦይችስ። ሄስካ ቃስ ሀዳነ መቶ ደኦ።
ECC 4:9 ባንታ ኦሱዋን ሎኦ አይፈ ደምያ ግሾ እስኖ ግደይሳፈ ናምአ ግደይስ ሎኦ።
ECC 4:10 ናምኣፈ እሶይ ኩንድኮ እሶይ ደንꬄስ፤ ሽን ባርካ ደእያ ኡራይ ኩንድኮ እያ ደንይ ባይና ግሾ እያ አየ!
ECC 4:11 ናምአይ እስፈ ዝንእኮ ሆኤስ፤ ሽን ባርካ ዝንእያ ኡራ ዋንድ ሆአናዉ ዳንዳኢ?
ECC 4:12 እስ አስ ባርካ ተቃናዉ ዳንዳኦና መቱዋ ናምኡ አሳት ተቃናዉ ዳንዳኦሶና። ሄꬑ አይፈን ዶቀትዳ ዎዶሮይ ኤለ ዱፀና።
ECC 4:13 ዞረ ኤኮና ኤያነ ጬጋ ካዉዋፐ ማንቆነ ጭንጫ ግድዳ ናአተꬃ ካዎይ ሎኦ።
ECC 4:14 ሄ ናአተꬃይ ቃሾ ኬꬃፈ ከይድ ዎይኮ ማንቆተꬃፈ ደንድድ ካዎ ግዳናዉ ዳንዳኤስ።
ECC 4:15 ሳሎፐ ጋርሳን ደእያነ ስመረትያ አሳ ኡባይ ካዋ ላትያ ናአተꬃ ካለይሳ በአስ።
ECC 4:16 እስ ካዎይ ሃርያ አሳ ታይቦይ ዳሮ ግዳናዉ ዳንዳኤስ። ሽን ካልያ የለተꬃይ እያ ካዎተꬃን ኡፋይትቤና። ሄስካ ሀዳ፤ ጫርኮ ኦይካናዉ ካሎ መላ።
ECC 5:1 ፆሳ ኬꬅ ገልያ ዎደ አኬካዳ ታንጋ። ኤንቲ ባንታ ኢታ ኦሱዋ ኤሮና ግሾ፥ ስአናዉ ሺቆይ ኤያታ ያርሹዋፈ አꬌስ።
ECC 5:2 ኦደታናዉ ኤሶቶፓ፤ ፆሳ ስንꬃን ኦደታናዉ ነ ዎዛናን ድርጎፋ። ፆሳይ ሳሎና፥ ኔኒ ሳአና፤ ሄሳ ግሾ፥ ነ ቃላይ ጉꬃ ግዶ።
ECC 5:3 ቆፍ ዳርያ ዎደ አሙሆይ ዳሬስ፤ ኦዳ ዳሮይ ኤያተꬅ ቆንጭሴስ።
ECC 5:4 ፆሳስ ገፕዳባ ፖላናዉ ጋምኦፋ፤ ኤያታን ፆሳይ ኡፋይተና። ሄሳ ግሾ፥ ኔኒ ገፕዳባ ኡባ ፖላ።
ECC 5:5 እስባ ገፕድ ፖሎና አጋናፐ ኮይሮ ገፖና አጎይ ሎኦ።
ECC 5:6 ናጋራን ነና ገልሶና መላ ነ እንፃርሳ የዳ ኦꬆፋ። ፆሳ ኬꬃን ኦይሳኮ፥ “ኮይሮ ሀይሳ ታኒ አኬኮና ገፓስ” ጎፓ። ሄስ ፆሳ ዳሮ ሀንቀꬅያ ግሾ፥ ነ ኩሸ ኦሶ ኡባ እ ባ ሀንቁዋን ꬋይሳናዉ ዳንዳኤስ።
ECC 5:7 ዳሮ አሙሆይነ ዳሮ ኦድ ሀዳ። ሄሳ ግሾ፥ ፆሳ ያያ።
ECC 5:8 እስ ቢታን ማንቆት ናቀትሽን፥ ፕርድ ጌላትሽን ኔኒ በእኮ ማላለቶፋ። እስ እስ ሀላቃስ እያፐ ቦላራ ሹመትድ እያ ፄልያ ሀራ ሀላቅ ደኤስ። ቃስ ኤንታፈ ቦላራ ሹመትድ ኤንታ ፄልያ ሀራ ሀላቃት ደኦሶና።
ECC 5:9 ቢታፈ በንትያ ዎይ ኡባሳ፤ ሀር አቶሽን፥ ካዎይካ ጎሻፈ ጎኤቴስ።
ECC 5:10 ብራ ዶስያ ኡራስ ብር ግድ ኤረና፤ ዱረተꬅ ሲቅያ ኡራይ ሚሸ ካል ኤረና፤ ሄ ኡባይ ሀዳ።
ECC 5:11 ዱረተꬅ ዳርያ ዎደ ምያ አስ ዳሬስ። ባ ሻሉዋ ጮ አይፈን ፄልድ፥ “ታኒ ዱረ” ጋናፐ ሀራባ አይ ማዲ?
ECC 5:12 ኦሶ ኦꬅያ አስ ጉꬁ ምን ዳሮ ምን፥ ሳሮ ꬍስኮ ꬍስኬስ፤ ሽን ዱረይ ባ ዱረተꬃስ ኡባ ዎደ ኡንኤትያ ግሾ ꬍስኮ ꬋይድ ደኤስ።
ECC 5:13 ሳሎፐ ጋርሳን ዳሮ አዛንꬅያባ ሀራባ ታኒ በአስ። ሄስካ ኢታ ዎደ ባና አሾ ግድ ምንጅዳ ሻሎ፥
ECC 5:14 ዎይኮ እስ ኢታባይ ጋክን ꬋይዳ ዱረተꬅ። እ ናአ የልዳባ ግድኮካ ናኣ ላትስያባ ꬋይድ መላ አቴስ።
ECC 5:15 አስ ኡባይ ካሎ የለትዳይሳዳ መላ ኩሸ ስሚድ ባና። አይ መላ እ ዳቡርድ ኦꬅኮካ ኤክድ ብያባይ ባዋ።
ECC 5:16 አስ ካሎ የለትድ ካሎ ጉየ ስመይስ ዳሮ አዛንꬅያ ኢታባ። እያ ዳቡራ ኡባይ ጫርኮ ኦይክያባዳ ሀዳ ግድኮ እያ አይ ማዲ?
ECC 5:17 እ ባ ላይꬃ ኡባ ꬉማ ደኦን፥ አዛኖን፥ ዬላን፥ ሀርገንነ ይሎን ዉርሴስ።
ECC 5:18 ህዛ፥ ታኒ አኬክዳ እስ ሎኦባይ፥ ሳሎፐ ጋርሳን ፆሲ አሳስ እምዳ ቃንꬃ ላይꬃን፥ አስ ባ ዳቡራፐ ምድ ኡይድ ኡፋይተይስ ሎኦነ በሲያባ፤ እያ ቃዳይ ሄሳ።
ECC 5:19 ፆሲ አሳስ ዱረተꬅነ ሻሎ እመይ፥ ባ ዳቡራ ጋትያ ደምድ፥ ምድ ኡይድ ኡፋይታና መላሳ፤ ሄስካ ፆሳፈ እያዉ እመትዳ እሞታ።
ECC 5:20 ፆሲ እያ ዎዛናን ኡባ ዎደ ኡፋይስ ኩንꬅያ ግሾ እ ባ ደኦ ላይꬃባ ዳሮ ቆፐና።
ECC 6:1 ሳሎፐ ጋርሳን አሳ ቦላ ጋክያ ዳሮ ኢታባ ታኒ በአስ።
ECC 6:2 ፆሲ አሳስ ሻሎ፥ ዱረተꬅነ ቦንቾ እሜስ፤ እያዉ ኮሽያባፐ እስባካ ፓጭሰና። ሽን እያዉ እመትዳ ሻሉዋንነ ዱረተꬃን ኡፋይታና መላ ኩመꬃ ማታ እመና። ሄሳ ፃላላ ግዶናሽን እ ዳቡርድ ደምዳባን ሀር ኡፋይታና መላ ኦꬄስ፤ ሄስካ ሀዳነ አዛንꬅያ ኢታባ።
ECC 6:3 እስ አስ ፄቱ ናአ የልድ፥ አዱሳ ላይꬅ ደእድ ጭማናዉ ዳንዳኤስ። ሽን እ ባዉ እመትዳባን ኡፋይቶናነ ዉርሰꬃን ቦንቾን ሞገቶና አትኮ እያፐ ቦሽ ሎኦ ጋይስ።
ECC 6:4 ሄ ቦሻይ ጮ የለትድ ኦንካ ሀሳዮና ꬉማ ብያ ግሾ እያ ሱንꬃይ ꬉማን ካመትድ አቴስ።
ECC 6:5 እ፥ አዋ ፖኦ በኦና ዎይኮ አይብባካ ኤሮና አትኮካ ሄ ኡራፐ አꬍድ እያዉ ሸምፖይ ደኤስ።
ECC 6:6 ሄሳ ግሾ፥ ኡፋይስ ባይና ናምኡ ሙኩሉ ላይꬅ ደእያ አሳፐ ሄ ቦሻ ቃዳይ ሎኦ። ዉርሰꬃን ናምአይ እስ በሲ ቦሶና።
ECC 6:7 አስ ዳቡርድ ኦꬅያ ኡባይ ባዉ ምያባ ደማናሳ፤ ሽን እያ አሞይ አል ኤረና።
ECC 6:8 ያትን፥ ጭንጫ አስ ኤያ አሳፐ አይብን ዱማቲ? ማንቆይ ዳሮ ጭንጭድ፥ ሀራታ ስንꬃን ዋንድ ዳነኮ ኤሮይ እያ አይ ማዲ?
ECC 6:9 አሞን ፁገታናፐ አይፈን በኦይ ሎኦ፤ ሄስካ ጫርኮ ኦይካናዉ ካሎ መላ ሀዳ።
ECC 6:10 ሀንያባ ኡባይ ኮይሮትድ ኤረትድ ደኤስ። እስ እስ አስ ዋናናዉ ደእያኮ አዱሳ ዎደፐ ካሰ ኤረትድ ኡትስ። አይ አስካ ባፐ ምነይሳራ ባፀታናዉ ዳንዳኤና።
ECC 6:11 ኦድ ዳርያ ዎደ ሀዳባይ ዳሬስ፤ ያትን ሄስ አሰ አይ ማዲ?
ECC 6:12 ሀዳ ግድድ ኩያዳ ጮ አꬍያ ባ ጉꬃ ላይꬃ አስ ዋትድ አꬃናዉ ኮሽያኮ ኤረይ ኦኔ? አስ ሀይቅድ አግን ሳሎፐ ጋርሳን ሀናናዉ ደእያባ አሳስ ኦዳናዉ ዳንዳኤይ ኦኔ?
ECC 7:1 አልኦ ሽቶፈ ሎኦ ሱንꬅ አꬌስ፤ የለትያ ጋላሳፐ ሀይቆ ጋላስ ሎኦ።
ECC 7:2 አሳ ኡባ ዉርሰꬃይ ሀይቆ ግድዳ ግሾ፥ ግብራ ኬꬅ በይሳፈ ዬሆ ኬꬅ በይስ ሎኦ፤ ደኦን ደእያ አስ ሄሳ ባ ዎዛናን ዎꬃናዉ ኮሼስ።
ECC 7:3 አዛኖይ ሶምኦ ካሬꬅኮካ፥ ዎዛና ፖእስያ ግሾ ሚቻፈ አዛኖይ ሎኦ።
ECC 7:4 ጭንጫ አሳ ዎዛን ዬሆ ሶን ደኤስ፤ ሽን ኤያ አሳ ዎዛን ኡፋይሳ ሶን ደኤስ።
ECC 7:5 ኤያታ የꬅ ስአናፐ ጭንጫታ ሴራ ስስ ሎኦ።
ECC 7:6 ኤያ አሳ ሚች አጉንꬃን ታማ የድን ꬉቀይሳ መላ፤ ሄስካ ሀዳ።
ECC 7:7 ገነ ኦሶይ ጭንጫ አስ ኤያ ከሴስ፤ ዎꬋፈ ኤኮይ ዎዛና ኢሴስ።
ECC 7:8 ዶመꬃፈ ዉርሰꬅ ሎኦ፤ ኦቶሮፐ ዳንዳእ ሎኦ።
ECC 7:9 ኤያታ ሀንቆይ ኤንታ ክኦን ደእያ ግሾ፥ ኔኒ ነ ሸምፑዋን ሀንቆስ ኤለሶፓ።
ECC 7:10 “ሀእ ዎድያፐ ካሰ ዎደይ አይስ ሎኦ ግድዴ?” ጋዳ ኦይቾፋ፤ ሄሳ መላ ኦይሾይ ጭንጫ አስ ኦይችያ ኦይሾ ግደና።
ECC 7:11 ሀ ሳአን ደእያ አስ ኡባይ ጭንጫ ግዳናዉ ኮሼስ፤ ጭንጫተꬅ ደሞይ ላታፐ ሎኦ።
ECC 7:12 ሚሸይ አሰ ኢታፐ ካምድ አሸይሳዳ ጭንጫተꬅካ አሼስ። ሽን ጭንጫተꬅ ሚሸፐ አይ አሳ ደኦ ናጋናዉ ዳንዳእያ ግሾሳ።
ECC 7:13 አነ ፆሲ ኦꬅዳባ አኬካ! ፆሲ ጌላይዳባ ኦን ሱርሳናዉ ዳንዳኢ?
ECC 7:14 ሳእ ጊግዳ ዎደ ኡፋይታ፤ መቶይ ጋክያ ዎደ አኬካ። ኡፋይስ ግድን መቶ ግድን ፆሲ የድያ ዎደን ዬስ። ሽን አዉስ ኮይሮትድ ያነኮ ኔኒ ኤራካ።
ECC 7:15 ሀ ሀዳ ግድዳ ታ ላይꬃን ዳሮባ በአስ። ሄስካ፥ ጌላይ ባ ጌላተꬃን አዱሳ ላይꬅ ደእያ ዎደ ፅሎይ ቃንꬃ ላይꬃን ሀይቄስ።
ECC 7:16 ሄሳ ግሾ፥ ኔኒ ኤለ ꬋዮናዳ ዳሮ ፅሎ ዎይኮ ዳሮ ጭንጫ ግዶፓ።
ECC 7:17 ኔኒ ዎደይ ጋኮና ሀይቆናዳ አꬍዳ ኢታ ግዶፓ፤ አꬋዳ ኤያ ግዶፓ።
ECC 7:18 ሀ ኡባን ፆሰ ያያ፤ አስ መቶ ኡባ ፆኖን ከያናዉ ዳንዳእያ ግሾ ኔኒ ዳሮ ኢታ ዎይኮ ዳሮ ፅሎ ግዶናሽን ግዶ አስ ግዳ።
ECC 7:19 ጭንጫተꬅ ጭንጫስ እምያ ዎልቃይ እስ ካታማ ሃርያ ታሙ አሳታ ዎልቃፈ አꬌስ።
ECC 7:20 ፅሎባ ፃላላ ኦꬅድ ናጋራ ኦꬆና ደእያ አስ ሀ ሳኣ ቦላ ባዋ።
ECC 7:21 አስ ሃሳያ ቃላ ኡባ ስአዳ ፖላና ጎፓ፤ ኔኒ ኡባ ስአና ጊኮ ነ አይለይ ነና ባድሽን ስአና።
ECC 7:22 ቃስ ኔኒ ነ ሁጰን ሀራታ ባድያባ ነ ዎዛናይ ኤሬስ።
ECC 7:23 ሄሳ ኡባ ታኒ ጭንጫተꬃን ፕልጋዳ በአስ። ያታዳ፥ “ታኒ ጭንጫ ግዳና” ያጋስ። ሽን ታኒ ግዳይሳዳ ሀንቤና።
ECC 7:24 ጭንጫተꬅ ኡባ ዎደ ሃሆን ደእያባነ ጪሞባ፤ ያትን፥ እያ ኮይድ ደማናዉ ዳንዳኤይ ኦኔ?
ECC 7:25 ታኒ ፕልጋዳ ፄላናዉ ጭንጫተꬅነ ኦዳ ኡባ ዉርሰꬃ ኤራናዉ ቆፓስ። ናጋር ኤያተꬅ፥ ኤያተꬅ ጎሻተꬅ ግደይሳ ኤራናዉ ጋካስ።
ECC 7:26 ታኒ ሀይቆፐ አꬍድ ጫምያ ሀራባ ደማስ። ሄስካ፥ እ ዎዛናይ ግተ፥ እ ኩሸይ ሳንꬃላታ ግድድ ፅሄዳ ኦይክያ እስ ማጫስ በአስ። ፆሰ ያይያ አስ ኢፐ ከስ ኤካና፤ ሽን ናጋራንቹዋ እያ ባ ፅህያን ፃፃዳ ኦይካና።
ECC 7:27 አስታማረይ ሀይሳዳ ያግስ፤ “ታኒ ፕልጋዳ ደምዳባይ ሀይሳ።
ECC 7:28 ሄስካ፥ ታኒ ሀች ጋካናዉ ኮያዳ ደማቦናባ። ሙኩሉ አደ አሳ ግዶፈ ቦንቾይ በሲያ እስ አደ ፃላላ ደማስ፤ ሽን ማጫ አሳ ግዶፈ እስኖካ ደማናዉ ዳንዳአብከ።
ECC 7:29 ታኒ ፕልጋዳ ደምዳ ሀራባይ፥ ፆሲ አሰ ሱረ ቆፋራ መꬍስ፤ ሽን አስ ዳሮ ገነ ኦገ ኮይድ ብስ” ያግስ።
ECC 8:1 ጭንጫ አስ ዳነይ ኦኔ? ኡባባስ ብርሸꬃ ኤረይ ኦኔ? ጭንጫተꬅ ፓሽክስድ፥ ꬉምዳ ሶምኡዋ ፖእሴስ።
ECC 8:2 ካዎስ ኪተታ፤ ካሰ ኔኒ ኪተታና ጋዳ ፆሳ ስንꬃን ጫቃዳሳ።
ECC 8:3 ካዋ ስንꬃፈ ኤለሳዳ ከዮፓ፤ ካዎይ ባ ኮይዳባ ኦꬃናዉ ዳንዳእያ ግሾ ኢታ ኦሶ ኦꬃናዉ ደንዶፋ።
ECC 8:4 ኡባባ ኦꬃናዉ ካዋስ ማት ደእያ ግሾ፥ “አይስ ሀይሳ ኦꬃዲ?” ያግድ እያ ኦይቻናዉ ዳንዳኤይ ኦኔ?
ECC 8:5 እያ ኪታ ፖልያ አስ ቆሄተና፤ ጭንጫ አስ ልከ ዎድያነ ኦꬅያ ኦግያ ኤሬስ።
ECC 8:6 አሰ ዴፆ መቶይ ጋክኮካ ኡባባስ ዎደይነ ኦገይ ደኤስ።
ECC 8:7 ስንꬃፈ ሀናናባ ኤርያ አስ ባዋ፤ “ሀይስ ሀናና” ግድ ኦዳናዉ ዳንዳኤይ ኦኔ?
ECC 8:8 ሸምፖይ ሻከትድ ብያ ጋላስ ኦይክድ ተቃናዉ ዳንዳእያ አስ ባዋ፤ ዎይኮ ሀይቆይ ባ ጋላሳን ዮናዳ ድጋናዉ ዳንዳእያ አስ ባዋ። ኦላ ዎደ ኦንካ ኦለትከ ጋናዉ ዳንዳኦናይሳዳ ኢታተꬅ ኢታ ኦꬅያ ኡራ የደና።
ECC 8:9 ሳሎፐ ጋርሳን ሀንያባ ኡባ ታኒ አኬካዳ ቆፕያ ዎደ አስ ባዉ ደእያ ማታ ሀራ አስ ቆሀናዉ ጎኤተይሳ በአስ።
ECC 8:10 ኢታ አሳት ቦንቾን ሞገትሽን በአስ። ኤንቲ ኢታተꬃ ኦꬅዳ ካታማ አሳይ ሺቅድ ኤንታ ሳቢሽን ስአስ፤ ሄስ ኡባይ ሀዳ።
ECC 8:11 አስ ቆፕድ ኢታባ ኦꬅያ ጋሶይ፥ ኢታባ ኦꬅዳ አሳታ ኤለስድ ሴረይ ባይና ግሾሳ።
ECC 8:12 ናጋራንቾይ ፄቱ ቶሆ ኢታባ ኦꬅሽን እያ ባረይ አዱቅኮካ፥ ፆሰ ያየይሳታስነ ቦንቸይሳታስ ሳእ ሎአናይሳ ታ ኤራይስ።
ECC 8:13 ኢታት ፆሰ ያዮና ግሾ ሳሮተꬅ ኤንታዉ ባዋ፤ ኤንቲ ፆሰ ያዮና ግሾ ኤንታ ባረይ ኩያዳ ቃማና።
ECC 8:14 ሀ ሳአን ኦሰትያ ሀራ ሀዳባይ ደኤስ። ሄስካ፥ ጌሻ አሳት፥ ናጋራንቾት ኤካናዉ በሲያ ሴራ ኤክያ ዎደ ናጋራንቾት ጌሻት ኤካናዉ በሲያ ሎኦባ ኤከይሳ፤ ሄስ ኡባይ ሀዳ።
ECC 8:15 አስ ምያባፐ፥ ኡያባፐነ ባና ኡፋይስያባፐ አꬍድ ሎኦባይ ሳሎፐ ጋርሳን ሀር ባይና ግሾ፥ አስ ባ ደኦን ኡፋይትኮ ሎኦ ጋስ። ፆሲ እያዉ እምዳ ላይꬃን እ ዳቡርድ ደምዳባን ኡፋይታናዉ ዳንዳኤስ።
ECC 8:16 ታኒ ጭንጫተꬅ አይበኮ ኤራናዉነ አስ ሀ ሳአ ቦላ ዳቡርያ ዳቡራ አኬካናዉ ሀልቻስ፤ ዉርሰꬃን አስ ꬍስኮ ꬋይድ ኦꬅያ ኦሶይ ደኤይሳ በአስ።
ECC 8:17 ታኒ ፆሲ ኦꬅዳባ ኡባ በአስ። ሳሎፐ ጋርሳን ኦሰትዳ ኦሶ አስ ፕልግድ ኤራናዉ ዳንዳኦናይሳ ኤራስ። አስ አይ መላ ዳቡርድ ፕልግ ፄልኮካ፥ እያ ብርሸꬃ ኤራናዉ ዳንዳኤና። ቃስ ጭንጫ አስ ሀይሳ ኤራይስ ጋናዉ ዳንዳኤና።
ECC 9:1 ሀ ኡባ ታ ዎዛናን ቆፕዳፐ ጉየ ጭንጫትነ ፅሎት፥ ኤንታ ኦሶት ፆሳ ኩሸን ደኦሶና ጋዳ ኩያስ። ሽን ሲቆ ግድን ዎይኮ እፆ አይብ እያ ናግያኮ ኦንካ ኤረና።
ECC 9:2 ዱማተꬅ ባይና ኡባ ጋክያ ቃዳይ እስኖ፤ ፅሎ ግድን ጌላ፥ ሎኦ ግድን ኢታ፥ ቱና ግድን ቱና ግዶና እፅን፥ ያርሾ ያርሸይሳ ግድን ያርሾናይሳ ኡባ ቃዳይ እስኖ። ሎኦ አሳስ ናጋራንቹዋፈ ሎእያ ቃድ ባዋ፤ ጫቆ ያየይስ ያዮናይሳፈ ዱማተና።
ECC 9:3 አሳ ኡባ ቃዳይ እስኖ ግደይስ፥ ሀ ሳአን ደእያ ሀራ ኢታተꬃ መላ ዳሮ ኢታ። አስ ደኦን ደእዳ ላይꬃ ኡባን እያ ዎዛናይ ኢታተꬃንነ ጎሻተꬃን ኩምድ ደኤስ፤ ዉርሰꬃን ሀይቅድ አጌስ።
ECC 9:4 ሀይቅዳ ጋሞፈ ፓፃ ደእያ ካን ሎኦ፤ ደኦን ደኤይሳታራ ደእያ ኡራስ ኡፋይስ ደኤስ።
ECC 9:5 ደኦን ደእያ አሳት እስ ቶሆ ሀይቃናዉ ደኤይሳ ኤሮሶና፤ ሽን ሀይቅዳይሳት እስባካ ኤሮኮና። ኤንቲ ዶገትዳይሳታ ግድያ ግሾ አይኮካ ማዶኮና።
ECC 9:6 ኤንታ ሲቆይ፥ እፆይነ ቃናተ ኡባይ ኤንታራ እስፈ ꬋዬስ። ህዛፐ ጉየ ሳሎፐ ጋርሳን ሀንያባ ኡባን መርናዉ ኤንታዉ ቃድ ባዋ።
ECC 9:7 ባ፥ ነ ካꬃ ኡፋይሳን ማ፤ ነ ዎይነ ኡሻ ነ ዎዛናይ ኡፋይትን ኡያ። ፆሳይ ሄሳ ነዉ ካሰፐ ጊግስድ ዎꬅስ።
ECC 9:8 ኡባ ዎደ ነ ማኦይ ቦꬅ ግዶ፤ ነ ሁጰን ዛይተ ትያ።
ECC 9:9 ሳሎፐ ጋርሳን ፆሳይ ነዉ እምዳ ሀ ሀዳ ደኡዋን፥ ሀዳ ግድዳ ነ ቃማታን ነ ሲቅያ ነ ማቸራ ኡፋይታዳ ደአ። ኔኒ ሳሎፐ ጋርሳን ዳቡራዳ ኦꬅዳባ ኡባፈ ነና ጋክያ ሳማይ ሄሳ።
ECC 9:10 ነ ኩሸይ ኦꬃናዉ ደምዳባ ኡባ ነ ኩመꬃ ዎልቃን ኦꬃ፤ ኔኒ ባና ዱፉዋን ኦሶይ ዎይኮ ሀልቾይ ዎይኮ ኤር ዎይኮ ጭንጫተꬅ ባዋ።
ECC 9:11 ታኒ ሳሎፐ ጋርሳን ሀራባ በአስ። ሄስካ፥ ኤሶን ዎፀይሳት ኡባ ዎደ ፆኖኮና፤ ምኖ ኦላንቾት ኡባ ዎደ ኦላን ካንꬆኮና፤ ጭንጫት ኡባ ዎደ ካꬅ ደሞኮና፤ ሂላንቾት ኡባ ዎደ ዱረቶኮና፤ ታማርዳ አሳት ኡባ ዎደ ሳበቶኮና። ሽን ኡባ ቃድነ ዎደይ ጋꬅዳይሳዳ ሀኔስ።
ECC 9:12 ግዶሽን ሄ ዎደይ አዉደ ያነኮ ኤራናዉ ዳንዳእያ አስ ባዋ። ካፎይ ፅሄን ገለይሳዳ ዎይኮ ሞሎይ ግተን ኦይከተይሳዳ አስ ኡባይ ቆፖና ጋክያ ኢታ ዎደን ኦይከቴስ።
ECC 9:13 ሳሎፐ ጋርሳን ታኒ በእዳባ ሀራባይ ደኤስ። ሄስካ ጭንጫተꬅ ግታ ሌምሶ ግደይሳ።
ECC 9:14 ጉꬃ አስ ደእያ እስ ጉꬃ ካታምያ ደአዉሱ። ሄ ካታምዉ እስ ዎልቃማ ካዎይ ኦላናዉ ደንድስ፤ እዮ ተቅድ ኦይክስ።
ECC 9:15 ሄ ካታመን ማንቆ ግድዳ እስ ጭንጫ አደይ ደኤስ፤ እ ባ ጭንጫተꬃን ሄ ካታምዉ አሽስ። ሽን ሄ ማንቆ አድያ ዛሪድ ሀሳይዳይ ባዋ።
ECC 9:16 ታኒ፥ “ጭንጫተꬅ ዎልቃፈ አꬌስ” ያጋስ። ግዶሽን፥ ጭንጫ ግድኮካ ማንቆ አስ ካቴስ፤ እ ኦድያባ ስኤይ ባዋ።
ECC 9:17 ሄስ ሀንኮካ፥ ደርያ ሃረይስ ኤያታ ሺቆን ዋስያ ዋሱዋ ስአናፐ ሎዳራ ኦደትያ ጭንጫ አሳ ቃላ ስኤይስ ሎኦ።
ECC 9:18 ጭንጫተꬅ ኦላ ሚሸፐ አꬌስ፤ ሽን እስ ናጋራንቾይ ዳሮ ሎኦባ ꬋይሴስ።
ECC 10:1 ሀይቅዳ ኡዱንፀት ሳውያ ሽቱዋ ፅንቅሶሶና፤ ሄሳዳካ፥ ጉꬃ ኤያተꬅ ጭንጫተꬅነ ግታ ቦንቹዋ ኢሴስ።
ECC 10:2 ጭንጫ አሳ ዎዛናይ እያ ኡሻች ካለꬄስ፤ ሽን ኤያ አሳ ዎዛን ሀድርስ ካለꬄስ።
ECC 10:3 ኤያ አስ ኦገ ሄመትያ ዎደ እያዉ አኬክ ባዋ፤ እ ኤያ ግደይሳ አስ ኡባይ ኤሬስ።
ECC 10:4 ነ ሀላቃይ ነ ቦላ ሀንቀትኮ ነ በሳ የዶፋ፤ ስእ ግድ ዳንዳኦይ ግታ ናጋራ አቶ ጊሴስ።
ECC 10:5 ሳሎፐ ጋርሳን ታኒ በእዳ ሀራ ኢታባይ ደኤስ። ሄስካ ደርያ ሃረይሳት ኦꬅያ ናቁዋ።
ECC 10:6 ኤያት ዳሮ ꬎቃ ሹማተꬃ ኦይክድ ደእያ ዎደ ዱረት ዝቃ በሳን ኡትዶሶና።
ECC 10:7 ታኒ አይለት ሃረይሳታዳ ፓራ ቶግድ ብሽን ቃስ ሃረይሳት አይለታዳ ቶሆን ሄመትሽን በአስ።
ECC 10:8 ኦላ ቦክያ አስ ሄ ኦላን ኩንዴስ፤ ግምበ ድርስ ላልያ ኡራ ሾሽ ዱኬስ።
ECC 10:9 ሹቹ ደንꬅያ አስ ሄ ሹቻን፥ ምꬅ ቀርያ አስ ሄ ምꬃን ደሸቴስ።
ECC 10:10 ዱንእዳ ካልታ ሌፎና ቀርኮ ዳሮ ዎልቃ ዉርሴስ፤ ሽን ጭንጫተꬃን ኦꬅያ ኦሱዋስ አይፈይ ደኤስ።
ECC 10:11 ሾሽ ዱክ አግን ሾሹ ዶቅያ ꬋለ ዎይስ ሄ ኡራ አይኮካ ማደና።
ECC 10:12 ጭንጫ አሳ ኦድ እያዉ ቦንቾ እምሴስ፤ ሽን ኤያይ ባ ዶናፐ ከይዳ ቃላን ባዉ መቶን ገሌስ።
ECC 10:13 ኤያይ ባ ሃሳያ ኤያ ቃላን ዶምድ፥ ኢታተꬃንነ ጎሻተꬃን ፖሌስ።
ECC 10:14 ኤያ አስ ዳሮባ ኦደቴስ። ግዶሽን፥ ስንꬃፈ ሀናናዉ ደእያባ ኦንካ ኤረና። አስ ሀይቅ አግን፥ ሀንያባ እያዉ ኦዳናዉ ዳንዳኤይ ባዋ።
ECC 10:15 ኤያ አስ ባ ኦሶን ዳቡሬስ፤ እ ባ ሶ ብያ ኦግያ ኤረና።
ECC 10:16 ናአ ግድዳ ካዎይነ ዎንታ ጉራ ግብራ ምያ ሀላቃት ደእያ ቢተ ነና አየ!
ECC 10:17 ቦንቸትዳ ካዎይነ ማꬆታናዉ ግዶናሽን ዎልቃነ ምኖተꬅ ደማናዉ ማራን ምያነ ኡያ ሀላቃት ደእያ ቢትያ አንጀትዳሮ።
ECC 10:18 አደይ አዛላ ግድኮ እያ ካራይ ዎዴስ፤ እያ ኩሸይ ኦꬆናባ ግድኮ፥ እያ ኬꬃይ ፆኬስ።
ECC 10:19 ካꬅ ሙሳንነ ዎይነ ኡሻን ኡፋይስ በንቴስ፤ ሽን ሚሸይ ኡባባ ሻሜስ።
ECC 10:20 ስእያ አስ ባዋ ጋዳ ነ ዎዛናን ካዎ ጫዮፓ፤ ዎይኮ ነ ዝንእያ ክፍልያን ዱረ ኡራ ባዶፋ። ነ ግዳይሳ ሳሎ ካፎይ ብድ ኤንታዉ ኦዳናዉ ዳንዳኤስ።
ECC 11:1 ነ ካꬃ ሃꬃ ቦላ የጋ፤ ዳሮ ጋላሳፐ ጉየ ኔኒ ዛራዳ ደማና።
ECC 11:2 ነዉ ደእያ ሻሉዋ ላፑን ዎይኮ ሆስፑን በሳን ሻካዳ ዎꬃ። ስንꬃፈ ሀ ሳኣ ቦላ አይ ኢታባይ ያነኮ ኔኒ ኤራካ።
ECC 11:3 ሻር እራ ቶክኮ ቢታ ቦላ እር ቡኬስ። ምꬅ ፑደ ኩንድን ዱገ ኩንድን ባ ኩንድዳ በሳን ደኤስ።
ECC 11:4 ጫርኮ ናግያ ኦንካ ካꬅ ዘረና፤ ሻር ደንዳና ጋካናዉ ናግያ ኦንካ ባ ካꬃ ጫከና።
ECC 11:5 ጫርኮይ ብያ ኦግያነ ናእ ባ አየ ኡሎን ዋንድ መትያኮ ነ ኤሮናይሳዳ ኡባባ መꬍዳ ፆሳይ ባ ኦሱዋ ዋት ኦꬅያኮ ኤራናዉ ዳንዳአካ።
ECC 11:6 ጉራ ግድን ኦማርስ ነ ዘረꬅ ዘረይሳ አጎፋ፤ ዎንታይስ ዎይኮ ኦማርሳይስ ሎአነኮ ኔኒ ኤራካ።
ECC 11:7 ፖኦይ ኡፋይስያባ፤ አዋ አይፈ በኦይ ሎኦባ።
ECC 11:8 አስ አዱሳ ላይꬅ ሀ ሳአን ደእኮ ሄ ላይꬃን ኡፋይቶ። ሽን ሀ አላምያባይ ሀዳ ግደይሳነ ያና ꬉማ ዎደይ መርናዉ ዳናይሳ ቆፖ።
ECC 11:9 ነኖ ናአተꬃዉ፥ ናአተꬅ ዳሮ ሎኦባ ግድያ ግሾ ነ ናአተꬃ ላይꬃን ኡፋይታ፤ ነ ዎዛናይካ ኡፋይቶ። ነ አይፈይ በእዳባነ ነ ዎዛናይ አሞትዳባ ኡባ ፖላ። ሽን ሄ ኔኒ ኦꬅዳባ ኡባ ግሾ ነና ፆሳይ ፕርዳናዉ ደኤይሳ ዶጎፓ።
ECC 11:10 ናአተꬅነ ጎባተꬅ ሀዳ ግድያ ግሾ ነ ዎዛናፐ አዛኖ፥ ነ አሳተꬃፈ ኢታተꬅ ድጋ።
ECC 12:1 ነ ናአተꬃ ላይꬃን ነና መꬍዳይሳ ቆፓ። ኡንአ ጋላሳት ዮና ደእሽን፥ “ሀይስ ታና ኡፋይሰና” ጌተትያ ዎደት ጋኮና ደእሽን፥
ECC 12:2 አውነ ፖኦይ፥ አጌንነ ፆልንቶት ꬉሞና ደእሽን፥ እር ቡክድ አꬍን፥ ሻር ስሞና ደእሽን፥ ነና መꬍዳይሳ ቆፓ።
ECC 12:3 ሄ ዎደይ ኬ ናገይሳት ኮኮርያ ዎደ፥ ምኖ አስ ኩንያ ዎደ፥ ጋጨይሳት ታይቦን ጉፅዳ ግሾ ጋቸ አግያ ዎደነ ማስኮተራ ፄለይሳት ዳቡርያ ዎደ ግዳና።
ECC 12:4 ሄ ዎደይ፥ ዎጋ ኦግያኮ ስምዳ ፐንገት ጎርደትያ ዎደ፥ ጋጭያ ዎፃ ግርሳይ ዝቅ ግያ ዎደ፥ ካፎ ዋሶይ አሰ ꬍስኮፈ ባርክስያ ዎደ፥ ማጫ ናይታ የꬃ ግርሳይ ለፕያ ዎደ ግዳና።
ECC 12:5 ሄ ዎደይ፥ ደረ ከያናዉ ፆነትያ ዎደ፥ ዳልጋ ኦገታራ ሄመታናዉ ያሽያ ዎደ፥ ላዉዘ ምꬅ ጪይያ ዎደ፥ ቦለይ ቃፃናዉ ፆነትያ ዎደ፥ አሞያባይ አግያ ዎደ ግዳና። ሄ ዎደይ፥ አስ ባ መርና ኬꬃ ብያ ዎደ፥ ዬከይሳት ዳልጋ ኦግያራ ዬክሸ ዩይያ ዎደ ግዳና።
ECC 12:6 ብራ ሳንꬃላታይ ዱፆና ደእሽን፥ ዎርቃ ከረይ መቆና ደእሽን፥ ሃꬃ ኦቶይ ፑልቱዋ ማታን መቆና ደእሽን፥ ሃ ኦላፈ ጎች ከስያ ዎዶሮይ ዱፆና ደእሽን፥
ECC 12:7 ቢታይ ቢታኮ ስሞና ደእሽን፥ ሸምፖይ ባና እምዳ ፆሳኮ ስሞና ደእሽን፥ ነና መꬍዳይሳ ቆፓ።
ECC 12:8 አስታማረይ፥ “ሀዳ! ሀዳ! ኡባባይ ሀዳ” ያግስ።
ECC 12:9 አስታማረይ ጭንጫ ፃላላ ግዶናሽን ኤራካ ግድያ ግሾ ደርያ ታማርስስ። እ ዳሮ ሌምሶታ ፕልግድ እሱዋ እሱዋ እያ ማራን ማራን ዱማይድ ዎꬅስ።
ECC 12:10 አስታማረይ ልከ ግድዳ ቃላ ደማናዉ ኮይስ፤ ሄሳ ግሾ፥ እ ፃፍዳባይ ሱረነ ቱማ።
ECC 12:11 ጭንጫታ ቃላይ ሄንꬃንቾይ ዉደ ላግያ ፄራ ኦጮ ፃምአ መላ። እስፈ ሺቅዳ ሌምሶት ጋꬅ ኦይꬅያ ምስማረ መላ።
ECC 12:12 ታ ናአዉ፥ ሀ ኡባፈ ቦላራ ኔኒ ናገታናዉ ኮሽያባይ ደኤስ። ማፃፋ ፃፍድ ዉርሳናዉ ዳንዳኤተና። ቃስ ዳሮባ ፕልግድ አጎና እፆይ አሳተꬅ ዳቡርሴስ።
ECC 12:13 ሄኮ ኡባባይ ኦደትስ፤ ኡባባስ ኩሻይ ሀይሳ፤ ፆሰ ያይያ፤ እያ ኪታ ናጋ፤ ሄስ አሳስ ዋና ኦሶ።
ECC 12:14 ፆሳይ ኦሶ ኡባ ቃስ ጌምዳ ኡባ ሎኦ ግድን ኢታ ፕርዳናዉ ደኤስ።
SOL 1:1 ማዝሙረ ኡባፈ አꬍያ ሶሎሞነ ማዝሙረይ ሀይሳ።
SOL 1:2 ነ ሲቆይ ዎይነፐ አꬍድ ኡፋይስያ ግሾ ታና ዛራ ዛራ ዬራ።
SOL 1:3 ነ ትየትያ ሽቶይ ዋንድ ሳዊ! ነ ሱንꬃይ ጎግያ ሽቶ መላ፤ ጌላኦት ነና ሲቀይ ሄሳሳ።
SOL 1:4 ታና ኔራ ኤካዳ ባ፤ አነ እስፈ ዎፆስ! ካዋዉ፥ ታና ነ ቁሩፁዋን ገልሳ። ነናን ኑ ኡፋይቶስ፤ ነ ሲቁዋ ዎይነ ኡሻፈ አꬅድ ናሾስ። ማጫስ ኡባይ ነና ሲቀይሳ በሳ።
SOL 1:5 ህንተኖ፥ የሩሳላመ ማጫሳቶ ስእተ፤ ታኒ ካሬꬅ ግድኮካ ማላ ሎኦ። ታ ካሬꬃተꬃይ ቀዳረ ዱንካነ መላ፤ ሽን ታ ማላይ ሶሎሞነ ማጋራጆታ መላ።
SOL 1:6 ታ ማላ ካሬꬅዳይ አዋ፤ ታኒ ካሬꬅ ግድዳ ግሾ ታና ቦሮፕተ። ታ እሻት፥ ታ አየ ናይት ታራ ኦየትድ፥ ታና ዎይነ ጋደ ናግስዶሶና፤ ሄሳ ግሾ ታ ዎይንያ ናጋብከ።
SOL 1:7 ታ ሲቁዋዉ፥ አነ ታዉ ኦዳ፤ ነ ዶርሳ ዉድያ አዉን ሄማይ? ሴታ ጋላስ ኤንታ አዉን ሸምፕሳይ? ነና ደማናዉ ነ ላገታ ዉድያ ካላዳ፥ አይስ ጉሉንታዳ ብያ ማጫስ ግዶ?
SOL 1:8 ማጫሳ ኡባፈ ሎእያረ፥ በሳ ኤሮና እፅኮ ዶርሳታ ጌዶ ካላ። ነ ዴሻ ማራታ ሄንꬃንቾታ ዱንካንያ ማታን ሄማ።
SOL 1:9 ታ ሲቀ! ግብፀ ካዎ ፓራ ጋረታ ጎችያ፥ ፓራታ ግዶን ደእያ ማጋየዳ ሎኣሳ።
SOL 1:10 ነ ሀይꬃን ደእያ አሌቁዋራ ሺቅድ፥ ነ ሻካላይ ዋንድ ሎእ! ነ ቆይ አልኦ ሹቻን አሌቀትስ።
SOL 1:11 ኑኒ ነዉ ብራን ጫደትዳ፥ ዎርቃ አሌቁዋ ኦስሳና።
SOL 1:12 ካዎይ ጋይታ ቦላ ኡትዳሽን፥ ታ ሽቱዋ ሳዎይ ኬꬃን ቶንኩ ግስ።
SOL 1:13 ታ ሲቆይ ታ ꬋንꬃታ ግዶን ደእያ፥ ፁንተትዳ ሳውያ ካርበ ዳኔስ።
SOL 1:14 ታ ሲቆይ፥ ኤንጋዳ ዎይነ ጋደን፥ ዶልዳ ሄና ጪሻ መላ።
SOL 1:15 ታ ሲቀ፥ ኔኒ ዋና ሎአይ! ኔኒ ዋና ሎአይ! ነ አይፈት ሆለ አይፈዳ ሎኦሶና።
SOL 1:16 ታ ሲቁዋዉ፥ ኔኒ ዋና ሎአይ! አይባ ኡፋይሳይ፤ ኑ አርሳይ ጭልኦ ማታ መላ ኡፋይሴስ።
SOL 1:17 ኑ ኬꬃ ቱሳይ ዝጋ፤ ኑ ካራይ ፂዳን ኦይከትስ።
SOL 2:1 ታኒ ሳሮናን ዶልያ ጪሻነ ዛንጋራን ዶልያ ሱፈ ጪሻ መላ።
SOL 2:2 ታ ሲቅያ ማጫሳ ግዶን በእያ ዎደ፥ አጉንꬃ ግዶን በንትያ ሱፈ ጪሻ መላ።
SOL 2:3 ታ ሲቆይ ሀራ ፓንꬃታ ግዶን ፄልያ ዎደ ዎራን ደእያ አፕለ ምꬃ መላ። ታና ዳሮ ኡፋይስን፥ እያ ኩያ ግዶን ኡታስ፤ እያ አይፈይ ምን ታና ማልኤስ።
SOL 2:4 እ ታና ግብራ ምያ ኬꬅ ገልስስ፤ ባ ሲቁዋ ባንድራዳ ታ ቦላ ꬎቁ ꬎቁ ኦꬅስ።
SOL 2:5 ታኒ እያ ሲቁዋን ኦይከታዳ ሀርግዳ ግሾ፥ ዛብበ አይፈ ሙዝድ ታና ጋሽትስተ፤ አፕለ ሙዝድ ታ ዎልቃ ምንꬅተ።
SOL 2:6 ባ ሀድርሳ ኩሽያ ታና ቦርኮትስስ፤ ባ ኡሻቻ ኩሽያን ታና ቆምስ።
SOL 2:7 ህንተኖ፥ የሩሳላመ ያላጋ ማጫሳዉ፥ ሲቆይ ባዉ ዶስድ ደንዳና ጋካናዉ፥ እያ ህንተ ባርከꬆና መላ፥ ታ ህንተና ገንኤንነ ዎራ ዎሽኤን አማታይስ።
SOL 2:8 ታ ሲቁዋ ግርሳይ ደርያ ቦላራ ጉፕሸነ፥ ዙማ ቦላራ ፆንገትሸ የይስ ስኤቴስ።
SOL 2:9 ታ ሲቆይ ዎሽኤ ዎይኮ ገንኤ ማር ዳኔስ፤ ሄኮ፥ ኑ ኬꬃ ማታን ኤቅስ፤ ማስኮተራ ሶ ፄሌስ፤ ማጋራጁዋ ግዶራ ፄሌስ።
SOL 2:10 ታ ሲቆይ፥ ሀይሳዳ ያጌስ፤ “ታ ሲቀ፥ ደንዳ! ታ የገልሰ፥ ሃያ፥ እስፈ አነ ቦስ።
SOL 2:11 ሄኮ፥ ባልጎይ አꬍስ፤ እራይካ ኤቅስ።
SOL 2:12 ቢታን ጪሽ ጪይስ፤ የꬅ የፅያ አጌናይ ጋክስ፤ ሆለ የꬅ ኑ ቢታን ስኤትስ።
SOL 2:13 ባላሰ ምꬃይ አይፈ ዶምስ፤ ዎይነይ ጪይስ፤ ጪሻ ሳዎይ ቢታን ቶንኩ ጌስ። ታ ሲቀ፥ ደንዳ፤ ታ የገልሰ፥ ሃያ፤ አነ እስፈ ቦስ።”
SOL 2:14 አፎ ዶናን ዛላ ቆጶን፥ ቆሰትዳ ሆለ ዳንያረ፤ አነ እስ ቶሆ ታና ነ ሶምኡዋ በሳ፤ ነ ግርሳ ስሳ። ነ ቃላይ ታና ማልኤስ፤ ነ ሶምኦይ ዳሮ ሎኤስ።
SOL 2:15 ኑ ዎይነይ ጪይስ፤ ኑ ዎይነ ጋድያ ኢስያ ዎርካናታ፥ ሄ ጉꬃ ቡታለታ ፅሄን ኦይክተ።
SOL 2:16 ታ ሲቆይ ታባ፤ ታንካ እያባ፤ ጪሻታ ግዶን እ ባ ዉድያ ሄሜስ።
SOL 2:17 ሳእ ጌያና ጋካናዉ፥ ኩያይ ꬋያና ጋካናዉ፥ ታ ሲቁዋዉ፥ ገንኤዳ ዎይኮ ዎሽኤ ማራዳ፥ አፎትያ ደርያራ ዎፃሸ ሃ ስማ።
SOL 3:1 ቃማ ኩመꬅ ሂፃን ዝንአዳ፥ ታ ሲቁዋ ደማናዉ አሞታስ፤ ምንꬃዳ ኮያስ፤ ሽን ደማብከ።
SOL 3:2 ካታማ ግዶን ደእያ ዳልጋነ ፁንꬃ ኦገታ ኡባን ዩያስ። ታ ሲቁዋ ደማናዉ ኮያስ፤ ምንꬃዳ ኮያስ፤ ሽን ደማናዉ ዳንዳአብከ።
SOL 3:3 ካታማ ዩይድ ናገይሳት ታና ደምዶሶና፤ ታኒ፥ “ታ ሲቁዋ በእደቲ?” ያጋዳ ኦይቻስ።
SOL 3:4 ኤንታ አጋዳ አꬍዳ መላ ታ ሲቁዋ ደማስ፤ እ ታፐ ከስ ኤኮናዳ ምንꬃዳ ኦይካስ። ታ አየ ሶ ኤፋስ፤ ታ የለትዳ ክፍልያ ገልሳስ።
SOL 3:5 ህንተኖ የሩሳላመ ማጫ ናይቶ፥ ሲቆይ ባዉ ዶስድ ደንዳና ጋካናዉ፥ እያ ህንተ ባርክሶና መላ ታኒ ህንተና ገንኤንነ ዎሽኤን አማታይስ።
SOL 3:6 ዛልአንቾ እፃነዳነ ካርበዳ ሳውያራ፥ ጩያ ቱሱ ዳንያራ፥ ሀና መላ ቢታፈ ያራ እያ ኦኔ?
SOL 3:7 ሄኮ፥ ሶሎሞነ ፓራ ጋርያ ያዉሱ፤ ሄ ፓራ ጋርዉ እስራኤለፐ ዶረትዳ፥ ኡሱፑን ታሙ ዎልቃማ ቶራንቾት አጃብዶሶና።
SOL 3:8 ኤንቲ ኡባይ ማሻ ኦይꬃን ሜዘትዶሶና፤ ኦላንካ ፓጨትዶሶና። ቃማ ጋክያ መቱዋ ተቃናዉ፥ ኤንቲ ማሸ ዳንጭድ ጊግዶሶና።
SOL 3:9 ካዋ ሶሎሞነይ ፓራ ጋረ ግዶን፥ ባዉ ኡትያ አራታ ጊግስስ፤ እያ አራታይ ልባኖሰፐ ይዳ ምꬃን ኦሰትስ።
SOL 3:10 አራታ ቱሳይ ብራን ላንፀትስ፤ ዘምፖይ ዎርቃን አሌቀትስ። ኦይደይ ኦቻ ቴራ ዳንያ ቃጭናን ካመትስ፤ ጋꬃይ የሩሳላመ ጌላኦታ ሲቆን አሌቀትስ።
SOL 3:11 ህንተኖ፥ ፅዮነ ጌላኦቶ፥ ካዋ ሶሎሞነ በአናዉ ሃይተ። እ ዳሮ ኡፋይትዳ እያ ያጋኑዋ ጋላስ እያ አይያ እያ ሁጰን ዎꬅዳ ካላቻ ዎꬅስ።
SOL 4:1 ታ ሲቀ፥ ኔኒ ዋና ሎአይ! ኔኒ ዋንዳ የገልሰ! ነ አይፈት ጉሉንꬃ ግዶራ በእያ ዎደ፥ ሆለዳ ሎኦሶና። ነ ብናናይ ጋላዳ ዙማፐ ዎꬍያ ዴሻ ዉደ ዳኔስ።
SOL 4:2 ነ አቻይ ሜደትድ ሃꬃን ሜጨትዳ፥ ኡባይ መንተ የልያ፥ ኤንታ ግዶን አዉጫየይ ባይና ዶርሳ ዉደ መላ።
SOL 4:3 ነ መተርሻይ ዞኦ ቃጭና ዳኔስ፤ ነ ሃሳያ ዎደ ዳሮ ኡፋይሶሶና። ነ ናምኡ ሻካላይ ጉሉንꬃ ግዶራ ፄልያ ዎደ፥ ናምአ ከስድ ጳልቅዳ ኦሮማነ ዳኖሶና።
SOL 4:4 ነ ቆይ ሎይꬅ ኦꬅዳ፥ እያ ቦላ ኦላንቾታ ጎንዳለይ ደእያ፥ ሙኩሉ ምኖ ኦላንቾታ ጎንዳለይ ካቀትዳ፥ ዳዊታ አዱሳ ግምብያ ዳኔስ።
SOL 4:5 ነ ናምኡ ꬋንꬃት መንተ የለትዳ፥ ሎኦ ጪሻታ ግዶን ምያ ዎሽኤ ማራታ ዳኖሶና።
SOL 4:6 ሳእ ጌያናፐ ስን፥ ꬉማይ ክቻናፐ ስን፥ ካርበ ደርያነ እፃነ ዙማ ባዳ ሸምፓና።
SOL 4:7 ታ ሲቀ፥ ነ አሳተꬃይ ኩመꬅ ሎኦ፤ ነናን ቦረትያባይ ባዋ።
SOL 4:8 ታ ሙሹራተ፥ ልባኖሰፐ ሃያ፤ ጋሞይ ፔእያ፥ ማሄይ አቅያ፥ አማና ዙማፐ፥ ሳንራ ሊጰፐ አርሞና ሁጵያፐ ዎꬋ።
SOL 4:9 ታ ሲቀ፥ ምቾ ግድዳ ታ ሙሹራተ፤ ነ አይፍያ ፄሎይነ ነ ቆꬍያ አሌቆይ፥ ታ ዎዛና ኡፋይሳን ጎሽስ።
SOL 4:10 ታ ሲቆ ምቾ ግድዳ ታ ሙሹራተ! ነ ሲቆይ ታና ዋን ኡፋይስ! ነ ሲቆይ ዎይነ ኡሻፈ አꬍድ ኡፋይሴስ፤ ነ ሽቶይ ኡባፈ አꬍድ ሳዌስ።
SOL 4:11 ታ ሙሹራተ፥ ነ መተርሻፈ እልሎ ኤስ ፆኬስ፤ ነ ዶናፐ ኤስነ ማꬅ ፑልቴስ፤ ነ ማኦይ ልባኖሰ ሽቶዳ ሳዌስ።
SOL 4:12 ታ ሲቆ ምቾ ግድዳ ታ ሙሹራተ፥ ነ ዩሾይ ድረትድ ናገትያ አታክልተ በሳ መላ፤ ነ ሀራታስ ጎርደትዳ፥ ታዉ ዶየትዳ ፑልቶ መላ።
SOL 4:13 ኔኒ አታክልተ ግዶን፥ ኦሮማነይ፥ ዶረትዳ አታክልተ አይፈት፥ ናርዶሰ ጌተትያ አይፈት ደእያ በሳ መላ።
SOL 4:14 ናርዶሰይ፥ ላደይ፥ ሳውያ ማት፥ ቃራፍን፥ እፃናዳ ሳውያባት ደኦሶና። ካርበይ፥ ጎዳረ ኡꬃ ጪሽነ ዱማ ዱማ ቅማመ አታክልተት ዶሎሶና።
SOL 4:15 ኔኒ አታክልተ በሳ ኡሽያ ፑልቶ መላ፤ ደኦ ሃꬅ በንትያ ኦላ መላ፤ ልባኖሰ ዙማፐ ጎግያ ሻፋ መላ።
SOL 4:16 ፑደሀ ባጋ ጫርኩዋዉ፥ ደንዳ! ዱገሀ ባጋ ጫርኩዋዉ፥ ሃያ! ታ አታክልትያ ቦላ ጫርካ! እያ ሳዎይ ቶንኩ ጎ። ታ ሲቆይ ባ አታክልትያ ግዶ ዮ፤ ዳሮ ማልእያ አይፈታ ሞ።
SOL 5:1 ታ ምቸ፥ ታ ሙሹራተ፥ ታኒ ታ አታክልትያ ግዶ ገላስ። ታ ካርብያነ ታ ሽቶ ጪሻ ቆራስ፤ ታኒ ኤሳ ኡይꬅ ማስ፤ ታ ዎይንያነ ታ ማꬃ ኡያስ። እያ ላገቶ፥ ሚተ ኡይተ፤ ሲቆ አላና ጋካናዉ ኡይተ።
SOL 5:2 ታኒ ꬍስካስ፤ ሽን ታ ዎዛናይ ባርክስ፤ ታ ሲቆይ ሀይሳዳ ያግድ ፐንግያ ቆንክሽን ስአስ። “ታ ምቸ፥ ታ ሲቀ፥ ታ የገልሰ፤ ቦረይ ባይና ታ ሆለ፥ ታዉ ፐንግያ ዶያ። ታ ሁጰይ አካን ላክስ፤ ታ ብናናይ ቃማ ፑሰን እርፅስ።”
SOL 5:3 ታ ማኡዋ ቃራስ፥ ዛራዳ ማኦዬ? ታ ቶሁዋ ሜጨታስ፥ ዛራዳ ቅታዮዬ?
SOL 5:4 ታ ሲቆይ እብꬃ ፆኤራ ባ ኩሽያ ሶ የድስ፤ ታ ዎዛናይ እያ ግሾ ሴሌስ።
SOL 5:5 ታ ሲቁዋስ ዶያናዉ ደንዳስ፤ ፐንግያ ዶያናዉ ኮብያ ኦይክያ ዎደ፥ ታ ኩሽያፐ ካርበይ፥ ታ ብራꬍያፈ ሽቶይ ፆኬስ።
SOL 5:6 ታ ሲቁዋስ ካርያ ዶያስ፥ ሽን እ ዴና፤ እያ ቃላ ስአናዉ ዳሮ አሞታስ። ምንꬃዳ ኮያስ፥ ሽን እያ ደማብከ፤ ፄጋስ፥ ሽን ታዉ ኮይቤና።
SOL 5:7 ካታማ ናገይሳት ታና ደምድ፥ ዋꬍዶሶና፤ ማዱንፅስዶሶና። ካታማ ድርሳ ናገይሳት፥ ታ ላፃና ቃር ኤክዶሶና።
SOL 5:8 ህንተኖ፥ የሩሳላመ ጌላኦቶ፥ ታ ሲቁዋ ደምኮ፥ ታኒ እያ ሲቁዋን ሀርግዳይሳ፥ ሀዳራ እያዉ ኦድተ።
SOL 5:9 ነኖ፥ ማጫሳ ኡባፈ ሎእያራ፥ ነ ላገይ ሀራታፐ ዋንድ ዱማቲ? ኔኒ ኑና ሀዳራ ገይ፥ እ ሀራታፐ አይብን ዱማቲ?
SOL 5:10 ታ ሲቆይ ማላ ሎኦነ አያንታ፤ ታሙ ሙኩሉ አደታ ግዶን እያ መል ባዋ።
SOL 5:11 እያ ሁጰይ አልኦ ዎርቃ ዳኔስ፤ እያ ብናናይ ሎኦነ ቁሮ መላ ካሬꬅ።
SOL 5:12 እያ አይፈይ ሻፋ ማታን ኤቅዳ፥ ማꬃን ሜጨትዳ ሆለታ ዳኔስ።
SOL 5:13 እያ ሻካላይ ሳውያ ቅማመይ ቶከትዳ ማዳበዳ ሎኤስ፤ እያ መተርሻይ ካርበ ሽቶይ ፆክያ ዎራ ጪሻዳ ሎኤስ።
SOL 5:14 እያ ቀሰይ አልኦ ሹቻን አሌቀትዳ ዎርቃ ፃምአዳ ሎኤስ፤ እያ አሳተꬃይ ሳንፓረ አልኦ ሹቻን አሌቀትዳ ዳንጋርሳ ዛለ መላ።
SOL 5:15 እያ ቶሆት ዎርቃ ባሶን ኤቅዳ ሳሎ ሹቻ ቱስ ዳኖሶና፤ እያ ማላይ ዝጋን አሌቀትዳ ልባኖሰ ዙማ መላ።
SOL 5:16 እያ ዶናይ ኤሳዳ ማልኤስ፤ እያ ኩመꬃ አሳተꬃይ ሎኤስ። ህንተኖ የሩሳላመ ጌላኦቶ፥ ታ ሲቆይነ ታ ላገይ ሀይሳ ዳነስ።
SOL 6:1 ማጫሳ ኡባፈ ሎእያረ፥ ነ ላገይ አዉ ብዴ? ኑ ኔራ ኮያና መላ እ ብዳ ግና ኑስ ኦዳ።
SOL 6:2 ታ ሲቆይ ዶርሳ ዉደ ሄማናዉ፥ ሎኦ ጪሻ ሺሻናዉ፥ ሽቶ ማታይ ደእያ አታክልትያ ግዶ ብስ።
SOL 6:3 ታኒ ታ ሲቁዋባ፤ ታ ሲቆይ ታባ፤ እ ሱፈ ጪሻ ግዶን ዉደ ሄሜስ።
SOL 6:4 ታ ሲቀ፥ ነ ትርሳ ካታሜዳ ሎኣሳ፤ የሩሳላመዳ ዳሮ ሎኣሳ። ባንድራ ኦይክድ ሳልፕያ፥ ኦላንቾዳ ያሻሳ።
SOL 6:5 ኤንቲ ታና ኡንኤꬅዳ ግሾ፥ ሀያና ነ አይፍያ ታፐ ደንꬃ። ነ ብናናይ ጋላዳ ዙማፐ ዎꬍያ፥ ዴሻ ዉደ ዳኔስ።
SOL 6:6 ነ አቻይ ሜጨትድ ከይያ፥ ኡባይ መንተ የልያ፥ ኤንታ ግዶን አዉጫየይ ባይና ዶርሳ ዉደ መላ።
SOL 6:7 ነ ናምኡ ሻካላይ ጉሉንꬃ ግዶራ ፄልያ ዎደ፥ ናምኡ ከስድ ጳልቅዳ ኦሮማነ ዳኖሶና።
SOL 6:8 ኡሱፑን ታሙ ማጫ ካዎት፥ ሆስፑን ታሙ ላገꬆት፥ ታይቦይ ባይና ጌላኦት ደኦሶና።
SOL 6:9 ሽን ቦረይ ባይና ታ ሆልያ ታዉ ዱማ፤ እያ ባ አየስ እስኖ። እዮ የልዳ አይያ ኡባፈ አꬃዳ እዮ ዶሳዉሱ፤ ጌላኦት እዮ በእድ፥ “ሀና አንጀትዳሮ” ያጎሶና፤ ማጫ ካዎትነ ላገꬆት እዮ ሳቦሶና።
SOL 6:10 ሀና ዎንታ ፃልቀዳ ዶልያራ፥ አጌናዳ ፖእያራ፥ ፃልቀዳ ጫድያራ፥ ባንድራ ኦይክድ ሳልፐ ከይዳ፥ ኦላንቾዳ ያሽያራ ሀና ኦኔ?
SOL 6:11 ታኒ ዛንጋራን ቶከትዳ ምꬃታ በአናዉ፥ ዎይነይ አጭዳኮ ኦሮማነይ አይፍዳኮ ፄላናዉ፥ ዱገ ኦቾሎነ ጋደ ዎꬋስ።
SOL 6:12 ታ ቆፖና ደእሽን ታ አሞይ ታና ኤፍድ፥ ካዋ አሳ ፓራ ጋረታ ግዶን ታና ኡትስስ።
SOL 6:13 ነኖ ሱላማፐ ይዳረ፥ ሃያ፤ ሃ ስማ፤ ኑ ነና ሎይꬅድ ፄላና መላ ሃ ስማ። ዳሮ አሳ ስንꬃን የፅያ አሳዳ፥ ታና አይስ ፄሌቲ?
SOL 7:1 ካዎ ናአዳ ሎእያረ፥ ላፃና ጫማ አꬅዳ ነ ቶሆት ዋን ሎእ! ነ ሼቸይ ሂላንቾይ ቆፅድ፥ አሌቅስዳ አልኦ ሹቹ ዳኔስ።
SOL 7:2 ነ ጉልአይ ዎይነይ ኩምዳ ብርለ ዳኔስ፤ ነ ፄሳ ዩሾይ ጪሻን ቃሸትዳ ግስተ ምርቀ ዳኔስ።
SOL 7:3 ነ ꬋንꬃት መንተ የለትዳ፥ ገንኤ ማር ዳኖሶና።
SOL 7:4 ነ ቆይ ዳንጋርሳ ዛለን አሌቀትዳ አዱሳ ሻኮ መላ። ነ አይፈይ ግታ ሀሰቦና ካታማ ፐንግያ ማታን፥ ደእያ ዜሮ ሃꬃ ዳኔስ። ነ ሲይ ዳማስቆኮ ዛሪድ ግምብዳ፥ ልባኖሰ ግምብያ ዳኔስ።
SOL 7:5 ነ ሁጰይ ቃርመሎሳ ዙማ ዳኔስ፤ ነ ብናናይ ቃጭና ፃꬅ ዳኔስ፤ ነ ሁጵያ ዳꬃይ ካዋ ኡፋይሴስ።
SOL 7:6 ታ ሲቀ፥ ነ ዋና ሎአይ! ነ ዋንዳ የገልሰ! ነ ሲቆይ ታና ዋን ኡፋይስ!
SOL 7:7 ነ ጌሳይ ዛምባ ዳኔስ፤ ነ ꬋንꬃይ ዛምባ ሞርኤ ዳኔስ።
SOL 7:8 ታኒ፥ “ዛምባ ቦላ ከያና፤ እያ አይፍያ ማፃና” ያጋስ። ነ ꬋንꬃይ ዎይነ ሞርኤ መላ፤ ነ ሲꬍያራ ከያ ፔኖይ አፕለዳ ሳዌስ።
SOL 7:9 ነ ዶናፐ ከይያ ፔኖይ ሎኦ ዎይነ መላ። ህዛ ሎእያ ዎይነ ኡሻይ፥ ነ ሲቀ መተርሻፈነ አቻፈ ግዶራ፥ ለፕ ግድ ጎጎ።
SOL 7:10 ታኒ ታ ሲቁዋባ፤ እካ ታና አሞቴስ።
SOL 7:11 ታ ሲቁዋዉ፥ ሃያ፤ ካታማፐ ከይድ ጋፃረ ቦስ፤ ናምአይ ቃማ ያን አꬃና።
SOL 7:12 ዎንታ ጉራ ዎይነ አታክልትያ ግዶ ቦስ፤ ዎይነይ ጪይዳኮ፥ አይፈ አꬅዳኮ፥ ኦሮማነይ አይፍዳኮ አነ በኦስ። ታኒ ታ ሲቁዋ ነና ያን በሳና።
SOL 7:13 እንኮየ አይፈ ሳዎይነ ዱማ ዱማ ኡፋይስያ አታክልተ አይፈይ ኑ ካረን ኩምስ። ታ ሲቁዋዉ! ሀ አይፈታፐ ቴርዳይሳነ ኦራꬅ ማፅዳይሳ ነዉ ዎꬃስ።
SOL 8:1 ነ ታዉ ታ አየ ꬋንꬅ ꬋምዳ ታ እሻ ግድዳኮ አይበ! ታ ነና ኦገን ደማዳ ዬርዳኮ፥ ታና ኦንካ ቦረናሽን።
SOL 8:2 ታኒ ነና ካለꬃዳ፥ ታና ታማርስዳ ታ አየ ሶ ገልሳርክናሽን። ማልእያ ኦሮማነ ጉምኤꬃነ ሎእያ ዎይነ ኡሻ ታ ነና ያን ኡሻርክና።
SOL 8:3 ታና ነ ሀድርሳ ኩሸይ ቦርኮትሴስ፥ ነ ኡሻቻ ኩሸይ ታና ቆመስ።
SOL 8:4 ህንተኖ፥ የሩሳላመ ጌላኦቶ፥ ታ ሲቆይ ባ ዎደ ደንዳና ጋካናዉ፥ ኮይሮትድ ህንተ እያ ደንꬆናዳ ሀዳራ ጋይስ።
SOL 8:5 ባ ሲቁዋ ሀሸን ዘምፓዳ፥ መላ ቢታፈ ያራ ሀና ኦኔ? በን ነ አይያ ነና እቀታዳ የልዳ፥ አፕለ ምꬃ ጋርሳን ነ ዝንእዳሽን፥ ነና ታ ባርክሳስ።
SOL 8:6 መርና ሲቁዋን ታና ነ ዎዛናን አታማ፤ ነ ቀስያን ማታመዳ ታ ፃላላ ኦይካ። ሲቆይ ሀይቆ መላ ምኖ፤ ቃናተይ ስኦለ መላ ኢታ፤ እያ ላጮይ ፆሳ ታማ ላጮ መላ።
SOL 8:7 ዳሮ ሃꬅ ሲቆ ታማ ቶይሳናዉ ዳንዳኤና፤ ድኦይካ ሜጭድ ኤፋናዉ ዳንዳኤና። አስ ሲቆ ሻማናዉ ባዉ ደእያ ኡባ እምኮካ፥ ሲቆይ ሚሸን ሻመቶና ግሾ፥ አስ እያ ካꬌስ።
SOL 8:8 ꬋንꬅ ትራን ኡትቦና ምቻ ኑስ ደአዉሱ፤ አዝን እዮ ኦይችኮ፥ ኑ እዉ አይ ኦꬃኔ?
SOL 8:9 እያ ግምበ ድርስ ግድያኮ፥ ኑኒ እ ቦላ አዱሳ ብራ ግምበ ግምባና፤ እያ ድርሳ ፐንገ ግድያኮ ዝጋ እብ መꬋና።
SOL 8:10 ታኒ ድርሳ ግምበ፤ ታ ꬋንꬃይ ግምበ ቦላ ደእያ ሻኮ መላ፤ ታኒ ታ ሲቁዋራ ደእያ ዎደ እ ታናን ኡፋይቴስ።
SOL 8:11 ሶሎሞነስ ባኣል-ሀሞናን ዎይነ ጋደይ ደኤስ፤ ሄ ዎይነ ጋድያ ኡነ ኦይሳታስ እሚስ። ከራ ኤክዳይሳት አይፍያ ግሾ፥ እሶይ እሶይ ሙኩሉ ብራ እያዉ ኤሆሶና።
SOL 8:12 ሽን ታዉ ታ ቡዞ ዎይነ ጋደይ ደኤስ፤ ሶሎሞነ፥ ኔኒ ሙኩሉ ብራ ኤካ፤ ኡነ ኤክድ ኦይሳት ናምኡ ፄቱ ብራ ኤኮ።
SOL 8:13 ነኖ፥ አታክልትያ ግዶን ደእያ ታ ሲቀ፥ ነ ላገት ነ ቃላ ስአናዉ ኮዮሶና፤ ነ ቃላ ታናካ ስሳ።
SOL 8:14 ታ ሲቁዋዉ፥ ታኮ ኤለ ያ! ሽቶ ማታይ ዶልያ ደረታ ቦላራ፥ ጉፕያ ገንኤ ዎይኮ ዎሽኤ ማራዳ ሀና።
ISA 1:1 ኦዝያን፥ እዮአታም፥ አካዝነ ህዝቅያስ ይሁዳን ካል ካልድ ካዎትዳ ዎደ አሞፀ ናአይ እሳያስ ይሁዳባነ የሩሳላመባ በእዳ ቆንጨꬃይ ሀይሳ።
ISA 1:2 ሳሎቶ ስእተ፤ ሳአዉ ሀይዛ ስአ፤ ጎዳይ ሀይሳዳ ያጌስ፤ “ታ ናይታ የላዳ ድቻስ፤ ሽን ኤንቲ ታዉ ማካልዶሶና።
ISA 1:3 ቦር ባ ጎዳ ኤሬስ፤ ሀረይካ ባና ሃርዳይሳ ዛዳሉዋ ኤሬስ። ሽን እስራኤለይ ኤረና፤ ታ አሳይ አኬከና።
ISA 1:4 ህንተኖ፥ ናጋራንቾ ካዎተꬃቶ፥ ባላ ኦሶን ዴፅዳይሳቶ፥ ኢታ ኦꬅያ የለተꬃቶ፥ ቱና ኦሶስ እመትዳ ናይቶ፥ ጎዳ አግዳይሳቶ፥ ህንተና አየ! እስራኤለ ጌሻ ካꬍደታ፤ እያዉ ዞኮ ዛርደታ።
ISA 1:5 ማካላ ቦላ ማካላ አይስ ጉጄቲ? አይስ ዛር ዛር ሾጨቴቲ? ህንተ ሁጰይ ሀርገትስ፤ ህንተ ዎዛናይ ዳቡርስ።
ISA 1:6 ሁጰ ብናናፐ ቶሆ ፁጉንꬅ ጋካናዉ ፓያተꬅ ባዋ፤ ማዱንꬅ፥ ክፅነ ꬉስ ማእስ። ኤንቲ ጊይቦኮና፥ ዎይኮ ሜጨትድ ቃሸትቦኮና ዎይኮ ዛይተን ትየትድ ሎፅክቦኮና።
ISA 1:7 “ህንተ ቢታይ ኦፅስ፤ ህንተ ካታማት ታማን ፁገትዶሶና። ህንተ በእሽን ህንተ ጎሻ አላጋት ኤካና፤ እማꬃ አሳት ህንተ ቢታ ቁኤ ከሳና።
ISA 1:8 የሩሳላመይ ዎይነ ጋደን ደእያ ሻቃራዳ፥ ሌሄ ግዶን ደእያ ጋባዳነ ሞርከን ተቀትዳ ካታማዳ ሀናዳ አታና።
ISA 1:9 ኡባፈ ዎልቃማ ጎዳይ ኑስ ጉꬃ ኮቸ አሾናኮ ኑኒ ሶዶመነ ጋሞራ ካታማዳ ሀናናሽን” ያግስ።
ISA 1:10 ህንተኖ፥ ሶዶመ ሀላቃቶ፥ ጎዳ ቃላ ስእተ! ህንተኖ፥ ጋሞራ አሳዉ፥ ኑ ፆሳ ህግያ ስእተ!
ISA 1:11 “ህንተ ያርሾ ዳሮይ ታዉ አይ ኦꬂ? ሀኖ ጋካናዉ ህንተ ታዉ ሺሽዳ ኡርገ ዶርሳነ ሞꬎ መሄ ፁሳ ያርሾይ ታዉ ግዳና። ታኒ ኮርማታ፥ ዶርሳ ኡርገታነ ዴሻታ ሱꬃን ኡፋይትከ።
ISA 1:12 ህንተ ታ ስንꬃን በንታናዉ ያ ዎደ ታ ኬꬃ ዳባባ ህንተ የꬋና መላ ኦነ ኦይችዳይ?
ISA 1:13 ሀዳ ያርሹዋ ኤሄይሳ አግተ! ህንተ ጩይስያ እፃነይ ታና ሻቴስ። አጌና ፄሮን ህንተ ቦንችያ ጋላሳ፥ ሳምባታነ ኢታተꬃን ህንተ ሺቅያ ሺቁዋ ታኒ እፃይስ።
ISA 1:14 አጌና ፄሮን ህንተ ቦንችያ ጋላሳነ ህንተ ባኣለ ጋላሳታ ታኒ እፃስ፤ ኤንቲ ታዉ ቶሆ ግድዶሶና፤ ታኒ ኤንታ ቶካናዉ ዳንዳእከ።
ISA 1:15 ህንተ ኩሸ ምጭድ ታና ዎስያ ዎደ ታኒ ታ አይፍያ ህንተፈ ገንꬃና። ህንተ ኩሸይ ሱꬃን ኩምዳ ግሾ ህንተ ዳርስ ዎስኮካ ታኒ ስእከ።
ISA 1:16 ሜጨትተ፤ ህንተና ጌሽተ፤ ህንተ ኢታ ኦሱዋ ታ ስንꬃፈ ድግተ፤ ገነ ሀኑዋ አግተ።
ISA 1:17 ሎኦባ ኦሶ ታማርተ፤ ፅሎ ፕርዳ ኮይተ። ኡንኤትዳይሳታ አሽተ፤ ይኦታስ ኤቅተ፤ አምኤታስ ሞተትተ” ያጌስ ጎዳይ።
ISA 1:18 “ሃይተ፤ አነ ዎል አማንꬆስ። ህንተ ናጋራይ ባራ ቢታዳ ዞእኮካ፥ ሻቻዳ ቦፃና፤ ሱꬃዳ ዞእኮካ ፑቶዳ ቦፃና።
ISA 1:19 ህንተ ኤሮ ግድ ታዉ ኪተትኮ ቢታ አንጁዋ ማና።
ISA 1:20 ሽን ህንተ እፃስ ግድ ማካልኮ፥ ማሻን ሜተታና” ያጌስ ጎዳይ ባ ዶናን።
ISA 1:21 አማነትዳ ካታምያ ዋናዳ ላይማ ግዳዴ? ካሰ ሱረተꬅነ ፅሎተꬅ እ ግዶን ኩምስ፥ ሽን ሀእ ሸምፖ ዎይሳት እ ግዶን ደኤስ።
ISA 1:22 ነ ብራይ ባልትስ፤ ነ ማልኦ ዎይነይ ሃꬃን የለትስ።
ISA 1:23 ህንተ ሀላቃት ማካላንቾታነ ካይሶ ላገ ግድዶሶና፤ ኤንቲ ኡባይ ዎꬋፈ ዶሰይሳታነ ኩሸ ፄለይሳታ። ይኦታስ ሱረ ፕርዶኮና፤ አምኤታ ዋሱዋ ስኦኮና።
ISA 1:24 ሄሳ ግሾ፥ ጎዳይ፥ ኡባፈ ዎልቃማ ፆሳይ፥ እስራኤለ ዎልቃማይ፥ ሀይሳዳ ያጌስ፤ “ሀእ ታኒ ታ ሞርከታ ቦላ ታ ሀንቁዋ ጉሳና፤ ታራ ኤቀተይሳታ ሀሎ ከያና።
ISA 1:25 ታኒ ታ ኩሽያ ነ ቦላ ዛራና፤ ነ ባልተꬃ ጌሻና፤ ነ ቱናተꬃ ኡባ ኔፐ ድጋና።
ISA 1:26 ታኒ በንይሳዳ ነ ሀላቃታ፥ ኮይሮይሳዳ ነ ዞራንቾታ ደንꬃና። ሄሳፈ ጉየ፥ ኔኒ አማነትዳ ቢታ፤ ፅሎተꬃ ካታማ ጌተታና” ያጌስ።
ISA 1:27 ፅዮነይ ሱረ ፕርዳን፥ ባንታ ናጋራ ፓፀይሳትካ ፅሎተꬃን ዎዘታና።
ISA 1:28 ሽን ማካላንቾትነ ናጋራንቾት እስፈ መቃና፤ ጎዳ አገይሳት ꬋያና።
ISA 1:29 ህንተ ኡፋይትዳ ያርሾ ዎላን ዬላታና፤ ህንተ ዶርዳ ኮራን ካዉያና።
ISA 1:30 ህንተ ሀይꬅ ቆቆፈትድ ዉርዳ ዎላዳነ ሃꬅ ꬋይዳ አታክልተ በሳዳ ግዳና።
ISA 1:31 ባና ምኖ ገይ ቡፃ ግዳና፤ እያ ኦሶይካ ፖልኡ ግድ ቶእያ ታማ ግዳና፤ ኤንቲ እስፈ ፁገታና፤ ሄ ታማ ቶይሳና አስ ባዋ።
ISA 2:1 አሞፀ ናአይ እሳያስ ይሁዳባነ የሩሳላመባ በእዳይስ ሀይሳ።
ISA 2:2 ዉርሰꬃ ጋላሳታን ጎዳ ኬꬃይ ኬፀትዳ ዙማይ፥ ዙማታ ኡባፈ ꬎቁ ግድ በንታና፤ ዙማ ኡባፈ ቦላራ ꬎቁ ጋና። ካዎተꬃት ኡባይ እያኮ ባና።
ISA 2:3 ህገይ ፅዮነፐ፥ ጎዳ ቃላይ የሩሳላመፐ ከይያ ግሾ፥ ዳሮ አሳይ ይድ፥ “አነ ሃይተ! ጎዳ ዙማኮ፥ ያይቆባ ፆሳ ኬꬃኮ ከዮስ። ኑኒ እያ ኦግያን ባና መላ እ ኑና ባ ኦግያ ታማርሳና” ያጋና።
ISA 2:4 እ ካዎተꬃታ ግዶን ፕርዳና፤ ዳሮ አሳታ ፓላማ ሻካና። ኤንቲ ባንታ ማሻ ማራሻ፥ ባንታ ቶራ ባጫ ከሳና። ካዎተꬃት ካዎተꬃታ ቦላ ማሻ ደንꬆኮና፤ ህዛፐ ኤንቲ ኦላ ትምርተ ታማሮኮና።
ISA 2:5 ህንተኖ፥ ያይቆባ ኮቻቶ፥ ሃይተ! አነ ጎዳ ፖኡዋን ሄመቶስ።
ISA 2:6 ጎዳዉ፥ ነ አሳ፥ ያይቆባ ኮቻታ አጋዳሳ። ኤንቲ ዶሎሀ ባጋ አሳ ብታንነ ፍልስፄመ አሳ ሙሩኑዋን ኩምዶሶና፤ አላጋ አሳራ እስፍዶሶና።
ISA 2:7 ኤንታ ቢታን ብርነ ዎርቀይ ኩምስ፤ ኤንታ ሚሽያስ ዛው ባዋ። ኤንታ ቢታን ፓር ኩምስ፤ ኤንታ ፓራ ጋርያስ ዛው ባዋ።
ISA 2:8 ኤንታ ቢታን ኤቅ ኩምዶሶና፤ ኤንቲ ባንታ ኩሸ ኦሱዋ ጎይኖሶና።
ISA 2:9 ሄሳ ግሾ፥ አሳ ኡባይ ቶሸታናነ ካዉያና። ኤንታ ናጋራ አቶ ጎፓ።
ISA 2:10 ጎዳ ዳጋንꬁዋፈነ ያሽያ ቦንቹዋፈ አታናዉ ዛላኮ ቢተ፤ ቢታ ግዶን ቆሰትተ!
ISA 2:11 ኦቶራንቾት ካዉያና፤ ጬቀተይሳት ጉፃና፤ ሄ ጋላስ ጎዳ ፃላል ꬎቁ ꬎቁ ጋና።
ISA 2:12 ኡባፈ ዎልቃማ ጎዳይ፥ እስ ጋላስ ኦቶራንቾታ፥ ጬቀተይሳታነ ባንታና ꬎቁ ꬎቁ ኦይሳታ ካዉሻና።
ISA 2:13 አዱሳ ልባኖሰ ዝጋታነ ባሳና ዎላ ኡባ ꬋይሳና፤
ISA 2:14 ꬎቃ ደረታነ ዙማታ ደምባያና።
ISA 2:15 ካታማ ናግያ አዱሳ ሻኮታነ ምኖ ድርሳ ግምበታ ዝቅ ኦꬃና።
ISA 2:16 ጎዳይ ግታነ ሎኦ ማርካበታ ሃꬃን ምትሳና።
ISA 2:17 አሳ ኦቶሮይ ዝቅ ጋና፤ እያ ጬቀተꬃይ ꬋያና። ሄ ጋላስ ጎዳ ፃላል ꬎቁ ꬎቁ ጋና።
ISA 2:18 ኤቃ ኡባይ ፖሎ ꬋያና።
ISA 2:19 ጎዳይ ቢታ ቃꬃናዉ ደንድያ ዎደ እያ ዳጋንꬁዋፈነ እያ ያሽያ ቦንቹዋፈ አታናዉ አሳይ ሹቻ ጎንጎሎንነ ቢታ ኦላን ቆሰታና።
ISA 2:20 ሄ ጋላሳይ አሳይ ጎይናናዉ መꬍዳ ባንታ ብራ ምስለታነ ባንታ ዎርቃ ምስለታ ግሮታስነ ሽርሽቆታስ የጋና።
ISA 2:21 ጎዳይ ቢታ ቃꬃናዉ ደንድያ ዎደ እያ ዳጋንꬁዋፈነ እያ ያሽያ ቦንቹዋፈ አታናዉ ኤንቲ ጎንጎሎ ግዶነ ሹቻ ዛኦ ግዶ ባቃታና።
ISA 2:22 ህዛ ሸምፖይ ሲን ደእያ፥ ሀ ሀይቅያ አሳን አማነቶፍተ። አስ አይ ማዲ?
ISA 3:1 ሄኮ፥ ጎዳይ፥ ኡባፈ ዎልቃማ ፆሳይ፥ ምንጃነ ማዶ ኡባ፥ ካꬃ ምንጃነ ሃꬃ ምንጃ ኡባ የሩሳላመፐነ ይሁዳፐ ድጋና።
ISA 3:2 ምኖታነ ኦላንቾታ፥ ዳይናነ ናብያ፥ ብተይሳነ ጭማ፥
ISA 3:3 ቶራ ሞጮናነ ደርያ አይሰይሳ፥ ዞረይሳ፥ ሂላንቹዋነ ቃራ ማሮታ ኡባ ድጋና።
ISA 3:4 ታኒ ዮጋ ናይታ ኤንታ ሀላቃ ኦꬃና፤ ጉꬃ ናይት ኤንታ ሃራና።
ISA 3:5 አሳይ አሳ ቦላ፥ ሾሮይ ሾሩዋ ቦላ ደንድድ፥ እሶይ እሱዋ ሱጋና። ናአተꬃይ ጭማ ቦላ፥ ካትዳይስ ቦንቸትዳይሳ ቦላ ደንዳና።
ISA 3:6 እስ አስ ባ አዋ ኬꬃን ደእያ ባ እሻታፐ እሱዋ ኦይክድ፥ “ነዉ ማኦይ ደኤስ፤ ኔኒ ኑስ ሀላቃ ግዳ፤ ሀ ላለትዳ በሳ አዋተꬃን ኤካ” ያጋና።
ISA 3:7 ሄ ጋላስ፥ እ ባ ቃላ ꬎቁ ኦꬅድ፥ “ታኒ ማድከ፤ ታ ሶን ካꬅ ዎይኮ ማኦይ ባዋ፤ ህንተ ቦላ ታና ሹሞፕተ” ያጋና።
ISA 3:8 የሩሳላመይ ጋንድጋራሱ፤ ይሁድ ኩንዳናዉ ማታሱ፤ ኤንቲ ባንታ ኦዳንነ ባንታ ኦሱዋን ጎዳ ቦላ ደንድድ፥ እያ ቦንቹዋ ቶችዶሶና።
ISA 3:9 ኤንታ ሶምኦይ ኤንታ ቦላ ማርካቴስ፤ ኤንቲ ባንታ ናጋራ ሶዶመ አሳ መላ አዋጆሶና፤ ባንታ ናጋራ ቆቶኮና። ኤንቲ ባንታ ቦላ ꬋዮ ኤህዳ ግሾ ኤንታ አየ!
ISA 3:10 ኤንቲ ባንታ ኦሱዋ አይፍያ ማና ግሾ፥ ፅሎታስ ሎኦ ግዳና ጋዳ ኦዳ።
ISA 3:11 ኤንቲ ባንታ ኩሸ ኦሱዋ ጋትያ ኤካና ግሾነ ꬋዮይ ኤንታ ቦላ ይዳ ግሾ ኢታታ አየ!
ISA 3:12 ናአተꬃት ታ አሳ ኡንኤꬆሶና፤ ማጫሳት ኤንታ ሃሮሶና። ታ አሳዉ፥ ህንተና ካለይሳት ባለꬆሶና፤ ህንተ ብያ ኦግያፐ ካረ ከሶሶና።
ISA 3:13 ጎዳይ ባ አራታን ኡትስ፤ አሳ ቦላ ፕርዳናዉ ጊገትስ።
ISA 3:14 ጎዳይ ደርያ ጭማታነ ካለይሳታ ፕርዳናዉ ሺሽድ፥ “ታ ዎይነ ጋድያ ꬋይስዳይ ህንተና፤ ማንቆታፐ ቦንቅዳይስ ህንተ ሶን ደኤስ።
ISA 3:15 ህንተ ታ አሳ አይስ ትንቸረቲ? ማንቆታ ሶምኡዋ አይስ ካሬቲ?” ያጌስ ኡባፈ ዎልቃማ ጎዳይ።
ISA 3:16 ጎዳይ፥ “ፅዮነ ማጫሳት ኦቶርትዶሶና፤ ባንታ ቆꬍያ አዱስድ፥ ባንታ አይፍያን ቃምኦቶሶና፤ ባንታ ሄመꬃ ላምድ፥ ባንታ ቶሆ አልቡዋ ጊርስሸ ሄመቶሶና።
ISA 3:17 ሄሳ ግሾ፥ ጎዳይ ፅዮነ ማጫሳ ሁጵያ ꬉሳን ኩንꬃና፤ ጎዳይ ኤንታ ሁጵያ ቦአያና” ያጌስ።
ISA 3:18 ሄ ጋላስ ጎዳይ ፅዮነ ማጫሳ አሌቆታ፥ ሄስካ፥ ቶሆ አልቡዋ፥ ሻሽያ፥ ቆ ዎርቃ፥
ISA 3:19 ሀይꬃ ዎርቃ፥ ኩሸ አምባረ፥ ሶምኦ ካማ፥
ISA 3:20 ሁጰ ካማ፥ ቀሰ ሳንꬃላታ፥ ዳንጩዋ፥ ሽቱዋ፥ ጎዝዳ፥
ISA 3:21 ሲ ዎርቃ፥ ብራ ምግዱዋ፥
ISA 3:22 ኮይሰ ማኡዋ፥ አዱሳ ማኡዋ፥ ካባ፥ ቦርሳ፥
ISA 3:23 ማስቶትያ፥ ሊኑዋ፥ ሁጰ አሌቆታ፥ ሻርብያ ኡባ ኤንታፈ ኤካና።
ISA 3:24 ሽቶ ግሾ ፅንቆ፥ ዳንጮ ግሾ ዎዶሮ፥ ጎፋረ ግሾ ቦአ፥ ኮይሰ ማኦ ግሾ ካዮ ማኦ፥ ሎኦተꬃ ግሾ ቤታ ግዳና።
ISA 3:25 ነ አሳት ማሻን፥ ነ ኦላንቾት ኦላን ሀይቃና።
ISA 3:26 ፅዮነ ፐንገት ዬካናነ ዘሌላና፤ ካዮታዳ ሳአን ኡትዳ ማጫሳዳ ሀናና።
ISA 4:1 ሄ ጋላስ ላፑን ማጫሳት እስ አደ ኦይክድ፥ “ኑኒ ኑ ካꬅ ማና፤ ኑ ማኦ ማአና። ነ ሱንꬃን ፄገታና መላ ኦꬃዳ ኑ ካዉሻ ኑፐ ድጋርኪ?” ያግድ ዎሳና።
ISA 4:2 ሄ ዎደ ጎዳ ታሸይ፥ ሎአናነ ቦንቸታና፤ አትዳ እስራኤለ አሳስ ቢታ ካꬃይ ጬቆነ ቦንቾ ግዳና።
ISA 4:3 ፅዮነን አትዳይሳት፥ የሩሳላመን ꬋዮፐ ከስ ኤክዳይሳትነ ደኦስ ፃፈትዳይሳት ጌሻታ ጌተታና።
ISA 4:4 ጎዳይ ፅዮነ ማጫሳ ቅታ ሜጫና፤ ባ ፕርዳንነ ባ አያና ታማን ሱꬃ ጉሶ የሩሳላመፐ ድጋና።
ISA 4:5 ጎዳይ ፅዮነ ዙማ ቦላነ ያን ሺቅያ ኡባ ቦላ ጋላስ ሻራ ጩያነ ቃማ ታማ ላጮ መꬋና፤ እያ ቦንቾ ኡባ ቦላ ካማ ግዳና።
ISA 4:6 እ፥ ጋላሳ ምሻፐ አሽያ ኩያነ ኡሾፐነ እራፐ ቆሰትያ በሰ ግዳና።
ISA 5:1 ታ ዶስያ አድያ ዎይነ ጋድያባ፥ ሲቆ የꬅ የፃና። ታኒ ዶስያ አድያስ፥ አራዳ ዙማ ቦላ እያዉ ዎይነ ጋደይ ደኤስ።
ISA 5:2 ቢታ ቦክድ፥ ሹቻ ቆር ከስድ፥ ሎኦ ዎይነ ቶክስ። ናጎ ሻኮ እያ ግዶን ሻክስ፤ ዎይንያ ጉምእያ በሳ ጊግስስ። ሄሳፈ ጉየ፥ ሎኦ አይፈ አይፋና ግድ ናግስ፤ ሽን ጫላ አይፈ አይፍስ።
ISA 5:3 “ህንተኖ፥ የሩሳላመን ደኤይሳቶ፥ ህንተኖ ይሁዳ አሳዉ፥ ታፐነ ታ ዎይነ ጋድያ ግዶን ደእያ ኦዳ አነ ፕርድተ።
ISA 5:4 ታኒ ታ ዎይነ ጋድያስ ኦꬅዳይሳፈ ሀራ አይ ኦꬃናባይ አትዴ? ሎኦ አይፈ አይፋና ጋዳ ናጋስ፥ ሽን አይስ ጫላ አይፈ አይፍዴ?
ISA 5:5 ሀእ ታኒ ታ ዎይነ ጋድያ ቦላ ኦꬃናባ ህንተዉ ኦዳና። ታኒ እያ ድርሳ ድጋና፤ ዎይነይ ꬋያናዳ ኦꬃና። ታኒ ግምብያ ላላና፤ ዎይነ ጋደይ የታና።
ISA 5:6 ታኒ ሄ ጋድያ ቁኤ ኦꬃና፤ ዎይነይ ፅንተተና፥ ሀርመተና። ሄ በሳን ክንቾተይነ አጉንꬅ ዶላና፤ እር እያ ቦላ ቡኮና መላ ታኒ ሻራ ኪታና” ያግስ።
ISA 5:7 ኡባፈ ዎልቃማ ጎዳ ዎይነ ጋደይ እስራኤለ አሳ። እ፥ ኡፋይትያ አታክልተ በሳይ ይሁዳ አሳ። ኤንታ ሱረ ፕርዶሶና ግድ ናግስ፤ ሽን ሱꬅ ጉስዶሶና። ፅሎተꬅ ኦꬆሶና ግድ ናግስ፤ ሽን ኡንአ ዋሶይ ዳራና መላ ኦꬅዶሶና።
ISA 5:8 በሲ ꬋይን፥ ህንተ ፃላላ ቢታ ቦላ ዳና ጋካናዉ፥ ኬ ኬꬃ ቦላ፥ ጋደ ጋደ ቦላ፥ ጉጀይሳቶ ህንተና አየ!
ISA 5:9 ኡባፈ ዎልቃማ ጎዳይ ሀይሳዳ ግድ ጫቅሽን ታ ስአስ። “ሄ ግታ ኬꬃት ካይሳታና፤ ሄ ሎኦ ኬꬃታን ዳናዉ አስ ꬋያና።
ISA 5:10 ታሙ ዋፃን ቶክዳ ዎይንያፐ፥ እስ ኦቶ ጉምኤꬃ ዎይነ ፃላላ ኤካና። ሆስፑን ታሙ ክሎ ግራመ ዘርዳ ጋደፐ፥ ታማነ ሆስፑን ክሎ ግራመ ፃላላ ኤካና” ያግስ።
ISA 5:11 ማꬆያ ኡሻ ኮያናዉ ዎንታ ጉራ ደንደይሳታነ ዎይነ ኡሻይ ፁጋና ጋካናዉ፥ ያን ቃምስያ አሳ አየ!
ISA 5:12 ኤንታ እማቱዋን ማስንቆይ፥ ዲꬅ፥ ካራቦይ፥ ሱሱልኤይነ ዎይነ ኡሽ ደኤስ። ሽን ኤንቲ ጎዳ ኦሱዋ በእቦኮና፤ እያ ኩሸ ኦሱዋ አኬኮኮና።
ISA 5:13 ህዛ ታ አሳይ አኬካ ꬋይዳ ግሾ፥ ድኤታና፤ አይሰይሳት ኮሻን ሀይቃና፤ አሳይ ሳሞን ፁገታና።
ISA 5:14 ዱፎይ ባ ጎምፓ ዳልግስስ፤ ባ ዶና ዛው ባይና ዶይስ። የሩሳላመን ደእያ ግታ አሳ፥ ዳሮ አሳ፥ ዎጫመይሳታነ ኡፋይተይሳታ ምታና።
ISA 5:15 አስ ቶሸታና፤ አሳ ኮቸ ኡባይ ካዉያና፤ ኦቶርትያ ኡባይ ጉፃና።
ISA 5:16 ሽን ኡባፈ ዎልቃማ ጎዳይ፥ ባ ሱረ ፕርዳን ꬎቁ ꬎቁ ጋና፤ ፆሳ ጌሻተꬃይ እያ ፅሎተꬃን ቆንጫና።
ISA 5:17 ሄ ዎደ ዶርሳት ሄ በሳን ሄመታና፤ ዶርሳ ኡርገት ላለትዳ ኬꬃ በሳታን ማና።
ISA 5:18 ጭሞ ዎዶሮን ናጋራ፥ ጋረ ዎዶሮን ኢታተꬅ ጎቸይሳታ አየ!
ISA 5:19 “አነ ፆሳይ ኤለሶ! ኑኒ በአና መላ ባ ኦሱዋ ኤሶዮ! ኑኒ ኤራና መላ እስራኤለ ጌሻይ ቆፕዳ ቆፋ ፖሎ” ያገይሳታ አየ!
ISA 5:20 ኢታ ሎኦ፥ ሎኡዋ ኢታ፤ ꬉማ ፖኦ፥ ፖኡዋ ꬉማ፤ ጫሙዋ ማልኦ፥ ማልኡዋ ጫሞ ገይሳታ አየ!
ISA 5:21 ባንታና ጭንጫነ ቃራ ገይሳታ አየ!
ISA 5:22 ዎይነ ኡሻን ኤረትዳ አሳነ ማꬆይያ ኡሹ ዋላካናዉ ዎዛን ምኖ ግድዳ አሳ አየ!
ISA 5:23 ቆህዳ ኡራ ፅልሳናዉ ዎꬋፈ ኤክድ፥ ፅሎ አሳ ሱረ ፕርዳ ጌላየይሳታ አየ!
ISA 5:24 ኤንቲ ኡባፈ ዎልቃማ ጎዳ ህግያ እፅዳ ግሾነ እስራኤለ ጌሻ ቃላ ካꬍዳ ግሾ ታማ ላጮይ ካለ ኦይከይሳዳነ ቡረይ ታማን ሜተትድ ꬋየይሳዳ ኤንታ ፃጶይ ዎቃና። ኤንታ ጪሻይ ባናዳ ላለትድ ꬋያና።
ISA 5:25 ሄሳ ግሾ፥ ጎዳ ሀንቆይ እያ አሳ ቦላ ኤፅስ፤ እያ ኩሸይ ደንድድ፥ ኤንታ ꬋይስስ። ደረት ቃፅዶሶና፤ ሀይቅዳ አሳ አሀይ ኦገ ቦላ ቡረዳ ሀንስ። ሄ ኡባንካ እያ ሀንቆይ ስምቤና፤ እያ ኩሸይ ሀእካ ደንድዳ በሳን ደኤስ።
ISA 5:26 ጎዳይ ሃሆ ሶን ደእያ ካዎተꬃታስ ማላ ꬎቃን ኤስስ፤ ሳኣ ጋፃን ደእያ አሳ ሱይቅድ ፄግስ፤ ኤንቲ ድርግሸ ፑቱ ጎሶና።
ISA 5:27 ኤንታ ግዶን ዳቡረይነ ꬉበተይ ባዋ፤ ኤንታፈ እሶይካ ꬍስከና ዎይኮ ዝንኤና። ፄሳን ዳንጭዳ ሳቀይ ብርሸተና፤ ኤንታ ጫማ ዎዶሮይ ዱፀና።
ISA 5:28 ኤንታ ቶራይ ቃራ፤ ኤንታ ዶንገይካ ዋፀትድ ደኤስ። ኤንታ ፓራታ ቶሆይ ቃራ ሹቻ መላ፤ ኤንታ ፓራ ጋረታ ገርቶይ ጎተ መላ።
ISA 5:29 ኤንቲ ጋሞ መላ ጉሞሶና፤ ዎዳላ ጋሞ መላ ጉዶሶና። ኤንቲ ሳርቡቅሸ ምያባ ኦይክድ፥ ቶክ ኤክድ ቦሶና፤ ኤንታፈ ዎꬅድ ኤከይ ኦንካ ባዋ።
ISA 5:30 ሄ ዎደ ኤንቲ ግታ አባ ጉንꬃዳ እስራኤለ ቦላ ጉማና። እስ አስ ሄ ቢታ ፄልያ ዎደ ꬉምነ ዋየይ በአና፤ ፖኦይ ሻራን ምተታና።
ISA 6:1 ካዎይ ኦዝያን ሀይቅዳ ላይꬅ ጎዳይ ꬎቃ አራታንነ ቦንቾ በሳን ኡትዳይሳ በአስ፤ እያ ማኦይ ፆሳ ኬꬃ ኩምስ።
ISA 6:2 ሱራፌላ ጌተትያ ኪታንቾት እያፐ ቦላራ ደኦሶና፤ እስ እስ ኪታንቹዋስ ኡሱፑን ቀፈት ደኦሶና፤ ናምኡ ቀፈታን ባ ሶምኡዋ ካሜስ፤ ናምኡ ቀፈታን ባ ቶሁዋ ካሜስ፤ ናምኡ ቀፈታን ፕራꬌስ።
ISA 6:3 ኤንቲ እሶይ እሱዋኮ፥ “ጌሻይ፥ ጌሻይ፥ ጌሻይ፥ ኡባፈ ዎልቃማ ጎዳ! ሳአ ኡባይ እያ ቦንቹዋን ኩምስ” ያጎሶና።
ISA 6:4 ኤንታ ግርሳ ዋሱዋ ጋሶን ፆሳ ኬꬃ ባሶይ ቃፅስ፤ ፆሳ ኬꬃይ ጩያን ኩምስ።
ISA 6:5 ያትን፥ “ታኒ መተርሻይ ቱንዳ አሳ ግዶን ደአይስ፤ ታ መተርሻይካ ቱና። ታኒ ካዋ፥ ኡባፈ ዎልቃማ ጎዳ ታ አይፈን በእዳ ግሾ፥ ታና አየ! ታ ꬋያስ!” ያጋስ።
ISA 6:6 ሄ ኪታንቾታፐ እሶይ ያርሾ በሳፈ ቦንቆ ታማ ቃጰራ ኤክድ ፕራꬍሸ ታኮ ይስ።
ISA 6:7 ቦንቆ ታማን ታ መተርሻ ቦችድ፥ “ሄኮ፤ ሀ ቦንቆ ታማይ ነ መተርሻይ ቦችዳ ግሾ ነ ናቆይ ኔፐ ክችስ፤ ነ ናጋራይ አቶ ጌተትስ” ያግስ።
ISA 6:8 ሄሳፈ ጉየ ጎዳይ፥ “ኦና ኪቶ? ኑስ ኦነ ባናይ?” ያግሽን ስአስ። ታኒ፥ “ሄኮ፥ ታና ኪታ፥ ታኒ ባና” ያጋስ።
ISA 6:9 ጎዳይ ታኮ፥ “ባዳ ሀ አሳ፥ ‘ህንተ ስስ ስኤታ፥ ሽን አኬከከታ፤ ህንተ ፄለታ፥ ሽን ደመከታ’ ” ያጋዳ ኦዳ።
ISA 6:10 ካልድካ፥ “ሀ አሳ ዎዛና ሙምሳ፤ ኤንታ ሀይꬃ ቱልሳ፤ ኤንታ አይፍያ ጎዛ። ሄስ ሀኖና እፅኮ፥ ኤንቲ ባንታ አይፍያን በእድ፥ ባንታ ሀይꬃን ስእድ፥ ባንታ ዎዛናን አኬክድ፥ ታኮ ስማና፤ ዛሪድ ፓፃና” ያግስ።
ISA 6:11 ታኒ፥ “አቤት ጎዳዉ፥ ሄስ ሀናናይ አዉደ ጋካናሴ?” ያጋስ። እ ዛሪድ፥ “ካታማት ላለታና ጋካናዉ፥ ኬꬃት ካይሳ ግዳና ጋካናዉ፥ ቢታይ ፖሎ ዶገታና ጋካናዉ፤
ISA 6:12 አሳ ሃሆ በሲ የዳና ጋካናዉነ ቢታይ አስ ባይና መላ ቢታ ግዳና ጋካናሳ።
ISA 6:13 ታሙ አሳፐ እስ አስ ቢታ ቦላ አትኮ፥ እካ ꬋያና። ቃንፅን አትዳ ዎላነ ጫጫ ዱሩማ መላ ግዳና፤ ሄ ዱሩማይ ጌሻ ኮቸ ግዳና” ያግስ።
ISA 7:1 ኦዝያና ናአይ እዮአታማ ናአይ አካዝ፥ ይሁዳን ካዎትዳ ዎደ አራመ ካዎይ ራዝንነ እስራኤለ ካዎይ ራማላ ናአይ ፋቁሄይ የሩሳላመ ኦላናዉ ይዶሶና፤ ሽን ፆናናዉ ዳንዳእቦኮና።
ISA 7:2 አራመ ቢታይ ኤፍሬማ ቢታራ እስፈ ኦላስ ጫቅዳይሳ ይሁዳ ካዎይ ስእዳ ዎደ፥ ዎራን ደእያ ምꬃ ጫርኮይ ቃይሳዳ፥ አካዛ ዎዛናይነ አሳ ዎዛናይ ዳጋማን ቃፅስ።
ISA 7:3 ጎዳይ እሳያሳኮ፥ “ኔራነ ነ ናኣ ሼር-ያሱባራ አካዛራ ጋሄታናዉ ቢተ፤ ህንተ እያ ማኦ ሜጭያ ጎሻኮ ኤፍያ ኦግያ ማታን ቆሞ ባጋን ደእያ ሃꬃ ኦላ ዉርሰꬃን ህንተ እያ ደማና።
ISA 7:4 እያዉ ሀይሳዳ ያጋዳ ኦዳ፤ ‘ናገታ፤ ዎፑ ጋ፤ ያዮፋ። ሀ ናምኡ ካዎት ታማፐ አትድ ጩያ ዱሩማ መላ ግድያ ግሾ፥ አራመ ካዋ ራዝናነ ራማላ ናኣ ሀንቁዋስ ያዮፋ፤ ነ ዎዛናይ ዳጋሞፎ።’
ISA 7:5 አራመ ቢታይ፥ ኤፍሬማ አሳራነ ራማላ ናኣራ ነ ቦላ ኢታባ ማቀትዶሶና።”
ISA 7:6 ኤንቲ “አነ ይሁዳ ኦልድ ኦይኮስ፤ እያ መንረꬅድ ኑ ግዶን ሻክ ኤክድ፥ ፃቤላ ናኣ ካዎꬃና ያጎሶና” ያጋ።
ISA 7:7 ግዶሽን፥ ኡባ ሃርያ ጎዳይ፥ “ሀ ኤንታ ማቆይ ምነና፤ ኤንታ ዞረታይ ፖለተና።
ISA 7:8 ዳማስቆይ አራመ ሁጰ፤ ካዎይ ራዝን ዳማስቆ ሁጰ። ኡሱፑን ታማነ እቻሹ ላይꬃ ግዶን ኤፍሬም ላለትድ ካዎተꬅ ግዶና አታና።
ISA 7:9 ኤፍሬማ ሁጰይ ሳማርያ፤ ራማላ ናአይ፥ ፋቁሄይ ሳማርያ ሁጰ። ህንተ፥ ህንተ አማኑዋን ምኖና እፅኮ፥ ኤቃናዉ ዳንዳኤከታ” ያጌስ።
ISA 7:10 ቃስካ ጎዳይ አካዛኮ፥
ISA 7:11 “ቦላ ሳሉዋፐ ዎይኮ ጋርሳ ሳኣፐ ጎዳይ፥ ነ ፆሳይ ነዉ እስ ማላ እማና መላ ኦይቻ” ያግስ።
ISA 7:12 ሽን አካዝ፥ “ኦይችከ፤ ኦይቻዳ ጎዳ ፓጭከ” ያግስ።
ISA 7:13 ያትን፥ እሳያስ፥ “ህንተኖ፥ ዳዊታ ሶ አሳዉ፥ ስእተ! ህንተ አሳ ዳንዳአ ፓጨይስ አይ ጉፅን፥ ቃስ ታ ፆሳ ዳንዳአ ፓጨቲ?
ISA 7:14 ሄሳ ግሾ፥ ጎዳይ ባ ሁጰን ህንተዉ ማላ እማና፤ ጌላእያ ቃንꬃታዳ አደ ናአ የላና፤ እያ ሱንꬃካ አማኑኤላ ጋዳ ፄጋና።
ISA 7:15 እ፥ ኢታ እፆነ ሎኦ ዶሮ ኤርያ ዎደ መቃ ማꬅነ ኦይስ ማና።
ISA 7:16 ሽን ናአይ ኢታ እፆነ ሎኡዋ ዶሮ ኤራናፐ ስን፥ ኔኒ ያይያ ናምኡ ካዎታ ቢታት ባይሳታና።
ISA 7:17 ኤፍሬም ይሁዳፐ ሻከቶሳፐ ዶምን ሀንቦና መቶ ዎደ ጎዳይ ነ ቦላ፥ ነ አሳ ቦላነ ነ አዋ ሶ አሳ ቦላ ኤሀና፤ እ ኤሀናይካ አሶረ ካዋ” ያግስ።
ISA 7:18 ሄ ጋላስ ጎዳይ፥ ሃሆ ሻፋ ጋፃን ደእያ ግብፀ ኡዱንፀታነ አሶረ ማꬃታ ሱይቅድ ፄጋና።
ISA 7:19 ያትን፥ ኤንቲ ኡባይ ይድ፥ መላ ቢታ ዛንጋራን፥ ሹቻ ጎንጎሎን፥ አጉንꬅ ደእያ ቡረንነ ሃꬃ ኦላታን ኡታና።
ISA 7:20 ሄ ጋላስ ጎዳይ ኤፍራፂሳ ሻፋ ሄፍንꬃ ባጋፈ ጋርፅዳ ሽግርያን፥ አሶረ ካዋን፥ ህንተ ሁጵያ ቡሉሳና፤ ህንተ እክስያነ ህንተ ቡቻ ሜዳና።
ISA 7:21 ሄ ጋላስ እስ አሳስ እስ ሚዝነ ናምኡ ዴሻ ፃላል አታና።
ISA 7:22 ግዶሽን፥ ኤንታ ማꬃይ ዳሮ ግድያ ግሾ እ መቃ ማꬅ ኡስታና፤ ሄ ቢታን አትዳ አሳ ኡባይ መቃ ማꬅነ ኤስ ማና።
ISA 7:23 ሄ ጋላስ እስ ሙኩሉ ብራን ዋሸትያ ሙኩሉ ዎይነ ቶሆት ደእያ በሳ ኡባን ክንቾተይነ አጉንꬅ ዶላና።
ISA 7:24 ቢታ ኡባን ክንቾተይነ አጉንꬅ ኩምዳ ግሾ፥ አሳይ ያ ብያ ዎደ ዶንገ ኦይክድ ባና።
ISA 7:25 ካሰ ኮንተን ኦꬅዳ ዙማታን ሀእ ክንቾተይነ አጉንꬅ ኩምዳ ግሾ ያይድ፥ እስ አስካ ያ ቤና። ሽን መሄይነ ዶርስ ሄመትያ በሲ ግዳና።
ISA 8:1 ጎዳይ ታኮ፥ “ግታ ሳሌዳ ኤካዳ፥ ‘ድአናዉ ኤለሳ! ቦንቃናዉ ድርጋ!’ ያጋዳ ናባበትያ ፕዳለን ፃፋ።
ISA 8:2 ካህንያ ኡራያነ ባራካ ናኣ ዛካርያሳ አማነትያ ማርካ ኦꬃዳ ታኒ ፄጋና” ያግስ።
ISA 8:3 ሄሳፈ ጉየ፥ ታኒ ናበ ግድዳ ታ ማቸራ አቃስ፤ እያ ቃንꬃታዳ አደ ናአ የላሱ። ጎዳይ ታኮ፥ “እያ ሱንꬃ፥ ‘ማሃር-ሻላል-ሀሽ-ባዝ’ ያጋዳ ፄጋ።
ISA 8:4 ናአይ፥ ‘አቦ፥ እሞ’ ግድ ፄስ ኤራናፐ ስን አሶረ ካዎይ፥ ዳማስቆ ዱረተꬃነ ሳማርያ ሻሉዋ ኤክድ ባና” ያግስ።
ISA 8:5 ቃስካ ጎዳይ ታኮ ሀይሳዳ ያግስ።
ISA 8:6 “ሀ አሳይ ሎዳራ ጎግያ ሳልሆመ ሃꬃ እፅድ፥ ራዝናነ ራማላ ናኣ ኡፋይትድ ኤክዶሶና።
ISA 8:7 ሄሳ ግሾ፥ ጎዳይ ምኖነ ዳሮ ግድዳ ኤፍራፂሳ ሃꬃ፥ አሶረ ካዋ፥ እያ ኦላንቾታራ ኤሀና ሀኔስ። እ ሃꬅ ክፅድ ኩመይሳዳ ጋፃ ኡባ ማእድ ጎጋና።
ISA 8:8 ድእሸ ይሁዳ ገላና፤ ክፃይ ቆ ጋካናዉ ኩምድ ያራ ካንꬃና።” አቤት አማኑኤላ፥ እያ ቀፍያ ምጨꬃይ ነ ቢታ ኡባ ማእስ።
ISA 8:9 ህንተኖ ካዎተꬃቶ፥ እስፈ ኦላስ ሺቅተ፥ ሽን ህንተ ꬋያና። ሃሆ ቢታን ደእያ አሳቶ፥ ስእተ፤ ኦላስ ጊግተ፤ ሽን ህንተ ሊቃና! ኤ፥ ኦላስ ጊግተ፤ ህንተ ዉራና።
ISA 8:10 ፆሳይ ኑራ ደእያ ግሾ፥ ኦላስ ማቀትተ፥ ሽን ህንተ ማቆይ ካንና፤ ሀልችተ፥ ሽን ህንተ ሀልቾይ ሀላና።
ISA 8:11 “ጎዳይ ባ ምኖ ኩሽያ ታ ቦላ ዎꬅድ፥ ታ ሀ አሳ ኦግያን ቦና መላ ታዉ ምንꬅድ ኦድስ።
ISA 8:12 ሀ አሳ ማቆ ኡባ ማቆ ጎፕተ፤ ኤንቲ ያይያባ ያዮፍተ፤ ዳጋሞፕተ።
ISA 8:13 ህንተ ጌሽ ጋናዉ በሰይ ኡባፈ ዎልቃማ ጎዳ፤ እያዉ ያያናዉነ ዳጋማናዉ በሴስ።
ISA 8:14 እ፥ ጌሻ በሲ ግዳና፤ ሽን ይሁዳስነ እስራኤለስ እ፥ ꬉበ ሹችነ ኩንድስያ ዛላ ግዳና። የሩሳላመን ደእያ አሳስ እ ግተነ ፅሄ ግዳና።
ISA 8:15 ኤንታፈ ዳሮት ꬉበታና፤ ኩንድድ መአና፤ ፅሄን ኦይከትድ ድኤታና” ያግስ።
ISA 8:16 ታ ኦደይሳ ናጋ፤ ታ ታማረታ ግዶን ህግያ አታማ።
ISA 8:17 ታኒ ባ ሶምኡዋ ያይቆባ ዘረꬃፈ ገንꬅያ ጎዳ ናጋና፤ እያን አማነታና።
ISA 8:18 ታናነ ታዉ ጎዳይ እምዳ ናይታ በእተ። ኑኒ ፅዮነ ደርያን ደእያ ኡባፈ ዎልቃማ ጎዳፐ እስራኤለ አሳስ ማላነ ማላታ።
ISA 8:19 “ሱይቅሸነ ካልካሽሸ ኦድያ ማሮታነ ሞይትለታ ኦይችተ” ያግድ ህንተና ዞርያ አሳይ ደኦሶና። ደኦን ደኤይሳታስ ሀይቅዳይሳታ ኦይቸይሳፈ አሳይ ባንታ ፆሳ ኦይቻናዉ በሰኔ?
ISA 8:20 ህግያነ ጎዳ ማርካ ስእተ! ሄ አሳት ሀ ቃላዳ ሃሳዮና እፅኮ ኤንታዉ ሳእ ዎንተና።
ISA 8:21 አሳይ ዋየትሸነ ኮሻትሸ ቢታ ቦላ ቶይላታና። ኤንቲ ኮሻትዳ ዎደ ይሎትድ፥ ፑደ ሳሎ ፄልድ ባንታ ካዋነ ባንታ ፆሳ ባዳና።
ISA 8:22 ሳኣ ዱገ ፄልያ ዎደ ዋየ፥ ꬉማነ ያሽያ ጫጋና በአና፤ ኤንቲ ሳካና ꬉማን ሆለታና።
ISA 9:1 ግዶሽን፥ ዋየትዳይሳታስ ህዛፐ ጉየ ꬉመና። በን ዎደ ጎዳይ ዛብሎና ቢታነ ንፍታለመ ቢታ ካዉሽስ። ሽን ስንꬃፈ መደትራነ አባ ኦግያን ደእያ ቢታነ ዮርዳኖሰ ሻፋፐ ሄፍንꬃን ደእያ አይሁደ ግዶና አሳይ ደእያ ጋልላ ቢታ እ ቦንቻና።
ISA 9:2 ꬉማን ሄመትያ አሳይ ዎልቃማ ፖኦ በእስ፤ ቃስ ሀይቆ ꬉማን ደኤይሳታስ ፖኦይ ፖእስ።
ISA 9:3 ኔኒ ካዎተꬃ ዳርሳዳሳ፤ ኤንታ ኡፋይሳ ጉጃዳሳ። አስ ካꬅ ሺሽያ ዎደ ኡፋይተይሳዳ ዎይኮ ድኡዋ ሻክድ ኤክያ ዎደ ኡፋይተይሳዳ ነ ስንꬃን ኡፋይታና።
ISA 9:4 ኔኒ ምድያመ ቢታ ፆንዳይሳዳ ኤንታ ዴፆ ቃምባራ፥ ኤንታ ጋናስ ጊግዳ ፃምአነ ኤንታ ኡንኤይሳታ ጉምባ መንꬃዳሳ።
ISA 9:5 ኦላንቾታ ጫማይነ ሱꬃን ሙኑቀትዳ ማኦ ኡባይ ታማን ፁገታና፤ ታማስ ኦይሰꬆ ግዳና።
ISA 9:6 ኑስ ናእ የለትስ! አደ ናእ ኑስ እመትስ! ካዎተꬃ ማት እያ ሀሽያን ግዳና፤ እያ ሱንꬃይ፥ “ማላልስያ ዞራንቾ፥ ዎልቃማ ፆሳ፥ መርና አዋ፥ ሳሮተꬃ ሀላቃ” ጌተታና።
ISA 9:7 እያ ካዎተꬃ ዳልጋተꬃስነ እያ ሳሮተꬃስ ዛው ባዋ። ሀችፈ ዶምድ፥ መርና ጋካናዉ ሱረ ፕርዳንነ ፅሎተꬃን ምንꬃናዉነ ኤሳናዉ ዳዊታ አራታንነ እያ ካዎተꬃን እ ካዎታና። ኡባፈ ዎልቃማ ጎዳ ቃናተይ ሀይሳ ኦꬃና።
ISA 9:8 ጎዳይ ያይቆባ ዘረꬃ ቦላ ፕርዳ ቃላ ኪትን፥ እስራኤለ ካዎተꬃ ቦላ ዎꬍስ።
ISA 9:9 ኤፍሬማ አሳይነ ሳማረ ካታማ አሳይ ሀይሳ ኦꬅዳይ ጎዳ ግደይሳ ኤርሸ፥ ኦቶሮንነ ጬቆን፥
ISA 9:10 “ፁበፐ ኬፀትዳ ኬꬃት ላለትዶሶና፤ ሽን ኑ ዛሪድ ማሰትዳ ሹቻን ኬፃና፤ ቦባ ምꬃት ቃንፀትዶሶና፤ ሽን ኑ ኤንታ በሳን ዝጋታ ላማና” ያግዶሶና።
ISA 9:11 ሽን፥ ፆሳይ ራሶና ሞርከታ ምንꬃና፤ ኤንታ ቦላ ኤሀና፤ ኤንታራ ኤቀትያ ሞርከታ ኤንታ ቦላ ደንꬅስ።
ISA 9:12 ዶሎሀፐ አራመታ፥ ዉሎሀፐ ፍልስፄመታ ደንꬅን፥ ኤንቲ ባንታ ዶና ዶይድ፥ እስራኤለ ምትዶሶና። ሄ ኡባን ጎዳ ሀንቆይ ስምቤና፤ እያ ኩሸይ ደንድዳ በሳን ደኤስ።
ISA 9:13 ግዶሽን፥ አሳይ ባንታና ሾጭዳይሳኮ ስምቦኮና፤ ኡባፈ ዎልቃማ ጎዳ ኮይቦኮና።
ISA 9:14 ሄሳ ግሾ፥ እስ ጋላስ ጎዳይ እስራኤለፐ ሁጰነ ጎይና፥ ዛምባ ዳሻነ ማቃ ቃንፃና።
ISA 9:15 ጭማትነ ቦንቸትዳይሳት ሁጰ፤ ዎርዶ ታማርስያ ናበት ጎይና።
ISA 9:16 ሀ አሳ ካለይሳት ባለꬆሶና፤ ኤንታ ካለይሳትካ ባሎሶና።
ISA 9:17 ሄሳ ግሾ፥ ጎዳይ ኤንታ ናአተꬃታን ኡፋይተና፤ ይኦ ናይታስነ አምኤታስ ቃተና። አስ ኡባይ ኢታነ ፆሰ ኤሮናይሳ ግዳና፤ ኡባይ ባ ዶናን ኢታባ ኦደቴስ። ሄ ኡባን ጎዳ ሀንቆይ ስምቤና፤ እያ ኩሸይ ደንድዳ በሳን ደኤስ።
ISA 9:18 ታም ክንቾተነ አጉንꬅ መይሳዳ ኢታተꬅ ፁጌስ፤ ስከትዳ ዎር ፁገትን፥ ጩያይ ቱሳዳ ከየይሳዳ ከዬስ።
ISA 9:19 ኡባፈ ዎልቃማ ጎዳ ሀንቁዋን ቢታይ ፁገታና፤ አስካ ታማ ኦይሰꬅያባ ግዳና፤ ኦንካ ባ እሻ አሻናዉ ቆፐና።
ISA 9:20 ኤንቲ ኡሻቻ ባጋራ ቦንቃና፥ ሽን ኮሻታና፤ ኤንቲ ሀድርሳ ባጋራ ማና፥ ሽን ካሎኮና፤ ኤንቲ ባንታ የልዳ ናይታ ማና።
ISA 9:21 ምናሰይ ኤፍሬማ፥ ኤፍሬምካ ምናሰ ማና፤ ኤንቲ እስፈ ግድድ ይሁዳ ቢታ ሞርካና። ሄ ኡባን ጎዳ ሀንቆይ ስምቤና፤ እያ ኩሸይ ደንድዳ በሳን ደኤስ።
ISA 10:1 ኢታ ህገነ ኡንኤꬅያ አዋጆ ከሰይሳታ አየ!
ISA 10:2 ሄሳን ኤንቲ ማንቆታ፥ አምኤታነ ይኦታ ፕርዳ ጌላዮሶና፤ አምኤታነ ይኦታ አቁዋ ቦንቆሶና።
ISA 10:3 እ፥ ሃሆ ቢታፈ ያ መቱዋን ሴርያ ዎደ ህንተ ዋናኔ? ማዶ ደማናዉ ኦደኮ ባቃታኔ? ህንተ ሻሉዋ አዉን ቆታኔ?
ISA 10:4 ህንተ ድኤትዳ አሳራ ጎሸታና፤ ሀይቅዳ አሳ ግዶን ዝንአና። ሄ ኡባን ጎዳ ሀንቆይ ስምቤና፤ እያ ኩሸይ ደንድዳ በሳን ደኤስ።
ISA 10:5 ጎዳይ ሀይሳዳ ያጌስ፤ “ታ ይሉዋስ ፕርጮነ ታ ሀንቁዋስ ፃምአ ግድዳ አሶረ ቢታ አየ!
ISA 10:6 ኤንታ ሻሉዋ ድአናዳነ ቦንቃናዳ፤ ኦገ ኡርቃዳ ኤንታ የꬋናዳ ፆሰ ኤሮና ካዎተꬃ ቦላ ታኒ አሶረ ኪታና፤ ታና ሀንቀꬅዳ አሳ ቦላ እያ የዳና።
ISA 10:7 ሽን አሶረ ካዎይ ሀይሳ ሀልችቤና፤ እያ ዎዛናይ ሀይሳ ቆፕቤና። እ ቆፕዳይ ዳሮ ካዎተꬃታ ꬋይሳናሳ።
ISA 10:8 ሄሳ ግሾ እ ያግድ ጬቀቴስ፤ ‘ታ ቶራ ሞጮናት ኡባይ ካዎታ ግዶኮናዬ?’
ISA 10:9 ካልኖይ ካርካምሻ ካታማ መላ ግደነዬ? ሀማት አርፋዳ ካታማ መላ ግደነዬ? ሳማረይ ዳማስቆ ካታማ መላ ግደነዬ?
ISA 10:10 የሩሳላመንነ ሳማረን ደእያ ኤቃታፐ ዳርያ ኤቃታ ጎይንያ ካዎተꬃታ ሴራናዉ ታኒ ታ ኩሽያ የዳስ።
ISA 10:11 ታኒ ሳማረ ካታማ ቦላነ እያ ኤቃ ምስለታ ቦላ ኦꬅዳይሳዳ የሩሳላመ ካታማ ቦላነ እያ ኤቃ ምስለታ ቦላ ኦꬅክናዬ?” ያግስ።
ISA 10:12 ጎዳይ ፅዮነ ደርያ ቦላነ የሩሳላመ ቦላ ባ ኦሱዋ ኡባ ፖልዳፐ ጉየ፥ አሶረ ካዋ እያ ኦቶሩዋስነ ጬቁዋስ እያ ሴራና።
ISA 10:13 አሶረ ካዎይ ሀይሳዳ ያጌስ፦ “ታ ኩሸ ምኖተꬃን፥ ታ ጭንጫተꬃንነ ታ አኬካን ሀይሳ ኦꬃስ። ታኒ ካዎተꬃታ ግዶን ደእያ ዛዋታ ሾዳስ፤ ኤንታ ሻሉዋ ቦንቃስ፤ ታ ዎልቃን ካዎተꬃታ አራታፐ ዎꬍሳስ።
ISA 10:14 አስ ካፎ ኬꬃን ኩሸ የደይሳዳ ታኒ ካዎተꬃ ሻሉዋን ታ ኩሽያ የዳስ። ቃስ ዶገትዳ ጱጱለታ ሺሸይሳዳ ታኒ ቢታ ኡባ ሺሻስ። ባ ቀፍያ ቃꬅዳይ ዎይኮ ዶና ጱቅዳይ ዎይኮ ዋስዳይ እሶይካ ባዋ” ያግስ።
ISA 10:15 ካልት ባራ ቃንፅያ አድያ ቦላ ደንዳናዉ ዳንዳኢ? ዎይኮ ማጋዘይ ባናን ጎኤትያ አድያ ቦላ ኦቶራናዉ ዳንዳኢ? ኩሸይ ደንꬆና ፃምእ ባና ባዉ ደንꬂ? ጉፈይ ኦይክያ አስ ባይና ባዉ ሄመቲ?
ISA 10:16 ሄሳ ግሾ፥ ጎዳይ፥ ኡባፈ ዎልቃማ ፆሳይ፥ እያ ምኖ ኦላንቾታ ቦላ ግልቅስያ ሀርገ የዳና። እያ ቦንቹዋ ላፆ ታም ማና።
ISA 10:17 እስራኤለ ፖኦይ ታማ ግዳና፤ ኤንታ ጌሻይ ላጮ ግዳና። እያ አጉንꬃነ እያ ክንቾትያ እስ ጋላስ ፁጋናነ ማና።
ISA 10:18 ሀርገይ አሰ ግልቅሰይሳዳ ጎዳይ ባ ዎራ ምꬃ ቦንቹዋነ ባ አራዳ ቢታ ቦንቹዋ ꬋይሳና።
ISA 10:19 ዎራን አትያ ምꬃይ ዳሮ ጉꬅ ግድያ ግሾ፥ ሀር አቶሽን ጉꬃ ናእካ ታይብድ ዉርሳና።
ISA 10:20 ሄ ዎደ እስራኤለፐነ ይሁዳፐ አትዳ ጉꬃት ባንታና ሾጭዳይሳን ግዶናሽን፥ ቱማ ጎዳን፥ እስራኤለ ጌሻን ዘምፓና።
ISA 10:21 አትዳ ይሁዳ አሳይ ዎልቃማ ፆሳኮ ስማና።
ISA 10:22 ነኖ እስራኤለ፥ ኔኒ አባ ጋፃን ደእያ ሻፍያ መላ ዳርኮካ፥ አትዳ ጉꬃታ ፃላል ስማና። ፅሎተꬅ ኩምዳ ꬋዮይ እያ አሳስ አዋጀትስ።
ISA 10:23 ኤ፥ ጎዳይ፥ ኡባፈ ዎልቃማ ፆሳይ ሳአ ኡባ ቦላ ኤሀናዉ ቆፕዳ ꬋዩዋ ኤሀና።
ISA 10:24 ሄሳ ግሾ፥ ጎዳይ፥ ኡባፈ ዎልቃማ ፆሳይ ሀይሳዳ ያጌስ፦ “ፅዮነን ደእያ ታ አሳዉ፥ ግብፀት ኦꬅዳይሳዳ አሶረት ህንተና ፃምአን ሾጭያ ዎደነ ባንታ ጉምባ ህንተ ቦላ ደንꬅያ ዎደ ያዮፍተ።
ISA 10:25 ጉꬃ ዎደፐ ጉየ፥ ታኒ ህንተ ቦላ ሀንቀትዳይሳ አጋና፤ ሄሳፈ ጉየ፥ ታ ሀንቆይ ኤንታ ꬋይሳናዉ ደንዳና” ያጌስ።
ISA 10:26 ኡባፈ ዎልቃማ ጎዳይ ኦሬባ ሹቻ ማታን ምድያመታ ሾጭዳይሳዳ ኤንታ ልሶን ሾጫና። እ ግብፀን ኦꬅዳይሳዳ ባ ፃምአ አባ ቦላ ደንꬃና።
ISA 10:27 ሄ ጋላስ፥ እያ ቶሆይ ህንተ ሀሽያፐ ዎꬋና፤ እያ ቃምባራይ ህንተ ሞርገፈ ክቻና። ህንተ ኦርድዳ ግሾ ቃምባራይ መቃና።
ISA 10:28 ሞርክያ ዎታዳራት ጋየ ካታማ ገልዶሶና፤ ምግሮናራ ካንꬅዶሶና፤ ባንታ ኦላ ሚሽያ ምክማሳ ዎꬅዶሶና።
ISA 10:29 ኤንቲ ኦግያራ ካንꬅ አꬍድ፥ ጌባን አቅዶሶና። ራማን ደእያ አሳይ ኮኮርዶሶና፤ ግብአን፥ ካዋ ሳኦላ ካታማን ደእያ አሳይ ባቃትዶሶና።
ISA 10:30 ጋልማ አሳዉ፥ ዋሶ ጎችተ! ላይሻ አሳዉ፥ ስእተ! አናቶታ አሳዉ፥ ኦይሻ ዛርተ!
ISA 10:31 ማድማና አሳይ ባቃትዶሶና፤ ገብማ አሳይ ባንታ ሸምፑዋስ ቆሰትዶሶና።
ISA 10:32 ሞርክያ ዎታዳራት ሀች ኖባን ደኦሶና፤ ኤንቲ ፅዮነ ዙማ ቦላ ኤቅድ፥ ባንታ ኩሽያ ቃꬅድ፥ የሩሳላመ ካታማ ባብሶሶና።
ISA 10:33 ሄኮ፥ ጎዳይ፥ ኡባፈ ዎልቃማ ፆሳይ፥ ታሸታ ግታ ዎልቃን ሻቃና፤ አዱቅዳ ምꬃት ቃንፀታና፤ ꬎቃ ግዳይሳት ካዉያና።
ISA 10:34 ጎዳይ ስከትዳ ዎራ ካሎታና ጋካናዉ ቃንፃና፤ ልባኖሰይ ዎልቃማ ስንꬃን ኩንዳና።
ISA 11:1 እሰየ ዱሩማይ አጫና፤ እያ ፃጱዋፐ አይፍያ ታሸይ ከያና።
ISA 11:2 ጎዳ አያናይ እያ ቦላ ሸምፓና፤ ጭንጫተꬃነ አኬካ አያናይ፥ ዞርያነ ዎልቃ አያናይ፥ ኤራተꬃነ ጎዳስ ያይያ አያናይ፥ እያ ቦላ ሸምፓና።
ISA 11:3 ጎዳስ ያይድ ኡፋይቴስ፤ ባ አይፈይ በእዳባን ጮ ፕርደና፤ ዎይኮ ባ ሀይꬃይ ስእዳባን ጮ ኩየና።
ISA 11:4 ሽን እ፥ ማንቆታስ ፅሎተꬃን ፕርዳና፤ ሳአን ደእያ መቶታንቾታስ ሱረተꬃን ኩያና። እ ባ እንፃርሳ ፃምአን ሳኣ ሾጫና፤ ባ ዶና ሸምፑዋን ኢታታ ዎꬋና።
ISA 11:5 ፅሎተꬅ እያ ፄሳ ዳንጮ ግዳና፤ አማነተꬅ እያ ምያስ ሳቀ ግዳና።
ISA 11:6 ሱꬉመይ ዶርሳ ማራራ እስፈ ዳና፤ ማሄይ ዴሻ ማራራ እስፈ ዝንአና። ማር ጋሞ ቡታለራ እስፈ ሄመታና፤ ጉꬃ ናእ ኤንታ ሄማና።
ISA 11:7 ሚዝነ ባባንꬅ እስፈ ሄመታና፤ ኤንታ ማራት እስፈ ዝንአና፤ ጋሞይ ቦራዳ ካለ ማና።
ISA 11:8 ꬋምያ ናእ ሾሻ ኦላን ካአና፤ ꬋንꬅ ዱፅዳ ናእ ዎꬍያ ሾሻ ኦላን ባ ኩሽያ የዳና።
ISA 11:9 ታ ጌሻ ዙማ ቦላ ኦንካ ቆሄተና ዎይኮ ꬋየና። አቢ ሃꬃን ኩመይሳዳ ሳእ ጎዳ ኤሮን ኩማና።
ISA 11:10 ሄ ዎደ እሰየ ፃጶይ አሳስ ማላ ግዳና፤ ካዎተꬃ ኡባይ እያ ኮያና፤ እ ደእያ በሳይ ቦንቸታና።
ISA 11:11 ሄ ጋላስ ጎዳይ አትዳ ባ አሳ፥ አሶረፐ፥ ግብፀፈ፥ ጳትሮሳፐ፥ ቶጰፈ፥ ኤላማፐ፥ ሳናኦረፐ፥ ሀማታፐነ ዩሾይ አባን ተቀትዳ ቢታፈ ናምአንꬆ ኤሀናዉ ባ ኩሽያ ዛሪድ የዳና።
ISA 11:12 እ ካዎተꬃታስ ማላ ꬎቁ ኦꬅድ ደንꬃና፤ እስራኤለፐ ላለትዳይሳታ እስፈ ጋꬃና፤ ይሁዳፐ ሳኣ ኦይዱ ባጋን ዘረትዳይሳታ ሺሻና።
ISA 11:13 ሄሳፈ ጉየ፥ ኤፍሬማ ቃናተይ እያፐ ክቻና፤ ይሁዳ ሞርከተꬃይ እያፐ ቃንፀታና። ኤፍሬም ይሁዳ ቃናተና፤ ይሁድ ኤፍሬማ ሞርከና።
ISA 11:14 ኤንቲ ዉሎሀ ባጋን ደእያ ፍልስፄመ ቢታ ቦላ ጉፕ ዎꬋና፤ ኤንቲ ዶሎሀ ባጋን ደእያ አሳ ቦንቃና። ኤንቲ ኤዶመ ቦላነ ሞአበ ቦላ ባንታ ኩሽያ ዎꬃና፤ አሞነት ኤንታዉ ሃረታና።
ISA 11:15 ጎዳይ ግብፀ ማታን ደእያ ዞኦ አባ መልሳና፤ ባ መልስያ ጫርኩዋራ ባ ኩሽያ ኤፍራፂሳ ሻፋ ቦላ ቃꬃና። ያትድ አሳይ መላ በሳራ ፕናና መላ ላፑን ጉꬃ ሻፋ ከስድ ሻካና።
ISA 11:16 እስራኤለ አሳይ ግብፀ ቢታፈ ከይያ ዎደ ኦገይ ከይዳይሳዳ፥ አትዳ እያ አሳይ፥ አሶረ ቢታፈ ስምያ ኦገይ ከያና።
ISA 12:1 ሄ ዎደ ህንተ ሀይሳዳ ያግድ የፃና። “ጎዳዉ፥ ኔኒ ታ ቦላ ሀንቀታዳሳ፤ ሽን ሀእ ነ ሀንቁዋፈ ስማዳሳ። ታና ምንꬃዳሳ፤ ሄሳ ግሾ፥ ታኒ ነና ጋላታይስ።
ISA 12:2 ፆሳይ ታ አቶተꬃ፤ ታኒ እያን አማነታይስ፥ ያይከ። ጎዳይ ፆሳይ፥ ታ ዎልቃነ የꬃ፤ እ ታ አቶተꬃ” ያጋና።
ISA 12:3 አቶተꬃ ፑልቱዋፈ ህንተ ሃ ኡፋይሳን ዱቃና።
ISA 12:4 ሄ ጋላስ ህንተ ያግድ የፃና፦ “ጎዳ ጋላትተ! እያ ሱንꬃ ፄግተ። እያ ኦሶታ ካዎተꬃታ ኡባስ ኦድተ፤ እ ግታ ግደይሳ አዋጅተ።
ISA 12:5 ጎዳይ ግታ ኦሶ ኦꬅዳ ግሾ፥ እያዉ የፅተ፤ ሀይስ ሳአ ኡባን ኤረቶ።
ISA 12:6 እስራኤለ ጌሻይ ህንተ ግዶን ግታ ግድያ ግሾ፥ ፅዮነ አሳዉ፥ እልልተ፥ ኡፋይሳን የፅተ!” ያጋና።
ISA 13:1 አሞፀ ናአይ፥ እሳያስ ጎዳይ ባብሎነባ ቆንጭስን በእዳይስ ሀይሳ።
ISA 13:2 አይኮይ ባይና ደርያ ቦላ ማላ ኤስድ፥ ህንተ ቃላ ꬎቁ ኦꬅድ ዋስተ፤ ኤንቲ ሀላቃታ ፐንግያራ ገላና መላ ዉትተ።
ISA 13:3 ታኒ ሀንቀትዳይሳታ ሴራና መላ ታ ጌሻታ ኪታስ፤ ታ ፆኖይ ኡፋይስያ ታ ዎልቃማታ ፄጋስ።
ISA 13:4 ዳሮ አሳይ ዎጫመይሳዳ ደርያ ሁጵያን ደእያ ዎጫማ ስእተ! ቃስ ካዎተꬃት እስፈ ሺቅድ ፓላምያ ፓላማ ስእተ! ኡባፈ ዎልቃማ ጎዳይ ኦላንቾታ ኦላስ ጊግስስ።
ISA 13:5 ጎዳይነ እያ ሀንቆ ኦላ ሚሸይ ቢታ ኡባ ꬋይሳናዉ ሃሆ ቢታፈ፥ ሳሎ ጋፃፐ ዮሶና።
ISA 13:6 ጎዳ ጋላሳይ ማትዳ ግሾ ዬክተ! ሄ ጋላሳይ ኡባፈ ዎልቃማ ፆሳ ማታፐ ꬋይሳናዉ ያና።
ISA 13:7 ሄሳ ግሾ፥ ያሻን ኤንታ ኩሸይ ዶጫና፤ አሳ ኡባ ዎዛናይ ትልአና።
ISA 13:8 ኤንቲ ዳጋማና፤ እቀꬅነ ኡንኤተꬅ ኤንታ ኦይካና። የሎ ከይዳ ማጫሳዳ ኤንቲ እንፃፃና። ኤንቲ ዳጋምድ እሶይ እሱዋ ፄላና፤ ኤንታ ሶምኦይ ብዶ ግድስ።
ISA 13:9 ሄኮ ቢታ ባይሳ ከሳናዉነ እያን ደእያ ናጋራንቾታ ꬋይሳናዉ ይሎንነ ሱልዳ ሀንቆን ጎዳ ጋላሳይ ያና።
ISA 13:10 ሳሎ ፆልንቶትነ ፆልንቶ ኮጨት ባንታ ፖኡዋ ድጋና፤ ዶልያ አዋይ ꬉማና፤ አጌናይካ ባ ፖኡዋ እመና።
ISA 13:11 ጎዳይ፥ “ታኒ ሀ ሳኣ እያ ኢታተꬃ ግሾ፥ ኢታታካ ኤንታ ናጋራ ግሾ ሴራና። ታኒ ኦቶራንቾታ ኦቶሩዋ ሻራና፤ ኢታታ ጬቁዋ ካዉሻና።
ISA 13:12 አትዳይሳት ዋላህ ባይና ዎርቃፈ አልኦ ግዳና፤ አሳ ናእ ኦፍራ ዎርቃፈ አꬍድ ቦንቾ ግዳና።
ISA 13:13 ሄሳ ግሾ፥ ኡባፈ ዎልቃማ ጎዳ ሀንቁዋን፥ እያ ሀንቁዋ ሱላ ጋላስ፥ ታኒ ሳሎታ ኮኮርሳና፤ ሳኣካ እያ በሳፈ ቃꬃና” ያጌስ።
ISA 13:14 ሻንካፈ ባቃትያ ጋራዳ ዎይኮ ሄምያ አስ ባይና ዶርሳ ዉደዳ አስ ኡባይ ባ አሳኮ ስማና፤ ኡባይ ባ ቢታ ባቃታና።
ISA 13:15 በንትዳ ኦንካ ጫደታና፤ ኦይከትዳ ኦንካ ማሻን ሀይቃና።
ISA 13:16 ኤንታ ጉꬃ ናይት ኤንታ ስንꬃን ቡሰታና፤ ኤንታ ኬꬃይ ቦንቀታና፤ ኤንታ ማቸታ ሀራ አስ ኢሳና።
ISA 13:17 ብራ ኮዮናነ ዎርቃን ኡፋይቶና ሜዶና አሳ ታኒ ኤንታ ቦላ ደንꬃና።
ISA 13:18 ኤንታ ዶንገይ ናአተꬃታ ዎꬋና፤ ዮጋ ናይታካ ማሮኮና፤ ኤንታ አይፈይ ናይታስ ቃተና።
ISA 13:19 ካዎተꬃታስ ቦንቾ፥ ባ አሳስ አሌቆ ግድዳ ባብሎነ ቢታ፥ ጎዳይ ሶዶመዳነ ጋሞራዳ ሽር የጋና።
ISA 13:20 ሄ ቢታን አስ ኡተና፤ ዎይኮ የለታፐ የለታ ጋካናዉ ያን አስ ዴና። አራበ አሳይ ያን ባንታ ዱንካንያ ቶሎኮና፤ ዶርሰ ሄመይሳትካ ያን ባንታ ዉድያ ሄሞኮና።
ISA 13:21 ሽን ባዞ ዶአት ያን አቃና፤ ዎርካናት ኤንታ ኬꬃ ኩማና፤ ጉቶት ያን ዳና፤ ያንቾት ያን ኬፃና፤ ባዞ ዴሻት ያን ጉፓና።
ISA 13:22 ኤንታ ኬꬃታን ጎዳረይ ዋሳና፤ ኤንታ ካዎ ጋꬎን ዎርካናት ቦጫና። እያ ዎደይ ማትስ፤ እያ ጋላሳይካ ጋምኤና።
ISA 14:1 ጎዳይ ያይቆባስ ቃታና፤ እስራኤለ ዛሪድ ዶራና፤ ኤንታ፥ ኤንታ ቡዞ ቢታን ዎꬃና። በታንቾት ኤንታራ እስፋና፥ ያይቆባ ሶ አሳራ ኦይከታና።
ISA 14:2 ካዎተꬃት ኤንታ፥ ኤንታ ቢታ ኤሀና። እስራኤለ አሳይ ኤንታና ማጫነ አደ አይለ ኦꬅድ ጎዳ ቢታን ሃራና። ኤንቲ ባንታና ድእዳይሳታ ድአና፤ ባንታና ሃርዳይሳታ ሃራና።
ISA 14:3 ጎዳይ ህንተና፥ ህንተ ኡንኣፈ፥ መቱዋፐነ ህንተ ሃረትዳ ኢታ አይለተꬃፈ ሸምፕስያ ዎደ፥
ISA 14:4 ህንተ ባብሎነ ካዋ ቦላ ሀይሳዳ ያግድ ቀልቅሳና። ኡንኤይስ ዋንድ አግዴ? እያ ሀንቁዋ ሱላይ ዋንድ አትዴ?
ISA 14:5 ጎዳይ ካዎተꬃታ ፃምኣነ ሃረይሳታ ጉምባ መንꬅስ።
ISA 14:6 ኤንቲ አሳ ዛው ባይና ሀንቁዋን ሾጭዶሶና፤ ባንታና ፆንዳይሳታ ቃንፆና ኡንኤꬅሸ ደእዶሶና።
ISA 14:7 ሽን ቢታ ኡባይ ሸምፕድ ደእስ፤ ኡፋይሳን የፅስ።
ISA 14:8 ሀር አቶሽን፥ ልባኖሰ ዝጋትነ ፂዳት ካዋ ኩንደꬃን ኡፋይትድ፥ “ኔኒ ካዉያዳ ኩንድዳፐ ጉየ፥ ኑና ቃንፃናዉ የይ ባዋ” ያጎሶና።
ISA 14:9 ኔኒ ያ ዎደ፥ ስኦለይ ነና ሞካናዉ ጊግስ፤ እ ካሰ ቢታ ካለꬅዳ አሳ ሞይትለታ፥ ነና ሳሮꬃና መላ ደንꬄስ፤ ቃስ ካሰ ካዎ ግድዳ ኡባ ኤንታ አራታፐ ደንꬅድ ኤሴስ።
ISA 14:10 ኤንቲ ኡባይ ሀይሳዳ ያጋና። “ሄኮ ነካ ኑዳ ዎልቃ ꬋያዳሳ፤ ኑ መላ ግዳዳሳ።”
ISA 14:11 ካሰ ዲꬅ ዲፅን ሳበትያ ነ ቦንቾይ ሀእ ስኦለ ገልስ። ኦላꬅ ኔኒ ዝንእያ ሂፃ፤ ጉፁነይ ኔኒ ማእያ አፍላ ግዳና ያጋና።
ISA 14:12 ነኖ ዎንታ ናአዉ፥ ጉራ ባካላዉ፥ ሳሎፐ ዋና ኩንዳዲ? ነኖ ካዎተꬃታ ካዉሽዳይሶ ዋና ቃንፀታዳ ሳአን ዎꬋዲ?
ISA 14:13 ኔኒ ነ ዎዛናን፥ “ታኒ ሳሎ ከያና፤ ታ ካዎተꬃ አራታ ፆሳ ፆልንቶታፐ ቦላራ ዎꬃና፤ ታኒ ፑደሀ ባጋ ጋፃን ሺቆ ደርያ ሁጰን ኡታና ።
ISA 14:14 ታኒ ሻራት ደእያ ꬎቃ በሳፈ ቦላ አꬋና፤ ታኒ፥ ታና ኡባፈ ꬎቃ ፆሳ ዳንሳና” ያጋዳሳ።
ISA 14:15 ሽን ኔኒ ስኦለን፥ ህርክ ጪሞ ኦላን ዱገ የገታዳሳ።
ISA 14:16 ነና በእዳይሳት፥ “ቢታ ቃꬅዳይስ፥ ካዎተꬃታ ኮኮርስዳይስ፥
ISA 14:17 ሳኣ ቢታ ባዞ ከስዳይስ፥ ሳአን ደእያ ካታማታ ሽር የግዳይስ፥ ባ ቃሾ አሳታ የዶና እፅዳይስ ሀይሴ?” ያግድ ትሽ ኦꬅድ ፄላና።
ISA 14:18 ካዎተꬃታ ካዎት ኡባይ ባ ዱፎን ዱፎን ቦንቾን ዝንአና።
ISA 14:19 ሽን ኔኒ እፀትዳ ታሸዳ ነ ዱፉዋፐ ጋፃ ሆለታዳሳ። ነ አሀይ ማሻን ሀይቅዳ አሀንነ ኦላን ደእያ ሹቻታኮ ዱገ ዎꬍዳይሳታ አሀን ካመትስ። ኔኒ ቶሆን የትዳ አሀ መላ ግዳዳሳ።
ISA 14:20 ኔኒ ነ ቢታ ꬋይስዳ ግሾነ ነ አሳ ዎꬍዳ ግሾ ኤንታራ ሞገታካ። ኢታ ሱንꬃይ ኮቻይ መርናዉ ፄገቶፎ።
ISA 14:21 ኤንቲ ደንድድ ቢታ ላቶና፤ ሳአ ኡባ ካታማ ፃላላ ኦꬆና መላ ኤንታ አዋታ ናጋራ ግሾ፥ እያ ናይታ ዎꬋናዉ ጊግስተ።
ISA 14:22 ታኒ “ኤንታ ቦላ ደንዳና፤ ኤንታ ሱንꬃ፥ ኤንታ ኮቻነ ኤንታ የለታ ባብሎነፐ ꬋይሳና።
ISA 14:23 ታኒ ባብሎነ ቁፃረይ ደእያ በስነ ሃꬅ ኤልያ በሲ ኦꬃና፤ ታኒ ጋዶ ፕቶን እያ ፕታና” ያጌስ ኡባፈ ዎልቃማ ጎዳይ።
ISA 14:24 ኡባፈ ዎልቃማ ጎዳይ ሀይሳዳ ያግድ ጫቅስ፦ “ታኒ ሀልችዳይሳዳ ሀናና፤ ታኒ ቆፕዳይሳዳ ፖለታና።
ISA 14:25 ታኒ አሶረ አሳ ታ ቢታን መንረꬃና፤ ታ ደርያ ቦላ እያ የꬋና። እያ ቃምባራይ ኤንታ ቦላፈ፥ እያ ቶሆይ ኤንታ ሀሽያፐ ክቻና” ያግስ።
ISA 14:26 ሳአ ኡባስ ቆፈትዳ ቆፋይ ሀይሳ፤ ካዎተꬃታ ኡባ ቦላ ምጨትዳ ኩሸይካ ሀይሳ።
ISA 14:27 ኡባፈ ዎልቃማ ጎዳይ ሀይሳ ቆፕዳ ግሾ እያ ድጋናዉ ዳንዳኤይ ኦኔ? እያ ኩሸይ ምጨትስ፤ ሄሳ ጉየ ዛራናዉ ዳንዳኤይ ኦኔ?
ISA 14:28 ካዎይ አካዝ ሀይቅዳ ላይꬅ ኦደትዳ ቃላይ ሀይሳ:
ISA 14:29 ህንተኖ ፍልስፄመ አሳዉ፥ ህንተና ሾጭዳ ፃምአይ መእዳ ግሾ ኡፋይቶፍተ። ሄ ሾሻ ኮቻፈ ሀሶይ ከያና፤ እያ ኮቻይ ቃስ ፆንገትያ ሾሽ ግዳና።
ISA 14:30 ማንቆፈ ማንቆት ታ ቆሩዋን ሄመታና፤ መቶታንቾት ዎፑ ግድ ዝንአና። ሽን ታኒ ነ ኮቻ ኮሻን ዉርሳና፤ ኔፐ አትዳ ጉꬃታ ዎꬋና።
ISA 14:31 ነኖ ፐንግያዉ፥ ዬካ! ነኖ ካታማዉ፥ ዋሳ! ህንተኖ ፍልስፄመ አሳዉ፥ ህንተ ኡባይ ህርጋን ትልእተ! ፑደሀ ባጋፈ ጩይ ከይድ ዬስ፤ ሄ ጩጋፐ ዱፅድ ጉየ አተይ ባዋ።
ISA 14:32 ሄ ካዎተꬃይ ኪትዳ አሳታስ ዎይግድ ዛራኔ? ጎዳይ ፅዮነ ኬፅን፥ ቆሄትዳ አሳይ እ ግዶን ቆሰትድ አትያ በሲ ደምስ።
ISA 15:1 ሞአበ ቢታባ ጎዳይ ኦድዳ ቃላይ ሀይሳ: ሞአበን ደእያ ኤራ ካታማይነ ቂራ ካታማይ እስ ቃማ ላለትድ ꬋይዶሶና።
ISA 15:2 ድቦናን ደእያ አሳይ ባንታ ኤቃ ኬꬃን ዬካናዉ ꬎቃ በሲ ከይዶሶና። ሞአበ አሳይ ነቦስነ መደባስ ዬኬስ። ሁጰ ኡባይ ቡሉሰትስ፤ ቡች ኡባይ ሜደትስ።
ISA 15:3 ኦገ ቦላ ካዮ ማኦ ማኦሶና፤ ፖቀ ቦላነ ዳባባ ኡባን ዬኮሶናነ አፉꬅ ꬋርጮሶና።
ISA 15:4 ሀሰቦና አሳይነ ኤላላ አሳይ ዋሶሶና፤ ኤንታ ዋሶይ ያሃፃ ጋካናዉ ስኤቴስ። ሄሳ ግሾ፥ ኦላስ ዳንጭዳ ሞአበ ዎታዳረት ባንታ ቃላ ꬎቁ ኦꬅድ ዋስዶሶና፤ ኤንታ ሸምፖይ ኮኮርስ።
ISA 15:5 ታኒ ሞአበስ ዎዛናፐ ዬካስ፤ እያን ደእያ አሳይ ዞኣረነ ኤግላት-ሸልሻ ካታማ ባቃትስ። ኤንቲ ሉህታ ኦግያን ዬክሸ ቦሶና፤ ባጋት ቃስ ሆሮናይማ ብያ ኦግያን፥ ባንታ ꬋዩዋ ግሾ ዋሶ ጎችዶሶና።
ISA 15:6 ናምርማ ሃꬃት መልዶሶና፤ ማታይ ምጭስ፤ አጫይ ሹልስ፤ ጭልኦባይ አይብካ ባዋ።
ISA 15:7 ሄሳ ግሾ፥ ኤንቲ ባንታ ሺሽዳ ሻሉዋነ ምንጃ ቶክ ኤክድ፥ አሀያ ምꬃይ ደእያ ዛንጋራፐ ሄፍንꬅ ኤፎሶና።
ISA 15:8 ሞአበ ሄራ ኡባይ ዋሶ ፃላላ ግድስ፤ ኤንታ ዋሶይ ኤግላማነ ብኤር-ኤልመ ጋካናዉ ስኤቴስ።
ISA 15:9 ድሞና ሃꬃት ሱꬅ ግድዶሶና፤ ሽን፥ ሀእካ ታኒ ድሞና ካታማ ቦላ ካሰይሳፈ አꬍያ መቶ ኤሀና። ሞአበፐ ከስ ኤክድ ባቃተይሳታ ቦላነ ሄ ቢታን አትዳይሳታ ቦላ ጋሞ የዳዳ ዉርሳና።
ISA 16:1 ሞአበ አሳዉ፥ ባዞ ብያ ኦግያን ደእያ ሴላፐ ኡርገ ዶርሳታ እሞታ ኦꬅድ፥ የሩሳላመን ደእያ ቢታ ሃረይሳስ የድተ።
ISA 16:2 ሞአበ ማጫሳይ ባንታ ኬꬃፈ ጎደትዳ ካፎታዳ አርኖና ሻፋ ፕንያ በሳን ላለታና።
ISA 16:3 ሞአበ አሳይ ይሁዳ አሳኮ፥ “ኑና ዞርተ፤ ኑና ኑ ሞርከታፐ አሽተ፤ ሴታ ጋላሳን ምꬃ ኩያዳ ህንተ ኩያ ኑ ቦላ ኩያይተ። ጎደተይሳታ ቆስተ፤ ቆሰትዳይሳታ አꬅድ እሞፕተ።
ISA 16:4 ሞአበፐ ጎደተይሳት ህንተ ግዶን ደኦ፤ ኤንታ ꬋይሳናዉ ኮየይሳታፐ ቆሰትድ አትያ በሰ ግድተ። ኤንታ ኡንኤይሳት ዉርዶሶና፤ ኤንታ ꬋዮይ አትስ፤ ኦቶራንቾት ቢታፈ ꬋይዶሶና።
ISA 16:5 ሄሳፈ ጉየ፥ ሲቆን እስ ካዎተꬃ አራታይ ኤቃና፤ ሄ አራታን፥ ዳዊታ ኮቻፈ እስ አማነትያ ካዎይ ኡታና። እ ሱረተꬃ ኮያና፤ ፅሎተꬃ ኦꬃናዉ ኤለሳና” ያጋና።
ISA 16:6 ይሁዳ አሳይ፥ “ሞአበ አሳይ አይ መላ ኦቶርያኮ ኑ ኤንታ ኦቶሩዋ ስእዳ፤ ኤንታ ጬቁዋነ ኤንታ ጫሻ ስእዳ፤ ሽን ኤንታ ኦቶሮይ ሀዳ” ያጋና።
ISA 16:7 ሄሳ ግሾ፥ ሞአበይ ባዉ ዬኮ፤ አስ ኡባይካ ሞአበስ ዬኮ። ቅር-ሄሬሳን ህንተ ደእያ ዎደ ምዳ ሎኦ ካꬃ ሀሳይሸ ዬክተ።
ISA 16:8 ሀሰቦና ጎሻይነ ሰባማ ዎይነ ጋደይ ꬋይስ። ካዎተꬃታ ሀላቃት የረꬅዳ ታሸት መላ ቢታ ካንꬅድ ያእዜራ ጋክዶሶና፤ ኤንታ አጫይ ዳይድ፥ አባ ፕንስ።
ISA 16:9 ታኒ ያእዜራ ካታማስ ዬክዳይሳዳ ሰባማ ካታማ ዎይነታስ ዬካይስ። ሀሰቦና ካታማስነ ኤልኣላ ካታማስ፥ ታኒ ታ አፉꬃ ጉሳይስ። ህንተ ምꬃ አይፍያነ ህንተ ቦትዳ ካꬃ ቦላ ኦል ደንድስ።
ISA 16:10 ጎሻ ጋድያፐ ኡፋይስነ ሀሹ ጉስ ኤከትስ። ዎይነ ጋድያን ማዝሙረይ የፀተና። ኡፋይሳን ዎይነ ጉምእያ በሳን ጉምእያ አስ ባዋ፤ ታኒ ጉምኤይሳታ እልልሳ ꬋይሳስ።
ISA 16:11 ሄሳ ግሾ፥ ታ ዎዛናይ ሞአበስ፥ ታ ጋርሳ አሳተꬃይካ ቅር-ሄሬሳስ ዬኬስ።
ISA 16:12 ሞአበይ ባ ዙማ ቦላ ከይኮካ፥ ባና ጮ ዳቡርሴስ፤ እ ዎሳናዉ ባ ኤቃ ኬꬅ ገልኮካ ባና አይኮካ ማደና።
ISA 16:13 ጎዳይ ካሰትድ ሞአበባ ኦድዳ ቃላይ ሀይሳ።
ISA 16:14 ሽን ሀእ ጎዳይ፥ “ኡነ ኦሳንቾ ዎደይ ጉꬃ ግደይሳ መላ ሞአበ ቦንቾይነ እያ ዳሮተꬃይ ሄꬑ ላይꬃ ግዶን ዉራና። እያን አትያ አሳይ ፓꬆናይሳታነ ዎልቅ ባይናይሳታ ግዳና” ያጌስ።
ISA 17:1 ዳማስቆባ ጎዳይ ሀይሳዳ ያጌስ፦ “ሄኮ፥ ህዛፐ ጉየ ዳማስቆይ ካታማ ግዶኖሽን፥ ላለꬃ ዶረ ግዳና።
ISA 17:2 አሮራ ካታማት አስ ባይና ባይሳ ቢታ ግዳና፤ ያን መሄይ ሄመታና፤ ኤንታ ያሽያባይ ዴና።
ISA 17:3 ኤፍሬማፐ ሚፃት፥ ዳማስቆፈ ካዎተꬃይ ꬋያና፤ ሶረፐ አትዳ ጉꬃት እስራኤለ አሳ ቦንቹዋ መላ ግዳና” ያጌስ ኡባፈ ዎልቃማ ጎዳይ።
ISA 17:4 “ሄ ዎደ እስራኤለ ቦንቾይ ቃረታና፤ እያ ኦርደተꬃይ ግልቃና።
ISA 17:5 እስራኤለይ፥ ካꬅ ጫክ ኤክድ ከይዳ ጎሻ ጋደ መላ ግዳና፤ ዎይኮ ካꬅ ጫክ ስምን ካሎትዳ ራፋይመ ዛንጋራ መላ ግዳና።
ISA 17:6 ሻማሆ ቆቆፍ ስምን፥ ፄራን ናምኡ ዎይኮ ሄꬑ አይፈት አተይሳዳ ዎይኮ እስ ያንግያ ቦላ ኦይዱ ዎይኮ እቻሹ አይፈት አተይሳዳ እስራኤለፐ ጉꬃት አታና” ያጌስ ጎዳይ እስራኤለ ፆሳይ።
ISA 17:7 ሄ ጋላስ አሳይ ባንታና መꬍዳይሳኮ፥ ባንታ አይፍያካ እስራኤለ ጌሻኮ ዛራና።
ISA 17:8 ኤንቲ ባንታ ኩሸን ጊግስዳ ያርሾ በሳኮ ፄሎኮና፤ አሼራ ኤቃ ምስልያስ ግድን፥ እፃነ ጩይሳናዉ ኤንቲ ባንታ ኩሸን መꬍዳ ያርሾ በሳ ቦንቾኮና።
ISA 17:9 ሄ ዎደ እስራኤለ አሳ ጋሶን ህወነ አሞረ ካታማት ላለትዳይሳዳ ኤንታ ምኖ ካታማት ላለታና፤ ባይሳ ግዳና።
ISA 17:10 ህንተ ህንተና አሽያ ፆሳ ዶግደታ፤ ህንተ ቆሰት አትያ ዛላ ቆፕበከታ። ሄሳ ግሾ፥ ኔኒ ሎኦ ምꬃነ ካረ ቢታፈ ይዳ ሎኦ አታክልትያ ቶክኮካ፥
ISA 17:11 ሄ ጋላስ ኤንቲ ድጭድ ጋካና መላ ኦꬅኮካ፥ ቃስ ኔኒ ዘርዳ ዎንተ ኤንቲ ጪያኮካ ኔኒ አይፈ ደማካ። እያ በሳን ፓፆና ሀርገነ መቶ ጫካና።
ISA 17:12 ሄኮ፥ አባ ቤታዳ ጉምያ ዳሮ አሳ፥ ቃስ ዎልቃማ ሃꬃዳ ዋስያ ካዎተꬃታ አየ!
ISA 17:13 ካዎተꬃት ዳሮ ሃꬃዳ ጉሞሶና፤ ሽን ጎዳይ ኤንታ ሴራና። ኤንቲ ዙማ ሁጰን ደእያ ቡረ ጫርኮይ ደንይሳዳነ ጎተይ ባና ደንይሳዳ ኤንታ ደንꬅድ ሃሆ በሲ ላላና።
ISA 17:14 ሳእ ቃምያ ዎደ ኤንቲ ዳጋማና፤ ሳእ ዎንታናፐ ስን ኤንቲ ꬋያና። ኑና ዎልቃን ኤከይሳታነ ቦንቀይሳታ ቃዳይ ሀይሳ።
ISA 18:1 ቶጰ ሻፋታፐ ሄፍንꬃን ጊርያ ቀፈት ደእያ ቢታ አየ!
ISA 18:2 ሄ ቢታይ፥ ኪተትያ አሳታ ማይረ ዎጎሎን ዎꬅድ ናይለ ሻፋ ቦላራ ኪቴስ። ህንተኖ፥ ኤሶን ኪተተይሳቶ፥ አዱሰነ ሊቆ አሳኮ፥ ማታንነ ሃሆን ያሽያ አሳኮ፥ ዎልቃማነ ፆንያ ካዎተꬃኮ፥ ሻፋን ኤንታ ዛዋይ ሻከትዳ ቢታኮ ቢተ።
ISA 18:3 ህንተኖ፥ ሳአን ደእያ ኡባቶ፥ ህንተኖ፥ ቢታን ደኤይሳቶ፥ ዙማ ቦላ ማል ኤቅያ ዎደ ህንተ በአና፤ ሞይዘይ ፑነትያ ዎደ ህንተ ስአና።
ISA 18:4 ጎዳይ ታኮ፥ “ሴታ ጋላስ ስእ ግድ ፖእያ አዋዳ፥ ቃስ ካꬅ ጫክያ አጌናን፥ ሆምብያ ቃማን በንትያ አካ መላ ታኒ ስእ ጋዳ፥ ታ ደእያ በሳፈ ዱገ ፄላና” ያግስ።
ISA 18:5 ካꬃ ጫክያ ዎድያፐ ካሰ፥ ጪሻይ ቆለትድ ስምን፥ ዎይነ ቴርያ ዎደ ኦጮ ባጫን ፄራ ቃንፀይሳዳ እ ሄ ቢታ አሳ ꬋይሳና።
ISA 18:6 ኤንቲ ኡባይ ደርያ ሁጵያን ደእያ፥ ምያባ ዎችያ ካፎታስነ ዶአታስ አታና። ካፎት ባልጎን፥ ዶአት ቦነን ኤንታ ምድ ሻጫና።
ISA 18:7 ሄ ዎደ አዱሰነ ሊቆ አሳፐ፥ ማታንነ ሃሆን ያሽያ አሳፐ፥ ዎልቃማነ ፆንያ ካዎተꬃፈ፥ ዛዋይ ሻፋን ሻከትዳ ቢታፈ፥ ኡባፈ ዎልቃማ ጎዳስ እሞት ፅዮነ ዙማ፥ እያ ሱንꬃይ ደእያ በሳ ያና።
ISA 19:1 ግብፀ ቦላ ጎዳይ ሀይሳዳ ያግድ ኦድስ: “ሄኮ፥ ጎዳይ ኤሶትያ ሻራ ቶግድ፥ ግብፀ ዬስ። ግብፀ ኤቃት እያ ስንꬃን ኮኮራና፤ ግብፀ አሳ ዎዛናይ ያሻን ትልአና።
ISA 19:2 ግብፀ አሳ እሱዋ እሱዋ ቦላ ደንꬃና። እሻይ እሻ ቦላ፥ ሾሮይ ሾሩዋ ቦላ፥ ካታማይ ካታማ ቦላ፥ ካዎተꬃይ ካዎተꬃ ቦላ ደንዳና።
ISA 19:3 ግብፀ አሳይ ኤሾ ꬋያና፤ ታኒ ኤንታ ሀልቹዋ ሀዳ ኦꬃና። ኤንቲ ባንታ ኤቃታ፥ ሞይትለራ ኦደተይሳታ፥ ብታንቾታነ ማሮታ ዞረ ኦይቻና።
ISA 19:4 ታኒ ዎዛና ምኖ ግድዳ ግብፀ ካዋ ኩሸን አꬃዳ እማና፤ እ ኤንታ ሃራና” ያጌስ ኡባፈ ዎልቃማ ጎዳይ።
ISA 19:5 ናይለ ሻፋ ጉፅ ጉፅ ባና፤ ሃꬃይካ መላና።
ISA 19:6 ꬋዋይ ፅንቃና፤ ግብፀ ሃꬃት ጉፃናነ መላና፤ ማይረይነ ማቃይ ሹላና፤
ISA 19:7 ናይለ ሻፋ ጋፃን ደእያ ጭልኦባይ መላና፤ እያ ሄራን ዘረትዳ ካꬃ ኡባይ መላናነ ꬋያና።
ISA 19:8 ሞሎ ኦይከይሳት ካዮታና፤ ናይለ ሻፋን ግተነ ሞሎ ማንፃቆ የግያ ኡባይ ዬካናነ ዶጫና።
ISA 19:9 ፓደትዳ ታልባፈ ሊኖ ማኦ ኦይሳት፥ ቦꬃ ማኦ ዳድያ ዶርዘት ኡፋይስ ቃንፃና።
ISA 19:10 ፒቀይሳትነ ኡነ ኦꬅያ ኡባይ ካዮታና።
ISA 19:11 ፆኣነ ሃረይሳት ኤያ፤ ግብፀ ካዋ ዞርያ ጭንጫት ፓꬆና ዞረ ዞሮሶና። ያትን፥ ህንተ ግብፀ ካዋኮ፥ “ኑኒ ጭንጫታ ናይታ፤ ኑኒ በን ካዎታ ናይታ” ጋናዉ ዋንድ ዳንዳኤቲ?
ISA 19:12 ያትን፥ ነ ጭንጫ አሳት ሀእ አዉን ደኦና? ኡባፈ ዎልቃማ ጎዳይ ግብፀ ቦላ ኦꬃናዉ ሀልችዳባ አነ ኤንቲ ነዉ ኦዶነ ነና ኤርሶና።
ISA 19:13 ፆኣነ ሃረይሳት ኤይዶሶና፤ መምፕሳ ሃረይሳት ጭመትዶሶና። ግብፀ ዞርያ ግታ አሳት እያ ባለꬅዶሶና።
ISA 19:14 ጎዳይ ኤንታ ግዶን ኤይስያ አያና የድስ፤ ኤንቲ ማꬆትዳ አስ ባ ጮሻን ጎንዶረተይሳዳ ግብፀይ ባ ኦሶ ኡባን ጎንዶረታና መላ ኦꬅዶሶና።
ISA 19:15 ዛምቦይ ዎይኮ ቦዝ፥ ዛምባ ታሸይ ዎይኮ ማይረይ ግብፀን ኦꬃናባይ አይብካ ባዋ።
ISA 19:16 ሄ ጋላስ ግብፀ አሳይ ማጫሳ መላ ግዳና። ኤንቲ ኡባፈ ዎልቃማ ጎዳይ ኤንታ ቦላ ቃꬅያ እያ ኩሽያ በእድ ያሻን ኮኮራና።
ISA 19:17 ይሁድ ግብፀ ያሽሳና፤ ኡባፈ ዎልቃማ ጎዳይ ኤንታ ቦላ ኦꬃናዉ ቆፕዳ ቆፋ ግሾ ይሁዳባ ስእያ ኡባይ ያያና።
ISA 19:18 ሄ ጋላስ ግብፀ ቢታን ደእያ እቻሹ ካታማት ካናነ ቃላን ኦደተይሳታነ ኡባፈ ዎልቃማ ጎዳስ አማነታናዉ ጫቀይሳታ ግዳና። ሄ ካታማታፐ እሶይ፥ “አዋ ካታማ” ጌተትድ ፄገታና።
ISA 19:19 ሄ ዎደ ግብፀ ቢታስ ግዱዋን፥ ጎዳስ ያርሾ በሳይ ጊጋና፤ ቃስ ግብፀ ቢታ ዛዋን ጎዳስ ቱስ ኤቃና።
ISA 19:20 ሄስ ኡባፈ ዎልቃማ ጎዳስ ግብፀ ቢታን ማላነ ማርካ ግዳና። ኤንቲ ባንታና ኡንኤይሳታ ግሾ ጎዳኮ ዋስያ ዎደ ኤንታዉ አሸይሳ ኪትድ ኤንታ አሻና።
ISA 19:21 ሄ ዎደ ጎዳይ ግብፀ ቢታን ኤረትዳይሳ ግዳና፤ ግብፀ አሳይ ሄ ጋላስ ጎዳ ኤራና። ያርሾነ ካꬃ ያርሾ ኤክ ይድ እያ ጎይናና። ኤንቲ ጎዳስ ቃንጋናነ ባንታ ቃንገꬃ ጋꬃና።
ISA 19:22 ጎዳይ ግብፀ ቢታ ሾጫና፤ እዮ ዛሪድ ፓꬃና። ኤንቲ ጎዳኮ ስማና፤ እ ኤንታ ዎሳ ስእድ ፓꬃና።
ISA 19:23 ሄ ጋላስ ግብፀፈ አሶረ ጋካናዉ ዳልጋ ኦገይ ከያና፤ አሶረ አሳይ ግብፀ፥ ግብፀ አሳይ አሶረ ስመረታና፤ ግብፀ አሳይ አሶረ አሳራ እስፈ ጎይናና።
ISA 19:24 ሄ ጋላስ እስራኤለይ ግብፀራነ አሶረራ ሄꬓንꬆ ቢታ ግድድ፥ ሳኣስ አንጆ ግዳና።
ISA 19:25 ኡባፈ ዎልቃማ ጎዳይ ኤንታ ሀይሳዳ ያግድ አንጃና፦ “ታ አሰ ግድዳ ግብፀይ አንጀቶ፤ ታ ኩሸ ኦሶ ግድዳ አሶረይ አንጀቶ፤ ታ ላታ ግድዳ እስራኤለይ አንጀቶ” ያጋና።
ISA 20:1 አሶረ ካዎይ ሳርጎን ኪትዳ ቶራ ሞጮናት ይድ፥ ፍልስፄመ ካታማ ግድዳ አሽዶዳ ኦልድ ኦይክዳ ላይꬅ፥
ISA 20:2 ጎዳይ አሞፀ ናኣ እሳያሳ ሀይሳዳ ያግስ፦ “ነ ካዮ ማኡዋ ቃራ፤ ነ ቶሁዋፐ ጫማ ከሳ” ያግስ። እሳያስ ጎዳይ ግዳይሳዳ ኦꬅድ ካሎነ መላ ቶሆን ሄመትስ።
ISA 20:3 ያትን ጎዳይ ሀይሳዳ ያግስ፦ “ታ አይለይ እሳያስ ግብፀነ ቶጰ ቦላ ጋካና መቱዋስ ማላ ግዳና መላ ሄꬑ ላይꬅ ካሎነ መላ ቶሆን ሄመትስ።
ISA 20:4 ሄሳ ግሾ አሶረ ካዎይ፥ ግብፀታስ ዬላ ግዳና መላ ግብፀፈነ ቶጰፈ ድኤትዳ ናአተꬃታነ ጭማታ ካሎነ መላ ቶሆ ላግድ ኤፋና።
ISA 20:5 ቶጰን አማነተይሳትነ ግብፀን ጬቀተይሳት ያያና፤ ዬላታና።
ISA 20:6 ሄ ጋላስ አባ ጋፃን ደእያ አሳይ ሀይሳዳ ያጋና፦ ‘ኑና አሶረ ካዉዋፐ አሻና ግድ ኡፋይስ ኦꬅድ ኤንታኮ ባቃትዳ አሳ ቦላ ሀይስ ጋክኮ፥ ያትን፥ ኑኒ ዋንድ ከስ ኤካኔ?’ ያጋና” ያግስ።
ISA 21:1 አባ ማታን ደእያ ባዙዋስ ኦደትዳ ቃላ። ናገበ ጎተይ መንረꬅሸ የይሳዳ ኦላንቾይ ባዞፈ፥ ꬋዮ ቢታፈ ዬስ።
ISA 21:2 ታኒ እስ ያሽያ ቆንጨꬅ በአስ፤ አꬅድ እመይስ አꬅድ እሜስ፤ ድኤይስ ድኤስ። ኤላማ ከያ! ሜዶና ካታማ ኦይካ! ባብሎነይ ጋꬅዳ ዋይያ ታኒ ድጋና።
ISA 21:3 ሄሳ ግሾ ታ አሳተꬃይ ሳከትስ፤ ማጫስ ኤቀተይሳዳ ታኒ ኡንኤታስ። ታኒ ስእያባይ ታና ኮኮርስስ፤ ታኒ በእያባይ ታና ዳጋንꬅስ።
ISA 21:4 ታና ቢጮዬስ፤ ያሻን ኮኮራስ፤ ታኒ ኡፋይስ ዎꬅዳ ኦማርሳይ ኡንአን ላመትስ።
ISA 21:5 ግብራ ጊግስዶሶና፤ ኡትያ ሶ ጊግስዶሶና፤ ማናዉነ ኡያናዉ ኡትዶሶና። ህንተኖ ሀላቃቶ፥ ደንድተ! ህንተ ጎንዳልያ ቁችተ!
ISA 21:6 ጎዳይ ታኮ ሀይሳዳ ያግስ፦ “ባዳ ሀንያባ ዎችድ ነዉ ኦድያ አስ ዎꬃ።
ISA 21:7 ፓራት ጋረ ጎችያ ዎደ፥ ሀረነ ግማለ ቶገይሳታ በእያ ዎደ፥ ሎይꬅድ ፄሎ፤ አኬክድ በኦ” ያግስ።
ISA 21:8 ዎቸይስ፥ “ጎዳዉ፥ ጋላስነ ቃማ ፓጭ ባይና ታ ሻኩዋ ቦላ ኡታዳ ናጋይስ።
ISA 21:9 ሄኮ፥ ናምአ ናምአ ግድድ ፓራ ጋረ ቶግዳ አሳት ዮሶና” ያግስ። እ ቃስካ፥ “ባብሎነይ ኩንድስ፤ እያ ፆሳታ ምስለት ሳአን ኩንድድ ጋጨትዶሶና” ያግድ ዋስስ።
ISA 21:10 ህንተኖ፥ ዉዱማን ጋጨትዳ ታ አሳዉ፥ ኡባፈ ዎልቃማ ጎዳፐ፥ እስራኤለ ፆሳፈ ስእዳባ ታኒ ህንተዉ ኦዳይስ።
ISA 21:11 ኤዶመባ ጎዳይ ሀይሳዳ ያግስ፦ “እስ አስ ሳይረፐ ታና ፄግድ፥ ናገይሶ፥ ሳእ ዎንታናዉ አይ ማል አትዴ? ናገይሶ፥ ሳእ ጌያናዉ አይ ማል አትዴ?” ያጌስ።
ISA 21:12 ናገይስ ዛሪድ፥ “ሳእ ዎንታና ሀኔስ፤ ሽን ዛር ቃማና። ህንተ ኦይቻናዉ ኮይኮ ኦይችተ፤ ስም ይድ ኦይችተ” ያግስ።
ISA 21:13 አራበ ባ ጎዳይ ሀይሳዳ ያጌስ፦ “ህንተኖ ዳዳና ዛልአንቾቶ፥ ህንተ፥ ህንተ ጫና ግማለታራ አራበ መላ ቢታን አቃና።
ISA 21:14 ህንተኖ፥ ቴማን ቢታን ደእያ አሳዉ፥ ሳሞትዳይሳታስ ሃ ኤህተ፤ ኮሻትዳይሳታስ ካꬅ እምተ።
ISA 21:15 ኤንቲ ማሻፈ፥ ሾሆፔ ሾደትዳ ማሻፈ፥ ዳፈትዳ ዶንገፈነ ምኖ ኦላፐ ባቃቶሶና” ያጌስ።
ISA 21:16 ጎዳይ ታኮ ሀይሳዳ ያግስ፦ “ኡነ ኦሳንቾ ዎደይ ዉረይሳዳ፥ እስ ላይꬃ ግዶን ቀዳረ ቦንቾ ኡባይ ዉራና።
ISA 21:17 ቀዳረን ደእያ ዶንገን ዱክያ ዎልቃማ ኦላንቾታፐ ጉꬃት አታና፤ ጎዳይ እስራኤለ ፆሳይ ሄሳ ኦድስ” ያግስ።
ISA 22:1 “ቆንጨꬃ ዛንጋራ” ጌተትያ በሳባ ጎዳይ ኦድዳ ቃላ። ህንተና ኡባ አይብ ኡንኤꬅን ፖቀ ኬꬃ ቦላ ከይደቲ?
ISA 22:2 ነኖ ዋሶይ፥ ድርጎይነ ዎጫም ኩምዳ ካታማዉ፥ ነ ግዶን ሀይቅዳ አሳት ማሻን ዎይኮ ኦላን ሀይቅቦኮና።
ISA 22:3 ህንተ ሀላቃት ኡባይ እስፈ ባቃትዶሶና፤ ኤንቲ ዶንገይ ባይና ጮ ድኤትዶሶና። ኤንቲ ሃክድ ባቃትኮካ በትዳ ኡባይ ኦይከትዶሶና።
ISA 22:4 ሄሳ ግሾ፥ “ታና አጋግተ፤ ታ አሳስ ምሻ ዬሆ አፉፃዳ ዬካና፤ ታ አሳ ꬋዩዋስ ታና ምንꬆፕተ” ያጋስ።
ISA 22:5 ጎዳይ፥ ኡባፈ ዎልቃማ ፆሳይ ቆንጨꬃ ዛንጋራን ዳጋማ፥ የተꬅነ ኡንአ ጋላስ ኦꬅስ፤ ቃስ ግምበት ዎድያ ጋላስነ ደረታኮ ማዴስ ዋስያ ጋላስ ኦꬅስ።
ISA 22:6 ኤላም ባ ፓራ ጋረታራነ ፓራ አሳታራ ባ ዶንግያ ኦይክድ ይስ፤ ቂራ ዎታዳረት ባንታ ጎንዳለታ ጊግስዶሶና።
ISA 22:7 ህንተ ሎኦ ዛንጋራት ፓራ ጋረታን ኩምዶሶና፤ ፓራ አሳት የሩሳላመ ፐንግያ ስንꬃን ኤቅዶሶና።
ISA 22:8 እ ይሁዳ ሚፃታ ቃርስ። ሄ ጋላስ ዎራ ኬꬃን ደእያ ካዋ ኦላ ሚሸታ በእደታ።
ISA 22:9 ዳዊታ ካታማ ግዶን ላለꬃ ዶርያ በእደታ፤ ጋርሳ ባጋን ደእያ ኦላን ሃ ኩንꬅደታ።
ISA 22:10 የሩሳላመን ደእያ ኬꬃታ ታይብደታ፤ ድርሳ ዛሪድ ግምባናዉ ኬꬃታ ላልደታ።
ISA 22:11 ካሰ ጋልአ ዜሩዋን ደእያ ሃꬃ ዛሪድ፥ ናምኡ ግምበታፐ ግዱዋን ኦላ ጊግስደታ። ሽን ህንተ ሄሳ መꬍዳ ፆሳ አኬክበከታ፤ ዎይኮ ዳሮ ዎደፐ ስን ሄሳ ሀልችዳይሳ ሀሳይበከታ።
ISA 22:12 ሄ ጋላስ ጎዳይ፥ ኡባፈ ዎልቃማ ፆሳይ፥ ህንተና ዬሆስነ ዘለልሳስ፥ ሁጰ ቡሉሳናዉነ ካዮ ማኦ ማአናዉ ፄግስ።
ISA 22:13 ሽን ህንተ ሄሳ አግድ ኡፋይተታነ የፄታ፤ ቦሩነ ዶርሰ ሹኬታ፤ አሹዋ ሜታ፤ ዎይነ ኡዬታ። ኑኒ “ዎንቶ ሀይቃናዉ ደእያ ግሾ፥ ሀች ማናነ ኡያና” ያጌታ።
ISA 22:14 ኡባፈ ዎልቃማ ጎዳይ ሀይሳ ታዉ ቆንጭስስ፤ “ህንተ ሀይቃና ጋካናዉ ሀ ናጋራይ ህንተዉ አቶ ጌተተና። ታኒ ጎዳይ፥ ኡባፈ ዎልቃማ ፆሳይ ሀይሳ ኦዳይስ” ያግስ።
ISA 22:15 ጎዳይ፥ ኡባፈ ዎልቃማ ፆሳይ፥ “ባዳ ካዎ ጋꬎን ሹመትዳ ሳምናሳኮ ሀይሳዳ ያጋ፤
ISA 22:16 ኔኒ ሀይሳን አይ ኦꬃይ? ኔኒ ሀይሳን፥ ዛላ ዎጫዳ ዱፎ ጊግሳና መላ፥ ꬎቃ በሳን ነዉ ዱፎ ቦካና መላነ ዛላ ዎጫዳ ነዉ ሸምፖ በሲ ኦꬃና መላ ኦና ኦይቻዲ?
ISA 22:17 ነኖ ምኖ አድያዉ፥ ነና ጎዳይ ምንꬅድ ኦይካና፤ ጩጩምድ ዎራ ሆላና።
ISA 22:18 ኮሰዳ ነና ዩሽድ ዳልጋ ቢታን ሆላና። ነኖ ነ ጎዳ ኬꬃስ ዬላ ግድዳ አድያዉ ኔኒ ያን ሀይቃና፤ ነ ቦንቾ ፓራ ጋረት ያን አታና።
ISA 22:19 ታኒ ነና ነ ኦሱዋፐ ከሳና፤ ነ ሹማተꬃፈ ሻራና።
ISA 22:20 ሄ ጋላስ ታኒ ካልቀ ናኣ፥ ታ አይልያ ኤልያቄመ ፄጋና።
ISA 22:21 ታኒ ነ ማኡዋ እያ ማይዛና፤ ነ ዳንጩዋ እያ ዳንጭሳና፤ ነ ሹማተꬃ እያዉ እማና። እ፥ የሩሳላመንነ ይሁዳን ደእያ አሳስ አዋ ግዳና።
ISA 22:22 ታኒ ዳዊተ ኬꬃ ቁልፕያ እያዉ እማና፤ እ ዶይን ኦንካ ጎርደና፤ እ ጎርድን ኦንካ ዶየና።
ISA 22:23 ታኒ እያ አማንꬅያ በሳን ꬍሸዳ ቶላና፤ እ ባ አዋ ኬꬃስ ቦንቾ አራታ ግዳና።
ISA 22:24 ቃንዳፈ ኦቶ ጋካናዉ ደእያ ሶ ሚሸታ፥ ኮጫን ካቀይሳዳ፥ እያ አዋ ኬꬃ ቦንቹዋ፥ ናይታነ፥ ናይታ ናይታ ኡባ እያ ቦላ ካቃና” ያግስ።
ISA 22:25 ኡባፈ ዎልቃማ ጎዳይ ሀይሳዳ ያጌስ፦ “ሄ ጋላስ አማንꬅያ በሳን ꬍሽዳ ቶለይ ክቻና፤ ቃንፀታናነ ኩንዳና። እያ ቦላ ካቀትዳ ቶሆ ኡባይ ዱፅድ ዎꬋና” ያጌስ። ጎዳይ ሀይሳ ኦድስ።
ISA 23:1 ፅሮሳ ካታማስ ኦደትዳ ጎዳ ቃላይ ሀይሳ። ፅሮሳ ካታማን ኬꬅ ዎይኮ ሸምፕያ ሶይ ባይና ግሾ ህንተኖ ታርሰሳ ማርካብያ ላገይሳቶ ዬክተ! ቆጵሮሳ ቢታፈ ሀ ዎረይ ህንተኮ ይስ።
ISA 23:2 ህንተኖ፥ አባ ማታን ደእያ አሳዉ፥ ህንተኖ አባ ቦላራ ሄመትያ ዱረትዳ፥ ስዶና ዛልአንቾቶ፥ ስእ ጊተ!
ISA 23:3 ህንተዉ ያ ካꬃይ፥ ናይለ ሻፋፐ ጫከትዳ ሽሆራ ቢታ ካꬅ፤ ህንተ ካዎተꬃታስ ዛልኤ በሲ።
ISA 23:4 ነኖ ስዶና ካታማዉ፥ አባ ማታን ደእያ ሚፃዉ፥ አባይ፥ “ታኒ እቀታብከ፤ የላብከ፤ አደነ ማጫ ናአ ድቻብከ” ያግድ ኦድዳ ግሾ ዬላታ።
ISA 23:5 ሄ ዎረይ ግብፀ ቢታ ጋክያ ዎደ ኤንቲ ፅሮሳባ ስእድ ዳጋማና።
ISA 23:6 ህንተኖ አባ ማታን ደእያ አሳዉ፥ ዘሌልሸ ታርሰሳ ፕንተ።
ISA 23:7 በን ዎደ ኬፀትዳ ካታማይ፥ እያ ቶሆይ እያ ሃሆ ቢታ ኤፍዳይነ ህንተ እያን ኡፋይትያ ፅሮሳ ካታማይ ሀይሴ?
ISA 23:8 ካላቻ ዎስስያ ካታማ፥ እያ ዛልአንቾት ሀላቃታ ግድዳነ እያ ግዶን ባይዘይሳትነ ላመይሳት ቦንቸትዳይሳታ ግድዳ ፅሮሳ ካታማ ቦላ ሀይሳ ሀልችዳይ ኦኔ?
ISA 23:9 ኦቶራንቾታ ቦንቾ ኡባ ጉꬃናዉነ ቢታ ቦላ ቦንቸትዳ ኡባ ካዉሻናዉ ኡባፈ ዎልቃማ ጎዳይ ሀይሳ ሀልችስ።
ISA 23:10 ህንተኖ፥ ታርሰሳ አሳዉ፥ ህንተና ተቅያባይ ባይና ግሾ፥ ናይለ ሻፋዳ ቢታ ቦላ ኩምድ ጎግተ።
ISA 23:11 ጎዳይ አባ ቦላ ባ ኩሽያ ምጭስ፤ እያ ካዎተꬃ ቃꬅስ። ካናነ ሚፃ ላላና መላ ጎዳይ ኪትስ።
ISA 23:12 ጉጅድካ፥ “ህንተኖ፥ ኡንኤትዳ ስዶና አሳዉ፥ ህንተ ኡፋይሳን የፅያ ዎደይ ዉርስ። ደንድድ ቆጵሮሳ ፕንተ፤ ያንካ ህንተ ሳሮ ደመከታ” ያግስ።
ISA 23:13 ባብሎነ ቢታ በእተ፤ ሄ ቢታይ ሀእ ፓꬆናባ ግድስ። አሶረ አሳይ ሄ ቢታን ዶእ አቃናዳ ኦꬅስ። ኤንቲ ያን ደእያ ዎጋ ኬꬃታ ላልድ ባንታዉ ሚፃ ግምብዶሶና፤ ቢታ ባይሳ ኦꬅዶሶና።
ISA 23:14 ህንተኖ፥ ታርሰሳ ማርካበቶ፥ ህንተ ሚፃይ ላለትዳ ግሾ፥ ዘሌልተ።
ISA 23:15 ፅሮሳ ካታማይ እስ ካዎስ ደኦ ላይꬅ ግድያ ላፑን ታሙ ላይꬅ ዶገትድ ዳና ዎደይ ያና። ላፑን ታሙ ላይꬅ ዉርያ ዎደ ላይማ ማጫሳስ የፀትያ የꬃ መላ ፅሮሳ ካታማስ የፀታና።
ISA 23:16 ኤንቲ፥ “ነኖ ዶገትዳ ላይማ ካታማዉ፥ ነ ዲꬃ ኤካዳ ካታማራ ዩያ። ነና አሳይ ሀሳያና መላ ማልኦ ቃላን ዳሮ የꬅ የፃ” ያጋና።
ISA 23:17 ላፑን ታሙ ላይꬃይ ፖለትያ ዎደ፥ ጎዳይ ፅሮሳ ፆሞሳና። ሽን ሄሳፈ ጉየ፥ እ በን ባ ላይማተꬃ ኦሱዋኮ ስማና፤ ሳአን ደእያ ካዎተꬃታ ኡባራ ላይማታና።
ISA 23:18 ግዶሽን፥ እያ ዛልእያ ዎይነ እያ ዳሞዘይ ጎዳስ ዱማትዳይሳ ግዳና፤ እያ ዛልእያ ዎይነ ካꬅነ ሎኦ ማኦ ሻማናዉ፥ ጎዳስ ኦꬅያ አሳስ እመታናፐ አትሽን፥ ሚሸ ኬꬃን ዎይኮ ምንጃ ኬꬃን ኡተና።
ISA 24:1 ሄኮ፥ ጎዳይ ቢታ ላላናነ ባይሳ ከሳና፤ እ፥ ቢታ ꬋይስድ እያን ደእያ አሳ ላላና።
ISA 24:2 አስ ኡባይ እስኖ ግዳና፤ ካህነይ አሳራ እስኖ ግዳና፤ አይለይ ጎዳራ እስኖ ግዳና፤ ጋꬍንድያ ጎዳተራ እስኖ ግዳና፤ ሻመይስ ባይዘይሳራ እስኖ ግዳና፤ ታልኤ እመይስ ታልኤ ኤከይሳራ እስኖ ግዳና፤ አጮ አቸይስ አጮ ጭገይሳራ እስኖ ግዳና።
ISA 24:3 ቢታ ኡባይ ቦንቀትድ ባይሳ ግዳና፤ ጎዳይ ሀ ቃላ ኦድስ።
ISA 24:4 ቢታይ መላና፥ እያ አጫይ ሹላና፤ አላመይ አርጋጫና፥ ዳቡራና፤ ቢታን ደእያ ዎልቃማ አሳይ ዳቡራና።
ISA 24:5 ቢታይ ባናን ደእያ አሳ ጋሶን ቱንስ። ኤንቲ ህግያስ ኪተትቦኮና፤ ዎጋ ናግቦኮና፤ መርና ጫቁዋ መንꬅዶሶና።
ISA 24:6 ሄሳ ግሾ፥ ባደꬃይ ቢታ ሜስ፤ አሳይ ባንታ ናጋራ ጋሶን ፕርደታናዉ በሴስ። ሳአን ደእያ አሳይ ፁገትዶሶና፤ ጉꬃ አስ አትስ።
ISA 24:7 ዎይነይ ፃጶራ መልስ፥ ማልአንቶ ዎይነይ ዉርስ፤ ካሰ ኡፋይትያ ኡባይ አዛንስ።
ISA 24:8 ካራቦ ባቆይ አትስ፤ የꬃ ዋሶይ ስእ ግስ፤ ኡፋይስያ ዲꬃ ዱርሳይ ኤቅስ።
ISA 24:9 ህዛፐ የፅሸ ዎይነ ኡሻ ኡዮኮና፤ ኡሻይካ ኤንታዉ ጫሞ ግዳና።
ISA 24:10 ላለትዳ ካታማይ ባይሳ ግዳና፤ ኦንካ ገሎናዳ ኬꬃ ኡባይ ጎርደትስ።
ISA 24:11 ዎይነ ኡሽ ꬋይዳ ግሾ አሳይ ዳባባን ዋሴስ፤ ኡፋይስ አዛኖን ላመትስ፤ ኡፋይስያባይ ሳአፐ ꬋይስ።
ISA 24:12 ካታማይ ላለትስ፤ ካታማ ፐንገት መቀረትዶሶና።
ISA 24:13 ሻማሆ ቴራ ቆቆፈይሳዳ፥ ዎይነ ማፅ ስምን፥ ፖሽለይ አተይሳዳ፥ ቢታ ቦላ ደእያ ካዎተꬃታ ቦላ ሄሳዳ ሀናና።
ISA 24:14 ኤንቲ ባንታ ቃላ ꬎቁ ኦꬅድ፥ ኡፋይሳን የፆሶና፤ ዉሎሀ ባጋራ ደእያ ኡባይ ጎዳ ግታተꬃ ኦዳና።
ISA 24:15 ሄሳ ግሾ፥ ዶሎሀ ባጋራ ደኤይሳት፥ ጎዳስ ቦንቾ እማና፤ ዩሾይ አባን ተቀትዳ ቢታት ጎዳስ፥ እስራኤለ ፆሳስ ቦንቾ እማና።
ISA 24:16 ኑኒ፥ “ፅሉዋስ ቦንቾይ ግዶ” ግያ ማዝሙረ ቢታ ጋፃፐ ስእዳ። ሽን፥ “ታኒ ግልቃስ! ታኒ ላፋስ! ታና አየ! አꬅ እመይስ አꬅድ እሜስ፤ ካደይሳት ጉጅድ አꬅድ እሞሶና” ያጋስ።
ISA 24:17 ህንተኖ፥ ሳአን ደእያ አሳዉ፥ ዳጋም አፎይነ ፅሄይ ህንተና ናጌስ።
ISA 24:18 ዳጋንꬅያ ግርሳፈ ባቃተይስ ኦላን ኩንዳና፤ ኦላፈ ከየይሳ ፅሄይ ኦይካና፤ ሳሎ ማስኮተት ዶየትዶሶና፤ ቢታ ባሶት ቃፅዶሶና።
ISA 24:19 ቢት ዛእስ፤ ቢት ሻከትስ፤ ቢት ቃፅስ።
ISA 24:20 ቢት ማꬆ አሳዳ ጋንድጋሬስ፤ ጫርኮይ ሱግያ ጋባዳ ዩዬስ። ጌላታ ባላይ ዳሮ ዴፅዳ ግሾ ዛር ደንዶና መላ ኩንድስስ።
ISA 24:21 ሄ ጋላስ ጎዳይ ሳሎ ዎልቃታ ሳሎን፥ ሳኣ ካዎታ ሳአን ፕርዳና።
ISA 24:22 ኦላን ደእያ ቃሾ አሳዳ ኤንታ እስፈ ሺሻና፤ ቃሾ ኬꬃን ኤንቲ ጎርደትድ ኡታና። ዳሮ ጋላሳፐ ጉየ ኤንቲ ሴረታና።
ISA 24:23 ኡባፈ ዎልቃማ ጎዳይ ፅዮነ ዙማንነ የሩሳላመን ካዎታና፤ የሩሳላመ ጭማታ ስንꬃን ባ ቦንቹዋ ቆንጭሳና። ሄ ዎደ አጌናይ ꬉማና፥ አዋይ ዬላታና።
ISA 25:1 አቤት ጎዳዉ፥ ኔኒ ታ ፆሳ። ታኒ ነና ꬎቁ ꬎቁ ኦꬃና፤ ነ ሱንꬃ ጋላታና። ኔኒ ነ ፖሎ አማነተꬃን በንፐ ቆፈትድ ደእያ ማላልስያ ኦሶታ ኦꬃዳሳ።
ISA 25:2 ኔኒ ካታማ ላለꬃ ዶረ ኦꬃዳሳ፤ ምኖ ግምበ ድርሳይ ደእያ ካታማ ላላዳሳ። አላጋታ ካዎ ኬꬃይ ዛሪድ ካታማ ግዶና መላ ኦꬃዳሳ፤ ዛሪድ ፖሎ ኬፀተና።
ISA 25:3 ሄሳ ግሾ፥ ምኖ አሳት ነና ቦንቻና፤ ዎዛና ምኖ ካዎተꬃታ ካታማት ነዉ ያያና።
ISA 25:4 ኔኒ ማንቆይ ባቃትድ አትያ በሲ፥ መቶታንቾይ ቆሰትያ በሲ፥ ኡሾፐ አትያ ገሸነ አዋ ሴላፐ አትያ ኩያ ግዳዳሳ። ዎዛና ምኖ አሳ ሀንቆይ ግምበራ ዶምኤꬅያ ኡሾ መላነ
ISA 25:5 መላ ቢታን ሆንገ መላ። ሻራ ኩያይ አዋ ሴላ እርፅስያ መላ ኔኒ አላጋታ የꬃ ስእ ኦꬃዳሳ፤ ያትን ዎዛና ምኖ አሳ ዋሶይ ስእ ግስ።
ISA 25:6 ኡባፈ ዎልቃማ ጎዳይ አሳ ኡባስ ሀ ዙማ ቦላ ግታ ግብራ ጊግሳና። ሄ ግብራ ቦላ ሞꬎ አሹዋ፥ ሎኦ ካꬅነ ጫልዳ ዎይነ ኡሻ ጊግስስ።
ISA 25:7 እ ሀ ዙማ ቦላ አሳ ኡባ ካምዳ ማጋራጁዋነ ካዎተꬃ ኡባ ቦላ ምጨትዳ ካማ ꬋይሳና።
ISA 25:8 እ መርናዉ ሀይቆ ምታና፤ ኡባ ሃርያ ጎዳይ አይፈ ኡባፈ አፉꬃ ቁቻና፤ ባ አሳ ካዉሻ ቢታ ኡባፈ ድጋና። ጎዳይ ሀይሳ ኦድስ።
ISA 25:9 ሄ ጋላስ ኤንቲ፥ “ቱማ ሀይስ ኑ ፆሳ፤ ኑኒ እያን አማነትዳ ግሾ እ ኑና አሽስ። ኑ ጎዳይ ሀይሳ፤ ኑኒ እያን አማነትዳ፤ አነ እያ አቶተꬃን ኡፋይቶስ፤ ሀሹ ጎስ” ያጋና።
ISA 25:10 ጎዳ ኩሸይ አሻናዉ ሀ ዙማ ቦላ ሸምፓና። ሽን ኡቱል ኡርቃራ ኦላን የተይሳዳ ሞአበይ የታና።
ISA 25:11 ሃ ዋይስ ባ ኩሽያ የደይሳዳ ኤንቲ ባንታ ኩሽያ የዳና። ሽን ጎዳይ እያ ገነ ኩሸ ኦሱዋን ጭመቶና፥ እያ ኦቶሩዋ ካዉሻና።
ISA 25:12 ኤንቲ ꬎቅስድ ግምብዳ ምኖ ድርሳ ግምብያ እ ዎድሳናነ ካዉሻና፤ እ ዱገ ሳአን፥ ኡባ ህርክ ባናን ሆላና።
ISA 26:1 ሄ ጋላስ ይሁዳ ቢታን ሀ ማዝሙረይ የፀታና። ኑስ ምኖ ካታም ደኤስ፤ ፆሳይ አቶተꬃ እያ ዩሹዋን ግምበነ ሚፃ ኦꬅስ።
ISA 26:2 ባ አማኑዋ ናግያ ፅሎ ደረይ፥ ገላና መላ ካረታ ዶይተ።
ISA 26:3 እ ነናን አማነትዳ ግሾ፥ ባ ዎዛና ነናን ዎꬅዳ ኡራ፥ ኔኒ ፖሎ ሳሮተꬃን ናጋሳ።
ISA 26:4 ጎዳይ መርና ዛላ ግድያ ግሾ፥ ጎዳን መርናዉ አማነታ።
ISA 26:5 ꬎቃን ደኤይሳታ ዝቅ ኦꬅስ፤ ꬎቁ ግዳ ካታማ ካዉሽስ። እያ ሳአን ዱገ የግስ፤ ቢታ ባናን ሆልስ።
ISA 26:6 ማንቆት እያ የꬋና ኡንኤትዳይሳት እያ ቦላራ ሄመታና።
ISA 26:7 ፅሎታ ኦገይ ሱረ፤ አቤት ፅሉዋዉ፥ ኔኒ ፅሎታ ኦግያ ጊግሳሳ።
ISA 26:8 አቤት ጎዳዉ፥ ኑኒ ነ ህግያ ናጋናዉ አሞቶስ፤ ነ ሱንꬃ ቦንቾይነ ነ ቴማይ ኑ ዎዛና አሞ።
ISA 26:9 ቃማ ታኒ ነና ላሞታስ፤ ዎንታ ታ አያናይ ነና ምንꬅድ ኮዬስ። ነ ቢታ ፕርዳናዉ ያ ዎደ፥ ሳአን ደእያ አሳይ ፅሎተꬅ ታማሬስ።
ISA 26:10 ኢታ አሳስ ኬሀተꬅ ኦሰትኮካ፥ እ ፅሎተꬅ ታማረና። ሱረ ቢታን ኢታባ ኦꬄስ፤ ጎዳ ግታተꬃ ኤረና።
ISA 26:11 አቤት ጎዳዉ፥ ነ ኩሸይ ꬎቁ ግስ፤ ሽን ኤንቲ በኦኮና። ነ አሳስ ኔኒ ምሸትያ ምሻ በእድ ዬላቶ። ኔኒ ነ ሞርከታስ ጊግስዳ ታማይ ኤንታ ምድ ꬋይሶ።
ISA 26:12 አቤት ጎዳዉ፥ ኑስ ሳሮተꬅ እማዳሳ፤ ኑ ኦሶ ኡባ ነ ኦꬃዳሳ።
ISA 26:13 አቤት ጎዳዉ፥ ኑ ፆሳዉ፥ ሀራ ጎዳት ኑና ሃርዶሶና፤ ሽን ኑኒ ነ ሱንꬃ ፃላላ ቦንቾስ።
ISA 26:14 ኤንቲ ሀይቅዶሶና፤ ስሚድ ደኦን ዶኮና። ነ ሴርን ꬋይዳ ግሾ፥ ዛሪድ ደንዶኮና። ኤንታ ቆፍሱዋ ኡባ ቁቻዳ ꬋይሳዳሳ።
ISA 26:15 አቤት ጎዳዉ፥ ኔኒ ካዎተꬃ ዳርሳዳሳ፤ ካዎተꬃ ዳርሳዳ ኔኒ ቦንቸታዳሳ፤ ቢታ ዛዋ ኡባ ዳልግሳዳሳ።
ISA 26:16 አቤት ጎዳዉ፥ መቶ ዎደ ኤንቲ ነና ኮይዶሶና። ነ ኤንታ ሴርዳ ዎደ ነና ካልካሽድ ዎስዶሶና።
ISA 26:17 አቤት ጎዳዉ፥ ቃንꬃትዳ ማጫስ፥ የሎ ዎደይ ጋክን ኡንኤታዳ ዋሰይሳዳ፥ ኑኒ ነ ስንꬃን ሄሳዳ ሀንዳ።
ISA 26:18 ኑኒ ቃንꬃትዳ፤ እቀትዳ፤ ሽን ጫርኮ የልዳ። ኑኒ ሳኣስ አቶተꬅ ኤህቦኮ፤ ቢታን ደእያ አሳ የልቦኮ።
ISA 26:19 ሀይቅዳ ነ አሳይ ፓፃና፤ ኤንታ አሀይ ደንዳና። ህንተኖ፥ ቢታ ጋርሳን ደኤይሳቶ፥ ደንድድ ኡፋይሳ ማዝሙረ የፅተ። ህንተ አካይ ዎንታ አካ መላ፤ ቢትያ ሀይቅዳይሳታ ዛራዳ እማና።
ISA 26:20 ታ አሳዉ፥ ብድ ህንተ ሶ ገልድ፥ ካርያ ህንተ ቦላ ጎርድተ። ጎዳ ሀንቆይ አꬋና ጋካናዉ፥ ጉꬃ ዎደስ ህንተና ቆስተ።
ISA 26:21 ቢታ ቦላ ደእያ አሳ፥ ኤንታ ናጋራ ግሾ ሴራናዉ፥ ጎዳይ ባ ደእያ በሳፈ ከይድ ዬስ። ቢትያ ባ ቦላ ጉክዳ ሱꬃ ቆንጭሳና፤ ሀይቅዳይሳታ ዛራዳ ገንꬁኩ።
ISA 27:1 ሄ ጋላስ ጎዳይ ባ ምኖ፥ ግታነ ዎልቃማ ማሻን ሌዋታነ ጌተትያ ፆንገትያነ ፃፀትያ ሾሻ ሴራና፤ አባን ደእያ ዶኣካ ዎꬋና።
ISA 27:2 ሄ ጋላስ ሀይሳዳ ጌተታና፦ “ሎኦ ዎይነ ጋድያስ የፅተ፤
ISA 27:3 ታኒ፥ ጎዳይ እያ ናጋይስ፤ ታኒ ቃንፆና ሃ ኡሻይስ፤ ኦንካ እያ ቆሆናዳ ቃማ ጋላስ ናጋይስ።
ISA 27:4 ታኒ ሀንቀትከ፤ ታራ ኦለታናዉ አጉንꬅነ ጎምኦረይ አነ ደንዶ! ታኒ ኤንታ ቦላ ከያዳ ኤንታ ፁጋ ዉርሳናሽን።
ISA 27:5 ዎይኮ ቆሰትድ አታናዉ ታኮ ዮ፤ ታራ ስገቶ፤ ኤ፥ ታራ ስገቶ” ያገታና።
ISA 27:6 ያና ዎድያን ያይቆብ ፃጶ የዳና፤ እስራኤለይ አጫናነ ጪያና፤ እያ አይፈይ ቢታ ኡባ ኩማና።
ISA 27:7 ኤንታ ሾጭዳይሳታ ሾጭዳይሳዳ ጎዳይ እስራኤለ አሳ ሾጭደዬ? ዎይኮ ኤንታ ዎꬍዳይሳታ ዎꬍዳይሳዳ ኤንቲ ሀይቅዶናዬ?
ISA 27:8 ጎዳይ ባ አሳ ድኤታና መላ ኦꬅድ ሴርስ፤ ዎልቃማ ዶሎሀ ባጋ ጎትያን ኤንታ ጎድድ ከስስ።
ISA 27:9 ያይቆባ ናቆይ አቶ ጌተታናይነ እያ ናጋራይ ፖሎ ቁሸታናይ፥ ያርሾ ሹቻ ኡባ እ መንረꬅድ ቦቅንተ ሹቻዳ ኦꬅያ ዎደነ አሼራ ኤቃ ምስልያ ዎይኮ እፃነ ጩይስያ በሳ ላልያ ዎደ።
ISA 27:10 ድረትዳ ካታማይ ባይሳትስ፤ ካሰ አስ ደእያ በሳይ ሀእ ባዞ መላ ዶገትድ አትስ። መሄይ ሄመትያ በሲ ግድዳ ግሾ፥ ማታነ ምꬃ ሀይꬃ ምድ ማራት ያን አላቶሶና።
ISA 27:11 ምꬃ ታሸት መልያ ዎደ መቀረቶሶና፤ ማጫሳይ ምፅድ ኤꬃናዉ ኤፎሶና። ሀ አሳይ አኬክ ባይና አስ ግድያ ግሾ፥ ኤንታ መꬍዳይስ ኤንታዉ ቃተና፤ ኤንታ ማረና።
ISA 27:12 ሄ ጋላስ ኤፍራፂሳ ሻፋፐ ግብፀ ሻፋ ጋካናዉ ጎዳይ ካꬃ ቆፃና። ህንተ፥ እስራኤለ አሳይ እሶይ እሶይ ሺቃና።
ISA 27:13 ሄ ጋላስ ግታ ሞይዘይ ፑነታና፤ አሶረ ቢታን ꬋይዳይሳትነ ግብፀ ቢታ ድኤትዳይሳት ይድ፥ የሩሳላመን ጌሻ ዙማ ቦላ ጎዳ ጎይናና።
ISA 28:1 ኤፍሬማን ማꬆተይሳታስ ቆፍሶ ካላቻ ግድዳይሳ፥ አራዳ ዛንጋራ ሁጵያን ኡትዳይሳ፥ እያ ቦንቹዋስ አሌቆ ግድዳ ሹልዳ ጪሻነ ማꬆይያ ኡሻይ ኤንታዉ ናሸተꬃስ ግድዳ ካታማ አየ!
ISA 28:2 ሄኮ፥ ጎዳስ ዎልቃማነ ምኖ ግድዳ እሶይ ደኤስ። ጎዳይ እያ ሻቻ ኡሾዳ፥ ꬋይስያ ጎተዳነ ክፅዳ ዎልቃማ ሃꬃዳ ምኖ ኩሽያን ዱገ ሳአን ሆላና።
ISA 28:3 ሄ ማꬆትያ ኤፍሬማ አሳ ኦቶሩዋ ካላቻይ ቶሆን የꬃና።
ISA 28:4 አራዳ ዛንጋራ ሁጰን ደእያ ሹልዳ ጪሻይ፥ እያ ቦንቾ አሌቆይ ዎደይ ጋካናፐ ስን ቴርዳ ባላሰ አይፈ መላ ግዳና። እስ አስ ሄ ባላስያ በእያ ዎደ ባ ኩሸን ኦይክዳ መላ ም አጌስ።
ISA 28:5 ሄ ጋላስ ኡባፈ ዎልቃማ ጎዳይ አትዳ ባ አሳስ ቦንቾ ካላቻነ አሌቆ ግዳና።
ISA 28:6 እ ዳይናታስ ሱረ ፕርድያ አያና፥ ካታማ ፐንግያፈ ኦላ ዛረይሳታስ ዎልቃ ግዳና።
ISA 28:7 ኤንቲ ዎይነ ኡሻን ቢጮቶሶና፤ ማꬆይያ ኡሻን ጋንድጋሮሶና። ካህነይነ ናበይ ማꬆይያ ኡሻን ቢጮቴስ፤ ኤንቲ ዎይነ ኡሻን ያርኮሶና፤ ማꬆይያ ኡሻን ጋንድጋሮሶና። ቆንጨꬅ በእሸ ባለቶሶና፤ ፕርድሸ ꬉበቶሶና።
ISA 28:8 ኤንቲ ምያ ጋይታ ኡባይ ጮሻ ፃላላ ግድያ ግሾ፥ ኢትቦና በሲ ባዋ።
ISA 28:9 ኤንቲ ሀይሳዳ ጋና፦ “እ ኤራተꬃ ኦና ታማርሳኔ? ኪታ ኦደስ ቆንጭሳኔ? ቡሮ ማꬅ ፓሄቲያ ዎይኮ ꬋንꬅ ዱፅዳ ናይታሰዬ?
ISA 28:10 እ፥ ኪታ ቦላ ኪታ፥ ኪታ ቦላ ኪታ፤ ዎጋ ቦላ ዎጋ፥ ዎጋ ቦላ ዎጋ፤ ያን ጉꬃ ሀን ጉꬃ” ያጋና።
ISA 28:11 ሽን ጎዳይ አላጋ ቃላንነ እማꬃ ዶናን ሀ አሳስ ኦዳና።
ISA 28:12 እ ኤንታኮ፥ “ሀይስ ሸምፖ በሲ፤ ዳቡርዳይሳ ሸምፕስተ። ሀይስ ሸምፕ ኤክያ በሲ” ያግስ። ሽን ኤንቲ ስኦና እፅዶሶና።
ISA 28:13 ሄሳ ግሾ፥ ኤንቲ ብድ ኩንዳና መላ፥ መአና መላነ ፅሄን ኦይከትድ ባና መላ ጎዳ ቃላይ ኤንታዉ ኪታ ቦላ ኪታ፥ ኪታ ቦላ ኪታ፤ ዎጋ ቦላ ዎጋ፥ ዎጋ ቦላ ዎጋ፤ ያን ጉꬃ ሀን ጉꬃ ግዳና።
ISA 28:14 ህንተኖ፥ የሩሳላመን ደእያ አሳ ሃርያ ቀልቅሰይሳቶ ጎዳ ቃላ ስእተ።
ISA 28:15 ህንተ፥ “ኑኒ ሀይቆራ ጫቅዳ፤ ስኦለራ ጊግዳ፤ ኑኒ ዎርዶ ኑስ ቆታ ኦꬅዳ ግሾነ ማልተ ካተ ኦꬅዳ ግሾ፥ ጋዶይ ኑና ቦቾና አꬋና” ያግድ ጬቀተታ።
ISA 28:16 ሄሳ ግሾ፥ ኡባ ሃርያ ጎዳይ፥ “ሄኮ፥ ታኒ አልኦነ ዶረትዳ ባሶ ሹቻ ፅዮነን ዎꬃስ፤ እያን አማንያ ኦንካ ዬላተና።”
ISA 28:17 ታኒ ሱረ ፕርዳ ዋꬋ ዎዶሮ፥ ፅሎተꬃ ቱምበ ኦꬃና። ህንተ፥ “ኑስ ቆታ ግዳ ዎርዶ ሻቻይ ሾጫና፤ ህንተ ኑስ ካተ ግዳ በሳ ድኦይ ꬋይሳና” ያጌስ።
ISA 28:18 ህንተ ሀይቆራ ጫቅዳ ጫቆይ ላለታና፤ ስኦለራ ጊግዳ ጊጎይ ምነና። ጋዶይ ያ ዎደ ህንተ እያን ሾጨታና።
ISA 28:19 ሄ ጋዶይ ያ ዎደ ህንተና ኤክድ ባና፤ ዎንታ ዎንታ፥ ቃምነ ጋላስ ያራ አꬋና፤ ሄ አꬍያ ዎደ ኡባን ህንተና አገና። ሀ ኪታ አኬኮይ ህንተዉ ዳጋማ ፃላላ እማና።
ISA 28:20 ህንተ ቆሰትያ በሲ ህንተዉ ባዋ፤ ህንተ ዝንእያ አርሳይ ህንተዉ ግደና፤ ህንተ ማእያ አፍላይ ህንተና ጋከና።
ISA 28:21 ፓራዚማ ዙማ ቦላ ጎዳይ ኦꬅዳይሳዳ ባ ኦሱዋ፥ ባ እማꬃ ኦሱዋ፥ ሄስካ ባ ኦራꬃ ኦሱዋ ኦꬃናዉ ደንዳና። ጋባኦና ዛንጋራን ኦꬅዳይሳዳ ሀንቃና።
ISA 28:22 ጎዳይ፥ ኡባፈ ዎልቃማ ፆሳይ፥ ቢታ ኡባ ቦላ ꬋዮ ኤሀናዉ አዋጅዳይሳ ታ ስእዳ ግሾ ህንተ ቃሾይ ምኖና መላ ቀልቅሰይሳ አግተ።
ISA 28:23 ህንተ ሀይꬃ ሃ የግድ፥ ታ ኦደይሳ ስእተ፤ ታ ኦዳ አኬክተ።
ISA 28:24 ካꬅ ዘራናዉ ጎይያ ጎሻንቾይ ኡባ ዎደ ጎይሸ ደእዬ? ቃስ ኡባ ዎደ ጋጋህያ ዎꬍሸነ ሊቅስሸ ደኢ?
ISA 28:25 ጋድያ ሊቅስድ፥ ካሬꬃ ሳዋነ ኦካሸ፥ ባንጋነ ግስተ፥ ባንጋ እያ ዶኡዋን፥ እያ በሳን በሳን ዘሬስ ግደኔ?
ISA 28:26 ሀ ሂላ እያ ፆሳይ እያ ኤርሰስነ ታማርሴስ።
ISA 28:27 ካሬꬃ ሳዎነ ኦካሸ ሾጩ ዎꬋን ቆፀና፤ ሽን ጉꬃ ፃምአን ሾጨቴስ።
ISA 28:28 ካꬃ አይፈይ ቡከቴስፐ አትሽን፥ ሊቀና፤ ቃስ ካꬃ ቡክያ ፓራ ጋረት እያ ቦላራ ላገትኮካ ካꬃይ ጋጨተና።
ISA 28:29 ሀ ጭንጫተꬃ ኡባይ ባ ዞርያንነ ባ ጭንጫተꬃን ማላልስያ ኡባፈ ዎልቃማ ጎዳፐ ዬስ።
ISA 29:1 ዳዊቲ ደእዳ አርኤላ ካታማዉ ነና አየ! ላይꬃ ቦላ ላይꬅ ጉጃ፤ ነ ባለታ ዛራ ዛራ ቦንቻ።
ISA 29:2 ታኒ አርኤላ ካታማ ቡሮ ኡንኤꬃና፤ እ ዘሌልድ ዬካና። ሄ ካታማይ ሱꬅ ካምዳ ያርሾ በሳ መላ ግዳና።
ISA 29:3 ታኒ ነ ዩሹዋ ተቃና፤ አዱሳ ግምብያን ነና ድራና፤ ነ ቦላ ኦላ ሻኮ ኤሳና።
ISA 29:4 ኔኒ ገልዳ ኦላን ግዳዳ ኦደታና፤ ጋርሳ ባናፐ ነ ግርሳይ ያና። ነ ግርሳይ ሞይትለ ግርሳዳ ቢታ ግዶፈ ከያና፤ ባና ግዶፈ ነ ካልካሻና።
ISA 29:5 ሽን ነ ሞርከት ባና መላ ዳሮ፤ ዎዛና ምኖ አሳታ ታይቦይ ጫርኮይ ኤፍያ ፑኖ መላ።
ISA 29:6 ቆፖና ደእሽን፥ ኡባፈ ዎልቃማ ጎዳይ ዳዳን፥ ቢታ ቃፆን፥ ግታ ግርሳን፥ ጎተን፥ ጫርኮንነ ታማ ላጮን ህንተና ዎቻና።
ISA 29:7 አርኤላ ካታማ ኦልያ ዳሮ ካዎተꬃ ኡባይ፥ ሄ ካታማነ እያ ሚፃ ኦልያ ኡባይ፥ እያ ኡንኤꬅያ ኡባይ ꬍስኮ አሙሆዳነ ኤልሞዳ ሀናና።
ISA 29:8 ኮሻትዳ አስ አሙሆን ካꬅ ምድ፥ ባርክያ ዎደ እያ ኮሻይ አጎናይሳዳ ዎይኮ ሳሞትዳ አስ አሙሆን ኡይድ፥ ባርክያ ዎደ ሳሙዋ አሎናይሳዳ፥ ፅዮነ ደርያ ኦልያ ካዎተꬃት ኡባይ ሄሳዳ ሀናና።
ISA 29:9 ማላለትተ፤ ዳጋምተ፤ ቅልምእተ፤ ቆቅተ። ማꬆትተ፥ ሽን ዎይነ ኡሻን ግዶፖ። ጋንድጋርተ፥ ሽን ማꬆይያ ኡሻን ግዶፖ።
ISA 29:10 ጎዳይ ꬍስኮ አያና ህንተ ቦላ ጉስስ። ናበቶ፥ ህንተ አይፈይ ጎዘትስ፤ ቆንጨꬅ በኤይሳቶ፥ ህንተ ሁጰይ ካመትስ።
ISA 29:11 ሀ ኡባ ቆንጨꬃይ ነዉ አታመትዳ ማፃፋ መላ ግድስ። እስ አስ፥ “ሄኤ፥ ሀይሳ ናባባ” ያግድ፥ እስ ናባቦ ኤርያ አሳስ እምያ ዎደ፥ እ፥ “ማፃፋይ አታመትዳ ግሾ፥ ታ ናባባናዉ ዳንዳእከ” ያጋና።
ISA 29:12 ማፃፋ ናባብ ኤሮና አሳኮ፥ “ሄኤ፥ ሀይሳ ናባባ” ያግድ እምያ ዎደ፥ እ፥ “ታኒ ናባባ ኤርከ” ያጋና።
ISA 29:13 ጎዳይ ያጌስ፦ “ሀ አሳይ ታና ባንታ ዶናን ቦንቼስ፤ ሽን ኤንታ ዎዛናይ ታፐ ሃሆን ደኤስ። ኤንቲ አስ መꬍዳ ዎጋ ታማርስሸ ታና ጮ ጎይኖሶና።
ISA 29:14 ሄሳ ግሾ፥ ታኒ ሀ አሳ ቦላ ዛራ ዛራ ማላልስያባ ኦꬃና። ጭንጫታ ጭንጫተꬃ ኤያ ከሳና፤ ኤራንቾታ ኤራ ዶግሳና” ያግስ።
ISA 29:15 ባንታ ሀልቹዋ ጎዳፐ ቆሳናዉ ጪሞየይሳታ፥ ባንታ ኦሱዋ ꬉማን ኦꬅሸ፥ “ኑና ኦን በኢ? ኑና ኦን ኤሪ?” ያገይሳታ አየ!
ISA 29:16 ህንተ ኡባባ ሽር የጌታ። ኦቶ መይስ ኡርቃ መላ ግድ ቆፔታ! መትዳይስ መꬍዳይሳ፥ “እ ታና መꬍቤና” ግዬ? ኦቶይ ባና መꬍዳይሳ፥ “እ አይኮካ ኤረና” ጋናዉ ዳንዳኢ?
ISA 29:17 ልባኖሰ ዎራይ አራዳ ጋደ ግዳናዉ፤ ቃስ አራዳ ጋደይ ዎራ ግዳናዉ ጉꬃ ዎደይ አትስ ግደኔ?
ISA 29:18 ሄ ጋላስ ቱለት ማፃፋ ቃላ ስአና፤ ꬉማን ደእያ ቆቀታ አይፈይ ፄላና።
ISA 29:19 አሽከት ጎዳን ኡፋይታና፤ ማንቆት እስራኤለ ጌሻን ሀሹ ጋና።
ISA 29:20 ኡሎ ኢታት ዉራና፤ ቀልቅሰይሳት ትምእ ጋና፤ ኢታባ ኦꬃናዉ ዎችያ ኡባይ ꬋያና።
ISA 29:21 አሰ ኦዳን ባላ ኦይሳት፥ ሞተትዳይሳ ፕርዳ ኬꬃን ፅሄን የገይሳትነ ዎርዶ ማርካተꬃን ፅሎ አሳ ፕርዳ ጌላየይሳት ꬋያና።
ISA 29:22 ሄሳ ግሾ፥ አብራሃመ ዎዝዳ ጎዳይ ያይቆባ ኮቻኮ ሀይሳዳ ያጌስ፦ “ያይቆባ ኮቻይ ህዛፐ ጉየ ዬላተና፤ እያ ሶምኦይ ዬላትድ ሳአ ፄለና።
ISA 29:23 ሽን ኤንቲ ታ ኩሸ ኦሶ ግድዳ ባንታ ናይታ ባንታ ግዶን በእያ ዎደ ታ ሱንꬃ ጌሻና፤ ኤንቲ ያይቆባ ጌሻ፥ ጌሻተꬃ ናጋና፤ እስራኤለ ፆሳ ያሻተꬃን ቦንቻና።
ISA 29:24 አያናን ባለይሳት አኬካ ደማና፤ ዙዙመይሳት ትምርተ ኤካና” ያጌስ።
ISA 30:1 ጎዳይ፥ “ጌላ ናይታ አየ! ታኒ ሀልቻቦና ኦꬆሶና፤ ታ አያናን ግዶናሽን ባንታ ሸነን ጫቅድ ናጋራ ቦላ ናጋራ ጉጀይሳታ አየ!
ISA 30:2 ታና ዞረ ኦይቾና ግብፀ ዎꬎኦሶና። ፓሮና ሚፃ ባንታዉ ተቀ፥ ግብፀ ባንታዉ ሸምፕያ ኩያ ኦꬆሶና።
ISA 30:3 ሽን ፓሮና ሚፃይ ህንተዉ ዬላ፥ ግብፀ ኩያይ ህንተዉ ካዉሻተꬅ ግዳና።
ISA 30:4 ኤንታ ሀላቃት ፃነሳን ደእኮካ፥ ኤንቲ ኪትዳይሳት ሀኔሳ ካታማ ጋክኮካ፥
ISA 30:5 ዬላፈ አትሽን፥ ሀራ ማደይነ ጎእ ባይና ግሾ እያን አማነትያ ኡባይ ካዉያናነ ዬላታን” ያጌስ።
ISA 30:6 ነገባን ደእያ ዶአታባ ጎዳይ ኦድዳይ ሀይሳ፦ ኪተትዳይሳት መቶይነ ኡንእ ደእያ ቢታራ፥ አደ ጋሞይነ ማጫ ጋሞይ ዎራራ፥ ኢታነ ፆንገትያ ሾሻት ደእያ ባዙዋራ ካንꬅድ ባና። ሀረታነ ግማለታ ዞኮን ባንታ ዱረተꬃ ጫንድ ኤንታ አይኮካ ማዶና ቢታ ባና።
ISA 30:7 ግብፀይ አይኮካ ማደና፤ ሄሳ ግሾ፥ ታኒ እያ፥ “ፓꬆና ራኣባ” ያጋዳ ፄጋና።
ISA 30:8 ሀእ ባዳ ስንꬃራ ያና ዎድያስ መርና ማላ ግዳና መላ ኤንታ ስንꬃን ሹቻ ዎጫዳ ፃፋ፤ ማዝጋበንካ ፃፋ።
ISA 30:9 ኤንቲ ጌላነ ዎርዳንቾ ናይታ፤ ኤንቲ ጎዳይ ኦድያባ ስአናዉ ኮዮና ናይታ።
ISA 30:10 ኤንቲ ቆንጨꬅ በኤይሳታ፥ “ቆንጨꬅ በኦፕተ” ያጎሶና። ናበታ፥ “ኡፋይስያባነ ጭምያባ ኦድተፐ አትሽን፥ ሱረባ ኦዶፕተ።
ISA 30:11 ኦግያፐ ክችተ፤ ሆሮጋፐ ሃክተ፤ እስራኤለ ጌሻራ ኑና ሶምኦን ጋꬆፍተ” ያጎሶና።
ISA 30:12 ሄሳ ግሾ፥ እስራኤለ ጌሻይ ሀይሳዳ ያጌስ፦ “ህንተ ሀ ቃላ እፅድ፥ ገነንነ ጭሞን አማነትዳ ግሾ፥
ISA 30:13 ሀ ናጋራይ ህንተዉ ዛእድ ዎድያ፥ አኬኮና ኤለስድ ኩንድያ አዱሳ ግምበ መላ ግዳና።
ISA 30:14 እያ መቆይ ኡርቃፈ መꬍዳ ኦቶ መላ ድፕ ግድ መቃና። ሄ መቁዋ ግዶፈ ታማ ካሽያ ዎይኮ ሃ ዱቅያ ኩንእ በንተና” ያጌስ።
ISA 30:15 እስራኤለ ጌሻይ፥ ኡባ ሃርያ ጎዳይ፥ ሀይሳዳ ያጌስ። “ስሞንነ ሸምፖን ህንተ አታና፤ ስእ ጉሳንነ አማነተꬃን ህንተዉ ዎልቃ ግዳና፤ ሽን ህንተ እፅደታ።
ISA 30:16 ህንተ፥ ‘አካይ፥ ኑኒ ፓራ ቦላ ኡትድ ባቃታና’ ያግደታ፤ ሄሳ ግሾ፥ ህንተ ባቃታና። ቃስ ህንተ፥ ‘ኤሶትያ ፓራ ቶግድ ባና’ ” ያግደታ፤ ሽን ህንተና የደይሳት ህንተፈ አꬎ ኤሶታና።
ISA 30:17 እስ ቶራንቹዋ በእድ ህንተፈ ሙኩሉ አሳይ ባቃታና፤ እቻሹ ቶራንቾት ህንተና ኡባ የደꬃና። ዙማ ሁጰን ኤቅዳ ባንድራ ምꬃዳ ዎይኮ ዙማ ቦላ ደእያ ማላዳ ህንተ ሀናና ጋካናዉ ህንተና የደና።
ISA 30:18 ሽን ጎዳይ ህንተዉ ኬሀናዉ ናጌስ፤ ጎዳይ ፅሎ ፕርድያ ፆሲ ግድያ ግሾ ህንተዉ ቃታናዉ ደንዳና። እያ አማነትድ ናግያ ኡባይ አንጀትዳይሳታ።
ISA 30:19 ህንተኖ፥ የሩሳላመን ደእያ ፅዮነ አሳዉ፥ ህዛፐ ጉየ ዬከከታ። ፆሳይ ቃን ኩምዳ ፆሲ ግድያ ግሾ፥ ህንተ ማደ ኮይድ እያኮ ዋስያ ዎደ ህንተዉ ዛሮ እማና።
ISA 30:20 ጎዳይ ህንተዉ መቶ ካꬅነ ኡንአ ሃꬅ እምኮካ፥ ህንተ አስታማረይ ህዛፐ ባና ቆሰና። ሽን ህንተ አይፈይ ህንተ አስታማርያ በአና።
ISA 30:21 ህንተ ኡሻች ዎይኮ ሀድርስ ስምያ ዎደ፥ ጉየራ ህንተና፥ “ኦገይ ሀይሳ፤ እያራ ቢተ” ግያ ቃላ ህንተ ስአና።
ISA 30:22 ብራንነ ዎርቃን አሌቀትዳ ኤቃ ምስለታ ህንተ ቱንሳና። ቱና ጩርቃዳ ህንተ ኤንታ፥ “ኑፐ ሃክተ” ያግድ ዎራ ሆላና።
ISA 30:23 ሄ ዎደ እ፥ ህንተ ቢታን ዘርዳ ካꬃስ እራ ቡክሳና፤ ቢታፈ ዶልያ ካꬃይ ዳሮነ ሙሩታ ግዳና። ሄ ጋላስ ህንተ መሄይ ዳልጋ ደንባን ሄመታና።
ISA 30:24 ጎሻ ቦራትነ ሀረት ግላን ፑነትዳ ጌሻ ሀርቁዋ ማና።
ISA 30:25 አስ ዉርያ ዎደ ሚፃት ላለትያ ጋላስ ደረታነ ዙማታ ቦላፈ ፑልቶ ሃꬅ ጎጋና።
ISA 30:26 ሄ ጋላስ አጌና ፖኦይ አዋ ፖኦዳ ሀናና፤ አዋ ፖኦይ ካሰይሳፈ ላፑን ኩሸ ዳራና፤ ላፑን ጋላስ ፖኡዋ መላ ግዳና። ሄ ኡባይ ሀናናይ ጎዳይ መቅዳ ባ አሳ ኮልያ ዎደነ እ ደችን ማዱንፅዳ አሳ ፓꬅያ ዎደ።
ISA 30:27 ሄኮ፥ ጎዳ ሱንꬃይ ሱልያ ሀንቁዋራ፥ ꬉምዳ ጩያ ሻራራ ሃሆ በሳፈ ያና። እያ ዶናን ሀንቆይ ኩምስ፤ እያ እንፃርሳን ምያ ታም ደኤስ።
ISA 30:28 እያ ፔኖይ፥ ቆ ጋካናዉ ክፅድ፥ ኡባባ ፕትድ ኤፍያ ሃꬃ ክፃ መላ። እ፥ ካዎተꬃታ ꬋዮ ዛርዛረን ሀርቃና፤ አሳ ጋፓታ ብፃልድ ኦገ ባለꬃና።
ISA 30:29 ጌሻ ባለይ ቦንቸትያ ጋላስ የፀይሳዳ፥ ህንተ የፃና። ጎዳ ዙማኮ፥ እስራኤለ ዛላኮ ብያ ዎደ ሱሱልኤ ፑንሸ የፅያ አሳይ ኡፋይተይሳዳ ህንተ ኡፋይታና።
ISA 30:30 ጎዳይ ባ ያሽያ ቃላ ስሳና፤ ባ ሱልያ ሀንቁዋን፥ ታማ ላጩዋን፥ ጎትያን፥ ኡሹዋንነ ሻቻን ባ ቀስያ ቆንጭሳና።
ISA 30:31 ጎዳይ ባ ግርሳን አሶረ ዳጋንꬃና፤ እያ ፃምአይ ኤንታ ሾጫና።
ISA 30:32 ጎዳይ ኤንታ ባ ሴርያ ፃምአን ኤንታ ሾጭያ ዎደ እያ አሳይ ካራቦራነ ዲꬃራ የፃና። ባ ቀስያ ደንꬅድ ኤንታ ሾጫና።
ISA 30:33 በንፐ ዶምድ አሶረ ካዎይ ፁሳ ቶፈታ ጌተትያ በሲ ጊግስ። ሄ በሳይ ኦላነ ዳልጋ፤ ቃስ ዳሮ ምꬅ ዶረትድ ደእያ በሲ። ጎዳ ፔኖይ ዲነ ሻፋዳ ጎግድ፥ ሄ ታማ ኤꬃና።
ISA 31:1 ማዶ ደማናዉ ግብፀ ዎይሳታነ ፓራን አማነተይሳታ አየ! ፓራ ጋረታ ዳሮተꬃንነ ፓራ አሳታ ምኖተꬃን አማነተይሳታ አየ! ኤንቲ እስራኤለ ጌሻ ፄሎኮና ዎይኮ ጎዳፐ ማዶ ኮዮኮና።
ISA 31:2 ሽን ጎዳይ ጭንጫ ግድያ ግሾ ጋዶ የዳና፤ እ ኦድዳይሳ አገና። ኢታ አሳ ቦላነ ኢታባ ኦꬅያ አሳ ማደይሳታ ቦላ ደንዳና።
ISA 31:3 ግብፀት አሰፐ አትሽን፥ ፆሰ ግዶኮና፤ ኤንታ ፓራትካ አሾፐ አትሽን፥ አያና ግዶኮና። ጎዳይ ሀንቆን ባ ቀስያ ደንꬅያ ዎደ ማደይስ ꬉበታና፤ ማደተይስ ኩንዳና፤ ኤንቲ ኡባይ እስፈ ꬋያና።
ISA 31:4 ጎዳይ ታኮ ሀይሳዳ ያግስ፦ “ጋሞይ ዎይኮ ዎዳላ ጋሞይ መሄ ኦይክድ ዳርያ ዎደ ሄንꬃንቾት ፄገትድ ሺቅኮካ፥ እ ኤንታ ዋሱዋስ ዳጋመና፤ ኤንታ ቃላስ ያየና። ሄሳዳካ፥ ኡባፈ ዎልቃማ ጎዳይ ፅዮነ ዙማነ እያ ዙማታ ኦላናዉ ዎꬋና።
ISA 31:5 ካፎይ አለይሳዳ ኡባፈ ዎልቃማ ጎዳይ የሩሳላመ ገቻና፥ አሻና፥ ናጋና፤ እያ ቦላራ አልድ ሄማና።
ISA 31:6 “ህንተኖ እስራኤለ አሳዉ፥ ህንተ ማካልድ እፅዳ፥ እያኮ ስምተ።
ISA 31:7 ሄ ጋላስ ናጋር ኩምዳ ህንተ ኩሽያን ብራፐነ ዎርቃፈ ኦꬅዳ ኤቃታ ዎራ ሆላና።
ISA 31:8 አሶረይ አሳባ ግዶና ማሻን ኩንዳና፤ አሳባ ግዶና ማሽ ኤንታ ማና። ኤንቲ ማሻ ስንꬃፈ ባቃታና፤ ኤንታ ናአተꬃት ዎልቃን አሳስ ኦꬃና።
ISA 31:9 ዳጋማ ጋሶን ኤንታ ምኖ ሚፃይ ላለታና፤ ኤንታ ቶራ ሞጮናት ዳጋምድ የግ ꬋያና” ያጌስ፥ እያ ታማይ ፅዮነን፥ እያ ጮጨይ የሩሳላመን ደእያ ጎዳይ።
ISA 32:1 ሄኮ፥ ካዎይ ፅሎተꬃን ካዎታና፤ ሃረይሳት ሱረተꬃን ሃራና።
ISA 32:2 እስ እስ አስ ባ ሁጰን ጫርኮፈ ጌምያ በሲ፥ ጎተፐ ቆሰትድ አትያ በሲ ግዳና። መላ ቢታን ጎግያ ሃꬃ መላነ ሳሞ ቢታን ግታ ዛላ ኩያ መላ ግዳና።
ISA 32:3 ፄልያ አሳታ አይፈይ ቅልምኤና፤ ስእያ አሳታ ሀይꬃይ ሀይዝድ ስአና።
ISA 32:4 ኤሶትያ አሳ ዎዛናይ ኤራናነ አኬካና። ደዶትያ አሳ እንፃርሳይ ብለታና፤ ጌሽድ ኦደታና።
ISA 32:5 ህዛፐ ጉየ ኤይ አስ ኤራንቾ ጌተተና፤ ኢታ አስ ቦንቸተና።
ISA 32:6 ኤያይ ኤያተꬅ ኦደቴስ፤ እያ ዎዛናይ ናጋራ ቆፔስ። ጎዳ ቦላ ምኖባ ኦደቴስ፤ እያ ቦላ ኢታባ ማቀቴስ፦ ኮሻትዳይሳስ ካꬅ እመና፤ ሳሞትዳይሳ ሃ ድጌስ።
ISA 32:7 ገነ አሳ ቆፋይ ኢታ፤ ማንቆት ሱረባ ኦደትኮካ ኤንታ ꬋይሳናዉ ዎርዶን ኢታ ቆፋ ቆፔስ።
ISA 32:8 ሎኦ አስ ሎኦባ ሀልቼስ፤ ሄ ሎኦ ሀልቹዋን ምንድ ደኤስ።
ISA 32:9 ህንተኖ ቆፍ ባይና ደእያ ማጫሳዉ፥ ደንድተ፤ ታ ኦደይሳ ስእተ፤ ህንተኖ አማነትድ ደእያ ማጫ ናይቶ፥ ታ ህንተዉ ኦደይሳ ስእተ።
ISA 32:10 ላይꬅ ኩሞና ህንተ አማነትድ ደኤይሳት ኮኮራና፤ ዎይነ እያ ዎድያን ማፀከታ፤ ቶክዳባፐ አይፈ ሺሸከታ።
ISA 32:11 ህንተኖ እንጀትን ደእያ ማጫሳዉ ኮኮርተ። ህንተኖ አማነትድ ደእያ ማጫ ናይቶ ያይተ። ህንተ ማኡዋ ቃርድ ካዮ ማኦ ህንተ ፄሳን ዳንጭተ።
ISA 32:12 ሎኦ ጋደን አይፍያ ዎይነይ ꬋይዳ ግሾ፥ አዛንድ ህንተ ትራ ቆፅተ።
ISA 32:13 አጉንꬅነ ክንቾተይ ታ አሳ ጋድያን ዶልስ። አሳይ ኡፋይትድ ደእዳ ኬꬃታስነ ካታማስ ዬክተ።
ISA 32:14 ካዎ ኬꬃይነ ዳሮ አሳይ ደእያ ካታማይ ባይሳታና፤ ሚፃትነ ግምበ ሻኮት መርናዉ ላለታና፤ ዎራ ሀረት ኡፋይትያ በስነ ዶርሳ ዉደይ ሄመትያ በሲ ግዳና።
ISA 32:15 ሄስ ሀናናይ፥ አያናይ ኑ ቦላ ጉካና ጋካናዉ፥ መላ ቢታይ አራዳና ጋካናዉነ አራዳ ቢታይ ዎራ ግዳና ጋካናሳ።
ISA 32:16 ሄሳፈ ጉየ፥ መላ ቢታን ሱረ ፕርድ፥ አራዳ ቢታን ፅሎተꬅ ዳና።
ISA 32:17 ፅሎተꬅ ሳሮተꬅ ኤሀና፥ ዎፓተꬅነ አማነተꬅ መርናዉ ቢታ ኩማና።
ISA 32:18 ታ አሳይ ሳሮይ ኩምዳ ኬꬃን፥ አማንꬅያ በሳንነ ዎፑ ግዳ ሶን ሸምፕድ ዳና።
ISA 32:19 ሻች ቡክድ ዎራ ꬋይስያኮካ፥ ቃስ ካታማይ ኩምꬅ ላለትያኮካ፥
ISA 32:20 ሻፋታ ጋፃን ህንተ ካꬃ ዘርድ፥ ህንተ መህያስነ ህንተ ሀረታስ ሄንꬃ በሲ ደመይሳት ህንተ አንጀታና።
ISA 33:1 ነና ꬋይሶና ደእሽን ሀራ ꬋይሰይሶ፥ ነና አꬅድ እሞና ደእሽን ሀራ አꬃ እመይሶ፥ ነና አየ! ነ ꬋይሶ አግዳ ዎደ ነና ꬋይሳና፤ ነ አꬃ እሞ አግዳ ዎደ ነና አꬅድ እማና።
ISA 33:2 አቤት ጎዳዉ፥ ኑና ማራ፤ ኑኒ ነና ኡፋይሳን ናጎስ፤ ዎንታ ዎንታ ኑስ ዎልቃ ግዳ፤ መቶ ዎደ ኑና አሻ።
ISA 33:3 ነ ግርሳ ደሹዋን ደረይ ባቃቴስ፤ ኔኒ ኑና ማዳናዉ ደንድያ ዎደ ካዎተꬃት ላለቶሶና።
ISA 33:4 ጎንዶይ ሺቀይሳዳ ህንተ ድኦይ ሺቃና፤ ቦለይ ድርገይሳዳ አሳይ እያ ቦላ ድርጋና።
ISA 33:5 ጎዳይ ቦላ ደእያ ግሾ፥ ꬎቁ ꬎቁ ግስ፤ ፅዮነ ሱረ ፕርዳንነ ፅሎተꬃን ኩንꬃና።
ISA 33:6 እ ህንተ ዎድያስ አማንꬅያ ባሶ ግዳና፤ ህንተዉ አቶተꬅ፥ ጭንጫተꬅነ ኤራተꬅ ግዳና፤ ጎዳስ ያሽ ሀ ኡባ ሻሉዋስ ቁልፐ ግዳና።
ISA 33:7 ሄኮ፥ ጎባት ኦገ ቦላ ዋሶሶና፤ ስገꬃናዉ ኪተትዳይሳት ጫመትድ ዬኮሶና።
ISA 33:8 ዎጋ ኦገት ካይሳትዶሶና፤ ኦግያራ ካንꬅያ አስ ባዋ። ጫቆይ ላለትስ፤ ካታማት ካትዶሶና፤ ቦንቾ አሳት ቦረትዶሶና።
ISA 33:9 ቢታይ አዛንስ፤ ዳቡርስ፤ ልባኖሰይ ዬላትድ መልስ፤ ሳሮና ዛንጋራይ መላ ቢታ ግድስ። ባሳነ ደርያንነ ቃርመሎሳ ደርያን ደእያ ምꬃ ሀይꬃይ ቆቆፈትስ።
ISA 33:10 ጎዳይ ሀይሳዳ ያጌስ፦ “ሀእ ታኒ ደንዳና፤ ሀእ ታኒ ቦንቸታና፤ ሀእ ታኒ ꬎቁ ꬎቁ ጋና።
ISA 33:11 ህንተ ኡቱላ ቃንꬃትድ ፑኖ የልደታ፤ ህንተ ሸምፖይ ህንተና ታማዳ ማና።
ISA 33:12 አሳይ ቦቅንተ ሹቻዳ ታማን ፁገታና፤ ቃስ አጉንꬃዳ ታማን ኤፃና።
ISA 33:13 ህንተኖ፥ ሃሆን ደኤይሳቶ፥ ታ ኦꬅዳይሳ ስእተ፤ ማታን ደኤይሳቶ ታ ዎልቃ አኬክተ” ያጌስ።
ISA 33:14 ፅዮነን ደእያ ናጋራንቾት ዳጋምዶሶና፤ ፆሳ ኤሮናይሳት ኮኮርዶሶና። ኤንቲ፥ “ኑ ግዶፈ ምያ ታማራነ መርናዉ ኤፅያ ላጩዋራ ዳናዉ ዳንዳኤይ ኦኔ?”
ISA 33:15 ፅሎተꬃን ሄመተይ፥ ሱረ ኦደተይ፥ በሶና ኦገራ በንትያ ጎአ እፀይ፥ ባ ኩሽያ ዎꬋፈ ኤኮና መላ ድገይ፥ ሸምፖ ዎꬎባ ስኦና መላ ባ ሀይꬃ ቱጨይ፥ ኢታባ ፄሎና መላ ባ አይፍያ ካመይ፥
ISA 33:16 ሄ ኡራይ ꬎቃ በሳን ዳና። እ፥ ቆሰትድ አትያ በሳይ ምኖ ዛላ ግዳና፤ እያ ካꬃይ እያዉ እመታና፤ እ፥ ኡያ ሃꬃይ ፓጨና።
ISA 33:17 ህንተ አይፈይ ካዋ፥ እያ የገልሳራ በአና፤ ሃሆን ደእያ ቢታ ደማና።
ISA 33:18 ህንተ፥ “ሀላቃይ አዉን ደኢ? ጊራ ኤከይስ አዉን ደኢ? ግምበ ሻኮታ ሀላቃይ አዉን ደኢ?” ያግድ ህንተ ዎዛናን በን ያሽያ ዎድያ ቆፓና።
ISA 33:19 ዎዛና ምኖ አሳ፥ ህንተዉ ገሎና ዶናን ኦደትያ አሳነ እንፃርሳይ ደዶትያ አሳ ህዛፐ ጉየ ህንተ በኤከታ።
ISA 33:20 ኑኒ ኑ ባኣለ ቦንችያ ፅዮነ ካታማ በእተ! ዎፑ ግድ ደእያ፥ እያ ꬍሸይ ሾደቶና፥ እያ ዎዶሮይ ዱፆናነ እያ ꬍሸይ ቃፆና ዱንካነ መላ ሀንዳ የሩሳላመ ካታማ ህንተ፥ ህንተ አይፈን በአና።
ISA 33:21 ሄ በሳን ጎዳይ ኑስ ዎልቃ ግዳና። ሄ በሳይ ዳልጋ ሳፋነ ጎግያ ሃꬃ መላ ግዳና። ዎጎሎይ እያ ቦላራ ባናዉ ዳንዳኤና፤ ግታ ማርካበት ያራ ካንꬃናዉ ዳንዳኦኮና።
ISA 33:22 ጎዳይ ኑስ ፕርደይሳ፤ ጎዳይ ኑስ ህገ እመይሳ፤ ጎዳይ ኑ ካዋ፤ እ ኑና አሻና።
ISA 33:23 ነ ቃሾ ዎዶሮይ ዶልአና፤ ማርካብያ ቱሳይ ሹጋና፤ እያ ሻራይካ ቶለትቤና። ሄ ዎደ ዳሮ ድኦ ሻከታና፤ ሀር አቶሽን ዎበትካ ድኦ ኤካና።
ISA 33:24 ፅዮነን ደእያ ኦንካ “ታና ሳኬስ” ያገና፤ ያን ደእያ አሳ ናጋራይ አቶ ጌተታና።
ISA 34:1 ህንተኖ፥ ካዎተꬃቶ፥ ሺቅድ ስእተ! ህንተኖ፥ አሳዉ አኬክተ! ቢታይነ ቢታን ደእያባ ኡባይ፥ ሳእነ ሳአፐ ከያባ ኡባይ ስኦ።
ISA 34:2 ጎዳይ ካዎተꬃታ ኡባ ቦላ ሀንቀትስ፤ ኤንታ ቶራንቾታ ኡባ ቦላ ይሎትስ። እ፥ ኤንታ ኡባ ꬋይሳና፤ ኤንታ ሹከይሳታስ አꬅድ እማና።
ISA 34:3 ኤንታ አሀይ ሆለትድ፥ አትድ ፅንቃና፤ ደረት ኤንታ ሱꬃን ካመታና።
ISA 34:4 ሳሎ ፆልንቶት ኡባይ ሴራና፤ ሳሎት ሳሌናዳ ፃፀታና። ዎይነ ሀይꬅነ ባላሰ አይፈይ ቆቆፈተይሳዳ ፆልንቶት ኡባይ ቆቆፈታና።
ISA 34:5 ታ ማሻይ ሳሎታን አላና ጋካናዉ ኡይስ፤ ሄኮ ኤዶመ ቦላ፥ ታኒ ꬋይስዳ አሳ ቦላ ፕርዳናዉ ዎꬋና።
ISA 34:6 ጎዳ ማሻይ ሱꬃን ሙከትስ። ያርሾስ ሹከትያ ዶርሳታነ ዴሻታ ሱꬃን ማሽ ሙከተይሳዳነ ኤንታ ክላሆ ሞꬉዋን ካመተይሳዳ ጎዳ ማሻይ ሱꬃን ሙከትስ፤ ሞꬉዋን ካመትስ። ጎዳይ ባሶራ ካታማን ያርሾ፥ ኤዶመ ቢታን ግታ ሹካ ጊግስስ።
ISA 34:7 መንꬃት፥ ዎፋኖትነ ቦራት ኤንታራ ኩንዳና። ኤንታ ጋደይ ሱꬃ ፃላላ ግዳና፤ ኤንታ ቢታይ ሞꬎን ሙኑቀታና።
ISA 34:8 ጎዳይ ሀሎ ከያና ጋላስነ ፅዮነ ኦልዳ ሞርከታ ቦላ ኩሸ ዛርያ ላይꬅ ጊግስስ።
ISA 34:9 ኤዶመ ሻፋት መልድ ማደ ግድስ፤ እያ ባናይ ዲነ ላመታና፤ እያ ቢታይ ኤፅያ ማደ ግዳና።
ISA 34:10 ቃማነ ጋላስ ታማይ ቶኤና፤ እያ ጩያይ መርናዉ ጩያና። ኤዶመ ቢታይ የለተꬃፈ የለተꬃ ጋካናዉ ባይሳ ግዳና፤ ኦንካ መርናዉ ያራ ካንና።
ISA 34:11 ሽን ፅሎይነ ቁፃረይ እያ ላታና፤ ጉቶይነ ቁሮይ ያን ዳና። ፆሳይ ኤዶመ ቦላ ላለꬃ ዋꬋ ዎዶሮነ ባይሳተꬃ ቱምበ የዳና።
ISA 34:12 ሄ ቢታ አይስያ ካዎይ ዴና፤ ሀላቃት ያፐ ክቻና።
ISA 34:13 ካዎ ኬꬃታ አጉንꬅ፥ ሚፃታ ኦህ ማአና፤ ዎርካናት አላትያ በስነ ያንቾት ደእያ ሶ ግዳና።
ISA 34:14 ባዞ ዶአት ጎዳረታራ ጋሄታና፤ ቱና አያናት እሶይ እሱዋራ ፄገታና፤ ቃማ ቆለት ዎꬍድ ያን ዳና።
ISA 34:15 ጉቶት ያን ኬ ኬፅድ፥ ጱጱልድ ቆፃና። ባንታ ናይታ ባንታ ቀፈታ ጋርሳን ሀጳና፤ ጵርጮት ባንታ ላገታራ ያን ሺቃና።
ISA 34:16 ጎዳ ማፃፋን ኮይድ ናባብተ። ጎዳ ዶናይ ኦድዳ ግሾነ እያ አያናይ ሺሽዳ ግሾ፥ ሀይሳታፐ እሶይካ ፓጨና፤ ቃስ እሶይካ ባ ላገይ ባይና ዴና።
ISA 34:17 እ፥ ኤንታዉ ሳማ ከስስ፤ እያ ኩሸይ ቢታ ኤንታዉ ዎዶሮን ሻክስ፤ ኤንቲ እያ መርናዉ ላታና፤ የለተꬃፈ የለተꬃ ጋካናዉ ኤንቲ ያን ዳና።
ISA 35:1 ባይሳ ቢታይነ መላ ቢታይ ኡፋይታና፤ አይኮይ ባይና መላ ቢታይ ኡፋይታናነ ጪያና።
ISA 35:2 መላ ቢታይ ጪሸ ማአና፤ ኡፋይሳ ማዝሙረ የፃና። ልባኖሰ ቦንቹዋ ማአና፤ ቃርመሎሳነ ሳሮና ግታተꬃይ እመታና፤ ኤንቲ ጎዳ ቦንቹዋነ ኑ ፆሳ ግታተꬃ በአና።
ISA 35:3 ዳቡርዳ ኩሸታነ አርጋጭዳ ጉልባታታ ምንꬅተ።
ISA 35:4 ያሻ ዎዛን ደኤይሳታኮ፥ “ምንተ! ያዮፍተ! ሄኮ፥ ህንተ ፆሳይ ሀሎ ከያናዉነ ባ ፆሳተꬃን ኩሸ ዛራናዉ ይድ ህንተና አሻና” ያግተ።
ISA 35:5 ሄ ዎደ፥ ቆቀታ አይፈይ ዶየታና፤ ቱለታ ሀይꬃይ ስአና።
ISA 35:6 ዎበት ገንኤዳ ጉፓና፤ ደዶት ኡፋይሳን የፃና፤ መላ ቢታን ሃꬅ ጎጋና፤ መላ በሳን ፑልቶይ ꬉቃና።
ISA 35:7 ፁግያ ሻፈይ ኤለ ሃꬅ ግዳና፤ መላ ቢታይ ሃ ፑልታና፤ ዎርካናት አላትያ በሳን ማትነ ማይረይነ ማቅ ዶላና።
ISA 35:8 ያራ ዎጋ ኦገይ ከያና፤ እካ “ጌሻተꬃ ኦገ” ጌተታና። ቱናት ሄ ኦግያራ ቦኮና፤ ኤያት ያን ስመረቶኮና፤ ሽን ጌሻታስ ግዳና።
ISA 35:9 ጋሞይ ዎይኮ ያሽያ ዶአት ያራ ካንꬆኮና፤ ያን በንቶኮና፤ ሽን ዎዘትዳይሳታ ፃላል ሄመታና።
ISA 35:10 ጎዳይ ዎዝዳይሳት ስማና፤ የፅሽ፥ ፅዮነ ገላና፤ መርና ኡፋይሳይ ኤንታ ሁጵያን ኡታና። ኤንቲ ኡፋይታናነ ሀሹ ጋና፤ አዛኖይነ ኦለይ ኤንታፈ ሃካና።
ISA 36:1 ህዝቅያስ ካዎትዳ ታማነ ኦይዳንꬆ ላይꬃን፥ አሶረ ካዎይ ሳናክሬም ዩሾይ ግምበትዳ ይሁዳ ካታማታ ኦልድ ኦይክስ።
ISA 36:2 ሄሳፈ ጉየ፥ አሶረ ካዎይ ላክሶ ካታማፐ እስ ቶራ ሞጮና ዳሮ ኦላንቾታራ ካዋ ህዝቅያሳኮ የሩሳላመ የድስ። እ፥ ብድ ማኦ ሜጭያ ጋድያኮ ኤፍያ ኦግያፐ ቆሞ ባጋራ ደእያ ኤልዳ ሃꬃይ ጎግያ ꬋዋ ማታን ኤቅስ።
ISA 36:3 ካዎ ጋꬎ አይስያ አልቃ ናአይ ኤልያቄም፥ ፃፈይ ሼብነ፥ ታርከ ፃፈይ፥ አሳፋ ናአይ፥ ዮኣስ እያኮ ካረ ከይዶሶና።
ISA 36:4 አሶረ ቶራ ሞጮናይ ኤንታኮ፥ “ህዝቅያሳስ ሀይሳዳ ያግድ ኦድተ፦ ‘ዎልቃማ አሶረ ካዎይ፥ ኔኮ ሀይሳዳ’ ያጌስ፦ ኔኒ ሀይሳ መላ ምናናዉ አይብን አማነታዲ?
ISA 36:5 ኔኒ ጮ ቃላን፥ ኦላ ኦለታናዉ ታዉ ጭንጫተꬅነ ዎልቅ ደኤስ ያጋሳ። ሽን ኔኒ ኦናን አማነታዳ ታ ቦላ ሀይሳዳ ማካላይ?
ISA 36:6 ኔኒ ‘ግብፀ ካዎይ ታና ማዳና’ ጋዳ ቆፕዳባ ግድኮ መቅዳ ማይረ ፃምአ ጉፈትያ አሳ መላ። ፃምአይ መቅን ፕንጮይ ኩሽያ ጫደስነ ማዱንፅሴስ። ግብፀ ካዎይ ባናን አማነትያ አሳ ኡባስ ሄሳ መላ።
ISA 36:7 ሽን ኔኒ፥ ‘ኑኒ ጎዳን፥ ኑ ፆሳን፥ አማነቶስ’ ያግኮ፥ ህዝቅያስ ይሁዳነ የሩሳላመ አሳ፥ ‘ህንተ የሩሳላመን ደእያ ያርሾ በሳን ጎይናናዉ ኮሼስ’ ግድ፥ ፆሳ ጎይንያ ꬎቃ በሳታነ ያርሾ በሳታ ድግዳይ እያ ግደኔ?
ISA 36:8 “አነ ሀእ ሃያ! ታ ጎዳ አሶረ ካዉዋራ ጌዳረታ። ቶጋናዉ ዳንዳእያ አስ ነ ደምኮ፥ ናምኡ ሙኩሉ ፓራታ ታ ነዉ እማና።
ISA 36:9 ኔኒ፥ ‘ግብፀት ፓራ አሳታነ ፓራ ጋረታ ታዉ የዳና’ ጋዳ አማንኮ፥ ታ ጎዳ ቶራ ሞጮናታፐ እስ ላፋካ ዛራናዉ ዳንዳአካ።
ISA 36:10 ሄሳ ቦላካ፥ ታኒ ሀ ቢታ ꬋይሳናዉ ቱማ ጎዳ ሸነይ ባይና ከያድና? ጎዳይ ባ ሁጰን ታና ‘ባዳ ሀ ቢታ ኦላዳ ꬋይሳ’ ያግድ ኪትስ” ያግስ።
ISA 36:11 ሄሳፈ ጉየ ኤልያቄም፥ ሼብነ ዮኣስ አሶረ ሀላቃኮ፥ “ኑኒ ኤርያ አራምከ ዶናራ ኑስ ነ አይለታስ ኦዳፐ አትሽን፥ ግምበ ድርሳ ቦላ ደእያ አሳይ ስአና መላ እብራወꬆ ዶናን ኦዶፓ” ያግዶሶና።
ISA 36:12 ሽን ሀላቃይ ዛሪድ፥ “ሀ ኪታ ታኒ ህንተዉነ ህንተ ጎዳ ፃላላስ ኦዳና መላ ታና ታ ጎዳይ ኪትቤና። ህንተራ እስፈ ባንታ ሽአ ማናዉነ ባንታ ሼሻ ኡያናዉ ደእያ፥ ሀ ግምበ ድርሳ ቦላ ደእያ አሳ ኡባስ ኦዳና መላ ኪትስ” ያግስ።
ISA 36:13 አሶረ ሀላቃይ ደንድ ኤቅድ፥ ባ ቃላ ꬎቁ ኦꬅድ፥ እብራወꬆ ዶናን ሀይሳዳ ያግስ፦ “ዎልቃማ ግድዳ አሶረ ካዎይ ግያባ ስእተ!
ISA 36:14 ካዎይ ህንተኮ ሀይሳዳ ያጌስ፤ ‘ህዝቅያስ ህንተና ጭሞፎ’ እ ህንተና ታ ኩሸፐ አሻናዉ ዳንዳኤና።
ISA 36:15 ህዝቅያስ ህንተና፥ ‘ቱማ ጎዳይ ኑና አሻና፤ ሀ ካታማይካ አሶረ ካዋ ኩሸን ገለና’ ያግድ፥ ህንተ ጎዳን አማነታና መላ ኦꬆፎ።
ISA 36:16 “ህንተ ህዝቅያስ ኦድያባ ስኦፕተ። አሶረ ካዎይ ህንተና፥ ‘ታራ ስገትተ፤ ሃ ታኮ ዪተ። ሄሳ ህንተ ኦꬅኮ፥ ህንተ ኡባይ ህንተ ዎይነፐነ ህንተ ባላሰፐ ማና፤ ህንተ ቦክዳ ኦላፈካ ሃ ኡያና።
ISA 36:17 ታኒ ያዳ፥ ህንተና ህንተ ቢታ ዳንያ ቢታ ኤካዳ ኤፋና። ሄ ቢታይ ካꬅነ ዎይነይ ኩምዳ ቢታ’ ” ያግስ።
ISA 36:18 “ህዝቅያስ፥ ‘ጎዳይ ህንተና አሻና’ ያግድ ጭሞናዳ ናገትተ። ሀራ ካዎተꬃታ ፆሳታፐ ባ ቢታ አሶረ ካዋ ኩሸፐ አሽዳ ፆሲ ደእዬ?
ISA 36:19 ሀማታ ፆሳትነ አርፋዳ ፆሳት አዉን ደኦና? ሳፋርዋይማ ፆሳት አዉ ብዶና? ኤንቲ ሳማርያ ታ ኩሸፐ ዎꬅ ኤክዶና?
ISA 36:20 ሀ ቢታታ ፆሳታፐ ባ ቢታ ታ ኩሸፐ አሽድ ኤክዳይ ደኢ? ያትን ህንተ፥ ‘ጎዳይ የሩሳላመ ታ ኩሸፐ አሻና’ ያግድ ቆፔቲ?” ያግስ።
ISA 36:21 ሽን ካዎይ ኤንታኮ፥ “እያዉ አይ ዛሮካ እሞፕተ” ያግድ ዞርዳ ግሾ፥ አሳይ እስ ቃላካ እያዉ ዛሮና ስእ ግዶሶና።
ISA 36:22 ሄሳፈ ጉየ ካዎ ጋꬎ አይስያ ካልቀ ናአይ ኤልያቄም፥ ፃፈይ ሼብነ ታርከ ፃፈይ አሳፋ ናአይ ዮኣስ ባንታ ማኡዋ ፔꬍዶሶና። ህዝቅያሳኮ ብድ አሶረ ሀላቃይ ግዳባ ኡባ እያዉ ኦድዶሶና።
ISA 37:1 ካዎይ ህዝቅያስ ሄሳ ስእዳ ዎደ ባ ማኡዋ ፔꬍድ፥ ካዮ ማኦ ማእድ፥ ጎዳ ኬꬅ ገልስ።
ISA 37:2 ካዎ ጋꬎ አይስያ ኤልያቄም፥ ፃፈይ ሼብነ ካለꬅያ ካህነት ካዮ ማኦ ማእድ፥ አሞፀ ናኣ ናብያ እሳያሳኮ ባና መላ ኪትስ።
ISA 37:3 ኤንቲ እሳያሳኮ ብድ፥ ህዝቅያስ ሀይሳዳ ያጌስ፦ “ሀ ጋላሳይ መቶ ጋላስ፥ ሴራ ጋላስነ ዬላ ጋላስ። ሄስካ ናእ የለታናዉ ዎደይ ጋክን፥ ባናካዳ የላናዉ ዎልቅ ꬋይዳ ማጫሳ መላ ግድዳ።
ISA 37:4 ደኦ ፆሳ ጫያናዳ እያ ጎዳይ፥ አሶረ ካዎይ፥ ኪትዳ ሀላቃ ቃላ ጎዳይ ነ ፆሳይ ስኦና አገና። ቃስ ጎዳይ ነ ፆሳይ ሄ ቃላ ጋሶን እያ ሴሮና አገና። ሄሳ ግሾ፥ አሳ ግዶፈ አታናይሳታስ ዎሳ” ያግዶሶና።
ISA 37:5 ካዎይ ህዝቅያስ ኪትዳይሳ እሳያስ ስእዳ ዎደ፥
ISA 37:6 ኤንታኮ፥ “ህንተ ጎዳስ ሀይሳዳ ያግድ ኦድተ፦ ጎዳይ፥ ‘አሶረ ካዋ አይለት ታና ጫይሽን፥ ኔኒ ስእዳ ጫሻ ቃላስ ያዮፋ።
ISA 37:7 ሄኮ፥ እ ኦዳ ስእድ፥ ባ ቢታ ስማና መላ፥ ታኒ እያ ግዶን እስ አያና የዳና። ያታዳ እ ባ ቢታ ብድ ያን ማሻን ሀይቃናዳ ኦꬃና’ ያጌስ” ያግድ ኪትስ።
ISA 37:8 አሶረ ካዎይ ላክሶ ካታማፐ ደንድድ ብዳይሳ አሶረ ሀላቃይ ስእድ፥ ጉየ ስሚድ ካዎይ ልብና ካታማን ኦለተይሳ ደምስ።
ISA 37:9 ካዎይ ሳናክሬም፥ “ቶጰ ካዎይ ትርሃቅ ነና ኦላናዉ ይስ” ግያ ኦዳ ስእድ፥ ህዝቅያሳስ ሀይሳዳ ያግድ ኪትስ።
ISA 37:10 “ይሁዳ ካዋ ህዝቅያሳ፥ ኔኒ አማነትያ ፆሳይ፥ ‘የሩሳላመ አሶረ ካዋ ኩሸን የገና’ ያግድ ጭሞፎ።
ISA 37:11 አሶረ ካዎት ቢታታ ኡባ ዋት ꬋይስዳኮ ኔኒ ስአዳሳ። ያትን፥ ኔኒ አታኔ?
ISA 37:12 በን ታ ማይዛት ꬋይስዳ ጎዛና፥ ካራነነ ራፌሳ ቢታ ፆሳትነ ታላሳራን ደእያ ኤደነ ቢታ ፆሳት ሄ ቢታታ ꬋዮፐ አሽዶና?
ISA 37:13 ሀማታ ካዎይ፥ አርፋዳ ካዎይ፥ ሳፋርዋይማ ካዎይ፥ ሄና ካዎይነ እዋ ካዎይ አዉን ደኦና?” ያግድ ኪትስ።
ISA 37:14 ህዝቅያስ ዳብዳብያ ኪተትዳ አሳፐ ኤክድ ናባብስ። ዳብዳብያ ጎዳ ኬꬅ ኤፍድ ጎዳ ስንꬃን ምጭስ።
ISA 37:15 ጎዳ ሀይሳዳ ያግድ ዎስስ፦
ISA 37:16 “አቤት ኡባፈ ዎልቃማ ጎዳዉ፥ ክሩበታፐ ግዱዋን ኡትዳ እስራኤለ ፆሳዉ፥ ሳአ ካዎተꬃታ ኡባ ቦላ ነ ፃላል ፆሰ። ሳሉዋነ ሳኣ ኔኒ መꬋዳሳ።
ISA 37:17 አቤት ጎዳዉ፥ ነ ሀይꬃ የጋዳ ሃ ስአ። አቤት ጎዳዉ፥ ነ አይፍያ ዶያዳ ሃ ፄላ። ነና፥ ደኦ ፆሳ፥ ሳናክሬም ጫይዳ ጫሻ ስአ።
ISA 37:18 “አቤት ጎዳዉ፥ አሶረ ካዎት ካዎተꬃታነ ኤንታ ቢታ ꬋይስዳይስ ኤ ቱማ።
ISA 37:19 ኤንታ ፆሳታ ታማን ፁግድ ꬋይስዶሶና፤ ኤንታ ፆሳት ካሰካ አሳ ኩሸይ ማስድ ከስዳ ምꬅነ ሹች ግድያ ግሾ፥ ፆሳታ ግዶኮና።
ISA 37:20 ህዛ አቤት ጎዳዉ፥ ኑ ፆሳዉ፥ ነ ፃላል ጎዳ ግደይሳ ሳኣ ካዎተꬃት ኡባይ ኤራና መላ ኔኒ ኑና እያ ኩሸፐ አሻ” ያግድ ዎስስ።
ISA 37:21 ሄሳፈ ጉየ፥ አሞፀ ናአይ እሳያስ ህዝቅያሳስ ሀይሳዳ ያግድ ኪትስ፦ ጎዳይ፥ እስራኤለ ፆሳይ ሀይሳዳ ያጌስ፦ “ኔኒ አሶረ ካዋ ሳናክሬማ ጋሶን ታና ዎስዳ ዎሳ ታኒ ስአስ” ያጌስ።
ISA 37:22 “ጎዳይ ሳናክሬማ ሀይሳዳ ያግስ። ፅዮነ ጌላእያ ነና ካꬋሱ፤ ለቃሱ፤ የሩሳላመ ናእያ ባ ሁጵያ ቃꬃዳ ነና ቦራሱ።
ISA 37:23 ኔኒ ጫይዳይነ ቶችዳይ ኦኔ? ነ ኦደ ቦላ ነ ቃላ ꬎቁ ኦꬃዳ ኦደታዲ? ነ ኦቶሮን ኦና ꬎቁ ጋዳ ፄላዲ? ሄሳ ነ ኦꬅዳይ እስራኤለ ጌሻ ቦላና ግደኔ?
ISA 37:24 ኔኒ ኪትዳ አሳ ባጋራ ጎዳ ጫያዳሳ። ሀይሳዳ ያጋዳሳ፦ ‘ታ ዳሮ ፓራ ጋረታራ ꬎቃ ዙማ ሁጵያ፥ ልባኖሰ ዙማ ፄራ ከያስ። ኡባፈ አዱሳ ዝጋታነ ኡባፈ ሎኦ ፂዳታ ቃንፃስ። ꬎቃ በሳን ደእያ ፅትዳ ዎራ ጋካስ።
ISA 37:25 ታኒ አላጋ ቢታታን ሃꬃ ኦላ ቦካዳ ሃ እያፐ ኡያስ። ግብፀ ቢታን ጎግያ ሃꬃ ኡባ ታኒ ታ ቶሁዋን የꬋዳ መልሳስ’ ” ያጋዳሳ።
ISA 37:26 “ዳሮ ዎደፐ ስን ኔኒ ግምበትዳ ካታማታ ላላዳ፥ ሹቻ ኬላ ከሳና መላ፥ ታ ቆፋ ቃቻ ዎꬅዳይሳ ነ ኤራብኪ? ታኒ ሀእ ኦꬅያ ኦሶታ በን ሀልቻ ዎꬃስ።
ISA 37:27 ሄሳ ግሾ፥ ኤንታ አሳስ ዎልቃይ እፅን፥ ኤንቲ ካዉይዶሶናነ ዬላትዶሶና። ኤንቲ ማታ መላነ ዮጋ ጪሻ መላ። ኤንቲ ኬꬃ ሁጰን ዶልያ ማታ መላነ ሌገይ ኩንድስያ ካꬃ መላ ሀንዶሶና።
ISA 37:28 “ሽን ኔኒ ኡትያ፥ ከይያ፥ ገልያ በሳነ ታ ቦላ ነ ሀንቀትዳ ሀንቁዋ ኤራይስ።
ISA 37:29 ነ ታ ቦላ ሀንቀትዳ ግሾነ፥ ነ ኦቶሩዋ ታኒ ስእዳ ግሾ፥ ታኒ ነ ሲꬍያን ዳፎ አꬃና፤ ነ ዶናን ብፃላ ባርሳና። ያታዳ ኔኒ ይዳ ኦግያራ ነና ጉየ ዛራና።”
ISA 37:30 እሳያስ ካዋ ህዝቅያሳኮ ሀይሳዳ ያግስ። “ሄስ ፖለታናይሳስ ማላይ ሀይሳ፤ ሀ ላይꬅነ ዎንቶ ላይꬅ ህንተ አሰቦ ካፅዳ ካꬅ ማና። ሽን ሄꬓንꬆ ላይꬃን ህንተ፥ ህንተ ሁጰን ዘርተነ ጫክተ፤ ዎይነ ቶክተነ እያ አይፍያ ሚተ።
ISA 37:31 ይሁዳ አሳፐ አትዳይሳት ፃጶ የዳና፤ አይፈ አይፋና።
ISA 37:32 አትዳ ጉꬃት የሩሳላመፐነ ፅዮነ ደርያፐ ያና። ኡባፈ ዎልቃማ ጎዳ ቃናተይ ሄሳ ኦꬃና።
ISA 37:33 “ሄሳ ግሾ፥ አሶረ ካዉዋባ ጎዳይ ሀይሳዳ ያጌስ። አሶረ ካዎይ ሀ ካታማ ገለና፤ ዎይኮ ሀይሳን ባ ዶንግያ ዱከና፤ ዎይኮ ባ ጎንዳልያ ኦይክድ፥ ሀ ካታማ ስን አና፤ ዎይኮ ካታማ ዩሹዋ ተቀና።
ISA 37:34 አሶረ ካዎይ ባ ይዳ ኦግያራ ጉየ ስማና፤ ሀ ካታማ ገለና።” ታኒ ጎዳይ ሀይሳ ኦዳይስ።
ISA 37:35 “ታኒ ታ ቦንቹዋ ግሾነ ታ አይልያ ዳዊታ ግሾ፥ ሀ ካታማ አሻና” ያግስ።
ISA 37:36 ሄ ቃማ ጎዳ ኪታንቾይ ከይድ፥ አሶረ አሳይ ዱንካንዳ ጉታ ብድ፥ 185,000 አደታ ዎꬍስ። ዎንተꬃ ጋላስ አሳይ ደንድድ አህ አሀ ቦላ ዶረትዳይሳ በእዶሶና።
ISA 37:37 ሄሳ ግሾ፥ አሶረ ካዎይ ሳናክሬማ ደንድድ፥ ጉየ ስም ብድ ናናወ ካታማን ኡትስ።
ISA 37:38 እስ ጋላስ ሳናክሬማ ባ ፆሳ ንስሮካ ኬꬃን ጎይንሽን፥ እያ ናይት አድራመለክነ ሳርፃር ማሻን እያ ዎꬍድ አራራተ ቢታ ባቃትዶሶና። እያ ናአይ አስራዶን እያ በሳን ካዎትስ።
ISA 38:1 ሄ ዎደ ካዎይ ህዝቅያስ ሀርግድ፥ ሀይቃናዉ ማትስ። አሞፀ ናአይ ናበይ እሳያስ እያኮ ብድ፥ ጎዳይ፥ “ነ ሀይቃና ሀንያ ግሾ ነ ኬꬃ ጊግሳ” ያግስ።
ISA 38:2 ህዝቅያስ ጎዳኮ ስም ዝንእድ፥ ጎዳ ዎስስ።
ISA 38:3 “አቤት ጎዳዉ፥ ታኒ ነ ስንꬃን ቱማተꬃንነ ኩመꬃ ዎዛናን ሄመትዳይሳነ ነና ኡፋይስያባ ኦꬅዳይሳ ሀሳያ” ያግድ ጫመትድ ዬክስ።
ISA 38:4 ሄሳፈ ጉየ፥ ጎዳ ቃላይ እሳያሳኮ፥
ISA 38:5 ባዳ ህዝቅያሳኮ፥ ጎዳይ ነ ማይዛ ዳዊታ ፆሳይ፥ “ታኒ ነ ዎሳ ስአስ፤ ነ አፉꬃ በአስ። ነ ላይꬃ ቦላ ታኒ ታማነ እቻሹ ላይꬃ ጉጃና።
ISA 38:6 ነናነ ሀ ካታማ አሶረ ካዋ ኩሸፐ አሻና፤ ታኒ ሀ ካታማስ ኦለታና” ያጋ።
ISA 38:7 “ጎዳይ ባ ግዳ ቃላ ፖላናዉ እምዳ ማላይ ሀይሳ ያግስ፦
ISA 38:8 አካዝ ከያናዉ ጊግስዳ ደꬃን ደእያ ኩያይ ታሙ ታንጎ ጉየ ስሚድ ባና መላ ታኒ ኦꬃና” ያግስ። ኩያይ ታሙ ታንጎ ጉየ ስሚድ ብስ።
ISA 38:9 ይሁዳ ካዎይ ህዝቅያስ ሀርግያፈ ፓፅድ ፃፍዳ ማዝሙረይ ሀይሳ፦
ISA 38:10 ታኒ፥ “ታ ደኦ ላይꬃይ ባጋ ጋኮና ደእሽን፥ ሀይቆ ፐንገራ ገላና ሀንያና? አትዳ ላይꬃ ቦንቀታና ሀንያና?” ያጋስ።
ISA 38:11 “ታኒ ደኦን ደኤይሳታ ቢታን ጎዳ በእከ፤ ሀ ሳአን አሰ በእከ፤ ሀ አላምያን ደኤይሳታራ ዛራዳ ደእከ።
ISA 38:12 ዶርሰ ሄመይሳታ ዱንካንያዳ፥ ታ ደኦይ ሾደትስ። ዶርዘይ አፍላ ዋንዳራሸን ፃፀይሳዳ፥ ታ ደኦይ ፃፀትስ። ዶርዘይ አፍላ ዱꬅያዳ፥ ታ ደኡዋ ዱꬅስ። ዎንታፈ ኦማርስ ጋካናዉ ታና ꬋይሳሳ” ያጋስ።
ISA 38:13 “ቃማ ኩመꬃ ዳንዳአን ናጋስ፤ ጋሞዳ ታ መቀꬃ ኡባ መንꬃዳሳ፤ ዎንታፈ ኦማርስ ጋካናዉ ታና ꬋይሳዳሳ።
ISA 38:14 ታኒ ካሮዳነ ጭላሾዳ ዋሳስ፤ ሆለዳ ዙዙማስ። ታ አይፈይ ሳሎ ፄልሸ ዳቡርስ፤ ጎዳዉ፥ ታኒ ኡንኤታስ፤ ኔኒ ታና ሀ ኡንኣፈ ከሳ” ያጋስ።
ISA 38:15 ሀይሳ ኡባ ኦꬅዳይ ጎዳ፤ ታኒ አይ ጋናዉ ዳንዳእያና? ታ ሸምፖይ ኡንኤትዳ ግሾ፥ ታ ላይꬃ ኡባ አሽከተꬃን ዳና።
ISA 38:16 ጎዳዉ፥ ሀይሳ መላ ሴራን አሳይ ደኦን ደኤስ። ሀእ ታ ፓያተꬃ ዛራዳ፥ ታና ደኦን ዎꬃ!
ISA 38:17 ታ ኡንኤተꬃይ ታዉ ሎኦ ግድስ፤ ኔኒ ታ ሸምፑዋ ꬋዮ ኦላፈ አሻዳሳ፤ ታ ናጋራ ኡባ ኔኒ ጉየ የጋዳሳ።
ISA 38:18 ዱፎይ ነና ጋላተና፤ ሀይቆይ ነና ሳበና። ኦላን ዎꬍዳይሳት፥ ነ አማነተꬃ ኡፋይስ ኦꬆኮና።
ISA 38:19 ታኒ ሀች ነና ጋላተይሳዳ፥ ደኦን ደኤይሳት ነና ጋላቶሶና። ነ አማነተꬃ አዋት ባንታ ናይታስ ኦዶሶና።
ISA 38:20 ጎዳይ ታና አሻና፤ ሄሳ ግሾ፥ ኑኒ ኑ ደኦ ላይꬃ ኡባን፥ ጎዳ ኬꬃን ዲꬃን የፃና።
ISA 38:21 እሳያስ ካሰ፥ “ባላሰ ዳፅድ፥ እያ ክፃ ቦላ ዎꬅተ፤ እ ፓፃና” ያግስ።
ISA 38:22 ህዝቅያስ ካሰ፥ “ታኒ ፓፃዳ ጎዳ ኬꬅ ባናይሳስ ማላይ አይበ” ያግድ እሳያሳ ኦይችስ።
ISA 39:1 ሄ ዎደ፥ ባልዳና ናአይ፥ ባብሎነ ካዎይ ማርዶክ-ባልዳን፥ ህዝቅያስ ሀርግድ ፓፅዳይሳ ስእዳ ግሾ፥ ዳብዳበነ እሞታ ህዝቅያሳስ የድስ።
ISA 39:2 ህዝቅያስ ኪተትድ ይዳ አሳታ ሞክስ። ባ ሻሉዋ ምንጅያ ኬꬃን ደእያ ብራ፥ ዎርቃ፥ ሳዉዋ፥ ሎኦ ዛይተ፥ ባ ኦላ ሚሸታነ ባ ሻሉዋ ምንጅያ ኬꬃን ደእያባ ኡባ ኤንታ በስስ። ባ ሶን ዎይኮ ባ ጋꬉዋን ደእያባ ኡባፈ ህዝቅያስ ኤንታ በሶና አግዳባይ ባዋ።
ISA 39:3 ናበይ እሳያስ ካዋ ህዝቅያሳኮ ብድ፥ “ሀ አሳት ዎይግዶና? አዉፐ ይዶና?” ያግድ ኦይችስ። ህዝቅያስ፥ “ኤንቲ ታኮ፥ ሃሆ ቢታ ባብሎነፐ ይዶሶና” ያግስ።
ISA 39:4 እሳያስ ዛሪድ፥ “ኤንቲ ነ ሶን አይ አይ በእዶና?” ያግድ ኦይችስ። ህዝቅያስ፥ “ኤንቲ ታ ጋꬎን ደእያ ኡባባ በእዶሶና፤ ታ ሻሉዋ ምንጃ ኬꬃን ደእያባፐ ታኒ ኤንታ በሶናባይ ባዋ” ያግስ።
ISA 39:5 ያትን፥ እሳያስ ህዝቅያሳኮ፥ “ኡባፈ ዎልቃማ ጎዳይ ግያባ ስአ።
ISA 39:6 ‘ኔኒ፥ ካዎ ጋꬎን ደእያባ ኡባይነ ነ ማይዛት ሀች ጋካናዉ ሺሽዳባ ኡባይ ኩምꬅ ድኤትድ፥ ባብሎነ ቢታ ባና ዎደይ ያና፤ አይብካ አተና።
ISA 39:7 ቃስ ኔፐ የለትዳ ነ አሾነ ነ ሱꬁ ግድዳ ነ ኮቻት ድኤትድ ባና፤ ባብሎነን ካዎ ጋꬎን ሹፋ ግድድ ኦꬃና’ ያጌስ” ያግስ።
ISA 39:8 ህዝቅያስ ዛሪድ፥ “ኔኒ ኦድዳ ጎዳ ቃላይ ሎኦ። ሽን ታ ላይꬃን ሳሮነ ዎፓ ግዶ” ያግድ ቆፕስ።
ISA 40:1 ህንተ ፆሳይ ሀይሳዳ ያጌስ፦ “ታ ደርያ ምንꬅተ! ምንꬅተ!
ISA 40:2 እ አይለተꬃን ደእዳ ዎደይ ፖለትስ፤ እያ ናጋራይ አቶ ጌተትስ፤ ባ ናጋራ ግሾ፥ ጎዳይ እያ ዳኮ ሴርዳይሳ፥ የሩሳላመስ ሊቆ ቃላን ኦድተ፤ አዋጅተ” ያጌስ።
ISA 40:3 ሀይሳዳ ግያ ግርሳይ ስኤቴስ፤ “መላ ቢታን ጎዳ ኦግያ ጊግስተ፤ ኑ ፆሳስ አራባ መላ ቢታን ሆሮጋ ስት ኦꬅተ።
ISA 40:4 ዛንጋራ ኡባይ ꬎቁ ጋና፤ ደረይነ ዙማይ ዝቅ ጋና፤ ኢታ ኦገትነ ገላ ከሳት ደምባታና።
ISA 40:5 ሄ ዎደ ጎዳ ቦንቾይ ቆንጫና፤ አሾ ማእዳ ኡባይ ሄሳ እስፈ በአና። ጎዳ ዶናይ ሀይሳ ኦድስ” ያጌስ።
ISA 40:6 እስ ግርስ፥ “ዋሳ” ያግሽን ስአስ፤ ታኒ፥ “ዎይጋዳ ዋሶ?” ያጋስ። “አስ ኡባይ ማታ መላ፤ እያ ቦንቾ ኡባይ ጪሻ መላ።
ISA 40:7 ጎዳ እያ ቦላ ሸምፕያ ዎደ፥ ማታይ መሌስ፤ ጪሻይ ቆቆፈቴስ፤ አስ ቱማ ማታ መላ።
ISA 40:8 ማት መሌስ፤ ጪሽ ቆቆፈቴስ፤ ሽን ኑ ፆሳ ቃላይ መርናዉ ኤቅድ ደኤስ” ያጋዳ ዋሳ።
ISA 40:9 ነኖ ፅዮነስ ሎኦባ ኦደይሶ፤ ዙማ ቦላ ከያ። ነኖ የሩሳላመስ ሎኦባ ኦደተይሶ፤ ነ ቃላ ꬎቁ ኦꬃዳ ዋሳ። ያዮፋ፤ ꬎቁ ኦꬃ፤ ይሁዳ ካታማታስ፥ “ህንተ ፆሳይ ሀይስሽ” ያጋ።
ISA 40:10 ሄኮ፥ ኡባ ሃርያ ጎዳይ ዎልቃራ ዬስ፤ እያ ቀሰይ እያዉ ሃራና። እያ ዎይቶይ እያራ ደኤስ፤ ጭግያ ጋተይ እያ ስንꬃና።
ISA 40:11 እ ባ ዉድያ ሄንꬃንቾዳ ሄማና፤ ባ ዶርሳ ማራታ ባ ቀስያን ሺሻና፤ ኤንታ ባ ክኦን እድማና፤ ꬋንይሳታ ሎዳራ ካለꬃና።
ISA 40:12 ሃꬃታ ባ ኩሸ ቃቃን፥ ሳሎታ ታካꬎን ልክዳይ፥ ቢታ ባና ዳቾን ማክዳይ፥ ደረታነ ዙማታ ምዛነን ልክዳይ ኦኔ?
ISA 40:13 ጎዳ አያና ኤርዳይ፥ እያ ዞርድ ታማርስዳይ ኦኔ?
ISA 40:14 እያዉ ቆንጭሳና መላ ኦና ዞረ ኦይችዴ? ሱረ ፕርዳ እያ ታማርስዳይ ኦኔ? እያ ጭንጫተꬅ ታማርስዳይ፥ እያ አኬካ በስዳይ ኦኔ?
ISA 40:15 ሄኮ፥ ካዎተꬃት ፁጋን ደእያ እስ ፆኮ መላ፤ ኤንቲ ምዛነ ቦላ ደእያ ባና መላ፤ እ ዩሾይ አባን ተቀትዳ ቢታታ ባናዳ ልከስ።
ISA 40:16 ልባኖሰ ምꬃይ ያርሾ በሳን ኤፃናዉ ግደና፤ እያን ደእያ ዶአት ፁሳ ያርሾስ ግዶኮና።
ISA 40:17 ካዎተꬃት ኡባይ እያ ስንꬃን ባይናባ መላ፤ ኤንቲ እያ ስንꬃን ኡባ አይኮካ ግዶኮና፤ ባይናባፐካ ላፋ።
ISA 40:18 ያትን፥ ፆሳ ህንተ ኦደራ ግናየቲ? አይባ ምስለራ ጋꬅድ ፄለቲ?
ISA 40:19 ኩሸ ሂላንቾይ ኤቃ ምስለ ጊግሴስ፤ ዎርቃ ሼሸይስ ዎርቃን ላንፄስ፤ ብራ ሼሸይስ እያ ቦላ ብራ ሳንꬃላታ መꬌስ።
ISA 40:20 ሚሸይ ባይና ማንቆይ፥ ያርሾስ ፆꬎና ምꬅ ዶሬስ። ምስለይ ቃፆና መላ ኤሳናዉ ኩሸ ሂላንቾ ኮዬስ።
ISA 40:21 ኤርቤከቲ? ዎይኮ ስእቤከቲ? ሀይስ ህንተዉ ኮይሮፐ ኦደትቤኔ? ዎይኮ ሳእ መቶሳፐ ሀይሳ ህንተ አኬክበከቲ?
ISA 40:22 እ ቢታ ገርቱዋፈ ቦላ ባጋን ባ አራታን ኡቴስ፤ ቢታን ደእያ አሳት ፃቆ መላ። ሳሎታ ገሸዳ ምጬስ፤ ዱንካነዳ ደእያ በሲ ኦꬅድ ቶሌስ።
ISA 40:23 እ፥ ሀላቃታ ባይናባዳ ኦꬄስ፤ ሀ አላምያ ሃረይሳታ ሀዳ ከሴስ።
ISA 40:24 ኤንቲ ቶከትድ ቡሮ ጋምኦናሽን፥ ዘረትድ ቡሮ ፃጶ የዶናሽን፥ ጎዳይ ኤንታ ቦላ ጫርኮ የድስ፤ ኤንቲ መልን ጎተይ ኤንታ ፑኖዳ ኤፍስ።
ISA 40:25 ያትን፥ ታና ኦደራ ልከየቲ? ታና ኦደራ ግናየቲ? ያጌስ ጌሻይ።
ISA 40:26 ህንተ አይፍያ ꬎቁ ኦꬅድ ሳሎ ፄልተ፤ ሀ ፆልንቶታ መꬍዳይ ኦኔ? እ ኤንታ ኦላንቾዳ ካለꬄስ፤ ኤንታ ታይቡዋ ኤሬስ። እ ኤንታ ኡባ ኤንታ ሱንꬃን ሱንꬃን ፄጌስ፤ እያ ዎልቃ ግታተꬃፈነ ምኖተꬃፈ ደንዶይሳን፥ ኤንታፈ እሶይካ ꬋየና።
ISA 40:27 ነኖ ያይቆባ፥ ነኖ እስራኤለ፥ ታ ኦገይ ጎዳፐ ጌምስ፤ ታ ፕርዳይ ፆሳፈ ቆሰትስ፤ ያጋዳ አይስ ኦደታይ?
ISA 40:28 ኤራብኪ? ስአብኪ? ጎዳይ መርና ፆሳ፤ ቢታ ኡባ መꬍዳይ እያ። እ ዳቡረና፤ ዎይኮ አርጋጨና፤ ኦንካ እያ ቆፋ ኤራናዉ ዳንዳኤና።
ISA 40:29 እ ዳቡርዳይሳታስ ዎልቃ እሜስ፤ ምኖተꬅ ባይናይሳስ ምኖተꬅ ጉጄስ።
ISA 40:30 ሀር አቶሽን ያላጋ ናይት ዳቡሮሶና፤ አርጋጮሶና፤ ናአተꬃት ዳቡርድ ኩንዶሶና።
ISA 40:31 ሽን ጎዳ አማነትድ ናገይሳት፥ ባንታ ዎልቃ ኦራꬃና። ኤንቲ አርጋንꬃዳ ቀፈን ፓላና፤ ዎፃና፥ ሽን ዳቡሮኮና፤ ሄመታና፥ ሽን አርጋጮኮና።
ISA 41:1 ህንተኖ፥ ዩሾይ አባን ተቀትዳ ቢታቶ፥ ስእ ግድ፥ ታኒ ኦደይሳ ስእተ! ደረይ ባንታ ዎልቃ ኦራꬆ፤ ኤንቲ ሃ ሺቅድ፥ ኦደቶ፤ አነ ኑኒ ፕርደታናዉ እስፈ ሺቆስ።
ISA 41:2 “ዶሎሀ ባጋፈ እሱዋ ደንꬅድ ብያ በሳ ኡባን ፆኖ እመይ ኦኔ? እ ካዎተꬃታ እያ ኩሸን አꬅድ እሜስ፤ ካዎታ እያዉ ሃርስስ። እ ኤንታ ባ ማሻን ብዶ ከሴስ፤ ባ ዶንግያን ኤንታ ፑኖ ኦꬄስ።
ISA 41:3 እ ኤንታ የደꬅሸ፥ እያ ቶሆይ ካሰ የꬍቦና ኦግያራ ሳሮ ካንꬄስ።
ISA 41:4 ሀይሳ ኦꬅዳይነ ፖልዳይ የለተꬃካ ኮይሮፐ ፄግዳይ ኦኔ? ታኒ ጎዳይ፥ ኮይሩዋራ ደአይስ ዉርሰꬃራካ ደኤይ ታና” ያጌስ።
ISA 41:5 ዩሾይ አባን ተቀትዳ ቢታት፥ ሄሳ በእድ ያይዶሶና፤ ሳኣ ጋፃን ደኤይሳት ኮኮርዶሶና። ኤንቲ እስፈ ሺቅድ ታኮ ይዶሶና።
ISA 41:6 እሶይ እሱዋ ማዴስ፤ ባ እሻ፥ “ምና” ያጌስ።
ISA 41:7 ኩሸ ሂላንቾይ ዎርቃ ሼሸይሳ ምንꬄስ፤ ናርቃን ቆፅድ ሌእሰይስ ባቻን ብራታ ሴርሰይሳ፥ “ምና” ጌስ። እ ብራታ ꬋንይሳ፥ “ሎኦ ኦꬃሳ” ያጌስ፤ ኤቃይ ቃፆና መላ ምስማረን ꬍሼስ።
ISA 41:8 “ሽን ነኖ እስራኤለ፥ ታ አይልያዉ፥ ታ ዶርዳ ያይቆባ፥ ታ ላግያ አብራሃመ ኮቻዉ፥
ISA 41:9 ታኒ ነና ቢታ ጋፃፐ ኤሀስ፤ ሃሆሶፐ ፄጋዳ፥ ‘ኔኒ ታ አይለ’ ታኒ ነና ዶራስ፤ ታኒ ነና የግከ።
ISA 41:10 ያዮፋ፥ ታኒ ኔራ ደአይስ፤ ዳጋሞፋ፥ ታኒ ነ ፆሳ። ታኒ ነና ምንꬃና፤ ነና ማዳና፤ ታኒ ነና ፆንያ ታ ኡሻቻ ኩሽያን ካትሳና።
ISA 41:11 ነ ቦላ ሀንቀትያ ኡባይ ዬላትድ ካዉያና፤ ኔራ ኤቀተይሳት ባይናባ ግዳና።
ISA 41:12 ነ ሞርከታ ኔኒ ኮያና፤ ሽን ኤንታ ደማካ፤ ነና ኦለይሳት ባይናባ ግዳና።
ISA 41:13 ታኒ ጎዳይ፥ ነ ፆሳይ፥ ነ ኡሻቻ ኩሽያ ኦይካና፤ ያዮፋ፥ ታኒ ነና ማዳና።
ISA 41:14 ነኖ ጉፁንያዉ፥ ያይቆባ፥ ህንተኖ እስራኤለ አሳዉ፥ ያዮፍተ፤ ታኒ ህንተና ማዳና፤ ህንተና ዎዝያ እስራኤለ ጌሻይ ታና።
ISA 41:15 ሄኮ፥ ታኒ ነና ኦራꬅ፥ ቃራነ አቻራ ደእያ፥ ካꬅ ቆፅያ ሚሸ ኦꬃስ። ኔኒ ደረታ ቆፃዳ ሊቅሳና፤ ዙማታካ ፑኖ ኦꬃና።
ISA 41:16 ኔኒ ኤንታ ፑናና፤ ጫርኮይ ኤንታ ኤፋና፤ ሽን ኔኒ ጎዳን ኡፋይታና፤ እስራኤለ ጌሻን ቦንቸታና።”
ISA 41:17 “ማንቆትነ መቶታንቾት ሃ ኮያና፥ ሽን ደሞኮና፤ ኤንታ ቆይ ሳሞን መላና። ግዶሽን፥ ታኒ ጎዳይ ኤንታ ስአና፤ ታኒ፥ እስራኤለ ፆሳይ፥ ኤንታ አግከ።
ISA 41:18 ታኒ መላ ዙማታ ቦላ ሻፋ፥ ዛንጋራታን ፑልቶ ꬉሳና። ባዙዋ ሃꬅ ኤልያ በሲ፥ መላ ቢታ ፑልቶይ ከያሶ ኦꬃና።
ISA 41:19 ታኒ መላ ቢታን፥ ዝጋ፥ ሶቃላ ምꬅ፥ ባርሰኔተ ምꬃነ ሻማሆ ዶልሳና። መላ ቢታ ፂድ፥ ማሮይነ ጫጭ ኩምዳ ቢታ ኦꬃና።
ISA 41:20 እስራኤለ ጌሻይ ሄሳ መꬍዳይሳነ ጎዳ ኩሸይ ሄሳ ኦꬅዳይሳ አሳይ በአና፥ ኤራና፥ ቆፓናነ አኬካና መላ ታኒ ሄሳ ኦꬃስ።”
ISA 41:21 “አነ ህንተ ሞቱዋ ሺሽተ” ያጌስ ጎዳይ፤ “አነ ህንተ ማርካ ሃ ኤህተ” ያጌስ ያይቆባ ካዎይ።
ISA 41:22 አነ ኤንቲ ባንታ ኤቃታ ሃ ኤሆ፥ አይብ ሀናኔኮ ኤንታ ኤቃት ኑስ ኦዶ። ኑኒ አኬካና መላነ ኤንታ ዉርሰꬃ ኤራና መላ ካሰ ሀንዳባይ አይበኮ ኑስ ኦዶ፤ ዎይኮ ስንꬃፈ ሀናናባ ኑስ ቆንጭሶ።
ISA 41:23 ህንተ ፆሳታ ግደይሳ ኑኒ ኤራና መላ ስንꬃፈ ያናዉ ደእያባ ኑስ ኦድተ። ኑኒ ዳጋማና መላነ ያያና መላ፥ ሎኦ ግድን ኢታ ግድን አነ እስባ ኦꬅተ።
ISA 41:24 ሽን ህንተ ባይናባ መላ፤ ህንተ ኦሶይካ ሀዳ፤ ህንተና ዶርያ አሳይካ እፀትዳይሳታ።
ISA 41:25 ታኒ ፑደሀ ባጋፈ እሱዋ ደንꬅን፥ እ ዬስ። ታ ሱንꬃ ፄግያ እሶይ ዶሎሀፐ ያና፤ ኦቶ መይስ ኡርቃ የይሳዳ፥ እ ካለይሳታ የꬋና።
ISA 41:26 ኑኒ ኤራና መላነ እ ልከ ጋና መላ ካሰትድ ኑስ ሀይሳ ኦድዳይ ኦኔ? ህንተፈ ኦንካ ካሰትድ ሀይሳ ቆንጭስዳይ፥ ዎይኮ አዋጅዳይ ዎይኮ ባ ቃላ ስስዳይ ባዋ።
ISA 41:27 ታኒ ሀይሳ ካሰታዳ ፅዮነስ ኦዳስ፤ ታኒ የሩሳላመስ ምሽራቾ ኦደይሳ እማስ።
ISA 41:28 ሽን ታኒ ፄልያ ዎደ እሶይካ ባዋ፤ ታኒ ዞረ ኦይችያ ዎደ ኤንታ ኤቃታ ግዶፈ ዛሮ እምያ እሶይካ ባዋ።
ISA 41:29 ሄኮ፥ ኤንቲ ኡባይ ሀዳ፤ ኤንታ ኦሶይካ ፓና፤ ሼሽድ መꬍዳ ኤንታ ምስለትካ ጫርኮ።
ISA 42:1 “ታኒ ካትሳዳ ኦይክዳ ታ አይለይ፥ ታ እያን ኡፋይተይስ፥ ታኒ ዶርዳይስ ሀይሳ። ታኒ ታ አያና እያ ቦላ ዎꬃስ፤ እ ካዎተꬃታስ ሱረ ፕርዳ ኤሀና።
ISA 42:2 እ ዋሰና፤ ባ ቃላ ꬎቁ ኦና ባ ቃላ ኦገን ስሰና።
ISA 42:3 ድንጨትዳ ማይርያ እ መንና፤ ሊእ ሊእድ ኤፅያ ሙቃዳ እ ቶይሰና፤ አማነተꬃን እ ሱረ ፕርዳ ኤሀና።
ISA 42:4 እ ቢታን ሱረ ፕርዳ ኤሰና ጋካናዉ አርጋጨና ዎይኮ ጉየ ጌና። ዩሾይ አባን ተቀትዳ ቢታን ደእያ አሳይ እያ ህግያ ስአናዉ ናጌስ።
ISA 42:5 ሳሎታ መꬍዳይነ ኤንታ ምጭዳይ፥ ሳኣነ ሳአ ቦላ ደእያባ መꬍዳይ፥ ሳአን ደእያ አሳስ ሸምፖ እምዳይ፥ እያን ሄመትያ ኡባስ ደኦ እምዳይ፥ ጎዳ ፆሳይ ሀይሳዳ ያጌስ።
ISA 42:6 ታኒ ጎዳይ ነና ፅሎተꬃን ፄጋስ፤ ነ ኩሽያ ኦይካዳ ነና ናጋና። ታኒ ነና አሳስ ጫቆ ኦꬃና፤ ካዎተꬃታስ ፖኦ ኦꬃዳ እማና።
ISA 42:7 ኔኒ ቆቀ አይፈታ ዶያና፤ ꬉማ ኦላን፥ ቃሾ ኬꬃን ደኤይሳታ ከሳና።
ISA 42:8 ታኒ ጎዳ፤ ሄስ ታ ሱንꬃ፤ ታ ቦንቹዋ ታኒ ሀራስ እምከ፤ ታ ጋላታ ኤቃታስ እምከ።
ISA 42:9 ሄኮ ታኒ ካሰ ኦድዳባ ኡባይ ፖለትዶሶና፤ ሀእ ታኒ ኦራꬃባ አዋጃይስ፤ ኤንቲ ሀናናፐ ስን ታኒ ህንተዉ ኦዳይስ” ያጌስ።
ISA 42:10 ጎዳስ ኦራꬃ ማዝሙረ የፅተ፤ ቢታ ጋፃፐ ጋፃ ጋካናዉ እያ ጋላታ የፅተ። አባ ግዶራ በይሳትነ እያን ደኤይሳት፥ ዩሾይ አባን ተቀትዳ ቢታትነ እያን ደእያ ኡባይ የፆ።
ISA 42:11 መላ ቢታን ደእያ ካታማት፥ ቀዳረ አሳይ ደእያ ጉታት ባንታ ቃላ ꬎቁ ኦꬆና። ሰላአ ካታማን ደኤይሳት ኡፋይሳን የፆ፤ ደርያ ሁጰን ባንታ እልልሳ ስሶ።
ISA 42:12 ኤንቲ ቦንቾ ጎዳስ እሞ፤ እያ ጋላታ ዩሾይ አባን ተቀትዳ ቢታታን ኦዶ።
ISA 42:13 ጎዳይ ምኖ አሳዳ ከያና፤ ባ ቃላ ꬎቁ ኦꬅድ ኦላ አዋጃና። ባ ቃላ ꬎቁ ኦꬅድ ገሬራና፤ ባ ሞርከታ ፆናና።
ISA 42:14 ዳሮ ዎደ ስእ ጋዳ ጋምአስ፤ ስእ ጋዳ ዳንዳአስ። ሽን ሀእ እቀꬅ ኦይክዳ ማጫሳዳ ታ ዋሳና፤ ቶካ ሸምፓናነ ፔኑቃና።
ISA 42:15 ደረታነ ዙማታ ላላና፤ ኤንታ ቦላ ዶልዳባ ኡባ መልሳና። ሻፋታ ዩሾይ አባን ተቀትዳ ቢታ ከሳና፤ ኤለ ሃꬃታ መልሳና።
ISA 42:16 ታኒ ቆቀታ ኤንቲ ኤሮና ኦግያራ ካለꬃና፤ ኤንቲ ኤሮና ሆሮጋራ ኤፋና። ኤንታ ስንꬃን ꬉማ ፖኦ ከሳና፤ ኤንታ ስንꬃን ደእያ ኦግያ ባሳና። ሀ ኡባ ታኒ ኤንታዉ ኦꬃና፤ ታኒ ኤንታ ኦꬆና አግከ።
ISA 42:17 “ሽን ኤቃ ምስለታን አማነተይሳት፥ ምስለታ፥ ‘ህንተ ኑ ፆሳታ’ ያገይሳት፥ ዬላን ጉየ ስማና።
ISA 42:18 ህንተ ቱለት፥ ስእተ፤ ህንተ ቆቀት፥ ፄልተ፥ ሎይꬅድ በእተ።
ISA 42:19 ታ አይልያፈ ሀር ቆቀይ ኦኔ? ታ ኪትዳይሳፈ ሀር ቱለይ ኦኔ? ባና ጎዳስ አꬅድ እምዳ ኡራፐ ጎዳ አይልያፈ ሀር ቆቀይ ኦኔ?
ISA 42:20 ዳሮባ በአዳሳ፥ ሽን አኬካካ፤ ነ ሀይꬃይ ዶያ፥ ሽን ስአካ” ያጌስ።
ISA 42:21 ጎዳይ ባ ፅሎተꬃ ግሾ፥ ባ ህግያ ግታያናዉነ ቦንቻናዉ ዶስስ።
ISA 42:22 ሽን ሀ አሳይ ቦንቀትስ፤ ደእያባ ኤከትስ። ኦላ ግዶን ፅሄን ኦይከትስ፥ ቃሾ ኬꬃን ኤንታ ቦላ ጎርደትስ። ኤንቲ ቦንቀትዶሶና፥ ሽን ኤንታ አሸይ ባዋ፤ ድኤትዶሶና፥ ሽን ኦንካ “ኤንታ ጉየ ዛራ” ግያ አስ ባዋ።
ISA 42:23 ህንተ ግዶፈ ሀይሳ ስኤይ ኦኔ? ስንꬃፈ ያና ዎድያባ ቆፐይ ኦኔ?
ISA 42:24 ያይቆባ ድኤተꬃስ፥ እስራኤለ ቦንቄስ አꬅድ እምዳይ ኦኔ? ናጋራ ኦꬅድ ኑ ቆህዳ፥ እያ ኦግያ ካላናዉነ፥ እያ ህግያ ኪተታናዉ ኑኒ እፅዳ ጎዳ ግደነዬ?
ISA 42:25 ሄሳ ግሾ፥ እ ኤንታ ቦላ ባ ኤፅያ ሀንቁዋ ጉስስ፤ ኤንታ ዩሹዋ ታማ ላጮን ተቅስ፥ ሽን ኤንቲ ኤርቦኮና፤ እ ኤንታ ፁግስ፥ ሽን ኤንቲ አኬክቦኮና።
ISA 43:1 ሽን ነኖ ያይቆባ ነና መꬍዳይ፥ ነኖ እስራኤለ፥ ነና ጊግስዳይ፥ ጎዳይ ሀይሳዳ ያጌስ፦ “ታኒ ነና ዎዝዳ ግሾ ያዮፋ፤ ታኒ ነና ነ ሱንꬃን ፄጋስ፤ ኔኒ ታባ።
ISA 43:2 ኔኒ ሃꬃ ግዶራ ፕንያ ዎደ ታኒ ኔራ ግዳና። ኔኒ ሻፋታ ግዶራ ፕንያ ዎደ ኤንቲ ነና ምቶኮና። ኔኒ ታማ ግዶራ አꬍያ ዎደ ፁገታካ፤ ላጮይካ ነና ሜና።
ISA 43:3 ታኒ ነና አሽይሳ፥ እስራኤለ ጌሻ፥ ጎዳ ነ ፆሳ። ግብፀ ነዉ ዎዞ ኦꬃዳ፥ ቶጰነ ሳባ ነዉ ላመ ኦꬃዳ እማና።
ISA 43:4 ኔኒ ታ ስንꬃን አልኦነ ቦንቾ ግድያ ግሾ፥ ታኒ ነና ዶስያ ግሾ፥ አሳ ነ ግሾ፥ ካዎተꬃታ ነ ሸምፑዋ ግሾ ላመ ኦꬃዳ እማና።
ISA 43:5 ታኒ ኔራ ደእያ ግሾ ያዮፋ፤ ታኒ ነ ናይታ ዶሎሀፐ ነና ዉሎሀፐ ሺሻና።
ISA 43:6 ታኒ ፑደሀ ባጋ፥ ‘ኤንታ ዛራዳ ኤሀ!’ ዱገሀ ባጋ፥ ‘ኤንታ ተቆፋ’ ያጋና። ታ አደ ናይታ ሃሆሶፐ፥ ታ ማጫ ናይታ ሳኣ ጋፃፐ ኤሀና።
ISA 43:7 ኤንቲ ታ ሱንꬃን ፄገትዳይሳታ፥ ታኒ ታ ቦንቹዋስ መꬍዳይሳታ፥ ታኒ ጊግስዳይሳታነ ኦꬅዳይሳታ ሀምተ።”
ISA 43:8 አይፈይ ደእሽን ቆቅዳ አሳታ፥ ሀይꬅ ደእሽን ቱልዳ አሳታ ከሳ።
ISA 43:9 ካዎተꬃት ኡባይ እስፈ ሺቆ፤ አሳይ ዱላታ ኡቶ። ኤንታ ኤቃታ ግዶፈ ሀይሳ ኦዳናዉ፥ ካሰ አꬍዳባታ ኑስ ቆንጭሳናዉ ዳንዳኤይ ኦኔ? ሀራ አሳይ ስእድ፥ “ሀይስ ቱማ” ጋና መላ፥ ኤንቲ ልከ ግደይሳ በሳናዉ ባንታ ማርካታ ኤሆ።
ISA 43:10 ጎዳይ ሀይሳዳ ያጌስ፦ “ህንተ ታ ማርካታ፤ ህንተ ታና ኤራና መላነ አማናና መላ ታኒ ፆሰ ግደይሳ አኬካና መላ ታኒ ዶርዳ ታ አይለት ህንተና። ታፐ ካሰ ሀራ ፆሲ መትቤና፤ ታፐ ጉየ ሀራ ፆሲ ዴና።
ISA 43:11 ታኒ ጎዳ፤ ታፐ አትሽን፥ ሀር አሸይ ባዋ።
ISA 43:12 ታ ካሰታዳ ኦዳስ፥ ታ ኦꬃናባ አዋጃስ፥ ታ አሻስ። ህንተ ግዶን ደእያ አላጋ ፆሳታፐ ሄሳ ኦꬅዳይ ባዋ። ታኒ ፆሰ ግደይሳስ ህንተ ታዉ ማርካታ።
ISA 43:13 መርናፐ መርናዉ ታኒ ፆሰ፤ ታ ኩሸፐ ኦንካ አሸና፤ ታ ኦꬅዳባ ላማናዉ ዳንዳኤይ ባዋ” ያጌስ ጎዳይ።
ISA 43:14 ጎዳይ፥ ህንተና ዎዝያ፥ እስራኤለ ጌሻይ፥ ሀይሳዳ ያጌስ፦ “ህንተ ግሾ፥ ታኒ ባብሎነ ቦላ ኦላንቾታ ኪታና። ባብሎነታ ኡባ ኤንቲ ጬቀትያ ማርካበታራ በታና መላ ኦꬃና።
ISA 43:15 ታኒ ጎዳ፥ ህንተ ጌሻ፥ እስራኤለ መꬍዳ ህንተ ካዋ” ያጌስ።
ISA 43:16 አባ ግዶን ኦገ፥ ዎልቃማ ሃꬃታ ግዶራ ሆሮጋ ከስዳ ጎዳይ ሀይሳዳ ያጌስ።
ISA 43:17 ፓራ ጋረታነ ፓራታ፥ ኦላንቾታነ ምኖ አሳታ አባን ኤህድ፥ ኤንቲ ደንዶና መላ የግዳይ፥ ኤንታ ሙቃዳ ታማዳ ቶይስዳ።
ISA 43:18 ጎዳይ ሀይሳዳ ያጌስ፦ “ካሰባታ ሃሳዮፕተ፤ በንባታ ቆፖፍተ።
ISA 43:19 ሄኮ፥ ሀእ ታኒ ኦራꬃባ ኦꬃይስ፤ እካ ሀእ ዶላና። ሄስ ህንተዉ በንተኔ? ታኒ መላ ቢታን ኦገ፥ መላ ቢታን ሻፋታ ከሳና።
ISA 43:20 ታኒ ዶርዳ፥ ታ አሳስ መላ ቢታን ሃ፥ መላ ቢታን ሃꬃ ሻፋታ እማስ። ዎራ ዶአት፥ ዎርካናትነ ያንቾት ታና ቦንቻና።
ISA 43:21 ታኒ ታዉ መꬍዳ ደረ ግድያ ግሾ፥ ታ ጋላታ አዋጃና ማላ ታ ሀይሳ ኦꬃስ።
ISA 43:22 ሽን ነኖ ያይቆባ፥ ኔኒ ታ ሱንꬃ ፄጋባካ፤ ነኖ እስራኤለ፥ ኔኒ ታና ሳለታዳሳ።
ISA 43:23 ኔኒ ታዉ ፁሳ ያርሾስ ዶርሰ ኤሀባካ፤ ሀራ ያርሾንካ ታና ቦንቻባካ። ታኒ ነና ካꬃ ያርሾ ኤሀ ጋዳ ዋይሳብከ፤ እፃነ ታዉ ጩይሶ ጋዳ ዳቡርሳብከ።
ISA 43:24 ኔኒ ታዉ ሳውያ እፃነ ሻማባካ፤ ነ ሞꬎ ያርሾን ታና ኡፋይሳባካ። ሽን ኔኒ ነ ናጋራን ታና ዋይሳዳሳ፤ ነ ናቁዋን ታና ዳቡርሳዳሳ።
ISA 43:25 “ታ ግሾ ጋዳ ነ ናጋራ ቁቸይ ታና፤ ነ ናጋራ ዛራዳ ቆፕከ።
ISA 43:26 አነ ታና ሀሳይሳ፤ ኔኒ ፅሎ ግደይሳ ኤርሳናዉ እስፈ ሺቅድ ሞተቶስ።
ISA 43:27 ነ ኮይሮ አዋይ ናጋራ ኦꬅስ፤ ነ አስታማረት ታና ቆህዶሶና።
ISA 43:28 ሄሳ ግሾ፥ ታኒ ታ ኬꬃ ሀላቃታ ካዉሻስ፤ ያይቆባ ጋዶስ፥ እስራኤለ ጫሻስ አꬃዳ እማስ።”
ISA 44:1 ሽን ታ አይልያ ያይቆባ፥ ታ ዶርዳ እስራኤለ፥ ሀእካ ስአ።
ISA 44:2 ነና መꬍዳ፥ ነ አየ ኡሎን ነና ጊግስዳ ጎዳይ ሀይሳዳ ያጌስ። ታ አይልያ ያይቆባ፥ ታኒ ዶርዳ ይሹሩና፥ ያዮፋ።
ISA 44:3 ታኒ ሳሞትዳ ቢታን ሃꬃ ጉሳና፤ መላ ቢታ ቦላ ሻፋ ጎግሳና። ታ አያና ነ ናይታ ቦላ፥ ታ አንጁዋ ነ ኮቻ ቦላ ጉሳና።
ISA 44:4 ኤንቲ ሃꬃ ዶናን ዶልዳ ማታዳ፥ ሻፋ ላንቀን ደእያ ምꬃዳ አጫና።
ISA 44:5 እሶይ ባና፥ ታኒ ጎዳባ ያጋና፤ ሀንኮይ ባና ያይቆባ ሱንꬃን ፄጋና፤ ሀራይ ባ ኩሽያ ቦላ፥ “ታኒ ጎዳባ” ያግድ ጫዳና፤ እ እስራኤለ እያ ሱንꬃን ፄገታና።
ISA 44:6 ጎዳይ፥ እስራኤለ ካዎይነ እያ ዎዝዳይ፥ ኡባፈ ዎልቃማ ጎዳይ ሀይሳዳ ያጌስ፦ “ኮይሮይ ታና፤ ዉርሰꬃይ ታና፤ ታፐ ሀራ ፆሲ ባዋ።
ISA 44:7 ታ መል ኦኔ? ደእኮ አነ አዋጆ፤ አነ ታ ስንꬃን ኤቅድ ኦዶ። በንፐ ዶምድ፥ ሀንዳባ ኦዶ፤ ስንꬃፈ ሀናናባ ቆንጭሶ።
ISA 44:8 ያዮፍተ፤ ዳጋሞፕተ፤ ታኒ ሀይሳ በንፐ ዶማዳ ኦዳብክና? ካሰታዳ ኤርሳብክና? ሄሳስ ህንተ ታዉ ማርካ። ታፐ አትሽን፥ ሀራ ፆሲ ደኢ? ሀራ ዛል ባዋ፤ ኦንካ ባይናይሳ ታ ኤራይስ” ያጌስ።
ISA 44:9 ኤቃ ምስለታ መꬍያ ኡባይ ሀዳ፤ እያን ኡፋይትያባት ኤንታ ጎኦኮና። ኤንታ ማርካት ቆቀታ ኤንታዉ ኤር ባዋ፤ ኤንቲ ዬላታና።
ISA 44:10 ባና ጎኦና ኤቃ ፆሳ ኦꬅድ ጊግስዳይ ኦኔ?
ISA 44:11 ኤቃ መይ አሰፐ አትሽን፥ ሀራ ግደና፤ እነ እያ ላገት ዬላታና፤ ኡባት እስፈ ሺቅድ ኤቆ፥ ያዮ፥ ዬላቶ።
ISA 44:12 ብራታ ቆፀይስ ኤቃ ኦꬃናዉ ባ ብራታ ታማን ሴርስድ ማላ እማናዉ ባ ምኖ ኩሽያን ናርቃን ቆፄስ። ሄሳ ጊግስሸ ኮሻቴስ፤ እያ ዎልቃይ ዉሬስ፤ ሳሞተስነ ላባኔስ።
ISA 44:13 አናፀይ ዎዶሮን ልክድ እርሳሰን እያ ቦላ ማላ ዎꬄስ፤ ሊቅስያ ሚሸን ሊቅሴስ። ሎኦ አሳ ማላን መꬍድ ባ ኤቃ ኬꬃን ዎꬄስ።
ISA 44:14 እ ሄሳ ኦꬃናዉ ዝጋ ቃንፄስ፤ ዎላ ዎይኮ ፂዳ ዎራ ግዶፈ ዶርድ ድጫና መላ ኦꬄስ። ዎይኮ ዝጋ ቶክድ እራን ድጫና መላ ናጌስ።
ISA 44:15 እያፐ ባጋ ኤꬃናዉ ጎኤቴስ፤ እያፐ ባጋ ኤክድ፥ ኤꬅድ ካዬስ፤ ባጋ ኤꬅድ ካꬅ ካꬄስ። አትዳይሳ ኤክድ ፆሰ ኦꬅድ እያዉ ጎይኔስ፤ ኤቃ መꬍድ እያ ስንꬃን ጉፋኔስ።
ISA 44:16 እያፐ ባጋ ኤꬅድ ካꬅ ካꬄስ፤ ባጋን አሾ ጫጭድ ካልድ ሜስ። ቃስ ታማ ካይሸ፥ “ኤሮሾ፥ ታማ ጎፓ፤ ዋን ሆእ” ያጌስ።
ISA 44:17 ቃስ አትዳ ምꬃ ማስድ፥ ጎይንያ ፆሳ ምስለ ከሴስ። ሄ ምስልያ ስንꬃን ጉፋንድ፥ እያዉ ጎይኔስ፤ “ኔኒ ታዉ ፆሰ ግድያ ግሾ፥ ታና አሻ” ያግድ ዎሴስ።
ISA 44:18 ኤንቲ አይኮካ ኤሮኮና፤ አይኮካ አኬኮኮና፤ ኤንቲ በኦና መላ ኤንታ አይፈይ ጎዘትስ፤ አኬኮና መላ ኤንታ ዎዛናይ ጎርደትስ።
ISA 44:19 ኤቃ ኦꬅያ አሳ ግዶፈ ባ ዎዛናን፥ “እያፐ ባጋ ታማን ኤꬃስ፤ እያ ቦንቁዋን ካꬅ ካꬃስ፤ እያን አሾ ጫጫዳ ማስ። እያፐ አትዳይሳ እፀትዳ ኤቃ ኦꬃዳ መꬎ? አትዳ ጩገꬃ ምꬃስ ጉፋናዳ ጎይኖ?” ያግድ ቆፕያ ዎይኮ አኬክያ አስ ባዋ።
ISA 44:20 እ ብዶ ሜስ፤ እያ ጭመትዳ ዎዛናይ እያ ሀራ ሶ ካለꬅስ። እ ባ ሸምፑዋ አሻናዉ ዳንዳኤና፤ “ሀይስ ታ ኡሻቻ ኩሸን ደኤይ ዎርዶ ግደና” ጋናዉ ዳንዳኤና።
ISA 44:21 ጎዳይ ሀይሳዳ ያጌስ፦ “ያይቆባ፥ ሀይሳ አኬካ፤ እስራኤለ፥ ኔኒ ታ አይለ ግድያ ግሾ ሀይሳ ሀሳያ። ታኒ ነና መꬋስ፤ ኔኒ ታ አይለ፤ ነኖ እስራኤለ፥ ታኒ ነና ዶግከ።
ISA 44:22 ታኒ ነ ናጋራ ፕታዳ ድጋስ፥ ነ ናቁዋ ጫጋናዳ ቁቻስ። ታኒ ነና ዎዝዳ ግሾ፥ ታኮ ስማ” ያጌስ።
ISA 44:23 “ህንተኖ ሳሎቶ፥ ጎዳይ ሀይሳ ኦꬅዳ ግሾ፥ ኡፋይሳን የፅተ፤ ነኖ ቢታዉ፥ እልላ። ህንተኖ ደረቶ፥ ዎራዉነ እያ ግዶን ደእያ ምꬃ ኡባይ ማዝሙረ የፅተ። ጎዳይ ያይቆባ ዎዝስ፤ እስራኤለ ግዶን ቦንቸትስ።
ISA 44:24 ነ አየ ኡሎን ነና መꬍዳይስ፥ ነና ዎዝዳይስ ጎዳይ ሀይሳዳ ያጌስ፦ ኡባባ መꬍዳይ፥ ሳሎታ ታርካ ምጭዳይ፤ ሳኣካ ታርካ ሂፅዳይ፥ ታኒ ጎዳ።
ISA 44:25 ታኒ ዎርዶ ናበታ ትንብትያ ሀዳ ኦꬃስ፤ ማሮታ ካዮዋ ኤያተꬅ ከሳስ። ታኒ ጭንጫታ ጭንጫተꬃ ሽራ የጋስ፤ ኤንታ ኤራ ኤያ ኦꬃስ።
ISA 44:26 ታኒ ታ አይለታ ቃላ ምንꬃና፤ ታ ናበታ ትንብትያ ፖላና። ታኒ የሩሳላመ ካታማ፥ ‘ኔኒ አሳይ ደእያ በሲ ግዳና’ ያጋስ፤ ይሁዳ ካታማታ፥ ‘ህንተ ስሚድ ኬፀታና፤ ህንተ ግምበይ ኦራፃና’ ያጋስ።
ISA 44:27 ታኒ ጎግያ ሃꬃታ መልሳና ግሾ ጪሞ ሃꬃ፥ ‘ነ መላ’ ያጋና።
ISA 44:28 ቅሮሳኮ፥ ‘ኔኒ ታ አሳ ሄመይሳ፤ ኔኒ ታ ሀልቹዋ ፖለይሳ’ ያጋና። እ፥ የሩሳላመ ካታማ፥ ‘ኔኒ ስማዳ ኬፀታና’፤ ፆሳ ኬꬃ፥ ‘ነ ባሶይ የገታና’ ” ያጋና።
ISA 45:1 ጎዳይ ትይዳይሳስ፥ ካዎታ ዳንጮ ብልሳና መላ፥ ደርያ እያዉ ሃርሳና መላ፥ ፐንገት እያ ስንꬃን ዶየታና መላ እያ ኡሻቻ ኩሽያ ኦይክዳ ቅሮሳ ጎዳይ ሀይሳዳ ያጌስ፦
ISA 45:2 ታኒ ነ ስንꬃራ ባና፤ ደረታ ደምባያና፤ ናሰ ብራታ ሳንቃታ መንꬃና፤ ብራታ ኮበታ ቃንፃና።
ISA 45:3 ነና ነ ሱንꬃን ፄገይ ታና ጎዳ፥ እስራኤለ ፆሳ ግደይሳ ኔኒ ኤራና መላ ታኒ ነዉ ꬉማን ደእያ ሻሉዋ፥ ጌማን ቆሰትዳ ዱረተꬃ እማና።
ISA 45:4 ታ አይልያ ያይቆባ ግሾ፥ ታኒ ዶርዳ እስራኤለ ግሾ፥ ታኒ ነና ነ ሱንꬃን ፄጋስ። ኔኒ ታና ኤሮና እፅኮካ፥ ታኒ ነና ቦንቾ ሱንꬃን ፄጋስ።
ISA 45:5 ታኒ ጎዳ፤ ታፐ ሀራ ፆሰ ባዋ፤ ኔኒ ታና ኤሮና እፅኮካ ታኒ ነዉ ዎልቃ እማና።
ISA 45:6 ሄስካ አው ዶልያሶፐ ዉልያሶ ጋካናዉ ታፐ ሀር ባይናይሳ አሳይ ኤራና መላሳ፤ ታኒ ጎዳ፤ ታፐ ሀራ ፆሲ ባዋ።
ISA 45:7 ታኒ ፖኦነ ꬉማ መꬋስ፤ ሳሮተꬅነ ꬋዮ ኤሀይስ፤ ሀ ኡባ ታኒ ጎዳይ ኦꬃይስ።
ISA 45:8 ህንተኖ ሳሎቶ፥ ቦላፈ ፅሎተꬅ ትግተ፤ ሻራት ቡክሶ። ቢታይ ዶየቶ፥ አቶተꬅ ፅሎተꬃይ እስፈ ዶሎ፤ ታኒ ጎዳይ ሀይሳ መꬋስ።
ISA 45:9 ባና መꬍዳይሳራ ፓላምያ ኡራ አየ! እ ሳአን መቅድ ዎꬍዳ ኦቶፐ እሱዋ መላ። ኦቶይ ባና መይሳኮ፥ ኔኒ፥ “አይ ኦꬃይ?” “ነዉ ኩሸይ ባዋ” ያግዬ?
ISA 45:10 ባ አዋ፥ “ታና አይስ የላዲ?” ግያ፥ ባ አይዉ፥ “ታና ሀይሳዳ አይስ ኢቀታዳ የላዲ?” ግያ ኡራ አየ!
ISA 45:11 ጎዳይ፥ እስራኤለ ጌሻይ፥ እያ መꬍዳይስ ሀይሳዳ ያጌስ፦ “ስንꬃፈ ሀናናባ፥ ህንተ ታና ታ ናይታባ ኦይቻናዉ፥ ታ ኩሸ ኦሶታባ ታና ኪታናዉ በሰቲ?
ISA 45:12 ታኒ ሳኣ ኦꬃስ፤ አሰካ እያ ቦላ መꬋስ። ሳሎታ ታኒ ታ ኩሸን ምጫስ፤ ኤንታ ቦላ ፆልንቶታ ኡባ ዎꬃስ።
ISA 45:13 ታኒ ቅሮሳ ፅሎተꬃን ደንꬃስ፤ እያ ኦግያ ኡባ ሱረ ኦꬃና። ሚሸ ቃንፆና ዎይኮ ዎይቶ እሞና እ ታ ካታማ ኬፃና፤ ታ አሳ ድኦፐ ዛራና” ያጌስ ኡባፈ ዎልቃማ ጎዳይ።
ISA 45:14 “ጎዳይ ሀይሳዳ ያጌስ፦ ግብፀ ዱረተꬃይነ ቶጰ ዛልኤይ፥ ጌሳይ አዱሳ ግድዳ ሳባ አሳት ኔኮ ይድ፥ ነባ ግዳና፤ ኤንቲ ሳንꬃላታን ቃሸትድ፥ ነና ካላና። ኤንቲ ነዉ ጎይንሸ፥ ‘ፆሲ ኔራ ደኤስ፤ እያፐ አትሽን፥ ሀራ ፆሲ ባዋ’ ” ያጋና።
ISA 45:15 “እስራኤለ አሽያ ጎዳ ፆሳዉ፥ ቱማ ኔኒ ነና ገንꬅያ ፆሰ።
ISA 45:16 ኤቃ መይሳት ኡባይ ዬላታናነ ካዉያና፤ ኤንቲ እስፈ ዬላ ማአና።
ISA 45:17 ሽን ጎዳይ እስራኤለ መርና አቶተꬃን አሻና፤ ህንተ መርናዉ ዬላተከታ ካዉየከታ።
ISA 45:18 ሳሎታ መꬍዳ ጎዳይ፥ ቢታ ጊግስድ ኦꬅዳይ፥ አስ ዳና መላፐ አትሽን፥ ቢታ ጮ መꬍቦና ፆሳይ ሀይሳዳ ያጌስ፦ ታኒ ጎዳ፤ ታፐ ሀር ባዋ።
ISA 45:19 ታኒ ጌማን፥ ዎይኮ ꬉማ ቢታን ኡታዳ ኦዳብከ። ያይቆባ ዘረꬃኮ፥ ‘ታና ጮ በሳን ኮይተ’ ጋብከ፤ ታኒ ጎዳይ ቱማ ሃሳይስ፤ ልከ ግድዳባ ቆንጭሳይስ።
ISA 45:20 ህንተኖ ካዎተꬃታ ግዶፈ አትዳይሳቶ፥ እስፈ ሃ ማታ ሺቅተ። ምꬃፈ ኦሰትዳ ኤቃ ምስልያ ቶክ ዩየይሳታስ፥ አሻናዉ ዳንዳኦና ፆሳታ ዎሰይሳታስ ኤር ባዋ።
ISA 45:21 አነ ፓላምት፤ ህንተ ሞቱዋስ ጋሶ ሺሽተ፤ እስፈ ዞረትተ። ዳሮ ዎደፐ ካሰ ሀይሳ ኦድዳይ ኦኔ? በንፐ ሀይሳ አዋጅዳይ ኦኔ? ታና ጎዳ ግድክናዬ? ታፐ አትሽን፥ ሀራ ፆሲ ባዋ። ታፐ አትሽን፥ ሀር ፅሎይነ አሽያ ፆሲ ባዋ።
ISA 45:22 ህንተኖ ቢታ ጋፃፐ ጋፃ ጋካናዉ ደኤይሳቶ፥ ታኮ ስሚድ አትተ፤ ታፐ አትሽን፥ ሀራ ፆሲ ባዋ።
ISA 45:23 ታኒ ታናን ጫቃስ፤ ጉየ ስሞና ቃል ታ ዶናፐ ፅሎተꬃን ከይስ። ጉልባት ኡባይ ታዉ ጉልባታና፤ እንፃርስ ኡባይ ታናን ጫቃና።
ISA 45:24 ኤንቲ ታባ ሃሳይሸ፥ ‘ፅሎተꬅነ ምኖተꬅ ጎዳ ፃላላን ደኤስ’ ያጋና። እያ እፅያ ኡባይ እያኮ ይድ ዬላታና።
ISA 45:25 ሽን እስራኤለ ዘረꬃ ኡባይ፥ ጎዳን፥ ፆኖነ ቦንቾ ደማና።
ISA 46:1 ቤላ ጌተትያ ባብሎነ ኤቃይ ሆክስ፤ ነቦ ጌተትያ ኤቃይ ጉፋንስ። ኤንታ ምስለት ጫና መሄ ቦላ ጫነትዶሶና፤ ዳቡርዳ መሄታስ ዴፆ ቶሆ ግድዶሶና።
ISA 46:2 ዴፁዋፐ ደንድዳይሳን ጫና መሄት፥ ጫናራ እስፈ ኩንድዶሶና። ኤቃት ባንታና አሻናዉ ዳንዳኦና ግሾ ባንታዉ ድኤትድ ብዶሶና።
ISA 46:3 ህንተኖ፥ እስራኤለፐ አትዳይሳቶ፥ ያይቆባ ኮቻቶ፥ ህንተ ቃንꬃትዳ ዎደፐ ዶማዳ ናግዳይ፥ ህንተ የለትዳ ዎደፐ ዶማዳ ቶክዳይ፥ ታኒ ኦደይሳ ስእተ።
ISA 46:4 ህንተ ጭማና ጋካናዉ፥ ፑሉማና ጋካናዉ ታኒ ታና፤ ታ ህንተና ማዳና። ታኒ ህንተና መꬋስ፤ ታ ህንተና ናጋና፤ ታ ህንተና ቶካናነ አሻና።
ISA 46:5 ታና ኦደራ ጋደዬቲ? ዎይኮ ኦደራ ልክሴቲ? ኤንቲ ዎል ዳኔስ ጋናዉ ታና ኦደራ ግናየቲ?
ISA 46:6 አሳይ ዎርቃነ ብራ ባንታ ቃርፂታፐ ቆልድ፥ ፆሰ ኦꬅድ መꬋና መላ ዎርቃ ሼሸይሳስ እሞሶና። እ ኦꬅድ ስምን ኤንቲ ኤቃ ስንꬃን ጉፋንድ ጎይኖሶና።
ISA 46:7 ኤንቲ እያ ደንꬅድ፥ ባንታ ሀሽያን ቶክድ፥ እያ በሳን እያ ዎꬅን፥ እ ሄ በሳን ኤቅ አጌስ። ባ ደእያ በሳፈ ቃፀና፤ አስ እያኮ ዋስኮ እያዉ ዛሮ እመና፤ እያ መቱዋፐ እያ አሸና።
ISA 46:8 ህንተኖ ናጋራንቾቶ፥ ሀይሳ ሀሳይተ፤ ቆፕተ፤ ህንተ ዎዛናን ዎꬅተ።
ISA 46:9 በን ዎደ ሀንዳባታ ሀሳይተ፤ ታፐ አትሽን፥ ሀራ ፆሲ ባዋ፤ ታኒ ፆሰ፤ ታ መል ኦንካ ባዋ።
ISA 46:10 ታ ቆፋይ ምናና፤ ታኒ ታ ሀልቹዋ ኡባ ፖላና። ዉርሰꬃን ሀናናባ ዶመꬃን፥ ስንꬃፈ ሀናናባ ኮይሮታዳ ኤርሳይስ።
ISA 46:11 ዶሎሀ ባጋፈ ቦንቅያ ካፎ፥ ሃሆ ቢታፈ ታ ቆፋ ፖልያ አስ ፄጋና። ታኒ ቆፕዳባ ፖላና፤ ታኒ ሀልችዳባ ኦꬃና።
ISA 46:12 ህንተኖ ዎዛን ሙምዳይሳቶ፥ ፅሎተꬃፈ ሃክዳይሳቶ ታና ስእተ።
ISA 46:13 ታኒ ታ ፅሎተꬃ ማታያና፤ እካ ሃሆና ግደና። ታ አቶተꬃይ ጋምኤና፤ ታ አቶተꬃ ፅዮነስ፥ ታ ቦንቹዋ እስራኤለስ እማና” ያጌስ።
ISA 47:1 “ባብሎነ ጌላኤ፥ ዱገ ዎꬋዳ ባና ቦላ ኡታ። ባብሎነ ናተ፥ ነ አራታ አጋዳ ሳአን ኡታ። ህዛፐ ጉየ ኔኒ ሳጶትያሮነ ባሎትያሮ ጌተታካ።
ISA 47:2 ዎፃ ተቃዳ ካꬅ ጋጫ፤ ነ ጉሉንꬃ ቃራ፤ ነ አዱሳ ማኡዋ ከሳ፤ ነ ዎድርያ ቃራዳ ሻፋ ፕና።
ISA 47:3 ነ ካሎይ ቃረታና፤ ነ ፖኮይ በንታና። ታኒ ሀሎ ከያና፤ ኦደስካ ቃትከ” ያጌስ ጎዳይ።
ISA 47:4 ኑና ዎዝያ እስራኤለ ጌሻ ሱንꬃይ ኡባፈ ዎልቃማ ጎዳ።
ISA 47:5 “ባብሎነ ናተ፥ ባዳ ꬉማን ስእ ጋዳ ኡታ፤ ህዛፐ ጉየ ኔኒ ካዎተꬃታ ካውዉ ጌተታካ።
ISA 47:6 ታኒ ታ አሳ ሀንቀታስ፤ ታ ላታ ቱንሳስ፤ ታኒ ኤንታ ነ ኩሸን አꬃዳ እማስ። ኔኒ ኤንታዉ ቃታባካ፤ ጭምዳይሳታ ቦላ ነ ዴፆ ቃምባራ ዎꬃዳሳ።
ISA 47:7 ኔኒ፥ ‘ታኒ መርናዉ ካዎ ግዳና’ ያጋዳሳ፤ ሽን ነ ኦꬅዳ ኦሱዋነ እያ ዉርሰꬃይ ዋናነኮ ቆፓባካ።
ISA 47:8 “ነኖ ዎፑ ጋዳ ኡትዳረነ ናገታዳ ደእዳረ ስአ። ነ ዎዛናን፥ ‘ታፐ አትሽን፥ ሀር ባዋ፤ ታኒ አምኦ ግድከ፤ ዎይኮ የላዳ ናእ ባይና አስ ግድከ’ ያጋዳሳ።
ISA 47:9 ሀ ናምኡባት ቆፖና እስ ጋላስ ነ ቦላ ያና። ነ ብታይ አይ ዳርኮካ፥ ነ ሙሩኖይ አይ ዎልቃምኮካ ኔኒ ነ ናይታፐ መላ አተይስነ አምኤተꬃይ አተና።
ISA 47:10 “ኔኒ ነ ኢታተꬃን አማነታዳ፥ ‘ኦንካ ታና በኤና’ ያጋዳሳ። ነ ኤራተꬃይነ ጭንጫተꬃይ ነና ባለꬅን፥ ኔኒ ነ ዎዛናን፥ ‘ታፐ አትሽን፥ ሀር ባዋ’ ያጋዳሳ።
ISA 47:11 ሽን ኔኒ ዋታዳ ነ ብታን ሃሳኔኮ ኤሮና ኢታይ ነ ቦላ ያና። ኔኒ ጋተ ቃንፃናዉ ዳንዳኦና ꬋዮይ ነ ቦላ ዎꬋና፤ ቃስ ኔኒ አይኮካ ቆፖና ጋዶይ ነ ቦላ ያና።
ISA 47:12 “አነ ኔኒ ነ ናአተꬃፈ ዶማዳ ኦꬃሸ ደእዳ ነ ብታነ ነ ሙሩኑዋ ሀእካ ኦꬃ። ኦን ኤር ነ ቆፕዳይሳ መላ ሀናኔኮ ዎይኮ ኔኒ እያራ ዳጋንꬃኔኮ።
ISA 47:13 ኔኒ ኤክዳ ዞረይ ኡባይ ዳቡርሳፈ አትሽን፥ ነና አይኮካ ማድቤና። ሳሎ ፆልንቶ ታይበይሳትነ እያ ፄልድ አጌናን አጌናን ሀናናባ ኦደይሳት አነ ነና አሾ።
ISA 47:14 ኤንቲ ቡረ መላ፤ ታም ኤንታ ማና። ኤንቲ ታማ ላጩዋፐ ባንታና አሻናዉ ዳንዳኦኮና። አስ ካያ ቦንቆይ ዎይኮ አስ እያ ስንꬃን ኡትድ ሆእያ ታማ ግደና።
ISA 47:15 ኔኒ ኤንታራ ዳቡርዳይሳት፥ ናአተꬃፈ ዶምድ ኔራ ዛልእዳይሳት ነዉ ሄሳ መላ። ኤንቲ እሶይ እሶይ ባ ባላን ባላን ኦይከታና፤ ነና አሽያ ኦንካ ባዋ።”
ISA 48:1 “ህንተኖ፥ ያይቆባ ሶ አሳዉ፥ እስራኤለ ሱንꬃን ፄገትዳይሳቶ፥ ይሁዳ ኮቻፈ ይዳይሳቶ፥ ሀይሳ ስእተ። ህንተ ጎዳ ሱንꬃን ጫቀታ፤ እስራኤለ ፆሳ ፄገታ፤ ሽን ቱማተꬃንነ ፅሎተꬃን ግደና።
ISA 48:2 ህንተ፥ ‘ኑኒ ጌሻ ካታማን ደኦስ፤ እስራኤለ ፆሳን ዘምፖስ፤ እያ ሱንꬃይ ኡባፈ ዎልቃማ ጎዳ’ ” ያግድ ጬቀተታ።
ISA 48:3 ታኒ ስንꬃፈ ሀናናባታ ዳሮ ዎደፐ ካሰ ኦዳስ። ታ ዶናፐ ኤንቲ ከይን፥ ኤንቲ ኤሶን ፖለታና መላ ኦꬃስ።
ISA 48:4 ኔኒ ኦድን ስኦናይሳ፥ ነ ሞርገይ ብራታ መላ ግደይሳ ነ ሶምኦይ ናሰ ብራታዳ ሌቃሞናይሳ ታኒ ኤራይስ።
ISA 48:5 ሄሳ ግሾ፥ ኔኒ፥ “ሀይሳ ታ ኤቃይ ኦꬅስ፤ ታ ማሰትዳ ምስለት፥ ታ ሼሻዳ ኦꬅዳ ምስለት ኦꬅዶሶና” ጎናዳ፥ ታኒ ሄሳ ነዉ በንፐ ዶማዳ ኦዳስ። ኤንቲ ሀናናፐ ስን ታኒ ኤንታ ነዉ ኤርሳስ።
ISA 48:6 “ታ ካሰ ኦድዳይሳ ነ ስአዳሳ፤ እ ፖለትዳይሳ በአዳሳ፥ ያትን እያ ቱማተꬃ ኤክኪ? ህዛፐ ነ ኤሮና ኦራꬃባታ ታ ነዉ ኦዳና።
ISA 48:7 ኤንቲ በን መትዳባ ግዶናሽን ሀእ መትዶሶና። ኔኒ፥ ‘ታኒ ኤንታ ኤራይስ’ ጎናዳ ሀይሳፈ ካሰ ኔኒ ኤንታባ ስአባካ።
ISA 48:8 ኔኒ ስአባካ፤ ኤራባካ፤ ነ ሀይꬃይ በንፐካ ዶየትቤና። ኔኒ አይ ጭምያ አሴኮ ታኒ ኤራይስ፤ ኔኒ የለቶሳፐ ጌላ ጌተታዳ ፄገተይሳ ኤራይስ።
ISA 48:9 ታ ሱንꬃ ግሾ፥ ታኒ ታ ሀንቁዋ ዛራና፤ ታ ቦንቹዋ ግሾ ነና ꬋይሶና መላ ታ ሀንቁዋ ተቃና።
ISA 48:10 ታኒ ነና ፓጫስ፤ ብራዳ ግዶናሽን ታኒ ነና መቶ ታማን ፓጫስ።
ISA 48:11 ታኒ ታ ግሾ፥ ሀይሳ ኦꬃና፤ ታ ሱንꬃይ ቶሸታና መላ ኮይከ፤ ታኒ ታ ቦንቹዋ ሀራስ እምከ።”
ISA 48:12 “ነኖ ያይቆባ፥ ታኒ ፄግዳ እስራኤለ፥ ታኒ ኦድያባ ስአ፤ ታኒ እያ፤ ኮይሮይካ ታና፤ ዉርሰꬃይካ ታና።
ISA 48:13 ታ ኩሸይ ቢታ ባሱዋ መꬍስ፤ ታ ኡሻቻ ኩሸይ ሳሎታ ምጭስ። ታኒ ኤንታ ፄግያ ዎደ ኤንቲ እስፈ ኤቆሶና።
ISA 48:14 “ህንተ ኡባይ እስፈ ሺቅድ ስእተ፤ ኤቃታፐ ሀይስ ሀናናይሳ ስንꬃትድ ኦድዳይ ኦኔ? ጎዳይ ዶርዳይስ እያ ቆፋ ባብሎነ ቦላ ፖላና፤ እያ ቀሰይካ ባብሎነ ቢታ ቦላ ግዳና።
ISA 48:15 ታኒ፥ ታ ሁጰን እያዉ ኦዳስ፤ እያ ፄጋስ፤ ታ እያ ኤሀና፤ እ ኦꬅያባ ኡባይ እያዉ ፖለታና።
ISA 48:16 “ታኮ ሃ ሺቅድ ሀይሳ ስእተ፤ “ታኒ ኮይሮፐ ዶማዳ ጌማን ኦዳብከ፤ ሄስ ሀንዳ ዎደፐ ዶማዳ ታኒ ያን ደአይስ” ያጌስ። ሀእካ ኡባ ሃርያ ጎዳይነ እያ አያናይ ታና ኪትዶሶና።
ISA 48:17 ነና ዎዝያ ጎዳይ፥ እስራኤለ ጌሻይ ሀይሳዳ ያጌስ፦ “ነና ማድያባ ታማርሰይ ነ ባናዉ በሲያ ኦግያ ነ ካለይ፥ ታና ነ ጎዳ፥ ነ ፆሳ።
ISA 48:18 ኔኒ ታ ኪታ ስእዳባ ግድያኮ፥ ነ ሳሮተꬃይ ሻፋ ሃꬃዳ ጎጋናሽን፤ ነ ፅሎተꬃይ አባ ቤታዳ ሀናናሽን።
ISA 48:19 ነ ኮቻይ አባ ሻፈዳ፥ ነ ናይት ታይበቶና ባና መላ ዳራናሽን፤ ኤንታ ሱንꬃይ ታ ስንꬃፈ ꬋየና፤ ክቸናሽን” ያጌስ።
ISA 48:20 ባብሎነ ቢታፈ ከይተ፤ ባብሎነፐ ባቃትተ! ቃላ ꬎቁ ኦꬅድ፥ ኡፋይሳን ሀይሳዳ ያግድ ዋስተ። ሳኣ ጋፃፐ ጋፃ ጋካናዉ ሀይሳ ኪትተ፤ “ጎዳይ ባ አይልያ ያይቆባ ዎዝስ” ያግድ ኦድተ።
ISA 48:21 እ ኤንታ መላ ቢታራ ካለꬅዳ ዎደ ሳሞትቦኮና። ዛላፈ ሃꬅ ኤንታዉ ፑልትስ፤ እ ዛላ ጳልቅን ሃꬅ ꬉቅስ።
ISA 48:22 “ኢታታስ ሳሮይ ባዋ” ያጌስ ጎዳይ።
ISA 49:1 ህንተኖ፥ ዩሾይ አባን ተቀትዳ ቢታቶ፥ ታኒ ኦደይሳ ስእተ። ህንተኖ፥ ሃሆሶን ደእያ ካዎተꬃቶ አኬክተ፤ ታኒ የለታናፐ ካሰ ጎዳይ ታና ፄግስ፤ ታ አየ ኡሎን ደእሽን፥ ታ ሱንꬃ ሱንꬅስ።
ISA 49:2 ታ እንፃርሳ ቃራ ማሽ ኦꬅስ፤ ባ ኩሽያ ኩያን ታና ገንꬅስ። እ ታና ፖሸትዳ ዶንገ ዪሽ ኦꬅድ ባ ሾሁዋን ታና ቆትስ።
ISA 49:3 እ ታኮ፥ “እስራኤለ፥ ኔኒ ታ አይለ፤ ታኒ ታ ቦንቹዋ ነናን ቆንጭሳና” ያግስ።
ISA 49:4 ሽን ታኒ፥ “ታኒ ጮ ዳቡራስ፤ ታ ዎልቃ ጎእ ባይናባንነ ሀዳባን ዉርሳስ። ግዶሽን፥ ታ ፕርዳይ ጎዳ ማታና፤ ታ ጋተይ ታ ፆሳ ማታና” ያጋስ።
ISA 49:5 ታኒ ጎዳ አይፈ ስንꬃን ቦንቸትዳ ግሾ፥ ታ ፆሳይ ታዉ ዎልቃ ግድዳ ግሾ፥ ያይቆባ እያኮ ዛራናዉ እስራኤለ እያኮ ሺሻናዉ፥ ታኒ እያ አይለ ግዳና መላ ታና ታ አየ ኡሎን ዶርዳ
ISA 49:6 ጎዳይ ታኮ ሀይሳዳ ያጌስ፤ ኔኒ ያይቆባ ኮቻ ደንꬃናዉ እስራኤለፐ አትዳ ጉꬃታ ዛራዳ ኤሀናዉ ኔኒ ታዉ አይለ ግደይስ ዳሮ ጉꬃባ። ሄሳፈ አꬃዳ፥ ታ አቶተꬃይ ቢታ ጋፃ ጋካና መላ ታኒ ነና ካዎተꬃታስ ፖኦ ኦꬃና።
ISA 49:7 ካትዳይሳስነ እፀትዳይሳስ ቃስ ካዎተꬃታ ሃርያ አይልያስ፥ እስራኤለ ዎዝያ ጎዳይ፥ እስራኤለ ጌሻይ ሀይሳዳ ያጌስ፤ አማንꬅያ ጎዳ ግሾ፥ ነና ዶርዳ እስራኤለ ጌሻ ግሾ ካዎት በእድ ደንድ ኤቃና፤ ደርያ ሃረይሳት በእድ ጎይናና።
ISA 49:8 ጎዳይ ያጌስ፤ “ታኒ ዶርዳ ዎደን ነ ኦይሻ ዛራና፤ አቶተꬃ ጋላስ ታኒ ነና ማዳና። ታኒ ነና ናጋና፤ ኔኒ ቢታ ዛራዳ ኤሳና መላ፤ አስ ዶና ቢታ ኔኒ ላትሳና መላ ታኒ ነና አሳስ ጫቆ ኦꬃዳ እማስ።
ISA 49:9 ድኤትዳይሳታ፥ ‘ከይተ!’ ꬉማ ቃሾን ደኤይሳታ፥ ‘ብርሸትተ!’ ጋና መላ ታኒ ነና ኦꬃና። ኤንቲ ኦገ ማታን ሄመታና፤ መላ ደረ ቦላ ሄመትያ በሲ ደማና።
ISA 49:10 ኤንቲ ኮሻቶኮና ዎይኮ ሳሞቶኮና፤ ኤንታ መላ ቢታ ምሻይ ፁገና፤ አዋይ ኤንታ ሜና። ኤንታዉ ቃተይስ ኤንታ ካለꬃና፤ ፑልቶ ሃꬃኮ ኤንታ ላጋና።
ISA 49:11 ታኒ ታ ደረታ ኡባ ኦገ ከሳና፤ ታ ዎጋ ኦገታ ꬎቁ ኦꬃና።
ISA 49:12 ሄኮ፥ ታ አሳይ ሃሆሶፐ ያና፦ ፑደሀ ባጋፈነ ዉሎሀ ባጋፈ፥ ቃስ አስዋና ቢታፈ ያና” ያጌስ።
ISA 49:13 ህንተኖ ሳሎቶ፥ ኡፋይሳን የፅተ፤ ነኖ ቢታዉ ኡፋይታ። ህንተኖ ደረቶ፥ እልልተ! ጎዳይ ባ አሳ ምንꬅስ፤ ባ መቶተትዳ ባ አሳስ ቃትስ።
ISA 49:14 ሽን ፅዮነይ፥ “ጎዳይ ታና አግስ፤ ፆሳይ ታና ዶግስ” ያጋሱ።
ISA 49:15 አይያ ባ ꬋንꬅያ ናኣ ዶጋናዉ ዳንዳአይ? ባ ኡሎፐ ከይዳ ናአስ ቃተኬ? እያ ዶግኮካ፥ ታኒ ነና ዶግከ!
ISA 49:16 ሄኮ፥ ታኒ ነና ታ ኩሸ ቃቃን ፃፋ ዎꬃስ፤ ነ ድርሳ ግምበት ኡባ ዎደ ታ ስንꬃን ደኦሶና።
ISA 49:17 ነና ዛሪድ ኬፀይሳት ኤለስድ ያና፤ ነና ላልዳይሳት ኔፐ ሃካና።
ISA 49:18 አነ ꬎቁ ጋዳ ነ ዩሹዋ ፄላ፤ ነ ናይት ኡባይ እስፈ ሺቅድ ኔኮ ያና። ታኒ ጎዳይ፥ ታናን ጫቃስ፦ ኔኒ ኤንታ ኡባ አሌቆዳ ማአና፤ ገላናዉ ሀንያ ማጫስ አሌቀተይሳዳ ኔኒ ኤንታን አሌቀታና።
ISA 49:19 ኔኒ ላለታዳ ባይሳ ግድኮካ፥ ነ ቢታይ ꬋይኮካ፥ ሀእ ነናን ደእያ አሳስ ዳሮ ፁማና፤ ነና ላልዳይሳት ኔፐ ሃካና።
ISA 49:20 ኔኒ ካዮትያ ላይꬃን ነዉ የለትዳ ናይት ነ ሀይꬃን፥ “ሀይስ በሳይ ኑስ ዳሮ ፁንꬁ ግድያ ግሾ፥ ኑ ዳና ዳልጋ በሲ እማ” ያጋና።
ISA 49:21 ኔኒ ነ ዎዛናን፥ “ሀ ናይታ ኡባ ታዉ ኦነ የልዳይ? ታኒ የላዳ ꬎንꬁ ግዳስ፤ ታኒ ድኤታስ፥ እፀታስ። ያትን፥ ሀይሳታ ኦነ ድችዳይ? ታኒ ታርካ አታስ፤ ያትን ሀ ናይት ኡባይ አዉፐ ይዶና? ያጋና።”
ISA 49:22 ኡባ ሃርያ ጎዳይ ሀይሳዳ ያጌስ፦ “ሄኮ፥ ታኒ ካዎተꬃታ ማላታ በሳና፤ አሳስ ታ ባንድራ ኤሳና። ኤንቲ ነ አደ ናይታ እድምድ፥ ነ ማጫ ናይታ ባንታ ሀሽያን ቶክድ ኤሀና።
ISA 49:23 ካዎት ነና ድችያ አዋታ ግዳና፤ ኤንታ ማጫ ካዎት ነና ꬋንꬅያ አዮ ግዳና። ኤንቲ ጉፋንድ ነዉ ጎይናና፤ ነ ቶሆ ባና ላጫና። ታኒ ጎዳ ግደይሳ ኔኒ ሄሳን ኤራና፤ ታናን አማነትድ ናገይሳት ዬላቶኮና” ያጌስ።
ISA 49:24 ኦላንቹዋፈ ድኦ የግሳናዉ፥ ዎዛን ኢታ አሳ ኩሸፐ ድኤትዳ አስ ከስ ኤካናዉ ዳንዳኤትዬ?
ISA 49:25 ሽን ጎዳይ ያጌስ፦ ኦላንቾ ኩሸፐ ድኤትዳ አስ ከስ ኤካናዉ፥ ዎዛና ምኖ አሳፐ ድኦ የግሳናዉ ዳንዳኤቴስ። ኔራ ኦለተይሳታራ ታኒ ኦለታና፤ ነ ናይታካ አሻና።
ISA 49:26 ነና ኡንኤይሳት ባንታ አሹዋ ማና መላ ኦꬃና፤ ዎይነ ኡይድ ማꬆተይሳዳ ኤንቲ ባንታ ሱꬃ ኡይድ ማꬆታና። ሄ ዎደ አሳ ኡባይ ታኒ ጎዳ፥ ነና አሽያ፥ ዎዝያነ ያይቆባ ዎልቃማ ግደይሳ ኤራና።
ISA 50:1 ጎዳይ ያጌስ፤ “ታኒ ህንተ አይዉ የድዳ ፕርማ ዎርቃተይ አዉን ደኢ? ታኒ ኦደስ ህንተና ባይዛድና? ሄኮ፥ ህንተ ናጋራ ግሾ ህንተ ባይዘትደታ፤ ህንተ ናቁዋ ግሾ ህንተ አይያ የደታሱ።
ISA 50:2 ታኒ ይዳ ዎደ፥ ሀይሳን አስ አይስ ꬋይዴ? ታኒ ፄግዳ ዎደ፥ ‘ዬ!’ ጋናዉ አይስ አስ ꬋይዴ? ታኒ ህንተና ዎዛናዉ ታ ኩሸይ ቃንዬ? ህንተና አሻናዉ ታዉ ዎልቅ ባወዬ? ታኒ አባ ሴራዳ መልሳይስ፤ ሻፋታ መላ ቢታ ኦꬃይስ። ሃꬅ ꬋይን ኤንታን ደእያ ሞሎት ዎቆሶና፤ ሳሞይ ዎꬍን ሀይቆሶና።
ISA 50:3 ታኒ ሳሎታ ꬉማ ማይዛይስ፤ ኤንታ ካማይ ካዮ ማኦ ዳኔስ” ያግስ።
ISA 50:4 ዳቡርዳይሳ ታኒ ቃላን ምንꬆ ኤራና መላ፥ ኡባ ሃርያ ጎዳይ ታዉ ታማርዳ እንፃርስ እሚስ። እ ታና ዎንታ ዎንታ ባርክስድ፥ ታኒ ታማረዳ ስአናዳ ታ ሀይꬃ ዶዬስ።
ISA 50:5 ኡባ ሃርያ ጎዳይ ታ ሀይꬃ ዶይስ፤ ታኒ ጌላ ግዳብከ፤ ጉየ ስማብከ።
ISA 50:6 ታኒ ታ ዞኩዋ ሾጨይሳታስ፥ ታ ቡቻ ሾደይሳታስ ታ ጋጩዋ አꬃዳ እማስ። ታ ቦላ ጩተይሳታፐነ ታና ካዉሸይሳታፐ ታ ሶምኡዋ ገንꬃብከ።
ISA 50:7 ኡባ ሃርያ ጎዳይ ታና ማድያ ግሾ፥ ታኒ ዬላትከ። ታኒ ታ ሶምኡዋ ሳሎ ሹቹ ኦꬃስ፤ ታኒ ዬላቶናይሳ ኤራይስ።
ISA 50:8 ታዉ ፕርደይስ ማታን ደኤስ፤ ያትን፥ ታና ሞተይ ኦኔ? አነ ታራ ሞተታናዉ ኤቆ!
ISA 50:9 ኡባ ሃርያ ጎዳይ ታና ማዴስ፤ ያትን፥ ታ ቦላ ፕርደይ ኦኔ? ኤንቲ ኡባይ ማኦዳ ጭማና፤ ኤንታ ብል ማና።
ISA 50:10 ህንተ ግዶፈ ጎዳ ያየይ፥ እያ አይልያ ቃላስ ኪተተይ ኦኔ? ꬉማን ሄመተይነ ፖኦይ ባይናይ እ ኦኔ? ሄ ኡራይ ጎዳ ሱንꬃን አማነቶ፤ ባ ፆሳን ዘምፖ።
ISA 50:11 ህንተኖ ታማ ኤꬅያ ኡባቶ፥ ላጮ ፆምፐ ህንተዉ ሺሸይሳቶ፥ ህንተ ኤꬅዳ ታማ ፖኡዋን ሄመትተ። ላጮ ፆምፕያን ስመረትተ፤ ህንተ ታ ኩሸፐ ኤካናዉ ደኤይ ሀይሳ፤ ህንተ ዎልቃማ መቶ ሴላን ዝንአና።
ISA 51:1 ህንተኖ ፅሎተꬅ ካለይሳቶ፥ ህንተኖ ጎዳ ኮየይሳቶ ስእተ። ህንተ ጳልቀትድ ኤከትዳ ሹቻ ህንተ ቦከትድ ከይዳ ኦላ ፄልተ።
ISA 51:2 ህንተ አዋ አብራሃመነ ህንተና የልዳ ሳሮ ፄልተ። እ ባርካ ደእሽን፥ ታኒ እያ ፄጋዳ አንጃስነ ታይቦን ዳርሳስ።
ISA 51:3 “ጎዳይ ፅዮነነ ላለትዳ በሳን ደእያ አሳ ኡባ ምንꬃና። እ መላ ቢታ ኤደነ፥ ካሎትዳ ቢታ ጎዳ አታክልተ ጋደዳ ኦꬃና። ያን ኡፋይስነ ሀሹ ጉስ ዳና፤ ጋላትነ ማዝሙረይ ስኤታና።
ISA 51:4 “ታ አሳዉ፤ ታ ኦድያባ ስእተ፤ ታ ደርያዉ፥ ህንተ ሀይꬃ ታኮ ዛርተ። ህገይ ታፐ ከዬስ፤ ታ ሱረ ፕርዳይ ካዎተꬃታስ ፖኦ ግዳና።
ISA 51:5 ታ ፅሎተꬃይ ኤለስድ ሺቃና፤ ታ አቶተꬃይ ማትስ፤ ታ ቀሰይ ካዎተꬃታስ ሱረ ፕርዳ ኤሀና። ዩሾይ አባን ተቀትዳ ቢታት ኡባይ ታናን አማነትድ ናጋና፤ ታኒ ኤንታ ታ ዎልቃን አሻናይሳ ኡፋይሳን ናጋና።
ISA 51:6 ፑደ ꬎቁ ግድ ሳሎታ ፄልተ፤ ዱገ ሳኣካ ፄልተ። ሳሎት ጩያዳ ላለትድ ꬋያና፤ ሳእ አፍላዳ ዉራና፤ እያን ደእያ አሳ ኡባይ ኡዱንፀዳ ሀይቃና። ሽን ታ አቶተꬃይ መርናዉ ዳና፤ ታ ፅሎተꬃይ ዉረና።
ISA 51:7 “ህንተኖ ፅሎተꬃ ኤረይሳቶ፥ ታ ህገይ ህንተ ዎዛናን ደኤይሳቶ፥ ስእተ። አሳ ቦረ ያዮፍተ፤ ኤንታ ጫሻስ ዳጋሞፕተ።
ISA 51:8 ብል ማኦ፥ ዶርሳ እክሰ ጉፁነይ መይሳዳ፥ ኤንቲ ሜተታና። ሽን ታ ፅሎተꬃይ መርናዉ ዳና፤ ታ አቶተꬃይ የለተꬃ ኡባስ ግዳና” ያጌስ።
ISA 51:9 አቤት ጎዳዉ፥ ደንዳ! ደንዳ! ጎዳ ቀስያዉ፥ ዎልቃ ማአ። በን ዎደታንነ የለተꬃን ሀንዳይሳዳ ደንዳ፤ ራኣባ ጌተትያ ዳውያ ቃንፀረꬅዳይነ ጫድዳይ ነና ግድክዬ?
ISA 51:10 አባነ ግታ ጪሞ ሃꬃ መልስዳይ ነና ግድክዬ? ነ ዎዝዳይሳት ፕናና መላ ጪሞ አባ ኦገ ኦꬅዳይ ነና ግድክዬ?
ISA 51:11 ጎዳይ ዎዝዳይሳት የፅሸ ስሚድ ፅዮነ ያና፤ መርና ኡፋይሳይ ካላቻ መላ ኤንታ ቦላ ኡታና። ኤንቲ ኡፋይስነ ሀሹ ግያባ ደማና፤ አዛኖይነ ዬሆይ ኤንታፈ ሃካና።
ISA 51:12 ጎዳይ፥ “ታኒ፥ ህንተና ምንይ ታና፤ ያትን፥ ሀይቅያ አሰነ ማታዳ ሹልያ አሳ ናአ ያያናዉ ህንተ ኦኔ?
ISA 51:13 ሳሎታ ምጭዳነ ሳአ ባሱዋ ኤስዳ ጎዳ፥ ህንተና መꬍዳ ፆሳ ዶግደታ። ኤንቲ ህንተና ꬋይሳናዉ ኡንኤꬅያ አሳ ሀንቁዋ ጋሶን ኡባ ጋላስ ያሻን ደኤታ። ሽን ህንተና ኡንኤይሳታ ሀንቆይ አዉን ደኢ?
ISA 51:14 ድኤትዳይሳት ኤሶን ብርሸታና፤ ቃሸትዳ ኦላን ሀይቆኮና፤ ኮሻቶኮና።”
ISA 51:15 “ታኒ ጎዳ፥ ነ ፆሳ፤ ጉማና መላ አባ ቃይ ታና፤ ታ ሱንꬃይ ኡባፈ ዎልቃማ ጎዳ።
ISA 51:16 ታ ቃላ ነ ዶናን ዎꬅዳይ፥ ታ ኩሸ ኩያን ነና ገንꬅዳይ፥ ሳሎታ ምጭዳይ፥ ሳኣ ባሱዋ ኤስዳይ፥ ፅዮነኮ፥ ‘ኔኒ ታ አሰ’ ” ያግዳይ ታና።
ISA 51:17 ነኖ፥ ጎዳ ኩሸፐ ጋንድጋርስያ ሀንቆ ፁኣ አሾና ኡይዳ የሩሳላመ፥ ባርካ! ደንዳ! ደንዳ።
ISA 51:18 እያ የልዳ ናይታፐ እዮ ካለꬅያ እሶይካ ባዋ፤ እያ ድችዳ ናይታፐ እ ኩሽያ ኦይክድ ኤፍዳ እሶይካ ባዋ።
ISA 51:19 ሀ ናምኡባት ነ ቃዳ ግድዶሶና፤ ሄሳት ላለተꬅነ ꬋዮ፤ ኮሽነ ማሽ ነ ቦላ ያና፤ ያትን፥ ነና ኦን ምንꬃኔ?
ISA 51:20 ነ ናይት ግተን ገልዳ ገንኤዳ ኦገ ጋፃን ኩንድድ ላባንዶሶና። ኤንቲ ጎዳ ሀንቁዋንነ ነ ፆሳ ሴራን ኩምዶሶና።
ISA 51:21 ሄሳ ግሾ፥ ዎይነ ኡሻን ግዶናሽን መቶን ማꬆትዳይሳቶ፥ ህንተ ሀይሳ ስእተ።
ISA 51:22 “ባ አሳስ ሞተትያ ነ ጎዳይ፥ ነ ፆሳይ ያጌስ፤ ሄኮ፥ ነና ጋንድጋርስያ፥ ታ ሀንቆ ፁኣ ታኒ ነ ኩሸፐ ኤካስ፤ ኔኒ ዛራዳ ሄ ማꬆይያ ኡሻ ኡያካ።
ISA 51:23 ታኒ ሄሳ ነና ኡንኤꬅያ አሳ ኩሸን ዎꬃና፤ ኤንቲ ኔኮ፥ ‘ኑኒ ነ ቦላራ ሄመትድ አꬋና መላ ዛቁላ’ ” ያግዶሶና። ኔኒ ኤንቲ አꬋና ጋካናዉ ነ ዞኩዋ ኤንታዉ ቢታዳነ ኦገዳ ኦꬃዳሳ።
ISA 52:1 ነኖ ፅዮነ፥ ባርካ፤ ባርካ፥ ምኖተꬅ አፍላዳ ማአ። ነኖ ጌሻ ካታመ፥ የሩሳላመ፥ ነ ቦንቾ ማኡዋ ማአ። ህዛፐ ጉየ ቃፃረቶናይነ ቱን ነ ግዶ ገለና።
ISA 52:2 ነኖ፥ ድኤትዳ የሩሳላመ፥ ነ ባና ቆቆፋ፤ ደንዳዳ ነ አራታ ቦላ ኡታ። ነኖ ፅዮነ አሳዉ፥ ነ ቆን ቃሸትዳ ሳንꬃላታ ብርሻ።
ISA 52:3 ኡባ ሃርያ ጎዳይ ሀይሳዳ ያጌስ፦ “ህንተ ካሰ ጋተይ ባይና ባይዘትደታ፤ ሀእ ቃስ ሚሸ እሞና ጮ ዎዘታና።
ISA 52:4 ጎዳይ ሀይሳዳ ያጌስ፦ ታ አሳይ ኮይሮ በተ አስ ግድድ ግብፀ ብስ፤ ጉየፐ አሶረት ታ አሳ ጮ ኡንኤꬅዶሶና።
ISA 52:5 ፆሳይ ሀይሳዳ ያግድ ኦዴስ፦ ታ አሳይ ጋተይ ባይና ጮ ድኤትድ ብን፥ ታዉ ሀይሳን አይበ ደኤይ? ኤንታ ሃረይሳት ቶቾሶና፤ ታ ሱንꬃይ ኡባ ዎደ ጫየቴስ።
ISA 52:6 ሄሳ ግሾ፥ ታ አሳይ ታ ሱንꬃ ኤራና፤ ሄ ጋላስ ሀይሳ ኦደይ ታና ግደይሳ ኤንቲ ኤራና፤ ኤ፥ እ ታና” ያጌስ ኡባ ሃርያ ጎዳይ።
ISA 52:7 ሎኦ ምሽራቾ ኤህያ፥ ሳሮተꬃ አዋጅያ፥ አቶተꬅ ኦድያ፥ ፅዮነኮ፥ “ነ ፆሳይ ካዎትስ” ያግሸ ደርያ ቦላራ ያ ቶሆት ዋን ሎኦና።
ISA 52:8 ነ ካታማ ናገይሳት ባንታ ቃላ ꬎቁ ኦꬅድ፥ ኡፋይሳን እስፈ የፆሶና። ጎዳይ ፅዮነ ስምያ ዎደ ኤንቲ ባንታ አይፈን በአና።
ISA 52:9 ህንተኖ የሩሳላመን ላለትዳ በሳቶ፥ እስፈ ኡፋይሳን የፅተ፤ ጎዳይ ባ አሳ ምንꬅስ፤ የሩሳላመ ዎዝስ።
ISA 52:10 ጎዳይ ባ ጌሻ ቀስያ ካዎተꬃታ ኡባ ስንꬃን ቆንጭስስ። ቢታ ጋፃ ጋካናዉ ደእያ አሳ ኡባይ ኑ ፆሳ አቶተꬃ በአና።
ISA 52:11 ህንተኖ ጎዳ ሚሽያ ቶከይሳቶ፥ ሻከትተ፥ ሻከትተ፥ ያፐ ከይተ። ቱናባ ቦቾፍተ፤ እያ ግዶፈ ከይተ፤ ህንተና ጌሽተ።
ISA 52:12 ሽን ህንተ ከይሸ ኤሶን ከየከታ፤ ዎይኮ ጎደትድ ቤከታ። ጎዳይ ህንተፈ ስን አꬍድ ካለꬃና፤ እስራኤለ ፆሳይ ጉየራ ግድድ ህንተና ናጋና።
ISA 52:13 “ሄኮ፥ ታ አይለይ አኬካን ኦꬃና፤ እ ቦንቸትድ፥ ꬎቁ ꬎቁ ጋና፤ ዳሮ ግታታና።
ISA 52:14 እያ ሶምኦይ አሳ ኡባፈ፥ እያ መꬎይ አሳ ናይታፐ አꬍድ ቆሄትስ፤ እያ በእድ ዳሮ አሳይ ዳጋምዶሶና።
ISA 52:15 ሽን ሀእ ዳሮ ካዎተꬃት ኡባይ እያባን ማላለታና፤ እያ ጋሶን፥ ዳሮ ካዎት ባንታ ዶና ኦይካና። ኤንቲ ባንታዉ ኦደትቦናባ በአና፤ ስእቦናባ አኬካና” ያጌስ።
ISA 53:1 ኑኒ ኦድዳባ ኦን አማንዴ? ጎዳ ቀሰይ ኦደስ ቆንጭዴ?
ISA 53:2 እ እያ ስንꬃን መላ ቢታን አጭዳ ዱሩማ መላ፤ ፃጶ የድዳ ዶላ መላ ድጭስ። ኑኒ እያ ሎይꬅ ፄሎና መላ ማል ዎይኮ ቴም ባዋ። ኑኒ እያኮ ሺቆና መላ ጩቹ ማልኦ ግደና።
ISA 53:3 እ አሳን ካትስ፥ እፀትስ፤ እ መቶፐነ አዛኖፐ ሻከት ኤሮና አስ ግድስ። አስ እያ በአናፐ ግድ ባ ሶምኡዋ ዎራ ዛርያ አሳዳ ካትስ፤ ኑኒ እያ ቦንችቦኮ።
ISA 53:4 እ ቱማ ኑ ዋይያ ባዉ ኤክስ፤ ቃስ ኑ ዳቡራ ቶክስ። ሽን ኑኒ፥ እ ፆሳን ደሸትድ ኩንድዳዳነ ማዱንፅዳዳ ቆፕዳ።
ISA 53:5 ሽን እ ኑ ናጋራ ግሾ፥ ጫደትድ ማዱንፅስ፤ ኑ ቆሁዋ ግሾ ሾጨትድ ሊቅስ። እያ ሴራን ኑኒ ሳሮ ደምዳ፤ እያ ማዱንꬃን ኑኒ ፓፅዳ።
ISA 53:6 ኑኒ ኡባይ ኦገ ባልዳ ዶርሳዳ ዎራ ብዳ፤ ኑ ኡባይ ኑ ኦግያ ኦግያ ብዳ። ሽን ጎዳይ ኑ ኡባ ናቁዋ እያ ቦላ ዎꬅስ።
ISA 53:7 እ ኡንኤትስ፤ ቆሄትስ፤ ሽን ባ ዶና ዶይቤና። ሹካናዉ ኤፍያ ኡርገ ዶርሳዳ ላገትስ፤ ባ እክስያ ሜድያ ኡራ ስንꬃን ስእ ግያ ዶርሳ መላ አይኮካ ፖግቤና።
ISA 53:8 ኤንቲ እያ ኡንኤꬆንነ ጌላ ፕርዳን ኤፍዶሶና፤ እ ታ አሳ ናጋራ ግሾ ሾጨትድ፥ ደኦን ደኤይሳታ ቢታፈ ክችዳይሳ እያ ኮቻፈ ኦን አኬክዴ?
ISA 53:9 እያ ዶናን ባል ባይና፥ እ፥ ኢታባ ኦꬆና፥ ባ ሀይቁዋን ኢታ አሳታራ ታይበትስ፤ እያ ዱፎይ ዱረ አሳታራ ግድስ።
ISA 53:10 ሽን እያ ቆሄተꬃይነ እያ ኡንኤተꬃይ ጎዳ ሸነ ግድስ። እ ባና ናጋራ ያርሾ ኦꬅያ ዎደ ባ ኮቻ በአና። እያ ላይꬃይ አዱቃና፤ ጎዳ ሸነይ እያ ኩሸን ፖለታና።
ISA 53:11 ባ ሸምፑዋ ዋያፐ ጉየ፥ እ ደኦ ፖኦ በአና፤ ኡፋይታና። ታ ፅሎ አይለይ ባ ኤራተꬃን ዳሮታ ፅልሳና፤ ኤንታ ቆሁዋካ ቶካና።
ISA 53:12 ሄሳ ግሾ፥ ታኒ እያ ግሹዋ ግታ አሳታ ግዶን እማና፤ ምኖታራ እ ድኡዋ ሻከታና። እ ባ ሸምፑዋ ሀይቆስ አꬅድ እምድ፥ ኢታታራ ፓይደትስ። እ ዳሮ አሳ ናጋራ ቶክስ፤ ጌላታስ ጋናትስ።
ISA 54:1 ናተ፥ የሎና ማይን፥ የፃ! ናተ፥ እቀታ ኤሮናረ፥ ኡፋይሳን እልላ! አዝናራ ደእያ ማጫሰ ናይታፐ ባርካ ደእያ ማጫሰ ናይት ዳራና።
ISA 54:2 ነ ዱንካንያ በሳ ዳልግሳ፤ ዱንካንያ ገሸታ ፕድ ኦꬃዳ ምጫ፤ ፁምሶፓ፤ ዎዶሩዋ አዱሳ፤ ꬍሽያ ምንꬃ።
ISA 54:3 ኔኒ ኡሻችነ ሀድርስ ዳልጋና፤ ነ ኮቻት ካዎተꬃታ ላታና፤ ባይሳትዳ ኤንታ ካታማታን ኬፅድ ዳና።
ISA 54:4 “ያዮፋ፤ ኔኒ ዬላታካ፤ ዳጋሞፋ፤ ኔኒ ካዉያካ። ነ ያላጋተꬃ ዬላ ኔኒ ዶጋና፤ ነ አምኤተꬃ ቦርያ ህዛፐ ጉየ ሀሳያካ።
ISA 54:5 ነ አዝናይ ነና መꬍዳይሳ፤ እያ ሱንꬃይ ኡባፈ ዎልቃማ ጎዳ። እስራኤለ ጌሻይ ነና ዎዝዳይሳ፤ እ ቢታ ኡባ ፆሳ ጌተታና።
ISA 54:6 አዝን አግን፥ ዶገታዳ አዛንያ ማጫሳዳ፥ ያላጋተꬃን አዝና ሶፐ ከይዳ፥ ማጫሳዳ ኔኒ ሀናዳ ደእሽን፥ ታኒ ጎዳይ ነና ዛራዳ ፄጋስ።
ISA 54:7 “ጉꬃ ዎደ ታኒ ነና አጋስ፥ ሽን ግታ ቃን ታኒ ነና ዛራዳ ኤሀና።
ISA 54:8 ሱልያ ሀንቆን ታኒ ታ ሶምኡዋ ኔፐ ጉꬃ ዎደስ ገንꬃስ። ሽን መርና ማሮተꬃን ታኒ ነዉ ቃታና” ያጌስ ነና ዎዝያ ጎዳይ።
ISA 54:9 “ሀይስ ታዉ ኖሄ ዎድያ መላ፤ ሄ ዎደ ታኒ ꬋዮ ሃꬃን ዛራዳ ሳኣ ꬋይስከ ጋዳ ጫቅዳይሳዳ፥ ዛራዳ ነ ቦላ ሀንቀቶና መላነ ሴሮና መላ ታኒ ጫቃስ።
ISA 54:10 ደረት ቃፃናዉ፥ ዙማት ባንታ በሳፈ ክቻናዉ ዳንዳኦሶና፤ ሽን ታ መርና ሲቆይ ኔፐ ሻከተና፤ ታ ሳሮተꬃ ጫቆይ ኔፐ ክቸና” ያጌስ ነዉ ቃትያ ጎዳይ።
ISA 54:11 “ነኖ፥ መቶትዳ ካታመ፥ ጎተይ ያነ ሃነ ሾጭዳረ፥ ምንꬅያባይ ꬋይዳረ፥ ሄኮ፥ ታኒ ነና ቦንቾ ሹቻን አሌቅሳዳ ኬፃና፤ ነ ባሱዋ ሳንፓረ ሹቻን ሂፃና።
ISA 54:12 ነ ሹቻ ግምብያ ቁስትያ ዞኦ እንቆ ሹቻን፥ ነ ፐንግያ ጶልያ አልኦ ሹቻን፥ ነ ድርሳ ቦንቾ ሹቻን ግምባና።
ISA 54:13 ነ ናይት ኡባይ ጎዳፐ ታማራና፤ ነ ናይታ ሳሮተꬃይ ዳራና።
ISA 54:14 ኔኒ ፅሎተꬃን ምናዳ ኤቃና፤ ገነይነ ኡንኤꬆይ ኔፐ ሃካና። ነና ያሽስያባ ዴና፤ ዳጋም ኔኮ ሺቀና።
ISA 54:15 ነና ኦላናዉ ደንደይ ደእኮ፥ ሄስ ታፐ ግደና፤ ነና ቆሀናዉ ኮየይ ደእኮ፥ እ ኩንዳና።
ISA 54:16 “ሄኮ፥ ሁበን ታማ ሁብድ፥ ባ ቆፕዳ ኦላ ሚሽያ ቆፅያ ኡራ ታኒ መꬋስ፤ ꬋይሳና መላ ꬋይሰይሳ መꬍዳይ ታና።
ISA 54:17 ነና ቆሀናዉ ኦሰትዳ አይ ሚሸይካ ነ ቦላ ኦና፤ ነና ሞትያ እንፃርሳ ኡባስ ነ ዛሮ እማና። ጎዳ አይለታ ላታይ ሀይሳ፤ ታፐ ኤንቲ ኤክያ ፅሎ ሀይሳ” ያጌስ ጎዳይ።
ISA 55:1 ህንተኖ፥ ሳሞትዳይሳቶ፥ ኡባይ ታኮ ሃ ዪተ፤ ሚሸይ ባይናይሳቶ፥ ሃ ዪተ። ሻምድ ሚተ፤ ሃ ይድ፥ ሚሸ ቃንፆና ጮ ዎይነ ኡሽነ ማꬅ ሻምተ።
ISA 55:2 ካꬅ ግዶናባስ ህንተ ሚሽያ አይስ ከሴቲ? ካልሶናባን ህንተ ዎልቃ አይስ ዉርሴቲ? አነ ታና ስእተ፥ ታኒ ኦደይሳ ሀይዝተ፤ ሎኦ ካꬃ ሚተ፤ ሎኦ ካꬃን ህንተ አሳተꬃ ኡፋይስተ።
ISA 55:3 “ህንተ ሀይꬃ ታኮ ዛሪድ ታና ስእተ፤ ደኦን ዳናዉ ታ ኦደይሳ ስእተ፤ ታኒ ዳዊታስ ገልዳ ኡፋይሳ ቃላን ህንተና አንጃና።
ISA 55:4 ሄኮ፥ ታኒ እያ ካዎተꬃታስ ማርካ፥ ካለይሳነ ሀላቃ ኦꬃስ።
ISA 55:5 ጎዳይ፥ ነ ፆሳይ፥ እስራኤለ ጌሻይ ነና ቦንችዳ ግሾ፥ ኔኒ ኤሮና ካዎተꬃታ ፄጋና፤ ነና ኤሮና ካዎተꬃት ኤለስድ ኔኮ ያና።”
ISA 55:6 “ጎዳይ በንትያ ዎደ እያ ኮይተ፤ ማታን ደእያ ዎደ እያ ፄግተ።
ISA 55:7 ኢታ አስ ባ ኦግያፐ ስሞ፤ ናጋራንቾይ ባ ቆፋ አጎ። ጎዳኮ ስሞ፥ እካ እያ ማራና፤ እ ኑ ፆሳኮ ስሞ፥ እያዉ አቶ ጋና።
ISA 55:8 ታ ቆፋይ ህንተ ቆፋ መላ፥ ታ ኦገይ ህንተ ኦግያ መላ ግደና” ያጌስ ጎዳይ።
ISA 55:9 ሳሎት ሳኣፐ ꬎቀይሳዳ፥ ታ ኦገይ ህንተ ኦግያፐ፥ ታ ቆፋይ ህንተ ቆፋፐ ꬎቄስ።
ISA 55:10 እርነ ሻች ሳሎፐ ዎꬍድ፥ ቢታ ላክስድ፥ ካꬅ ዶላና መላነ አይፋና መላ ኦይሳዳ፥ ዘረይሳስ ዘረ፥ መይሳስ ካꬅ እሞና ጉየ ሳሎ ስመና።
ISA 55:11 ታ ዶናፐ ከይያ ቃላይ ሄሳ ማላ፤ እ ታኒ ሀልችዳይሳ ፖሎናነ ታ ኪትዳይሳ ኦꬆና ታኮ ጮ ስመና።
ISA 55:12 “ህንተ ኡፋይሳን ከያና፤ ሳሮን ሞይዘታና፤ ደረትነ ዙማት ህንተ ስንꬃን ኡፋይትድ የፃና፤ ባዞ ምꬃት ኡባይ ባንታ ኩሽያ ባቃና።
ISA 55:13 አጉንꬃ ግሾ ፂዳ፥ ጎምኦረ ግሾ ፃይꬅ ዶላና። ሄስ ጎዳ ቆፍስያባነ መርናዉ ꬋዮና ማላ ግዳና” ያጌስ ጎዳይ።
ISA 56:1 “ሱረ ፕርዳ ናግተ፤ ፅሎ ኦꬅተ፤ ታ አቶተꬃይ ኤለስድ ያና፤ ታ ፅሎተꬃይ ማታን ቆንጫና።
ISA 56:2 ሀይሳ ኦꬅያ ኡራይ፥ ሳምባታ ቱንሶና ቦንችያ ኡራይነ ባ ኩሸይ ኢታባ ኦꬆና መላ ተቅያ ኡራይ አንጀትዳይሳ” ያጌስ ጎዳይ።
ISA 56:3 ጎዳኮ ሺቅዳ በተ አስ፥ “ጎዳይ ታና ባ አሳፐ ሻካና” ጎፖ፤ ሹፋይ፥ “ታኒ መልዳ ምꬅ” ጎፖ።
ISA 56:4 “ታ ሳምባታ ቦንችያ፥ ታና ኡፋይስያባ ዶረይነ ታ ጫቁዋ ምንꬅድ ናግያ ሹፋታስ፥
ISA 56:5 ኤንታዉ ታኒ ታ ኬꬃንነ ታ ድርሳ ግምብያ ግዶን ኤንቲ ሀሳየትያባ እማና። ኤንቲ ማጫ ናአነ አደ ናአ የልድ፥ ደምያ ቦንቹዋፈ አꬍያ ሱንꬅ ታኒ ኤንታዉ እማና፤ ታኒ መርናዉ ꬋዮና ሱንꬅ ኤንታዉ እማና።
ISA 56:6 ጎዳ ሀጋዛናዉ፥ ጎዳ ዶሳናዉነ እያ አይለ ግዳናዉ ባንታና እያኮ ሺሽያ፥ ሳምባታ ቱንሶና ቦንችያነ ታ ጫቆ ቃላ ምንꬅድ ናግያ በተ አሳታ፥
ISA 56:7 ታኒ ታ ጌሻ ዙማ ቦላ ኤሀዳ ታ ዎሳ ኬꬃን ኤንታ ኡፋይሳና። ኤንቲ ታ ያርሾ በሳን ሺሽያ ፁሳ ያርሾይነ ሀራ ያርሾይ ኤከታና፤ ታ ኬꬃይ አሳ ኡባይ ፆሳ ዎስያ ኬꬅ ጌተታና” ያጌስ።
ISA 56:8 “ሽቅዳይሳታ ቦላ ጉጃዳ ሀራታካ ታኒ ሺሻና” ያጌስ እስራኤለፐ ላለትዳይሳታ ሺሽያ፥ ኡባ ሃርያ ጎዳይ።
ISA 56:9 ህንተኖ ባዞ ዶአቶ፥ ህንተኖ ዎራ ዶአቶ፥ ኡባይ ሃ ይድ ሚተ።
ISA 56:10 እስራኤለ አሳ ናገይሳት ቆቀ፤ ኤንታዉ ኤር ባዋ፤ ኤንቲ ኡባይ ቦጫናዉ ዳንዳኦና ቡታለ ካናታ፤ ኤንቲ ዝንእድ ኤልሞቶሶና፤ ꬍስኮ ዶሶሶና።
ISA 56:11 ኤንቲ ምድ ካሎና ያራምባ ካና መላ፤ ኤንቲ አኬክ ፓጭዳ ሄንꬃንቾ። ኤንቲ ኡባይ ባንታ ኦገ ብዶሶና፤ ኡባይ ባንታ ጎአ ፃላላ ኮዮሶና።
ISA 56:12 ኤንቲ፥ “ሃ ዪተ፤ ዎይነ ኡሻ አነ ኡዮስ፤ ማꬆይያ ኡሻ አነ ጋኖስ! ዎንቶይ ሀች መላ ግዳና፤ ሀችፈካ አꬍድ ሎአና” ያጎሶና።
ISA 57:1 ፅሎ አስ ሀይቄስ፤ ሽን ሄሳ ቆፐይ ባዋ። ባንታና ፆሳስ እምዳ አሳይ ቢታፈ ኤከቶሶና፥ ሽን ፅሎ አስ ኢት ያናፐ ስንꬃትድ፥ ኤከተይሳ ኦንካ አኬከና።
ISA 57:2 እ፥ ብድ ሳሮተꬅ ደእያ በሲ ገሌስ፤ ሱረተꬃን ሄመተይሳት ሀይቅድ፥ ሸምፖ ደሞሶና።
ISA 57:3 “ህንተኖ፥ ማሮ ናይቶ፥ ህንተኖ ላምያነ ላይማትያ ዛረቶ፥ ሃ ዪተ።
ISA 57:4 ህንተ ኦና ቀልቅሴቲ? ህንተ ኦና ቦሬቲእ? ህንተ እንፃርሳ ኦደ ቦላ ከሴቲ? ህንተ ጌላታነ ዎርዳንቾ ናይታ ግደከቲ?
ISA 57:5 ህንተ ዎላ ጋርሳንነ ዳሻ ምꬃ ጋርሳን አሞን ፁገቴታ። ህንተ ናይታ ዛንጋራንነ ዛላ ቆጶን ሹክድ ያርሼታ።
ISA 57:6 ዛንጋራን ደእያ ሊቆ ሹቻት ህንተ ፆሳታ፤ ህንተ ኤንታዉ ኡሻ ያርሾ ትግደታ። ካꬃ ያርሾካ እምደታ ያትን፥ ታኒ ሀይሳን ሀንቀትክና?
ISA 57:7 ዙማ ሁጰን ሂፃ የግደታ፤ ያን ያርሻናዉ ከይደታ።
ISA 57:8 ህንተ ፐንግያፈነ ጎባነታፐ ሶ ባጋራ ኤቃ ምስለታ ኤስደታ። ታና አግድ ህንተ አርሳ ዳልግስድ፥ ያ ከይደታ፤ ኤንታራ ጫቅደታ፤ ያትድ ኤንታ አርሳ ዶስደታ፤ ኤንታ ካሉዋ በእደታ።
ISA 57:9 ዛይተነ ሽቶ ኤክድ ሞሎካ ጌተትያ ኤቃኮ ብደታ፤ ህንተ ኪታንቾታ ሃሆ ሶ ኪትደታ፤ ሀር አቶሽን ስኦለ ጋካናዉ ዎꬍደታ።
ISA 57:10 ህንተ ሀራ ፆሳታ ኮይሸ ዳቡርደታ፤ ሽን፥ ‘ኡፋይስ ባዋ’ ግቤከታ። ህንተ ዎልቃይ ሃ ኦራፅስ፤ ሄሳ ግሾ፥ ላባንድ ኩንድቤከታ።
ISA 57:11 “ህንተ ኦና ያይድ፥ ታዉ ዎርዶትደቲ? ህንተ ታና ቆፕበከታ፤ ህንተ ዎዛናን ቆፕበከታ። ህንተ ታዉ ያዮና እፅዳይ ታኒ ዳሮ ዎደ ስእ ግዳ ግሾ ግደኔ?
ISA 57:12 ታኒ ህንተ ፅሎተꬃነ ህንተ ኦሶታ አዋጃና፤ ሽን ህንተና አይኮካ ጎኦኮና።
ISA 57:13 ህንተ ማዶ ደማናዉ ዋስያ ዎደ ህንተ ሺሽዳ ኤቃት ህንተና አሸና! ኤንታ ኡባ ጫርኮይ ኤፋና፤ እስ ቶሆ ጫርክያ ጫርኮይ ኤንታ ፑንድ ꬋይሳና። ሽን ታና ባዉ ባቃትድ አትያ በሰ ኦꬅያ ኡራይ ቢታ ላታና፤ ታ ጌሻ ዙማ ኤካና” ያጌስ።
ISA 57:14 “ባስተ፥ ባስተ! ኦገ ጊግስተ፤ ታ አሳ ኦግያፐ ꬉብያባ ኡባ ድግተ” ያጌስ ጎዳይ።
ISA 57:15 መርናዉ ደኤይስ፥ ግታይ፥ ꬎቃ በሳን ደኤይስ፥ እያ ሱንꬃይ ጌሻ ጌተተይስ፥ ያጌስ፦ “ካዉይዳ አሳ አያና ደንꬃናዉ፥ መቅዳ ዎዛን ደኤይሳታ ኮላናዉ፥ ካዉይዳነ መቅዳ አያን ደኤይሳራ ዳና።
ISA 57:16 ታ መꬍዳ አሳ አያናይነ ሸምፖይ፥ ታ ስንꬃን ዶጮና መላ ታኒ መርናዉ ሞትከ፤ ኡባ ዎደ ሀንቀትከ።
ISA 57:17 ኤንታ ናጋራ ጋሶን ታኒ ኤንታ ሀንቀታዳ ሴራስ፤ ታ ሶምኡዋ ኤንታፈ ገንꬃስ፤ ሽን ኤንቲ ሀእካ ባንታ ዎዛና ቆፋን ብዶሶና።
ISA 57:18 ታኒ ኤንታ ኦግያ በአስ፤ ሽን ታኒ ኤንታ ፓꬃና፥ ካለꬃና፤ እያዉነ እያ ግሾ ዬከይሳታ ምንꬃና።
ISA 57:19 እስራኤለ ቢታን ዬከይሳታ፥ መተርሻን ጋላታ ኩንꬃና። ሃሆንነ ማታን ደኤይሳታስ፥ ሳሮይ ግዶ፤ ታኒ ኤንታ ፓꬃና” ያጌስ ጎዳይ።
ISA 57:20 ሽን ኢታት ኡርቃነ ስልሞ ከስያ፥ ዎፑ ጋናዉ ዳንዳኦና አባ ቤታ መላ።
ISA 57:21 “ኢታታስ ሳሮይ ባዋ” ያጌስ ታ ፆሳይ።
ISA 58:1 ጎዳይ ሀይሳዳ ያጌስ፦ “ነ ቃላ ꬎቁ ኦꬃዳ ዋሳ፤ ጉየ ጎፓ፤ ነ ቃላ ሞይዘዳ ꬎቁ ኦꬃ። ታ አሳስ ኤንታ ጌላተꬃ፥ ያይቆባ ኬꬃስ ኤንታ ናጋራ ኦዳ።
ISA 58:2 ሽን ኤንቲ ታና ጋላስ ጋላስ ኮዮሶና፤ ታ ኦግያ ካላናዉ ዶስያ ዳኖሶና። ፅሎ ኦꬅዳነ ፆሳ ኪታ አግቦና አሳዳ ኤንቲ ታና ሱረ ፕርዳ ኦይቾሶና፤ ታኮ ፆሳኮ ሺቃናዉ ዶስያ ዳኖሶና።
ISA 58:3 ኤንቲ ጎዳኮ፥ ‘ኑኒ ፆሞስ፥ ሽን ኔኒ አይስ ኑና ፄልኪ? ኑኒ ኑናተꬃ ካዉሽዳ፥ ሽን ኔኒ አይስ ኤሮናዳ ሀናድ’ ያጎሶና። ጎዳይ ዛሪድ፥ ‘ሄኮ፥ ህንተ ፆምያ ዎደ ህንተና ኡፋይስያባ ኦꬄታ፤ ህንተ ኦሳንቾታ ኡንኤꬄታ።’
ISA 58:4 ህንተ ኦሻንነ ፓላማን ፆሜታ፤ ቃይ ባይና ኢታ ደሸꬅ ደቻናዉ ፆሜታ። ሄሳ መላ ፆምያ ህንተ ዎሳይ ቦላ ሳሉዋን ስኤቶና መላ ኦꬄስ።
ISA 58:5 ታኒ ዶርዳ ፆማይ ሀይሳ መላ ፆሜ? እስ አስ ባናተꬃ ካዉሸይ ሀይሳ መላ ጋላሳ ፃላላኔ? ታኒ ኮይያ ፆማይ አስ ባ ሁጵያ ካፅዳ ጋሸዳ ሆክሳና መላነ ብዶ ትየትድ ካዮ ማኦ ማእድ ኡተዬ? ህንተ ሄሳ ፆማ ግድ ፄገትዬ? ሄ ፆማ ጋላሳይ ጎዳ ስንꬃን ኤከትዬ?
ISA 58:6 “ታኒ ዶርያ ፆማይ ሀይሳ፤ ሱረ ፕርዳ ꬋዮ ሳንꬃላታ ብላና መላነ ቃምባራ መንꬅድ ኡንኤትዳይሳታ ላአ ከሳና መላ ግደነዬ?
ISA 58:7 ታኒ ዶርያ ፆማይ ኮሻትዳይሳ ሙዛና መላ፥ ኬꬅ ባይና ማንቆታ ሶ ኤካና መላ፥ ካሎትዳይሳ በአዳ ማይዛና መላነ ማዶ ኮይያ ህንተ ዳቡዋፈ ህንተና ገንꬆና መላሳ ግደኔ?
ISA 58:8 ያትኮ፥ ህንተ ፖኦይ ዎንታ ፃልቀዳ ፖአና፤ ህንተ ፓፆተꬃይ ኤሶን ያና። ህንተ ፅሎተꬃይ ህንተፈ ስንꬃራ ባና፤ ጎዳ ቦንቾይ ህንተፈ ጉየራ ግድድ፥ ህንተና ናጋና።
ISA 58:9 ሄ ዎደ ህንተ ፄጋና፤ ጎዳይ ህንተዉ ኮያና። ህንተ ማዶ ኮይድ ዋሳና፤ እ፥ ‘ሄኮ፥ ታኒ ሀይሳን ደአይስ!’ ያጋና። “ህንተ ግዶፈ ኡንኤꬅያ ቃምባራ ድግኮ፥ ብራን ማለይሳነ ኢታባ ኦደተይሳ አግኮ፥
ISA 58:10 ኮሻትዳይሳ ሙዝኮ፥ መቶትዳይሳታ ኮሽያባን ማድኮ፥ ሄ ዎደ ህንተ ፖኦይ ꬉማን ፖአና፤ ህንተ ቃማይ ሴታ ጋላስ ግዳና።
ISA 58:11 ጎዳይ ህንተና ኡባ ዎደ ካለꬃና፤ ህንተና መላ ቢታን ኮሽያባን ካልሳና፤ ህንተ ፃጱዋ ፃልሳና። ህንተ ሃ ኡያ ጋናተ መላነ መል ኤሮና ሃꬃ ፑልቶ መላ ግዳና።
ISA 58:12 ነ አሳይ በን ላለትዳ በሳታ ዛሪድ ኬፃና፤ ዳሮ ዎደፐ ካሰ ባሰትዳ ባሶታ ኬፅድ ꬎቁ ኦꬃና። ህንተ ‘ላለትዳ ግምበታ ግምበይሳታነ አሳይ ደእያ በሳነ ዎጋ ኦገይ ደእያ ካታማታ ኤሰይሳታ ጌተታና።’
ISA 58:13 “ሳምባታ ጋላሳ ቦንቾ አጎና እፅኮ፥ ታ ጌሻ ጋላስ ህንተ ጎአ የደይሳ አግኮ፥ ሳምባታ ኡፋይስነ ቦንቸትዳ፥ ጎዳ ጋላሳ ቦንቾ ጋዳ ፄግኮ፥ ህንተ ህንተ ኦግያ ቦና አግድ ሄ ጋላሳ ቦንችኮ፥ ህንተና ኡፋይስያባ ኦꬆናነ ሀዳባ ኦደቶና አግኮ፥
ISA 58:14 ሄ ዎደ ህንተ ጎዳን ኡፋይታና፤ ታኒ ህንተና ዳሮ ቦንቸትዳይሳታ ኦꬃና፤ ህንተ አዋ ያይቆባ ላታ ህንተ ማና መላ ኦꬃና። ታኒ ጎዳይ ሀይሳ ኦዳስ” ያጌስ።
ISA 59:1 ሄኮ፥ ጎዳ ኩሸይ ህንተና አሻናዉ ቃምቤና፤ እያ ሀይꬃይ ስአናዉ ቱልቤና።
ISA 59:2 ሽን ህንተ ናጋራይ ህንተፈነ ህንተ ፆሳፈ ግዶን ሻሄተꬅ መꬍስ። እ ስኦና መላ ህንተ ናጋራይ እያ ሶምኡዋ ህንተፈ ገንꬅስ።
ISA 59:3 ህንተ ኩሸይ ሱꬃን፥ ህንተ ብራይ ናቆን ቱንስ፤ ህንተ ዶናይ ዎርዶ ኦደቴስ፤ ህንተ እንፃርሳይ ኢታባ ዙዙሜስ።
ISA 59:4 ፅሎተꬃን ሞተይ ባዋ፤ ሱረተꬃን ፕርደይካ ባዋ። ኤንቲ ጮ ፓላማን ጬቀቶሶና፤ ዎርዶ ኦደቶሶና፤ ጭሞ ቃንꬃትድ ኢታተꬅ የሎሶና።
ISA 59:5 ኤንቲ ሾሻ ጱጱለ ሀጶሶና፤ ሻንጎ ሃዳ ዳዶሶና። ሄ ጱጱለታ ምያ አስ ሀይቄስ፤ ጱጱልያፈ እሶይ መቅኮ፥ እያፐ ሾሽ ከዬስ።
ISA 59:6 ኤንቲ ዳድዳ ሻንጎ ሃዳይ ማኦስ ሀነና፤ እያራ ባንታ አሳተꬃ ካማናዉ ዳንዳኦኮና። ኤንታ ኦሶይ ኢታ፤ ጌላ ኦሶይ ኤንታ ኩሸን ኩምስ።
ISA 59:7 ኤንታ ቶሆት ኢታባ ኦꬃናዉ ዎፆሶና፤ ፅሎ ሱꬅ ጉሳናዉ ኤሶቶሶና። ኤንታ ቆፋይ ኢታ፤ ኤንቲ ብዳ በሳ ኡባን ቆሆይነ ቦሽ ደኤስ።
ISA 59:8 ኤንቲ ሳሮተꬃ ኦገ ኤሮኮና፤ ኤንታ ኦግያን ሱረ ፕርድ ባዋ። ኤንቲ ባንታ ኦግያ ጌላይዶሶና፤ ሄ ኦግያራ ሄመትያ ኦንካ ሳሮ ደመና።
ISA 59:9 ሄሳ ግሾ፥ ሱረ ፕርድ ኑፐ ሃክስ፤ ፅሎተꬅ ኑኮ ሺቀና። ኑኒ ፖኦ ኮዮስ፥ ሽን ꬉማ ግድስ፤ ዋጋጋ ፖኦ ኮዮስ፥ ሽን ሳካና ꬉማን ሄመቶስ።
ISA 59:10 ኑኒ ቆቀዳ ድርሳ ግምብያ ቦላ ታታፎስ፤ ሴታ ጋላስ፥ ሳእ ለምእን ሄመትያዳ ꬉበቶስ፤ ዎልቃራ ደእያ አሳ ግዶን ኑኒ ሀይቅዳ አሳ መላ ግድዳ።
ISA 59:11 ኑኒ ኡባይ ባባንꬃዳ ዋሶስ፤ ሆለዳ ካዮትድ ኦሎስ። ኑኒ ሱረ ፕርዳ ኮይዳ፥ ሽን ደምቦኮ፤ አቶተꬅ ኮይዳ፥ ሽን እ ኑፐ ሃክስ።
ISA 59:12 ኑ ባላይ ነ ስንꬃን ዳርስ፤ ኑ ናጋራይ ኑ ቦላ ማርካቴስ። ኑ ናቆይ ኑራ ደኤስ፤ ኑ ቆሁዋ ኑ ኤሮስ።
ISA 59:13 ኑኒ ማካልድ፥ ጎዳ ካꬍዳ፤ ኑ ፆሳ አግድ ጉየ ስምዳ። ጌላተꬅነ ገነ ኦደትዳ፤ ኑኒ ዎርዶ ቃንꬃትድ ዎርዶ የልዳ።
ISA 59:14 ሱረ ፕርድ ጉየ ሱገትስ፤ ፅሎተꬅ ኑፐ ሃክስ። ቱማተꬅ ዳባባን ꬉበቴስ፤ አማነተꬅ ገላናዉ በሰ ꬋይስ።
ISA 59:15 ቱማተꬅ አዉንካ በንተና፤ ኢታተꬃፈ ሃክያ አስ ቆሆስ አꬍድ እመቴስ፤ ጎዳይ ሱረ ፕርድ ባይናይሳ በእድ አዛንስ።
ISA 59:16 ኡንኤተይሳታ ማድያ አስነ ኤንታዉ ጋናትያ አስ ባይናይሳ ጎዳይ በእድ ማላለትስ። ሄሳ ግሾ፥ እያ ቀሰይ እያዉ አቶተꬅ ኤህስ፤ እያ ፅሎተꬃይ እያ ካትስድ ኦይክስ።
ISA 59:17 እ፥ ፅሎተꬅ ትራን ዎꬅያ ኦላ ሚሸዳ ማእስ፤ ባ ሁጵያን አቶተꬃ ባርኔፃ ዎꬅስ፤ ሀሎ ከስ ማኦዳ፥ ሀንቆ አፍላዳ ማእስ።
ISA 59:18 እ ኤንታዉ ኤንታ ኦሱዋዳ ኦሱዋዳ ዛራና፤ ሀንቁዋ ባ ሞርከታስ፥ ሴራ ባራ ኤቀተይሳታስ ጭጋና፤ ዩሾይ አባን ተቀትዳ ቢታታስ ኤንታ ኦሱዋዳ እማና።
ISA 59:19 ጎዳ ፔኖይ ዎልቃማ ጎተዳ ድእሸ ያና ግሾ፥ ዉሎሀ ባጋን ደኤይሳት ጎዳ ሱንꬃስ ያያና፤ ዶሎሀ ባጋን ደኤይሳት እያ ቦንቻና።
ISA 59:20 “ፅዮነስነ ያይቆባ ዘረꬃ ግዶን ባንታ ናጋራፐ ስመይሳታ ዎዘይስ ያና።
ISA 59:21 ታዉ ኤንታራ ደእያ ጫቆይ ሀይሳ፦ ህንተ ቦላ ደእያ ታ አያናይነ ታኒ ህንተ ዶናን ዎꬅዳ ታ ቃላይ፥ ሀችፈ ዶምድ፥ መርና ጋካናዉ፥ ህንተ ዶናፐ፥ ህንተ ናይታ ዶናፐነ ህንተ ናይታ ናይታ ዶናፐ ሻከተና” ያጌስ ጎዳይ።
ISA 60:1 ነ ፖኦይ ይዳ ግሾ፥ ደንዳዳ ፖእሳ፤ ጎዳ ቦንቾይ ነ ቦላ ፖአና።
ISA 60:2 ሄኮ፥ ꬉም ሳኣ፥ ሳካና ꬉም አሳ ካማና፤ ሽን ጎዳይ ነ ቦላ ደንዳና፤ እያ ቦንቾይ ነ ቦላ ፖአና።
ISA 60:3 ካዎተꬃት ነ ፖኡዋኮ፥ ካዎትካ ነ ዎንታ ፆልቀꬃኮ ያና።
ISA 60:4 ꬎቁ ጋዳ ነ ዩሹዋ ፄላ፤ ኡባይ እስፈ ኔኮ ያና። ነ አደ ናይት ሃሆፐ ያና፤ ነ ማጫ ናይት ባኤትድ ኔኮ ያና።
ISA 60:5 ሄ ዎደ ኔኒ በአዳ ኡፋይታና፤ ነ ዎዛናይ ኡፋይሳን ኖጩ ጋና። አባ ቦላ ደእያ ሻሎይ ኔኮ ያና፤ ካዎተꬃታ ዱረተꬃይ ነባ ግዳና።
ISA 60:6 ምድያመፐነ ኤፋ ቢታፈ ይዳ፥ ግማለ ዉደይ ነ ቢታ ካማና። ዎርቃነ እፃነ ኤሄይሳት ጎዳ ጋላታ አዋጅሸ ሳባፐ ያና።
ISA 60:7 ቀዳረነ ነባዮታ ዶርሳ ዉደ ኡባይ፥ ታ ያርሾ በሳ ኔኮ ያና፤ ታኒ ታ ቦንቾ ኬꬃ ቦንቻና።
ISA 60:8 “ሀይሳቲ ሻራዳ ዎይኮ ሆለዳ ባንታ ኬꬃኮ ፓለይሳት ኦኔ?
ISA 60:9 ቱማ ዩሾይ አባን ተቀትዳ ቢታት፥ ታናን ኡፋይስ ዎꬃና፤ እስራኤለ ጌሻይ፥ ጎዳይ ህንተ ፆሳይ፥ ህንተና ቦንችዳ ግሾ፥ ታርሰሳ ማርካበት ስንꬃት ከይድ፥ ነ ናይታ ሃሆ ቢታፈ ኤንታ ብራራነ ዎርቃራ ፆሳ ቦንቹዋስ ኤሀና።
ISA 60:10 “አላጋ ቢታት ነ ድርሳ ግምባና፤ ኤንታ ካዎት ነዉ ኦꬃና። ነና ታኒ ታ ሀንቁዋን ካሰ ሾጫስ፥ ሽን ሀእ ታ ቃꬍያን ነና ማራስ።
ISA 60:11 ነ ፐንገት ኡባ ዎደ ዶያ ዳና፤ ካዎተꬃታ ዱረተꬃይነ ኤንታ ካዎት ድኤትድ ኔኮ ያና መላ ጋላስነ ቃማ ጎርደቶኮና።
ISA 60:12 ነዉ ኦꬆና አስ ዎይኮ ካዎተꬅ ኡባይ ꬋያና።
ISA 60:13 ታ ኬꬃ በሳ ሎይꬃና መላ ልባኖሰ ቦንቾ ግድዳ ዝጋይ፥ ፂዳይነ ፃይꬃይ ኔኮ ያና፤ ታኒ ታ ቶሁዋ ዎꬅያ በሳ ቦንቻና።
ISA 60:14 ነና ኡንኤꬅዳ አሳ ናይት ይድ ነዉ ሆካና፤ ነና ካꬍዳ ኡባይ ነ ስንꬃን ጎይናና። ኤንቲ ነና፥ ‘ጎዳ ካታመ፥ ፅዮነ፥ እስራኤለ፥ ጌሻ ካታመ’ ያግድ ፄጋና።
ISA 60:15 “ሀይሳፈ ካሰ ኦንካ ነ ግዶራ ካንꬆና መላ የገታዳሳነ እፀታዳሳ። ሽን ሀእ ታኒ ነና መርናዉ ግታ ኦꬃና፤ የለተꬃ ኡባይ ነናን ኡፋይታና።
ISA 60:16 ኔኒ ካዎተꬃታ ማꬃ ኡያና፤ ካዎታ ꬋንꬃ ꬋማና። ጎዳይ፥ ነና አሸይሳ፥ ዎዘይሳነ ያይቆባ ዎልቃማ ግደይሳ ኔኒ ኤራና።
ISA 60:17 ናሰ ብራታ ግሾ ዎርቃ፥ ብራታ ግሾ ብራ፥ ምꬃ ግሾ ናሰ ብራታ፥ ሹቻ ግሾ ብራታ ታኒ ነዉ ኤሀና። ታኒ፥ ሳሮተꬅ ነና አይሰይሳ፥ ፅሎተꬅ ነዉ ሀላቃ ኦꬃና።
ISA 60:18 ጌላተꬅ ነ ቢታን፥ ꬋዮይ ዎይኮ ቦሽ ነ ዛዋን ስኤተና። ኔኒ ነ ድርሳ ግምብያ፥ ‘አቶተꬃ’፥ ነ ፐንግያ፥ ‘ጋላታ’ ያጋዳ ፄጋና።
ISA 60:19 ጋላስ አዋ ፖኦ፥ ቃማ አጌና ፖኦ ነዉ ኮሸና፤ ጎዳይ ነዉ መርና ፖኦ፥ ነ ፆሳይ ነዉ ቦንቾ ግዳና።
ISA 60:20 አው ናምአንꬆ ዉለና፤ ነ አጌናይ ፖኦ አገና። ጎዳይ ነዉ መርና ፖኦ ግዳና፤ ኔኒ ዬክዳ ጋላሳት ነዉ ግዳና።
ISA 60:21 ነ አሳ ኡባይ ፅሎ ግዳና፤ ኤንቲ ቢታ መርናዉ ላታና። ኤንቲ ታኒ ታ ቦንቹዋ ቆንጭሳናዉ ቶክዳ ፑቶታ፤ ታ ኩሸ ኦሶታ።
ISA 60:22 ህንተ ግዶን እስ ኬꬃን ደእያ ጉꬃ አሳታ ዳርሳና፤ ኡባፈ ጉꬃ ግታ ካዎተꬅ ኦꬃና። ታኒ ጎዳ፤ ዎደይ ጋክያ ዎደ፥ ታኒ ሄሳ ኤሶን ፖላና” ያጌስ።
ISA 61:1 ኡባ ሃርያ ጎዳ አያናይ ታ ቦላ ደኤስ፤ ማንቆታስ ሎኦባ ኦዳና መላ ጎዳይ ታና ትይስ። ዎዛን መቅዳይሳታ ኮላና መላ፥ ድኤትዳይሳታ ላአ ከሳና መላነ ቃሸትዳይሳታ ብላና መላ ጎዳይ ታና ኪትስ።
ISA 61:2 ዶሰትዳ ጎዳ ላይꬃ ኦዳና መላ፥ ኑ ፆሳይ ሀሎ ከያና ጋላሳ አዋጃና መላ፥ አዛነይሳታ ኡባ ምንꬃና መላ ታና ኪትስ።
ISA 61:3 ፅዮነን ካዮተይሳታስ፥ ብዶ ግሾ ካላቻ፥ ዬሆ ግሾ ኡፋይሳ ዛይተ፥ አዛኖ ግሾ ጋላታ ማኦ እማና መላ ታና ኪትስ። ኤንቲ ጎዳይ ባ ቦንቹዋስ ቶክዳ ፅሎ ምꬃ ጌተትድ ፄገታና።
ISA 61:4 ኤንቲ በን ላለትዳ በሳታ ዛሪድ ኬፃና፤ በን ኩንድዳ በሳታ ዛሪድ ኤሳና። ኤንቲ ዳሮ የለተꬃፈ ካሰ ላለትድ ኦንዳ ካታማታ ዛሪድ ኬፃና።
ISA 61:5 አላጋ አሳት ህንተ ዶርሳ ዉድያ ሄማና፤ እማꬃት ህንተ ጋድያ ጎያና ኤንቲ ህንተ ዎይነ ጋድያ ናጋና።
ISA 61:6 አሳይ ህንተና፥ “ጎዳ ካህነታነ ኑ ፆሳ ኦሳንቾታ” ያግድ ፄጋና። ህንተ ካዎተꬃታ ዱረተꬃ ማና፤ ኤንታ ሻሉዋን ህንተ ናሸታና።
ISA 61:7 ታ አሳይ ባንታ ዬላ ግሾ ናምኡ ኩሸ ኤካና፤ ባንታ ካዉሻ ግሾ ላታን ኡፋይታና። ሄሳ ግሾ፥ ህንተ ኤንታ ቢታን ዳኮ ላታና፤ ህንተ ኡፋይሳይ መርና ኡፋይስ ግዳና።
ISA 61:8 “ታኒ፥ ጎዳይ ሱረ ፕርዳ ዶሳይስ፤ ቦንቀነ ኢታ ኦሶ እፃይስ። ታኒ ቱማ ኤንታ ኦሱዋ ጋትያ ቃንፃና፤ ታኒ ኤንታራ መርናዉ ጫቃና።
ISA 61:9 ኤንታ ኮቻት ካዎተꬃታ ግዶን፥ ኤንታ ናይት ደረታ ግዶን ኤረታና፤ ኤንታ በእዳ ኡባይ ታኒ፥ ጎዳይ፥ ኤንታ አንጅዳ አስ ግደይሳ ኤራና።”
ISA 61:10 ታኒ ጎዳን ዳሮ ኡፋይታይስ፤ ታ ሸምፕያ ታ ፆሳን ሀሹ ጋዉሱ። ኤከይስ ባ ሁጰን ካላቻ ዎይሳዳ፥ ገልያራ ባና አሌቅሰይሳዳ፥ እ ታና አቶተꬃ ማኦ ማይዝስ፤ ፅሎተꬅ አፍላ ቦላራ ጉጅስ።
ISA 61:11 ቢታፈ ምꬅ ማት ዶለይሳዳ፥ ጋደይ ቶክዳባ ድቸይሳዳ፥ ኡባ ሃርያ ጎዳይ ፅሎተꬅነ ጋላታ ካዎተꬃ ኡባ ስንꬃን ፑርጭሳና።
ISA 62:1 ፅዮነ ግሾ፥ ታኒ ስእ ጊከ፤ የሩሳላመ ፅሎተꬃይ ፖኦዳ፥ እ አቶተꬃይ ዎንታ ፃልቀዳ ከያና ጋካናዉ ታኒ ስእ ጊከ።
ISA 62:2 ካዎተꬃት ነ ፅሎተꬃ፥ ካዎት ኡባይ ነ ቦንቹዋ በአና። ጎዳይ ሱንꬅያ ኦራꬃ ሱንꬃን ኔኒ ፄገታና።
ISA 62:3 ኔኒ ጎዳ ኩሸን ሎእዳ ካዎተꬃ ካላቻ ግዳና።
ISA 62:4 ኔኒ፥ “ዶገትዳሮ” ጌተታካ፤ ነ ቢትያ፥ “ꬎንꬁ” ጌተቱኩ። ሽን ኔኒ፥ “ታ ኡፋይሳይ እን ደእያሮ”፥ ነ ቢትያ፥ “አዝና ገልዳሮ” ጌተታና። ጎዳይ ነናን ኡፋይታና፤ ነ ቢትያካ አዝን ደእያሮ ግዳና።
ISA 62:5 ፓንꬅ ጌላኦ ኤከይሳዳ፥ ነ ናይት ነና ማቻና። ኤከይስ ገልያርን ኡፋይተይሳዳ፥ ነ ፆሳይ ነናን ኡፋይታና።
ISA 62:6 ነኖ የሩሳላመ፥ ነ ድርሳ ግምብያ ቦላ ዎቸይሳታ ታኒ ዎꬃስ፤ ኤንቲ ጋላስነ ቃማ ስእ ጎኮና።
ISA 62:7 ህንተኖ፥ ጎዳ ቆፍሰይሳቶ፥ እ፥ የሩሳላመ ኬፃና ጋካናዉነ ቢታ ኡባን ናሸትዳ ካታማ ኦꬃና ጋካናዉ ህንተካ ሸምፖፕተ፤ እያካ ሸምፕሶፕተ።
ISA 62:8 ጎዳይ ባ ኡሻቻ ኩሽያንነ ባ ዎልቃማ ቀስያን ሀይሳዳ ያግድ ጫቅስ፦ “ታኒ ናምአንꬆ ህንተ ካꬃ ህንተ ሞርከት ማና መላ ኦꬅከ። ህንተ ዳቡርዳ ህንተ ዎይነ ኡሻ አላጋት ኡዮኮና።
ISA 62:9 ሽን ባንታ ካꬃ ጫክዳይሳት ምድ ጎዳ ጋላታና፤ ዎይነ ማፀይሳት ታ ኬꬃ ዳባባን ኡያና።
ISA 62:10 አꬍተ! ፐንገራ ከይድ ቢተ! አሳስ ኦገ ጊግስተ! ዎጋ ኦገ ከስተ። ሹቻ ድግተ፤ ካዎተꬃት ኦግያ ደማና መላ ማላ ኤስተ።
ISA 62:11 ጎዳይ ሳአ ጋፃስ ሀይሳዳ ያግድ አዋጅስ: ‘ፅዮነ አሳስ ሀይሳዳ ያግተ፤ ሄኮ፥ ህንተና አሸይስ ጋክስ! እያ ጋተይ እያራ ደኤስ፤ እ እምያ ዎይቶይ እያ ስንꬃን ደኤስ’ ያግተ።
ISA 62:12 ህንተ፥ ‘ጎዳይ ዎዝዳ ጌሻ አሳታ’ ጌተትድ ፄገታና። የሩሳላመይ፥ ‘ኮየትያሮነ የገታ አታቦና ካታምዉ’ ” ጌተታና።
ISA 63:1 ኤዶመ ቢታን፥ ባሶራ ካታማፐ ዞኦ ማኦ ማእድ የይ ሀይስ ኦኔ? ቦንቾ ማኦ ማእድ ባ ዎልቃ ምኖተꬃን ስን ሆርዶፈይ ኦኔ? “ፅሎ ኦደተይነ አሽያ ዎልቅ ደኤይ ታና” ያጌስ ጎዳይ።
ISA 63:2 ዎይነ ጉምእያሶን ዎይነ የꬍያ አሳ ማኦዳ ነ ማኦይ አይስ ዞእዴ?
ISA 63:3 “ታኒ ዎይነ ጉምእያሶን ዎይንያ ታርካ የꬋስ፤ ካዎተꬃታፐ እስ አስካ ታራ ባዋ። ታኒ ኤንታ ታ ሀንቁዋን የꬋስ፤ ታ ይሉዋን ኤንታ ድርፀረꬃስ። ኤንታ ሱꬃይ ታ ማኡዋ ቦላ ꬋርጨትን፥ ታ ማኦ ኡባይ ኢትስ።
ISA 63:4 ታኒ ታ አሳ ዎዝያ ጋላሳይነ ኤንታ ሞርከታ ሀሎ ከይያ ላይꬃይ ጋክስ።
ISA 63:5 ታኒ በአስ፥ ሽን ታና ማድያ እስ አስካ ደማብከ፤ ማደይ ꬋይዳ ግሾ፥ ታኒ ማላለታስ። ሄሳ ግሾ፥ ታ ቀሰይ ታዉ አቶተꬅ ኤህስ፤ ታ ሀንቆይ ታና ማድስ።
ISA 63:6 ታኒ ታ ሀንቁዋን ካዎተꬃታ የꬋስ፤ ታ ይሉዋን ኤንታ ድርፀረꬃስ፤ ኤንታ ሱꬃ ቢታን ጉሳስ” ያጌስ ጎዳይ።
ISA 63:7 ጎዳይ ኑስ ኦꬅዳ ኦሶ ኡባ፥ ጎዳይ ባ ማሮተꬃንነ ባ ቃꬍያን እስራኤለ አሳስ ኦꬅዳ ሎኦ ኦሶ ኡባነ እያ ሱንꬃይ ጋላተታና መላ በስዳ ኬሀተꬃ ኡባ ታኒ ኦዳና።
ISA 63:8 እ፥ “ኤንቲ ቱማ ታ አሰነ ታ ናአ ግድያ ግሾ፥ ታዉ ዎርዶቶኮና” ያግስ። ሄሳ ግሾ፥ እ ኤንታ አሸይሳ ግድስ።
ISA 63:9 ኤንታ ዋየ ኡባ እ ዋየትስ፤ እያ ስንꬃ ኪታንቾይ ኤንታ አሽስ። እ ኤንታ ባ ሲቁዋንነ ባ ማሮታን ዎዝስ፤ ካሰ አꬍዳ ዎደታ ኡባን እ ኤንታ ቶክስ።
ISA 63:10 ሽን ኤንቲ ማካልዶሶና፤ እያ ጌሻ አያና አዛንꬅዶሶና። ሄሳ ግሾ፥ እ ስሚድ፥ ኤንታዉ ሞርከ ግድስ፤ ኤንታ ኦልስ።
ISA 63:11 ሄሳፈ ጉየ አሳይ በንባነ ባ አይልያ ሙሰ ዎደ ኦꬅዳባ ቆፕድ፥ ሀይሳዳ ያግዶሶና፦ “ባ ዉድያ ሄንꬃንቾታራ እስፈ አባ ግዶራ ካንꬅስዳ ፆሳይ አዉን ደኢ? ሄ ዎደ ባ ጌሻ አያና ኤንታ ግዶን፥ ዎꬅዳ ፆሳይ ሀእ አዉን ደኢ?
ISA 63:12 ባዉ መርና ሱንꬁ ግዳና መላ ኤንታ ስንꬃን ሃꬃ ሻክድ፥ ባ ቦንቾ ዎልቃማ ቀሰይ ሙሰስ ኡሻቻ ኩሸ ግዳና መላ ኪትዳይስ አዉን ደኢ?
ISA 63:13 ቢታ ቦላራ ፓር ብያዳ ኤንቲ ꬉበቶና ጪሞ ሃꬃ ግዶራ ፕንꬅዳይስ አዉን ደኢ?” ያግዶሶና።
ISA 63:14 ዛንጋራ ዎꬍያ መሄዳ፥ ጎዳ አያናይ ኤንታዉ ሸምፖ እሚስ። ነ ሱንꬃይ ቦንቸታና መላ ሄሳዳ ኦꬃዳ ነ አሳ ካለꬃዳሳ።
ISA 63:15 አቤት ጎዳዉ፥ ሳሎራ ዱገ ፄላ፤ ኔኒ ደእያ ጌሽነ ቦንቾ ግድዳ አራታፐ በአ። ነ ቅናተይነ ነ ዎልቃይ አኔ? ነ ማሮታይነ ነ ቃይ ኑፐ ሃክስ።
ISA 63:16 አብራሃመይ ኑና ኤሮና እፅኮካ፥ ያይቆብ ኑና አኬኮና እፅኮካ፥ አቤት ጎዳዉ፥ ኔኒ ኑ አዋ፤ በንፐ ዶምድ፥ ነ ሱንꬃይ ኑና ዎዘይሳ።
ISA 63:17 አቤት ጎዳዉ፥ ኑኒ ነ ኦግያፐ ꬋያናዳነ ነዉ ያዮናዳ ኑ ዎዛና አይስ ሙምሳዲ? ጎዳዉ፥ ነ አይለታ ግሾ፥ ነ ላታ ግድዳ ኮቻታ ግሾ፥ ኑኮ ስማ።
ISA 63:18 ነ ጌሻ አሳይ ነ ኬꬃ ጉꬃ ዎደስ ላትዶሶና፤ ሽን ሀእ ኑ ሞርከት እያ የꬍዶሶና።
ISA 63:19 ኑኒ በንፐ ነባ፤ ሽን ኤንታ ኔኒ ሃራባካ፤ ነ ሱንꬃንካ ኤንቲ ፄገትቦኮና።
ISA 64:1 አቤት ጎዳዉ፥ ሳሎታ ዳካዳ ዱገ ዎꬋ፤ ደረት ነ ስንꬃን ኮኮሮ።
ISA 64:2 ታም ኤፅድ ሃ ፐንትሰይሳዳ ዱገ ዎꬋዳ፥ ነ ሱንꬃ ነ ሞርከታ ኤርሳ፤ ካዎተꬃታካ ነ ስንꬃን ኮኮርሳ።
ISA 64:3 ካሰ ኑኒ ናግቦና ማላታታ ኔኒ ኦꬅዳ ዎደ ዎꬋዳሳ፤ ደረት ነ ስንꬃን ኮኮርዶሶና።
ISA 64:4 በንፐ ዶምድ፥ ነና አማነትድ፥ ናገይሳታስ ማላታታ ኦꬅዳይ ኔፐ አትሽን፥ ሀራ ፆሲ፥ አሳ ሀይꬅ ስእቤና፤ አሳ አይፈይ በእቤና።
ISA 64:5 ኡፋይትድ ፅሎተꬅ ኦይሳታነ ነ ኦግያ ቆፐይሳታ ኔኒ ማዳዳሳ። ሽን ኑኒ ናጋራ ኦሶ አጎና እፅዳ ዎደ ኔኒ ሀንቀታዳሳ፤ ኑኒ ዋንድ አታኔ?
ISA 64:6 ኑኒ ኡባይ ቱና አስ ግድዳ፤ ኑ ፅሎተꬃ ኦሶ ኡባይ ቱና ጩርቃ መላ። ኑ ኡባይ ቦንጮዳ ቆለትዳ፤ ኑ ናጋራይ ኑና ጫርኮዳ ፕትድ ኤፍስ።
ISA 64:7 ኔኒ ነ ስንꬃ ኑፐ ገንꬃዳሳ፤ ኑ ናጋራይ ኑና ꬋይሳና መላ አጋዳሳ። ነ ሱንꬃ ፄገይ ዴና፤ ነና ምንꬅድ ኦይካናዉ ኮየይ ባዋ።
ISA 64:8 ግዶሽን፥ አቤት ጎዳዉ፥ ኔኒ ኑ አዋ፤ ኑኒ ኡርቃ፤ ነ ኡርቃ መꬋዳሳ፤ ኑኒ ኡባይ ነ ኩሸን መትዳ።
ISA 64:9 አቤት ጎዳዉ፥ ዳሮ ሀንቀቶፋ፤ ኑ ናጋራ መርናዉ ቆፖፋ። ኑኒ ኡባይ ነ አሰ ግድያ ግሾ፥ ኑና በአ።
ISA 64:10 ነ ጌሻ ካታማት መላ ቢታ ግድዶሶና፤ ፅዮነ ካታማይ መላ ቢታ፥ የሩሳላመይ ባይሳ ግድስ።
ISA 64:11 ኑ አዋት እያን ነና ጋላትዳ ጌሽነ ሎኦ ግድዳ ኑ ፆሳ ኬꬃይ ታማን ፁገትስ፤ ኑ ሎኦ በሳ ኡባይ ላለትስ።
ISA 64:12 አቤት ጎዳዉ፥ ኔኒ ሀይሳ ኡባ በአሸ ስእ ጋኔ? ሀ ኡባይ ሀንን፥ ኑኮ ስምኪ? ኔኒ ስእ ጋዳ ዛው ባይና ሴራኔ?
ISA 65:1 “ታና ኦይችቦናይሳታስ ቆንጫስ፤ ታና ኮይቦናይሳታስ በንታስ። ታ ሱንꬃ ፄግቦና ካዎተꬃስ፥ ‘ዬ! ዬ!’ ያጋዳ ኮያስ።
ISA 65:2 ባንታ ቆፋ ካልድ፥ ሎኦ ግዶና ኦግያን ሄመትያ ጌላ አሳስ ጋላስ ኩመꬅ ታ ኩሽያ ምጫስ።
ISA 65:3 ሀ አሳይ፥ ታ ስንꬃን አታክልተ ጋደን ያርሽሸነ ፁበ ያርሾ በሳን እፃነ ጩይስሸ ታና ኡባ ዎደ ሀንቀꬆሶና።
ISA 65:4 ኤንቲ ዱፎን ኡተይሳታ፥ ጌማ በሳን አቀይሳታ፥ ጉዱንꬆ አሾ መይሳታ፤ ኤንታ ፃሩዋን፥ ቱና አሾ ጫምብ ደኤይሳታ።
ISA 65:5 “ኤንቲ፥ ‘ነዉ ያን ደአ፤ ታኒ ኔፐ ጌሽ ግድያ ግሾ ታኮ ሺቆፓ!’ ያጎሶና። ሄሳ መላ አሳት ሲ ቱጭያ ጩያ መላ፤ ጋላስ ኩመꬅ ኤፅያ ታማ መላ።
ISA 65:6 “ሄኮ፥ ታ ስንꬃን ፃፈት ኡትስ፤ ታኒ ኤንታዉ ዛራና ስእ ጊከ፤ ኤንታ ሴራናዉ ደንዳስ።
ISA 65:7 ታኒ ኤንታ ናጋራነ ኤንታ አዋታ ናጋራ አጩዋ እስፈ ኤንታዉ ቃንፃና። ኤንቲ ደርያ ቦላ እፃነ ጩይስዶሶና፤ ዙማታ ቦላ ታና ጫይዶሶና። ኤንቲ ካሰ ኦꬅዳ ኦሱዋ አጩዋ ታኒ ኤንታዉ ቃንፃና” ያጌስ ጎዳይ።
ISA 65:8 ጎዳይ ያጌስ፦ “ኢታ ዎይነ ሱሳ ግዶን ሎኦ ዎይነ አይፈይ ደኤይሳዳ፥ አሳይ፥ ‘እያ ግዶን ሎኦ ዎይነ አይፈይ ደእያ ግሾ ኡባ ዎራ ሆሎፕተ’ ገይሳ መላ፥ ታኒ ታ አይለታ ሀይሳዳ ኦꬃና፤ ታኒ ኤንታ ኡባ ꬋይስከ።
ISA 65:9 ታኒ ያይቆባፐ ኮቸ፥ ይሁዳፐ ታ ደርያ ላተይሳታ ከሳና፤ ታ ዶርዳይሳት እያ ላታና፤ ታ አይለት ያን ዳና።
ISA 65:10 ታና ምንꬅድ ኮይያ ታ አሳስ፥ ሳሮን ዶርሳ ዉደይ ሄመትያ በሲ ግዳና፤ አኮራ ዛንጋራይ ሚዛ ዉደይ አላትያ በሲ ግዳና።
ISA 65:11 “ሽን ህንተኖ፥ ጎዳ አግድ፥ ታ ጌሻ ዙማ ዶግዳይሳቶ፥ ‘ቃዳ’ ጌተትያ ኤቃስ ግብራ ጊግሰይሳቶ፥ ህንተ ዉርሰꬃ ኤራናዉ ‘ሳማ’ ጌተትያ ኤቃስ ዋላሀ ዎይነ ኡሻ ዋንጫን ኩንይሳቶ፥
ISA 65:12 ታኒ ህንተ ዉርሰꬃ ማሻስ አꬃዳ እማና፤ ህንተ ኡባይ ጎይረታናዉ ሆካና። ታኒ ህንተና ፄግን ኮይበከታ፤ ኦድስን ስእቤከታ። ህንተ ታ ስንꬃን ኢታባ ኦꬅደታ፤ ታኒ ዶሶናባ ዶርደታ።”
ISA 65:13 ኡባ ሃርያ ጎዳይ ያጌስ፦ “ታ አይለት ማና፥ ሽን ህንተ ኮሻታና፤ ታ አይለት ኡያና፥ ሽን ህንተ ሳሞታና፤ ታ አይለት ኡፋይታና፥ ሽን ህንተ ዬላታና።
ISA 65:14 ታ አይለት ዎዛናፐ ኡፋይትድ የፃና፥ ሽን ህንተ ዎዛናፐ ካዮታና፤ ህንተ አያናይ መቅዳ ግሾ፥ ህንተ ዘሌልድ ዬካና።
ISA 65:15 ህንተ፥ ህንተ ሱንꬃ ታ ዶረትዳ ደርያስ ቃንገꬅ ኦꬅድ እማና። ኡባ ሃርያ ጎዳይ ህንተና ዎꬋና፤ ሽን እ ባ አይለታ ዱማ ሱንꬃን ፄጋና።
ISA 65:16 ካሰ መቶት ዶገትዳ ግሾነ ታ አይፍያ ስንꬃፈ ጌምዳ ግሾ ሄ ቢታን አንጆ ኮይያ ኡባይ ቱማ ፆሳ ሱንꬃን ዎሳና። ሄ ቢታን ጫቆ ጫቅያ ኡባይ ቱማ ፆሳ ሱንꬃን ጫቃና።
ISA 65:17 “ሄኮ፥ ታኒ ኦራꬃ ሳሎታነ ኦራꬃ ሳአ መꬋና፤ ካሰባ ኡባይ ሀሳየተና፤ ቆፈተና።
ISA 65:18 ሽን ታኒ መꬍያባን መርናዉ ኡፋይትተነ ሀሹ ጊተ። ታኒ የሩሳላመ ኡፋይሳስነ እ አሳካ ጋላታን ኩምዳይሳታ ኦꬃዳ መꬋና።
ISA 65:19 ታኒ የሩሳላመን ኡፋይታና፤ ታ አሳን ሀሹ ጋና። ህዛፐ ጉየ ዬሆይነ ኡንአ ዋሶይ ያን ስኤተና።
ISA 65:20 “የሩሳላመን ህዛፐ ጉየ፥ ጉꬃ ዎደ ደእድ ሀይቅያ ናእ፥ ባ ላይꬃ ዉርሶና ሀይቅያ ጭማ አስ ዴና። ፄቱ ላይꬃራ ሀይቅያ ኡራይ፥ ናአተꬃን ሀይቅስ ጌተታና፤ ፄቱ ላይꬅ ጋꬆና ሀይቀይ፥ ባደትዳ አሳዳ ታይበታና።
ISA 65:21 ሄ ዎደ አሳይ ኬ ኬፅድ ዳና፤ ዎይነ ቶክድ እያ አይፍያ ማና።
ISA 65:22 ኤንቲ ኬፅን ሀር ዴና፤ ኤንቲ ቶክን ሀር ሜና። ታ አሳ ላይꬃይ ምꬃ ላይꬃዳ አዱቃና፤ ታኒ ዶርዳይሳት አዱሳ ዎደ ባንታ ኩሸ ኦሱዋን ኡፋይታና።
ISA 65:23 ኤንቲ ጮ ዳቡሮኮና ቃድ ባይና ናአ የሎኮና። ኤንቲ ባንታ ናይታራ ጎዳን አንጀትዳ ኮቻታ ግዳና።
ISA 65:24 ኤንቲ ታና ፄጋናፐ ስን፥ ታኒ ኤንታዉ ኮያና፤ ኤንቲ ቡሮ ሃሳዮና ደእሽን ታኒ ኤንታ ስአና።
ISA 65:25 ሱꬉመይነ ዶርሳ ኡርገይ እስፈ ሄመታና፤ ጋሞይ ቦራዳ ካለ ማና፤ ባን ሾሻስ ካꬅ ግዳና። ሄ ዎደ ታ ጌሻ ዙማ ቦላ ኤንቲ ቆሄቶኮናነ ꬋዮኮና” ያጌስ ጎዳ ፆሳይ።
ISA 66:1 ጎዳይ ያጌስ፤ ሳሎይ ታ አራታ፥ ሳእ ታ ቶሆይ የꬍያ በሰ። ያትን ህንተ ታዉ ኬፅያ ኬꬃይ፥ አይ መላ ኬꬄ? ታ ሸምፓና በሳይ አዉሴ?
ISA 66:2 ሀይሳ ኡባ ታ ኩሸይ ኦꬅስ፤ ኤንትካ ሀንዶሶና። ሽን ታኒ ባና ዝቅ ኦꬅያ ኡራ፥ ባ አያናን መቅዳ ኡራነ ታ ቃላን ኮኮርያ ኡራ ፄላና።
ISA 66:3 ኮርማ ያርሸይ አሰ ዎꬍያ አሳ መላ፤ ኡርገ ዶርስ ያርሸይ ካና ያርሽያ አሳ መላ፤ ካꬃ ያርሾ ያርሸይ፥ ጉዱንꬆ ሱꬅ ያርሽያ አሳ መላ፤ ቆፍሶ እፃነ ጩይሰይ ኤቃ ጎይንያ አሳ መላ። አሳ ኡባይ ባዉ እንጀትያ ኦገ ዶርዶሶና፤ ኤንታ ሸምፖይ ኤንታ ቱናተꬃን ኡፋይቴስ።
ISA 66:4 ሄሳ ግሾ፥ ታኒ ኤንታ መቶስ አꬃ እማና፤ ኤንቲ ያይዳባ ኤንታ ቦላ ኤሀና። ታኒ ፄግዳ ዎደ ኦንካ ኮይቤና፤ ታኒ ኦድያ ዎደ ኦንካ ስእቤና። ኤንቲ ታ ስንꬃን ኢታባ ኦꬅዶሶና፤ ታና ኡፋይሶናባ ዶርዶሶና።
ISA 66:5 ህንተኖ፥ ጎዳ ቃላስ ኮኮረይሳቶ እያ ቃላ ስእተ፦ “ህንተና እፅያ ህንተ እሻት፥ ታ ሱንꬃ ግሾ፥ ህንተና ኩረይሳት፥ ‘ህንተ ኡፋይትን ኑኒ በአና መላ አነ ጎዳይ ቦንቸቶ’ ” ያግዶሶና፤ ሽን ኤንቲ ዬላታና።
ISA 66:6 ካታማፐ ያ ዋሱዋ ስእተ፤ ፆሳ ኬꬃፈ ከይያ ግርሳ ስእተ። ሄ ግርሳይ ባ ሞርከታስ ኤንታ ኦሱዋዳ ኩሸ ዛርያ ጎዳ ግርሳ።
ISA 66:7 “እቀቶና ናአ የልያ ማጫስ ደኢ? ባናኮና አደ ናአ የልያ ማጫስ ደኢ?
ISA 66:8 ሀይሳ መላባ ኦነ ስእዳይ? ሄሳ መላባ ኦነ በእዳይ? እስ ደረይ እስ ጋላስ የለታናዉ ዳንዳእዬ? እስ ካዎተꬅ ቅጵ ዛሮን መትዬ? ፅዮነይ ቡሮ እቀꬅ ኦይኮና፥ ኤለሳዳ ባ ናይታ የላሱ።
ISA 66:9 የላና ዎደ ጋꬅያ ታኒ ኤንቲ የላናዳ ኦꬅክናዬ? የላናዳ ኦꬅያ ታኒ የልያ ኡሎ ጎርዳይናዬ? ሀይሳ ግዳይ ታና፥ ጎዳ፥ ነ ፆሳ።
ISA 66:10 ህንተኖ የሩሳላሞ ዶስያ ኡባዉ፥ ኢራ ኡፋይትተ፤ እ ግሾ ኡፋይሳን ኖጩ ጊተ። ህንተኖ እዉ ዬክያ ኡባዉ፥ ኢራ ኡፋይትተ።
ISA 66:11 ህንተ፥ እያ ምንꬅያ ꬋንꬃ ꬋምድ ካላና፤ እ ዳሮ ቦንቹዋፈ ሎይꬅ ኡይድ፥ ኡፋይታና።”
ISA 66:12 ጎዳይ ያጌስ፤ “ታኒ እዉ ሳሮተꬃ ሻፋዳ ዳርሳና፤ እዉ ካዎተꬃታ ዱረተꬃ ክፃ ሻፋዳ ኤሀና። ህንተ ሄሳ ꬋማና፤ እ ሀሽያን ቶከታና፤ እ ክኦን ኡትድ ባሎታና።
ISA 66:13 አይያ ባ ናአ ምንይሳዳ ታኒ ህንተና ምንና፤ ህንተ የሩሳላመን ምነታና።
ISA 66:14 ሄሳ ህንተ በእያ ዎደ ህንተ ዎዛናይ ኡፋይታና፤ ህንተ መቀꬃይ ማታ መላ አጫና። ጎዳ ኩሸይ እያ አይለታ ቦላ ደኤይስን እያ ሀንቆይ እያ ሞርከታ ቦላ ደኤይስ ኤረታና።
ISA 66:15 ሄኮ፥ ጎዳይ ታማራ ያና፤ እያ ፓራ ጋረት ጎተ መላ። ባ ሸንያ ሀንቆን፤ ባ ሴራካ ታማ ላጮን ቆንጭሴስ።
ISA 66:16 ጎዳይ አሾ ማእዳ ኡባ ታማንነ ማሻን ፕርዳና፤ ዳሮት ጎዳ ማሻን ሀይቃና።
ISA 66:17 “ባንታ ኤቃ ጎይናናዉ አታክልተ ጋደ ባናዉ፥ ባንታና ዱማየይሳትነ ጌሸይሳት፤ ጉዱንꬆ፥ ኤጨረነ ሀራ ቱናባታ መይሳታ ግዶፈ እሱዋ ካልድ በይሳት ኡባይ ꬋያና።
ISA 66:18 “ታኒ ኤንታ ኦሱዋነ ኤንታ ቆፋ ኤርያ ግሾ፥ ካዎተꬃታነ ዱማ ዱማ ዶናን ኦደተይሳታ፥ እስፈ ሺሻና፤ ኤንቲ ሺቅድ፥ ታ ቦንቹዋ በአና።
ISA 66:19 ታኒ ኤንታ ግዶን ማላታ ኦꬃና፤ ኤንታፈ አትዳይሳታ ግዶፈ ታ ግታተꬃ ስእቦናነ ታ ቦንቹዋ በእቦና ካዎተꬃታኮ፥ ታርሰሳኮ፥ ሊበኮ፥ ሊደኮ፥ ቱባላኮ፥ ያዋናኮነ ዩሾይ አባን ተቀትድ ሃሆ ቢታታኮ ኪታና፤ ኤንቲ ታ ቦንቹዋ ካዎተꬃታ ግዶን አዋጃና።
ISA 66:20 እስራኤለ አሳይ ካꬃ ያርሹዋ ጌሻ ሚሸን ዎꬅድ ፆሳ ኬꬅ ኤሄይሳዳ፥ ኤንቲ ህንተ እሻታ ኡባ ካዎተꬃታ ግዶፈ፥ ፓራታን፥ ፓራ ጋረታን፥ ግማለታን፥ ባቁሎታንነ ጫነ ጋረታን ኡትስድ፥ ጎዳስ እሞ ኦꬅድ ታ ጌሻ ዙማ ቦላ የሩሳላመ ኤሀና።
ISA 66:21 ኤንታፈ እሶታ እሶታ ካህነነ ሌወ ኦꬃና” ያጌስ ጎዳይ።
ISA 66:22 “ታኒ መꬍዳ ኦራꬃ ሳሎትነ ኦራꬃ ሳእ ታ ስንꬃን ምንድ ደኤይሳዳ፥ ህንተ ኮቻይነ ህንተ ሱንꬃይ ምንድ ዳና።
ISA 66:23 አጌና ፄሮፐ ብድ አጌና ፄሮ ጋካናዉ፥ ሳምባታፐ ብድ ሳምባታ ጋካናዉ አሳ ኡባይ ታ ስንꬃን ጎይናናዉ ያና።
ISA 66:24 ኤንቲ ከይድ ብሸ፥ ታ ቦላ ማካልዳ አሳ አሀ በአና። ኤንታ ምያ ጉፁነይ ሀይቀና፤ ኤንታ ፁግያ ታማይ ቶኤና፤ ኤንቲ አሳ ኡባስ ሻትያባ ግዳና” ያጌስ ጎዳይ።
JER 1:1 ብንያመ ቢታን፥ አናቶታ ካታማን ደእያ ካህነታፐ እሱዋ ግድዳ ካልቀ ናኣ ኤርምያሳ ቃላይ ሀይሳ።
JER 1:2 አሞነ ናአይ፥ ይሁዳ ካዎይ እዮስያስ ካዎትዳ ታማነ ሄꬓንꬆ ላይꬃን ጎዳ ቃላይ ኤርምያሳኮ ይስ።
JER 1:3 እዮስያሳ ናአይ፥ ይሁዳ ካዎይ እዮአቄም ካዎትዳ ላይꬃታን ጎዳ ቃላይ ኤርምያሳኮ ይስ። ቃስ እዮስያሳ ናአይ፥ ሰደቅያስ ካዎትን፥ ታማነ እስ ላይꬅ ጋካናዉነ፥ እቻሻንꬆ አጌናን የሩሳላመ አሳይ ድኤትድ ብዳ ዎድያ ጋካናዉ ጎዳ ቃላይ እያኮ ይስ።
JER 1:4 ጎዳ ቃላይ ታኮ ሀይሳዳ ያግሸ ይስ፦
JER 1:5 “ኔኒ ነ አየ ኡሎን መታናፐ ስን ታ ነና ኤራይስ። ነ የለታናፐ ስን ታ ነና ዱማያዳ ዎꬃስ፤ ካዎተꬃታስ ነና ናበ ኦꬃዳ ሹማስ” ያግስ።
JER 1:6 ታኒ፥ “ኡባ ሃርያ ጎዳዉ፥ ታኒ ናአ ግድያ ግሾ ዋታዳ ኦደታነኮ ኤርከ” ያጋስ።
JER 1:7 ሽን ጎዳይ፥ “ ‘ታኒ ናአ ጎፓ’፤ ታኒ ነና ኪትያ በሳ ባዳ ታ ኪታ ኡባ አሳስ ኦዳ።
JER 1:8 ታኒ ነና አሻናዉ ኔራ ደእያ ግሾ ኤንታዉ ያዮፋ። ሀይሳ ኦደይ ጎዳ” ያግስ።
JER 1:9 ጎዳይ ባ ኩሽያ የድድ፥ ታ ዶና ቦችድ፥ “ሄኮ፤ ታኒ ታ ቃላ ነ ዶናን ዎꬃስ።
JER 1:10 ሾዳናዉነ ላላናዉ፥ ꬋይሳናዉነ ሽራ የጋናዉ፥ ኬፃናዉነ ቶካናዉ፥ አሳ ቦላነ ካዎተꬃታ ቦላ ታ ነና ሀች ሹማስ” ያግስ።
JER 1:11 ጎዳ ቃላይ ታኮ፥ “ኤርምያሳ፥ ኔኒ አይ በአይ?” ያግስ። ታኒ ዛራዳ፥ “ላዉዘ ምꬃ ፃምአ በአይስ” ያጋስ።
JER 1:12 ጎዳይ፥ “ኔኒ ልከ በአዳሳ። ታካ ታ ቃላ ፖላናዉ ሀይሳዳ በአይስ” ያግስ።
JER 1:13 ዛሪድ ጎዳይ፥ “ሀራ አይ በአይ” ያግስ። ታኒ ዛራዳ፥ “እስ ፐንትያ ፃሮይ ፑደሀ ባጋፈ እስ ባጋ ገድ ግድ ኡትዳይሳ በአይስ” ያጋስ።
JER 1:14 ጎዳይ፥ “ፑደሀ ባጋፈ ꬋዮይ ፖꬍድ፥ ቢታን ደእያ አሳ ኡባ ቦላ ጉካና።
JER 1:15 ታኒ ፑደሀ ባጋ ካዎተꬃታን ደእያ አሳ ኡባ ፄጋና ሀናይስ። ኤንታ ካዎት ይድ፥ የሩሳላመ ገልያ ፐንገታን፥ ድርሳ ዩሹዋንነ ይሁዳ ካታማታ ኡባን ባንታ አራታ ዎꬃና።
JER 1:16 ይሁዳ አሳይ ታና አግድ፥ ኢታ ኦꬅዳ ግሾ፥ ሀራ ፆሳታስ እፃነ ጩይስዳ ግሾነ ባንታ ኩሸን ኦꬅዳ ፆሳታ ጎይንዳ ግሾ ታ ፕርዳ ኤንታ ቦላ ኤሀስ።
JER 1:17 “ሽን ኔኒ ጊገታ! ደንዳዳ ታኒ ነና ኪትያባ ኡባ ኤንታዉ ኦዳ። ኤንታዉ ያዮፋ፤ ነ ኤንታዉ ያይኮ፥ ታ ነና ኤንታ ስንꬃን ጉጃዳ ያሽሳና።
JER 1:18 ሀች ታ ነና ሀ ቢታ ቦላ፥ ይሁዳ ካዎታ ቦላ፥ ሀላቃታ ቦላ፥ ካህነታ ቦላነ ሀ አሳ ቦላ ግምበትዳ ካታማዳ፥ ብራታ ቱሳዳነ ናሰ ብራታን ድርዳ ድርሳዳ ኦꬃዳ ምንꬃስ።
JER 1:19 ኤንቲ ኔራ ኦለታና፤ ሽን ታ አሻናዉ ኔራ ደእያ ግሾ ነና ፆኖኮና። ሀይሳ ኦደይ ጎዳ” ያግስ።
JER 2:1 ጎዳ ቃላይ ታኮ ሀይሳዳ ያግሸ ይስ፦
JER 2:2 “ባዳ የሩሳላመ አሳ ሀይꬃን ሀይሳዳ ያጋዳ አዋጃ። ነ ናአተꬃን ታዉ አይ መላ አማነትዳኮ፥ ነ ቡሮ መዳን ደእያ ዎደ ታና አይ መላ ሲቅዳኮ፥ ታ አኬካይስ። ኔኒ መላ ቢታን ዘረꬅ ዘረት ኤሮና ቢታን ታና ካላዳሳ።
JER 2:3 ሄ ዎደ እስራኤለይ ጎዳስ ጌሽ፤ እያዉ ባይራ ካꬃ መላ። እያፐ ምዳ ኡባይ ባላ ግዶሶና፤ ኤንታ ቦላ ꬋዮይ ይስ። ሄሳ ኦደይ ጎዳ” ያጌስ።
JER 2:4 ህንተኖ፥ ያይቆባ ናይቶ፥ እስራኤለ ዛረ፥ ኡባይ ጎዳ ቃላ ስእተ!
JER 2:5 ጎዳይ ያጌስ፤ ካሰ ህንተ አዋት ታፐ አይ ባላ ደምድ ታፐ ሃክድ ብዶና? ኤንቲ ፓꬆና ኤቃታ ጎይንድ ፓꬆናባ ግድዶሶና።
JER 2:6 ኤንቲ፥ “ኑና ግብፀፈ ከስዳ፥ መላ ቢታን ካለꬅዳ፥ አፎራነ መላ ቢታራ አꬅዳ፥ ኮሽነ ሳካና ꬉም ደእያ ቢታራ ፕንꬅዳ፥ ኦንካ አꬎናነ ደኦና በሳራ ካለꬅዳ ጎዳይ አዉን ደኢ?” ያግድ ኦይችቦኮና።
JER 2:7 ህንተ ሄ ቢታ አይፍያፐ ሎኡዋ ማና መላ ታ ህንተና አራዳ ቢታ ኤሀስ። ሽን ህንተ ይድ፥ ታ ቢታ ቱንስደታ፤ ታ ላታ ኢስደታ።
JER 2:8 ካህነት፥ “ጎዳይ አዉኔ?” ያግድ ኦይችቦኮና። ታ ህገይ ኤንታ ኩሸን ደእያ አሳት ታና ኤርቦኮና። ደርያ አይሰይሳት ታ ቦላ ማካልዶሶና። ናበት ባኣለ ኤቃ ሱንꬃን ትንብተ ኦድድ ፓꬆና ኤቃታ ጎይንዶሶና።
JER 2:9 “ሄሳ ግሾ፥ ታ ህንተራ ቡሮ ሞተታና፤ ህንተ ናይታ ናይታራ ሞተታና።
JER 2:10 አነ ዉሎሀ ባጋ ብድ፥ ዩሾይ አባን ተቀትዳ ቢታ ቆጵሮሳ ፄልተ፤ ዶሎሀ ባጋ ብድ ቀዳረ ቢታ አሰ ኪትድ ፆሞስተ። ሀይሳ መላባይ ሀይሳፈ ካሰ ሀንዳኮ በእተ።
JER 2:11 ኤንቲ ቱማ ፆሳታ ግዶና እፅኮካ ባ ፆሳታ ላምዳ ደረይ ኦኔ? ሽን ታ አሳይ ኤንታዉ ቦንቾ ግድዳ ታና ፓꬆና ኤቃታራ ላምስ።”
JER 2:12 “ሳሎቶ፥ ሀይሳን ማላለትተ፤ ዳጋምድ ኮኮርተ” ያጌስ ጎዳይ
JER 2:13 ታ አሳይ ናምኡ ናጋራ ኦꬅዶሶና፤ ሄስካ፥ ደኦ ፑልቶ ግድዳ ታና አግስ። ሃ ኦይካናዉ ዳንዳኦና፥ ፆኤ ኦላታ ባንታዉ ቦክዶሶና።
JER 2:14 “እስራኤለይ ሻመትዳ አይለዬ? ዎይኮ ሶን የለትዳ አይለዬ? ያትን፥ ሞርከት አይስ ዶኦዳ ሻንካቶና?
JER 2:15 እያ ሞርከት ጋሞዳ እያ ቦላ ጉዶሶና። ኤንቲ ባንታ ቃላ ꬎቁ ኦꬅድ ዳሮሶና። ኤንቲ እያ ቢታ ካይስ ከስዶሶና፤ እያ ካታማት ላለትድ አስ ባይና ሶ ግድዶሶና።
JER 2:16 ሄሳ ቦላካ መምፕሳነ ፃፍናሳ አሳት እያ ሁጵያ ሜድዶሶና።
JER 2:17 ነኖ እስራኤለ፥ ኦገ ኡባን ነና ካለꬅያ፥ ጎዳ ነ ፆሳ አጋዳ ሀይሳ ነ ቦላ ኤህዳይ ነና ግድኪ?
JER 2:18 ናይለ ሻፋፐ ሃ ኡያናዉ ግብፀ ቡስ ነና አይ ማዳኔ? ኤፍራፂሳ ሻፋፐ ሃ ኡያናዉ አሶረ ቡስ ነና አይ ማዳኔ?
JER 2:19 ህዛ ነ ኢታተꬃይ ነና ሴራና፤ ነ ታና ካድዳይስ ነ ቦላ ፕርዳና። ነ ታና ጎዳ ነ ፆሳ አግዳይስ አይ መላ ኢታነ ጫሞ ግድያኮ አኬካ በአ። ነ ታዉ ያይያ ያሻይ ባዋ” ያጌስ ጎዳይ፥ ኡባፈ ዎልቃማ ፆሳይ።
JER 2:20 “ታ ነ ቃምባራ ዳሮ ዎደፐ ካሰ መንꬃስ፤ ነ ቃሹዋ ዱꬃስ። ኔኒ፥ ‘ታ ነና ጎይንከ’ ያጋዳሳ። ደረ ቦላነ ዳሻ ምꬃ ጋርሳን ላይማታናዉ ዝንአዳሳ።
JER 2:21 ታ ነና ዶረትዳ ዘረꬃፈ ኤካዳ፥ ሎኦ ዎይነ ጋደን ቶካስ። ያትን፥ ዋናዳ፥ ጉየ ስማዳ፥ ዎራን ዶልዳ፥ ኢታ ዎይነ ግዳዲ?” ያጌስ ጎዳይ።
JER 2:22 “ነ ሳንጌኖራ ሜጨትያኮካ፥ ሳሙናን ጎርፐትያኮካ ነ ቅታይ ታ ስንꬃና።
JER 2:23 ኔኒ ዋናዳ፥ ‘ታ ቱናብከ፤ ባኣለ ኤቃ ጎይናብከ’ ጋይ? ኔኒ ዛንጋራን ሀንዳባ ፄላ፤ ነ ኦꬅዳባ አኬካ። ኔኒ ያነ ሃነ ዎፅያ ዚታ ከይዳ ግማለ መላ።
JER 2:24 ኔኒ ባዞ ሜዘትዳ፥ ዚታ ዎደ ጫርኮ ስንገꬅያ ሀረ መላ። እ አሞይ ደንድን፥ ኦን እዮ ተቃናዉ ዳንዳኢ? እያ ባዉ ኮያዳ ጋክያ ግሾ አይ አደ ሀረይካ እዮ ደማናዉ ዳቡረና።
JER 2:25 ነኖ፥ እስራኤለ፥ ነ ጫማይ ዉራና ጋካናዉ ነ ኮቶኖይ መላና ጋካናዉ ሀራ ፆሳታ ጌዶ ዎፆፋ። ሽን ኔኒ፥ ‘አቶ፥ ሄስ ታና ማደና። ታኒ እማꬃ ፆሳታ ዶሳስ፤ ታኒ ኤንታ ጎይናና’ ያጋዳሳ።
JER 2:26 “ካይሶይ ኦይከትዳ ዎደ ዬላተይሳዳ እስራኤለ አሳይ ዬላትዶሶና፤ ኤንቲ፥ ኤንታ ካዎት፥ ኤንታ ሀላቃት፥ ኤንታ ካህነትነ ኤንታ ናበት ኡባይ ዬላታና።
JER 2:27 ኤንቲ ምꬃኮ፥ ‘ነ ታ አዋ’ ያጎሶና፤ ሹቻ፥ ‘ታና ነ የላዳሳ ያጎሶና። ኤንቲ ባንታ ሶምኡዋ አግድ፥ ባንታ ዞኩዋ ዛርዶሶና። ሽን ኤንቲ መቶ ዎደ ኑና አሻ!’ ያጎሶና።
JER 2:28 ሽን ህንተ፥ ህንተዉ መꬍዳ ፆሳት አዉን ደኦና? ህንተ መቶን ገልያ ዎደ ህንተና አሻናዉ ዳንዳእኮ ደንድድ ህንተና አሾ። ህንተኖ፥ ይሁዳ አሳዉ፥ ህንተ ፆሳት ህንተ ካታማታ መላ ዳሮ” ያጌስ ጎዳይ።
JER 2:29 “ህንተ ታራ አይስ ሞተተቲ? ህንተ ኡባይ ታዉ ማካልደታ።
JER 2:30 ታ ህንተና ጮ ሴራስ፤ ህንተ ህንተ ኦሱዋፐ ስምያባ ግደከታ። ኮሻትዳ ጋሞዳ ህንተ ማሻይ ህንተ ናበታ ምስ” ያጌስ ጎዳይ።
JER 2:31 ህንተኖ፥ ሀ ዎድያ የለታዉ፥ ጎዳ ቃላ ስእተ። ታ እስራኤለታስ ባዞ ዎይኮ ሳካና ꬉማን ደእያ ቢታ ግዳድናዬ? ያትን፥ አይስ ታ አሳይ፥ “ኑኒ ኑ ሸነዳ ባና፤ ኔኮ ስሞኮ” ያግዶና?
JER 2:32 ጌላእያ ባ አሌቁዋ፥ ሙሹርያ ባ ማኡዋ ዶጋይ? ሽን ታ አሳይ ታና ታይቦይ ባይና ጋላስ ዶግዶሶና።
JER 2:33 ኔኒ ነ ላገꬆታ ጌዶ ዎꬃ ዋናዳ ሜዘታዲ? ዳሮ ኢታ ማጫሳት ነ ኦግያ ታማሮሶና።
JER 2:34 መንꬅድ ገልሽን ኦይክዳ አሳ ሱꬃን ግዶናሽን ፅሎ ማንቆታ ሱꬃን ነ ማኦይ ኢትስ። ኔኒ ሄሳ ኡባ ኦꬃዳካ፥
JER 2:35 ኔኒ፥ “ ‘ታኒ ፅሎ፤ ቱማ ጎዳይ ታ ቦላ ሀንቀተና፤ ታኒ ናጋራ ኦꬃብከ’ ግያ ግሾ ታ ነ ቦላ ፕርዳና።
JER 2:36 ኔኒ ነ ኦግያ ላማሸ አይስ ዎፃይ? ነና አሶረይ ዬላይዳይሳዳ ግብፀይ ዬላያና።
JER 2:37 ጎዳይ ነ አማነተይሳታ ካዉሽዳ ግሾነ ነ ኤንታፈ ማደ ደሞና ግሾ ነ ሁጵያ ኦይካዳ ያፐ ከያና” ያጌስ ጎዳይ።
JER 3:1 “እስ አስ ባ ማችዉ የድን፥ እያ ባዳ ሀራ አዝና ገልኮ፥ ሄ አደይ እዮ ዛሪ? ዛርኮ ሄ ቢታይ ቱና ግደኔ? ሽን ነ ላይማታናዉ ኮያዳ ዳሮ ላገꬆታራ ደአዳሳ፤ ሀእ ኔኒ ታኮ ስማኔ? ያጌስ ጎዳይ
JER 3:2 ꬎቁ ጋዳ አይኮይ ባይና ደረታ ፄላ። ላይማታናዉ ነ ዝንአቦና በሲ ደኢ? አራበ አስ መላ ቢታን ኡተይሳዳ፥ ኔኒ ላገꬆታ ናጋዳ ኦገ ዶናን ኡታዳሳ። ነ ላይማተꬃንነ ነ ኢታተꬃን ቢታ ቱንሳዳሳ።
JER 3:3 ሄሳ ግሾ፥ ቶርቸ እራይ ተቀትስ፤ ስላ እራይካ ቡኮና እፅስ። ሄስ ሀንንካ፥ ነዉ ላይማተꬃ መꬎይ ደኤስ፤ ነ ዬላቶና እፃዳሳ።
JER 3:4 ሀእ ኔኒ፥ ‘ታ አዋዉ፥ ታ ናአተꬃ ላግያዉ ነ ታና ሲቃሳ።
JER 3:5 ነ ኡባ ዎደ ይሎታይ? ነ ሀንቆይ መርናዉ አገኔ?’ ያጋሳ። ሽን ነ ኦꬃናዉ ዳንዳእያ ኢታ ኡባ ኦꬃሳ” ያጌስ ጎዳይ።
JER 3:6 ካዋ እዮስያሳ ዎደ ጎዳይ ታኮ ሀይሳዳ ያግስ፦ “አማኖይ ባይና እስራኤለይ ኦꬅዳባ ነ በአዲ? እያ ደረ ቦላነ ዳሻ ምꬃ ኡባ ጋርስ ባዳ ያን ላይማታሱ።
JER 3:7 እያ ሀይሳ ኡባ ኦꬅንካ ታኮ ስማንደ ጋዳ ቆፓስ፥ ሽን ስማቡኩ። እ ምችያ፥ አማነቶና ይሁድካ ሄሳ በአሱ።
JER 3:8 አማኖይ ባይና እስራኤለይ ዳሮ ዎደ ላይማትዳ ግሾ ፕርማ እማዳ እዮ የዳስ። ሄስ ሀንንካ እስራኤለ ምችያ፥ አማነቶና ይሁድ፥ ያዮናይሳ ታ በአስ፤ እያካ ከያዳ ላይማታሱ።
JER 3:9 ላይማተꬃይ እዉ ላፋባ ግድያ ግሾ፥ ምꬃራነ ሹቻራ ላይማታዳ ቢታ ቱንሳሱ።
JER 3:10 ሄ ኡባን እ ምችያ፥ አማነቶና ይሁድ ስምዳባ ዳናዉሱፐ አትሽን፥ ኩመꬃ ዎዛናፐ ታኮ ስማቡኩ” ያጌስ ጎዳይ።
JER 3:11 “አማነቶና ይሁዳፐ አማኖይ ባይና እስራኤለይ ፅሎ።
JER 3:12 ባዳ ፑደሀ ባጋን ደእያ አሳስ ሀይሳዳ ያጋዳ አዋጃ፦ ‘አማኖይ ባይና እስራኤለ፥ ስማ! ታኒ ማሮት ኩምዳ ጎዳ ግድያ ግሾ ነና ኢታ አይፈን ፄልከ። መርናዉ ሀንቀትከ’።
JER 3:13 ግዶሽን፥ ‘ታኒ ጎዳ፥ ታ ፆሳ ቦላ ማካላስ። አላጋ ፆሳታራ ዳሻ ምꬃ ጋርሳን ላይማታስ። ነ ቃላ ኪተታብከ’ ጋዳ ነ ቆሁዋ አማና” ያጌስ ጎዳይ።
JER 3:14 “ህንተኖ፥ አማነቶና አሳዉ፥ ታ ህንተዉ አዝና ግድያ ግሾ ስምተ። ታኒ እስ ካታማፐ እስኖ፥ እስ ያራፐ ናምአ ዶራ ኤካዳ ፅዮነ ኤሀና።
JER 3:15 ታ ዎዛናዳ ህንተና ሄምያ ሄንꬃንቾታ ህንተዉ እማና። ኤንቲ ህንተና ኤራተꬃንነ አኬካን ሄማና” ያጌስ ጎዳይ።
JER 3:16 “ሄ ጋላሳታን ህንተ ሄ ቢታን ዳርያ ዎደ አሳይ፥ ‘ጎዳ ጫቆ ታቦትያ’ ግድ ኦደቶኮና። እ ኤንታዉ ቆፈተና፤ ሀሳየተና፤ ባይናይስ ኤንታዉ ኤረተና፤ ሀርካ ኦሰተና።
JER 3:17 ሄ ዎደ ኤንቲ የሩሳላመ፥ ‘ጎዳ አራታ’ ግድ ፄጋና። ካዎተꬃ ኡባፈ አሳይ ጎዳ ሱንꬃ ቦንቻናዉ የሩሳላመ ሺቃና። ሄሳፈ ጉየ፥ ኤንቲ ባንታ ዎዛና ኢታተꬃ ካሎኮና።
JER 3:18 ሄ ዎደ ይሁዳ አሳይነ እስራኤለ አሳይ ጋሄትድ ፑደሀ ባጋ ቢታፈ ታ ህንተ አዋታ ላትስዳ ቢታ እስፈ ያና” ያጌስ ጎዳይ።
JER 3:19 “ታ ህንተና ናአꬆ ኤካዳ፥ ቢታ ኡባፈ ሎእያነ አራዳ ቢታ ህንተዉ እማናዉ ኮያስ። ‘ታ አዋዉ’ ግድ ፄጋናነ ታና ካላና ጋዳ ቆፓስ።
JER 3:20 ሽን እስራኤለ አሳዉ፥ ህንተ ባ አዝናስ አማነቶና ማችዳ ታዉ አማነትበከታ” ያጌስ ጎዳይ።
JER 3:21 ኤንቲ ባንታ ኦግያ ጌላይዳ ግሾነ ባንታ ፆሳ አግዳ ግሾ ማንቆ ዙማታፐ እስራኤለ አሳ ዋሶይነ ዬሆይ ስኤቴስ።
JER 3:22 “ህንተኖ፥ አማኖይ ባይና አሳዉ፥ ታኮ ስምተ። ህንተ አማነታና መላ ታ ህንተና ፓꬃና” ያጌስ ጎዳይ። ህንተ፥ “ኔኒ፥ ኑ ጎዳ ፆሳ ግድያ ግሾ ኔኮ ስማና።
JER 3:23 ደረታ ቦላነ ዙማታ ቦላ ኤቃ ጎይኖይ ቱማ ጭሞ። ቱማ እስራኤለ አቶተꬃይ ጎዳ፥ ኑ ፆሳ።
JER 3:24 ኑ ናአተꬃፈ ዶምን፥ ኑ አዋት ዳቡርድ ደምዳ፥ ኤንታ ዶርሳነ መህያ፥ ኤንታ ማጫነ አደ ናይታ ዬላይያ ኤቃት ምድ ꬋይስዶሶና።
JER 3:25 ናአተꬃፈ ሀች ጋካናዉ፥ ኑነ ኑ አዋት ጎዳ ኑ ፆሳ ቦላ ናጋራ ኦꬅዳ። ጎዳ ኑ ፆሳ ቃላ ኪተትቦኮ። ሄሳ ግሾ፥ ኑኒ ዬላን ጉፋናናዉ ቃስ ካዉሻተꬅ አፍላዳ ኑና ካሞ” ያጎሶና።
JER 4:1 ጎዳይ ያጌስ፥ “እስራኤለ አሳዉ፥ ስምኮ፥ ታኮ ስምተ። ህንተ ታና ሻትያ ህንተ ኤቃታ ታ ስንꬃፈ ድግኮ፥ ታ ኦግያፐ ካረ ከዮና እፅኮ፥
JER 4:2 ቱማን፥ ሱረተꬃንነ ፅሎተꬃን፥ ‘ደኦ ፆሳይ ኤርያ መላ’ ግድ ጫቅኮ፥ ሄ ዎደ ካዎተꬃት እያን አንጀታናነ እያን ጬቃና።”
JER 4:3 ጎዳይ ይሁዳነ የሩሳላመ አሳኮ ሀይሳዳ ያጌስ፦ “ህንተ ኦ ቢታ ጎይተ፤ አጉንꬃ ቦላ ዘሮፕተ።
JER 4:4 ህንተኖ፥ ይሁዳነ የሩሳላመ አሳዉ፥ ህንተ ፆሳስ ቃፃረትተ፤ ህንተ ዎዛና ሾሁዋ ድግተ። ሄስ ሀኖና እፅኮ ህንተ ኢታተꬃ ግሾ፥ ታ ሀንቆይ ታማዳ ኤፃና፤ እያ ኦንካ ቶይሳናዉ ዳንዳኤና” ያጌስ ጎዳይ።
JER 4:5 ይሁዳን አዋጅተ፤ የሩሳላመን ሞይዘ ፑንተ! ህንተ ቃላ ꬎቁ ኦꬅድ ሀይሳዳ ግድ ዋስተ! እስፈ ሺቅድ ግምበትዳ ካታማታኮ የꬍተ።
JER 4:6 አሳይ ፅዮነ ባና መላ ማልተ! ህንተ ሸምፑዋ አሻናዉ ጋምኦና ባቃትተ! ጋምኦፍተ! ታ ፑደሀ ባጋፈ ጋዶነ ꬋዮ ቢታ ቦላ ኤሀና ሀናይስ።
JER 4:7 ጋሞይ ዎራፐ ከየይሳዳ ካዎተꬃታ ꬋይሰይስ ባ በሳፈ ደንድድ ህንተ ቢታ ꬋይሳናዉ ይስ። ህንተ ካታማት ላለትድ ባይሳ ግዳና።
JER 4:8 ሄሳ ግሾ፥ ካዮ ማኦ ማእድ፥ “ዎ! ዎ!” ግድ ዘሌልተነ ዬክተ። ጎዳ ሱልያ ሀንቆይ ኑ ቦላፈ ክችቤና።
JER 4:9 “ሄ ዎደ ካዋነ ሀላቃታ ዎዛናይ ትልአና፤ ካህነት ዳጋማና፤ ናበት ህርጋና” ያጌስ ጎዳይ።
JER 4:10 ታኒ፥ “ኡባ ሃርያ ጎዳዉ፥ ማሽ ኤንታ ቆን ዎꬍያ ዎደ ‘ህንተዉ ሳእ ሳሮ ግዳና’ ያጋዳ ሀ አሳነ የሩሳላመ አይስ ጭማይ” ያጋስ።
JER 4:11 ሄ ዎደ ሀ አሳስነ የሩሳላመስ ሀይሳዳ ያግድ ኦደታና፦ “መላ ቢታን ደእያ አይኮይ ባይና ꬎቃ ደረታፐ ምችያ ጫርኮይ ታ አሳ ቦላ ጫርካና፤ ሄስ ካꬅ ጌሻናሳ ግደና።
JER 4:12 ታ ኪታን ዎልቃማ ጫርኮይ ጫርካና፤ ታ ኤንታ ፕርዳና” ጌስ።
JER 4:13 ሄኮ፥ ሞርከይ ሻራዳ ከዬስ። እያ ፓራ ጋረት ጎተ መላ፤ እያ ፓራት አርጋንꬃፈ አꬍድ ኤሶቶሶና። ኑና አየ! ኑ ꬋይዳ!
JER 4:14 “ነኖ የሩሳላመ፥ አታና መላ ነ ዎዛና ሜጫዳ ኢታተꬃፈ ጌያ። ኢታ ቆፋይ ነ ዎዛናን አዉደ ጋካናዉ ጋምአኔ?
JER 4:15 ዳነ ካታማፐነ ኤፍሬማ ዙማፐ ይዳይሳት ኢታባ አዋጆሶና።
JER 4:16 ይሁዳ ካታማታ ቦላ ኦላ አዋጅያ ኦላንቾት ሃሆ ቢታፈ ዩሳ ቦላ ደኦሶና ግድ ካዎተꬃታስ ኦድተ፤ የሩሳላመስካ አዋጅተ።
JER 4:17 እ ታ ቦላ ማካልዳ ግሾ፥ ጋደን ደእያ ካꬃ ናገይሳዳ ኦላንቾት ይሁዳ ዩሹዋ ተቃና” ያጌስ ጎዳይ።
JER 4:18 ይሁዳ አሳዉ፥ ህንተ ሀኖይነ ህንተ ኦሶይ ሀይሳ ኡባ ህንተ ቦላ ኤህስ። ሀይስ ህንተዉ ሴራ። እ አይ መላ ጫም! ህንተ ዎዛና አይ መላ ጫድ!
JER 4:19 ታና አየ! ታ ሀይሳ ዋታ ዳንዳአነ! አየ ታ ዎዛና! ታ ዎዛናይ ኮኮሬስ፤ ታ ስእ ጋናዉ ዳንዳእከ። ታኒ ሞይዘ ፑኖነ ኦላ ግርስ ስእዳ ግሾ ስእ ጋናዉ ዳንዳእከ።
JER 4:20 ꬋዮይ ꬋዮ ቦላ ዬስ፤ ቢታይ ኩመꬅ ꬋይስ። ታ ዱንካነይ ኩንድስ፤ ታ ሻቃራይካ ላለትስ።
JER 4:21 ታኒ አዉደ ጋካናዉ ኦላ ማላ በአኔ? አዉደ ጋካናዉ ሞይዘ ፑኖ ስአኔ?
JER 4:22 “ታ አሳይ ኤያ፤ ኤንቲ ታና ኤሮኮና። ኤንቲ ቆፍ ባይና ናይታ መላ፤ ኤንታዉ አኬክ ባዋ። ኤንቲ ኢታባ ኦꬃናዉ ጭንጫ፤ ሽን ሎኦባ ኦꬅድ ኤሮኮና” ያጌስ ጎዳይ።
JER 4:23 “ታኒ ሳኣ በእያ ዎደ፥ ሳእ አይኮይካ ባይና ባይሳ ግድዳይሳ በአስ። ቃስ ሳሎታ ፄልያ ዎደ፥ ፖኦይ ባይናይሳ ፄላስ።
JER 4:24 ታ ደረታ ፄልያ ዎደ ኤንቲ ቃፆሶና፤ ታኒ ዙማታ በእያ ዎደ ያ ሃ ዎፆሶና።
JER 4:25 ታ ፄልያ ዎደ አስ ባዋ፤ ሳሎ ካፎት ኡባይ ፓልድ ባቃትዶሶና።
JER 4:26 ታ ፄልያ ዎደ አራዳ ቢታይ ቃኤ ግድዳይሳ በአስ። ጎዳ ስንꬃንነ እያ ሱልያ ሀንቁዋ ስንꬃን ሄ ቢታ ካታማት ላለትዶሶና።
JER 4:27 “ቢታይ ꬋያና፤ ሽን ታ እያ ኩመꬅ ꬋይስከ።
JER 4:28 ሳአይ ዬካና፤ ሳሎይ ꬉማና። ታ ኦዳስ፤ ማርስከ። ታ ቆፋ ቃቻስ፤ አግከ” ያጌስ ጎዳይ።
JER 4:29 ፓራ አሳታነ ዶንገ አሳታ ዋሱዋን፥ አሳይ ካታማ ኡባፈ ባቃታና። ባጋት ዎፅድ ዎራ ገላና፥ ባጋት ዛላ ቦላ ከያና። ካታማ ኡባይ ባይስ ግድን ደእያ አስ ꬋያና።
JER 4:30 ነኖ፥ ꬋዮስ አትዳረ ነ ዋናይ? ነ ዞኦ ማኡዋ አይስ ማአዲ? ዎርቃ አሌቆ አይስ ዎꬃዲ? ነ አይፍያ ስጵንꬃ አይስ ትያይ? ኔኒ ጮ ነና ሎይꬃሳ፤ ነ ላገꬆት ነና ካꬍዶሶና፤ ኤንቲ ነና ዎꬋናዉ ኮዮሶና።
JER 4:31 ታኒ እቀꬅ ኦይክዳ ማጫስ ዋስያ ዋሱዋ መላ ስአስ። እ ዋሶይ ኮይሮ ናአ የልያ ማጫሳ ዋሶ መላ። ሄ ዋሶይ፥ የሩሳላመይ ሸምፖ ꬋያዳ፥ ባ ኩሽያ ምጫዳ፥ “ታና አየ! ታ ꬋያስ! ታና ዎꬋናዉ ሀኖሶና!” ያጋዳ ዋስያ ዋሱዋ።
JER 5:1 “አነ የሩሳላመ ኦግያ ቦላ ከይተ፤ ፑደነ ዱገ ሄመትተ፤ እያ ዩሹዋ ፄልተነ አኬክተ፤ እያ ጉታራንካ ኮይተ። ፅሎ ፕርድያነ ቱማ ኮያ እስ አስ ህንተ ደምኮ፥ ታ የሩሳላመ ማራና።
JER 5:2 ኤንቲ፥ ‘ደኦ ጎዳይ ኤርያ መላ’ ግድ ጫቅኮካ፥ ዎርዶ ጫቆሶና” ያጌስ ጎዳይ።
JER 5:3 አቤት ጎዳዉ፥ ነ አይፈት ቱማ ፄሎኮናዬ? ነ ኤንታ ሾጫዳሳ ሽን ኤንታ ሳክቤና። ነ ኤንታ መንረꬃዳሳ ሽን ኤንቲ ስሞና እፅዶሶና። ኤንቲ ባንታ ሶምኡዋ ዛላፈ አꬅድ ምንꬅድ ባንታ ናጋራፐ ስሞና እፅዶሶና።
JER 5:4 ሄሳፈ ጉየ፥ ታኒ፥ “ሀይሳቲ ጎዳ ኦግያነ ባንታ ፆሳ ህግያ ኤሮና ግሾ፥ ማንቆነ ኤያ” ያጋዳ ቆፓስ።
JER 5:5 ህዛ፥ ታ ግታ አሳታኮ ባዳ ኤንታዉ ኦዳና። ጎዳ ኦግያነ ባንታ ፆሳ ህግያ ኤሮሶና። ሽን ኤንቲ ኡባይ እያ ቃምባራ መንꬅዶሶና፤ እያ ቃሹዋካ ዱꬅዶሶና።
JER 5:6 ኤንታ ማካላይነ ኤንታ ኩንደꬃይ ዳሮ ግድያ ግሾ፥ ጋሞይ ዎራፐ ከይድ፥ ኤንታ ዎꬋና። ሱꬉመይ ባዞፈ ከይድ፥ ኤንታ ማና። ማሄይ ኤንታ ካታማታ ሆክድ ናጋና። ሄ ካታማታፐ ከይያ ኡባይ ፑዘታና።
JER 5:7 “ታኒ ህንተ ናጋራ አይስ አቶ ጎ? ህንተ ናይት ታና አግድ፥ ዎርዶ ፆሳታን ጫቅዶሶና። ታኒ ኤንታ ሙዛዳ ካልሳስ፥ ሽን ኤንቲ ላይማትዶሶና፤ ኤንታ ኬꬃን አቅዶሶና።
JER 5:8 ኤንቲ ꬊከትዳ ኮርማ ፓራዳ፥ ሀራ አሳ ማቾ ላገꬃናዉ ስንገꬆሶና።
JER 5:9 ቱማ ታ ሀ ኦሶታ ግሾ፥ ኤንታ ሴራናዉ በስክና? ሀይሳ መላ ካዎተꬃ ቦላ ታ ሃሉዋ ከይክና?” ያጌስ ጎዳይ።
JER 5:10 “እ ዎይነ ጋድያ ግዶ ገልድ ኢስተ፥ ሽን ኩመꬅ ꬋይሶፍተ። ኤንቲ ጎዳባ ግዶና ግሾ እ ታሸታ ካርድ የግተ።
JER 5:11 እስራኤለ አሳይነ ይሁዳ አሳይ ኩመꬅ ካድዶሶና” ያጌስ ጎዳይ።
JER 5:12 ኤንቲ ሀይሳዳ ግድ ጎዳ ቦላ ዎርዶ ኦደትዶሶና፦ “እ አይኮካ ኦና፤ ቆህያባይ አይብካ ኑ ቦላ ዬና። ሞርከ ማሻይ ዎይኮ ኮሽ ኑና ፖሎ ደመና።
JER 5:13 ናበት ጫርኮ መላ፤ ኤንታን ፆሳ ቃላይ ባዋ። ሄሳ ግሾ፥ ኤንቲ ግያባ ኡባይ ኤንታ ጋኮ” ያጎሶና።
JER 5:14 ሄሳ ግሾ፥ እስራኤለ አሳኮ፥ “ኤንቲ ሀ ቃላ ኦድዳ ግሾ ታኒ ታ ቃላ ነ ዶናን ታማ ኦꬃና፤ ሀ አሳይ ምꬅ ግዳና፤ ታማይካ ኤንታ ማና” ያጌስ ጎዳይ፥ ኡባፈ ዎልቃማ ፆሳይ።
JER 5:15 ጎዳይ እስራኤለ አሳኮ፥ “ህንተኖ፥ እስራኤለ አሳዉ፥ ታ ህንተ ቦላ ሃሆ ቢታፈ እስ ካዎተꬅ ኤሀና። ኤንታ ቃላ ህንተ ኤሮና፥ ኤንታ ኦዳይ ህንተዉ ገሎና ዎልቃማነ በን ካዎተꬅ።
JER 5:16 ኤንታ ዶንገ ፓልኤ ሾሆይ ዶያ ዱፎ መላ፤ ኤንታ ኦላንቾት ዎልቃማ።
JER 5:17 ኤንቲ ህንተ ካꬃነ ህንተ ጎሻ አይፍያ ማና፤ ህንተ አደ ናይታነ ማጫ ናይታ ዎꬋና፤ ህንተ ዶርሳነ መህያ ቦንቃና፤ ህንተ ዎይንያነ ባላሰ ምꬃ ꬋይሳና። ህንተ አማነትያ፥ ግምበትዳ ካታማታ ባንታ ማሻን ኦልድ ꬋይሳና” ያጌስ።
JER 5:18 “ግዶሽን፥ ሄ ጋላሳታን ግድኮካ፥ ታኒ ታ አሳ ኩመꬅ ꬋይስከ” ያጌስ ጎዳይ
JER 5:19 አሳይ ነና፥ “ ‘ጎዳይ ኑ ፆሳይ ኑ ቦላ ሀይሳ ኡባ አይስ ኦꬅዴ?’ ግድ ኦይችኮ፥ ነ ኤንታኮ፥ ‘ህንተ ታና አግድ፥ ህንተ ቢታን እማꬃ ፆሳታ ጎይንዳይሳዳ፥ ህንተካ አሳ ቢታን ሀራታስ ሀጋዛና’ ያጋ” ያግስ።
JER 5:20 “ሀይሳ ያይቆባ አሳስ ኦዳ፤ ይሁዳ ቢታን አዋጃ።
JER 5:21 ህንተኖ፥ አይፈይ ደእሽን በኦናይሳቶ፥ ሀይꬅ ደእሽን ስኦናይሳቶ፥ ኤያነ አኬኮና አሳዉ ሀይሳ ስእተ!
JER 5:22 ህንተ ታዉ ያያናዉ በሰኔ? ህንተ ታ ስንꬃን ኮኮራናዉ ኮሸኔ? ያጌስ ጎዳይ። አባይ አꬍድ ቦና መላ ሻፈ እያዉ ዛዋ ኦꬅዳይ ታና? ዙለይ ሱግኮካ እያፐ አꬋናዉ ዳንዳኤና፤ ሆበይ ደንድኮካ ካንꬅድ አና።
JER 5:23 ሽን ሀ አሳስ ሙመነ ማካላ ዎዛን ደኤስ። ኤንቲ ሀራ ሶ ስሚድ ዎራ ብዶሶና።
JER 5:24 ኤንቲ ባንታ ዎዛናን፥ ‘ኑስ ስላ እራነ ቶርቸ እራ ዎደን ዎደን እምያ፥ ካꬃ ሺሽያ ዎደ ኑስ እምያ ጎዳ አነ ያዮስ’ ያግቦኮና።
JER 5:25 ህንተ ባላይ ሄሳ ተቅስ፤ ህንተ ናጋራይ ህንተና ሎኦባፐ አሽስ” ያጌስ።
JER 5:26 “ታ አሳ ግዶን ኢታ አሳት ደኦሶና። ካፎ ኦይካናዉ ናግያ አሳዳ ሆክድ ናጎሶና። ኤንቲ ግተ የግድ አሳ ኦይኮሶና።
JER 5:27 ካፎ ኬꬃን ካፎይ ኩምዳዳ፥ ኤንታ ኬꬃይ ጭሞን ኩምስ፤ ኤንቲ ዎልቃማነ ዱረ።
JER 5:28 ኤንቲ ኦርደነ ሞꬎ ግድዶሶና፤ ኤንታ ኢታ ኦሱዋስ ዛው ባዋ። ኤንቲ ይኦ ናይታ ግሾ ሞተቶኮና፤ ማንቆታስ ሱረ ፕርድቦኮና።
JER 5:29 ያትን፥ ታኒ ሄሳ ግሾ ኤንታ ሴራናዉ በሰኔ? ሀይሳ መላ ካዎተꬃ ቦላ ታ ሃሉዋ ከያናዉ በሰኔ?” ያጌስ ጎዳይ።
JER 5:30 “ዳሮ ኢታባይነ ዳጋንꬅያባይ ቢታ ቦላ ሀንስ።
JER 5:31 ናበት ዎርዶ ኦዶሶና፤ ካህነት ኤንታ ዞርያን አይሶሶና። ታ አሳይካ ሄሳ መላባ ዶሴስ። ሽን ዉርሰꬃን ህንተ ዋናኔ?” ያጌስ ጎዳይ።
JER 6:1 ህንተኖ፥ ብንያመ አሳዉ፥ ህንተ ሸምፑዋ አሻናዉ ባቃትተ! የሩሳላመፐ ከይተ! ታቁሄ ካታማን ሞይዘ ፑንተ! ቤት-ሀካሬማን ማላ በስተ! ፑደሀ ባጋፈ ኢታባይነ ግታ ꬋዮይ ያና ሀኔስ።
JER 6:2 ታኒ ሎእያነ ኡፋይስያ ፅዮነ ካታማታ ꬋይሳና።
JER 6:3 ሄንꬃንቾት ባንታ ዉድያ ኤክድ ያ ያና። እያ ዩሹዋን ባንታ ዱንካንያ ቶካና፤ እሶይ እሶይ ባ ዉድያ ሄማና።
JER 6:4 “የሩሳላመ ኦላናዉ ጊገትተ! ደንድተ! እያ ሴታ ጋላስ ኦሎስ። ሽን አየ! ሳእ ቃሜስ፤ ኦማርሳ ኩያይ አዱቅ አዱቅ ቤስ።
JER 6:5 ሄሳ ግሾ፥ ደንድተ! ቃማ ኦልድ እያ ሚፃ ላሎስ” ያግድ ማቀቶሶና።
JER 6:6 ኡባፈ ዎልቃማ ጎዳይ ሀይሳዳ ያጌስ፦ “ምꬃታ ቃንፅተ። የሩሳላመ ግምብያ ምየን ቢታ ዶርተ። ሄ ካታማን ናቆይ ኩምዳ ግሾ እ ሴረታናዉ በሴስ።
JER 6:7 ሃꬃ ኦል ሃ ፑልተይሳዳ እካ ባ ኢታተꬃ ፑልቴስ። ማካልነ ꬋዮይ እያ ግዶን ስኤቴስ፤ እያ ሀርገይነ ማዱንꬃይ ታ ስንꬃና።
JER 6:8 ነኖ የሩሳላመ፥ ታ ሴራ ኤካ። አካይ፥ ጊኮ፥ ታ ኔፐ ሻከታናነ ነ ቢታ አስ ባይና ባይሳ ከሳና” ያጌስ።
JER 6:9 “ዎይነ ፖሽልያዳ፥ እስራኤለ አሳ ግዶፈ አትዳይሳታ ሎይꬅድ ፖሽልተ። ዎይነ ቆርያ አሳዳ፥ ህንተ ኩሽያ ዳሻታ ግዶ ዛሪድ የድተ” ያጌስ ኡባፈ ዎልቃማ ጎዳይ።
JER 6:10 “ታ ኦደስ ኦዶ? ኦና ሴሮ? ኦን ስአኔ? ኤንቲ ስኦና መላ ኤንታ ሀይꬃይ ቱልስ። ጎዳ ቃላይ ኤንታዉ ሚቻስ አትስ፤ ኤንቲ እያን ኡፋይቶኮና።
JER 6:11 ጎዳ ሀንቆይ ታናን ኩምስ። ታ ሀ ሸንያ ተቃናዉ ዳንዳእከ። ኦገ ቦላ ደእያ ዮጋ ናይታ ቦላነ ሺቅዳ ናአተꬃታ ቦላ ታ ሀንቁዋ ትጋ። ማችያ፥ አዝናይነ ጭምዳ አሳ ኡባይ አቶኮና።
JER 6:12 ታኒ ሄ ቢታን ደኤይሳታ ቦላ ታ ኩሽያ የድያ ዎደ ኤንታ ኬꬃይ፥ ኤንታ ጎሻይነ ኤንታ ማቸት ኡባይ ሀራታስ እመታና” ያጌስ።
JER 6:13 “ጉꬃፈ ግታ ጋካናዉ ኡባይ ባና ጎእያባ ኮዬስ። ናበትነ ካህነት ኡባይ ጭሞሶና።
JER 6:14 ታ አሳ ማዱንꬃ ፓꬆናባ ኦꬅድ ጉꬃ ꬋለ ዎꬆሶና። ሳሮይ ባይናሽን፥ ‘ሳሮ፤ ሳሮ!’ ያጎሶና።
JER 6:15 ኤንቲ ሀ ሻትያ ኦሱዋ ኦꬅድ ዬላትዶና? አካይ፥ ኤንቲ ኩመꬅ ዬላትቦኮና፤ ኤንቲ ዬል አይበኮ ኤሮኮና። ሄሳ ግሾ፥ ኤንትካ ኩንድዳይሳታ ግዶን ኩንዳና። ታኒ ኤንታ ሴርያ ዎደ ኤንታ ካዉሻና” ያጌስ ጎዳይ።
JER 6:16 ጎዳይ ሀይሳዳ ያጌስ፦ “ኦግያን ኤቅድ ፄልተ፤ በን ኦገይ ደእያ በሳ ኦይችተ። ሎኦ ኦገይ አዉን ደእያኮ ኦይችድ እያን ሄመትተ፤ ህንተ ሸምፖ ደማና። ሽን ህንተ፥ ኑኒ ሄ ኦግያን ሄመቶኮ!” ያግደታ።
JER 6:17 ታኒ ናገይሳታ ህንተ ቦላ ሹማዳ፥ “ሞይዘ ግርሳ ስእተ” ያጋስ። ሽን ህንተ፥ “ኑ ስኦኮ” ያግደታ።
JER 6:18 “ሄሳ ግሾ፥ ካዎተꬃቶ፥ ስእተ! ታኒ ታ አሳ ቦላ ኦꬃናባ አኬክተ።
JER 6:19 ሳአን ደእያ አሳዉ፥ ሀይሳ ስእተ! ኤንቲ ታ ቃላ ስኦና እፅዳ ግሾነ ታ ህግያ ካꬍዳ ግሾ ታ ኤንታ ቦላ ꬋዮ ኤሀና።
JER 6:20 ሳባ ቢታፈ እፃነ ዎይኮ ሃሆ ቢታፈ ይዳ ሳዎይነ ቅማመይ ታዉ አይሴ? ህንተ ፁሳ ያርሾይካ ኤከተና። ህንተ ያርሾይ ታና ኡፋይሰና” ያጌስ።
JER 6:21 ሄሳ ግሾ፥ ጎዳይ፥ “ታኒ ሀ አሳ ስንꬃን ꬉበ ዎꬃና፤ አዋትነ ናይት ኤንታን ꬉበታና፤ ሾሮትነ ላገት ꬋያና” ያጌስ።
JER 6:22 ጎዳይ፥ “ፑደሀ ባጋ ቢታፈ ኦላንቾት ዮሶና፤ እስ ግታ ካዎተꬃይ ሳኣ ጋፃፐ ደንድስ።
JER 6:23 ኤንቲ ዶንገነ ቶራ ዳንጭዶሶና፤ ኤንቲ ቃይ ባይና ዎዛና ምኖታነ ማሮተꬅ ኤሮናይሳታ። ኤንቲ ፓራን ጋላብያ ዎደ አባዳ ጉሞሶና። ህንተኖ፥ ፅዮነ ካታማ አሳዉ፥ ኤንቲ ህንተና ኦላናዉ ሳልፕዶሶና” ያጌስ።
JER 6:24 ኑኒ ሄ ኦዳ ስእን፥ ኑ ኩሸይ አርጋጭስ፤ ማጫስ እቀꬅ ኦይከይሳዳ ኑና መቶይነ ኡንእ ኦይክስ።
JER 6:25 ሞርከይ ማሻ ኦይክዳ ግሾነ ያን ሀን ዳጋም ደእያ ግሾ ሶፐ ከዮፕተ፤ ኦገ ቦላካ በንቶፍተ።
JER 6:26 ꬋይሰይስ ቆፖና ኑ ቦላ ያና ግሾ፥ ካዮ ማኦ ማእድ፥ ብዶ ቦላ ጎንዶረትድ፥ አስ ባ እስ ናአስ ዬክያ መላ ታ አሳስ ዬክተ።
JER 6:27 ጎዳይ ኤርምያሳኮ፥ “ኔኒ ኤንታ ኦግያ ፆሞሳና መላነ ፓጫና መላ ብራታ ፓጭያ አሳዳ ታ ነና ኦꬃስ።
JER 6:28 ኤንቲ ኡባይ ዝግራናዉ ዩዮሶና፤ ኦድን ስኦና ማካላንቾታ። ኤንቲ ናሰ ብራታዳነ ብራታዳ ምኖ፤ ኤንቲ ኡባይ ናጋራ ኦꬆሶና።
JER 6:29 ብራታ ቦላ ደእያ ሽአ ፁግድ ጌሻናዉ ግልፐይ ፑኔስ። ሽን ጌሻናዉ ዋይዳ ዋየይ ጮ ግድስ፤ ታ አሳ ግዶን ደእያ ኢታት ክችቦኮና።
JER 6:30 ጎዳይ ኤንታ የግድ አግዳ ግሾ፥ ኤንቲ የገትዳ ብራ ጌተታና” ያጌስ።
JER 7:1 ጎዳፐ ኤርምያሳኮ ይዳ ቃላይ ሀይሳ፦
JER 7:2 “ፆሳ ኬꬃ ፐንግያን ኤቃዳ፥ ሀይሳዳ ያጋዳ አዋጃ። ህንተኖ፥ ጎዳ ጎይናናዉ ሀ ፐንገታራ ገልያ ይሁዳ አሳዉ፥ ኡባይ ጎዳ ቃላ ስእተ!
JER 7:3 ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ ህንተ ኦግያነ ህንተ ኦሱዋ ላምተ፤ ታ ህንተና ሀ በሳን ዎꬃና።
JER 7:4 ‘ሀይስ ፆሳ ኬꬅ! ሀይስ ፆሳ ኬꬅ! ሀይስ ፆሳ ኬꬅ’ ያግድ ጭሞ ቃላን አማነቶፍተ።
JER 7:5 ህንተ፥ ህንተ ኦግያነ ኦሱዋ ቱማ ላምኮ፥ እሶይ እሱዋስ ፅሎ ፕርድኮ፥
JER 7:6 በተ አሳ፥ ይኦ ናይታነ አምኤታ ናቆና አግኮ፥ ሀ በሳን ፅሎ አሳ ሱꬁ ጉሶና አግኮነ፥ ህንተ ቆሄቶናዳ ሀራ ፆሳታ ጎይኖና አግኮ፥
JER 7:7 ታ ህንተ ማይዛታስ መርናዉ እምዳ ቢታን ህንተና ዎꬃና።
JER 7:8 ሽን ህንተ ማዶና ጭሞ ቃላን አማነተታ” ያጌስ።
JER 7:9 “ህንተ ካይሶቴታ፥ ዎꬌታ፥ ላይማተታ፥ ዎርዶ ጫቅድ ማርካቴታ፥ ባኣለ ኤቃስ ያርሾ ያርሼታ፥ ሀይሳፈ ካሰ ህንተ ኤሮና ሀራ ፆሳታ ጎይነታ።
JER 7:10 ያትድ፥ ታ ሱንꬃን ፄገትዳ ፆሳ ኬꬃ ይድ፥ ታ ስንꬃን ኤቅድ፥ ‘ኑኒ ሳሮ’ ያጌታ። ሽን ሀ ሻትያ ኦሱዋ ኡባ ኦꬄታ
JER 7:11 ታ ሱንꬃን ፄገትዳ ሀ ፆሳ ኬꬃይ ህንተዉ ፓንጋት ቆሰትያ ጎንጎሎ ግደትዬ? ህንተ ኦꬅያባ ኡባ ታኒ ታ አይፈን በአስ” ያጌስ።
JER 7:12 “ታኒ ታ ሱንꬃይ ደእያ በሲ ኦꬃዳ ኮይሮ ዶርዳ፥ ሴሎ ቢተ። ታ አሳ እስራኤለ ኢታተꬃ ግሾ፥ ታኒ ሄ በሳ ዋትዳኮ በእተ።
JER 7:13 ህንተ ሀ ኡባ ኦꬅያ ዎደ ታ ህንተዉ ዛራ ዛራ ኦዳስ፤ ሽን ስኦና እፅደታ። ታ ህንተና ፄጋስ፤ ሽን ታዉ ኮይበከታ።
JER 7:14 ሄሳ ግሾ፥ ታ ሴሎ ቦላ ኦꬅዳይሳዳ ሀይሳን ህንተ አማነትያ፥ ታ ሱንꬃን ፄገትዳ ሀ ፆሳ ኬꬃ ቦላ፥ ህንተዉነ ህንተ ማይዛታስ እምዳ ሀ በሳ ቦላ ሄሳዳ ኦꬃና።
JER 7:15 ህንተ ዳቦታ፥ ኤፍሬማ ኮቻ ታ ድግዳይሳዳ ታ ስንꬃፈ ህንተናካ ድጋና” ያጌስ።
JER 7:16 “ኤርምያሳ፥ ታ ስኦና ግሾ፥ ሀ አሳስ ዎሶፋ፤ ኤንታ ግሾ ታና ኦይቾፋ ዎይኮ ዋሶፋ፤ ኤንታዉ ጋናቶፓ።
JER 7:17 ኤንቲ ይሁዳ ካታማታንነ የሩሳላመ ኦገታን ኦꬅያባይ አይበኮ በእክዬ?
JER 7:18 ናይት ምꬅ ምፆሶና፤ አዋት ታማ ኤꬆሶና፤ ማጫሳት፥ ‘ሳሎ ካዊዉ’ ጌተትያ ኤቄስ ኡይꬅ ኡካናዉ ꬊለ ሙኑቆሶና። ኤንቲ ታና ይሎያናዉ ኡሻ ያርሾ ሀራ ፆሳታስ ጉሶሶና።
JER 7:19 ኤንቲ ሀይሳ ኦይ ቱማ ታና ቆሀናሰዬ? ሀይሳን ቆሄትድ ዬላታናይ ኤንታ ግዶኮናዬ?” ያጌስ ጎዳይ።
JER 7:20 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ታ ሀንቆይ ሀ በሳ ቦላ፥ አሳ ቦላነ መህያ ቦላ፥ ጋደን ደእያ ምꬃ ቦላነ ቢታን ደእያ ካꬃ ቦላ ጉካና፤ እ ኤፃና፥ ቶአናዉ ዳንዳኤና።”
JER 7:21 ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ “ህንተ ፁሳ ያርሹዋ ሀራ ያርሾታ ቦላ ጉጅድ፥ አሹዋ ህንተዉ ሚተ።
JER 7:22 ታ ህንተ ማይዛታ ግብፀ ቢታፈ ከስያ ዎደ፥ ፁሳ ያርሾባነ ሀራ ያርሾታባ ኦዳብከ ዎይኮ ኪታብከ።
JER 7:23 ሽን ታ ኤንታኮ፥ ታዉ ኪተትተ፤ ታ ህንተ ፆሳ ግዳና፤ ህንተካ ታ አሰ ግዳና። ህንተዉ እንጀታና መላ ታ ህንተና ኪትያ ኦገ ኡባን ሄመትተ።
JER 7:24 ሽን ኤንቲ ታና ስኦና ዎይኮ ታዉ በሰ እሞና እፅዶሶና። ኤንቲ ባንታ ኢታ ዎዛና ቆፋ ካልድ ብዶሶና፤ ስን ባናይሳ አግድ ጉየ ብዶሶና።
JER 7:25 ህንተ ማይዛት ግብፀፈ ከይዳ ዎደፐ ዶምድ ሀች ጋካናዉ ታ አይለታ፥ ናበታ ዎንታ ዎንታ ህንተዉ ኪታስ።
JER 7:26 ሽን ህንተ ታና ስኦና ዎይኮ ታዉ በሰ እሞና እፅደታ። ህንተ ሞርግያ ምንꬅደታ፤ ህንተ አዋታፐ አꬍድ ኢታባ ኦꬅደታ።
JER 7:27 “ሀ ኡባ ነ ኤንታዉ ኦዳ፤ ሽን ኤንቲ ነ ግያባ ስኦኮና። ነ ኤንታ ፄጋና፤ ሽን ኤንቲ ኮዮኮና።
JER 7:28 ሄሳ ግሾ፥ ኤርምያሳ፥ ነ ኤንታኮ ሀይሳዳ ያጋ፦ ሀ ካዎተꬃይ ባ ጎዳ ፆሳ ኪተቶና ዎይኮ እያ ዞርያ ስኦና ካዎተꬅ። ቱም ꬋይስ፤ ቱም ኤንታ እንፃርሳን ዴና።
JER 7:29 ህንተ ሁጵያ ሜድድ ዎራ ሆልተ። ጎዳይ ባና ይሎይዳ የለታ እፅዳ ግሾነ የግድ አግዳ ግሾ አይብካ ባይና ꬎቃ ዙማ ቦላ ከይድ ዘሌልተ” ያግስ።
JER 7:30 “ይሁዳ አሳይ ታ ስንꬃን ኢታባ ኦꬅዶሶና። ኤንቲ ታ ሱንꬃን ፄገትዳ ፆሳ ኬꬃ ቱንሳናዉ ታኒ እፅያ ኤቃታ ኤህድ እያ ግዶን ዎꬅዶሶና።
JER 7:31 ኤንቲ ባንታ አደ ናይታነ ማጫ ናይታ ታማን ፁግድ ያርሻናዉ፥ ህኖማ ዛንጋራን ቶፈታ ጌተትያ ያርሾ በሳ ግምብዶሶና። ሽን ሄስ ታ ኤንታ ኪታቦናባነ ታ ቆፋን ባይናባ።
JER 7:32 ሄሳ ግሾ፥ ሄ በሳይ ህኖማ ዛንጋራ ዎይኮ ቶፈታ ጌተትድ ፄገተይስ አትድ፥ ሹካ ዛንጋራ ያገትድ ፄገታና ዎደይ ያና። ሞግያ በሲ ባይና ግሾ፥ ቶፈት ኤንቲ ባንታ አሀ ሞግያ በሲ ግዳና።
JER 7:33 ሄ ዎደ ሄ አሳ አሀይ ሳሎ ካፎታስነ ሳአ ዶአታስ ካꬅ ግዳና፤ ኤንታ ጎዳና አስካ ባዋ።
JER 7:34 ታኒ የꬅ፥ ኡፋይስነ ያጋኖ ግርስ ይሁዳ ካታማታንነ የሩሳላመ ኦገታን ስኤቶናዳ ኦꬃና፤ ቢታይ ባይሳ ግዳና” ያጌስ ጎዳይ።
JER 8:1 “ሄ ዎደ ይሁዳ ካዎታ መቀꬃይ፥ ሀላቃታ መቀꬃይ፥ ካህነታ መቀꬃይ፥ ናበታ መቀꬃይነ የሩሳላመን ደእያ አሳ መቀꬃ ኡባይ ዱፎፐ ማፀትድ ከያና።
JER 8:2 ኤንቲ ሲቅዳ፥ ኪተትዳ፥ ካልዳ፥ ዞረ ኦይችዳነ ጎይንዳ አዋ፥ አጌናነ ሳሎ ፆልንቶታ ኡባ ስንꬃን ምጨታና። ኤንታ መቀꬃይ ሺቀና ዎይኮ ሞገተና፤ ሽን ቢታ ቦላ ፕቶ መላ የገታና።
JER 8:3 ታ ላልዳ በሳታን ደእያ፥ ሀ ኢታ ካዎተꬃፈ አትዳ አሳ ኡባይ ደኦፐ ሀይቆ አሞታና” ያጌስ ኡባፈ ዎልቃማ ጎዳይ።
JER 8:4 ጎዳይ ሀይሳዳ ያጌስ ጋዳ ኦዳ፦ “እስ አስ ኩንድኮ፥ ስሚድ ደንደነዬ? ዎይኮ እስ አስ ኦገ ባለትኮ ጉየ ስመነዬ?
JER 8:5 ያትን፥ ሀ አሳይ አይስ ጉየ ስምዴ? የሩሳላመይ አይስ ኡባ ዎደ ኦገ ባሌቲ? ኤንቲ ጭሞ ባቅድ ኦይክዶሶና፤ ስሞና እፅዶሶና።
JER 8:6 ታ ምንꬃዳ ሀይዛስ፤ ሽን ኤንቲ ቱማ ሃሳዮኮና። ‘ታ አይ ኦꬃድና?’ ግድ ባ ኢታ ናጋራ ፓፀይ እሶይካ ባዋ። ኡባይ ኦላስ ጋላብያ ፓራዳ ባዉ ባዉ ዎፄስ።
JER 8:7 ሀር አቶሽን፥ ሃꬃ ካፎት ባንታ ዎድያ ኤሮሶና፤ ሆለት፥ ካሮትነ ማስቃላ ካፎት ባንታ ስምያ ዎድያ ናጎሶና፤ ሽን ታ አሳይ ጎዳ ዎጋ ኤሮኮና።
JER 8:8 “ያትን ዋንድ፥ ‘ጎዳ ህገይ ኑራ ደእያ ግሾ ኑ ጭንጫ’ ጋናዉ ዳንዳኤቲ? ዎርዳንቾ ፃፈት ታ ህግያ ዎርዶ ከስዳይሳ በኤከቲ?
JER 8:9 ጭንጫት ዬላታና፤ ኤንቲ ካዉያናነ ኦይከታና። ኤንቲ ጎዳ ቃላ እፅን፥ ኤንታዉ አይ ጭንጫተꬅ ደኢ?
JER 8:10 ሄሳ ግሾ፥ ታ ኤንታ ማቸታ ሀራታስ፥ ኤንታ ጎሻ አላጋ አሳስ እማና። ጉꬃፈ ግታ ጋካናዉ በሶና ጎአስ ዪቀቶሶና። ናበትነ ካህነት ኡባይ አሳ ጭሞሶና።
JER 8:11 ኤንቲ ታ አሳ ማዱንꬃ ላፋ ግድ፥ ጉꬃ ꬋለ ዎꬆሶና። ሳሮይ ባይናሽን ‘ሳሮ፥ ሳሮ!’ ያጎሶና።
JER 8:12 ሀ ሻትያ ኦሱዋ ኦꬅሸ፥ ኤንቲ ዬላትዶና? አካይ፥ ኤንቲ አይኮካ ዬላትቦኮና። ኤንቲ ዬል አይበኮ ኤሮኮና። ሄሳ ግሾ፥ ኤንቲ ኩንድዳይሳታ ግዶን ኩንዳና፤ ኤንቲ ሴረትያ ዎደ ካዉያና።
JER 8:13 ኤንታ ጎሻ አይፍያ ታ ኤንታፈ ኤካና። ኤንታ ዎይነ አይፈይ ꬋያና፤ ባላሰ ምꬃ አይፈይ በንተና። እያ ቦንጮይ ሹላና፤ ታ ኤንታዉ እምዳባ ኤንታፈ ኤካና” ያጌስ ጎዳይ።
JER 8:14 አሳይ ዛሪድ ሀይሳዳ ያጎሶና፦ “ኑ ስእ ግድ አይስ ኡታኔ? አነ ሺቅተ፤ ግምበትዳ ካታማታ ገልድ ያን ሀይቃና። ጎዳይ ኑ ፆሳይ ኑና ሀይቆስ አꬅድ እሚስ። ኑ እያ ቦላ ናጋራ ኦꬅዳ ግሾ፥ ኑ ዎꬍያ ሃꬅ ኡያና መላ ኦꬅስ።
JER 8:15 ሳሮተꬅ ኡፋይሳን ናግዳ፤ ሽን ሎኦባይ ይቤና። ኑ ፓፆ አሞትዳ፤ ሽን ዳጋማ ግድስ።
JER 8:16 ሞርከ ፓራ ጋርማሞይ ዳነ ካታማን ስኤቴስ፤ ኤንታ ኮርማ ፓራታ ጫገꬃን ቢት ቃፄስ። ኤንቲ ቢታነ ቢታን ደእያባ ኡባ፥ ካታማነ ካታማን ደእያ አሰ ኡባ ምድ ꬋይሳናዉ ይዶሶና።
JER 8:17 ታኒ ሾሻታ ህንተ ግዶ የዳና። ብት ተቃናዉ ዳንዳኦና ሀሶ ሾሻታ ህንተ ግዶ የዳና፤ ኤንቲ ህንተና ዱካና” ያጌስ ጎዳይ።
JER 8:18 ታ አዛኑዋስ ምንꬆይ ባዋ፤ ታ ዎዛናይ ትልእስ።
JER 8:19 ታ አሳይ ሃሆ ቢታን ዋስያ ዋሱዋ ስእተ። ኤንቲ፥ “ጎዳይ ፅዮነን ባዌ? ሀ ፅዮነ ካዎይ ዛሪድ ያን ዴኔ?” ያግድ ዋሶሶና። ጎዳይ ኤንታ ካዎይ፥ “ኤንቲ ባንታ መꬍዳ ምስለታን፥ ባንታ ፓꬆና አላጋ ኤቃታን ታና አይስ ይሎይዶና?” ያግስ።
JER 8:20 አሳይ ዛሪድ፥ “ሄኮ ጫካ ዎደይ አꬍስ፤ ቦነይ ዉርስ፤ ኑኒ አትቦኮ” ያግድ ዋሶሶና።
JER 8:21 ታ አሳይ ማዱንፅዳ ግሾ፥ ታ ዎዛናይካ ማዱንፅስ። ታ ካዮታስ፤ ያሽ ታና ኦይክስ።
JER 8:22 ጋላዳን ትየትያ ꬋለይ ባዌ? ያን አክመይ ዴኔ? ያትን፥ ታ አሳ መቆይ አይስ ፓፀኔ?
JER 9:1 ሀይቅዳ ታ አሳስ ቃማነ ጋላስ ዬካና መላ ታ ሁጰይ ሃꬃ ኦላ፥ ታ አይፈይ ፑልቶ ሃꬅ ግዴረነ።
JER 9:2 ኤንቲ ኡባይ ማካላነ ላይማትያ አስ ግድያ ግሾ፥ ታኒ ታ አሳፐ ሻከታዳ ባና መላ፥ ኦገ አስ አቅያ በሲ፥ ታዉ መላ ቢታን ደኤረነሽን።
JER 9:3 “ኤንቲ ባንታ እንፃርሳን ዎርዶ ኦደታናዉ ኡባ ዎደ ጊግድ ደኦሶና። ኤንታ ቢታን ቱማ ግዶናሽን ዎርዶይ ካዎትስ። ኤንቲ እስ ናጋራፐ ሀራ ናጋራን ፕንዶሶና፤ ታና ኤሮኮና” ያጌስ ጎዳይ።
JER 9:4 “እሽ ጭመይሳ፥ ሾሮይ ዝግረይሳ ግድያ ግሾ ሾሩዋፐ ናገቶ፤ እሻይ እሻ አማነቶፎ።
JER 9:5 ሾሮይ ሾሩዋ ጭሜስ፤ ቱማ ኦደተይ ዴና። ዎርዶ ኦደታና መላ ባንታ እንፃርሳ ታማርስዶሶና፤ ናጋራ ኦሶን ባንታና ዳቡርስዶሶና።
JER 9:6 ነ ጭሞ ግዶን ደኣሳ፤ ኤንቲ ባንታ ጭሙዋን ታና ኤሮና እፅዶሶና” ያጌስ ጎዳይ።
JER 9:7 “ሄሳ ግሾ፥ ታ ኤንታ ብራታዳ ሴርሳና፤ ኤንታ ፓጫና። ታ አሳ ግሾ፥ ታ ሀራባ አይ ኦꬃናዉ ዳንዳእያና?
JER 9:8 ኤንታ እንፃርሳይ ዎꬍያ ዶንገ ቶራ መላ፤ ኤንቲ ጭሞን ሃሳዮሶና። ባንታ ዶናን እሶይ እሱዋራ ሳሮ ቃላ ሃሳዮሶና፤ ሽን ባንታ ዎዛናን ፅሄ ዎꬆሶና።
JER 9:9 ያትን፥ ታ ሀ ሀኖታስ ኤንታ ሴራናዉ በሰኔ? ታኒ ሀይሳ መላ ካዎተꬃ ቦላ ሀሎ ከያናዉ በሰኔ?” ያጌስ ኡባፈ ዎልቃማ ጎዳይ።
JER 9:10 ታኒ ꬎቃ ደረታስ ዬካና፤ ኤንታ ግሾ ዋሳና፤ ባዞን ደእያ ሄንꬃ ጋደታስ ዘሌላና። ኤንቲ ꬋይዶሶና፤ ያራ እስ አስካ አና። መሄ ዋሶይ ስኤተና፤ ሳሎ ካፎትነ ዶአት ባቃትዶሶና።
JER 9:11 “የሩሳላመ ካታማ ላለትዳ ኬላነ ዎርካናት ጉፕያ በሲ ኦꬃና። ይሁዳ ካታማታ ኦንካ ዶና ባይሳ ከሳና” ያጌስ ጎዳይ።
JER 9:12 ሀይሳ አኬካናዉ ዳንዳእያ ጭንጫ አስ ኦኔ? ሀራ አሳስ ኦዳና መላ ጎዳይ ኦደስ ቆንጭስዴ? እስ አስካ እያ ግዶራ አꬎና መላ ቢታይ ኢትድ ባዞዳ ኦንዳይ አይብሴ?
JER 9:13 “ሀይስ ሀንዳይ፥ ኤንታዉ ታ እምዳ ህግያ ኤንቲ አግዳ ግሾሳ። ኤንቲ ታዉ ኪተቶናነ ሀ ህግያ ካሎና እፅዳ ግሾሳ።
JER 9:14 ሄሳ አግድ፥ ኤንቲ ባንታ ዎዛና ሙመተꬃ ካልዶሶና፤ ኤንታ አዋት ታማርስዳ ባኣለ ጌተትያ ኤቃ ጎይንዶሶና” ያጌስ ጎዳይ።
JER 9:15 ሄሳ ግሾ፥ ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ “ታኒ ሀ አሳ ጫምያ ካꬅ ሙዛና፤ ዎꬍያ ሃꬅ ኡሻና።
JER 9:16 ኤንቲ ዎይኮ ኤንታ አዋት ኤሮና ካዎተꬃታ ግዶን ታ ኤንታ ላላና። ኤንታ ꬋይሳና ጋካናዉ ማሻን የደꬃና” ያጌስ።
JER 9:17 ኡባፈ ዎልቃማ ጎዳይ ሀይሳዳ ያጌስ፦ “አነ ቆፕተ። ዬሆ ዬክያ ማጫሳታ ፄግተ፤ ዘለልስ ኤርያ አሳታ ኤህተ።
JER 9:18 ኤንቲ ኤለስድ ይድ፥ ኑ አይፈይ አፉꬁ ሆልꬁ ኦꬃና ጋካናዉነ ኑ አይፍያ ጭሮይ ሃ ፑልታና ጋካናዉ ዘለልስ ከሶ።
JER 9:19 ፅዮነን ዘለልሳ ግርስ ስኤቴስ፤ ‘ኑ ꬋይዳ! ኑ ካዉይዳ! ኑ ኬꬃይ ላለትዳ ግሾ፥ ኑ ቢታ አግድ ባናዉ ኮሼስ’ ” ያጎሶና።
JER 9:20 ህንተኖ፥ ማጫሳቶ፥ ጎዳ ቃላ ስእተ! ህንተ ሀይꬃይ እያ ዶናፐ ከይያ ቃላ ሀይዞ። ህንተ ማጫ ናይታ ዘለልስ ታማርስተ፤ እሶይ እሱዋ ዬሆ ታማርሶ።
JER 9:21 ሀይቆይ ዮጋ ናይታ ኦገን፥ ናአተꬃታ ዳባባን ቄፅሸ ይድ፥ ኑ ማስኮተታ ጋክስ፤ ኑ ሚፃ ገልስ።
JER 9:22 “አሳ አህ ቡረዳ ደንባን የገታና፤ ጫከይሳት ጫክድ ጉየ የግዳ ካꬃ መላ ኤንታ ኦንካ ሺሸና” ያጌስ ጎዳይ።
JER 9:23 “ጭንጭ ባ ጭንጫተꬃን ጬቆፎ፤ ዎልቃም ባ ዎልቃን ጬቆፎ፤ ዱረይ ባ ዱረተꬃን ጬቆፎ።
JER 9:24 ሽን ጬቅያ ኦንካ ታና ኤሮንነ አኬኮን ጬቆ። ማሮተꬅ፥ ሱረ ፕርዳነ ፅሎተꬅ ሳአ ቦላ ኦꬅያ ጎዳ፥ ታና ኤርድ ጬቆ፤ ሄስ ታና ኡፋይሴስ” ያጌስ ጎዳይ።
JER 9:25 “ባንታ አሾ ፃላላ ቃፃረትዳ አሳ ታ ሴራና ዎደይ ያና።
JER 9:26 ሄሳትካ ግብፀ፥ ይሁዳ፥ ኤዶመ፥ አሞነነ ሞአበ አሳነ ባንታ ሁጵያ ዩሹዋ ሜድድ፥ መላ ቢታን ደእያ አሳ ኡባ። ሀ ካዎተꬃት ኡባይ ቱማ ቃፃረትቦኮና፤ እስራኤለ አሳ ኡባይካ ባንታ ዎዛናን ቃፃረትቦኮና” ያጌስ ጎዳይ።
JER 10:1 ህንተኖ፥ እስራኤለ አሳዉ፥ ጎዳይ ኦድያ ቃላ ስእተ!
JER 10:2 ጎዳይ ሀይሳዳ ያጌስ፦ “ሀራ ካዎተꬃታ ኦግያ ታማሮፕተ። ኤንቲ ሳሎ ቦላ ማላታ በእድ ዳጋምኮካ፥ ህንተ ዳጋሞፕተ።
JER 10:3 ኤንታ ዎጋይ ሀዳ፤ ኤንቲ ዎራፐ ምꬅ ቃንፆሶና፤ ማሰይስ ካልታን ማሴስ።
JER 10:4 ኤንቲ ብራንነ ዎርቃን አሌቅሶሶና፤ ቃፆናዳ ምስማረን ꬍሽድ ኦይꬆሶና።
JER 10:5 ኤንታ ኤቃት ሌሄ ግዶን ካፎ ዳጋንꬃናዉ ኤስያ ማላ መላ። ኤንቲ ኦደቶኮና፤ ኤንቲ ሄመታናዉ ዳንዳኦና ግሾ አሳይ ኤንታ ቶኮሶና። ኤንታስ ኩምꬅ ያዮፍተ። ኤንቲ ቆሀናዉካ ማዳናዉካ ዳንዳኦና ግሾ ኤንታዉ ያዮፍተ” ያጌስ ጎዳይ።
JER 10:6 አቤት ጎዳዉ፥ ነ ማል ኦንካ ባዋ። ኔኒ ግታ፤ ነ ሱንꬃይካ ግታነ ዎልቃማ።
JER 10:7 አቤት ካዎተꬃታ ካዋዉ፥ ነና ቦንቾናይ ኦኔ? ጭንጫ አሳ ግዶንነ ኤንታ ካዎተꬃ ግዶን ነ መል ባይና ግሾ ነዉ ቦንቾ በሴስ።
JER 10:8 ኤንቲ ኤያነ ኤር ꬋይዳይሳታ፤ ኤንቲ ምꬃፈ ማስዳ፥ ፓꬆና ኤቃታፐ አይ ታማሮና?
JER 10:9 ሄ ኤቃት ታርሰሳ ብራንነ አፌዛ ዎርቃን አሌቀትዶሶና። ኤንቲ ኡባይ ኩሸ ሂላንቾታን ኦሰትዳ ዎይነነ ካሎሰ ዳንያ ማኡዋን ካመትዶሶና።
JER 10:10 ሽን ጎዳይ ቱማ ፆሳ፤ እ ደኦ ፆሳነ መርና ካዋ። እያ ሀንቁዋን ቢታይ ቃፄስ፤ ካዎተꬃት እያ ይሉዋ ዳንዳኦኮና።
JER 10:11 “ሀይሳቲ ሳሎነ ሳአ መꬍቦና ፆሳት ሳአፐነ ሳሎፐ ꬋያና” ያጋዳ ኔኒ ኤንታዉ ኦዳ።
JER 10:12 ባ ዎልቃን ሳኣ መꬍዳይ፥ ባ ጭንጫተꬃን ሳኣ ኤስዳይ፥ ባ አኬካን ሳሎታ ምጭዳይ፥ ፆሳ።
JER 10:13 እ፥ ባ ኮሽንቻ ስስያ ዎደ፥ ሳሎን ደእያ ሃꬃት ጉሞሶና። እ ሻራ ሳአ ጋፃፐ ፑደ ደንꬄስ፤ ዎልአንꬅ እራራ የዴስ፤ ጫርኩዋ ባ ምንጃ ኬꬃፈ ከሴስ።
JER 10:14 አስ ኡባይ ኤራ ꬋይድ ኤይስ፤ ዎርቃ ሼሽያ ኡባይ ባ ኤቃን ዬላትስ። ኤንቲ መꬍዳ ኤቃት ዎርዶ፤ ኤንታዉ ሸምፖይ ባዋ።
JER 10:15 ኤንቲ ፓꬆናባነ ሀዳ፤ ኤንቲ ሴረትያ ዎደ ꬋያና።
JER 10:16 ሽን እ ኡባ መꬍዳ ግሾ፥ ያይቆባ ሳማ ግድዳ ፆሳይ ሄሳ መላ ግደና፤ እስራኤለይ፥ እ ባዉ ዶርዳ ካዎተꬅ፤ እያ ሱንꬃይ ኡባፈ ዎልቃማ ጎዳ።
JER 10:17 ህንተኖ፥ ሞርከይ ተቅዳይሳቶ፥ ቢታፈ ከያናዉ ህንተዉ ደእያባ ሺሽተ።
JER 10:18 “ታኒ፥ ሀ ዎድያን፥ ሀ ቢታን ደእያ አሳ ከሳዳ ያምባራና። ኤንታ ቆሆይ ኤረታና ጋካናዉ ኤንታ ቦላ ኢታባ ኤሀና” ያጌስ ጎዳይ።
JER 10:19 ታ ማዱንፃስ! ታ ማዱንꬃይ ፓፀና። ሽን ታኒ፥ “ሀይስ ታ ሀርገ፤ ታ ዳንዳአናዉ በሴስ” ያጋስ።
JER 10:20 ታ ዱንካነይ ላለትስ፤ እያ ዎዶሮ ኡባይ ዱፀረትስ። ታ ናይት ኡባይ ታፐ ሻከትድ ብዶሶና፤ ኤንቲ ባዋ። ታ ዱንካንያ ዛሪድ ቶካናዉ ዎይኮ ታ ማጋራጁዋ ካቃናዉ እስ አስካ አትቤና።
JER 10:21 ሄንꬃንቾት ኤይዶሶና፤ ኤንቲ ጎዳ ኦይችቦኮና። ሄሳ ግሾ፥ ኤንታዉ እንጀቶና እፅስ፤ ኤንታ ዉደ ኡባይ ላለትስ።
JER 10:22 ኦራꬃ ኦድ ይስ፤ ስእተ። ፑደሀ ባጋን ደእያ ካዎተꬃን ግታ ድርጎይ መትስ። እያ ኦላንቾት ይድ፥ ይሁዳ ካታማታ ባይሳነ ዎርካናት ጉፕያ በሲ ከሳና።
JER 10:23 አቤት ጎዳዉ፥ አሳ ደኦይ እያዉ ቡዞ ግዶናይሳነ ባ ኦግያ ሱርሳናዉ እያ ሸነ ግዶናይሳ ታ ኤራይስ።
JER 10:24 አቤት ጎዳዉ፥ ታና ሴራ፤ ሽን ልከራ ግዶ። ታ ꬋዮና መላ ነ ሀንቁዋን ታ ቦላ ዮፓ።
JER 10:25 ነ ሸንያ፥ ነና ኤሮና ካዎተꬃታ ቦላነ ነ ሱንꬃ ፄጎና አሳ ቦላ ጉሳ። ኤንቲ ያይቆባ አሳ ምዶሶና፤ ኤንታ ምትዶሶና፤ ኤንታ ቢታ ꬋይስዶሶና።
JER 11:1 ጎዳፐ ኤርምያሳኮ ይዳ ቃላይ ሀይሳ፦
JER 11:2 “ሀ ጫቆ ቃላ ስአዳ ይሁዳ አሳስነ የሩሳላመ ካታማን ደእያ አሳስ ኦዳ።
JER 11:3 ጎዳይ እስራኤለ ፆሳይ ሀይሳዳ ያጌስ ጋዳ ኦዳ። ‘ሀ ጫቁዋ ናጎና አስ ኦንካ ባደትዳይሳ ግዶ’።
JER 11:4 ታኒ ካሰ ህንተ አዋታ ግብፀ ቢታፈ፥ ብራታ ሴርስያ ጮጭያፐ ከስያ ዎደ፥ ‘ታዉ ኪተትተ፤ ታ ህንተና ኪትያባ ኡባ ኦꬅተ። ህንተ ታ አሰ ግዳና፤ ታካ ህንተ ፆሰ ግዳና’ ያጋዳ ኦዳስ።
JER 11:5 ሄሳዳካ፥ ማꬅነ ኤስ ጎግያ ቢታ ካሰ ህንተ አዋታስ እማናዉ፥ ታኒ ጫቅዳ ጫቁዋ ፖላና።” ታኒ፥ “ኤሮ፥ ጎዳዉ፥ አምንእ” ያጋስ።
JER 11:6 ጎዳይ ታኮ፥ “ሀ ቃላታ ኡባ ይሁዳ ካታማታንነ የሩሳላመ ኦገታን ሀይሳዳ ያጋዳ አዋጃ፦ ‘ሀ ጫቆ ቃላ ስእተ፤ እያ ካልተ።
JER 11:7 ካሰ ህንተ አዋታ ታ ግብፀ ቢታፈ ከስዳ ዎድያፐ ሀች ጋካናዉ፥ ዛራ ዛራዳ፥ “ታዉ ኪተትተ” ጋዳ ሴራስ።
JER 11:8 ሽን ኤንቲ ታ ቃላ ስእቦኮና ዎይኮ ታዉ ኪተትቦኮና። ኤንቲ ባንታ ኢታ ዎዛና ካልዶሶና። ታ ጫቆ ቃላ ኤንቲ ናጋና መላ ኪታስ፤ ሽን ኤንቲ እፅዶሶና። ሄሳ ግሾ፥ ሄ ጫቁዋ ባደꬃ ኡባ ኤንታ ቦላ ኤሀስ’ ” ያግስ።
JER 11:9 ዛርድካ ጎዳይ ታኮ ሀይሳዳ ያግስ፦ “ይሁዳ አሳይነ የሩሳላመን ደእያ አሳይ ታ ቦላ ማቀትዶሶና።
JER 11:10 ኤንቲ ካሰ ታ ቃላ ስኦና እፅዳ ባንታ ማይዛታ ናጋራኮ ጉየ ስምዶሶና። ኤንቲ ሀራ ፆሳታ ጎይንዶሶና፤ ኤንታዉ ኦꬅዶሶና። እስራኤለ አሳይነ ይሁዳ አሳይ ታ ካሰ ኤንታ ማይዛታራ ጫቅዳ ጫቁዋ መንꬅዶሶና።
JER 11:11 ሄሳ ግሾ፥ ‘ኤንቲ ባቃትድ አታናዉ ዳንዳኦና መቱዋ ኤንታ ቦላ ኤሀና። ኤንቲ ታኮ ዋስንካ ታ ኤንታ ስእከ።
JER 11:12 ሄ ዎደ ይሁዳ አሳይነ የሩሳላመ አሳይ፥ እፃነ ጩይስያ ባንታ ፆሳታኮ ዋሳና። ሽን መቶ ዎደ ሄ ፆሳት ኤንታ ማዶኮና።
JER 11:13 ህንተኖ፥ ይሁዳ አሳዉ፥ ህንተ ፆሳት ህንተ ካታማታ መላ ዳሮ። ቃስ ባኣለ ጌተትያ ዬላያ ፆሳስ እፃነ ጩይሳናዉ ህንተ ጊግስያ ያርሾ በሳት የሩሳላመ ኦገታ መላ ዳሮ’ ያጌስ ጎዳይ።
JER 11:14 “ኤርምያሳ፥ ሀ አሳስ ታና አይኮካ ዎሶፋ፤ ኤንታ ግሾ ጋናቶፓ ዎይኮ ኦይቾፋ። ኤንቲ ባንታ መቱዋ ጋላስ ታና ፄግያ ዎደ ታ ኤንታ ስእከ።
JER 11:15 “ዳሮ አሳራ ባ ኢታ ማቁዋ ማቀታሸ፥ ታ ዶስያ ታ አሳይ፥ ታ ኬꬃን በንታናዉ በሲ? ህንተ ህንተ ኢታ ኦሱዋ ኦꬅሽን፥ ያርሸትዳ መህያ አሾይ ህንተና ሴራፐ አሻኔ? ሄሳ ግድያኮ ህንተ ኡፋይታናሽን” ያግስ።
JER 11:16 ጎዳይ ነና፥ ድጭያ፥ ሎኦ አይፈ አይፍያ ሻማሆ ያግድ ሱንꬅስ። ሽን፥ እ ሄ ሻማሁዋ ዎልቃማ ዳዳ ጉንꬃን፥ ታማን ፁጋና፤ እያ ታሸይካ መቃና።
JER 11:17 ታኒ፥ ህንተና ቶክዳ ኡባፈ ዎልቃማ ጎዳይ፥ ህንተ ቦላ ኢታባ ኤሀናዉ አዋጃስ። እስራኤለ አሳይነ ይሁዳ አሳይ ባኣለስ እፃነ ጩይስድ ታና ይሎይዶሶና።
JER 11:18 ጎዳይ ኤንታ ማቁዋ ታዉ ቆንጭስዳ ግሾ ታ ኤራስ። ሄ ዎደ ኤንቲ ኦꬅያ ኢታ ኦሱዋ ታና በስስ።
JER 11:19 ታኒ ሹካስ ጊግዳ ዶርሳዳ ሀናስ። ኤንቲ፥ “አነ ምꬃነ እያ አይፍያ ꬋይሶስ። እያ ሱንꬃይ ሀሳየቶና መላ እያ ፓፃ ደኤይሳታ ግዶፈ ሾድድ ድጎስ” ያግድ ማቀትዳይሳ ታ ኤራብከ።
JER 11:20 ሽን አቤት ኡባፈ ዎልቃማ ጎዳዉ፥ ፅሎ ፕርደይሶ፥ አሳ ዎዛናነ ቆፋ ሻካዳ ኤረይሶ፥ ነ ኤንታ ቦላ ነ ሃሉዋ ከያዳ ታና በሳ። ታኒ ታ ቆሁዋ ነና በሳስ።
JER 11:21 ሄሳ ግሾ፥ “ጎዳ ሱንꬃን ትንብተ ኦዶፓ ኢꬅኮ ነ ኑ ኮሸን ሃይቃና” ያግድ፥ ነና ዎꬋናው ኮይያ አናቶታ አሳባ ጎዳይ ሀይሳዳ ያጌስ።
JER 11:22 ኡባፈ ዎልቃማ ጎዳይ ሀይሳዳ ያጌስ፦ “ታ ኤንታ ሴራና፤ ኤንታ ፓንꬃት ማሻን ሀይቃና፤ ኤንታ ማጫ ናይትነ አደ ናይት ኮሻን ሀይቃና፤
JER 11:23 ኤንታፈ እሶይነ አተና። አይስ ጊኮ፥ ታኒ ሴርያ ላይꬅ አናቶታ አሳ ቦላ ኢታባ ኤሀና” ያጌስ።
JER 12:1 አቤት ጎዳዉ፥ ታ ኔራ ሞተትያ ዎደ ኡባንካ ነ ፅሎ። ግዶሽን፥ ነ ፅሎ ፕርዳባ ኔራ ኦደታናዉ ኮያይስ። ኢታ አሳት ኦꬅያባይ ኤንታዉ አይስ እንጀቲ? ገነ አሳት አይስ ዱረትድ ደኦና?
JER 12:2 ኔኒ ኤንታ ቶካዳሳ፤ ኤንቲ ፃጶ የድዶሶና፤ ድጭድ አይፈ አይፍዶሶና። ኤንቲ ነና ዶናፐ የጎኮና፤ ሽን ኤንታ ዎዛናፐ ነ ሃሆን ደኣሳ።
JER 12:3 ሽን አቤት ጎዳዉ፥ ነ ታና ኤራሳ፤ ታና በኣሳ፤ ታ ነባ አይ ቆፕያኮ ፓጫሳ። ሹካ ዶርሳዳ፥ ሄ ኢታ አሳታ ጎቻዳ ከሳ፤ ሹካ ጋላሳስ ኤንታ ዱማያዳ ዎꬃ።
JER 12:4 ቢታይ እራ ꬋይድ ቆሄታናይ፥ ደንባን ደእያ ማታይ መላናይ አዉደ ጋካናሴ? አሳ ኢታተꬃ ጋሶን፥ ዶእነ ካፎይ ዉርስ። አሳይ ቃስ፥ “ጎዳይ ኑ ኦꬅያባ ደመና” ያጎሶና።
JER 12:5 ጎዳይ ኤርምያሳኮ፥ “ኔኒ ቶሆን ዎፅያ አሳታራ ጋደታዳ ዳቡርኮ፥ ፓራራ ዋናዳ ጋደታኔ? ነ ሳሮ ቢታን ꬉበትኮ፥ ዮርዳኖሰ ዎራ ግዶራ ዋናዳ ሄመታኔ?
JER 12:6 ነ እሻት፥ ህንተ ሶ አሳት ነና አꬅድ እምዶሶና፤ ነ ቦላ ደንድዶሶና። ሄሳ ግሾ፥ ሎኦባ ኦድኮካ ኤንታ አማኖፓ።
JER 12:7 “ታ እስራኤለ አጋስ፤ ታ ዶረትዳ ካዎተꬃ የጋስ፤ ታ ሲቅያ አሳ እያ ሞርከታ ኩሸን አꬃዳ እማስ።
JER 12:8 ታ ዶርዳ አሳይ ታዉ ዎራን ደእያ ጋሞ መላ ግድስ። እ ታ ቦላ ጉድስ፤ ሄሳ ግሾ ታ እያ እፃስ።
JER 12:9 ታ ዶርዳ አሳይ ኡባ ባጋራ ጵርጮይ ተቅዳ ካፎ መላ ግድዶሶና። ብድ ዶአታ ኡባ ሺሽድ እያ ማና መላ ኤህተ።
JER 12:10 “ዳሮ አላጋ ካዎት ታ ዎይነ ጋድያ ኢስዶሶና፤ ታ ጋድያ የꬍዶሶና፤ ታ ሎኦ ጎሻ ባይሳ ከስዶሶና።
JER 12:11 ሄ ቢታይ ኢትድ ኦፅስ፤ ታ ስንꬃን መላነ ባይሳ ግድስ። ቃተይ ባይና ግሾ ቢታይ ኩመꬅ ኢትስ።
JER 12:12 መላ ቢታን ደእያ አይኮካ ባይና ደረ ካንꬅድ፥ ቦንቀይሳት ይዶሶና። ጎዳ ማሻይ ቢታ ሀ ጋፃፐ ያ ጋፃ ጋካናዉ ምስ። ሄሳ ግሾ፥ ኦንካ ሳሮ አታናዉ ዳንዳኤና።
JER 12:13 ኤንቲ ግስተ ዘርድ፥ አጉንꬁ ጫክዶሶና፤ ኤንቲ ዳሮ ዳቡርዶሶና፤ ሽን አይኮካ ደምቦኮና። ጎዳ ዎልቃማ ሸንያ ጋሶን ኤንታ ካꬃይ ꬋይስ” ያግስ።
JER 12:14 “ታኒ ታ አሳ፥ እስራኤለስ፥ እምዳ ቢታ ኦይክዳ፥ ኢታ ሾሮ ካዎተꬃታ ኤንታ ቢታፈ ሾዳና። ቃስ ይሁዳ አሳ ኤንታ ግዶፈ ከሳና።
JER 12:15 ሽን ኤንታ ቢታፈ ሾድዳፐ ጉየ፥ ዛራዳ ኤንታዉ ቃታና። ኤንታ እሱዋ ኤንታ ላታ ቢታነ ኤንታ ካዎተꬃ ዛራዳ ኤሀና።
JER 12:16 ካሰ ታ አሳ ባኣለ ሱንꬃን ጫቃና መላ ታማርስዳይሳዳ ኤንቲ ታ አሳ ኦግያ ታማርኮነ ታ ሱንꬃን ጫቅኮ ኤንቲ ታ አሳ ግዶን ምንድ ዳና።
JER 12:17 ሽን ኪተቶና እፅዳ ካዎተꬃታ ታኒ ፖሎ ሾዳዳ ꬋይ-ሳና” ያጌስ ጎዳይ።
JER 13:1 ጎዳይ ታኮ፥ “ባዳ ሊኖ ቃጭናፐ ዳደትዳ ዳንጮ ሻማዳ፥ ነ ፄሳን ዳንጫ፤ ሽን ሃꬃን ቦሽሶፓ” ያግስ።
JER 13:2 ሄሳ ግሾ፥ ታኒ ጎዳይ ኪትዳይሳዳ ዳንጩዋ ሻማዳ ታ ፄሳን ዳንጫስ።
JER 13:3 ጎዳይ ናምአንꬆ ታኮ ሀይሳዳ ያግስ፦
JER 13:4 “ነ ሻማዳ ዳንጭዳ ዳንጩዋ ኤካዳ፥ ኤፍራፂሳ ሻፋ ባዳ ሹቻ ቆጶን ቆሳ” ያግስ።
JER 13:5 ጎዳይ ታዉ ኦድዳይሳዳ ኤፋዳ፥ ኤፍራፂሳ ሻፋ ላንቀን ቆሳስ።
JER 13:6 ዳሮ ጋላሳፐ ጉየ ጎዳይ፥ “ኤፍራፂሳ ሻፋ ባዳ፥ ታ ነና፥ ‘ያን ቆሳ’ ግዳ ዳንጩዋ ኤካ” ያግስ።
JER 13:7 ታኒ ኤፍራፂሳ ሻፋ ባዳ፥ ዳንጩዋ ሞግዳ በሳፈ ኤካስ። ሽን ሄ ዳንጮይ ኢትድ አይኮካ ማዶናባ ግድስ።
JER 13:8 ሄሳፈ ጉየ፥ ጎዳ ቃላይ ታኮ፥
JER 13:9 “ታኒ ይሁዳ ጬቀተꬃነ የሩሳላመ ኦቶሩዋ ሀይሳዳ ኦꬃዳ ꬋይሳና።
JER 13:10 ታ ቃላ ስኦና እፅድ፥ ባንታ ዎዛና ሙምስድ፥ ሀራ ፆሳታ ጎይናናዉነ ኤንታዉ ኦꬃናዉ ብያ ሀ ኢታ አሳት፥ ሀ ዳንጩዋዳ ማዶናባ ግዳና።
JER 13:11 ዳንጮይ አሳ ፄስ ባቅድ ኦይከይሳዳ ይሁድነ እስራኤለይ ታራ ኦይከትድ፥ ታ ሱንꬃስ ጋላታነ ቦንቾ ግዳና መላነ ታ አሰ ግዳና መላ ኦꬃስ፤ ሽን ኤንቲ ስኦና እፅዶሶና” ያጌስ ጎዳይ።
JER 13:12 ጎዳይ ታኮ፥ “ጎዳይ እስራኤለ ፆሳይ፥ ሀይሳዳ ያጌስ ጋዳ ኦዳ ያግስ፦ ‘እስ እስ ፁጋይ ዎይነ ኡሻን ኩማና’ ያጋ። ኤንቲ ኔኮ፥ ‘ኑኒ እስ እስ ፁጋይ ዎይነን ኩማናይሳ ኤሮኮዬ?’ ያግኮ፥
JER 13:13 ነ ኤንታኮ፥ ‘ታኒ ሀ ቢታን ደእያ አሳ ኡባ፥ ሀር አቶሽን፥ ዳዊታ አራታን ኡትያ ካዎታ፥ ካህነታ፥ ናበታነ የሩሳላመን ደእያ አሳ ኡባ፥ ኤንቲ ማꬆታና ጋካናዉ ዎይነ ኡሻን ኩንꬃና።
JER 13:14 ታኒ ኤንታ፥ እሱዋ እሱዋራ፥ አዋ ናኣራ ዶምኤꬃና። ታ ኤንታ ꬋይሳና፤ ታ ኤንታዉ ኬህከ፥ ቃትከ፤ ኤንታ ማርከ’ ” ያጌስ ጎዳይ።
JER 13:15 ሀይሳ ኦደይ ጎዳ ግድያ ግሾ ህንተ ኦቶሩዋ አግድ ስእተ፤ አኬክተ።
JER 13:16 እ ꬉማ ኤሀናፐ ስን፥ ህንተ ቶሆይ ꬉምያ ደርያን ꬉበታናፐ ስን፥ ጎዳ ህንተ ፆሳ ቦንችተ። ህንተ፥ “ፖኦይ ያና” ግድ ናገታ፤ ሽን እ ሳካና ꬉማን ላማና።
JER 13:17 ሽን ህንተ ስኦና እፅኮ፥ ህንተ ኦቶሩዋ ግሾ ታ ጌማን ዬካይስ። ጎዳ ዉደይ ድኤትድ ብዳ ግሾ፥ ታ ዬካይስ፤ ታ አይፈይ አፉꬁ ጉሴስ።
JER 13:18 ጎዳይ ታኮ፥ “ካዋስነ ካዋ አየስ፥ ሀይሳዳ ያጋዳ ኦዳ፦ ህንተ ቦንቾ ካላቻይ ህንተ ሁጵያፐ ኩንድዳ ግሾ፥ ህንተ ካዎተꬃ አራታፐ ዱገ ዎꬍተ።
JER 13:19 ነገበ ቢታን ደእያ ካታማት ኡባይ ጎርደትዶሶና። ኤንታ ዶያናዉ እስ አስካ ያን ባዋ። ይሁዳ አሳይ ኩመꬅ ድኤትድ ብዶሶና” ያግስ።
JER 13:20 ጎዳይ፥ “አነ ꬎቁ ጋዳ፥ ፑደሀ ባጋፈ የይሳታ ፄላ። ነዉ እመትዳ ዉደይ፥ ነ ጬቀትዳ ዶርሳት አዉን ደኦና?
JER 13:21 ኔኒ፥ ነዉ ላገ ግዳና መላ ኮይዳይሳት ነና ፆንድ ሃርያ ዎደ ዎይጋይ? የሎስ ከይዳ ማጫሳዳ እቀꬅ ነና ኦይከኔ?
JER 13:22 የሩሳላመ፥ ኔኒ ነ ዎዛናን፥ ‘ሀ ኡባይ ታና አይስ ጋክዴ?’ ጊኮ፥ ነ ማኦይ ቃረትዳይነ ነ ቦንቀትዳይ ነ ናጋራይ ዳርዳ ግሾሳ።
JER 13:23 ቶጰይ ባ ማላ ዎይኮ ማሄይ ባ ጋዛተꬃ ላማናዉ ዳንዳኢ? ሄሳዳካ፥ ኢታ ኦሶን ሜዘትዳ ህንተ፥ ሎኦ ኦሶ ኦꬃናዉ ዳንዳኤከታ” ያግስ።
JER 13:24 “ታ ህንተና ባዞ ጫርኮይ ኤፍያ ሱላዳ ላላና።
JER 13:25 ህንተ ታና ዶግዳ ግሾነ ዎርዶ ፆሳታን አማነትዳ ግሾ ህንተ ሳማይነ ታ ህንተዉ እምያ ግሾይ ሀይሳ።
JER 13:26 ህንተ ካሎይ በንታና መላ ታ ህንተ ማኡዋ ቃራ የጋና።
JER 13:27 ነ ቦርሶ ኦሱዋ፥ ኮርማ ፓራዳ ዚታስ ጫገይሳ፥ ዬል ባይና ላይማተꬅ፥ ዙማ ቦላነ ደንባን ነ ኦꬅያ እፀትዳ ኦሱዋ ታ በአስ። የሩሳላመ፥ ነና አየ! ነ አዉደ ጋካናዉ ጌዮና ዳኔ?” ያጌስ ጎዳይ።
JER 14:1 ኮሻባ ጎዳይ ኤርምያሳስ ኦድዳ ቃላይ ሀይሳ፦
JER 14:2 “ይሁዳ ቢታይ ካዮቴስ፤ እያ ካታማት ላባንዶሶና። ያን ደእያ አሳት ቢታን ኡትድ ዬኮሶና፤ የሩሳላመፐ ግታ ዋሶይ ስኤትስ።
JER 14:3 ዱረ አሳት ሃ ትካናዉ ባንታ አይለታ ኪቶሶና። ኤንቲ ሃꬃ ኦላኮ ቦሶና፤ ሽን ሃ ደሞኮና፤ ባንታ ኦቱዋ መላ ቶክ ኤክድ ስሞሶና። ሀንያባ ꬋይድ ዬላትሸ፥ ባንታ ሁጵያ ጉሉንቶሶና።
JER 14:4 እር ቡኮና ግሾ ቢታይ መልድ ዛእስ። ጎሻንቾት ዬላትድ፥ ባንታ ሁጵያ ጉሉንትዶሶና።
JER 14:5 ማት ባይና ግሾ ዎሽኤይ ባ የልዳ ጋሎ ማርዉ ደንባን የጋዳ ባዉሱ።
JER 14:6 ባዞ ሀረት አይብካ ባይና ꬎቃ ዙማታ ቦላ ኤቅድ፥ ዎርካናዳ ላፈቶሶና። ኤንታዉ ምያባይ ꬋይን፥ ኤንታ አይፈይ ፄላናዉ ዳቡርስ” ያግስ።
JER 14:7 አሳይ ሀይሳዳ ያግድ ዎስስ፦ “አቤት ጎዳዉ፥ ኑ ናጋራይ ኑ ቦላ ማርካትኮካ፥ ነ ሱንꬃ ግሾ፥ ኑስ እስባ ኦꬃ። ኑ ነና አግድ ዳሮ ዎደ ጉየ ስምዳ፤ ነ ቦላ ናጋራ ኦꬅዳ።
JER 14:8 አቤት እስራኤለ ኡፋይሳዉ፥ መቶ ዎደ አሸይሶ፥ ነ እማꬃዳ፥ እስ ቃማ አቃናዉ ገልዳ ኦገ አሳዳ አይስ ሀናይ?
JER 14:9 ነ ዳጋምዳ አሳዳ፥ አሻናዉ ዳንዳኦና አሳዳ አይስ ሀናይ? አቤት ጎዳዉ፥ ነ ኑ ግዶን ደኣሳ! ኑኒ ነ ሱንꬃን ፄገትዳ፤ ኑና አጎፋ!” ያግስ።
JER 14:10 ሀ አሳታባ ጎዳይ ሀይሳዳ ያጌስ፦ “ኤንቲ ቶይላተꬅ ዳሮ ዶሶሶና፤ ባንታ ቶሁዋ ተቆኮና። ሄሳ ግሾ፥ ጎዳይ ኤንታን ኡፋይተና። እ ኤንታ ኢታ ኦሱዋ ሀሳይድ፥ ኤንታ ናጋራ ግሾ ኤንታ ሴራና” ያጌስ።
JER 14:11 ሄሳፈ ጉየ፥ ጎዳይ ታኮ፥ “ሀ አሳ ሳሮተꬃስ ዎሶፋ።
JER 14:12 ኤንቲ ፆምኮካ፥ ታ ኤንታ ዋሱዋ ስእከ። ፁሳ ያርሾነ ካꬃ ያርሹዋ ኤንቲ ያርሽኮካ፥ ታ ኤክከ። ታኒ ኤንታ ኦላን፥ ኮሻንነ ጋዶን ꬋይሳና” ያግስ።
JER 14:13 ታኒ ዛራዳ፥ “አቤት ኡባ ሃርያ ጎዳዉ፥ ናበት ‘ህንተ ኦላ በኤከታ ዎይኮ ኮሽ ጋከና። ጎዳይ ሀ ቢታን ፖሎ ሳሮተꬅ እማና’ ያጎሶና” ያጋስ።
JER 14:14 ጎዳይ ዛሪድ፥ “ናበት ታ ሱንꬃን ዎርዶ ኦዶሶና፤ ታ ኤንታ ኪታብከ ዎይኮ ኤንታዉ ኦዳብከ። ኤንቲ ህንተዉ ኦደይ ዎርዶ ቆንጨꬅ፥ ፓꬆና ካዮነ ባንታዉ መꬍ ከስዳ ዎርዶ ሃሳዮሶና።
JER 14:15 ሄሳ ግሾ፥ ጎዳ ሱንꬃን ኦድያ ናበታ ታ ኪታብከ። ሽን ኤንቲ፥ ‘ኦል ዎይኮ ኮሽ ሀ ቢታ ቦቸና’ ያጎሶና። ሄ ናበት ባንታዉ ኦላንነ ኮሻን ꬋያና!
JER 14:16 ቃስ ትንብተይ ኦደትዳ አሳይ ኮሻነ ኦላ ጋሶን ሀይቃና፤ ኤንታ አሀይ የሩሳላመ ኦግያ ቦላ ሆለታና። ኤንታ ዎይኮ ኤንታ ማቸታ፥ ኤንታ አደ ናይታነ ዎይኮ ኤንታ ማጫ ናይታ ሞግያ አስ ꬋያና። ኤንታዉ በሲያ ዋይያ ኤንታ ቦላ ትጋና” ያግስ።
JER 14:17 ታ አዛኑዋባ ታ አሳስ ኦዳና መላ ጎዳይ ታና ኪትስ። “ታ አሳይ ደሸትድ፥ ዳሮ ማዱንፅዳ ግሾ፥ ታ አይፈይ ቃማነ ጋላስ ቃንፆና አፉፃና።
JER 14:18 ታ ደምባ ከይኮ፥ ማሻን ሀይቅዳይሳታ በአይስ። ካታማ ገልኮ፥ ኮሻን ቆሄትዳይሳታ በአይስ። ናበትነ ካህነት ባንታ ኦሱዋ ኦꬆሶና፤ ሽን አይ ኦꬅያኮ ኤሮኮና” ያጋስ።
JER 14:19 አቤት ጎዳዉ፥ ነ ይሁዳ አጋዲ? ፅዮነ አሳ እፃዲ? ኑ ፓፆናዳ ኦꬃዳ አይስ ደቻዲ? ኑ “ሳሮ ግዳና” ግድ ናግዳ፤ ሽን አይብካ ሎኦባይ በንትቤና። ኑ “ፓፃና ዎደይ ያና” ግድ ናግዳ፤ ሽን ዳጋማ ፃላል ጋክስ።
JER 14:20 አቤት ጎዳዉ፥ ኑ ኢታተꬃ ኤርዳ፤ ኑ አዋታ ባላ አኬክዳ፤ ኑኒ ናጋራ ኦꬅዳ።
JER 14:21 ነ ሱንꬃ ግሾ ጋዳ ኑና ካꬎፓ፤ ነ ቦንቾ አራታ ካዉሾፋ። ነ ኑራ ጫቅዳ ጫቁዋ ሀሳያ፤ ነ ጫቁዋ መንꬆፋ።
JER 14:22 ካዎተꬃታ ኤቃታፐ እሶይ እራ ቡክሳናዉ ዳንዳኢ? ሳሎይ ባ ሸነን ፑሳናዉ ዳንዳኢ? ዳንዳኤና! አቤት ጎዳዉ፥ ኑ ፆሳዉ፥ ሄሳ ዳንዳኤይ ነና! ሀይሳ ኡባ ኦይ ነና ግድያ ግሾ ነናን ኡፋይስ ኦꬆስ።
JER 15:1 ሄሳፈ ጉየ፥ ጎዳይ ታኮ ሀይሳዳ ያግስ፦ “ሀር አቶሽን ሙሰይነ ሳሜል ታ ስንꬃን ኤቅድ ዎስያኮካ ታ ዎዛናይ ሀ አሳኮ ስመና። ኤንታ ታ ስንꬃፈ ድጋ፤ ኤንቲ ቦ።
JER 15:2 ኤንቲ ነና፥ ‘ኑ አዉ ባኔ?’ ግድ ኦይችኮ፥ ጎዳይ ሀይሳዳ ያጌስ ጋዳ ኤንታዉ ኦዳ፦ ‘ሀይቆስ ፕርደትዳይሳት ሀይቆስ፤ ማሻስ ፕርደትዳይሳት ማሻስ፤ ኮሻስ ፕርደትዳይሳት ኮሻስ፤ ድኤታናዉ ፕርደትዳይሳት ድኤታናዉ ቦ’ ያግስ።
JER 15:3 “ታኒ ኦይዱ ቆሞ ጋዶታ ኤንታ ቦላ ኤሀና ያጌስ ጎዳይ። ሄስካ፥ ኤንታ ዎꬋናዉ ማሻ፥ ኤንታ አሀ ጎቻናዉ ካናታ፥ ኤንታ አሾ ምድ ꬋይሳናዉ ሳሎ ካፎታነ ሳአ ዶአታ ኤሀና።
JER 15:4 ህዝቅያሳ ናአይ፥ ይሁዳ ካዎይ ምናሰይ የሩሳላመን ኦꬅዳ ኢታ ኦሱዋ ግሾ፥ ታ ኤንታ ሳኣ ካዎተꬃ ኡባስ ዳጋማ ኦꬃና።
JER 15:5 “የሩሳላመ አሳዉ፥ ህንተዉ ኦነ ቃታናይ? ህንተዉ አዛናናይ ኦኔ? ህንተ ዋንደቲ? ግድ ህንተና ኦይቻናይ ኦኔ?” ያጌስ ጎዳይ።
JER 15:6 “ህንተ ታና አግደታ፤ ህንተ ጉየ ስምደታ። ሄሳ ግሾ፥ ታኒ ህንተ ቦላ ታ ኩሽያ ደንꬃዳ ህንተና ꬋይሳስ፤ ህዛፐ ታ ህንተዉ ቃትከ።
JER 15:7 ኤንቲ ባንታ ኢታ ኦግያፐ ስሞና እፅዳ ግሾ ኤንታ ካታማታ ፐንግያን ፕ ኤካዳ ሀርቃስ። ታ ኤንታ ናይታ ዎꬋ ዉርሳስ፤ ታ አሳ ꬋይሳስ።
JER 15:8 ኤንታ አምኤታ ታይቦይ አባ ጋፃን ደእያ ሻፍያፐ ዳርስ። ታኒ ሴታ ጋላስ ናአተꬃታ አየታ ቦላ ꬋዮ ኤሀና። ቆፖና ደእሽን፥ ኤንታ ቦላ ዳጋማነ ኮኮርስ ኤሀና።
JER 15:9 ላፑን ናይት ሀይቅዳ አይያ ሸምፓናዉ ፆነታዳ ዳቡራሱ። እዉ ጋላስ ቃምስ፤ እያ ካዉያሱነ ዬላታሱ። ፓፃ አትዳይሳታ ኤንታ ሞርከታ ስንꬃን ማሻን ዉርሳና” ያጌስ ጎዳይ።
JER 15:10 ታ አየ፥ ታና አይስ የላዲ? ታና አየ! ታ ቢታ ኡባን ደእያ አሳራ ካጭያነ ባፀትያ አስ ግዳስ። ታ ኦደስካ ታልአብከ፤ ኦደፈካ ታልአዳ ኤካብከ፤ ሽን አሳ ኡባይ ታና ባዴስ።
JER 15:11 ጎዳይ ታኮ፥ “ቱማ ታ ነና ሎኦ ኦሶስ አሻዳ ኤካና። ቱማ ነ ሞርከት መቱዋ ዎደነ ዋየ ዎደ ነና ዎሳና መላ ኦꬃና።
JER 15:12 አስ ብራታ፥ ፑደሀ ባጋፈ ያ ብራታ ዎይኮ ናሰ ብራታ መንꬃናዉ ዳንዳኢ?
JER 15:13 ቢታ ኡባን ህንተ ኦꬅዳ ናጋራ ግሾ፥ ህንተ ሻሉዋነ ዱረተꬃ ህንተ ሞርከታስ አꬃዳ እማና።
JER 15:14 ህንተና ኤሮና ቢታን ህንተ ሞርከት ህንተና አይለ ኦꬃና። ታ ሀንቆይ ምያ ታማ ግድድ መርናዉ ኤፃና” ያግስ።
JER 15:15 አቤት ጎዳዉ፥ ነ ኤራሳ። ታና ሀሳያ፤ ታና ማዳ፤ ታና የደይሳታ ቦላ ታ ሃሉዋ ከያ። ነ ዳንዳአን ታና ዎራ የጎፋ። ታ ነ ግሾ ጫየተይሳ ቆፓ።
JER 15:16 አቤት ጎዳዉ፥ ኡባፈ ዎልቃማ ፆሳዉ፥ ታ ነ ሱንꬃን ፄገትዳ ግሾ፥ ነ ቃላይ ታኮ ይን ማስ። ማ ስምን ታና ፓሽክስስ፤ ታ ዎዛና ኡፋይስስ።
JER 15:17 ቀልቅሰይሳታ ጩጋን ኡታብከ፤ ኤንታራ ኡፋይታብከ። ኔኒ ነ ኩሽያ ታ ቦላ ዎꬅዳ ግሾነ ታ ቦላ ይሎትዳ ግሾ ታ ታርካ ዱማ ኡታስ።
JER 15:18 ታ ሀርገይ ፓፆናይ፥ ታ ማዱንꬃይ መሎናይ አይብሴ? ነ ታዉ ኤቅያ ሻፋዳ፥ መልያ ፑልቶዳ ሀናዬ?
JER 15:19 ሄሳ ግሾ፥ ጎዳይ ሀይሳዳ ያጌስ፦ “ነ ታኮ ስምኮ፥ ታ ዛራዳ ነና ኤካና፤ ነ ታዉ ኦꬃና። ሀዳ ኦዳ አጋዳ፥ ቦንቾ ቃላ ፃላላ ኦደትኮ፥ ነ ታ ዶና ግዳና። ኤንቲ ኔኮ ስማና፤ ሽን ነ ኤንታኮ ስማካ።
JER 15:20 ታ ነና ሀ አሳስ ናሰ ብራታን ግምበትዳ ግምበ ኦꬃና። ኤንቲ ኔራ ኦለታና፤ ሽን ነና ፆኖኮና፤ ታ ነና አሻና።
JER 15:21 ኢታታ ኩሸፐ ታ ነና አሻና፤ ቃይ ባይና ዎዛና ምኖ አሳፐ ታ ነና ዎዛና” ያጌስ ጎዳይ።
JER 16:1 ጎዳ ቃላይ፥ ሀይሳዳ ያግሸ ታኮ ይስ፦
JER 16:2 “ኔኒ ማቾ ኤኮፋ፤ ማጫ ናአነ አደ ናአ ሀ በሳን የሎፓ።
JER 16:3 ሀ በሳን የለትያ ማጫ ናይታባነ አደ ናይታባ፥ ኤንታ የልያ አየታነ አዋታባ ጎዳይ ሀይሳዳ ያጌስ።
JER 16:4 ኤንቲ ኢታ ሀርገን ሀይቃና፤ ኤንታዉ ዬክያ ዎይኮ ኤንታ ሞግያ አስ በንተና። ኤንታ አሀይ ቢታ ቦላ ፕቶ መላ የገታና፤ ኤንቲ ማሻንነ ኮሻን ዉራና፤ ኤንታ አሾይ ሳሎ ካፎታስነ ሳአ ዶአታስ ካꬅ ግዳና” ያግስ።
JER 16:5 “ዬሆ ኬꬅ ገሎፓ፤ ዬካናዉ ዎይኮ ቃታናዉ ቦፓ። ታኒ ሀ አሳ ቦላፈ ታ ሳሮተꬃ፥ ታ ሲቁዋነ ታ ማሮተꬃ ድጋስ።
JER 16:6 ግትነ ጉꬅ ሀ ቢታን ሀይቃና፤ ኤንቲ ሞገቶኮና። ኦንካ ኤንታዉ ዬከና፤ ኦንካ ባና ጋረና ዎይኮ ሁጰ ሜደትድ ካዮተና።
JER 16:7 ዬክያ አሳስ ሾቹ ኤፍድ፥ ኤንታራ እስፈ ምድ ኡይድ፥ ካዩዋ ባለꬅያ አስ እሶይካ ዴና። ሀር አቶሽን፥ አይያ ዎይኮ አው ሀይቅዳ አሳካ ምንꬅያ አስ ባዋ።”
JER 16:8 “ኤንታራ ማናዉነ ኡያናዉ ግብር ደእያ ኬꬅ ገሎፓ።
JER 16:9 ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ ‘ታኒ ኡፋይስነ እልልስ፥ ያጋኖ የꬅ ሀ በሳፈ ድጋና። ሄሳ አሳይ ባንታ ላይꬃንነ ባንታ አይፍያን በአና።’ ”
JER 16:10 “ነ ሀ ቃላ ኡባ አሳስ ኦድያ ዎደ፥ ኤንቲ፥ ‘ጎዳይ አይስ ሀይሳ መላ ኢታባ ኑ ቦላ አዋጅዴ? ኑ አይ ባልዶ? ጎዳ፥ ኑ ፆሳ ቦላ ኑ አይ ናጋራ ኦꬅዶ?’ ” ያጋና።
JER 16:11 ሄ ዎደ ነ ኤንታኮ፤ “ህንተ አዋት ታና አግዳ ግሾሳ፥ ኤንቲ ሀራ ፆሳታ ካልዳ ግሾሳ፥ ኤንታዉ ኦꬅዳነ ጎይንዳ ግሾሳ፥ ታና አግድ ታ ህግያ ናጎና እፅዳ ግሾሳ።
JER 16:12 ህንተ፥ ህንተ አዋታፐ አꬍድ ኢታ ኦꬅዳ ግሾሳ። ህንተ እሶይ እሶይ ኤሮ ጎና ህንተ ኢታ ዎዛና ካልደታ፤ ታዉ ኪተቶና እፅደታ።
JER 16:13 ሄሳ ግሾ፥ ታ ህንተና ሀ ቢታፈ ደንꬃዳ፥ ህንተ ዎይኮ ህንተ አዋት ኤሮና ቢታ ሆላና። ያን ህንተ ሀራ ፆሳታ ጋላስነ ቃማ ሀጋዛና፤ ታኒ ህንተዉ ቃትከ” ያጌስ ጎዳይ።
JER 16:14 አሳይ፥ “እስራኤለ አሳ ግብፀ ቢታፈ ከስዳ ጎዳይ ኤርያ መላ” ያግድ ጫቆና ዎደይ ያና።
JER 16:15 ሄሳ አግድ፥ “ ‘እስራኤለ አሳ ፑደሀ ባጋ ቢታፈነ ኤንታ ላልዳ ቢታ ኡባፈ ዛሪድ ኤህዳ ጎዳይ ኤርያ መላ’ ያግድ ጫቃና። ታኒ ኤንታ ካሰ ኤንታ አዋታስ እምዳ ቢታ ዛራዳ ኤሀና” ያጌስ ጎዳይ።
JER 16:16 “ታ ሞሎ ኦይክያ ዳሮ አሳ ኪታና፤ ኤንቲ ኤንታ ኦይካና። ሄሳፈ ጉየ፥ ዳሮ ሻንካትያ አሳ ኪታና፤ ደረፐ፥ ዙማፐነ ሹቻ ቆጶፐ ኤንታ ሻንካትድ ከሳና።
JER 16:17 ታ አይፈይ ኤንታ ኦግያ ቦላ ደኤስ፤ ኤንቲ ታፐ ቆሰትቦኮና፤ ኤንታ ናጋራይ ታ ስንꬃፈ ጌምቤና።
JER 16:18 ታ ኤንታ ኢታተꬃነ ኤንታ ናጋራ ግሾ ኤንታዉ ናምኡ ኩሸ ዛራና። ኤንቲ አሀ ዳንያ ባንታ እፀትዳ ኤቃታን ታ ቢታ ቱንስዶሶና፤ ሻትያ ባንታ ምስለታን ታ ላታ ኩንꬅዶሶና” ያጌስ ጎዳይ።
JER 16:19 አቤት ጎዳዉ፥ ታ ዎልቃዉ፥ ታ ሚፃዉ፥ መቶ ጋላስ ታ ባቃታዳ አትያ በሳዉ፥ ካዎተꬃት ሳኣ ጋፃፐ ኔኮ ይድ፥ “ኑ አዋት ፓꬆናነ ማዶና ዎርዶ ፆሳታ ፃላላ ላትዶሶና።
JER 16:20 አሳይ ባንታዉ ፆሳታ መꬋናዉ ዳንዳኦና? ኤ፥ ኤንቲ መꬍያኮካ ቱማ ፆሳታ ግዶኮና!” ያጋና።
JER 16:21 “ሄሳ ግሾ፥ ታ ኤንታ ታማርሳና፤ ታ ዎልቃነ ታ ግታተꬃ ኤንታ ኤርሳና። ሄ ዎደ ኤንቲ ታ ሱንꬃይ ጎዳ ግደይሳ ኤራና” ያጌስ ጎዳይ።
JER 17:1 “ይሁዳ ናጋራይ ብራታ ቢረን ፃፈትስ፤ ኤንታ ዎዛና ቦላነ ያርሾ በሳን ደእያ ካጭያ ቦላ አልማዘ ጌተትያ ሹቻ ፄራን ፃፈትስ።
JER 17:2 ኤንታ ናይት እርፃ ምꬃ ጋርሳን፥ ዙማታ ቦላነ ደረታ ቦላ ጊግስዳ ያርሾ በሳን አሼራ ጌተትያ ፆሴስ ኤስዳ ምስልያ ጎይኖሶና።
JER 17:3 ህንተ ቢታ ቦላ ኦꬅዳ ናጋራ አጩዋ ቃንፅሳናዉ ህንተ ሻሉዋነ ህንተ ሚሽያ ህንተ ሞርከታስ እማና።
JER 17:4 ህንተ መርናዉ ኤፅያ ታ ሸንያ ደንꬅዳ ግሾ፥ ህንተና ላትስዳ ቢታፈ ሾዳና፤ ህንተ ኤሮና ቢታን ህንተ ሞርከታስ አይለ ኦꬃና” ያጌስ ጎዳይ።
JER 17:5 ጎዳይ ሀይሳዳ ያጌስ፦ “አሳን አማነተይ፥ አሾ ማእዳ አሳን ጬቀተይነ ባ ዎዛና ፆሳፈ ሃሰይ ባደትዳይሳ ግዶ።
JER 17:6 ሄሳ መላ አስ ባዞን ደእያ ቱሸ መላ፤ ሎኦባይ ያ ዎደ እ በኤና። እ ባዞን፥ መላ በሳን፥ አስ ዶና ማፅነ ቢታን ዳና።
JER 17:7 “ጎዳን አማነትያ አስ፥ እያ ጬቆይ ጎዳ ግድዳ አስ አንጀትዳይሳ።
JER 17:8 እ ሃꬃ ማታን ቶከትድ፥ ባ ፃጱዋ ጎግያ ሃꬃን የድዳ ምꬃ መላ። እ አዋ ሱላስ ያየና። ሄ ምꬃ ሀይꬃይ ጭልኦሽን ደኤስ። እር ቡኮና ላይꬃን ህርገና፤ ኡባ ዎደ አይፈ አገና።
JER 17:9 “አሳ ዎዛን ኡባፈ አꬍድ ጭሜስነ ኢታ፤ እያ ጋꬃ ቆፋ ኦን ኤራናዉ ዳንዳኢ?
JER 17:10 ታኒ ጎዳይ፥ አሳ ኡባስ እያ ኦግያዳነ እያ ኦሱዋዳ እማናዉ፥ አሳ ዎዛና ፕልጋይስ፤ እያ ካሃ ፓጫይስ” ያጌስ ጎዳይ።
JER 17:11 በሶና ኦገን ሻሎ ሺሽያ አስ ባባ ግዶና ጱጱለ ቆፅያ ኩራቾ መላ። ባ ላይꬃ ባጋ ዛዋን አግድ ባና፤ ዉርሰꬃን እያ ኤያተꬃይ ቆንጫና።
JER 17:12 ኑ ፆሳ ኬꬃይ ኮይሮፐ ዶምድ፥ ቦንቾ ካዎተꬃ አራታዳ ꬎቃ ደርያ ቦላ ደኤስ።
JER 17:13 አቤት ጎዳዉ፥ እስራኤለ ኡፋይሳዉ፥ ነና አግዳ ኡባይ ዬላታና። ደኦ ፑልቶ ሃꬃ፥ ነና ጎዳ ኤንቲ አግዳ ግሾ ባናን ፃፈትዳ ሱንꬃዳ ꬋያና።
JER 17:14 አቤት ጎዳዉ፥ ነ ታ ጋላታ ግድያ ግሾ፥ ታና ፓꬃ፤ ታ ፓፃና፤ ታና አሻ፤ ታ አታና።
JER 17:15 አሳይ ታኮ፥ “ ‘ጎዳይ ታዉ ኦድስ’ ያጋዳ ነ ኦድዳ ቃላይ አዉን ደኢ? እ አይስ ፖለተኔ?” ያጎሶና።
JER 17:16 ታኒ ሄንꬃንቾ ግዳዳ ነና ሀጋዞ አጋብከ፤ ኤንቲ መቶታና ጋላሳ ታ አሞታብከ። ታ ዶናፐ ከይዳ ቃላ ነ ኤራሳ።
JER 17:17 ታና ዳጋንꬆፋ፤ መቶ ጋላስ ታኒ ባቃታዳ አትያ በሳይ ነና።
JER 17:18 ታና የደይሳት ዬላቶ፤ ሽን ታና ዬላዮፓ። ኤንታ ዳጋንꬃ፤ ሽን ታና ዳጋንꬆፋ። ኤንታ ቦላ መቶ ኤሀ፤ ኤንታ ናምኡ ኩሸ ሴራ።
JER 17:19 ጎዳይ ታኮ፥ “ኮይሮ ባዳ ይሁዳ ካዎት ካታማ ገልያነ ከይያ፥ አሳይ ገልያ ፐንግያንነ ሀራ የሩሳላመ ፐንገታ ኡባን ኤቃ።
JER 17:20 አሳኮ ሀይሳዳ ያጋ፦ ‘ህንተኖ ይሁዳ ካዎቶ፥ ህንተኖ ይሁዳ አሳዉ፥ ህንተኖ የሩሳላመ አሳዉ፥ ሀ ፐንገታራ ገልያ አሳዉ፥ ኡባይ ጎዳ ቃላ ስእተ።
JER 17:21 ሳምባታ ጋላስ ቶሆ ቶክድ የሩሳላመ ፐንግያራ ገሎና መላ ናገትተ።
JER 17:22 ሳምባታ ጋላስ ህንተ ኬꬃፈ ቶሆ ቶክድ ከሶፍተ፥ ዎይኮ አይብ ኦሶካ ኦꬆፕተ። ካሰ ህንተ አዋታ ታ ኪትዳይሳዳ ሳምባታ ጋላስ ቦንችተ።
JER 17:23 ግዶሽን፥ ኤንቲ ስእቦኮና፤ ባንታ ሀይꬃ ታኮ ዛርቦኮና። ኤንቲ ታና ስኦናነ ታፐ ታማሮና እፅዶሶና።
JER 17:24 ሽን ህንተ ታዉ ኪተትኮ፥ ሳምባታ ጋላሳን ቶሆ ቶክድ፥ ሀ ካታማ ፐንገታራ ገሎና አግኮ፥ ሳምባታ ጋላስ አይኮካ ኦꬆና ዱማይድ ቦንችኮ፥
JER 17:25 ዳዊታ አራታን ኡትያ ካዎት ባንታ ሞርናታራ ፓራታነ ፓራ ጋረታ ቶግድ፥ ሀ ፐንገታራ ገላና። ኤንቲ ይሁዳ አሳራነ የሩሳላመ ካታማን ደእያ አሳራ ገላና፤ ሀ ካታማይ መርናዉ አስ ደእያ ካታማ ግዳና።
JER 17:26 አሳይ ፁሳ ያርሾ፥ ሀራ ያርሾ፥ ካꬃ ያርሾ፥ እፃነነ ጋላታ ያርሾ ኤክድ፥ ይሁዳ ካታማታፐ፥ የሩሳላመ ዩሹዋን ደእያ ጉታታፐ፥ ብንያመ ቢታፈ፥ ጋꬋፐ፥ ደረይ ዳርያ ቢታፈነ፥ ነገባፐ ጎዳ ፆሳ ኬꬃ ያና።
JER 17:27 ሽን ህንተ ሳምባታ ጋላሳ ዱማይድ ቦንቾና አግድ፥ ሳምባታ ጋላሳን ቶሆ ቶክድ፥ የሩሳላመ ፐንገታራ ገልድ፥ ታ ህግያ መንꬅኮ፥ ታ ሄ ፐንገታን ታማ ኦይꬃና። የሩሳላመ ካዎ ኬꬃታ ማና፤ ሄ ታማይ ቶኤና’ ” ያጌስ ጎዳ-ይ።
JER 18:1 ጎዳፐ ኤርምያሳኮ ይዳ ቃላይ ሀይሳ፦
JER 18:2 “ደንዳዳ ኡርቃ መꬍያ አድያ ሶ ባ። ያን ታ ነና ታ ቃላ ስሳና” ያግስ።
JER 18:3 ታኒ ዱገ ኡርቃ መꬍያ አድያ ሶ ባዳ፥ እ ባ ገርቱዋ ቦላ ኡርቃ መꬍሽን በአስ።
JER 18:4 እ መꬍሽን፥ ሄ ሚሸይ እያ ኩሸን ኢትስ። እ ሄ ኡርቃ ዛሪድ ሙኑቅድ፥ ባና ሎእያ ሀራ ሚሸ ከስድ መꬍስ።
JER 18:5 ሄ ዎደ ጎዳ ቃላይ፥ ሀይሳዳ ያግሸ ታኮ ይስ፦
JER 18:6 “እስራኤለ አሳዉ፥ ኡርቃ መꬍያ አደይ ኦይሳዳ ታ ህንተና ኦꬃናዉ ዳንዳእክና? እስራኤለ አሳዉ፥ ኡርቃይ ባና መይሳ ኩሸን ደኤይሳዳ፥ ህንተካ ታ ኩሸን ደኤታ።
JER 18:7 እስ ካዎተꬅ ዎይኮ እስ ደረይ ሾደታና መላ፥ ላለታና መላነ ꬋያና መላ ታ ኦድዳ ዎደ፥
JER 18:8 ሄ ካዎተꬃይ ባ ኢታተꬃፈ ስምኮ፥ ታ ኤንታ ቦላ ኤሀና ግዳ ኢታባ ኤሆና አጋጋና።
JER 18:9 ቃስ ሀራ ዎደ እስ ደርያ ዎይኮ ካዎተꬃ፥ ‘ታ ህንተና ኬፃናነ ቶካና’ ጋዳ ኦድዳ ዎደ፥
JER 18:10 ሄ ካዎተꬃይ ታ ኦደይሳ ስኦና እፅድ፥ ታ ስንꬃን ኢታባ ኦꬅኮ፥ ታ ኦꬃና ግዳ ሎኦባ ኦꬆና አጋጋና።
JER 18:11 “ሄሳ ግሾ፥ ይሁዳ አሳስነ የሩሳላመን ደእያ አሳስ ሀይሳዳ ያጋ። ታኒ ህንተዉ ꬋዮ ጊግሳይስነ ኢታባ ሀልቻይስ። ህንተ ኡባይ ህንተ ኢታ ኦግያፐ ስምተ፤ ህንተ ኦግያነ ህንተ ኦሱዋ ላምተ።
JER 18:12 ሽን ኤንቲ፥ ‘ሀይስ አይኮካ ማደና! ኑኒ ኑ ቆፋዳ ሀናና፤ ኑ እሶይ እሶይ ኑ ኢታ ዎዛና ካላና’ ያጋና” ያግስ።
JER 18:13 ሄሳ ግሾ፥ “ጎዳይ፥ ‘ሀይሳ መላባ ስእ ኤሬቲ?’ ያግድ ካዎተꬃታ ኦይችተ። ጌላኦ ግድዳ እስራኤለይ ዳሮ ሻትያባ ኦꬃሱ።
JER 18:14 ልባኖሰ ዙማ ቦላ ደእያ ሻቻይ፥ ዛላ ቦላፈ ꬋይድ ኤሪ? ሄ ዙማፐ ጎግያ እርፃ ሃꬅ መል ኤሪ?
JER 18:15 ሽን ታ አሳይ ታና ዶግዶሶና፤ ፓꬆና ፆሳታስ እፃነ ጩይስዶሶና። ባንታ ኦግያፐ፥ ባንታ በን ኦግያፐ፥ ጋፃ ከይድ ꬉበትዶሶና።
JER 18:16 ኤንቲ ባንታ ቢታ ባይሳነ ካትዳባ ከስዶሶና። ያራ አꬍያ ኦንካ ማላለትድ ባ ሁጵያ ቃꬄስ።
JER 18:17 ባን ዶሎሀ ባጋ ጫርኩዋን ላለተይሳ መላ፥ ታኒ ታ አሳ ሞርከታ ስንꬃን ላላና። ኤንታ መቱዋ ጋላስ ታ ኤንታዉ ዞኮ ዛራናፐ አትሽን፥ ታ ሶምኡዋ ኤንታ በስከ” ያጌስ ጎዳይ።
JER 18:18 አሳይ፥ “ካህነታ ማታን ህገይ፥ ጭንጫታ ማታን ዞረይ፥ ናበታ ማታን ቃል ꬋዮና ግሾ አነ ኤርምያሳ ቦላ ማቀቶስ። ኑ እንፃርሳን ኦይኮስ፤ እ ኦድያ ቃላ ስኦና እፃና” ያግዶሶና።
JER 18:19 አቤት ጎዳዉ፥ ታና ስአ፤ ታ ሞርከት ታ ቦላ ግያባ ሀይዛ።
JER 18:20 ሎኦ ኦꬅዳ አሳስ ዛሮይ ኢተዬ? ሽን ኤንቲ ታዉ ኦላ ቦኮሶና። ነ ሀንቆይ ኤንታፈ ስማና መላ ታ ኤንታ ግሾ ጋናተይሳ በአ።
JER 18:21 ሄሳ ግሾ፥ ኤንታ ናይታ ኮሻስ አꬃዳ እማ፤ ኤንታ ማሻስ አꬃዳ እማ። ኤንታ ማቸት ናእ ባይናይሳታነ አምኦ ግዶ። ኤንታ አደት ዎꬍያ ሀርገን ጋሄቶና፤ ኤንታ ናአተꬃት ኦላን ዉሮ።
JER 18:22 ኤንቲ ታና ኦይካናዉ ኦላ ቦክዳ ግሾነ ታ ቶሁዋስ ፅሄ ዎꬅዳ ግሾ፥ ቆፖና ቦንቀይሳታ ኤንታ ቦላ የዳ፤ ኤንታ ኬꬃን ዋሶይ ከዮ።
JER 18:23 ሽን አቤት ጎዳዉ፥ ኤንቲ ታና ዎꬋናዉ ማቀተይሳ ነ ኤራሳ። ነ ኤንታ ኢታተꬃ አቶ ጎፓ ዎይኮ ኤንታ ናጋራ ነ ስንꬃፈ ቁቾፋ። ኤንቲ ነ ስንꬃን ፆነትድ ኩንዶ፤ ነ ሸነትያ ዎደ ኤንታ ሀይሳዳ ኦꬃ።
JER 19:1 ጎዳይ ታኮ፥ “ባዳ ኦቶ መይሳፈ ፁጋ ሻማ። ኔራ ጉꬃ ቢታ ጭማታነ ጉꬃ ካህነ ጭማታ ኤካዳ፥
JER 19:2 ኩንአ መኦ ፐንግያ ማታራ አꬋዳ፥ ህኖማ ዛንጋራ ባ፤ ያን ታ ነዉ ኦድያ ቃላ አዋጃ።
JER 19:3 ‘ህንተኖ፥ ይሁዳ ካዎቶ፥ ህንተኖ የሩሳላመ ካታማ አሳዉ፥ ጎዳ ቃላ ስእተ!’ ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ ‘ስእያ ኡባ ሀይꬃስ ኢትያ ፓላባ ሀ ቢታ ቦላ ታ ኤሀና።’
JER 19:4 ሀ አሳይ ታና አግድ፥ ኤንቲ ዎይኮ ኤንታ አዋት ዎይኮ ይሁዳ ካዎት ኤሮና ሀራ ፆሳታስ እፃነ ጩይስድ ሀ በሳ ቱንስዶሶና። ኤንቲ ፅሎ አሳ ሱꬃ ሀ በሳን ጉስዶሶና።
JER 19:5 ታ ኤንታ ኪቶናባ ዎይኮ ኤንታዉ ኦዶናባ ዎይኮ ታ ቆፖናባ ኦꬅዶሶና፤ ባንታ አደ ናይታ ናጋራስ ታማን ፁሳ ያርሾ ኦꬅድ ያርሻናዉ፥ ꬎቃ ጎይኖ በሳታ ግምብዶሶና።
JER 19:6 ሄሳ ግሾ፥ ሀ በሳይ ቶፈታ ዎይኮ ህኖማ ዛንጋራ ጌተተይስ አትድ፥ ሹሀ ዛንጋራ ያገትድ ፄገታና ጋላሳይ ያና።
JER 19:7 ይሁዳነ የሩሳላመ አሳ ሀልቹዋ ታ ሀ በሳን ላላና። ኤንቲ ባንታ ሞርከታ ማሻንነ ባንታና ዎꬋናዉ ኮይያ አሳ ኩሸን ሀይቃናዳ ኦꬃና። ኤንታ አሀ ሳሎ ካፎታስነ ሳአ ዶአታስ ካꬅ ኦꬃዳ እማና።
JER 19:8 ታኒ ሀ ካታማ ባይሳነ ሚቻስ ከሳና። ያራ አꬍያ ኡባይ እያ ꬋዩዋን ማላለትድ፥ ‘ፖራ’ ያጋና።
JER 19:9 ኤንቲ ባንታ ማጫ ናይታነ አደ ናይታ አሹዋ ማናዳ ኦꬃና። ኤንታ ዎꬋናዉ ኮይያ ሞርከት ኤንታ ተቅድ ዋይስያ ዎደ ኡንኤትድ ኤንቲ እሶይ እሱዋ አሹዋ ማና” ያግስ።
JER 19:10 “ሄሳፈ ጉየ፥ ኔራ ብዳ አሳ ስንꬃን ፁጋ መንꬃ።
JER 19:11 ኤንታኮ ሀይሳዳ ያጋ፦ ፁጋይ መቅዳይሳዳነ ዛሪድ ኮላናዉ ዳንዳኤቶናይሳዳ ታ ሀ ካዎተꬃነ ሀ ካታማ መንረꬃና። አስ አሀ ሞግያ በሲ ባይና ግሾ ቶፈታን ሞገታና።
JER 19:12 ሀ በሳንነ እያን ደእያ አሳ ቦላ ሀይሳ ኦꬃና። ሀ ካታማ ቶፈታዳ ኦꬃና።
JER 19:13 የሩሳላመ አሳ ኬꬃትነ ይሁዳ ካዎታ ኬꬃት፥ ኬꬃ ቦላ ደምባይድ ኦꬅዳ በሳን ሳሎ ፆልንቶታስ እፃነ ጩይስዳነ ሀራ ፆሳታስ ኡሻ ያርሾ ጉስዳ ኬꬃት ኡባይ ቶፈታዳ ቱና ግዳና” ያጌስ ኡባፈ ዎልቃማ ጎዳይ።
JER 19:14 “ሄሳፈ ጉየ፥ ኤርምያስ ጎዳይ ትንብተ ኦዳና መላ ኪትዳ ቶፈታፐ ስሚድ፥ ፆሳ ኬꬃ ግዶን ደእያ ዳባባን ኤቅድ አሳ ኡባኮ ሀይሳዳ ያግስ፦
JER 19:15 ኤንቲ ሞርግያ ጋቢስድ፥ ታ ኦድያባ ስኦና እፅዳ ግሾ ሀ ካታማ ቦላነ እያ ሄራን ደእያ ጉታታ ቦላ ኤሀና ግዳ ኢታባ ኡባ ኤሀና ሀናይስ” ያጌስ ኡባፈ ዎልቃማ ጎዳይ።
JER 20:1 ሄ ዎደ ጎዳ ኬꬃነ ሀላቃ ግድያ፥ እመራ ናኣ ካህንያ ጳስኮር ኤርምያስ ትንብተ ኦድሽን ስእስ።
JER 20:2 ጳስኮር ናብያ ኤርምያሳ ደሽስድ፥ ቆሞ ብንያመ ፐንግያን ፆሳ ኬꬃ ገልያ ፐንገን ጎንገ ሉሆን ቃሽስስ።
JER 20:3 ዎንተꬃ ጋላስ ጳስኮር ኤርምያሳ ቃሾፐ ብርሽን፥ ኤርምያስ እያዉ ሀይሳዳ ያግስ፦ “ሀችፈ ዶምን፥ ጎዳይ ነ ሱንꬃ ጳስኮር ያገና፤ እ ነ ሱንꬃ ‘ያን ሀን ዳጋማ’ ያጋና።
JER 20:4 ጎዳይ ሀይሳዳ ያጌስ፦ ‘ታኒ ነና፥ ነዉነ ነ ላገታ ኡባስ ዳጋማ ኦꬃና። ኤንቲ ኔኒ ፄልሽን፥ ባንታ ሞርከታ ማሻን ዉራና። ታኒ ይሁዳ አሳ ኡባ ባብሎነ ካዋ ኩሸን አꬃዳ እማና። እ ኤንታ ድእድ፥ ባብሎነ ኤፍድ፥ ያን ማሻን ዎꬋና።
JER 20:5 ሄሳዳካ፥ ሀ ካታማ ሻሉዋነ ዱረተꬃ ኡባ፥ ኦይክ የꬍዳባ ኡባ፥ ሃርዳባ ኡባነ ይሁዳ ካዎታ ሚሽያ ኡባ ታኒ ኤንታ ሞርከታስ አꬃዳ እማና፤ ኤንቲ ኤንታ ቦንቅድ ባብሎነ ኤፋና።
JER 20:6 ቃስ ኔኒ ጳስኮር፥ ነ ሶን ደእያ አሳ ኡባይ ድኤትድ፥ ባብሎነ ባና። ኔኒ ዎርዶ ትንብተ ኦድዳ ነ ላገታ ኡባራካ ያን ሀይቃናነ ያን ሞገታና’ ያጌስ” ያግስ።
JER 20:7 አቤት ጎዳዉ፥ ኔኒ ታና ጭማዳሳ፤ ታንካ ጭመታስ። ኔኒ ታፐ ምናዳ፥ ታና ፆናዳሳ። ጋላሳ ኩመꬃ ታኒ አሳ ሚቻስ አታስ፤ ኡባይ ታና ቀልቅስስ።
JER 20:8 ታኒ ሃሳያ ዎደ ኡባን፥ “ማካላባይነ ꬋዮይ ጋክስ” ጋዳ ዋሳይስ። ጎዳ ቃላይ ታዉ ጋላስ ጋላስ ቦረነ ቀልቅሰꬅ ኤህስ።
JER 20:9 ታኒ፥ “ታኒ ጎዳባ ደንꬃዳ ኦድከ” ዎይኮ፥ “እያ ሱንꬃን ናምአንꬆ ኦድከ” ጊኮ፥ ጎዳ ቃላይ ታ መቀꬃ ግዶን ቁምኤትድ፥ ኤፅያ ታማ መላ ግድድ፥ ታ ዎዛናን ምቼስ። ታኒ ግዶን ኦይካዳ አሾና ጋዳ ዳቡራስ፤ ሽን ተቃናዉ ዳንዳአብከ።
JER 20:10 ታኒ ዳሮ ካልካሻ ስአስ፤ “ያን ሀን ዳጋም ደኤስ! አነ እያ ሞትተ! ኑኒካ እያ ሞቶስ” ያጎሶና። ታዉ ማታ ላገት ኡባይ ታ ኩንደꬃ ናግድ፥ “ኦን ኤር፥ ኑኒ እያ ኦይካና መላነ ኑ ሃሉዋ ከያና መላ፥ እ ጭማናዉ ዳንዳኤስ” ያጎሶና።
JER 20:11 ሽን ጎዳይ ያሽስያ ቶራ ቃራዳን ታራ ደኤስ። ሄሳ ግሾ፥ ታና የደይሳት ꬉበታና፤ ኤንቲ ታና ፆኖኮና። ኤንታዉ ጊጎና ግሾ፥ ኤንቲ ግታ ዬላ ዬላታና። ኤንታ ካዉሻይ ኩምꬅ ዶገተና።
JER 20:12 አቤት ኡባፈ ዎልቃማ ጎዳዉ፥ ፅሎታ ፓጨይሶ፥ ዎዛናነ ካሀ በኤይሶ፥ ኔኒ ታ ሞርከታ ቦላ ነ ሃሉዋ ከያዳ ታና በሳ። አይስ ጊኮ፥ ታኒ ታ ሞቱዋ ነዉ አꬃስ።
JER 20:13 ጎዳስ የፅተ! ጎዳ ጋላትተ! አይስ ጊኮ፥ እ ማንቆታ ኢታታ ኩሸፐ አሼስ።
JER 20:14 ታኒ የለትዳ ጋላሳይ ባደትዳይሳ ግዶ! ታ አይያ ታና የልዳ ጋላሳይ አንጀቶፎ!
JER 20:15 ታ አዋስ፥ “ነዉ ምሽራቾ፤ ነዉ አደ ናእ የለትስ!” ያግ ኦድድ፥ ዳሮ ኡፋይስዳ ኡራይካ ባደትዳባ ግዶ!
JER 20:16 ሄ አደይ ጎዳይ ቃቶና አꬅድ የግድ ꬋይስዳ ካታማታዳ ሀኖ። ሄ አደይ ዎንታ ዋሱዋ፥ ጋላስ ሴታን፥ “ኦላይ ጋክስ!” ግያ ኦዳ ስኦ።
JER 20:17 አይስ ጊኮ፥ ታ አይያ ታዉ ዱፎ ግዳና መላነ እ ኡሎይካ ታና መርናዉ ኦይክ ኡታና መላ፥ ታና ኡሎን ዎꬍቤና።
JER 20:18 ታኒ መቶነ አዛኖ በአናዉነ ላይꬃ ኡባ ዬላታሸ ዉርሳናዉ፥ አይስ ታ አየ ኡሎፐ ከያድና?
JER 21:1 ካዎይ ሰደቅያስ ማልክያ ናኣ ጳስኮራነ ማእሰያ ናኣ ካህንያ ሶፎንያሳ ኪትዳ ዎደ፥ ጎዳ ቃላይ ኤርምያሳኮ ሀይሳዳ ያግድ ይስ፦
JER 21:2 ኤንቲ፥ “ባብሎነ ካዎይ ናቡካዳናፆር ባ ኦላንቾታራ ሀ ካታማ ተቅዳ ግሾ ኑስ ጎዳ ኦይቻ። ኦን ኤር፥ ጎዳይ በንይሳዳ ማላልስያ ኦሱዋ ኑ ግሾ ኦꬅድ፥ እያ ጉየ ዛሮና አገና” ያግዶሶና።
JER 21:3 ኤርምያስ ኤንታዉ ዛሪድ፥ “ብድ ሰደቅያሳኮ ያግተ፦
JER 21:4 ‘ኔኒ ባብሎነ ካዉዋራነ ግምብያፈ ካረራ ነ ካታማ ተቅዳ እያ ኦላንቾታራ ኦለትያነ ነ ኩሸን ደእያ ኦላ ሚሽያ ታ ነ ቦላ ዛራና፤ ኤንታ ኡባ ሀ ካታማ ግዶ ገልሳና።
JER 21:5 ታኒ፥ ታ ሁጰን ሴራስ ምጨትዳ ኩሸን፥ ዎልቃማ ቀስያን፥ ይሎን፥ ሀንቆንነ ዎልቃማ ጋዶን ነና ኦላና።
JER 21:6 ታ ሀ ካታማን ደእያ አሳነ መህያ ሾጫና፤ ኤንቲ ኢታ ጋዶን ዉራና።
JER 21:7 ሄሳፈ ጉየ፥ ይሁዳ ካዋ ሰደቅያሳ፥ እያ ሞርናታ፥ ጋዶፐ፥ ማሻፈነ ኮሻፐ አትዳ፥ ሀ ካታማ አሳ ኡባ፥ ባብሎነ ካዋ ናቡካዳናፆራስነ ኤንታ ዎꬋናዉ ኮይያ ሞርከታስ አꬃዳ እማና። እ ኤንታ ቃራ ማሻን ጎይራና። እ ኤንታዉ ቃተና፤ ሳለትድ አገና፤ ማረና’ ” ያጌስ ጎዳይ እስራኤለ ፆሳይ።
JER 21:8 ጎዳይ ኤርምያሳኮ፥ “ጉጃዳ አሳኮ ሀይሳዳ ያጋ፦ ታ ህንተ ስንꬃን ደኦ ኦግያነ ሀይቆ ኦግያ ዎꬃስ።
JER 21:9 ሀ ካታማን ጋምእያ ኦንካ ማሻን ዎይኮ ኮሻን ዎይኮ ጋዶን ሀይቃና። ሽን ካታማፐ ከይድ ካታማ ተቅድ ኦይክዳ ባብሎነታስ ባ ኩሽያ እምያ ኦንካ ፓፃ አታና፤ ሄ ኡራይ ባ ሸምፑዋ አሻና።
JER 21:10 ታኒ ሀ ካታማ ቦላ ሎኦባ ግዶናሽን ኢታባ ኦꬃናዉ ደንዳስ። ታ እያ ባብሎነ ካዋስ አꬃዳ እማና፤ እ ሀ ካታማ ታማን ፁጋና” ያጌስ ጎዳይ።
JER 21:11 ይሁዳ ካዋ ኬꬃ አሳስ ሀይሳዳ ያጋ፦ ጎዳ ቃላ ስእተ!
JER 21:12 ህንተኖ፥ ዳዊታ ኮቻቶ፥ ጎዳይ ህንተኮ ሀይሳዳ ያጌስ፤ “ዎንታ ዎንታ ሱረ ፕርድተ፤ ቦንቀትዳይሳታ ኡንኤꬅያ አሳ ኩሸፐ አሽተ። ሄሳ ህንተ ኦꬆና እፅኮ፥ ህንተ ኢታ ኦሱዋ ጋሶን ታ ሀንቆይ ታማዳ ኤፃና፤ ኦንካ እያ ቶይሰና” ያጌስ ጎዳይ።
JER 21:13 ነኖ፥ የሩሳላመ፥ ደንባን ደእያ ዛላዳ፥ ዛንጋራፐ ꬎቁ ጋዳ በንታሳ፤ ሽን ታ ነና ኦላና። ኔኒ፥ “ኦንካ ታ ቦላ ፃለና ዎይኮ ታ ደእያ በሳ ገለና” ያጋሳ።
JER 21:14 ሽን፥ “ታኒ ጎዳይ ነና ነ ኦሱዋዳ ሴራና። ታኒ ነ ካዎ ኬꬃን ታማ ኦይꬃና፤ ነ ዩሹዋን ደእያ ኡባ ምድ ꬋይሳና” ያጌስ ጎዳይ።
JER 22:1 ጎዳይ ሀይሳዳ ያጌስ፤ “ዱገ ይሁዳ ካዋ ጋꬎ ባዳ፥ ያን ሀ ቃላ ኦዳ።
JER 22:2 ‘ነኖ ይሁዳ ካዋዉ፥ ዳዊታ አራታን ኡትዳይሶ፥ ኔኒ፥ ነ ሞርናትነ ሀ ፐንግያራ ገልያ ነ አሳይ ጎዳ ቃላ ስእተ!
JER 22:3 ሱረ ፕርዳ ፕርድተ፤ ፅሎ ኦꬅተ። ቦንቀትዳይሳ ኡንኤꬅያ አሳ ኩሸፐ አሽተ። በተ አሳስ፥ ይኦታስነ አምኤታስ ገነ ኦꬆፕተ ዎይኮ ሱጎፕተ። ፅሎ አሳ ሱꬁ ሀ በሳን ጉሶፍተ።
JER 22:4 ሀ ኪታታ ህንተ ናግኮ፥ ዳዊታ አራታን ኡትያ ካዎት ፓራነ ፓራ ጋረ ቶግድ፥ ባንታ ሞርናታራነ ባንታ አሳራ ሀ ካዎ ጋꬎ ፐንግያራ ገላና።
JER 22:5 ሽን ህንተ ኪተቶና እፅኮ፥ ሀ ካዎ ጋꬎይ ባይሳ ግዳና ያጋዳ ታ ጎዳይ ታ ሁጰን ጫቃስ’ ” ያጌስ ጎዳይ።
JER 22:6 ጎዳይ ይሁዳ ካዎ ጋꬉዋባ ሀይሳዳ ያጌስ፦ “ኔኒ ታዉ ጋላዳ ቢታነ ልባኖሰ ዙማ መላ ግድኮካ፥ ታ ነና መላ ቢታነ አስ ዶና ካታማ ኦꬃና።
JER 22:7 ታኒ ነና ላልያ አሳ ኦላ ሚሸ ኦይꬃዳ ኪታና፤ ኤንቲ ነ ዝጋ ቱቀታ ቃንፀረꬅድ፥ ታማን የጋና።
JER 22:8 “ዱማ ዱማ ካዎተꬃታፐ አሳይ ሄ ካታማ ማታራ አꬍሸ፥ ‘ጎዳይ አይስ ሀ ግታ ካታማ ሀይሳዳ ኦꬅዴ?’ ያግድ እሶይ እሱዋ ኦይቻና።
JER 22:9 ኤንቲ ዛሪድ፥ ‘ጎዳ ባንታ ፆሳራ ጫቅዳ ጫቁዋ መንꬅድ፥ ሀራ ፆሳታ ጎይንዳ ግሾነ ኦꬅዳ ግሾሳ’ ” ያጋና።
JER 22:10 ሀይቅዳ ካዋ እዮስያሳስ ዬኮፍተ ዎይኮ ካዮቶፍተ። ሄሳ አግድ፥ ድኤትድ ብዳ ሳሎማስ ሴለትድ ዬክተ። እ ጉየ ስመና፤ ባ የለትዳ ቢታ ዛሪድ በኤና።
JER 22:11 ባ አዋ በሳን ይሁዳን ካዎትድ ደእሸ፥ ሀ በሳፈ ብዳ እዮስያሳ ናአ ሳሎማባ ጎዳይ ሀይሳዳ ያጌስ። “እ ጉየ ስመና።
JER 22:12 እ ድኤትድ ብዳ ቢታን ሀይቃና፤ ስሚድ ሀ ቢታ በኤና” ያጌስ ጎዳይ።
JER 22:13 ባ ኬꬃ ገነን ኬፀይሳ፥ ጌላ ኦገን ፖቀ ቦላ ፖቀ ጉጀይሳ፥ ባ አሳስ አይኮካ እሞናነ ጋቴ ቃንፆና ኦስሰይሳ አየ!
JER 22:14 ሄ ኡራይ፥ “ታኒ ታዉ ግታ ፖቀይ ደእያ ዳልጋ ኬꬅ ኬፃና” ያግድ፥ ባ ኬꬃስ ዳልጋ ማስኮተታ ከስድ፥ ዝጋ ምꬃን አሌቅስድ፥ ዞኦ ቃላመ ትዬስ።
JER 22:15 ነ ዳሮ ዝጋን ኬፅዳይስ ነና ሎኦ ካዎ ከሴስ ጋዳ ቆፓይ? ነ አዋ እዮስያሳስ ምያባይነ ኡያባይ ꬋይዴ? እ ሱረ ፕርዳ ፕርድስ፤ ፅሎ ኦꬅስ። ሄሳ ግሾ፥ እያዉ ኡባባይ እንጀትስ።
JER 22:16 እ ማንቆታስነ መቶታንቾታስ ሱረ ፕርድያ ግሾ፥ ኡባባይ እያዉ እንጀትስ። ጎዳ ኤሬስ ጉሳይ ሀይሳ።
JER 22:17 ሽን ነ አይፈይነ ነ ዎዛናይ ሸምፕዳይ፥ ጭሞን ጎአ ደሞ፥ ፅሎ ሱꬅ ጉሶ፥ ገነነ ኡንኤꬆ ቦላና።
JER 22:18 ሄሳ ግሾ፥ ጎዳይ እዮስያሳ ናኣ፥ ይሁዳ ካዋ እዮአቄማባ ሀይሳዳ ያጌስ፦ “እ ሀይቅያ ዎደ ኤንቲ እያዉ፥ ‘ዎ፥ ታ እሻዉ፥ ዎ ታ እሻዉ’ ያግድ ዬኮኮና። ቃስ፥ ‘ዎ፥ ታ ጎዳዉ፥ ዎ፥ ታ ካዋዉ’ ያግድ ዘሌሎኮና።
JER 22:19 እያ ሞጎይካ ሀረ ሞጎ መላ ግዳና። እያ አሀይ ጎሸትድ፥ የሩሳላመ ፐንገታፐ ያ ባጋን የገታና” ያጌስ ጎዳይ።
JER 22:20 ጎዳይ የሩሳላመባ ሀይሳዳ ያጌስ፦ “ኦላስ ኔራ ዙፐተይሳት ኡባይ ፆነትዳ ግሾ፥ ፑደ ልባኖሰ ባዳ፥ ያን ዋሳ። ባሳነ ቢታን ዋሶ ሱልሳ፤ አባሪማ ዙማን ዋሳ።
JER 22:21 ነ ሳሮ ደእያ ዎደ ታ ነዉ ኦዳስ፤ ሽን ነ ታና ስኦና እፃዳሳ። ነ ናአተꬃፈ ዶምን ነ ሀኖይ ሀይሳ፤ ነ ታዉ ኪተቶና እፃዳሳ።
JER 22:22 ነ ሄንꬃንቾታ ኡባ ጫርኮይ ኤፋና፤ ኦላስ ኔራ ዙፐተይሳት ድኤትድ ባና። ሄ ዎደ ነ ኢታተꬃ ኡባ ግሾ ዬላታናነ ካዉያና።
JER 22:23 ህንተኖ፥ ልባኖሰ ዝጋን ኬፀትዳ ኬꬃን ደኤይሳቶ፥ እቀꬅ ኦይክዳ ማጫሳዳ ኡንእ ህንተ ቦላ ፑቱ ጊኮ ህንተ ዋናኔ?” ያጌስ።
JER 22:24 ጎዳይ ሀይሳዳ ያጌስ፦ “ታ ደኦይ ኤሮ! ኔኒ እዮአቄማ ናአይ፥ ይሁዳ ካዎይ ዮአክን፥ ታ ኡሻቻ ኩሸን ደእያ ታ ማታሜ ዎꬅያ ምግዶ ግድያኮካ ታ ነና ከሳ የጋና።
JER 22:25 ነና ዎꬋናዉ ኮየይሳታስ፥ ነ ያይያ ባብሎነ ካዋ ናቡካዳናፆራስነ እያ ኦላንቾታስ ታ ነና አꬃዳ እማና።
JER 22:26 ታ ነናነ ነ አይዉ ህንተ የለቶና ሀራ ቢታ ሆላና፤ ህንተ ናምአይካ ያን ሀይቃና።
JER 22:27 ህንተ ስማናዉ ላሞትያ ቢታ ፖሎ ስመከታ” ያጌስ።
JER 22:28 ሀ አደይ ዮአክን፥ ካትዳነ መቅዳ ፁጌ? እ፥ ኦንካ ኮዮና ሚሼ? እነ እያ ናይት አይስ ጎደትድ፥ ኤሮና ቢታን የገትድ አትዶና?
JER 22:29 ቢተ፥ ቢተ፥ ቢተ፥ ጎዳ ቃላ ስአ!
JER 22:30 “እያ ኮቻፈ እሱዋስካ እንጀቶና ግሾነ ዳዊታ አራታን ኡትያ ዎይኮ ይሁዳን ካዎትያ አስ እሶይካ ባይና ግሾ፥ ሀ አድያ፥ ናእ ባይና አስ፥ ባ ላይꬃ ኡባን ደኦይ እንጀቶና አስ” ጋዳ ፃፋ ያጌስ ጎዳይ።
JER 23:1 “ታ ሄንꬃ በሳን ደእያ ዶርሳታ ꬋይስያነ ላልያ ሄንꬃንቾታ አየ!” ያጌስ ጎዳይ።
JER 23:2 ጎዳይ፥ እስራኤለ ፆሳይ፥ ባ አሳ ሄምያ ሄንꬃንቾታ ሀይሳዳ ያጌስ፦ “ህንተ ታ ዶርሳታ ላልዳ ግሾ፥ ጎድዳ ግሾ፥ ናግቦና ግሾነ ህንተ ኦꬅዳ ህንተ ኢታ ኦሱዋ ግሾ ታ ህንተና ሴራና።
JER 23:3 ታ ዉድያፐ አትዳይሳታ ታ ካሰ ላልዳ ቢታ ኡባፈ ታ ሁጰን ሺሻና። ኤንታ ጉየ ኤንታ ሄንꬃ በሳ ዛራና፤ ኤንቲ ያን የለትድ ዳራና።
JER 23:4 ኤንታ ሎይꬅድ ሄምያ ሄንꬃንቾታ ኤንታዉ ሹማና። ኤንቲ ዛሪድ ያዮኮና፤ ዳጋሞኮና፤ ኤንታፈ እሶይካ ꬋየና” ያጌስ ጎዳይ።
JER 23:5 “ዳዊታ ኮቻፈ ፅሎ አጫ ደንꬃና ዎደይ ያና። እ ካዎተꬃ ጭንጫተꬃን አይሳና፤ ቢታ ቦላ ሱረነ ፅሎ ኦꬃና።
JER 23:6 እያ ካዎተꬃ ዎድያን ይሁድ አታና፤ እስራኤለይ ሳሮ ዳና። እያ ሱንꬃይ፥ ‘ፆሳይ ኑ ፅሎተꬃ’ ጌተታና” ያጌስ ጎዳይ።
JER 23:7 ሄሳ ግሾ፥ “አሳይ፥ ‘እስራኤላ አሳ ግብፀ ቢታፈ ከስዳ ጎዳይ ኤርያ መላ’ ያግድ ጫቃናይሳ አግድ፥
JER 23:8 ‘እስራኤላ ኮቻ ፑደሀ ባጋ ቢታፈነ ኤንታ ላልዳ ቢታ ኡባፈ ኤህዳ ጎዳይ ኤርያ መላ’ ያግድ ጫቃና ዎደይ ያና። ሄሳፈ ጉየ፥ ኤንቲ ባንታ ቡዞ ቢታን ዳና” ያጌስ ጎዳይ።
JER 23:9 ናበታባ ታ ቆፕያ ዎደ ታ ዎዛናይ ዳቡሬስ፤ ታ መቀꬃት ኮኮሮሶና። ጎዳ ግሾነ እያ ጌሻ ቃላ ግሾ ዎይነይ ፆንን ማꬆትዳ አስ ግዳስ።
JER 23:10 ቢታይ ላይማተꬃን ኩምስ። ቃንገꬃ ግሾ፥ ቢታይ ዬኬስ፤ ባዞ ሄንꬃ በሳት መልዶሶና። ናበት ኢታ ኦገን ሄመቶሶና፤ ባንታ ማታ ልከ ግዶና ኦገን ጎኤቶሶና።
JER 23:11 “ናበትነ ካህነት ቱንዶሶና፤ ሀር አቶሽን ታ ኬꬃን ኤንቲ ኦꬅያ ኢታ ታ በአስ” ያጌስ ጎዳይ።
JER 23:12 “ሄሳ ግሾ፥ ኤንታ ኦገይ ሀልፃና፤ ኤንቲ ꬉማን የገታና፥ ꬉበትድ ኩንዳና። ኤንቲ ሴረትያ ዎደ ኤንታ ቦላ ጋዶ ኤሀና” ያጌስ ጎዳይ።
JER 23:13 “ሳማረ ናበታ ግዶን ኢታባ በአስ። ኤንቲ ባኣለ ሱንꬃን ትንብተ ኦዶሶና፤ ታ አሳ እስራኤለ ባለꬆሶና።
JER 23:14 ቃስ የሩሳላመ ናበታ ግዶንካ ሀይꬃስ ዴፅያባ በአስ። ኤንቲ ላይማቶሶና፤ ዎርዶትድ ደኦሶና። ኦንካ ባ ኢታ ኦሱዋፐ ስሞና መላ ኤንቲ ኢታ ኦይሳታ ምንꬆሶና። ኤንቲ ኡባይ ታዉ ሶዶማ መላ፤ የሩሳላመ አሳይ ጋሞራ መላ” ያጌስ ጎዳይ።
JER 23:15 ሄሳ ግሾ፥ ኡባፈ ዎልቃማ ጎዳይ ናበታባ ሀይሳዳ ያጌስ፦ “የሩሳላመ ናበታ ዶናፐ ቱናባይ ከይድ፥ ቢታ ኡባን ላለትዳ ግሾ፥ ታ ኤንታ ጫምያ ካꬅ ሙዛና፤ ኤንታ ዎꬍያ ሃꬅ ኡሻና” ያጌስ።
JER 23:16 “ናበት ኦድያባ ስኦፕተ፤ ኤንቲ ሀኖና ኡፋይሳን ኩንꬆሶና። ጎዳይ ኦዶናሽን ኤንቲ ባንታፈ መꬍ ከስድ ቆንጨꬅ ኦዶሶና።
JER 23:17 ታና ካይሳታኮ፥ ‘ህንተ ሳሮ ዳና’ ያጎሶና፤ ቃስ ባንታ ዎዛና ኢታተꬃ ካለይሳታኮ፥ ‘ህንተና ኢታባይ ጋከና’ ያጎሶና” ያጌስ ኡባፈ ዎልቃማ ጎዳይ።
JER 23:18 “ሽን በአናዉ ዎይኮ እያ ቃላ ስአናዉ ጎዳይ ዞርያ በሳን ኤንታፈ ኦነ ኤቅዳይ? እያ ቃላ ስእዳይ ኦኔ?
JER 23:19 ጎዳ ጎተይ ሀንቆን ደንዳና፤ ዎልቃማ ሆበይ ኢታታ ሁጵያ ሾጫና።
JER 23:20 ባ ዎዛና ቆፋ ፖሎና ደእሸ፥ ጎዳ ሀንቆይ ስመና። ዉርሰꬃ ዎድያን ሀይሳ ህንተ አኬካና።
JER 23:21 ታ ሀ ናበታ ኪታብከ፤ ሽን ኤንቲ ባንታ ኪታ ኤክድ ዎፆሶና። ታ ኤንታዉ ኦዳብከ፤ ሽን ኤንቲ ትንብተ ኦዶሶና።
JER 23:22 ኤንቲ ታ ዞርያ በሳን ኤቅዳባ ግድያኮ፥ ታ ቃላ፥ ታ አሳስ ኦዳናሽን። ኤንቲ ኢታ ኦግያፐነ ኤንታ ኢታ ኦሱዋፐ ዛራናሽን” ያጌስ ጎዳይ።
JER 23:23 “ታ ማታ ፃላላ ፆሴ? ሃሆ ፆሲ ግድክና?
JER 23:24 ታ በኦናዳ፥ አስ ጌማ በሳን ባና ቆሳናዉ ዳንዳኢ? ሳሎንነ ሳአን ኩምዳይ ታና ግድክና?” ያጌስ ጎዳይ።
JER 23:25 “ታ ሱንꬃን ዎርዶ ትንብተ ኦደይሳት ግያባ ስአስ። ኤንቲ፥ ‘ታ አሙሆ በአስ፤ ታ አሙሆ በአስ’ ያጎሶና።
JER 23:26 ሀ ናበት ባንታዉ መꬍድ ከስድ ኦድያ ዎርዶ ትንብተይ ኤንታ ዎዛናን አዉደ ጋካናዉ ጋምአኔ?
JER 23:27 ኤንታ አዋት ባኣለ ኤቃ ጎይንድ ታ ሱንꬃ ዶግዳይሳዳ፥ ኤንቲ እሶይ እሱዋስ ኦድያ አሙሁዋን፥ ታ አሳይ ታ ሱንꬃ ዶጋና መላ ኦꬃናዉ ቆፖሶና።
JER 23:28 አሙሆ አሙህያ ናበይ ባ አሙሁዋ ኦዶ፤ ሽን ታ ቃላ ስእያ ናበይ ታ ቃላ አማነትድ ኦዶ። ዳልነ ግስተይ አዉን ጋሄቲ?
JER 23:29 ታ ቃላይ ታማ መላ ግደኔ? ዛላ መንረꬅያ ናርቃ መላ ግደኔ?” ያጌስ ጎዳይ።
JER 23:30 “ሄሳ ግሾ፥ ታ ቃላ እሶይ እሱዋፈ ካይሶትድ ታፐ ኤክዳ ዳንስድ ትንብተ ኦድያ ናበታ ታ እፃይስ።
JER 23:31 ሄሳዳካ፥ ባንታ ዎዛና ቆፋ ኦድሸ፥ ‘ጎዳይ ያጌስ’ ግያ ናበታካ ታኒ እፃይስ።
JER 23:32 ዎርዶ አሙህሸ ትንብተ ኦድያ ናበታ ቦላ ታ ደንዳና። ኤንቲ ባንታ አሙሁዋን ካትድ ትንብተ ኦድያ ናበታ ታኒ እፃይስ። ታ ኤንታ ኪቶናሽን ዎይኮ ሹሞናሽን ዎርዶ ትንብተ ኦዶሶና፤ ታ አሳ ባለꬆሶና። ኤንቲ ሀ አሳ አይኮካ ማዶኮና” ያጌስ ጎዳይ።
JER 23:33 “ጎዳይ ታኮ፥ ‘ሀ አሳይ ዎይኮ ናበይ ዎይኮ ካህነይ፥ ጎዳ ኪታይ አይቤ?’ ግድ ኦይችኮ፥ ነ ኤንታኮ፥ ‘ጎዳይ፥ ታ ህንተና ሆላና’ ያጌስ” ጋዳ ኦዳ።
JER 23:34 “ናበይ ዎይኮ ካህነይ ዎይኮ አሳይ፥ ‘ሀይስ ጎዳ ኪታ’ ያግድ ኦድኮ፥ ታ ሄ አድያነ እያ ሶ አሳ ሴራና።
JER 23:35 ሄሳ አግድ እሶይ እሶይ፥ ‘ጎዳይ ዎይግዴ? ዎይኮ ጎዳይ አይ ኦድዴ?’ ያግድ ባ ላገታነ ባ ዳቦታ ኦይቻናዉ በሴስ።
JER 23:36 ህዛፐ ኦንካ፥ ‘ጎዳ ኪታ’ ያግድ ዛሪድ ኦደታናዉ በሰና። ሄሳ ግሾ፥ እያ ዶናፐ ከይያ ቃላይ እያዉ ኪታ ግድያ ግሾ፥ ደኦ ፆሳ፥ ኡባፈ ዎልቃማ ጎዳ፥ ኑ ፆሳ ቃላ ህንተ ምርቄታ።
JER 23:37 ኔኒ ናበታኮ፥ ‘ጎዳይ ህንተና ዎይግዴ?’ ዎይኮ ‘አይ ኦድዴ?’ ያጋዳ ኦይቻናዉ በሴስ።
JER 23:38 ሽን ህንተ፥ ‘ሀይስ ጎዳ ኪታ’ ጊኮ፥ ጎዳይ ሀይሳዳ ያጌስ፦ ታኒ ህንተና፥ ‘ሀይስ ጎዳ ኪታ ጎፕተ’ ያግንካ ህንተ፥ ‘ሀይስ ጎዳ ኪታ’ ግደታ።
JER 23:39 ሄሳ ግሾ፥ ታ ህንተና ዶጋና፤ ህንተናነ ህንተ አዋታስ እምዳ ካታማ ኩመꬅ ታ ስንꬃፈ ድጋና።
JER 23:40 ታ ህንተ ቦላ መርና ካዉሻነ ዶገቶና ዬላ ኤሀና” ያጌስ ጎዳይ።
JER 24:1 ካዎይ ናቡካዳናፆር፥ እዮአቄማ ናኣ፥ ይሁዳ ካዋ እኮንያና፥ ይሁዳ ሀላቃታራ፥ ኩሸ ሂላታራነ ብራታ ቆፀይሳታራ የሩሳላመፐ ባብሎነ ድእድ ኤፍዳፐ ጉየ፥ ጎዳይ ታና ቆንጨꬅ በስስ። ጎዳይ ታና፥ ፆሳ ኬꬃስ ስንꬃ ባጋራ ባላሰይ ደእያ ናምኡ ኬሸታ በስስ።
JER 24:2 እስ ኬሽያን ኮይሮ ቴርዳ ዳንያ ሎኦ ባላሰይ ደኤስ፤ ሀንኮ ኬሽያን ቃስ ማናዉ ጊጎና ኢታ ባላሰይ ደኤስ።
JER 24:3 ጎዳይ ታኮ፥ “ኤርምያሳ፥ ነ በኤይ አይቤ?” ያግድ ኦይችስ። ታኒ፥ “ባላሰ በአይስ፤ ሎኦ ቴራይ ዳሮ ሎኦ፤ ኢታ ቴራይ ቃስ ማናዉ ጊጎና ዳሮ ኢታ” ያጋስ።
JER 24:4 ሄሳፈ ጉየ፥ ጎዳ ቃላይ ታኮ ይስ፦
JER 24:5 ጎዳይ እስራኤለ ፆሳይ ሀይሳዳ ያጌስ፦ “ይሁዳ ቢታፈ ድኦን ባብሎነ ቢታ የድዳ አሳታ፥ ሀ ሎኦ ባላሰ ቴራዳ ሎኦ ጋና።
JER 24:6 ታኒ ሎኦ አይፈን ኤንታ ፄላና፤ ቃስ ኤንታ ዛራዳ ሀ ቢታ ኤሀና። ታ ኤንታ ኬፃናፐ አትሽን፥ ላልከ፤ ኤንታ ቶካናፐ አትሽን፥ ሾድከ።
JER 24:7 ታኒ ጎዳ ግድዳይሳ ኤንቲ ኤራና መላ ኤንታዉ ዎዛና እማና። ኤንቲ ባንታ ኩመꬃ ዎዛናፐ ታኮ ስማናዉ ደእያ ግሾ፥ ኤንቲ ታ አሰ ግዳና፤ ታ ኤንታ ፆሰ ግዳና” ያጌስ።
JER 24:8 ግዶሽን፥ “ይሁዳ ካዋ ሰደቅያሳ፥ እያ ሞርናታ፥ ሀ ቢታን ግድን የሩሳላመን አትዳ አሳነ ግብፀ ቢታን ደኤይሳታ ማናዉ ጊጎና ዳሮ ኢታ ባላሰ ቴራዳ ኢታ ጋና።
JER 24:9 ታኒ ኤንታ ጎዳዳ የድያ ቢታ ኡባን፥ ሀ ሳአ ካዎተꬃት ኤንታ በእድ ዳጋማና። ታኒ ኤንታ እፀትዳይሳታ፥ ጫየትዳይሳታ፥ ቦረትዳይሳታ፥ ሌምሰተይሳታ፥ ቀልቅሰተይሳታ፥ ባደትዳይሳታ ኦꬃና።
JER 24:10 ታ ኤንታዉነ ኤንታ ማይዛታስ እምዳ ቢታፈ ኤንቲ ፖሎ ꬋያና ጋካናዉ ማሻ፥ ኮሻነ ቦሻ ኤንታ ቦላ የዳና” ያጌስ ጎዳይ።
JER 25:1 እዮስያሳ ናአይ፥ ይሁዳ ካዎይ እዮአቄም ካዎትዳ ኦይዳንꬆ ላይꬃን፥ ባብሎነ ካዎይ ናቡካዳናፆር ካዎትዳ ኮይሮ ላይꬃን፥ ይሁዳ አሳባይ ኤርምያሳኮ ይዳ ቃላይ ሀይሳ።
JER 25:2 ናበይ ኤርምያስ ይሁዳ ኡባስነ የሩሳላመን ደእያ ኡባስ ሀይሳዳ ያግስ፦
JER 25:3 አሞፀ ናአይ፥ ይሁዳ ካዎይ፥ እዮስያስ ካዎትዳ ታማነ ሄꬓንꬆ ላይꬃፈ ዶምድ፥ ሀች ጋካናዉ፥ ላታማነ ሄꬑ ላይꬅ ጎዳ ቃላይ ታኮ ይስ። ታ ህንተዉ ዛራ ዛራ ኦዳስ፤ ሽን ህንተ ስኦና እፅደታ።
JER 25:4 ጎዳይ ባ አይለታ፥ ናበታ ኡባ ዛር ዛር ህንተኮ ኪትስ፤ ሽን ህንተ ስኦና እፅደታ።
JER 25:5 ኤንቲ፥ “ህንተ ኡባይ ህንተ ኢታ ኦግያፐነ ህንተ ኢታ ኦሱዋፐ ስምተ። ጎዳይ ህንተዉነ ህንተ ማይዛታስ መርናዉ እምዳ ቢታን ህንተ ዳና።
JER 25:6 ሀራ ፆሳታ ጎይናናዉነ ኤንታዉ ኦꬃናዉ ካሎፍተ። ቃስ ህንተ፥ ህንተ ኩሸን ኦꬅዳ ኤቃታን ጎዳ ሀንቁዋ ደንꬆፍተ። ሄስ ሀንኮ ጎዳይ ህንተና ቆሄና” ያግዶሶና።
JER 25:7 “ህንተ ታ ኦድዳይሳ ስኦና እፅድ፥ ህንተ ኩሸይ ኦꬅዳባን ታና ይሎይደታ። ህንተ፥ ህንተና ቆህያባ ኦꬅደታ” ያጌስ ጎዳይ።
JER 25:8 “ሄሳ ግሾ፥ ኡባፈ ዎልቃማ ጎዳይ ሀይሳዳ ያጌስ፦ ህንተ ታ ቃላስ ኪተቶና እፅዳ ግሾ፥
JER 25:9 ፑደሀ ባጋ አሳ ኡባነ ታ አይልያ ባብሎነ ካዋ ናቡካዳናፆራ ፄጋና። ኤንታ ሀ ቢታ ቦላ፥ ሀ ቢታን ደእያ አሳ ቦላነ ሄራን ደእያ ካዎተꬃታ ኡባ ቦላ ኤሀና። ታ ሀ ቢታ ኩመꬅ ꬋይሳና፤ ቃስ በእዳ ኡባይ ሻትያባነ ቀልቅስያባ ኦꬃና” ያጌስ ጎዳይ።
JER 25:10 ኤንታ ግዶፈ እልልስነ ኡፋይሳ ቃላ፥ ያጋኖ ግርስ፥ ዎፃ ግርስነ ፆምፐ ፖኦ ꬋይሳና።
JER 25:11 ሀ ቢታይ ኩመꬅ ላለትዳነ ባይሳ ቢታ ግዳና፤ ካዎተꬃት ባብሎነ ካዋስ ላፑን ታሙ ላይꬅ ሃረታና።
JER 25:12 “ላፑን ታሙ ላይꬃይ ፖለትዳፐ ጉየ፥ ታኒ ባብሎነ ካዋነ እያ አሳ ኤንታ ናጋራ ግሾ ሴራና፤ ኤንታ ቢታ መርናዉ ባይሳ ኦꬃና።
JER 25:13 ታ ሀ ቢታ ቦላ ኦድዳ ኡባ፥ ኤርምያስ ካዎተꬃታ ኡባ ቦላ ኦድዳ ትንብትያነ ሀ ማፃፋን ፃፈትዳ ኡባ ሀ ቢታ ቦላ ኤሀና።
JER 25:14 ዳሮ ካዎተꬃትነ ግታ ካዎት ባብሎነ አሳ ሃራና። ታ ኤንታዉ፥ ኤንታ ሀኑዋዳነ ኤንታ ኩሸ ኦሱዋዳ ዛራና” ያጌስ ጎዳይ።
JER 25:15 “ታ ሀንቁዋን ኩምዳ ዎይነ ዋንጫ ታ ኩሸፐ ኤካ። ኤፋዳ ታ ነና ኪትያ ካዎተꬃታ ኡባ ኡሻ።
JER 25:16 ኤንቲ ኡይድ፥ ታኒ ኤንታ ግዶ የድያ ማሻ ጋሶን ጋንድጋራናነ ጎያና” ያጌስ ጎዳይ እስራኤለ ፆሳይ።
JER 25:17 ታኒ ጎዳ ኩሸፐ ዋንጫ ኤካዳ፥ እ ታና ኪትዳ ካዎተꬃታ ኡባ ኡሻስ።
JER 25:18 ሀች ሀንዳይሳዳ ኤንታ ኡባ ꬋዮነ ዳጋማ፥ ጫሸነ ባደꬅ ኦꬃና መላ የሩሳላመነ ይሁዳ ካታማታ፥ እያ ካዎታነ እያ ሞርናታ ኡባ ኡሻስ።
JER 25:19 ግብፀ ካዋ፥ እያ አይለታ፥ እያ ሞርናታ፥ እያ ቢታ አሳ ኡባነ
JER 25:20 ያን ደእያ አላጋ አሳ ኡባ ኡሻስ። ኦፃ ካዎታ ኡባ ኡሻስ። ፍልስፄመን ደእያ አስቃሎና፥ ጋዛ፥ ኤቅሮናነ አሽዶዳፐ አትዳ ካዎታ ኡባ ኡሻስ።
JER 25:21 ኤዶመ፥ ሞአበነ አሞነ ኡሻስ።
JER 25:22 ፅሮሳ ካዎታ ኡባ፥ ስዶና ካዎታ ኡባነ መደትራነ አባፈ ሄፍንꬃን፥ ሃሆን ደእያ ካዎታ ኡሻስ።
JER 25:23 ደዳና፥ ተማና፥ ቡዛነ ባንታ ሁጵያ ጋፃ ሜድያ አሳ ኡባ ኡሻስ።
JER 25:24 አራበ ካዎታ ኡባነ መላ ቢታን ደእያ ዋላካ አሳ ካዎታ ኡባ ኡሻስ።
JER 25:25 ዝምራ፥ ኤላማነ ሜዶና ካዎታ ኡባ ኡሻስ።
JER 25:26 ፑደሀ ቢታ ካዎታ ኡባ፥ ሃሆንነ ማታን ደእያ ካዎታ ኡባ ካላዳ ካላዳ ሳኣ ቦላ ደእያ ካዎተꬃታ ኡባ ኡሻስ። ኤንታፈ ጉየ ባብሎነ ካዎይ ኡያና።
JER 25:27 ጎዳይ ታኮ፥ “ሄሳ ግሾ፥ ‘ኡባፈ ዎልቃማ ጎዳይ፥ እስራኤለ ፆሳይ ህንተኮ ሀይሳዳ ያጌስ’ ያጋ። ‘ኡይተነ ማꬆትተ፤ ጮይተነ ኩንድተ። ታኒ ህንተ ግዶ የድያ ማሻ ጋሶን ዛሪድ ደንዶፍተ’ ያግስ።
JER 25:28 ሽን ኤንቲ ነ ኩሸፐ ዋንጫ ኤኮናነ ኡዮና እፅኮ፥ ኤንታኮ ሀይሳዳ ያጋ። ‘ኡባፈ ዎልቃማ ጎዳይ ህንተኮ ሀይሳዳ ያጌስ፦ ህንተ ኡያናዉ በሴስ።
JER 25:29 ታ ሱንꬃን ፄገትዳ ካታማ ቦላ ኢታባ ኦꬃናዉ ዶማይስ። ያትን ህንተ ሴረቶና አታናዉ ዳንዳኤቲ? ታ ሳአን ደእያ ኡባ ቦላ ማሻ ፄግዳ ግሾ ህንተ ሴረቶና አተከታ’ ” ያጌስ ኡባፈ ዎልቃማ ጎዳይ።
JER 25:30 “ሄሳ ግሾ፥ ኤርምያሳ፥ ሀ ቃላ ኡባይ ኤንታ ቦላ ፖለታናይሳ ኤንታዉ ኦዳ። ጎዳይ ꬎቃን ጉማና፤ ጎዳይ ባ ጌሻ በሳፈ ባ ጉንꬃ ስሳና። እ ባ ቢታ ቦላ ፃጋና፤ ዎይነ ጉምኤይሳት ዋሰይሳዳ ሳአን ደእያ ኡባ ቦላ ዋሳና።
JER 25:31 ጎዳስ ካዎተꬃታራ ሞቶይ ደእያ ግሾ እያ ዋሶይ ሳአ ጋፃ ጋክድ ስኤቴስ። ጎዳይ አሳ ኡባራ ፕርደታና፤ እ ኢታታ ማሻስ አꬅድ እማና” ያጌስ ጎዳይ።
JER 25:32 “ኢታባይ ካዎተꬃፈ ካዎተꬃ ላለትስ፤ ሳኣ ጋፃፐ ጎተይ ደንድስ” ያጌስ ኡባፈ ዎልቃማ ጎዳይ።
JER 25:33 ሄ ዎደ ጎዳይ ዎꬍዳይሳታ አሀይ፥ ቢታ ቦላ ሀ ጋፃፐ ያ ጋፃ ጋካናዉ ላለታና። ኤንታዉ ዬከተና፥ ኤንታ አሀይ ሺቀና ዎይኮ ሞገተና፤ ኤንቲ ቢታን ፕቶ መላ ግዳና።
JER 25:34 ህንተኖ፥ ሄንꬃንቾቶ፥ ዬክተነ ዋስተ። ህንተኖ፥ ዉድያ ካለይሳቶ፥ ብዶን ጎንዶረትተ። ህንተ ሹከትያ ዎደይ ጋክስ፤ ህንተ ኩንዳናነ ሎኦ ኡርቃ ሚሻዳ መቀረታና።
JER 25:35 ሄንꬃንቾት ባቃትድ አትያ በሲ ባዋ፤ ዉድያ ካለይሳት ከስ ኤክያ በሲ ባዋ።
JER 25:36 ጎዳይ ኤንታ ሄንꬃ ጋድያ ꬋይስያ ግሾ፥ ሄንꬃንቾት ዋስያ ዋሱዋነ ዉድያ ካለይሳት ዬክያ ዬሁዋ ስእተ።
JER 25:37 ጎዳ ሱልያ ሸንያ ጋሶን ሳሮ ቢታይ ባይሳታና።
JER 25:38 ጋሞይ ባ ደእያ ዎራፐ ከየይሳዳ ጎዳይ ባ ደእያ በሳፈ ከያና። ኤንታ ቢታይ ኡንኤይሳታ ማሻንነ ጎዳ ሱልያ ሀንቁዋን ባይሳ ግዳና።
JER 26:1 እዮስያሳ ናአይ ይሁዳ ካዎይ እዮአቄም ካዎትዳ ዎደ ጎዳ ቃላይ ይስ።
JER 26:2 ጎዳይ፥ “ፆሳ ኬꬃ ዳባባን ኤቃ። ፆሳ ኬꬃን ጎይናናዉ ይሁዳ ካታማታፐ ያ ኡባስ፥ ታ ነና ኪትዳ ቃላፐ እሱዋካ አሾና ኦዳ።
JER 26:3 ኤንቲ ስእድ፥ ባንታ ኢታ ኦግያፐ ስማነኮ ኦን ኤር። ሄሳ ግድኮ፥ ታኒ ኤንታ ኢታተꬃ ግሾ ꬋይሳናዉ ቆፕዳይሳ አጋጋና።”
JER 26:4 ኤንታኮ ሀይሳዳ ያጋ፦ “ህንተ ታና ስኦና እፅኮነ ታ ህንተዉ እምዳ ህግያ ኪተቶና እፅኮ፥
JER 26:5 ህንተ ስኦና እፅኮካ ታ ዛራ ዛራዳ ህንተኮ ኪትዳ፥ ታ አይለታ ናበታ ቃላ ስኦናን እፅኮ፥
JER 26:6 ታ ሀ ፆሳ ኬꬃ ሴሎዳ ኦꬃና። ሀ ካታማ ሳአን ደእያ ካዎተꬃታ ኡባስ ባደꬅ ኦꬃና” ያግስ።
JER 26:7 ኤርምያስ ፆሳ ኬꬃን ሀ ቃላ ኦድሽን፥ ካህነት፥ ናበትነ አሳ ኡባይ ስእዶሶና።
JER 26:8 ኤርምያስ፥ ጎዳይ፥ ኦዳ ግድ እምዳ ኪታ ኦድድ ኦንግዳ ዎደ ካህነት፥ ናበትነ አሳ ኡባይ እያ ኦይክድ፥ “ነ ሀይቃናዉ በሳሳ” ያግዶሶና።
JER 26:9 ኔኒ፥ “ ‘ሀ ፆሳ ኬꬃይ ሴሎዳ ሀናና፤ ቃስ ሀ ካታማይ ꬋያና፤ ባይሳ ግዳና’ ያጋዳ፥ ጎዳ ሱንꬃን አይስ ትንብተ ኦዳዲ?” ያግድ፥ ፆሳ ኬꬃን ሺቅዳ አሳ ኡባይ ኤርምያሳ ተቅዶሶና።
JER 26:10 ይሁዳ ሀላቃት ሄሳ ስእዳ ዎደ፥ ካዎ ጋꬎፐ ከይድ፥ ፆሳ ኬꬅ ይዶሶና። ፆሳ ኬꬃን ኦራꬃ ፐንገ ጌተትያ ፐንግያን ኡትዶሶና።
JER 26:11 ካህነትነ ናበት ሀላቃታኮነ አሳ ኡባኮ ሀይሳዳ ያግዶሶና፦ “ህንተ፥ ህንተ ሀይꬃን ስእዳይሳዳ፥ ሀ አደይ ሀ ካታማ ቦላ ትንብተ ኦድዳ ግሾ፥ እ ሀይቃናዉ በሴስ!” ያግዶሶና።
JER 26:12 ኤርምያስ ሀላቃታኮነ አሳ ኡባኮ ሀይሳዳ ያግስ፦ “ሀ ህንተ ስእዳ ቃላ ኡባይ ሀ ፆሳ ኬꬃ ቦላነ ሀ ካታማ ቦላ ሀናና ጋዳ ታ ኦዳና መላ ጎዳይ ታና ኪትስ።
JER 26:13 ህዛ ህንተ ኦግያነ ህንተ ኦሱዋ ላምተ፤ ጎዳ ህንተ ፆሳ ቃላስ ኪተትተ። ሄሳ ህንተ ኦꬅኮ፥ ጎዳይ ህንተ ቦላ ኤሀና ግዳ ኢታባ አጋጋና።
JER 26:14 ታና ግድኮ፥ ታ ህንተ ኩሸን ደአይስ። ህንተዉ ሎኦነ ሱረ ዳንዳባ ታ ቦላ ኦꬅተ።
JER 26:15 ታኒ ሀ ቃላ ኡባ ህንተዉ ኦዳና መላ ጎዳይ ቱማ ታና ኪትዳ ግሾ፥ ህንተ ታና ዎꬍኮ፥ ህንተ ህንተ ቦላ፥ ሀ ካታማ ቦላነ እያን ደእያ አሳ ቦላ ፅሎ ሱꬃ አጮ ኤሀናይሳ ኤርተ” ያግስ።
JER 26:16 ሀላቃትነ አሳ ኡባይ፥ ካህነትነ ናበት፥ “እ፥ ጎዳ፥ ኑ ፆሳ ሱንꬃን ኑስ ኦድዳ ግሾ፥ ሀ አደይ ሀይቃናዉ በሰና” ያግዶሶና።
JER 26:17 ቢታ ጭማታፐ እሶት እሶት ደንድ ኤቅድ፥ ሺቅዳ አሳኮ ሀይሳዳ ያግዶሶና፦
JER 26:18 “ህዝቅያስ ይሁዳን ካዎትዳ ላይꬃን ሞረሴታ አደይ ምክያስ ካሰ ይሁዳ አሳስ ሀይሳዳ ያግድ፥ ትንብተ ኦድስ፦ ‘ፅዮነይ ሾቃዳ ጎየታና። የሩሳላመ ካታማይ ላለትድ፥ ላለꬃ ዶረ ግዳና። ፆሳ ኬꬃይ ኬፀትዳ ደረይ ዎራ ግዳና’ ያጌስ ኡባፈ ዎልቃማ ጎዳይ” ያግስ።
JER 26:19 ያትን፥ “ይሁዳ ካዎይ ህዝቅያስነ ይሁዳ አሳ ኡባይ እያ ዎꬍዶና? አካይ፥ ህዝቅያስ ጎዳስ ያይድ፥ ጎዳ ማሮተꬅ ኦይችቤኔ? ጎዳይ ኤንታ ቦላ ኤሀና ግዳ ኢታባ አግቤኔ? ሽን ኑኒ ኑ ቦላ ኢታባ ኤሀና ሀኖስ” ያግዶሶና።
JER 26:20 ቅርያት-ይኣርማ ጌተትያ በሳን፥ ሻማያ ናኣ፥ ኦርዮና ጌተትያ እስ አደይ ደኤስ። እካ ኤርምያስ ኦድዳይሳዳ፥ ሀ ካታማ ቦላነ ሀ ቢታ ቦላ ጎዳ ሱንꬃን ካሰ ትንብተ ኦድስ።
JER 26:21 ካዎይ እዮአቄም፥ እያ ኦላንቾት፥ እያ ሞርናት፥ ኦርዮን ኦድዳይሳ ስእዳ ዎደ ካዎይ እያ ዎꬋናዉ ኮይስ። ኦርዮን ሄሳ ስእዳ ዎደ ያይድ፥ ግብፀ ባቃትስ።
JER 26:22 ግዶሽን፥ ካዎይ እዮአቄም አክቦራ ናኣ ኤልናታናነ ሀራ አሳታ ግብፀ ኪትስ።
JER 26:23 ኤንቲ ኦርዮና ግብፀፈ ከስድ፥ ካዋ እዮአቄመኮ ኤፍን፥ እያ ማሻን ዎꬍስድ ደረይ ሞገትያ ዱፎን ሞግዶሶና።
JER 26:24 ሽን ሳፋና ናአይ፥ አክቃም ኤርምያሳ ማድዳ ግሾ አሳይ እያ ዎꬋናዉ አꬅድ እምቦኮና።
JER 27:1 እዮስያሳ ናአይ ሰደቅያስ፥ ይሁዳን ካዎቶ ዶምዳ ዎደ ሀ ቃላይ ጎዳፐ ኤርምያሳኮ ይስ።
JER 27:2 “ዳፎ ጎነ ዎዶሮራ ደእያ ቃምባራ መꬋዳ ነ ጋናን ዎꬃ።
JER 27:3 ይሁዳ ካዋ ሰደቅያሳኮ የሩሳላመ ኪተትዳ አሳ ባጋራ፥ ኤዶመ፥ ሞአበ፥ አሞነ፥ ፅሮሳነ ስዶና ኪታ።
JER 27:4 ኤንቲ ባንታ ጎዳታስ ኦዳና መላ ኤንታ ኪታ። ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦
JER 27:5 ‘ታ ግታ ዎልቃንነ ታ ምጨትዳ ኩሸን ሳኣ፥ ሳአን ደእያ አሳ፥ መሄነ ዶአታ መꬋስ፤ ታኒ እያ፥ ታ ኮይያ ኦደስካ እማይስ።
JER 27:6 ሀእ ታ ቢታ ኡባ ታ አይልያስ፥ ባብሎነ ካዋ ናቡካዳናፆራስ እማስ። ቃስ ታ ባዞ ዶአትካ እያዉ ሃረታና መላ ኦꬃስ።
JER 27:7 እያ ቢታይ ሀራታስ ሃረትያ ዎደይ ጋካናዉ ካዎተꬃት ኡባይ እያዉ፥ እያ ናኣስነ እያ ናኣ ናኣስ ሃረታና። ሄሳፈ ጉየ፥ ዳሮ ካዎተꬃትነ ግታ ካዎት እያ ሃራና።’
JER 27:8 “ሽን አይ ቢት ዎይኮ አይ ካዎተꬅ ባብሎነ ካዋ ናቡካዳናፆራስ ኪተቶና እፅኮነ እያ ቃምባራን ገሎና እፅኮ፥ ሄ ካዎተꬃይ እያ ኩሸን ꬋያና ጋካናዉ ማሻን፥ ኮሻንነ ቦሻን ሴራና።
JER 27:9 ሄሳ ግሾ፥ ‘ባብሎነ ካዋስ ሃረተከታ’ ግያ ህንተ ናበታ፥ ህንተዉ ካየይሳታ፥ ህንተ አሙሆ ብለይሳታ፥ ህንተ ማሮታነ ሞይትለ ፄገይሳታ ስኦፕተ።
JER 27:10 ኤንቲ ህንተዉ ዎርዶ ኦዶሶና፤ ህንተና ህንተ ቢታፈ ሾዳና፤ ህንተና ጎዳዳ ከሳና፤ ህንተካ ꬋያና።
JER 27:11 ሽን አይ ካዎተꬅካ ባብሎነ ካዋ ቃምባራን ገልድ፥ እያዉ ሃረትኮ፥ ታ ሄ ካዎተꬃ እያ ቢታን አሻና፤ ኤንቲ ሄ ቢታ ጎያና፤ ያን ዳና” ያጌስ ጎዳይ።
JER 27:12 ታኒ፥ ይሁዳ ካዋ ሰደቅያሳስካ ሀ ቃላ ኦዳስ፤ “ባብሎነ ካዋ ቃምባራን ገላዳ እያዉነ እያ አሳስ ሃረትኮ፥ ነ ደኦን ዳና።
JER 27:13 ጎዳይ ባብሎነ ካዋስ ሃረቶና እፅያ ካዎተꬃስ ኦድዳይሳዳ ማሻን፥ ኮሻንነ ቦሻን ነነ ነ አሳይ አይስ ሀይቄቲ?
JER 27:14 ኤንቲ ኦደይ ዎርዶ ግድያ ግሾ፥ ‘ህንተ ባብሎነ ካዋስ ሃረተከታ’ ያግድ ኦድያ ናበታ ስኦፕተ።
JER 27:15 ታ ኤንታ ኪታብከ፤ ሽን ኤንቲ ታ ሱንꬃን ዎርዶ ትንብተ ኦዶሶና። ሄሳ ግሾ፥ ታ ህንተና ጎዳዳ ከሳና፤ ህንተነ ህንተ ናበት ꬋያና” ያጌስ ጎዳይ።
JER 27:16 ሄሳፈ ጉየ፥ ታ ካህነታስነ አሳ ኡባስ ሀይሳዳ ያጋዳ ኦዳስ፦ “ፆሳ ኬꬃ ሚሸይ ባብሎነፐ ማታራ ስሚድ ያና” ያግድ ዎርዶ ኦድያ ናበታ ስኦፕተ።
JER 27:17 ኤንቲ ግያባ ስኦና አግድ፥ ባብሎነ ካዋስ ሃረትተ፤ ህንተ ደኦን ዳና። ሀ ካታማይ አይስ ላለትዳ በሲ ግዳኔ?
JER 27:18 ኤንቲ ቱማ ናበ ግድኮነ ጎዳ ቃላይ ኤንታን ደእኮ፥ ፆሳ ኬꬃን፥ ይሁዳ ካዎ ጋꬎንነ የሩሳላመን አትዳ ሚሸይ ባብሎነ ቦናዳ ኡባፈ ዎልቃማ ጎዳ ፆሳ ዎሶ።
JER 27:19 “ኡባፈ ዎልቃማ ጎዳይ፥ ፆሳ ኬꬃ ካረን ኤቅዳ ናምኡ ናሰ ብራታ ቱሳታባ፥ ግታ ከረታባ፥ ጫና ጋረታባነ ሀራ ሚሸታባ ሀይሳዳ ያጌስ፦
JER 27:20 ባብሎነ ካዎይ ናቡካዳናፆር እዮአቄማ ናኣ፥ ይሁዳ ካዋ እኮንያናነ ይሁዳንነ የሩሳላመን ደእያ ግታ አሳ ኡባ ድእድ ኤፍዳ ዎደ፥
JER 27:21 ኡባፈ ዎልቃማ ጎዳይ፥ እስራኤለ ፆሳይ፥ ፆሳ ኬꬃን፥ ይሁዳ ካዎ ጋꬎንነ የሩሳላመን አትዳ ሚሸታባ ሀይሳዳ ያጌስ፤
JER 27:22 ኤንቲ ባብሎነ ቢታ ጋዘታና፤ ታ ኤንታ ግሾ ያና ዎደይ ጋካናዉ፥ ኤንቲ ያን ዳና። ሄ ዎደ ታ ኤንታ ጉየ ዛራዳ ኤንታ በሳን ዎꬃና” ያጌስ ጎዳይ።
JER 28:1 ሄ ላይꬅ፥ ይሁዳ ካዎይ ሰደቅያስ ካዎቶ ዶምዳ ኦይዳንꬆ ላይꬃን፥ እቻሻንꬆ አጌናን ጋባኦና አደይ፥ አዙራ ናአይ ናበይ ሀናን፥ ፆሳ ኬꬃን ካህነታነ አሳ ኡባ ስንꬃን ታኮ ሀይሳዳ ያግስ፦
JER 28:2 “ኡባፈ ዎልቃማ ጎዳይ፥ እስራኤለ ፆሳይ፥ ‘ባብሎነ ካዋ ቃምባራ መንꬃና።
JER 28:3 ባብሎነ ካዎይ፥ ናቡካዳናፆር፥ ባብሎነ ኤፍዳ ፆሳ ኬꬃ ሚሸ ኡባ ታ ናምኡ ላይꬃ ግዶን ዛራዳ ሀ በሳ ኤሀና።
JER 28:4 እዮአቄማ ናኣ፥ ይሁዳ ካዋ ዮአክና፥ ይሁዳፐ ድኤትድ ባብሎነ ብዳ አሳ ኡባ ዛራዳ ሀ በሳ ኤሀና። ታኒ ባብሎነ ካዋ ቃምባራ መንꬃና’ ” ያጌስ ጎዳይ።
JER 28:5 ፆሳ ኬꬃ ግዶን ኤቅዳ ካህነታነ አሳ ኡባ ስንꬃን ናበይ ኤርምያስ፥ ናብያ ሀናናኮ ሀይሳዳ ያግስ።
JER 28:6 “አምንእ! ጎዳይ ነ ግዳይሳዳ ኦꬆ። ፆሳ ኬꬃ ሚሸታነ ድኤትድ ብዳ አሳ ኡባ ባብሎነፐ ዛሪድ፥ ነ ኦድያ ቃላ ጎዳይ ፖሎ!
JER 28:7 ግዶሽን፥ ታ ነዉነ ነ አሳስ ኦደይሳ ስአ።
JER 28:8 ኔፐነ ታፐ ካሰ ደእዳ ናበት፥ ኦላባ፥ ꬋዮባነ ጋዶባ ግታ ካዎተꬃታ ቦላ ትንብተ ኦድዶሶና።
JER 28:9 ሽን፥ ሳሮባ ኦድያ ናበይ፥ ቱማ ፆሲ ኪትዳ ናበ ግደይስ ኤረተይ፥ እ ኦድያ ትንብተይ ፖለትያ ዎደና” ያግስ።
JER 28:10 ሄሳፈ ጉየ፥ ናበይ ሀናን፥ ናብያ ኤርምያሳ ጋናፈ ቃምባራ ኤክድ መንꬅስ።
JER 28:11 ሀናን አሳ ኡባ ስንꬃን፥ “ታኒ ናምኡ ላይꬃ ግዶን ባብሎነ ካዋ ናቡካዳናፆራ ቃምባራ ካዎተꬃታ ኡባ ጋናፈ ደንꬃዳ ሀይሳዳ መንꬃና” ያጌስ ጎዳይ። ሄሳፈ ጉየ፥ ኤርምያስ ደንድድ፥ ባ ኦግያ ብስ።
JER 28:12 ናበይ ሀናን፥ ናብያ ኤርምያሳ ጋናፈ መንꬅዳ ጉꬃ ዎደፐ ጉየ፥ ጎዳ ቃላይ ናብያ ኤርምያሳኮ ሀይሳዳ ያግሸ ይስ።
JER 28:13 ባዳ ሀናናስ ኦዳ፤ “ኔኒ ምꬃ ቃምባራ መንꬃዳሳ፤ ሽን ኔኒ እያ ግሾ ብራታ ቃምባራ መꬋና።
JER 28:14 ባብሎነ ካዋ ናቡካዳናፆራስ ሃረታና መላ ታኒ ሀ ካዎተꬃታ ኡባ ጋናን ብራታ ቃምባራ ዎꬃና፤ ኤንትካ እያዉ ሃረታና። ታኒ ሀር አቶሽን፥ ባዞ ዶአትካ እያዉ ሃረታና መላ ኦꬃና” ያጌስ ኡባፈ ዎልቃማ ጎዳይ፥ እስራኤለ ፆሳይ።
JER 28:15 ሄሳፈ ጉየ፥ ናበይ ኤርምያስ፥ ናብያ ሀናናኮ ሀይሳዳ ያግስ፦ “ሀናንያ፥ ስአ! ጎዳይ ነና ኪትቤና፤ ሽን ኔኒ ሀ አሳይ ዎርዶባን አማነታና መላ ኦꬃዳሳ።
JER 28:16 ሄሳ ግሾ፥ ጎዳይ፥ ‘ታ ነና ሳአ ቦላፈ ድጋና። ኔኒ ሀ አሳይ ታ ቦላ ማካላና መላ ኦꬅዳ ግሾ ነ ሀ ላይꬅ ሀይቃና’ ” ያግስ።
JER 28:17 ሄ ላይꬅ ላፑንꬃ አጌናን ናበይ ሀናን ሀይቅስ።
JER 29:1 ናብያ ኤርምያስ ድኤትዳ አሳ ግዶን ደእያ አትዳ ጭማታስ፥ ካህነታስ፥ ናበታስነ ናቡካዳናፆር የሩሳላመፐ ድእድ፥ ባብሎነ ኤፍዳ ኡባስ የሩሳላመፐ የድዳ ዳብዳበይ ሀይሳፈ ካልድ ፃፈትዳይሳ።
JER 29:2 ሀይስ ሀንዳይ፥ ካዎይ እኮንያን፥ እያ አይያ ካውያ፥ እያ ሞርናት፥ ይሁዳነ የሩሳላመ ሀላቃት፥ ኩሸ ሂላንቾትነ ብራታ ቆፀይሳት የሩሳላመፐ ድኤትድ ብድ ስምና።
JER 29:3 ኤርምያስ ይሁዳ ካዎይ ሰደቅያስ ባብሎነ ካዋ ናቡካዳናፆራኮ ኪተትዳ ሳፋና ናኣ ኤልኣሳነ ካልቄ ናኣ ጋማራ ቦላ ሄ ዳብዳብያ የድስ። ዳብዳበይ ሀይሳዳ ያጌስ፦
JER 29:4 “ኡባፈ ዎልቃማ ጎዳይ፥ እስራኤለ ፆሳይ፥ የሩሳላመፐ ባብሎነ ድኤትዳ አሳ ኡባስ ሀይሳዳ ያጌስ፦
JER 29:5 ኬ ኬፅድ ያን ደእተ። ካꬅ ዘርድ አይፍያ ሚተ።
JER 29:6 ማቾ ኤክድ ማጫ ናአነ አደ ናአ የልተ። ህንተ አደ ናይታስ ማቾ ኦይችድ እምተ፤ ህንተ ማጫ ናይታ አዝናስ እምተ። ኤንቲ ማጫ አደ የሎ፤ ያን ታይቦን ዳርተ፤ ጉፆፍተ።
JER 29:7 ህንተ ድኤትድ ብዳ ካታማስ ሳሮይ ዳና መላ ኮይተ። ሄ ካታማስ ጎዳ ዎስተ። እያዉ ሳሮይ ደእኮ፥ ህንተዉካ ሳሮይ ዳና።
JER 29:8 ህንተ ግዶን ደእያ ህንተ ናበትነ ማሮት ኦድያባን ጭመቶፍተ፤ ኤንቲ አሙህያ አሙሁዋ ስኦፕተ።
JER 29:9 ኤንቲ ታ ሱንꬃን ዎርዶ ትንብተ ኦዶሶና፤ ታ ኤንታ ኪታብከ” ያጌስ ኡባፈ ዎልቃማ ጎዳይ፥ እስራኤለ ፆሳይ።
JER 29:10 “ህንተ ባብሎነን ጋምእያ ላፑን ታሙ ላይꬃይ ፖለትያ ዎደ ታ ህንተ ግሾ ያዳ፥ ህንተና፥ ህንተ ቢታ ዛራዳ ኤሀና ጋዳ ገልዳ ቃላ ፖላና።
JER 29:11 ታኒ ህንተዉ ቆፕያ ቆፋ ኤራይስ። ሄ ቆፋይ፥ ዉርሰꬃይ ሎኦነ ኡፋይስ ደእያ፥ ህንተና ጎእያ ቆፋፐ አትሽን፥ ቆህያ ቆፋ ግደና።
JER 29:12 ሄሳፈ ጉየ፥ ህንተ ታና ፄጋና፤ ታኮ ያናነ ታና ዎሳና፤ ታካ ህንተና ስአና።
JER 29:13 ህንተ ታና ኮያና፤ ህንተ ታና ህንተ ኩመꬃ ዎዛናን ኮይዳ ዎደ ደማና።
JER 29:14 ታ ህንተዉ በንታና፤ ታ ህንተና ድኤተꬃፈ ዛራና። ታኒ ህንተና ላልዳ ካዎተꬃታፐነ ዱማ ዱማ በሳፈ ሺሻና። ታ ህንተና ድኦን ደንꬅዳ ህንተ ቢታ ጉየ ዛራዳ ኤሀና” ያጌስ ጎዳይ።
JER 29:15 ህንተ፥ “ጎዳይ ናበ ኑስ ባብሎነን ደንꬅስ” ያግደታ።
JER 29:16 ግዶሽን፥ ዳዊታ አራታን ኡትያ ካዋባነ ህንተ መላ ድኤትድ ቦና አትዳ አሳባነ ህንተ ዳቦታባ ጎዳይ ሀይሳዳ ያጌስ።
JER 29:17 “ታ ኤንታ ቦላ ማሸ፥ ኮሻነ ጋዶ የዳና። ታ ኤንታና ሜተታናዉ ዳንዳኤቶና ኢትዳ ባላሰ ምꬃ አይፈዳ ኦꬃና።
JER 29:18 ታኒ ኤንታ ማሻን፥ ኮሻንነ ጋዶን የደꬃዳ፥ ኤንታ ሳአን ደእያ ካዎተꬃ ኡባስ ዳጋማ ኦꬃና። ቃስ ታ ኤንታ ከሳዳ የድዳ ቢታ ኡባን ባደꬃስ፥ ዳጋማስ፥ ቦረስነ ጫሻስ ኦꬃና።
JER 29:19 ታ አይለታ ናበታ ባጋራ ዛራ ዛራዳ ኪትዳ ታ ቃላ ኤንቲ ስኦና እፅዶሶና። ህንተ ድኤትድ ብዳይሳትካ ስኦና እፅደታ።
JER 29:20 ህንተኖ፥ የሩሳላመፐ ባብሎነ ድኤትድ ብዳ አሳዉ፥ ህንተ ኡባይ ጎዳ ቃላ ስእተ” ያጌስ ኡባፈ ዎልቃማ ጎዳይ።
JER 29:21 ታ ሱንꬃን ዎርዶ ትንብተ ኦድያ፥ ቆላያ ናኣ አካባባነ ማሰያ ናኣ ሰደቅያሳባ ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ። “ታ ኤንታ ባብሎነ ካዋ ናቡካዳናፆራስ አꬃዳ እማና። ህንተ ፄልሽን፥ እ ኤንታ ዎꬋና።
JER 29:22 ሄሳፈ ጉየ፥ ይሁዳፐ ድኤትድ፥ ባብሎነ ብዳ አሳይ እስ አስ ባዳናዉ ኮይኮ፥ ‘ባብሎነ ካዎይ ታማን ፁግዳ ሰደቅያሳዳነ አካባዳ ጎዳይ ነና ኦꬆ’ ያጋና።
JER 29:23 ኤንቲ እስራኤለን ኢታ ናጋራ ኦꬅዶሶና። ኤንቲ ባንታ ሾሮታ ማቸታራ ላይማትዶሶና፤ ታ ኤንታ ኪቶና ዎርዶ ትንብተ ታ ሱንꬃን ኦድዶሶና። ሄሳ ኤረይ ታና፤ ሄሳስ ታኒ ማርካ” ያጌስ ጎዳይ።
JER 29:24 ናሄላመ አድያ ሻማያስ ሀይሳዳ ያጋዳ ኦዳ፦
JER 29:25 “ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ ‘ኔኒ ነ ሱንꬃን የሩሳላመን ደእያ አሳስ፥ ማእሰያ ናኣ ካህንያ ሶፎንያሳስነ ሀራ ካህነታስ ዳብዳበ የዳዳሳ።’ ነ ሶፎንያሳስ ሀይሳዳ ያጋዳሳ፦
JER 29:26 ‘ፆሳ ኬꬃን ሀላቃ ግዳና መላ ጎዳይ ነና ዮዳሄ በሳን ካህነ ኦꬅድ ሹምስ። ባና ናበ ግድ ትንብተ ኦድያ ጎያ ኦናካ እያ ቶሁዋ ዱꬃን፥ እያ ቆꬍያ ሳንꬃላታን ኔኒ ቃቻናዉ በሴስ።
JER 29:27 ያትን ባና ናበ ግያ አናቶታ አድያ ኤርምያሳ አይስ ሄሳዳ ኦꬃብኪ?
JER 29:28 ኤርምያስ፥ ድኤተꬃ ላይꬃይ ዳሮ ግድያ ግሾ ባብሎነን ኬ ኬፅድ ደእተ፤ ካꬅ ዘርድ አይፍያ ሚተ’ ” ያግድ ኑና ኪትስ።
JER 29:29 ካህነይ ሶፎንያስ ናብያ ኤርምያሳስ ዳብዳብያ ናባብስ።
JER 29:30 ጎዳ ቃላይ ኤርምያሳኮ ሀይሳዳ ያግድ ይስ፤
JER 29:31 “ሀ ኪታ ድኦን ደእያ አሳ ኡባስ ኪታ፤ ናሄላማ አድያ ሳማየባ ጎዳይ ሀይሳዳ ያጌስ፤ ታኒ ኪቶና ሻማየይ ዎርዶ ትንብተ ኦድድ ህንተ ዎርዶን አማንታና መላ ኦꬅስ።
JER 29:32 ታ ናሄላማ አድያ ሻማያነ እያ ሶ አሳ ሴራና። እ ታ ቦላ ማካላባ ኦድዳ ግሾ ሀ አሳ ግዶን እያዉ እስ አስካ ደኦን አተና። ታኒ ታ አሳስ ኦꬃና ኬሀተꬃ እ በኤና” ያጌስ ጎዳይ።
JER 30:1 ጎዳፐ ኤርምያሳኮ ይዳ ቃላይ ሀይሳ።
JER 30:2 “ኤርምያሳ፥ ታ ነዉ ኦድዳ ቃላ ኡባ ፃꬃ ማፃፋን ፃፋ።
JER 30:3 ታኒ ታ አሳ እስራኤለነ ይሁዳ ድኦፐ ጉየ ዛርያ ዎደይ ማታትስ። ኤንታ ማይዛታስ እምዳ ቢታ ኤንታ ዛራና፤ ኤንቲ እያ ላታና” ያጌስ ጎዳይ እስራኤለ ፆሳይ።
JER 30:4 ጎዳይ እስራኤለባነ ይሁዳባ ኦድዳ ቃላይ ሀይሳ።
JER 30:5 “ታ ያሻነ ዳጋማ ዋሶ ስአስ፤ ዳጋማ ዋሶፐ አትሽን፥ ሳሮ ዋሶ ግደና።
JER 30:6 አነ ኦይችተ፤ በእተ፤ አደይ ናአ የላናዉ ዳንዳኢ? ያትን፥ አደ ኡባይ እቀꬅ ኦይክዳ ማጫሳዳ፥ ባ ኩሸን ባ ኡሉዋ ኦይክዳሽን ታ በኤይስ አይቤ? አሳ ኡባ ሶምኦይ አይስ ካሬፅዴ?
JER 30:7 ሄ ጋላሳይ አይ መላ ኡንኤꬅያ ጋላሴ? ሄሳ መላ ጋላስ ባዋ። ሄ ጋላሳይ ያይቆባ ዘረꬃስ ኡንአ ዎደ ግዳና። ግዶሽን ኤንቲ ሄ ኡባፈ አታና” ያጌስ ጎዳይ።
JER 30:8 ኡባፈ ዎልቃማ ጎዳይ ሀይሳዳ ያጌስ፦ “ሄ ጋላሳን ታ ኤንታ ጋናፈ ቃምባራ መንꬃና፤ ኤንቲ ቃሸትዳ ሳንꬃላታ ዱꬃና። ሄሳፈ ጉየ፥ አላጋ ቢታ አሳይ ኤንታ አይለየና።
JER 30:9 ሽን ኤንቲ ጎዳስ፥ ባንታ ፆሳስ፥ ኦꬃና፤ ታ ኤንታዉ ደንꬅያ ካዋ ዳዊታስ ሃረታና።
JER 30:10 “ሄሳ ግሾ፥ ታ አይለቶ፥ ያይቆባ ኮቻቶ፥ ያዮፍተ። ህንተኖ፥ እስራኤለቶ፥ ዳጋሞፕተ። ህንተ ሃሆ በሳን ደእሽን፥ ታ ህንተና አሻና፤ ህንተ ኮቻታ ኤንቲ ድኤትዳ ቢታፈ ዛራና። ያይቆባ ዛረት ስሚድ፥ ሳሮ ዳና፤ ኤንታ ኦንካ ያሽሰና።
JER 30:11 ታ ህንተና አሻናዉ ህንተራ ደአይስ። ህንተና ላልዳ ካዎተꬃታ ኡባ ꬋይሳና፤ ሽን ህንተና ꬋይስከ። ታ ህንተና ፅሎ ፕርዳን ሴራና፤ ሽን ሴሮና ህንተና ጮ የድከ” ያጌስ ጎዳይ።
JER 30:12 “ህንተ መቆይ ኮለተና፤ ህንተ ማዱንꬃይ ፓፀና።
JER 30:13 ህንተዉ ሞተተይ ባዋ፤ ህንተ ማዱንꬃስ ꬋለይ ዴና፤ ህንተዉ ፓፆይ ባዋ።
JER 30:14 ህንተ ዶሰይሳት ህንተና ዶግዶሶና፤ ኤንቲ ህንተባ ዉዳ ጎኮና። ህንተ ባላይነ ህንተ ናጋራይ ዳሮ ግድያ ግሾ፥ ታ ህንተና ሞርከዳ ሾጫስ፤ ቃይ ባይና ሴራስ።
JER 30:15 ፓፆይ በንቶና ህንተ ሀርግያስነ ህንተ ማዱንꬃስ አይስ ዋሰቲ? ህንተ ባላይነ ህንተ ናጋራይ ዳርዳ ግሾ ታ ሀይሳ ህንተ ቦላ ኦꬃስ።
JER 30:16 “ሽን ህንተና ጋሽድ ምዳ ኡባይ ሜተታና፤ ህንተ ሞርከት ኡባይ ድኤታና። ህንተና ቦንቅዳይሳት ቦንቀታና፤ ህንተባ ኤክዳይሳት ኤከታና።
JER 30:17 ኤንቲ፥ ‘ኦንካ ኮዮናነ ቦረትዳ ፅዮነ’ ግዶሶና፤ ሽን ታ ህንተዉ ኬሀና፤ ህንተ ማዱንꬃ ፓꬃና” ያጌስ ጎዳይ።
JER 30:18 “ያይቆባ ኮቻታ ድኤትዳ በሳፈ ጉየ ዛራዳ፥ ኬፃና፤ ኤንቲ ደእያ በሳስካ ቃታና። የሩሳላመ ካታማይ ካሰ ባ ላለትዳ በሳን፥ ካዎ ጋꬎይ ካሰ ባ በሳን ስሚድ ኬፀታና።
JER 30:19 ያን ደእያ አሳ ኡባይ ጋላታ ማዝሙረነ ኡፋይሳ የꬅ የፃና። ታ ኤንታ ታይቡዋ ዳርሳናፐ አትሽን፥ ጉፀና። ታኒ ኤንታ ቦንቸትዳ ደረ ኦꬃና፤ ኤንቲ ካዉዮኮና።
JER 30:20 ኤንታ ናይት በን ዱሳዳ ዳና፤ ኤንታ ማባራይ ታ ስንꬃን ምንድ ዳና። ኤንታ ኡንኤꬅያ ኡባ ታ ሴራና።
JER 30:21 ኤንታ ካለꬃናይ ኤንታ ግዶፈ ከያና፤ ኤንታ ሃራናይ ኤንታ ግዶፈ ደንዳና። ታኒ እያ ታዉ ማታ ኤሀና፤ እ ታኮ ሺቃና። ታኒ እያ ሺሾና ደእሽን፥ ምንድ ታኮ ሺቃናዉ ዳንዳኤይ ኦኔ?” ያጌስ ጎዳይ።
JER 30:22 ሄሳ ግሾ፥ ህንተ ታ አሰ ግዳና፤ ታካ ህንተ ፆሰ ግዳና።
JER 30:23 ሄኮ፥ ጎዳ ሀንቆይ ጎተዳ ደንዴስ፤ ሽረት ሽረት ዎꬍሸ ኢታታ ሁጰን ዎꬋና።
JER 30:24 ጎዳይ ባ ዎዛና ቆፋ ዉርስድ ፖላና ጋካናዉ ኤፅያ እያ ሀንቆይ ጉየ ስመና። ሄሳ ስንꬃፈ ያና ዎደታን ህንተ አኬካና።
JER 31:1 “ሄ ዎደ ታኒ እስራኤለ ዘረꬃ ኡባስ ፆሰ ግዳና፤ ኤንትካ ታ አሰ ግዳና” ያጌስ ጎዳይ።
JER 31:2 “ማሻፈ አትዳ አሳይ መላ ቢታን ታ ስንꬃን ሳባ ደማና። ታኒ እስራኤለ አሳስ ሸምፖ እማናዉ ያና።
JER 31:3 ታኒ ኤንታዉ ሃሆ በሳፈ ቆንጫስ፤ ታኒ ህንተና መርና ሲቁዋን ዶሳስ፤ ታ ቃꬍያን ህንተና ታኮ ሺሻስ።
JER 31:4 ጌላኦ እስራኤለ፥ ታ ህንተና ዛራዳ ኬፃና፤ ህንተካ ኬፀታና። ኔኒ ካራቡዋ ዛራ ኦይካዳ፥ ኡፋይተይሳታራ ኔኒ የፃናነ ዱራና።
JER 31:5 ሳማረ ዙማ ቦላ ዎይነ ቶካና፤ ቶክዳይሳት እያ አይፍያን ኡፋይታና።
JER 31:6 ኤፍሬማ ገዘ ቢታን ናገይሳት፥ ‘ሃ ዪተ፤ ጎዳኮ፥ ኑ ፆሳኮ፥ ፑደ ፅዮነ ቦስ’ ያግድ ፄግያ ዎደይ ያና” ያጌስ ጎዳይ።
JER 31:7 “ያይቆባ አሳስ ኡፋይሳን የፅተ፤ ካዎተꬃታ ኡባፈ አꬍያ እስራኤለስ እልልተ። ‘እስራኤለ አሳፐ አትዳይሳታ አሻ’ ያግድ ጋላታ ማዝሙረ የፅተ።
JER 31:8 ታኒ ኤንታ ፑደሀ ባጋ ቢታፈ ኤሀና፤ ሳኣ ጋፃፐ ታ ኤንታ ሺሻና። ቆቀት፥ ዎበት፥ ዎደꬃ ማጫሳትነ እቀꬅ ኦይክዳ ማጫሳት ኤንታራ እስፈ ያና፤ ዳሮ አሳይ ባንታ ቢታ ስማና።
JER 31:9 ታ ኤንታ ዛራዳ ኤህያ ዎደ ኤንቲ ኡፋይሳፈ ደንዶይሳን ዬክሸነ ዎስሸ ያና። ታኒ ኤንታ ሻፋ ላንቅያራ፥ ኤንቲ ꬉበቶና ጊግዳ ኦግያራ ካለꬃና። ታኒ እስራኤለስ አዋ፤ ኤፍሬም ታዉ ባይራ ናአ።
JER 31:10 “ህንተኖ፥ ካዎተꬃቶ፥ ጎዳ ቃላ ስእድ፥ ሃሆ በሳን፥ ዩሾይ አባን ተቀትዳ ቢታታን፥ ‘እስራኤለ ላልዳይስ እ ኤንታ ሺሻና፤ ሄንꬃንቾይ ባ ዉድያ ሄመይሳዳ እ ኤንታ ሄማና’ ያግድ አዋጅተ።
JER 31:11 ጎዳይ ያይቆባ ኮቻታ ዎዛና፤ እ ኤንታ፥ ኤንታፈ ምነይሳታ ኩሸፐ አሽስ።
JER 31:12 ኤንቲ ይድ ፅዮነ ዙማ ቦላ ኡፋይሳን የፃና፤ ኤንቲ፥ ጎዳይ እምያ ኬሀተꬃን፥ ካꬃን፥ ዎይነን፥ ዛይተን፥ ዶርሳንነ መሄን ኡፋይታና። ኤንቲ ሃ ሎይꬅድ ኡሽዳ አታክልተ በሳ መላ ግዳና፤ ኤንቲ ዛሪድ አዛኖኮና።
JER 31:13 ሄ ዎደ ጌላኦት ኡፋይሳን ዱራና፤ ፓንꬃትነ ጭማት ኡፋይታና። ታ ኤንታ ዬሁዋ ኡፋይሳን ላማና፤ ታ ኤንታ ምንꬃና፤ ኤንታ አዛኑዋ ግሾ ኤንታ ኡፋይሳና።
JER 31:14 ታኒ ካህነታስ ዳሮ ካꬅ እማና፤ ታ አሳይ ታ ኬሀተꬃ ካላና” ያጌስ ጎዳይ።
JER 31:15 “ዬሆይነ ዘለልስ ራማ ካታማን ስኤትስ፤ ራሄላ ባ ናይታስ ዬካሱ፤ ኤንቲ ባይና ግሾ ዬሆ ምንꬆ እፃሱ” ያጌስ ጎዳይ።
JER 31:16 “ዬሁዋ አግድ፥ ህንተ አፉꬃ ቁችተ። ህንተ ኦꬅዳ ኦሱዋስ ዎይቶ ህንተ ኤካና፤ ሞርከ ቢታፈ ህንተ ናይት ስማና።
JER 31:17 ህንተ ናይት ባንታ ቢታ ስማናዉ ደእያ ግሾ፥ ህንተዉ ኡፋይስ ደኤስ” ያጌስ ጎዳይ።
JER 31:18 “ኤፍሬማ ኮቻታ ዙዙንꬃ ታ ስአስ። ኤንቲ፥ ‘ኔኒ ኑና ዋትቦና ዎፋኖዳ ዋꬋዳሳ፤ ኑካ ኬድዳ። ኔኒ ጎዳ፥ ኑ ፆሳ ግድያ ግሾ ኑና ዛራ፤ ኑኒ ኔኮ ስማና።
JER 31:19 ኑ ካሰ ኔፐ ሃክድ ብዳ፤ ሽን ሀእ ኑ ናጋራ ፓፅዳ። ነ ኑና ሴርን፥ ዬላትድ ኑ ትራ ባቅዳ። ኑኒ ኑ ናአተꬃ ላይꬃ ናጋራ ግሾ፥ ካዉይዳነ ዬላትዳ’ ያግዶሶና።
JER 31:20 “ኤፍሬም ታዉ ቱማ አልኦነ ታ ዶስያ ናአ ግደኔ? ታኒ እያ ሱንꬃ ደንꬅያ ዎደ ኡባን እያ ሀሳያይስ። ሄሳ ግሾ፥ ታ ዎዛናይ እያ ላሞቴስ፤ ታ እያዉ ዳሮ ቃታይስ” ያጌስ ጎዳይ።
JER 31:21 “ህንተ ኦግያን ማላታ ዎꬅተ፤ ማላታ ምꬅ ኤስተ፤ ህንተ ብዳ ኦግያ አኬክተ። ጌላኦ እስራኤለ፥ ስማ፤ ነ ካታማታ ገላ።
JER 31:22 ህንተኖ፥ አማኖይ ባይና እስራኤለቶ፥ አዉደ ጋካናዉ ቶይላተቲ? ጎዳይ ሳአ ቦላ ኦራꬃባ ኦꬃና፤ ሄስካ ማጫስ አደ ዩሾን ኤቃና” ያጌስ ጎዳይ።
JER 31:23 ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፦ “ታኒ እስራኤለ አሳ ድኤተꬃፈ ዛራዳ ኤህያ ዎደ ይሁዳ ቢታንነ እያ ካታማታን ኤንቲ፥ ‘ነኖ ፅሎተꬅ አቅያ በሳዉ፥ ጌሻ ደርያዉ፥ ጎዳይ ነና አንጆ’ ያግድ ዛሪድ ኦደታና።
JER 31:24 ይሁዳንነ ይሁዳን ደእያ ካታማታን አሳይ ዳና፤ ጎሻንቾትነ ሄንꬃንቾት ባንታ ዉድያራ ያን ዳና።
JER 31:25 ታኒ ዳቡራንቾታ ጋሽትሳና፤ ቃስ ኮሻትድ ግልቅዳይሳታ ካልሳና” ያጌስ ጎዳይ።
JER 31:26 ሄ ዎደ ባርካዳ ታ ዩሹዋ ፄላስ፤ ታ ꬍስኮይ ታዉ ማልኦ ꬍስኮ ግድስ።
JER 31:27 “ታኒ እስራኤለንነ ይሁዳን አሰነ መሄ ኩንꬅያ ዎደይ ያና።
JER 31:28 ኤንታ ሾዳናዉ፥ ላላናዉ፥ ሽራ የጋናዉ፥ ꬋይሳናዉነ ጋዶ ኤሀናዉ ደንድዳይሳዳ ኤንታ ዛራዳ ግምባናዉነ ቶካናዉ ደንዳና” ያጌስ ጎዳይ።
JER 31:29 “ሄ ዎደ አሳይ፥ ‘አዋት ቃዉኤ ዎይነ አይፈ ምን፥ ናይታ አቻይ ዶጭስ’ ያግድ ሃሳያ ሌምሶይ አታና።
JER 31:30 ሽን እሶይ እሶይ ባ ናጋራን ሀይቃና፤ ቃዉኤ ዎይነ አይፈ ምያ ኦደስካ እያ አቻይ ዶጫና” ያጌስ ጎዳይ።
JER 31:31 “ታኒ እስራኤለራነ ይሁዳራ ኦራꬃ ጫቆ ጫቃና ዎደይ ያና።
JER 31:32 ሄ ጫቆይ ታ ኤንታ ግብፀፈ ከሳናዉ ኤንታ ኩሽያ ኦይክዳ ዎደ ኤንታ ማይዛታራ ጫቅዳ ጫቁዋ መላ ግደና። ታ ኤንታዉ አዝና መላ ግዳ ኡትንካ ኤንቲ ታ ጫቁዋ መንꬅዶሶና” ያጌስ ጎዳይ።
JER 31:33 “ሽን ታኒ ሄ ዎድያፐ ጉየ እስራኤለራ ጫቃና ጫቆይ ሀይሳ፦ ታኒ ታ ህግያ ኤንታ ጉግያን ዎꬃና፤ ኤንታ ዎዛናን ፃፋና። ታኒ ኤንታ ፆሰ ግዳና፤ ኤንትካ ታ አሰ ግዳና።
JER 31:34 ህዛፐ ጉየ፥ አስ ባ ላግያ ዎይኮ ባ እሻ፥ ‘ጎዳ ኤራ’ ያግድ ታማርሰና። ጉꬃፈ ግታ ጋካናዉ ኡባይ ታና ኤራና። ታኒ ኤንታ ናቁዋ አቶ ጋና፤ ኤንታ ናጋራ ዛራዳ ቆፕከ” ያጌስ ጎዳይ።
JER 31:35 ጋላስ ፖአና መላ አዋ ዎꬅዳይ፥ ቃማ ፖአና መላ አጌናነ ፆልንቶ ኪትዳይ፥ አባ ቃꬅድ፥ ቤታይ ጉማናዳ ኦይ፥ እያ ሱንꬃይ ኡባፈ ዎልቃማ ጎዳ ጌተተይስ ሀይሳዳ ያጌስ።
JER 31:36 “ሀ ኤቅድ ደእያ መተꬃ ህገይ ታ ስንꬃፈ ሻረትኮ፥ ሄ ዎደ እስራኤለ ኮቻይ ታ ደረ ግደይስ መርናዉ አታና” ያጌስ ጎዳይ።
JER 31:37 “ቦላ ሳሎታ ዋꬋናዉ ዎይኮ ጋርሳ ሳኣ ባሶይ ኤረታናዉ ዳንዳእኮ፥ ሄ ዎደ ታ እስራኤለ ዘረꬃ ኡባ፥ ኤንቲ ኦꬅዳ ናጋራ ግሾ ታ ስንꬃፈ ድጋና” ያጌስ ጎዳይ።
JER 31:38 “ሀናንኤላ ሻኮ ግምብያፈ ዶምድ፥ ማዛነ ፐንግያ ጋካናዉ የሩሳላመ ካታማይ ታ ካታማ ግድድ፥ ኬፀትያ ዎደይ ያና።
JER 31:39 ሄ ካታማ ዛዋይ ዉሎሀ ባጋፈ ብድ ጋረባ ዙማነ ጎአ ዩሹዋ ጋካናዉ ዳልጋና።
JER 31:40 አሀ ሞግያነ ብዶ የግያ ዛንጋራይነ ቀድሮና ዛንጋራፐ ቆሞራ ዶሎሀ ባጋራ ብድ፥ ፓራ ፐንገ ማዛንያ ጋካናዉ ደእያ ቢታ ኡባይ ጎዳስ ዱማትድ፥ ጌሽ ግዳና። ህዛፐ ጉየ፥ ካታማይ መርናዉ ሾደተና፤ ላለተና” ያጌስ ጎዳይ።
JER 32:1 ይሁዳ ካዎይ ሰደቅያስ ካዎትዳ ታማንꬆ ላይꬃን፥ ባብሎነ ካዎይ ናቡካዳናፆር ካዎትዳ ታማነ ሆስፑንꬆ ላይꬃን ጎዳፐ ሀ ቃላይ ኤርምያሳኮ ይስ።
JER 32:2 ሄ ዎደ ባብሎነ ካዋ ኦላንቾት የሩሳላመ ተቅዶሶና፤ ናበይ ኤርምያስ ይሁዳ ካዎ ጋꬎን ደእያ፥ ናገይሳታ ዳባባን እያ ቦላ ጎርደትን ደኤስ።
JER 32:3 ይሁዳ ካዎይ ሰደቅያስ እያ ሀይሳዳ ያግድ ቃችድ ዎꬅስ፦ “ነ አይስ ሀይሳዳ ያጋዳ ትንብተ ኦዳይ? ‘ጎዳይ ሀ ካታማ ባብሎነ ካዋ ኩሸን አꬅድ እማና፤ እ እያ ኦይካና’ ያጋዳ አይስ ኦዳይ።
JER 32:4 ይሁዳ ካዎይ ሰደቅያስ ባብሎነ አꬍድ እመታና፤ እ ባብሎነ ካዋ ኩሸን ገላና። እያ ስንꬃን ኤቅድ፥ እያራ ኦደታና፤ እ ባ አይፈን እያ በአና።
JER 32:5 ናቡካዳናፆር ሰደቅያሳ ባብሎነ ኤፋና፤ ታ እያባ በአና ጋካናዉ እ ያን ዳና። ኔኒ ባብሎነታራ ኦለታናዉ ቆፕኮ፥ ሄስ ነዉ ሀነና” ያጌስ ጎዳይ።
JER 32:6 ኤርምያስ፥ “ጎዳ ቃላይ ሄ ዎደ ታኮ ሀይሳዳ ያግድ ይስ” ያግስ።
JER 32:7 “ነ አዋ እሻ ሳሉማ ናአይ፥ ሀናምኤል ኔኮ ይድ፥ ‘ዎዛናዉ ማት ደእያ ማታ ዳቦይ ነና ግድያ ግሾ አናቶታ ካታማን ደእያ ታ ጋድያ ሻማ’ ያጋና።
JER 32:8 ጎዳይ ግዳይሳዳ፥ ታ አዋ እሻ ናአይ ሀናምኤል ታኮ ናገይሳታ ዳባባ ይድ፥ ‘ዎዛናዉ ማት ደእያ ማታ ዳቦይ ነና ግድያ ግሾ፥ ብንያመ ቢታን አናቶታን ደእያ ታ ጋድያ ሻማ’ ያግን፥ ታኒ ሄሳ ኦድዳይ ጎዳ ግደይሳ ኤራስ።
JER 32:9 “አናቶታ ካታማን ደእያ ጋድያ ታ አዋ እሻ ናኣ ሀናምኤላፐ ሻማስ። እያ ጋትያ ምዛነን ልክን፥ ታማነ ላፑን ብራ ሳንትመ ግድስ።
JER 32:10 ሻማ ፕርማ ማርካት ደእያ በሳን ፓራማስ፤ ጎርዳስ፤ ማታመ እያ ቦላ ዎꬃስ፤ ሚሽያ ምዛነን ልካዳ እያዉ እማስ።
JER 32:11 ሄሳፈ ጉየ፥ ታኒ ዛልእያ ሀኖታ ቆንጭስያ አሻገትድ አታመትዳ ሻማ ፕርማነ አታመትቦና ሻማ ፕርማ ኤካስ።
JER 32:12 ታ አዋ እሻ ናአይ ሀናምኤል፥ ሻማ ፕርማ ፓራምዳ ማርካትነ ናገይሳታ ዳባባን ኡትዳ አይሁደት ኡባይ በእሽን፥ ሄ ሻማ ፕርማ ማህሰያ ናኣ፥ ኔራ ናኣ ባሮካስ እማስ።
JER 32:13 ኤንታ ስንꬃን ታ ባሮካ ሀይሳዳ ያጋዳ ኪታስ፦
JER 32:14 ‘ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፦ ዳሮ ዎደ ጋምአና መላ ሀ አሻገትድ አታመትዳ ፕርማነ አታመትቦና ፕርማ ኤፋዳ ኦቶን ዎꬃ።’
JER 32:15 ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፦ ሀ ቢታን አሳይ ዛሪድ ኬ፥ ጋደነ ዎይነ ቶክያ በሲ ሻማና” ያጌስ ጎዳይ።
JER 32:16 ታኒ ኔራ ናኣ ባሮካስ ሻማ ፕርማ ዋርቃትያ እምዳፐ ጉየ፥ ሀይሳዳ ያጋዳ ዎሳስ።
JER 32:17 “አቤት ኡባ ሃርያ ጎዳዉ፥ ነ ሳሎታነ ሳኣ ነ ግታ ዎልቃንነ ነ ምጨትዳ ኩሸን መꬋዳሳ። ነዉ ዳንዳኤቶናባይ ባዋ።
JER 32:18 ኔኒ ነ ሲቁዋ ሙኩሉ አሳስ በሳሳ፤ ሽን አዋታ ናጋራ ኤንታ ናይታ ቦላ ዛራሳ። አቤት ግታነ ዎልቃማ ፆሳዉ፥ ነ ሱንꬃይ ኡባፈ ዎልቃማ ጎዳ ጌተቴስ።
JER 32:19 ነ ሀልቾይ ግታ፤ ነ ኦꬅያ ኦሶይ ዎልቃማ። አሳ ኦገ ኡባ ነ በኣሳ፤ አሳ ኡባስ እያ ኦግያዳነ እያ ኦሱዋዳ ዛራሳ።
JER 32:20 “ነ ግብፀን ማላታነ ማላታ ኦꬃዳሳ፤ ሀች ጋካናዉ ሀ ማላታ እስራኤለ አሳ ግዶንነ ሀራ ካዎተꬃታ ኡባ ግዶን ኦሶ አጋባካ። ሄሳፈ ደንዶይሳን ነ ሱንꬃይ ኡባ በሳን ኤረትስ።
JER 32:21 ኔኒ ነ አሳ እስራኤለ ግብፀፈ ማላታንነ ማላታን፥ ነ ምኖ ቀስያን፥ ነ ምጨትዳ ኩሽያንነ ግታ ዳጋማን ከሳዳሳ።
JER 32:22 ኤንታ ማይዛታስ ነ እማናዉ ጫቅዳ ቢታ፥ ማꬅነ ኤስ ጎግያ ቢታ ኤንታዉ እማዳሳ።
JER 32:23 ኤንቲ ሄ ቢታ ገልድ ላትዶሶና። ሽን ኤንቲ ነዉ ኪተትቦኮና፤ ነ ህግያ ናግቦኮና፤ ኤንቲ ኦꬃና መላ ነ ኪትዳ ኡባ ኦꬅቦኮና። ሄሳ ግሾ፥ ነ ኤንታ ቦላ ሀ ጋዱዋ ኡባ ኤሀዳሳ።
JER 32:24 “ባብሎነ አሳይ ካታማ ኦይካናዉ ግምብያ ዩሹዋን ቢታ ዶርድ ተቅዶሶና። ኦላፐ፥ ኮሻፐነ ቦሻፐ ደንዶይሳን ካታማይ ኤንታ ኦልያ ባብሎነ ኩሸን አꬍድ እመትስ። ነ ሀእ በኤይሳዳ ነ ግዳባ ኡባይ ፖለትስ።
JER 32:25 አቤት ኡባ ሃርያ ጎዳዉ፥ ካታማይ ባብሎነ አሳስ እመታናዉ ሀንያ ዎደካ ነ ታና፥ ‘ማርካ ፄጋዳ፥ ሚሸን ጋድያ ሻማ’ ጋዳሳ” ያጋዳ ዎሳስ።
JER 32:26 ሄሳፈ ጉየ፥ ጎዳ ቃላይ ኤርምያሳኮ ሀይሳዳ ያግድ ይስ፦
JER 32:27 “ታኒ ጎዳ፥ አሳ ኡባ ፆሳ። ታዉ ዳንዳኤቶናባይ ደኢ?” ያግስ።
JER 32:28 ታኒ ሀ ካታማ ባብሎነ አሳስነ ባብሎነ ካዋ ናቡካዳናፆራስ አꬃዳ እማና፤ ኤንቲ እያ ኦይካና።
JER 32:29 ሀ ካታማ ተቅዳ ባብሎነ አሳይ ይድ፥ ካታማ ታማን ፁጋና፤ ፖቅያ ቦላ ባኣለ ኤቃስ እፃነ ጩይስሸነ ሀራ ፆሳታስ ኡሻ ያርሾ ጉስሸ ታና ሀንቀꬅዳ አሳይ ደእያ ኬꬃትካ ፁገታና።
JER 32:30 “እስራኤለይነ ይሁድ ባንታ ናአተꬃፈ ዶምድ፥ ታ ስንꬃን ኢታባፐ አትሽን፥ ሎኦባ፥ ኦꬅቦኮና፤ ኤንቲ ባንታ ኩሸን ኦꬅዳ ኦሱዋን ታና ሀንቀꬅዶሶና።
JER 32:31 ሀ ካታማይ ኬፀትዳ ዎደፐ ሀች ጋካናዉ፥ ሀ ካታማ አሳይ ታና ዳሮ ሀንቀꬅዳ ግሾ ሀ ካታማ ታ ስንꬃፈ ꬋይሳና።
JER 32:32 እስራኤለይነ ይሁድ፥ ኤንታ ካዎትነ ሀላቃት፥ ኤንታ ካህነትነ ናበት ኦꬅዳ ኢታ ኦሶ ኡባን ታና ይሎይዶሶና።
JER 32:33 ኤንቲ ባንታ ሶምኡዋ ግዶናሽን፥ ባንታ ዞኩዋ ታዉ ዛርዶሶና። ታ ኤንታ ዛራ ዛራዳ ታማርስንካ፥ ኤንቲ ስእቦኮና ዎይኮ ሴራ ኤክቦኮና።
JER 32:34 ኤንቲ እፀትዳ ባንታ ኤቃታ ታ ሱንꬃይ ፄገትዳ ኬꬃን ኤስድ ቱንስዶሶና።
JER 32:35 ኤንቲ ባንታ አደ ናይታነ ማጫ ናይታ ሞሎካ ኤቃስ ያርሻናዉ ህኖማ ዛንጋራን ባኣለ ኤቃስ ያርሾ ꬎቃ በሳታ ጊግስዶሶና። ኤንቲ ሄሳ ኦꬃና መላ ታ ኪታብከ፤ ይሁዳ አሳይ ናጋራ ኦꬃና መላ ሄሳ ኤንቲ ኦꬃና ጋዳ ታ ናጋብከ” ያግስ።
JER 32:36 “ኔኒ፥ ‘ሀ ካታማይ ኦላን፥ ኮሻንነ ቦሻን ባብሎነ ካዋ ኩሸን አꬍድ እመታና’ ያግዳ ሀ ካታማባ ጎዳይ እስራኤለ ፆሳይ ሀይሳዳ ያጌስ።
JER 32:37 ታ ሱልያ ሀንቁዋንነ ግታ ሸንያን ኤንታ ላልዳ ቢታ ኡባፈ ሺሻዳ ሀ በሳ ዛራ ኤሀዳ፥ ኤንቲ ሳሮተꬃን ዳና መላ ኦꬃና።
JER 32:38 ኤንቲ ታ አሰ ግዳና፤ ታ ኤንታ ፆሰ ግዳና።
JER 32:39 ኤንቲ ታዉ መርናዉ ያያና መላ፥ ታ ኤንታዉ እስ ዎዛናነ እስ ኦገ እማና፤ ሄስ ኤንታዉነ ኤንታፈ ጉየ ኤንታ ናይታስ ሎኦ ግዳና።
JER 32:40 ታኒ ኤንታራ መርናዉ ጫቃና፤ ሄ ጫቁዋን ታ ኤንታዉ ሎኦባ ኦሶ አግከ። ኤንቲ ታና አግድ ጉየ ስሞና መላ ኤንቲ ታዉ ያያና መላ ኦꬃና።
JER 32:41 ታ ኤንታዉ ሎኦባ ኦይስ ታና ኡፋይሴስ፤ ታ ኩመꬃ ዎዛናፐነ ታ ኩመꬃ ሸምፑዋፈ ቱማ ሀ ቢታን ኤንታ ቶካና” ያጌስ ጎዳይ።
JER 32:42 “ታ ሀ አሳ ቦላ ኢታ ቦሻ ኡባ ኤህዳይሳዳ ታ ኤንታዉ እማና ግዳ ሎኦባ ኡባ እማና።
JER 32:43 ህንተ፥ ‘ሀ ቢታይ አሳይነ መሄይ ባይና ባይሳ ቢታ ግዳና፤ እ ባብሎነታስ እመትስ’ ያግዳ ቢታን አሳይ ዛሪድ ጋደ ሻማና።
JER 32:44 ታ ኤንታ ዛራዳ ኤህያ ግሾ፥ አሳይ ጋደ ሻማና፤ ማርካ ስንꬃን ዛልእያ ሀኖታ ቆንጭስያ ፕርማ ፓራምድ፥ ማታመ ዎꬃና። ሀይስ ኡባይ ብንያመ ቢታን፥ የሩሳላመ ዩሹዋን ደእያ ሄራታን፥ ይሁዳ ካታማታን፥ ደረይ ዳርያ ካታማታን፥ ጋꬋ ካታማታንነ ነገበ መላ ቢታን ደእያ ካታማታ ኡባን ሀናና” ያጌስ ጎዳይ።
JER 33:1 ኤርምያስ ቡሮ ናገይሳታ ዳባባን ቃሸትድ ደእሽን፥ ጎዳ ቃላይ ዛሪድ እያኮ ይስ።
JER 33:2 ሳኣ መꬍዳ ጎዳይ፥ ጊግስድ እያ በሳን ዎꬅዳ ጎዳይ፥ እያ ሱንꬃይ ጎዳ ጌተተይስ ሀይሳዳ ያጌስ፦
JER 33:3 “ታና ፄጋ፤ ታ ነዉ ኮያና፤ ነ ኤሮና ግታባነ ዎልቃማባ ታ ነዉ ቆንጭሳና።”
JER 33:4 ጎዳይ፥ እስራኤለ ፆሳይ፥ ባብሎነ ኦላ፥ ቢታ ዶረꬃነ፥ ድኤተꬃ ተቃና መላ ድርሳ ግምብያ ምንꬃናዉ ላልዳ ሀ ካታማ ኬꬃታባነ ይሁዳ ካዎታ ጋꬎታባ ሀይሳዳ ያጌስ።
JER 33:5 ኤንታ ኢታተꬃ ጋሶን፥ ታ ሀ ካታማ ቦላፈ ታ ሶምኡዋ ደንꬅዳ ግሾ፥ ህንተራ ኦለታናዉ ታኒ ታ ሀንቁዋን ሾጫና አሳ አሀን ሀ በሳን ኩንꬃናዉ ባብሎነት ገላና።
JER 33:6 ግዶሽን፥ “ታ ሀ ካታማነ እያን ደእያ አሳ ዛራዳ ፓꬃና፤ ኤንታ ፓያተꬃ ዛራና፤ ሳሮነ ዎፓ ዱሱ ኤንታዉ እማና።
JER 33:7 ታኒ ይሁዳ አሳነ እስራኤለ አሳ ድኦፐ ዛራና፤ ኤንቲ ካሰ ደእዳይሳዳ ኦꬃዳ ኤንታ ግምባና።
JER 33:8 ኤንቲ ታና ኦꬅዳ ናጋራ ኡባፈ ታ ኤንታ ጌሻና፤ ኤንቲ ናቁዋነ ኤንታ ማካላ ኡባ አቶ ጋና።
JER 33:9 የሩሳላመ ካታማይ ታዉ ኡፋይስ፥ ቦንቾነ ጋላታ ሳአን ደእያ ካዎተꬃታ ኡባ ስንꬃን ኤሀና። ታኒ የሩሳላመ አሳስ ኦꬅያ ሎኦባነ ካታማስ ኤህያ ዱረተꬃነ ሳሮተꬃ ስእድ፥ ካዎተꬃት ኡባይ ያሻን ኮኮራና” ያጌስ ጎዳይ።
JER 33:10 “ህንተ፥ ‘አስነ መሄይ ባይና ባይሳ’ ግዳ ሀ በሳን፥ አስነ መሄይ ባይና ይሁዳ ካታማታንነ የሩሳላመ ኦገታን ኡፋይስነ እልልሳ ግርስ ስኤታና።
JER 33:11 የꬅነ ያጋኖ ግርስ፥ ኡፋይሳ ግርስ፥ ሄሳዳካ፥ ፆሳ ኬꬅ ጋላታ ያርሾ ኤህድ፥ “እ ኬሀ ግድያ ግሾ፥ እያ ማሮተꬃይ መርናሳ ግድያ ግሾ፥ ኡባፈ ዎልቃማ ጎዳ ጋላትተ። ያግድ የፅሸ ፆሳ ኬꬅ ጋላታ ያርሾ ኤክድ ያ አሳ ግርሳይ ስኤታና። ታኒ ኤንታ ድኦፐ ዛራና፤ ኤንቲ ካሰ ደእዳይሳዳ ኦꬃዳ ዎꬃና” ያጌስ ጎዳይ።
JER 33:12 “ሀ አሳይነ መሄይ ባይና ባይሳ ቢታንነ እያን ደእያ ካታማታን ሄንꬃንቾት ባንታ ዶርሳ ዉድያ ሄምያ ጋደይ ዳና።
JER 33:13 ገዘ ካታማታን፥ ጋꬋ ካታማታን፥ ነገበ መላ ቢታን ደእያ ካታማታን፥ ብንያመ ቢታን፥ የሩሳላመ ዩሹዋን ደእያ በሳታንነ ይሁዳ ካታማታን ሄንꬃንቾት ባንታ ዶርሳታ ዛሪድ ታይባና” ያጌስ ኡባፈ ዎልቃማ ጎዳይ።
JER 33:14 “ታኒ እስራኤለ አሳስነ ይሁዳ አሳስ ገልዳ ቃላ ፖልያ ዎደይ ያና።
JER 33:15 ሄ ዎደ ታኒ ዳዊታ ኮቻፈ እስ ፅሎ አጫ ደንꬃና፤ እ ሱረ ፕርዳ ፕርዳና፤ ፅሎ ኦꬃና።
JER 33:16 ሄ ዎደ ይሁዳ አሳይ አታና፤ የሩሳላመ አሳይ ዎፑ ግድ ደአና። ሀ ካታማይ፥ ‘ጎዳይ ኑ ፅሎተꬃ’ ጌተትድ ፄገታና።
JER 33:17 ዳዊታ ኮቻፈ እስራኤለ አራታን ኡትያ አስ ꬋየና።
JER 33:18 ሄሳዳካ፥ ፁሳ ያርሾ፥ ካꬃ ያርሾነ ሀራ ያርሾ ያርሻናዉ ሌወ ኮቻፈ ካህነ ግድያ አስ መርናዉ ታ ስንꬃፈ ꬋየና” ያጌስ ጎዳይ።
JER 33:19 “ጎዳ ቃላይ ኤርምያሳኮ ሀይሳዳ ያግድ ይስ።
JER 33:20 ጋላሳስነ ቃማስ ታ ዎꬅዳ ዎጋ መንꬅድ፥ ጋላስነ ቃም ባንታ ዎድያን ስመረቶና መላ ኦꬅድ ታ ጫቁዋ ላማናዉ ህንተ ዳንዳእኮ፥
JER 33:21 እያ ኮቻፈ አራታን ኡትያ አስ ꬋዮናዳ፥ ታ አይልያ ዳዊታራ ጫቅዳ ጫቁዋ ላማና፤ ታዉ ኦꬅያ፥ ሌወ ኮቸ ግድዳ ካህነታራ ጫቅዳ ጫቁዋ ላማና።
JER 33:22 ታኒ ታ አይልያ ዳዊታ ኮቻነ ታ ስንꬃን ኦꬅያ ሌወ ኮቻ ታይባናዉ ዳንዳኤቶና ሳሎ ፆልንቶታዳነ ማካናዉ ዳንዳኤቶና አባ ሻፍያዳ ዳርሳና” ያጌስ ጎዳይ።
JER 33:23 ጎዳ ቃላይ ቃስካ ኤርምያሳኮ ሀይሳዳ ያግድ ይስ።
JER 33:24 “ሀ አሳይ፥ ‘ጎዳይ ባ ዶርዳ ናምኡ ካዎተꬃታ፥ እስራኤለነ ይሁዳ አጋግስ’ ያግድ ኦደተይሳ ነ አኬካብኪ? ኤንቲ ታ አሳ ካꬍድ፥ ባና ዳንዳእዳ ካዎተꬅ ግዶኮና ግድ ቆፖሶና።
JER 33:25 ታኒ ጋላሳራነ ቃማራ ጫቅዳ ጫቁዋነ ሳሎነ ሳአ ህግያ ምንꬃቦናባ ግድኮ፥
JER 33:26 ያይቆባ ዘረꬃነ ታ አይልያ ዳዊታ ኮቻ አጋጋና። እያ ናይታፐ አብራሃመ፥ ይሳቃነ ያይቆባ ኮቻታ ቦላ ካዎꬃናዉ ዳዊታ ኮቻ ዶርከ። ታኒ ታ አሳ ማራና፤ ኤንታ ሻሉዋ ዛራና” ያጌስ ጎዳይ።
JER 34:1 ባብሎነ ካዎይ ናቡካዳናፆር፥ እያ ኦላንቾት ኡባይነ እ ሃርያ ካዎተꬃታን ደእያ አሳ ኡባይ፥ የሩሳላመነ የሩሳላመ ዩሹዋን ደእያ ካታማታ ኡባ ኦልያ ዎደ፥ ሀ ቃላይ ጎዳፐ ኤርምያሳኮ ይስ፦
JER 34:2 ጎዳይ እስራኤለ ፆሳይ ሀይሳዳ ያግስ፤ “ባዳ ይሁዳ ካዋ ሰደቅያሳኮ ሀይሳዳ ያጋ፦ ‘ታኒ ሀ ካታማ ባብሎነ ካዋ ኩሸን አꬃዳ እማና፤ እ ካታማ ታማን ፁጋና።
JER 34:3 ኔኒ እያ ኩሸፐ ከሳ ኤካካ፤ ኔኒ ኦይከታና፤ እያዉ አꬋዳ እመታና። ኔኒ ነ አይፈን ባብሎነ ካዋ በአና፤ እካ ኔራ ኦደታና። ኔኒ ባብሎነ ቢታ ባና’ ያጌስ ጎዳይ።
JER 34:4 “ግዶሽን፥ ይሁዳ ካዋዉ ሰደቅያሳ፥ ጎዳይ ግያባ ስአ። ኔኒ ኦላን ሀይቃካ።
JER 34:5 ነ ሳሮ ሀይቃና። ኔፐ ካሰ ደእዳ ካዎታ ቦንቹዋስ፥ ነ ማይዛታስ እፃነ ጩይስዳይሳዳ፥ አሳይ ነ ቦንቹዋስ እፃነ ጩይሳና። ዎ ኑ ካዋዉ፥ ያግድ ነዉ ዬካና። ታኒ ጎዳይ ሀይሳ ኦዳይስ” ያጌስ።
JER 34:6 ሄሳፈ ጉየ፥ ናበይ ኤርምያስ ሀ ትንብትያ ይሁዳ ካዋ ሰደቅያሳስ የሩሳላመን ኦድስ።
JER 34:7 ሄ ዎደ ባብሎነ ኦላንቾት የሩሳላመ ካታማነ ይሁዳን አትዳ ላክሶነ አዜቃ ካታማታ ኦልዶሶና። ይሁዳን አትዳ ግምበትዳ ካታማት ኤንታ ፃላላ።
JER 34:8 ካዎይ ሰደቅያስ አይለታ ላአ ከስያ አዋጁዋ አዋጃናዉ የሩሳላመን ደእያ አሳ ኡባራ ጫቅዳፐ ጉየ፥ ጎዳ ቃላይ ኤርምያሳኮ ሀይሳዳ ያግድ ይስ፦
JER 34:9 ሄ አዋጆይ፥ እስ እስ እብራወ አስ አደነ ማጫ አይለ አይለተꬃፈ ላአ ከሶ። ኦንካ አይሁደ አስ ግድዳ ባ እሻ አይለ ኦꬆፎ።
JER 34:10 ሄሳ ግሾ፥ አሳይነ ሀላቃት ኡባይ ጫቅዳ ጫቁዋን ባንታ አደነ ማጫ አይለታ አይለተꬃፈ ላአ ከሳናዉነ ዛሪድ አይለተꬃን ሃሮና አጋናዉ ጊግድ ኤንታ አይለተꬃፈ ላአ ከስዶሶና።
JER 34:11 ሽን ኤንቲ ባንታ ቆፋ ላምድ፥ አይለተꬃፈ ላአ ከስዳ ባንታ አደነ ማጫ አይለታ ዛሪድ ሃርዶሶና።
JER 34:12 ሄሳፈ ጉየ፥ ጎዳ ቃላይ ኤርምያሳኮ ያግስ።
JER 34:13 ጎዳይ፥ እስራኤለ ፆሳይ ሀይሳዳ ያጌስ፦ “ታኒ ህንተ ማይዛታ ግብፀፈ፥ አይለተꬃ ቢታፈ ከስዳ ዎደ ኤንታራ ሀይሳዳ ያጋዳ ጫቃስ።
JER 34:14 ሄ ጫቁዋ ማራን፥ ‘እብራወ አይለይ ደእያ አሰ ኡባይ፥ አይለታ ኡሱፑን ላይꬅ ኦስስድ፥ ላፑንꬃ ላይꬃን አይለተꬃፈ ከስድ የድተ’ ያጋዳ ኪታስ። ሽን ህንተ ማይዛት ታ ኦድያባ ስኦና እፅዶሶና፤ ታዉ ኪተትቦኮና።
JER 34:15 ህንተካ ማታ ዎደፐ ካሰ ህንተ ናጋራፐ ስሚድ፥ አይለታ ላአ ከሳናዉ አዋጅደታ፤ ታ ስንꬃን ሱረባ ኦꬅደታ። ቃስ ሄሳ ኦꬃናዉ ታ ስንꬃን፥ ታ ሱንꬃይ ፄገትያ ታ ኬꬃን ጫቅደታ።
JER 34:16 ሽን ህንተ፥ ህንተ ቆፋ ላምድ፥ ታ ሱንꬃ ቱንስደታ። ኤንቲ ኮይዳ በሳ ባና መላ ላአ ከስዳ አደነ ማጫ አይለታ ዛሪድ ሃርደታ።”
JER 34:17 ሄሳ ግሾ፥ ጎዳይ፥ “ህንተ ታዉ ኪተቶና እፅድ፥ ህንተ እሻ ዎይኮ ህንተ ሾሩዋ አይለተꬃፈ ላአ ከስያ አዋጁዋ አዋጅበከታ። ህንተ ቦላ ኦል፥ ቦሽነ ኮሽ ከያና መላ ታ አዋጃይስ። ታ ህንተና ሳአ ቦላ ደእያ ካዎተꬃታስ ዳጋማ ኦꬃና።
JER 34:18 ታ ጫቁዋ መንꬅዳ አሳ፥ ታ ስንꬃን ጫቁዋ ናጎና እፅዳ አሳ፥ ሹክድ፥ ናምኡ በሳን ሻክድ፥ እያ ግዶራ አꬍዳ ማራ መላ ታ ኤንታ ኦꬃና።
JER 34:19 ሄ አሳይ ይሁዳ ሀላቃታ፥ የሩሳላመ ሀላቃታ፥ ቢታ አይሰይሳታ፥ ካህነታነ ናምኡ በሳን ሻክዳ ማራ አሹዋ ግዶራ አꬍዳ አሳ ኡባ።
JER 34:20 ታ ኤንታ፥ ኤንታ ሞርከታ ኩሸንነ ኤንታ ዎꬋናዉ ኮይያ አሳ ኩሸን አꬃዳ እማና፤ ኤንታ አሀይ ሳሎ ካፎታስነ ሳአ ዶአታስ ካꬅ ግዳና።
JER 34:21 “ታኒ ይሁዳ ካዋ ሰደቅያሳነ እያ ሀላቃታ፥ ኤንታ ሞርከታ ኩሸን፥ ኤንታ ዎꬋናዉ ኮየይሳታ ኩሸንነ ህንተና ኦለይሳ አግዳ ባብሎነ ኦላንቾታ ኩሸን አꬃዳ እማና።
JER 34:22 ታኒ ባብሎነ ኦላንቾታ ኪትን፤ ኤንቲ ሀ ካታማ ስማና። ኤንቲ ሀ ካታማ ኦላና፥ ድአናነ ታማን ፁጋና። ይሁዳን ደእያ ካታማታ አስ ዶና ባይሳ በሲ ኦꬃና” ያጌስ ጎዳይ።
JER 35:1 እዮስያሳ ናኣ ይሁዳ ካዋ እዮአቄማ ላይꬃን፥ ጎዳ ቃላይ ኤርምያሳኮ ሀይሳዳ ያግድ ይስ።
JER 35:2 “ራካባ ያራ ግድዳ አሳኮ ባዳ፥ ኤንታራ ኦደታዳ፥ ፆሳ ኬꬃ ክፍለታፐ እሱዋ ግዶ ገልሳዳ ዎይነ ኡሻ ኤንታዉ እማ” ያግስ።
JER 35:3 ታኒ ባዳ፥ ካባሳ ናኣ ናኣ፥ ኤርምያሳ ናኣ ያእዛና፥ እያ እሻታነ እያ አደ ናይታ ኡባ፥ ራካባ ያራ ኡባ ኤካዳ፥
JER 35:4 ፆሳ ኬꬅ ኤሀስ። ኤንታ፥ ይግዳላ ናኣ፥ ፆሳ አስ ግድዳ ሀናና ናይታ ክፍለ ገልሳስ። ሄ ክፍለይ፥ ፐንግያ ናግያ ሳሉማ ናኣ ማእሰያ ክፍልያፐ ቦላ ባጋራ፥ ሀላቃታ ክፍልያ ማታን ደኤስ።
JER 35:5 ሄሳፈ ጉየ፥ ታኒ ራካባ ያራታ ስንꬃን ዎይነ ኡሻይ ኩምዳ ፁጋታነ ፁአታ ዎꬃዳ፥ “ዎይነ ኡሻ ኡይተ” ያጋስ።
JER 35:6 ሽን ኤንቲ ዛሪድ፥ “ኑ ዎይነ ኡሹ ኡዮኮ፤ ኑ ማይዛይ ራካባ ናአይ ዮናዳብ ኑኮ፥ ‘ህንተነ ህንተ ናይት ዎይነ ኡሹ መርናዉ ኡዮፕተ።
JER 35:7 ኬ ኬፆፍተ፤ ጎሸ ጎዮፕተ፤ ዎይነ ቶኮፍተ። ዱንካነ ግዶን ደእተ፤ ህንተ አዱሳ ላይꬅ ሀ ቢታን ዳና’ ያግስ።
JER 35:8 ኑ ማይዛይ ራካባ ናአይ ዮናዳብ ኑና ኪትዳ ኡባ ኪተትዳ። ኑኒ ዎይኮ ኑ ማቸት ዎይኮ ኑ አደ ናይት ዎይኮ ኑ ማጫ ናይት ኑ ደኦ ላይꬃ ኡባን ዎይነ ኡሹ ኡይቦኮ።
JER 35:9 ዱሳ ኬꬅ ኬፅቦኮ፤ ዎይነ ጋደ ዎይኮ ጎሽ ኑስ ባዋ።
JER 35:10 ኑ ዱንካነን ደእዳ፤ ኑ ማይዛይ ዮናዳብ ኪትዳ ኡባ ኪተትዳ።
JER 35:11 ሽን ባብሎነ ካዎይ ናቡካዳናፆር ኑ ቢታ ቦላ ደንድዳ ዎደ፥ ‘ባብሎነነ ሶረ ኦላንቾታፐ አታናዉ፥ የሩሳላመ ቦስ’ ያግዳ። ሀእ ኑ የሩሳላመን ደኤይ ሄሳሳ” ያግዶሶና።
JER 35:12 ሄሳፈ ጉየ፥ ጎዳይ ኤርምያሳኮ ያግስ።
JER 35:13 ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ። “ይሁዳ አሳኮነ የሩሳላመ አሳኮ ባዳ ሀይሳዳ ያጋ፤ ‘ታ ቃላ ናጋናዉ ሀይሳፈ ታማረከት።’
JER 35:14 ራካባ ናአይ ዮናዳብ ባ አደ ናይታ ዎይነ ኡሹ ኡዮናዳ ኪትዳ ኪታ ናግዶሶና። ኤንቲ ባንታ ማይዛ ኪታ ናግድ ሀች ጋካናዉ ዎይነ ኡሹ ኡዮኮና። ታኒ ህንተዉ ኡባ ዎደ ኦዳይስ፤ ሽን ህንተ ታና ስእቤከታ።
JER 35:15 ታኒ ዛራዳ ዛራዳ ናበታ፥ ታ አይለታ ህንተኮ የዳስ፤ ኤንቲ፥ ‘ህንተ ኡባይ ህንተ ኢታ ኦግያፐ ስምተ፤ ህንተ ኦሱዋ ሎይꬅተ፤ ሀራ ፆሳታ ጎይኖፍተ፤ ኤንታዉ ኦꬆፕተ። ሄ ዎደ፥ ታ ህንተዉነ ህንተ ማይዛታስ እምዳ ቢታን ህንተ ዳና’ ያግዶሶና። ሽን ህንተ ታና ስአናዉ ህንተ ሀይꬃ ታኮ ዛርቤከታ።
JER 35:16 ራካባ ናኣ ዮናዳበ ኮቻት ኤንታ ማይዛይ ኤንታ ኪትዳ ኪታ ኦꬅዶሶና፤ ሽን ሀ አሳይ ታዉ ኪተትቤና ያጋ” ያጌስ ጎዳይ።
JER 35:17 “ሄሳ ግሾ፥ ጎዳይ፥ ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ። ‘ስእተ፥ ታ ይሁዳ አሳ ቦላነ የሩሳላመን ደኤይሳታ ቦላ ኤሀና ግዳ ኢታባ ኤሀና። ታ ኤንታዉ ኦድን፥ ስኦና እፅዶሶና፤ ታ ኤንታ ፄግን ኮዮና እፅዶሶና’ ” ያጌስ።
JER 35:18 ሄሳፈ ጉየ፥ ኤርምያስ ራካባ ያራታኮ፥ “ኡባፈ ዎልቃማ ጎዳይ፥ እስራኤለ ፆሳይ ህንተና ሀይሳዳ ያጌስ፦ ‘ህንተ፥ ህንተ ማይዛ ዮናዳባስ ኪተትዳ ግሾ፥ እያ ዎጋ ካልዳ ግሾነ እ ኪትዳ ኡባ ኦꬅዳ ግሾ፥
JER 35:19 ራካባ ናአይ ዮናዳብ፥ ታዉ ኦꬅያ አደ አስ አዉደካ ꬋየና’ ” ያጌስ።
JER 36:1 እዮስያሳ ናአይ ይሁዳ ካዎይ እዮአቄም ካዎትዳ ኦይዳንꬆ ላይꬃን፥ ጎዳይ ኤርምያሳኮ ሀይሳዳ ያግስ፦
JER 36:2 “እስ ፃꬃ ማፃፋ ኤካዳ፥ እዮስያሳ ዎደ ታኒ ነዉ ኦዶ ዶምዳ ኮይሮ ጋላሳፐ ዶማዳ፥ ሀች ጋካናዉ እስራኤለ ቦላ፥ ይሁዳ ቦላነ ሀራ ካዎተꬃታ ቦላ ታኒ ኦድዳ ቃላ ኡባ ፃፋ።
JER 36:3 ታ ይሁዳ አሳ ቦላ ኤሀና ጋዳ ሀልችዳ ቦሻ ኡባ ስእድ፥ ኦን ኤር፥ ኤንቲ ባንታ ኢታ ኦሱዋፐ ስማና፤ ታ ኤንታ ናቁዋነ ኤንታ ናጋራ አቶ ጋና” ያግስ።
JER 36:4 ሄሳ ግሾ፥ ኤርምያስ ኔራ ናኣ ባሮካ ፄግድ፥ ጎዳይ እያዉ ኦድዳባ ኡባ ባሮካስ ኦድን፥ እ ፃꬃ ማፃፋን ፃፍስ።
JER 36:5 ሄሳፈ ጉየ፥ ኤርምያስ ባሮካኮ፥ “ታኒ ቃሾ ኬꬃን ደእያ ግሾ፥ ፆሳ ኬꬅ ገላናዉ ዳንዳእከ።
JER 36:6 ሄሳ ግሾ፥ ነ ፆማ ጋላስ ፆሳ ኬꬅ ባዳ፥ ታ ኦድን፥ ነ ፃꬃ ማፃፋን ፃፍዳ ጎዳ ቃላ ኤንታዉ ናባባ፤ ባንታ ካታማታፐ ይዳ ይሁዳ አሳ ኡባስ ናባባ።
JER 36:7 ሀ አሳ ቦላ ጎዳይ አዋጅዳ ሀንቆይ ግታ ግድያ ግሾ፥ ኦን ኤር፥ ኤንቲ ባንታ ኢታ ኦሱዋፐ ስሚድ፥ ጎዳ ዎሳና” ያግስ።
JER 36:8 ኔራ ናአይ ባሮክ ናበይ ኤርምያስ ኪትዳይሳዳ ፆሳ ኬꬃን ጎዳ ቃላ ኡባ ናባብስ።
JER 36:9 እዮስያሳ ናአይ ይሁዳ ካዎይ እዮአቄም ካዎትዳ እቻሻንꬆ ላይꬃን፥ ኡዱፉንꬆ አጌናን፥ የሩሳላመን ደእያ አሳስነ ይሁዳ ካታማታፐ ይዳ አሳ ኡባይ ጎዳ ስንꬃን ፆማና መላ አዋጅዶሶና።
JER 36:10 ባሮክ ፆሳ ኬꬃን፥ ቆሞ ባጋ ዳባባን፥ ኦራꬃ ፐንገ ጌተትያ በሳን፥ ፃፍያ ሳፋና ናኣ፥ ጋማራ ክፍልያን ኤቅድ፥ ኤርምያሳ ቃላይ ፃፈትዳ ፃꬃ ማፃፋ አሳ ኡባስ ናባብስ።
JER 36:11 ሳፋና ናኣ ናአይ፥ ጋማራ ናአይ ምካይ ማፃፋፐ ጎዳ ቃላ ባሮክ ናባብሽን ስእዳ ዎደ፥
JER 36:12 ካዎ ጋꬎን ፃፈይ ኡትያ ክፍልያ ብስ። እ ብያ ዎደ፥ ፃፈይ ኤልሻም፥ ሻማያ ናአይ ዳል፥ አክቦራ ናአይ ኤልናታን፥ ሳፋና ናአይ ጋማራ፥ ሀናንያ ናአይ ፅድቀነ ሀራ ሀላቃት ያን ኡትዶሶና።
JER 36:13 ባሮክ አሳስ ማፃፋፐ ናባብሽን ስእዳ ቃላ ኡባ ምካይ ኤንታኮ ኦድስ።
JER 36:14 ሀላቃት ናታና ናኣ ይሁዳ ባሮካኮ ኪትድ፥ “አሳስ ኔኒ ናባብዳ ማፃፋ ኤካዳ ሃ ያ” ያግዶሶና። (ናታን ሳላማ ናአ፤ ሳላም ኩሳ ናአ።) ባሮክ ማፃፋ ኤክድ፥ ኤንታኮ ይስ።
JER 36:15 ኤንትካ እያ፥ “አነ ኡታዳ፥ ኑስ ማፃፋ ናባባ” ያግዶሶና። ያግን ባሮክ ማፃፋ ናባብስ።
JER 36:16 እ ናባብዳ ቃላ ኡባ ስእድ ያይዶሶና፥ እሶይ እሱዋ ፄልድ፥ ባሮካ፥ “ሀ ቃላ ኡባ ኑኒ ካዋስ ኦዳናዉ ኮሼስ” ያግዶሶና።
JER 36:17 ቃስካ ዛሪድ፥ “ኔኒ ሀ ቃላ ኡባ ዋታዳ ፃፍዳኮ ኑስ ኦዳ። ሀይሳ ነዉ ኤርምያስ ኦድን ፃፋዲ?” ያግዶሶና።
JER 36:18 ባሮክ፥ “ኤ፥ ሀ ቃላ ኡባ ኤርምያስ ባ ዶናፐ ታዉ ኦድስ፤ ታኒ ቃላመን ሀ ፃꬃ ማፃፋን ፃፋስ” ያግስ።
JER 36:19 ኤንቲ ባሮካ፥ “ኔንነ ኤርምያስ ብድ ቆሰትተ፤ ህንተ ደእያ በሳ ኦንካ ኤሮፖ” ያግዶሶና።
JER 36:20 ሀላቃት ማፃፋ ፃፍያ ኤልሻማ ክፍለን ዎꬅዳፐ ጉየ፥ ካዎይ ደእያ ዳባባ ብድ፥ ሀንዳባ ኡባ ካዋስ ኦድዶሶና።
JER 36:21 ሄ ማፃፋ ኤሀና መላ፥ ካዎይ ይሁዳ ኪትስ፤ ፃꬃ ማፃፋ ኤልሻማ ክፍለፐ ኤህድ፥ ካዋስነ እያ ዩሹዋን ኤቅዳ ሀላቃታስ ናባብስ።
JER 36:22 ኡዱፉንꬆ አጌናን ሳእ ባልጎ ግድያ ግሾ፥ ካዎይ ባልጉዋ አꬅያ ኬꬃን ኡትስ። ሄ ዎደ ካዋ ስንꬃን ደእያ ጮጭያን ታም ኤፄስ።
JER 36:23 ይሁድ ሄꬑ ዎይኮ ኦይዱ በሳታ ናባብዳፐ ጉየ፥ ካዎይ ሄ በሳታ ፃꬃ ማፃፋፐ ማሻን ቃንፅ ቃንፅድ፥ ታማን የግስ፤ ሄሳዳ ኦꬅድ፥ ማፃፋ ኩመꬅ ፁግስ።
JER 36:24 ሀ ቃላ ስእድ ካዎይነ እያራ ኦꬅያ ሞርናት ኡባይ አይነ ባብቦኮና፤ ዎይኮ ካዮትድ፥ ባንታ ማኡዋ ፔꬍቦኮና።
JER 36:25 ሀር አቶሽን ኤልናታን፥ ዳላይነ ጋማር ካዎይ ሄ ማፃፋ ፁጎና መላ ዎስንካ፥ ኤንታ ዎሳ ስኦና እፅስ።
JER 36:26 ካዋ ናአ ይራህማኤላ፥ አዝርኤላ ናኣ ሳራያነ አብድኤላ ናኣ ሰለማ፥ ፃፍያ ባሮካነ ናብያ ኤርምያሳ ኦይካና መላ ካዎይ ኪትስ። ሽን ጎዳይ ኤንታ ቆትስ።
JER 36:27 ኤርምያስ ኦድን፥ ባሮክ ፃፍዳ ማፃፋ ካዎይ ፁግድ ስምን፥ ጎዳ ቃላይ ኤርምያሳኮ ሀይሳዳ ያግሸ ይስ፦
JER 36:28 “ሀራ ፃꬃ ማፃፋ ኤካዳ፥ ይሁዳ ካዎይ እዮአቄም ፁግዳ ፃꬃ ማፃፋን ደእያ ቃላ ኡባ ዛራዳ ፃፋ።
JER 36:29 ቃስ ይሁዳ ካዋ እዮአቄማ ሀይሳዳ ያጋ፦ ጎዳይ ሀይሳዳ ያጌስ፤ ኔኒ፥ ‘ባብሎነ ካዎይ ይድ፥ ሀ ቢታ ꬋይሳና፤ ቃስ ያን ደእያ አሳነ መህያ ዉርሳና’ ጋዳ አይስ ፃፋዲ?” ያጋዳ ማፃፋ ፁጋዳሳ።
JER 36:30 “ሄሳ ግሾ፥ ጎዳይ ይሁዳ ካዋ እዮአቄማ ሀይሳዳ ያጌስ፦ ዳዊታ አራታን ኡትያ ኮቻይ ነዉ ኩምꬅ ዴና። ነ አሀይ ጮ ሆለትድ፥ ጋላስ አዋ ሱሎስ፥ ቃማ ሜጎን ሾጨታና።
JER 36:31 ህንተ ናጋራ ግሾ ነና፥ ነ፥ ኮቻነ ኔራ ኦꬅያ ሞርናታ ኡባ ሴራና። ኤንቲ ታኒ ኦድዳባ ስኦና እፅዳ ግሾ፥ ታ ግዳ ኢታባ ኡባይ ህንተ ቦላ፥ ይሁዳንነ የሩሳላመን ደእያ አሳ ኡባ ቦላ ኤሀና” ያጌስ።
JER 36:32 ሄሳፈ ጉየ፥ ኤርምያስ ሀራ ፃꬃ ማፃፋ ኤክድ፥ ኔራ ናኣ ፃፍያ ባሮካስ እሚስ። ባሮክ ይሁዳ ካዎይ እዮአቄም ታማን ፁግዳ ፃꬃ ማፃፋ ቃላ ኡባ ኤርምያስ እያዉ ዶናን ኦድን ፃፍስ። ቃስ ኤርምያስ ሄሳ ዳንያ ሀራ ቃላካ ጉጅን፥ ኡባካ ባሮክ ፃፍስ።
JER 37:1 ባብሎነ ካዎይ ናቡካዳናፆር እዮአቄማ ናኣ እኮንያና በሳን እዮስያሳ ናኣ ሰደቅያሳ ይሁዳ ቢታን ካዎꬅስ።
JER 37:2 ሰደቅያስ፥ እያራ ኦꬅያ ሀላቃትነ ቢታን ደእያ አሳ ኡባይ፥ ጎዳይ ናብያ ኤርምያሳ ባጋራ ኦድዳ ቃላስ ኪተትቦኮና።
JER 37:3 ሽን ካዎይ ሰደቅያስ ሰለማ ናኣ ዮካላነ ማእሰያ ናኣ ካህንያ ሶፎንያሳ፥ “ሀያና፥ ኑ ግሾ ጎዳ ኑ ፆሳ ዎሳ” ያግድ ኤርምያሳኮ ኪትስ።
JER 37:4 ሄ ዎደ ኤርምያስ ቃሾ ኬꬅ ገልቦና ግሾ፥ አሳ ግዶን ስመረቴስ።
JER 37:5 ግብፀ ካዋ ኦላንቾት፥ ግብፀፈ ከይዳይሳ የሩሳላመ ተቅዳ ባብሎነ ኦላንቾት ስእዳ ዎደ የሩሳላመ የድድ ከይዶሶና።
JER 37:6 ሄሳፈ ጉየ፥ ጎዳ ቃላይ ናብያ ኤርምያሳኮ ይስ።
JER 37:7 “ጎዳይ እስራኤለ ፆሳይ ሀይሳዳ ያጌስ፦ ታና ኦይቻና መላ ህንተና ታኮ ኪትዳ ይሁዳ ካዋስ ሀይሳዳ ያግተ፤ ‘ህንተና ማዳናዉ ይዳ ግብፀ ካዋ ኦላንቾት ባንታ ቢታ ስሚድ ባና።
JER 37:8 ቃስ ባብሎነ ኦላንቾት ስሚድ ያና፤ ሀ ካታማ ኦልድ ኦይካና፤ ታማን እያ ፁጋና’ ያግተ።
JER 37:9 “ባብሎነ ኦላንቾት ስሚድ ዩሳይ አቶና ግሾ ‘ባብሎነ ኦላንቾት ዮኮና’ ግድ ህንተና ህንተዉ ጭሞፍተ።
JER 37:10 ህንተ ባብሎነ ኦላንቾታ ኩመꬅ ፆንያኮካ፥ ማዱንፅድ፥ ዱንካነን ዝንእዳይሳት ደንድድ፥ ሀ ካታማ ታማን ፁጋና” ያጌስ ጎዳይ።
JER 37:11 ግብፀ ካዋ ኦላንቾት ማትዳ ግሾ፥ ባብሎነ ኦላንቾት የሩሳላመ አግድ ባንታ ደእያ በሳ ጉየ ስምዶሶና።
JER 37:12 ሄ ዎደ ኤርምያስ ባ ግሾ ቢታ ኤካናዉ ብንያመ ቢታ ባናዉ የሩሳላመፐ ደንድስ።
JER 37:13 ግዶሽን፥ እ ብድ፥ ብንያመ ፐንገ ጋክያ ዎደ ፐንግያ ናገይሳታፐ እሶይ፥ ሀናንያ ናአይ፥ ሳሌማ ናአ ዬራ፥ “ነ ኑና ካዳዳ ባብሎነ ባሳ ግድኪ?” ያግድ ኦይክስ።
JER 37:14 ኤርምያስ ዛሪድ፥ “ነ ገይሳ መላ ታ ባብሎነ ብያ አስ ግድከ” ያግስ። ሽን ዬረይ እ ገይሳ ስኦና እፅድ ኤርምያሳ ኦይክድ ሀላቃታኮ ኤፍስ።
JER 37:15 ሀላቃት ዳሮ ሀንቀትድ፥ ኤርምያሳ ዋꬍ፥ ኤንቲ ቃሾ ኬꬅ ኦꬅዳ፥ ፃፍያ ዮናታና ኬꬃን እያ ቃችዶሶና።
JER 37:16 ኤርምያስ ያን ቢታ ጋርሳን ደእያ ክፍልያን ዳሮ ዎደ ጋምእስ።
JER 37:17 ሄሳፈ ጉየ፥ ካዎይ ሰደቅያስ አሰ ኪትድ፥ ኤርምያሳ ባ ካዎ ጋꬎ ፄግስድ፥ ዱማ ቆሳን እያ፥ “ጎዳይ ነዉ ኦድዳባይ ደኢ?” ያግድ ኦይችስ። ኤርምያስ ዛሪድ፥ “ኤ ደኤስ፤ ኔኒ ባብሎነ ካዋ ኩሸን አꬋዳ እመታና” ያግስ
JER 37:18 ቃስካ ኤርምያስ ካዋ ሰደቅያሳ ሀይሳዳ ያግድ ኦይችስ፦ “ታና ህንተ ቃሾ ኬꬃን የጋናዉ ታ ነ ቦላ፥ ነዉ ኦꬅያ ሀላቃታ ቦላ ዎይኮ ሀ አሳ ቦላ አይ ባላ ኦꬃድና?
JER 37:19 ያትን፥ ‘ባብሎነ ካዎይ ይድ ህንተናነ ህንተ ቢታ ኦለና’ ያግድ ነዉ ትንብተ ኦድዳ ነ ናበት ሀእ አዉን ደኦና?
JER 37:20 ታ ጎዳዉ፥ ካዋዉ፥ ስአ፤ ታ ኦይችያ እስባ ነ ፖላና መላ ነና ዎሳይስ። ታ ሄ በሳን ሀይቆና መላ እያ ኬꬃይ ቃሾ ኬꬅ ግድዳ ፃፍያ ዮናታና ሶ ታና ጉየ ዛሮፓ” ያግስ።
JER 37:21 ካዎይ ሰደቅያስ ናገይሳታ ዳባባን ኤርምያሳ ዳና መላ ኪትስ። ያን እ ደእሽን ካታማፐ ዳቦይ ꬋያና ጋካናዉ ጋላስ ጋላስ እስ እስ ዳቦ ኡክያ በሳፈ ኤህድ እያዉ እሞሶና። ሄሳ ግሾ፥ ኤርምያሳ ካዋ ዛባን ጋምእስ።
JER 38:1 ማታና ናአይ ሳፋፅ፥ ጳስኮራ ናአይ ጎዶልያ፥ ሰለማ ናአይ ዮካልነ ማልካያ ናአይ ጳስኮር ኤርምያስ አሳ ኡባስ ኦድዳ ቃላ ስእዶሶና።
JER 38:2 ኤርምያስ፥ “ሀ ካታማን አትያ ኦንካ ኦላን፥ ኮሻንነ ቦሻን ሀይቃና። ሽን ባብሎነታስ ባ ኩሸ እምያ ኦንካ ሀይቀና፤ አታና፤ ደኦን ዳና።
JER 38:3 የሩሳላመ ካታማይ ባብሎነ ካዋ ኦላንቾታ ኩሸን አꬍድ እመታና፤ ኤንትካ እያ ፖሎ ድአና” ያጌስ ጎዳይ።
JER 38:4 ሄሳፈ ጉየ፥ ሀላቃት ካዋኮ ብድ፥ “ሀ አደይ ሀይቃናዉ ኮሼስ፤ ሀይሳ መላ ኦዳ ኦድድ፥ ሀ ካታማን ደእያ ኦላንቾትነ አሳ ኡባይ ሹጋና መላ ኦꬅስ። እ አሰ ቆህያባ አሞቴስፐ አትሽን፥ ሳሮባ አሞተና” ያግዶሶና።
JER 38:5 ካዎይ ሰደቅያስ ዛሪድ፥ “ህንተ እያ ቦላ ኦꬃና ግዳባ ታ ህንተና ድጋናዉ ዳንዳእከ” ያግስ።
JER 38:6 ኤንቲ ኤርምያሳ ካዎ ጋꬎ ዳባባን ደእያ፥ ካዋ ናኣ ማልካያ ሃꬃ ኦላን፥ ዎዶሮን ዱገ የግዶሶና። ሄ ዎደ ሄ ኦላን ስልሞፐ አትሽን፥ ሃꬅ ባዋ፤ ኤርምያስ ሄ ስልሙዋ ግዶ ገልስ።
JER 38:7 ሽን ቶጰ አሰ ግድዳ፥ ካዎ ሞርናይ፥ አበመለከ ጌተትያ አደይ ኤርምያስ ኦላን የገትዳይሳ ስእስ። ሄ ዎደ ካዎይ ብንያመ ፐንገ ፕርዳ ኦይደን ኡትስ።
JER 38:8 ኤበድ-መለክ ካዋኮ ብድ፥ ሀይሳዳ ያግስ፤
JER 38:9 “ታ ጎዳዉ ካዋዉ፥ ሀ አሳት ግታ ኢታባ ኦꬅዶሶና፤ ኤንቲ ናብያ ኤርምያሳ ሃꬃ ኦላን የግዶሶና። ቃስ ካታማን ቁም ባይና ግሾ እ ያን ኮሻን ሀይቃና” ያግስ።
JER 38:10 ካዎይ ዛሪድ፥ ቶጰ አደይ ኤበድ-መለካኮ፥ “ሀስታሙ አስ ኔራ ኤካ ባዳ፥ ኤርምያስ ሀይቆና ደእሽን ሃꬃ ኦላፈ ከስተ” ያግስ።
JER 38:11 ኤበድ-መለክ አሰ ኤክድ፥ ብድ ካዎ ጋꬎን ሻሎ ምንጅያ ኬꬃፈ ጋርሳ ባጋራ ደእያ ክፍልያ ገልድ፥ ጋልአ ማኦነ ጩርቃ ኤክስ። ሄ ጩርቃ ዎዶሩዋ ፄራን ቃችድ፥ ኤርምያሳስ ዱገ ኦላ ግዶ የድስ።
JER 38:12 ቶጰ አደይ ኤበድ-መለክ ኤርምያሳ ፄግድ፥ “ሀ ጩርቃ ማኡዋ ዎዶሩዋፐ ጋርሳራ ነ ሾጵያን ዎꬃ” ያግስ። ኤርምያስ እ ግዳይሳዳ ኦꬅስ።
JER 38:13 ኤንቲ ዎዶሩዋራ ጎችድ፥ ኤርምያሳ ኦላፈ ከስድ፥ ናገይሳታ ኬꬅ ገልስድ ጎርድዶሶና።
JER 38:14 ሄሳፈ ጉየ፥ ካዎይ ሰደቅያስ ኤርምያሳ ኪትድ ኤህስድ፥ ፆሳ ኬꬅ ገልያ ሄꬓንꬆ ፐንግያ ማታን፥ “ታ ነና እስባ ኦይቻና፤ ነ ታፐ ቆሶፓ” ያግስ።
JER 38:15 ኤርምያስ ዛሪድ፥ “ታ ኦድኮ፥ ነ ታና ዎꬍኪ? ታ ዞርን ነ ስአካ” ያግስ።
JER 38:16 ካዎይ ሰደቅያስ፥ “ደኦ ፆሳይ ኤርያ መላ፥ ታ ነና ዎꬍከ፤ ነና ዎꬋናዉ ኮየይሳታስ አꬃዳ እምከ” ያግድ ቆሳን ኤርምያሳስ ጫቅስ።
JER 38:17 ኤርምያስ ዛሪድ፥ “ጎዳይ፥ ኡባፈ ዎልቃማ ፆሳይ፥ እስራኤለ ፆሳይ ሀይሳዳ ያጌስ፦ ‘ባብሎነ ካዋ ሀላቃታስ ነ ኩሸ እምኮ፥ ነ ፓፃ አታና፤ ሀ ካታማይ ታማን ፁገተና፤ ነነ ነ ኬꬃ አሳይ ደኦን ዳና።
JER 38:18 ሽን ነ ኤንታዉ ኩሸ እሞና እፅኮ፥ ሀ ካታማይ ባብሎነታስ አꬍድ እመታና፤ ኤንቲ እያ ፁጋና፤ ነ ኤንታፈ ከሳ ኤካካ’ ” ያግስ።
JER 38:19 ካዎይ ሰደቅያስ፥ “ታ ያየይ ሀ ቢታ ካድድ፥ ባብሎነ ብዳ አይሁደታሳ። ባብሎነት ታና ኤንታ ኩሸን አꬅድ እምን፥ አይሁደት ታና ካአና” ያግድ ዛርስ።
JER 38:20 ኤርምያስ፥ “አይኮይ ባዋ! ኤንቲ ነና ኤንታዉ አꬅድ እሞኮና። ታ ኦድያ ጎዳ ቃላስ ሀያና ኪተታ። ሄስ ነዉ ሎኦ ግዳና፤ ነ ፓፃ አታና።
JER 38:21 ሽን ነ ኩሸ እሞና እፅኮ፥ ጎዳይ ታና በስዳ ቆንጨꬅ ደኤስ።
JER 38:22 ሄስካ፥ ይሁዳ ካዎ ጋꬎን አትዳ ማጫሳት ኡባይ ድኤትድ፥ ባብሎነ ሀላቃታኮ ባና። ኤንቲ ኔኮ፥ ‘ነ ማታ ላገት ነና ባለꬅዶሶና፤ ኤንቲ ነና ፆንዶሶና። ሽን ሀእ ነ ቶሆይ ስልሞ ግዶ ገልን፥ ሄ ላገት ነና የግድ ብዶሶና’ ያጋና።
JER 38:23 ነ ማቸትነ ነ ናይት ኡባይ ባብሎነ ድኤትድ ባና። ነ ኤንታ ኩሸፐ ከሳ ኤካካ። ባብሎነ ካዎይ ነና ኦይካና። ሀ ካታማይ ታማን ፁገታና” ያግስ።
JER 38:24 ሰደቅያስ ዛሪድ፥ “ሀይሳ ነ ታዉ ኦድዳይሳ አሳስ ኦዶና እፅኮ ነ ሀይቃካ።
JER 38:25 ሀላቃት ታ ኔራ ኦደትዳይሳ ስእድ፥ ‘ኔራ ካዋራ አይ ኦደትዳኮ ኑስ ኦዳ። ነ ኑስ ቆቶና እፅኮ፥ ኑ ነና ዎꬎኮ’ ያግድ ኦይቻና።
JER 38:26 ኔኒ፥ ‘ታ ያን ሀይቆና መላ ታና ዛራዳ ቃሾ ኬꬅ ግድዳ ዮናታና ሶ የዶና መላ ካዋ ዎሳስ’ ” ጋዳ ዛራ ያጋ።
JER 38:27 ሄሳፈ ጉየ፥ ሀላቃት ኡባይ ኤርምያሳኮ ይድ፥ ሄ ኦይሻ ኦይችዶሶና። ካዎይ እያ ኪትዳይሳዳ ኤንታዉ ኦድስ፤ ኤርምያሳራ ካዋራ ሃሳይሽን ስእዳ አስ ባይና ግሾ ኤንቲ ስእ ግዶሶና።
JER 38:28 የሩሳላመይ ኦይከታና ዎደይ ጋካናዉ፥ ኤርምያስ ናገይሳታ ዳባባን ጎርደትድ ጋምእስ።
JER 39:1 ሰደቅያስ ይሁዳን ካዎትዳ ኡዱፉንꬆ ላይꬃን፥ ታማንꬃ አጌናን፥ ባብሎነ ካዎይ ናቡካዳናፆርነ እያ ኦላንቾት ኡባይ ይድ፥ የሩሳላመ ተቅዶሶና።
JER 39:2 ሰደቅያስ ካዎትዳ ታማነ እስንꬆ ላይꬃን፥ ኦይዳንꬆ አጌናን፥ ኡዱፉንꬆ ጋላሳን ባብሎነ ኦላንቾት ካታማ ግምብያ መንꬅዶሶና።
JER 39:3 ሄ ዎደ ባብሎነ ካዋ ሀላቃት፥ ኤርጋል-ሳራስራ፥ ሳምጋር-ናቦ፥ ሳርሳክማነ ኤርጋል-ሳራስራ ጌተተይሳት ሀራ ዳሮ ሀላቃታራ እስፈ ይድ ግዶ ፐንገ ጌተትያ በሳን ኡትዶሶና።
JER 39:4 ይሁዳ ካዎይ ሰደቅያስነ እያ ኦላንቾት ኡባይ ባብሎነ ኦላንቾታ በእዳ ዎደ ባቃትዶሶና። ቃማ ካታማፐ ከይድ፥ ካዋ አታክልተ በሳ ኤፍያ ኦግያራ፥ ናምኡ ድርሳ ግምበታ እስፈ ጋꬅያ ፐንግያራ ከይድ ዮርዳኖሰ ዛንጋራኮ ስሚድ ብዶሶና።
JER 39:5 ግዶሽን፥ ባብሎነ ኦላንቾት ኤንታ የደꬅድ፥ እያርኮ ደምባ ጋꬅሸ፥ ሰደቅያሳ ኦይክዶሶና። ሀማታ ቢታን፥ እርብላ ካታማን ደእያ ካዋ ናቡካዳናፆራኮ ኤፍዶሶና። ካዎይ ናቡካዳናፆር ያን ሰደቅያሳ ቦላ ፕርድስ።
JER 39:6 ባብሎነ ካዎይ፥ ሰደቅያሳ አደ ናይታ እያ ስንꬃን፥ እርብላ ካታማን ዎꬍስ፤ ቃስ ይሁዳ ሀላቃታ ኡባ ዎꬍስ።
JER 39:7 ሰደቅያሳ አይፈታ ዎጭ ከስድ፥ እያ ባብሎነ ቢታ ኤፋናዉ ሳንꬃላታን ቃችስ።
JER 39:8 ባብሎነ ኦላንቾት ካዎ ጋꬎነ አሳይ ደእያ ኬꬃ ኡባ ታማን ፁግዶሶና፤ የሩሳላመ ግምብያካ ላልዶሶና።
JER 39:9 ካዋ ናገይሳታ ሀላቃይ ናቡዛርዳን ካታማን አትዳ አሳነ ካድድ እያኮ ይዳ አሳ ኡባ ድእድ ባብሎነ ቢታ ኤፍስ።
JER 39:10 ካዋ ናገይሳታ ሀላቃይ ናቡዛርዳን አይኮካ ባይና ጉꬃ ማንቆታ ይሁዳን አግድ፥ ኤንታዉ ዎይነ ጋደነ ጎሻ ጋደ እሚስ።
JER 39:11 ናቡካዳናፆር፥ ካዋ ናገይሳታ ሀላቃ ናቡዛርዳና ሀይሳዳ ያግድ ኪትስ፦
JER 39:12 “ባዳ ኤርምያሳ ኮያ ደማዳ፥ እያዉ ኮሽያባ ኡባ ኦꬃ፤ እያ ቦላ ሀራ ኢታባ አይኮካ ኦꬆፋ” ያግስ።
JER 39:13 ሄሳ ግሾ፥ ናቡዛርዳን፥ ናቡሻዝባና፥ ኤርጋል-ሳራስራነ ባብሎነ ካዋ ሀላቃታ ኡባ ኪትድ፥
JER 39:14 ኤርምያሳ ቃሸትድ ደእያ፥ ናገይሳታ ዳባባፐ ከስዶሶና። ባ ሶ ኤፍድ ዎꬃና መላ ሳፋና ናኣ፥ አክቃማ ናኣ ጎዶልያስ ሀዳራ እምዶሶና። ሄሳ ጋሶን፥ ኤርምያስ ባ ቢታ አሳራ እስፈ ደእስ።
JER 39:15 ኤርምያስ ናገይሳታ ዳባባን ቃሸትድ ደእሽን፥ ጎዳ ቃላይ እያኮ ሀይሳዳ ያግድ ይስ።
JER 39:16 “ባዳ፥ ቶጰ አድያ ኤበመለካኮ ሀይሳዳ ያጋ፦ ‘ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፦ ህዛፐ ጉየ ታ ኦድዳይሳዳ ሀ ካታማ ቦላ ሎኦባ ግዶናሽን፥ ꬋዮ ኤሀና። ሄስ ኡባይ ሀንያ ዎደ ነ ሀ ካታማን ኡታዳ፥ ነ አይፈን በአና።
JER 39:17 ግዶሽን፥ ሄ ጋላስ ታ ነና አሻና፤ ነ ያይያ፥ ነ ሞርከታ ኩሸን አꬃዳ እምከ።
JER 39:18 ታ ነና ፖሎ አሻና፤ ነ ኦላን ሀይቃካ፤ ነ ታናን አማነትዳ ግሾ፥ ሀይቆፐ አታና’ ” ያጌስ ጎዳይ።
JER 40:1 ካዋ ናገይሳታ ሀላቃይ ናቡዛርዳን ኤርምያሳ ራማን ብርሽድ ስምን፥ ጎዳ ቃላይ ኤርምያሳኮ ይስ። ናቡዛርዳን የሩሳላመፐነ ይሁዳፐ ድእድ፥ ባብሎነ ኤፋናዉ ቃችዳ አሳ ግዶን ኤርምያስ ሳንꬃላታን ቃሸትድ ደኤስ።
JER 40:2 ካዋ ናገይሳታ ሀላቃይ ኤርምያሳ ዱማ ከስድ፥ ሀይሳዳ ያግስ፦ “ጎዳይ ነ ፆሳይ፥ ꬋዮ ሀ ቢታ ቦላ ኤሀናይሳ ኦድስ።
JER 40:3 እ ኤሀና ግዳይሳዳ ሀእ ኦꬅስ፤ ጎዳ ቦላ ህንተ ናጋራ ኦꬅዳ ግሾነ እያዉ ኪተቶና እፅዳ ግሾ ሀይስ ኡባይ ሀንስ።
JER 40:4 ሄኮ፥ ሀእ ታ ነ ኩሸን ደእያ ሳንꬃላታ ብርሻዳ ነና የዳስ። ታራ ባብሎነ ባና ጊኮ የꬋ፤ ታ ነዉ ኮሽያባ ኡባ ኩንꬃና። ባብሎነ ባናዉ ኮዮና እፅኮ አታናዉ ዳንዳኣሳ። ቢታ ኡባይ ነ ስንꬃን ደኤስ፤ ነና ሎእዳ በሲ አዉካ ባ” ያግስ።
JER 40:5 ኤርምያስ እያ ማታፐ ቦና ደእሽን፥ ናቡዛርዳን ጉጅድ ያግስ፤ “ሳፋና ናኣ፥ አክቃማ ናኣ ጎዶልያኮ ባ። ባብሎነ ካዎይ ናቡካዳናፆር እያ ይሁዳ ካታማታ ሃርያ አስ ኦꬅድ ሹምስ። ሄሳ ግሾ፥ እያራ እስፈ ያን አሳራ ደአ፤ ዎይኮ ነና ሎእዳ በሲ አዉካ ባ” ያግስ። ካዋ ናገይሳታ ሀላቃይ እያዉ ሽንቀነ ሀራ እሞታ እምድ የድስ።
JER 40:6 ኤርምያስ ምፅጳን ደእያ አክቃማ ናኣ ጎዶልያኮ ብስ። እ ያን አትዳ አሳራ እስፈ ደእስ።
JER 40:7 ይሁዳ ቶራ ሞጮናታፐነ ኦላንቾታፐ ጉꬃት ባብሎነ ካዋስ ኩሸ እምቦኮና። ኤንቲ ባብሎነ ካዎይ፥ አክቃማ ናአ ጎዶልያ ቢታ ሃረይሳ ኦꬅድ ሹምዳይሳነ ባብሎነ ድኤትድ ቦና ይሁዳን አትዳ ማንቆታስ ሀላቃ ኦꬅዳይሳ ስእዶሶና።
JER 40:8 ናታና ናአይ እስማኤል፥ ቃረያ ናይት ዮሃንነ ዮናታን፥ ታንሁመታ ናአይ ሳራይ፥ ናፆፋ አድያ ዮፋ ናይትነ ማእካ አድያ ናአይ ያዛን ባንታ ኦላንቾታ ኡባራ ጎዶልያኮ ምፅጳ ይዶሶና።
JER 40:9 ሳፋና ናአይ፥ አክቃማ ናአይ ጎዶልያ ኤንታዉ ሀይሳዳ ያግድ ጫቅስ፦ “ባብሎነታስ ኩሸ እማናዉ ያዮፍተ፤ ሄ ቢታን ደእተ። ባብሎነ ካዋስ ሃረትተ፤ ኡባባይ ህንተዉ እንጀ ግዳና።
JER 40:10 ታ ምፅጳን ኡታዳ፥ ባብሎነ ቢታፈ ህንተራ ጋሄታናዉ ያ ኡባራ ህንተ ዶና ግዳዳ ኦደታና። ሽን ህንተ ደእያ በሳን ዎይነ፥ ሻማሆ ዛይተነ ሀራ ካꬃ አይፈ ኡባ ሺሽድ ዳጋይተ” ያግስ።
JER 40:11 ሞአበን፥ አሞነን፥ ኤዶመንነ ሀራ ቢታታን ደእያ አይሁደ ኡባይ ባብሎነ ካዎይ፥ ጉꬃ ይሁዳ አሳት ይሁዳን አታና መላ ኦꬅዳይሳነ ሳፋና ናአ አክቃማ ናአ ጎዶልያ ኤንታ ቦላ ሹምዳይሳ ስእዶሶና።
JER 40:12 ኤንቲ ላለትድ ደእያ ባንታ ቢታፈ ይሁዳ ስሚድ፥ ጎዶልያ ደእያ በሳ ምፅጳ ይዶሶና። ያን ኤንቲ ዳሮ ዎይነነ ሀራ ካꬃ አይፈ ሺሽድ ዳጋይዶሶና።
JER 40:13 ሄሳፈ ጉየ፥ ቃራያ ናአይ ዮሃንነ ኩሸ እምቦና ቶራ ሞጮናት ኡባይ ጎዶልያኮ ምፅጳ ይድ፥
JER 40:14 “አሞነ ካዎይ ባአልስ ነና ዎꬋና መላ ናታና ናኣ እስማኤላ የድዳይሳ ኤራይ?” ያግዶሶና። ሽን አክቃማ ናአይ ጎዶልያ ኤንታ ኦዳ አማኖና እፅስ።
JER 40:15 ቃራያ ናአይ ዮሃን ምፅጳን ደእያ ጎዶልያኮ ይድ፥ “ኦንካ ኤሮና ደእሽን ባዳ፥ ናታንያ ናኣ እስማኤላ ታ ዎꬋና። እ ነና ዎꬍኮ፥ ነ ማታን ሺቅዳ አይሁደ ኡባይ ላለታና፤ ቃስ ይሁዳን አትዳ አሳ ኡባይ ዉራና” ያግስ።
JER 40:16 ሽን አክቃማ ናአይ ጎዶልያ ዛሪድ፥ “እስማኤላባ ነ ኦድያ ኡባይ ዎርዶ ግድያ ግሾ ሄሳ መላባ ኦꬆፋ” ያግስ።
JER 41:1 ላፑንꬃ አጌናን ካዎ ኮቸ ግድድ፥ ካዋ ሞርናታፐ እሶይ፥ ኤልሳማ ናአይ፥ ናታና ናአይ እስማኤል ታሙ አሳራ እስፈ አክቃማ ናኣ ጎዶልያራ ጋሄታናዉ ምፅጳ ብስ። ኡባይ ኡትድ ካꬅ ምሽን፥
JER 41:2 ናታና ናአይ እስማኤልነ እያራ ደእያ ታሙ አሳት ባንታ ማሻ ማሻ ከስድ፥ ባብሎነ ካዎይ ይሁዳ ቦላ ሹምዳ አክቃማ ናኣ ጎዶልያ ዎꬍዶሶና።
JER 41:3 እስማኤል ቃስ ምፅጳን ጎዶልያራ ደእያ አይሁደታነ ባብሎነ ኦላንቾታ ኡባ ዎꬍስ።
JER 41:4 ጎዶልያ ሀይቅዳ ዎንተꬃ ጋላስ፥ ኦንካ እያ ሀይቁዋ ኤሮና ደእሽን፥
JER 41:5 ሴከማፐ፥ ሴሎፐነ ሳማረፐ ሆስፑን ታሙ አሳት አዛንድ፥ ባንታ ቡቻ ሜድድ፥ ባንታ ማኡዋ ዳክድ፥ ባንታ ሶምኡዋ ጋርሸ ይዶሶና። ኤንቲ ፆሳ ኬꬃስ እምያ ካꬅነ እፃነ ኤህዶሶና።
JER 41:6 እስማኤል ዬክሸ ምፅጳፈ ከይድ፥ ኤንታራ ጋሄታናዉ ብስ። ኤንታ ጋሄትዳ ዎደ፥ “አክቃማ ናኣ ጎዶልያኮ ሃ ይድ እያ በእተ” ያግስ።
JER 41:7 ኤንቲ ካታማ ገልዳ ዎደ እስማኤልነ እያራ ደእያ አሳት ኤንታ ዎꬍድ ሃꬃ ኦላን የግዶሶና።
JER 41:8 ሽን ሄ ሆስፑን ታሙ አሳታፐ ታማት እስማኤላ ሀይሳዳ ያግድ ዎስዶሶና፦ “ኑና ዎꬎፓ! ኑ ጎሻን ኑ ቆስዳ ዳሮ ግስተይ፥ ባንግ፥ ሻማሆ ዛይተይነ ኤስ ደኤስ” ያግዶሶና። እ ኤንታ ዎꬎና የድ አግስ።
JER 41:9 እስማኤል አሳ ዎꬍድ የግዳ ኦላይ፥ እስራኤለ ኦላናዉ ባኦስ ይዳ ዎደ ካዎይ አስ ቦክስዳ ግታ ግምበትዳ ሃꬃ ኦላ። ናታንያ ናአይ እስማኤል ሄ ኦላ አሀን ኩንꬅስ።
JER 41:10 እስማኤል ካዋ ማጫ ናይታነ ምፅጳን አትዳ አሳ ኡባ ድእስ። ሄሳት ካዋ ናገይሳታ ሀላቃይ ናቡዛርዳን አክቃማ ናኣ ጎዶልያ አዋተꬃ ጋርሳን ምፅጳን ዎꬅዳይሳታ። እ ኤንታ ድእድ፥ ባራ ኤክድ፥ አሞነ ቢታ ባናዉ ደንድስ።
JER 41:11 ቃራያ ናአይ ዮሃንነ እያራ ደእያ ቶራ ሞጮናት እስማኤል ኦꬅዳ ኢታባ ኡባ ስእዶሶና።
JER 41:12 ባንታ አሳ ኤክድ፥ እያራ ኦለታናዉ ብዶሶና፤ እስማኤላ ጋባኦናን ደእያ ግታ ኤለ ሃꬃ ማታን ኦይክዶሶና።
JER 41:13 እስማኤል ድእድ ኤፍያ አሳ ኡባይ ቃራያ ናኣ ዮሃናናነ እያራ ደእያ ቶራ ሞጮናታ በእዳ ዎደ ዳሮ ኡፋይትዶሶና።
JER 41:14 ሄ ድኤትዳይሳት ኡባይ ጉየ ስሚድ፥ ቃራያ ናኣ ዮሃናናን ጋሄትዶሶና።
JER 41:15 ሽን እስማኤልነ ሀራ ሆስፑን አሳት ዮሃናናፐ ከስ ኤክድ፥ አሞነ ቢታ ባቃትዶሶና።
JER 41:16 እስማኤል አክቃማ ናኣ ጎዶልያ ዎꬍድ፥ ምፅጳፈ ድእድ ኤህዳ ኦላንቾት፥ ማጫሳት፥ ናይትነ ሹፋት ኡባይ ቃራያ ናኣ ዮሃናራነ ሀራ ቶራ ሞጮናታራ ደንድድ ብዶሶና።
JER 41:17 ኤንቲ ያፐ ደንድድ፥ ግብፀ ባናዉ፥ ቤተለመ ማታን ደእያ ገሮት-ካማሀማ ጌተትያ በሳን ሸምፕዶሶና።
JER 41:18 ኤንቲ ግብፀ ብዳይ ባብሎነ ካዎይ ሹምዳ አክቃማ ናኣ ጎዶልያ እስማኤል ዎꬍዳ ግሾ፥ ባብሎነታስ ያይድ፥ ባብሎነፐ ባቃትድ፥ ግብፀ ባናዉ ደንድዶሶና።
JER 42:1 ቶራ ሞጮናት ኡባይ፥ ቃራያ ናአይ ዮሃን፥ ሆሻያ ናአይ አዛርያስ አሳ ኡባይ፥ ጉꬃፈ ግታ ጋካናዉ፥
JER 42:2 ናብያ ኤርምያሳኮ ይድ፥ “ኑ ነና ኦይችያባ ኑስ ኦꬃርክ። አትዳ ኑ ግሾ ጎዳ ነ ፆሳ ዎሳርክ። ኑ ካሰ ዳሮ፤ ሽን ሀእ ነ በኤይሳዳ ጉꬃ አሳ ፃላል አትዳ።
JER 42:3 ኑ ብያ ኦግያነ ኑ ኦꬃናባ እ ኑና በሳና መላ ጎዳ ነ ፆሳ ኑ ግሾ ዎሳ” ያግዶሶና።
JER 42:4 ናበይ ኤርምያስ ዛሪድ፥ “ሎኦ፤ ህንተ ኦይሻዳ፥ ጎዳ ህንተ ፆሳ ታ ዎሳና፤ ህንተፈ አይኮካ ቆሶና እ ኦድያባ ኡባ ህንተዉ ኦዳና” ያግስ።
JER 42:5 ኤንቲ ዛሪድ፥ ኤርምያሳኮ፥ “ጎዳይ ነ ፆሳይ ነ ባጋራ ኑና ኪትያባ ኡባ ኑ ፖሎና እፅኮ፥ ጎዳይ ባ ሁጰን ኑ ቦላ ቱማነ አማነትዳ ማርካ ግዶ።
JER 42:6 ኑ ዶስያባ ግድን፥ እፅያባ ግድን፥ ኑ ነና እያኮ ኪትያ ጎዳይ፥ ኑ ፆሳይ ኪትያባ ኑ ኦꬃና። ኑ እያዉ ኪተትኮ፥ ኑስ ኡባባይ እንጀ ግዳና” ያግዶሶና።
JER 42:7 ታሙ ጋላሳፐ ጉየ፥ ጎዳ ቃላይ ኤርምያሳኮ ይስ።
JER 42:8 ቃራያ ናኣ ዮሃና፥ እያራ ደእያ ቶራ ሞጮናታነ አሳ ኡባ፥ ጉꬃፈ ግታ ጋካናዉ ፄግድ፥
JER 42:9 ህንተ ዎሳ ታ እያኮ ሺሻና መላ ህንተ ታና ኪትዳ ጎዳይ እስራኤለ ፆሳይ ሀይሳዳ ያጌስ።
JER 42:10 “ ‘ታ ካሰ ህንተ ቦላ ኤህዳ ኢታባይ ታና አዛንꬅዳ ግሾ፥ ህንተ ሀ ቢታን ኡትኮ፥ ታ ህንተና ኬፃናፐ አትሽን፥ ላልከ፤ ቶካናፐ አትሽን፥ ሾድከ።
JER 42:11 ህንተ ሀእ ያይያ ባብሎነ ካዋስ አይኮካ ያዮፍተ። ህንተና እያ ኩሸፐ አሻናዉ ታ ህንተራ ደእያ ግሾ ያዮፍተ።
JER 42:12 ታ ህንተዉ ቃታና፤ ያታዳ እ ህንተዉ ቃትድ፥ ህንተና ህንተ ቢታ ዛራና መላ ኦꬃና’ ያጌስ ጎዳይ።
JER 42:13 “ግዶሽን፥ ህንተ ጎዳስ፥ ህንተ ፆሳስ ኪተቶና እፅድ፥ ሀ ቢታን ኡቶኮ ጊኮ፥
JER 42:14 ቃስ ህንተ፥ ‘ኦላ ዎረነ ኦላስ ፑንያ ሞይዘ ስኦናነ ኮሽ ባይና ግብፀ ብድ፥ ያን ዳና’ ጊኮ፥
JER 42:15 ህንተኖ፥ ይሁዳን አትዳ አሳዉ፥ ጎዳይ ግያባ ስእተ። ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ ‘ህንተ ግብፀ ብድ፥ ያን ዳናዉ ቆፋ ቃችኮ፥
JER 42:16 ህንተ ያይዳ ኦላይ ግብፀን ህንተና ኦይካና፤ ህንተ ህርግዳ ኮሻይ ህንተና ካልድ ባና፤ ህንተ ያን ግብፀን ሀይቃና።
JER 42:17 ግብፀ ብድ ዳናዉ ቆፋ ቃችዳ አሳ ኡባይ ኦላን ዎይኮ ኮሻን ዎይኮ ቦሻን ሀይቃና። ታ ኤንታ ቦላ ኤህያ ኢታፐ እሶይካ ከስ ኤከና ዎይኮ አተና’ ያጌስ።
JER 42:18 “ኡባፈ ዎልቃማ ጎዳይ፥ እስራኤለ ፆሳይ፥ ‘የሩሳላመን ደኤይሳታ ቦላ ታ ሀንቆይነ ታ ይሎይ ጉክዳይሳዳ፥ ህንተ ግብፀ ገልያ ዎደ ህንተ ቦላ ታ ሀንቆይ ሄሳዳ ጉካና። ህንተ ዳጋማስ፥ ጫሻስ፥ ባደꬃስነ ሚቻስ አታና፤ ሀ በሳ ዛሪድ በኤከታ’ ያጌስ።
JER 42:19 “ይሁዳን አትዳይሳቶ፥ ጎዳይ ህንተኮ፥ ‘ግብፀ ቦፕተ!’ ያግስ። ታ ሀች ህንተኮ፥ ‘ናገትተ’ ገይሳ ስእተ።
JER 42:20 ህንተ ታኮ፥ ‘ኑ ግሾ ጎዳ ኑ ፆሳ ዎሳ፤ እ ነዉ ኦድያባ ኡባ ኑስ ኦዳ፤ ኑ ኦꬃና’ ያግድ፥ ታና ጎዳኮ፥ ህንተ ፆሳኮ፥ ኪትደታ፤ ሄሳን ግታ ባላ ባልደታ።
JER 42:21 ታ እ ግዳባ ኡባ ሀች ህንተዉ ኦዳስ። ሽን ጎዳይ ህንተ ፆሳይ ታ ባጋራ ህንተዉ ኪትዳ ቃላስ ኪተቶና እፅደታ።
JER 42:22 ህዛ፥ ሀይሳ ስእተ፤ ህንተ ብድ ዳናዉ ኮይያ ቢታን ህንተ ኦላን፥ ኮሻንነ ቦሻን ሀይቅድ ዉራና” ያግስ።
JER 43:1 ጎዳይ ኤንታ ፆሳይ ኪትዳ ቃላ ኡባ ኤርምያስ ኤንታዉ ኦድድ ዉርስዳፐ ጉየ፥
JER 43:2 ሆሻያ ናአይ አዛርያስ፥ ቃራያ ናአይ ዮሃንነ ኦቶራንቾ አሳ ኡባይ ኤርምያሳኮ፥ “ነ ዎርዶ ኦዳሳ! ጎዳይ ኑ ፆሳይ ኑ ግብፀ ብድ ኡቶና መላ ድጋናዉ ነና ኑኮ ኪትቤና።
JER 43:3 ሽን ባብሎነ አሳይ ኑና ዎꬋናዳ ዎይኮ ድእድ ባንታ ቢታ ኤፋናዳ ነ ኑና ኤንታ ኩሸን አꬃዳ እማና መላ ነና ኑ ቦላ ደንꬅዳይ ኔራ ናኣ ባሮካ” ያግዶሶና።
JER 43:4 ቃራያ ናአይ ዮሃን፥ ቶራ ሞጮናት ኡባይነ አሳ ኡባይ ይሁዳ ቢታን ዳና መላ ጎዳይ ኤንታ ኪትዳ ኪታ ፖሎና እፅዶሶና።
JER 43:5 ቃራያ ናአይ ዮሃንነ ቶራ ሞጮናት ኡባይ ባንታ ላለትዳ ካዎተꬃታ ኡባፈ ይሁዳን ዳናዉ ስምዳ ይሁዳ አሳ ባንታራ ኤክድ ግብፀ ብዶሶና።
JER 43:6 ካዋ ናገይሳታ ሀላቃይ ናቡዛርዳን ሳፋና ናኣ፥ አክቃማ ናኣ ጎዶልያራ ዳና መላ አሽዳ አደታ፥ ማጫሳ፥ ናይታነ ካዋ ማጫ ናይታ ኡባ ኤፍዶሶና። ቃስ ናብያ ኤርምያሳነ ኔራ ናኣ ባሮካ ኤፍዶሶና።
JER 43:7 ኤንቲ ጎዳ ኪታ እፅድ፥ ግብፀ ቢታ ገልድ፥ ፃፍናሳ ካታማ ጋካናዉ ብዶሶና።
JER 43:8 ፃፍናሳን ጎዳ ቃላይ ኤርምያሳኮ ሀይሳዳ ያግድ ይስ።
JER 43:9 “ግታ ሹቻታ ኤካዳ፥ ይሁዳ አሳይ በእሽን፥ ፃፍናሳን ደእያ ግብፀ ካዋ ጋꬎ ገልያ በሳን ስንꬃ ባጋራ ደእያ ባሱዋን ሞጋ።
JER 43:10 ኤንታኮ፥ ‘ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፤ ታ ኪታዳ፥ ታ አይልያ ባብሎነ ካዋ ናቡካዳናፆራ ኤህሳና። ሀ ሞገትዳ ሹቻታ ቦላ እያ ካዎተꬃ አራታ ዎꬃና። እ ባ ካዎተꬃ ዱንካንያ እያ ቦላ ኤሳና።
JER 43:11 እ ይድ ግብፀ ቢታ ኦላና። ሀይቆስ በሰይሳት ሀይቃና፤ ድኤታናዉ በሰይሳት ድኤታና፤ ማሻን ሀይቃናዉ በሰይሳት ማሻን ሀይቃና።
JER 43:12 ግብፀን ደእያ ኤቃ ፆሳታ ኬꬃ ታማ ኦይꬃና፤ ኤቃታ ፁጋና ዎይኮ ድአና። ሄንꬃንቾይ ባ እትያ ማኤይሳዳ፥ ግብፀ ቢታ ማአና። ያትድ፥ ያፐ ሳሮ ባና።
JER 43:13 እ፥ ግብፀ ቢታን ሄልዮታ ካታማን ደእያ ሀዉልትያ መንረꬃና፤ ግብፀ ፆሳታ ኬꬃ ታማን ፁጋና’ ” ያግስ።
JER 44:1 ግብፀን ምግዶላ፥ ፃፍናሳ፥ መምፕሳነ ጳትሮሳ ቢታን ደእያ አይሁደታስ ጎዳ ቃላይ ኤርምያሳኮ ሀይሳዳ ያግድ ይስ።
JER 44:2 “ኡባፈ ዎልቃማ ጎዳይ፥ እስራኤለ ፆሳይ፥ የሩሳላመ ቦላነ ይሁዳ ካታማ ኡባ ቦላ ታ ኤህዳ ꬋዮ ኡባ ህንተ፥ ህንተ አይፈን በእደታ። ኤንቲ ሀች ጋካናዉ ላለትድ አትዶሶና፤ ኦንካ ያን ዴና።
JER 44:3 ሄስ ሀንዳይ፥ ኤንቲ ኢታ ኦሶ ኦꬅድ፥ ታና ሀንቀꬅዳ ግሾሳ። ኤንቲ ዎይኮ ህንተ ዎይኮ ህንተ ማይዛት ኤሮና ሀራ ፆሳታስ እፃነ ጩይስድ ኤንታዉ ጎይንዶሶና።
JER 44:4 ‘ታ እፅያ ሀይሳ መላ ኢታባ ኦꬆፕተ’ ያግድ ኦዳና መላ ዛራ ዛራ ታ አይለታ፥ ናበታ ኪታስ።
JER 44:5 ግዶሽን፥ ኤንቲ ስኦና ዎይኮ አኬኮና እፅዶሶና። ሀራ ፆሳታስ እፃነ ጩይስያ ኢታ ኦሱዋ አጎና እፅዶሶና።
JER 44:6 ሄሳ ጋሶን ታ ሱልያ ሀንቆይነ ይሎይ ይሁዳ ካታማታ ቦላነ የሩሳላመ ኦገታን ኤፅስ። ኤንቲ ሀች ህንተ በኤይሳዳ ላለትዶሶና፤ ባይሳ ግድዶሶና።
JER 44:7 “ሀእካ ጎዳይ፥ ኡባፈ ዎልቃማ ፆሳይ፥ እስራኤለ ፆሳይ፥ ሀይሳዳ ያጌስ፤ ህንተ ኮቻይ አቶና መላ፥ ማጫሳ፥ አደታ፥ ናይታነ ዮጋ ናይታ ይሁዳ ቢታፈ ꬋይሳናዳ ኢታባ ህንተ፥ ህንተ ቦላ አይስ ኦቲ?
JER 44:8 ህንተ ዳናዉ ይዳ ግብፀ ቢታን ሀራ ፆሳታስ እፃነ ጩይስድ ታና አይስ ሀንቀቲ? ሳአን ደእያ ካዎተꬃታ ኡባ ግዶን ባደꬃስነ ቦረስ አትድ፥ ህንተና ꬋይሳናዉ አይስ ኮዬቲ?
JER 44:9 ካሰ ህንተ አዋት፥ ይሁዳ ካዎትነ ኤንታ ማቸት፥ ህንተነ ህንተ ማቸት ይሁዳ ካታማታንነ የሩሳላመ ኦገታን ኦꬅዳ ኢታ ኡባ ዶግደትዬ?
JER 44:10 ህንተ ሀች ጋካናዉ ህንተናተꬃ ካዉሽበከታ፤ ታና ቦንችቤከታ። ታ ህንተዉነ ህንተ ማይዛታስ እምዳ ህግያነ ዎጋ ካልበከታ።
JER 44:11 “ሄሳ ግሾ፥ ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፤ ታ ህንተና፥ ይሁዳ ዘርታ ኡባ ꬋይሳናዉ ቆፋ ቃቻስ።
JER 44:12 ይሁዳን አትዳ አሳ ግዶፈ፥ ግብፀ ብድ፥ ያን ዳናዉ ቆፋ ቃችዳይሳታ ታ ꬋይሳና። ኤንቲ ኡባይ ግብፀን ዉራና፤ ኦላንነ ኮሻን ሀይቃና። ግታፐ ጉꬁ ጋካናዉ ደእያ ኡባይ ኦላንነ ኮሻን ꬋያና። ኤንቲ ዳጋማስ፥ ጫሻስ፥ ባደꬃስነ ሚቻስ አታና።
JER 44:13 ታ የሩሳላመ፥ ኦላን፥ ኮሻንነ ቦሻን ሴርዳይሳዳ ግብፀ ቢታን ደኤይሳታ ሴራና።
JER 44:14 አትዳ ይሁዳ አሳፐ ግብፀ ብድ ደኤይሳት ግብፀታ ኩሽያፐ ፖሎ ከስ ኤኮኮና። ኤንቲ ስሚድ ዳና ግድ አሞትያ ይሁዳ ቢታ አይ አስካ ስመና። ጉꬃ አሳፐ አትሽን፥ ኦንካ ስሚድ ዬና” ያግስ።
JER 44:15 ኤንታ ማቸት ሀራ ፆሳታስ እፃነ ጩይሰꬅ ኤርያ አደይ ኡባይ፥ ያን ደእያ ማጫሳ ኡባይነ ግታ ማባራ ግድድ፥ ግብፀንነ ጳትሮሳን ደእያ አሳ ኡባይ ኤርምያሳኮ ሀይሳዳ ያግዶሶና።
JER 44:16 “ኔኒ ጎዳ ሱንꬃን ኑስ ኦድያባ ኡባ ኑ ስኦኮ።
JER 44:17 ኑ ኦꬃና ግድ ቆፕዳባ ኡባ ኦꬃና። ኑኒ፥ ኑ ማይዛት፥ ኑ ካዎትነ ኑ ሀላቃት ይሁዳ ካታማታንነ የሩሳላመ ኦገታን ካሰ ኦꬅዳይሳዳ ሳሎ ካውዉ ጌተትያርስ ኑ ፆሴስ እፃነ ጩይሳና፤ ኡሻ ያርሹዋ እዉ ጉሳና። ኑ ካሰ ሄሳ ኦꬅያ ዎደ፥ ኑስ ዳሮ ካꬅ ደኤስ፤ ሄ ዎደ ኑስ ሳእ ኬሀ፤ ኑና አይብካ መትቤና።
JER 44:18 ሽን ሳሎ ካዌስ እፃነ ጩይሰይሳነ ኡሻ ያርሾ ጉሰይሳ አግዳፐ ጉየ፥ ኑስ ኡባባይ ፓጭስ፤ ኑ ኦላንነ ኮሻን ዉርዳ” ያግዶሶና።
JER 44:19 ማጫሳት ጉጅድ፥ “ኑ ሳሎ ካዌስ ማላን ኡይꬁ ኡክያ ዎደ፥ እፃነ ጩይስያ ዎደነ ኡሻ ያርሾ እዉ ጉስያ ዎደ ኑ አዝናት ኤሮና ደእሽን፥ ኑ ኦꬅዳባይ አይብካ ባዋ” ያግዶሶና።
JER 44:20 ሀይሳዳ ያግድ ዛርዳ አሳ ኡባስ፥ ማጫሳስነ አደታስ፥ ኤርምያስ ሀይሳዳ ያግስ፤
JER 44:21 “ህንተነ ህንተ ማይዛት፥ ህንተ ካዎትነ ህንተ ሀላቃት፥ ቢታን ደእያ አሳ ኡባይ፥ ይሁዳ ካታማታንነ የሩሳላመ ኦገታን እፃነ ጩይስዳይሳ ጎዳይ ኤረና ዎይኮ ዶግስ ግድ ቆፔቲ?
JER 44:22 ህንተ ኦꬅያ ኢታነ ሻትያ ኦሱዋ ጎዳይ ስእ ጋናዉ ዳንዳእቦና ግሾ፥ ህንተ ቢታ ሀች ህንተ በኤይሳዳ ላለትዳ፥ ባይሳነ ባደትዳ ቢታ ኦꬅስ።
JER 44:23 ሀ ꬋዮ ኡባይ ህንተና ጋክዳይ፥ ህንተ ሀራ ፆሳታስ እፃነ ጩይስዳ ግሾሳ፥ ጎዳ ቦላ ናጋራ ኦꬅዳ ግሾሳ፥ ጎዳ ቃላ ስኦና እፅዳ ግሾሳነ እያ ህግያ፥ እያ ዎጋነ አዋጁዋስ ኪተቶና እፅዳ ግሾሳ” ያግስ።
JER 44:24 ሄሳፈ ጉየ፥ ኤርምያስ አሳ ኡባስነ ማጫሳስ ሀይሳዳ ያግስ፤ “ህንተኖ፥ ይሁዳፐ ይድ፥ ግብፀ ቢታን ደእያ አሳዉ፥ ጎዳይ ግያባ ስእተ።
JER 44:25 ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፤ ህንተነ ህንተ ማቸት፥ ‘ኑኒ ሳሎ ካዌስ እፃነ ጩይሳና፤ ኡሻ ያርሹዋ እዉ ጉሳና’ ግድ ጫቅዳ ጫቁዋ ፖልድ፥ ኦሶን በስደታ። ህዛ፥ ጉየ ጎፕተ፤ ህንተ ጫቁዋ ፖልተ።
JER 44:26 “ግዶሽን፥ ህንተኖ፥ ግብፀ ቢታን ደእያ ይሁዳ አሳዉ፥ ጎዳይ ግያባ ስእተ! ጎዳይ ሀይሳዳ ያጌስ፤ ‘ህዛፐ ጉየ ግብፀ ቢታን ደእያ ይሁዳ አሳፐ እሶይካ ታ ሱንꬃን፥ “ኡባ ሃርያ ጎዳይ ኤሮ” ’ ግድ ጫቆና መላ ታ ግታ ሱንꬃን ጫቃስ።
JER 44:27 ታ ኤንታ ቦላ ሎኦባ ግዶናሽን፥ ኢታባ ኤሀናዉ ምናይስ። ግብፀን ደእያ ይሁዳ አሳይ ዉራና ጋካናዉ ኦላንነ ኮሻን ሀይቃና።
JER 44:28 ኦላፐ አትዳ ጉꬃ አሳት ግብፀፈ ይሁዳ ስማና። ሄ ዎደ ግብፀን ደእያ ይሁዳ አሳይ፥ ታ ቃላፐነ ኤንታ ቃላፐ አዉስ ቱሜኮ ኤራና።
JER 44:29 ታ ህንተና ሀ በሳን ሴርያ ዎደ፥ ‘ታ ህንተ ቦላ ኢታባ ኤሀና’ ግዳይስ ቱማ ግደይሳስ ታ ህንተዉ ማላታ እማና።
JER 44:30 ታ ይሁዳ ካዋ ሰደቅያሳ እያዉ ሞርከ ግድድ፥ እያ ዎꬋናዉ ኮይያ ባብሎነ ካዋ ናቡካዳናፆራስ አꬃዳ እምዳይሳዳ ግብፀ ካዋ ሆፍራ እያ ዎꬋናዉ ኮይያ እያ ሞርከታስ አꬃዳ እማና” ያጌስ ጎዳይ።
JER 45:1 እዮስያሳ ናአይ እዮአቄም ይሁዳን ካዎትዳ ኦይዳንꬆ ላይꬃን፥ ኔራ ናአይ ባሮክ ሀ ቃላታ ኤርምያስ ኦድን፥ ስእድ፥ ማፃፋን ፃፍስ። ሄ ዎደ ኤርምያስ እያዉ ኦድዳ ቃላይ ሀይሳ፦
JER 45:2 “ባሮካ፥ ጎዳይ፥ እስራኤለ ፆሳይ ኔኮ ሀይሳዳ ያጌስ፦
JER 45:3 ኔኒ፥ ‘ጎዳይ ታ ሳኩዋ ቦላ አዛኖ ጉጅዳ ግሾ ታኖሾ! ታኒ ኡንአን ዳቡራዳ ሸምፖ ꬋያስ’ ” ያጋዳሳ።
JER 45:4 ባሮካ፥ ጎዳይ ኔኮ ሀይሳዳ ያጌስ፦ “ታ ኬፅዳይሳ ታ ላላና፤ ታ ቶክዳይሳ ታ ሾዳና። ታ ሀይሳ ቢታ ኡባን ኦꬃና።
JER 45:5 ያትን፥ ነ ነዉ ግታባ ኮያዬ? ሄሳ ኮዮፓ። አሳ ኡባ ቦላ ታ ꬋዮ ኤሀና። ሽን ነ ብዳ በሳ ኡባን ታ ነ ሸምፑዋ አሻና” ያጌስ ጎዳይ።
JER 46:1 ካዎተꬃታባ ጎዳይ ኤርምያሳስ ኦድዳ ቃላይ ሀይሳ።
JER 46:2 እዮኣሳ ናአይ እዮአቄም ይሁዳን ካዎትዳ ኦይዳንꬆ ላይꬃን፥ ኤፍራፂሳ ሻፋ ማታን፥ ካርካምሻ ጌተትያ በሳን፥ ባብሎነ ካዎይ ናቡካዳናፆር ፆንዳ ግብፀ ካዋ ናኮ ኦላንቾታባ ጎዳይ ሀይሳዳ ያጌስ።
JER 46:3 ህንተ ቶራነ ጎንዳለ ጊግስተ፤ ኦላስ ከይተ።
JER 46:4 ህንተ ፓራታ ብፃልድ ቶግተ፤ ህንተ ሁጵያን ብራታ ባርኔፃ ዎꬅተ። ህንተ በሳ በሳ ኦይክተ፤ ህንተ ቶራ ሌፍተ፤ ህንተ ኦላ ማኡዋ ማእተ።
JER 46:5 “ሽን ሀይስ ታ በኤይ አይቤ? ኤንቲ ያይድ ጉየ ስምዶሶና። ዎልቃማት ፆነትዶሶና፤ ጉየ ፄሎና ባቃትዶሶና፤ ኤንታ ዩሾ ኡባን ዳጋም ደኤስ” ያጌስ ጎዳይ።
JER 46:6 ኤሶተይስ ከስ ኤከና፤ ምኖይካ አታናዉ ዳንዳኤና። ፑደሀ ባጋን ኤፍራፂሳ ሻፋ ማታን፥ ኡባይ ꬉበትድ ኩንድዶሶና።
JER 46:7 ሀይስ ናይለ ሻፋ ክፃዳ ደንደይ፥ ድኦ ሃꬃዳ ጎገይ ኦኔ?
JER 46:8 ግብፀይ ናይለ ሻፋዳ ደንዴስ፤ ድኦ ሃꬃዳ ጉፔስ። ግብፀይ፥ “ታኒ ክፃዳ፥ ቢታን ኤላና፤ ካታማታነ እያን ደእያ አሳ ኡባ ꬋይሳና” ያጌስ።
JER 46:9 ፓራቶ፥ ጉፕድ ከይተ፤ ፓራ ጋረቶ ዎፅተ። ጎንዳለ ኦይክዳ ቶጰነ ፑፃ አሳዉ፥ ዶንገን ዱክያ ሉዳ አሳዉ፥ ምኖ ኦላንቾቶ፥ ደንድድ ኦለትተ።
JER 46:10 ሄ ጋላሳይ ጎዳ ኡባፈ ዎልቃማ ጎዳ ጋላስ፥ ጎዳይ ባ ሞርከታ ቦላ ሀሎ ከይያ ጋላስ። እያ ማሻይ ካላና ጋካናዉ ኤንታ ማና፤ አላና ጋካናዉ ኤንታ ሱꬃ ኡያና። ጎዳይ፥ ኡባፈ ዎልቃማ ፆሳይ፥ ፑደሀ ባጋን ኤፍራፂሳ ሻፋ ማታን፥ ኤንታ ያርሾ ኦꬅድ ኤካና።
JER 46:11 ጌላኤ፥ ግብፀ ማጫ ናተ፥ ጋላዳ ቢታ ባዳ ትየትያ ꬋለ ኤሀ። ግዶሽን፥ ነ ጮ ꬋለ ዳርሳሳፐ አትሽን፥ ነዉ ፓፆይ ባዋ።
JER 46:12 ካዎተꬃት ነ ዬላ ስእዶሶና፤ ነ ዬሆይ ቢታ ኡባ ኩማና። ነ ኦላንቾት እሶይ እሱዋን ꬉበትድ፥ ኡባይ እስፈ ኩንድዶሶና።
JER 46:13 ባብሎነ ካዎይ ናቡካዳናፆር ግብፀ ኦላናዉ ያናይሳ፥ ጎዳይ ናብያ ኤርምያሳስ ኦድዳ ቃላይ ሀይሳ፦
JER 46:14 ሀይሳ ግብፀን ኦዳ፤ ምግዶላን፥ መምፕሳንነ ፃፍናሳን አዋጃ። ህንተ በሳን በሳን ኤቅተ፤ ጊገትተ፤ ህንተ ዩሹዋን ደእያ ኡባ ማሽ ማና።
JER 46:15 ህንተ ምኖ ኦላንቾት አይስ ኩንድዴ? ጎዳይ ኤንታ ሱግዳ ግሾ ግደኔ?
JER 46:16 ኦላንቾት ꬉበትድ ኩንድዶሶና፤ እሶይ እሱዋ፥ “ደንድድ የꬍተ፤ ሞርከ ማሻፈ አታናዉ፥ ኑ አሳኮ፥ ኑ ቢታ ስሞስ” ያጎሶና።
JER 46:17 ኤንቲ ያን ግብፀ ካዋኮ፥ “ባ ቃዳ ጎኤቶና ጮ ዉርስያ ኦዳንቾ” ግድ ሱንꬃና።
JER 46:18 “ኡባፈ ዎልቃማ ጎዳ” ጌተትያ ካዎይ ሀይሳዳ ያጌስ፦ “ታኒ፥ ታ ሸምፑዋን ጫቃይስ፤ ደረታ ግዶን ታቦረ ደረይ፥ አባ ማታን ደእያ ቃርመሎሳ ደረይ፥ አዱቀይሳዳ አዱቅያ ሞርከይ ህንተ ቦላ ያና።
JER 46:19 ህንተኖ፥ ግብፀን ደኤይሳቶ፥ ድኤትድ ባናዉ ጊግተ። መምፕሳ ካታማይ ላለትድ፥ ኦንካ ደኦና መላ ቢታ ግዳና።
JER 46:20 ግብፀይ ሎኦ ኡሳ መላ፤ ሽን ፑደሀ ባጋ ቢታፈ ያ ቦፅያን እያ ሳፀታና።
JER 46:21 ሚሸይ ጭገትን ኦꬅያ ኦላንቾት ሞꬍዳ ዎፋኖ መላ። ኤንታ ꬋዮ ጋላሳይ ማትዳ ግሾ፥ ኤንቲ ሴረትያ ዎደይ ጋክዳ ግሾ፥ ኤንቲ እስፈ ጉየ ስሚድ ባቃትዶሶና፤ ኤንቲ ባንታ በሳን ኤቅቦኮና።
JER 46:22 ሞርከይ ዎልቃን ሱግድ ያ ዎደ፥ ግብፀ አሳይ ባቃትያ ሾሻዳ ኮልፃና። ሞርከት ምꬅ ቃንፅያ አሳዳ፥ ካልታ ኤክድ እያ ቦላ ያና።
JER 46:23 አሳይ ስፅዳ ዎራ ቄፅድ ꬋይሰይሳዳ፥ ግብፀ አሳ ቃንፅድ ዉርሳና ሞርከታ ታይቦይ ቦለፐ ዳሮ፤ ኤንታ ታይባናዉ ዳንዳኤተና።
JER 46:24 ግብፀ ማጫ ናእያ ካዉያና፤ ፑደሀ ባጋ አሳስ አꬋዳ እመታና።”
JER 46:25 ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ። “ታኒ ተብሳ ፆሳ አሞነ፥ ካዋ ፓሮና፥ ግብፀ ቢታነ ግብፀ ፆሳታ፥ ግብፀ ካዎታነ ካዋ ፓሮና ቦላ ዘምፕያ ኡባ ሴራና።
JER 46:26 ኤንታ ሸምፑዋ ኮይያ ባብሎነ ካዋ ናቡካዳናፆራ ኩሸንነ እያ ኦላንቾታ ኩሸን አꬃዳ እማና። ሄሳፈ ጉየ፥ ግብፀ ቢታይ ካሰይሳዳ አስ ደእያ ቢታ ግዳና” ያጌስ ጎዳይ።
JER 46:27 “ታ አይልያዉ፥ ያይቆባ ያዮፋ፤ እስራኤለ፥ ዳጋሞፋ። ነና ሃሆ በሳፈ፥ ነ ኮቻይ ድኤትድ ብዳ ቢታፈ አሻና። ያይቆብ ስሚድ፥ ሳሮን ዎፑ ግድ ዳና፤ ኤንታ ያሽስያባይ ዴና።
JER 46:28 ታ አይልያዉ፥ ያይቆባ፥ ታ ኔራ ደእያ ግሾ፥ ያዮፋ። ታ ነና ላልዳ ካዎተꬃታ ኡባ ꬋይሳና፤ ሽን ነና ꬋይስከ። ታ ነና ፅሎ ፕርዳን ሴራና፤ ሽን ሴር ባይና ነና ጮ አግከ” ያጌስ ጎዳይ።
JER 47:1 ግብፀ ካዎይ ጋዛ ኦልድ ኦይካናፐ ካሰ፥ ፍልስፄመባ ጎዳፐ ናብያ ኤርምያሳኮ ይዳ ቃላይ ሀይሳ፦
JER 47:2 ጎዳይ ሀይሳዳ ያጌስ፤ “ሄኮ፥ ፑደሀ ባጋፈ ሃꬅ ꬉቃና፤ ድኦይ ገልዳ ክፃ ሃꬃዳ ጎጋና። ቢታነ ቢታን ደእያባ ኡባ፥ ካታማታነ ኤንታ ግዶን ደእያ አሳ ኡባ ሙካና። አሳይ ዋሳና፤ ቢታን ደእያ ኡባይ ዬካና።
JER 47:3 ፓራታ ግርሳ፥ ፓራ ጋረታ ኮሽንቻ፥ ጋረታ ጎንዶርሳ ግርሳ ስአና። አዋታ ኩሸይ አርጋጭዳ ግሾ፥ ባንታ ናይታ ማዳናዉ ጉየ ስሞኮና።
JER 47:4 ፍልስፄመ አሳ ꬋይሳናዉ፥ ፅሮሳነ ስዶና ማዳናዉ አትያ አሳ ꬋይሳናዉ ዎደይ ጋክስ። ጎዳይ ፍልስፄመፐ አትዳይሳታ፥ ሃꬃን ተቀትዳ ደእያ ካፍቶራፐ ይዳ ኮቻታ ꬋይሳና።
JER 47:5 ጋዝ ካዮታዳ ባ ሁጵያ ሜዳሱ፤ አስቃሎን ባ ኩሽያ ዶና ቦላ ዎꬃሱ። ህንተኖ፥ አባ ጋፃን አትዳይሳቶ፥ አዉደ ጋካናዉ ህንተ አሳተꬃ ጋረቲ?
JER 47:6 ህንተ፥ ‘ጎዳ ማሻዉ፥ ኔኒ ስእ ጎና እፀይ አዉደሴ? ነ በሳ ስማዳ ገላ፤ ስእ ጋዳ ኡታ’ ያጌታ።
JER 47:7 ሽን ጎዳይ እያ ኪትን፥ እ ዋንድ ስእ ጋኔ? አስቃሎናነ አባ ጋፃን ደእያ ቢታ ኦላና መላ ኪታስ” ያግስ።
JER 48:1 ሞአበ ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፤ “እ ꬋያና ግሾ፥ ናቦ ካታማ አየ! ቅራታይማ ካታማይ ዬላታናነ፤ ኦይከታና፤ ኤንታ ሚፃይ ካዉያና፤ መቀረታና።
JER 48:2 ህዛፐ ሞአበ ጬቆይ ꬋያና፤ ሀሰቦና ካታማ አሳይ ሞአበ ቦላ፥ ‘ሃይተ፥ ሀ ቢታ ꬋይሳና’ ያግድ ኢታባ ማቀትስ። ነኖ፥ ማድማና ካታመ፥ ማሽ ነና የደꬃና ግሾ ስእ ጋ።
JER 48:3 ሆሮናይማ አሳይ፥ ‘ꬋዮይነ ኩንደꬅ፥ ጋክስ’ ግድ ዋስያ ዋሱዋ ስእተ!
JER 48:4 ሞአበይ መቀረታና፤ እያ ናይት ዬክያ ዬሁዋ ስእተ!
JER 48:5 ኤንቲ ዬክሸ፥ ሉህታ ፑደ ከያና፤ ሆሮናይማፐ ዱገ ዎꬍሸ፥ ꬋዮ ዋሱዋ ስአና።
JER 48:6 እሶይ እሶይ፥ ‘ባቃትተ፤ ህንተ ሸምፕዉ አሽተ፤ መላ ቢታን ደእያ አሮኤራዳ ዱማትተ፥ ህንተ ሸምፑዋ አሽተ’ ያጋና።
JER 48:7 ኔኒ ነ ዎልቃንነ ነ ዱረተꬃን ጬቀትዳ ግሾ፥ ነካ ድኤታና። ካሞሽካ ባ ካህነታራነ ሀላቃታራ፥ ድኤትድ ባና።
JER 48:8 ጎዳይ ኦድዳይሳዳ፥ ካታማ ኡባ ꬋይሰይስ ያና። እስ ካታምካ አተና፤ ዛንጋራይነ ደምባ ኡባይ ꬋያና።
JER 48:9 ሞአበይ ፓልድ አታና መላ ቀፈ እምተ። እ ካታማይ ꬋያና ላትያ አስካ ደመና።
JER 48:10 ጎዳ ኦሱዋ ቀል ግድ ኦꬅያ ኡራይ ባደትዳይሳ ግዶ። ሱꬁ ጉሶና መላ ባ ማሻ ተቅያ ኡራይ ባደትዳይሳ ግዶ!
JER 48:11 “ሞአበይ ያላጋተꬃፈ ዶምድ፥ እንጀን ደእዳ አሳ መላ፤ እ ሀራ ቢታ ድኤትቤና። ሞአበይ ኦቶፐ ኦቶን ትገቶናነ ቃፆና፥ ማልኦይ ላመቶናነ ሳዎይ አጎና፥ ኡትድ ደእዳ ዎይነ ኡሻ መላ።
JER 48:12 ታኒ ኦቱዋ ጉፓንይሳታ ኪትያ ዎደይ ያና። ኤንቲ እያ ጉሳና፤ ኦቱዋፐ ፂዞ ꬋይሳና፤ ኦቱዋ መንረꬃና።
JER 48:13 እስራኤለ አሳይ ባ አማነትዳ፥ ቤተለን ደእያ ኤቃን ካዉይዳይሳዳ ሞአበይ ባ ፆሳ ካሞሻን ካዉያና።
JER 48:14 “ህንተ፥ ‘ኑ ዎልቃማ አስነ ምኖ ኦላንቾ’ ግድ አይስ ጬቀተቲ?
JER 48:15 ሄኮ፥ ሞአበይነ ያን ደእያ ካታማት ꬋይዶሶና። እያ ያላጋ አደ ናይት ሹከታናዉ ዱገ ብዶሶና” ያጌስ፥ ካዎይ፥ ኡባፈ ዎልቃማ ጎዳይ።
JER 48:16 ሞአበ ꬋዮይ ማታትስ፤ እያ ላለተꬃ ዎደይ ኤለስድ ጋክስ።
JER 48:17 እያ ዩሹዋን ደእያ አሳይ፥ እያ ግታተꬃ ኤርያ ኡባይ፥ “ምኖ ግድዳ ካዎተꬃ ፃምአይ ዋንድ መቅዴ?” ቦንቸትዳ ፃምአይ ዋንድ ትንቸትዴ? ያግድ ዘሌልተ።
JER 48:18 “ህንተኖ፥ ድቦና ካታማን ደኤይሳቶ፥ ህንተ ቦንቾ በሳፈ ዎꬍድ፥ መላ ቢታን ኡትተ። ሞአበ ꬋይሰይስ ህንተ ቦላ ያና፤ ህንተ ሚፃ ኡባ ላላና።
JER 48:19 አሮኤራ ካታማን ደኤይሳቶ፥ ኦገ ዶናን ኤቅድ ፄልተ፤ ከስ ኤክድ ባቃትያ አደታነ ማጫሳ፥ ‘አይበ ከይዳይ?’ ያግድ ኦይችተ።
JER 48:20 ኤንቲ፥ ‘ሞአበይ ኩንድዳ ግሾ ካዉይስ፤ እያዉ ዬክተነ ዘሌልተ። ሞአበ ꬋይዳይሳ ግሾ አርኖና ሻፋ ማታን አዋጅተ’ ” ያግድ ዛራና።
JER 48:21 “ገዘን ደእያ ሆሎና፥ ያሳ፥ መፋታ፥
JER 48:22 ድቦና፥ ናቦ፥ ቤት-ድብላታይማ፥
JER 48:23 ቅራታይማ፥ ቤት-ጋሙላ፥ ቤት-ማኦና፥
JER 48:24 ቅርዮታነ፥ ባሶራ ካታማታ ቦላነ ማታንነ ሃሆን ደእያ ሞአበ ካታማታ ቦላ ፕርድ ይስ።
JER 48:25 ሞአበ ካጨይ ቃንፀትስ፤ እያ ቀሰይ መቅስ።”
JER 48:26 ጎዳ ቦላ ኦቶርትዳ ግሾ፥ ሞአበ ኡሽድ ማꬆይተ። ባ ጮሻ ቦላ ጎንዶረቶ፤ አሳ ኡባይ እያ ቦላ ቀልቅሶ።
JER 48:27 ካሰ ነ እስራኤለ ቦላ ቀልቅሳብኪ? እያባ ሃሳያ ዎደ ካꬋዳ ሁጰ ቃꬅዳይ እስራኤለይ ካይሶታራ ኦይከትዳ ግሾዬ?
JER 48:28 ህንተኖ፥ ሞአበን ደኤይሳቶ፥ ካታማፐ ከይድ፥ ሹቻ ሆምኦን ደእተ። አፎ ዶናን ባዉ ኬ ኬፅያ ሆለ መላ ግድተ።
JER 48:29 ሞአበይ ዳሮ ኦቶርትስ፤ ሞአበይ አይ መላ ባ ጋና ጋቢስዳኮ፥ ጬቀትያኮ፥ ኦቶርትያኮ፥ አይ መላ ባና ꬎቁ ኦꬅያኮ፥ ታ ስአስ።
JER 48:30 ታ ኤንታ ጬቁዋ ኤራይስ፤ ሽን አይኮካ ማደና፤ ኤንታ ኦቶሮይ አይኮካ ኦና።
JER 48:31 ሄሳ ግሾ፥ ታ ሞአበስ ዋሳስ፤ ቅር-ሄሬሳ አሳስ ካዮታዳ ዬካይስ።
JER 48:32 ህንተኖ፥ ሰባማ አሳዉ፥ ያእዜራ አሳስ ዬከይሳፈ አꬃዳ ህንተዉ ዬካይስ። ህንተ ታሸይ ዳይድ፥ ማፅነ አባ ፕንድ፥ ያእዜራ ጋክዳ ዎይነ መላ፤ ሽን ህንተ ዎይነ አይፍያነ ዉርጩዋ ቦንቀይሳት ይድ ꬋይስዶሶና።
JER 48:33 ኡፋይስነ ሎኦባይ አይፍያ ሞአበ ቢታፈ ኤከትስ። ዎይነ ጉምእያ በሳፈ ዎይነይ ጎጎናዳ ተቃስ። ኦንካ እልልሸ ዎይነ ጉምኤና። ስኤትያ ግርስ ደእኮካ ኡፋይሳ ግርስ ግደና።
JER 48:34 ኤንቲ ሀሰቦናንነ ኤልያላን ዋስያ ዋሶይ ያሃፃ ጋካናዉ ስኤቴስ። ዞኣራፐ ብድ ሆሮናይማነ ኤግላት-ሻልሻ ጋካናዉ ስኤቴስ። ሀር አቶሽን፥ ንምርማ ሃꬃይ መልስ።
JER 48:35 ታኒ ሞአበፐ ꬎቃ በሳታን ጎይነሳታነ ባንታ ፆሳታስ እፃነ ጩይሰይሳታ ꬋይሳና።
JER 48:36 “ኤንቲ ካሰ ደምዳ ዱረተꬃይ ሀእ ꬋይዳ ግሾ፥ ታ ዎዛናይ ሞአበስነ ቅር-ሄሬሳ አሳስ ሱሱልኤዳ ዬካስ።
JER 48:37 ኤንቲ ባንታ ሁጵያነ ባንታ ቡቻ ሜድዶሶና፤ ባንታ ኩሽያ ቃንፅድ ማዱንፅስዶሶና፤ ባንታ ፄሳን ካዮ ማኦ ዳንጭዶሶና።
JER 48:38 ታኒ ሞአበ ኦንካ ኮዮና ኦቶዳ መንꬅዳ ግሾ፥ ሞአበታ ኬꬃ ቦላንነ ዳባባን ዬሆፐ አትሽን፥ ሀራባይ ባዋ” ያጌስ ጎዳይ።
JER 48:39 ሞአበይ አይብ መቆ መቅደ! እያ አሳይ አይብ ዋሶ ዋስ! ሞአበ ዋን ዬላትድ፥ ባ ዞኩዋ ዛርዴ? ሄሳ ግሾ፥ ሞአበይ ባ ዩሹዋን ደእያ ኡባስ ሚቻስነ ዳጋማስ አትስ።
JER 48:40 አርጋንꬅ ባ ቀፍያ ምጭድ የይሳዳ ሞርከይ ሞአበ ቦላ ያና።
JER 48:41 እያ ካታማት ኦይከታና፤ እያ ሚፃት ኤከታና። ሄ ጋላስ ሞአበ ምኖ ኦላንቾታ ዎዛናይ እቀꬅ ኦይክዳ ማጫሳ ዎዛና መላ ኡንኤታና።
JER 48:42 ሞአበ ታ ቦላ ማካልዳ ግሾ ꬋያና፤ ህዛፐ ጉየ ካዎተꬅ ግድድ ዴና።
JER 48:43 ሞአበ አሳዉ፥ ያሽ፥ ኦልነ ፅሄይ ህንተና ናጌስ።
JER 48:44 ዳጋንꬅያባፐ ባቃትያ ኦንካ ኦላን ኩንዳና፤ ኦላፈ ከይያ ኦንካ ፅሄን ኦይከታና። ታኒ ሞአበ ሴርያ ዎደ ሄሳ ኦꬃና።
JER 48:45 “ባቃትድ ብዳይሳት ዎልቃ ꬋይድ፥ ሀሰቦና ካታማ ኩያን ኤቅዶሶና። ሀሰቦና ካታማፐ ታም፥ ካዎይ ስሆነይ ደእዳ ኬꬃፈ ላጮይ ከይድ፥ ሞአበ ቢታነ ያን ደእያ ማካላንቾ አሳ ምስ።
JER 48:46 ሞአበ አሳዉ፥ ህንተና አየ! ካሞሻ ጌተትያ ኤቃ ፆሳ ጎይነይሳት ꬋይዶሶና፤ ኤንታ አደ ናይትነ ማጫ ናይት ድኤትድ ብዶሶና።
JER 48:47 ግዶሽን፥ ዉርሰꬃን ታኒ ሞአበ ዛራዳ ኦራꬃና” ያጌስ ጎዳይ። ሞአበ ቦላ ኦደትዳ ፕርዳይ ሀይሳን ዉርስ።
JER 49:1 አሞነባ ጎዳይ ሀይሳዳ ያጌስ፤ “እስራኤለስ አደ ናእ ባዌ? እያ ላተይ ባዌ? ያትን፥ ሞሎካ ጌተትያ ኤቃ ፆሳ ጎይንያ አሳት ጋደ ቢታ አይስ ኦይክዶና? ኤንታ ካታማን አይስ ኡትዶና?
JER 49:2 አሞነ ቢታን ራባ ካታማ ቦላ ኦላ ዋሶይ ስኤታና መላ ታ ኦꬃና ዎደይ ያና። ሄ ካታማይ ላለትድ ባይሳ ግዳና። እያ ዩሹዋን ደእያ ጉታት ታማን ፁገታና። እስራኤለይ ባና ባ ቢታፈ ጎድዳይሳታ ጎዳና” ያጌስ ጎዳይ።
JER 49:3 “ሀሰቦና አሳዉ፥ ጋየ ካታማይ ላለትዳ ግሾ ዘሌልተ። ራባ አሳዉ፥ ዬክተ፤ ካዮ ማኦ ማእድ ካዮትተ፤ ካታማ ግምብያ ግዶን ዎፀረትተ። ህንተ ፆሳይ ሞሎክ ባ ካህነታራነ ባ ሀላቃታራ ድኤትስ።
JER 49:4 አማኖይ ባይና አሳዉ፥ ‘ኑና ኦላናይ ኦኔ?’ ያግድ ህንተ ዱረተꬃንነ ህንተ አራዳ ዛንጋራታን አይስ ጬቀተቲ?
JER 49:5 ታ ነ ዩሹዋን ደኤይሳት ነና ዳጋንꬃና መላ ኦꬃና” ያጌስ ጎዳይ፥ ኡባፈ ዎልቃማ ፆሳይ። ህንተ ኡባይ ከይድ ባቃታና ግሾ ባቃትድ ብዳይሳታ ሺሽያ አስ ꬋያና።
JER 49:6 “ግዶሽን፥ ዉርሰꬃን ታ አሞነ አሳ ዛራዳ ኦራꬃና” ያጌስ ጎዳይ።
JER 49:7 ኤዶመባ ኡባፈ ዎልቃማ ጎዳይ ሀይሳዳ ያጌስ፤ “ተማና አሳስ ደእያ ጭንጫተꬃይ አዉ ብዴ? ዞረይሳታፐ ዞረይ ꬋይዴ? ኤንታ ጭንጫተꬃይ ኤንታፈ ኤከትዴ?
JER 49:8 ታኒ ኤሳዌ ኮቻ ሴርያ ዎደ እያ ቦላ ꬋዮ ኤሀና ግሾ፥ ዳዳነን ደኤይሳቶ፥ ባቃትድ አፎን ቆሰትተ።
JER 49:9 ዎይነ ማፀይሳት ፖሽለ አሾኮና? ካይሶት ቃማ ገልኮ፥ ባንታዉ ኮያባ ፃላላ ኤኮኮና?
JER 49:10 ሽን ታ ኤሳዋ ኮቻ ቃራዳ ካሎ አሻና፤ ኤንቲ ቆሰታናዉ ዳንዳኦና መላ፥ ኤንቲ ቆሰትያ በሳ ቃራዳ ቆንጨ በሲ ኦꬃና። ኤሳዌ ሼሻይ፥ እያ ዳቦትነ እያ ሾሮት ኡባይ ꬋያና፤ ኤንታፈ እሶይካ አተና።
JER 49:11 ህንተ ግዶን ደእያ ይኦ ናይታ አጋግተ፤ ኤንታ ታ ድቻና። ህንተ አምኤትካ ታናን አማነቶ” ያጌስ።
JER 49:12 ጎዳይ ሀይሳዳ ያጌስ፤ “ህዛ ሴራ ኤካናዉ በሶና አሳስ ሴረተꬅ አቶናባ ግድኮ፥ ህንተ ዋንድ ሴረቶና አታኔ? ቱማ ህንተካ ሴራ ፁአፐ ኡዬታፐ አትሽን፥ ጮ አተከታ።
JER 49:13 ባሶራ ካታማይ ባይሳ ግድድ አታና፤ እያ በእዳ አሳ ኡባስ ዳጋማስ፥ ቀልቅሰꬃስነ ባደꬃስ አታና። እያ ዩሹዋን ደእያ ጉታ ኡባይ መርናዉ ላለትድ አታና። ሀይሳ ታኒ ታ ሱንꬃን ጫቃይስ” ያጌስ ጎዳይ።
JER 49:14 ታኒ ጎዳፐ ይዳ እስ ኪታ ስአስ። ካዎተꬃታ ግዶ ኪተትዳይስ፥ “ኤዶመ ተቃናዉ ሺቅተ፤ እያራ ኦለታናዉ ደንድተ” ያግስ።
JER 49:15 “ህዛ፥ ታ ነና ካዎተꬃታ ግዶን ጉꬃና፤ አሳ ግዶን ካትዳ አስ ኦꬃና።
JER 49:16 ሹቻ ቆጶንነ ደረ ቦላ ደኤይሶ፥ ነ ዳጋንꬆይነ ነ ኦቶሮይ ነና ጭምስ። ነ ኬꬃ አርጋንꬃዳ ꬎቃን ኬፅኮካ፥ ታ ነና ያፐ ዱገ ዎꬍሳና” ያጌስ ጎዳይ።
JER 49:17 “ኤዶመይ አሰ ዳጋንꬅያ ቢታ ግዳና። ያራ አꬍያ አሳ ኡባይ እያ ꬋዩዋ በእድ፥ ዳጋማና፤ ማላለታና።
JER 49:18 ሶዶመይነ ጋሞር ባንታ ዩሹዋን ደእያ ካታማታራ ꬋይያ ዎደ ሀንዳይሳዳ ኦንካ ያን ዴና፤ አስ ያን ኡተና” ያጌስ ጎዳይ።
JER 49:19 “ዮርዳኖሰ ሻፋ ላንቀን ደእያ ዎራፐ ዶርሳት ሄመትያ ሎኦ ቆሮይ ደእያ በሳ፥ ቆፖና ከይያ ጋሞዳ፥ ታ ኤዶመ አሳታ ቆፖና ኤንታ ቢታፈ የደꬃና። ታ ዶርዳ አስ እያ ቦላ ሹማና። ታ መል ኦኔ? ታ ኦꬃና ግዳባ ተቃናዉ ዳንዳኤይ ኦኔ? ታራ ኤቀታናዉ ዳንዳእያ ሄንꬃንቾይ ኦኔ?
JER 49:20 “ታ ኤዶመ ቦላነ ተማና ካታማ ቦላ ኦꬃናዉ ሀልችዳባነ ቆፕዳባ ስእተ። ኤንታ ናይታ ዎልቃን ጎችድ ኤፋና፤ ሄሳ ጋሶን ኤንታ ሶ አሳይ ዳጋማና።
JER 49:21 ኤዶመ ኩንደꬃ ግርሳይ ቢታ ቃꬃና፤ ኤዶመታ ዋሶይ ዞኦ አባ ጋካናዉ ስኤታና።
JER 49:22 አርጋንꬅ ባ ቀፍያ ምጭድ ዱገ ፓልድ የይሳዳ፥ ሞርከይ ባሶራ ቦላ ያና። ሄ ዎደ ኤዶመ ኦላንቾት እቀꬅ ኦይክዳ ማጫሳዳ ህርጋና” ያጌስ።
JER 49:23 ዳማስቆባ ጎዳይ ሀይሳዳ ያጌስ፤ “ኢታ ኦዳ ስእዳ ግሾ፥ ሀማታነ አርፋዳ ካታማታን ደእያ አሳይ ዬላትስ፤ ያይስ። ዙለይ ሾጭዳ አባዳ ኤንታ ዎዛናይ ሸምፖ ደማናዉ ዳንዳእቤና።
JER 49:24 ዳማስቆይ ዳቡርስ፤ ኤንቲ ዳጋማን ኮኮርድ ባቃትዶሶና፤ ማጫስ እቀꬅ ኦይከይሳዳ መቶይነ ኡንእ ኤንታ ኦይክስ።
JER 49:25 ኡፋይስ ኩምዳ ኤረትዳ ካታማይ ዋንድ ባይሳ ግድዴ?
JER 49:26 ሄ ዎደ ሄ ካታማን ደእያ ያላጋ አደት ካታማ ግዶ ኦገታን ሀይቃና፤ ኦላንቾት ኡባይ ዉራና።
JER 49:27 ታኒ ዳማስቆ ካታማ ድርሳ ግምብያን ታማ የዳና፤ ሄ ታማይ ዎልደ-አዳራ ሚፃ ማና” ያጌስ ኡባፈ ዎልቃማ ጎዳይ።
JER 49:28 ባብሎነ ካዎይ ናቡካዳናፆር ኦልድ ፆንዳ ቀዳረነ ሀፆራ ካዎተꬃታባ ጎዳይ ሀይሳዳ ያጌስ፤ “ደንድድ፥ ቀዳረ አሳ ኦልተ፤ ዶሎሀ ባጋራ ደእያ አሳ ዉርስተ።
JER 49:29 ኤንታ ዱንካነታነ ኤንታ ዉደታ ኤክተ። ኤንታ ገሸታ፥ ኤንታ ሻሉዋነ ኤንታ ግማለታ ኤክተ። ያትድ ኤንታዉ፥ ‘ህንተ ዩሹዋን ዳጋም ደኤስ’ ያግድ ኦድተ።
JER 49:30 ሀፆራን ደኤይሳቶ፥ ባብሎነ ካዎይ ናቡካዳናፆር ህንተ ቦላ ኢታባ ኦꬃናዉ ማቀትድ ኡትዳ ግሾ፥ ባቃትተ፤ አፎን ቆሰትተ” ያጌስ ጎዳይ።
JER 49:31 “ደንዳዳ፤ ህርግ ባይና ሳሮ ደእያ ካዎተꬃታ ኦላ። ኤንታ ካታማ ግምብያስ እብꬅ ዎይኮ ኮበይ ባዋ፤ ኤንቲ ባንታርካ ደኦሶና።
JER 49:32 “ኤንታ ግማለት ቦንቀታና፤ ኤንታ ዉደይ ድኤታና። ባንታ ሁጵያ ጋፃ ሜደይሳታ ጫርኮን ላላና፤ ታ ኡባ በሳራ ኤንታ ቦላ ꬋዮ ኤሀና።
JER 49:33 ሀፆር መርናዉ ዎርካናት ደእያ መላ ቢታ ግዳና። ኦንካ ያን ዴና፤ አስ ያን ኡተና” ያጌስ ጎዳይ።
JER 49:34 ይሁዳ ካዎይ ሰደቅያስ ኮይሮ ካዎትዳ ዎደ፥ ኤላማባ ጎዳፐ ኤርምያሳኮ ይዳ ቃላይ ሀይሳ፤
JER 49:35 ኡባፈ ዎልቃማ ጎዳይ ሀይሳዳ ያጌስ፤ “ኤላማስ ዎልቃ ግድዳ ዶንገ ዱክያ አሳታ ታ ዎꬋና።
JER 49:36 ኡባ በሳራ ታ ኤላማ ቦላ ጫርኮ ኤሀና፤ ኤንታ ሄ ጫርኩዋን ላላና። ሄሳ ግሾ፥ ኤላማ አሳይ ላለትድ ጋኮና ቢት ዴና።
JER 49:37 ኤንታ ሞርከታ ስንꬃንነ ኤንታ ዎꬋናዉ ኮየይሳታ ስንꬃን ታ ኤላማ ዳጋንꬃና። ታ ግታ ሀንቁዋን ኤንታ ቦላ ꬋዮ ኤሀና። ታ ኤንታ ꬋይሳና ጋካናዉ ማሻን የደꬃና።
JER 49:38 ታኒ ኤላማ ካዋነ ኤንታ ሀላቃታ ꬋይሳዳ ታ አራታ ያን ዎꬃና።
JER 49:39 ግዶሽን፥ ዉርሰꬃ ዎደ ታኒ ኤላማ ዛራዳ ኦራꬃና” ያጌስ ጎዳይ።
JER 50:1 ባብሎነነ ባብሎነ አሳባ ናብያ ኤርምያሳ ባጋራ ጎዳይ ኦድዳ ቃላይ ሀይሳ፦
JER 50:2 “ካዎተꬃታ ግዶን ኦድተነ አዋጅተ። ባንድራ ꬎቁ ኦꬅ ኦይክድ፥ አይኮካ ቆሶና፥ ሀይሳዳ ያግድ ኦድተ። ‘ባብሎነይ ኩንድስ! ቤል ጌተትያ ኤቃይ ዬላትስ፤ ማርዱካ ጌተትያ ኤቃይ ካዉይስ። እያ ምስለት ዬላትዶሶና፤ እያ ኤቃት ካዉይዶሶና።
JER 50:3 ፑደሀ ባጋፈ እስ ካዎተꬅ ይድ፥ ባብሎነ ቢታ ꬋይሳና። አሳይነ መሄይ ባቃታና፤ ኦንካ ያን ዴና’ ” ያግስ።
JER 50:4 “ሄ ዎደነ ሄ ጋላስ እስራኤለይነ ይሁድ እስፈ ዬክሸ ይድ ጎዳ ባንታ ፆሳ ኮያና።
JER 50:5 ኤንቲ ፅዮነ ኤፍያ ኦግያ ኦይቻና፤ ባንታ ሶምኡዋ ያ ዛራና። ኤንቲ፥ ፖሎ ዶገቶና መርና ጫቁዋን ጎዳራ” ኦይከታና።
JER 50:6 “ታ አሳይ ꬋይዳ ዶርሳ መላ፤ ኤንታ ሄንꬃንቾት ኤንታ ባለꬅድ፥ ዙማ ቦላ ጉየ የድዶሶና። እስ ዙማፐ ሀራ ዙማ ቦላ ቶይላትድ ባንታ ግርብያ ዶግዶሶና።
JER 50:7 ደምዳ ኡባይ ኤንታ ሻንካትስ። ኤንታ ሞርከት፥ ‘ኑ አይኮካ ባልቦኮ፤ ሀ መቶይ ኤንታ ጋክዳይ፥ ኤንቲ ጎዳ፥ ባንታ ሸምፖ በሳ፥ ባንታ ማይዛታ ኡፋይሳ ቦላ ናጋራ ኦꬅዳ ግሾሳ።’
JER 50:8 “እስራኤለ አሳዉ፥ ባብሎነፐ ባቃትተ፤ ባብሎነ ቢታፈ ከይተ፤ ዉደ ካለꬅያ ኮለ ዴሻ መላ ግድተ።
JER 50:9 ታኒ ፑደሀ ባጋፈ ግታ ካዎተꬃታ ጩጋ ደንꬃዳ፥ ባብሎነ ቦላ ኤሀና ሀናይስ። ኤንቲ እያ ኦልድ ኦይካና፤ ኤንታ ዶንገይ ዱክድ፥ ባሎና ኦላንቾ መላ።
JER 50:10 ባብሎነይ ቦንቀታና፤ እያ ቦንቅያ ኡባይ ካላና” ያጌስ ጎዳይ።
JER 50:11 ባብሎነ አሳዉ፥ ታ አሳ ቦንቀይሳቶ፥ ህንተ ኡፋይትድ ሀሹ ግደታ። ቆሮን ካልዳ ኡሳዳ ፔኑቅደታ፤ ኮርማ ፓራዳ ጫግደታ።
JER 50:12 ሽን ሀእ ህንተ ግታ ካታማይ ዬላታናነ ካዉያና። ካዎተꬃታ ግዶን ባብሎነይ ኡባፈ ላፋ ግዳና፤ ሃꬅ ባይና መላ ቢታ ግዳና።
JER 50:13 ጎዳ ሀንቁዋ ጋሶን፥ ባብሎነይ ꬋያና፤ ላለታና። እያ ማታራ አꬍያ ኡባይ እያ ቦላ ጋክዳ ቦሻ በእድ፥ ዳጋማናነ ማላለታና።
JER 50:14 “ዶንገ ዱከይሳቶ፥ ባብሎነ ኦላናዉ እያ ዩሹዋን ሳልፕተ፤ እ ጎዳ ቦላ ናጋራ ኦꬅዳ ግሾ ህንተ ዶንግያን እያ ዱክተ።
JER 50:15 ኡባ ባጋራ ባብሎነ ቦላ ኦላ ዋሶ ዋስተ፤ ባብሎነይ ኩሸ እሚስ፤ እያ ግምበት ኩንድዶሶና፤ እያ ግምበ ድርሳይ ላለትስ። ጎዳይ እያ ቦላ ሀሎ ከይሸ ደእያ ግሾ፥ ህንተ እያ ቦላ ሀሎ ከይተ። እ ሀራታ ቦላ ኦꬅዳባ ህንተካ እያ ቦላ ኦꬅተ።
JER 50:16 ዘረꬅ ዘረይሳነ ጫካ ዎደ ባጫራ ከየይሳ ባብሎነፐ ꬋይስተ። ꬋይሰይሳታ ማሻ ያይዳ ግሾ፥ ሄ ቢታን ደእያ አሳ ኡባይ ባ ያራኮ ያራኮ ስሚድ ባ ቢታ ቢታ ባቃታና።
JER 50:17 “እስራኤለይ ጋሞይ የደꬅድ ላልዳ ዶርሳ መላ። ኮይሮ አሶረ ካዎይ እያ አሹዋ ምስ፤ ዉርሰꬃን ባብሎነ ካዎይ ናቡካዳናፆር እያ መቀꬃ ꬎግስ።”
JER 50:18 ሄሳ ግሾ፥ ኡባፈ ዎልቃማ ጎዳይ፥ እስራኤለ ፆሳይ፥ “አሶረ ካዋ ታ ሴርዳይሳዳ ባብሎነ ካዋነ እያ ቢታ ሴራና።
JER 50:19 ሽን እስራኤለ፥ እያ ሄንꬃ በሳ ዛራና፤ ቃርመሎሳነ ባሳነ ደረታን እ ሄመታና። እ ኤፍሬማነ ጋላዳ ገዘ ቢታን ካልድ ማና።
JER 50:20 ሄ ዎደ፥ ሀይቆፐ ታ አሽዳ እስራኤለ አሳ ናጋራ ታ አቶ ጋና ግሾ፥ አሳይ እስራኤለን ናጋራ ኮያና፥ ሽን ደሞኮና። ይሁዳን ናጋራ ኮያና፥ ሽን በንተና” ያጌስ ጎዳይ።
JER 50:21 “ምራታይማ ቢታንነ ፕቆዳን ደእያ አሳ ቦላ ደንድድ ኤንታ ኦልተ፤ ዎꬍተ፤ ኤንታ ፖሎ ꬋይስተ። ታ ህንተና ኪትያ ኡባ ኦꬅተ” ያጌስ ጎዳይ።
JER 50:22 ቢታ ቦላ ኦላ ዋሶይ ስኤቴስ፤ ግታ ꬋዮይ ጋክስ።
JER 50:23 ቢታ ኡባ ሊቅስያ ናርቃይ ዋንድ መቅደ! ዋንድ ሊቅደ! ካዎተꬃታ ኡባ ግዶን ባብሎነይ ዋንድ ዳጋንꬅያባ ግድደ!
JER 50:24 ነኖ፥ ባብሎነ፥ ታ ነና ኦይካናዉ ፅሄ ዎꬃስ፤ ኔኒ ኤሮናሽን ገላዳ ኦይከታዳሳ። ኔኒ ጎዳራ ኤቀትዳ ግሾ ኦይከታዳሳ።
JER 50:25 ታኒ ታ ኦላ ሚሽያ ዎꬅያ ኬꬃ ዶያዳ፥ ታ ይሉዋን ኦላ ሚሽያ ያፐ ከሳስ። ሄሳ ኦꬅዳይ፥ ጎዳይ፥ ኡባፈ ዎልቃማ ጎዳይ ባብሎነ ቢታን ኦꬅያ ኦሶይ ደእያ ግሾሳ።
JER 50:26 ያራ ሃራ እያ ቦላ ደንድተ፤ ካꬃይ ደእያ እያ ሻልያ ዶይተ፤ ድኡዋ ካꬃዳ ዶርተ፤ አይብባካ አሾና ዉርስድ ꬋይስተ።
JER 50:27 ቦሩ ሹከይሳዳ ኤንታ ኦላንቾታ ዎꬍተ። ባብሎነ አሳይ ሴረትያ ዎደይ ጋክዳ ግሾ ኤንታ አየ!
JER 50:28 “ድኤትዳ አሳይ ባብሎነፐ ከስ ኤክድ፥ የሩሳላመ ባቃታና። ባብሎነ አሳይ ፆሳ ኬꬃ ቦላ ኦꬅዳባስ ጎዳይ፥ ኤንታ ፆሳይ ሀሎ ከያናይሳ ኤንቲ ፅዮነን ኦዳና።
JER 50:29 ባብሎነ ኦላናዉ ዶንገ ዱክያ ኡባ ፄግተ፤ እሶይካ ከስ ኤኮናዳ እያ ዩሹዋ ተቆ። ጎዳ ቦላ፥ እስራኤለ ጌሻ ቦላ፥ እ ኦቶርትዳ ግሾ፥ እያ ኦሱዋዳ እያዉ ዛርተ። እ ሀራታ ቦላ ኦꬅዳይሳዳ እያ ቦላ ኦꬅተ።
JER 50:30 ሄሳ ግሾ፥ እያ ያላጋ አደት ካታማ ግዶ ኦግያን ሀይቃና፤ ሄ ጋላስ እያ ኦላንቾት ኡባይ ꬋያና” ያጌስ ጎዳይ።
JER 50:31 ጎዳይ፥ ኡባፈ ዎልቃማ ጎዳይ፥ “ኔኒ ሴረትያ ዎደይ ጋክዳ ግሾ፥ ነኖ፥ ኦቶራንቹዋዉ፥ ታ ነ ቦላ ደንዳስ።
JER 50:32 ኦቶራንቾይ ꬉበትድ ኩንዳና፤ እያ ደንꬅያ አስ ዴና። ታ እያ ካታማታ ታማን ኦይꬃና፤ ሄ ታማይ ዩሹዋን ደእያ ኡባ ꬋይሳና” ያጌስ።
JER 50:33 ኡባፈ ዎልቃማ ጎዳይ ሀይሳዳ ያጌስ፦ “እስራኤለ አሳይነ ይሁዳ አሳይ ኡንኤትዶሶና። ኤንታ ድእድ ኤፍዳይሳት ኤንታ ምንꬅድ ኦይክዶሶና፤ ኤንታ የደናዉ ኮይቦኮና።
JER 50:34 ሽን ኤንታ ዎዘይስ ምኖ፤ እያ ሱንꬃይ ኡባፈ ዎልቃማ ጎዳ። እ፥ ኤንታ ቢታስ ሸምፖ እማናዉ ኤንታ ግሾ ሞተቴስ። ሽን ባብሎነ ቢታን ደኤይሳታ ቦላ ዳጋማ የዳና።
JER 50:35 ባብሎነይ፥ ባብሎነን ደኤይሳት፥ እያ ሀላቃትነ እያ ጭንጫት ማሻን ሀይቃና” ያጌስ ጎዳይ።
JER 50:36 “እያ ኤያ ዎርዶ ናበት ማሻን ሀይቆና። ዳጋምያ እያ ዎልቃማ ኦላንቾት ማሻን ሀይቃና።
JER 50:37 እያ ፓራታ ቦላ፥ እያ ፓራ ጋረታ ቦላነ ማጫሳ መላ ግድዳ እያ አላጋ ኦላንቾታ ቦላ ማሽ ዮ። እያ ሻሉዋ ምንጅያ ኬꬃ ቦላ ማሽ ዮ፤ እያ ቡቁራ ኡባይ ቦንቀታና።
JER 50:38 ባብሎነን ኤቅ ኩምዳ ግሾነ ዳጋማን ኮኮርያ ኤቃት ደእያ ግሾ፥ እያ ሃꬃይ መሎ፤ እያ ቦላ ኮሽ ዮ።
JER 50:39 “ሄሳ ግሾ፥ ባብሎነይ ባዞ ዶአትነ ዎርካናት ደእያ በሲ ግዳና፤ ቃስ ያንቾት ያን ዳና። ያን መርናዉ አስ ዴና፤ የለታፐ የለታ ጋካናዉ አስ ደእያ በሲ ግደና።
JER 50:40 ፆሳይ በን ሶዶመነ ጋሞራ ኤንታ ዩሹዋን ደእያ ካታማታራ ꬋይስዳይሳዳ ባብሎነን ኦንካ ዴና፤ አስ ያን ኡተና” ያጌስ ጎዳይ።
JER 50:41 “ሄኮ፥ አሳይ ፑደሀ ባጋፈ ያና፤ ምኖ ካዎተꬃትነ ዳሮ ካዎት ሳኣ ጋፃፐ ያናዉ ደንድዶሶና።
JER 50:42 ኤንቲ ባንታ ዶንግያነ ቶራ ኦይክዶሶና፤ ኤንቲ ዎዛና ምኖነ የድ ማሮና አስ። ኤንቲ ባንታ ፓራ ቶግድ ብያ ዎደ፥ ቤታይ ሾጭያ አባ ጉንꬃዳ ሀኔስ። ነኖ፥ ባብሎነ፥ ኤንቲ ኡባይ ኦላስ ጊግዳ አስ ግድድ ነ ቦላ ሳልፕዶሶና።
JER 50:43 “ባብሎነ ካዎይ ሄሳ ስእያ ዎደ እያ ኩሸይ ዳቡርድ ስልስ፤ እቀꬅ ኦይክዳ ማጫሳዳ ኡንኤትስ።
JER 50:44 “ዮርዳኖሰ ሻፋ ላንቀን ደእያ ዎራፐ፥ ሎኦ ቆሮይ ደእያ በሳፈ ቆፖና ከይያ ጋሞዳ፥ ታ ያዳ፥ ባብሎነ አሳ ኤንታ ቢታፈ የደꬃና። ሄሳፈ ጉየ፥ ታ ዶርዳ አስ እያ ቦላ ሹማና፤ ያትን ታ መል ኦኔ? ታ ኦꬃና ግዳባ ተቃናይ ኦኔ? አይ ሄንꬃንቾይ ታራ ኤቀታናዉ ዳንዳኢ?
JER 50:45 ሄሳ ግሾ፥ ጎዳይ ባብሎነ ቦላነ ባብሎነ ቢታ ቦላ ሀልችዳባነ ቆፕዳባ ስእተ። ኤንታ ናይታ ዎልቃን ጎችድ ኤፋና፤ ሄሳ ጋሶን ኤንታ ሶ አሳ ኡባይ ዳጋማና።
JER 50:46 ባብሎነ ኩንደꬃ ግርሳይ ቢታ ቃꬃና፤ ባብሎነ ዋሶይ ካዎተꬃታ ኡባን ስኤታና” ያጌስ።
JER 51:1 ባብሎነ አሳነ ባብሎነ ቢታ ꬋይስያ ጫርኮ ኪታና።
JER 51:2 ታኒ ባብሎነ ቦላ ጫርኮዳ ፑንያ አላጋታ ኪታና። እያ ꬋዩዋ ጋላስ ኤንቲ ኡባ በሳራ እያ ኡንኤꬃና።
JER 51:3 እያ ኦላንቾት ዶንግያ ዱካና ጋካናዉ ዎይኮ ባንታ ኦላ ሚሽያ ዳንጫና ጋካናዉ ናጎፕተ። እያ ያላጋ አደታስ ምሸቶፕተ፤ እያ ኦላንቾታ ፖሎ ꬋይስተ።
JER 51:4 ኤንቲ ባብሎነ ቢታን ሹከታና፤ እ ዳባባን ጫደትድ ኩንዳና።
JER 51:5 ኤንቲ ቢታ ናጋራን ኩንꬅኮካ፥ ፆሳይ፥ ኡባፈ ዎልቃማ ጎዳይ፥ እስራኤለ ጌሻይ፥ እስራኤለነ ይሁዳ አምእዳ የግድ አግቤና።
JER 51:6 ባብሎነፐ ባቃትተ፤ እሶይ እሶይ ባ ሸምፑዋ አሾ። እ ኦꬅዳ ናጋራ ጋሶን ህንተ ዉሮፕተ። ሀ ዎደይ ታኒ ጎዳይ ሀሎ ከይያ ዎደ።
JER 51:7 ባብሎነይ ሳአን ደእያ አሳ ኡባይ ኡይድ ማꬆትያ፥ ዎይነ ኡሽ ትገትያ፥ ታ ኩሸን ደእያ ዎርቃ ዋንጫ መላ። ካዎተꬃት ኡባይ ሄ ዎይነ ኡሻ ኡይድ ጎይዶሶና።
JER 51:8 ባብሎነይ ቆፖና ኩንድድ መቅስ። ሄሳ ግሾ፥ እያዉ ዬክተ፤ እ ፓፃነኮ ኦን ኤር እያ ማዱንꬃስ ꬋለ እምተ።
JER 51:9 ባብሎነን ደእያ አላጋ አሳይ፥ “ኑ ባብሎነ ፓꬃናዉ ኮይዳ፤ ሽን ፓፃናዉ ዳንዳእቤና። እያ ፕርዳይ ሃክድ ሳሎ ጋክዳ ግሾነ ሻራ ጋካናዉ ꬎቁ ግዳ ግሾ እያ አግድ ኑ ቢታ ስሞስ” ያግዶሶና።
JER 51:10 እስራኤለ አሳይ፥ “ጎዳይ ኑስ ፕርድዳ ግሾ፥ ፅዮነ ብድ፥ ጎዳይ ኑ ፆሳይ ኦꬅዳባ ኦዳና” ያጋና።
JER 51:11 “ጎዳይ ባብሎነ ꬋይሳናዉ ቆፋ ቃችዳ ግሾ፥ ሜዶና ካዎታ ደንꬅስ። እ ባ ኬꬃ ግሾ ሀሎ ከያናዉ ቆፕስ። ሜዶና ሀላቃት፥ ‘ዶንገ ቶራ ሌፍተ፤ ጎንዳለ ኦይክተ።
JER 51:12 ባብሎነ ቦላ ኦላ ባንድራ ደንꬅተ፤ ምንꬅድ ናግተ። ዎቸይሳታ ኤንታ በሳን በሳን ዎꬅተ፤ ዙግድ ጫድያ ኦላንቾታ ጊግስተ’ ” ያግዶሶና። ጎዳይ ባብሎነ አሳ ቦላ ቆፕዳባነ ባ ግዳባ ኦꬃና።
JER 51:13 ባብሎነ፥ ኔኒ ዳሮ ሻፋትነ ዱረተꬅ ኩምዳ ቢታ፥ ሽን ነ ዉርሰꬃይ ጋክስ፤ ኔኒ በሶና ኦገን ሺሽያ ጎአይ አትስ።
JER 51:14 ኡባፈ ዎልቃማ ጎዳይ፥ “ቦለይ ቢታ ኩመይሳዳ ታኒ አሳ ነ ቢታን ኩንꬃና፤ ኤንቲ ነና ፆንዳ ኡፋይሳን ባንታ ቃላ ꬎቁ ኦꬅድ ነ ቦላ ጋይራና” ያግድ ባ ሱንꬃን ጫቅስ።
JER 51:15 ጎዳይ ባ ዎልቃን ሳኣ መꬍስ፤ ባ ጭንጫተꬃን ቢታ ባስስ፤ ሳሎታ ባ አኬካን ምጭስ።
JER 51:16 እ ኪትያ ዎደ፥ ሳሎን ደእያ ሃꬃት ጉሞሶና። ሻራታ ሳኣ ጋፃፐ ኤሄስ፤ እር ቡክያ ዎደ ዎልአንꬅ ዎልአሜስ፤ ባ ምንጃ በሳፈ ጫርኩዋ ከሴስ።
JER 51:17 አስ ኡባይ ኤያነ አኬክ ባይናይሳ፤ ኤንታ ምስለት ዎርዶነ ሸምፖይ ባይናይሳታ ግድያ ግሾ፥ ዎርቃ ሼሽድ ኤቃ መይሳት ዬላትዶሶና።
JER 51:18 ሄ ምስለት ፓꬆናይሳታነ ከትዳይሳታ፤ ኤንታ ቦላ ፆሳይ ፕርድያ ዎደ ኤንቲ ꬋያና።
JER 51:19 ሽን ያይቆባ ፆሳይ ኤንታ መላ ግደና፤ ኡባባ መꬍዳይ እያ። እ ባዉ ዶርዳ ኮቻይ እስራኤለ አሳ፤ እያ ሱንꬃይ ኡባፈ ዎልቃማ ጎዳ።
JER 51:20 “ባብሎነ፥ ነ ታ ናርቃነ ታ ኦላ ሚሸ፤ ነና ጎኤታዳ ታኒ ቢታታ መንረꬃስ፤ ካዎተꬃታ ꬋይሳስ።
JER 51:21 ነና ጎኤታዳ ፓራታነ ፓራ ቶገይሳታ፤ ፓራ ጋረታነ ኤንታ ላገይሳታ መንረꬃስ።
JER 51:22 ነና ጎኤታዳ ማጫነ አደ፥ ጭማነ ናይታ ፓንꬅነ ጌላኦ መንረꬃስ።
JER 51:23 ሄንꬃንቹዋነ እያ ዉድያ፥ ጎየይሳነ እያ ዋꬃ ቦራታ፥ ደርያ ሃረይሳታነ ሀላቃታ ነና ጎኤታዳ መንረꬃስ” ያጌስ ጎዳይ።
JER 51:24 “ባብሎነይነ ባብሎነ አሳይ ፅዮነ ቦላ ኦꬅዳ ኢታ ኦሱዋ ግሾ ህንተ ፄልሽን ታ ሀሎ ከያና” ያጌስ ጎዳይ።
JER 51:25 “ነኖ፥ ባብሎነ፥ ነ ቢታ ꬋይስያ ዙማ መላ፤ ሽን ታ ጎዳይ ነና እፃስ። ታኒ ታ ኩሽያ የዳዳ፥ ነና ዙማ ቦላፈ ዱገ ጎንዶርሳና፤ ኔኒ ፁገትዳ ዙማ ግዳዳ አታና።
JER 51:26 ኔፐ ባሶን የግያ ዎይኮ ግምቤስ ኤከትያ ሹች ዴና፤ ነ መርናዉ ባይሳ ግዳና” ያጌስ ጎዳይ።
JER 51:27 “ባብሎነ ቦላ ኦላ ባንድራ ደንꬅተ፤ አሳ ግዶን ሞይዘ ፑንተ። እያ ኦላናዉ አሳ ኡባ ጊግስተ፤ አራራተ፥ ምናነ አስካናዛ ካዎተꬃታ ፄግተ። ኦላ ሀላቃታ ሹምተ፤ ቦለ መላ ዳሮ ፓራታ ኤህተ።
JER 51:28 ባብሎነ ኦላናዉ ካዎተꬃታ ኡባ ጊግስተ፤ ሜዶና ካዎታ፥ ኤንታ ሀላቃታ፥ ደርያ ሃረይሳታነ ኤንቲ ሃርያ ቢታ አሳ ኡባ ደንꬅተ።
JER 51:29 “ባብሎነይ ኦንካ ዶና ባይሳ ኦꬃናዉ ጎዳይ ሀልችዳ ሀልቹዋ ፖልያ ግሾ፥ ቢታ ኡባይ ኮኮረስነ ፖርቃቴስ።
JER 51:30 ባብሎነ ኦላንቾት ኦላ አግድ፥ ባንታ ሚፃን ኡትዶሶና። ኤንታ ዎልቃይ ላፍን፥ ማጫሳ መላ ግድዶሶና። ኤንታ ኬꬃት ፁገትዶሶና፤ ካታማ ፐንግያ ኮበ ምꬃት መቅዶሶና።
JER 51:31 ሀ ጋፃፐ ህን ጋፃ ጋካናዉ፥ ካታማይ ሞርከን ኦይከትዳይሳ ባብሎነ ካዋስ ኦዳናዉ፥ ዎፀይስ ዎፀይሳ ካልድ፥ ኪተትዳይስ ኪተትዳይሳ ካልድ ቦሶና።
JER 51:32 ሻፋራ ፕንያ በሳት ኦይከትዳይሳ፥ ሃꬃ ጋፃን ደእያ ዎራይ ፁገትዳይሳነ ኦላንቾት ዳጋምዳይሳ ኤንቲ ካዋስ ኦዳናዉ ዎፆሶና” ያጌስ ጎዳይ።
JER 51:33 “ባብሎነ ቢታይ ካꬅ ቡክያ ዉዱማ ግዳና፤ ጉꬃ ዎደፐ ጉየ እ ጫከትያ ዎደይ ያና” ያጌስ ኡባፈ ዎልቃማ ጎዳይ፥ እስራኤለ ፆሳይ።
JER 51:34 ባብሎነ ካዎይ ናቡካዳናፆር ኑና ዉርስድ ምስ፤ ኑ ካታማ ካይሳ ኦቶ ከስስ። ዳወይ ምተይሳዳ እያ ምትስ፤ ማልኦባ ምድ ኩንይሳዳ እ ኑ ሻሉዋን ባ ጋንጅያ ኩንꬅስ፤ አትዳይሳ ሙጭድ ጩትስ።
JER 51:35 ፅዮነይ፥ “ባብሎነይ ኑ ቦላ ኦꬅዳ ኢታባ ኡባይ እያ ቦላ ስሞ” ያጎሶና። የሩሳላመይ፥ “ኑ ሱꬃ አጮይ ባብሎነ አሳ ኦይኮ” ያጎሶና።
JER 51:36 ሄሳ ግሾ፥ ጎዳይ የሩሳላመ አሳ ሀይሳዳ ያጌስ፦ “ታ ነ ግሾ ሞተታና፤ ነ ሃሉዋ ታ ከያና። ታኒ ባብሎነ ሃꬃነ ፑልቶታ መልሳና።
JER 51:37 ባብሎነይ ላለꬃ ዶረነ ዎርካናት ጉፕያ በሲ ግዳና። እያ በእያ ኡባይ ዳጋማናነ ቀልቅሳና፤ ያን እስ አስካ ዴና።
JER 51:38 ባብሎነ አሳ ኡባይ ጋሞዳ ጉዶሶና፤ ጋሞ ማራዳ ዳሮሶና።
JER 51:39 ኤንታ አሳተꬃይ ሆእያ ዎደ፥ ታ ኤንታዉ ኡሻ ግብራ ጊግሳና። ኤንቲ ማꬆታና ጋካናዉ ታ ኤንታ ኡሻና፤ ኤንቲ ዛሪድ ደንዶና መላ መርናዉ ꬍስካና” ያጌስ ጎዳይ።
JER 51:40 ሹካናዉ ኤፍያ ኡርገዳ፥ ማራዘዳነ ኮለዳ ታኒ ኤንታ ሹካ በሲ ኤፋና።
JER 51:41 “አሳ ኡባይ ሳቢያ ባብሎነይ ዋንድ ኦይከትደ! ባብሎነይ ካዎተꬃታ ግዶን ዋንድ ዳጋንꬅያባ ግድደ!
JER 51:42 ባብሎነ ሞርከት አባ ቤታይ ደንደይሳዳ ደንድድ ካታማን ኤልዶሶና።
JER 51:43 እያ ካታማት ላለትድ፥ ዳጋንꬅያባ ግድዶሶና፤ ሃꬅ ባይና መላ ቢታ ዳንዶሶና፤ አስ ዶና በስነ ኦንካ ካንꬅድ አꬎና በሲ ግድዶሶና።
JER 51:44 ቤላ ጌተትያ ባብሎነ ኤቃ ታ ሴራና፤ እ ምትዳባ እያ ኡሉዋፐ ከሳና። ህዛፐ ጉየ፥ ካዎተꬃት እያኮ ጎገይሳ አጋና፤ ባብሎነ ግምበይ ኩንዳና።
JER 51:45 “ታ አሳዉ፥ እያ ግዶፈ ከይተ! ህንተ፥ ጎዳ ሀንቆ ሱሉዋፐ ህንተና አሽተ!
JER 51:46 ቢታን ኦደትያ ኦዳ ስእያ ዎደ ኡፋይስ ቃንፆፍተነ ያዮፍተ። ላይꬃን ላይꬃን ኦድ ካልድ ካልድ ያና። ሄ ዎደ ካዎይ ካዋ ቦላ ደንድያ ማካላ ኦድ ቢታን ስኤታና።”
JER 51:47 “ሄሳ ግሾ፥ ታኒ ባብሎነ ኤቃ ምስለታ ሴርያ ጋላስ ያና። ቢታ ኡባይ ዬላታና፤ ሀይቅዳይሳት ኡባይ ካታማ ግዶን ኩንዳና።
JER 51:48 ፑደሀ ባጋፈ ያና ꬋይሰይሳታ ኩሸን ባብሎነይ ገልያ ዎደ ሳሎንነ ሳአን ደእያ ኡባባይ እልላና።
JER 51:49 ባብሎነይ፥ እስራኤለ አሳነ ሳአን ደእያ አሳ ኡባ ዎꬍዳይሳዳ ባብሎነ አሳይ ሀይቃናዉ ኮሼስ።
JER 51:50 ታ አሳዉ፥ ኦላፐ ከስ ኤክዳይሳቶ፥ ቢተ፤ ሀይሳን ኤቆፍተ። ህንተ ደእያ ሃሆ ቢታን ታና ጎዳ ሀሳይተ፤ የሩሳላመ ቆፕተ።”
JER 51:51 ህንተ፥ “ኑኒ ጫየትዳ ግሾ ካዉይዳ፤ አላጋት ፆሳ ኬꬃን ደእያ ጌሻ በሳታ ገልዳ ግሾ፥ ኑ ዬላ ማእዳ” ያግደታ።
JER 51:52 ሽን “ታኒ ጎዳይ ባብሎነ ኤቃታ ሴርያ ዎደይ ያና። ማዱንፅዳይሳት ቢታ ኡባን ኦላና።
JER 51:53 ባብሎነይ ሳሎ ፑደ ከይድ፥ ያን ሚፃ መꬋናዉ ዳንዳእያኮካ፥ ያ ጋካናዉ ከይድ፥ እያ ያን ꬋይስያ አስ ታኒ ኪታና” ያጌስ ጎዳይ።
JER 51:54 “ባብሎነን ዋሶይ፥ ባብሎነ ቢታን ግታ ꬋዮ ግርስ ስኤታና።
JER 51:55 ጎዳይ ባብሎነ ꬋይሳና፤ እያ ዎልቃማ ግርሳ ስእ ኦꬃና። አባ ቤታዳ ጉምያ ሞርከት ኦልሸ ጬቀታና።
JER 51:56 ꬋይሰይሳት ባብሎነ ቦላ ያና፤ እያ ኦላንቾት ኦይከታና፤ ኤንታ ዶንገይ መቃና። ታኒ ጎዳይ ሀሎ ከይያ ፆሰ ግድያ ግሾ፥ ኤንታ ኦሱዋዳ ኤንታዉ ዛራና።
JER 51:57 እያ ሀላቃታ፥ እያ ጭንጫ አሳታ፥ እያ ደርያ ሃረይሳታ፥ እያ ቶራ ሞጮናታነ እያ ኦላንቾታ ማꬆያና። ኤንቲ ዛሪድ ደንዶና መላ መርናዉ ꬍስካና” ታኒ ካዎይ፥ ኡባፈ ዎልቃማ ጎዳ ጌተተይስ ሀይሳ ኦዳይስ።
JER 51:58 “ግታ ባብሎነ ግምበይ ኩንዳና፤ እያ አዱሳ ፐንገት ታማን ፁገታና። አሳይ ኦꬅዳባ ኡባይ ሀዳ፤ ካዎተꬃት ዳቡርያባይ ታማሳ” ያጌስ ኡባፈ ዎልቃማ ጎዳይ።
JER 51:59 ማሰያ ናኣ፥ ኔራ ናአይ ሳራይ ካዋ ሰደቅያሳ ሹማ። ሰደቅያስ ይሁዳን ካዎትዳ ኦይዳንꬆ ላይꬃን፥ ሳራይ እያራ ባብሎነ ብያ ዎደ ኤርምያስ ሳራያ ቦላ ኪታ የድስ።
JER 51:60 ባብሎነ ቦላ ጋካናዉ ደእያ ኢታባ ኡባነ ባብሎነ ፄልያ ሀራባ ኡባ ኤርምያስ ማፃፋን ፃፍስ።
JER 51:61 ሳራያኮ፥ “ኔኒ ባብሎነ ጋክዳ ዎደ ነ ቃላ ꬎቁ ኦꬃዳ አሳስ ሀ ማፃፋ ናባባ።
JER 51:62 ቃስ ሀይሳዳ ያጋዳ ዎሳ፦ ‘አቤት ጎዳዉ፥ ኔኒ ሀ በሳ ꬋይሳና፤ ሀ በሳን ሸምፖራ ደእያ መተꬅ፥ አስነ መሄይ ዴና፤ ሀ በሳይ መርናዉ መላ ቢታ ግዳና’ ያጋ።
JER 51:63 ሀ ማፃፋ ናባባ ዉርስዳፐ ጉየ፥ ማፃፋ ሹቻራ ጋꬃ ቃቻዳ፥ ኤፍራፂሳ ሻፋን ሆላ።
JER 51:64 ታኒ ጎዳይ እያ ቦላ ኤህያ ꬋዩዋ ጋሶን፥ ባብሎነይ ዛሪድ ደንዶና መላ ሀይሳዳ ሙከታና” ያጋ። ኤርምያስ ኦድዳ ቃላይ ሀይሳን ዉርስ።
JER 52:1 ሰደቅያስ ካዎትያ ዎደ፥ እያዉ ላይꬅ ላታማነ እስኖ፤ እ የሩሳላመን ታማነ እስ ላይꬅ ካዎትስ። እያ አየ ሱንꬃይ አምፃሎ፤ እያ ልብና ካታማን ደእያ ኤርምያሳ ናአ።
JER 52:2 እዮአቄም ኦꬅዳይሳዳ ሰደቅያስ ጎዳ ስንꬃን ኢታባ ኦꬅስ።
JER 52:3 ጎዳይ የሩሳላመ ቦላነ ይሁዳ ቦላ ሀንቀትዳ ግሾ ኤንታ ባ ስንꬃፈ ድግስ። ሰደቅያስ ባብሎነ ካዋ ቦላ ማካልስ።
JER 52:4 ሰደቅያስ ካዎትዳ ኡዱፉንꬆ ላይꬃን፥ ታማንꬆ አጌናን፥ ታማንꬆ ጋላሳን ባብሎነ ካዎይ ናቡካዳናፆር ባ ኦላንቾታ ኡባ ኤክድ፥ የሩሳላመ ተቅስ። ኤንቲ እያ ዩሹዋን ቢታ ዶርዶሶና።
JER 52:5 ሰደቅያስ ካዎትዳ ታማነ እስንꬆ ላይꬅ ጋካናዉ፥ የሩሳላመይ ተቀትድ ጋምእስ።
JER 52:6 ሄ ላይꬅ ኦይዳንꬆ አጌናን፥ ኡዱፉንꬆ ጋላሳን፥ ኮሽ ሱልን፥ አሳይ ምያባ ꬋይስ።
JER 52:7 ካታማ ግምበይ እስ ባጋራ መቅስ። ባብሎነ አሳይ ካታማ ዩሹዋ ናግኮካ፥ ይሁዳ ካዋ ኦላንቾት ኡባይ ቃማ ካዎ አታክልተ በሳ ኤፍያ ኦግያ ኦይክድ፥ ናምኡ ድርሳ ግምበታ እስፈ ጋꬅያ ፐንግያራ ከይድ ባቃትዶሶና። ኤንቲ ዮርዳኖሰ ዛንጋራኮ ስሚድ ብዶሶና።
JER 52:8 ሽን ባብሎነ ኦላንቾት ካዋ ሰደቅያሳ የደꬅድ፥ እያርኮ ደምባ ጋꬅሸ ኦይክዶሶና። እያ ኦላንቾት ኡባይ እያ ካድድ ላለትዶሶና።
JER 52:9 ሄሳፈ ጉየ፥ እያ ሀማታ ቢታን፥ እርብላ ካታማን ደእያ ባብሎነ ካዋኮ ኤፍዶሶና። ያን ናቡካዳናፆር ሰደቅያሳ ቦላ ፕርድስ።
JER 52:10 ሰደቅያሳ አደ ናይታ ሰደቅያስ ፄልሽን፥ ባብሎነ ካዎይ ዎꬍስ። ይሁዳ ሀላቃታ ኡባ ያን እርብላ ካታማን ዎꬍዶሶና።
JER 52:11 ሰደቅያሳ አይፈታ ዎጭድ፥ ሳንꬃላታን ቃችድ፥ ባብሎነ ኤፍዶሶና። እ ሀይቃና ጋካናዉ፥ ያን ቃሾ ኬꬃን እያ ዎꬅዶሶና።
JER 52:12 ናቡካዳናፆር ባብሎነን ካዎትዳ ታማነ ኡዱፉንꬆ ላይꬃን፥ እቻሻንꬆ አጌናን፥ ታማንꬆ ጋላሳን፥ ካዋ ሞርናይ፥ ካዋ ናገይሳታ ሀላቃይ ናቡዛርዳን የሩሳላመ ገልስ።
JER 52:13 ፆሳ ኬꬃ፥ ካዎ ጋꬎነ የሩሳላመን ደእያ ኬꬃታ ኡባ ታማን ፁግስ፤ ቃስ ግታ ኬꬃታ ኡባ ፁግስ።
JER 52:14 ባብሎነ ኦላንቾት ኡባይ ካዋ ናገይሳታ ሀላቃ ኪታን፥ የሩሳላመ ካታማ ዩሹዋን ደእያ ድርሳ ግምብያ ኡባ ላልዶሶና።
JER 52:15 ናቡዛርዳን ጉꬃ ማንቆታ፥ ካታማን አትዳ አሳታ፥ ካድድ ባብሎነ ኦላንቾታን ገልዳ አሳታነ ኩሸ ሂላንቾታ ድእድ ባብሎነ ኤፍስ።
JER 52:16 ሽን ናቡዛርዳን ማንቆታፐ ጉꬃ አሳ ዎይነ ቶካናዳነ ጋደ ጎያናዳ ይሁዳን አግስ።
JER 52:17 ባብሎነት ፆሳ ኬꬃ ካረን ኤቅዳ ናሰ ብራታ ቱቀታ፥ ጫና ጋረታነ ግታ ከረታ መንረꬅድ፥ ናሰ ብራታ ኡባ ባብሎነ ኤፍዶሶና።
JER 52:18 ከረታ፥ አካፋታ፥ ፆምፐ ሻሉዋ ፄራ ፕትያባታ፥ ፃሮታ፥ እፃነ ሳነታነ ያርሾ ዎደ ጎኤትያ ናሰ ብራታ ሚሸታ ኡባ ኤፍዶሶና።
JER 52:19 ካዋ ናገይሳታ ሀላቃይ ናቡዛርዳን ዎርቃፈነ ብራፐ ኦሰትዳ ድስተታ፥ ታማ ኤክያ ሚሸታ፥ ፃሮታ፥ ላፋ ከረታ፥ ፆምፐ ዎꬅያ ኮጫታ፥ እፃነ ሳነታነ ኡሻ ያርሾስ ጎኤትያ ኦቶታ ኤፍስ።
JER 52:20 ካዎይ ሶሎሞነይ ፆሳ ኬꬃን ኦሰትያባስ መꬍዳ ናምኡ ቱሳት፥ ግታ ከረታ፥ ታማነ ናምኡ ኮርማታ ምስለትነ ጫና ጋረት መትዳ ናሰ ብራታት ምዛነን ልካናዉ ዳንዳኤተና።
JER 52:21 ናምኡ ቱሳት እስ መላ ግድድ፥ እሶይ እሶይ ታማነ ሆስፑን ዋꬋ አዱሰ። ኤንታ ኡባይ ታማነ ናምኡ ዋꬋ። ኤንታዉ ግዶይ ካይስ ግድድ፥ ብራታይ ኦይዱ ብራ ኬና ኦርደ።
JER 52:22 ናምኡ ቱሳታ ሁጵያን ናሰፐ ኦሰትዳ ጉምቦት ደኦሶና። እስ ጉምቡዋ ጌሳይ እቻሹ ዋꬋ ግድድ፥ ዩሾይ ግተ ምስለንነ ኦሮማነ ምስለን አሌቀትድ ኡትስ። ናምአንꬆ ጉምቦይካ እያ መላ።
JER 52:23 ጉምቦታስ ምየን ምየን ደእያ ኦሮማነታ ምስለት ኡዱፉን ታማነ ኡሱፑና፤ ዩሹዋን ደእያ ግተ ምስለታፐ ቦላ ባጋራ ደእያ ኦሮማነ ምስለት እስ ፄታ።
JER 52:24 ካዋ ናገይሳታ ሀላቃይ ናቡዛርዳን ካህነ ሀላቃ ሳራያ፥ እያ ካልያ ካህንያ ሶፎንያሳነ ፐንገ ናግያ ሄꬑ አሳታ ኦይክስ።
JER 52:25 ካታማን ደእያ አሳፐ ቶራ ሞጮና፥ ካዋ ዞረይሳታፐ ላፑን አሳታ ኤፍስ። ቶራ ሞጮና፥ ፃፍያ፥ አሳ ኦላንቾታ ዶርያ ሀላቃነ ሀራ ኡሱፑን ታሙ አሳታ ኤፍስ።
JER 52:26 ናቡዛርዳን ኤንታ ኡባ ኤክድ፥ ባብሎነ ካዋኮ፥ እርብላ ካታማ ኤፍስ።
JER 52:27 ሀማታ ቢታን፥ እርብላ ካታማን፥ ባብሎነ ካዎይ ኤንታ ኡባ ዎꬍስስ። ሄሳዳ ሀንድ፥ ይሁዳ አሳይ ባንታ ቢታፈ ድኤትድ ብዶሶና።
JER 52:28 ናቡካዳናፆር ካዎትዳ ላፑንꬆ ላይꬃን፥ ሄꬑ ሙኩሉነ ላታማነ ሄꬑ አሳይ ይሁዳፐ ድኤትስ።
JER 52:29 ታማነ ሆስፑንꬆ ላይꬃን ሆስፑን ፄታነ ሀስታማነ ናምኡ አሳይ የሩሳላመፐ ድኤትስ።
JER 52:30 ናቡካዳናፆር ካዎትዳ ላታማነ ሄꬓንꬆ ላይꬃን ካዋ ናገይሳታ ሀላቃይ ናቡዛርዳን ላፑን ፄታነ ኦይታማነ እቻሹ አሳ ድእስ። ድኤትዳ አሳ ታይቦይ ኦይዱ ሙኩሉነ ኡሱፑን ፄታ።
JER 52:31 ዮአክን ድኤትዳ ሀስታማነ ላፑንꬃ ላይꬃን፥ ታማነ ናምአንꬆ አጌናን፥ ላታማነ እቻሻንꬆ ጋላሳን፥ ዮር-ማሮዳክ ካዎትዳ ላይꬅ ይሁዳ ካዋ ዮአክና ቦንችድ፥ ቃሾፐ ብርሽስ።
JER 52:32 ዮር-ማሮዳክ ዮአክናራ ማልኦ ቃላ ኦደትድ፥ ባብሎነን ድኦን ደእያ ሀራ ካዎታ ኡባፈ አꬅድ እያ ቦንችስ።
JER 52:33 ሄሳ ግሾ፥ ዮአክን ቃሾ ኬꬃን ማእያ ማኡዋ ላምድ፥ ባ ደኦ ላይꬃ ኡባን ካዎ ጋይታፐ ምሸ ደእስ።
JER 52:34 ዮአክን ሀይቃና ጋካናዉ፥ ጋላስ ጋላስ እያዉ ኮሽያባ ኡባ ባብሎነ ካዎይ እሚስ።
LAM 1:1 ካሰ አስ ኩምዳ ካታምያ ሀእ ዋናዳ አስ ባይና በሲ ግዳዴ? ካሰ ካዎተꬃታ ግዶን ግታ ግድዳራ ሀእ ዋናዳ አምኦ ግዳዴ? ካታማታ ግዶን ካዎ ግድዳራ ሀእ ዋናዳ አይለ ግዳዴ?
LAM 1:2 ቃማ ይባታ ዬሆ ዬካሸ አቃዉሱ፤ አፉꬅ እ አይፈ ካረራ ዱገ ዎꬌስ። ካሰ እዮ ዶሰይሳታፐ ሀእ እዮ ምንꬅያ እሶይካ ባዋ። እ ላገት እዮ አꬅድ እምዶሶና፤ እዉ ሞርከ ግድዶሶና።
LAM 1:3 ይሁድ ናቀታዳ፤ አይለታዳ ድኤታሱ፤ ሀእ ካዎተꬃታ ግዶን ደአዉሱ፤ ሽን ሸምፖ በሲ ደማቡኩ። እያ መቶታዳ ደእሽን፥ የደይሳት እዮ ደምዶሶና።
LAM 1:4 ላይꬃ ባኣለ ቦንቻናዉ ያ አስ ባይና ግሾ፥ ፅዮነ ኦገት ዬኮሶና። እ ድርሳ ፐንገት ባይሳትዶሶና፤ እ ካህነት ኦሎሶና። ያን ደእያ ጌላኦ ናይት ኡንኤትዶሶና፤ እያካ ኡንኤታዳ ዬካዉሱ።
LAM 1:5 እ ሞርከት እዉ ጎዳ ግድዶሶና፤ ኤንታዉ እንጀትን ደእዶሶና። እ፥ ናጋራ ጋሶን ጎዳይ እዮ ኡንኤꬅስ፤ እ ናይት ሞርከታን ድኤትድ ብዶሶና።
LAM 1:6 ፅዮን ቦንቾይ ኢፐ ቃረትስ፤ እ፥ ሀላቃትካ ምያ በሲ ꬋይዳ ጋራዳ ሀንዶሶና፤ ኤንቲ ዎልቃ ꬋይድ ባንታና የደይሳታ ስንꬃፈ ባቃትዶሶና።
LAM 1:7 የሩሳላመይ ባ መቱዋነ ባ ኡንአ ጋላሳን፥ በን ባ ቦንቾ ሻሉዋ ሀሳያዉሱ። እ፥ አሳይ ሞርከታ ኩሸን አꬍድ እመትዳ ዎደ፥ እዮ ማድያ እሶይካ በንትቤና። እ ሞርከት እዮ ፄልድ፥ እ ꬋዩዋን ሚጭዶሶና።
LAM 1:8 የሩሳላመይ ግታ ናጋራ ኦꬅዳ ግሾ ቱናሱ፤ እዮ ቦንችዳ ኡባይ እ ካሉዋ በእዳ ግሾ ካꬌስ፤ እያ ኦላሸ ጉየ ስማሱ።
LAM 1:9 ቱናተꬅ እ አፍላ ቦላ በንትስ፤ ስንꬃፈ ባ ቦላ ያናባ ቆፓቡኩ። እ ኩንደꬃይ ዳጋንꬅያባ ግድስ፤ እዮ ምንꬅያ ኦንካ ባዋ። እያ፥ “አቤት ጎዳዉ፥ ታ ኡንኤተꬃ በአ! ታ ሞርከት ታና ፆንዶሶና” ያጋሱ።
LAM 1:10 ሞርከት እ ቦንቾ ሻሉዋ ቦንቅዶሶና፤ ካሰ ነ ማባራ ግዶ ገሎና መላ፥ ኔኒ ድግዳ አሳት፥ እ ኬꬃ ገልሽን በአሱ።
LAM 1:11 እ አሳት ኮሻትድ ካꬅ ደማናዉ ኦሎሶና፤ ኤንቲ ደኦን ዳናዉ ባንታ ሻሉዋ ካꬃን ላሞሶና። የሩሳላመይ ሀይሳዳ ያጋሱ፤ አቤት ጎዳዉ፥ ታና ፄላ፤ ታ ካዉሻተꬃ በአ!
LAM 1:12 ህንተኖ፥ ሀይሳራ አይሳቶ፥ ሀይስ ህንተዉ አይኮካ ዳነኔ? አነ በእተ፤ አኬክተ፤ ባ ኤፅያ ሀንቆ ጋላሳን፥ ፆሳይ ታ ቦላ ኤህዳ መቱዋ መላ መቶይ ደኢ?
LAM 1:13 ቦላፈ ታማ ዱገ የድስ፤ ሄ ታማይ ታ መቀꬃ ግዶ ገልስ። ታ ቶሆይ ፅሄን ኦይከትስ፤ ታና ጉየ ዛርስ፤ ታና ጋላስ ኡባ ላባንꬅድ የግ አግስ።
LAM 1:14 ታ ኦꬅዳ ናጋራ ኡባ ሺሽ ቃችድ፥ ቃምባራዳ ታ ጋናን ዎꬅስ፤ ያትድ ታ ዎልቃ ዉርስስ። ታ ኤቀታናዉ ዳንዳኦና አሳስ፥ ታና አꬅድ እሚስ።
LAM 1:15 ጎዳይ ታ ግዶን ደእያ ዎልቃማ ኦላንቾታ ኡባ ድግስ። ታ ያላጋታ ꬋይሳናዉ ዎደ ቃችስ፤ ዎይነ የይሳዳ፥ ጎዳይ ይሁዳ ጌላኦታ የꬍስ።
LAM 1:16 ታኒ ዬካሸ ታ አፉꬃ ጉሰይ ሄሳሳ፤ ታና ምንይነ ካትስያ ኦንካ ባዋ፤ ሞርከይ ጎብን፥ ታ ናይት ኡንኤትዶሶና።
LAM 1:17 ፅዮነይ ባ ኩሽያ ምጫሱ፤ ሽን እዮ ምንꬅያ ኦንካ ባዋ። እ ዩሹዋን ደኤይሳት እዮ ሞርካናዳ ጎዳይ ኦꬅስ። የሩሳላመይ ኤንታ ግዶን ቱና ግዳሱ።
LAM 1:18 እያ ሀይሳዳ ያጋሱ፤ “ጎዳይ ፅሎ፤ እያ ኪተቶና እፅዳይ ታና። ህንተኖ፥ አሳቶ ኡባይ ስእተ፤ ታ መቱዋካ በእተ፤ ታ ፓንꬃትነ ታ ጌላኦት ድኤትዶሶና።
LAM 1:19 ታ ላገታ ፄጋስ፤ ሽን ኤንቲ ታና ጭምዶሶና፤ ካህነትነ ጭማት ባንታ ሸምፑዋ አሻናዉ፥ ካꬅ ኮይሸ ካታማ ግዶን ሀይቅዶሶና።
LAM 1:20 አቤት ጎዳዉ፥ ታ ዋይያ በአ! ታ ጋርሳይ ዳጋምስ። ታኒ ዳሮ ማካልዳ ግሾ፥ ታ ዎዛናይ መቅስ፤ ካረን ማሽ ዉርሴስ፤ ሶን ሀይቆይ ደኤስ።
LAM 1:21 አሳይ ታ ዘለልሳ ስእዶሶና፤ ሽን ታና ምንꬅያ እስ አስካ ባዋ። ታ ሞርከት ታ መቱዋ ስእዶሶና፤ ነ ታ ቦላ ኦꬅዳባን ኡፋይትዶሶና። ኤንቲ ታዳ ሀናና መላ፥ ኤንታ ቦላ ነ አዋጅዳ ጋላሳ ኤሀ!
LAM 1:22 ኤንታ ኢታተꬃ ኡባይ ነ ስን ጋኮ፤ ታ ናጋራ ግሾ ታና ሴርዳይሳዳ ኤንታካ ሴራ፤ ታ ዘለልሳይ ዳርስ፤ ታ ዎዛናይካ መቅስ።”
LAM 2:1 ጎዳይ ባ ሀንቆ ሻራፐ ጋርሳን፥ ፅዮነ ናእዉ፥ ዋትድ ዎꬅደ! እስራኤለ ቦንቹዋ ሳሎፐ ሳአ ሆልስ፤ ባ ሀንቁዋ ጋላስ፥ እያ ቶሆይ የꬍያ በሳ ቆፕቤና።
LAM 2:2 ጎዳይ ይሁዳን ኬꬃታ ኡባ ቃቶና ꬋይስስ፤ ባ ሀንቁዋን ይሁዳ ቢታ ሚፃ ኡባ ላልስ፤ ሄ ካዎተꬃነ ሀላቃታ ሳአን ዱገ የግድ ካዉሽስ።
LAM 2:3 ባ ዎልቃማ ሀንቁዋን እስራኤለ ዎልቃ መንረꬅስ፤ ሞርከይ እያ ኦላናዉ ያ ዎደ ጎዳይ ባ ኡሻቻ ኩሽያ ኤንታ ቦላፈ ድግስ። ባ ዩሹዋን ደእያባ ኡባ ምያ ታማዳ፥ ያይቆባ ቦላ ታማ ላጮይ ኤፅስ።
LAM 2:4 ሞርከዳ እ ባ ዶንግያ ኤንታ ቦላ ዳፍስ፤ ኡንኤꬅያ እያ ኡሻቻ ኩሸይ ጊግስ። አይፌስ ሎእያ አሳ ኡባ ዎꬍስ፤ ፅዮነ ቦላ ባ ሸንያ ታማዳ ቆልስ።
LAM 2:5 ጎዳይ ሞርከዳ ሀንድ፥ እስራኤለ ꬋይስስ፤ ካዎ ጋꬎታነ ሚፃ ኡባ ላልስ ይሁዳ አሳስ ዬሆነ ካዮ ጉጅስ።
LAM 2:6 ባ ኬꬃ አታክልተ ጋደን ደእያ ሻቃራዳ ሾድድ ሆልስ፤ ላይꬃ ባለትነ ሳምባታት ዶገታናዳ ኦꬅስ፤ ባ ግታ ሀንቁዋን ካዋነ ካህንያ ካዉሽስ።
LAM 2:7 ጎዳይ ባ ያርሾ በሳ ካꬍስ፤ ባ ኬꬃ አጋግስ፤ ካዎ ጋꬎታ ግምብያ ሞርከታ ኩሸን የግስ። ላይꬃ ባኣለ ቦንችያ ጋላሳ ዎጫማዳ፥ ሞርከት ፆሳ ኬꬃን ዎጫምዶሶና።
LAM 2:8 ጎዳይ ፅዮን ናኤ ድርሳ ግምብያ፥ ላላናዉ ቃችስ፤ እ ቦላ ዋꬋ ዎዶሮ የግስ። እዮ ꬋይሶና ደእሸ ባ ኩሽያ ዛረና፤ ግምበይነ ሚፃይ እስፈ ኩንዳናዳ ኦꬅስ።
LAM 2:9 የሩሳላመ ፐንገ ሳንቃት ቢታን ሞገትዶሶና፤ ኤንታ ጎርደ ምꬃታ መንረꬅድ ꬋይስስ። ካዎይነ ሞርናት ድኤትድ ካዎተꬃታ ግዶ ብዶሶና፤ ህገ ታማርሰይ ባዋ፤ ናበትካ ህዛፐ ጉየ ቆንጨꬅ በኦኮና።
LAM 2:10 ፅዮነ ጭማት ስእ ግድ ቢታን ኡትዶሶና፤ ባንታ ሁጰን ባና ቆልድ ካዮ ማኦ ማእዶሶና፤ የሩሳላመ ጌላኦት ሳአን ዱገ ሆክዶሶና።
LAM 2:11 ታ አሳይ ꬋይዳ ግሾ፥ ጉꬃ ናይት ካታማ ኦግያ ቦላ ዳቡርድ ኩንድዳ ግሾ፥ ታ አይፈይ አፉꬃን ቱልጫትስ፤ ታ ዎዛናይ አዛኖን ዳጋምስ።
LAM 2:12 ኤንቲ ባንታ አየታኮ፥ “ካꬅ እማ! ሃ እማ” ያግድ ዋሶሶና፤ ካታማ ኦግያን ማዱንፅድ ላባንያ አሳዳ፥ ኤንቲ ዳቡርን ኤንታ ሸምፖይ ኤንታ አየታ ክኦን ከዬስ።
LAM 2:13 የሩሳላመ ናተ፥ ታኒ ነባ አይ ጋኔ? ነ ቆሁዋ ታ አይብራ ግናዮ? ዶሰትዳ ፅዮነ ጌላኤ፥ ታ ነና ዋታዳ ምንꬆ? ነ ማዱንꬃይ አባ መላ ጪሞ፤ ነና ኦን ፓꬃናዉ ዳንዳኢ?
LAM 2:14 ነ ናበት ዎርዶነ ፓꬆና ቆንጨꬅ በእዶሶና፤ ነ ድኤቶና መላ ነ ናጋራ ቆንጭስድ ኦድቦኮና፤ ኤንቲ ባለꬅያ ዎርዶ ቆንጨꬅ ነዉ በእዶሶና።
LAM 2:15 ነ ማታራ አꬍያ ኡባይ ባ ኩሽያ ባቄስ፤ “ቢታን ኡባፈ አꬋዳ ሎእያ ካታምያ ሀኖ? ቢታ ኡባስ ኡፋይስ ጌተትዳ ካታምያ ሀኖ?” ያግድ ነና ቀልቅስሸ ባንታ ሁጵያ ቃꬅዶሶና።
LAM 2:16 ነ ሞርከት ኡባይ ባንታ ዶና ነ ቦላ ዶይዶሶና፤ ነ ቦላ ቀልቅስዶሶና። ባንታ አቻ ቃርጭሸ ሀይሳዳ ያጎሶና፤ ኑ ኤንታ ꬋይስዳ፥ ኑ አሞትዳይ ሄሳ ዉርሰꬃን በእዳ።
LAM 2:17 ጎዳይ ባ ቆፕዳባ ኦꬅስ፤ ካሰ ኦድዳ ባ ቃላ ፖልስ። የሩሳላመስ ቃቶና እዮ ላልስ እ ሞርከት ኡፋይታና መላ፥ ሞርከታ ዎልቃ ምንꬅስ።
LAM 2:18 ፅዮነ፥ ነ ድርሳ ግምበይ ጎዳኮ ዋሶ! ነ አፉꬃይ ቃማነ ጋላስ ሻፋዳ ጎጎ! ነዉካ ሸምፖፋ፤ ነ አይፍያስ ሸምፖ እሞፋ!
LAM 2:19 ቃማ ደንዳዳ ዋሳ፤ ጎዳ ስንꬃን ነ ዎዛና ሃꬃዳ ጉሳ። ኮሻትድ ኦገ ዶናን ኩንድዳ ነ ናይታ ሸምፑዋስ ነ ኩሽያ እያኮ ፑደ ደንꬃዳ ዎሳ!
LAM 2:20 አቤት ጎዳዉ፥ በአ! ካሰ ሀይሳዳ ኔኒ ኦደ ቦላ ኦꬃዲ? አየት ባንታ ክኦን ኮእስድ ድችዳ ባንታ ናይታ ሞ ጋይ? ካህነትነ ናበት ፆሳ ኬꬃን ሀይቆ ጋይ?
LAM 2:21 ጭምነ ናአተꬅ ኦገ ቦላ ኩንድዶሶና፤ ጌላኦትነ ፓንꬃት ማሻን ዉርዶሶና። ኔኒ ነ ሀንቁዋ ጋላስ ኤንታ ዎꬋዳሳ፤ ኤንታዉ ቃቶና ኤንታ ቡꬃዳሳ።
LAM 2:22 ግብራ ጋላስ አሰ ፄገይሳዳ፥ ዳጋንꬅያ ታ ሞርከታ ኡባ በሳፈ ፄጋዳሳ። ጎዳ ሀንቆ ጋላሳን ኦንካ ከስ ኤክቤና ዎይኮ አትቤና። ታኒ ታ ክኦን ኮእሳዳ ድችዳ ናይታ ኡባ ሞርከይ ዎꬍድ ꬋይስስ።
LAM 3:1 ጎዳ ሸነ ፃምአን መቶ በእዳ አስ ታና።
LAM 3:2 ታና ባ ስንꬃፈ ከስድ፥ ፖኦይ ባይና ꬉማን ዎꬅስ።
LAM 3:3 ጋላስ ኩመꬅ ታና ሾጫናዉ ዛር ዛር ባ ኩሽያ ደንꬅስ።
LAM 3:4 እ፥ ታ ጋልባነ ታ አሹዋ ጭምስስ፤ ታ መቀꬃ መንꬅስ።
LAM 3:5 እ፥ ታ ዩሹዋ መቶንነ ዳቡራን ድርስ።
LAM 3:6 በን ሀይቅዳ አሳዳ ታና ꬉማን ዎꬅስ።
LAM 3:7 ታ ከሳ ኤኮና መላ፥ ታ ዩሹዋ ድርስ፤ ዴፆ ዱꬃን ታና ዱፅስ።
LAM 3:8 ታኒ ማደ ኮያዳ እያ ፄግን፥ እያኮ ዋስን፥ ታና ስኦና እፅስ።
LAM 3:9 ታ ኦግያ ዎልቃማ ሹቻን ጎርድስ፤ ታ ኦግያ ጌላይስ።
LAM 3:10 እ፥ ታዉ ዙግድ ናግያ ባባንꬃ መላ፥ ቆሰትድ ናግያ ጋሞ መላ ግድስ።
LAM 3:11 እ፥ ታና ታ ኦግያፐ ከስድ ዱሰረꬅስ፤ ታና አስ ባይና በሳን የግ አግስ።
LAM 3:12 ባ ዶንግያ ዳፍድ፥ ታና ዱካናዉ ማልስ።
LAM 3:13 ባ ዶንግያ ዳፍድ፥ ታ ዎዛና አይፈን ጫድስ።
LAM 3:14 ታኒ አሳ ኡባስ ሚቻስ አታስ፤ ጋላስ ኩመꬅ ቦረ የꬃስ ግዳስ።
LAM 3:15 እ፥ ታና መቶን ጫምስስ፤ ጫሞ ጎዳረ ኡꬅ ታና ኡሽድ ካልስስ።
LAM 3:16 እ፥ ታ አቻ አጨን መንꬅስ፤ ታና ባናን የꬍስ።
LAM 3:17 ሳሮይ ታፐ ሃክስ፤ ታኒ እንጀ ዱሱ ዶጋስ።
LAM 3:18 ሄሳ ግሾ፥ “ታ ዎልቃይ ታፐ ኤከትስ፤ ታኒ ጎዳን ዎꬅዳ ኡፋይሳ ኡባይ ꬋይስ” ያጋስ።
LAM 3:19 ታ መቱዋነ ታ ኡንኣ ሀሳይን ደኦይ ታና ጫምስ።
LAM 3:20 ታ ሄሳ ኩመꬅ ዶግከ፤ ታ ሸምፖይ አዛኔስ።
LAM 3:21 ግዶሽን፥ ታ እስባ ታ ዎዛናን ቆፕያ ዎደ ታ ኡፋይሳን ኩማይስ።
LAM 3:22 ሄስካ፥ ኑኒ ꬋይቦናይ ጎዳ ሲቁዋፐ ደንዶይሳና፤ እያ ቃይ ዉር ኤረና።
LAM 3:23 ኤንቲ ዎንታ ዎንታ ኦራꬅ፤ ነ ዳሮ አማንꬃሳ።
LAM 3:24 ጎዳይ ታ ሳማ፤ ሄሳ ግሾ፥ ታ እያን ኡፋይስ ዎꬃና።
LAM 3:25 እያን ባንታ ኡፋይሳ ዎይሳታስነ እያ ኮየይሳታስ ጎዳይ ሎኦ።
LAM 3:26 አስ ስእ ግድ ጎዳ አቶተꬃን ናግኮ ሎኦ።
LAM 3:27 አስ ባ ናአተꬃን መቶ ዳንዳአ ታማርኮ ሎኦ።
LAM 3:28 ጎዳይ መቶ ኤህያ ዎደ ስእ ግድ ኡቶ።
LAM 3:29 እያዉ ስንꬃፈ ኡፋይስ ዳናዉ ዳንዳእያ ግሾ ባና ዝቅ ኦꬆ።
LAM 3:30 እ ባ ሻካላ ባቀይሳስ እሞ፤ ጫሸ ካሎ።
LAM 3:31 ጎዳይ አሰ መርናዉ የገና።
LAM 3:32 እ አሳ ቦላ መቶ ኤህኮካ፥ ባ መርና ሲቁዋ ዳሮተꬃን ዛሪድ ቃቴስ።
LAM 3:33 እ አሳ ቦላ መቶ ዎይኮ ኡንአ ኤህድ ኡፋይተና።
LAM 3:34 ብታን ደኢያ ቃሾ አሳታ የያ ዎደ፥
LAM 3:35 ኡባፈ ዎልቃማ ፆሳ ስንꬃን አሳ ማት የትያ ዎደ፥
LAM 3:36 ፅሎ ፕርድ ꬋይያ ዎደ ጎዳይ ሄሳ ኡባ በኤነዬ?
LAM 3:37 ጎዳይ ኪቶናሽን ኦድድ ፖልሳናዉ ዳንዳኤይ ኦኔ?
LAM 3:38 ኢታባ ግድን ሎኦባ ኦድ ፖለይ ኡባፈ ꬎቃ ፆሳ ግደነዬ?
LAM 3:39 ያትን፥ አስ ደኦን ደእሸ ባ ናጋራ ግሾ ሴረትያ ዎደ አይስ ዙዙሚ?
LAM 3:40 አነ ኑ ኦግያ ፓጮስ፤ ጎዳኮ ስሞስ።
LAM 3:41 ኑ ዎዛና ኑ ኩሽያራ ሳሎን ደእያ ፆሳኮ ደንꬅድ ሀይሳዳ ያጎስ፦
LAM 3:42 ኑ ነና ናቅዳ፤ ነዉ ማካልዳ፤ ነካ ኑስ አቶ ጋባካ።
LAM 3:43 ነ ሀንቁዋን ካመታዳ ኑና የደꬃዳ፤ ነ ኑስ ቃቶና ኑና ዎꬋዳሳ።
LAM 3:44 ኑ ዎሳይ ኔኮ ጋኮናዳ፥ ነናተꬃ ሻራን ካማዳሳ።
LAM 3:45 አሳ ግዶን ኑና ፕቶነ ቡረ ኦꬃዳሳ።
LAM 3:46 ኑ ሞርከት ኡባይ ኑ ቦላ ባንታ ዶና ዶይዶሶና።
LAM 3:47 ኑ ዳጋማንነ ግተን ገልዳ፤ መቶንነ ኡንአን ላለትዳ።
LAM 3:48 ታ አሳ ጋክዳ ዋይያ ጋሶን ታ አይፈፐ አፉꬁ ሻፋዳ ጎጌስ።
LAM 3:49 ታ አይፈይ አጎና አፉፄስ።
LAM 3:50 ጎዳይ ሳሎፐ ዱገ በአና ጋካናዉ ሄስ ሀኔስ።
LAM 3:51 ታ ካታማን ደእያ ማጫሳታ ቦላ ጋክዳባ ታ አይፈይ በእዳ ዎደ ታ ዎዛናይ አዛንስ።
LAM 3:52 ጮ ታና ሞርከይሳት ካፎ ሻንካትያዳ ታና ሻንካትዶሶና።
LAM 3:53 ታ ፓፃ ደእሽን ታና ኦላን የግድ፥ ኦላ ዶና ሹቻን ጎርድዶሶና።
LAM 3:54 ሃꬅ ኩምድ ታ ሁጰራ ጎግያ ዎደ ታ ꬋያስ ጋዳ ቆፓስ።
LAM 3:55 አቤት ጎዳዉ፥ ታ ጪሞ ኦላን ደአሸ ነ ሱንꬃ ፄጋስ።
LAM 3:56 ታ ዋሱዋ ስአናዳ ታ ነና ዎስያ ዎደ ታና ስአዳሳ።
LAM 3:57 ታኒ ነና ፄግዳ ዎደ ታኮ ሺቃዳ፥ “ባቦፋ” ያጋዳሳ።
LAM 3:58 አቤት ጎዳዉ ነ ታ ሞቱዋ ሞተታዳ ታና ዎዛዳሳ።
LAM 3:59 አቤት ጎዳዉ፥ ነ ታ ኡንኣ በአዳሳ፤ ሄሳ ግሾ፥ ነ ታዉ ፕርዳ።
LAM 3:60 ኤንቲ ሀሎ ከያናዉ ታ ቦላ ማቀትያ ማቁዋ ኡባ በአዳሳ።
LAM 3:61 አቤት ጎዳዉ፥ ኤንቲ ታና ጫይያ ጫሻነ ታ ቦላ ማቀትያ ማቁዋ ኡባ ስአዳሳ።
LAM 3:62 ታ ሞርከት ጋላስ ኩመꬅ ታ ቦላ ዙዙመይሳነ ካልካሸይሳ ስአዳሳ።
LAM 3:63 ኤንቲ ኡትሸነ ኤቅሸ ታና ቦርድ የፆሶና።
LAM 3:64 አቤት ጎዳዉ፥ ኤንቲ ኦꬅዳ ኦሱዋስ በሲያ ዛሩዋ ኤንታዉ ቃንፃ!
LAM 3:65 ኤንታ ዎዛና ኤይሳ፤ ነ ባደꬃይ ኤንታ ጋኮ።
LAM 3:66 አቤት ጎዳዉ፥ ነ ኤንታ ነ ሀንቁዋን የደꬃ፤ ሳሎፐ ጋርሳን ኤንታ ꬋይሳ።
LAM 4:1 ዎርቀይ ጶለይሳ ዋንድ አግዴ? ጌሻ ዎርቃይ ዋንድ ዳምዴ? ፆሳ ኬꬃይ ግምበትዳ ሹቻይ ኦገ ዶናን ላለትስ።
LAM 4:2 ካሰ አልኦ ዎርቃ መላ ቦንቸትዳ ፅዮነ ናይት ሀእ ቢታፈ መትዳ ኦቶ ግድዶሶና።
LAM 4:3 ሀር አቶሽን ዎራካን ባ ማር ꬋንꬃዉሱ፤ ሽን ታ አሳይ ባዞን ደእያ ያንቾዳ፥ ባ ናይታስ ኢታ ግድስ።
LAM 4:4 ሳሞ ጋሶን ዮጋ ናይታ እንፃርሳይ ኮቶኖራ ኦይከትስ፤ ናይት ካꬅ ዎሶሶና፤ ሽን ኤንታዉ እምያ ኦንካ ባዋ።
LAM 4:5 ካሰ ማልኦ ካꬃ ፃላላ መይሳት ሀእ ኦገ ዶናን ኮሻን ዉርዶሶና። ካሰ ሊኖ ማእድ ድጭዳይሳት ሀእ ብዶ ቦላ ዝንእዶሶና።
LAM 4:6 ታ አሳ ናጋራይ፥ ኦደ ኩሸይካ እዮ ቦቾና፥ ቆፖና ሽረትድ ዎꬍዳ ሶዶመ አሳ ናጋራፐ ዳሮ።
LAM 4:7 ይሁዳ ሀላቃት ሻቻፈ አꬍዳ ጌሽ፥ ማꬃፈ አꬍዳ ቦꬁ። ኤንታ አሳተꬃይ ዞኦ እንቆፈ አꬍዳ አርሰ፤ ኤንታ መꬎይ ሳንፓረ አልኦ ሹቻ መላ።
LAM 4:8 ሽን ሀእ ኤንታ ሶምኦይ ሻላፐ አꬍድ ካሬፅስ፤ አስ ኦገን ኤንታ በእድ ኤረና፤ ኤንታ ጎጋይ መቀꬃራ ኦይከትድ ምꬃዳ መልስ።
LAM 4:9 ምያባ ꬋይድ፥ ኮሻን ሀይቅዳይሳታፐ ኦላን ሀይቅዳይሳት ሎኦ።
LAM 4:10 ታ አሳ ቦላ ይዳ ꬋዩዋ ጋሶን፥ ቃትያ አየት ባንታ ናይታ ዶይስድ ምዶሶና።
LAM 4:11 ጎዳ ሀንቆ ፁአይ ኩምስ፤ እ ባ ሱልያ ሸንያ ትግስ። የሩሳላመ ባሱዋ ታማ ኦይꬅስ።
LAM 4:12 ሀ ሳአ ካዎታፐ ዎይኮ ካዎተꬃታን ደእያ አሳፐ ኦንካ ሞርከይ የሩሳላመ ፐንግያራ ገላና ግድ አማንበና።
LAM 4:13 ሽን ሀይስ ሀንዳይ እያ ናበታ ናጋራስነ እያ ካህነት ኦꬅዳ ናቁዋሳ፥ ፅሎታ ሱꬃ እያ ግዶን ጉስዳ ግሾሳ።
LAM 4:14 ኤንቲ ቆቀ አሳዳ፥ ኦገ ታታፎሶና፤ ኤንቲ ሱꬃን ቱንዳ ግሾ ኤንታ ማኡዋ ኦንካ ቦቻናዉ ኮየና።
LAM 4:15 ሄሳ ግሾ፥ አሳይ፥ “ክችተ! ህንተ ቱና ግድያ ግሾ፥ ኑና ቦቾፍተ!” ያግድ ኤንታ ቦላ ዋስዶሶና። ኤንቲ ባቃትድ ቶይላትያ ዎደ፥ ካዎተꬃታን ደእያ አሳይ፥ “ህንተ ኑራ ሀይሳን ዳናዉ ዳንዳኤከታ” ያግዶሶና።
LAM 4:16 ጎዳይ ኤንታ ላልስ፤ እ ኤንታባ ዛሪድ ቆፐና፤ ኤንታ ካህነት ቦንቸቶኮና፤ ኤንታ ጭማት ናሸቶኮና።
LAM 4:17 ኑ አይፈይ ማዶ ደማናዉ ፄልሸ ጮ ዳቡርስ፤ ኑና አሻናዉ ዳንዳኦና ካዎተꬃታፐ ማዶ ናግዳ።
LAM 4:18 አሳይ ኑ ገዳ ካልያ ግሾ፥ ኑ ካታማ ኦገራ ሄመታናዉ ዳንዳእቦኮ። ኑ ዉርሰꬃይ ማትስ፤ ኑ ላይꬃይ ዉርስ፤ ኑስ ꬋዮ ዎደይካ ጋክስ።
LAM 4:19 ኑና የደይሳት ፕራꬍያ አርጋንꬃፈ አꬍድ ኤሶቶሶና፤ ኤንቲ ኑና ደረ ሁጰራ የደꬅዶሶና፤ ባዞን ሆክድ ኑና ናግዶሶና።
LAM 4:20 ጎዳይ ትይዳ ካዎይ፥ ኑ ደኡዋስ ሸምፖይ፥ ኤንታ ፅህያን ኦይከትስ። ኑ እያ ኩያ ጋርሳን ኡትድ፥ ካዎተꬃታ ግዶን ዳና ግድ ቆፕዳ።
LAM 4:21 ህንተኖ፥ ኡፃ ቢታን ደእያ ኤዶመ አሳዉ፥ ኡፋይትተ፤ ሀሹ ጊተ። ሽን ፁአይ ህንተ ቦላ ያና፤ ህንተ ማꬆትድ ካሎ አታና።
LAM 4:22 ህንተኖ፥ ፅዮነ አሳዉ፥ ህንተ ሴራይ ግዳና፤ እ ህዛፐ ህንተና ድኦ ቢታን ዎና። ሽን ኤዶመ አሳዉ፥ ህንተ ሴረታና፤ ህንተ ናጋራይካ ቆንጫና።
LAM 5:1 አቤት ጎዳዉ፥ ኑና ጋክዳባ ኡባ ቆፓ፤ ኑ ካዉሻተꬃ በአ!
LAM 5:2 ኑ ላታይ አላጋታስ፥ ኑ ኬꬃይካ እማꬃ አሳስ እመትስ።
LAM 5:3 ኑኒ አው ሀይቅዳ ናአ ግድዳ፤ ኑ አየትካ አምኦ ግድዶሶና።
LAM 5:4 ኑኒ ኡሻ ሃꬃ ሻምድ ኤኮስ፤ ኤꬅያ ምꬃስ ጋተ ቃንፆስ።
LAM 5:5 ኑና የደይሳት ኑ ግንድያ ጋርሳና፤ ኑ ዳቡርዳ ሽን ሸምፓናዉ ዳንዳእቦኮ።
LAM 5:6 ኑኒ ካꬅ ካላና ግድ፥ ግብፀታስነ አሶረታስ ኩሸ እምዳ።
LAM 5:7 ናጋራ ኦꬅዳይ ኑ ማይዛታ፥ ሽን ኤንቲ ሀእ ዶኮና፤ ኤንቲ ኤካናዉ በሲያ ሴራ ኤክዳይ ኑና።
LAM 5:8 ኑና አይለት ሃሮሶና፤ ኤንታ ኩሸፐ ኑና አሽያ ኦንካ ባዋ።
LAM 5:9 ማሻን ዎይሳት ባዞን ደእያ ግሾ፥ ኑ ሸምፑዋ ባይዝድ ካꬅ ደምዳ።
LAM 5:10 ኢታ ኮሻ ጋሶን፥ ኑ ጎጋይ ታማ ጮጨዳ ምቼስ።
LAM 5:11 ማጫሳታ ፅዮነን ጌላኦታ ይሁዳ ካታማታን ዎልቃን ኦይክድ ቱንስዶሶና።
LAM 5:12 ሀላቃታ ኤፍድ ካቅዶሶና፤ ጭማት ቦንቸትቦኮና።
LAM 5:13 ያላጋ አደት ዎፃን ጋጭዶሶና፤ አደ ናይት ዴፆ ምꬅ ቶክድ ጋንድጋርዶሶና።
LAM 5:14 ጭማት ካታማ ፐንገን ፕርዳናዉ ኡተይሳ አግዶሶና፤ ያላጋ አደት ናይት የꬅ ዶግዶሶና።
LAM 5:15 ኑ ዎዛናፐ ኡፋይስ ክችስ፤ ኑ ዱርሳይ ዬሆን ላመትስ።
LAM 5:16 ኑ ሁጵያፐ ካላቻይ ኩንድስ፤ ኑ ናጋራ ኦꬅዳ ግሾ ኑና አየ!
LAM 5:17 ሄሳ ግሾ፥ ኑ ዎዛናይ ዳቡርስ፤ ኑ አይፈይ ተልጁምስ።
LAM 5:18 ፅዮነ ደረይ ባይሳ ግድዳ ግሾ፥ ዎርካናት ያን ጉፖሶና።
LAM 5:19 አቤት ጎዳዉ፥ ነ መርናዉ ሃራሳ፤ ነ አራታይ የለታፐ የለታ ጋካናሳ።
LAM 5:20 ኔኒ ኑና አይስ ኡባ ዎደ ዶጋይ? ሀይሳ መላ አዱሳ ዎደ ኑና አይስ አጋይ?
LAM 5:21 አቤት ጎዳዉ፥ ኑና ኔኮ ዛራ፤ ኑ ስማና፤ ኑ ዎድያ በንይሳꬆ ዛራዳ ኦራꬃ።
LAM 5:22 ኔኒ ኑና ፖሎ አጋድዬ? ነ ሀንቁዋስ ዛው ባወዬ?
EZE 1:1 ሀስታማንꬆ ላይꬃን፥ ኦይዳንꬆ አጌናን፥ እቻሻንꬆ ጋላስ፥ ታኒ ኮቦራ ሻፋን ድኤትዳ አሳ ግዶን ደእሽን ሳሎት ዶየትን፥ ፆሳ ቆንጨꬅ በአስ።
EZE 1:2 ካዎይ ዮአክን ድኤትዳ እቻሻንꬆ ላይꬃን፥ ሄ አጌናን እቻሻንꬆ ጋላሳን፥
EZE 1:3 ካልዳወታ ቢታን ኮቦራ ሻፋ ማታን ደእያ ታኮ፥ ቡዛ ናኣ፥ ካህንያ ህዝቄላኮ፥ ጎዳ ቃላይ ይስ፤ ጎዳ ዎልቃይ ታና ሃርስ።
EZE 1:4 ታ ፄልያ ዎደ ጎተይ ፑደሀ ባጋፈ ይሽን በአስ፤ ዎልቃማ ሻራ ግዶፈ ዎልአንꬅ በንቴስ፤ እያ ዩሹዋን ደእያ ሳሎይ ፖእስ። ታማ ግዶ ባጋይ ጶልያ ናሰ ብራታ ዳኔስ።
EZE 1:5 እያ ግዶን ኦይዱ ደኦን ደእያ መተꬃት ደኦሶና። ኤንታ ማላይ አሳ ማላ ዳኔስ።
EZE 1:6 ኤንታ እሱዋስ እሱዋስ ኦይዱ ኦይዱ ሶምኦይነ ኦይዱ ኦይዱ ቀፈይ ደኤስ።
EZE 1:7 ኤንታ ገዳይ ስት ግስ፤ ኤንታ ቶሆይ መሄ ቅንጫፍለ መላ፤ ሄ ቶሆት ቁችድ ጌሽዳ ናሰ ብራታዳ ጶሌስ።
EZE 1:8 ኤንታ ቀፍያፐ ጋርሳራ ኦይዱ ባጋራ አሳ ኩሸ ዳንያ ኩሸይ ደኤስ። ሄ ኦይዱ መተꬃታስ ሶምኦይነ ቀፈይ ደኤስ።
EZE 1:9 ኤንታ ቀፈይ እሶይ እሱዋ ቦቼስ፤ ኤንቲ ኡባይ ያ ሃ ስሞና ስት ግድ ስን ቦሶና።
EZE 1:10 ኤንታ እሱዋስ እሱዋስ ስንꬃ ባጋራ አሳ ሶምኦይ ደኤስ፤ ኡሻቻ ባጋራ ጋሞ ሶምኦይ ደኤስ፤ ሀድርሳ ባጋራ ቦራ ሶምኦይ ደኤስ፤ ጉየ ባጋራ አርጋንꬃ ሶምኦይ ደኤስ።
EZE 1:11 ኤንታ ቀፈይ ꬎቁ ግድ ምጨትድ ኡትስ፤ ኤንታ እሱዋ እሱዋ ናምኡ ቀፈይ ናምኡ ባጋራ ሀንኮ መተꬃታ ቀፈይ ቦቼስ፤ ናምኡ ቀፈይ ኤንታ አሳተꬃ ካሜስ።
EZE 1:12 ኤንቲ ኡባይ ስት ግድ ስን ቦሶና፤ ያ ሃ ስሞና፥ ፆሳ አያናይ ብያ ሶ አዉካ ቦሶና።
EZE 1:13 ሀ ደኦን ደእያ መተꬃታ ግዶን እስ ኤፅያ ታማ ቦንቆ ዳነይስ ደኤስ። ሄ ታማይ ስንነ ጉየ ቃፅያ፥ ኤፅያ ፆምፐ ዳኔስ፤ ሄ ታማይ ጶሌስ፤ እያ ግዶፈ ዎልአንꬅ ከዬስ።
EZE 1:14 ሀ ደኦን ደእያ መተꬃት ዎልአንꬃዳ ስንነ ጉየ ኤሶን ስመረቶሶና።
EZE 1:15 ሄኮ፥ ሀ ኦይዱ መተꬃታ ታ በእያ ዎደ፥ ኤንታ ምየን፥ ሳአን ደእያ ገርቶታ በአስ፤ እስ እስ መተꬃ ምየን እስ እስ ገርቶይ ደኤስ።
EZE 1:16 ሀ ገርቶት አልኦ ሹቻዳ ጶሎሶና፤ ኤንቲ ኦይዳይ መꬎንነ ማላን እሶይ እሱዋ ዳኖሶና። እስ ገርቶይ ሀንኮ ገርቱዋ ግዶራ ካንꬅድ አꬍዳባ ዳኔስ።
EZE 1:17 ኤንቲ ብያ ዎደ ኦይዱ ባጋፈ አዉ ስሚድ ባነኮ ያ ሃ ስሞና ቦሶና።
EZE 1:18 ግታነ ያሽያ ኦይዱ ገርቶት ደኦሶና፤ ሄ ገርቶታስ ጋፅ ደኤስ፤ ሄ ጋፃ ዩሾይ አይፈን ኩምድ ኡትስ።
EZE 1:19 ሀ መተꬃት ብያ ዎደ፥ ኤንታ ምየን ደእያ ገርቶት ገንደረቶሶና። ሄ መተꬃት ቢታፈ ፑደ ደንድያ ዎደ ገርቶትካ ደንዶሶና።
EZE 1:20 አያናይ ብያ አዉካ ኤንቲ ደንድድ ቦሶና። ሄስ ሀነይ፥ ደኦ አያናይ ገርቶታ ግዶን ደእያ ግሾሳ።
EZE 1:21 ደኦ አያናይ ገርቶታ ግዶን ደእያ ግሾ፥ መተꬃት ብያ ዎደ ገርቶት ቦሶና፤ መተꬃት ኤቅያ ዎደ ገርቶት ኤቆሶና፤ መተꬃት ቢታፈ ፑደ ደንድያ ዎደ ገርቶት ኤንታራ ደንዶሶና።
EZE 1:22 ደኦን ደእያ መተꬃታ ሁጰ ሶፐ ቦላ ባጋራ ማስቶተዳ ጶልድ አይፈ ጫድያ ሳሎ ጉፋንꬆ ዳንያባይ ምጨትድ ደኤስ።
EZE 1:23 ሄ ሳሎ ጉፋንꬁዋፈ ጋርሳ ባጋራ ኤንታ ቀፈይ ስት ግድ፥ እሶይ እሱዋኮ ምጨትድ ኡትስ። ኤንታ ኡባስ ባንታ አሳተꬃ ካምያ ናምኡ ናምኡ ቀፈይ ደኤስ።
EZE 1:24 መተꬃት ፓልያ ዎደ ኤንታ ቀፍያ ግርሳይ ሃꬃ ክፃ ጉንꬃዳ፥ ኡባ ዳንዳእያ ፆሳ ቃላዳነ ዳሮ ኦላንቾታ ኮሽንቻዳ ሀነይሳ ስአስ። ኤንቲ ፓሎ አግያ ዎደ ባንታ ቀፍያ ሺሽድ ኤኮሶና።
EZE 1:25 ኤንቲ ባንታ ቀፍያ ሺሽ ኤክድ፥ ሄ በሳን ኤቅዳሽን፥ ኤንታ ሁጰ ሶፐ ቦላ ባጋራ ደእያ ሳሎ ጉፋንꬁዋፈ ቦላ ꬎቃፈ ግርስ ስኤትስ።
EZE 1:26 ሳሎ ጉፋንꬁዋፈ ቦላ ባጋራ ሳንፓረ ጌተትያ አልኦ ሹቻፈ መትዳ አራታ ዳነይስ ደኤስ፤ አራታ ዳነይሳ ቦላ አሰ ዳነይስ ኡትስ።
EZE 1:27 ታኒ እያ በእያ ዎደ እያዉ ፄሰ ዳነይሳፈ ቦላ ባጋይ ታማን ደእያ ናሰ ብራታዳ ጶሌስ። እያፐ ጋርሳ ባጋይ ታማ ዳኔስ፤ እያ ዩሾን ጶልያ ፖኦይ ደኤስ።
EZE 1:28 እያ ዩሹዋን ደእያ ጶልያ ፖኦይ እራ ዎደ ሻራን ኤቅያ ዙላ ዳኔስ። ሀይስ ጎዳ ቦንቾ ቆንጨꬃ ዳኔስ። ታኒ ሄሳ በእዳ ዎደ ቢታን ዱገ ጉፋናዳ እስ ቃላ ግርስ ስአስ።
EZE 2:1 እ ታኮ፥ “አሳ ናአዉ፥ ደንዳ ኤቃ። ታ ኔራ ኦደታናዉ ኮያይስ” ያግስ።
EZE 2:2 እ ታራ ኦደትያ ዎደ ፆሳ አያን ታ ግዶ ገልድ፥ ታና ታ ቶሁዋን ኤስስ፤ እ ታዉ ኦደይሳ ስአስ።
EZE 2:3 “አሳ ናአዉ፥ ታ ነና እስራኤለ አሳኮ፥ ታ ቦላ ማካልዳ ደርያኮ ኪታይስ። ኤንትነ ኤንታ ማይዛት ሀች ጋካናዉ ታ ቦላ ማካልዳ መላ ደኦሶና።
EZE 2:4 ኤንቲ ዎዛና ሙመነ ዬል ባይናይሳታ ግድያ ግሾ፥ ታ ነና ኤንታኮ ኪታይስ። ታኒ፥ ኡባ ሃርያ ጎዳይ ሀይሳዳ ያጋይስ።
EZE 2:5 ሀ ማካላንቾ አሳይ ስእን፥ ስኦና እፅን፥ ናበይ ኤንታ ግዶን ደኤይሳ ኤንቲ ኤራና።
EZE 2:6 አሳ ናአዉ፥ ኤንታዉነ ኤንታ ቃላስ ያዮፋ! ክንቾተይነ ፁንዱቀይ ነ ዩሾን ደእኮካ፥ ቃስ ኮርነታ ግዶን ነ ኡትኮካ ያዮፋ። ኤንቲ ማካላንቾ ኮቸ ግድያ ግሾ ኤንታዉ ዎይኮ ኤንታ ቃላስ ያዮፋ።
EZE 2:7 ኤንቲ ማካላንቾ ኮቸ ግድያ ግሾ ኤንቲ ስእን፥ ስኦና እፅን ታ ቃላ ኤንታዉ ኦዳ።
EZE 2:8 ሽን፥ አሳ ናአዉ፥ ታ ነዉ ኦደይሳ ስአ። ሀ ማካላንቾ አሳዳ ነካ ማካላንቾ ግዶፓ፤ ነ ዶና ዶያዳ ታ ነዉ እመይሳ ማ” ያግስ።
EZE 2:9 ታ ፄልያ ዎደ፥ ሄኮ፥ ታኮ ምጨትዳ ኩሸ በአስ፤ ሄ ኩሽያን ፃꬃ ማፃፍ ደኤስ።
EZE 2:10 እ ታ ስንꬃን ሄ ፃꬃ ማፃፋ ብልስ፤ ሄ ማፃፋስ ናምኡ ባጋራ ዬሆይ፥ አዛኖይነ ዘለልስ ሁጰ ቆፋ ግድድ ፃፈትስ።
EZE 3:1 ፆሳይ፥ “አሳ ናአዉ፥ ነ ስንꬃን ደኤይሳ ማ፤ ሀ ፃꬃ ማፃፋ ማ፤ ባዳ፥ እስራኤለ አሳስ ኦዳ” ያግስ።
EZE 3:2 ሄሳ ግሾ፥ ታኒ ታ ዶና ዶይን፥ እ ታና ፃፃ ማፃፋ ባርስስ።
EZE 3:3 እ ታኮ፥ “አሳ ናአዉ፥ ሀ ታ ነና ባርስያ ፃꬃ ማፃፋ ማ፤ እያራ ነ ኡሉዋ ኩንꬃ” ያግስ። ታ ምያ ዎደ ታ ዶናን ኤሳዳ ማልእስ።
EZE 3:4 ፆሳይ ታኮ፥ “አሳ ናአዉ፥ ደንዳዳ፥ እስራኤለ አሳኮ ባ፤ ታ ቃላ ኤንታዉ ኦዳ።
EZE 3:5 ኔኒ ኪተትዳይ፥ ኤንታ ዶናይ ኤረቶናነ ቃላይ ገሎና አሳኮ ግደና፤ ሽን ኔኒ እስራኤለ አሳኮ ኪተታዳሳ።
EZE 3:6 ታኒ ነና ኤንታ ቃላይ ገሎና፥ ኤንታ ዶናይ ኤረቶናነ አኬካናዉ መትያ ዳሮ ደርያኮ ታ ነና ኪታብከ። ታ ነና ኤንታኮ ኪትዳባ ግድያኮ፥ ኤንቲ ነ ኦድያባ ስአናሽን።
EZE 3:7 እስራኤለ አሳይ ታ ኦድያባ ስአናዉ ኮዮና ግሾ፥ ነ ኦደይሳ ስኦኮና። እስራኤለ አሳይ ዎዛና ሙመነ ዬል ባይናይሳታ ግድያ ግሾ ነ ኦድያባ ስኦኮና።
EZE 3:8 ሽን ታኒ ነና ኤንታዳ ዎዛና ሙመነ ዬል ባይናይሳ ኦꬃና።
EZE 3:9 ታኒ ነና ያሽ ባይናነ ዛላፈ አꬍዳ ምኖ ኦꬃና። ኤንቲ ማካላንቾ ግድኮካ፥ ኤንታዉ ያዮፋ፤ ኤንታዉ ዳጋሞፋ” ያግስ።
EZE 3:10 ጉጅድ ፆሳይ፥ “አሳ ናአዉ፥ ታ ነዉ ኦድያ ቃላ ኡባ ምንꬃዳ ስአ፤ አኬካ።
EZE 3:11 ድኦን ደእያ ነ አሳኮ ባዳ ኤንታዉ ኦዳ። ኤንቲ ስእን፥ ስኦና እፅን፥ ታኒ ኡባ ሃርያ ጎዳይ ኦደይሳ ኤንታዉ ኦዳ” ያግስ።
EZE 3:12 ሄሳፈ ጉየ፥ አያናይ ታና ፑደ ደንꬅስ፤ ጎዳ ቦንቾይ ባ በሳፈ ፑደ ደንድያ ዎደ ታፐ ጉየራ ዎልቃማ ጉንꬁ ስአስ።
EZE 3:13 ሄስካ፥ ደኦን ደእያ መተꬃታ ቀፈይ እሶይ እሱዋራ ቦሸትያ ግርሳይነ ኤንታ ምየን ደእያ ገርቶታ ግርሳራ ጋሄትድ፥ ዎልቃማ ጉንꬃ ግርስ ስአስ።
EZE 3:14 አያናይ ታና ፑደ ደንꬅስ፤ ታና ኤክድ ሀራ በሲ ኤፍስ፤ ጎዳ ግታ ዎልቃይ ታና ሃርስ፤ ታ አያናን ጫመታሸነ ይሎታሸ ባስ።
EZE 3:15 ኮቦራ ሻፋ ማታን፥ ተል-አብባን ደእያ ድኤትዳ አሳኮ ጋካስ። ታኒ ዳጋማዳ ያን ኤንታራ ላፑን ጋላስ ጋምአስ።
EZE 3:16 ላፑንꬆ ጋላስ ዉርሰꬃን ጎዳ ቃላይ ታኮ ሀይሳዳ ያግሸ ይስ፦
EZE 3:17 “አሳ ናአዉ፥ ታ ነና እስራኤለ አሳ ናግያ አስ ኦꬃስ። ታ ዶናፐ ከይያ ቃላ ስእዲ፥ ናጋና መላ ኤንታዉ ኦዳ።
EZE 3:18 ታኒ ናጋራንቹዋ፥ ‘ቱማ ኔኒ ሀይቃና’ ግያ ዎደ፥ ነ ባዳ እያዉ ኦዶና እፅኮ፥ እ ባ ኢታ ኦግያፐ ስማና መላነ እያ ሸምፖይ አታና መላ ነ እያ ናግሶና እፅኮ፥ እ ባ ናጋራን ሀይቃና፤ ሽን እያ ሱꬃ ግሾ ታ ነና ኦይቻና።
EZE 3:19 ኔኒ ናጋራንቹዋስ ኦድን፥ እ ባ ናጋራፐነ ባ ኢታ ኦግያፐ ስሞና እፅኮ፥ እ ባ ናጋራን ሀይቃና፤ ሽን ኔኒ ነ ሁጵያ አሻና።
EZE 3:20 “ፅሎ አስ ባ ፅሎተꬃፈ ጉየ ስሚድ፥ ኢታ ኦꬅያ ዎደ ታ እያ ስንꬃን ꬉበ ዎꬅን፥ እ ሀይቃና። እ ስማና መላ ነ እያዉ ኦዶና ግሾ እ ባ ናጋራን ሀይቃና። እ ካሰ ኦꬅዳ ፅሎ ኦሶይ ዛሪድ ቆፈተና፤ ሽን ታኒ እያ ሱꬃ ግሾ ነና ኦይካና።
EZE 3:21 ሽን ፅሎ አስ ናጋራ ኦꬆና መላ ነ እያዉ ኦድን፥ እ ነ ኪታ ስእድ፥ ናጋራ ኦꬆና አግኮ፥ ቱማ እ ደኦን ዳና፤ ኔኒ ነና አሻና” ያግስ።
EZE 3:22 ሄ በሳን ጎዳ ዎልቃይ ታና ሃርስ፤ እ ታኮ፥ “ደንዳዳ ዛንጋራ ባ፤ ያን ታ ነዉ ኦዳና” ያግስ።
EZE 3:23 ታ ደንዳዳ፥ ዛንጋራ ባስ። ሄ በሳን ካሰ ኮቦራ ሻፋ ማታን ታ በእዳይሳዳ፥ ያን ጎዳ ቦንቹዋ በአስ፤ ታኒ ሳአን ሶምኦራ ጉፋናስ።
EZE 3:24 ሽን አያናይ ታ ግዶ ገልድ፥ ታና ታ ቶሃን ኤስስ። ጎዳይ ታኮ፥ “ነ ሶ ባዳ፥ ነ ቦላ ፐንግያ ጎርዳዳ ኡታ።
EZE 3:25 አሳ ናአዉ፥ ነ ዎዶሮን ቃሸታና፤ አሳኮ ከያናዉ ዳንዳአካ።
EZE 3:26 ሀ ማካላንቾ አሳስ ነ ኦዶና መላነ ኤንታ ቦላ ሀንቀቶና መላ ታ ነ ዶና ሙምሳና።
EZE 3:27 ሽን ታ ነዉ ኦድያ ዎደነ ነ ዶና ዶይያ ዎደ ኔኒ፥ ‘ኡባ ሃርያ ጎዳይ፥ ኤንቲ ማካላንቾ ግድያ ግሾ፥ ስእያ ኦንካ ስኦ፤ ስኦና እፅያ ኦንካ ስኦፖ’ ያጋዳ” ኦዳና።
EZE 4:1 “ነኖ አሳ ናአዉ፥ ቢታፈ መꬍዳ ፁበ ኤካዳ፥ ነ ስንꬃን ዎꬃ፤ ያታዳ የሩሳላመ ካታማ ምስለ እያ ቦላ መꬋ።
EZE 4:2 ካታማ ዩሹዋ ድራ፤ እያ ቢታ ዶራ፤ ሚፃ ኬꬃ፤ ኦላንቾት ኡትያ በሲ ጊግሳ፤ ግምብያ ላልያ ዱሩማ እያ ዩሾን ጊግሳ።
EZE 4:3 ብራታ ባሸ ኤካዳ፥ ነ ግዶንነ ካታማ ግዶን ድርስ ኦꬃዳ ኤሳ። ነ ሶምኡዋ እያኮ ዛራዳ ደሬቃ፤ ካታማ ዩሹዋ ተቃ፤ እያ ተቀይካ ነና፤ ሄስካ እስራኤለ አሳስ ማላ ግዳና።
EZE 4:4 “እስራኤለ አሳ ሴረተꬃስ ማላ ግዳና መላ ኔኒ ነ ሀድርሳ ምየን ዝንአ። ኔኒ ነ ሀድርሳ ምየን ዝንእያ ጋላሳታ ታይቡዋን እስራኤለ አሳይ ዋንድ ሴረታናዉ ደእያኮ በሳና።
EZE 4:5 እስራኤለ አሳይ ዋንድ ሴረታናዉ ደእያኮ በሳናዉ ኔኒ ዝንአና መላ ሄꬑ ፄታነ ኡዱፉን ታሙ ጋላስ ነዉ እማስ፤ እስ ጋላስ እስ ላይꬃራ ግና ግዳና።
EZE 4:6 “ኔኒ ሄ ጋላሳታ ፖልዳፐ ጉየ፥ ዛራዳ፥ ይሁዳ አሳይ ዋንድ ሴረታናዉ ደእያኮ በሳናዉ ነ ኡሻቻ ምየን ዝንአና መላ ኦይታሙ ጋላስ ነዉ እማስ። እስ ጋላስ እስ ላይꬃራ ግና ግዳና።
EZE 4:7 ነ ሶምኡዋ ተቀትዳ የሩሳላመኮ ዛራዳ፥ ነ ኩሽያ ደንꬃዳ ማንዳሸ፥ የሩሳላመ ቦላ ትንብተ ኦዳ።
EZE 4:8 ሄ ተቀꬃይ ዉራና ጋካናዉ እስ ምየፐ ሀራ ምየ ሽረቶና መላ ታ ነና ዎዶሮን ቃቻና።
EZE 4:9 “ኔኒ ግስተነ ባንጋ፥ ቆምኦሎነ ምስረ፥ ማልዶነ ሙርቃ ኤካዳ፥ ካꬅ ዎꬅያ ሚሸን ቆላዳ፥ ኔኒ ዝንእያ ሄꬑ ፄታነ ኡዱፉን ታሙ ጋላስ እያፐ ካꬃዳ ማና።
EZE 4:10 ጋላስ ጋላስ ነ ምያ ካꬃ ማዛና፤ እካ ናምኡ ፄታነ ሀስታሙ ግራመ ግዶ፤ ሄሳ እያ ዎደን ዎደን ማ።
EZE 4:11 ጋላስ ጋላስ ነ ኡያ ሃꬃይካ ልከራ ግዶ፤ እካ ናምኡ ኩባያ ግዶ፤ ሄሳ እያ ዎደን ዎደን ኡያ።
EZE 4:12 ዎራ ሼሻ ከምኤለ ኤꬃዳ፥ አሳይ ፄልሽን፥ ሄ ዋላክዳ ካꬃ ባንጋ ኡይꬃዳ ኡካዳ ማ።
EZE 4:13 ሄስ እስራኤለ አሳይ ታ ኤንታ ላልያ ካዎተꬃታ ግዶን ደእሸ፥ ቱንዳ ካꬅ ማናዉ ደኤይሳስ ማላ” ያግስ።
EZE 4:14 ታኒ፥ “ሀይእ! ኡባ ሃርያ ጎዳዉ፥ ሄስ ሀነና፤ ታኒ ቱናዳ ኤርከ። ታ ናአተꬃፈ ዶማዳ ሀች ጋካናዉ፥ ባዉታ ዎይኮ ዶእ ዎꬍዳባ ማ ኤርከ፤ ቱንዳ አሾይ ታ ዶናኮ ሺቅ ኤረና” ያጋስ።
EZE 4:15 እ ዛሪድ፥ “ሎኦ፥ ያትኮ፥ ዎራ ሼሻ ከምኤለን ኡከይሳ አጋዳ፥ ኦሻ ከምኤለን ነ ኡይꬃ ኡካ” ያግስ።
EZE 4:16 እ ጉጅድ፥ “ነኖ፥ አሳ ናአዉ፥ አኬካ! የሩሳላመ ካታማ ካꬅ ገሎና መላ ታኒ ተቃና ሀናይስ። አሳይ ካꬅ ህርግሸ ማክድ ማና፤ ሃ ያይሸ ልክድ ኡያና።
EZE 4:17 ህዛ፥ ኤንታዉ ደእያ ካꬃይነ ሃꬃይ ዉራና፤ ኤንቲ ዳጋማን እሶይ እሱዋ ፄላና፤ ባንታ ናጋራ ጋሶን ሴረትድ ግልቃና።
EZE 5:1 “ነኖ፥ አሳ ናአዉ፥ ኦጮ ማሽ ኤካዳ፥ ማቅላራ ሜድያዳ ነ ሁጵያነ ነ ቡቻ ሜዳ። ሄ ሁጵያ ምዛነን ማዛና፤ ነ ብናና ሄꬑ በሳን ሻካ።
EZE 5:2 ኔኒ ተቅያ ጋላሳይ ዉርያ ዎደ፥ ነ ሻክዳ ብናናፐ ስኩዋ ነ ጊግስዳ ካታማ ምስልያስ ግዱን ዎꬃዳ ታማን ፁጋ። ናምአንꬆ ስኩዋ ሄ ካታማ ዩሹዋ ኡባን ማሻን ቃንፀረꬃ። ሄꬓንꬆ ስኩዋ ጫርኮ ቦላ ላላ፤ ታ ኤንታ ማሻን የደꬃና።
EZE 5:3 እያፐ ጉꬃ ብናና ኤካዳ፥ ነ ማኡዋ ማጫራን ቃቻ።
EZE 5:4 ቃስ እያፐ ጉꬃራ ኤካዳ፥ ታማን የጋዳ ፁጋ። ያን ዶምዳ ታማይ እስራኤለ አሳ ኡባ ጋካና” ያግስ።
EZE 5:5 ኡባ ሃርያ ጎዳይ፥ “ካዎተꬃታ ኡባ እያ ዩሾን ኤሳዳ፥ እያ ግዶን ዎꬅዳ፥ የሩሳላመ ካታማ ሀይሳ በአ።
EZE 5:6 ሽን እ ባ ኢታ ኦሱዋን ባ ዩሹዋን ደእያ ቢታታፐነ ካዎተꬃታፐ አꬍድ ታ ህግያነ ታ ዎጋ ቦላ ማካልስ። ቱማ እ ታ ህግያ መንꬅስ፤ ታ ዎጋ ካልቤና” ያጌስ።
EZE 5:7 ሄሳ ግሾ፥ ኡባ ሃርያ ጎዳይ፥ “ነ ዩሹዋን ደእያ ካዎተꬃታፐ አꬋዳ መቶ መꬋዳሳ፤ ታ ህግያ መንꬃዳሳ፤ ታ ዎጋ ናጎና እፃዳሳ። ሀር አቶሽን፥ ነ ዩሹዋን ደእያ ካዎተꬃታ ዎጋዳካ ደእቤከታ” ያጌስ።
EZE 5:8 ሄሳ ጋሶን፥ ኡባ ሃርያ ጎዳይ፥ “ነኖ፥ የሩሳላመ፥ ታኒ ነ ቦላ ደንዳና፤ ሀራ ካዎተꬃት ኡባይ በእሽን፥ ነ ቦላ ታኒ ፕርዳ ኤሀና።
EZE 5:9 እፀትዳ ኤቃ ጎይኖ ኡባ ነ ኦꬅዳ ግሾ፥ ሀይሳፈ ካሰ ኦꬃቦና፥ ስንꬃፈካ ዮና ፕርዳ ታ ነ ቦላ ኤሀና።
EZE 5:10 ሄሳ ጋሶን፥ ነ ግዶን አዋት ባንታ ናይታ ማና፤ ናይት ባንታ አዋታ ማና። ታ ህንተና ፕርዳና፤ አትዳይሳታ ጫርኮ ቦላ ላላና።
EZE 5:11 ሄሳ ግሾ፥ ኡባ ሃርያ ጎዳይ፥ ታኒ ታ ደኡዋን ጫቃይስ። ህንተ ኤቃታንነ እፀትዳ ኦሶታን ታ ኬꬃ ቱንስዳ ግሾ፥ ታ ህንተና ቢታፈ ፕታዳ ꬋይሳና። ታ ህንተዉ ቃትከ፤ ህንተና ማርከ።
EZE 5:12 ነ ግዶን ደእያ አሳፐ እስ ስኮይ ካታማ ግዶን ቦሻንነ ኮሻን ሀይቃና፤ ናምአንꬆ ስኮይ ማሻን ዉራና፤ ሄꬓንꬆ ስኩዋ ጫርኮ ቦላ ላላዳ፥ ኤንታ ማሻን የደꬃና” ያጌስ።
EZE 5:13 “ታ ይሎይ ኤንታ ቦላ ፖለታና፤ ታ ዎልቃማ ሀንቆይ እርፃና። ታኒ ታ ሀንቁዋ ኤንታ ቦላ ዉርስያ ዎደ ታኒ ቃናተን ኦድዳይሳ ኤንቲ ኤራና።
EZE 5:14 “ነ ዩሹዋን ደእያ ካዎተꬃታ ግዶንነ ህንተ ማታራ አꬍያ ኡባ ስንꬃን ታ ህንተና ባይሳ ኦꬃና፤ ህንተና ሚቻስ አጋና።
EZE 5:15 ታ ህንተና ታ ሀንቁዋን፥ ታ ይሉዋንነ፥ ቃይ ባይና ሴራን ፕርድያ ዎደ ህንተ ዩሹዋን ደእያ ካዎተꬃታ ስንꬃን ቀልቅሰꬃስ፥ ጫሻስ፥ ህንተና በእዳ አስ ናገትያባነ ዳጋምያባ ኦꬃና።
EZE 5:16 ዱክያ ዶንጌ ቶራዳ፥ ታ ህንተና ዎꬍያነ ꬋይስያ ኮሻ ህንተ ቦላ የዳና። ታኒ ዛራ ዛራ ኮሻ ህንተ ቦላ ኤሀና፤ ካꬅ የሩሳላመ ገሎና መላ ተቃና።
EZE 5:17 ታኒ ኮሻነ ዶአ ህንተ ቦላ የዳና፤ ኤንቲ ህንተ ናይታ ꬋይሳና፤ ቦሻነ ሸምፖ ዎꬎ ህንተ ቦላ ኤሀና” ያጌስ ጎዳይ።
EZE 6:1 ጎዳ ቃላይ ታኮ ሀይሳዳ ያግሸ ይስ።
EZE 6:2 “ነኖ፥ አሳ ናአዉ፥ እስራኤለ ዙማታ ደሬቃ ፄላሸ፥ ኤንታ ቦላ ትንብተ ኦዳ።
EZE 6:3 ህንተኖ፥ እስራኤለ ደረቶ፥ ኡባ ሃርያ ጎዳ ቃላ ስእተ። ኡባ ሃርያ ጎዳይ እስራኤለ ዙማታኮ፥ ዞዘታኮ፥ ዛንጋራታኮነ ካካታኮ ሀይሳዳ ያጌስ፦ ‘አሳይ ኤቃ ጎይንያ በሳታ ታኒ ꬋይሳናዉ ማሻ የዳና።
EZE 6:4 ህንተ ያርሾ ፃርጴዛቲ ላለታና፤ ህንተ እፃነ ጩይስያ ሚሸት መቃና፤ ሀይቅዳ ህንተ አሳይ ህንተ ኤቃታ ስንꬃን የገታና።
EZE 6:5 ታኒ እስራኤለ አሳ አሀ ኤንታ ኤቃታ ስንꬃን ዝንእሳና፤ ህንተ መቀꬃታ ህንተ ያርሾ ፃርጴዛታ ዩሾን ላላና።
EZE 6:6 ህንተ ደእያ በሳ ኡባን፥ ህንተ ካታማትነ ህንተ ጎይኖ በሳት ላለታና። ሄሳዳካ፥ ህንተ ያርሾ በሳይ ቱናናነ ላለታና፤ ህንተ ኤቃት መቃና፤ ህንተ እፃነ ጩይስያ ሚሸት መቃና፤ ህንተ ኦꬅዳባ ኡባይ ፕተትድ ꬋያና።
EZE 6:7 ሀይቅዳ አሳይ ህንተ ግዶን ኩንዳና። ታኒ ጎዳ ግደይሳ ህንተ ሄሳን ኤራና።
EZE 6:8 ታኒ ህንተ ግዶን ማሻፈ አትዳ ጉꬃታ ፓፃ አሻና፤ ህንተ ቢታታንነ ካዎተꬃታ ግዶን ላለታና።
EZE 6:9 ማሻፈ አትዳ ኤንቲ፥ ድኤትድ ብዳ ካዎተꬃታ ግዶን ደእሸ ታና ሀሳያና። ኤንቲ ባንታ ላይማ ዎዛናንነ አሞትያ አይፍያን ኤቃ ጎይናናዉ ስሚድ ታ ዎዛና መንꬅዳይሳ ኤንቲ አኬካና። ኤንቲ ባንታ ኢታ ኦሱንነ እፀትዳ ኤቃ ጎይኖ ጋሶን ባንታና ሻተታና።
EZE 6:10 ታኒ ጎዳ ግደይሳ ኤንቲ ኤራና። ታኒ ኤንታ ቦላ ኢታባ ኤሀና ግዳይ ጮ ባብሶ ግዶናይሳ ኤንቲ አኬካና’ ” ያጌስ።
EZE 6:11 ኡባ ሃርያ ጎዳይ ታኮ ሀይሳዳ ያጌስ፦ “እስራኤለ አሳይ እፀትዳ ኤቃ ጎይንዳ ግሾ፥ ነ ሀንቁዋ ብራ ማላዳ በሳ፤ ነ ይሉዋ ቢታ ቃካዳ ቆንጭሳ። ኤንታና አየ! ኤንቲ ኦላን፥ ኮሻንነ ጋዶን ዉራና።
EZE 6:12 ሃሆን ደኤይ ጋዶን ꬋያና፤ ማታን ደኤይ ኦላን ሀይቃና፤ ፓፃ አትዳይ፥ ኮሻን ዉራና። ሄሳዳ ኦꬃዳ፥ ታ ሀንቁዋ ኤንታ ቦላ ፖላና።
EZE 6:13 ኤንታ አሀይ ኤንታ ኤቃታ ግዶ ኡባን፥ ኤንታ ያርሾ በሳ ዩሾ ኡባን፥ ዙማታ ቦላ ኡባን፥ ደረ ቦላ ኡባን፥ ጭልኦ ምꬃ ጋርሳ ኡባን፥ ዳሻ ምꬃ ጋርሳ ኡባን፥ ባንታ ኤቃታስ ሳውያ ያርሾ ያርሽዳ በሳ ኡባን ኩንድዳ ዎደ ታኒ ጎዳ ግደይሳ ኤራና።
EZE 6:14 ታኒ ታ ኩሽያ የዳዳ፥ ኤንቲ ደእያ ቢታ ኡባ፥ ዱገሀ መላ ቢታፈ ብድ ፑደሀን ደእያ ደብላታ ጋካናዉ ባይሳ ኦꬃና። ታኒ ጎዳ ግደይሳ ኤንቲ ሄሳን ኤራና” ያጌስ።
EZE 7:1 ጎዳ ቃላይ ታኮ ሀይሳዳ ያግሸ ይስ።
EZE 7:2 “ነኖ አሳ ናአዉ፥ ኡባ ሃርያ ጎዳይ እስራኤለ ቢታኮ ሀይሳዳ ያጌስ፦ ‘ዉርሰꬅ ማትስ፤ ኡባ ባጋራ ሀ ቢታ ቦላ ዉርሰꬅ ይስ።
EZE 7:3 ሀእ፥ ዉርሰꬅ ህንተ ቦላ ጋክስ፤ ታኒ ታ ሀንቁዋ ህንተ ቦላ የዳና። ታኒ ህንተ ኦሱዋዳ፥ ህንተ ቦላ ፕርዳና፤ ህንተ እፀትዳ ኤቃ ጎይንዳ ግሾ ህንተና ሴራና።
EZE 7:4 ታኒ ህንተዉ ቃትከ፤ ህንተና ማርከ። ህንተ ኢታ ኦሱዋዳ ህንተ ቦላ ፕርዳና፤ ህንተ ግዶን ደእያ እፀትዳ ኤቃ ጎይኖታ ቆንጭሳና። ታኒ ጎዳ ግደይሳ ህንተ ሄሳን ኤራና’ ” ያጌስ።
EZE 7:5 ኡባ ሃርያ ጎዳይ፥ “ሄኮ፥ ጋዶይ ጋክስ፤ ጋዶይ ጋዶ ቦላ ዬስ።
EZE 7:6 ዉርሰꬅ ጋክስ፤ ዉርሰꬅ ማትስ፤ እ ህንተ ቦላ ደንድስ፤ ሄኮ፥ ጋክስ።
EZE 7:7 ቢታ ቦላ ደኤይሳቶ፥ ህንተ ፕርዳይ ጋክስ፤ ዎደይ ማትስ፤ ጋላሳይ ማታትስ። ሄስ ዳጋማ ጋላስፐ አትሽን፥ ዙማታ ቦላ ኡፋይሳን እልልያ ጋላስ ግደና።
EZE 7:8 ሀእ ማታ ዎደ ታኒ ታ ሀንቁዋ ህንተ ቦላ ጉሳና፤ ታ ይሉዋ ህንተ ቦላ ዉርሳና። ታኒ ህንተ ኦሱዋ ግሾ ህንተ ቦላ ፕርዳና፤ እፀትዳ ኤቃ ጎይንዳ ግሾ ህንተና ሴራና።
EZE 7:9 ታ ህንተዉ ቃትከ፤ ህንተና ማርከ። ህንተ ኢታ ኦሱዋዳ ህንተ ቦላ ፕርዳና፤ ህንተ ግዶን ደእያ እፀትዳ ኤቃ ጎይኖታ ቆንጭሳና። ሄ ዎደ ህንተና ሴረይ ታና ጎዳ ግደይሳ ህንተ ኤራና።
EZE 7:10 “ሄኮ፥ ጋላሳይ! ሄ ጋላሳይ ጋክስ! ህንተ ꬋዮይ ማትስ! ህንተ ኢታተꬃይ ጋምቡፅስ፤ ህንተ ኦቶሮይ ጪይስ።
EZE 7:11 ጌላተꬃ ጋሶን ኢታ ኦሶይ ዳርስ። ኤንታፈ እሶይካ አተና፤ ኤንታ ሻሉዋፐ ዎይኮ ኤንታ አሳፐ ዎይኮ ኤንታ ቦንቹዋፈ አታናባይ ባዋ።
EZE 7:12 ዎደይ ጋክስ፤ ጋላሳይ ማትስ፤ ታ ሀንቆይ አሳ ኡባ ቦላ ግድያ ግሾ ሻመይስ ኡፋይቶፎ፤ ባይዘይስ አዛኖፖ።
EZE 7:13 ናምአይ ደኦን ደእያ ዎደ ኡባን፥ ባይዝዳይስ ባ ባይዝዳባ ኤካናዉ ጉየ ስመና። እስራኤለ አሳ ኡባ ቦላ ኦደትዳ ሀ ቆንጨꬃይ ፖለቶና አተና። ኤንታ ናጋራ ጋሶን ኤንታፈ እሶይካ ባ ሸምፑዋ አሸና።
EZE 7:14 ታ ሀንቆይ አሳ ኡባ ቦላ ቆንጫናዉ ደእያ ግሾ ኤንቲ ኦላስ ሞይዘ ፑንድ ጊገቶኮና፤ ኦንካ ኦላስ ከየና።
EZE 7:15 “ካረን ኦል ደኤስ፤ ሶን ቦሽነ ኮሽ ደኤስ። ካታማፐ ካረን ደኤይ ኦላን ሀይቃና፤ ካታማ ግዶን ደኤይ ቦሻንነ ኮሻንነ ዉራና።
EZE 7:16 ከስ ኤክድ አትዳይሳት፥ ዛንጋራፐ ያሻን ደረ ቦላ ፕራꬍድ ከይዳ ሆለዳ፥ ባንታ ናጋራ ግሾ ደረ ቦላ ዘሌላና።
EZE 7:17 ኩሸ ኡባይ ዶጫና፤ ኡባይ ያሻን ኮኮርድ ሼሽ የጋና።
EZE 7:18 ኤንቲ ካዮ ማኦ ማአና፤ ያሻን ኮኮራና። ኤንታ ኡባ ሶምኦይ ዬላ ማአና፤ ኤንታ ኡባ ሁጰይ ሜደታና።
EZE 7:19 ኤንቲ ባንታ ብራ ኦገን ሆላና፤ ኤንታ ዎርቃይ ቱናባ ግዳና። ጎዳ ዎልቃማ ሀንቆ ጋላስ ኤንታ ብራይነ ኤንታ ዎርቃይ ኤንታ አሻናዉ ዳንዳኤና። ኤንታዉ ꬉበ ግድድ፥ ናጋራን ገልስዳ፥ ብራይነ ዎርቃይ ኡሎ ኩምድ፥ ኤንታ ኮሻፐ አሸና።
EZE 7:20 “ኤንቲ ባንታ አልኦ አሌቆታ ኦቶርትድ፥ እፀትዳ ኤቃነ ዬላይያ ምስለ መꬋናዉ ጎኤትዶሶና። ሄሳ ግሾ፥ ታኒ ሄ አልኦ አሌቆታ ኤንታዉ ቱናባ ከሳስ።
EZE 7:21 ታኒ ኤንታ አሌቁዋ አላጋ ቢታ አሳስ ድኦ፥ ቢታን ደእያ ኢታ አሳስ ቦንቀ አꬃዳ እማና፤ ኤንቲ እያ ቱንሳና።
EZE 7:22 ሄ ዎደ ታኒ ታ ሶምኡዋ ሀራ ሶ ዛራና፤ ታ ቦንቾ ኬꬃ ፓንጋት ገልድ ቱንሳና።
EZE 7:23 “ሱረ ፕርዳ ꬋዮን ቢታይ ሱꬃን ኩምዳ ግሾነ ካታማይ ጌላ ኦሶን ኩምዳ ግሾ ሳንꬃላታ ጊግሳ።
EZE 7:24 ታኒ ኢታ ካዎተꬃታ ኤሀዳ ኤንታ ኬꬃታ ቦንቃና መላ ኦꬃና። ዎልቃማታ ኦቶሩዋ ꬋይሳና፤ ኤንታ ጌሻ ጎይኖ በሳት ቱናና።
EZE 7:25 ኤንቲ ዳጋምያ ዎደ ሳሮ ኮያና፤ ሽን ደሞኮና።
EZE 7:26 እስ ጋዶይ ሀራ ጋዶ ካለꬃና፤ እስ ዎረይ ሀራ ዎረ ካልድ ያና። ኤንቲ ናበታፐ ቆንጨꬅ ኮያና፤ ካህነታስ ታማርስያባይ ꬋያና፤ ጭማታስ ዞርያባይ ꬋያና።
EZE 7:27 ካዎይ ዬካና፤ ሀላቃይ ኡፋይስ ቃንፃና፤ አሳይ ያሻን ኮኮራና። ታኒ ኤንታዉ ኤንታ ኦሱዋዳ ኦꬃና፤ ኤንቲ ሀራታ ቦላ ፕርድዳይሳዳ ታ ኤንታ ቦላ ፕርዳና። ታኒ ጎዳ ግደይሳ ኤንቲ ሄሳን ኤራና” ያጌስ።
EZE 8:1 ኑኒ ድኤትዳ ኡሱፑንꬆ ላይꬃን፥ ኡሱፑንꬆ አጌናን፥ እቻሻንꬆ ጋላሳን፥ ታኒ ታ ሶን ኡትዳሽን፥ ይሁዳ ጭማትካ ታ ስንꬃን ኡትዳሽን፥ ኡባ ሃርያ ጎዳ ዎልቃይ ታና ሃርስ።
EZE 8:2 ሄኮ፥ ታኒ ꬎቁ ጋዳ ፄልያ ዎደ አሰ ዳነይሳ በአስ። እያዉ ፄሰ ዳነይሳፈ ጋርሳ ባጋይ ታማ ላጮ ዳኔስ፤ ቦላ ባጋይ ጶልያ ናሰ ብራታ ዳኔስ።
EZE 8:3 እ ኩሸ ዳንያባ ታኮ የድድ፥ ታ ብናና ኦይክስ። አያናይ ታና ሳአፐነ ሳሎፐ ግዶ ፑደ ደንꬅድ፥ ፆሳ ቆንጨꬃን ታና የሩሳላመ ኤፍስ። ያን ቆሞ ባጋራ ፆሳ ኬꬃ ግዶ ዳባባ ገልያ ፐንግያራ ገልስድ፥ ጎዳ ቃናትያ ደንꬅያ ኤቃይ ኤቅዳ በሳ በስስ።
EZE 8:4 ሄኮ፥ ካሰ ታኒ ዛንጋራን በእዳይሳዳ፥ እስራኤለ ፆሳ ቦንቹዋ ያን በአስ።
EZE 8:5 ጎዳይ ታኮ፥ “ነኖ አሳ ናአዉ፥ ፑደሀ ባጋ ፄላ” ያግስ። ታኒ ፄልያ ዎደ ቃናተ ደንꬅያ ኤቃይ፥ ድርሳ ፐንግያ ስንꬃን ደእያ ያርሾ በሳ ማታን ደኤይሳ በአስ።
EZE 8:6 እ ታኮ፥ “ነኖ፥ አሳ ናአዉ፥ ኤንቲ ኦꬅያባ በአይ? ታና ታ ጌሻ ኬꬃፈ ሃሳናዉ፥ እስራኤለ አሳይ ኦꬅያ እፀትዳ ኤቃ ጎይኑዋ በአይ? ሀይሳፈ አꬍያ እፀትዳ ኤቃ ጎይኖ ኔኒ ቡሮ በአና” ያግስ።
EZE 8:7 እ ታና ፆሳ ኬꬃ ዳባባ ፐንገ ኤህን፥ ታኒ ፄልያ ዎደ፥ ሄኮ፥ ጎዳ ቦላ ፆኤ በአስ።
EZE 8:8 እ ታኮ፥ “ነኖ፥ አሳ ናአዉ፥ ጎዳ ቦካ” ያግን፥ ታ ቦክያ ዎደ እስ ፐንገ ያን በአስ።
EZE 8:9 እ ታኮ፥ “ገላዳ ኤንቲ ያን ኦꬅያ ኢታ ኦሱዋነ እፀትዳ ኤቃ በአ” ያግስ።
EZE 8:10 ታ ግዶ ገላዳ ፄልያ ዎደ፥ ሄኮ፥ ሳአራ ጎሸትያ ዱማ ዱማ መተꬃታ ምስለይ፥ ቱና ዶአታ ምስለይነ እስራኤለ አሳ ኤቃታ ኡባ ምስለይ ጎዳ ቦላ ዩይ አꬍድ መት ኡትዳይሳ በአስ።
EZE 8:11 ኤንታፈ ስንꬃ ባጋራ እስራኤለ አሳፐ ላፑን ታሙ ጭማት ኤቅዶሶና፤ ሳፋና ናኣ ያእዛን ኤንታ ግዶን ኤቅስ። ኡባይ እፃነ ጩይስያባ ባንታ ኩሸን ኦይክዶሶና፤ እፃንያ ጩያይ ቱቁ ጌስ።
EZE 8:12 ጎዳይ ታኮ፥ “ነኖ፥ አሳ ናአዉ፥ እስራኤለ አሳ ጭማት ኡባይ ꬉማን ባንታ ኤቃ ምስልያ ኬꬃን ኦꬅያባ በአይ? ኤንቲ፥ ጎዳይ ኑና በኤና፤ ጎዳይ ሀ ቢታ አግስ” ያጎሶና።
EZE 8:13 እ ታኮ፥ “ሀይሳፈ አꬍያ እፀትዳ ኤቃ ጎይኖ ኔኒ ቡሮ በአና” ያግስ።
EZE 8:14 ሄሳፈ ጉየ፥ ፑደሀ ባጋን ደእያ ፆሳ ኬꬃ ፐንግያኮ ኤፍን፥ ሄኮ፥ ማጫሳይ ያን ኡትድ፥ ታሙዛ ጌተትያ ባንታ ፆሳስ ዬክሽን በአስ።
EZE 8:15 እ ታኮ፥ “ነኖ አሳ ናአዉ፥ ሀይሳ በአይ? ሀይሳፈ አꬍያ እፀትዳ ኤቃ ጎይኖ ኔኒ ቡሮ በአና” ያግስ።
EZE 8:16 ሄሳፈ ጉየ፥ እ ታና ፆሳ ኬꬃ ግዶ ዳባባ ኤፍስ፤ ያን ፆሳ ኬꬃ ፐንግያ ማታን፥ ባራንዳፈነ ያርሾ በሳፈ ግዶን፥ ላታማነ እቻሹ ግድያ አሳታ በአስ። ኤንቲ ባንታ ዞኩዋ ፆሳ ኬꬃኮ፥ ባንታ ሶምኡዋ ዶሎሀኮ ዛሪድ፥ ዶሎሀራ ከይያ አዋ ጎይኖሶና።
EZE 8:17 ጎዳይ ታኮ፥ “ነኖ አሳ ናአዉ፥ ሀይሳ በአዲ? ይሁዳ አሳይ ሀ እፀትዳ ኤቃ ጎይኖይ ሀይሳን ኦይስ ኤንታዉ ላፋባ ግድዴ? ኤንቲ ቢታ ጌላ ኦሶን ኩንꬅድ፥ ዛሪ ዛሪድ ታና ሀንቀꬃናዉ በሲ? ኤንቲ ባንታዉ ዳንዳኤትዳ መላ ታና ኢስድ ጫዮሶና።
EZE 8:18 ሄሳ ግሾ፥ ታ ኤንታራ ሀንቆን ጋሄታና፤ ታ ኤንታዉ ቃትከ፤ ኤንታፈ እሱዋካ አሽከ። ኤንቲ ባንታ ቃላ ꬎቃ ኦꬅድ ዋስንካ፥ ታ ኤንታ ስእከ” ያግስ።
EZE 9:1 ሄሳፈ ጉየ፥ “ካታማ ሴራናዉ ዶረትዳ አሳት፥ ኦላ ሚሸ ባንታ ኩሸን ኦይክድ ሃ ዮሶና” ያግድ ዋስሽን ታኒ ስአስ።
EZE 9:2 ሄኮ፥ ዎꬍያ ኦላ ሚሸ ባንታ ኩሸን ኦይክዳ ኡሱፑን አሳት፥ ፑደሀ ባጋን ደእያ ቆሞ ፐንግያፈ ይዶሶና። ኤንታራ እስፈ ሊኖፐ ኦሰትዳ ማኦ ማእድ፥ ባ ምየን ፃፍያባ ኮሮጆን ኦይክዳ እስ አስ ደኤስ። ኤንቲ ግዶ ገልድ፥ ናሰ ብራታፐ ኦሰትዳ ያርሾ በሳ ማታን ኤቅዶሶና።
EZE 9:3 እስራኤለ ፆሳ ቦንቾይ ባ ደእያ ክሩበታፐ ደንድድ፥ ፆሳ ኬꬃ ፐንገ ብስ። ጎዳይ ሊኖ ማእድ፥ ባ ምየን ፃፍያባ ኮሮጆን ኦይክዳ አድያ ፄግድ፥
EZE 9:4 “የሩሳላመ ካታማ ግዶ ካንꬃዳ ባሸ፥ ያን ኦሰትያ እፀትዳ ኤቃ ጎይኑዋ ግሾ አዛንሸነ ኦልሸ ደእያ አሳ ሶምኦን ማላ ዎꬃ” ያግስ።
EZE 9:5 ታ ስእሽን፥ ፆሳይ ሀራታኮ ሀይሳዳ ያግስ፦ “እያ ጌዶ ካልድ፥ ካታማ ግዶ ካንꬅድ ዎꬍተ። እሱዋካ ማሮፕተ፤ ኦደስካ ቃቶፍተ።
EZE 9:6 ጭማታ፥ ፓንꬃታ፥ ጌላኦታ፥ ማጫሳታነ ናይታ ኡባ ሹክተ፤ ሽን ሶምኦን ማል ደእያ አሰ ኦናካ ቦቾፍተ። ታ ኬꬃን ዎꬎ ዶምተ” ያግስ። ኤንቲ ፆሳ ኬꬃ ስንꬃን ኤቅዳ ጭማታን ዎꬎ ዶምዶሶና።
EZE 9:7 ፆሳይ፥ “ብድ ፆሳ ኬꬃ ቱንስተ፤ ዳባባታ አሀን ኩንꬅተ” ያግስ። ኤንቲ ከይድ፥ ካታማ ግዶ ኡባን ዎꬎ ዶምዶሶና።
EZE 9:8 ኤንቲ ዎꬍሽን፥ ታኒ ታርካ አታዳ፥ ታ ሶምኡዋራ ቢታን ጉፋናዳ፥ ታ ቃላ ꬎቁ ኦꬃዳ፥ “አቤት ኡባ ሃርያ ጎዳዉ፥ ኔኒ የሩሳላመ ቦላ ጉስያ ነ ሀንቁዋን እስራኤለፐ አትዳይሳታ ኩመꬅ ꬋይሳኔ?” ያጋስ።
EZE 9:9 እ ዛሪድ፥ “እስራኤለነ ይሁዳ አሳ ናጋራይ ዳሮ፤ ቢታ ኡባይ ሱꬃን ኩምስ። ካታማ ኡባን ሱረ ፕርዲ ባዋ። አሳይ፥ ‘ጎዳይ ሀ ቢታ አግስ፤ ጎዳይ በኤና’ ያጎሶና።
EZE 9:10 ሄሳ ግሾ፥ ታ ኤንታዉ ቃትከ፤ ኤንታና ማርከ። ታኒ ኤንታ ኦግያ መላ ኤንታዉ ዛራና” ያግስ።
EZE 9:11 ሄሳፈ ጉየ፥ ሊኖ ማእድ፥ ባ ምየን ፃፍያባ ኮሮጆን ኦይክዳ አደይ፥ ጉየ ስሚድ፥ “ነ ታና ኪትዳይሳዳ ኦꬃስ” ያግስ።
EZE 10:1 ታኒ ክሩበታ ሁጰፐ ቦላ ባጋራ ደእያ ሳሎ ጉፋንꬆ ዳነይሳ በአስ። ክሩቤላ ቦላ ሳንፓረ አልኦ ሹቻፈ ኦሰትዳ አራታ በአስ።
EZE 10:2 ጎዳይ ሊኖ ማእዳ አድያኮ፥ “ክሩቤላፐ ጋርሳ ባጋራ ገርቶታ ግዶራ ካንꬃዳ ባ። ፂፋ ቦንቆ ነ ኩሸን ኮጰታ ኤካዳ፥ ካታማ ቦላ ላላ” ያግስ። ታ ፄልሽን ታማ ኤካናዉ ገልስ።
EZE 10:3 አደይ ሶ ገልያ ዎደ ክሩቤቲ ፆሳ ኬꬃፈ ጋርሳ ባጋራ ኤቅዶሶና፤ ግዶ ዳባባን ሻር ኩምስ።
EZE 10:4 ጎዳ ቦንቾይ ክሩቤላ ቦላፈ ደንድድ፥ ፆሳ ኬꬃ ፐንገ ብስ። ሻር ኬꬃ ኩምስ፤ ዳባባይ ጎዳ ቦንቾ ጶለꬃን ኩምስ።
EZE 10:5 ክሩቤላ ቀፍያ ግርሳይ ኡባ ሃርያ ጎዳ ግርሳዳ ካረ ዳባባን ስኤቴስ።
EZE 10:6 ጎዳይ ሊኖ ማእዳ አድያ፥ “ክሩቤላ ጋርሳ ባጋን ደእያ ገርቶታ ግዶፈ ታማ ኤካ” ያግድ ኪትን፥ እ ገልድ እስ ገርቱዋ ማታን ኤቅስ።
EZE 10:7 ክሩቤላፐ እሶይ ባንታ ግዶን ደእያ ታማን ባ ኩሽያ የድድ፥ እያፐ ጉꬃራ ኤክድ፥ ሊኖ ማእዳ አድያ ኩሸን ዎꬅን፥ እ ኤክድ ከይስ።
EZE 10:8 ክሩቤላ ቀፍያፐ ጋርሳ ባጋራ አሳ ኩሸ ዳንያባይ ደኤስ።
EZE 10:9 ታ ፄልያ ዎደ ክሩቤላ ማታን ኦይዱ ገርቶይ ደኤስ። እስ እስ ክሩብያ ማታን እስ እስ ገርቶይ ደኤይሳ በአስ፤ ሄ ገርቶይ አልኦ ሹቻዳ ጶሌስ።
EZE 10:10 ኤንቲ ኦይዳይ እሶይ እሱዋ ዳኖሶና፤ እስ እስ ገርቶይ ሀራ ገርቶ ግዶራ ካንꬅ አꬍድ መትዳ ዳኔስ።
EZE 10:11 ክሩቤቲ ብያ ዎደ ኦይዱ ባጋ ያ ሃ ስሞና ቦሶና፤ እስ ገርቶት ብዳ ግንደ ሀንኮ ገርቶይ ያ ሃ ስሞና ስት ግድ ቦሶና።
EZE 10:12 ኤንታ ኩመꬃ ቦላ፥ ሄስካ ኤንታ ዞኩዋን፥ ኤንታ ኩሽያን፥ ኤንታ ቀፍያንነ ኤንታ ኦይዱ ገርቶታን ፄልያ አይፈይ ኩምስ።
EZE 10:13 ታ ስእሽን፥ ገርቶት ዩይያ ገርቶታ ጌተትድ ፄገትዶሶና።
EZE 10:14 እስ እስ ክሩብያስ ኦይዱ ሶምኦይ ደኤስ። ኮይሮ ሶምኦይ ክሩበ ሶምኦ፥ ናምአንꬆይ አሳ ሶምኦ፥ ሄꬓንꬆይ ጋሞ ሶምኦ፤ ኦይዳንꬆይ አርጋንꬃ ሶምኦ።
EZE 10:15 ክሩበት ፑደ ደንድዶሶና። ኤንቲ ታኒ ኮቦራ ሻፋ ማታን በእዳ ደኦን ደእያ መታꬃታ።
EZE 10:16 ክሩበት ብያ ዎደ፥ ኤንታ ምየን ደእያ ገርቶት ቦሶና፤ ክሩበት ቢታፈ ፑደ ደንዳናዉ ባንታ ቀፍያ ምጭያ ዎደ ገርቶት ኤንታ ምየፐ ሻከቶኮና።
EZE 10:17 ደኦን ደእያ መተꬃታ አያናይ ገርቶታ ግዶን ደእያ ግሾ፥ ኤንቲ ኤቅያ ዎደ ገርቶት ኤቆሶና፤ ኤንቲ ቢታፈ ፑደ ደንድያ ዎደ ኤንቲ ደንዶሶና።
EZE 10:18 ሄሳፈ ጉየ፥ ጎዳ ቦንቾይ ፆሳ ኬꬃ ፐንገፈ ደንድድ፥ ክሩበታፐ ቦላ ባጋን ኤቅስ።
EZE 10:19 ታ ፄልሽን፥ ክሩበት ባንታ ቀፍያ ምጭድ፥ ክርክሮታራ እስፈ ቢታፈ ፑደ ደንድዶሶና። ኤንቲ ፆሳ ኬꬃፈ ዶሎሀ ባጋ ፐንግያ ማታን ኤቅዶሶና። እስራኤለ ፆሳ ቦንቾይ ኤንታፈ ቦላ ባጋራ ደኤስ።
EZE 10:20 ኤንቲ ኮቦራ ሻፋን እስራኤለ ፆሳፈ ጋርሳ ባጋራ በእዳ ደኦን ደእያ መታꬃታ። ኤንቲ ክሩበታ ግደይሳ ታ ኤራስ።
EZE 10:21 ኤንታ ኡባስ ኦይዱ ሶምኦትነ፥ ኦይዱ ቀፈት ደኦሶና፤ ኤንታ ቀፈታፐ ጋርሳ ባጋራ አሳ ኩሸ ዳንያባይ ደኤስ።
EZE 10:22 ኤንታ ሶምኦት ኮቦራ ሻፋ ማታን ታ በእዳ ሶምኦታ ዳኖሶና። ኤንቲ ኡባይ ስት ግድ ስን ቦሶና።
EZE 11:1 ፆሳ አያናይ ታና ደንꬅድ፥ ፆሳ ኬꬃስ ዶሎሀ ባጋ ፐንግያኮ ኤፍስ። ፐንግያ ማታን ላታማነ እቻሹ አደት ደኦሶና፤ ኤንታ ግዶን አሳ ካለꬅያ አዙራ ናኣ ያእዛና ባናያ ናኣ ፓላፃ በአስ።
EZE 11:2 ጎዳይ ታኮ፥ “ነኖ አሳ ናአዉ፥ ሀ አሳይ ካታማ ቦላ ኢታ ቆፋ ቆፖሶና፤ ኢታ ዞረ ዞረቶሶና።
EZE 11:3 ኤንቲ፥ ‘ኑኒ ኬ ዛሪድ ኬፃና ዎደይ ማታትስ። ሀ ካታማይ አሾ ፃሮ፤ ኑኒ ቃስ አሾ’ ያጎሶና።
EZE 11:4 ሄሳ ግሾ፥ ትንብተ ኦዳ፤ አሳ ናአዉ፥ ኤንታ ቦላ ትንብተ ኦዳ” ያግስ።
EZE 11:5 ጎዳ አያናይ ታ ቦላ ዎꬍድ፥ ታኮ ሀይሳዳ ያግስ፦ “እስራኤለ አሳዉ፥ ህንተ ሄሳዳ ጌታ፤ ሽን ታ ህንተ አይ ቆፕያኮ ኤራይስ።
EZE 11:6 ሀ ካታማን ህንተ ዳሮ አሳ ዎꬍድ፥ ኦገ ኡባን አሀ ኩንꬅደታ” ያጌስ።
EZE 11:7 ሄሳ ግሾ፥ ኡባ ሃርያ ጎዳይ ሀይሳዳ ያጌስ፤ “ህንተ ዎꬍድ የግዳ አሀይ አሾ፤ ሀ ካታማይ አሾ ፃሮ፤ ሽን ታ ህንተና ሀ ካታማፐ የደꬃዳ ከሳና።
EZE 11:8 ህንተ ኦላስ ያይደታ፤ ሽን ታ ህንተ ያይዳ ኦላ ህንተ ቦላ ኤሀና።
EZE 11:9 ታ ህንተና ሀ ካታማፐ ከሳዳ፥ አላጋታ ኩሸን አꬃዳ እማና፤ ታ ህንተና ህንቴ ዛዋን ፕርዳና።
EZE 11:10 ህንተ ኦላን ዉራና፤ ታ ህንተና ህንተ ቢታን ፕርዳና። ሄ ዎደ ህንተ ታ ጎዳ ግደይሳ ኤራና።
EZE 11:11 ሀ ካታማይ ህንተዉ አሾ ፃሮ ግደና፤ ህንተካ እያ ግዶን አሾ ግደከታ። ታ ህንተ ቦላ እስራኤለ ዛዋን ፕርዳና።
EZE 11:12 ህንተ ታ ህግያነ ታ ዎጋ ሻርድ ህንተ ዩሹዋን ደእያ ካዎተꬃታ ዎጋ መላ ደእዳ ግሾ ህንተ ቦላ ፕርደይ ጎዳ ግደይሳ ህንተ ኤራና” ያጌስ ኡባ ሃርያ ጎዳይ።
EZE 11:13 ታ ትንብተ ኦድያ ዎደ ባናያ ናኣ ፓላፅ ሀይቅን፥ ታኒ ጉፋናዳ፥ ታ ቃላ ꬎቁ ኦꬃዳ፥ “አቤት ኡባ ሃርያ ጎዳዉ፥ እስራኤለፐ አትዳይሳታ ኩመꬅ ዉርሳና ሀናዬ?” ያጋዳ ዋሳስ።
EZE 11:14 ጎዳ ቃላይ ታኮ ሀይሳዳ ያግድ ይስ፤
EZE 11:15 “ነኖ አሳ ናአዉ፥ የሩሳላመን ደእያ እስራኤለ አሳይ ነባነ ድኦን ደእያ ነ ዳቦታባ፥ ‘ኤንቲ ጎዳፐ ሃክዶሶና፤ ሀ ቢታይ ኑስ ላታ ግድድ እመትስ’ ” ያግድ ሃሳዮሶና።
EZE 11:16 ኡባ ሃርያ ጎዳይ ሀይሳዳ ያጌስ፦ “ታ ኤንታ ሃሆን ደእያ ካዎተꬃታ ግዶ የድኮካ፥ ቢታ ኡባን ላልኮካ፥ ኤንቲ ብዳ ቢታታን ጉꬃ ዎደስ ኤንታራ ግዳና” ያጌስ።
EZE 11:17 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ታ ህንተና ካዎተꬃታፐነ ህንተ ላለትዳ ቢታታፐ ሺሻና፤ እስራኤለ ቢታ ዛራዳ ህንተዉ እማና።
EZE 11:18 ኤንቲ ጉየ ስሚድ ያ ዎደ ቱና ምስለታነ ኤቃታ ቢታፈ ꬋይሳና።
EZE 11:19 ታኒ ኤንታዉ እስ ዎዛና እማና፤ ኦራꬃ አያና ኤንታ ግዶን ዎꬃና። ኤንታፈ ሹቻ ዎዛና ድጋዳ፥ አሾ ዎዛና ኤንታዉ እማና።
EZE 11:20 ሄ ዎደ ኤንቲ ታ ህግያ ካላና፤ ታ ኪታ ናጋና። ኤንቲ ታ አሰ ግዳና፤ ታኒ ኤንታ ፆሳ ግዳና።
EZE 11:21 ግዶሽን፥ እፀትዳ ምስልያነ ቱና ኤቃ ጎይናናዉ ዶሰይሳታ ታኒ ኤንታ ኦሱዋዳ ኦꬃና” ያጌስ ኡባ ሃርያ ጎዳይ።
EZE 11:22 ሄ ዎደ ክሩበት ባንታ ቀፍያ ምጭዶሶና፤ ኤንታ ምየን ገርቶት ደኦሶና። እስራኤለ ፆሳ ቦንቾይ ኤንታፈ ቦላራ ደኤስ።
EZE 11:23 ጎዳ ቦንቾይ ካታማ ግዶፈ ደንድድ፥ ዶሎሀ ባጋን ደእያ ዙማ ቦላ ኤቅስ።
EZE 11:24 ፆሳ አያናይ ታዉ እምዳ ቆንጨꬃን አያናይ ታና ቢታፈ ደንꬅድ፥ ካልዳወታ ቢታን ደእያ ድኤትዳይሳታኮ ኤፍስ። ሄሳፈ ጉየ፥ ቆንጨꬃይ ታፐ ሻከትስ።
EZE 11:25 ጎዳይ ታና በስዳባ ኡባ ድኦን ደኤይሳታስ ኦዳስ።
EZE 12:1 ጎዳ ቃላይ ታኮ ሀይሳዳ ያግድ ይስ፤
EZE 12:2 “ነኖ አሳ ናአዉ፥ ኔኒ ጌላ አሳ ግዶን ደኣሳ። ኤንቲ ጌላ አስ ግድያ ግሾ ኤንታዉ አይፈይ ደኤስ፥ ሽን ደሞኮና፤ ሀይꬅ ደኤስ፥ ሽን ስኦኮና።
EZE 12:3 ሄሳ ግሾ፥ አሳ ናአዉ፥ ድኦን ብያ አሳዳ፥ ኔኒ ኤፋናዉ ዳንዳእያባ ኡባ ሺሻ ቃቻዳ፥ ጋላስ ኤንቲ በእሽን ከያዳ፥ ነ ደእያ በሳፈ ሀራ በሲ ባ። ኦን ኤር ኤንቲ ጌላ አስ ግድኮካ አኬካና።
EZE 12:4 ጋላስ ኤንቲ ፄልሽን፥ ድኦ ብያ አሳዳ፥ ነ ቃችዳባ ካረ ከሳ፤ ኦማርስ ኤንቲ ፄልሽን፥ ድኤትድ ብያ አሳዳ ከያ።
EZE 12:5 ኤንቲ ፄልሽን፥ ነ ኬꬃ ጎዳ ሉካዳ ፆእያራ ከያ።
EZE 12:6 ነ ከስዳ ሚሽያ ኤንቲ ፄልሽን፥ ነ ሀሸን ቶካዳ፥ ለምእሽን ደንዳዳ ባ። ነ አዉ ብያኮ በኦና መላ ነ ሶምኡዋ ካማ። ነ ሀንያባይ እስራኤለ አሳስ ማላ ግዳና” ያግስ።
EZE 12:7 ታኒ እ ታና ኪትዳይሳዳ ኦꬃስ። ድኤትድ ብያ አሳዳ፥ ጋላስ ታ ቃችዳባ ካረ ከሳስ። ኦማርስ ታ ኬꬃ ጎዳ ታ ኩሸን ሉካዳ ከያስ፤ ታ ከስዳ ሚሽያ ኤንቲ ፄልሽን፥ ታ ሀሸን ቶካዳ፥ ለምእሽን ባስ።
EZE 12:8 ዎንታ ጉራ ጎዳ ቃላይ ታኮ ሀይሳዳ ያግድ ይስ።
EZE 12:9 “ነኖ አሳ ናአዉ፥ ጌላ እስራኤለ አሳይ፥ ‘ነ ኦꬅያባይ አይቤ?’ ግድ ነና ኦይችቦኮና?
EZE 12:10 ኤንታዉ ኡባ ሃርያ ጎዳይ ሀይሳዳ ያጌስ ጋዳ ኦዳ። ‘ሀ ትንብተይ የሩሳላመን ደእያ ሀላቃባነ እስራኤለ አሳባ ኦዴስ።’
EZE 12:11 ነ ሀንያባይ ኤንታዉ ማላ ግደይሳ ኦዳ፤ ኤንቲ ድኤትድ ሀራ ቢታ ባና።
EZE 12:12 ኤንታ ግዶን ደእያ ሀላቃይ ጎዳ ሉክድ ባ ሚሽያ ባ ሀሸን ቶክድ፥ ለምእሽን ባና፤ ቢታ በኦና መላ ባ ሶምኡዋ ካማና።
EZE 12:13 ታ ግተ እያ ስንꬃን የጋዳ ኦይካና። ታኒ እያ ካልዳወታ ቢታ ባብሎነ ካታማ ኤሀና፤ ሽን እ ሄ ካታማ በኦና ሀይቃና።
EZE 12:14 እያ ዩሾን ደእያ እያ ማደይሳታነ እያ ኦላንቾታ ኡባ ታ ኡባ በሲ ፕስክ ኦꬃና፤ ታ ኤንታ ማሻን የደꬃና።
EZE 12:15 “ኤንታ ታ ሀራ ቢታታነ ካዎተꬃታ ግዶ ላልያ ዎደ ታ ጎዳ ግደይሳ ኤንቲ ሄ ዎደ ኤራና።
EZE 12:16 ኤንቲ ቢያ ካዎተꬃታ ግዶን ባንታ ቱና ኦሶ ፓፃና መላ ኤንታፈ ጉꬃታ ኦላፐ፥ ኮሻፐነ ሀርገፐ አትዲ አከካናዳ ኦꬃና። ታ ጎዳ ግደይሳ ኤንቲ ሄ ዎደ ኤራና” ያግስ።
EZE 12:17 ጎዳ ቃላይ ታኮ ሀይሳዳ ያግድ ይስ፤
EZE 12:18 “ነኖ አሳ ናአዉ፥ ነ ካꬃ ዳጋማን ማ፤ ነ ሃꬃ ያሻን ኮኮራሸ ኡያ።
EZE 12:19 ቢታን ደእያ አሳኮ ሀይሳዳ ያጋ። ኡባ ሃርያ ጎዳይ እስራኤለ ቢታን ደእያ የሩሳላመ አሳባ ሀይሳዳ ያጌስ፦ ‘ቢታን ደእያ አሳ ኡባይ ገነ ኦꬅያ ግሾ ኤንታ ቢታይ ካሎ አታና፥ ኤንቲ ባንታ ኡይꬃ ህርጋን ማና፤ ባንታ ሃꬃ ዳጋማን ኡያና።
EZE 12:20 ሀእ አስ ኩምዳ ካታማት ꬋያና፤ ቢታይ ባይሳ ግዳና። ታኒ ጎዳ ግደይሳ ኤንቲ ሄ ዎደ ኤራና’ ” ያጌስ።
EZE 12:21 ጎዳ ቃላይ ታኮ ሀይሳዳ ያግድ ይስ፤
EZE 12:22 “ነኖ አሳ ናአዉ፥ ህንተ እስራኤለ ቢታን፥ ዎደ አዱቅስ ቆንጨꬅ ኡባይ ሀዳ ግድስ አꬍስ ያግድ ሌምሰይ እ አይቤ?
EZE 12:23 ኡባ ሃርያ ጎዳይ ሀይሳዳ ያጌስ፤ ‘ታኒ ሀ ሌምሶይ ናምአንꬆ ኦደቶና መላ ኦꬃና፤ ኤንቲ ዛሪድ፥ እስራኤለ ቢታን ሌምሶኮና’ ያጌስ። ‘ጋላሳይ ማታትስ፤ ቆንጨꬅ ኡባይ ፖለታና ሀኔስ’ ያጋ።
EZE 12:24 ህዛፐ ጉየ እስራኤለ አሳ ግዶን ዎርዶ ቆንጨꬅነ ሙሩኖ ዴና።
EZE 12:25 ታ ጎዳይ ኦዳናዉ ኮይዳባ ኦዳና፤ ሄስካ ጋምኦና ፖለታና። ህንተኖ፥ ጌላቶ፥ ታ ኦድያባ ኡባ ህንተ ላይꬃን ፖላና” ያጌስ ኡባ ሃርያ ጎዳይ።
EZE 12:26 ቃስካ ጎዳ ቃላይ ታኮ ሀይሳዳ ያግድ ይስ።
EZE 12:27 “ነኖ አሳ ናአዉ፥ እስራኤለ አሳይ፥ ‘እ በእዳ ቆንጨꬃይነ እ ኦድያ ትንብተይ ዳሮ ላይꬃፈ ጉየ ሀናናባ’ ያግድ ኦዶሶና።
EZE 12:28 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ ‘ታ ኦድያ ቃላይ ፖለታናፐ አትሽን፥ እሶይካ ጋምኤና’ ” ያጌስ ኡባ ሃርያ ጎዳይ።
EZE 13:1 ጎዳ ቃላይ ሀይሳዳ ያግሸ ታኮ ይስ።
EZE 13:2 “ነኖ አሳ ናአዉ፥ እስራኤለን ትንብተ ኦድያ ናበታ ቦላ ነ ትንብተ ኦዳ። ባንታዉ መꬍ ከስድ ትንብተ ኦደይሳታ ሀይሳዳ ያጋ፤ ጎዳ ቃላ ስእተ።
EZE 13:3 ኡባ ሃርያ ጎዳይ ሀይሳዳ ያጌስ፦ ‘አይባካ በኦና ባንታ ቆፋን ደንድድ ትንብተ ኦድያ ኤያ ናበታ አየ!’
EZE 13:4 እስራኤለ አሳዉ፥ ህንተ ናበት ላለትዳ ካታማን ደእያ ዎርካናታ መላ።
EZE 13:5 ጎዳ ጋላሳን ኦላን ምንድ ኤቃና መላ እስራኤለ አሳ ድርሳ ግምብያ ምንꬅድ ኤስቤከታ፤ ፑደ ላለትዳ በሳ ከይበከታ።
EZE 13:6 ኤንታ ቆንጨꬃይነ ኤንታ ብታይ ዎርዶ። ኤንቲ ጎዳይ ኪቶናሽን፥ ጎዳይ ሀይሳዳ ያጌስ ያጎሶና። ኤንቲ ኦደይሳ ጎዳይ ፖላና ግድ ናጎሶና።
EZE 13:7 ታኒ ኦዶናሽን፥ ጎዳይ ሀይሳዳ ያጌስ ያግድ ኦድያነ ዎርዶ ቆንጨꬅ በኤይሳታነ ሙራንቾታ ግደከቲ?” ያጌስ።
EZE 13:8 ሄሳ ግሾ፥ ኡባ ሃርያ ጎዳይ ሀይሳዳ ያጌስ፤ “ህንተ በእዳ ቆንጨꬃነ ህንተ ኦድዳ ትንብተይ ዎርዶ ግድያ ግሾ ታ ህንተዉ ሞርከ ግዳና።
EZE 13:9 ዎርዶ ቆንጨꬅ በእያነ ሙራንችያ ናበታ ቦላ ታኒ ታ ኩሽያ ደንꬃና። ኤንቲ ታ አሳ ዞረታን ገሎኮና፤ እስራኤለ አሳ ማዝጋበን ፃፈቶኮና፤ ኤንቲ እስራኤለ ቢታ ገሎኮና። ሄ ዎደ ታ ኡባ ሃርያ ጎዳ ግደይሳ ህንተ ኤራና።
EZE 13:10 “ሳሮይ ባይናሽን ሳእ ሳሮ ያግድ ታ አሳ ባለꬆሶና። አሳይ ሹቹ ኬልድ ዶርን፥ ኤንቲ ቦቅንተ ትዮሶና።
EZE 13:11 ሀ ቦቅንተ ትየይሳታስ፤ ሀ ህንተ ትይዳ ግምበይ ኩንዳና፤ ዎልቃማ እር ቡካና። ታኒ ግታ ሻች የጋና፤ ዎልቃማ ጎተይ ደንዳና።
EZE 13:12 ሄ ግምበይ ኩንድያ ዎደ አሳይ ህንተ ትይዳ ኖራይ አኔ? ያግድ ኦይቾና አጋነ” ያጌስ።
EZE 13:13 ኡባ ሃርያ ጎዳይ ሀይሳዳ ያጌስ፦ “ታኒ ግምብያ ላላናዉ፤ ታ ሀንቁዋን ዎልቃማ ጎተ የዳና፤ ታ ይሉዋን ግታ ሻቻ ኪታና፥ ታ ሸንያን ዎልቃማ እራ ቡክሳና።
EZE 13:14 ህንተ ቦቅንተ ትይዳ ግምብያ ታ መንረꬃና፤ ባሶይ በንታና ጋካናዉ ላላና። እ ኩንድያ ዎደ ህንተ እያ ግዶን ሀይቃና፤ ሄ ዎደ ታኒ ጎዳ ግደይሳ ህንተ ኤራና።
EZE 13:15 ታ ሀንቆይ ግምብያ ቦላነ ግምብያ ቦቅንተ ትይዳ አሳታ ቦላ ዎꬋና። ታ ህንተኮ፥ ‘ግምበይ ባዋ፤ ግምብያ ቦቅንተ ትይዳይሳትካ ዶኮና።
EZE 13:16 እስራኤለን ደእያ ናበት፥ የሩሳላመባ ትንብተ ኦደይሳት፥ ሳሮይ ባይናሽን ሳሮ ቆንጨꬅ በኤይሳት ዶኮና’ ” ያጌስ ኡባ ሃርያ ጎዳይ።
EZE 13:17 “ነኖ አሳ ናአዉ፥ ባንታ ቆፋን ደንድድ፥ ትንብተ ኦድያ ማጫሳ ደሬቃ ፄላዳ ኤንታ ቦላ ትንብተ ኦዳ።
EZE 13:18 ኡባ ሃርያ ጎዳይ ሀይሳዳ ያጌስ፦ ‘ሀራ አሳ ቦላ ዎልቅ ዳናዳ፥ ኤንታ ሀሽያ ቦላ ሙሩኖባ ስክያነ አሳስ ኡባስ ቢታ ቃጨ ጊግስያ ማጫሳ አየ! ህንተ ታ አሳ ፅሄን ኦይክድ ህንተ ሸምፑዋ አሻኔ?
EZE 13:19 እስ ኮጰ ባንጋ ዎይኮ እስ ባሶ ኡይꬅ ደማናዉ፥ ዬላያባ ኦꬅድ፥ ታ አሳ ስንꬃን ታና ካዉሼታ። ህንተ ሀይቃናዉ በሶናይሳታ ዎꬍድ ዳናዉ በሶናይሳታ አሼታ። ያትድ ታ አሳ ዎርዶ ኦዴታ፤ ኤንትካ ህንተ ዎርዱዋ ስኦሶና’ ” ያጌስ።
EZE 13:20 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ህንተዉ ሀራ አሳ ቦላ ዎልቅ ዳና መላ ህንተ ኩሸን ቃችዳ ሙሩኑዋ ቃጭያ ታ ዳፋ ኤካና። ታ እያ ህንተ ኩሽያፐ ዱꬃ ሆላና፤ ፅሄፐ ከስ ኤክያ ካፎዳ ታ ኤንታ ህንተ ፅህያፐ ከሳ ኤካና።
EZE 13:21 ታኒ ህንተ ሻሽያ ቃራ ኤካዳ፥ ታ አሳ መርናዉ ህንተ ኩሸፐ አሻና። ታኒ ጎዳ ህንተ ሄ ዎደ ኤራና።
EZE 13:22 ታኒ አዛንꬃቦና ፅሎ አሳ ዎዛና ህንተ ዎርዶን አዛንꬅደታ፤ ናጋራንቾት ባንታ ኢታ ኦሱዋፐ ስሚድ፥ ባንታ ሸምፑዋ አሾና መላ ኤንታ ምንꬅደታ።
EZE 13:23 ህዛፐ ህንተ ዎርዶ ቆንጨꬅ በኤከታ፤ ሙሩነከታ። ታኒ ታ አሳ ህንተ ኩሸፐ ከሳ ኤካና። ታኒ ጎዳ ግደይሳ ህንተ ሄ ዎደ ኤራና” ያጌስ።
EZE 14:1 እስራኤለ ጭማታፐ እሶት እሶት ታኮ ይድ፥ ታ ስንꬃን ኡትዶሶና።
EZE 14:2 ጎዳ ቃላይ ሀይሳዳ ያግሸ ታኮ ይስ።
EZE 14:3 “አሳ ናአዉ፥ ሀ አሳት ባንታ ዎዛናን ኤቃ ኤስዶሶና፤ ኤንታ ናጋራይ ኤንታዉ ꬉበ ሹች ግድስ። ያትን፥ ኤንቲ ታና ኦይቻና መላ ኦꬆዬ?”
EZE 14:4 ነ ኤንታዉ ኡባ ሃርያ ጎዳይ ሀይሳዳ ያጌስ ጋዳ ኦዳ፤ “እስራኤለ አሳፐ ኦንካ ኤቃ ባ ዎዛናን ዎꬅድ፥ እያ ናጋራይ እያዉ ꬉበ ሹቹ ግድን፥ ናበ ኦይቻናዉ ቢኮ፥ ታኒ ታ ሁጰን እያ ኤቃታ ዳሮተꬃዳ እያዉ ዛራና።
EZE 14:5 ሄ ኤቃት እስራኤለ አሳ ታፐ ሃስዶሶና፤ ሽን ሀእ ታ ኤንታዉ እምያ ዛሩዋን ኤንታ ዎዛና ታኮ ዛራና” ያጌስ።
EZE 14:6 “ሄሳ ግሾ፥ እስራኤለ አሳስ ሀይሳዳ ያጋዳ ኦዳ። ኡባ ሃርያ ጎዳይ ሀይሳዳ ያጌስ፤ ናጋራ ፓፅተ፤ ህንተ ኤቃ አግተ፤ ህንተ ቱና ኦሶ ኡባፈ ስምተ።
EZE 14:7 “እስራኤለ አሳ ግድን ዎይኮ እስራኤለ ቢታን ደእያ አላጋ ቢታ አሳ ግድን፥ ታፐ ሃክድ፥ ባ ዎዛናን ኤቃ ዎꬅድ፥ እያ ናጋራይ እያዉ ꬉበ ሹቹ ግድን፥ ታና ዞረ ኦይቻናዉ ናበኮ ቢኮ፥ ታኒ ጎዳይ ታ ሁጰን እያዉ ዛሮ እማና።
EZE 14:8 ታኒ ሄ ኡራ ሞርካና፤ ታ እያ አሳ ማላስነ ሚቻስ አሻና፤ ታኒ እያ ታ አሳ ግዶፈ ꬋይሳና፤ ታ ጎዳ ግደይሳ ህንተ ሄ ዎደ ኤራና።
EZE 14:9 እስ ናበይ ጭመትድ ትንብተ ኦድኮ፥ ሄ ናበይ ኦዳና መላ ጭምዳይ ታና ጎዳ። ታኒ እያ ቦላ ታ ኩሽያ ዎꬃዳ፥ ታ አሳ ግዶፈ እያ ꬋይሳና።
EZE 14:10 ኤንቲ ባንታ ናጋራ ሴራ ቶካና፤ ናበይነ ናብያ ኦይቸይስ እስ ግና ሴረታና።
EZE 14:11 ህዛፐ ጉየ እስራኤለ አሳይ ኦገ ባለትድ ታፐ ሃከና፤ ባንታ ናጋራን ባንታና ቱንሶኮና። ኤንቲ ታ አሰ ግዳና፤ ታንካ ኤንታ ፆሳ ግዳና” ያጌስ ኡባ ሃርያ ጎዳይ።
EZE 14:12 ጎዳ ቃላይ ሀይሳዳ ያግሸ ታኮ ይስ፦
EZE 14:13 “አሳ ናአዉ፥ እስ ቢታ አሳይ ናጋራ ኦꬅድ፥ ታዉ አማነቶና እፅኮ፥ ታኒ ታ ኩሽያ ደንꬃዳ፥ ኤንታ ካꬃ ꬋይሳዳ፥ ኮሻ ኤሀና፤ አሳነ መህያ ዎꬋና።
EZE 14:14 ሀር አቶሽን ሀ ሄꬑ አሳት ኖሄይ፥ ዳነልነ እዮብ ሄ ቢታን ደእያኮካ፥ ኤንቲ ባንታ ፅሎተꬃን ባንታ ሸምፑዋ ፃላላ አሻና” ያጌስ ኡባ ሃርያ ጎዳይ።
EZE 14:15 “ታኒ ኤንታ ቢታ ቦላ ዎራ ዶአታ የዳዳ፥ ሄ ቢታይ አስ ባይናነ ኦንካ ካንꬆና መላ ባይሳ ኦꬃና።
EZE 14:16 ታኒ ኡባ ሃርያ ጎዳይ ታ ደኡዋን ጫቃስ። ሀር አቶሽን፥ ሀ ሄꬑ አሳት ሄ ቢታን ደእያኮካ፥ ኤንቲ ባንታ ናይታ አሻናዉ ዳንዳኦኮና። ኤንቲ ባንታዉ አታና፤ ሽን ቢታይ ባይሳ ግዳና” ያጌስ ኡባ ሃርያ ጎዳይ።
EZE 14:17 “ታኒ ሄ ቢታ ቦላ ቶራ የዳዳ፥ ያን ደእያ አሳነ መህያ ዎꬍኮ፥
EZE 14:18 ታኒ ኡባ ሃርያ ጎዳይ ታ ደኡዋን ጫቃስ። ሀ ሄꬑ አሳት ሄ ቢታን ደእያኮካ፥ ባንታ ናይታ አሻናዉ ዳንዳኦኮና። ኤንቲ ባንታዉ አታና” ያጌስ ጎዳይ።
EZE 14:19 “ታኒ ሄ ቢታ ቦላ ኢታ ሀርገ የዳዳ፥ ታ ሀንቁዋን ሱꬅ ጉካና መላ ኦꬅኮ፥ ያን ደእያ አሳነ መህያ ዎꬍኮ፥
EZE 14:20 ታኒ ኡባ ሃርያ ጎዳይ ታ ደኡዋን ጫቃስ። ሀር አቶሽን፥ ኖሄይ፥ ዳነልነ እዮብ ሄ ቢታን ደእያኮካ፥ ኤንቲ ባንታ ፅሎተꬃን ባንታ ሸምፑዋ አሻናፐ አትሽን፥ ባንታ ናይታ አሾኮና” ያጌስ ኡባ ሃርያ ጎዳይ።
EZE 14:21 ኡባ ሃርያ ጎዳይ ሀይሳዳ ያጌስ፤ “ታኒ አሳነ መህያ ዎꬋናዉ የሩሳላመ ቦላ ኦይዱ ኢታ ፕርዳታ፦ ቶራ፥ ኮሻ፥ ዎራ ዶአታነ ሀርገ የዳና።
EZE 14:22 ግዶሽን፥ አትድ ከይዳ ጉꬃ አሳት፤ ማጫ ናይትነ አደ ናይት ያፐ ከያና። ኤንቲ ህንተኮ ያ ዎደ ኤንታ ሀኖታነ ኤንታ ኦሱዋ ህንተ በእድ፥ ታ የሩሳላመ ቦላ ኤህዳ ጋዶይ ልከ ግደይሳ አኬካና።
EZE 14:23 ህንተ ኤንታ ሀኖታነ ኤንታ ኦሱዋ በእድ፥ ታ ኤንታ ቦላ ጮ ፕርዶናይሳ ኤራና” ያጌስ ኡባ ሃርያ ጎዳይ።
EZE 15:1 ጎዳ ቃላይ ሀይሳዳ ያግሸ ታኮ ይስ።
EZE 15:2 “አሳ ናአዉ፥ ዎይነይ ዎራን ደእያ ሀራ ምꬃፈ አይብን አꬊ?
EZE 15:3 ጎእ ደእያ ባ ኦꬃናዉ ቃንፀትድ ኤርዬ? አይኮባ ካቅያ ኮጫ እያፐ ከሳናዉ ዳንዳኤቲ?
EZE 15:4 እያ ታማ ኦይሰꬃናዉ ታማን የግን፥ ፄራይነ ዱለይ ታማን ሜተትን አትዳ ዱንቻይ አይ ማዳኔ?
EZE 15:5 ፁገቶና ደእሸ፥ አይኮ ማዶናይስ ታም ምን ምጭድ አይ ማዳኔ?”
EZE 15:6 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ታኒ ዎራን ደእያ ምꬃ ግዶፈ ዎይነ ምꬃ ታማስ አꬃዳ እምዳይሳዳ የሩሳላመን ደእያ አሳ ሄሳዳ ኦꬃና።
EZE 15:7 ታኒ ታ ሶምኡዋ ኤንታ ቦላ ዛራና፤ ኤንቲ እስ ታማፐ ከይኮካ፥ ሀራ ታም ኤንታ ማና። ታኒ ታ ሶምኡዋ ኤንታ ቦላ ዛርያ ዎደ ታኒ ጎዳ ግደይሳ ህንተ ኤራና።
EZE 15:8 ኤንቲ ታናን አማነቶና አግዳ ግሾ ታ ኤንታ ቢታ ባይሳ ከሳና” ያጌስ ኡባ ሃርያ ጎዳይ።
EZE 16:1 ጎዳ ቃላይ ሀይሳዳ ያግሸ ታኮ ይስ።
EZE 16:2 “አሳ ናአዉ፥ የሩሳላመ እያ ቱና ኦሶታ ኤርሳ።
EZE 16:3 ኡባ ሃርያ ጎዳይ የሩሳላመኮ ሀይሳዳ ያጌስ። ነ ማይዛነ ነ ሼሻይ ካናነ ቢታና፤ ነ አዋይ አሞረ፤ ነ አይያ ህተ አስ።
EZE 16:4 ነ የላትያ ጋላስ ነ ጉልአይ ቃንፀትበና፤ ዎይኮ ነና ጌሻናዉ ሃꬃን ሜጨታባካ፤ ዎይኮ ማፅነን ጎርፐታዳ ጩርቃን ፃፀታባካ።
EZE 16:5 ሀ ጌተትዳይሳታፐ ሀር አቶሽን እሱዋ ኦꬃናዉ ነዉ ምሸትዳይ ባዋ። ነ የለትዳ ጋላስ ቦረትዳ ግሾ ዎራ የገታዳሳፐ አትሽን፥ ነዉ ኦንካ ቃትቤና።
EZE 16:6 “ታ ያራ አꬍያ ዎደ ኔኒ ነ ሱꬃን ኢታዳ ዞሄትሽን በአዳ፥ ኔኒ ነ ሱꬃን ዝንእዳ ደእሽን፥ ‘ደኦን ደአ’ ያጋስ።
EZE 16:7 ታ ነና አራዳ ቢታን ደእያ ካꬃዳ ድቻስ። ኔኒ ድጫ አዱቃዳ፥ ጋማ ጋካዳሳ። ነ ꬋንꬃይ ኡትስ፤ ነ ሁጰይ ድጭስ፤ ሽን ነ ካሎ ደኣሳ።
EZE 16:8 “ዛራዳ ታ ያራ አꬋሸ ነና ፄልያ ዎደ፥ ኔኒ ገሎስ ጋካዳ፥ ካሎ ቦርሰትያ አሰ ግዳዳሳ። ታ አፍላ ማጫራ ነ ቦላ የጋዳ፥ ነ ካሉዋ ካማስ፤ ታ ኔራ ጫቃዳ ነና ታዉ ቡዞ ኦꬃስ” ያጌስ ኡባ ሃርያ ጎዳይ።
EZE 16:9 “ሱꬃን ኢትዳ ነ አሳተꬃ ሃꬃን ሜጫ ጌሻዳ፥ ዛይተን ትያስ።
EZE 16:10 ታኒ ነና አሌቆ ማኦ ማይዛስ፤ ሎኦ ጋልባፈ ኦሰትዳ ጫማ አስሳስ፤ ሊኖ ሻሸ ነና ቃጭሳስ፤ አልኦ ኩታ ጉልንትሳስ።
EZE 16:11 ነና አሌቆን አሌቅሳስ፤ ነ ኩሸን ሳጋዮ አꬃስ፤ ነ ቆꬍያ ዎርቃን ማይዛስ።
EZE 16:12 ነ ስንነ፥ ነ ሀይꬃን ዎርቃ፥ ነ ሁጰን ሎኦ ካላቻ ዎꬃስ።
EZE 16:13 ነ ዎርቃንነ ብራን አሌቀታዳሳ፤ ነ ማኦ ኡባይ አልኦ ሊኖ፥ አልኦ ኩታነ አሌቆ ቃምሰ። ነ ምያ ካꬃይ ሎኦ ꬊለ፥ ኤስነ ዛይተ። ኔኒ ዳሮ ፑላታዳ፥ ካዎ ግዳናዉ ጋካዳሳ።
EZE 16:14 ታ ነዉ እምዳ ቦንቹዋ ጋሶን፥ ነ ዳሮ ፑላትዳ ግሾ ካዎተꬃታ ኡባን ኤረታዳሳ” ያጌስ ኡባ ሃርያ ጎዳይ።
EZE 16:15 “ሽን ኔኒ ነ ፑላን አማነታዳ፥ ሀራታን ኤረትዳ ግሾ ኦገራ አꬍያ ኡባስ ነና አꬃ እማዳሳ።
EZE 16:16 ነ ማኡዋፐ ባጋ ኤካዳ፥ ነ ጎይኖ በሳታ አሌቅሳዳሳ፤ ያን ላይማታዳሳ። ሄሳ መላባይ ሀይሳፈ ካሰ ሀንቤና፤ ስንꬃፈካ ሀናናዉ በሰና።
EZE 16:17 ታ ነዉ እምዳ ዎርቃፈነ ብራፐ ኦሰትዳ ሎኦ አሌቆ፥ አደ ምስለታ ኦꬃዳ ኤንታራ ላይማታዳሳ።
EZE 16:18 ታ እምዳ አሌቆ ማኡዋ ሄ ምስለታ ማይዛዳሳ፤ ታ ዛይትያነ ታ እፃንያ ኤንታዉ ሺሻዳሳ።
EZE 16:19 ታ ነዉ እምዳ ሎኦ ꬊልያ፥ ዛይትያነ ኤሳ ኤንታ ስንꬃን ሳዎ ቶንኩ ግያ ያርሾ ኦꬃዳ ሺሻዳሳ” ያጌስ ኡባ ሃርያ ጎዳይ።
EZE 16:20 ነ ላይማተꬃይ ጉፅቤናሽን፥ ነ ታዉ የልዳ አደ ናይታነ ማጫ ናይታ ኤፋዳ፥ ኤቃታስ ያርሻዳሳ።
EZE 16:21 ነ ታ ናይታ ሹካዳ፥ ኤቃታስ ታማን ያርሻዳሳ።
EZE 16:22 ነ ቱናተꬃንነ ነ ላይማተꬃን ኡባን ደአሸ፥ ካሰ ነ ያላጋተꬃ ላይꬃ፥ ካሎ ሱꬃን ሙከታዳ ዞሄትያ ዎድያ ዶጋዳሳ።
EZE 16:23 ኡባ ሃርያ ጎዳይ፥ “አየ! ነና አየ!” ያጌስ። ሀ ኢታተꬃ ኡባ ቦላ ጉጃዳ፥
EZE 16:24 ዳባባ ኡባን ꬎቃ ኤቃ ጎይንያ በሳታ ነዉ ጊግሳዳሳ።
EZE 16:25 ኦገ ዶናን ላይማትያ በሳታ ኬፃዳ፥ ነ ፑላ ቱንሳዳሳ፤ ኦገራ አꬍያ ኡባስ ነ አሳተꬃ አꬃ እማዳ፥ ላይማተꬅ ዳርሳዳሳ።
EZE 16:26 ኔኒ አሞን ኩምዳ፥ ነ ሾሮ ግድዳ ግብፀታራ ላይማታዳሳ፤ ነ ላይማተꬃን ታና ይሎያዳሳ።
EZE 16:27 ሄሳ ግሾ፥ ታኒ ታ ኩሽያ ነ ቦላ ደንꬃስ፤ ነና ጋክያ ነ አንጁዋ ጉꬃስ። ታኒ ነና ነ ፖኮ ሀኖታን ዬላትያ፥ ነና ሞርክያ ፍልስፄመታስ አꬃዳ እማስ።
EZE 16:28 ነ አሎና አስ ግድያ ግሾ፥ አሶረ አሳራ ላይማታዳሳ። ሄ ኡባን ታዉ ግዳና ጋባካ።
EZE 16:29 ዛልኤን አቅያ ካልዳወታራ ላይማታዳሳ፥ ሽን ሄስ ታዉ ግዳና ጋባካ።
EZE 16:30 ኡባ ሃርያ ጎዳይ፥ “ኔኒ ዬል ባይና ላይማ ማጫሳዳ ሀንያራ፥ ነ አይብ ላፋ አሰ!
EZE 16:31 ኔኒ ኦገ ዶናን ላይማትያ በሳታ ነዉ ኬፅያ ዎደነ ዳባባ ኡባን ኤቃስ ጎይንያ በሳታ ጊግሳዳሳ። ግዶሽን፥ ሀራ ላይማ ማጫሳት ኤክያ ሚሸ ኤካባካ።
EZE 16:32 ኔኒ ባ አዝናይ ደእሽን፥ አላጋ አደታራ ላይማትያ ማጫሳ መላ።
EZE 16:33 ላይማ ማጫሳስ ሚሸይ ቃንፀቴስ፥ ሽን ኔኒ ነ ላገꬆታስ እሞታ እማሳ፤ ኤንቲ ኡባ በሳፈ ኔኮ ያና መላ ኤንታዉ ሚሸ እማሳ።
EZE 16:34 ኔኒ ላይማትያ ሀራ ማጫሳታፐ ዱማ፤ ኔራ ላይማታናዉ ነና ካልያ ኦንካ ባዋ። ኔኒ ገደ እሞታ እማሳፐ አትሽን፥ ሃ ኤካካ፤ ኔኒ ሀራታፐ ዱማ” ያጌስ።
EZE 16:35 ነኖ፥ ላይማ የሩሳላመ ጎዳ ቃላ ስአ።
EZE 16:36 ኡባ ሃርያ ጎዳይ ሀይሳዳ ያጌስ፤ “ኔኒ ነ ላይማተꬃ አሙዋን ነ ላገꬆታስ ነ አሳተꬃ ቃርዳ ግሾ፥ ነ ኤቃታ ኡባ ግሾነ ነ ናይታ ሱꬃ ነ ኤንታዉ ጉስዳ ግሾ፥
EZE 16:37 ነ ኤንታን ኡፋይትዳ ነ ላገꬆታ ኡባ፥ ነ ዶሰይሳታነ ነ እፀይሳታ ታ ነዉ ሞርከ ኦꬃዳ ሺሻና። ታኒ ኤንታ ዱማ ዱማ በሳፈ ነ ዩሹዋን ሺሻዳ፥ ኤንታ ስንꬃን ነና ቃራና፤ ኤንቲ ነ ካሉዋ በአና።
EZE 16:38 ታኒ ላይማ ማጫሳታ ቦላነ ሱꬁ ጉስያ ማጫሳታ ቦላ ፕርደይሳዳ ነ ቦላ ፕርዳና፤ ታ ሀንቁዋንነ ታ ቃናትያን ነ ቦላ ሀይቆ ኤሀና።
EZE 16:39 ታ ነና ነ ላገꬆታስ አꬃዳ እማና፤ ኤንቲ ነ ላይማትያ በሳታነ ኤቃ ጎይኖ በሳታ ላላና። ኤንቲ ነ ማኡዋ ቃርድ፥ ነ ሎኦ አሌቁዋ ኤክድ፥ ነና ፅረ ካሎ አሻና።
EZE 16:40 ነና ሹቻን ጫድድ፥ ማሻን ቃንፀረꬅድ ዎꬍያ አሳ ነ ቦላ ኤንቲ ደንꬃና።
EZE 16:41 ኤንቲ ነ ኬꬃ ፁግድ፥ ዳሮ ማጫሳ ስንꬃን ነ ቦላ ፕርዳና። ታ ነ ላይማተꬃ አግሳና፤ ነ ላገꬆታስ ገደ ሚሸ ቃንፃካ።
EZE 16:42 ሄሳን ነ ቦላ ደእያ ታ ይሎይ እርፃና፤ ታ ቃናትያ ኔፐ ሃሳና፤ ህዛፐ ስእ ጋና፤ ዛራዳ ሀንቀትከ።
EZE 16:43 ኔኒ ነ ናአተꬃ ላይꬃ ዶጋዳ፥ ሀ ኢታ ኦሶ ኡባን ታና ሀንቀꬃዳሳ። ሄሳ ግሾ፥ ነ ኦꬅዳባ ኡባ ታ ነ ቦላ ዛራና። ነ ቱና ኦሶ ኡባ ቦላ ላይማተꬅ አይስ ጉጃዲ?” ያጌስ ኡባ ሃርያ ጎዳይ።
EZE 16:44 “የሩሳላመ፥ አሳይ ነና፥ ‘ናእያ አየ ማላ’ ግድ ሌምሳና።
EZE 16:45 ቱማ ኔኒ ባ አዝናነ ባ ናይታ ሻተትያ ነ አየ መላ፤ ባንታ አዝናታነ ባንታ ናይታ ሻተትያ ነ ምቸታ መላ፤ ነ አይያ ህተ አስ፤ ነ አዋይ አሞረ አስ።
EZE 16:46 ነ ባይራ ምችያ፥ ባ ጉታራ ኔፐ ፑደሀ ባጋን ደእያ ሳማረነ እ ማጫ ናይታ፤ ነ ካሎ ምችያ ባ ጉታራ ኔፐ ዱገሀ ባጋን ደእያ ሶዶመነ እ ማጫ ናይታ።
EZE 16:47 ነ ኤንታ ኦግያ ካላዳ ኤንታ ቱና ኦሶታ ፖሎ ፃላላ ግዶናሽን፥ ጉꬃ ዎደን ኤንታፈ አꬋዳ ኢታ ኦꬃዳሳ።
EZE 16:48 “ታኒ ኡባ ሃርያ ጎዳይ ታ ደኡዋን ጫቃስ። ኔንነ ነ ጉታን ደኤይሳት ኦꬅዳይሳዳ ነ ምችያ ሶዶመነ እ ማጫ ናይት ኦꬅቦኮና።
EZE 16:49 ነ ምችያ ሶዶመ ኦꬅዳ ናጋራይ ሀይሳ፦ እያነ እ ማጫ ናይት ኦቶራንቾ፥ ኤንቲ ካልዳይሳታነ እንጀ ዱሱ ደእኮካ ኤንቲ መቶታንቾታነ ማንቆታ ማድቦኮና።
EZE 16:50 ኤንቲ ኦቶራንቾ ግድድ፥ ታ ስንꬃን ቱና ኦሶ ኦꬅዶሶና። ሄሳ ግሾ፥ ህንተ በእዳይሳታ ታ ኤንታ ꬋይሳስ።
EZE 16:51 “ሳማረይ ነ ኦꬅዳ ናጋራስ ባጋካ ኦꬃቡኩ፤ ነ ኢፐ አꬋዳ ሻትያ ቱና ኦꬃዳሳ። ነ ኦꬅዳ ቱና ኦሶታ ኡባ ጋሶን ነ ምቸት ፅሎ አዛና መላ ኦꬃዳሳ።
EZE 16:52 ኔኒ ነ ምቸታ ሱረ አስ ከስዳ ግሾ ዬላ ማአ። ነ ናጋራይ ኤንታይሳፈ አꬍድ ኢትን፥ ኤንቲ ኔፐ ፅሎ ዳንዶሶና። ሄሳ ግሾ፥ ካዉያዳ ዬላ ማአ።
EZE 16:53 “ግዶሽን፥ ሶዶመነ እ ማጫ ናይታ፥ ሳማረነ እ ማጫ ናይታ ታኒ ኤንታ ሻሉዋ ዛርያ ዎደ ነ ሻሉዋካ ዛራና።
EZE 16:54 ነባን ኔኒ ዳሮ ዬላታና፤ ነ ካዉሻተꬃይ ዳሮ ግድያ ግሾ ነ ምቸት ሄሳን ምነታና።
EZE 16:55 ነ ምቸት፥ ሶዶመ ባ ጉታታራነ ሳማርያ ባ ማጫ ናይታራ ባንታ ካሰ ዱሳኮ ስማና፤ ነካ ነ ማጫ ናይታራ ካሰ ነ ዱሳኮ ስማና።
EZE 16:56 ነ ኦቶርትያ ዎደ ነ ምቸ ሶዶም ቦላ ቀልቅሳብኪ?
EZE 16:57 ሄስ ሀንዳይ ነ ናጋራይ ቆንጫናፐ ካሰ ግደኔ? ሀእ ኔኒ ነ ዩሹዋን ደእያ ኤዶመስ ምቾታስነ እ ሾሮታስ፥ ፍልስፄመስነ እ ምቸ ናይታስ፤ ሄሳዳካ ነና እፅያ ኡባስ ቦረስ አታዳሳ።
EZE 16:58 ነ ላይማተꬃ ግሾነ ነ ቱና ኦሶታ ግሾ ነ ሴረታና” ያጌስ ጎዳይ።
EZE 16:59 ኡባ ሃርያ ጎዳይ ሀይሳዳ ያጌስ፤ “ኔኒ ኡፋይሳ ቃላ መንꬃዳ፥ ጫቁዋ ላልዳ ግሾ ነ ኦꬅዳ ኦሱዋዳ ታ ነዉ ኦꬃና።
EZE 16:60 ግዶሽን፥ ታ ነ ናአተꬃ ዎድያን ኔራ ጫቅዳ ጫቆ ቃላ ሀሳያና፤ መርናዉ ኔራ ጫቃና።
EZE 16:61 ነ ባይራነ ነ ካሎ ምቸታ ታ ኔኮ ኤህያ ዎደ ኔኒ ነ ሄመꬃ ሀሳያዳ ዬላታና። ሽን ሄስ ታ ኔራ ጫቅዳ ጫቁዋ መላ ግዶና እፅኮካ፥ ታ ኤንታ ነዉ ናአ ኦꬃዳ እማና።
EZE 16:62 ታኒ ታ ጫቁዋ ኔራ ኦራꬃና፤ ሄ ዎደ ታ ጎዳ ግደይሳ ነ ኤራና።
EZE 16:63 ነ ኦꬅዳ ናጋራ ኡባ ታኒ አቶ ግያ ዎደ ነ ኦꬅዳባ ሀሳያዳ፥ ዬላስ ነ ዶና ኦይካና” ያጌስ ኡባ ሃርያ ጎዳይ።
EZE 17:1 ጎዳ ቃላይ ሀይሳዳ ያግድ ታኮ ይስ፦
EZE 17:2 “አሳ ናአዉ፥ እስራኤለ አሳስ ቃንእሽን ኦዳ፤ ሌምሶን ቆንጭሳ።
EZE 17:3 ኡባ ሃርያ ጎዳይ ሀይሳዳ ያጌስ ጋዳ ኦዳ። ‘ግታ ቀፈይነ ዱማ ዱማ ማላራ ደእያ ባለት ደእያ እስ አርጋንꬅ ደኤስ። ሄ አርጋንꬃይ ልባኖሰ ይድ ዝጋ ፄራን ኦይክስ።
EZE 17:4 ሄ ዝጋ ፄራ መንꬅ ኤክድ፥ ዛልኤይ ዳርያ ቢታ ኤፍድ ዛልአንቾታ ካታማን ቶክስ።
EZE 17:5 እ እስራኤለ ቢታፈ አጫ ኤፍድ፥ አራዳ ቢታን፥ ሃꬃ ማታን ቶክስ።
EZE 17:6 አጫይ ዳሮ አዱቆና ደእሸ ዳይድ አርጋንꬃኮ ስሚድ ድጭስ፤ ሽን እያ ፃጶይ ቢታ ግዶ ገልስ። ሄ ዎይነይ ዳሮ ታሸነ ሀይ ከስስ።
EZE 17:7 ሄሳዳካ፥ ግታ ቀፈይነ ዳሮ ባለት ደእያ ሀራ አርጋንꬅ ደኤስ። ሃ ደማናዉ ሄ ዎይነይ ባ ቶከትዳ በሳፈ ሄ አርጋንꬃይ ደእያ በሳኮ ባ ፃጱዋነ ባ ታሽያ የድስ።
EZE 17:8 ሽን፥ ሄ ዎይነይ ታሸ ከሳና መላ፥ አይፈ አይፋና መላነ ሎኦ ዎይነ ግዳና መላ አራዳ ቢታን፥ ዳሮ ሃꬅ ደእያ በሳን ቶከትስ’ ” ያጌስ።
EZE 17:9 ኡባ ሃርያ ጎዳይ ሀይሳዳ ያጌስ ጋዳ ኦዳ። “ሄ ዎይነይ ድጫኔ? ኮይሮ እያ ቶክዳ አርጋንꬃይ እያ ሾደኔ? እያ አይፈታ ቆቆፍድ፥ እያ እርፃ ሀይꬃታ መልሰኔ? እያ ሄ በሳፈ ፃጶራ ሾዳናዉ ግታ ዎልቃ ዎይኮ ዳሮ አስ ኮሸና።
EZE 17:10 እያ ሾድድ፥ ሀራ በሳን ቶክያኮ እ ድጫኔ? ዶሎሀ ባጋ ጫርኮይ ሾጭን ባ ቶከትዳ በሳን መለኔ?”
EZE 17:11 ጎዳ ቃላይ ሀይሳዳ ያግሸ ታኮ ይስ፦
EZE 17:12 “ሄ ሌምሱዋ ብርሸꬃይ አይበኮ አነ ሀ ጌላ አሳታ ኦይቻ። ሄስ አይበ ጊኮ፥ ባብሎነ ካዎይ የሩሳላመ ይድ፥ ኤንታ ካዋነ ኤንታ ሀላቃታ ድእድ፥ ባብሎነ ኤፍስ።
EZE 17:13 ካዋ ሶ አሳፐ እሱዋ ኤክድ፥ ባራ ጫቅስድ፥ አሳ ግዶፈ ኤረትዳይሳታ ድእድ ኤፍስ።
EZE 17:14 ሄሳ ኦꬅዳይ ኤንታ ካዎተꬃይ ዎልቃ ꬋይድ፥ ዛሪድ ደንዶናዳ ባንታ ጫቁዋ ፃላላ ናግድ ዳና መላሳ።
EZE 17:15 ሽን ይሁዳ ካዎይ ማካልድ፥ ፓራታነ ዳሮ ኦላንቾታ የዳና መላ ግብፀ ኪትስ። ያትን ሄስ ሀናንዴ? ሄሳ ኦꬅዳ እ ከስ ኤካንዴ? እ ጫቁዋ መንꬅድ ሴረቶና አታንዴ?”
EZE 17:16 “ታኒ ኡባ ሃርያ ጎዳይ ታ ደኡዋን ጫቃስ። ባና ካዎꬅዳ ካዋ ጫቁዋ መንꬅዳ ግሾነ ጫቁዋ ካꬍዳ ግሾ፥ ሄ ካዋ ቢታን፥ ባብሎነን እ ሀይቃና።
EZE 17:17 ባብሎነ ኦላንቾት ዳሮ አሳ ዎꬋናዉ ግምብያ ዩሾን ቢታ ዶርድ ድርስ ጊግስያ ዎደ፥ ግብፀ ካዎይ ባ ኦላንቾታራነ ባ ዳሮ አሳራ ይድ አይኮካ ማደና።
EZE 17:18 እ ጫቆ ካꬍድ መንꬅዳ ግሾነ ባ ኩሽያ እምድ፥ ባ ግዳ ባ ኡባ ፖሎና አግዳ ግሾ ከስ ኤካናዉ ዳንዳኤና።”
EZE 17:19 “ታኒ ኡባ ሃርያ ጎዳይ ታ ደኡዋን ጫቃስ። እ ጫቁዋ ካꬍድ ታ ጫቁዋ መንꬅዳ ግሾ ታ ሱንꬃን ጫቅዳስ ታ እያ ቦላ ዛራዳ ኤሀና።
EZE 17:20 ታኒ ታ ግትያ እያ ቦላ ምጭን፥ እ ታ ፅህያን ኦይከታና። እ ታዉ አማነቶና እፅዳ ግሾ ታ እያ ባብሎነ ኤፋዳ፥ ያን እያ ቦላ ፕርዳና።
EZE 17:21 ዶረትዳ እያ ኦላንቾት ማሻን ሀይቃና፤ አትዳይሳት ዱማ ዱማ በሳራ ላለታና።” ሄሳ ኦደይ ታና፥ ጎዳ ግደይሳ ህንተ ኤራና።
EZE 17:22 ኡባ ሃርያ ጎዳይ ሀይሳዳ ያጌስ፤ “ታኒ ታ ሁጰን አዱሳ ዝጋ ፄራ ቃንፃ ኤካዳ፥ ꬎቃነ አዱሳ ዙማ ሁጰን ቶካና።
EZE 17:23 ታኒ እያ እስራኤለ ዙማ ሁጰን ቶካና፤ ያን ዳያና፤ አይፈ አይፋናነ ሎኦ ዝጋ ግዳና። ካፎ ኮቸ ኡባይ እያን ኬፃና፤ ኤንቲ እያ ታሽያ ኩያን ሸምፓና።
EZE 17:24 አዱሳ ምꬃ ዝቅ ኦይነ ቃንꬃ ምꬃ ꬎቁ ኦይ፥ ቃስ ጭልኦ ምꬃ መልሰይነ መላ ምꬃ አጭሰይ ታና ጎዳ ግደይሳ ቢታን ደእያ ምꬃ ኡባይ ኤራና። ታኒ ጎዳይ ሀይሳ ኦዳስ፤ ታ ኦድዳይሳ ታ ኦꬃና” ያጌስ።
EZE 18:1 ጎዳ ቃላይ ሀይሳዳ ያግሸ ታኮ ይስ።
EZE 18:2 “እስራኤለ ቢታባ አሳይ፥ ‘አዋቲ ቃዉኤ ዎይነ ምን፥ ናይታ አቻይ ሀይቅስ’ ያግድ ኦድያ ሌምሶይ አይቤ?
EZE 18:3 ታኒ ኡባ ሃርያ ጎዳይ ታ ደኡዋን ጫቃስ። ህዛፐ ጉየ ህንተ እስራኤለ ቢታን ሀ ሌምሱዋ ሌምሰከታ።
EZE 18:4 አሳ ኡባ ሸምፖይ ታባ፤ አዋ ሸምፖይነ ናኣ ሸምፖይ ታባ። ናጋራ ኦꬅያ ሸምፖይ እ፥ ባዉ ሀይቃና።
EZE 18:5 “እስ አስ ፅሎ ግድኮ፥ ቱማ ፕርዳነ ሱረባ ኦꬅኮ፥
EZE 18:6 እ ደርያ ቦላ ደእያ ኤቃ ጎይንያ በሳን ሜና፤ እስራኤለ አሳ ኤቃ ጎይነና፤ ባ ሾሩዋ ማችዉ ቱንሰና፤ ኩሸ መቶራ ደእያ ማጫራ አቀና፤
EZE 18:7 ኦናካ ኡንኤና፤ አጮስ ኦይክዳባ ጉየ ዛሬስ፥ ቦንቀና፤ ኮሻትዳ አስ ሙዜስ፤ ካሎትዳ አስ ማይዜስ፤
EZE 18:8 ባ ሚሽያ የሎራ ታልኤና፤ ባ ኩሽያ ኢታባፐ ናጌስ፤ አሰ ስገꬅሸ ፅሎ ፕርዴስ።
EZE 18:9 ታ ህግያ ናጌስ፤ ታ ዎጋ አማነተꬃን ፖሌስ፤ ሄ ኡራይ ፅሎ አስ ግድያ ግሾ እ ደኦን ዳና” ያጌስ ኡባ ሃርያ ጎዳይ።
EZE 18:10 ግዶሽን፥ ሄ ኡራስ ሸምፖ ዎꬍያ ዎይኮ ካልድ ደኤይሳታፐ እሱዋ ኦꬅያ ኢታ ናእ ደእኮ፥
EZE 18:11 እያ አዋይ ሀይሳታፐ እሱዋካ ኦꬆና አግን፥ እያ ናአይ ደረ ቦላ ኤቃ ጎይኖ በሳታን ሚኮ፥ አሳ ማቾ ቱንስኮ፥
EZE 18:12 መቶታንቾታነ ማንቆታ ኡንኤꬅኮ፥ ቦንቅኮ፥ አጮስ ኦይክዳባ ዛሮና እፅኮ፥ ኤቃ ጎይንኮ፥ ቱናባ ኦꬅኮ፥
EZE 18:13 ባ ሚሽያ የሎራ ታልእድ ዎ ኤክኮ፥ ሄሳ መላ አስ ደኦን ደአኔ? እ ደኦን ዴና! እ ሄሳ መላ ቱናባ ኦꬅዳ ግሾ ቱማ ሀይቃና፤ እያ ጎመይ እያ ኦይካና።
EZE 18:14 “ሀ ኢታ ኡራስ ናእ ደእኮ ሄ ናአይ ባ አዋይ ኦꬅያ ሀ ናጋራ ኡባ በእሸ፥ ሄሳ መላባ ኦꬆና እፅኮ፥
EZE 18:15 እ ደረ ቦላ ደእያ ኤቃ ጎይኖ በሳታን ሞና እፅኮ፥ እስራኤለ አሳ ኤቃ ጎይኖና እፅኮ፥ ባ ላግያ ማችዉ ቱንሶና እፅኮ፥
EZE 18:16 ኦናካ ኡንኤꬆና እፅክ፥ አጮስ ኦይክዳባ ጉየ ዛርኮ፥ ቦንቆና እፅኮ፥ ኮሻትዳይሳ ሙዝኮ፥ ካሎትዳይሳ ማይዝኮ፥
EZE 18:17 ኢታ ኦሶፐ ባ ኩሽያ ተቅኮ ዎ ኤካናዉ የሎራ ታልኦና እፅኮ፥ ታ ህግያ ናግኮ፥ ታ ዎጋ ካልኮ፥ ያትኮ፥ ሄ ናአይ ደኦን ዳናፐ አትሽን፥ ባ አዋ ናጋራ ጋሶን ሀይቀና።
EZE 18:18 ሽን እያ አዋይ አሳ ማታ ሱግዳ ግሾ፥ ባ እሻታ ቦንቅዳ ግሾነ ባ አሳ ግዶን ኢታ ኦꬅዳ ግሾ ባ ናጋራ ጋሶን ሀይቃና።
EZE 18:19 “ሽን ህንተ፥ ‘ናአይ ባ አዋ ናጋራ ጋሶን አይስ ሴረተኔ?’ ” ያጌታ። ናአይ ቱማ ፕርዳነ ሱረ ኦꬅድ፥ ታ ህግያ ምንꬅድ ናግኮ፥ ቱማ ደኦን ዳና።
EZE 18:20 ናጋራ ኦꬅያ ኡራይ ባዉ ሀይቃና። ናአይ አዋ ናጋራ ጋሶን ሴረተና፤ ሄሳዳካ፥ አዋይ ናኣ ናጋራ ጋሶን ሴረተና። ፅሎ አስ ባ ፅሎተꬃ ጋትያ ኤካና፤ ኢታ አስ ባ ኢታተꬃን ሴረታና።
EZE 18:21 ሽን ኢታ አስ ባ ናጋራ ኡባፈ ስሚድ፥ ታ ኪታ ናግኮ ቱማ ፕርዳነ ሱረ ኦꬅኮ፥ እ ቱማ ደኦን ዳናፐ አትሽን፥ ሀይቀና።
EZE 18:22 እ ኦꬅዳ ናጋራፐ እሶይካ ቆፈተና፤ ባ ኦꬅዳ ፅሎ ኦሱዋ ጋሶን እ ደኦን ዳና።
EZE 18:23 ታኒ ኡባ ሃርያ ጎዳይ፥ ኢታ አስ ባ ኢታ ኦግያፐ ስሚድ፥ ደኦን ደኤይሳን ኡፋይታይስፐ አትሽን፥ እያ ሀይቁዋን ኡፋይትከ።
EZE 18:24 ሽን ፅሎ አስ ባ ፅሎተꬃ አግድ፥ ኢታ አስ ኦꬅያ ቱና ኦሶታ ኡባ ኦꬅኮ፥ እ ደኦን ዳኔ? ሀነና፥ እ ኦꬅዳ ፅሎ ኦሱዋፐ እሶይካ ቆፈተና፤ እ አማነቶና እፅዳ ግሾነ እ ኦꬅዳ ናጋራ ግሾ እ ሀይቃና።
EZE 18:25 ግዶሽን፥ “ህንተ፥ ‘ጎዳ ኦገይ ሱረ ግደና’ ጌታ። እስራኤለ አሳዉ፥ ስእተ፤ ሱረ ግዶናይ ታ ኦግያዬ? ህንተ ኦግያ ግደኔ?
EZE 18:26 ፅሎ አስ ባ ፅሎተꬃ አግድ፥ ኢታ ኦꬅያ ዎደ ባ ናጋራን ሀይቄስ፤ ባ ኦꬅዳ ቆሁዋ ጋሶን ደኦን ደኤና።
EZE 18:27 ሽን ኢታ አስ ባ ኢታተꬃ አግድ፥ ቱማ ፕርዳነ ሱረ ኦꬅያ ዎደ ባ ሸምፑዋ አሻና።
EZE 18:28 እ ባ ኦꬅዳ ናጋራ ቆፕድ ጉየ ስምዳ ግሾ፥ እ ቱማ ደኦን ዳናፐ አትሽን፥ ሀይቀና።
EZE 18:29 ሽን እስራኤለ አሳይ፥ ‘ጎዳ ኦገይ ሱረ ግደና’ ያግዶሶና። እስራኤለ አሳዉ፥ ሱረ ግዶናይ ታ ኦግያ? ህንተ ኦግያ ግደኔ?
EZE 18:30 “ህንተኖ፥ እስራኤለ አሳዉ፥ ታ ህንተና ህንተ ኦሱዋꬆ ኦሱዋꬆ ፕርዳና። ኡባ ሃርያ ጎዳይ ሀይሳዳ ያጌስ፤ ናጋር ህንተዉ ꬋዮስ ጋሶ ግዶና መላ ፓፅተ፤ ህንተ ባላ ኡባፈ ስምተ።
EZE 18:31 ህንተ ኢታ ኦሱዋ ኡባ ዎራ የግድ፥ ኦራꬃ ዎዛናነ ኦራꬃ አያና ኤክተ። ህንተኖ፥ እስራኤለ አሳዉ፥ አይስ ሀይቄቲ?
EZE 18:32 ታኒ እስ አሳ ሀይቆንካ ኡፋይትከ። ሄሳ ግሾ፥ ህንተ ናጋራ ፓፅድ፥ ደኦን ደእተ” ያጌስ ኡባ ሃርያ ጎዳይ።
EZE 19:1 ጎዳይ ህዝቄላኮ፥ እስራኤለ ሀላቃታስ ሀይሳዳ ያጋዳ ዘሌላ፦
EZE 19:2 “ህንተ አይያ ጋሞታ ግዶን ዋንዳ ጋሞ! ያላጋ ጋሞታ ግዶን ዝንአዳ፥ ባ ማራታ ድቻሱ።
EZE 19:3 እያ ባ ማራታፐ እሱዋ ድችን፥ እ ዎዳላ ጋሞ ግድስ፤ ሻንካ ታማርስ፤ አሰ ሙሱ ዶምስ።
EZE 19:4 ካዎተꬃት ኡባይ እያባ ስእዶሶና፤ ኤንቲ ቦክዳ ኦላን ገልድ ኦይከትስ፤ ሲን ዎዶሮ አꬅድ ግብፀ ቢታ ኤፍዶሶና።
EZE 19:5 እያ አይያ ናግዳይስ ሀኖና እፅን፥ እ ኡፋይሳይ ꬋይዳይሳ በእዳ ዎደ፥ ባ ማራታፐ እሱዋ ድቻዳ፥ ዎዳላ ጋሞ ከሳሱ።
EZE 19:6 እ ዎዳላ ጋሞ ግድድ፥ ሀራ ጋሞታራ ስመረትስ፤ እ ሻንካ ታማርስ፤ አሰ ሙሱ ኦይክስ።
EZE 19:7 እ ኤንታ ሚፃ መንረꬅስ፤ ካታማታ ꬋይስስ፤ እ ጉድያ ዎደ ቢታን ደእያ አሳ ኡባይ ዳጋሜስ።
EZE 19:8 እያ ዩሹዋን ደእያ ካዎተꬃት ኡባይ እያ ኦይካናዉ ፅሄ ዎꬅዶሶና፤ ባንታ ግትያ ምጭዶሶና፤ ኤንታ ኦላን እ ኦይከትስ፤
EZE 19:9 ኤንቲ እያ ስን ዎዶሮ አꬅድ ሆን የግድ፥ ባብሎነ ካዋኮ ኤፍዶሶና። እ ጉደይስ ዛሪድ እስራኤለን ስኤቶና መላ ኤንቲ እያ ቃሾ ኬꬃን የግዶሶና።
EZE 19:10 ነ አይያ ሃꬃ ዶናን ቶከትዳ ዎይነ መላ፤ ዳሮ ሃꬅ ደእያ ግሾ ዎይነይ ዳሻንነ አይፈን ኩምድ ደኤስ።
EZE 19:11 እያ ታሸት ምኖ ግድያ ግሾ ካዎታ ፃምአ ግድዶሶና። ዎይነይ ዎራን ደእያ ምꬃታፐ አꬍድ ድጭስ፤ ባ ታሽያ ዳሮተꬃንነ አዱሳተꬃን ኡባፈ ቦላራ በንትስ።
EZE 19:12 ሽን ሄ ዎይነይ ሀንቆን ሾደትድ ሳአን የገትስ፤ ዶሎሀ ጫርኮይ እያ አይፍያ መልስስ፤ እያ ምኖ ታሸይ መልን ታም ምስ።
EZE 19:13 ሀእ እ ሃꬅ ባይና መላ ቢታን ቶከትስ።
EZE 19:14 ታም እያ ኡባፈ ከይድ፥ እያ አይፍያነ ታሽያ ምስ። ካዎታ ፃምአ ግዳና ምኖ ታሸይ፥ እያ ቦላ በንትቤና። ሀይስ ዬሆ ዘለልስ፤ ሀይሳ ዘለልስ ከስያ ዎደ ጎኤታናዉ በሴስ” ያግስ።
EZE 20:1 ኑ ድኤትዳ ላፑንꬆ ላይꬃን፥ እቻሻንꬆ አጌናን፥ ታማንꬆ ጋላሳን፥ እስራኤለ ጭማታፐ ጉꬃት ጎዳ ሸንያ ኦይቻናዉ ይድ፥ ታ ስንꬃን ኡትዶሶና።
EZE 20:2 ሄ ዎደ ጎዳ ቃላይ ሀይሳዳ ያግሸ ታኮ ይስ፤
EZE 20:3 “አሳ ናአዉ፥ ኡባ ሃርያ ጎዳይ፥ እስራኤለ ጭማታኮ ጎዳይ ሀይሳዳ ያጌስ ያጋ፦ ‘ህንተ ታ ሸንያ ኦይቻናዉ ይደቲ? ታኒ ኡባ ሃርያ ጎዳይ ታ ደኡዋን ጫቃስ፦ ህንተ ታና ኦይቻና መላ ታ ኮይከ።’
EZE 20:4 “አሳ ናአ ነ ኤንታ ቦላ ፕርዳኔ? ቱማ ኤንታ ቦላ ፕርዳኔ? ሄሳ ግድኮ፥ ኤንታ ማይዛታ ቱና ኦሱዋ ኤንታ ኤርሳ።
EZE 20:5 ኡባ ሃርያ ጎዳይ ሀይሳዳ ያጌስ ጋዳ ኤንታዉ ኦዳ። ‘ታኒ እስራኤለ ዶርዳ ዎደ ታ ኩሽያ ደንꬃዳ ያይቆባ ዘረꬃስ ጫቃስ። ታኒ ታናተꬃ ግብፀ ቢታን ኤንታዉ ቆንጭሳስ። ታ ኩሽያ ደንꬃዳ፥ ታኒ ጎዳ፥ ህንተ ፆሳ።
EZE 20:6 ታ ህንተና ግብፀፈ ከሳዳ፥ ህንተዉ ዶርዳ ቢታ፥ ማꬅነ ኤስ ጎግያ ቢታ፥ ሀራ ቢታ ኡባፈ አꬍዳ ሎኦ ቢታ ኤሀና’ ጋዳ ጫቃስ።
EZE 20:7 ታ ኤንታኮ፥ ‘ህንተ እሶይ እሶይ ዶስያ ቱና ኤቃታ ድግተ፤ ግብፀ ኤቃታን ህንተና ቱንሶፕተ። ታኒ ጎዳ ህንተ ፆሳ’ ” ያጋስ።
EZE 20:8 ግዶሽን፥ ኤንቲ ታዉ ማካልድ፥ ታ ኦድያባ ስኦና እፅዶሶና። ኤንቲ ባንታ አሞትዳ ቱና ኤቃታ ድግቦኮና፤ ግብፀ ኤቃታ ጎይኖ አግቦኮና። ሄሳ ግሾ፥ ኤንቲ ግብፀን ደእሽን፥ ታ ሀንቁዋ ኤንታ ቦላ ጉሳናዉ ቆፓስ። ታ ሸንያ ዉርሳናዉ ቆፋ ቃቻስ።
EZE 20:9 ሽን ኤንቲ ደእያ ካዎተꬃታ ግዶንነ እስራኤለ አሳ ግብፀፈ ከሳናዉ ጫቅያ ዎደ ታ ታናተꬃ ኤርስዳ አሳ ስንꬃን ታ ሱንꬃይ ቱኖና መላ ኦꬃስ።
EZE 20:10 ሄሳ ግሾ፥ ታ ኤንታ ግብፀፈ ከሳዳ መላ ቢታ ኤሀስ።
EZE 20:11 ኪተትያ ኡባስ ደኦ እምያ ታ ህግያ ኤንታዉ እማስ፤ ታ ዎጋ ኤንታ ታማርሳስ።
EZE 20:12 ኤንታ ጌሸይ ታና ጎዳ ግደይሳ ኤንቲ ኤራና መላ፥ ታ ሳምባታ ታፐነ ኤንታፈ ግዶን ማላ ኦꬃዳ እማስ።
EZE 20:13 ሽን እስራኤለ አሳይ መላ ቢታን ታ ቦላ ማካልዶሶና። ኪተትይዳ ኡባስ ደኦ እምያ ታ ህግያ መንꬅዶሶና፤ ታ ዎጋ ካልቦኮና፤ ታ ሳምባታ ቱንስዶሶና። ታኒ መላ ቢታን ታ ሀንቁዋ ኤንታ ቦላ ጉሳዳ ኤንታ ꬋይሳናዉ ቆፓስ።
EZE 20:14 ሽን ታ ኤንታ ግብፀፈ ከስያ ዎደ በእዳ ካዎተꬃታ ስንꬃን ታ ሱንꬃይ ቱኖና መላ ኤንታ ꬋይሳብከ።
EZE 20:15 ኤንቲ መላ ቢታን ደእሽን፥ ኤንታዉ እምዳ፥ ሀራ ቢታ ኡባፈ ሎኦ ግድዳ ማꬅነ ኤስ ጎግያ ቢታ፥ ኤንታ ገልስከ ጋዳ ጫቃስ።
EZE 20:16 ሄስ ሀንዳይ ኤንቲ ኤቃ ጎይንድ፥ ታ ህግያ መንꬅዳ ግሾ፥ ታ ዎጋ ካልቦና ግሾነ ታ ሳምባታ ቱንስዳ ግሾሳ።
EZE 20:17 ግዶሽን፥ ታ ኤንታዉ ቃትዳ ግሾ፥ መላ ቢታን ኤንታ ዉርሳ ꬋይሳብከ።
EZE 20:18 ኤንቲ መላ ቢታ ደእሽን፥ ኤንታ ናይታኮ ሀይሳዳ ያጋስ፤ “ህንተ አዋታ ዎጋ ካሎፍተ፤ ኤንታ ህግያ ናጎፕተ፤ ዎይኮ ኤንታ ኤቃታን ቱኖፕተ።
EZE 20:19 ታኒ ጎዳ ህንተ ፆሳ። ታ ዎጋስ ኪተትተ፤ ታ ህግያ ናግተ።
EZE 20:20 ታ ህንተራ ጫቅዳ ጫቁዋስ ማላ ግዳና መላነ ታኒ ጎዳ ህንተ ፆሳ ግደይሳ ህንተ ኤራና መላ ሳምባታ ዱማይተ” ያጋስ።
EZE 20:21 “ሽን ኤንታ ናይት ታ ቦላ ማካልዶሶና፤ ኪተትያ ኡባስ ደኦ እምያ ታ ዎጋ መንꬅዶሶና፤ ታ ህግያ ናግቦኮና፤ ታ ሳምባታ ቱንስዶሶና። ያትን፥ መላ ቢታን ታ ሀንቁዋ ኤንታ ቦላ ጉሳዳ ታ ይሎይ ዉራና ጋካናዉ ኤንታና ꬋይሳናዉ ቆፓስ።
EZE 20:22 ሽን ታኒ ኤንታ ግብፀፈ ከስያ ዎደ በእዳ ካዎተꬃታ ስንꬃን ታ ሱንꬃይ ቱኖና መላ ኤንታ ꬋይሳብከ።
EZE 20:23 ኤንታ ሀራ ካዎተꬃታ ግዶነ ዱማ ዱማ ቢታ ላላናዉ መላ ቢታን ታ ኩሽያ ደንꬃዳ ጫቃስ።
EZE 20:24 ኤንቲ ታ ዎጋስ ኪተቶና እፅዶሶና፤ ታ ህግያ መንꬅዶሶና፤ ታ ሳምባታ ቱንስዶሶና፤ ባንታ አዋታ ኤቃ አሞትዶሶና።
EZE 20:25 ያትን፥ ኤንታዉ ሎኦ ግዶና ዎጋታነ ደኦ እሞና ህገታ እማስ።
EZE 20:26 ኤንቲ ባንታ ያርሹዋን ቱናናዳ፥ ባንታ ባይራ ናይታ ያርሻናዳ፥ ታ ኤንታ የዳ በሳስ። ታ ሄሳ ኦꬅዳይ ኤንታ ዳጋንꬃናሳነ ታኒ ጎዳ ግደይሳ ኤንቲ ኤራና መላሳ” ያግስ።
EZE 20:27 “ሄሳ ግሾ፥ አሳ ናአዉ፥ እስራኤለ አሳስ፥ ኡባ ሃርያ ጎዳይ ሀይሳዳ ያጌስ ጋዳ ኦዳ፦ ሄሳ ኦꬅድ ህንተ አዋት አማነቶና እፅድ ታና ጫይዶሶና።
EZE 20:28 ታ ኤንታዉ እማና ጋዳ ታ ኩሽያ ደንꬃ ጫቅዳ ቢታ ኤንታ ኤህዳ ዎደ፥ ኤንቲ ደረታ ኡባነ እርፃ ምꬃ ኡባ በእዶሶና። ያን ባንታ ያርሹዋ ያርሽዶሶና። ባንታ፥ እፃንያንነ ኡሻ ያርሹዋን ታና ይሎይዶሶና።
EZE 20:29 ታኒ፥ ‘ሀይስ ህንተ ብያ ꬎቃ በሳይ አይቤ?’ ያጋዳ ኦይቻስ። ሀች ጋካናዉ ሄ በሳይ ‘ባማ’ ጌተቴስ እያ ብርሸꬃይ ‘ꬎቃ ጎይኖ በሳታ’ ጌተትድ ፄገቴስ” ያጌስ።
EZE 20:30 “ሄሳ ግሾ፥ እስራኤለ አሳስ፥ ኡባ ሃርያ ጎዳይ ሀይሳዳ ያጌስ ያጋዳ ኦዳ፦ ‘ህንተ ማይዛት ኦꬅዳ ናጋራ ኦꬅድ፥ አይስ ህንተና ቱንሴቲ? ኤንታ ቱና ኤቃ ጎይናናዉ አሞትድ አይስ ካሌቲ?’
EZE 20:31 ሀችካ ህንተ ያርሹዋ ያርሽያ ዎደ ህንተ ናይታ ታማን ያርሽድ፥ ኤቃ ኡባን ህንተና ቱንሴታ። ህንተኖ፥ እስራኤለ አሳዉ፥ ታኒ ህንተናን ኦይሸቶ? ታኒ ኡባ ሃርያ ጎዳይ ታ ደኡዋን ጫቃስ፦ ታ ህንተናን ኦይሸትከ።
EZE 20:32 ህንተ፥ ‘ኑኒ ምꬅነ ሹቹ ጎይንያ ሀራ ካዎተꬃታ መላነ ቢታን ደእያ ሀራ አሳ መላ ግዳና ያግድ ቆፔታ። ሽን ህንተ ቆፋይ ፖሎ ሀነና።’ ”
EZE 20:33 ኡባ ሃርያ ጎዳይ ሀይሳዳ ያጌስ፦ “ታ ምኖ ቀስያን፥ ታ ምጨትዳ ኩሽያንነ ታ ሀንቁዋን ህንተ ቦላ ካዎታና።
EZE 20:34 ካዎተꬃታ ግዶፈ ታ ህንተና ከሳና፤ ህንተ ላለትዳ ቢታ ኡባፈ ታ ምኖ ቀስያን፥ ታ ምጨትዳ ኩሽያንነ ታ ሀንቁዋን ህንተና ሺሻና።
EZE 20:35 ታ ህንተና ‘ካዎተꬃታ መላ ቢታ’ ግያ መላ ቢታ ኤሀዳ፥ ህንተና ታ ስንꬃን ኤሳዳ፥ ህንተ ቦላ ፕርዳና።
EZE 20:36 ግብፀ መላ ቢታን ህንተ ማይዛታ ቦላ ፕርድዳይሳዳ፥ ህንተ ቦላ ፕርዳና።
EZE 20:37 ታኒ ህንተና ታ ካዎተꬃ ፃምአ ጋርሳን ሃራና፤ ህንተ ታ ጫቁዋ ናጋና መላ ኦꬃና።
EZE 20:38 ማካላንቾታነ ናጋራንቾታ ታ ህንተ ግዶፈ ድጋና፤ ሀእ ኤንቲ ደእያ ቢታፈ ታ ኤንታ ከሳና። ሽን ኤንቲ እስራኤለ ቢታ ገሎና መላ ተቃና፤ ሄ ዎደ ታኒ ጎዳ ግደይሳ ህንተ ኤራና” ያጌስ ኡባ ሃርያ ጎዳይ።
EZE 20:39 እስራኤለ አሳዉ፥ ህንተኮ ኡባ ሃርያ ጎዳይ ሀይሳዳ ያጌስ፦ “ሀእ ታ ኦደይሳ ህንተ ስኦና እፅኮ፥ ኡባይ ብድ ህንተ ኤቃ ጎይንተ። ሽን ህዛፐ ጉየ፥ ህንተ እሞታንነ ህንተ ኤቃታን ታ ጌሻ ሱንꬃ ቱንሶፕተ።
EZE 20:40 ታ ጌሻ ዙማ ቦላ፥ ꬎቃ እስራኤለ ዙማ ቦላ ህንተ እስራኤለ አሳይ ታና፥ ኡባ ሃርያ ጎዳ ጎይናና። ታኒ ህንተና ኤካና፤ ህንተ ያርሹዋ፥ ህንተ ዶርዳ እሙዋነ ህንተ ጌሻ እሙዋ ታ ህንተፈ ኮያና።
EZE 20:41 ህንተ ላለትዳ ካዎተꬃታ ግዶፈ ታኒ ህንተና ኤህያ ዎደነ ሀራ ቢታታፐ ታ ህንተና ሺሽያ ዎደ ሳዎ ቶንኩ ግያ ያርሾዳ ታ ህንተና ኤካና። ካዎተꬃት ፄልሽን፥ ህንተ ግዶን ታ ጌሻተꬃ ቆንጭሳና።
EZE 20:42 ካሰ ህንተ ማይዛታስ እማና ጋዳ ታ ኩሽያ ደንꬃዳ ጫቅዳ እስራኤለ ቢታ ህንተና ዛራዳ ኤህዳ ዎደ ታኒ ጎዳ ግደይሳ ህንተ ኤራና።
EZE 20:43 ህንተ ኢታ ሀኖታነ ህንተ ቱና ኦሱዋ ህንተ ሄ በሳን ሀሳያና፤ ህንተ ኦꬅዳ ኢታ ኦሶ ኡባ ህንተ ሻተታና።
EZE 20:44 ህንተኖ፥ እስራኤለ አሳዉ፥ ህንተ ኢታ ሀኖታ መላነ ህንተ ቱና ኦሱዋ መላ ግዶናሽን፥ ታ ሱንꬃ ግሾ ታ ኦꬅያ ዎደ ታኒ ጎዳ ግደይሳ ህንተ ኤራና” ያጌስ ኡባ ሃርያ ጎዳይ።
EZE 20:45 ጎዳ ቃላይ ሀይሳዳ ያግሸ ታኮ ይስ።
EZE 20:46 “አሳ ናአዉ፥ ዱገሀ ባጋ ስማዳ ፄላ፤ ዱገሀ ባጋስ ኦዳ፤ ዱገሀ ዎራ ቦላ ትንብተ ኦዳ።
EZE 20:47 ዱገሀ ዎራስ፥ ኡባ ሃርያ ጎዳይ ኦድያባ ስአ ያጋዳ ኦዳ። ‘ታ ነ ግዶን ታማ የዳና፤ ሄ ታማይ ጭልኦ ምꬃነ መላ ምꬃ ኡባ ማና። ሄ ኤፅያ ታማይ ቶኤና፤ ዱገሀፐ ብድ፥ ፑደሀ ባጋ ጋካናዉ ደእያ አሳ ሶምኦ ኡባ ሄ ላጮይ ላባና።
EZE 20:48 ሄ ታማ ኦይꬅዳይ ታና ጎዳ ግደይሳ አሳ ኡባይ በአና። ሄ ታማይ ቶኤና’ ” ያጌስ።
EZE 20:49 ታኒ ዛራዳ፥ “ኡባ ሃርያ ጎዳዉ፥ ሄሳ ኦዳ ጋዳ ታና ኪቶፋ። ኤንቲ፥ ‘እ ኡባ ዎደ ሌምሶን ኦዴስ ግደኔ?’ ያጎሶና” ያጋስ።
EZE 21:1 ጎዳ ቃላይ ሀይሳዳ ያግሸ ታኮ ይስ።
EZE 21:2 “አሳ ናአዉ፥ ነ ሶምኡዋ የሩሳላመኮ ዛራዳ፥ አሳይ ጎይንያ በሳታ ቦላነ እስራኤለ ቢታ ቦላ ትንብተ ኦዳ።
EZE 21:3 ሀይሳዳ ያጋ፦ ‘ታኒ ነዉ ሞርከ። ታኒ ታ ማሻ ሾሁዋፐ ሾዳዳ፥ ነ ግዶፐ ፅሎ አሳነ ኢታ አሳ ኡባ ዉርሳና።
EZE 21:4 ፅሉዋነ ናጋራንቹዋ ኡባ ꬋይሳናዉ ዱገሀፐ ፑደሀ ጋካናዉ ደእያ አሳ ኡባ ቦላ ታ ማሻ ሾዳና።
EZE 21:5 ታኒ ጎዳይ፥ ታ ማሻ ሾሁዋፐ ሾድዳይሳነ ጉየ ዛሮናይሳ አሳ ኡባይ ኤራና’ ” ያጌስ።
EZE 21:6 “ሄሳ ግሾ፥ አሳ ናአዉ፥ አሳ ኡባይ ፄልሽን፥ ነ ዎዛናይ መቅን፥ ጫመታዳ ኦላ።
EZE 21:7 ‘አይስ ኦላይ?’ ያግድ ኤንቲ ነና ኦይችኮ፥ ‘ስንꬃራ ያ ኢታ ዎርያ ግሾ ኦላይስ’ ያጋ። ሄ ዎርያን፥ ‘ዎዛን ኡባይ ያሻን ሴራና፤ ኩሸ ኡባይ አርጋጫና፤ ጎባተꬅ ኡባይ ኤከታና፤ ጉልባት ኡባይ ኮኮራና። ሄ ዎደይ ጋክስ፤ ቱማ ፖለታና’ ” ያጌስ ኡባ ሃርያ ጎዳይ።
EZE 21:8 ጎዳ ቃላይ ሀይሳዳ ያግሸ ታኮ ይስ፦
EZE 21:9 “አሳ ናአዉ፥ ትንብተ ኦዳ፤ ታኒ ጎዳይ ኦድያባ አሳስ ኦዳ፤ ማሻ፤ ሌፈትዳነ ቁሸትዳ ማሻ።
EZE 21:10 “ጎራአናዉ ሌፈትስ፤ ዎልአንꬃ መላ ጶላናዉ ቁሸትስ። ታ አሳይ እመትዳ ሴራ እፅዳ ግሾ፥ ህዛፐ ጉየ፥ ኦንካ ኡፋይተና።
EZE 21:11 ጎኤታናዉ ማሻይ ቁሸትስ፤ ሌፈትድነ ቁሸትድ፥ ጎራኤይሳስ እመታናሳ።
EZE 21:12 አሳ ናአዉ፥ ዬካነ ዘሌላ፤ ሀ ማሻይ ጊገትዳይ ታ አሳ ቦላነ እስራኤለ ሀላቃታ ቦላና። ሀላቃት ታ አሳራ እስፈ ማሻን ሀይቃና፤ ሄሳ ግሾ፥ አዛናዳ ነ ትራ ቆፃ።
EZE 21:13 ታኒ ታ አሳ ፓጫና፤ ኤንቲ ናጋራ ፓፆና እፅኮ፥ ሀ መቶይ ኡባይ ኤንታ ቦላ ያና፤ ኡባ ሃርያ ጎዳይ ሀይሳ ኦድስ።
EZE 21:14 “ሀእካ አሳ ናአዉ፥ ትንብተ ኦዳ፤ ነ ኩሽያ ባቃ። ሄ ዎደ ማሽ ናምኡ ቶሆ ሄꬑ ቶሆ ዛሪድ ሾጫና፤ ሄስካ ዳጋንꬅያ፥ ዩሹዋ ኡባን ዎꬍያነ ሹክያ ማሽ።
EZE 21:15 ሄስ ኤንታ ዎዛናይ ትልአናዳነ ኤንታፈ ዳሮት ꬉበታናዳ ኦꬃና። ህንተና አየ! ህንተ ፐንገን ማሽ ዎልአንꬃ መላ ዎልአሜስ፤ ሹካናዉ ሾሆፐ ሾደትስ።
EZE 21:16 ነኖ፥ ቃራ ማሻዉ፥ ኡሻችነ ሀድርስ ስምዳ ነ ስምዳ ባጋ ኡባ ቡꬃ።
EZE 21:17 ህዛ ታኒ ታ ኩሽያ ባቃና፤ ታ ሀንቆይ ዶቻና” ያጌስ ጎዳይ።
EZE 21:18 ጎዳ ቃላይ ሀይሳዳ ያግሸ ታኮ ይስ።
EZE 21:19 “አሳ ናአዉ፥ ባብሎነ ካዋ ማሻይ ያ ናምኡ ኦገታን ማላ ዎꬃ። ናምኡ ኦገት እስ ቢታፈ ደንዶሶና፤ ኦገይ ካታማኮ ስምያ ኦገን ማላታ ቱሱ ኤሳ።
EZE 21:20 እስ ኦግያን ደእያ ማላ ራባ ጌተትያ አሞነ ካታማ ብያ ኦግያ ማሌስ፤ ሀንኮይ ኦገይ ግምበትዳ ይሁዳን ደእያ የሩሳላመ ካታማ ብያ ኦግያ ማሌስ።
EZE 21:21 ባብሎነ ካዎይ ኦገት ጋሄትያ ዳጋላን፥ ማላ ቱሳታ ማታን ኤቄስ። እ አዉ ኦግያራ ባነኮ ኤራናዉ፥ ዶንገ ቶራን ሳማ የጋና፤ ባ ኤቃታ ዞረ ኦይቻና፤ ማራጭያ በአና።
EZE 21:22 ግምብያ ፐንግያ ላልያ ዱሩማ ኤሀና መላ፥ ዎꬎ ኪታ አꬃና መላ፥ ጬቀታና መላ፥ ድርሳ ፐንግያ ላልያ ዱሩማ ካታማ ፐንገን ኤሳና መላ፥ ቢታ ዶራና መላነ ሚፃ ጊግሳና መላ የሩሳላመ ሳም እያዉ ኡሻቻ ኩሸን ከይስ።
EZE 21:23 የሩሳላመ አሳይ ባብሎነ ካዉዋራ ጫቅዳ ግሾ፥ ሄስ ባንታ ቦላ ጋካና ግድ ቆፕቦኮና። ሽን ባብሎነ ካዎይ ኤንታ ድእያ ዎደ ኤንቲ ባንታ ናጋራ ሀሳያና።
EZE 21:24 ሄሳ ግሾ፥ ኡባ ሃርያ ጎዳይ ሀይሳዳ ያጌስ፤ ህንተ ናጋራይ ቆንጭስ፤ ህንተ ባላ ግደይሳ አሳ ኡባይ ኤሬስ፤ ህንተ ኦሶይ ህንተ ናጋራንቾ ግደይሳ በሴስ። ሄሳ ግሾ፥ ህንተ ኢታ ኦሶይ ሀሳየታና፤ ህንተ፥ ህንተ ሞርከታስ አꬍድ እመታና።
EZE 21:25 “ነኖ፥ ኢታነ ቱና ግድዳ እስራኤለ ሀላቃዉ፥ ነ ፕርዳ ጋላሳይ ጋክስ።
EZE 21:26 ኡባ ሃርያ ጎዳይ ሀይሳዳ ያጌስ፦ ነ ሁጵያፐ ካላቻ ደንꬃ፤ ነ ሁጰ ፃꬃ ቃራ። ህዛፐ ጉየ ካሰይሳዳ ሀናናባይ ባዋ፤ ዝቃይ ꬎቁ ጋና፤ ꬎቃይ ዝቅ ጋነ።
EZE 21:27 ጋዶ! ጋዶ! ታኒ ሀ ካታማ ꬋይሳና። ፕርዳናዉ ማት ደኤይስ ያና ጋካናዉ ሀ ካታማይ ዛሪድ ኬፀተና። እ ያ ዎደ ታ እያዉ አꬃዳ እማና” ያጌስ።
EZE 21:28 አሳ ናአዉ፥ ሀይሳዳ ያጋዳ ትንብተ ኦዳ። እስራኤለ ጫይያ አሞነታ ኡባ ሃርያ ጎዳይ ሀይሳዳ ያጌስ ጋዳ ኦዳ። “ꬋይስያ ማሽ ሾሆፐ ሾደትስ፤ ዎꬋናዉ ዎልአሜስ፤ ዉርሳናዉ ቁሸቴስ።
EZE 21:29 ህንተ በእያ ቆንጨꬃይ ዎርዶ፤ ህንተ ኦድያ ትንብተይ ዎርዶ። ህንተ ኢታነ ቱና አስ፤ ህንተ ፕርዳ ጋላሳይ ጋክስ ህንተ ቆን ማሽ ዎꬋና ሀኔስ።
EZE 21:30 ማሻ ሾሁዋን ዛርተ፤ ህንተ መትዳ በሳን፥ ህንተ የለትዳ ቢታን ታ ህንተ ቦላ ፕርዳና።
EZE 21:31 ታኒ ታ ሀንቁዋ ህንተ ቦላ ጉሳና፤ ታ ሀንቆ ታማይ ህንተ ቦላ ኤፃና፤ ꬋይሶ ሜዘትዳ፥ ዎዛና ምኖ አሳስ አꬃዳ እማና።
EZE 21:32 ህንተ ታማን ꬋያና፤ ህንተ ሱꬃይ ህንተ ቢታን ጉካና፤ ህንተ ዛሪድ ሀሳየተከታ። ታኒ ጎዳይ ሀይሳ ኦዳስ” ያግስ።
EZE 22:1 ጎዳ ቃላይ ሀይሳዳ ያግሸ ታኮ ይስ።
EZE 22:2 “አሳ ናአዉ፥ ሸምፖ ዎይሳት ኩምዳ ካታማ ቦላ ፕርዳናዉ ጊጋዲ? ያትኮ፥ እ ኦꬅዳ ቱና ኦሶ ኡባ እያዉ ኦዳ።
EZE 22:3 ኡባ ሃርያ ጎዳይ ሀይሳዳ ያጌስ ጋዳ ኦዳ፦ ነ ዳሮ አሳ ዎꬍዳ ግሾነ ኤቃ ጎይኖን ነና ቱንስዳ ግሾ ነ ꬋዮ ዎደይ ጋክስ።
EZE 22:4 ነ ጉስዳ ሱꬃን ባላ ግዳዳሳ፤ ነ ኦꬅዳ ኤቃን ቱናዳሳ። ነ ፕርዳ ጋላሳይ ማታትስ፤ ነ ꬋዮ ዎደይ ጋክስ። ሄሳ ግሾ፥ ታ ነና ካዎተꬃታስ ሚቻስነ ሀራ ቢታታስ ቀልቅሴስ አጋና።
EZE 22:5 ነኖ፥ ነ ሱንꬃይ ኢትዳ ዳጋም ኩምዳ ካታማዉ፥ ማታንነ ሃሆን ደኤይሳት ነና ቀልቅሳና።
EZE 22:6 “ነ ግዶን ደእያ እስራኤለ ሀላቃት ኡባይ ሱꬁ ጉሳናዉ ባንታ ዎልቃ አይ መላ ጎኤትያኮ በአ።
EZE 22:7 ነ ግዶን ደኤይሳት ባንታ አዋነ ባንታ አይዉ ቦንቾኮና። ኤንቲ በተ አሳ ጭሞሶና፤ አምኤታነ አዉ አይያ ባይና ናይታ ናቆሶና።
EZE 22:8 ኤንቲ ታ ጌሻ ሚሸታ ካꬎኦሶና፤ ታ ሳምባታ ቱንሶሶና።
EZE 22:9 ነ ግዶን እሶት እሶት ሀራታ ዎꬍሳናዉ ዎርዶን ኦዶሶና፤ ሀራት ኤቃስ ያርሸትዳባ ሞሶና፤ ሀራት ላይማቶሶና።
EZE 22:10 ነ ግዶን እሶት እሶት ባ አዋ ማቸራ ቱኖሶና፤ ሀራት ኩሸ መቶይ ደእያ ማጫሳራ ዎልቃን ቱንሶሶና።
EZE 22:11 ነ ግዶን እሶት እሶት ባ ሾሩዋ ማቸራ ቱኖሶና፤ አዋይ ባ ናአ ማቸራ ቱኔስ፤ ባ አዋ ናእዉ፥ ባ ምችዉ ዎልቃን ኢስድ ዬላዬስ።
EZE 22:12 ነ ግዶን እሶት እሶት ሚሸ ኤክድ፥ ሸምፖ ዎꬎኦሶና፤ ሀራት ባንታ ሚሽያ ባንታ ያራ ግድዳ እስራኤለታስ የሎራ ታልኦሶና፤ ኤንታ ቦንቅድ ባንታዉ ዱረቶሶና፤ ታና ኩመꬅ ዶግዶሶና” ያጌስ ኡባ ሃርያ ጎዳይ።
EZE 22:13 “አሳይ በሶና ሚሸ ኤክያ ግሾነ ሸምፖ ዎꬍያ ግሾ፥ ታኒ ታ ኩሽያ ህንተ ቦላ ደንꬃና።
EZE 22:14 ታ ነና ሴርያ ዎደ ነ ጎባተꬃይ ኔራ ዳኔ? ዎይኮ ነ ኩሸይ ምኖ ግዳኔ? ታኒ ጎዳይ ሀይሳ ኦዳስ፤ ታ ኦድዳይሳዳ ኦꬃና።
EZE 22:15 ታ ነና ካዎተꬃታ ግዶንነ ቢታታ ግዶን ላላና፤ ነ ቱናተꬃ ኔፐ ድጋና።
EZE 22:16 ሀራ ካዎተꬃታ ስንꬃን ነ ካዉያና፤ ታኒ ጎዳ ግደይሳ ነ ኤራና” ያግስ።
EZE 22:17 ጎዳይ ታኮ ሀይሳዳ ያግስ፦
EZE 22:18 “አሳ ናአዉ፥ እስራኤለ አሳይ አይኮካ ፓꬆኮና፤ ኤንቲ ኡባይ ብራ ሼሽያ ዎደ ናሰ ብራታፐ፥ ቆርቆሮፐ፥ ብራታፐነ እርሳሰፐ ከያ ሻአ መላ።
EZE 22:19 ሄሳ ግሾ፥ ኡባ ሃርያ ጎዳይ ሀይሳዳ ያጌስ፤ ‘ህንተ ኡባይ አታላ መላ ግድዳ ግሾ ታ ህንተና ኡባ የሩሳላመ ሺሻና።
EZE 22:20 ብራ፥ ናሰ ብራታ፥ ብራታ፥ እርሳሰነ ቆርቆሮ ታማን ሁብድ ሼሸይሳዳ ታ ህንተና ሺሻዳ ታ ሀንቁዋና ትልእሳና።
EZE 22:21 ታ ህንተና የሩሳላመ ሺሻዳ፥ ታ ሀንቆ ታማ ህንተ ቦላ ኤꬃዳ ህንተና ያን ትልእሳና።
EZE 22:22 ብር ጮጨን ሼኤይሳዳ ህንተ የሩሳላመን ትልአና። ሄ ዎደ ታኒ ጎዳይ ታ ሀንቁዋ ህንተ ቦላ ጉስዳይሳ ህንተ ኤራና’ ” ያጌስ።
EZE 22:23 ዛሪድ ጎዳ ቃላይ ሀይሳዳ ያግሸ ታኮ ይስ።
EZE 22:24 “አሳ ናአዉ፥ ኤንታ ቢታይ ቱንዳ ግሾ፥ ታ ሀንቁዋን እር ቡኮና መላ ድጋዳ ኤንታ ሴራ ዶምዳሳ እስራኤለ አሳስ ኦዳ።
EZE 22:25 ነ ግዶን ኤንታ ሀላቃት ዎꬍዳባ ጉድሸ መንረꬅያ ጋሞ መላ፤ ኤንቲ ዎꬎኦሶና፤ ሚሸ ግድን፥ ሀራ ቡቁራ ግድን፥ ኡባ ባንታዉ ኤኮሶና፤ ዳሮ ማጫሳታ አምኦ ኦꬅዶሶና።
EZE 22:26 ካህነት ታ ህግያ መንꬅዶሶና፤ ታ ጌሻባታ ቦንችቦኮና። ጌሽነ ጌሽ ግዶና ባ ሻኮኮና፤ ቱናነ ቱና ግዶና ባ ሻክድ ታማርሶኮና፤ ታ ሳምባታ የግ አግደታ። ሄሳ ጋሶን ታ እስራኤለ አሳ ግዶን ቦንቸታብከ።
EZE 22:27 ሀላቃት ባንታ ዎꬍዳባ ዱሰረꬅያ ሱꬉመ መላ፤ ኤንቲ ባንታዉ በሶና ዱረተꬅ ደማናዉ ሸምፖ ዎꬎኦሶና።
EZE 22:28 ናበት ጎዳ ቦቅንተ ትይያ አሳዳ፥ ዎርዶ ቆንጨꬅ በእድ፥ ዎርዶ ትንብተ ኦድድ ኤንታ ናጋራ ገንꬆሶና። ጎዳይ ኦዶና ደእሽን፥ ‘ኡባ ሃርያ ጎዳይ ሀይሳዳ ያጌስ’ ያጎሶና።
EZE 22:29 ቢታን ደእያ አሳይ ቦንቆሶና፤ ማንቆታነ መቶታንቾታ ኡንኤꬆሶና፤ ኤንቲ ሱረ ፕርዳ ድግድ በተ አሳ ጌላዮሶና።
EZE 22:30 “ታኒ ቢታ ꬋይሶና መላ ድርሳ ግምብያ ኬፀይ፥ ላለትዳ ድርሳ ግምብያ ባጋራ ታ ስንꬃን ኤቅድ ናግያ እስ አስ ኮያስ፤ ሽን ኦናካ ደማብከ።
EZE 22:31 ሄሳ ግሾ፥ ታ ሀንቁዋ ኤንታ ቦላ ጉሳና፤ ታኒ ታ ይሉዋን ኤንታ ꬋይሳና፤ ኤንቲ ኦሱዋ ኤንታ ቦላ ዛራና” ያጌስ ኡባ ሃርያ ጎዳይ።
EZE 23:1 ጎዳ ቃላይ ሀይሳዳ ያግሸ ታኮ ይስ፦
EZE 23:2 “አሳ ናአዉ፥ እስ አየፐ የለትዳ ናምኡ ምቸት ደኦሶና።
EZE 23:3 ኤንቲ ግብፀን ደእሸ፥ ባንታ ናአተꬃፈ ዶምድ፥ ላይማ ግድዶሶና። ሄ ቢታን ደእያ አደት ኤንታ ꬋንꬃን ካእዶሶና፤ ኤንታ ጌላኦተꬃይ ኤከትስ።
EZE 23:4 ኤንታፈ ባይረ ሱንꬃይ ኦሆሎ፤ ካሎ ምቸ ሱንꬃይ ኦሆልባ። ኤንታ ናምአ ታኒ ማችን፥ ታዉ አደነ ማጫ ናአ የልዶሶና። ኦሆላ ሳማረ፤ ኦሆልባ ቃስ የሩሳላመ።”
EZE 23:5 “ኦሆላ ታዉ ማቾ ግዳዳ ደአሸ ላይማታሱ፤ እያ ባ ኦላንቾ ግድዳ አሶረ ላገꬆታ ካላዳ ባዉሱ።
EZE 23:6 ኤንቲ ካሎሰ ዳንያ ማኦ ማእዳ ኦላንቾታ፥ ቢታ ሃረይሳታነ ቶራ ሞጮናታ፤ ኤንቲ ኡባይ ናአተꬅነ ማላ ሎኦ ግድዳ ፓራ ቶግያ አሳታ።
EZE 23:7 እያ ባና ላይማ ኦꬃዳ፥ ኡባፈ ሎእያ አሶረ አደታስ ባና አꬃዳ እማሱ። እ ላይማተꬃይ እያ አሶረ ኤቃታ ጎይናዳ ቱናና መላ ኦꬅስ።
EZE 23:8 እያ ግብፀን ዶምዳ ላይማተꬃ ሀእካ አጋቡኩ፤ እ ናአተꬃፈ ዶምድ፥ አደት እ ꬋንꬃ ካኦሶናነ ኢራ ላይማቶሶና።”
EZE 23:9 “ሄሳ ግሾ፥ እያ ምንꬃዳ ሲቅያ አሶረ ላገꬆታስ ታኒ እዮ አꬃዳ እማስ።
EZE 23:10 ኤንቲ እዮ ቃርድ ካሎይዶሶና፤ እ አደነ ማጫ ናይታ ድእድ ኦይክዶሶና፤ እዮ ማሻን ዎꬍዶሶና። እዮ ጋክዳ ፕርዳ ጋሶን፥ ማጫሳ ግዶን ቀልቅሰꬃስ አታሱ።”
EZE 23:11 “እ ምችያ ኦሆልባ ሄሳ በአሱ፤ እያ ባ አሙዋንነ ባ ላይማተꬃን ባ ምቸፈ አꬋዳ ቱና ግዳሱ።
EZE 23:12 እያካ አሶረ ሃረይሳት፥ ቶራ ሞጮናታ፥ ሎኦ ማኦ ማእዳ ኦላንቾታነ ፓራ ቶግያ አሳታ፥ ናአተꬅነ ማላ ሎኦ አሳታ ምንꬃዳ ሲቃሱ።
EZE 23:13 እያካ ባና ቱንስዳይሳ በአስ፤ ኤንቲ ናምአይ እስ ኦገን ቦሶና።”
EZE 23:14 “እያ ባ ላይማተꬃ ያ ዳርሳሱ፤ እያ ጎዳ ቦላ ዎጨትድ ኦሰትድ ዞኦ ቃላመን ትየታዳ ካልዳወታ አደ ምስለ በአሱ።
EZE 23:15 ኤንቲ ባንታ ፄሳን ዝናረ ዳንጭዶሶና፤ ባንታ ሁጵያን ሎኦ ጫርቀ ፃፅዶሶና። ኤንቲ ኡባይ ካልዳወ ቢታፈ ይዳ ካልዳወታ ሀላቃታ ዳኖሶና።
EZE 23:16 እያ ኤንታ ምስለታ በእዳ ዎደ ዳሮ ሲቃዳ፥ ኤንታ ፄጋናዉ ካልዳወታ ቢታ አሰ ኪታሱ።
EZE 23:17 ባብሎነት ኢኮ ይድ፥ ኢራ ላይማትድ እዮ ቱንስዶሶና። ኤንቲ እዮ ዳሮ ቱንስዳፐ ጉየ፥ እያ ኤንታ ሻተታሱ።
EZE 23:18 እያ ባ ላይማተꬃ ቆንጨን ኦꬅዳ ዎደነ ባ ካሉዋ ቃራ በስዳ ዎደ፥ ታኒ እ ምችዉ አግዳይሳዳ እዮካ ሻተታዳ አጋስ።
EZE 23:19 ሽን እያ ግብፀን ላይማ ግዳዳ ደእያ፥ ባ ያላጋተꬃ ዎድያ ሀሳያዳ፥ ባ ላይማተꬃ ካሰይሳፈ ያ ዳርሳሱ።
EZE 23:20 ኤንታ አቱንꬃይ ሀረይሳ መላ፥ ኤንታ ኮቻይ ፓራይሳ መላ ግድዳ ባ ላገꬆታ ካላዳ ባሱ።
EZE 23:21 ነኖ፥ ኦሆልበ፥ ነ ያላጋተꬃ ዎድያን ግብፀ አደት ነ ꬋንꬃን ካእሽን፥ ነ ጌላኦተꬃ ኤክሽን፥ ኔኒ ፖልዳ ላይማተꬃ ዛራዳ ሀእ ኦꬃናዉ አሞታሳ።”
EZE 23:22 ሄሳ ግሾ፥ ኦሆልበ፥ ኡባ ሃርያ ጎዳይ ሀይሳዳ ያጌስ፦ “ታኒ ነ ላገꬆታ፥ ነ ሻተታ አግዳይሳታ ነ ቦላ ደንꬃና፤ ታ ኤንታ ነ ቦላ ኡባ በሳራ ኤሀና።
EZE 23:23 ባብሎነታነ ካልዳወታ ኡባ፥ ፋቁዳ፥ ሶሃነ ቆኣና፥ አሶረታ ኡባ፥ ናአተꬅነ ማላ ሎኦ አሳታ፥ ቢታ ሃረይሳታ፥ ቶራ ሞጮናታ፥ ኦላንቾታ፥ ሀላቃታነ ፓራ ቶግያ አሳታ ነ ቦላ ኤሀና።
EZE 23:24 ኤንቲ ኦላ ፓራ ጋረታራ፥ ጫና ጋረታራነ ዳሮ ኦላንቾታራ ፑደሀ ባጋፈ ህንተ ቦላ ያና። ኤንቲ ዎጋ ጎንዳለነ ጉꬃ ጎንዳለ ኦይክድ፥ ብራታ ባርኔፃ ዎꬅድ፥ ነ ዩሹዋን ሳልፓና። ታኒ ነና ኤንታዉ አꬃዳ እማና፤ ኤንቲ ነና ባንታ ዎጋ መላ ፕርዳና።
EZE 23:25 ታኒ ታ ሀንቁዋ ነ ቦላ የዳና፤ ኤንቲ ኔራ ሀንቆ ሱላን ጋሄታና። ኤንቲ ነ ሲꬍያነ ነ ሀይꬃ ቃንፃና፤ አትዳይሳት ማሻን ዉራና። ኤንቲ ነ አደ ናይታነ ነ ማጫ ናይታ ኦይካና፤ አትዳይሳታ ታማን ፁጋና።
EZE 23:26 ኤንቲ ነ ማኦ ኡባ ኔፐ ቃርድ ኤካና፤ ነ አሌቆ ኡባ ኔፐ ከስድ ኤካና።
EZE 23:27 ሄሳዳ ኦꬃዳ፥ ነ ግብፀፈ ኤህዳ ላይማተꬃ አሙዋ ኔፐ ድጋና። ኔኒ ናምአንꬆ ግብፀታ ኤቃ ምስለታ ꬎቁ ጋዳ ፄሎናዳ ዎይኮ ኤንታ ሀሳዮናዳ ኦꬃና።”
EZE 23:28 ኡባ ሃርያ ጎዳይ ሀይሳዳ ያጌስ፦ “ታኒ ነና ነ እፀይሳታ፥ ነ ሻተታዳ አግዳይሳታስ አꬃዳ እማና።
EZE 23:29 ኤንቲ ነና እፃና፤ ነ ዳቡራዳ ደምዳባ ኡባ ቦንቅድ፥ ነና ፅረ ካሎ አሻና። ነ ላይማተꬃ አሞይ ቆንጫናዳ ኦꬃና። ነ ላይማተꬃ አሞይ፥
EZE 23:30 ሄሳ ነ ቦላ ኤህስ። ኔኒ ካዎተꬃታራ ላይማታዳሳ፤ ኤንታ ኤቃታራ ነና ቱንሳዳሳ።
EZE 23:31 ነ ምችያ ብዳ ኦግያ ነካ ባዳሳ። ሄሳ ግሾ፥ ነና እ ፁኣ ኡሻና።”
EZE 23:32 ኡባ ሃርያ ጎዳይ ሀይሳዳ ያጌስ፦ “ኔኒ ነ ምቸ ፁአፐ ኡያና፤ ሄ ፁአይ ግታነ ጪሞ። እ ትግን፥ ዳሮ ኤክያ ግሾ፥ አስ ኡባይ ነ ቦላ ሚጫናነ ነና ቅꬋና።
EZE 23:33 ኔኒ ማꬆታ ጋንድጋራናነ አዛናና። ሄስ ነ ምቸ ሳማረ ፁአይ ነዉ ዳጋማነ ꬋዮ ኤሀና።
EZE 23:34 ነ እያ ፂዞꬃዳ ኡያና፤ ፁአ መንꬃና፤ ኩንአን ነ ꬋንꬃ ጋራና።” ታኒ ኡባ ሃርያ ጎዳይ ሀይሳ ኦዳይስ።
EZE 23:35 ኡባ ሃርያ ጎዳይ ሀይሳዳ ያጌስ፦ “ኔኒ ታና ዶግዳ ግሾ፥ ታዉ ዞኮ ዛርዳ ግሾነ ነ ላይማተꬃ አሙዋስ ጋተ ኤካና።”
EZE 23:36 ጎዳይ ታኮ ሀይሳዳ ያግስ፦ “አሳ ናአዉ፥ ኦሆል ቦላነ ኦሆልብ ቦላ ፕርዳናዉ ጊገታዲ? ኤንቲ ኦꬅዳ ቱና ኦሱዋ ኤንታዉ ኦዳ።
EZE 23:37 ኤንቲ ናምአይ ላይማትዶሶና፤ ሸምፖ ዎꬍዶሶና። ኤንቲ ባንታ ኤቃ ጎይንዶሶና። ሀር አቶሽን፥ ኤንቲ ታዉ የልዳ ባንታ አደ ናይታ ባንታ ኤቃታስ ካꬅ ኦꬅድ ያርሽዶሶና።
EZE 23:38 ሄሳፈ አꬅድ ሀራ ኢታባ ታ ቦላ ኦꬅዶሶና፤ ኤንቲ ታ ኬꬃ ቱንስዶሶና፤ ሄ ዎደ ታ ሳምባታካ ሻርዶሶና።
EZE 23:39 ኤንቲ ባንታ ናይታ ኤቃታስ ያርሽዳ ጋላስ፥ ኤንቲ ታ ኬꬃ ገልድ ቱንስዶሶና፤ ኤንቲ ታ ኬꬃን ኦꬅዳይ ሀይሳ።”
EZE 23:40 ኤንቲ ሃሆ በሳፈ አደት ያና መላ አሰ ኪትን፥ ኤንቲ ይዶሶና። ህንተ ናምኡ ምቸት ህንተ ቦላ ሜጨትደታ፤ ህንተ አይፍያ ትየትደታ፤ አሌቆ አꬅደታ።
EZE 23:41 ሎኦ አርጄታ ቦላ ኡትደታ፤ ፃርጴዛ ቦላ ታ እፃንያነ ታ ሻማሆ ዛይትያ ዎꬅደታ።
EZE 23:42 ኡፋይትያ አሳ ኮይሰꬅ ህንተ ማታን ስኤቴስ። ማꬆትዳ አሳይ መላ ቢታ ይዶሶና። ህንተ ኩሸን ሳጋዮ ዎꬅዶሶና፤ ሎኦ ካላቻታ ህንተ ሁጰን ጎፅዶሶና።
EZE 23:43 ታኒ ታ ዎዛናን፥ “ሀ አደት አሳተꬃይ ላይማተꬃን ግልቅዳ ማጫሴራ ላይማቶሶና” ያጋስ።
EZE 23:44 አደይ ማጫሳራ ላይማተይሳዳ፥ ሀይሳቲ ኤንታራ ላይማትዶሶና። ኤንቲ ላይማታናዉ አሞትያ ኦሆልራነ ኦሆልብራ ላይማትዶሶና።
EZE 23:45 ኤንቲ ላይማ ግድያ ግሾነ ሸምፖ ዎꬍያ ግሾ፥ ፅሎ አሳት ላይማትያነ ሸምፖ ዎꬍያ ኤንታ ቦላ ፕርዳና።
EZE 23:46 ኡባ ሃርያ ጎዳይ ሀይሳዳ ያጌስ፦ “ዳሮ አሳ ደንꬃዳ ኤንታ ቦላ ኤሀ። ኤንታ ዳጋንꬅያነ ኤንታ ቦንቅያ አሳታስ አꬃ እማ።
EZE 23:47 ሀ ዳጋንꬅያ አሳት ይድ፥ ኤንታ ሹቻን ጫዶ፤ ማሻን ቡꬆ፤ ኤንታ አደነ ማጫ ናይታ ዎꬎ፤ ኤንታ ኬꬃ ታማን ፁጎ።
EZE 23:48 ማጫስ ኡባይ ናገታና መላ ታኒ ቢታ ኡባፈ ላይማተꬅ ꬋይሳና።
EZE 23:49 ህንተ ናምኡ ምቸት ህንተ ላይማተꬃ ግሾነ ኤቃታ ህንተ ጎይንዳ ናጋራ ግሾ ህንተና ፕርዳና። ታኒ ኡባ ሃርያ ጎዳ ግደይሳ ህንተ ሄ ዎደ ኤራና” ያጌስ።
EZE 24:1 ኑኒ ድኤትዳ ኡዱፉንꬆ ላይꬃን፥ ታማንꬆ አጌናን፥ ታማንꬆ ጋላስ፥ ጎዳ ቃላይ ሀይሳዳ ያግሸ ታኮ ይስ።
EZE 24:2 “አሳ ናአዉ፥ ሀች ጋላስ ማዝጋበን ፃፋ። ባብሎነ ካዎይ የሩሳላመ ተቅዳይ ሀች።
EZE 24:3 ሀ ማካላንቾ አሳስ ኡባ ሃርያ ጎዳይ ሀይሳዳ ያጌስ ጋዳ ሀ ሌምሱዋ ኦዳ። ማዳበ ድስተ ታማ ቦላ ዎꬃዳ ሃ እያን ትጋ።
EZE 24:4 ገዳነ አንጋሱዋ፥ ሎኦ አሾ ኡባ ሙፃዳ፥ እያን የጋ፤ ሎኦ መቀꬃ ቃንፀረꬃዳ እያን ኩንꬃ።
EZE 24:5 ሄሳስ ነ ኤካና ዶርሳይ ዉድያፐ ዶረትዳይሳ ግዶ። ድስትያ ጋርሳን ምꬅ ዎꬃዳ አሹዋነ መቀꬃ ካፃና ጋካናዉ ዶይሳ።”
EZE 24:6 ኡባ ሃርያ ጎዳይ ሀይሳዳ ያጌስ፦ “ሱꬁ ጉስያ ካታማ አየ! እያ ሽእድ ጌዮና እፅዳ ናሰ ብራታ ድስተ መላ ግዳሱ። እ ግዶን ደእያ ሙፀትዳ አሹዋ ሳማ የጎና ኩሸን ጋሄትዳይሳ ከሳ ከሳ ኤካ።
EZE 24:7 ሄ ካታማይ ዎꬍዳ አሳ ሱꬃይ ሀኖ ጋካናዉ እን ደኤስ። ሱꬅ ጉሳሸ፥ አይብካ ካሞና ዳንዳኦና ዛላ ቦላ ጉሳሱፐ አትሽን፥ ባናን ካማና ቢታ ቦላ ጉሳቡኩ።
EZE 24:8 ሀሎ ከያናዉ፥ ታ ሀንቁዋ ደንꬃናዳ፥ ካመቶና መላ እያ ጉስዳ ሱꬃ ታኒ ዛላ ቦላ ዎꬃስ።”
EZE 24:9 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ሱꬁ ጉስያ ካታማ አየ! ታኒ ምꬅ ጉጃዳ ዎꬃና።
EZE 24:10 ዳሮ ምꬅ ዎꬃ፤ ታማ ኤꬃ። አሹዋ ሎይꬃዳ ዶይሳ፤ ጫምባ ማልኤꬃ፤ መቀꬃ ፁጋ።
EZE 24:11 ካይሳ ማዳበ ድስተ ታማ ቦላ ዎꬃ። እያ ቦላ ደእያ ቡቃይ ሴርድ ክቻና ጋካናዉነ እያ ቦላ ደእያ ሽአይ ፁገትድ ꬋያና ጋካናዉ ሱልድ ምቻና መላ ታማ ቦላ ዎꬃ።
EZE 24:12 ሄ ዳቡራይ ኡባይ ጮ መላ ግድስ፤ እያ ቦላ ደእያ ዳሮ ሽአይ ሀር አቶሽን፥ ታማን ክችቤና።
EZE 24:13 የሩሳላመ፥ ነነ ቱንዳይ ነ ኢታ ኦሱዋና። ታ ሀንቆይ ነ ቦላ ዉራና ጋካናዉ ህዛፐ ኔኒ ጌያካ። ነ ቱናተꬃፈ ነና ጌሻናዉ ኮያስ ሽን፥ ነ ጌያናዉ ኮያባካ።
EZE 24:14 ታኒ ጎዳይ ሀይሳ ኦዳስ፤ ሄስ ሀናና። ታኒ ጉየ ስምከ፤ ነዉ ቃትከ፤ ታ ቆፋ ላምከ። ነ ኦግያዳነ ነ ኦሱዋዳ ታኒ ነና ፕርዳና። ታኒ ኡባ ሃርያ ጎዳይ ሀይሳ ኦዳይስ” ያግስ።
EZE 24:15 ቃስካ ጎዳ ቃላይ ሀይሳዳ ያግሸ ታኮ ይስ።
EZE 24:16 “አሳ ናአዉ፥ ነ ሲቅያነ ነ አይፈ ስንꬃን ሎእያ ነ ማችዉ አኬኮና ዎꬋና። ሄሳን ካዮቶፋ፥ ዬኮፋነ አፉፆፋ።
EZE 24:17 ኦላ፥ ሽን ነ ኦልያ አስ ስኦፖ፤ ሀይቅዳርስ ካዮቶፋ። ኔኒ ነ ሁጰን ቃጨ ፃፃ፤ ነ ቶሁዋን ጫማ አꬃ። ነ ዶና ካሞፋ፤ ሾች ሞፓ።”
EZE 24:18 ዎንታ ታኒ አሳስ ኦዳስ፤ ኦማርስ ታ ማችያ ሀይቃሱ። ዎንተꬃ ጋላስ ጎዳይ ታና ኪትዳይሳዳ ኦꬃስ።
EZE 24:19 አሳይ ታኮ፥ “ሀ ኔኒ ኦꬅያባስ ብርሸꬃይ አይበኮ ኑስ አይስ ኦድኪ?” ያግስ።
EZE 24:20 ጎዳ ቃላይ ሀይሳዳ ያግሸ ታኮ ይስ ያጋዳ ኤንታዉ ኦዳስ።
EZE 24:21 ኡባ ሃርያ ጎዳይ እስራኤለ አሳ ሀይሳዳ ያጌስ፤ “ህንተ ጬቀትያ፥ ህንተ አይፈ አሙዋነ ህንተ ሸምፖይ አሞትያ ታ ኬꬃ ታኒ ቱንሳና ሀናይስ። ህንተ ጉየ አሽዳ ህንተ አደ ናይትነ ህንተ ማጫ ናይት ማሻን ዉራና።
EZE 24:22 ሄ ዎደ ታ ኦꬅዳይሳዳ ህንተ ኦꬃና። ህንተ ዶና ካመከታ፤ ሾቹ ሜከታ።
EZE 24:23 ህንተ ሁጵያ ፃፅተ፤ ህንተ ቶሁዋን ጫማ አꬅተ። ካዮተከታ ዎይኮ ዬከከታ። ሽን ህንተ ህንተ ናጋራ ጋሶን ግልቃናነ እሶይ እሱዋራ ኦላና።
EZE 24:24 ሄ ዎደ ህዝቄል ህንተዉ ማላታ ግዳና፤ እ ኦꬅዳይሳዳ፥ ህንተ ኦꬃና። ሄስ ሀንያ ዎደ፥ ታኒ ኡባ ሃርያ ጎዳ ግደይሳ ህንተ ኤራና።
EZE 24:25 “አሳ ናአዉ፥ ታኒ ኤንታ ኡፋይሳነ ቦንቹዋ፥ ኤንታ አይፈን ሎእያባነ ኤንታ ዎዛናይ አሞትያባ ምኖ በሳ፥ ቃስ ኤንታ አደ ናይታነ ኤንታ ማጫ ናይታ ኤንታፈ ኤካና።
EZE 24:26 ሄ ጋላስ ነዉ ዎረ ኦዳናዉ እስ አስ ከስ ኤክድ ያና።
EZE 24:27 ሄ ጋላስ ነ ዶናይ ዶየታና፤ ነ እያራ ኦደታና፤ ዛራዳ ሙመ ግዳካ። ሄሳዳ ሀናዳ፥ ነ አሳስ ማላታ ግዳና። ታኒ ጎዳ ግደይሳ ኤንቲ ሄ ዎደ ኤራና” ያግስ።
EZE 25:1 ጎዳ ቃላይ ሀይሳዳ ያግሸ ታኮ ይስ።
EZE 25:2 “አሳ ናአዉ፥ ነ ሶምኡዋ አሞነኮ ዛራዳ፥ ኤንታ ቦላ ትንብተ ኦዳ።
EZE 25:3 ኡባ ሃርያ ጎዳይ ኦድያ ቃላ ስእተ። ህንተ ታ ኬꬃ ቱንስያ ዎደ፥ እስራኤለ ቢታይ ባይሳ አትያ ዎደነ ይሁዳ አሳይ ድኤትያ ዎደ ሀሹ ግደታ።
EZE 25:4 ታኒ ህንተና ዶሎሀ ባጋ ቢታ አሳስ ላታ ኦꬃዳ እማና። ኤንቲ ህንተ ግዶን ካምበ ኬፅድ ዳና። ህንተ ምꬃ አይፍያ ኤንቲ ማና፤ ህንተ ማꬃ ኤንቲ ኡያና።
EZE 25:5 ታኒ ራባ ካታማ ግማለት ሄመትያ በሲ ከሳና፤ አሞነታ ቢታ ዶርሳ ዉደይ ፔእያ በሲ ኦꬃና። ታኒ ጎዳ ግደይሳ ህንተ ሄ ዎደ ኤራና።
EZE 25:6 ኡባ ሃርያ ጎዳይ ሀይሳዳ ያጌስ፦ ‘ህንተ እስራኤለ ꬋዩዋን ኩሸ ባቅዳ ግሾ፥ ጉፕዳ ግሾነ ኡፋይትድ ቀልቅስዳ ግሾ፥
EZE 25:7 ታኒ ህንተ ቦላ ታ ኩሽያ ደንꬃስ። ህንተና ካዎተꬃታስ ድኦ ኦꬃዳ እማና። ታ ህንተና አሳፐ ሾዳና፤ ካዎተꬃታ ግዶፈ ꬋይሳና። ታኒ ጎዳ ግደይሳ ህንተ ሄ ዎደን ኤራና’ ” ያጌስ።
EZE 25:8 ኡባ ሃርያ ጎዳይ ሀይሳዳ ያጌስ፦ “ሞአበይነ ሳይረ፥ ‘ይሁድ ሀራ ካዎተꬃታ ኡባ መላ’ ያግዳ ግሾ፥
EZE 25:9 ታኒ ሞአበ ቢታ ተቃና፤ እያ ዛዋ ናግያ፥ ኤረትዳ ቤት-ያሽሞታ፥ ባኣል-ማኦናነ ቅራታይማ ካታማታ ꬋይሳና።
EZE 25:10 ህዛፐ ጉየ አሞነታ ጉጃዳ፥ ኤንቲ ካዎተꬃታ ግዶን ሀሳየቶና መላ ኤንታ ዶሎሀ ባጋ ቢታፈ ይዳ አሳስ አꬃዳ እማና።
EZE 25:11 ታኒ ሞአበ ፕርዳና፤ ታኒ ጎዳ ግደይሳ ኤንቲ ሄ ዎደ ኤራና” ያጌስ።
EZE 25:12 ኡባ ሃርያ ጎዳይ ሀይሳዳ ያጌስ፤ “ኤዶመይ ይሁዳ ቦላ ሀሎ ከይዳ ግሾነ ቆህዳ ግሾ፥
EZE 25:13 ታኒ ኩሽያ ኤዶመ ቦላ ደንꬃና። ያን ደእያ አሳነ መህያ ኩመꬅ ꬋይሳዳ ባይሳ ከሳና። ተማናፐ ብድ፥ ደዳና ካታማ ጋካናዉ ኤንቲ ማሻን ዉራና።
EZE 25:14 ታኒ እስራኤለ ባጋራ ኤዶመ ቦላ ሀሎ ከያና። እስራኤለት ኤንታ ቦላ ታ ይሉዋ መላ ኦꬃና። ታኒ ሀሎ ከይዳይሳ ኤዶመይ ኤራና” ያጌስ ኡባ ሃርያ ጎዳይ።
EZE 25:15 ኡባ ሃርያ ጎዳይ ሀይሳዳ ያጌስ፦ “ፍልስፄመት ባንታ ዎዛና ኢታተꬃን ሀሎ ከይዳ ግሾነ አቅዳ ሞርከን ይሁዳ ካꬍድ ꬋይሳናዉ ኮይዳ ግሾ፥
EZE 25:16 ታኒ ታ ኩሽያ ፍልስፄመታ ቦላ ደንꬃና። ታኒ ከልታወታ ቃንፃና፤ አባ ዶናን አትዳይሳታ ኡባ ꬋይሳና።
EZE 25:17 ታ ኤንታ ቦላ ግታ ሀሎ ከያና፤ ታ ሀንቁዋን ኤንታ ሴራና። ታኒ ኤንታ ቦላ ሀሎ ከይያ ዎደ፥ ታኒ ጎዳ ግደይሳ ኤንቲ ሄ ዎደ ኤራና” ያጌስ።
EZE 26:1 ኑኒ ድኤትዳ ታማነ እሳንꬆ ላይꬃን፥ አጌና ኮይሮ ጋላሳን፥ ጎዳ ቃላይ ሀይሳዳ ያግሸ ታኮ ይስ።
EZE 26:2 “አሳ ናአዉ፥ ፅሮሳ አሳይ ኡፋይትሸ፥ ‘ሀሹ! የሩሳላመይ ኩንድስ፤ እያ ፐንገይ ዋግ ግድ ዶየትስ። እ ላለትድ ዶየትዳ ግሾ ህዛፐ ጉየ ኑ ዱረታና’ ያጎሶና።
EZE 26:3 ሄሳ ግሾ፥ ኡባ ሃርያ ጎዳይ ሀይሳዳ ያጌስ፤ ‘ነኖ፥ ፅሮሳ፥ ታኒ ነዉ ሞርከ። አባ ዙለይ ደንደይሳዳ ታኒ ዳሮ ካዎተꬃታ ነ ቦላ ኤሀና።
EZE 26:4 ኤንቲ ነ ድርሳ ግምብያ ላላና፤ ነ ግምበ ሻኮታ መንꬃና። ታ ነና ቢታ ኡባ ቁችድ ኤፍን፥ ካሎ ደእያ ዛላ ኦꬃና።
EZE 26:5 ኔኒ አባ ግዶን አሳይ ባንታ ሞሎ ግትያ መልሳናዉ ምጭያ በሲ ግዳና። ሀራ ካዎተꬃት ፅሮሳ ቦንቃና።
EZE 26:6 ዋና ቢታን ደእያ ጉታታ ማሻን ዉርሳና። ታኒ ጎዳ ግደይሳ ኤንቲ ሄ ዎደ ኤራና’ ያጌስ ኡባ ሃርያ ጎዳይ።
EZE 26:7 “ኡባ ሃርያ ጎዳይ ሀይሳዳ ያጌስ፦ ‘ፅሮሳ ቦላ ኦላ ደንꬃና መላ ካዎታ ካዎ ግድዳ ባብሎነ ካዋ ናቡካዳናፆራ፥ ፓራታራ፥ ፓራ ጋረታራነ ዳሮ ኦላንቾታራ ፑደሀ ባጋፈ ኤሀና።
EZE 26:8 ኤንቲ ዋና ቢታን ደእያ ጉታታ ማሻን ዉርሳና። ኤንቲ ነና ተቅድ፥ ነ ድርሳ ግምብያ ጋꬅድ፥ ቢታ ዶራና፤ ባንታ ጎንዳልያ ነ ቦላ ደንꬃና።
EZE 26:9 ድርሳ ግምበታ ዶምእድ ላልያ ሚሸን ነ ድርሳ ግምብያ መንረꬃና፤ ባንታ ኦላ ሚሸን ነ አዱሳ ግምበታ ላላና።
EZE 26:10 እያ ፓራት ዳሮ ግድያ ግሾ፥ ኤንቲ ደንꬅያ ባናይ ነና ካማና። ፓራትነ ፓራታ ጋረት ላለትዳ ካታማ ድርሳ ፐንግያራ ገልያ ዎደ ኤንቲ ስስያ ጋርማሞይ ነ ድርሳ ግምብያ ቃꬃና።
EZE 26:11 ኤንታ ፓራት ኦገታ ኡባ የꬋና። ነ አሳ ማሻን ዉርሳና፤ ነ ዎልቃማ ቱሳት ሳአን ኩንዳና።
EZE 26:12 ነ ሻሎይ ድኤታና፤ ነ ዛልእያ ሚሸት ቦንቀታና። ነ ድርሳ ግምበታነ ነ ሎኦ ኬꬃታ ኡባ ꬋይሳና፤ ነ ሹቻታ፥ ነ ሳንቃነ ላለትዳ ኡባ ኤፍድ አባን የጋና።
EZE 26:13 ነ ማልኦ የꬃ ታ ተቃና፤ ነ ዲꬃ ግርሳይ ዛር ስኤተና።
EZE 26:14 ታ ነና ካሎ ደእያ ዛላ ኦꬃና፤ ኔኒ አሳይ ባንታ ሞሎ ግትያ ምጭያ በሲ ግዳና። ታኒ ጎዳይ ሀይሳ ኦድዳ ግሾ፥ ኔኒ ዛራዳ ኬፀታካ’ ” ያጌስ ኡባ ሃርያ ጎዳይ።
EZE 26:15 “ኡባ ሃርያ ጎዳይ ፅሮሳ ካታማኮ ሀይሳዳ ያጌስ፦ ‘ነ ሞርከት ነ ቦላ ደንድያ ዎደ ዩሾይ አባን ተቀትዳ ቢታን ደእያ አሳይ፥ ነ ጎይረትያ ዎደ ዋስያ ዋሱዋ ስእድ፥ ያሻን ኮኮራና።
EZE 26:16 አባ ዶናን ደእያ ሃረይሳት ባንታ አራታፐ ዎꬋና። ባንታ ቦንቾ ማኡዋነ አሌቀትድ ኦሰትዳ ማኡዋ ቃርድ ያሻን ኮኮርሸ ቢታን ኡታና። ነ ቦላ ጋክዳ መቱዋ ቆፕድ፥ ኤንቲ ዳሮ ዳጋማና፤ ኤንቲ ኡባ ዎደ ኮኮርሸ ዳና።’
EZE 26:17 ኤንቲ ነዉ ሀይሳዳ ያግድ ዘለልስ ከሳና፦ “አባ ዶናን ደእያ ያሽያ ካታማታ፤ ዎልቃማ አሳይ ደእያ ካታመ፥ ኔኒ ዋና ላለታዲ? ኔንነ ነ ግዶን ደእዳ አሳይ አባ ዶናን ደእያ አሳ ኡባ ያሽሳዳሳሽን።
EZE 26:18 ኔኒ ኩንድያ ጋላስ ዩሾይ አባን ተቀትዳ ቢታት ኮኮርዶሶና። ሃꬃን ተቀትዳ ቢታት ነ ꬋዩዋን ዳጋምዶሶና” ያግስ።
EZE 26:19 ኡባ ሃርያ ጎዳይ ሀይሳዳ ያጌስ፦ “ሀእ ኦንካ ዶና ካታማታዳ ታ ነና ባይሳ ከሳና። ታኒ አባ ሃꬃ ነ ቦላ ኤህን፥ ዳሮ ሃꬃይ ነና ካማና።
EZE 26:20 ኔኒ ስኦለ ገላዳ በን ሀይቅዳ አሳራ ዋላከታና መላ ኦꬃና። ኔኒ ቢታፈ ጋርሳን፥ በን ሞገትድ፥ መርናዉ ላለትድ አትዳይሳታራ ዳና መላ ኦꬃና። ኔኒ ዛራዳ አስ ደእያ ካታማ ግዳካ፤ ደኦን ደኤይሳታ ቢታን ዛራዳ በሰ ደማካ።
EZE 26:21 ታኒ ነ ዉርሰꬃ ዳጋንꬅያ ዉርሰꬅ ኦꬃና፤ ነዉ ሄስ ዉርሰꬅ ግዳና። አስ ነና ኮያና፤ ሽን ኔኒ ዛራዳ በንታካ” ያጌስ ኡባ ሃርያ ጎዳይ።
EZE 27:1 ጎዳ ቃላይ ሀይሳዳ ያግሸ ታኮ ይስ።
EZE 27:2 “አሳ ናአዉ፥ ፅሮሳስ ዘለልስ ከሳ።
EZE 27:3 ዩሾይ አባን ተቀትዳ ቢታን ደእያነ አባ ጋፃን ደእያ ዳሮ አሳራ ዛልእያ፥ ካታማስ፥ ኡባ ሃርያ ጎዳይ ሀይሳዳ ያጌስ። “ ‘ነኖ ፅሮሳ፥ ታኒ ፑላነ ቦረይ ባይና ማላ ሎኦ’ ” ያጋዳሳ።
EZE 27:4 ነ ዛዋይ አባ ጉልኣና፤ ነና ኬፀይሳት ሎይꬅድ ኦꬅድ ኬፅዶሶና።
EZE 27:5 ነ ሳንቃ ሳንራ ፂዳን ኦꬅዶሶና፤ ነ ማርካብያ ቱሳ ልባኖሰ ዝጋን ጊግስዶሶና።
EZE 27:6 ሃꬃ ፕꬍያ ምꬃት ባሳነ ዎላፐ ኦሰትዶሶና። ነ ማርካብያ ሂፃይ ቆጵሮሳ ፂዳን፥ እያ ዩሾይ ዳንጋርሳ ዛለን አሌቀትስ።
EZE 27:7 ነ ሻራይ ባንድራዳ ሃሆን በንታና መላ፥ ግብፀታ ሊኖፐ አሌቀትድ ኦሰትስ። ነ ካማ ገሸይ ቆጵሮሳፐ ይዳ፥ ካሎሰ ኦቻ ቴራ ዳንያ ማኦፐ ኦሰትዳይሳታ።
EZE 27:8 ነ ማርካብያ ኮልፅሰይሳት ስዶናነ አርዋዳ ካታማታፐ ይዳይሳታ፤ ነ ማርካብያ ላገይሳት ሎህዳ ነ አሳታ።
EZE 27:9 ማርካብያ ጊግሰይሳት ገባላፐ ይዳ ኤራንቾታነ ካለꬅያ ሂላንቾታ፤ አባን ብያ ማርካበ ኡባን ደእያ ኦሳንቾት ዎꬋ ከያ ግድ ነ ግዶን ዛልኦሶና።
EZE 27:10 “ፋርሰፈ፥ ሊደፐነ ሊበፐ ይዳ ኦላንቾት፥ ነ ኦላንቾታ ማድድ ኦለትዶሶና። ባንታ ጎንዳልያነ ባንታ ኦላ ባርኔፃ ነ ግዶን ካቅዶሶና፤ ኤንቲ ነና ቦንችዳ አሳታ።
EZE 27:11 አርዋዳነ ሄለካ ኦላንቾት፥ ነ ድርሳ ግምብያ ናጎሶና። ጋማዳ አሳይ ነ አዱሳ ግምብ ሻኮ ቦላ ናጎሶና፤ ባንታ ጎንዳልያ ነ ግምብያ ቦላ ካቅዶሶና፤ ነ ፑላታና መላ ኦꬅዳይ ኤንታና።
EZE 27:12 ነ ዳሮ ዱረተꬃ ጋሶን ታርሰስ ኔራ ዛልእስ፤ እ ብራ፥ ብራታ፥ ቆርቆሮነ እርሳሰ ኔራ ላምድ ዛልኦሶና።
EZE 27:13 ያዋን፥ ቱባልነ ሞሳህ ኔራ ዛልእዶሶና፤ አይለታነ ናሰ ብራታ እምድ፥ ነ ሚሽያራ ላምዶሶና።
EZE 27:14 ቤት-ቶርጋማ አሳይ ቶጋ ፓራታ፥ ኦላ ፓራታነ ባቁሎታ እምድ፥ ነ ሚሽያራ ላምስ።
EZE 27:15 ድዳና አሳይ ኔራ ዛልእዶሶና፤ ዩሾይ አባን ተቀትዳ ቢታታን ደእያ አሳይ ዳንጋርሳ ዛለነ ዞጰ ምꬅ ነዉ ኤሆሶና።
EZE 27:16 “ነ ዳሮ ዱረተꬃ ጋሶን፥ ሶረ አሳት ኔራ ዛልእዶሶና፤ ኤንቲ ጭሊሎ አልኦ ሹች፥ ዞኦ አልኦ ሹች፥ የሌሎ አሌቆ፥ ኦቻ ቴራ ዳንያ ማኡዋ፥ አልኦ ሊኖነ አሌቀትዳ ማኦ ኤህድ ነ ሚሽያራ ላምዶሶና።
EZE 27:17 ይሁዳነ እስራኤለ አሳይ ኔራ ዛልእዶሶና፤ ኤንቲ ምንተ ጋደ ግስተ፥ ማልዶ፥ ኤስ፥ ዛይተነ ꬋልያ ባልሳመ ዛይተ ነ ሚሽያራ ላምዶሶና።
EZE 27:18 ነ ዳሮ ዱረተꬅነ ሻሎይ ደእያ ግሾ፥ ዳማስቆይ፥ ከልቦና፥ ዎይንያነ ዛሃራ ዶርሳ እክሰ እምድ ነ ሚሽያራ ላምዶሶና።
EZE 27:19 ኡዛለን ደእያ ዳነነ ያዋና አሳይ ነ ዱማ ዱማ ሚሸታ ሻምዶሶና። ኤንቲ ነ ሚሽያራ ላማናዉ አሌቀትዳ ብራታነ ዱማ ዱማ ሳዎ ኤህዶሶና።
EZE 27:20 “ድዳና አሳይ ኮራ ግላሰ ኤህድ ዛልእዶሶና።
EZE 27:21 አራበትነ ቀዳረ ሀላቃት ኡባይ ነ ዛልኤ ሚሽያስ ዶርሳ ኡርገታ፥ ማራዘታነ ዴሻታ ኤህዶሶና።
EZE 27:22 ሳባነ ራማ ዛልአንቾት አልኦ ሹቹ፥ ዎርቃነ ዶረትዳ ሳዎታ እምድ፥ ነ ሚሽያራ ላምዶሶና።
EZE 27:23 ካራነ፥ ካነ፥ ኤደነ፥ ሳባ አሶረነ ከልማዳ ካታማት ኡባይ ኔራ ዛልእዶሶና።
EZE 27:24 ኤንቲ ሎኦ ማኦታ፥ ካሎሰ ዳንያ ማኡዋ፥ አሌቀትዳ ማኡዋ፥ ጋዛ ስጋጃታ፥ ሎይꬅ ዶቅዳ ስባጎታነ ዎዶሮታ እምድ፥ ነ ግያን ዛልኦሶና።
EZE 27:25 “ታርሰሳ ማርካበት ነ ሚሸታ ጫንዶሶና። ኔኒ ዳሮባይ ጫነትን፥ አባ ቦላ ብያ ማርካበ መላ ግዳዳሳ።
EZE 27:26 ነ ማርካብያ ላገይሳት ነና ኤክድ፥ አባ ግዶ ግና ኤፍዶሶና፤ ሽን ዶሎሀ ጫርኮይ ነና አባ ግዶን መንረꬅስ።
EZE 27:27 ኔኒ መቀረትዳ ዎደ ነ ዱረተꬃይነ ነ ዛልኤ ሚሸ ኡባይ፥ ነ ማርካብያ ላገይሳት፥ ነ ማርካብያ ጊግሰይሳት፥ ነ ዛልአንቾትነ ነ ግዶን ደእያ ኦላንቾት ኡባይ አባ ግዶን ሙከትዶሶና።
EZE 27:28 ኤንታ ዋሶይ አባ ጋፃ ደእያ ቢታ ዳጋንꬅስ።
EZE 27:29 “ማርካብያ ቦላ ኡትድ ሃꬃ ፕይሳት ኡባይ ማርካበታፐ ከይድ፥ አባ ጋፃን ኤቅዶሶና።
EZE 27:30 ኤንቲ ኡባይ ባንታ ሁጰን ባና ቆልድ፥ ብዶን ጎንዶረትሸ፥ ነ ꬋዩዋ ግሾ ኢታ ዬሆ ዬክዶሶና።
EZE 27:31 ነዉ ካዮትድ፥ ባንታ ሁጵያ ሜድድ፥ ካዮ ማኦ ማእዶሶና፤ ኤንቲ ዳሮ አዛንድ ነዉ ዬክዶሶና።
EZE 27:32 ኤንቲ ሀይሳዳ ያግድ ነዉ ዘሌልዶሶና፦ “ሀእ አባ ግዶን ስእ ግዳ፥ ፅሮሳ መል ኦኔ?”
EZE 27:33 “ነ ዛልኤ ሚሸይ አባ ፕንድ ያ ዎደ፥ ዳሮ አሳ ካልሳዳሳ፤ ነ ሻሉዋን ቢታን ደእያ ካዎት ዱረትዶሶና።
EZE 27:34 ሽን ሀእ ጪሞ አባን መቀረታዳሳ፤ ነ ዛልኤ ሚሸይነ ነዉ ኦꬅያ አሳ ኡባይ፥ ኔራ አባ ግዶን ሙከትድ ꬋይዶሶና።
EZE 27:35 ዩሾይ አባን ተቀትዳ ቢታን ደእያ አሳ ኡባይ ነ ቦላ ጋክዳባ በእድ ዳጋምዶሶና። ኤንታ ካዎት ዳሮ ያይዶሶና፤ ኤንታ ሶምኦይ ያሻን ሹልስ።
EZE 27:36 ነ ዉርሰꬃይ ዳጋንꬅያባ ግድስ፤ ኔኒ ዛራዳ ዳካ። ሄሳ ግሾ፥ ቢታ ኡባን ደእያ ዛልአንቾት፥ ሽንቻለ ግዶሶና” ያግስ።
EZE 28:1 ጎዳ ቃላይ ሀይሳዳ ያግሸ ታኮ ይስ።
EZE 28:2 “አሳ ናአዉ፥ ኡባ ሃርያ ጎዳይ ሀይሳዳ ያጌስ ጋዳ ፅሮሳ ሀላቃስ ኦዳ፦ ‘ነ ዎዛናይ ኦቶርትዳ ግሾ፥ ታኒ ፆሰ፤ ታኒ አባ ግዶን፥ ፆሳታ አራታን ኡታስ’ ያጋዳሳ። ኔኒ፥ ‘ታኒ ፆሳዳ፥ ጭንጫ ግዳስ ጋዳ ቆፕኮካ ነ አሰፐ አትሽን፥ ፆሰ ግዳካ።
EZE 28:3 ነ ዳነላፐ አꬋዳ ጭንጫይ? አይ ፁርካ ኔፐ ጌመኔ?
EZE 28:4 ቱማ ነ ጭንጫተꬃንነ ነ አኬካን ዱረ ግዳዳሳ፤ ነ ቡቁራ ምንጃ ኬꬃን ብራነ ዎርቃ ሺሻዳሳ።
EZE 28:5 ነ ዛልእያ ኤራን ዳሮ ዎ ደማዳሳ፤ ነ ዱረተꬃ ጋሶን ነ ዎዛናይ ኦቶርትስ’ ” ያጌስ።
EZE 28:6 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ታኒ ፆሳዳ ጭንጫ ጋዳ ቆፕያ ግሾ፥
EZE 28:7 ታ ነ ቦላ ቃይ ባይና ዎዛና ምኖ ሞርከታ ኤሀና፤ ኤንቲ ኔኒ ጭንጫተꬃንነ ኤራተꬃን ሺሽዳ ሻሎ ኡባ ማሻን ꬋይሳና፤ ኤንቲ ነ ቦንቹዋ ቱንሳና።
EZE 28:8 ኤንቲ ነና ስኦለ የዳና፥ ነካ ጪሞ አባን ሀይቃና።
EZE 28:9 ኤንቲ ነና ዎꬋናዉ ያ ዎደ ኔኒ፥ ‘ታኒ ፆሳ’ ጋኔ? ነና ዎꬍያ አሳ ኩሸን ነ ኩንድያ ዎደ ነ አሰፐ አትሽን፥ ፆሰ ግዳካ።
EZE 28:10 ኔኒ አላጋታ ኩሸን አማኖና አስ ሀይቅያ ሀይቆ ሀይቃና” ያጌስ ኡባ ሃርያ ጎዳይ።
EZE 28:11 ቃስ ጎዳ ቃላይ ሀይሳዳ ያግሸ ታኮ ይስ።
EZE 28:12 “አሳ ናአዉ፥ ኡባ ሃርያ ጎዳይ ሀይሳዳ ያጌስ ጋዳ ፅሮሳ ካዋስ ዘሌላ፦ ‘ኔኒ ካሰ ጭንጫተꬃን ኩማዳሳ፤ ኔኒ አስ ሌምስድ ኦድያ ፑላነ ጭንጫ ግዳዳሳ።
EZE 28:13 ኔኒ ኤደነን፥ ፆሳ ጋናትያን ካሰ ደአዳሳ፤ ሳርድዮነ፥ ቶጳዘ፥ አልማዘ፥ ብርለ፥ ማርግደ፥ ያስጵደ፥ ሳንፓረነ ባሉረ ጌተትያ አልኦ ሹቻን አሌቀታዳ፥ ሎኦ ዎርቃ አሌቆ ካሰ ማአዳሳ፤ ነ መትዳ ጋላስ ሄ ኡባይ ነዉ ጊግስ።
EZE 28:14 ነና ናግያ ክሩበ ኦꬃዳ ሹማስ፤ ነና ትያስ። ታ ጌሻ ዙማ ቦላ ነ ደአዳሳ፤ ታማዳ ጶልያ አልኦ ሹቻታ ግዶን ስመረታዳሳ።
EZE 28:15 ነ መትዳ ጋላሳፐ ዶማዳ፥ ኢታባይ ነ ቦላ በንታና ጋካናዉ ቦረይ ባይና ደአዳሳ።
EZE 28:16 ነ ዳሮ ዛልኤን ማꬆትዳ ግሾ ቡቀꬃን ኩማዳ፥ ናጋራ ኦꬃዳሳ። ሄሳ ግሾ፥ ታ ጌሻ ዙማፐ ነና ዎልቃን ከሳስ። ነና ናግያ ክሩበይ፥ ሄ ታማዳ ጶልያ አልኦ ሹቻታ ግዶፈ የደꬅስ።
EZE 28:17 ኔኒ ማላ ሎኦ ግድያ ግሾ ዳሮ ኦቶርታዳሳ፤ ነ ቦንቾ ኮያዳ ጭንጫተꬃ ካዉሻዳሳ። ሄሳ ግሾ፥ ታ ነና ሳአን የጋስ፤ ሀራ ካዎት ነና በእድ ባያና መላ ኦꬃስ።
EZE 28:18 ነ ናጋራንነ ነ ባለꬅያ ዛልእያን፥ ነ ጎይኖ በሳታ ቱንሳዳሳ። ሄሳ ግሾ፥ ታም ነ ግዶፈ ከያናዳ ኦꬃስ፤ እካ ነና ምስ። ኡባይ ፄልሽን፥ ታ ነና ፁጋዳ ሳኣ ቦላ ብዶ ከሳስ።
EZE 28:19 ነና ካሰ ኤርያ ካዎተꬃት ኡባይ ዳጋምዶሶና። ነ ዉርሰꬃይ ያሽያባ ግድስ፤ ኔኒ ዛራዳ በንታካ’ ” ያግስ።
EZE 28:20 ጎዳ ቃላይ ሀይሳዳ ያግሸ ታኮ ይስ።
EZE 28:21 “አሳ ናአዉ፥ ነ ሶምኡዋ ስዶናኮ ዛራዳ እያ ቦላ ትንብተ ኦዳ።
EZE 28:22 ነኖ፥ ስዶና፥ ታ ነዉ ሞርከ ግዳና። ታኒ ነ ቦላ ኦꬅያባን ታ ቦንቾይ ቆንጫና። ነ ግዶን ደኤይሳት ፕርዳን ታኒ ታ ጌሻተꬃ በሲያ ዎደ፥ ታኒ ጎዳ ግደይሳ ኤንቲ ኡባይ ኤራና።
EZE 28:23 ታ ነ ቦላ ኢታ ሀርገ የዳና፤ ኦገ ኡባን ሱꬅ ጉካናዳ ኦꬃና። ኡባ ባጋራ ያ ኦላ ጋሶን ነ አሳይ ማሻን ሀይቃና። ታኒ ጎዳ ግደይሳ ኤንቲ ሄ ዎደ ኤራና።
EZE 28:24 ህዛፐ ጉየ እስራኤለ ዩሾን ደእያ፥ እያ ካꬍድ ፄልያ፥ ቢታ ኡባን አጉንꬃዳነ ክንቾተዳ ቆህያ ኦንካ ዴና። ታኒ ኡባ ሃርያ ጎዳ ግደይሳ ኤንቲ ሄ ዎደ ኤራና” ያጌስ ኡባ ሃርያ ጎዳይ።
EZE 28:25 “እስራኤለ አሳ ላለትዳ ቢታ ኡባፈ ሺሻዳ ኤህያ ዎደነ ካዎተꬃታ ኡባ ስንꬃን ታኒ ታ ጌሻተꬃ በሲያ ዎደ፥ ታኒ ታ አይልያ ያይቆባስ እምዳ ባንታ ቢታን ኤንቲ ዳና።
EZE 28:26 ያን ኤንቲ ሳሮነ ናገትድ ዳና፤ ኬ ኬፃና፤ ዎይነ ቶካና። ኤንታ ካꬍድ ፄልያ ኤንታ ሾሮታ ኡባ ታኒ ፕርድያ ዎደ እስራኤለ አሳይ ሳሮ ዳና። ታኒ ጎዳ ኤንታ ፆሳ ግደይሳ ኤንቲ ሄ ዎደ ኤራና” ያጌስ ኡባ ሃርያ ጎዳይ።
EZE 29:1 ኑኒ ድኤትዳ ታማንꬆ ላይꬃን፥ ታማንꬆ አጌናን፥ ታማነ ናምአንꬆ ጋላስ፥ ጎዳ ቃላይ ሀይሳዳ ያግሸ ታኮ ይስ።
EZE 29:2 “አሳ ናአዉ፥ ነ ሶምኡዋ ግብፀ ካዋኮ ዛራዳ፥ እያ ቦላነ ግብፀ ቢታ ኡባ ቦላ ትንብተ ኦዳ።
EZE 29:3 ኡባ ሃርያ ጎዳይ ሀይሳዳ ያጌስ ጋዳ ኦዳ። ‘ነኖ፥ ናይለ ሻፋ ግዶን ዝንእዳ፥ ግታነ ያሽያ ዶአ ዳነይሶ። ናይለ ሻፋይ ታባ፤ እያ መꬍዳይ ታና’ ግያ ግብፀ ካዋዉ፥ ታ ነዉ ሞርከ ግዳና።
EZE 29:4 ታ ነ ሲን ዳፎ አꬃና፤ ነ ሻፋን ደእያ ሞሎታ ቀፈይ ነ ጋልባራ ኦይከታና መላ ኦꬃና፤ ሞሎት ነ ጎጋራ ኦይከትድ ኡትዳሽን፥ ታ ነና ሃꬃፈ ጎቻዳ ጋፃ ከሳና።
EZE 29:5 ታ ነናነ ነ ሻፋን ደእያ ሞሎታ ኡባ መላ ቢታ ሆላና፤ ነ አሀይ ደንባን የገትድ አታና፤ ነ አሀ ሺሽድ ሞግያ አስ ꬋያና። ታ ነና ሳሎ ካፎታስነ ሳኣ ዶአታስ ካꬅ ኦꬃና።
EZE 29:6 ግብፀን ደእያ አሳ ኡባይ ታኒ ጎዳ ግደይሳ ሄ ዎደ ኤራና። “ኔኒ እስራኤለ አሳስ ማቃ ፃምአ ግዳዳሳ፤
EZE 29:7 ኤንቲ ነና ኦይክዳ ዎደ መቃዳ ኤንታ ሾጰን ጫዳዳሳ፤ ኤንቲ ነናን ዘምፕዳ ዎደ መቃዳ ኤንታ ዞኩዋ ዱꬃዳሳ።
EZE 29:8 ሄሳ ግሾ፥ ታኒ ኡባ ሃርያ ጎዳይ፥ ነ ቦላ ማሸ ደንይሳታ ኤሀና፤ ኤንቲ ነ አሳነ ነ መህያ ኡባ ዉርሳና።
EZE 29:9 ግብፀ ላለትድ ባይሳ ቢታ ግዳና። ታኒ ጎዳ ግደይሳ ኤንቲ ሄ ዎደ ኤራና። ኔኒ፥ ‘ናይለ ሻፋይ ታባ፤ እያ መꬍዳይ ታና’ ያግዳ ግሾ፥
EZE 29:10 ታኒ ነ ቦላነ ነ ሻፋ ቦላ ደንዳስ። ፑደሀ ባጋራ ምግዶላፐ ዶማዳ፥ ዱገሀ ባጋራ አስዋና ጋካናዉ፥ ያራ ካንꬅድ ቶጰ ዛዋ ጋካናዉ ግብፀ ኡባ አስ ባይና ባይሳ በሰ ከሳና።
EZE 29:11 አሰ ግድን መሄ ግድን ያራ ካንና፤ ኦይታሙ ላይꬅ ዉራና ጋካናዉ፥ አይብካ ያን ዴና።
EZE 29:12 ታኒ ግብፀ ቢታ ኡባፈ አꬍዳ ባይሳ ቢታ ኦꬃና፤ እያ ካታማት ኦይታሙ ላይꬅ ዉራና ጋካናዉ፥ ሀራ ላለትዳ ካታማ ኡባፈ አꬍድ ላለትዳ ካታማ ግዳና። ግብፀ አሳ ታኒ ካዎተꬃታ ግዶንነ ሀራ አሳ ግዶን ላላና” ያጌስ።
EZE 29:13 ኡባ ሃርያ ጎዳይ ሀይሳዳ ያጌስ፦ “ኦይታሙ ላይꬃፈ ጉየ፥ ታኒ ግብፀይ ላለትዳ ካዎተꬃታ ግዶፈ ሺሻና።
EZE 29:14 ታኒ ነና ዛራዳ ጋሽትሳና ኤንታ የለትዳ ዱገሀ ግብፀን ደእያ ጳትሮሳ ቢታ ዛራና፤ ያን ኤንቲ ላፋ ካዎተꬅ ግድድ ዳና።
EZE 29:15 ግብፀይ ሀራ ካዎተꬃታ ኡባፈ ላፋ ካዎተꬅ ግዳና። ዛሪድ ሀራ ካዎተꬃታ ቦላ ባና ꬎቁ ꬎቁ ኦና፤ እ ሀራ ካዎተꬅ ሃሮናዳ ታኒ እያ ጉꬃና።
EZE 29:16 እስራኤለይ ዛሪድ ማዶ ደማናዉ ግብፀን አማነተና፤ ግብፀን አማነትዳ አማነተꬃይ አይ መላ ቆሆኮ እስራኤለይ አኬካና። ታኒ ኡባ ሃርያ ጎዳ ግደይሳ ኤንቲ ሄ ዎደ ኤራና” ያጌስ።
EZE 29:17 ኑኒ ድኤትዳ ላታማነ ላፑንꬆ ላይꬃን፥ ኮይሮ አጌናን፥ ኮይሮ ጋላሳን፥ ጎዳ ቃላይ ሀይሳዳ ያግሸ ታኮ ይስ።
EZE 29:18 “አሳ ናአዉ፥ ባብሎነ ካዎይ ናቡካዳናፆር ፅሮሳ ቦላ ኦላ ደንꬃናዉ ጊግስ። ኤንታ ሁጰይ ቆለታና ጋካናዉነ ኤንታ ሀሸይ ሾለታና ጋካናዉ ኦላንቾት ዴፆ ቶሆ ቶካና መላ ኦꬅዶሶና። ግዶሽን፥ ካዎይነ ኦላንቾት ሀ ዳቡራ ኡባን ፅሮሳፐ ደምዳባይ ባዋ።
EZE 29:19 ‘ታኒ ግብፀ ቢታ ባብሎነ ካዋ ናቡካዳናፆራስ አꬃዳ እማና፤ እካ ባ ኦላንቾታስ ዳሞዘ ግዳና መላ ድኦንነ ቦንቀን ኦይክዳባ ኡባ ኤክድ ባና።
EZE 29:20 እነ እያ ኦላንቾት ታዉ ኦꬅዳ ግሾ፥ ታኒ እያዉ ግብፀ ቢታ ኤንታ ዳቡራስ ዳሞዘ ኦꬃዳ እማና’ ” ያጌስ ኡባ ሃርያ ጎዳይ።
EZE 29:21 “ሄ ጋላስ ታኒ እስራኤለ ደርያ ምንꬃና። ህዝቄላ፥ ነካ አሳስ ኦዳና መላ ታ ነና ምንꬃና። ታኒ ጎዳ ግደይሳ ኤንቲ ሄ ዎደ ኤራና” ያግስ።
EZE 30:1 ቃስካ ጎዳ ቃላይ ሀይሳዳ ያግሸ ታኮ ይስ፦
EZE 30:2 “አሳ ናአዉ፥ ኡባ ሃርያ ጎዳይ ሀይሳዳ ያጌስ ጋዳ ትንብተ ኦዳ። “ ‘ሄ ጋላሳ አየ! ያጋዳ ዘሌላ።’
EZE 30:3 ሄ ጋላሳይ ማትስ! ጎዳ ጋላሳይ ጋክስ! ሄ ጋላሳይ ሻር ካምዳ ጋላስ ካዎተꬃታ ኡባስ መቶ ጋላስ ግዳና።
EZE 30:4 ግብፀ ቦላ ኦል ያና፤ ቶጰ ቦላ ኡንእ ያና። ዳሮት ግብፀ ቢታን ሀይቃና፤ እያ ዱረተꬃይ ቦንቀታና፤ እያ ባሶይ ሾደታና።
EZE 30:5 ሄ ኦላይ ቶጰ፥ ሊደ፥ ሊበ፥ አራበነ ጫቆ ደረ ኡባይ ግብፀራ እስፈ ማሻን ዉርሳና” ያጌስ።
EZE 30:6 ግብፀ ማደይሳት ኩንዳና፤ እያ ኦቶሩዋ ዎልቃይ ዉራና። ምግዶላፐ ብድ አስዋና ጋካናዉ፥ ኤንቲ ማሻን ሀይቃና። ታኒ ኡባ ሃርያ ጎዳይ ሄሳ ኦዳይስ።
EZE 30:7 ግብፀይ ቢታ ኡባፈ አꬍዳ ባይሳ ቢታ ግዳና፤ እያ ካታማት ሀራ ላለትዳ ካታማ ኡባፈ አꬍድ ላለትድ አታና።
EZE 30:8 ታኒ ግብፀ ታማን ኦይꬅያ ዎደነ እያ ማደይሳት ኡባይ ሀይቅድ ዉርያ ዎደ፥ ታኒ ጎዳ ግደይሳ ኤንቲ ኤራና።
EZE 30:9 “ሄ ዎደ ታኒ ሳሮ ደእያ ቶጰ አሳ ዳጋንꬃናዉ አሳታ ማርካበን ኪታና። ግብፀይ ፕርደትያ ጋላስ ቶጰ አሳ ቦላ ዋየይ ያና። ሄ ጋላሳይ ጋክስ” ያጌስ።
EZE 30:10 ኡባ ሃርያ ጎዳይ ሀይሳዳ ያጌስ፦ “ባብሎነ ካዋ ናቡካዳናፆራ ኩሸን ታኒ ግብፀ ዱረተꬃ ꬋይሳና።
EZE 30:11 ካዎተꬃታ ኡባፈ አꬍድ፥ ዎዛና ምኖ ኦላንቾታ ካለꬅድ ይድ፥ ቢታ ꬋይሳና፤ ኤንቲ ግብፀ አሳ ቦላ ማሸ ሾድድ፥ ቢታን አሀ ኩንꬃና።
EZE 30:12 ናይለ ሻፋ ታኒ መልሳና፤ ታኒ ግብፀ ኢታ አሳታ ኩሸን አꬃዳ እማና፤ ሄ ቢታነ ያን ደእያባ ኡባ አላጋታን ꬋይሳና። ታኒ ጎዳይ ሀይሳ ኦዳስ” ያጌስ።
EZE 30:13 ኡባ ሃርያ ጎዳይ ሀይሳዳ ያጌስ፦ “መምፕሳ ካታማን ደእያ ኤቃታነ ምስለታ ኡባ ታ ꬋይሳና፤ ግብፀ ቢታን ዛሪድ ሀላቃይ ዴና፤ ቢታ ኡባ ታኒ ያሽሳና።
EZE 30:14 ታኒ ጳትሮሳ ጌተትያ ዱገሀ ባጋ ግብፀ ባይሳ ከሳና፤ ፑደሀ ባጋራ ደእያ ፆኣነ ካታማን ታማ የዳና፤ ተብሳ ካታማ ፕርዳና።
EZE 30:15 ግብፀ ሚፃ ግድዳ ፐሉስያማን ታ ሀንቁዋ ጉሳና፤ ተብሳ አሳ ኡባ ዉርሳና።
EZE 30:16 ታኒ ግብፀን ታማ ኦይꬃና፤ ፐሉስያም ዳሮ ዋየታና፤ ተብሳ ድርሳ ግምበይ ላለታና፤ መምፕሳ ካታማ ዱፆና መቶይ ጋካና።
EZE 30:17 ኦናንነ ቡባስቱ ካታማን ደእያ ናአተꬃት ኡባይ ማሻን ዉራና፤ ማጫሳይ ድኤትድ ባና።
EZE 30:18 ግብፀ ዎልቃ ታ መንረꬅያ ዎደ ፃፍናሳን ጋላስ ቃማና፤ እ ኦቶሩዋ ዎልቃይ ዉራና፤ ግብፀ ሻር ካማና፤ ሄ ካታማ ዩሾን ደእያ ጉታቲ ኡባ ድኤትድ ባና።
EZE 30:19 ታኒ ግብፀ ሄሳዳ ኦꬃዳ ፕርዳና። ታኒ ጎዳ ግደይሳ ኤንቲ ሄ ዎደ ኤራና” ያጌስ።
EZE 30:20 ኑኒ ድኤትዳ ታማነ እስንꬆ ላይꬃን፥ ኮይሮ አጌናን፥ ላፑንꬃ ጋላሳን፥ ጎዳ ቃላይ ሀይሳዳ ያግሸ ታኮ ይስ።
EZE 30:21 “አሳ ናአዉ፥ ታ ግብፀ ካዋ ቀስያ መንꬃስ፤ እያ ዎይሻንነ ጩርቃን ፃፅድ፥ ኮልድ ፓꬅያ ሂል ባዋ፤ ህዛፐ ጉየ እ ምኖተꬅ ደምድ ማሸ ኦይካናዉ ዳንዳኤና።
EZE 30:22 ሄሳ ግሾ፥ ኡባ ሃርያ ጎዳይ ሀይሳዳ ያጌስ። ታኒ ግብፀ ካዋስ ሞርከ ግዳና። ካሰ እያዉ መቅዳ ቀስያነ ሎኦ ደእያ ቀስያ ናምኣካ ታ መንꬃና፤ እያ ማሻይ እያ ኩሸፐ ሳአን ዎꬋናዳ ኦꬃና።
EZE 30:23 ታኒ ግብፀታ ካዎተꬃታ ግዶንነ ሀራ ቢታታን ላላና።
EZE 30:24 ታኒ ባብሎነ ካዋ ናምኡ ቀስያ ምንꬃዳ፥ ታ ማሻ እያ ኦይꬃና። ሽን ግብፀ ካዋ ቀስያ መንꬃና፤ ባ ሞርክያ ስንꬃን እ ሀይቃና ሀንያ አሳዳ ኦላና።
EZE 30:25 ታኒ ግብፀ ካዋ ቀስያ ዳቡርሳዳ፥ ባብሎነ ካዋ ቀስያ ምንꬃና። ታኒ ባብሎነ ካዋ ታ ማሻ ኦይꬅያ ዎደነ እ ግብፀ ቦላ ደንꬅያ ዎደ ግብፀት ታኒ ጎዳ ግደይሳ ኤራና።
EZE 30:26 ግብፀታ ታኒ ካዎተꬃታ ግዶንነ ቢታ ኡባን ላላና። ታኒ ጎዳ ግደይሳ ኤንቲ ሄ ዎደ ኤራና” ያጌስ።
EZE 31:1 ኑኒ ድኤትዳ ታማነ እስንꬆ ላይꬃን፥ ሄꬓንꬆ አጌናን፥ ኮይሮ ጋላሳን፥ ጎዳ ቃላይ ሀይሳዳ ያግሸ ታኮ ይስ።
EZE 31:2 “አሳ ናአዉ፥ ግብፀ ካዋስነ አሳ ኡባስ ሀይሳዳ ያጋዳ ኦዳ፦ ‘ነ ግታተꬃ ታ ኦደራ ጋደዮ?’ ”
EZE 31:3 ነ ሎኦ ዳሻ ኩያይ ደእያ ልባኖሰ ዝጋ መላ፤ እ ድጭስ፤ እያ ፄራይ ሻራ ጋክስ።
EZE 31:4 ያን እያ ድችያ ሃꬅ ደኤስ፤ ፑልቶ ጪሞት እያ ድችዶሶና። ሻፋት ጎግድ እያ ዩሹዋ እርፅስዶሶና፤ ፑልቶት ምꬃይ ዶልያ በሳ ኡባ ኡሾሶና።
EZE 31:5 ሄ ምꬃይ ዎራን ደእያ ምꬃ ኡባፈ አዱቅስ፤ እያ ዳሻይ ዳርስ፤ ታሸይ አዱቅስ፤ ሃꬅ ዳርዳ ግሾ ኦርድስ።
EZE 31:6 ሳሎ ካፎት እያ ዳሻን ባንታ ኬꬃ ኬፅዶሶና፤ ባዞ ዶአት እያ ኩያ ጋርሳን ናአ የልዶሶና፤ ግታ ካዎተꬃት ኡባይ እያ ኩያን ሸምፖሶና።
EZE 31:7 ባ ፃጱዋ ጪሞ ሃꬃን ዱገ የድዳ ግሾ ሄ ምꬃይ ባ ዳሻ ታሽያራ ዋንድ ሎእ!
EZE 31:8 ሀር አቶሽን ፆሳ ጋናትያን ሄ ዝጋራ ግንያ ዝግ ባዋ፤ እያ መላ ዳሽ ደእያ ፂድካ ባዋ። ሄሳ መላ ኦቻ ምꬅ፥ ፆሳ ጋናትያን ሄሳ መላ ሎኦ ምꬅ ባዋ።
EZE 31:9 ታኒ እያ ዳሮ ዳሻን ፑላያስ፤ ኤደነ ጌተትያ ፆሳ ጋናትያን ደእያ ምꬃት ኡባይ እያ ቃናቶሶና።
EZE 31:10 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ሄ ምꬃይ አዱቅድ ድጭዳ ግሾ፥ እያ ፄራይ ሻራ ጋክዳ ግሾነ እ ባ ጌሳን ኦቶርትዳ ግሾ፥
EZE 31:11 ታ እያ የጋ አጋስ፤ ዎልቃማ፥ አላጋ ካዋስ አꬃዳ እማስ። ሄ ካዎይ እያ ኢታተꬃ መላ እያ ቦላ ኦꬃና።
EZE 31:12 ዎዛና ምኖ አላጋት ሄ ምꬃ ቃንፅድ የጋና፤ ቃንፅዳ ታሸት ደረታን፥ ኦላታንነ ዛንጋራታን የገትድ አታና። እያ ኩያን ሸምፕያ ካዎተꬃት ኡባይ ሄ በሳ አግድ ባና።
EZE 31:13 ሳሎ ካፎት ይድ ኩንድዳ ምꬃ ቦላ ኡታና፤ ባዞ ዶአት እያ ታሸታ የꬋና።
EZE 31:14 ሃꬃ ማታን ድጭያ ምꬃታ ግዶን እያ መላ አዱቅድ፥ ፄራይ ሻራ ጋክያ ምꬅ ዴና። ሀይቅያ አሳ ቦላ ጋክያ ሀይቆ ፕርዳይ ሄ ምꬃ ቦላ ጋካና፤ እ ዱፎን ደኤይሳታራ ግዳና” ያጌስ።
EZE 31:15 ኡባ ሃርያ ጎዳይ ሀይሳዳ ያጌስ፦ “ሄ ምꬃይ ዱፎ ገልያ ጋላስ ጪሞ ፑልቶ ሃꬃት እያዉ ካዮታና መላ ኦꬃና። ሄ ፑልቶ ሃꬃይ ጎጎና መላ ኦꬃና፤ ልባኖሰይ እያ ግሾ አዛናና መላ ኦꬃና፤ ዎራ ምꬃ ኡባይ ሹላና።
EZE 31:16 ታ ሄ ምꬃ ዱፎን ሆልያ ዎደ፥ እያ ኩንደꬃ ግርሳን ካዎተꬃ ኡባይ ቃፃና። ኩንድድ ዱፎን ገልዳ ኤደነ ምꬃትነ ሃ ኡይድ ኦርድዳ ሎኦ ልባኖሰ ምꬃት ኡባይ እያ ኩንደꬃን ምንተና።
EZE 31:17 ካዎተꬃታ ግዶን እያራ እስፍዳይሳትነ እያ ኩያን ደእያ ኡባይ ካሰ ማሻን ሀይቅዳይሳታራ ጋሄታናዉ እያራ እስፈ ዱፎ ገላና።
EZE 31:18 ኤደነ ጋናትያን ደእያ ምꬃታ ግዶን ሄሳ መላ ግትነ ሎኦይ ባዋ። ሽን ሀእ ኤደነ ምꬃታዳ እካ ሀይቅድ ዱፎን ገሌስ፤ ያን እ ማሻን ሀይቅዳ አማኖናይሳታራ ጋሄታና። “ሄ ምꬃይ ግብፀ ካዋነ እያ አሳ ሌምሶ” ያጌስ ኡባ ሃርያ ጎዳይ።
EZE 32:1 ኑኒ ድኤትዳ ታማነ ናምአንꬆ ላይꬃን፥ ታማነ ናምአንꬆ አጌናን፥ ኮይሮ ጋላሳን፥ ጎዳ ቃላይ ሀይሳዳ ያግሸ ታኮ ይስ።
EZE 32:2 “አሳ ናአዉ፥ ግብፀ ካዋስ ሀይሳዳ ያጋዳ ዘሌላ። ኔኒ ካዎተꬃታስ ግዶን ነና ጋሞ መላ ከሳዳሳ፤ ሽን ነ አባ ግዶን ደእያ ዬሩንꬃ መላ። ነ ሃꬃፈ ከያዳሳ፤ ነ ቶሁዋን የꬋዳ፥ ሃꬃ ቡሎያዳሳ።
EZE 32:3 ዳሮ አሳይ ሺቅያ ዎደ ታኒ ታ ግትያን ነና ኦይካና፤ አሳይ ነና ጎችድ፥ ሃꬃፈ ጋፃ ከሳና።
EZE 32:4 ታኒ ነና ቢታን ሆላ አጋና፤ ሳአ ቦላ ምጫና፤ ሳሎ ካፎታ ነ ቦላ ኡትሳና፤ ባዞ ዶአታ ነ አሹዋ ካልሳና።
EZE 32:5 ታ ነ አሹዋ ደረታ ቦላ ላላና፤ ዛንጋራታ ነ አሀን ኩንꬃና።
EZE 32:6 ሻፋታ ኩምድ ደረታ ካማና፥ ጋካናዉ፥ ነ ሱꬃይ ጉካና መላ ኦꬃና።
EZE 32:7 ታ ነና ꬋይስያ ዎደ ሳሎይ ጎዘታና፤ ፆልንቶት ꬉማና፤ አዋይ ሻራን ካመታና፤ አጌናይ ባ ፖኡዋ ድጋና።
EZE 32:8 ኔፐ ቦላራ ደእያ ሳሎ ፖኦታ ኡባ ꬋይሳዳ፥ ቢታ ꬉምሳና” ያጌስ ኡባ ሃርያ ጎዳይ።
EZE 32:9 ነ ቦላ ጋክዳ ꬋዩዋ ነ ኤሮና ካዎተꬃታ ስስያ ዎደ ዳሮ አሳ ዎዛናይ ኡንኤታና።
EZE 32:10 ዳሮ ካዎተꬃት ነና በእድ ዳጋማና። ታኒ ታ ማሻ ኤንታ ስንꬃን ሾዳዳ ሴስያ ዎደ፥ ካዎተꬃት ያሻን ኮኮራና፤ ነ ኩንድያ ዎደ ኤንቲ ኡባይ ባንታ ሸምፑዋስ ያያና።
EZE 32:11 ኡባ ሃርያ ጎዳይ ግብፀ ካዋኮ ሀይሳዳ ያጌስ፦ “ባብሎነ ካዋ ማሻይ ነ ቦላ ያና።
EZE 32:12 ሀራ ካዎተꬃታፐ አꬍዳ፥ ዎዛና ምኖ ኦላንቾት ባንታ ማሻን ዳሮ አሳ ዉርሳናዳ ታኒ ኦꬃና። ኤንቲ ግብፀ ኦቶሩዋ ꬋይሳና፤ ዳሮ አሳይ ዉራና።
EZE 32:13 ዳሮ ሃꬃ ማታን ደእያ መሄ ኡባ ታ ꬋይሳና፤ ህዛፐ ጉየ፥ ሃꬃ ቡሎያ አስ ዎይኮ መሄይ ዴና።
EZE 32:14 ሄ ዎደ ታኒ ነ ሃꬃታ ፅልሳና፤ ነ ሻፋታ ዎፑ ኦꬃዳ ጎግሳና። ታኒ ኡባ ሃርያ ጎዳይ ሀይሳ ኦዳይስ።
EZE 32:15 ታኒ ግብፀ ባይሳ ከስያ ዎደ እያን ደእያ ኡባ ቁቻዳ ꬋይስያ ዎደነ እያን ደእያ አሳ ኡባ ሾጭያ ዎደ ታኒ ጎዳ ግደይሳ ኤንቲ ኤራና።
EZE 32:16 ሀ ኡባይ ኤንታዉ ዘሌለትያ ዘለልስ ግዳና። ካዎተꬃታ ማጫሳት ግብፀስነ እያ ዳሮ አሳስ ዘሌላና” ያጌስ ኡባ ሃርያ ጎዳይ።
EZE 32:17 ኑኒ ድኤትዳ ታማነ ናምአንꬆ ላይꬃን፥ ሄ አጌናን፥ ታማነ እቻሻንꬆ ጋላሳን፥ ጎዳ ቃላይ ሀይሳዳ ያግሸ ታኮ ይስ፦
EZE 32:18 “አሳ ናአዉ፥ ዳሮ ግድዳ ግብፀ ኦላንቾታ ግሾ ዬካ። እዮነ፥ ዎልቃማ ካዎተꬃታ ማጫ ናይታ ሀይቅድ ዱፎ ገለይሳታራ እስፈ ዱገ ዱፎ ሞይዛ።
EZE 32:19 ኤንታኮ፥ ‘ህንተኖ ግብፀቶ፥ ህንተ ሀራታፐ አꬍድ ማላ ሎኦ? ህንተ ዱፎ ገላና፤ ያን ህንተ ጎዳ ቃፃረቶናይሳታራ እስፈ ሞገታና።’
EZE 32:20 ግብፀ ቢታስ ማሽ ሾደትድ ኡትዳ ግሾ፥ ኤንቲ ማሻን ሀይቅዳይሳታ ግዶን ኩንዳና፤ ግብፀይ ባ ዳሮ አሳራ ዱገ ጎሸታና።
EZE 32:21 ዱፎን ደእያ ዎልቃማ ሀላቃት ግብፀባነ ግብፀራ እስፍዳይሳታባ ሃሳይሸ፥ ‘ኤንቲ ዱገ ይዶሶና፤ ጎዳ ቃፃረቶናይሳታ ማሻን ሀይቅዳይሳታራ ኤንቲ ዝንእዶሶና’ ያጎሶና።
EZE 32:22 “አሶረይ ዱፎን ደኤስ። ኦላን ሀይቅዳ አሶረ ኦላንቾታ ዱፎት እያ ዩሹዋ ተቅድ ኡትዶሶና።
EZE 32:23 ኤንታ ዱፎት ኦላስ ዉርሰꬃ ጋፃን ደኦሶና። እያ ኦላንቾት ዱፉዋ ዩሾን ኬለትዶሶና፤ ካሰ ደኦን ደእያ አሳ ሄራን ቡቀꬅ ደንꬅያ አሳይ ሹከትዶሶና፤ ማሻን ዉርዶሶና።
EZE 32:24 “ኤላም ዱፎን ደኤስ፤ እያ ኦላንቾት ኡባይ ሹከትዶሶና ማሻን ኩንድዶሶና። ደኦን ደእያ አሳ ማታን ቡቀꬅ ደንꬅዳሳት ኡባይ ቃፃረቶና ቢታ ጋርስ አꬍዶሶና ዱፎ ገልድ ዝንእዶሶና።
EZE 32:25 ሀይቅዳይሳታ ግዶን ኤላማስ በሲ ጊግድ ኡትስ። ኤላማ ኦላንቾታ ዱፎት እያ ዩሹዋን ደኦሶና፤ ኤንቲ ኡባይ ማሻን ሀይቅዶሶና። ኤንቲ ኡባይ ቃፃረትቦናይሳታነ ማሻን ሀይቅዳይሳታ ኤንቲ ደኦን ደኤይሳታ ግዶን ቡቀꬅ ደንꬅዳ ግሾ ዱፎ ጌልዳይስታራ እስፈ ዝንእዶሶና።
EZE 32:26 “ሞሳህነ ቶባል ባንታ ኦላንቾታራ ዱፎን ደኦሶና፤ ኤንቲ ካሰ ካዎተꬃታ ኡባ ያሻን ኮኮርስዳይሳታ ግድኮካ፥ ኤንቲ ኡባይ ማሻን ሀይቅዶሶና። ኤንቲ ኡባይ ቃፃረቶናይሳታ። ኤንቲ ደኦን ደኤይሳታ ግዶን ቡቀꬅ ደንꬅዳ ግሾ ማሻን ሀይቅዶሶና።
EZE 32:27 ኤንቲ በን ጎባ ኦላንቾት ባንታ ኦላ ሚሽያ ዳንጭድ ባንታ ጎንዳልያ ትራን ዎꬅድ ባንታ ማሻ ቦርኮትድ ሞገተይሳዳ ቦንቾን ሞገትቦኮና። ሀ ኦላንቾታ ደኦን ደእያ አሳ ግዶን ቡቀꬅ ደንꬅዳ ግሾ ኤንታ ናጋራይ ኤንታ መቀꬃ ቦላ ደኤስ።
EZE 32:28 “ህንተ ግብፀ አሳት ፆነታናነ ማሻን ሀይቅዳ፥ አማኖና አሳታራ እስፈ ዝንአና።
EZE 32:29 “ኤዶመይ ባ ካዎታራነ ባ ሀላቃታራ እስፈ ዱፎን ደኤስ፤ ኤንቲ ካሰ ምኖ ኦላንቾታ፤ ሽን ሀእ ኦላን ሀይቅዳ፥ አማኖና አሳታራ ኦላን ገልዶሶና።
EZE 32:30 “ፑደሀ ባጋ ሀላቃትነ ስዶና አሳይ ዱፎን ደኦሶና። ኤንቲ ካሰ ባንታ ዎልቃን አሳ ያሽስዶሶና፤ ሽን ሀእ ኤንቲ ባንታ ዬላራ ያ ገልዶሶና። ማሻን ሀይቅዳ ቃፃረትቦና አሳራ እስፈ ዱፎ ገሎሶና።
EZE 32:31 “ግብፀ ካዎይነ እያ ኦላንቾት፥ ማሻን ሀይቅዳ ኦላንቾታ ያን በእድ ምነታና” ያጌስ ኡባ ሃርያ ጎዳይ።
EZE 32:32 “ታ ሀይሳፈ ካሰ ካዎተꬃት ግብፀ ካዋስ ያያና መላ ኦꬅዳባ ግድኮካ፥ እነ እያ ኦላንቾት ጎዳ አማኖና፥ ማሻን ሀይቅዳ አሳታራ እስፈ ዝንአና” ያጌስ ኡባ ሃርያ ጎዳይ።
EZE 33:1 ጎዳ ቃላይ ሀይሳዳ ያግሸ ታኮ ይስ።
EZE 33:2 “አሳ ናአዉ፥ ነ ቢታ አሳስ ሀይሳዳ ያጋዳ ኦዳ፦ ‘ታ እስ ቢታ ቦላ ኦላ ኤህያ ዎደ ሄ ቢታ አሳይ ባንታ ቦላ ያባ ዎችያ አስ ዶሮ ባንታ ግዶፈ ዶሮ።
EZE 33:3 ሄ ዎችያ ኡራይ ሞርከይ ይሽን በእድ፥ አሳይ ናገታና መላ ሞይዘ ፑንኮ፥
EZE 33:4 ኦንካ ሞይዘ ፑኑዋ ስእድ፥ ናገቶና እፅን፥ ኦል ይድ እያ ዎꬍኮ፥ ሱꬃ አጮይ እያ ኦይኮ።
EZE 33:5 እ ሞይዘ ፑኑዋ ስእድ፥ ናገቶና እፅዳ ግሾ እያ ሱꬃ አጮይ እያ ቦላና። እ ስእድ ናገትዳባ ግድያኮ ሀይቆፐ አታናሽን።
EZE 33:6 ሽን ዎቸይስ ሞርከይ የይሳ በእሸ፥ ሞይዘ ፑንድ አሳ ኤርሶና አግኮ፥ ኦላይ ይድ፥ ሄ አሳፐ እስ አስ ዎꬍኮ፥ ሄ ኡራይ ባ ናጋራን ሀይቄስ፤ ሽን ታኒ እያ ሱꬃ ዎቸይሳ ኩሸፐ ኤካና’ ” ያጋ።
EZE 33:7 “አሳ ናአዉ፥ ታ ነና እስራኤለ አሳስ ዎችያ አስ ኦꬃስ፤ ታ ነዉ ኦደይሳ ስአዳ አሳ አኬክሳ።
EZE 33:8 ታኒ እስ ኢታ አስ፥ ‘ኔኒ ቱማ ሀይቃና’ ግያ ዎደ፥ እ ባ ናጋራፐ ስማና መላ ነ እያዉ ኦዶና እፅኮ፥ ሄ ኡራይ ባ ናጋራን ሀይቄስ፤ ሽን ታኒ እያ ሱꬃ ግሾ ነና አቻና።
EZE 33:9 ሽን ናጋራንቾይ ባ ናጋራፐ ስማና መላ ነ ኦድን፥ እ እፅኮ፥ እ ባ ናጋራን ሀይቄስ፤ ሽን ነ ነ ሸምፑዋ አሻሳ።”
EZE 33:10 “አሳ ናአዉ፥ እስራኤለ አሳስ ሀይሳዳ ያጋዳ ኦዳ፦ ‘ህንተ፥ ኑ ናጋራይ ኑ ቆሆይ ኑ ቦላ ደኤስ፤ ሄሳ ጋሶን ኑ ግልቅዳ። ያትን፥ ኑ ዋንድ ፓፃ ዳናዉ ዳንዳኦና?’ ” ያጌታ።
EZE 33:11 ታኒ ኡባ ሃርያ ጎዳይ ታ ደኡዋን ጫቃይስ፦ “ናጋራንቾይ ባ ናጋራ አግድ፥ ደኦን ዳና መላ ኮያይስፐ አትሽን፥ ናጋራንቹዋ ሀይቁዋን ኡፋይትከ። ህንተኖ፥ እስራኤለ አሳዉ፥ ስምተ፤ ህንተ ኢታ ኦሱዋ አግተ! አይስ ሀይቃናዉ ኮዬቲ?” ያግስ።
EZE 33:12 አሳ ናአዉ፥ ነ ቢታ አሳስ ኦዳ። “ፅሎ አስ ናጋራ ኦꬅኮ፥ እያ ካሰ ፅሎተꬃይ እያ አሸና፤ ቃስ ናጋራንቾይ ባ ናጋራፐ ስምኮ፥ ካሰ ናጋራ ግሾ እ ፕርደተና። ፅሎ አስ ናጋራ ኦꬅኮ፥ ካሰ ፅሎተꬃ ግሾ ደኦን ዳናዉ ዳንዳኤና።
EZE 33:13 ታኒ ፅሎ አሳኮ፥ ‘ኔኒ ቱማ ደኦን ዳና’ ያግዳ ዎደ፥ እ ባ ፅሎተꬃን አማነትድ ናጋራ ኦꬅኮ፥ ባ ኦꬅዳ ናጋራን እ ሀይቃናፐ አትሽን፥ ካሰ ፅሎተꬃይ እያው ቆፈተና።
EZE 33:14 ቃስ ታኒ ናጋራንቾ አሳኮ፥ ‘ኔኒ ቱማ ሀይቃና’ ያግዳ ዎደ እ ባ ናጋራፐ ስሚድ፥ ቱማነ ሱረ ኦሶ ኦꬅኮ፥
EZE 33:15 ሚሸ ታልአናዉ ኦይክዳባ ዛርኮ፥ ካይሶትዳባ ጉየ እምኮ፥ ናጋራ ኦሶ አግድ፥ ደኦ እምያ ህግያ ናግኮ፥ እ ቱማ ደኦን ዳናፐ አትሽን፥ ሀይቀና።
EZE 33:16 እ ካሰ ኦꬅዳ ናጋራይ እሶይ ቆፈተና፤ ሀእ ቱማነ ሱረ ኦሶ ኦꬅዳ ግሾ፥ እ ቱማ ደኦን ዳና።
EZE 33:17 “ግዶሽን፥ ነ ቢታ አሳይ፥ ‘ጎዳ ኦገይ ልከ ግደና’ ያጎሶና፤ ሽን ልከ ግዶናይ ኤንታ ኦግያ።
EZE 33:18 ፅሎ አስ ባ ፅሎተꬃ አግድ፥ ናጋራ ኦꬅኮ፥ እ ባ ናጋራን ሀይቃና።
EZE 33:19 ቃስ ናጋራንቾ አስ ባ ናጋራፐ ስሚድ፥ ቱማነ ሱረ ኦሶ ኦꬅኮ፥ ሄ ኦሱዋን እ ደኦን ዳና።
EZE 33:20 ሽን ህንተ፥ ‘ጎዳ ኦገ ልከ ግደና’ ያጌታ። እስራኤለ አሳዉ፥ ታ ህንተ እሱዋ እሱዋ ቦላ ህንተ ኦሱዋዳ ፕርዳና” ያግስ።
EZE 33:21 ኑኒ ድኤትዳ ታማነ ናምአንꬆ ላይꬃን፥ ታማንꬆ አጌናን፥ እቻሻንꬆ ጋላሳን፥ የሩሳላመፐ ከስ ኤክድ ይዳ እስ አስ ካታማይ ኩንድዳይሳ ታዉ ኦድስ።
EZE 33:22 ሄ ኡራይ ያናፐ እስ ጋላስ ስን፥ ኦማርሳ ዎደ ጎዳ ኩሸይ ታ ቦላ ደኤስ፤ ታ ዶናይ ዶየትስ፤ ዎንተꬃ ጋላስ ሄ ኡራይ ታኮ ጋክያ ዎደ ታኒ ኦዳ ዶማስ።
EZE 33:23 ጎዳ ቃላይ ሀይሳዳ ያግሸ ታኮ ይስ።
EZE 33:24 “አሳ ናአዉ፥ እስራኤለ ቢታን ላለትዳ ካታማታን ደእያ አሳይ ሀይሳዳ ያጎሶና፦ ‘አብራሃመይ ባርካ ደእያ እስ አስ፤ እ ሀ ቢታ ላትስ፤ ሽን ኑኒ ዳሮ፤ ቢታይ ቱማ ኑስ ላታ ግድድ እመትስ’ ” ያጎሶና።
EZE 33:25 ሄሳ ግሾ፥ ኡባ ሃርያ ጎዳይ ሀይሳዳ ያጌስ ጋዳ ኤንታዉ ኦዳ። “ህንተ ሀእካ ሱꬃራ ደእያ አሾ ሜታ፤ ኤቃ ጎይነታ፤ ሸምፖ ዎꬌታ። ሀይሳ ኡባ ኦꬅሸ ህንተ ቱማ ቢታ ላታኔ?
EZE 33:26 ህንተ ህንተ ማሻን አማነተታ፤ ቱና ኦሶ ኦꬄታ፤ ህንተ ኡባይ ህንተ ሾሩዋ ማቸታ ቱንሴታ። ሀይሳ ኡባ ኦꬅሸ ህንተ ቱማ ቢታ ላታኔ?” ያጌስ።
EZE 33:27 ኡባ ሃርያ ጎዳይ ባ ደኡዋን ጫቅድ ሀይሳዳ ያጌስ፦ “ላለትዳ ካታማታን ደእያ አሳይ ማሻን ሀይቃና፤ ካታማፐ ጋፃን ደእያ አሳ ታኒ ባዞ ዶኣስ ካꬅ ኦꬃና፤ ደረ ቦላነ ጎንጎሎ ግዶን ደእያ አሳይ ኢታ ሀርገን ሀይቃና።
EZE 33:28 ታ ሄ ቢታ ካሎነ ባይስ ከሳና፤ ኤንቲ ኦቶርትያ ዎልቃይ ዉራና፤ እስራኤለ ደረት አይ አስካ ያራ ካንꬆና ባይስ ግዳና።
EZE 33:29 ኤንቲ ኦꬅዳ ቱና ጋሶን ታኒ ቢታ ካሎነ ባይስ ከስያ ዎደ፥ ታኒ ጎዳ ግደይሳ ኤንቲ ኤራና” ያጌስ።
EZE 33:30 “አሳ ናአዉ፥ አሳይ ካታማ ድርሳ ማታንነ ባንታ ኬꬃታ ፐንገን ኤቅድ፥ እሶይ እሱዋራ ሀይሳዳ ያግድ፥ ነባ ኦደቴስ። ‘ሃይተ፤ ጎዳ ማታፐ ይዳ ቃላይ ዎይግያኮ አነ ስኦስ’ ያጎሶና።
EZE 33:31 ኤንቲ ካሰ አሳይ የይሳዳ ኔኮ ዮሶና፤ ታ አሳዳ ነ ስንꬃን ኡቶሶና፤ ነ ኦደይሳ ስኦሶና፤ ሽን ኦꬆኮና። ኤንቲ ሲቆባ ሃሳዮሶና፤ ሽን ኤንታ ዎዛናይ ጎአ ፃላላ ያረቴስ።
EZE 33:32 ነ ኤንታዉ እስ ሲቆ ማዝሙረ ሎኦ ግርሳን የፅያነ ዲꬅ ሎይꬅድ ዲፅያ አሳ መላ። ኤንቲ ነ ኦደይሳ ስኦሶና፤ ሽን ኦꬆኮና።
EZE 33:33 ሽን ነ ኦደይስ ቱማ ፖለታና፤ ፖለትያ ዎደ፥ ናበይ ኤንታ ግዶን ደኤይሳ ኤንቲ ኤራና” ያግስ።
EZE 34:1 ጎዳ ቃላይ ሀይሳዳ ያግድ ታኮ ይስ።
EZE 34:2 “አሳ ናአዉ፥ እስራኤለ ሄንꬃንቾታ ቦላ ሀይሳዳ ያጋዳ ትንብተ ኦዳ፦ ህንተኖ፥ ህንተና ሄምያ እስራኤለ ሄንꬃንቾቶ፥ ህንተና አየ! ህንተ ዶርሳታ ሄማናዉ በሰኔ?
EZE 34:3 ኤንታ ማꬃ ኡዬታ፤ ኤንታ እክስያፐ ዳደትዳ ሱፍያ ማኤታ፤ ኤንታፈ ሞꬉዋ ሹክድ ሜታ፤ ሽን ዶርሳታ ሱረ ሄመከታ።
EZE 34:4 ዳቡርዳይሳታ ጋሽትስበከታ፤ ሀርግዳይሳታ ፓꬅቤከታ፤ መቅዳይሳታ ኮልቤከታ፤ በትዳይሳታ ዛርቤከታ፤ ꬋይዳይሳታ ኮይበከታ። ሄሳ አግድ ኤንታ ዎልቃን ኡንኤꬅድ ሃርደታ።
EZE 34:5 ዶርሳት ኡባይ ሄምያ አስ ꬋይን ላለትዶሶና፤ ባዞ ዶአታስ ካꬅ ግድዶሶና።
EZE 34:6 ታ ዶርሳት ላለትዶሶና፤ ኤንቲ ዙማታ ቦላነ ደረታ ቦላ ቶይላትዶሶና። ቢታ ጋፃ ጋካናዉ ላለትዶሶና፤ ሽን ኤንታ ፆሞሰይ ዎይኮ ኮየይ ባዋ” ያጌስ ኡባ ሃርያ ጎዳይ።
EZE 34:7 ሄሳ ግሾ፥ ህንተኖ፥ ሄንꬃንቾቶ፥ ጎዳ ቃላ ስእተ።
EZE 34:8 “ታኒ ታ ደኡዋን ጫቃይስ፦ ታ ዶርሳታ ሄምያ አስ ꬋይን፥ ታ ዶርሳት ኦይከትድ፥ ባዞ ዶአታስ ካꬅ ግድዶሶና። ታ ሄንꬃንቾት ታ ዶርሳታ ኮይቦና ግሾነ ኤንቲ ታ ዶርሳታ ሄሞና አግድ፥ ባንታና ሄምዳ ግሾ፥
EZE 34:9 ህንተኖ፥ ሄንꬃንቾቶ፥ ጎዳ ቃላ ስእተ።
EZE 34:10 ታ ህንተዉ፥ ሄንꬃንቾሆታስ ሞርከ ግዳና፤ ታ ዶርሳታ ታኒ ህንተፈ ኤካና፤ ታ ህንተና ናምአንꬆ ኤንታዉ ሄንꬃንቾ ኦꬅከ። ህዛፐ ጉየ ህንተ ህንተና ሄምሸ ደኤከታ። ታ ዶርሳታ ታ ህንተፈ ኤካና፤ ህዛፐ ኤንቲ ህንተዉ ካꬅ ግዶኮና” ያጌስ ኡባ ሃርያ ጎዳይ።
EZE 34:11 “ታኒ ታ ሁጰን ታ ዶርሳታ ፆሞሳናነ ኮያና።
EZE 34:12 ሄንꬃንቾይ ባ ዶርሳታፐ ꬋይን ኮየይሳዳ፥ ታኒ ታ ዶርሳታ ኮያና፤ ሻርነ ꬉም ጎዝዳ ጋላስ ኤንቲ ꬋይዳ በሳፈ ታ ኤንታ ሺሻና።
EZE 34:13 ታኒ ካዎተꬃታ ግዶፈነ ሀራ ቢታ ኡባፈ ሺሻዳ፥ ኤንታና፥ ኤንታ ቢታ ኤሀና። እስራኤለ ደረታን፥ ፑልቶታንነ አሳይ ደእያ በሳታን ኤንታ ሄማና።
EZE 34:14 ታኒ ኤንታ ሎኦ ቆሮን ሄማና፤ እስራኤለ ዙማት ኤንቲ ሄመትያ በሰ ግዳና። ኤንቲ ሎኦ ቆሮይ ደእያ እስራኤለ ዙማታ ቦላ ሄመታናነ አላታና።
EZE 34:15 ታኒ ታ ሁጰን ታ ዶርሳታ ሄማናነ ሸምፕሳና።
EZE 34:16 ታኒ ꬋይዳይሳ ኮያና፤ በትዳይሳ ዛራና፤ መቅዳይሳ ኮላና፤ ሀርግዳይሳ ፓꬃና። ሽን ታኒ ሱረ ፕርድያ ሄንꬃንቾ ግድያ ግሾ ገነን ሞꬍዳይሳነ ምንዳይሳ ꬋይሳና” ያጌስ ኡባ ሃርያ ጎዳይ።
EZE 34:17 ህንተኖ፥ ታ ዶርሳቶ፥ “ህንተና ኡባ ታ ፕርዳና፤ ኬሀ ኢታፐ፥ ዶርሳ ዴሻፐ ታ ሻካና።
EZE 34:18 ህንተ ሎኦ ቆሮን ሄመተይስ ግዶና እፅን፥ አትዳ ማታ ቶሆን የꬌቲ? ቃስ ህንተ ፅሎ ሃꬅ ኡየይስ ግዶና እፅን፥ አትዳ ሃꬃ ቶሆን ቡሎየቲ?
EZE 34:19 ታ ዶርሳት ህንተ ቶሆን የꬍዳ ማታ ማናዉነ ህንተ ቶሆን ቡሎይዳ ሃꬃ ኡያናዉ በሲ?” ያጌስ ኡባ ሃርያ ጎዳይ።
EZE 34:20 ሄሳ ግሾ፥ ኡባ ሃርያ ጎዳይ ኤንታኮ ሀይሳዳ ያጌስ፦ “ሞꬎ መህያ ግዶንነ ግልቃ መህያ ግዶን ታ ታ ሁጰን ፕርዳና።
EZE 34:21 ዳቡራንቾታ፥ ህንተ፥ ህንተ ምያነ ህንተ ሀሽያን ሱግያ ግሾነ ጋፃ ከሳና ጋካናዉ ህንተ ኤንታ ህንተ ካጭያን ቃይጭያ ግሾ፥
EZE 34:22 ታኒ ታ ዶርሳታ አሻና። ህዛፐ ጉየ ኦንካ ኤንታ ኦይከና፤ ታ ኬሀ ዶርሳታ ግዶንነ ኢታ ዶርሳታ ግዶን ታ ፕርዳና።
EZE 34:23 ታ ኤንታ ቦላ እስ ሄንꬃንቹዋ፥ ታ አይልያ ዳዊታ ሹማና፤ እ ኤንታ ሄማናነ ኤንታዉ ሄንꬃንቾ ግዳና።
EZE 34:24 ህዛፐ ጉየ ታ ጎዳይ ኤንታ ፆሳ ግዳና፤ ታ አይለይ ዳዊቲ ኤንታ ግዶን ሀላቃ ግዳና” ያጌስ ጎዳይ።
EZE 34:25 “ታ ኤንታራ ሳሮተꬃ ጫቆ ጫቃና፤ ኢታ ዶአታ ታኒ ቢታፈ ድጋና፤ ታ ዶርሳት ባዞን ሳሮ ዳና፤ ዎራ ጋርሳን ህርግ ባይና አላታና።
EZE 34:26 ታ ኤንታነ ታ ዙማ ዩሾን ደእያ በሳታ አንጃና። ኤንታዉ ኮሽያ እራ ዎደን ዎደን እማና፤ ሄ እራይ ኤንታዉ አንጆ ግዳና።
EZE 34:27 ጋደን ደእያ ምꬃት አይፋና፤ ቢታይ ካꬅ ዶልሳና፤ ኡባይ ባንታ ቢታን ሳሮ ዳና። ታ ኤንታ ቃምባራ መንꬃዳ፥ ኤንታ አይለ ኦꬅድ ሃርዳይሳታ ኩሸፐ ከስያ ዎደ ታኒ ጎዳ ግደይሳ ኤንቲ ኤራና።
EZE 34:28 ሀራ ካዎተꬃት ኤንታ ቦንቆኮና፤ ቢታን ደእያ ዶአት ኤንታ ሞኮና፤ አይኮይካ ዳጋንꬆና ኤንቲ ሳሮ ዳና።
EZE 34:29 ታ ኤንታዉ አራዳ ቢታ እማና፤ ኤንቲ ዛሪድ ኮሻን ዉሮኮና፤ ዎይኮ ሀራ ካዎተꬃታስ ጫሻስ አቶኮና።
EZE 34:30 ሄ ዎደ ኤንቲ ታኒ ጎዳይ፥ ኤንታ ፆሳይ ኤንታራ ደኤይሳነ እስራኤለ አሳይ ታ አሰ ግደይሳ ኤንቲ ኤራና።
EZE 34:31 ህንተኖ፥ እስራኤለ አሳዉ፥ ህንተ ታ ዉደ፤ ታ ቆሮን ምያ ታ ዉድያ፤ ህንተ ታ አሰ፥ ታኒ ህንተ ፆሳ” ያጌስ ኡባ ሃርያ ጎዳይ።
EZE 35:1 ጎዳ ቃላይ ሀይሳዳ ያግሸ ታኮ ይስ።
EZE 35:2 “አሳ ናአዉ፥ ሳይረ ዙማኮ ነ ሶምኡዋ ዛራዳ ትንብተ ኦዳ፦
EZE 35:3 ‘ነኖ፥ ሳይረ ዙማዉ፥ ታ ነዉ ሞርከ ግዳና፤ ታኒ ታ ኩሽያ ነ ቦላ ደንꬃዳ፥ ነና ካሎነ ባይሳ ከሳና።
EZE 35:4 ታኒ ነ ካታማታ ላላና፤ ነ ባይሳ ግዳና። ታኒ ጎዳ ግደይሳ ነ ሄ ዎደ ኤራና’ ” ያጌስ ኡባ ሃርያ ጎዳይ።
EZE 35:5 ነዉ እስራኤለራ ዉሮና ሞርከተꬅ ደእያ ግሾ፥ ኤንታ ኡንኣ ዎደነ ኤንታ ዉርሰꬃ ፕርዳ ዎደ፥ ኤንታ ነ ማሻስ አꬃዳ እማዳሳ።
EZE 35:6 ታ ኡባ ሃርያ ጎዳይ ታ ደኡዋን ጫቃይስ፦ ታኒ ነና ሀይቆን ፕርዳና፤ ነ ሀይቆፐ ከሳ ኤካናዉ ዳንዳአካ። ነ አሰ ዎꬎ እፆና ግሾ አሰ ዎይ ነና ካላና።
EZE 35:7 ታኒ ሳይረ ዙማ ካሎነ ባይሳ ከሳና፤ ያራ ኦንካ አꬎና መላ ኦꬃና።
EZE 35:8 ታኒ ነ ደረታ ኡባ አሀን ኩንꬃና፤ ደረት፥ ሻፋትነ ዛንጋራት ማሻን ሀይቅዳይሳታ አሀን ካመታና።
EZE 35:9 ታ ነና መርናዉ ባይሳ ኦꬃና፤ ነ ካታማት ካሎ አታና፤ ታኒ ጎዳ ግደይሳ ህንተ ሄ ዎደ ኤራና።
EZE 35:10 “ታኒ ጎዳይ እስራኤለንነ ይሁዳን ደእሽን ህንተ፥ ‘ሀ ናምኡ ካዎተꬃታነ ሀ ናምኡ ቢታታ ኑ ኦይካና፤ ኤንቲ ኑባ ግዳና ግዳ ግሾ፥
EZE 35:11 ህንተ ኤንታ ሞርክድ፥ ኤንታ ቦላ ይሎትዳ ግሾነ ቃናትዳ ግሾ ታ ህንተና ሴራና። ታ ህንተና ፕርድያ ዎደ ታኒ ታና ግደይሳ ህንተና ኤርሳና።’
EZE 35:12 ህንተ፥ ‘እስራኤለ ደረት ባይሳ አትዶሶና፤ ኑኒ ምድ ꬋይሳና መላ ኑስ እመትዶሶና’ ግድ፥ ጫይዳ ጫሻ ኡባ ታኒ ጎዳይ ስእዳይሳ ህንተ ሄ ዎደ ኤራና።
EZE 35:13 ነ ታ ቦላ ኦቶሮን ኦደትዳ ኦዳነ ዛው ባይና ሃሳይዳ ሃሳያ ታኒ ስአስ።
EZE 35:14 ቢታ ኡባይ ኡፋይትያ ዎደ ታኒ ህንተና ባይሳ ከሳና።
EZE 35:15 እስራኤለ ላታ ቢታይ ባይሳ ግድዳ ዎደ ህንተ ኡፋይትዳ ግሾ፥ ሳይረ ዙማዉ ኤዶመ ቢታ ኡባ ታኒ ባይሳ ኦꬃና። ታኒ ጎዳ ግደይሳ ህንተ ሄ ዎደ ኤራና” ያጌስ ኡባ ሃርያ ጎዳይ።
EZE 36:1 “አሳ ናአዉ፥ እስራኤለ ዙማታ ሀይሳዳ ያጋዳ ትንብተ ኦዳ፦ ‘ህንተኖ፥ እስራኤለ ዙማቶ፥ ጎዳ ቃላ ስእተ።’
EZE 36:2 ህንተ ሞርከት፥ ‘ሀሹ! በን ꬎቃ ደረት ኡባይ ኑ ላታ ግድዶሶና’ ያግዶሶና።
EZE 36:3 ሄሳ ግሾ፥ ኡባ ሃርያ ጎዳይ ሀይሳዳ ያጌስ ጋዳ ትንብተ ኦዳ። ኤንቲ ህንተና ኡባ በሳራ መንረꬅድ ባይሳ ኦꬅዳ ግሾነ ህንተ ሀራ ካዎተꬃታን ሃረታና መላ ኦꬅዳ ግሾ ህንተና ጫሻስነ ሚቻስ አግስ።
EZE 36:4 ጎዳ ቃላ ስእተ! ኡባ ሃርያ ጎዳይ ደረታኮ፥ ዙማታኮ፥ ዛንጋራታኮ፥ ኦላታኮ፥ ዩሹዋን ደእያ ሀራ ካዎተꬃን ቦንቀትዳ፥ ቀልቅሰትዳነ ባይሳ አትዳ ካታማታኮ ሀይሳዳ ያጌስ።
EZE 36:5 ታኒ፥ ታ ኤፅያ ቃናትያን ሀራ ካዎተꬃታ ቦላነ ኤዶመ ኡባ ቦላ ቱማ ኦዳስ። ኤንቲ ኡፋይትሸነ ካꬍሸ ታ ቢታ ባንታዉ ኤክዶሶና፤ ሄንꬃ ጋደታ ላትዶሶና።
EZE 36:6 ሄሳ ግሾ፥ እስራኤለ ቢታ ቦላ ትንብተ ኦዳ። ካዎተꬃታ ጫሻ ግሾ፥ ታ ቃናተን ኤፃዳ ደረታስ፥ ዙማታስ፥ ዛንጋራትስነ ኦላታስ ኦደይሳ ኦዳ።
EZE 36:7 ህንተ ዩሹዋን ደእያ ካዎተꬃት ኡባይ ካዉያናይሳ ታኒ ኡባ ሃርያ ጎዳይ ህንተዉ ታ ኩሽያ ደንꬃዳ ጫቃዳ ኦዳይስ።
EZE 36:8 “ሽን፥ እስራኤለ ደረታ ቦላ ደእያ ምꬃት ታ አሳ እስራኤለስ ዛሪድ አጫና፤ አይፈ አይፋና፤ ኤንቲ ኤሶን ባንታ ቢታ ስማና።
EZE 36:9 ታ ህንተራ ደአይስ፤ ታ ህንተኮ ስማና፤ ህንተ ቢታይ ጎየታናነ ዘረታና።
EZE 36:10 ታ እስራኤለ አሳ ታይቡዋ ሀ ቢታን ዳርሳና፤ አሳይ ካታማታን ዳና፤ ላለትዳ በሳት ዛሪድ ግምበታና።
EZE 36:11 ታኒ አሳነ መህያ ህንተዉ ዳርሳና፤ ኤንቲ የለታናነ ዳራና። በን ህንተ ደእዳይሳዳ ዳና፤ ካሰይሳፈ አꬃዳ ታ ህንተና ዱረያና። ሄ ዎደ ህንተ፥ ታኒ ጎዳ ግደይሳ ኤራና።
EZE 36:12 ታኒ ታ አሳ እስራኤለ፥ ሀ ቢታን ዛሪድ ዳና መላ ኦꬃና። ዛሪድ ሄ ቢታይ ህንተ ናይታ ꬋይሰና፤ ቢታይ ህንተ ላታ ቢታ ግዳና” ያጌስ።
EZE 36:13 ኡባ ሃርያ ጎዳይ ሀይሳዳ ያጌስ አሳይ ህንተና፥ “ቢታይ አሰ ምያ ቢታ” ካዎተꬅውካ፥ “ናእ ባይና አስ ኦꬃሱ” ያገይስ ቱማ።
EZE 36:14 ህዛፐ ጉየ፥ ቢታይ፥ “አሰ ምያ ቢታ” ግዱኩ፤ ቃስ ካዎተꬃት፥ “ናእ ባይና አስ ግዶኮና” ያጌስ ኡባ ሃርያ ጎዳይ።
EZE 36:15 “ህዛፐ ጉየ፥ ካዎተꬃታ ጫሻ ታ ህንተና ስስከ፤ ህዛፐ ጉየ ዬላተከታ፤ ሄ ቢታይ ህንተዉ ꬉበ ግዱኩ” ያጌስ ኡባ ሃርያ ጎዳይ።
EZE 36:16 ዛሪድ፥ ጎዳ ቃላይ ሀይሳዳ ያግሸ ታኮ ይስ።
EZE 36:17 “አሳ ናአዉ፥ እስራኤለ አሳይ ባንታ ቢታን ደእያ ዎደ፥ ባንታ ሀኖታንነ ባንታ ኦሱዋን ቢታ ቱንስዶሶና፤ ኤንታ ሀኖይ ታ ስንꬃን ማጫሳ ኩሸ መቶ መላ።
EZE 36:18 ኤንቲ ቢታን ሱꬁ ጉስዳ ግሾነ ባንታ ኤቃን ቢታ ቱንስዳ ግሾ ታ ሀንቁዋ ኤንታ ቦላ ጉሳስ።
EZE 36:19 ታኒ ኤንታ ካዎተꬃታ ግዶን ላላስ፤ ቢታ ኡባን ዘራስ። ታኒ ኤንታ ሀኖታነ ኤንታ ኦሱዋ መላ ፕርዳስ።
EZE 36:20 ኤንቲ ብዳ በሰ ኡባን አሳይ ኤንታ፥ ‘ሀይሳቲ ጎዳ አሳታ፤ ኤንቲ እያ ቢታፈ ከይዳይሳታ’ ” ያግድ ታ ጌሻ ሱንꬃ ቱንሳና መላ ኦꬅዶሶና።
EZE 36:21 ሽን እስራኤለ አሳይ ብዳ ካዎተꬃታ ኡባን ቱንስዳ ታ ጌሻ ሱንꬃይ ታና ቆፍሴስ።
EZE 36:22 “ሄሳ ግሾ፥ ታኒ ኡባ ሃርያ ጎዳይ፥ እስራኤለ አሳስ ግያባ ኦዳ። ‘ህንተኖ፥ እስራኤለ አሳዉ፥ ታ ሄሳ ኦይ፥ ህንተ ብዳ ካዎተꬃታ ግዶን ቱንስዳ ታ ጌሻ ሱንꬃ ግሾፐ አትሽን፥ ህንተ ግሾ ግደና።
EZE 36:23 ህንተ ቱንስዳ፥ ካዎተꬃታ ግዶን ቱንዳ ታ ግታ ሱንꬃ ጌሻተꬃ ታ በሳና። ኤንቲ ፄልሽን፥ ህንተ ባጋራ ታ ጌሻተꬃ በሲያ ዎደ፥ ታኒ ጎዳ ግደይሳ ኤንቲ ኤራና’ ” ያጌስ ኡባ ሃርያ ጎዳይ።
EZE 36:24 “ታኒ ህንተና ካዎተꬃታ ግዶፈ ከሳና፤ ቢታ ኡባፈ ሺሻዳ ህንተ ቢታ ዛራዳ ኤሀና።
EZE 36:25 ታ ህንተ ቦላ ፅሎ ሃꬅ ꬋርጫና፤ ህንተካ ጌያና። ህንተና ህንተ ቱናተꬅ ኡባፈነ ኤቃ ጎይኖ ኡባፈ ጌሻና።
EZE 36:26 ታ ህንተዉ ኦራꬃ ዎዛና እማና፤ ኦራꬃ አያና ህንተ ግዶን ዎꬃና፤ ሹቻ ዎዛና ህንተፈ ከሳዳ፥ አሾ ዎዛና ህንተዉ እማና።
EZE 36:27 ታ አያና ህንተ ግዶን ዎꬃና፤ ታ ዎጋነ ታ ህግያ ናጋና መላ ኦꬃና።
EZE 36:28 ታ ህንተ ማይዛታስ እምዳ ቢታን ህንተ ዳና፤ ህንተ ታ አሰ ግዳና፤ ታካ ህንተ ፆሳ ግዳና።
EZE 36:29 ህንተ ቱና ኡባፈ ታ ህንተና አሻና፤ ካꬃይ ህንተዉ ዳራና መላ ኦꬃና፤ ዛራዳ ህንተ ቦላ ኮሻ ኤህከ።
EZE 36:30 ኮሻ ጋሶን ህንተ ካዎተꬃታ ግዶን ካዉዮና መላ ህንተ ምꬃ አይፍያነ ህንተ ጎሻ ካꬃን ኩንꬃና።
EZE 36:31 ሄ ዎደ ህንተ፥ ህንተ ኢታ ሀኖታነ ኢታ ኦግያ ሀሳያና። ህንተ ናጋራነ ህንተ ቱና ኦሱዋ ግሾ፥ ህንተ ህንተና ሻተታና።
EZE 36:32 ታ ሄሳ ኡባ ኦይ ህንተ ግሾ ግዶናይሳ ኤርተ። ህንተኖ፥ እስራኤለ አሳዉ፥ ህንተ ሀኖታን ዬላትተነ ካዉይተ” ያጌስ ኡባ ሃርያ ጎዳይ።
EZE 36:33 ኡባ ሃርያ ጎዳይ ሀይሳዳ ያጌስ፦ “ታ ህንተና፥ ህንተ ናጋራ ኡባፈ ጌሽያ ዎደ፥ ህንተ ካታማታን ዛሪድ ዳና መላ ኦꬃና፤ ላለትዳይሳት ዛሪድ ግምበታና።
EZE 36:34 እያ ማታራ አꬍያ አሳ ስንꬃን ባይሳ ግድድ ደእያ ቢታይ ጎሻ ቢታ ግዳና።
EZE 36:35 አሳይ፥ ‘ሀይስ ካሰ ባይሳ ግድዳ ቢታይ ሀእ ዋንድ ኤደነ ጋናተ ግድዴ? ካሰ ላለትዳ፥ አስ ዶናነ ባይሳ ካታማት ሀእ ዋንድ ዩሾይ ግምበትዳነ አስ ደእያ ካታማታ ግድዶና?’ ያጋና።
EZE 36:36 ሄ ዎደ ህንተ ዩሹዋን ደእያ አትዳ ካዎተꬃት፥ ታኒ ላለትዳ ካታማታ ዛራዳ ኬፅዳይሳነ ባይሳ ቢታይ ዛሪድ ካꬅ ዶላና መላ ኦꬅዳይ ታና ጎዳ ግደይሳ ኤንቲ ኤራና። ታኒ ጎዳይ ሄሳ ኦዳስ፤ ታ ኦድዳይሳ ታ ኦꬃና” ያጌስ።
EZE 36:37 ኡባ ሃርያ ጎዳይ ሀይሳዳ ያጌስ፤ “እስራኤለ አሳይ እስ ቶሆ ታና ማዶ ኦይቻና መላ ኦꬃና፤ ኤንታ ታይቡዋ ዉደዳ ዳርሳና።
EZE 36:38 ባኣለ ጋላስ ያርሾስ ይዳ ዉደ መሄን የሩሳላመይ ኩመይሳዳ፥ ላለትዳ ካታማታን አሰ ኩንꬃና። ሄ ዎደ ኤንቲ ታኒ ጎዳ ግደይሳ ኤራና” ያግስ።
EZE 37:1 ጎዳ ኩሸይ ታ ቦላ ደኤስ፤ እያ አያናይ ታና መቀꬅ ኩምዳ ዛንጋራን ዎꬅስ።
EZE 37:2 እ ታና ኤንታ ግዶን ያነ ሃነ ዩሽስ፤ ታ ህንች ግድ መልዳ ዳሮ መቀꬃታ ዛንጋራ ግዶን በአስ።
EZE 37:3 እ፥ “አሳ ናአዉ፥ ሀ መቀꬃት ዛሪድ፥ ሸምፖራ ዳናዉ ዳንዳኦና?” ያግስ። ታኒ፥ “ኡባ ሃርያ ጎዳዉ፥ ሀይሳ ነ ኤራሳ” ያጋስ።
EZE 37:4 እ ታኮ፥ “ሀ መቀꬃታስ ሀይሳዳ ያጋዳ ትንብተ ኦዳ፤ ህንተኖ፥ መልዳ መቀꬃቶ፥ ጎዳ ቃላ ስእተ።
EZE 37:5 ኡባ ሃርያ ጎዳይ ሀ መቀꬃታኮ ሀይሳዳ ያጌስ፦ ‘ታኒ ሸምፖ ህንተ ግዶ ገልሳና፤ ዛሪድ ህንተ ደኦን ዳና።
EZE 37:6 ታ ህንተ ቦላ ሻያ ዎꬃና፤ ህንተና አሾ ማይዛና፤ ህንተና ጎጋን ካማና። ህንተ ደኦን ዳና መላ ታ ህንተ ግዶ ሸምፖ ገልሳና። ሄ ዎደ ህንተ ታኒ ጎዳ ግደይሳ ኤራና’ ” ያጌስ።
EZE 37:7 እ ታና ኪትዳይሳዳ ትንብተ ኦዳስ፤ ታ ትንብተ ኦዶ ዶምያ ዎደ ግርስ ስኤትስ፤ መቀꬃት ሺቅድ፥ ባ በሳን በሳን ኦይከትዶሶና።
EZE 37:8 ታ ፄልያ ዎደ፥ ኤንታ ቦላ ሻይ ደኤስ፤ አሾይ ኤንታ ቦላ በንትስ፤ ጋልባ ማእዶሶና፤ ሽን ሸምፖይ ኤንታ ግዶን ዴና።
EZE 37:9 እ ታኮ፥ “አሳ ናአዉ፥ ጫርኩዋስ ትንብተ ኦዳ፤ ነኖ፥ ጫርኩዋዉ፥ ኦይዱ ባጋፈ ሃ ያ፤ ኤንቲ ደኦን ዳና መላ ሀ ሀይቅዳይሳታ ቦላ ሸምፖ ፑና” ያግስ።
EZE 37:10 እ ታና ኪትዳይሳዳ ትንብተ ኦዳስ፤ ሸምፖይ ኤንታ ግዶ ገልስ፤ ደኦ ደምዶሶና፤ ኤንቲ ዳሮ ኦላንቾ ግድድ ባንታ ቶሆን ኤቅዶሶና።
EZE 37:11 እ ታኮ፥ “አሳ ናአዉ፥ ሀ መቀꬃት እስራኤለ አሳ ሌምሶ፤ እስራኤለ አሳይ፥ ‘ኑ መቀꬃት መልዶሶና፤ ኑ ኡፋይሳይ ꬋይስ፤ ኑባይ ኩመꬅ ሀልስ’ ያጎሶና።
EZE 37:12 ሄሳ ግሾ፥ ኤንታዉ ሀይሳዳ ያጋዳ ትንብተ ኦዳ፤ ‘ህንተኖ፥ ታ አሳዉ፥ ታኒ ህንተ ዱፉዋ ዶያና፤ ህንተና ያፐ ከሳና፤ ታ ህንተና ዛራዳ፥ እስራኤለ ቢታ ኤሀና።
EZE 37:13 ታ አሳዉ፥ ታ ህንተ ዱፉዋ ዶይያ ዎደነ ህንተና ከስያ ዎደ፥ ታ ጎዳ ግደይሳ ህንተ ኤራና።
EZE 37:14 ታኒ ታ አያና ህንተ ግዶን ዎꬃና፤ ህንተ ደኦን ዳና። ታኒ ህንተና፥ ህንተ ቢታን ዎꬃና። ሄ ዎደ ታኒ ጎዳይ ኦድዳይሳነ ኦꬅዳይሳ ህንተ ኤራና’ ” ያጌስ ኡባ ሃርያ ጎዳይ።
EZE 37:15 ዛሪድ ጎዳ ቃላይ ሀይሳዳ ያግሸ ታኮ ይስ፦
EZE 37:16 “አሳ ናአዉ፥ እስ ምꬃ ፃምአ ኤካዳ፥ እያ ቦላ፥ ‘ሀይስ ይሁዳስነ እያራ ደእያ እስራኤለ አሳሳ’ ያጋዳ ፃፋ። ቃስ ሀራ ፃምአ ኤካዳ፥ እያ ቦላ፥ ‘ሀይስ ኤፍሬማ፤ ዮሰፋነ እያራ ደእያ እስራኤለ አሳሳ’ ያጋዳ ፃፋ።
EZE 37:17 ሄሳፈ ጉየ፥ ኤንቲ ነ ኩሸን እስ ፃምአ ግዳና መላ ናምአ እስፈ ጋꬃዳ ኦይካ።
EZE 37:18 ነ ቢታ አሳይ ኔኮ፥ ‘ሀይስ ነ ኦይስ አይቤ? ኑስ ብርሸꬃ ኦዳ’ ያግድ ኦይችኮ፥
EZE 37:19 ኡባ ሃርያ ጎዳይ ሀይሳዳ ያጌስ ጋዳ ኦዳ፦ ታኒ ኤፍሬማ ኩሸን ደእያ ዮሰፋ ፃምአነ እያራ ደእያ እስራኤለ ኮቻታ ኤካናዉ ሀናይስ፤ ኤንታ ናምኣ እስ ፃምአ ኦꬃናዉ፥ ይሁዳ ፃምአራ ጋꬃና። ኤንቲ ናምአይ ታ ኩሸን እሶ ግዳና” ያጌስ ኡባ ሃርያ ጎዳይ ያጋዳ ኦዳ።
EZE 37:20 “ሄ ነ ኤንታ ቦላ ፃፍዳ ናምኡ ፃምአታ ኤንታ ስንꬃን ኦይካዳ፥
EZE 37:21 ኡባ ሃርያ ጎዳይ ሀይሳዳ ያጌስ ጋዳ ኦዳ። ታኒ እስራኤለ አሳ ኤንቲ ላለትዳ ካዎተꬃታ ግዶፈ ከሳና፤ ታ ኤንታ ሺሻዳ፥ ኤንታ ቢታ ዛራዳ ኤሀና።
EZE 37:22 እስራኤለ ደረታ ቦላነ ኤንታ ቢታን ታ ኤንታ እስ ካዎተꬅ ኦꬃና፤ ኤንታ ኡባ ቦላ እስ ካዎ ካዎꬃና። ቃስ ኤንቲ ዛሪድ ናምኡ ቢታ ግዶኮና፤ ናምኡ ካዎተꬅ ግድድ ሻከቶኮና።
EZE 37:23 ህዛፐ ጉየ፥ ኤንቲ ባንታ ኤቃታን፥ ባንታ እፀትዳባታንነ ባንታ ናጋራ ኡባን ባንታና ቱንሶኮና። ታኒ ኤንታ ኩንድዳ በሳፈ ደንꬃዳ ናጋራ ኡባፈ ጌሻና። ኤንቲ ታ አሰ ግዳና፤ ታካ ኤንታዉ ፆሰ ግዳና።
EZE 37:24 “ታ አይለይ ዳዊቲ ኤንታዉ ካዎ ግዳና፤ ኤንታ ኡባስ እስ ሄንꬃንቾ ፃላል ዳና። ኤንቲ ታ ህግያ ካላና፤ ታ ዎጋ ምንꬅድ ናጋና።
EZE 37:25 ታኒ ታ አይልያ ያይቆባስ እምዳነ ኤንታ ማይዛት ደእዳ ቢታን ኤንቲ ዳና። ሄ ቢታን ኤንቲ፥ ኤንታ ናይትነ ኤንታ ናይታ ናይት መርናዉ ዳና፤ ታ አይለይ ዳዊቲ ኤንታ ቦላ መርናዉ ካዎ ግዳና።
EZE 37:26 ታ ኤንታራ ሳሮተꬃ ጫቆ ጫቃና፤ ሄ ጫቆይ መርና ጫቆ ግዳና። ታኒ ኤንታ ምንꬃዳ ኤሳና፤ ኤንታ ታይቡዋ ዳርሳና፤ ታ ኬꬃ መርናዉ ኤንታ ግዶን ዎꬃና።
EZE 37:27 ታኒ ያን ኤንታራ ዳና፤ ኤንታዉ ፆሰ ግዳና፤ ኤንቲ ታ አሰ ግዳና።
EZE 37:28 ፆሳ ኬꬃይ ኤንታ ግዶን መርናዉ ደእያ ዎደ፥ እስራኤለ ጌሸይ ታን፥ ጎዳ ግደይሳ ካዎተꬃት ኤራና” ያግስ።
EZE 38:1 ጎዳ ቃላይ ሀይሳዳ ያግሸ ታኮ ይስ።
EZE 38:2 “አሳ ናአዉ፥ ማጎገ ቢታን ደእያ ሞሳሀነ ቶቤላ አሳ ቦላ ዋና ሀላቃ ግድዳ ጎገ ቦላ ትንብተ ኦዳ።
EZE 38:3 ኡባ ሃርያ ጎዳይ ሀይሳዳ ያጌስ ጋዳ ኦዳ። ሞሳሀነ ቶቤላ ዋና ሀላቃ ግድዳ ጎገ ታ ነ ቦላ ደንዳስ።
EZE 38:4 ታ ነና ጉየ ዛራና፤ ነ ስን ዳፎ አꬃዳ፥ ነ ኦላንቾታራ፥ ነ ፓራታራ፥ ኦላ ሚሸ ማእዳ ነ ፓራ አሳታራ፥ ባንታ ማሻ ሌፍዳ፥ ግታነ ጉꬃ ጎንዳለ ኦይክዳ አሳራ ነና ጎቻዳ ከሳና።
EZE 38:5 ፋርሰፈ፥ ቶጰፈነ ሊበፐ ይዳ አሳይ ጎንዳለ ኦይክድ፥ ሁጰን ብራታ ባርኔፃ ዎꬅድ፥ ኤንታራ ግዳና።
EZE 38:6 ጎመርነ እያ ኦላንቾት ኡባይ፥ ፑደሀ ባጋን ደእያ ቤት-ቶርጋምነ እያ ኦላንቾት ኔራ ግዳና።
EZE 38:7 “ነነ ኔኮ ሺቅዳ አሳ ኡባይ ደንድተ፤ ህንተና ጊግስተ፤ ነ ኤንታዉ ሀላቃ ግዳ።
EZE 38:8 ዳሮ ዎደፐ ጉየ፥ ነ ኦላስ ኮየታና፤ ስንꬃፈ ያና ላይꬃታን ዳሮ ዎደ ባይሳ ግድድ ደእዳ ቢታ፥ ኦላፐ ሸምፕዳ ቢታነ፥ እያን ደእያ አሳይ ዳሮ ካዎተꬃታፐ እስራኤለ ደረታ ሺቅዳ ቢታ ኦላናዉ ነ ደንዳና። ኤንቲ ዳሮ ካዎተꬃታፐ ሺቅዳይሳታነ ኡባይ ሀእ ሳሮ ደኤይሳታ።
EZE 38:9 ኔኒ፥ ነ ኦላንቾትነ ኔራ ደእያ ዳሮ ካዎተꬃት ጎተዳ ደንዳና፤ ህንተ ሻራዳ ቢታ ካማና” ያጌስ።
EZE 38:10 ኡባ ሃርያ ጎዳይ ሀይሳዳ ያጌስ፦ “ሄ ዎደ ቆፍ ነ ዎዛና ግዶ ይን፥ ነ ኢታባ ሀልቻና።
EZE 38:11 ኔኒ፥ ‘ታኒ ድረትቦና ጉታታ ኦላና፤ ዎፑ ግድ፥ ህርግ ባይና ደእያ አሳታ፥ ድርስ፥ ፐንገይ ዎይኮ ጎርደይ ባይና ካታማታ ታ ኦላና።
EZE 38:12 ታኒ ኤንታ ድአናነ ቦንቃና፤ ካሰ ባይሳ ግድዳ ቢታ ይድ ኡትዳ፥ ካዎተꬃታ ግዶፈ ሺቅዳ፥ መሄነ ሚሸ ሃርዳ፥ ቢታስ ጉልአን ኡትዳ አሳ ቦላ ታ ኩሽያ ደንꬃና’ ያጋና።
EZE 38:13 ሳባ አሳይነ ድዳና አሳይ ታርሰሳ ዛልአንቾትነ ናአተꬅ ኦላንቾት ኡባይ፥ ‘ነ ቦንቃናዉ ያዲ? ነ ኦላንቾታ ድኦ ቶሳናዉ፥ ብራነ ዎርቃ ጋዝሳናዉ፥ መሄነ ሚሸ ኤካናዉነ ድኡዋ ቦንቃናዉ ዳሮ አስ ሺሻዲ?’ ” ያጋና።
EZE 38:14 ሄሳ ግሾ፥ አሳ ናአዉ፥ ጎገ ቦላ ሀይሳዳ ያጋዳ ትንብተ ኦዳ። ኡባ ሃርያ ጎዳይ ሀይሳዳ ያጌስ፦ “ሄ ዎደ፥ ታ አሳይ እስራኤለ ህርግ ባይና ደእያ ዎደ፥ ኔኒ አኬክኪ?
EZE 38:15 ኔኒ ደእያ ፑደሀ ባጋ ቢታፈ ያና። ነነ ኔራ ደእያ ዳሮ ካዎተꬃት ፓራ ቶግድ፥ ምኖ ኦላንቾ ግድድ፥ ያና።
EZE 38:16 ቢታ ካምያ ሻራዳ፥ ነ ታ አሳ እስራኤለ ቦላ ያና። ጎገ ስንꬃፈ ያና ዎድያን ታ ነና ታ ቢታ ቦላ ደንꬃና። ሄሳ ታ ኦይ ካዎተꬃት ታና ኤራና መላነ ታኒ ነ ባጋራ ኦꬅያባይ ታ ጌሻተꬃ ኤንታ ስንꬃን በሳና መላሳ” ያጌስ።
EZE 38:17 ኡባ ሃርያ ጎዳይ ሀይሳዳ ያጌስ፦ “ታኒ ታ አይለ ግድዳ እስራኤለ ናበታ ባጋራ፥ ካሰ ዎደ ዛራ ዛራዳ እስራኤለን ትንብተ ኦዳስ።
EZE 38:18 ኡባ ሃርያ ጎዳይ ሀይሳዳ ያጌስ፦ ‘ጎገይ እስራኤለ ቦላ ደንድያ ዎደ ታ ሀንቆይ ሱላና።
EZE 38:19 ሄ ዎደ እስራኤለ ቢታን ዎልቃማ ቢታ ቃፆይ ሀናና፤ ታኒ ታ ሸንያንነ ታ ኤፅያ ሀንቁዋን አዋጃስ።
EZE 38:20 አባ ሞሎይ፥ ሳሎ ካፎይ፥ ደረን ደእያ መሄይነ ዶአይ፥ ሳአ ቦላ ዎፅ ቃፅያ መተꬅ ኡባይነ ሳአን ደእያ አሳ ኡባይ ታ ስንꬃን ኮኮራና። ደረት ኩንዳና፤ አፎት ዎዳና፤ ድርሳ ግምበ ኡባይ ላለታና።
EZE 38:21 ታ ዙማታን ኡባን ጎገ ቦላ ማሽ ደንዳና መላ ኦꬃና፤ ኦላንቾት ባንታ ማሻ ባንታ ቦላ ዛሪድ፥ እሶይ እሱዋ ዎꬋና። ታኒ ኡባ ሃርያ ጎዳይ ሀይሳ ኦዳስ።
EZE 38:22 ታኒ ሀርገንነ ሀይቆን እያ ሴራና፤ ዎልቃማ እራ፥ ሻች፥ ፁግያ ዲነ እያ ቦላ፥ እያ ኦላንቾታ ቦላነ እያራ ደእያ ካዎተꬃታ ቦላ ቡክሳና።
EZE 38:23 ሄሳዳ ኦꬃዳ፥ ታኒ ታ ግታተꬃነ ታ ጌሻተꬃ በሳና። ዳሮ ካዎተꬃታ ታኒ ታናተꬃ ኤርሳና። ታኒ ጎዳ ግደይሳ ኤንቲ ሄ ዎደ ኤራና’ ” ያግስ።
EZE 39:1 ኡባ ሃርያ ጎዳይ ሀይሳዳ ያጌስ፦ “አሳ ናአዉ፥ ጎገ ቦላ ሀይሳዳ ያጋዳ ትንብተ ኦዳ። ሞሳሀነ ቶቤላ አሳስ ዋና ሀላቃ ግድዳ ጎገ፥ ታ ነዉ ሞርከ።
EZE 39:2 ታ ነና ጉየ ዛራና፤ ሃሆ ግድዳ ፑደሀ ባጋ ቢታፈ ጎቻ ከሳዳ፥ እስራኤለ ደረታ ቦላ ነና ኤሀና።
EZE 39:3 ታኒ ነ ሀድርሳ ኩሽያፐ ዶንገታ ባቃ የጋና፥ ነ ኡሻቻ ኩሽያፐ ዶንገ ቶራታ የግሳና።
EZE 39:4 ኔኒ፥ ነ ኦላንቾትነ ኔራ ደእያ ካዎተꬃት ኡባይ እስራኤለ ደርያ ቦላ ኩንድድ አታና። ታኒ ህንተ አሹዋ ካፎታስነ ባዞ ዶአታስ ካꬅ ኦꬃዳ እማና።
EZE 39:5 ታኒ ኡባ ሃርያ ጎዳይ ሄሳ ኦድዳ ግሾ፥ ህንተ ኡባይ ደንባን ኩንድድ አታና።
EZE 39:6 ማጎገ ቢታንነ ዩሾይ አባን ተቀትዳ ቢታታን፥ ህርግ ባይና ኡትዳ አሳ ቦላ ታኒ ኤፅያ ታማ የዳና። ታኒ ጎዳ ግደይሳ ኤንቲ ሄ ዎደ ኤራና።
EZE 39:7 ታ ጌሻ ሱንꬃይ ታ አሳ እስራኤለ ግዶን ኤረታናዳ ኦꬃና። ህዛፐ ጉየ ታ ጌሻ ሱንꬃይ ጫየተና። ካዎተꬃት ታኒ ጎዳ፥ እስራኤለ ጌሻ ግደይሳ ኤራና” ያግስ።
EZE 39:8 ኡባ ሃርያ ጎዳይ ሀይሳዳ ያጌስ፦ “ሄ ጋላሳይ ያና፤ አተና” ያጋዳ ታ ኦድዳ ጋላሳይ ሀይሳ።
EZE 39:9 “ሄ ዎደ እስራኤለ ካታማታን ደእያ አሳይ ከይድ፥ ኦላ ሚሸታ ኡባ ታማን ኤꬃና፤ ሄስካ ጉꬃነ ግታ ጎንዳለታ፥ ዶንገታ፥ ዶንገ ቶራ፥ ቶራታነ ፃምአታ ኡባ ፁጋና። ላፑን ላይꬅ ኩመꬅ ኤንቲ ኤሶ ምꬅ ኦꬅድ ጎኤታና።
EZE 39:10 ኤንቲ ምꬅ ምፃናዉ ዎይኮ ዎራፐ ምꬅ ቃንፃናዉ ኮሸና። ኤንቲ ሺሽዳ ኦላ ሚሸታ ኤሶ ምꬅ ኦꬅድ ጎኤታና። ባንታና ቦንቅዳይሳታ ዛሪድ ቦንቃና፤ ኤንታባ ኤክዳይሳታፐ ኤንቲ ዛሪድ ኤካና” ያጌስ ኡባ ሃርያ ጎዳይ።
EZE 39:11 ሄ ጋላስ ጎገ ሞገትያ በሲ ታኒ እያዉ እስራኤለ ቢታን እማና። ሄ በሳይ አባፈ ዶሎሀ ባጋራ ደእያ ኦገ አሳታ ዛንጋራ ጌተትያ ዛንጋራ ግዶን ግዳና። ጎገይነ እያ ኦላንቾት ኡባይ ያን ሞገትያ ግሾ፥ ኤንታ ዱፎይ ያራ ሄመትያ አሳስ ኦገ ጎርዳና። ሄ በሳይ፥ “ጎገ ኦላንቾታ ዛንጋራ” ጌተትድ ፄገታና።
EZE 39:12 “እስራኤለ አሳይ ቢታ ጌሻናዉ፥ ላፑን አጌና ኩመꬅ አሀ ሞግሸ ጋምአና።
EZE 39:13 ሄ ቢታን ደእያ አሳ ኡባይ አሀ ሞጎን ማደታና፤ ሄሳን፥ ታኒ ታ ቦንቹዋ ቆንጭስያ ዎደ ኤንታዉ ቦንቾ ግዳና” ያጌስ ኡባ ሃርያ ጎዳይ።
EZE 39:14 ላፑን አጌናፐ ጉየ አትዳ አህ ደእኮ፥ ሞጋና መላ አስ ዶረታና፤ ሄ አሳይ ቢታይ ጌያና ጋካናዉ ኡባ ዎደ ቢታ ኡባን ዩይድ አትዳ አሀ ደምድ ሞጎሶና።
EZE 39:15 ኤንቲ ቢታን ዩይሽን፥ አሳ መቀꬅ በንትኮ፥ ሄ መቀꬃ ማታን ማላ ዎꬅድ አꬋና። ሞገይሳት ይድ፥ ጎገ ኦላንቾታ ዛንጋራን ሞጋና።
EZE 39:16 ሄ ካታማ ሱንꬃይ ሀሞና ጌተታና። ኤንቲ ቢታ ዛሪድ ጌሻና። እያ ሄራን፥ “ኦላንቾታ ካታማ” ጌተትድ ፄገትያ ካታም ዳና።
EZE 39:17 ኡባ ሃርያ ጎዳይ ሀይሳዳ ያጌስ፦ “አሳ ናአዉ፥ ካፎ ኮቸነ ሳአ ዶአታስ ሀይሳዳ ያጋዳ ፄጋ። ታ ህንተዉ እስራኤለ ደረታ ቦላ ጊግስዳ ግታ ያርሾ ባለን አሾ ማናዉነ ሱꬁ ኡያናዉ ኡባ በሳፈ ሺቅድ ሃይተ።
EZE 39:18 ህንተ ምኖ አሳታ አሹዋ ማና፤ ቢታ ሀላቃታ ሱꬃ ኡያና። ኤንቲ ህንተዉ ባሳነ ሞꬎ ኡርገ ዶርሳዳ፥ ማራዘዳ፥ ኮለዳነ ቦራ መላ ግዳና።
EZE 39:19 ታኒ ህንተዉ ጊግስዳ ያርሾ ባለን ህንተ ካላና ጋካናዉ፥ ሞꬎ ማና፤ ማꬆታና ጋካናዉ፥ ሱꬁ ኡያና።
EZE 39:20 ታ ህንተዉ ጊግስያ ግብራፐ ፓራታ፥ ፓራ አሳታ፥ ምኖ ቶራ አሳታነ ሀራ ኦላንቾታ ኡባ አሹዋ ህንተ ካላና ጋካናዉ ማና” ያጌስ ኡባ ሃርያ ጎዳይ።
EZE 39:21 “ታኒ ካዎተꬃታ ግዶን ታ ቦንቹዋ ቆንጭሳና። ካዎተꬃት ኡባይ ታ ኤንታ ፕርድዳ ፕርዳነ ታ ኤንታ ቦላ ደንꬅዳ ታ ኩሽያ በአና።
EZE 39:22 ሄ ዎድያፐ ዶምድ፥ እስራኤለ አሳይ ታኒ ጎዳ፥ ኤንታ ፆሳ ግደይሳ ኤራና።
EZE 39:23 እስራኤለ አሳይ ድኤትድ ብዳይ ባንታ ናጋራ ጋሶን፥ ግደይሳ ሀራ ካዎተꬃት ኤራና። ኤንቲ ታዉ አማነቶና እፅዳ ግሾ፥ ታኒ ታ ሶምኡዋ ኤንታፈ ደንꬃዳ፥ ኤንታ ሞርከታስ ኤንታ አꬃዳ እምን፥ ኤንቲ ኡባይ ኦላን ሀይቅዶሶና።
EZE 39:24 ኤንታ ቱናተꬃነ ኤንታ ኢታተꬃ መላ ኤንታዉ በሲያ ሴራ ሴራስ፤ ታ ሶምኡዋ ኤንታፈ ገንꬃስ” ያግስ።
EZE 39:25 ኡባ ሃርያ ጎዳይ ሀይሳዳ ያጌስ። “ሀእ ታኒ ያይቆባ ኮቻታ ድኦፐ ዛራዳ ጋሽትሳና፤ እስራኤለ አሳ ኡባስ ቃታና። ታ ጌሻ ሱንꬃስ ምሸታዳ ጫየቶና መላ ኦꬃና።
EZE 39:26 ኤንታ ያሽያባይ ባይና፥ ባንታ ቢታን ሳሮ ዱሱ ዶምያ ዎደ ካሰ ባንታ ዬላነ ታዉ አማነቶና እፅዳይሳ ዶጋና።
EZE 39:27 ታኒ ኤንታ ካዎተꬃታ ኡባ ግዶፈ ዛራዳ ኤሀና፤ ሞርከታ ቢታፈ ኤንታ ሺሻና። ሄሳዳ ኦꬃዳ፥ ታኒ ጌሽ ግደይሳ ኤንታ ባጋራ ካዎተꬃታ ኡባ በሳና።
EZE 39:28 ኤንቲ ድኤትድ ባና መላ ኦꬅዳይ ታና ግድያ ግሾነ ኤንታ ሺሻዳ፥ ኤንታ ቢታ ዛርዳ ግሾ፥ ታኒ ጎዳ ኤንታ ፆሳ ግደይሳ ኤንቲ ኤራና። ታኒ ኤንታፈ እሱዋካ ካዎተꬃታ ግዶን አግከ።
EZE 39:29 ታኒ ታ አያና እስራኤለ አሳ ቦላ ጉሳና፤ ዛራዳ ታ ሶምኡዋ ኤንታፈ ገንꬅከ” ያጌስ ኡባ ሃርያ ጎዳይ።
EZE 40:1 ኑኒ ድኤትዳ ላታማነ እቻሻንꬆ ላይꬃን፥ የሩሳላመይ ፆነትዳ ታማነ ኦይዳንꬆ ላይꬃን፥ ኮይሮ አጌናን፥ ታማንꬆ ጋላሳን ጎዳ ኩሸይ ታ ቦላ ደኤስ። እ ታና ደንꬅድ የሩሳላመ ኤፍስ።
EZE 40:2 ፆሳይ ታና ቆንጨꬃን እስራኤለ ቢታ ኤፍድ፥ እስ ዙማ ቦላ ኤስስ። ሄ ዙማፐ ዱገሀ ባጋራ ዳሮ ኬꬅ ኬፀትዳ ካታማ ዳንያባ በአስ።
EZE 40:3 እ ታና ያ ኤፍን ታኒ ናሰ ብራታዳ ጶልያ እስ አድያ በአስ። ሄ ኡራይ ሊኖፐ ኦሰትዳ ዎዶሮነ ዋꬋ ፃምአ ኦይክድ፥ ድርሳ ፐንግያ ማታን ኤቅስ።
EZE 40:4 እ ታኮ፥ “አሳ ናአዉ፥ ታ ነና ሀ በሳ ኤህዳይ ታ ነና በሲያባ ኡባ ነ ምንꬃ አኬካና መላሳ። ሄሳ ግሾ፥ ነ አይፍያን ፄላ፤ ነ ሀይꬃን ስአ፤ ነ ዎዛናን ዎꬃ። ነ በእያባ ኡባ እስራኤለ አሳስ ኦዳ” ያግስ።
EZE 40:5 ታኒ ፆሳ ኬꬃ ዩይ አꬍዳ ድርሳ ግምብያ በአስ። ሄ አድያ ኩሸን ኡሱፑን ዋꬋ አዱሰ ግድዳ ፃምእ ደኤስ። እስ አዱሳ ዋꬋይ እስ ዋꬎ ቦላ ኦይዱ ብራታ ጉጃ ግዴስ። ድርሳ ግምብያ ልክያ ዎደ ዳልጋተꬃይ እስ ዋꬋነ ታካꬎ፤ ጎምፓይነ አዱሳተꬃይ ኡሱፑን ዋꬋ።
EZE 40:6 ሄሳፈ ጉየ፥ ዶሎሀ ባጋራ ደእያ ድርሳ ፐንግያኮ ብስ። ደꬃ ከይድ፥ ገልያ ፐንግያ ዋꬍያ ዎደ ኡሱፑን ዋꬋ ግድስ።
EZE 40:7 ያራ አꬍያ ዎደ ኡሻቻራነ ሀድርሳራ ፐንገ ናገይሳት ኤቅያ ሄꬑ ሄꬑ ክፍለት ደኦሶና። እስ እስ ክፍለይ ኡሱፑን ዋꬋ አዱሰነ ኡሱፑን ዋꬋ ዳልጋ። ኤንታ ግዶን ደእያ ጎዳት እቻሹ ዋꬋ ኦርደ። ፐንግያ ናገይሳታ ክፍለታፐ ያ ባጋራ፥ ፆሳ ኬꬃኮ ስምዳ ኡሱፑን ዋꬋ ባራንድ ደኤስ።
EZE 40:8 ሄ ኡራይ ገልያ በሳ ባራንዳ ዋꬍን፥ ሆስፑን ዋꬋ ግድስ።
EZE 40:9 ፆሳ ኬꬃኮ ስምዳ ፐንገይ ዉርሰꬃን ደኤስ። ሄ ባራንዳ ቱቀታ ኦርደተꬃይ ናምኡ ዋꬋ።
EZE 40:10 ዶሎሀ ባጋ ፐንግያን ኡሻቻንነ ሀድርሳ ባጋን እስ ግና ግድዳ ሄꬑ ናጎ ኬꬅ ደኤስ።
EZE 40:11 ሄ ኡራይ ድርሳ ፐንግያ ዋꬍያ ዎደ ዳልጋተꬃይ ታሙ ዋꬋ፥ አዱሳተꬃይ ታማነ ሄꬑ ዋꬋ።
EZE 40:12 እስ እስ ፐንገ ናገይሳታ ክፍልያ ስንꬃን አዱሳተꬃይ እስ ዋꬋ፥ ዳልጋተꬃይ እስ ዋꬋ ግድዳ ጎድ ደኤስ፤ ናገይሳታ ክፍለት ናምኡ ባጋራ ኡሱፑን ኡሱፑን ዋꬋ።
EZE 40:13 ሀፍንꬃን ደእያ ናገይሳታ ክፍለት ጉየ ባጋፈ ሄፍንꬃን ደእያ ናገይሳታ ክፍለታ ጉየ ባጋ ጋካናዉ ደእያ በሳይ ላታማነ እቻሹ ዋꬋ ግድስ።
EZE 40:14 ሄ ኡራይ ዳባባ ስንꬃን ደእያ ዉርሰꬃ ክፍልያ ዋꬍን፥ ላታሙ ዋꬋ ግድስ።
EZE 40:15 ፐንግያ ገልያ በሳፈ ብድ፥ ዉርሰꬃን ደእያ እያ ባራንዳ ጋካናዉ ደእያ ፐንግያ አዱሳተꬃይ እሻታሙ ዋꬋ።
EZE 40:16 ክፍለታ ኡባስ ካረ ባጋ ስምዳ ጉꬃ ማስኮተት ደኦሶና፤ ክፍለታፐ ግዶን ደእያ ጎዳታስ ማስኮተት ደኦሶና። ያነ ሃነ ሻክያ ጎዳታ ቦላ ዛምባ ምስለይ ደኤስ።
EZE 40:17 ሄ ኡራይ ታና ካረ ዳባባኮ ኤፍስ። ያን ታኒ ዳባባ ዩሾን ደእያ ሹች ሂፀትዳ ባሱዋነ ሄ ባሱዋ ኬፀትዳ ሀስታሙ ክፍለታ በአስ።
EZE 40:18 ሹቻይ ሂፀትዳ ባሶይ ዳባባ ዩሾ ኡባ ጋክስ፤ ካረ ዳባባይ ግዶ ዳባባፐ ዝቄስ።
EZE 40:19 ግዶ ዳባባ ጋꬅያ፥ ꬎቃን ኦሰትዳ፥ ድርሳ ፐንገይ ደኤስ። ሄ ኡራይ ናምኡ ፐንገታፐ ግዶን ደእያ በሳ ዋꬍን፥ ጎምፓይ ዉሎሀ ባጋ ፄቱ ዋꬋ ዶሎሀ ባጋይ ፄቱ ዋꬋ ግድስ።
EZE 40:20 ሄ ኡራይ ታና ቆሞ ባጋ ኤፍድ፥ ካረ ባጋ ዳባባ ስንꬃን ደእያ ድርሳ ፐንግያ ዋꬍስ።
EZE 40:21 ዉሎሀፐ ኡሻቻንነ ሀድርሳ ባጋራ ደእያ ሄꬑ ናገይሳታ ክፍለት፥ ኤንታፈ ግዶን ደእያ ጎዳትነ እያ ባራንዳይ ኮይሮ ዶሎሀ ፐንግያ ባጋን ዋꬍን እስ ግና ግድዶሶና። ድርሳ ፐንገ አዱሳተꬃይ እቻሹ ዋꬋ፤ ዳልጋተꬃይ ላታማነ እቻሹ ዋꬋ።
EZE 40:22 ባራንዳይ፥ ማስኮተትነ ዛምባ ምስለይ ካሰ ዶሎሀ ፐንግያ ባጋን በእዳይሳዳ እስ ግና። ያ ጋꬅያ ላፑን ደꬃት ደኦሶና። ባራንዳይ ዳባባ ስንꬃ ባጋራ ደኤስ።
EZE 40:23 ዶሎሀ ባጋን፥ ቆሞ ባጋ ግዶ ዳባባስ ሀራ ፐንገይ ደኤስ። ሄ ኡራይ ሀ ናምኡ ድርሳ ፐንገታፐ ግዶን ደእያ በሳ ዋꬍን፥ ፄቱ ዋꬋ ግድስ።
EZE 40:24 ሄ ኡራይ ታና ጋርሳ ባጋ ድርሳ ፐንግያኮ ካለꬅን፥ ያን ሀራ ድርሳ ፐንገ በአስ። እ ቱቀታነ ግዶ ክፍለታ ዋꬍያ ዎደ ሀራታራ ግና ግድስ።
EZE 40:25 ሄ ድርሳ ፐንግያ ማታን ደእያ ክፍለታ ኡባስ ማስኮተት ደኦሶና። ድርሳ ፐንግያ አዱሳተꬃይ እሻታሙ ዋꬋ፤ ዳልጋተꬃይ ላታማነ እቻሹ ዋꬋ።
EZE 40:26 ያ ጋꬅያ ላፑን ደꬃት ደኦሶና። ባራንዳይ ዳባባ ስንꬃን ደኤስ። ፐንግያ ቦላ ያ ባጋራነ ሀ ባጋራ ዛምባ ምስለይ ደኤስ።
EZE 40:27 ግዶ ዳባባስ ሀራ ፐንገይ ደኤስ። ሄ ኡራይ ሀ ናምኡ ድርሳ ፐንገታፐ ግዶን ደእያ በሳ ዋꬍን፥ ፄቱ ዋꬋ ግድስ።
EZE 40:28 ሄ ኡራይ ታና ጋርሳ ድርሳ ፐንግያ ባጋራ ግዶ ዳባባኮ ኤፍስ። እ ድርሳ ፐንግያ ዋꬍን፥ ሀራ ፐንገታራ ግና ግድስ።
EZE 40:29 ናገይሳታ ክፍለት፥ ጎዳትነ ባራንዳት ኡባይ ሀራ ድርሳ ፐንገታራ እስ ግና። ሄ ድርሳ ፐንግያ ዩሾን ደእያ ክፍለታ ኡባስ ማስኮተት ደኦሶና። ሀ ፐንግያ አዱሳተꬃይ እሻታሙ ዋꬋ፤ ጎምፓይ ላታማነ እቻሹ ዋꬋ።
EZE 40:30 ሄ ድርሳ ፐንገይ ዩሹዋን ባራንዳት ደኦሶና፤ ኤንታ አዱሳተꬃይ ላታማነ እቻሹ ዋꬋ፤ ጎምፓይ እቻሹ ዋꬋ።
EZE 40:31 ሄ ባራንዳት ካረ ባጋ ዳባባ ስንꬃን ደኦሶና። ፐንግያ ቦላ ያ ባጋራነ ሀ ባጋራ ዛምባ ምስለይ ደኤስ። ያ ጋꬅያ ሆስፑን ደꬃት ደኦሶና።
EZE 40:32 ሄ ኡራይ ታና ዶሎሀ ባጋ ድርሳ ፐንግያራ ግዶ ዳባባኮ ኤፍስ። እ ሄ ድርሳ ፐንግያ ዋꬍን፥ ሀራ ፐንገታራ ግና ግድስ።
EZE 40:33 ናገይሳታ ክፍለት፥ ጎዳትነ ባራንዳይ ሀንኮ ድርሳ ፐንገታራ እስ ግና። ሄ ድርሳ ፐንግያ ዩሾን ደእያ ክፍለታ ኡባስ ማስኮተት ደኦሶና። ሄ ፐንግያ አዱሳተꬃይ እሻታሙ ዋꬋ፤ ጎምፓይ ላታማነ እቻሹ ዋꬋ።
EZE 40:34 ባራንዳይ ካረ ባጋ ዳባባ ስንꬃን ደኤስ። ፐንግያ ቦላ ያ ባጋራነ ሀ ባጋራ ዛምባ ምስለይ ደኤስ። ያ ጋꬅያ ሆስፑን ደꬃት ደኦሶና።
EZE 40:35 ሄ ኡራይ ታና ፑደሀ ባጋ ድርሳ ፐንግያኮ ኤፍስ። እ ሄ ድርሳ ፐንግያ ዋꬍን፥ ሀንኮ ፐንገታራ እስ ግና ግድስ።
EZE 40:36 ናገይሳታ ክፍለት፥ ጎዳትነ ባራንዳይ ሀንኮ ድርሳ ፐንገታራ እስ ግና። ሄ ድርሳ ፐንግያ ዩሾን ማስኮተት ደኦሶና። ሄ ፐንግያ አዱሳተꬃይ እሻታሙ ዋꬋ፤ ጎምፓይ ላታማነ እቻሹ ዋꬋ።
EZE 40:37 ባራንዳይ ካረ ባጋ ዳባባ ስንꬃን ደኤስ። ፐንግያ ቦላ ያ ባጋራነ ሀ ባጋራ ዛምባ ምስለይ ደኤስ። ያ ጋꬅያ ሆስፑን ደꬃት ደኦሶና።
EZE 40:38 ካረ ዳባባ ቆሞ ባጋራ፥ ግዶ ድርሳ ፐንግያ ባራንዳራ ኦይከትድ፥ ሀራ ክፍለይ ደኤስ። ፁሳ ያርሾ ኤህያ መሄ አሾይ ሜጨተይ ሄ ክፍልያና።
EZE 40:39 ሄ ባራንዳን ሀ ባጋራ ናምኡ ፃርጴዛት፥ ያ ባጋራ ናምኡ ፃርጴዛት ደኦሶና፤ ፁሳ ያርሾስ፥ ናጋራ ያርሾስነ ናቆ ያርሾስ መሄ ኡባይ ሹከትያ ሄ ፃርጴዛታ ቦላና።
EZE 40:40 ባራንዳፈ ካረ ባጋራ ቆሞ ድርሳ ፐንግያ ማታን ናምኡ ፃርጴዛት ሀ ባጋራ፥ ናምኡ ፃርጴዛት ያ ባጋራ ደኦሶና።
EZE 40:41 ሄሳ ግሾ፥ ያርሾስ ሺቅዳ መሄይ ሹከትያ ሆስፑን ፃርጴዛት ደኦሶና፤ ኤንታፈ ኦይዳት ባራንዳን ደኦሶና፤ ኦይዳት ካረ ዳባባን ደኦሶና።
EZE 40:42 ፁሳ ያርሾ ዎꬃናዉ ጊግስዳ፥ ሹቻፈ ማሰትድ ኦሰትዳ ኦይዱ ፃርጴዛት ደኦሶና። ኤንታዉ አዱሳተꬃይ እስ ዋꬋነ ታካꬎ፤ እስ ዋꬋነ ታካꬎ፤ ዳልጋተꬃይ እስ ዋꬋነ ታካꬎ። ፁሳ ያርሾነ ሀራ ያርሾ ኡባ ሹክያ ሚሸት ሄ ፃርጴዛታ ቦላ ኡቶሶና።
EZE 40:43 ኦይዱ ብራ አዱቅያ ካቆታ ጎዳ ቦላ ዩይ አꬍድ ꬍሸትድ ኡትዶሶና። ያርሾስ ሺሽያ አሾ ኡባይ ሄ ፃርጴዛታ ቦላ ኡቴስ።
EZE 40:44 ሄ ኡራይ ታና ግዶ ዳባባ ገልስስ። ያን ፐንገት ግዶ ዳባባኮ ዶየትያ ናምኡ ክፍለት ደኦሶና። ኤንታፈ እስ ክፍለይ ቆሞ ድርሳ ፐንግያ ማታራ ጋርሳ ባጋ ስምስ፤ ናምአንꬆይ ጋርሳ ድርሳ ፐንግያ ማታራ ቆሞ ባጋ ስምስ።
EZE 40:45 ሄ ኡራይ፥ “ዱገሀ ባጋ ስምዳ ክፍለይ ፆሳ ኬꬃን ኦꬅያ ካህነታባ።
EZE 40:46 ቆሞ ባጋ ስምዳ ክፍለይ ያርሾ በሳን ኦꬅያ ካህነታባ። ካህነት ኡባይ ሳዶቃ ያራፐ የለትዳ ሌወታ፤ ጎዳ ስንꬃን ኤቅድ ኦꬃናዉ በሰይሳት ሀይሳታ ፃላላ” ያግስ።
EZE 40:47 ሄ ኡራይ ዳባባ ዋꬍን፥ አዱሳተꬃይ ፄቱ ዋꬋ፥ ዳልጋተꬃይ ፄቱ ዋꬋ ግድስ። ዳባባን ፆሳ ኬꬃፈ ስንꬃ ባጋራ እስ ያርሾ በሲ ደኤስ።
EZE 40:48 እ ታና ፆሳ ኬꬃ ባራንዳኮ ኤፍስ። ባራንዳ ገልያ በሳን ኤቅዳ ጎባነታ ዋꬍን፥ አዱሳተꬃይ እቻሹ ዋꬋ፤ ዳልጋተꬃይ ታማነ ኦይዱ ዋꬋ። ሀድርሳራነ ኡሻቻራ ደእያ ጎዳታ ኦርደተꬃይ ሄꬑ ዋꬋ ግድስ።
EZE 40:49 ባራንዳ አዱሳተꬃይ ላታሙ ዋꬋ፤ ጎምፓይ ታሙ ዋꬋ። ያ ጋꬅያ ታሙ ደꬃት ደኦሶና። ገልያ በሳን ኡሻቻራነ ሀድርሳራ ኤቅዳ ናምኡ ቱቀት ደኦሶና።
EZE 41:1 ሄሳፈ ጉየ፥ ሄ ኡራይ ታና ፆሳ ኬꬃን ደእያ ጌሻ በሳ ገልስስ። ሄ ጌሻ በሳ ግዶራ አꬅያ ኦግያ ልክን ኡሱፑን ዋꬋ ግድስ።
EZE 41:2 ጎምፓይ ታሙ ዋꬋ ግድስ። ሀድርሳራነ ኡሻቻራ ደእያ ጎዳታ ጎምፓይ እቻሹ ዋꬋ። እ ጌሻ በሳ ዋꬍን አዱሳተꬃይ ኦይታሙ ዋꬋ፥ ጎምፓይ ላታሙ ዋꬋ ግድስ።
EZE 41:3 ሄሳፈ ጉየ፥ ቆልአ ገልስ። ቆልአ ገልያ ኦግያ ዋꬍን፥ ናምኡ ዋꬋ ግድስ፤ ጎምፓይ ኡሱፑን ዋꬋ ግድስ፤ ሀድርሳራነ ኡሻቻራ ደእያ ጎዳታ ጎምፓይ ላፑን ዋꬋ ግድስ።
EZE 41:4 እ ቆልአ ዋꬍን፥ አዱሳተꬃይ ላታሙ ዋꬋ፥ ዳልጋተꬃይ ላታሙ ዋꬋ ግድስ። ሄሳፈ ጉየ፥ “ሀይስ ኡባፈ ጌሻ በሳ” ያግስ።
EZE 41:5 ሄ ኡራይ ፆሳ ኬꬃ ጎዳ ዋꬍን፥ ኦርደተꬃይ ኡሱፑን ዋꬋ ግድስ። ሄ ጎዳራ ኦይከትድ፥ ፆሳ ኬꬃ ግዶ ባጋ ዩሹዋን ኬፀትዳ ኦይዱ ኦይዱ ዋꬋ ዳልግያ ዳሮ ክፍለት ደኦሶና።
EZE 41:6 ሄ ክፍለት እሶይ እሱዋ ቦላ ኬፀትዳ ሄꬑ ፖቀ ግድን፥ እስ እስ ፖቅያ ቦላ ሀስታሙ ክፍለት ደኦሶና። ግምብያ ዩሾን ደእያ ክፍለታ ቶክያ ቱቀት ደኦሶና። ሽን ሄ ቱቀት ግምብያ ግዶ ኩመꬅ ገልቦኮና።
EZE 41:7 ፆሳ ኬꬃ ዩሾን ደእያ ክፍለታ ዳልጋተꬃይ ፖቀይ ጉጅያ ዎደ ጉጄስ። ፆሳ ኬꬃ ዩሾን ደእያ ኬꬃ ኦሶይ ጋርሳፈ ፑደ ዳልግሸ ብያ ግሾ ኬꬃይ ፑደ ጉዠትዳ ዎደ ኡባን ክፍለታ ዳልጋተꬃይ ጉጅሸ ቤስ። ግዶ ፖቅያራ ካንꬅድ፥ ቆሞ ዉርሰꬃ ፖቅያ ጋካናዉ ኤፍያ ደꬃት ደኦሶና።
EZE 41:8 ፆሳ ኬꬃ ዩሾን ꬎቁ ግዳ ባሶይ ደኤይሳ በአስ። እያ ዩሹዋን ደእያ ክፍለት ሄ ባሱዋ ቦላ ኬፀትዶሶና፤ ሄ ባሶይ ግዶ ዳባባፐ ኡሱፑን ዋꬋ ꬎቄስ።
EZE 41:9 ሄ ክፍለታ ካረ ባጋ ጎዳ ኦርደተꬃይ እቻሹ ዋꬋ። ካይሳ በሳይ ፆሳ ኬꬃፈነ፥
EZE 41:10 ካህነታ ክፍልያፐ ግዶን ደኤስ፤ እያ ኦርደተꬃይ ላታሙ ዋꬋ።
EZE 41:11 ካይሳ በሳፈ ኡሻቻንነ ሀድርሳ ባጋን ደእያ ክፍለታ ገልስያ ፐንገት ደኦሶና። ሄ ፐንገት እሶይ ቆሞ ባጋራ፥ እሶይ ቃስ ጋርሳ ባጋራ ደኤስ። ካይሳ በሳ ዩሹዋ ጋሰꬅያ ባሱዋ ዳልጋተꬃይ እቻሹ ዋꬋ።
EZE 41:12 ፆሳ ኬꬃፈ ዉሎሀ ባጋራ ደእያ ካይሳ በሳፈ ስንꬃ ባጋራ እስ ኬꬅ ደኤስ። ሄ ኬꬃ አዱሳተꬃይ ኡዱፉን ታሙ ዋꬋ፤ ጎምፓይ ላፑን ታሙ ዋꬋ። ሄ ኬꬃ ጎዳ ኦርደተꬃይ እቻሹ ዋꬋ።
EZE 41:13 ሄ ኡራይ ፆሳ ኬꬃ ካረ ባጋ ዋꬍን፥ አዱሳተꬃይ ፄቱ ዋꬋ። ፆሳ ኬꬃፈ ጉየ ባጋራ ደእያ ካይሳ በሳ ካንꬅድ ዉሎሀ ባጋ ኬꬃ ጋካናዉ ደእያ በሳ ዋꬍን ፄቱ ዋꬋ ግድስ።
EZE 41:14 ዶሎሀ ባጋራ ደእያ ፆሳ ኬꬃ ጎምፓይ ናምኡ ካይሳ በሳታ ጉጅድ ዋꬍን ፄቱ ዋꬋ ግድስ።
EZE 41:15 ናምኡ ባጋራ ደእያ አꬍያ በሳታ ጉጅድ፥ ዉሎሀ ባጋራ ደእያ ኬꬃ አዱሳተꬃ ዋꬍን፥ ፄቱ ዋꬋ ግድስ። ፆሳ ኬꬃ ጌሻ በሳይ፥ እያ ቆልአይነ እያ ባራንዳይ
EZE 41:16 ዉይገፐ ብድ፥ ማስኮተታ ጋካናዉ ደእያ በሳይ ምꬃን ልጨትድ ኡትስ፤ ማስኮተትካ ምꬃን ልጨትድ ኡትዶሶና።
EZE 41:17 ፆሳ ኬꬃ ሶ ባጋ ክፍለታ ጎዳይ፥ ፐንገታፐ ቦላ አꬋና ጋካናዉ አሌቀትድ ኡትስ።
EZE 41:18 ክፍለታ ዩሾን፥ ዛምባ ምꬃንነ ክሩበታ ምስለይ አሌቀትስ። ሄ ዛምባ ምꬃ ምስለት አሌቀትዳይ ናምኡ ክሩበታፐ ግዶና። ክሩበታስ ናምኡ ናምኡ ሶምኦይ ደኤስ።
EZE 41:19 እስ ባጋራ አሳ ሶምኦ ዳንያ ሶምኦይ ዛምባ ምስልያ ፄሌስ፤ ሀንኮ ባጋራ ጋሞ ሶምኦ ዳንያ ሶምኦይ ዛምባ ምስልያ ፄሌስ።
EZE 41:20 ጌሻ በሲ ዉይገፐ ብድ፥ ፐንገታፐ ቦላ ባጋን ደእያ በሳ ጋካናዉ፥ ጎዳ ዩሾ ኡባይ ሄሳዳ አሌቀትስ።
EZE 41:21 ፆሳ ኬꬃ ፐንገ ፃንገት ኡባይ ኦይዱ ማዛነይ ደእያ ኡባይ እስ ልከ። ኡባፈ ጌሻ በሳ ገልያ በሳ ስንꬃን
EZE 41:22 ምꬃፈ ኦሰትዳ ያርሾ በሲ ዳንያ በሲ በንቴስ። እካ ኦይዱ ማዛነይ ግድድ፥ ዳልጋተꬃይነ አዱሳተꬃይ እስ ግና፤ እሶይ እሶይ ናምኡ ዋꬋ፤ አዱሳተꬃይ ሄꬑ ዋꬋ። ማዛነታ ቱሳት፥ ባሶትነ ምየ ባጋን ደእያ ሳንቃት ኡባይ ምꬃፈ ኦሰትዶሶና። ሄ ኡራይ ታኮ፥ “ሀይስ ጎዳ ስንꬃን ደእያ ፃርጴዛ” ያግስ።
EZE 41:23 ጌሻ በሳ ገልስያ እስ ፐንገይ ደኤስ፤ ኡባፈ ጌሻ በሳ ገልስያ እስ ፐንገይ ደኤስ።
EZE 41:24 እስ እስ ፐንግያስ ግዶን ዳኮትድ ዶየትያ ናምኡ ሳንቃት ደኦሶና።
EZE 41:25 ጎዳታ ቦላ መትዳይሳዳ ጌሻ በሳ ፐንገታ ሳንቃታ ቦላ ክሩበታነ ዛምባታ ምስለይ መትድ ኡትስ። ጋꬅ ገልያ ክፍልያ ስንꬃን፥ ካረ ባጋራ ምꬃፈ ኦሰትዳ ካም ደኤስ።
EZE 41:26 ሄ ክፍልያ ገልያ ጎዳታ ምየን ማስኮተት ደኦሶና። ጎዳት ዛምባ ምስለን አሌቀትዶሶና። ሄ ክፍልያ ገልያ ኡሻቻንነ ሀድርሳን ደእያ ክፍለታ ደꬃ ባጋራ ካምያ ካር ደኤስ።
EZE 42:1 ሄሳፈ ጉየ፥ ሄ ኡራይ ታና ፑደሀ ባጋ ፐንግያራ ካረ ዳባባኮ ካለꬅድ ፆሳ ኬꬃ ግዶ ዳባባ ግምብያራ ኦይከትዳ ኬꬃኮ ታና ኤህስ።
EZE 42:2 ሄ ኬꬃ ዉላይ ፑደሀ ባጋ ስምስ። ሀ ኬꬃይ ፄቱ ዋꬋ አዱሰነ እሻታሙ ዋꬋ ዳልጋ።
EZE 42:3 ግዶ ዳባባፐ ላታሙ ዋꬋ ሃክድ፥ ቃስ ስንꬃ ባጋራ ካረ ዳባባን ደእያ ሂፀትዳ ሹቻፈ ስንꬃ ባጋራ ዎልኮ ስምዳ ሄꬑ ደꬅ ደእያ ፖቀይ ደኤስ።
EZE 42:4 ሄ ክፍለታ ፐንገት ፑደ ፄሎሶና። ኤንታፈ ስንꬃ ባጋራ ታሙ ዋꬋ ዳልጋነ ፄቱ ዋꬋ አዱሰ ግድዳ ግዶራ አꬅያ ኦገይ ደኤስ።
EZE 42:5 ሄ ኬꬃስ ቦላ ሄꬓንꬆ ፖቀይ ናምአንꬆ ፖቅያፐ ፁሜስ፤ ናምአንꬆይ ኮይሩዋፐ ፁሜስ። ሄስ ሀንዳይ ኤንቲ እሶይ እሱዋፈ ጉየ ሺቅድ ግምበትዳ ግሾሳ።
EZE 42:6 ሄ ፖቅያስ ቦላ ባጋ ክፍለት ግዶ ክፍለታፐነ ጋርሳ ባጋ ክፍለታፐ ፁምያ ግሾ፥ ካረ ዳባባን ደእያ ሀራ ኬꬃታዳ ኤንታዉ ቱስ ባዋ።
EZE 42:7 ሄ ክፍለታፐ ስንꬃ ባጋራ እሻታሙ ዋꬋ አዱቅያ ካረ ዳባባ ባጋራ ደእያ እስ ግምበይ ደኤስ።
EZE 42:8 ካረ ዳባባ ባጋራ ደእያ ክፍለታ አዱሳተꬃይ እሻታሙ ዋꬋ ግድሽን፥ ፆሳ ኬꬃ ስንꬃን ደእያ ክፍለታ አዱሳተꬃይ ፄቱ ዋꬋ።
EZE 42:9 ካረ ዳባባፐ ጋꬅ ገልያ ዎደ ዶሎሀ ባጋራ ጋርሳ ክፍለታ ገልያ ፐንገይ ደኤስ።
EZE 42:10 ዱገሀ ባጋራ ካረ ዳባባ ካልድ ፆሳ ኬꬃ ዳባባራ ኦይከትድ ኬፀትዳ ካረ ዳባባኮ ስምዳ ክፍለይ ደኤስ።
EZE 42:11 ሄ ኬꬃ ክፍለታ ስንꬃን ኦገይ ደኤስ። ሄ ኬꬃይ ቆሞ ባጋን ደእያ ኬꬃራ እስ ግና፤ አዱሳተꬃይ፥ ዳልጋተꬃይ፥ ክፍለትነ ፐንገት ኡባይ እስ ግና።
EZE 42:12 ድርሳ ግምበይ ዉርያ ዶሎሀ ባጋ ጋፃ ዶምድ ግምብያስ ዱገሀ ባጋራ ደእያ ክፍለታ ገልያ ፐንገይ ደኤስ።
EZE 42:13 ሄ ኡራይ ታኮ፥ “ፆሳ ኬꬃ ዳባባ ስንꬃን፥ ፑደሀ ባጋንነ ዱገሀ ባጋን ደእያ ክፍለት ካህነታሳ። ሄ ክፍለታ ግዶን ጎዳ ስንꬃን ኦꬅያ ካህነት ኡባፈ ጌሻ ካꬃ ማና። ሄ ክፍለት ጌሽ ግድያ ግሾ፥ ኡባፈ ጌሻ እሞታ፥ ሄስካ ካꬃ ያርሾ፥ ናጋራ ያርሾነ ናቆ ያርሾ ኤንቲ ያን ዎꬃና።
EZE 42:14 ካህነት እስ ቶሆ ኡባፈ ጌሻ በሳ ገልዳፐ ጉየ፥ ፆሳስ ኦꬅያ ዎደ ማእያ ማኦት ጌሽ ግድያ ግሾ፥ ባንታ ኦሶ ማኡዋ ላሞናሽን ካረ ዳባባ ከያናዉ ዳንዳኦኮና። ኤንቲ አሳኮ ካረ ከይሸ ካሰ ማእያ ሀራ ማኦታ ማእድ ከያናዉ ኮሼስ” ያግስ።
EZE 42:15 ሄ ኡራይ ፆሳ ኬꬃ ጋꬃ ባጋ ዋꬍድ ዉርስዳፐ ጉየ ዶሎሀ ባጋ ድርሳ ፐንግያራ ታና ካረ ከስድ፥ ፆሳ ኬꬃ ካረ ባጋ ዩሹዋ ኡባ ዋꬍስ።
EZE 42:16 ዋꬋ ፃምአ ኤክድ፥ ዶሎሀ ባጋ ዋꬍን፥ እቻሹ ፄቱ ዋꬋ ግድስ።
EZE 42:17 ፑደሀ ባጋ ሄ ፃምአን ዋꬍን፥ እቻሹ ፄቱ ዋꬋ ግድስ።
EZE 42:18 ዱገሀ ባጋ ዋꬍን፥ እቻሹ ፄቱ ዋꬋ ግድስ።
EZE 42:19 ዉሎሀ ባጋ ዋꬍን፥ እቻሹ ፄቱ ዋꬋ ግድስ።
EZE 42:20 ሄሳዳ ኦꬅድ፥ እ ኦይዱ ባጋ ኡባ ዋꬍስ። እያ ዩሹዋን እቻሹ ፄቱ ዋꬋ አዱቅያ፥ ቃስ እቻሹ ፄቱ ዋꬋ ዳልግያ ድርሳ ግምበይ ደኤስ። ሄ ግምበይ ጌሻ በሳነ ጮ በሳ ሻካናሳ።
EZE 43:1 ሄ ኡራይ ታና ዶሎሀ ባጋ ፐንግያኮ ኤህስ።
EZE 43:2 ታኒ እስራኤለ ፆሳ ቦንቾይ ዶሎሀ ባጋፈ የይሳ በአስ። እያ ዩሳ ግርሳይ ክፃ ሃꬃ ጉንꬃ መላ፤ ቢታይ እያ ቦንቹዋን ፖእስ።
EZE 43:3 ታ በእዳ ቆንጨꬃይ ካሰ ጎዳይ የሩሳላመ ካታማ ꬋይሳናዉ ይዳ ዎደ በእዳ ቆንጨꬃ ዳኔስ። ኮቦራ ሻፋ ማታን ታኒ በእዳ ቆንጨꬃ ዳኔስ። ሄ ዎደ ታ ሶምኡዋ ሳአ ጋꬃዳ ጉፋናስ።
EZE 43:4 ጎዳ ቦንቾይ ዶሎሀ ፐንግያራ ፆሳ ኬꬃ ግዶ ገልስ።
EZE 43:5 ሄ ዎደ ጎዳ አያናይ ታና ደንꬅድ፥ ግዶ ዳባባ ገልስን፥ ሄኮ፥ ጎዳ ቦንቾይ ፆሳ ኬꬃ ኩምስ።
EZE 43:6 ያን ሄ ኡራይ ታ ማታን ኤቅዳሽን፥ ፆሳ ኬꬃ ግዶፈ ጎዳይ ታዉ ኦድሽን ስአስ።
EZE 43:7 እ ታኮ፥ “አሳ ናአዉ፥ ሀይስ ታ አራታይ ኡትያነ ታ ቶሆይ የꬍያ በሰ። ታ እስራኤለ አሳ ግዶን መርናዉ ዳና። ህዛፐ ጉየ እስራኤለ አሳ ግድን፥ ኤንታ ካዎታ ግድን፥ ኤቃ ጎይንድ ዎይኮ ባንታ ካዎታ ሀዉልተ ጎይንሸ ታ ጌሻ ሱንꬃ ቱንሶኮና።
EZE 43:8 እስ ጎዳ ፃላል ታናነ ኤንታ ሻክን፥ ባንታ ፐንግያ ታ ፐንግያ ማታን፥ ባንታ ፐንገ ዝዝግያ ታ ፐንገ ምꬃ ማታን ኤስዶሶና። ባንታ እፀትዳ ኦሱዋን ታ ጌሻ ሱንꬃ ቱንስዶሶና። ሄሳ ግሾ፥ ታኒ ታ ሀንቁዋን ኤንታ ꬋይሳስ።
EZE 43:9 ህዛ ኤቃ ጎይኖ አጎ፤ ባንታ ካዎታ ሀዉልተ ታ ማታፐ ድጎ። ያትኮ፥ ታ ኤንታ ግዶን መርናዉ ዳና።”
EZE 43:10 ዛሪድ ጎዳይ ታኮ፥ “አሳ ናአዉ፥ ታ ነና በስዳ ፆሳ ኬꬃ ኦሱዋ እስራኤለ አሳስ ኦዳ፤ ኤንቲ ባንታ ኦꬅዳ ናጋራን ዬላታና መላ እያ መꬉዋባ ኤንታዉ ኦዳ።
EZE 43:11 ኤንቲ ባንታ ኦꬅዳባን ዬላትያባ ግድኮ፥ ፆሳ ኬꬃ ማላ፥ እ ኬፀትዳ ሀኖታ፥ ከይያ ደꬃታ፥ ገልያ ፐንገታነ እያ ኩመꬃ ምስልያ ኤንታዉ ቆንጭሳ። ሄሳዳካ፥ እያ ዎጋ፥ እያ ህግያ ኡባ ኤንታ ኤርሳ። ሄ ኬꬃ ሀኖታ ካላና መላ እያ ህግያነ ዎጋ ናጋና መላ ኤንቲ ፄልሽን ፃፋ።
EZE 43:12 ፆሳ ኬꬃ ህገይ ሀይሳ፥ ዙማ ሁጰን፥ ፆሳ ኬꬃ ዩሹዋን ደእያ በሳ ኡባይ ኡባፈ ጌሽ ግዳና።”
EZE 43:13 ያርሾ በሳይ ካሰ ፆሳ ኬꬃ ዋꬍዳይሳዳ፥ እስ ዋꬋነ ኦይዱ ብራ ጉጅድ ዋትስ። ያርሾ በሳ ባሱዋ ዩሾን እስ ዋꬋ ዝቃነ እስ ዋꬋ ዳልግያ ኦል ደኤስ፤ ሄ ኦላይ ካረ ባጋራ እስ ታካꬎ ꬎቄስ፤ ሄስ ያርሾ በሳ ꬎቃተꬃ።
EZE 43:14 ባሱዋፐ ብድ፥ ኮይሮ ደꬃ ጋካናዉ ꬎቃተꬃይ ናምኡ ዋꬋ፤ ጎምፓይ እስ ዋꬋ። ጉꬃ ደꬃፈ ብድ ግታ ደꬃ ጋካናዉ ꬎቃተꬃይ ኦይዱ ዋꬋ፤ ቃስ ጎምፓይ እስ ዋꬋ።
EZE 43:15 ያርሾይ ፁሳ ጮጨይ ደእያ ዉርሰꬃ ደꬃይ ኦይዱ ዋꬋ ꬎቃ። እ ኦይዱ ማዛነ ግድድ፥ ኦይዱ ማዛንያ ቦላ እስ እስ ካጨይ ደኤስ፤
EZE 43:16 ታማይ ኤፅያ ጮጨይ ኦይዱ ማዛነ ግድድ፥ አዱሳተꬃይነ ዳልጋተꬃይ ታማነ ናምኡ ዋꬋ።
EZE 43:17 ናምአንꬆ ደꬃይ ሄሳ መላ ኦይዱ ማዛነ ግድድ፥ አዱሳተꬃይነ ዳልጋተꬃይ ታማነ ኦይዱ ዋꬋ። ሄ ደꬃ ካረ ባጋ ጋፃይ እስ ታካꬎ ꬎቄስ፤ ዩሾን እስ ዋꬋ ኦል ደኤስ። ያርሾ በሳ ፑደ ኤፍያ ደꬃት ዶሎሀ ባጋን ደኦሶና።
EZE 43:18 ኡባ ሃርያ ጎዳይ ታኮ፥ “አሳ ናአዉ፥ ፁሳ ያርሾ ያርሻናዉነ ሱꬁ ዉርፃናዉ፥ ያርሾ በሳ ግምብድ ዉርስያ ጋላስ ኦሰታና ዎጋይ ሀይሳ።
EZE 43:19 ታ ስንꬃን ኤቅድ ኦꬅያ ሳዶቃ ያራፐ የለትዳ ሌወ ኮቸ ግድዳ ካህነታስ ናጋራ ያርሾ ኦꬃዳ እስ ዎፋኖ እማ” ያጌስ ኡባ ሃርያ ጎዳይ።
EZE 43:20 ኔኒ ሄ ሱꬃፈ ኤካዳ፥ ኦይዱ ካጨታ፥ ናምአንꬆ ደꬃ ኦይዱ ማዛነታነ ሄ ደꬃ ጋፃ ትያ። ሄሳዳ ኦꬃዳ፥ ያርሾ በሳ ጌሻ።
EZE 43:21 ናጋራ ያርሾስ እመትዳ ኮርማ ኤካዳ፥ ፆሳ ኬꬃስ ተቀትዳ ጌሻ በሳፈ ካረ ባጋራ እያዉ ጊግዳ በሳን ፁጋ።
EZE 43:22 ዎንተꬃ ጋላስ ቦረይ ባይና እስ ኮለ ኤካዳ፥ ናጋራ ያርሾ ኦꬃዳ ያርሻ። ካሰ ኮርማ ሱꬃን ጌሽዳይሳዳ ሄ ኮልያ ሱꬃን ያርሾ በሳ ጌሻ።
EZE 43:23 ጌሻ ስማዳ ቦረይ ባይና እስ ዎፋኖነ እስ ማራዘ ኤካዳ፥
EZE 43:24 ናምኣካ ጎዳ ስን ሺሻ። ካህነት ኤንታ ቦላ ማፅነ ላልድ፥ ጎዳስ ፁሳ ያርሾ ኦꬅድ ያርሾ።
EZE 43:25 “ላፑን ጋላስ ኩመꬅ፥ እስ እስ ጋላስ፥ እስ ኮለ፥ እስ ዎፋኖነ እስ ማራዘ ናጋራ ያርሾ ኦꬃዳ ያርሻ።
EZE 43:26 ካህነት ላፑን ጋላስ ኩመꬅ ያርሾ በሳ ጌሽድ ጎዳስ ዱማዮ።
EZE 43:27 ሀ ጋላሳት ዉርያ ዎደ፥ ሆስፑንꬆ ጋላሳፐ ዶምድ፥ ካህነት ፁሳ ያርሾነ እስፈተꬃ ያርሾ ሺሾ። ሄ ዎደ ታ ህንተናን ኡፋይታና” ያጌስ ኡባ ሃርያ ጎዳይ።
EZE 44:1 ሄሳፈ ጉየ፥ ሄ ኡራይ ታና ጉየ ዛሪድ፥ ፆሳ ኬꬃስ ዶሎሀ ባጋራ ደእያ ካረ ባጋ ድርሳ ፐንግያኮ ኤህያ ዎደ ድርሳ ፐንገይ ጎርደትድ ኡትስ።
EZE 44:2 ጎዳይ ታኮ፥ “ሀ ፐንገይ ጎርዳን ዳናፐ አትሽን፥ ናምአንꬆ ዶየተና። ጎዳይ እስራኤለ ፆሳይ ያራ ገልዳ ግሾ ኦንካ ያራ ገለና። ሄሳ ግሾ፥ ሄ ፐንገይ ጎርዳን ዳና።
EZE 44:3 ግዶሽን፥ እስራኤለ ሀላቃይ፥ ጎዳ ስንꬃን ኡይꬅ ማናዉ ያን ኡታናዉ ዳንዳኤስ። ፐንግያ ባራንዳራ እ ገላናዉነ ከያናዉ ዳንዳኤስ” ያግስ።
EZE 44:4 ሄ ኡራይ ታና ፑደሀ ፐንግያኮ ኤፍያ ኦግያራ ኤፍድ፥ ፆሳ ኬꬃስ ስንꬃ ባጋ ጋꬅስ። ያን ግዳዳ ታ በእያ ዎደ፥ ሄኮ፥ ጎዳ ቦንቾይ ፆሳ ኬꬃ ኩምድ ኡትዳይሳ በአዳ ሶምኦራ ሳአን ጉፋናስ።
EZE 44:5 ጎዳይ ታኮ፥ “አሳ ናአዉ፥ ፆሳ ኬꬃ ዎጋታነ እያ ህገታ ኡባ ነ በኤይሳነ ስኤይሳ ሎይꬃዳ ናጋ። ፆሳ ኬꬃ ገላናዉነ ከያናዉ በሲያ አሳትነ በሶና አሳት ኦናንተኮ ሎይꬃዳ አኬካ።
EZE 44:6 ማካላንቾ እስራኤለ አሳስ፥ ኡባ ሃርያ ጎዳይ ሀይሳዳ ያጌስ ጋዳ ኦዳ። ‘ህንተኖ፥ እስራኤለ አሳዉ፥ ህንተ ኦꬅያ ቱና ኦሶታ አግተ።
EZE 44:7 ህንተ ታዉ ታ ካꬃ፥ ሞꬉዋነ ሱꬁ ያርሾ ኦꬅድ ሺሽያ ዎደ ዎዛናይነ አሾይ ቃፃረትቦና አላጋ አሳታ ፆሳ ኬꬅ ገልስድ ታ ኬꬃ ቱንስደታ፤ ታ ጫቁዋ መንꬅደታ።
EZE 44:8 ታ ጌሻ ሚሸታ ቦላ አዋቶና እፅድ፥ ታ ኬꬃን አላጋታ አዋይደታ’ ” ያጌስ።
EZE 44:9 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “እስራኤለ አሳ ግዶን ደእያ አላጋ አስ፥ ባ ዎዛናንነ ባ አሹዋ ቃፃረትቦና፥ ኦንካ ታ ኬꬃ ገሎፖ።”
EZE 44:10 “ታና አግድ፥ እስራኤለ አሳራ ኤቃ ጎይንዳ ሌወታ ታ ሴራና።
EZE 44:11 ኤንቲ ታ ኬꬃን ኦሳንቾ ግዶ፤ ታ ኬꬃ ድርሳ ፐንገታ ናጎ፤ ፆሳ ኬꬃ ኦሱዋካ ኦꬆ። ኤንቲ ፁሳ ያርሾነ አሳይ ኤህያ ሀራ ያርሾ ሹኮ፤ ቃስ አሳስ ኦꬃናዉ አሳኮ ሺቆ።
EZE 44:12 ሽን ኤንቲ ካሰ እስራኤለ አሳ ኤቃ ጎይንስዳ ግሾነ አሳ ናጋራኮ ካለꬅዳ ግሾ፥ ኤንቲ ባንታ ናጋራ ሴራ ኤካና መላ ታ ኩሸ ደንꬃዳ ጫቃስ” ያጌስ ኡባ ሃርያ ጎዳይ።
EZE 44:13 ኤንቲ ካህነ ግድድ ኦꬃናዉ ታኮ ሺቆፖ፤ ዎይኮ ታዉ ዱማትዳ ጌሻባኮነ ኡባፈ ጌሻ በሳኮ ሺቆፖ። ኤንቲ ባንታ ኦꬅዳ ቱና ኦሱዋ ግሾ፥ ኦይሸታና።
EZE 44:14 ሄሳ ግሾ ኤንቲ ፆሳ ኬꬃን አዋታናዳነ እያ ግዶን ኦꬃናዉ ደእያ ኦሶ ኡባ ኦꬃና መላ ታ ኤንታ ሹማና።
EZE 44:15 “ሽን እስራኤለ አሳይ ታና አግድ፥ ታ ስንꬃፈ ሃክዳ ዎደ ፆሳ ኬꬃ ዎጋ አማነትድ ፖልዳ፥ ሌወ ኮቸ ግድዳ ካህነት፥ ሳዶቃ ያራት፥ ታዉ ኦꬃናዉ ታኮ ሺቆ። ሞꬉዋነ ሱꬃ ሺሽድ ኤንቲ ታ ስንꬃን ኦꬆ” ያጌስ ኡባ ሃርያ ጎዳይ።
EZE 44:16 ፆሳ ኬꬃ ኤንቲ ገሎ፤ ታዉ ኦꬃናዉ ታ ያርሾ በሳ ኤንቲ ሺቆ፤ አዋተꬃ ኤንቲ ኦይኮ።
EZE 44:17 ኤንቲ ፆሳ ኬꬃስ ግዶ ዳባባ ገልያ ዎደ፥ ሊኖፐ ዳደትዳ ማኦ ማኦ፤ ግዶ ዳባባ ፐንገን ዎይኮ ፆሳ ኬꬃ ግዶን ኦꬅያ ዎደ ሱፈ ማኦ ማኦፋ።
EZE 44:18 ኤንቲ ባንታ ሁጰን ሊኖ ጎፅድ፤ ባንታ ፄሳን ሊኖ ቃንꬃ ሱረ ዳንጮ፤ ጫዋያ ማኦ ማኦፎ።
EZE 44:19 አሳይ ደእያ ካረ ዳባባ ኤንቲ ከያናፐ ስን ፆሳ ኬꬃን ኦꬅሸ ማእዳ ማኡዋ ቃርድ፥ ጌሻ ክፍለታን ዎꬆ። ሄስካ፥ አሳይ ኤንታ ጌሻ ማኡዋ ቦችድ ቆሄቶና መላሳ።
EZE 44:20 “ካህነት ባንታ ሁጵያ ሜደቶፎ ዎይኮ አዱስድ ድቾፎ፤ ባንታ ሁጵያ ማራን ቃንፀቶ።
EZE 44:21 አይ ካህነት ግዶ ዳባባ ገልያ ዎደ ዎይነ ኡሽ ኡዮፖ።
EZE 44:22 ኤንቲ አዝን ሀይቅዳ፥ ዎይኮ ሳዮ ማጫስ ኤኮፎ። እስራኤለ አሳፐ ጌላኦ ኤኮ፤ ዎይኮ አዝናይ ካህነ ግድድ ደእሸ ሀይቅዳ ማጫስ ኤኮ።
EZE 44:23 “ካህነት ጎዳስ ዱማትዳባነ ዱማቶናባ ግዶን ደእያ ዱማተꬃ ታ አሳ ታማርሶ፤ ጌሽነ ቱና ግዶን ደእያ ዱማተꬃ ኤንታ በሶ።
EZE 44:24 አይ ሞቶይ ደንድኮካ፥ ካህነት ህገይ ኦደይሳዳ ፕርዶ። ታ ህገይነ ታ ዎጋይ ገይሳዳ ታ ባለታ ቦንቾ፤ ታ ሳምባታ ዱማይድ ቦንቾ።
EZE 44:25 “ካህነይ ሀይቅዳ አሀኮ ሺቅድ፥ ባና ቱንሶፖ። ግዶሽን፥ ሀይቅዳይ አዋ ዎይኮ አዮ ዎይኮ እያ አደ ናአ ዎይኮ ማጫ ናአ ዎይኮ እሻ ዎይኮ አዝና ገላቦና ምቾ ግድኮ ባና ቱንሶ።
EZE 44:26 ቱንዳፐ ጉየ፥ ላፑን ጋላስ ጋምኦ፤ ሄሳፈ ጉየ፥ እ ጌሽ ግዳና።
EZE 44:27 ጌሻ በሳን ሀጋዛናዉ ግዶ ዳባባ ገልያ ዎደ ባ ናጋራ ግሾ ያርሾ ሺሾ” ያጌስ ኡባ ሃርያ ጎዳይ።
EZE 44:28 ካህነታስ ላት ባዋ፤ ታ ኤንታዉ ላታ። እስራኤለ ቢታን ኤንታዉ አይ ላታካ እሞፕተ፤ ኤንታ ላታይ ታና።
EZE 44:29 ኤንቲ ካꬃ ያርሾ፥ ናጋራ ያርሾነ ናቆ ያርሾ ሞ። እስራኤለ ቢታን ጎዳስ ዱማይዳባ ኡባይ ኤንታሳ።
EZE 44:30 ኮይሮ ጋክያ ዱማ ዱማ ካꬃ ፄራ አይፈይነ ህንተ ጎዳስ እምያ እሞታ ኡባይ ካህነታሳ። ህንተ ኬꬃይ አንጀታና መላ ህንተ ꬊልያፈ ኮይሮ ኩሽያ ኤንታዉ እምተ።
EZE 44:31 ካህነት ባዉታ ዎይኮ ዶእ ዎꬍዳ ካፎ አሾ ዎይኮ መሄ አሾ ሞፖ።
EZE 45:1 “ቢታ ላታናዉ ህንተ ሳማን ሻክያ ዎደ ሄ ቢታፈ እስ ሳማ ጎዳስ ዱማይተ። ሄስካ ታማነ ናምኡ ክሎ ምትረነ ባጋ አዱቅያነ ታሙ ክሎ ምትረ ዳልግያ በሰ ግዶ። ሄ በሳይ ኡባይ ጌሻ በሰ ግዶ።
EZE 45:2 ሄ በሳፈ ኦይዱ ማዛነ ደእያ አዱሳተꬃይነ ዳልጋተꬃይ እስ ግና ግድያ እቻሹ ፄቱ ዋꬋ፥ በሲ ፆሳ ኬꬃስ ተቀቶ፤ እያ ዩሾን እሻታሙ ዋꬋ ግድዳ ካይሳ በሲ ደኦ።
EZE 45:3 ሄ ጎዳስ ዱማይዳ በሳፈ አዱሳተꬃይ ታማነ ናምኡ ክሎ ምትረነ ባጋ፥ ጎምፓይ እቻሹ ክሎ ምትረ ግድዳ በሰ ዋꬋዳ ሻካ። ሄ በሳይ ኡባፈ ጌሻ በሳይ ደእያ ፆሳ ኬꬃስ፥ ግድድ ደኦ።
EZE 45:4 ሄስ ፆሳ ኬꬃ ግዶን ጎዳስ ሀጋዛናዉ፥ እያኮ ሺቅያ ካህነታስ ዱማትዳ ጌሻ በሲ ግዶ። ሄስ ካህነታ ኬꬃይነ ፆሳ ኬꬃይ ኬፀትያ በሰ ግዶ።
EZE 45:5 ቃስ አትዳ ታማነ ናምኡ ክሎ ምትረ ባጋ አዱቅያነ እቻሹ ክሎ ምትረ ባጋ ዳልግያ በሳይ ፆሳ ኬꬃን ኦꬅያ ሌወታስ ላታ ግዶ፤ ኤንቲ ባንታዉ ዱሳ ካታማታ ያን ኬፆ።
EZE 45:6 “ጎዳስ ዱማይዳ በሳ ማታን ታማነ ናምኡ ክሎ ምትረነ ባጋ አዱቅያነ ናምኡ ክሎ ምትረነ ባጋ ዳልግያ በሳይ ካታማ ኬፃናዉ ደኦ፤ ሄ በሳይ እስራኤለ አሳ ኡባስ ግዶ።
EZE 45:7 እስራኤለ ሀላቃስ እመትዳ ግሾይ ናምኡ ባጋራ ጎዳስ ዱማይዳ በሳንነ ካታማ በሳን ዛዋቴስ። እ ዉሎሀ ባጋራ መደትራነ አባ ጋኬስ፤ ዶሎሀ ባጋራ እስራኤለ ቢታ ዛዋ ጋኬስ። እያ አዱሳተꬃይ እስራኤለ ኮቻፈ እሱዋ ግሹዋዳ ዉሎሀ ባጋ ዛዋፐ ብድ፥ ዶሎሀ ባጋ ዛዋ ጋኬስ።
EZE 45:8 ሄ ግሾይ እስራኤለ ሀላቃስ ላታ ጋደ ግዶ። ህዛፐ ጉየ ታ ሀላቃት ታ አሳ ኡንኤꬆፎ፤ ኤንቲ እስራኤለ አሳ ኡባይ ባ ኮቻን ኮቻን ቢታ ኤካናዳ ኦꬆና” ያጌስ።
EZE 45:9 ኡባ ሃርያ ጎዳይ ሀይሳዳ ያጌስ፤ “ህንተኖ፥ እስራኤለ ሀላቃቶ፥ ህንተዉ ሀእ ግዳና! ቡቀꬅነ አሳ ኡንኤꬆ አግተ፤ ሱረ ፕርድተ፤ ፅሎተꬅ ኦꬅተ። ታ አሳ ኤንታ ላታ ቢታፈ ሾድድ ጎደይሳ አግተ። ሀይሳ ኦደይ ታና ኡባ ሃርያ ጎዳ።
EZE 45:10 ህንተዉ እሱዋስ እሱዋስ ልከ ምዛነይነ ማካ ሚሸይ ደኦ።
EZE 45:11 ማካ ሚሸ ኡባስ ግዶ ግድያ ጎማረ ጌተትያ ማካ ሚሸ ግዶ። መላባ ማክያ እፋ ጌተትያ ሚሸይነ ጉክያባ ማክያ ባተ ጌተትያ ሚሸይ እስ ልከ ግዶ። ሄሳ ጉሳይ፥ እስ ጎመረይ ታሙ እፋራነ ታሙ ባተራ እስ ግና ግዴስ።
EZE 45:12 ጉꬃባ ማክያ ዎደ ህንተ ማካ ሚሸይ ሳቅለ ግዶ። ላታሙ ጌር እስ ሳቅለ ግዶ፤ ኡሱፑን ታሙ ሳቅለይ እስ ምናነ ግዶ።
EZE 45:13 “ህንተ እሙዋ እምሸ ሀይሳዳ እምተ። ህንተ ሺሽያ ግስተፈ ኡሱፑን ታማፈ እስ ኩሸ፥ ባንጋፈ ኡሱፑን ታማፈ እስ ኩሸ ግዶ።
EZE 45:14 ሻማሆ ዛይትያፐ ፄታፐ እስ ኩሸ እምተ። ሄሳ ማክያ ዎደ ነ ማክያ ሚሸይ ባተ ግዶ። ታሙ ባተይ እስ ጎማረ ዎይኮ እስ ቆረ ግዴስ።
EZE 45:15 እስራኤለ አሳይ ሄምያ ናምኡ ፄቱ መሄፐ ደእያ እስ ዉድያፐ እስ እስ መሄ እምተ። ሄስ አሳ ናጋራ አቶተꬃስ ያርሸትያ፥ ካꬃ ያርሾራ፥ ፁሳ ያርሾራነ እስፈተꬃ ያርሾራ ሺቃና” ያጌስ ኡባ ሃርያ ጎዳይ።
EZE 45:16 ቢታን ደእያ አሳ ኡባይ ሄሳ ኡባ እስራኤለ ሀላቃስ እሞ።
EZE 45:17 ሀላቃይ ኦꬅያ ኦሶይ፥ እስራኤለ አሳይ ቦንችያ ባለታን፥ አጌና ፄሮን ሳምባታታ ጋላሳን፥ ፁሳ ያርሾ፥ ካꬃ ያርሾነ ኡሻ ያርሾ ሺሾ። እስራኤለ አሳ ናጋራ አቶተꬃስ ናጋራ ያርሾ፥ ካꬃ ያርሾ፥ ፁሳ ያርሾነ እስፈተꬃ ያርሾ ኮሽያባ እሞ።
EZE 45:18 ኡባ ሃርያ ጎዳይ ሀይሳዳ ያጌስ፦ “ኮይሮ አጌናን፥ ኮይሮ ጋላሳን ቦረይ ባይና እስ ዎፋኖ ፆሳ ኬꬃ ጌሻናዉ ሺሻ።
EZE 45:19 ካህነይ ናጋራ ያርሾ ሱꬃፈ ኤክድ፥ ፆሳ ኬꬃ ፐንገ ፃንገታ፥ ያርሾ በሳ ዩሾን ደእያ ደꬃን ደእያ ኦይዱ ማዛነታነ ግዶ ዳባባ ኤፍያ ድርሳ ፐንገ ፃንገታ ትዮ።
EZE 45:20 ኦንካ ቆፖና ዎይኮ ኤሮና ኦꬅዳ ናጋራ አቶተꬃስ፥ ሄ አጌናን ላፑንꬆ ጋላስ ሄሳዳ ኦꬃ። ያታዳ ፆሳ ኬꬃ ጌሻ።
EZE 45:21 “ኮይሮ አጌናን፥ ታማነ ኦይዳንꬆ ጋላስ ፓስካ ባኣለ ቦንችተ፤ ላፑን ጋላስ ጋካናዉ፥ እርሾይ ባይና ኡይꬅ ሚተ።
EZE 45:22 ኮይሮ ጋላስ ሀላቃይ ባ ግሾነ ባ አሳ ግሾ ናጋራ ያርሾ ኦꬅድ እስ ኮርማ ሺሾ።
EZE 45:23 ሄ ባለይ ቦንቸትያ ላፑን ጋላሳታን ጋላስ ጋላስ ቦረይ ባይና ላፑን ኮርማታነ ላፑን ማራዘ ዶርስ ፁሳ ያርሾ ኦꬅድ፥ ጎዳስ ሺሾ። ሄሳራ ጋꬅድ ናጋራ ያርሾስ ጋላስ ጋላስ እስ ዴሻ ኮለ ሺሾ።
EZE 45:24 እስ እስ ኮርማነ ማራዘ ያርሽያ ዎደ፥ ካꬃ ያርሾስ ታማነ ላፑን ክሎ ግራመ ግስተነ ሄꬑ ልትሮ ዛይተ ሺሾ።
EZE 45:25 “ላፑንꬆ አጌናን፥ ታማነ እቻሻንꬆ ጋላሳን ዶምያ ላፑን ጋላሳ ባኣለ ዎደ ናጋራ ያርሾ፥ ፁሳ ያርሾ፥ ካꬃ ያርሾነ ዛይተ ካሰይሳፈ ዱማዮና ሀላቃይ ሺሾ” ያጌስ።
EZE 46:1 ኡባ ሃርያ ጎዳይ ሀይሳዳ ያጌስ፦ “ግዶ ዳባባ ገልስያ ዶሎሀ ባጋ ድርሳ ፐንገይ ኡሱፑን ኦሶ ጋላሳታን ጎርደትድ ጋምኦ፤ ሽን ሳምባታ ጋላስነ አጌና ፄሮ ጋላሳን ዶየቶ።
EZE 46:2 እስራኤለ ሀላቃይ ድርሳ ፐንግያ ባጋራ ካረ ዳባባፐ ጋꬅ ገልድ፥ ድርሳ ፐንግያ ማታን ኤቆ። ካህነት እ እምዳ ፁሳ ያርሾነ እስፈተꬃ ያርሾ ሺሾ። እ ያን ድርሳ ፐንግያ ማታን ጎይንድ ስሚድ ካረ ከዮ። ሽን ድርሳ ፐንገይ ኦማርስ ጋካናዉ ጎርደተና።
EZE 46:3 ሄ ቢታ አሳይ ሳምባታንነ አጌና ፄሮ ዎደ ሄ ግዶ ዳባባ ፐንግያ ስንꬃን ጎዳ ጎይኖ።
EZE 46:4 ሀላቃይ ሳምባታ ጋላስ ጎዳስ ፁሳ ያርሾ ኦꬅድ፥ ቦረይ ባይና ኡሱፑን ኡርገ ዶርሳታነ እስ ማራዘ ዶርስ ሺሾ።
EZE 46:5 እስ ዶርሳ ኡርግያራ ታማነ ላፑን ክሎ ግራመ ካꬃ ያርሾ እሞ። ኡርገ ዶርሳታር ሺቅያ ካꬃ ያርሾይ ሀላቃይ ባዉ ሺሻናዉ ኮየይሳ መላ ግዶ። ቃስ እስ እስ ታማነ ላፑን ክሎ ግራመ ካꬃራ ሄꬑ ሄꬑ ልትሮ ዛይተይ እሞ።
EZE 46:6 አጌና ፄሮ ጋላስ ቦረይ ባይና እስ ዎፋኖ፥ ኡሱፑን ኡርገ ዶርሳታነ እስ ማራዘ ሺሾ።
EZE 46:7 እስ እስ ዎፋኖነ ኡርገ ዶርስ ያርሽያ ዎደ ካꬃ ያርሾስ እስ እስ ታማነ ላፑን ክሎ ግራመ ግስተነ ሄꬑ ሄꬑ ልትሮ ዛይተ ሺሾ። ኡርገ ዶርሳታራ ሺቅያ ካꬃ ያርሾይ ሀላቃይ ባዉ ሺሻናዉ ኮይዳይሳ መላ ግዶ።
EZE 46:8 ሀላቃይ ገልሸ፥ ድርሳ ፐንገ ባራንዳራ አꬍድ ገሎ፤ ከይሸካ ያራ ከዮ።
EZE 46:9 “አሳይ ባኣለ ጋላስ ጎዳ ጎይናናዉ ያ ዎደ ጎይናናዉ ፑደሀ ፐንግያራ ገልዳይሳት ጋርሳ ፐንግያራ ከዮ፤ ዱገሀ ፐንገራ ገልዳይሳት ፑደሀ ፐንገራ ከዮ። ኦንካ ባ ስንꬃን ደእያ ፐንግያራ ስት ግድ ከዮፖ አትሽን፥ ባ ገልዳ ፐንግያራ ከዮፖ።
EZE 46:10 ኤንቲ ገልያ ዎደ፥ ሀላቃይ ኤንታራ ገሎ፤ ኤንቲ ከይያ ዎደ ኤንታራ ከዮ።
EZE 46:11 “ኡፋይሳ ጋላሳታንነ ላይꬃ ባለታን እስ እስ ኮርማራነ እስ እስ ማራዝያራ ሺቅያ ካꬃ ያርሾይ እስ እስ ታማነ ላፑን ክሎ ግራመ ግስተራ ሄꬑ ሄꬑ ልትሮ ዛይተራ ግዶ። ቃስ ኡርገ ዶርሳራ ሺቅያ ያርሾይ ሀላቃይ ባዉ ሺሻናዉ ኮይዳይሳ መላ ግዶ።
EZE 46:12 ሀላቃይ ባ ዶሳን እምያ ያርሾ፥ ሄስካ ፁሳ ያርሾ ዎይኮ እስፈተꬃ ያርሾ ጎዳስ ኤህያ ዎደ፥ ዶሎሀ ባጋ ድርሳ ፐንገይ እያዉ ዶየቶ። ባ ፁሳ ያርሹዋ ዎይኮ እስፈተꬃ ያርሹዋ ሳምባታ ጋላስ እ ሺሸይሳዳ ሺሾ። እ ከይድ ብን፥ ድርሳ ፐንገይ ጎርደቶ።
EZE 46:13 “ሀላቃይ ጋላስ ጋላስ ቦረይ ባይና እስ ላይꬅ ግድዳ እስ ዶርሰ ፁሳ ያርሾ ኦꬅድ፥ ጎዳስ ሺሾ፤ እ ሄሳ ዎንታ ጉራ ፓጨይ ባይና ኦꬆ።
EZE 46:14 ሄሳዳካ ናምኡ ክሎ ግራመ ꬊለይ እስ ልትሮ ዛይተራ ሙኑቀትድ፥ ዎንታ ጉራ ካꬃ ያርሾ ግድድ ሺቆ። ሄስ ህንተ ጎዳስ ጋላስ ጋላስ ሺሽያ ያርሾ ዎጋ።
EZE 46:15 ሀይስ ኡርገ ዶርሳይ፥ ካꬅነ ዛይተይ ፓጭ ባይና ዎንታ ዎንታ ፁሳ ያርሾ ግድድ ሺቃናዉ በሴስ” ያጌስ።
EZE 46:16 ኡባ ሃርያ ጎዳይ ሀይሳዳ ያጌስ፦ “ሀላቃይ ባ ጋድያፐ ሻክድ፥ ባ አደ ናይታፐ እሱዋስ እምኮ፥ ሄስ ሄ ናኣስነ እያ ናይታስ ላታ ግዴስ።
EZE 46:17 ሽን ሀላቃይ ባ ጋድያፐ ሻክድ፥ ባ አይለታፐ እሱዋስ እምኮ፥ እሻታማንꬆ ላይꬃ ባለይ ጋካናዉ፥ ሄ ጋደይ እያባ ግዴስ። ሄሳፈ ጉየ፥ ሀላቃስ ስሞ፤ ሄስ ሀላቃሳ ግድያ ግሾ፥ መርናዉ እያዉነ እያ ናይታስ ላታ ግዴስ።
EZE 46:18 ሀላቃይ አሰ ናቅድ፥ አሳ ላታ ጋድያ ዎልቃን ኤኮፎ። ታ አሳይ ባ ላታ ጋድያፐ ሾደቶና መላ እ ባ አደ ናይታስ ባ ጋድያፐ እሞ” ያጌስ።
EZE 46:19 ሄሳፈ ጉየ፥ ሄ ኡራይ ታና ቆሞ ባጋን ደእያ ካህነታ ክፍለታ ገልያ ፐንግያኮ ኤህስ። ሄሳት ግዶ ዳባባ ጋꬅያ ጋርሳ ባጋ ድርሳ ፐንግያ ማታን ደኤይሳታ። ክፍለታፐ ዉሎሀ ባጋራ ታኒ እስ በሲ በአስ።
EZE 46:20 እ ታኮ፥ “ሀ በሳይ ካህነት ናጋራ ያርሾነ ናቆ ያርሾ አሹዋ ዶይስያ በስነ ካꬃ ያርሾ ኡክያ በሲ። ሄ በሳን ጎኤትያ ጋሶይ አሳ ቆሆይ ጋኮና መላ ጌሻ ያርሹዋፈ ካረ ዳባባ ከየና” ያግስ።
EZE 46:21 ሄሳፈ ጉየ፥ ሄ ኡራይ ታና ካረ ባጋ ዳባባ ኤፍድ፥ ዳባባ ኦይዱ ማዛነታ ዩሽድ በስስ። እስ እስ ማዛንያን ጉꬃ ዳባብ ደኤስ።
EZE 46:22 ኦይዱ ማዛነታን ደእያ ዳባባት እስ ግና፤ ኤንቲ ኦይታሙ ዋꬋ አዱሰ፤ ሀስታሙ ዋꬋ ኦርደ።
EZE 46:23 ሄ ኦይዱ ዳባባታ ዩሾን ሹቻ ግምበይ ደኤስ፤ ግምብያ ጋርሳን ታማ ኤꬅያ በሲ ደኤስ።
EZE 46:24 ሄ ኡራይ ታኮ፥ “ሀይስ ኡባይ ፆሳ ኬꬃን ኦይሳት አሳይ ኤህያ ያርሹዋ ዶይስያ በሳታ” ያግስ።
EZE 47:1 ሄ ኡራይ ዛሪድ፥ ታና ፆሳ ኬꬃ ገልያ ፐንግያኮ ኤፍስ። ፆሳ ኬꬃ ገልያ ፐንግያፈ ጋርሳራ ሃꬅ ፑልትድ፥ ፆሳ ኬꬃፈ ዶሎሀ ባጋ ጎጌስ። ፆሳ ኬꬃስ ጋርሳ ባጋራ ዱገ ጎግድ፥ ያርሾ በሳፈ ጋርሳ ባጋራ ካንꬄስ።
EZE 47:2 እ ታና ቆሞ ፐንግያ ባጋራ ከስድ፥ ዶሎሀ ፐንግያኮ ዩሽስ። ሄ ፐንግያፈ ጋርሳ ባጋራ ሃꬅ ጎጌስ።
EZE 47:3 ሄ ኡራይ ዋꬋ ዎዶሮ ባ ኩሸን ኦይክድ፥ ዶሎሀ ባጋ ብድ፥ ጎግያ ሃꬃ ካልድ፥ እስ ሙኩሉ ዋꬍስ። ታና ሃꬃ ግዶራ ካለꬅስ፤ ሃꬃይ ታዉ ሹቁለ ጋክስ።
EZE 47:4 ዛሪድ እስ ሙኩሉ ዋꬍድ፥ ሃꬃ ግዶራ ታና ካለꬅስ። ሃꬃይ ታዉ ጉልባታ ጋክስ። ቃስ እስ ሙኩሉ ዋꬍድ፥ ታና ሃꬃ ግዶራ ካለꬅስ። ሄ ዎደ ሃꬃይ ታዉ ፄሰ ጋክስ።
EZE 47:5 እ ቃስ እስ ሙኩሉ ዋꬍስ። ሽን ሄ ሃꬃይ ዳሮ ጪሞ ግድያ ግሾ፥ ታ ፕናናዉ ዳንዳአብከ፤ እ አስ ዋꬎና ፕናናዉ ዳንዳኦና ሻፋ ግድስ።
EZE 47:6 ሄ ኡራይ ታኮ፥ “አሳ ናአዉ፥ ሀይሳ አኬካዳ በአይ?” ያግስ። ሄሳፈ ጉየ፥ እ ታና ሻፋ ጋፃ ጉየ ዛርስ።
EZE 47:7 ታ ያ ጋክያ ዎደ ሻፋ ጋፃን ሀ ባጋራነ ያ ባጋራ ዳሮ ምꬅ ደኤይሳ በአስ።
EZE 47:8 እ ታኮ፥ “ሀ ሃꬃይ ዶሎሀ ባጋ ጎግድ፥ አራበ ዛንጋራነ ማፅነ አባን ገሌስ። ሃꬃይ ማፅነ አባ ገልያ ዎደ ማፅነ አባይ ኦራፅድ ፅሎ ሃꬅ ግዴስ።
EZE 47:9 ሻፋይ ጎግድ ብያ በሳን ዱማ ዱማ መተꬃት ደኦሶና። ሄ ሻፋይ ያራ ጎግያ ግሾነ ሄ ሃꬃ ኦራꬅድ ፅልስያ ግሾ ዳሮ ሞሎት ያን ደኦሶና። ሄሳ ግሾ ሃꬃይ ጎግያ በሳን ደእያ መተꬃት ኡባይ ደኦን ዳና።
EZE 47:10 ሞሎ ኦይክያ አሳት አባ ጋፃን ኤቃና፤ ኤንጋዳፐ ብድ ኤን ኤግላይማ ጋካናዉ ደእያ በሳይ ሞሎ ኦይካናዉ ግተ የግያ በሰ ግዳና። መደትራነ አባን ደእያ ሞሎታዳ፥ ያን ዳሮ ዱማ ዱማ ሞሎት ዳና።
EZE 47:11 ሽን አባ ጋፃን ደእያ ኤለይነ ጫፋ ሃꬃይ ማፅነ ግድድ አታናፐ አትሽን፥ ኦራፅድ ፅለና።
EZE 47:12 ሄ ሻፋ ዶናን ሀ ባጋራነ ያ ባጋራ ሜተትያ አይፈ እምያ፥ ዱማ ዱማ ቆሞ ምꬃት ደኦሶና። ኤንታ ሀይꬃይ ቆቆፈተና፤ አይፈ አጎኮና። ፆሳ ኬꬃፈ ከይያ ሃꬃይ ኤንታኮ ጎግያ ግሾ፥ ኤንቲ አጌናን አጌናን ኦራꬃ አይፈ አይፋና። ኤንቲ አይፍያ አይፈይ ካꬅ ግዳና፤ ኤንታ ሀይꬃይ ꬋለ ግዳና” ያጌስ።
EZE 47:13 ኡባ ሃርያ ጎዳይ ሀይሳዳ ያጌስ፦ “ታማነ ናምኡ እስራኤለ ዘረꬃስ ላታ ቢታ ኦꬃዳ፥ ነ ሻካና ዛዋይ ሀይሳ። ዮሰፋ ኮቻስ ናምኡ ሳም እመቶ።
EZE 47:14 ታኒ ካሰ ህንተ ማይዛታ ሀ ቢታ ላትሳናዉ ጫቃስ፤ ሀእ ህንተ ኡባይ ሻክድ ላትተ።
EZE 47:15 “ፑደሀ ባጋ ቢታ ዛዋይ ሀይሳ፦ መደትራነ አባፈ ደንድድ፥ ሄትሎናነ ሀማታ ካንꬅድ፥ ፀዳዳ ጋኬስ።
EZE 47:16 ዳማስቆፈነ ሀማታፐ ግዶን ደእያ በሮታነ ስብራይማ ካታማታ ካንꬅድ፥ ሀዉራና ዛዋን ደእያ ትኮና ካታማ ጋኬስ።
EZE 47:17 እስራኤለ ቢታ ፑደሀ ባጋ ዛዋይ ሀማታ ቢታ ፑደሀ ባጋን አግድ፥ መደትራነ አባፈ ዶሎሀ ባጋ ብድ፥ ዳማስቆ ዛዋን ደእያ ሀፃር-ኤናና ካታማ ጋኬስ።
EZE 47:18 “ዶሎሀ ባጋ ዛዋይ ሀፃር-ኤናናፐ ደንድድ፥ ዳማስቆፈነ ሀዉራናፐ ግዱዋራ ካንꬄስ። እስራኤለፐነ ጋላዳፐ ግዶን ደእያ ዮርዳኖሰ ሻፋን ዛዋትድ ማፅነ አባ ካንꬅድ ታማረ ካታማ ጋኬስ።
EZE 47:19 “ዱገሀ ባጋ ዛዋይ ታማራፐ ደንድድ፥ ማርባ ቃደሳን ደእያ ሃꬃ ጋኬስ። ያፐ ግብፀ ሻፋፐ ብድ መደትራነ አባ ጋኬስ። ሄስ ዱገሀ ዛዋ።
EZE 47:20 “ዉሎሀ ባጋ ዛዋይ መደትራነ አባ ግድድ፥ ፑደሀ ባጋራ ሀማታ ስንꬃራ ካንꬅድ ዉሎሀ ባጋ ጋኬስ።
EZE 47:21 “ሀ ቢታ እስራኤለ ዛረት ሻክድ ኤክተ።
EZE 47:22 ህንተነ ህንተ ግዶን ናአ የልድ ደእያ በተ አሳስ ላታ ቢታ ኦꬅድ ሻክተ። ኤንታ ህንተ፥ ህንተ ቢታን የለትዳ እስራኤለ አሳዳ ፄልተ። ኤንቲ እስራኤለ ኮቻታራ ታይበትድ ቢታ ሳማን ሻከትድ ኤኮ።
EZE 47:23 በተ አስ እስራኤለን ኮቻራ አዉንካ ደእኮ፥ ሄ እ ደእያ ኮቻ ግዶን እያዉ ላታ ቢታ እምተ” ያጌስ ኡባ ሃርያ ጎዳይ።
EZE 48:1 “ቢታ ሻካናዉ ማዝጋበትዳ ኮቻታ ሱንꬃይ ሀይሳ፦ ፑደሀ ባጋራ እስ ሳም ዳነ ኮቻስ እመቶ። ሄስካ ሄትሎናፐ ሀማታ ኤፍያ ኦግያ ካልድ፥ ያፐ ዳማስቆ ቢታን ደእያ ሀፃር-ኤናና ካታማ ጋኬስ። ሄስ ዶሎሀፐ ብድ ዉሎሀ ጋካናዉ ደእያ በሳስ ፑደሀ ባጋ ዛዋ ግዳና።
EZE 48:2 ዳነ ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ አሴራ ኮቻስ እመቶ።
EZE 48:3 አሴራ ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ ንፍታለመ ኮቻስ እመቶ።
EZE 48:4 ንፍታለመ ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ ምናሰ ኮቻስ እመቶ።
EZE 48:5 ምናሰ ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ ኤፍሬማ ኮቻስ እመቶ።
EZE 48:6 ኤፍሬማ ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ ሮቤላ ኮቻስ እመቶ።
EZE 48:7 ሮቤላ ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ ይሁዳ ኮቻስ እመቶ።
EZE 48:8 “ይሁዳ ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማ ዱማያ ዎꬃ። እያ ጎምፓይ ታማነ ናምኡ ክሎ ምትረነ ባጋ ግዶ። ዶሎሀፐ ዉሎሀ ጋካናዉ ደእያ አዱሳተꬃይ እስ ኮቻ ሻክን ጋክያ ሳማራ ግና። እያዉ ግዶ ግናን ፆሳ ኬꬃ ደኤስ።
EZE 48:9 “ሄ በሳፈ ኔኒ ጎዳስ ዱማያዳ ዎꬅያ በሳይ ታማነ ናምኡ ክሎ ምትረነ ባጋ አዱሰነ ታሙ ክሎ ምትረ ዳልጋ ግዶ።
EZE 48:10 ሄ በሳፈ ባጋይ ካህነታስ ዱማትዳ በሰ ግዶ፤ እ ፑደሀ ባጋራ ታማነ ናምኡ ክሎ ምትረነ ባጋ አዱሰ፤ ዉሎሀ ባጋራነ ዶሎሀ ባጋራ እቻሹ ክሎ ምትረ ዳልጋ ግዶ። ፆሳ ኬꬃይ እያዉ ግዶ ግናን ደኤስ።
EZE 48:11 ሀ ዱማትዳ በሳይ እስራኤለ አሳይ ታ ኦግያፐ ካረ ካረ ከይዳ ዎደ ኤንታራ ካረ ከይዳ ሌወታዳ ግዶና፥ አማነትድ ታዉ ኦꬅሸ ጋምእዳ፥ ጌሻ ካህነታስ፥ ሳዶቃ ያራታስ እመቶ።
EZE 48:12 ሄስ ጎዳስ ዱማትዳ ቢታፈ ኤንታዉ ዱማ ግሾ፤ እ ኡባፈ ጌሻ በሲ። ኤንታ ዛዋይ ሌወታስ ሳማን እመቶ።
EZE 48:13 “ካህነታ ዛዋራ ኦይከትድ፥ ሌወታስ አዱሳተꬃይ ታማነ ናምኡ ክሎ ምትረ ባጋ፥ ዳልጋተꬃይ እቻሹ ክሎ ምትረ ግድዳ እስ ሳም እመቶ።
EZE 48:14 ኤንቲ ሄ ቢታፈ ባይዛናዉ ዎይኮ ላማናዉ ኮሸና። ሄ ቢታይ ሎኦ ቢታ ግድያ ግሾ፥ ሀራ አሳ ኩሸን ገላናዉ በሰና፤ ጎዳስ እ ጌሻ በሰ።
EZE 48:15 “አትዳ ናምኡ ክሎ ምትረነ ባጋ ዳልጋነ ታማነ ናምኡ ክሎ ምትረነ ባጋ አዱሳ በሳይ ካታማ አሳ ኡባይ ኬꬃስነ መሄ ሄምያ በሰ ግዶ፤ ካታማይ ሄ ቢታ ግዶ ግናን ደኦ።
EZE 48:16 ሄ ካታማይ ኦይዱ ማዛነራ ደኤስ። ፑደሀ ባጋይ ኦይዱ ሙኩሉነ እቻሹ ፄቱ ዋꬋ፤ ዱገሀ ባጋይ ኦይዱ ሙኩሉነ እቻሹ ፄቱ ዋꬋ፤ ዶሎሀ ባጋይ ኦይዱ ሙኩሉነ እቻሹ ፄቱ ዋꬋ፤ ዉሎሀ ባጋይ ኦይዱ ሙኩሉነ እቻሹ ፄቱ ዋꬋ።
EZE 48:17 ካታማስ ሄንꬃ ጋደይ ደኦ፤ ሄ ጋደይ ፑደሀ ባጋራ፥ ዱገሀ ባጋራ፥ ዶሎሀ ባጋራነ ዉሎሀ ባጋራ ናምኡ ፄታነ እሻታሙ ዋꬋ ዳልጋ ግዶ።
EZE 48:18 ፆሳ ኬꬃይ ኬፀትድ ስምን፥ ጌሻ በሳን አትዳ በሳይ ዶሎሀ ባጋራ አዱሳተꬃይ እቻሹ ክሎ ምትረ፤ ዉሎሀ ባጋራ አዱሳተꬃይ እቻሹ ክሎ ምትረ ግዶ። አትዳ ቢታይ ሄ ካታማን ደእያ አሳስ ጎሻ ቢታ ግዳና።
EZE 48:19 ሄ ካታማን ደእያ እስራኤለ ዛረ ግድዳ ኦንካ ሄ ቢታ ጎ ያናዉ ዳንዳኤስ።
EZE 48:20 ህንተ ዱማያ በሳ ኦይዱ ማዛነይ ታማነ ናምኡ ክሎ ምትረነ ባጋ አዱቆ። ሄ በሳይ ካታማይ ኬፀትዳ በሳነ ጌሻ በሳ ጉጄስ።
EZE 48:21 “ጌሻ በሳፈነ ካታማ በሳፈ አትዳ ቢታይ ሀላቃ ግሾ ግዶ። ሄስካ ታማነ ናምኡ ክሎ ምትረነ ባጋ ግድዳ ጌሻ በሳፈ ብድ ዶሎሀ ባጋ ዛዋ ጋኬስ። ዉሎሀ ባጋን ደእያ ታማነ ናምኡ ክሎ ምትረ ግድዳ ካታማ ቢታይ ዉሎሀ ባጋ ዛዋ ጋኬስ። ሄሳዳ ሀንድ ጌሻ በሳይነ ፆሳይ ኬꬃይ ግዶን ግዳና።
EZE 48:22 ሄሳ ግሾ፥ ሌወታ ቢታይነ ካታማ ቢታይ ሀላቃስ እመትዳ ቢታፈ ግዶን ግዳና። ሄ ሀላቃ ቢታይ ፑደሀ ባጋራ ይሁዳ ላታን፥ ጋርሳ ባጋራ ብንያመ ላታን ዛዋቴስ።
EZE 48:23 “አትዳ ኮቻታስ ቢታይ ሀይሳዳ ሀንድ ሻከትስ። ዶሎሀፐ ዉሎሀ ጋካናዉ ደእያ እስ ሳማይ ብንያመ ኮቻስ እመቶ።
EZE 48:24 ብንያመ ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ ስሞና ኮቻስ እመቶ።
EZE 48:25 ስሞና ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ ይሳኮራ ኮቻስ እመቶ።
EZE 48:26 ይሳኮራ ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ ዛብሎና ኮቻስ እመቶ።
EZE 48:27 ዛብሎና ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ ጋደ ኮቻስ እመቶ።
EZE 48:28 ጋደ ዱገሀ ዛዋይ ታማራ ካታማፐ ደንድድ፥ ማርባ ቃደሳን ደእያ ፑልቷ ጋክድ፥ ግብፀ ሻፋ ካልድ፥ መደትራነ አባ ጋኬስ።
EZE 48:29 “ህንተ እስራኤለ አሳስ ሻካና ቢታይ ሀይሳ፤ ሄስ ኤንታ ግሹዋ” ያግድ ኡባ ሃርያ ጎዳይ ኦድስ።
EZE 48:30 ካታማፐ ከይያ ፐንገት ሀይሳታ። ፑደሀ ባጋራ ደእያ ኦይዱ ሙኩሉነ እቻሹ ፄቱ አዱቅያ ፐንግያፈ ዶምድ፥
EZE 48:31 ካታማ ፐንገት እስራኤለ ኮቻታ ሱንꬃን ፄገታና። ፑደሀ ባጋራ ደእያ ሄꬑ ፐንገት ሮቤላ ፐንገ፥ ይሁዳ ፐንገነ ሌወ ፐንገ ግዳና።
EZE 48:32 ዶሎሀ ባጋራ ኦይዱ ሙኩሉነ እቻሹ ፄቱ ዋꬋ አዱቅያ ሄꬑ ፐንገት፥ ዮሰፋ ፐንገ፥ ብንያመ ፐንገነ ዳነ ፐንገ ግዳና።
EZE 48:33 ዱገሀ ባጋራ ኦይዱ ሙኩሉነ እቻሹ ፄቱ አዱቅያ ሄꬑ ፐንገት፥ ስሞና ፐንገ፥ ይሳኮራ ፐንገነ ዛብሎና ፐንገ ግዳና።
EZE 48:34 ዉሎሀ ባጋራ ኦይዱ ሙኩሉነ እቻሹ ፄቱ ዋꬋ አዱቅያ ሄꬑ ፐንገት፥ ጋደ ፐንገ፥ አሴራ ፐንገነ ንፍታለመ ፐንገ ግዳና።
EZE 48:35 “ካታማ ዩሾይ ኩመꬅ ዋꬍን፥ ታማነ ሆስፑን ሙኩሉ ዋꬋ ግዳና። ሄ ዎደፐ ዶምድ ሄ ካታማይ፥ ‘ጎዳይ ያን ደኤስ’ ጌተትድ ፄገታና” ያጌስ።
DAN 1:1 ይሁዳ ካዎይ እዮአቄም ካዎትዳ ሄꬓንꬆ ላይꬃን ባብሎነ ካዎይ ናቡካዳናፆር የሩሳላመ ካታማ ቦላ ደንድ ካታማ ተቅስ።
DAN 1:2 ጎዳይ ይሁዳ ካዋ እዮአከመነ ፆሳ ኬꬃን ደእያ ሚሸታፐ ባጋ፥ እያ ኩሸን አꬅድ እሚስ። እ ሄ ሚሸታ ሳናኦራ ቢታን ደእያ ባ ኤቃ ፆሳታ ኬꬅ ኤፍድ፥ ሚሸ ምንጅያ ኬꬃን ዎꬅስ።
DAN 1:3 ካዎይ፥ አስፋናዛ ጌተትያ ባ ኦሳንቾታ ሀላቃ ሀይሳዳ ያግድ ኪትስ፦ “እስራኤለ አሳ ግዶፈ ካዎ ኮቸ ግድዳይሳታነ ግታ አሳታ ኮቸ ግድዳይሳታ ዶራ።
DAN 1:4 ዶረታና ናአተꬃት፥ ቦረይ ባይናይሳታ፥ ማላ ሎኦታ፥ ትምርተ ኤለስድ ኤካናዉ ዳንዳኤይሳታ፥ አኬካንቾታ፥ ኤራተꬅ ኩምዳይሳታነ ካዎ ጋꬎን ኦꬃናዉ ዳንዳኤይሳታ ግዳናዉ በሴስ። ኤንታ ባብሎነ ዶናነ ፃፎ ታማርሳ” ያግስ።
DAN 1:5 ኤንቲ ማና ካꬃነ ኡያና ዎይነ ኡሻ ካዋ ካꬃፈነ ኡሻፈ ጋላስ ጋላስ እማና መላ ካዎይ ኪትስ። ሄꬑ ላይꬅ ሎህዳፐ ጉየ ካዋ ስን ሺቅድ ኦሶ ዶማና መላ ቆፋ ኩይስ።
DAN 1:6 ዶረትዳይሳታ ግዶፈ ይሁዳ ኮቸ ግድዳ ዳነላ፥ አናና፥ ምሳኤላነ አዛራ ጌተተይሳት ደኦሶና።
DAN 1:7 ካዋ ኦሳንቾታ ሀላቃይ ኤንታ ሱንꬃ ላምድ፥ ዳነላ ብልፃሶራ፥ አናና ስድራቃ፥ ምሳኤላ ምሳቃ፥ አዛራ አብዳናጎ ግድ ሱንꬅስ።
DAN 1:8 ዳነል ካዋ ካꬃ ምድነ ዎይነ ኡሻ ኡይድ፥ ባና ቱንሶና መላ ባ ዎዛናን ቆፋ ቃችድ፥ ሄ ቆፋ ኤካናዳ፥ ካዋ ኦሳንቾታ ሀላቃ ዎስስ።
DAN 1:9 ፆሳይ፥ ኦሳንቾታ ሀላቃ ስንꬃን ዳነላስ ሳባነ ቃ እሚስ።
DAN 1:10 ግዶሽን፥ ኦሳንቾታ ሀላቃይ ዳነላኮ፥ “ህንተዉ ሀ ካꬃነ ኡሻ ኪትዳ ታ ጎዳ፥ ካዋ ያያይስ። ህንተ ላገ ግድዳ ናአተꬃታ ሶምኡዋፈ ህንተ ሶምኦይ ግልቅድ በንትኮ፥ ህንተ ጋሶን ካዎይ ታና ዎꬋና” ያግስ።
DAN 1:11 ኦሳንቾታ ሀላቃይ ሹምን ዳነላ፥ አናና፥ ምሳኤላነ አዛራ ናግያ አድያኮ፥ ዳነል ሀይሳዳ ያግስ፦
DAN 1:12 “ማናዉ ኑስ አታክልተ፥ ኡያናዉ ሃꬃ ፃላላ እማዳ፥ ኑና ነ አይለታ ታሙ ጋላስ ፓጫ።
DAN 1:13 ያታዳ፥ ኑ ሶምኡዋነ ካዎ ካꬃ ምያ ናአተꬃታ ሶምኡዋ ፄላዳ፥ ኑና ነ አይለታ ነዉ በንትዳይሳዳ ኦꬃ” ያግስ።
DAN 1:14 እ፥ ሄሳ ኤክድ ታሙ ጋላስ ኤንታ ፓጭስ።
DAN 1:15 ታሙ ጋላሳፐ ጉየ፥ ካዋ ካꬃ ምዳ ናአተꬃታ ኡባፈ ኤንታ ሶምኦይ ጪይን፥ ሞꬍድ በንትዶሶና።
DAN 1:16 እ፥ ኤንታዉ ጊግዳ ካꬃነ ዎይነ ኡሻ ድግድ አታክልተ እሚስ።
DAN 1:17 ሀ ኦይዱ ናአተꬃታስ ፆሳይ ኤራነ ኡባ ቆሞ ፁፈነ ትምርተ ኤክያ አኬካ እሚስ። ዳነል ቆንጨꬅነ አሙሆ ብርሸꬅ ኤሬስ።
DAN 1:18 ካዎይ፥ ናአተꬃት ባኮ ገላናዳ ኪትዳ ዎደይ ጋክን፥ ኦሳንቾታ ሀላቃይ ኤንታ ናቡካዳናፆራ ስን ኤህስ።
DAN 1:19 ካዎይ፥ ኤንታ ኦድስያ ዎደ ዳነላ፥ አናና፥ ምሳኤላነ አዛራ መላ አስ ኤንታ ግዶን በንትቤና። ያትን፥ ኤንቲ ካዋስ ኦꬃናዉ ገልዶሶና።
DAN 1:20 ካዎይ ኤንታ ኦይችዳ አይ ጭንጫተꬃነ አኬካ ኦይሻን፥ እያ ካዎተꬃን ደእያ ማሮታፐነ ብታንቾታፐ ኤንቲ ታሙ ኩሸ አꬍድ በንትዶሶና።
DAN 1:21 ዳነል፥ ካዎይ ቅሮስ ካዎትዳ ኮይሮ ላይꬃ ጋካናዉ ጋምእስ።
DAN 2:1 ናቡካዳናፆር ካዎትዳ ናምአንꬆ ላይꬃን አሙሆ አሙህስ። ሄ አሙሆይ እያ ዳጋንꬅን፥ ꬍስኮይ እያ ኤኮና እፅስ።
DAN 2:2 ሄሳ ግሾ፥ እ አሙህዳ አሙሁዋ እያዉ ኦዳና መላ ማሮት፥ ብታንቾት፥ ሙሩነይሳትነ ፆልንቶ ታይበይሳት ያና መላ ካዎይ ኪትስ። ኤንቲ ይድ እያ ስንꬃን ኤቅዶሶና።
DAN 2:3 ካዎይ ኤንታኮ፥ “ታና ዳጋንꬅያ አሙሆ አሙሀስ፤ ሄ አሙሆይ አይበኮ ኤራናዉ ኮያይስ” ያግስ።
DAN 2:4 ፆልንቶ ታይበይሳት ሶረ ዶናን፥ “ካዋዉ፥ መርናዉ ካዎታ! ነ አሙሁዋ ኑስ ነ አይለታስ ኦዳ፤ ኑ ነዉ እያ ብርሸꬃ ኦዳና” ያግዶሶና።
DAN 2:5 ካዎይ ኤንታኮ፥ “ህንተ ሀ አሙሁዋነ እያ ብርሸꬃ ታና ኤርሶና እፅኮ፥ ታ ህንተና ቃንፃና፤ ህንተ ኬꬃይ ቡረ የግያ በሲ ግዳናይሳ ታ ህንተዉ ምንꬃዳ ኦዳይስ።
DAN 2:6 ሽን ህንተ አሙሁዋነ እያ ብርሸꬃ ታዉ ኦድኮ፥ እሞታ፥ ዎይቶነ ዳሮ ቦንቾ ታፐ ደማና። ሄሳ ግሾ፥ አነ አሙሁዋነ እያ ብርሸꬃ ታና ኤርስተ” ያግስ።
DAN 2:7 ኤንቲ ዛሪድ፥ “ካዎይ አሙሁዋ ኑስ ባ አይለታስ ኦዶ፤ ኑ እያ ብርሸꬃ ኤርሳና” ያግዶሶና።
DAN 2:8 ካዎይ ዛሪድ፥ “ታ ምኖ ቆፋ ህንተ ኤርያ ግሾ ዎደ አዱሳናዉ ህንተ ኮየይሳ ታ ኤራይስ።
DAN 2:9 ህንተ አሙሁዋ ታዉ ኦዶና እፅኮ፥ እስ ፕርድ ህንተና ናጌስ። ሀኖታይ ላመታና ግድ ህንተ ኡፋይስ ኦꬅያ ግሾ ታዉ ዎርዶነ ገነ ቃላ ኦዳናዉ ማቀትደታ። ሄሳ ግሾ፥ አሙሁዋ ታዉ ኦድተ። ያትኮ፥ ህንተ እያ ብርሸꬃ ኤርሳናዉ ዳንዳኤይሳ ታ ኤራና” ያግስ።
DAN 2:10 ፆልንቶ ታይበይሳት ዛሪድ፥ “ካዎይ ኦይችያ ኦይሻ ዛራናዉ ዳንዳእያ እስ አስካ ቢታን ባዋ። አይ ግታነ ዎልቃማ ካዎይ ማሮታ፥ ብታንቾታነ ፆልንቶ ታይበይሳታ ሄሳ መላባ ኦይችድ ኤረና።
DAN 2:11 ካዎይ ኦይችዳ ኦይሾይ ዴፆ፤ አሳ ግዶን ዶና ፆሳታፐ አትሽን፥ ሄሳ ካዋስ ቆንጭሳናዉ ዳንዳኤይ ባዋ” ያግዶሶና።
DAN 2:12 ካዎይ ዳሮ ይሎትድ፥ ባብሎነን ደእያ ጭንጫታ ኡባ ዎꬋናዳ ኪትስ።
DAN 2:13 ጭንጫታ ዎꬋናዉ አዋጆይ ከይስ፤ ዳነላነ እያ ላገታ ዎꬋናዉ አስ ኪተትስ።
DAN 2:14 ካዋ ናገይሳታ ሀላቃይ አርዮክ፥ ባብሎነን ደእያ ጭንጫታ ዎꬋናዉ ከይያ ዎደ ዳነል እያ ጭንጫተꬃንነ ሂላን ኦድስስ።
DAN 2:15 እ ካዋ ናገይሳታ ሀላቃ አርዮካ፥ “ካዎይ ሀይሳ መላ ኢታ አዋጆ አይስ ከስዴ?” ግድ ኦይችስ። አርዮክ ሀኖታ ዳነላስ ኦድስ።
DAN 2:16 ዳነል ካዋኮ ገልድ፥ አሙሁዋ ብርሸꬃ ኤርሳናዉ ባዉ ዎደይ እመታና መላ ዎስስ።
DAN 2:17 ሄሳፈ ጉየ ዳነል ባ ሶ ስሚድ፥ ባ ሄꬑ ላገታስ፥ አናንያስ፥ ምሳኤላስነ አዛርያስ ሀኖታ ኦድስ።
DAN 2:18 ኤንቲ ባብሎነን ደእያ ሀንኮ ጭንጫታራ እስፈ ሀይቆናዳ፥ ሳሎ ፆሳይ ማሮታ ኦꬅድ፥ ሀ ፁራ ኤንታዉ ቆንጭሳናዳ ዎሳና መላ ኤንታዉ ኦድስ።
DAN 2:19 ሄ ቃማ ፁራይ ዳነላስ ቆንጭስ። ዳነል ሳሎ ፆሳ ሀይሳዳ ያግድ ጋላትስ፤
DAN 2:20 “ጭንጫተꬅነ ዎልቅ ፆሳሳ ግድያ ግሾ፥ እያ ሱንꬃይ መርናፐ መርና ጋካናዉ ጋላተቶ።
DAN 2:21 እ ዎደታነ አጌናታ ላሜስ፤ ካዎታ አራታን ኡትሴስ፤ አራታፐ ድጌስ። ጭንጫታስ ጭንጫተꬅ እሜስ፤ አኬካንቾታስ ኤራ እሜስ።
DAN 2:22 እ ፁራነ ጌምዳባ ቆንጭሴስ፤ እ ꬉማን ደእያባ ኤሬስ፤ ፖኦይ እያራ ደኤስ።
DAN 2:23 ታ ማይዛታ ፆሳዉ፥ ታ ነና ጋላታይስ፤ ሳባይስ። ነ ታዉ ጭንጫተꬅነ ዎልቃ እማዳሳ፤ ኑኒ ነና ኦይችዳባ ታና ኤርሳዳሳ፤ ካዋ አሙሁዋ ኑና ኤርሳዳሳ” ያግስ።
DAN 2:24 ሄሳፈ ጉየ፥ ዳነል ባብሎነን ደእያ ጭንጫታ ዎꬍሳናዉ ካዉዋፐ ኪታ ኤክዳ፥ አርዮካኮ ብድ፥ “ጭንጫታ ዎꬎፓ፤ ታና ካዋኮ ገልሳ፤ ታኒ እያ አሙሁዋ ብርሸꬃ እያ ኤርሳና” ያግስ።
DAN 2:25 አርዮክ ኤለስድ ዳነላ ካዋኮ ገልስድ፥ ካዋኮ፥ “ይሁዳፐ ድኤትድ ይዳ አሳፐ ካዋ አሙሁዋ ብርሸꬃ ኤርሳናዉ ዳንዳእያ አሰ ደማስ” ያግስ።
DAN 2:26 ካዎይ ብልፃሶራ ጌተትያ ዳነላ፥ “ታ አሙህዳ አሙሁዋነ እያ ብርሸꬃ ታና ኤርሳናዉ ዳንዳአይ?” ግድ ኦይችስ።
DAN 2:27 ዳነል ሀይሳዳ ያግድ ዛርስ፦ “ካዋዉ፥ ነ ኦይችዳ ፁራ ቆንጭሳናዉ ዳንዳእያ ጭንጫ አስ፥ ማሮይ፥ ብታንቾይነ፥ ሙሩንያ አስ ባዋ።
DAN 2:28 ሽን ፁራ ቆንጭስያ እስ ፆሲ ሳሎን ደኤስ። ዉርሰꬃ ዎደታን ሀናናባ እ፥ ነና በስስ። ነ አርሳን ዝንአዳ፥ ነ በእዳ አሙሆይነ ቆንጨꬃይ ሀይሳ።
DAN 2:29 “ካዋዉ፥ ነ አርሳን ዝንአዳ፥ ስንꬃፈ ያናባ ቆፓዳሳ። ሄ ዎደ ፁራ ቆንጭስያ ፆሳይ ስንꬃፈ ሀናናባ ነና በስስ።
DAN 2:30 ሀ ፁራይ ታዉ ቆንጭዳይ፥ ታ ሀራ አሳፐ ጭንጫ ግድዳ ግሾ ግደና። ሽን ኔኒ ካዎይ፥ አሙሁዋ ብርሸꬃ ኤራናዳነ ነ ሁጰን ስመረትያ ቆፋ አኬካና መላሳ።
DAN 2:31 “ካዋዉ፥ ነ ዳሮ ግታ፥ ጶልያነ ፄላናዉ ያሽያ ምስለይ ነ ስንꬃን ኤቅዳይሳ በአዳሳ።
DAN 2:32 ሄ ምስልያ ሁጰይ፥ ዋላህ ባይና ዎርቃፈ፥ እያ ትራይነ ኩሸት ብራፐ፥ ኡሎይነ ዎድረት ናሰ ብራታፐ፥
DAN 2:33 ሱይለይ ብራታፐነ ቶሆ ያቻ ባጋይ ብራታፐ ባጋይ ቢታፈ መትስ።
DAN 2:34 ኔኒ ምስልያ ፄልያ ዎደ፥ እስ ሹች አሳ ኩሸይ ቦቾና ꬎቆለትድ፥ ብራታፐነ ቢታፈ መትዳ ምስልያ ቶሆ ያቻ ቦላ ዎꬍድ ጋጭስ።
DAN 2:35 ሄ ዎደ ብራት፥ ኡርቅ፥ ናሰ ብራታይ፥ ብርነ ዎርቀይ ኡባይ ጋጨትድ፥ ቦነን ዉዱማን ደእያ ሱላ መላ ግድን፥ አይኮይካ አቶናሽን ጫርኮይ ፕትድ ኤፍስ። ሽን ምስልያ ቦላ ዎꬍዳ ሹቻይ ዙማ ግድድ ሳኣ ኩምስ።
DAN 2:36 “አሙሆይ ሀይሳ፤ ሀእ ብርሸꬃ ኑኒ ነዉ ኦዳና።
DAN 2:37 ካዋዉ፥ ኔኒ ካዎታ ካዎ። ሳሎ ፆሳይ ነዉ ካዎተꬅነ ዎልቃ፥ ምኖተꬅነ ቦንቾ እሚስ።
DAN 2:38 ኔኒ ቢታ ኡባ ሃራናዳ ኦꬅስ፤ አሰ፥ ዶአነ ሳሎ ካፎ ነ ኩሸን ዎꬅስ። ሄሳ ግሾ፥ ዎርቃ ሁጰይ ነና።
DAN 2:39 “ኔፐ ጉየ፥ ምኖተꬃን ነና ጋኮና ሀራ ካዎተꬅ ደንዳና። ካልድ፥ ቢታ ኡባ ሃርያ፥ ናሰ ብራታ ግድያ፥ ሄꬓንꬆ ካዎተꬅ ደንዳና።
DAN 2:40 ዉርሰꬃን ኡባ ጋጭድ ሊቅስያ ብራታዳ ምንዳ ኦይዳንꬆ ካዎተꬅ ደንዳና። ብራት ኡባ ጋጭድ ሊቅሰይሳዳ እ፥ ባፐ ካሰ ደንድዳ ካዎተꬃታ ጋጭድ ሊቅሳና።
DAN 2:41 “ቶሆትነ ቶሆ ብራት ባጋይ ብራታፐ፥ ባጋይ ቢታፈ መትዳይሳ ነ በእዳይሳዳ፥ ሄ ካዎተꬃይ ሻከትዳ ካዎተꬅ ግዳና። ብራት ቢታራ ዋላከትን፥ ኔኒ በእዳይሳዳ ባጋይ ብራታዳ ምኖ ግዳና።
DAN 2:42 ቶሆ ብራት ባጋይ ብራታ፥ ባጋይ ቢታ ግድዳይሳዳ፥ ሀ ካዎተꬃስ ባጋይ ምኖ፥ ባጋይ ሹጎ ግዳና።
DAN 2:43 ብራት ቢታራ ዋላከትን ኔኒ በእዳይሳዳ ሄ ናምኡ ባጋ አሳይ ገሎንነ ኤኮን ዋላከታና። ሽን ብራት ቢታራ ዋላከታናዉ ዳንዳኦናይሳዳ ኤንቲ እስኖ ግድድ ጋምአናዉ ዳንዳኦኮና።
DAN 2:44 “ሄ ካዎታ ላይꬃን፥ ሳሎ ፆሳይ ኩንዶና፥ ሀራ አሳስ አꬍድ እመቶና ካዎተꬃ ኤሳና። ሄ ኤቅዳ ካዎተꬃይ፥ ሄ ካዎተꬃታ ኡባ ጋጭድ ꬋይሳና፤ ሽን እ መርናዉ ኤቅድ ዳና።
DAN 2:45 አሳ ኩሸይ ቦቾና ዙማፐ ꬎቆለትድ፥ ዎꬍድ፥ ብራታፐ፥ ናሰ ብራታፐ፥ ቢታፈ፥ ብራፐነ ቢታፈ መትዳ ምስልያ ጋጭዳ ሹቻ ብርሸꬃይ ሄ ካዎተꬃ። “ግታ ፆሳይ ስንꬃፈ ሀናናባ ካዋ በስስ። አሙሆይ ቱማ፤ ብርሸꬃይካ አማነትዳይሳ” ያግድ ዛርስ።
DAN 2:46 ሄሳፈ ጉየ፥ ካዎይ ናቡካዳናፆር ዳነላ ቦንችድ፥ ጉፋንስ፤ አሳይ እያ ስንꬃን ያርሾ ያርሻና መላነ እፃነ ጩይሳና መላ ኪትስ።
DAN 2:47 ካዎይ ዳነላ፥ “ቱማ ነ ፆሳይ ፆሳታ ፆሰ፥ ካዎታ ጎዳነ ፁራ ቆንጭስያ ፆሰ። ኔኒ ሀ ፁራ ቆንጭሳናዉ ዳንዳእዳይ ሄሳ ግሾሳ” ያግስ።
DAN 2:48 ሄሳፈ ጉየ፥ ካዎይ ዳነላ አꬅድ ቦንችስ፤ ዳሮነ አልኦ እሞታታ እያዉ እሚስ። ባብሎነ ቢታ ሃርያ አሰ ኦꬅስ፤ ባብሎነን ደእያ ጭንጫታ ኡባ ቦላ ሀላቃ ኦꬅድ ሹምስ።
DAN 2:49 ዳነል ኦይሻን፥ ካዎይ ስድራቃ፥ ምሳቃነ አብዳናጎ ባብሎነ ቢታ አይሰይሳታ ኦꬅድ ሹምስ፤ ሽን ዳነል ካዎ ኬꬃን ጋምእስ።
DAN 3:1 ካዎይ ናቡካዳናፆር አዱሳተꬃይ ኡሱፑን ታሙ ዋꬋ፥ ጎምፓይ ኡሱፑን ዋꬋ ግድያ ምስለ ዎርቃፈ መꬍድ፥ ባብሎነ ቢታን ዱራ ደምባን ኤስስ።
DAN 3:2 ሄ ምስልያ አንጅሳናዉ ያና መላ፥ ካዎ ሞርናታ፥ ሹማታ፥ ቢታ አይሰይሳታ፥ ካዋ ዞረይሳታ፥ ሚሸ ኬꬃን ኦይሳታ፥ ፕርዳ ዳይናታ፥ ህገ ኤራንቾታነ አዉራጃ ሹማታ ፄግስ።
DAN 3:3 ሄ ዎደ ካዎ ሞርናት፥ ሹማት፥ ቢታ አይሰይሳት፥ ካዋ ዞረይሳት፥ ሚሸ ኬꬃን ኦይሳት፥ ፕርዳ ዳይናት፥ ህገ ኤራንቾትነ አዉራጃ ሹማት ሺቅድ፥ ካዎይ ናቡካዳናፆር ኤስዳ ምስልያ ስንꬃን ኤቅዶሶና።
DAN 3:4 ሄ ዎደ አዋጅያ አደይ ባ ቃላ ꬎቁ ኦꬅድ፥ ሀይሳዳ ያግስ፦ “ህንተኖ፥ አሳዉ፥ ካዎተꬃቶ፥ ዱማ ዱማ ዶና ኦደተይሳቶ፥
DAN 3:5 ኡባይ ሞይዘ፥ ሱሱልኤ፥ ማስንቆ፥ ዲꬅ፥ ዛየነ ሀራ የꬃ ሚሸ ግርስ ስእያ ዎደ፥ ካዎይ ናቡካዳናፆር ኤስዳ ዎርቃ ምስልያስ ጉፋንድ ጎይንተ።
DAN 3:6 ምስልያ ስንꬃን ጉፋንድ ጎይኖና ኦንካ፥ ሄ ሳትያን ኤፅያ እቶነ ታማን ሆለታና” ያግስ።
DAN 3:7 ሄሳ ግሾ፥ አሳይ፥ ካዎተꬃትነ ዱማ ዱማ ዶና ኦደትያ ኡባይ ሞይዘ፥ ሱሱልኤ፥ ማስንቆ፥ ዲꬅ፥ ዛየነ ሀራ የꬃ ሚሸ ግርስ ስእዳ ዎደ ቢታን ጉፋንድ፥ ካዎይ ናቡካዳናፆር ኤስዳ ዎርቃ ምስልያስ ጎይንዶሶና።
DAN 3:8 ሄ ዎደ ባብሎነ አሳታፐ እሶት እሶት አይሁደታ ሞትዶሶና።
DAN 3:9 ኤንቲ ካዋ ናቡካዳናፆራኮ ሀይሳዳ ያግዶሶና፤ “ካዋዉ፥ መርናዉ ካዎታ።
DAN 3:10 ካዋዉ፥ ነ ሞይዘ፥ ሱሱልኤ፥ ማስንቆ፥ ዲꬅ፥ ዛየነ ሀራ የꬃ ሚሸ ግርስ ስእያ ኦንካ ጉፋንድ፥ ዎርቃ ምስልያስ ጎይናና መላ፥
DAN 3:11 ቢታን ጉፋንድ ጎይኖና አስ ደእኮ፥ እቶነ ታማን ሆለታና መላ አዋጆ ከሳዳሳ።
DAN 3:12 ሽን ካዋዉ፥ ኔኒ ባብሎነ ቢታን ሹምዳ አይሁደት፥ ስድራቅ፥ ምሳቅነ አብዳናጎይ ነ ኪታ እፅዶሶና። ነ ፆሳታስ ኦꬆኮና፤ ቃስ ነ ኤስዳ ዎርቃ ምስልያካ ጎይኖኮና” ያግዶሶና።
DAN 3:13 ናቡካዳናፆር ሄሳ ስእዳ ዎደ፥ ይሎ ኤፅድ፥ ስድራቃ፥ ምሳቃነ አብዳናጎ ኤሀና መላ ኪትስ፤ ኤንታ ካዋ ስን ኤህዶሶና።
DAN 3:14 ናቡካዳናፆር ኤንታ ሀይሳዳ ያግስ፦ “ስድራቃ፥ ምሳቃ፥ አብዳናጎ፥ ህንተ ታ ፆሳታስ ኦꬅቦናይስነ ታ ኤስዳ ዎርቃ ምስልያ ጎይንቦናይስ ቱሜ?
DAN 3:15 ሀእ ሞይዘ፥ ሱሱልኤ፥ ማስንቆ፥ ዲꬅ፥ ዛየነ ሀራ የꬃ ሚሸ ግርስ ስእያ ዎደ ታ ኤስዳ ምስልያስ ጉፋንድ ጎይንኮ ሎኦ። ሽን ህንተ ጎይኖና እፅኮ፥ ኤለስድ ኤፅያ እቶነ ታማን ሆለታና። አይ ፆስካ ህንተና ታ ኩሸፐ አሸና” ያግስ።
DAN 3:16 ስድራቅ፥ ምሳቅነ አብዳናጎይ ዛሪድ፥ “ካዋዉ፥ ናቡካዳናፆራ፥ ሀይሳስ ኑ ነዉ ዛሮ እማናዉ በሰና።
DAN 3:17 ካዋዉ፥ ኑ ኤፅያ እቶነ ታማን ሆለትያኮካ፥ ኑ እያዉ ኦꬅያ ፆሳይ ታማፐ ኑና አሻናዉ ዳንዳኤስ። ቃስ ካዋዉ፥ እ ኑና ነ ኩሸፐ አሻና።
DAN 3:18 ሽን ካዋዉ፥ እ ኑና አሾና እፅኮካ፥ ኑኒ ነ ፆሳታስ ኦꬆናይሳነ ነ ኤስዳ ዎርቃ ምስልያ ጎይናናይሳ ኤራ” ያግዶሶና።
DAN 3:19 ሄ ዎደ ናቡካዳናፆር ስድራቃ፥ ምሳቃነ አብዳናጎ ቦላ ይሎ ኤፅን፥ እያ ሶምኦይ ላመትስ። ታማይ ካሰ ኤፀይሳፈ ላፑን ኩሸ አꬍድ ኤፃና መላ ኪትስ።
DAN 3:20 ስድራቃ፥ ምሳቃነ አብዳናጎ ቃችድ፥ ኤፅያ እቶነ ታማን ሆላና መላ፥ ባ ኦላንቾታ ግዶፈ ምኖ አሳታ ኪትስ።
DAN 3:21 ኤንቲ ባንታ አፍላራ፥ ሱርያራ፥ ሁጰ ፃꬃራነ ሀራ ማኦ ኡባራ ደእሽን፥ ኤፅያ እቶነ ታማን ሆልዶሶና።
DAN 3:22 ካዋ ኪታይ ዳሮ ኤሶ ግድዳ ግሾነ እቶነ ታማይ ካሰፐ አꬍድ ኤፅያ ግሾ፥ ስድራቃ፥ ምሳቃነ፥ አብዳናጎ ታማን ሆልዳ፥ ምኖ አሳታ ታማ ላጮይ ዎꬍስ።
DAN 3:23 ሀ ሄꬑ ቃሸትዳ አሳት፥ ስድራቅ፥ ምሳቅነ አብዳናጎይ፥ ኤፅያ እቶነ ታማን ዎꬍዶሶና።
DAN 3:24 ሄሳፈ ጉየ፥ ካዎይ ናቡካዳናፆር ማላለትድ፥ ኤሶን ደንድ ኤቅድ፥ “ኑ ቃችድ ኤፅያ እቶነ ታማን የግዳ አሳት ሄꬓ ግዶኮናዬ?” ያግድ ባና ዞረይሳታ ኦይችስ። ኤንቲ፥ “ካዋዉ፥ ኤ፥ ቱማ ሄꬓ” ያግድ ዛርዶሶና።
DAN 3:25 ካዎይ ዛሪድ፥ “ቃሾፐ ብርሸትድ፥ ታማ ግዶን ያነ ሃነ ሄመትያ፥ ታማይ አይኮካ ቦቾና ኦይዱ አሳታ በአይስ፤ ኦይዳንꬆይ ፆሳታ ናአ ዳኔስ” ያግስ።
DAN 3:26 ናቡካዳናፆር ኤፅያ እቶነ ታማ ማታ ሺቅድ፥ ባ ቃላ ꬎቁ ኦꬅድ፥ “ኡባፈ ꬎቃ ፆሳ ኦሳንቾቶ፥ ስድራቃ፥ ምሳቃ፥ አብዳናጎ፥ ከይድ ሃ ዪተ!” ያግድ ፄግስ። ስድራቅ፥ ምሳቅነ አብዳናጎይ ታማ ግዶፈ ከይዶሶና።
DAN 3:27 ካዉዋፐ ጋርሳራ ቢታ አይሰይሳት፥ ሞርናት፥ ሹማትነ ካዋ ዞረይሳት ኤንታኮ ሺቅዶሶና። ታማይ ኤንታ አሳተꬃ ቦችቦናይሳ፥ ኤንታ ሁጰ ብናናፐ እሶይካ ፁገትቦናይሳ፥ ኤንታ ማኦይካ ሜተትቦናይሳነ ታማ ፔኖይ ኤንታ ቦላ ባይናይሳ በእዶሶና።
DAN 3:28 ሄሳፈ ጉየ፥ ናቡካዳናፆር ሀይሳዳ ያግስ፦ “ስድራቃ፥ ምሳቃነ አብዳናጎ ፆሳይ ጋላተቶ። እ፥ ባ ኪታንቹዋ ኪትድ፥ ባናን አማነትዳ፥ ባ አይለታ አሽስ። ኤንቲ ካዋ ኪታ እፅድ፥ ባንታ ፆሳፈ አትሽን፥ ሀራ ፆሰ ጎይናናፐ ሀይቃናዉ ዶስዶሶና።
DAN 3:29 ሄሳ ግሾ፥ ሀራ አይ ፆስካ ሀይሳዳ ኦꬅድ አሰ አሾና ግሾ፥ ስድራቃ፥ ምሳቃነ አብዳናጎ ፆሳ ቶችድ ኦደትያ አይ አስካ፥ ዎይኮ አይ ካዎተꬅካ፥ ዎይኮ ዱማ ዱማ ዶናን ኦደትያ አይ ኮቻይካ ቃንፀታና መላ ኤንታ ኬꬃይካ ላለትድ፥ ፕቶ ዶረ ግዳና መላ ታኒ ኪታስ” ያግስ።
DAN 3:30 ካዎይ ስድራቃ፥ ምሳቃነ አብዳናጎ ባብሎነ ቢታን ꬎቁ ꬎቁ ኦꬅድ ሹምስ።
DAN 4:1 ካዎይ ናቡካዳናፆር፥ አሳስ፥ ካዎተꬃታስ፥ ዱማ ዱማ ዶናን ኦደትያ ኮቻታስ ሀይሳዳ ያግድ ዳብዳበ ፃፍስ፦ ሳሮይ ህንተዉ ግዶ፥
DAN 4:2 ኡባፈ ꬎቃ ፆሳይ ታዉ ኦꬅዳ፥ ማላልስባነ ኦራꬃባ ታ ህንተዉ ኦዳናዉ ኮያይስ።
DAN 4:3 እያ ማላታይ አይባ ግተ! እ ኦꬅያ ኦራꬃባይ አይባ ምኖ! እያ ካዎተꬃይ መርና ካዎተꬅ፤ እ የለታፐ የለታ ጋካናዉ ሃሬስ።
DAN 4:4 ታኒ፥ ናቡካዳናፆር ታ ኬꬃን እንጀትን፥ ታ ካዎ ጋꬎን ሚኮትን ደአይስ።
DAN 4:5 እስ ጋላስ ታኒ ያሽያ አሙሆ በአስ። ታኒ ታ አርሳን ዝንአዳ፥ በእዳ አሙሆይነ ቆንጨꬃይ ታና ዳጋንꬅስ።
DAN 4:6 ሄሳ ግሾ፥ አሙሁዋ ብርሸꬃ ታና ኤርሳና መላ ባብሎነን ደእያ ጭንጫታ ኡባ ታኮ ኤሀና መላ ኪታስ።
DAN 4:7 ሄ ዎደ ማሮት፥ ሙራንቾት፥ ፆልንቶ ታይበይሳትነ ብታንቾት ታኮ ይን፥ ታ አሙሁዋ ኤንታዉ ኦዳስ፤ ሽን ኤንቲ ብርሸꬃ ታና ኤርሳናዉ ዳንዳእቦኮና።
DAN 4:8 ዉርሰꬃን ታ ፆሳ ሱንꬃን ብልፃሶራ ጌተትድ ፄገትያ፥ ጌሻ ፆሳታ አያን እያን ደእያ፥ ዳነል ታኮ ገልን፥ እያዉ ታ አሙሁዋ ኦዳስ።
DAN 4:9 ጭንጫታ ሀላቃ ግድዳ ብልፃሶራ፥ ጌሻ ፆሳታ አያን ነናን ደኤይሳነ አይባ ፁርካ ኔፐ ጌሞናይሳ ታኒ ኤራይስ። ታኒ በእዳ አሙሆይ ሀይሳ፤ አነ ታዉ እያ ብርሸꬃ ኦዳ።
DAN 4:10 ታኒ ታ አርሳን ዝንአዳ፥ ቢታስ ግድ ዛዋን እስ ግታ ምꬅ ኤቅዳይሳ ቆንጨꬃን በአስ።
DAN 4:11 ሄ ምꬃይ ድጭድ ግታትስነ ምንስ። እያ ፄራይ ሳሎ ጋኬስ፤ ሳኣ ጋፃፐ ጋፃ ጋካናዉ በንቴስ።
DAN 4:12 ሄ ምꬃ ሀይꬃይ ፄላናዉ ሎኤስ፤ እያ አይፈይካ ዳሮ፤ እያ ቦላ ኡባስ ሜተትያባይ ደኤስ። ሳአ ዶአት እያ ኩያን ሸምፖሶና፤ ሳሎ ካፎት እያ ታሽያ ቦላ ኬፅድ ደኦሶና። ደኦራ ደእያ ኡባይ እያፐ ሜስ።
DAN 4:13 “ታኒ ታ አርሳን ዝንአዳ፥ ጌሻ ኪታንቾይ ሳሎፐ ዎꬍሽን ቆንጨꬃን በአስ።
DAN 4:14 እካ ባ ቃላ ꬎቁ ኦꬅድ፥ ሀይሳዳ ያግስ፦ ‘ሀ ምꬃ ቃንፅተ፤ እያ ታሽያ ካርተ፤ እያ ሀይꬃ ዱꬅተ፤ እያ አይፍያ ላልተ። እያ ጋርሳን ደእያ ዶአትነ እያ ታሽያን ኡትያ ካፎት ኡባይ ባቃቶ።
DAN 4:15 ሽን ዱሩማነ እያ ፃጱዋ ብራታንነ ናሰ ብራታ ሳንꬃላታን ቃችድ፥ ቢታን፥ ማታ ግዶን አጋግተ። ሳሎ አካን ላኮ፤ ባዞን ማታ ግዶን ዶአራ ደኦ።
DAN 4:16 እያ ካሀይ አሳፐ ዶአይሳን ላመቶ፤ ሄሳዳ ሀንድ ላፑን ላይꬅ ደኦ።
DAN 4:17 ኡባፈ ꬎቃ ፆሳይ አሳ ናይታ ካዎተꬃ ኡባ ሃረይሳ፥ ካዎተꬅ ኮይያ አሳስ እመይሳነ ሀር አቶሽን ቦረትዳይሳ ሹመይሳ ደኦን ደእያ አስ ኡባይ ኤራና መላ፥ ሄሳ ኪታንቾት አዋጅዶሶና፤ ጌሻት ፕርዳ ኤህዶሶና’ ” ያግስ።
DAN 4:18 “ታኒ፥ ካዎይ ናቡካዳናፆር በእዳ አሙሆይ ሀይሳ፦ ሀእ፥ ብልፃሶራ፥ ታዉ እያ ብርሸꬃ ኦዳ። ታ ካዎተꬃን ደእያ ጭንጫታፐ እሶይካ ታና ብርሸꬃ ኤርሳናዉ ዳንዳእቤና። ሽን ጌሻ ፆሳታ አያን ነናን ደእያ ግሾ፥ ኔኒ ዳንዳኣሳ” ያጋስ።
DAN 4:19 ሄ ዎደ ብልፃሶራ ጌተትያ ዳነል ዳጋምድ፥ ሀንያባ ꬋይስ። እ ዳጋምዳ ግሾ ጉꬃ ዎደ ስእ ግድ ጋምእስ። ያትን፥ ካዎይ፥ “ብልፃሶራ፥ ሀ አሙሆይነ እያ ብርሸꬃይ ነና ዳጋንꬆፎ” ያግስ። ብልፃሶር ዛሪድ፥ “ታ ጎዳዉ፥ ሀ አሙሆይ ነና እፀይሳታስ፥ እያ ብርሸꬃይ ነ ሞርከታስ ግዶ።
DAN 4:20 ነ አሙሆን በእዳ ምꬃይ፥ ድጭድ ምንዳይ፥ ዳይድ ሳሎ ጋክዳይ፥ ሳአ ጋፃፐ ጋፃ ጋካናዉ በንትዳይ፥
DAN 4:21 ሀይꬃይ ፄላናዉ ሎኤይ፥ አይፈይ ዳርዳይ፥ እያ ቦላ ኡባስ ምያባይ ደኤይ፥ ዶአት እያ ኩያን ሸምፕዳይነ ሳሎ ካፎት እያ ታሽያን ኬፅድ ደኤይ፥
DAN 4:22 ካዋዉ፥ ሄ ምꬃይ ነና። ኔኒ ግታታዳሳ፤ ምናዳሳ፤ ነ ግታተꬃይ ድጭድ፥ ሳሎ ጋክስ፤ ነ ማታይ ሳኣ ጋፃፐ ጋፃ ጋክስ።”
DAN 4:23 “ካዋዉ፥ ጌሻ ኪታንቾይ ሳሎፐ ዎꬍድ፥ ‘ሀ ምꬃ ቃንፅድ ꬋይስተ፤ ሽን እያ ዱሩማነ እያ ፃጱዋ ብራታንነ ናሰ ብራታ ሳንꬃላታን ቃችድ፥ ቢታን፥ ማታ ግዶን አጋግተ። እ ሳሎ አካን ላኮ፤ ላፑን ላይꬅ ጋካናዉ ዎራን ዶአዳ ደኦ’ ” ግያ ዎደ በአዳሳ።
DAN 4:24 “ካዋዉ፥ ብርሸꬃይ ሀይሳ፦ ሀይስ ኡባፈ ꬎቃ ፆሳይ ታ ጎዳ፥ ካዋ ቦላ ፖላናዉ ኪትዳ ፕርዳ።
DAN 4:25 ኔኒ አሳ ግዶፈ ጎደታዳ ዶአታራ እስፈ ዳና። ኔኒ ቦራዳ ማታ ማናነ ሳሎ አካን ላካና። ቃስ ኡባፈ ꬎቃ ፆሳይ፥ አሳ ናይታ ካዎተꬃ ኡባ ሃረይሳነ ካዎተꬅ ባ ኮይዳ አሳስ እመይሳ ነ ኤራና ጋካናዉ፥ ላፑን ላይꬅ ነ ቦላራ አꬋና።
DAN 4:26 ዱሩማይ ፃጶራ ቢታን አታናዳ ኪተትዳይስ፥ ሳሎ ፆሳይ ቢታ ኡባ ሃረይሳ ኔኒ ኤርያ ዎደ፥ ነ ካዎተꬃይ ነዉ ስማናይሳ በሴስ።
DAN 4:27 ካዋዉ፥ ታ ዞርያ ኤካ። ናጋራ ኦሶ አጋዳ ሱረባ ኦꬃ፤ ኡንኤትዳይሳታ ናቆ አጋዳ ኤንታዉ ቃታ። ኦን ኤር ኔኒ ሳሮ ዳና ዎደይ አዱቆና አገና” ያግስ።
DAN 4:28 ሀ ኡባይ ካዋ ናቡካዳናፆራ ቦላ ጋክስ።
DAN 4:29 ታማነ ናምኡ አጌናፐ ጉየ፥ ካዎይ ባብሎነን ደእያ ካዎ ጋꬎ ቦላ ደእያ በሳን ስመረቴስ።
DAN 4:30 ካዎይ፥ “ታኒ፥ ታ ግታ ዎልቃን፥ ታ ግታ ቦንቹዋስ ካዎይ ዳና መላ ታ ኬፅዳ ዎልቃማ ባብሎነ ካታማይ ሀይሳ ግደኔ?” ያግስ።
DAN 4:31 እ፥ ባ ኦዳ ዉርሶና ደእሽን፥ ሳሎፐ ሀይሳዳ ግያ ቃል ይድ፥ “ካዋ ናቡካዳናፆራ፥ ነ ቦላ ፕርደትዳ ፕርዳይ ሀይሳ፦ ነ ካዎተꬃይ ኔፐ ኤከትስ።
DAN 4:32 ኔኒ አሳ ግዶፈ ጎደታዳ፥ ባዞ ዶአታራ ዳና፤ ነ ቦራዳ ማታ ማና። ኡባፈ ꬎቃ ፆሳይ አሳ ናይታ ካዎተꬃ ኡባ ሃረይሳነ እ ባ ኮይዳ አሳስ ካዎተꬅ እመይሳ ኔኒ ኤራና ጋካናዉ ላፑን ላይꬅ ነ ቦላራ አꬋና” ያግስ።
DAN 4:33 ናቡካዳናፆራ ቦላ ጌተትዳባይ ኤለስድ ፖለትስ። አሳ ግዶፈ ጎደትድ፥ ቦራዳ ማታ ምስ። እያ አሳተꬃይ ሳሎ አካን ላክስ። እያ ብናናይ አንኮ ባለዳ፥ እያ ፁጉንꬃይካ ካፎ ፁጉንꬃዳ ድጭስ።
DAN 4:34 “ሄ ላፑን ላይꬃይ ዉርዳፐ ጉየ፥ ታኒ ናቡካዳናፆር ꬎቁ ጋዳ ሳሎ ፄላስ። ታ ካሀይ ስምን፥ ኡባፈ ꬎቃ ፆሳ ጋላታስ፤ መርና ፆሳ ቦንቻስ፤ ሳባስ። “እ መርናፐ መርናዉ ሃሬስ፤ እያ ካዎተꬃይ የለተꬃፈ የለተꬃ ጋካናሳ።
DAN 4:35 ሳአን ደእያ አሳ ኡባይ እያ ስንꬃን ላፋባ። ሳሎ መተꬃታ ቦላነ ሳአን አሳ ቦላ እ ዶስዳባ ኦꬄስ። እያ ኩሽያ ተቃናዉ ዳንዳኤይ ባዋ፥ እያ፥ ‘አይ ኦꬃይ?’ ያግድ ኦይቸይ ዴና።
DAN 4:36 ታ ካሀይ ስምን፥ ታ ካዎተꬃ ቦንቾይነ ታ ቴማይ ታዉ ስምስ። ካሰ ታና ዞረይሳትነ ታ ሞርናት ታና ኮይዶሶና። ታኒ ታ አራታን ምናስ፤ ታዉ ካሰይሳፈ አꬍያ ግታተꬅ ጉዠትስ።
DAN 4:37 ህዛ፥ ታኒ ናቡካዳናፆር ሳሎ ካዋ ጋላታይስ፤ እያ ꬎቁ ꬎቁ ኦꬃይስ፤ እያ ቦንቻይስ። እ ኦꬅያባ ኡባይ ልከ፤ እያ ኦገ ኡባይ ሱረ፤ እ ኦቶሮን ሄመተይሳታ ካዉሻናዉ ዳንዳኤስ” ያግስ።
DAN 5:1 እስ ጋላስ ካዎይ ብልፃሶር ሙኩሉ ግድያ ባ ሹማታስ ግብራ ጊግስድ፥ ኤንታራ እስፈ ዎይነ ኡሻ ኡይስ።
DAN 5:2 ብልፃሶር ዎይነ ኡሻ ኡይድ ማꬆትዳ ዎደ፥ እያ አዋይ ናቡካዳናፆር የሩሳላመን ደእያ ፆሳ ኬꬃፈ ኤህዳ ዎርቃፈነ ብራፐ ኦሰትዳ ኡሻ ሚሸታ ኤሀና መላ ኪትስ። እ ሄሳ ኦꬅዳይ እ፥ እያ ሹማታስ፥ እያ ማቸትነ እያ ላገꬆት ኡሻ ሄ ሚሸታን ኡያናዉ ኮይዳ ግሾሳ።
DAN 5:3 ኤንቲ የሩሳላመን ደእያ ፆሳ ኬꬃፈ ኤህዳ ዎርቃፈ ኦሰትዳ ኡሻ ሚሸታ ካዋስ ኤህዶሶና። ያትን ካዎይ፥ እያ ሹማት፥ እያ ማቸትነ እያ ላገꬆት ሄ ሚሸታን ትገትዳ ዎይነ ኡሻ ኡይዶሶና።
DAN 5:4 ኤንቲ ሄ ዎይነ ኡሻ ኡይሸ፥ ዎርቃፈ ብራፐ፥ ናሰ ብራታፐ፥ ብራታፐ፥ ምꬃፈነ ሹቻፈ ኦሰትዳ ፆሳታ ጋላትዶሶና።
DAN 5:5 ሄ ዎደ ቆፖና ደእሽን፥ አሳ ኩሸ ብራት ከይድ፥ ፆምፐ ዎꬅያ ኮጫ ስንꬃን፥ ሜሸትዳ ካዎ ጋꬎ ጎዳ ቦላ ፃፍዶሶና። ሄ ኩሸይ ፃፍያ ዎደ ካዎይ በእስ።
DAN 5:6 ሄ ዎደ እያ ሶምኦይ ላመትድ፥ ብዶ ግድስ፤ ያሻን እያ ጋደይ ኮኮርስ፤ እያ ጉልባታይ እፅስ።
DAN 5:7 ካዎይ ባ ቃላ ꬎቁ ኦꬅድ፥ ሙራንቾታ፥ ማሮታነ ፆልንቶ ፓይደይሳታ ኤሀና መላ ኪትስ። እ፥ ባብሎነ ጭንጫታኮ ሀይሳዳ ያግስ፦ “ሀ ፁፍያ ናባብድ፥ እያ ብርሸꬃ ታዉ ኦድያ ኦንካ፥ ኦቻ ቴራ ዳንያ ማኡዋ ማአና፤ እያ ቆን ዎርቃ አꬃና፤ እ፥ ታ ካዎተꬃ ሃርያ ሄꬓንꬆ አስ ግዳና” ያግስ።
DAN 5:8 ባብሎነ ጭንጫት ኡባይ እያ ስን ይዶስና፤ ሽን ኤንታፈ ኦንካ ሄ ፁፍያ ናባባናዉ ዎይኮ እያ ብርሸꬃ ኦዳናዉ ዳንዳእቤና።
DAN 5:9 ካዎይ ብልፃሶር ካሰይሳፈ አꬍድ ዳጋምን፥ እያ ሶምኦይ ካሰይሳፈ አꬍድ ብዶ ግድስ። እያ ሹማት ሀንያባ ꬋይዶሶና።
DAN 5:10 እያ አይያ፥ ካዋነ እያ ሹማታ ፓላማ ስአዳ፥ ኤንቲ ግብራ ምያ ኬꬃ ገላዳ፥ ሀይሳዳ ያጋሱ፦ “ካዋዉ፥ መርናዉ ካዎታ! ሀ ቆፋን ዳሮ ዳጋሞፋ፤ ነ ሶምኦይ ላመቶፎ።
DAN 5:11 ጌሻ ፆሳታ አያን እያ ቦላ ደእያ፥ እስ አስ ነ ካዎተꬃ ግዶን ደኤስ። እያዉ ኤራተꬅ፥ አኬክነ ጭንጫተꬅ ደኤስ። ካሰ ነ አዋይ፥ ካዎይ ናቡካዳናፆር እያ፥ ማሮታ፥ ሙራንቾታ፥ ብታንቾታነ ፆልንቶ ፓይደይሳታ ሀላቃ ኦꬅድ ሹምስ።
DAN 5:12 እ፥ ሎኦ አያን፥ ኤርነ አኬክ ደእያ አሰ። እ አሙሆ ብርሻናዉ፥ ቃንእሸ ኦዳናዉነ ፁራ ቆንጭሳናዉ ዳንዳኤስ። ካዎይ ብልፃሶራ ግድ ሱንꬅዳ ዳነላ ፄጋ። እ ነዉ ፁፍያ ብርሸꬃ ኦዳና” ያጋሱ።
DAN 5:13 ሄ ዎደ ዳነላ ካዋኮ ኤህን፥ ካዎይ እያኮ ሀይሳዳ ያግስ፦ “ዳነል ነኔ? ታ አዋይ፥ ካዎይ ይሁዳፐ ድእድ ኤህዳይሳታፐ እሶይ ነኔ?
DAN 5:14 ፆሳታ አያን ነናን ደኤይሳ፥ ኤር፥ አኬክነ ጭንጫተꬅ ነዉ ደኤይሳ ታ ስአስ።
DAN 5:15 ሀ ፁፍያ ናባባናዉነ እያ ብርሸꬃ ታዉ ኦዳናዉ ሙራንቾትነ ጭንጫት ይዶሶና፤ ሽን ኤንቲ ታዉ ብርሸꬃ ኦዳናዉ ዳንዳእቦኮና።
DAN 5:16 ኔኒ ብርሸꬃ ኦዳናዉነ ዴፆ ኦይሻ ኡባ ዛራናዉ ዳንዳኤይሳ ታ ስአስ። ህዛ ነ ሀ ፁፍያ ናባባናዉነ እያ ብርሸꬃ ታዉ ኦዳናዉ ዳንዳእኮ፥ ኦቻ ቴራ ዳንያ ማኡዋ ማይዛና፤ ነ ቆን ዎርቃ አꬃና፤ ኔኒ፥ ካዎተꬃ ሃርያ ሄꬓንꬆ አሰ ግዳና።”
DAN 5:17 ዳነል ካዋስ ዛሪድ፥ “ነ እሞይ ነዉ ግዶ፤ ነ ዎይቱዋ ሀራ አሳስ እማ። ግዶሽን፥ ታኒ ፁፍያ ካዋስ ናባባና፤ ብርሸꬃካ ኦዳና።”
DAN 5:18 “ካዋዉ፥ ኡባፈ ꬎቃ ፆሳይ ነ አዋ ናቡካዳናፆራስ ካዎተꬅ፥ ግታተꬅ፥ ቦንቾነ ቴማ እሚስ።
DAN 5:19 እያ ግታተꬃ ጋሶን ደረይ፥ ካዎተꬃትነ ዱማ ዱማ ዶናን ኦደትያ ኮቻት እያዉ ያሻን ኮኮርዶሶና። እ ዎꬋናዉ ኮየይሳ ዎꬌስ፤ አሻናዉ ኮየይሳ አሼስ፤ ሹማናዉ ኮየይሳ ሹሜስ፤ ካዉሻናዉ ኮየይሳ ካዉሼስ።
DAN 5:20 ሽን እ ኦቶርትዳ ዎደነ እያ ዎዛናይ ሙምዳ ዎደ፥ ባ አራታፐ ዎꬍስ፤ እያ ቦንቾይካ ቃረትስ።
DAN 5:21 አሳ ግዶፈ ጎደትስ፤ እያ ካሀይ ላመትን ዶአ ግድስ። ቦራዳ ማታ ምሸ ደምባ ሀረታራ እስፈ ደእስ። እያ አሳተꬃይ ሳሎ አካን ላክስ። ሄስ ሀንዳይ፥ ኡባፈ ꬎቃ ፆሳይ አሳ ናይታ ካዎተꬃ ኡባ ሃረይሳነ ባ ኮይዳይሳስ እመይሳ እ ኤራና መላሳ።
DAN 5:22 “ሽን ብልፃሶራ፥ ኔኒ እያ ናአይ፥ ሀ ኡባ ኤራሸ ነ ነናተꬃ ካዉሻባካ።
DAN 5:23 ቃስ ሳሎ ጎዳ ቦላ ኦቶርታዳ፥ ነናተꬃ ꬎቁ ꬎቁ ኦꬃዳሳ። እያ ኬꬃፈ ቦንቀትድ ይዳ ዎርቃ ሚሸታን ኔኒ፥ ነ ሹማት፥ ነ ማቸትነ ነ ላገꬆት፥ ዎይነ ኡሻ ኡይደታ። ቃስ ፄላናዉ፥ ስአናዉነ ኤራናዉ ዳንዳኦና ብራፐ፥ ዎርቃፈ፥ ናሰ ብራታፐ፥ ብራታፐ፥ ምꬃፈነ ሹቻፈ ኦሰትዳ ፆሳታ ጋላትደታ። ነ ደኡዋነ ነ ኦግያ ባ ኩሸን ኦይክዳ ፆሳ ቦንቻባካ።
DAN 5:24 ሄሳ ግሾ፥ ኩሸ ብራት እያፐ ኪተትን፥ ሀ ፁፈይ ፃፈትስ።
DAN 5:25 “ፁፈይ፥ ‘ማነ፥ ማነ፥ ተቀል፥ ፓረስ’ ያጌስ።
DAN 5:26 “አራምከ ዶናን እያ ብርሸꬃይ ሀይሳ። ማነ፦ (ታይበትስ) ‘ፆሳይ ነ ካዎታ ላይꬃ ታይብድ ዉራናዳ ኦꬅስ’ ጉሱ።
DAN 5:27 ተቀል፦ (ማዛነትስ) ‘ምዛነን ማዛነታዳ፥ ካዉያዳ በንታዳሳ’ ጉሱ።
DAN 5:28 ፓረስ፦ (ሻከትስ) ‘ነ ካዎተꬃይ ሻከትድ ሜዶናስነ ፋርሰስ እመትስ’ ” ጉሱ።
DAN 5:29 ሄ ዎደ፥ ብልፃሶራ ኪታን፥ ኦቻ ቴራ ዳንያ ማኡዋ ዳነላ ማይዝዶሶና፤ እያ ቆን ዎርቃ አꬅዶሶና፤ ቃስ ካዎተꬃ ሃርያ ሄꬓንꬆ አስ ግዳና መላ አዋጅዶሶና።
DAN 5:30 ሄ ዎደ ቃማ ሞርከት ገልድ፥ ባብሎነ ካዋ ብልፃሶራ ዎꬍዶሶና።
DAN 5:31 እያ ካዎተꬃ፥ ላይꬅ ኡሱፑን ታማነ ናምአ ግድዳ ሜዶና አደይ ዳርዮስ ኤክስ።
DAN 6:1 ካዎይ ዳርዮስ ባ ካዎተꬃ ኡባ ግዶን ባፐ ጋርሳራ ቢታ ሃርያ ፄታነ ላታሙ አሳታ ሹማናዉ ቆፕስ።
DAN 6:2 ካዋስ አይብካ ፓጮና መላ ሹማታ አዋተꬃን ፄላና መላ ሄꬑ አሳታ ሀላቃ ኦꬅድ ዶርስ፤ ዶረትዳይሳታፐ እሶይ ዳነላ።
DAN 6:3 ዳነል ኦሶ ኦꬃናዉ ባዉ ደእያ ዱማ ኤራን ሀራ ሀላቃታፐነ ሹማታፐ አꬍድ በንትስ። ሄሳ ግሾ፥ ካዎይ እያ ባ ኩመꬃ ካዎተꬃ ቦላ ሹማናዉ ቆፕስ።
DAN 6:4 ቢታ ሹማትነ ሀላቃት ዳነላ ሞታናዉ፥ እ አይስያ አይሱዋ ቦላ ባላ ደማናዉ ኮይዶሶና። ሽን እ፥ ባና ናግያነ አማነትዳ አስ ግድያ ግሾ፥ እያ ሞታናዉ እያ ቦላ አይ ባላካ ደምቦኮና።
DAN 6:5 ዉርሰꬃን ኤንቲ፥ “እያ ፆሳ ህግያ ባጋራ ግዶና እፅኮ፥ ሀራ ባጋራ ዳነላ ሞትያባ ደሞኮ” ያግዶሶና።
DAN 6:6 ሄሳፈ ጉየ፥ ቢታ ሹማትነ ሀላቃት እስፈ ካዋኮ ብድ፥ ሀይሳዳ ያግዶሶና፦ “ካዋዉ ዳርዮሳ፥ መርናዉ ካዎታ!
DAN 6:7 ኑኒ ነ ካዎተꬃ ኦሶ ኦꬅያ ሀላቃት፥ ሹማት፥ አይሰይሳት፥ ዞረይሳትነ ቢታ ሃረይሳት ኡባይ ዞረትዳ እስ ዞረይ ደኤስ። ሄስካ ሀስታሙ ጋላስ ጋካናዉ፥ አይ አስካ ካዋ ዎሳናፐ አትሽን፥ ሀራ አይ አስ ዎይኮ አይ ፆሰ ዎሶናዳ፥ ኔኒ አዋጆ ከሳና መላሳ። ሄ አዋጁዋ ኤኮናይ ጋሞ ኦላን የገታና መላ ኔኒ ኪታ።
DAN 6:8 ህዛ ካዋዉ፥ ሀ አዋጆይ ሻረቶና ሜዶናነ ፋርሰ ህገዳ ምኖነ ላመቶናይሳ ግዳና መላ ፓራማ” ያግዶሶና።
DAN 6:9 ሄሳ ግሾ፥ ካዎይ ዳርዮስ አዋጁዋ ፃፍድ ፓራምስ።
DAN 6:10 ዳነል አዋጆይ ፓራመትድ ከይዳይሳ ኤርዳ ዎደ ባ ሶ ብስ፤ ፖቀ ቦላ ደእያ ክፍልያ ገልስ። ሄ ክፍልያ ማስኮተይ የሩሳላመ ባጋ ስሚድ ዶየትድ ደእሽን፥ ካሰ ዎሰይሳዳ ጉልባትድ፥ ባ ፆሳ ጋላትሸ፥ እስ ጋላሳን ሄꬑ ቶሆ ዎሴስ።
DAN 6:11 ሄ አሳት እስፈ ብድ፥ ዳነል ባ ፆሳ ዎስሽንነ ባ ጎዳ ማዶ ኦይችሽን ደምዶሶና።
DAN 6:12 ኤንቲ ካዋኮ ብድ፥ “ካዋዉ፥ ሀስታሙ ጋላሳታ ግዶን ነ አትሽን፥ ሀራ አይ አሰ ዎይኮ አይ ፆሰ ዎስያ ኦንካ ጋሞ ኦላን የገታና መላ አዋጆ ከሳብኪ?” ያግዶሶና። ካዎይ ዛሪድ፥ “ኤ አዋጃይ ከይስ፤ ሻረቶና ሜዶናነ ፋርሰ ህገዳ ምንዳይሳ” ያግስ።
DAN 6:13 ኤንቲ፥ “ካዋዉ፥ ሄኮ ይሁዳፐ ድኤትድ፥ ይዳ አሳፐ እሶይ፥ ዳነል፥ ነዉ ግድን ነ ፓራማዳ ከስዳ ነ አዋጁዋካ ኪተተና። እ ሀእ ጋካናዉ ጋላሳን ሄꬑ ቶሆ ባ ፆሳ ዎሴስ” ያግዶሶና።
DAN 6:14 ካዎይ ሄሳ ስእዳ ዎደ ዳሮ አዛንስ፤ ዳነላ አሻናዉ ቆፕድ፥ አው ዉላና ጋካናዉ እያ አሻና ኦገ ኡባ ኮይስ።
DAN 6:15 ሄ ዎደ አሳት እስፈ ካዋኮ ብድ፥ “ካዋዉ፥ ሜዶናነ ፋርሰ ህግያዳ፥ ካዎይ አዋጅዳ አዋጆይ ዎይኮ ኪታይ ላመቶናይሳ ኤራ” ያግዶሶና።
DAN 6:16 ካዋ ኪታን፥ ዳነላ ኤህድ፥ ጋሞ ኦላን የግዶሶና። ካዎይ ዳነላኮ፥ “ነ ኡባ ዎደ ጎይንያ ፆሳይ ነና አሾ” ያግስ።
DAN 6:17 ኤንቲ ሹቹ ኤህድ፥ ኦላ ዶና ጎርድዶሶና። ኦንካ ዳነላ ቦላ ኦሰትዳባይ ላመቶና መላ፥ ካዎይ ባ ማታመነ ባ ሞርናታ ማታመ ሹቻ ቦላ ዎꬅስ።
DAN 6:18 ካዎይ ባ ጋꬎ ስሚድ፥ ካꬅ ሞናነ ኡፋይስያባ ባኮ ሺሾና፥ ꬍስኮ ꬋይድ አቅስ።
DAN 6:19 ካዎይ ዎንታ ጉራ ደንድድ፥ ኤለስድ ጋሞ ኦላኮ ብስ።
DAN 6:20 እ አዛንሸ ያ ጋክድ፥ “ደኦ ፆሳ አይልያዉ፥ ዳነላ፥ ኔኒ ኡባ ዎደ ጎይንያ ነ ፆሳይ፥ ነና ጋሞታፐ አሻናዉ ዳንዳእዴ?” ያግድ ፄግስ።
DAN 6:21 ዳነል ዛሪድ፥ “ካዋዉ፥ መርናዉ ካዎታ!
DAN 6:22 ታ ፆሳይ ባ ኪታንቹዋ ኪትድ፥ ጋሞታ ዶና ጎርድስ፤ ኤንቲ ታና ቦችቦኮና። ታኒ እያ ስንꬃን ፅሎ፤ ቃስ ካዋዉ፥ ነ ስንꬃንካ ባላ ኦꬃብከ” ያግስ።
DAN 6:23 ካዎይ ዳሮ ኡፋይትድ፥ ዳነላ ኦላፈ ከሳና መላ ኪትስ። ዳነል ኦላፈ ከይስ፤ እ ባ ፆሳን አማነትዳ ግሾ፥ እያ አሳተꬃ ቦላ ቆሆይ በንትቤና።
DAN 6:24 ካዎይ ዳነላ ሞትዳ አሳታ ኤሀና መላ ኪትስ። ኤንቲ ኦይከትድ፥ ባንታ ማቸታራነ ባንታ ናይታራ ይድ፥ ኡባይ ጋሞ ኦላን የገትዶሶና። ኤንቲ ኦላ ዉርሰꬃ ጋኮና ደእሽን፥ ጋሞት ጉፕ ኤክድ፥ ኤንታ መቀꬃ መንረꬅ አግዶሶና።
DAN 6:25 ካዎይ ዳርዮስ አሳስ፥ ካዎተꬃታስነ ዱማ ዱማ ዶናን ኦደትያ ኮቻታስ ሀይሳዳ ያግድ ፃፍስ፦ “ሳሮይ ህንተዉ ግዶ!
DAN 6:26 “ታ ካዎተꬃን ደእያ አሳ ኡባይ ዳነላ ፆሳ ያያና መላነ ኮኮራና መላ ታኒ አዋጆ ከሳስ። “እ መርናዉ ደእያ ደኦ ፆሳ፤ እያ ካዎተꬃይ ፖሎ ꬋየና፤ እያ ካዎተꬃስ ዛው ባዋ።
DAN 6:27 እ፥ አሼስ፤ መቶፐ ከስድ ኤኬስ፤ ሳሎንነ ሳአን ማላታነ ማላታታ ኦꬄስ፤ እ፥ ዳነላ ጋሞታ ዶናፐ አሽስ” ያግስ።
DAN 6:28 ዳነል ዳርዮሳ ካዎተꬃ ዎደነ ፋርሰ ካዋ ቅሮሳ ካዎተꬃ ዎደ ኡባን እንጀትን ደእስ።
DAN 7:1 ባብሎነ ካዎይ ብልፃሶር ካዎትዳ ኮይሮ ላይꬃን፥ ዳነል ባ አርሳን ዝንእድ፥ አሙሆነ ቆንጨꬅ በእስ። ባ አሙሁዋን በእዳ አይፈ ቆፋታ ፃፍስ።
DAN 7:2 ዳነል ሀይሳዳ ያግስ፦ “ሳሎፐ ይዳ ኦይዱ ጫርኮት ግታ አባ ቡቅሽን ታ ቃማ ቆንጨꬃን በአስ።
DAN 7:3 እሶይ እሱዋፈ ዱማ ግድዳ ኦይዱ ግታ ዶአት አባፈ ከይዶሶና።
DAN 7:4 “ኮይሮ ዶአይ ጋሞ ዳኔስ፤ እያዉ አርጋንꬃ ቀፈይ ደኤስ። ታ በእሽን፥ እያ ቀፈይ ሾደትን፥ ሳአፐ ደንድድ፥ አሳዳ ናምኡ ቶሆን ኤቃናዳ ኦሰትስ፤ እያዉ አሳ ዎዛን እመትስ።
DAN 7:5 “ናምአንꬆ ዶአይ እስ ባጋ ꬎቁ ግድ ኤቅዳ ባባንꬅ ጌተትያ ዶአ ዳኔስ። ሄ ዶአይ ሄꬑ ጋይለ መቀꬅ ባ ዶናን ባርድ፥ ባ አቻን ሳፅድ ኦይክስ። እካ፥ ‘ደንዳ፤ ካላና ጋካናዉ አሾ ማ’ ጌተትስ።
DAN 7:6 “ሄሳፈ ካላዳ፥ ማሄ ዳንያ ሀራ ዶአ በአስ። እያ ዞኮን ካፎ ቀፈ ዳንያ ኦይዱ ቀፈት ደኦሶና። እያዉ ኦይዱ ሁጰት ደኦሶና፤ እያዉ ሃሮ ማት እመትስ።
DAN 7:7 “ሄሳፈ ጉየ፥ ቃማ ቆንጨꬃን ያሽያ፥ ዳጋንꬅያነ ዳሮ ምኖ ግድዳ ኦይዳንꬆ ዶአ በአስ። እያዉ ግታ ብራታ አች ደኤስ። እ ባናን ጋሄትያ ኡባ ኤንታን መንረꬅድ ሜስ፤ አትዳይሳታ ባ ቶሁዋን የረꬄስ። ካሰ ታ በእዳ ዶአታ ኡባፈ እ ዱማቴስ፤ እያዉ ታሙ ካጨይ ደኤስ።
DAN 7:8 ታኒ ሄ ካጨታባ ቆፕሽን፥ ኤንታ ግዶፈ ሀራ እስ ጉꬃ ካጨይ ከይሽን በአስ። ሄ ካጨይ ሀንኮ ካጨታፐ ሄꬓታ ꬎቆልድ ሆልስ። ሄ ቃጭያስ አሳ አይፈ ዳንያ አይፈይነ ኦቶሮን ኦደትያ እንፃርስ ደኤስ።
DAN 7:9 “ታኒ ሄሳ በእሽን፥ አራታት ኡተꬃስ ጊግዶሶና። መርናዉ ደኤይስ ባ አራታን ኡትስ፤ እያ ማኦይ ሻቻዳ፥ እያ ሁጰ ብናናይ ሙቃዳዳ ቦꬁ። እያ አራታይነ አራታ ገርቶይ ታማዳ ሎጬስ።
DAN 7:10 እያ አራታ ግዶፈ ታማ ሻፍ ፑልትድ፥ ከዬስ። ሙኩሉ ቶሆ ሙኩላን ታይበተይሳት እያዉ ኦꬆሶና፤ ታሙ ሙኩሉ ቶሆ ታሙ ሙኩላን ታይበተይሳት እያ ስንꬃን ኤቆሶና። ፕርድ ዶመትስ፤ ማፃፋት ዶየትዶሶና።
DAN 7:11 “ካጨይ ኦደትያ ኦቶሮ ቃላ ታኒ ስእዳ ግሾ፥ እያ ጫዳ ፄላስ። ታኒ በእሽን ዶአይ ሀይቅድ፥ ኤፅያ ታማን የገትድ፥ ꬋይስ።
DAN 7:12 ሀንኮ ሄꬑ ዶአታ ማታይ ኤከትስ፤ ሽን ኤንቲ ጉꬃ ዎደ ደኦን ዳና መላ ኤንታዉ እመትስ።
DAN 7:13 “ታኒ፥ ቃማ ቆንጨꬃን፥ አሳ ናአ ዳነይስ ሳሎፐ ሻራራ ይሽን በአስ። መርናዉ ደኤይሳኮ ሺቅን፥ እያ ስን አꬅዶሶና።
DAN 7:14 እያዉ ማት፥ ቦንቾይነ ካዎተꬅ እመትስ፤ ደረይ፥ ካዎተꬃትነ ዱማ ዱማ ዶናን ኦደትያ ኡባይ ሃረትዶሶና። እያ ማታይ መርናዉ ሻረቶና ማታ፤ እያ ካዎተꬃስ ዛው ባዋ።
DAN 7:15 “ታኒ፥ ዳነል፥ ታ በእዳባን ዳጋማስ፤ ቆንጨꬃይ ታና ህርግስስ።
DAN 7:16 ታኒ ያን ኤቅዳይሳታፐ እሱዋኮ ሺቃዳ፥ ሀ ኡባስ ቱማ ብርሸꬃይ አይበኮ ኦይቻስ። እ ታዉ እያ ብርሸꬃ ኡባ ሀይሳዳ ያግድ ኦድስ፦
DAN 7:17 ‘ሀ ኦይዱ ግታ ዶአት ሳአን ስንꬃፈ ደንዳና ኦይዱ ካዎተꬃታ።
DAN 7:18 ሽን ኡባፈ ꬎቃ ፆሳ ጌሻት እያ ካዎተꬃ ኤክድ፥ መርናዉ ባንታባ ኦꬃና፤ መርናዉ ካዎተꬃ ኤንቲ ላታና’ ያግስ።
DAN 7:19 “ሄሳፈ ጉየ፥ ታኒ ሀራ ዶአታ ኡባፈ ዱማ ግድዳ ያሽያ ኦይዳንꬆ ዶኣስ ደእያ ቱማ ብርሸꬃ ኤራናዉ ኮያስ። ሄ ዶኣስ ብራታ አችነ ናሰ ብራታ ፁጉንꬅ ደኤስ፤ እ ባናን ጋሄትያ ኡባ መንረꬅድ ሜስ፤ አትዳይሳ ባ ቶሁዋን የረꬄስ።
DAN 7:20 ሄ ዶኣ ሁጰን ደእያ ታሙ ካጨታባነ ጉየፐ ከይድ፥ ኤንታፈ ሄꬓታ ꬎቆልድ የግዳ ጉꬃ ካጭያባ ኤራናዉ ኮያስ። ሄ ጉꬃ ቃጭያስ አይፈይነ ኦቶሮ ቃላ ኦደትያ እንፃርስ ደኤስ። ሄ ካጨይ ሀንኮታፐ አꬍድ ያሼስ።
DAN 7:21 ታኒ በእያ ዎደ ሄ ካጨይ ጌሻታራ ኦለትድ፥ ኤንታ ፆንስ።
DAN 7:22 ሄስ ሀንዳይ፥ መርናዉ ደኤይስ ያና ጋካናዉነ ኡባፈ ꬎቃ ፆሳ ጌሻታስ ፕርዳና ጋካናሳ፤ ኤንቲ ካዎተꬃ ላትያ ዎደይ ጋክስ።
DAN 7:23 “እ ብርሸꬃ ታዉ ሀይሳዳ ያግድ ኦድስ፤ ‘ኦይዳንꬆ ዶአይ ሀ ሳአን ስንꬃፈ ደንዳና ኦይዳንꬆ ካዎተꬃ። ሄ ካዎተꬃይ ሀራ ካዎተꬃ ኡባፈ ዱማ፤ እ፥ ቢታ ኡባ ማና፥ የꬋናነ መንረꬃና።
DAN 7:24 ታሙ ካጨት ሀ ካዎተꬃፈ ደንዳና ታሙ ካዎታ። ሄሳፈ ጉየ፥ ካሰ ታሙ ካዎታፐ ዱማ ግድዳ ሀራ ካዎይ ደንዳና። እ፥ ኤንታፈ ሄꬑ ካዎታ ፆንድ ሃራና።
DAN 7:25 እ፥ ኡባፈ ꬎቃ ፆሳ ቦላ ኦቶሮን ኦደታና፤ ኡባፈ ꬎቃ ፆሳ ጌሻታ ኡንኤꬃና። ቃስ ዎደታነ ህግያ ላማናዉ አሞታና። ዎደይ፥ ዎደትነ ዎደ ባጋይ ጋካናዉ፥ ጌሻት እያ ማታፐ ጋርሳን ሃረታና።
DAN 7:26 ሽን ፕርድ ዶመታና፤ እያ ማታይ ኩመꬅ ኤከታና፤ እ መርናዉ ꬋያና።
DAN 7:27 ሳሎፐ ጋርሳን ደእያ ካዎተꬃታ ማታይ፥ ዎልቃይነ ግታተꬃይ፥ ኡባፈ ꬎቃ ፆሳ ጌሻታስ እመታና። እያ ካዎተꬃይ መርናዉ ዳና፤ ቢታ ሃረይሳት እያዉ ኪተታና፤ እያ ጎይናና’ ” ያግስ።
DAN 7:28 ታ ቆንጨꬃባይ ሀይሳን ዉርስ። ታኒ፥ ዳነል፥ ታ ቆፋን ዳሮ ዳጋማስ፤ ታ ሶምኦይ ብዶ ግድስ። ሽን ኡባባ ታኒ ታ ዎዛናን ዎꬃስ።
DAN 8:1 ብልፃሶር ካዎትዳ ሄꬓንꬆ ላይꬃን፥ ታኒ፥ ዳነል፥ ካሰ በእዳ ቆንጨꬃፈ ሀራ ቆንጨꬅ በአስ።
DAN 8:2 ሄ ቆንጨꬃን፥ ኤላማ ቢታን፥ ሱሳ ካታማን፥ ኡባላ ሻፋ ማታን ኤቃዳ ታና ደማስ።
DAN 8:3 ሄ ሻፋ ማታን ናምኡ አዱሳ ካጨት ደእያ ዶርስ ኤቅስ። ናምኡ ካጨታፐ እሶይ ጉየፐ ዶልስ፤ ሽን ኮይሮ ዶልዳይሳፈ አዱሰ።
DAN 8:4 ሄ ዶርሳይ ባ ካጭያን ቃይጫናዉ፥ ዉሎሀ፥ ፑደሀነ ዱገሀ ባጋ ኮልሽን በአስ። እያራ ኤቀታናዉነ እያ ዎልቃፈ ከስ ኤካናዉ አይ መሄይካ ዳንዳእቤና። እ፥ ባ ኮይዳባ ኦꬄስ፤ ያትድ ግታ ግድስ።
DAN 8:5 ታኒ ሀ ቆንጨꬃባ ቆፕሽን፥ እስ ዴሽ ዉሎሀ ባጋፈ ከይድ፥ ቢታ ካንꬅድ፥ ቶሆይ ሳአ የꬎና ይስ። እያ ናምኡ አይፈታፐ ግዶን እስ ግታ ካጨይ ደኤስ።
DAN 8:6 እ፥ ዳሮ ይሎራ፥ ሻፋ ማታን ታኒ በእዳ ናምኡ ካጨራ ደእያ ዶርሳኮ ይስ።
DAN 8:7 እ፥ ዳሮ ይሎትድ፥ ታ በእሽን፥ ዶርሳ ካጨት ናምአይ መቃና ጋካናዉ፥ ኢታ ዶምኤ ዶምእስ። ዶርሳይ እያራ ኤቀታናዉ ዎልቅ ꬋይስ፤ ዴሻይ እያ ሳአን የግድ የꬍድ ኤቅስ። ዴሻ ዎልቃፈ ሄ ዶርሳ አሽያባይ ባዋ።
DAN 8:8 ሄ ዴሻይ ዳሮ ዎልቃምስ፤ ሽን እያ ዎልቃይ ዳርሸ ብን፥ እያ ግታ ካጨይ መቅስ። እያ በሳን ኦይዱ ግታ ካጨት ቢታ ኦይዱ ባጋ ስሚድ ድጭዶሶና።
DAN 8:9 ሀ ኦይዱ ካጨታፐ እሱዋ ቦላ ሀራ ጉꬃ ካጨይ ዶልድ፥ ዱገሀ፥ ዶሎሀነ እስራኤለ ቢታኮ ስሚድ ዎልቃራ ድጭስ።
DAN 8:10 እ፥ ብድ ሳሎን ደእያ ኦላንቾታ ጋካናዉ ድጭድ፥ ሳሎ ፆልንቶታፐ ጉꬃታ ሳአን የግድ ኤንታ የꬍስ።
DAN 8:11 ሳሎ ቶራ ሞጮና ግድዳ ፆሳራ ባና ልክሳና ጋካናዉ ꬎቁ ꬎቁ ግስ። እያዉ ጋላስ ጋላስ ያርሸትያ ያርሹዋ ድግስ፤ እያ ኬꬃካ ቱንስስ።
DAN 8:12 ናጋራ ጋሶን ኦላንቾትነ ጋላስ ጋላስ ያርሸትያ ያርሾይ ሄ ካጭያስ እመትስ። ቱም ሳአን ሆለትስ፤ ሄ ካጨይ ኦꬅያባ ኡባይ እያዉ እንጀትስ።
DAN 8:13 ሄሳፈ ጉየ፥ እስ ጌሻ ኪታንቾይ፥ ሀራ ጌሻ ኪታንቹዋራ ኦደትሽን ታኒ ስአስ። እሶይ እሱዋ፥ “ጋላስ ጋላስ ያርሸትያ ያርሹዋባ፥ ꬋዮ ኤህያ ማካላተꬃባ፥ ሳሎ ኦላንቾትነ ፆሳ ኬꬃይ የትሸ ዳናባ ኦድያ፥ ቆንጨꬃይ አዉደ ፖለታኔ?” ያግድ ኦይችስ።
DAN 8:14 እ ዛሪድ፥ “ናምኡ ሙኩሉነ ሄꬑ ፄቱ ዎንታነ ኦማርስ ጋካናዉ ጋምአና፤ ሄሳፈ ጉየ፥ ፆሳ ኬꬃይ ጌያና” ያግድ ኦድሽን ስአስ።
DAN 8:15 ታኒ፥ ዳነል፥ ሀ ቆንጨꬃ በአሸነ እያ ብርሸꬃ ኤራናዉ ቆፓሸ ደእሽን፥ እስ አሰ ዳንያባይ ታ ስንꬃን ኤቅዳይሳ በአስ።
DAN 8:16 ኡባላ ሻፋፐ፥ “ጋብሬላ፥ ሀ አድያስ ሀ ቆንጨꬃ ብርሸꬃ ኦዳ” ግያ ግርስ ስአስ።
DAN 8:17 እ፥ ይድ ታ ማታን ኤቅዳ ዎደ፥ ታኒ ዳጋማዳ፥ ሳአን ኩንዳስ። እ ታኮ፥ “አሳ ናአዉ፥ ሀ ቆንጨꬃይ ዉርሰꬃ ዎድያባ ኦደይሳ አኬካ” ያግስ።
DAN 8:18 እ ታራ ኦደትያ ዎደ፥ ታኒ ሳአን ታ ሶምኡዋራ ጉፋናዳ፥ ታና ባላ አጋስ። እ ታና ሳኣፐ ደንꬅድ፥ ታ ቶሁዋን ኤስስ።
DAN 8:19 እ ታኮ፥ “ሀ ቆንጨꬃይ ዉርሰꬃ ዎድያባ በሲያ ግሾ፥ ጎዳ ሀንቆ ጋላሳን ሀናናዉ ደእያባ ታ ነዉ ኦዳና።
DAN 8:20 ኔኒ በእዳ ናምኡ ካጨራ ደእያ ዶርሳይ፥ ሜዶናነ ፋርሰ ካዎታ ሌምሶ።
DAN 8:21 ዴሻይ ግርከ ካዋ ሌምሶ፤ እያ ናምኡ አይፍያፐ ግዶን ደእያ ግታ ካጨይ ግርከ ካዋ።
DAN 8:22 ካጨ መቅን እያ በሳን ዶልዳ ኦይዱ ካጨት እያ ካዎተꬃፈ ሻከትድ ከያና ኦይዱ ካዎተꬃታ ሌምሶ። ሽን ኤንታ ዎልቃይ ኮይሮ ካዋ ዎልቃ ጋከና።
DAN 8:23 “ኤንታ ካዎተꬃ ዉርሰꬃን፥ ኤንታ ናጋራይ ዛዋ ጋክያ ዎደ፥ ኢታነ ጭምያ ካዎይ ደንዳና።
DAN 8:24 እ ዳሮ ምኖ ግዳና፤ ሽን ባ ዎልቃን ግደና። እ ዳጋንꬅያ ꬋዮ ꬋይሳና፤ እ ኦꬅያባ ኡባይ እያዉ እንጀታና። እ ምኖ አሳታነ ጌሻ አሳታ ꬋይሳና።
DAN 8:25 እ ጭምያ ግሾ እያዉ እንጀታና፤ እ ባና ኡባፈ ꬎቁ ꬎቁ ኦꬃና። ኤንቲ ሳእ ሳሮ ግድ ደእሽን፥ ኤንታፈ ዳሮታ ዎꬋና። እ ሀላቃታ ሀላቃራ ኤቀታና፥ ሽን እ፥ አስ ቦቾና ባዉ ꬋያና።
DAN 8:26 “ነዉ ኦደትዳ ናምኡ ሙኩሉነ ሄꬑ ፄቱ ዎንታነ ኦማርሳ ቆንጨꬃይ ቱማ። ሽን ሀ ቆንጨꬃይ ዳሮ ዎደፐ ጉየ ፖለታናዉ ደእያ ግሾ፥ ማታመ እያ ቦላ ዎꬃዳ ጎርዳዳ ናጋ” ያግስ።
DAN 8:27 ታኒ ዳነል፥ ዳሮ ዳቡርዳ ግሾ፥ ሳከታዳ ዳሮ ጋላስ ዝንአስ። ሄሳፈ ጉየ ደንዳዳ፥ ካዋ ኦሶስ ባስ። ሀ ቆንጨꬃን ታኒ ዳሮ ዳጋማስ፤ አኬካናዉ ዳንዳአብከ።
DAN 9:1 ሜዶና አስ ግድዳ አርፀክስሳ ናአይ፥ ዳርዮስ ባብሎነን ካዎትስ።
DAN 9:2 እ ካዎትዳ ኮይሮ ላይꬃን፥ ታኒ ዳነል፥ ጌሻ ማፃፋታ ናባባሸ፥ ናበይ ኤርምያስ ኦድዳይሳዳ፥ የሩሳላመይ ላፑን ታሙ ላይꬅ ላለትድ ጋምአናዉ ደኤይሳ አኬካስ።
DAN 9:3 ሄሳ ግሾ፥ ካዮ ማኦ ማአዳ፥ ብዶ ታ ሁጰን ቆላዳ፥ ፆማሸነ ዎሳሸ ታ ጎዳ ፆሳኮ ታ ሶምኡዋ ዛራስ።
DAN 9:4 ታ ናጋራ ፓፃሸ፥ ጎዳ፥ ታ ፆሳ ሀይሳዳ ያጋዳ ዎሳስ፦ “አቤት ጎዳዉ፥ ዎልቃማነ ያሽያ ፆሳዉ፥ ነና ዶሰይሳታስነ ነዉ ኪተተይሳታስ ነ መርና ሲቁዋነ ጫቁዋ ናገይሶ፥
DAN 9:5 ኑ ናጋራ ኦꬅዳ ባልዳ። ኑ ኢታባ ሀንዳ፤ ማካልዳ፤ ነ ኪታፐነ ነ ህግያፈ ካረ ከይዳ።
DAN 9:6 ኑ ካዎታስ፥ ኑ ሀላቃታስ፥ ኑ አዋታስነ ቢታን ደእያ አሳ ኡባስ ነ ሱንꬃን ትንብተ ኦድዳ ነ ናበታ ስኦና እፅዳ።
DAN 9:7 “አቤት ጎዳዉ፥ ነ ፅሎ፤ ሽን ኑኒ ሀች ዬላ ማእዳ። ይሁዳንነ የሩሳላመን ደእያ አሳ ኡባይ ነዉ አማነቶና እፅን፥ ነ ሃሆ ቢታንነ ማታ ቢታን ላልዳ እስራኤለ አሳ ኡባይ ዬላትዳ።
DAN 9:8 አቤት ጎዳዉ፥ ኑኒ፥ ኑ ካዎት፥ ኑ ሀላቃትነ ኑ አዋት ነና ናቅዳ ግሾ ዬላ ማእዳ።
DAN 9:9 ሽን ኑ እያ ቦላ ማካልኮካ፥ ጎዳይ ኑ ፆሳይ ማርያነ አቶ ግያ ፆሲ።
DAN 9:10 ኑኒ ኑ ጎዳ፥ ኑ ፆሳ፥ ኪተትቦኮ፤ ቃስ ባ ናበታ ባጋራ እምዳ እያ ህግያ ናግቦኮ።
DAN 9:11 እስራኤለ አሳ ኡባይ ነ ህግያ መንꬅድ፥ ካረ ከይዶሶና፤ ነዉ ኪተትቦኮና። “ኑ ነ ቦላ ናጋራ ኦꬅዳ ግሾ፥ ፆሳ አይልያ ሙሰ ህገ ማፃፋን ፃፈትዳ ባደꬃይነ ፕርዳይ ኑ ቦላ ጋክስ።
DAN 9:12 ቃስ ኑ ቦላነ ኑና ካለይሳታ ቦላ ግታ መቶ ኤሀናዉ ነ ኦድዳ ቃላ ኑ ቦላ ፖላዳሳ። የሩሳላመ ቦላ ጋክዳ መቱዋ መል ሳሎፐ ጋርሳን ሀራ ቢታ ቦላ ጋክቤና።
DAN 9:13 ሙሰ ህግያን ፃፈትዳይሳዳ፥ ሀ ꬋዮ ኡባይ ኑ ቦላ ጋክስ። ኑኒ ኑ ናጋራፐ ስምቦኮ፤ ነ ቱማ ስእቦኮ፤ ነና፥ ጎዳ፥ ኑ ፆሳ ማሮታ ኦይችቦኮ።
DAN 9:14 ጎዳይ ሀ ꬋዩዋ ኑ ቦላ ኤሀናዉ ጉየ ግቤና። ጎዳይ፥ ኑ ፆሳይ ባ ኦꬅያባ ኡባን ፅሎ፥ ሽን ኑ እያዉ ኪተቶና እፅዳ።
DAN 9:15 “አቤት ጎዳዉ፥ ኑ ፆሳዉ፥ ካሰ ነ አሳ፥ ነ ምኖ ኩሽያን ግብፀፈ ከሳዳ፥ ሀች ጋካናዉ ነ ሱንꬃ ፄግሳዳሳ፤ ኑኒ ናጋራ ኦꬅዳ፤ ባልዳ።
DAN 9:16 አቤት ጎዳዉ፥ ኔኒ ካሰ ነ ፅሎ ኦሶ ኡባ ኦꬅዳይሳዳ፥ ሀእ ነ ሀንቁዋነ ነ ጋዱዋ ነ ካታማፐ፥ የሩሳላመፐ፥ ነ ጌሻ ዙማፐ ደንꬃ። ኑኒ ኦꬅዳ ናጋራይነ ኑ አዋት ኦꬅዳ ባላይ የሩሳላመነ ነ አሳ ኑ ዩሹዋን ደእያ ኡባ ስንꬃን ካዉሽስ።
DAN 9:17 “ህዛ ኑ ፆሳዉ፥ ታኒ ነ አይለይ ዎስያ ዎሳነ ማጋኑዋ ስአ። ጎዳዉ፥ ነ ሱንꬃ ግሾ ጋዳ፥ ሀ ላለትዳ ነ ኬꬃ፥ ነ ኬሀ አይፍያን ፄላ።
DAN 9:18 አቤት ታ ፆሳዉ፥ ነ ሀይꬃ ኑኮ ዛራ፤ ነ አይፍያ ዶያዳ፥ ነ ሱንꬃይ ፄገትዳ ካታማ ꬋዩዋ በአ። ኑኒ፥ ነና ዎሰይ፥ ኑ ፅሎተꬃ ግሾ ግዶናሽን፥ ነ ግታ ማሮተꬃ ግሾሳ።
DAN 9:19 አቤት ጎዳዉ፥ ስአ! አቤት ጎዳዉ፥ አቶ ጋዳ! አቤት ጎዳዉ፥ ነ ኦሱዋ ቆንጭሳ! ነ ካታማይነ ነ አሳይ ነ ሱንꬃን ፄገትዳ ግሾ፥ አቤት ታ ፆሳዉ፥ ነ ሱንꬃ ግሾ ጋምኦፋ።”
DAN 9:20 ታኒ ዎሳሸ፥ ታ ናጋራነ ታ አሳ እስራኤለ ናጋራ ፓፃሸነ ታ ፆሳ ጌሻ ዙማባ፥ የሩሳላመባ ጎዳ፥ ታ ፆሳስ ኦዳሸ ጋምአስ።
DAN 9:21 ታኒ ዎሳ ቦላ ደእሽን፥ ካሰ ቆንጨꬃን ታ በእዳ ጋብሬለይ፥ ታኮ ኤሶን ፕራꬍሸ፥ ኦማርሳ ያርሾ ያርሽያ ዎደ ፑቱ ግስ።
DAN 9:22 እ ሀይሳዳ ያግድ፥ ታዉ ኦድስ፦ “ዳነላ፥ ታ ነዉ ኤራነ አኬካ እማናዉ ሀእ ያስ።
DAN 9:23 ኔኒ ቡሮ ዎሳ ዶምዳ ዎደ ነ ዎሳ ዛሮይ እመትስ፤ ታ ሄሳ ነዉ ኦዳናዉ ያስ። ፆሳይ ነና ዳሮ ዶሴስ። ሄሳ ግሾ፥ ታ ኦደይሳ ቆፓ፤ ቆንጨꬃ አኬካ።
DAN 9:24 “ፆሳይ ነ አሳስነ ነ ጌሻ ካታማስ ቃችዳ ዎደይ፥ ላፑን ቶሆ ላፑን ታሙ ላይꬅ። ሄ ዎደ ናቆይ ዉራና፤ ናጋራ ኦሶይ አታና፤ ቆሆይ አቶ ጌተታና፤ መርና ፅሎተꬅ ካዎታና፤ ቆንጨꬅነ ትንብተይ ፖለታና ኡባፈ ጌሻ በሳይ ትየታና።
DAN 9:25 “ሀይሳ ኤራ፤ አኬካ። የሩሳላመ ኦራꬃናዉነ ኬፃናዉ ኪት ከይዳ ጋላሳፐ ብድ ትየትዳ ሀላቃይ ያና ጋካናዉ፥ ላፑን ቶሆ ላፑናነ ኡሱፑን ታማነ ናምኡ ቶሆ ላፑን ላይꬅ አꬋና። ሄ ዎደ የሩሳላመ ካታማይ ኦራፃና፤ ኦገትነ ዩሾ ግምበት ኦሰታና፤ ሽን ግምበትያ ዎደይ፥ መቶ ዎደ ግዳና።
DAN 9:26 ኡሱፑን ታማነ ናምኡ ቶሆ ላፑን ላይꬃፈ ጉየ ትየትዳይስ ሀይቃና፤ እያዉ አይኮይካ አትቤና። ያና ሀላቃ ኦላንቾት ካታማነ ፆሳ ኬꬃ ላላና። ሄ ካታማ ዉርሰꬃይ ድኦዳ አኬኮና ያና። ሄ ዎደፐ ብድ ዉርሰꬅ ጋካናዉ ኦልነ ꬋዮይ አዋጀትስ።
DAN 9:27 ላፑን ላይꬃ ግዶን፥ ሄ ሀላቃይ አሳራ ምኖ ጫቆ ጫቀታና። ሄ ላፑን ላይꬃታ ባጋ ዛዋን ያርሾነ እሞታ ድጋና። አዋጀትዳ ፕርዳይ፥ እያ ቦላ ትገታና ጋካናዉ፥ እ ꬋዮ ኤህያ ቱናተꬃ ፆሳ ኬꬃን ኤሳና” ያግስ።
DAN 10:1 ፋርሰ ካዎይ ቅሮስ ካዎትዳ ሄꬓንꬆ ላይꬃን፥ ብልፃሶራ ጌተትያ ዳነል ሀራ ቆንጨꬅ በእስ። ሄ ቆንጨꬃይ ቱማ፤ ቆንጭዳባይ ዎልቃማ ኦላባ። ሄ ቆንጨꬃ ኤራና መላ አኬክ እያዉ እመትስ።
DAN 10:2 ሄ ዎደ ታኒ፥ ዳነል፥ ሄꬑ ሳምንታ ዬካስ።
DAN 10:3 ሄꬑ ሳምንታይ ዉራና ጋካናዉ ካꬅ ማብከ፤ አሾይ ዎይኮ ዎይነ ኡሽ ታ ዶናኮ ሺቅበና፤ ታ ሁጵያ ትየታብከ
DAN 10:4 ኮይሮ አጌናን ላታማነ ኦይዳንꬆ ጋላሳን፥ ግታ ፀግሮሳ ሻፋ ማታን ኤቃስ።
DAN 10:5 ታኒ ፄልያ ዎደ ሊኖ ማኦ ማእዳ እስ አድያ በአስ። እ ባ ፄሳን አፌዛ ዎርቃፈ ኦሰትዳ ዳንጮ ዳንጭስ።
DAN 10:6 እያ አሳተꬃይ ጶልያ አልኦ ሹቹ ዳኔስ፤ እያ ሶምኦይ ዎልአንꬃ መላ ዎልአሜስ፤ እያ አይፈይ ታማ ላጮ ዳኔስ፤ እያ ኩሸይነ እያ ቶሆይ ቁሸትዳ ናሰ ብራታዳ ፖኤስ፤ እያ ቃላይ ዳሮ አሳ ግርሳዳ ኮሽሜስ።
DAN 10:7 ሀ ቆንጨꬃ ታኒ፥ ዳነል ታርካ በአስ። ታራ ደእያ አሳይ በእቦኮና፤ ኤንቲ ዳሮ ዳጋምዳ ግሾ ባቃትድ ቆሰትዶሶና።
DAN 10:8 ታኒ ሀ ግታ ቆንጨꬃ በአሸ፥ ታርካ አታስ። ታዉ ዎልቅ እፅን ዳቡራስ፤ ታ ሶምኦይ ቡላትስ።
DAN 10:9 ታኒ እያ ኮሽንቻ ስእዳ ዎደ ሳአን ታ ሶምኡዋራ ጉፋናዳ፥ ታና ባላ አጋስ።
DAN 10:10 ሄሳፈ ጉየ፥ እስ ኩሸይ ታና ቦችስ፤ ታኒ ኮኮራሽን፥ ታ ኩሽያንነ ታ ጉልባታን ታና ደንꬅድ ኤስስ።
DAN 10:11 እ ታኮ፥ “ዳሮ ዶሰትዳ ዳነላ፥ ታኒ ነዉ ኦድያ ቃላ ሎይꬃዳ አኬካ፤ ደንዳ ኤቃ። ታኒ ኪተታዳ ኔኮ ያስ” ያግስ። እ ታኮ ሀይሳዳ ግን፥ ታኒ ኮኮራሸ ደንዳ ኤቃስ።
DAN 10:12 ቃስካ፥ “ዳነላ፥ ያዮፋ! ኔኒ አኬካ ደማናዉ ቆፓዳ፥ ነ ፆሳ ስንꬃን ነናተꬃ ካዉሽዳ ኮይሮ ጋላሳፐ ዶምድ፥ ነ ዎሳይ ስኤትስ፤ ታ ነዉ ዛሮ ኤካዳ ያስ።
DAN 10:13 ሽን ፋርሰ ካዎተꬃ ሀላቃ ግድዳ አያናይ ላታማነ እስ ጋላስ ታና ተቅስ። ታኒ፥ ታርካ ፋርሰ ካዎተꬃ ሀላቃራ ያን አትዳ ግሾ፥ ኪታንቾታ ሀላቃታፐ እሶይ፥ ምካኤል፥ ታና ማዳናዉ ይስ።
DAN 10:14 ሀ ቆንጨꬃይ ስንꬃፈ ሀናናባ በሲያ ግሾ፥ ታኒ ኔኮ ይዳይ፥ ዉርሰꬃ ጋላሳን ነ አሳ ቦላ ሀናናዉ ደእያባ ነዉ ቆንጭሳናሳ” ያግስ።
DAN 10:15 እ ሄሳ ታዉ ኦድያ ዎደ፥ ታኒ ሳአን ጉፋናዳ፥ ጋናባ ꬋያስ።
DAN 10:16 ሄሳፈ ጉየ፥ አሰ ዳንያ እሶይ ታ መተርሻ ቦችስ፤ ታ ዶናይ ዶየትን፥ ኦደተꬅ ዶማስ። ታ ስንꬃን ኤቅዳይሳኮ፥ “ታ ጎዳዉ፥ ሀ ቆንጨꬃይ ታና ዳሮ ዳጋንꬅዳ ግሾ ዳሮ ዳቡራስ።
DAN 10:17 ታኒ ነ አይለይ፥ ኔራ፥ ታ ጎዳራ ዋናዳ ኦደታናዉ ዳንዳአይና? ታ ዎልቃይ ዉርስ፤ ሸምፓናዉካ ታዉ እፀትስ” ያጋስ።
DAN 10:18 ሄ አሰ ዳንያ እሶይ ናምአንꬆ ታና ቦችድ፥ ታዉ ዎልቃ እሚስ።
DAN 10:19 እ ታኮ፥ “ዳሮ ዶሰትዳ አድያዉ ያዮፋ! ሳሮይ ነዉ ግዶ። ምና፤ ፃላ” ያግስ። እ ሄሳ ግድ ታና ምንꬅን፥ ታኒ ምናዳ፥ “ታ ጎዳዉ፥ ኔኒ ታና ምንꬅዳ ግሾ ታዉ ኦዳ” ያጋስ።
DAN 10:20 እ ዛሪድ፥ “ታኒ ኔኮ አይስ ይዳኮ ነ ኤራይ? ሀእ ታ ስማዳ ፋርሰ ሀላቃ ግድዳ አያናራ ኦለታናዉ ባና፤ ታኒ ቢኮ ግርከ ሀላቃ ግድዳ አያናይ ያና።
DAN 10:21 ሽን ቱማ ማፃፋን ፃፈትዳባ ታኒ ነዉ ኦዳና። ታኒ ኤንታራ ኦለትያ ዎደ፥ ህንተ ሀላቃ ምካኤላፐ አትሽን፥ ታና ማድያ ሀር ባዋ።”
DAN 11:1 “ሜዶና አስ ግድዳ ዳርዮስ፥ ካዎትዳ ኮይሮ ላይꬃን፥ ታኒ እያ ማዳናዉነ ምንꬃናዉ እያ ምየን ኤቃስ።”
DAN 11:2 “ህዛ ታ ነዉ ቱማ ኦዳይስ። ሀራ ሄꬑ ካዎት ፋርሰ ቢታን ካዎታና፤ ኤንታፈ ጉየ ካዎትያ ኦይዳንꬆ ካዎይ፥ ሀንኮታፐ አꬍዳ ዱረ ግዳና። እ ባ ዱረተꬃ ጋሶን ዎልቃ ደምያ ዎደ፥ አሳ ኡባይ ግርከ ካዎተꬃራ ኦለታና መላ ደንꬃና።
DAN 11:3 “ሄሳፈ ጉየ፥ ዎልቃን ሃርያ ምኖ ካዎይ ደንድድ፥ ባ ኮይዳባ ኡባ ኦꬃና።
DAN 11:4 እ ዎልቃን ምንዳ ዎደ እያ ካዎተꬃይ ላለትድ፥ ኦይዱ በሳን ሻከታና። እያ ኮቻት እያ ካዎተꬃ ላቶኮና፤ ካዎተꬃይ እ ካሰ አይሰይሳዳ ዎልቃማ ግደና፤ እያ ካዎተꬃይ እያፐ ኤከትድ፥ ሀራታስ እመታና።
DAN 11:5 “ዱገሀ ቢታ ካዎይ ምኖ ግዳና፤ ሽን እያ ሹማታፐ እሶይ እያፐ ዳሮ ምንድ፥ ሄ ግታ ካዎተꬃ ሃራና።
DAN 11:6 ጉꬃ ላይꬃፈ ጉየ፥ ዱገሀ ቢታ ካዎይነ ፑደሀ ቢታ ካዎይ ባንታ ግዶን ዳቦተꬃ ጫቆ ጫቀታና። ዱገሀ ቢታ ካዋ ናእያ ፑደሀ ቢታ ካዋ ገላና፤ ሽን እ ዎልቃይ ምነና፤ ቃስ እካ እያ ዎልቃይካ ዳሮ ዎደ ጋምኤና። ሄ ዎደ፥ ኢራ እስፈ፥ እዮ ማደይሳት፥ እ ናአይነ እ አዝናይ፥ ኡባይ አꬍድ እመታና።
DAN 11:7 “ጉꬃ ዉደፐ ጉየ፥ እ ዳቦታፐ እሶይ ዱገሀ ቢታን ካዎታና። ፑደሀ ቢታ ካዋ ቦላ ደንዳና፤ እያ ሚፃ መንꬅ ገልድ እያ ፆናና።
DAN 11:8 ቃስ ኤንታ ፆሳታ፥ ምስለታነ ብራፐነ ዎርቃፈ ኦሰትዳ ሚሸታ ኤክድ፥ ግብፀ ኤፋና። ጉꬃ ዎደስ ፑደሀ ቢታ ካዋ ኦላናዉ ደንደና።
DAN 11:9 ፑደሀ ቢታ ካዎይ ዱገሀ ቢታ ካዋ ቦላ ደንዳና፤ ሽን ባ ይዳ ኦግያራ ጉየ ስማና።
DAN 11:10 “ፑደሀ ቢታ ካዋ አደ ናይት ኦላስ ጊግድ፥ ዳሮ ኦላንቾታ ሺሻና። ኤንታራ ጋሄትያባ ኡባ ሜጭድ ኤፍያ ዎልቃማ ድኦዳ ካንꬅድ አꬋና፤ ዛር ኦልድ ዱገሀ ካዋ ሚፃ ጋካናዉ ባና።
DAN 11:11 ሄ ዎደ ዱገሀ ቢታ ካዎይ ዳሮ ሀንቀትድ፥ ፑደሀ ቢታ ካዋ ኦላናዉ ደንዳና። ፑደሀ ቢታ ካዎይ ሺሽዳ ዳሮ ኦላንቾታራ ኦለትድ፥ ኤንታ ፆናና።
DAN 11:12 ዳሮ ኦላንቾታ ድእዳፐ ጉየ፥ ኦቶሮን ፑነታና። ዳሮ ሙኩሉ አሳ ዎꬋና፤ ሽን እያ ፆኖይ እያራ ጋምኤና።
DAN 11:13 “ፑደሀ ቢታ ካዎይ ካሰይሳፈ አꬍያ ሀራ ኦላንቾታ ጊግሳና። ጉꬃ ላይꬅ ጋምእዳፐ ጉየ፥ ኩመꬃ ኦላ ሚሸ ኦይክዳ፥ ኦላንቾታ ኤክድ ኦላስ ከያና።
DAN 11:14 ሄ ዎደ ዳሮ አሳይ ዱገሀ ቢታ ካዋ ቦላ ደንዳና። ቆንጨꬃይ ፖለታና መላ ነ አሳፐ እስ እስ ማካላንቾት ደንዳና፥ ሽን ኤንቲ ፆኖኮና።
DAN 11:15 ፑደሀ ቢታ ካዎይ ዱገሀ ቢታ ይድ፥ ዩሾይ ግምበትዳ እስ ካታማ ኦልድ ኦይካና። ዱገሀ ቢታ ካዋ ኦላንቾት ዎልቃ ꬋያና፤ ሀር አቶሽን፥ ኤንታፈ ምኖ ኦላንቾትካ ኤንታራ ኤቀታናዉ ዳንዳኦኮና።
DAN 11:16 እያራ ኤቀታናዉ ዳንዳኤይ ባይና ግሾ ፑደሀ ቢታ ካዎይ ባ ኮይዳባ ኡባ ኦꬃና። እ ዶረትዳ ቢታን ምን ኤቅድ፥ እያ ꬋይስያ ዎልቃ ደማና።
DAN 11:17 እ ባ ካዎተꬃን ደእያ ዎልቃ ኡባ ኤክድ ያናዉ ሀልቻና፤ ዱገሀ ቢታ ካዉዋራ ዳቦተꬃ ጫቆ መꬋና። ሄ ካዎተꬃ ꬋይሳናዉ ሀልችድ፥ ባ ናእዉ እያዉ እማና፥ ሽን እያ ሀልቾይ ፖለተና።
DAN 11:18 ባ ሶምኡዋ ዩሾይ አባን ተቀትዳ ቢታታኮ ዛሪድ፥ ኤንታፈ ዳሮታ ኦልድ ባዉ ኤካና። ሽን እስ ቶራ ሞጮናይ እያ ፆንድ እያ ኦቶሩዋ ጊሻና፤ እያ ኦቶሮ ኦዳ እያ ቦላ ዛራና።
DAN 11:19 ፑደሀ ቢታ ካዎይ ባ ቢታ፥ ባ ሚፃኮ ስማና። ሽን እ ꬉበትድ ኩንዳና፤ እያ ናምአንꬆ ኦንካ በኤና።
DAN 11:20 “እያ በሳን ካዎትያ ሀራ ካዎይ ባ ካዎተꬃ ቦንቹዋ ናጋናዉ ጊራ ጊርስያ አሰ ካዎተꬃ ግዶ ኪታና። ግዶሽን፥ ጉꬃ ዎደፐ ጉየ፥ ቆንጨን ዎይኮ ኦላን ግዶናሽን፥ እ ጮ ሀይቅድ ꬋያና።
DAN 11:21 “እያ በሳን እስ ካትዳ አስ ደንዳና፤ ሽን ኤንቲ እያዉ ካዎተꬃ ቦንቾ እሞኮና። አሳይ ሳእ ሳሮ ግድ ኡትዳሽን፥ ጭምድ ካዎተꬃ ኦይካና።
DAN 11:22 ዳሮ ኦላንቾት እያ ስንꬃፈ ፕተትድ ꬋያና፤ ጫቆ ሀላቃይካ ሀይቃና።
DAN 11:23 እያራ ጫቁዋ ጫቅ ስሚድ፥ ባ ኦꬅያባ ጭሞን ኦꬃና፤ ጉꬃ አሳታ ፃላላራ እ ምናና።
DAN 11:24 አሳይ ሳእ ሳሮ ግድ ኡትዳሽን፥ ሄ ቢታን እ፥ ዳሮ ዱረ ግድዳ እስ ባጋ ኦይካና። ካሰ እያ አዋይ ዎይኮ እያ ማይዛይ ኦꬅቦናባ ኦꬃና፤ እ ድእድ ሺሽዳ ዱረተꬃነ አቁዋ ባና ካለይሳታስ ግሻና። እ ሚፃታ ላላናዉ ሀልቻና፤ ሽን ሄስ ሀናናይ ጉꬃ ዎደሳ።
DAN 11:25 ባ ዎልቃ ምንꬅድ፥ ዳሮ ኦላንቾታራ ዱገሀ ቢታ ካዋ ቦላ ደንዳና። ዱገሀ ቢታ ካዎይ ዳሮነ ዎልቃማ ኦላንቾታራ ኦላስ ደንድድ፥ እያራ ኦለታና። ሽን እያ ቦላ ኤንቲ ማቅዳ ማቁዋ ጋሶን፥ እ ኤንታራ ኤቀታናዉ ዳንዳኤና።
DAN 11:26 ካዉዋራ እስ ጋይታን መይሳት እያ ꬋይሳና፤ እያ ኦላንቾት ፕተታና፤ ዳሮት ኦላን ሀይቃና።
DAN 11:27 ሀ ናምኡ ካዎት ባንታ ዎዛናን ኢታ ቆፋ ኦይክድ፥ እስፈ እስ ጋይታ ቦላ ኡታና፤ እሶይ እሱዋ ጭማናዉ ዎርዶ ኦደታና። ሽን ቃመትዳ ዎደይ ቡሮ ጋክቦና ግሾ ኤንቲ ኦꬃና ግድ ቆፕያባይ ኤንታዉ እንጀተና።
DAN 11:28 ፑደሀ ቢታ ካዎይ ዳሮ ዱረተꬃራ ባ ቢታ ስማና። ሽን እ ባ ዎዛናን ጌሻ ጫቁዋ እፃና። ጌሻ ጫቁዋ ቆሀናዉ እያ ቦላ እስባ ኦꬅድ፥ ባ ቢታ ስማና።
DAN 11:29 “ቃመትዳ ዎደይ ጋክን፥ እ ዛሪድ ዱገሀ ቢታ ቦላ ደንዳና፥ ሽን እያዉ ካሰይሳዳ እንጀተና።
DAN 11:30 ክፅማፐ ያ ኦላ ማርካበት እያ ዳጋንꬃና። ጉየ ስሚድ፥ ጌሻ ጫቁዋ ቦላ ሀንቀታና። ቃስ ያፐ ስሚድ፥ ጌሻ ጫቁዋ አግዳይሳታራ ዳቦታና።
DAN 11:31 “እያ ኦላንቾት ፆሳ ኬꬃነ እያ ዩሹዋ ቱንሳና፤ ጋላስ ጋላስ ያርሸትያ ያርሹዋ ድጋና። ያትድ፥ ꬋዮ ቱናተꬃ ያን ኤሳና።
DAN 11:32 እ ጫቆ ቃላ መንይሳታ፥ ጭሞ ቃላን ባ ባጋ ዛራና፤ ሽን ባንታ ፆሳ ኤርያ አሳይ ምናናነ እያራ ኤቀታና።
DAN 11:33 “አሳ ግዶን ደእያ ጭንጫት ዳሮ አሳ ታማርሳና። ሽን ጉꬃ ዎደን ሄ አሳት ማሻን ሀይቃና፥ ታማን ፁገታና፥ ድኤታና ዎይኮ ቦንቀታና።
DAN 11:34 ሄ መቱዋ ግዶን ደእሸ፥ ኤንቲ ጉꬃ ማዶ ደማና፤ ዳሮ አሳይ ኤንታ ባጋ ዳንድ፥ ኤንታኮ ስማና፤ ሽን ቱማ ዎዛናፐ ግደና።
DAN 11:35 ጭንጫታፐ እሶት እሶት ꬉበታና። ቃመትዳ ዎደይ ቡሮ ጋክቦና ግሾ፥ ኤንቲ ሄሳዳ ሀንድ፥ ዉርሰꬃ ዎደይ ጋካናዉ፥ ፓጨትድ ከያና፥ ጌያናነ ቦረይ ባይናይሳታ ግዳና።”
DAN 11:36 “ካዎይ ባና ሎእዳባ ኦꬃና፤ ባና ፆሳታ ኡባፈ ꬎቁ ኦꬅድ ግታያና፤ ፆሳታ ፆሳ ቦላ ካሰ ስኤትድ ኤሮና ኢታ ቃላ ኦደታና። ሀናናዉ ደእያባይ ሀናናዉ በሲያ ግሾ፥ ፆሳ ሀንቆይ ፖለታና ጋካናዉ እ ኦꬅያባ ኡባይ እያዉ እንጀታና።
DAN 11:37 እ፥ ባ ማይዛታ ፆሳታ ዎይኮ ማጫሳይ ዶስያ ፆሳታ ካꬋና። እ ባና ኡባፈ አꬅድ ꬎቁ ኦꬅያ ግሾ፥ ሀራ ፆሳታ ኤከና።
DAN 11:38 እ ኤንታ ቦንቾ አግድ ሚፃታ ፆሳ ቦንቻና፤ እያ ማይዛት ኤሮና ፆሰ፥ ዎርቃ፥ ብራ፥ አልኦ ሹችነ ሎኦ እሞታ እምድ ቦንቻና።
DAN 11:39 እማꬃ ፆሳን ማደትድ፥ እ ምኖ ሚፃታ ቦላ ደንዳና። ቃስ እያ ማታ ኤርያ አሳ ዳሮ ቦንቻና። እ ኤንታ፥ አሳ ቦላ ሹማና፤ ቢታ ዎይቶ ኦꬅድ ኤንታዉ ሻክ ሻክ እማና።
DAN 11:40 “ዉርሰꬃ ዎደይ ጋክን፥ ዱገሀ ቢታ ካዎይ ደንድድ፥ ፑደሀ ቢታ ካዋ ኦላና። ሽን ፑደሀ ቢታ ካዎይ ፓራ ጋረታ፥ ፓራ አሳታነ ዳሮ ማርካበታ ኤክድ፥ እያ ቦላ ጎተዳ ያና። ዳሮ ቢታ ኦይክድ፥ ድኦዳ ሜጭድ ኤፋና።
DAN 11:41 እ ጌሻ ቢታ ቦላ ደንዳና፤ ዳሮ ቢታት እያ ኩሸን ኩንዳና። ሽን ኤዶመይ፥ ሞአበይነ አሞነፐ ዳርያ ባጋይ እያ ኩሸፐ አታና።
DAN 11:42 እ ዳሮ ቢታታ ቦላ ደንድያ ዎደ፥ ግብፀይካ እያፐ ከስ ኤከና።
DAN 11:43 ግብፀ ዎርቃ፥ ብራነ ዱረተꬃ ኡባ፥ ባ ኩሸን አꬃና። ሊበነ ቶጰ አሳይ እያዉ ሃረታና።
DAN 11:44 ሽን ዶሎሀ ባጋፈነ ፑደሀ ባጋፈ ያ ኦዳይ፥ እያ ዳጋንꬃና። ሀንቆ ኤፅ ከይድ፥ ዳሮታ ዎꬋናነ ꬋይሳና።
DAN 11:45 እ ባ ካዎታ ዱንካንያ አባፈነ ሎኦ ጌሻ ዙማፐ ግዶን ቶካና። ሽን እ፥ ዉርሰꬃን ባዉ ꬋያና፤ እያ ማድያ ኦንካ በንተና።”
DAN 12:1 “ሄ ዎደ ነ አሳ ናግያ ግታ ሀላቃይ፥ ምካኤል ደንዳና። ካዎተꬅ መትዳ ዎድያፐ ዶምድ፥ ሀን ኤሮና መቶ ዎደይ ያና። ግዶሽን፥ ኤንታ ሱንꬃይ ፆሳ ማፃፋን ፃፈትዳ ነ አሳ ኡባይ ሄ ዎደ አታና።
DAN 12:2 ሀይቅዳ አሳፐ ዳሮት ደንዳና። ኤንታፈ ባጋት መርና ደኦስ፥ ባጋት ቃስ ዬላስነ መርና ካዉሻስ ደንዳና።
DAN 12:3 ጭንጫት ሳሎ ፖኦዳ ቃስ ዳሮታ ፅሎተꬃ ኦገ ካለይሳት መርናዉ ፆልንቶዳ ፖአና።
DAN 12:4 ሽን ነኖ ዳነላ፥ ነ ዉርሰꬃ ዎደይ ጋካናዉ፥ ሀ ማፃፋ ጎርዳዳ፥ ማታመ ዎꬃ። ዳሮት ኤራተꬅ ደማናዉ ያነ ሃነ ዎፀረታና” ያግስ።
DAN 12:5 ታኒ፥ ዳነል፥ ናምኡ አሳታ፥ እሶይ ሻፋፐ ሀፍንꬃ፥ እሶይ ሻፋፐ ሄፍንꬃን ኤቅዳይሳታ በአስ።
DAN 12:6 ኤንታፈ እሶይ ሊኖ ማእድ፥ ሻፋፐ ቦላ ባጋራ ኤቅዳ ኪታንቹዋ፥ “ሀ ማላታት ፖለታናዉ አይ መላ ዎደ ጋምአኔ?” ያግድ ኦይችስ።
DAN 12:7 ሊኖ ማእድ፥ ሻፋፐ ቆሞ ባጋራ ኤቅዳ ኪታንቾይ፥ ባ ኡሻቻ ኩሽያነ ባ ሀድርሳ ኩሽያ ሳሎ ደንꬅድ፥ መርናዉ ደኤይሳ ሱንꬃን ሀይሳዳ ያግድ ጫቅስ፦ “ሀይስ፥ ዎደይ፥ ዎደትነ ዎደ ባጋይ ጋካናዉ ጋምአና፤ ጌሻ አሳታ ዎልቃይ ዉርያ ዎደ ሀ ኡባይ ፖለታና” ያግስ።
DAN 12:8 ሀ ኡባ ታኒ ስአስ፥ ሽን ታዉ ገልቤና። ያትን፥ ታኒ፥ “ታ ጎዳዉ፥ ሀ ኡባስ ዉርሰꬃይ አይ ግዳንዴ?” ጋዳ ኦይቻስ።
DAN 12:9 እ ዛሪድ፥ “ዳነላ፥ ሀ ቃላይ ዉርሰꬃ ዎደይ ጋካናዉ ጎርደትዳነ አታመትዳ ግሾ ኔኒ ባ፤
DAN 12:10 ዳሮት ፓጨትድ ከያና፥ ጌያናነ ቦረይ ባይናይሳታ ግዳና፤ ሽን ኢታት፥ ኢታባ ኦꬃና። ኢታታፐ እስ አስካ አኬከና፤ ሽን ጭንጫት አኬካና።
DAN 12:11 “ጋላስ ጋላስ ያርሸትያ ያርሾይ ድገትዳፐነ ꬋዮ ቱናተꬃይ ሄ በሳን ኤቅዳፐ ስምን፥ 1,290 ጋላስ።
DAN 12:12 ገንጭድ 1,335 ጋላስ ጋካናዉ ናግያ አስ አንጀትዳይሳ።
DAN 12:13 “ኔኒ ዉርሰꬅ ጋካናዉ ባ። ነ ሸምፓና፤ ዉርሰꬃን ነና ጋክያ ላታ ኤካናዉ ደንዳና” ያግስ።
HOS 1:1 ኦዝያን፥ እዮአታም፥ አካዝነ ህዝቅያስ ካል ካል ይሁዳን ካዎትዳ ዎደ ቃስ ዮኣሳ ናአይ እዮርባም እስራኤለን ካዎትዳ ዎደ ብኤራ ናኣ ሆሰኮ ይዳ ጎዳ ቃላይ ሀይሳ።
HOS 1:2 ጎዳይ ኮይሮ ሆሰ ባጋራ ኦድዳ ዎደ “ታ አሳይ ታፐ ሃክድ ኢታ ላይማተꬅ ኦꬅዳ ግሾ፥ ኔኒ ባዳ፥ ላይማ ማጫስ ኤካዳ ላይማ ናይታ ኢፐ የላ” ያግስ።
HOS 1:3 ሄሳ ግሾ፥ ሆሰይ ብድ፥ ድብላይማ ናእዉ ጎመሮ ኤክን፥ እያ ቃንꬃታዳ አደ ናአ የላሱ።
HOS 1:4 ያትን፥ ጎዳይ ሆሰኮ ነ ናአ ሱንꬃ፥ “እዝራኤለ” (ላላና ዎይኮ ዘራና) ያጋዳ ሱንꬃ። አይስ ጊኮ፥ እዝራኤለን ጉክዳ ሱꬃ ግሾ ታኒ እዩ ኮቻ ቃንꬃ ዎደን ፕርዳና፤ እስራኤለ ካዎተꬃካ ꬋይሳና።
HOS 1:5 ሄ ጋላስ ታኒ እዝራኤላ ዛንጋራን እስራኤለ ኦላንቾታ መንረꬃና።
HOS 1:6 ጎመራ ናምአንꬆ ቃንꬃታዳ፥ ማጫ ናአ የላሱ። ያትን፥ ጎዳይ ሆሰኮ፥ “እ ሱንꬃ ሎሩሃማ (ማሮተꬅ ደሞናሮ) ያጋዳ ሱንꬃ። አይስ ጊኮ፥ ህዛፐ ጉየ ታኒ እስራኤለ አሳስ ቃትከ፤ ኤንታዉ አቶ ጊከ።
HOS 1:7 ሽን ታኒ ይሁዳ አሳስ ቃታና፤ ታኒ ኤንታ ዶንገን ዎይኮ ማሻን ዎይኮ ኦላን ዎይኮ ፓራታን ዎይኮ ፓራ አሳታን ግዶናሽን፥ ታኒ ጎዳይ፥ ኤንታ ፆሳይ፥ ታ ዎልቃን ኤንታ አሻና” ያግስ።
HOS 1:8 ጎመራ ሎሩሃሞ ꬋንꬅ ዱꬅዳፐ ጉየ ቃንꬃታዳ ሀራ አደ ናአ የላሱ።
HOS 1:9 ያትን፥ ጎዳይ ሆሰኮ፥ “እያ ሱንꬃ ሎኣማ (ታ አሰ ግደና) ያጋዳ ሱንꬃ። አይስ ጊኮ፥ ህንተ ታ አሰ ግደከታ፤ ታካ ህንተ ፆሰ ግድከ።
HOS 1:10 “ግዶሽን፥ እስራኤለ አሳይ ማካናዉነ ታይባናዉ ዳንዳኤቶና አባ ሻፍያ መላ ግዳና። ኤንቲ፥ ‘ህንተ ታ አሰ ግደከታ’ ጌተትድ ፄገትዳ በሳን ህንተ ‘ደኦ ፆሳ ናይታ’ ጌተታና።
HOS 1:11 ይሁዳ አሳይነ እስራኤለ አሳይ እስፈ ሺቅድ ባንታዉ እስ ሀላቃ ዶርድ ድኤትዳ ቢታፈ ስማናነ እንጀትድ ዳና። ሄ ጋላሳይ እዝራኤለስ ግታ ጋላስ ግዳና።
HOS 2:1 “ህንተ እሻታ፥ ‘ታ አሰ’ ቃስ ህንተ ምቸታ፥ ‘ማሮተꬅ ደምዳይሳታ’ ያግድ ፄግተ።
HOS 2:2 “ህንተ አይዉ ሀንቀትተ፤ እዮ ካጭተ። አይስ ጊኮ፥ እያ ታ ማቾ ግዱኩ፤ ታካ እ አዝና ግድከ። እያ ባ ሶምኡዋፈ ላይማተꬃ ማላ ድጎ፤ ላይማተꬃ ኦሱዋ ባ ꬋንꬃታ ግዶፈ ድጎ።
HOS 2:3 ሄስ ሀኖና እፅኮ እያ የለትዳ ጋላሳዳ፥ ታኒ እዮ ፅረ ካሎ አሻና። ቃስ እዮ መልዳ መላ ቢታ ኦꬃና፤ ታኒ እዮ ሳሞን ዎꬋና።
HOS 2:4 ኤንቲ ላይመፐ የለትዳ ናይታ ግድዳ ግሾ፥ ታኒ እ ናይታስ ቃትከ።
HOS 2:5 ኤንታ አይያ ላይማታሱ፤ ካዉሻባ ሀናዳ ኤንታ ቃንꬃታሱ። እያ፥ ‘ታኒ ታ ካꬃነ ታ ሃꬃ፥ ታ ሱፍያነ ታ ሊኑዋ፥ ታ ዛይትያነ ታ ኡሻ ታዉ እምያ ታ ላገꬆታ ካላዳ ባና’ ያጋሱ።
HOS 2:6 ሄሳ ግሾ፥ ታኒ እ ኦግያ አጉንꬃን ጎርዳና፤ እያ ባ ኦግያ ደሞና መላ ታኒ እ ዩሹዋ ግምበን ድራና።
HOS 2:7 እያ ባ ላገꬆታ ጌዶ ዎፃና፥ ሽን ጋኩኩ፤ ኤንታ ኮያና፥ ሽን ደሙኩ። ሄሳፈ ጉየ፥ ‘ሀእ ዱሳፈ ታዉ በንይስ ሎኦ ግድያ ግሾ፥ ስማዳ ታ ኮይሮ አዝናኮ ባና’ ያጋና።
HOS 2:8 ካꬃ፥ ዎይነ ኡሻነ ዛይትያ እዉ እምዳይነ ኤንቲ ባኣለ ኤቃስ ያርሽያ ብራነ ዎርቃ እዉ ዳርስዳይ ታና ግደይሳ እያ ኤሮና እፃሱ።
HOS 2:9 ሄሳ ግሾ፥ ካፅያ ዎደ ታ ካꬃ፥ ቴርያ ዎደ ታ ዎይንያ ኢፐ ዛራዳ ኤካና። እያ ባ ካሉዋ ካምያ ሱፍያነ ሊኑዋ ኢፐ ቃራ ኤካና።
HOS 2:10 እ ላገꬆታ ስንꬃን ታኒ እ ካሉዋ ቃራና፤ ታ ኩሽያፐ እዮ ኦንካ አሸና።
HOS 2:11 ታኒ እ ኡፋይሳ ባለታ ኡባ፥ አጌና ፄሮ ጋላሳታ፥ እ ሳምባታ ጋላሳታ፥ ላይꬃን ላይꬃን ቦንቸትያ ባለታ አሻና።
HOS 2:12 እያ፥ ‘ታ ላገꬆት ታዉ እምዳ ጭጋ’ ግያ ዎይንያነ ባላሰ ምꬃ ታ ꬋይሳና፤ ታኒ ሄ በሳ ዎራ ኦꬃና፤ ባዞ ዶአት እያ ማና።
HOS 2:13 እያ ታና ዶጋዳ ባ ላገꬆታ ካላዳ፥ ሳጋዮታንነ አሌቆታን አሌቀታዳ፥ ባኣለ ኤቃስ እፃነ ጩይስዳ ጋላሳታ ግሾ ታኒ እዮ ሴራና፤ ያጌስ ጎዳይ።
HOS 2:14 “ሄሳ ግሾ፥ ታኒ እዮ ጭማዳ መላ ቢታ ኤሀዳ፥ እዉ ሲቆ ቃላን ኦዳና።
HOS 2:15 ያን ታኒ እ ዎይነ ጋደ እዉ ዛራዳ እማና፤ አኮራ ዛንጋራ (መቶ ዛንጋራ) እዉ ኡፋይሳ ፐንገ ኦꬃና። ግብፀ ቢታፈ ከይዳ ዎድያዳ ባ ጌላኦተꬃ ላይꬃን ደእያ ሀኖታን ኡፋይሳን የፃና” ያጌስ።
HOS 2:16 ሄ ጋላስ እያ ታና፥ “ታ አዝናዉ” ያጋዳ ፄጋና፤ ካሰይሳዳ፥ “ታ ጎዳዉ” ያጋዳ ፄጉኩ።
HOS 2:17 አይስ ጊኮ፥ ታኒ እ ዶናፐ “ባኣለ” ኤቃታ ሱንꬃ ድጋና፤ ህዛፐ ጉየ ታኒ እዮ “ባኣለ” ሱንꬃ ፄግስከ።
HOS 2:18 ሄ ዎደ ታኒ ታ አሳ ግሾ ሳኣ ዶአታራ፥ ሳሎ ካፎታራነ ቢታራ ጎሸትያ መተꬃታራ ጫቃና። ታኒ ቢታፈ ዶንገ፥ ማሸነ ኦላ ꬋይሳና። ኤንቲ ቢታ ቦላ ሳሮ ዳና።
HOS 2:19 ታኒ ነና መርናዉ ታዉ ማቾ ኦꬃና፤ ፅሎተꬃን፥ ሱረ ፕርዳን፥ መርና ሲቁዋንነ ማሮተꬃን ታዉ ጊግሳና።
HOS 2:20 ታኒ አማነታዳ ነና ታዉ ጊግሳና፤ ነካ ጎዳ ኤራና።
HOS 2:21 “ሄ ዎደ ታኒ ዛሮ እማና፤ ታኒ ሳሎታስ ዛሮ እማና፥ ሳሎት ሳኣስ ዛሮ እማና።
HOS 2:22 ሳአይ ካꬃስ፥ ዎይነ ኡሻስነ ዛይትያስ ዛሮ እማና፤ ኤንቲ እዝራኤለስ (ፆሳይ ቶካና) ዛሮ እማና።
HOS 2:23 ታኒ እዮ ታ ግሾ ጋዳ ቢታ ቦላ ቶካና፤ ካሰ ታኒ፥ ‘ማርከ’ ግዳይሳታ ማራና፤ ‘ታ አሰ ግደከታ’፤ ግዳይሳታ፥ ‘ታ አሰ’ ጋና። ኤንትካ ታና፥ ‘ኔኒ ኑ ፆሳ’ ያጋና” ያጌስ ጎዳይ።
HOS 3:1 ጎዳይ ታና፥ “እስራኤለ አሳይ ሀራ ፆሳታኮ ስሚድ፥ ዛብበ ኡይꬃ ያርሻናዉ ኮይኮካ፥ ጎዳይ ኤንታ ዶሰይሳዳ እዮ ዶሳ። እያ ሀራ ላገꬅያባነ ላይማትያባ ግድኮካ ኔኒ እዮ ዶሳ” ያግስ።
HOS 3:2 ያግን፥ ታኒ እዮ ታማነ እቻሹ ብራ ሳንትመንነ ፄታነ እሻታሙ ክሎ ግራመ ባንጋን ሻማስ።
HOS 3:3 ታኒ እዮ፥ “ኔኒ ላይማቶናነ ሀራ አደራ ዶና ታራ ዳሮ ዎደ ዳናዉ ኮሼስ። ታንካ ኔራ ዳና” ያጋስ።
HOS 3:4 እስራኤለ አሳይ ካዎይ ዎይኮ ሀላቅ ባይና፥ ያርሾይ ዎይኮ ኤቃ ቱስ ባይና፥ ኤፉደ ማኦይ ዎይኮ ኤቃ ምስለይ ባይና ዳሮ ዎደ ዳና።
HOS 3:5 ሄሳፈ ጉየ፥ እስራኤለ አሳይ ጎዳ ባንታ ፆሳኮነ ባንታ ካዋ ዳዊታኮ ስማና። ዉርሰꬃ ዎድያን ኤንቲ ኮኮርሸ፥ ጎዳኮነ እያ አንጁዋኮ ያና።
HOS 4:1 ሀ ቢታን ደእያ አሳ ኡባ፥ ጎዳይ ሞትያባይ ደእያ ግሾ፥ እስራኤለ አሳቶ፥ ጎዳ ቃላ ስእተ። ሄስካ፥ ቢታ ቦላ አማነተꬅ፥ ሲቆይነ ፆሳ ኤሮይ ባዋ።
HOS 4:2 ሀ ቢታ ቦላ ደኤይ ባደꬅ፥ ዎርዶ፥ ሸምፖ ዎꬎ፥ ካይሶቶነ ላይማ ፃላላ። ኤንቲ ዎጋ ኡባ መንꬆሶና፤ ሱꬁ ጉሶሶና።
HOS 4:3 ሄሳ ጋሶን ቢታ ኡባይ ዬካና፤ ቢታን ደእያ ኡባይ ዳቡራና። ሳአ ዶአት፥ ሳሎ ካፎትነ አባ ሞሎት ሀይቃና።
HOS 4:4 ህንተኖ፥ ካህነቶ፥ ታኒ ህንተና ሞትያባይ ደእያ ግሾ፥ ኦንካ ሀራ አሳራ ፓላመቶፎ፤ ዎይኮ ሀራ አስ ሞቶፖ።
HOS 4:5 ህንተ ጋላስነ ቃማ ꬉበቴታ፤ ናበትካ ህንተራ ꬉበቶሶና። ሄሳ ግሾ፥ ታኒ ህንተ አይዉ ꬋይሳና።
HOS 4:6 ታ አሳስ ኤራተꬅ ባይና ግሾ ꬋይዶሶና። ህንተ ኤራተꬅ እፅዳ ግሾ፥ ታካ ህንተ ታዉ ካህነ ግዶና መላ እፃስ። ህንተ ፆሳ ህግያ ዶግዳ ግሾ፥ ታካ ህንተ ናይታ ዶጋና።
HOS 4:7 ካህነታ ታይቦይ ዳር ዳር ብያ ዎደ ታና ጉጅ ጉጅ ናቅዶሶና፤ ታኒ ኤንታ ቦንቹዋ ቃራዳ ዬላያና።
HOS 4:8 ታ አሳ ናጋራይ ኤንታዉ ካꬅ ግድዳ ግሾ ኤንቲ ታ አሳይ ባላባ ኦꬃና መላ ኮዮሶና።
HOS 4:9 ካህነት ደርያፐ ዱማትቦኮና። ታኒ ኤንታ ሀኖታ ግሾ፥ ኤንታ ሴራና፤ ኤንታ ኦሱዋዳ ኤንታዉ ዛራና።
HOS 4:10 ኤንቲ ጎዳ አግዳ ግሾ ማና፥ ሽን ካሎኮና፤ ላይማታና፥ ሽን ናአ የሎኮና።
HOS 4:11 ላይማተꬅ፥ ጋምእዳ ዎይነ ኡሽነ ማልአንቶ ዎይነ ኡሽ ታ አሳ ዎዛና ꬋይስስ።
HOS 4:12 ኤንቲ ምꬃፈ ኦሰትዳ ኤቃ ምስለ ዞረ ኦይቾሶና፤ ኤንታ ፃምአይ ኤንታ ኦይሻ ዛሬስ። ላይማተꬃ አያናይ ኤንታ ባለꬅስ፤ ኤንቲ ባንታ ፆሳፈ ሃክድ ላይማትዶሶና።
HOS 4:13 ደረታ ሁጰን ያርሾ ያርሾሶና፤ ሎኦ ኩያይ ደእያ ዎላ ጋርሳን፥ ፂዳ ጋርሳን እፃነ ጩይሶሶና። ሄሳ ግሾ፥ ህንተ ማጫ ናይት ላይማቶሶና፤ ህንተ ናይታ ማቸት ላሞሶና።
HOS 4:14 ህንተ ማጫ ናይት ላይማትያ ዎደነ ህንተ ናይታ ማቸት ላምያ ዎደ ታኒ ሴርከ። አይስ ጊኮ፥ አደት ባንታ ሁጰን ላይማተይሳታራ ላገቶሶና፤ ኤንታራ ያርሾሶና። ሄሳ ግሾ፥ አኬክ ባይና ደረይ ꬋያና።
HOS 4:15 “እስራኤለ አሳቶ፥ ህንተ ላይማትኮካ፥ ይሁዳ አሳይ ህንተይሳዳ ባላ ግዶፖ። ጋልጋላ ቦፕተ፤ ቤት-አዌና (ኢታተꬃ ኬꬅ) ከዮፕተ፤ ‘ደኦ ፆሳይ ኤርያ መላ’ ግድ ጫቆፍተ።
HOS 4:16 እስራኤለ አሳይ ጌላ ኡሳዳ ጌላትስ። ያትን፥ ጎዳይ ኤንታና ዳልጋ ደንባን ዶርሳ ማራዳ ዋትድ ሄማኔ?
HOS 4:17 ኤፍሬም ኤቃታራ ጋሄትስ፤ ኤንታ አጋግተ።
HOS 4:18 ኤንቲ ዳሮ ዎይነ ኡሻ ኡይ ስሚድ፥ ላይማተꬅ አጎኮና፤ ኤንታ ሀላቃትካ ዬላያባ ዳሮ ዶሶሶና።
HOS 4:19 ኤንታ ጫርኮይ ኤፋና፤ ባንታ ኤቃስ ያርሽዳ ያርሾታ ጋሶን ኤንቲ ዬላታና።”
HOS 5:1 “ህንተኖ ካህነቶ፥ ሀይሳ ስእተ! ህንተኖ እስራኤለ አሳቶ፥ አኬክተ! ካዎ ኬꬃ አሳቶ፥ ሎይꬅ ስእተ! ሀ ፕርዳይ ህንተ ቦላ ፕርደትስ። ህንተ ምፅጳስ ፅሄ ግድደታ፤ ታቦረ ዙማ ቦላ ምጨትዳ ግተዳ ግድደታ።
HOS 5:2 ጌላት ዎꬎ አግቦኮና፤ ሄሳ ግሾ፥ ታ ኤንታ ኡባ ሴራና።
HOS 5:3 ታኒ ኤፍሬማ ኤራይስ፤ እስራኤለይ ታፐ ጌምቤና። ኤፍሬማ፥ ኔኒ ሀእ ላይማ ግዳዳሳ፤ እስራኤለይ ቱንስ።”
HOS 5:4 “እስራኤለ አሳይ ባንታ ፆሳኮ ስሞና መላ ኤንታ ኢታ ኦሶይ ኤንታ ተቅስ። ላይማተꬃ አያን ኤንታ ዎዛናን ደእያ ግሾ ኤንቲ ጎዳ ኤሮኮና።
HOS 5:5 እስራኤለ አሳ ኦቶሮይ ኤንታ ቦላ ማርካቴስ። እስራኤለ አሳይነ ኤፍሬማ አሳይ ባንታ ናጋራ ጋሶን ꬉበቶሶና፤ ይሁዳ አሳይካ ኤንታራ ꬉበቴስ።
HOS 5:6 ኤንቲ ጎዳስ ያርሻናዉ ባንታ ዶርሳ ዉድያነ መሄ ዉድያ ላግ ኤክድ እያ ኮያናዉ ባና፤ ሽን እ ኤንታፈ ሻከትዳ ግሾ እያ ደሞኮና።
HOS 5:7 ኤንቲ ላይማተꬃን ናይታ የልዳ ግሾ ጎዳስ አማነትቦኮና። ሄሳ ግሾ፥ እስ አጌናን ኤንትነ ኤንታ ቢታይ ꬋያና።
HOS 5:8 ግብአ ካታማን ሞይዘ፥ ራማ ካታማን ዛየ ፑንተ። ብንያመ አሳዉ፥ ‘ጉየ ስሚድ በእተ’ ያግድ ቤት-አዌናን ዋስተ።
HOS 5:9 ሴረትያ ዎደ ኤፍሬም ባይሳ ግዳና። እስራኤለ ኮቻ ግዶን ቱማ ሀናናባ ታኒ አዋጃና።
HOS 5:10 “ጎዳይ፥ ‘ይሁዳ ሀላቃት ዛዋ ሱግያ አሳ መላ ግድዶሶና፤ ታኒ ታ ሀንቁዋ ኤንታ ቦላ ድኦ ሃꬃዳ ጉሳና።
HOS 5:11 ኤፍሬማ አሳይ ኤርድ ኤቃ ጎይንዳ ግሾ፥ ሱረ ፕርዳን ኡንኤትዶሶና፤ ትንቸትዶሶና።
HOS 5:12 ሄሳ ግሾ፥ ታኒ ኤፍሬማ አሳስ ብሌ፥ ይሁዳ አሳስ ፆꬋ ግዳና።
HOS 5:13 “ ‘ኤፍሬም ባ ሀርግያ፥ ይሁድ ባ ማዱንꬃ በእዳ ዎደ ኤፍሬም አሶረ ቢታ ብስ፤ ሄ ግታ ካዋ ማዶ ኦይችስ። ሽን እ ኤንታ ሀርግያ ꬋላናዉ ዎይኮ ኤንታ ማዱንꬃ ፓꬃናዉ ዳንዳእቤና።
HOS 5:14 ሄሳ ግሾ፥ ታኒ ኤፍሬማስ ጋሞዳ ሀናና፤ ይሁዳስ ዎዳላ ጋሞዳ ሀናና። ታኒ ኤንታ መንረꬃዳ ኤካ ባና፤ ኦንካ ኤንታ ታ ኩሸፐ አሸና።
HOS 5:15 ኤንቲ ባንታ ባላ አኬካና ጋካናዉነ ታና ኮያና ጋካናዉ ታኒ ጉየ ታ በሳ ስማና። ኤንቲ ባንታ ዋያን ታና ምንꬅድ ኮያና’ ” ያጌስ።
HOS 6:1 እስራኤለ አሳይ፥ “ሃይተ! አነ ጎዳኮ ስሞስ። እ ኑና መንረꬅስ፥ ሽን እ ኑና ኮላና፤ እ ኑና ማዱንፅስስ፥ ሽን እ ኑ ማዱንꬃ ቃቻና።
HOS 6:2 ናምኡ ጋላሳፐ ጉየ እ ኑና ፓꬃና፤ ሄꬓንꬆ ጋላሳን ኑ እያ ስንꬃን ዳና መላ ኑና ደንꬃና።
HOS 6:3 አነ ጎዳ ኤሮስ፤ እያ ኤራናዉ ምንꬅድ ካሎስ። ፃልቀይ ዶለይሳዳ እ ቆንጫና፤ ቶርቸ እር የይሳዳ እ ኑኮ ያና” ያግዶሶና።
HOS 6:4 ጎዳይ፥ “ታ ህንተና ኤፍሬማ አሳ ዋቶ? ታ ህንተና ይሁዳ አሳ ዋቶ? ህንተ ሲቆይ ዎንታ ፃሳ መላ፤ ኤለስድ ꬋይያ አካ መላ።
HOS 6:5 ሄሳ ግሾ፥ ታኒ ናበታ ባጋራ ህንተና ቃንፀረꬃስ፤ ታ ዶናፐ ከይዳ ቃላን ህንተና ዎꬋስ። ታ ፕርዳይ ህንተ ቦላ ፖኦዳ ዋጋግ ጋና።
HOS 6:6 ታ ያርሾ ግዶናሽን ማሮታ ኮያይስ፤ ፁሳ ያርሾ ግዶናሽን ፆሳ ኤሮ ኮያይስ።
HOS 6:7 “ሽን ኤንቲ አዳመዳ፥ ጫቆ መንꬅዶሶና፤ ያን ታዉ አማነቶና እፅዶሶና።
HOS 6:8 ጋላዳ ካታማይ ሱꬅ ጉክያ ኢታ ኦሶ ኦꬅያ አሳይ ኩምዳ ካታማ።
HOS 6:9 ፓንጋት አሰ ዎꬋናዉ ቆሰትድ ናገይሳዳ ካህነታ ጩጋይ ሄሳዳ ናጎሶና። ሴከማ ካታማ ኤፍያ ኦግያን ናግድ አሰ ዎꬎኦሶና፤ ኤንቲ ዬላያ ዎራንꬖ ኦሶ ኦꬆሶና።
HOS 6:10 ታኒ እስራኤለ አሳ ግዶን ዳጋንꬅያባ በአስ። ኤፍሬማ ግዶን ላይማተꬅ ደኤስ፤ እስራኤለይ ቱንስ።
HOS 6:11 “ይሁዳ፥ ታኒ ታ አሳ ድኡዋ ዛርያ ዎደ ነዉ ቃስ ጫካ ዎደ ጊግሳስ።
HOS 7:1 “ታኒ እስራኤለ ፓꬃናዉ ኮይያ ዎደ ኤፍሬማ ናጋራይነ ሳማረ አሳ ኢታ ኦሶይ ቆንጭስ። ኤንቲ ኡባ ዎደ ጭሞሶና፤ ካይሶት መንꬅድ ገሎሶና፤ ፓንጋት ከይድ ቦንቆሶና።
HOS 7:2 ሽን ታኒ ኤንታ ኢታ ኦሶ ኡባ ኤረይሳ አኬኮኮና። ኤንታ ኢታ ኦሶይ ኤንታ ናቅ ኦይክስ፤ ሄ ኢታ ኦሶይ ኡባ ዎደ ታ ስንꬃን ደኤስ።
HOS 7:3 “ኤንቲ ካዋ ባንታ ኢታተꬃን፥ ሀላቃታ ባንታ ዎርዱዋን ኡፋይሶሶና።
HOS 7:4 ኤንቲ ኡባይ ላሞሶና፤ ሙኑቃይ ደንዳና ጋካናዉ ዳቦ ኡከይስ ታማ ሺሾ ኮሾናይሳዳ ኤንቲ ቴልዳ ጮጨ መላ።
HOS 7:5 ባንታ ካዋ ቦንቾ ባኣለ ጋላሳን ሀላቃት ዎይነ ኡሻን ማꬆትዶሶና። እካ ቀልቅሰይሳታስ ባ ኩሽያ እሚስ።
HOS 7:6 ኤንታ ዎዛናይ ታማ ጮጨ መላ፤ ኤንቲ ሺቅድ ኢታባ ማቀትዶሶና። ኤንታ ሀንቆይ ቃማ ኩመꬃ ጩይሸ አቄስ፤ ሳእ ዎንትያ ዎደ ታማ ላጮዳ ኤፄስ።
HOS 7:7 ኤንቲ ኡባይ ቴልዳ ጮጨ መላ ባንታ ሀላቃታ ሞሶና። ኤንታ ካዎት ኡባይ ኩንድዶሶና፤ ኤንታፈ ኦንካ ታና ፄገይ ባዋ።
HOS 7:8 “ኤፍሬማ አሳይ ሀራ ካዎተꬃ አሳራ ዋላከትስ፤ ኤፍሬማ አሳይ ሽረትቦና ኡይꬃ መላ ግድስ።
HOS 7:9 አላጋት እያ ዎልቃ ምዶሶና፥ ሽን እ ሄሳ ኤርቤና፤ እያ ሁጰይ ፑሉምስ፥ ሽን እ ሄሳ አኬክበና።
HOS 7:10 እስራኤለ አሳ ኦቶሮይ ኤንታ ቦላ ማርካቴስ። ሄስ ኡባይ ሀንንካ ኤንቲ ጎዳኮ፥ ባንታ ፆሳኮ፥ ስምቦኮና ዎይኮ እያ ኮይቦኮና።
HOS 7:11 “ኤፍሬማ አሳይ ሆለዳ ኤያነ ጮ ጭመተይሳታ። ኤንቲ ማዶ ደማናዉ እስ ቶሆ ግብፀ፤ እስ ቶሆ አሶረ ስሞሶና።
HOS 7:12 ኤንቲ ብያ ዎደ ታኒ ኤንታ ቦላ ግተ የጋና፤ ታኒ ኤንታ ካፎ ኦይክያዳ ኦይካና። ኤንታ ኢታ ኦሱዋ ግሾ ታኒ ኤንታ ሴራና።
HOS 7:13 “ኤንታ አየ! ኤንቲ ታፐ ሃክዶሶና። ኤንታዉ ꬋዮ ግዶ! ኤንቲ ታ ቦላ ማካልዶሶና። ታኒ ኤንታ ዎዛናዉ ኮያስ፥ ሽን ኤንቲ ታ ቦላ ዎርዶ ሃሳዮሶና።
HOS 7:14 ባንታ ሂፃን ዝንእድ ዘሌሎሶና፥ ሽን ባንታ ዎዛናፐ ዎሶኮና። ካꬃስነ ዎይነ ኡሻስ ባንታ አሳተꬃ ጋሮሶና፥ ሽን ኤንቲ ታፐ ሃክዶሶና።
HOS 7:15 “ኤንታ ሎህስዳይነ ምንꬅዳይ ታና፥ ሽን ታዉ ኢታባ ማቀቶሶና።
HOS 7:16 ኤንቲ ሀዳባኮ ስምዶሶና። ኤንቲ አማንꬆና ዶንገ ግድዶሶና። ኤንታ ሀላቃት ኢታባ ኦደትዳ ግሾ ማሻን ዉራና፤ ሄስካ ኤንታዉ ግብፀን ሚቻስ ግዳና።
HOS 8:1 “ሞይዘ ፑና! ኤንቲ ታ ጫቁዋነ ታ ህግያ መንꬅዳ ግሾ፥ ጎዳ አሳ ቦላ ሞርከይ አንኮዳ አለስ።
HOS 8:2 እስራኤለ አሳይ፥ ‘አቤት ኑ ፆሳዉ፥ ኑኒ ነና ኤሮስ’ ያግድ ታኮ ዋሶሶና።
HOS 8:3 ሽን እስራኤለ አሳይ ሎኦባ እፅዳ ግሾ፥ ሞርከይ ኤንታ የደꬃና።
HOS 8:4 ኤንቲ ታና ኦይቾና ባንታዉ ካዎታ ካዎꬅዶሶና፤ ታ ኤሮና ደእሽን ባንታዉ ሀላቃታ ዶርዶሶና። ꬋያናዉ ማችድ ኤቃ ምስለታ ባንታ ብራፐነ ዎርቃፈ መꬍዶሶና።
HOS 8:5 ሳማረ አሳዉ፥ ህንተ ማር ዳንስድ መꬍዳ ኤቃ ታ እፃስ፤ ታ ሀንቆይ ህንተ ቦላ ኤፅስ። ኤንቲ ቱንዳ መላ አዉደ ጋካናዉ ዳኔ?
HOS 8:6 ሀ ማራ ኤቃ ምስለይ ኩሸ ሂላን መትስፐ አትሽን፥ እ ፆሰ ግደና። ሳማረ ኤቃ ምስለይ መቀረታና።
HOS 8:7 “ኤንቲ ጫርኮ ዘርድ ጎተ ቡጮሶና። ኤቆን ደእያ ኤንታ ካꬃስ አይፈይ በንተና፤ ꬊለይካ ባዋ፤ አይፈይ ደእኮካ አላጋት ማና።
HOS 8:8 እስራኤለ አሳይ ሀእ አላጋ አሳ ግዶን ምተትዶሶና፤ ኤንቲ ፓꬆና አስ ግድዶሶና።
HOS 8:9 ኤንቲ ባዞ ሀረይ ባርካ ቶይላተይሳ መላ ቶይላትሸ አሶረ ብዶሶና። ኤፍሬማ አሳይ ባንታ ሚሽያን ላገꬆ ሻምዶሶና።
HOS 8:10 ባንታና ማዳና መላ ሚሸን ሻምኮካ ታ ኤንታ ሺሻና። ካረ ቢታ ካዎትነ ሀላቃት ኤንታና ኡንኤꬅን ኤንቲ ጮ ꬋያና።
HOS 8:11 “ኤፍሬማ አሳይ ናጋራ ያርሾ ያርሽያ ዳሮ በሳታ ኬፅስ፥ ሽን ሄ ያርሾ በሳት ናጋራ ኦꬅያ በሲ ግድዶሶና።
HOS 8:12 ታኒ ኤንታዉ ታ ህግያን ዳሮባ ፃፋስ፥ ሽን ኤንቲ ሄ ህግያ አላጋባዳ ፄልዶሶና።
HOS 8:13 ኤንቲ ያርሻናዉ ዶሶሶና፤ ያርሾ አሹዋ ሞሶና፥ ሽን ጎዳይ ኤንታ ያርሹዋ ኤክቤና። እ ሀእ ኤንታ ናጋራ ሀሳያና፤ ኤንታ ናጋራ ግሾ ኤንታ ሴራና፤ ኤንቲ ግብፀ ቢታ ስማና።
HOS 8:14 እስራኤለ አሳይ ባና መꬍዳይሳ ዶግድ፥ ካዎ ጋꬎታ ኬፅስ። ይሁዳ አሳይ ግምበትዳ ዳሮ ካታማታ ኬፅስ። ሽን ታኒ ሄ ካታማታን ታማ የድን፥ ኤንታ ሚፃ ማና” ያጌስ።
HOS 9:1 እስራኤለ አሳቶ፥ ኡፋይቶፍተ! ሀራ ካዎታዳ ፖጩ ጎፕተ! ህንተ ህንተ ፆሳፈ ሃክድ ላይማትደታ፤ ካꬃ ጌሽያ ዉዱማን ላይማተꬃስ እምያ ጋትያ ዶስደታ።
HOS 9:2 ሄሳ ግሾ፥ ህንተ ዉዱማፈ ካꬅ፥ ጉምእያ በሳፈ ዎይነ ኡሻ ደመከታ፤ ዎይነይ ህንተዉ አይፈና።
HOS 9:3 ኤንቲ ጎዳ ቢታን ጋምኦኮና። ኤፍሬም ግብፀ ቢታ ስማና፤ አሶረ ቢታን ቱና ካꬅ ማና።
HOS 9:4 ኤንቲ ጎዳስ ዎይነ ኡሻ ያርሾ ጉሶኮና፤ ኤንታ ያርሾይ እያ ኡፋይሰና። ሄ ያርሾይ ኤንታዉ ሾቻ መላ ግዳና፤ ሄሳ ምያ ኡባይ ቱናና። ሄ ካꬃይ ኤንታ ኮሻ ፃላላ ዛራናሳፈ አትሽን፥ ጎዳራ ደእያ እስፈተꬃስ ማደና።
HOS 9:5 ጎዳ ህንተ ቦንቻና መላ እ ህንተዉ እምዳ ባኣለ ጋላሳታን ህንተ አይ ኦꬃኔ?
HOS 9:6 ኤንቲ ꬋዮፐ ከስ ኤክኮካ ግብፀይ ኤንታ ሺሻና፤ መምፕሳ ካታማይ ኤንታ ሞጋና። ኤንቲ ሺሽዳ ብራ ሚሸ ኡባ ሻራፍ ምታና፤ ኤንቲ ደእያ በሳን ቡሎይ ዶላና።
HOS 9:7 ሴራ ጋላስ ይስ፤ ፕርዳ ዎደይ ጋክስ። እስራኤለ አሳይ ሄሳ ኤሮ! ህንተ ናጋራ ግሾነ ሞርከተꬃ ግሾ ናበይ ኤያ መላ ፆሳ አስ ጌተትዳይስ ጎሻ መላ ታይበትስ።
HOS 9:8 ናበይ ፆሳራ ግድድ፥ ኤፍሬማ ናጌስ፤ ሽን እያ ኦግያን ፅሄይ የገትስ፤ ፆሳ ኬꬃን እያ ሞርከተꬅ ናጌስ።
HOS 9:9 ግብአ ካታማን ሀንዳይሳዳ ኤንቲ ቱንዶሶና። ፆሳይ ኤንታ ናቁዋ ሀሳያና፤ ናጋራ ግሾ ኤንታ ሴራና።
HOS 9:10 ጎዳይ፥ “ታኒ መላ ቢታን ዎይነ አይፈ ደምዳይሳዳ እስራኤለ አሳ ደማስ። ታኒ ባላሰ ምꬃን ኮይሮ አይፈ በእዳይሳዳ ህንተ አዋታ በአስ። ሽን ኤንቲ ብኤል-ፋጎራ ጌተትያ በሳ ይድ፥ ዬላይያ ኤቃስ ባንታና ዱማይዶሶና፤ ኤንቲ ሄ ዶስዳ ኤቃዳ ቱንዶሶና።
HOS 9:11 ኤፍሬማ ቦንቾይ ካፎዳ ፓል ꬋያና፤ ህዛፐ ጉየ የሎይ ባዋ፤ ቃንꬃቶይ ባዋ፤ አተꬅ ባዋ።
HOS 9:12 ኤንቲ ናአ የልድ ድችያባ ግድኮካ ታ ኤንታ ዎꬋ ዉርሳና። ታኒ ኤንታፈ ሃክዳ ዎደ ኤንታና አየ!
HOS 9:13 ኤፍሬም ሎኦ በሳን ቶከትዳ ዛምባ ምꬃ መላ ሀንን በአስ፥ ሽን ባ ናይታ ሹካስ አꬃ እሚስ” ያግስ።
HOS 9:14 አቤት ጎዳዉ፥ ኤንታዉ እማ! ነ ኤንታዉ አይ እማኔ? ነ ኤንታዉ ቦሸትያ ኡሎነ መልዳ ꬋንꬅ እማ።
HOS 9:15 ጎዳይ፥ “ኤንታ ኢታተꬃ ግሾ ታኒ ጋልጋላን እፆ ዶማስ። ኤንታ ናጋራ ግሾ ታኒ ኤንታ ታ ኬꬃፈ ጎዳና፤ ህዛፐ ጉየ ታ ኤንታ ዶስከ፤ ኤንታ ሀላቃት ኡባይ ጌላታ።
HOS 9:16 ኤፍሬም ደሸትን፥ እያ ፃጶይ መልስ፤ አይፈይካ ባዋ። ኤንቲ ናአ የልኮካ ታኒ ኤንቲ ዶስያ ናይታ ዎꬋና” ያግስ።
HOS 9:17 ኤንቲ እያዉ ኪተቶና እፅዳ ግሾ ታ ፆሳይ ኤንታ ፕፅር ሆላና፤ ኤንቲ ካዎተꬃታ ግዶን ቶይላትሸ ዳና።
HOS 10:1 እስራኤለ አሳይ ዳሮ አይፈ አይፍያ ዳይዳ ዎይነ መላ፤ ኤንታ አይፈይ ዳርዳ መላ ኤቃ ያርሾ በሳታ ዳርስ ኬፅዶሶና። ኤንታ ቢታይ ዱረትዳ ኬና ጎይንያ ኤቃ ቱሳታ አሌቅስድ መꬍዶሶና።
HOS 10:2 ኤንታ ዎዛናይ ጫከትስ፤ ሀእ ኤንቲ ባንታ ናጋራ ቶካና። ጎዳይ ኤንታ ያርሾ በሳታ ላላና፤ ኤንታ ኤቃ ቱሳታ ꬋይሳና።
HOS 10:3 ሄ ዎደ አሳይ፥ “ኑኒ ጎዳስ ያይቦና ግሾ፥ ኑስ ካዎይ ባዋ። ሽን ካዎይ ደእያኮካ ኑስ አይ ኦꬃኔ?” ያጋና።
HOS 10:4 ኤንቲ ሀኖና ኡፋይሳ ቃላ ገሎሶና፤ ዎርዶን ጫቆሶና፤ ሄሳ ግሾ፥ ዎꬍያ ሀርመይ ጋደን ዶለይሳዳ ኤንታ ቦላ ፕርድ ዶላና።
HOS 10:5 ሳማረ ካታማን ደእያ አሳይ ቤት-አዌናን ደእያ ማራ ምስልያስ ያሻን ኮኮሮሶና። እያ ቦንቾይ እያፐ ቃረትዳ ግሾ እያዉ ዬካና፤ ሄ ኤቃ ምስልያ ካህነት ዋሳና።
HOS 10:6 ሄ ኤቃ ምስለይ አሶረ ቶከትድ፥ ብድ፥ ግታ ካዋስ እሞታ ግድድ እመታና። ኤፍሬም ዬላታና፤ እስራኤለይ ኤቃ ምስልያ ግሾ ካዉያና።
HOS 10:7 ሳማረ ካዎይ ሃꬃ ጎፖንቶ ግድድ ꬋያና።
HOS 10:8 እስራኤለ አሳይ አዌና ካታማን ኤቃስ ጎይንሸ፥ ናጋራ ኦꬅያ ꬎቃ በሳት ላለታና። ኤንታ ያርሾ በሳን አጉንꬅነ ጎምኦረይ ዶላና። ሄ ዎደ ኤንቲ ደረታኮ፥ “ኑና ቆስተ!” ዙማታኮ፥ “ኑና ገንꬅተ” ያጋና።
HOS 10:9 ጎዳይ፥ “እስራኤለ አሳዉ፥ ግብአን ህንተ ናጋራ ኦሶ ዶምዳ ዎድያፐ፥ ሀች ጋካናዉ ናጋራ ኦሶ አግበከታ። ሄሳ ግሾ፥ ኢታ ኦይሳታ ግብአን ኦል ዉርስቤኔ?
HOS 10:10 ታኒ ዶስዳ ዎደ ሄ ጌላታ ሴራና። ኤንቲ ኦꬅዳ ዳሮ ናጋራ ግሾ ታኒ ኤንታ ሴርያ ዎደ ካዎተꬃት ኤንታ ቦላ ደንዳና።
HOS 10:11 ኤፍሬም ካꬅ የꬋናዉ ዶስያ ዋꬍ ከስዳ ዎፋኖ መላ። ሽን ታኒ እያ ሎእያ ሞርግያን ቃምባራ ዎꬃዳ ዋፃና። ይሁዳ አሳይ ዎርፃፋና፤ ያይቆባ አሳይ ሽረቻና።
HOS 10:12 ጎዳይ ይድ ፅሎተꬅ ህንተ ቦላ ቡክሳና ጋካናዉ እያ ኮይተ። ህንተ ፅሎተꬅ ዘርያባ ግድኮ መርና ሲቆ ጫካና። ሄሳ ግሾ፥ ኦ ቢታ ዎርፃፍተ።
HOS 10:13 ሽን ህንተ፥ ህንተ ኦግያንነ ህንተ ዳሮ ኦላንቾታን አማነትዳ ግሾ፥ ኢታተꬅ ዘርድ ናጋራ ጫክደታ፤ ህንተ ዎርዱዋ አይፍያ ምደታ።
HOS 10:14 ህንተ ቦላ ዎልቃማ ኦል ደንዳና፤ በን ካዎይ ሳልማን ቤት-አርበላ ካታማ ኦልድ ላልዳይሳዳነ አየታነ ናይታ ꬋይስዳይሳዳ ቃስ ህንተ ሚፃታ ꬋይሳና።
HOS 10:15 ቤተለ ካታማን ደኤይሳቶ፥ ህንተ ናጋራይ ዳሮ ግድያ ግሾ ሄሳ መላባይ ህንተና ጋካና። ሄ ጋላስ ሳእ ዎንትያ ዎደ እስራኤለ ካዎይ ሀይቃና።
HOS 11:1 “እስራኤለይ ናአ ደእያ ዎደ እያ ዶስዳይ ታና፤ ታ ናኣ ግብፀፈ ፄጋስ።
HOS 11:2 ታኒ ኤንታ ዳርሳዳ ፄግን፥ ኤንቲ ታፐ ዳሮ ሃክድ ብዶሶና። ባኣለ ኤቃታስ ያርሾ ያርሽዶሶና፤ ኤቃ ምስለታስ እፃነ ጩይስዶሶና።
HOS 11:3 ኤፍሬማ አሳ ኩሽያ ኦይካዳ ሄመꬅ ታማርስዳይ ታና፥ ሽን ኤንታ ፓꬅዳይ ታና ግደይሳ ኤሮኮና።
HOS 11:4 ታኒ ኤንታ ቃንነ ሲቆ ዎዶሮን ጎቻስ፤ ኤንታ ሞርገፈ ቃምባራ ደንꬃዳ ሆካዳ ኤንታ ሙዛስ።
HOS 11:5 ኤንቲ ታኮ ስሞና እፅድ ግብፀ ቢታ ስማና፤ አሶረ ቢታ ካዎይ ኤንታ ቦላ ካዎታና።
HOS 11:6 ኤንታ ካታማን ማሽ ደንዳና፤ ኤንታ ካታማታ ፐንገታ መንረꬃና፤ ኤንታ ዞረታይ ላለታና።
HOS 11:7 ታ አሳይ ታፐ ሃካናዉ ኮይስ። ኤንቲ ፆሳኮ ዋስኮካ፥ እ ኤንታና ቦንቸና።
HOS 11:8 ኤፍሬም፥ ታኒ ነና ዋታዳ አጎ? እስራኤለ፥ ታኒ ነና ዋታዳ አꬃ እሞ? ታኒ ነና ዋታዳ አዳማ ካታማዳ ኦꬆ? ታኒ ነና ዋታዳ ፃቦይማ ካታማዳ ኦꬆ? ታኒ ነና ዳሮ ዶስያ ግሾ ታ ዎዛናይ ሄሳ ኤሮ ጌና።
HOS 11:9 ታኒ ህንተ ግዶን ደእያ ጌሻ ፆሳፈ አትሽን፥ አሰ ግድከ። ሄሳ ግሾ፥ ታኒ ታ ሱልያ ሀንቁዋ ህንተ ቦላ ኤህከ፤ ናምአንꬆ ኤፍሬማ ꬋይስከ፤ ታ ሀንቁዋራ ህንተኮ ዪከ።
HOS 11:10 ኤንቲ ጎዳ ካላና፤ እካ ጋሞዳ ጉዳና። እ ጉድያ ዎደ እያ ናይት ዉሎሀ ባጋፈ ኮኮርሸ ያና።
HOS 11:11 ግብፀፈ ካፎዳ፥ አሶረፐ ሆለዳ ፓልሸ ያና። ታኒ ኤንታ፥ ኤንታ ኬꬃን ኬꬃን ዎꬃና። ታኒ ጎዳይ ሄሳ ኦዳስ” ያግስ።
HOS 11:12 ኤፍሬማ አሳይ ዎርዶን፥ እስራኤለ አሳይ ጭሞን ታና ተቅዶሶና። ይሁዳ አሳይ አማንꬅያ ጌሻ ፆሳ ቦላ ፃልታምስ።
HOS 12:1 ኤፍሬማ አሳይ ዎንታፈ ኦማርስ ጋካናዉ ዶሎሀ ጫርኮ ኦይኬስ ዎይኮ የደꬄስ። ኤንቲ ዎርዶነ ጌላተꬅ ዳርሶሶና፤ አሶረ ቢታራ ጫቅዶሶና፤ ሻማሆ ዛይተ ግብፀ ቢታ የዶሶና።
HOS 12:2 ጎዳስ ይሁዳ አሳራ ሞቶይ ደኤስ፤ እ ያይቆባ ናይታ ኤንታ ኦግያዳ ሴራና፤ ኤንታ ኦሱዋዳ ኤንታዉ ዛራና።
HOS 12:3 ያይቆብ ባ አየ ኡሎን ደእሸ ባ እሻ ግንድያ ኦይክስ። ድጭ ጋክድ ፆሳራ ቡተትስ፤
HOS 12:4 ኪታንቾራ ባፀትድ ፆንስ። ባና ኬሀ አይፈን ፄላና መላ ባ እሻ ዬክድ ዎስስ። ያይቆብ ፆሳ ቤተለን ደምን ፆሳይ ያን እያራ ሃሳይስ።
HOS 12:5 እ ጎዳ፥ ኡባፈ ዎልቃማ ፆሳ። እያ ኤረትዳ ሱንꬃይ ጎዳ ጌተቴስ።
HOS 12:6 ሄሳ ግሾ፥ ህንተ ፆሳኮ ስምተ፤ ሲቆነ ሱረ ፕርዳ ምንꬅ ኦይክተ፤ ህንተ ፆሳይ ኦꬃና ጋካናዉ ናግተ።
HOS 12:7 ዛልአንቾይ ዎርዶ ምዛነን ዛልኤስ፤ እ አሳ ጭማናዉ ዶሴስ።
HOS 12:8 ኤፍሬም፥ “ታኒ ዳሮ ዱረ፤ ታኒ ታዉ አቆ ደማስ። ታ አቆ ኡባን ታናን ኤንቲ ባላ ዎይኮ ናጋራ ደሞኮና።
HOS 12:9 ሽን ታኒ ህንተና ግብፀ ቢታፈ ከሳዳ ኤህዳ ጎዳ፥ ህንተ ፆሳ፤ ሻቃራ ባኣለ ጋላስ ህንተ ዱንካነን ደእዳይሳዳ ታ ህንተና ዛራ ዱንካነን ዎꬃና።
HOS 12:10 ታኒ ናበታስ ኦዳስ፤ ዳሮ ቆንጨꬅ ኤንታዉ እማስ፤ ኤንታ ባጋራ ዳሮ ሌምሶታ ኦዳስ” ያግስ።
HOS 12:11 ጋላድ ኢታ ናጋራንቾ፤ ጋላዳ አሳት ፓꬆናይሳታ። ኤንቲ ጋልጋላን ኮርማታ ያርሻና። ኤንታ ያርሾ በሳይ ጎሻን ደእያ ኬላ ሹቻዳ ላለታና።
HOS 12:12 ያይቆብ ሶረ ቢታ ባቃትስ፤ እስራኤለይ ማቾ ኤካናዉ ኡነ ኦꬅስ። ኮይታ እማናዉ ያን ዶርሰ ሄምስ።
HOS 12:13 ጎዳይ እስራኤለ አሳ ናበታ ባጋራ ግብፀ ቢታፈ ከስድ ሄ ናበታ ባጋራ ኤንታ ናግስ።
HOS 12:14 ሽን ኤፍሬም ጎዳ ዳሮ ሀንቀꬅስ፤ እ ሱꬅ ጉስዳ ግሾ እያ ጎዳይ አቻና፤ እያ ጫሻ እያዉ ዛራና።
HOS 13:1 ኤፍሬም ኦደትዳ ዎደ ስእዳ ኡባይ ያሻን ኮኮርስ፤ እስራኤለ ቢታን ኤንቲ ቦንቸትዳ አስ። ሽን ባኣለ ኤቃ ጎይንዶሶና፤ ሄ ናጋራ ጋሶን ሀይቅዶሶና።
HOS 13:2 ሀእካ ናጋራ ቦላ ናጋራ ኦꬆሶና፤ ባንታ ብራ ሼሽድ ባንታዉ ኤቃ መꬍዶሶና፤ ሂላን ኦሰትዳ ምስለታ ጊግስዶሶና፤ ኡባይካ ኩሸ ሂላን መትዶሶና። አሳይ ኤንታባ ኦድሸ፥ “ያርሽያ አሳይ ማራ ኤቃ ምስለታ ዬርተ” ያጎሶና።
HOS 13:3 ሄሳ ግሾ፥ ኤንቲ ዎንታ ሻራ መላ ዎይኮ ዎንታ ፃሳ መላ ዎይኮ ጫርኮይ ዉዱማፈ ደንꬅድ ኤፍያ ፑኖ መላ ዎይኮ ማስኮተራ ከያ ጩያ መላ ግዳና።
HOS 13:4 ጎዳይ “ታኒ ህንተና ግብፀ ቢታፈ ከሳዳ ኤህዳ ጎዳ፥ ህንተ ፆሳ። ህንተ ታፐ አትሽን፥ ሀራ ፆሲ ኤረከታ፤ አሸይ ታፐ ሀር ባዋ።
HOS 13:5 ባዞን፥ መላ ቢታን ታኒ ህንተና ናጋስ።
HOS 13:6 ታኒ ህንተና ሙዝን፥ ምድ ካልድ ኦቶርትደታ፤ ሄሳፈ ጉየ ታና ዶግደታ።
HOS 13:7 ሄሳ ግሾ፥ ታኒ ህንተ ቦላ ጋሞ ግዳና፤ ማሄ መላ ኦገ ዶናን ዙጋና።
HOS 13:8 ማር ኤከትዳ ማሄ መላ ታኒ ህንተራ ጋሄታዳ ታ ህንተና ፑዛና። ታኒ ህንተና ጋሞዳ መንረꬃና፤ ባዞ ዶአዳ ህንተና ፖሻና።
HOS 13:9 “እስራኤለ አሳቶ፥ ህንተ ታ ቦላ፥ ህንተና ማደይሳ ቦላ ደንድዳ ግሾ ታ ህንተና ꬋይሳና።
HOS 13:10 ህንተ ታና፥ ‘ኑስ ካዎነ ሀላቃ እማ’ ያግድ ኦይችደታ። ህንተና አሽያ ህንተ ካዎይ አኔ? ካታማታን ደእያ ህንተ ሀላቃት አዉን ደኦና?
HOS 13:11 ታኒ ታ ሀንቁዋን ህንተዉ ካዎ እማስ፤ ታ ይሉዋን እያ ደንꬃስ።
HOS 13:12 ኤፍሬማ ባላይነ ናጋራይ ፃፈትድ ኡትስ።
HOS 13:13 እቀꬅ ኦይክዳ ማጫስ ኡንኤተይሳ መላ ኡንእ እያ ቦላ ያና። ሽን እ ኤር ባይና ናአ፤ የለትያ ዎደይ ጋክን፥ ባ አየ ኡሎፐ ዎꬎና እፅያ ናአ መላ።
HOS 13:14 ታኒ ኤንታ ዱፎፐ አሻና፤ ሀይቆ ዎልቃፈ ዎዛና። ሀይቆ፥ ነ ጋዶይ አዉኔ? ስኦለ፥ ነ ꬋይሶይ አዉኔ? ታኒ ታ አሳስ ቃትከ።
HOS 13:15 ኤፍሬም ባ እሻታ ግዶን ምንኮካ፥ ጎዳይ የድዳ ዶሎሀ ባጋ ጫርኮይ ባዞፈ ጫርክሸ ያና፤ እያ ፑልቶይ ኤቃና፤ እያ ሃꬃይ መላና። እ ምንጅዳ አልኦ ሚሸ ኡባይ ቦንቀታና።
HOS 13:16 ሳማረ አሳይ ባንታ ፆሳ ቦላ ጌላትዳ ግሾ፥ ሴራ ኤካናዉ በሴስ። ኤንቲ ማሻን ቡሰታና፤ ኤንታ ናይት ትንቸታና፤ ኤንታ ቃንꬃትዳ ማጫሳታ ኡሎይ ዳከታና” ያጌስ።
HOS 14:1 እስራኤለ አሳዉ፥ ህንተ ናጋራ ጋሶን ꬉበትድ ኩንድዳ ግሾ ሀእ ጎዳ፥ ህንተ ፆሳኮ ስምተ።
HOS 14:2 ጎዳኮ ስሚድ፥ ሀይሳዳ ያግድ ዎስተ፤ “ኑ ናጋራ ኡባፈ ኑና ማራ፤ ኑኒ ኑ መተርሻ አይፈ ግድዳ ጋላታ ነዉ ሺሻና መላ ነ ኑና ነ ኬሀተꬃን ሺሻ ኤካ።
HOS 14:3 አሶረይ ኑና አሸና፤ ኑ ኦላ ፓራታንካ አማነቶኮ። ኑኒ ኑ ኩሸን መꬍዳ ኤቃ ምስለታ ኡባ፥ ‘ኑ ፆሳታ’ ጎኮ። አዋይ ባይናይሳታስ ቃተይ ነና” ያግተ።
HOS 14:4 ጎዳይ፥ “ታ ሀንቆይ ኤንታፈ ስምዳ ግሾ፥ ታኒ ኤንታ ማካላ ሀኑዋፐ ኤንታ ፓꬃዳ፥ ኤንታ ዎዛናፐ ሲቃና።
HOS 14:5 ታኒ እስራኤለ አሳስ አካ ግዳና፤ ኤንቲ ጪሻዳ ጭይድ፥ ልባኖሰ ዝጋ መላ ፃጶ የዳና።
HOS 14:6 ኤንታ ዶላይ ጭልአና፤ ኤንቲ ሻማሆዳ ሎአና። ኤንታ ሳዎይ ልባኖሰ ዝጋዳ ቶንኩ ጋና።
HOS 14:7 አሳይ ስሚድ ታ ኩያ ጋርሳን ሸምፓና፤ ኤንቲ ዶላዳ ጭልአና፤ ኤንቲ ዎይነዳ ጪያና፤ ልባኖሰ ዎይነ ኡሻዳ ኤረትያባ ግዳና።
HOS 14:8 ኤፍሬማ አሳዉ፥ ህዛፐ ጉየ ኤቃ ምስለራ ታዉ አይ ጋሄተꬅ ደኢ? ህንተ ዎሳ ስኤይነ ህንተና ናገይ ታና። ታኒ ጭልኦ ዝጋ መላ፤ ህንተ አይፈ አይፋና መላ ኦይ ታና” ያጌስ።
HOS 14:9 ጭንጫተꬅ ደእያ ኦንካ ሀይሳ አኬኮ፤ ዎዛን ደእያ ኦንካ ሄሳ ኤሮ። ጎዳ ኦገይ ሱረ፤ ፅሎት ሄ ኦግያራ ሄመቶሶና፤ ሽን ናጋራንቾት እያን ꬉበቶሶና።
JOE 1:1 ባቱኤላ ናኣ እዩኤላኮ ጎዳይ ኪትዳ ቃላይ ሀይሳ።
JOE 1:2 ህንተኖ ጭማቶ፥ ሀይሳ ስእተ! ይሁዳ ቢታን ደእያ አሳ ኡባይ ስእተ! ሀይሳ መላባይ ህንተ ዎደ ዎይኮ ህንተ አዋታ ዎደ ሀን ኤሪ?
JOE 1:3 ሀይሳ ህንተ ናይታስ ኦድተ፤ ህንተ ናይት ባንታ ናይታስ ኦዶ፤ ኤንታ ናይት ካልያ የለታስ ኦዶ።
JOE 1:4 ጎንዶፈ አትዳ ካꬃ ቦለይ ምስ፤ ቦለፐ አትዳ ካꬃ ጉዶይ ምስ፤ ጉዶፈ አትዳ ካꬃ ፃቆይ ምስ።
JOE 1:5 ማልእያ ዎይነይ ህንተፈ አትዳ ግሾ፥ ህንተኖ፥ ማꬆተይሳቶ ባርክተ ዬክተ! ህንተኖ፥ ዎይነ ኡያ ኡባት ዘሌልተ!
JOE 1:6 ታይቦይ ባይና ቦለይ ታ ቢታ ኦይክስ፤ ኤንታ አቻይ ጋሞ አቻ መላ፤ ኤንታ ጋጮይ ማጫ ጋሞ ጋጮ መላ።
JOE 1:7 ኤንቲ ታ ዎይንያ ꬋይስዶሶና፤ ታ ባላስያ ምꬃ ꬎግዶሶና። ኤንቲ ፖቅድ ምዳ ግሾ፥ ዎይንያነ ባላስያ ታሸት ፑፁ ግስ።
JOE 1:8 ጌላእያ፥ ባ ጊግዳ አዝናይ ሀይቅን፥ ካዮ ማኦ ማአዳ ዬከይሳዳ ህንተካ ዬክተ!
JOE 1:9 ካꬃ ያርሾይነ ኡሻ ያርሾይ ጎዳ ኬꬃን ꬋይዳ ግሾ፥ ጎዳ ኬꬃን ኦꬅያ ካህነት ዬኮሶና።
JOE 1:10 ጎሻይ መላ አትስ፤ ቢታይ ዬኬስ፤ ካꬃይ ꬋይስ፤ ዎይነይነ ዛይተይ መልስ።
JOE 1:11 ጋደን ደእያ ግስተይነ ባንግ ꬋይዳ ግሾ፥ ህንተኖ ጎሻንቾቶ፥ ካዮትተ፤ ህንተኖ ዎይነ ቶከይሳቶ፥ ዘሌልተ!
JOE 1:12 ዎይነይ መልስ፤ ባላሰይ ሹልስ፤ ኦሮማነይ፥ ተምረይ፥ አፕለይ፥ ጋደን ደእያ ሀራ ምꬅ ኡባይ መልስ፤ ሄሳ ግሾ፥ አሳፐ ኡፋይስ ሃክስ።
JOE 1:13 ህንተኖ ካህነቶ፥ ካዮ ማኦ ማእድ ዬክተ፤ ህንተኖ ያርሾ በሳ ስንꬃን ኦይሳቶ፥ ዘሌልተ። ህንተኖ ታ ፆሳ ስንꬃን ኦይሳቶ፥ ፆሳ ኬꬅ ገልድ ካዮ ማኦ ማእድ አቅተ። ካꬃ ያርሾይነ ኡሻ ያርሾይ፥ ፆሳ ኬꬃን ያርሽያባይ ባዋ።
JOE 1:14 ፆማ አዋጅተ፤ ጌሻ ሺቆ ፄግተ። ጭማታነ ቢታን ደእያ አሳ ኡባ ጎዳ ህንተ ፆሳ ኬꬃን ሺሽተ፤ ያን ጎዳኮ ዋስተ።
JOE 1:15 ጎዳ ጋላሳይ ማትስ፤ ሄ ጋላሳ አየ! ሄ ጋላሳይ ኡባ ዳንዳእያ ፆሳ ሀንቆ ጋላስ ግድድ ዬስ።
JOE 1:16 ኑ ስንꬃፈ ካꬅ፥ ኑ ፆሳ ኬꬃፈ፥ ኡፋይስነ እልልስ ꬋይስ ግደኔ?
JOE 1:17 ዘረትዳ ዘረꬃይ ቢታ ግዶን ቡቅስ፤ ካꬃይ ꬋይዳ ግሾ ኤለይ ካሎትስ፤ ሻለይ ላለትስ።
JOE 1:18 ሄምያ በሲ ባይና ግሾ፥ መሄይ ዋሴስ። ሀር አቶሽን ዶርሳ ዉደይካ ማታ ꬋይድ ኡንኤቴስ።
JOE 1:19 አቤት ጎዳዉ፥ ባዙዋ ታም ምዳ ግሾ፥ ፃራግ ደንባን ደእያ ማታ ፁግዳ ግሾ፥ ዎራ ምꬃ ታማ ላጮይ ꬋይስዳ ግሾ፥ ታኒ ኔኮ ዋሳይስ።
JOE 1:20 ጎግያ ሃꬅ መልዳ ግሾ፥ ታም ባዞን ደእያ ማታ ምድግዳ ግሾ፥ ባዞ ዶአትካ ኔኮ ዋሶሶና።
JOE 2:1 ፅዮነን ሞይዘ ፑንተ፤ ታ ጌሻ ዙማ ቦላ ዋስተ። ቢታን ደእያ አስ ኡባይ ኮኮሮ፤ ጎዳ ጋላሳይ ዬስ፤ ካረን ደኤስ።
JOE 2:2 ሄ ጋላሳይ ꬉማነ ጫጋና ጋላስ፤ ሻራነ ሳካና ꬉማ ጋላስ! ዙማ ቦላ ፃልቀይ ጫረይሳዳ ዳሮነ ዎልቃማ ቦለይ ቢታ ማአና። ሄሳ መላባይ ካሰ ሀንቤና፥ ስንꬃፈካ ሄሳ መላባይ ሀነና።
JOE 2:3 ኤንታፈ ስንꬃራ ምያ ታም ቤስ፤ ኤንታፈ ጉየራ ላጮይ ፁጌስ። ኤንታ ስንꬃይ ጋናተ መላ፤ ሽን ኤንታ ጉየይ ቦድላ ባዞ መላ፤ ኤንታፈ አይብካ ከስ ኤከና።
JOE 2:4 ኤንታ መꬎይ ፓራ መꬎ መላ፤ ኤንቲ ኦላ ፓራዳ አዳርሶሶና።
JOE 2:5 ፓር ጎችያ ጋረዳ ጊሮሶና፤ ደርያ ሁጰራ ጉፖሶና። ቡርያ ምያ ታማ ላጮዳ ፁጎሶና፤ ኦላ ባናዉ ከይዳ ዎልቃማ ኦላንቾ ዳኖሶና።
JOE 2:6 ኤንታ ስንꬃን አስ ኮኮሬስ፤ ያሻን አሳ ሶምኦይ ካሬፄስ።
JOE 2:7 ኤንቲ ኦላንቾዳ ዎፆሶና፤ ቶራ አሳዳ ድርሳ ቦላራ ጉፖሶና። ኤንቲ ኡባይ ማራን ቦሶና፤ ባንታ ሳልፕያፈ ጋፃ ከዮኮና።
JOE 2:8 እሶይ እሱዋራ ሱገቶኮና፤ ኡባይ ቅንፅ ግድ ስን ቦሶና። ኤንቲ ባንታራ ኤቀተይሳታ መንꬅድ ቦሶና፤ ኤንታ ተቅያባይ ባዋ።
JOE 2:9 ኤንቲ ካታማ ኦይኮሶና፤ ድርሳ ግምብያ ቦላራ ዎፆሶና። ኤንቲ ኬꬃ ቦላ ከዮሶና፤ ካይሶዳ ማስኮተራ ገሎሶና።
JOE 2:10 ኤንታ ስንꬃን ቢት ቃፄስ፤ ሳሎት ኮኮሮሶና። አውነ አጌን ꬉሜስ፤ ፆልንቶት ባንታ ፖኡዋ ድጎሶና።
JOE 2:11 ጎዳይ ባ ኦላንቾታ ስንꬃን ጉሜስ፤ እያዉ ኪተትያ ኦላንቾት ታይቦፐ ቦላ። ጎዳ ጋላሳይ ግታነ ዳሮ ያሼስ፤ ሄ ጋላሳ ዳንዳአናይ ኦኔ?
JOE 2:12 “ሀእካ ፆማን፥ ዬሆንነ አዛኖን ህንተ ፖሎ ዎዛናፐ ታኮ ስምተ።”
JOE 2:13 ህንተ ዎዛናፐ አትሽን፥ ህንተ ማኡዋ ፔꬎፕተ። ጎዳ፥ ህንተ ፆሳኮ፥ ስምተ፤ እ፥ ቃይነ ማሮት ኩምዳይሳ፤ እ፥ ሀንቃናዉ ኤለሶናይሳነ ሲቆይ ዳርዳይሳ፤ እ፥ ህንተና ሴራናዉ ኤለሰና።
JOE 2:14 ጎዳይ ህንተ ፆሳይ፥ ባ ሀንቁዋፈ ስሚድ ህንተና አንጃነኮ ኦን ኤሪ? ሄ ዎደ ጎዳስ ህንተ ፆሳስ፥ ካꬃ ያርሾነ ኡሻ ያርሾ ያርሻና።
JOE 2:15 ፅዮነን ሞይዘ ፑንተ፤ ፆማ አዋጅተ፤ ጌሻ ሺቁዋ ሺቅተ!
JOE 2:16 አሳ ሺሽድ፥ ህንተ ሺቁዋ ጌሽተ፤ ጭማታ እስፈ ሺሽተ፤ ጉꬃ ናይታነ ꬋመይሳታ አሾፍተ። መዳን ደኤይሳት ባንታ ቁሩፁዋፐ ከዮ።
JOE 2:17 ጎዳስ ኦꬅያ ካህነት ፆሳ ኬꬃ ባራንዳፈነ ያርሾ በሳፈ ግዶን ኤቅድ ዬኮ። ኤንቲ ሀይሳዳ ያግድ ዎሶ፤ “አቤት ጎዳዉ፥ ነ አሳስ ቃታ፤ ካዎተꬃት፥ ‘ኤንታ ፆሳይ አዉኔ? ያጋና መላ ኦꬃዳ፥ ነ አሳ ቦረስነ ሚቻስ የጎፋ’ ” ያጎ።
JOE 2:18 ጎዳይ ባ ቢታስ ደእያ ምሻን ባ አሳስ ቃትስ።
JOE 2:19 ጎዳይ ዛሪድ ባ አሳ ሀይሳዳ ያጋና፤ “ሄኮ፥ ታኒ ህንተዉ ካꬃ፥ ዎይንያነ ዛይትያ፥ ካልሳና ጋካናዉ የዳና፤ ህዛፐ ጉየ ካዎተꬃታ ግዶን ህንተና ቦረስ አግከ።”
JOE 2:20 “ፑደሀ ባጋራ ይዳ ቦልያ፥ ታኒ የደꬃዳ ህንተፈ ሃሳና። ባይሳነ መላ ቢታ ኤንታ ጎዳና፤ ስንꬃ ባጋራ ደኤይሳታ ማፅነ አባ፥ ጉየ ባጋራ ደኤይሳታ መደትራነ አባ፥ የደꬃና፤ ያን ኤንቲ ሀይቅድ ፅንቃና። ቱማ ጎዳይ ዎልቃማባ ህንተዉ ኦꬅስ” ያጋና።
JOE 2:21 ቢታዉ፥ ህዛ ያዮፋ፤ ጎዳይ ግታባ ኦꬅዳ ግሾ፥ ኡፋይታነ ሀሹ ጋ!
JOE 2:22 ህንተኖ ሳኣ መሄቶ፥ ያዮፍተ፤ ባዞን ደእያ ማታይ አጭስ። ምꬃይ አይፍስ፤ ባላሰይነ ዎይነ አይፈይ ቡርኩክስ።
JOE 2:23 ህንተኖ ፅዮነ አሳቶ፥ ኡፋይትተ፤ ጎዳን ህንተ ፆሳን፥ ሀሹ ጊተ! እ፥ ባልጎ እራ ህንተዉ ዳርስድ እሚስ፤ ካሰይሳዳ ስላነ ቶርቸ እራ ግድስድ እሚስ።
JOE 2:24 ካꬃ ቡክያ ዉዱማን ካꬅ ኩማና፤ ዎይንያነ ዛይትያ ጉምእያ ኦላይ ኩምድ ፓላሀና።
JOE 2:25 ካሰ ታኒ ህንተ ግዶ የድዳ፥ ዎልቃማ ጎንዶይ፥ ቦለይ፥ ጉዶትነ ፃቆት ምዳይሳ፥ ታ ህንተዉ ዛራና።
JOE 2:26 ህንተ ምን ካልስድ ፓላህያ ካꬅ ዳና፤ ማላልስያባ ህንተዉ ኦꬅዳ ጎዳ። ህንተ ፆሳ ሱንꬁ ጋላታና፤ ታ አሳይ ዛሪድ ዬላተና።
JOE 2:27 ሄ ዎደ ታኒ እስራኤለ ግዶን ደኤይሳ፥ ታኒ ጎዳይ ህንተ ፆሳ ግደይሳነ ታፐ ሀራ ፆሲ ባይናይሳ ህንተ ኤራና። ታ አሳይ ዛሪድ ዬላተና።
JOE 2:28 ህዛፐ ጉየ ሀይሳዳ ሀናና፤ ታኒ አሳ ኡባ ቦላ ታ አያና ጉሳና። ህንተ አደ ናይትነ ማጫ ናይት ትንብተ ኦዳና፤ ህንተ ጭማት አሙሆ አሙሀና፤ ህንተ ናአተꬃት ቆንጨꬅ በአና።
JOE 2:29 ሄ ጋላሳታን ታ አደ አይለልታ ቦላነ ታ ማጫ አይለታ ቦላ ታ አያና ጉሳና።
JOE 2:30 ታኒ ሳሎንነ ሳአን ማላልስያባ ኦꬃና፥ ታማነ ሳሎ ደንድያ ጩያ በሳና።
JOE 2:31 ግታነ ያሽያ ጎዳ ጋላሳይ ያናፐ ካሰ፥ አው ꬉማና፤ አጌን ሱꬁ ዳናና።
JOE 2:32 ሄ ዎደ ሀይሳዳ ሀናና፤ ጎዳ ሱንꬃ ፄግያ ኡባይ አታና። ጎዳይ ግዳይሳዳ ፅዮነ ዙማንነ የሩሳላመን አትዳይሳት ዳና።
JOE 3:1 “ሄ ጋላሳንነ ሄ ዎድያን ታኒ ይሁዳነ የሩሳላመ አሳ ድኤተꬃፈ ዛራዳ አንጃና።
JOE 3:2 ታኒ ካዎተꬃታን ደእያ አሳ ሺሻዳ፥ ዮሳፈፃ ዛንጋራ ዎꬍሳና። ታ አሳ እስራኤለ ቦላ ኤንቲ ኦꬅዳ ኢታ ኦሱዋ ግሾ፥ ታኒ ኤንታ ያን ፕርዳና። ኤንቲ ካዎተꬃታ ግዶን ታ አሳ ላልዶሶና፤ ታ ቢታ ባንታዉ ሻክ ኤክዶሶና።
JOE 3:3 ታ አሳ ቦላ ሳማ የግዶሶና፤ ላይማትያ ማጫስ ደማናዉ፥ አደ ናይታ እምዶሶና፤ ዎይነ ኡሻስ ማጫ ናይታ ባይዝዶሶና።
JOE 3:4 “ህንተኖ፥ ፅሮሳ፥ ስዶናነ ፍልስፄመ ቢታ አሳቶ፥ ህንተ ታ ቦላ አይ ኦꬃናዉ ቆፕደቲ? ታ ቦላ ሀሎ ከያናዉ ኮዬቲ? ህንተ ሄሳ ኮይኮ፥ ታኒ ኤለሳዳ ህንተ ኦሱዋ ህንተ ቦላ ዛራና።
JOE 3:5 ታ ብራ፥ ታ ዎርቃነ ታ አልኦ ሚሽያ ኡባ ኤክድ ህንተ ኤቃ ኬꬃ ገልስደታ።
JOE 3:6 ይሁዳነ የሩሳላመ አሳ ኤንታ ቢታፈ ሃስ ኤፍድ፥ ግርከ አሳስ ባይዝደታ።
JOE 3:7 ሄኮ፥ ህንተ ባይዝዳ በሳፈ ታኒ ሀእ ኤንታ ከሳዳ ህንተ ኦꬅዳባ ኡባ ህንተ ሁጰን ዛራና።
JOE 3:8 ታኒ ህንተ አደ ናይታነ ህንተ ማጫ ናይታ ይሁዳ አሳስ አꬃ እማና። ኤንቲ ሃሆ ቢታን ደእያ ሳባ አሳስ ኤንታ ባይዛና። ታኒ ጎዳይ ሀይሳ ኦዳስ።
JOE 3:9 “ሀይሳዳ ያግድ ካዎተꬃታ ግዶን አዋጅተ፤ ኦላስ ጊግተ፤ ምኖ አሳታ ደንꬅተ፥ ኦላንቾት ሺቅድ ኦላስ ከዮ።
JOE 3:10 ህንተ ማራሻ ማሸ፥ ህንተ ባጫ ቶራ ኦꬅድ ቆፅተ! ዳቡራንቾይ፥ ‘ታኒ ምኖ!’ ያጎ።
JOE 3:11 ህንተኖ፥ ዩሹዋን ደእያ ካዎተꬃቶ፥ ኤለ ከይተ፤ ሃ ሺቅተ” ያግተ። አቤት ጎዳዉ፥ ነ ኦላንቾታ ዱገ የዳ!
JOE 3:12 “ካዎተꬃት ደንድድ፥ ዮሳፈፃ ዛንጋራ ዮ፤ እስራኤለ ዩሹዋን ደእያ ካዎተꬃታ፥ ኡባ ቦላ ፕርዳናዉ ታኒ ያን ኡታና።
JOE 3:13 ኤንታ ኢታተꬃይ ዳሮ፤ ጫካ ዎደይ ጋክዳ ካꬃዳ ኤንታ ጫክተ። ዎይነ አይፈይ ኦላን ኩምን የይሳዳ፥ ኤንታ የꬍተ።
JOE 3:14 ፕርዳ ዛንጋራን ጎዳይ ፕርድያ ጋላሳይ ጋክስ፤ ሄሳ ግሾ፥ ታይቦን ዳሮ አሳይ ሄ ዛንጋራን ሺቅስ።
JOE 3:15 ሄ ጋላስ አውነ አጌን ꬉማና፤ ፆልንቶት ባንታ ፖኡዋ ድጋና።
JOE 3:16 ጎዳይ ፅዮነን ግድድ ደቻና፤ የሩሳላመን ባ ቃላ ስሳና፤ ሳሎይነ ሳእ ኮኮራና። ሽን ጎዳይ ባ አሳስ፥ እስራኤለስ ባቃትድ አትያ በሲ ግዳና።”
JOE 3:17 “ሄ ዎደ ህንተ፥ ታኒ ታ ጌሻ ዙማ ቦላ፥ ፅዮነን ደእያ ጎዳ ህንተ ፆሳ ግደይሳ ኤራና። የሩሳላመ ካታማይ ጌሽ ግዳና፤ አላጋት ዛሪድ የሩሳላመ ኦሎኮና።
JOE 3:18 ሄ ጋላስ ደረት ማልአንቶ ዎይነ ኡሻን ፆካና፤ ዙማት ማꬅ ጎጋና። ይሁዳ ቢታን ደእያ ሻፋ ኡባን ሃꬅ ፑልታና። ጎዳ ኬꬃን ፑልቶይ ꬉቃና፤ ሴፅማ ዛንጋራ ኡሻና።
JOE 3:19 “ግብፀይ ባይሳ ግዳና፤ ኤዶመይ ቦድላ ባዞ ግዳና። ኤንቲ ይሁዳ አሳ ቦላ ኢታባ ኦꬅዶሶና፤ ፅሎ አሳ ሱꬃ ጉስዶሶና።
JOE 3:20 ሽን ይሁድነ የሩሳላመይ መርናዉ፥ የለታ ኡባስ ደእያ በሲ ግዳና።
JOE 3:21 ታኒ ሀሎ ከዮና አግዳ ኤንታ ሱꬃ ሃሉዋ ቡሮ ከያና” ያጌስ ጎዳይ።
AMO 1:1 ኦዝያን ይሁዳ ቢታን፥ እዮኣሳ ናአይ እዮርባም እስራኤለ ቢታን ካዎትዳ ላይꬃን ታቆሀ ቢታን መሄ ሄመይሳታፐ እሶይ፥ አሞፀይ፥ ቢት ቃፃናፐ ናምኡ ላይꬃፈ ስን እስራኤለባ ኦድዳ ትንብተይ ሀይሳ፦
AMO 1:2 እ፥ “ጎዳይ ፅዮነ ዙማ ቦላ ጉዴስ፤ የሩሳላመ ካታማን ደቼስ። መሄ ሄምያ በሳት መሎሶና፤ ቃርመሎሳ ዙማ ቦላ ደእያ እርፃይ ሹሌስ” ያግስ።
AMO 1:3 ጎዳይ፥ “ዳማስቆ አሳይ ዛር ዛር ኦꬅዳ ናጋራ ግሾ፥ ታኒ ኤንታ ሴሮና አግከ። ኤንቲ ጋላዳ ቢታ አሳ ብራታ አች ደእያ ጋረን ጎንዶርስድ የꬍዶሶና።
AMO 1:4 ሄሳ ግሾ፥ ታኒ ካዋ ሀዛኤላ ኬꬃን ታማ የዳና፤ ሄ ታማይ ካዋ በን-ሀዳዳ ሚፃታ ማና።
AMO 1:5 ታኒ ዳማስቆ ካታማ ፐንግያ መንꬃና፤ አዌና ዛንጋራን ደእያ አሳ የደꬃናነ ካዎታ ፃምኣ ኦይክዳይሳታ ቤት-ኤደናፐ ꬋይሳና፤ ሶረ አሳይ ደኤትድ፥ ቂራ ባና” ያጌስ።
AMO 1:6 ጎዳይ፥ “ጋዛ ካታማ አሳይ ዛር ዛር ኦꬅዳ ናጋራ ግሾ፥ ታ ኤንታ ሴሮና አግከ። ኤንቲ ቢታን ደእያ አሳ ኡባ ድእድ፥ ኤዶመ ቢታ አሳስ ባይዝዶሶና።
AMO 1:7 ሄሳ ግሾ፥ ታኒ ጋዛ ካታማ ድርሳን ታማ የዳና፤ ሄ ታማይ ካታማ ሚፃታ ማና።
AMO 1:8 አሽዶዳን ደእያ አሳ ታኒ የደꬃናነ ካዎታ ፃምኣ ኦይክዳይሳታ አስቃሎናፐ ꬋይሳና። ኤቅሮና ካታማን ደእያ አሳ ሴራና፤ ፍልስፄመ አሳፐ አትዳይሳት ሀይቃና። ታኒ ኡባ ሃርያ ጎዳይ ሄሳ ኦዳይስ” ያጌስ።
AMO 1:9 ጎዳይ፥ “ፅሮሳ ካታማ አሳይ ዛር ዛር ኦꬅዳ ናጋራ ግሾ፥ ታኒ ኤንታ ሴሮና አግከ። ኤንቲ ጫቅዳ እሻተꬃ ጫቁዋ መንꬅድ፥ ደኤትዳ አሳ ኡባ ኤዶመ አሳስ ባይዝዶሶና።
AMO 1:10 ሄሳ ግሾ፥ ታኒ ፅሮሳ ካታማ ድርሳን ታማ የዳና፤ ሄ ታማይ ካታማ ሚፃታ ማና” ያጌስ።
AMO 1:11 ጎዳይ፥ “ኤዶመ አሳይ ዛር ዛር ኦꬅዳ ናጋራ ግሾ፥ ታኒ ኤንታ ሴሮና አግከ። ኤንቲ ባንታ እሻ እስራኤለ ማሻን የደꬅዶሶና፤ ኤንቲ ኤንታዉ ቃትቦኮና፤ ኤንታ ይሎይ መርናዉ እርፀና።
AMO 1:12 ሄሳ ግሾ፥ ታኒ ተማና ካታማ ቦላ ታማ የድን፥ ሄ ታማይ ቦሶራ ካታማ ሚፃታ ማና” ያጌስ።
AMO 1:13 ጎዳይ፥ “አሞነ አሳይ ዛር ዛር ኦꬅዳ ናጋራ ግሾ፥ ታኒ ኤንታ ሴሮና አግከ። ኤንቲ ባንታ ዛዋ አሳናዉ ጋላዳ ቢታን ደእያ ቃንꬃትዳ ማጫሳታ ኡሉዋ ዳክዶሶና።
AMO 1:14 ሄሳ ግሾ፥ ታኒ ራባ ካታማ ድርሳን ታማ የዳና፤ ሄ ታማይ ካታማ ሚፃታ ማና። ሄሳፈ ጉየ፥ ኦላ ጋላስ ዋሶይ ዳራና፤ ኦላንቾት ጎተዳ ዎልቃማና።
AMO 1:15 ኤንታ ካዎይነ እያራ ኦꬅያ ሀላቃት ኡባይ ደኤትድ ባና” ያጌስ።
AMO 2:1 ጎዳይ፥ “ሞአበ አሳይ ዛር ዛር ኦꬅዳ ናጋራ ግሾ፥ ታኒ ኤንታ ሴሮና አግከ። ኤንቲ ኤዶመ ካዋ መቀꬃይ ብዶ ግዳና ጋካናዉ ፁግዶሶና።
AMO 2:2 ሄሳ ግሾ፥ ታኒ ሞአበ ቢታን ታማ የዳና፤ ሄ ታማይ ቅርዮታ ካታማ ሚፃታ ማና። ኦላንቾታ ዋሱዋን፥ ሞይዘ ፑኑዋንነ ኦላ ግርሳን ሞአበ አሳይ ዉራና።
AMO 2:3 ታኒ ሞአበ ሃረይሳነ እያ ሞርናታ ኡባ ꬋይሳና” ያጌስ።
AMO 2:4 ጎዳይ፥ “ይሁዳ አሳይ ዛር ዛር ኦꬅዳ ናጋራ ግሾ፥ ታኒ ኤንታ ሴሮና አግከ። ኤንቲ ጎዳ ህግያ እፅዶሶና፤ እያ ኪታ ናግቦኮና። ኤንታ አዋት ካልዳ ዎርዶ ፆሳት ኤንታና ባለꬅዶሶና።
AMO 2:5 ሄሳ ግሾ፥ ታኒ ይሁዳ ቦላ ታማ የዳና፤ ሄ ታማይ የሩሳላመ ሚፃታ ማና” ያጌስ።
AMO 2:6 ጎዳይ፥ “እስራኤለ አሳይ ዛር ዛር ኦꬅዳ ናጋራ ግሾ፥ ታኒ ኤንታ ሴሮና አግከ። ኤንቲ ፅሉዋ ሚሸስ፥ ማንቁዋ ጫማስ ባይዞሶና።
AMO 2:7 ማንቆታ ቢታ ባናን የግድ፥ ኤንታ ሁጵያ የꬎኦሶና፤ ኡንኤትዳይሳታ ፕርዳ ድጎሶና። አዋራነ ናኣራ እስ ማጫስ ላገꬅድ ታ ጌሻ ሱንꬃ ቱንሶሶና።
AMO 2:8 ኤንቲ አሳፐ አጮስ ኦይክዳ ማኡዋ ያርሽያ በሳታን ኡባ ማታን ሂፅድ፥ ዝንኦሶና፤ ቃስ አሳፐ አጮስ ኤክዳ ዎይነ ኡሻ ባንታ ፆሳታ ኬꬃን ኡዮሶና።
AMO 2:9 “ግዶሽን፥ ህንተ ግሾ ጋዳ ዝጋዳ አዱቅዳ፥ ዎላዳ ምንዳ አሞረ አሳታ ህንተ ስንꬃፈ ꬋይስዳይ ታና። ታኒ ኤንታዉ ቦላ አይፍያ፥ ጋርሳ ፃጱዋ ኡባ ꬋይሳስ።
AMO 2:10 ታኒ ህንተና ግብፀ ቢታፈ ከሳዳ፥ ባዞን ኦይታሙ ላይꬅ ካለꬃስ፤ አሞረታ ቢታ ህንተዉ ላታ ኦꬃዳ እማስ።
AMO 2:11 ህንተ አደ ናይታ ግዶፈ ናበታ፥ ህንተ ናአተꬃታ ግዶፈ ናዝራወታ ደንꬃስ። እስራኤለ አሳዉ፥ ሄስ ቱማ ግደኔ? ታኒ ጎዳይ ሄሳ ኦዳስ።
AMO 2:12 ሽን ህንተ ናዝራወታ ጫቆ መንꬅስድ፥ ዎይነ ኡሻ ኡሽደታ፤ ናበታ ትንብተ ኦዶና መላ ድግደታ።
AMO 2:13 “ሄሳ ግሾ፥ ካꬅ ዳርስድ ጫንዳ ጋረይ መኤይሳዳ ታኒ ህንተና መንꬃና።
AMO 2:14 ጎባ ዎፀይስ ከስ ኤከና፤ ምኑዋስ ዎልቅ እፃና፤ ኦላንቾይ ባ ሸምፑዋ አሸና።
AMO 2:15 ዶንገን ዱከይስ ኤቃናዉ ዳንዳኤና፤ ጎባ ዎፅያ ኦላንቾይ ከስ ኤከና፤ ፓራዋይ ባ ሸምፑዋ አሸና።
AMO 2:16 ሄ ጋላስ ሀር አቶሽን ኦላንቾታ ግዶን ዳሮ ፃላ ጌተተይሳት ፅረ ካሎ ባቃታና” ያጌስ ጎዳይ።
AMO 3:1 ግብፀ ቢታፈ ህንተና ከስዳ፥ እስራኤለ አሳዉ፥ ጎዳይ ህንተዉ ኦደይሳ ስእተ።
AMO 3:2 ጎዳይ፥ “ሳአን ደእያ አሳ ኡባፈ ታኒ ህንተ ፃላላ ዶራስ። ሄሳ ግሾ፥ ህንተ ኦꬅዳ ናጋራ ኡባስ ታኒ ህንተና ሴራና” ያጌስ።
AMO 3:3 ናምኡ አሳት ዎላ ባና ግድ ቆፋ ቃቾና ደእሸ እስፈ ሄመቶና?
AMO 3:4 ጋሞይ ዎꬋ ደሞና ዎራን ጮ ጉድዬ? ዎይኮ ዎዳላ ጋሞይ አይኮ የደꬅድ ኦይኮና ኡት ደንድድ ሳርቡቅዬ?
AMO 3:5 ካፎይ ፅሄይ ባይና ጮ ደንባን ኦይከትዬ? ዎይኮ ፅሄይ አይኮይ ቦቾና ጮ ፕርዬ?
AMO 3:6 ካታማ ግዶን ኦላ ሞይዘይ ፑነትያ ዎደ አሳይ ያሻን ኮኮረነዬ? ዎይኮ ጎዳይ ኪቶና ደእሽን ꬋዮይ እስ ካታማ ቦላ ዪዬ?
AMO 3:7 ቱማ ኡባ ሃርያ ጎዳይ ባ ፁራ ናበታስ፥ ባ ኦሳንቾታስ ካሰትድ ቆንጭሶና ደእሸ አይኮካ ኦና።
AMO 3:8 ጋሞይ ጉድን ያዮናይ ኦኔ? ኡባ ሃርያ ጎዳይ ኦድን፥ ትንብተ ኦዶናይ ኦኔ?
AMO 3:9 አሽዶዳንነ ግብፀን ደእያ ሚፃ ኡባስ ሀይሳዳ ያግድ አዋጅተ፦ “ሳማርያ ደረታ ቦላ ሺቅድ፥ ያን ደእያ ኢታተꬃነ ሱገꬃ በእተ” ያግተ።
AMO 3:10 “ሀ አሳይ ሎኦባ ኦꬅ ኤሮኮና፤ ኢታተꬃንነ ቦንቅድ ኤህዳ ሚሸን ባንታ ኬꬃ ኩንꬆሶና” ያጌስ ጎዳይ።
AMO 3:11 ሄሳ ግሾ፥ “ሞርከይ ህንተ ቢታ ተቃና፤ ህንተ ባሱዋ ላላና፤ ህንተ ኬꬃ ቦንቃና” ያጌስ ኡባ ሃርያ ጎዳይ።
AMO 3:12 “ሄንꬃንቾይ ጋሞ ዶናፐ ናምኡ ሹቁለ ዎይኮ ዱፃ ሀይꬅ የግስ ኤከይሳዳ፥ ሳማረ ቢታን እንጀ ዱሱ ደእያ እስራኤለ አሳፐ ጉꬃት አታና” ያጌስ ጎዳይ።
AMO 3:13 “ሀይሳ ስእድ ያይቆባ ኮቻታ ቦላ ሀይሳዳ ያግድ ማርካትተ።
AMO 3:14 ታኒ እስራኤለ አሳ ኤንታ ናጋራ ግሾ ሴርያ ዎደ፥ ቤተለ ካታማን ደእያ ያርሾ በሳታ ላላና፤ ያርሾ በሳን ደእያ ካጨት መእድ፥ ሳአን ዎꬋና።
AMO 3:15 ኤንቲ ባልጎነ ቦነ ደእያ ኬꬃታ ኡባ ታኒ ꬋይሳና። ኤንቲ ዳንጋርሳ ዛለን አሌቅስድ፥ ኬፅዳ ኬꬃ ላላና፤ ቃስ ግታ ግታ ኬꬃት ኡባይ ꬋያና” ያጌስ ጎዳይ፥ ኡባፈ ዎልቃማ ፆሳይ።
AMO 4:1 ህንተኖ፥ ባሳነ ሚዛታዳ ሞꬍዳ ሳማረ ማጫሳቶ፥ ሀይሳ ስእተ! ህንተ ማንቆታ ኡንኤꬄታ፤ መቶታንቾታ ዋየታ። ህንተ አዝናታኮ፥ “ኑስ ኡሽ እምተ” ያጌታ።
AMO 4:2 ኡባ ሃርያ ጎዳይ ሀይሳዳ ያግድ፥ ባ ጌሻተꬃን ጫቅስ፥ “ህንተ ማንፃቆን ኦይከትድ ጎሸታና ጋላስነ ህንተፈ አትዳ ጉꬃት ማንፃቆን ኦይከትድ ብያ ሞሎዳ ሀናና ጋላስ ያና።
AMO 4:3 ህንተ ኡባይ ድርሳ ፆኤራ ጎሸትድ፥ ከይድ፥ አርሞነ ሆለታና” ያግስ ።
AMO 4:4 “ህንተኖ፥ እስራኤለ አሳዉ፥ ቤተለ ብድ ናጋራ ኦꬅተ፤ ጋልጋላ ብድ ናጋራ ጉጅድ ኦꬅተ። ዎንታ ዎንታ ህንተ ያርሹዋ ያርሽተ፤ ሄꬓንꬆ ጋላስ ጋላስ ህንተ አስራታ ኤህተ።
AMO 4:5 ህንተ ኦꬃናዉ ዶሰይ ሄሳ ግድያ ግሾ፥ እርሾ የግድ ኡክዳ ኦይꬃ ፁግድ፥ ጋላታ ያርሹዋ ያርሽተ። ህንተ ህንተ ዶሳን እምያ እሙዋ ግሾ፥ ኦቶርትድ አዋጅተ” ያጌስ ኡባ ሃርያ ጎዳይ።
AMO 4:6 “ህንተ ካታማ ኡባን ታኒ ኮሻ የዳዳ፥ ሀር አቶሽን ህንተ አቻን ጋꬅያባ ꬋይሳስ፤ ሽን ህንተ ሄሳን ታኮ ስምበከታ።
AMO 4:7 ካꬅ ጫክያ ዎደይ ጋካናዉ ቡሮ ሄꬑ አጌን ደእሽን፥ ታኒ ህንተዉ እራ ተቃስ። ታኒ እስ ካታማን እራ ቡክሳዳ ሀራ ካታማን ቡኮናዳ ድጋስ፤ እስ ጎሻን ቡክስ፤ ሀራ ጎሻይ ቃስ እራ ꬋይድ መልስ።
AMO 4:8 ሄሳ ግሾ፥ ናምኡ ዎይኮ ሄꬑ ካታማ አሳይ ሃ ኡያናዉ እስ ካታማ ብዶሶና፤ ሽን አልቦኮና። ሄሳንካ ህንተ ታኮ ስምበከታ” ያጌስ ጎዳይ።
AMO 4:9 “ታኒ ህንተ ካꬃ ቦላ ሀርገ የዳስ፤ ህንተ አታክልትያ፥ ህንተ ዎይንያ ህንተ ባላስያነ ህንተ ሻማሆ ኡባ ቦለይ ምስ፤ ሽን ህንተ ሄሳንካ ታኮ ስምበከታ” ያጌስ ጎዳይ።
AMO 4:10 “ታኒ ግብፀ አሳ ቦላ ጋዶ የድዳይሳዳ፥ ህንተ ቦላ ጋዶ የዳስ። ህንተ ፓንꬃ ናይታ ማሻን ዎꬋስ፤ ህንተ ፓራት ድኤታና መላ ኦꬃስ። ህንተ ሞꬃ አሀ ፅንቆን ኡላስ፤ ሽን ህንተ ሄሳንካ ታኮ ስምበከታ” ያጌስ ጎዳይ።
AMO 4:11 “ሶዶመነ ጋሞራ ካታማታ ꬋይስዳይሳዳ ህንተፈ ዳሮታ ꬋይሳስ፤ ህንተ ታማፐ አትዳ ዱንቻ መላ፤ ሽን ሄሳንካ ህንተ ታኮ ስምበከታ” ያጌስ ጎዳይ።
AMO 4:12 ሄሳ ግሾ፥ “እስራኤለ አሳዉ፥ ታኒ ህንተና ሀይሳዳ ኦꬃዳ ሴራና። ታኒ ህንተና ሀይሳዳ ኦꬃዳ ሴራና ሀንያ ግሾ፥ እስራኤለ አሳዉ፥ ህንተ ፆሳራ ጋሄታናዉ ጊግተ” ያጌስ ጎዳይ።
AMO 4:13 ደረታ ጊግስዳይ፥ ጫርኮ መꬍዳይ፥ ባ ዎዛና ቆፋ አሳስ ቆንጭሰይ፥ ጋላሳ ፖኡዋ ꬉማን ላመይ፥ ቢታ ꬎቃ በሳታ ቦላ ሄመተይ፥ እያ ሱንꬃይ ጎዳ፥ ኡባፈ ዎልቃማ ፆሳ።
AMO 5:1 እስራኤለ አሳዉ፥ ታኒ ህንተዉ ዘሌልያ ዘለልሳ ስእተ!
AMO 5:2 “ጌላእያ፥ እስራኤለይ ኩንዳሱ፤ ዛራዳ ደንዱኩ። እያ ሳአን የገታሱ፤ እዮ ደንꬅያ ኦንካ ባዋ” ያጋስ።
AMO 5:3 “እስራኤለ ካታማፐ ሙኩሉ ኦላንቾታ ኦላስ የድኮ፥ ፄቱ ኦላንቾታ ፃላል አታና፤ ካታማፐ ፄቱ ኦላንቾታ ኦላስ የድኮ፥ ታሙ ኦላንቾታ ፃላል አታና” ያጌስ ኡባ ሃርያ ጎዳይ።
AMO 5:4 “ታና ኮይተ፤ ህንተ ደኦን ዳና።
AMO 5:5 ሽን ጋልጋል ድኤታና፤ ቤተለይ ꬋያና ግሾ፥ ቤተለ ኮዮፕተ፤ ጋልጋላ ገሎፕተ። በርሳበ ፕኖፍተ” ያጌስ ጎዳይ።
AMO 5:6 ጎዳ ኮይተ፤ ህንተ ደኦን ዳና። ሄሳ እፅኮ፥ እ ዮሰፋ ኮቻ ታማዳ ፁጋና፤ ቤተለን ደእያ አሳ ታም ማና። ሄ ታማ ቶይሳና አስ ባዋ።
AMO 5:7 ህንተኖ፥ ሱረ ፕርዳ ምርቀይሳቶ፥ ፅሎተꬅ ሳአን የገይሳቶ፥ ስእተ።
AMO 5:8 ፕልያድሳ ጌተትያ ላፑን ፆልንቶታ ኦꬅዳይ፥ ኦርዮና ጌተትያ ፆልንቶ ኮጫታ መꬍዳይ፥ ꬉማ ፖኦን፥ ጋላሳ ቃማን ላመይ፥ አባን ደእያ ሃꬃታ ሳሎ ፑደ ፄግድ፥ ሳአ ምጨꬃ ቦላ ዱገ ትገይ፥ እያ ሱንꬃይ ጎዳ።
AMO 5:9 እ ሚፃታ ላላናዉ ዎልቃማታ ቦላ ጋዶ ኤሄስ።
AMO 5:10 ህንተና ፕርዳ ዳባባን ሴረይሳ እፄታ፤ ቱማ ኦደይሳ ካꬌታ።
AMO 5:11 ህንተ ማንቆታ የꬍድ፥ ኤንታ ካꬃ ቦንቄታ። ያትድ ሹቻ ኬꬃታ ግምብደታ፤ ሽን ህንተ እያን ደኤከታ። ሎኦ ዎይነ ቶክደታ፤ ሽን ህንተ ሄ ዎይነ ኡሻ ኡየከታ።
AMO 5:12 ህንተ ናቆይ አይ መላ ዳሮኮ፥ ህንተ ናጋራይ አይ መላ ግቴኮ ታኒ ኤራይስ። ህንተ ፅሎታ ናቀታ፤ ዎꬋፈ ኤኬታ፤ ቃስ ዳባባን ማንቆታ ፕርዳ ናቀታ።
AMO 5:13 ሄሳ ግሾ፥ ዎደይ ኢታ ግድያ ግሾ፥ ሄሳ መላ ዎደን ጭንጫ አስ ስእ ጌስ።
AMO 5:14 ሎኦ ዶስተ፤ ኢታ እፅተ፤ ህንተ ደኦን ዳና። ሄሳ ኦꬅኮ፥ ህንተ ገይሳዳ፥ ጎዳይ፥ ኡባፈ ዎልቃማ ፆሳይ ህንተራ ግዳና።
AMO 5:15 ኢታባ እፅተ፤ ሎኦባ ዶስተ። ፕርዳ በሳን ሱረ ፕርዳ ፕርድተ። ኦን ኤር ጎዳይ፥ ኡባፈ ዎልቃማ ፆሳይ ዮሰፋ ኮቻፈ አትዳ ጉꬃታስ ቃቶና አገና።
AMO 5:16 ሄሳ ግሾ፥ ጎዳይ፥ ኡባፈ ዎልቃማ ፆሳይ፥ “ዳባባ ኡባን ዋሶይ ስኤታና፤ ኦገ ኡባን ዘለልስ ዳራና። ጎሻንቾት ዬሆ፥ ዘሌልድ ዬክያ አሳይ ዘለልሳስ ፄገታና።
AMO 5:17 ታኒ ህንተና ሴራናዉ ህንተ ግዶራ አꬍያ ግሾ፥ ዎይነ ጋደ ኡባን ዬሆይ ዳና” ያጌስ።
AMO 5:18 ህንተኖ፥ ጎዳ ጋላሳይ ያና መላ አሞተይሳቶ፥ ህንተና አየ! ጎዳ ጋላሳ አይስ አሞቴቲ? ሄ ጋላሳይ ፖኦ ግዶናሽን ꬉማ ግዳና።
AMO 5:19 ሄ ጋላሳይ አስ ጋሞፈ ባቃትድ አትያ ዎደ ማሄይ ጋከይሳ መላ ቃስ ባ ሶ ገልድ፥ ባ ኩሽያ ጎዳ ቦላ ዘምፕስያ ዎደ ሾሽ ዱክያ አሳ መላ ግዳና።
AMO 5:20 ጎዳ ጋላሳይ ꬉማ ግዳናፐ አትሽን፥ ፖኦ ግደና፤ ሄ ጋላሳይ ሳካና ꬉማ ግዳናፐ አትሽን፥ ፖኦይ ባይና ጋላስ ግዳና።
AMO 5:21 “ታኒ ህንተ ቦንችያ ባለታ እፃይስነ ሻተታይስ፤ ህንተ ጌሻ ሺቆት ታና ኡፋይሶኮና።
AMO 5:22 ህንተ ታዉ ፁሳ ያርሾነ ካꬃ ያርሾ ሺሽያ ዎደ ታኒ ኤክከ። ቃስ ህንተ ታዉ እስፈተꬃ ያርሾስ ኤህያ ዶረትዳ ሞꬎ መሄታ በእከ።
AMO 5:23 ህንተ ማዝሙረ ጫንጨꬃ ታ ማታፐ ሃስተ፤ ህንተ ዲፅያ ዲꬃ ስእከ።
AMO 5:24 ሽን ሱረ ፕርድ ፑልቶ ሃꬃዳ፥ ፅሎተꬅ መሎና ሻፋ ሃꬃዳ ጎጎ።
AMO 5:25 “ህንተኖ፥ እስራኤለ አሳዉ፥ ታኒ ህንተና መላ ቢታን ኦይታሙ ላይꬅ ካለꬅያ ዎደ፥ ታዉ ያርሾ ሺሽደቲ? ዎይኮ እሞታ እምደቲ?
AMO 5:26 ሄ ዎደ ህንተ፥ ህንተ ኩሸን መꬍዳ፥ ‘ካዋ ሳኩታ’ ጌተትያ ኤቃነ ‘ከዋና’ ጌተትያ ፆልንቶ ኤቃ ፆሳታ ቶክደታ።
AMO 5:27 ሄሳ ግሾ፥ ታኒ ህንተና ድእሳዳ ዳማስቆ ካታማፐ አꬃዳ ሃሆ በሲ የዳና” ያጌስ እያ ሱንꬃይ፥ ኡባፈ ዎልቃማ ፆሳ ጌተትያ ጎዳይ።
AMO 6:1 ህንተኖ፥ አሳይ ማዶ ኦይችያ ቦንቸትዳ እስራኤለ ሀላቃቶ፥ ህንተኖ፥ ፅዮነን እንጀን ደኤይሳቶ፥ ሳማረ ካታማን ህርግ ባይና ኡትዳይሳቶ፥ ህንተና አየ!
AMO 6:2 አነ ካልነ ካታማ ብድ በእተ። ያፐ ግታ ሀማታ ካታማነ ፍልስፄመ ካታማ ጌተ ዎꬍተ። ኤንቲ ህንተ ናምኡ ካዎተꬃታፐ አꬎና? ኤንታ ቢታይ ህንተ ቢታፈ ዳልጊ?
AMO 6:3 ህንተ፥ “ኢታ ጋላስ ኤለ ዬና” ግድ፥ ኢታ ኦሶ ኦይሳቶ፥
AMO 6:4 ዛለፐ ኦሰትዳ አርሳን ዝንኤይሳቶ፥ እንጀን ኡትዳይሳቶ፥ ዶርሳ ዉድያፐ አንቃራታነ ሚዛ ዎድያፐ ጋታርመንꬁዋ መይሳቶ፥
AMO 6:5 ዳዊቲዳ የꬃ ሚሸ ህንተዉ ጊግስድ፥ ዱማ ዱማ የꬅ የፀይሳቶ፥
AMO 6:6 ዎይነይ ኡሻ ከረራ ጋነይሳቶ፥ አልኦ ሽቶን ትየተይሳቶ፥ ዮሰፋ ኮቻታ ꬋዩዋን አዛኖናይሳቶ፥ ህንተና አየ!
AMO 6:7 ሄሳ ግሾ፥ ኮይሮ ድኤታናይ ህንተና፤ ሄ ዎደ ህንተ እንጀ ዱሳይ አታና።
AMO 6:8 ጎዳይ፥ ኡባፈ ዎልቃማ ፆሳይ ሀይሳዳ ያግድ፥ ባናን ጫቅስ፦ “ታኒ ያይቆባ ኦቶሩዋ እፃስ፤ ኤንታ ሚፃካ ሻተታስ፤ ታኒ ካታማነ ካታማን ደእያ ኡባ ኤንታ ሞርከታስ አꬃዳ እማና” ያጌስ።
AMO 6:9 እስ ኬꬃን ታሙ አስ አትኮ፥ ኤንትካ ሀይቃና።
AMO 6:10 ሀይቅዳይሳታ ዳቦታፐ እሶይ አሀ ሞጋናዉ ሶፐ ከስ ኤፍሸ፥ ሄ ኬꬃን ቆሰትዳ ኡራኮ፥ “ኔራ አትዳ ሀራ አስ ደኢ?” ያግድ ኦይቻና። እ ዛሪድ፥ “ባዋ” ያጋና። ኦይቸይስ ዛሪድ፥ “ሀይዛ፥ ሀይዛ! ጎዳ ሱንꬃ ኑኒ ፄጋናዉ ኮሸና” ያጋና።
AMO 6:11 ጎዳ ኪታን፥ ግታ ኬꬃት ላለታና፤ ላፋ ኬꬃት መቀረታና።
AMO 6:12 ፓራት ዛላ ቦላ ጋላባናዉ ዳንዳኦና? ዎይኮ ጎሻንቾይ ቦር ዋፅድ፥ አባ ጎያናዉ ዳንዳኢ? ሽን ህንተ ሱረ ፕርዳ ጪየ፥ ፅሎተꬃ ጫሞ ኦꬅደታ።
AMO 6:13 ህንተ ሎዶባራ ካታማ ፆንዳ ግሾ ኡፋይተታ፤ ህንተ፥ “ኑኒ ቃርናይማ ካታማ ኑ ምኖተꬃን ኦይክዳ” ግድ ጬቀተታ።
AMO 6:14 “ህንተኖ፥ እስራኤለ አሳዉ፥ ታኒ ህንተ ቦላ ሀራ ካዎተꬅ ደንꬃና፤ ኤንቲ ህንተና ሀማታ ፕኑዋፐ ዶምድ፥ አራባ ዛንጋራ ጋካናዉ ኡንኤꬃና” ያጌስ ጎዳይ፥ ኡባፈ ዎልቃማ ፆሳይ።
AMO 7:1 ኡባ ሃርያ ጎዳይ ታና ቆንጨꬅ በስስ። ሄ ቆንጨꬃን ታኒ ካዋ ጋክያ ካꬃይ ጫከትዳፐ ጉየ፥ ናምአንꬆ ጫርዳ ዶላ ቦላ ፆሳይ ቦለ ዉደ መꬍሽን በአስ።
AMO 7:2 ኤንቲ እርፃባ ኡባ ምድ ዉርስዳ ዎደ ታኒ፥ “አቤት፥ ኡባ ሃርያ ጎዳዉ፥ ሀያና ነ ደርያ ማራርክ! ያይቆባ ዛረት ዋንድ አታናዉ ዳንዳኦና? ኤንቲ ኡባ ጉꬃ!” ያጋስ።
AMO 7:3 ሄሳ ግሾ፥ ጎዳይ ኤንታዉ ቃትድ፥ “ሀ ኔኒ በእዳባይ ፖለተና” ያግስ።
AMO 7:4 ኡባ ሃርያ ጎዳይ ታና ሀራ ቆንጨꬅ በስስ። ኡባ ሃርያ ጎዳይ ባ አሳ ፕርዳናዉ ታማ ፄግስ፤ ሄ ታማይ ግታ ጪሞ አባ ም ድግድ፥ ቢታ ማናዉ ዶምስ።
AMO 7:5 ታኒ፥ “አቤት፥ ኡባ ሃርያ ጎዳዉ፥ ሀያና ሀ ታማ ቶይሳርክ! ያይቆባ ዛረት ዋንድ አታናዉ ዳንዳኦና? ኤንቲ ኡባ ጉꬃ!” ያጋስ።
AMO 7:6 ሄሳ ግሾ፥ ጎዳይ ቃትድ፥ “ሀይስ ፖለተና” ያጌስ ኡባ ሃርያ ጎዳይ።
AMO 7:7 ቃስ ፆሳይ ታና ሀራ ቆንጨꬅ በስስ። ታኒ ሄ ቆንጨꬃን በእያ ዎደ፥ ጎዳይ ቱምበ ኦይክድ፥ ቱምበን ልከትድ ግምበትዳ ግምብያ ማታን ኤቅስ።
AMO 7:8 ጎዳይ ታኮ፥ “አሞፀ፥ ኔኒ አይ ፄላይ?” ያግድ ኦይችስ። ታኒ፥ “ቱምበ ፄላይስ” ያጋስ። ጎዳይ ታኮ፥ “ሄኮ፥ ታኒ ታ አሰ ግድዳ እስራኤለ ግዶን ቱምበ የጋይስ፤ ታኒ ኤንታ ሴሮና አግከ።
AMO 7:9 ይሳቃ ኮቻት ጎይንያ ꬎቃ በሳት ላለታና፤ እስራኤለ ጌሻ በሳት ꬋያና፤ እዮርባማ ካዎተꬃ ቦላ ታኒ ማሻራ ደንዳና” ያግስ።
AMO 7:10 ቤተለ ካታማን ካህነ ግድድ ደእያ አማስያስ እስራኤለ ካዋ እዮርባማኮ ሀይሳዳ ያግድ ኪትስ፦ “አሞፀይ እስራኤለ አሳ ግዶን ደእሸ፥ ነ ቦላ ማቀቴስ፤ እ ባ ኦዳን ቢታ ꬋይሴስ።
AMO 7:11 እ፥ ‘እዮርባም ማሻን ሀይቃና፤ እስራኤለ አሳይ ባንታ ቢታፈ ድኤትድ ባና’ ያጌስ” ያግስ።
AMO 7:12 አማስያስ አሞፀኮ፥ “ነኖ ትንብተ ኦደይሶ፥ ባ፤ ይሁዳ ቢታ ባዳ፥ ያን ኦꬃዳ አቃ፤ ያን ትንብተ ኦዳ።
AMO 7:13 ሽን ቤተለይ ካዎይ ጎይንያ በስነ ካዎተꬃ ኬꬅ ግድያ ግሾ፥ ናምአንꬆ ሀ በሳን ትንብተ ኦዶፓ” ያግስ።
AMO 7:14 አሞፀይ ዛሪድ፥ “ታኒ መህያ ሄምያነ ቦባ አይፈ ማፅያ አሰፐ አትሽን፥ ናበ ዎይኮ ናበ ናአ ግድከ።
AMO 7:15 ሽን ጎዳይ ታና ዶርሳ ዉደ ሄምያ በሳፈ ኤክድ፥ ‘ባዳ ታ አሳ እስራኤለስ ትንብተ ኦዳ’ ያግስ።
AMO 7:16 ሀእ ህዛ ጎዳይ ግያባ ስአ! ኔኒ፥ ‘እስራኤለ ቦላ ትንብተ ኦዶፓ፤ ይሳቃ ኮቻታ ሳባኮፓ’ ያጋዳሳ።
AMO 7:17 ሄሳ ግሾ፥ ጎዳይ፥ ‘ነ ማችያ ካታማ ግዶን ላይማ ግዳና፤ ነ አደ ናይትነ ነ ማጫ ናይት ማሻን ሀይቃና። ነ ቢታይ ዎዶሮን ሻከታና፤ ቃስ ኔኒ ነ ሁጰን አላጋ ቢታን ሀይቃና። ስይ ባይና እስራኤለ አሳይ ባንታ ቢታፈ ድኤትድ ባና’ ያጌስ” ያግስ።
AMO 8:1 ኡባ ሃርያ ጎዳይ ታና ሀራ ቆንጨꬅ በስስ፤ ሄስካ፥ ቴራ አይፈይ ኩምዳ ዳቾ በስስ።
AMO 8:2 እ ታኮ፥ “አሞፀ፥ ኔኒ አይ በአይ?” ያግድ ኦይችስ። ታኒ፥ “ቴራ አይፈይ ኩምዳ ዳቾ በአይስ” ያጋስ። ጎዳይ ታኮ፥ “ታ አሳ እስራኤለ ዉርሰꬃይ ጋክስ፤ ህዛፐ ጉየ ታኒ ኤንታ ሴሮና አግከ” ያግስ።
AMO 8:3 ኡባ ሃርያ ጎዳይ፥ “ሄ ጋላስ ካዎ ኬꬃን የፅያ የꬃይ ዬሆን ላመታና፤ አሳ አህ ዱማ ዱማ በሳን ዎꬋና፤ ዬሆይ ዋሶይ ባይና ስእ ግድ የገታና” ያጌስ።
AMO 8:4 ህንተኖ፥ መቶታንቾታ ኡንኤይሳቶ፥ ቢታን ደእያ ማንቆታ ꬋይሳናዉ ኮየይሳቶ፥ ሀይሳ ስእተ!
AMO 8:5 ህንተ፥ “ኑኒ ካꬃ ባይዛናዉ አጌና ፄሮ ባለይ አዉደ አꬋነ! ቃስ ኑኒ ኑ ዛልእያ ዶማናዉ ሳምባት አዉደ አꬋነ! ኑኒ ካꬃ ጉꬃባን ማክድ፥ ዳሮ ሚሸን ባይዛና። ቃስ ዎርዶ ምዛነን አሳ ጭማና።
AMO 8:6 ማንቁዋ ብራን፥ መቶታንቹዋ ዋꬃ ጫማን ሻማና፤ ቃስ ሀርቆ ግስተ ሙሩቶ ግስተ ጋተን ባይዛና” ያጌታ።
AMO 8:7 ያይቆብ እያ ሱንꬃን ጬቀትያ ጎዳይ፥ ፆሳይ፥ ሀይሳዳ ያግድ ባ ሁጰን ጫቅስ፦ “ታኒ ኤንቲ ኦꬅዳ ኢታ ኦሶ ኡባ ዶግከ።
AMO 8:8 ሄሳ ጋሶን ቢታይ ያርኬስ፤ አሳ ኡባይ ዬኬስ። ናይለ ሻፋይ ክፅድ ከየይሳዳነ ዎይሳዳ ቢታ ኡባይ ቃፃናነ ስም ዎꬋና” ያግስ።
AMO 8:9 ኡባ ሃርያ ጎዳይ፥ “ሄ ጋላስ ታኒ አዋ ሴታ ጋላስ ዉልሳና፤ ጋላሳ ቃምሳና።
AMO 8:10 ታኒ ህንተ ኡፋይሳ ባልያ አዛኖን፥ ህንተ የꬃ ዬሆን ላማና። ፐፅ እስ ናእ ሀይቅን ዬክያ አሳዳ፥ ህንተ ህንተ ሁጵያ ሜደትድ ካዮ ማኦ ማአናዳ፥ ህንተና ኦꬃና። ሄ ጋላሳ ዉርሰꬃይ ዳሮ ጫሞ ግዳና” ያጌስ።
AMO 8:11 ኡባ ሃርያ ጎዳይ፥ “ሄኮ፥ ታኒ ቢታ ኡባ ቦላ ኮሻ የድያ ዎደይ ያና። ሄ ኮሻይ ካꬅ ዎይኮ ሃꬃ ኮሻ ግዶናሽን፥ ስአናዉ ጎዳ ቃላ ꬋዮ ኮሻ ግዳና።
AMO 8:12 አሳይ ዶሎሀፐ ዉሎሀ ጋካናዉ፥ ፑደሀፐ ዱገሀ ጋካናዉ ዎፀረታና። ኤንቲ ጎዳ ቃላ ኮያናዉ ያነ ሃነ ዎፃና፥ ሽን ደሞኮና።
AMO 8:13 ሄ ጋላስ የገልሳ ጌላኦትነ ዎልቃማ ፓንꬃት ሳሞን ፕቅ ጋና።
AMO 8:14 ሳማረ ኤቃታራ ጫቅዳይሳት፥ ‘ዳና ፆሳይ ኤሮ!’ ያገይሳት፥ ‘በርሳበ ፆሳይ ኤሮ’ ያገይሳት ኩንዳና። ኤንቲ ዛር ደንዶኮና” ያጌስ።
AMO 9:1 ታኒ ጎዳይ ያርሾ በሳ ማታን ኤቅዳሽን በአስ። እ ታኮ፥ “ባሶይ ቃፃና ጋካናዉ ፆሳ ኬꬃ ጉምቡዋ ሾጫዳ አሳ ኡባ ሁጰን መንረꬃ። ሄሳፈ አትዳ አሳ ታኒ ማሻን ዎꬋና። ባቃትያ አስ ከስ ኤከና፤ ከስ ኤክዳ አስካ ፓፃ አተና።
AMO 9:2 ኤንቲ ቢታ ቦክድ፥ ስኦለን ዎꬍኮካ፥ ታኒ ኤንታና ያፐ ከሳና። ሳሉዋ ከይኮካ፥ ታኒ ኤንታ ያፐ ዎꬍሳና።
AMO 9:3 ኤንቲ ቃርመሎሳ ዙማ ሁጰን ቆሰትኮካ፥ ታኒ ኤንታ ኮያዳ ያፐ ከሳና። አባ ጪሞን ገልድ፥ ታ ስንꬃፈ ጌምኮካ፥ ታኒ ዳወ ኪትን፥ እ ኤንታ ዱካና።
AMO 9:4 ኤንቲ ባንታ ሞርከታን ድኤትድ፥ ቢኮካ፥ ያን ኤንቲ ማሻን ሀይቃናዳ ኪታና፤ ታኒ ኤንታ ኢታ አይፈን ፄላና፤ ኤንታ ሎኦ አይፈን ፄልከ” ያግስ።
AMO 9:5 ጎዳይ፥ ኡባፈ ዎልቃማ ፆሳይ፥ ሳኣ ቦችን ሳእ ትልኤስ፤ ቃስ ሳአን ደእያ ኡባይ ዬኬስ። ናይለ ሻፋይ ክፅድ ከየይሳዳነ ዎይሳዳ ቢታ ኡባይ ቃፃናነ ስም ዎꬋና።
AMO 9:6 ባ ኬꬃ ሳሎን ኬፅዳይ፥ እያ ባሱዋ ሳአን ኤስዳይ፥ አባ ሃꬃ ፄግድ፥ ቢታ ቦላ ዱገ ቡክሰይ፤ እያ ሱንꬃይ ጎዳ።
AMO 9:7 ጎዳይ፥ “እስራኤለ አሳዉ፥ ህንተ ታዉ ቶጰ አሳ መላ ግደከትዬ? ታኒ ህንተና ግብፀ ቢታፈ ከስዳይሳዳ፥ ፍልስፄመ አሳ ካፍቶራፐ፥ ቃስ ሶረ አሳ ቂራፐ ከሳብክና?” ያጌስ።
AMO 9:8 ጎዳይ፥ “ሄኮ፥ ኡባ ሃርያ ጎዳ አይፈይ ናጋራንቾ ካዎተꬃ ቦላ ደኤስ። ታኒ እያ ቢታ ቦላፈ ꬋይሳና፤ ሽን ታኒ ያይቆባ ኮቻ ኡባ ꬋይስከ።
AMO 9:9 ታኒ ካꬅ ዛርዛረን ሀርቀተይሳዳ እስራኤለ አሳይ ካዎተꬃታ ኡባ ግዶን ላለታና መላ ኪታና። ሽን ኤንታ ግዶን አማነትዳይሳታፐ እሶይካ ሳአን ዎꬍድ ꬋየና።
AMO 9:10 ‘ኑና አይባ ኢትካ ጋከና ዎይኮ ደመና’ ግያ ታ አሳ ግዶን ደእያ ናጋራንቾት ኡባይ ማሻን ዉራና” ያጌስ።
AMO 9:11 “ሄ ጋላስ ታኒ ኩንድዳ ዳዊታ ካዎተꬃ ደንꬃና። ድርሳ ግምበታ ዛራ ኤሳና፤ ላለትዳ በሳታ ኦራꬃና፤ ታኒ እያ ካሰይሳዳ ኦꬃዳ ኬፃና።
AMO 9:12 ሄስካ ኤዶመፐ አትዳይሳታነ ታ ሱንꬃን ፄገትዳ ካዎተꬃታ ኡባ ላታና” ያጌስ ሄሳ ኦꬅያ ጎዳይ።
AMO 9:13 “ካꬅ ጫከይሳት ጫክ ዉርሶና ደእሽን፥ ጎየይሳት ጋክያ ዎደይ፥ ዎይነ ጉምኤይሳት ጉምእድ ዉርሶና ደእሽን፥ ዎይነ ቶከይሳት ጋክያ ዎደይ ያና። ሄ ዎደ ደረት ማልኦ ዎይነ ኡሽ ፑልታና፤ ዙማት ዎይነ ኡሻን ምተታና።
AMO 9:14 ድኤትድ ብዳ ታ አሳ እስራኤለ ዛራና፤ ኤንቲ ላለትዳ ካታማታ ዛር ኬፅድ ዳና። ዎይነ ቶክድ እያፐ ዎይነ ኡሻ ኡያና፤ አታክልተ ቶክድ ኤንታ አይፍያ ማና።
AMO 9:15 ታኒ ታ አሳ፥ እስራኤለ ኤንታ ቢታን ቶካና፤ ኤንቲ ታኒ ኤንታዉ እምዳ ቢታፈ ዛሪድ ሾደቶኮና” ያጌስ ሄሳ ኦꬅያ ጎዳይ።
OBA 1:1 አብድዩይ በእዳ ቆንጨꬃ። ጎዳ ፆሳይ ኤዶመባ ሀይሳዳ ያጌስ: ኤዶመባ ጎዳይ፥ ባ ኪትያ አድያ ቦላ ካዎተꬃታስ ኪትዳይሳ ኑኒ ስእዳ፤ “ደንድተ! ኤዶመ ኦላናዉ ቦስ” ያግስ።
OBA 1:2 “ሄኮ፥ ታ ነና ካዎተꬃታ ግዶን ላፋ ከሳና፤ ኔኒ ዳሮ ካትዳይሳ ግዳና።
OBA 1:3 ነኖ፥ ዛላ ቆጶ ግዶን ደኤይሶ፥ ነ ኬꬃ ꬎቃ ደረታ ቦላ ኬፅዳይሶ፥ ነ ዎዛናን፥ ‘ታና ሀይሳፈ ሳአን ዎꬍሳናይ ኦኔ?’ ያገይሶ፥ ነና ነ ዎዛና ኦቶሮይ ጭምስ።
OBA 1:4 ነ አርጋንꬃዳ ፑደ ሃካዳ ፕራꬍኮካ፥ ነ ኬꬃ ፆልንቶታ ግዶን ኬፅኮካ፥ ታ ነና ያፐ ዱገ ዎꬍሳና” ያጌስ ፆሳይ።
OBA 1:5 “ካይሶይ ዎይኮ ባንቅያ አስ ቃማ ዪኮ፥ ባንታዉ ግደይሳ መላ ፃላላ ካይሶቶኮናዬ? ዎይነ ማፀይሳት ማፅሸ፥ ፖሽለ አሾኮናዬ? ሽን ነ ሞርከት ነና ፖሎ ꬋይሳና።
OBA 1:6 አቤት ኤሳዌይ ዋንድ ቦንቀታንዴ? ቆሳን ደእያ እያ ሻሎይ ዋንድ ኤከታንዴ?
OBA 1:7 ኔራ ጫቅዳይሳት ኡባይ ነና ነ ቢታፈ ጎዳና፤ ቃስ ነ አማነትዳ ላገት ጭምድ ነና ፆናና። ነ ካꬃ ምዳይሳት ነ ኦገን ግተ የጋና፥ ሽን ኔኒ ሄሳ አኬካካ” ያጌስ።
OBA 1:8 “ሄ ጋላስ ታኒ ኤዶመፐ ጭንጫታነ ኤሳዌ ዙማፐ አኬካ ꬋይሳና።
OBA 1:9 ህንተኖ፥ ተማና አሳቶ፥ ህንተ ኦላንቾት ዳጋማና፤ ኤሳዌ ዙማ ቦላ ደእያ አሳ ኡባይ ጎይረታና” ያጌስ ጎዳይ።
OBA 1:10 ነ እሻ ያይቆባ ቦላ ነ ኦꬅዳ ኢታባ ግሾ፥ ነ ዬላ ማአና፤ ነ መርናዉ ꬋያና።
OBA 1:11 እማꬃትነ አላጋት እያ ሻሉዋ ቦንቅያ ጋላስ ኔኒ ጋፃ ከያዳ ኤቃ ፄላዳሳ። ቃስ እያ ፐንገራ ገልድ፥ የሩሳላመ ካታማ ቦላ ሳማ የግያ ዎደ ኔኒ ኤንታፈ እሱዋ መላ ግዳዳሳ።
OBA 1:12 ኔኒ ነ እሻይ መቶትያ ጋላስ እያ መቱዋን ኡፋይታናዉ በሰናሽን፤ ይሁዳ አሳ ቦላ ዋየይ ጋክያ ጋላስ ሀሹ ጋናዉ በሰናሽን። ኤንታ ኡንአ ጋላሳን ኦቶሮን ኦደታናዉ በሰናሽን!
OBA 1:13 ኔኒ ኤንታ መቱዋ ጋላስ ታ አሳይ ደእያ ካታማ ገላናዉ፥ ኤንታ ዋያን ኔኒ ኡፋይታናዉነ ኤንታ መቱዋ ጋላስ ኤንታ ሻሉዋ ቦንቃናዉ በሰናሽን!
OBA 1:14 ባቃተይሳታ ዎꬋናዉ ኔኒ ዳጋላ ኦገን ናጋናዉነ አትዳይሳታ ኤንታ ኡንኣ ጋላስ ሞርከታስ አꬃዳ እማናዉ በሰናሽን!
OBA 1:15 ጎዳ ፕርዳ ጋላሳይ ካዎተꬃታ ኡባ ቦላ ማትስ። ነኖ ኤዶመ፥ ኔኒ ሀራታ ቦላ ኦꬅዳባይ ነ ቦላ ኦሰታና፤ ነ ኦሶይ ነ ቦላ ስማና።
OBA 1:16 ታ ጌሻ ዙማ ቦላ ነ ኡይዳይሳ መላ ካዎተꬃ ኡባይ ቃንፆና ኡያና፤ ጉጅድካ ኡያና፤ ኤንቲ ካሰ ሀን ኤሮናባ ሀናና።
OBA 1:17 “ሽን ፅዮነ ዙማን ከስ ኤክዳይሳት ዳና፤ ፅዮነይ ጌሽ ግዳና፤ ያይቆባ ኮቻይ ባንታ ቢታ ዛር ላታና።
OBA 1:18 ያይቆባ ኮቻይ ታማ ግዳና፤ ዮሰፋ ኮቻይ ላጮ ግዳና፤ ኤሳዌ ኮቻይ ቡረ ግዳና። ታም ቡረ መይሳዳ፥ ያይቆባ ዘረꬃይነ ዮሰፋ ኮቻይ ኤሳዌ ኮቻ ምድ ፖሎ ꬋይሳና” ያጌስ ጎዳይ።
OBA 1:19 ነገበ መላ ቢታን ደእያ አሳይ ኤሳዌ ዙማ ላታና፤ ጋꬋ ቢታን ደእያ አሳይ ፍልስፄመ ቢታ፥ ኤፍሬማ ቢታነ ሳማረ ቢታ ላታና። ቃስ ብንያመ ኮቻይ ጋላዳ ቢታ ላታና።
OBA 1:20 ድኤተꬃፈ ስምዳ እስራኤለ አሳይ፥ ካናነፐ ብድ ስራፍታ ጋካናዉ ደእያ ቢታ ላታና። የሩሳላመፐ ደኤትድ፥ ሳፋራዳ ጌተትያ በሳን ደእያ አሳት ነገበ ካታማታ ላታና።
OBA 1:21 አሸይሳት ኤሳዌ አሳ ሃራናዉ ፅዮነ ዙማ ቦላ ከያና፤ ካዎተꬃይ ጎዳባ ግዳና።
JON 1:1 ጎዳ ቃላይ አማተ ናኣ፥ ዮናሳስ ሀይሳዳ ያግድ ቆንጭስ።
JON 1:2 “ሄ ካታማ አሳ ኢታተꬃይ ታ ስን ጋክዳ ግሾ፥ ደንዳዳ ህን ዎልቃማ ካታማ ናናወ ባዳ ሳባካ” ያግስ።
JON 1:3 ሽን ዮናስ ጎዳ ስንꬃፈ በትድ ታርሰሳ ቢታ ባናዉ ከይስ። እ፥ ዮጰ ካታማ ዎꬍድ ታርሰሳ ብያ ማርካበ ደምስ። ጎዳ ስንꬃፈ በታናዉ ኮይድ ታርሰሳ ባናዉ ኮሽያ ሚሸ ጭግድ ማርካብያን ገልስ።
JON 1:4 ሽን ጎዳይ አባ ቦላ ዎልቃማ ጫርኩዋ ደንꬅስ። አባን ዎልቃማ ሆበይ ዎልቃምዳ ግሾ ማርካብያ መቃናዉ ጋካሱ።
JON 1:5 ያትን ማርካብያ ኦሳንቾት ያይዶሶና። እሶይ እሶይ ባ ፆሳኮ ባ ፆሳኮ ዋስስ። ቃስ ማርካበይ ካዉያና መላ ግዶን ደእያ ጫና ደንꬅድ አባን የግዶሶና። ሽን ዮናስ ማርካብያስ ግዶ ገልድ ዎልቃማ ꬍስኮ ꬍስክስ።
JON 1:6 ማርካብያ ላገይስ እያኮ ሺቅድ፥ “ሀይሳ መላ ሳተን ዋና ꬍስካይ? ደንዳ ነ ፆሳ ዎሳ! ኦን ኤር እ ኑስ ቃትድ ኑና አሻነኮነ” ያግስ።
JON 1:7 ማርካብያ ኦሳንቾት እሶይ እሱዋኮ፥ “ሃ ዪተ፥ ሀ ኢታባይ ኑና ኦደ ጋሶን ጋክዳኮ ኤራናዉ ሳማ የጋና” ያግዶሶና። ሳማ የግን፥ ሳማይ ዮናሳ ቦላ ዎꬍስ።
JON 1:8 ኤንቲ ዮናሳኮ፥ “ሀ ኢታባይ ኦደ ጋሶን ኑ ቦላ ጋክዳኮ አነ ኑስ ኦዳ። ነ ኦሶይ አይቤ? አዉፐ ያዲ? ነ ቢታይ አዌ? ኔኒ ኦደ ባጌ?” ያግድ ኦይችዶሶና።
JON 1:9 ዮናስ ዛሪድ፥ “ታኒ እብራወ አስ፤ አባነ ቢታ መꬍዳ ጎዳ፥ ሳሎ ፆሳ ጎይንያ አስ” ያግስ።
JON 1:10 እ ኤንታዉ ኮይሮትድ ኦድዳይሳዳ እ ጎዳ ስንꬃፈ በተይሳ ኤርዶሶና። ሄሳ ግሾ፥ ኤንቲ ያይድ፥ “ላ አይባ ፓላባ ኦꬃድ” ያግዶሶና።
JON 1:11 አባ ሆበይ ካሰይሳፈ ሃ ዳርዳ ግሾ አሳት ዮናሳ፥ “ኑስ አባይ ስእ ጋና መላ ነና ኑኒ ዋትኖ?” ያግድ ኦይችዶሶና።
JON 1:12 እካ፥ “ሀ ዎልቃማ ሆበይ ህንተ ቦላ ደንድዳይ ታ ጋሶን ግደይሳ ታኒ ኤራይስ። ሄሳ ግሾ፥ ታና ኤክድ አባን የግተ። ያትኮ አባይ ህንተዉ ስእ ጋና” ያግስ።
JON 1:13 ሽን ማርካብያ ኦሳንቾት ማርካብያ ጋፃ ከሳናዉ ግታ ፕꬍዶሶና። ሽን አባ ሆበይ ሃ ዳርዳ ግሾ ጋፃ ከሳናዉ ዳንዳእቦኮና።
JON 1:14 ሄሳ ግሾ፥ ኤንቲ ጎዳኮ፥ “አቤት ጎዳዉ፥ ሃ ኡራ ሸምፑዋ ግሾ፥ ኔኒ ኑና ꬋይሶናዳነ ሀ ጌሻ ሱꬃ አጩዋ ኔኒ ኑፐ አቾናዳ ኑኒ ነና ምንꬅድ ዎሶስ” ያግድ ጎዳ ዎስዶሶና።
JON 1:15 ሄሳፈ ጉየ፥ ዮናሳ ደንꬅድ፥ አባን የግዶሶና። አባ ሆባይካ ስእ ግስ።
JON 1:16 ያትን አሳት ጎዳስ ዳሮ ያይድ ያርሾ ያርሽዶሶና፤ እያዉ ቃንግዶሶና።
JON 1:17 ዮናሳ ምታና መላ እስ ግታ ሞሎ ጎዳይ ጊግስስ። ዮናስ ሄ ሞሉዋ ኡሎን ሄꬑ ጋላስነ ሄꬑ ቃማ ጋምእስ።
JON 2:1 ዮናስ ሞሉዋ ኡሎን ደእሸ፥ ባ ጎዳ ፆሳ ሀይሳዳ ያግድ ዎስስ።
JON 2:2 “ታኒ ታ ዋያን ደአሸ ነና ፄጋስ፤ ነካ ታዉ ስአዳሳ። ታኒ ስኦለ ጪሙዋ ግዶን ደአሸ፥ ማዶ ኮያዳ ኔኮ ዋሳስ ነካ ታ ዋሱዋ ስአዳሳ።
JON 2:3 ኔኒ ታና አባ ጪሙዋን ዱገ የጋዳሳ። ሃꬅ ታ ዩሹዋ ተቅስ፤ ዎልቃማ ዙለይ ታ ቦላራ አꬍስ።
JON 2:4 ‘ታኒ ነ ስንꬃፈ ዎራ ሆለታስ፥ ሽን ነ ጌሻ ኬꬃ ዛራዳ በአና’ ጋዳ ቆፓስ።
JON 2:5 ሃꬅ ታዉ ቆ ጋክስ፥ አባ ጪሞይ ታና ምትስ። አባን ደእያ ማታይ ታ ሁጰን ፃፀትስ።
JON 2:6 ታኒ ሃꬃ ጋርሳን ደእያ ደረታ ባሱዋ ጋካዳ ምተታስ፥ ቢታ ዉላይ መርናዉ ታ ቦላ ጎርደትስ፥ ሽን ታ ጎዳዉ ፆሳዉ፥ ኔኒ ታ ሸምፕዉ ኢታ ኦላፈ ከሳዳሳ።
JON 2:7 ታ ሸምፕያ ዶጭዳ ዎደ፥ ጎዳዉ ታ ነና ቆፓስ፤ ታ ዎሳይ ኔኮ ነ ጌሻ ኬꬃ ጋክስ።
JON 2:8 ሀዳ ግድዳ ኤቃ ፆሳታ ቦላ ዘምፐይሳት፥ ነዉ ደእያ ባንታ አማነተꬃ አጎሶና።
JON 2:9 ሽን ታኒ ጋላታ ማዝሙረ ነዉ ያርሻና። ታ ቃንግዳባካ ነዉ ጋꬃና። አይስ ጊኮ፥ አቶተꬃይ ፆሳፈ” ያግስ።
JON 2:10 ሄሳፈ ጉየ፥ ጎዳይ ሞሉዋ ኪትስ። ሞሎይ ዮናሳ መላ ቢታ ቦላ ጮይስ።
JON 3:1 ጎዳ ቃላይ ናምአንꬆ ዮናሳኮ ሀይሳዳ ያግድ ይስ።
JON 3:2 “ደንዳዳ ግታ ካታማ ናናወ ባ፤ ታ ነዉ ኦድያ ቃላ ኤንታዉ አዋጃ” ያግስ።
JON 3:3 ዮናስ ጎዳስ ኪተትድ ናናወ ብስ። ናናወይ ዳሮ ግታ ካታማ። ሀ ጋፃፐ ህን ጋፃ ጋካናዉ ሄꬑ ቃማ ሄመꬄስ።
JON 3:4 ዮናስ ካታማ ገልድ እስ ጋላሳ ኦገ ሄመትድ፥ “ናናወይ ኦይታሙ ጋላሳፐ ጉየ ꬋያና” ያግድ አዋጅስ።
JON 3:5 ናናወ አሳይ ፆሳ አማንዶሶና። ፆማ አዋጅዶሶና፤ ጉꬃፈ ግታ ጋካናዉ አስ ኡባይ ካዮ ማኦ ማእዶሶና።
JON 3:6 ናናወ ካዎይ ሄ ኦዳ ስእዳ ዎደ ባ ካዎተꬃ አራታፐ ዎꬍድ፥ ካዎተꬃ ማኡዋ ቃርድ ካዮ ማኦ ማእድ ብዶ ቦላ ኡትስ።
JON 3:7 ናናወ ደርያስ ሀይሳዳ ያግድ አዋጅስስ፦ “ካዋፐነ እያ ሞርናታፐ ከይዳ ኪታዳ ሀችፈ ዶምድ ህንተራነ ህንተ መሄታራ፥ አይብባካ ሞና መላ ኡዮና መላ።
JON 3:8 አስነ መሄ ኡባይ ካዮ ማኦ ማኦ። እስ እስ አስ ምንꬅድ ፆሳኮ ዋሶ። ባ ኢታ ኦግያፐ ስሞ፥ ባ ኢታ ኦሱዋካ አጎ።
JON 3:9 ፆሳይ ኑስ ቃትድ፥ ኑኒ ꬋዮና መላ ባ ዎልቃማ ሀንቁዋፈ ስማነኮ ኦን ኤር!” ያግስ።
JON 3:10 ኤንቲ ባንታ ኢታ ኦግያፐ ስምዳይሳ ፆሳይ በእዳ ዎደ ኤንታዉ ቃትድ ኤንታ ቦላ ኤሀና ግዳ ኢታባ አጋግስ።
JON 4:1 ሽን ሄስ ዮናሳ ዳሮ ኡፋይስቤና። ሄሳ ግሾ፥ እ ይሎትስ።
JON 4:2 ጎዳኮ፥ “አቤት ጎዳዉ ታኒ ኮይሮ ታ ቢታን ደአሸ ግዳይስ ሀይሳ ግደኔ? ታኒ ነ ስንꬃፈ በታዳ ታርሰሳ ባናዉ ኤለስዳይ ሀይሳሳ። ኔኒ ቃይነ ማሮት ኩምዳ ፆሲ ግደይሳ፥ ሀንቆስ ኤለሶናይሳነ ዉሮና ሲቆን ኩምዳይሳ፥ ቃስ ኤሀና ግዳ ኢታባካ ቃታዳ አግያ ፆሲ ግደይሳ ታኒ ካሰካ ኤራይስ።
JON 4:3 ሀእ አቤት ጎዳዉ፥ ሀያና ታና ዎꬋ፤ ደኦፐ ታዉ ሀይቆይ ሎኦ” ያግድ ዎስስ።
JON 4:4 ጎዳይ እያኮ፥ “ኔኒ ሀይሳꬆ ሸነታናዉ በሲ?” ያግስ።
JON 4:5 ሄሳፈ ጉየ፥ ዮናስ ካታማፐ ጋፃ ከይድ ዶሎሀ ባጋን ኡትስ። ሄሳን ባዉ ሻቃራ ሻቃርድ እ ኩያን ኡትድ ካታማ ቦላ ጋካናዉ ደእያባ ባአናዉ ናጌስ።
JON 4:6 አዋ ሱላፐ ዮናሳ አሻና መላ ጎዳይ እስ ጎሰ ዶልስስ። ሄ ጎሰ ሀይꬃይ ዮናሳ ሁጰ ቦላ ባጋራ ኩያ ግዳና መላ ኦꬅስ። ዮናስ ሄ ጎሰ ጋሶን ዳሮ ኡፋይትስ።
JON 4:7 ሽን ዎንተꬃ ጋላስ ዎንታ ጉራ ፆሳይ ጉፁነ ጊግስስ። ሄ ጉፁንያ ጎሰይ መላና ጋካናዉ ማሱ።
JON 4:8 አዋይ ከይያ ዎደ ፆሳይ ዶሎሀ ባጋፈ ምሻ ጫርኮ የድስ። ዮናስ ላባናና ጋካናዉ አዋይ ዮናሳ ሁጵያ ፁግስ። ያትን እ፥ “ደኦፐ ታዉ ሀይቆይ ሎኦ” ያግድ ሀይቆስ ዎስስ።
JON 4:9 ፆሳይ ዮናሳኮ፥ “ኔኒ ሀ ጎሰ ግሾ ይሎታናዉ በሲ?” ያግስ። ዮናስ፥ “ኤ በሴስ፤ ኡባራካ ሀይቃና ጋካናዉ ይሎታናዉ ታዉ በሴስ” ያግስ።
JON 4:10 ያትን ፆሳይ ዮናሳኮ፥ “ዝነ ዶላዳ ሀች መልዳ ጎሴስ፥ ነ ዳቡሮናርስ፥ ነ ድቾናርስ ሀይሳ መላ ቃታዳሳ።
JON 4:11 ሽን ኡሻችነ ሀድርስ ሻክድ ኤሮና ፄታነ ላታሙ ሙኩሉ አስነ ዳሮ መሄይ ደእያ ሀ ግታ ካታማ ናናወስ ታኒ ቃታናዉ በሰኔ?” ያግስ።
MIC 1:1 እዮአታም አካዝነ ህዝቅያስ ካል ካልድ ይሁዳን ካዎትዳ ዎደ ሞረሴታ ካታማ አስ ግድዳ ምክያሳኮ ይዳ ጎዳ ቃላይ ሀይሳ፦ እ ሳማረባነ የሩሳላመባ ቆንጨꬅ በእስ።
MIC 1:2 ህንተ፥ አሳ ኡባይ ስእተ፤ ሳእነ እያ ደእያ ኡባይ ሀይሳ ሀይዝድ ስእተ። ኡባ ሃርያ ጎዳይ፥ ባ ጌሻ ኬꬃፈ ህንተ ቦላ ማርካቴስ።
MIC 1:3 ሄኮ፥ ጎዳይ ባ ደእያ በሳፈ ዬስ፤ ቢታ ꬎቃ በሳታ ቦላ ሄመቴስ።
MIC 1:4 ሙቃድ ታማን ትልኤይሳዳ፥ ሃꬅ ደረፐ ዱገ ጎገይሳዳ፥ ደረት እያ ቶሁዋፐ ጋርሳን ትልአና፤ ዛንጋራት ጳልቀታና።
MIC 1:5 ሄስ ኡባይ ሀንዳይ ያይቆባ ቆሁዋ ግሾነ እስራኤለ ናጋራ ግሾሳ። ያይቆብ ባለታና መላ ጋሶ ግድዳይ ኦኔ? ኤንታ ካታማ ሳማረ ግደነዬ? ይሁዳ አሳይ ኤቃ ጎይናና መላ ጋሶ ግድዳይ ኦኔ? የሩሳላመ ግደነዬ?
MIC 1:6 ሄሳ ግሾ፥ ጎዳይ፥ “ታኒ ሳማረ፥ ደንባን ኬለትዳ ሹችነ ዎይነይ ቶክያ በሳ መላ ኦꬃና። ታኒ እያ ሹቻ ዛንጋራን ሆላና፤ እያ ባሱዋ ካሎያና።
MIC 1:7 እያ ኤቃ ምስለት ኡባይ ትንቸታና፤ እያ ኤቃ ኬꬃን ኦꬅያ ላይማታስ እመትዳ ጋተይ ኡባይ ፁገታና፤ ታኒ እያ ኤቃታ ኡባ ꬋይሳና። ሄ ጋተ ኡባይ ላይማን ደምዳባ ግድያ ግሾ፥ እካ ስሚድ፥ ሀራ ላይማስ እመታና” ያጌስ።
MIC 1:8 ሄሳ ግሾ፥ ታኒ ዬካናነ ዋሳና፤ ፅረ ካሎነ መላ ቶሆን ሄመታና። ዎርካናዳ ዋሳና፤ ቃስ ያንቾዳ ዪ ጋና።
MIC 1:9 ሳማረ ማዱንꬃይ ፓፃናዉ ዳንዳኤና። ሄ ዋየይ ይሁዳ ቢታ ጋክስ፤ ታ አሳይ ደእያ የሩሳላመ ካታማ ፐንግያኮ ጋክስ።
MIC 1:10 ጋተ ካታማን ደእያ ኑ ሞርከታስ ሄሳ ኦዶፕተ፤ ኤንታ ስንꬃን ዬኮፍተ። ቤት-ኦፊራ ካታማን ባናን ጎንዶረትድ ዬክተ።
MIC 1:11 ህንተኖ፥ ሻፍራ ካታማን ደኤይሳቶ፥ ካሎ ዬላትሸ፥ ድኤትድ ቢተ። ፃናና ካታማን ደኤይሳት ያፐ ከያናዉ ፃሎኮና። ቤት-ኤፀላ ካታማይ ዬሆይ ደእያ በሲ ግድያ ግሾ፥ እ ህንተዉ አትያ በሲ ግዳናዉ ዳንዳኤና።
MIC 1:12 መቶይ ጎዳፐ የሩሳላመ ፐንገ ጋካናዉ ይዳ ግሾ፥ ማሮታን ደእያ አሳይ፥ “ሎኦባይ ያንዴሻ!” ግድ ናግሸ ዳቡርስ።
MIC 1:13 ፅዮነ አሳ ናጋራይ ኮይሮ ህንተ ቦላ በንትዳ ግሾነ የሩሳላመ አሳ ናጋራይ ህንተናን በንትዳ ግሾ፥ ህንተኖ፥ ላክሶ ካታማን ደኤይሳቶ፥ ጋረ ፓራታ ኮርተ።
MIC 1:14 ሄሳ ግሾ፥ ህንተኖ ይሁዳ አሳቶ፥ ህንተ ብድ፥ ሞረሴት-ጋተ ካታማ አሳስ እሞታ እማና። አክዚባ ካታማ አሳይ እስራኤለ ካዎታ ጭማና።
MIC 1:15 ህንተኖ፥ ማረሻ ካታማን ደኤይሳቶ፥ ጎዳይ ህንተና ኦልድ ኦይክያ ኦላንቾታ ህንተ ቦላ ኤሀና፤ ቦንቸትዳ እስራኤለ ሀላቃት አዱላማ ጎንጎሉዋን ቆሰታና።
MIC 1:16 ህንተኖ፥ ይሁዳ አሳቶ፥ ህንተ ዶስያ ናይት ህንተፈ ድኤትድ ባናዉ ደእያ ግሾ፥ ህንተ ሁጵያ ሜደትተ፤ ህንተ ሁጵያ ቆራሰ ሁጰዳ ቦሮቆ ኦꬅተ።
MIC 2:1 ኢታባ ሀልቸይሳታ፥ ቃስ ባንታ ሂፃን ደእሸ፥ ገነ ዋት ኦꬃነኮ ቆፐይሳታ አየ! ዎልቃይ ኤንታ ኩሸን ደእያ ግሾ፥ ሳእ ዎንትያ ዎደ ባንታ ቆፋ ፖሎሶና።
MIC 2:2 ኤንቲ ጎሻ ጋደ ኮይኮ፥ ዎልቃን ኤኮሶና፤ ኬ ኮይኮ ዎልቃን ኦይኮሶና። አሳ ማታ የꬍድ፥ እያ ላታ ጮ ቦንቆሶና።
MIC 2:3 ሄሳ ግሾ፥ “ሄኮ፥ ታኒ ህንተ ቦላ ኢታባ ኤሀናዉ ቆፓስ፤ ህንተ ከስ ኤካናዉ ዳንዳኤከታ። እ ኢታ ዎደ ግድያ ግሾ፥ ህንተ ኦቶሮን ስመረታናዉ ዳንዳኤከታ።
MIC 2:4 “ሄ ዎደ ኤንቲ ህንተ ቦላ ሌምሶን ቀልቅሳና፤ ቃስ ሀይሳዳ ያግድ ዘሌልሸ ህንተና ኦዳ ጫዳና። ‘ኑኒ ኡባይ ቱማ ꬋይዳ፤ ጎዳይ ኑ ቢታ ኤክድ፥ ኑና ድእዳይሳታስ ሻክድ እሚስ’ ” ያጌስ ጎዳይ።
MIC 2:5 ሄሳ ግሾ፥ ጋደይ ሳማን ሻከትያ ዎደ ጎዳ አሳ ግዶን ነ ሳማ ከስያ አስ ꬋያና።
MIC 2:6 አሳይ ታኮ፥ “ኑ ቦላ ትንብተ ኦዶፓ፤ ህንተ ቦላ ሀይሳ መላባይ ጋካና ጋዳ ኑ ቦላ ትንብተ ኦዶፓ። ሄሳ መላ ካዉሻባይ ኑና ጋከና” ያጎሶና።
MIC 2:7 ታኒ ኤንታኮ፥ “ያይቆባ ኮቻቶ፥ ጎዳ ዳንዳአይ ዉርደዬ? እ ሄሳ ማላባ ኦꬅዬ? ሱረ ኦገን በይሳታስ ታ ቃላይ ሎኦባ ኦኔ? ያግድ ህንተ ኦይቻናዉ በሲ? ያጋስ።
MIC 2:8 ሽን ማታ ዎደፐ ዶምድ፥ ታ አሳይ ታ ቦላ ሞርከዳ ደንድስ። ህርግ ባይና ህንተ ግዶራ አꬍያ ሳሮ አሳ ኦላፐ ቃረትድ ስምያ አሳዳ ኦꬅደታ።
MIC 2:9 ታ አሳ ግዶን ደእያ ማጫሳታ ኤንታ ሎኦ ኬꬃፈ ላግድ ከሴታ፤ ታ አንጁዋ ኤንታ ናይታፐ መርናዉ ኤክደታ።
MIC 2:10 ሀ በሳይ ቱናተꬃ ጋሶን ኢትዳ ግሾ፥ ደንድድ ቢተ። ሀይስ ህንተዉ ሸምፖ በሲ ግደና።
MIC 2:11 እስ ጭምያ ዎርዳንቾይ ይድ፥ ‘ህንተ ስንꬃፈ ዎይነ ኡሻንነ ማꬆይያ ኡሻን ኡፋይታና’ ያግድ ዎርዶ ትንብተ ኦድኮ፥ እ ህንተዉ ናበ ግዳና።
MIC 2:12 “ያይቆባ ኮቻቶ፥ ታኒ ህንተና ኡባ ሺሻና፤ ታኒ እስራኤለ አሳፐ አትዳይሳታ ቱማ እስፈ ሺሻና። ዶርስ ግርበን ሺቀይሳዳነ ዉደይ ሄንꬃ በሳን ሺቀይሳዳ፥ ታኒ ኤንታ እስፈ ሺሻና። ሄ በሳይ ዳሮ አሳን ኩማና።
MIC 2:13 ኤንታዉ ኦገ ዶይድ ካለይስ ኤንታፈ ስንꬃትድ ከያና፤ ኤንትካ ፐንግያ መንꬅድ፥ ከያና። ጎዳይ፥ ኤንታ ካዎይ ባ ሁጰን ኤንታዉ ኤንታ ስን አꬍድ ኤንታ ካለꬃና” ያጌስ።
MIC 3:1 ታኒ፥ “ያይቆባ ኮቻታ ሀላቃቶነ እስራኤለ አሳ ካለይሳቶ፥ ስእተ! ህንተ ሱረ ፕርዳ ኤራናዉ በሰነዬ?
MIC 3:2 ህንተ ሎኦ እፅድ፥ ኢታ ዶሴታ። ታ አሳ ጋልባ ቃረታ፤ ኤንታ አሹዋ ኤንታ መቀꬃፈ ሻከታ።
MIC 3:3 ህንተ ታ አሳ አሹዋ ሜታ፤ ኤንታ ጋልባ ቃርድ፤ ኤንታ መቀꬃ ቃንፀረታ፤ አሾ ድስተን የጋናዉ ሙፀይሳዳ ኤንታ አሹዋ ሙፀረታ።
MIC 3:4 ኤንቲ ኢታ ኦሶ ኦꬅዳ ግሾ፥ ሄ ዎደ ኤንቲ ጎዳኮ ዋሳና፥ ሽን እ ኤንታዉ ዛረና፤ እ ባ ሶምኡዋ ሄ ዎደ ኤንታፈ ቆታና” ያጋስ።
MIC 3:5 ጎዳይ ዎርዶ ናበታኮ፥ “ህንተ ምያባ እምያ ዎደ፥ ‘ነዉ ሳእ ሳሮ’ ያጌታ፤ ሽን ህንተና ሙዞና እፅኮ እያ ቦላ ኦላ አዋጀታ።
MIC 3:6 ሄሳ ግሾ፥ ህንተዉ ጋላስ ቃማ ግዳና፤ ቆንጨꬅ በኤከታ። ሳእ ህንተዉ ꬉማና፤ ዛሪድ ሙሩነከታ፤ ናበታስ አዊ ዉላና፤ ጋላስ ꬉማና።
MIC 3:7 ቆንጨꬅ በኤይሳት ዬላታና፤ ሙሩነይሳት ካዉያና። ጎዳ ማታፐ ኤንታዉ ዛሮይ ባይና ግሾ፥ ኤንቲ ዬላትድ፥ ኡባይ ባንታ ዶና ኦይካና” ያጌስ።
MIC 3:8 ሽን ታኒ ያይቆባ ዘረꬃስ ኤንታ ናጋራ፥ እስራኤለ አሳስ ኤንታ ናጋራ ኦዳና መላ ዎልቃን፥ ጎዳ አያናን፥ ሱረ ፕርዳንነ ምኖተꬃን ኩማስ።
MIC 3:9 ህንተ ሱረ ፕርዳ እፀይሳትነ ሎኦባ ጌላይያ ያይቆባ ኮቻታ ሀላቃትነ እስራኤለ አሳ ካለይሳት ሀይሳ ስእተ።
MIC 3:10 ህንተ ፅዮነ ካታማ ሱꬅ ጉስድ ኬፀታ፤ የሩሳላመ ካታማ ጌላተꬃን ግምበታ።
MIC 3:11 እያ ሀላቃት ዎꬋፈን ፕርዶሶና፤ ካህነት ሚሸን ታማርሶሶና፤ ናበት ሚሸይ ባይና ሙሩኖኮና። ሽን ሄ ኡባ ኦꬅድ፥ “ጎዳይ ኑ ግዶን ደእያ ግሾ፥ ኑ ቦላ ኢታባይ ዬና” ያግድ እያ አማነቶሶና።
MIC 3:12 ሄሳ ግሾ፥ ህንተ ጋሶን ፅዮነ ካታማይ ጋደዳ ጎየታና፤ የሩሳላመ ካታማይ ላለꬃ ዶረ ግዳና። ፆሳ ኬꬃይ ኬፀትዳ ደረይ ዎራ ግዳና።
MIC 4:1 ዉርሰꬃ ጋላሳን ጎዳ ፆሳ ኬꬃይ ኬፀትዳ ዙማይ፥ ዙማታ ኡባፈ ꬎቁ ግድ በንታና። ደረ ኡባፈ ꬎቁ ꬎቁ ጋና። ካዎተꬃት ኡባይ እያኮ ዎዳና።
MIC 4:2 ህገይ ፅዮነፐ፥ ጎዳ ቃላይ የሩሳላመፐ ከይያ ግሾ፥ ዳሮ ካዎተꬃት ይድ፥ “አነ ሃይተ፤ ጎዳ ዙማኮ፥ ያይቆባ ፆሳ ኬꬃኮ ከዮስ። ኑ እያ ሸንያ ኦꬃና መላ እ ኑና ባ ኦግያ ታማርሳና” ያጋና።
MIC 4:3 እ ዳሮ አሳታ ግዶን ፕርዳና፤ ሃሆን ደእያ ምኖ ካዎተꬃታ ፓላማ ድጋና። ኤንቲ ባንታ ማሻ ማራሻ፥ ባንታ ቶራ ባጫ ከሳናዉ ቆፃና። ካዎተꬃይ ካዎተꬃ ቦላ ኦላ ደንና፤ ህዛፐ ጉየ፥ ኤንቲ ኦላ ትምርተ ታማሮኮና።
MIC 4:4 ሽን አስ ኡባይ ባ ዎይነ ኩያንነ ባላሰ ኩያ ጋርሳን ዎፑ ግድ ኡታና፤ ህርግስያባይ አይብካ ባዋ። ኡባፈ ዎልቃማ ጎዳይ ሄሳ ኦድስ።
MIC 4:5 አሳ ኡባይ ባ ፆሳ ፆሳ ጎይናና። ሽን ኑኒ ጎዳ፥ ኑ ፆሳ ሱንꬃን መርናዉ ሄመታና።
MIC 4:6 ጎዳይ፥ “ሄ ጋላስ ታኒ ዎበታነ ታኒ ዋዬስ አꬃ እምን፥ ድኤትድ ሃሆ በሲ ብዳይሳታ ሺሻና።
MIC 4:7 ዎበት አትድ ዳና መላ ኦꬃና፤ ድኤትድ ሃሆ በሲ ብዳይሳታ ምኖ ካዎተꬅ ከሳና። ሄ ዎደፐ ዶማዳ መርናዉ ታኒ ጎዳይ፥ ፅዮነ ደርያን ኤንታ ቦላ ካዎታና” ያጌስ።
MIC 4:8 ነኖ፥ ጎዳ አሳ ዎችያ የሩሳላመ ꬎቃ ግምብያዉ፥ ካሰ ነ ሃርያ ማታይነ የሩሳላመ ካዎተꬃ ዛዋይ ኡባይ ነዉ ስማና።
MIC 4:9 ሀእ ኔኒ ነ ቃላ ꬎቁ ኦꬃዳ ዋሰይነ እቀꬅ ኦይክዳ ማጫሳዳ ኡንኤተይ አይብሴ? ነዉ ካዎይ ባይና ግሾዬ? ዎይኮ ነና ዞርያ ꬋይዳ ግሾሴ?
MIC 4:10 ፅዮነ አሳዉ፥ እቀꬅ ኦይክዳ ማጫሳዳ ኦልሸ ዞከትተ። ህንተ ካታማፐ ከይድ ቃኤን ዳና፤ ያፐ ባብሎነ ባና። ግዶሽን፥ ያን ህንተ አታና፤ ጎዳይ ህንተና ህንተ ሞርከታ ኩሸፐ ዎዛና።
MIC 4:11 ሽን ሀእ ዳሮ ካዎተꬃት ነ ቦላ ሺቅድ፥ “የሩሳላመይ ቱኖ፤ ኑ አይፈይ ፅዮነ በኦ” ያጎሶና።
MIC 4:12 ሽን ኤንቲ ጎዳ ቆፋ ኤሮኮና፤ እያ ሀልቹዋ አኬክቦኮና። ካꬅ የታናዉ ዉዱማን ሺቀይሳዳ፥ ጎዳይ ኤንታ ሴራናዉ ሺሽስ።
MIC 4:13 ጎዳይ፥ “የሩሳላመ አሳዉ፥ ደንድድ፥ ህንተ ሞርከታ የꬍተ። ታኒ ህንተዉ ብራታ ካጨ እማና፤ ታኒ ህንተዉ ናሰ ብራታ ቶሆ እማና። ህንተ ዳሮ ካዎተꬃታ ትንቸረꬃና፤ ኤንቲ ገነን ሺሽዳ ኡባ ህንተ ጎዳስ ዱማያና፤ ኤንታ ሻሉዋ ህንተ ሳአ ኡባ ጎዳስ እማና” ያጌስ።
MIC 5:1 ህንተኖ፥ የሩሳላመ አሳዉ፥ ህንተ ኦላንቾታ ሺሽተ! ኑ ሞርከት ኑና ተቅዶሶና፤ ኤንቲ እስራኤለ ካለይሳ ጋጩዋ ፃምአን ሾጫና ሀኖሶና።
MIC 5:2 ጎዳይ፥ “ኤፍራታን ደእያ ቤተለመ ካታማዉ፥ ኔኒ ይሁዳ ካታማታ ግዶን ጉꬃ፤ ሽን እያዉ ደንዶይ በንፐ ዶምድ፥ መርናዉ ግድዳይስ፥ እስራኤለ ሃራናይስ ታዉ ኔፐ ከያና” ያጌስ።
MIC 5:3 ሄሳ ግሾ፥ እቀꬅ ኦይክዳ ማጫስያ ናኣ የላና ጋካናዉ፥ ጎዳይ እስራኤለ ሞርከታስ አꬅድ እማና። ሄሳፈ ጉየ፥ ድኤትድ ደእያ እያ እሻት ስሚድ፥ ባንታ አሳራ ዋላከታና።
MIC 5:4 እ ጎዳ ምኖተꬃን ይድ፥ ጎዳ ባ ፆሳ ሱንꬃ ዎልቃን ባ አሳ ሄማና። እ ሳኣ ጋፃ ጋካናዉ ግታ ግድያ ግሾ፥ ኤንቲ ሳሮተꬃን ዳና።
MIC 5:5 እ ኤንታዉ ሳሮተꬅ ግዳና። አሶረ ቢታ አሳት ኑ ቢታ ኦይክያ ዎደነ ኑ ሚፃታ የꬍድ ገልያ ዎደ ኑኒ ላፑን ናገይሳታነ ሆስፑን ካለይሳታ ኤንታ ቦላ ደንꬃና።
MIC 5:6 ኤንቲ ናምሩደይ ደእያ አሶረ ቢታ ኦላን ፆንድ ሃራና። አሶረ ቢታ አሳት ኑ ቢታ ኦልድ ኦይክያ ዎደነ ኑ ዛዋ የꬍያ ዎደ እ ኑና ኤንታ ኩሸፐ አሻና።
MIC 5:7 አትዳ ያይቆባ ዛረት ዳሮ ደርያ ግዶን ጎዳይ ኪትዳ ፃሳ መላነ ማታ ቦላ ዎꬍያ አካ መላ ግዳና። ኤንቲ አማነትድ ናገይ ጎዳፐ አትሽን፥ አሰ ግደና።
MIC 5:8 አትዳ ያይቆባ ዛረት ካዎተꬃታ ግዶንነ ዳሮ አሳ ግዶን፥ ባዞን ዶአታ ግዶን ጋሞ መላነ ዶርሳ ዉደ ግዶን ጉፕ ዎꬍያ ዎዳላ ጋሞ መላ ግዳና። እ ያራ አꬍያ ዎደ የረስነ መንረꬄስ፤ ኦንካ አሻናዉ ዳንዳኤና።
MIC 5:9 ህንተ ኩሸይ ህንተራ ኤቀተይሳታ ቦላ ደንዳና፤ ህንተ ሞርከት ኡባይ ꬋያና።
MIC 5:10 ጎዳይ፥ “ሄ ጋላስ ታኒ ህንተ ፓራታ ህንተ ግዶፈ ꬋይሳና፤ ህንተ ፓራ ጋረታ መንረꬃና።
MIC 5:11 ታኒ ህንተ ቢታን ደእያ ካታማታ ꬋይሳና፤ ህንተ ሚፃ ኡባ ላላና።
MIC 5:12 ህንተ ማሮታ ታኒ ꬋይሳና፤ ህዛፐ ጉየ ሙሩነይሳት ህንተ ግዶን ዶኮና።
MIC 5:13 ታኒ ህንተ ኤቃ ምስለታነ ህንተ ጎይናናዉ ኤስዳ ሹቻታ ህንተ ግዶፈ ꬋይሳና፤ ህዛፐ ጉየ ህንተ ህንተ ኩሸን መꬍዳባ ጎይነከታ።
MIC 5:14 ታኒ አሼራ ኤቃ ፆሳታ ህንተ ግዶፈ ሾዳና፤ ህንተ ካታማታ ꬋይሳና።
MIC 5:15 ታዉ ኪተትቦና ካዎተꬃታ ቦላ ይሎንነ ሀንቆን ሀሎ ከያና” ያጌስ።
MIC 6:1 ጎዳይ እስራኤለ አሳስ ኦደይሳ ስእተ። አቤት ጎዳዉ፥ ደንዳዳ ꬎቃ ደረታ ስንꬃን ፕርደታ፤ ኔኒ ኦድያባ ዙማት ስኦ።
MIC 6:2 ህንተ ደረት፥ ህንተ ምኖ ሳኣ ባሶት፥ ጎዳይ ሞትያ ሞቱዋ ስእተ። ጎዳይ ባ አሳራ ሞተቴስ፤ እስራኤለ አሳራ ፓላሜስ።
MIC 6:3 ጎዳይ፥ “ታ አሳዉ፥ ታኒ ህንተና አይ ቆሀድና? ታኒ ህንተዉ ዋናዳ ቶሆ ግዳድና? አነ ታዉ ኦድተ!
MIC 6:4 ታኒ ህንተና ግብፀ ቢታፈ ከሳስ፤ ታ ህንተና አይለተꬃ ቢታፈ ዎዛስ። ህንተና ካለꬃና መላ ሙሰ፥ አሮናነ ማይራሞ ህንተዉ እማስ።
MIC 6:5 ታ አሳዉ፥ ሞአበ ካዋ ባላቅ ነዉ ቆፕዳባነ ብኦራ ናአይ ባላም እያዉ ዎይግድ ዛርዳኮ አኬክተ። ኔኒ ሴፅማፐ ጋልጋላ ብያ ዎደ፥ ኦገን ሀንዳባ አነ ቆፕተ። ሄሳ ህንተ ቆፕኮ ታኒ ጎዳይ ህንተና አሻናዉ ኦꬅዳባ ኡባ ህንተ አኬካና” ያጌስ።
MIC 6:6 ጎዳ፥ ꬎቃ በሳን ደእያ ፆሳ ስንꬃን ጎይናናዉ ያሸ ታኒ አይ ኤካዳ ሺቆ? እያዉ ፁሳ ያርሾ ግዳና መላ እስ ላይꬃ ዎፋኖ ኤካዳ ዮ?
MIC 6:7 ጎዳይ ሙኩሉ ዶርሳ ማራዘታን ዎይኮ ታሙ ሙኩሉ ሻፋን ደእያ ሃꬃ መላ ሻማሆ ዛይተን ኡፋይታንዴ? ታ ናቁዋ ግሾ፥ ታ ባይራ ናኣ፥ ታ ሸምፑዋ ናጋራ ግሾ ታ የሉዋ እሞ?
MIC 6:8 አሳ ናኦ፥ ጎዳይ ነዉ ሎኦባ ኦድ ዎꬅስ። ጎዳይ ኔፐ ኮየይ አይቤ? ኔኒ ሱረ ፕርዳና መላ፥ ማሮታ ዶሳና መላነ አሽከተꬃን ነ ፆሳራ ዳና መላ ግደኔ?
MIC 6:9 ጎዳይ፥ “የሩሳላመ ካታማ ፄግድ፥ ‘እያ ሱንꬃስ ያሸተꬅ ጭንጫተꬅ’ ሴራ ፃምአነ እያ ጊግስዳይ ኦነኮ አኬክተ።
MIC 6:10 ናጋራንቾይ ገነን ባ ሶን ሺሽዳ ሻሉዋነ እፀትዳ ዎርዶ ማካ ሚሸታ ታኒ ዶጋነዬ?
MIC 6:11 ያትን፥ ታኒ ዎርዶ ምዛነን ዎርዶ ማካ ሚሸታ ዋታዳ አቶ ጎ?
MIC 6:12 ሄ ካታማ ዱረት ጌላተꬃን ኩምዳይሳታ። እያን ደእያ አሳ ኡባይ ዎርዳንቾ፤ ኤንታ እንፃርሳይ ኢታ።
MIC 6:13 ሄሳ ግሾ፥ ታኒ ህንተ ናጋራ ግሾ ህንተና ꬋይሳናዉ ደንዳስ።
MIC 6:14 ህንተ ማና፥ ሽን ካለከታ፤ ኮሽ ህንተፈ ዱፀና። ህንተ ቡርድ ሺሻና፥ ሽን ህንተዉ አደና፤ ህንተ ዳጋያባ ታኒ ማሻን ꬋይሳና።
MIC 6:15 ህንተ ካꬅ ዘራና፥ ሽን ጫከከታ፤ ሻማሆ ቴራ ጉምአና፥ ሽን ጎኤተከታ፤ ዎይነ ቴራ ጉምአና፥ ሽን እያ ኡየከታ።
MIC 6:16 ህንተ ካዋ ኦምራ ዎጋ፥ እያ ናኣ ካዋ አካባ ሶ ኢታ ኦሱዋነ ኤንታ ዞርያ ካልዳ ግሾ፥ ታኒ ህንተና ꬋይሳና፤ ህንተና አስ ኡባይ ቦራና መላ ኦꬃና። አሳይ ህንተና ጫይያ ጫሻ ህንተ ቶካና” ያጌስ።
MIC 7:1 ታና አየ! ታኒ ቴራ አይፈይ ማፀትድ ዉርን፥ ዎይንያፐነ ባላሰ ምꬃፈ ባ አሞትዳይሳ ደማናዉ ዳንዳእቦና ኮሻትዳ ኡራ መላ ግዳስ።
MIC 7:2 ፆሳ አስ ቢታን ባዋ፤ አሳ ጋርሳን ሱረ አስ ꬋይስ። አስ ኡባይ አሳ ሱꬅ ጉሳናዉ ሆክድ ናጌስ፤ ኡባይ ባ እሻ ግተን ኦይካናዉ ካሌስ።
MIC 7:3 ኤንታ ናምኡ ኩሸት ኢታባ ኦꬃናዉ ሎህዶሶና። ሀላቅነ ዳይን ዎꬋፈ ኦይቾሶና፤ ዎልቃራ ደእያ አሳት ባንታ ኮይዳባ ዎልቃን ፖልሶሶና። ኤንቲ ኡባይ እስፈ ፕርዳ ምርቅድ ꬋይሶሶና።
MIC 7:4 ኤንታ ጋርሳን ኬሀ ጌተተይስ አጉንꬃ መላ፤ ሱረ ጌተተይስ ክንቾተ መላ። ጎዳይ ናበታ ባጋራ ኦድዳይሳዳ እ ባ አሳ ሴራና ጋላሳይ ጋክስ፤ ኤንቲ ያርካና ዎደይ ሀእ ማትስ።
MIC 7:5 ነ ሾሩዋ አማኖፓ፤ ነ ላግያን አማነቶፋ። ኔራ ደእያ ነ ማቸፈ ነ ዶና ናጋ።
MIC 7:6 ሄ ዎደ ናአይ ባ አዋ ካꬌስ፤ ናእያ ባ አየ ቦላ፥ ናኣ ማችያ ባ አዝና አየ ቦላ ሞርከተꬃን ደንዳና። አሳስ እያ ሶ አሳይ ሞርከ ግዳና።
MIC 7:7 ሽን ታኒ ኡፋይሳን ጎዳ ፄላና፤ ታና አሽያ ፆሳ ናጋና፤ ታ ፆሳይ ታና ስአና።
MIC 7:8 ታ ሞርክያዉ፥ ታ መቱዋን ኡፋይቶፋ፤ ታኒ ኩንድኮካ ደንዳና፤ ታ ꬉማን ኡትኮካ ጎዳይ ታዉ ፖአና።
MIC 7:9 ታኒ ጎዳ ናቃስ፤ እ ታዉ ሞተትድ፥ ታባ ፕርዳና ጋካናዉ፥ ታኒ እያ ሀንቁዋ ዳንዳአና። እ ታና ፖኦን ከሳና፤ ታኒ እያ ፅሎ ፕርዳ በአና።
MIC 7:10 ሄ ዎደ ታ ሞርከይ ሄሳ በአና፤ ታኮ፥ “ጎዳይ ነ ፆሳይ አዉን ደኢ?” ያግድ ቀልቅስዳይ ዬላ ማአና። እ ኦገን ደእያ ኡርቃዳ የትን፥ ታኒ ታ አይፈን በአና።
MIC 7:11 ህንተኖ፥ እስራኤለ አሳዉ፥ ህንተ ካታማ ግምበ ድርሳት ድረትያ ጋላሳይ ያና፤ ሄ ጋላስ ህንተ ዛዋይ አካና።
MIC 7:12 ሄ ጋላስ ህንተ አሳይ ህንተኮ ስማና። ኤንቲ አሶረፐ፥ ግብፀፈ፥ ኤፍራፂሳ ሻፋ ሄራን ደእያ ቢታታፐ፥ ሃሆ በሳን ደእያ አባ ጋፃፐነ ꬎቃ ዙማታፐ ህንተኮ ስማና።
MIC 7:13 ሽን ቢታይ እያ ቦላ ደእያ አሳ ኢታተꬃ ጋሶን አስ ባይና ባይሳ ግዳና።
MIC 7:14 ኔኒ ባዞን ባርካ ደእያ፥ ነ ላታ ደርያ ነ አራዳ ቢታን ነ አሳ ሄማ። ኤንቲ ካሰ ዎድያዳ ባሳነንነ ጋላዳን ሄመታና መላ ኦꬃ።
MIC 7:15 ጎዳይ፥ “ህንተ ግብፀፐ ከይዳ ዎድያዳ ታኒ ህንተና ማላልስያባ በሳና” ያጌስ።
MIC 7:16 ኤንታ ዎልቃይ ግታ ግድኮካ፥ ካዎተꬃት ኡባይ ሄሳ በእድ ዬላታና። ኤንቲ ዬላትድ፥ ባንታ ዶና ኦይካና፤ ኤንታ ሀይꬃይ ቱላና።
MIC 7:17 ኤንቲ ሾሻዳነ ሳአራ ጎሸትያ መተꬃታዳ ቢታ ላጫና። ኤንቲ ባንታ ሚፃፐ ኮኮርሸ ከይድ ግታ ዳጋማን ጎዳኮ፥ ኑ ፆሳኮ፥ ስማና፤ ኤንቲ ጎዳ ያይድ ዳና።
MIC 7:18 ናጋራ ኡባ አቶ ያገይ፥ አትዳ ባ አሳ ናቁዋ ታይቦናይ ነ መላ ፆሲ ኦኔ? ማሮተꬅ ነና ኡፋይስያ ግሾ ነ ሀንቁዋን መርናዉ ጋምአ ኤራካ።
MIC 7:19 ኔኒ ዛራዳ ነ አሳስ ቃታሳ፤ ኑ ናቁዋ ነ ቶሁዋን የꬋሳ፤ ኑ ናጋራ አባ ጪሞን ሆላሳ።
MIC 7:20 ኔኒ በን ኑ ማይዛታስ ጫቅዳ ጫቁዋዳ አብራሃመነ ያይቆባ ዛረ ግድዳ ነ አሳስ ነ አማነተꬃነ ነ መርና ሲቁዋ በሳና።
NAH 1:1 ኤልቆሻ ካታማን ደእያ ናሆም ናናወባ ኦድዳ ቃላይነ በእዳ ቆንጨꬃይ ሀይሳ።
NAH 1:2 ጎዳይ ቃናተይሳነ ሀሎ ከይያ ፆሲ፤ ጎዳይ ሀሎ ከየይሳነ ሀንቆን ኩምዳይሳ። ጎዳይ ባራ ኤቀተይሳታ ሀሎ ከዬስ፤ ባ ሞርከታ ሴራናዉ ጊገት ኡትስ።
NAH 1:3 ጎዳይ ሀንቀታናዉ ኤለሰና፤ እያ ዎልቃይ ግታ፤ እ ቆህዳይሳ ሴሮና አገና። ጎዳስ ጎትያነ ሆቢያ ግዶራ ኦገይ ደኤስ፤ ሻራይ እያ ቶሆይ የꬍን ደንድያ ባና።
NAH 1:4 እ አባነ ሻፋ ሀንቅድ መልሴስ፤ ባሳነነ ቃርመሎስ ሹሎሶና። ልባኖሰ ጪሻይ ቆቆፈቴስ።
NAH 1:5 እያ ስንꬃን ደረት ቃፆሶና፤ ዙማት ትልኦሶና። እ ቆንጭያ ዎደ ቢት ቃፃና፤ ሳአን ደእያ ኡባይ ኮኮራና።
NAH 1:6 እያ ሀንቁዋ ስንꬃን ኤቃናይ ኦኔ? እያ ሀንቁዋ ሱሏ ዳንዳአናይ ኦኔ? እያ ሀንቆይ ታማዳ ቡክያ ዎደ ዛላት ዛእድ ጳልቀቶሶና።
NAH 1:7 ጎዳይ ሎኦ፤ መቶ ጋላስ ቆሰትድ አትያ በሰ፤ እ ባናን አማነተይሳታ ኤሬስ።
NAH 1:8 ሽን እ ባ ሞርከታ ድኦን ሙክድ ꬋይሳና፤ ባራ ኤቀተይሳታ ꬉማን ገልሳና።
NAH 1:9 ህንተ ጎዳ ቦላ ማቀተይ አይብሴ? እ ህንተና ኩምꬅ ꬋይሳና፤ መቶይ ዛር ደንደና።
NAH 1:10 ህንተ ማꬆትድ ጋንድጋረይሳት፥ ዎልራ ኦይከትዳ አጉንꬅነ ቡረይ ታማን ፁገትያ መላ ህንተ ታማን ፁገትድ ꬋያና።
NAH 1:11 ናናወ፥ ጎዳ ቦላ ኢታባ ማቀተይነ ኢታ ዞረ ዞረይ ነ ግዶፈ ከይስ።
NAH 1:12 ጎዳይ፥ “ናናወት ምኖነ ዳሮ ግድኮካ፥ ሾደትድ ꬋያና። ታኒ ካሰ ይሁዳ አሳ ኡንኤꬃስ፥ ሽን ህዛፐ ጉየ ኡንኤꬅከ።
NAH 1:13 ታኒ ሀእ አሶረታ ቃምባራ ህንተ ጋናፈ መንꬃና፤ ህንተ ቃሸትዳ ሳንꬃላታ ዱሰረꬃና” ያጌስ።
NAH 1:14 ናናወ፥ ጎዳይ ነ ቦላ ፕርድዳ ፕርዳይ ሀይሳ: “ህዛፐ ጉየ ነ ሱንꬃ ፄግስያ ኮቸ ነዉ ዴና። ነ ፆሳታ ኬꬃን ደእያ ምስለታነ ኤቃታ ታኒ ꬋይሳና። ኔኒ ፓꬆናባ ግድያ ግሾ፥ ታኒ ነ ዱፉዋ ቦካና” ያጌስ።
NAH 1:15 ሄኮ፥ ሎኦ ዎረ ኦድሸነ ሳሮተꬃ አዋጅሸ ኪተትድ የይሳ ቶሆይ ደርያ ቦላራ ጋክስ። ይሁዳ አሳዉ፥ ህንተ ሞርከት ኩምꬅ ꬋይዶሶና፤ ኤንቲ ዛሪድ ህንተ ቢታ ኦልድ ኦይኮኮና። ሄሳ ግሾ፥ ህንተ ባለታ ቦንችተ፤ ህንተ ቃንገꬃ ጋꬅተ።
NAH 2:1 ነኖ፥ ናናወ፥ መንረይስ ከይስ! ሄሳ ግሾ፥ ነ ሚፃ ናጋ፤ ነ ኦግያ ዎቻ፤ ነ ዳንጩዋ ምንꬃ፤ ነና ጊግሳ።
NAH 2:2 ቦንቀይሳት ቦንቅድ፥ ኤንታ ዎይንያ ꬋይስኮካ፥ ጎዳይ እስራኤለ ቦንቹዋ ዛርዳይሳዳ ያይቆባ ቦንቹዋ ዛራና።
NAH 2:3 ኦላንቾት ዞኦ ጎንዳለ ኦይክዶሶና፤ ዞኦ ማኦ ማእዶሶና። ኤንቲ ኦላስ ጊግያ ዎደ ፓራ ጋረት ቅንኣሮሶና፤ ኤንቲ ባንታ ቶራ ሉፆሶና።
NAH 2:4 ፓራ ጋረት ኦግያን አዳርሶሶና፤ ኤንቲ ያነ ሃነ ሄመትሸ ካታማ ኦግያን ዩዮሶና። ቃስ ኤንቲ ላጮይ ሎጩ ግያ ፆምፐ ዳኖሶና፤ ዎልአንꬃዳ ኤለሶሶና።
NAH 2:5 ናናወይ ባ ሀላቃታ ፄግድ ሺሻና፥ ሽን ኤንቲ ይሸ ኦገ ቦላ ꬉበታና። ኤንቲ ካታማ ግምበ ድርሳኮ ኤለሳና፥ ሞርከታ ቆሁዋፐ ኤንታ ናግያ ጎንዳለይ ጊግስ።
NAH 2:6 ሻፋ ባጋራ ደእያ ካታማ ድርሳ ፐንገት ዶየትዶሶና፤ ካዎ ጋꬎይ ዳጋምስ።
NAH 2:7 ካውያ ድኤታዳ ባሱ፤ እ ማጫ አይለት አዛንድ ሆለዳ ጉጉማና፤ ባንታ ትራ ባቅሸ ዬካና።
NAH 2:8 ተቀትዳ ሃꬅ ዶይ በስን ጎገይሳዳ ናናወ አሳይ ካታማፐ ባቃታና። አስ ኤንታ ባ ቃላ ꬎቁ ኦꬅድ፥ “ኤቅተ! ኤቅተ!” ያግድ ፄጋና፥ ሽን ኦንካ ጉየ ፄለና።
NAH 2:9 ሄ ካታማ ሻሉዋስነ፥ እያን ምንጀትዳ ቦንቾ ሚሽያስ ታይቦይ ባዋ። ሄሳ ግሾ፥ ሄ ብራነ ዎርቃ ቦንቅተ!
NAH 2:10 ናናወይ ባይሳ ግድስ፤ ካይሳትድ፥ ባዞ ግድስ! አሳ ዎዛናይ ያሻን ትልእስ፤ ጋደይ ኮኮርስ፤ ፄሳይ ፃፀትስ፤ ሶምኦይ ቡላትስ!
NAH 2:11 ጋሞት አቅያ በሳይ፥ ዎዳላ ጋሞት ደእያ በሳይ፥ አደይነ ማጫ ጋሞት ባንታ ማራታራ ያሽ ባይና ጉፕያ በሲ ዳንያ ናናወ ካታማይ ሀእ አዉን ደኢ?
NAH 2:12 ጋሞይ ባ ማራታስ ግድያባ ኦይክስ፤ ባራ ደእያ ማጫ ጋመስ መንረꬅድ እሚስ። ባ ጎንጎሉዋ ዎꬃን፥ ባ ኦላ አሾን ኩንꬅስ።
NAH 2:13 ኡባፈ ዎልቃማ ጎዳይ፥ “ሄኮ፥ ታኒ ነ ቦላ ደንዳስ! ታኒ ነ ፓራ ጋረታ ታማን ፁጋና፤ ነ ዎዳላ ጋሞታ ማሽ ማና። ኔኒ ሀራታፐ ኤክዳባ ታኒ ኔፐ ዎስሳና፤ ነ ኪታንቾታ ቃላይ ህዛፐ ስኤተና” ያጌስ።
NAH 3:1 ዳሮ አሳ ሱꬅ ጉስዳ ናናወ ካታማ አየ! ዎርዶይ ኩምስ፤ ቦንቅ ኤክዳ ሻሉዋስ ታይቦይ ባዋ።
NAH 3:2 ናናወ ካታመን ልሶ ግርሳይ፥ ገርቶ ጎንዶርሳይ፥ ፓራታ አዳርሶይነ ፓራ ጋረታ ጉፋይ ስኤቴስ።
NAH 3:3 ፓራ አሳት ፒርፆሶና፤ ማሻይ ሎጬስ፤ ቶራይ ጶሌስ። ዳሮ አስ ሀይቅስ! አህ አሀ ቦላ ዶረትስ፤ ሀይቅዳባስ ታይቦይ ባዋ! ያራ ካንꬅድ ብያ አስ አሀን ꬉበቴስ።
NAH 3:4 ሄስ ኡባይ ሀንዳይ ማር ባይና ናናወ ላይማተꬃ ጋሱዋና። እ ዳሮ ሙሩኖ ኦꬃሱ፤ ካዎተꬃታ ባ ላይማተꬃን፥ አሳ ባ ሙሩኑዋን አይለያሱ።
NAH 3:5 ኡባፈ ዎልቃማ ጎዳይ፥ “ሄኮ፥ ታኒ ነ ቦላ ደንዳስ! ታኒ ነ ማኡዋ ኔፐ ቃራና፤ ነ ካሉዋ አሳ፥ ነ ፖኩዋ ካዎተꬃታ በሳና።
NAH 3:6 ታኒ ነና ፕቶ የግያ በሲ ከሳና፤ ነና ካꬋና፤ አስ ኡባይ ነና ሚጫናዳ ኦꬃና።
NAH 3:7 ነና በእያ ኡባይ ኔፐ ሃክድ፥ ‘ሄኮ፥ ናናወ ካታማይ ባይሳትስ፤ እያዉ አዛናናይ ኦኔ? እያ ምንꬅያ አስ አዉፐ በንታንደሻ?’ ያጋና” ያጌስ።
NAH 3:8 ነኖ፥ ናናወ፥ ኔኒ ግብፀን ደእያ ተብሶ ካታማፐ አꬋይ? እያ ናይለ ሻፋ ማታን ደአዉሱ፤ ሃꬅ እ ዩሹዋ ተቅስ፤ ሻፋይ እዉ ሚፃ ግድስ፤ ቃስ ሃꬃይካ እዉ ድርስ።
NAH 3:9 ቶጰይነ ግብፀይ እዉ ዛው ባይና ዎልቃ፤ ፑፅነ ሊበይ እዮ ማደይሳታ።
NAH 3:10 ግዶሽን፥ እያ ድኤታሱ፤ እ ጉꬃ ናይት ደሸትድ፥ ኦገ ጋፃ ኡባን ኩንድዶሶና። እ ቦንቸትዳ አሳታ ቦላ ሳም የገትስ፤ እ ግታ አሳት ኡባይ ሳንꬃላታን ቃሸትዶሶና።
NAH 3:11 ነኖ፥ ናናወ፥ ኔኒ ማꬆትድ ጋንድጋርያ አሳዳ ሀናና። ነ ሞርከታ ስንꬃፈ ባቃታዳ አትያ በሲ ኮያና።
NAH 3:12 ነ ሚፃት ኡባይ ኮይሮ ቴርዳ አይፈይ ደእያ ባላሰ ምꬃ መላ። ባላሰ ምꬃ ቃꬅያ ዎደ ቴራይ መይሳ ዶናን ዎꬌስ።
NAH 3:13 ሄኮ፥ ነ ኦላንቾት ኡባይ ማጫሳ መላ። ነ ዛዋ ፐንገት ነ ሞርከታስ ዳልግድ ዶየትዶሶና፤ ኮበ ምꬃ ታም ምስ።
NAH 3:14 ነ ሞርከት ነ ዩሹዋ ኡንኤꬅያ ዎደ ኡያና ሃꬃ ሀእ ትካ። ነ ሚፃ ምንꬃ፤ ኡርቃ የꬋዳ ፁበ መꬋ፤ ኦቶ ጊግሳ።
NAH 3:15 ነና ያን ታም ማና፤ ቦለይ ካꬅ መይሳዳ ነና ማሽ ማና። ኔኒ ቦለዳ ዳራ ጎንዶዳ የለታ።
NAH 3:16 ኔኒ ነ ዛልአንቾታ ሳሎ ፆልንቶታፐ አꬃዳ ዳርሳዳሳ። ሽን ኤንቲ ቦለዳ ኡባ ም ድግድ ፓልድ ꬋያና።
NAH 3:17 ነ ቶራ ሞጮናትነ ነ ሞርናት ሜጎ ዎደ ድርሳ ቦላ ኡትዳ ቦለ መላ። ኤንቲ አው ከይያ ዎደ ፓልድ ꬋዮሶና፤ ኤንቲ ደእያ በሳ ኤረይ ባዋ።
NAH 3:18 ነኖ አሶረ ካዋዉ፥ ነ ሀላቃት ꬍስክዶሶና፤ ነ ቦንቸትዳ አሳት ኩንድዶሶና። ነ አሳይ ደረታ ቦላ ላለትስ፤ ኤንታ ሺሽያ አስካ ባዋ።
NAH 3:19 ኔኒ ዛው ባይና ኢታተꬃፈ ከስ ኤክዳ አስ ባይና ግሾ፥ ነ መኦይ ኮለተና፤ ነ ማዱንꬃይ ፓፀና። ነባ ስእዳ ኡባይ ነ ቦላ ኩሸ ባቃና።
HAB 1:1 ናብያ እንባቆመስ ጎዳይ ቆንጭስዳ ቃላይ ሀይሳ።
HAB 1:2 እንባቆመይ፥ “አቤት ጎዳዉ፥ ታና ማዳና መላ ታኒ ነና ፄግያ ዎደ አዉደ ጋካናዉ ስኦና እፃይ? ታኒ ኡንኤታዳ ኔኮ ዋስያ ዎደ አዉደ ጋካናዉ አሾና እፃይ?
HAB 1:3 ኔኒ ሀ ኢታተꬃ ኡባ ታና አይስ በሳይ? ኔኒ ባላ በአሸ አይስ ስእ ጋይ? ꬋዮይነ ጌላተꬅ ታ ስንꬃና፤ ፓላምነ ኦሽ ቢታ ኡባን ዳርስ።
HAB 1:4 ሄሳ ግሾ፥ ህገይ ዶልእስ፤ ሱረ ፕርድ ካንና። ናጋራንቾት ፅሎ አሳታ ተቅድ ኦይክዳ ግሾ፥ ፕርድ ጌላትስ” ያግስ።
HAB 1:5 ጎዳይ ዛሪድ፥ “ህንተ ዩሹዋን ደእያ ካዎተꬃታ ፄልድ ማላለትተ። ህንተዉ አስ ኦድን ህንተ አማኖና ኦሱዋ ታኒ ህንተ ዎድያን ኦꬃና።
HAB 1:6 ታኒ ቃይ ባይናይሳታነ ድርግያ ባብሎነ አሳ ደንꬃና። ኤንቲ ባንታባ ግዶና ቢታ ኦልድ ኦይካናዉ ቢታ ኡባን ዩዮሶና።
HAB 1:7 ኤንቲ ያሽሶሶናነ ዳጋንꬆሶና፤ ባንታና ቦንችስያ ህገ ከሶሶና።
HAB 1:8 ኤንታ ፓራት ማሄፐ አꬍድ ኤለሶሶና፤ ኮሻትዳ ኦማርሳ ሱꬉመፐ አꬍድ ዎዛና ምኖ። ኤንታ ፓራ አሳት ሃሆፐ ዮሶና፤ ኤንቲ አርጋንꬅ እስባ ኦይካናዉ ዎꬍያዳ ፓሎሶና።
HAB 1:9 ኤንታ ኦላንቾት ኡባይ ኢታ ኦሶ ኦꬃናዉ ባዞ ጫርኮዳ ጫርክሸ ዮሶና። አሳ ድእድ ሻፈዳ ሺሾሶና።
HAB 1:10 ኤንቲ ካዎታ ቦላ ቀልቅሶሶና፤ ሃረይሳታ ኤንቲ ቶቾሶና። ኤንቲ ሹቻ ድርሳን ድረትዳ ካታማታ ኡባ ቦላ ሚጮሶና። ሄ ድርሳታ ድአናዉ ኤንታ ዩሹዋን ቢታ ሺሾሶና።
HAB 1:11 ሄሳፈ ጉየ፥ ኤንቲ ኡባ ጫርኮ መላ ፕትድ ኤፋና። ሄ ጌላታስ ኤንታ ዎልቃይ ኤንታ ፆሳ” ያግስ።
HAB 1:12 አቤት ጎዳዉ፥ ታ ፆሳዉ፥ ታ ጌሻዉ፥ ኔኒ መርና ፆሳ ግድኪ? ኔኒ ኑ ዛላ ግድያ ግሾ ኑኒ ሀይቆኮ። አቤት ጎዳዉ፥ ባብሎነ አሳይ ኑና ፕርዳና መላ ኤንታ ደንꬃዳ ዎልቃ ኤንታዉ እማዳሳ።
HAB 1:13 ነ አይፈት ዳሮ ጌሽ ግድያ ግሾ፥ ኢታባ ፄላናዉ ዶሶኮና፤ ኔኒ ኢታባይ ኦሰትያ ዎደ በአሸ ስእ ጋካ። ያትን፥ ሀ ኢታታ አይስ ስእ ጋዳ ፄላይ? ናጋራንቾት ባንታፈ አꬍድ ፅልያ አሳታ ምትያ ዎደ አይስ ስእ ጋይ?
HAB 1:14 ኔኒ አሰ አባ ሞሎዳነ ካለይ ባይና ኡሎራ ጎሸትያ መተꬃታ መꬋዳሳ።
HAB 1:15 ባብሎነ አሳይ አሳ ኡባ ቃጰን ቆርድ ከሳና፤ ኤንታ ባንታ ግትያን ኦይካና፤ ኤንታ ባንታ ዳቹዋን ቡርድ ሺሻና፤ ሄሳ ኦꬅድ ኤንቲ ኡፋይታናነ ሀሹ ጋና።
HAB 1:16 ሄሳ ግሾ፥ ኤንቲ ባንታ ግትያስ ያርሻና፤ ባንታ ዳቹዋስ እፃነ ጩይሳና። ኤንቲ ሻሎ ደመይነ እንጀትን ደኤይ ሄ ግተታና።
HAB 1:17 ያትን፥ ኤንቲ ባንታ ግትያ ቃይ ባይና የግሸነ ምሽ ካዎተꬃታ ꬋይስሸ ዋንድ ዳኔ?
HAB 2:1 ታኒ ዎችያ ግምብያ ቦላ ኤቃዳ ናጋና። ሄ በሳን ኤቃዳ ጎዳይ ታዉ ኦድያባነ ታ ሞቱዋስ እምያ ዛሩዋ ስአናዉ ናጋሻና።
HAB 2:2 ጎዳይ ዛሪድ፥ “ዎፅያ አደይ ናባባና መላ ሎቸ ሹቻ ቦላ ታኒ ነዉ ቆንጭስያ ቃላ ኦርድሳዳ ፃፋ።
HAB 2:3 ቆንጨꬃይ ባ ዎድያ ናጌስ፤ ቆንጨꬃይ ፖለትያ ዎደይ ኤለ ጋካና፤ ዎርዶ ግደና። ጋምእኮካ ናጋ፤ እ ቱማ ሀናና፤ ጋምኤና።”
HAB 2:4 ሄኮ፥ እያ ዎዛናይ ኦቶርትስ፤ እያ ቆፋይ ሱረ ግደና፤ ሽን ፅሎይ ባ አማኑዋን ደኦን ዳና።
HAB 2:5 ዱረተꬅ አሰ ጭሜስ፤ ጬቀትያ ኡራስ ሸምፖይ ባዋ። እ ዱፎዳ ያራምባ ግድያ ግሾነ ሀይቆዳ ካል ኤሮና ግሾ፥ ካዎተꬃታ ኡባ ባዉ ሺሼስ፤ አሳ ኡባ ባዉ ድኤስ።
HAB 2:6 ድኤትዳ አሳይ ስሚድ ኤንታ ቦርሸነ ቀልቅስሸ ሀይሳዳ ያጋና፦ “ባባ ግዶና ሚሸ ሺሽድ ዶረይሳነ ቦንቅድ ዱረትዳይሳታ አየ! ሀይስ ሀይሳዳ ሀንድ፥ አዉደ ጋካናዉ ዳኔ?” ያጋና።
HAB 2:7 ኔኒ ኤንታፈ ቦንቅዳ አሳት ነ አኬኮና ነ ቦላ ደንድድ ነና ኮኮርሳና። ሄሳፈ ጉየ፥ ኤንቲ ነ ሻሉዋ ኡባ ቦንቃና።
HAB 2:8 ኔኒ ዳሮ አሳ ሻሉዋ ቦንቅዳ ግሾ፥ ኤንታፈ አትዳይሳት ነ ሻሉዋ ቦንቃና። ነ ዳሮ አሳ ሱꬃ ጉሳዳሳ፤ ሳኣ ቦላ፥ ካታማታ ቦላነ ያን ደእያ አሳ ኡባ ቦላ ኢታ ኦሶ ኦꬃዳሳ።
HAB 2:9 መቶይ ነና ጋኮና መላ ነ ኬꬃ ꬎቃ በሳን ኬፃናዉ ጌላተꬃን ሚሸ ሺሽዳይሶ ነና አየ!
HAB 2:10 ዳሮ አሳ ገናዳ ꬋይስዳ ግሾ፥ ነ ሶ አሳ ካዉሻዳሳ፤ ኔኒ ነ ቦላ ꬋዮ ኤሀዳሳ።
HAB 2:11 ሀር አቶሽን ነ ኬꬃ ግምበ ሹቻይ ነ ቦላ ዋሳና፤ ኬꬃ ቱቀት ዋሱዋ ኮሹማና።
HAB 2:12 ካታማ ኢታተꬃን ባስድ አሳ ሱꬃን ኬፀይሳቶ ህንተና አየ!
HAB 2:13 አሳይ ኦꬅያባ ኡባይ ታማ ካሆ ግዳና መላ፥ ካዎተꬃት ዳቡርዳ ኡባይ ሀዳ ግዳና መላ ኦꬅዳይ ኡባፈ ዎልቃማ ጎዳ ግደኔ?
HAB 2:14 አብ ሃꬃን ኩመይሳዳ ሳእ ጎዳ ቦንቹዋ ኤራተꬃን ኩማና።
HAB 2:15 “ባ ሾሮይ ካሎትን በአና ግድ፥ ማꬆይያ ኡሽ ኡሽያ ኡራ አየ!
HAB 2:16 ኔኒ ቦንቾ አጋዳ ካዉሸ ማአና። ሀእ ማꬆይ ነ ታራ፤ ነ ኡያዳ ካሎታ። ጎዳ ኡሻቻ ኩሽያን ደእያ ፁአይ ነዉ እመታና፤ ነ ቦንቾይ ዬላን ላመታና።
HAB 2:17 ነ ልባኖሰ ꬋይስዳይሳዳ ነካ ꬋያና። ነ ዶአታ ዉርሳዳሳ፥ ሀእ ኤንቲ ነና ያሽሳና። ነ ዳሮ አሳ ሱꬃ ጉሳዳሳ፤ ሳአ ቦላ፥ ካታማታ ቦላነ እያን ደእያ አሳ ቦላ ኢታ ኦሶ ኦꬃዳሳ።
HAB 2:18 “እ ባዉ ኤቅ አይ ማዲ? እያ አሳ ኩሸን ጊግስ ግደኔ? ዎርዶፈ አትሽን፥ እያን ሀራባይ በንተና። ያትን፥ እያ መꬍዳ ኡራይ ሀ አይኮካ ኦደቶና ኤቃን አማነተይስ እያ አይ ማዳኔ?
HAB 2:19 ምꬃፈ ጊግዳይሳ ‘ባርካ’ ገይሶ፥ ቃስ ሸምፖይ ባይና ሹቻ ‘ደንዳ’ ገይሶ ነና አየ! እ ዎና ነዉ አይ ቆንጭሳናዉ ዳንዳኢ? ሄኮ፥ ዎርቃንነ ብራን ሜሸትስ፤ እያዉ ሸምፖይ ባዋ።
HAB 2:20 “ሽን ጎዳይ ባ ጌሻ ኬꬃና። ሄሳ ግሾ፥ ሳአን ደእያ አሳ ኡባይ እያ ስንꬃን ስእ ጎ” ያግስ።
HAB 3:1 ማዝሙረን ሽቅዳ ናብያ እንባቆመ ዎሳይ ሀይሳ፦
HAB 3:2 አቤት ጎዳዉ፥ ኔኒ ካሰ ኦꬅዳባ ታኒ ስአዳ ያያስ። ጎዳዉ፥ ኑ ዎድያንካ ሄ ኦሶታ ዛራዳ ኦꬃ፤ ኤንቲ ኑ ዎድያንካ ኤረቶ። ነ ሀንቀትያ ዎደ ነ ማሮታ ቆፓ።
HAB 3:3 ፆሳይ ተማና ቢታፈ ዬስ፤ ጌሻይ ፓራና ደርያፐ ዎꬌስ። እያ ቦንቾይ ሳሉዋ ካምስ፤ እያ ጋላታይ ሳኣ ኩምስ።
HAB 3:4 እያ ፖኦይ ጶልያ አዋ መላ፤ እያ ዎልቃይ ቆሰትድ ኡትዳ እያ ኩሽያፐ ፆልቅያ ፖኦይ ከዬስ።
HAB 3:5 ጋዶይ እያ ስንꬃን ቤስ፤ ታማ ላጮይ እያ ቶሁዋፐ ከዬስ።
HAB 3:6 እ ኤቅን ቢታይ ቃፅስ፤ እ ፄልን ካዎተꬃት ኮኮርዶሶና። መርና ደረት ዎድዶሶና፤ እ ኤንታ ቦላ ሄመትያ በንፐ ደእያ ዙማት ላለትዶሶና።
HAB 3:7 ታኒ ቶጰ አሳ ዱንካነይ መቶትሽን በአስ፤ ምድያመ ቢታ አሳይ ኮኮርሽን በአስ።
HAB 3:8 አቤት ጎዳዉ፥ ኔኒ አይስ ሀንቀታዲ? ሻፋት ነና ሀንቀꬅዶና? ዎይኮ ነ ሀንቆይ አባ ቦሌ? አካይ፥ ኔኒ ነ ፓራታነ ነ ፓራ ጋረታ ቶግዳይ ነ አሳስ ፆኖ እማናሳ ግደኔ?
HAB 3:9 ኔኒ ነ ዶንግያ ዋፃዳሳ፤ ዱካናዉ ጊግሳዳሳ፤ ቢታ ጳልቃዳ ሃ ከሳዳሳ። ሳላሀ
HAB 3:10 ደረት ነና በእድ ያሻን ኮኮርዶሶና፤ ክፃ ሃꬃይ አꬍስ። ጪሞ ሃꬃት ዋስዶሶና፤ ባንታ ዙልያ ꬎቁ ꬎቁ ኦꬆሶና።
HAB 3:11 ነ ዶንግያ ዱካን፥ ነ ቶራ ጶለꬃን፥ አውነ አጌን ባንታ ደእያ በሳን ኤቅዶሶና።
HAB 3:12 ኔኒ ሀንቁዋን ቢታ ኡባ ዩያዳሳ፤ ካዎተꬃታ ነ ሀንቁዋን የꬋዳሳ።
HAB 3:13 ነ አሳነ ነ ትይዳይሳ አሻናዉ ከያዳሳ፤ ኢታታ ሀላቃ ሾጫዳሳ፤ እያ ማኡዋ ቃራዳ ካሎ አሻዳሳ። ሳላሀ
HAB 3:14 ኑና ላላናዉ ጎተዳ ይዳ ኑ ሞርክያ፥ መቶታንቾታ ምታናዉ ጌማን ቆሰትዳይሳ፥ እያ ቶራን እያ ጫዳዳሳ።
HAB 3:15 ኔኒ ነ ፓራታራ አባ ቦላ ሄመታዳሳ፤ ዳሮ ሃꬃ የꬋዳሳ።
HAB 3:16 ታኒ ሄሳ ኡባ ስእን ታ ዎዛናይ ዳጋምስ፤ ታ መተርሻይ ኮኮርስ። ታ መቀꬃይ ዳጋምስ፤ ታ ቶሆይ ጉንድስ። ኑ ሞርከታ ጎዳይ ሴራና ጋካናዉ፥ ታኒ መቱዋ ጋላሳ ዳንዳአን ናጋና።
HAB 3:17 ባላሰ ምꬃይ አይፎና እፅኮካ፥ ዎይንያ ቦላ አይፈይ በንቶና እፅኮካ፥ ሻማሆይ አይፎና እፅኮካ፥ ጎሻን ካꬅ ካፅናኮካ፥ ግርበን ዶርስ ꬋይኮካ፥ ዛዳሎን መሄይ ꬋይኮካ፥
HAB 3:18 ታኒ ጎዳን ኡፋይታና፤ ታና አሽያ ፆሳን ኡፋይሳን ኩማና።
HAB 3:19 ታ ዎልቃይ ኡባ ሃርያ ጎዳ፤ እ ታ ቶሁዋ ጋራ ቶሆዳ ምንꬄስ፤ እ ታና ꬎቃ በሳን ሄመꬄስ።
ZEP 1:1 አሞነ ናአይ እዮስያስ ይሁዳን ካዎትዳ ዎደ ሶፎንያሳኮ ይዳ ጎዳ ቃላይ ሀይሳ። ሶፎንያስ ኩሻ ናኣ፤ ኩሽ ጋዳላ ናአ፤ ጋዳል አማረ ናአ፤ አማረይ ህዝቅያሳ ናኣ።
ZEP 1:2 “ታኒ ቢታ ቦላ ደእያባ ኡባ ꬋይሳና።
ZEP 1:3 አሰነ መሄ፥ ሳሎ ካፎታነ አባ ሞሎታ ꬋይሳና። ኢታ አሳታ ሽራ የጋና፤ አሳ ዛረ ቢታ ቦላፈ ꬋይሳና” ያጌስ ጎዳይ።
ZEP 1:4 “ይሁዳንነ የሩሳላመን ደእያ ኡባ ሴራናዉ ታ ኩሽያ ደንꬃና። ባኣለ ኤቃ ጎይነይሳታነ እያ ሀጋዝያ ካህነታ ሄ በሳፈ ꬋይሳና።
ZEP 1:5 ኬꬃ ቦላ ከይድ አዋስ፥ አጌናስነ ፆልንቶታስ ጎይነይሳታ ታኒ ꬋይሳና። ጎዳ ጎይንሸነ እያ ሱንꬃን ጫቅሸ ሞሎካ ጌተትያ ኤቃ ሱንꬃን ጫቀይሳታ ታኒ ꬋይሳና።
ZEP 1:6 ታና ካሎ አግድ ጉየ ስምዳይሳታ፥ ታና ኮይቦናይሳታነ ታና ኦይችቦናይሳታ ታኒ ꬋይሳና” ያጌስ ጎዳይ።
ZEP 1:7 ጎዳ ጋላሳይ ማትዳ ግሾ፥ ኡባ ሃርያ ጎዳ ስንꬃን ስእ ጊተ! ጎዳይ ያርሹዋ ጊግስስ፤ ቃስ ባ ፄግዳ እማꬃታ ጌሽስ።
ZEP 1:8 “ጎዳ ያርሹዋ ጋላስ ሀላቃታ፥ ካዋ ናይታነ አላጋ ቢታ ማኦ ማእዳ ኡባ ታኒ ሴራና።
ZEP 1:9 ሄ ጋላስ አላጋ ቢታ አሳታዳ፥ ኤቃ ጎይነይሳታነ ባንታ ጎዳ ኬꬃ ጌላተꬃንነ ጭሞን ኩንይሳታ ታኒ ሴራና” ያጌስ ጎዳይ።
ZEP 1:10 “ሄ ጋላስ ሞሎ ፐንግያ ባጋራ ዋሶይ፥ ካታማስ ናምአንꬆ ሻሁዋን ዬሆነ ዙማታ ቦላ ግታ ዶምኤ ግርስ ስኤታና።
ZEP 1:11 ህንተኖ፥ ካታማስ ጋርሳ ባጋን ደኤይሳቶ፥ ዬክተ። ያን ዛልእያ ኡባይ ꬋይዶሶና፤ ብራ ኦይክዳይሳት ሀይቅ ዉርዶሶና።
ZEP 1:12 ሄ ጋላስ ታኒ ፆምፐ ኦይꬃዳ የሩሳላመ ግዱዋ ኮያና። ህርግ ባይና ዎꬍ ኡትድ ባንታ ዎዛናን፥ ‘ጎዳይ ሎኦካ ኢታካ’ ገይሳታ ታኒ ሴራና።
ZEP 1:13 ኤንታ ሻሎይ ቦንቀታና፤ ኤንታ ኬꬃይ ላለታና። ኤንቲ ኬ ኬፃና፥ ሽን ሄ ኬꬃን ዶኮና፤ ዎይነ ቶካና፥ ሽን ሄ ዎይንያ ኡዮኮና” ያጌስ ጎዳይ።
ZEP 1:14 “ጎዳ ግታ ጋላሳይ ማትስ፤ ኤለስድ ጋክስ። ጎዳ ጋላሳይ ጫሞ ጋላስ፤ ሄ ጋላስ ምኖ ኦላንቾትካ ዋሶ ጎቻና።
ZEP 1:15 ሄ ጋላሳይ ሀንቆ ጋላስ፥ ሄ ጋላሳይ መቶነ ኡንአ ጋላስ፥ ꬋዮነ ላለተꬃ ጋላስ፥ ꬉማነ ጫጋና ጋላስ፥ ሻራነ ሳካና ꬉማ ጋላስ ግዳና።
ZEP 1:16 ሄ ጋላሳይ ድረትዳ ካታማታ ቦላ፥ አዱሳ ግምበታ ቦላ ኦላ ሞይዘይ ፑነታና፤ ጊገታ ግያ ዋሶይ ስኤታና።
ZEP 1:17 ኤንቲ ታና ቆህዳ ግሾ፥ ቆቀዳ ታታፋና ጋካናዉ፥ ኤንታ ቦላ መቶ ኤሀና። ኤንታ ሱꬃይ ድኦዳ ጎጋና፤ ኤንታ አሀይ ፕቶዳ የገታና።
ZEP 1:18 ጎዳ ሀንቆ ጋላስ ኤንታ ብራይነ ኤንታ ዎርቃይ ኤንታ አሸና። እ ሳአን ደእያ ኡባ ቆፖና ꬋይሳና፤ ቢታ ኡባይ እያ ሀንቁዋ ታማን ሜተታና” ያጌስ ጎዳይ።
ZEP 2:1 ህንተኖ፥ ዬል ባይና አሳዉ፥ አነ እስፈ ሺቅተ!
ZEP 2:2 ጫርኮይ ፑንድ ኤፍያ ባናዳ ሀኖና ደእሽን፥ ያሽያ ጎዳ ሀንቆይ ህንተ ቦላ ዎꬎና ደእሽን፥ ጎዳ ሀንቆ ሱላ ጋላሳይ ህንተ ቦላ ዮና ደእሽን ጎዳኮ ስምተ።
ZEP 2:3 ህንተኖ፥ ቢታን ደእያ አሽከቶ፥ እያ ኪታ ናግያ ኡባቶ፥ ጎዳ ኮይተ፤ ፅሎተꬃ ኮይተ፤ አሽከተꬅ ኮይተ። ኦን ኤር ጎዳ ሀንቆ ጋላስ ህንተ አቶና አገከታ።
ZEP 2:4 ጋዛ ካታማይ ኦና ግዳና፤ አስቃሎና ካታማይ ባይሳ ግዳና። አሽዶዳ ካታማ አሳይ ሴታ ጋላስ ጎደታና፤ ኤቅሮና ካታማይ ሾደታና።
ZEP 2:5 ህንተኖ፥ አባ ጋፃን ደእያ ከልታወቶ፥ ህንተና አየ! ነኖ፥ ፍልስፄመት ደእያ ካናነ ቢታዉ፥ ጎዳ ፕርዳይ ነ ቦላ ዬስ። ታኒ ነና ꬋይሳና፤ እስ አስካ አተና።
ZEP 2:6 አባ ጋፃን ደእያ ህንተ ቢታይ መሄ ሄመትያ በሲ፥ ሄንꬃንቾት ደእያ በስነ መሄ ዳራ ግዳና።
ZEP 2:7 ይሁዳ አሳፐ አትዳይሳት አባ ጋፃን ደእያ በሳ ላታና፤ ኤንቲ ያን ሄማና። ሳአይ ቃምያ ዎደ ኤንቲ አስቃሎና ካታማን ደእያ ኬꬃታን አቃና። ጎዳይ ኤንታ ፆሳይ ኤንታባ ቆፓና፤ እ ኤንታ ዛሪድ ናንሳና።
ZEP 2:8 ኡባፈ ዎልቃማ ጎዳይ፥ እስራኤለ ፆሳይ፥ “ታኒ ሞአበ ቶሽያነ አሞነ ጫሻ ስአስ። ኤንቲ ታ አሳ ዋትድ ቶችዳኮነ ኤንታ ቢታ ኤካናዉ ዋትድ ማንድዳኮ ታ ኤራይስ።
ZEP 2:9 ሄሳ ግሾ፥ ታ ደኦ ሱንꬃን ጫቃይስ፤ ሞአበይ ሶዶመዳ ሀናና፤ አሞነይ ጋሞራዳ ሀናና። ኤንቲ መርናዉ ማፅነ ኦላነ አጉንꬅ ማእዳ ባዞ ግዳና። ታ አሳፐ አትዳይሳት ኤንታ ሻሉዋ ቦንቃና፤ ኤንታ ቢታ ላታና” ያጌስ።
ZEP 2:10 ኤንቲ ኡባፈ ዎልቃማ ጎዳ አሳ ቶችዳ ግሾነ ጫይዳ ግሾ፥ ኤንታ ቦላ መቶይ ጋካና።
ZEP 2:11 ኤንታ ቢታን ደእያ ፆሳታ እ ꬋይስያ ዎደ ጎዳይ ኤንታና ያሽሳና። ሳአን ደእያ ካዎተꬃታን ደእያ አሳ ኡባይ ባ ደእያ በሳን እያ ጎይናና።
ZEP 2:12 ህንተኖ፥ ቶጰ አሳዉ፥ ህንተ ታ ማሻን ሀይቃና።
ZEP 2:13 እ ባ ኩሽያ ፑደሀ ባጋ የድድ አሶረ ቢታ ꬋይሳና። ቃስ ናናወ ካታማ መላ ባዞዳ ባይሳ በሲ ኦꬃና።
ZEP 2:14 መሄ ዉደይነ ቢታን ደእያ ዶአት ኡባይ ያን ሄመታና፤ ጉቶይነ ቁፃረይ ላለትዳ ግምብያ ግዶን ዳና። ኤንታ ቃላይ ማስኮተራነ ፐንግያራ ስኤታና፤ ዝጋ ቱቀት ካሎታና።
ZEP 2:15 “ታፐ አትሽን፥ ሀር ባዋ” ያግድ ኦቶርትድ ደእዳ ካታማይ ሀእ ዋንድ ዶአት አቅያ በሲ ግድዴ? እያ ማታራ አꬍያ ኡባይ ባንታ ኩሽያ ባቅሸ፥ “ፖራ!” ጋና።
ZEP 3:1 ማካላንቹዋስ፥ ቱንዳይሳስነ ባ ደርያ ኡንኤꬅዳ የሩሳላመ ካታማ አየ!
ZEP 3:2 እ ኦናካ ኪተተና፤ ሴርን ስመና፤ ጎዳን አማነተና፤ ባ ፆሳኮ ሺቀና።
ZEP 3:3 እያ ሀላቃት ጉድያ ጋሞ መላ፤ እያ ዳይናት ደምዳባ ዎንቶስ አሾና ኡባ ምድ ኦንግያ ኦማርሳ ሱꬉመ መላ።
ZEP 3:4 እያ ናበት ኦቶራንቾነ ገናንቾ፤ እያ ካህነት ጌሻ ቱንሰይሳታ፤ ኤንቲ ጎዳ ህግያ ምርቆሶና።
ZEP 3:5 ሽን እያ ግዶን ደእያ ጎዳይ ፅሎ፤ እ ባላ ኦና። ዎንታ ዎንታ እ ፅሎ ፕርዴስ፤ ጋላስ ጋላስ ሄሳ አገና። ግዶሽን፥ ያን ደእያ ጌላይ ዬላ ኤረና።
ZEP 3:6 “ታኒ ካዎተꬃታ ꬋይሳስ፤ ኤንታ ግምበታ ላላስ። ኤንታ ካታማታ እስ ዶና ባይሳ ቢታ ኦꬃስ፤ ኤንታ ኦገታ አስ ካንꬆና ባዞ ኦꬃስ።
ZEP 3:7 ታኒ ሀይሳ ኡባ ኦꬃዳ፥ ‘ታ አሳይ ታና ቦንቻና፤ ታ ሴራ ኤካና፤ ታ ኪትዳባ ዶገና’ ያጋስ። ሽን ኤንቲ ካሰፐ አꬍድ ኢትዶሶና፤ ባንታ ኦሱዋን ቱንዶሶና” ያጌስ ጎዳይ።
ZEP 3:8 “አነ ታኒ ፕርድያ ጋላሳይ ጋካናዉ ጉꬁ ናግተ። ታኒ ደረታነ ካዎተꬃታ ሺሻናዉ ቆፋ ቃቻስ፤ ታ ሀንቁዋ ሱላ ኤንታ ቦላ ጉሳና፤ ቢታይ ኩመꬅ ታ ሀንቁዋ ታማን ፁገታና።
ZEP 3:9 “ሄ ዎደ አሳ ኡባይ ጌሻ ኦዳ ኦደታና መላ ኦꬃና። ኤንቲ ኡባይ ጎዳ ሱንꬃ ፄጋና፤ እስፈ እያዉ ጎይናና።
ZEP 3:10 ላለትዳ አሳይ፥ ታና ቱማ ጎይነይሳት፥ ቶጰ ሻፋታፐ ሄፍንꬃን ደኤይሳት ታዉ እሞታ ኤሀና።
ZEP 3:11 ኦቶረይሳታነ ጬቀተይሳታ ታ ህንተ ግዶፈ ꬋይስያ ግሾ፥ ሄ ዎደ ህንተ ታ ቦላ ኦꬅዳ ኦሱዋ ጋሶን ዬላተከታ። ህዛፐ ጉየ ህንተ ታ ጌሻ ዙማ ቦላ ኦቶርተከታ።
ZEP 3:12 ታኒ ህንተ ግዶፈ ባንታና ካዉሸይሳታነ አዳታ አሻና፤ ኤንቲ ጎዳ ሱንꬃን አማነታና።
ZEP 3:13 እስራኤለ አሳፐ አትዳይሳት ኢታባ ኦꬆኮና፤ ዎርዶ ኦደቶኮና፤ ኤንታ እንፃርሳን ጭሞይ በንተና። ሄሳ ግሾ፥ ኤንቲ ምድ ካልድ ሳሮን ዳና፤ ኤንታ ያሽስያባይ ባዋ” ያጌስ።
ZEP 3:14 ፅዮነ ናኤ፥ ማዝሙርያ የፃ! እስራኤለ አሳዉ፥ እልልተ! የሩሳላመ ናኤ፥ ነ ፖሎ ዎዛናፐ ኡፋይታ፤ ሀሹ ጋ!
ZEP 3:15 ጎዳይ ህንተ ቦላ ፕርድዳ ፕርዳ አግስ፤ ህንተ ሞርከታ ድግስ። ጎዳይ፥ እስራኤለ ካዎይ ህንተ ግዶን ደኤስ፤ ህዛፐ ጉየ ህንተና ያሽስያባይ ባዋ።
ZEP 3:16 ሄ ጋላስ ኤንቲ የሩሳላመ ሀይሳዳ ያጋና፦ “ፅዮነ፥ ያዮፋ! ነ ኩሸይ አርጋጮፖ።
ZEP 3:17 ጎዳይ፥ ነ ፆሳይ ነ ግዶን ደኤስ፤ እ ነዉ ፆኖ እምያ ኦላንቹዋ። እ ነናን ኡፋይታና፤ ባ ሲቁዋን ነና ኦራꬃና። አሳይ ባኣለ ጋላስ ማዝሙረ የፀይሳዳ፥ እ ነናን ኡፋይተይሳ ማዝሙረ የፅድ በሳና” ያጋና።
ZEP 3:18 ጎዳይ ሀይሳዳ ያጌስ፦ “ህዛፐ ጉየ ነ ቦላ ꬋዮይ ጋኮናዳ ኦꬃና፤ ነ ዬላ ድጋና።
ZEP 3:19 ሄ ዎደ ታኒ ነና ኡንኤꬅዳይሳታ ኡባ ሴራና፤ ዎበታ አሻና፤ ላለትዳይሳታ ሺሻና። ኤንቲ ዬላትዳ በሳን ዛራዳ ቦንቻና፤ ኤንታ ዬላ ቦንቾንነ ሳባን ላማና።
ZEP 3:20 ሄ ዎደ ታኒ ህንተና ሺሻና፤ ህንተና እስፈ ዛራዳ ሺሻና። ታኒ ህንተና ናንስያ ዎደ፥ ህንተ ሀ ሳአን ደእያ አሳ ኡባ ማታን፥ ቦንቸትዳይሳታነ ኤረትዳይሳታ ግዳና” ያጌስ ጎዳይ።
HAG 1:1 ካዎይ ዳርዮስ ካዎትዳ ናምአንꬆ ላይꬃን፥ ኡሱፑንꬆ አጌናን ኮይሮ ጋላሳን፥ ጎዳ ቃላይ ናብያ ሀገ ባጋራ ይሁዳ ቢታ ሃርያ ሳላትያላ ናኣ፥ ዛሩባበላኮነ ካህነ ሀላቃ ግድዳ እዮሳደቃ ናኣ፥ እያሱኮ ሀይሳዳ ያግድ ይስ።
HAG 1:2 ኡባፈ ዎልቃማ ጎዳይ፥ “ሀ አሳይ ጎዳ ኬꬃ ዛሪድ ኬፅያ ዎደይ ቡሮ ጋክቤና” ያጌስ።
HAG 1:3 ያትን፥ ጎዳ ቃላይ ናብያ ሀገ ባጋራ ሀይሳዳ ያግስ:
HAG 1:4 “ታ አሳዉ፥ ታ ኬꬃይ ላለትድ ኡትን፥ ህንተ፥ ህንተ አሌቀትዳ ኬꬃታን ዳናዉ ሀይስ ህንተዉ ዎዴ?” ያግስ።
HAG 1:5 ሄሳ ግሾ፥ ኡባፈ ዎልቃማ ጎዳይ፥ “አነ ህንተ ህንተና ጋክሸ ደእያባ ቆፕተ።
HAG 1:6 ህንተ ዳሮ ዘርደታ፥ ሽን ጉꬁ ሺሽደታ። ሜታ፥ ሽን ካለከታ፤ ኡዬታ፥ ሽን አለከታ። ማኤታ፥ ሽን ህንተና ሆኤና። ዳሞዘ ኤኬታ፥ ሽን ፔꬃ ኪሰን የግያዳ ጮ ꬋዬስ” ያጌስ።
HAG 1:7 ኡባፈ ዎልቃማ ጎዳይ፥ “አነ ህንተ ህንተና ጋክሸ ደእያባ ቆፕተ።
HAG 1:8 ህዛ ደርያ ቦላ ከይድ፥ ምꬅ ቃንፅድ ኤህተ፤ ታኒ እያን ኡፋይታና መላነ ቦንቸታና መላ ፆሳ ኬꬃ ዛሪድ ኬፅተ።
HAG 1:9 ህንተ ዳሮ ካꬅ ሺሻናዉ ቆፕደታ፥ ሽን ጉꬃ ግድስ። እያ ህንተ ሶ ገልስያ ዎደ ታ ፑንን ꬋይ አግስ። ሀይስ አይብስ ሀንዴ? ታኒ ሀይሳ ኦꬅዳይ ህንተ ኡባይ ህንተ ኬꬃ ኬꬃ ኬፅሽን፥ ታ ኬꬃይ ላለትድ አትዳ ግሾሳ።
HAG 1:10 ሄሳ ግሾ፥ ሳሎይ እራ ድግስ፥ ሳእ ካꬅ እሞና እፅስ።
HAG 1:11 ታኒ ቢታነ ዙማ ቦላ፥ ካꬃ ቦላ፥ ዎይንያነ ዛይትያ ቦላ፥ ቢት ዶልስያባ ኡባ ቦላ፥ አሳነ መህያ ቦላነ ህንተ ዳቡራ ኡባ ቦላ ኮሻ ፄጋስ” ያጌስ።
HAG 1:12 ሀይሳፈ ጉየ፥ ሳላትያላ ናአይ ዛሩባበል፥ ካህነ ሀላቃ ግድዳ እዮሳደቃ ናአይ፥ እያሱይነ ድኤተꬃፈ ስምዳ አሳ ኡባይ፥ ጎዳ ባንታ ፆሳ ቃላስነ ጎዳይ ኤንታ ፆሳይ ኪትዳ ናብያ ሀገ ቃላስ፥ ኪተትዶሶና፤ አሳይ ጎዳ ያይዶሶና።
HAG 1:13 ያትን፥ ጎዳይ ኪትዳ ሀገይ አሳኮ፥ “ ‘ታኒ ህንተራ ደአይስ’ ያጌስ” ያግድ ጎዳ ኪታ አሳስ ኦድስ።
HAG 1:14 ያትን፥ ጎዳይ፥ ይሁዳ ቢታ ሃርያ ሳላትያላ ናኣ፥ ዛሩባበላ፥ ካህነ ሀላቃ ግድዳ እዮሳደቃ ናኣ፥ እያሱነ ድኤተꬃፈ ስምዳ አሳ ኡባ ደንꬅስ። ኤንቲ ኡባፈ ዎልቃማ ጎዳ፥ ባንታ ፆሳ ኬꬃ ኬፆ ዶምዶሶና።
HAG 1:15 ሀይስ ሀንዳይ ካዎይ ዳርዮስ ካዎትዳ ናምአንꬆ ላይꬃን፥ ኡሱፑንꬆ አጌናን ላታማነ ኦይዳንꬆ ጋላሳና።
HAG 2:1 ዳርዮስ ካዎትዳ ናምአንꬆ ላይꬃን፥ ላፑንꬃ አጌናን ላታማነ እስንꬆ ጋላሳን፥ ጎዳ ቃላይ ናብያ ሀገ ባጋራ ሀይሳዳ ያግስ።
HAG 2:2 “ይሁዳ ሃርያ፥ ሳላትያላ ናኣ፥ ዛሩባበላስ፥ ካህነ ሀላቃ ግድዳ እዮሳደቃ ናኣ፥ እያሱስነ ድኤተꬃፈ ስምዳ አሳስ ሀይሳዳ ያጋዳ ኦዳ:
HAG 2:3 ሀ ፆሳ ኬꬃ ካሰ ቦንቾይ አይ መለኮ በእዳ አሳፐ ህንተ ግዶን አትዳ አስ ደኢ? ሀች ህንተ በእያ ዎደ አይ ዳኒ? ህንተ አይፍያ ስንꬃን ባይናባ ዳነኔ?
HAG 2:4 ግዶሽን፥ ዛሩባበላ፥ ሀእ ምና! ካህነ ሀላቃ ግድዳ እዮሳደቃ ናአዉ፥ እያሱ ምና! ቢታን ደእያ አሳዉ ህንተ ምንድ ኦꬅተ! ታኒ ህንተራ ደአይስ። ታኒ ኡባፈ ዎልቃማ ጎዳይ ሀይሳ ኦዳይስ።
HAG 2:5 ህንተ ግብፀፈ ከይያ ዎደ ታኒ ህንተራ ግዳና ጋዳ ጫቅዳይሳዳ ታ አያናይ ህንተራ ደእያ ግሾ ያዮፍተ!” ያግስ።
HAG 2:6 ኡባፈ ዎልቃማ ጎዳይ፥ “ታኒ ቃንꬃ ዎደን እስ ቶሆ ጉጃዳ ሳሎታነ ሳኣ፥ አባነ ቢታ ቃꬃና።
HAG 2:7 ካዎተꬃታ ኡባ ቃꬃዳ ካዎተꬃታ ኡባን ደእያ ሻሎይ ሃ ያና መላ ኦꬃና። ሀ ፆሳ ኬꬃ ቦንቾን ኩንꬃና።
HAG 2:8 ብራይ ታባ፤ ዎርቃይ ታባ።
HAG 2:9 ኮይሮ ቦንቹዋፈ ሀ ናምአንꬆ ፆሳ ኬꬃ ቦንቾይ አꬋና። ታኒ ኡባፈ ዎልቃማ ጎዳይ ሀ በሳን ሳሮተꬅ እማና ያጋዳ ኦዳ” ያግስ።
HAG 2:10 ዳርዮስ ካዎትዳ ናምአንꬆ ላይꬃን፥ ኡዱፉንꬆ አጌናን ላታማነ ኦይዳንꬆ ጋላሳን፥ ጎዳ ቃላይ ናብያ ሀገ ባጋራ ሀይሳዳ ያግድ ይስ።
HAG 2:11 ኡባፈ ዎልቃማ ጎዳይ፥ “ህገይ ዎይግያኮ ኤራናዉ ካህነታ ኦይቻ።
HAG 2:12 ‘እስ አስ ጌሻ አሹዋ ባ አፍላ ማጫራን ቃችድ ኤክ ብሽን፥ ሄ አፍላ ማጫራይ፥ ኡይꬃ ዎይኮ ዎፅያ ዎይኮ ዎይንያነ ዛይትያ ዎይኮ ሀራ አይ ቆሞ ካꬅ ቦችኮ፥ ሄ ቦሸትዳ ካꬃይ ጌሽ ግዳናዉ ዳንዳኢ?’ ያጋዳ ኦይቻ” ያግስ። ካህነይ ዛሪድ፥ “ጌሽ ግዳናዉ ዳንዳኤና” ያግስ።
HAG 2:13 ሀገይ ዛሪድ፥ “አሀ ቦችድ ቱንዳ እስ አስ ሀይሳታፐ እስ ቆሞ ካꬃ ቦችኮ ሄ ካꬃይ ቱና ግዳኔ?” ያግድ ኦይችስ። ካህነይ፥ “ኤ ቱናና” ያግድ ዛርስ።
HAG 2:14 ሀገይ ዛሪድ፥ “ሀ አሳይነ ሀ ካዎተꬃይ ታ ስንꬃን ሄሳ መላ። ኤንቲ ኦꬅያ ኦሶይነ ኤንቲ እምያ እሞታይ ኡባይ ሄሳ መላ ቱና” ያጌስ ጎዳይ።
HAG 2:15 “ሀችፈ ዶምድ፥ ህንተ ቦላ ጋክዳባ አኬክተ! ጎዳ ኬꬃ ኬፆ ዶማናፐ ካሰ፥
HAG 2:16 ህንተ ናምኡ ኩንታለ ካꬅ ኤካና ግድ፥ ካꬅ ዎꬅዳ በሳ ብደታ፥ ሽን እስ ኩንታለ ፃላላ ደምደታ። እስ ፄቱ ልትሮ ዎይነ ኤካናዉ ዎይነ ጉምእያ ኦላ ብደታ፥ ሽን ህንተ ኦይታሙ ልትሮ ፃላላ ዎይነ ደምደታ።
HAG 2:17 ታኒ ህንተ ኩሸ ኦሶ ኡባ ቦላ መልስያ ጫርኮ፥ ካꬃ ሀርገነ ሻች የዳዳ ꬋይሳስ። ሽን ህንተ ሀ ኡባን ታኮ ስምበከታ” ያጌስ ጎዳይ።
HAG 2:18 “ሀች ጋላሳፐ፥ ሀ ኡዱፉንꬆ አጌናን ላታማነ ኦይዳንꬆ ጋላሳፐ ዶምድ አነ አኬክተ። ጎዳ ኬꬃ ባሶይ ባሰትዳ ጋላሳፐ ዶምድ ቆፕተ።
HAG 2:19 ሀእ ዘረꬃስ ሀንያ ካꬅ ህንተ ሻለን ꬋይኮ፥ ዎይነይ፥ ባላሰይ፥ ኦሮማነይነ ሻማሆይ ሀች ጋካናዉ አይፎና እፅኮካ፥ ሀችፈ ዶማዳ ታኒ ህንተና አንጃና” ያጌስ ጎዳይ።
HAG 2:20 ሄ አጌናን ላታማነ ኦይዳንꬆ ጋላሳን ጎዳ ቃላይ ናምአንꬆ ሀገኮ ሀይሳዳ ያግስ።
HAG 2:21 ይሁዳ ሃርያ ዛሩባበላስ ሀይሳዳ ያጋዳ ኦዳ: “ታኒ ሳሎታነ ሳኣ ቃꬃና።
HAG 2:22 ካዎተꬃታ አራታ ሽራ የጋና፤ ኤንታ ዎልቃ ꬋይሳና። ፓራ ጋረታ ኤንታ ላገይሳታራ ሽራ የጋና፤ ኤንታ ፓራት ዉራና፤ ፓራ አሳት ዎሉ ዎꬋና።
HAG 2:23 ‘ታ አይልያዉ፥ ሳላትያላ ናአ ዛሩባበላ፥ ታኒ ኡባፈ ዎልቃማ ጎዳይ ነና ሄ ጋላስ ኤካና። ታኒ ነና ታ ምግዶ ማታመ መላ ኦꬃና። ታኒ ነና ዶራስ’ ያጌስ” ያጋዳ ኦዳ።
ZEC 1:1 ዳርዮስ ካዎትዳ ናምአንꬆ ላይꬃን፥ ሆስፑንꬆ አጌናን፥ ጎዳ ቃላይ እዶ ናኣ፥ ባራካ ናኣ፥ ናብያ ዛካርያሳኮ ይስ።
ZEC 1:2 “ጎዳይ ህንተ ማይዛታ ቦላ ዳሮ ሀንቀትስ።
ZEC 1:3 ሽን ሀእ አሳስ ሀይሳዳ ያጋዳ ኦዳ፦ ‘ታኮ ስምተ፤ ታኒ ህንተኮ ስማና’ ያጌስ ኡባፈ ዎልቃማ ጎዳይ።
ZEC 1:4 ካሰ ናበት፥ ህንተ አዋታኮ፥ ‘ህንተ ኢታ ኦግያፐነ ኢታ ኦሱዋፐ ስምተ’ ያግድ ኦድን፥ ስኦና እፅድ፥ ባንታ ኢታ ኦግያፐነ ኦሱዋፐ ስሞና እፅዳ፥ ህንተ ማይዛታዳ ሀኖፕተ” ያጌስ ኡባፈ ዎልቃማ ጎዳይ።
ZEC 1:5 ህንተ ማይዛት ሀእ አዉን ደኦና? ሄ ናበት መርናዉ ፓፃ ደኦና?
ZEC 1:6 ግዶሽን፥ ናበታ፥ ታ አይለታ ባጋራ ታኒ ኦድዳ ኪታትነ ህገት ኡባይ ህንተ ማይዛታ ቦላ ጋክቤኔ? ያትን፥ ኤንቲ ባንታ ናጋራ ፓፅድ፥ “ኡባፈ ዎልቃማ ጎዳይ ኑ ኦግያዳነ ኑ ኦሱዋዳ ኑስ እማና ግዳይሳዳ ባ ኦሱዋ ኦꬅስ” ያግዶሶና።
ZEC 1:7 ዳርዮስ ካዎትዳ ናምአንꬆ ላይꬃን፥ ሻባፃ ጌተትያ ታማነ እስንꬆ አጌናን፥ ላታማነ ኦይዳንꬆ ጋላሳን፥ ጎዳ ቃላይ እዶ ናኣ፥ ባራካ ናኣ፥ ናብያ ዛካርያሳኮ ይስ።
ZEC 1:8 ታኒ ቃማ ቆንጨꬃን፥ ዞኦ ፓራ ቶግዳ እስ አስ በአስ። እ ዛንጋራን ደእያ ባርሰኔተ ጌተትያ ምꬃታ ጋርሳን ኤቅስ፤ እያፐ ጉየ ባጋራ ዞኦ፥ ዳማነ ቦꬃ ፓራት ደኦሶና።
ZEC 1:9 ያትን ታኒ፥ “ታ ጎዳዉ፥ ሀይሳቲ አይቤ?” ያጋዳ ኦይቻስ። ታራ ሃሳያ ኪታንቾይ፥ “ሀይሳቲ አይበኮ ታኒ ነና በሳና” ያግስ።
ZEC 1:10 ባርሰኔተ ምꬃ ጋርሳን ኤቅዳ ኡራይ፥ “ሀይሳቲ ሳኣ ኡባ ዩይድ ዎቻና መላ ጎዳይ ኪትዳይሳታ” ያግስ።
ZEC 1:11 ኤንቲ ባርሰኔተ ምꬃ ጋርሳን ኤቅዳ ጎዳ ኪታንቹዋኮ፥ “ኑኒ ሳአ ኡባ ዩይድ ዎችዳ፤ ሳእ ዎፑ ግድ ሳሮ ደኤስ” ያግዶሶና።
ZEC 1:12 ሄሳፈ ጉየ፥ ጎዳ ኪታንቾይ፥ “አቤት ኡባፈ ዎልቃማ ጎዳዉ፥ ኔኒ ሀንቀትን ሀእ ላፑን ታሙ ላይꬅ ኩምስ፤ ያትን፥ ኔኒ የሩሳላመነ ይሁዳ ካታማታ ማሮና አዉደ ጋካናዉ ጋምአኔ?” ያግስ።
ZEC 1:13 ጎዳይ ታራ ሃሳያ ኪታንቻዋስ ሎኦነ ምንꬅያ ቃላን ዛሮ እሚስ።
ZEC 1:14 ታራ ሃሳያ ኪታንቾይ ታኮ፥ “ሀ ቃላ አዋጃ! ኡባፈ ዎልቃማ ጎዳይ፥ ‘ታኒ የሩሳላመስነ ፅዮነስ ዳሮ ምሸታይስ።
ZEC 1:15 ኑኒ ሳሮ ደኦስ ግድ ቆፕያ ሀራ ካዎተꬃታ ቦላ ታኒ ዳሮ ሀንቀታስ። ታኒ ታ አሳ ቦላ ጉꬃራ ሀንቀታስ፥ ሽን ኤንቲ አꬅድ ታ ደርያ ቆህዶሶና።’
ZEC 1:16 ሄሳ ግሾ፥ ታኒ የሩሳላመኮ ማሮታን ስማና፤ ታ ኬꬃይ ዛሪድ ያን ኬፀታና፤ የሩሳላመ ካታማ ቦላ ዋꬋ ዎዶሮ የጋና” ያጌስ ኡባፈ ዎልቃማ ጎዳይ።
ZEC 1:17 ጉጃዳ ሀይሳዳ ያጋዳ አዋጃ፦ “ታ ካታማታ ዱረተꬃይ ኩምድ ፓላሀና፤ ታኒ ጎዳይ ፅዮነ ዛራ ምንꬃና፤ የሩሳላመ ዛራ ዶራና” ያጌስ ኡባፈ ዎልቃማ ጎዳይ።
ZEC 1:18 ታኒ ቆንጨꬃን ኦይዱ ካጨታ በአስ።
ZEC 1:19 ታራ ሃሳያ ኪታንቹዋ፥ “ሀይሳቲ አይቤ?” ያጋዳ ኦይቻስ። እ ዛሪድ፥ “ሀ ካጨት ይሁዳ፥ እስራኤለነ የሩሳላመ ላልዳ ካዎተꬃታ” ያግስ።
ZEC 1:20 ሄሳፈ ጉየ፥ ጎዳይ ታና ብራታ ቆፅያ ኦይዱ ሂላንቾታ በስስ።
ZEC 1:21 ታኒ፥ “ሀይሳቲ አይ ኦꬃናዉ ይዶና?” ያጋዳ ኦይቻስ። እ ዛሪድ፥ “ሀይሳቲ ኦንካ ዛር ደንꬆና መላ ይሁዳ ቢታ ላልዳ ካጨታ ካዉሻናዉነ ꬋይሳናዉ ይዶሶና። ኤንቲ ይሁዳ ቢታ ላላናዉ ባንታ ካጭያ ደንꬅዳ ሀራ ካዎተꬃታ ካጭያ ሾጭድ ሳአን የጋናዉ ይዶሶና” ያግስ።
ZEC 2:1 ሀራ ቆንጨꬃን ባ ኩሸን ዋꬋ ዎዶሮ ኦይክዳ እስ አስ በአስ።
ZEC 2:2 ታኒ፥ “ኔኒ አዉ ባይ?” ያጋዳ ኦይቻስ። እ ዛሪድ፥ “ታኒ የሩሳላመ ዳልጋተꬃይነ አዱሳተꬃይ አይ መለኮ ዋꬋናዉ ባይስ” ያግስ።
ZEC 2:3 ሄሳፈ ጉየ፥ ታራ ሃሳያ ኪታንቾይ ከይድ ብስ፤ እያራ ጋሄታናዉ ሀራ ኪታንቾይ ይስ።
ZEC 2:4 ይዳ ኪታንቾይ፥ “ዎፃ ባዳ፥ ናአተꬃ አድያኮ፥ ‘የሩሳላመን ዳሮ አስነ ዳሮ መሄይ ዳና ግሾ፥ ካታማ ዩሾን ግምበ ድርስ ኮሸና።
ZEC 2:5 ታኒ እያ ዩሹዋን ታማ ድርስ ግዳና፤ ታኒ እያዉ ቦንቾ ግዳና’ ያጌስ ጎዳይ።
ZEC 2:6 “ታኒ ህንተና ቢታ ኦይዱ ባጋ ላልዳ ግሾ፥ ያፐ ከይተ፤ ኤለ ከይተ፤ ፑደሀ ባጋ ቢታፈ ባቃትተ” ያጌስ ጎዳይ።
ZEC 2:7 “ነኖ፥ ፅዮነ ከያ፤ ባብሎነ ማጫ ናይታ ግዶን ደእያረ፥ ኤንታ ግዶፈ ባቃታ” ያጌስ ጎዳይ።
ZEC 2:8 ኡባፈ ዎልቃማ ጎዳይ እያ ቦንቹዋ ቆንጭሳና መላ፥ ባ አሳ ቦንቅዳ ካዎተꬃታኮ ታና ኪትድ፥ “ህንተና ቦችያ ኡራይ እያ አይፍያ ቡሉዋ ቦቼስ።
ZEC 2:9 ታኒ ታ ኩሽያ ኤንታ ቦላ ደንꬃና፤ ኤንታ አይለት ኤንታ ዛሪድ ቦንቃና። ሄ ዎደ ህንተ ኡባፈ ዎልቃማ ጎዳይ ታና ኪትዳይሳ ኤራና።”
ZEC 2:10 “ታኒ ያዳ ህንተ ግዶን ዳና ግሾ፥ ፅዮነ አሳዉ፥ ዛማርተ፤ ኡፋይትተ!” ያጌስ ጎዳይ።
ZEC 2:11 ሄ ዎደ ዳሮ ካዎተꬃት ጎዳራ ጋሄትድ እያ አሰ ግዳና። እ ህንተ ግዶን ዳና፤ ኡባፈ ዎልቃማ ጎዳይ ታና ህንተኮ ኪትዳይሳ ሄ ዎደ ህንተ ኤራና።
ZEC 2:12 ጌሻ ቢታን ይሁዳ፥ ባና ጋክዳ ግሾ ኦꬅድ ላታና፤ የሩሳላመ ዛሪድ ዶራና።
ZEC 2:13 ጎዳይ ባ ደእያ ጌሻ በሳን ደንድዳ ግሾ፥ አሾ ማእዳ ኡባይ እያ ስንꬃን ስእ ጎ!
ZEC 3:1 ሄሳፈ ጉየ፥ ካህነ ሀላቃይ እያሱይ ጎዳ ኪታንቹዋ ስንꬃን ኤቅዳይሳነ ፃላሄይ እያሱ ሞታናዉ እያፐ ኡሻቻ ባጋራ ኤቅዳይሳ ታና ቆንጨꬃን በስስ።
ZEC 3:2 ጎዳይ፥ “ፃላህያዉ፥ ጎዳይ ነና ሴሮ፤ የሩሳላመ ዶርዳ ጎዳይ ነና ሴሮ! ሀ አደይ ታማፐ አትዳ ዱንቻ መላ ግደኔ?” ያግስ።
ZEC 3:3 እያሱይ ቅታትዳ ማኦ ማእድ ኪታንቹዋ ስንꬃን ኤቅስ።
ZEC 3:4 ኪታንቾይ ባ ስንꬃን ኤቅዳይሳታ፥ “እያ ቦላፈ ሀ ቅታ ማኡዋ ቃርተ” ያግስ። ቃስ እያሱኮ፥ “ሄኮ፥ ታኒ ነ ናጋራ ኔፐ ድጋስ፤ ቦንቾ ማኡዋ ነና ማይዛና።”
ZEC 3:5 ታኒ፥ “ጌሻ ፃꬃ ቃጭያ እያ ሁጰን ፃፅተ” ያግስ። ኤንቲ ኪትዳይሳዳ ኦꬅዶሶና፤ ማኦ ማይዝዶሶና። ጎዳ ኪታንቾይ ሄ ዎደ እያ ምየን ኤቅስ።
ZEC 3:6 ሄሳፈ ጉየ፥ ጎዳ ኪታንቾይ እያሱኮ፥
ZEC 3:7 ኡባፈ ዎልቃማ ጎዳይ ሀይሳዳ ያጌስ፤ “ኔኒ ታ ኦግያን ሄመትኮነ ታ ኪታ ናግኮ፥ ኔኒ ታ ኬꬃ አይሳና፤ ታ ዳባባን አዋታና። ቃስ ሀይሳን ኤቅዳይሳታራ እስፈ ገልያነ ከይያ ማታ ነዉ እማና።
ZEC 3:8 ካህነ ሀላቃ እያሱ፥ ሀይሳ ስአ! ስንꬃራ ያና ሎኦባስ ማላታ ግድዳይሳትነ ኔራ ኦይሳት ሀይሳ ስኦ! ታኒ፥ ‘ታሸ’ ጌተትያ ታ አይልያ ኤሀና።
ZEC 3:9 ሄኮ፥ ታኒ እያሱ ስንꬃን ሹቹ ዎꬃና፤ ሄ ሹቻ ቦላ ላፑን አይፈት ደኦሶና። ታኒ ሄ ሹቻ ዎጫዳ እያ ቦላ ፁፈ ፃፋና፤ ሀ ቢታ ናጋራ እስ ጋላስ ድጋና” ያጌስ ኡባፈ ዎልቃማ ጎዳይ።
ZEC 3:10 “ሄ ጋላስ ህንተ ኡባይ ህንተ ዎይነነ ህንተ ባላሰ ጋርሳን ኡትድ ህንተ ሾሩዋ ፄጋና” ያጌስ ኡባፈ ዎልቃማ ጎዳይ።
ZEC 4:1 ሄሳፈ ጉየ፥ ታራ ሃሳያ ኪታንቾይ ስሚድ ይድ፥ ꬍስክዳ አስ ባርክያ መላ ታና ባርክስስ።
ZEC 4:2 እ ታኮ፥ “ኔኒ አይ በአይ?” ያግስ። ታኒ ዛራዳ፥ “ታኒ ዎርቃ ፃላላፐ ኦሰትዳ ፆምፐ ዎꬅያ ኮጫ በአይስ፤ እያ ፄራን ዛይተ ፃሮይ ደኤስ። ቃስ እያ ቦላ ላፑን ፆምፐት ደኦሶና፤ ሄ ላፑን ፆምፐታስ ላፑን ላፑን ፒቀት ደኦሶና።
ZEC 4:3 ሄ ፆምፕያ ዎꬅያ ኮጫ ማታን ናምኡ ሻማሆ ምꬃት ደኦሶና። ኤንቲ ዛይተ ፃሩዋፐ ኡሻቻ ባጋራነ ሀድርሳ ባጋራ ደኦሶና” ያጋስ።
ZEC 4:4 ታራ ሃሳያ ኪታንቹዋ፥ “ታ ጎዳዉ፥ ሀይስ አይቤ?” ያጋዳ ኦይቻስ።
ZEC 4:5 ኪታንቾይ ዛሪድ፥ “ሀይሳቲ አይበኮ ኤርኪ?” ያግስ። ታኒ ዛራዳ፥ “ታ ጎዳዉ፥ ታኒ ኤርከ” ያጋስ።
ZEC 4:6 እ ታኮ፥ “ዛሩባበላስ ጎዳይ ኦድዳ ቃላይ ሀይሳ፤ ‘ታ አያናናፐ አትሽን፥ ዎልቃን ዎይኮ ምኖተꬃን ግደና’ ያጌስ ኡባፈ ዎልቃማ ጎዳይ።
ZEC 4:7 ግታ ዙማዉ፥ ኔኒ አይቤ? ኔኒ ዛሩባበላ ስንꬃን ልች ግዳ ደምባ ግዳና። ዛሩባበል ፆሳ ኬꬃ ኬፅ ፖልድ፥ ዉርሰꬃ ሹቻ ከስያ ዎደ አሳይ፥ ‘ሀሹ! ሀሹ ፖለትስ’ ” ያጋና።
ZEC 4:8 ቃስካ ጎዳ ቃላይ ታኮ ሀይሳዳ ያግድ ይስ።
ZEC 4:9 “ፆሳ ኬꬃ ባሱዋ ዛሩባበላ ኩሸት ባስዶሶና፤ እያ ኩሸት ኬፅድ ፖላና። ሄሳፈ ጉየ፥ ኡባፈ ዎልቃማ ጎዳይ ታና ህንተኮ ኪትዳይሳ ህንተ ኤራና።
ZEC 4:10 ሀ ጉꬃ ዶመꬃ ካꬍያ ኦንካ ጉየፐ ኡፋይታና፤ ኤንቲ ዛሩባበላ ኩሸን ቱምብያ በአና። ሀይሳቲ ላፑን ፆምፐት ቢታ ኡባ ዩይድ ፄልያ ጎዳ አይፈታ” ያግስ።
ZEC 4:11 ታኒ ኪታንቹዋ ዛራዳ፥ “ሀ ፆምፐ ዎꬅያ ኮጫፐ ኡሻቻ ባጋራነ ሀድርሳ ባጋራ ደእያ ሀ ናምኡ ሻማሆት አይቤ?” ያጋዳ ኦይቻስ።
ZEC 4:12 ጉጃዳካ፥ “ዛይተይ ኤንታፈ ጎግያ ናምኡ ዎርቃ ፒቀታ ማታን ደእያ ናምኡ ሻማሆ ምꬃ ታሸት አይቤ?” ያጋዳ ኦይቻስ።
ZEC 4:13 እ ዛሪድ፥ “ሀይሳቲ አይበኮ ኔኒ ኤርኪ?” ያግስ። ታኒ ዛራዳ፥ “ታ ጎዳዉ፥ ታኒ ኤርከ” ያጋስ።
ZEC 4:14 እ ዛሪድ፥ “ሀይሳቲ ሳአ ኡባ ጎዳስ ኦꬅያ ናምኡ ትየትዳ አሳታ” ያግስ።
ZEC 5:1 ቃስ ታኒ ꬎቁ ጋዳ ፄልያ ዎደ ቦላራ ፕራꬍያ እስ ፃꬃ ማፃፋ በአስ።
ZEC 5:2 ኪታንቾይ ታና፥ “ኔኒ አይ በአይ?” ያግድ ኦይችስ። ታኒ ዛራዳ፥ “ታኒ ቦላራ ፕራꬍያ እስ ፃꬃ ማፃፋ በአይስ፤ ሄ ማፃፋ አዱሳተꬃይ ላታሙ ዋꬋ ቃስ ጎምፓይ ታሙ ዋꬋ” ያጋስ።
ZEC 5:3 እ ታኮ፥ “ሀ ፃꬃ ማፃፋ ግዶን ቢታ ኡባ ቦላ ያና ባደꬃይ ፃፈትስ። ሄ ማፃፋን እስ ባጋራ፥ ‘ካይሶ ኡባይ ቢታፈ ꬋያና’፤ ቃስ ሀንኮ ባጋራ፥ ‘ዎርዶን ጫቅያ ኡባይ ꬋያና’ ግያ ፁፈይ ፃፈትስ።
ZEC 5:4 ‘ታኒ ሀ ባደꬃ ኪታና፤ ሄ ባደꬃይ ብድ፥ ካይሱዋ ሶነ ታ ሱንꬃን ዎርዶ ጫቀይሳ ሶ ገላና። ሄ ኬꬃ ገልድ ምꬃነ ሹቻ ꬋይሳና’ ” ያገስ ኡባፈ ዎልቃማ ጎዳይ።
ZEC 5:5 ሄሳፈ ጉየ፥ ታራ ሃሳያ ኪታንቾይ ታኮ ይድ፥ “አነ ꬎቁ ጋዳ፥ ያባይ አይበኮ በአ” ያግስ።
ZEC 5:6 ታኒ፥ “እ አይቤ?” ያጋዳ ኦይቻስ። እ ዛሪድ፥ “ሀይስ ማክያ ዳቾ” ያግስ። ቃስ ጉጅድ፥ “ሀይስ አሳይ ሀ ቢታ ኡባን ኦꬅዳ ናቁዋ ማላታ” ያግስ።
ZEC 5:7 እርሳሰ ጌተትያ ብራታፐ ኦሰትዳ ዳቹዋ ካማ ደንꬅያ ዎደ እስ ማጫስ ዳቹዋን ኡታሱ።
ZEC 5:8 ኪታንቾይ፥ “ሀና ኢታተꬃ ሌምሶ” ያግስ። እዮ ጉየ ዳቹዋን የግድ እርሳሰ ካማ ዛሪድ ካምስ።
ZEC 5:9 ሄሳፈ ጉየ፥ ታኒ ꬎቁ ጋዳ ፄልያ ዎደ ኤንታ ቀፍያን ጫርኮይ ደእያ፥ ፕራꬍያ ናምኡ ማጫሳታ በአስ። ኤንታ ቀፈይ ጎሎ ቀፈ መላ ምኖ፤ ኤንቲ ዳቹዋ ሳአፐ ድንꬅድ ኤክድ ፕራꬍዶሶና።
ZEC 5:10 ታኒ ኪታንቹዋኮ፥ “ሀይሳቲ ዳቹዋ አዉ ኤፎና?” ያጋዳ ኦይቻስ።
ZEC 5:11 እ ዛሪድ፥ “ኤንቲ እያዉ ኬ ኬፃናዉ ሳናኦራ ቢታ ኤፎሶና። ኬꬃይ ኬፀት ስምኮ ኤንቲ ሄ ዳቹዋ እያዉ ጊግዳ በሳን ዎꬃና” ያግስ።
ZEC 6:1 ቃስ ታኒ ꬎቁ ጋዳ ፄልያ ዎደ ኦይዱ ፓራ ጋረት ናምኡ ናሰ ብራታ ደረታፐ ግዶራ የይሳታ በአስ።
ZEC 6:2 ኮይሮ ጋርያ ዞኦ ፓራት ጎቾሶና፤ ናምአንꬆ ጋርያ ካሬꬃ ፓራት ጎቾሶና።
ZEC 6:3 ሄꬓንꬆ ጋርያ ቦꬃ ፓራት ጎቾሶና፤ ኦይዳንꬆ ጋርያ ዋንጮ ፓራት ጎቾሶና።
ZEC 6:4 ታኒ ኪታንቹዋኮ፥ “ታ ጎዳዉ፥ ሀይሳቲ አይቤ?” ያጋዳ ኦይቻስ።
ZEC 6:5 ኪታንቾይ ዛሪድ፥ “ሀይሳቲ ቢታ ኡባ ጎዳ ስንꬃን ኤቅድ ኦꬅያ ኦይዱ ሳሎ ጫርኮታ።
ZEC 6:6 ካሬꬃ ፓራት ጎችያ ጋረይ ፑደሀ ባጋ ቢታ ቤስ፤ ቦꬃ ፓራት ጎችያ ጋረይ ዉሎሀ ባጋ ቤስ፤ ዋንጮ ፓራት ጎችያ ጋረይ ዱገሀ ባጋ ቤስ” ያግስ።
ZEC 6:7 ሄ ፓራት ቢታ ዎቻናዉ ከይዳ ዎደ ገደ ሃ ፓችፓሮሶና። ኪታንቾይ ኤንታኮ፥ “ብድ ቢታ ኡባ ዩይድ ዎችተ” ያግስ። ኤንቲ ብድ ቢታ ኡባ ዩይድ ዎችዶሶና።
ZEC 6:8 ሄሳፈ ጉየ፥ ኪታንቾይ ባ ቃላ ꬎቁ ኦꬅድ፥ “ሄኮ፥ ፑደሀ ባጋ ቢታ ብዳ ፓራት ታ አያና ሄ ቢታን ሸምፕስዶሶና” ያግስ።
ZEC 6:9 ጎዳ ቃላይ ታኮ ሀይሳዳ ያግሸ ይስ፦
ZEC 6:10 “ባብሎነ ድኤተꬃፈ ስምዳ ሄልዳይ፥ ፆበይነ ያዳይ እምያ ብራነ ዎርቃ እሞታ ኤካዳ ሄ ጋላስ ሶፎንያሳ ናኣ እዮስያሳ ሶ ባ።
ZEC 6:11 ኤንታፈ ኤክዳ ብራፐነ ዎርቃፈ ካላቻ መꬋዳ እዮሳደቃ ናኣ፥ ካህነ ሀላቃ እያሱ ሁጰን ዎꬃ።
ZEC 6:12 ኡባፈ ዎልቃማ ጎዳይ ሀይሳዳ ያጌስ ጋዳ እያዉ ኦዳ፦ ሄኮ፥ ታሸይ ባ በሳን ዳያ ግሾነ እ ፆሳ ኬꬃ ኬፅያ ግሾ፥ እያ ሱንꬃይ ‘ታሸ ጌተትዳ አደይ ሀይሳ።
ZEC 6:13 ጎዳ ኬꬃ ኬፃናይ እያ፤ እ ካዎተꬃ ማኡዋ ማእድ፥ አራታን ኡትድ ሃራና። ቃስ እያ አራታ ማታን እስ ካህነይ ኤቃና፤ ኤንታ ናምኣ ግዶን እስፈተꬅ ዳና።’
ZEC 6:14 ሄ ካላቻይ ሄልዳያ፥ ፆቢያ፥ ያዳያነ ሶፎንያሳ ናኣ እዮስያሳ ቆፍሶ ግድድ፥ ጎዳ ፆሳ ኬꬃን ዳና” ያግስ።
ZEC 6:15 ሄ ዎደ ሃሆ በሳን ደእያ አሳት ጎዳ ኬꬃ ኬፅድ ማዳናዉ ያና። ኡባፈ ዎልቃማ ጎዳይ ታና ህንተኮ ኪትዳይሳ ህንተ ሄሳን ኤራና። ጎዳስ፥ ህንተ ፆሳስ ህንተ ፖሎ ኪተትኮ ሄስ ሀናና።
ZEC 7:1 ዳርዮስ ካዎትዳ ኦይዳንꬆ ላይꬃን፥ ክሲላ ጌተትያ ኡዱፉንꬆ አጌናን፥ ኦይዳንꬆ ጋላሳን፥ ዛካርያሳኮ ይዳ ጎዳ ቃላይ ሀይሳ።
ZEC 7:2 ቤተለ ካታማ አሳይ ሳረዜራ፥ ረገም-መለካነ ኤንታራ እስፈ ደእያ አሳታ ጎዳ አንጆይ ያና መላ ዎሳናዉ ኪትዶሶና።
ZEC 7:3 ቃስ ኡባፈ ዎልቃማ ጎዳ ኬꬃን ኦꬅያ ካህነታነ ናበታ፥ “ዳሮ ላይꬅ ኦꬅሸ ጋምእዳይሳዳ ኑኒ ሀእካ እቻሻንꬆ አጌናን ዬካናዉነ ፆማናዉ በሲ?” ያግድ ኦይቻና መላ ኪትዶሶና።
ZEC 7:4 ሄሳፈ ጉየ፥ ኡባፈ ዎልቃማ ጎዳ ቃላይ ሀይሳዳ ያግድ ታኮ ይስ፦
ZEC 7:5 “ቢታን ደእያ አሳ ኡባስነ ካህነታስ ሀይሳዳ ያጋዳ ኦዳ፦ ‘ህንተ ሀ አꬍዳ ላፑን ታሙ ላይꬃን እቻሻንꬆ አጌናንነ ላፑንꬃ አጌናን ፆምዳይነ ዬክዳይ ታና ቦንቻናሴ?
ZEC 7:6 ህንተ ምያ ዎደነ ኡያ ዎደ ህንተዉ ሜታነ ኡዬታ።
ZEC 7:7 የሩሳላመ ካታማይነ እያ ዩሹዋን ደእያ ካታማታን ደእያ አሳይ ሸምፖንነ እንጀን ደእዳ ዎደነ ነገባንነ ጋꬋን አሳይ ዎፑ ግድ ደእዳ ዎደ ጎዳይ ባ ናበታ ባጋራ ኦድዳ ቃላይ ሀይሳ ግደኔ?’ ያጋ” ያግስ።
ZEC 7:8 ጎዳ ቃላይ ዛካርያሳኮ ሀይሳዳ ያግድ ይስ፦
ZEC 7:9 “ኡባፈ ዎልቃማ ጎዳይ ካሰ እምዳ ኪታይ፥ ‘ሱረ ፕርዳ ፕርድተ፤ ህንተ እሶይ እሱዋስ ኬሀተꬅነ ማሮተꬅ ኦꬅተ።
ZEC 7:10 አምኤታ፥ ይኦታ፥ በተ አሳነ ማንቆታ ናቆፍተ። ቃስ ህንተፈ ኦንካ ባ እሻ ቦላ ኢታባ ኦꬃናዉ ባ ዎዛናን ቆፖፎ።’
ZEC 7:11 “ሽን ኤንቲ ስኦና እፅዶሶና፤ ዞኮ ዛሪድ ባንታ ሀይꬃ ቱጭዶሶና።
ZEC 7:12 ኡባፈ ዎልቃማ ጎዳይ ባ አያናን ካሰ ባ ናበታ ባጋራ ኪትዳ ህግያነ ቃላ ስኦና እፅድ ባንታ ዎዛና ዛላዳ ምንꬅዶሶና። ሄሳ ግሾ፥ ኡባፈ ዎልቃማ ጎዳ ማታፐ ግታ ሀንቆይ ኤንታ ቦላ ይስ።
ZEC 7:13 ታኒ ፄግያ ዎደ ኤንቲ ስኦና እፅዳይሳዳ ኤንቲ ፄግያ ዎደ ታኒ ስእከ” ያጌስ ኡባፈ ዎልቃማ ጎዳይ።
ZEC 7:14 “ታኒ ጎተ ኤሀዳ ኤንቲ ኤሮና ካዎተꬃታ ግዶን ላላስ። ቢታይ አስ ያነ ሃነ ስመረቶና ካይሳ ቢታ ግድስ፤ ሀ ሎኦ ቢታይ ባይሳ ግድስ” ያጌስ ኡባፈ ዎልቃማ ጎዳይ።
ZEC 8:1 ኡባፈ ዎልቃማ ጎዳ ቃላይ ቃስካ ታኮ ሀይሳዳ ያግድ ይስ፦
ZEC 8:2 ኡባፈ ዎልቃማ ጎዳይ፥ “ታኒ ፅዮነስ ዳሮ ቃታይስ፤ እ ምሻይ ታና ፁጌስ።
ZEC 8:3 ታኒ ፅዮነ ስማዳ የሩሳላመን ዳና። ቃስ የሩሳላመይ አማንꬅያ ካታማ ጌተታዳ ኤረታና። ኡባፈ ዎልቃማ ጎዳ ዙማይ ጌሻ ዙማ ጌተትድ ፄገታና” ያጌስ።
ZEC 8:4 ኡባፈ ዎልቃማ ጎዳይ፥ “ጭምድ ጉፈራ ብያ አደይነ ማጫሳይ ካሰይሳዳ የሩሳላመ ዳባባን ኡታና።
ZEC 8:5 የሩሳላመ ካታማ ኦገት ካእያ አደነ ማጫ ናይታን ኩማና” ያጌስ።
ZEC 8:6 “አትዳ አሳስ ሄስ ማላልስያባ ግድኮካ፥ ታና ሄስ ማላልስያባዬ? ያጌስ ኡባፈ ዎልቃማ ጎዳይ።
ZEC 8:7 ሄኮ ታኒ ታ አሳ ዶሎሀፐነ ዉሎሀፐ ሺሻና።
ZEC 8:8 ኤንቲ የሩሳላመን ዳና መላ ኦꬃና። ኤንቲ ታ አሰ ግዳና፤ ታኒ ፅሎነ አማንꬅያ ኤንታ ፆሳ ግዳና” ያጌስ ኡባፈ ዎልቃማ ጎዳይ።
ZEC 8:9 ኡባፈ ዎልቃማ ጎዳይ ሀይሳዳ ያጌስ፦ “ህንተኖ፥ ኡባፈ ዎልቃማ ጎዳ ኬꬃ ባሶይ የገትዳ ጋላሳፐ ዶምድ ናበት ኦድዳ ቃላ ስእዳይሳቶ፥ ህንተ ኩሽያ ምንꬅተ፤ ኦሱዋ ምንድ ፖልተ።
ZEC 8:10 ሄ ዎድያፐ ካሰ አሳስ ዳሞዘይ፥ መህያስ ቃንፀትያ ከር ባዋ። ታኒ አሳ ኡባ እሱዋ እሱዋ ቦላ ሞርከተꬃን ደንꬅዳ ግሾ፥ ገለይሳስነ ከየይሳስ ሳሮይ ባዋ።
ZEC 8:11 ሽን ሀእ ታኒ ሀ አትዳ አሳ ቦላ ካሰ ኦꬅዳይሳዳ ኦꬅከ” ያጌስ ኡባፈ ዎልቃማ ጎዳይ።
ZEC 8:12 “ኤንቲ ዘርዳ ኡባይ ዶላና፤ ዎይነይ ባ አይፍያ እማና፤ ጎሻይ ካꬃን ኩማና፤ ሳሎት ባንታ እራ እማና። ሀይሳ ኡባ አትዳ አሳስ ላታ ኦꬃዳ እማና።
ZEC 8:13 ህንተኖ፥ ይሁዳ አሳዉ፥ እስራኤለ አሳዉ፥ ካዎተꬃታ ግዶን ህንተ ባደትዳይሳታ ግድደታ፥ ሽን ሀእ ታኒ ህንተና አሻና፤ ህንተ አንጀትዳይሳታ ግዳና። ያዮፍተ! ህንተ ኩሽያ ምንꬅተ!” ያጌስ።
ZEC 8:14 “ህንተ ማይዛት ታና ይሎይዳ ዎደ ኤንታ ቃይ ባይና ሴራናዉ ቆፋ ቃቻስ።
ZEC 8:15 ሀእ ታኒ የሩሳላመስነ ይሁዳስ ሎኦባ ኦꬃናዉ ቆፋ ቃቻስ። ህዛ ያዮፍተ!
ZEC 8:16 ህንተ ኦꬃናዉ ኮሽያባይ ሀይሳ፦ እሶይ እሱዋራ ቱማ ኦደትተ፤ ፕርዳ ዳባባን ቱማነ ሳሩዋ ኤህያ ፕርዳ ፕርድተ።
ZEC 8:17 እሶይ እሱዋ ቆሀናዉ ኢታባ ህንተ ዎዛናን ማቀቶፍተ፤ ዎርዶን ጫቆፍተ። ሀይሳታ ኡባ ታኒ እፃይስ” ያጌስ ኡባፈ ዎልቃማ ጎዳይ።
ZEC 8:18 ኡባፈ ዎልቃማ ጎዳ ቃላይ ቃስካ ታኮ ሀይሳዳ ያግድ ይስ፦
ZEC 8:19 “ኦይዳንꬆ፥ እቻሻንꬆ፥ ላፑንꬆነ ታማንꬆ አጌናን ህንተ ፆምዳ ፆማይ ይሁዳ አሳስ ኡፋይስነ እንጀ ዎደ ግዳና። ሄሳ ግሾ፥ ህንተ ቱማተꬅነ ሳሮተꬅ ዶስተ” ያጌስ።
ZEC 8:20 “ዳሮ አሳይነ ዳሮ ካታማታን ደእያ አሳይ የሩሳላመ ያና።
ZEC 8:21 እስ ካታማን ደእያ አሳይ ሀራ ካታማን ደእያ አሳኮ ብድ፥ ‘ጎዳ አንጆይ ያና መላ ዎሳናዉነ ኡባፈ ዎልቃማ ጎዳ ኮያናዉ አነ ቦስ፤ ታንካ ባይስ’ ያጋና።
ZEC 8:22 ቃስ ዳሮ አሳይነ ዎልቃማ ካዎተꬃት ኡባፈ ዎልቃማ ጎዳ ኮያናዉነ ዎሳናዉ የሩሳላመ ያና።
ZEC 8:23 ሄ ጋላሳታን ዱማ ዱማ ቃላን ሃሳያ ካዎተꬃታ ኡባፈ ታሙ አሳት ይድ፥ እስ አይሁደ አድያ ማኡዋ ማጫራ ኦይክድ፥ ‘ፆሳይ ህንተራ ደኤይሳ ኑኒ ስእዳ ግሾ፥ ኑኒ ህንተራ ባና’ ያጋና” ያጌስ ኡባፈ ዎልቃማ ጎዳይ።
ZEC 9:1 አሳ አይፈይነ እስራኤለ አሳ ኡባ አይፈይ ጎዳ ፄልያ ግሾ፥ ሳድራካ ቢታይነ ዳማስቆ ካታማይ ꬋያናይሳ፥ ጎዳይ ኦድዳ ፕርዳ ቃላይ ሀይሳ።
ZEC 9:2 ቃስ ሀ ፕርዳይ ሀድራካ ዛዋ ግድዳ ሀማታ ካታማነ ቃራ ግድዳ ፅሮሳነ ስዶና ካታማታ ቦላ ሀ ፕርዳይ ጋካና።
ZEC 9:3 ፅሮሳ ካታማይ ባዉ ምኖ ሚፃ ግምብስ። ቃስ ብራነ ዎርቃ ቢታዳ ዶርስ።
ZEC 9:4 ሽን እ ሺሽዳባ ኡባ ጎዳይ ኤካና፤ እያ ሻሉዋ አባን ሆላና፤ ካታማይ ታማን ሜተታና።
ZEC 9:5 አስቃሎና ካታማይ ሄሳ በእድ ያያና፤ ጋዛ ካታማይ ኡንኤታና፤ ኤቅሮና ካታማይ ኡፋይስ ꬋያና። ጋዛ ካዎይ ꬋያና፤ አስቃሎና ካታማይ ካይሳ ግዳና።
ZEC 9:6 አሽዶዳ ካታማን ዋላሀ አሳይ ዳና። ጎዳይ ሀይሳዳ ያጌስ፦ “ፍልስፄመታ ኦቶሩዋ ታኒ ዉርሳና።
ZEC 9:7 ታኒ ኤንታ ዶናፐ ሱꬅ፥ ኤንታ አቻፈ ቱናባ ድጋና። ኤንታፈ አትዳይሳት ኑ ፆሳ አስ ግዳና፤ ቃስ ይሁዳ ያራፐ እሱዋ ግዳና። ኤቅሮና አሳይ ያቡሰ አሳዳ ታ አሰ ግዳና።
ZEC 9:8 ሄሳፈ ጉየ፥ ኦላንቾት ኦይኮናዳ፥ ታኒ ታ ኬꬃ ናጋና። ታኒ ታ ሁጰን ናግያ ግሾ፥ ዛሪድ ኦንካ ታ አሳ ኡንኤና” ያጌስ።
ZEC 9:9 ነኖ፥ ፅዮነ ካታመ፥ ኡፋይታ! ነኖ፥ የሩሳላመ ካታመ፥ እልላ! ሄኮ፥ ፆንዳ ነ ፅሎ ካዎይ ኔኮ ዬስ። ነ ካዎይ አሽከ ግድድ፥ ሀረ ቦላ፥ አꬍድ ሀረ ማራ ቦላ ኡትድ ኔኮ ዬስ።
ZEC 9:10 ታኒ ፓራ ጋረታ እስራኤለፐ፥ ኦላ ፓራታ የሩሳላመፐ ꬋይሳና፤ ኦላ ዶንግያ መንረꬃና። ነ ካዎይ ካዎተꬃታስ ሳሮ አዋጃና፤ እ አባስ ጋፃፐ ህን ጋፃ ጋካናዉ ኤፍራፂሳ ሻፋፐ ዶምድ ሳኣ ጋፃ ጋካናዉ ሃራና።
ZEC 9:11 ታኒ ኔራ ሱꬃ ጫቁዋ ግሾ፥ ቃሸትዳ ነ አሳታ ሃꬅ ባይና ኦላፈ ከሳና።
ZEC 9:12 ህንተኖ፥ ስንꬃን ኡፋይስ ደእያ ቃሾ አሳቶ፥ ህንተ ሚፃ ስምተ። ካሰይሳ ግሾ ዳኮ ሻሎ ህንተዉ እማናይሳ ሀች ታኒ ህንተዉ አዋጃይስ።
ZEC 9:13 ታኒ ይሁዳ ዶንገዳ፥ እስራኤለ ዶንገ ቶራዳ ጎኤታና። ፅዮነ፥ ታኒ ነ ናይታ ግርከ ናይታ ቦላ ደንꬃና፤ ነና ዎልቃማ ኦላንቹዋ ማሻ መላ ኦꬃና።
ZEC 9:14 ሄ ዎደ ጎዳይ ኤንታ ቦላ ቆንጫና፤ እያ ዶንገ ቶራይ ዎልአንꬃዳ ዎልአማና። ኡባ ሃርያ ጎዳይ ሞይዘ ፑናና፤ ዱገሀ ባጋ ጎተዳ ደንዳና።
ZEC 9:15 ኡባፈ ዎልቃማ ጎዳይ ኤንታ ግሾ ኦለታና። ኤንቲ ባንታ ሞርከታ ዉርሳና፤ ያምባርሻን ኦለይሳታ የꬋና። ኤንቲ ባንታ ሞርከታ ሱꬃ ዎይነ ኡሻዳ ኡያና፤ ሱꬅ ከረን ኩምያዳ ኩማና፤ ኤንቲ ያርሾ በሳን ጉክያ ሱꬃዳ ጉካና።
ZEC 9:16 ሄ ጋላስ ሄንꬃንቾይ ባ ዶርሳታ አሸይሳዳ ጎዳይ ኤንታ ፆሳይ ኤንታ አሻና። ካላቻ ቦላ ደእያ አሌቆዳ ኤንቲ ጎዳ ቢታን ጶላና።
ZEC 9:17 ኤንቲ ዋንድ ሎኦነ ፑላንቾ ግዳንደሻ! ናአተꬃ ናይታ ካꬃይ፥ ጌላኦ ናይታ ዎይነ ኡሻይ አጭሳና።
ZEC 10:1 ባልጎይ ጋክያ ዎደ ጎዳይ እራ እማና መላ ዎስተ። ጎዳይ እራ ቶክዳ ሻራ ኪቴስ፤ አሳስ እራ እሜስ፤ ጎሻን አታክልተ ዶልስስ።
ZEC 10:2 ኤቃት ሀዳባ ኦዶሶና፤ ማሮት ዎርዶ ቆንጨꬅ በኦሶና፤ አሙሄይሳት ዎርዶ አሙሆ ኦዶሶና፤ ሀዳ ምንꬆ ምንꬆሶና። ሄሳ ግሾ፥ አሳይ ꬋይዳ ዶርሳዳ ቶይላቶሶና፤ ኤንታ ሄምያ አስ ባይና ግሾ፥ ኤንቲ ቆሄትዶሶና።
ZEC 10:3 ጎዳይ ሀይሳዳ ያጌስ፦ “ታ ሀንቆይ ሄንꬃንቾታ ቦላ ኤፅ ከይስ፤ ሄ ካለይሳታ ታኒ ሴራና። ኡባፈ ዎልቃማ ጎዳይ ባ ዉድያ ይሁዳ ሄሜስ። እ ኤንታ ኦላስ ጊግዳ ዎልቃማ ፓራ መላ ኦꬃና።
ZEC 10:4 ይሁዳ አሳ ግዶፈ ቁስተ ሹቻ መላ፥ ዱንካነ ꬍሸ መላነ ኦላ ቶራ መላ ሀንዳ ካለይሳት ከያና።
ZEC 10:5 ባንታ ሞርከታ ኦግያ ኡርቃዳ የꬍያ ምኖ ኦላንቾታ መላ ግዳና። ጎዳይ ኤንታራ ደእያ ግሾ፥ ኤንቲ ኦለትድ ፆናና።
ZEC 10:6 “ታኒ ይሁዳ አሳ ምንꬃና፤ ዮሰፋ አሳ አሻና። ታኒ ኤንታዉ ቃትያ ግሾ፥ ኤንታ ዛራዳ ኤሀና። ኤንቲ ታኒ ካሰካ ኤንታ የጋቦና አሳ መላ ግዳና። ታኒ ጎዳ ኤንታ ፆሳ ግድያ ግሾ፥ ኤንታ ዎሳ ስአና።
ZEC 10:7 እስራኤለ አሳይ ምኖ ኦላንቾ መላ ግዳና፤ ዎይነ ኡይዳ አሳዳ ኤንታ ዎዛናይ ኡፋይታና። ኤንታ ናይት ሄሳ በእድ፥ ሀሹ ጋና፤ ኤንታ ዎዛናይ ጎዳን ኡፋይታና።
ZEC 10:8 “ታኒ ታ አሳ ሱይቃዳ ፄጋና፤ ኤንታ እስፈ ሺሻና። ታኒ ኤንታ ዎዛና፤ ኤንቲ ካሰይሳዳ ዳራና።
ZEC 10:9 ታኒ ኤንታ ካዎተꬃታ ግዶን ላልኮካ ኤንቲ ባንታ ደእያ ሃሆ ቢታን ግድድ ታና ሀሳያና። ቃስ ኤንትነ ኤንታ ናይቲ ደኦን ዳናነ ባንታ ቢታ ስማና።
ZEC 10:10 “ታኒ ኤንታ ግብፀ ቢታፈ ዛራና፤ አሶረ ቢታፈ ኤንታ ሺሻና። ኤንታዉ ኡትያ በሲ ꬋያና ጋካናዉ ታኒ ኤንታ ጋላዳ ቢታንነ ልባኖሰ ቢታን ኩንꬃና።
ZEC 10:11 ኤንቲ መቶ አባ ግዶራ አꬍያ ዎደ ታኒ ጎዳይ አባ ሴራና። ጪሞ ግድዳ ናይለ ሻፋይ መላና። አሶረ ቢታ ኦቶሮይ ካዉያና፤ ግብፀ ካዎተꬃ ፃምአይ መቃና።
ZEC 10:12 ታኒ፥ ኤንታ ጎዳይ ኤንታ ምንꬃና፤ ኤንቲ እያ ሱንꬃን ሄመታና። ታኒ ጎዳይ ሀይሳ ኦዳይስ” ያጌስ።
ZEC 11:1 ነኖ፥ ልባኖሰ፥ ታም ነ ዝጋታ ማና መላ፥ ነ ፐንገታ ዶያ!
ZEC 11:2 ነኖ ፂዳዉ፥ ዝጋይ ኩንድዳ ግሾ፥ ቦንቾ ምꬃት ꬋይዳ ግሾ፥ ዪ ጋዳ ዬካ! ህንተኖ ባሳና ዎላቶ፥ ሄ ስከትዳ ዎራይ ማንኤትዳ ግሾ፥ ዪ ግድ ዬክተ።
ZEC 11:3 ኤንታ ሎኦ ሄንꬃ በሳይ ꬋይዳ ግሾ፥ ሄንꬃንቾታ ዘለልሳ ስእተ፤ ዮርዳኖሰ ዎራይ ꬋይዳ ግሾ፥ ጋሞት ጉደይሳ ስእተ።
ZEC 11:4 ጎዳይ ታ ፆሳይ ታኮ ሀይሳዳ ያግስ፦ “ሹከታናዉ ደእያ ዶርሳ ዉድያ ሄማ።
ZEC 11:5 ኤንታ ሻመይሳት ሹኮሶና፤ ሽን ሴረቶኮና። ባይዘይሳት፥ ‘ኑኒ ዱረትዳ፤ ጎዳይ ጋላተቶ’ ያጎሶና፤ ሀር አቶሽን፥ ኤንታ ሄንꬃንቾት ኤንታዉ ቃቶኮና” ያግስ።
ZEC 11:6 ጎዳይ ሀይሳዳ ያጌስ፦ “ታኒ ህዛፐ ጉየ ሀ ቢታን ደእያ አሳስ ቃትከ። ታኒ እስ እስ አሰ እያ ሾሩዋስነ እያ ካዋስ አꬃዳ እማና። ኤንቲ ቢታ ꬋይሳና፤ ታኒ እስ አስካ ኤንታ ኩሽያፐ አሽከ” ያጌስ።
ZEC 11:7 ሄሳ ግሾ፥ ታኒ ሹከታናዉ ደእያ ዶርሳታ፥ አꬃዳ ቃስ ዉድያ ግዶን ኡንኤትዳይሳታ ሄመይሳ ግዳስ። ያታዳ ዶርሳታ ሄማናዉ ናምኡ ፃምአታ ኤካዳ፥ እሱዋ “ዶሰትዳይሳ” ጋዳ ፄጋስ፤ ናምአንꬁዋ “እስፈተꬅ” ጋዳ ፄጋስ።
ZEC 11:8 ታኒ እስ አጌናን ሄꬑ ሄንꬃንቾታ ꬋይሳስ። ኤንታ ሀኖተꬃይ ታዉ ዳንዳኤተና፤ ኤንትካ ታና እፅዶሶና።
ZEC 11:9 ያታ ስማዳ ታ ዶርሳታኮ፥ “ታኒ ህንተና ናምአንꬆ ሄምከ፤ ሀይቀይስ ሀይቆ፤ ꬋየይስ ꬋዮ፤ አትዳይሳት እሶይ እሱዋ ሞ” ያጋስ።
ZEC 11:10 ሄሳፈ ጉየ ታኒ “ዶሰትዳይሳ” ጌተትያ ፃምአ ኤካዳ መንꬃስ። ሄሳ ታ ኦꬅዳይ ካዎተꬃታራ ገልዳ ጫቆይ ዱፅዳይሳ በሳናሳ።
ZEC 11:11 ሄ ጋላስ ጫቆይ መእስ፤ ሄ ዎደ ዶርሰ ሻመይሳትነ ባይዛይሳት ታና በእድ፥ ሄስ ጎዳ ቃላ ግደይሳ ኤርዶሶና።
ZEC 11:12 ታኒ፥ “ህንተ ዶስኮ ታ ዳሞዝያ እምተ፤ እፃስ ጊኮ አጋግተ” ያጋስ። ያትን ኤንቲ ታዉ ሀስታሙ ብራ ሳንትመ እምዶሶና።
ZEC 11:13 ጎዳይ ታኮ፥ “ኤንቲ እምዳ ቦንቾ ሚሽያ ኤፋዳ ፆሳ ኬꬃን ደእያ ኦቱዋን የጋ” ያግስ። ታኒ ሄ ሚሽያ ኤፋዳ ፆሳ ኬꬃን ደእያ ኦቱዋን የጋስ።
ZEC 11:14 ሄሳፈ ጉየ፥ ታኒ ይሁዳስነ እስራኤለስ ግዶን ደእያ እሻተꬃይ ꬋይዳይሳ በሳናዉ “እስፈተꬅ” ጌተትያ ታ ናምአንꬆ ፃምኣ መንꬃስ።
ZEC 11:15 ቃስካ ጎዳይ ታና፥ “ናምአንꬆ ባዳ ፓꬆና ሄንꬃንቾታ ሚሽያ ኤካ።
ZEC 11:16 ታኒ ሀ ቢታን እስ ሄንꬃንቾ ደንꬃና። እ ቆሄትዳ ዶርሳታ ማደና፤ ላለትዳ ዶርሳታ ሺሸና፤ መቅዳ ዶርሳታ ኮለና፤ ፓፃ ደኤይሳታ ሄመና። ሽን እ ሄሳ አግድ፥ ሞꬎታ ሹክድ ሜስ፤ ኤንታ ኮልዝያ ꬎጌስ።
ZEC 11:17 ዶርሳ ዉድያ የግ ꬋይዳ ሄ ፓꬆና ሄንꬃንቾታ አየ! እያ ቀስያነ እያ ኡሻቻ አይፍያ ቦላ ማሽ ዎꬎ። እያ ኡሻቻ ኩሸይ ስሎ፤ እያ ኡሻቻ አይፈይ ቆቆ” ያግስ።
ZEC 12:1 ሳሎታ ምጭዳይ፥ ሳኣ መꬍዳይ፥ አሳስ ደኦ አያና እምዳ ጎዳይ እስራኤለባ ኦድዳ ጎዳ ቃላይ ሀይሳ፦
ZEC 12:2 “ሄኮ፥ ታኒ የሩሳላመ ካታማ፥ እያ ዩሹዋን ደእያ አሳ ኡባይ ኡይን ጋንድጋርስያ ዎይነ ኡሽ ትግያ ዋንጫ ኦꬃና። የሩሳላመይ ኦይከትያ ዎደ ይሁዳ ካታማት ኦይከታና።
ZEC 12:3 ሄ ዎደ ታኒ የሩሳላመ ካታማ አሳ ኡባስ ዴፆ ሹቹ ኦꬃና፤ እያ ደንꬅያ ኡባይ ባዉ ደሸታና። ሳኣ ካዎተꬃት ኡባይ እያ ኦላናዉ እስፈ ሺቃና።
ZEC 12:4 ሄ ዎደ ታኒ ፓራ ኡባ ዳጋንꬃና፤ ፓራ አሳታ ጎሻና።” ታኒ ጎዳይ ሀይሳ ኦዳይስ። ይሁዳ አሳ ታኒ ታ ኬሀ አይፈን ፄላና፤ ሽን ሞርከታ ፓራታ ኡባ ቆቅሳና።
ZEC 12:5 ሄ ዎደ ይሁዳ ሀላቃት ባንታ ዎዛናን፥ “የሩሳላመ አሳይ ኡባፈ ዎልቃማ ጎዳን፥ ባንታ ፆሳን፥ ምኖተꬃ ደምዶሶና” ያጋና።
ZEC 12:6 “ሄ ዎደ ታኒ ይሁዳ ኮቻታ ምꬃ ዶርያ ግዶን ደእያ ፂፋነ ምርቄታ ግዶን ላፅያ ፆምፐ ኦꬃና። ኤንቲ ባንታ ኡሻቻን፥ ባንታ ሀድርሳንነ ባንታ ዩሹዋን ደእያ አሳ ኡባ ማና፤ ሽን የሩሳላመ ካታማይ፥ አሳይ ሳሮ ደእያ በሲ ግዳና።
ZEC 12:7 “ዳዊታ ኮቻታ ቦንቾይነ የሩሳላመን ደኤይሳታ ቦንቾይ ይሁዳ አሳ ቦንቹዋፈ አꬎና መላ ታኒ ጎዳይ ካሰታዳ ይሁዳ አሳስ ፆኖ እማና።
ZEC 12:8 ሄ ዎደ ኤንታ ግዶን ዳሮ ላፋ ጌተትያ አስ ዳዊታ መላ ምኖ ግዳና። ታኒ ጎዳይ የሩሳላመን ደኤይሳታስ ጎንዳለ ግዳና። ዳዊታ ኮቻት ፆሳ መላ፥ ጎዳ ኪታንቾ መላ ግድድ ኤንታ ካለꬃና።
ZEC 12:9 ሄ ዎደ ታኒ የሩሳላመ ኦላናዉ ደንድያ ካዎተꬃታ ኡባ ꬋይሳናዉ ደንዳና።
ZEC 12:10 “ሄ ዎደ ታኒ ዳዊታ ኮቻታ ቦላነ የሩሳላመን ደእያ አሳ ቦላ ቃነ ዎሳ አያና ጉሳና። ሄሳ ግሾ፥ ኤንቲ ባንታ ጫድዳይሳ በእያ ዎደ አስ ባ እስ ናአስ ዬከይሳዳ ዬካና። ቃስ ባ ባይራ ናአስ ካዮተይሳዳ ካዮታና።
ZEC 12:11 ሄ ዎደ የሩሳላመን ዬከትያ ዬሆይ ማግዶ ደንባን ሀዳድ-ርሞናስ ዬከትዳ ዬሁዋ መላ ዎልቃማ ግዳና።
ZEC 12:12 ቢታን ደእያ እስ እስ ኮቻይ ባዉ ባዉ ዬካና፤ ዳዊታ ኮቻት ባንታ ማቸታራ፥ ናታና ኮቻት ባንታ ማቸታራ ባንታዉ፥
ZEC 12:13 ሌወ ኮቻት ባንታ ማቸታራ ባንታዉ፥ ሳመአ ኮቻት ባንታ ማቸታራ ባንታዉ፥ ዬካና።
ZEC 12:14 አትዳ ኮቻ ኡባይ ባዉ ባዉ ዬካና፤ ኤንታ ማቸት ባንታዉ ባንታዉ ዬካና” ያጌስ።
ZEC 13:1 ኡባፈ ዎልቃማ ጎዳይ ሀይሳዳ ያጌስ፦ “ሄ ዎደ ዳዊታ ኮቻታነ የሩሳላመን ደኤይሳታ ናጋራፐነ ቱናተꬃፈ ጌሽያ ፑልቶይ ꬉቃና።
ZEC 13:2 ሄ ዎደ ታኒ ኤንቲ ናምአንꬆ ቆፈቶና መላ ኤቃታ ሱንꬃ ቢታፈ ꬋይሳና። ቃስ ናበታነ ቱና አያናታ ቢታፈ ꬋይሳና። ታኒ ኡባፈ ዎልቃማ ጎዳይ ሀይሳ ኦዳይስ።
ZEC 13:3 ቃስ ኦንካ፥ ታኒ ናበ ጊኮ፥ እያ አዋነ አይያ እያ፥ ‘ኔኒ ጎዳ ሱንꬃን ዎርዶ ኦድያ ግሾ፥ ሀይቃናዉ በሴስ’ ያጋና። እ ትንብተ ኦድያ ዎደ እያ አዋይነ አይያ እያ ጫድድ ዎꬋና።
ZEC 13:4 ሄ ዎደ ታኒ ናበ ግያ ኦንካ ባ በእዳ ቆንጨꬃን ዬላታና። ቃስ አሰ ጭማናዉ እክሰይ ደእያ ማኦ ማኤና።
ZEC 13:5 ሽን እ፥ ‘ታኒ ናበ ግድከ፤ ናአተꬃፈ ዶማዳ ቢታ ኦꬅያ አስ’ ያጋና።
ZEC 13:6 እስ አስ፥ ‘ያትን፥ ሀ ነ ቦላ ደእያ ማዱንꬃይ አይቤ?’ ያግድ ኦይችኮ፥ እ፥ ‘ሀይስ ታኒ ታ ላገታ ሶን ማዱንፅዳይሳ’ ያጋና” ያጌስ።
ZEC 13:7 “ማሻዉ ደንዳ፥ ታዉ ማታ ግድዳ ታ ዶርሳታ ሄንꬃንቹዋ ቦላ ባርካ! ዶርሳት ላለታና መላ ሄንꬃንቹዋ ዎꬋ። ታኒ ጉꬃ ዶርሳታ ቦላ ታ ኩሽያ ደንꬃና” ያጌስ ኡባፈ ዎልቃማ ጎዳይ።
ZEC 13:8 “ቢታ ኡባን ደእያ ሄꬑ ኩሸ አሳፐ ናምኡ ኩሸይ ሾጨትድ ሀይቅን፥ እስ ኩሸ ፃላል አታና። ታኒ ጎዳይ ሀይሳ ኦዳይስ።
ZEC 13:9 ሀ አትዳ ስኮ አሳ ታኒ ታማን የጋና፤ ብር ታማን ጌያዳ ኤንታ ጌሻና፤ ዎርቀይ ፓጨትያዳ ፓጫና። ሄሳፈ ጉየ፥ ኤንቲ ታ ሱንꬃን ዎሳና፤ ታኒ ኤንታ ስአና። ታኒ ኤንታ፥ ‘ታ አሰ’ ጋና፤ ኤንቲ፥ ጎዳይ፥ ‘ኑ ፆሰ’ ያጋና” ያጌስ።
ZEC 14:1 ሄኮ፥ ጎዳ ፕርዳ ጋላሳይ ዬስ፤ ሄ ዎደ ህንተ ፄልሽን፥ ህንተፈ ቦንቅዳባ ህንተ ስንꬃን ሻከታና።
ZEC 14:2 ካዎተꬃታ ኡባ ጎዳይ የሩሳላመ ቦላ ኦላስ ሺሻና። ካታማይ ኦይከታና፤ ኬꬃይ ቦንቀታና፤ ማጫ አሳ ዎልቃን ኢሳና። ካታማ አሳፐ ባጋይ ድኤትድ ባና፤ ሽን አትዳ አሳይ ካታማፐ ከየና።
ZEC 14:3 ሄሳፈ ጉየ ጎዳይ ከይድ፥ ካሰ ኦላ ጋላስ ኦለተይሳዳ ካዎተꬃታ ኦላና።
ZEC 14:4 ሄ ጋላስ እያ ቶሆት የሩሳላመፐ ዶሎሀ ባጋራ ደእያ ሻማሆ ዙማ ቦላ ኤቃና። ሻማሆ ደረይ ዶሎሀፐ ዉሎሀ ጋካናዉ ናምኡ ከይድ ጳልቀትን፥ ዳሮ ግታ ዛንጋራይ መታና። ዙማፐ ባጋይ ፑደሀ ባጋ፥ ቃስ ባጋይ ዱገሀ ባጋ ሸርእ ጋና።
ZEC 14:5 ሄ ዛንጋራይ ብድ አፄላ ጋካና፤ ህንተ ሄ ዛንጋራራ ባቃት አꬍድ አታና። በን ይሁዳ ካዋ ኦዝያነ ላይꬅ ቢታይ ቃፅን፥ ህንተ ማይዛት ባቃትድ አትዳይሳዳ ህንተ ባቃታና። ሄሳፈ ጉየ፥ ጎዳይ ታ ፆሳይ ባ ጌሻታ ኡባራ እስፈ ያና።
ZEC 14:6 ሄ ዎደ ሜጎይ፥ ሻችነ ꬉም ዴና።
ZEC 14:7 ሄ ዎደ ቃምነ ጋላስ ባዋ፥ ጎዳይ ፃላል ኤርያ ዱማ ጋላስ ግዳና፤ ሄ ጋላስ ቃማይ ፖኦ ግዳና።
ZEC 14:8 ሄ ዎደ ደኦ ሃꬃይ የሩሳላመፐ ጎጋና፤ እያፐ ባጋይ ማፅነ አባን ገላና፤ ቃስ ባጋይ መደትራነ አባን ገላና። ሄ ሃꬃይ ባልጎነ ቦነ ጎግሸ ዳና።
ZEC 14:9 ጎዳይ ቢታ ኡባ ቦላ ካዎታና፤ ሄ ዎደ እስ ጎዳ ፃላል ዳና፤ እያ ሱንꬃ ፃላላ ፄጋና።
ZEC 14:10 ግብአፐ ዶምድ የሩሳላመ ዱገሀ ባጋራ አꬍድ እርሞና ካታማ ጋካናዉ ደእያ ቢታ ኡባይ ደምባታና። ሽን የሩሳላመይ ብንያመ ፐንግያፈ ብድ፥ በን ፐንግያ ግናራ ዞዘ ፐንግያ ጋካናዉ፥ ቃስ ሀናንኤላ አዱሳ ግምብያፈ ብድ፥ ካዎ ዎይነ ጉምእያ በሳ ጋካናዉ ባ በሳን ꬎቁ ግድ ዳና።
ZEC 14:11 የሩሳላመይ አስ ደእያ በሲ ግዳና፤ ህዛፐ ጉየ ꬋየና፤ እያን ደእያ አሳይ ህርግ ባይና ሳሮ ዳና።
ZEC 14:12 ጎዳይ የሩሳላመ ኦላናዉ ደንድዳ አሳ ኡባ ቦላ ጋዶ ኤሀና። ኤንቲ ኤቆን ደእሽን፥ ኤንታ አሾይ ዎቃና፤ ኤንታ አይፈይ ባ ኦላን፥ ኤንታ እንፃርሳይ ባ ኮቶኑዋን ዎቃና።
ZEC 14:13 ሄ ዎደ ጎዳይ ኤንታ ዎልቃማ ዳጋማ ዳጋንꬃና። አሳ ኡባይ እሶይ እሱዋ ኩሽያ ኦይክድ ኦለታና።
ZEC 14:14 ይሁዳ አሳይ የሩሳላመ ባጋ ግድድ ኦለታና። ዩሹዋን ደእያ ካዎተꬃታ፥ ታይቦይ ባይና ሻሉዋ፥ ዎርቃ፥ ብራነ ማኡዋ ድእድ ሺሻና።
ZEC 14:15 ሀ ጋዱዋ ዳንያ ጋዶይ ፓራታ ቦላ፥ ባቁሎታ ቦላ፥ ግማለታ ቦላ፥ ሀረታ ቦላነ ሞርከት ዱንካንዳ በሳን ደእያ መሄ ኡባ ቦላ ያና።
ZEC 14:16 ሄሳፈ ጉየ፥ የሩሳላመ ኦልዳ ካዎተꬃታፐ አትዳ ኡባይ ካዋ፥ ኡባፈ ዎልቃማ ጎዳ ጎይናናዉነ ሻቃራ ባኣለ ቦንቻናዉ ላይꬃን ላይꬃን የሩሳላመ ባና።
ZEC 14:17 ሳአን ደእያ አሳፐ ኦንካ ካዋ፥ ኡባፈ ዎልቃማ ጎዳ ጎይናናዉ የሩሳላመ ቦና እፅኮ፥ ኤንታዉ እር ቡከና።
ZEC 14:18 ግብፀ አሳይ ብድ ጎይኖና እፅኮ፥ ሻቃራ ባኣለ ቦንቻናዉ ቦና እፅዳ አሳ ቦላ ጋክዳ ጋዶይ ኤንታ ቦላ ያና።
ZEC 14:19 ሻቃራ ባኣለ ቦንቻናዉ ቦና እፅዳ ግብፀይነ ሀራ ካዎተꬃት ኡባይ ሴረታና ሴራይ ሀይሳ።
ZEC 14:20 ሄ ዎደ ፓራታ ቆን ደእያ ሻሾትያ ቦላ፥ “ጎዳስ ጌይዳይሳ” ጌተትያ ማላ ፁፈይ ፃፈታና። ፆሳ ኬꬃን ደእያ ካꬅያ ኦቶይ ያርሾ በሳ ማታን ደእያ ሳንያ መላ ጌሽ ግዳና።
ZEC 14:21 የሩሳላመንነ ይሁዳን ደእያ ኦቶ ኡባይ ኡባፈ ዎልቃማ ጎዳስ ጌሽ ግዳና። ያርሾ ያርሽያ አሳ ኡባይ ሄ ኦቶታ ኤክድ፥ ያርሾ አሹዋ ኤንታን ካꬃና። ሄ ዎደ ኡባፈ ዎልቃማ ጎዳ ኬꬃን አይ ዛልአንቾይ ዴና።
MAL 1:1 ጎዳይ ምልክያሳ ባጋራ እስራኤለ አሳስ ኦድዳ ትንብተ ቃላይ ሀይሳ።
MAL 1:2 ጎዳይ ባ አሳኮ፥ “ታ ህንተና ዶሳስ” ያጌስ። ሽን ህንተ፥ “ነ ኑና አይብን ዶሳዲ?” ያጌታ። ጎዳይ ዛሪድ፥ “ኤሳዌይ ያይቆባ እሻ ግደነዬ? ሽን ታኒ ያይቆባ ዶሳስ፤
MAL 1:3 ኤሳዌ እፃስ። ታኒ ደረይ ዳርያ ኤሳዌ ቢታ ባይሳ ኦꬃስ፤ እያ ላታ ዎርካናት ጉፕያ መላ ቢታ ኦꬃስ” ያጌስ።
MAL 1:4 ኤሳዌ ኮቸ ግድዳ ኤዶመ አሳይ፥ “ኑ ካታማት ላለትኮካ፥ ኑ ኤንታ ዛሪድ ኬፃና” ያግኮካ፥ ኡባፈ ዎልቃማ ጎዳይ፥ “ኤንቲ ዛሪድ ኬፃና፥ ሽን ታኒ ላላና። አሳይ ኤንታ፥ ‘ሀ ቢታይ ኢታ ቢታ፤ ሀ አሳይካ ጎዳይ መርናዉ ሀንቀትዳ አሰ’ ያጋና” ያጌስ።
MAL 1:5 ሄሳ ህንተ፥ ህንተ አይፈን በእድ፥ “ሄኮ፥ ጎዳይ እስራኤለ ቢታፈ ካረንካ ዎልቃማ” ያጋና።
MAL 1:6 ኡባፈ ዎልቃማ ጎዳይ ሀይሳዳ ያጌስ፦ “ህንተኖ፥ ታ ሱንꬃ ካዉሽያ ካህነቶ፥ ናእ ባ አዋ፥ አይለይ ባ ጎዳ ቦንቼስ። ያትን፥ ታኒ ህንተዉ አዋ ግድኮ፥ ህንተ ታና ቦንችያ ቦንቾይ አዉኔ? ታኒ ህንተዉ ጎዳ ግድኮ፥ ህንተ ታዉ ያይያ ያሻይ አዉኔ? ህንተ ታ ሱንꬃ ካዉሽደታ። ህንተ ዛሪድ፥ ‘ኑኒ ነ ሱንꬃ ዋትድ ካዉሽዶ?’ ያጌታ።
MAL 1:7 “ህንተ ታ ያርሾ በሳን ቱና ካꬅ ዎታ። ቃስ፥ ‘ኑኒ ነና ዋትድ ቱንስዶ?’ ያጌታ። ህንተ፥ ‘ጎዳ ያርሾ በሳይ ካትዳባ’ ያግድ ታና ቱንስደታ።
MAL 1:8 ህንተ ቆቀ መሄ ያርሽያ ዎደ ሄስ ቆሆ ግደነዬ? ህንተ ሀርጋንቾ ዎይኮ ዎበ መሄ ያርሽያ ዎደ ሄስ ቆሆ ግደነዬ? ህንተ ሄሳ መላ መሄ ህንተ ሀላቃስ እምያኮ፥ እ ሄሳ ኤካናባነ እያን ኡፋይታናባ ህንተዉ ዳኒ? ያጌስ ኡባፈ ዎልቃማ ጎዳይ።
MAL 1:9 “ሀእ ፆሳይ ህንተዉ ቃታና መላ እያ ዎስተ። ዎና ህንተ ሄሳ መላ እሞታ እያዉ እምን፥ እ ህንተና ማዳኔ?” ያጌስ ኡባፈ ዎልቃማ ጎዳይ።
MAL 1:10 “ህንተ ታ ያርሾ በሳን ሀዳ ታማ ኤꬆና መላ ፆሳ ኬꬃ ፐንግያ ጎርድያ እስ አስ በንትዳ ግደረነሽን! ታ ህንተናን ኡፋይትከ፤ ህንተ እምያ እሞታካ ኤክከ” ያጌስ ኡባፈ ዎልቃማ ጎዳይ።
MAL 1:11 “አው ዶልያሶፐ ዉልያሶ ጋካናዉ ታ ሱንꬃይ ካዎተꬃታ ግዶን ዎልቃማ። ኡባ በሳን ታ ሱንꬃስ እፃነ ጩይሳናነ ጌሻ ያርሾ ያርሻና፤ ታ ሱንꬃይ ካዎተꬃታ ግዶን ዎልቃማ” ያጌስ ኡባፈ ዎልቃማ ጎዳይ።
MAL 1:12 “ሽን ህንተ፥ ‘ጎዳ ያርሾ በሳይ ቱና፤ እያን ያርሸትያ ካꬅካ ካትዳባ’ ያግድ እያ ካዉሽደታ።
MAL 1:13 ቃስ ህንተ፥ ‘ሀይስ ጮ ዳቡርስ’ ያግድ፥ ቅꬍድ ጩትደታ። “ህንተ ቦንቅድ ኤህዳባ ዎይኮ ዎበ ዎይኮ ሀርጋንቾ መሄ ያርሼታ፤ ያትን፥ ታኒ ሄሳ ህንተ ኩሸፐ ኤካናዉ በሲ?
MAL 1:14 ታኒ ግታ ካዎ፤ ታ ሱንꬃይካ ካዎተꬃታ ግዶን ቦንቸትዳይሳ ግድያ ግሾ፥ ፆሳስ እማና ግድ፥ ዶርዳ ማራዘይ እያ መህያ ግዶን ደእሽን፥ እያ አግድ፥ ቦረትዳ ማራዘ ያርሾ ሽሺያ አስነ ጭምያ አስ ባደትዳባ ግዶ” ያጌስ ጎዳይ።
MAL 2:1 “ሀእካ ካህነቶ፥ ሀ ኪታይ እመትዳይ ህንተሳ።
MAL 2:2 ህንተ ስኦና እፅኮ፤ ታ ሱንꬃ ቦንቻናዉ ህንተ ዎዛናን ታ ቃላ ዎꬆና እፅኮ፥ ታ ህንተ ቦላ ባደꬅ የዳና፤ ህንተ አንጁዋ ታኒ ባደꬃን ላማና። ህንተ ህንተ ዎዛና ታና ቦንቻናዉ ጊግስቦና ግሾ፥ ታ ህንተና ባዳስ” ያጌስ ኡባፈ ዎልቃማ ጎዳይ።
MAL 2:3 “ታኒ ህንተ ኮቻ ሴራና፤ ህንተ ያርሾ መሄ ኦሻ ህንተ ሶምኦን ላላና፤ ህንተካ እያራ እስፈ ሆለታና።
MAL 2:4 ሄ ዎደ ታ ሌወራ ጫቅዳ ጫቆይ፥ ምንድ ዳና መላ ሀ ኪታ ኪትዳይ ታና ግደይሳ ህንተ ኤራና” ያጌስ ኡባፈ ዎልቃማ ጎዳይ።
MAL 2:5 “ታ እያራ ጫቅዳ ጫቆይ ደኦነ ሳሮተꬃ ጫቆ፤ እ ታዉ ያያና መላ ደኦነ ሳሮተꬃ እያዉ እማስ፤ እካ ታዉ ያይስ፥ ታ ሱንꬃ ቦንችዳ መላ ደእስ።
MAL 2:6 ቱማ ትምርተይ እያ ዶናን ደእስ፤ እያ እንፃርሳንካ ዎርዶይ በንትቤና። እ ታራ ሳሮተꬃንነ ሱረተꬃን ሄመትስ፤ ቃስ ዳሮታ ናጋራፐ ዛርስ።
MAL 2:7 ካህነይ፥ ኡባፈ ዎልቃማ ጎዳይ ኪትዳይሳ ግድያ ግሾ፥ እያ መተርሻይ ኤራተꬅ ናጋናዉ ኮሼስ፤ አሳይ ኤራተꬅ እያ ዶናፐ ታማራናዉ በሴስ” ያጌስ ኡባፈ ዎልቃማ ጎዳይ።
MAL 2:8 “ሽን ህንተ ታ ኦግያፐ ጋፃ ከይደታ፤ ህንተ ትምርትያን ዳሮታ ꬉብደታ፤ ታኒ ሌወራ ጫቅዳ ጫቁዋ መንꬅደታ።
MAL 2:9 ሄሳ ግሾ፥ ህንተ ታ ኦግያን ቦና እፅድ፥ ህንተ ትምርትያን አሳ ግዶን ሻሄተꬅ መꬍያ ግሾ፥ ታ ህንተና አሳ ኡባ ስንꬃን ካታናዳነ ካዉያናዳ ኦꬃስ” ያጌስ ኡባፈ ዎልቃማ ጎዳይ።
MAL 2:10 ኑ ኡባስ እስ አው ደኤስ ግደኔ? ኑና እስ ፆሳይ መꬍበነዬ? ያትን፥ ኑ እሶይ እሱዋስ አማነቶና እፅድ፥ ኑ ማይዛታ ጫቁዋ አይስ መንꬃኔ?
MAL 2:11 ይሁድ ጭምስ፤ እስራኤለንነ የሩሳላመን ቱናባይ ኦሰትስ፤ ይሁድ አላጋ ፆሳ ማጫ ናይታ ኤክድ፥ ጎዳይ ዶስያ ፆሳ ኬꬃ ቱንስስ።
MAL 2:12 ሄሳ ታማርሰይነ ካልያ ኦንካ፥ ኡባፈ ዎልቃማ ጎዳስ ያርሾ ኤህያኮካ፥ ጎዳይ እያ ያይቆባ ዱንካንያፐ ꬋይሶ።
MAL 2:13 ቃስ ህንተ ኦꬅያ ሀራባይ አይበ ጊኮ፥ ጎዳይ ህንተ ያርሹዋኮ ፄሎና ግሾ ዎይኮ ኡፋይሳን ኤኮና ግሾ ያርሾ በሳ አፉꬃን፥ ዬሆንነ አዛኖን ኩንꬄታ።
MAL 2:14 ህንተ፥ “እ ኑ ያርሹዋ አይስ ኤከኔ?” ያግድ ኦይቼታ። ሄስ ሀንዳይ፥ ህንተ፥ ህንተ ናአተꬃ ማቸራ ጫቅዳ ጫቁዋ መንꬅዳ ግሾነ ጭምዳ ግሾሳ፤ እያ ነ ምየነ ነ ጫቆ ማቾ ግድያ ግሾ ጎዳይ ማርካ።
MAL 2:15 ጎዳይ ህንተዉነ ህንተ ማቸታስ እስ አሳተꬅነ እስ አያን ዳና መላ ኦꬅቤኔ? ሄሳ አይስ ኦꬅዴ? ፆሳ ያይያ ኮቸ ዳና መላ ኮይዳ ግሾሳ። ሄሳ ግሾ፥ ህንተ አያና ናግተ፤ ህንተ ናአተꬃ ማቸታ ጭሞፍተ።
MAL 2:16 “ታኒ ጎዳይ፥ እስራኤለ ፆሳይ፥ አዝን ባ ማችዉ የዳናይሳ እꬃይስ፤ ባ ማኡዋ ኢታ ኦሶን ካምያ ኦናካ ታ እፃይስ። ሄሳ ግሾ፥ ህንተ አያና ናግተ፤ ህንተ ናአተꬃ ማቸታ ጭሞፍተ” ያጌስ ኡባፈ ዎልቃማ ጎዳይ።
MAL 2:17 ህንተ፥ ህንተ ኦዳን ጎዳ ሳለꬅደታ። ህንተ ዛሪድ፥ “ኑኒ እያ ዋትድ ሳለꬅዶ?” ያጌታ። ህንተ እያ ሳለꬅዳይ፥ “ኢታ ኦꬅያ ኡባይ ጎዳ ስንꬃን ሎኦ፤ እካ ኤንታን ኡፋይቴስ” ያጉሳና፤ ዎይኮ፥ “ፅሎ ፕርድያ ፆሳይ አዉን ደኢ?” ያጉሳና።
MAL 3:1 “ሄኮ፥ ታ ስንꬃን ኦገ ጊግሳና መላ ታ ኪታንቹዋ ካሰታዳ ኪታና። ህንተ ኮያ ጎዳይ ቆፖና ደእሽን ባ ኬꬃ ያና። ህንተ ኡፋይሳን ናግያ፥ ጫቆ ኪታንቾይ ያና” ያጌስ ኡባፈ ዎልቃማ ጎዳይ።
MAL 3:2 ሽን እ ብራ ሴርስድ ጌሽያ ታማ መላነ ማኡዋ ሜጭያ ሳሙና መላ ግድያ ግሾ፥ እ ያ ጋላሳን ዳንዳእ ኤቃናይ ኦኔ? ቃስ እ ቆንጭያ ዎደ እያ ስንꬃን ኤቃናዉ ዳንዳኤይ ኦኔ?
MAL 3:3 እ ብራ ሼሽያነ ጌሽያ አሳዳ ኡታና። እ ሌወ ኮቻታ ብራዳነ ዎርቃዳ ጌሻና። ሄ ዎደ ኤንቲ ጎዳስ ፅሎተꬃን ያርሾ ያርሻና።
MAL 3:4 ሄ ዎደ ይሁዳነ የሩሳላመ ያርሾይ በን ዎደታነ አꬍዳ ላይꬃዳ ጎዳ ኡፋይስያባ ግዳና።
MAL 3:5 “ሄሳፈ ጉየ፥ ፕርዳስ ታኒ ህንተኮ ያዳ፥ ብታንቾታ፥ ላመይሳታ፥ ዎርዶን ጫቀይሳታ፥ ኦሳንቾታ ዳሞዘ ድገይሳታ፥ አምኤታነ ይኦታ ኡንኤይሳታ፥ በታንቾታስ ፕርዳ ድገይሳታነ ታዉ ያዮናይሳታ ቦላ ኤሶን ማርካታና” ያጌስ ኡባፈ ዎልቃማ ጎዳይ።
MAL 3:6 “ታኒ ጎዳይ ላመትከ፤ ሄሳ ግሾ፥ ህንተኖ ያይቆባ ኮቻቶ፥ ህንተ ꬋይበከታ።
MAL 3:7 ህንተ ማይዛታ ዎደፐ ዶምድ፥ ታ ዎጋፐ ካረ ከይደታ፤ እያ ናግበከታ። ሀእ ታኮ ስምተ፤ ታንካ ህንተኮ ስማና” ያጌስ ኡባፈ ዎልቃማ ጎዳይ። ሽን ህንተ፥ “ኑኒ አይ ኦገን ስምኖ?” ያግድ ኦይቼታ።
MAL 3:8 “አስ ፆሰ ካይሶቲ? ሽን ህንተ ታና ካይሶትደታ።” ቃስካ ህንተ፥ “ኑኒ ነና ዋትድ ካይሶትዶ? ያጌታ። “ህንተ አስራታንነ እሞታን ታና ካይስደታ።
MAL 3:9 እስራኤለ አሳ ኡባይ ታና ካይሶትዳ ግሾ፥ ህንተ ባደትዳይሳታ።
MAL 3:10 ታ ኬꬃን ካꬅ ዳና መላ አስራታ ኡባ ሻለን የግተ። ያትድ፥ ታኒ ሳሎ ማስኮትያ ዶያዳ አንጆ ህንተዉ ፓላህሳዳ እሞና እፅኮ ሄሳን ታና ፓጭተ” ያጌስ ኡባፈ ዎልቃማ ጎዳይ።
MAL 3:11 “ካꬅ ሞና መላ ታኒ ህንተ ግሾ፥ ጎንዱዋ ሴራና፤ ጋደን ደእያ ዎይነ አይፈይካ ቆቆፈተና።
MAL 3:12 ህንተ ቢታይ ዳናዉ እንጀትያ ቢታ ግድያ ግሾ፥ ካዎተꬃት ኡባይ ህንተና አንጀትዳይሳታ ያጋና” ያጌስ ኡባፈ ዎልቃማ ጎዳይ።
MAL 3:13 ጎዳይ ሀይሳዳ ያጌስ፦ “ህንተ ታ ቦላ ምኖ ቃላ ኦደትደታ። ያትድ ቃስ፥ ‘ኑኒ ነ ቦላ ዎይግድ ምኖ ቃላ ኦደትዶ?’ ያግድ ኦይቼታ።
MAL 3:14 “ህንተ፥ ‘ፆሳስ ኦይስ ሀዳ፤ እያ ኪታ ናግድ፥ ኡባፈ ዎልቃማ ጎዳ ስንꬃን አዛንያ አሳዳ ስመረተꬅ ኑና አይ ማድዴ?
MAL 3:15 ሀእካ ኑኒ ኦቶረይሳታ አንጀትዳይሳታ ጎስ፤ ኢታ ኦይሳት ዱረቶሶና፤ ሀር አቶሽን ኤንቲ ፆሳ ፓጭሸካ ከስ ኤኮሶና’ ያጌታ” ያጌስ ፆሳይ።
MAL 3:16 ሄ ዎደ ጎዳስ ያየይሳት እሶይ እሱዋራ ኦደትዶሶና፤ ጎዳይካ ሀይዝድ ስእስ። ጎዳስ ያየይሳትነ እያ ሱንꬃ ቦንቸይሳት ዶገቶና መላ ኤንታ ሀሳይስያ ማፃፋይ እያ ስንꬃን ፃፈትስ።
MAL 3:17 “ኤንቲ ታባ ግዳና፤ ታኒ ኦꬅያ ጋላስ ኤንቲ ታዉ ቡዞ ሚሸ ግዳና፤ አው ባዉ ኦꬅያ ባ ናአ ማረይሳዳ ታኒ ኤንታ ማራና።
MAL 3:18 ሄ ዎደ ህንተ ስሚድ ፅሉዋነ ናጋራንቹዋ ግዶን፥ ፆሳስ ኪተተይሳነ ኪተቶናይሳ ግዶን ደእያ ዱማተꬃ በአና” ያጌስ ኡባፈ ዎልቃማ ጎዳይ።
MAL 4:1 “ሄኮ፥ ጮጨ ታማዳ ኤፅያ ጋላስ ያና፤ ኦቶራንቾትነ ኢታ ኦይሳት ኡባይ ቡረ መላ ግዳና። ሄ ያ ጋላሳይ ኤንታ ፁጋና፤ ኤንታዉ ፃጶነ ፄራ አሸና” ያጌስ ኡባፈ ዎልቃማ ጎዳይ።
MAL 4:2 ሽን “ህንተዉ፥ ታ ሱንꬃስ ያየይሳታስ፥ ፅሎተꬃ አው ባ ቀፈ ጋርሳን ፓፆተꬅ ኤክድ ከያና። ህንተ ቃሾፐ የደትዳ ኮኦ ጋሎዳ ጉፓና።
MAL 4:3 ታኒ ኦꬅያ ጋላስ፥ ናጋራንቾት ህንተ ቶሆፐ ጋርሳን ብድን ግዳና፤ ህንተ ኤንታ የꬋና” ያጌስ ኡባፈ ዎልቃማ ጎዳይ።
MAL 4:4 “እስራኤለ አሳይ ኪተታና መላ ታኒ ኮሬባ ዙማ ቦላ ታ አይልያ ሙሰ ባጋራ እምዳ ህግያነ ኪታ አኬክተ።
MAL 4:5 “ሄኮ፥ ግታነ ያሽያ ጎዳ ጋላሳይ ያናፐ ካሰታዳ፥ ታኒ ህንተዉ ናብያ ኤልያሳ ኪታና።
MAL 4:6 ታኒ ያዳ ቢታ ባደꬃን ꬋይሶና መላ አዋታ ዎዛና ናይታኮ፥ ናይታ ዎዛና አዋታኮ ዛራና” ያጌስ።
MAT 1:1 ሀይሳፈ ካልድ ፃፈትዳይስ ዳዊታ ናአ አብራሃመ ናአ ግድዳ የሱስ ክርስቶሳ የለተꬃ።
MAT 1:2 አብራሃመይ ይሳቃ የልስ፤ ይሳቅ ያይቆባ የልስ፤ ያይቆብ ይሁዳነ እያ እሻታ የልስ፤
MAT 1:3 ይሁድ ትማርፐ ፋረሳነ ዛራ የልስ፤ ፋረስ አስሮመ የልስ፤ አስሮመይ ራመ የልስ፤
MAT 1:4 ራመይ አምናዳበ የልስ፤ አምናዳበይ ናአሶና የልስ፤ ናአሶን ሳልሞና የልስ፤
MAT 1:5 ሳልሞና ራብፐ ቦኤዛ የልስ፤ ቦኤዝ ኡሩትፐ እዮቤዳ የልስ፤ እዮቤድ እሰየ የልስ፤
MAT 1:6 እሰየይ ካዋ ዳዊታ የልስ፤ ዳዊቲ ኮይሮ ኦርዮ ማቸፈ ሶሎሞነ የልስ፤
MAT 1:7 ሶሎሞነይ ኦሮብኣማ የልስ፤ ኦሮብኣመይ አብያ የልስ፤ አብይ አሳፋ የልስ፤
MAT 1:8 አሳፍ እዮሳፈፃ የልስ፤ እዮሳፈፅ እዮራማ የልስ፤ እዮራም ኦዝያና የልስ፤
MAT 1:9 ኦዝያን እዮአታመ የልስ፤ እዮአታም አካዛ የልስ፤ አካዝ ህዝቅያሳ የልስ፤
MAT 1:10 ህዝቅያስ ምናሰ የልስ፤ ምናሰይ አሞነ የልስ፤ አሞን እዮስያሳ የልስ፤
MAT 1:11 እስራኤለ አሳይ ድኤትድ ባብሎነ ቢታ ብዳ ዎደ እዮስያስ እኮንያናነ እያ እሻታ የልስ።
MAT 1:12 ባብሎነ ቢታ እስራኤለ አሳይ ድኤትድ ብዳፐ ጉየ እኮንያን ሳላትያላ የልስ። ሳላትያል ዛሩባበላ የልስ፤
MAT 1:13 ዛሩባበል አብድዩ የልስ፤ አብድዩይ ኤልያቄመ የልስ፤ ኤልያቄም አዛራ የልስ፤
MAT 1:14 አዛር ሳዶቃ የልስ፤ ሳዶቅ አክመ የልስ፤ አክመይ ኤልዩዳ የልስ፤
MAT 1:15 ኤልዩድ አላዛራ የልስ፤ አላዛር ማታነ የልስ፤ ማታነይ ያይቆባ የልስ፤
MAT 1:16 ያይቆብ ዮሰፋ የልስ፤ ዮሰፍ ክርስቶሳ ጌተትያ የሱሳ የልዳ ማይራም አዝና።
MAT 1:17 ህዛ፥ የለተꬃይ አብራሃመፐ ዳዊታ ጋካናዉ ታማነ ኦይዳ። ዳዊታፐ ብድ ባብሎነ ድኡዋ ጋካናዉ ታማነ ኦይዳ። ባብሎነ ድኡዋፐ ብድ ክርስቶሳ ጋካናዉ ታማነ ኦይዱ የለተꬅ ግዴስ።
MAT 1:18 የሱስ ክርስቶሳ የለተꬃ ታርከይ ሀይሳፈ ካለይሳ። እያ አይያ ማይራማ ዮሰፋስ ኦይሸታ ደአሸ ዮሰፋራ ጋሄቶና ጌሻ አያናፐ ቃንꬃታሱ።
MAT 1:19 ዮሰፍ ፅሎ አስ ግድዳ ግሾ እዮ አሳን ከሳናዉ ኮይቤና። ያንያ ግሾ ቆሳን እዮ አጋናዉ ቆፕስ።
MAT 1:20 እ ሄ ቆፋን ደእሽን ፆሳ ኪታንቾይ አሙሆን ቆንጭድ፥ “ዳዊታ ናአዉ፥ ዮሰፋ፥ ማይራማ ቃንꬃትዳይ ጌሻ አያናፐ ግድያ ግሾ እዮ ኤካናዉ ያዮፋ” ያግስ።
MAT 1:21 እያ አደ ናአ የላና፥ እ ባ ደርያ ኤንታ ናጋራፐ አሽያ ግሾ እያ ሱንꬃ ነ የሱሳ ጋዳ ፄጋና።
MAT 1:22 ጎዳይ ናብያ እሳያሳ ዶናን፥
MAT 1:23 “ሄኮ ጌላእያ ቃንꬃታና፤ አደ ናአ የላና፤ እያ ሱንꬃይ አማኑኤላ” ጌተታና ጎይስ ፖለታና መላ ሀ ኡባይ ሀንስ። አማኑኤላ ገይሳስ ብርሸꬃይ “ፆሳይ ኑራ ደኤስ” ጉሱ።
MAT 1:24 ዮሰፍ ꬍስኮፈ ባርክድ ጎዳ ኪታንቾይ ኪትዳይሳ መላ ማይራሞ ባ ሶ ኤፍስ።
MAT 1:25 ሽን ባ ባይራ ናአ የላና ጋካናዉ እዮ ቦችቤና፤ የለትዳ ናአካ የሱሳ ግድ ፄግስ።
MAT 2:1 ካዋ ሄሮዲሳ ዎደን የሱሲ ይሁዳ ቢታን ቤተለመ ካታማን የለትዳፐ ጉየ ፆልንቶ ታይብያ አሳት ዶሎሀፐ የሩሳላመ ይድ፥
MAT 2:2 “የለትዳ አይሁደ ካዎይ አዉን ደኢ? ኑኒ ዶሎሀ ባጋራ ከይዳ እያ ፆልንቱዋ በእድ እያዉ ጎይናናዉ ይዳ” ያግድ ኦይችዶሶና።
MAT 2:3 ካዎይ ሄሮዲስ ሄሳ ስእዳ ዎደ ዳጋምስ። የሩሳላመን ደእያ አሳ ኡባይካ ዳጋምዶሶና።
MAT 2:4 ሄሮዲስ ካህነ ሀላቃታነ ህገ አስታማረታ ባኮ ፄግድ፥ “ክርስቶስ አዉን የለታንደሻ?” ያግድ ኤንታ ኦይችስ።
MAT 2:5 ኤንትካ፥ “ይሁዳ ቤተለመና፤ ናበይ፥
MAT 2:6 ‘ይሁዳን ደእያ ቤተለመ፥ ይሁዳን ደእያ ጎባ ካታማታፐ፥ ኔኒ አይብንካ ጉፃካ። ታ ደርያ እስራኤለ አይሳናይስ፥ ኔፐ ከያና’ ግድ ፃፍስ” ያግዶሶና።
MAT 2:7 ሄሳፈ ጉየ፥ ሄሮዲስ ዶሎሀፐ ይዳ አሳታ ጌማን ፄግድ፥ ፆልንቱዋ ኤንቲ በእዳ ዎድያ ኤንታፈ ጌሽድ ኤርስ።
MAT 2:8 እ ኤንታና ቤተለመ የድሸ፥ “ብድ የለትዳ ናኣ ምንꬅድ ኮይተ፤ እያ ህንተ ደምዳ ዎደ ታካ ባዳ እያዉ ጎይናና መላ ስሚድ ይሸ ታዉ ኦድተ” ያግስ።
MAT 2:9 ኤንትካ ካዎይ ሄሮዲስ ግዳይሳ ስእድ ብዶሶና። ኤንቲ ዶሎሀ ባጋራ በእዳ ፆልንቶይ ኤንታና ካለꬅሸ ናአይ ደእያሱዋ ጋካናዉ ኤፍስ።
MAT 2:10 ኤንቲ ሄ ፆልንቱዋ በእዳ ዎደ ግታ ኡፋይስ ኡፋይትዶሶና።
MAT 2:11 ሶ ገልድ ናኣ ባ አየ ማይራምራ ደኤይሳ በእዶሶና። እያዉ ጉልባትድ ጎይንዶሶና። ባንታ ሳፅንያ ዶይድ ዎርቃ፥ እፃነነ ካርበ እያዉ እምዶሶና።
MAT 2:12 ኤንቲ ሄሮዲሳኮ ጉየ ስሞና መላ ፆሳይ አሙሆን ኤንታዉ ኦድን፥ ሀራ ኦገራ ባንታ ቢታ ስምዶሶና።
MAT 2:13 ዶሎሀ ባጋፈ ይዳ አሳት ብዳፐ ጉየ፥ ጎዳ ኪታንቾይ ዮሰፋስ አሙሆን ቆንጭድ፥ “ሄሮዲስ ናኣ ዎꬋናዉ ኮይያ ግሾ ደንዳ፤ ኤለሳዳ ናኣነ ናኣ አይዉ ኤካዳ ግብፀ ቢታ ባ። ነ ስማና ዎድያ ታ ነዉ ኦዳና ጋካናዉ ያን ጋምአ” ያግስ።
MAT 2:14 ሄሳ ግሾ፥ ዮሰፍ ሄ ቃማን ደንድድ፥ ናኣነ ናኣ አይዉ ኤክድ ግብፀ ብስ።
MAT 2:15 ናብያ ዶናን ፆሳይ፥ “ታኒ፥ ታ ናኣ፥ ግብፀ ቢታፈ ፄጋስ” ጌተትዳ ቃላይ ፖለታና መላ ሄሮዲስ ሀይቃና ጋካናዉ እ ያን ደእስ።
MAT 2:16 ሄሳፈ ጉየ፥ ዶሎሀ ባጋፈ ይዳ አሳት እያ ጭምዳይሳ ኤርዳ ዎደ ዳሮ ይሎትስ። እ ካሰ ኤንታፈ ስእዳይሳዳ ቤተለመንነ ሄ ሄራን ደእያ ናምኡ ላይꬅ ኩምዳይሳታነ ናምኡ ላይꬃፈ ጋርሳን ደእያ አደ ናይታ ኡባ ባ ዎታዳረታ የድድ ዎꬍስስ።
MAT 2:17 ናብያ ኤርምያሳ ዶናን፥ “ዬሆይነ ዘለልስ፥ ራማ ካታማን ስኤትስ። ራሄላ ባ ናይታስ ዬካዉሱ፤ ኤንቲ ሀይቅዳ ግሾ ምነታናዉ ዳንዳአቡኩ” ግድ ኦድዳይስ ፖለትስ።
MAT 2:19 ሄሮዲስ ሀይቅዳፐ ጉየ ግብፀን ጎዳ ኪታንቾይ ዮሰፋስ አሙሆን ቆንጭድ፥
MAT 2:20 “ናኣ ዎꬋናዉ ኮይያ አሳት ሀይቅዳ ግሾ፥ ደንዳዳ ናኣነ ናኣ አይዉ ኤካዳ እስራኤለ ቢታ ስማ” ያግስ።
MAT 2:21 ዮሰፍ ደንድድ ናኣነ ናኣ አይዉ ኤክድ እስራኤለ ቢታ ስምስ።
MAT 2:22 ሽን አርከልዮስ ይሁዳን ባ አዋ ሄሮዲሳ በሳን ካዎትዳይሳ ስእዳ ዎደ ያ ባናዉ ያይስ። ፆሳይ አሙሆን እያዉ ቆንጭስን ጋልላ ቢታ ብስ።
MAT 2:23 ናበታ ዶናን፥ “ናዝረተ አስ ጌተታና” ግድ ኦደትዳይስ ፖለታና መላ ናዝረተ ካታማ ብድ ያን ደእስ።
MAT 3:1 ሄ ዎደ ፃማቅያ ዮሃንስ፥ “ፆሳ ካዎተꬃይ ማታትዳ ግሾ ህንተ ናጋራፐ ስምተ” ያግድ ሳባክሸ ይሁዳ መላ ቢታ ብስ።
MAT 3:3 ናብያ እሳያስ ዮሃንሳባ ኦድዳይሳ መላ፥ “መላ ቢታን፥ እሶይ ባ ቃላ ꬎቁ ኦꬅድ፥ ‘ጎዳ ኦግያ ጊግስተ። እያ ሆሮጋ ፕድ ኦꬅተ’ ግስ” ያገትዳይ እያሳ ያግስ።
MAT 3:4 ዮሃንስ ግማለ እክሰፐ ኦሰትዳ አፍላ ማኤስ። ባ ፄሳን ዳፎ ዳንጬስ። እ ምያ ካꬃይካ ቦለነ ደገራ ኤስ።
MAT 3:5 አሳይ ሄ ዎደ የሩሳላመ ካታማፐ፥ ይሁዳ ቢታ ኡባፈነ ዮርዳኖሰ ሻፋ ሄራፐ እያኮ ዮሶና።
MAT 3:6 ባንታ ናጋራ ፓፅድ ዮርዳኖሰ ሻፋን ዮሃንሳ ኩሸን ፃማቀቶሶና።
MAT 3:7 ዮሃንስ፥ ዳሮ ፋርሳወትነ ሳዱቃወት ፃማቀታናዉ ባኮ የይሳታ በእድ፥ ኤንታኮ፥ “ሀ ኢታ ሾሻቶ፥ ያና ፆሳ ሀንቁዋፈ ባቃታና መላ ህንተና ኦነ ዞርዳይ?
MAT 3:8 ህዛ፥ ህንተ፥ ህንተ ናጋራፐ ስምዳይሳ ኤርስያባ ኦꬅተ።
MAT 3:9 ህንተ፥ ህንተ ዎዛናን፥ ‘አብራሃመይ፥ ኑ አዋይ ደኤስ’ ግድ ቆፖፍተ። ሎይꬅ ስእተ! ፆሳይ ሀ ሹቻታፐ አብራሃመስ ናአ ከሳናዉ ዳንዳኤስ።
MAT 3:10 ቤፀይ ምꬃ ፃጶን ጊግድ ኡትስ፤ ሎኦ አይፈ አይፎና ምꬃ ኡባይ ቃንፀትድ ታማን የገታና።
MAT 3:11 “ህንተ፥ ህንተ ናጋራፐ ስምዳይሳ ኤርሳናዉ ታኒ ህንተና ሃꬃን ፃማቃይስ። ሽን ታፐ ጉየራ የይስ ህንተና ጌሻ አያናንነ ታማን ፃማቃና። እ ታፐ ዳሮ ዎልቃሜስ፤ ታኒ ሀር አቶሽን እያ ጫማ ቶካናዉካ በስከ።
MAT 3:12 ካꬃ ጌሽያ ፕይ እያ ኩሸን ደኤስ። ካꬃ ሎይꬅ ጌሼስ፤ ግስትያ ባ ሻልያን ቆላና፥ ሽን ፑኑዋ ቶኦና ታማን ፁጋና” ያግስ።
MAT 3:13 ሄ ዎደ የሱሲ ዮሃንሳ ኩሸን ፃማቀታናዉ ጋልላፐ ዮርዳኖሰ ሻፋ ብስ።
MAT 3:14 ሽን ዮሃንስ እያ ድጋናዉ ኮይድ፥ “ታኒ ነናን ፃማቀታናዉ ኮሽሽን ኔኒ ታኮ ያይ?” ያግስ።
MAT 3:15 ሽን የሱሲ ዛሪድ፥ “ፆሳይ ኑፐ ኮያባ ኡባ ኑ ፖላናዉ በሲያ ግሾ፥ ሀእ ታዉ ኤሮ ጋ” ያግስ። ዮሃንስ እያዉ ኤሮ ግድ ኤክስ።
MAT 3:16 የሱሲ ፃማቀትዳ መላ ሃꬃፈ ከይስ። ኢራካ ሳሎይ ዶየትን ፆሳ አያናይ ሆለዳ ይሽን ቃስ ባ ቦላ ዎልአምድ ዎꬍሽን በእስ።
MAT 3:17 ሄ ዎደ፥ “ታ ዶስያ፥ እያን ታና ኡፋይስያ ታ ናአይ ሀይሳ” ግያ ቃላይ ሳሎፐ ይስ።
MAT 4:1 ሄሳፈ ጉየ፥ ፃላሄይ የሱሳ ፓጫና መላ ጌሻ አያናይ የሱሳ መላ ቢታ ኤፍስ።
MAT 4:2 ኦይታሙ ቃማነ ኦይታሙ ጋላስ ፆምዳፐ ጉየ ኮሻትስ።
MAT 4:3 ፃላሄይ የሱሳኮ ይድ “ኔኒ ፆሳ ናአ ግድኮ፥ አነ ሀ ሹቻት ኡይꬅ ግዳና መላ ኪታ” ያግስ።
MAT 4:4 የሱሲ ዛሪድ፥ “ ‘አስ ፆሳ ዶናፐ ከይያ ቃላ ኡባን ደኤስፐ አትሽን፥ ኡይꬃ ፃላላን ዴና’ ጌተትድ ፆሳ ቃላን ፃፈትስ” ያግስ።
MAT 4:5 ካልድካ፥ ፃላሄይ የሱሳ ጌሻ ካታማ ኤፍድ፥ ፆሳ ኬꬃ ሁጵያ ከስድ፥
MAT 4:6 “ኔኒ ፆሳ ናአ ግድኮ፥ አነ ዱገ ሳአን ኩንዳ። “ ‘ነ ቶሆይ ሹቻን ꬉበቶና መላ፥ ባንታ ኩሽያን ነና ደንꬃና መላ፥ ፆሳይ ባ ኪታንቾታ ነ ግሾ ኪታና’ ጌተትድ ፆሳ ቃላን ፃፈትስ” ያግስ።
MAT 4:7 የሱሲ እያኮ፥ “ቃስካ፥ ‘ፆሳ ቃላን ነ ጎዳ፥ ነ ፆሳ ፓጮፋ’ ያገትድ ፃፈትስ” ግድ ዛርስ።
MAT 4:8 ዉርሰꬃን ፃላሄይ የሱሳ እስ ዎልቃማ ዙማ ሁጰ ከስድ አላምያ ካዎተꬃታ ኤንታ ቦንቹዋራ እስፈ በስድ፥
MAT 4:9 “ነ ታዉ ኩንዳዳ ጎይንኮ ታ ነዉ ሀ ኡባ እማና” ያግስ።
MAT 4:10 የሱሲ ዛሪድ፥ “ሀ ፃላህያዉ፥ ታፐ ሃካ! ‘ነ ጎዳ፥ ነ ፆሳ ጎይና፥ እያ ፃላላ ሀጋዛ’ ጌተትድ ፆሳ ቃላን ፃፈትስ” ያግስ።
MAT 4:11 ሄሳፈ ጉየ፥ ፃላሄይ አግድ ብስ፤ ኪታንቾት ይድ እያ ሀጋዝዶሶና።
MAT 4:12 የሱሲ፥ ዮሃንስ ቃሸቶይሳ ስእዳ ዎደ ጋልላ ቢታ ብስ።
MAT 4:13 ናዝረተ ካታማ አግድ ዛብሎናንነ ንፍታለመ ሄራን፥ አባ ማታን ደእያ ቅፍርናሆማ ካታማ ብድ ያን ደእስ።
MAT 4:14 ሄስ ሀንዳይ ናብያ እሳያሳ ዶናን፥
MAT 4:15 “ዛብሎና ቢታን፥ ንፍታለመ ቢታን፥ ዮርዳኖሰ ሻፋፐ ሄፍንꬃን፥ አባ ኦግያ ጋፃን ደእያ፥ አይሁደ ግዶና ደረይ ደእያ ጋልላን፥
MAT 4:16 ꬉማን ደእያ ደረይ፥ ዎልቃማ ፖኦ በእስ። ሀይቆ ኩያ ቢታን፥ ደኤይሳታስ ፖኦይ ከይስ” ያግድ ኦደትዳ ቃላይ ፖለታና መላሳ።
MAT 4:17 ሄ ዎደፐ ዶምድ የሱሲ፥ “ፆሳ ካዎተꬃይ ማታትዳ ግሾ ህንተ ናጋራፐ ስምተ” ያግድ ቃላ ሳባኬስ።
MAT 4:18 የሱሲ ጋልላ አባ ማታራ አꬍሸ ናምኡ እሻታ፥ ጰፅሮሳ ጌተትያ ስሞናነ እያ እሻ እንድርያሳ በእስ። ኤንቲ ሞሎ ኦይከይሳታ ግድዳ ግሾ ባንታ ግትያ አባን የጎሶና።
MAT 4:19 የሱሲ ኤንታና፥ “ሃ ዪተ፤ ታና ካልተ፤ ታኒ ህንተና አሰ ኦይꬅ ታማርሳና” ያግስ።
MAT 4:20 ኤንትካ፥ ኤለስድ ባንታ ግትያ የግ አግድ የሱሳ ካልዶሶና።
MAT 4:21 የሱሲ ያፐ ቡሮ ገደ ስን አꬍሸ ሀራ ናምኡ እሻታ፥ ዛብድዮሳ ናይታ፥ ያይቆባነ ዮሃንሳ በእስ። ባንታ አዋ ዛብድዮሳራ እስፈ ዎጎሉዋ ግዶን ባንታ ግትያ ጊግሰይሳታ ፄግስ።
MAT 4:22 ኤንትካ፥ ኤለስድ ባንታ ዎጎሉዋነ ባንታ አዋ አግድ የሱሳ ካልዶሶና።
MAT 4:23 የሱሲ አይሁደ ዎሳ ኬꬃታን ታማርስሸ፥ ሳሎ ካዎተꬃ ዎንገላ ኦድሸነ ዱማ ዱማ ሀርግያፈ አሳ ፓꬅሸ ጋልላ ቢታ ኡባን ዩይስ።
MAT 4:24 ሄሳፈ ደንዶይሳን እያ ሱንꬃይ ሶረ ቢታ ኡባን ከይስ። ዱማ ዱማ ሀርገን ኦይከትዳይሳታነ ዋየተይሳታ፥ ቱና አያናን ኦይከትዳይሳታ፥ ሾጭ የግያ ሀርገን ኦይከትዳይሳታነ፥ ጉንዳታ እያኮ ኤህዶሶና፤ እካ ኤንታና ፓꬅስ።
MAT 4:25 አሳይ ጋልላፐ፥ ታሙ ካታማታፐ፥ የሩሳላመፐ፥ ይሁዳፐነ ዮርዳኖሰ ሻፋ ሄፍንꬃን ደእያ ቢታፈ ይዳ ዳሮ አሳይ እያ ካልዶሶና።
MAT 5:1 ዳሮ ደረይ ሺቅዳይሳ የሱሲ በእዳ ዎደ ዙማ ቦላ ከይድ ኡትስ። እያ ታማረት እያኮ ሺቅን፥
MAT 5:2 ሀይሳዳ ያግድ ታማርስስ፦
MAT 5:3 “ባንታ አያናን ማንቆት አንጀትዳይሳታ፥ ሳሎ ካዎተꬃይ ኤንታሳ።
MAT 5:4 ዬከይሳት አንጀትዳይሳታ፥ ኤንቲ ምንꬆ ደማና።
MAT 5:5 ባንታ ዎዛናን አሽከት አንጀትዳይሳታ፥ ኤንቲ ሳኣ ላታና።
MAT 5:6 ፅሎባ ኦꬃናዉ ኮሻተይሳትነ ሳሞተይሳት አንጀትዳይሳታ፥ ኤንቲ ካላና።
MAT 5:7 ማረይሳት አንጀትዳይሳታ፥ ኤንቲ ማሮተꬅ ደማና።
MAT 5:8 ዎዛና ጌሻት አንጀትዳይሳታ፥ ኤንቲ ፆሳ በአና።
MAT 5:9 ስገይሳት አንጀትዳይሳታ፥ ኤንቲ ፆሳ ናይታ ጌተትድ ፄገታና።
MAT 5:10 ፅሎባ ኦꬅያ ግሾ ግድ፥ ጎደተይሳት አንጀትዳይሳታ፥ ሳሎ ካዎተꬃይ ኤንታሳ።
MAT 5:11 “አሳይ ህንተና ታ ግሾ ግድ ጫይያ ዎደ፥ ጎድያ ዎደነ ህንተ ቦላ ኢታባ ኡባ ዎርዶን ኦድስያ ዎደ ህንተ አንጀትዳይሳታ።
MAT 5:12 ህንተ ዎይቶይ ሳሎን ግታ ግድያ ግሾ ኡፋይትተ፥ ሀሹ ጊተ። ህንተፈ ካሰ ደእያ ናበታ ሄሳዳ ጎድዶሶና።
MAT 5:13 “ህንተ ቢታስ ማፅነ፤ ማፅነይ ባ ማፅነተꬃ አግኮ፥ ባ ማልኦተꬃ ዋት ዛር ደማኔ? ካረ ሆልን አሳን የታናፐ አትሽን፥ አይብስካ ማደና።
MAT 5:14 “ህንተ ቢታስ ፖኦ፤ ዙማ ቦላ ደእያ ካታምያ ቆሰታናዉ ዳንዳኡኩ።
MAT 5:15 ፆምፐ ኦይꬅድ ሶን ደእያ አሳ ኡባስ ፖአና መላ ꬎቃ ሶን ዎꬄስፐ አትሽን፥ ዳሎ ግዶን ዎይ ባዋ።
MAT 5:16 ሄሳ መላ አሳይ ህንተ ሎኦ ኦሱዋ በእድ፥ ሳሎን ደእያ ህንተ አዋ ቦንቻና መላ ህንተ ፖኦይ አሳ ስንꬃን ፖኦ።
MAT 5:17 “ታኒ ሙሰ ህግያነ ናበታ ቃላ ሻራናዉ ይዳ ህንተዉ ዳኖፖ። ታኒ፥ ኤንቲ ኦድዳይስ ቱማ ግደይሳ ቆንጭሳናዉ ያስፐ አትሽን፥ ሻራናዉ ያቢከ።
MAT 5:18 ታ ህንተዉ ቱማ ኦዳይስ፤ ሳሎይነ ሳእ አꬋና ጋካናዉ ህገ ኡባይ ፖለታናፐ አትሽን፥ ህግያፈ እስ ቃላይ ዎይኮ ፕዳለይ አና።
MAT 5:19 ሄሳ ግሾ፥ ሀ ኪታታፐ ጉፅያ እስ ኪታ መንꬅያ ኦንካ ቃስ ሀራታ ሄሳꬆ ኦꬃና መላ ታማርሰይ ኦንካ ሳሎ ካዎተꬃን ኡባፈ ጉꬃ ግዳና። ሽን ሀ ኪታ ፖለይስነ ሀራታካ ፖላና መላ ታማርሰይ ሳሎ ካዎተꬃን ግታ ግዳና።
MAT 5:20 ታ ህንተዉ ኦዳይስ፤ ህንተ ፅሎተꬃይ ፋርሳወታ ፅሎተꬃፈነ ህገ አስታማረታ ፅሎተꬃፈ አꬎና እፅኮ፥ ሳሎ ካዎተꬃ ገለከታ።
MAT 5:21 “ህንተ ማይዛታስ፥ ‘ዎꬎፕተ፤ ሸምፖ ዎꬍዳ ኦንካ ፕርደታና’ ጌተቶይሳ ስእደታ።
MAT 5:22 ሽን ታ ህንተዉ ኦዳይስ፤ ባ እሻ ቦላ ሀንቀትያ ኡባይ ፕርደታና። ባ እሻ ጫይያ ኦንካ ዳይና ስን ፕርዳስ ሺቃና። ባ እሻኮ፥ ‘ኤያይ’ ግያ ኦንካ ቃስ ጋናመ ታማን ፕርደታና።
MAT 5:23 “ሄሳ ግሾ፥ ኔኒ ነ ያርሹዋ ያርሽያ ዎደ፥ ነ እሻ ቆህዳባይ ነዉ አኬከትኮ፥
MAT 5:24 ነ ያርሹዋ ሄ በሳን አጋዳ ባ፤ ኮይሮታ ባዳ ነ እሻራ ጊጋ፤ ያታ ስማዳ፥ ነ ያርሹዋ ፆሳስ ያርሻ።
MAT 5:25 “ነና ሞተይሳራ ፕርዳ ኬꬅ ባሸ ኦገ ቦላ እያራ ጊጋ። ሄስ አቶ ጊኮ እ ነና ዳይና ስን ኤፋና። ዳይናይ ነና ቃቸይሳስ አꬅድ እማና፤ እ ነና ዎይነን የጋና።
MAT 5:26 ታ ቱማ ኦዳይስ፤ ነ ቦላ ፕርደትዳ አጩዋ እስ ሳንትመይ አቶና ጭጋ ኦንጋና ጋካናዉ ቃሾ ኬꬃፈ ከያካ።
MAT 5:27 “ሀይሳፈ ካሰ፥ ‘ላይማቶፕተ’ ጌተቶይሳ ስእደታ።
MAT 5:28 ሽን ታ ህንተዉ ኦዳይስ፥ ማጫስ ፄልድ፥ አሞትዳ ኡባይ ባ ዎዛናን ኢራ ላይማቴስ።
MAT 5:29 ነ ኡሻቻ አይፈይ ነዉ ናጋራስ ጋሶ ግድኮ፥ ከሳ ሆላ። ነ አሳተꬃይ ኩመꬅ ጋናመ ታማን ዎꬋናፐ ነ አሳተꬃፈ እሶይ ꬋይኮ ነዉ ሎኦ።
MAT 5:30 ነ ኡሻቻ ኩሸይ ነዉ ናጋራስ ጋሶ ግድኮ፥ እያ ቃንፃ ሆላ። ነ አሳተꬃይ ኩመꬅ ጋናመ ታማን ዎꬋናፐ ነ አሳተꬃፈ እሶይ ꬋይኮ፥ ነዉ ሎኦ።
MAT 5:31 “ ‘ባ ማቼስ አንጆ ዎርቃተ እሞ’ ጌተትስ።
MAT 5:32 ሽን ታ ህንተዉ ኦዳይስ፤ ባ ማቹያ ላይማቶና ደእሽን ብልያ ኦንካ እያ ላይማታና መላ ኦꬄስ። ሄሳዳካ፥ አንጀትዳ ማጫስዉ ኤክያ ኡባይ ላይማቴስ።
MAT 5:33 “ህንተ ማይዛታኮ፥ ‘ዎርዶን ጫቆፍተ፤ ህንተ ፆሳ ስንꬃን ጫቅዳይሳ ፖልተ’ ጌተትዳይሳ ስእደታ።
MAT 5:34 ሽን ታ ህንተዉ ኦዳይስ፤ ኡባራካ ጫቆፍተ። ፆሳይ ኡትያ አራታ ግድያ ግሾ፥ ሳሎን ጫቆፍተ።
MAT 5:35 እያ ቶሆይ የꬍያ ሶ ግድያ ግሾ፥ ሳአንካ ጫቆፍተ። ግታ ካዋ ካታማ ግድያ ግሾ፥ የሩሳላመንካ ጫቆፍተ።
MAT 5:36 ህንተ ብናናፐ እሱዋካ ቦꬅ ዎይኮ ካሬꬅ ኦꬃናዉ ዳንዳኦና ግሾ፥ ህንተ፥ ህንተ ሁጰንካ ጫቆፍተ።
MAT 5:37 ሄሳ ግሾ፥ ህንተ ቃላይ፥ ‘ኤ’ ዎይኮ ‘አካይ’ ግዶ። ሄሳፈ ካረ ከየይ ፃላሄፐ ዬስ።
MAT 5:38 “ ‘አይፈ ግሾ አይፈ፤ አቻ ግሾ አቸ’ ጌተትዳይሳ ስእደታ።
MAT 5:39 ሽን ታ ህንተዉ ኦዳይስ፤ ህንተ ቦላ ኢታባ ኦꬅያ ኡራራ ኤቀቶፍተ። ኦንካ ነ ኡሻቻ ሻካላ ባቅኮ ነ ሀድርሳ ሻካላ በሳ።
MAT 5:40 እስ አስ ነ ሻምዝያ ኤካናዉ ነና ሞትኮ፥ ነ ኮትያ ጉጃዳ እማ።
MAT 5:41 እስ አስ ነና ዎልቃን ባባ ቶስድ እስ ሳተ ኦገ ባራ ባና መላ ነና ኡንኤꬅኮ፥ እያራ ናምኡ ሳተ ኦገ ባ።
MAT 5:42 ዎስያ ኦደስካ እማ፤ ኔፐ ታልአናዉ ኮይያ ኦናካ ድጎፋ።
MAT 5:43 “ ‘ነና ዶሰይሳ ዶሳ፤ ነና እፀይሳ እፃ’ ጌተቶይሳ ስእደታ።
MAT 5:44 ሽን ታ ህንተዉ ኦዳይስ፤ ህንተ ሞርከታ ዶስተ፤ ህንተና ቆሄይሳታስ ዎስተ።
MAT 5:45 ሄሳꬆ ህንተ ኦꬅኮ፥ ሳሎን ደእያ ህንተ አዋስ ህንተ ናይታ ግዳና። እ ኢታታስነ ሎኦታስ አዋ ከሴስ፤ ፅሎታስነ ናጋራንቾታስ ባ እራ ቡክሴስ።
MAT 5:46 ህንተና ዶስያ አሳ ፃላላ ህንተ ዶስኮ፥ ህንተዉ አይ ዎይቶይ ደኢ? ሀር አቶሽን፥ ቃራፃ ቃንፅሰይሳትካ ሄሳ ኦꬆሶና።
MAT 5:47 ህንተ፥ ህንተ እሻታ ፃላላ ሳሮꬅኮ፥ ሀራታፐ አይ ሀራ አꬍያባ ኦꬅደቲ? ሀር አቶሽን፥ ፆሳ አማኖና አሳይካ ሄሳ ኦꬆሶና።
MAT 5:48 ህዛ፥ ሳሎን ደእያ ህንተ አዋይ ፖሎ ግዶይሳዳ ህንተካ ፖሎ ግድተ።”
MAT 6:1 “አስ በኦ ግድ ህንተ ሎኦ ኦሱዋ አሳ ስንꬃን ኦꬆናዳ ናገትተ። ሄሳꬆ ሀኖና እፅኮ ሳሎን ደእያ ህንተ አዋፐ ዎይቶ ደመከታ።
MAT 6:2 “ህንተ ማንቆታስ እምያ ዎደ አሳ ስንꬃን ቦንቸታናዉ ግድ ጩቦት ኦግያ ዶናንነ አይሁደ ዎሳ ኬꬃታን ኦይሳዳ አስ በኦ ግድ ኦꬆፍተ። ታ ህንተዉ ቱማ ኦዳይስ፤ ኤንቲ ባንታ ኩመꬃ ዎይቱዋ ኤክዶሶና።
MAT 6:3 ሽን ህንተ ማንቆታስ እምያ ዎደ ህንተ ኡሻቻ ኩሸይ ኦይሳ ህንተ ሀድርሳ ኩሸይ ኤሮፖ፤
MAT 6:4 ህንተ እሞይ ጌማን ግዶ። ጌማን ኦይሳ በእያ ህንተ አዋይ ህንተዉ ዎይቱዋ ቆንጨን እማና።
MAT 6:5 “ዎሳ ዎስሸ ጩቦታꬆ ሀኖፕተ። ኤንቲ፥ ባንታና አስ በኦ ግድ አይሁደ ዎሳ ኬꬃንነ ኦግያ ዶናን ኤቅድ ዎሰይሳ ዶሶሶና። ታ ህንተዉ ቱማ ኦዳይስ፤ ኤንቲ ባንታ ኩመꬃ ዎይቱዋ ኤክዶሶና።
MAT 6:6 ሽን ኔኒ ዎስያ ዎደ፥ ነ ሶ ገላ፥ ዉላ ጎርዳዳ ጌማን ደእያ ነ አዋኮ ዎሳ፤ ጌማን ኦሰትዳይሳ በእያ ነ አዋይ ነዉ ዎይቱዋ እማና።
MAT 6:7 ህንተ ዎስያ ዎደ አማኖና አሳꬆ ጮ ቃላ ዳርስድ ዎሶፍተ። ኤንቲ አዱስ ዎስን ፆሳይ ስኤስ ግድ ቆፖሶና።
MAT 6:8 ሄሳ ግሾ፥ ኤንታይሳዳ ሀኖፕተ። አይስ ጊኮ፥ ህንተ አዋይ ህንተዉ አይ ኮሽያኮ ህንተ ዎሳናፐ ስንꬃትድ ኤሬስ።
MAT 6:9 “ህዛ፥ ህንተ ያግድ ዎስተ፦ “ ‘ሳሎን ደእያ ኑ አዋዉ፥ ነ ጌሻ ሱንꬃይ አንጀቶ።
MAT 6:10 ነ ካዎተꬃይ ዮ፥ ነ ሸነይ ሳሎን ሀንዳይሳዳ ሳአንካ ሀኖ።
MAT 6:11 ጋላሳ ካꬃ ሀች ሀች ኑስ እማ።
MAT 6:12 ኑኒ ኑና ቆህዳይሳታ፥ አቶ ገይሳዳ፥ ኑስካ ኑ ቆሁዋ አቶ ጋ።
MAT 6:13 ኑና ኢታፐ አሻፈ አትሽን፥ ፓጨን ገልሶፋ። [ካዎተꬃይ፥ ዎልቃይነ ቦንቾይ መርናዉ ኔሳ፤ አምንእ።’]
MAT 6:14 “ህንተ ህንተና ቆህዳይሳታ አቶ ጊኮ፥ ሳሎን ደእያ ህንተ አዋይ ህንተ ቆሁዋካ አቶ ጋና።
MAT 6:15 ሽን ህንተ ሀራ አሳ ናጋራ አቶ ጎና እፅኮ ህንተ አዋይ ህንተ ናጋራ አቶ ጌና።
MAT 6:16 “ህንተ ፆምያ ዎደ ጩቦታꬆ ካዮቶፍተ። አይስ ጊኮ፥ ኤንቲ ፆመይሳ አስ ኤራና መላ ባንታ ሶምኡዋ ቅታዮሶና። ታ ቱማ ኦዳይስ፤ ኤንቲ ባንታ ዎይቱዋ ኤክዶሶና።
MAT 6:17 “ሽን ኔኒ ፆምያ ዎደ ነ ሶምኡዋ ሜጫ፥ ነ ሁጵያ ትየታ።
MAT 6:18 ሄሳዳ ነ ኦꬅኮ ነ ፆምያ ፆማይ አሳፐ ጌምዳይሳ፥ ሽን ጌማን ደእያ ነ አዋይ ኤርያ ፆማ ግዳና። ጌማን ኦሰትዳይሳ በእያ ነ አዋይ ነዉ ዎይቱዋ እማና።
MAT 6:19 “ብል ምያ በሳን፥ ብራት ሽእያሶን፥ ካይሶይ ቦክድ ኤክያሶን፥ ሀ ሳአን፥ ህንተዉ ሻሎ ሺሾፕተ።
MAT 6:20 ሽን ብል ሞናሶን፥ ብራት ሽኦናሶን፥ ካይሶይ ቦክድ ኤኮናሶን ሳሎን ህንተዉ ሻሎ ሺሽተ።
MAT 6:21 ነ ሻሎይ ደእያሱዋን ነ ዎዛናይ ደአና።
MAT 6:22 “አይፈይ አሳተꬃስ ፆምፐ። ሄሳ ግሾ፥ ነ አይፈይ ፓፃ ግድኮ ነ ኩመꬃ አሳተꬃይ ፖኦ ግዴስ።
MAT 6:23 ነ አይፈይ ሀርጋንቾ ግድኮ ነ ኩመꬃ አሳተꬃይ ꬉማ ግዴስ። ህዛ፥ ነናን ደእያ ፖኦይ ꬉማ ግድኮ፥ ꬉማይ አይ መላ አꬍድ ꬉማንዴሻ!
MAT 6:24 “እስ አስ ናምኡ ጎዳስ ሃረታናዉ ዳንዳኤና። እሱዋ ዶስኮ ሀንኩዋ እፄስ፤ ዎይኮ እሱዋ ቦንችኮ ሀንኩዋ ካꬌስ። ፆሳስነ ሚሸስ ሃረታናዉ ዳንዳኤከታ።
MAT 6:25 “ህዛ፥ ስእተ! ህንተ ደኦን ዳናዉ፥ ‘አይ ማኔ? አይ ኡያኔ? አይ ማአኔ?’ ግድ ኡንኤቶፍተ፤ ደኦይ ካꬃፈ ዎይኮ አሳተꬅ ማኦፐ አኔ?
MAT 6:26 ሳሎ ካፎታ ፄልተ፤ ኤንቲ ዘሮኮና፥ ቡጮኮና፥ ሻለን የጎኮና፥ ሽን ህንተ ሳሎ አዋይ ኤንታ ሙዜስ። ህንተ ኤንታፈ ዳሮ አከቲ?
MAT 6:27 ህንተ ግዶፈ ዳሮ ኡንኤትድ ባ ላይꬃ ቦላ እስ ጋላስ ጉጃናዉ ዳንዳኤይ ደኢ?
MAT 6:28 “ቃስ ህንተ ማእያባስ አይስ ኡንኤተቲ? አነ ጪሻታ በእተ፥ ኦሶን ዳቡሮኮና ዎይኮ ሱቆኮና።
MAT 6:29 ስእተ! ሀር አቶሽን፥ ካዋ ሶሎሞነይ ባ ቦንቾ ኡባን ሀ ጪሻታፐ እሱዋ መላካ ማእቤና።
MAT 6:30 ህንተኖ፥ አማኖይ ፓጭዳይሳቶ፥ ፆሳይ ሀች በንትድ ዎንቶ ታማን ዎꬋናዉ ደእያ ማታ ያትድ ማይዝያባ ግድኮ፥ ህንተና ኤንታፈ አꬅድ ዋት ማይዘኔ?
MAT 6:31 ሄሳ ግሾ፥ ‘አይ ማኔ? አይ ኡያኔ? አይ ማአኔ?’ ግድ ኡንኤቶፍተ።
MAT 6:32 ሄ ኡባ ፆሳ አማኖና አሳይ ዳርስድ ደማናዉ ኡንኤቶሶና። ህንተ ሳሎ አዋይ ሄ ኡባይ ህንተዉ ኮሸይሳ ኤሬስ።
MAT 6:33 ሽን ኡባፈ ስን ፆሳ ካዎተꬃነ እያ ፅሎተꬃ ኮይተ፤ ሄ ኡባይ ህንተዉ ጉጅ እመታና።
MAT 6:34 ሄሳ ግሾ፥ ዎንቶስ ቆፕሸ ኡንኤቶፍተ። ዎንቶይስ ዎንቶስ አቆ፤ እስ እስ ጋላሳይ ባዉ ግድያ መቶራ ደኤስ።
MAT 7:1 “ህንተ ቦላ ፕርደቶና መላ ሀራታ ቦላ ፕርዶፍተ።
MAT 7:2 አይስ ጊኮ፥ ሀራታ ቦላ ህንተ ፕርደይሳዳ ህንተ ቦላ ፕርደታና፤ ህንተ ሀራታስ ማክዳባን ህንተዉ ዛር ማከታና።
MAT 7:3 ነ አይፈን ደእያ ቱሱ ዳነይሳ በኦና ነ እሻ አይፈን ደእያ ቡርያ አይስ በአይ?
MAT 7:4 ነ አይፈን ቱስ ደእሽን ነ እሻ አይፈን ደእያ ቡርያ ከሶ ጋናዉ ዋና ዳንዳአይ?
MAT 7:5 ነኖ ጩቡዋዉ፥ ኮይሮታዳ ነ አይፈን ደእያ ቱስ ዳነይሳ ከሳ። እያፐ ጉየ፥ ነ እሻ አይፈን ደእያ ቡርያ ከሳናዉ ነ ጌሻ ፄላና።
MAT 7:6 “ጉየ ስሚድ ህንተና ሳፆና መላ ጌሻባ ካናታስ የጎፍተ። ባንታ ቶሁዋን የꬍድ ኢሶና መላ ህንተ አልኦ እንቁዋ ጉዱንꬆታ ስንꬃን የጎፍተ።
MAT 7:7 “ዎስተ ህንተዉ እመታና፥ ኮይተ ህንተ ደማና፥ ካረ ይድ ፄግተ ህንተዉ ዶየታና።
MAT 7:8 ዎስያ ኦደስካ እመታና፥ ኮይያ ኦደስካ በንታና፥ ካረ ይድ ፄግያ ኦደስካ ዶየተና።
MAT 7:9 “ህንተ ግዶፈ ባ ናእ ኡይꬅ ዎስኮ ሹች እመይ ኦኔ?
MAT 7:10 ዎይኮ ሞሎ ዎስኮ ሾሽ እመይ ደኢ?
MAT 7:11 ያትን ህንተ ኢታ ግድሸ ህንተ ናይታስ ሎኦባ እሞ ኤርኮ፥ ህንተ ሳሎ አዋይ ባና ዎሰይሳታስ ሎኦባ ዋት ዳርስድ እመኔ?
MAT 7:12 ሀራት ህንተዉ ኦꬃና መላ ህንተ ኮያባ ኡባ ህንተካ ሀራታስ ኦꬅተ። አይስ ጊኮ፥ ሙሰ ህገይነ ናበት ታማርሰይ ሀይሳ።
MAT 7:13 “ፁንꬃ ዉላራ ገልተ፤ አይስ ጊኮ፥ ꬋዮስ ኤፍያ ኦገይ ዎጋ፥ ዉላይካ ዳልጋ። እያራ ገልያ አሳይካ ዳሮ።
MAT 7:14 ሽን ደኡዋኮ ኤፍያ ኦገይነ ዉላይ ፁንꬁ፤ ያ ገልያ አሳይካ ጉꬃ።
MAT 7:15 “ቦላ ባጋራ ዶርሰ ዳንድ ባንታ ጋꬃን ሱꬉመ ግድድ ህንተ ግዶ ገልያ ዎርዳንቾ ናበታፐ ናገትተ።
MAT 7:16 ህንተ ኤንታ፥ ኤንታ አይፍያፐ ኤራና፤ አጉንꬃፈ ዎይነይ፥ ክንቾተፐ ላደይ ማፀተና።
MAT 7:17 ሄሳ መላ ሎኦ ምꬅ ኡባይ ሎኦ አይፈ አይፌስ፤ ኢታ ምꬅ ኢታ አይፈ አይፌስ።
MAT 7:18 ሎኦ ምꬅ ኢታ አይፈ አይፈና፥ ቃስ ኢታ ምꬅ ሎኦ አይፈ አይፋናዉ ዳንዳኤና።
MAT 7:19 ሎኦ አይፈ አይፎና ምꬅ ኡባይ ቃንፀትድ ታማን ፁገታና።
MAT 7:20 ሄሳ ግሾ፥ ህንተ ኤንታ፥ ኤንታ አይፍያን ኤራና።
MAT 7:21 “ሳሎን ደእያ ታ አዋ ሸንያ ኦꬅያ ኡራይ ሳሎ ካዎተꬅ ገላናፐ አትሽን፥ ጮ ታና ‘ጎዳዉ፥ ጎዳዉ’ ግያ ኡባይ ሳሎ ካዎተꬅ ገለና።
MAT 7:22 ፕርዳ ጋላስ ዳሮት፥ ‘ጎዳዉ፥ ጎዳዉ፥ ነ ሱንꬃን ትንብተ ኦድቦኮ? ነ ሱንꬃን ቱና አያናታ ከስቦኮ? ነ ሱንꬃን ማላታታ ኦꬅቦኮ?’ ያጋና።
MAT 7:23 ሄ ዎደ ታኒ፥ ‘ታ ህንተና ኡባራካ ኤርከ፥ ህንተ ኢታ ኦይሳት ታፐ ሃክተ’ ያጋና።
MAT 7:24 “ህዛ፥ ሀ ታ ቃላ ስእድ ኦꬅያ ኦንካ ባ ኬꬃ ሹቻ ቦላ ኬፅዳ ዎዛናማ አሳ መላ።
MAT 7:25 እራይ ቡክስ፥ ድኦይ ድእስ፥ ጫርኮይካ ጫርክድ ሄ ኬꬃ ሱግስ። ሽን ኬꬃይ ሹቻ ባሶ ቦላ ኬፀትዳ ግሾ ኩንድቤና።
MAT 7:26 ሀ ታ ቃላ ስእድ ኦꬆና ኦንካ ባ ኬꬃ ሻፈ ቦላ ኬፅዳ ኤያ ኡራ መላ።
MAT 7:27 እራይ ቡክድ፥ ድኦይ ድእድ፥ ጫርኮይካ ጫርክድ፥ ሄ ኬꬃ ሱግን፥ ሄ ኬꬃይ ኩንድስ፤ እያ ኩንደꬃይካ ዎልቃማ” ያግስ።
MAT 7:28 የሱሲ ባ ኦዳ ኦንግዳ ዎደ እያ ትምርተይ ህገ አስታማረታ መላ ግዶናሽን፥ ማታራ ግድያ ግሾ አሳይ እያ ትምርትያን ማላለትዶሶና።
MAT 8:1 የሱሲ ዙማፐ ዎꬍያ ዎደ ዳሮ አሳይ እያ ካልዶሶና።
MAT 8:2 ሄኮ እስ ባሮ ሀርጋንቾይ እያኮ ሺቅድ፥ እያ ስንꬃን ጉልባትድ፥ “ጎዳዉ፥ ነ ሸነ ግድኮ ታና ጌሻዳ ፓꬃናዉ ዳንዳኣሳ” ያግስ።
MAT 8:3 የሱሲ ባ ኩሽያ የድድ እያ ቦችድ፥ “ኤ፥ ታ ሸነ፥ ፓፃ” ያግስ። ኡራይ ኢራካ ጌይ አግስ።
MAT 8:4 የሱሲ እያኮ፥ “ነ ፓፁዋ ኦደስካ ኦዶፓ። ሽን ባዳ ነ ጌያዳ ፓፆይሳ ካህነ በሳ። ነ ፓፁዋስ ማርካ ግዳና መላ ባዳ ሙሰይ ኪትዳ ያርሹዋ ያርሻ” ያግስ።
MAT 8:5 የሱሲ ቅፍርናሆማ ካታማ ጋክዳ ዎደ፥ እስ ማቶ ሀላቃይ እያኮ ሺቅድ፥
MAT 8:6 “ጎዳዉ፥ ታ አይለይ አሳተꬃይ ጉንድን ዳሮ ሀርገትድ፥ ሶን ዝንእድ ደኤስ” ያግድ ዎስስ።
MAT 8:7 የሱሲ ዛሪድ፥ “ታኒ ባዳ እያ ፓꬃና” ያግስ።
MAT 8:8 ሽን ማቶ ሀላቃይ ዛሪድ፥ “ጎዳዉ፥ ነ ታ ሶ ገላናዉ በሲያ አስ ግድከ፥ ሽን ነ ሀን ኡታዳ ቃላ ፃላላ ኦዳ፥ ታ አይለይ ፓፃና።
MAT 8:9 አይስ ጊኮ፥ ታፐ ቦላራ ታና ኪትያ አሳት ደኦሶና፥ ቃስ ታፐ ጋርሳራ ታዉ ኪተተይሳት ደኦሶና። ኤንታፈ እሱዋ፥ ‘ባ’ ግያደ ቤስ፤ ሀንኩዋ ቃስ ‘ሃያ!’ ግያደ ዬስ። ታ አይልያ፥ ‘ሀይሳ ኦꬃ’ ግያደ ኦꬄስ” ያግስ።
MAT 8:10 የሱሲ ሄሳ ስእዳ ዎደ ማላለትድ፥ ባና ካልያ አሳኮ፥ “ታ ህንተዉ ቱማ ኦዳይስ፤ ታኒ ሀይሳ መላ አማኖ እስራኤለ አሳንካ በአብከ።
MAT 8:11 ታ ህንተዉ ኦዳይስ፤ ዳሮት ዶሎሀፐነ ዉሎሀፐ ይድ፥ ሳሎ ካዎተꬃን አብራሃመራ፥ ይሳቃራነ ያይቆባራ እስፈ እማቶ ቦላ ኡታና።
MAT 8:12 ሽን ሳሎ ካዎተꬃ ላታናዉ በስሽን አትዳይሳት ካረ ꬉማን ሆለታና። ያን ኤንታዉ ዬሆነ አቻ ጋርጨꬅ ግዳና” ያግስ።
MAT 8:13 የሱሲ ማቶ ሀላቃኮ፥ “ነ ሶ ባ፥ ነ አማኑዋꬆ ነዉ ሀኖ” ያግስ። እያ አይለይ ኢራካ ፓፅ አግስ።
MAT 8:14 የሱሲ ጰፅሮሳ ሶ ገልያ ዎደ፥ ጰፅሮሳ ማቸ አይያ ቆፆ ምሻ ሀርገን ሳከታዳ ዝንእዳሮ በእስ።
MAT 8:15 የሱሲ እ ኩሽያ ቦችዳ ዎደ ቆፆይነ ምሻይ አጋግስ። ፓፃ ደንዳዳ እያ ሞካሱ።
MAT 8:16 ሄ ዎደ ኦማርስ ቱና አያናን ኦይከትዳ ዳሮ አሳታ፥ አሳይ የሱሳኮ ኤህዶሶና። እካ ቱና አያናታ ባ ቃላን ከስስ፥ ሀርጋንቾታ ኡባ ፓꬅስ።
MAT 8:17 ሄሳንካ ናብያ እሳያስ፥ “እ ኑ ሀርግያ ባዉ ኤክስ፥ ኑ ዳቡራ ቶክስ” ግዳ ቃላይ ፖለትስ።
MAT 8:18 የሱሲ ዳሮ አሳይ እያ ዩሹዋን ኤቅዳይሳ በእድ፥ አባፈ ሄፍንꬅ ፕናና መላ ባ ታማረታ ኪትስ።
MAT 8:19 ህገ አስታማረታፐ እሶይ፥ “አስታማርያዉ፥ ነ ብያ በሳ ኡባ ታ ካላና” ያግስ።
MAT 8:20 የሱሲ እያኮ “ዎርካናታስ ኦል ደኤስ፥ ሳሎ ካፎታስ ኬꬅ ደኤስ። ሽን አሳ ናኣስ ባ ሁጵያ ሸምፕስያ በሲ ባዋ” ያግስ።
MAT 8:21 የሱሳ ካልያ አሳታፐ እሶይ፥ “ጎዳዉ፥ ታኒ ስንꬃታ ባዳ ታ አዋ ሞጋዳ ያና” ያግስ።
MAT 8:22 ሽን የሱሲ፥ “ሀይቅዳይሳት ባንታ ሀይቆታ ሞጎ፤ ኔኒ ታና ካላ” ያግስ።
MAT 8:23 የሱሲ ባናዉ ዎጎሉዋን ገልዳ ዎደ፥ እያ ታማረትካ እያራ ባናዉ ገልዶሶና።
MAT 8:24 ኤንቲ ቆፖና ደእሽን፥ ዎልቃማ ሆበይ ሃꬃ ቦላ ደንድን ዎጎሎይ ምተታናዉ ጋክስ። ሽን የሱሲ ꬍስክስ።
MAT 8:25 እያ ታማረት እያኮ ሺቅድ እያ ባርከꬅድ፥ “ጎዳዉ፥ ኑ ꬋዮስ ኑና አሻርክ” ያግዶሶና።
MAT 8:26 የሱሲ ኤንታኮ፥ “ህንተኖ፥ አማኖይ ፓጭዳይሳቶ፥ አይስ ያየቲ?” ያግስ። ደንድድ፥ ሆቢያነ ጎትያ ኤስስ። ኤለስድ ኡባባይ ስእ ግስ።
MAT 8:27 እያ ታማረት ማላለትድ፥ “ሀይስ፥ ሀር አቶሽን፥ ሆበይነ ጎተይ ኪተተይስ ዋንዳ አሴ?” ያግዶሶና።
MAT 8:28 የሱሲ አባፈ ሄፍንꬃን ደእያ ገርገሶነ ቢታ ጋክዳ ዎደ ቱና አያናይ ኦይክዳ ናምኡ አሳት ዱፎፐ ከይድ እያራ ጋሄትዶሶና። ኤንቲ ዳሮ ኢታነ ያሽያ አሳታ ግድያ ግሾ አስ ሄ በሳራ አꬋናዉ ዳንዳኤና።
MAT 8:29 ኤንትካ፥ “ፆሳ ናአዉ፥ ኑናነ ነና አይበ ጋይ? ዎደይ ጋኮና ደእሽን ኑና ፕርዳናዉ ያዲ?” ግድ ዋስዶሶና።
MAT 8:30 ኤንታፈ ዳሮ ሃኮና ጉዱንꬆ ዉደይ ሄመቴስ።
MAT 8:31 ቱና አያናት የሱሳ፥ “ነ ኑና ከሳናባ ግድኮ፥ ህን ጉዱንꬆ ዉድያ ግዶ የዳርክ” ያግድ ዎስዶሶና።
MAT 8:32 የሱሲ፥ “ቢተ” ያግስ። ቱና አያናት አሳታፐ ከይድ ጉዱንꬆታን ገልዶሶና። ጉዱንꬆት ኡባይ አፎ ዶናራ ድርግድ ብድ አባን ምተትድ ሀይቅዶሶና።
MAT 8:33 ጉዱንꬆ ዉድያ ሄመይሳት ባቃትድ ካታማ ብድ፥ ሀንዳባነ ቱና አያናይ ኦይክዳ አሳታ ቦላ ኦሰትዳባ ኡባ ኦድዶሶና።
MAT 8:34 ያትን፥ ካታማን ደእያ አሳ ኡባይ የሱሳ በአናዉ ከይዶሶና። ኤንቲ የሱሳ በእዳ ዎደ ባንታ ቢታፈ ከይድ ባና መላ ዎስዶሶና።
MAT 9:1 ሄሳፈ ጉየ፥ የሱሲ ዎጎሉዋን ገልድ፥ አባ ፕንድ ባ ካታማ ብስ።
MAT 9:2 ሀንዳ ጉꬃ አሳት እስ ጉንዳ ኡራ አልጋራ ቶክድ የሱሳኮ ኤህዶሶና። የሱሲ ኤንታ አማኑዋ በእድ፥ ጉንዳ ኡራ፥ “ታ ናአዉ፥ ያዮፋ፤ ነ ናጋራይ አቶ ጌተትስ” ያግስ።
MAT 9:3 ሄ ሳትያን፥ አይሁደ ህገ አስታማረታፐ እሶት እሶት፥ “ሀይስ ፆሳ ጫሸ ግደነ” ያግድ ባንታ ዎዛናን ቆፕዶሶና።
MAT 9:4 የሱሲ ኤንታ ቆፋ ኤርድ፥ “ኢታባ ህንተ ዎዛናን አይስ ቆፔቲ?
MAT 9:5 ሀኖሽን፥ ‘ነ ናጋራይ አቶ ጌተትስ’ ገይሳፈነ ‘ደንዳ ኤቃዳ ባ’ ገይሳፈ አዉስ ካዉዪ?
MAT 9:6 ሽን ሳአ ቦላ ናጋራ አቶ ጋናዉ አሳ ናኣስ ማት ደኤይሳ ታ ህንተና ኤርሳና” ያግድ፥ ጉንዳ አድያኮ፥ “ደንዳ ኤቃ፥ ነ አልጋ ቶካዳ፥ ነ ሶ ባ” ያግስ።
MAT 9:7 ጉንዳ ኡራይ ደንድድ ባ ሶ ብስ።
MAT 9:8 ደረይ ሄሳ በእድ ማላለትዶሶና። ሄሳ መላ ማታ አሳስ እምዳ ፆሳ ጋላትዶሶና።
MAT 9:9 የሱሲ ያፐ ደንድድ ብሸ ማቶሳ ገይሳ ቃራፃ ቃንፅስያ በሳን ኡትዳሽን በእድ፥ “ታና ካላ” ያግስ። እካ ደንድድ ካልስ።
MAT 9:10 የሱሲ ማቶሳ ሶን ጋይታ ቦላ ኡትዳሽን፥ ቃራፃ ቃንፅስያ ዳሮ አሳትነ ናጋራንቾት ይድ እያራነ እያ ታማረታራ እስፈ ማናዉ ኡትዶሶና።
MAT 9:11 እስ እስ ፋርሳወት ሄሳ በእድ፥ የሱሳ ታማረታ፥ “ህንተ አስታማረይ ቃራፃ ቃንፅሰይሳታራነ ናጋራንቾታራ አይስ ሚ?” ያግዶሶና።
MAT 9:12 የሱሲ ሄሳ ስእድ፥ “ꬋለ ኮሸይ ሀርጋንቾታሳፈ አትሽን፥ ፓፃታሳ ግደና።
MAT 9:13 ሽን ህንተ ብድ፥ ‘ታኒ ህንተ ያርሹዋ ግዶናሽን ህንተ ሀራታ ማራና መላ ኮያይስ’ ጌተትድ ፃፈትዳይስ አይ ጉሰኮ ኤርተ። አይስ ጊኮ፥ ታኒ ናጋራንቾታ ፄጋናዉ ያስፐ አትሽን፥ ፅሎታ ፄጋናዉ ያቢከ” ያግስ።
MAT 9:14 ሄ ዎደ ዮሃንሳ ታማረት የሱሳኮ ሺቅድ፥ “ኑነ ፋርሳወት ፆሞስ፥ ሽን ነ ታማረት አይስ ፆሞኮና?” ያግድ ኦይችዶሶና።
MAT 9:15 የሱሲ ዛሪድ ኤንታኮ፥ “ማችዉ ኤከይስ ኤንታራ ደእሽን ፄገትድ ይዳ አሳይ ካዮታናዉ ዳንዳኦና? ሙሹራይ ኤንታ ማታፐ ኤከታና ዎደይ ያና፥ ኤንቲ ሄ ዎደ ፆማና።
MAT 9:16 “ኦራꬃ ማኦፐ ፔꬍድ ጋልአ ማኦ ቦላ ስከይ ኦንካ ባዋ። ሄሳꬆ ኦꬅኮ ኦራꬃይ ጋልአ ፔꬌስ። ፔꬃይካ ጉጅ ዳልጌስ።
MAT 9:17 ኦራꬃ ዎይነ ጋልአ ኦጎሮን ቆልያ ኦንካ ባዋ። ሄሳꬆ ኦꬅኮ ኦራꬃ ዎይነይ ጋልአ ኦጎሩዋ ꬉሴስ ዎይነይካ ጉኬስ፤ ኦጎሮይካ ናምአንꬆ ማዶናባ ግዴስ። ሽን ኦራꬃ ዎይነይ ኦራꬃ ኦጎሮን ቆለታናዉ በሴስ። ሄሳꬆ ኦሰትኮ ናምአይካ ኢቶና ናገቶሶና” ያግስ።
MAT 9:18 የሱሲ ሄሳ ኦዶ ቦላ ደእሽን፥ አይሁደ ሀላቃታፐ እሶይ እያኮ ይድ፥ እያ ስንꬃን ጉልባትድ፥ “ታ ናእያ ሀእ ሀይቃሱ፥ ሽን እያ ፓፃና መላ ኔኒ ያዳ ነ ኩሽያ እ ቦላ ዎꬃርክ” ግድ ዎስስ።
MAT 9:19 የሱሲ ደንድድ እያራ ብስ፤ እያ ታማረትካ ካልዶሶና።
MAT 9:20 እ ብሽን ታማነ ናምኡ ላይꬅ ኩመꬅ ሱꬅ ጎግድ ዋይስያ እስ ማጫስያ ጉየራ ሺቃዳ የሱሳ አፍላ ማጫራ ቦቻሱ።
MAT 9:21 እያ ባ ዎዛናን፥ “ታ እያ አፍላ ማጫራ ፃላላ ቦችያኮ ፓፃና” ያጋዳ ቆፓሱ።
MAT 9:22 የሱሲ ጉየ ስም እዮ ፄልድ፥ “ታ ናተ፥ ያዮፋ! ነና ነ አማኖይ ፓꬅስ” ያግስ። ማጫስያ ኤለሳዳ ፓፃ አጋሱ።
MAT 9:23 የሱሲ አይሁደ ሀላቃ ሶ ጋክያ ዎደ ዛየ ፑነይሳታነ ዬከይሳታ በእድ፥
MAT 9:24 “አነ ክችተ፤ ጉꬃ ናእያ ꬍስካሱፐ አትሽን፥ ሀይቃቡኩ” ያግስ። ሽን አሳይ እያ ቦላ ሚጭዶሶና።
MAT 9:25 አሳ ካረ ከስዳፐ ጉየ ሶ ገልድ፥ ናኤ ኩሽያ ኦይክስ፥ ናእያ ደንዳ ኤቃሱ።
MAT 9:26 ሄ ዎረይ ሄ ቢታ ኡባ ጋክስ።
MAT 9:27 የሱሲ ያፐ ደንድድ ገደ ስን ብያ ዎደ ናምኡ ቆቀት ባንታ ቃላ ꬎቁ ኦꬅድ፥ “ዳዊታ ናአዉ፥ ኑና ማራርክ” ያግሸ እያ ካልዶሶና።
MAT 9:28 የሱሲ ሶ ገልዳ ዎደ ቆቀት እያ ካልድ ይዶሶና። የሱሲ ኤንታኮ፥ “ታኒ ሄሳ ኦꬃናዉ ዳንዳኤይሳ ህንተ አማነቲ?” ያግስ። ኤንትካ፥ “ኤ፥ ጎዳዉ” ያግድ ዛርዶሶና።
MAT 9:29 ሄሳፈ ጉየ፥ የሱሲ ኤንታ አይፍያ ቦችድ ኤንታኮ፥ “ህንተዉ፥ ህንተ አማኑዋꬆ ሀኖ” ያግስ።
MAT 9:30 ኤንታ አይፈይካ ዶየትስ። የሱሲ ኤንታኮ፥ “ሀይሳ ኦደስካ ኦዶፕተ” ያግድ ምንꬅ ኦድስ።
MAT 9:31 ሽን አሳት ብድ የሱሳባ ሄ ቢታ ኡባን ኦድዶሶና።
MAT 9:32 ኤንቲ ያፐ ከይያ ዎደ አሳይ ቱና አያናይ ኦይክድ ሙምስዳ እስ አስ የሱሳኮ ኤህዶሶና።
MAT 9:33 ቱና አያናይ ከይዳፐ ጉየ ሙመ ኡራይ ኦደትስ። ደረይካ ማላለትድ፥ “ሀይሳ መላ ኦራꬃባይ እስራኤለ ቢታን ሀንቤና” ያግዶሶና።
MAT 9:34 ሽን ፋርሳወት፥ “ቱና አያናታ ሀላቃን ቱና አያናታ ከሴስ” ያግዶሶና።
MAT 9:35 የሱሲ አይሁደ ዎሳ ኬꬃታን ታማርስሸ፥ ሳሎ ካዎተꬃ ዎንገላ ሳባክሸ፥ አሳ ሀርገ ኡባፈ ፓꬅሸ ካታማታንነ ጉታ ኡባን ዩይስ።
MAT 9:36 ዳሮ ደረይ፥ ሄምያ አስ ባይና ዶርሳዳ ኤንታና በእያ አስ ꬋይን ኡንኤትድ ደኤይሳታ በእድ ኤንታዉ ቃትስ።
MAT 9:37 ባ ታማረታኮ፥ “ሺቃና ካꬃይ ዳሮ፥ ሽን ካꬃ ሺሽያ አሳይ ጉꬃ።
MAT 9:38 ሄሳ ግሾ፥ ጎዳይ ካꬃ ሺሽያ ኦሳንቾታ የዳና መላ ዎስተ” ያግስ።
MAT 10:1 የሱሲ ታማነ ናምኡ ታማረታ ባኮ ፄግድ፥ ቱና አያናታ ከሳና መላነ ሀርገ ኡባ ፓꬃና መላ ኤንታዉ ማታ እሚስ።
MAT 10:2 የሱሲ ኪትዳ ታማነ ናምኡ ሀዋረታ ሱንꬃይ፦ ኮይሮይ ጰፅሮሳ ጌተትያ ስሞናነ እያ እሻ እንድርያሳ፥ ዛብድዮሳ ናኣ ያይቆባነ እያ እሻ ዮሃንሳ፥
MAT 10:3 ፍልጶሳነ ባርተለሞሳ፥ ቶማሳነ ቃራፃ ቃንፅስያ ማቶሳ፥ እልፍዮሳ ናኣ ያይቆባ፥ ታድዮሳ፥
MAT 10:4 ባ ቢታስ ምሸትያ ስሞናነ የሱሳ አꬅድ እምዳ አስቆሮታ ይሁዳ።
MAT 10:5 ሄ ታማነ ናምአታ የሱሲ ኪትድ የድሸ፥ “አይሁደ ግዶና ደርያኮ ቦፕተ፥ ቃስ ሳማረታ ካታማካ ገሎፕተ።
MAT 10:6 ሽን እስራኤለ ኬꬃፈ ግድዳ ህን ꬋይዳ ዶርሳታኮ ቢተ።
MAT 10:7 ያ ብድ፥ ‘ሳሎ ካዎተꬃይ ማታትስ’ ግድ ኦድተ።
MAT 10:8 ሀርጋንቾታ ፓꬅተ፥ ሀይቅዳይሳታ ሀይቆፐ ደንꬅተ፥ ባሮ ሀርጋንቾታ ጌሽ ፓꬅተ፥ ቱና አያናታ ከስተ። ህንተ ጮ ኤክዳይሳ ጮ እምተ።
MAT 10:9 ህንተ ኪሰን ዎርቃ፥ ዎይኮ ብራ ሳንትመ ኦይኮፍተ።
MAT 10:10 ህንተ ኦግያስ ካርፂቶ፥ ናምኡ አፍላ፥ ዎይኮ ጫማ ዎይኮ ፃምአ ኦይኮፍተ፤ ኦሳንቹዋስ ጋላሳ ካꬅ ኮሼስ።
MAT 10:11 “ህንተ እስ ካታማ ዎይኮ ጉታ ገልያ ዎደ ህንተና ሞክድ ኤካናዉ ኡፋይትያ ኡራ ኮይድ እያ ሶን ሸምፕተ፤ ህንተ ባና ጋካናዉ ያን ጋምእተ።
MAT 10:12 ቃስ ኦደ ሶካ ገልሸ ሳሮꬅተ።
MAT 10:13 ሄ ኬꬃይ ህንተና ሞክኮ ህንተ ሳሮꬅዳ ሳሮይ ኤንታና ጋኮ፥ ሽን ኤንቲ ሞኮና እፅኮ ህንተ ሳሮꬅዳ ሳሮይ ህንተዉ ጉየ ስሞ።
MAT 10:14 ኦንካ ህንተና ሞኮናነ ህንተ ኦድያባ ስኦና እፅኮ ሄ ኬꬃፈ ዎይኮ ሄ ካታማፐ ከይሸ ህንተ ቶሁዋን ደእያ ባና ፕትድ ከይተ።
MAT 10:15 ታ ህንተዉ ቱማ ኦዳይስ፤ ፆሳ ፕርዳ ጋላሳን ሄ ካታማፐ ሶዶመስነ ጋሞራ ካታማታስ ፕርዳይ ካዉያና።
MAT 10:16 “ታ ህንተና ዶርሳታዳ ሱꬉመታ ግዶ የዳና። ሄሳ ግሾ፥ ሾሻዳ ጭንጫታ፥ ሆለዳ አዳታ ግድተ።
MAT 10:17 አሳይ ህንተና ፕርዳ ዳይናታስ አꬅድ እማና፥ ቃስ አይሁደ ዎሳ ኬꬃን ህንተና ጋራፋና። ሄሳ ግሾ፥ ኤንታፈ ናገትተ።
MAT 10:18 ታ ግሾ ግድ ህንተና ደርያ ሃረይሳታ ስንነ ካዎታ ስን ኤፋና። ኤንታ ስንꬃንነ አይሁደ ግዶና ደርያ ስንꬃን ኤቅድ ህንተ ታባ ማርካታና።
MAT 10:19 ሽን ህንተና ፕርዳስ አꬅድ እምያ ዎደ፥ ዎይግድ ዛርኖ ግድ ኡንኤቶፍተ፤ ሄ ሳትያን ህንተ ጋናባ ፆሳይ ህንተዉ እማና።
MAT 10:20 አይስ ጊኮ፥ ህንተናን ኦደተይ ህንተ አዋ ጌሻ አያናፐ አትሽን፥ ህንተና ግደከታ።
MAT 10:21 “እሻይ ባ እሻ፥ አዋይ ባ ናአ፥ ሀይቆስ አꬅድ እማና፥ ናይት ባንታና የልዳይሳታ ቦላ ደንድድ ኤንታ ዎꬍሳና።
MAT 10:22 ታ ግሾ ግድ አሳ ኡባይ ህንተና እፃና፥ ሽን ዉርሰꬅ ጋካናዉ ምንዳይ አታና።
MAT 10:23 እስ ሄራፐ ህንተና ኤንቲ ጎድኮ ሀራ ካታማ ባቃትተ። ታኒ ህንተዉ ቱማ ኦዳይስ፤ አሳ ናአይ ያና ጋካናዉ፥ ህንተ እስራኤለ ካታማ ኡባ ካንከታ።
MAT 10:24 “ታማረይ ባ አስታማርያፐ፥ አይለይ ባ ጎዳፐ አና።
MAT 10:25 ታማረይ ባ አስታማርያ፥ አይለይ ባ ጎዳ ዳንኮ እያዉ ግዳና። ኬꬃ ጎዳ ብኤል-ዘቡላ ጊኮ እያ ሶ አሳ ዋትድ ኢስድ ፄገኔ?
MAT 10:26 “ህዛ፥ አሳስ ያዮፍተ። ካመትዳባይ ቆንጮና፥ ቆሰትዳባይ ጌሽ ከዮና አተና።
MAT 10:27 ታኒ ህንተዉ ꬉማን ኦድያባ ህንተ ፖኦን ኦድተ፤ ታ ህንተዉ ሀይꬃን ካልካሽዳባ ዳባባን አዋጅተ።
MAT 10:28 አሾፐ አትሽን፥ ሸምፖ ዎꬋናዉ ዳንዳኦናይሳታስ ያዮፍተ። ሽን ሸምፑዋነ አሹዋ ጋናመን ꬋይሳናዉ ዳንዳእያ ፆሳስ ያይተ።
MAT 10:29 ናምኡ ቡበት እስ ሳንትመን ባይዘቶኮናዬ? ሀኖፐ አትሽን፥ ኤንታፈ እስናካ ህንተ ፆሳይ ጎና ደእሽን ሳአን ዎꬉኩ።
MAT 10:30 ሀር አቶሽን፥ ህንተ ሁጰ ብናናይካ ፓይደትድ ደኤስ።
MAT 10:31 ህዛ፥ ዳሮ ቡበታፐ ህንተ አꬍያ ግሾ ያዮፍተ።
MAT 10:32 “አሳ ስንꬃን ታዉ ማርካትያ ኡባስ ታንካ ሳሎን ደእያ ታ አዋ ስንꬃን ማርካታና።
MAT 10:33 ሽን አሳ ስንꬃን ታና ካደይሳ ታንካ ሳሎን ደእያ ታ አዋ ስንꬃን ካዳና።
MAT 10:34 “ታኒ ሳአን ሳሮ ኤሀናዉ ይዳ ህንተዉ ዳኖፖ። ታኒ ቶራፐ አትሽን፥ ሳሮተꬅ ኤሀናዉ ያቢከ።
MAT 10:35 ታኒ ይዳይ፥ “ ‘ናኣ አዋፐ ማጫ ናእዉ አየፐ ናኣ ማችዉ አዝና አየፐ ሻካናሳ።
MAT 10:36 አሳስ ሞርከት እያ ሶ አሳታ ግዳና።’
MAT 10:37 “ታፐ አꬅድ ባ አዋ ዎይኮ ባ አይዉ ዶሰይ፥ ታባ ግዳናዉ በሰና። ባ አደ ናአ ዎይኮ ባ ማጫ ናእዉ ታፐ አꬅድ ዶሰይ፥ ታባ ግዳናዉ በሰና።
MAT 10:38 ባ ማስቃልያ ቶክድ ታና ካሎና ኦንካ ታባ ግዳናዉ በሰና።
MAT 10:39 ባ ሸምፑዋ አሻናዉ ኮየይ ꬋይሳና፥ ሽን ባ ሸምፑዋ ታ ግሾ አꬅድ እመይ አሻና።
MAT 10:40 “ህንተና ሞከይ ታና ሞኬስ፥ ታና ሞከይ ቃስ ታና ኪትዳይሳ ሞኬስ።
MAT 10:41 ናብያ ናበ ሱንꬃን ሞከይ፥ ናብያꬆ ዎይተታና፤ ቃስ ፅሉዋ ፅሎ ሱንꬃን ሞከይ፥ ፅሉዋꬆ ዎይተታና።
MAT 10:42 ታ ህንተዉ ቱማ ኦዳይስ፤ ሀ ታ ታማረታፐ ጉፅያ እሱዋስ ታና ካልያ ግሾ ሀር አቶሽን ጉꬃ እርፃ ሃꬅ እምኮ እያ ዎይቶይ ꬋየና” ያግስ።
MAT 11:1 የሱሲ ታማነ ናምኡ ታማረታ ኪትዳፐ ጉየ ያፐ ደንድድ ታማርሳናዉነ ሳባካናዉ ጋልላ ካታማታ ብስ።
MAT 11:2 ዮሃንስ ቃሾ ኬꬃን ደእሸ ክርስቶስ ኦꬅያባታ ስእድ፥ ባ ታማረታፐ እያኮ ኪትድ፥
MAT 11:3 “ያና ጌተትዳይ ነነዬ? ዎይኮ ኑኒ ሀራ ናግኖ?” ያግድ ኦይችስ።
MAT 11:4 የሱሲ ኤንታኮ ዛሪድ፥ “ብድ ህንተ ስእያባነ ህንተ በእያባ ዮሃንሳስ ኦድተ።
MAT 11:5 ቆቀት ፄሎሶና፥ ዎበት ሄመቶሶና፥ ባሮ ሀርጋንቾት ፓፆሶና፥ ቱለት ስኦሶና፥ ሀይቅዳይሳት ሀይቆፐ ደንዶሶና፤ ማንቆታስ ዎንገላይ ሳባከቴስ።
MAT 11:6 ታናን ꬉበቶናይ አንጀትዳይሳ” ያግስ።
MAT 11:7 ዮሃንሳ ታማረት ጉየ ስሚድ ብን፥ የሱሲ ደርያስ ዮሃንሳባ ኦድሸ፥ “ሀ መላ ቢታ አይ በአናዉ ከይደቲ? ጫርኮይ ቃꬅያ ማይረ በአናዉ ይደትዬ?
MAT 11:8 ያትን፥ አይ በአናዉ ከይደቲ? ኮይሰ ማኦ ማእዳ አሰ በአናሰዬ? ኮይሰ ማኦ ማእዳ አሳት ካዎ ጋꬎን ደኦሶና።
MAT 11:9 ያትን፥ አይ በአናዉ ከይደቲ? ናበ በአናሰዬ? ሄኮ፥ ህንተ ናበፐ አይሳ በኤታ።
MAT 11:10 “ነ ኦግያ ነ ስንꬃን ጊግስያ ታ ኪታንቹዋ ኔፐ ስን ኪታና” ጌተትድ ፃፈትዳይ እያሳ።
MAT 11:11 ታ ህንተዉ ቱማ ኦዳይስ፤ ማጫሳፐ የለትዳይሳታ ግዶፈ ዮሃንሳፐ አይ ኦንካ ባዋ፤ ሳሎ ካዎተꬃን ኡባፈ ጉፀይ እ፥ እያፐ አꬋና።
MAT 11:12 ፃማቅያ ዮሃንሳ ዎድያፐ ዶምድ ሀች ጋካናዉ ሳሎ ካዎተꬃይ ዳሮ ናቀቴስ፥ ምንዳ አሳት ዎልቃን ያ ገላና።
MAT 11:13 ናበት ኡባይነ ሙሰ ህገይ ዮሃንሳ ዎደ ጋካናዉ ሳሎ ካዎተꬃባ ትንብተ ኦድዶሶና።
MAT 11:14 ህዛ፥ ህንተ ኤንታ ኪታ አማናና ግድኮ፥ ያና ጌተትዳ ኤልያስ፥ እ ዮሃንሳ።
MAT 11:15 ህዛ፥ ስእያ ሀይꬅ ደኤይ ስኦ።
MAT 11:16 “ህዛ፥ ሀ ዎድያ የለተꬃ አይብራ ዳንሶ? ግያ ግዶን ኡትድ ዎል ፄግድ፥
MAT 11:17 ‘ኑ ህንተዉ ሱሱልኤ ፑንን፤ ህንተ የፀከታ። ኑ ሳቢድ ዘሌልን፤ ህንተ ዬከከታ’ ግያ ናይታ ዳኖሶና።
MAT 11:18 ፃማቅያ ዮሃንስ ሞናነ ኡዮና ይን፥ ‘ቱና አያን ደኤስ’ ያግደታ።
MAT 11:19 አሳ ናአይ ምሸነ ኡይሸ ይን፥ ‘ያራምባነ ኡሻንቾ፥ ቃራፃ ቃንፅሰይሳታነ ናጋራንቾታ ዳቦ’ ያግደታ። ህዛ፥ ጭንጫተꬃ ቱማተꬃይ እያ ኦሱዋን ቆንጬስ” ያግስ።
MAT 11:20 ሄሳፈ ጉየ፥ የሱሲ ዳሮ ማላታታ ኦꬅዳ ካታማታን ደእያ አሳት ባንታ ናጋራፐ ስሚድ ማሮታን ገሎና እፅዳ ግሾ ኤንታና፥
MAT 11:21 “ኮራዝነ ካታማዉ ነና አየ! ቤተሳይዳ ካታማዉ ነና አየ! አይስ ጊኮ፥ ህንተ ግዶን ኦሰትዳ ማላታት ፅሮሳንነ ስዶናን ኦሰትዳ ግድያኮ፥ ኤንቲ በን ብዶ ትየትድ፥ ካዮ ማኦ ማእድ ባንታ ናጋራፐ ስም አጋና።
MAT 11:22 ሽን ታ ህንተዉ ኦዳይስ፤ ፕርዳ ጋላስ ህንተፈ አꬅድ ፅሮሳስነ ስዶናስ ፕርዳይ ካዉያና።
MAT 11:23 ቃስ፥ ቅፍርናሆማ፥ ኔኒ ፑደ ሳሎ ከያናዉ ኮያይ? ሀነና! ኔኒ ስኦለን የገታና። አይስ ጊኮ፥ ነ ግዶን ኦሰትዳ ማላታት ሶዶመን ኦሰትዳባ ግድያኮ፥ ሶዶመይ ሀች ጋካናዉ ደአናሽን።
MAT 11:24 ሽን ታ ነዉ ኦዳይስ፤ ፕርዳ ጋላስ ኔፐ አꬅድ ሶዶመስ ፕርዳይ ካዉያና” ያግድ ሀንቀትስ።
MAT 11:25 ሄ ዎደ የሱሲ፥ “አዋዉ፥ ሳሉዋነ ሳኣ ጎዳዉ፥ ኔኒ ሀይሳ ኤራንቾታፐነ ጭንጫታፐ ገንꬃዳ ናይታስ ቆንጭስዳ ግሾ፥ ነና ጋላታይስ።
MAT 11:26 ኤ፥ ታ አዋዉ፥ ሀይስ ነ ሎኦ ሸንያዳ ሀንስ።
MAT 11:27 “ኡባይ ታዉ ታ አዋፐ እመትስ። አዋፐ ሀር ናአ ኤረይ ባዋ፥ ናኣፐነ እ ኤንታዉ ቆንጭሳናዉ ኮየይሳታፐ ሀር አዋ ኤራናዉ ዳንዳኤይ ባዋ።
MAT 11:28 “ህንተኖ፥ ዳቡራንቾቶ፥ ቶሆይ ዴፅዳ ኡባይ ታኮ ሃ ዪተ፤ ታኒ ህንተና ሸምፕሳና።
MAT 11:29 ታኒ ታ ዎዛናን አሽከነ አዳ ግድያ ግሾ፥ ታ ቃምባራን ገልተ፥ ታፐ ታማርተ፤ ህንተ፥ ህንተ ሸምፑዋስ ሸምፖ ደማና።
MAT 11:30 ታ ቃምባራይ ሊቆ፥ ቃስ ታ ቶሆይካ ካዉሸ” ያግስ።
MAT 12:1 ሄሳፈ ጉየ፥ ሳምባታ ጋላስ፥ የሱሲ ጋደ ግዶራ አꬌስ። የሱሳ ታማረት ኮሻትዳ ግሾ ትያ ባንጋ ሽርክድ ሞሶና።
MAT 12:2 ሽን ፋርሳወት ሄሳ በእድ የሱሳኮ፥ “ሄኮ፥ ነ ታማረት ሳምባታ ጋላስ ኦꬃናዉ በሶናባ ኦꬆሶና” ያግዶሶና።
MAT 12:3 የሱሲ ዛሪድ፥ “ዳዊቲ ኮሻትዳ ዎደ እያራ ደኤይሳታራ አይ ኦꬅዳኮ ናባብበከቲ?
MAT 12:4 ዳዊቲ ፆሳ ኬꬅ ገልድ ካህነታ ፃላላፐ አትሽን፥ እነ እያራ ደኤይሳታስ በሶና ጌሻ ዳቡዋ ምስ።
MAT 12:5 ዎይኮ ካህነት ሳምባታ ዎጋ ሻርድ ፆሳ ኬꬃን ሳምባታ ጋላስ ኦሶ ኦꬅኮ ኤንታዉ ባላ ግዶናይሳ ሙሰ ህግያን ናባብበከቲ?
MAT 12:6 ሽን ስእተ! ፆሳ ኬꬃፈ አይ ሀይሳን ደኤስ።
MAT 12:7 ‘ታኒ ህንተ ያርሹዋ ግዶናሽን ሀራታ ማራና መላ ኮያይስ’ ግያ ቃላይ ወይ ጉሰኮ ህንተ ኤርዳኮ፥ ፅሎ አሳ ቦላ ፕርደከታ።
MAT 12:8 አሳ ናአይ ሳምባታ ጎዳ” ያግስ።
MAT 12:9 የሱሲ ያፐ ብድ አይሁደ ዎሳ ኬꬅ ገልስ።
MAT 12:10 ያን ኩሸይ ጉንድዳ እስ ኡራይ ደኤስ። የሱሳ ሞታናዉ ጋሶ ኮይያ አሳት፥ “ሳምባታ ጋላስ ፓꬃናዉ በሲ በሰኔ?” ያግድ ኦይችዶሶና።
MAT 12:11 እ ኤንታኮ፥ “ህንተ ግዶፈ እሱዋስ ዶርስ ሳምባታ ጋላስ አፎን ዉልኮ፥ ጎችድ ከሶናይ ኦኔ?
MAT 12:12 ያትን አስ ዶርሳፈ ዋንድ ዳሮ አኔ? ሄሳ ግሾ፥ ሳምባታ ጋላስ ሎኦባ ኦሶይ በሴስ” ያግስ።
MAT 12:13 ሄሳፈ ጉየ፥ የሱሲ አድያኮ፥ “ነ ኩሽያ ፕድ ኦꬃ” ያግን፥ ኡራይ ፕድ ኦꬅስ። እያ ኩሸይ ፓፅድ ሀንኮ ኩሽያዳ ሀንስ።
MAT 12:14 ሽን ፋርሳወት ያፐ ካረ ከይድ፥ የሱሳ ዋት ዎꬋነኮ ማቀትዶሶና።
MAT 12:15 የሱሲ ኤንታ ቆፋ ኤርድ ሄ በሳ አግድ ሀራ ሶ ብስ። ዳሮ አሳይ እያ ካልድ ብዶሶና፥ ሀርጋንቾታ ኡባ ፓꬅስ።
MAT 12:16 የሱሲ፥ “ታባ ሀራ ኦደስካ ኦዶፕተ” ያግድ ምንꬅ ኦድስ።
MAT 12:17 ሄስካ ናብያ እሳያስ፥
MAT 12:18 “ሄኮ ታ ዶርዳ አይለይ፥ ታ ዶሰይስ፥ ታና ኡፋይሰይስ፥ ታኒ ታ አያና፥ እያ ቦላ ሸምፕሳና፤ እ፥ አይሁደ ግዶና ደርያስ ሱረ ፕርዳባ አዋጃና።
MAT 12:19 እ ፓላመና ዎይኮ ካጨና፤ ባ ቃላካ ደንባን ጮ ስሰና።
MAT 12:20 ሱረ ፕርዳን ፆኖ ደማና ጋካናዉ፥ ድንጨትዳ ማይረ መንና፥ ጩይያ ሙቃዳ ቶይሰና።
MAT 12:21 አይሁደ ግዶና ደረይ ኡባይ እያን ኡፋይስ ዎꬃና” ያግድ ፃፍዳይስ ፖለታና መላሳ።
MAT 12:22 ሄሳፈ ጉየ፥ ቱና አያናን ኦይከትዳ ቆቀነ ሙመ አሰ ደኤይሳ እያኮ ኤህዶሶና። የሱሲ ኡራ ፓꬅን፥ ኡራይ ፄልስ፤ ኦደትስ።
MAT 12:23 አሳ ኡባይ ማላለትድ፥ “ሀይስ ዳዊታ ናኣ ግዳንደሻ?” ያግዶሶና።
MAT 12:24 ሽን ፋርሳወት ሄሳ ስእድ፥ “ሀ ኡራይ ቱና አያናታ ከሰይ ቱና አያናታ ሀላቃ ብኤል-ዘቡላ ዎልቃና” ያግዶሶና።
MAT 12:25 የሱሲ ኤንታ ቆፋ ኤርድ፥ “ዎል ግዶን ሻከትያ ካዎተꬃ ኡባይ ኩንዳና፤ ቃስ ዎል ግዶን ሻከትያ ካታማይ ዎይኮ ኬꬃይ ምንድ ኤቀና።
MAT 12:26 ፃላሄይ ፃላሄ ከስያባ ግድኮ ባ ግዶን ሻከትስ ጉሱ። ሄሳꬆ ሀንያባ ግድኮ እያ ካዎተꬃይ ዋንድ ምንድ ኤቃናዉ ዳንዳኢ?
MAT 12:27 ታኒ ቱና አያና ከሰይ ብኤል-ዘቡላ ዎልቃን ግድኮ ህንተና ካልያ አሳት ኦደ ዎልቃን ከሳኔ? ሄሳ ግሾ፥ ህንተና ካልያ አሳት ህንተና ፕርዳና።
MAT 12:28 ሽን ታኒ ቱና አያናታ ከሰይ ፆሳ አያናን ግድኮ፥ ፆሳ ካዎተꬃይ ህንተኮ ይስ።
MAT 12:29 “ዎይኮ እስ አስ ዎልቃማ አሳ ሶ ገልድ እያ ሻሉዋ ቦንቃናዉ ኮይኮ ኮይሮትድ ሄ ኡራ ቃቾና እፅኮ ዋትድ ዳንዳኢ? ያትኮ እያ ሻሉዋ ቦንቃናዉ ዳንዳኤስ።
MAT 12:30 “ታራ ግዶናይ ኦንካ ታራ ኤቀቴስ፤ ቃስ ታራ እስፈ ሺሾና ኡባይ ላሌስ።
MAT 12:31 ሄሳ ግሾ፥ ስእተ፤ አሳይ ኦꬅያ አይ ናጋርነ ጫሻ ቃል ኡባይ አቶ ጌተታና፥ ሽን ጌሻ አያና ጫይያ ኦደስካ እያ ናጋራይ አቶ ጌተተና።
MAT 12:32 ኦንካ አሳ ናአ ቦላ ኢታባ ኦደትኮ እያዉ አቶ ጌተታና፥ ሽን ጌሻ አያና ቦላ ኢታባ ኦደትያ ኦደስካ ሀ ሳአን ግድን ያና አላምያን እያ ናጋራይ አቶ ጌተተና።
MAT 12:33 “ሎኦ ምꬃይ ሎኦ አይፈ አይፌስ፤ ቃስ ኢታ ምꬃይ ኢታ አይፌስ። ህዛ፥ ምꬃይ ኤረተይ ባ አይፍያና።
MAT 12:34 ህንተኖ፥ ሾሻ ናይቶ፥ ህንተ ኢታ ግድሸ ዋንድ ሎኦባ ኦደታናዉ ዳንዳኤቲ? አስ ባ ዎዛናን ኩምዳባፐ ዶናን ኦደቴስ።
MAT 12:35 ሎኦ አስ ባ ዎዛናን ዎꬅዳ ሎኦባፐ፥ ሎኦባ ከሴስ፤ ኢታ አስ ባ ዎዛናን ዎꬅዳ ኢታባፐ፥ ኢታባ ከሴስ።
MAT 12:36 ሽን ስእተ፥ አሳይ ኦደትያ ጮ ኦዳ ኡባስ ፕርዳ ጋላስ ዛሮ እማና።
MAT 12:37 አይስ ጊኮ፥ ነ ኦደትያ ነ ቃላን ፅላና፤ ነ ኦደትያ ነ ቃላይ ነ ቦላ ፕርዳና” ያግስ።
MAT 12:38 ሄሳፈ ጉየ፥ እስ እስ ፋርሳወትነ ህገ አስታማረት የሱሳኮ፥ “አስታማርያዉ፥ ኔኒ ማላታ ኦꬃዳ ኑና በሳ” ያግዶሶና።
MAT 12:39 ሽን የሱሲ ዛሪድ፥ “አማነቶናነ ኢታ የለተꬃይ ማላታ ኮዬስ። ሽን ናብያ ዮናሳ ማላታፐ ሀራ ማላት እያዉ እመተና።
MAT 12:40 ዮናስ ግታ ሞሎ ኡሎን ሄꬑ ጋላስነ ሄꬑ ቃማ ጋምእዳይሳ መላ አሳ ናአይ ሄꬑ ጋላስነ ሄꬑ ቃማ ቢታ ጋርሳን ጋምአና።
MAT 12:41 ናናወ አሳይ ፕርዳ ጋላስ ደንድድ ሀ የለተꬃ ቦላ ፕርዳና፤ አይስ ጊኮ፥ ኤንቲ ዮናስ ሳባክን፥ ስእድ ባንታ ናጋራፐ ስምዶሶና። ሄኮ፥ ዮናሳፐ አይስ ሀይሳን ደኤስ።
MAT 12:42 ፕርዳ ጋላስ ዱገሀ ካውያ ደንዳዳ ሀ የለተꬃ ቦላ ፕርዳና፤ አይስ ጊኮ፥ እያ ሶሎሞነ ጭንጫተꬃ ስአናዉ ቢታ ጋፃፐ ያሱ። ሄኮ፥ ሶሎሞነፐ አይ ሀይሳን ደኤስ።
MAT 12:43 “ቱና አያናይ አሳፐ ከይዳፐ ጉየ ባዉ ሸምፕያ በሲ ኮይድ ሃꬅ ባይና መላ በሳን ዳቡሬስ፥ ሽን ባ ኮይያ ሸምፑዋ ደመና።
MAT 12:44 ያንን፥ ‘ታ አጋ ከይዳ ኬꬃ ስማዳ ባና’ ያጌስ። እ ስምያ ዎደ ኬꬃይ ካይስ ግደይሳነ ፕተትድ ጊግድ ኡትዳይሳ ደሜስ።
MAT 12:45 ህዛ፥ ስም ብድ፥ ባፐ ኢትያ ሀራ ላፑን ኢታ አያናታ ኤክድ ዬስ፤ ኤንትካ ኡራ ግዶ ገልድ ደኦሶና። ሄ ኡራስ ካሰይሳፈ ጉየይስ ዳሮ ኢቴስ። ሀ ኢታ የለተꬃ ቦላ ሄሳ መላ ሀናና” ያግስ።
MAT 12:46 የሱሲ ደርያስ ኦዳ ቦላ ደእሽን እያ አያነ እያ እሻት እያ ኦድሳናዉ ኮይድ ካረን ኤቅዶሶና።
MAT 12:47 እስ አስ እያኮ፥ “ነ አያነ ነ እሻት ነና ኦድሳናዉ ኮይድ ካረን ኤቅዶሶና” ያግስ።
MAT 12:48 የሱሲ ዛሪድ፥ “ታ አይያ ኦኔ? ታ እሻትካ ኦናንቴ?” ያግስ።
MAT 12:49 ባ ኩሽያራ ታማረታ ማልሸ፥ “በእተ፥ ታ አያነ ታ እሻት ሀይሳታ።
MAT 12:50 ሳሎን ደእያ ታ አዋ ሸንያ ኦꬅያ ኡባይ ታ እሻ፥ ታ ምቾነ ታ አዮ” ያግስ።
MAT 13:1 ሄ ጋላስ የሱሲ ሶፐ ከይድ አባ ጋፃን ኡትስ።
MAT 13:2 ዳሮ ደረይ እያ ዩሹዋን ሺቅን አሳ አባ ጋፃን አጋግድ ዎጎሎን ገልድ ኡትስ።
MAT 13:3 አሳስ ዳሮባ ሌምሶን ያግድ ኦድስ፦ “እስ ጎሻንቾይ ዘረꬅ ዘራናዉ ከይስ።
MAT 13:4 እ ዘርያ ዎደ እስ እስ ዘረꬃት ኦገ ጋፃን ዎꬍዶሶና፤ ኤንታካ ካፎት ይድ ማፅ ምዶሶና።
MAT 13:5 እስ እስ ዘረꬃት ጋርሳን ሻሎይ ደእያ ቢታ ቦላ ዎꬍዶሶና። ዳሮ ቢት ባይና ግሾ ኤለስድ ዶልስ።
MAT 13:6 ሽን አዋይ ከይን ሹልስ፤ ፃጶይ ባይና ግሾ መልስ።
MAT 13:7 እስ እስ ዘረꬃይ አጉንꬃ ግዶን ዎꬍስ፤ አጉንꬃይ ድጭድ ሄ ዶላ ጩልስ።
MAT 13:8 ሀራት ቃስ አራዳ ቢታ ቦላ ዎꬍስ፤ ዶልድ አይፈ አይፍስ። እሶይ ፄታ፥ እሶይ ኡሱፑን ታማ፥ እሶይ ቃስ ሀስታማ አይፍስ።
MAT 13:9 ስእያ ሀይꬅ ደእያ ኡራይ ስኦ” ያግስ።
MAT 13:10 የሱሳ ታማረት እያኮ ሺቅድ፥ “አይስ ኔኒ ደርያስ ሌምሶን ኦዳይ?” ያግድ ኦይችዶሶና።
MAT 13:11 እ ዛሪድ፥ “ህንተዉ ሳሎ ካዎተꬃ ፁራ ኤራይ እመትስ፥ ሽን ኤንታዉ እመትቤና።
MAT 13:12 ደእያ ኡባስ ጉዠታና፥ እያዉ ዳራና፥ ሽን ባይናይሳፈ ሀር አቶሽን እያዉ ደእያራካ ኤከታና።
MAT 13:13 ሄሳ ግሾ፥ ታኒ ኤንቲ፥ ፄልሸ ደሞና መላ፥ ስእሸ ስኦና መላ ዎይኮ አኬኮና መላ ኤንታዉ ሌምሶን ኦዳይስ።
MAT 13:14 “እሳያስ ባ ማፃፋን ኦድዳይስ ኤንታ ቦላ ፖለትስ። እ ኦድሸ፥ “ ‘ህንተ ስስ ስኤታ፥ ሽን አኬከከታ፤ ህንተ ፄለታ፥ ሽን በኤከታ።
MAT 13:15 አይስ ጊኮ፥ ሀ አሳ ዎዛናይ ዘልኡምስ፤ ባንታ ሀይꬃ ኤርሸ ቱልስዶሶና፥ ባንታ አይፍያ ጎዝዶሶና። ሄስ ባይነኮ ኤንቲ ባንታ አይፍያን በእድ፥ ባንታ ሀይꬃን ስእድ፥ ባንታ ዎዛናን አኬክድ፥ ታኮ ስማና፥ ታካ ኤንታ ፓꬃናሽን’ ያግስ።
MAT 13:16 “ሽን ህንተ አይፈት በእያ ግሾነ ህንተ ሀይꬃት ስእያ ግሾ ህንተ አንጀትዳይሳታ።
MAT 13:17 ታ ህንተዉ ቱማ ኦዳይስ፤ ዳሮ ናበትነ ፅሎት ህንተ በኤይሳ በአናዉነ ህንተ ስኤይሳ ስአናዉ አሞትዶሶና፥ ሽን ኤንታዉ ሀንቤና።
MAT 13:18 “ህዛ፥ ሀ ዘረꬅ ዘርያ ኡራ ሌምሱዋ ስእተ።
MAT 13:19 ኦገ ጋፃን ዎꬍዳ ዘረꬃ ሌምሶይ ሀይሳ፦ ሳሎ ካዎተꬃ ቃላ ስእድ አኬኮና ኡራ ዎዛናፐ ፃላሄይ ይድ እያ ዎዛናን ደእያ ዘረꬃ ማፅ ድጌስ።
MAT 13:20 ሻሎይ ጋርሳን ደእያ ቢታ ቦላ ዘረትዳይስ ቃላ ስእድ ኤለስድ ኡፋይሳን ኤከይሳታ።
MAT 13:21 ሽን ፃጶ የዳናዉ ዳንዳኦና ግሾ ዳሮ ጋምኦኮና። ቃላ ጋሶን መቶይ ዎይኮ ጎደተꬅ ያ ዎደ ኤለስ ꬉበቶሶና።
MAT 13:22 አጉንꬃ ጋꬃን ዘረትዳይስ ቃላ ስእስ፥ ሽን ሀ አላምያ ዱሳ ህርጋይነ ዱረተꬃ ቆፋይ ቃላ ጩልያ ግሾ አይፈ አይፎና አቴስ።
MAT 13:23 ሽን አራዳ ቢታን ዘረትዳ ዘረꬃይ አኬካን ቃላ ስእያ ኡራ። እ አይፈ አይፌስ፤ እሶይ ፄታ፥ እሶይ ኡሱፑን ታማ እሶይ ቃስ ሀስታማ አይፌስ” ያግስ።
MAT 13:24 የሱሲ ኤንታዉ ሀራ ሌምሶ ኦድስ፥ “ፆሳ ካዎተꬃይ ባ ጎሻን ሎኦ ዘረꬅ ዘርዳ ኡራ ዳኔስ።
MAT 13:25 ሽን አስ ኡባይ ꬍስክን እያ ሞርከይ ይድ ግስትያ ግዶን ሌሾ ዘርድ ብስ።
MAT 13:26 ግስተይ ድጭድ አይፍያ ዎደ ሌሾይ እያ ግዶን በንትስ።
MAT 13:27 “ጋድያ ጎዳ አይለት ጎዳኮ ብድ፥ ‘ጎዳዉ፥ ነ ጎሻን ነ ሎኦ ዘረꬅ ዘራብክሾ? ያትን፥ ሌሾይ አዉፐ ይዴ?’ ያግዶሶና።
MAT 13:28 “እ ኤንታኮ፥ ‘ሄሳ ሞርከይ ኦꬅስ’ ያግስ። “አይለት ጎዳኮ፥ ‘ኑ ብድ ሌሹዋ ሾዳና መላ ኮያይ?’ ያግዶሶና።
MAT 13:29 “ሽን እ፥ ‘አቶ ቦቾፍተ፤ ህንተ ሌሹዋ ሾዳይስ ግሽን ግስተይ ሾደታና።
MAT 13:30 ቦቾፍተ፤ ጫካ ዎደይ ጋካናዉ እስፈ ድጮ። ሄ ዎደ ጫክያ አሳታ ሌሹዋ ስንꬃትድ ማፅድ ታማን ፁጋናዉ ምርቀን ምርቀን ቃችተ። ሽን ግስትያ ሺሽድ ታ ሻልያን ቆልተ’ ያጋና” ያግስ።
MAT 13:31 ቃስ ሀራ ሌምሶ ያግድ ኦድስ፤ “ሳሎ ካዎተꬃይ እስ አስ ባ ጎሻን ባክዳ ጉꬃ ምꬄ አይፈ ዳኔስ።
MAT 13:32 ሄ ምꬄ አይፈይ ሀራ ምꬃ አይፈታፐ ጉꬃ፥ ሽን እያ ዶላ ድጭዳ ሀራ ምꬃታ ኡባፈ አꬋዳ ግታታዉሱ። እ ታሽያን ካፎት ኬፅድ ኡታና ጋካናዉ ዎልቃማ ምꬅ ግዳዉሱ” ያግስ።
MAT 13:33 ካልድካ፥ የሱሲ ሀራ ሌምሶ ኦድስ፤ “ሳሎ ካዎተꬃይ እስ ማጫስ ሄꬑ ጋባተ ꬊለ ኤካ ሙኑቃዳ፥ ሙኑቃይ ደንዳና መላ እያን ጉጅዳ እርሾ ዳኔስ” ያግስ።
MAT 13:34 የሱሲ ደርያስ ሄ ሌምሱዋ ኡባ ኦድስ። ሌምሶይ ባይና እስባካ ኦድቤና።
MAT 13:35 ናበይ ባ ማፃፋን፥ “ታኒ ታ ዶና፥ ሌምሶን ዶያና፤ ሳሎይነ ሳእ መቶሳፐ፥ ጌምዳይሳ ኦዳይስ” ያግድ ኦድዳይስ ሄሳን ፖለትስ።
MAT 13:36 የሱሲ ደርያ ሞይዝድ ሶ ገልስ። እያ ታማረት እያኮ ሺቅድ፥ “ጎሻን ደእያ ሌሹዋ ብርሸꬃ ኑስ ኦዳ” ያግዶሶና።
MAT 13:37 እ ዛሪድ፥ “ሎኦ ዘረꬃ ዘርዳይ አሳ ናአ።
MAT 13:38 ጎሻይ ሀ አላምያ። ሎኦ ዘረꬃይ ሳሎ ካዎተꬃ ናይታ። ሌሾይ ፃላሄ ናይታ።
MAT 13:39 ሌሹዋ ዘርዳይ ሞርክያ ፃላሄ። ጫካ ዎደይ፥ ዎደ ዉርሰꬅ፤ ጫከይሳት ኪታንቾታ።
MAT 13:40 “ሌሾይ ማፀትድ ታማን ፁገተይሳ መላ ዎድያ ዉርሰꬃን ሄሳዳ ሀናና።
MAT 13:41 አሳ ናአይ ባ ኪታንቾታ ኪታና። ኤንቲ ናጋራስ ጋሶ ግደይሳታነ ኢታ ኦꬅያ ኡባ ማፅድ እያ ካዎተꬃፈ ከሳና።
MAT 13:42 ማፅ ሺሽድ ዬሆይነ አቻ ጋርጨꬅ ደእያ ቶኦና ታማን የጋና።
MAT 13:43 ሄ ዎደ ፅሎት ባንታ አዋ ካዎተꬃን አዋዳ ፖአና። ስእያ ሀይꬅ ደኤይ ስኦ!
MAT 13:44 “ፆሳ ካዎተꬃይ ጎሻን ሞገትዳ ሚሸ ዳኔስ። እስ አስ ሄ ሚሽያ ደምድ ዛር ሞግስ። ዳሮ ኡፋይትድ ብድ ባዉ ደእያባ ኡባ ባይዝድ ሄ ጎሻ ጋድያ ሻምስ።
MAT 13:45 “ሄሳዳካ፥ ቃስ ሳሎ ካዎተꬃይ እንቁ ጌተትያ አልኦ ሹቻታ ኮይያ ዛልአንቾ ዳኔስ።
MAT 13:46 ዳሮ አልኦ እንቁዋ ደምድ ብድ ባዉ ደእያባ ኡባ ባይዝድ እያ ሻምስ።
MAT 13:47 “ቃስ ፆሳ ካዎተꬃይ አባን የገትዳ ዱማ ዱማ ቆሞ ሞሎ ኦይክያ ግትያ ዳኔስ።
MAT 13:48 ሞሎ ኦይክያ አሳት ሞሎይ ግትያን ኩምን አባፈ ጋፃ ከስዶሶና። ያን ኡትድ ሎኡዋ ቆር ቆር ዳቾን የግዶሶና፥ ሽን ኢታ ሞሎታ ዎራ ሆልዶሶና።
MAT 13:49 ዎድያ ዉርሰꬃን ሄሳꬆ ሀናና። ኪታንቾት ይድ ናጋራንቾታ ፅሎታፐ ሻክድ፥
MAT 13:50 ዬሆይነ አቻ ጋርጨꬅ ደእያ ቶኦና ታማን የጋና።
MAT 13:51 “ሀ ኡባይ ህንተዉ ገልዴ?” ያግድ ኤንታ ኦይችስ። ኤንቲ ዛሪድ፥ “ኤ” ያግዶሶና።
MAT 13:52 የሱሲ፥ “ህዛ፥ ሳሎ ካዎተꬃ ኤራ ኤክድ ህግያ ታማርስያ ኡባይ፥ ባ ምንጅዳ ሻሉዋፐ ኦራꬃነ ጋልአ ከስያ አሰ ዳኔስ” ያግስ።
MAT 13:53 የሱሲ ሀ ሌምሱዋ ኦድ ዉርስዳፐ ጉየ ያፐ ደንድድ ብስ።
MAT 13:54 ባ የለትዳ ቢታ ብድ አይሁደ ዎሳ ኬꬃን ደርያ ታማርስስ። ኤንቲ ማላለትድ፥ “ሀ ኡራይ ሀ ጭንጫተꬃነ ሀ ማላታታ ኦꬅያ ዎልቃ አዉፐ ኤክዴ?
MAT 13:55 ሀይስ አናፅያ ናኣ ግደነዬ? እያ አየ ሱንꬃይ ማይራሞ ግደኔ? እያ እሻት ያይቆባ፥ ዮሰፋ፥ ስሞናነ ይሁዳ ግዶኮናዬ?
MAT 13:56 እያ ምቸት ኑራ ደኦሶና ግዶኮና? ያትን፥ ሀ ኡራይ ሀ ኡባ አዉፐ ኤክዴ?” ያግዶሶና።
MAT 13:57 ሄሳ ግሾ፥ እ ግያባ ኤኮና እፅዶሶና። ሽን የሱሲ፥ “ናበይ ባ የለትዳ ቢታንነ ባ ሶ አሳ ማታን ቦንቸተና” ያግስ።
MAT 13:58 ኤንቲ አማኖና እፅዳ ግሾ ዳሮ ማላታታ ሄ በሳን ኦꬅቤና።
MAT 14:1 ሄ ዎደ ጋልላ አይስያ ሄሮዲስ የሱሳባ ስእስ።
MAT 14:2 ባ አይለታኮ፥ “ሀይስ ፃማቅያ ዮሃንሳ፤ እ ሀይቆፐ ደንድስ። ያንዳ ግሾ፥ ሀ ኡባ ማላታታ እ ኦꬄስ” ያግስ።
MAT 14:3 እ ሄሳ ግዳይ ሄሮዲስ ባ እሻ ፍልጶሳ ማቸ ሄሮድያድ ጋሶን ዮሃንሳ ቃሾ ኬꬅ ገልስዳ ግሾሳ።
MAT 14:4 ዮሃንስ ሄሮዲሳ፥ “ነ እዮ ኤካናዉ ዎጋ ግደና” ያግስ።
MAT 14:5 ሄሮዲስ ዮሃንሳ ዎꬋናዉ ኮይስ፥ ሽን ደረይ ዮሃንሳ ናበ ኦꬅድ በእያ ግሾ ያሸትስ።
MAT 14:6 ሄሮዲስ ባ የለትዳ ጋላሳ ቦንችያ ዎደ፥ ሄሮድያዳ ናእያ አሳ ስንꬃን የꬃን ዱራዳ እያ ኡፋይሳሱ።
MAT 14:7 ያትን፥ እ፥ “እያ ኮያባ ኡባ እማና ግድ” ጫቅስ።
MAT 14:8 ናእያ ባ አየ ዞርያ ስአዳ ሄሮዲሳኮ፥ “ፃማቅያ ዮሃንሳ ሁጵያ ከረን ዎꬃዳ ታዉ እማ” ያጋሱ።
MAT 14:9 እያ ያግን ካዎይ ቂሮትስ፥ ሽን ባ ጫቁዋ ግሾነ ባራ ደእያ እማꬃታ ግሾ ግድ እ ኦይሻይ ፖለታና መላ ኪትስ።
MAT 14:10 ካዎይ አሰ ኪትድ ዮሃንስ ቃሾ ኬꬃን ደእሽን እያ ቆꬍያ ጎራእስስ።
MAT 14:11 ሁጵያ ከረን ዎꬅ ኤህድ ናኤስ እምዶሶና፤ ናእያካ ኤካዳ ባ አየስ ኤፋሱ።
MAT 14:12 ዮሃንሳ ታማረት ይድ እያ አሀ ኤፍድ ሞግዶሶና። እያፐ ጉየ ሀንዳባ ኡባ ብድ የሱሳስ ኦድዶሶና።
MAT 14:13 የሱሲ ሀንዳባ ስእዳ ዎደ ዎጎሎን ገልድ ሄ በሳፈ እስ ጌምያ ሶ ባርካ ብስ። አሳይ ሄሳ ስእድ ካታማታፐ ደንድድ ቶሆን እያ ካልዶሶና።
MAT 14:14 የሱሲ ዎጎሉዋፐ ዎꬍድ ዳሮ አሳ በእድ ኤንታዉ ቃትስ። ኤንታ ግዶን ደእያ ሀርጋንቾታ ፓꬅስ።
MAT 14:15 ሳአይ ኦማርስሸ ብያ ዎደ የሱሳ ታማረት እያኮ ሺቅድ፥ “ሀ በሳይ አስ ባይና በሲ፥ ሳእካ ቃምስ። ያንያ ግሾ፥ ሄራን ደእያ ጉታታ ብድ ባንታዉ ሻምድ ማና መላ ደርያ የዳ” ያግዶሶና።
MAT 14:16 ሽን የሱሲ ኤንታኮ፥ “ደረይ ሞና ባናዉ ኮሸና፤ ኤንቲ ማናባ ህንተ እምተ” ያግስ።
MAT 14:17 ኤንቲ ዛሪድ፥ “ኑስ ሀይሳን እቻሹ ኡይꬃፈነ ናምኡ ሞሎፐ ሀር ባዋ” ያግዶሶና።
MAT 14:18 እካ፥ “አነ ኤንታ ሃ ኤህተ” ያግስ።
MAT 14:19 ካልድካ፥ ደረይ ማታን ኡታና መላ ኦድስ። እቻሹ ኡይꬃነ ናምኡ ሞሎታ ኤክድ፥ ሳሎ ፄልድ ጋላት ስሚድ፥ ኡይꬃ መንꬅድ ባ ታማረታስ እሚስ፤ ኤንቲ ቃስ ደርያስ እምዶሶና።
MAT 14:20 ኡባይ ምድ ካልዶሶና። የሱሳ ታማረት ምሽን አትዳይሳ ታማነ ናምኡ ጋይታ ደንꬅዶሶና።
MAT 14:21 ካꬃ ምዳ አሳይ ማጫሳይነ ናይት አትሽን፥ እቻሹ ሙኩሉ ግዴስ።
MAT 14:22 የሱሲ ባ ታማረት ዎጎሎን ገልድ ባፐ ስንꬃትድ አባፈ ሄ ፕንꬅ ፕናና መላ ኪትድ ባዉ ደርያ ሞይዛናዉ ጉየ አትስ።
MAT 14:23 ደርያ ሞይዝ ስሚድ ባርካ ዎሳናዉ እስ ዙማ ቦላ ከይስ። ሳአይ ቃምንካ እ ባርካ ያን ጋምእስ።
MAT 14:24 ሄ ዎደ ዎጎሎይ አባ ቦላ ብሽን ስንꬃ ባጋራ ጫርኮይ ደንድን ሆበይ ዎጎሉዋ ኡንኤꬅስ።
MAT 14:25 ዎንትማꬃ ቦላ የሱሲ አባ ቦላ ሄመትሸ ባ ታማረታኮ ይስ።
MAT 14:26 እያ ታማረት፥ እ አባ ቦላ ሄመትሸ ባንታኮ የይሳ በእድ ያይዶሶና። ኤንትካ፥ “ሀይስ ሞይትለ” ግድ ያይድ ዋስዶሶና።
MAT 14:27 ሽን የሱሲ ኤለስድ፥ “አይኮይ ባዋ! ያዮፍተ! ታናባይ” ያግስ።
MAT 14:28 ጰፅሮስ እያኮ፥ “ጎዳዉ፥ ነና ግድኮ፥ ታኒ ሃꬃ ቦላራ ሄመታዳ ኔኮ ባና መላ ታና ኪታ” ያግስ።
MAT 14:29 የሱሲ ጰፅሮሳኮ፥ “ሃያ” ያግስ። ጰፅሮስ ዎጎሉዋፐ ዎꬍድ ሃꬃ ቦላራ ሄመትሸ የሱሳኮ ቡሱ ኦይክስ።
MAT 14:30 ሽን ዎልቃማ ጫርኩዋ በእድ ያይስ። ሃꬃን ምተተꬅ ኦይክዳ ዎደ፥ “ጎዳዉ! ታና አሻርክ!” ያግድ ዋስስ።
MAT 14:31 የሱሲ ኤለስድ ባ ኩሽያ የድ እያ ኦይክድ፥ “ነኖ፥ አማኖይ ፓጭዳይሶ አይስ ስꬋይ” ያግስ።
MAT 14:32 የሱሳራነ ጰፅሮሳራ ዎጎሉዋን ገልዳ ዎደ ጫርኮይ ስእ ግስ።
MAT 14:33 ዎጎሉዋ ግዶን ደእያ እያ ታማረት፥ “ኔኒ ቱማካ ፆሳ ናአ” ግድ ጎይንዶሶና።
MAT 14:34 ኤንቲ አባ ፕንድ ገንሳሬፀ ቢታ ጋክዶሶና።
MAT 14:35 ሄ ቢታን ደእያ አሳይ የሱሳ ኤርዳ ዎደ ባንታ ሄራን ደእያ ጉታ ኡባ ኪታ የድዶሶና። አሳይ ሀርጋንቾታ ኡባ እያኮ ኤህዶሶና።
MAT 14:36 ሀርጋንቾት እያ አፍላ ማጫራ ፃላላ ቦቻና መላ ዎስዶሶና። ቦችዳ ኡባይካ ፓፅዶሶና።
MAT 15:1 ሄሳፈ ጉየ፥ እስ እስ ፋርሳወትነ ህገ አስታማረት የሩሳላመፐ የሱሳኮ ይድ፥
MAT 15:2 “ነ ታማረት አይስ ኑ አዋታ ዎጋ መንꬆና? ኤንቲ ካꬅ ማናፐ ስን ባንታ ኩሽያ ሜጨቶኮና” ያግድ ኦይችዶሶና።
MAT 15:3 የሱሲ ዛሪድ፥ “ህንተ፥ ህንተ ዎጋ ግሾ፥ ፆሳ ኪታ ፖለይሳ አይስ እፄቲ?
MAT 15:4 አይስ ጊኮ፥ ፆሳይ፥ ‘ነ አዋነ ነ አይዉ ቦንቻ። እ ባ አዋ ዎይኮ ባ አይዉ ጫየይስ ሀይቆ ግቤኔ?’ ያግስ።
MAT 15:5 ሽን ህንተ፥ እስ አስ ባ አዋ ዎይኮ ባ አይዉ ማዳናባይ ደእሽን፥ ‘ሀይሳ ታ ፆሳስ ያርሻስ ጊኮ፥
MAT 15:6 ባ አዋ ዎይኮ ባ አይዉ ቦንቻናዉ በሰና’ ያጌታ። ያትድ ህንተ፥ ህንተ ዎጋ ፖላናዉ ፆሳ ቃላ መንታ።
MAT 15:7 ህንተኖ፥ ጩቦቶ፥ እሳያስ ህንተባ ልከ ኦድስ፥
MAT 15:8 “ ‘ሀ አሳይ ታና ባንታ ዶናን ቦንቼስ፥ ሽን ኤንታ ዎዛናይ ታፐ ሃሆን ደኤስ።
MAT 15:9 አሳይ ታና ጮ ጎይኖሶና፤ ኤንቲ አስ መꬍዳ ኪታ ፆሳ ህገ ዳንስድ ታማርሶሶና’ ግስ” ያግስ።
MAT 15:10 የሱሲ ዳሮ አሳ ባኮ ፄግድ፥ “ስእተ! አኬክተ!
MAT 15:11 አሰ ቱንስያባይ ዶናራ ገልያባ ግዶናሽን ዶናፐ ከያባ” ያግስ።
MAT 15:12 ሄሳፈ ጉየ፥ የሱሳ ታማረት እያኮ ይድ፥ “ፋርሳወት ኔኒ ግዳይሳ ስእድ ꬉበትዳይሳ አኬካይ?” ያግዶሶና።
MAT 15:13 ሽን የሱሲ ዛሪድ፥ “ሳሎን ደእያ ታ አዋይ ቶክቦና ምꬅ ኡባይ ሾደታና።
MAT 15:14 ኤንታባ ህርጎፍተ፤ ኤንቲ ቆቀ ካለꬅያ ቆቀታ። ቆቀይ ቆቀ ካለꬅኮ፥ ናምአይካ ኦላን ኩንዳና” ያግስ።
MAT 15:15 ጰፅሮስ ዛሪድ፥ “ሀ ሌምሱዋ ብርሸꬃ ኑስ ኦዳርኪ” ያግስ።
MAT 15:16 የሱሲ ኤንታኮ፥ “ህንተዉካ ሀእ ጋካናዉ ገልቤኔ?
MAT 15:17 ዶናራ ገልያባ ኡባይ ኡሎ ገልድ ካረ ከየይሳ ኤረከቲ?
MAT 15:18 ሽን ዶናራ ከያባይ ዎዛናፐ ከዬስ። አሰ ቱንስያባት ሄሳታ።
MAT 15:19 ኤንትካ፦ አሳ ዎዛና ግዶፈ ከይያ ኢታ ቆፋ፥ ዎꬎ፥ ላይማተꬅ፥ ኢታ ኦሶ፥ ካይሶ፥ ዎርዶ ማርካተꬅ፥ ጫሸ።
MAT 15:20 ሄሳ ዳንያባት አሰ ቱንሴስፐ አትሽን፥ ሜጨቶና ኩሸራ መይስ ቱንሰና” ያግስ።
MAT 15:21 ሄሳፈ ጉየ፥ የሱሲ ያፐ ከይድ ፅሮሳነ ስዶና ካታማት ደእያ ቢታ ብስ።
MAT 15:22 እስ ካናነ ቢታ ማጫስ የሱሳኮ ያዳ፥ ባ ቃላ ꬎቁ ኦꬃዳ፥ “ጎዳዉ፥ ዳዊታ ናአዉ፥ ታዉ ቃታርክ፤ ታ ናእዉ ቱና አያናይ ኦይክድ ኢታ ዋይሴስ” ያጋሱ።
MAT 15:23 ሽን የሱሲ እስ ቃላካ ዛሮና ስእ ግስ። የሱሳ ታማረት እያኮ ይድ፥ “ሀ ማጫስያ ኑ ጌዶ ካላ ካላዳ፥ ዎሳዉሱ። ሄሳ ግሾ፥ ኔኒ እዮ ሞይዛርክ” ያግድ ዎስዶሶና።
MAT 15:24 የሱሲ ዛሪድ፥ “ታኒ ዉደፐ ꬋይዳ ዶርሳዳ እስራኤለ ኬꬃፈ ꬋይዳ አሳታ ፃላላስ ኪተታስ” ያግስ።
MAT 15:25 ሽን እያ፥ እያ ስንꬃን ኩንዳዳ፥ “ጎዳዉ፥ ታና ማዳርኪ?” ያጋሱ።
MAT 15:26 እ ዛሪድ፥ “ናይታ ካꬅ ኤክድ ካናታስ የገይስ ሎኦ ግደና” ያግስ።
MAT 15:27 ማጫስያካ፥ “ጎዳዉ፥ ሄስ ቱማ፥ ሽን ሀር አቶሽን ካናት ባንታ ጎዳት ምሽን፥ ጋይታፐ ዎꬍያ ቲፍያ ሞሶና” ያጋሱ።
MAT 15:28 የሱሲ ዛሪድ፥ “ሀ ማጫሰተ፥ ነ አማኖይ ግታ፤ ነ ኮይዳይሳዳ ነዉ ሀኖ” ያግስ። እ ናእያ ኢራካ ፓፃ አጋሱ።
MAT 15:29 የሱሲ ያፐ ደንድድ ጋልላ አባ ማት ብስ። እስ ዙማ ቦላ ከይድ፥ ያን ኡትስ።
MAT 15:30 ዳሮ አሳይ ባንታራ፥ ዎበታ፥ ቆቀታ፥ ኩናታ፥ ዶና ሙመታነ፥ ሀራ ዳሮ ሀርጋንቾታ ኤክድ፥ እያኮ ኤህድ እያ ስንꬃን ዎꬅዶሶና። የሱሲ ኤንታና ፓꬅስ።
MAT 15:31 ሄሳ ግሾ፥ ሙመት ኦደትሽን፥ ኩናት ፕድ ግሽን፥ ዎበት ሄመትሽን፥ ቆቀት ፄልሽን አሳይ በእድ ማላለትድ፥ እስራኤለ ፆሳ ጋላትዶሶና።
MAT 15:32 የሱሲ ባ ታማረታ ባኮ ፄግድ፥ “ሀ ዳሮ አሳይ ታራ ሄꬑ ጋላስ ጋምእዳ ግሾነ ኤንታዉ ሀእ ምያባይ ባይና ግሾ ታኒ ኤንታዉ ቃታይስ። ኤንቲ ኦገን ዳቡርድ ኩንዶና መላ አይኮ ሙዞና ኤንታ መላ የዳናዉ ኮይከ” ያግስ።
MAT 15:33 እያ ታማረት ዛሪድ፥ “ኑኒ ሀ ባዙዋን ሀይሳ ኬና አሳስ ግድያ ካꬅ አዉፐ ደማኔ?” ያግዶሶና።
MAT 15:34 የሱሲ ኤንታኮ፥ “ህንተዉ አፑን ኡይꬅ ደኢ?” ያግድ ኦይችስ። ኤንቲ ዛሪድ፥ “ላፑን ኡይꬅነ ላፋ ሞሎታፐ ጉꬅ ደኤስ” ያግዶሶና።
MAT 15:35 የሱሲ ደርያ ሳአን ኡትተ ያግድ ኪትስ።
MAT 15:36 ሄሳፈ ጉየ፥ ሄ ላፑን ኡይꬃነ ሞሉዋ ኤክድ ፆሳ ጋላትስ። መንꬅድ ባ ታማረታስ እሚስ። እያ ታማረት ዳሮ አሳስ ግሽዶሶና።
MAT 15:37 አሳ ኡባይ ምድ ካልዶሶና። እያ ታማረት፥ ምሽን አትዳ ቲፍያ ላፑን ግታ ጋይታ ኩመꬅ ደንꬅዶሶና።
MAT 15:38 ምዳ አሳይ ማጫስነ ናአ ፓይዶና አደ ፃላል ኦይዱ ሙኩሉ።
MAT 15:39 የሱሲ ደርያ የድዳፐ ጉየ ዎጎሉዋን ገልድ ማገዶና ቢታ ብስ።
MAT 16:1 ፋርሳወትነ ሳዱቃወት የሱሳኮ ይዶሶና። እያ ፓጫናዉ ኮይድ፥ ባንታና ሳሎፐ ማላታ በሶ ግድ ኦይችዶሶና።
MAT 16:2 ሽን እ ኤንታኮ፥ “ሳእ ኦማርስያ ዎደ፥ ‘ሳሎይ ዞእዳ ግሾ ዎንቶ ቦቃላና’ ያጌታ።
MAT 16:3 ዎንትያ ዎደ፥ ‘ሳሎይ ዞእድ ሻራትዳ ግሾ እሪ ቡካና’ ያጌታ። ያትን ህንተ ሳሎ ማላ በእድ ኤሬታ፥ ሽን ዎድያ ማላ ኤራናዉ ዳንዳእቤከታ።
MAT 16:4 ኢታነ አማኖና የለተꬃይ ማላታ ኮዬስ። ሽን እያዉ ዮናሳ ማላታፐ ሀራ ማላት እመተና” ያግስ። ሄሳፈ ጉየ፥ ኤንታና ያን አግድ ሀራ ሶ ብስ።
MAT 16:5 ኤንቲ አባፈ ሄፍንꬅ ፕንዳ ዎደ ዳቦ ኤክድ ያናይሳ ዶግዶሶና።
MAT 16:6 የሱሲ ኤንታኮ፥ “ፋርሳወታፐነ ሳዱቃወታ እርሹዋፈ ናገትተ” ያግስ።
MAT 16:7 ኤንትካ ባንታ ጋርሳን፥ “እ ሄሳ ግዳይ ኑ ዳቦ ኤክድ ዮና ግሾሳ ግዳና” ያግዶሶና።
MAT 16:8 የሱሲ ኤንታ ቆፋ ኤርድ፥ “ህንተኖ፥ አማኖይ ፓጭዳይሳቶ! ዳቦ ኤኮና ይዳ ግሾ ዎል ግዶን አይስ ኦደቴቲ?
MAT 16:9 ሀእካ ህንተ አኬከቲ? እቻሹ ሙኩሉ አሳስ እቻሹ ኡይꬃ ግሽዳይሳነ ኤንቲ ምድ ካልን ህንተ አፑን ጋይታ ኩመꬅ ደንꬅዳኮ ዶግደቲ?
MAT 16:10 ሄሳዳካ፥ ላፑን ኡይꬃ ኦይዱ ሙኩሉ አሳስ ግሽዳይሳነ ኤንቲ ምድ ካልን፥ ህንተ አፑን ግታ ጋይታ ኩመꬅ ደንꬅዳኮ አኬከከቲ?
MAT 16:11 ህዛ፥ ታኒ ፋርሳወታነ ሳዱቃወታ እርሹዋፈ ናገትተ ጋዳ ኦደይስ ዳቦባ ግዶናይሳ አኬከከቲ?” ያግስ።
MAT 16:12 ያትን፥ እያ ታማረት የሱሲ ኦደይ ሙኑቃ ደንꬃናዉ የገትያ እርሾባ ግዶናሽን ፋርሳወታነ ሳዱቃወታ ትምርትያፈ ናገታናይሳ ግደይሳ አኬክዶሶና።
MAT 16:13 የሱሲ ቅሳረ ፍልጶሳ ቢታ ጋክዳ ዎደ ባ ታማረታኮ፥ “አሳይ፥ አሳ ናኣ ኦና ጎና?” ያግድ ኦይችስ።
MAT 16:14 ኤንትካ፥ “እሶት እሶት ፃማቅያ ዮሃንሳ፥ ሀራት ኤልያሳ ቃስ ሀንኮት ኤርምያሳ ዎይኮ ናበታፐ እሱዋ ጎሶና” ያግዶሶና።
MAT 16:15 የሱሲ ዛሪድ፥ “ያትን፥ ህንተ ታና ኦና ጌቲ?” ግድ ኤንታ ኦይችስ።
MAT 16:16 ስሞና ጰፅሮስ ዛሪድ፥ “ኔኒ ክርስቶሳ፥ ደኦ ፆሳ ናአ” ያግስ።
MAT 16:17 የሱሲ ጰፅሮሳኮ፥ “ዮና ናኣ ስሞና፥ ኔኒ አንጀትዳይሳ! ሀይሳ ነዉ ቆንጭስዳይ ሳሉዋን ደእያ ታ አዋፐ አትሽን፥ አሰ ግደና።
MAT 16:18 ታ ነዉ ኦዳይስ ጰፅሮሳ፥ ኔኒ ዛላ! ታኒ ሀ ዛላ ቦላ ታ ዎሳ ኬꬃ ኬፃና። ሀይቆ ዎልቃትካ እዮ ፆኖኮና።
MAT 16:19 ሳሎ ካዎተꬃ ቁልፐታ ታ ነዉ እማና። ሳአን ኔኒ ድግያባይ ኡባይ ሳሎን ፆሳ ማታን ድገትዳባ ግዳና። ሳአን ኔኒ ሀኖ ግያባይ ኡባይ ሳሎን ፆሳ ማታን ሀንዳባ ግዳና” ያግስ።
MAT 16:20 ሄሳፈ ጉየ፥ እ፥ ክርስቶሳ ግደይሳ ኦደስካ ኦዶና መላ ባ ታማረታ ምንꬅድ ኪትስ።
MAT 16:21 ሄ ዎድያፐ ዶምድ የሱሲ ባ ታማረታስ፥ “ታኒ የሩሳላመ ባናዉ በሴስ። ያን ደርያ ጭማታን፥ ካህነ ሀላቃታነ ህገ አስታማረታ ኩሸን ዋየ ኤካናዉ በሴስ። ኤንቲ ታና ዎꬋና፥ ሽን ታኒ ሄꬓንꬆ ጋላስ ሀይቆፐ ደንዳና” ያግድ ቆንጭስስ።
MAT 16:22 ጰፅሮስ የሱሳ ጋፃ ከስድ፥ “ጎዳዉ፥ ሄስ ሀነና! ሄሳ መላባይ ነና ኡባራካ ጋኮፎ!” ያግድ ሀንቀትስ።
MAT 16:23 የሱሲ ጰፅሮሳኮ ጉየ ስሚድ፥ “ሀ ፃላህያዉ፥ ታፐ ሃካ! ኔኒ አሳ ቆፋ ቆፓሳፐ አትሽን፥ ፆሳ ቆፋ ቆፖና ግሾ ታዉ ꬉበ ግዳሳ” ያግስ።
MAT 16:24 ሄሳፈ ጉየ፥ የሱሲ ባ ታማረታኮ፥ “ኦንካ ታና ካላናዉ ኮያባ ግድኮ ባና ካዶ፥ ባ ማስቃልያ ቶክድ ታና ካሎ።
MAT 16:25 ባ ደኡዋ አሻናዉ ኮይያ ኡባይ ꬋይሴስ። ሽን ባ ደኡዋ ታ ግሾ ግድ አꬅድ እመይስ አሼስ።
MAT 16:26 አስ አላመ ኩመꬅ ባዉ ኦꬅድ፥ ግዶሽን ባ ሸምፑዋ ꬋይስኮ እያ አይ ማዲ? ዎይኮ አስ ባ ሸምፑዋ ላመ አይ እማናዉ ዳንዳኢ?
MAT 16:27 አሳ ናአይ ባ አዋ ቦንቹዋን ባ ኪታንቾታራ ያና። ሄ ዎደ እስ እስ ኡራስ እያ ኦሱዋዳ እማና።
MAT 16:28 ታ ቱማ ኦዳይስ፤ ሀይሳን ኤቅዳ አሳታፐ አሳ ናአይ ካዎ ግድድ ስመይሳ በአና ጋካናዉ ሀይቆናይሳት ሀይሳን ደኦሶና” ያግስ።
MAT 17:1 ኡሱፑን ጋላሳፐ ጉየ የሱሲ፥ ጰፅሮሳ፥ ያይቆባነ እያ እሻ ዮሃንሳ ባራ ኤክድ ባንታርካ ግዳናዉ ዙማ ቦላ ከይስ።
MAT 17:2 ያን ኤንታ ስንꬃን የሱሳ ማላይ ኩመꬅ ላመትስ፤ እያ ሶምኦይካ አዋዳ ፆልቅስ። እያ ማኦይካ ዳሮ ቦፅስ።
MAT 17:3 ሄኮ፥ ሙሰይነ ኤልያስ እያራ ኦደትሽን በእዶሶና።
MAT 17:4 ጰፅሮስ የሱሳኮ፥ “ኑኒ ሀይሳ ሀሹ ይዳ። ነ ኮይኮ እስኖ ነዉ፥ እስኖ ሙሰስ፥ እስኖ ኤልያሳስ ሀይሳን ሄꬑ ሻቃራ ሻቃራና” ያግስ።
MAT 17:5 ጰፅሮስ ሄሳ ቡሮ ኦድሽን ቦꬃ ሻራይ ኤንታና ካምስ። ሻራ ግዶራ፥ “ታና ኡፋይስያ፥ ታ ዶስያ ናአይ ሀይሳ፥ እያ ስእተ!” ግያ ቃላይ ይስ።
MAT 17:6 የሱሳ ታማረት ሄሳ ስእዳ ዎደ ዳጋምድ ባንታ ሶምኡዋራ ሳአን ኩንድዶሶና።
MAT 17:7 ሽን የሱሲ ኤንታኮ ሺቅድ ኤንታ ቦችድ፥ “ደንድተ፥ ያዮፍተ!” ያግስ።
MAT 17:8 ኤንቲ ꬎቁ ግድ በእያ ዎደ የሱሳፐ ሀራ ኦናካ በእቦኮና።
MAT 17:9 ኤንቲ ዙማ ቦላፈ ዎꬍሽን የሱሲ ኤንታኮ፥ “አሳ ናአይ ሀይቆፐ ደንዳና ጋካናዉ ሀ ህንተ በእዳባ ኦደስካ ኦዶፕተ” ግድ ኪትስ።
MAT 17:10 የሱሳ ታማረት፥ “ያትን፥ ህገ አስታማረት ኤልያስ ክርስቶሳፐ ካሰትድ ያና ግዳይ አይብሴ?” ያግድ ኦይችዶሶና።
MAT 17:11 የሱሲ ዛሪድ፥ “ኤ! ኤልያስ ካሰት ይድ ኡባባ ጊግሳና።
MAT 17:12 ሽን ታ ህንተዉ ቱማ ኦዳይስ፤ ኤልያስ ካሰትድ ይስ። ኤንትካ እያ ቦላ ኮይዳባ ኦꬅዶሶናፐ አትሽን፥ እያ ሻክ ኤርቦኮና። ሄሳዳ አሳ ናአይ ኤንታ ኩሸን ዋየታና” ያግስ።
MAT 17:13 ሄ ዎደ የሱሲ ግዳይ ፃማቅያ ዮሃንሳባ ግደይሳ አኬክዶሶና።
MAT 17:14 ኤንቲ ደርያፐ አሳኮ ስምያ ዎደ እስ አስ የሱሳ ስንꬃን ጉልባትድ፥
MAT 17:15 “ጎዳዉ፥ ሀያና ታ ናኣስ ቃታርክ፤ እያ ሾጭድ የግያ ሀርገይ ዳሮ ኡንኤꬅድ ታማንነ ሃꬃን የጌስ።
MAT 17:16 ነ ታማረታኮ ኤሀስ፥ ሽን ኤንቲ ፓꬃናዉ ዳንዳእቦኮና” ያግስ።
MAT 17:17 የሱሲ ዛሪድ፥ “ህንተኖ፥ አማኖና ጌላ የለተꬃዉ አዉደ ጋካናዉ ታ ህንተራ ዳኔ? አዉደ ጋካናዉ ታ ህንተና ዳንዳአኔ? አነ ናኣ ሃ ኤክ ዪተ” ያግስ።
MAT 17:18 የሱሲ ቱና አያና ሀንቅን፥ ቱና አያናይ ናኣፐ ከይስ፤ ሄ ሳተንካ ናአይ ፓፅስ።
MAT 17:19 ሄሳፈ ጉየ፥ የሱሳ ታማረት ባንታርካ እያኮ ሺቅድ፥ “ኑኒ ቱና አያና ከሳናዉ ዳንዳእቦናይ አይብሴ?” ያግድ ኦይችዶሶና።
MAT 17:20 እ ኤንታኮ፥ “ህንተዉ አማኖይ ላፍዳ ግሾሳ። ታ ህንተዉ ቱማ ኦዳይስ፤ ጋሸ አይፈ መላ አማኖይ ህንተዉ ደእኮ ‘ሀ ዙማ ሀይሳፈ ደንዳዳ ገደ አꬋ’ ጊኮ ህንተዉ ኪተታና። ህንተዉ ዳንዳኤቶናባይ ዴና።
MAT 17:21 [ሽን ሄሳ መላይ ዎሳፐነ ፆማፐ አትሽን፥ ሀራን ከየና”] ያግስ።
MAT 17:22 የሱሳ ታማረት ጋልላን ሺቅድ ደእሽን የሱሲ ኤንታኮ፥ “አሳ ናእ አሳ ኩሸን አꬍድ እመታና።
MAT 17:23 ኤንቲ እያ ዎꬋና፥ ሽን እ ሄꬓንꬆ ጋላስ ሀይቆፐ ደንዳና” ያግስ። እያ ታማረትካ ዳሮ ቂሮትዶሶና።
MAT 17:24 የሱሳራነ እያ ታማረታራ ቅፍርናሆማ ካታማ ጋክዳ ዎደ ፆሳ ኬꬃ ጊራ ቃንፅሰይሳት ጰፅሮሳኮ ይድ፥ “ህንተ አስታማረይ ፆሳ ኬꬃ ጊራ ጊሪ?” ያግድ ኦይችዶሶና።
MAT 17:25 ጰፅሮስ ዛሪድ፥ “ጊሬስ” ያግስ። ጰፅሮስ ሶ ገልያ ዎደ የሱሲ ካሰትድ፥ “ጰፅሮሳ፥ ነዉ አይ ዳኒ? ሀ ሳኣ ካዎተꬃት ቃራፃነ ጊራ ኦፐ ኤኮና? ጋደ አሳፐየ ዎይኮ አሳ ጋደ አሳፔ?” ያግድ ኦይችስ።
MAT 17:26 ጰፅሮስ “አሳ ጋደ አሳፐ” ግድ ዛርስ። የሱሲ ዛሪድ፥ “ጋደ አሳይ ጊራ ጊሮኮና ጉሱ።
MAT 17:27 ሽን ኤንቲ ꬉበቶና መላ አባ ባዳ ሞሎ ኦይካናዉ ማንፃቆ የጋ። ኮይሮ ነ ኦይክያ ሞሉዋ ዶና ዶያዳ ጊራስ ግድያ ሚሸ ነ ግሾነ ታ ግሾ ኤፋዳ ጊራ” ያግስ።
MAT 18:1 ሄ ዎደ የሱሳ ታማረት ይድ፥ “ሳሎ ካዎተꬃን ኡባፈ አይ ኦኔ?” ያግድ ኦይችዶሶና።
MAT 18:2 የሱሲ እስ ጉꬃ ናአ ፄግድ ኤንታ ግዶን ኤስድ ሀይሳዳ ያግስ።
MAT 18:3 “ታኒ ህንተዉ ቱማ ኦዳይስ፤ ህንተ ላመቶናነ ጉꬃ ናይታዳ ሀኖና እፅኮ ሳሎ ካዎተꬃ ኡባራካ ገላናዉ ዳንዳኤከታ።
MAT 18:4 ህዛ፥ ሀ ጉꬃ ናአዳ ባና ካዉሽያ ኦንካ ሳሎ ካዎተꬃን ኡባፈ አይሳ ግዳና።
MAT 18:5 ሀይሳ መላ ናአ ታ ሱንꬃን ሞክያ ኦንካ ታና ሞኬስ።
MAT 18:6 “ሽን ታናን አማንያ ሀ ጉꬃታፐ እሱዋ ናጋራ ኦꬃና መላ ꬉበ ግድያ ኦንካ ግታ ጋቻ ዎፃ ባ ቆን ቃችድ ጪሞ አባን ምተትኮ እያዉ ሎኦ።
MAT 18:7 አላመን አሳይ ናጋራ ኦꬃና መላ ኦꬅያባት ደእያ ግሾ አላምያ አየ! ሄሳ መላባት ዮና አተና፥ ሽን ꬉበይ እያ ጋሶን ያ ኡራ አየ!
MAT 18:8 “ነ ኩሸይ ዎይኮ ነ ቶሆይ ነና ባለꬅኮ ኔፐ ቃንፃ የጋ። ኔኒ ናምኡ ኩሸራ ዎይኮ ናምኡ ቶሆራ መርና ታማን የገታናፐ ኩሸ ዎይኮ ቶሆ ዱፃ ግዳዳ መርና ደኦ ደመይስ ነዉ ሎኦ።
MAT 18:9 ቃስ ነ አይፈይ ነና ባለꬅኮ እዮ ዎጫ ከሳዳ ዎራ ሆላ። ኔኒ ናምኡ አይፈራ ጋናመ ታማን የገተይሳፈ እስ አይፈራ መርና ደኡዋ ገለይስ ነዉ ሎኦ።
MAT 18:10 “ታ ህንተዉ ኦዳይስ፤ ሳሎን ደእያ ኤንታ ናግያ ኪታንቾት ኡባ ዎደ ሳሎን ደእያ ታ አዋ ስንꬃን ደእያ ግሾ፥ ህንተ ሀ ጉꬃታፐ እሱዋካ ካꬎና መላ ናገትተ።
MAT 18:11 አሳ ናአይ ꬋይዳይሳታ አሻናዉ ይስ” ያግስ።
MAT 18:12 ቃስ የሱሲ፥ “ህንተዉ አይ ዳኒ? እስ ኡራስ ፄቱ ዶርሳት ደኤይሳታፐ እሶይ ꬋይኮ ኡዱፉን ታማነ ኡዱፉናታ ደርያ ቦላ የግ አግድ ሄ ꬋይዳይሳ ኮያናዉ ቤኔ?
MAT 18:13 ታ ቱማ ኦዳይስ፤ እ ደምዳ ዎደ ኡዱፉን ታማነ ኡዱፉናታፐ አꬅድ ꬋይድ በንትዳ እስ ዶርሳ ግሾ ኡፋይቴስ።
MAT 18:14 ሄሳዳካ፥ ሳሎን ደእያ ህንተ አዋይ ሀ ጉꬃታፐ እሶይ ꬋያና መላ ኮየና።
MAT 18:15 “ነ እሻይ ነና ቆህኮ ነርካ እያኮ ባዳ እያ ቆሁዋ እያዉ ኦዳ። እ ነና ስእኮ እያ ነዉ እሻ ኦꬃ።
MAT 18:16 ሽን እ ነና ስኦና እፅኮ፥ ናምኡ ዎይኮ ሄꬑ አሳ ማርካን ሞቶይ ላሰትያ ግሾ፥ እስ ዎይኮ ናምኡ አስ ኤካዳ እያኮ ባ።
MAT 18:17 እ ኤንታና ስኦና እፅኮ፥ ዎሳ ኬꬃስ ኦዳ። ዎሳ ኬꬅ ግያባ ስኦና እፅኮ አማኖና አሳዳ ዎይኮ ቃራፃ ቃንፅስያ አሳዳ እያ ፓይዳ።
MAT 18:18 “ታ ህንተዉ ቱማ ኦዳይስ፤ ሳአን ህንተ ድግያባት ኡባይ ሳሎን ፆሳ ማታን ድገትዳባ ግዳና። ሳአን ህንተ ሀኖ ግያባት ኡባይ ሳሎን ፆሳ ማታን ሀንዳባ ግዳና።
MAT 18:19 “ቃስካ ታ ህንተዉ ኦዳይስ፤ ሳአን ህንተፈ ናምአይ ባንታ ዎስያባስ እስ ዎዛናን ግድድ ፆሳ ዎስያባ ግድኮ ሳሎን ደእያ ታ አዋይ ህንተዉ ኦꬃና።
MAT 18:20 ታና ካለይሳታፐ ናምአ ዎይኮ ሄꬓ ግድድ ሺቅያ በሳን ታኒ ኤንታ ግዶን በንታና” ያግስ።
MAT 18:21 ሄ ዎደ ጰፅሮስ የሱሳኮ ይድ፥ “ጎዳዉ፥ ታ እሻይ ታና ቆህኮ አፑን ቶሆ ታኒ አቶ ጋናዉ በሲ? ላፑን ቶሆ ጋካናሰዬ?” ግድ ኦይችስ።
MAT 18:22 የሱሲ ዛሪድ፥ “ግደና፥ ላፑን ታሙ ቶሆ ላፑናፐ አትሽን፥ ላፑን ቶሆ ግደና።
MAT 18:23 “ሄሳ ግሾ፥ ፆሳ ካዎተꬃይ ባ ኦሳንቾታራ ባ ሚሸይ ፓጭዳኮነ ፓላህዳኮ በአናዉ ቆፕዳ ካዋ ዳኔስ።
MAT 18:24 ሄ ካዎይ ሚሸይ ፓጭዳኮነ ፓላህዳኮ በእያ ዎደ ዳሮ ግንድግንዳ አጮይ ደእያ እስ ኡራ እያኮ ኤህዶሶና።
MAT 18:25 ሽን ሄ አይለይ አጩዋ ቃንፃናዉ ፆነትን እያራ፥ እያ ማቸራ፥ እያ ናይትነ እያዉ ደእያባይ ኡባይ ባይዘትድ አጮይ ጭገታና መላ እያ ጎዳይ ኪትስ።
MAT 18:26 ያትን አይለይ ባ ጎዳ ቶሁዋ ቦላ ጉልባትድ፥ ‘ታ ጎዳዉ፥ ሀያና ጉꬃ ዎደ ታካርክ፥ ታ አጩዋ ኡባ ታ ጭጋና’ ያግድ ዎስስ።
MAT 18:27 ካዎይ እያዉ ቃትድ፥ የድ አግስ፤ እያ አጩዋ ማርስ።
MAT 18:28 “ሽን ሄ አይለይ ከይ ብድ ባ ላገ ኦሳንቾታፐ እሶይ ባፐ ዳሮ ጉꬃ ሚሸ ታልእዳይሳ፥ ‘ነ ቦላ ደእያ ታ ሚሽያ ታዉ ጭጋ’ ግድ ቆ ኦይክስ።
MAT 18:29 “ሄ እያ ላገ አይሌይ እያ ስንꬃን ጉልባትድ፥ ‘ሀያና ጉꬃ ዎደ ታካርክ ታኒ ታ አጩዋ ኡባ ጭጋና’ ያግድ ዎስስ።
MAT 18:30 “ሽን እፅድ ኤክ ኤፍድ ባ ላገይ አጩዋ ቃንፃና ጋካናዉ ቃሾ ኬꬅ ገልስስ።
MAT 18:31 ሄሳ ግሾ፥ ሀራ ላገ ኦሳንቾት ሄሳ በእዳ ዎደ ዳሮ ይሎትድ፥ ብድ ባንታ ጎዳስ እ ኦꬅዳባ ኡባ ኦድዶሶና።
MAT 18:32 “ያትን ካዎይ ሄ አይልያ ፄግስድ፥ ‘ሀ ኢታ አይልያዉ፥ ኔኒ ታና ዎስዳ ግሾ፥ ታ ነ አጩዋ ኡባ ነዉ ማራስ።
MAT 18:33 ያትን፥ ታኒ ነ አጩዋ ማርዳይሳዳ ኔኒ ነ ላገ አይልያ አጩዋ ማራናዉ ነዉ በሰኔ?’ ያግስ።
MAT 18:34 ሄሳ ግሾ፥ ካዎይ ዳሮ ይሎትድ፥ እ ባ አጩዋ ኡባ ጭጋና ጋካናዉ ፓፃ ካኤታና መላ ቃሾ ኬꬃን የግስ።
MAT 18:35 “ሄሳዳካ፥ ህንተ እሶይ እሶይ ህንተ እሻ ዎዛናፐ ማሮና እፅኮ ሳሎን ደእያ ታ አዋይ ህንተና ሄሳዳ ኦꬃና” ያግስ።
MAT 19:1 የሱሲ ሄሳ ኦድ ኦንግዳፐ ጉየ፥ ጋልላፐ ደንድድ ዮርዳኖሰ ሻፋፐ ሄፍንꬃን ደእያ ይሁዳ ቢታ ብስ።
MAT 19:2 ዳሮ አሳይ እያ ካልድ ብን ኤንታ ግዶፈ ሀርጋንቾታ ፓꬅስ።
MAT 19:3 ፋርሳወት እያ ፓጫናዉ ኮይድ እያኮ ይድ፥ “እስ አስ አይ ጋሶንካ ባ ማችዉ የዳናዉ በሲ?” ያግድ ኦይችዶሶና።
MAT 19:4 የሱሲ ዛሪድ፥ “ፆሳይ ኮይሮ አደነ ማጫስ ኦꬅ መꬍዳይሳ ህንተ ናባብበከቲ?
MAT 19:5 ‘ሄሳ ግሾ፥ እስ አስ ባ አዋነ ባ አይዉ አግድ ባ ማቸራ እስኖ ግዴስ፥ ናምአይካ እስ አሾ ግዶሶና።’
MAT 19:6 ሄሳ ግሾ፥ ኤንቲ እስ አስ ግዶሶናፐ አትሽን፥ ናምኡ አስ ግዶኮና። ህዛ፥ ፆሲ ቃችዳይሳ አስ ሻኮፎ” ያግስ።
MAT 19:7 ፋርሳወት፥ “ያትን፥ ሙሰይ እስ አስ አንጆ ዎርቃተ እምድ የዳና መላ አይስ ኪትዴ?” ያግድ ኦይችዶሶና።
MAT 19:8 የሱሲ ዛሪድ፥ “ህንተ፥ ህንተ ማቸታ የዳና መላ ሙሰይ ህንተና ኪትዳይ፥ ህንተ ዎዛና ምኖተꬃ ግሾፐ አትሽን፥ ኮይሮፐ ሄሳ መላ ግደና።
MAT 19:9 ታ ህንተዉ ኦዳይስ፤ ባ ማችያ ላይማቶና ደእሽን የድድ ሀራ ኤክያ ኦንካ ላሜስ” ያግስ።
MAT 19:10 እያ ታማረት እያኮ፥ “አዝናባይነ ማችባይ ሄሳ መላ ግድኮ ኤኮ ገሎይ አትኮ ሎኦ” ያግዶሶና።
MAT 19:11 የሱሲ ዛሪድ፥ “ሄሳ መላ ትምርተይ ፆሳይ ዳንዳአ እምዳይሳታሳፈ አትሽን፥ አሳ ኡባሳ ግደና።
MAT 19:12 ህዛ፥ የለትሸ ሹፋ ግድድ የለትዳይሳት ደኦሶና፥ ቃስ አስ ቃራትዳይሳት ደኦሶና፥ ቃስ ሳሎ ካዎተꬃ ግሾ ግድ ባንታና ሹፋይዳይሳት ደኦሶና። ሄሳ ግሾ፥ ሀይሳ ኤካናዉ ዳንዳእያ ኦንካ ኤኮ” ያግስ።
MAT 19:13 የሱሲ ባ ኩሽያ ጉꬃ ናይታ ቦላ ዎꬅድ ኤንታዉ ዎሳና መላ እስ እስ አሳይ ናይታ እያኮ ኤህዶሶና። ሽን እያ ታማረት አሳ ሀንቀትዶሶና።
MAT 19:14 ሽን የሱሲ፥ “ፆሳ ካዎተꬃይ ሀይሳታ መላሳ ግድያ ግሾ፥ ጉꬃ ናይት ታኮ የይሳ ድጎፍተ፤ ዮ ጊተ” ያግስ።
MAT 19:15 ባ ኩሽያ ኤንታ ቦላ ዎꬅዳፐ ጉየ ሄ በሳፈ አግድ ብስ።
MAT 19:16 እስ ጋላስ እስ ኡራይ የሱሳኮ ይድ፥ “አስታማርያዉ፥ ታኒ መርና ደኦ ደማናዉ አይ ሎኦባ ኦꬆ?” ያግስ።
MAT 19:17 የሱሲ እያኮ፥ “ሎኦባ ነ ታና አይስ ኦይቻይ? እስ ፆሳፈ አትሽን፥ ሀር ሎኦይ ባዋ። ሽን ኔኒ መርና ደኡዋ ኤካናዉ ኮይኮ ኪታታ ናጋ” ያግስ።
MAT 19:18 ኡራይ ዛሪድ፥ “አዉሳ ኪታታ” ያግድ ኦይችስ። የሱሲ ዛሪድ፥ “ዎꬎፓ፥ ላይማቶፓ፥ ካይሶቶፓ፥ ዎርዶ ማርካቶፋ፥
MAT 19:19 ነ አዋነ ነ አይዉ ቦንቻ፥ ነ ሾሩዋ ነ ሁጰዳ ዶሳ” ያግስ።
MAT 19:20 ሄ ናአተꬃይ፥ “ታኒ ሀይሳታ ኡባ ናአተꬃፈ ዶማዳ ናጋስ። ያትን፥ ሀር ታዉ ፓጭያባይ አይቤ?” ያግድ ኦይችስ።
MAT 19:21 የሱሲ ዛሪድ፥ “ኔኒ ፖሎ ግዳናዉ ኮይኮ ባዳ ነዉ ደእያባ ባይዛዳ ማንቆታስ እማ፤ ኔኒ ሳሎን ዱረታና። ያታ ስማ ያዳ ታና ካላ” ያግስ።
MAT 19:22 ሽን ሄ ናአተꬃ ኡራይ ዳሮ ዱረ ግድያ ግሾ፥ ሄሳ ስእዳ ዎደ አዛንሸ አግድ ብስ።
MAT 19:23 ሄሳፈ ጉየ፥ የሱሲ ባ ታማረታ፥ “ታኒ ህንተዉ ቱማ ኦዳይስ፤ ዱረይ ሳሎ ካዎተꬅ ገላናይስ ዳሮ መቶ።
MAT 19:24 ዱረ አስ ፆሳ ካዎተꬃ ገላናይሳፈ ግማለይ ናርፐ ሉሆራ አይስ ካዉዬስ” ያግስ።
MAT 19:25 የሱሳ ታማረት ሄሳ ስእድ ማላለትድ፥ “ያትን፥ ኦን አታናዉ ዳንዳኢ?” ያግድ ኦይችዶሶና።
MAT 19:26 የሱሲ ኤንታ ጫድ ፄልድ፥ “ሀይስ አሳስ ዳንዳኤተና፥ ሽን ፆሳስ ኡባይ ዳንዳኤቴስ” ያግስ።
MAT 19:27 ጰፅሮስ ዛሪድ፥ “ኑኒ ኡባባ አግድ ነና ካልዳ። ያትን፥ ኑኒ አይ ደማኔ?” ያግስ።
MAT 19:28 የሱሲ ኤንታኮ ሀይሳዳ ያግስ፦ “ታኒ ህንተዉ ቱማ ኦዳይስ፤ አሳ ናአይ ያና አላምያን ባ ቦንቾ አራታን ኡትያ ዎደ ህንተ ታማነ ናምአት፥ ታና ካልዳይሳት፥ ታማነ ናምኡ አራታን ኡትድ ታማነ ናምኡ እስራኤለ ዘረꬃታ ቦላ ፕርዳና።
MAT 19:29 ታ ሱንꬃ ግሾ ኬ ዎይኮ እሻታ ዎይኮ ምቸታ ዎይኮ አዋ ዎይኮ አይዉ ዎይኮ ናይታ ዎይኮ ጋዴ አግዳይ ኦንካ ፄቱ ኩሸ ኤካና። ቃስ መርና ደኡዋካ ኤካና።
MAT 19:30 ሽን ዳሮት ሀእ ደꬃን ስን ግድዳይሳት ጉየ ግዳና፥ ቃስ ጉየ ግድዳይሳት ስን ግዳና” ያግስ።
MAT 20:1 “ፆሳ ካዎተꬃይ ባ ዎይነ ጋደን ኡነ ኦꬅያ አስ ኦስሳናዉ ዎንታ ጉራ ከይዳ ኡራ ዳኔስ።
MAT 20:2 እ ሄ ኡነ ኦꬅያ አሳ ሀች ሀች እስ ድናረ ቃንፃናዉ ኤንታራ ጊግድ፥ ኤንታ ባ ዎይነ ጋድያ ግዶ የድስ።
MAT 20:3 “ቃስ ዎንታፈ ሄꬑ ሳተ ግድሽን ከይድ ኦሶ ꬋይድ ግያ ቦላ ኤቅዳ ሀራ አሳታ ደምስ።
MAT 20:4 እ ኤንታኮ፥ ‘ህንተካ ታ ዎይነ ጋዴ ግዶ ብድ ኦꬅተ፥ ታኒ ህንተዉ በሲያ ጋትያ ቃንፃና’ ያግስ።
MAT 20:5 ኤንትካ ብዶሶና። ቃስካ እ ኡሱፑን ሳተንነ ኡዱፉን ሳተን ከይድ ሄሳዳ ኦꬅስ።
MAT 20:6 ታማነ እስ ሳተ ግድሽን እ ከይያ ዎደ ሀራት ያን ኤቅዳይሳታ ደምድ፥ ‘ህንተ ኦሶ ኦꬆና ጋላስ ኩመꬅ ሀይሳን አይስ ኤቅድ ፔእደቲ?’ ያግስ።
MAT 20:7 “ኤንቲ ዛሪድ፥ ‘ኑና ኡነ ኦስስያ አስ ꬋይዳ ግሾሳ’ ያግዶሶና። “እካ፥ ‘ህንተካ ታ ዎይነ ጋድያ ግዶ ብድ ኦꬅተ’ ያግስ።
MAT 20:8 “ሳእ ኦማርስን፥ ዎይነ ጋድያ ጎዳይ ኦሳንቾታ ሀላቃኮ፥ ‘ኦሳንቾታ ፄጋዳ ዉርሰꬃን ኦሶ ገልዳይሳታፐ ዶማዳ ኮይሮ ገልዳይሳታ ጋካናዉ ኤንታ ጋትያ ቃንፃ’ ያግስ።
MAT 20:9 ታማነ እስ ሳተን ኦሶ ኦይክዳይሳት ይድ፥ ሁጰን ሁጰን እስ እስ ድናረ ኤክዶሶና።
MAT 20:10 ኮይሮ ኦሶ ኦይክዳይሳት ይድ፥ ባንታዉ ዳሮ እመታና ግድ ቆፕዶሶና። ሽን ኤንትካ ሁጰን ሁጰን እስ እስ ድናረ ኤክዶሶና።
MAT 20:11 ባንታ ሚሽያ ኤክ ስሚድ ጎዳ ቦላ ዙዙምዶሶና።
MAT 20:12 ‘ሀይሳቲ ጉየፐ ይድ እስ ሳተ ፃላላ ኦꬅዶሶና። ሽን ጋላስ ኩመꬅ አዋ ሱላን ዳቡርድ ፔእዳ ኑራ ኤንቲ ዋንድ እስኖ ግዶና’ ያግዶሶና።
MAT 20:13 “ዎይንያ ጎዳይ ኦሳንቾታፐ እሱዋኮ፥ ‘ታ እሻዉ፥ ታኒ ነና ቆሀብከ፤ ነ ታራ ጊግዳይ እስ ድናረሳ ግደኔ?
MAT 20:14 ነ ሚሽያ ኤካዳ ነ ሶ ባ። ታ ኦማርስ ይዳይሳስካ ነይሳ መላ እማናዉ ኮያይስ።
MAT 20:15 ታኒ ታ ሚሽያን ኮይዳባ ኦꬃናዉ ታዉ ማት ባዌ? ዎይኮ ታኒ ኬሀ ግድዳ ግሾ ኔኒ ቃናታይ?’ ያግስ።
MAT 20:16 “ሄሳዳ ሀእ ደꬃን ጉየ ግድዳይሳት ስንꬃታና፥ ስንꬃትዳይሳት ቃስ ጉየታና” ያግስ።
MAT 20:17 የሱሲ የሩሳላመ ብሸ፥ ታማነ ናምኡ ታማረታ ዱማ ጋፃ ከስድ ኤንታኮ ያግስ፦
MAT 20:18 “ሄኮ፥ ኑኒ ሀእ የሩሳላመ ቡሳ ቦላ ደኦስ። ያን አሳ ናአይ ካህነ ሀላቃታስነ ህገ አስታማረታስ አꬍድ እመታና። ኤንቲ እያ ቦላ ሀይቆ ፕርዳ ፕርዳና።
MAT 20:19 እያ አይሁደ ግዶና ደርያስ አꬅድ እማና። ኤንቲ እያ ካዉሻና፥ ጋራፋና፥ ያትድ እያ ማስቃልያ ቦላ ካቃና። ሽን እ ሄꬓንꬆ ጋላስ ሀይቆፐ ደንዳና” ያግስ።
MAT 20:20 ሄ ዎደ ዛብድዮሳ ማችያ ባ ናምኡ አደ ናይታራ የሱሳኮ ያዳ፥ እያ ስንꬃን ጉልባታዳ እስባ እያ ዎሳሱ።
MAT 20:21 የሱሲ ኢኮ፥ “ነ አይ ኮያይ?” ያግስ። እያ ዛራዳ፥ “ነ ካዎተꬃን ሀ ታ ናምኡ ናይት እሶይ ነ ኡሻቻን እሶይ ነ ሀድርሳን ኡቶ ጋርክ!” ያጋሱ።
MAT 20:22 ሽን የሱሲ ናይታኮ ዛሪድ፥ “ህንተ አይ ዎስያኮ ኤረከታ፤ ታኒ ኡያናዉ ደእያ ዋየ ፁኣ ኡያናዉ ዳንዳኤቲ?” ያግስ። ኤንትካ፥ “ኤ ዳንዳኦስ” ያግዶሶና።
MAT 20:23 የሱሲ፥ “ቱማካ ታኒ ኡያናዉ ደእያ ፁአፐ ህንተ ኡያና። ሽን ታ ኡሻቻንነ ሀድርሳን ኡታናይሳታ ዶረይ ታና ግድከ። ሄ በሳይ እመተይ፥ ታ አዋይ እማናዉ ጊግስዳ አሳታሳ” ያግስ።
MAT 20:24 አትዳ ታሙ እያ ታማረት ሄሳ ስእዳ ዎደ ናምኡ እሻታ ቦላ ሀንቀትዶሶና።
MAT 20:25 ሽን የሱሲ ኤንታ ኡባ ፄግድ ሀይሳዳ ያግስ። “አይሁደ ግዶና አሳ ሃረይሳት ባንታ አሳ ቦላ ጎዳተይሳነ ኤንታ ካለይሳት ዎልቃን ሃረይሳ ህንተ ኤሬታ።
MAT 20:26 ሽን ህንተ ግዶን ሄሳዳ ግዶፖ። ህንተፈ ግታታናዉ ኮይያ ኦንካ ህንተዉ አይለ ግዶ።
MAT 20:27 ህንተ ግዶን ኡባፈ ቦላ ግዳናዉ ኮይያ ኦንካ ህንተዉ አይለ ግዳናዉ በሴስ።
MAT 20:28 ሄሳዳካ፥ አሳ ናአይ አሰ ሀጋዛናዉነ ዳሮ አሳ ዎዛናዉ ባ ሸምፑዋ እማናዉ ይስፐ አትሽን፥ አሳን ሀጋዘታናዉ ይቤና” ያግስ።
MAT 20:29 ሄሳፈ ጉየ፥ የሱሲ ባ ታማረታራ እያርኮፈ ከይድ ብሽን፥ ዳሮ አሳይ ኤንታና ካልዶሶና።
MAT 20:30 ኦገ ጋፃን ኡትዳ ናምኡ ቆቀት የሱሲ ያራ አይሳ ስእድ፥ “ጎዳዉ፥ ዳዊታ ናአዉ፥ ኑስ ቃታርክ” ያግድ ዋስዶሶና።
MAT 20:31 ዳሮ አሳይ ኤንታና፥ “ሀይዝተ” ያግድ ካጭዶሶና። ሽን ኤንቲ፥ “ጎዳዉ፥ ዳዊታ ናአዉ፥ ኑስ ቃታርክ” ግድ ጉጅ ዋስዶሶና።
MAT 20:32 የሱሲ ኤቅድ፥ ኤንታ ፄግድ፥ “ታ ህንተዉ አይ ኦꬃና መላ ኮዬቲ?” ያግድ ኦይችስ።
MAT 20:33 ኤንትካ፥ “ጎዳዉ፥ ኑ አይፈይ ፄላና መላ ኮዮስ” ያግዶሶና።
MAT 20:34 የሱሲ ኤንታዉ ቃትድ፥ ኤንታ አይፍያ ቦችስ። ኤለስድ ኤንታ አይፈይ ፄልስ፤ ኤንቲ እያ ካልድ ብዶሶና።
MAT 21:1 የሱሳራነ እያ ታማረታራ የሩሳላመ ማትድ፥ ሻማሆ ዙማ ቦላ ደእያ ቤተፋገ ጌተትያ ጉታ ጋክሸ፥ የሱሲ ባ ታማረታፐ ናምአታ ባፐ ስን ያግድ ኪትስ፦
MAT 21:2 “ህንተፈ ስንꬃን ደእያ ጉታ ቢተ። ያን እስ ሀረይ ቃሾን ደእያሮ እ ማራራ ህንተ ደማና። ኤንታ ብልድ ሃ ኤክ ዪተ።
MAT 21:3 ኦንካ ህንተና ኦይችኮ፥ ‘ጎዳይ ኤንታና ኮዬስ’ ያግተ። እ ኤንታና ኢራካ የድ አጋና” ያግስ።
MAT 21:4 ሄስካ ናበይ፥
MAT 21:5 “ፅዮነ ካታማስ፥ ‘ሄኮ፥ ነ ካዎይ አሽከ ግድድ፥ ሀረ ቦላነ ሀረ ማራ ቦላ ኡትድ፥ ኔኮ ዬስ’ ያግተ” ያግድ ፃፍዳይስ ፖለታና መላ ሄስ ሀንስ።
MAT 21:6 እያ ታማረት ብድ የሱሲ ኤንታ ኪትዳይሳዳ ኦꬅዶሶና።
MAT 21:7 ሃሪውነ ሀረ ማራ ኤህድ ቦላራ ማእዳ ባንታ ማኡዋ ኤንታ ዞኮን የግዶሶና። የሱሲ ማኦታ ቦላ ኡትስ።
MAT 21:8 ዳሮ አሳይ ባንታ ማኡዋ ኦግያን ሂፅዶሶና። ሀራት ቦንጮ ታሽድ ኦገ ቦላ የግዶሶና።
MAT 21:9 የሱሳፐ ስንꬃራ ሄመተይሳትነ እያፐ ጉየራ ካልያ ዳሮ አሳይ፥ “ሆሳና! ዳዊታ ናአይ ጋላተቶ! ጎዳ ሱንꬃን የይስ አንጀትዳይሳ! ቦንቾይ ኡባፈ ꬎቃ ሳሉዋን ፆሳስ ግዶ!” ያግድ ዋስዶሶና።
MAT 21:10 የሱሲ የሩሳላመ ካታማ ገልዳ ዎደ ሄ ካታማን ደእያ አሳ ኡባይ፥ “ሀይስ ኦኔ?” ያግድ ያርክዶሶና።
MAT 21:11 አሳይ፥ “ሀይስ ጋልላን ደእያ ናዝረተ ካታማፐ ይዳ ናብያ የሱሳ” ያግዶሶና።
MAT 21:12 የሱሲ ፆሳ ኬꬅ ገልድ፥ ያን ባይዘይሳታነ ሻመይሳታ ኡባ ካረ ጎድስ። ሚሸ ላመይሳታ ፃርጴዛታነ ሆለታ ባይዝያ ኦይደታ ሽር የግስ።
MAT 21:13 እካ ኤንታኮ፥ “ፆሳ ቃላን፥ ‘ታ ኬꬃይ ፆሳ ዎስያ ኬꬅ ጌተታና’ ጌተትድ ፃፈትስ። ሽን ህንተ ፓንጋት ቆሰትያ ጎንጎሎ ኦꬅደታ” ያግስ።
MAT 21:14 የሱሲ ፆሳ ኬꬃን ደእሽን ቆቀትነ ጉንዳት እያኮ ይን ኤንታ ፓꬅስ።
MAT 21:15 ሽን ካህነ ሀላቃትነ ህገ አስታማረት የሱሲ ኦꬅዳ ማላልስያባታ በእዳይሳስነ ጉꬃ ናይት ፆሳ ኬꬃን፥ “ዳዊታ ናአይ፥ ጋላተቶ” ያግድ ዋሰይሳ ስእድ ሀንቀትዶሶና።
MAT 21:16 ኤንቲ የሱሳኮ፥ “ሀይሳቲ ገይሳ ነ ስአይ?” ያግዶሶና። የሱሲ፥ “ኤ ስአይስ፥ ፆሳ ቃላን፥ ‘ጉꬃ ናይታ ዶናንነ ꬋምያ ናይታ ዶናን ጋላታ ዎꬃዳሳ’ ጌተትድ ፃፈትዳይሳ ህንተ ናባብበከቲ?” ያግስ።
MAT 21:17 ኤንታና ያን አግድ ብታነ ካታማ ብድ አቅስ።
MAT 21:18 የሱሲ ዎንታ ጉራ ካታማ ስሚድ ይሸ ኮሻትስ።
MAT 21:19 ኦገ ጋፃን እስ ባላሰ ምꬅ በእድ ኢኮ ብስ። ሽን ሀይꬃፈ አትሽን፥ ሀራ አይኮካ ደምቤና። ሄሳ ግሾ፥ እዮ፥ “ህዛፐ ናምአንꬆ አይፈ አይፎፓ!” ያግስ። ሄ ባላሰ ምꬅያ ኤለሳዳ መላ አጋሱ።
MAT 21:20 እያ ታማረት ሄሳ በእድ፥ “ሀ ባላስያ ዋናዳ ኤለሳ መላዴ?” ያግድ ማላለትዶሶና።
MAT 21:21 የሱሲ ዛሪድ፥ “ታኒ ህንተዉ ቱማ ኦዳይስ፤ ህንተዉ አማኖይ ደእኮ፥ ቃስ ህንተ ስꬎና እፅኮ ባላሰ ቦላ ታኒ ኦꬅዳይሳ መላ ፃላላ ኦከታ፥ ሽን ‘ሀ ዙማ ሾደታዳ አባን ዎꬋ’ ያግኮ ሀናና።
MAT 21:22 አማንድ ህንተ ዎስያባ አይብባ ግድኮካ ህንተ ኤካና” ያግስ።
MAT 21:23 የሱሲ ፆሳ ኬꬃ ገልድ ታማርስሽን፥ ካህነ ሀላቃትነ አይሁደ ጭማት እያኮ ይድ፥ “ኔኒ ሀይሳ ኦꬃና መላ ነዉ አይ ማት ደኢ? ነዉ ሀ ማታ እምዳይ ኦኔ?” ያግድ ኦይችዶሶና።
MAT 21:24 የሱሲ ኤንታኮ፥ “ታንካ ህንተና እስባ ኦይቻይስ፤ ህንተ ታዉ ሄሳ ዛርኮ፥ ታኒ አይ ማታን ኦꬅያኮ ህንተዉ ኦዳና።
MAT 21:25 ዮሃንስ ፃማቃና መላ ማታይ አዉፐ እመትዴ? ፆሳፈየ አሳፔ?” ያግስ። ኤንቲ ባንታ ግዶን ዞረትድ፥ “ኑኒ፥ ‘ፆሳፈ’ ጊኮ፥ እ ኑና፥ ‘ያትን አይስ አማንበከቲ?’ ያጋና።
MAT 21:26 ኑኒ፥ ‘አሳፐ’ ጊኮ፥ አሳ ኡባይ ዮሃንሳ ናበ ኦꬅ ፄልያ ግሾ፥ አሳ ያዮስ” ያግዶሶና።
MAT 21:27 ሄሳ ግሾ፥ “ኑኒ ኤሮኮ” ያግድ ዛርዶሶና። እካ፥ “ህዛ፥ ታንካ ሀይሳ አይ ማታን ኦꬅያኮ ህንተዉ ኦድከ” ያግስ።
MAT 21:28 “የሱሲ ካልድካ ሀይሳዳ ያግስ፦ ናምኡ አደ ናይት ደእያ እስ ኡራይ ደኤስ። ሄ ኡራይ ባይራ ናኣኮ ብድ፥ ‘ታ ናአዉ፥ ሀች ዎይነ ግዶ ባዳ ኦꬃ’ ያግስ።
MAT 21:29 ናአይ ዛሪድ፥ ‘አቶ ቢከ’ ያግስ። ሽን ጉየፐ ባ ዎዛናን ቆፕ ኤክድ ኦꬃናዉ ብስ።
MAT 21:30 አዋይ ባ ካሎ ናኣኮ ብድ፥ ባ ባይራ ናኣኮ ግዳይሳዳ ኪትስ። እካ፥ ‘ኤሮ፥ ታ አዋዉ’ ያግስ። ሽን ብቤና።
MAT 21:31 ሀ ናምኡ ናይታፐ ባ አዋስ ኪተትዳይስ አዉሴ?” ያግስ። ኤንትካ፥ “ባይራ” ያግዶሶና። የሱሲ ኤንታኮ፥ “ታ ህንተዉ ቱማ ኦዳይስ፤ ቃራፃ ቃንፅሰይሳትነ ላይማተይሳት ህንተፈ ስንꬃትድ ፆሳ ካዎተꬃ ገላና።
MAT 21:32 ፃማቅያ ዮሃንስ ሱረ ኦግያ ታማርስሸ ይን እ ገይሳ አማንበከታ። ሽን ቃራፃ ቃንፅሰይሳትነ ላይማተይሳት አማንዶሶና። ህንተ ሀር አቶሽን፥ ኤንታ በእድካ ህንተ ናጋራፐ ስሚድ አማንበከታ” ያግስ።
MAT 21:33 ቃስካ የሱሲ ሀይሳዳ ያግስ፤ “ሀራ ሌምሶ ስእተ፥ ዎይነ ቶክዳ እስ ኡራይ ደኤስ። ሄ ዎይንያ ዩሹዋ ድርስ። ዎይነ ጉምእያ ኦላ ቦክስ። ዎይንያ ናጋናዉ ሻኮ ሻክስ። ሄሳፈ ጉየ፥ ጋድያ ኮ እምድ ሀራ ቢታ ብስ።
MAT 21:34 ዎይነ አይፍያ ማፅያ ዎደይ ጋክን ባና ጋክያ ባጋ ኤክድ ያና መላ ባ አይለታ ኤንታኮ የድስ።
MAT 21:35 ኮ አዋት እያ አይለታ ኦይክድ እሱዋ ዋꬍዶሶና፥ ሀንኩዋ ዎꬍዶሶና ቃስ አትዳይሳ ሹቻን ጫድዶሶና።
MAT 21:36 ዎይነ አታክልትያ ጎዳይ ካሰይሳታፐ ዳርያ ሀራ አይለታ ኪትስ። ኮ አዋት ኤንታ ቦላካ ሀንኮይሳታ ቦላ ኦꬅዳይሳዳ ኦꬅዶሶና።
MAT 21:37 ዉርሰꬃን እ፥ ‘ታ ናኣ ኤንቲ ቦንቻና!’ ያግድ ባ ናኣ ኤንታኮ ኪትስ።
MAT 21:38 “ሽን ኮ አዋት ናኣ በእድ ባንታ ግዶን ‘ጋድያ ላታናይስ ሀይሳ፥ እያ ዎꬍድ ጋድያ ኑኒ ላቶስ!’ ያግዶሶና።
MAT 21:39 ናአ ኦይክድ ዎይነ ጋድያ ግዶፈ ጋፃ ከስድ ዎꬍዶሶና።
MAT 21:40 “ህዛ፥ ዎይነ ጋድያ ጎዳይ ያ ዎደ ሄ ኮ አዋታ ዋታኔ?” ያግድ ኦይችስ።
MAT 21:41 ኤንቲ ዛሪድ፥ “እ ሄ ኢታ አሳታ ኢታ ዎꬎ ዎꬍድ፥ ዎይነይ አይፍያ ዎደ እያ ጋክያ ባጋ ዎደን ዎደን እምያ ሀራ ኮ አዋታስ እማና” ያግዶሶና።
MAT 21:42 የሱሲ ዛሪድ ኤንታኮ፥ ፆሳ ቃላን፥ “ ‘ግምበይሳት ቦርድ እፅዳ ሹቻይ፥ ጎዳ ፃጱዋ ምንꬅያ፥ ኡባፈ አꬍያ ሹቻ ግድስ። ሀይስ ጎዳይ ኦꬅዳባ፤ ኑ አይፍያስ ማላልስያባ’ ጌተትድ ፃፈትዳይሳ ናባብበከቲ?
MAT 21:43 “ሄሳ ግሾ፥ ታኒ ህንተዉ ኦዳይስ፤ ፆሳ ካዎተꬃይ ህንተፈ ኤከትድ ሎኦ አይፈ አይፍያ አሳታስ እመታና።
MAT 21:44 [ሀ ሹቻ ቦላ ኩንድያ ኦንካ መቀረታና። ቃስ ሀ ሹቻይ እያ ቦላ ዎꬍያ ኡራይካ ጋጨታና”] ያግስ።
MAT 21:45 ካህነ ሀላቃትነ ፋርሳወት የሱሲ ኦድዳ ሌምሱዋን ባንታና ኦድዳይሳ ኤርዶሶና።
MAT 21:46 ኤንቲ የሱሳ ኦይካናዉ ኮይዶሶና፥ ሽን አሳይ የሱሳ ናበ ኦꬅድ ፄልያ ግሾ፥ አሳስ ያይዶሶና።
MAT 22:1 የሱሲ አሳስ ዛሪድ ሀይሳዳ ያግድ ሌምሶ ኦድስ።
MAT 22:2 “ፆሳ ካዎተꬃይ ባ ናኣስ ያጋኖ ጊግስዳ ካዋ ዳኔስ።
MAT 22:3 ሄ ካዎይ ያጋኖ ያና መላ ኦድ ዎꬅዳ አሳታ ፄጋናዉ ባ አይለታ ኪትስ። ሽን አሳት ያናዉ ኮይቦኮና።
MAT 22:4 ቃስ ሀራ አይለታ ፄግድ፥ ፄገትዳ አሳታኮ ብድ፥ ‘ታኒ ታ ሳንጋታነ ሞꬍዳ ጋታርመንꬆታ ሹካስ፤ ኡባባይ ጊግስ። ታ ያጋኑዋ ሃ ዪተ ያግተ’ ያግድ ኪትስ።
MAT 22:5 ሽን ፄገትዳይሳት ፄሳ እፅድ፥ ባንታ ኦሶስ ኦሶስ ብዶሶና። እሶይ ባ ጎሻስ፥ ሀንኮይ ባ ዛልእያስ ብስ።
MAT 22:6 ሀራት ቃስ ካዋ አይለታ ኦይክድ፥ ካዉሽ ዋꬍድ ዎꬍዶሶና።
MAT 22:7 “ካዎይ ዳሮ ይሎትድ፥ ባ ዎታዳረታ የድድ ሸምፖ ዎꬍዳይሳታ ዎꬍስስ፥ ኤንታ ካታማካ ፁግስ።
MAT 22:8 ሄሳፈ ጉየ፥ ባ አይለታኮ፥ ‘ያጋኖይ ጊግስ፥ ሽን ፄገትዳይሳት ያጋኑዋስ በሲያ አስ ግዶኮና።
MAT 22:9 ሄሳ ግሾ፥ ዎጋ ኦገታ ብድ፥ ደምዳ አስ ኡባ ያጋኑዋ ያና መላ ፄግተ’ ያግስ።
MAT 22:10 አይለት ኦግያ ቦላ ብድ ባንታ ደምዳ አስ ኡባ ሎኦታነ ኢታታ ኤህድ ያጋኖ ሻቃራ ገልስድ ኩንꬅዶሶና።
MAT 22:11 “ሽን ካዎይ ካꬃ ማናዉ ኡትዳ አሳ በአናዉ ገልዳ ዎደ ያጋኖ ማኦ ማእቦና እስ አስ ደምስ።
MAT 22:12 እያኮ፥ ‘ላ፥ ነ ያጋኖ ማኦ ማኦና ዋናዳ ሀይሳ ገላዲ?’ ያግስ። ሽን ኡራይ ስእ ግስ።
MAT 22:13 “ካዎይ ባ አይለታኮ፥ ‘ሀ ኡራ ኩሽያነ ቶሁዋ ቃችድ፥ ካረ ꬉማ ከስ የግተ። ያን እያዉ ዬሆነ አቻ ጋርጨꬅ ግዳና’ ያግስ።
MAT 22:14 “ሄሳዳካ፥ ፆሳ ካዎተꬃስ ፄገትዳይሳት ዳሮ ሽን ዶረትዳይሳት ጉꬃ” ያግስ።
MAT 22:15 ሄሳፈ ጉየ፥ ፋርሳወት ብድ፥ የሱሳ ዋት ኦዳን ኦይካኔኮ ዞረትዶሶና።
MAT 22:16 ባንታ ታማረታነ ሄሮዲሳ ባጋታፐ እሶታ እሶታ ኪትዶሶና። ኤንትካ፥ “አስታማርያዉ፥ ነ ቱማ ኦደይሳ ኑ ኤሮስ። ኔኒ አሳፐ አሰ ሻካካ፥ አሳ ዎይጋንደስ ጋዳ አይኮካ ኦꬃካ፥ ፆሳ ኦገ ቱማተꬃን ታማርሳሳ።
MAT 22:17 አነ ኑስ ኦዳ፥ ኑኒ ሮመ ካዋስ ጊራ ጊራናዉ በሲ በሰኔ?” ያግዶሶና።
MAT 22:18 ሽን የሱሲ ኤንታ ኢታ ቆፋ ኤርድ፥ “ሀ ጩቦቶ፥ ታና አይስ ፓጨቲ?
MAT 22:19 ጊራ ጊርያ ሚሽያ ታና በስተ” ያግስ። ኤንትካ እያዉ ሳንትመ ኤህዶሶና።
MAT 22:20 እ፥ “ሀ ሱንꬃይነ ምስለይ ኦደባዬ?” ያግስ።
MAT 22:21 ኤንቲ፥ “ሮመ ካዎይሳ” ያግዶሶና። ያትን የሱሲ ኤንታኮ፥ “ህዛ፥ ካዋስ በሰይሳ ካዋስ፥ ፆሳስ በሰይሳ ፆሳስ እምተ” ያግስ።
MAT 22:22 ኤንቲ ሄሳ ስእዳ ዎደ ማላለትድ እያ ማታፐ አግድ ብዶሶና።
MAT 22:23 ሄ ጋላስ ሀይቆፐ ደንዶይ ባዋ ግያ ሳዱቃወት የሱሳኮ ይድ፥ ያግድ እያ ኦይችዶሶና።
MAT 22:24 “አስታማርያዉ፥ ‘ሙሰይ፥ እስ አስ ናአ የሎና ሀይቅኮ፥ ሄ ሀይቅዳይሳ እሻይ እያ ማችዉ ኤክድ፥ ባ እሻስ ናአ የሎ’ ያግድ ኪትስ።
MAT 22:25 ኑ ኤርያ ላፑን እሻት ደኦሶና። ባይራይ ማቾ ኤክድ ናአ የሎና ሀይቅስ። እያ ማችዉ እያ ካሎ እሻይ ኤክስ።
MAT 22:26 ሄሳዳካ፥ ሄ ማጫስዉ ኤክዳ ናምአንꬆይካ፥ ሄꬓንꬆይካ፥ ብድ ላፑናት ዉራና ጋካናዉ ኡባይ ሀይቅዶሶና።
MAT 22:27 ኡባፈ ጉየ ሄ ማጫስያ ሀይቃሱ።
MAT 22:28 ያትን፥ ላፑናት ኡባይ እዮ ኤክዳ ግሾ፥ ሀይቆፐ ደንድያ ጋላስ፥ ሄ ማጫስያ ላፑናታፐ አዉሳስ ማቾ ግዳኔ?” ያግዶሶና።
MAT 22:29 የሱሲ ዛሪድ፥ “ህንተ ፆሳ ቃላይ ታማርስያባ ዎይኮ እያ ዎልቃ ኤሮና ግሾ ባሌታ።
MAT 22:30 አሳይ ሀይቆፐ ደንድያ ዎደ ሳሎን ደእያ ኪታንቾታ መላ ግዳናፐ አትሽን፥ ኤኮኮና ገሎኮና።
MAT 22:31 ቃስ ሀይቅዳ አሳት ሀይቆፐ ደንዳናባ ፆሳይ ህንተዉ ኦድዳይሳ ናባብበከቲ?
MAT 22:32 ፆሳይ፥ ‘ታኒ አብራሃመ ፆሳ፥ ይሳቃ ፆሳ፥ ያይቆባ ፆሳ’ ያግስ። ሄሳ ግሾ፥ ፆሳይ ፓፃ ደኤይሳታ ፆሳፈ አትሽን፥ ሀይቅዳይሳታ ፆሳ ግደና” ያግስ።
MAT 22:33 ዳሮ አሳይ ሄሳ ስእድ፥ እያ ትምርትያን ማላለትዶሶና።
MAT 22:34 የሱሲ ሳዱቃወታስ ጋናባ ꬋይስዳይሳ ፋርሳወት ስእዳ ዎደ እስፈ ሺቅዶሶና።
MAT 22:35 ኤንታ ግዶፈ እስ ህገ አስታማረይ የሱሳ ፓጨ ኦይሾ ኦይችስ።
MAT 22:36 “አስታማርያዉ፥ ህገ ኡባፈ አይስ አዉሴ?” ያግድ ኦይችስ።
MAT 22:37 የሱሲ ዛሪድ፥ “ ‘ነ ጎዳ፥ ነ ፆሳ፥ ነ ኩመꬃ ዎዛናፐ፥ ነ ኩመꬃ ሸምፑዋፈ፥ ነ ኩመꬃ ቆፋፐ ዶሳ።
MAT 22:38 ኡባፈ አይስነ ባይራ ኪታይ ሀይሳ።
MAT 22:39 ናምአንꬆ ኡባፈ አꬍያ ኪታይ፥ አሰ ኡባ ነ ሁጵያ ነ ዶሰይሳዳ ዶሳ’ ያገይሳ።
MAT 22:40 ሙሰ ህገይነ ናበታ ትምርተይ ኡባይ ሀ ኪታታ ቦላ ካቶሶና” ያግስ።
MAT 22:41 ፋርሳወት እስ ቦላ ሺቅድ ደእሽን፥ የሱሲ ኤንታና፥
MAT 22:42 “ክርስቶሳባ ህንተ ዎይገቲ? እ ኦደ ናኤ?” ያግድ ኦይችስ። ኤንቲ፥ “እ ካዋ ዳዊታ ናአ” ያግድ ዛርዶሶና።
MAT 22:43 የሱሲ ኤንታኮ፥ “ያትን፥ ዳዊቲ ጌሻ አያናን ግድድ ዋትድ ክርስቶሳ፥ ‘ጎዳ’ ግድ ፄጊ? ዳዊታ ግሸ፥
MAT 22:44 “ ‘ጎዳ ፆሳይ፥ ታ ጎዳኮ፥ ነ ሞርከታ ነ ቶሆይ የꬍያሶ ኦꬃና ጋካናዉ፥ ሀይሳን ታፐ ኡሻቻ ባጋን ኡታ’ ግስ።
MAT 22:45 ህዛ፥ ዳዊቲ ክርስቶሳ ጎዳ ግድ ፄግኮ፥ ዋንድ ክርስቶስ ዳዊታ ናአ ግዲ?” ያግስ።
MAT 22:46 የሱሳስ እስ ቃላ ዛራናዉ ዳንዳእዳ አስ ኦንካ ባዋ። ቃስ ሄ ጋላሳፐ ዶምድ ሀራ ኦይሻ ኦይቻናዉ ኦንካ ዳንዳእቤና።
MAT 23:1 ሄሳፈ ጉየ፥ የሱሲ ሺቅዳ አሳስነ ባ ታማረታስ ሀይሳዳ ያግስ።
MAT 23:2 “ህገ አስታማረትነ ፋርሳወት ሙሰ ህግያ ብላናዉ ማታራ ደኦሶና።
MAT 23:3 ሄሳ ግሾ፥ ኤንቲ ህንተና ኪትያ ኡባ ኦꬅተነ ናግተ። ሽን ኤንቲ ኦይሳዳ ኦꬆፍተ። አይስ ጊኮ፥ ኤንቲ ኦደይሳዳ ኦꬆኮና።
MAT 23:4 ኤንቲ ቶካናዉ ዳንዳኤቶና ቶሆ ቃችድ አሳ ቶሶሶና። ሽን ባንታዉ ሀር አቶሽን፥ ሄ ቶሁዋ አሳይ ቶክያ ዎደ ብራ ፄራን ቦቻናዉ ኮዮኮና።
MAT 23:5 “ሽን ኤንቲ ባንታ ኦሶ ኡባ አስ በኦና መላ ኦꬆሶና። ባንታ ሶምኦንነ ቀሰን ቃችያ ማፃፋ ፅቅሰይ ደእያ ክታፈ ዳልግሶሶና፥ ባንታ ማኡዋ ማጫራ አዱሶሶና።
MAT 23:6 ሞከትያ በሳን ቦንቾ በስነ አይሁደ ዎሳ ኬꬃታን ዳሮ ሎእያ ኦይደ ዶሶሶና።
MAT 23:7 አሳይ ግያን ኤንታና ቦንቾን ሳሮꬃናይሳነ ‘አስታማርያዉ’ ግድ ፄጋናይሳ ኮዮሶና።
MAT 23:8 “ሽን ህንተ አስታማረይ እሱዋ ፃላላ ግድዳ ግሾነ ህንተ ኡባይ እሻታ ግድዳ ግሾ፥ ‘አስታማርያዉ’ ጌተትድ ፄገቶፍተ።
MAT 23:9 ህንተዉ ሳሎን እስ አዋ ፃላል ደእያ ግሾ፥ ሀ ሳአን ኦናካ ‘አዋዉ’ ግድ ፄጎፕተ።
MAT 23:10 ህንተዉ እስ ጎዳይ ክርስቶሳ ፃላል ደእያ ግሾ ‘ጎዳዉ’ ጌተትድ ፄገቶፍተ።
MAT 23:11 ህንተ ግዶን ባይራተይ ህንተ አይለ ግዶ።
MAT 23:12 ባና ግታያ ኦንካ ካዉያና፤ ባና ካዉሽያ ኦንካ ግታታና።
MAT 23:13 “ህንተኖ፥ ጩቦቶ፥ ህገ አስታማረቶነ ፋርሳወቶ፥ አሳ ስንꬃን ሳሎ ካዎተꬃ ጎርደይሳቶ ህንተና አየ! ህንተ፥ ህንተ ሁጰን ገለከታ ቃስ ሀራታካ ገልሰከታ።
MAT 23:14 [“ህንተኖ ጩቦቶ፥ ህገ አስታማረቶነ፥ ፋርሳወቶ፥ አምኤታ ኬꬃ ህንተ ቦንቅሸ፥ አስ በኦ ግድ ዎሳ አዱሰታ። ሄሳ ግሾ፥ ህንተና አየ! ኡባፈ አꬍያ ፕርዳይ ህንተና ናጌስ።]
MAT 23:15 “ህንተኖ፥ ጩቦቶ፥ ህገ አስታማረቶነ ፋርሳወቶ፥ ህንተ እስ ኡራ አማንꬃናዉ አባራነ ሳአራ ዩየታ። ሽን ህንተ እያ አማንꬅዳ ዎደ ሄ ኡራ ህንተፈ አꬅድ ጋናመስ ጊገትዳይሳ ኦꬅያ ግሾ፥ ህንተና አየ!
MAT 23:16 “ኦንካ ፆሳ ኬꬃን ጫቅኮ አይኮይካ ባዋ። ሽን ፆሳ ኬꬃን ደእያ ዎርቃን ጫቅኮ፥ ሄ ጫቆይ እያ ጎማና ግያ ቆቀቶ፥ ህንተዉ ቆቅድ ሀራታ ካለይሳቶ፥ ህንተና አየ!
MAT 23:17 ህንተኖ፥ ኤያቶ፥ ቆቀቶ፥ ዎርቃይ አꬍዬ? ዎርቅያ ፆሳስ ዱማያ ፆሳ ኬꬃይ አꬊ?
MAT 23:18 ቃስ ‘ኦንካ ያርሾ በሳን ጫቅኮ፥ አይኮይካ ባዋ። ሽን ኦንካ እያ ቦላ ደእያ ያርሹዋን ጫቅኮ፥ ሄ ጫቆይ እያ ጎማና’ ያግድ ታማርሴታ።
MAT 23:19 ህንተኖ፥ ቆቀቶ፥ ያርሾይ አꬍዬ? ያርሹዋ ፆሳስ ዱማያ በሳይ አꬊ?
MAT 23:20 ሄሳ ግሾ፥ ያርሾ በሳን ጫቅያ ኡራይ፥ ሄ ያርሾ በሳንነ እያ ቦላ ደእያ ኡባባን ጫቄስ።
MAT 23:21 ፆሳ ኬꬃን ጫቅያ ኡራይ፥ ሄ ፆሳ ኬꬃንነ እያን ደእያ ፆሳን ጫቄስ።
MAT 23:22 ሳሎን ጫቅያ ኡራይ ፆሳ አራታንነ ሄ አራታ ቦላ ኡትያ ፆሳን ጫቄስ።
MAT 23:23 “ህንተኖ፥ ጩቦቶ፥ ህገ አስታማረቶነ ፋርሳወቶ፥ ህንተና አየ! ህንተ ካሬꬃ ሳዎፐ፥ ናትሮፐነ ኦካሸፐ አስራታ ከሴታ። ሽን ህገን ደእያ አꬍድ ኮሸይሳታ አግደታ። ሄስካ፥ ሱረ ፕርዳ፥ ቃተꬅነ ኡባባን አማነተꬅ። ሀራታካ አጎናሽን ሀይሳታ ህንተ ኦꬃናዉ በሴስ።
MAT 23:24 ህንተዉ ቆቅድ ሀራ አስ ካለይሳቶ፥ ህንተ ኡሻፈ ኡዱንፀ ከስድ ግማለ ምቴታ።
MAT 23:25 “ህንተኖ፥ ጩቦቶ፥ ህገ አስታማረቶነ ፋርሳወቶ፥ ህንተና አየ! ህንተ ሻትያስነ ከርያስ ቦላ ባጋ ጌሼታ። ሽን ኤንታዉ ጋርሳን ቦንቀይነ ኡዘተꬅ ኩም ኡትስ።
MAT 23:26 ነኖ ቆቀ ፋርሳውያዉ፥ ሻትያስነ ከርያስ ጋርሳ ካሰታዳ ጌሻ። ሄሳፈ ጉየ፥ ቦላ ባጋይካ ጌሽ ግዳና።
MAT 23:27 “ህንተኖ፥ ጩቦቶ፥ ህገ አስታማረቶነ ፋርሳወቶ፥ ህንተና አየ! ካረ ባጋራ ቃላመ ትየትድ ሎእድ፥ ግዶን መቀꬅነ ዎቅዳባይ ኩምዳ ዱፎታ ዳነታ።
MAT 23:28 ሄሳዳካ፥ ቦላ ባጋራ አሳስ ሎኦ ዳነታ። ሽን ህንተ ጋርሳን ጩቦተꬅነ ኢታተꬅ ኩምስ።
MAT 23:29 “ህንተኖ፥ ጩቦቶ፥ ህገ አስታማረቶነ ፋርሳወቶ፥ ህንተና አየ! ህንተ ናበታስ ዱፎ ኬፀታ፥ ቃስ ፅሎታ ዱፉዋካ ሎይꬄታ።
MAT 23:30 ቃስ ህንተ፥ ‘ኑኒ በን ኑ አዋታ ዎደ ደእዳባ ግድያኮ፥ ኤንታራ እስፈ ናበታ ሱꬃ ጉሶኮሽን’ ያጌታ።
MAT 23:31 ሄሳ ግሾ፥ ህንተ ናበታ ዎꬍዳ አሳ ናይታ ግደይሳ ህንተ ህንተ ሁጰን ማርካቴታ።
MAT 23:32 ህዛ፥ ህንተ አዋት ዶምዳይሳ ህንተ ፖልተ።
MAT 23:33 “ሀ ሾሻቶ፥ ሾሻ ናይቶ፥ ህንተ ጋናመ ፕርዳፈ ዋንድ አታኔ?
MAT 23:34 ሄሳ ግሾ፥ ሄኮ፥ ታኒ ናበታ፥ ጭንጫ አሳታነ አስታማረታ ህንተኮ ኪታና። ኤንታፈ እሶታ እሶታ ህንተ ዎꬋናነ ማስቃላ ቦላ ካቃና። ባጋታ አይሁደ ዎሳ ኬꬃታን ልሶን ጋራፋናነ ካታማፐ ካታማ ጎዳና።
MAT 23:35 ሄሳ ግሾ፥ ፅሉዋ አበላ ዎꬍዳ ዎደፐ ዶምድ፥ ፆሳ ኬꬃስነ ያርሾ በሳፈ ግዶን ህንተ ዎꬍዳ ባራካ ናአ ዛካርያሳ ዎደ ጋካናዉ ሀይቅዳ ፅሎ አሳ ኡባ ግሾ፥ ህንተ ሴረታና።
MAT 23:36 ታኒ ህንተዉ ቱማ ኦዳይስ፤ ህንተነ ህንተ አዋት ኦꬅዳ ናጋራስ ሀ ፕርዳ ኡባይ ሀ የለተꬃ ቦላ ጋካና።
MAT 23:37 “የሩሳላመ፥ የሩሳላመ፥ ናበታ ዎꬍያረ! ፆሳይ ኔኮ ኪትዳይሳታ ሹቻን ጫድያረ! ኩቶይ ባ ናይታ ባ ቀፈን ሀጰይሳዳ ታኒ ነ አሳ ታ ቀስያን ገቻናዉ አፑን ቶሆ ኮያድና! ሽን ታና ድጋዳሳ።
MAT 23:38 ህዛ፥ ሄኮ፥ ህንተ ኬꬃይ ካይስ ግዳና።
MAT 23:39 ታኒ ህንተዉ ኦዳይስ፤ ‘ጎዳ ሱንꬃን የይስ አንጀትዳይሳ’ ህንተ ጋና ጋካናዉ ናምአንꬆ ታና በኤከታ” ያግስ።
MAT 24:1 የሱሲ ፆሳ ኬꬃፈ ከይድ ብሽን፥ እያ ታማረት እያኮ ይድ፥ ማላለትድ ፆሳ ኬꬃ ግምብያ በስዶሶና።
MAT 24:2 የሱሲ ኤንታኮ ዛሪድ፥ “ኤ! ሀይሳ ኡባ በኤቲ? ታኒ ህንተዉ ቱማ ኦዳይስ፤ ሹች ሹቻ ቦላ ግምበትዳ መላ ላለቶና አተና” ያግስ።
MAT 24:3 የሱሲ ሻማሆ ዙማ ቦላ ኡትዳሽን፥ እያ ታማረት ባንታርካ እያኮ ይድ፥ “ሄስ አዉደ ሀናኔኮ ኑስ ኦዳ። ቃስ ነ ዩሳስነ ዎድያ ዉርሰꬃስ ማላታይ አይቤ?” ያግድ ኦይችዶሶና።
MAT 24:4 የሱሲ ዛሪድ፥ “ህንተና ኦንካ ባለꬆና መላ ናገትተ!
MAT 24:5 አይስ ጊኮ፥ ዳሮ አሳት ታ ሱንꬃን፥ ‘ታኒ ክርስቶሳ፥ ፆሳይ አሳ አሻናዉ ኪትዳይሳ’ ያግሸ ይድ ዳሮ አሳ ባለꬃና።
MAT 24:6 ማታን ደእያ ኦላ ግርሳ፥ ሃሆን ደእያ ኦላ ዎረ ስአናዉ ደኤታ። ሄሳ መላባይ ሀናናዉ በሲያ ግሾ ህርጎፍተ። ሽን ዉርሰꬃይ ቡሮና።
MAT 24:7 ደረይ ደርያራ፥ እስ ካዎተꬃይ ሀራ ካዎተꬃራ ኦለታና። ኮሻይነ ቢታ ቃፆይ ኡባ በሳን ሀናና።
MAT 24:8 ሄስ ኡባይ የሎ እቀꬃስ ዞከ መላ።
MAT 24:9 “ሄ ዎደ አሳይ ህንተና ዋዬስ አꬅድ እማና፥ ቃቻናነ ዎꬋና። ታ ሱንꬃ ግሾ አሳ ኡባይ ህንተና እፃና።
MAT 24:10 ሄ ዎደ ዳሮት አማኖ አጋና። ባንታ ግዶን እሶይ እሱዋ አꬅድ እማና፥ እሶይ እሱዋ እፃና።
MAT 24:11 ቃስ ዳሮ ዎርዶ ናበት ደንድድ ዳሮታ ባለꬃና።
MAT 24:12 ጌላተꬅ ዳርያ ግሾ፥ ዳሮ አሳ ሲቆይ እርፃና።
MAT 24:13 ሽን ዉርሰꬅ ጋካናዉ ገንጭያ ኡራይ አታና።
MAT 24:14 አሳ ኡባስ ማርካ ግዳና መላ ፆሳ ካዎተꬃ ዎንገላይ ቢታ ኡባን ኦደታና። ሄሳፈ ጉየ፥ ዉርሰꬃይ ያና።
MAT 24:15 “ሄሳ ግሾ፥ ናብያ ዳነል ኦድዳ ꬋዮ ቱናተꬃይ ጌሻ በሳን ኤቅዳይሳ ህንተ በአና። (አኬክሶ፦ ሄስ ዎይ ጉሰኮ ናባበይስ አኬኮ!)
MAT 24:16 ሄ ዎደ ይሁዳ ቢታን ደኤይሳት ደርያኮ ባቃቶ።
MAT 24:17 ኬꬃ ሁጰን ደእያ ኡራይ ባ ሶን ደእያባ ኤካናዉ ሶ ገሎና ባቃቶ።
MAT 24:18 ጋደን ደኤይስ ባ ማኡዋ ኤካናዉ ጉየ ስሞፎ።
MAT 24:19 ሄ ዎደ ቃንꬃ ማጫሳታስነ ꬋንꬅያ ማጫሳታስ ዳሮ ኡንአ ግዳና።
MAT 24:20 ባልጎን ዎይኮ ሳምባታን ህንተ ባቃቶይ ግዶና መላ ፆሳ ዎስተ።
MAT 24:21 አይስ ጊኮ፥ ሳእ መቶሳፐ ሀች ጋካናዉ ሀኖናባይ፥ ቃስ ስንꬃፈካ ኡባራካ ሀኖና ዋየይ ሄ ዎደ ሀናና።
MAT 24:22 ፆሳይ ሄ ጋላሳታ ታይቡዋ ጉꬆናኮ አሰ ግድዳ ኦንካ አተና። ሽን እ ባ ዶርዳ አሳታ ግሾ፥ ሄ ጋላሳታ ታይቡዋ ጉꬃና።
MAT 24:23 “ሄ ዎደ ኦንካ ህንተና፥ ‘ሄኮ፥ ክርስቶስ ሀይሳን’ ዎይኮ ‘ህንን ደኤስ’ ያግኮ አማኖፕተ።
MAT 24:24 አይስ ጊኮ፥ ዎርዶ ክርስቶሳትነ ዎርዶ ናበት ደንዳና። ኤንታዉ ዳንዳኤትኮ፥ ሀር አቶሽን ፆሳይ ዶርዳይሳታካ ባለꬃናዉ ግታ ማላታታነ ማላልስያባታ ኦꬃና።
MAT 24:25 አኬክተ፥ ታኒ ህንተዉ ሀይሳ ካሰታዳ ኦዳስ።
MAT 24:26 “ሄሳ ግሾ፥ አሳይ ህንተኮ፥ ‘ሄኮ፥ ክርስቶስ ባዞን ደኤስ’ ጊኮ፥ ያ ቦፕተ። ዎይኮ ህንተኮ፥ ‘ሄኮ፥ ቆልአን ደኤስ’ ጊኮ፥ ኤንታባ አማኖፕተ።
MAT 24:27 አይስ ጊኮ፥ ዎልአንꬅ ሳሎን ዎልአምድ፥ ዶሎሀፐ ዉሎሀ ጋካናዉ በንተይሳዳ፥ አሳ ናኣ ዩሳይ ሄሳዳ ሀናና።
MAT 24:28 “ባዉት ደእያሶን አንኮት ሺቃና።
MAT 24:29 “ሄ ዎደ ሄ ዋየ ጋላሳታፐ ጉየ፥ ኤለስድ አዋይ ꬉማና፥ አጌናይ ባ ፖኡዋ ድጋና። ፆልንቶት ሳሎፐ ዎꬋና፥ ቃስ ሳሎን ደእያ ዎልቃት ቡቀታና።
MAT 24:30 ሄ ዎደ አሳ ናኣ ዩሳ ማላይ ሳሉዋ ቦላ በንታና። ሳአን ደእያ አስ ኡባይ ዬካና። ቃስ አሳ ናአይ፥ ዎልቃራነ ግታ ቦንቹዋራ ሳሉዋ ሻራ ግዶራ ይሽን ኤንቲ በአና።
MAT 24:31 እ ባ ኪታንቾታ ግታ ሞይዘ ፑኖራ ኪታና። ኤንቲ ሳኣ ኦይዱ ባጋ ብድ፥ ሀ ጋፃፐ ያ ጋፃ ጋካናዉ ደእያ እያዉ ዶረትዳይሳታ ሺሻና።
MAT 24:32 “ባላሰ ምꬃፈ ታማርተ። እያ አጫዳ ሀይፅያ ዎደ ቶርቸይ ማታትዳይሳ ህንተ ኤሬታ።
MAT 24:33 ሄሳዳካ፥ ህንተ ሀ ኡባባ በእያ ዎደ የሱሲ ማትድ ፐንገን ደኤይሳ ኤርተ።
MAT 24:34 ታኒ ህንተዉ ቱማ ኦዳይስ፤ ሀ ኡባባይ ፖለታና ጋካናዉ፥ ሀ የለተꬃይ አና።
MAT 24:35 ሳሎይነ ሳእ አꬋና፥ ሽን ታ ቃላይ ኡባካ አና።
MAT 24:36 “ሄ ጋላሳነ ሄ ሳትያ ሳሎን ደእያ ታ አዋፐ አትሽን፥ ሀር ሳሎ ኪታንቾታ ግድን ዎይኮ ናኣ ግድን ኦንካ ኤረና።
MAT 24:37 አሳ ናኣ ዩሳይ፥ ኖሄ ዎደ ሀንዳይሳ መላ ግዳና።
MAT 24:38 ሄ ዎደ ꬋዮ ሃꬃይ ያናፐ ስን ኖሄይ ማርካብያን ገልዳ ጋላሳ ጋካናዉ፥ አሳይ ምሸነ ኡይሸ፥ ኤክሸነ ገልሸ ጋምእስ።
MAT 24:39 ꬋዮ ሃꬃይ ይድ፥ ኤንታ ኡባ ꬋይሳና ጋካናዉ አኬክቦኮና። አሳ ናኣ ዩሳይካ ሄሳዳ ሀናና።
MAT 24:40 “ሄ ዎደ ናምኡ አሳት ጋደን ኦꬃና። ኤንታፈ እሶይ ኤከታና፥ ሀንኮይ አታና።
MAT 24:41 ናምኡ ማጫሳት እስፈ ጋጫና። ኤንታፈ እስንያ ኤከታና ሀንክያ አታና።
MAT 24:42 “ህዛ፥ ህንተ ጎዳይ አይ ጋላስ ያነኮ ህንተ ኤሮና ግሾ፥ ምንድ ናግተ።
MAT 24:43 ሽን ካይሶይ ቃማፈ አይ ሳተን ያነኮ ጎዳይ ኤርያኮ፥ ባ ኬꬃይ ቦከቶና መላ ባርክድ ናጋናሽን።
MAT 24:44 ሄሳዳካ፥ አሳ ናአይ ህንተ ቆፖና ሳተን ያና ግሾ፥ ህንተካ ጊግድ ደእተ።
MAT 24:45 “ያትን፥ ባ ሶ አሳስ ካꬃ ኮሽያ ዎድያን እማና መላ እያ ጎዳይ ዶርዳ አማንይስነ ዎዛናማ አይለይ ኦኔ?
MAT 24:46 እ ባ ጎዳይ ኪትዳይሳ ኦꬅሽን እያ ጎዳይ ይድ ደምያ አይለይ አንጀትዳይሳ።
MAT 24:47 ታኒ ህንተዉ ቱማ ኦዳይስ፤ ጎዳይ ሄ አይልያ ባባ ኡባ ቦላ ሹማና።
MAT 24:48 ሽን ሄ አይለይ ኢታ ግድኮ፥ ‘ታ ጎዳይ ጋምእድ ያና’ ያግድ ባ ዎዛናን ቆፕድ፥
MAT 24:49 ባ ላገ ኦሳንቾታ ዋꬎ ዶምኮ፥ ማꬆተይሳታራ ሚኮነ ኡይኮ፥
MAT 24:50 ሄ አይልያ ጎዳይ እ ቆፖና ጋላስነ እ ኤሮና ሳተን፥
MAT 24:51 ይድ እያ ቃንፀረꬃና። እያ ቃዳ ጩቦታራ ኦꬃና። ሄ በሳን እያዉ ዬሆነ አቸ ጋርጨꬅ ግዳና።
MAT 25:1 “ሄ ዎደ ሳሎ ካዎተꬃይ ባንታ ፆምፐ ኦይክድ፥ ማቾ ኤሀናዉ ብዳ አድያ ሞካናዉ ከይዳ ታሙ ጌላኦታ ዳኔስ።
MAT 25:2 ኤንታፈ እቻሻት ኤያ፥ ቃስ እቻሻት ጭንጫ።
MAT 25:3 ኤያት ፆምፐ ኦይክዶሶና፥ ሽን ጉዣ ዛይተ ኦይክቦኮና።
MAT 25:4 ሽን ጭንጫት ባንታ ፆምፐነ ሀራ ጉዣ ዛይተ ኦይክዶሶና።
MAT 25:5 ማችዉ ኤከይስ ጋምእን፥ ሄ ጌላኦት ባንታና ꬍስኮይ ኦይክን ꬍስክዶሶና።
MAT 25:6 “ግድ ብላሄ ግድያ ዎደ፥ ‘ሄኮ፥ ማችዉ ኤሄይስ ጋክስ፥ እያ ሞካናዉ ከይተ’ ግያ ግታ ጫቦይ ስኤትስ።
MAT 25:7 “ሄ ዎደ ሄ ጌላኦት ኡባይ ባርክድ፥ ባንታ ፆምፕያ ጊግስዶሶና።
MAT 25:8 ኤያት ጭንጫታኮ፥ ‘ኑ ፆምፐይ ቶአና ሀንያ ግሾ፥ ህንተ ዛይትያፐ ኑስ እመርከት’ ያግዶሶና።
MAT 25:9 “ሽን ጭንጫት ዛሪድ፥ ‘አካይ፥ ኑስነ ህንተዉ ግድያ ዛይተይ ባዋ። ሄሳ ግሾ፥ ብድ ህንተዉ ሻምድ ኤክተ’ ያግዶሶና።
MAT 25:10 ኤያ ጌላኦት ዛይተ ሻማናዉ ብን፥ ማችዉ ኤከይስ ፑቱ ግስ። ጊገት ኡትዳ እቻሹ ጌላኦት እያራ እስፈ ያጋኖ ኬꬅ ገልዶሶና፤ ካረይካ ጎርደት አግስ።
MAT 25:11 “ጉየፐ ሀንኮ ጌላኦት ይድ፥ ‘ጎዳዉ፥ ጎዳዉ፥ ኑስ ዶያርክ’ ያግዶሶና።
MAT 25:12 “ሽን እ ዛሪድ፥ ‘ታኒ ህንተዉ ቱማ ኦዳይስ፤ ታ ህንተና ኤርከ!’
MAT 25:13 “ህዛ፥ አሳ ናአይ ያና ጋላሳ ዎይኮ ሳትያ ህንተ ኤሮና ግሾ ባርክድ ናግተ።
MAT 25:14 “ፆሳ ካዎተꬃይ ባ ኦሳንቾታ ፄግድ ባዉ ደእያባ ኤንታዉ ሼꬍድ ኦገ ባናዉ ከይዳ ኡራ ዳኔስ።
MAT 25:15 ኤንታዉ ሁጰን ሁጰን ኤንታ ዎልቃ መላ እሱዋስ እቻሹ ካርፂተ ብራ፥ እሱዋስ ናምኡ ካርፂተ ብራ ቃስ እሱዋስ እስ ካርፂተ ብራ እምድ ባ ኦግያ ብስ።
MAT 25:16 እቻሹ ካርፂተ ብራ ኤክዳ አይለይ ኤለስ ብድ ዛልእድ፥ ሀራ እቻሹ ካርፂተ ብራ ዎꬍስስ።
MAT 25:17 ሄሳዳካ፥ ቃስ ናምኡ ካርፂተ ብራ ኤክዳ አይለይ ሀራ ናምኡ ካርፂተ ብራ ዎꬍስስ።
MAT 25:18 ሽን እስ ካርፂተ ብራ ኤክዳይስ ብድ፥ ኦላ ቦክድ፥ ባ ጎዳ ሚሽያ ሞግስ።
MAT 25:19 “ዳሮ ዎደፐ ጉየ ሄ አይለታ ጎዳይ ይድ፥ ባ ሚሽያ ኤንታራ ሳላእስ።
MAT 25:20 እቻሹ ካርፂተ ብራ ኤክዳ አይለይ ይድ፥ ሀራ እቻሹ ካርፂተ ብራ ኤህድ፥ ‘ታ ጎዳዉ፥ ኔኒ ታዉ እቻሹ ካርፂተ ብራ እማዳሳ። ሽን ታኒ ሀራ እቻሹ ካርፂተ ብራ ዎꬍሳስ’ ያግስ።
MAT 25:21 እያ ጎዳይ፥ ‘ዛምቦይ! ኔኒ ሎኦነ አማንꬅያ አይለ፤ ኔኒ ጉꬃባን አማነታዳሳ። ታኒ ነና ዳሮባ ቦላ ሹማና፤ ሃ ገላዳ ነ ጎዳራ ኡፋይታ’ ያግስ።
MAT 25:22 “ቃስ ናምኡ ካርፂተ ብራ ኤክዳይስ ይድ፥ ‘ታ ጎዳዉ፥ ኔኒ ታዉ ናምኡ ካርፂተ ብራ እማዳሳ። ሽን ታኒ ሀራ ናምኡ ካርፂተ ብራ ዎꬍሳስ’ ያግስ።
MAT 25:23 እያ ጎዳይ፥ ‘ዛምቦይ! ኔኒ ሎኦነ አማንꬅያ አይለ፤ ኔኒ ጉꬃባን አማነታዳሳ። ታኒ ነና ዳሮባ ቦላ ሹማና፤ ሃ ገላዳ ነ ጎዳራ ኡፋይታ’ ያግስ።
MAT 25:24 “ቃስ እስ ካርፂተ ብራ ኤክዳይስ ይድ፥ ‘ታ ጎዳዉ፥ ኔኒ ዘሮና በሳፈ ጫክያነ ꬋርጮና በሳፈ ማፅያ ኢታ አስ ግደይሳ ታኒ ኤራይስ።
MAT 25:25 ሄሳ ግሾ፥ ያያዳ ነ ብራ ቢታን ሞጋስ። ነ ሚሸይ ሀይስሽ’ ያግስ።
MAT 25:26 “እያ ጎዳይ ዛሪድ፥ ‘ሀ ኢታ አዛላ አይልያዉ፥ ታኒ ዘሮና በሳፈ ጫከይሳነ ꬋርጮና በሳፈ ማፅያ አስ ግደይሳ ኤራዳሳ።
MAT 25:27 ያትን፥ ኔኒ ታ ሚሽያ ባንከን ዎꬅዳባ ግድያኮ፥ ታኒ ስምያ ዎደ ታ ሚሽያ ዎራ ኤካናይሳ ድጋዳሳ።
MAT 25:28 ሄሳ ግሾ፥ ሚሽያ እያፐ ኤክድ፥ ታሙ ካርፂተ ብር ደኤይሳስ እምተ።
MAT 25:29 አይስ ጊኮ፥ ደእያ ኡባስ ጉዠታናነ ዳራና። ሽን ባይናይሳፈ ሀር አቶሽን፥ ሄ እያዉ ደእያ ጉꬅያካ ኤከታና።
MAT 25:30 ሀ ማዶና አይልያ ካረ ꬉማ ከስ የግተ። ያን እያዉ ዬሆነ አቸ ጋርጨꬅ ግዳና’ ያግስ።
MAT 25:31 “አሳ ናአይ፥ ኪታንቾ ኡባታራ፥ ባ ቦንቹዋራ ያ ዎደ እ ባ ቦንቾ ካዎተꬃ አራታ ቦላ ኡታና።
MAT 25:32 ቢታን ደእያ አስ ኡባይ እያ ስን ሺቃና። ሄንꬃንቾይ ዶርሳታ ዴሻታፐ ሻከይሳዳ እ ሄ አሳ ናምአን ሻካና።
MAT 25:33 ቃስ ዶርሳታ ኡሻቻ ባጋራ ዴሻታ ሀድርሳ ባጋራ ኤሳና።
MAT 25:34 “ሄሳፈ ጉየ፥ ካዎይ ኡሻቻ ባጋራ ደኤይሳታኮ ሀይሳዳ ያጋና፦ ‘ታ አዋይ አንጅዳይሳቶ፥ ሀ ይድ ሳእ መትያ ዎደፐ ዶምድ ህንተዉ ጊግዳ ካዎተꬃ ላትተ።
MAT 25:35 አይስ ጊኮ፥ ታኒ ኮሻትን ሙዝደታ፥ ሳሞትን ኡሽደታ፥ ኤረቶና እማꬃ አስ ግዳዳ ብን ሞክደታ፥
MAT 25:36 ካሎትን ማይዝደታ፥ ሀርገትን ሀርግስደታ፥ ቃሸትን ታና ኦይችደታ’ ያጋና።
MAT 25:37 “ሄሳፈ ጉየ፥ ፅሎት ዛሪድ፥ ‘ጎዳዉ፥ ኔኒ ኮሻትን አዉደ በእድ ሙዝዶ? ዎይኮ ኔኒ ሳሞትን አዉደ በእድ ኡሽዶ?
MAT 25:38 ኔኒ እማ ግዳዳ ይን አዉደ በእድ ሞክዶ? ዎይኮ ኔኒ ካሎትን አዉደ ማይዝዶ?
MAT 25:39 ኔኒ ሀርግን ዎይኮ ቃሸትን ኔኮ ብድ ነና አዉደ ኦይችዶ?’ ያጋና።
MAT 25:40 ካዎይ ዛሪድ፥ ‘ታኒ ህንተዉ ቱማ ኦዳይስ፤ ህንተ ታና ካልያ ሀ ኡባፈ ጉፀይሳስ ኦꬅዳይሳ ታዉ ኦꬅደታ’ ያጋና።
MAT 25:41 “ሄ ዎደ ሀድርሳ ባጋራ ደኤይሳታኮ፥ ‘ሀ ባደትዳይሳቶ፥ ታ ማታፐ ሃክተ። ፃላሄስነ እያ ኪታንቾታስ ጊግዳ መርና ታማን ቢተ።
MAT 25:42 አይስ ጊኮ፥ ኮሻትን ታና ሙዝቤከታ፤ ሳሞትን ኡሽቤከታ።
MAT 25:43 ታኒ እማ ግዳዳ ብን ታና ሞክበከታ፥ ካሎትን ማይዝቤከታ፥ ሀርግንነ ቃሸትን ታና ኦይችቤከታ’ ያጋና።
MAT 25:44 “ሄ ዎደ ኤንቲ፥ ‘ጎዳዉ፥ ኔኒ ኮሻትን ዎይኮ ሳሞትን ዎይኮ እማ ግዳዳ ብን ዎይኮ ካሎትን ዎይኮ ሀርግን ዎይኮ ቃሸትን በእድ ነና አዉደ ማዶና እፅዶ?’ ያግድ ዛራና።
MAT 25:45 “ሄ ዎደ ካዎይ ዛሪድ ኤንታኮ፥ ‘ታኒ ህንተዉ ቱማ ኦዳይስ፤ ህንተ ታና ካልያ ሀ ኡባፈ ጉፀይሳ ማዶና እፅዳይስ፥ ታና ማዶና እፅዳይሳ’ ያጋና።
MAT 25:46 ሄሳ ግሾ፥ ሄ አሳት መርና ፕርዳስ ቃስ ፅሎት መርና ደኡዋስ ባና” ያግስ።
MAT 26:1 የሱሲ ሀ ትምርትያ ኡባ ዉርስዳ ዎደ ባ ታማረታኮ፥
MAT 26:2 “ናምኡ ጋላሳፐ ጉየ፥ ፓስካ ባኣለ ቦንችያ ጋላስ ግደይሳ ኤሬታ። ሄ ጋላስ አሳ ናእ ማስቃለ ቦላ ካቀታናዉ አሳ ኩሸን አꬍድ እመታና” ያግስ።
MAT 26:3 ሄ ዎደ ካህነ ሀላቃትነ ጭማት፥ ቃያፋ ጌተትያ ካህነ ሀላቃ ኬꬃን ሺቅድ፥
MAT 26:4 አስ ኤሮና የሱሳ ኦይክድ፥ ዎꬋናዉ ማቀትዶሶና።
MAT 26:5 ሽን ኤንቲ፥ “አሳይ ኦሽ ከሶና መላ ግድ፥ ፓስካ ቦንችያ ጋላስ ሄሳ ኦꬆኮ” ያግዶሶና።
MAT 26:6 የሱሲ ብታነ ካታማን ባሮ ሀርግዳ ስሞና ሶን ደኤስ።
MAT 26:7 የሱሲ እማቱዋ ቦላ ደእሽን እስ ማጫስያ አልባስፅሮሳ ብልቃፀ ኩመꬃ ዳሮ አልኦ ሽቶ ኤካ ያዳ የሱሳ ሁጰን ትጋሱ።
MAT 26:8 ሽን የሱሳ ታማረት ሄሳ በእድ ሀንቀትድ፥ “ሀ ሽቶይ ጮ ኢተይ አይብሴ?
MAT 26:9 ሀ ሽቶይ አልኦ ጋተን ባይዘትድ፥ ሚሸይ ማንቆታስ እመታናዉ ዳንዳኤቴስ” ያግዶሶና።
MAT 26:10 የሱሲ ኤንቲ ገይሳ ኤርድ፥ ኤንታኮ፥ “ሀ ማጫስዉ አይስ ዋይሰቲ? እያ ታዉ ሎኦባ ኦꬃሱ።
MAT 26:11 ማንቆት ኡባ ዎደ ህንተራ ዳና። ሽን ታኒ ህንተራ ኡባ ዎደ ደእከ።
MAT 26:12 እያ ሀ ሽቱዋ ታ ቦላ ትግዳይስ ታና ሞጋናዉ ጊግሳናሳ።
MAT 26:13 ታኒ ህንተዉ ቱማ ኦዳይስ፤ ቢታ ኡባን ሀ ዎንገላይ ሳባከትያ በሳን አዉንካ፥ አሳይ እዮ ሀሳያና መላ እያ ኦꬅዳይስ ኦደታና” ያግስ።
MAT 26:14 ሄ ዎደ ታማነ ናምኡ የሱሳ ታማረታፐ እሶይ፥ አስቆሮታ ይሁዳ ጌተተይስ ካህነ ሀላቃታኮ፥
MAT 26:15 ብድ፥ “ታኒ ህንተዉ የሱሳ አꬃ እምኮ፥ ህንተ ታዉ አይ እማኔ?” ያግድ ኤንታ ኦይችስ። ኤንቲ ዞረትድ ሀስታሙ ብራ ሳንትመ እምዶሶና።
MAT 26:16 ሄሳፈ ጉየ፥ ይሁድ የሱሳ አꬅድ እማናዉ እንጀትያ ዎደ ዎቼስ።
MAT 26:17 ኡይꬃ ባኣለ ቦንችያ ኮይሮ ጋላስ፥ የሱሳ ታማረት እያኮ ይድ፥ “ፓስካ ቦንችያ ጋላስ ኔኒ ማና ካꬅ ኑኒ አዉን ጊግስኖ?” ያግዶሶና።
MAT 26:18 የሱሲ ኤንታኮ፥ “ካታማን ደእያ አድያኮ ብድ፥ ‘አስታማረይ፥ ታዉ ዎደይ ጋክዳ ግሾ፥ ታ ታማረታራ ፓስካ ቦንችያ ጋላሳ ነ ሶን አꬃና ያጌስ’ ያግተ” ያግስ።
MAT 26:19 እያ ታማረት የሱሲ ባንታና ኪትዳይሳዳ ኦꬅድ፥ ፓስካ ባኣለ ጋላስ ማና ካꬃ ጊግስዶሶና።
MAT 26:20 ሳአይ ኦማርስያ ዎደ፥ የሱሲ ታማነ ናምኡ ሀዋረታራ ካꬅ ማናዉ ኡትስ።
MAT 26:21 ኤንቲ ምሽን፥ የሱሲ ኤንታኮ፥ “ታኒ ህንተዉ ቱማ ኦዳይስ፤ ህንተፈ እስ ኡራይ ታና አꬅድ እማና” ያግስ።
MAT 26:22 ኤንቲ ዳሮ ዳጋምድ፥ እሶይ እሶይ፥ “ጎዳዉ፥ ቱማ ታነሻ?” ግድ እያ ኦይችዶሶና።
MAT 26:23 የሱሲ ዛሪድ፥ “ባ ኩሽያ ታራ እስፈ ሻትያን የደይስ እ ታና አꬅድ እማና።
MAT 26:24 አሳ ናአይ፥ ፆሳ ቃላን እያዉ ፃፈትዳይሳዳ ሀይቃና። ሽን አሳ ናኣ አꬅድ እምያ ኡራ አየ! ሄ ኡራይ የለቶና አትዳኮ እያዉ ሎኦሽን” ያግስ።
MAT 26:25 እያ አꬅድ እማናዉ ደእያ ይሁድ ዛሪድ፥ “አስታማርያዉ፥ ኔኒ ገይ ታነዬ?” ያግስ። የሱሲ ዛሪድ፥ “ኔኒ ነ ሁጰን ጋዳሳ” ያግስ።
MAT 26:26 ኤንቲ ምሽን፥ የሱሲ ኡይꬃ ኤክድ ፆሳ ጋላትስ። ሄ ኡይꬃ መንꬅድ ባ ታማረታስ እምድ፥ “ሄእተ፥ ሚተ፥ ሀይስ ታ አሹዋ” ያግስ።
MAT 26:27 ፁኣ ኤክድ፥ ፆሳ ጋላትስ። ኤንታዉ እምድ፥ “ኡባይ ሀይሳፈ ኡይተ።
MAT 26:28 ሀይስ ዳሮ አሳ ናጋራ አቶተꬃስ መላ ጉክያ ታ ሱꬃ። ሀ ሱꬃይ ፆሳይ ህንተራ ገልያ ጫቁዋ ምንይሳ።
MAT 26:29 ሽን ታኒ ህንተዉ ኦዳይስ፤ ታኒ ታ አዋ ካዎተꬃን ኦራꬃ ዎይነ ኡሻ ህንተራ ኡያና ጋላሳ ጋካናዉ ናምአንꬆ ሀ ዎይነ ኡሻ ኡይከ” ያግስ።
MAT 26:30 ጋላታ ማዝሙረ የፅዳፐ ጉየ፥ ሻማሆ ዙማ ብዶሶና።
MAT 26:31 ሄ ዎደ የሱሲ ኤንታኮ፥ “ ‘ፆሳይ ሄንꬃንቹዋ ሾጫና ዶርሳትካ ላለታና’ ጌተትድ ፆሳ ቃላን ፃፈትዳይሳ መላ ሀች ቃማ ህንተ ኡባይ ታና አግድ ባቃታና።
MAT 26:32 ሽን ታኒ ሀይቆፐ ደንድዳፐ ጉየ ህንተፈ ስንꬃታዳ ጋልላ ባና” ያግስ።
MAT 26:33 ጰፅሮስ ዛሪድ፥ “ኤንቲ ኡባይ ነና አግድ ባቃትኮካ፥ ታኒ ነና አግከ” ያግስ።
MAT 26:34 የሱሲ ጰፅሮሳኮ፥ “ታኒ ነዉ ቱማ ኦዳይስ፤ ሀች ቃማ ኩቶይ ዋሳናፐ ስን ኔኒ ታና ሄꬑ ቶሆ ካዳና” ያግስ።
MAT 26:35 ጰፅሮስ ዛሪድ፥ “ታኒ ኔራ እስፈ ሀይቆፐ አትሽን፥ ነና ኡባካ ካድከ” ያግስ። ሀንኮ እያ ታማረት ኡባይካ ሄሳዳ ግዶሶና።
MAT 26:36 ያትድ፥ የሱሲ ባ ታማረታራ ጌታሰማነ ጌተትያ በሳ ብድ፥ ኤንታኮ፥ “ታኒ ህን ባዳ ፆሳ ዎሳሻና፥ ህንተ ሀይሳን ኡትተ” ያግስ።
MAT 26:37 ጰፅሮሳነ ዛብድዮሳ ናይታ ናምአታ ባራ ኤክ ብድ ዳሮ አዛኖነ ኡንኤተꬅ ዶምስ።
MAT 26:38 ቃስካ ኤንታኮ፥ “ታኒ ሀይቆስ ጋꬅያ ኡንአ ኡንኤታስ። ሀይሳን ታራ ጋምእተነ ምንድ ናግተ” ያግስ።
MAT 26:39 ጉꬅ ስን ብድ ቢታን ጉፋንድ፥ “ታ አዋዉ፥ ዳንዳኤትያባ ግድኮ ሀ ዋየ ፁኣ ታፐ ድጋ። ሽን ነ ሸነይ ሀኖፐ አትሽን፥ ታ ሸነይ ሀኖፖ” ያግድ ፆሳ ዎስስ።
MAT 26:40 የሱሲ ባ ታማረታኮ ስም ይድ ኤንቲ ꬍስክዳሽን ደምስ። ጰፅሮሳኮ፥ “ህንተ እስ ሳተኮካ ꬍስኮና ታራ ምናናዉ ዳንዳእቤከቲ?
MAT 26:41 ፓጨን ህንተ ገሎና መላ ባርክድ ናግተነ ፆሳ ዎስተ። ህንተዉ ሎኦ አሞይ ደኤስ፥ ሽን ህንተ ዳቡራንቾ አስ” ያግስ።
MAT 26:42 የሱሲ ቃስ ናምአንꬆ ብድ፥ “ታ አዋዉ፥ ታኒ ሀ ዋየ ፁአፐ ኡዮና ደእሸ አꬋናዉ ዳንዳኤቶናባ ግድኮ ነ ሸነይ ሀኖ” ያግድ ፆሳ ዎስስ።
MAT 26:43 ቃስካ ስም ያ ዎደ እያ ታማረታ አይፍያ ꬍስኮይ ጎዝን፥ ዝንእዳሽን ደምስ።
MAT 26:44 ቃስካ ኤንታ አግድ፥ ብድ ካሰ ቃላ ዛር ሄꬓንꬆ ዎስስ።
MAT 26:45 ሄሳፈ ጉየ፥ ባ ታማረታኮ ይድ፥ “ሀእ ጋካናዉ ꬍስከትነ ሸምፐቲ? ሄኮ፥ አሳ ናእ፥ ናጋራንቾታ ኩሸን አꬍድ እመትያ ሳተይ ጋክስ።
MAT 26:46 ደንድድ የꬍተ፥ ታና አꬅድ እመይስ ሀይስሽ ጋክስ” ያግስ።
MAT 26:47 የሱሲ ቡሮ ሄሳ ሃሳይሽን፥ ታማነ ናምኡ ታማረታፐ እሶይ፥ ይሁድ ጋክ ዎꬍስ። ካህነ ሀላቃትነ ደርያ ጭማት ኪትዳ ዳሮ አሳት ማሸነ ፃምአ ኦይክድ እያራ እስፈ ይዶሶና።
MAT 26:48 የሱሳ አꬅድ እምያ ይሁድ ሄ ዳሮ አሳኮ፥ “ታኒ ዬረይስ ህንተ ኮየይስ እያ፥ እያ ኦይክተ” ያግድ ማላ እም ዎꬅስ።
MAT 26:49 ኢራካ የሱሳኮ ሺቅድ፥ “አስታማርያዉ፥ ሳሮ ደአይ” ያግድ እያ ዬርስ።
MAT 26:50 የሱሲ እያኮ፥ “ታ ላግያዉ፥ ኔኒ ኦꬃናባ ኦꬃ አጋ” ያግስ። ሄሳፈ ጉየ፥ ሺቅድ፥ የሱሳ ኦይክዶሶና።
MAT 26:51 የሱሳራ ደኤይሳታፐ እሶይ ባ ማሻ ሾድድ ካህነ ሀላቃ አይልያ ሾጭድ፥ እያ ሀይꬃ ቃንፅድ የግስ።
MAT 26:52 ሽን የሱሲ፥ “ነ ማሻ ጉየ ሾሁዋን ዛራ። አይስ ጊኮ፥ ማሻ ሾድያ ኡባይ ማሻን ሀይቃና።
MAT 26:53 ታ፥ ታ አዋ ዎስያኮ ዳሮ ሙኩሉን ታይበትያ ኪታንቾታ የዳናዉ ዳንዳኦናባ ነዉ ዳኒ?
MAT 26:54 ያትን፥ ፆሳ ቃላን ሄሳዳ ሀናናዉ በሴስ ጌተትዳይስ ዋንድ ፖለታኔ?” ያግስ።
MAT 26:55 ሄ ሳትያን፥ የሱሲ ሄ ሺቅዳ ዳሮ አሳኮ፥ “ታና ፓንጋ ኦꬅድ ኦይካናዉ ማሻነ ፃምአ ኦይክድ ይደቲ? ታኒ ፆሳ ኬꬃን ጋላስ ጋላስ ታማርሳሸ ህንተራ ደእያ ዎደ ታና ኦይክቤከታ።
MAT 26:56 ሽን ሀይስ ኡባይ ሀንዳይስ ናበት ፆሳ ቃላን ፃፍዳይስ ፖለታና መላሳ” ያግስ። ሄ ዎደ እያ ታማረት ኡባይ እያ አግድ ባቃትዶሶና።
MAT 26:57 የሱሳ ኦይክዳይሳት ካህነ ሀላቃ ቃያፋኮ እያ ኤፍዶሶና። ያን ህገ አስታማረትነ ቢታ ጭማት ሺቅድ ደኦሶና።
MAT 26:58 ሽን ጰፅሮስ ካህነ ሀላቃ ዛባ ጋካናዉ ሃሆን እያ ካልስ። እያ ዉርሰꬃይ ሻከታና ጋካናዉ ዛባ ገልድ ናገይሳታራ ኡትስ።
MAT 26:59 ካህነ ሀላቃትነ ሺቅዳ አሳ ኡባይ የሱሳ ዎꬋናዉ እያ ቦላ ዎርዶ ማርካ ኮይዶሶና።
MAT 26:60 ዳሮት ይድ እያ ቦላ ዎርዶ ማርካ ማርካትዶሶና፥ ሽን አይኮካ ደምቦኮና። ጉየፐ ናምኡ አሳት ይድ፥
MAT 26:61 “ሀ ኡራይ፥ ‘ታኒ ፆሳ ኬꬃ ላላዳ ሄꬑ ጋላሳን ዛራ ኬፃናዉ ዳንዳአይስ’ ያግስ” ያግዶሶና።
MAT 26:62 ካህነታ ሀላቃይ ደንድ ኤቅድ የሱሳኮ፥ “ሀይሳቲ ነና ሞትያ ሞቱዋስ ኔኒ ዛርያባይ ባዌ?” ያግስ።
MAT 26:63 ሽን የሱሲ ስእ ግስ። ቃስካ ካህነ ሀላቃይ፥ “ታኒ ነና ደኦ ፆሳ ሱንꬃን ኦይካይስ፤ ኔኒ ፆሳ ናኣ ክርስቶሳ ግድኮ ኑስ ኦዳ” ያግስ።
MAT 26:64 የሱሲ ዛሪድ፥ “ኔኒ ነ ሁጰንካ ጋዳሳ። ሽን ታኒ ህንተዉ ኦዳይስ፤ ህዛፐ ጉየ፥ አሳ ናአይ ዎልቃማ ፆሳ ኡሻቻ ባጋን ኡትዳሽን፥ ቃስ ሳሎ ሻራራ ይሽን ህንተ በአና” ያግስ።
MAT 26:65 ሄ ዎደ ካህነ ሀላቃይ ዳሮ ይሎትድ ባ ማኡዋ ፔꬍድ፥ “ሀይሳ በእተ ፆሳ ጫይስ! ኑና ሀራ ማርካ አይ ኮሺ? እ ሀእ ጫይዳይሳ ህንተ ስእደታ።
MAT 26:66 ህንተ ቆፋይ አይቤ?” ያግስ። ኤንትካ፥ “እያዉ ሀይቆ በሴስ” ያግድ ዛርዶሶና።
MAT 26:67 ያትን፥ ኤንቲ እያ ሶምኦን ጩትድ ደችዶሶና። ሀራት እያ ባቅድ፥
MAT 26:68 “ክርስቶሳ! ነና ደችዳይ ኦኔ? አነ ኑስ ኦዳ” ያግዶሶና።
MAT 26:69 ጰፅሮስ ዛባን ኡትዳሽን፥ እስ አይልያ እያኮ ያዳ፥ “ኔንካ ጋልላ የሱሳራ እስፈ ደኣሳ” ያጋሱ።
MAT 26:70 ሽን እ ኤንታ ኡባ ስንꬃን ሄ አይለኮ፥ “ኔኒ ግያባይ አይበኮ ታኒ ኤርከ” ያግድ ካድስ።
MAT 26:71 ቃስ ብድ ድርሳ ፐንገኮ ጋክሽን ሀራ አይልያ እያ በአዳ፥ ያን ደእያ አሳኮ፥ “ሀ ኡራይ ናዝረተ የሱሳራ ደኤስ” ያጋሱ።
MAT 26:72 ጰፅሮስ ናምአንꬆ ጫቅድ፥ “ታኒ ሄ ኡራ ኤርከ!” ያግስ።
MAT 26:73 ጉꬁ ጋምእሽን፥ ያን ኤቅዳ አሳት ጰፅሮሳኮ ይድ፥ “ነካ ቱማ ኤንታራ እስፈ ደኣሳ፤ ኔኒ ነ ኦዳን ኤረታሳ” ያግዶሶና።
MAT 26:74 ሄሳፈ ጉየ፥ ጰፅሮስ፥ “ታኒ ሄ ኡራ ኤርከ!” ያግድ፥ ባና ባደꬅነ ጫቆ ዶምስ። ሄ ዎደ ኢራካ ኩቶይ ዋስ አግስ።
MAT 26:75 የሱሲ እያኮ፥ “ኔኒ ኩቶይ ዋሳናፐ ስን ታና ሄꬑ ቶሆ ካዳና” ግዳይሳ ጰፅሮስ አኬክድ፥ ካረ ከይድ ኢታ ዬሆ ዬክስ።
MAT 27:1 ዎንታ ጉራ ካህነ ሀላቃትነ ቢታ ጭማት ኡባይ የሱሳ ዎꬍሳናዉ ማቀትዶሶና።
MAT 27:2 ኤንቲ የሱሳ ቃች ኤፍድ ደርያ ሃርያ ጵላፆሳስ አꬅድ እምዶሶና።
MAT 27:3 ሄ ዎደ የሱሳ ኦይꬅዳ ይሁድ፥ ጵላፆስ የሱሳ ቦላ ፕርድዳይሳ በእድ፥ ቂሮትድ፥ ሄ ሀስታሙ ብራ ሳንትመ ካህነ ሀላቃታስነ ደርያ ጭማታስ ጉየ ዛርስ።
MAT 27:4 “ታኒ ፅሎ አስ ሀይቆስ አꬃ እማዳ ናጋራ ኦꬃስ” ያግስ። ሽን ኤንቲ፥ “ሄስ ኑ መቶ ግደና ነ መቶ” ያግዶሶና።
MAT 27:5 ይሁድ ሚሽያ ፆሳ ኬꬃን የግ አግድ ኤንታ ማታፐ ብድ፥ ሱለትድ ሀይቅስ።
MAT 27:6 ካህነ ሀላቃት ሚሽያ ኤክድ፥ “ሀ ሚሸይ ሱꬃ ሚሸ ግድያ ግሾ፥ ኑኒ ፆሳ ኬꬃ ሚሽያራ ጋይስ ዎጋ ግደና” ያግዶሶና።
MAT 27:7 ሄሳፈ ጉየ፥ እስፈ ዞረትድ፥ በተ አስ ሞጋናዉ ማና ቢታ ሻምዶሶና።
MAT 27:8 ሄሳ ግሾ፥ ሄ ጋደይ ሀች ጋካናዉ ሱꬃ ቢታ ጌተትድ ፄገቴስ።
MAT 27:9 ናብያ ኤርምያስ፥ “እስራኤለ አሳይ እያዉ ቃንፃናዉ ጋማትዳ ሀስታሙ ብራ ሳንትመ ኤክዶሶና።
MAT 27:10 ጎዳይ ታና ኪትዳይሳዳ ማና ቢታ ሻማናዉ እምዶሶና” ግዳይስ ሄ ዎደ ፖለትስ።
MAT 27:11 የሱሲ ደርያ ሃርያ ጵላፆሳ ስን ሺቅን፥ ጵላፆስ እያኮ፥ “ኔኒ አይሁደ ካዎ?” ያግድ ኦይችስ። የሱሲ ዛሪድ፥ “ነ ጋዳሳ” ያግስ።
MAT 27:12 ካህነ ሀላቃትነ ቢታ ጭማት እያ ሞትያ ዎደ ኤንታዉ አይብ ዛሮካ እምቤና።
MAT 27:13 ሄ ዎደ ጵላፆስ የሱሳኮ፥ “ሀይሳቲ ነና ሞትያ ሞቱዋ ኡባ ስእኪ?” ያግስ።
MAT 27:14 የሱሲ ሀር አቶሽን፥ እስ ቃላካ ዛሮና እፅን፥ ደርያ ሃረይስ ዳሮ ማላለትስ።
MAT 27:15 ደርያ ሃረይስ ላይꬃን ላይꬃን ፓስካ ባኣለ ቦንችያ ጋላሳን፥ አሳይ ኮይያ እስ አስ ቃሾፐ ብርሽያ ዎግ ደኤስ።
MAT 27:16 ሄ ዎደ እስ ባርባና የሱሳ ጌተትያ ዳሮ ኤረትዳ ኢታ አስ ቃሾ ኬꬃን ደኤስ።
MAT 27:17 ሄሳ ግሾ፥ ዳሮ አሳይ ሺቅድ ደእሽን ጵላፆስ፥ “ታኒ ህንተዉ ባርባና ብሎየ ዎይኮ የሱሳ ጌተትያ ክርስቶሳ ብሎ?” ያግድ አሳ ኦይችስ።
MAT 27:18 እ ሄሳ ግዳይ ኤንቲ ቃናትድ የሱሳ ኦይꬅዳይሳ ኤርያ ግሾሳ።
MAT 27:19 ጵላፆስ ፕርዳ ኬꬃን ኡትዳሽን፥ እያ ማችያ፥ “ታኒ ሀች ቃማ አሙሆን እያባ ዳሮ ዋየታሸ አቅዳ ግሾ፥ ሄ ፅሎ ኡራ ቦላ አይብባካ ኦꬆፋ” ያጋዳ ኪታሱ።
MAT 27:20 ሄ ዎደ ካህነ ሀላቃት፥ “ባርባን ብለቶ፥ የሱሲ ሀይቆ” ግድ ጵላፆሳ ዎሳና መላ አሳ ጭምዶሶና።
MAT 27:21 ጵላፆስ ዛሪድ፥ “ታኒ ኤንታ ናምኣፈ ህንተዉ ኦና ብላና መላ ኮዬቲ?” ያግድ ኦይችስ። ኤንቲ፥ “ባርባና ብላና መላ ኮዮስ” ያግዶሶና።
MAT 27:22 ጵላፆስ፥ “ያትን፥ የሱሳ ጌተትያ ክርስቶሳ ዋቶ?” ያግድ ኤንታ ኦይችስ። ኡባይ ዛሪድ፥ “ማስቃልያ ቦላ እያ ካቃ” ያግዶሶና።
MAT 27:23 ጵላፆስ አሳኮ፥ “አይስ? እ አይ ኢታባ ኦꬅዴ?” ያግድ ኦይችስ። ሽን አሳይ ካሰይሳፈ አꬅድ፥ “ማስቃልያ ቦላ እያ ካቃ” ግድ ዋስዶሶና።
MAT 27:24 ኦሽ ደንꬆፈ ሀራ አይብባካ ኦꬃናዉ ዳንዳኤቶናይሳ ጵላፆስ በእድ፥ ሃ ኤክድ፥ “ሀ ኡራ ሀይቁዋን ታኒ ደእከ። ሄሳ ኦይ ህንተና” ያግድ አሳ ስንꬃን ባ ኩሽያ ሜጨትስ።
MAT 27:25 አሳ ኡባይ ዛሪድ፥ “እያ ሱꬃ ጎመይ ኑናነ ኑ ናይታ ጋኮ” ያግዶሶና።
MAT 27:26 ያትን፥ ጵላፆስ ባርባና ኤንታዉ ብልድ፥ የሱሳ ልሶን ጋራፍድ፥ ማስቃልያ ቦላ ካቀትድ ሀይቃና መላ ኤንታዉ አꬅድ እሚስ።
MAT 27:27 ሄሳፈ ጉየ፥ ጵላፆሳ ዎታዳረት የሱሳ ደርያ ሃረይሳ ሶ ኤክ ኤፍን፥ ዎታዳረት ኡባይ እያ ዩሹዋን ኤቅዶሶና።
MAT 27:28 እያ አፍላ ቃር ኤክድ ዞኦ አፍላ ማይዝዶሶና።
MAT 27:29 ቃስ አጉንꬃ ካላቻ ጊግስድ፥ እያ ሁጰን ዎꬅዶሶና። እያ ኡሻቻ ኩሽያን ማይረ ፃምአ ኦይꬅድ፥ እያ ስንꬃን ጉልባትድ፥ “አይሁደ ካዋዉ፥ ሙኩሉ ላይꬅ ካዎታ!” ያግድ፥ እያ ቦላ ቀልቅስዶሶና።
MAT 27:30 እያ ቦላ ጩትዶሶና። ሄ ማይረ ፃምኣ ኤክድ፥ እያ ሁጰን ሾጭዶሶና።
MAT 27:31 ኤንቲ እያ ቦላ ቀልቅስዳፐ ጉየ፥ ዞኦ አፍላ እያፐ ቃር ኤክድ፥ እያ አፍላ እያ ማይዝዶሶና። ማስቃልያ ቦላ እያ ካቃናዉ ኤክ ኤፍዶሶና።
MAT 27:32 ኤንቲ ካረ ከይድ፥ እስ ስሞና ጌተትያ ቀሬና ቢታ አስ ደምድ፥ የሱሳ ማስቃልያ ዎልቃን ቶስዶሶና።
MAT 27:33 ጎልጎታ ጌተትያ በሲ ጋክዶሶና። “ጎልጎታ” ጉሳይ “ጉገ በሲ” ጉሱ።
MAT 27:34 ሄሳን ኤንቲ ጪየ ዋላከትዳ ዎይነ ኡሻ ኡዮ ግድ እያዉ እምዶሶና። ሽን እ ሄሳ ጋንፅ ኤክድ፥ ኡዮና እፅስ።
MAT 27:35 ኤንቲ ማስቃልያ ቦላ እያ ካቅዳይሳፈ ጉየ፥ እያ አፍላ ሻክድ፥ ሳማ የግድ ኤክዶሶና።
MAT 27:36 ሄሳፈ ጉየ፥ ያን ኡትድ እያ ናግዶሶና።
MAT 27:37 ቃስ፥ “ሀይስ አይሁደ ካዋ የሱሳ” ግያ ሞቶ ፁፍያ እያ ሁጰ ሶን ዎꬅዶሶና።
MAT 27:38 የሱሳራ ሄ ዎደ ናምኡ ፓንጋታ እሱዋ እያፐ ኡሻቻ ባጋን፥ ሀንኩዋ እያፐ ሀድርሳ ባጋራ፥ ማስቃልያ ቦላ ካቅዶሶና።
MAT 27:39 ኦግያራ አꬍያ አሳይ የሱሳ ቦርድ፥ እያ ቦላ ጩትሸ፥
MAT 27:40 “ፆሳ ኬꬃ ላላዳ ሄꬑ ጋላሳ ግዶን ኬፀይሶ፥ ነና አሻ። ኔኒ ፆሳ ናአ ግድኮ፥ አነ ማስቃልያ ቦላፈ ዎꬋ” ያግዶሶና።
MAT 27:41 ሄሳዳካ፥ ካህነ ሀላቃት፥ ህገ አስታማረትነ ቢታ ጭማት እስፈ የሱሳ ቦላ ቀልቅስዶሶና። ሀይሳዳ ያግዶሶና፦
MAT 27:42 “ሀራታ አሽስ፥ ሽን ባና አሻናዉ ዳንዳእቤና። እ እስራኤለ ካዎ ግድኮ፥ አነ ማስቃልያ ቦላፈ ሀእ ዎꬎ፥ ኑካ እያ አማናና።
MAT 27:43 ፆሳን እ አማነቴስ፥ ፆሳይ እያ አሻናዉ ኮይኮ አነ አሾ። አይስ ጊኮ፥ እ ባና፥ ‘ታኒ ፆሳ ናአ’ ጌስ” ያግዶሶና።
MAT 27:44 ቃስ ሀር አቶሽን፥ እያራ ማስቃልያ ቦላ ካቀትዳ ፓንጋትካ ሄሳዳ ግድ እያ ቦላ ቀልቅስዶሶና።
MAT 27:45 ኡሱፑን ሳተፐ ብድ፥ ኡዱፉን ሳተ ጋካናዉ ቢታ ኡባይ ꬉምስ።
MAT 27:46 ኡዱፉን ሳተ ግድያ ዎደ የሱሲ፥ “ኤሎሄ፥ ኤሎሄ፥ ላማ ሳባቅታኒ?” ግድ ግታ ዋሶ ዋስስ። “ኤሎሄ፥ ኤሎሄ፥ ላማ ሳባቅታኒ?” ገይሳ ብርሸꬃይ “ታ ፆሳዉ፥ ታ ፆሳዉ፥ ታና አይስ አጋዲ?” ጉሱ።
MAT 27:47 ሄሳን ኤቅዳ አሳፐ እሶት እሶት ሄሳ ስእድ፥ “ሀ ኡራይ ኤልያሳ ፄጌስ” ያግዶሶና።
MAT 27:48 ኢራ ኤንታፈ እሶይ ዎፅ ብድ፥ እስፖንጀ ኤክድ፥ ጫላ ዎይነ ኡሻ ኩንꬅስ። ሄሳ ማይረ ፃምአ ፄራን ዎꬅድ ኡሻናዉ እያ ዶናኮ ሺሽስ።
MAT 27:49 ሽን ሀንኮት፥ “ናጋ፥ ኤልያስ እያ አሻናዉ ያነኮ አነ በኦስ” ያግዶሶና።
MAT 27:50 የሱሲ ናምአንꬆ ግታ ዋሶ ዋስድ፥ ሀይቅ አግስ።
MAT 27:51 ሄ ሳተን ፆሳ ኬꬃን ካቀትዳ ማጋራጆይ ቆሞፈ ዱገ ጋካናዉ ናምኡ ከይድ፥ ፔት ዎꬍስ። ቢታይ ቃፅስ፥ ዛላይካ ጳልቀትስ።
MAT 27:52 ዱፎት ዶየትን ፆሳ አሳታፐ ዳሮት ሀይቆፐ ደንድዶሶና።
MAT 27:53 ኤንቲ ዱፎፐ ከይድ፥ የሱሲ ሀይቆፐ ደንድዳፐ ጉየ፥ ጌሻ ካታማ ብዶሶና፤ ያን ኤንቲ ዳሮ አሳስ በንትዶሶና።
MAT 27:54 ማቶ ሀላቃይነ እያራ የሱሳ ናግያ ዎታዳረት ቢታይ ቃፅዳይሳነ ሄሳን ሀንዳባ በእዳ ዎደ ዳሮ ያይድ “ቱማ ሀይስ ፆሳ ናኣ” ያግዶሶና።
MAT 27:55 ሄሳን ዳሮ ማጫሳት፥ ጋልላፐ ዶምድ የሱሳ ሀጋዝሸ ካልዳይሳት ሃሆን ኤቅድ ፄሎሶና።
MAT 27:56 ኤንታ ግዶን ማግደላ ማይራማ፥ ያይቆባነ ዮሰፋ አይያ ማይራማነ ዛብድዮሳ ማችያ ደኦሶና።
MAT 27:57 ሳአይ ኦማርስያ ዎደ ዮሰፋ ጌተትያ እስ ዱረ አደይ፥ አርማተ ካታማፐ ይስ። እ ባ ሁጰንካ የሱሳ ካልያ አስ።
MAT 27:58 ዮሰፍ ጵላፆሳኮ ብድ፥ የሱሳ አሀ ኤካናዉ ዎስስ። ጵላፆስ አሀይ ዮሰፋስ እመታና መላ ኪትስ።
MAT 27:59 የሱሳ አሀ ኤክድ፥ ጌሻ ሞጎ አፍላን ፃፅስ።
MAT 27:60 ባዉ ሞገታናዉ ሹቻፈ ዎጭዳ ኦራꬃ ጎንጎሎን እያ አሀ ዎꬅስ። ቃስ ሄ ጎንጎሉዋ ዶናን ግታ ሹቻ ጎንዶርስ ዎꬅድ፥ አግድ ብስ።
MAT 27:61 ማግደላ ማይራማነ ሀንኮ ማይራማ ሄ ጎንጎሉዋኮ ስሚድ ኡትዶሶና።
MAT 27:62 ዎንተ ሳምባታ ጋላስ፥ ካህነ ሀላቃትነ ፋርሳወት ጵላፆሳኮ ይድ፥ ሀይሳዳ ያግዶሶና፦
MAT 27:63 “ጎዳዉ፥ ሀ ዎርዳንቾይ ፓፃ ደእሸ፥ ‘ታኒ ሄꬑ ጋላሳፐ ጉየ፥ ሀይቆፐ ደንዳና’ ያግዳይስ ኑስ ሀሳየትስ።
MAT 27:64 ሄሳ ግሾ፥ እ ሞገትዳ ጎንጎሉዋ ሄꬑ ጋላስ ጋካናዉ፥ ምንꬅ ናጋና መላ ኪታርክ። ሄስ ሀኖና እፅኮ፥ እያ ታማረት ብድ እያ አሀ ካይስ ꬋይስድ፥ ‘ሀይቆፐ ደንድስ’ ያግድ አሳስ ኦድኮ ናምአንꬆ ባለሶይ ኮይሮይሳፈ ኡባ ሃ ኢታና” ያግዶሶና።
MAT 27:65 ጵላፆስ ኤንታኮ፥ “ህንተዉ ናገይሳት ደኦሶና፤ ብድ ህንተዉ ዳንዳኤትዳ መላ ናግስተ” ያግስ።
MAT 27:66 ሄሳ ግሾ፥ ኤንቲ ብድ ዱፎይ ቦሸቶና መላ ሹቻ ቦላ ማታመ ዎꬅድ ዎታዳረታን ናግስዶሶና።
MAT 28:1 ሳምባት አꬍን፥ ዎጋ ዎደ ዎንታ ጉራ፥ ማግደላ ማይራማነ ሀንኮ ማይራማ የሱሲ ሞገትዳ ጎንጎሉዋ በአናዉ ብዶሶና።
MAT 28:2 ቆፖና ዎልቃማ ቢታ ቃፆይ ሀንስ። ጎዳ ኪታንቾይ ሳሎፐ ዎꬍድ ዱፉዋ ዶናን ደእያ ሹቻ ጎንዶርስድ እያ ቦላ ኡትስ።
MAT 28:3 እያ ማላይ ዎልአንꬅ ዳኔስ። እያ ማኦይካ ሻቻዳ ቦꬅ።
MAT 28:4 ናገይሳት ኪታንቹዋ በእድ፥ ያሻን ኮኮርድ፥ ሀይቅዳ አሳዳ ሀንዶሶና።
MAT 28:5 ኪታንቾይ ማጫሳታኮ፥ “ህንተ ማስቃልያ ቦላ ካቀትዳ የሱሳ ኮየይሳ ታኒ ኤርያ ግሾ፥ ያዮፍተ።
MAT 28:6 እ ካሰ ኦድዳይሳ መላ ሀይቆፐ ደንድስ፤ ሀይሳን ዴና። ሃ ይድ እያ ዝንእስዳ በሳ በእተ።
MAT 28:7 ህንተ ሀእ ኤለስ ብድ፥ እያ ታማረታስ፥ ‘የሱሲ ሀይቆፐ ደንድስ። ቃስ እ ህንተፈ ስንꬃትድ ጋልላ ባና፤ ህንተ እያ ያን በአና’ ያግድ ኦድተ። ታኒ ህንተዉ ሀይሳ ኦዳናዉ ያስ” ያግስ።
MAT 28:8 ኤንቲ ያይሸነ ዳሮ ኡፋይትሸ፥ ዱፉዋ ማታፐ ኤለስድ ብድ፥ እያ ታማረታስ ኦዳናዉ ዎፅዶሶና።
MAT 28:9 ቆፖና የሱሲ ኤንታራ ጋሄትድ ኤንታኮ፥ “ሳሮይ ህንተዉ ግዶ” ያግስ። ኤንቲ እያኮ ሺቅድ፥ እያ ቶሁዋ ኦይክድ እያዉ ጎይንዶሶና።
MAT 28:10 ሄ ዎደ የሱሲ ኤንታኮ፥ “ያዮፍተ፤ ብድ ታ ታማረት ጋልላ ባና መላ ኤንታዉ ኦድተ። ኤንቲ ያን ታና በአና” ያግስ።
MAT 28:11 ሄ ማጫሳት ብሽን፥ ዱፉዋ ናግያ ዎታዳረታፐ ባጋት ካታማ ብድ፥ ሀንዳባ ኡባ ካህነ ሀላቃታስ ኦድዶሶና።
MAT 28:12 ካህነ ሀላቃትነ ጭማት ሺቅድ ዞረትድ፥ ዎታዳረታስ ዳሮ ሚሸ እምድ፥
MAT 28:13 “ ‘ኑኒ ꬍስክዳሽን እያ ታማረት ቃማ ይድ፥ እያ አሀ ካይስዶሶና’ ያግተ።
MAT 28:14 ሀ ኦዳ ደርያ ሃረይስ ስእኮ፥ ሄስ ህንተ ባላ ግዶናይሳ ኑኒ እያ ኦድ አማንꬃና። ህንተና አይብካ ህርግሶፖ” ያግዶሶና።
MAT 28:15 ዎታዳረት ሚሽያ ኤክድ፥ ኪተትዳይሳዳ ኦꬅዶሶና። ሀ ኦዳይ አይሁደ ማታን ሀች ጋካናዉ ኦደትሸ ደኤስ።
MAT 28:16 ታማነ እስ እያ ታማረት የሱሲ ባንታና ቢተ ግዳ ጋልላ ዙማ ቦላ ከይዶሶና።
MAT 28:17 ያን ኤንቲ እያ በእዳ ዎደ እያዉ ጎይንዶሶና፥ ሽን ኤንታፈ እሶት እሶት ስꬍዶሶና።
MAT 28:18 የሱሲ ኤንታኮ ሺቅድ፥ “ሳሎንነ ሳአን ማት ኡባይ ታዉ እመትስ።
MAT 28:19 ህዛ፥ ህንተ ኡባ በሲ ብድ፥ አዋ፥ ናኣ፥ ጌሻ አያና ሱንꬃን አሰ ኡባ ፃማቅድ ታና ካለይሳታ ኦꬅተ።
MAT 28:20 ታኒ ህንተና ኪትዳባ ኡባ ኤንቲ ናጋና መላ ኤንታ ታማርስተ። ታኒ ዎድያ ዉርሰꬃ ጋካናዉ ኡባ ዎደ ህንተራ ደአይስ” ያግስ።
MAR 1:1 ሀይስ ፆሳ ናአ የሱስ ክርስቶሳ ዎንገላ ዶመꬅ።
MAR 1:2 ናብያ እሳያስ ፃፍዳ ማፃፋን ፆሳይ፥ “ሄኮ፥ ታኒ ታ ኪታንቹዋ ታኒ ኔፐ ስን የዳና። እ ነ ኦግያ ጊግሳና።
MAR 1:3 እሶይ መላ ቢታን ባ ቃላ ꬎቁ ኦꬅድ፥ ‘ጎዳ ኦግያ ጊግስተ፤ እ ሄመታና ሆሮጋ እያዉ ሱርስተ ግስ’ ” ያጌስ።
MAR 1:4 ፃማቅያ ዮሃንስ አሳ ፃማቅሸ፥ “ህንተ ናጋራፐ ስሚድ ፃማቀትተ፤ ፆሳይ ህንተ ናጋራ አቶ ጋና” ያግድ ቃላ ኦድሸ መላ ቢታፈ ይስ።
MAR 1:5 ይሁዳ ቢታን ደእያ አሳ ኡባይነ የሩሳላመ ካታማ አሳ ኡባይ ዮሃንሳኮ ዮሶና። ባንታ ናጋራ ፓፅን፥ ዮሃንስ ኤንታ ዮርዳኖሰ ሻፋን ፃማቄስ።
MAR 1:6 ዮሃንስ ግማለ እክሰፐ ዳደትዳ አፍላ ማኤስ። ባ ፄሳን ዳፎ ዳንጬስ፤ ቃስ ቦለነ ደገራ ኤስ ሜስ።
MAR 1:7 ዮሃንስ ቃላ ኦድሸ፥ “ታፐ ጉየራ ዳሮ ምነይስ ዬስ። ሀር አቶሽን፥ ታኒ እያ ጫማ ዎዶሩዋ ሆካዳ ብላናዉ በስከ።
MAR 1:8 ታኒ ህንተና ሃꬃን ፃማቃይስ፥ ሽን እ ህንተና ጌሻ አያናን ፃማቃና” ያግስ።
MAR 1:9 የሱሲ ሄ ዎደ ጋልላ ቢታን ደእያ ናዝረተ ካታማፐ ይን፥ ዮሃንስ ዮርዳኖሰ ሻፋን እያ ፃማቅስ።
MAR 1:10 የሱሲ ሃꬃፈ ከይያ ዎደ ሳሎይ ዶየትን፥ ጌሻ አያናይ ባ ቦላ ሆለዳ ዎꬍሽን በእስ።
MAR 1:11 ቃስ ሳሎፐ፥ “ታኒ ዶስያ ታ ናአይ ነና፤ ታ ነናን ኡፋይታይስ” ግያ ቃላይ ይስ።
MAR 1:12 ኢራ ጌሻ አያናይ የሱሳ መላ ቢታ ኤፍስ።
MAR 1:13 የሱሲ መላ ቢታን ፃላሄን ፓጨትሸ ኦይታሙ ጋላስ ጋምእስ። ዶአታራ ደእስ፥ ሽን ኪታንቾት ይድ እያ ማድዶሶና።
MAR 1:14 ዮሃንስ ቃሸትዳፐ ጉየ፥ የሱሲ ፆሳ ካዎተꬃ ዎንገላ ኦድሸ ጋልላ ቢታ ብስ።
MAR 1:15 ያን፥ “ዎደይ ጋክስ፤ ፆሳ ካዎተꬃይ ማታትስ። ህንተ ናጋራፐ ስሚድ፥ ዎንገላን አማንተ” ያግስ።
MAR 1:16 የሱሲ ጋልላ አባ ማታራ አꬍሸ፥ ሞሎ ኦይክያ፥ ስሞናነ እያ እሻ እንድርያሳ፥ ባንታ ግትያ አባን የገይሳታ በእስ።
MAR 1:17 ኤንታኮ፥ “ታና ካልተ፤ ታኒ ህንተና አሰ ኦይꬁ ታማርሳና” ያግስ።
MAR 1:18 ኤንቲ ኤለስድ ባንታ ግትያ የግ አግድ የሱሳ ካልዶሶና።
MAR 1:19 የሱሲ ጉꬅ ስን ብድ፥ ናምኡ እሻታ ዛብድዮሳ ናይታ፥ ያይቆባነ ዮሃንሳ ዎጎሉዋ ግዶን ባንታ ግትያ ጊግሰይሳታ በእስ።
MAR 1:20 እ ኤንታ በእዳ መላ ፄግስ። ኤንቲ ባንታ አዋ ዛብድዮሳ፥ እያ ኦሳንቾታራ ዎጎሉዋ ግዶን የግ አግድ የሱሳ ካልድ ብዶሶና።
MAR 1:21 ኤንቲ ቅፍርናሆማ ካታማ ገልዶሶና። ሳምባት ገልዳ መላ የሱሲ ኤለስድ አይሁደ ዎሳ ኬꬅ ገልድ ታማርሶ ኦይክስ።
MAR 1:22 ማታራ ደእያ አሳዳ ታማርሰስፐ አትሽን፥ ህገ አስታማረታꬆ ታማርሶና ግሾ፥ አሳይ እያ ትምርትያን ማላለትዶሶና።
MAR 1:23 ሄ ዎደ ቱና አያናይ ኦይክዳ እስ ኡራይ አይሁደ ዎሳ ኬꬅ ገልድ ባ ቃላ ꬎቁ ኦꬅድ፥
MAR 1:24 “ናዝረተ የሱሳ፥ ኔኒ ኑፐ አይ ኮያይ? ኑና ꬋይሳናዉ ያዲ? ኔኒ ኦነኮ ታ ኤራይስ፤ ኔኒ ፆሳ ጌሻ ግድኪ?” ያግስ።
MAR 1:25 የሱሲ ሄ ቱና አያና፥ “ሀይዛ፥ ሀ አድያፈ ከያ” ግድ ኪትስ።
MAR 1:26 ቱና አያናይ ኡራ ዳፈረꬅድ፥ ዋስድ እያፐ ከይስ።
MAR 1:27 አሳ ኡባይ ማላለትድ፥ “ሀይስ አይቤ? ሀ ኡራይ ባ ማታን ሀር አቶሽን ቱና አያናታካ ኪቴስ። ኤንቲ እያዉ ኪተቶሶና፤ ሀይስ አይብ ኦራꬃ ትምርቴ?” ግድ፥ ባንታ ግዶን እሶይ እሱዋ ኦይችዶሶና።
MAR 1:28 የሱሳ ሱንꬃይ ኤለስድ ጋልላ ቢታን ደእያ ሄራ ኡባን ከይስ።
MAR 1:29 የሱሲ አይሁደ ዎሳ ኬꬃፈ ከይድ፥ ያይቆባራነ ዮሃንሳራ ስሞና ሶነ እንድርያሳ ሶ ብስ።
MAR 1:30 ስሞና ማቸ አይያ ቆፆ ምሻ ሀርጋዳ ዝንእዳሮ የሱሲ ያ ጋክያ ዎደ እያዉ ኦድዶሶና።
MAR 1:31 እ ኢኮ ሺቅድ፥ እ ኩሽያ ኦይክድ፥ እዮ ደንꬅድ ኤስስ። ቆፆይነ ምሻይ አግን እያ ኤንታ ሞካሱ።
MAR 1:32 ሀርግዳ አሳ ኡባነ ቱና አያናት ኦይክዳ አሳ ኡባ ኦማርስ አዋይ ዉልዳፐ ጉየ፥ እያኮ ኤህዶሶና።
MAR 1:33 ካታማን ደእያ አሳ ኡባይ ሄ ኬꬃ ካረ ሺቅዶሶና።
MAR 1:34 የሱሲ ዱማ ዱማ ሀርገን ኦይከትዳ ዳሮ አሳ ፓꬅድ፥ ዳሮ ቱና አያናታ ከስስ። እ ኦነኮ ቱና አያናት ኤርዳ ግሾ፥ ኤንታ ኦድሶና ድግስ።
MAR 1:35 የሱሲ ዎንታ ጉራ ደንድድ፥ አስ ባይና በሲ ብድ፥ ያን ፆሳ ዎስስ።
MAR 1:36 ስሞንነ እያራ ደኤይሳት እያ ኮይሸ ብዶሶና።
MAR 1:37 ኤንቲ እያ ደምድ፥ “አሳ ኡባይ ነና ኮዬስ” ያግዶሶና።
MAR 1:38 የሱሲ ቃስ ኤንታ፥ “ሄ ሄራን ደእያ ሀራ ካታማታ የꬍተ። ታኒ ይዳይ ዎንገላ ኦዳናዉ ግድያ ግሾ ያንካ ቃላ ኦዳናዉ በሴስ” ያግስ።
MAR 1:39 አይሁደ ዎሳ ኬꬃታን ቃላ ኦድሸነ ቱና አያናታ ከስሸ፥ ጋልላ ቢታ ኡባን ዩይስ።
MAR 1:40 ባሮይ ኦይክዳ እስ ኡራይ የሱሳኮ ይድ፥ እያ ስንꬃን ጉልባትድ፥ “ኔኒ ኮይኮ ታና ጌሻናዉ ዳንዳኣሳ” ያግድ ዎስስ።
MAR 1:41 የሱሲ እያዉ ቃትድ፥ ባ ኩሽያ የድድ እያ ቦችድ፥ “ታኒ ኮያይስ፥ ጌይያ” ያግስ።
MAR 1:42 ኤለስድ ባሮይ ኡራ የድን ኡራይ ፓፅስ።
MAR 1:43 የሱሲ ኡራ ምንꬅ ናግስድ ከስ የድስ።
MAR 1:44 የሱሲ እያ፥ “ነና ኤራ፥ ሀይሳ ኦደስካ ኦዶፓ። ሽን ባዳ ነ አሳተꬃ ካህነ በሳ። ኔኒ ሀእ ጌሽ ግድዳይሳ አሳ ኤርሳናዉ፥ ሙሰይ ኪትዳ ያርሹዋ ያርሻ” ያግስ።
MAR 1:45 ሽን ኡራይ ብድ፥ ጉታ ኡባን አሳ ኡባስ ኦድስ። ሄሳ ግሾ፥ የሱሲ ቆንጨ ከይድ፥ ካታማ ገላናዉ ዳንዳእቤና። ሽን አስ ባይና በሳን ጋፃን ደእስ፤ ቃስ አሳይ ኡባ በሳፈ እያኮ ዮሶና።
MAR 2:1 ጉꬃ ጋላሳፐ ጉየ፥ የሱሲ ቅፍርናሆማ ስሚድ፥ ሶን ደኤስ ግያ ኦዳይ ስኤትስ።
MAR 2:2 አሳ ኬꬃይ ኤኮና እፅን፥ ሀር አቶሽን ካረይካ ፁማና ጋካናዉ ዳሮ አሳይ ሺቅን፥ የሱሲ ቃላ ታማርስስ።
MAR 2:3 ኦይዱ አሳት እስ ጉንዳ ኡራ ቶክድ እያኮ ኤህዶሶና።
MAR 2:4 አሳይ ዳርዳ ግሾ፥ ኡራ የሱሳኮ ሺሻናዉ ኤንታዉ ዳንዳኤቶና እፅን፥ የሱሲ ደእያ ግናራ ኬꬃ ቃርድ፥ ካራ ቃዉፅድ ኡራ እ ዝንእዳ አልጋራ ዱገ የድድ የሱሳ ስንꬃን ዎꬍስዶሶና።
MAR 2:5 የሱሲ ኤንታ አማኑዋ በእድ፥ ሄ ጉንዳ ኡራ፥ “ታ ናአዉ፥ ነ ናጋራይ አቶ ጌተትስ” ያግስ።
MAR 2:6 ህገ አስታማረታፐ ሄ በሳን ኡትዳ እሶት እሶት ባንታ ዎዛናን፥
MAR 2:7 “ላ ሀ ኡራይ ሀይሳ መላ ኢታባ ፆሳ ቦላ አይስ ኦዴቲ? ፆሳ ፃላላፐ አትሽን፥ ሀር ኦን ናጋራ አቶ ጋናዉ ዳንዳኢ?” ግድ ቆፕዶሶና።
MAR 2:8 ኤንቲ ባንታ ዎዛናን ሄሳዳ ቆፕዳይሳ የሱሲ ኤለስድ ባ አያናን ኤርድ፥ ኤንታኮ፥ “ህንተ ህንተ ዎዛናን አይስ ሄሳዳ ቆፔቲ?
MAR 2:9 ጉንዳ ኡራ፥ ‘ነ ናጋራይ አቶ ጌተትስ’ ገይስ ማተዬ? ዎይኮ፥ ‘ደንዳ ኤቃዳ ነ አልጋ ቶካዳ ባ’ ገይስ ማቴ?
MAR 2:10 ሽን ታዉ፥ አሳ ናኣስ፥ ሳአ ቦላ ናጋራ አቶ ጋናዉ ማት ደኤይሳ ህንተ ኤራና መላ” ግድ ሄ ጉንዳ ኡራኮ፥
MAR 2:11 “ነና ጋይስ፥ ደንዳ ኤቃዳ ነ አልጋ ቶካዳ ነ ሶ ባ” ያግስ።
MAR 2:12 ኡራይ ኤለስ ደንድ ኤቅድ፥ ባ አልጋ ቶክድ አሳ ኡባይ በእሽን ብስ። አሳ ኡባይ ማላለትድ፥ “ኑኒ ሀይሳ መላ ማላልስያባ በእ ኤሮኮ” ያግድ ፆሳ ጋላትዶሶና።
MAR 2:13 የሱሲ ቃስ ጋልላ አባ ዶና ስም ብድ፥ ባኮ ይዳ አሳ ኡባ ታማርስስ።
MAR 2:14 ያራ አꬍሸ፥ እልፍዮሳ ናኣ ሌወ ጌተተይስ ቃራፃ ቃንፅስያ በሳን ኡትዳይሳ በእድ፥ “ታና ካላ” ያግስ። ሌወይ ደንድ ኤቅድ እያ ካልስ።
MAR 2:15 የሱሲ ካꬅ ማናዉ ሌወ ሶን ኡትስ። እያ ካልያ አሳይ ዳሮ ግድያ ግሾ፥ ቃራፃ ቃንፅስያ ዳሮ አሳይነ ናጋራንቾት እያራነ እያ ታማረታራ እስፈ ኡትዶሶና።
MAR 2:16 ህገ አስታማረ ግድዳ እስ እስ ፋርሳወት የሱሲ ናጋራንቾታራነ ቃራፃ ቃንፅሰይሳታራ ካꬅ ምሽን በእድ፥ “እ አይስ ናጋራንቾታራነ ቃራፃ ቃንፅሰይሳታራ ካꬅ ሚ?” ያግድ፥ እያ ታማረታ ኦይችዶሶና።
MAR 2:17 የሱሲ ኤንቲ ገይሳ ስእድ፥ “ሀርጋንቾታፐ አትሽን፥ ፓፃታስ አክመ ኮሸና። ታኒ ናጋራንቾታ ፄጋናዉ ያስፐ አትሽን፥ ፅሎታ ፄጋናዉ ያቢከ” ያግድ ኤንታዉ ዛርስ።
MAR 2:18 ፃማቅያ ዮሃንሳ ታማረትነ ፋርሳወት ፆሞሶና። እስ እስ አሳት የሱሳኮ ይድ፥ “ዮሃንሳ ታማረትነ ፋርሳወታ ታማረት ፆሞሶና፥ ሽን ነ ታማረት አይስ ፆሞኮና?” ያግዶሶና።
MAR 2:19 የሱሲ ኤንታኮ፥ “ያጋኑዋ ይዳ አሳት ማችዉ ኤከይስ ኤንታራ ደእሽን፥ ፆማናዉ ዳንዳኦና? ማችዉ ኤከይስ ኤንታራ ደእሽን፥ ፆማናዉ ዳንዳኦኮና።
MAR 2:20 ሽን ማችዉ ኤከይስ ኤንታ ማታፐ ኤከታና ዎደይ ያና፥ ኤንቲ ሄ ዎደ ፆማና።
MAR 2:21 “ጋልአ ማኦ ቦላ ኦራꬃ ጫርቀ ዎꬅድ ስክያ አስ ባዋ። ዎꬅድ ስክኮ፥ ኦራꬃይ ጬጋ ማኡዋ ዳኬስ፤ ዳከꬃይካ ካሰይሳፈ ዳሬስ።
MAR 2:22 ቃስ ማልአንቶ ዎይነ ጬጋ ኦጎሮን ቆልያ አስ ባዋ። ሽን ቆልኮ፥ ሄ ዎይነይ ኦጎሩዋ ዳኬስ፥ ባዉካ ጉኬስ፥ ኦጎሮይካ ኢቴስ። ሽን ማልአንቶ ዎይነይ ኦራꬃ ኦጎሮን ቆለቴስ” ያግስ።
MAR 2:23 የሱሲ እስ ሳምባታ ጋላስ ባንጋ ጋደ ግዶራ አꬍሽን፥ እያ ታማረት እያራ ብሸ ባንጋ ትያ ሽርክድ ሞሶና።
MAR 2:24 ፋርሳወት የሱሳኮ፥ “ሄኮ፥ ነ ታማረት ሳምባታ ጋላስ ዎጋ ግዶናባ አይስ ኦꬆና?” ያግዶሶና።
MAR 2:25 የሱሲ ኤንታኮ፥ “ዳዊቲ ኮሻትድ፥ ምያባ ኮይዳ ዎደ፥ ባራ ደኤይሳታራ ኦꬅዳይሳ ናባብበከቲ?
MAR 2:26 አብያታር ካህነ ሀላቃ ግድድ ደእያ ዎደ ዳዊቲ ፆሳ ኬꬅ ገልድ፥ ካህነታ ፃላል ማናፐ አትሽን፥ ኦንካ ማናዉ ዎጋ ግዶናይሳ ጎዳ ስንꬃን ዎꬅዳ ዳቡዋ ምስ፥ ባራ ደኤይስታስካ እሚስ” ያግስ።
MAR 2:27 ቃስካ የሱሲ ኤንታኮ፥ “ሳምባት አሳ ናአ ጎአስ መትስፐ አትሽን፥ አስ ሳምባታስ መትቤና።
MAR 2:28 ሄሳ ግሾ፥ አሳ ናአይ፥ ሀር አቶሽን ሳምባታስካ ጎዳ” ያግስ።
MAR 3:1 የሱሲ አይሁደ ዎሳ ኬꬅ ስም ገልስ። ያን ኩሸይ ጉንድዳ እስ ኡራይ ደኤስ።
MAR 3:2 እስ እስ አሳይ የሱሳ ሞታናዉ ኮይድ፥ ኩሸይ ጉንድዳ ኡራ ሳምባታ ጋላስ እ ፓꬅኮነ አግኮ በአናዉ ኮይድ ምንꬅድ ናጎሶና።
MAR 3:3 የሱሲ ኩሸይ ጉንድዳ ኡራ፥ “ደንዳ ኤቃዳ ሃ ስን ያ” ያግስ።
MAR 3:4 ሄሳፈ ጉየ፥ አሳኮ፥ “ሳምባታ ጋላስ ሎኦባ ኦይስ ዎገየ ኢታባ ኦይስ ዎጌ? አሳ ሸምፖ አሾየ ዎይኮ ዎꬎ?” ያግድ ኦይችስ። ሽን አሳይ ስእ ግስ።
MAR 3:5 የሱሲ ሀንቀትድ፥ ኤንታ ዩሽ አꬅ ፄልድ፥ ኤንቲ ኦድን ስኦናይሳታ ግድያ ግሾ፥ ኤንታ ቦላ ዳሮ አዛንስ። ሄ አድያኮ፥ “ነ ኩሽያ ፕድ ኦꬃ” ያግስ። ኡራይ ፕድ ኦꬅን እያ ኩሸይ ፓፅስ።
MAR 3:6 ኤለስድ ፋርሳወት አይሁደ ዎሳ ኬꬃፈ ካረ ከይድ፥ የሱሳ ዋት ዎꬋነኮ ማቀታናዉ ሄሮዲሳ ባጋታራ እስ ሶ ሺቅዶሶና።
MAR 3:7 የሱሲ ባ ታማረታራ ጋልላ አባኮ ብስ። ጋልላፐነ ይሁዳፐ ይዳ ዳሮ አሳይ እያ ካልዶሶና።
MAR 3:8 ቃስካ የሩሳላመፐ፥ ኤዶምያሳፐ፥ ዮርዳኖሰ ሻፋ ፕንꬃፈ፥ ፅሮሳ ካታማፐነ ስዶና ካታማፐ የሱሲ ኦꬅዳባ ስእድ፥ ዳሮ አሳይ እያኮ ይዶሶና።
MAR 3:9 አሳ ዳሮተꬃፈ ደንዶይሳን እያ ኡንኤꬆና መላ እያ ታማረት ዎጎሎ እያዉ ጊግሳና መላ ኪትስ።
MAR 3:10 ዳሮ አሳ እ ፓꬅዳ ግሾ፥ ሀርግያ አሳ ኡባይ እያ ቦቻናዉ ሱገቶሶና።
MAR 3:11 ቱና አያናይ ኦይክዳ አሳት እያ በእዳ ዎደ እያ ስንꬃን ኩንድድ፥ ባንታ ቃላ ꬎቁ ኦꬅድ፥ “ኔኒ ፆሳ ናኣ ግድኪ?” ያጎሶና።
MAR 3:12 ሄ ቱና አያናት እያ ኦናተꬃ ኦደስካ ቆንጭሶና መላ ኤንታዉ ምንꬅድ ኦድስ።
MAR 3:13 የሱሲ ደርያ ቦላ ከይድ፥ ባ ኮይዳ አሳታ ባኮ ፄግስ፤ ኤንትካ እያኮ ብዶሶና።
MAR 3:14 ኤንቲ ባራ ዳና መላነ ቃላ ታማርሳና መላ ታማነ ናምአታ ዶርድ፥ ኤንታ፥ “ሀዋረታ” ግድ ሱንꬅስ።
MAR 3:15 ቱና አያናታካ ከሳና መላ ኤንታዉ ማታ እሚስ።
MAR 3:16 እ ዶርዳ ታማነ ናምአት ሀይሳታ፦ ጰፅሮሳ ያግድ ሱንꬅዳ ስሞና፥
MAR 3:17 ቦአነርገስ (ዳዳ ናይታ) ያግድ ሱንꬅዳይሳታ፥ ዛብድዮሳ ናይታ ያይቆባነ ያይቆባ እሻ ዮሃንሳ፥
MAR 3:18 እንድርያሳ፥ ፍልጶሳ፥ ባርተለሞሳ፥ ማቶሳ፥ ቶማሳ፥ እልፍዮሳ ናአ ያይቆባ፥ ታድዮሳ፥ ባ ቢታስ ምሸትያ ስሞናነ፥
MAR 3:19 የሱሳ አꬅድ እምዳ አስቆሮታ ይሁዳ።
MAR 3:20 ሄሳፈ ጉየ፥ የሱሲ ሶ ብስ። ቃስ ዳሮ አሳይ ሺቅን፥ እነ እያ ታማረት ሀር አቶሽን ካꬅ ማናዉካ ዳንዳእቦኮና።
MAR 3:21 አሳይ እያ፥ “ጎዬስ” ግያ ግሾ፥ እያ ዳቦት ሄሳ ስእድ እያ ኤካናዉ ብዶሶና።
MAR 3:22 ህገ አስታማረታፐ እሶት እሶት የሩሳላመፐ ይድ፥ “እያ ቦላ ብኤል-ዘቡል ደኤስ”፥ እ፥ “ፃላሄይ ዎልቃን ቱና አያናታ ከሴስ” ያግድ ኦደትዶሶና።
MAR 3:23 የሱሲ አሳ ባኮ ፄግድ ሌምሶ ኦድስ። “ፃላሄይ ፃላሄ ዋት ከሳናዉ ዳንዳኢ?
MAR 3:24 እስ ካዎተꬃይ ባ ግዶን ሻከትኮ ሄ ካዎተꬃይ ኤቃናዉ ዳንዳኤና።
MAR 3:25 ሄሳዳካ፥ እስ ኬꬃ አሳይ ባንታ ግዶን ሻከትኮ ꬋያናፐ አትሽን፥ ዳናዉ ዳንዳኦኮና።
MAR 3:26 ህዛ፥ ፃላሄይ ባራ ካጨትድ ሻከትኮ ꬋዮፐ አትሽን፥ ዳናዉ ዳንዳኤና።
MAR 3:27 “ሽን ኮይሮትድ ዎልቃማ ኡራ ቃቾና ደእሸ እያ ኬꬃ ገልድ፥ እያ ሚሽያ ቦንቃናዉ ዳንዳእያ አስ ባዋ። ቃች ስሚድ እያ ኬꬃ ቦንቃናዉ ዳንዳኤስ።
MAR 3:28 “ታኒ ህንተዉ ቱማ ኦዳይስ፤ ፆሳይ አሳ ናይታስ ናጋራ ኡባነ ኤንቲ ጫይያ ጫሸ ኡባ አቶ ጋና።
MAR 3:29 ሽን ጌሻ አያና ቦላ ኢታባ ኦደትያ ኦደስካ መርና ናጋራ ግዳናፐ አትሽን፥ ፆሳይ ኡባራካ እያ ማረና” ያግስ።
MAR 3:30 የሱሲ ሄሳ ግዳይ፥ እስ እስ አሳት፥ “እያ ቦላ ቱና አያናይ ደኤስ” ያግዳ ግሾሳ።
MAR 3:31 እያ አያነ እያ እሻት ይድ ካረን ኤቅድ፥ እያኮ አሰ ኪትድ እያ ፄግዶሶና።
MAR 3:32 እያ ማታን ኡትዳ ዳሮ አሳት፥ “ሄኮ፥ ነ አየራነ ነ እሻታራ ካረን ኤቅድ ነና ኮዮሶና” ያግዶሶና።
MAR 3:33 የሱሲ ዛሪድ፥ “ታ አይያ ኦኔ? ቃስ ታ እሻት ኦናንቴ?” ያግስ።
MAR 3:34 ባ ማታን ኡትዳ አሳ ዩሽ አꬅ ፄልድ፥ “ሄኮ፥ ታ አያነ ታ እሻት ሀይሳታ።
MAR 3:35 ፆሳይ ሸንያ ኦꬅያ ኡባይ ታ እሻ፥ ታ ምቾነ ታ አዮ” ያግስ።
MAR 4:1 የሱሲ ዛሪድ ጋልላ አባ ማታን ታማርሴስ። ዳሮ አሳይ እያ ማታን ዩሹዋን ሺቅን፥ አባን ደእያ ዎጎሉዋ ግዶ ገልድ ኡትስ፥ አሳ ኡባይ አባ ማታን ደኤስ።
MAR 4:2 እ ኤንታ ዳሮባ ሌምሶን ታማርስስ። ታማርስሸ ሀይሳዳ ያግስ፦
MAR 4:3 “ስእተ! እስ ኡራይ ዘረꬅ ዘራናዉ ከይስ።
MAR 4:4 እ ዘርሽን፥ እስ እስ ዘረꬃይ ኦገ ጋፃን ዎꬍስ፤ ካፎት ይድ ምዶሶና።
MAR 4:5 እስ እስ ዘረꬃይ ጋርሳን ሻሎይ ደእያ ቢታ ቦላ ዎꬍስ። ዳሮ ቢት ባይና ግሾ፥ ሄ ዘረꬃይ ኤለስድ ዶልስ።
MAR 4:6 ሽን አው ከይዳ ዎደ ሹልስ። ሎይꬅድ ፃጶ የድቦና ግሾ፥ ኤለስ መልስ።
MAR 4:7 እስ እስ ዘረꬃይ አጉንꬃ ግዶን ዎꬍስ። ዶልዳይሳ አጉንꬃይ ድጭድ ጩልዳ ግሾ አይፈ አይፎና አትስ።
MAR 4:8 እስ እስ ዘረꬃይ አራዳ ቢታን ዎꬍድ ዶልስ። ድጭድ እሶይ ሀስታማ፥ እሶይ ኡሱፑን ታማ እሶይ ፄታ አይፍስ” ያግስ።
MAR 4:9 “ስእያ ሀይꬅ ደእያ ኦንካ ስኦ” ያግስ።
MAR 4:10 የሱሲ ኦድዳይሳ ስእዳ እስ እስ አሳትነ ታማነ ናምኡ ታማረት የሱሲ ባርካ ደእሽን፥ እያኮ ሺቅድ ሄ ሌምሱዋ ብርሸꬃ ኦይችዶሶና።
MAR 4:11 የሱሲ ኤንታኮ ሀይሳዳ ያግስ፦ “ህንተዉ ፆሳ ካዎተꬃ ፁራ ኤሮይ እመትስ። ሽን ሀራታስ ካዎተꬃፈ ካረን ደኤይሳታስ ኡባባይ ሌምሶን ኦደቴስ።
MAR 4:12 ጋሶይካ፥ “ ‘ኤንቲ ፄሎሶና፥ ሽን ደሞኮና። ስኦሶና፥ ሽን አኬኮኮና። ኤንቲ ደምያኮነ አኬክያኮ፥ ፆሳኮ ስማና እካ ኤንታ ማራናሽን’ ” ያግስ።
MAR 4:13 የሱሲ ኤንታኮ፥ “ሀ ሌምሶይ ህንተዉ ገለኔ? ያትን፥ ሌምሶ ኡባ ህንተ ዋት አኬካኔ?
MAR 4:14 ዘረይስ ፆሳ ቃላ ዘሬስ።
MAR 4:15 ቃላይ ዘረትያ ዎደ ኦገ ጋፃን ዎꬍዳይሳት ቃላ ስእዳይሳታ። ሽን ፃላሄይ ኤለስድ፥ ይድ ኤንታ ዎዛናን ዘረትዳ ቃላ ማፅ ድጌስ።
MAR 4:16 ሄሳዳካ፥ ጋርሳን ሻሎይ ደእያ ቢታን ዘረትዳይስ ቃላ ስእድ፥ ኤለስድ ኡፋይሳን ኤከይሳ።
MAR 4:17 ሽን እያዉ ምኖ ፃጶይ ባይና ግሾ ሀእሳፈ አትሽን፥ ጋምኦኮና። ጉꬃ ዎደፐ ጉየ ቃላ ጋሶን ዋየይ ዎይኮ ጎድ ጋክያ ዎደ ኤለስድ ꬉበቶሶና።
MAR 4:18 አጉንꬃ ግዶን ዘረትዳይስ ቃላ ስኤይሳታ።
MAR 4:19 ሽን ሀ ሳአ ደኡዋስ ህርጎይ፥ ዱረተꬃ ዶሶይነ ሀራባ አሞተይስ እያ ዎዛናን ገልድ ቃላ ጩልያ ግሾ አይፈ አይፎና አትስ።
MAR 4:20 ሽን አራዳ ቢታን ዘረትዳይሳት ቃላ ስእድ ኤከይሳታ። ኤንቲ እሶይ ሀስታማ፥ እሶይ ኡሱፑን ታማ እሶይ ፄታ አይፍስ” ያግስ።
MAR 4:21 የሱሲ ጉጅድ፥ “ፆምፐ ኤክድ፥ ዳቾፈ ዎይኮ አልጋፈ ጋርሳን ዎꬅያ አስ ደኢ? ꬎቃ በሳን ዎነዬ?
MAR 4:22 ህዛ፥ ቆሰትዳባይ ኡባይ ቆንጨ ከያና፤ ጌምዳባይ ኡባይ ኤረቶና አተና።
MAR 4:23 ስእያ ሀይꬅ ደእያ ኦንካ ስኦ” ያግስ።
MAR 4:24 ቃስ ኤንታኮ፥ “ህንተ ስእያባ አኬክድ ስእተ! ፆሳ ቃላ ህንተ ስኤይሳ መላ እ ህንተዉ አኬካ እማና። ኡባካ ህንተዉ ዳርስድ እማና።
MAR 4:25 እስባይ ደእያ ኡራስ ጉጅ እመታና፥ ባይናይሳፈ ሀር አቶሽን፥ እያዉ ደእያ ሄ ጉꬅያካ ኤከታና” ያግስ።
MAR 4:26 የሱሲ ዛሪድ፥ “ፆሳ ካዎተꬃይ ባ ጋደን ዘረꬅ ዘርያ አሳ መላ።
MAR 4:27 ሄ ኡራይ ቃማ ꬍስኬስ፤ ዎንታ ደንዴስ። እ ባ ሁጰን ዋንያኮ ኤሮና ደእሽን ሄ ዘረꬃይ ዶሌስነ ድጬስ።
MAR 4:28 ቢታይ ካꬅ ባርካ እሜስ። ኮይሮ ዶልድ ድጬስ፥ ካልድ አይፋናዉ ጋምቡፄስ፥ ዉርሰꬃን ኩመꬃ አይፈ አይፌስ።
MAR 4:29 ሽን ካꬃይ ጋክያ ዎደ ኡራይ ኤለስድ ባጫራ ገል አጌስ” ያግስ።
MAR 4:30 የሱሲ፥ “ኑኒ ፆሳ ካዎተꬃ አይ ዳኔስ ጋኔ? ዎይኮ አይብራ ሌምሳኔ?
MAR 4:31 ፆሳ ካዎተꬃይ አይፈ ጉꬃ ምꬅ ዳኔስ። ሄ ምꬃ አይፍያ ዘርያ ዎደ ሳአን ደእያ ምꬃ አይፈ ኡባፈ ጉፄስ።
MAR 4:32 ዘርን ዶልድ አታክልተ ኡባፈ ግታቴስ፤ ዳሮ ዳሽ ዳዬስ። ካፎት እያ ታሽያ ቦላ ኬፅድ ኡታና ጋካናዉ ዳዬስ” ያግስ።
MAR 4:33 የሱሲ ሀይሳ መላ ዳሮ ሌምሶን አሳይ አኬካናዉ ዳንዳኤይሳ መላ ቃላ ኦድስ።
MAR 4:34 አሳስ ሌምሶይ ባይና ኦደና። ሽን የሱሲ ባ ታማረታ ፃላላራ ደእያ ዎደ፥ ኤንታዉ ኡባባ ብርሽድ ኦድስ።
MAR 4:35 ሄ ጋላስ ሳእ ኦማርስን፥ የሱሲ ባ ታማረታኮ፥ “አባፈ ሄፍንꬅ ፕኖስ” ያግስ።
MAR 4:36 እያ ታማረት ዳሮ አሳ የግ አግድ፥ የሱሲ ካሰ ገል ኡትዳ ዎጎሉዋን ገልድ የሱሳ ባንታራ ኤፍዶሶና። ሀራ ዎጎሎትካ ያን ደኦሶና።
MAR 4:37 ዎልቃማ ጎተይ ደንድድ፥ ሆበይ ዎጎሉዋ ሾጭን፥ ኩማና ጋካናዉ ዎጎሉዋ ግዶ ሃꬅ ገልስ።
MAR 4:38 ሄ ዎደ የሱሲ ዎጎሉዋን ጉየ ባጋራ ቦርኮትድ ꬍስክስ። እያ ታማረት እያ ደንꬅድ፥ “አስታማርያዉ፥ ኑኒ ꬋይያ ዎደ ነ ስእ ጋዳ ፄላይ?” ያግዶሶና።
MAR 4:39 ያትን፥ እ ባርክድ ጎትያ፥ “ስእ ጋ” ግድ፥ አባካ፥ “ዎፑ ጋ” ግስ። ጎተይካ ስእ ግን ኡባባይ ዎፑ ግስ።
MAR 4:40 የሱሲ ባ ታማረታኮ፥ “አይስ ሀይሳዳ ባበቲ? ህንተዉ አማኖይ ዋንድ ꬋይዴ?” ያግስ።
MAR 4:41 ኤንቲ ዳሮ ባብድ ባንታ ግዶን፥ “ሀይስ ሀር አቶሽን፥ ጎተይነ አባይ ኪተተይስ ኦኔ?” ያግዶሶና።
MAR 5:1 የሱስነ እያ ታማረት አባ ፕንድ፥ ገርገሶነ ቢታ ጋክዶሶና።
MAR 5:2 የሱሲ ዎጎሉዋፐ ዎꬍያ ዎደ ቱና አያናይ ኦይክዳ እስ ኡራይ ዱፎፐ ከይድ እያራ ጋሄትስ።
MAR 5:3 ሄ ኡራይ አቅ ፔእድ ደኤይ ዱፎና። እያ ኦንካ ሳንꬃላታን ቃቻናዉ ዳንዳኤና።
MAR 5:4 እ ዳሮ ቶሆ ዱꬃንነ ሳንꬃላታን ቃሸትድ ደኤስ። ሽን ሳንꬃላታ ዱሰረꬄስ፥ ዱꬃ መንረꬄስ። እያ ተቃናዉ ዳንዳእያ ኦንካ ባዋ።
MAR 5:5 እ ቃማነ ጋላስ ሄ ዱፉዋንነ ደረ ቦላ ዋሴስ፥ ባ አሳተꬃ ሹቻን ጋሬስ።
MAR 5:6 የሱሳ ሃሆን በእዳ ዎደ ዎፅ ብድ እያ ስንꬃን ጉልባትስ።
MAR 5:7 ሄ ኡራይ ባ ቃላ ꬎቁ ኦꬅድ፥ “ኡባፈ ቦላ ፆሳ ናአዉ የሱሳ፥ ነናነ ታና አይበ ጋይ? ታና ꬋይሶና መላ ታኒ ነና ፆሳ ሱንꬃን ዎሳይስ” ያግስ።
MAR 5:8 እ ሄሳ ግዳይ የሱሲ እያ፥ “ላ ሀ ቱና አያናዉ፥ ሀ አድያፈ ከያ” ያግዳ ግሾሳ።
MAR 5:9 የሱሲ እያኮ፥ “ነ ሱንꬃይ ኦኔ?” ያግድ ኦይችስ። እ፥ “ኑኒ ዳሮ ግድያ ግሾ፥ ታ ሱንꬃይ ሌግዮና” ያግስ።
MAR 5:10 ቱና አያናት ባንታና ሄ ቢታፈ ከስ የዶና መላ የሱሳ ምንꬅድ ዎስዶሶና።
MAR 5:11 ሄ ደርያ ቦላ ዳሮ ጉዱንꬆ ዉደይ ሄመቴስ።
MAR 5:12 ቱና አያናት የሱሳኮ፥ “ኑና ህን ጉዱንꬆ ዉድያኮ የዳርክ፥ ኤንታን ብድ ገሎስ” ያግድ ዎስዶሶና።
MAR 5:13 የሱሲ ኤንታኮ፥ “ቢተ” ያግስ። ያትን ቱና አያናት አድያፈ ከይድ ጉዱንꬆታን ገልዶሶና። ናምኡ ሙኩሉ ግድያ ጉዱንꬆ ዉደይ አፎ ዶናራ ድርግድ ብድ አባን ገልድ ምተትዶሶና።
MAR 5:14 ጉዱንꬆ ዉድያ ሄመይሳት ባቃት ብድ ሀንዳባ ካታማንነ ጋፃርያን ኦድዶሶና። ያትን አሳይ ሀንዳባ በአናዉ ከይዶሶና።
MAR 5:15 አሳይ የሱሳኮ ያ ዎደ ቱና አያናን ኦይከትዳ ኡራ በእዶሶና። እ ባ ዎዛናኮ ስሚድ፥ ማኦ ማእድ፥ ያን ኡትዳይሳ በእዳ ዎደ ኡባይ ያይዶሶና።
MAR 5:16 ሄሳ በእዳ አሳት ቱና አያናት ኦይክዳ ኡራ ቦላነ ጉዱንꬆታ ቦላ ሀንዳባ ኡባ አሳስ ኦድዶሶና።
MAR 5:17 ሄሳ ግሾ፥ አሳይ ባንታ ቢታፈ የሱሲ ባና መላ ዎስዶሶና።
MAR 5:18 የሱሲ ዎጎሉዋን ገልያ ዎደ ካሰ ቱና አያናይ ኦይክድ የድዳ ኡራይ፥ የሱሳ ካላናዉ እያ ዎስስ።
MAR 5:19 ሽን የሱሲ እፅድ እያኮ፥ “ነ ሶ ስማዳ፥ ጎዳይ ነዉ አይ መላ ግታባ ኦꬅዳኮነ ነዉ አይ መላ ኬህዳኮ ነ ሶ አሳስ ኦዳ” ያግስ።
MAR 5:20 ኡራይ ብድ ታሙ ካታማ ጌተትያ በሳን ዩይድ፥ የሱሲ ባዉ አይ መላ ግታባ ኦꬅዳኮ ኦድስ። እ ኦድዳይሳ ስእዳ አሳ ኡባይ ማላለትዶሶና።
MAR 5:21 የሱሲ ስሚድ፥ ዎጎሉዋን ገልድ፥ አባ ፕንዳፐ ጉየ ዳሮ አሳይ አባ ጋፃን እያ ዩሹዋን ሺቅዶሶና።
MAR 5:22 እያሮሳ ጌተትያ አይሁደ ዎሳ ኬꬃ ሀላቃታፐ እሶይ፥ የሱሳ በእዳ ዎደ እያኮ ይድ እያ ቶሁዋ ቦላ
MAR 5:23 ኩንድድ፥ “ታ ናእያ ሀርጋዳ ሀይቃና ሀናዉሱ። እያ ፓፃዳ ደአና መላ ያዳ ነ ኩሽያ እ ቦላ ዎꬃርክ” ያግድ የሱሳ ምንꬅድ ዎስስ።
MAR 5:24 የሱሲ እያሮሳራ ብስ። እ ብሽን ዳሮ አሳይ እያ ካልድ ኡንኤꬅዶሶና።
MAR 5:25 ታማነ ናምኡ ላይꬅ እፔ ሱꬅ ꬎሂያ እስ ማጫስያ ደአዉሱ።
MAR 5:26 ዳሮ አክመት እዮ አክምዶሶና፥ ሽን እያ ፓፃ ካኤታሱ። እያ ባ ሚሽያ ኡባ ዉርስንካ እዉ ሃ ኢትስፐ አትሽን፥ አይኮካ ማድቤና።
MAR 5:27 ሄ ማጫስያ የሱሳባ ስአዳ፥ አሳ ካንꬃዳ የሱሳ ጉየራ ያዳ እያ ማኡዋ ቦቻሱ።
MAR 5:28 እያ፥ “ታኒ ሀር አቶሽን እያ ማኡዋ ቦችያኮ ፓፃና” ጋዳ ቆፓሱ።
MAR 5:29 ኢፐ ጎግያ ሱꬃይ ኢራካ ኤቅ አግስ። እያ ባ ዋያፐ ፓፅዳይሳ ባ አሳተꬃን ኤራሱ።
MAR 5:30 የሱሲ ባፐ ዎልቅ ከይዳይሳ ባ ሁጰን ኤርድ፥ ኤለስድ ዳሮ አሳ ግዶን ጉየ ስሚድ፥ “ታ ማኡዋ ቦችዳይ ኦኔ?” ያግስ።
MAR 5:31 እያ ታማረት፥ “አሳይ ነና ሱገይሳ በአሸ፥ ‘ዎይጋዳ ታና ኦነ ቦችዳይ ያጋይ?’ ” ያግዶሶና።
MAR 5:32 የሱሲ ሄሳ ኦን ኦꬅዳኮ በአናዉ ዩሽ አꬅ ፄልስ።
MAR 5:33 ሽን ማጫስያ ባዉ ሀንዳባ ኤራዳ፥ ያሻን ኮኮራሸ ያዳ የሱሳ ስንꬃን ጉፋናሱ፤ ቃስ ሀንዳባ ኡባ ቱማ እያዉ ኦዳሱ።
MAR 5:34 ያንን፥ የሱሲ ኢኮ፥ “ታ ናተ፥ ነና ነ አማኖይ ፓꬅስ፥ ሳሮን ባ፥ ነ ዋያፐካ ፓፃ” ያግስ።
MAR 5:35 የሱሲ ቡሮ ሄሳ ኦድሽን፥ አይሁደ ዎሳ ኬꬃ ሀላቃ ሶፐ ኪተትዳ አሳት ይድ፥ “ነ ናእያ ሀይቃሱ፥ አስታማርያ አይስ ዳቡርሳይ?” ያግዶሶና።
MAR 5:36 ሽን የሱሲ ኤንቲ ገይሳ ስእድ፥ አይሁደ ዎሳ ኬꬃ ሀላቃኮ፥ “አማኖ ፃላላ አማናፐ አትሽን፥ ባቦፋ” ያግስ።
MAR 5:37 የሱሲ ጰፅሮሳፐ፥ ያይቆባፐነ ያይቆባ እሻ ዮሃንሳፐ ሀር ኦንካ ባና ካሎና መላ ድግስ።
MAR 5:38 ኤንቲ አይሁደ ዎሳ ኬꬃ ሀላቃ ሶ ጋክያ ዎደ የሱሲ አሳይ ካሀ ꬋይድ ዬከይሳነ ዘሌለይሳ በእስ።
MAR 5:39 ገልድ አሳኮ፥ “አይስ ካሀ ꬋይድ ዬከቲ? ናእያ ꬍስካሱፐ አትሽን፥ ሀይቃቡኩ” ያግስ።
MAR 5:40 አሳይ እያ ቦላ ሚጭስ። ሽን አሳ ኡባ ካረ ከስድ፥ ናኤ አዋ፥ አይዉነ ሄꬑ ታማረታ ባራ ኤክድ ናእያ ደእያሱዋ ገልስ።
MAR 5:41 የሱሲ ናኤ ኩሽያ ኦይክድ፥ “ፃልታ፥ ቁም” (ጉꬃ ናተ፥ ነና ጋይስ ደንዳ) ያግስ።
MAR 5:42 ናእያ ኤለሳ ደንዳ ኤቃዳ ሄመታሱ። እያ ታማነ ናምኡ ላይꬃ ናአ። ሄሳን አሳይ ዳሮ ማላለትዶሶና።
MAR 5:43 የሱሲ ሄሳ ኤንቲ ኦደስካ ኦዶና መላ ኤንታ ምንꬅ ኪትስ። ኤንቲ እዉ ምያባ እማና መላ ኦድስ።
MAR 6:1 የሱሲ ያፐ ከይድ፥ ባ ታማረታ ካለꬅድ፥ ባ ካታማ ናዝረተ ብስ።
MAR 6:2 ሳምባታ ጋላስ አይሁደ ዎሳ ኬꬃን ታማርሶ ኦይክስ። እ ታማርሰይሳ ስእዳ ዳሮ አሳይ ማላለትድ፥ “ሀይስ ሀ ኡባ አዉፐ ደምዴ? ሀ ጭንጫተꬃ እ አዉፐ ኤክዴ? ሀ ማላታታ ኦꬅያ ማታ እ አዉፐ ደምዴ?
MAR 6:3 ሀይስ አናፅያ ግደኔ? ማይራም ናአ፥ ያይቆባ፥ ዮሳ፥ ይሁዳነ ስሞና እሻ ግደነዬ? እያ ምቸት ኑራ ሀይሳን ደኦኮናዬ?” ያግድ፥ እ ግያባ ኤኮና እፅዶሶና።
MAR 6:4 የሱሲ ሄ አሳኮ፥ “ናበይ ባ ቢታን፥ ባ ዳቦታንነ ባ ሶ አሳን ቦንቸተናፈ አትሽን፥ ሀራታ ማታን ቦንቸቴስ” ያግስ።
MAR 6:5 እ ሄ በሳን ባ ኩሽያ ጉꬃ አሳ ቦላ ዎꬅድ ፓꬅዳይሳፈ አትሽን፥ ሀራ ማላታታ ኦꬃናዉ ዳንዳእቤና።
MAR 6:6 አሳይ አማንቦና ግሾ ዳሮ ማላለትስ። ሄሳፈ ጉየ፥ የሱሲ ሄ ሄራን ደእያ ጉታታን አሳ ታማርሴስ።
MAR 6:7 የሱሲ ታማነ ናምኡ ታማረታ ባኮ ፄግድ፥ ናምኣ ናምኣ ጋꬅድ ኪትስ። ኤንታዉ ቱና አያናታ ከስያ ዎልቃ እሚስ።
MAR 6:8 ኤንታ፥ “ኦገ ፃምአፈ አትሽን፥ ካꬅ፥ ካርፂታ፥ ህንተ ኪሰን ሚሸ አይብባካ ኦይኮፍተ።
MAR 6:9 ህንተ ቶሁዋን ጫማ አꬅተ፥ ሽን ናምኡ አፍላ ኦይኮፍተ” ያግስ።
MAR 6:10 ቃስካ፥ “ህንተና አስ ሞክዳ ሶ አዉንካ ግድን ሄ በሳ የድድ ባና ጋካናዉ ሄ ኬꬃን ጋምእተ።
MAR 6:11 ህንተና አስ ሞኮናሱዋ ዎይኮ ህንተ ኦድያባ ስኦናሱዋ አዉን ግድኮካ፥ ሄ ቢታን ደእያ አሳስ ማርካ ግዳና መላ ሄ በሳፈ ከይሸ፥ ህንተ ቶሁዋፐ ባና ፕትተ” ያግስ።
MAR 6:12 ታማነ ናምኡ ታማረት ብድ፥ አሳይ ባንታ ናጋራፐ ስማናዳ ቃላ ኦድዶሶና።
MAR 6:13 ኤንቲ አሳፐ ዳሮ ቱና አያናታ ከስዶሶና። ዳሮ ሀርጋንቾታ ዛይተ ትይድ ፓꬅዶሶና።
MAR 6:14 የሱሳ ሱንꬃይ ኡባ በሳን ከይዳ ግሾ፥ ካዎይ ሄሮዲስ እያባ ስእስ። እስ እስ አሳይ፥ “ፃማቅያ ዮሃንስ ሀይቆፐ ደንድስ፥ ሄሳ ግሾ ሀ ማላታታ ኦይ እያ” ያግዶሶና።
MAR 6:15 ባጋት፥ “ሀይስ ኤልያሳ ግደኔ?” ያግዶሶና። ሀራት ቃስ፥ “ሀይስ በን ዎደ ናበታፐ እሱዋ ግዶና አገና” ያግዶሶና።
MAR 6:16 ሽን ሄሮዲስ ሄሳ ስእዳ ዎደ፥ “ሀይስ ታኒ ቆꬍያ ቃንፅስዳ ፃማቅያ ዮሃንሳ ግደኔ? እ ሀይቆፐ ደንድስ” ያግስ።
MAR 6:17 ሄሮዲስ ባ እሻ ፍልጶሳ ማችዉ ሄሮድያዳ ኤክዳ ግሾ እ ጋሶን ዮሃንሳ ኦይꬅድ ቃሽስስ።
MAR 6:18 ዮሃንስ ሄሮዲሳ፥ “ኔኒ ነ እሻ ማችዉ ኤካናዉ በሰና” ያግስ።
MAR 6:19 ሄሮድያዳ ዮሃንሳ ባ ኡሎን ሞርካዳ እያ ዎꬍሳናዉ ኮያሱ፥ ሽን ዳንዳአቡኩ።
MAR 6:20 ዮሃንስ ፅሎነ ጌሻ አስ ግድዳይሳ ሄሮዲስ ኤርዳ ግሾ፥ እያዉ ባብድ ሎይꬅ ናግሴስ። ሄሮዲስ ዮሃንስ ግያባ ስአናዉ ዶስኮካ እ ግያባ ስእያ ዎደ ዳሮ ዳጋሜስ።
MAR 6:21 ሄሮዲስ ባ የለትዳ ጋላሳ ቦንቻናዉ ደርያ ሃረይሳታስ፥ ሻላቃታስነ ጋልላን ደእያ ግታ አሳስ እማቶ ጊግስስ። ሄስ ሄሮድያዳስ እንጀ ጋላስ ግድስ።
MAR 6:22 ሄሮድያዳ ናእያ እማꬃይ ሞከትያ በሳ ገላ ዱራዳ፥ ሄሮዲሳነ እያ እማꬃታ ኡፋይሳሱ። ካዎይ ናእዉ፥ “ነ ኮያባ አይባ ግድኮካ ታና ኦይቻ፥ ታኒ ነዉ እማና” ያግስ።
MAR 6:23 ቃስ እዉ ጫቅድ፥ “ኔኒ ኦይችያባ አይባ ግድኮካ፥ ታኒ ነዉ እማና። ሀር አቶሽን፥ ታ ካዎተꬃ ባጋ ግድኮካ ታኒ ነዉ እማና” ያግስ።
MAR 6:24 ናእያ ካረ ከያዳ ባ አየኮ፥ “አይ እማ ጎ?” ጋዳ ኦይቻሱ። እ አይያ፥ “ፃማቅያ ዮሃንሳ ሁጵያ እማ ጋ” ያጋሱ።
MAR 6:25 ናእያ ኤለሳዳ ካዋኮ ባዳ፥ “ፃማቅያ ዮሃንሳ ሁጵያ ሳነን ዎꬃዳ ሀእ ታዉ እማና መላ ኮያይስ” ያጋሱ።
MAR 6:26 ያንን፥ ካዎይ ዳሮ ቂሮትስ፥ ሽን ባ እማꬃታ ግሾ እዉ ጫቅዳ ባ ጫቁዋ መንꬃናዉ ኮይቤና።
MAR 6:27 ሄሳ ግሾ፥ ኤለስድ ናገይሳ ዮሃንሳ ሁጵያ ኤሀና መላ ኪትስ። ናገይስ ቃሾ ኬꬅ ብድ ዮሃንሳ ቆꬍያ ቃንፅስ።
MAR 6:28 ሄ ቃንፀትዳ ሁጵያ ሳነን ዎꬅ ኤህድ ናኤስ እሚስ። ናእያ ቃስ ባ አየስ እማሱ።
MAR 6:29 ዮሃንሳ ታማረት ሄሳ ስእዳ ዎደ ብድ እያ አሀ ኤክ ኤፍድ ሞግዶሶና።
MAR 6:30 ታማነ ናምኡ ሀዋረት ስም ይድ ኤንቲ ኦꬅዳባነ ታማርስዳባ ኡባ የሱሳስ ኦድዶሶና።
MAR 6:31 ኤንታኮ ያ አሳይነ ብያ አሳይ ዳርዳ ግሾ፥ የሱሳራነ እያ ታማረታራ፥ ሀር አቶሽን ካꬅ ማናዉካ ኤንታ ጋꬆና እፅስ። ያንን፥ የሱሲ ኤንታኮ፥ “ኑርካ ጉꬅ ሸምፕ ኤካናዉ አስ ባይና በሲ የꬍተ” ያግስ።
MAR 6:32 ሄሳ ግሾ፥ ኤንቲ ባንታርካ ዎጎሎን ገልድ አስ ባይና በሲ ብዶሶና።
MAR 6:33 ኤንቲ ብሽን ዳሮ አሳይ ኤንታ በእድ ኤርዶሶና። ያትን፥ ካታማ ኡባፈ አሳይ ቶሆራ ዎፅ ብድ ኤንቲ ብያ በሳ ኤንታፈ ስን ጋክዶሶና።
MAR 6:34 የሱሲ ዎጎሉዋፐ ዎꬍድ ዳሮ አሳ በእስ። አሳይ ሄምያ አስ ባይና ዶርሳ መላ ግድዳይሳ በእድ ኤንታዉ ቃትድ ኤንታ ዳሮባ ታማርስስ።
MAR 6:35 ሳአይ ኦማርስያ ዎደ የሱሳ ታማረት እያኮ ይድ፥ “ሀይስ በሳይ አስ ባይና በሲ፤ ሀእ ሳእካ ቃምስ።
MAR 6:36 አሳይ ጉታታነ ካታማታ ብድ ባንታዉ ምያባ ሻማና መላ አሳ የዳ” ያግዶሶና።
MAR 6:37 ሽን የሱሲ ዛሪድ ኤንታኮ፥ “አሳስ ምያባ ህንተ እምተ” ያግስ። ኤንቲ፥ “ኑኒ ብድ ናምኡ ፄቱ ድናረን ኡይꬁ ሻምድ አሳ ሙዛና መላ ኮያይ?” ያግድ ኦይችዶሶና።
MAR 6:38 የሱሲ ኤንታኮ፥ “ህንተዉ አፑን ኡይꬅ ደኢ? አነ ብድ በእተ” ያግስ። ኤንቲ በእድ፥ “እቻሹ ኡይꬁነ ናምኡ ሞሎ” ያግዶሶና።
MAR 6:39 የሱሲ ባ ታማረታ አሳ ኡባ ጩጋን ጩጋን ሻክድ ማታን ኡትሳና መላ ኪትስ።
MAR 6:40 አሳይ ፄቱ ጩጋንነ እሻታሙ ጩጋን ሻከት ሻከት ኡትዶሶና።
MAR 6:41 የሱሲ እቻሹ ኡይꬃነ ናምኡ ሞሎታ ኤክድ፥ ፑደ ሳሎ ፄልድ ፆሳ ጋላትስ። ኡይꬃ መንꬅድ አሳስ ግሻና መላ ባ ታማረታስ እሚስ። ቃስ ናምኡ ሞሎታ ኤንታ ኡባስ ሻክስ።
MAR 6:42 አሳ ኡባይ ምድ ካልዶሶና።
MAR 6:43 አትዳ ኡይꬃ ቲፍያነ ሞሎታ ቲፍያ፥ እያ ታማረት ታማነ ናምኡ ጋይታ ኩመꬅ ደንꬅዶሶና።
MAR 6:44 ኡይꬃ ምዳ አደ አሳ ታይቦይ እቻሹ ሙኩሉ።
MAR 6:45 ኤለስድ የሱሲ ባ ታማረት ዎጎሉዋን ገልድ፥ አባፈ ሄፍንꬃን ደእያ ቤተሳይዳ ባፐ ስንꬃትድ ባና መላ ኪትስ። ሽን ባዉ አሳ ሞይዛናዉ ጉየ አትስ።
MAR 6:46 አሳ ሞይዝዳፐ ጉየ፥ ፆሳ ዎሳናዉ ዙማ ቦላ ከይስ።
MAR 6:47 ሳአይ ቃምያ ዎደ ዎጎሎይ አባ ግዶን ደኤስ፥ ሽን የሱሲ አባፈ ጋፃን ባርካ ደኤስ።
MAR 6:48 ጫርኮይ እያ ታማረታኮ ጫርክያ ግሾ፥ አባ ፕꬎይ ዋይሰይሳ የሱሲ በእስ። ዎንትማ ሳእ ጌያና ሀንያ ዎደ እ አባ ቦላ ሄመትሸ ኤንታኮ ይድ፥ ኤንታ የግድ አꬋናዉ ኮይስ።
MAR 6:49 ሽን እ አባ ቦላ ሄመትሽን፥ ኤንቲ በእድ፥ ኤንታዉ ሞይትለ ዳንን ዋስዶሶና።
MAR 6:50 ኤንቲ ኡባይ እያ በእድ፥ ያሻን ኮኮርዶሶና። ሽን የሱሲ ኤለስድ ኤንታኮ፥ “ታና፥ አይኮይ ባዋ፤ ያዮፍተ” ያግስ።
MAR 6:51 የሱሲ ዎጎሉዋን ገልድ ኤንታራ እስፈ ኡትን ጫርኮይ ዎፑ ግስ። ኤንቲ ዳሮ ማላለትዶሶና።
MAR 6:52 ኤንታ ዎዛናይ ዘልኡምዳ ግሾ፥ ኤንቲ ኡይꬃባ አኬክቦኮና።
MAR 6:53 ኤንቲ አባ ፕንድ፥ ገንሳሬፀ ቢታ ጋክድ፥ ዎጎሉዋ ጋፃ ሺሽድ ቃችዶሶና።
MAR 6:54 ኤንቲ ዎጎሉዋፐ ዎꬍያ ዎደ አሳይ ኤለስድ የሱሳ ኤርዶሶና።
MAR 6:55 ኤንቲ ሄራን ደእያ ቢታ ኡባን ዎፀረትድ ሀርጋንቾታ ሀላን ቶክድ፥ “የሱሲ ደኤስ” ግን ስእዳ በሳ ኤህዶሶና።
MAR 6:56 አሳይ እ ብዳ ሶ ኡባን፥ ጋፃርያን ግድን፥ ካታማን፥ ደእያ ሀርጋንቾታ ዳባባ ኤፎሶና። ሀርጋንቾት እያ አፍላ ማጫራ ግድኮካ ቦቻና መላ አሳይ እያ ዎስዶሶና። ቦችዳ ኡባይ ፓፅስ።
MAR 7:1 የሩሳላመፐ ይዳ ጉꬃ ፋርሳወትነ ህገ አስታማረት የሱሳ ማታን ሺቅዶሶና።
MAR 7:2 የሱሳ ታማረታፐ እሶት እሶት ጌዮና ኩሽያን፥ ሄስካ ኩሸ ሜጨቶና ካꬅ መይሳታ በእዶሶና።
MAR 7:3 ፋርሳወትነ አይሁደ አሳ ኡባይ ባንታ አዋታ ዎጋꬆ ባንታ ኩሽያ ሜጨቶና ሞኮና።
MAR 7:4 ሄሳዳካ፥ ኤንቲ ግያፐ ሻመትዳባ ሜጮና ደእሸ ሞኮና። ቃስ ኤንቲ ባንታ አዋታፐ ኤክዳ ሀራ ዳሮ ዎግ ደኤስ፦ ሄስካ ስነታ፥ ከረታ፥ ብራታ ሚሸታነ አርሳ ሜጭያ ዎጋ ናገይሳ።
MAR 7:5 ፋርሳወትነ ህገ አስታማረት የሱሳ፥ “ነ ታማረት አይስ አዋታ ዎጋ መንꬅድ ባንታ ኩሽያ ሜጨቶና ካꬅ ሞና?” ያግድ ኦይችዶሶና።
MAR 7:6 የሱሲ ኤንታኮ፥ “እሳያስ ህንተና ጩቦታ፥ “ ‘ሀይስ አሳይ ታና ባ እንፃርሳ ፃላላን ቦንቼስ፥ ሽን ኤንታ ዎዛናይ ታፐ ሃሆን ደኤስ።
MAR 7:7 አስ መꬍዳ ዎጋ ፆሳ ህገ ዳንስድ ታማርስያ ግሾ፥ ኤንቲ ታዉ መላ ጎይኖሶና’ ” ግድ ፃፍዳይስ ቱማ።
MAR 7:8 “ህንተ ፆሳ ኪታ አግድ አሳ ዎጋ ምንꬅድ ናገታ” ያግስ።
MAR 7:9 ቃስካ የሱሲ፥ “ህንተ ህንተ ዎጋ ናግድ ፆሳ ኪታ የግ አጋናዉ ሎኦ ኦገ ደምደታ።
MAR 7:10 ሙሰይ፥ ‘ነ አዋነ ነ አይዉ ቦንቻ’፥ ቃስ ‘ባ አዋነ ባ አይዉ ጫየይስ ሀይቃናዉ በሴስ’ ያግስ።
MAR 7:11 ሽን እስ አስ ባ አዋ ዎይኮ ባ አይዉ ማዳናይሳ አግድ፥ ‘ሀይስ ታኒ ፆሳስ እምዳ ያርሾ’ ጊኮ፥
MAR 7:12 እ ባ አዋ ዎይኮ ባ አይዉ ማዶና መላ ኦꬄታ።
MAR 7:13 ሄሳዳካ፥ ህንተ ሀራታ ታማርስዳ ህንተ ዎጋን ፆሳ ቃላ ካꬍደታ። ሄሳ መላ ሀራ ዳሮባ ኦꬄታ” ያግስ።
MAR 7:14 የሱሲ ዳሮ አሳ ቃስካ ባኮ ፄግድ፥ “ኡባይ ታኒ ኦደይሳ ስእተነ አኬክተ።
MAR 7:15 አሳ ዎዛናፐ ከያባይ አሰ ቱንሴስፐ አትሽን፥ ካረፐ አሳ ኡሎ ገልድ አሰ ቱንስያባይ አይብካ ባዋ።
MAR 7:16 ስእያ ሀይꬅ ደእያ ኦንካ ስኦ” ያግስ።
MAR 7:17 የሱሲ ዳሮ አሳ የግ አግድ ሶ ገልን እያ ታማረት ሄ ሌምሱዋባ እያ ኦይችዶሶና።
MAR 7:18 እ ኤንታኮ፥ “ህንተዉካ ቃስ ገልቤኔ? ካረፐ አሳን ገልያባይ አይብካ አሰ ቱንሳናዉ ዳንዳኦናይሳ አኬከቲ?
MAR 7:19 አይስ ጊኮ፥ ካꬅ አሳ ኡሎ ግዶ ገልድ ካንꬅድ አስፐ አትሽን፥ አሳ ዎዛና ግዶ ገለና” ያግስ። ሄሳን የሱሲ ካꬅ ኡባይ ጌሽ ግደይሳ ኤርስስ።
MAR 7:20 ካልድካ፥ የሱሲ፥ “አሳ ቱንስያባይ አሳ ዎዛና ግዶፈ ከያባ።
MAR 7:21 አሳ ዎዛና ግዶፈ ከያባይ ኢታ ቆፋ፥ ላይማተꬅ፥ ካይሶ፥ አሰ ዎꬎ፥ ላመ፥
MAR 7:22 ኢታ አሞ፥ ኢታተꬅ፥ ገነ፥ ቃይፀ፥ ጭሞ፥ ቃናተ፥ ጫሸ፥ ኦቶሮነ ቦዛተꬅ።
MAR 7:23 ሀ ኢታባይ ኡባይካ አሳ ዎዛና ግዶፈ ከይድ አሰ ቱንሴስ” ያግስ።
MAR 7:24 የሱሲ ያፐ ከይድ፥ ፅሮሳ ካታማ ማታን ደእያ ቢታ ብስ። እ እስ ኬꬅ ገልድ ያን ደኤይሳ ኦንካ ኤራና መላ ኮይቤና። ሽን ቆሰትድ ጋምአናዉ ዳንዳእቤና።
MAR 7:25 ሽን እ ጉꬃ ናእዉ ቱና አያናይ ኦይክዳ እስ ማጫስያ የሱሳባ ስአዳ ኤለሳ እያኮ ያዳ እያ ቶሁዋ ቦላ ኩንዳሱ።
MAR 7:26 እያ አይሁደ ማጫስ ግዱኩ፤ እያ የለትዳይ ስሮፍንቀ ቢታና። እያ፥ ባ ናኤፐ ቱና አያና ከሳና መላ የሱሳ ዎሳሱ።
MAR 7:27 ሽን የሱሲ ዛሪድ፥ “ናይት ኮይሮትድ ካꬃ ካሎ፤ ናይታ ካꬃ ኤክድ ካናታስ የገይስ ሎኦ ግደና” ያግስ።
MAR 7:28 ማጫስያ ዛራዳ፥ “ታ ጎዳዉ ሄስ ቱማ፥ ሽን ጋይታ ማታን ደእያ ካናት ናይታፐ ዎꬍያ ቲፍያ ሞሶና” ያጋሱ።
MAR 7:29 የሱሲ ቃስ ኢኮ፥ “ሀ ነ ቃላ ግሾ፥ ነ ሶ ባ፤ ቱና አያናይ ነ ናኤፐ ከይስ” ያግስ።
MAR 7:30 ማጫስያ ባ ሶ ብያ ዎደ ቱና አያናይ ኢፐ ከይን ሂፃን ዝንእዳሮ ደማሱ።
MAR 7:31 የሱሲ ፅሮሳ ካታማፐ ከይድ፥ ስዶናራነ ታሙ ካታማታ ጌተትያ ቢታራ ካንꬅድ ጋልላ አባኮ ብስ።
MAR 7:32 አሳይ ቱለነ ዋይድ ኦደትያ አስ የሱሳኮ ኤህድ፥ ባ ኩሽያ እያ ቦላ ዎꬃና መላ እያ ዎስዶሶና።
MAR 7:33 የሱሲ ባርካ ሄ ኡራ ዳሮ አሳፐ ጋፃ ከስድ፥ ባ ብራꬍያ እያ ሀይꬃን የድስ። ቃስ ጩቹ ጩትድ እያ እንፃርሳ ቦችስ።
MAR 7:34 ሳሎ ፑደ ፄልድ፥ ቶክ ሸምፕድ፥ “ኤፍታህ” ግስ። ብርሸꬃይካ “ዶየታ” ጉሱ።
MAR 7:35 ኡራ ሀይꬃይ ኤለስድ ዶየትስ፥ ቃሸትዳ እንፃርሳይካ ብርሸትስ፥ ኡራይ ጌሽድ ኦደትስ።
MAR 7:36 የሱሲ አሳኮ፥ “ሀይሳ ኦደስካ ኦዶፕተ” ያግስ። ሽን እ ዳሮ ምንꬅድ ኦዶፕተ ግን፥ አሳይ ኦዳ ያ ዳርስስ።
MAR 7:37 ሄሳ ስእዳ አሳ ኡባይ ዳሮ ማላለትድ፥ “ኡባባ እ ሎይꬅ ኦꬄስ። ሀር አቶሽን፥ ቱልያ ስሴስ፥ ሙምያ ኦድሴስ” ያግዶሶና።
MAR 8:1 ጉꬃ ዎደፐ ጉየ፥ ዳሮ አሳይ የሱሳኮ ሺቅዶሶና። አሳስ ምያባይ ꬋይን የሱሲ ባ ታማረታ ባኮ ፄግድ፥
MAR 8:2 “ሀ አሳይ ታራ ሄꬑ ጋላስ ጋካናዉ ጋምእድ፥ አይኮካ ምያባ ደምቦና ግሾ፥ ታና አሳይ ቃꬄስ።
MAR 8:3 ታኒ አሳ ኮሻራ ሶ የድኮ አሳይ ብሸ ኦገን ዳቡርድ ኩንዳና፥ ባጋ አሳይ ሃሆሶፐ ይዶሶና” ያግስ።
MAR 8:4 የሱሳ ታማረት ዛሪድ፥ “ሀ መላ ቢታን ሀ አሳ ኡባ ሙዛናዉ ግድያ ካꬅ ደማናዉ ዳንዳኤይ ኦኔ?” ያግዶሶና።
MAR 8:5 የሱሲ ኤንታኮ፥ “ህንተዉ አፑን ኡይꬅ ደኢ?” ያግድ ኦይችስ። ኤንቲ ዛሪድ፥ “ላፑን ኡይꬅ ደኤስ” ያግዶሶና።
MAR 8:6 የሱሲ አሳይ ሳአን ኡታና መላ ኪትስ። ያትድ፥ ላፑን ኡይꬃ ኤክድ ፆሳ ጋላት ስሚድ ሄ ኡይꬃ መንꬅድ፥ አሳስ ግሻና መላ ባ ታማረታስ እሚስ። እያ ታማረት አሳስ ግሽዶሶና።
MAR 8:7 ኤንታዉ ቃስ ጉꬃ ላፋ ሞሎት ደኦሶና። የሱሲ ሄ ሞሎታ ግሾ ፆሳ ጋላትድ፥ አሳስ ግሻና መላ ባ ታማረታ ኪትስ።
MAR 8:8 አሳ ኡባይ ምድ ካልዶሶና። እያ ታማረት አትዳ ቲፍያ ላፑን ጋይታ ኩመꬅ ደንꬅዶሶና።
MAR 8:9 ካꬃ ምዳ አሳ ታይቦይ ኦይዱ ሙኩሉ ግዳና። ሄሳፈ ጉየ፥ የሱሲ አሳ የድስ።
MAR 8:10 እ ቃስ ባ ታማረታራ ኤለስ ዎጎሎን ገልድ ዳልማኑታ ቢታ ብስ።
MAR 8:11 ፋርሳወት ይድ የሱሳ ፓጫናዉ ኮይድ፥ ሳሎፐ ባንታና ማላታ በሳና መላ የሱሳራ ፓላማ ኦይክዶሶና።
MAR 8:12 የሱሲ ቶክ ሸምፕድ፥ “ሀ ዎድያ አሳይ አይስ ማላታ ኮዪ? ታኒ ህንተዉ ቱማ ኦዳይስ፤ ሀ ዎድያ አሳስ አይ ማላትካ እመተና” ያግስ።
MAR 8:13 እ ኤንታ ያን የግ አግድ ዛር ዎጎሎን ገልድ አባፈ ሄፍንꬅ ፕንስ።
MAR 8:14 እያ ታማረት ካꬅ ኤፋናይሳ ዶግዶሶና፤ ኤንታዉ ዎጎሉዋ ግዶን እስ ኡይꬃፈ ሀር ባዋ።
MAR 8:15 የሱሲ ኤንታኮ፥ “ህንተና ኤርተ። ፋርሳወታ እርሹዋፈነ ሄሮዲሳ እርሹዋፈ ናገትተ” ያግድ ኪትስ።
MAR 8:16 ኤንቲ ባንታ ግዶን፥ “እ ሀይሳ ገይ ኑስ ኡይꬅ ባይና ግሾሳ” ያግዶሶና።
MAR 8:17 የሱሲ ኤንቲ ገይሳ ኤርድ ኤንታኮ፥ “ህንተዉ ኡይꬅ ባይና ግሾ አይስ ኦደቴቲ? ሀእካ ኤረከቲ? ዎይኮ አኬከከቲ? ህንተ ዎዛናይ ዶጭዴ?
MAR 8:18 ህንተዉ አይፈይ ደእሽን በኤከቲ? ሀይꬅ ደእሽን ስኤከቲ? ህንተ አኬከቲ?
MAR 8:19 ታኒ እቻሹ ኡይꬃ እቻሹ ሙኩሉ አሳስ ባꬅዳ ዎደ አፑን ጋይታ ኩመꬅ ቲፈ ደንꬅደቲ?” ያግስ። ኤንትካ፥ “ታማነ ናምኡ ጋይታ ኩመꬅ” ያግዶሶና።
MAR 8:20 “ሄሳዳካ፥ ታኒ ላፑን ኡይꬃ ኦይዱ ሙኩሉ አሳስ ባꬅዳ ዎደ አፑን ጋይታ ኩመꬃ ቲፈ ደንꬅደቲ?” ያግስ። ኤንቲ፥ “ላፑን ጋይታ ኩመꬅ ደንꬅዳ” ያግዶሶና።
MAR 8:21 ያትን፥ “ሀእካ አኬክበከቲ?” ያግስ።
MAR 8:22 ኤንቲ ቤተሳይዳ ካታማ ብዶሶና። ጉꬃ አሳት ቆቀ ኡራ የሱሳኮ ኤህድ ሄ ኡራ ቦቻና መላ እያ ዎስዶሶና።
MAR 8:23 የሱሲ ቆቀ ኡራ ኩሽያ ኦይክድ ካታማፐ ጋፃ ከስስ። እያ አይፍያን ጩትድ ባ ኩሽያ እያ ቦላ ዎꬅድ፥ “ነዉ አይኮይ በንቲ?” ያግድ ኦይችስ።
MAR 8:24 ኡራይ ꬎቁ ግድ ፄልድ፥ “ታዉ አሳይ በንቴስ፥ ሽን አሳይ ሄመትሸ ምꬅ ዳኔስ” ያግስ።
MAR 8:25 ሄሳፈ ጉየ፥ የሱሲ ዛሪድ፥ ኡራ አይፍያን ባ ኩሽያ ዎꬅስ። ኡራይ ሎይꬅ ፄልስ፥ እያ አይፈይ ፓፅስ፥ ኡባባ ጌሽድ በእስ።
MAR 8:26 የሱሲ አድያኮ፥ “ነ ሶ ባ፥ ሽን ጉታ ገሎፓ” ያግድ ኪትስ።
MAR 8:27 የሱሲ ባ ታማረታራ ቅሳረ ፍልጶሳ ማታን ደእያ ጉታ ብስ። ኤንቲ ብሽን ኦገ ቦላ የሱሲ፥ “ታና አሳይ ኦና ጎና?” ያግድ ባ ታማረታ ኦይችስ።
MAR 8:28 እያ ታማረት፥ “እስ እስ አሳይ ነና፥ ‘ፃማቅያ ዮሃንሳ’ ጎሶና፤ ሀራት፥ ‘ኤልያሳ ጎሶና’ ቃስ ሀራት፥ ‘ናበታፐ እሱዋ’ ጎሶና” ያግዶሶና።
MAR 8:29 የሱሲ ኤንታኮ፥ “ያትን ህንተ ታና ኦና ጌቲ?” ያግድ ኦይችስ። ጰፅሮስ፥ “ኔኒ ክርስቶሳ” ያግድ ዛርስ።
MAR 8:30 የሱሲ፥ “ታባ ኦደስካ ኦዶፕተ” ያግድ ኤንታ ኪትስ።
MAR 8:31 የሱሲ ባ ታማረታኮ፥ “አሳ ናአይ፥ ዳሮ መቶ ኤካናዉ በሴስ፤ ጭማት፥ ካህነ ሀላቃትነ ህገ አስታማረት እያ እፃናዉ በሴስ። ኤንቲ እያ ዎꬋናዉነ እ፥ ሄꬑ ጋላሳፐ ጉየ፥ ሀይቆፐ ደንዳናዉ በሴስ” ያግድ ኤንታ ታማርስስ።
MAR 8:32 እ ሄሳ ኤንታዉ ጌሽድ ኦድስ። ጰፅሮስ እያ እስ ባጋ ዛሪድ ሀንቀትስ።
MAR 8:33 ሽን የሱሲ ጉየ ስሚድ፥ ባ ታማረታ ፄልድ፥ ጰፅሮሳ ሀንቀትድ፥ “ሀ ፃላሄይ፥ ታፐ ሃካ። ኔኒ አስ ዶስያባ ቆፓሳፐ አትሽን፥ ፆሳይ ዶስያባ ቆፓካ” ያግስ።
MAR 8:34 ቃስካ የሱሲ ዳሮ አሳነ ባ ታማረታ ባኮ ፄግድ፥ “ታና ካላናዉ ኮይያ ኦንካ ባና ካዶ፤ ባ ማስቃልያ ቶክድ ታና ካሎ።
MAR 8:35 ባ ሸምፑዋ አሻናዉ ኮይያ ኡራይ ꬋይሳና። ሽን ታ ግሾነ ዎንገላ ግሾ ባ ሸምፑዋ ꬋይስያ ኡራይ አሻና።
MAR 8:36 እስ አስ ሳአን ደእያ ኡባባ ባዉ ሺሽድ፥ ባ ሸምፑዋ ꬋይስኮ እያ አይ ማዳኔ?
MAR 8:37 እስ አስ ባ ሸምፑዋ ዎዛናዉ አይ እማናዉ ዳንዳኢ?
MAR 8:38 ፆሳ አማኖና ሀ ኢታ የለተꬃን፥ እስ አስ ታናንነ ታ ቃላን ዬላትኮ፥ አሳ ናአይ፥ ቃስ ባ አዋ ቦንቾን ጌሻ ኪታንቾታራ ያ ዎደ እያን ዬላታና” ያግስ።
MAR 9:1 የሱሲ ኤንታኮ፥ “ታኒ ህንተዉ ቱማ ኦዳይስ፤ ፆሳ ካዎተꬃይ ዎልቃራ የይሳ በኦና ሀይቆና እስ እስ አሳት ሀይሳን ደኦሶና” ያግስ።
MAR 9:2 የሱሲ ኡሱፑን ጋላሳፐ ጉየ፥ ባራ ጰፅሮሳ፥ ያይቆባነ ዮሃንሳ ኤክድ፥ ኤንታ ፃላላ ግታ ዙማ ቦላ ከስድ ኤንታ ስንꬃን ላመትስ።
MAR 9:3 እያ ማኦይካ ጶልስ፤ ሳአን ማኦ ሜጭያ ኦንካ ጌሻናዉ ዳንዳኦናይሳ መላ ዳሮ ቦፅስ።
MAR 9:4 ሄ ሄꬑ ታማረት፥ ኤልያስነ ሙሰይ የሱሳራ ኦደትሽን በእዶሶና።
MAR 9:5 ጰፅሮስ የሱሳ፥ “አስታማርያዉ፥ ኑኒ ሀይሳን ደኤይስ ኑስ ሎኦ፤ ኑ ሄꬑ ሻቃራታ እሱዋ ነዉ፥ እሱዋ ሙሰስ፥ ቃስ እሱዋ ኤልያሳስ ሻቃራና” ያግስ።
MAR 9:6 እያራነ ሀንኮታራ ዳሮ ያይዳ ግሾ እ አይ ግያኮካ ኤርቤና።
MAR 9:7 ሄሳፈ ጉየ፥ ሻራይ ይድ ኤንታ ካምን ሻራፐ፥ “ሀይስ ታ ዶስያ፥ ታ ናኣ፥ እ ገይሳ ስእተ” ግያ ቃላይ ይስ።
MAR 9:8 ኤለስድ ኤንቲ ዩሽ አꬅድ ፄልያ ዎደ፥ የሱሳፐ አትሽን፥ ሀራ ኦናካ ባንታ ማታን በእቦኮና።
MAR 9:9 ኤንቲ ዙማ ቦላፈ ዎꬍሽን፥ የሱሲ ኤንታኮ፥ “አሳ ናአይ፥ ሀይቆፐ ደንዳና ጋካናዉ፥ ህንተ በእዳባ ኦደስካ ኦዶፕተ” ያግድ ኪትስ።
MAR 9:10 እ ኪትዳይሳ ኤንቲ፥ “ኤሮ” ግድ፥ “ሀ ሀይቆፐ ደንዶ ጉሳይ ዎይጉሰ” ግድ፥ ባንታ ግዶን ኦደትዶሶና።
MAR 9:11 ኤንቲ ዛሪድ፥ “ህገ አስታማረት፥ ‘ኤልያስ ኮይሮትድ ያናዉ በሴስ’ አይስ ጎና?” ያግድ ኦይችዶሶና።
MAR 9:12 የሱሲ ዛሪድ “ኤልያስ ኮይሮትድ ይድ፥ ኡባባ ጊግሴስ፤ ያትን፥ ጌሻ ማፃፋን፥ ‘አሳ ናእ ዳሮ ዋየታና፤ እፀታና’ ያግድ አይብስ ፃፈትዴ?
MAR 9:13 ሽን ታኒ ህንተዉ ኦዳይስ፤ ኤልያስ ይስ፤ ቃስ እያባይ ጌሻ ማፃፋን ፃፈትዳይሳዳ፥ አሳይ እያ ቦላ ባንታ ኮይዳባ ኦꬅዶሶና” ያግስ።
MAR 9:14 የሱሲ፥ ጰፅሮስ፥ ያይቆብነ ዮሃንስ ሀንኮ እያ ታማረታኮ ስሚድ ያ ዎደ፥ ዳሮ አሳይ ኤንታ ዩሹዋን ኤቅዳይሳታነ ህገ አስታማረ ግድዳ ጉꬃ አሳት ኤንታራ ፓላመይሳ በእዶሶና።
MAR 9:15 ሄ ዳሮ አሳይ የሱሳ በእዳ ዎደ ማላለትድ፥ ኤለስድ እያኮ ዎፅ ይድ፥ እያ ሳሮꬅዶሶና።
MAR 9:16 የሱሲ ባ ታማረታኮ፥ “ኤንታራ አይ ፓላሜቲ?” ያግድ ኦይችስ።
MAR 9:17 ሄ ዳሮ አሳ ግዶፈ እስ ኡራይ ዛሪድ፥ “አስታማርያዉ፥ ታ ናኣ ቦላ ኦደተꬅ ድግያ ቱና አያናይ ደእያ ግሾ፥ እያ ኔኮ ኤካዳ ያስ።
MAR 9:18 ሀ ቱና አያናይ እያ ኦይክያ ዎደ ኡባን፥ እያ ሾጭ የጌስ፤ እያ ዶናራ ጎፖንቶይ ዬስ፤ ቃስ አቸ ጋርጭሴስ፤ አሳተꬃይካ ምኔስ። እያፐ ሀ ቱና አያና ከሳና መላ፥ ነ ታማረታስ ኦዳስ፥ ሽን ከሳናዉ ዳንዳእቦኮና” ያግስ።
MAR 9:19 የሱሲ ዛሪድ ኤንታኮ፥ “አማኖና ሀ ዎድያ አሳዉ! ታኒ ህንተራ አዉደ ጋካናዉ ዳኔ? ቃስ ህንተና አዉደ ጋካናዉ ዳንዳአኔ? ናኣ ታኮ ሃ ኤክ ዪተ” ያግስ።
MAR 9:20 ኤንቲ ናኣ እያኮ ኤህዶሶና፤ ሄ ቱና አያናይ የሱሳ በእዳ መላ ናኣ ኮኮርስስ፤ ናአይ ሳአን ኩንድድ፥ ዶናራ ጎፖንቶይ ቶፉ ግሽን ጎንዶረትስ።
MAR 9:21 የሱሲ ሄ ናኣ አዋኮ፥ “ሀይስ ነ ናኣ ኦይኮሳፐ አይ መላ ዎደ ግዳኔ?” ያግድ ኦይችስ። ናኣ አዋይ፥ “እ ጉꬃን ደእሽን ኦይክስ።
MAR 9:22 እያ ዎꬋናዉ ዳሮ ዎደ ታማንነ ሃꬃን የጌስ፥ ሽን ነ ዳንዳእኮ፥ ኑስ ቃታርክ፥ ኑና ማዳርክ” ያግስ።
MAR 9:23 የሱሲ እያ፥ “ ‘ኔኒ ዳንዳእኮ ጋይ?’ አማንያ ኦደስካ ኡባባይ ዳንዳኤቴስ” ያግስ።
MAR 9:24 ኤለስድ ናኣ አዋይ ባ ቃላ ꬎቁ ኦꬅድ፥ “ታኒ አማናይስ፥ ሽን ጉጃ አማናናዳ ታና ማዳርክ” ያግስ።
MAR 9:25 የሱሲ አሳይ ዳር ዳር በይሳ በእድ፥ ቱና አያና፥ “ሀ ቱለነ ሙመ አያናዉ፥ ሀ ናኣፐ ከያ ጋዳ ነና ታ ኪታይስ፤ ቃስ ናምአንꬆ እያን ገሎፓ” ያግስ።
MAR 9:26 ሄ ቱና አያናይ ዋስድ፥ ናኣ ዳሮ ኮኮርስድ፥ እያፐ ከይስ። ናአይ ሀይቅዳ ዳንን፥ ዳሮ አሳይ፥ “ናአይ ሀይቅስ” ያግዶሶና።
MAR 9:27 ሽን የሱሲ ናኣ ኩሽያ ኦይክድ ደንꬅን፥ ናአይ ደንድ ኤቅስ።
MAR 9:28 የሱሲ ሶ ገልዳይሳፈ ጉየ፥ እያ ታማረት፥ “ኑኒ ሄ ቱና አያና ከሳናዉ አይስ ዳንዳእቦኮ?” ያግድ የሱሳ ዱማ ኦይችዶሶና።
MAR 9:29 የሱሲ ዛሪድ፥ “ሄሳ መላይ ዎሳፐነ ፆማፐ አትሽን፥ ሀራባን ከያናዉ ዳንዳኤና” ያግስ።
MAR 9:30 ኤንቲ ሄ በሳፈ ደንድድ፥ ጋልላራ አꬍድ ብዶሶና፤ የሱሲ ባ ደእያሱዋ ኦንካ ኤራና መላ ኮይቤና።
MAR 9:31 እ ባ ታማረታኮ፥ “አሳ ናኣ፥ አስ አሳስ አꬅድ እማናነ ዎꬋና፤ እ ሄꬑ ጋላሳፐ ጉየ፥ ሀይቆፐ ደንዳና” ያግድ ታማርሴስ።
MAR 9:32 ሽን ኤንታዉ እ ገይስ ገልቤና፤ ቃስ እያ ኦይቻናዉካ ያይዶሶና።
MAR 9:33 ኤንቲ ቅፍርናሆማ ካታማ ብድ ሶ ገልዳይሳፈ ጉየ፥ የሱሲ ኤንታኮ፥ “ኦገን አይ ኦደቴቲ?” ያግድ ኦይችስ።
MAR 9:34 ሽን ኤንቲ፥ “ኑ ግዶን ኡባፈ አꬋናይ ኦኔ?” ያግድ ፓላምዳ ግሾ፥ ስእ ግዶሶና።
MAR 9:35 የሱሲ ኡትድ፥ ታማነ ናምኡ ታማረታ ፄግድ፥ “ኦንካ ስን አꬋናዉ ኮይኮ፥ ኡባፈ ጉየ አꬍድ፥ ኡባስ አይለ ግዳናዉ በሴስ” ያግስ።
MAR 9:36 እስ ጉꬃ ናኣ ኤክድ፥ ኤንታ ግዶን ኤስስ፤ ሄ ጉꬃ ናኣ እድምድ ኤንታኮ፥
MAR 9:37 “ሀይሳ መላ ጉꬃ ናይታፐ እሱዋ ታ ሱንꬃን ሞክያ ኦንካ ታና ሞኬስ፤ ቃስ ታና ሞክያ ኦንካ ታና ኪትዳይሳካ ሞኬስፐ አትሽን፥ ታ ፃላላ ሞከና” ያግስ።
MAR 9:38 ዮሃንስ፥ “አስታማርያዉ፥ እስ አስ ነ ሱንꬃን ቱና አያናታ ከስሽን ኑኒ በእድ፥ ኑ ባጋ ግዶና ግሾ፥ እያ ድግዳ” ያግስ።
MAR 9:39 ሽን የሱሲ፥ “ኦንካ ታ ሱንꬃን ፆሳይ ኦꬅያ ማላታታ ኦꬅድ፥ ኤለስድ ታ ቦላ ኢታባ ኦደታናዉ ዳንዳኤይ ባይና ግሾ ድጎፍተ።
MAR 9:40 ኑባ እፆና ኡራይ ኑ ባጋ።
MAR 9:41 ታኒ ህንተዉ ቱማ ኦዳይስ፤ ህንተ ታባ ግድያ ግሾ፥ ኦንካ ህንተዉ ታ ሱንꬃን ሀሎ ሃꬅ ኡያናዉ እምኮካ፥ ባ ዎይቱዋ ኤካና።
MAR 9:42 “ታና አማንያ ሀ ጉꬃታፐ እሱዋ ባለꬅያ ኦንካ፥ ጋቻ ዎጋ ዎፃ ባ ቆን ቃችድ፥ አባን ዉልያኮ እያዉ ሎኦ።
MAR 9:43 ነ ኩሸይ ነና ባለꬅኮ፥ ቃንፃ ሆላ። ኔኒ ናምኡ ኩሸራ ቶኦና ጋናመ ታማን የገተይሳፈ፥ ዱፃ ኩሸራ ደኡዋ ገሎይ ነዉ ሎኦ።
MAR 9:45 ነ ቶሆይ ነና ባለꬅኮ፥ ቃንፃ ሆላ። ኔኒ ናምኡ ቶሁዋራ ጋናመ ታማን የገተይሳፈ፥ ዎበ ግዳዳ ደኡዋ ገለይስ ነዉ ሎኦ።
MAR 9:47 ነ አይፈይ ነና ባለꬅኮ፥ ዎጫ ከሳ ሆላ። ኔኒ ናምኡ አይፍያራ ጋናመ ታማን የገተይሳፈ፥ እስ አይፍያራ ፆሳ ካዎተꬃ ገለይስ ነዉ ሎኦ።
MAR 9:48 ያን ኤንታ ምያ ጉፁነይ ሀይቀና፥ ታማይካ ቶኤና።
MAR 9:49 “ያርሾይ ማፅነን ጌየይሳ መላ አስ ኡባይ ታማን ሀርቀታና።
MAR 9:50 ማፅነይ ሎኦ፥ ሽን እ ማልኦና እፅኮ፥ ዛሪድ ዋት ማልኤꬃኔ? ህንተናን ማፅነይ ደኦ። ያንድ፥ እሶይ እሱዋራ ሳሮተꬃን ደእተ” ያግስ።
MAR 10:1 የሱሲ ሄሳፈ ደንድድ፥ ይሁዳ ቢታ ብድ ዮርዳኖሰ ሻፋ ፕንስ። ዳሮ አሳይ ዛሪድ እያኮ ሺቅን፥ ካሰይሳዳካ ሄ አሳ ታማርስስ።
MAR 10:2 እስ እስ ፋርሳወት ፓጫናዉ ኮይድ የሱሳ፥ “እስ አስ ባ ማችዉ የዳና መላ ሙሰ ህገይ ኪቲ?” ያግድ እያ ኦይችዶሶና።
MAR 10:3 እ ዛሪድ፥ “ሙሰይ ህንተና ዎይግድ ኪትዴ?” ያግስ።
MAR 10:4 ኤንቲ፥ “ሙሰይ፥ ‘እስ አስ ባ ማቼስ አንጆ ዎርቃተ እምድ የዶ’ ግስ” ያግዶሶና።
MAR 10:5 የሱሲ ዛሪድ፥ ኤንታ “ህንተ ኦድን ስኦናይሳታ ግድያ ግሾ፥ ሙሰይ ሀ ኪታ ህንተዉ ፃፍስ።
MAR 10:6 ሽን ፆሳይ ኮይሮ መꬍያ ዎደ፥ አደነ ማጫ ኦꬅድ፥ ኤንታ መꬍስ።
MAR 10:7 ሄሳ ግሾ፥ እስ አስ ባ አዋነ ባ አይዉ አግድ፥ ባ ማቸራ እስፈ ደኤስ።
MAR 10:8 ኤንቲ ናምአይ እስ አሰ ግዶሶና፤ ህዛፐ፥ ኤንቲ እስ አሰ ግዶሶናፐ አትሽን፥ ናምኡ አስ ግዶኮና።
MAR 10:9 ሄሳ ግሾ፥ ፆሳይ እስፈ ቃችዳይሳ አስ ሻኮፎ” ያግስ።
MAR 10:10 ኤንቲ ሶ ስምዳ ዎደ፥ እያ ታማረት ሀ ኦዳባ የሱሳ ናምአንꬆ ኦይችዶሶና።
MAR 10:11 የሱሲ ኤንታኮ፥ “ባ ማችዉ የድድ ሀራ ኤክያ ኦንካ ላይማቴስ።
MAR 10:12 ቃስ ማጫስያካ ባ አዝናፐ ከያዳ ሀራ አዝና ገልኮ ላይማታዉሱ” ያግስ።
MAR 10:13 የሱሲ ጉꬃ ናይታ ቦላ ባ ኩሽያ ዎꬃና መላ፥ እስ እስ አሳይ ናይታ እያኮ ኤሆሶና፥ ሽን እያ ታማረት ሄ አሳ ሀንቀትዶሶና።
MAR 10:14 የሱሲ ሄሳ በእድ፥ ባ ታማረታ ሀንቀትድ፤ ኤንታኮ፥ “ጉꬃ ናይት ታኮ የይሳ ድጎፍተ፤ ፆሳ ካዎተꬃይ ሀይሳታ መላሳ።
MAR 10:15 ታኒ ህንተዉ ቱማ ኦዳይስ፤ ፆሳ ካዎተꬃ ጉꬃ ናአዳ ኤኮና ኡራይ ኦንካ ሄ ካዎተꬃ ኡባራካ ገለና” ያግስ።
MAR 10:16 ጉꬃ ናይታ እድምድ፥ ባ ኩሽያ ኤንታ እሱዋ እሱዋ ቦላ ዎꬅድ አንጅስ።
MAR 10:17 የሱሲ ባናዉ ከይዳ ዎደ፥ እስ ኡራይ ዎፅ ይድ፥ እያ ስንꬃን ጉልባትድ፥ “ኬሀ አስታማርያዉ፥ ታኒ መርና ደኦ ላታናዉ አይ ኦꬆ?” ያግድ ኦይችስ።
MAR 10:18 የሱሲ፥ “አይስ ታና ኬሀዉ ጋዳ ፄጋይ? ፆሳ ፃላላፐ አትሽን፥ ሀር ኬህ ኦንካ ባዋ።
MAR 10:19 ፆሳ ኪታ፥ ዎꬎፓ፤ ላይማቶፓ፤ ካይሶቶፓ፤ ዎርዶ ማርካቶፋ፤ እንፃርሳን ጭሞፋ፤ ነ አዋነ ነ አይዉ ቦንቻ ያገይሳ ኤራሳ” ያግስ።
MAR 10:20 ኡራይ፥ “አስታማርያዉ፥ ታኒ ሄሳ ኡባ ናአተꬃፈ ዶማዳ ሀእ ጋካናዉ ናጋይስ” ያግስ።
MAR 10:21 የሱሲ ኡራ ትሽ ኦꬅ ፄልድ ዶስስ፤ “ነዉ እስባይ ፓጬስ፤ ባዳ ነዉ ደእያባ ኡባ ባይዛዳ፥ ሄ ሚሽያ ማንቆታስ እማ፤ ኔኒ ሳሎን ዱረ ግዳና። ያታ ስማዳ ታና ካላ” ያግስ።
MAR 10:22 ሽን ኡራይ ሄሳ ስእድ፥ እ ዳሮ ዱረ ግድያ ግሾ፥ ባ ሶምኡዋ ካሬꬅስ፥ ኡፋይቶና አግድ ብስ።
MAR 10:23 የሱሲ ባ ታማረታ ዩሽ አꬅ ፄልድ፥ “ዱረ አስ ፆሳ ካዎተꬃ ገላናይስ ዋንድ መታንዴሻ!” ያግስ።
MAR 10:24 እያ ታማረት እያ ትምርትያ ስእድ ማላለትዶሶና። ሽን የሱሲ ቃስካ ኤንታኮ፥ “ናይቶ፥ ፆሳ ካዎተꬃ ገላናይስ ዋንድ መታንዴሻ!
MAR 10:25 ዱረ አስ ፆሳ ካዎተꬃ ገላናይሳፈ፥ ግማለይ ናርፐ ሉሆራ አይስ ካዉዬስ” ያግስ።
MAR 10:26 እያ ታማረት ማላለትድ፥ “ያትን፥ ኦን አታኔ?” ያግድ፥ እሶይ እሱዋ ኦይችዶሶና።
MAR 10:27 የሱሲ ኤንታ ትሽ ኦꬅ ፄልድ፥ “ሀይስ ፆሳስ ዳንዳኤተስፐ አትሽን፥ አሳስ ዳንዳኤተና፤ ፆሳስ ኡባባይ ዳንዳኤቴስ” ያግስ።
MAR 10:28 ጰፅሮስ የሱሳኮ፥ “ሄኮ፤ ኑኒ ኑባ ኡባ አግድ፥ ነና ካልዳ” ያግስ።
MAR 10:29 የሱሲ “ታኒ ህንተዉ ቱማ ኦዳይስ፤ ታ ግሾነ ዎንገላ ግሾ፥ ኬ ዎይኮ እሻታ ዎይኮ ምቸታ ዎይኮ አዋ ዎይኮ አዮ ዎይኮ ማችዉ ዎይኮ ናይታ ዎይኮ ጋደ አግዳ ኦንካ፥
MAR 10:30 ሀእ ሀ ዎድያን ፄቱ ኩሸ ኬꬃ፥ እሻታ፥ ምቸታ፥ አየታ፥ ናይታ፥ ጋድያ፥ ጎደተꬃራ እስፈ ኤካና። ስንꬃፈ ያና ዎድያንካ መርና ደኡዋ ኤካና።
MAR 10:31 ሽን ዳሮት ሀእ ደꬃን ስን ግድዳይሳት ጉየ ግዳና፥ ቃስ ዳሮት ሀእ ጉየ ግድዳይሳት ስን ግዳና” ያግስ።
MAR 10:32 የሱሳራነ እያ ታማረታራ የሩሳላመ ብሽን፥ የሱሲ ባ ታማረታ ስንꬃን ሄመቴስ። ኤንቲ ማላለትዶሶና። እያ ካለይሳትካ ያይዶሶና። ናምአንꬆ፥ ታማነ ናምኡ ታማረታ ጋፃ ከስድ፥ ባና ጋካናባ ዱማ ኤንታዉ ሀይሳዳ ያግድ ኦድስ።
MAR 10:33 “ሄኮ፥ ኑኒ የሩሳላመ ሀእ ከዮስ። ያን አሳ ናአይ፥ ካህነ ሀላቃታስነ ህገ አስታማረታስ አꬍድ እመታና። ኤንቲ እያ ቦላ ሀይቆ ፕርዳ ፕርዳና፤ ቃስ አይሁደ ግዶና ደርያስ እያ አꬅድ እማና።
MAR 10:34 አይሁደ ግዶና ደረይ እያ ቶቻና፥ እያ ቦላ ጩታና፥ ልሶን ጋራፋናነ ዎꬋና። እ ሄꬑ ጋላሳፐ ጉየ፥ ሀይቆፐ ደንዳና” ያግስ።
MAR 10:35 ዛብድዮሳ ናይት ያይቆብነ ዮሃንስ የሱሳኮ ይድ፥ “አስታማርያዉ፥ ኑኒ ነና ዎስያ እስባ ኑስ ኦꬃርክ” ያግዶሶና።
MAR 10:36 የሱሲ ኤንታኮ፥ “ታኒ ህንተዉ አይ ኦꬆ?” ያግስ።
MAR 10:37 ኤንቲ፥ “ኔኒ ነ ቦንቾ ካዎተꬃን ኡትያ ዎደ፥ ኑፐ እሱዋ ኡሻቻ ባጋራ ቃስ እሱዋ ሀድርሳ ባጋራ ኡትሳርክ” ያግዶሶና።
MAR 10:38 ሽን የሱሲ ኤንታኮ፥ “ህንተ አይ ዎስያኮ ኤረከታ፥ ታ ኡያናዉ ደእያ ፁኣ ኡያናዉ ዳንዳኤቲ? ቃስ ታኒ ፃማቀታናዉ ደእያ ፅንቃትያ ፃማቀታናዉ ዳንዳኤቲ?” ያግስ።
MAR 10:39 ኤንቲ ዛሪድ፥ “ኤ ዳንዳኦስ” ያግዶሶና። የሱሲ ቃስ፥ “ቱማካ ታ ኡያናዉ ደእያ ፁኣ ህንተ ኡያና፥ ታኒ ፃማቀታናዉ ደእያ ፅንቃትያ ህንተ ፃማቀታና።
MAR 10:40 ሽን ታፐ ኡሻቻ ባጋራነ ሀድርሳ ባጋራ ኡታናይሳታ ዶራናዉ ታዉ ማት ባዋ፥ ሽን ሄ በሳይ ፆሳይ እማናዉ ጊግስድ ዎꬅዳይሳታሳ” ያግስ።
MAR 10:41 ሀንኮ ታሙ ታማረት ሄሳ ስእዳ ዎደ፥ ያይቆባነ ዮሃንሳ ቦላ ሀንቀትዶሶና።
MAR 10:42 የሱሲ ኤንታ ኡባ ባኮ ፄግድ፥ “አይሁደ ግዶና አሳ ሀላቃት ደርያ ሃረይሳታ ጌተትድ ፄገተይሳነ ሃረይሳታስ ደርያ ቦላ ማት ደኤይሳ ህንተ ኤሬታ።
MAR 10:43 ሽን ህንተ ግዶን ሄሳ መላ ግደና፤ ህንተ ግዶን ግታታናዉ ኮየይ ኦንካ ህንተዉ አይለ ግዳናዉ በሴስ።
MAR 10:44 ቃስ ህንተ ግዶን ኡባፈ ቦላ ግዳናዉ ኮየይ ኦንካ ህንተ ኡባስ አይለ ግዳናዉ በሴስ።
MAR 10:45 ሀር አቶሽን፥ አሳ ናአይካ፥ አሳስ ኦꬃናዉነ ዳሮታ ዎዛናዉ ባ ሸምፑዋ አꬅድ እማናዉ ይስፐ አትሽን፥ አስ እያዉ ኦꬃና መላ ይቤና” ያግስ።
MAR 10:46 ኤንቲ እያርኮ ካታማ ብዶሶና። የሱሲ ባ ታማረታራነ ዳሮ አሳራ እያርኮፈ ከይሽን፥ ፅሞሳ ናአይ፥ ቆቀይ፥ ባርፅሞሳ ጌተተይስ፥ ኦገ ጋፃን ዎስሸ ኡትስ።
MAR 10:47 ባርፅሞስ፥ ያራ አይ ናዝረተ የሱሳ ግድዳይሳ ስእዳ ዎደ፥ ባ ቃላ ꬎቁ ኦꬅድ፥ “ዳዊታ ናኣ የሱሳ፥ ታና ማራርክ!” ያግድ ዋሶ ዶምስ።
MAR 10:48 ዳሮ አሳይ እያ፥ “ሀይዛ!” ግድ ሀንቀትዶሶና። ሽን፥ እ ባ ቃላ ካሰይሳፈ ዳሮ ꬎቁ ኦꬅድ፥ “ዳዊታ ናአዉ፥ ታና ማራርክ!” ያግስ።
MAR 10:49 የሱሲ ኤቅድ፥ “እያ ሃ ፄግተ” ያግስ። ኤንቲ ቆቅያኮ፥ “አይኮይ ባዋ፥ ደንዳ ኤቃ፥ ነና ፄጌስ” ያግዶሶና።
MAR 10:50 ቆቀይ ባ ማኡዋ ሆል የግድ፥ ጉፕ ደንድ ኤቅድ፥ የሱሳኮ ብስ።
MAR 10:51 የሱሲ፥ “ታኒ ነዉ አይ ኦꬃና መላ ኮያይ?” ያግስ። ቆቀይ፥ “አስታማርያዉ፥ ታ ፄላናዉ ኮያይስ” ያግስ።
MAR 10:52 የሱሲ፥ “ባ፥ ነ አማኖይ ነና ፓꬅስ” ያግስ። ኢራካ እያ አይፈይ ፄልን፥ የሱሳ ካልስ።
MAR 11:1 ኤንቲ የሩሳላመ ማትሸ፥ ሻማሆ ዙማ ማታን ደእያ ቤተፋገነ ብታነ ካታማታ ጋክዶሶና። የሱሲ ባ ታማረታፐ ናምአታ ስን ኪትድ፥
MAR 11:2 “ህንተፈ ስንꬃን ደእያ ጉታ ቢተ፤ ያ ገልዳ መላ ኦንካ ቶግቦና ቃሾን ደእያ ሀረ ማር ህንተ ደማና፥ እያ ብልድ፥ ሃ ኤክ ዪተ።
MAR 11:3 ኦንካ ህንተና፥ ‘ሀይሳ አይስ ኦቲ?’ ያግድ ኦይችኮ፥ ‘ጎዳይ እያ ኮዬስ፥ ኤለስድ ሃ የዳና’ ያግተ” ያግስ።
MAR 11:4 ኤንቲ ብድ፥ ሀረ ማር ካረ ቦላ ኦገ ማታን ቃሸትድ ደኤይሳ ደምድ ብልዶሶና።
MAR 11:5 ሄ በሳን ኤቅዳ እስ እስ አሳት ኤንታኮ፥ “ሀረ ማራ ዋታናዉ ብሌቲ?” ያግድ ኦይችዶሶና።
MAR 11:6 እያ ታማረት የሱሲ ባንታና ኪትዳይሳ ኦድን፥ አሳት የድ አግዶሶና።
MAR 11:7 ኤንቲ ሀረ ማራ የሱሳኮ ኤህድ፥ ባንታ ማኡዋ እያ ዞኮን ሂፅን የሱሲ ሄ ሀረ ማራ ቶግስ።
MAR 11:8 ዳሮ አሳይ ባንታ ማኡዋ ኦግያን ሂፅዶሶና፤ ቃስ ሀራት ምꬃ ታሸ ታሽድ፥ ኦገን ሂፅዶሶና።
MAR 11:9 የሱሳፐ ስንꬃራ ሄመትያ አሳይነ እያ ካልያ አሳይ ባንታ ቃላ ꬎቁ ኦꬅድ፥ “ሆሳና! ፆሳይ ጋላተቶ! ጎዳ ሱንꬃን የይስ አንጀትዳይሳ።
MAR 11:10 ጎዳ ሱንꬃን ያ ኑ አዋ ዳዊታ ካዎተꬃይ አንጀትዳይሳ። ኡባፈ ቦላ ሳሎን ደእያ ፆሳይ ጋላተቶ” ያግዶሶና።
MAR 11:11 የሱሲ የሩሳላመ ብድ፥ ፆሳ ኬꬃ ገልስ። ቃስ ኡባባ ዩይ ፄልዳፐ ጉየ፥ ሳእ ቃምያ ግሾ፥ ታማነ ናምኡ ታማረታራ ብታነ ካታማ ብስ።
MAR 11:12 ዎንተꬃ ጋላስ ኤንቲ ብታነፐ ከይድ ብሽን፥ የሱሲ ኮሻትስ።
MAR 11:13 ሃሆን እስ ባላሰ ምꬅዉ ሀይꬃ ፃላላ ማአ ኡትዳሮ በእድ፥ እ ቦላ አይፈይ በንትኮ ግድ፥ በአናዉ ኢኮ ብስ፥ ሽን ኢኮ እ ብያ ዎደ፥ ሀይꬃ ፃላላፐ አትሽን፥ እስ አይፈካ ደምቤና፤ አይስ ጊኮ፥ ባላሰይ አይፍያ ዎደይ ጋክቤና።
MAR 11:14 የሱሲ ሄ ባላስዉ፥ “ህዛ፥ አስ ኔፐ መርናዉ አይፈ ሞፖ” ያግስ። እያ ታማረት እ ገይሳ ስእዶሶና።
MAR 11:15 ኤንቲ የሩሳላመ ብዶሶና፤ የሱሲ ፆሳ ኬꬅ ገልድ፥ ያን ባይዘይሳታነ ሻመይሳታ ካረ ጎዶ ኦይክስ፤ ቃስ ሚሸ ላመይሳታ ፃርጴዛነ ሆለ ባይዘይሳታ ኦይድያ ሽር የግድ፥
MAR 11:16 አስ አይብባካ ቶክድ፥ ፆሳ ኬꬃ ግዶራ አꬎና መላ ድግስ።
MAR 11:17 የሱሲ አሳ ሀይሳዳ ያግድ ታማርስስ፦ “ጌሻ ማፃፋን፥ ‘ታ ኬꬃይ አስ ኡባይ ፆሳ ዎስያ ኬꬅ ግዳና’ ጌተትድ ፃፈትስ። ሽን ህንተ እያ ፓንጋት ቆሰትያ ጎንጎሎ ኦꬅደታ” ያግስ።
MAR 11:18 ካህነ ሀላቃትነ ህገ አስታማረት ሄሳ ስእድ፥ እያ ዎꬋናዉ ኦገ ኮይዶሶና። ሽን ዳሮ አሳይ እያ ትምርትያን ማላለትያ ግሾ፥ እያዉ ባብዶሶና።
MAR 11:19 ሳአይ ኦማርስያ ዎደ የሱሲነ እያ ታማረት ካታማፐ ጋፃ ከይዶሶና።
MAR 11:20 ኤንቲ ዎንተꬃ ጋላስ ሄ ኦግያራ አꬍሸ፥ ሄ ባላስያ ፃጶራ መልዳሮ በእዶሶና።
MAR 11:21 ጰፅሮስ አኬክድ፥ “አስታማርያዉ፥ ሄኮ፥ ኔኒ ባድዳ ባላስያ መላሱ” ያግስ።
MAR 11:22 የሱሲ ዛሪድ፥ “ፆሳ አማንተ።
MAR 11:23 ታኒ ህንተዉ ቱማ ኦዳይስ፤ ኦንካ ባ ዎዛናን ስꬎና ግዳባይ ሀናናይሳ አማንድ፥ ሀ ዙማ፥ ‘ደንዳዳ አባን ኩንዳ’ ያግኮ እያዉ ሀናና።
MAR 11:24 ሄሳ ግሾ፥ ታኒ ህንተዉ ኦዳይስ፤ ፆሳ ህንተ ዎስያባነ ኦይችያባ አይባ ግድኮካ ኤክዳዳ አማንተ፥ ህንተ ኤካና።
MAR 11:25 ፆሳ ዎሳናዉ ህንተ ኤቅያ ዎደ፥ ሳሎን ደእያ ህንተ አዋይ ህንተ ናጋራ አቶ ጋና መላ፥ ኦንካ ህንተና ናቅዳባይ ደእኮ፥ እያዉ አቶ ጊተ።
MAR 11:26 ሽን አሳ ናጋራ ህንተ አቶ ጎና እፅኮ፥ ሳሎን ደእያ ህንተ አዋይካ ህንተ ናጋራ ህንተዉ አቶ ጌና” ያግስ።
MAR 11:27 ኤንቲ ዛሪድ የሩሳላመ ብዶሶና። የሱሲ ፆሳ ኬꬃን ሄመትሽን፥ ካህነ ሀላቃት፥ ህገ አስታማረትነ ጭማት እያኮ ይድ፥
MAR 11:28 “ኔኒ ሀይሳ ኦꬃናዉ ነዉ አይ ማት ደኢ? ዎይኮ ነዉ ሀ ማታ እምዳይ ኦኔ?” ያግዶሶና።
MAR 11:29 የሱሲ ዛሪድ፥ “ታ ህንተና እስባ ኦይቻና፥ ታዉ ኦድተ። ታ ቃስ ሀይሳ አይ ማታን ኦꬅያኮ፥ ህንተዉ ኦዳና።
MAR 11:30 ዮሃንሳ ፅንቃተይ ፆሳፈየ ዎይኮ አሳፔ? ታዉ ኦድተ” ያግስ።
MAR 11:31 ኤንቲ ባንታ ግዶን ፓላማ ዶምድ፥ “ኑኒ፥ ‘ፆሳፈ’ ጊኮ፥ እ ኑኮ፥ ‘ያትን፥ ዮሃንስ ኦድዳይሳ አይስ አማንበከቲ?’ ያጋና።
MAR 11:32 ‘አሳፐ ጊኮ’ አሳ ኡባይ ዮሃንስ ናበ ግደይሳ ኤሮሶና።” ሄሳ ግሾ፥ አሳስ ያይዶሶና።
MAR 11:33 ሄሳ ግሾ፥ ኤንቲ የሱሳኮ፥ “ኑኒ ኤሮኮ” ያግድ ዛርዶሶና። የሱሲ፥ “ታንካ ሀይሳ አይ ማታን ኦꬅያኮ፥ ህንተዉ ኦድከ” ያግስ።
MAR 12:1 የሱሲ ኤንታዉ ሌምሶን ያግድ ኦድስ፦ “እስ ኡራይ ዎይነ ቶክድ፥ እያ ዩሾን ድርስ ድርስ። ቃስ ሄ ዎይነ ጉምእያ ኦላ ቦክስ። እያ ናጋናዉ አዱሳ ሻኮ ሻክስ። ሄሳፈ ጉየ፥ ኮ ኦꬅያ አሳስ እምድ፥ ሀራ ቢታ ብስ።
MAR 12:2 ዎይነ አይፍያ ማፅያ ዎደይ ጋክን፥ ባና ጋክያ ግሹዋ ኤሀና መላ፥ እስ ባ አይልያ ኮ አዋታኮ የድስ።
MAR 12:3 ኮ አዋት እያ አይልያ ኦይክድ ዋꬍድ፥ መላ ኩሸ የድዶሶና።
MAR 12:4 ናምአንꬆ ሀራ አይለ ኤንታኮ ኪትን፥ ኤንቲ ሄ አይልያ ሁጵያ ቆእድ ካዉሽድ የድዶሶና።
MAR 12:5 ዎይነ አታክልትያ ጎዳይ ቃስካ ሀራ አይለ ኪትስ። ሄ አይልያ ዎꬍዶሶና፥ ቃስ ሀራ ዳሮታ ሄሳዳ ኦꬅዶሶና፥ እሶታ እሶታ ዋꬍድ፥ ሀራታ ዎꬍዶሶና።
MAR 12:6 “ዎይነ አታክልትያ ጎዳስ ኪታናዉ ኡባፈ ዉርሰꬃን እ ዳሮ ዶስያ ባ ናኣ ፃላል አትስ። እ፥ ‘ኤንቲ ታ ናኣ ቦንቾና አጎኮና’ ግድ፥ ባ ናኣ ኤንታኮ ኪትስ።
MAR 12:7 “ሽን ኮ አዋት ባንታ ግዶን፥ ‘ላታናይስ ሀይሳ፤ የꬍተ እያ ዎꬎኦስ፤ እያ ላታይ ኑባ ግዳና!’ ያግዶሶና።
MAR 12:8 ናኣ ኦይክድ ዎꬍድ፥ እያ አሀ ዎይነ ጋድያ ግዶፈ ጋፃ ከስድ የግዶሶና።
MAR 12:9 “ህዛ፥ ዎይነ ጋድያ ጎዳይ ዋታኔ? ይድ ሄ ኮ አዋታ ዎꬍ ኦንግድ፥ ዎይንያ ኮ ኦꬅያ ሀራ አሳስ እማና።
MAR 12:10 “ ‘ግምበይሳት ቦርድ እፅዳ ሹቻይ ጎዳ ፃጱዋ ምንꬅያ፥ ኡባፈ አꬍያ ሹቹ ግድስ። ሀይስ ጎዳይ ኦꬅዳባ፤ ቃስ ኑ አይፍያስካ ማላልስያባ’ ያገይሳ ጌሻ ማፃፋፐ ናባብበከቲ?” ያግስ።
MAR 12:12 ካህነ ሀላቃት፥ ህገ አስታማረትነ ጭማት የሱሲ ሄ ሌምሱዋ ባንታ ቦላ ሌምስዳይሳ ኤርዳ ግሾ፥ እያ ኦይካናዉ ኮይዶሶና፥ ሽን አሳስ ያይድ፥ አግድ ብዶሶና።
MAR 12:13 ቃስ እያ ኦዳፐ ባላ ደምድ፥ እያ ኦይካና መላ፥ ፋርሳወታፐነ ሄሮዲሳ ባጋታፐ ጉꬃ አሳታ እያኮ ኪትዶሶና።
MAR 12:14 ኤንቲ እያኮ ይድ፥ “አስታማርያዉ፥ ኔኒ ቱማ ኦደተይሳነ አሳፐ አሰ ሻኮናይሳ ኑኒ ኤሮስ። ኔኒ አሰ ዱማያካ፤ ቃስ ፆሳ ኦግያ ቱማተꬃን ታማርሳሳ። ኑኒ ሮመ ቢታ ካዋ ቄሳረስ ጊራ ጊረይስ ዎገየ ዎጋ ግደኔ? ጊራ ጊራነ አጋኔ?” ያግዶሶና።
MAR 12:15 ሽን የሱሲ ኤንታ ጩቦተꬃ ኤርድ፥ “ታና አይስ ፓጨቲ? አነ እስ ሳንትመ ታና በስተ” ያግስ።
MAR 12:16 ኤንቲ እያዉ ኤህዶሶና፥ “ሀ ምስለይነ ሱንꬃይ ኦደባዬ?” ያግድ ኤንታ ኦይችስ። ኤንቲ፥ “ሮመ ካዋ ቄሳረይሳ” ያግዶሶና።
MAR 12:17 የሱሲ ዛሪድ፥ “ያትኮ፥ ቄሳረባ ቄሳረስ፥ ፆሳባ ፆሳስ እምተ” ያግን ኤንቲ እያባ ማላለትዶሶና።
MAR 12:18 ሀይቅዳ አስ ደንደና ግያ ሳዱቃወታፐ እስ እስ አሳት የሱሳኮ ይድ፥ ሀይሳዳ ያግድ፥ እያ ኦይችዶሶና።
MAR 12:19 “አስታማርያዉ፥ ሙሰይ ኑስ ህግያ ፃፍሸ፥ ‘ማቾ ኤክዳ አስ ናአ የሎና ሀይቅኮ፥ ሄ ሀይቅዳይሳ እሻይ እያ ማችዉ ኤክድ፥ ባ እሻስ ናአ የላናዉ በሴስ’ ያግስ።
MAR 12:20 በን ዎደ ላፑን እሻት ደኤይሳታፐ ባይራይ ማቾ ኤክድ፥ ናአ የሎና ሀይቅስ።
MAR 12:21 ናምአንꬆይ እዮ ኤክስ፥ እካ ናአ የሎና ሀይቅስ። ሄꬓንꬆይካ ሄሳዳ ሀንስ።
MAR 12:22 ላፑናትካ ሄሳꬆ እዮ ኤክድ፥ ናአ የሎና ሀይቅዶሶና። ኡባፈ ጉየ፥ ቃስ ሄ ማጫስያ ሀይቃሱ።
MAR 12:23 ያትን፥ ላፑናት እዮ ኤክዳ ግሾ ሀይቅዳ አሳይ ሀይቆፐ ደንድያ ጋላስ፥ እያ ኤንታፈ አዉሳስ ማቾ ግዳኔ?” ያግዶሶና።
MAR 12:24 የሱሲ ዛሪድ፥ “ህንተ ባለተይ፥ ጌሻ ማፃፋታ ዎይኮ ፆሳ ዎልቃ ኤሮና ግሾሳ!
MAR 12:25 ሀይቅዳ አሳይ ሀይቆፐ ደንድያ ጋላስ፥ ሳሎን ደእያ ኪታንቾታ መላ ግዳናፐ አትሽን፥ ኤኮኮና፤ ገለኮና።
MAR 12:26 ሽን ሀይቅዳይሳታ ደንዱዋባ ግድኮ፥ ሙሰ ማፃፋን ፃፈትዳ ፁገትያ ቱሽያባ ኦድያ በሳን፥ ፆሳይ ሙሰኮ፥ ‘ታኒ፥ አብራሃመ ፆሳ፥ ይሳቃ ፆሳ፥ ያይቆባ ፆሳ’ ግዳይሳ ናባብበከቲ?
MAR 12:27 ሄሳ ግሾ፥ እ፥ ፓፃ ደኤይሳታ ፆሳፈ አትሽን፥ ሀይቅዳይሳታ ፆሰ ግደና። ህንተ ዳሮ ባልደታ” ያግስ።
MAR 12:28 ህገ አስታማረታፐ እሶይ ኤንቲ ፓላመይሳ ሺቅድ ስእስ። ቃስ የሱሲ ኤንታዉ ሎይꬅ ዛርዳይሳ ስእድ፥ “ኪታ ኡባፈ አꬍያ ኪታይ አዉሴ?” ያግድ የሱሳ ኦይችስ።
MAR 12:29 የሱሲ ዛሪድ፥ እያ ሀይሳዳ ያግስ፦ “ኪታ ኡባፈ አꬍያ ኪታ ስእተ፤ ‘እስራኤለ አሳዉ፥ ጎዳይ ኑ ፆሳይ እስ ጎዳ።
MAR 12:30 ነ ጎዳ ነ ፆሳ ነ ኩመꬃ ዎዛናፐ፥ ነ ኩመꬃ ሸምፑዋፈ፥ ነ ኩመꬃ ቆፋፐ፥ ነ ኩመꬃ ዎልቃፈ ዶሳ’ ያጌስ።
MAR 12:31 ቃስ ኪታ ኡባፈ አꬍያ ናምአንꬆ ኪታይ ሀይሳ፤ ‘አሰ ኡባ ነ ሁጵያዳ ዶሳ’ ያገይሳ፤ ሀይሳታፐ አꬍያ ሀራ ኪት ባዋ” ያግስ።
MAR 12:32 ህገ አስታማረይ የሱሳኮ፥ “አስታማርያዉ፥ ቱማ ጋዳሳ፤ ኔኒ ‘ፆሳይ እስ ፆሳ ፃላላ። እያፐ አትሽን፥ ሀር ባዋ’ ግዳይስ ቱማ።
MAR 12:33 ፆሳ ኩመꬃ ዎዛናፐ፥ ኩመꬃ ቆፋፐነ ኩመꬃ ዎልቃፈ ዶሰይስነ ቃስ አሰ ኡባ ባ ሁጵያዳ ዶሰይስ፥ ፁሳ ያርሾፈነ ሀራ ያርሾ ኡባፈ አꬌስ” ያግስ።
MAR 12:34 የሱሲ ህገ አስታማርያ ዛሮይ አꬍዳ ኤራንቾ አሳ ዛሮ ግድዳይሳ በእድ፥ “ኔኒ ፆሳ ካዎተꬃፈ ሃካባካ” ያግስ፤ ሄሳፈ ጉየ፥ የሱሳ ሀራባ ኦይቻናዉ ኦንካ ምንቤና።
MAR 12:35 የሱሲ ፆሳ ኬꬃን ታማርስሸ፥ ሀይሳዳ ያግስ፦ “ህገ አስታማረት ክርስቶሳ ዎይግድ ዳዊታ ናአ ጎና?
MAR 12:36 ዳዊቲ ጌሻ አያናን ኩምድ፥ “ ‘ጎዳይ፥ ታ ጎዳ፥ “ታኒ ነ ሞርከታ ነ ቶሆይ የꬍያሶ ኦꬃና ጋካናዉ፥ ሀይሳን ታፐ ኡሻቻ ባጋራ ኡታ” ግስ’ ያግስ።
MAR 12:37 ዳዊቲ ባ ሁጰን ክርስቶሳ፥ ‘ጎዳ’ ግድ ፄግኮ፥ ያትን፥ ክርስቶስ ዋንድ፥ ዳዊታ ናአ ግድ?” ያግስ። ዳሮ አሳይ የሱሲ ገይሳ ኡፋይሳን ስእዶሶና።
MAR 12:38 የሱሲ ታማርስሸ፥ ሀይሳዳ ያግስ፦ “ህገ አስታማረታፐ ናገትተ፤ ኤንቲ አዱሳ ማኦ ማእድ ዩየይሳነ ግያንካ አሳይ ኤንታ ቦንችድ ሳሮይሳ ዶሶሶና።
MAR 12:39 ኤንቲ አይሁደ ዎሳ ኬꬃታን ዳሮ ሎእያ ኦይድያ ዶሶሶና፤ ቃስ አስ ባንታና ሞክያ በሳን ቦንቾ በሲ ዶሶሶና።
MAR 12:40 ኤንቲ አምኤታ ኬꬃ ቦንቅድ፥ ባንታዉ ሎኦ ዳናናዉ ዎሳ አዱሶሶና፤ ኤንቲ ኡባፈ አꬍያ ፕርዳ ኤካና” ያግስ።
MAR 12:41 የሱሲ ፆሳ ኬꬃን ሙፃታ የግያ ሳፅንያ ማታን ኡትድ፥ አሳይ ባ ሚሽያ ሄ ሳፅንያን የገይሳ በእስ፤ ዳሮ ዱረ አሳይ ዳሮ ሚሽያ ሄ ሳፅንያን የጎሶና።
MAR 12:42 እስ ማንቆ አምእያ ያዳ፥ ናምኡ ባካና ሄ ሳፅንያን የጋሱ።
MAR 12:43 የሱሲ ባ ታማረታ ፄግድ፥ “ታኒ ህንተዉ ቱማ ኦዳይስ፤ ሙፃታ ሳፅንያን የግዳ አሳ ኡባፈ ሀ ማንቆ አምእያ ዳርሳዳ የጋሱ።
MAR 12:44 አይስ ጊኮ፥ ሀራት ኡባይ ባንታዉ ፓላህዳ ሚሽያፐ የግዶሶና። ሽን እያ ባ ፓጫፐ፥ ባዉ ደእያ አቁዋ ኩመꬅ እማሱ” ያግስ።
MAR 13:1 የሱሲ ፆሳ ኬꬃፈ ከይሽን፥ እያ ታማረታፐ እሶይ፥ “አስታማርያዉ፥ ሀ ሎኦ ሹቻነ ሀ ሎኦ ሹቻ ኬꬃ በአይ!” ያግስ።
MAR 13:2 የሱሲ ዛሪድ፥ “ሀ ግታ ሹቻ ኬꬃ በአይ? ሀ ኬꬃይ ሹች ሹቻ ቦላ ግምበትዳ መላ ላለቶና አተና፤ እስ ሹችካ አቶና ኡባይ ላለታና” ያግስ።
MAR 13:3 የሱሲ ፆሳ ኬꬃፈ ህን ባጋራ ሻማሆ ዙማ ቦላ ኡትዳሽን፥ ጰፅሮስ፥ ያይቆብ፥ ዮሃንስነ እንድርያስ ባንታርካ እያኮ ይድ፥
MAR 13:4 “ሀይስ አዉደ ሀናኔኮ፥ ኑስ ኦዳ፤ ሀ ኡባይ ፖለታና ዎድያ ኤርስያ ማላታይ አይቤ?” ያግድ ኦይችዶሶና።
MAR 13:5 የሱሲ ቃስ ኤንታኮ ሀይሳዳ ያግድ ኦድስ። “ህንተና ኦንካ ባለꬆና መላ ናገትተ።
MAR 13:6 ዳሮ አሳት ታ ሱንꬃን፥ ‘ታኒ ክርስቶሳ’ ያግድ ታማርስሸ ይድ፥ ዳሮ አሳ ባለꬃና።
MAR 13:7 ማታን ደእያ ኦላነ ሃሆን ደእያ ኦላ ዎረ ህንተ ስእያ ዎደ ህርጎፍተ። ሄሳ መላባይ ሀናናዉ በሴስ፥ ሽን ዉርሰꬃይ ቡሮና።
MAR 13:8 እስ ቢታ አሳይ ሀራ ቢታ አሳራ ኦለታና፤ ቃስ እስ ካዎተꬃይ ሀራ ካዎተꬃታራ ኦለታና፤ ቢታ ቃፆይ ኡባ በሳን ሀናና፤ ኮሻይ ዳና፥ ሽን ሄስ ኡባይ የሎ እቀꬃስ ዞከ መላ።
MAR 13:9 “ሽን ህንተ፥ ህንተ ሁጰን ናገትተ። አይስ ጊኮ፥ አስ ህንተና ኦይክድ፥ ፕርዳ ኬꬃስ አꬅድ እማና፤ ቃስ አይሁደ ዎሳ ኬꬃታንካ ህንተና ልሶን ጋራፋና፤ ደርያ ሃረይሳታ ስንꬃንነ ካዎታ ስንꬃን ታ ግሾ ህንተ ማርካታናዉ ኤቃና።
MAR 13:10 ዉርሰꬃይ ጋካናፐ ስን ዎንገላይ ኮይሮ ደረ ኡባስ ኦደታናዉ በሴስ።
MAR 13:11 ኤንቲ ህንተና ፕርዳ ኬꬅ ኤህያ ዎደነ አꬅድ እምያ ዎደ፥ ዎይግድ ኦዳነኮ ኮይሮ ህርጎፍተ፤ ሄ ሳትያን ፆሳይ ህንተዉ እምያባ ኦድተ። ህንተናን ጌሻ አያናይ ኦደቴስፐ አትሽን፥ ህንተና ግደከታ።
MAR 13:12 “እሻይ ባ እሻ፥ አዋይ ባ ናኣ ዎꬍሳና። ናይት ባንታና የልዳይሳታ ቦላ ደንድድ፥ ኤንታ ዎꬍሳና።
MAR 13:13 አሳ ኡባይ ህንተና ታ ሱንꬃ ግሾ እፃና፥ ሽን ዉርሰꬅ ጋካናዉ ምንዳይ አታና።
MAR 13:14 “ሽን ꬋዮ ቱናተꬃይ ኤቃናዉ በሶና በሳን ኤቅዳሽን ህንተ በአና።” (አኬክሶ፦ ሄስ ዎይ ጉሰኮ ናባበይስ አኬኮ!) “ይሁዳ ቢታን ሄ ዎደ ደኤይሳት ደርያኮ ባቃቶ።
MAR 13:15 ኬꬃ ሁጰን ደእያ ኡራይካ እስባ ኤካናዉ ዱገ ዎꬍድ፥ ባ ሶ ገሎፖ።
MAR 13:16 ጋደን ደኤይስ ባ ማኡዋ ኤካናዉ ጉየ ስሞፎ።
MAR 13:17 ሄ ዎደ ቃንꬃትዳ ማጫሳታስነ ꬋንꬅያ ማጫሳታስ ዳሮ ኡንአ ግዳና።
MAR 13:18 ሽን ሀይስ ኡባይ ሀንያ ዎደይ ባልጎ ግዶና መላ፥ ፆሳ ዎስተ።
MAR 13:19 አይስ ጊኮ፥ ፆሳይ አላምያ መꬍዳ ዎድያፐ ዶምድ፥ ሀእ ጋካናዉ ሀንቦና መቶይነ ስንꬃፈካ ሀኖና መቶይ አሳ ቦላ ሄ ዎደ ሀናና።
MAR 13:20 ጎዳይ ሄ ጋላሳታ ታይቡዋ ጉꬆናኮ፥ አሰ ግድዳይ ኦንካ አተና። ሽን እ ባ ዶርዳ አሳ ግሾ፥ ሄ ጋላሳታ ታይቡዋ ጉꬄስ።
MAR 13:21 “ሄ ዎደ ኦንካ ህንተና፥ ‘ሄኮ፥ ክርስቶስ ሀይሳን ደኤስ ዎይኮ ክርስቶስ ህንን ደኤስ’ ያግኮ፥ ሄሳ አማኖፕተ።
MAR 13:22 ዎርዳንቾ ክርስቶሳትነ ዎርዶ ናበት ደንድድ ባንታዉ ዳንዳኤትኮ፥ ሀር አቶሽን ፆሳይ ዶርዳይሳታካ ባለꬃናዉ ማላታታነ ማላልስያባታ በሳና።
MAR 13:23 ሽን ህንተ ናገትተ፤ ታኒ ህንተዉ ኡባባ ካሰታዳ ኦዳስ።
MAR 13:24 “ሽን ሄ ዎደ ሄ ዋያፐ ጉየ፥ አዋይ ꬉማና፤ አጌናይ ፖኡዋ አጋና።
MAR 13:25 ፆልንቶት ሳሎፐ ኩንዳና፤ ቃስ ሳሎን ደእያ ዎልቃትካ ቃፃና።
MAR 13:26 ሄ ዎደ አሳ ናአይ፥ ግታ ዎልቃራነ ቦንቹዋራ ሻራ ግዶራ ይሽን ኤንቲ በአና።
MAR 13:27 ሄ ዎደ ታኒ ኪታንቾታ ሳአ ኦይዱ ባጋ ኪታና፤ ሳአ ጋፃፐ ሳሎ ጋፃ ጋካናዉ፥ ፆሳይ ዶርዳ አሳ ሺሻና።
MAR 13:28 “ሌምሱዋ ባላሰ ምꬃፈ አኬክተ፤ ባላስያ አጭያ ዎደነ እ ሀይꬃይ ጭልእያ ዎደ፥ ቶርቸይ ማታትዳይሳ ህንተ ኤሬታ።
MAR 13:29 ሄሳዳካ፥ ህንተ ሄ ኡባባይ ሀነይሳ በእያ ዎደ፥ እ ማትድ ፐንገ ጋክዳይሳ ኤርተ።
MAR 13:30 ታኒ ህንተዉ ቱማ ኦዳይስ፤ ሀ ኡባባይ ሀናና ጋካናዉ ሀይሳን ደእያ አሳ ኡባይ ሀይቀና።
MAR 13:31 ሳሎይነ ሳእ አꬋና፥ ሽን ታ ቃላይ አና።
MAR 13:32 “ሽን ሄ ጋላሳነ ሄ ሳትያ አዋ ፃላላፐ አትሽን፥ ሀር አቶሽን ሳሎን ደእያ ኪታንቾታ ግድን ዎይኮ ናኣ ግድን ኦንካ ኤረይ ባዋ።
MAR 13:33 ሄ ዎደይ አዉደ ግዳኔኮ፥ ህንተ ኤሮና ግሾ፥ ናገትተነ ምንተ።
MAR 13:34 ታ ዩሳይ፥ ባ ኬꬃ አግድ፥ ኦገ ብያ አሳ መላ። ኡራይ ባ አይለታስ ሁጰን ሁጰን ኦሶ እምድ ኤንታ ባ ኦሱዋ ቦላ አዋ ኦꬅስ፤ ቃስ ናገይስ ምንꬅድ ናጋና መላ ኪትስ።
MAR 13:35 “ሄሳ ግሾ፥ ምንተ። አይስ ጊኮ፥ ጎዳይ ኦማርስ ግድን ዎይኮ ግድ ብላሄ ግድን ዎይኮ ኩቶ ዋሶ ግድን ዎይኮ ዎንት ማ ግድን አዉደ ያነኮ፥ ህንተ ኤረከታ።
MAR 13:36 ህንተ አኬኮና እ ይድ ህንተ ꬍስክድ ደእሽን ደሞና መላ ምንተ።
MAR 13:37 ታኒ ህንተዉ ኦደይሳ አሳ ኡባስ ኦዳይስ፤ ምንተ” ያግስ።
MAR 14:1 ፓስካ ባኣለ ቦንችያ ጋላስነ ኡይꬃ ባኣለ ቦንችያ ጋላስ ጋካናዉ ናምኡ ጋላስ አትስ። ካህነ ሀላቃትነ ህገ አስታማረት አስ ኤሮና የሱሳ ኦይክድ ዎꬍያ ኦገ ኮዮሶና።
MAR 14:2 “አሳይ ኦሽ ከሶና መላ ፓስካ ቦንችያ ጋላሳን ሄሳ ኦꬆኮ” ያግዶሶና።
MAR 14:3 የሱሲ ብታነ ካታማን ባሮ ሀርጋንቾ ግድዳ ስሞና ሶን ግብራ ቦላ ኡትዳሽን፥ እስ ማጫስያ አልባስፅሮሳ ሹቻፈ ኦሰትዳ ጵልቃፀ ኩመꬃ ናርዶሰ ጌተትያ ዳሮ አልኦ ሽቶ ኤካዳ ያሱ። ሄ ጵልቃፀ መንꬃዳ ሽቱዋ የሱሳ ሁጰን ትጋሱ።
MAR 14:4 ሄ በሳን ደእያ አሳፐ እሶት እሶት ሀንቀትድ፥ “ሀ ሽቶይ መላ ጮ ኢተይ አይብሴ?
MAR 14:5 ሀ ሽቱዋ ሄꬑ ፄቱ ድናረን ባይዝድ፥ ሚሽያ ማንቆታስ እማናዉ ዳንዳኤቴስ” ያግድ ባንታ ግዶን ኦደትዶሶና። ያትድ፥ ሄ ማጫስዉ ዳሮ ቦርዶሶና።
MAR 14:6 ሽን የሱሲ “ሀ ማጫስዉ አይኮካ ጎፕተ፤ እዮ አይስ ዋይሰቲ? እያ ታዉ ሎኦባ ኦꬃሱ።
MAR 14:7 ማንቆት ኡባ ዎደ ህንተራ ደኦሶና። ህንተ ኮይዳ ዎደ አዉደካ ህንተ ኤንታ ማዳናዉ ዳንዳኤታ፥ ሽን ታኒ ኡባ ዎደ ህንተራ ደእከ።
MAR 14:8 እያ ባ ዳንዳእዳይሳ ኦꬃሱ፤ ቃስ ታና ሞጎስ ጊግሳናዉ ካሰታዳ ሽቶ ትያሱ።
MAR 14:9 ታኒ ህንተዉ ቱማ ኦዳይስ፤ ሳአ ኡባን ዎንገላ ኦድያ በሳ አዉንካ፥ አሳይ እዮ አኬካና መላ ሀ እያ ኦꬅዳይስ ኦደታና” ያግስ።
MAR 14:10 ታማነ ናምኡ ታማረታፐ እሶይ አስቆሮታ ይሁዳ ጌተተይስ የሱሳ ካህነ ሀላቃታስ አꬅድ እማናዉ ኤንታኮ ብስ።
MAR 14:11 ኤንቲ ሄሳ ስእዳ ዎደ ኡፋይትድ፥ “ኑኒ ነዉ ሚሸ እማና” ያግዶሶና፤ ይሁድ የሱሳ አꬅድ እማናዉ እንጀ ዎደ ኮዬስ።
MAR 14:12 ኡይꬃ ምያ ጋላስ ቦንችያ ኮይሮ ጋላስ፥ ፓስካ ካꬃ ማናዉ ማራዘ ሹክያ ዎደ፥ የሱሳ ታማረት እያኮ፥ “ፓስካ ቦንችያ ጋላስ ኔኒ ማና ካꬃ ኑኒ አዉ ብድ ጊግስኖ?” ግድ ኦይችዶሶና።
MAR 14:13 የሱሲ ባ ታማረታፐ ናምአታ ሀይሳዳ ያግድ ኪትስ፦ “ካታማ ቢተ፤ ህንተ ብሽን፥ ኦቶራ ሃ ቶክዳ እስ ኡራይ ህንተራ ጋሄታና፤ እያ ካልተ።
MAR 14:14 እ ብድ ገልያ ኬꬃ ጎዳ፥ ‘አስታማረይ ኔኮ፥ “ታኒ ታ ታማረታራ ፓስካ ማናዉ እማꬃ ክፍለይ አዉኔ?” ያጌስ’ ያግተ።
MAR 14:15 ጎዳይ ህንተና ፖቅያ ቦላ ደእያ ጊግድ ኡትዳ ዳልጋ ክፍለ በሳና፤ ሄሳን ጊግስተ” ያግስ።
MAR 14:16 ሄ ናምኡ ታማረት ከይድ፥ ካታማ ብዶሶና፤ የሱሲ ኤንታዉ ኦድዳይሳዳ ደምድ፥ ፓስካ ካꬅ ጊግስዶሶና።
MAR 14:17 ሳአይ ኦማርስያ ዎደ የሱሲ ታማነ ናምኡ ታማረታራ ያ ብስ።
MAR 14:18 ኤንቲ ኡትድ ካꬅ ምሽን፥ የሱሲ ኤንታኮ፥ “ታኒ ህንተዉ ቱማ ኦዳይስ፤ ህንተፈ እሶይ ታራ መይስ፥ ታና አꬅድ እማና” ያግስ።
MAR 14:19 እያ ታማረት ዳጋምድ፥ ባንታ ሁጰን ሁጰን፥ “ቱማ ታነሻ?” ያግድ እያ ኦይችዶሶና።
MAR 14:20 የሱሲ ዛሪድ፥ “ሄ ኡራይ፥ ህንተ ታማነ ናምአታፐ እሱዋ፤ እ ታራ እስፈ ቱሻናዉ ባ ኡይꬃ ሻተን የደይሳ።
MAR 14:21 አሳ ናአይ፥ ጌሻ ማፃፋይ ሀይቃና ግዳይሳዳ ሀይቃና፥ ሽን አሳ ናአ፥ አꬅድ እምያ ኡራ አየ! ሄ ኡራይ የለቶና አትዳኮ እያዉ ሎኦሽን” ያግስ።
MAR 14:22 ኤንቲ ምሽን፥ የሱሲ ኡይꬃ ኤክድ፥ ፆሳ ጋላትስ፤ ሄ ኡይꬃ መንꬅድ፥ ባ ታማረታስ እምሸ፥ “ሄእተ፥ ሀይስ ታ አሹዋ” ያግስ።
MAR 14:23 ፁአ ኤክድ፥ ፆሳ ጋላትድ፥ ኤንታዉ እምን ኡባይካ ሄ ፁአፐ ኡይዶሶና።
MAR 14:24 የሱሲ፥ “ሀይስ ኦራꬃ ጫቁዋን ዳሮ አሳ ግሾ ጉክያ ታ ሱꬃ።
MAR 14:25 ታኒ ህንተዉ ቱማ ኦዳይስ፤ ታኒ ፆሳ ካዎተꬃን ኦራꬃ ዎይነ ኡያና ጋላስ ጋካናዉ ዛራዳ ሀ ዎይንያፐ ኡይከ” ያግስ።
MAR 14:26 ማዝሙረ የፅዳፐ ጉየ፥ ሻማሆ ዙማ ቦላ ብዶሶና።
MAR 14:27 የሱሲ ኤንታኮ፥ “ህንተ ኡባይ ታና የግ አግድ ባቃታና፤ ጌሻ ማፃፋይ፥ “ ‘ፆሳይ ዉደ አዋ ሾጫና፥ ዶርሳት ኡባይ ላለታና’ ያጌስ።
MAR 14:28 ሽን ታኒ ሀይቆፐ ደንድዳፐ ጉየ፥ ህንተፈ ስንꬃታዳ ጋልላ ባና” ያግስ።
MAR 14:29 ጰፅሮስ ዛሪድ፥ “ኤንቲ ኡባይ ነና የግ አግድ ባቃትኮካ፥ ታ ነና አግከ” ያግስ።
MAR 14:30 የሱሲ ጰፅሮሳኮ፥ “ታኒ ነዉ ቱማ ኦዳይስ፤ ሀች ቃማ ኩቶይ ናምኡ ቶሆ ዋሳናፐ ስን ኔኒ ታና ሄꬑ ቶሆ ካዳና” ያግስ።
MAR 14:31 ሽን ጰፅሮስ ካሰይሳፈ ምንꬅድ፥ “ታኒ ሀር አቶሽን፥ ኔራ እስፈ ሀይቅያኮካ፥ ነና ካድከ” ያግስ። ቃስ ሀራት ኡባትካ ሄሳዳ ግዶሶና።
MAR 14:32 ጌታሰማነ ጌተትያ በሳ ብዶሶና፤ የሱሲ ባ ታማረታኮ፥ “ታኒ ፆሳ ዎሳዳ ስማና ጋካናዉ ህንተ ሀይሳን ኡትሽተ” ያግስ።
MAR 14:33 የሱሲ ጰፅሮሳ፥ ያይቆባነ ዮሃንሳ ባራ ኤክድ ብስ፤ ዳሮ ዋየትስነ ኡንኤትስ።
MAR 14:34 ቃስ ኤንታኮ፥ “ታኒ ሀይቃና ጋካናዉ አዛናስ፥ ሀይሳን ጋምእሽተ፤ ꬍስኮፍተ” ያግስ።
MAR 14:35 ጉꬅ ስን ሺቅድ፥ ሳአን ጉፋንድ፥ ዳንዳኤትያባ ግድኮ፥ ሄ ዋይያ ሳተይ ባፐ አꬋና መላ፥ ፆሳ ዎስስ።
MAR 14:36 ቃስ፥ “አባ፥ ታ አዋዉ፥ ኡባባይ ነዉ ዳንዳኤቴስ፥ ሀ ዋየ ፁኣ ታፐ ድጋ። ሽን ነ ሸነይ ሀኖፐ አትሽን፥ ታ ሸነይ ሀኖፖ” ያግስ።
MAR 14:37 የሱሲ ባ ታማረታኮ ስም ይድ፥ ኤንቲ ꬍስክዳሽን ደምድ፥ ጰፅሮሳኮ፥ “ስሞና፥ ꬍስካዲ? ኔኒ እስ ሳተካ ባርካዳ ናጋናዉ ዳንዳአብኪ?
MAR 14:38 ፓጨን ህንተ ገሎና መላ ባርክድ ናግተነ ፆሳ ዎስተ። ህንተዉ ሎኦ አሞይ ደኤስ፥ ሽን ህንተ ዳቡራንቾ አስ” ያግስ።
MAR 14:39 ቃስካ ብድ ካሰይሳዳ ፆሳ ዎስስ።
MAR 14:40 ባ ታማረታኮ ጉየ ስሚድ ያ ዎደ፥ ꬍስክዳሽን ደምስ። ኤንታ አይፍያ ꬍስኮይ ጎዝ ዎꬅዳ ግሾ፥ እያኮ አይ ኦደትያኮካ ኤሮኮና።
MAR 14:41 ሄꬓንꬆ ኤንታኮ ይድ፥ “ሀእ ጋካናዉካ ꬍስከትነ ሸምፐቲ? ህዛ፥ ግዳና፤ ሳተይ ጋክስ፤ በእተ! አሳ ናአይ፥ ናጋራንቾ አሳስ አꬍድ እመታና ዎደይ ጋክስ።
MAR 14:42 ደንድድ የꬍተ፤ በእተ፥ ታና አꬅድ እማናይስ ጋክስ” ያግስ።
MAR 14:43 የሱሲ ሄሳ ቡሮ ኦድሽን፥ ታማነ ናምኡ እያ ታማረታፐ እሶይ፥ ይሁድ፥ ኤለስድ ጋክ ዎꬍስ። ቃስ ካህነ ሀላቃት፥ ህገ አስታማረትነ ጭማት ኪትን፥ ማሻነ ፃምአ ኦይክዳ ዳሮ አሳይ እያራ እስፈ ይዶሶና።
MAR 14:44 የሱሳ አꬅድ እማናይስ ሄ ዳሮ አሳስ፥ “ታኒ ዬርያ ኡራይ እያ፤ እያ ኦይክድ፥ ሎይꬅ ናግድ ኤፍተ” ያግድ ማላ ኦድ ዎꬅስ።
MAR 14:45 ይሁድ ጋክ ዎꬍዳ መላ የሱሳኮ ሺቅድ፥ “አስታማርያዉ” ያግድ የሱሳ ዬር ኤክስ።
MAR 14:46 ሄ ዳሮ አሳይ የሱሳ ኦይክዶሶና።
MAR 14:47 ሽን ማታን ኤቅዳይሳታፐ እሶይ ባ ማሻ ሾድድ ካህነ ሀላቃ አይልያ ሾጭድ፥ እያ ሀይꬃ ቃንፅድ ሆልስ።
MAR 14:48 የሱሲ ዛሪድ፥ ሄ ሺቅዳ ዳሮ አሳኮ፥ “ታና ፓንጋ ከስድ፥ ፓንጋ ኦይከይሳዳ ኦይካናዉ ማሸነ ፃምአ ኦይክድ ይደቲ?
MAR 14:49 ታኒ ፆሳ ኬꬃን ታማርሳሸ፥ ጋላስ ጋላስ ህንተራ ደእያ ዎደ ታና ኦይክቤከታ፥ ሽን ጌሻ ማፃፋይ ግዳይስ ፖለታናዉ በሴስ” ያግስ።
MAR 14:50 እያ ታማረት ኡባይ እያ የግ አግድ ባቃትዶሶና።
MAR 14:51 ላፃና ፃላላ ማእዳ እስ ናአተꬃ ኡራይ የሱሳ ካለይሳ አሳይ ኦይክስ።
MAR 14:52 ሽን ሄ ኡራይ ላፃና የግ አግድ፥ ፅረ ካሎ ባቃትስ።
MAR 14:53 አሳይ የሱሳ ካህነ ሀላቃ ሶ ኤፍዶሶና። ያን ካህነ ሀላቃት፥ ጭማትነ ህገ አስታማረት ሺቅድ ደኦሶና።
MAR 14:54 ጰፅሮስ ካህነ ሀላቃ ዛባ ጋካናዉ ሃሆን እያ ካል ብድ ያን ናገይሳታራ ኡትድ ታማ ካዬስ።
MAR 14:55 ካህነ ሀላቃትነ ሺቅዳ አሳ ኡባይ የሱሳ ዎꬋናዉ እያ ቦላ ማርካ ኮይዶሶና፥ ሽን አይኮካ ደምቦኮና።
MAR 14:56 ዳሮ አሳት እያ ቦላ ዎርዶ ማርካትዶሶና፥ ሽን ኤንታ ማርካተꬃይ እስኖ ግድቤና።
MAR 14:57 እስ እስ አሳት ደንድ ኤቅድ የሱሳ ቦላ፥ “እ፥ ‘ታኒ አስ ኬፅዳ ሀ ፆሳ ኬꬃ ላላዳ፥ አሳ ኩሸን ኬፀትቦና ሀራ ፆሳ ኬꬃ ሄꬑ ጋላሳ ግዶን ኬፃና’ ግሽን ኑኒ ስእዳ” ያግድ ዎርዶ ማርካትዶሶና።
MAR 14:59 ግዶሽን፥ ኤንታ ማርካተꬃይ ሄሳንካ እስኖ ግድቤና።
MAR 14:60 ካህነ ሀላቃይ አሳ ኡባ ስንꬃን ደንድ ኤቅድ፥ “ሀይሳቲ ነና ሞትያ ሞቱዋስ ነ ዛርያባይ ባዌ?” ያግድ የሱሳ ኦይችስ።
MAR 14:61 ሽን የሱሲ ስእ ግስ፤ አይኮካ ዛርቤና። ካህነ ሀላቃይ፥ “አንጀትዳ ፆሳ ናአይ፥ ክርስቶስ ነነዬ?” ያግድ ዛር ኦይችስ።
MAR 14:62 የሱሲ ዛሪድ፥ “ኤ ታና፥ ህንተ አሳ ናአይ፥ ዎልቃማ ፆሳፈ ኡሻቻ ባጋራ ኡትዳሽን ቃስ ሳሉዋ ሻራራ ይሽን በአና” ያግስ።
MAR 14:63 ካህነ ሀላቃይ ባ ማኡዋ ፔꬍድ፥ “ኑና ሀራ ማርካ አይ ኮሺ?
MAR 14:64 ህንተ እያ ጫሻ ስእደታ፤ ህንተ ቆፋይ አይቤ?” ያግስ። ኤንቲ ኡባይ፥ “እ ሀይቃናዉ በሴስ” ያግድ እያ ቦላ ፕርድዶሶና።
MAR 14:65 ኤንታፈ እሶት እሶት እያ ቦላ ጩተꬅ ኦይክዶሶና። እያ አይፍያ ጎዝድ ባቅሸ፥ “ነና ደችዳይ ኦኔ? አነ ኑስ ኦዳ!” ያግዶሶና። ናገይሳት እያ ኤክ ኤፍድ ጋራፍዶሶና።
MAR 14:66 ጰፅሮስ ካህነ ሀላቃ ዛባን ጋርሳ ባጋራ ደእሽን፥ ካህነ ሀላቃ ጋꬍንዶታፐ እስንያ ያ ያሱ።
MAR 14:67 ጰፅሮስ ታማ ካየይሳ ደማዳ፥ ትሽ ኦꬃ ፄላዳ፥ “ነካ ናዝረተ የሱሳራ ደኣሳ” ያጋሱ።
MAR 14:68 ሽን ጰፅሮስ፥ “ነ ገይስ አይበኮ ታ ኤርከ፥ ታዉ አኬከተና” ያግድ ካድስ። ያግ ስሚድ፥ ዛጎ ከይያ ዎደ ኢራካ ኩቶይ ዋስስ።
MAR 14:69 ሄ ጋꬍንድያ ጰፅሮሳ በአዳ፥ እያ ማታን ኤቅዳ አሳታኮ፥ “ሀ ኡራይካ ኤንታራ ደኤስ” ጋዳ ዛራ ኦዳሱ።
MAR 14:70 ሽን ጰፅሮስ ቃስካ ካድስ። ጉꬁ ጋምእሽን፥ ማታን ኤቅዳ አሳት ናምአንꬆ ጰፅሮሳኮ፥ “ኔኒ ጋልላ ቢታ አስ ግድያ ግሾ ቱማ ኤንታራ ደኣሳ” ያግዶሶና።
MAR 14:71 ሽን ጰፅሮስ፥ “ታኒ ህንተ ግያ ኡራ ኤርከ!” ያግድ ባና ባደꬅነ ጫቆ ኦይክስ።
MAR 14:72 ኤለስድ ኩቶይ ናምአንꬆ ዋስ አግስ። ጰፅሮስ፥ የሱሲ እያኮ፥ “ኔኒ ኩቶይ ናምኡ ቶሆ ዋሳናፐ ስን ሄꬑ ቶሆ ታና ካዳና” ግዳይሳ አኬክድ ዳሮ ዬክስ።
MAR 15:1 ዎንታ ጉራ ኤለስድ ካህነ ሀላቃት፥ ጭማት፥ ህገ አስታማረትነ አይሁደ ሻንጎት ኡባይ ሺቅድ ማቀትዶሶና። ኤንቲ የሱሳ ቃች ኤፍድ ጵላፆሳስ አꬅድ እምዶሶና።
MAR 15:2 ጵላፆስ እያኮ፥ “ኔኒ አይሁደ ካዎ?” ያግድ ኦይችስ። የሱሲ ዛሪድ፥ “ነ ጋዳሳ” ያግስ።
MAR 15:3 ካህነ ሀላቃት የሱሳ ዳሮባን ሞትዶሶና።
MAR 15:4 ሽን ጵላፆስ ዛሪድ የሱሳኮ፥ “ነዉ ዛርያባይ ባዌ? ኤንቲ ነ ቦላ አይ መላ ሞቱዋ ኤህያኮ በእኪ?” ያግስ።
MAR 15:5 ሽን የሱሲ ሀራባ ዛሮና እፅን፥ ጵላፆስ ማላለትስ።
MAR 15:6 ጵላፆሳስ ፓስካ ባኣለ ቦንችያ ጋላሳን አሳይ ኮያ እስ አስ ቃሾፐ ብልያ ሜዘይ ደኤስ።
MAR 15:7 ሄ ዎደ እስ ባርባና ጌተትያ ኡራይ ኦሹ ከስድ ሸምፖ ዎꬍዳ አሳራ እስፈ ቃሾ ኬꬃን ደኤስ።
MAR 15:8 ሺቅዳ ዳሮ አሳይ ጵላፆስ ካሰይሳዳ ኦꬃና መላ እያ ኦይችዶሶና።
MAR 15:9 ጵላፆስ አሳ ዛሪድ፥ “ታኒ ህንተዉ አይሁደታ ካዋ ብላናይሳ ኮዬቲ?” ያግድ ኦይችስ።
MAR 15:10 ሄሳ እ ግዳይ፥ ካህነ ሀላቃት የሱሳ ቃናትድ አꬅድ እምዳይሳ ኤርያ ግሾሳ።
MAR 15:11 ሽን ካህነ ሀላቃት የሱሳ ግሾ ባርባና ብላናዳ፥ ሄ ሺቅዳ አሳይ ጵላፆሳ ዎሳና መላ አሳ ማቅዶሶና።
MAR 15:12 ጵላፆስ ዛሪድ፥ “ያትን፥ ሀ ህንተ አይሁደ ካዎ ገይሳ ዋቶ?” ያግስ።
MAR 15:13 አሳይ ጵላፆሳ ቦላ ዋስድ፥ “ማስቃለ ቦላ እያ ካቃ” ያግዶሶና።
MAR 15:14 ጵላፆስ፥ “አይስ? እ አይ ኢታባ ኦꬅዴ?” ያግስ። ሽን አሳይ ካሰይሳፈ ጉጅ ዋስድ፥ “ማስቃለ ቦላ እያ ካቃ” ያግዶሶና።
MAR 15:15 ጵላፆስ አሳ ኡፋይሳናዉ ኮይድ፥ ባርባና አሳስ ብልስ፤ ያትድ ልሶን የሱሳ ጋራፍድ፥ ማስቃልያ ቦላ ካቃና መላ ኤንታዉ አꬅድ እሚስ።
MAR 15:16 ሄሳፈ ጉየ፥ ዎታዳረት የሱሳ ደርያ ሃረይሳ ኦሶ ኬꬅ ኤፍድ፥ ሀራ ዎታዳረታ ኡባ እስፈ ፄግዶሶና።
MAR 15:17 ቃስ ዞኦ አፍላ እያ ማይዝዶሶና፤ አጉንꬃ ካላቻ ጊግስድ፥ እያ ሁጰን ዎꬅዶሶና።
MAR 15:18 ሄሳፈ ጉየ፥ እያኮ፥ “አይሁደታ ካዋዉ መርናዉ ካዎታ” ያግድ፥ እያዉ ዝግዶሶና።
MAR 15:19 እያ ሁጵያ ፃምአን ሾጭዶሶና፤ ቃስ እያ ቦላ ጩትዶሶና፤ ጉልባትድ እያዉ ጎይንዶሶና።
MAR 15:20 እያ ቶችዳፐ ጉየ ዞኦ አፍላ እያፐ ቃር ኤክድ፥ እያ አፍላ እያ ማይዝድ ማስቃለ ቦላ እያ ካቃናዉ ኤፍዶሶና።
MAR 15:21 ኤንቲ ብሸ፥ እስክንድረነ ሩፎሳ አዋ፥ ስሞና ጌተትያ ቀሬና ቢታ አስ፥ ጋፃረፐ ካታማ የይሳራ ጋሄትድ፥ የሱሳ ማስቃልያ ዎልቃን ቶስዶሶና።
MAR 15:22 ያትድ ጎልጎታ ጌተትያ በሳ የሱሳ ኤፍዶሶና። “ጎልጎታ” ጉሳይ “ሁጰ ጉገ” ጉሱ።
MAR 15:23 ሳኮይ ስኤቶና መላ ካርበራ ዋላከትዳ ዎይነ ኡዮ ግድ እያዉ እምዶሶና፤ ሽን እ ኡዮና እፅስ።
MAR 15:24 ኤንቲ ማስቃለ ቦላ እያ ካቅዶሶና። ኦና አይብ ጋካኔኮ ግድ እያ አፍላ ሻክድ ሳማ የግዶሶና።
MAR 15:25 ኤንቲ ማስቃለ ቦላ እያ ካቅያ ዎደ ዎንታፈ ሄꬑ ሳተ።
MAR 15:26 ኤንቲ፥ “አይሁደ ካዋ” ያግድ እያ ሞትያ ፁፈ ፃፍድ ዎꬅዶሶና።
MAR 15:27 የሱሳራ ናምኡ ፓንጋታ እሱዋ እያፐ ኡሻቻ ባጋራ ሀንኩዋ እያፐ ሀድርሳ ባጋራ ማስቃለ ቦላ ካቅዶሶና።
MAR 15:28 ጌሻ ማፃፋይ፥ “ኢታባ ኦꬅዳ አሳታራ እ ፓይደትስ” ጌተትዳይስ ፖለትስ።
MAR 15:29 ኦገራ አꬍያ አሳይ የሱሳ ካꬍድ፥ ባንታ ሁጵያ ቃꬅድ ጫይዶሶና፤ “ሄኮ! ፆሳ ኬꬃ ላላዳ ሄꬑ ጋላሳ ግዶን ኬፀይሶ፥ ነ ሁጵያ አሻ፤
MAR 15:30 አነ ማስቃልያ ቦላፈ ዎꬋ” ያግዶሶና።
MAR 15:31 ሄሳዳካ፥ ካህነ ሀላቃት ህግያ ታማርሰይሳታራ እስፈ የሱሳ ቶችድ፥ “ሀራታ አሽስ፥ ሽን ባና አሻናዉ ዳንዳኤና፤
MAR 15:32 ኑኒ በእድ አማናና መላ ክርስቶስ፥ እስራኤለ ካዎይ፥ አነ ማስቃለ ቦላፈ ሀእ ዎꬎ” ያግዶሶና። ቃስ ሀር አቶሽን፥ እያራ ማስቃለ ቦላ ካቀትዳይሳትካ እያ ቶችዶሶና።
MAR 15:33 ኡሱፑን ሳተፐ ዶምድ፥ ኡዱፉን ሳተ ጋካናዉ ቢታ ኡባይ ꬉምስ።
MAR 15:34 ኡዱፉን ሳተን የሱሲ፥ “ኤሎሄ፥ ኤሎሄ፥ ላማ ሳባቅታኒ?” ያግድ ዋስስ። ሄሳ ጉሳይ፥ “ታ ፆሳዉ፥ ታ ፆሳዉ፥ ታና አይስ አጋዲ?” ጉሱ።
MAR 15:35 ሄሳን ኤቅዳ አሳፐ እሶይ እሶይ ሄሳ ስእድ፥ “ሄኮ፥ ኤልያሳ ፄጌስ” ያግስ።
MAR 15:36 ሄ አሳፐ እሶይ ዎፅድ፥ እስፖንጀን ጫላ ዎይነ ኩንꬅስ፤ ሄሳ ፃምአ ፄራን ዎꬅድ፥ “ናግተ፤ ኤልያስ ማስቃለ ቦላፈ እያ ዎꬍሳናዉ ያነኮ አነ በኦስ” ያግድ የሱሳ ዶናኮ ኡሻናዉ ሺሽስ።
MAR 15:37 የሱሲ ባ ቃላ ꬎቁ ኦꬅ ዋስድ፥ ሀይቅስ።
MAR 15:38 ፆሳ ኬꬃን ካቀትዳ ማጋራጆይ ቆሞፈ ዱገ ጋካናዉ፥ ናምኡ ከይድ ዳከት ዎꬍስ።
MAR 15:39 ማስቃልያፐ ስንꬃ ባጋራ ያን ኤቅዳ እስ ማቶ ሀላቃይ፥ የሱሲ ዋንድ ሀይቅዳኮ በእዳ ዎደ፥ “ሀ ኡራይ ቱማ ፆሳ ናአ” ያግስ።
MAR 15:40 ሄሳ ሃሆን ኤቅድ በእያ ጉꬃ ማጫሳት ደኦሶና። ኤንታ ግዶን ማግደላ ማይራማ፥ ካሉዋ ያይቆባነ ዮሳ አይያ ማይራማነ ሳሎማ ደኦሶና።
MAR 15:41 ሄ ማጫሳት የሱሲ ጋልላን ደእያ ዎደ እያ ካልዳይሳታነ እያ ሞክዳይሳታ ቃስ የሱሳራ እስፈ የሩሳላመ ብዳ ሀራ ዳሮ ማጫሳት ያን ደኦሶና።
MAR 15:42 ሳእ ኦማርስዳ ዎደ፥ ሺቅዳ አሳን ቦንቸትዳ አይሁደ ሻንጎታፐ እሶይ፥ ዮሰፋ ጌተትያ ኡራይ፥ ፆሳ ካዎተꬃይ ያናይሳ ናግሸ ደኤይስ፥ አርማተ ካታማ አስ ደኤይስ ይስ። ዎንተ ሳምባታስ ጊገትያ ጋላስ ግድዳ ግሾ፥ ዮሰፍ ምንድ ጵላፆሳኮ ብድ፥ የሱሳ አሀ ኤካናዉ ዎስስ።
MAR 15:44 ጵላፆስ፥ የሱሲ ሀይቅዳይሳ ስእዳ ዎደ ማላለትስ፤ ማቶ ሀላቃ ፄግድ፥ “እ ሀይቅድ ጋምእዴ?” ያግድ ኦይችስ።
MAR 15:45 ጵላፆስ፥ የሱሲ ሀይቅዳይሳ ማቶ ሀላቃፐ ስእድ እያ አሀ ዮሰፋስ እሚስ።
MAR 15:46 ዮሰፍ ሞጎ አፍላ ሻምስ፤ የሱሳ አሀ ማስቃልያፐ ዎꬅድ፥ አፍላን ፃፅድ፥ ሹቻፈ ዎጨትዳ ዱፎን እያ አሀ ሞግስ። ቃስ ሄ ዱፉዋ ዶናን ግታ ሹቹ ጎንዶርስድ ዎꬅስ።
MAR 15:47 ማግደላ ማይራማነ ዮሳ አይያ ማይራማ የሱሳ አሀ ኤንቲ አዉን ዎꬅያኮ በኦሶና።
MAR 16:1 ሳምባት አꬍዳፐ ጉየ፥ ማግደላ ማይራማ፥ ያይቆባ አይያ ማይራማነ ሳሎማ ብድ፥ የሱሳ አሀ ትያናዉ ሽቶ ሻምዶሶና።
MAR 16:2 ዎጋ ዎደ ዎንታ ዳሮ ጉራ ፃልቀይ ጫርሽን፥ ዱፎ ብዶሶና።
MAR 16:3 ኤንቲ ባንታ ግዶን እሶይ እሱዋራ፥ “ዱፉዋ ዶናፐ ኑስ ሹቻ ኦኔ ጎንዶርስድ ድጋናይ?” ያግድ ኦደትዶሶና።
MAR 16:4 ኤንቲ ፄልያ ዎደ ሄ ዳሮ ግታ ሹቻይ ጎንዶረትድ ክችዳይሳ በእዶሶና።
MAR 16:5 የሱሲ ሞገትዳ ዱፉዋ ግዶ ገልያ ዎደ እስ ፓንꬃ አደይ ቦꬃ ማኦ ማእድ፥ ኡሻቻ ባጋራ ኡትዳይሳ በእድ ዳጋምዶሶና።
MAR 16:6 ሽን እ ኤንታኮ፥ “ዳጋሞፍተ፤ ማስቃልያ ቦላ ካቀትዳ፥ ናዝረተ የሱሳ ህንተ ኮየይሳ ታኒ ኤራይስ። እ ሀይሳን ዴና፥ ሀይቆፐ ደንድስ። ኤንቲ እያ ሞግዳ በሳ ሀይሳ በእተ።
MAR 16:7 ሀእ ብድ የሱሳ ታማረታስነ ጰፅሮሳስ፥ ‘የሱሲ ህንተፈ ስንꬃትድ ጋልላ ቤስ። እ፥ ህንተዉ ኦድዳይሳዳ ህንተ እያ ያን በአና’ ያግድ ኦድተ” ያግስ።
MAR 16:8 ማጫሳት ያሻን ኮኮርሸ ዱፎፐ ከይድ ባቃትዶሶና። ቃስ ኤንቲ ያይዳ ግሾ፥ ሄሳ ኦደስካ አይኮካ ኦድቦኮና።
MAR 16:9 የሱሲ ሀይቆፐ ደንድዳፐ ጉየ፥ ዎጋ ጋላስ ዎንታ፥ ላፑን ቱና አያናታ ከስዳ ማግደላ ማይራምስ ኮይሮትድ በንትስ።
MAR 16:10 እያ ባዳ ካሰ እያራ ደኤይሳታስ፥ ኤንቲ አዛንሸነ ዬክሸ ደእሽን ኦዳሱ።
MAR 16:11 ሽን የሱሲ ፓፃ ደኤይሳነ እዉ በንትዳይሳ ኤንቲ ስእዳ ዎደ እያ ገይሳ አማንቦኮና።
MAR 16:12 ሄሳፈ ጉየ፥ ኤንታፈ ናምአት ካታማፐ ከይድ ብሽን፥ ኦገ ቦላ የሱሲ ካሰፐ ዱማትድ ኤንታዉ በንትስ።
MAR 16:13 ኤንቲ ጉየ ስሚድ፥ ሀራታስ ኦድዶሶና፥ ሽን ሀራትካ ኤንታ ኦዳ ቱማ ግቦኮና።
MAR 16:14 ጉየፐ ታማነ እስ እያ ታማረት ካꬅ ምሽን፥ የሱሲ ኤንታዉ በንትስ። ኤንታዉ አማኖይ ባይና ግሾነ ሀይቆፐ እ ደንድዳይሳ በእዳ አሳይ ኦድን፥ ኤንቲ አማኖና እፅዳ ግሾ እ ኤንታ ቦርስ።
MAR 16:15 እ ኤንታኮ፥ “ቢታ ኡባ ብድ አሳ ኡባስ ዎንገላ ኦድተ።
MAR 16:16 አማነይነ ፃማቀተይ አታና፥ ሽን አማኖናይ ፕርደታና።
MAR 16:17 አማነይሳታስ ሀ ማላታት እመታና። ኤንቲ ታ ሱንꬃን ቱና አያናታ ከሳና፥ ኦራꬃ ዶናን ኦደታና።
MAR 16:18 ኤንቲ ሾሹ ኦይክኮካ ዎይኮ ዎꬍያባ ኡይኮካ ኤንታ ቆሄና። ቃስ ኤንቲ ባንታ ኩሽያ ሀርጋንቾታ ቦላ ዎꬅድ ኤንታ ፓꬃና” ያግስ።
MAR 16:19 ጎዳይ የሱሲ ታማረታራ ኦደትዳፐ ጉየ፥ ፑደ ሳሎ ከይስ፤ ፆሳፈ ኡሻቻ ባጋራ ኡትስ።
MAR 16:20 እያ ታማረት ብዳ በሳ ኡባን ቃላ ኦድዶሶና። ጎዳይካ ኤንታራ እስፈ ኦꬄስ። ኤንቲ ኦድያ ቃላይ ቱማ ግድዳይሳ ፆሳይ ኤንታዉ እምያ ማላታታን ኤርስስ።
LUK 1:1 ቦንቾ ተዎፍሎሳ፥ ኑ ግዶን ፖለትዳባስ ዳሮት፥ ባንታዉ ዳንዳኤትዳ መላ ፃፍዶሶና።
LUK 1:2 ሄ ታርክያ ኤንቲ ፃፍዳይ ኮይሮፐ ዶምድ አይፈ ማርካትነ ቃላ ሀጋዘይሳት ኑስ ኦድዳይሳ።
LUK 1:3 ታካ ታ ባጋራ ኮይሮፐ አኬካ ፄልዳፐ ጉየ፥ ሄ ታርክያ ሀኖታ ማራያዳ ነዉ ፃፎይ ሎኦ ግድድ በንትስ።
LUK 1:4 ሄስካ፥ ነ ታማርዳባይ ቱማ ግደይሳ ኤርሳናሳ።
LUK 1:5 ይሁዳ ካዋ ሄሮዲሳ ዎደ አብያ ያራፐ ግድዳ ዛካርያሳ ጌተትያ አይሁደ ካህነይ ደኤስ። እያ ማችያካ አሮና ሼሻፐ። እ ሱንꬃይካ ኤልሳቤፆ።
LUK 1:6 ናምአይካ ጎዳ ዎጋነ ኪታ ኡባ ናግድ ቦረይ ባይና ፆሳ ስንꬃን ፅሎተꬃን ደእዶሶና።
LUK 1:7 ሀኖፐ አትሽን፥ ኤልሳቤፃ ማይንꬅ ግድዳ ግሾ ኤንታዉ ናእ ባዋ፤ ናምአይካ ቃስ ጭምዶሶና።
LUK 1:8 እስ ጋላስ ዛካርያስ ባ ግሹዋ ማራን ፆሳ ስንꬃን ካህነተꬃን ሀጋዜስ።
LUK 1:9 ካህነተꬃ ዎጋን ፆሳ ኬꬅ ገልድ እፃነ ጩይሳናዉ እያ ሳም ጋክስ።
LUK 1:10 እፃነይ ጩያ ዎደ አሳይ ካረን ዎሴስ።
LUK 1:11 ጎዳ ኪታንቾይ ያርሾ ያርሽያ በሳፈ ኡሻቻ ባጋራ ኤቅድ በንትስ።
LUK 1:12 ዛካርያስ እያ በእዳ ዎደ ዳጋምድ ዳሮ ያይስ።
LUK 1:13 ሽን ኪታንቾይ እያኮ፥ “ዛካርያሳ ያዮፋ፤ ነ ዎሳይ ስኤትስ። ነ ማችያ ኤልሳቤፃ አደ ናአ የላና፥ እያ ዮሃንሳ ጋዳ ነ ሱንꬃና።
LUK 1:14 እ ነዉ እንጀነ ኡፋይስ ግዳና፤ ዳሮት እያ የለተꬃን ኡፋይታና።
LUK 1:15 ጎዳ ስንꬃን እ ግታ ግዳና፤ ዎይነ ኡሽ ግድን ሀራ ማꬆይያ ኡሻ ኡየና። ባ አየ ኡሎን ደእሸ ጌሻ አያናን ኩማና።
LUK 1:16 እስራኤለ አሳታፐ ዳሮታ ባንታ ጎዳ፥ ፆሳኮ ዛራና።
LUK 1:17 አዋታ ዎዛና ናይታኮ ዛራና፥ ኪተቶናይሳታ ፅሎታ ጭንጫተꬃኮ ዛራና መላ፥ ጎዳስ በሲያ ደረ ጊግሳናዉ ኤልያሳ አያናንነ ዎልቃን ጎዳ ስንꬃን ባና” ያግስ።
LUK 1:18 ዛካርያስ ኪታንቹዋኮ፥ “ታ ሄሳ አይብን ኤራኔ? ታራነ ታ ማቸራ ጭምዳ” ያግስ።
LUK 1:19 ኪታንቾይ ዛሪድ፥ “ታኒ ፆሳ ስንꬃን ኤቅያ ጋብሬለ። ሀ ምሽራቹዋ ነዉ ኦዳናዉ ፆሳፈ ኪተታስ።
LUK 1:20 ሄኮ፥ ዎድያ ናግድ ፖለትያ ታ ቃላ ነ አማኖና እፅዳ ግሾ፥ ሀይስ ፖለታና ጋካናዉ ኔኒ ሙመ ግዳና፥ ኦደታናዉካ ዳንዳአካ” ያግስ።
LUK 1:21 ሄ ዎደ ዛካርያስ ፆሳ ኬꬅ ገልድ ጋምእዳ ግሾ፥ አይብ ሀንደ ግድ አሳይ ካረን ናግሸ ጋምእስ።
LUK 1:22 እ ካረ ከይድ ኤንታና ኦድሳናዉ ዳንዳእቤና። ማል በሶፐ አትሽን፥ ኦደታናዉ ዳንዳኦናይሳ በእዳ ዎደ ቆንጨꬅ በእዳይሳ ኤርዶሶና።
LUK 1:23 ዛካርያስ ባ ሀጋዙዋ ፖልድ ሶ ስምስ።
LUK 1:24 ሄሳፈ ጉየ፥ እያ ማችያ ኤልሳቤፃ ቃንꬃታሱ። እቻሹ አጌና ኩመꬅ ባና ገንꬃዳ ጋምአሱ።
LUK 1:25 እያ፥ “ጎዳይ ባ ማሮታን ታ ቦርያ አሳ ግዶፈ ድጋናዉ በእድ ሀ ዎድያን ሀይሳ ኦꬅስ” ያጋሱ።
LUK 1:26 ኤልሳቤፃ ቃንꬃትን ኡሱፑንꬆ አጌናን፥ ፆሳይ ኪታንቹዋ ጋብሬለ ጋልላ ቢታን ደእያ ናዝረተ ካታማ ኪትስ።
LUK 1:27 ካዋ ዳዊታ ሼሻፐ ግድዳ ዮሰፋ ጌተትያ ኡራስ ኦይሸትዳ ጌላኤኮ ኪትስ። ሄ ጌላእያ ማይራሞ ጌተታዉሱ።
LUK 1:28 ኪታንቾይ ኢኮ ብድ፥ “ዳሮ ዶሰትዳረ፥ ሳሮይ ነዉ ግዶ፥ ፆሳይ ኔራ ደኤስ፤ ኔኒ አንጀትዳሮ” ያግስ።
LUK 1:29 ማይራማ እያ ኦዳን ዳሮ ዳጋማዳ፥ “ሀይስ አይብ ሳሮꬆ” ጋዳ ሄታሱ።
LUK 1:30 ኪታንቾይ ዛሪድ፥ “ማይራመ፥ ባቦፋ፤ ኔኒ ፆሳ ስንꬃን ሳባ ደማዳሳ።
LUK 1:31 ሄኮ ኔኒ ቃንꬃታና አደ ናአ የላና፥ እያ ሱንꬃ የሱሳ ጋዳ ሱንꬃና።
LUK 1:32 እ ግታ ግዳና፥ ኡባፈ ቦላ ፆሳ ናኣ ጌተትድ ፄገታና። ጎዳ ፆሳይ እያ አዋ ዳዊታ አራታ እያዉ እማና።
LUK 1:33 እ ያይቆባ ሼሻ ቦላ መርናዉ ካዎታና፤ እያ ካዎተꬃስ ዛው ባዋ” ያግስ።
LUK 1:34 ማይራማ ኪታንቹዋኮ፥ “ሄስ ዋንድ ሀናኔ? ታ አደ ኤርከ” ያጋሱ።
LUK 1:35 ኪታንቾይ ዛሪድ፥ “ጌሻ አያናይ ነ ቦላ ዎꬋና፥ ኡባፈ ቦላ ፆሳ ዎልቃይ ነ ቦላ ኩያታና። ሄሳ ግሾ፥ የለትያ ጌሻ ናአይ ፆሳ ናኣ ጌተታና።
LUK 1:36 ሄኮ፥ ነ ዳብያ ኤልሳቤፃ ባ ጭማተꬃ ላይꬃን አደ ናአ ቃንꬃታሱ። እያ ማይንꬅ ጌተትዳሮ፥ ሽን ሀእ ኡሱፑንꬆ አጌና ኦይካሱ።
LUK 1:37 ፆሳ ፆንያባይ ባዋ” ያግስ።
LUK 1:38 ማይራማ፥ “ሄኮ፥ ታኒ ጎዳ አይልዉ፥ ነ ቃላዳ ታዉ ሀኖ” ያጋሱ። ሄሳፈ ጉየ፥ ኪታንቾይ ኢፐ ሻከትስ።
LUK 1:39 ማይራማ ሄ ሳምንታን ደንዳዳ ይሁዳ ቢታን ደእያ እስ ደረይ ዳርያ ካታማ ባሱ።
LUK 1:40 ዛካርያሳ ሶ ገላዳ ኤልሳቤፆ ሳሮꬃሱ።
LUK 1:41 ኤልሳቤፃ ማይራም ሳሮꬁዋ ስእዳ ዎደ እ ኡሉዋን ደእያ ናአይ ኡፋይሳን ጉፕስ። ኤልሳቤፃ ጌሻ አያናን ኩማዳ፥
LUK 1:42 ባ ቃላ ꬎቁ ኦꬃዳ፥ “ኔኒ ማጫሳ ግዶፈ አንጀትዳሮ፥ ነ ቃንꬃትዳ ናአይካ አንጀትዳይሳ።
LUK 1:43 ሀኖሽን፥ ታ ጎዳ አየ፥ ኔኒ ታኮ ያና መላ ታኒ ኦኔ?
LUK 1:44 ሄኮ ነ ሳሮꬁዋ ታ ስእዳ ዎደ ታ ኡሉዋን ደእያ ናአይ ኡፋይሳን ጉፕስ።
LUK 1:45 ጎዳይ ፖላና ግድ እምዳ ቃላ አማንዳራ፥ እያ አንጀትዳሮ” ያጋሱ።
LUK 1:46 ማይራማ ሀይሳዳ ያጋሱ፦ “ታ ሸምፕያ ጎዳ ቦንቻዉሱ፥
LUK 1:47 ታ አያናይ ꬋልያ ፆሳን ኡፋይቴስ።
LUK 1:48 እ ባ አይለ ካዉሻተꬃ በእስ። ሀችፈ ዶምድ የለተꬅ ኡባይ ታና አንጀትዳሮ ጋና።
LUK 1:49 አይስ ጊኮ፥ ዎልቃማ ግድዳ እ፥ ታዉ ግታባ ኦꬅስ። እያ ሱንꬃይ ጌሻ።
LUK 1:50 እያ ቦንቸይሳታ ቦላ፥ እያ ማሮተꬃይ መርናፐ መርና ጋካናሳ።
LUK 1:51 ባ ቀስያን ምኖባ ኦꬅስ፥ ባንታ ዎዛናን ኦቶርተይሳታ ላልስ።
LUK 1:52 ዎልቃማ ካዎታ አራታፐ ካዉሽስ፤ ባንታና ካዉሽዳይሳታ ካቦይስ።
LUK 1:53 ኮሻትዳይሳታ ሎኦባን ካልስስ፥ ሽን ዱረታ መላ ኩሸ የድስ።
LUK 1:54 ባ ማሮታ ቆፕድ፥ ባ አይልያ እስራኤለ ማድስ።
LUK 1:55 ሄስካ ኑ አዋታስ ኦድዳ ቃላ፥ አብራሃመስነ እያ ሼሻስ ግዳይሳ መርናዉ ፖላናሳ” ያጋሱ።
LUK 1:56 ማይራማ ኤልሳቤፅ ማታን ሄꬑ አጌና መላ ጋምአዳ ባ ሶ ስማሱ።
LUK 1:57 ኤልሳቤፅስ የሎ ቃማይ ጋክን አደ ናአ የላሱ።
LUK 1:58 እ ሾሮትነ እ ዳቦት ጎዳይ ግታ ማሮታ ኦꬅዳይሳ ስእድ፥ ኢራ እስፈ ኡፋይትዶሶና።
LUK 1:59 ሆስፑንꬃ ጋላሳን ዮጋ ናኣ ቃፃራናዉ ይዶሶና። እያ አዋ ሱንꬃን ዛካርያሳ ግድ ሱንꬃናዉ ኮይዶሶና።
LUK 1:60 ሽን አይያ፥ “አካይ፥ ዮሃንሳ ጌተታናዉ በሴስ” ያጋሱ።
LUK 1:61 ኤንትካ፥ “ነ ዳቦታፐ ሀ ሱንꬃን ፄገትዳይ ኦንካ ባዋ” ያግዶሶና።
LUK 1:62 እያ አዋይ ኦና ግድ ሱንꬃነኮ ኤራናዉ ኮይድ እያ ማላ ኦይችዶሶና።
LUK 1:63 እ ፃፍያባ ኦይች ኤክድ፥ “እያ ሱንꬃይ ዮሃንሳ” ግድ ፃፍስ። ኡባይ እ ፃፍዳይሳ በእድ ማላለትዶሶና።
LUK 1:64 ኢራ ዛካርያሳ እንፃርሳይ ብለትስ፥ ፆሳ ጋላትሸ ኦደተꬅ ኦይክስ።
LUK 1:65 ሾሮት ኡባይ ያሻን ኩምዶሶና። ሀ ሀንዳባይ ደረይ ዳርያ ይሁዳ ቢታን ኦደትስ።
LUK 1:66 ሄሳ ስእዳ ኡባይ፥ “ሀ ናአይ አይ ሀናንደሻ” ግድ ባንታ ግዶን ኦደትዶሶና። ጎዳ ኩሸይ እያራ ደኤስ።
LUK 1:67 ዮሃንሳ አዋይ ዛካርያስ ጌሻ አያናን ኩምድ ሀይሳዳ ያግድ ትንብተ ኦድስ።
LUK 1:68 “እስራኤለ ጎዳይ ጋላተቶ፥ ይድ ባ አሳ ዎዝስ።
LUK 1:69 ባ አይልያ ዳዊታ ኬꬃን አቶተꬃ ካጭያ ደንꬅስ።
LUK 1:70 ሄስካ በን ዎደ ጌሻ ናበታ ዶናን ኦደትዳይሳ መላ፥
LUK 1:71 እያ አሾይ ኑ ሞርከታፐነ ኑራ ኤቀትያ ኡባ ኩሽያፐ።
LUK 1:72 ሄሳ እ ኦꬅዳይ ኑ አዋታስ ባ ማሮታ በሳናስነ፥ ባ ጌሻ ጫቁዋ ናጋናሳ።
LUK 1:73 ኑ አዋ አብራሃመስ ጫቅዳ ጫቁዋ ቆፓናስነ
LUK 1:74 ኑ ሞርከታ ኩሸፐ ከስድ ያሽ ባይና እያ ሀጋዛና መላሳ።
LUK 1:75 ኑ ላይꬃ ኡባን ጌሻተꬃንነ ፅሎተꬃን ባ ስንꬃን ኑና ኤሳናሳ።
LUK 1:76 ቃስ ላ ናአዉ፥ ኔኒ ኡባፈ ቦላ ፆሳ ናበ ጌተታና። ጎዳ ኦግያ ሎይꬃናዉ ነ እያ ስንꬃን ባና።
LUK 1:77 ኤንታ ናጋራይ ቁሸትን፥ ኤንቲ አቶተꬅ ደማናይሳ ነ ጎዳ ደርያስ ኦዳና።
LUK 1:78 ኑ ፆሳ ሎኦ ማሮተꬃፈ ደንዶይሳን ዎንታ ፃልቀይ ኑስ ሳሉዋፐ ከይስ።
LUK 1:79 ሄስካ ꬉማንነ፥ ሀይቆ ኩያ ጋርሳን ደኤይሳታስ ፖእሳናሳ፥ ኑ ቶሁዋካ ሳሮ ኦግያኮ ዛራናሳ” ያግስ።
LUK 1:80 ናአይ ድጭስ፥ አያናን ምንስ፥ እስራኤለ አሳስ ቆንጫና ጋካናዉ መላ ቢታን ደእስ።
LUK 2:1 ሄ ዎደ ሮመ ቢታን ደእያ አሳ ኡባይ ታይበታና መላነ ሱንꬃይ ፃፈታና መላ ካዎይ አዉግስፆስ ኪትስ።
LUK 2:2 ሄስካ ቀረኖስ ሶረ ቢታ አይስያ ዎደ ኦሰትዳ ኮይሮ ታይቡዋ።
LUK 2:3 ሄሳ ግሾ፥ እስ እስ አስ ባ ሱንꬃ ፃፈታናዉ ባ የለትዳ ቢታ ብስ።
LUK 2:4 ዮሰፍካ ዳዊታ ኬꬃፈነ ያራፐ ግድዳ ግሾ፥ ጋልላ ናዝረተ ካታማፐ ደንድድ ዳዊታ ካታማ ግድዳ ይሁዳ ቤተለመ ብስ።
LUK 2:5 ብሸ፥ የላናዉ ዎደይ ዉርዳ እ ኦይች ዎꬅዳ፥ ማይራምራ ዎላ ፃፈታናዉ ብስ።
LUK 2:6 ኤንቲ ያን ደእሽን እዉ የሎ ዎደይ ጋክስ።
LUK 2:7 ባ ባይራ ናኣ የላሱ። ጩርቃራ ፃፃዳ እማꬅ አቅያ ኬꬃን በሲ ꬋይዳ ግሾ ዳራን መሄ ሙዝያ ጎንገን ዝንእሳሱ።
LUK 2:8 ሄ ጋድያን ቃማ ዶርሳ ዉድያ ናግሸ ካረን አቅያ ሄንꬃንቾት ደኦሶና።
LUK 2:9 ጎዳ ኪታንቾይ ሀሳዮና ይድ ኤንታ ማታን ኤቅስ። ጎዳ ቦንቾይ ኤንታ ዩሹዋን ፖእስ፤ ኤንትካ ዎልቃማ ያሽ ያይዶሶና።
LUK 2:10 ሽን ኪታንቾይ፥ “ያዮፍተ! ሄኮ፥ አሳ ኡባስ ግድያ ግታ ኡፋይሳ ምሽራቹዋ ኤካዳ ያስ።
LUK 2:11 ሄስካ፥ ዳዊታ ካታማን አሸይስ ህንተዉ ሀች የለትስ። እ ጎዳ ክርስቶሳ።
LUK 2:12 ዞቃለ ናእ ጩርቃራ ፃፀትድ ጎንገን ዝንእዳይሳ ህንተ ደማና፤ ሄስካ ህንተዉ ማላ ግዶ” ያግስ።
LUK 2:13 ቆፖና ዳሮ ሳሎ ኪታንቾት ኪታንቹዋራ እስፈ ቆንጭድ፥
LUK 2:14 “ቦንቾይ ፆሳስ ꬎቃ ሳሉዋን፥ ሳሮይ ቢታ ቦላ ፆሳይ ዶስያ አሳስ ግዶ” ያግድ ጋላትዶሶና።
LUK 2:15 ኪታንቾት ኤንታፈ ሻከትድ ሳሉዋ ከይዳፐ ጉየ ሄንꬃንቾት፥ “አነ ጎዳይ ኑስ ቆንጭስዳባነ ሀንዳባ በአናዉ ቤተለመ ቦስ” ያግዶሶና።
LUK 2:16 ኤንትካ ኤለስድ ብዶሶና። ማይራሞ፥ ዮሰፋነ ዞቃለ ናኣ ጎንገን ዝንእዳይሳ በእዶሶና።
LUK 2:17 በእ ስሚድ ናአባ ኤንታዉ ኦደቶይሳ፥ ቆንጭስድ ሄ በሳን ደእያ አሳስ ማርካትዶሶና።
LUK 2:18 ሄሳ ስእዳ ኡባይ ሄንꬃንቾት ኦድዳይሳን ማላለትዶሶና።
LUK 2:19 ማይራማ ሀንዳባ ኡባ ባ ዎዛናን ቆፓሸ ደአሱ።
LUK 2:20 ሄንꬃንቾት ኤንታዉ ኦደትዳይሳዳ ሀንን በእዶሶና። ሄሳ ግሾ፥ ባንታ ስእዳባስነ በእዳባ ኡባስ ፆሳ ቦንችሸነ ጋላትሸ ስምዶሶና።
LUK 2:21 ሆስፑንꬃ ቃማን፥ ቃፃሮ ዎደይ ጋክን፥ እ ቃንꬃታናፐ ስን ኪታንቾይ ዎꬅዳ ሱንꬃን የሱሳ ጌተትስ።
LUK 2:22 ሙሰ ዎጋ መላ ኤንታ ጌሻተꬃ ዎደይ ፖለትዳፐ ጉየ ዮሰፋራነ ማይራምራ ዮጋ ናኣ ባንታ ጎዳስ እማናዉ የሩሳላመ ብዶሶና።
LUK 2:23 ሄስካ፥ ጎዳ ዎጋን፥ “አደ ግድዳ ባይራ ናእ ኡባይ ጎዳስ ዱማትዳይሳ ግዶ” ጌተትድ ፃፈትዳይሳ ፖላናሳ።
LUK 2:24 ቃስ ጎዳ ዎጋን፥ ናምኡ ኩራቾ ዎይኮ ሆለ ያርሻናዉ ኤፍዶሶና።
LUK 2:25 ሄ ዎደ ጌሽነ አማኖራ ምኖ ግድዳ ስሞና ጌተትያ አስ የሩሳላመን ደኤስ። እ እስራኤለታ አቶተꬃ ናግሸ ደኤስ። ጌሻ አያናይካ እያ ቦላ ደኤስ።
LUK 2:26 ቃስ ክርስቶሳ በኦና ሀይቆናይሳ ጌሻ አያናይ እያዉ ቆንጭስን ኤርድ ደኤስ።
LUK 2:27 እ ሄ ጋላስ አያናይ ካለꬅን ፆሳ ኬꬅ ብስ። ናኣ አየራነ አዋራ ዎጋ ፖላናዉ ዮጋ ናኣ የሱሳ ኤክድ ገልዳ ዎደ፥
LUK 2:28 ስሞን ሞክ ኤክድ ናኣ እድምድ፥
LUK 2:29 “ጎዳዉ ነ ታዉ ገልዳ ቃላ መላ፥ ሀእ ነ አይልያ ሳሮን ሞይዛ።
LUK 2:30 ታ አይፈይ አሳ ኡባ ስንꬃን ነ ጊግስዳ፥
LUK 2:31 ነ አሹዋ በእስ።
LUK 2:32 ሄስካ ካዎተꬃታ ኡባስ፥ ፆሳ ኦግያ ቆንጭስያ ፖኦ፥ ነ አሳ እስራኤለስካ ቦንቾ” ያግድ ፆሳ ጋላትስ።
LUK 2:33 ዮሰፋራነ ማይራምራ እያዉ ኦደትዳባን ማላለትዶሶና።
LUK 2:34 ስሞን ኤንታ አንጅስ። አየ ማይራምኮ፥ “ሄኮ ዳሮ አሳ ዎዛና ቆፋይ ቆንጫና መላ፥ እስራኤለን ደእያ ዳሮታስ ኤንታ ኩንደꬃስነ ደንዱዋስ ፆሳን ዶረትስ።
LUK 2:35 ቃስ ኤቀተይሳታስ ማላ ግዳና። ነ ሸምፑዋራካ ቃስ ማሽ አꬋና” ያግስ።
LUK 2:36 ቃስ አሴራ ያራፐ ግድዳ ፋኑኤላ ናእያ ሃና ጌተትያ ናበይ ደአዉሱ። እያ ዳሮ ጭማሱ፤ እያ ባ ኮይሮ አዝናራ ላፑን ላይꬅ ደአሱ።
LUK 2:37 እ አዝናይ ሀይቅን ሆስፑን ታማነ ኦይዱ ላይꬅ ግዳና ጋካናዉ ቃማነ ጋላስ ፓጨይ ባይና ዎሳንነ ፆማን ፆሳ ኬꬃን ሀጋዛሱ።
LUK 2:38 እያ ሄ ሳትያን ባዳ ፆሳ ጋላታሱ፤ የሩሳላመ ዎዘተꬃ ናግያ ኡባስ ዮጋ ናአባ ማርካታሱ።
LUK 2:39 ዮሰፋራነ ማይራምራ ጎዳ ህግያን ኪተትዳ ዎጋ ኡባ ፖልዳፐ ጉየ ጋልላ ቢታን ደእያ ባንታ ካታማ ናዝረተ ስምዶሶና።
LUK 2:40 ናአይ ድጭሸነ ምንሸ ብስ። ጭንጫተꬃን ኩምስ፤ ፆሳ አꬎ ኬሀተꬃይ እያ ቦላ ደኤስ።
LUK 2:41 ዮሰፋራነ ማይራምራ ፓስካ ባኣለ ቦንቻናዉ ላይꬃን ላይꬃን የሩሳላመ ቦሶና።
LUK 2:42 የሱሳስ ታማነ ናምኡ ላይꬅ ግድያ ዎደ ካሰ ሜዘትዳይሳዳ ባኣለ ቦንቻናዉ ብዶሶና።
LUK 2:43 ባልያ ቦንችዳፐ ጉየ ሶ ስምያ ዎደ ናአይ የሱሲ የሩሳላመን አትስ። ሽን ዮሰፋራነ ማይራምራ እ የሩሳላመን አቶይሳ ኤርቦኮና።
LUK 2:44 እ ሶ ስምያ አሳራ ዎላ ደእያ ዳንን ኤንቲ እስ ጋላሳ ኦገ ብዶሶና። እ ባይናይሳ ኤርዳፐ ጉየ ባንታ ዳቦታነ ላገታ ማታን ኮይዶሶና።
LUK 2:45 እ ያን ꬋይን ኮይሸ ጉየ የሩሳላመ ጋካናዉ ብዶሶና።
LUK 2:46 ሄꬑ ጋላሳፐ ጉየ ፆሳ ኬꬃን አስታማረታ ግዶን ኡትድ ኤንታባ ስእሸነ ኤንታ ኦይችሸ ደእሽን ደምዶሶና።
LUK 2:47 እያ ስእያ ኡባይ እያ አኬካንነ ዛሩዋን ማላለትዶሶና።
LUK 2:48 ሶ አሳይ እያ ደምዳ ዎደ ማላለትዶሶና። እያ አያካ፥ “ታ ናአዉ፥ አይስ ኑና ሀይሳዳ ኦꬃዲ? ነ አዋራነ ታራ ነና ኮይሸ ኡንኤትዳ” ያጋሱ።
LUK 2:49 የሱሲ ኤንታኮ፥ “ታና አይስ ኮዬቲ? ታ፥ ታ አዋ ኬꬃን ዳናዉ በሰይሳ ኤረከት” ያግስ።
LUK 2:50 ሽን እ ኤንታኮ ግዳባ ኤንቲ አኬክቦኮና።
LUK 2:51 ሄሳፈ ጉየ፥ ኤንታራ እስፈ ናዝረተ ካታማ ብስ። ኤንታዉ ኪተትሸ ደእስ። እያ አይያ ሄ ኡባ ባ ዎዛናን ዎꬃዳ ናጋሱ።
LUK 2:52 የሱሲ፥ ጭንጫተꬃን፥ ጌሳንነ ቴማን ፆሳ ስንꬃንነ አሳ ስንꬃን ድጭስ።
LUK 3:1 ካዎይ ፅባርዮስ ሮመ ቢታን ካዎትን፥ ታማነ እቻሻንꬆ ላይꬃን፥ ጰንፀ ጵላፆስ ይሁዳ ሃርያ ዎደ፥ ሄሮዲስ ጋልላ ሃርያ ዎደ፥ እያ እሻ ፍልጶስ እፁርያሳነ ፅራኮንዶሳ ሃርያ ዎደ፥ ልሳንዮስ አብላንሳ ሃርያ ዎደ፥
LUK 3:2 ሃናራነ ቃያፋራ ካህነ ሀላቃ ግድ ደእሽን፥ ፆሳ ቃላይ ዛካርያሳ ናኣ ዮሃንሳኮ መላ ቢታ ይስ።
LUK 3:3 ዮሃንስ፥ “ህንተ ናጋራፐ ስምተነ ፃማቀትተ። ፆሳይ ህንተ ናጋራ አቶ ጋና” ያግድ ታማርስሸ ዮርዳኖሰ ሻፋ ሄራን ደእያ ቢታ ኡባ ብስ።
LUK 3:4 ሄስካ ናበይ እሳያስ ባ ማፃፋን፥ “መላ ቢታን ባ ቃላ ꬎቁ ኦꬅድ፥ ዋስያ ኡራ ቃላይ፥ ‘ጎዳ ኦግያ ጊግስተ፥ ሆሮጋካ ፕድ ኦꬅተ።
LUK 3:5 አፎ ኡባይ ኩማና፥ ዙማይነ ደረይ ዝቅ ጋና። ዎበ ኦገይ ሉላና፥ ጊጎና ሆሮጋይ ቅንፅ ጋና።
LUK 3:6 አሾ ማእዳ ኡባይ፥ ፆሳ አሹዋ በአና’ ” ግድ ፃፍዳይሳዳ ሀንስ።
LUK 3:7 ዮሃንስ፥ ባ ኩሸን ፃማቀታናዉ ይዳ አሳኮ፥ “ህንተኖ፥ ሾሻ ናይቶ ያናዉ ደእያ ሀንቁዋፈ አታና መላ ህንተና ዞርዳይ ኦኔ?
LUK 3:8 ህዛ፥ ህንተ ስሙዋ ቆንጭስያ ሎኦ ኦሶ ኦꬅተ፥ ህንተ ዎዛናን፥ ‘ኑስ፥ ኑ አዋይ አብራሃመይ ደኤስ ግድ ጬቀቶፍተ።’ ሃ ስእተ፥ ሀ ሹቻታፐ ፆሳይ አብራሃመስ ናአ ከሳናዉ ዳንዳኤስ።
LUK 3:9 ሄኮ፥ ቤፀይ ምꬃ ፃጶን ደኤስ። ህዛ፥ ሎኦ አይፈ አይፎና ምꬃ ኡባይ ቃንፀትድ ታማን የገታና” ያግስ።
LUK 3:10 አሳይ፥ “ያትን ኑኒ አይ ኦꬅኖ?” ያግድ ኦይችዶሶና።
LUK 3:11 ዮሃንስ ዛሪድ፥ “ናምኡ አፍል ደእያ አስ ባይናይሳስ እሞ። ካꬅ ደኤይስ ባይናይሳስ እሞ” ያግስ።
LUK 3:12 ቃራፃ ቃንፅሰይሳት ፃማቀታናዉ ይድ፥ “አስታማርያዉ፥ ኑኒ አይ ኦꬅኖ?” ያግዶሶና።
LUK 3:13 እ ዛሪድ፥ “ህንተ ቃንፅሳናዉ ኪተቶይሳፈ አꬅድ ኤኮፍተ” ያግስ።
LUK 3:14 ቃስ ዎታዳረት ይድ፥ “ኑኒ አይ ኦꬅኖ” ያግድ ኦይችዶሶና። ዮሃንስ፥ “ኦደባካ ዎልቃን ዳፍድ ኤኮፍተ፥ ኦናካ ዎርዶን ሞቶፕተ፥ ህንተ ዳሞዘይ ህንተዉ ግዶ፤ ኡፋይትድ ደእተ” ያግስ።
LUK 3:15 አሳይ ክርስቶሳ ናግሸ ደእያ ግሾ፥ ዮሃንሳ፥ “እ ክርስቶሳ ግዳንደሻ?” ግድ ቆፕዶሶና።
LUK 3:16 ዮሃንስ ኡባስ ዛሪድ፥ “ታኒ ህንተና ሃꬃን ፃማቃይስ፥ ሽን ታፐ አꬍድ ዎልቃመይስ ያና። ታኒ እያ ጫማ ዎዶሩዋ ብላናዉ በሶና አስ። እ ህንተና ጌሻ አያናንነ ታማን ፃማቃና።
LUK 3:17 ዉዱማን ደእያ ካꬃ ፖሎ ጌሻናዉ ፕይ እያ ኩሸን ደኤስ። ጌሻ ካꬃ ባ ሻልያን ቆላና፤ ካልያ ꬋዮና ታማን ፁጋና” ያግስ።
LUK 3:18 ቃስ ዮሃንስ አሳ ዳሮ ዞረ ዞርድ ዎንገላ ኦድስ።
LUK 3:19 ሽን ዮሃንስ ሄሮዲስ ባ እሻ ማችዉ፥ ሄሮድያዳ፥ ኤክዳ ግሾነ ሀራ ኢታ ኦሶታ ግሾ ሃንቄትዳ ዎደ፥
LUK 3:20 ሄሮዲስ ካሰይሳ ቦላ ሀራባ ኡባ ጉጅድ ዮሃንሳ ዎይነ ገልስስ።
LUK 3:21 ዮሃንስ ቃሸታናፐ ስን አሳ ኡባ ፃማቅድ ስምን፥ ቃስ የሱሲካ ፃማቀትስ። እ ዎስሽን ሳሎይ ዶየትስ።
LUK 3:22 ጌሻ አያናይ ሆለዳ በንትሸ እያ ቦላ ኡትስ። ሳሎፐ “ታኒ ዶስያ ናአይ ነና፤ ነ ታና ኡፋይሳሳ” ግያ ቃላይ ይስ።
LUK 3:23 የሱሲ ታማርሶ ኦይክያ ዎደ እያዉ ሀስታሙ ላይꬅ ግድሽን፥ አሳይ እያ ዮሰፋ ናአ ግድ ቆፕስ። ዮሰፍ ኤለ ናአ፥
LUK 3:24 ኤለይ ማታ ናአ፥ ማት ሌወ ናአ፥ ሌወይ ማልካ ናአ፥ ማልክ ዮና ናአ፥ ዮን ዮሰፋ ናአ፥
LUK 3:25 ዮሰፍ ማታታ ናአ፥ ማታት አሞፀ ናአ፥ አሞፀይ ናሆመ ናአ፥ ናሆመይ አስሊመ ናአ፥ አስሊመይ ናገ ናአ፥
LUK 3:26 ናገይ ማኣተ ናአ፥ ማኣተይ ማታታ ናአ፥ ማታት ሳማየ ናአ፥
LUK 3:27 ሳማየይ ይሁዳ ናአ፥ ይሁድ ዮናና ናአ፥ ዮናነይ ራሰ ናአ፥ ራሰይ ዛሩባበላ ናአ፥ ዛሩባበል ሳላትያላ ናአ፥ ሳላትያል ኔራ ናአ፥
LUK 3:28 ኔር ማልካ ናአ፥ ማልክ ሀደ ናአ፥ ሀድ ቆሳማ ናአ፥ ቆሳም ኤልሞዳና ናአ፥ ኤልሞዳን ኤራ ናአ፥
LUK 3:29 ኤር ዮሰአ ናአ፥ ዮሰእ አላዛራ ናአ፥ አላዛር ዮራመ ናአ፥ ዮራመይ ማታ ናአ፥ ማታ ሌወ ናአ፥
LUK 3:30 ሌወይ ስሞና ናአ፥ ስሞን ይሁዳ ናአ፥ ይሁድ ዮሰፋ ናአ፥ ዮሰፍ ዮናና ናአ፥ ዮናነይ ኤልያቄመ ናአ፥
LUK 3:31 ኤልያቄም ማልያ ናአ፥ ማልይ ማይናነ ናአ፥ ማይናነይ ማታ ናአ፥ ማት ናታና ናአ፥ ናታን ዳዊታ ናአ፥
LUK 3:32 ዳዊቲ እሰየ ናአ፥ እሰየይ እዮቤዳ ናአ፥ እዮቤድ ቦኤዛ ናአ፥ ቦኤዝ ሳልሞና ናአ፥ ሳልሞና ናአሶና ናአ፥
LUK 3:33 ናአሶን አምናዳበ ናአ፥ አምናዳበይ ራመ ናአ፥ ራመይ አርነ ናአ፥ አርነይ አስሮመ ናአ፥
LUK 3:34 አስሮመይ ፋረሳ ናአ፥ ፋረስ ይሁዳ ናአ፥ ይሁድ ያይቆባ ናአ፥ ያይቆብ ይሳቃ ናአ፥ ይሳቅ አብራሃመ ናአ፥ አብራሃመይ ታራ ናአ፥
LUK 3:35 ታር ናኮራ ናአ፥ ናኮረይ ሳሩጋ ናአ፥ ሳሩግ ረሁ ናአ፥ ረሁይ ፋለቃ ናአ፥ ፋለቅ ኤቤራ ናአ፥ ኤቤሮይ ሴላ ናአ፥
LUK 3:36 ሴል ቃይናማ ናአ፥ ቃይናም አርፋክሳደ ናአ፥ አርፋክሳድ ሴማ ናአ፥ ሴም ኖሄ ናአ፥ ኖሄይ ላመሀ ናአ፥
LUK 3:37 ላመህ ማቱሳላ ናአ፥ ማቱሳል ሄኖከ ናአ፥ ሄኖከይ ያረዳ ናአ፥ ያረድ ማላልኤላ ናአ፥ ማላልኤል ቃይናና ናአ፥
LUK 3:38 ቃይናን ሄኖሳ ናአ፥ ሄኖስ ሴታ ናአ፥ ሴት አዳመ ናአ፥ አዳመይ ፆሳ ናአ።
LUK 4:1 የሱሲ ጌሻ አያናን ኩምድ ዮርዳኖሰ ሻፋፐ ስምዳ መላ አያናይ እያ መላ ብታ ኤፍስ።
LUK 4:2 ያን ኦይታሙ ጋላስነ ቃማ ፃላሄን ፓጨትስ። ሄ ጋላሳታን አይኮካ ሞና ጋምእዳ ግሾ ዉርሰꬃን ኮሻትስ።
LUK 4:3 ፃላሄይ እያኮ፥ “ኔኒ ፆሳ ናአ ግድኮ አነ ሀይስ ሹቻይ ኡይꬁ ግዶ ጋዳ ኪታ” ያግስ።
LUK 4:4 የሱሲ ዛሪድ፥ “አስ ኡይꬃ ፃላላን ዴና ጌተትድ ፃፈትስ” ያግስ።
LUK 4:5 ሄሳፈ ጉየ፥ ፃላሄይ የሱሳ አዱሳ ደረ ቦላ ከስድ ሀ አላምያ ካዎተꬃታ አይፈ ቅጵ ዛራናዉ በስስ።
LUK 4:6 ፃላሄይ፥ “ሀ ኡባስ ማታይነ ቦንቾይ ታዉ እመትስ። ታኒ ዶስዳ ኦደስካ እምያ ግሾ ነዉ እማና።
LUK 4:7 ሄሳ ግሾ፥ ኔኒ ታዉ ጎይንኮ ኡባይ ነዉ ግዳና” ያግስ።
LUK 4:8 የሱሲ ዛሪድ፥ “ነ ጎዳ፥ ነ ፆሳ፥ እያ ፃላላ ጎይና ጌተትድ ፃፈትስ” ያግስ።
LUK 4:9 ዉርሰꬃን ፃላሄይ የሱሳ የሩሳላመ ኤፍድ ፆሳ ኬꬃስ ሁጵያ ቦላ ኤስድ፥ “ኔኒ ፆሳ ናአ ግድኮ አነ ዱገ ሳአን ነና የጋ።
LUK 4:10 አይስ ጊኮ፥ “ ‘ነና ናግያ ኪታንቾታ ፆሳይ ነ ግሾ ኪታና።
LUK 4:11 ኤንቲ ነ ቶሆይ ሹቻን ꬉበቶና መላ፥ ባንታ ኩሽያን ꬎቁ ኦꬅድ ነና ደንꬃና’ ጌተትድ ፃፈትስ” ያግስ።
LUK 4:12 የሱሲ ዛሪድ፥ “ነ ጎዳ ፆሳ ፓጮፋ ጌተትድ ፃፈትስ” ያግስ።
LUK 4:13 ፃላሄይ የሱሳ ፓጭያ ዉርስዳፐ ጉየ ሀራ እንጀ ዎደ ደማና ጋካናዉ እያፐ ሻከትስ።
LUK 4:14 የሱሲ አያና ዎልቃን ኩምድ ጋልላ ስምስ። እያ ሱንꬃይ ሄራን ደእያ ቢታ ኡባን ከይስ።
LUK 4:15 እ አይሁደ ዎሳ ኬꬅ ገልድ ታማርስስ፤ አሳ ኡባይ እያ ጋላትዶሶና።
LUK 4:16 ያፐ እ ድጭዳ ካታማ ናዝረተ ይስ። ካሰ ሜዘትዳይሳዳ ሳምባታ ጋላስ አይሁደ ዎሳ ኬꬅ ገልስ። ናባባናዉካ ደንድ ኤቅስ።
LUK 4:17 ናብያ እሳያሳ ማፃፋይ እያዉ እመትን፥ ዶይድ፥ ሀይሳዳ ያግድ ፃፈትዳይሳ ደምስ፦
LUK 4:18 “ጎዳ አያናይ ታ ቦላ ደኤስ፥ ማንቆታስ ዎንገላ ኦዳና መላ ፆሳይ ታና ዶርስ። ቃሸትዳይሳታስ ብለተꬅ፥ ቆቅዳይሳታ ፄልሳናስነ ኡንኤትዳይሳታ ብርሻና መላ፥
LUK 4:19 ፆሳይ ኬሀናዉ ቆፕዳ ላይꬃ ኦዳና መላ ታና ኪትስ” ያግስ።
LUK 4:20 ሄሳፈ ጉየ፥ ማፃፋ ፃፅድ ሀጋዘይሳስ እምድ ታማርሳናዉ ኡትስ። አይሁደ ዎሳ ኬꬃን ደእያ አሳት ኡባይ ጫድ ፄሎሶና።
LUK 4:21 እ፥ “ሀይስ ህንተ ሀይꬃን ህንተ ስእያ ሀ ማፃፋ ቃላይ ሀች ፖለትስ” ያግስ።
LUK 4:22 ኡባይ እያባ ዳርስድ ኦደቶሶና። ቃስ እያ ዶናፐ ከይያ አꬎ ኬሀተꬃን ኩምዳ ቃላን ማላለትሸ፥ “ሀይስ ዮሰፋ ናኣ ግደነዬ?” ያግዶሶና።
LUK 4:23 እ፥ “ ‘ነኖ ꬋለ አዋዉ ነና አሻ፥ ቅፍርናሆማን ነ ኦꬅዳባ ኑ ስኦይሳ ቃስ ሀይሳን ነ ካታማን ኦꬃ’ ግያ ሌምሱዋን ህንተ ታና ጋናይሳስ ስይ ባዋ” ያግስ።
LUK 4:24 ቃስ፥ “ቱማ ኦዳይስ፤ ናበይ ባ የለትዳ ቢታን ቦንቸተና።
LUK 4:25 “ታ ህንተዉ ቱማ ኦዳይስ፤ ሳሎይ ሄꬑ ላይꬅነ ባጋ ጎርደትን ምኖ ኮሽ ቢታ ኡባን ደእያ ኤልያሳ ዎደ ዳሮ አምኤት እስራኤለን ደኦሶና።
LUK 4:26 ኤልያስ ኤንታፈ እስነኮካ ኪተትቤና። ሽን ሳራፕታን ደእያ አምኤኮ ኪተትስ።
LUK 4:27 ናብያ ኤልሳ ዎደ እስራኤለን ዳሮ ባሮ ሀርጋንቾት ደኦሶና። ሽን ሶረ ኡራ ንእማነፐ አትሽን፥ ኦንካ ፓፅቤና” ያግስ።
LUK 4:28 አይሁደ ዎሳ ኬꬃን ደእያ አሳ ኡባይ ሄሳ ስእዳ ዎደ ዳሮ ይሎትዶሶና።
LUK 4:29 ባንታ ኡትዳ በሳፈ ደንድድ ደረ ቦላ ኬፀትዳ ካታማፐ ጋፃ ከስድ ሱግ የዳናዉ አፎ ዶና ኤፍዶሶና።
LUK 4:30 ሽን እ ኤንታ ግዶራ ካንꬅድ አꬍስ።
LUK 4:31 ያፐ ጋልላ ቢታን ደእያ ቅፍርናሆማ ካታማ ብስ። ያን ሳምባታ ጋላስ አሳ ታማርስስ።
LUK 4:32 እ ታማርሰይ ማታራ ግድያ ግሾ ኡባይ እያ ትምርትያን ማላለትዶሶና።
LUK 4:33 አይሁደ ዎሳ ኬꬃን ቱና አያናይ ኦይክዳ ኡራይ ደኤስ።
LUK 4:34 እ፥ “ናዝረተ የሱሳ ኑና አይስ ዋይሳይ ኑፐ ሃካ፤ ኔኒ ይዳይ ኑና ꬋይሳናሰዬ? ኔኒ ኦነኮ ታኒ ኤራይስ። ኔኒ ፆሳፈ ይዳ ጌሻ” ያግድ ዋስስ።
LUK 4:35 የሱሲ ቱና አያናኮ፥ “ስእ ጋዳ ሀ ኡራፐ ከያ” ያግድ ሀንቅስ። ቱና አያናይ ኡራ አሳ ኡባ ስንꬃን ሆል የግድ አይኮካ ቆሆና የድድ ከይስ።
LUK 4:36 አሳ ኡባይ ማላለትዶሶና። ዎልኮ፥ “ሀኖስ፥ ሀይስ አይብ ትምርቴ? ቱና አያናታ ማታንነ ዎልቃን ኪቴስ፤ ኤንትካ ከዮሶና” ያግዶሶና።
LUK 4:37 እያ ሱንꬃይ ሄራ ኡባን ከይስ።
LUK 4:38 ሄሳፈ ጉየ፥ የሱሲ አይሁደ ዎሳ ኬꬃፈ ከይድ ስሞና ሶ ገልስ። ስሞና ማቸ አይያ ምኖ ቆፆ ምሻ ሀርገን ሳከታሱ። እዮ ፓꬃና መላ የሱሳ ዎስዶሶና።
LUK 4:39 እ ሂፃኮ ሺቅ ሆክድ እ ሀርግያ ሀንቅስ። ምሻይ አግን ኤለሳ ደንዳዳ ኤንታ ሞካሱ።
LUK 4:40 አዋይ ዉላና ሀንሽን ዱማ ዱማ ሀርግያን ኦይከትዳ አሳ እያኮ ኤህዶሶና። እ እሱዋ እሱዋ ቦላ ባ ኩሽያ ዎꬅድ ፓꬅስ።
LUK 4:41 ቱና አያናት ቃስ፥ “ኔኒ፥ ፆሳ ናኣ” ግድ ዋስሸ ዳሮ አሳፐ ከይዶሶና። ሽን እ ኤንታና ሀንቅስ። እ ክርስቶሳ ግደይሳ ኤንቲ ኤርያ ግሾ፥ እስባካ ኦደቶና መላ ድግስ።
LUK 4:42 ቡሮ ዎንትያ ዎደ የሱሲ እስ ጌማ በሲ ብስ። አሳይ ኮይሸ እ ደእያ በሳ ይዶሶና። ኤንታፈ እ ሻከትድ ቦና መላ ድጋናዉ ኮይዶሶና።
LUK 4:43 ሽን እ፥ “ታኒ ሀራ ካታማታ ባዳ ፆሳ ካዎተꬃ ዎንገላ ማርካታናዉ በሴስ። ታ ኪተትዳይ ሄሳሳ” ያግስ።
LUK 4:44 ይሁዳ ቢታን ደእያ አይሁደ ዎሳ ኬꬃን ሳባክስ።
LUK 5:1 እስ ጋላስ የሱሲ ገንሳሬፀ አባ ማታን ኤቅዳሽን ዳሮ አሳይ እያ ዩሹዋ ኡንኤꬅድ፥ እ ታማርስያ ፆሳ ቃላ ስኦሶና።
LUK 5:2 ያን ሃꬃ ጋፃን ደእያ ናምኡ ዎጎሎታ በእስ። ሞሎ ኦይክያ አሳት ዎጎሎታፐ ዎꬍድ ባንታ ግትያ ሜጮሶና።
LUK 5:3 ሄ ዎጎሎታፐ ስሞናይሳን ገልድ ቢታፈ ጉꬅ ግዶ ሺሻና መላ ኦይችስ። ያትድ፥ ሄ ዎጎሉዋ ቦላ ኡትድ አሳ ታማርስስ።
LUK 5:4 ባ ትምርትያ ኦንግዳፐ ጉየ ስሞናኮ፥ “ገደ ጪሙዋኮ ሺሻዳ ሞሉዋ ኦይካናዉ ህንተ ግትያ የግተ” ያግስ።
LUK 5:5 ስሞን ዛሪድ፥ “አስታማርያዉ፥ ቃማ ኩመꬅ ዳቡርሸ አቅድ አይኮካ ኦይክቦኮ፥ ሽን ነ ጊኮ ግትያ የጋና” ያግስ።
LUK 5:6 ኤንቲ ግትያ የግዳ ዎደ ግተይ ዳከታና ጋካናዉ ዳሮ ሞሎ ኦይክዶሶና።
LUK 5:7 ሀራ ዎጎሎን ደእያ ባንታ ላገት ይድ፥ ባንታና ማዳና መላ ዉትድ ፄግዶሶና። ኤንቲ ይድ ናምኡ ዎጎሎት፥ ሃꬃን ምተታና ጋካናዉ ሞሎን ኩንꬅዶሶና።
LUK 5:8 ስሞን ጰፅሮስ ሄሳ በእዳ ዎደ፥ የሱሳ ስንꬃን ኩንድድ፥ “ጎዳዉ፥ ታኒ ናጋራንቾ አስ ግድያ ግሾ፥ ታፐ ሻከታ” ያግስ።
LUK 5:9 እ ሄሳ ግዳይ፥ እነ እያራ ደኤይሳት ኦይክዳ ሞሉዋ ዳሮተꬃን ማላለትዳ ግሾሳ።
LUK 5:10 ቃስ ስሞና ላገ ግድዳ ዛብድዮሳ ናይት ያይቆባራነ ዮሃንሳራ ማላለትዶሶና። የሱሲ ስሞናኮ፥ “ባቦፋ! ህዛፐ ኔኒ አሰ ኦይክያ አስ ግዳና” ያግስ።
LUK 5:11 ኤንቲ ዎጎሎታ ጋፃ ሺሽዳፐ ጉየ ኡባ አግድ የሱሳ ካልዶሶና።
LUK 5:12 የሱሲ ካታማታፐ እሱዋን ደእሽን እስ ባሮ ሀርገን ኦይከትዳ አስ ሄ ካታማን ደኤስ። ሄ ኡራይ የሱሳ በእድ እያ ስንꬃን ጉፋንድ፥ “ጎዳዉ፥ ነ ሸነ ግድኮ ታና ጌሻናዉ ዳንዳኣሳ” ግድ ዎስስ።
LUK 5:13 የሱሲ ባ ኩሽያ የድ ቦችድ፥ “ኤ፥ ታ ሸነ፤ ጌይያ” ያግስ። ኢራ ባሮ ሀርገይ ኡራፐ ክችስ።
LUK 5:14 የሱሲ፥ “ሀይሳ ኦደስካ ኦዶፓ፥ ሽን ባዳ ነናተꬃ አይሁደ ካህነ በሳ። ነ ጌይዳይሳስ ማርካ ግዳና መላ ሙሰይ ኪትዳ ያርሾ ያርሻ” ግድ ኪትስ።
LUK 5:15 ግዶሽን፥ እያ ሱንꬃይ ካሰፐ አꬍድ ኤረትሸ ብስ። ዳሮ አሳይ እ ኦድያባ ስአናዉነ ባንታ ሀርግያፈ ፓፃናዉ ዮሶና።
LUK 5:16 ሽን የሱሲ ዳሮ ዎደ ጌማ በሲ ብድ ዎሴስ።
LUK 5:17 እስ ጋላስ የሱሲ ታማርስሽን ጋልላፐነ ይሁዳ ሄራ ኡባፈ ቃስ የሩሳላመፐ ይዳ ፋርሳወትነ ህገ አስታማረት ያን ኡትዶሶና። አሳ ፓꬅያ ጎዳ ዎልቃይካ እያራ ደኤስ።
LUK 5:18 ሄ ዎደ አሳይ እስ ጉንዳ አስ ሀላራ ቶክድ ኤህዶሶና። ሶ ገልስድ እያ ስንꬃን ዎꬃናዉ ቆፕዶሶና።
LUK 5:19 ሽን አሳ ዳሮተꬃፈ ደንዶይሳን ሶ ገልሳናዉ ፆነትድ ኬꬃ ቦላ ከይድ፥ ካራ ቃዉፅድ፥ ሀርጋንቹዋ ሀላራ አሳ ሻክድ የሱሳ ስንꬃን የግዶሶና።
LUK 5:20 የሱሲ ኤንታ አማኑዋ በእድ፥ “ላ አድያዉ፥ ነ ናጋራይ አቶ ጌተትስ” ያግስ።
LUK 5:21 ህገ አስታማረትነ ፋርሳወት፥ “ሀይስ ፆሳ ቦላ ያግድ ኦደተይ ኦኔ? እስ ፆሳፈ አትሽን፥ ሀር ናጋራ አቶ ጋናዉ ዳንዳኤይ ኦኔ?” ያግድ ቆፕዶሶና።
LUK 5:22 የሱሲ ኤንታ ቆፋ ኤርዳ ግሾ ኤንታኮ፥ “ህንተ ዎዛናን ሄሳꬆ አይስ ቆፔቲ?
LUK 5:23 ‘ነ ናጋራይ ቁሸትስ ገይሳፈነ ደንዳዳ ባ ገይሳፈ አዉስ ካዉዪ?’
LUK 5:24 ሽን ታ ሄሳ ግዳይ አሳ ናእ ሳአ ቦላ ናጋራ አቶ ጋናዉ ማት ደኤይሳ ህንተ ኤራና መላሳ።” ሄሳፈ ካልድ፥ ጉንዳ ኡራኮ፥ “ደንዳ፤ ነ አልጋ ቶካዳ ነ ሶ ባ” ያግስ።
LUK 5:25 እ ኤለስ ደንድድ ኤንታ ስንꬃን ኤቅስ፤ እ ቶከትድ ይዳ አልጋ ቶክድ ፆሳ ጋላትሸ ባ ሶ ብስ።
LUK 5:26 ሄ ዎደ ኡባይካ ማላለትዶሶና። ፆሳ ጋላትሸ፥ “ሀች ግታ ማላታ በእዳ” ያግድ ያሸትዶሶና።
LUK 5:27 ሄሳፈ ጉየ፥ የሱሲ ያፐ ከይድ ብስ። ሌወ ጌተትያ እስ ቃራፃ ቃንፅሰይስ ቃራፃ ቃንፅስያ በሳን ኡትዳይሳ በእድ፥ “ታና ካላ” ያግስ።
LUK 5:28 እ ኡባባ አግድ፥ ደንድድ እያ ካልስ።
LUK 5:29 ሄ ሌወይ ባ ሶን ግታ ግብራ ጊግስስ። ዳሮ ቃራፃ ቃንፅሰይሳትነ ሀራ አሳት ካꬃ ቦላ ኡትዶሶና።
LUK 5:30 ፋርሳወትነ ህገ አስታማረት፥ “ቃራፃ ቃንፀይሳታራነ ናጋራንቾታራ አይስ ሜትነ ኡዬቲ?” ያግድ የሱሳ ታማረታ ቦላ ዙዙምዶሶና።
LUK 5:31 የሱሲ ኤንታኮ፥ “ሀርጋንቾታሳፈ አትሽን፥ ፓፃታስ አክመ ኮሸና።
LUK 5:32 ታኒ ናጋራንቾታ ማሮታኮ ዛራናሳፈ አትሽን፥ ጌሻታ ፄጋናዉ ያቢከ” ያግድ ዛርስ።
LUK 5:33 ኤንቲ የሱሳኮ፥ “ዮሃንሳ ታማረት ዳሮ ዎደ ፆሞሶና፥ ዎሶሶና፤ ቃስ ፋርሳወታ ታማረትካ ሄሳꬆ ኦꬆሶና። ሽን ነይሳት ኡባ ዎደ ሞሶናነ ኡዮሶና” ያግዶሶና።
LUK 5:34 የሱሲ ኤንታኮ፥ “ማችዉ ኤከይስ ኤንታራ ደእሽን ፄገትዳ አሳይ ፆማና መላ ኦꬃናዉ ዳንዳኤቲ?
LUK 5:35 ሽን ሙሹራይ ኤንታፈ ሻከታና ጋላሳይ ያና፥ ሄ ዎደ ኤንቲ ፆማና።”
LUK 5:36 ቃስ ያግድ ሌምሶ ኦድስ፤ “ኦራꬃ ማኦፐ ፔꬍድ ጋልአ ማኦ ቦላ ስከይ ኦንካ ባዋ። ሄሳꬆ ኦꬅኮ ኦራꬃ ማኡዋ ፔꬌስ፥ ኦራꬃይ ጋልኣስ ጊገና።
LUK 5:37 ማልአንቶ ዎይነ ጋልአ ኦጎሮን ቆልያ ኦንካ ባዋ። ሄሳ ኦꬅኮ፥ ኦራꬃ ዎይነይ ጋልአ ኦጎሩዋ ꬉሴስ፤ ዎይነይ ጉኬስ ኦጎሮይካ ማዶናባ ግዴስ።
LUK 5:38 ሄሳ ግሾ፥ ኦራꬃ ዎይነይ ኦራꬃ ኦጎሮን ቆለታናዉ በሴስ።
LUK 5:39 ህዛ፥ ጫላይ ሎኦ ግያ ግሾ፥ ጫላ ዎይነ ኡይ ስሚድ ማልአንቶ ኮየይ ኦንካ ባዋ” ያግስ።
LUK 6:1 እስ ሳምባታ ጋላስ የሱሲ ግስተ ጋደ ግዶራ አꬌስ። የሱሳ ታማረት ትያ ባንጋ ዱꬅድ ባንታ ኩሸን ሽርክድ ሞሶና።
LUK 6:2 ሽን ፋርሳወታ ግዶፈ እሶት እሶት፥ “ሳምባታ ጋላስ ኦꬃናዉ በሶናባ አይስ ኦቲ?” ያግዶሶና።
LUK 6:3 የሱሲ ኤንታኮ ዛሪድ፥ “ዳዊቲ ኮሻትዳ ዎደ ባራ ደኤይሳታራ እስፈ ኦꬆይሳ ናባብበከቲ?
LUK 6:4 ፆሳ ኬꬅ ገልድ አይሁደ ካህነታ ፃላላስ በሲያ ዳቡዋ ምስ፤ ባራ ደኤይሳታስካ እሚስ” ያግስ።
LUK 6:5 ቃስ የሱሲ፥ “አሳ ናአይ ሳምባታ ጎዳ” ያግስ።
LUK 6:6 ሀራ ሳምባታ ጋላስ የሱሲ አይሁደ ዎሳ ኬꬅ ገልድ ታማርሴስ። ሄ በሳን ኡሻቻ ኩሸይ ስልዳ እስ አስ ደኤስ።
LUK 6:7 ህገ አስታማረትነ ፋርሳወት እያ ሞታናዉ ጋሶ ኮይድ ሳምባታ ጋላስ ፓꬅኮ በአና ግድ ናጎሶና።
LUK 6:8 ሽን የሱሲ ኤንታ ቆፋ ኤርድ ኩሸይ ስልዳ ኡራኮ፥ “ደንዳዳ አሳ ግዶን ኤቃ” ያግስ። ኡራይካ ደንድ ኤቅስ።
LUK 6:9 የሱሲ፥ “አነ ታ ህንተና እስባ ኦይቻይስ፤ ሳምባታ ጋላስ ኦꬃናዉ በሰይ ሎኦባየየ ኢታባዬ? ሸምፖ አሾየ ዎይኮ ꬋይሶ?” ያግስ።
LUK 6:10 ቃስ የሱሲ እያ ዩሹዋን ደእያ አሳ ዩሽ ፄልድ ኡራኮ፥ “ነ ኩሽያ ፕድ ኦꬃ” ያግስ። ኡራይካ እ ግዳይሳዳ ኦꬅን ኩሸይ ፓፅስ።
LUK 6:11 ሽን ህገ አስታማረትነ ፋርሳወት ዳሮ ይሎትዶሶና። የሱሳ ቦላ አይ ኦꬅኖ ግድ ባንታ ግዶን ማቀትዶሶና።
LUK 6:12 ሄ ዎደ ጋላሳታፐ እሱዋን የሱሲ ዎሳናዉ ዙማ ቦላ ከይስ። ቃማ ኩመꬅ ዎስሸ አቅስ።
LUK 6:13 ዎንተ ባ ታማረታ ፄግድ ኤንታ ግዶፈ ታማነ ናምአታ ዶርድ፥ ኤንታና፥ “ሀዋረታ” ግድ ሱንꬅስ።
LUK 6:14 ኤንትካ፥ ጰፅሮሳ ግድ ሱንꬅዳ ስሞና፥ እያ እሻ እንድርያሳ፥ ያይቆባ፥ ዮሃንሳ፥ ፍልጶሳ፥ ባርተለሞሳ፥
LUK 6:15 ማቶሳ፥ ቶማሳ፥ እልፍዮሳ ናኣ ያይቆባ፥ ባ ቢታስ ምሸትያ ስሞና፥
LUK 6:16 ያይቆባ ናኣ ይሁዳነ የሱሳ አꬅድ እምዳ አስቆሮታ ይሁዳ።
LUK 6:17 የሱሲ ኤንታራ እስፈ ዙማፐ ዎꬍድ ደምባ በሳን ኤቅስ። እያ ታማረታፐ ዳሮት ሄ በሳን ደኦሶና። ይሁዳ ቢታ ኡባፈ የሩሳላመፐ፥ ፅሮሳፐነ ስዶና አባ ጋፃፐ ይዳ ዳሮ አሳይ ደኤስ።
LUK 6:18 ኤንቲ ይዳይ፥ እ ታማርስያባ ስአናዉነ ባንታ ሀርግያፈ ፓፃናሳ። ቱና አያናን ዋየትያ አሳትካ ፓፅዶሶና።
LUK 6:19 ዎልቅ እያፐ ከይድ አሳ ኡባ ፓꬅያ ግሾ አሳይ እያ ቦቻናዉ ኮዮሶና።
LUK 6:20 ባ ታማረታ ፄልድ ሀይሳዳ ያግስ፦ “ህንተኖ፥ ማንቆቶ፥ ህንተ አንጀትዳይሳታ፤ ፆሳ ካዎተꬃይ ህንተሳ።
LUK 6:21 ህንተ ሀእ ኮሻተይሳት አንጀትዳይሳታ፥ ህንተ ካላና። ህንተ ሀእ ዬከይሳት አንጀትዳይሳታ ህንተ ሚጫና።
LUK 6:22 አሳይ ህንተና አሳ ናኣ ግሾ፥ እፅያ ዎደ፥ ህንተና ህልያ ዎደ፥ ህንተና ኤንቲ ቶችያ ዎደነ፥ ኢታ ሱንꬁ ኤንቲ ህንተዉ እምያ ዎደ ህንተ አንጀትዳይሳታ።
LUK 6:23 “ሄኮ፥ ህንተ ዎይቶይ ሳሎን ግታ ግድያ ግሾ ሄ ዎደ ኡፋይሳን ጉፕተ። አይስ ጊኮ፥ በን ኤንታ አዋት ናበታ ቦላ ሄሳዳ ኦꬅዶሶና።”
LUK 6:24 “ሽን ዱረቶ ህንተና አየ! ህንተ ሀእ ሎኦ ዱሳ ኤክደታ።
LUK 6:25 ሀእ ካልዳይሳቶ ህንተና አየ! ህንተ ኮሻታና። ሀእ ሚጨይሳቶ ህንተኖሾ ህንተ ካዮታናነ ዬካና።
LUK 6:26 አስ ኡባይ ህንተ ሎኦተꬃ ፃላላ ኦድያ ዎደ ህንተና አየ! ኤንታ አዋት በን ዎርዳንቾ ናበታ ቦላ ሄሳዳ ኦꬅዶሶና።
LUK 6:27 “ሽን ታና ስእያ ህንተዉ ታ ኦዳይስ፤ ህንተ ሞርከታ ዶስተ፤ ህንተና እፀይሳታስ ሎኦባ ኦꬅተ።
LUK 6:28 ህንተና ባደይሳታ አንጅተ፥ ህንተና ናቀይሳታስ ዎስተ።
LUK 6:29 እስ ባጋ ሻካላ ባቀይሳስ ሀንኮ ባጋ በሳ። ነ ላፃና ኤካና ገይሳስ ነ ሻምዝያ ጉጃዳ እማ።
LUK 6:30 ነና ዎስያ ኡባስ እማ፤ ኔፐ ኤክዳ ኦናካ ዛሮ ጋዳ ኦይቾፋ።
LUK 6:31 አሳይ ህንተዉ ኦꬃና መላ ህንተ ኮያባ ኡባ ህንተካ አሳስ ኦꬅተ።
LUK 6:32 “ህንተ፥ ህንተና ዶስያ አሳታ ፃላላ ዶስኮ፥ አይ ጋላት ህንተዉ ደኢ? ሀር አቶሽን፥ ናጋራንቾትካ ባንታና ዶሰይሳታ ዶሶሶና።
LUK 6:33 ህንተዉ ሎኦባ ኦይሳታ ፃላላስ ሎኦባ ኦꬅኮ ህንተዉ አይ ጋላት ደኢ? ናጋራንቾትካ ሄሳዳ ኦꬆሶና።
LUK 6:34 ታልኤ ዛራና አሳ ፃላላስ ህንተ ታልእኮ አይ ዱማ ጋላተተቲ? ናጋራንቾትካ ጉየ ዛራና አስ በእድ ታልኦሶና።”
LUK 6:35 “ሽን ህንተ ሞርከታ ዶስተ፤ ኤንታዉ ሎኦባ ኦꬅተ። ጉየ ኤካናዉ ቆፖና ታልእተ። ሄሳን ህንተ ኤካና ዎይቶይ ግታ ግዳና። ህንተ ኡባፈ ቦላ ፆሳ ናይታ ግዳና። እ ባና ጋላቶናይሳታስነ ኢታታስ ኬሀ።
LUK 6:36 ህንተ አዋይ ኬሀ ግዶይሳዳ ህንተካ ኬሀ ግድተ።
LUK 6:37 “አሳ ቦላ ፕርዶፍተ፤ ህንተ ቦላ ፕርደተና። ህንተ ቦረቶና መላ ኦናካ ቦሮፕተ። አቶ ጊተ፤ ፆሳይ ህንተዉ አቶ ጋና።
LUK 6:38 እምተ፤ ህንተዉ እመታና። ህንተ ማክዳባን ህንተዉ ዛር ማከታና፥ ኡባራካ ሎኦ ማክያባን ባቅድ፥ ሱድ ኩንꬅድ፥ ላለታና ጋካናዉ ህንተዉ ማከት እመታና” ያግስ።
LUK 6:39 ቃስካ የሱሲ ያግድ ኤንታዉ ሌምሶ ኦድስ፤ “ቆቀይ ቆቀ ካለꬃናዉ ዳንዳኢ? ካለꬅኮ ናምአይካ ዎል ኤክድ አፎን ዉሎኮናዬ?
LUK 6:40 ታማረይ አስታማረፐ አና። ሽን ሎይꬅ ታማርዳ ኡራይ ባ አስታማርያꬆ ሀኔስ።
LUK 6:41 “ነ እሻ አይፈን ደእያ ቡርያ አይስ በአይ? ነ አይፈን ደእያ ቱሱ ዳነይሳ አይስ በእኪ?
LUK 6:42 ነ አይፈን ደእያ ቱሱ ዳነይሳ በኦና ነ እሻኮ፥ ‘ታ እሻዉ፥ ነ አይፈን ደእያ ቡርያ ከሶ’ ጋናዉ ዋና ዳንዳኤይ? ነኖ ጩቡዋዉ፥ ኮይሮታዳ ነ አይፈን ደእያ ቱሱ ዳነይሳ ከሳ። ሄሳፈ ጉየ፥ ነ እሻ አይፈን ደእያ ቡርያ ከሳናዉ ጌሻዳ ፄላና።
LUK 6:43 “ሎኦ ምꬅ ኢታ አይፈ አይፈና፤ ሄሳዳካ ኢታ ምꬅ ሎኦ አይፈ አይፈና።
LUK 6:44 አይፈ አይፍያ ምꬅ ኡባይ ባ አይፈን ኤረቴስ። አጉንꬃፈ ባላሰ አይፈይ ማፀተና ቃስ ላደፐ ዎይነ አይፈይ ማፀተና።
LUK 6:45 ሎኦ አስ ባ ዎዛናን ኩምዳ ሎኦባፐ ሎኦባ ከሴስ። ኢታ አስ ባ ዎዛናን ኩምዳ ኢታባፐ ኢታባ ከሴስ። አስ ባ ዎዛናን ኩምድ ፓላህዳባፐ ባ ዶናን ኦደቴስ።
LUK 6:46 “ታ ገይሳ ኦከታ፥ ሽን ያትን አይስ ታና፥ ‘ጎዳዉ፥ ጎዳዉ፥ ጌቲ?’
LUK 6:47 ታኮ የይነ ታ ቃላ ስእድ ፖልያ ኡባይ ኦና ዳንያኮ ታ ህንተና በሳና።
LUK 6:48 እ ኬ ኬፃናዉ ዝቅ ኦꬅ፥ ኦላ ቦክድ፥ ጋርሳን ደእያ ዛላ ቦላ ኬ ኤስዳ ጭንጫ ኡራ ዳኔስ። ድኦይ ድእድ ሄ ኬꬃ ሱግስ፥ ሽን ምንꬅድ ኬፅዳ ግሾ፥ ቃፃናዉ ዳንዳእቤና።
LUK 6:49 ሽን ታ ቃላ ስእድ ኦꬆናይ ባ ኬꬃ ሻፈ ቦላ ኬፅዳ ኡራ ዳኔስ። ድኦይ ድእድ ሄ ኬꬃ ሱግዳ ዎደ ኤለስድ ኩንድስ። ሄ ኬꬃይ ዎልቃማ ኩንደꬅ ኩንድስ” ያግስ።
LUK 7:1 የሱሲ ሄሳ ኡባ አሳ ስንꬃን ታማርስድ ኦንግዳፐ ጉየ፥ ቅፍርናሆማ ካታማ ብስ።
LUK 7:2 ሄ በሳን እስ ማቶ ሀላቃይ ደኤስ። እ ዳሮ ዶስያ አይለይ ሀርገትድ ሀይቆስ ጋክስ።
LUK 7:3 እ የሱሳባ ስእዳ ዎደ ባ አይልያ ፓꬃና መላ እያ ዎሶ ግድ እስ እስ አይሁደ ጭማታ የሱሳኮ ኪትስ።
LUK 7:4 ኪተትዳይሳት፥ የሱሳኮ ብድ፥ “ነ እያዉ ሀይሳ ኦꬃናዉ በሴስ።
LUK 7:5 አይስ ጊኮ፥ ሀ ኡራይ ኑ አሳ ዶሴስ፥ አይሁደ ዎሳ ኬꬃካ ኬፅስ” ግድ ምንꬅ ዎስዶሶና
LUK 7:6 የሱሲካ ኤንታራ ብስ። ማቶ ሀላቃ ሶኮ ማትያ ዎደ ባ ላገታ እያኮ ኪትድ፥ “ጎዳዉ፥ ታ ካራፐ ጋርሳን ነ ገላናዉ ታ በሶና ግሾ፥ ዳቡሮፓ።
LUK 7:7 ታካ ታና ነ ስን ሺቃናዉ በሲያ አስ ጋዳ ቆፕከ። ሽን ነ እስ ቃላ ኦዳ፤ ታ አይለይ ፓፃና።
LUK 7:8 ታዉ ታፐ ቦላራ ሀላቃይ ደኤስ፥ ታፐ ጋርሳን ታ ኪትያ ዎታዳረት ደኦሶና። እሱዋ፥ ‘ባ’ ጊኮ ቤስ፥ ሀንኩዋ፥ ‘ሃያ’ ጊኮ ዬስ። ታ አይልያኮ፥ ‘ሀኖ ኦꬃ’ ጊኮ ኦꬄስ” ያግስ።
LUK 7:9 የሱሲ ሄሳ ስእዳ ዎደ ማላለትስ። ጉየ ስሚድ ባራ ያ አሳኮ፥ “ታኒ ህንተዉ ቱማ ኦዳይስ፤ ሀር አቶሽን እስራኤለንካ ሀይሳ መላ ግታ አማኖ ደማብከ” ያግስ።
LUK 7:10 ኪተትዳ አሳት ሶ ስምያ ዎደ አይለይ ፓፅን ደምዶሶና።
LUK 7:11 ጉꬃ ዎደፐ ጉየ የሱሲ ናይነ ካታማ ብስ። እያ ታማረታራነ ሀራ ዳሮ አሳት እያራ ብዶሶና።
LUK 7:12 እ ካታማ ገላና ሀንያ ዎደ አሀ ቶክዳ ዳሮ አሳት ካታማፐ ከዮሶና። ሀይቅዳ ናአይ ባ አየስ እሱዋ፥ እያካ አምኦ ግዳዳ ደአዉሱ። ካታማ አሳፐ ዳሮት ኢራ ደኦሶና።
LUK 7:13 ጎዳይ እዮ በእዳ ዎደ ቃትድ፥ “ዬኮፋ” ያግስ።
LUK 7:14 ሺቅድ ሀላ ቦችን ቶክዳ አሳት ኤቅዶሶና። የሱሲ፥ “ላ፥ ያላጋዉ ደንዳ” ያግስ።
LUK 7:15 ሀይቅዳይስ ደንድ ኡትድ ኦዳ ኦይክስ። የሱሲ ናኣ ኤክድ አየስ እሚስ።
LUK 7:16 አሳ ኡባይ ያሸትድ፥ “ግታ ናበይ ኑ ግዶን ደንድስ፤ ፆሳይ ባ አሳ በእስ” ያግድ ፆሳ ጋላትዶሶና።
LUK 7:17 እያ ሱንꬃይ ይሁዳንነ ሄ ሄራን ደእያ ቢታ ኡባን ስኤትስ።
LUK 7:18 ፃማቅያ ዮሃንሳ ታማረት ሄሳ ኡባ ዮሃንሳስ ኦድዶሶና። እ ኤንታ ግዶፈ ናምአታ ፄግድ፥
LUK 7:19 “ያና ጌተትዳይ ነነዬ? ዎይኮ ሀራ ናግኖ?” ያግድ ኦይችተ ግድ ጎዳኮ ኪትስ።
LUK 7:20 አሳት “የሱሳኮ ብድ፥ ፃማቅያ ዮሃንስ፥ ‘ያና ጌተትዳይ ነነዬ? ዎይኮ ሀራ ናግኖ?’ ጊተ ግድ ኑና ኔኮ ኪትስ” ያግዶሶና።
LUK 7:21 ሄ ሳተንካ የሱሲ ዳሮ አሳ ሀርግያፈ ፓꬅስ። ቱና አያናታ ከስስ፥ ቆቅዳ አይፍያካ ፄልስስ።
LUK 7:22 ዮሃንሳ ማታፐ ኪተትድ ይዳይሳታኮ፥ “ብድ ህንተ በእዳይሳነ ስእዳይሳ ዮሃንሳስ ኦድተ። አይፈ ቆቀት ፄሎሶና፥ ጉንዳት ብርሸትድ ሄመቶሶና፥ ባሮ ሀርጋንቾት ጌዮሶና፥ ቱለት ስኦሶና፥ ሀይቅዳይሳት ሀይቆፐ ደንዶሶና፥ ማንቆታስ ዎንገላይ ሳባከቴስ።
LUK 7:23 ታናን ꬉበቶና ኦንካ አንጀትዳይሳ።”
LUK 7:24 ዮሃንስ ኪትዳይሳት ብዳፐ ጉየ የሱሲ አሳስ ዮሃንሳባ ያግድ ኦድስ፦ “ህንተ አይ በአናዉ መላ ቢታ ከይደቲ? ጫርኮይ ቃꬅያ ማታ በአናሰዬ?
LUK 7:25 ያትን፥ አይ በአናዉ ከይደቲ? ኮይሰ ማኦ ማእዳ አሳ በአናሰዬ? ኮይሰ ማኦ ማእዳይሳትነ ሳእ እንጀትዳ አሳይ ካዎ ጋꬎን ደኦሶና።
LUK 7:26 ያትን፥ አይ በአናዉ ከይደቲ? ናብያ በአናሰዬ? ኤ፥ ታ ያጋይስ፦ ህንተ በአናዉ ከይዳይ ናበፐ አይሳ።
LUK 7:27 “ ‘ነ ኦግያ ነ ስንꬃን ጊግስያ ታ ኪታንቹዋ ኔፐ ስን ታ ኪታና’ ጌተትድ ፃፈትዳይ እያሳ።
LUK 7:28 ታ ህንተዉ ኦዳይስ፤ ማጫሳፐ የለትዳይሳታ ግዶፈ ዮሃንሳፐ አይ ባዋ። ፆሳ ካዎተꬃን ኡባፈ ጉፀይስ፥ እ ኡባፈ ግታ ግዳና” ያግስ።
LUK 7:29 ሀር አቶሽን፥ የሱሳ ቃላ ስእዳ ቃራፃ ቃንፅሰይሳት ኡባይ ዮሃንሳ ኩሸን ፃማቀትድ ፆሳይ ፅሎ ግደይሳ ቆንጭስዶሶና።
LUK 7:30 ሽን ፋርሳወትነ ህገ አስታማረት ዮሃንሳ ኩሸን ፃማቀቶና እፅድ ፆሳ ዞርያ ለቅስዶሶና።
LUK 7:31 የሱሲ ካልድ ሀይሳዳ ያግስ፦ “ህዛ፥ ሀ ዎድያ የለተꬃ አይብራ ዳንሶ? ኤንትካ ኦና ዳኖና?
LUK 7:32 ግያ ግዶን ኡትድ ዎል ፄግድ፥ ‘ኑ ህንተዉ ሱሱልኤ ፑንን፥ ህንተ የፀከታ። ኑ ሳቢድ ዘሌልን፥ ህንተ ዬከከታ’ ግያ ናይታ ዳኖሶና።
LUK 7:33 ፃማቅያ ዮሃንስ ሞናነ ኡዮና ይን፥ ‘ኢታ አያናራ ደኤስ ግደታ።’
LUK 7:34 አሳ ናአይ ምሸነ ኡይሸ ይን፥ ‘ያራምባነ ኡሻንቾ፥ ቃራፃ ቃንፅሰይሳታነ ናጋራንቾታ ዳቦ’ ግደታ።
LUK 7:35 ህዛ፥ ጭንጫተꬃ ቱማተꬃይ እያ ናይታ ኡባ ማታን ኤረትስ” ያግስ።
LUK 7:36 እስ ፋርሳወይ የሱሳ ካꬅ ሙዛናዉ ባ ሶ ፄግስ። እ ፋርሳውያ ሶ ብድ ጋይታ ቦላ ኡትስ።
LUK 7:37 ሄ ካታማን እስ ናጋራንቾ ማጫስ፥ የሱሲ ፋርሳውያ ሶን ግብራ ቦላ ደኤይሳ ስእዳ ዎደ ዳሮ አልኦ ጵልቃፀ ሽቶ ኤካዳ ያሱ።
LUK 7:38 የሱሳፐ ጉየ ባጋራ፥ እያ ቶሁዋ ማታን ኤቃዳ ዬካሸ እያ ቶሁዋ ባ አፉꬃራ ላኮꬃዉሱ። ባ ብናናራ እያ ቶሁዋ ቁቻሸነ ዬራሸ ሽቶ ትያሱ።
LUK 7:39 ግብራ ጊግስዳ ፋርሳወይ ሄሳ በእዳ ዎደ ባ ዎዛናን፥ “ሀይስ ናበ ግድያኮ ሀ ማጫስያ፥ እያ ቦችያራ ኦነኮ ቃስ እያ ናጋራንቾ ግደይሳካ እ ኤራናሽን” ያግስ።
LUK 7:40 የሱሲ፥ “ስሞና፥ ታ ነዉ ኦድያባይ ደኤስ” ያግስ። እ፥ “አስታማርያዉ፥ ታዉ ኦዳ” ያግስ።
LUK 7:41 የሱሲ እያኮ፥ “ናምኡ አሳት እስ ኡራፐ ሚሸ ታልእዶሶና። እሶይ እቻሹ ፄቱ ብራ ሀንኮይ ቃስ እሻታሙ ብራ ታልእዶሶና።
LUK 7:42 ናምአይካ ታልእያ ጭጋናዉ ፆነትን፥ ናምአታስካ ታልእያ ማርስ። ህዛ፥ ሀ ናምአታፐ ሄ ኡራ ዳሮ ዶሳናይ ነዉ ኦና ዳን” ያግስ።
LUK 7:43 ስሞን፥ “ዳሮ አጮይ ማረትዳ ኡራይ ዳሮ ዶሳና ዳኔስ” ያግስ። የሱሲ፥ “ነ ቱማ ፕርዳዳሳ” ያግስ።
LUK 7:44 ሄሳፈ ጉየ፥ የሱሲ ማጫሴኮ ስም ፄልድ፥ ስሞናኮ፥ “ሀኖ ማጫስዉ በአይ? ታኒ ነ ሶ ገልን ሀር አትሽን፥ ነ ታዉ ቶሆ ሃ እማባካ፥ ሽን እያ ታ ቶሁዋ ባ አፉꬃን ላኮꬃዳ ባ ብናናን ቁቻሱ።
LUK 7:45 ኔኒ ታና ዬራ ኤካባካ፥ ሽን እያ ታ ነ ሶ ገሎሳፐ ዶማዳ ታ ቶሁዋ ዬሮ አጋቡኩ።
LUK 7:46 ኔኒ ታ ሁጵያን ዛይተ ትያባካ፥ ሽን እያ ታ ቶሁዋ ሽቶ ትያዉሱ።
LUK 7:47 እያ ታና ዳሮ ዶስዳ ግሾ፥ እ ዳሮ ናጋራይ አቶ ጌተትስ። ጉꬃ ናጋር አቶ ጌተትዳ ኡራይ ጉꬃራ ዶሴስ።”
LUK 7:48 የሱሲ ማጫሴኮ፥ “ነ ናጋራይ አቶ ጌተትስ” ያግስ።
LUK 7:49 እያራ እስፈ ጋይታን ኡትድ ምያ እማꬃት፥ “ናጋራ አቶ ያገይ፥ እ ሀይስ ኦኔ?” ያግድ ባንታ ዎዛናን ቆፕዶሶና።
LUK 7:50 የሱሲ ማጫሴኮ፥ “ነ አማኖይ ነና አሽስ፤ ሳሮ ባ” ያግስ።
LUK 8:1 ሄሳፈ ጉየ፥ የሱሲ ፆሳ ካዎተꬃ ዎንገላ ሳባክሸ ካታማራነ ጉታራ አꬍስ። ሄ ዎደ ታማነ ናምኡ ሀዋረት እያራ ደኦሶና።
LUK 8:2 ቃስ ቱና አያናፐነ ዱማ ዱማ ሀርግያፈ ፓፅዳ እስ እስ ማጫሳት እያራ ደኦሶና። ኤንትካ፥ ላፑን ቱና አያናት ከይዳ ማግደላ ማይራሞ፥
LUK 8:3 ሄሮዲሳ ሹማ ኩዛ ማችዉ ዮሃና፥ ሶስናራነ ቃስ ሀራ ዳሮት ኤንታና ሚሸን ማደይሳት ደኦሶና።
LUK 8:4 ዳሮ አሳይ ዱማ ዱማ ካታማፐ እያኮ ሺቅን ሌምሶን ኤንታዉ ኦድስ።
LUK 8:5 “እስ ጎሻንቾይ ዘረꬅ ዘራናዉ ከይስ። እ ዘርሽን እስ እስ ዘረꬃይ ኦገ ጋፃን ዎꬍድ የትስ፥ ሳሎ ካፎት ማፅዶሶና።
LUK 8:6 ሀራት ሻሎይ ጋርሳን ደእያ ቢታ ቦላ ዎꬍዶሶና። ቡሮ ዶልዳ መላ ቢታን ላሆይ ባይና ግሾ ምጭዶሶና።
LUK 8:7 ሀራ ዘረꬃይ ቃስ አጉንꬃ ግዶን ዎꬍስ። አጉንꬃራ ዎላ ድጭዳ ግሾ አጉንꬃይ ጩልድ በሳን አሽስ።
LUK 8:8 ሀራት ሎኦ ቢታ ቦላ ዎꬍዶሶና። ዶልዳ ዎደ ፄቱ ኩሸ አይፍዶሶና።” ሄሳ ኦድ ኦንግድ፥ ባ ቃላ ꬎቁ ኦꬅድ፥ “ስእያ ሀይꬅ ደእያ ኡባይ ስኦ” ያግስ።
LUK 8:9 እያ ታማረት፥ “ሀ ሌምሱዋ ብርሸꬃይ አይቤ?” ያግድ ኦይችዶሶና
LUK 8:10 እ፥ “ፆሳ ካዎተꬃ ፁራ ኤራና መላ ህንተዉ እመትስ። ሽን ሀራት በእሸ ደሞና መላ፥ ስእሸ አኬኮና መላ ሌምሶን ኦዳይስ።
LUK 8:11 “ህዛ፥ ሀ ሌምሱዋ ብርሸꬃይ ሀይሳ፦ ዘረ ያገትዳይ ፆሳ ቃላ።
LUK 8:12 ኦገ ጋፃን ዎꬍዳ ዘረꬃይ ቃላ ስኤይሳታ። ግዶሽን፥ ኤንቲ አማንድ አቶና መላ ፃላሄይ ቃላ ኤንታ ዎዛናፐ ማፅ ድጌስ።
LUK 8:13 ሻሎይ ጋርሳን ደእያ ቢታ ቦላ ዎꬍዳ ዘረꬃይ ቃላ ስእድ ኡፋይሳን ኤከይሳታ። ኤንቲ ሀእስ አማኖሶናፐ አትሽን፥ ፃጶይ ባይና ግሾ ፓጨይ ጋክያ ዎደ ኤለስድ ካዶሶና።
LUK 8:14 አጉንꬃ ግዶን ዘረትዳ ዘረꬃይ ቃላ ስኤይሳታ። ኤንትካ አላምያ ቆፋን፥ ዱረተꬃንነ ሳአ ዱሳ ሚኮተꬃን ጩለትድ በሰይሳዳ አይፍቦኮና።
LUK 8:15 ሎኦ ቢታን ዎꬍዳ ዘረꬃይ ሎኦ ዎዛናን ቃላ ስእድ ናገይሳታነ ዳንዳአን ምንድ አይፈ አይፈይሳታ።
LUK 8:16 “ፆምፐ ኦይꬅድ፥ ዳቾ ካመይ ዎይኮ አርሳፈ ጋርሳን ዎይ ዴና። ገልያ አስ በአና መላ ꬎቃ በሳን ዎꬄስ።
LUK 8:17 “ሄሳ ግሾ፥ ቆንጨ ከዮና ቆሰትድ አትያባይ፥ ኤረቶና ጌምድ አትያባይ ዴና።
LUK 8:18 “ህዛ፥ ህንተ ቃላ ዋት ስእያኮ አኬክተ። ደእያ ኡባስ ጉዠትድ እመታና፥ ባይናይሳስ ሀር አቶሽን እያዉ ደእያ ጉꬅያካ እያፐ ኤከታና” ያግስ።
LUK 8:19 የሱሳ አየራነ እሻታራ እያኮ ይዶሶና። ሽን አሳ ዳሮተꬃፈ ደንዶይሳን እያ ደማናዉ ዳንዳእቦኮና።
LUK 8:20 እስ አስ የሱሳኮ፥ “ነ አየራነ ነ እሻታራ ነና ኮይድ ካረን ናጎሶና” ያግስ።
LUK 8:21 የሱሲ ዛሪድ፥ “ፆሳ ቃላ ስእድ ኦሶን ፔሸይሳት ኡባይ፥ ታዉ አዮነ ታዉ እሻ” ያግስ።
LUK 8:22 እስ ጋላስ የሱሳራነ እያ ታማረታራ እስፈ ዎጎሎን ገልድ፥ “አባ ፕኖስ” ያግስ። ኤንትካ ባናዉ ደንድዶሶና።
LUK 8:23 አባ ቦላራ ኤንቲ ፕናናዉ ብሽን የሱሲ ꬍስክስ። ቆፖና ምኖ ጫርኮይ አባ ቦላ ደንድስ። ሃꬅ ዎጎሉዋን ገልን ዎጎሎይ ምተተꬅ ኦይክያ ዎደ ኡባይ ባብዶሶና።
LUK 8:24 እያ ታማረት እያኮ ሺቅድ፥ “ጎዳዉ! ጎዳዉ! ኑ ꬋዮስ” ያግድ የሱሳ ደንꬅዶሶና። የሱሲ ደንድድ ጫርኩዋነ ጎትያ ሀንቅስ። ኤለስድ ጫርኮይነ ጎተይ ዎፑ ግስ፤ ሳሮተꬅ ስምስ።
LUK 8:25 የሱሲ ባ ታማረታኮ፥ “ህንተ አማኖይ አዉኔ?” ያግስ። ኤንትካ፥ ያይሸነ ማላለትሸ እሶይ እሱዋኮ፥ “ጫርኮይነ ሃꬃይ ኪተተይስ፥ እ ሀይስ ኦኔ” ያግዶሶና።
LUK 8:26 አባ ፕንድ ጋልላ ባጋራ ደእያ ገርገሶነ ቢታ ጋክዶሶና።
LUK 8:27 የሱሲ ዎጎሎፐ ከይድ ሳአን ዎꬍሽን ቱና አያናን ኦይከትዳ ኡራይ ካታማፐ ከይድ እያራ ጋሄትስ። ዳሮ ላይꬅ ማኦ ማኦና ካሎ ዱፎን ደኤስፐ አትሽን፥ ሶ ገለና።
LUK 8:28 የሱሳ በእዳ ዎደ እያ ስንꬃን ጉፋንድ፥ ባ ቃላ ꬎቁ ኦꬅድ፥ “ኡባፈ ቦላ ፆሳ ናአዉ የሱሳ ኔራ ታዉ አይብ እስፈተꬅ ደኢ? ሀያና ታና ሀእ ኡንኤꬆፋርክ” ያግስ።
LUK 8:29 ሄሳ እ ግዳይ፥ ቱና አያናይ ኡራፐ ከያና መላ የሱሲ ሀንቅዳ ግሾሳ። ዳሮ ዎደ ቱና አያናይ እያ ሃርዳ ግሾ ሳንꬃላታንነ ቶሆ ቃችያ ብራታን ቃሸትድ ናገቴስ። ሽን ቃሹዋ ዱꬅድ ቱና አያናን ላገትድ መላ ቢታ ገልስ።
LUK 8:30 የሱሲ፥ “ነ ሱንꬃይ ኦነ” ያግድ ኦይችስ። እ፥ ዳሮ ቱና አያናት እያ ኦይክዳ ግሾ ባና፥ “ሌግዮና” ግስ።
LUK 8:31 ቱና አያናት ባንታና ስኦለ ኪቶና መላ ዎስዶሶና።
LUK 8:32 ሄ በሳን ዞዘ ቦላ ምያ ጉዱንꬆ ዉደይ ሄመቴስ። ህን ጉዱንꬆታን ገልኖ ግድ ዎስዶሶና፥ እካ “ገልተ” ግስ።
LUK 8:33 ቱና አያናት ኡራፐ ከይድ ጉዱንꬆታን ገልዶሶና። ዉደይ ደርያፐ ዱገ ጉርጉፅድ አባን ገልስ።
LUK 8:34 ሄንꬃንቾት ሀንዳይሳ በእዳ ዎደ ዎፅ ብድ፥ ካታማንነ ጉታ ኡባን ኦድዶሶና።
LUK 8:35 አሳይ ሀንዳባ በአናዉ ከይድ የሱሳኮ ይዶሶና። ቱና አያናይ ከይዳ ኡራይ ማኦ ማእድ፥ እያ ዎዛናይ ስምን፥ የሱሳ ቶሆ ማታን ኡትዳይሳ ደምድ ያይዶሶና።
LUK 8:36 እያ በእዳ አሳይ ቱና አያናን ኦይከትዳ ኡራይ ዋንድ ፓፅዳኮ ኦድዶሶና።
LUK 8:37 ገርገሶነ ዩሾን ደእያ አሳይ ግታ ያሽ ያይድ፥ የሱሲ ባንታ ማታፐ ባና መላ ዎስዶሶና። እ ዎጎሉዋን ገልድ ጉየ ስምስ።
LUK 8:38 ቱና አያናይ ከይዳ ኡራይ የሱሳራ ዳናዉ ዎስስ።
LUK 8:39 ሽን የሱሲ እያኮ፥ “ነ ሶ ስማ፥ ፆሳይ አይ መላ ግታባ ነዉ ኦꬅዳኮ ኦዳ” ያግድ ሞይዝስ። ኡራይካ የሱሲ አይ መላ ግታባ እያዉ ኦꬅዳኮ ካታማ ኡባን ማርካትሸ ብስ።
LUK 8:40 አሳይ ናግድ ጋምእዳ ግሾ የሱሲ ስምያ ዎደ ሞክ ኤክዶሶና።
LUK 8:41 አይሁደ ዎሳ ኬꬃ ሀላቃ ግድዳ እያሮሳ ጌተትያ ኡራይ ባ ሶ ያና መላ የሱሳ ቶሁዋ ቦላ ዎꬍድ ዎስስ።
LUK 8:42 እያዉ ታማነ ናምኡ ላይꬅ ግድዳ ማጫ ናእ ሳከታዳ ሀይቆስ ጋካዳ ደአዉሱ። የሱሲ ብያ ዎደ አሳይ እያ ኡንኤꬄስ።
LUK 8:43 ታማነ ናምኡ ላይꬅ ሱꬅ ጎግሸ ጋምእዳ ማጫስ ደአዉሱ። እያ ባዉ ደእያ ሚሽያ አክመታስ እማዳ ኦንጋሱ። ሽን ፓፃናዉ ዳንዳአቡኩ።
LUK 8:44 እያ የሱሳስ ጉየ ባጋራ ሺቃዳ፥ እያ አፍላ ማጫራ ቦቻሱ፥ ኢራካ ጎግያ ሱꬃይ ኤቅ አግስ።
LUK 8:45 የሱሲ፥ “ታና ቦችዳይ ኦኔ?” ያግስ። ኡባይ፥ “ኑ ቦችቦኮ” ያግን፥ ጰፅሮስ፥ “አስታማርያዉ፥ ዳሮ አሳይ ካልሽንነ ኡንኤꬅሽን በአሸ ዋናዳ፥ ‘ታና ቦችዳይ ኦኔ?’ ጋይ” ያግስ።
LUK 8:46 ሽን የሱሲ፥ “እስ አስ ታና ቦችስ፤ አይስ ጊኮ፥ ዎልቅ ታፐ ከዮይስ ታዉ ኤረትስ” ያግስ።
LUK 8:47 ማጫስያ፥ እባይ ቆንጭዳይሳ ኤርዳ ዎደ ኮኮራሸ ያዳ የሱሳ ቶሁዋ ቦላ ኩንዳሱ። አይስ ቦችዳኮነ ዋናዳ ኤለሳዳ ፓፅዳኮ አሳ ኡባ ስንꬃን ማርካታሱ።
LUK 8:48 እ፥ “ታ ናተ፥ ነ አማኖይ ነና ፓꬅስ፤ ሳሮ ባ” ያግስ።
LUK 8:49 የሱሲ ኦዳ ኦንጎና ደእሽን፥ አይሁደ ዎሳ ኬꬃ ሀላቃ፥ እያሮሳ ሶፐ እስ አስ ይድ፥ “እያሮሳ፥ ነ ናእያ ሀይቃሱ፤ አስታማርያ መላ ዳቡርሶፋ” ያግስ።
LUK 8:50 ሽን የሱሲ ሄሳ ስእድ እያሮሳኮ፥ “ባቦፋ! አማና፥ ነ ናእያ ፓፃና” ያግስ።
LUK 8:51 የሱሲ እያሮሳ ሶ ጋክዳ ዎደ ጰፅሮሳፐ፥ ዮሃንሳፐ፥ ያይቆባፐ፥ ናኤ አዋፐነ አየፐ አትሽን፥ ሀር ገላና መላ ኮይቤና።
LUK 8:52 ሄ በሳን ደእያ አሳ ኡባይ ናኤስ ምሸትድ ዬክሽን፥ የሱሲ፥ “ዬኮፍተ ናእያ ꬍስካሱፐ አትሽን፥ ሀይቃቡኩ” ያግስ።
LUK 8:53 አሳይ ናእያ ሀይቅዳይሳ ኤርያ ግሾ፥ እያ ኦዳ ለቅድ ሚጭዶሶና።
LUK 8:54 ሽን የሱሲ ናኤ ኩሽያ ኦይክድ፥ “ናተ ደንዳ” ያግስ።
LUK 8:55 ናኤስ ሸምፖይ ስምን ደንዳ ኤቃሱ። የሱሲ ኤንታኮ፥ “እዉ ምያባ እምተ” ያግስ።
LUK 8:56 ናኤ አዋራነ አየራ ማላለትዶሶና። ሽን የሱሲ ሀይሳ፥ “ኦደስካ ኦዶፕተ” ያግስ።
LUK 9:1 የሱሲ ታማነ ናምኡ ሀዋረታ ባኮ ፄግድ፥ ቱና አያናታ ከሳና መላነ ሀርገ ኡባ ፓꬃና መላ ዎልቃነ ማታ እሚስ።
LUK 9:2 ፆሳ ካዎተꬃባ ማርካታናዳነ ሀርጋንቾታ ፓꬃናዳ ኪትስ።
LUK 9:3 እ ኤንታኮ፥ “ፃምአ ግድን ኦጎሮ ግድን ካꬅ ግድን ሚሸ ግድን ላምድ ማእያ አፍላ ግድን ኦገስ ግድ አይኮካ ኦይኮፍተ።
LUK 9:4 ሄ ካታማፐ ህንተ ከያና ጋካናዉ እማꬃተꬃን ህንተ ገልዳ ኬꬃን ጋምእተ።
LUK 9:5 ኦንካ ህንተና ሞኮና እፅኮ ሄ ካታማፐ ከይሸ ኤንታዉ ማርካ ግዳና መላ ህንተ ቶሁዋን ደእያ ባና ፕትድ ከይተ።”
LUK 9:6 ኤንትካ ኪተትዳይሳዳ ከይድ ዎንገላ ኦድሸነ ዱማ ዱማ ጉታታን ሀርጋንቾታ ፓꬅሸ አꬍዶሶና።
LUK 9:7 ጋልላ ቢታ ሃርያ ሄሮዲስ የሱሲ ኦꬅዳባ ኡባ ስእዳ ዎደ ዳጋምስ። አይስ ጊኮ፥ እስ እስ አሳት ዮሃንስ ሀይቆፐ ደንዶና አገና ያጎሶና።
LUK 9:8 ባጋት፥ “ኤልያስ ቆንጭስ” ጎሶና፤ ሀራት ቃስ፥ “በን ናበታፐ እሶይ ሀይቆፐ ደንድስ” ያግድ ኦደቶሶና።
LUK 9:9 ሽን ሄሮዲስ፥ “ታኒ ዮሃንሳ ቆꬍያ ቃንፅሳዳ ዎꬋስ። ያትን፥ ሀይሳꬆ ያገትድ እያባ ኦደተይ፥ እ ኦኔ?” ያግድ ባ አይፈን በአናዉ ኮዬስ።
LUK 9:10 ታማነ ናምኡ ሀዋረት ጉየ ስም ይድ፥ ኤንቲ ኦꬅዳባ ኡባ የሱሳስ ኦድዶሶና። እ ኤንታና ኤክድ ቤተሳይዳ ካታማፐ ጋፃ ኤፍስ።
LUK 9:11 ሽን ዳሮ አሳይ የሱሳ ግደይሳ ኤርድ እያ ካልዶሶና። እ ኤንታ ሞክ ኤክድ ፆሳ ካዎተꬃባ ታማርስስ፤ ፓፃናዉ ኮየይሳታካ ፓꬅስ።
LUK 9:12 ሳእ ኦማርስያ ዎደ ታማነ ናምኡ ሀዋረት እያኮ ሺቅድ፥ “ኑ ደኤይ መላ ቢታ ግድያ ግሾ አሳይ ዱማ ዱማ ጉታታነ ካታማታ ብድ፥ ካꬅነ አቅያ በሲ ኮያና መላ አሳ ሞይዛ” ያግዶሶና።
LUK 9:13 ሽን እ፥ “ኤንታዉ ምያባ ህንተ እምተ” ያግስ። ኤንቲ፥ “ኑስ ደኤይ እቻሹ ኡይꬅነ ናምኡ ሞሎ ግድያ ግሾ፥ ሀ አሳስ ግድያ ካꬅ ኑኒ ብድ ሻሞና እፅኮ ግደና” ያግዶሶና።
LUK 9:14 ሄ በሳን እቻሹ ሙኩሉ ግድያ አደት ደኦሶና። የሱሲ ባ ታማረታኮ፥ “እሻታማን እሻታማን ሻክ ሻክ አሳ ኡትስተ” ያግስ።
LUK 9:15 እያ ታማረት፥ እ ኪትዳይሳዳ አሳ ኡትስዶሶና።
LUK 9:16 እ እቻሹ ኡይꬃነ ናምኡ ሞሎታ ኤክድ፥ ሳሎ ፄልድ፥ ፆሳ ጋላትድ፥ መንꬅድ አሳ ኡባ ጋꬃና መላ ባ ታማረታስ እሚስ።
LUK 9:17 ኡባይ ምድ ካልዶሶና። ኤንታፈ አትዳ ቲፈይ ታማነ ናምኡ ጋይታ ኩመꬅ ግድስ።
LUK 9:18 የሱሲ ባ ፃላላ ዎስሽን፥ እያ ታማረት እያኮ ይዶሶና። እ፥ “አሳይ ታና ኦና ጎና?” ግድ ኦይችስ።
LUK 9:19 ኤንቲ ዛሪድ “እሶት እሶት፥ ‘ፃማቅያ ዮሃንሳ፥ ባጋት ኤልያሳ፥ ሀራት ቃስ፥ በን ናበታፐ እሶይ ሀይቆፐ ደንድስ’ ያጎሶና” ያግዶሶና።
LUK 9:20 እ ዛሪድ፥ “ያትን ህንተ ታና ኦና ጌቲ?” ያግስ። ጰፅሮስ፥ “ኔኒ ፆሳፈ ኪተትዳ ክርስቶሳ” ያግድ ዛርስ።
LUK 9:21 የሱሲ ሀይሳ ኦደስካ ኦዶፕተ ግድ ምንꬅድ ኦድስ።
LUK 9:22 ቃስካ የሱሲ፥ “አሳ ናእ ዳሮ መቱዋ ኤካና። ቢታ ጭማታ፥ ካህነ ሀላቃታነ ህገ አስታማረታ ኩሸን አꬍድ እመታና። ኤንቲ እያ ዎꬋና፥ ሽን እ ሄꬓንꬆ ጋላስ ሀይቆፐ ደንዳና” ያግስ።
LUK 9:23 የሱሲ አሳ ኡባኮ፥ “ታና ካላናዉ ኮየይ ኦንካ ደእኮ ባና ካዶ፥ ባ ማስቃልያ ጋላስ ጋላስ ቶክድ ታና ካሎ።
LUK 9:24 ባ ሸምፕዉ አሻናዉ ኮያ ኡባይ እዮ ꬋይሴስ፥ ባ ሸምፕዉ ታ ግሾ ግድ ꬋይስያ ኦንካ እዮ አሼስ።
LUK 9:25 አስ አላመ ኡባ ሃርድ፥ ግዶሽን፥ ባ ሸምፕዉ ꬋይስያባ ዎይኮ ቆህያባ ግድኮ እያ አይ ማዲ?
LUK 9:26 ኦንካ ታናንነ ታ ቃላን ዬላትኮ፥ አሳ ናእ ባ ቦንቹዋራ ሄሳዳካ አዋ ቦንቹዋራነ ጌሻ ኪታንቾታ ቦንቹዋራ ያ ዎደ እያን ዬላታና።
LUK 9:27 ታ ህንተዉ ቱማ ኦዳይስ፤ ሀይሳን ኤቅዳይሳታ ግዶፈ ፆሳ ካዎተꬃ በኦናሽን ሀይቆና አሳት ደኦሶና” ያግስ።
LUK 9:28 የሱሲ ሄ ኦዳ ኦድን፥ ሆስፑን ጋላሳፐ ጉየ፥ ጰፅሮሳ፥ ያይቆባነ ዮሃንሳ ባራ ኤክድ ዎሳናዉ ዙማ ቦላ ከይስ።
LUK 9:29 እ ዎሳ ቦላ ደእሽን እያ አይፈ ካረይ ላመትስ፤ አፍላይካ ቦፅድ፥ አዋ መላ ጶልስ።
LUK 9:30 ናምኡ አሳት፥ ኤንትካ ሙሰራነ ኤልያሳራ ቦንቾን ቆንጭድ፥
LUK 9:31 የሩሳላመን ፖለታናዉ ደእያባ፥ ሄስካ፥ እ ሀ አላምያፐ ሻከታናባ እያራ ኦደቶሶና።
LUK 9:32 ጰፅሮሳነ እያራ ደኤይሳታ ꬍስኮይ ኤፍን፥ ኤንቲ ꬍስኮፈ ባርክያ ዎደ እያ ቦንቹዋነ እያራ ኤቅዳ ናምኡ አሳታ በእዶሶና።
LUK 9:33 አሳት የሱሳፐ ሻከትድ ባና ሀንሽን፥ ጰፅሮስ የሱሳኮ፥ “ጎዳዉ፥ ኑ ሀይሳን ግድኮ ኑስ አይ መላ ሎኦ! እስኖ ነዉ፥ እስኖ ሙሰስ፥ እስኖ ኤልያሳስ ኦꬅድ፥ ሄꬑ ሻቃራ ሻቃሮስ” ያግስ። ሽን እ አይ ግዳኮ ኤረና።
LUK 9:34 እ ያግድ ኦደትሽን ሻራይ ይድ ኤንታና ካምስ። ኤንቲ ሄ ሻራ ግዶ ገልሸ ባብዶሶና።
LUK 9:35 ሻራ ግዶፈ፥ “ታ ዶርዳ ናአይ ሀይሳ እያ ስእተ” ግያ ቃል ስኤትስ።
LUK 9:36 ቃል ስኤትዳፐ ጉየ፥ የሱሲ ባርካ ደእሸ በንትስ። ሄ ዎደ ኤንቲ በእዳባ ኦደስካ ኦዶና፥ ባንታ ዎዛናን ኦይክድ ስእ ግዶሶና።
LUK 9:37 ዎንተ ኤንቲ ዙማ ቦላፈ ዎꬍያ ዎደ ዳሮ አሳይ ይድ እያራ ጋሄትዶሶና።
LUK 9:38 ሄ ዎደ አሳ ግዶፈ እስ አስ፥ “አስታማርያዉ፥ ታ እስ ናኣ ያዳ በአርክ።
LUK 9:39 ቱና አያናይ ቆፖና ኦይክድ ዋስሴስ፤ ጎፖንቶ የግስድ ቃከረꬄስ፥ አሳተꬃ ቆህድ ኡንኤꬅድ የዴስ።
LUK 9:40 ነ ታማረት ከሳና መላ ዎሳስ፥ ሽን ኤንቲ ዳንዳእቦኮና” ያግድ ዎስስ።
LUK 9:41 የሱሲ፥ “አማኖይ ባይና ጌላ የለታቶ፥ አዉደ ጋካናዉ ታ ህንተራ ዳነ፥ ህንተና ዳንዳአኔ? ነ ናኣ ባዳ ሃ ኤካያ” ያግስ።
LUK 9:42 ናኣ ኤክድ ያ ዎደ ቱና አያናይ ሳአን ሆል የግድ ኮኮርስስ። ሽን የሱሲ ቱና አያና ሀንቅድ ናኣፐ ከስስ። ናኣካ ናኣ አዋስ እሚስ።
LUK 9:43 አሳ ኡባይ ፆሳ ግታ ዎልቃን ማላለትዶሶና። ኤንቲ እ ኦꬅዳባን ማላለትሽን፥ የሱሲ ባ ታማረታኮ፥
LUK 9:44 “ሀይሳ ታ ህንተዉ ኦደይሳ ሎይꬅ ስእተ፤ አሳ ናእ ሞርከታ ኩሸን አꬍድ እመታና” ያግስ።
LUK 9:45 ሽን እ ግዳባይ ኤንታፈ ጌምዳ ግሾ፥ አኬክቦኮና። ሄሳ ግሾ፥ ዛሪድ ኦይቻናዉ ባብዶሶና።
LUK 9:46 የሱሳ ታማረት፥ “ኑ ግዶን ግታ ግዳናይ ኦኔ?” ግድ ፓላማ ኦይክዶሶና።
LUK 9:47 የሱሲ ኤንታ ዎዛና ቆፋ ኤርድ ዮጋ ናኣ ባ ማታን ኤስድ፥
LUK 9:48 “ሀ ዮጋ ናኣ ታ ሱንꬃን ሞክያ ኦንካ ታና ሞኬስ፥ ታና ሞከይ ታና ኪትዳይሳ ሞኬስ፥ ህንተ ኡባፈ ጉፀይስ፥ እ ግታ ግዳና” ያግስ።
LUK 9:49 ዮሃንስ፥ “ጎዳዉ፥ እስ አስ ነ ሱንꬃን ቱና አያናታ ከስሽን በእድ፥ እ ኑራ ግዶና ግሾ ድግዳ” ያግስ።
LUK 9:50 የሱሲ ዛሪድ፥ “ህንተራ ኤቀቶናይስ፥ እ ህንተ ባጋ። ሄሳ ግሾ፥ እያ ድጎፍተ” ያግስ።
LUK 9:51 የሱሲ ሳሎ ብያ ዎደይ ማታትዳ ግሾ፥ የሩሳላመ ባናዉ ቃንፅድ ደንድስ።
LUK 9:52 ሳማረ ቢታን ደእያ እስ ጉታ ብድ፥ ኡባባ እያዉ ጊግሳና መላ አሰ ያ ኪትስ።
LUK 9:53 ሽን እ በይ የሩሳላመ ግድያ ግሾ፥ ኤንቲ እያ ሞክ ኤክቦኮና።
LUK 9:54 የሱሳ ታማረት ያይቆባራነ ዮሃንሳራ ሄሳ በእድ፥ “ጎዳዉ፥ ሳሎፐ ታም ዎꬍድ ኤንታ ሞ ጋና መላ ነ ኮያይ” ያግዶሶና።
LUK 9:55 ሽን የሱሲ ጉየ ስም ኤንታ ሀንቀትድ፥ “ህንተ ጋርሳን አይብ አያን ደእያኮ ህንተ ኤረከታ። አሳ ናእ አሰ አሻናዉ ይስፐ አትሽን፥ ꬋይሳናሳ ግደና” ያግስ።
LUK 9:56 ያፐ ደንድድ ሀራ ጉታ ብዶሶና።
LUK 9:57 ኤንቲ ኦገራ ብሽን፥ እስ አስ፥ “ነ ብያ ሶ ኡባ ታ ካላና” ያግስ።
LUK 9:58 የሱሲ ዛሪድ፥ “ዎርካናታስ ኦል፥ ሳሎ ካፎታስ ኬꬅ ደኤስ፥ ሽን አሳ ናእ ባ ሁጰ ሸምፕስያ በሲ ባዋ” ያግስ።
LUK 9:59 ሀንኩዋኮ፥ “ኔኒ ታና ካላ” ያግስ። ሽን ኡራይ፥ “ጎዳዉ፥ ኮይሮታዳ ታ አዋ ሞጋዳ ያና” ያግስ።
LUK 9:60 ሽን የሱሲ፥ “ሀይቅዳይሳት ሀይቅዳይሳታ ሞጋና መላ ኤንታዉ አጋጋ፤ ኔኒ ባዳ ፆሳ ካዎተꬃ ሳባካ” ያግስ።
LUK 9:61 ቃስ ሀራ አስ፥ “ጎዳዉ፥ ታ ነና ካላና፥ ሽን ኮይሮታዳ ታ ሶ አሳ ሳሮꬃዳ ያና” ያግስ።
LUK 9:62 የሱሲ ዛሪድ፥ “ኮፀ ኦይክድ ጉየ ፄልያ ኦንካ ፆሳ ካዎተꬃስ በሰና” ያግስ።
LUK 10:1 ሄሳፈ ጉየ፥ ጎዳይ ሀራ ላፑን ታማነ ናምኡ አሳታ ዶርስ። እ ባናዉ ቆፕዳ ካታማነ ጉታ ኡባ ስንꬃትድ ባና መላ ናምአ ናምአ ኦꬅድ ኪትስ።
LUK 10:2 የሱሲ ኤንታኮ፥ “ሄኮ፥ ሺቃና ካꬃይ ዳሮ ሽን ኦሳንቾት ጉꬃ። ያንያ ግሾ፥ ካꬃ ጎዳይ ኦሳንቾታ ኪታና መላ ዎስተ።
LUK 10:3 ህዛ፥ ቢተ፥ ታኒ ህንተና ዶርሳታዳ ሱꬉመታ ግዶ የዳና።
LUK 10:4 ህንተ ብያ ኦግያስ አይኮካ ኦይኮፍተ፥ ሚሸ ግድን ካꬅ ግድን ጫማ ኦይኮፍተ። ኦገ ቦላ ኦናካ ሳሮꬆፍተ።
LUK 10:5 ህንተ ገልያ ኬ ኡባ ኮይሮትድ፥ ‘ሳሮይ ሀ ኬꬃስ ግዶ’ ያግተ።
LUK 10:6 ሳሮ ዶስያ አስ ሄ በሳን ደእኮ፥ ህንተ ሳሮይ ያን ሸምፓና፤ እፃስ ጊኮ ህንተ ሳሮይ ህንተዉ ስማና።
LUK 10:7 ኦሳንቾስ ዳሞዘ በሲያ ግሾ፥ ህንተ ገልዳ ኬꬃን ህንተዉ ሺሽዳባ ኡባ ምሸነ ኡይሸ ያን ጋምእተ። እሱዋ ሶፐ እሱዋ ሶ ዩዮፕተ።
LUK 10:8 አይ ካታማካ ህንተ ገልያ ዎደ አሳይ ህንተና ሞክድ፥ ህንተዉ ሺሽዳባ ኡባ ሚተ።
LUK 10:9 ሄ ካታማን ደእያ ሀርጋንቾታ ፓꬅሸ፥ ‘ፆሳ ካዎተꬃይ ህንተኮ ማትስ’ ያግድ ኦድተ።
LUK 10:10 ሽን እስ ካታማ ገልያ ዎደ አሳይ ህንተና ሞኮና እፅኮ ዳባባ ከይድ ሀይሳዳ ጊተ:
LUK 10:11 ‘ኑ ቶሁዋ ቦላ ደእያ ህንተ ካታማ ባና ፕቶስ፥ ሽን ፆሳ ካዎተꬅ ህንተኮ ማታትዳይሳ ኤርተ።’
LUK 10:12 ፕርዳ ጋላሳን፥ ሀ ካታማፐ ሶዶመ ካታማስ ፕርድ ካዉሸ ግዳናይሳ ታ ህንተዉ ኦዳይስ” ያግስ።
LUK 10:13 ካልድካ፥ የሱሲ፥ “ነኖ ኮራዝነ፥ ነኖ ቤተሳይዳ፥ አየ! ህንተናን ኦሰትዳ ማላታት ፅሮሳንነ ስዶናን ኦሰትዳኮ ያን ደእያ አሳይ ካዮ ማኦ ማእድ፥ ብድንꬃ ቦላ ኡትድ፥ በን ማሮታን ገል አጋናሽን።
LUK 10:14 ሄሳ ግሾ፥ ህንተፈ አꬅድ ፅሮሳስነ ስዶናስ ፆሳ ፕርድ ካዉያና።
LUK 10:15 ነካ ቅፍርናሆማ፥ ሳሎ ጋካናዉ ነና ꬎቁ ኦꬃናዉ ኮያይ? ነ ዱገ ስኦለ ሆለታና” ያግስ።
LUK 10:16 ቃስካ የሱሲ ባ ታማረታኮ፥ “ህንተና ስኤይ ታና ስኤስ፥ ህንተና ኤኮናይ ታና ኤከና፥ ታና ኤኮናይ ታና ኪትዳይሳ ኤከና” ያግስ።
LUK 10:17 ላፑን ታማነ ናምኡ ታማረት ኪተትዳ በሳፈ ዳሮ ኡፋይትሸ ስምዶሶና። የሱሳኮ ሺቅድ፥ “ጎዳዉ፥ ነ ሱንꬃን ቱና አያናትካ ኑስ ኪተትዶሶና” ያግዶሶና።
LUK 10:18 የሱሲ ኤንታኮ፥ “ፃላሄይ ሳሎፐ ዎልአንꬃዳ ዎꬍሽን ታ በአስ።
LUK 10:19 ሄኮ፥ ሾሽነ ኮርነ የꬋና መላነ ሞርክያ ዎልቃ ዛራና መላ ማታ ህንተዉ እማስ። ህንተና ቆሀናባይ አይኮይካ ዴና።
LUK 10:20 ግዶሽን፥ ህንተ ሱንꬃይ ሳሎ ማዝጋበን ፃፈትዳ ግሾ፥ ኡፋይትተፐ አትሽን፥ ቱና አያናት ኪተትዳ ግሾ ኡፋይቶፍተ” ያግስ።
LUK 10:21 ሄ ዎደ፥ የሱሲ ጌሻ አያናን ኡፋይትድ፥ “ሳሉዋ ሳኣ ጎዳዉ፥ ሀይሳ ጭንጫታፐነ ኤራንቾታፐ ገንꬃዳ ያላጋታስ ቆንጭስዳ ግሾ ጋላተታ። ኤ፥ ታ አዋዉ፥ ሄሳ ነ ኦꬃናዉ ሎኦ ሸነ ግድስ።
LUK 10:22 “ኡባባይ ታ አዋፐ ታዉ እመትስ። ናአይ ኦነኮ አዋፐ አትሽን፥ ሀር ዎይኮ ናአይ ቆንጭሳናዉ ኮየይሳፈ ሀር ኦንካ አዋ ኤረይ ባዋ” ያግስ።
LUK 10:23 ካልድካ፥ የሱሲ ባ ታማረታስ ዱማ፥ “ህንተ በኤይሳ በኤይሳት አንጀትዳይሳታ።
LUK 10:24 ቱማ ዳሮ ናበትነ ካዎት ህንተ በኤይሳነ ስኤይሳ በአናዉነ ስአናዉ አሞትዶሶና፥ ሽን በእቦኮና፥ ስእቦኮና” ያግስ።
LUK 10:25 ሄኮ፥ እስ ጋላስ ሙሰ ዎጋ ኤርያ እስ ኡራይ ደንድድ የሱሳ ያግድ ፓጨ ኦይሾ ኦይችስ። “አስታማርያዉ፥ መርና ደኦ ላታናዉ ታኒ አይ ኦꬆ?” ያግስ።
LUK 10:26 የሱሲ፥ “ሙሰ ማፃፋን ፃፈትዳይስ ዎይጊ? ነ ዋታ ናባባይ?” ያግስ።
LUK 10:27 አደይ ዛሪድ፥ “ ‘ነ ጎዳ ነ ፆሳ፥ ነ ኩመꬃ ዎዛናፐ፥ ነ ኩመꬃ ሸምፖፈ፥ ነ ኩመꬃ ዎልቃፈነ ነ ኩመꬃ ቆፋፐ ዶሳ። ቃስ ነ ሾሩዋ ነ ሁጰዳ ዶሳ’ ያጌስ” ያግስ።
LUK 10:28 የሱሲ እያኮ፥ “ኔኒ ልከ ዛራዳሳ፥ ነካ ሄሳዳ ኦꬃ። ኔኒ መርናዉ ደኦን ዳና” ያግስ።
LUK 10:29 ሽን ኡራይ ባና ፅሎ ኦꬃናዉ ኮይድ፥ “እ ታ ሾሮይ ኦኔ?” ያግስ።
LUK 10:30 እያ ኦይሻስ የሱሲ ያግድ ዛሮ እሚስ፤ “እስ አሰ ደኤይስ የሩሳላመ ካታማፐ ዱገ እያርኮ ካታማ ብሽን፥ ኦገ ቦላ ፓንጋት ከይድ ሾጭዶሶና። እያ ማኡዋ ቃር ኤክድ ሀይቆፐነ ፓፃፐ ግዶን የግድ ብዶሶና።
LUK 10:31 ጉየፐ፥ አይሁደ ካህነ እሶይ ሄ ኦግያራ ባ ቡሱ ብሸ ኡራ በእድ ደሽ ግድ አꬍስ።
LUK 10:32 ቃስ እስ ሌወ ደኤይስ ሄ በሳ ጋክሸ ኡራ በእድ፥ ሀራ ሶራ አꬍድ ብስ።
LUK 10:33 ሽን፥ እስ ሳማረ ቢታ አሰ ደኤይስ ሄ ኦግያራ ይሸ ኡራ በእድ እያዉ ቃትስ
LUK 10:34 እያኮ ሺቅድ፥ እያ ማዱንꬃ ቦላ ዛይተነ ዎይነ ትግድ ቃችስ። ባ ሀርያ ቦላ ኡትስድ እማꬅ አቅያ ኬ ኤፍስ። ሄ በሳን እያዉ ኮሽያባ ኡባ ኦꬅስ።
LUK 10:35 ዎንተ ናምኡ ድናረ ከስድ እማꬃ ኬꬃ አዋስ እምድ፥ ‘ሀያና ሀ ኡራ ሎይꬃ ፄላ። ታኒ ነዉ እምዳይሳፈ ቦላራ ነ ከስያባ ኡባ ታ ነዉ ጭጋና’ ያግስ።
LUK 10:36 “ህዛ፥ ሀ ሄꬑ አሳታፐ ፓንጋት ሾጭዳ ኡራስ ሾሮተይ ነዉ ኦና ዳኒ?”
LUK 10:37 ኡራይ ዛሪድ፥ “እያዉ ቃትዳይሳካ” ያግስ። የሱሲ፥ “ነካ ባዳ ሄሳዳ ኦꬃ” ያግስ።
LUK 10:38 የሱሲ ባ ታማረታራ ኦገ ብሸ እስ ጉታ ጋክስ። ያን ማርታ ጌተትያ እስ ማጫስያ፥ እያ ባ ሶን ሞካሱ።
LUK 10:39 እዉካ ማይራሞ ጌተትያ ምችያ ደአዉሱ፥ ማይራማ ቃላ ስአሸ ጎዳ ቶሁዋ ማታን ኡታሱ።
LUK 10:40 ሽን ማርታ ዳሮ ኦሶን ኡንኤታዳ የሱሳኮ ሺቃዳ፥ “ጎዳዉ፥ ታ ምችያ ኦሱዋ ታ ፃላላስ የጋዳ ኡታ አግን ታ ዳቡርያ ዎደ ኔኒ በአሸ ስእ ጋይ? እያ ታና ማዳና መላ ኦድኪ” ያጋሱ።
LUK 10:41 ሽን ጎዳይ ዛሪድ፥ “ማርታ፥ ማርታ፥ ኔኒ ዳሮባን ኡንኤታሳነ መቶታሳ።
LUK 10:42 ግዶሽን፥ ኮየተይ እስባ ፃላላ። ማይራማ ሎኦባ ዶራሱ፥ ሄስካ ኢፐ ኤከተና” ያግስ።
LUK 11:1 እስ ጋላስ የሱሲ እስ በሳን ዎሴስ። ዎሳ ዉርስዳ ዎደ እያ ታማረታፐ እሶይ፥ “ጎዳዉ፥ ዮሃንስ ባ ታማረታ ዎሳ ታማርስዳ መላ ነካ ኑና ዎሳ ታማርሳ” ያግስ።
LUK 11:2 የሱሲ፥ “ሀይሳዳ ያግድ ዎስተ፦ “ ‘ሳሎን ደእያ ኑ አዋዉ ነ ጌሻ ሱንꬃይ አንጀቶ፤ ነ ካዎተꬃይ ዮ።
LUK 11:3 ኑ ጋላሳ ካꬃ ሀች ሀች ኑስ እማ።
LUK 11:4 ኑና ቆሄይሳታ ኑኒ አቶ ገይሳዳ፥ ኑ ናጋራ አቶ ጋ፤ ፓጨን ኑና ገልሶፋ’ ያግተ” ያግስ።
LUK 11:5 ካልድካ፥ የሱሲ ባ ታማረታኮ ያግስ፦ “ሌምሶስ ህንተፈ እሱዋስ ላገይ ደኤስ። እ ግድ ብላሄ ባ ላግያ ሶ ብድ፥ ‘ታ ላግያዉ፥ ምያባይ ደእኮ ታዉ እማርክ።
LUK 11:6 ታዉ ላገ ግድዳ እስ አስ ኦገፐ ይን፥ እያዉ አꬅያባ ꬋያስ’ ያግኮ፥
LUK 11:7 “እያ ላገይ ኬꬃ ግዶን ግድድ፥ ‘ሀያና ታና ዋይሶፓ፥ ፐንገይ ጎርደትስ። ታ ናይትካ ታራ አርሳ ቦላ ዝንእዶሶና። ያንያ ግሾ፥ ደንዳዳ ነ ኮያባ እማናዉ ዳንዳእከ’ ያግዬ?
LUK 11:8 ታ ህንተዉ ኦዳይስ፤ ላገተꬃ ግሾ ደንድድ እማናዉ ኮዮና እፅኮካ ዎሳን ሳለꬅዳ ግሾ፥ ደንድድ ኮሽያባ ኡባ እሜስ።
LUK 11:9 “ሄሳ ግሾ፥ ታኒ ህንተዉ ኦዳይስ፤ ዎስተ ህንተዉ እመታና፤ ኮይተ ህንተ ደማና፤ ካረ ይድ ፄግተ ህንተዉ ዶየታና።
LUK 11:10 ጋሶይካ፥ ዎስያ ኡባይ ኤኬስ፤ ኮየይ ደሜስ፤ ካረ ይድ ፄገይሳስ ዶየቴስ።
LUK 11:11 “ህንተኖ፥ አዋቶ ህንተ ግዶፈ ናእ ኡይꬅ ዎስን፥ ሹቹ እመይ ኦኔ? ሞሎ ዎስን ሾሽ እመይ ኦኔ?
LUK 11:12 ዎይኮ ጱጱለ ዎስኮ ኮርነ እሚ?
LUK 11:13 ህንተ ኢታታ ግድሸ ህንተ ናይታስ ሎኦባ እሞ ኤርኮ፥ ሳሎን ደእያ ህንተ አዋይ ዎሰይሳታስ ጌሻ አያና ዋትድ አꬅድ እመኔ?” ያግስ።
LUK 11:14 እስ ጋላስ የሱሲ፥ ዶና ሙምስዳ ቱና አያና እስ ኡራፐ ከስስ። ቱና አያናይ ከይዳ መላ ሙመ ኡራይ ኦደትስ። አሳይካ ማላለትስ።
LUK 11:15 ሽን እሶት እሶት፥ “ቱና አያና ሀላቃ፥ ብኤል-ዘቡላ ዎልቃን ቱና አያናታ ከሴስ” ያግዶሶና።
LUK 11:16 ሀራት ቃስ ፓጬስ ሳሎፐ ማላ በሳና መላ ኮይዶሶና።
LUK 11:17 ሽን የሱሲ ኤንታ ቆፋ ኤርድ ኤንታኮ፥ “ዎል ግዶን ሻከትያ ካዎተꬅ ኡባይ ꬋዬስ፤ ዎል ግዶን ሻከትያ ኬꬅ ኩንዴስ።
LUK 11:18 ፃላሄይ ዎል ግዶን ሻከትኮ እያ ካዎተꬃይ ዋንድ ምንድ ኤቃኔ? ህንተ ታና፥ ‘እ ቱና አያናታ ብኤል-ዘቡላ ዎልቃን ከሴስ’ ያጌታ።
LUK 11:19 ህዛ፥ ታኒ ቱና አያና ብኤል-ዘቡላ ዎልቃን ከስያባ ግድኮ ህንተ ናይት ኦደ ዎልቃን ከሶናሻ? ሄሳ ግሾ፥ ኤንቲ ህንተ ቦላ ፕርደይሳታ ግዳና።
LUK 11:20 ሽን ታኒ ቱና አያናታ ፆሳ ብራን ከስያባ ግድኮ፥ ህዛ፥ ፆሳ ካዎተꬃይ ህንተኮ ማትዳይሳ ኤርተ።
LUK 11:21 “ምኖ አስ ቶራነ ጎንዳለ ኦይክድ፥ ባ ኬꬃ ናግያባ ግድኮ፥ እያ ሻሎይ ቦሸተና።
LUK 11:22 ሀኖሽን፥ እያፐ አꬍድ ምኖ ግድዳ አስ ይድ፥ እያ ቆህድ ፆንኮ፥ አማነትዳ ቶራነ ጎንዳለ ዎስስ ኤክድ፥ እያ ሻሉዋ ቦንቅድ ሀራስ ሻኬስ።
LUK 11:23 “ታራ ግዶናይስ ታና እፄስ፤ ታራ ሺሾናይስ ላሌስ።
LUK 11:24 “ቱና አያናይ አሳፐ ከይዳ ዎደ ሸምፕያ በሲ ኮይድ ሃꬅ ባይና ሶራ ዩዬስ። ሸምፕያ በሲ ꬋይዳ ዎደ፥ ‘ታ ከይዳሱዋ ስማና’ ያጌስ።
LUK 11:25 እ ስምያ ዎደ ኬꬃይ ፕተትድ ሎእድ ደእሽን ደምስ።
LUK 11:26 ሄሳፈ ጉየ፥ ብድ እያፐ አꬍድ ኢትዳ ሀራ ላፑን ቱና አያናታ ኤክድ ዬስ። እያን ገልድ ዱሱ ኦይኬስ። ሄ ኡራስ ኮይሮይሳፈ አꬍድ ጉየይስ ኢታ ግዴስ” ያግስ።
LUK 11:27 የሱሲ ሄሳ ኦዳ ቦላ ደእሽን፥ እስ ማጫስ አሳ ጋꬃፈ ደንዳዳ፥ ባ ቃላ ꬎቁ ኦꬃዳ፥ “ነና ቶክዳ ኡሎይነ ኔኒ ꬋምዳ ꬋንꬃት አንጀትዶሶና” ያጋሱ።
LUK 11:28 ሽን እ፥ “አንጀትዳይሳት ፆሳ ቃላ ስእድ ኪተተይሳታ” ያግስ።
LUK 11:29 ዳሮ አሳይ ሺቅዳ ዎደ የሱሲ፥ “ሀ የለተꬃይ ኢታ የለተꬅ፤ ኦራꬃ ማላ ኮዬስ። ሽን ዮናሳ ማላታፐ አትሽን፥ ሀር ኤንታዉ እመተና።
LUK 11:30 ዮናስ ናናወ አሳስ ማላ ግድዳ መላ አሳ ናእካ ሀ የለተꬃስ ማላ ግዳና።
LUK 11:31 ዱገሀ ካውያ ፕርዳ ጋላስ ሀ የለተꬃራ ደንዳዳ ፕርዳና። ጋሶይካ፥ እያ ሶሎሞነ ጭንጫተꬃ ስአናዉ ቢታ ጋፃፐ ደንዳዳ ያሱ። ሄኮ ሶሎሞነፐ አይ ሀይሳን ደኤስ
LUK 11:32 ናናወ አሳት ፕርዳ ጋላስ ሀ የለተꬃራ ደንድድ ኤንታ ቦላ ፕርዳና። ጋሶይካ፥ ዮናሳ ስብካትያን ማሮታ ገልዶሶና። ሄኮ፥ ዮናሳፐ አይ ሀይሳን ደኤስ” ያግስ።
LUK 11:33 “ፆምፐ ኦይꬅድ ቆሳ በሳን ዎይኮ ኦቶ ግዶን ዎꬅያ አስ ዴና። አስ ፖኡዋ በአና መላ ꬎቃ በሳን ዎꬄስ።
LUK 11:34 ነ አሳተꬃስ ፖኦይ ነ አይፍያ። ነ አይፈይ ሎኦ ግድኮ፥ ነ ኩመꬃ አሳተꬃይ ፖኤስ። ነና አይፈይ ሳክኮ ነ አሳተꬃይ ኡባይ ꬉሜስ።
LUK 11:35 ሄሳ ግሾ፥ ነ ጋርሳን ደእያ ፖኦይ ꬉሞና መላ ናገታ።
LUK 11:36 ህዛ፥ ነ ኩመꬃ አሳተꬃይ ፖኦ ግድኮ፥ ነ አሳተꬃንካ ሀር ꬉማ በሲ ꬋይኮ፥ ነ አሳተꬃ ኩመꬃይ ዎልለ ፖኦ መላ ግዴስ” ያግስ።
LUK 11:37 የሱሲ ባ ኦዳ ኦንግዳ መላ እስ ፋርሳወይ ባራ ካꬅ ማና መላ ፄግስ። የሱሲ፥ እያራ እስፈ ገልድ ግብራ ቦላ ኡትስ።
LUK 11:38 ፋርሳወይ የሱሲ ካꬅ ማናፐ ስን ኩሸ ሜጮናይሳ በእድ ማላለትስ።
LUK 11:39 ጎዳይ እያኮ፥ “ህንተ ፋርሳወት ቁለስነ ሻተስ ቦላ ባጋ ሜጨታ። ሽን ህንተ ጋꬃይ ኡዘተꬃንነ ኢታተꬃን ኩምስ።
LUK 11:40 ህንተኖ፥ ኤያቶ፥ ካረ ባጋ መꬍዳይ፥ ጋꬃ ባጋ መꬍዳይ እያ ግደኔ?
LUK 11:41 ሽን ቁልያንነ ሻትያን ደኤይሳ ማንቆታስ እምተ። ሄ ዎደ ህንተዉ ኡባባይ ጌሽ ግዳና።
LUK 11:42 “ፋርሳወቶ ህንተና አየ! ሳዎፐ፥ ፃሎተፐነ ሄሳ መላባፐ አስራታ ከሴታ። ሽን ፅሎተꬅነ ፆሰ ዶሶይ ህንተናን ባዋ። ሀራታ አጎና ሀይሳታካ ኦꬃናዉ በሴስ፥ ሽን አግደታ።
LUK 11:43 “ፋርሳወቶ ህንተና አየ! አይሁደ ዎሳ ኬꬃን ቦንቾ ኦይደ፥ ግያ ግዶን ቦንቾ ሳሮꬆ ዶሴታ።
LUK 11:44 “ማል ꬋይን፥ አሳይ ኤሮና ቦላራ ብያ ዱፎ ዳነይሳቶ ህንተና አየ!” ያግስ።
LUK 11:45 ህገ አስታማረይ ዛሪድ፥ “አስታማርያዉ፥ ነ ሄሳ ጋሸ ኑና ጫያሳ” ያግስ።
LUK 11:46 የሱሲ፥ “ህንተኖ፥ ህገ አስታማረቶ፥ ህንተናካ አየ! አሳይ ቶካናዉ ዳንዳኦና ዴፆ ቶሆ ቶሰታ፥ ሽን ህንተ ህንተ ሁጰስ ሀር አቶሽን ብራ ፄራንካ ቦቸከታ።
LUK 11:47 “ህንተ አዋት ዎꬍዳ ናበታ ዱፉዋ ህንተ ጊግስያ ግሾ፥ ህንተና አየ!
LUK 11:48 ህዛ፥ ህንተ አዋታ ኦሱዋ ምንꬃናዉ ኤንቲ ዎꬍዳ ናበታ ዱፉዋ ህንተ ሎይꬅያ ግሾ፥ ኤንታ ኢታ ኦሱዋስ ህንተ ማርካ።
LUK 11:49 ሄሳ ግሾ፥ ፆሳይ ባ ጭንጫተꬃን፥ ‘ናበታነ ሀዋረታ ታ ህንተዉ ኪታና፥ ሽን ህንተ ባጋታ ዎꬋና፤ ሀራታ ጎዳና’ ያግስ።
LUK 11:50 ሀ የለተꬃይ አላመይ መቶሳፐ ሀኖ ጋካናዉ ጉክዳ ናበታ ኡባ ሱꬃስ ኦይሸታና።
LUK 11:51 አበላፐ ዶምድ ያርሾ በሳስነ ፆሳ ኬꬃፈ ግዱዋን ጉክዳ ዛካርያሳ ሱꬃ ግሾ ሀ የለተꬃይ ኦይሸታና።
LUK 11:52 “ህገ አስታማረቶ፥ ህንተና አየ! ኤራተꬃ ቁልፕያ ህንተ ኩሸን ኦይክደታ፥ ሽን ህንተዉ ገለከታ ሀራታካ ገልሰከታ” ያግስ።
LUK 11:53 የሱሲ ያፐ ባናዉ ከይያ ዎደ፥ ህገ አስታማረትነ ፋርሳወት እያራ ኤቀትድ ኦይሾን ዋይሶሶና።
LUK 11:54 እያ ዶናፐ ከይያ ቃላን እያ ኦይካናዉ ኮይድ ሄሳ ኦꬅዶሶና።
LUK 12:1 ሄ ዎደ ዳሮ ሙኩሉን ታይበትያ አሳይ ዎል ቦላ የታና ጋካናዉ አስ አሳ ቦላ ሺቅድ ደእሽን፥ የሱሲ ባ ታማረታኮ፥ “ፋርሳወታ እርሾፈ ናገትተ። ሄስካ ኤንታ ጩቦተꬃ።
LUK 12:2 ቆንጮና ቆሰትድ፥ ኤረቶና ጌምድ አትያባይ አይኮይካ ባዋ።
LUK 12:3 ህዛ፥ ህንተ ꬉማን ኦደትዳባይ ኡባይ ፖኦን ስኤታና፥ ቆልአ ጋꬃን ካልካሽዳባይ ዳባባን ኦደታና።
LUK 12:4 “ታ ባጋቶ፥ ታ ኦደይሳ ስእተ፤ አሹዋ ዎꬎኦሶናፐ አትሽን፥ ሀራ አይኮካ ኦꬃናዉ ዳንዳኦናይሳታስ ባቦፍተ።
LUK 12:5 ሀኖሽን፥ ህንተ ባባናዉ በሰይሳ ታ ህንተዉ ቆንጭሳና። ሄስካ ዎꬍዳፐ ጉየ ጋናመን የጋናዉ ዎልቃይ ደኤይሳስ እያዉ ባብተ። ኤ፥ ቱማ ኦዳይስ፤ እያዉ ባብተ።
LUK 12:6 እቻሹ ቡበት እስ ሳንትመስ ባይዘቶኮናዬ? ሀኖሽን፥ ኤንታፈ እስናካ ፆሳ ስንꬃን ዶገቱኩ።
LUK 12:7 ሀር አቶሽን፥ ህንተ ሁጰ ብናናይካ ፓይደትድ ደኤስ። ህዛ፥ ባቦፍተ፤ ዳሮ ቡበታፐ ህንተ አታ።
LUK 12:8 “ታ ኦደይሳ ስእተ፤ አሳ ስንꬃን ታዉ ማርካትያ ኡባስ አሳ ናእ ፆሳ ኪታንቾታ ስንꬃን ማርካታና።
LUK 12:9 አሳ ስንꬃን ታና ካደይሳስ ፆሳ ኪታንቾታ ስንꬃን ታ እያ ካዳና።
LUK 12:10 አሳ ናአ ቦላ ካ ቃላ ሃሳያ ኡባይ ማሮታ ደማና፥ ሽን ጌሻ አያና ቦላ ካ ቃላ ኦደተይስ ማረተና።
LUK 12:11 “አስ ህንተና ኦይክድ አይሁደ ዎሳ ኬꬃን፥ ዳይናታ ስንꬃንነ ካዎታ ስንꬃን ጎሸችያ ዎደ አይ ኦዳነኮነ ዎይግ ዛራነኮ ህርጎፍተ።
LUK 12:12 ሄ ዎደ ህንተ ኦዳናባ ጌሻ አያን ህንተና ታማርሳና” ያግስ።
LUK 12:13 አሳ ግዶፈ እስ አስ የሱሳኮ ይድ፥ “ታ እሻይ ታዉ ኑ አዋ ላታፐ ሻካና መላ እያዉ ኦዳ” ያግስ።
LUK 12:14 የሱሲ ዛሪድ፥ “ላ አድያዉ፥ ህንተ ቦላ ታና ዳይናነ ላታ ሻክያ ጭማ ኦꬅዳይ ኦኔ?” ያግስ።
LUK 12:15 ጉጅድካ፥ የሱሲ፥ “አሳ ደኦይ ሻሎ ዳሮተꬃን ግዶና ግሾ ያረ አግድ ምንꬅድ ህንተና ናግተ” ያግስ።
LUK 12:16 ካልድካ ሌምሶን፥ “ጋደይ ዳሮ ካꬅ እምያ እስ ዱረ ኡራይ ደኤስ።
LUK 12:17 ሄ ኡራይ፥ ‘ታ ካꬃ ታኒ ሺሻናዉ በሲ ጉፅዳ ግሾ አይ ኦꬆ?’ ያግድ ባ ዎዛናን ቆፕስ።
LUK 12:18 ህዛፐ ያታና፤ ካሰ ደእያ ሻለታ ላላዳ ሀራ ዳልጋ ሻለታ ኬፃና። ካꬅነ ታዉ ደእያባ ኡባ እያን የጋና።
LUK 12:19 ባ ሸምፐኮ፥ ‘ታ ሸምፐተ፥ ዳሮ ላይꬃስ ነዉ ግድያ ሻሎ ሺሻስ። ህዛ፥ ሸምፓዳ ማ፥ ኡያ፥ ኡፋይታ’ ያጋና።
LUK 12:20 “ሽን ፆሳይ፥ ‘ላ፥ ኤያ ኡራዉ፥ ሀች ቃማ ነ ሸምፕያ ኔፐ ኤከታዉሱ። ህዛ፥ ነ ሺሽዳባይ ኦደስ ግዳኔ?’ ያግስ።
LUK 12:21 “ሄሳ ግሾ፥ ባዉ ዱረተꬅ ሳአን ሺሽያ አሳስ፥ ፆሳ ማታን ዱረ ግዶና አሳስ ዉርሰꬃይ ሀ ኡራ መላ” ያግስ።
LUK 12:22 ሄሳፈ ጉየ፥ የሱሲ ባ ታማረታኮ፥ “ህዛ፥ ታ ኦድያባ ስእተ፥ ህንተ ሸምፑዋስ አይ ሚኖ? ህንተ አሳተꬃስ አይ ማእኖ? ያግድ ኡንኤቶፍተ።
LUK 12:23 ሸምፖይ ካꬃፈ፥ አሳተꬅ አፍላፐ አꬌስ።
LUK 12:24 ካፎታ በእተ ዘሮኮና፥ ኪሾኮና፥ ኤለይነ ሻለይ ኤንታዉ ባዋ። ሽን ፆሳይ ኤንታና ሙዜስ። ህንተ ካፎታፐ ዳሮ አታ።
LUK 12:25 ሀኖሽን፥ ህንተፈ ኡንኤትድ ባ ላይꬃ ቦላ እስ ቃማ ጉጃናዉ ዳንዳኤይ ኦኔ?
LUK 12:26 ህዛ፥ ሀ ጉꬃባ ኦꬃናዉ ዳንዳኦና ህንተ፥ ሀራባስ አይስ ኡንኤተቲ?
LUK 12:27 አነ ጪሻት ዋንድ ድጭያኮ በእተ። ዋዮኮናነ ሱቆኮና። ሀር አቶሽን፥ ሶሎሞነይ ባ ደእያ ቦንቾ ኡባን ኤንታፈ እሱዋ መላካ ማእቤና።
LUK 12:28 ህንተኖ፥ አማኖይ ፓጭዳይሳቶ፥ ህዛ፥ ፆሳይ ሀች በንትድ ዎንቶ ታማን የገታና ጪሻታ ሀይሳዳ ማይዝኮ፥ ህንተና ዋት አꬅድ ማይዘኔ?
LUK 12:29 ሄሳ ግሾ፥ አይ ምኖ ዎይኮ አይ ኡይኖ ግድ ኡንኤቶፍተ።
LUK 12:30 ሄ ኡባስ ፆሳ አማኖና አሳት ኡንኤቶሶና። ሽን ህንተ አዋይ ፆሳይ ሄስ ኡባይ ህንተዉ ኮሸይሳ ኤሬስ።
LUK 12:31 ኡባፈ አꬅድ ፆሳ ካዎተꬃ ኮይተ፤ ሄስ ኡባይ ህንተዉ ጉጅ እመታና።
LUK 12:32 “ህንተኖ፥ ጉꬃ ደረቶ፥ ያዮፍተ፤ ህንተ አዋ ፆሳይ ካዎተꬃ ህንተዉ እማናዉ ኡፋይቴስ።
LUK 12:33 ህንተዉ ደእያባ ባይዝድ ማንቆታስ እምተ። ካይሶይ ኤኮናሶን፥ ብል ሞናሶን፥ ጭሞና ካርፂታን፥ ዉሮና ሻሎ ሳሎን ሺሽተ።
LUK 12:34 ህንተ ዎዛናይ ህንተ ሻሎይ ደእያ በሳን ግዳና።
LUK 12:35 “ቃንꬃን ዳንጭድ ጊገትተ፤ ህንተ ፆምፐይ ፖኦ።
LUK 12:36 ባንታ ጎዳይ ያጋኖፐ ስማና ጋካናዉ ባርክድ ናገይሳታዳ፥ ጎዳይ ይድ ፄግያ ዎደ ኤለስድ ዶያናዉ ጊግዳ አሳታ ዳንተ።
LUK 12:37 ባንታ ጎዳይ ስምያ ዎደ ꬍስኮና ደእሸ ናገይሳት አንጀትዳይሳታ። ቱማ ጋይስ፤ ጎዳይ ቃንꬃን ዳንጭድ ጋይታ ዩሾን ኡትስድ ሞኬስ።
LUK 12:38 ጎዳይ ላደ ግድን፥ ግድ ብላሄ ግድን፥ ዎይኮ ዎንት ማ ግድን ይድ፥ ሄሳ መላ ꬍስኮና ናግሽን ደምያ ሄ አይለት አንጀትዳይሳታ።
LUK 12:39 ሽን ሀይሳ ኤርተ፤ ካይሶይ አዉደ ያነኮ ኬꬃ አዋይ ኤርያኮ ኬꬃይ ቦከትያ ዎደ ስእ ግድ በኤና።
LUK 12:40 ህንተካ ጊግድ ናግተ፤ አሳ ናእ ህንተ ቆፖና ዎደ ያና” ያግስ።
LUK 12:41 ጰፅሮስካ፥ “ጎዳዉ ሀ ሌምሱዋ ኑ ፃላላስ ኦዳየ ዎይኮ አሳ ኡባሴ?” ያግስ።
LUK 12:42 ጎዳይ ዛሪድ፥ “ህዛ፥ ካꬃ ሙዛናዉ በሲያ ዎድያን እማና መላ ጎዳይ ባ አይለታ ቦላ ሹምዳ አማንይስነ ዎዛናማ ሀላቃይ ኦኔ?
LUK 12:43 ጎዳይ ስምያ ዎደ ሄሳ መላ ኦꬅሸ በንትያ አይለይ፥ እ አንጀትዳይሳ
LUK 12:44 ታ ህንተዉ ቱማ ኦዳይስ፤ ባ ጎዳስ ደእያ ሻሎ ኡባ ቦላ እ፥ ሹመታና።
LUK 12:45 ሽን ሄ አይለይ፥ ‘ታ ጎዳይ ኤለ ዬና’ ያግድ ባ ዎዛናን ቆፕድ፥ ማጫ አይለታነ አደ አይለታ ዋꬍኮ፥ ቃስ ባዉ ኮይዳ መላ ምሸነ ኡይሸ ማꬆትኮ፥
LUK 12:46 ሄ አይልያ ጎዳይ፥ እ ቆፖና ጋላሳንነ ህርጎና ዎደ ያና። ይድ እያ ቃንፀረꬅድ፥ እያ ቃዳ አማኖና አሳራ ኦꬃና።
LUK 12:47 “ጎዳ ሸንያዳ ጊጎናይስነ እያ ጎዳይ አይ ዶስያኮ ኤርሸ ኦꬆና አይለይ ዳሮ ጋራፈታና።
LUK 12:48 ሽን ባ ጎዳ ሸንያ ኤሮና አትድ ጋራፈታናዉ በሰይሳ ኦꬅዳይ ጉꬃራ ጋራፈታና። ጋሶይካ ዳሮ እመትዳይሳፈ ዳሮ ኮየቴስ፥ ዳሮ ሀዳራ ኤክዳይሳፈካ ዳሮ እማና ግድ ናገቴስ።
LUK 12:49 “ታኒ ይዳይ ቢታ ቦላ ታማ ኦይꬃናሳ። ሀእ ታማይ ኦይክያኮ ታና ዋንድ ኡፋይሳንደሻ!
LUK 12:50 ሀኖሽን፥ ታ ሀእ ፃማቀተይ ፅንቃተይ ደኤስ። እ ፖለታና ጋካናዉ ታ ዳሮ ኡንኤታይስ።
LUK 12:51 ሳአ ቦላ ሳሮተꬅ ኤሀናዉ ይዳ ህንተዉ ዳኒ? ግደና፥ ታ ይዳይ ሻካናሳ።
LUK 12:52 ሀእፈ ዶምድ ዎል ግዶን ሻከትዳ እቻሹ ኬꬃ አሳት እስፈ ደኦሶና። ናምአት ሄꬓታ ቦላ፥ ሄꬓትካ ናምአታ ቦላ፥ ደንድድ ሻከቶሶና።
LUK 12:53 አዋይ ናኣ ቦላ፥ ናአይካ አዋ ቦላ፥ አይያ ናኤ ቦላ፥ ናእያ አየ ቦላ፥ አዝና አይያ ናአ ማቸ ቦላ፥ ናአ ማችያ አዝና አየ ቦላ፥ ደንድድ ሻከታና።”
LUK 12:54 ቃስካ አሳኮ፥ “ዉሎሀ ባጋራ ሳሎይ ሻራትያ ዎደ በእድ፥ ኤለስድ፥ ‘እር ያና’ ያጌታ፥ ሄሳዳካ ሀኔስ።
LUK 12:55 ዱገሀ ጫርኮይ ጫርክያ ዎደ ‘ሳእ አዋና’ ያጌታ፥ ሄሳዳካ ሀኔስ” ያግስ።
LUK 12:56 ህንተኖ፥ ጩቦቶ፥ ሳሎባነ ሳአባ ሻክድ ኤሬታሽን ሀ ዎድያ ሻክድ ኤሮይ ህንተና ዋንድ ፆንዴ?
LUK 12:57 “ያትን፥ ህንተ ሁጰስ አይስ ቱማ ፕርደከቲ?
LUK 12:58 ነ ሞርክያራ ዎላ ዳይና ስንꬃን ኤቃናዉ ባሸ ኦገ ቦላ ጊጋናዉ ኮያ። ነ ጊጎና እፅኮ ጎሸችድ ዳይና ስን ነና ኤፋና። ዳይናይ ነና ቃችያ አሳስ አꬅድ እማና። እ ነና ዎይነን የጋና።
LUK 12:59 ስእተ፥ እስ ባካን አቶና ጭጋ ኦንጋና ጋካናዉ ነ ያፐ ከዮናይሳ ኤራ” ያግስ።
LUK 13:1 ሄ ዎደ የሱሳኮ አሳይ ይድ ጵላፆስ ዎꬍድ ኤንታ ሱꬃራ ኤንታ ያርሹዋ ዋላክዳ ጋልላ አሳባ ኦድዳ አሳት ሄ በሳን ደኦሶና።
LUK 13:2 እ ሀይሳዳ ያግድ ዛርስ፤ “ያትን ሄ ጋልላ አሳት ሄ ኢታ ሀይቆ ሀይቅዳ ግሾ፥ ጋልላን ደእያ አሳ ኡባፈ አꬍዳ ናጋራንቾ ዳኖና?
LUK 13:3 ግደና! ግዶሽን፥ ህንተካ ማሮታን ስሞና እፅኮ፥ ኡባይ ሄሳዳ ꬋያና።
LUK 13:4 ዎይኮ ቃስ ሳልሆመ ጌተትያ በሳን ግምበይ ዎድድ ዎꬍዳ ታማነ ሆስፑን አሳይ የሩሳላመን ደእያ አሳ ኡባፈ አꬍዳ ናጋራንቾ ዳኖና?
LUK 13:5 ግደና! ሽን ህንተካ ማሮታን ስሞና እፅኮ ኡባይ ሄሳዳ ꬋያና።”
LUK 13:6 ቃስካ የሱሲ ሀይሳዳ ግድ ሌምሶ ኦድስ፦ “እስ ኡራስ ዎይነ ጋደን ቶከትዳ ባላሰ ምꬅ ደአዉሱ። እ ኢፐ አይፈ ደማናዉ ኮይድ አይኮካ ደምቤና።
LUK 13:7 ዎይነ ጋድያ ጎዳይ ዎይነ ኦሳንቹዋኮ፥ ‘አይፈ ደማናዉ ኮያዳ ሄꬑ ላይꬅ ስመረታዳ አይኮካ ደማብከ። ሄሳ ግሾ፥ ቃንፃ ድጋ፤ አይስ ቢታ መልሳይ?’ ያግስ።
LUK 13:8 “ሽን ኦሳንቾይ፥ ‘ጎዳዉ፥ እ ዩሹዋ ኦꬃዳ ኦሻ የጋና ጋካናዉ ሀ ላይꬃስ አጋርክ።
LUK 13:9 ሀ ላይꬅ አይፍኮ ሎኦ፥ እፅኮ ቃንፃ አጋ’ ” ያግድ ዛርስ።
LUK 13:10 የሱሲ ሳምባታ ጋላስ አይሁደ ዎሳ ኬꬃን ታማርሴስ።
LUK 13:11 ሄ በሳን ታማነ ሆስፑን ላይꬅ ቱና አያን ዞኮ ኩንስዳ እስ ማጫስያ ደአዉሱ። እያ ኩናፐ ደንዶይሳን ሱረ ኤቃናዉ ዳንዳኡኩ።
LUK 13:12 የሱሲ እዮ በእዳ ዎደ ፄግድ፥ “ሀ ማጫሰተ፥ ነ ሀርግያፈ ፓፃዳሳ” ያግስ።
LUK 13:13 ባ ኩሽያ እ ቦላ ዎꬅን፥ እያ ኤለሳዳ፥ ሱራዳ ኤቃሱ። ፆሰ ጋላታሱ።
LUK 13:14 ሽን አይሁደ ዎሳ ኬꬃ ሀላቃይ ይሎትድ አሳኮ፥ “ኦሶ ኦꬅያ ኡሱፑን ጋላሳት ደኦሶና። ሄሳ ግሾ፥ ሄ ጋላሳታን ይድ ፓፅተፐ አትሽን፥ ሳምባታ ጋላስ ግደና” ያግስ።
LUK 13:15 ጎዳይ፥ “ጩቦቶ፥ ህንተ ግዶፈ ቦር ዎይኮ ሀረ ሳምባታ ጋላስ ዛዳሎፐ ብልድ ሃ ኡሻናዉ ኤፎናይ ኦኔ?
LUK 13:16 ያትን፥ ሀ ማጫስያ አብራሃመ ናአ ግዳሸ ፃላሄን ቃሸታዳ ታማነ ሆስፑን ላይꬅ ኩመꬅ ደእዳርስ ሳምባታ ጋላስ ብርሸተꬅ ኮሸኔ?” ያግድ ኦይችስ።
LUK 13:17 እ ሄሳ ኦድዳ ዎደ ኤቀተይሳት ኡባይ ዬላትዶሶና። ሽን አሳ ኡባይ እ ኦꬅዳ ማላልስያ ኦሶ ኡባን ኡፋይትዶሶና።
LUK 13:18 ሄሳፈ ጉየ፥ የሱሲ ሀይሳዳ ያግስ፥ “ፆሳ ካዎተꬅ አይ ዳኒ? እያ አይብራ ዳንሶ?
LUK 13:19 ፆሳ ካዎተꬅ እስ አስ ባ ጎሻን ቶክዳ ዎላ አይፈ መላ። እ ድጭድ ምꬅ ግድስ። ሳሎ ካፎት እያ ታሽያ ቦላ ሸምፕዶሶና።”
LUK 13:20 ቃስ፥ “ፆሳ ካዎተꬃ አይብራ ዳንሶ?
LUK 13:21 እስ ማጫስያ ዳሮ ꬊለራ ዋላካዳ ሙኑቅዳ ጉꬃ እርሾ ዳኔስ” ያግስ።
LUK 13:22 ሄሳፈ ጉየ፥ የሱሲ የሩሳላመ ብሸ እ ካንꬅያ ኦግያን ደእያ ካታማታንነ ጉታታን ታማርስሸ አꬍስ።
LUK 13:23 እስ አስ የሱሳኮ፥ “ጎዳዉ፥ አታናይ ጉꬃ አሳ ፃላሌ?” ያግድ ኦይችስ። የሱሲ ኤንታኮ፥
LUK 13:24 “ስእተ፥ ፁንꬃ ዉላራ ገላናዉ ባፀትተ። ዳሮት ገላናዉ ኮዮሶና ሽን ኤንታዉ ሀነና።
LUK 13:25 ኬꬃ አዋይ ደንድድ ዉላ ጎርድዳፐ ጉየ፥ ‘ኑስ ዶያርክ’ ያግሸ ካረን ኤቅድ ፄስ ኦይከታ። ሽን እ፥ ‘ህንተ ኦነኮነ አዉፐ ይዳኮ ታ ኤርከ’ ግድ ዛራና።
LUK 13:26 ሄ ዎደ ህንተ፥ ‘ኔራ ዎላ ምዳ፥ ኡይዳ፥ ኑ ዳባባንካ ታማርሳዳሳ’ ያጋና።
LUK 13:27 “እ ዛሪድ፥ ‘ህንተ ኦነኮነ አዉፐ ይዳኮ ኤርከ። ህንተኖ፥ ጌላቶ ታፐ ሃክተ’ ያጋና።
LUK 13:28 አብራሃመ፥ ይሳቃ፥ ያይቆባነ ናበታ ኡባ ፆሳ ካዎተꬃን በአና፥ ሽን ህንተ ካረን ዎꬍድ አትያ ዎደ ህንተዉ ዬሆነ አቸ ጋርጨꬅ ግዳና።
LUK 13:29 አሳይ ዶሎሀፐ፥ ዉሎሀፐ፥ ፑደሀፐነ ዱገሀፐ ይድ ፆሳ ካዎተꬃን ግብራ ቦላ ኡታና።
LUK 13:30 ሄሳ ግሾ፥ ሀእ ደꬃን ጉየ ግድዳይሳታፐ ስን ግዳናይሳት፥ ስን ግድዳይሳታፐ ጉየ ግዳናይሳት ደኦሶና” ያግስ።
LUK 13:31 ሄ ዎደ ፋርሳወታፐ እሶት እሶት ይድ፥ “ሄሮዲስ ነና ዎꬋናዉ ኮይያ ግሾ ሀ በሳፈ ደንዳዳ ባ” ግዶሶና።
LUK 13:32 እ ዛሪድ፥ “ብድ፥ ሄ ዎርካናስ፥ ‘ሄኮ፥ ሀችነ ዎንቶ ቱና አያናታ ከሳና፥ ሀርጋንቾታ ፓꬃና፥ ሄꬓንꬆ ጋላሳን ኩሻ ቦላ ጋካና’ ያግስ ጊተ።
LUK 13:33 ሀኖፐ አትሽን፥ ናበይ የሩሳላመፐ ካረን ሀይቃናዉ በሰና። ሄሳ ግሾ፥ ሀች፥ ዎንቶነ ዎንት ፔእን ሄ በሳ ባናዉ ደንዳስ።
LUK 13:34 “የሩሳላመ፥ የሩሳላመ፥ ናበታ ዎꬍያረ፥ ኔኮ ኪተትዳይሳታ ሹቻን ጫድያረ፥ ኩቶይ ባ ናይታ ባ ቀፍያፐ ጋርሳን ሺሽያዳ ነ ናይታ ታ ቀስያፐ ጋርሳን አፑን ቶሆ ሺሻናዉ ኮያድና፥ ሽን ህንተ እፃስ ግደታ።
LUK 13:35 ታ ህንተዉ ኦዳይስ፤ ህንተ ኬꬃይ ካይሳታና። ጎዳ ሱንꬃን የይስ አንጀትዳይሳ ህንተ ጋና ጋካናዉ ታና ደመከታ” ያግስ።
LUK 14:1 እስ ሳምባታ ጋላስ የሱሲ እስ ፋርሳወታ ሀላቃ ሶ ካꬅ ማናዉ ገልያ ዎደ አሳይ ጫድ ፄሎሶና።
LUK 14:2 ሄ በሳን ሻዉሄ ሀርገን ዋየትያ እስ አስ እያዉ ስንꬃ ባጋራ ዝንእስ።
LUK 14:3 የሱሲ ፋርሳወታነ ህገ አስታማረታ፥ “ሳምባታ ጋላስ ሀርጋንቾ ፓሶይ ዎገየ ዎጋ ግደኔ?” ያግድ ኦይችስ።
LUK 14:4 ኤንቲ ስእ ግዶሶና። የሱሲ ሀርገትያ ኡራ ቦች ፓꬅድ ሞይዝስ።
LUK 14:5 “ቃስካ ህንተፈ እሱዋስ ናእ ዎይኮ ቦር ሳምባታ ጋላስ አፎን ዉልኮ፥ ኤለስድ ከሶናይ ኦኔ?” ያግድ ኦይችስ።
LUK 14:6 ኤንቲ እስባካ ዛራናዉ ዳንዳእቦኮና።
LUK 14:7 የሱሲ እማቱዋስ ፄገትዳይሳት ቦንቾ በሲ ዶርሽን በእድ፥ ሀ ሌምሱዋ ኦድስ፦
LUK 14:8 “እስ አስ ነና ያጋኖ ፄግኮ ቦንቾ በሳን ኡቶፋ። ኔፐ አꬍድ ቦንቸትያ አስ ፄገታናዉ ዳንዳኤስ።
LUK 14:9 ህንተና ናምአታካ ፄግዳይስ ይድ፥ ‘ነ በሳ ሀ እማꬃስ የዳ’ ግያ ዎደ ኔኒ ዬላታሸ ዝቃ በሲ ዎꬋሳ።
LUK 14:10 ግዶሽን፥ ነ ፄገትዳ ዎደ ኮይሮታዳ ዝቃ በሲ በአዳ ኡታ። ፄጎይስ ይድ፥ ‘ታ ላግያዉ፥ ሀ ቦንቾ በሳን ኡታ’ ያጋና። ሄ ዎደ ኔራ እስፈ ፄገትዳ አሳ ኡባ ስንꬃን ነ ቦንቸታና።
LUK 14:11 ባና ꬎቁ ꬎቁ ኦꬅያ ኡባይ ካዉያና፤ ባና ዝቅ ዝቅ ኦꬅያ ኡባይ ꬎቁ ꬎቁ ጋና።”
LUK 14:12 ቃስ የሱሲ እያ ሞክዳ ኬꬃ አዋኮ፥ “ቁማ ዎይኮ ካሆ እማቶ ፄግያ ዎደ፥ ኔኒ ኩሸ ዛሮ ፄጎና መላ ነ ላገታ ዎይኮ ነ እሻታ ዎይኮ ነ ዳቦታ ዎይኮ ነ ዱረ ሾሮታ እማቶ ፄጎፓ።
LUK 14:13 ግዶሽን፥ ነ እማቶ ጊግስዳ ዎደ ማንቆታ፥ ዎበታ፥ ጉንዳታነ ቆቀታ ፄጋ፤ ኔኒ አንጀታና።
LUK 14:14 ሀይሳቲ ኩሸ ዛራናዉ ዳንዳኦና ግሾ ኩሸ ዛሮይ ጌሻታ ደንዶ ጋላሳን ነዉ ስማና” ያግስ።
LUK 14:15 የሱሳራ ዎላ እማቶ ቦላ ኡቶይሳታ ግዶፈ እሶይ፥ ሄሳ ስእድ፥ “ፆሳ ካዎተꬃን እማቶ ቦላ ኡተይስ አንጀትዳይሳ” ያግስ።
LUK 14:16 የሱሲ፥ “እስ አስ ግታ እማቶ ጊግስድ ዳሮ አሳታ ፄግስ።
LUK 14:17 እማቶይ ሞከትያ ሳተይ ጋክያ ዎደ፥ ፄገትዳ እማꬃታ፥ ‘ሄኮ ኡባባይ ጊግስ፥ ሃ ዪተ’ ያግድ ፄጋናዳ ባ አይልያ ኪትስ።
LUK 14:18 “ሽን ኡባይካ ባንታ ጋሶ ጋሶ መꬍዶሶና። እሶይ፥ ‘ሀእ ቡሮ ጋደ ሻምዳ ግሾ፥ ባዳ በአናዉ ኮሼስ፤ ሀያና ታና አጋርክ ያጋ’ ያግስ።
LUK 14:19 ሀንኮይ፥ ‘እቻሹ ዋꬃ ቦር ሻማስ፤ ኤንታና ዋፃ በአና ግሾ ሀያና ታና ላንጮፋ’ ያግስ።
LUK 14:20 ቃስ ሀራይ፥ ‘ታኒ ቡሮ መዳን ደእያ ግሾ፥ ያናዉ ዳንዳእከ’ ያግስ።
LUK 14:21 “አይለይ ስም ይድ ሄ ኡባ ባ ጎዳስ ኦድስ። ሄ ዎደ ያጋኖ አዋይ ሀንቀትድ አይልያኮ፥ ‘ኤለሳዳ ካታማን ደእያ ዎጋ ኦገታነ ዳጋላታ ባዳ፥ ማንቆታ፥ ዎበታ፥ ቆቀታነ ጉንዳታ ሃ ኤሀ’ ያግስ።
LUK 14:22 “አይለይ፥ ‘ታ ጎዳዉ፥ ነ ኪትዳይስ ኡባይ ፖለትስ፥ ሽን ሀእካ በሲ ደኤስ’ ያግስ።
LUK 14:23 “ጎዳይ አይልያኮ፥ ‘ሆሮጋታ ቦላነ፥ ጋደ ግዶ ኦገታ ከያ፥ ታ ኬꬃይ ኩማና ጋካናዉ ደምዳ ኡባ ያና መላ ኦꬃ።
LUK 14:24 ታ ህንተዉ ኦዳይስ፤ እማቶ ፄገትዳይሳታፐ ኦንካ ታ ግብራፐ ሞናይሳ ኤርተ’ ግስ” ያግስ።
LUK 14:25 ዳሮ አሳይ እያራ ዎላ ብሽን፥ የሱሲ ኤንታኮ ጉየ ስሚድ፥
LUK 14:26 “ታኮ ያ ኡባይ ባ አዋነ ባ አይዉ፥ ባ ማችዉነ ባ ናይታ፥ ባ እሻታነ ባ ምቸታ፥ ሀር አቶሽን ባ ደኡዋ እፆናይ ታ ታማረ ግዳናዉ ዳንዳኤና።
LUK 14:27 ባ ማስቃልያ ቶክድ ታና ካሎናይ ታ ታማረ ግዳናዉ ዳንዳኤና።
LUK 14:28 “ህንተፈ እስ አስ ሹቻ ኬꬅ ኬፃናዉ ኮይኮ፥ ኬꬃ ኬፅድ ኦንጋናዉ አይ መላ ሚሸ ኮሽያኮ ኮይሮትድ ኤራናዉ ቆፕ በኦናይ ኦኔ?
LUK 14:29 ሄሳ ግዶና እፅኮ፥ ሀ ኡራይ ባሶ ሹቹ ሂፅን ቁስተꬅ ፆንኮ፥
LUK 14:30 በእያ ኡባይ፥ ‘ሀ ኡራይ ግምበꬅ ኦይክን ቁስታናዉ እያ ፆንስ’ ያግድ ቦሮሶና።
LUK 14:31 “ዎይኮ እስ ካዎይ ሀራ ካዎራ ኦለታናዉ ደንድሸ ላታሙ ሙኩሉ ኦላንቾታ ኤክ ያ ካዉዋራ ታሙ ሙኩሉ ኦላንቾታራ ኤቀታናዉ ዳንዳአናይሳነ ዳንዳኦናይሳ ኡትድ ዞረቶናይ ኦኔ?
LUK 14:32 ኤቀታናዉ ዳንዳኤቶናባ ግድኮ፥ ሄ ካዋራ ሃሆን ደእሽን ጊጋናዉ ኮይሮትድ ጭማ የድድ ኦይቼስ።
LUK 14:33 ሄሳዳካ፥ ህንተፈ ኦንካ ባዉ ደእያባ ኡባ አጎና እፅኮ፥ ታ ታማረ ግዳናዉ ዳንዳኤና።
LUK 14:34 “ማፅነይ ሎኦ፥ ሽን ማፅነይ ባ ማልኡዋ አግኮ፥ ዋንድ ማፅነ ጌተታናዉ ዳንዳኢ?
LUK 14:35 ቢታተꬃስነ አራዳተꬃስ ማዶና ግሾ ዎራ የገቴስ። ህዛ፥ ስእያ ሀይꬅ ደእያ አስ ስኦ” ያግስ።
LUK 15:1 እስ ጋላስ ቃራፃ ቃንፀይሳትነ ናጋራንቾት የሱሳ ትምርትያ ስአናዉ እያ ዩሾን ሺቅዶሶና።
LUK 15:2 ሽን ፋርሳወትነ ህገ አስታማረት፥ “ሀይስ ኡራይ ናጋራንቾታ ሺሽድ ኤኬስ፥ ኤንታራ እስፈ ሜስ” ያግድ ዙዙምዶሶና።
LUK 15:3 የሱሲ ሀ ሌምሱዋ ኤንታዉ ያግድ ኦድስ፦
LUK 15:4 “ህንተ ግዶፈ እሱዋስ ፄቱ ዶርሳት ደእያባ ግድኮ ኤንታፈ እሶይ ꬋይኮ ኡዱፉን ታማነ ኡዱፉናታ ባዞን አግድ ꬋዮይሳ ደማና ጋካናዉ ኮዮናይ ኦኔ?
LUK 15:5 ደምዳ ዎደ ኡፋይትድ ባ ጋናን ቶክድ፥
LUK 15:6 ባ ሶ ስሜስ። ባ ላገታነ ሾሮታ ፄግድ፥ ‘ꬋይዳ ታ ዶርሳ ደማስ፥ ታራ እስፈ ኡፋይትተ’ ያጌስ።
LUK 15:7 ሄሳዳካ፥ ማሮት ኮሾና ኡዱፉን ታማነ ኡዱፉን ፅሎታፐ አꬅድ፥ ማሮታን ገልያ እስ ናጋራንቹዋ ጋሶን ሳሎን ግታ ኡፋይስ ግዴስ።
LUK 15:8 “ዎይኮ ታሙ ብር ደእያ እስ ማጫስያ ታማፈ ኢስያ ꬋይኮ ደማና ጋካናዉ ፆምፐ ኦይꬃዳ ኬꬃ ፕታዳ ምንꬃ ኮዮናይ ኦኔ?
LUK 15:9 ደምዳ ዎደ ባ ላገታነ ባ ሾሮታ ፄጋዳ ‘ꬋይዳ ታ እስ ብራ ደምዳ ግሾ ታራ ኡፋይትተ’ ያጋዉሱ።
LUK 15:10 ስእተ፥ ሄሳ መላ እስ ማሮተꬃን ገልያ ናጋራንቹዋን ፆሳ ኪታንቾታ ስንꬃን ኡፋይስ ግዴስ” ያግስ።
LUK 15:11 ዛሪድ የሱሲ፥ “እስ ኡራስ ናምኡ ናይት ደኦሶና።
LUK 15:12 ኤንታፈ ካሎ ናአይ ባ አዋኮ፥ ‘ታ አዋዉ፥ ነ ሻሉዋፐ ታ ግሹዋ ታዉ እማ’ ያግስ። አዋይ ባ ሻሉዋ ባ ናይታስ ሻክስ።
LUK 15:13 ጉꬃ ጋላሳፐ ጉየ፥ ካሎ ናአይ ባ ግሹዋ ኡባ፥ ቃች ኤክድ ሃሆ ቢታ ብስ። ያን አልታጫን ሻሉዋ ቶችድ ኦንግስ።
LUK 15:14 እ ባዉ ደእያባ ኡባ ዉርስዳፐ ጉየ ሄ ቢታ ኡባን ምኖ ኮሽ ከይን መቶትስ።
LUK 15:15 ሄሳ ግሾ፥ ሄ ቢታ አሳፐ እሱዋ ሶ ጋታ ገልስ። ኡራይ እያ ጉዱንꬆ ሄማና መላ ባ ሞꬁ የድስ።
LUK 15:16 ጉዱንꬆት ምያ ሀርቁዋፈ ማናዉ አሞትስ፥ ሽን እዮካ እያዉ እምያ አስ በንትቤና።
LUK 15:17 እ ባ ዎዛናኮ ስሚድ፥ ‘አፑን ታ አዋ አይለታስ ካꬅ ዎራ ዎꬍን ታ ሀይሳን ኮሻራ ሀይቃናዉ ጋካድና?’
LUK 15:18 ደንዳዳ ታ አዋኮ ባዳ፥ ‘ታ አዋዉ፥ ሳሎን ፆሳ፥ ሳአን ነና ቆሀስ።
LUK 15:19 ህዛፐ ነ ናአ ጌተታዳ ፄገታናዉ ታዉ በሶና ግሾ፥ ነ ሶን ደእያ አይለታፐ እሱዋዳ ታና ፓይዳ’ ያጋና” ያግስ።
LUK 15:20 ሄሳ ግሾ፥ ደንድድ ባ አዋኮ ብስ። “ሀኖሽን፥ እ ቡሮ ሃሆን ደእሽን አዋይ ቃትድ፥ እያኮ ዎፅ ብድ፥ እድምድ ዬርስ።
LUK 15:21 ናአይካ፥ ‘ታ አዋዉ ሳሎን ፆሳ፥ ሳአን ነና ታ ቆሀስ። ህዛፐ ነ ናአ ጌተታዳ ፄገታናዉ በስከ’ ያግስ።
LUK 15:22 “እያ አዋይ አይለታ ፄግድ፥ ‘ኤለስድ ኡባፈ ሎኦ ግድዳ ማኦ ኤህድ እያ ማይዝተ፤ እያ ብራን ሳጋዮ፥ እያ ቶሆን ጫማ አꬅተ።
LUK 15:23 ሞꬎ ጋታርመንꬆ ኤህድ ሹክተ፥ ሞስ፥ ኡፋይቶስ።
LUK 15:24 ታ ናአይ ሀይስ ሀይቅስ፥ ሽን ሀእ ፓፅስ፤ ꬋይስ፥ ሽን በንትስ’ ያግስ። ሄሳፈ ጉየ፥ ኡፋይስ ዶምዶሶና።
LUK 15:25 “ሄ ዎደ ባይራ ናአይ ጎሻ ጋደን ደኤስ። ያፐ ይሸ ሶ ማትሽን የꬅነ ጉፋ ግርስ ስእስ።
LUK 15:26 እ፥ አይለታፐ እሱዋ ፄግድ ሀንያባይ አይበኮ ኤራናዉ ኦይችስ።
LUK 15:27 አይለይ፥ ‘ነ እሻይ ሳሮ ይዳ ግሾ ነ አዋይ ሞꬎ ጋታርመንꬆ እያዉ ሹክስ’ ያግስ።
LUK 15:28 “ባይራ እሻይ ይሎትድ ሶ ገላናዉካ ኮይቤና። አዋይ ካረ ከይድ ሶ ገላና መላ እያ ዎስስ።
LUK 15:29 ሽን እ ባ አዋኮ፥ ‘ሄኮ፥ ሀይሳ መላ ላይꬅ ታ ነዉ አይለታዳ ነ ኪታፐ እሱዋካ ፓጭሶና ነዉ ኪተትን፥ ታኒ ታ ላገታራ ኡፋይታና መላ ሀር አቶሽን እስ ላቃ ዴሸ እማባካ።
LUK 15:30 ሀኖሽን፥ ሀይስ ነ ናአይ ነ ሻሉዋ ላይማታራ ꬋይስድ ይን፥ ሞꬎ ጋታርመንꬆ ሹካዳሳ’ ” ያግስ።
LUK 15:31 “አዋይካ፥ ‘ታ ናአዉ፥ ኔኒ ኡባ ዎደ ታራ ደኣሳ፥ ታባ ኡባይ ኔሳ።
LUK 15:32 ሀይስ ነ እሻይ ሀይቅስ፥ ሽን ፓፅስ፤ ꬋይስ፥ ሽን በንትስ። ሄሳ ግሾ፥ ዳሮ ኡፋይታናዉ በሴስ’ ያጋና” ያግስ።
LUK 16:1 የሱሲ ባ ታማረታኮ፥ “እስ ዱረ ኡራስ እያፐ ጋርሳራ እስ ሹም ደኤስ። ሄ ሹማይ ባ ጎዳ ሻሉዋ ቶቼስ ግያ ዎረይ ኬꬃ አዋ ጋክስ።
LUK 16:2 ኬꬃ አዋይ ሹማ ፄግስድ፥ ‘ታኒ ዎይግያባ ስአድና? ህዛፐ ኔኒ ታ ኬꬃስ ሹማ ግዳዳ ኦꬃናዉ ዳንዳኦና ግሾ፥ ታ ሻሉዋ ታዉ ሼꬋ’ ያግስ።
LUK 16:3 “ሄ ሹማይ ባ ዎዛናን ሀይሳዳ ያግድ ቆፕስ፦ ‘ታ ጎዳይ ታና ሹማተꬃፈ ዎꬃና ሀኔስ፥ ጎያ አቃናዉ ዎልቅ ባዋ፥ ዎሳ ማናዉ ዬላዬስ፤ ያትን ታ ዋኖ?
LUK 16:4 ሹማተꬃፈ ታ ዎꬍያ ዎደ አሳይ ታና ሞካና መላ ኦꬃናባ ታ ኤራይስ’ ያግስ።
LUK 16:5 “ሄሳ ግሾ፥ እያ ጎዳ አጮይ ደእያ አሳ እሱዋ እሱዋ ፄግ ኤህድ ኮይሮ ኡራኮ፥ ‘ነ ቦላ ታ ጎዳ አጮይ አይ መል ደኢ?’ ያግድ ኦይችስ።
LUK 16:6 “እ፥ ‘ላታሙ ባርሜለ ዛይተ አጮይ ደኤስ’ ያግስ። “ሹማይ፥ ‘ዉለ ዋርቃትያ ሄኤ፥ ኤለሳዳ፥ ታሙ ባርሜለ ዛይተ አጮይ ደኤስ ጋዳ ፃፋ’ ያግስ።
LUK 16:7 “ሄሳፈ ካልድ ናምአንꬁዋኮ፥ ‘ነዉ አፑን ደኢ?’ ያግስ። “እ፥ ‘ሄꬑ ፄታነ ላፑን ታሙ ኩንታለ ግስተ አጮይ ደኤስ’ ያግስ። “ሹማይ፥ ‘ነ ዉለ ዋርቃትያ ሄኤ፥ ኤለሳዳ፥ 296 ኩንታለ ያጋዳ ፃፋ’ ያግስ።
LUK 16:8 ኬꬃ አዋይ አማነትቦና ሹማ እያ ጭንጫተꬃስ ናሽስ። ሀ አላምያ ናይት አሰ ኦይꬃን ፖኦ ናይታፐ አꬍዳ ዎዛናማታ።
LUK 16:9 “ሄሳ ግሾ፥ ታ ህንተዉ ኦዳይስ፤ ሀ አላምያ ሚሸይ ዉርያ ዎደ መርና ኬꬃን ሞከታና መላ ሀ ሚሽያራ ህንተዉ ላገታ ሻምተ።
LUK 16:10 ኡባፈ ጉꬃባን አማነትዳይ ዳሮባን አማነትዳይሳ ግዴስ። ቃስ ኡባፈ ጉꬃባን አማነቶናይስ ዳሮባን አማነተና።
LUK 16:11 ህዛ፥ ሀ አላመ ሚሸን ህንተ አማነቶና እፅኮ፥ ቱማ ሚሸ ህንተዉ ኦን ሀዳራ እማኔ?
LUK 16:12 ህንተ ሀራ አሳ ሚሸን አማነቶና እፅኮ፥ ህንተ ቡዞ ሚሸ ህንተዉ ኦን እማኔ?
LUK 16:13 “እስ አይለይ ናምኡ ጎዳታስ ሃረታናዉ ዳንዳኤና። እሱዋ እፅኮ ሀንኩዋ ዶሴስ ዎይኮ እሱዋኮ ሺቅኮ ሀንኩዋ ካꬌስ። ሄሳዳካ፥ ህንተ ፆሳስነ ሚሸስ ሃረታናዉ ዳንዳኤከታ።”
LUK 16:14 ሚሸ ዶስያ ፋርሳወት ሄሳ ስእዳ ዎደ የሱሳ ቀልቅስዶሶና።
LUK 16:15 እ፥ “ህንተ፥ ህንተና አሳ ስንꬃን ፅልሴታ፥ ሽን ፆሳይ ህንተ ዎዛና ኤሬስ። አሳ ስንꬃን ቦንቸትዳይስ ፆሳ ስንꬃን ቦረትዳይሳ።
LUK 16:16 “ሙሰ ህገይነ ናበታ ኪታይ ዮሃንሳ ጋካናዉ ህንተዉ ኦደትሸ ጋምእስ። ሄሳፈ ጉየ፥ ፆሳ ካዎተꬃ ዎንገላይ ሳባከትሸ ጋምእስ። አስ ኡባይ ያ ገላናዉ ዳፈቴስ።
LUK 16:17 ግዶሽን፥ ህግያፈ እስ ላፋ ፕዳለይ አታናፐ ሳሎይነ ሳእ አይስ ካዉዬስ።
LUK 16:18 “ባ ማችዉ የድድ ሀራ ኤክያ ኡባይ ላሜስ። ባ አዝናፐ አንጀትዳሮ ኤከይስካ ላሜስ” ያግስ።
LUK 16:19 “አልኦነ አሌቆ አፍላ ማእያ፥ ሳእ እንጀትን ጋላስ ጋላስ ኡፋይሳን ደእያ እስ ዱረ አስ ደኤስ።
LUK 16:20 ሀር ቃስ አሳተꬃይ ኩመꬅ ማዱንፅዳ እስ አላዛራ ጌተትያ ማንቆይ ሄ ዱረ ኡራ ካረን የገትድ አትዳይስ ደኤስ።
LUK 16:21 ኮሻፐ ደንዶይሳን ዱረ ኡራ ጋይታፐ ዎꬍያ ቲፍያ ማናዉ አሞትሸ ደኤስ። ሀር አቶሽን፥ ካናት ይድ እያ ማዱንꬃ ላጮሶና።
LUK 16:22 “ሄ ማንቆይ ሀይቅስ፤ ኪታንቾት እያ አብራሃመ ክኦ ኤፍዶሶና። ቃስ ዱረ ኡራይካ ሀይቅድ ሞገትስ።
LUK 16:23 ስኦለን ኡንኤትድ ደእሸ ꬎቁ ግድ ሃሆን አብራሃመነ እያ ክኦን ደእያ አላዛራ በእስ።
LUK 16:24 እ፥ ‘አዋዉ አብራሃመ፥ ታዉ ቃታርክ፤ ሀ ታማ ላጮን ኡንኤታዳ ደእያ ግሾ አላዛር ባ ብራꬍያ ሃꬃን የድድ ታ እንፃርሳ ላኮꬃና መላ ሀያና እያ የዳርክ’ ያግድ ዋስስ።
LUK 16:25 “ሽን አብራሃመይ እያኮ፥ ‘ታ ናአዉ፥ ነ ሳአን ደእያ ዎደ ሎኦባታ ኤክዳይሳ፥ ቃስ አላዛር ኢታባታ ኤክዳይሳ አኬካ። ሽን ሀእ እ ሀይሳን ኡፋይቴስ፥ ቃስ ኔኒ ዋየታሸ ደኣሳ’ ያግስ።
LUK 16:26 ሀ ኡባፈ አꬍድ፥ ‘ሃፐ ህንተኮ፥ ህንፐ ሃ ኑኮ አꬋናዉ ኮየይሳት ፕኖና መላ ኑስነ ህንተዉ ግዶን ግታ አፎይ ደኤስ’ ያግስ።
LUK 16:27 “ዱረ ኡራይ፥ ‘አዋዉ፥ ያኮ አላዛራ ታ አዋ ሶ ኪታና መላ ታ ነና ዎሳይስ።
LUK 16:28 ታዉ እቻሹ እሻት ደእዶሶና፥ ኤንትካ ሀ ዋየ በሳ ዮና መላ ኤንታዉ ብድ ማርካቶ’ ያግስ።
LUK 16:29 “ሽን አብራሃመይ፥ ‘ኤንታዉ ሙሰራነ ናበታራ ደኦሶና፤ ኤንቲ ኦድያባ ስኦና’ ያግስ።
LUK 16:30 “ዱረ ኡራይ፥ ‘አዋዉ አብራሃመ፥ ሄሳꬆ ግደና፤ እስ አስ ሀይቆፐ ደንድድ ቢኮ ኤንቲ ማሮታን ገላና’ ያግስ።
LUK 16:31 “አብራሃመይ፥ ‘ሙሰነ ናበታ ስኦና እፅኮ፥ ሀር አቶሽን ሀይቆፐ እስ አስ ደንድ ኦድኮካ አማኖኮና’ ያግስ።”
LUK 17:1 የሱሲ ባ ታማረታኮ፥ “አሰ ꬉበꬅድ ናጋራን ገልስያባይ ዮና አገና። ግዶሽን፥ ናጋራን ገላና መላ ኦꬅያ ኡራ አየ!” ያግስ።
LUK 17:2 ሄ ኡራይ ካሎታፐ እሱዋ ባለꬃናፐ ዎፃ ባ ቆን ቃችድ አባን ዉልኮ እያዉ ሎኦ።
LUK 17:3 ሄሳ ግሾ ናገትተ። “ነ እሻይ ናጋራ ኦꬅኮ ሀንቀታ፤ ቂሮትድ ማሮተꬃን ስምኮ፥ እያዉ አቶ ያጋ።
LUK 17:4 እስ ጋላሳን ላፑን ቶሆ ቆህድ፥ ላፑን ቶሆ፥ ‘ታኒ ታ ናጋራ ኤራስ ታና ማራ’ ያግድ ኔኮ ዪኮ እያዉ አቶ ጋ።”
LUK 17:5 ሀዋረት ጎዳኮ፥ “አማኖ ኑስ ጉጃርክ” ያግዶሶና።
LUK 17:6 ጎዳይ፥ “ጋሸ አይፈ መላ አማኖይ ህንተዉ ደእኮ ‘ሀይሳ ዎላ ሾደታዳ አባ ግዶን ቶከታ’ ያግኮ ህንተዉ ኪተታና” ያግስ።
LUK 17:7 ጉጅድካ የሱሲ፥ “ህንተ ግዶፈ እሱዋስ ጎሻንቾይ ዎይኮ ዶርሰ ሄምያ አይለይ ደእኮ ኦሶ ጋደፐ ዎይኮ ዉደፐ ሶ ስምያ ዎደ፥ ‘ኤለ ሃያዳ ካꬅ ማናዉ ኡታ’ ያገይ ደኢ?
LUK 17:8 ዴና፥ ‘ታዉ ካሆ ጊግሳ፤ ታኒ ማዳ፥ ኡያዳ አጋና ጋካናዉ ኤቃዳ ሙዛ። ሄሳፈ ጉየ፥ ኔኒ ቃስ ማሳነ ኡያሳ’ ያገነዬ?
LUK 17:9 ህዛ፥ ጎዳይ፥ አይለይ ኪታ ፖልዳ ግሾ አንጅዬ?
LUK 17:10 ሄሳ ግሾ፥ ህንተካ ኪተቶይሳ ኡባ ፖልዳ ዎደ፥ ‘ኑ ፓꬆና አይለታ፤ ኦꬃናዉ በሲያ ኦሱዋ ፖልዳ’ ያግተ” ያግስ።
LUK 17:11 የሱሲ የሩሳላመ ብሸ ሳማርስነ ጋልላስ ግዶራ ካንꬅድ አꬍስ።
LUK 17:12 እስ ጉታ ገልያ ዎደ ባሮ ሀርገን ኦይከትዳ ታሙ አሳት እያ ደምዶሶና። ኤንትካ ሃሆን ኤቅድ፥
LUK 17:13 “ጎዳ የሱሳ፥ ኑስ ቃታርክ” ያግድ ዋስዶሶና።
LUK 17:14 እ ኤንታ በእዳ ዎደ፥ “ብድ ህንተናተꬃ አይሁደ ካህነ በስተ” ያግስ። ኤንቲ ኦግያ ቦላ ብሸ ፓፅዶሶና።
LUK 17:15 ኤንታፈ እሶይ ባ ፓፁዋ በእዳ ዎደ ꬎቁ ግዳ ቃላን ፆሳ ቦንችሸ የሱሳኮ ስምስ።
LUK 17:16 እ፥ ሳማረ ቢታ አስ፥ ሽን የሱሳ ቶሆ ቦላ ጉፋንድ እያ ጋላትስ።
LUK 17:17 የሱሲ፥ “ፓፅዳይ ታሙ አሳታ ግዶኮናዬ? ያትን፥ ኡዱፉናት አዉ ብዶና?
LUK 17:18 ሀ አላጋ ኡራፐ አትሽን፥ ሀር ስሚድ ፆሳ ጋላተይ ዴና ጉሰዬ?” ያግድ ኦይችስ።
LUK 17:19 ኡራኮ፥ “ነ አማኖይ ነና ፓꬅስ፤ ደንዳዳ ባ” ያግስ።
LUK 17:20 ፋርሳወት፥ “ፆሳ ካዎተꬃይ አዉደ ያኔ?” ግድ የሱሳ ኦይችዶሶና። እ፥ “ፆሳ ካዎተꬃይ በንትያ ማላን ዬና።
LUK 17:21 ቃስካ እያ፥ ‘ሀንና ዎይኮ ህንና ያጋናዉ ዳንዳኤና። አይስ ጊኮ፥ ፆሳ ካዎተꬃይ ህንተ ግዶን ደኤስ’ ” ያግድ ዛርስ።
LUK 17:22 የሱሲ ባ ታማረታኮ፥ “አሳ ናአ ጋላሳታፐ እሱዋ በአናዉ ህንተ አሞትያ ዎደይ ያና፥ ሽን ህንተ በኤከታ።
LUK 17:23 አሳይ፥ ‘እ ያን ደኤስ’ ዎይኮ፥ ‘ሀይሳን ደኤስ’ ያጋና፥ ሽን ኤንታና ካልድ ቦፕተ።
LUK 17:24 ዎልአንꬅ ዎልአምድ ሳሎ ጋፃፐ ጋፃ ፖእስያ መላ አሳ ናኣ ዩሳ ጋላሳይ ሄሳዳ ሀናና።
LUK 17:25 ሽን ሄስ ሀናናፐ ስን አሳ ናአይ ዳሮ ዋያናዉነ ሀ የለተꬃን እፀታናዉ በሴስ።
LUK 17:26 ኖሄ ዎደ ሀንዳይሳ መላ አሳ ናአ ዎደን ሄሳዳ ሀናና።
LUK 17:27 ኖሄይ ማርካብያን ገልዳ ቃማ ጋካናዉ አሳይ ምሸነ ኡይሸ፥ ኤክሸነ ገልሸ ደእሽን ꬋዮ ሃꬃይ ይድ ኡባ ꬋይስስ።
LUK 17:28 ሎፀ ላይꬃንካ ሄሳꬆ ሀንስ። አሳይ ምሸነ ኡይሸ፥ ሻምሸነ ባይዝሸ፥ ቶክሸነ ኬፅሸ፥ ጋምእዶሶና።
LUK 17:29 ሎፀይ ሶዶመፐ ከይዳ ጋላስ ዲነ ጌተትያ ፁግያባይ ሳሎፐ ቡክድ ኡባ ꬋይስስ።
LUK 17:30 አሳ ናአይ ቆንጭያ ዎደካ ሄሳዳ ሀናና።
LUK 17:31 “ሄ ጋላሳን ካረን ደእያ ኦንካ ኬꬃ ግዶን ደእያባ ኤካናዉ ሶ ገሎፖ። ሄሳዳካ፥ ጋደን ደእያ አስ አይኮስካ ሶ ስሞፎ።
LUK 17:32 ሎፀ ማችዉ አኬክተ፤
LUK 17:33 ባ ሸምፕዉ አሻናዉ ኮይያ አስ ኦንካ ꬋይሳና፤ ባ ሸምፕዉ አꬅድ እምያ ኦንካ እ አሻና።
LUK 17:34 ታ ህንተዉ ኦዳይስ፤ ሄ ጋላሳን ናምኡ አሳት እስ አርሳን ዝንአና፤ እሶይ ኤከታና፥ ሀንኮይ አታና።
LUK 17:35 ናምኡ ማጫሳት ዎላ ጋጭሽን ኢስያ ኤከታና፥ ሀንክያ አታና።
LUK 17:36 ናምኡ አሳት ዎላ ጋደን ጎየይሳታፐ እሶይ ኤከታና፥ ሀንኮይ አታና” ያግስ።
LUK 17:37 ኤንቲ፥ “ጎዳዉ አዉ ኤከታኔ?” ያግድ ኦይችዶሶና። እ፥ “ባዉት ደእያ በሳን አንኮት ሺቆሶና” ያግስ።
LUK 18:1 የሱሲ ባ ታማረታ አዛሎና ኡባ ዎደ ዎሳና መላ ታማርሳናዉ ኮይድ ያግድ ሌምሶ ኦድስ፦
LUK 18:2 “እስ ካታማን ፆሳስ ያሸቶና፥ አሳስ ዬላቶና እስ ዳይን ደኤስ
LUK 18:3 ሄ ካታማን እስ አምእያ ደአዉሱ። እያካ፥ ‘ታ ግዶንነ ታ ሞርክያ ግዶን ደእያ ሞቱዋ ፕርዳ’ ያጋዳ ኡባ ዎደ ሄ ዳይናኮ ስመረታዉሱ።
LUK 18:4 ዳይናይ ጉꬃ ዎደስ እ ኦዳ ስኦና እፅስ፥ ሽን ጉየፐ ባ ዎዛናን፥ ‘ታኒ ፆሳስ ያዮና፥ አሳስ ዬላቶና እፅኮካ፥
LUK 18:5 ሀ አምእያ ታና ዋይስያ ግሾ እዉ ፕርዳና፤ ያቶና እፅኮ ኡባ ዎደ ያዳ ታና ሳለꬃና’ ” ያግድ ቆፕስ።
LUK 18:6 ጎዳይካ፥ “ጌላ ዳይናይ ግዳይሳ ስእደታ፤
LUK 18:7 ፆሳይ ቃማነ ጋላስ እያኮ ዋስያ ባ ዶርዳይሳታስ ፕርደነዬ? ኤንታና ማዳናዉ ጋምእዬ?
LUK 18:8 ታ ህንተዉ ኦደይሳ ስእተ፥ ኤለስድ ፕርዳና። ግዶሽን፥ አሳ ናእ ያ ዎደ ሳአ ቦላ አማኖ ደማንደሻ?” ያግስ።
LUK 18:9 ቃስ ዛሪድ፥ የሱሲ፥ ባንታና ፅሎ አሳዳ ኦꬅድ ጬቀተይሳታስነ ሀራታ ካይሳታስ ሀይሳዳ ያግድ ሌምሶ ኦድስ፦
LUK 18:10 “ናምኡ አሳት ዎሳናዉ ፆሳ ኬꬅ ብዶሶና። እሶይ ፋርሳወ ሀንኮይ ቃስ ቃራፃ ቃንፅስያ አስ።
LUK 18:11 ፋርሳወይ ኤቅድ ባዉ ዎስሸ፥ ‘ፆሳዉ ታኒ ሀራታ መላ ቦንቃንቾ፥ ጌላነ ላይማትያ አስ፥ አꬋዳ ቃስ ሀ ቃራፃ ቃንፅስያ ኡራ መላ ግዶና ግሾ ነና ጋላታይስ።
LUK 18:12 ሳምንታፈ ናምኡ ቶሆ ፆማይስ፥ ታ ደምያባ ኡባፈ አስራታ ከሳይስ’ ያግስ።
LUK 18:13 “ሽን ቃራፃ ቃንፅሰይስ ሃሆን ኤቅድ ሀር አቶሽን ሳሎ ꬎቁ ግድ ፄላናዉካ ያይድ ባ ትራ እጭሸ ‘ፆሳዉ፥ ታና ናጋራንቹዋ ማራርክ’ ግድ ዎስስ።
LUK 18:14 ታ ህንተዉ ኦደይሳ ስእተ፤ ፋርሳውያፐ ሀይስ ቃራፃ ቃንፅሰይስ ፆሳ ስንꬃን ፅሎ ግድድ ባ ሶ ስምስ። አይስ ጊኮ፥ ባና ꬎቁ ꬎቁ ኦꬅያ አስ ካዉያና፥ ባና ካዉሽያ አስ ꬎቁ ꬎቁ ጋና” ያግስ።
LUK 18:15 የሱሲ ዮጋ ናይታ ቦላ ባ ኩሽያ ዎꬅድ አንጃና መላ አሳይ እያኮ ኤሆሶና። የሱሳ ታማረት ሄሳ በእድ “አይስ የሱሳኮ ኤሄቲ?” ያግድ ካጭዶሶና።
LUK 18:16 ሽን የሱሲ ናይታ ባኮ ፄግድ፥ “ዮጋ ናይት ታኮ ያናይሳ ድጎፍተ፤ ዮ ጊተ። አይስ ጊኮ፥ ፆሳ ካዎተꬃይ ኤንታዳ ሀንዳይሳታሳ።
LUK 18:17 ታኒ ህንተዉ ቱማ ኦዳይስ፤ ፆሳ ካዎተꬃ ዮጋ ናይታꬆ ኤኮናይ ኦንካ ያ ገለና” ያግስ።
LUK 18:18 አይሁደ ሀላቃታፐ እሶይ፥ “ኬሀ አስታማርያዉ፥ መርና ደኦ ደማናዉ አይ ኦꬆ?” ያግድ ኦይችስ።
LUK 18:19 የሱሲ እያኮ፥ “አይስ ታና ኬሀዉ ያጋዳ ፄጋይ? እስ ፆሳፈ አትሽን፥ ሀር ኬህ ባዋ።
LUK 18:20 ላሞፋ፥ ዎꬎፓ፥ ካይሶቶፓ፥ ዎርዶ ማርካቶፋ፥ ነ አዋነ ነ አይዉ ቦንቻ” ግያ ኪታ ኤራይ ግድ ኦይችስ።
LUK 18:21 ኡራይካ፥ “ሄሳታ ኡባ ታኒ ናአተꬃፈ ዶማዳ ናጋሸ ጋምአስ” ያግስ።
LUK 18:22 የሱሲ ሄሳ ስእዳ ዎደ፥ “ህዛ፥ ነዉ እስባይ ፓጬስ፤ ነዉ ደእያባ ኡባ ባይዛዳ ማንቆታስ እማ፤ ሳሎን ነና ሻሎይ ናጌስ። ያታ ስማዳ፥ ታና ካላ” ያግስ።
LUK 18:23 ሽን ኡራይ ሄሳ ስእዳ ዎደ እያዉ ዳሮ ሻሎይ ደእያ ግሾ ዳሮ ቂሮትስ።
LUK 18:24 የሱሲ ኡራ በእድ፥ “ዱረ አሳስ ፆሳ ካዎተꬅ ገሎይ ዋንድ ኡንአንደሻ?
LUK 18:25 ዱረይ ፆሳ ካዎተꬅ ገላናይሳፈ ግማለይ ናርፐ ሉሆራ ካንይስ ካዉዬስ” ያግስ።
LUK 18:26 ሄሳ ስእዳ አሳይ፥ “ሄሳ ግድኮ ኦን አታኔ?” ያግዶሶና።
LUK 18:27 የሱሲ፥ “አሳስ ዳንዳኤቶናባይ ፆሳስ ዳንዳኤቴስ” ያግስ።
LUK 18:28 ጰፅሮስ፥ “ሄኮ ኑኒ ኑባ ኡባ አግድ ነና ካልዳ” ያግስ።
LUK 18:29 “የሱሲ ቱማ ታ ህንተዉ ኦዳይስ፤ ፆሳ ካዎተꬃስ ግድ ባ ኬꬃ ዎይኮ ባ ማችዉ ዎይኮ ባ እሻታ ዎይኮ ባ አዋነ ባ አይዉ ዎይኮ ባ ናይታ አግዳይ፤
LUK 18:30 ሀ ዎድያን ዳኮ ዳሮ፥ ያና አላመን መርና ደኦ ኤኮናይ ኦንካ ባዋ” ያግስ።
LUK 18:31 የሱሲ ታማነ ናምአታ ባኮ ፄግድ፥ “አነ የሩሳላመ ቦስ፥ ናበት አሳ ናአባ ፃፍዳባ ኡባይ ያን ፖለታና።
LUK 18:32 እ አይሁደ ግዶና አሳስ አꬍድ እመታና። ኤንቲ እያ ቶቻና፥ ጫያናነ እያ ቦላ ጩታና።
LUK 18:33 እያ ጋራፍዳፐ ጉየ፥ ዎꬋና፥ ሽን ሄꬓንꬆ ጋላሳን እ ሀይቆፐ ደንዳና” ያግስ።
LUK 18:34 ሽን እያ ታማረት ሄ ኡባፈ እስባካ አኬክቦኮና። እያ ፁራይ ኤንታዉ ቆሰትዳ ግሾ እ ዎይግዳኮ ኤርቦኮና።
LUK 18:35 የሱሲ እያርኮ ማትያ ዎደ እስ ቆቀ ኡራይ ኦገ ጋፃን ኡትድ ዎሴስ።
LUK 18:36 ቆቀ ኡራይ አሳይ ሄ በሳራ አꬍሽን ስእድ፥ “እ አይቤ?” ግድ ኦይችስ።
LUK 18:37 ኤንቲ፥ “ናዝረተ የሱሲ ሀይሳራ አꬌስ” ያግዶሶና።
LUK 18:38 እ፥ “ዳዊታ ናአዉ፥ የሱሳ፥ ታና ማራርክ” ያግድ ዋስስ።
LUK 18:39 ስን ስን ብያ አሳት፥ “ስእ ጋ” ግድ ሀንቀትዶሶና። ሽን እ፥ “ዳዊታ ናአዉ፥ ታና ማራ” ያግድ ዳርስድ ዋስስ።
LUK 18:40 የሱሲ ኤቅድ ኡራ ባኮ ኤሀና መላ ኪትስ። ኡራይካ፥ እያኮ ሺቅን፥
LUK 18:41 “ታ ነዉ አይ ኦꬃና መላ ኮያይ?” ያግድ ኦይችስ። ቆቀይ፥ “ጎዳዉ ታ ፄላናዉ ኮያይስ” ያግስ።
LUK 18:42 የሱሲ፥ “ፄላ፥ ነ አማኖይ ነና ፓꬅስ” ያግስ።
LUK 18:43 ኡራይ ኤለስድ ፄል አግስ። ፆሳ ቦንችሸ የሱሳ ካልስ። አሳ ኡባይ ሄሳ በእድ ፆሰ ጋላትዶሶና።
LUK 19:1 የሱሲ እያርኮ ገልድ አꬌስ።
LUK 19:2 ያን ዛክዮሳ ጌተትያ ቃራፃ ቃንፅሰይሳታ ሀላቃይ ደኤስ። እ ዳሮ ዱረ።
LUK 19:3 እ የሱሲ ኦነኮ በአናዉ ኮይስ። እ ቃንꬅ ግድያ ግሾ አሳ ዳሮተꬃፈ ደንዶይሳን የሱሳ በአናዉ ዳንዳእቤና።
LUK 19:4 የሱሳ በአናዉ ኮይድ እ ብያ ኦግያስ ስን ዎፅ ብድ እስ ቦባ ምꬃ ቦላ ከይስ።
LUK 19:5 የሱሲ ሄ በሳ ጋክሸ ꬎቁ ግድ በእድ፥ “ዛክዮሳ፥ ሀች ታ ነ ሶን ፔአናዉ በሲያ ግሾ ኤለ ዎꬋ” ያግስ።
LUK 19:6 እ ኤለስ ዎꬍድ ኡፋይሳን የሱሳ ሞክስ።
LUK 19:7 ሄ በሳን ደእያ አሳ ኡባይ ሄሳ በእድ፥ “ናጋራንቹዋ ሶ ገልድ ሞከታንዉ ሀኔስ” ያግድ ዙዙምዶሶና።
LUK 19:8 ግዶሽን፥ ዛክዮስ ኤቅድ ጎዳኮ፥ “ጎዳዉ፥ ሄኮ ታዉ ደእያ ሻሎ ኡባፈ ባጋ ማንቆታስ እማና። አሳፐ አይባካ ዎርዶን ባለꬃዳ ኤክዳባ ግድኮ ኦይዱ ኩሸ ዛራና” ያግስ።
LUK 19:9 የሱሲ ቃስ፥ “ሀ ኡራይ አብራሃመ ናአ ግድዳ ግሾ ሀች አቶተꬃይ ሀ ሶ ይስ።
LUK 19:10 አሳ ናአይ ይዳይ ꬋይዳይሳ ኮያናሳነ አሻናሳ” ያግስ።
LUK 19:11 አሳይ ሄሳ ስእያ ዎደ፥ የሱሲ የሩሳላመ ማታትዳ ግሾነ ፆሳ ካዎተꬃይ ሀእ ማታራ ቆንጫና ዳንዳ ግሾ ኤንታዉ ሌምሶ ኦድስ።
LUK 19:12 ሄሳ ግሾ፥ የሱሲ፥ “እስ ግታ አስ ደኤይስ ባዉ ካዎተꬅ ኤክድ ያናዉ ሀራ ቢታ ብስ።
LUK 19:13 እያዉ ኦꬅያ አይለታፐ ታማታ ፄግድ እሱዋስ እሱዋስ ታሙ ምናነ እምድ ‘ታ ስማዳ ያና ጋካናዉ ሀ ሚሽያራ ዛልእተ’ ያግስ።
LUK 19:14 “ሄ ቢታ አሳይ እያ እፅያ ግሾ፥ ሀ ኡራይ ኑ ቦላ ካዎታና መላ ኑ ኮዮኮ ያግድ አሰ እያ ጉየራ ኪትዶሶና።
LUK 19:15 “ግዶሽን፥ ሄ ኡራይ ካዎ ግድድ ባ ቢታ ስምስ። ሄ ታሙ አይለት እ እምዳ ሚሽያን አይ መላ ዛልእድ ዎꬍስዳኮ ኤራናዉ ኮይድ ኤንታና ፄግስስ።
LUK 19:16 “ኮይሮይስ ይድ፥ ‘ጎዳዉ፥ ነ ታዉ እምዳ ሚሸይ ሀራ ታማ ዎꬍስ’ ያግስ።
LUK 19:17 “እያ ጎዳይ፥ ‘ነኖ አማነትዳ አይልያዉ ሎኦ ኦꬃዳሳ። ኔኒ ጉꬃባን አማነትዳ ግሾ ነዉ ታሙ ካታማታ ቦላ ማታ እማስ’ ያግስ።
LUK 19:18 “ናምአንꬆይ ይድ፥ ‘ጎዳዉ፥ ነ ታዉ እምዳ ሚሸይ ሀራ እቻሻ ዎꬍስ’ ያግስ።
LUK 19:19 “ጎዳይ እያኮ፥ ‘ነዉካ ቃስ እቻሹ ካታማታ ቦላ ማታ እማስ’ ያግስ።
LUK 19:20 “ሄኮ ሄꬓንꬆይ ይድ፥ ‘ጎዳዉ፥ ታ ጩርቃን ፃፃዳ ናግዳ ነ ሚሽያ ሀናሹ።
LUK 19:21 አይስ ጊኮ፥ ኔኒ ነባ ግዶናባ ኤከይሳነ ነ ዘሮናባ ጫክያ ኢታ አስ ግድያ ግሾ ነዉ ያያስ’ ያግስ።
LUK 19:22 “እያ ጎዳይ ዛሪድ፥ ‘ነኖ ኢታ አይልያዉ ነ ዶናꬆ ታ ነና ፕርዳና። ታ ዎꬆናባ ኤከይሳነ ዘሮናባ ጫክያ አስ ግደይሳ ነ ኤርኮ፥
LUK 19:23 ታ ያዳ ታ ሚሽያ ዎራ ኤካና መላ ዛልእያ አሳስ አይስ እማብኪ?’
LUK 19:24 “እያ ጎዳይ ሄ በሳን ኤቅዳይሳታኮ፥ ‘እያራ ደእያ ሚሽያ ኤክድ ታማ ዎꬍስዳይሳስ እምተ’ ያግስ።
LUK 19:25 “ኤንቲ፥ ‘ጎዳዉ፥ እያዉ ካሰካ ታሙ ምናነይ ደኤስ’ ያግዶሶና።
LUK 19:26 “ጎዳይ፥ ታ ህንተዉ ኦዳይስ፤ ‘ደእያ ኡባስ ሀር ጉዠታና፥ ሽን ባይናይሳፈ ሀራይ አቶ እያዉ ደእያራካ ኤከታና።
LUK 19:27 ግዶሽን፥ ታ ኤንታ ቦላ ካዎቶና መላ ኮይዳይሳታ ሄ ታ ሞርከታ ሀ ታ ስን ኤህድ ጎራዕተ’ ግስ” ያግስ።
LUK 19:28 የሱሲ ሄሳ ኦድዳፐ ጉየ፥ ኤንታፈ ስን ሄመትድ የሩሳላመ ብስ።
LUK 19:29 ሻማሆ ዙማ ቦላ ደእያ ቤተፋገነ ብታነ ማትዳ ዎደ ባ ታማረታፐ ናምአታ ኪትድ፥
LUK 19:30 “ህንተ ስንꬃን ደእያ ጉታ ቢተ፥ ህንተ ያ ጋክያ ዎደ ኦንካ ቶጎና ቃሸትድ ደእያ ሀረ ማር ደማና። እያ ብልድ ሃ ኤክ ዪተ።
LUK 19:31 ኦንካ፥ ‘አይስ ብሌቲ?’ ግድ ኦይችኮ፥ ‘ጎዳይ እያ ኮዬስ’ ያግተ” ያግስ።
LUK 19:32 ኪተትዳይሳት ብድ እ ግዳይሳዳ ሀንን በእዶሶና።
LUK 19:33 ኤንቲ ሀረ ማራ ብልሽን ጎዳት በእድ፥ “ሀረ ማራ አይስ ብሌቲ?” ያግዶሶና።
LUK 19:34 ኤንቲ ዛሪድ፥ “ጎዳይ እያ ኮዬስ” ያግዶሶና።
LUK 19:35 ያፐ ሀረ ማራ የሱሳኮ ኤህዶሶና። ባንታ ማኡዋ ሀረ ማራ ዞኮን የግድ የሱሳ ሀረ ማራ ቦላ ኡትስዶሶና።
LUK 19:36 አሳይካ እ ብያ ኦግያ ቦላ ባንታ ማኡዋ ሂፅዶሶና።
LUK 19:37 ሻማሆ ዙማ ዱገ ዎꬍስያ ኦግያኮ ማትያ ዎደ፥ ታይቦን ኬህ ዳሮ አሳይ ኤንቲ በእዳ ማላልስያባን ኡፋይትድ ባንታ ቃላ ꬎቁ ኦꬅድ፥
LUK 19:38 “ጎዳ ሱንꬃን ያ ካዎይ አንጀትዳይሳ ሳሉዋን ሳሮይ ኡባፈ ꬎቃ ሳሉዋን ቦንቾይ ፆሳስ ግዶ” ያግድ ፆሳ ጋላትዶሶና።
LUK 19:39 አሳ ግዶፈ እስ እስ ፋርሳወት የሱሳኮ፥ “አስታማርያዉ፥ ነ ታማረታ ሀይዝተ ጋዳ ሀንቀታ” ያግዶሶና።
LUK 19:40 እ ኤንታኮ፥ “ኤንቲ ስእ ጊኮ ሹቻት ዋሳና” ያግስ።
LUK 19:41 የሱሲ የሩሳላመ ማትሸ ካታማ በእድ እያዉ ዬክስ።
LUK 19:42 “ነዉ ሳሮ ግዳናይሳ ሀች ነ ኤርዳባ ግድያኮሽን፥ ሀእ ነ አይፍያፐ ጌምስ።
LUK 19:43 ነ ሞርከት ነ ዩሹዋ ድርድ ዱማ ዱማ ኦግያራ ነና ተቅድ ኡንኤꬅያ ዎደይ ያና።
LUK 19:44 ነናነ ነ ድርሳ ጋርሳን ደእያ ነ ናይታ ꬋይሳና። እስ እስ ሹቹ ደንꬅድ ላላና፥ አይስ ጊኮ ፆሳይ ነና አሻናዉ ያ ዎድያ ኤራባካ” ያግድ እዉ ዬክስ።
LUK 19:45 ሄሳፈ ጉየ፥ የሱሲ ፆሳ ኬꬅ ገልድ ዛልኤይሳታ ያፐ ጎድስ።
LUK 19:46 ቃስ፥ “ ‘ታ ኬꬃይ ፆሳ ዎስያ ኬꬅ ግዳና’ ግድ ፃፈትስ፥ ሽን ህንተ ታ ኬꬃ ፓንጋታ ጎንጎሎ ኦꬅደታ” ያግስ።
LUK 19:47 ጋላስ ጋላስ ፆሳ ኬꬃን ታማርሴስ። ካህነታ ሀላቃት፥ ህገ አስታማረትነ ደርያ ጭማት እያ ዎꬋናዉ ኦገ ኮዮሶና።
LUK 19:48 ግዶሽን፥ አሳ ኡባይ እያ ትምርትያ ባንታ ዎዛና የግድ ስእያ ግሾ፥ ኤንታዉ ኦꬃናባይ ꬋይስ።
LUK 20:1 እስ ጋላስ የሱሲ ፆሳ ኬꬃን አሳ ታማርስሽንነ ዎንገላ ማርካትሽን፥ ካህነ ሀላቃት፥ ህገ አስታማረትነ ደርያ ጭማት እስፈ እያኮ ይድ፥
LUK 20:2 “ኔኒ ሀይሳታ አይብ ማታን ኦꬅያኮ ኑስ ኦዳ። ሀ ማታ ነዉ እምዳይ ኦኔ?” ያግድ ኦይችዶሶና።
LUK 20:3 እ ኤንታኮ፥ “ታካ ህንተና እስባ ኦይቻና፥ አነ ታዉ ዛርተ።
LUK 20:4 ፃማቅያ ዮሃንሳ ፅንቃተይ ፆሳፈየ አሳፔ?” ያግስ።
LUK 20:5 ኤንቲ ዎል ግዶን ያግድ ዞረትዶሶና፦ “ፆሳፈ ጊኮ ያትን፥ አይስ አማንበከቲ?” ያጋና።
LUK 20:6 “አሳፐ ጊኮ፥ አሳ ኡባይ ዮሃንስ ናበ ግደይሳ አማንያ ግሾ ኑና ሹቻን ጫዳና።”
LUK 20:7 ያንያ ግሾ፥ “አዉፐኮ ኑ ኤሮኮ” ያግድ ዛርዶሶና።
LUK 20:8 የሱሲ ዛሪድ፥ “ህዛ፥ ታካ አይ ማታን ሀይሳታ ኦꬅያኮ ህንተዉ ኦድከ” ያግስ።
LUK 20:9 ሄሳፈ ጉየ፥ የሱሲ ያግድ ሀ ሌምሱዋ አሳስ ኦድስ፦ “እስ አስ ዎይነ ቶክስ። ጎሻንቾታስ ከራ እምድ ዳሮ ዎደ ጋምእድ ያናዉ ሀራ ቢታ ብስ።
LUK 20:10 ዎይነ አይፍያ ማፅያ ዎደይ ጋክን ዎይነ አይፍያፐ እያዉ የዳና መላ ጎሻንቾታኮ ባ አይልያ ኪትስ። ሽን ጎሻንቾት ሄ አይልያ ኦይክድ ዋꬍድ መላ ኩሸ የድዶሶና።
LUK 20:11 ካልድካ ሀራ አይልያ ኪትስ። ቃስ ጎሻንቾት እያ ዋꬍድ፥ ካዉሽድ መላ ኩሸ የድዶሶና።
LUK 20:12 ሀእካ ዛሪድ ሄꬓንꬆ አይልያ ኪትስ። ጎሻንቾት እያካ ማዱንፅስድ ዎይነ ጋድያ ግዶፈ ጋፃ ከስድ የግዶሶና።
LUK 20:13 “ዎይነ ጋድያ ጎዳይ፥ ‘ያትን ታ አይ ኦꬆ? አነ ቃስ ታ ዶስያ ታ ናአ የዳና፤ ኦን ኤር ኤንቲ እያ ቦንቾና አጎኮና’ ያግስ።
LUK 20:14 “ሽን ጎሻንቾት ኡራ ናአ በእዳ ዎደ፥ ‘ሀይስ እያ ላታናይሳ፥ ሃ ዪተ እያ ዎꬋና፥ ያትኮ ላታይ ኑስ ግዳና’ ያግድ ዞረትዶሶና።
LUK 20:15 ዎይነ ጋድያ ግዶፈ ጋፃ ከስድ ዎꬍዶሶና። ያትን፥ ዎይነ ጋድያ ጎዳይ ሄ አሳታ ዋታኔ?
LUK 20:16 ይድ ሄ ጎሻንቾታ ꬋይሳና፥ ዎይነ ጋድያ ሀራ አሳታስ እማና። አሳይ ሄሳ ስእዳ ዎደ ‘ሽንቻለ ሄሳ መላባ ጋꬆፎ’ ያግዶሶና።
LUK 20:17 “የሱሲ ኤንታ ጫድ ፄልድ፥ “ ‘ያትን፥ ግምበ ኬፅያ አሳት ቦርዳ ሹቻይ፥ ኬꬃስ ማላነ ምኖተꬅ እምያ ኡባፈ አꬍያ ሹች ግድስ’ ጌተትድ ፃፈትዳይሳ ብርሸꬃይ አይቤ?
LUK 20:18 ሄ ሹቻ ቦላ ኩንድያ ኡባይ ቆፀታና፥ ሹቻይ እያ ቦላ ዎꬍያ ኡባይ ሊቃና” ያግስ።
LUK 20:19 ህገ አስታማረትነ ካህነ ሀላቃት ሀ ሌምሶይ ኦደትዳይ ኤንታ ቦላ ግደይሳ ኤርድ ሄ ዎደ እያ ኦይካናዉ ኮይዶሶና፥ ሽን አሳስ ባብዶሶና።
LUK 20:20 ሄሳ ግሾ፥ የሱሳ ደርያ ሃርያ ሮመ ካዋ ማታስ አꬅድ እማናዉ ኮይድ እያ ዶናፐ ባላ ቃላ ናጎሶና። ሄሳ ፖልሳናዉ ፅሎ ዳንድ ጭምያ አሳታ እያኮ ኪትዶሶና።
LUK 20:21 ኪተትድ ብዳ አሳት፥ “አስታማርያዉ፥ ኔኒ ኦደይስነ ታማርሰይስ ልከ ግደይሳ፥ ቃስ ፆሳ ኦግያ ቱማተꬃን ታማርሰይሳነ ኦናካ ሻኮናይሳ ኑ ኤሮስ።
LUK 20:22 ሀኖሽን፥ ሮመ ካዋስ ጊራ ጊራናዉ በሲ በሰኔ?” ያግድ እያ ኦይችዶሶና።
LUK 20:23 ሽን እ ኤንታ ዎዛና ኢታተꬃ ኤርዳ ግሾ፥
LUK 20:24 “አነ ታና እስ ሳንትመ በስተ፥ እያ ቦላ ደእያ ምስለይነ ሱንꬃይ ኦደባዬ?” ያግስ። ኤንቲ ዛሪድ፥ “ሮመ ካዋ ቄሳረይሳ” ያግዶሶና።
LUK 20:25 እ ዛሪድ፥ “ያትኮ፥ ቄሳረባ ቄሳረስ፥ ፆሳባ ፆሳስ እምተ” ያግስ።
LUK 20:26 ሄሳ ግሾ፥ እ ዛርዳ ዛሩዋን አሳ ስንꬃን ባላ ደማናዉ ዳንዳእቦኮና። እያ ዛሩዋን ማላለትድ ስእ ግዶሶና።
LUK 20:27 ሀይቆፐ ደንዶይ ባዋ ግያ ሳዱቃወታፐ እሶት እሶት የሱሳኮ ይድ፥
LUK 20:28 “አስታማርያዉ፥ እስ አስ ማቾ ኤክድ ናአ የሎና ሀይቅኮ፥ እያ እሻይ ሄ ማጫስዉ ኤክድ ናይታ የልድ ባ እሻስ ኮቸ አሻና መላ ሙሰይ ፃፍስ።
LUK 20:29 ሄኮ ላፑን እሻት ደኦሶና። ኮይሮይስ ማቾ ኤክድ ናአ የሎና ሀይቅስ።
LUK 20:30 ናምአንꬆይ እዮ ኤክድ ናአ የሎና ሀይቅስ።
LUK 20:31 ሄꬓንꬆይካ ሄሳꬆ ሀንስ። ላፑናት ኡባይ ሄሳዳ ሀንድ እዮ ኤክዶሶና፥ ሽን ናአ የሎና ሀይቅዶሶና።
LUK 20:32 ዉርሰꬃን ማጫስያ ሀይቃሱ።
LUK 20:33 ህዛ፥ ላፑን አደይ እዮ ኤክዳ ግሾ ሀይቆፐ ደንድያ ዎደ እያ ኦደ ማቾ ግዳኔ?” ያግድ ኦይችዶሶና።
LUK 20:34 የሱሲ ዛሪድ፥ “አሳይ ሀ ዎድያን ኤኮሶናነ ገሎሶና።
LUK 20:35 ሽን ሀይቆፐ ደንድድ ያና አላምያን ዳናዉ በሰይሳት ኤኮኮናነ ገሎኮና።
LUK 20:36 ኤንቲ ኪታንቾ መላ ግድያ ግሾ ስንꬃፈ ሀይቆኮና። ሀይቆፐ ደንድዳ ግሾ ኤንቲ ፆሳ ናይታ።
LUK 20:37 ሙሰይ ጎዳ፥ ‘አብራሃመ ጎዳ፥ ይሳቃ ጎዳ፥ ያይቆባ ጎዳ’ ግድ ቱሽያ ግዶን ፁገትያ ታማ ታርክያ ፃፍዳይሳን ሀይቅዳ አሳይ ደንደይሳ በሴስ።
LUK 20:38 ኡባይ እያዉ ደኦን ደኤይሳታ ግድያ ግሾ እ ደኦን ደኤይሳታ ጎዳፐ አትሽን፥ ሀይቅዳይሳታ ጎዳ ግደና” ያግድ ዛርስ።
LUK 20:39 ህገ አስታማረታፐ እሶት እሶት፥ “አስታማርያዉ፥ ሎኦባ ኦዳዳሳ” ያግዶሶና።
LUK 20:40 ሄሳፈ ጉየ፥ ሀራ ኦይሾ ኦይቻናዉ ያይዶሶና።
LUK 20:41 እያፐ ካልድ የሱሲ ኤንታኮ፥ “አሳይ ክርስቶሳ ዋትድ ዳዊታ ናአ ያጎና?
LUK 20:42 አይስ ጊኮ፥ ዳዊቲ ባ ሁጰን ባ ማፃፋን፥ “ ‘ፆሳይ ታ ጎዳኮ “ታ ነ ሞርከታ ነ ቶሆይ የꬍያሶ ኦꬃና ጋካናዉ ታፐ ኡሻቻ ባጋን ኡታ” ግስ’ ያግስ።
LUK 20:44 “ህዛ፥ ዳዊቲ ክርስቶሳ፥ ‘ጎዳ ግድ ፄግሸ እያዉ ናአ ዋንድ ግዲ?’ ” ያግስ።
LUK 20:45 ደረይ ኡባይ ስእሽን ባ ታማረታኮ፥
LUK 20:46 “አዱሳ ማኦ ማእድ ዩሸ ዶሰይሳታፐ፥ ግያን ቦንቾ ሳሮꬆ፥ አይሁደ ዎሳ ኬꬃን ቦንቾ ኦይደ፥ ሞከትያ ሶንካ ቦንቾ በሲ ኮይያ ህገ አስታማረታፐ ናገትተ።
LUK 20:47 ኤንቲ አምኤታ ኬꬃ ካሎዮሶና፥ ፅሎ አስ ዳንድ ዎሳ አዱሶሶና። ሄሳት ኡባፈ አꬍያ ኢታ ፕርዳ ኤካና” ያግስ።
LUK 21:1 ዱረ አሳይ ፆሳ ኬꬃን ሙፃታ ሳፅንያን የግሽን የሱሲ ꬎቁ ግድ አሳ በእስ።
LUK 21:2 ቃስ እስ ማንቆ አምእያ ናምኡ ስክና የግሽን በእድ፥
LUK 21:3 “ታ ህንተዉ ቱማ ኦዳይስ፤ ሀ ማንቆ አምእያ ኡባፈ አꬃዳ እማሱ።
LUK 21:4 አይስ ጊኮ፥ ሀ አሳ ኡባይ ባንታዉ ደእያባፐ እምዶሶና፥ ሽን እያ ባ ፓጫፐ፥ ባዉ ደእያ አቁዋ ኡባ እማሱ” ያግስ።
LUK 21:5 የሱሳ ታማረታፐ እሶት እሶት ፆሳ ኬꬃይ ዳሮ ሎእያ ሹቻንነ አሳይ ፆሳስ እምዳ እሞታን ሎእዳይሳ ኦደቶሶና።
LUK 21:6 ሽን የሱሲ፥ “ሀ ህንተ በእያባይ ኡባይ ላለቶና፥ ሹች ሹቻ ቦላ ግምበትዳ መላ አቶና ዎደይ ያና” ያግስ።
LUK 21:7 ኤንትካ፥ “አስታማርያዉ፥ ሀ ኡባይ ሀናናይ አዉዴ? ቃስ ሀይስ ሀናናይሳስ ማላታይ አይቤ?” ያግድ ኦይችዶሶና።
LUK 21:8 የሱሲ ያግድ ኤንታዉ ዛሮ እሚስ፦ “ባለቶና መላ ናገትተ። ዳሮት፥ ‘ታኒ ክርስቶሳ፥ ዎደይ ማታትስ’ ያግሸ ታ ሱንꬃን ያና፥ ሽን ህንተ ኤንታ ካሎፍተ።
LUK 21:9 ህንተ ኦላባነ አሳ ጌላተꬃ ስእያ ዎደ ዳጋሞፍተ። ሄስ ስንꬃትድ ሀናናይስ አቶናባ ግድያ ግሾ ዎድያ ዉርሰꬃይ ኤለስድ ዬና” ያግስ።
LUK 21:10 ካልድካ፥ “ደረይ ደርያ ቦላ፥ ካዎተꬃይ ካዎተꬃ ቦላ ደንዳና።
LUK 21:11 ግታ ቢታ ቃፆይ ሀናና፥ ኮሻይነ ጋዶይ ዱማ ዱማ በሳን ዳራና፥ ያሽያባይነ ግታ ማላታት ሳሎፐ ቆንጫና።
LUK 21:12 ሽን ሀ ኡባይ ሀናናፐ ስን ታ ሱንꬃ ግሾ ግድ አሳይ ህንተና ጎዳናነ ኦይካና። አይሁደ ዎሳ ኬꬃንነ ቃሾ ኬꬃን ህንተና የጋና። ካዎታ ስንነ ደርያ ሃረይሳታ ስን ህንተና ኤፋና።
LUK 21:13 ሄስካ ታባ ህንተ ኤንታዉ ማርካታናዉ ሎኦ ኦገ ግዳና።
LUK 21:14 ሄሳ ግሾ፥ ህንተ ኦይሸትያ ዎደ ዎይግድ ዛሮ እማነ ግድ ህንተ ዎዛናን ኡንኤቶና መላ አኬክተ።
LUK 21:15 አይስ ጊኮ፥ ህንተ ሞርከት ህንተራ ኤቀታናዉነ ፓላማናዉ ዳንዳኦና ዶናነ ጭንጫተꬅ ታ ህንተዉ እማና።
LUK 21:16 ሀር አቶሽን፥ ህንተና የልዳይሳት፥ ህንተ እሻት፥ ህንተ ዳቦትነ ላገት ህንተና አꬅድ እማና። ህንተ ግዶፈ እሶታ እሶታ ዎꬋና።
LUK 21:17 ታ ሱንꬃ ግሾ አሳ ኡባ ስንꬃን ህንተ እፀትዳይሳታ ግዳና።
LUK 21:18 ሽን ሀር አቶሽን፥ ህንተ ብናናፐ እሶይካ ꬋየና።
LUK 21:19 ፖሎ ዳንዳአን ህንተ፥ ህንተ ሸምፑዋ አሻና።”
LUK 21:20 “የሩሳላመ ካታማይ ዎታዳረን ድረትድ ኡትዳሽን ህንተ በእኮ እያዉ ꬋዮይ ማታትዳይሳ ኤርተ።
LUK 21:21 ሄ ዎደ ይሁዳን ደእያ ኡባይ ደርያኮ ባቃቶ፥ ካታማን ደኤይሳት ያፐ ከዮ፥ ጋፃርያን ደኤይሳት ካታማ ገሎፖ።
LUK 21:22 አይስ ጊኮ፥ ሀ ፃፈትዳባይ ፖለታና መላ ሄስ ፆሳይ ኩሸ ዛርያ ዎደ።
LUK 21:23 ሳአ ቦላ ግታ መቶይ ያና፥ ሄሳንካ አሳ ቦላ ፆሳ ሀንቆይ ያና። ሄሳ ግሾ፥ ቃንꬃትዳይሳታነ ꬋንይሳታ አየ!
LUK 21:24 ኤንቲ ማሻን ሀይቃና፥ አሳ ኡባይ አላጋ ቢታ ድኤታና። አይሁደ ግዶና አሳ ዎደይ ፖለታና ጋካናዉ የሩሳላመይ ኤንታናን የትዳይሳ ግዳና።
LUK 21:25 “አዋን፥ አጌናንነ፥ ፆልንቶታ ቦላ ማላታት ሀንድ በንታና። አባፈነ ዙልያ ደሹዋፐ ደንዶይሳን ቢታን ደእያ አሳይ ኡንኤታናነ ያርካና።
LUK 21:26 ሳሉዋ ዎልቃት ቡቀታና ግሾ አሳይ ያሻንነ ቢታ ቦላ አይብ ሀናንደሻ ግድ ናጎን ባንታና ባለታና።
LUK 21:27 ሄ ዎደ አሳ ናአይ ዎልቃንነ ግታ ቦንቾን ሻራራ ይሽን ኤንቲ በአና።
LUK 21:28 ህንተ አቶተꬃይ ማታትዳ ግሾ ሀ ሀኖት ፖለተꬅ ኦይክያ ዎደ ጊገት ኤቅተ፥ ህንተ ሁጵያ ꬎቁ ኦꬅድ ፄልተ” ያግስ።
LUK 21:29 ካልድካ፥ ሀይሳዳ ግድ ሌምሶ ኦድስ፤ “ባላሰ ምꬅነ ሀራ ምꬃታ ኡባ በእተ።
LUK 21:30 ኤንቲ አጭያ ዎደ ቶርቸይ ማታትዳይሳ ህንተ ኤሬታ።
LUK 21:31 ሄሳዳ ሀ ሀኖት ፖለትሽን ህንተ በእኮ ፆሳ ካዎተꬃይ ማታትዳይሳ ኤርተ።
LUK 21:32 “ታ ህንተዉ ቱማ ኦዳይስ፤ ሀ ኡባይ ፖለታና ጋካናዉ ሀ የለተꬃይ አና።
LUK 21:33 ሳሎይነ ሳእ አꬋና፥ ሽን ታ ቃላይ አና።
LUK 21:34 “ህዛ፥ ꬋስ ባይና ደኦን፥ ኡሻ ዳሮንነ ዱሳባስ ኡንኤተꬃን ህንተ ዎዛናይ ኦይከቶና መላነ ሄ ቃማይ አኬኮና ፅሄዳ ህንተ ቦላ ጋኮና መላ ናገትተ።
LUK 21:35 ሄ ቃማይ ቢታ ኩመꬃን ደእያ ኡባ ቦላ ጋካና።
LUK 21:36 ሄሳ ግሾ፥ ያ ኢታፐ አታናዉነ አሳ ናአ ስንꬃን ኤቃናዉ ዳንዳአና መላ ኡባ ዎደ ምንድ ዎስተ” ያግስ።
LUK 21:37 ጋላስ ጋላስ የሱሲ ፆሳ ኬꬃን ታማርስሸ፥ ቃማ ቃማ ሻማሆ ዙማ ቦላ ከይድ አቄስ።
LUK 21:38 አሳ ኡባይ እያ ስአናዉ ዎንታ ጉራ እያኮ ፆሳ ኬꬅ ዮሶና።
LUK 22:1 ሄ ዎደ “ፓስካ” ግያ ኡይꬃ ባለይ ማትስ።
LUK 22:2 ካህነ ሀላቃትነ ህገ አስታማረት አሰ ያይያ ግሾ፥ ዋትድ የሱሳ ባንታ ግዶፈ ꬋይሳነኮ ኦገ ኮዮሶና።
LUK 22:3 ፃላሄይ ታማነ ናምአታፐ እሱዋ ግድዳ አስቆሮታ ይሁዳ ጌተተይሳ ግዶ ገልስ።
LUK 22:4 ይሁድ ካህነ ሀላቃታኮነ ፆሳ ኬꬃ ናገይሳታ ሀላቃታኮ ብድ የሱሳ ዋት አꬅድ እማነኮ ኤንታራ ማቀትስ።
LUK 22:5 ኤንትካ ሄሳን ኡፋይትድ ሚሸ እማናዉ እያራ ዞረትዶሶና።
LUK 22:6 እካ ዞረተꬃን ጊግስ። አꬅ ኤንታዉ እማናዉ አስ ባይና እንጀ ዎደ ናግሸ ደኤስ።
LUK 22:7 ሄሳፈ ጉየ፥ ፓስካ ዶርሳይ ሹከትያ ኡይꬃ ባለይ ጋክስ።
LUK 22:8 የሱሲ፥ “ፓስካ ካሁዋ ማና መላ ብድ ኑስ ጊግስተ” ያግድ ጰፅሮሳነ ዮሃንሳ ኪትስ።
LUK 22:9 ኤንቲ፥ “ኑ አዉን ጊግሳና መላ ነ ኮያይ” ያግድ ኦይችዶሶና።
LUK 22:10 እ ኤንታኮ፥ “ሄኮ ህንተ ካታማ ገልሽን ሃꬃ ኦቶ ቶክዳ አደይ ህንተራ ጋሄታና። እ ብድ ገልያ ኬꬃ እያ ካልድ ገልተ።
LUK 22:11 አስታማረይ ጎዳኮ፥ ‘ታ ታ ታማረታራ ዎላ ፓስካ ካሁዋ ማናዉ እማꬃ ኬꬅ አዉኔ? ያግስ’ ጊተ።
LUK 22:12 እ ፖቅያ ቦላ ሂፀትድ ጊግድ ደእያ ዳልጋ ክፍለ ህንተና በሳና፥ ያን ጊግስተ” ያግስ።
LUK 22:13 ኤንቲ ብድ የሱሲ ግዳይሳዳ ሀንን ደምዶሶና። ፓስካ ባኣለ ካሁዋ ያን ጊግስዶሶና።
LUK 22:14 ሳተይካ ጋክዳ ዎደ የሱሲ ሀዋረታራ ዎላ ካሁዋ ቦላ ኡትስ።
LUK 22:15 እ ኤንታኮ፥ “ታ ዋየ ኤካናፐ ስን ሀ ካሁዋ ህንተራ ማናዉ ዳሮ አሞታስ።
LUK 22:16 ህዛ፥ ስእተ! ፆሳ ካዎተꬃን ሀይሳስ ብርሸꬃይ ፖለታና ጋካናዉ ሀ ካሁዋ ዛራዳ ሚከ” ያግስ።
LUK 22:17 ኡሻ ኤክድ ጋላት ስሚድ፥ “ሄእተ ሀይሳ ህንተ ግዶን ሻከትተ።
LUK 22:18 ስእተ! ፆሳ ካዎተꬃይ ያና ጋካናዉ ሀችፈ ዶማዳ ሀ ዎይነ ኡሻፈ ዛራዳ ኡይከ” ያግስ።
LUK 22:19 ኡይꬃ ኤክድ፥ ጋላት ስሚድ፥ “ሀይስ ህንተዉ እመትያ ታ አሹዋ። ሀይሳ ኦꬅሸ ታና ቆፕተ” ያግድ መንꬅድ ኤንታዉ እሚስ።
LUK 22:20 ሄሳዳካ፥ ካሁዋፐ ጉየ፥ ኡሻ ኤክድ፥ “ሀ ኡሻይ ህንተዉ ጉክዳ ታ ሱꬃን ግድያ ኦራꬃ ጫቁዋ።
LUK 22:21 ግዶሽን፥ ታና አꬅድ እማና ኡራ ኩሸይ ታራ እስፈ ጋይታና።
LUK 22:22 አሳ ናአይ እያዉ ጌተቶይሳ መላ ሀይቃናዉ ደኤስ፥ ሽን እያ አꬅድ እምያ ኡራ አየ!” ያግስ።
LUK 22:23 ኤንቲ ባንታ ግዶን፥ “ሀይሳ ኦን ኦꬃኔ” ግድ ዎል ኦይችዶሶና።
LUK 22:24 ቃስ ኤንታ ግዶን ግታ ግዳናይ ኦነ ግያ ፓላም መትስ።
LUK 22:25 የሱሲ ኤንታኮ፥ “ደርያ ካዎት ባንታ አሳ ዎልቃን ሃሮሶና፤ ባንታ ደርያ ቦላ ጎዳተይሳታስካ ባንታና፥ ‘ሎኦ ኦይሳታ’ ያግድ ፄጎሶና።
LUK 22:26 ሽን ህንተ ግዶን ሄሳ መላ ግዶፖ። ህንተ ግዶን ባይራተይ ካሎዳ ሀኖ፤ ካለይስ ካለይሳዳ ሀኖ።
LUK 22:27 ሀኖሽን፥ ሞከይሳፈነ ሞከተይሳፈ አዉስ አꬊ? ሞከተይሳ ግደነዬ? ሽን ታኒ ህንተ ግዶን ሞከይሳ መላ።
LUK 22:28 “ህንተካ ታ መቱዋን ታፐ ሻከቶና ታራ ምንድ ኤቅዳይሳታ።
LUK 22:29 ህንተ ታ ጋይታፐ ማና መላ፥ ኡያና መላነ አራታታ ቦላ ኡትድ ታማነ ናምኡ እስራኤለ ሼሻታ ቦላ ፕርዳና መላ ታ አዋይ ታና ሹምዳይሳዳ ታካ ህንተና ታ ካዎተꬃን ሹማና” ያግስ።
LUK 22:31 ካልድካ የሱሲ፥ “ስሞና፥ ስሞና፥ ፃላሄይ ህንተና ግስተዳ ሀርቃናዉ ዎስስ።
LUK 22:32 ሽን ታኒ ነ አማኖይ ꬋዮና መላ ነዉ ጋናታስ። ነካ ስምዳ ዎደ ነ እሻታ ምንꬃ” ያግስ።
LUK 22:33 ስሞን፥ “ጎዳዉ፥ ታኒ ኔራ ቃሸታናዉነ ሀይቃናዉ ጊገታስ” ያግስ።
LUK 22:34 የሱሲ ጰፅሮሳኮ፥ “ታ ነዉ ኦዳይስ፤ ሀች ኩቶይ ዋሳናፐ ስን ነ ታና ሄꬑ ቶሆ ካዳና” ያግስ።
LUK 22:35 ካልድካ፥ የሱሲ ኤንታኮ፥ “ታኒ ህንተና ኮሮጆይ፥ ካርፂትነ ጫም ባይና ኪትዳ ዎደ ህንተዉ ፓጭዳባይ ደኢ?” ያግድ ኦይችስ። ኤንቲ ዛሪድ፥ “አይኮይካ ፓጭቤና” ያግዶሶና።
LUK 22:36 እ ኤንታኮ፥ “ሀእ ኮሮጆይነ ካርፂት ደኤይ ኦይኮ፤ ማሽ ባይናይ ባ አፍላ ባይዝድ ማሻ ሻሞ።
LUK 22:37 ሃ ስእተ! ‘ጌላታራ ታይበትስ’ ጌተትድ ፃፈትዳይስ ታናን ፖለታናዉ በሴስ። ኤ፥ ታ ግሾ ፃፈትዳባይ ፖለተይስ ቱማትስ” ያግስ።
LUK 22:38 እያ ታማረት፥ “ጎዳዉ ሀይሳን ናምኡ ማሻት ደኦሶና” ያግዶሶና። እ፥ “ግዳና” ያግስ።
LUK 22:39 የሱሲ ካሰ ሜዘትዳይሳዳ ደንድድ ሻማሆ ዙማ ቦላ ከይስ። እያ ታማረት እያ ካልዶሶና።
LUK 22:40 ሄ በሳ ጋክዳ ዎደ፥ “ፓጨን ገሎና መላ ዎስተ” ያግስ።
LUK 22:41 ኤንታፈ ሹች ሆልን ጋክያ ሶ መላ ሃክድ ጉልባትድ ዎስስ።
LUK 22:42 “ታ አዋዉ፥ ነ ሸነ ግድኮ ሀ መቱዋ ታፐ አꬃ። ሽን ታ ሸነ ግዶፖ ነ ሸነይ ሀኖ” ያግድ ዎስስ።
LUK 22:43 ኪታንቾይ ሳሎፐ ቆንጭድ ምንꬅስ።
LUK 22:44 ዳሮ ኡንኤትድ ምንድ ዎሴስ። እያ ጫዋይካ ሱꬅ ፆክያዳ ሳአን ፆኬስ።
LUK 22:45 የሱሲ ዎሳ ዉርስድ ባ ታማረታኮ ይስ። ኤንቲ፥ አዛኖፐ ደንዶይሳን ዳቡርድ ꬍስክዳሽን ደምድ፥
LUK 22:46 “አይስ ꬍስከቲ? ፓጨን ገሎና መላ ደንድድ ዎስተ” ያግስ።
LUK 22:47 እ ቡሮ ኦዳ ቦላ ደእሽን ዳሮ አሳት ይዶሶና። ታማነ ናምአታፐ እሶይ ይሁዳ ጌተተይስ ኤንታና ካለꬄስ። እ የሱሳ ዬራናዉ ማት ሺቅስ።
LUK 22:48 ሽን የሱሲ፥ “ይሁዳ፥ አሳ ናኣ ዬራዳ አꬃ እማኔ?” ያግስ።
LUK 22:49 የሱሳ ታማረት ሄ ሀኑዋ በእድ፥ “ጎዳዉ ማሻን ሾጭኖ?” ያግዶሶና።
LUK 22:50 ኤንታ ግዶፈ እሶይ ካህነ ሀላቃ ኦሳንቹዋ ሾጭድ ኡሻቻ ሀይꬃ ቃንፅድ የግስ።
LUK 22:51 ሽን የሱሲ፥ “አጋ! ድጎፍተ” ያግስ። ኡራ ሀይꬃ ቦችድ ፓꬅስ።
LUK 22:52 ሄሳፈ ጉየ፥ የሱሲ ባና ኦይካናዉ ይዳ ካህነ ሀላቃታኮ፥ ፆሳ ኬꬃ ናገይሳታ ሹማታኮነ ጭማታኮ፥ “ፓኖ ኦይክያ አሳዳ ማሸነ ፃምአ ኦይክድ ይደቲ?
LUK 22:53 ኡባ ጋላስ ፆሳ ኬꬃን ታ ህንተራ ደእያ ዎደ ታ ቦላ ኩሸ ዎꬅቤከታ። ሽን ሀይስ ꬉማ ካዎተꬃይ ሃርዳ ዎደነ ህንተ ዎደ” ያግስ።
LUK 22:54 ሄሳፈ ጉየ፥ የሱሳ ኦይክድ ካህነ ሀላቃ ዛባ ኤፍዶሶና። ጰፅሮስ ሃሆን የሱሳ ካሌስ።
LUK 22:55 አሳት ካህነ ሀላቃ ዛባን ታማ ኤꬅድ ዎላ ኡትዳሽን ጰፅሮስ ኤንታራ እስፈ ኡትስ።
LUK 22:56 እስ ጋꬍንዲያ ጰፅሮስ ታማ ማታን ኡትዳይሳ ጫዳ ፄላዳ፥ “ሀ ኡራይ እያራ ደኤስ” ያጋሱ።
LUK 22:57 ሽን ጰፅሮስ፥ “ሀ ማጫሰተ ታ ሄ ኡራ ኤርከ” ያግድ ካድስ።
LUK 22:58 ጉꬃ ዎደፐ ጉየ እስ ሀራ አደይ እያ በእድ፥ “ነካ ኤንታፈ እሱዋ” ያግስ። ሽን ጰፅሮስ፥ “ሀ አድያዉ ታና ግድከ” ያግስ።
LUK 22:59 እስ ሳተ መላ ጋምእዳፐ ጉየ እስ ሀራ አደይ ትልስድ፥ “ሀ ኡራይ ጋልላፐ ግድያ ግሾ ስይ ባይና እያራ ደኤስ” ያግስ።
LUK 22:60 ሽን ጰፅሮስ፥ “ሀ አድያዉ፥ ነ ገይሳ ታ ኤርከ” ያግስ። እ ሄ ኦዳ ኦንጎና ደእሽን ኩቶይ ዋስስ።
LUK 22:61 ጎዳይ ጉየ ስሚድ ጰፅሮሳ ፄልስ። ጰፅሮስ፥ “ሀች ኩቶይ ዋሳናፐ ስን ነ ታና ሄꬑ ቶሆ ካዳና” ያግድ፥ ጎዳይ ኦድዳ ቃላ አኬክስ።
LUK 22:62 ጰፅሮስ ካረ ከይድ ዳሮ ኮኮርድ ዬክስ።
LUK 22:63 የሱሳ ናግያ አሳት እያ ለቅሶነ ደሸꬅ ኦይክዶሶና።
LUK 22:64 እያ አይፍያ ጎዝድ “አነ ትንብተ ኦዳ፤ ነና ደችዳይ ኦኔ?” ያግድ ኦይቾሶና።
LUK 22:65 ሀራ ዳሮ ጫሸ ጫይድ ካዉሾሶና።
LUK 22:66 ሳእ ዎንትያ ዎደ አይሁደ ቢታ ጭማት፥ ካህነ ሀላቃትነ ህገ አስታማረት ሺቅድ፥ የሱሳ ባንታ ስን ሺሽዶሶና።
LUK 22:67 ኤንቲ፥ “ኔኒ ክርስቶሴ? አነ ኑስ ኦዳ?” ያግድ ኦይችዶሶና። የሱሲ፥ “ታ ኦድያኮ አማነከታ።
LUK 22:68 ታ ኦይችያኮ ዛረከታ።
LUK 22:69 ሽን አሳ ናአይ ሀይሳፈ ገደ ባጋን ዎልቃማ ፆሳ ኡሻቻ ባጋን ኡታና” ያግስ።
LUK 22:70 ሄ ዎደ ኡባይ፥ “ያትን፥ ኔኒ ፆሳ ናኤ?” ያግዶሶና። እ፥ “ታ ፆሳ ናአ ግደይሳ ህንተ ግደታ” ያግስ።
LUK 22:71 ኤንቲ፥ “ህዛ፥ ሀራ ማርካ አይ ኮሺ? እ ባ እንፃርሳን ኦድሽን ኑ ስእዳ” ያግዶሶና።
LUK 23:1 ሄ በሳን ሺቅዳ ሻንጎት ኡባይ ደንድድ የሱሳ ጵላፆሳኮ ኤፍዶሶና።
LUK 23:2 “ሀ ኡራይ ኑ አሳ ባለꬅሽን፥ ካዋስ ጊራ ጊሮና መላ ድግሽንነ፥ ቃስ ‘ታኒ ክርስቶሳ ህንተ ካዋ’ ያግሽን ደምዳ” ያግድ ሞትዶሶና።
LUK 23:3 ጵላፆስ የሱሳ፥ “ኔኒ አይሁደታ ካዎ?” ያግድ ኦይችስ። የሱሲ፥ “ኤ፥ ነ ግዳይሳ መላ” ያግስ።
LUK 23:4 ጵላፆስ ካህነ ሀላቃታኮነ አሳኮ፥ “ሀ ኡራ ቦላ ታኒ እስ ባላካ ደማብከ” ያግስ።
LUK 23:5 ሽን ኤንቲ፥ “ሀ ኡራይ ጋልላፐ ዶምድ ሀይሳ ጋካናዉ ይሁዳ ኩመꬃ ኢታባስ ደንꬄስ” ያግድ ምንꬅ ኦድዶሶና።
LUK 23:6 ጵላፆስ ሄሳ ስእዳ ዎደ የሱሲ ጋልላ አሴኮ ኤራናዉ ኮይድ እያ ኦይችስ።
LUK 23:7 የሱሲ ሄሮዲሳ ቢታፈ ይዳ አስ ግደይሳ ጵላፆስ ኤርዳ ዎደ ሄሮዲስ ሄ ዎደ የሩሳላመን ደእያ ግሾ እያኮ የድስ።
LUK 23:8 ሄሮዲስ የሱሳ በአናዉ ዳሮ ዎደፐ ኮይሸ ደእያ ግሾ፥ እያ በእዳ ዎደ ዳሮ ኡፋይትስ። አይስ ጊኮ፥ እያባ ስእዳ ግሾ ማላልስያባ ኦꬅን በአናዉ አሞትሸ ደኤስ።
LUK 23:9 ሄሮዲስ የሱሳ ዳሮ ኦይሾታ ኦይችስ፥ ሽን እ አይኮካ ዛርቤና።
LUK 23:10 ካህነታ ሀላቃትነ ህገ አስታማረት ያን ኤቅድ ምንꬅድ እያ ሞቶሶና።
LUK 23:11 ሄሮዲሳራነ እያ ዎታዳረታራ የሱሳ ካꬍዶሶናነ ለቅስዶሶና። ቦንቾ አፍላ ማይዝድ ጵላፆሳኮ ዛሪድ የድዶሶና።
LUK 23:12 ሄሮዲሳራነ ጵላፆሳራ ካሰ ሞርከሽን ሄ ጋላስ ዎላ ጊግዶሶና።
LUK 23:13 ጵላፆስ ካህነ ሀላቃታ፥ አሳ ሃረይሳታነ አሳ ፄግድ፥
LUK 23:14 “ ‘ሀ ኡራይ አሳ ጌላተꬃስ ደንꬄስ’ ግድ ታኮ ኤህደታ። ታካ ህንተ ስንꬃን ፕልጋዳ ህንተ ሺሽዳ ሞቱዋስ አይብ ባላካ ደማብከ።
LUK 23:15 ሄሮዲስ፥ ሄሳꬆ አይብ ባላካ እያ ቦላ ደምቦና ግሾ ኑኮ የድስ። ቱማካ ሀ ኡራይ ሀይቆስ ጋꬅያ አይብ ባላካ ኦꬅቤና።
LUK 23:16 ሄሳ ግሾ፥ እያ ጋራፋዳ ብላ የዳና” ያግስ።
LUK 23:17 ሄሳ እ ግዳይ ፓስካ ባኣለ ዎደ እስ አስ ኤንታዉ ብላናይስ እያዉ አቶናባ ግድያ ግሾሳ።
LUK 23:18 ደረይ ኡባይ እስ ቦላ፥ “ሀ ኡራ ገደ ድጋ፥ ኑስ ባርባና ብላ” ያግድ ዋስዶሶና።
LUK 23:19 ባርባን ካታማ ግዶን አሳ ኢታባስ ደንꬅድ አሰ ዎꬍድ ቃሸትዳ አስ።
LUK 23:20 ጵላፆስ የሱሳ ብላናዉ ኮይድ አሳስ ዛር ኦድስ።
LUK 23:21 ግዶሽን፥ አሳይ፥ “ካቃ! ካቃ!” ያግድ ዋስዶሶና።
LUK 23:22 ጵላፆስ ሄꬓንꬆ፥ “ሀ ኡራይ ቆህዳባይ አይቤ? ዎꬎስ ጋꬅያ ባላ ታ ደማብከ። ሄሳ ግሾ፥ ጋራፋዳ የዳ አጋና” ያግስ።
LUK 23:23 ኤንቲ ባንታ ቃላ ꬎቁ ኦꬅድ፥ “ካቀታናዉ በሴስ” ግድ ምንꬅ ዋስዶሶና። ኤንታ ዋሶይካ ፆንስ።
LUK 23:24 ኤንታ ኦይሻ ግሾ፥ ግድ ጵላፆስ እያ ቦላ ፕርድስ።
LUK 23:25 አሰ ኢታባስ ደንꬅዳይሳነ አሰ ዎꬍድ ቃሸትዳይሳ ብላና መላ ዎስዳ ግሾ ሄ ኡራ ኤንታዉ ብልስ። ሽን የሱሳ ኤንቲ ኮይዳባ ኦꬃና መላ ኤንታዉ አꬅድ እሚስ።
LUK 23:26 የሱሳ ኦይክድ ኤፍሽን ስሞና ጌተትያ ቀሬና ቢታ አደይ ጋፃረፐ ይሽን፥ ደምድ ማስቃልያ ቶስድ የሱሳ ካልድ ባና መላ ኡንኤꬅዶሶና።
LUK 23:27 ዳሮ አሳይነ ባንታ ትራ እጭሸ ዬክያ ማጫሳት እያ ጉየራ ካሎሶና።
LUK 23:28 ሽን የሱሲ ኤንታኮ ጉየ ስሚድ፥ “ህንተኖ፥ የሩሳላመ ማጫሳቶ፥ ህንተ ሁጰስነ ህንተ ናይታስ ዬክተፐ አትሽን፥ ታዉ ዬኮፍተ።
LUK 23:29 ‘ሄኮ ማይንꬃት፥ የሎና ኡሎትነ ꬋንꬆና ꬋንꬃት አንጀትዶሶና’ ህንተ ያጋና ጋላሳይ ያና።
LUK 23:30 ሄ ዎደ ደረታ፥ ‘ኑ ቦላ ኩንድተ’፥ ዙማታካ፥ ‘ኑና ካምተ’ ያጋና።
LUK 23:31 ህዛ፥ ቃየ ምꬃ ሄሳꬆ ኦꬅኮ መላ ምꬃ ዋታንደሻ?” ያግስ።
LUK 23:32 እያራ ዎꬋናዉ ሀራ ናምኡ ዎራንꬖታ ኤፍዶሶና።
LUK 23:33 ቀራንዮ ጌተትያ በሳ ጋꬅድ ካቅዶሶና። ዎራንꬖታፐ እሱዋ ኡሻቻ ባጋራ ሀንኩዋ ሀድርሳ ባጋራ ካቅዶሶና።
LUK 23:34 የሱሲ፥ “ታ አዋዉ፥ ኤንቲ አይ ኦꬅያኮ ኤሮና ግሾ፥ ኔኒ ኤንታዉ አቶ ያጋ” ያግስ። ኤንቲ እያ አፍላ ቦላ ሳማ የግድ ሻከትድ ኤክዶሶና።
LUK 23:35 አሳይ ኤቅድ ፄሎሶና፥ ሽን ደርያ ሃረይሳት፥ “ሀራታ አሽስ፤ ፆሳይ ዶርዳ ክርስቶስ እያ ግድኮ አነ ባና አሾ” ያግድ ለቅስዶሶና።
LUK 23:36 ዎታዳረት እያኮ ሺቅድ፥ ጫላ ዎይነ ኡሻ እምዶሶና።
LUK 23:37 ያትድ፥ “ኔኒ አይሁደታ ካዎ ግድኮ ነ ሁጵያ አሻ” ያግድ ለቅስዶሶና።
LUK 23:38 እያዉ ሁጰ ባጋራ፥ “ሀይስ አይሁደታ ካዎ” ግያ ፁፈይ ደኤስ።
LUK 23:39 ካቀትዳ ዎራንꬖታፐ እሶይ ጫሸ ሳአራ ጎችሸ፥ “አነ ኔኒ ክርስቶሳ ግድኮ፥ ነናካ ኑናካ አሻ” ያግስ።
LUK 23:40 ሽን ሀንኮ ዎራንꬖይ፥ “ኔኒ ሀይሳ መላ ፕርዳን ደአሸ ሀር አቶሽን፥ ፆሳስ ያይኪ?
LUK 23:41 ኑኒ ኑ ኦꬅዳ ናጋራ ግሾ በሲያ ፕርዳ ኤኮስ፥ ሽን ሀ ኡራይ እስ ኢታባ ኦꬅቤና” ያግድ ሀንቀትስ።
LUK 23:42 ቃስካ፥ “የሱሳ፥ ነ ነ ካዎተꬃራ ያ ዎደ ታና ቆፓ” ያግስ።
LUK 23:43 የሱሲ፥ “ታ ነዉ ቱማ ኦዳይስ፤ ሀች ኔኒ ታራ ጋናተን ግዳና” ያግስ።
LUK 23:44 ሄ ጋላስ ኡሱፑን ሳተፐ ብድ ኡዱፉን ሳተ ጋካናዉ አዋይ ፖኡዋ ድግዳ ግሾ፥ ቢታ ኡባ ቦላ ꬉማ ግድስ። ፆሳ ኬꬃ ማጋራጆይ ዳከትድ ናምአን ሻከትስ።
LUK 23:46 የሱሲ፥ ቃላ ꬎቁ ኦꬅድ፥ “ታ አዋዉ፥ ታ ታ ሸምፕዉ ነ ኩሸን ሼꬋይስ” ያግድ ሀይቅስ።
LUK 23:47 ማቶ ሀላቃይ፥ ሀንዳይሳ በእድ፥ “ሀይስ ኡራይ ቱማካ ፅሎ” ያግድ ፆሳ ጋላትስ።
LUK 23:48 ሀ ሀንያባ በአናዉ ሄ በሳ ሺቅዳ አሳ ኡባይ ሀንዳባ በእዳ ዎደ ባንታ ትራ እጭሸ ባንታ ሶ ስምዶሶና።
LUK 23:49 ግዶሽን፥ የሱሳ ማታን ኤርያ አሳ ኡባይ፥ ሄሳዳካ ጋልላፐ ካልድ ይዳ ማጫሳት ሄሳ በእሸ ሃሆን ኤቅዶሶና።
LUK 23:50 አይሁደ ሻንጎታፐ እሶይ፥ ዮሰፋ ጌተትያ ኡራይ ደኤስ። እ አርማተ ጌተትያ ይሁዳ ካታማፐ ይስ። እ ሎኦነ ፅሎ አስ ግድያ ግሾ ፆሳ ካዎተꬃ ዩሳ ናጌስ። ሻንጎታፐ እሱዋ ግድሸ ኤንታ ዞረተꬃንነ ኦሱዋን ዴና።
LUK 23:52 ሄ ኡራይ ጵላፆሳኮ ብድ፥ የሱሳ አሀ ሞጋናዉ ታዉ እማ ግድ ዎስስ።
LUK 23:53 ጵላፆስ ኤካ ያግን፥ የሱሳ አሀ ዎꬍስድ አፍላራ ፃፅስ። ዛላፈ ዎጭድ ከስዳ ሀራ አስ ሞገቶና ኦራꬃ ዱፎን ዎꬅስ።
LUK 23:54 ሳምባት ገላና ሀንያ ግሾ፥ ሄ ጋላሳይ ጊገተꬃ ቃማ።
LUK 23:55 ጋልላፐ ደንድድ የሱሳ ካልድ ይዳ ማጫሳት ዮሰፋራ ብድ እያ አሀ ዋት ሞግያኮ ዱፉዋ አኬክድ በእዶሶና።
LUK 23:56 ያፐ ስሚድ ሽቶነ ቅባተ ጊግስዶሶና። ህገይ ኪተይሳ መላ ሳምባታ ጋላስ ሸምፕ ፔእዶሶና።
LUK 24:1 ሳምንታፈ ኮይሮ ጋላስ፥ ዎጋ ዎደ ዎንታ ዳሮ ጉራ፥ ማጫሳት ባንታ ጊግስዳ ሽቱዋ ኤክድ ዱፉዋ ብዶሶና።
LUK 24:2 ኤንቲ ያ ጋክያ ዎደ ዱፉዋ ዶናን ደእያ ሹቻይ ጎንደረትድ ክቾይሳ ደምዶሶና።
LUK 24:3 ኤንቲ ዱፉዋ ጋꬅ ገልዶሶና፥ ሽን ጎዳ የሱሳ አሀ ደምቦኮና።
LUK 24:4 ኤንቲ ያን ኤቅድ አይብ ሀንደ ግድ ቆፕሽን አኬኮና ዳሮ ጶልያ አፍላ ማእዳ ናምኡ አሳት ኤንታ ማታን ኤቅዶሶና።
LUK 24:5 ማጫሳት ያሸትድ ባንታ ሁጵያ ሳአን ዝቅ ኦꬅድ ደእሽን፥ አሳት ኤንታኮ፥ “ደኦን ደኤይሳ ሀይቆታ ግዶን አይስ ኮዬቲ?
LUK 24:6 እ ሀይሳን ዴና፤ ሀይቆፐ ደንድስ፥ ‘አሳ ናአይ ናጋራንቾታ ኩሸን አꬍድ እመታና፤ ኤንትካ እያ ካቃና። እ ሄꬓንꬆ ቃማን ሀይቆፐ ደንዳና’ ያግድ፥ እ ህንተራ ጋልላን ደእሸ ህንተዉ ኦድዳ ቃላ ቆፕተ” ያግስ።
LUK 24:8 ማጫሳት ሄ ዎደ እያ ቃላ ቆፕዶሶና።
LUK 24:9 ማጫሳት ዱፉዋፐ ስሚድ ሀንዳባ ኡባ ታማነ እሶታስነ ሀራታስካ ኦድዶሶና።
LUK 24:10 ሄሳ ሀዋረታስ ኦድዳይ ማግደላ ማይራሞ፥ ዮሃና፥ ያይቆባ አይዉ ማይራሞነ ኤንታራ ደእያ ሀራ ማጫሳታ።
LUK 24:11 ሽን ኤንታዉ ማጫሳት ኦድዳይስ ኤልሞ ዳንን አማንቦኮና።
LUK 24:12 ሽን ጰፅሮስ ደንድ ዎፅድ ዱፎ ብስ። ሄ በሳ ጋክድ፥ ሆክድ ጋꬅ ፄልያ ዎደ ሞጎ አፍላ ፃላላ በእስ። ሀንዳባን ማላለትሸ ባ ሶ ስምስ።
LUK 24:13 ሄ ጋላስ ካልያ ታማረታፐ ናምአት የሩሳላመፐ ታማነ እስ ክሎ ምትረ ሃክያ ኤማሆሰ ጉታ ቦሶና።
LUK 24:14 ኤንቲ ዎላ ሀንዳባ ኡባ ኦደቶሶና።
LUK 24:15 ኤንቲ ሄ ሀኖታባ ቆፕሸነ ኦደትሸ ብያ ዎደ የሱሲ ባ ሁጰን ሺቅድ ኤንታራ ቤስ።
LUK 24:16 ሀኖሽን፥ ኤንቲ እያ ኤሮና መላ ኤንታ አይፈይ ኦይከትስ።
LUK 24:17 እ፥ “ህንተ ዎላ ኦገ ቦላ ደእሸ ኦደተይስ አይቤ?” ያግስ። ኤንቲ አዛንድ ስእ ግድ ኤቅዶሶና።
LUK 24:18 ኤንታፈ እሶይ ቀልዮጰ ጌተተይስ፥ “ሀ ቃማታ ግዶን የሩሳላመን ሀንዳባ ኤሮናይስ፥ ነ ቢታስ እማዬ?” ያግስ።
LUK 24:19 እ ዛሪድ፥ “እ ሀንዳይስ አይቤ?” ያግድ ኦይችስ። ኤንቲ፥ “ፆሳ ስንꬃንነ አሳ ስንꬃን ኦሶንነ ኦዳን ምኖ ናበ ግድዳ ናዝረተ የሱሳባ።
LUK 24:20 እያ ካህነ ሀላቃትነ ሃረይሳት ሀይቆ ፕርዳስ አꬅ እምድ፥ ካቅዶሶና።
LUK 24:21 ኑኒ እስራኤለ አሳ ዎዛንደ ግድ ኡፋይትድ ናግዳሽን ሀይስ ሀንን ሀች ሄꬓንꬆ ቃማ።
LUK 24:22 ቃስ ኑ ግዶፈ እስ እስ ማጫሳት ኑና ማላልስዶሶና። ኤንቲ ሀች ዎንታ ጉራ ዱፉዋ ብዶሶና።
LUK 24:23 እያ አሀ ꬋይዳ ዎደ ስም ይድ፥ ‘እ ፓፃ ደኤስ’ ግያ ኪታንቾት ቆንጭን በእዳ ያግድ ኦድዶሶና።
LUK 24:24 ኑ ግዶፈካ እሶት እሶት ዱፉዋ ብድ ማጫሳት ኦድዳይሳꬆ ሀንን በእዶሶና፥ ሽን እያ በእቦኮና” ያግስ።
LUK 24:25 እ ኤንታኮ፥ “ህንተኖ፥ አኬኮና አሳቶ፥ ህንተ ዎዛናይ ናበት ኦድዳባ ኡባ አማናናዉ ጋምኤይሳቶ፥
LUK 24:26 ክርስቶስ ሀ መቱዋ ኤካናዉነ ባ ቦንቹዋን ገላናዉ በሰኔ?” ያግስ።
LUK 24:27 ሙሰፐነ ናበታ ኡባፈ ደንድድ ጌሻ ማፃፋን እያባይ ፃፈትዳይሳ ኡባ ኤንታዉ ቆንጭስስ።
LUK 24:28 ኤንቲ ብያ ጉታኮ ማታትዳ ዎደ የሱሲ አꬍድ ሃሆ ሶ ብያ ዳንን፥
LUK 24:29 ኤንቲ፥ “ሳአይ ቃምዳ ግሾ ኑራ አቃ” ያግድ ምንꬅድ ዎስዶሶና። ሄሳ ግሾ፥ ኤንታራ አቃናዉ ገልስ።
LUK 24:30 ኤንታራ እስፈ ጋይታ ቦላ ኡትድ፥ ኡይꬃ ደንꬅድ፥ መንꬅድ፥ አንጅድ ኤንታዉ እሚስ።
LUK 24:31 ሄ ዎደ ኤንቲ ኤራና መላ ኤንታ አይፈይ ዶየትስ። ኤንትካ ኤርዶሶና። ሽን እ ኤንታፈ ጌምስ።
LUK 24:32 ኤንቲ፥ “ኑ ኦግያ ቦላ ደእሽን እ ኑስ ጌሻ ማፃፋ ብርሽሽንነ ኑና ኦድስሽን፥ ኑ ዎዛናይ ፁገትቤኔ?” ያግዶሶና።
LUK 24:33 ሄ ዎደ ደንድድ ጉየ የሩሳላመ ይዶሶና። ታማነ እሶትነ ሀራት እስ ቦላ ሺቅድ ደእሽን ደምዶሶና።
LUK 24:34 ኤንቲ፥ “ጎዳይ ቱማ ደንድስ፤ ስሞናስ ቆንጭስ” ያግዶሶና።
LUK 24:35 ሄ ናምኡ ታማረት ኤማሁሰ ኦግያ ቦላ ደእሽን ሀንዳይሳነ ኡይꬃ መንꬅዳ ዎደ ዋት እያ ኤርዳኮ ኤንታዉ ኦድዶሶና።
LUK 24:36 ናምኡ ታማረት ሄሳ ኦዳ ቦላ ደእሽን፥ የሱሲ ኤንታ ግዶን ኤቅድ፥ “ሳሮይ ህንተዉ ግዶ” ያግስ።
LUK 24:37 ግዶሽን፥ ኤንቲ ዳጋምድ፥ ሞይትለ በእዳ ዳንን ያይዶሶና።
LUK 24:38 እ ኤንታኮ፥ “አይስ ባብደቲ? አይስ ስይ ህንተ ዎዛናን ገልዴ?
LUK 24:39 ታ ኩሽያነ ታ ቶሁዋ በእተ፤ ታኒ ታና። ቃስ ኦይክድ በእተ፤ ታናን ህንተ በኤይሳዳ፥ ሞይትለስ አሾይነ መቀꬅ ባዋ” ያግስ።
LUK 24:40 ያግድ፥ ባ ቶሁዋነ ባ ኩሽያ ኤንታ በስስ።
LUK 24:41 ኤንቲ ኡፋይሳፈ ደንዶይሳን አማኖና ማላለተꬃን ደእሽን፥ የሱሲ ኤንታኮ፥ “ሀይሳን ህንተዉ ምያባይ ደኢ?” ያግስ።
LUK 24:42 ኤንቲ እስ ጫጨትዳ ሞሎ እያዉ እምዶሶና።
LUK 24:43 እ ኤክድ ኤንታ ስንꬃን ምስ።
LUK 24:44 እ፥ “ታ ህንተራ ጋምእዳ ዎደ ኡባን ሙሰ ማፃፋታን፥ ናበታ ማፃፋታንነ ማዝሙረ ማፃፋታን፥ ታ ግሾ ፃፈትዳባይ ኡባይ ፖለታናዉ በሴስ ያጋዳ ታ ህንተዉ ኦድዳ ቃላይ ሀይሳ” ያግስ።
LUK 24:45 ሄ ዎደ ጌሻ ማፃፋታ አኬካና መላ ኤንታ ዎዛና ዶይስ።
LUK 24:46 ሄሳዳካ፥ “ክርስቶስ ዋየ ኤካና፥ ሄꬓንꬆ ቃማን ሀይቆፐ ደንዳና ያግድ ፃፈትስ።
LUK 24:47 የሩሳላመፐ ደንድድ አሳ ኡባስ ናጋራፐ ማሮተꬃይነ አቶተꬃይ እያ ሱንꬃን ማርካታና።
LUK 24:48 ህንተ ሄሳስ ማርካታ።
LUK 24:49 ሄኮ፥ ታካ ታ አዋይ እምዳ ኡፋይሳ ህንተዉ የዳና። ህንተ ሳሎፐ ዎልቃ ማአና ጋካናዉ የሩሳላመ ካታማን ጋምእተ” ያግስ።
LUK 24:50 ሄሳፈ ጉየ፥ ብታነ ካታማ ኤንታና ኤክድ ብስ። ባ ኩሽያ ደንꬅድ አንጅስ።
LUK 24:51 ኤንታና አንጅሸ ኤንታፈ ሻከትድ ፑደ ሳሎ ኤከትስ።
LUK 24:52 ኤንቲ ዝግ ጎይንድ ዳሮ ኡፋይሳን የሩሳላመ ስምዶሶና።
LUK 24:53 ፆሳ ኡባ ዎደ ጋላትሸ ፆሳ ኬꬃን ጋምእዶሶና።
JOH 1:1 ቃላይ ኮይሮ ደኤስ። ቃላይካ ፆሳራ ደኤስ፤ ሄ ቃላይ ፆሳ።
JOH 1:2 ኮይሮፐ ቃላይ ፆሳራ ደኤስ።
JOH 1:3 ፆሳይ ኡባባ ቃላ ባጋራ መꬍስ። መትዳባፐ እሶይካ እያ ባጋራ መቶናባይ ባዋ።
JOH 1:4 እያን ደኦይ ደኤስ፤ ሄ ደኦይ አሳስ ፖኦ።
JOH 1:5 ፖኦይ ꬉማን ፖኤስ፤ ꬉማይ ፖኡዋ ፆንቤና።
JOH 1:6 ፆሳይ ኪትዳ፥ እስ ዮሃንሳ ጌተትያ አስ ደኤስ።
JOH 1:7 አሳ ኡባይ ፖኡዋን አማናና መላ እ ፖኦስ ማርካ ግድድ ይስ።
JOH 1:8 እ ፖኡዋባ ማርካታናዉ ይስፐ አትሽን፥ ባ ሁጰን ፖኦ ግደና።
JOH 1:9 አሳ ኡባስ ፖእስያ ቱማ ፖኦይ አላምያ ዬስ።
JOH 1:10 ቃላይ አላመን ደእስ። ፆሳይ ቃላን አላምያ መꬍስ፥ ሽን አላመይ እያ ኤርቤና።
JOH 1:11 እ ባ አሳኮ ይስ፥ ሽን እያ አሳይ እያ ኤክቦኮና።
JOH 1:12 ሽን እ ባና ኤክዳይሳታስነ እያ ሱንꬃን አማንዳይሳታስ ፆሳ ናይታ ግዳና መላ ማታ እሚስ።
JOH 1:13 ኤንቲ ፆሳፈ የለትዶሶናፐ አትሽን፥ አስ የለትያ ዎጋን ዎይኮ አደ ሸነን ዎይኮ አሳ አሞን የለትቦኮና። ፆሳይ እ ኤንታ አዋ።
JOH 1:14 ቃላይ አሰ ግድስ፤ አꬎ ኬሀተꬃነ ቱማ ኩምድ ኑ ግዶን ደእስ። እ አዋስ እስ ናኣ ግድድ ኤክዳ እያ ቦንቹዋ ኑኒ በእዳ።
JOH 1:15 ዮሃንስ እያባ ማርካትስ። ባ ቃላ ꬎቁ ኦꬅድ፥ “ታኒ፥ ‘ታፐ ጉየራ የይስ ታፐ ካሰ ደእያ ግሾ ታፐ አꬌስ’ ጋዳ ማርካትዳይስ ሀይሳ” ያግስ።
JOH 1:16 ኑኒ ኡባይ እያ አꬎ ኬሀተꬃ ኩመꬃፈ አንጆ ቦላ አንጆ ኤክዳ።
JOH 1:17 ፆሳይ ህግያ ሙሰ ባጋራ እሚስ፥ ሽን አꬎ ኬሀተꬃይነ ቱማተꬃይ የሱስ ክርስቶሳ ባጋራ ይስ።
JOH 1:18 ፆሳ በእዳ አስ ኦንካ ባዋ፤ ባ አዋ ማታን ደእያ እስ ናኣ ፃላል ባዉ ፆሰ ግድዳይስ እያ ቆንጭስስ።
JOH 1:19 የሩሳላመን ደእያ አይሁደ ሀላቃት፥ ካህነታነ ሌወታ፥ “ኔኒ ኦኔ?” ግድ፥ ዮሃንሳ ኦይቻና መላ እያኮ ኪትን፥ ዮሃንስ ኤንታዉ ማርካትዳ ማርካተꬃይ ሀይሳ።
JOH 1:20 ዮሃንስ፥ “ታኒ ክርስቶሳ ግድከ” ያግድ፥ ጌሽድ ማርካትስፐ አትሽን፥ ካድቤና።
JOH 1:21 ኤንቲ፥ “ያትን፥ ኔኒ ኦኔ? ኔኒ ኤልያሰዬ?” ያግድ ኦይችዶሶና። ዮሃንስ፥ “አካይ፥ ግድከ” ያግስ። ቃስ ኤንቲ፥ “ኔኒ ያና ጌተትዳ ናብያዬ?” ያግድ ኦይችዶሶና። ዮሃንስ፥ “አካይ” ግድ ዛርስ።
JOH 1:22 ያትን፥ “ኔኒ ኦኔ? ኑኒ ኑና ኪትዳይሳታስ ኦዳና መላ ኔኒ ነና ኦና ጋይ?” ያግዶሶና።
JOH 1:23 ዮሃንስ ዛሪድ፥ “ናብያ እሳያስ ግዳይሳዳ፥ “ ‘ጎዳ ኦግያ ሱርስተ!’ ግድ መላ ቢታን ዋስያ ኡራ ቃላይ ታና” ያግስ።
JOH 1:24 ቃስ ፋርሳወት ኪትዳ አሳት
JOH 1:25 ዮሃንሳኮ፥ “ኔኒ ክርስቶሳ ዎይኮ ኤልያሳ ዎይኮ ናበ ግዶና እፅኮ፥ ያትን አይስ ፃማቃይ?” ግድ ኦይችዶሶና።
JOH 1:26 ዮሃንስ ዛሪድ፥ “ታኒ ሃꬃን ፃማቃይስ፥ ሽን ህንተ ኤሮና አስ ህንተ ግዶን ኤቅስ።
JOH 1:27 እ ታፐ ጉየራ ዬስ። ታኒ ሀር አቶሽን እያ ጫማ ዎዶሩዋ ብላናዉ በስከ” ያግስ።
JOH 1:28 ሄስ ኡባይ ዮርዳኖሰ ሻፋፐ ሄፍንꬃን፥ ብታነ ካታማን፥ ዮሃንስ ፃማቅያ በሳን ሀንስ።
JOH 1:29 ዮሃንስ ዎንተꬃ ጋላስ የሱሲ ባኮ ይሽን በእድ፥ “አላምያ ናጋራ ቁችያ ፆሳ ዶርሳይ ሀይሳ!
JOH 1:30 ታኒ፥ ‘ታፐ ጉየራ እስ አስ ያና። እ ታፐ ካሰ ደእያ ግሾ ታፐ አꬌስ’ ጋዳ ኦድዳይስ ሀይሳ።
JOH 1:31 እ ኦነኮ ታኒ ኤርከ። ሽን እስራኤለ አሳስ እያ ቆንጭሳናዉ ሃꬃን ፃማቃሸ ያስ” ያግስ።
JOH 1:32 ዮሃንስ ሀይሳዳ ያግድ ማርካትስ፦ “ጌሻ አያናይ ሳሎፐ ሆለዳ ዎꬍሽንነ እያራ ደእሽን በአስ።
JOH 1:33 ሄስ ሀናናፐ ካሰ ታኒ እያ ኤርከ። ሽን ሃꬃን ፃማቃናዉ ታና ኪትዳ ፆሳይ፥ ‘ጌሻ አያናይ ዎꬍድ እያራ ደእሽን ኔኒ በአናይስነ ጌሻ አያናን ፃማቃናይስ እያ’ ያግድ ታዉ ኦድስ።
JOH 1:34 ታኒ ሄስ ሀንሽን በአዳ፥ እ ፆሳ ናኣ ግድዳይሳ ማርካታይስ” ያግስ።
JOH 1:35 ቃስ ዎንተꬃ ጋላስ ዮሃንስ ባ ታማረታፐ ናምአታራ እስፈ ኤቅስ።
JOH 1:36 የሱሲ አꬍሽን፥ ዮሃንስ በእድ፥ “ፆሳ ዶርሳይ ሀይስሽ!” ያግስ።
JOH 1:37 ዮሃንሳ ናምኡ ታማረት ዮሃንስ ገይሳ ስእድ የሱሳ ካልዶሶና።
JOH 1:38 የሱሲ ባና ካለይሳታ ጉየ ስም በእድ፥ “አይ ኮዬቲ?” ያግድ ኦይችስ። ኤንቲ ዛሪድ፥ “አስታማርያዉ፥ ኔኒ አዉን ደአይ?” ያግዶሶና።
JOH 1:39 የሱሲ ኤንታኮ፥ “ሃ ይድ በእተ” ያግስ። ኤንቲ ብድ እ ደእያሱዋ በእዶሶና። ሄ ጋላስ ሳእ ታሙ ሳተ ሄራ ግድያ ግሾ እያ ማታን ፔእዶሶና።
JOH 1:40 ዮሃንስ ግዳይሳ ስእድ፥ የሱሳ ካልዳ ናምኡ ታማረታፐ እሶይ፥ ስሞን ጰፅሮሳ እሻ እንድርያሳ።
JOH 1:41 እንድርያስ ኮይሮ ባ እሻ ስሞናራ ጋሄትድ፥ “ኑኒ ክርስቶሳ ደምዳ” ያግስ።
JOH 1:42 እንድርያስ ስሞና የሱሳኮ ኤህስ። የሱሲ ስሞና በእድ፥ “ኔኒ ዮና ናኣ ስሞና፤ ነ ሱንꬃይ ኬፋ ግድ ፄገታና” ያግስ።
JOH 1:43 ዎንተꬃ ጋላስ የሱሲ ጋልላ ቢታ ባናዉ ቆፋ ቃችስ። እ ፍልጶሳራ ጋሄትድ፥ “ታና ካላ!” ያግስ።
JOH 1:44 ፍልጶስ፥ እንድርያስነ ጰፅሮስ ደእዳ ቤተሳይዳ ካታማፐ ይዳ አሰ።
JOH 1:45 ፍልጶስ ናትናኤላራ ጋሄትድ፥ “ሙሰይ ህገ ማፃፋን፥ ቃስ ናበትካ እያባ ፃፍዳ ዮሰፋ ናኣ ናዝረተ የሱሳ ኑኒ ደምዳ” ያግስ።
JOH 1:46 ናትናኤል ዛሪድ፥ “ናዝረተ ካታማፐ ሎኦባይ ከያናዉ ዳንዳኢ?” ያግስ። ፍልጶስ፥ “ያዳ በአ” ያግስ።
JOH 1:47 ናትናኤል ባኮ የይሳ የሱሲ በእድ፥ “ገነይ ባይና ቱማ እስራኤለ አስ ሀይሳ!” ያግስ።
JOH 1:48 ናትናኤል የሱሳኮ፥ “ኔኒ ታና አዉን ኤራይ?” ያግስ። የሱሲ ዛሪድ፥ “ፍልጶስ ነና ፄጋናፐ ስን፥ ኔኒ ባላሰ ምꬃ ጋርሳን ደእሽን ታኒ ነና በአስ” ያግስ።
JOH 1:49 ናትናኤል ዛሪድ፥ “አስታማርያዉ፥ ኔኒ ፆሳ ናኣ! ኔኒ እስራኤለ ካዎ!” ያግስ።
JOH 1:50 የሱሲ እያኮ፥ “ታኒ ነና ባላሰ ምꬄ ጋርሳን በአስ ግዳ ግሾ አማናይ? ኔኒ ሀይሳፈ አꬍያባ በአና!” ያግስ።
JOH 1:51 ቃስ የሱሲ፥ “ታኒ ህንተዉ ቱማ ኦዳይስ፤ ሳሎይ ዶየትን፥ ፆሳ ኪታንቾት አሳ ናኣ ቦላ ከይሽንነ ዎꬍሽን ህንተ በአና” ያግስ።
JOH 2:1 ሄꬓንꬆ ጋላስ ጋልላ ቢታን ቃና ካታማን ያጋኖይ ያጋነትስ። የሱሳ አይያ ሄ ያጋኑዋን ደአዉሱ።
JOH 2:2 የሱሲካ ባ ታማረታራ እስፈ ሄ ያጋኑዋ ፄገትስ።
JOH 2:3 ዎይነ ኡሻይ ዉርን፥ የሱሳ አይያ የሱሳኮ፥ “ኤንታዉ ዎይነ ኡሻይ ዉርስ” ያጋሱ።
JOH 2:4 የሱሲ ዛሪድ፥ “ታ አየ፥ ነ ሀይሳን ገሎፓ? ታ ዎደይ ቡሮ ጋክቤና” ያግስ።
JOH 2:5 የሱሳ አይያ ኦሳንቾታኮ፥ “እ ህንተዉ ኦድያባ አይብባ ግድኮካ ኦꬅተ” ያጋሱ።
JOH 2:6 አይሁደት ባንታ ጌሾ ዎጋስ ጎኤትያ ኡሱፑን ሹቻ ባꬃት ሄ በሳን ደኦሶና። እስ እስ ባꬃይ ናምኡ ዎይኮ ሄꬑ ፁጋ ኦይኬስ።
JOH 2:7 የሱሲ ኦሳንቾታኮ፥ “ባꬃታን ሃ ኩንꬅተ” ያግስ። ኤንቲ ባꬃታስ ዶና ጋካናዉ ሃ ኩንꬅዶሶና።
JOH 2:8 የሱሲ ኤንታኮ፥ “ሀእ ዱቅድ ያጋኑዋ አዋተꬃን ፖልሰይሳስ እምተ” ያግስ። ኤንቲ እያዉ ኤፍድ እምዶሶና።
JOH 2:9 ያጋኑዋ አዋተꬃን ፖልሰይስ ዎይነ ኡሽ ላመትዳ ሃꬃ ጋንፅ ኤክድ አዉፐ ይዳኮ ኤርቤና፥ ሽን ሃꬃ ኩንꬅዳ ኦሳንቾት ኤሮሶና። ያጋኑዋ አዋተꬃን ፖልሰይስ ማችዉ ኤከይሳ ፄግድ፥
JOH 2:10 “ኦንካ ሎኦ ዎይነ ኡሻ አሳ ኮይሮትድ ኡሼስ። ያትድ አሳይ ኡይ ካልዳፐ ጉየ፥ ቅራርያ እሜስ። ሽን ኔኒ ሎኦ ዎይነ ኡሻ ሀኖ ጋካናዉ ዎꬃ አጋዳሳ” ያግስ።
JOH 2:11 የሱሲ ሀ ኮይሮ ማላታ ጋልላ ቢታን ቃና ካታማን ኦꬅስ፤ ሄሳን ባ ግታተꬃ በስስ። እያ ታማረት እያ አማንዶሶና።
JOH 2:12 ሄሳፈ ጉየ፥ የሱሲ ባ አየራ፥ ባ እሻታራነ ባ ታማረታራ እስፈ ቅፍርናሆማ ካታማ ብድ ጉꬃ ጋላስ ጋምእስ።
JOH 2:13 አይሁደት ቦንችያ ፓስካ ባኣለ ጋላሳይ ማታትን የሱሲ የሩሳላመ ብስ።
JOH 2:14 ብድ ፆሳ ኬꬃን ቦራታ፥ ሚዛታ፥ ዶርሳታነ ሆለታ ባይዘይሳታነ ባንታ ኦይድያን ኡትድ ሚሸ ላመይሳታ ደምስ።
JOH 2:15 እ ፁርቃፈ ዶቅድ አሳ ኡባ ኤንታ መሄታራ ፆሳ ኬꬃፈ ጎድድ ካረ ከስስ። ሚሸ ላመይሳታ ፃርጴዛታካ አꬅ የግድ ኤንታ ሚሽያ ላልስ።
JOH 2:16 ሆለ ባይዘይሳታ፥ “ሀ ሆለታ ሀይሳፈ ከስተ፤ ታ አዋ ኬꬃ ግያ ኦꬆፍተ” ያግስ።
JOH 2:17 እያ ታማረት ጌሻ ማፃፋን፥ “ታኒ ነ ኬꬃስ ምሸትያ ምሻይ ታና ታማዳ ፁጌስ” ጌተትድ ፃፈትዳይሳ አኬክዶሶና።
JOH 2:18 ሄሳፈ ጉየ፥ አይሁደት ዛሪድ፥ “ነ ሀይሳ ኦꬃናዉ ነዉ ማት ደኤይሳስ ኑና አይ ማላታ ኦꬃዳ በሳኔ?” ያግዶሶና።
JOH 2:19 የሱሲ፥ “ሀ ፆሳ ኬꬃ ላልተ፤ ታኒ ሄꬑ ጋላሳን ዛራዳ ኬፃና” ያግስ።
JOH 2:20 ቃስካ አይሁደት፥ “ሀ ፆሳ ኬꬃ ኬፃናዉ ኦይታማነ ኡሱፑን ላይꬅ ኤክስ፥ ሽን ኔኒ ሄꬑ ጋላሳን ኬፃኔ?” ያግዶሶና።
JOH 2:21 ሽን የሱሲ ኦድያ ፆሳ ኬꬃይ ባ አሳተꬃባ።
JOH 2:22 ሄሳ ግሾ፥ የሱሲ ሀይቆፐ ደንድዳፐ ጉየ እያ ታማረት እ ሄሳ ግዳይሳ አኬክዶሶና። ቃስ ኤንቲ ጌሻ ማፃፋን ፃፈትዳይሳነ የሱሲ ኦድዳይሳ አማንዶሶና።
JOH 2:23 የሱሲ ፓስካ ቦንችያ በሳን የሩሳላመን ደእሽን፥ እ ኦꬅዳ ማላታታ በእድ ዳሮ አሳይ እያ አማንዶሶና።
JOH 2:24 ሽን የሱሲ አሳ ኡባ ኤርያ ግሾ ኤንታ አማንበና።
JOH 2:25 አሳ ዎዛናን ደእያባ እ ባ ሁጰን ኤርያ ግሾ አሳባ ኦንካ እያዉ ኦዳና መላ ኮሽቤና።
JOH 3:1 ፋርሳወታ ያራፐ ግድዳ፥ አይሁደታ ሀላቃይ፥ ንቆድሞሳ ጌተትያ እስ አደይ ደኤስ።
JOH 3:2 ንቆድሞስ ቃማ የሱሳኮ ይድ፥ “አስታማርያዉ፥ ኔኒ ፆሳይ ኪትዳ አስታማረ ግደይሳ ኑኒ ኤሮስ። አይስ ጊኮ፥ ፆሳይ እያራ ዶና እፅኮ ሀ ኔኒ ኦꬅያ ማላታ ኦꬃናዉ ዳንዳእያ አስ ባዋ” ያግስ።
JOH 3:3 የሱሲ ዛሪድ፥ “ታኒ ነዉ ቱማ ኦዳይስ፤ ኦንካ ዛር የለቶና እፅኮ ፆሳ ካዎተꬃ በአናዉ ዳንዳኤና” ያግስ።
JOH 3:4 ንቆድሞስ፥ “ጬጋ አስ ዋንድ ዛር የለታናዉ ዳንዳኢ? ባ አየ ኡሎ ስም ገልድ ዛር የለታናዉ ዳንዳኢ?” ያግስ።
JOH 3:5 የሱሲ ዛሪድ፥ “ታኒ ነዉ ቱማ ኦዳይስ፤ ኦንካ ሃꬃፈነ ጌሻ አያናፐ የለቶና እፅኮ፥ ፆሳ ካዎተꬃ ገላናዉ ዳንዳኤና።
JOH 3:6 አሾ ናአተꬅ አዉፐነ አይፐ ዬስ፤ ፆሳ ናአተꬅ ጌሻ አያናፐ እመቴስ።
JOH 3:7 ታኒ፥ ‘ህንተ ዛር የለታናዉ በሴስ’ ጋዳ ህንተዉ ኦድዳ ግሾ ኔኒ ማላለቶፋ።
JOH 3:8 ጫርኮይ ባ ኮይዳ በሲ ጫርኬስ። ኔኒ እያ ኮሽንቻ ስአሳፐ አትሽን፥ እ አዉፐ ያኮ ዎይኮ አዉ ብያኮ ኤራካ። አያናፐ የለትዳ ኡባይ ሄሳ መላ” ያግስ።
JOH 3:9 ያትን ንቆድሞስ፥ “ሄስ ዋንድ ሀናናዉ ዳንዳኢ?” ያግድ ኦይችስ።
JOH 3:10 የሱሲ ዛሪድ፥ “ኔኒ እስራኤለታ አስታማረ ግዳሸ ሀይሳ ኤርኪ?
JOH 3:11 ታኒ ነዉ ቱማ ኦዳይስ፤ ኑ ኤርያባ ኦዶስነ በእዳባ ማርካቶስ፥ ሽን ኑ ማርካተꬃ ህንተ ኤከከታ።
JOH 3:12 ታኒ ህንተዉ ሳአባ ኦድን ህንተ አማኖናባ ግድኮ ሳሎባ ኦድን ዋትድ አማናኔ?
JOH 3:13 ሳሎፐ ዎꬍዳ አሳ ናኣፐ አትሽን፥ ሳሎ ከይዳይ ኦንካ ባዋ፤ [ሳሎን ደእያ አሳ ናአይ ታና”] ያግስ።
JOH 3:14 ሙሰይ መላ ቢታን ናሰ ብራታ ሾሽ ካቅዳይሳዳ ታና አማንዳ ኡባይ መርና ደኡዋ ኤካና መላ አሳ ናአይ ꬎቁ ጋናዉ በሴስ።
JOH 3:16 ፆሳ ናኣ አማንያ ኡባይ መርና ደኡዋ ላታናፐ አትሽን፥ ꬋዮና መላ ፆሳይ ሀ አላምያ ዳሮ ዶስዳ ግሾ ባ እስ ናኣ እሚስ።
JOH 3:17 ፆሳይ ባ ናኣ ሀ አላምያ ኪትዳይ አላምያ ፕርዳናዉ ግዶናሽን አላምያ እያ ባጋራ አሻናሳ።
JOH 3:18 ናኣ አማንያ ኦንካ ፕርደተና፥ ሽን ናኣ አማኖና ኦንካ እስ ፆሳ ናኣ አማንቦና ግሾ ሀእ ፕርደትስ።
JOH 3:19 ፕርዳይካ ሀይሳ፦ ፖኦይ አላምያ ይስ፥ ሽን አሳ ኦሶይ ኢታ ግድያ ግሾ አሳይ ፖኡዋፐ አꬅድ ꬉማ ዶሴስ።
JOH 3:20 ኢታባ ኦꬅያ ኦንካ ፖኦ እፄስ። አይስ ጊኮ፥ ባ ኦሶይ ቆንጮና መላ ፖኡዋኮ ዬና።
JOH 3:21 ሽን ቱማ ኦꬅያ ኦንካ ፆሳይ ኪትዳይሳዳ እ ኦꬅዳይሳ ፖኦይ ቆንጭሳና መላ ፖኡዋኮ ዬስ።
JOH 3:22 ሄሳፈ ጉየ፥ የሱሲነ እያ ታማረት ይሁዳ ቢታ ብዶሶና። የሱሲ ያን ፃማቅሸ ኤንታራ ጉꬃ ዎደ ኡትስ።
JOH 3:23 ቃስ ዮሃንስ ሳሌማ ማታን ደእያ ሄኖና ግያ በሳን ግድያ ሃꬅ ደእያ ግሾ አሳ ያን ፃማቄስ። አሳይካ ያ ብድ ፃማቀቶሶና።
JOH 3:24 ሄ ዎደ ዮሃንስ ቡሮ ቃሸትቤና።
JOH 3:25 ሄሳፈ ጉየ፥ ዮሃንሳ ታማረትነ እስ አይሁደ አደይ ጌሾ ዎጋባ ፓላምዶሶና።
JOH 3:26 ኤንቲ ዮሃንሳኮ ብድ፥ “አስታማርያዉ፥ ዮርዳኖሰ ሻፋፐ ሄፍንꬃን ኔራ ደኤይስ፥ ኔኒ እያባ ማርካትዳይስ፥ ሄኮ ፃማቄስ። አሳ ኡባይካ እያኮ ቦሶና” ያግዶሶና።
JOH 3:27 ዮሃንስ ዛሪድ፥ “ፆሳይ እሞና አስ አይብባካ ኤካናዉ ዳንዳኤና።
JOH 3:28 ‘ታኒ ክርስቶሳ ግድከ፥ ሽን እያፐ ስን ኪተታስ’ ግዳይሳስ ታዉ ህንተ፥ ህንተ ሁጰን ማርካ።
JOH 3:29 ገሎስ ጊግዳራ ኤከናዉ ጊግዳይሳሳ። ኤከይሳ ላገይ እያ ማታን ኤቅድ እ ገይሳ ስእያ ዎደ ዳሮ ኡፋይቴስ። ሄሳ ግሾ፥ ሀይስ ታ ኡፋይሳይ ፖለትስ።
JOH 3:30 እ ግታታናዉ ታኒ ጉፃናዉ በሴስ” ያግስ።
JOH 3:31 ቦላፈ የይስ ኡባፈ ቦላ። ሳአፐ በንትዳይስ ሳአባ። እ ሳአባ ኦዴስ። ሳሎፐ የይስ ኡባፈ ቦላ።
JOH 3:32 እ ባ በእዳባነ ስእዳባ ማርካቴስ፥ ሽን እያ ማርካተꬃ ኤከይ ባዋ።
JOH 3:33 እያ ማርካተꬃ ኤክያ ኦንካ ፆሳይ ቱማ ግደይሳ ቆንጭሴስ።
JOH 3:34 ፆሳይ ባ ጌሻ አያና እያዉ ኩመꬅ እምያ ግሾ ፆሳይ ኪትዳይስ ፆሳ ቃላ ኦዴስ።
JOH 3:35 አዋይ ባ ናኣ ዶስድ ኡባባ እያ ኩሸን ዎꬅስ።
JOH 3:36 ናኣ አማንያ ኡራስ መርና ደኦይ ደኤስ። ሽን ናኣ አማኖናይሳ ቦላ ፆሳ ሀንቆይ ደኤስፐ አትሽን፥ እ ደኦ ደመና።
JOH 4:1 የሱሲ ዮሃንሳፐ ዳሮ ካልያ አሳ ባኮ ሺሸይሳነ ፃማቀይሳ ፋርሳወት ስእዶሶና።
JOH 4:2 ግድኮካ የሱሳ ታማረት ፃማቅዶሶናፐ አትሽን፥ የሱሲ ኦናካ ፃማቅቤና።
JOH 4:3 የሱሲ አሳይ እያባ ገይሳ ስእዳ ዎደ ይሁዳፐ ደንድድ ጋልላ ብስ።
JOH 4:4 እ፥ ጋልላ ብሸ ሳማረራ አꬋናይስ አቶናባ ግድስ።
JOH 4:5 ሄሳ ግሾ፥ ያይቆብ ባ ናኣ ዮሰፋስ እምዳ ጋድያ ማታን ደእያ ስካረ ጌተትያ ሳማረ ካታማ ብስ።
JOH 4:6 ሄ በሳን ያይቆባ ሃꬃ ኦላይ ደኤስ። የሱሲ ሄመꬃን ዳቡርድ ሄ ሃꬃ ኦላ ማታን ኡትስ። ሄ ዎደ ሳእ ኡሱፑን ሳተ ሄራ።
JOH 4:7 እስ ሳማረ ካታማ ማጫስ ሄ ኦላፈ ሃ ትካናዉ ያሱ። የሱሲ ሄ ማጫሴኮ፥ “ታና ሃ ኡሻርክ” ያግስ።
JOH 4:8 ሄ ዎደ የሱሳ ታማረት ካꬅ ሻማናዉ ካታማ ብዶሶናሽን።
JOH 4:9 ሄ ማጫስያ ዛራዳ፥ “ኔኒ አይሁደ አሰ ግዳሸ፥ ሳማረ ማጫስ ግድያ ታና ዋናዳ ሃ ኡሻ ጋይ?” ያጋሱ። ሄሳ እያ ግዳይ አይሁደት ሳማረታራ ጋሄቶና ግሾሳ።
JOH 4:10 የሱሲ ዛሪድ፥ “ኔኒ ፆሳ እሞታነ ሃ ታና ኡሻ ገይስ ኦነኮ ኤርዳባ ግድያኮ እያ ነ ዎሳና፤ እካ ነዉ ደኦ እምያ ሃꬅ እማናሽን” ያግስ።
JOH 4:11 ማጫስያ ዛራዳ፥ “ጎዳዉ፥ ነዉ ዱቅያባይ ባዋ፤ ኦላይካ ዝቃ። ያትን፥ ደኦ እምያ ሃꬅ ነ አዉፐ ኤካኔ?
JOH 4:12 ኑስ ሀ ሃꬃ ኦላ እምዳ ኑ አዋ ያይቆባፐ ኔኒ አꬋይ? እ፥ እያ ናይትነ እያ መሄይ ሀ ኦላፈ ኡይዶሶና” ያጋሱ።
JOH 4:13 የሱሲ፥ “ሀ ሃꬃፈ ኡይዳ ኦንካ ዛር ሳሞታና።
JOH 4:14 ሽን ታኒ እማና ሃꬃ ኡያ ኦንካ ኡባካ ሳሞተና። ታኒ እሚያ ሃꬃይ እያ ግዶን መርና ደኦ እምያ ጎግያ ፑልቶ ግዳና” ያግስ።
JOH 4:15 ማጫስያ ዛራዳ፥ “ጎዳዉ፥ ታኒ ሳሞቶና መላነ ሃ ትካናዉ ሀ በሳ ዮና መላ ታዉ ሄ ሃꬃ እማ” ያጋሱ።
JOH 4:16 የሱሲ ኢኮ፥ “ባዳ ነ አዝና ፄጋዳ ያ” ያግስ።
JOH 4:17 ማጫስያ ዛራዳ፥ “ታዉ አዝን ባዋ” ያጋሱ። የሱሲ ኢኮ፥ “ታዉ አዝን ባዋ ጋሸ ባላባካ።
JOH 4:18 ነዉ ካሰ እቻሹ አዝናት ደኦሶና። ሀእ ኔራ ደእያ አደይ ነ አዝና ግደና። ኔኒ ሀእ ቱማ ኦዳዳሳ” ያግስ።
JOH 4:19 ማጫስያ ዛራዳ፥ “ጎዳዉ፥ ኔኒ ናበ ግደይሳ ታኒ ኤራስ።
JOH 4:20 ኑ አዋት ሀ ዙማ ቦላ ፆሳ ጎይንዶሶና። ሽን ህንተ አይሁደት አስ ፆሳስ ጎይናናዉ በሲያ በሳይ የሩሳላመና ጌታ” ያጋሱ።
JOH 4:21 የሱሲ፥ “ሀ ማጫሰተ ታና አማና፤ ሀ ዙማ ቦላ ዎይኮ የሩሳላመን አዋስ ህንተ ጎይኖና ዎደይ ያና።
JOH 4:22 ህንተ ሳማረት ኤሮናይሳ ጎይነታ። ሽን ኑኒ አቶተꬃይ አይሁደፐ ያ ግሾ ኑ ኤረይሳ ጎይኖስ።
JOH 4:23 ሽን አዋስ ቱማን ጎይነይሳት አያናንነ ቱማተꬃን ጎይናና ዎደይ ማታትስ፤ ሀእካ ጋክስ። ህዛ፥ አዋይ ኮየይ ሀይሳ መላ ኦግያን ጎይነይሳታ።
JOH 4:24 ፆሳይ አያና፤ እያዉ ጎይነይሳት አያናንነ ቱማተꬃን ጎይናናዉ በሴስ” ያግስ።
JOH 4:25 ማጫስያ ዛራዳ፥ “ክርስቶስ ያናይሳ ታኒ ኤራይስ። እ ያ ዎደ ኑስ ኡባባ ኦዳና” ያጋሱ።
JOH 4:26 የሱሲ፥ “ሀ ኔራ ኦደተይ ታኒ እያ” ያግስ።
JOH 4:27 ኤንቲ ኦደትሽን፥ የሱሳ ታማረት ብዳ በሳፈ ስምዶሶና። የሱሲ ማጫሳራ ኦደትሽን ኤንቲ በእድ ዳሮ ማላለትዶሶና። ሽን ማጫሴኮ፥ “አይ ኮያይ?” ዎይኮ የሱሳኮ፥ “ኢራ አይስ ኦደታይ?” ግዳይ ኦንካ ባዋ።
JOH 4:28 ሄሳፈ ጉየ፥ ማጫስያ ባ ሃꬃ ኦቱዋ አጋዳ ጉየ ካታማ ባዳ አሳኮ፥
JOH 4:29 “ታኒ ኦꬅዳባ ኡባ ታዉ ኦድዳ አድያ በአናዉ የꬍተ። እ ክርስቶሳ ግዳንደሻ?” ያጋሱ።
JOH 4:30 አሳይ ካታማፐ ከይድ የሱሳኮ ብዶሶና።
JOH 4:31 ሄስ ሀንሽን፥ እያ ታማረት የሱሳኮ፥ “ጉꬃባ ማርክ” ያግድ ዎስዶሶና።
JOH 4:32 ሽን እ፥ “ታዉ ህንተ ኤሮና ካꬅ ታ መይስ ደኤስ” ያግስ።
JOH 4:33 ሄሳ ግሾ፥ እያ ታማረት ባንታ ግዶን፥ “እያዉ ምያባ አስ ኤሆና አገና” ያግዶሶና።
JOH 4:34 የሱሲ ኤንታኮ፥ “ታ ካꬃይ ታና ኪትዳይሳ ሸንያ ኦꬃናይሳነ እያ ኦሱዋ ፖላናይሳ።
JOH 4:35 ህንተ፥ ‘ኦይዱ አጌናፐ ጉየ ካꬃይ ጫከታና’ ጌከትዬ? ሽን ታኒ ህንተዉ ኦዳይስ፤ ካꬃይ ካፅድ ሺሾስ ጋክዳይሳ ሎይꬅ ፄልተ።
JOH 4:36 ዘረይስነ ጫከይስ እስፈ ኡፋይታና መላ ጫከይስ ዳሞዝያ ኤኬስ ቃስ ካꬃ መርና ደኦስ ሺሼስ።
JOH 4:37 ህዛ፥ ‘እሶይ ዘሬስ፤ ሀንኮይ ቃስ ጫኬስ’ ግያ ኦዳይ ቱማ።
JOH 4:38 ህንተ ዳቡርቦናይሳ ሺሻና መላ ታኒ ህንተና ኪታስ። ሀራት ኦꬅ ዳቡርዳሱዋን ገልድ ህንተ ኤንታ ዳቡራ አይፍያ ኤክደታ” ያግስ።
JOH 4:39 ማጫስያ፥ “እ፥ ታኒ ኦꬅዳ ኡባባ ኦድስ” ጋዳ ማርካትዳ ግሾ ሄ ካታማን ደእያ ሳማረ አሳፐ ዳሮት የሱሳ አማንዶሶና።
JOH 4:40 ሳማረ አሳይ የሱሳኮ ይድ፥ ባንታ ማታን ጋምአና መላ የሱሳ ዎስን እ ያን ናምኡ ጋላስ ኡትስ።
JOH 4:41 እ ኦድያ ቃላ ግሾ ካሰይሳፈ ዳሮ አሳይ አማንዶሶና።
JOH 4:42 ቃስ ኤንቲ ማጫሴኮ፥ “ሀእ ኑ አማነይ ኑ ሁጰን እ ገይሳ ስእዳ ግሾሳፈ አትሽን፥ ኔኒ ማርካትዳ ግሾሳ ግደና። ቃስ እ ቱማ ሀ አላምያ አሸይሳ ግደይሳ ኑኒ ኤርዳ” ያግዶሶና።
JOH 4:43 ናምኡ ጋላሳፐ ጉየ፥ የሱሲ ያፐ ከይድ ጋልላ ቢታ ብስ።
JOH 4:44 የሱሲ ባ ሁጰን፥ “ናበይ ባ ቢታን ቦንቸተና” ያግድ ካሰትድ ኦድስ።
JOH 4:45 የሱሲ ጋልላ ጋክዳ ዎደ ጋልላ አሳይ እያ ሞክዶሶና። አይስ ጊኮ፥ ፓስካ ባኣለ ቦንችያ ጋላስ ኤንቲ የሩሳላመን ደእያ ግሾ እ ኦꬅዳባ ኡባ በእዶሶና።
JOH 4:46 የሱሲ ሃꬃ ዎይነ ኡሽ ላምዳ በሳ፥ ጋልላን ደእያ ቃና ካታማ ብስ። ቅፍርናሆማን ካዎ ኬꬃን ኦꬅያ እስ ሹማስ ናአይ ሀርገትስ።
JOH 4:47 የሱሲ ይሁዳፐ ጋልላ ይዳይሳ ሄ ሹማይ ስእድ እያኮ ይስ። ሀይቃናዉ ማትዳ ባ ናኣ ብድ ፓꬃና መላ የሱሳ ዎስስ።
JOH 4:48 የሱሲ ሹማኮ፥ “ፆሳይ ኦꬅያ ማላታታነ ኦራꬃባታ በኦና ደእሸ ህንተ ኡባራካ አማነከታ” ያግስ።
JOH 4:49 ሹማይ ዛሪድ፥ “ጎዳዉ፥ ታ ናአይ ሀይቆና ደእሽን ታራ የꬋርክ” ያግስ።
JOH 4:50 የሱሲ፥ “ነ ሶ ባ፤ ነ ናአይ ፓፃና” ያግስ። ሄ ሹማይ የሱሲ ግዳይሳ አማንድ ባ ሶ ብስ።
JOH 4:51 እ ባ ሶ ብሽን እያ አይለት እያኮ ይሸ እያራ ኦገን ጋሄትድ፥ “ነ ናአይ ፓፅስ” ግዶሶና።
JOH 4:52 እ ባ አይለታ ባ ናኣስ አይ ሳተን ሎእዳኮ ኦይችስ። ኤንቲ ዛሪድ፥ “ዝነ ላፑን ሳተን ምሻይ አግስ” ያግዶሶና።
JOH 4:53 ናኣ አዋይ የሱሲ ባኮ፥ “ነ ናአይ ፓፃና” ግዳይ ሄ ሳትያን ግደይሳ አኬክስ። ሄሳ ግሾ፥ እነ እያ ሶ አሳ ኡባይ አማንዶሶና።
JOH 4:54 ሄስ የሱሲ ይሁዳፐ ጋልላ ይድ ኦꬅዳ ናምአንꬆ ማላታ።
JOH 5:1 ሄሳፈ ጉየ፥ የሱሲ አይሁደት ቦንችያ ባልያ ቦንቻናዉ የሩሳላመ ብስ።
JOH 5:2 የሩሳላመን ዶርሳ ፐንግያ ማታን እብራወꬆ ዶናን ቤተሳይዳ ግያ ተቀትዳ ሃꬅ ደኤስ። ሄ ተቀት ኡትዳ ሃꬃ ማታን እቻሹ ሸምፕያ በሳት ደኦሶና።
JOH 5:3 [ሄሳን ሃꬃይ ቃፃናይሳ ናግያ] ዳሮ ሀርጋንቾት፥ ቆቀት፥ ዎበትነ ጉንዳት ዝንእዶሶና።
JOH 5:4 [አይስ ጊኮ፥ እስ እስ ቶሆ ጎዳ ኪታንቾይ ተቀትዳ ሃꬃን ዎꬍድ ሃꬃ ቃꬄስ። ሃꬃይ ቃፅያ ዎደ ኮይሮ ገልዳ ኡራይ ባና ኦይክዳ አይ ሀርገፈካ ፓፄስ።]
JOH 5:5 ሄ በሳን ሀስታማነ ሆስፑን ላይꬅ ሀርገትዳ እስ አደይ ደኤስ።
JOH 5:6 የሱሲ ያን ዝንእዳ አድያ በእድ፥ ቃስ ዳሮ ዎደ ሀርገትዳይሳ ኤርድ አድያኮ፥ “ፓፃናዉ ኮያይ?” ያግስ።
JOH 5:7 ሀርጋንቾይ ዛሪድ፥ “ጎዳዉ፥ ሃꬃይ ቃፅያ ዎደ ታና ሃꬃን የግያ አስ ባዋ። ታኒ ገላና ሀንያ ዎደ ሀራይ ታፐ ስንꬃትድ ገል ክቼስ” ያግስ።
JOH 5:8 የሱሲ እያኮ፥ “ደንዳ ኤቃ፤ ነ አልጋ ቶካዳ ባ” ያግስ።
JOH 5:9 አደይ ኢራካ ፓፅስ፤ ባ አልጋ ቶክድ ብስ። ሄስ ሳምባታ ጋላሳን ሀንስ።
JOH 5:10 ሄሳ ግሾ፥ አይሁደት ፓፅዳ አድያኮ፥ “ሀች ሳእ ሳምባታ፤ ኔኒ ነ አልጋ ቶከይስ ዎጋ ግደና” ያግዶሶና።
JOH 5:11 ሽን አደይ፥ “ታና ፓꬅዳይስ፥ ነ አልጋ ቶካዳ ባ ግስ” ያግድ ዛርስ።
JOH 5:12 ኤንቲ እያኮ፥ “ነና፥ ነ አልጋ ቶካዳ ባ ግዳይ እ ኦኔ?” ያግድ ኦይችዶሶና።
JOH 5:13 ሽን የሱሲ ሄ በሳን ዳሮ አሳ ግዶራ ኤርሶና ካንꬅድ ብዳ ግሾ አደይ ባና ፓꬅዳይ ኦነኮ ኤረና።
JOH 5:14 የሱሲ ጉየፐ ሄ አድያ ፆሳ ኬꬃን ደምድ፥ “ሄኮ፥ ኔኒ ፓፃዳሳ፤ ሀይሳፈ ኢታባይ ነና ጋኮና መላ ዛራዳ ናጋራ ኦꬆፋ” ያግስ።
JOH 5:15 ሄሳፈ ጉየ፥ አደይ ብድ ባና ፓꬅዳይስ የሱሳ ግድዳይሳ አይሁደታስ ኦድስ።
JOH 5:16 የሱሲ ሄሳ ሳምባታ ጋላስ ኦꬅዳ ግሾ፥ አይሁደት የሱሳ ጎዳ ኦይክዶሶና።
JOH 5:17 የሱሲ ዛሪድ፥ “ታ አዋይ ኡባ ዎደ ኦꬄስ፤ ታካ ኦꬃናዉ በሴስ” ያግስ።
JOH 5:18 የሱሲ ሳምባታ ቦንቾና ግሾ ፃላላስ ግዶናሽን ፆሳይ ባ አዋ ግድ ባና ፆሳራ ጊግስዳ ግሾ፥ አይሁደት እያ ዎꬋናዉ ካሰፐ ምንꬅድ ኮይዶሶና።
JOH 5:19 የሱሲ ዛሪድ፥ “ታኒ ህንተዉ ቱማ ኦዳይስ፤ ናአይ ባርካ አይኮካ ኦꬃናዉ ዳንዳኤና። እ ባ አዋይ ኦꬅሽን በኦይሳ ፃላላ ኦꬄስ። አዋይ ኦይሳ ናአይካ ኦꬄስ።
JOH 5:20 አዋይ ባ ናኣ ዶስያ ግሾ እ ኦꬅያ ኦሶ ኡባ ባ ናኣ በሴስ። ህንተ ማላለታና መላ እ ሀይሳፈ አꬍያ ኦሶ ባ ናኣ በሳና።
JOH 5:21 አዋይ ሀይቅዳይሳታ ሀይቆፐ ደንꬅድ ኤንታዉ ደኦ እመይሳዳ ናአይካ ባ ኮየይሳታስ ደኦ እሜስ።
JOH 5:22 አዋይ ናኣስ ፕርዳ ማታ ኡባ እሚስፐ አትሽን፥ እ ኦናካ ፕርደና።
JOH 5:23 አሳ ኡባይ አዋ ቦንቸይሳዳ ናኣካ ቦንቻና። ናኣ ቦንቾና ኦንካ ናኣ ኪትዳ አዋካ ቦንቸና።
JOH 5:24 “ታኒ ህንተዉ ቱማ ኦዳይስ፤ ታ ቃላ ስኤይሳስነ ታና ኪትዳይሳ አማነይሳስ መርና ደኦይ ደኤስ። እ ሀይቆፐ ደኦን ፕንዳ ግሾ ፕርደተና።
JOH 5:25 ታኒ ህንተዉ ቱማ ኦዳይስ፤ ሀይቅዳ አሳይ ፆሳ ናኣ ቃላ ስእያ ዎደይ ያና፤ ሄስካ ሀእ። ሄ ቃላ ስኤይ ደኦን ዳና።
JOH 5:26 አዋይ ደኦስ ፑልቶ ግድዳይሳዳ ናኣካ ደኦስ ፑልቶ ኦꬅስ።
JOH 5:27 ናአይ አሳ ናአ ግድያ ግሾ አዋይ ናኣስ ፕርዳ ማታ እሚስ።
JOH 5:28 “ዱፎን ደኤይሳት እያ ቃላ ስእድ ደንድያ ዎደይ ያና ግሾ ሀይሳን ማላለቶፍተ።
JOH 5:29 ሎኦ ኦꬅዳይሳት ደኦን ዳናዉ ቃስ ኢታ ኦꬅዳይሳት ፕርዳ ኤካናዉ ዱፎፐ ደንዳና።
JOH 5:30 “ታኒ ታ ማታን አይብባካ ኦꬃናዉ ዳንዳእከ። ፆሳይ ታዉ ኦድዳይሳዳ ፕርዳይስ። ታኒ ታና ኪትዳይስ ኮያባ ኦꬃይስፐ አትሽን፥ ታ ኮያባ ኦꬆና ግሾ ታ ፕርዳይ ቱማ።
JOH 5:31 “ታኒ ታባ ማርካትኮ ታ ማርካተꬃይ ቱማ ግደና።
JOH 5:32 ታባ ማርካትያ ሀር ደኤስ፤ እ ታባ ማርካተይስ ቱማ ግደይሳ ታኒ ኤራይስ።
JOH 5:33 “ህንተ ዮሃንሳኮ አሰ ኪትን እ ቱማስ ማርካትስ።
JOH 5:34 ታኒ ሄሳ ህንተዉ ኦደይ፥ ህንተ አታና መላ ጋዳፐ አትሽን፥ አሳ ማርካተꬅ ታዉ ኮሽን ግደና።
JOH 5:35 ዮሃንስ ሙቃዳዳ ኤፅሸ ፖእስ። ህንተ ጉꬃ ዎደ እያ ፖኡዋን ኡፋይትደታ።
JOH 5:36 “ሽን ታዉ ዮሃንሳፐ አꬍያ ማርክ ደኤስ። ታኒ ኦꬃና መላ ታ አዋይ ታዉ እምዳ ኦሶት ታባ ማርካቶሶና፤ አዋይ ታና ኪትዳይሳ ቆንጭሶሶና።
JOH 5:37 “ቃስ ታና ኪትዳ አዋይካ ባ ሁጰን ታባ ማርካቴስ። ህንተ እያ ቃላ ኡባራካ ስእቤከታ ዎይኮ እያ ማላ በእቤከታ።
JOH 5:38 እ ኪትዳይሳ ህንተ አማኖና ግሾ እያ ቃላይ ህንተ ዎዛናን ባዋ።
JOH 5:39 “ጌሻ ማፃፋታፐ መርና ደኦ ደማናባ ህንተዉ ዳንን ኤንታ ፕልጌታ፤ ኤንቲ ታባ ማርካቶሶና።
JOH 5:40 ሽን ህንተ ደኦ ደማናዉ ታኮ ያናዉ ኮየከታ።
JOH 5:41 “አሳፐ ታኒ ቦንቾ ኮይከ።
JOH 5:42 ሽን ታኒ ህንተ ዎዛናን ፆሳ ሲቆይ ባይናይሳ ኤራይስ።
JOH 5:43 ታኒ ታ አዋ ማታን ያስ፥ ሽን ታና ሞክበከታ። ሀራይ ባ ማታን ያ ዎደ እያ ሞኬታ።
JOH 5:44 ህንተ እሶይ እሱዋፈ ቦንቾ ኮየይሳት፥ እስ ፆሳፈ ያ ጋላታ ኤካናዉ ኮዮናይሳት፥ ዋንድ ታና አማናናዉ ዳንዳኤቲ?
JOH 5:45 “ታኒ ታ አዋ ስንꬃን ህንተና ሞትያባ ህንተዉ ዳኖፖ። ህንተና ሞታናይ ህንተ ኡፋይሳን ናግያ ሙሰ።
JOH 5:46 ህንተ ሙሰ አማንዳባ ግድያኮ እ ታባ ፃፍዳ ግሾ ታናካ አማናናሽን።
JOH 5:47 ሽን ህንተ እ ፃፍዳይሳ አማኖና እፅኮ ታ ቃላ ዋትድ አማናኔ?” ያግስ።
JOH 6:1 ሄሳፈ ጉየ፥ የሱሲ ፅብራዶሳ ጌተትያ ጋልላ አባፈ ሄፍንꬅ ፕንስ።
JOH 6:2 እ ሀርጋንቾታ ፓሶን ኦꬅዳ ማላታ በእዳ ግሾ፥ ዳሮ አሳይ እያ ካልዶሶና።
JOH 6:3 የሱሲ ዙማ ቦላ ከይድ፥ ያን ባ ታማረታራ እስፈ ኡትስ።
JOH 6:4 አይሁደት ቦንችያ ፓስካ ባኣለ ጋላሳይ ጋክስ።
JOH 6:5 የሱሲ ዳሮ አሳይ ባኮ የይሳ በእድ ፍልጶሳኮ፥ “ሀ አሳ ኡባ ሙዛናዉ ግድያ ካꬅ አዉፐ ሻማኔ?” ያግስ።
JOH 6:6 እ ሄሳ ፍልጶሳ ፓጫናዉ ግስፐ አትሽን፥ እ ባ ሁጰን አይ ኦꬃነኮ ኤሬስ።
JOH 6:7 ፍልጶስ ዛሪድ የሱሳኮ፥ “ሀር አቶሽን፥ ሁጰን ሁጰን፥ እስ እስ ባርስ ጋꬃናዉ፥ ናምኡ ፄቱ ድናረን ኡይꬁ ሻምንካ ግደና” ያግስ።
JOH 6:8 ቃስ የሱሳ ታማረታፐ እሶይ፥ ስሞን ጰፅሮሳ እሻይ እንድርያስ፥
JOH 6:9 “እቻሹ ባንጋ ኡይꬅነ ናምኡ ሞሎ ኦይክዳ እስ ናአይ ሀይሳን ደኤስ፥ ሽን ሀ አሳ ኡባስ ሄስ አይ ማዳኔ?” ያግስ።
JOH 6:10 የሱሲ ባ ታማረታኮ፥ “አሳ ኡትስተ” ያግስ። ሄ በሳን ዳሮ ማት ደኤስ፤ አሳ ኡባይ ኡትስ። አደ አሳ ታይቦይ እቻሹ ሙኩሉ ግዳና።
JOH 6:11 የሱሲ ኡይꬃ ኤክድ ፆሳ ጋላት ስሚድ ያን ኡትዳ አሳስ ግሽስ። ሞሉዋካ ኤክድ ሄሳዳ ኦꬅድ እምን፥ አሳይ ባ ኮይዳይሳ መላ ምስ።
JOH 6:12 ኤንቲ ኡባይ ካልዳፐ ጉየ፥ የሱሲ ባ ታማረታኮ፥ “እስባይካ ኢቶና መላ አትዳ ቲፍያ ሺሽተ” ያግስ።
JOH 6:13 ሄሳ ግሾ፥ ኤንቲ ኡባ ሺሽዶሶና። አሳይ ምን አትዳ ባንጋ ኡይꬃ ቲፍያ ሺሽድ ታማነ ናምኡ ጋይታ ኩንꬅዶሶና።
JOH 6:14 አሳይ የሱሲ ኦꬅዳ ማላታታ በእዳ ዎደ፥ “ሀይስ ቱማ ሀ አላምያ ያና ጌተትዳ ናብያ” ያግዶሶና።
JOH 6:15 የሱሲ ኤንቲ እያ ኦይክድ ዎልቃን ካዎ ኦꬃናዉ ሀነይሳ ኤርድ፥ ባርካ ዙማ ቦላ ዛሪድ ከይስ።
JOH 6:16 ሳአይ ኦማርስዳ ዎደ የሱሳ ታማረት አባኮ ዎꬍዶሶና።
JOH 6:17 ሳአይ ቃምዳ ግሾነ የሱሲ ቡሮ ኤንታኮ ይቦና ግሾ እያ ታማረት ዎጎሎን ገልድ አባ ፕንድ ቅፍርናሆማ ባናዉ ደንድዶሶና።
JOH 6:18 ዎልቃማ ጫርኮይ ጫርክዳ ግሾ አባይ ቃፄስ።
JOH 6:19 እቻሹ ዎይኮ ኡሱፑን ክሎ ምትረ ግደይሳ መላ ኤንቲ አባ ፕꬍድ ብዳፐ ጉየ፥ የሱሲ አባ ቦላራ ሄመትሸ የይሳ በእድ ያይዶሶና።
JOH 6:20 ሽን እ፥ “ባቦፍተ፥ ታና” ያግስ።
JOH 6:21 ኤንቲ ኡፋይትድ እያ ዎጎሉዋን ገልስዶሶና፤ ኢራካ ዎጎሎይ ኤንቲ ብያ አባ ጋፃ ጋክስ።
JOH 6:22 ዎንተꬃ ጋላስ አባፈ ሄፍንꬃን አትዳ ዳሮ አሳይ እስ ዎጎሎ ፃላል ደኤይሳ በእዶሶና። የሱሲ ባ ታማረታራ ዎጎሉዋን ገልድ፥ ኤንታራ ቦናይሳነ ኤንቲ ባንታርካ ብዳይሳ አኬክዶሶና።
JOH 6:23 ሽን ፅብራዶሳፐ ሀራ ዎጎሎት የሱሲ ፆሳ ጋላትን፥ አሳይ ኡይꬃ ምዳ በሳ ይዶሶና።
JOH 6:24 አሳይ የሱሲ ዎይኮ እያ ታማረት ያን ባይናይሳ በእድ፥ የሱሳ ኮያናዉ ዎጎሎታን ገልድ ቅፍርናሆማ ብዶሶና።
JOH 6:25 አሳይ የሱሳ አባፈ ሄፍንꬃን ደምዳ ዎደ፥ “አስታማርያዉ፥ ሃ አዉደ ያዲ?” ያግስ።
JOH 6:26 የሱሲ ዛሪድ፥ “ታኒ ህንተዉ ቱማ ኦዳይስ፤ ህንተ ታና ኮየይ ኡይꬅ ምድ ካልዳ ግሾሳፈ አትሽን፥ ማላታ በእዳ ግሾሳ ግደና።
JOH 6:27 ሳምያ ካꬃስ ኦꬆፍተ፥ ሽን መርና ደኦ እምያ ካꬃስ ኦꬅተ። ፆሳ አዋይ እ ኦꬃና መላ እያዉ ማታ እምዳ ግሾ ሄ ካꬃ አሳ ናአይ ህንተዉ እማና” ያግስ።
JOH 6:28 ያትን ኤንቲ፥ “ኑኒ ፆሳ ኦሱዋ ኦꬃናዉ አይ ኦꬃኔ?” ያግድ የሱሳ ኦይችዶሶና።
JOH 6:29 የሱሲ ዛሪድ፥ “ህንተ ኦꬃና መላ ፆሳይ ኮይያ ኦሶይ ሀይሳ፦ እ ኪትዳይሳ አማንተ” ያግስ።
JOH 6:30 ኤንቲ ዛሪድ፥ “ኑኒ በእድ፥ ነና አማናና መላ አይ ማላታ ነ በሳኔ? ነ አይ ኦꬃኔ?
JOH 6:31 ጌሻ ማፃፋን፥ ‘ኤንቲ ማና መላ ኡይꬁ ሳሎፐ እሚስ’ ጌተትድ ፃፈትዳይሳዳ ኑ አዋት መላ ቢታን ማና ምዶሶና” ያግዶሶና።
JOH 6:32 የሱሲ፥ “ታኒ ህንተዉ ቱማ ኦዳይስ፤ ህንተዉ ሳሎፐ ቱማ ኡይꬃ እምዳይ ታ አዋፐ አትሽን፥ ሙሰ ግደና።
JOH 6:33 ህዛ፥ ፆሳይ እምያ ኡይꬃይ ሳሎፐ ዎꬍዳይስ አላምያስ ደኦ እመይሳ” ያግስ።
JOH 6:34 ኤንቲ ዛሪድ፥ “ጎዳዉ፥ ኑስ ሄ ኡይꬃ ኡባ ዎደ እማ” ያግዶሶና።
JOH 6:35 የሱሲ፥ “ታኒ ደኦ እምያ ኡይꬃ፤ ታኮ ያ ኦንካ ኡባራካ ኮሻተና። ቃስ ታና አማንያ ኡራይ ኡባራካ ሳሞተና።
JOH 6:36 ሽን ታኒ ህንተዉ ኦዳስ፤ ህንተ ታና በእደታ፥ ሽን አማነከታ።
JOH 6:37 ታ አዋይ ታዉ እምያ ኡባይ ታኮ ያና፤ ቃስ ታኮ ያ ኦናካ ካረ የድከ።
JOH 6:38 ታኒ ታ ኮያባ ኦꬃናዉ ግዶናሽን ታና ኪትዳይስ ኮያባ ኦꬃናዉ ሳሎፐ ያስ።
JOH 6:39 ታና ኪትዳይስ ኮየይ ሀይሳ፦ ታኒ እ ታዉ እምዳ ኡባታካ ዉርሰꬃ ጋላስ ሀይቆፐ ደንꬃና መላፐ አትሽን፥ እሱዋካ ꬋይሳና መላ ኮየና።
JOH 6:40 ህዛ፥ ታ አዋይ ኮየይ ሄሳ፦ ናኣ በእድ አማንያ ኡባይ መርና ደኡዋ ኤካና፤ ታኒ ሄ ኡባ ዉርሰꬃ ጋላስ መርና ደኦስ ሀይቆፐ ደንꬃና” ያግስ።
JOH 6:41 የሱሲ፥ “ታኒ ሳሎፐ ዎꬍዳ ኡይꬃ” ግዳ ግሾ፥ አይሁደት እያ ቦላ ዙዙምዶሶና።
JOH 6:42 ኤንቲ፥ “ሀይስ ኑኒ እያ አዋነ እያ አይዉ ኤርያ ዮሰፋ ናኣ የሱሳ ግደኔ? ያትን፥ እ ዋንድ፥ ‘ታኒ ሳሎፐ ዎꬋስ’ ጋናዉ ዳንዳኢ?” ያግዶሶና።
JOH 6:43 የሱሲ ዛሪድ፥ “እሶይ እሱዋራ ዙዙንꬃ አግተ።
JOH 6:44 ታና ኪትዳ ታ አዋይ ታኮ ኤህያ አሳፐ አትሽን፥ ታኮ ያናዉ ዳንዳእያ ኦንካ ባዋ። ታኒ ዉርሰꬃ ጋላስ እያ መርና ደኦስ ሀይቆፐ ደንꬃና።
JOH 6:45 ናበት፥ ‘ፆሳይ አሳ ኡባ ታማርሳና’ ያግድ ፃፍዶሶና። አዋ ስኤይስነ እያፐ ታማርያ ኦንካ ታኮ ዬስ።
JOH 6:46 ፆሳ ማታፐ ይዳይሳፈ አትሽን፥ አዋ በእዳይ ኦንካ ባዋ፤ እያ ፃላል አዋ በእስ።
JOH 6:47 “ታኒ ህንተዉ ቱማ ኦዳይስ፤ ታና አማንያ ኦደስካ መርና ደኦይ ደኤስ።
JOH 6:48 ታኒ ደኦ እምያ ኡይꬃ።
JOH 6:49 ህንተ አዋት መላ ቢታን ማና ምዶሶና፥ ሽን ሀይቅዶሶና።
JOH 6:50 ሳሎፐ ያ ኡይꬃይ ሀይሳ፤ ሄ ኡይꬃ ምያ ኦንካ ሀይቀና።
JOH 6:51 ሳሎፐ ይዳ ደኦ ኡይꬃይ ታና። ኦንካ ሀ ኡይꬃ ሚኮ መርናዉ ዳና። ቃስ ሀ አላመይ ደኦን ዳና መላ ታኒ ህንተዉ እማና ኡይꬃይ ታ አሹዋ” ያግስ።
JOH 6:52 አይሁደት፥ “ሀ አደይ ባ አሹዋ ኑ ማና መላ ኑስ ዋትድ እማናዉ ዳንዳኢ?” ያግድ ባንታ ግዶን ፓላምዶሶና።
JOH 6:53 ሄሳ ግሾ፥ የሱሲ ኤንታኮ፥ “ታኒ ህንተዉ ቱማ ኦዳይስ፤ አሳ ናኣ አሹዋ፥ ህንተ ሞና እፅኮ፥ ቃስ እያ ሱꬃ ህንተ ኡዮና እፅኮ፥ ህንተዉ ደኦይ ባዋ።
JOH 6:54 ታ አሹዋ ምያ ኡራስነ ታ ሱꬃ ኡያ ኡራስ መርና ደኦይ ደኤስ። ታኒ ዉርሰꬃ ጋላስ እያ ሀይቆፐ ደንꬃና።
JOH 6:55 ታ አሾይ ቱማ ካꬅ፤ ታ ሱꬃይካ ቱማ ኡሹ።
JOH 6:56 ታ አሹዋ ምያ ኡራይነ ታ ሱꬃ ኡያ ኡራይ ታናን ደኤስ፤ ታካ እያን ደአይስ።
JOH 6:57 ደኦ አዋይ ታና ኪትን፥ ታኒ እያ ባጋራ ደኦን ደኤይሳዳ፥ ታና ምያ ኡራይካ ታ ጋሶን ደኦን ዳና።
JOH 6:58 ሳሎፐ ዎꬍዳ ኡይꬃይ ሀይሳ፦ ህንተ አዋት ምድ ሀይቅዳ ማና መላ ግደና፤ ሀ ኡይꬃ ምያ ኡራይ መርናዉ ዳና” ያግስ።
JOH 6:59 የሱሲ ቅፍርናሆማ ካታማን አይሁደ ዎሳ ኬꬃን ሀይሳ ታማርስስ።
JOH 6:60 የሱሳ ታማረታፐ ዳርያ ባጋይ ሄሳ ስእዳ ዎደ፥ “ሀይስ ገሎና ትምርተ፤ ሀይስ ኦደስ ገሊ?” ያግዶሶና።
JOH 6:61 የሱሲ ባ ታማረት ሄሳስ ዙዙምዳይሳ ኤርድ፥ “ሀይስ ህንተና ꬉቢ?
JOH 6:62 ያትን፥ አሳ ናአይ ካሰ ደእያሱዋ ፑደ ከይሽን ህንተ በእድ ዎይጋንደቲ?
JOH 6:63 ጌሻ አያናይ ደኦ እሜስ፤ አሳ ዎልቅ አይኮካ ማደና። ታ ህንተዉ ኦድያ ቃላይ ደኦ እምያ ጌሻ አያናፐ ዬስ።
JOH 6:64 ሽን ህንተ ግዶን አማኖናይሳት ደኦሶና” ያግስ። አማኖናይሳት ኦናንተኮ የሱሲ ኮይሮፐ ዶምድ ኤሬስ። ቃስ ባና አꬅድ እማናይ ኦነኮ ኤሬስ።
JOH 6:65 ቃስካ የሱሲ፥ “አዋይ ባ ጎና ኦንካ ታኮ ያናዉ ዳንዳኤና ጋዳ ታኒ ኦድዳይ ሄሳ ግሾሳ” ያግስ።
JOH 6:66 ሄሳ ጋሶን፥ የሱሳ ካለይሳታፐ ዳሮት እያ አግድ ጉየ ስምዶሶና፤ ዛር እያ ካልቦኮና።
JOH 6:67 የሱሲ ባ ታማነ ናምኡ ታማረታኮ፥ “ህንተካ አግድ ባናዉ ኮዬቲ?” ያግድ ኦይችስ።
JOH 6:68 ስሞን ጰፅሮስ ዛሪድ፥ “ጎዳዉ፥ ኑኒ ኦደኮ ባኔ? ነዉ መርና ደኦ እምያ ቃላይ ደኤስ።
JOH 6:69 ኔኒ ፆሳ ጌሻ ግደይሳ ኑኒ አማኖስነ ኤሮስ” ያግስ።
JOH 6:70 የሱሲ ኤንታኮ፥ “ታኒ ህንተና ታማነ ናምአታ ዶራብክና? ሽን ህንተፈ እሶይ ፃላሄ” ያግስ።
JOH 6:71 የሱሲ ሄሳ ግዳይ ስሞና ናኣ አስቆሮታ ይሁዳሳ። ይሁድ የሱሳ አꬅድ እማናዉ ደእያ ታማነ ናምኡ ታማረታፐ እሱዋ።
JOH 7:1 ሄሳፈ ጉየ፥ አይሁደት የሱሳ ዎꬋናዉ ኮይያ ግሾ እ ይሁዳ አግድ ጋልላን ስመረቴስ።
JOH 7:2 አይሁደት ቦንችያ ሻቃራ ባለይ ቦንቸታናዉ ማትስ።
JOH 7:3 ሄሳ ግሾ፥ የሱሳ እሻት፥ “ነ ታማረት ኔኒ ኦꬅያ ማላታታ በአና መላ ሀይሳፈ ደንዳዳ ይሁዳ ቢታ ባ።
JOH 7:4 ባዉ ኤረታናዉ ኮያ አስ ኦንካ ባ ኦሱዋ ገንና። ኔኒ ሀይሳታ ኦꬃዳ ነባ አላምያ ኤርሳ” ያግዶሶና።
JOH 7:5 እያ እሻት ሄሳ ግዳይ እያን አማንቦና ግሾሳ።
JOH 7:6 የሱሲ ኤንታኮ፥ “ታዉ እንጀ ዎደይ ጋክቤና፥ ሽን ህንተዉ ኡባ ዎደይ እንጀቴስ።
JOH 7:7 አላመይ ህንተና እፃናዉ ዳንዳኤና፥ ሽን ታኒ አላምያ ኦሶይ ኢታ ግደይሳ ማርካትያ ግሾ ታና እፄስ።
JOH 7:8 ህንተ ባልያ ቢተ፤ ታ ዎደይ ጋክቦና ግሾ ታኒ ባልያ ቢከ” ያግስ።
JOH 7:9 እ ሄሳ ግድ ጋልላን አትስ።
JOH 7:10 እያ እሻት ባኣለ ቦንቻናዉ ብዳፐ ጉየ የሱሲ ኦናካ ኤርሶና ቆሳን ሄ በሳ ብስ።
JOH 7:11 አይሁደት ባኣለ ቦንችያ በሳን፥ “እ አዉን ደኢ?” ያግድ እያ ኮይዶሶና።
JOH 7:12 አሳይ ካልካሽድ እያባ ኦደቶሶና። ባጋይ፥ “እ ሎኦ አስ” ግያ ዎደ ሀራት ቃስ፥ “አካይ፥ እ አሳ ባለꬄስ” ያጎሶና።
JOH 7:13 ሽን አይሁደ ሀላቃታስ ያይዳ ግሾ ኦንካ እያባ ቆንጨን ኦደተና።
JOH 7:14 ባልያ ቦንችድ ግዶ ጋꬅያ ዎደ የሱሲ ፆሳ ኬꬅ ብድ ታማርሶ ኦይክስ።
JOH 7:15 አይሁደት፥ “ሀ አደይ ትምርተ ታማሮና ሀይሳ ኡባ ዋት ኤርዴ?” ያግድ ማላለትዶሶና።
JOH 7:16 የሱሲ ዛሪድ፥ “ታ ታማርስያ ትምርተይ ታና ኪትዳ ፆሳ ማታፐ ያ ትምርተፈ አትሽን፥ ታባ ግደና።
JOH 7:17 ፆሳ ሸንያ ኦꬃናዉ ኮይያ ኦንካ ሀ ትምርተይ ፆሳ ማታፐ ያኮነ ዎይኮ ታኒ ታፐ ኦድያኮ ኤራና።
JOH 7:18 ባባ ኦድያ ኦንካ ባ ሁጰ ቦንቾ ኮዬስ። ሽን ባና ኪትዳይሳ ቦንቹዋ ኮይያ ኦንካ እ ቱማንቾ፤ እያን ዎርዶይ ባዋ።
JOH 7:19 ሙሰይ ህንተዉ ህግያ እሚስ፥ ሽን ህንተፈ ኦንካ ህግያ ናግቤና። ያትን አይስ ታና ዎꬋናዉ ኮዬቲ?” ያግስ።
JOH 7:20 አሳይ ዛሪድ፥ “ነና ፃላሄይ ኦይክስ፤ ነና ዎꬋናዉ ኦኔ ኮየይ?” ያግዶሶና።
JOH 7:21 የሱሲ፥ “ታኒ እስ ማላታ ኦꬅን ህንተ ኡባይ ማላለትደታ።
JOH 7:22 ህንተ፥ ህንተ ናይታ ቃፃራና መላ ሙሰይ ኪትስ። ሽን ቃፃሮ ህንተ ማይዛት ዶምዶሶናፐ አትሽን፥ ሙሰ ግደና። ሄሳ ግሾ፥ ህንተ ሳምባታ ጋላስ አደ ናይታ ቃፃሬታ።
JOH 7:23 ሙሰ ህገይ ኪትዳ ግሾ፥ ህንተ ሳምባታ ጋላስ ቃፃርያባ ግድኮ፥ ታኒ እስ አሳ ኩመꬃ አሳተꬃ ፓꬅዳ ግሾ፥ ታራ አይስ ካጬቲ?
JOH 7:24 ቱማ ፕርዳ ፕርድተፐ አትሽን፥ አሳ ሶምኦ በእድ ፕርዶፍተ” ያግስ።
JOH 7:25 የሩሳላመ አሳፐ እሶት እሶት፥ “ኤንቲ ዎꬋናዉ ኮይያ ኡራይ ሀይሳ ግደኔ?
JOH 7:26 ሄኮ፥ እ ቆንጨን ኦዴስ፤ ኤንቲ እያ አይኮካ ጎኮና። እ ክርስቶሳ ግደይሳ አይሁደ ሀላቃት ቱማ ኤርዶናሻ?
JOH 7:27 ክርስቶስ ያ ዎደ እ አዉፐ ያኮ ኦንካ ኤረና፥ ሽን እ አዉፐ ይዳኮ ኑ ኤሮስ” ያግዶሶና።
JOH 7:28 የሱሲ ፆሳ ኬꬃን ታማርስሸ ባ ቃላ ꬎቁ ኦꬅድ፥ “ቱማ ህንተ ታኒ ኦነኮነ ታ አዉፐ ይዳኮ ኤሬቲ? ታኒ ታ ማታን ያቢከ፥ ሽን ታና ኪትዳይስ ቱማንቾ፤ ህንተ እያ ኤረከታ።
JOH 7:29 ሽን ታኒ እ ኪትን እያ ማታፐ ይዳ ግሾ እያ ኤራይስ” ያግስ።
JOH 7:30 ሄሳ ግሾ፥ ኤንቲ እያ ኦይካናዉ ኮይዶሶና። ሽን እያ ዎደይ ቡሮ ጋክቦና ግሾ ኦንካ እያ ቦላ ኩሸ ዎꬅቤና።
JOH 7:31 ሽን ዳሮ አሳይ የሱሳ አማንድ፥ “ክርስቶስ ያ ዎደ ሀ ኡራይ ኦꬅዳ ማላታታፐ ዳርያ ማላታ ኦꬃነዬ?” ያግዶሶና።
JOH 7:32 ፋርሳወት ዳሮ አሳይ የሱሳባ ካልካሸይሳ ስእዶሶና። ካህነ ሀላቃትነ ፋርሳወት እያ ኦይꬅድ ቃሽሳናዉ ፆሳ ኬꬅ ናገይሳታ ኪትዶሶና።
JOH 7:33 የሱሲ፥ “ታኒ ህንተራ ጉꬃ ዎደ ጋምአና፤ ሄሳፈ ጉየ ታና ኪትዳይሳኮ ባና።
JOH 7:34 ህንተ ታና ኮያና፥ ሽን ደመከታ። ታኒ ደእያሱዋ ህንተ ያናዉ ዳንዳኤከታ” ያግስ።
JOH 7:35 አይሁደት እሶይ እሱዋራ፥ “ሀይስ ኑኒ ደሞናሶ አዉ ባና ሀኒ? ግርከ ካታማን ደእያ አይሁደታኮ ብድ ግርከታ ታማርሳናዉ ሀንዬ?
JOH 7:36 ‘ህንተ ታና ኮያና፥ ሽን ደመከታ’ ቃስ፥ ‘ታኒ ደእያሱዋ ህንተ ያናዉ ዳንዳኤከታ’ ጉሳይ አይ ጉሴ?” ያግዶሶና።
JOH 7:37 ባልያ ቦንችያ ጋላሳታፐ ዎልቃማነ ዉርሰꬃ ጋላሳን የሱሲ ደንድድ፥ ባ ቃላ ꬎቁ ኦꬅድ፥ “ሳሞትዳ ኦንካ ታኮ ይድ ኡዮ።
JOH 7:38 ታና አማንያ ኦንካ ጌሻ ማፃፋይ ግዳይሳዳ ደኦ እምያ ፑልቶ ሃꬃይ እያፐ ጎጋና” ያግስ።
JOH 7:39 እ ሄሳ ግዳይ እያ አማንዳይሳት ኤካናዉ ደእያ ጌሻ አያናባ። የሱሲ ቡሮ ቦንቸትቦና ግሾ፥ ሄ ዎደ ጌሻ አያናይ እመትቤና።
JOH 7:40 ሄ አሳፐ ዳሮት እ ገይሳ ስእድ፥ “ቱማ ሀይስ ናብያ” ያግዶሶና።
JOH 7:41 ሀራት ቃስ፥ “ሀይስ ክርስቶሳ” ያግዶሶና። ሽን ሀራት ቃስ፥ “ክርስቶስ ጋልላፐ ዋንድ ከዪ?
JOH 7:42 ጌሻ ማፃፋይ፥ ‘ክርስቶስ ዳዊታ ሼሻፐ ዳዊቲ ደእዳ ቤተለመ ካታማፐ ያና’ ያገነዬ?” ያግዶሶና።
JOH 7:43 ሄሳ ግሾ፥ የሱሳ ጋሶን አሳይ ባንታ ግዶን ሻከትዶሶና።
JOH 7:44 ሄ አሳፐ እሶት እሶት እያ ኦይካናዉ ኮይዶሶና፥ ሽን ኦንካ እያ ቦላ ኩሸ ዎꬅቤና።
JOH 7:45 ፆሳ ኬꬃ ናገይሳት ካህነ ሀላቃታኮነ ፋርሳወታኮ ጉየ ስም ይን ኤንቲ፥ “አይስ እያ ኤህበከቲ?” ያግድ ኦይችዶሶና።
JOH 7:46 ፆሳ ኬꬃ ናገይሳት ኤንታኮ፥ “ሀ አደይ ኦደተይሳꬆ ኦንካ ኦደተና” ያግድ ዛርዶሶና።
JOH 7:47 ፋርሳወት ዛሪድ፥ “እ ህንተናካ ባለꬅዴ?
JOH 7:48 አይሁደ ሀላቃታፐ ዎይኮ ፋርሳወተፐ እያ አማንዳ አስ ደኢ?
JOH 7:49 ሙሰ ህግያ ኤሮና ሀ አሳይ ባደትዳሳታ” ያግዶሶና።
JOH 7:50 ፋርሳወታፐ እሶይ ቃማ የሱሳኮ ብዳ ንቆድሞስ ኤንታኮ፥
JOH 7:51 “እስ አስ ግያባ ስኦና ዎይኮ እ አይ ኦꬅዳኮ ኤሮና ደእሸ ኮይሮትድ እያ ቦላ ፕርደይስ ኑ ህግያን ደኢ?” ያግስ።
JOH 7:52 ኤንቲ ዛሪድ፥ “ኔንካ ቃስ ጋልላ ቢታ አሴ? ጋልላ ቢታፈ ናበይ ከዮናይሳ ጌሻ ማፃፋፐ ፕልጋዳ ደማ” ያግዶሶና።
JOH 7:53 እሶይ እሶይ አግድ ባ ሶ ባ ሶ ብስ።
JOH 8:1 ሽን የሱሲ ሻማሆ ዙማ ቦላ ከይስ።
JOH 8:2 ቃስ ዎንተꬃ ጋላስ ጉራ ፆሳ ኬꬅ ስምስ። ዳሮ አሳይ እያኮ ይን ኡትድ ኤንታ ታማርስስ።
JOH 8:3 ህገ አስታማረትነ ፋርሳወት ላይማትሽን ኦይክዳ እስ ማጫስዉ እያኮ ኤህዶሶና። ኤንቲ አሳ ኡባ ስንꬃን እዮ ኤስድ፥
JOH 8:4 “አስታማርያዉ፥ ሀ ማጫስያ ላይማትሽን ኑ ኦይክዳ።
JOH 8:5 ሙሰ ህገይ ሀን መላ ማጫስ ሹቻን ጫደታ ሀይቃና መላ ኪቴስ። ያትን፥ ኔኒ ዎይጋይ?” ያግዶሶና።
JOH 8:6 ኤንቲ ሄሳ ግዳይ የሱሳ ፓጭድ እያ ሞትያባ ደማናሳ። ሽን የሱሲ ሆክድ ባ ብራን ቢታ ቦላ ፃፍስ።
JOH 8:7 ኤንቲ እያ ዛር ዛር ኦይችድ አጎና እፅን፥ ፑደ ꬎቁ ግድ፥ “ህንተ ግዶን ናጋራ ኦꬅቦና አስ ኮይሮትድ እዮ ሹቻን ጫዶ” ያግስ።
JOH 8:8 ቃስካ ሆክድ ቢታ ቦላ ፃፍስ።
JOH 8:9 ኤንቲ ሄሳ ስእዳ ዎደ ጭማታፐ ዶምድ እሶይ እሶይ ከይሸ ዉርዶሶና። የሱሳ ፃላል ሄ በሳን ኤቅዳ ማጫሴራ አትስ።
JOH 8:10 እ ፑደ ꬎቁ ግድ ማጫሴኮ፥ “ማጫሰተ፥ አሳት አዉ ብዶና? ነ ቦላ ፕርድዳይ ኦንካ ባዌ?” ያግስ።
JOH 8:11 ማጫስያ፥ “ጎዳዉ፥ ኦንካ ባዋ” ያጋሱ። የሱሲ ዛሪድ፥ “ታንካ ነ ቦላ ፕርድከ። ባ፤ ዛራዳ ናጋራ ኦꬆፋ” ያግስ።
JOH 8:12 ቃስካ የሱሲ አሳኮ፥ “ታኒ አላምያስ ፖኦ። ታና ካልያ ኦንካ ደኦ እምያ ፖኡዋ ኤካናፐ አትሽን፥ ꬉማን ስመረተና” ያግድ ኦድስ።
JOH 8:13 ፋርሳወት፥ “ኔኒ ነባ ማርካታሳ፥ ሽን ነ ማርካተꬃይ ቱማ ግደና” ያግዶሶና።
JOH 8:14 የሱሲ ዛሪድ፥ “ታኒ ታባ ማርካትኮካ ታ ማርካተꬃይ ቱማ። አይስ ጊኮ፥ ታኒ አዉፐ ይዳኮ ቃስ አዉ ብያኮ ኤራይስ፥ ሽን ህንተ ኤረከታ።
JOH 8:15 ህንተ አሳ ቆፋን ፕርደታ፤ ታኒ እስ አሳ ቦላካ ፕርድከ።
JOH 8:16 ታኒ ፕርድያባ ግድኮካ ታ ፕርዳይ ቱማ። አይስ ጊኮ፥ ታና ኪትዳ ታ አዋይ ታራ ደኤስፐ አትሽን፥ ታኒ ታርካ ደእከ።
JOH 8:17 ናምኡ አሳ ማርካተꬅ ቱማ ግደይስ ህንተ ህግያን ፃፈትስ።
JOH 8:18 ታኒ ታባ ታ ሁጰን ማርካታይስ፤ ቃስ ታና ኪትዳ ታ አዋይካ ታባ ማርካቴስ” ያግስ።
JOH 8:19 ኤንቲ፥ “ነ አዋይ አዉን ደኢ?” ያግድ እያ ኦይችዶሶና። የሱሲ ዛሪድ፥ “ህንተ ታና ዎይኮ ታ አዋ ኤረከታ። ታና ኤርዳባ ግድያኮ፥ ህንተ ታ አዋካ ኤራናሽን” ያግስ።
JOH 8:20 የሱሲ ፆሳ ኬꬃን ሙፃታ ሚሽያ የግያ ሳፅነይ ደእያ በሳን ሄሳ ታማርስስ። እያ ቃማይ ቡሮ ጋክቦና ግሾ ኦንካ እያ ኦይክቤና።
JOH 8:21 ቃስካ የሱሲ ኤንታኮ፥ “ታኒ ባና፤ ህንተ ታና ኮያና፥ ሽን ህንተ አቶተꬅ ደሞና ህንተ ናጋራን ሀይቃና። ታኒ ብያ በሳ ህንተ ባናዉ ዳንዳኤከታ” ያግስ።
JOH 8:22 አይሁደ ሀላቃት፥ “እ፥ ‘ታኒ ብያ በሳ ህንተ ባናዉ ዳንዳኤከታ’ ያጌስ። እ ባና ባርካ ዎꬋነዬ?” ያግዶሶና።
JOH 8:23 የሱሲ ዛሪድ፥ “ህንተ ጋርሳፈ፤ ታኒ ቦላፈ። ህንተ ሀ አላምያፐ፥ ታኒ ሀ አላምያፐ ግድከ።
JOH 8:24 ህንተ አቶተꬅ ደሞና ህንተ ናጋራን ሀይቃና ጋዳ ታኒ ህንተዉ ኦድዳይ ሄሳሳ። ‘ታኒ ታና ግደይሳ’ ህንተ አማኖና እፅኮ ህንተ አቶተꬅ ደሞና ህንተ ናጋራን ሀይቃና” ያግስ።
JOH 8:25 ኤንቲ፥ “ኔኒ ኦኔ?” ያግድ ኦይችዶሶና። የሱሲ ዛሪድ፥ “ታኒ፥ ኮይሮፐ ህንተዉ ኦድዳ ታና።
JOH 8:26 ታኒ ህንተባ ኦዳዳ ፕርድያባይ ዳሮባይ ደኤስ። ሽን ታና ኪትዳይስ ቱማንቾ፤ ቃስ ታኒ እያፐ ስእዳይሳ ፃላላ አላምያስ ኦዳይስ” ያግስ።
JOH 8:27 የሱሲ ባ አዋባ ኦደይሳ ኤንቲ አኬክቦኮና።
JOH 8:28 ሄሳ ግሾ፥ የሱሲ ኤንታኮ፥ “ህንተ አሳ ናኣ ፑደ ꬎቁ ኦꬅያ ዎደ ታኒ ታና ግደይሳ ህንተ ኤራና። ቃስካ ታኒ ታ ማታን አይኮካ ኦꬆናይሳነ ታ አዋይ ታና ታማርስዳይሳ ኦደይሳ ህንተ ኤራና።
JOH 8:29 ታና ኪትዳይስ ታራ ደኤስ። ታኒ ኡባ ዎደ እያ ኡፋይስያባ ኦꬅያ ግሾ እ ታና ታ ፃላላ አግቤና” ያግስ።
JOH 8:30 የሱሲ ሄሳ ኦድሽን ስእዳ ዳሮ አሳይ እያ አማንዶሶና።
JOH 8:31 የሱሲ ባና አማንዳ አሳታኮ፥ “ህንተ ታ ትምርትያስ ኪተትኮ ቱማ ታና ካለይሳታ።
JOH 8:32 ህንተ ቱማ ኤራና፤ ቱማይካ ህንተና አይለተꬃፈ ከሳና” ያግስ።
JOH 8:33 ኤንቲ ዛሪድ፥ “ኑኒ አብራሃመ ሼሽ፤ ኑኒ ኦደስካ አይለትቦኮ። ኔኒ ዎይጋዳ፥ ‘ህንተ አይለተꬃፈ ከያና’ ጋይ?” ያግዶሶና።
JOH 8:34 የሱሲ ዛሪድ፥ “ታኒ ህንተዉ ቱማ ኦዳይስ፤ ናጋራ ኦꬅያ ኦንካ ናጋራ አይለ።
JOH 8:35 አይለይ መርናዉ ሶ አሳራ ዴና፥ ሽን ናአይ መርናዉ ሶ አሳራ ደኤስ።
JOH 8:36 ናአይ ህንተና አይለተꬃፈ ከስኮ ህንተ አይለተꬃፈ ቱማ ከያና።
JOH 8:37 ህንተ አብራሃመ ሼሽ ግደይሳ ታኒ ኤራይስ። ሽን ታ ቃላይ ህንተ ዎዛናን ባይና ግሾ፥ ታና ዎꬋናዉ ኮዬታ።
JOH 8:38 ታኒ ታ አዋይ ታና በስዳይሳ ኦዳይስ፥ ሽን ህንተካ ህንተ አዋፐ ስእዳይሳ ኦꬄታ” ያግስ።
JOH 8:39 ኤንቲ ዛሪድ፥ “ኑ አዋይ አብራሃመ” ያግዶሶና። የሱሲ ኤንታኮ፥ “ህንተ አብራሃመ ናይታ ግድያኮ እ ኦꬅዳይሳ ኦꬃና።
JOH 8:40 ሽን ፆሳፈ ስእዳ ቱማ ኦድዳ ታና ህንተ ዎꬋናዉ ኮዬታ። አብራሃመይ ሄሳዳ ኦꬅቤና።
JOH 8:41 ህንተ፥ ህንተ አዋይ ኦꬅዳይሳ ኦꬄታ” ያግስ። ኤንቲ ዛሪድ፥ “ኑኒ ቱማ ፆሳ ናይታ፤ ኑስ እስ አዋይ ፆሳ ፃላል ደኤስ” ያግዶሶና።
JOH 8:42 የሱሲ ኤንታኮ፥ “ፆሳይ ቱማ ህንተ አዋ ግድያኮ ህንተ ታና ዶሳና፤ አይስ ጊኮ፥ ታኒ ፆሳ ማታፐ ያዳ ሀይሳን ደአይስ። ታና እ ኪትስፐ አትሽን፥ ታኒ ታ ማታን ያቢከ።
JOH 8:43 ታኒ ገይሳ ህንተ ስአናዉ ኮዮና ግሾ ታ ግያባይ ህንተዉ ገለና።
JOH 8:44 ህንተ፥ ህንተ አዋ ፃላሄ ናይታ። ቃስ ህንተ፥ ህንተ አዋይ አሞትያባ ኦꬃናዉ ኮዬታ። እ ኮይሮፐ ዶምድ ሸምፖ ዎይሳ። ቱም እያን ባይና ግሾ እ ቱማ እፄስ። ዎርዶይ እያዉ መꬎ ግድዳ ግሾነ እ ዎርዶ አዋ ግድያ ግሾ ዎርዶ ኦደትሸ ባፐ ኦደቴስ።
JOH 8:45 ታኒ ቱማ ኦዳይስ፥ ሽን ህንተ ታና አማነከታ።
JOH 8:46 ህንተፈ፥ ‘ኔኒ ናጋራ ኦꬅሽን ታ በአስ’ ጋናዉ ዳንዳኤይ ኦኔ? ታኒ ቱማ ኦደትያባ ግድኮ ታና አይስ አማነከቲ?
JOH 8:47 ፆሳ አስ ፆሳይ ግያባ ስኤስ። ህንተ ፆሳ አስ ግዶና ግሾ ፆሳይ ግያባ ስኤከታ” ያግስ።
JOH 8:48 አይሁደት ዛሪድ፥ “ ‘ኔኒ ሳማረ አስ፤ ነናን ቱና አያናይ ደኤስ’ ግሸ ልከ ግዶኮ?” ያግዶሶና።
JOH 8:49 የሱሲ ኤንታኮ “ታ ቦላ ቱና አያን ባዋ። ታኒ ታ አዋ ቦንቻይስ፥ ሽን ህንተ ታና ካዉሸታ።
JOH 8:50 ታኒ ታ ሁጰ ቦንቾ ኮይከ፤ ታኒ ቦንቸታና መላ ኮየይስነ ታዉ ፕርደይስ ደኤስ።
JOH 8:51 ታኒ ህንተዉ ቱማ ኦዳይስ፤ ታ ቃላ ናግያ ኦንካ ሀይቀና” ያግስ።
JOH 8:52 አይሁደት ዛሪድ፥ “ነ ቦላ ቱና አያናይ ደኤይሳ ኑኒ ሀእ ኤርዳ። አብራሃመይ ሀይቅስ፤ ናበትካ ሀይቅዶሶና። ሽን ኔኒ፥ ‘ታ ቃላ ናግያ ኦንካ ሀይቀና’ ያጋሳ።
JOH 8:53 ኔኒ ሀይቅዳ ኑ አዋ አብራሃመፐ አꬋዬ? ናበትካ ቃስ ሀይቅዶሶና። ኔኒ ነና ኦና ጋዳ ቆፓይ?” ያግዶሶና።
JOH 8:54 የሱሲ፥ “ታኒ ታና ቦንችኮ ታ ቦንቾይ ሀዳ። ህንተ፥ ‘ኑ ፆሳ’ ግያ ታ አዋይ እ ታና ቦንቼስ።
JOH 8:55 ህንተ እያ ኤሮና እፅኮ ታኒ እያ ኤራይስ። ታኒ እያ ኤርከ ጊኮ ህንተ መላ ዎርዶታይስ። ሽን ታኒ እያ ኤራይስ፤ ቃስ እያ ቃላካ ናጋይስ።
JOH 8:56 ህንተ አዋይ አብራሃመይ ታ ዩሳ ጋላሳ በእድ ኡፋይታናዉ አሞትስ፤ በእድካ ኡፋይትስ” ያግስ።
JOH 8:57 አይሁደት ዛሪድ፥ “ሀር አቶሽን፥ ነዉ እሻታሙ ላይꬅ ኩምቤናሽን ዋናዳ አብራሃመ በአስ ጋይ?” ያግዶሶና።
JOH 8:58 የሱሲ ኤንታኮ፥ “ታኒ ህንተዉ ቱማ ኦዳይስ፤ አብራሃመይ የለታናፐ ካሰ፥ ‘ታኒ ታና’ ” ያግስ።
JOH 8:59 ሄሳ ግሾ፥ ኤንቲ የሱሳ ጫዳናዉ ሹች ኤክዶሶና። ሽን የሱሲ ኤንታፈ ጌምድ ፆሳ ኬꬃፈ ከይድ ብስ።
JOH 9:1 የሱሲ ብሸ የለቶሳፐ ቆቀ ግድድ ደእያ እስ አድያ በእስ።
JOH 9:2 እያ ታማረት፥ “አስታማርያዉ፥ ሀ አደይ ቆቀ ግድድ የለታና መላ ናጋራ ኦꬅዳይ ኦኔ? እ ኦꬅደየ ዎይኮ እያ የልዳይሳት ኦꬅዶና?” ያግድ ኦይችዶሶና።
JOH 9:3 የሱሲ፥ “ፆሳ ኦሶይ እያ ቦላ ቆንጫና መላፐ አትሽን፥ እ ዎይኮ እያ የልዳይሳት ናጋራ ኦꬅዳ ግሾ ግደና።
JOH 9:4 ሳእ ጋላስ ደእሽን ታና ኪትዳይሳ ኦሱዋ ኑ ኦꬃናዉ በሴስ። ኦንካ ኦꬃናዉ ዳንዳኦና ቃማይ ዬስ።
JOH 9:5 ታኒ አላምያን ደአሸ አላምያስ ፖኦ” ያግስ።
JOH 9:6 የሱሲ ሄሳ ግድ ሳአን ጩትስ። ባ ጩቻን ጉꬃ ቢታ ላኮꬅድ ሄ ኡርቃን ቆቀ አድያ አይፍያ ትይስ።
JOH 9:7 ያትድ፥ “ባዳ ሳልሆመ (ሳልሆመ ጉሳይ ኪተትዳይሳ ጉሱ) ጌተትያ ተቀትዳ ሃꬃን ነ አይፍያ ሜጨታ” ያግስ። ሄሳ ግሾ፥ አደይ ብድ ባ አይፍያ ሜጨትድ ፄልሸ ስምስ።
JOH 9:8 አድያ ሾሮትነ አደይ ካሰ ዎስሽን በእዳ አሳይ፥ “ሀይስ ኡትድ ዎስያ አድያ ግደነዬ?” ያግዶሶና።
JOH 9:9 እስ እስ አሳይ፥ “ሀይስ እያ” ያግዶሶና። ሀራት ቃስ፥ “አካይ፥ ሀይስ እያ ዳኔስፐ አትሽን፥ እያ ግደና” ያግዶሶና። ሽን አደይ፥ “ኤ፥ ታና” ያግስ።
JOH 9:10 ኤንቲ እያኮ፥ “ያትን ነ አይፈይ ዋንድ ፄልዴ?” ያግድ ኦይችዶሶና።
JOH 9:11 እ ዛሪድ፥ “የሱሳ ጌተትያ አደይ ጉꬃ ኡርቃ ላኮꬅድ ታ አይፍያ ትይድ፥ ‘ሳልሆመ ባዳ ነ አይፍያ ሜጨታ’ ያግን፥ ታኒ ባዳ ሜጨታዳ ፄላ አጋስ” ያግስ።
JOH 9:12 ኤንቲ እያኮ፥ “እ አዉን ደኢ?” ያግድ ኦይችዶሶና። አደይ፥ “ታኒ ኤርከ” ያግስ።
JOH 9:13 ኤንቲ ካሰ ቆቀ፥ ሽን ሀእ ፄልዳ አድያ ፋርሳወታኮ ኤፍዶሶና።
JOH 9:14 የሱሲ ኡርቃ ላኮꬅድ አድያ አይፍያ ፓꬅዳ ጋላሳይ ሳምባታ ጋላስ።
JOH 9:15 ሄሳ ግሾ፥ አደይ ዋንድ ፄልዳኮ ፋርሳወት እያ ዛር ኦይችዶሶና። አደይ ኤንታኮ፥ “እ ታ አይፍያን ጉꬃ ኡርቃ ትይስ። ታ አይፍያ ሜጨታዳ ሀእ ፄላይስ” ያግስ።
JOH 9:16 ፋርሳወተፐ እሶት እሶት፥ “ሀይሳ ኦꬅዳ አደይ ሳምባታ ህግያ ናጎና ግሾ ፆሳ ማታፐ ይቤና” ያግዶሶና። ሽን ሀራት፥ “ናጋራንቾ አስ ሀይሳ መላ ማላታ ዋት ኦꬃናዉ ዳንዳኢ?” ያግድ ባንታ ግዶን ሻከትዶሶና።
JOH 9:17 ሄሳ ግሾ፥ ፋርሳወት አድያኮ፥ “እ ነ አይፍያ ፄልስዳ ግሾ ነ እያባ ዎይጋይ?” ያግዶሶና። አደይ፥ “እ ናበ” ያግስ።
JOH 9:18 አይሁደ ሀላቃት፥ እያ አይዉነ አዋ ፄግድ ኦይቻና ጋካናዉ፥ አደይ ካሰ ቆቀ ግድዳይሳነ ሀእ እ ፄለይሳ አማንቦኮና።
JOH 9:19 ኤንቲ እያ አይዉነ እያ አዋኮ፥ “ህንተ ‘ቆቀ ግድድ የለትስ’ ግያ ህንተ ናአይ ሀይሴ? ያትን፥ ሀእ ዋንድ ፄልዴ?” ያግድ ኦይችዶሶና።
JOH 9:20 እያ የልዳይሳት፥ “ሀይስ ኑ ናኣ ግድዳይሳነ ቆቀ ግድድ እ የለትዳይሳ ኑ ኤሮስ።
JOH 9:21 ሽን ሀእ እ ዋንድ ፄልዳኮ ቃስ እያ አይፍያ ኦን ፓꬅዳኮ ኑኒ ኤሮኮ። እያ ኦይችተ። እ ባና ኤርዳ አስ ግድያ ግሾ ባባ ኦዳናዉ ዳንዳኤስ” ያግዶሶና።
JOH 9:22 እያ የልዳይሳት ሄሳ ግዳይ አይሁደታስ ያይዳ ግሾሳ። አይስ ጊኮ፥ አይሁደት፥ የሱሲ እ ክርስቶሳ ያግድ ማርካትያ አስ ደእኮ ሄ ኡራ አይሁደ ዎሳ ኬꬃፈ ህላናዉ ኮይሮትድ ዞረ ቃችዶሶና።
JOH 9:23 እያ የልዳይሳት፥ “እ ባና ኤርዳ አስ፤ እያ ኦይችተ” ያግዳይ ሄሳሳ።
JOH 9:24 ሄሳ ግሾ፥ ቆቀ ግድድ የለትዳ አድያ ኤንቲ ዛር ፄግድ፥ “ቱማ ኦዳናዉ ፆሳን ጫቃ፤ ሀ አደይ ናጋራንቾ ግደይሳ ኑ ኤሮስ” ያግዶሶና።
JOH 9:25 አደይ ዛሪድ፥ “እ ናጋራንቾ ግደይሳ፥ ታ ኤርከ። ታኒ ቆቀ ግደይሳነ ሀእ ፄለይሳ ሄ እስባ ኤራይስ” ያግስ።
JOH 9:26 ኤንቲ ዛሪድ፥ “እ ነዉ አይ ኦꬅዴ? እ ነ አይፍያ ዋት ፓꬅዴ?” ያግዶሶና።
JOH 9:27 እ ኤንታኮ፥ “ታኒ ህንተዉ ኦዳስ፥ ሽን ስእቤከታ። አይስ ዛር ስአናዉ ኮዬቲ? ህንተካ እያ ታማረ ግዳናዉ ኮዬትዬ?” ያግስ።
JOH 9:28 ኤንቲ እያ ጫይድ፥ “ነ ሄ ኡራ ታማረ ግዳ፤ ኑኒ ሙሰ ታማረ።
JOH 9:29 ፆሳይ ሙሰስ ኦድዳይሳ ኑኒ ኤሮስ፥ ሽን ሀር አቶሽን ሀ ኡራይ እ አዉፐ ይዳኮካ ኑ ኤሮኮ” ያግዶሶና።
JOH 9:30 አደይ ኤንታኮ፥ “እ አዉፐ ይዳኮ ህንተ ኤሮናይስ ማላልስያባ፥ ሽን እ ታ አይፍያ ፓꬅስ።
JOH 9:31 ፆሳ ቦንቸይሳነ እ ኮያባ ኦꬅያ ኡራ ፆሳይ ስኤስፐ አትሽን፥ ናጋራንቾታ ስኤና።
JOH 9:32 ሳሎይ ሳእ መቶሳፐ ቆቀ ግድድ የለትዳ አሳ አይፈ ፓꬅዳይ ኦንካ ባዋ።
JOH 9:33 ሀ አደይ ፆሳፈ ኪተትቦናባ ግድያኮ እስባካ ኦꬃናዉ ዳንዳኤና” ያግስ።
JOH 9:34 ኤንቲ ዛሪድ፥ “ኔኒ ናጋራን የለታዳ ድጭዳይስ ኑና ታማርሳናዉ ኮያይ?” ያግዶሶና። እያ አይሁደ ዎሳ ኬꬃፈ ህልዶሶና።
JOH 9:35 የሱሲ ኤንቲ አድያ ከስዳይሳ ስእዳ ዎደ እያ ደምድ፥ “አሳ ናኣ አማናይ?” ያግድ ኦይችስ።
JOH 9:36 አደይ የሱሳኮ፥ “ጎዳዉ፥ ታኒ እያ አማናና መላ እ ኦኔ? ታዉ ኦዳርኪ?” ያግስ።
JOH 9:37 የሱሲ አድያኮ፥ “ኔኒ እያ በአዳሳ፤ ሀ ኔራ ኦደተይስ እያ” ያግስ።
JOH 9:38 አደይ ዛሪድ፥ “ጎዳዉ፥ አማናይስ” ያግድ የሱሳስ ጎይንስ።
JOH 9:39 የሱሲ፥ “ቆቀት ፄላና መላነ ፄለይሳት ቆቃና መላ ታኒ ፕርዳናዉ ሀ አላምያ ያስ” ያግስ።
JOH 9:40 እያራ ደእያ ጉꬃ ፋርሳወት ሄሳ ስእድ፥ “ኑ ቆቀዬ?” ያግድ ኦይችዶሶና።
JOH 9:41 የሱሲ፥ “ህንተ ቆቀ ግድያኮ ህንተዉ ናጋራ ግደና። ሽን ሀእ ህንተ ፄሎስ ግያ ግሾ ህንተ፥ ህንተ ናጋራን ደኤታ” ያግስ።
JOH 10:1 የሱሲ፥ “ታኒ ህንተዉ ቱማ ኦዳይስ፤ ዶርሳ ግርበ ግዶ ፐንገራ ግዶና ሀራሶራ ገልያ ኦንካ ካይሶነ ፓንጋ።
JOH 10:2 ሽን ፐንገራ ገለይስ ዶርሳታ ሄመይሳ።
JOH 10:3 ፐንግያ ናገይስ እያዉ ፐንግያ ዶዬስ፤ ዶርሳትካ እያ ቃላ ስኦሶና። እ ባ ዶርሳታ ኤንታ ሱንꬃን ሱንꬃን ፄጌስ፤ ኤንታ ካለꬅድ ካረ ከሴስ።
JOH 10:4 እ ባ ዶርሳታ ካረ ከስዳፐ ጉየ ኤንታ ስንꬃን ሄመቴስ። ኤንቲ እያ ቃላ ኤርያ ግሾ እያ ካሎሶና።
JOH 10:5 ሀራ ኡራ ቃላ ኤንቲ ኤሮና ግሾ እያፐ ባቃቶሶናፐ አትሽን፥ እያ ጌዶ ካሎኮና” ያግስ።
JOH 10:6 የሱሲ ኤንታዉ ሀ ሌምሱዋ ኦድስ፥ ሽን እ አይ ግዳኮ ኤንቲ አኬክቦኮና።
JOH 10:7 ዛሪድ የሱሲ ኤንታኮ፥ “ታኒ ህንተዉ ቱማ ኦዳይስ፤ ታኒ ዶርሳታስ ፐንገ።
JOH 10:8 ታፐ ስን ይዳ ኡባይ ካይሶነ ፓንጋ፥ ሽን ዶርሳት ኤንታ ስእቦኮና።
JOH 10:9 ፐንገይ ታና፤ ታ ባጋራ ገልያ ኦንካ አታና። እ ታ ባጋራ ገላናነ ከያና፤ ሎኦ ሄመትያ በሲ ደማና።
JOH 10:10 ካይሶይ ካይሶታናዉ፥ ሹካናዉነ ꬋይሳናዉ ዬስፐ አትሽን፥ ሀራባስ ዬና። ታኒ ኤንታዉ ደኦይ ዳና መላነ ኩምድ ፓላሀና መላ ያስ።
JOH 10:11 “ታኒ ሎኦ ሄንꬃንቾ፤ ሎኦ ሄንꬃንቾይ ባ ዶርሳታ ግሾ ባ ሸምፑዋ አꬅድ እሜስ።
JOH 10:12 ኡነ ሄምያ አስ ዶርሳታ ጎዳነ ሄንꬃንቾ ግዶና ግሾ ሱꬉመይ ያ ዎደ በእድ ዶርሳታ አግድ ቤስ። ሄሳ ግሾ፥ ሱꬉመይ ዶርሳታ ኦይክድ ላሌስ።
JOH 10:13 ኡነ ሄመይስ ሚሸስ ሄምያ ግሾነ ዶርሳታባይ እያ ቆፍሶና ግሾ ዶርሳታ አግድ ባቃቴስ።
JOH 10:14 “ታኒ ሎኦ ሄንꬃንቾ። ታ አዋይ ታና ኤረይሳዳ ታንካ ታ አዋ ኤራይስ። ሄሳዳካ፥ ታኒ ታ ዶርሳታ ኤራይስ፤ ታ ዶርሳትካ ታና ኤሮሶና። ታኒ ታ ዶርሳታ ግሾ ታ ሸምፑዋ አꬃ እማይስ።
JOH 10:16 ሀ ዉድያን ባይና ሀራ ዶርሳት ታዉ ደኦሶና። ታኒ ኤንታካ ኤሀናዉ በሴስ። ኤንቲ ታ ቃላ ስአና፤ ኤንቲ እስ ዉደ ግዳና፤ ሄንꬃንቾይካ እሱዋ።
JOH 10:17 “ታኒ ታ ሸምፑዋ አꬃ እማዳ ዛራ ኤክያ ግሾ ታ አዋይ ታና ዶሴስ።
JOH 10:18 ታ ዶሳዳ ታ ሸምፑዋ አꬃ እማይስፐ አትሽን፥ ታፐ ኦንካ ኤከና። ታኒ ታ ሸምፑዋ አꬃ እማናዉነ ዛራ ኤካናዉ ማት ታዉ ደኤስ። ታኒ ኦꬃና መላ ታ አዋይ ታና ኪትዳይስ ሀይሳ” ያግስ።
JOH 10:19 ሄሳ እ ግዳ ግሾ፥ አይሁደታ ግዶን ቃስካ ሻከተꬅ መትስ።
JOH 10:20 ኤንታፈ ዳርያ ባጋይ፥ “እያን ቱና አያናይ ደኤስ! እ ጎዬስ! እ ግያባ አይስ ስኤቲ?” ያግዶሶና።
JOH 10:21 ሀራት ቃስ፥ “ፃላሄይ ኦይክዳ አስ ሀይሳዳ ኦደተና። ቱና አያን ቆቀ አይፈ ፄልሳናዉ ዳንዳእዬ?” ያግዶሶና።
JOH 10:22 የሩሳላመን ፆሳ ኬꬃ አንጅስዳ ጋላሳታ ቦንችያ ባለይ ጋክስ፤ ሄ ዎደ ሳእ ባልጎ።
JOH 10:23 የሱሲ ፆሳ ኬꬃን ሶሎሞነ ባራንዳን ስመረቴስ።
JOH 10:24 አይሁደት የሱሳ ዩሾን ሺቅ ኤቅድ፥ “ኔኒ ኑና አዉደ ጋካናዉ ስራ ዎꬃኔ? ኔኒ ክርስቶሳ ግድኮ አነ ኑስ ጌሻዳ ኦዳ” ያግዶሶና።
JOH 10:25 የሱሲ ዛሪድ ኤንታኮ፥ “ታኒ ህንተዉ ኦዳስ፤ ሽን ታና አማነከታ። ታኒ ታ አዋይ ታዉ እምዳ ማታን ኦꬅያ ኦሶይ ታባ ማርካቴስ።
JOH 10:26 ሽን ታኒ ህንተዉ ኦድዳይሳዳ ህንተ ታ ዶርሰ ግዶና ግሾ አማነከታ።
JOH 10:27 ታ ዶርሳት ታ ቃላ ስኦሶና። ታኒ ኤንታ ኤራይስ፤ ኤንትካ ታና ካሎሶና።
JOH 10:28 ታኒ ኤንታዉ መርና ደኡዋ እማይስ፤ ኤንቲ ኡባራካ ꬋዮኮና። ኦንካ ታ ኩሸፐ ኤንታ ቦንቅ ኤካናዉ ዳንዳኤና።
JOH 10:29 ኤንታ ታዉ እምዳ ታ አዋይ ኡባፈ አꬌስ ኦንካ ታ አዋ ኩሸፐ ኤንታ ቦንቅ ኤካናዉ ዳንዳኤና።
JOH 10:30 ታነ ታ አዋይ እስኖ” ያግስ።
JOH 10:31 አይሁደት የሱሳ ጫዳናዉ ቃስካ ሹች ደንꬅዶሶና።
JOH 10:32 የሱሲ ኤንታኮ፥ “ታኒ ኦꬃና መላ ታ አዋይ ታዉ እምዳ ዳሮ ሎኦ ኦሶታ ህንተና ኦꬃ በሳስ። ሄሳታፐ አዉሳ ግሾ ታና ሹቻን ጫዳናዉ ኮዬቲ?” ያግስ።
JOH 10:33 አይሁደት ዛሪድ፥ “ኑኒ ነና ነ ሎኦ ኦሶ ግሾ ሹቻን ጫዳናዉ ኮዮኮ። ሽን ኔኒ ፆሳ ጫይያ ግሾነ አሰ ግዳሸ ኔኒ፥ ነና ፆሰ ግያ ግሾሳ” ያግዶሶና።
JOH 10:34 የሱሲ ዛሪድ፥ “ጌሻ ማፃፋን ፆሳይ፥ ‘ህንተ ፆሳታ’ ግዳይስ ፃፈትቤኔ?
JOH 10:35 ጌሻ ማፃፋይ መርናዉ ላመተና። ፆሳይ ባ ቃላ እምዳ አሳታ፥ ‘ፆሳታ’ ግድ ፄግኮ፥
JOH 10:36 አዋይ ዶርድ ሀ አላምያ ኪትዳ ታና ፆሳ ናአ ዋትድ ‘ፆሳ ጫያሳ’ ያገቲ?
JOH 10:37 ታኒ ታ አዋይ ኦይሳ ኦꬆና እፅኮ ታና አማኖፕተ።
JOH 10:38 ሽን ታኒ ኦꬅያባ ግድኮ ህንተ ታና አማኖና እፅኮካ፥ ታ አዋይ ታናን ደኤይሳነ ታካ ታ አዋን ደኤይሳ ህንተ ኤራና መላ ታ ኦሱዋ አማንተ” ያግስ።
JOH 10:39 ቃስካ ኤንቲ እያ ኦይካናዉ ኮይዶሶና፥ ሽን እ ኤንታፈ ከስ ኤክስ።
JOH 10:40 ዮሃንስ ካሰ ፃማቅያ በሳ፥ ዮርዳኖሰ ሻፋፐ ሄፍንꬅ የሱሲ ፕንድ ያን ደእስ።
JOH 10:41 ዳሮ አሳይ የሱሳኮ ይድ፥ “ዮሃንስ ማላታ ኦꬅቤና፥ ሽን እ ሀ አድያባ ኦድዳባይ ኡባይ ቱማ” ያግዶሶና።
JOH 10:42 ያን ዳሮ አሳይ የሱሳ አማንዶሶና።
JOH 11:1 ብታነ ጉታን አላዛራ ጌተትያ እስ አደይ ሀርገትስ። ብታነይ ማይራማነ እ ምችያ ማርታ ደእያ ጉታ።
JOH 11:2 ሄ ማይራማ ጎዳ ቶሁዋ ሽቶ ትያዳ ባ ብናናን እያ ቶሁዋ ቁችዳሮ። ሀርገትዳይ እ እሻ አላዛራ።
JOH 11:3 ሄሳ ግሾ፥ ምቸት፥ “ጎዳዉ፥ ነ ዶሰይስ ሀርገትስ” ግድ የሱሳኮ ኪትዶሶና።
JOH 11:4 የሱሲ ሄሳ ስእዳ ዎደ፥ “ሀ ሀርገይ፥ ፆሳይነ እያ ናአይ ቦንቸታና መላፐ አትሽን፥ ሀይቆስ ጋꬅያ ሀርገ ግደና” ያግስ።
JOH 11:5 የሱሲ ማርታ፥ እ ምችዉነ አላዛራ ዶሴስ።
JOH 11:6 ሽን አላዛር ሀርግዳይሳ የሱሲ ስእድ ባ ደእያ በሳን ናምኡ ጋላስ ጋምእስ።
JOH 11:7 ሄሳፈ ጉየ፥ የሱሲ ባ ታማረታኮ፥ “ዛሪድ ይሁዳ ቢታ ቦስ” ያግስ።
JOH 11:8 እያ ታማረት ዛሪድ፥ “አስታማርያዉ፥ ጉꬃ ዎደፐ ካሰ አይሁደት ነና ሹቻን ጫድድ ዎꬋናዉ ኮይዶሶና፤ ሀእካ ያ ባኔ?” ያግዶሶና።
JOH 11:9 የሱሲ፥ “እስ ጋላሳን ታማነ ናምኡ ሳተይ ደኤስ ግደነዬ? ጋላስ ሄመትያ አስ ሀ አላምያ ፖኡዋ በእያ ግሾ ꬉበተና።
JOH 11:10 ሽን ቃማ ሄመትያ ኦንካ ፖኦይ ባይና ግሾ፥ ꬉበቴስ” ያግስ።
JOH 11:11 የሱሲ ሄሳ ግዳፐ ጉየ ኤንታኮ፥ “ኑ ዶስያ አላዛር ꬍስክስ፥ ሽን እያ ደንꬃናዉ ታኒ ባና” ያግስ።
JOH 11:12 እያ ታማረት ዛሪድ፥ “ጎዳዉ፥ እ ꬍስክዳባ ግድኮ እያዉ ሎአና” ያግዶሶና።
JOH 11:13 የሱሲ አላዛር ሀይቅዳይሳ ኦድስ፥ ሽን ኤንታዉ ጮ ꬍስኮ ዳንስ።
JOH 11:14 ሄሳ ግሾ፥ የሱሲ ጌሽድ ኤንታኮ፥ “አላዛር ሀይቅስ።
JOH 11:15 ህንተ አማናና መላ ታኒ ሄ በሳን ደኦናይሳስ ህንተ ግሾ ኡፋይታይስ። አነ የꬍተ፤ እያኮ ቦስ” ያግስ።
JOH 11:16 ሄሳፈ ጉየ፥ ድድሞሳ ጌተትያ ቶማስ ባ ላገ ታማረታኮ፥ “አስታማርያራ ሀይቃናዉ ኑካ ቦስ” ያግስ።
JOH 11:17 የሱሲ ጋክያ ዎደ አላዛር ሞገትን ኦይዱ ጋላስ ግድስ።
JOH 11:18 ብታነይ የሩሳላመፐ ሄꬑ ክሎ ምትረ መላ ሃኬስ።
JOH 11:19 ዳሮ አይሁደት ማርታነ ማይራሞ ኤንታ እሻይ ሀይቅዳይሳስ ምንꬃናዉ ይዶሶና።
JOH 11:20 ማርታ የሱሲ ይዳይሳ ስአዳ እያ ሞካናዉ ከያሱ፥ ሽን ማይራማ ሶን አታሱ።
JOH 11:21 ማርታ የሱሳኮ፥ “ጎዳዉ፥ ኔኒ ሀይሳን ደእዳባ ግድያኮ ታ እሻይ ሀይቀናሽን።
JOH 11:22 ሽን ሀእ ግድኮካ ኔኒ ዎስያባ ፆሳይ ነዉ እማናይሳ ታኒ ኤራይስ” ያጋሱ።
JOH 11:23 የሱሲ፥ “ነ እሻይ ሀይቆፐ ደንዳና” ያግስ።
JOH 11:24 ማርታ እያኮ፥ “ዉርሰꬃ ጋላስ እ ሀይቆፐ ደንዳናይሳ ኤራይስ” ያጋሱ።
JOH 11:25 የሱሲ ኢኮ፥ “ታኒ ደንዶነ ደኦ፤ ታና አማንያ ኦንካ ሀይቅኮካ ደኦን ዳና።
JOH 11:26 ቃስ ደኦን ደኤይነ ታና አማንያ ኦንካ ሀይቀና። ሄሳ ኔኒ አማናይ?” ያግስ።
JOH 11:27 ማርታ ዛራዳ፥ “ጎዳዉ፥ ኤ ታኒ አማናይስ! ኔኒ ፆሳ ናኣ፥ አላምያ ያናዉ ደእያ ክርስቶሳ ግደይሳ ታኒ አማናይስ” ያጋሱ።
JOH 11:28 ማርታ ሄሳ ግዳፐ ጉየ፥ ባዳ ባ ምችዉ ጌማን ፄጋዳ፥ “አስታማረይ ይድ ነና ኮዬስ” ያጋሱ።
JOH 11:29 ማይራማ ሄሳ ስእዳ ዎደ ኤለሳ ደንዳ ኤቃዳ የሱሳኮ ባሱ።
JOH 11:30 ሄ ሳተን የሱሲ ማርታራ ጋሄትዳ በሳን ደኤስ፤ ቡሮ ጉታ ጋክቤና።
JOH 11:31 ማይራሞ ምንꬅሸ ኢራ ሶን ደእያ አይሁደት፥ እያ ደንዳ ኤቃዳ ኤለሳዳ ካረ ከይዳይሳ በእድ፥ ዱፎ ባዳ ዬካናዉ ሀንያ ዳንን እዮ ካልድ ከይዶሶና።
JOH 11:32 ማይራማ የሱሲ ደእያሱዋ ባዳ እያ በእዳ ዎደ እያ ቶሁዋ ቦላ ኩንዳዳ፥ “ጎዳዉ፥ ኔኒ ሀይሳን ደእዳባ ግድያኮ ታ እሻይ ሀይቀናሽን” ያጋሱ።
JOH 11:33 የሱሲ ማይራማነ ኢራ ደእያ፥ አይሁደት ዬከይሳ በእድ፥ ባ ዎዛናን ዳሮ ሴለትድ፥
JOH 11:34 “አዉን ሞግደቲ?” ያግድ ኦይችን፥ “ጎዳዉ፥ ያዳ በአ” ያግድ ዛርዶሶና።
JOH 11:35 የሱሲ አፉፅስ።
JOH 11:36 ሄሳ ግሾ፥ አይሁደት፥ “እ አላዛራ አይ መላ ዶስያኮ በእተ” ያግዶሶና።
JOH 11:37 ሽን ኤንታፈ እሶት እሶት፥ “ሀይስ ቆቅያ ፄልስዳይስ ሀ አደይ ሀይቆና መላ ኦꬃናዉ ዳንዳኤነሽን?” ያግዶሶና።
JOH 11:38 ቃስካ የሱሲ ሴለትድ፥ አላዛር ሞገትዳ ዱፉዋ ብስ። ሄ ዱፎይ ሹቻን ጎርደትዳ ጎንጎሎ።
JOH 11:39 የሱሲ፥ “ሹቻ ደንꬅተ” ያግድ ኪትስ። ማርታ፥ “ጎዳዉ፥ እ ሀይቆሳፐ ኦይዱ ጋላስ ግድዳ ግሾ፥ ሀእ ፅንቃና” ያጋሱ።
JOH 11:40 የሱሲ ማርታኮ፥ “ነ አማንያባ ግድኮ ፆሳ ቦንቹዋ በአናይሳ ታኒ ነዉ ኦዳብክና?” ያግስ።
JOH 11:41 ኤንቲ ሹቻ ደንꬅን የሱሲ ሳሎ ፑደ ፄልድ፥ “አዋዉ፥ ታና ነ ስእዳ ግሾ ነና ጋላታይስ።
JOH 11:42 ነ ኡባ ዎደ ታና ስኤይሳ ታኒ ኤራይስ። ሽን ሀይሳን ኤቅዳ አሳይ ኔኒ ታና ኪትዳይሳ አማናና መላ ታኒ ኤንታ ግሾ ሀይሳ ጋይስ” ያግስ።
JOH 11:43 የሱሲ ሄሳ ግዳፐ ጉየ፥ ባ ቃላ ꬎቁ ኦꬅድ፥ “አላዛራ፥ ሃ ከያ!” ያግስ።
JOH 11:44 ሀይቅዳ አደይ ዚትዳ መላ ኩሸይነ ቶሆይ ሻሎን ቃሸትድ ደእሽን እያ አይፈይ ካረይ ጎዘትዳ መላ ዱፉዋፐ ከይስ። የሱሲ ኤንታ፥ “ብርሽተ፥ ቦ ጊተ!” ያግስ።
JOH 11:45 ሄሳ ግሾ፥ ማይራምኮ ይዳ አይሁደታፐ ዳሮት የሱሲ ኦꬅዳይሳ በእድ እያ አማንዶሶና።
JOH 11:46 ሽን ኤንታፈ እሶት እሶት ፋርሳወታኮ ብድ የሱሲ ኦꬅዳይሳ ኤንታዉ ኦድዶሶና።
JOH 11:47 ሄሳፈ ጉየ፥ ካህነ ሀላቃትነ ፋርሳወት ሻንጉዋ ሺሽድ፥ “ሀ አደይ ዳሮ ማላታታ ኦꬅያ ግሾ ኑ አይ ኦꬅኖ?
JOH 11:48 ኑኒ እያ ስእ ግድ አግኮ አሳ ኡባይ እያ አማናና። ቃስ ሮመ ቢታ አሳት ይድ ኑ ፆሳ ኬꬃነ ኑ ደርያ ꬋይሳና” ያግዶሶና።
JOH 11:49 ኤንታፈ እሶይ ቃያፋ ገይስ፥ ሄ ላይꬅ ካህነ ሀላቃ ግድዳይስ፥ “ህንተ አይኮካ ኤረከታ!
JOH 11:50 አሳ ኡባይ ꬋየይሳፈ አሳ ኡባ ግሾ እስ አስ ሀይቀይስ ሎኦ ግደይሳ ኤረከቲ?” ያግስ።
JOH 11:51 እ ሄሳ ባፐ ግቤና። ሽን ሄ ላይꬅ ካህነ ሀላቃ ግድያ ግሾ፥ የሱሲ አይሁደ አሳ ግሾ ሀይቃናዉ በሰይሳ ትንብተ ኦድስ።
JOH 11:52 ቃስ የሱሲ አይሁደ አሳ ፃላላስ ግዶናሽን ላለትድ ደእያ ፆሳ አሳ ኡባ እስፈ ሺሻናዉነ እስ አስ ኦꬃናዉ ሀይቃና።
JOH 11:53 ሄ ጋላሳፐ ዶምድ ኤንቲ እያ ዎꬋናዉ ማቀትዶሶና።
JOH 11:54 ሄሳ ግሾ፥ የሱሲ አይሁደታ ግዶን ቆንጨን ስመረትቤና። ሽን መላ ቢታ ማታን ደእያ ኤፍሬማ ጉታ ብስ። ባ ታማረታራ ሄ በሳን ጋምእስ።
JOH 11:55 አይሁደት ቦንችያ ፓስካ ጋላሳይ ማትስ። ቃስ ዳሮ አሳይ ባንታና ጌሻናዉ ፓስካ ቦንችያ ጋላሳይ ጋካናፐ ስን ሄ ቢታፈ የሩሳላመ ብዶሶና።
JOH 11:56 ኤንቲ ፆሳ ኬꬃን ኤቅድ የሱሳ ዩሳ ናግያ ግሾ፥ “አይ ቆፔቲ? የሱሲ ባልያ ቦንቻናዉ ዬኔ?” ያግድ እሶይ እሱዋ ኦይችዶሶና።
JOH 11:57 ካህነ ሀላቃትነ ፋርሳወት የሱሳ ኦይካናዉ፥ እ ደእያሱዋ ኤርያ ኦንካ ባንታዉ ኦዳና መላ ኪትዶሶና።
JOH 12:1 ፓስካ ቦንችያ ጋላሳፐ ኡሱፑን ጋላስ ስንꬃትድ፥ የሱሲ ሀይቆፐ ደንꬅዳ አላዛር ደእያ ጉታ፥ ብታነ ብስ።
JOH 12:2 ሄ በሳን ኤንቲ እያዉ ካሆ ጊግስዶሶና። አላዛር የሱሳራ እስፈ ጋይታ ቦላ ኡትዳሽን ማርት ኤንታና እማታዉሱ።
JOH 12:3 ማይራማ ናርዶሰ ጌተትያ ዳሮ አልኦ ጌሻ ሽቶ ኤሀዳ የሱሳ ቶሁዋ ትያሱ። ባ ብናናን እያ ቶሁዋ ቁቻሱ፤ ኬꬃ ኡባይ ሽቶ ሳዎን ቶንኩ ግስ።
JOH 12:4 ሽን የሱሳ ታማረታፐ እሶይ፥ የሱሳ አꬅድ እማናይስ፥ አስቆሮታ ይሁዳ፥
JOH 12:5 “አይስ ሀ ሽቶይ ሄꬑ ፄቱ ድናረን ባይዘትድ፥ ሚሸይ ማንቆታስ እመተኔ?” ያግስ።
JOH 12:6 እ ካይሶ ግድዳ ግሾ ሄሳ ግስፐ አትሽን፥ ማንቆታስ ቃትድ ግቤና። እ ሚሸ ካርፂታ ኦይከይሳ ግድያ ግሾ ኡባ ዎደ እያፐ ባዉ ኤኬስ።
JOH 12:7 የሱሲ፥ “እያ ባዉ ደእያባ ታ ሞጎ ጋላሳስ ምንጅዳ ግሾ እዮ አጋግተ።
JOH 12:8 ማንቆት ኡባ ዎደ ህንተራ ዳና፥ ሽን ታኒ ኡባ ዎደ ህንተራ ደእከ” ያግስ።
JOH 12:9 ሄ ዎደ ዳሮ አሳይ የሱሲ ብታነን ደኤይሳ ስእድ ያ ብዶሶና። ኤንቲ የሱሳ ፃላላ ግዶናሽን፥ እ ሀይቆፐ ደንꬅዳ አላዛራካ በአናዉ ብዶሶና።
JOH 12:10 ሄሳ ግሾ፥ ካህነ ሀላቃት አላዛራካ ቃስ ዎꬋናዉ ማቀትዶሶና።
JOH 12:11 አይስ ጊኮ፥ አላዛራ ጋሶን ዳሮ አይሁደት ኤንታና እፅድ የሱሳ አማኖሶና።
JOH 12:12 ዎንተꬃ ጋላስ ፓስካ ቦንችያ በሳ ይዳ ዳሮ አሳይ የሱሲ የሩሳላመ በይሳ ስእድ፥
JOH 12:13 ዛምባ ሀይꬅ ኤክድ እያ ሞካናዉ ከይዶሶና። ባንታ ቃላ ꬎቁ ኦꬅድ፥ “ሆሳና! ፆሳይ ጋላተቶ! ጎዳ ሱንꬃን የይስ አንጀቶ! ፆሳይ እስራኤለ ካዋ አንጆ!” ያግዶሶና።
JOH 12:14 ጌሻ ማፃፋን፥ “ፅዮነ ካታማዉ፥ ባቦፋ! ሄኮ፥ ነ ካዎይ ሀረ ማራ ቦላ ኡትድ ዬስ” ጌተትዳያዳ የሱሲ ሀረ ማር ደምድ እያ ቶግስ።
JOH 12:16 የሱሳ ታማረት ሄሳ ካሰ አኬክቦኮና። ሽን የሱሲ ቦንቸትዳፐ ጉየ ኤንቲ ሄሳ ኡባ አኬክዶሶና። ሄስ ኡባይ ጌሻ ማፃፋይ ግዳይሳዳ ሀንስ።
JOH 12:17 የሱሲ አላዛራ ዱፎፐ ፄግድ፥ ሀይቆፐ ደንꬅዳ ዎደ እያራ ደእያ ዳሮ አሳይ የሱሳባ ማርካትዶሶና።
JOH 12:18 ዳሮ አሳይ እያ ሞካናዉ ከይዳይ፥ እ ሄ ማላታታ ኦꬅዳይሳ ስእዳ ግሾሳ።
JOH 12:19 ሄሳ ግሾ፥ ፋርሳወት እሶይ እሱዋኮ፥ “ኑ አይኮካ ኦꬃናዉ ዳንዳኦናይሳ በእተ፤ ደረ ኡባይ እያ ካሌስ” ያግዶሶና።
JOH 12:20 ፓስካ ቦንችያ ጋላስ ጎይናናዉ የሩሳላመ ብዳይሳታ ግዶን እስ እስ ግርከ አሳት ደኦሶና።
JOH 12:21 ኤንቲ ጋልላ ቢታን ቤተሳይዳ ካታማፐ ይዳ ፍልጶሳኮ ብድ፥ “ጎዳዉ፥ ኑኒ የሱሳ በአናዉ ኮዮስ” ያግድ ዎስዶሶና።
JOH 12:22 ፍልጶስ ብድ እንድርያሳስ ኦድን ናምአይ ብድ፥ የሱሳስ ኦድዶሶና።
JOH 12:23 የሱሲ ኤንታኮ፥ “አሳ ናአይ፥ ቦንቸትያ ዎደይ ጋክስ።
JOH 12:24 ታኒ ህንተዉ ቱማ ኦዳይስ፤ እስ ግስተ አይፈይ ቢታን ዎꬍድ ዎቆና እፅኮ ባርካ አቴስ። ሽን ሄ ግስተ አይፈይ ዎቅኮ ዳሮ አይፈ አይፌስ።
JOH 12:25 ባ ሸምፑዋ ዶስያ ኦንካ ꬋይሴስ፤ ባ ሸምፑዋ ሀ አላምያን እፅያ ኦንካ መርና ደኦስ አሼስ።
JOH 12:26 ታኒ ደእያሱዋን ታራ ዳና መላ ታዉ ኦꬃናዉ ኮይያ ኦንካ ታና ካላናዉ በሴስ። ታዉ ኦꬅያ ኦናካ ታ አዋይ ቦንቻና።
JOH 12:27 “ሀእ ታ ሸምፖይ ዳሮ ኡንኤትስ፤ ያትን ዎይጎ? ‘ታ አዋዉ፥ ታና ሀ ሳተፐ አሻርክ’ ያጎ? አካይ፥ ታኒ ይዳይ ዋየ ኤካናሳ።
JOH 12:28 ታ አዋዉ፥ ነ ሱንꬃ ቦንቻ” ያግስ። ሄ ዎደ ሳሎፐ፥ “ታኒ ታ ሱንꬃ ቦንቻስ፤ ዛራዳካ ቦንቻና” ግያ ቃላይ ይስ።
JOH 12:29 ሄ በሳን ኤቅዳ ዳሮ አሳይ ሄ ቃላ ስእድ፥ “ሄስ ዳዳ” ያግዶሶና። ሀራት ቃስ፥ “ኪታንቾይ እያዉ ኦድስ” ያግዶሶና።
JOH 12:30 የሱሲ ዛሪድ ኤንታኮ፥ “ሀ ቃላይ ህንተ ግሾ ይስፐ አትሽን፥ ታ ግሾ ግደና።
JOH 12:31 ሀ አላመይ ፕርደትያ ዎደይ ሀእ፤ ሀ አላምያ ሃረይስ ሀእ ካረ ሆለታና።
JOH 12:32 ቃስ ታኒ ሳአፐ ꬎቁ ኦሰትዳ ዎደ አሳ ኡባ ታኮ ኤሀና” ያግስ።
JOH 12:33 እ ሄሳ ግዳይ አይ መላ ሀይቆ ሀይቃነኮ ኤንታዉ ቆንጭሳናሳ።
JOH 12:34 ዳሮ አሳይ ዛሪድ፥ “ኑ ህገይ ክርስቶስ መርናዉ ደኤይሳ ኦዴስ። ያትን፥ ኔኒ ዎይጋዳ፥ ‘አሳ ናአይ ꬎቁ ጋናዉ በሴስ’ ጋይ? ‘እ፥ አሳ ናአይ ኦኔ?’ ” ያግዶሶና።
JOH 12:35 የሱሲ፥ “ፖኦይ ህንተራ ጉꬃ ዎደ ጋምአና። ህንተዉ ꬉሞና መላ ፖኦይ ደእሽን፥ ፖኡዋን ሄመትተ። ꬉማን ሄመትያ አስ አዉ ብያኮ ኤረና።
JOH 12:36 ፖኦ ናይታ ግዳና መላ ፖኦይ ደእሽን ፖኡዋ አማንተ” ያግስ። የሱሲ ሄሳ ኦደትዳፐ ጉየ ብድ ኤንታፈ ጌምስ።
JOH 12:37 እ ሄሳ መላ ማላታታ ኤንታ ስንꬃን ኦꬅንካ አማንቦኮና።
JOH 12:38 ናብያ እሳያስ፥ “ጎዳዉ፥ ኑ ማርካተꬃ ኦን አማንዴ? ጎዳይ ባ ዎልቃ ኦደስ ቆንጭስዴ?” ግዳይስ ቱማ ግዳና መላ ኤንቲ እያ አማንቦኮና።
JOH 12:39 ቃስካ እሳያስ፥ “ኤንታ አይፈይ ፄሎና መላ፥ ኤንታ ዎዛናይ አኬኮና መላ፥ ኤንቲ ፆሳኮ ስምን፥ እ ኤንታ ፓꬆና መላ፥ ፆሳይ ኤንታ አይፍያ ቆቅስስ። ኤንታ ዎዛና ምንꬅስ” ግዳ ግሾ ኤንቲ አማናናዉ ዳንዳእቦኮና።
JOH 12:41 እሳያስ ሄሳ ግዳይ፥ የሱሳ ቦንቹዋ በእዳ ግሾነ እያባ ኦድዳ ግሾሳ።
JOH 12:42 ግድኮካ፥ አይሁደታ ሀላቃታፐካ ዳሮት የሱሳ አማንዶሶና። ሽን ፋርሳወት ባንታና አይሁደታ ዎሳ ኬꬃፈ ከሶሶና ግድ ያይዳ ግሾ አማንዳ ግድ ቆንጨን ማርካትቦኮና።
JOH 12:43 ሄሳ ኤንቲ ኦꬅዳይ፥ ፆሳን ኤረታናይሳፈ አꬅድ አሳን ኤረታናይሳ ዶስዳ ግሾሳ።
JOH 12:44 የሱሲ ባ ቃላ ꬎቁ ኦꬅድ፥ “ታና አማንያ ኦንካ ታና ኪትዳይሳካ አማኔስፐ አትሽን፥ ታ ፃላላ አማነና።
JOH 12:45 ታና በእያ ኦንካ ታና ኪትዳይሳካ በኤስ።
JOH 12:46 ታና አማንያ ኡባይ ꬉማን ዶና መላ ታኒ ፖኦ ግዳዳ አላምያ ያስ።
JOH 12:47 ታ ቃላ ስእድ ኪተቶና ኦናካ ታኒ ፕርድከ። አይስ ጊኮ፥ ታኒ አላምያ አሻናዉ ያስፐ አትሽን፥ ፕርዳናዉ ያቢከ።
JOH 12:48 ታና እፀይሳነ ታ ቃላ ኤኮና ኦናካ ፕርደይስ ደኤስ። ታኒ ኦድዳ ቃላይ ዉርሰꬃ ጋላስ ሄ ኡራ ፕርዳና።
JOH 12:49 አይስ ጊኮ፥ ታኒ ሄሳ ታፐ ኦድከ፥ ሽን ታና ኪትዳ ታ አዋይ ታኒ ጋናይሳነ ኦዳናይሳ ኪትስ።
JOH 12:50 ቃስ እያ ኪታይ መርና ደኦ ግደይሳ ታኒ ኤራይስ። ሄሳ ግሾ፥ ታኒ ኦደይስ ታ አዋይ ታና ኦዳ ግዳይሳ” ያግስ።
JOH 13:1 ፓስካ ቦንችያ ጋላሳይ ጋካናፐ ስንꬃትድ ሀ አላምያ አግድ አዋኮ ብያ ዎደይ ጋክዳይሳ የሱሲ ኤርስ። ሀ አላምያን ደእያ ባ አሳ ኡባ ዎደ ዶስስ፤ ዉርሰꬅ ጋካናዉካ ኤንታ ዶስስ።
JOH 13:2 የሱሳራነ እያ ታማረታራ እስፈ ካሆ ሞሶና። ሄሳፈ ካሰ ፃላሄይ ስሞና ናኣ አስቆሮታ ይሁድ የሱሳ አꬅድ እማናዳ እያ ዎዛናን ኢታ ቆፋ ዎꬅስ።
JOH 13:3 የሱሲ አዋይ ኡባባ እያ ኩሸን ዎꬅዳይሳ፥ እ ፆሳ ማታፐ ይዳይሳነ ስሚድ እያኮ ባናይሳ ኤርስ።
JOH 13:4 የሱሲ ጋይታ ቦላፈ ደንድድ ቦላ ባጋ ማኡዋ ቃር ዎꬅድ፥ ፖፃ ኤክድ ባ ፄሳን ማርፃፍስ።
JOH 13:5 ሄሳፈ ጉየ፥ ሃ ሜቻ ሚሸን ትግድ፥ ባ ታማረታ ቶሁዋ ሜጭስ፤ ቃስ ባ ፄሳን ዳንጭዳ ፖፃን ቁችስ።
JOH 13:6 የሱሲ ስሞና ጰፅሮሳኮ ያ ዎደ ጰፅሮስ፥ “ጎዳዉ፥ ነ ታ ቶሁዋ ሜጫኔ?” ያግስ።
JOH 13:7 የሱሲ ዛሪድ እያኮ፥ “ታኒ ኦይሳ ነ ሀእ ኤራካ፥ ሽን ጉየፐ አኬካና” ያግስ።
JOH 13:8 ያትን፥ ጰፅሮስ፥ “ነ ታ ቶሁዋ ኡባራካ ሜጫካ” ያግስ። የሱሲ እያኮ፥ “ታኒ ነ ቶሁዋ ሜጮና እፅኮ ነዉነ ታዉነ እስፈተꬅ ባዋ” ያግስ።
JOH 13:9 ጰፅሮስ የሱሳኮ፥ “ጎዳዉ፥ ያትኮ፥ ታ ቶሁዋ ፃላላ ግዶናሽን ታ ኩሽያነ ታ ሁጵያ ሜጫ” ያግስ።
JOH 13:10 የሱሲ ዛሪድ፥ “ቦላ ሜጨትዳ ኦንካ ቶሆፐ ሀራባ ሜጨታናዉ ኮሸና፤ እያዉ ኡባሶይ ጌሽ። ህንተ ጌሽ፥ ሽን ኡባይ ጌሽ ግደከታ” ያግስ።
JOH 13:11 የሱሲ ባና አꬅድ እማና ኡራይ ኦነኮ ኤርያ ግሾ፥ “ህንተ ኡባይ ጌሽ ግደከታ” ያግስ።
JOH 13:12 ኤንታ ቶሁዋ ሜጭዳፐ ጉየ፥ የሱሲ ባ ማኡዋ ዛር ማእስ። ስም ጋይታ ቦላ ኡትድ ኤንታኮ፥ “ታኒ ህንተዉ ኦꬅዳይሳ አኬከቲ?
JOH 13:13 ህንተ ታና አስታማረነ ጎዳ ጌታ፤ ታኒ ህንተ ገይሳ ግድያ ግሾ ሎኦ ግደታ።
JOH 13:14 ታኒ ህንተዉ ጎዳነ አስታማረ ግዳሸ ህንተ ቶሁዋ ሜጭኮ ህንተካ እሶይ እሱዋስ ሄሳዳ ኦꬃናዉ በሴስ።
JOH 13:15 ህዛ፥ ታኒ ህንተዉ ኦꬅዳይሳዳ ህንተካ ኦꬃና መላ ህንተዉ ሌምሶ ግዳስ።
JOH 13:16 ታኒ ህንተዉ ቱማ ኦዳይስ፤ አይለይ ባ ጎዳፐ፥ ኪተትዳይስ ኪትዳይሳፈ አና።
JOH 13:17 ህንተ ሄሳ ኤርድ ኦꬅያባ ግድኮ አንጀትዳይሳታ።
JOH 13:18 “ታኒ ህንተና ኡባ ጊከ፤ ታኒ ዶርዳይሳታ ኤራይስ። ሽን ጌሻ ማፃፋን፥ ‘ታ ባርስዳይስ ታ ኩሽያ ሳፅስ’ ጌተትዳይስ ቱማ ግዳናዉ በሴስ።
JOH 13:19 ‘ታኒ ታና ግደይሳ’ ህንተ አማናና መላ ሄስ ሀናናፐ ስንꬃታዳ ህንተዉ ኦዳይስ።
JOH 13:20 ታኒ ህንተዉ ቱማ ኦዳይስ፤ ታኒ ኪትዳ ኦናካ ሞክያ ኡራይ ታና ሞኬስ። ታና ሞክያ ኦንካ ታና ኪትዳይሳ ሞኬስ” ያግስ።
JOH 13:21 የሱሲ ሄሳ ኦድዳፐ ጉየ፥ ባ ዎዛናን ዳሮ ኡንኤትድ፥ “ታኒ ህንተዉ ቱማ ኦዳይስ፤ ታና ህንተፈ እሶይ አꬅድ እማና” ግድ ቆንጭስድ ኦድስ።
JOH 13:22 እ ኦደባ ኦድያኮ እያ ታማረታስ ኤረቶና እፅን እሶይ እሱዋ ፄልዶሶና።
JOH 13:23 እያ ታማረታፐ እሶይ፥ የሱሲ ዶሰይስ፥ የሱሳ ማታን ኡትስ።
JOH 13:24 ሄሳ ግሾ፥ ስሞን ጰፅሮስ እያ ቃምኦትድ፥ “እ ኦና ግያኮ አነ ኦይቻ” ያግስ።
JOH 13:25 ሄሳ ግሾ፥ ሄ ታማረይ የሱሳኮ ሺቅድ ሀይꬃን፥ “ጎዳዉ፥ እ ኦኔ?” ያግስ።
JOH 13:26 የሱሲ ዛሪድ፥ “ታኒ ኡይꬃ ዎፀን ቱሻዳ ባርሰይሳ” ያግስ። ቃስ ኡይꬃ መንꬅ ኤክድ፥ ዎፀን ቱሽድ፥ ስሞና ናኣ አስቆሮታ ይሁዳ ባርስስ።
JOH 13:27 ይሁድ ኡይꬃ ባርዳፐ ጉየ፥ ፃላሄይ ኤለስድ ይሁዳን ገልስ። የሱሲ እያኮ፥ “ኔኒ ኦꬃናዉ ቆፕዳባ ኤለሳዳ ኦꬃ” ያግስ።
JOH 13:28 ሽን ጋይታ ቦላ ኡትዳይሳታፐ ኦንካ የሱሲ ሄሳ አይስ እያኮ ግዳኮ ኤርቤና።
JOH 13:29 ይሁድ ሚሸ ኦይክያ ግሾ፥ እያ ታማረታፐ እሶት እሶት የሱሲ እያ፥ “ፓስካ ቦንችያ ጋላሳስ ባንታዉ ኮሽያባ ሻማ ዎይኮ ማንቆታስ ሙፃታ እማ ግስ” ያግድ ቆፕዶሶና።
JOH 13:30 ይሁድ ኡይꬃ ባርዳ መላ ኤለስድ ካረ ከይስ። ሄ ዎደ ሳእ ቃማ።
JOH 13:31 ይሁድ ካረ ከይዳፐ ጉየ፥ የሱሲ፥ “ሀእ አሳ ናአይ ቦንቸትስ፤ ፆሳይካ እያ ባጋራ ቦንቸትስ።
JOH 13:32 ፆሳይ እያ ባጋራ ቦንቸትኮ እ ባ ሁጰን አሳ ናኣ ቦንቻና፤ ቃስ እ ሄሳ ኤለስድ ኦꬃና።
JOH 13:33 ታ ናይቶ፥ ታኒ ህንተራ ዳሮ ዎደ ጋምእከ። ህንተ ታና ኮያና፥ ሽን ታኒ አይሁደታስ ኦድዳይሳ መላ፥ ‘ህንተ ታኒ ብያ በሳ ባናዉ ዳንዳኤከታ።’
JOH 13:34 ታኒ ህንተዉ እምያ ኦራꬃ ኪታይ ሀይሳ፤ እሶይ እሱዋ ዶስተ። ታኒ ህንተና ዶስዳይሳዳ ህንተ እሶይ እሱዋ ዶሳናዉ በሴስ።
JOH 13:35 ህንተ እሶይ እሱዋራ ዶሰትኮ ህንተ ታ ታማረ ግደይሳ አሳ ኡባይ ኤራና” ያግስ።
JOH 13:36 ስሞን ጰፅሮስ የሱሳኮ፥ “ጎዳዉ፥ ኔኒ አዉ ባይ?” ያግስ። የሱሲ ዛሪድ፥ “ታኒ ብያ በሳ ኔኒ ሀእ ካላናዉ ዳንዳአካ፥ ሽን ጉየፐ ታና ካላና” ያግስ።
JOH 13:37 ጰፅሮስ፥ “ጎዳዉ፥ ታኒ ነና ሀእ ካላናዉ አይስ ዳንዳእክና? ታኒ ነ ግሾ፥ ሀይቃናዉካ ጊጋ ኡታስ” ያግስ።
JOH 13:38 የሱሲ ዛሪድ፥ “ታ ግሾ ሀይቃናዉ ቱማ ጊጋ ኡታዲ? ታኒ ነዉ ቱማ ኦዳይስ፤ ኩቶይ ዋሳናፐ ስን ኔኒ ታና ሄꬑ ቶሆ ካዳና” ያግስ።
JOH 14:1 የሱሲ ባ ታማረታኮ፥ “ህንተ ዎዛናይ ኡንኤቶፎ፥ ፆሳ አማንተ፥ ታናካ አማንተ።
JOH 14:2 ታ አዋ ኬꬃን ዳሮ በሲ ደኤስ። ታኒ ህንተዉ በሰ ጊግሳናዉ ባይስ። ሄሳ ግዶናኮ ታኒ ህንተዉ ኦድከሽን።
JOH 14:3 ታኒ ባዳ በሰ ጊግስዳፐ ጉየ፥ ታኒ ደእያሱዋን ህንተ ዳና መላ ስማ ያዳ ህንተና ታኮ ኤፋና።
JOH 14:4 ህንተ ታኒ ብያ በሳ ኤፍያ ኦግያ ኤሬታ” ያግስ።
JOH 14:5 ያትን፥ ቶማስ፥ “ጎዳዉ፥ ኔኒ ብያ በሳ ኑኒ ኤሮኮ፤ ኦግያ ዋትድ ኤራናዉ ዳንዳአኔ?” ያግስ።
JOH 14:6 የሱሲ ዛሪድ፥ “ኦገይ፥ ቱማይነ ደኦይ ታና። ታ ባጋራ ግዶና እፅኮ ኦንካ ታ አዋኮ ባናዉ ዳንዳኤና።
JOH 14:7 ህንተ ታና ኤርያባ ግድያኮ፥ ታ አዋካ ኤራና። ሽን ህዛፐ ዶምድ ህንተ እያ ኤሬታነ እያ በእደታ” ያግስ።
JOH 14:8 ፍልጶስ የሱሳኮ፥ “ጎዳዉ፥ አዋ ኑና በሳ፤ ሄስ ኑስ ግዳና” ያግስ።
JOH 14:9 የሱሲ ዛሪድ፥ “ታኒ ሀይሳ መላ ዎደ ህንተራ ደእንካ ታና ኤርኪ? ታና በእዳ ኡራይ አዋካ በእስ። ያትን፥ ኔኒ ዎይጋዳ፥ ‘አዋ ኑና በሳ’ ጋይ?
JOH 14:10 ታኒ አዋራ እስኖ ግደይሳነ አዋይካ ታራ እስኖ ግደይሳ ኔኒ አማንክዬ? ታኒ ህንተዉ ኦድያ ቃላ ታኒ ታፐ ኦድከ፥ ሽን ታናን ደእያ አዋይ ባ ኦሱዋ ኦꬄስ።
JOH 14:11 ታኒ አዋን ደኤይሳነ አዋይካ ታናን ደኤይሳ አማንተ። ሄሳ አማኖና እፅኮ ታ ኦꬅያባታን ታና አማንተ።
JOH 14:12 “ታኒ ህንተዉ ቱማ ኦዳይስ፤ ታና አማንያ ኡራይ ታኒ ኦꬅያ ኦሱዋፐ አꬍያ ኦሶ ኦꬃና። ታኒ አዋኮ ብያ ግሾ ታና አማንያ ኦንካ ሀይሳፈ አꬍያ ኦሶ ኦꬃና።
JOH 14:13 አዋይ ናኣ ባጋራ ቦንቸታና መላ ታ ሱንꬃን ህንተ ዎስያ ኡባ ታ ህንተዉ ኦꬃና።
JOH 14:14 ታ ሱንꬃን አይብባካ ህንተ ኦይችኮ ታ ህንተዉ ኦꬃና።
JOH 14:15 “ህንተ ታና ዶስኮ ታ ኪታ ናጋና።
JOH 14:16 ታኒ አዋ ዎሳና፤ ህንተራ መርናዉ ዳና መላ ምንይሳ ህንተዉ እማና።
JOH 14:17 ሄ አያናይ ፆሳ ቱማ ቆንጭሴስ። ሀ አላምያ አሳይ እያ በኦና ግሾነ ኤሮና ግሾ እያ ኤካናዉ ዳንዳኦኮና። ሽን እ ህንተራ ደእያ ግሾነ ህንተ ግዶን ዳና ግሾ ህንተ እያ ኤሬታ።
JOH 14:18 “ታኒ ህንተና አይያ አዉ ባይና ናአዳ ህንተ ፃላላ አግከ፤ ስማዳ ህንተኮ ያና።
JOH 14:19 ጉꬃ ዎደፐ ጉየ አላመይ ታና ዛር በኤና፥ ሽን ህንተ በአና። ታኒ ደኦን ደእያ ግሾ ህንተካ ደኦን ደአና።
JOH 14:20 ታኒ ታ አዋን፥ ህንተ ታናን፥ ቃስ ታኒ ህንተናን ደኤይሳ ህንተ ሄ ጋላስ ኤራና።
JOH 14:21 “ታ ኪታ ኤክድ ናገይ ታና ዶሴስ። ታና ዶሰይሳ ታ አዋይካ ዶሴስ፤ ታንካ እያ ዶሳይስ፤ ታኒ እያዉ ቆንጫና” ያግስ።
JOH 14:22 አስቆሮታ ይሁዳ ግዶና ይሁድ የሱሳኮ፥ “ጎዳዉ፥ ኔኒ ዋታዳ አላምያስ ግዶናሽን ኑስ ነና ቆንጭሳኔ?” ያግስ።
JOH 14:23 የሱሲ ዛሪድ፥ “ታና ዶስያ ኦንካ ታ ቃላስ ኪተታና። ታ አዋይ እያ ዶሳና። ቃስ ታ አዋይነ ታኒ እያኮ ይድ እያራ ዳና።
JOH 14:24 ታና ዶሶና ኦንካ ታ ቃላስ ኪተተና። ህንተ ስእያ ቃላይ ታና ኪትዳ አዋባፐ አትሽን፥ ታባ ግደና።
JOH 14:25 “ታኒ ህንተራ ሀእ ደአሸ ሄሳ ህንተዉ ኦዳስ።
JOH 14:26 ሽን አዋይ ታ ሱንꬃን ኪታና ምንꬅያ ጌሻ አያናይ፥ ህንተና ኡባባ ታማርሳና። ታኒ ህንተዉ ኦድዳ ኡባ እ ህንተና ሀሳይሳና።
JOH 14:27 “ሳሮተꬃ ህንተዉ እማና። ታኒ ታ ሳሮተꬃ ህንተዉ እማና። ታ እምያ ሳሮተꬃይ አላመይ እምያ ሳሮተꬃ መላ ግደና። ሄሳ ግሾ፥ ኡንኤቶፍተ፥ ያዮፍተ።
JOH 14:28 ‘ታኒ ባና፥ ሽን ስማዳ ህንተኮ ያና’ ግዳይሳ ስእደታ። ህንተ ታና ቱማ ዶስያባ ግድያኮ ታ አዋይ ታፐ አꬍያ ግሾ ታኒ እያኮ በይሳን ህንተ ኡፋይታና።
JOH 14:29 ሄስ ሀንያ ዎደ ህንተ አማናና መላ ሄስ ሀኖና ደእሽን ስንꬃታዳ ታኒ ህንተዉ ኦዳስ።
JOH 14:30 “ሀ አላምያ ሃረይስ ያ ግሾ ህዛፐ ጉየ ህንተራ ዳሮ ኦደትከ። ታና እ አይኮካ ኦꬃናዉ ዳንዳኤና።
JOH 14:31 ሽን ታኒ አዋ ዶሰይሳ አላመይ ኤራና መላ ታ አዋይ ታና ኪትዳይሳ ኡባ ኦꬃይስ። ደንድተ፤ ሀይሳፈ ቦስ።
JOH 15:1 “ታኒ ቱማ ዎይነ ኡባ። ጎሻንቾይ ታ አዋ።
JOH 15:2 እ፥ ታ ቦላ ደእያ አይፈ አይፎና ታሽያ ኡባ ካሬስ። አይፍያ ታሽያ ካሰፐ አꬍድ አይፋና መላ ሄ ታሽያ እ ጊግሳና።
JOH 15:3 ታኒ ህንተዉ ኦድዳ ቃላ ግሾ ህንተ ጌሽ።
JOH 15:4 ታናን ደእተ፤ ታንካ ህንተናን ደአና። ዎይነ ታሸይ ኡባራ ዶና እፅኮ ሄ ታሸይ ባርካ አይፈ አይፋናዉ ዳንዳኤና። ሄሳዳካ፥ ህንተካ ታናን ደኦና እፅኮ አይፈ አይፋናዉ ዳንዳኤከታ።
JOH 15:5 “ታኒ ዎይነ ኡባ፤ ህንተ ታሸታ። ታናን ደኤይስነ ታኒ እያን ደኤይስ፥ እ ዳሮ አይፈ አይፋና። ታ ባይና ህንተ ፃላላ አይኮካ ኦꬃናዉ ዳንዳኤከታ።
JOH 15:6 ታናን ዶና ኡራይ ታሽያዳ ካረን የግትድ መላና። ሄሳ መላ ታሸት ሺቅድ ታማን የገታና፥ ፁገታና።
JOH 15:7 ህንተ ታናን ደእኮ፥ ታ ቃላይካ ህንተናን ደእኮ፥ ህንተ ኮይያባይ አይባ ግድኮካ ዎስተ፤ ህንተ ኤካና።
JOH 15:8 ህንተ ዳሮ አይፈ አይፍያ ታ ታማረ ግድኮ፥ ሄሳን ታ አዋይ ቦንቸታና።
JOH 15:9 አዋይ ታና ዶሰይሳዳ ታንካ ህንተና ዶሳይስ፤ ታ ሲቁዋን ደእተ።
JOH 15:10 ታኒ ታ አዋ ኪታ ናጋዳ እያ ሲቁዋን ደእዳይሳዳ ህንተካ ታ ኪታ ናግኮ ታ ሲቁዋን ዳና።
JOH 15:11 “ታ ኡፋይሳይ ህንተናን ግዳና መላነ ህንተ ኡፋይሳይ ፖሎ ግዳና መላ ታኒ ህንተዉ ሄሳ ኦዳስ።
JOH 15:12 ታ ኪታይ ሀይሳ፤ ታኒ ህንተና ዶስዳይሳዳ ህንተካ እሶይ እሱዋ ዶስተ።
JOH 15:13 ባ ሸምፑዋ ባ ላግያስ አꬅድ እመይሳፈ አꬍያ ግታ ሲቆይ ባዋ።
JOH 15:14 ታኒ ህንተና ኪትዳባ ኡባ ኦꬅኮ ህንተ ዶሰትዳይሳታ።
JOH 15:15 “አይለይ ባ ጎዳይ ኦꬅያባ ኤሮና ግሾ ታኒ ህንተና ህዛፐ ጉየ አይለታ ጊከ። ሽን ታ አዋፐ ስእዳ ኡባ ታኒ ህንተዉ ኦድዳ ግሾ ህንተና ዶሰትዳይሳታ ጋስ።
JOH 15:16 ታኒ ህንተና ዶራስፐ አትሽን፥ ህንተ ታና ዶርበከታ። ህንተ ብድ ꬋዮና አይፈ አይፋና መላ ታኒ ህንተና ሹማስ። ያንኮ፥ ታ አዋይ ህንተ ታ ሱንꬃን ዎስዳባ ኡባ እማና።
JOH 15:17 ታ ኪታይ ሀይሳ፦ እሶይ እሱዋ ዶስተ።
JOH 15:18 “አላመይ ህንተና እፅኮ ኮይሮትድ ታና እፅዳይሳ አኬክተ።
JOH 15:19 ህንተ አላምያባ ግድያኮ አላመይ ህንተና ዶሳና። ሽን ታኒ ህንተና አላመፐ ዶርዳ ግሾነ ህንተ አላምያባ ግዶና ግሾ አላመይ ህንተና እፄስ።
JOH 15:20 ‘አይለይ ባ ጎዳፐ አና’ ጋዳ ታኒ ህንተዉ ኦድዳይሳ አኬክተ። ኤንቲ ታና ጎድዳባ ግድኮ ህንተናካ ጎዳና። ኤንቲ ታ ቃላ ናግዳባ ግድኮ ህንተ ቃላካ ናጋና።
JOH 15:21 ሽን ኤንቲ ታና ኪትዳይሳ ኤሮና ግሾ ሀ ኡባ ታ ጋሶን ህንተ ቦላ ኦꬃና።
JOH 15:22 ታኒ ያዳ ኤንታዉ ኦዶናባ ግድያኮ ናጋራ ግደና። ሽን ሀእ ኤንቲ ኦꬅዳ ናጋራስ ጋሶያባይ ባዋ።
JOH 15:23 ታና እፀይስ ታ አዋካ እፄስ።
JOH 15:24 ኦንካ ኦꬅቦና ኦሶ ታ ኤንታ ግዶን ኦꬃቦናባ ግድያኮ ኤንታዉ ናጋራ ግዶና አታና። ሽን ሀእ ኤንቲ ታኒ ኦꬅዳ ኦሱዋ በእድ ታናካ ታ አዋካ እፅዶሶና።
JOH 15:25 ሽን ኤንታ ህግያን፥ ‘ታና ጮ እፅዶሶና’ ጌተትድ ፃፈትዳይስ ፖለታና መላ ሄስ ሀንስ።
JOH 15:26 “አዋፐ ያ ቱማ ቆንጭስያ አያና ታ ህንተዉ ኪታና። እ ህንተና ምንꬃና፥ ታባ ማርካታና።
JOH 15:27 ህንተካ ኮይሮፐ ዶምድ ታራ ደእያ ግሾ ታባ ማርካታና።
JOH 16:1 “ታኒ ሄሳ ህንተ አማኖይ ꬋዮና መላ ህንተዉ ኦዳስ።
JOH 16:2 ኤንቲ ህንተና አይሁደ ዎሳ ኬꬃታፐ ከስ የዳና። ሄሳዳካ፥ ህንተና ዎꬍያ ኦንካ ፆሲ ኮያባ ኦꬅያ ዳንያ ዎደይ ያና።
JOH 16:3 ኤንቲ ሄሳ ህንተ ቦላ ኦይ ታና ዎይኮ አዋ ኤሮና ግሾሳ።
JOH 16:4 ሽን ኤንቲ ሄሳ ህንተ ቦላ ኦꬅያ ዎደይ ጋክያ ዎደ ታኒ ህንተዉ ኦድዳይሳ ህንተ አኬካና መላ ታኒ ህንተዉ ሀይሳ ኦዳስ። “ስንꬃታዳ ታኒ ሀይሳ ህንተዉ ኦዶና ጋምእዳይ ታ ህንተራ ደእያ ግሾሳ።
JOH 16:5 ሽን ሀእ ታኒ ታና ኪትዳይሳኮ ባይስ፤ ህንተፈ ኦንካ፥ ‘አዉ ባይ?’ ግድ ታና ኦይቸይ ባዋ።
JOH 16:6 ሽን ታኒ ሄሳ ኦድዳ ግሾ፥ ህንተ ዎዛናን ዳሮ አዛኖይ ደኤስ።
JOH 16:7 ሽን ታኒ ህንተዉ ቱማ ኦዳይስ፤ ታኒ ቢኮ ህንተዉ ሎኦ። አይስ ጊኮ፥ ታኒ ቦና እፅኮ ምንይስ ህንተኮ ዬና። ሽን ታኒ ቢኮ እያ ህንተኮ የዳና።
JOH 16:8 ምንይስ ይድ፥ ናጋራባ፥ ፅሎተꬃባነ ፕርዳባ ሀ አላምያ አሳ ኤርሳና።
JOH 16:9 ናጋራባይ፥ አሳይ ታና አማኖና ግሾሳ።
JOH 16:10 ፅሎተꬃባይ፥ ታኒ አዋኮ ብያ ግሾነ ህንተ ታና ዛር በኦና ግሾሳ።
JOH 16:11 ፕርዳባይ፥ ቃስ አላምያ ሃረይስ ፕርደትዳ ግሾሳ።
JOH 16:12 “ታኒ ህንተዉ ኦድያባይ ዳሮባይ ደኤስ፥ ሽን ሀእ ህንተዉ ገለና።
JOH 16:13 ቱማ አያናይ ያ ዎደ ህንተና ቱማተꬃ ኡባኮ ካለꬃና። እ ስእዳባ ኦዴስፐ አትሽን፥ ባፐ አይብባካ ኦደና። ቃስ ስንꬃፈ ያናባ ህንተዉ እ ኦዳና።
JOH 16:14 እ ታዉ ደኤይሳፈ ኤክድ ህንተዉ ኦድያ ግሾ እ ታና ቦንቻና።
JOH 16:15 አዋስ ደእያባ ኡባይ ታባ፤ ‘ምንይስ ታዉ ደኤይሳፈ ኤክድ ህንተዉ ኦዳና’ ታኒ ግዳይ ሄሳሳ።
JOH 16:16 “ጉꬃ ዎደፐ ጉየ ታና በኤከታ፤ ቃስ ጉꬃ ዎደፐ ጉየ ህንተ ታና በአና” ያግስ።
JOH 16:17 እያ ታማረታፐ እሶት እሶት ባንታ ግዶን፥ “ጉꬃ ዎደፐ ጉየ ህንተ ታና በኤከታ፤ ቃስ ጉꬃ ዎደፐ ጉየ ህንተ ታና በአና፤ ቃስካ ታኒ አዋኮ ባይስ ጉሳይ ዎይ ጉሴ?” ያግዶሶና።
JOH 16:18 “ጉꬃ ዎደፐ ጉየ ገይስ ዎይ ጉሴ? እ አይ ኦደትያኮ ኑስ ኤረተና” ያግዶሶና።
JOH 16:19 ኤንቲ ባና ኦይቻናዉ ኮየይሳ የሱሲ ኤርድ፥ “ታኒ፥ ‘ጉꬃ ዎደፐ ጉየ ታና በኤከታ፤ ቃስ ጉꬃ ዎደፐ ጉየ ህንተ ታና በአና’ ግዳይሳስ ህንተ እሶይ እሱዋ ኦይቼቲ?
JOH 16:20 ታኒ ህንተዉ ቱማ ኦዳይስ፤ ህንተ ዬካናነ አፉፃና፥ ሽን ሀ አላመይ ኡፋይታና። ሀእ ህንተ አዛናና፥ ሽን ህንተ አዛኖይ ኡፋይሳን ላመታና።
JOH 16:21 እስ ማጫስያ ናአ የላና ሀንያ ዎደ ባ የሎ ዎደይ ጋክዳ ግሾ ህርጋዉሱ። ሽን ናአ የልዳፐ ጉየ ናእ ሀ አላምያን የለትዳ ኡፋይሳ ግሾ ባ ኡንኣ ዶጋዉሱ።
JOH 16:22 ሄሳዳካ፥ ህንተካ ህንተ ዎዛናን አዛኔታ፥ ሽን ታኒ ህንተና ዛራዳ በአና። ህንተ ዎዛናይ ዳሮ ኡፋይታና፤ ሄ ኡፋይሳ ኦንካ ህንተፈ ኤከና።
JOH 16:23 “ሄ ጋላስ ህንተ ታና አይብባካ ዎሰከታ። ታኒ ህንተዉ ቱማ ኦዳይስ፤ ህንተ ታ ሱንꬃን ዎስያባ ኡባ አዋይ ህንተዉ እማና።
JOH 16:24 ሀእ ጋካናዉ ታ ሱንꬃን አይብባካ ዎስበከታ። ህንተ ኡፋይሳይ ፖሎ ግዳና መላ ፆሳ ዎስተ፤ ህንተ ኤካና።
JOH 16:25 “ታኒ ሀእ ጋካናዉ ህንተዉ ሌምሶን ኦዳስ፥ ህዛፐ ታኒ ሌምሶን ኦዶና ዎደይ ያና። ሽን አዋባ ታኒ ህንተዉ ቆንጨን ኦዳና።
JOH 16:26 ሄ ጋላስ ህንተ ታ ሱንꬃን አዋ ዎሳና፤ ህንተ ግሾ ታኒ አዋ ዎስከ።
JOH 16:27 አይስ ጊኮ፥ አዋይ ባ ሁጰን ህንተና ዶሴስ። ህንተ ታና ዶስያ ግሾነ ታኒ አዋ ማታፐ ይዳይሳ አማንዳ ግሾ፥ እ ህንተና ዶሴስ።
JOH 16:28 ታኒ አዋ ማታፐ ሀ አላምያ ያስ፤ ቃስ አላምያ አጋዳ አዋኮ ባና” ያግስ።
JOH 16:29 እያ ታማረት ዛሪድ፥ “ሄኮ፥ ሀእ ኔኒ ቆንጨን ኦዳሳ፤ ሌምሶን አይኮካ ኦዳካ።
JOH 16:30 ኔኒ ኡባባ ኤረይሳ ኑኒ ሀእ ኤሮስ፤ ቃስ ነና ኦንካ ኦይቻና መላ ኔኒ ኮያካ። ሄስ ኑና ኔኒ ፆሳፈ ኪተትዳይሳ አማንꬄስ” ያግዶሶና።
JOH 16:31 ያትን፥ የሱሲ ዛሪድ ኤንታኮ፥ “ሀእ አማነቲ?
JOH 16:32 ሄኮ፥ ህንተ፥ ህንተ ሶ ህንተ ሶ ላለትያ ዎደይነ ታ ፃላላ የግ አግድ ባቃትያ ዎደይ ያና፤ ሀእካ ይክችስ። ሽን አዋይ ታራ ደእያ ግሾ ታኒ ታ ፃላላ ግድከ።
JOH 16:33 ህንተ ታራ ደእሸ ሳሮይ ህንተዉ ዳና መላ ታኒ ሄሳ ኦዳስ። አላመን ደእሸ ህንተ ዋየታና። ሽን ምንተ፤ ታኒ አላምያ ፆናስ” ያግስ።
JOH 17:1 የሱሲ ሄሳ ኦድዳፐ ጉየ ፑደ ሳሎ ፄልድ፥ ሀይሳዳ ያግስ፦ “አዋዉ፥ ሳተይ ጋክስ፤ ነ ናአይ ነና ቦንቻና መላ ኔኒ ነ ናኣ ቦንቻ።
JOH 17:2 ኔኒ እያዉ እምዳ ኡባስ እ መርና ደኡዋ እማና መላ አሳ ኡባ ቦላ እያዉ ማታ እማዳሳ።
JOH 17:3 መርና ደኦይ፥ ነና፥ እስ ቱማ ፆሳነ ነ ኪትዳ የሱስ ክርስቶሳ ኤሮ።
JOH 17:4 ኔኒ ታ ኦꬃና መላ እምዳ ኦሱዋ ፖላዳ ነና ሳአን ቦንቻስ።
JOH 17:5 ሀእካ፥ አዋዉ፥ አላመይ መታናፐ ስን ነ ማታን ታዉ ደእያ ቦንቹዋን ታና ቦንቻ።
JOH 17:6 “አላምያ አሳፐ ኔኒ ታዉ እምዳይሳታ ነና ኤርሳስ። ኤንቲ ነይሳታ፤ ኔኒ ኤንታ ታዉ እማዳሳ። ኤንቲ ነ ቃላስካ ኪተትዶሶና።
JOH 17:7 ኔኒ ታዉ እምዳ ኡባባይ ኔፐ ይዳይሳ ኤንቲ ሀእ ኤሮሶና።
JOH 17:8 ኔኒ ታዉ እምዳ ቃላ ታኒ ኤንታዉ እማስ፤ ኤንትካ ሄ ቃላ ኤክዶሶና። ታኒ ነ ማታፐ ይዳይስ ቱማ ግደይሳ ኤርድ ኔኒ ታና ኪትዳይሳካ አማንዶሶና።
JOH 17:9 “ታኒ ኤንታዉ ዎሳይስ። ኤንቲ ነይሳታ ግድያ ግሾ ኔኒ ታዉ እምዳ አሳስ ዎሳይስፐ አትሽን፥ አላምያስ ዎስከ።
JOH 17:10 ታዉ ደእያ ኡባባይ ነባ፤ ነዉ ደእያ ኡባይካ ታባ። ታኒ ኤንታ ባጋራ ቦንቸታስ።
JOH 17:11 ታኒ ህዛፐ ጉየ አላምያን ደእከ፤ ኤንቲ አላመን ደኦሶና። ታኒ ሀእ ኔኮ ባይስ። ጌሻ አዋዉ፥ ሀ ኔኒ ታዉ እምዳይሳት ኔራነ ታራ እስኖ ግድዳይሳዳ ኤንቲ እስኖ ግዳና መላ ኤንታ ነ ታዉ እምዳ ነ ሱንꬃን ናጋ።
JOH 17:12 ታኒ ኤንታራ ሳአን ደአሸ፥ ነ ታዉ እምዳ ነ ሱንꬃ ዎልቃን ኤንታ ናጋስ። ጌሻ ማፃፋይ ግዳይስ ፖለታና መላ ꬋዮይ በሲያ ኡራፐ አትሽን፥ ኤንታፈ ሀር ኦንካ ꬋይቤና።
JOH 17:13 “ሀእ ታኒ ኔኮ ባይስ። ታ ኡፋይሳይ ኤንታ ዎዛናን ፖሎ ግዳና መላ ሀይሳ ታኒ አላመን ደአሸ ኦዳይስ።
JOH 17:14 ታኒ ኤንታዉ ነ ቃላ እማስ። ታኒ አላምያፐ ግዶናይሳዳ፥ ኤንትካ አላሚያፐ ግዶና ግሾ፥ አላመይ ኤንታ እፅስ።
JOH 17:15 ኔኒ ፃላሄፐ ኤንታ ናጋና መላፐ አትሽን፥ አላመፐ ከሳና መላ ዎስከ።
JOH 17:16 ታኒ አላመፐ ግዶናይሳዳ ኤንትካ አላመፐ ግዶኮና።
JOH 17:17 ኔኒ ነ ቱማተꬃን ኤንታ ነባ ኦꬃ፤ ነ ቃላይካ ቱማ።
JOH 17:18 ኔኒ ታና አላምያ ኪትዳይሳዳ ታንካ ኤንታ አላምያ ኪታስ።
JOH 17:19 ቃስ ኤንቲ ቱማ ነባ ግዳና መላ ኤንታ ግሾ ታኒ ታ ሁጵያ ነዉ እማይስ።
JOH 17:20 “ታኒ ኤንታ ፃላላስ ግዶናሽን ኤንቲ ቃላ ኦድን፥ ታና አማናናይሳታስካ ዎሳይስ።
JOH 17:21 ኤንቲ ኡባይ እስኖ ግዳና መላ ታኒ ዎሳይስ። አዋዉ፥ ነ ታናን ደኤይሳዳ፥ ቃስ ታ ነናን ደኤይሳዳ ኤንቲ ኑናን ዳና መላ ዎሳይስ። ሄ ዎደ ኔኒ ታና ኪትዳይሳ አላመይ አማናና።
JOH 17:22 ኔንነ ታኒ እስኖ ግደይሳዳ፥ ኤንቲ እስኖ ግዳና መላ፥ ኔኒ ታና ቦንችዳይሳዳ፥ ታንካ ኤንታ ቦንቻስ።
JOH 17:23 ታኒ ኤንታን፥ ኔኒ ታናን ደኤይሳዳ ኤንቲ ፖሎ እስኖ ግዳና መላ ነና ዎሳይስ። ሄስካ፥ ነ ታና ኪትዳይሳነ ነ ታና ዶስዳ ዶሱዋን ኤንታ ሲቅዳይሳ አላመይ ኤራን መላሳ።
JOH 17:24 “አዋዉ፥ ኔኒ ታዉ እምዳይሳት ታኒ ደእያሱዋን ታራ ዳና መላ ኮያይስ። አላመይ መታናፐ ስን ኔኒ ታና ዶስዳ ግሾ፥ ታዉ እምዳ ታ ቦንቹዋ ኤንቲ በአና።
JOH 17:25 “ጌሻ አዋዉ፥ አላመይ ነና ኤረና፥ ሽን ታኒ ኤራይስ። ቃስ ኔኒ ታና ኪትዳይሳ ሀይሳቲ ኤሮሶና።
JOH 17:26 ኔኒ ታና ሲቅዳ ሲቆይ ኤንታናን ዳና መላ፥ ቃስ ታኒ ኤንታናን ግዳና መላ፥ ታኒ ነ ሱንꬃ ኤንታ ኤርሳስ፤ ስንꬃስካ ኤርሳና” ያግስ።
JOH 18:1 የሱሲ ዎሳ ኦንግዳፐ ጉየ፥ ባ ታማረታራ ቀድሮና ዛንጋራ ፕንድ፥ ሄ በሳን ደእያ አታክልትያ ግዶ ገልዶሶና።
JOH 18:2 የሱሲ ኡባ ዎደ ባ ታማረታራ ያን ሺቅያ ግሾ የሱሳ አꬅድ እምዳ ይሁድ ሄ በሳ ኤሬስ።
JOH 18:3 ሄሳ ግሾ፥ ይሁድ ፓኖሰ፥ ፆምፐ፥ ቶራነ ጎንዳለ ኦይክዳ ዳሮ ዎታዳረታ፥ ካህነ ሀላቃትነ ፋርሳወት ኪትዳ ፆሳ ኬꬃ ናግያ ዎታዳረታ ካለꬅ ኤክድ፥ ሄ በሳ ብስ።
JOH 18:4 የሱሲ ባና ጋካና ሀንያባ ኡባ ኤርድ፥ ጋፃ ከይድ፥ “ኦና ኮዬቲ?” ያግስ።
JOH 18:5 ኤንቲ ዛሪድ፥ “ናዝረተ የሱሳ ኮዮስ” ያግዶሶና። እ ዛሪድ፥ “ታኒ የሱሳ” ያግስ። የሱሳ አꬅድ እምዳ ይሁድ ያን ኤንታራ ኤቅስ።
JOH 18:6 እ፥ “ታኒ የሱሳ” ግዳ ዎደ ኤንቲ ጉየ ሺቅድ፥ ሳአን ኩንድዶሶና።
JOH 18:7 የሱሲ ቃስካ፥ “ኦና ኮዬቲ?” ያግድ ኦይችስ። ኤንቲ፥ “ናዝረተ የሱሳ ኮዮስ” ያግዶሶና።
JOH 18:8 እ ዛሪድ፥ “ታኒ የሱሳ ግደይሳ ህንተዉ ኦዳስ። ህዛ፥ ህንተ ታና ኮያባ ግድኮ ሀይሳታ የድተ” ያግስ።
JOH 18:9 እ ሄሳ ግዳይ፥ “አዋዉ፥ ኔኒ ታዉ እምዳይሳታፐ ሀር አቶሽን እሱዋካ ꬋይሳብከ” ግዳይስ ፖለታና መላሳ።
JOH 18:10 ስሞን ጰፅሮሳስ ማሻይ ደኤስ። እ ሄ ማሻ ሾድድ ካህነ ሀላቃ አይልያስ ኡሻቻ ሀይꬃ ሾጭድ፥ ቃንፅ የግስ። ሄ አይልያ ሱንꬃይ ማልኮሳ።
JOH 18:11 የሱሲ ጰፅሮሳኮ፥ “ነ ማሻ ሾሁዋን ዛራ። ታ አዋይ ታዉ እምዳ ፁአፐ ታኒ ኡዮናባ ነዉ ዳኒ?” ያግስ።
JOH 18:12 ሮመ ዎታዳረትነ ኤንታ ሀላቃይ ፆሳ ኬꬃ ናግያ ዎታዳረታራ እስፈ የሱሳ ኦይክድ ቃችዶሶና።
JOH 18:13 ኮይሮ የሱሳ ሃናኮ ኤፍዶሶና። ሃን ሄ ላይꬅ ካህነ ሀላቃ ግድያ ቃያፋ ቦሎ።
JOH 18:14 ቃያፍ፥ “አሳ ኡባ ግሾ፥ እስ አስ ሀይቅኮ ሎኦ” ግድ ካሰ አይሁደታ ዞርዳይሳ።
JOH 18:15 ስሞን ጰፅሮስነ ሀራ እስ ታማረይ የሱሳ ካልድ ብዶሶና። ካህነ ሀላቃይ ሄ ሀራ ታማርያ ሎይꬅ ኤሬስ። ሄሳ ግሾ፥ እ የሱሳራ ካህነ ሀላቃ ዛባ ገልስ።
JOH 18:16 ሽን ጰፅሮስ ካረራ ድርሳ ፐንገን ኤቅስ። ካህነ ሀላቃይ ኤርያ ሀራ ታማረይ ካረ ከይድ፥ ፐንግያ ናግያ ናኤስ ኦድድ፥ ጰፅሮሳ ጋꬅ ገልስስ።
JOH 18:17 ፐንግያ ናግያ ናእያ ጰፅሮሳኮ፥ “ኔኒ፥ ሄ አድያ ታማረታፐ እሱዋ ግድኪ?” ያጋሱ። ጰፅሮስ ዛሪድ፥ “አካይ፥ ታኒ ግድከ” ያግስ።
JOH 18:18 ሳአይ ሜግያ ግሾ፥ አይለትነ ናገይሳት ፂፋ ታማ ኤꬅድ፥ ካዮሶና። ጰፅሮስካ ኤንታራ ኤቅድ ታማ ካዬስ።
JOH 18:19 ካህነ ሀላቃይ የሱሳ፥ እያ ታማረታባነ እያ ትምርትያባ ኦይችስ።
JOH 18:20 የሱሲ ዛሪድ፥ “ታኒ አሳ ኡባስ ቆንጨን ኦዳስ። ታኒ አይሁደ ኡባይ ሺቅያ አይሁደ ዎሳ ኬꬃንነ ፆሳ ኬꬃን ኡባ ዎደ ታማርሳስ። ጌማን አይኮካ ኦዳብከ።
JOH 18:21 ያትን፥ ኔኒ ታና አይስ ኦይቻይ? ታ ኦድሽን ስእዳ አሳ ኦይቻ። ሄ አሳይ ታኒ ኦድዳይሳ ኤሮሶና” ያግስ።
JOH 18:22 የሱሲ ሄሳ ግዳ ዎደ፥ ሄ በሳን ኤቅዳ ዎታዳረታፐ እሶይ የሱሳ ባቅድ፥ “ካህነ ሀላቃስ ሀይሳዳ ዛራይ?” ያግስ።
JOH 18:23 የሱሲ ዛሪድ፥ “ታኒ ኢታባ ኦድዳባ ግድኮ ሀይሳን ደእያ አሳ ኡባ ስንꬃን ኦዳ። ሽን ታኒ ቱማ ኦድዳባ ግድኮ ታና አይስ ባቃይ?” ያግስ።
JOH 18:24 ሄሳ ግሾ፥ ሃን፥ የሱሲ ቃሸትዳ መላ ካህነ ሀላቃ ቃያፋኮ የድስ።
JOH 18:25 ጰፅሮስ ያን ኤቅድ፥ ታማ ካይሽን፥ ሀራት እያኮ፥ “ኔኒ ሀ አድያ ታማረታፐ እሱዋ ግድኪ?” ያግስ። ጰፅሮስ ዛሪድ፥ “አካይ፥ ታኒ ግድከ” ያግድ ካድስ።
JOH 18:26 ካህነ ሀላቃ አይለታፐ እሶይ፥ ጰፅሮስ ሀይꬃ ቃንፅዳ አድያ ዳቦይ፥ ጰፅሮሳኮ፥ “ታኒ ነና እያራ አታክልትያ ግዶን በአብክና?” ያግድ ኦይችስ።
JOH 18:27 ጰፅሮስ ቃስካ ካድስ፤ ኤለስድ ኩቶይ ዋስ አግስ።
JOH 18:28 ዎንታ ጉራ፥ ኤንቲ የሱሳ ቃያፋ ሶፐ ደርያ ሃረይሳ ኦሶ ኬꬅ ኤክ ኤፍዶሶና። አይሁደት ፓስካ ባኣለ ካꬃ ማናዉ ባንታና ቱንሶና መላ ደርያ ሃረይሳ ኦሶ ኬꬃ ገልቦኮና።
JOH 18:29 ሄሳ ግሾ፥ ጵላፆስ ኤንታኮ ካረ ከይድ፥ “ሀ አድያ አይስ ሞተቲ?” ያግስ።
JOH 18:30 ኤንቲ፥ “እ ኢታ ኦꬆናባ ግድያኮ ኑኒ እያ ኔኮ ኤሆኮ” ያግዶሶና።
JOH 18:31 ጵላፆስ ዛሪድ፥ “ህንተ እያ ኤክ ኤፍድ፥ ህንተ ህገይ ገይሳዳ እያ ቦላ ፕርድተ” ያግስ። አይሁደት፥ “ኦናካ ዎꬍያ ማት ኑስ ባዋ” ያግዶሶና፤
JOH 18:32 ሄስ ሀንዳይ የሱሲ አይ መላ ሀይቆ ሀይቃነኮ ኤርሳናዉ ኦድዳይስ ፖለታናሳ።
JOH 18:33 ጵላፆስ ባ ኦሶ ኬꬃ ዛር ገልድ፥ የሱሳ ፄግድ፥ “ኔኒ አይሁደ ካዎ?” ያግድ ኦይችስ።
JOH 18:34 የሱሲ ጵላፆሳ፥ “ሀ ኦይሻ ኔኒ ኔፐ ኦይቻየ ዎይኮ ሀራ አስ ነዉ ታባ ኦድዴ?” ያግስ።
JOH 18:35 ጵላፆስ ዛሪድ፥ “ታ አይሁደ አሴ? ነ አሳይነ ካህነ ሀላቃት ነና ታዉ አꬅድ እምዶሶና። ነ አይ ኦꬃዲ?” ያግስ።
JOH 18:36 የሱሲ፥ “ታ ካዎተꬃይ ሀ አላምያና ግደና። እ ሀይሳን ግድያኮ ታ አይሁደታ ሀላቃታስ አꬋዳ እመቶና መላ ታ አይለት ታዉ ኦለታና። ሽን ታ ካዎተꬃይ ሀ አላምያና ግደና” ያግስ።
JOH 18:37 ሄሳ ግሾ፥ ጵላፆስ የሱሳኮ፥ “ያትን፥ ኔኒ ካዎዬ?” ያግድ ኦይችስ። የሱሲ ዛሪድ፥ “ቱማ ታ ካዎ ግደይሳ ነ ጋዳሳ። ታኒ የለትዳይነ ሀ አላምያ ይዳይ ቱማተꬃስ ማርካታናሳ። ቱማ ባጋ ግድዳ ኦንካ ታኒ ገይሳ ስኤስ” ያግስ።
JOH 18:38 ጵላፆስ፥ “ቱም አይቤ?” ያግስ። ጵላፆስ ሄሳ ግዳፐ ጉየ አይሁደታኮ ካረ ከይድ፥ “ታኒ እያፐ አይ ኢታካ ደማብከ።
JOH 18:39 ሽን ፓስካ ባኣለ ጋላስ፥ እስ አሰ ህንተዉ ቃሾፐ ብልያ ሜዘይ ደኤስ። ታኒ ህንተዉ አይሁደታ ካዋ ብላና መላ ኮዬቲ?” ያግስ።
JOH 18:40 ኤንቲ ዛሪድ፥ ባንታ ቃላ ꬎቁ ኦꬅድ፥ “ባርባና ብላፈ አትሽን፥ እያ ግደና” ያግዶሶና። ሽን ባርባን ፓንጋ።
JOH 19:1 ሄሳፈ ጉየ፥ ጵላፆስ የሱሳ ጋራፍስስ።
JOH 19:2 ዎታዳረት አጉንꬃ ካላቻ መꬍድ እያ ሁጰን ዎꬅዶሶና። ቃስ ዞኦ ማኦ እያ ማይዝዶሶና።
JOH 19:3 እያኮ ሺቅድ፥ “አይሁደ ካዋዉ፥ መርናዉ ካዎታ” ያግድ እያ ባቅዶሶና።
JOH 19:4 ጵላፆስ ቃስካ ካረ ከይድ፥ አይሁደታኮ፥ “ሄኮ፥ ታኒ እያፐ አይ ኢታካ ደማቦናይሳ ህንተ ኤራና መላ እያ ህንተኮ ካረ ከሳና” ያግስ።
JOH 19:5 ሄሳፈ ጉየ፥ የሱሲ አጉንꬃ ካላቻ ባ ሁጰን ዎꬅድ፥ ዞኦ ማኦ ማእድ፥ ካረ ከይስ። ጵላፆስ አይሁደታኮ፥ “ኡራ ሀይሳ በእተ” ያግስ።
JOH 19:6 ካህነ ሀላቃትነ ፆሳ ኬꬃ ናገይሳት እያ በእዳ ዎደ፥ ባንታ ቃላ ꬎቁ ኦꬅድ፥ “ማስቃልያ ቦላ ካቃ! ካቃ!” ያግዶሶና። ጵላፆስ ኤንታኮ፥ “ህንተ እያ ኤፍድ፥ ማስቃልያ ቦላ ካቅተ። ታኒ እያፐ አይ ኢታካ ደማብከ” ያግስ።
JOH 19:7 አይሁደት ዛሪድ፥ “ኑስ ህገይ ደኤስ። እ ባና ፆሳ ናአ ኦꬅዳ ግሾ ኑ ህግያꬆ እ ሀይቃናዉ በሴስ” ያግዶሶና።
JOH 19:8 ጵላፆስ ሄሳ ስእዳ ዎደ ካሰይሳፈ ዳሮ ያይስ።
JOH 19:9 ቃስካ ጵላፆስ ባ ኦሶ ኬꬅ ስም ገልድ የሱሳኮ፥ “ኔኒ አዉፐ ያዲ?” ያግድ ኦይችስ። ሽን የሱሲ እያዉ አይኮካ ዛርቤና።
JOH 19:10 ሄሳ ግሾ፥ ጵላፆስ፥ “ታዉ ኦድኪ? ነና ብላናዉ ዎይኮ ማስቃልያ ቦላ ካቃናዉ ታዉ ማት ደኤይሳ ኤርኪ?” ያግስ።
JOH 19:11 የሱሲ፥ “ፆሳይ ነዉ ማታ እምቦናባ ግድያኮ ታ ቦላ ማት ነዉ ዴናሽን። ሄሳ ግሾ፥ ታና ነዉ አꬅድ እምዳይስ አꬍያ ናጋራ ኦꬅስ” ያግስ።
JOH 19:12 ጵላፆስ ሄሳ ስእዳ ዎደ የሱሳ ብላናዉ ኦገ ኮይስ። ሽን አይሁደት ባንታ ቃላ ꬎቁ ኦꬅድ፥ “ኔኒ እያ ብልያባ ግድኮ ካዋ ቄሳረ ባጋ ግዳካ። ባና ካዎ ግያ ኦንካ ቄሳረ ሞርከ” ያግዶሶና።
JOH 19:13 ጵላፆስ ሄሳ ስእድ የሱሳ ካረ ከስስ። ያትድ፥ “ሎቸ ሹች” ጌተትያ በሳን ፕርዳ ኦይድያን ኡትስ። እብራወꬆ ዶናን ሄ በሳይ “ጋባተ” ጉሱ።
JOH 19:14 ሄ ጋላሳይ ፓስካ ባኣለ ቦንቻናዉ ጊገተꬃ ጋላስ። ሳአይ ኡሱፑን ሳተ ሄራ። ጵላፆስ አይሁደታኮ፥ “ህንተ ካዋ ሀይሳ በእተ” ያግስ።
JOH 19:15 አይሁደት ባንታ ቃላ ꬎቁ ኦꬅድ፥ “ድጋ! ድጋ! ማስቃልያ ቦላ ካቃ” ያግዶሶና። ጵላፆስ ዛሪድ፥ “ህንተ ካዋ ታኒ ማስቃልያ ቦላ ካቃናይሳ ኮዬቲ?” ያግድ ኦይችስ። ካህነ ሀላቃት፥ “ቄሳረፐ ሀራ ካዎይ ኑስ ባዋ” ያግዶሶና።
JOH 19:16 ሄሳፈ ጉየ፥ ኤንቲ የሱሳ ማስቃልያ ቦላ ካቃና መላ ጵላፆስ ኤንታዉ አꬅድ እሚስ። ኤንቲ የሱሳ ኦይክድ ኤፍዶሶና።
JOH 19:17 የሱሲ ባ ማስቃልያ ቶክድ፥ “ሁጰ ጉገ” ጌተትያ በሳ ብስ። “ሁጰ ጉገ” ጉሳይ እብራወꬆ ዶናን “ጎልጎታ” ጉሱ።
JOH 19:18 ኤንቲ ሄ በሳን ማስቃልያ ቦላ የሱሳ ካቅዶሶና። ቃስ እያራ ሀራ ናምኡ አሳታ፥ እሱዋ ያ ባጋራ ሀንኩዋ ሀ ባጋራ ማስቃልያ ቦላ ካቅዶሶና።
JOH 19:19 ጵላፆስ፥ “አይሁደታ ካዋ፥ ናዝረተ የሱሳ” ግያ ፁፈ ፃፍድ ማስቃልያ ቦላ ዎꬅስ።
JOH 19:20 የሱሲ ማስቃልያ ቦላ ካቀትዳ በሳይ ካታማስ ማታን ደእያ ግሾ፥ ዳሮ አይሁደት ሄ ፁፍያ ናባብዶሶና። ፁፈይ ፃፈትዳይ እብራወꬆ ዶናን፥ ላትነ ዶናንነ ግርከ ዶናና።
JOH 19:21 ሄሳ ግሾ፥ ካህነ ሀላቃት ጵላፆሳኮ፥ “ ‘ሀ አደይ ባና አይሁደ ካዎ ያግስ’ ጋዳ ፃፋፐ አትሽን፥ ‘አይሁደ ካዎ’ ጋዳ ፃፎፓ” ያግዶሶና።
JOH 19:22 ያትን፥ ጵላፆስ፥ “ታ ፃፍዳይሳ ፃፋስ” ያግድ ዛርስ።
JOH 19:23 ዎታዳረት ማስቃልያ ቦላ እያ ካቅዳፐ ጉየ፥ እያ ማኡዋ ኤክድ፥ ኦይዱ በሳን ሻክድ፥ እሶ እሶ ኤክዶሶና። የዳ ማኤትያ እያ አዱሳ ማኡዋ ኤክዶሶና።
JOH 19:24 ዎታዳረት፥ “ኦና ጋካኔኮ፥ ሳማ የጋናፐ አትሽን፥ ማኡዋ ፔꬎኮ” ያግዶሶና። ሄስ ሀንዳይ ጌሻ ማፃፋን፥ “ታ ማኡዋ ሻክ ኤክዶሶና፤ ታ አዱሳ ማኡዋ ቦላካ ሳማ የግዶሶና” ጌተትዳይስ ፖለታና መላሳ። ሄሳ ግሾ፥ ዎታዳረት ሄሳ ኦꬅዶሶና።
JOH 19:25 ሽን የሱሳ ማስቃልያ ማታን እያ አይያ፥ እያ አየ ምችያ፥ ቀልዮጰ ማችያ ማይራማነ ማግደላ ማይራማ ኤቅዶሶና።
JOH 19:26 የሱሲ ባ አይዉነ እ ዶስያ ታማረይ ያን ኤቅዳይሳታ በእድ፥ ባ አየኮ፥ “ታ አየ፥ ነ ናኣ ሀይሳ በአ” ያግስ።
JOH 19:27 ሄሳፈ ጉየ፥ ሄ ታማርያኮ፥ “ነ አይዉ ሀኖ በአ” ያግስ። ሄ ታማረይ እዮ ሄ ዎደፐ ዶምድ ባራ ዳና መላ ሶ ኤፍስ።
JOH 19:28 ሄሳፈ ጉየ፥ የሱሲ ኡባይ ሀእ ፖለትዳይሳ ኤርድ፥ ጌሻ ማፃፋን ፃፈትዳይስ ፖለታና መላ “ታና ሳሜስ” ያግስ።
JOH 19:29 ሄ በሳን እስ ፁጋ ኩመꬃ ጫላ ዎይነይ ደኤስ። ኤንቲ እስፖንጀ ሄ ዎይንያን የግድ፥ ህሶጰ ምꬃ ፄራን ዎꬅድ፥ የሱሳ ዶናኮ ሺሽዶሶና።
JOH 19:30 የሱሲ ዎይንያ ጋንፅ በእድ፥ “ፖለትስ” ያግስ። ሄሳፈ ጉየ፥ ባ ሁጵያ ዝቅ ኦꬅድ ባ ሸምፑዋ እሚስ።
JOH 19:31 ሄ ጋላሳይ ጊገተꬃ ጋላስ ግድያ ግሾነ ዎንተꬃ ጋላሳይ ቦንቾ ሳምባታ ግድያ ግሾ፥ አሳታ አሀይ ማስቃልያ ቦላ ሳምባታ ጋላስ ፔኦና መላ ኤንታ ቶሁዋ መንꬅድ፥ ማስቃልያፐ ዎꬍሳና መላ አይሁደት ጵላፆሳ ዎስዶሶና።
JOH 19:32 ሄሳ ግሾ፥ ዎታዳረት ብድ፥ የሱሳራ ካቀትዳ ናምኡ አሳታ ቶሁዋ መንꬅዶሶና።
JOH 19:33 ሽን የሱሳኮ ይዳ ዎደ እ ሀይቅዳይሳ በእድ፥ እያ ቶሁዋ መንꬅቦኮና።
JOH 19:34 ሽን ዎታዳረታፐ እሶይ እያ ምያ ቶራን ጫድን ኢራካ ሱꬅነ ሃꬅ ጎግስ።
JOH 19:35 ህንተ አማናና መላ ሄሳ በእዳይስ ማርካትስ። እያ ማርካተꬃይካ ቱማ። ቃስ እ ኦደይስ ቱማ ግደይሳ ኤሬስ።
JOH 19:36 ሄስ ሀንዳይ ጌሻ ማፃፋይ፥ “እያ መቀꬃታፐ እሶይካ መቀና” ግዳይስ ፖለታና መላሳ።
JOH 19:37 ቃስካ ጌሻ ማፃፋይ ሀራ በሳን፥ “ኤንቲ ባንታ ጫድዳይሳ በአና” ያጌስ።
JOH 19:38 ሄሳፈ ጉየ፥ አርማተ ካታማፐ ይዳ ዮሰፍ የሱሳ አሀ ኤካናዉ ጵላፆሳ ዎስስ። ዮሰፍ አይሁደታስ ያይዳ ግሾ ቆሳን የሱሳ ካለይሳ። ጵላፆስ፥ “ኤካ” ያግስ። ሄሳ ግሾ፥ ዮሰፍ ብድ የሱሳ አሀ ኤክስ።
JOH 19:39 ቃስ ንቆድሞስ ሄሳፈ ካሰ የሱሳኮ ቃማ ይዳይስ፥ ካርበነ ጎዳረ ኡꬃራ ዋላከትዳ ሀስታማነ እስ ክሎ ግራመ ግድያ ሽቶ ኤክድ ዮሰፋራ ይስ።
JOH 19:40 ሄ ናምኡ አሳት የሱሳ አሀ ኤክድ፥ አይሁደት አሀ ፃፅያ ማራን፥ ሽቶራ፥ ሞጎ አፍላን ፃፅዶሶና።
JOH 19:41 የሱሲ ማስቃልያ ቦላ ካቀትዳ በሳን ዳሮ አታክልተይ ደኤስ። ሄ አታክልትያ ግዶን ሹቻፈ ዎጨትድ ኦሰትዳ ቡሮ ኦንካ ሞገትቦና ኦራꬃ ዱፎይ ደኤስ።
JOH 19:42 ሄ ጎንጎሎይ ማታን ደእያ ግሾነ አይሁደት ሳምባታስ ጊገትያ ጋላስ ግድያ ግሾ፥ የሱሳ አሀ ያን ሞግዶሶና።
JOH 20:1 ዎጋ ዎደ ዎንታ ቡሮ ጌዮና ደእሽን፥ ማግደላ ማይራማ፥ የሱሲ ሞገትዳ ዱፉዋ ባዳ ሹቻይ ሄ ዱፉዋ ዶናፐ ደንድዳይሳ በአሱ።
JOH 20:2 ስሞን ጰፅሮሳኮነ የሱሲ ዶስያ ሀንኮ ታማርያኮ ዎፃ ባዳ፥ “ዱፉዋፐ ጎዳ ኤፍዶሶና፤ እያ አዉን ዎꬅዳኮ ኑ ኤሮኮ” ያጋሱ።
JOH 20:3 ሄሳ ግሾ፥ ጰፅሮስነ ሀንኮ ታማረይ ከይድ ዱፉዋ ብዶሶና።
JOH 20:4 ናምአይካ እስፈ ዎፅዶሶና፥ ሽን ሀንኮ ታማረይ ጰፅሮሳፐ አꬍድ ስንꬃትድ ዱፉዋ ጋክስ።
JOH 20:5 ሄ ታማረይ ሆክድ፥ ሞጎ አፍላ በእስ፥ ሽን ዱፉዋን ዎꬍቤና።
JOH 20:6 ስሞን ጰፅሮስ እያ ካል ይድ፥ ዱፉዋን ዎꬍድ ሞጎ አፍላይ ያን ደኤይሳ በእስ።
JOH 20:7 ቃስ የሱሳ ሁጰን ፃፀትዳ አፍላይ ፃፀትዳ መላ ዱማ እስ በሳን ደኤይሳ በእስ። ሄ አፍላይ ዱማ ደኤስፐ አትሽን፥ ሞጎ አፍላራ እስፈ ዴና።
JOH 20:8 ሄ ዎደ፥ ስንꬃትድ ዱፉዋ ጋክዳ ሀንኮ ታማረይ ገል በእድ አማንስ።
JOH 20:9 የሱሲ ሀይቆፐ ደንዳናዉ በሰይሳ ኦድያ ጌሻ ማፃፋ ቃላ ኤንቲ ቡሮ አኬክቦኮና።
JOH 20:10 ሄሳፈ ጉየ፥ እያ ታማረት ባንታ ሶ ስም ብዶሶና።
JOH 20:11 ሽን ማይራማ ሄ ዱፉዋ ዶናን ኤቃዳ ዬካሸ ሆካዳ ዱፉዋ ግዶ ፄላሱ።
JOH 20:12 ቦꬃ ማኦ ማእዳ ናምኡ ኪታንቾት የሱሳ አሀይ ዝንእዳ በሳን እሶይ ሁጰሶራ ሀንኮይ ቶሆሶራ ኡትዳሽን በአሱ።
JOH 20:13 ኤንቲ ኢኮ፥ “ማጫሰተ፥ አይስ ዬካይ?” ያግድ ኦይችዶሶና። እያ፥ “ኤንቲ ታ ጎዳ ኤፍዶሶና፤ ኤንቲ አዉን ዎꬅዳኮ ታኒ ኤርከ” ያጋሱ።
JOH 20:14 ሄሳ ግዳፐ ጉየ፥ እያ ጉየ ስማ ፄልያ ዎደ፥ የሱሲ ያን ኤቅዳይሳ በአሱ። ሽን እ የሱሳ ግድዳይሳ ኤራቡኩ።
JOH 20:15 የሱሲ ኢኮ፥ “ማጫሰተ፥ አይስ ዬካይ? ኦና ኮያይ?” ያግድ ኦይችስ። ማይራማ አታክልተ ኦሳንቹዋ ዳንን፥ “ጎዳዉ፥ ነ ኤክዳባ ግድኮ፥ እያ አዉን ዎꬅዳኮ ታዉ ኦዳርኪ። ታኒ እያ ኤካና” ያጋሱ።
JOH 20:16 የሱሲ ኢኮ፥ “ማይራመ” ያግስ። እያ እያኮ ስማዳ፥ እብራወꬆ ዶናን “ረቡን” ያጋሱ። ሄሳስ ብርሸꬃይ “አስታማርያዉ” ጉሱ።
JOH 20:17 የሱሲ ኢኮ፥ “ታኒ ቡሮ ታ አዋኮ ቦና ግሾ፥ ታና ኦይኮፋ። ሽን ታ እሻታኮ ባዳ፥ ‘ታኒ ታ አዋኮነ ህንተ አዋኮ፥ ታ ፆሳኮነ ህንተ ፆሳኮ፥ ስማና ግስ’ ጋዳ ኤንታዉ ኦዳ” ያግስ።
JOH 20:18 ማግደላ ማይራማ ጎዳ በእዳይሳነ እዉ ሄሳ እ ኦድዳይሳ ባዳ እያ ታማረታስ ኦዳሱ።
JOH 20:19 ዎጋ ዎደ ኦማርስ፥ እያ ታማረት አይሁደታስ ያይድ ካርያ ጎርድድ ሺቅ ኡትዳሽን፥ የሱሲ ይድ፥ ኤንታ ግዶን ኤቅድ፥ “ሳሮይ ህንተዉ ግዶ” ያግስ።
JOH 20:20 ሄሳ ግድ ስሚድ ባ ኩሽያነ ባ ምያ ኤንታ በስስ። እያ ታማረት ጎዳ በእዳ ዎደ ዳሮ ኡፋይትዶሶና።
JOH 20:21 የሱሲ ዛሪድ ኤንታኮ፥ “ሳሮይ ህንተዉ ግዶ፤ ታ አዋይ ታና ኪትዳይሳዳ ታንካ ህንተና ኪታይስ” ያግስ።
JOH 20:22 ሄሳ ግዳፐ ጉየ፥ ኤንታ ቦላ ኡፉ ግድ ፑንስ። ቃስ፥ “ጌሻ አያና ኤክተ።
JOH 20:23 ህንተ አቶ ግዳ አሳ ናጋራይ አቶ ጌተታና። ህንተ አቶ ጎናይሳታ ናጋራይ አቶ ጌተተና” ያግስ።
JOH 20:24 ሽን ታማነ ናምኡ ታማረታፐ እሶይ፥ ድድሞሳ ጌተትያ ቶማስ፥ የሱሲ ይዳ ዎደ ኤንታራ ዴና።
JOH 20:25 ሄሳ ግሾ፥ ሀንኮ እያ ታማረት ቶማሳኮ፥ “ኑኒ ጎዳ በእዳ” ያግዶሶና። ሽን ቶማስ ኤንታኮ፥ “ምስማረን እ ጫደትዳ እያ ኩሽያን ደእያ ቤታ በኦናነ ሄ ቤታ ታ ብራን ቦቾና፥ ቃስ ታ ኩሽያ እያ ምየን የዳ በኦና አማንከ” ያግስ።
JOH 20:26 ሳምንታፈ ጉየ፥ የሱሳ ታማረት ቃስካ ሶን ሺቅድ ኡትዶሶና፤ ቶማስካ ኤንታራ ደኤስ። ካረይ ጎርደትድ ደእሽን የሱሲ ይድ፥ ኤንታ ግዶን ኤቅድ፥ “ሳሮይ ህንተዉ ግዶ” ያግስ።
JOH 20:27 ሄሳፈ ጉየ፥ የሱሲ ቶማሳኮ፥ “ታ ኩሽያ ነ ብራን ቦቻዳ በአ። ቃስ ነ ኩሽያ ታ ምይያን የዳ በአ። ኔኒ ስꬎፓ፥ አማና” ያግስ።
JOH 20:28 ቶማስ ዛሪድ፥ “ታ ጎዳዉ፥ ታ ፆሳዉ” ያግስ።
JOH 20:29 ያትን የሱሲ፥ “ኔኒ ታና በእዳ ግሾ አማናዳሳ፥ ሽን ታና በኦና አማንዳይሳት አንጀትዳይሳታ” ያግስ።
JOH 20:30 የሱሲ ሀ ማፃፋን ፃፈትቦና ሀራ ዳሮ ማላታታ ባ ታማረታ ስንꬃን ኦꬅስ።
JOH 20:31 ሽን የሱሲ እ ክርስቶሳ፥ ፆሳ ናኣ ግደይሳ ህንተ አማናና መላነ አማንድ እያ ሱንꬃን ደኦ ደማና መላ ሃይስ ፃፈትስ።
JOH 21:1 ሄሳፈ ጉየ፥ የሱሲ ፅብራዶሳ አባ ማታን ባ ታማረታስ ዛር ቆንጭስ። እ ኤንታዉ ሀይሳፈ ካልድ ደእያ ሀኖታን ቆንጭስ።
JOH 21:2 ስሞን ጰፅሮስ፥ መንተ ጌተትያ ቶማስ፥ ቃና ጋልላፐ ይዳ ናትናኤል፥ ዛብድዮሳ ናይትነ የሱሳ ታማረታፐ ሀራ ናምአት እስፈ ደኦሶና።
JOH 21:3 ስሞን ጰፅሮስ ኤንታኮ፥ “ታኒ ሞሎ ኦይካናዉ ባይስ” ያግስ። ኤንቲ፥ “ኑካ ኔራ ባና” ያግድ፥ ዎጎሉዋ ግዶ ገልዶሶና። ሽን ኤንቲ ሄ ቃማን አይብ ሞሎካ ኦይክቦኮና።
JOH 21:4 ዎንታ ጉራ ፃልቀይ ዶላናፐ ስን፥ የሱሲ አባ ጋፃን ኤቅስ፥ ሽን እያ ታማረት የሱሳ ግድዳይሳ ኤርቦኮና።
JOH 21:5 የሱሲ ኤንታኮ፥ “ታ ላገቶ፥ ሞሎ ኦይክቤከቲ?” ያግስ። ኤንቲ ዛሪድ፥ “አይኮካ ኦይክቦኮ” ያግዶሶና።
JOH 21:6 እ ዛሪድ፥ “ህንተ ግትያ ዎጎሉዋፐ ኡሻቻ ባጋራ የግተ፤ ጉꬃ ሞሎ ህንተ ኦይካና” ያግስ። ሄሳ ግሾ፥ ግትያ ኡሻቻ ባጋራ የግዶሶና። ሞሎይ ዳርዳ ግሾ ጎች ከሳናዉ ፆነትዶሶና።
JOH 21:7 የሱሲ ዶስያ ታማረይ ጰፅሮሳኮ፥ “ሀይስ ጎዳ!” ያግስ። ስሞን ጰፅሮስ እ ጎዳ ግዳይሳ ስእዳ ዎደ፥ ካሎ ደእያ ግሾ፥ ባ ማኡዋ ማእድ አባ ግዶ ጉፕ ገልስ።
JOH 21:8 ሽን ዎጎሉዋን አትዳ ሀንኮ ታማረት ሞሎይ ኩምዳ ግትያ ጎችድ፥ አባፈ ጋፃ ከይዶሶና። ኤንቲ አባፈ ናምኡ ፄቱ ዋꬋ መላ ሃኮሶና።
JOH 21:9 ኤንቲ አባፈ ጋፃ ከይዳ ዎደ፥ ፂፋ ቦንቆን ሞሎይ ደኤይሳነ ኡይꬅ በእዶሶና።
JOH 21:10 የሱሲ ኤንታኮ፥ “ሀእ ህንተ ኦይክዳ ሞሉዋፐ ጉꬃራ ሀምተ” ያግስ።
JOH 21:11 ስሞን ጰፅሮስ ዎጎሉዋን ገልድ፥ ፄታነ እሻታማነ ሄꬑ ዎጋ ሞሎት ኩምዳ ግትያ ጎችድ አባፈ ጋፃ ከስስ። ሞሎይ ሄሳ መላ ዳሮ ግድን ግተይ ዳከትቤና።
JOH 21:12 የሱሲ ኤንታኮ፥ “ሃ ይድ ሚተ” ያግስ። እ ጎዳ ግደይሳ ኤንቲ ኤርዳ ግሾ፥ እያ ታማረታፐ እሶይካ፥ “ኔኒ ኦኔ?” ግድ እያ ኦይቻናዉ ምንዳይ ባዋ።
JOH 21:13 የሱሲ ይድ፥ ኡይꬃ ኤክድ ኤንታዉ እሚስ፤ ሞሉዋካ ሄሳዳ እሚስ።
JOH 21:14 የሱሲ ሀይቆፐ ደንድድ ባ ታማረታስ ቆንጭሽን ሀይስ ሄꬓንꬆ።
JOH 21:15 ኤንቲ ምዳፐ ጉየ፥ የሱሲ ስሞን ጰፅሮሳኮ፥ “ዮና ናአዉ ስሞና፥ ታና ሀይሳታፐ አꬃዳ ዶሳይ?” ያግስ። ስሞን ጰፅሮስ፥ “ኤ ጎዳዉ፥ ታኒ ነና ዶሰይሳ ነ ኤራሳ” ያግስ። የሱሲ እያኮ፥ “ታ ዶርሳ ማራታ ሄማ” ያግስ።
JOH 21:16 የሱሲ ቃስካ፥ “ዮና ናአዉ ስሞና፥ ታና ዶሳይ?” ያግስ። ስሞን ጰፅሮስ፥ “ኤ ጎዳዉ፥ ታኒ ነና ዶሰይሳ ነ ኤራሳ” ያግስ። የሱሲ፥ “ታ ዶርሳታ ሄማ” ያግስ።
JOH 21:17 የሱሲ ሄꬓንꬆ፥ “ዮና ናአዉ ስሞና፥ ታና ዶሳይ?” ያግስ። የሱሲ ሄꬓንꬆ ስሞን ጰፅሮሳኮ፥ “ታና ዶሳይ?” ያግድ ኦይችዳ ግሾ፥ ጰፅሮስ አዛንድ፥ “ጎዳዉ፥ ኔኒ ኡባባ ኤራሳ፤ ታኒ ነና ዶሰይሳ ነ ኤራሳ” ያግስ። የሱሲ፥ “ታ ዶርሳታ ሄማ።
JOH 21:18 ታኒ ነዉ ቱማ ኦዳይስ፤ ኔኒ ናአተꬃን ደእያ ዎደ፥ ነርካ ዳንጨታዳ፥ ነ ኮይዳ ሶ ባሳ። ሽን ነ ጭምዳ ዎደ ነ ኩሽያ ምጫ በሳና። ሀር ዳንጭሳና፤ ነ ዶሶና ሶ ኤፋና” ያግስ።
JOH 21:19 የሱሲ ሄሳ ጰፅሮስ አይ መላ ሀይቆ ሀይቅድ፥ ፆሳ ቦንችሳኔኮ ኤርሳናዉ ግስ። ሄሳ ግዳፐ ጉየ፥ የሱሲ ጰፅሮሳኮ፥ “ታና ካላ” ያግስ።
JOH 21:20 ጰፅሮስ ጉየ ስሚድ፥ የሱሲ ዶስያ ታማረይ ባፐ ጉየራ የይሳ በእስ። ሄ ታማረይ፥ ካሆ ምያ በሳን የሱሳኮ ሺቅድ፥ “ጎዳዉ፥ ነና አꬅድ እማናይ ኦኔ?” ግዳይሳ።
JOH 21:21 ጰፅሮስ ሄ ታማርያ በእድ፥ “ጎዳዉ፥ ሀ አደይ ቃስ ዋናኔ?” ያግድ የሱሳ ኦይችስ።
JOH 21:22 የሱሲ እያኮ፥ “ታኒ ያና ጋካናዉ እ ዳና መላ ታኒ ኮይኮ፥ ሄስ ነና አይ መትዴ? ኔኒ ታና ካላ” ያግስ።
JOH 21:23 ሄሳ ግሾ፥ ሄ ታማረይ ሀይቀና ግያ ኦዳይ እሻታ ኡባ ጋክስ። ሽን የሱሲ፥ “ታኒ ያና ጋካናዉ፥ እ ዳና መላ ታኒ ኮይኮ ነና አይ መትዴ?” ያግስፐ አትሽን፥ “ሀይቀና” ግቤና።
JOH 21:24 ሀ ኦዳባ ማርካትዳይነ ሀይሳ ፃፍዳይ ሄ ታማርያ። እያ ማርካተꬃይ ቱማ ግደይሳ ኑኒ ኤሮስ።
JOH 21:25 የሱሲ ኦꬅዳ ሀራ ዳሮባይ ደኤስ። ታ ቆፕን፥ ኡባባይ ሁጰን ሁጰን ፃፈትዳኮ፥ ፃፈትያ ማፃፋታስ ኩመꬃ አላመይ ዎꬃናዉ ግዳናባ ዳነና።
ACT 1:1 ተዎፍሎሳ፥ የሱሲ ባ ኦሱዋ ኦይክዳ ዎደፐ ሳሎ ብዳ ጋላሳ ጋካናዉ፥ ኦꬅዳባነ ታማርስዳባ ኡባ ታኒ ታ ኮይሮ ማፃፋን ፃፋስ። ሳሎ ባናፐ ስን እ ባ ዶርዳ ሀዋረታ፥ ጌሻ አያናን ኪትስ።
ACT 1:3 እ ባ ዋያፐ ጉየ፥ ሀይቆፐ ደንድዳይሳ ስይ ባይና ቆንጭስድ ኤንታዉ ባና በስስ። ኦይታሙ ጋላስ ኤንታዉ ቆንጭድ ፆሳ ካዎተꬃባ ኤንታ ታማርስስ።
ACT 1:4 እስ ዎደ ኤንታራ እስፈ ደእሸ ኤንታ ሀይሳዳ ያግድ ኪትስ፦ “ታ ህንተዉ ኦድዳ፥ ታ አዋይ እማና ግዳ ኡፋይሳ ቃላ ናግተፐ አትሽን፥ የሩሳላመፐ ከዮፕተ።
ACT 1:5 ዮሃንስ ሃꬃን ፃማቅስ፥ ሽን ጉꬃ ዎደፐ ጉየ፥ ጌሻ አያናን ህንተ ፃማቀታና” ያግስ።
ACT 1:6 ሀዋረት እስፈ የሱሳራ ሺቅዳ በሳን፥ “ጎዳዉ፥ እስራኤለታስ ነ ካዎተꬃ ዛራና ዎደይ ሀይሴ?” ያግድ ኦይችዶሶና።
ACT 1:7 የሱሲ ኤንታኮ፥ “ታ አዋይ ባ ማታን ኦꬅያ ዎደነ ላይꬅ ህንተ ኤራናዉ ዳንዳኤከታ።
ACT 1:8 ሽን ጌሻ አያናይ ህንተ ቦላ ዎꬍያ ዎደ፥ ህንተ ዎልቃን ኩማና። ያን ስሚድ፥ የሩሳላመን፥ ይሁዳ ቢታ ኡባን፥ ሳማረንነ ሳአ ጋፃ ጋካናዉ ታዉ ማርካታ ግዳና” ያግስ።
ACT 1:9 ሄሳ ግዳፐ ጉየ ኤንቲ ፄልሽን፥ ꬎቁ ꬎቁ ግድ፥ ሳሎ ብን፥ እያ ኤንታ አይፈፐ ሻር ገንꬅስ።
ACT 1:10 የሱሲ ብያ ዎደ ኤንቲ ሳሎ ትሽ ኦꬅድ ፄልሽን፥ ቦꬃ ማኦ ማእዳ ናምኡ አሳት አኬኮና ኤንታ ማታን ኤቅድ፥
ACT 1:11 “ጋልላ አሳቶ፥ ሳሎ ፄልሸ፥ ህንተ አይስ ኤቅደቲ? ሀ ህንተ በእሽን ሳሎ ብዳ የሱሲ ሄሳዳካ ስሚድ ያና” ያግዶሶና።
ACT 1:12 ሄሳፈ ጉየ፥ ሀዋረት ሻማሆ ዙማፐ የሩሳላመ ስምዶሶና። ሻማሆ ዙማይ የሩሳላመስ ማታን ደኤስ።
ACT 1:13 ኤንቲ የሩሳላመ ገልድ፥ ባንታ ደእያ በሳ፥ ፖቅያ ቦላ ከይዶሶና። ኤንትካ፦ ጰፅሮሳ፥ ዮሃንሳ፥ ያይቆባ፥ እንድርያሳ፥ ፍልጶሳ፥ ቶማሳ፥ ባርተለሞሳ፥ ማቶሳ፥ እልፍዮሳ ናአ ያይቆባ፥ ባ ቢታስ ምሸትያ ስሞናነ ያይቆባ ናአ ይሁዳ።
ACT 1:14 ሀይሳቲ ኡባይ ማጫሳታራ፥ የሱሳ አየ ማይራምራነ የሱሳ እሻታራ ኡባይ እስ ዎዛናን ግድድ ምንꬅድ ዎሶሶና።
ACT 1:15 ሄ ዎደ፥ ጰፅሮስ ፄታነ ላታማ ግድያ አማንያ አሳይ ሺቅዳ በሳን ደንድ ኤቅድ፥ ሀይሳዳ ያግስ፦
ACT 1:16 “አሳዉ፥ የሱሳ ኦይክዳይሳታ ካለꬅዳ ይሁዳባ፥ ጌሻ አያናይ ካሰ ዳዊታ ዶናን ኦድዳ ፆሳ ቃላይ ፖለታናዉ በሴስ።
ACT 1:17 ይሁድ ኑራ እስፈ ሀ ኦሱዋ ኦꬃናዉ ዶረትዳ አስ።”
ACT 1:18 ሽን ይሁድ ባ ኢታ ኦሱዋን ደምዳ ሚሸን ጋደ ሻምስ። እ ስንꬃ ጉꬁ ኩንድን፥ እያ ኡሎይ ዳከትስ፤ እያ ማራጨ ኡባይ ካረ ከይስ።
ACT 1:19 ይሁዳ ቦላ ሀንዳባ የሩሳላመን ደእያ አሳ ኡባይ ስእስ። ሄሳ ግሾ፥ ሄ ጋድያ ባንታ ቃላን አከልዳማ (ሱꬃ ጋደ) ግድ ፄግዶሶና።
ACT 1:20 “ሄስካ ማዝሙረ ማፃፋን፥ “ ‘እያ ኬꬃይ ካሎ አቶ፤ ኦንካ እያን ደኦፖ። ቃስ እያ ሹማተꬃ ሀር ኤኮ’ ጌተትድ ፃፈትስ።
ACT 1:21 “ሄሳ ግሾ፥ ጎዳ የሱሲ ኑ ግዶን ስመረትዳ ዎደ ኡባን ኑራ ደኤይሳታፐ፥
ACT 1:22 ቃስ ፃማቅያ ዮሃንሳ ዎደፐ ዶምድ ጎዳ የሱሲ ሳሎ ብዳ ጋላስ ጋካናዉ ኑራ ደኤይሳታፐ እስ አስ እያ ደንዱዋስ ኑራ ማርካ ግዳናዉ በሴስ” ያግስ።
ACT 1:23 ሄሳ ግሾ፥ አሳይ ዶሩዋስ ዮስፆሳ ዎይኮ ባርሳባሳ ጌተትያ ዮሰፋነ ማትያሳ ናምአ ሺሽዶሶና።
ACT 1:24 ሄሳፈ ጉየ፥ ፆሳ ዎስሸ፥ “አሳ ኡባ ዎዛና ኤርያ ጎዳዉ፥ ሀ ናምአታፐ ነ ኦና ዶርዳኮ ኑና በሳ።
ACT 1:25 ይሁድ ባ በሳ ብድ፥ አግዳ ኦሱዋነ ሀዋረተꬃ ኦሱዋ ኤካና መላ ሀይሳታፐ ኑስ ቆንጭሳ” ያግዶሶና።
ACT 1:26 ኤንታ ቦላ ሳማ የግዶሶና። ሳማይ ማትያሳ ቦላ ዎꬍን፥ ማትያስ ታማነ እስ ሀዋረታ ቦላ ጉዠትስ።
ACT 2:1 ጰንፀቆስፀ ጋላሳይ ጋክዳ ዎደ አማንያ አሳ ኡባይ እስፈ እስ በሳን ሺቅድ ደኦሶና።
ACT 2:2 ቆፖና ዎልቃማ ጎተዳ ጉምያ ጉንꬃይ አኬኮና ሳሎፐ ይድ ኤንቲ ደእያ ኬꬃ ኩምስ።
ACT 2:3 ቃስ ታማ ላጮ ዳንያ እንፃርሳት ኤንታዉ በንትሸ፥ ሻከት ሻከት ኤንታ ኡባ ቦላ ዎꬍዶሶና።
ACT 2:4 ኤንቲ ኡባይ ጌሻ አያናን ኩምድ ዱማ ዱማ ዶናን ኦደታና መላ ጌሻ አያናይ ኤንታ ዳንዳእስን ሃሳያ ዶምዶሶና።
ACT 2:5 ሄ ዎደ ቢታ ኡባፈ ይዳ ፆሳስ ባቢያ አይሁደት የሩሳላመን ደኦሶና።
ACT 2:6 ሄ ጉንꬃ ስእዳ ዎደ ዳሮ አሳይ ሺቅዶሶና። አማንያ አሳይ ኤንታ ቃላን ኦደትሽን ስእዳ ግሾ፥
ACT 2:7 ማላለትድ፥ “ሀ ኦደትያ አሳ ኡባይ ጋልላ አሰ ግዶኮናዬ?
ACT 2:8 ያትን፥ ኑኒ፥ ኑ የለትዳ ቢታ ዶናን ኤንቲ ኦደትሽን ዋንድ ስአናዉ ዳንዳእዶ?
ACT 2:9 ኑኒ ጳርፀን፥ ሜዶናን፥ ኤላማን፥ ማሰጰፆመን ደኤይሳት፥ ይሁዳን፥ ቃጳዶቃን፥ ጳንፆሳን፥ ኢሰን፥
ACT 2:10 ፕርገን፥ ጵንፍለን፥ ግብፀን፥ ቃረና ማታን ደእያ ሊበን ደኤይሳታ። ኑፐ ባጋትካ ሮመፐ ይዳ አሳታ።
ACT 2:11 አይሁደትነ አይሁደተꬃ አማኖ ገልዳ አሳት፥ ቃርፄሳነ አራበ አሳት፥ ፆሳይ ኦꬅዳ ግታ ኦሱዋ ኑ ቃላን ኦደትሽን ስኦስ” ያግዶሶና።
ACT 2:12 ኡባይ ማላለትድ፥ ጋናባ ꬋይድ፥ “ላ ሀይስ አይ ጉሴ?” ያግዶሶና።
ACT 2:13 ሽን ሀራት፥ “ሀይሳቲ ዎይነ ኡይድ ማꬆትዶሶና” ያግድ ቀልቅስዶሶና።
ACT 2:14 ሽን ጰፅሮስ፥ ታማነ እስ ሀዋረታራ ደንድ ኤቅድ፥ ባ ቃላ ꬎቁ ኦꬅድ፥ ኤንታዉ ሀይሳዳ ያግድ ኦድስ፦ “አይሁደቶ፥ የሩሳላመን ደእያ ኡባቶ፥ ታኒ ኦደይሳ ስእተ።
ACT 2:15 ዎንታፈ ሄꬑ ሳተ ግድያ ግሾ ህንተ ቆፐይሳዳ ሀ አሳት ማꬆትቦኮና፤ ሄስ ህንተዉ ኤረቶ።
ACT 2:16 ሽን ሀይስ ሀንዳይ ናበይ እዩኤል ኦድዳይስ ፖለታና መላሳ።
ACT 2:17 “ ‘ፆሳይ፥ ዎድያ ዉርሰꬃን ሀይሳዳ ሀናና ያጌስ፦ ታኒ አሳ ኡባ ቦላ ታ አያና ጉሳና። ህንተ አደ ናይትነ ማጫ ናይት፥ ትንብተ ኦዳና። ህንተ ያላጋት ቆንጨꬅ በአና፤ ህንተ ጭማት አሙሆ አሙሀና።
ACT 2:18 ሄ ጋላሳታን ታና አማንያ አደ አይለታ ቦላነ ማጫ አይለታ ቦላ ታኒ ታ አያና ጉሳና፤ ኤንቲ ትንብተ ኦዳና።
ACT 2:19 ቃስ ታኒ ቦላ ሳሎን ኦራꬃባ፥ ጋርሳ ሳአንካ ማላ በሳና። ሱꬃይ፥ ታማይነ ዎልቃማ ጫጋናይ በንታና።
ACT 2:20 ግታነ ቦንቾ ግድዳ ጎዳ ጋላሳይ ጋካናፐ ስን አው ꬉማና፤ አጌን ሱꬅ ዳናና።
ACT 2:21 ሄ ዎደ ሄሳዳ ሀናና፤ ጎዳ ሱንꬃ ፄግያ ኦንካ አታና’ ያግስ።
ACT 2:22 “እስራኤለ አሳቶ፥ ሀ ቃላ ስእተ። ናዝረተ የሱሳ ኦናተꬃይ፥ ፆሳይ ህንተ ግዶን ኦꬅዳ ዎልቃማ ኦሱዋንነ ማላታታን ህንተዉ ቆንጮይሳ ህንተ፥ ህንተ ሁጰን ኤሬታ።
ACT 2:23 ፆሳ ካሰ ኤራንነ እያ ሸነን፥ የሱሲ ህንተዉ አꬍድ እመትስ። ህንተ፥ ናጋራንቾት እያ ማስቃለ ቦላ ካቅድ ዎꬋና መላ አꬅድ እምደታ።
ACT 2:24 ሽን ፆሳይ ሀይቆ ዎልቃ ድግድ እያ ደንꬅስ። ሄሳ ግሾ፥ ሀይቆይ እያ ኦይካናዉ ዳንዳእቤና።
ACT 2:25 ዳዊቲ እያባ ኦድሸ፥ “ ‘ታኒ ያርኮና መላ፥ ጎዳይ ታ ኡሻቻን ደኤስ። ጎዳ ኡባ ዎደ ታ ማታን በአይስ።
ACT 2:26 ሄሳ ግሾ፥ ታ ዎዛናይ ኡፋይትስ፤ ታ እንፃርሳን ኡፋይስ ኩምስ፤ ሀይቅያ ታ አሳተꬃይ ኡፋይሳን ዳና።
ACT 2:27 አይስ ጊኮ፥ ታ ሸምፑዋ ስኦለን አጋካ። ቃስ ነ ጌሻ ናአ አሀ ዎቅሳካ።
ACT 2:28 ኔኒ ታና ደኦ ኦገ ኤርሳዳሳ። ኔኒ ታራ ደኤይሳን ታ ኡፋይሳይ ኩመꬅ ግዴስ’ ያግስ።
ACT 2:29 “አሳዉ፥ ኑ አዋ ዳዊታባ ታ ህንተዉ ጌሻዳ ኦዳና። ዳዊቲ ሀይቅድ ሞገትስ፤ እያ ዱፎይ ሀች ጋካናዉ ኑ ማታን ደኤስ።
ACT 2:30 ዳዊቲ ናበ ግድዳ ግሾ፥ ፆሳይ እያ ሼሻፐ እሱዋ እያ ካዎተꬃ አራታ ቦላ ኡትሳናዉ እያዉ ጫቅዳ ጫቁዋ ኤሬስ።
ACT 2:31 ሄሳ ግሾ፥ ክርስቶሳ ደንዱዋ ስን ፄልድ፥ ‘እያ ሸምፖይ ስኦለን አትቤና፤ እያ አሳተꬃይካ ዎቅቤና’ ግድ ኦድስ።
ACT 2:32 “ፆሳይ፥ ሀ የሱሳ ሀይቆፐ ደንꬅዳይሳስ ኑኒ ኡባይ ማርካ።
ACT 2:33 ሄሳ ግሾ፥ ፆሳይ ባራ ሃራና መላ ባፐ ኡሻቻ ባጋራ እያ ꬎቁ ꬎቁ ኦꬅድ፥ እያዉ እማና ጌተትዳ ጌሻ አያና ኤክድ፥ ሀይሳ ህንተ ሀእ በኤይሳነ ስኤይሳ ኑ ቦላ ጉስስ።
ACT 2:34 ጋሶይካ፥ ዳዊቲ ባ ሁጰን ሳሎ ብቤና ሽን ያግስ። “ጎዳይ፥ ታ ጎዳ፥ ‘ታኒ ነ ሞርከታ ነ ቶሆይ የꬍያሶ ኦꬃና ጋካናዉ ሀይሳን፥ ታፐ ኡሻቻ ባጋራ ኡታ’ ” ግስ። ያግስ።
ACT 2:36 “ሄሳ ግሾ፥ ሀ ህንተ ማስቃለ ቦላ ካቅዳ የሱሳ፥ ፆሳይ ጎዳነ ክርስቶሳ ኦꬅዳይሳ እስራኤለ አሳ ኡባይ ቱማ ኤሮ” ያግስ።
ACT 2:37 አሳይ ጰፅሮስ ግዳይሳ ስእዳ ዎደ ባንታ ዎዛናን ቦሸትድ ጰፅሮሳነ ሀንኮ ሀዋረታኮ፥ “እሻቶ፥ ያትን ኑኒ አይ ኦꬅኖ?” ያግዶሶና።
ACT 2:38 ጰፅሮስ ኤንታኮ፥ “ህንተ ናጋራይ አቶ ጌተታና መላ ናጋራፐ ስሚድ፥ ህንተ እሶይ እሶይ የሱስ ክርስቶሳ ሱንꬃን ፃማቀትተ። ፆሳይ እምያ ጌሻ አያና ህንተ ኤካና።
ACT 2:39 ጋሶይካ ፆሳይ እማና ግዳ ኡፋይሳ ቃላይ ህንተዉ፥ ህንተ ናይታስነ ጎዳይ ኑ ፆሳይ ባኮ ፄግያ ሃሆን ደእያ ኡባሳ” ያግስ።
ACT 2:40 ጰፅሮስ ኤንታዉ ሀራ ቃላካ ጉጅ ማርካትድ፥ “ሀ ዎድያ ጌላ አሳ ቦላ ያናዉ ደእያ ፕርዳፈ ህንተ ሁጵያ አሽተ” ያግድ ዞርስ።
ACT 2:41 ጰፅሮስ ኦድዳይሳ ኤክዳይሳት ፃማቀትዶሶና። ሄ ጋላስ ሄꬑ ሙኩሉ ግድያ አሳይ አማንዶሶና።
ACT 2:42 ኤንቲ ሀዋረታ ትምርትያን፥ እስፈተꬃን፥ ኡይꬃ ሙሳንነ ዎሳን ምኖሶና።
ACT 2:43 ሀዋረታ ኩሸን ዳሮ ኦራꬃባይነ ማላት ኦሰትያ ግሾ አሳ ኡባይ ያይዶሶና።
ACT 2:44 አማንዳ ኡባይ እስፈ ደኦሶና፤ ባንታዉ ደእያባ ኡባ እስፈ ሻከቶሶና።
ACT 2:45 ኤንቲ ባንታዉ ደእያባ ባይዝድ ሚሽያ እሱዋስ እሱዋስ ኮሽዳ መላ ሻኮሶና።
ACT 2:46 ኡባ ጋላስ እስ ዎዛናን ግድድ ፆሳ ኬꬃን ሺቆሶና። ባንታ ኬꬃን እሶይ እሱዋ ፄግድ ኡፋይሳንነ አሽከ ዎዛናን ካꬅ ሞሶና።
ACT 2:47 ፆሳ ጋላትሸ አሳ ኡባን ሳበትዶሶና። ጎዳይ አተይሳታ ጋላስ ጋላስ ኤንታ ቦላ ጉጄስ።
ACT 3:1 እስ ጋላስ ጰፅሮስነ ዮሃንስ ዎሳናዉ ኡዱፉን ሳተን ፆሳ ኬꬅ ብዶሶና።
ACT 3:2 የለቶሶፐ ዶምድ ዎበ ግድዳ እስ አደይ ፆሳ ኬꬅ ገልያ አሳፐ ሚሸ ዎሳና መላ ኡባ ጋላስ ሎኦ ጌተትያ ፆሳ ኬꬃ ፐንገን ኤህድ ዎꬆሶና።
ACT 3:3 ሄ ዎበ አደይ ጰፅሮስነ ዮሃንስ ፆሳ ኬꬅ ገላና ሀንሽን በእድ ኤንታ ሚሸ ዎስስ።
ACT 3:4 ኤንትካ እያ ጫድ ፄልድ፥ “ኑኮ ሃ ፄላ” ያግዶሶና።
ACT 3:5 ዎበ አደይ ኤንታፈ አይኮ ኤካና ዳንን ኤንታኮ ፄልስ።
ACT 3:6 ሽን ጰፅሮስ እያኮ፥ “ታዉ ሚሸይ ባዋ፥ ሽን ታዉ ደእያባ ታኒ ነዉ እማና። ናዝረተ የሱስ ክርስቶሳ ሱንꬃን ደንዳዳ ሄመታ” ያግስ።
ACT 3:7 ሄሳፈ ጉየ፥ ዎበ አድያስ ኡሻቻ ኩሽያ ኦይክድ ደንꬅስ። ኤለስድ እያ ቶሆይነ ቅንጫፍለይ ምን አግስ።
ACT 3:8 አደይ ጉፕድ ደንድ ኤቅስ። ገደነ ሃ ሄመꬅ ዶምስ። ሄመትሸ፥ ጉፕሸነ ፆሳ ጋላትሸ ኤንታራ እስፈ ፆሳ ኬꬅ ገልስ።
ACT 3:9 እ ሄመትሽንነ ፆሳ ጋላትሽን አሳ ኡባይ እያ በእዶሶና።
ACT 3:10 በእዳ ኡባይ ሚሸ ዎሳናዉ ሎኦ ጌተትያ ፆሳ ኬꬃ ፐንገን ኡትዳይስ፥ እያ ግድዳይሳ ኤርዶሶና፤ እ ሀንዳባ በእድ ማላለትዶሶና።
ACT 3:11 አደይ ጰፅሮሳፐነ ዮሃንሳፐ ዱፅከ ግድ ኦይክድ ደእሽን፥ አሳ ኡባይ ማላለትድ፥ ሶሎሞነ ባራንዳ ጌተትያ በሳን እስፈ ኤንታኮ ዎፅዶሶና።
ACT 3:12 ጰፅሮስ አሳ በእዳ ዎደ አሳኮ፥ “እስራኤለ አሳዉ፥ አይስ ሀይሳን ማላለተቲ? ዎይኮ አይስ ኑና ጫድ ፄለቲ? ኑኒ ኑ ዎልቃን ዎይኮ ኑ ፅሎተꬃን ሀ አድያ ሄመꬅዳባ ህንተዉ ዳኒ?
ACT 3:13 አብራሃመ፥ ይሳቃ፥ ያይቆባ ፆሳይ፥ ኑ አዋታ ፆሳይ፥ ባ ናኣ የሱሳ ቦንችስ። ሽን ህንተ ሀይቆስ አꬅድ እምዳይሳ ጵላፆስ ብላናዉ ኮይንካ ህንተ እያ ስንꬃን፥ ‘ኑኒ እያ ኤሮኮ’ ያግደታ።
ACT 3:14 ህንተ ጌሻነ ፅሉዋ፥ ‘ኑኒ እያ ኤሮኮ’ ግድ፥ ሸምፖ ዎꬍዳይሳ ህንተዉ ብላና መላ ጵላፆሳ ዎስደታ።
ACT 3:15 ደኦ እመይሳ ህንተ ዎꬍደታ፥ ሽን ፆሳይ ሀይቆፐ እያ ደንꬅስ። ሄሳስ ኑኒ ማርካ።
ACT 3:16 ሀ ህንተ በኤይስነ ኤርያ አደይ፥ ፓፅድ ምንዳይ የሱሳ ሱንꬃን አማንዳይሳና። ሀ ህንተ ኡባ ስንꬃን እያ ሀይሳዳ ፓꬅዳይ፥ እ የሱሳ አማንዳ ግሾሳ።
ACT 3:17 “ሀእካ ታ እሻቶ፥ ህንተካ ህንተና ካለይሳታዳ፥ ኤሮና ኦꬅዳይሳ ታኒ ኤራይስ።
ACT 3:18 ሽን ፆሳይ በን ናበታ ኡባ ዶናን፥ ‘ክርስቶስ ዋየ ኤካናዉ በሴስ’ ያግዳይስ ሀይሳዳ ፖለታና መላ ኦꬅስ።
ACT 3:19 ህዛ፥ ፆሳይ ህንተ ናጋራ አቶ ጋና መላ ጎዳኮ ስምተ።
ACT 3:20 ጎዳ ማታፐ ምንꬆ ዎደይ ህንተዉ ያና። ፆሳይ ክርስቶሳ ግዳና መላ ስንꬃትድ ዶርዳ የሱሳ ህንተዉ የዳና።
ACT 3:21 ፆሳይ ባ ጌሻ ናበታ ዶናን በን ኦድዳይሳ መላ ኡባባይ ኦራፅያ ዎደይ ጋካናዉ የሱሲ ሳሎን ጋምአናዉ በሴስ።
ACT 3:22 ሙሰይ፥ ‘ጎዳ ፆሳይ ታና ደንꬅዳይሳ መላ ህንተ ግዶፈ ህንተዉ ናበ ደንꬃና። ህንተ እ ገይሳ ኡባ ስእተ።
ACT 3:23 ሄ ናበይ ኦደይሳ ስኦና አስ ኦንካ አሳ ግዶፈ ሻከትድ ꬋዮ’ ያግስ።
ACT 3:24 “ቃስ ሳሜላፐ ዶምድ ደእያ ናበት ኡባይ ሀ ዎድያባ ኦድዶሶና።
ACT 3:25 ህንተ ናበታ ናይታ፤ ቃስ ፆሳይ አብራሃመስ፥ ‘ሳአን ደእያ አሳ ኡባ ታኒ ነ ሼሻ ባጋራ አንጃና’ ያግድ ኑ አዋታስ ገልዳ ቃላ ላትያ ናይታ።
ACT 3:26 ፆሳይ ህንተና ኡባ ህንተ ኢታ ኦገፐ ዛሪድ አንጃና መላ ባ ናአ ደንꬅድ ህንተዉ ኮይሮ የድስ” ያግስ።
ACT 4:1 ጰፅሮስነ ዮሃንስ አሳስ ኦድሽን ካህነ ሀላቃት፥ ፆሳ ኬ ናገይሳታ ሀላቃይነ ሳዱቃወት ኤንታኮ ይዶሶና።
ACT 4:2 ኤንቲ የሱሲ ሀይቆፐ ደንዶይሳነ እያ ጋሶን ሀይቆፐ ደንዶይ ደኤይሳ አሳ ታማርስዳ ግሾ ይሎትዶሶና።
ACT 4:3 ሄሳ ግሾ፥ ኤንታ ኦይክድ ሳእ ኦማርስዳ ግሾ ዎንታና ጋካናዉ ቃሾ ኬꬅ ገልስዶሶና።
ACT 4:4 ሽን ቃላ ስእዳይሳታፐ ዳሮት አማንዶሶና። አማንዳ አደ አሳ ታይቦይ እቻሹ ሙኩሉኮ ብስ።
ACT 4:5 ዎንተꬃ ጋላስ ደርያ ሃረይሳት፥ ጭማትነ፥ ህገ አስታማረት የሩሳላመን ሺቅዶሶና።
ACT 4:6 ሄ አሳ ግዶን ካህነ ሀላቃይ ሃን፥ ቃያፍ፥ ዮሃንስ፥ እስክንድረይነ ካህነ ሀላቃ ሶ አሳት ኡባይ ደኦሶና።
ACT 4:7 ሀዋረታ ባንታ ስንꬃን ኤስድ፥ “አይብ ዎልቃን ዎይኮ ኦደ ሱንꬃን ሀይሳ ህንተ ኦꬅደቲ?” ያግድ ኦይችዶሶና።
ACT 4:8 ሄ ዎደ ጰፅሮስ ጌሻ አያናን ኩምድ፥ “ደርያ ሃረይሳቶ፥ ጭማቶ፥
ACT 4:9 ሀች ሀ ዎበ አድያስ ኦሰትዳ ሎኦ ኦሱዋስነ እ ዋንድ ፓፅዳኮ ህንተ ኑና ኦይችኮ፥
ACT 4:10 ማስቃልያ ቦላ ህንተ ካቅን፥ ፆሳይ ሀይቆፐ ደንꬅዳ ናዝረተ የሱስ ክርስቶሳ ሱንꬃን ሀ አደይ ፓፅድ ህንተ ስንꬃን ኤቅዳይስ ህንተዉነ እስራኤለ አሳ ኡባስ ኤረቶ።
ACT 4:11 “ ‘ግምበይሳት ቦርድ እፅዳ ሹቻይ፥ ጎዳ ፃጱዋ ምንꬅያ፥ ኡባፈ አꬍያ ሹቹ ግድስ። ሄ ሹቻይ የሱሳ።’
ACT 4:12 ሄሳ ግሾ፥ አቶተꬅ እያ ባጋራፐ አትሽን፥ ሀራ ኦደ ባጋራካ ባዋ። ኑኒ እያ ሱንꬃን አታና መላ አሳ ኡባስ ፆሳይ ሳሎፐ ጋርሳን እምዳ ሀራ ሱንꬅ ባዋ” ያግስ።
ACT 4:13 ሺቅዳ አሳይ ጰፅሮስነ ዮሃንስ ምንዳ ምኖተꬃ በእዳ ዎደ ኤንቲ ታማርቦና ጮ አስ ግድዳይሳ አኬክድ፥ ማላለትዶሶና፤ ኤንቲ የሱሳራ ደኤይሳ ኤርዶሶና።
ACT 4:14 ቃስ ፓፅዳ አደይ ጰፅሮሳራነ ዮሃንሳራ ኤቅዳይሳ አሳይ በእድ ግያባ ꬋይዶሶና።
ACT 4:15 ሽን ጰፅሮሳነ ዮሃንሳ ካረ ከያና መላ ኦꬅድ ባንታ ግዶን፥
ACT 4:16 “ሀ አሳታ ኑ አይ ኦꬅኖ? ኤንታ ኩሸን ኦሰትዳ ግታ ማላታይ የሩሳላመን ደእያ ኡባስ በንቴስ። ኑኒ ሄሳ ኤሮኮ ጋናዉ ዳንዳኦኮ።
ACT 4:17 ሽን ሀ ኦዳይ አሳ ግዶን ላለቶና መላ ህዛፐ ጉየ፥ ሀ አሳት የሱሳ ሱንꬃን ኦደስካ ኦዶና መላ ምንꬅድ ናግሳና” ያግድ ዞረትዶሶና።
ACT 4:18 ኤንታ ፄግድ፥ የሱሳ ሱንꬃን ህዛፐ ኦዶና መላ ዎይኮ ታማርሶና መላ ኪትዶሶና።
ACT 4:19 ሽን ጰፅሮስነ ዮሃንስ ኤንታኮ ዛሪድ፥ “ፆሳስ ኪተታናይሳፈነ ህንተዉ ኪተታናይሳፈ ፆሳ ስንꬃን አዉስ ሎኦኮ? አነ ህንተ ፕርድተ።
ACT 4:20 ኑኒ በእዳባነ ስእዳባ ኦዶና አጋናዉ ዳንዳኦኮ” ያግዶሶና።
ACT 4:21 ቢታ ጭማትነ ደርያ ሃረይሳት ካሰፐ ምንꬅ ናግስድ ኤንታ የድ አግዶሶና። አሳይ ሀንዳባስ ፆሳ ጋላትያ ግሾ ኤንታ ሴራናዉ ዳንዳእቦኮና።
ACT 4:22 ሄ ማላታን ሀርገፈ ፓፅዳ አድያስ ላይꬅ ኦይታማፐ አꬍስ።
ACT 4:23 ጰፅሮስነ ዮሃንስ ብርሸትድ ባንታ ዳቦታኮ ብድ፥ ካህነ ሀላቃትነ ጭማት ባንታኮ ግዳባ ኡባ ኤንታዉ ኦድዶሶና።
ACT 4:24 ኤንቲ ሄሳ ስእዳ ዎደ እስ ዎዛናን ግድድ ፆሳ ሀይሳዳ ያግድ ዎስዶሶና፦ “ኡባ ሃርያ ጎዳዉ፥ ሳሉዋ፥ ሳኣ፥ አባነ ኤንታ ግዶን ደእያ ኡባባ መꬍዳይሶ፥
ACT 4:25 ኔኒ ነ አይልያ፥ ኑ አዋ ዳዊታ ዶናን ጌሻ አያናን፥ “ ‘ደረይ አይስ ይሎትዶና? አሳይ አይስ ጮ ማቀትዶና?
ACT 4:26 ሳኣ ካዎትነ ደርያ ሃረይሳት እስፈ ጎዳ ቦላነ ክርስቶሳ ቦላ ደንድዶሶና’ ያጋዳሳ።
ACT 4:27 “ቱማካ፥ ሄሮዲስነ ጰንፀ ጵላፆስ አይሁደ ግዶና አሳራነ እስራኤለ አሳራ ነ ዶርዳ ነ ጌሻ ናኣ የሱሳ ቦላ ደንዳናዉ ሀ ካታማን ሺቅዶሶና።
ACT 4:28 ቃስ ኔኒ ነ ዎልቃንነ ነ ሸንያን ኦꬃና ጋዳ ቆፓ ኡትዳባ ኡባ ፖልዶሶና።
ACT 4:29 ሀእካ ጎዳዉ፥ ኤንታ ማንደꬃ በአ፤ ኑኒ ነ አይለት ነ ቃላ ኩመꬃ ዎዛናን ኦዳና መላ ኑና ዳንዳእሳ።
ACT 4:30 ነ ጌሻ ናኣ የሱሳ ሱንꬃን ሀርጋንቾታ ፓꬃናዉ፥ ኦራꬃባይነ ማላታት ኦሰታና መላ ነ ኩሽያ ምጫ” ግድ ዎስዶሶና።
ACT 4:31 ኤንቲ ፆሳ ዎስዳፐ ጉየ፥ ሄ ኤንቲ ሺቅዳ በሳይ ቃፅስ። ኤንታ ኡባን ጌሻ አያን ኩምን ፆሳ ቃላ ምኖተꬃን ኦድዶሶና።
ACT 4:32 አማነይሳት ኡባይ ቆፋንነ ዎዛናን እስኖ ግድዶሶና። ኤንቲ ባንታዉ ደእያባ ታባ ጎናሽን እስፈ ሻከቶሶና።
ACT 4:33 ሀዋረት፥ ጎዳ የሱሲ ሀይቆፐ ደንድዳይሳ ግታ ዎልቃን ማርካቶሶና። ፆሳይ ኤንታ ኡባስ አꬎ ኬሀተꬃ ዳርስድ እሚስ።
ACT 4:34 ቢት ዎይኮ ኬꬅ ደኤይሳት ኡባይ ባይዝ ኤክዳ ሚሽያ ኤህያ ግሾ፥ አማነይሳታ ግዶን መቶታንቾይ እሶይካ ባዋ።
ACT 4:35 ሚሸ ኤህድ ሀዋረታስ እሞሶና፤ ሄ ሚሽያ አሳስ ኮሽዳይሳዳ እሱዋስ እሱዋስ ሻክ ሻክ እሜስ።
ACT 4:36 ቆጵሮሳ ጌተትያ በሳን የለትዳ ዮሰፋ ጌተትያ ሌወ ሼሻፐ ግድዳ እሶይ ደኤስ። እያ ሱንꬃ ሀዋረት ባርናባሳ (ምንꬆ ናአ) ግዶሶና።
ACT 4:37 ባርናባስ ባዉ ደእያ ቢታ ባይዝድ ሚሽያ ኤህድ ሀዋረታስ እሚስ።
ACT 5:1 እስ ሀናንያ ጌተትያ አደይ ባ ማቸ ሳጵርራ ጋደ ባይዝስ።
ACT 5:2 ሄ ባይዝዳ ሚሽያፐ ባ ማችያ ኤርሽን ባጋ አሽድ፥ አትዳይሳ ኤህድ ሀዋረታስ እሚስ።
ACT 5:3 ሽን ጰፅሮስ ሀናንያኮ፥ “ኔኒ ጌሻ አያና ጭማና መላነ ጋድያ ባይዝዳ ሚሽያፐ ሻካዳ አሻና መላ ፃላሄይ ነ ዎዛናን አይስ ገልዴ?
ACT 5:4 ኔኒ ባይዛናፐ ካሰ ጋደይ ነባ ግደነዬ? ቃስ ኔኒ ባይዛ ስምንካ ሚሸይ ነባ ግደነዬ? ያትን፥ ሄሳ መላባ ኦꬃናዉ አይስ ነ ዎዛናን ቆፓዲ? ኔኒ ፆሳ ቦላ ዎርዶታዳሳፐ አትሽን፥ አሳ ቦላ ዎርዶታባካ” ያግስ።
ACT 5:5 ሀናን ሄ ቃላ ስእዳ መላ ኩንድድ ሀይቅስ፤ ሄሳ ስእዳ ኡባይ ዳሮ ያይስ።
ACT 5:6 ናአተꬃ አሳት ሶ ገልድ እያ አሀ ፃፅድ ኤፍድ ሞግዶሶና።
ACT 5:7 ሄꬑ ሳተፐ ጉየ ሀናንያ ማችያ ሄሳ ኤሮና ደአሸ ጰፅሮስ ደእያሱዋ ገላሱ።
ACT 5:8 ጰፅሮስ ኢኮ፥ “ህንተ ጋድያ ሀይሳ መላ ሚሸስ ባይዝደቲ? አነ ታዉ ኦዳ” ያግስ። እያካ፥ “ኤ፥ ሀይሳ መላ ሚሸስ ባይዝዳ” ያጋሱ።
ACT 5:9 ጰፅሮስ ማጫስዉ፥ “ኔራነ ነ አዝናራ ጎዳ አያና ፓጫናዉ አይስ ዞረትደቲ? ሄኮ፥ ነ አዝና ሞግዳ አሳት ካረን ደኦሶና፤ ነናካ ኤንቲ ካረ ከሳና” ያግስ።
ACT 5:10 ማጫስያ ኢራካ ጰፅሮሳ ቶሁዋ ማታን ኩንዳዳ ሀይቃ አጋሱ፤ ናአተꬃት ገልያ ዎደ ሀይቅዳሮ ደምድ ካረ ከስድ፥ እ አዝና ማታን ሞግዶሶና።
ACT 5:11 ኩመꬃ ዎሳ ኬꬃይነ ሄሳ ስእዳ ሀራ አሳ ኡባይ ዳሮ ያይዶሶና።
ACT 5:12 ሀዋረት ዳሮ ማላታታነ ኦራꬃባታ አሳ ግዶን ኦꬆሶና። አማንያ ኡባይ ሶሎሞነ ባራንዳን እስፈ ሺቆሶና።
ACT 5:13 ሀራ አሳፐ ኤንታራ ጋሄታናዉ እስ አስካ ምንቤና፥ ሽን አሳይ ኤንታ ቦንቼስ።
ACT 5:14 አማንያ አደታነ ማጫሳታ ታይቦይ ካሰይሳፈ ዳርሸ ብስ።
ACT 5:15 ሄሳ ግሾ፥ አሳይ ሀርጋንቾታ ሀላንነ አልጋን ቶክድ ጰፅሮስ አꬍያ ዎደ እያ ኩያይ ኤንታፈ እሶታ እሶታ ቦላ ሸምፓና መላ ኦገ ዶናን ከስድ ዎꬆሶና።
ACT 5:16 ቃስ ዳሮ አሳይ የሩሳላመ ማታን ደእያ ካታማታፐ ሀርጋንቾታነ ቱና አያን ዋይስያ አሳታ ኤክድ ዮሶና፤ ኡባይካ ፓፅዶሶና።
ACT 5:17 ካህነ ሀላቃይነ እያራ ደእያ ሳዱቃወት ኡባይ ቃናተን ኩምድ ሀዋረታ ቦላ ደንድዶሶና።
ACT 5:18 ሀዋረታ ኦይክድ ደርያ ቃሾ ኬꬃን የግዶሶና።
ACT 5:19 ሽን ጎዳ ኪታንቾይ ቃማ ቃሾ ኬꬃ ፐንግያ ዶይድ ሀዋረታ ካረ ከስድ፥
ACT 5:20 “ብድ፥ ፆሳ ኬꬃን ኤቅድ ሀ ኦራꬃ ደኦ ቃላ አሳ ኡባስ ኦድተ” ያግስ።
ACT 5:21 ሀዋረት ሄሳ ስእዳ ዎደ ዎንታ ጉራ ፆሳ ኬꬅ ገልድ ታማርሶ ዶምዶሶና። ካህነታ ሀላቃይነ እያራ ደኤይሳት ይድ፥ እስራኤለ ጭማታ ኡባ ፄግ ሺሽድ ሀዋረታ ባንታ ስን ኤሀና መላ ዎታዳረታ ቃሾ ኬꬅ ኪትዶሶና።
ACT 5:22 ሽን ዎታዳረት ቃሾ ኬꬅ ብድ ሀዋረታ ደምቦኮና። ጉየ ስም ይድ ደርያስ፥
ACT 5:23 “ኑኒ ብያ ዎደ ቃሾ ኬꬃ ፐንገይ ምንꬅ ጎርደትን፥ ናገይሳት ፐንገን ኤቅዳይሳታ ደምዳ። ሽን ኑኒ ካርያ ዶይያ ዎደ ግዶን ሀር አቶሽን እስ አስካ ባዋ” ያግዶሶና።
ACT 5:24 ሄሳ ግሾ፥ ፆሳ ኬꬃ ዎታዳረታ ኪተይስነ ካህነ ሀላቃት ሄሳ ስእዳ ዎደ፥ “ሀዋረታ ቦላ አይብ ሀንዴ?” ያግድ ህርግዶሶና።
ACT 5:25 ሄ ዎደ እስ አደይ ኤንታኮ ይድ፥ “ሄኮ፥ ቃሾ ኬꬅ ህንተ ገልስዳ አሳት ፆሳ ኬꬃን ኤቅድ አሳ ታማርሶሶና” ያግድ ኤንታዉ ኦድስ።
ACT 5:26 ፆሳ ኬꬃ ዎታዳረታ ኪተይስ ባ ዎታዳረታራ ብድ ሀዋረታ ኤህስ። ሽን ኤንቲ ባንታና አሳይ ሹቻን ጫዳና ግድ ያይዳ ግሾ ኤንታ አዳሽድ ኤህዶሶና።
ACT 5:27 ኤንቲ ሀዋረታ ኤህድ፥ ሺቅዳ ሻንጉዋ ስንꬃን ኤስን ካህነ ሀላቃይ ኤንታኮ፥
ACT 5:28 “ህንተና ኑኒ ሄ ኡራ ሱንꬃን ታማርሶና መላ ምንꬅድ ኪትቦኮ? ሄኮ፥ ህንተ ትምርትያ የሩሳላመ ካታማ ኡባ ጋꬅደታ። ሄ ኡራ ሸምፑዋስ ኑና ኦይꬃናዉ ቆፔቲ?” ያግድ ኦይችስ።
ACT 5:29 ጰፅሮሳራነ ሀንኮ ሀዋረታራ ኤንታዉ ዛርሸ፥ “ኑኒ አሳስ ኪተታናፐ ፆሳስ ኪተታናዉ በሴስ።
ACT 5:30 ማስቃልያ ቦላ ህንተ ካቅድ ዎꬍዳ የሱሳ፥ ኑ አዋታ ፆሳይ ሀይቆፐ ደንꬅስ።
ACT 5:31 እስራኤለት ናጋራፐ ስማና መላነ ኤንታ ናጋራይ አቶ ጌተታና መላ ፆሳይ የሱሳ ሃረይሳነ አሸይሳ ኦꬅድ ቦንቾን ባፐ ኡሻቻ ባጋን ኡትስስ።
ACT 5:32 ሄሳስ ኑኒ ማርካ፤ ቃስ ፆሳይ ባና አማነይሳታስ እምዳ ጌሻ አያናይካ ማርካ” ያግዶሶና።
ACT 5:33 ሺቅዳ አሳይ ሄሳ ስእዳ ዎደ ዳሮ ይሎትድ፥ ሀዋረታ ዎꬋናዉ ቆፕዶሶና።
ACT 5:34 ሽን አሳ ኡባን ዳሮ ቦንቸትዳ ጋማልያለ ጌተተይስ፥ እስ ህገ አስታማረይነ ፋርሳወይ ደንድ ኤቅድ ሀዋረታ ጉꬃ ዎደስ ካረ ከሳና መላ ኪትስ።
ACT 5:35 ሄሳፈ ጉየ፥ ሺቅዳ አሳኮ፥ “እስራኤለ አሳዉ፥ ሀ አሳታ ቦላ ህንተ ኦꬃናዉ ቆፕያባፐ ናገትተ።
ACT 5:36 አይስ ጊኮ፥ ሀይሳፈ ካሰ ተዎዳስ ባና፥ ‘ታኒ ግታ’ ግድ ደንድን፥ ኦይዱ ፄቱ ግድያ አሳት እያራ እስፍዶሶና። ሽን እያ ዎꬍን እያ ካልዳ ኡባይ ላለትን ፓꬆና አስ ግድድ አትዶሶና።
ACT 5:37 ሄሳፈ ጉየ፥ አሳይ ታይበትያ ዎደ ጋልላ ይሁድ ደንድድ ዳሮ አሳ ፓንጋይድ ካለꬅስ፥ ሽን እያካ ዎꬍን እያ ካልዳ አሳ ኡባይ ላለትስ።
ACT 5:38 ሀእካ ታ ህንተዉ ኦዳይስ፤ ሀ አሳታፐ ሻከትተ፤ ኤንታ ቦቾፍተ። አይስ ጊኮ፥ ሀ ቆፋነ ሀ ኦሱዋ አስ ኦꬅያባ ግድኮ ꬋያና።
ACT 5:39 ሽን ሀ ቆፋይነ ሀ ኦሶይ ፆሳፈ ይዳባ ግድኮ፥ ህንተ ኤንታ ꬋይሳናዉ ዳንዳኤከታ። ሄሳዳ ሀንሸ ህንተ ፆሳራ ካጨታና” ያግድ ኦድስ። ሄሳ ግሾ፥ ሺቅዳ አሳይ ጋማልያለ ዞርያ ኤክዶሶና።
ACT 5:40 ሀዋረታ ሶ ፄግድ ልሶን ጋራፍስስ። ሄሳፈ ጉየ፥ ኤንታኮ፥ “የሱሳ ሱንꬃ ናምአንꬆ ደንꬆፍተ” ግድ ብርሽድ የድዶሶና።
ACT 5:41 የሱሳ ሱንꬃ ግሾ፥ ኤንቲ ካዉያናይስ በሲያባ ግደይሳ ኤርዳ ግሾ ሻንጉዋ ስንꬃፈ ኡፋይትሸ ከይዶሶና።
ACT 5:42 ኤንቲ ኡባ ጋላስ ፆሳ ኬꬃንነ አሳ ሶን የሱሲ እ ክርስቶሳ ግደይሳ ታማርሶነ ሳባኮ አግቦኮና።
ACT 6:1 ሄ ዎደ ካለይሳታ ታይቦይ ዳር ዳርድ ብሽን፥ ግርከ ዶና ኦደትያ አይሁደት ይሁዳን የለትድ ደእያ አይሁደታ ቦላ ዙዙምዶሶና። አይስ ጊኮ፥ ግርከ ዶና ኦደትያ አይሁደት፥ “ጋላስ ጋላስ እመትያ ካꬃን ኑ አምኤት ናቀቶሶና” ያግዶሶና።
ACT 6:2 ታማነ ናምኡ ሀዋረት ዎሳ ኬꬃ አሳ ኡባ ፄግድ፥ “ኑኒ ፆሳ ቃላ ኦደይሳ አግድ ካꬅ ግሻናዉ በሰና።
ACT 6:3 ህዛ፥ እሻቶ፥ ሎኦ አሳታ፥ ጌሻ አያናንነ ጭንጫተꬃን ኩምዳ ላፑን አሳታ ህንተ ግዶፈ ዶርተ፤ ኑኒ ኤንታ ሀ ኦሱዋስ ሹማና።
ACT 6:4 ሽን ኑኒ፥ ኑ ኩመꬃ ዎድያ ዎሳንነ ቃላ ታማርሶን ፔሻና” ያግዶሶና።
ACT 6:5 ሀዋረት ኦድዳ ኦዳይ አሳ ኡባ ኡፋይስስ። ሄሳ ግሾ፥ አማኖይነ ጌሻ አያን ኩምዳ እስፅፋኖሰ፥ ፍልጶሳ፥ ጵሮኮሮሳ፥ ንቃሮና፥ ፅሞና፥ ጳርመናነ አይሁደ አማኖ ገል ስምዳ አንፆከ አድያ ንቆላዎሳ ዶርዶሶና።
ACT 6:6 ኤንታ ሀዋረታ ስንꬃን ኤስን፥ ሀዋረት ኤንታ ቦላ ኩሸ ዎꬅድ ዎስዶሶና።
ACT 6:7 ፆሳ ቃላይ ዳልግ ዳልግ ብስ። የሩሳላመን ደእያ አማነይሳታ ታይቦይ ዳር ዳርድ ብስ፤ ዳሮ ካህነትካ አማንዶሶና።
ACT 6:8 እስፅፋኖሰይ አꬎ ኬሀተꬃንነ ዎልቃን ኩምድ አሳ ግዶን ኦራꬃባታነ ማላታታ ኦꬄስ።
ACT 6:9 አይለተꬃፈ ከይዳ አይሁደ ዎሳ ኬꬃ አሳይ ቀሬናፐነ እስክንድረፐ ክልቀፈነ ኢሰፐ ይዳ እስ እስ አሳት ደንድድ እስፅፋኖሰራ ፓላምዶሶና።
ACT 6:10 ሽን እስፅፋኖሰይ አያና ዎልቃን ኦደትያ ጭንጫተꬃ ኤንቲ ኤቀታናዉ ዳንዳእቦኮና።
ACT 6:11 ሄ ዎደ ኤንቲ፥ “ሙሰነ ፆሳ እ ጫይሽን ስእዳ” ግያ ዎርዶ አሳታ ሻምዶሶና።
ACT 6:12 ሄሳዳ ኦꬅድ ቢታ ጭማታነ ህገ አስታማረታ እያ ቦላ ደንꬅዶሶና። እስፅፋኖሰ ኦይክድ ሻንጉዋ ስን ኤፍዶሶና።
ACT 6:13 እያ ቦላ ፓይድዳ ዎርዶ ማርካት፥ “ሀ ኡራይ ሀ ፆሳ ኬꬃነ ሙሰ ህግያ ዛር ዛር ጫዬስ።
ACT 6:14 እ፥ ‘ሀይስ ናዝረተ የሱሲ፥ ሀ ፆሳ ኬꬃ ላላና፤ ቃስ ሙሰይ ኑስ እምዳ ህግያ ላማና’ ያግሽን ኑኒ ስእዳ” ያግዶሶና።
ACT 6:15 ሻንጎ ሺቆን ኡትዳ አሳ ኡባይ እስፅፋኖሰ ሎይꬅድ ፄልያ ዎደ እያ ሶምኦይ ኪታንቾ ሶምኦ ዳኔስ።
ACT 7:1 ካህነታ ሀላቃይ እስፅፋኖሰኮ፥ “ሀይስ ቱሜ?” ያግድ ኦይችስ።
ACT 7:2 እስፅፋኖሰይ፥ “ታ እሻቶ፥ ታ አዋቶ፥ ስእተ! ኑ አዋ አብራሃመይ ካራነን ዳናዉ ባናፐ ስን ማሰጰፆመን ደእሽን፥ ቦንቾ ፆሳይ እያዉ ቆንጭድ፥
ACT 7:3 ‘ነ ቢታፈነ ነ ዳቦታፐ ሻከታዳ ታኒ ነና በሲያ ቢታ ባ’ ያግስ።
ACT 7:4 ሄ ዎደ አብራሃመይ ካልዳወታ ቢታፈ ከይድ ካራነን ዳናዉ ብስ። እያ አዋይ ሀይቅዳፐ ጉየ ፆሳይ እያ ሀ ቢታ ሀእ ህንተ ደእያ በሳ ኤህስ።
ACT 7:5 እ ሀ ቢታፈ ሀር አቶሽን ቶሆይ የꬍያ በስካ አብራሃመስ እምቤና። ሽን ናእ እያዉ ባይና ዎደ ፆሳይ ሀ ቢታ እያዉነ እያ ሼሻስ ላታ ኦꬅድ እማናይሳ ቃላ ገልስ።
ACT 7:6 ፆሳይ አብራሃመኮ፥ ‘ነ ሼሻይ ሀራ ቢታን እማꬃተꬃን ዳና፤ ያን ኦይዱ ፄቱ ላይꬅ ኤንቲ አይለተꬃን ሃረታና።
ACT 7:7 ሽን ታኒ ነ ሼሻ ሃርያ ካዎተꬃታ ፕርዳና። ሄሳፈ ጉየ፥ ኤንቲ ሄ ቢታፈ ከይድ ሀይሳን ታዉ ጎይናና’ ያግስ።
ACT 7:8 ፆሳይ አብራሃመ ሼሻይ ቃፃረታና መላ እያራ ጫቅን፥ ይሳቅ የለትዳ ሆስፑንꬆ ጋላሳን ቃፃርስ። ይሳቅ ያይቆባ ቃፃርስ፤ ቃስ ያይቆብ ታማነ ናምኡ ባ ናይታ፥ ኑ አዋታ ማይዛታ ቃፃርስ።
ACT 7:9 “ያይቆባ ናይት ዮሰፋ ቃናትድ ግብፀ ቢታን አይለተꬃስ ባይዝዶሶና፥ ሽን ፆሳይ እያራ ደኤስ።
ACT 7:10 እያ፥ እያ ዋየ ኡባፈ ከስስ። ግብፀ ካዋ ስንꬃን ሳባነ ጭንጫተꬅ እያዉ እሚስ። ግብፀ ካዎይ ዮሰፋስ ግብፀ ቢታነ ባ ጋꬉዋ ኡባ አይሳናዳ አዋተꬅ እሚስ።
ACT 7:11 “ግብፀ ቢታንነ ካናነ ቢታን ኡባን ኮሽ ገልድ ዳሮ አሳ ኡንኤꬅስ። ሄ ዎደ ኑ ማይዛት ካꬅ ደማናዉ ዳንዳእቦኮና።
ACT 7:12 ያይቆብ ግብፀ ቢታን ካꬅ ደኤይሳ ስእድ ኑ አዋታ ኮይሮ ያ የድስ።
ACT 7:13 ናምአንꬆ ቡሳን ዮሰፍ ባ እሻታስ ባናተꬃ ኤርስስ። ግብፀ ካዎይካ ዮሰፋ ሶ አሳ ኤርስ።
ACT 7:14 ዮሰፍ ባ አዋ ያይቆባነ ባ ሶ አሳ ኡባ፥ ላፑን ታማነ እቻሹ አሳ ባኮ ያና መላ ኪትድ ኤህስስ።
ACT 7:15 ያይቆብ ግብፀ ቢታ ዎꬍስ፤ እነ እያ ናይት ያን ሀይቅዶሶና።
ACT 7:16 ኤንታ አሀይ ሄ በሳፈ ሴከማ ቢታ ቶከትድ ብድ፥ ያን አብራሃመይ ሀሞረ ናይታፐ ዳሮ ብራን ሻምዳ ዱፎን ሞገትስ።
ACT 7:17 “ሽን ፆሳይ አብራሃመስ እማና ግዳይሳ ፖልያ ዎደይ ጋካናዉ ማትዳ ዎደ ግብፀ ቢታን ደእያ ኑ አሳይ ዳር ዳር ብስ።
ACT 7:18 ሄሳፈ ጉየ፥ ዮሰፋ ኤሮና ሀራ ካዎይ ግብፀ ቢታን ካዎትስ።
ACT 7:19 ሄ ካዎይ ኑ ኮቻ ገንድ ጉꬃ ናይት ሀይቃና መላ ኤንታ ካረ ከስ የጋና መላ ኑ አዋታ ኡንኤꬅስ።
ACT 7:20 “ሄ ዎደ ሙሰይ የለትስ፤ እ ፆሳ ስንꬃን ዳሮ ሎኦ ናአ። ባ አዋ ኬꬃን ሄꬑ አጌና ጋካናዉ ድጭስ።
ACT 7:21 ሙሰይ ዎራ ሆለትዳ ዎደ ግብፀ ካዋ ናእያ ደማ ኤካዳ ባ ናአ ኦꬃዳ እያ ድቻሱ።
ACT 7:22 ሙሰይ ግብፀታ ጭንጫተꬃ ኡባ ታማርድ ኦዳንነ ኦሶን ምኖ አስ ግድስ።
ACT 7:23 “ሙሰስ ላይꬅ ኦይታማ ኩምዳ ዎደ ባ እሻታ፥ እስራኤለታ በአናዉ ባ ዎዛናን ቆፕስ።
ACT 7:24 እስራኤለታፐ እሱዋ ግብፀ እሶይ ቆህሽን በእድ ሄ እስራኤለ ኡራ ማድድ፥ ሄ ቆህዳ ግብፀ ኡራ ዎꬍድ ኩሸ ዛርስ።
ACT 7:25 ሙሰይ ባ እሻታ ባ ባጋራ ፆሳይ አሻናዉ ሀነይሳ ኤንቲ አኬካና ግድ ቆፕስ፥ ሽን ኤንቲ አኬክቦኮና።
ACT 7:26 “ዎንተꬃ ጋላስ ናምኡ እስራኤለ አሳት እሶይ እሱዋራ ዋትሽን ደምድ ኤንታ ስገꬃናዉ ኮይድ፥ ‘አሳዉ፥ ህንተ እሻንታ፤ አይስ እሶይ እሱዋ ቆሄቲ?’ ያግስ።
ACT 7:27 “ሽን ባ ላግያ ቆሄይስ ሙሰኮ፥ ‘ነና ኑ ቦላ ሃረይሳነ ዳይና ኦꬅዳይ ኦኔ?
ACT 7:28 ኔኒ ዝነ ግብፀ ኡራ ዎꬍዳይሳዳ ታናካ ዎꬋናዉ ኮያይ?’ ያግድ ሙሰ ሱግ የድስ።
ACT 7:29 ሙሰይ ሄሳ ስእዳ ዎደ ግብፀፈ በትድ ምድያመ ቢታን በተ አስ ግድድ ደእሸ ናምኡ አደ ናይታ የልስ።
ACT 7:30 “ጎዳ ኪታንቾይ ኦይታሙ ላይꬃፈ ጉየ፥ ሲና ዙማ ማታን ደእያ ባዞ ቱሽያ ግዶን ኤፅያ ታማ ላጮ ግዶን ሙሰስ በንትስ።
ACT 7:31 ሙሰይ ባ በእዳይሳን ማላለትድ፥ ሎይꬅ በአናዉ ቱሽያ ማት ሺቅድ ደእሽን፥ ጎዳ ቃላይ፥
ACT 7:32 ‘ታኒ ነ አዋታ፥ አብራሃመ ፆሳ፥ ይሳቃ ፆሳ፥ ያይቆባ ፆሳ’ ያግሸ ሙሰኮ ይስ። ሙሰይ ያሻን ኮኮርድ ፄላናዉ ዳንዳእቤና።
ACT 7:33 “ጎዳይ ሙሰኮ፥ ‘ኔኒ ኤቅዳ ቢታይ ጌሽ ግድያ ግሾ ነ ቶሁዋን ደእያ ጫማ ከሳ።
ACT 7:34 ታኒ ግብፀን ደእያ ታ አሳ ኡንኤተꬃ በአስ። ኤንታ ዋሱዋ ስአዳ ኤንታ አሻናዉ ዎꬋስ። ሀእ ሃያ! ታኒ ነና ግብፀ ኪታና’ ያግስ።
ACT 7:35 “እስራኤለት ሙሰ፥ ‘ነና ኑ ቦላ ሃረይሳነ ዳይና ኦꬅዳይ ኦኔ?’ ያግድ እፅዳይሳ ቱሽያ ግዶን እያዉ በንትዳ ኪታንቹዋ ባጋራ ሃረይሳነ አሸይሳ ኦꬅድ ፆሳይ ኪትስ።
ACT 7:36 ሄ ሙሰይ እስራኤለታ ግብፀፈ ከስድ ማላልስያባታነ ኦራꬃባታ ግብፀ ቢታንነ ዞኦ አባን ኦꬅድ ኤንታ ኦይታሙ ላይꬅ መላ ቢታን ካለꬅስ።
ACT 7:37 “እስራኤለ አሳኮ፥ ‘ፆሳይ ታና ደንꬅዳይሳዳ ህንተ ሼሻ ግዶፈ ታ መላ ናበ ህንተዉ ደንꬃና’ ያግዳይ ሄ ሙሰ።
ACT 7:38 መላ ቢታን ሺቅዳ እስራኤለ አሳራ ደእዳይስ፥ ኑ አዋታራነ ሲና ዙማ ቦላ እያዉ ኦድዳ ኪታንቹዋራ ደእዳ ሙሰይ እያ። ያትድ፥ ፆሳ ደኦ ቃላ ኑስ እማናዉ ኤክስ።
ACT 7:39 “ሽን ኑ ማይዛት ሙሰስ ኪተታናዉ ዶስቦኮና፤ እያ እፅድ ጉየ ግብፀ ስማናዉ አሞትዶሶና።
ACT 7:40 ቃስ አሮናኮ፥ ‘ኑና ካለꬅያ ፆሳታ ኑስ ኦꬃ። አይስ ጊኮ፥ ሀይስ ኑና ግብፀፈ ኤህዳ ሙሰይ፥ ዋንዳኮ ኑኒ ኤሮኮ’ ያግዶሶና።
ACT 7:41 ሄ ዎደ ማር ዳንስድ ኤቃ ኦꬅዶሶና። ሄ ኤቃስ ያርሾ ያርሽድ ባንታ ኩሸን ኦꬅዳ ኦሱዋን ኡፋይትዶሶና።
ACT 7:42 ሽን ፆሳይ ኤንታዉ ዞኮ ዛርስ። ኤንቲ ሳሉዋ ፆልንቶታስ ጎይናና መላ ኤንታ የግ አግስ። ናበታ ማፃፋን፥ “ ‘እስራኤለ አሳቶ ኦይታሙ ላይꬅ ኩመꬅ መላ ቢታን ሹክዳ መህያነ ያርሽዳ ያርሹዋ ታዉ ያርሽደቲ?
ACT 7:43 ህንተ፥ ህንተዉ ጎይናናዉ ከስዳ ኤቃነ ሞሎካ ዱንካንያ ራፋና ጌተትያ ህንተ ፆሳ ፆልንቶ ምስልያ ቶክደታ። ታኒ ህንተና ባብሎነፐ ህን ባጋ የዳና’ ጌተትድ ፃፈትስ።
ACT 7:44 “ኑ አዋታስ መላ ቢታን ማርካ ዱንካነይ ደኤስ። እያካ ፆሳይ ሙሰ ኪትዳይሳዳነ እያ በስዳይሳዳ ኦꬅስ።
ACT 7:45 ቃስ ኑ አዋት ሄ ዱንካንያ ባንታ አዋታፐ ኤክድ ፆሳይ ካሰ ጎድዳ አይሁደ ግዶና አሳ ቢታ ኦይክዳ ዎደ እያሱራ ያ ኤክድ ገልዶሶና። ሄ ዱንካነይ ዳዊታ ዎደ ጋካናዉካ ሄ በሳን ደእስ።
ACT 7:46 ዳዊቲ ፆሳን ሳበትስ። ቃስ ያይቆባ ጎዳይ ደአና ኬꬃ ኬፃናዉ ፆሳ ዎስስ።
ACT 7:47 ሽን እያዉ ኬꬃ ኬፅዳይ ሶሎሞነ።
ACT 7:48 “ሀኖሽን፥ ኡባፈ ቦላ ፆሳይ አስ ኬፅዳ ኬꬃን ዴና። ናበይ ግዳይሳ መላ፥
ACT 7:49 “ ‘ሳሎይ ታ አራታ፥ ሳእካ ታ ቶሆይ የꬍያሶ። ያትን፥ ታዉ ህንተ አይ መላ ኬꬅ ኬፃኔ? ዎይኮ ታኒ ሸምፕያ በሲ አዉኔ?
ACT 7:50 ሀ ኡባ ታ ኩሸን ኦꬃብክና?’ ያጌስ ጎዳይ።
ACT 7:51 “ህንተ ዋንዳ ስኦና አሴ? ህንተ ዎዛናይ ፆሳ ቃላ ኤካናዉ አይስ እፅዴ? ህንተ ሀይꬃይ አይስ ቱልዴ? ህንተ፥ ህንተ አዋታꬆ ኡባ ዎደ ጌሻ አያናራ ኤቀተታ።
ACT 7:52 ናበታ ግዶፈ ህንተ አዋት ጎዶናይ ኦኔ? ፆሳ ናአይ፥ ፅሎይ ያናይሳ ካሰትድ ኦድዳይሳታ ዎꬍዶሶና። ሀእ ህንተ እያ አꬅ እምድ ዎꬍደታ።
ACT 7:53 ህንተ ኪታንቹዋ ኩሸፐ ፆሳ ህግያ ኤክደታ፥ ሽን ኪተትበከታ” ያግስ።
ACT 7:54 ኤንቲ ሄሳ ስእዳ ዎደ ባንታ ዎዛናን እስፅፋኖሰ ቦላ ዳሮ ይሎትድ፥ ባንታ መተርሻ ሳፅድ ማንድዶሶና።
ACT 7:55 ሽን እስፅፋኖሰይ ጌሻ አያናን ኩምድ፥ ሳሎ ፑደ ፄልድ፥ ፆሳ ቦንቹዋነ የሱሳ፥ ፆሳ ኡሻቻ ባጋን ኤቅዳይሳ በእስ።
ACT 7:56 “ሄኮ፥ ታኒ ሳሎይ ዶየትን፥ አሳ ናአይ፥ ፆሳ ኡሻቻ ባጋን ኤቅዳይሳ በአይስ” ያግስ።
ACT 7:57 ቃላ ꬎቁ ኦꬅድ ዋስሸ፥ ባንታ ሀይꬃ ኦይክድ እስፈ እያኮ ዎፅዶሶና
ACT 7:58 እያ ካታማፐ ጋፃ ከስድ፥ ሹቻን ጫድዶሶና። ማርካት ባንታ ማኡዋ እስ ሳኦላ ጌተትያ ናአተꬃ ማታን ዎꬅዶሶና።
ACT 7:59 እስፅፋኖሰይ፥ “ታ ጎዳ የሱሳ፥ ታ ሸምፑዋ ኤካ” ያግድ ፄግሽን ኤንቲ እያ ሹቻን ጫዶሶና።
ACT 7:60 ጉልባትድ፥ ባ ቃላ ꬎቁ ኦꬅድ፥ “ታ ጎዳዉ፥ ሀ ናጋራ ኤንታዉ አቶ ጋ” ያግስ። ሄሳ ያግድ ስምዳ መላ ሀይቅ አግስ።
ACT 8:1 ሳኦል እስፅፋኖሰ ሀይቁዋን ኡፋይትስ። ሄ ጋላስ የሩሳላመን ደእያ ዎሳ ኬꬃን ግታ ጎድ ደንድስ። ሀዋረት አትሽን፥ አማነይሳት ኡባይ ይሁዳ ቢታንነ ሳማረ ቢታን ላለትዶሶና።
ACT 8:2 እስ እስ ፆሳ አሳት እስፅፋኖሰ ሞግዶሶና፤ ቃስ እያዉ ዳሮ ዬክዶሶና።
ACT 8:3 ሽን ሳኦል ዎሳ ኬꬃ ꬋይሳናዉ ኮዬስ። ሶ ሶ ዩይ ገልድ፥ አማንያ አደታነ ማጫሳታ ጎች ጎች ከስድ ቃሾ ኬꬅ ገልሴስ።
ACT 8:4 ላለትዳ አማነይሳት ብዳ በሳ ኡባን ቃላ ኦድዶሶና።
ACT 8:5 ፍልጶስ ሳማረ ካታማ ብድ ክርስቶሳባ አሳስ ኦድስ።
ACT 8:6 ዳሮ አሳይ ፍልጶስ ኦድዳይሳ ስእዳ ዎደነ እ ኦꬅያ ማላታታ በእዳ ዎደ እያ አኬክድ ስእዶሶና።
ACT 8:7 ቱና አያናት ዋስድ ዳሮ አሳፐ ከይዶሶና፤ ቃስ ዳሮ ጉንዳትነ ዎበት ብለትዶሶና።
ACT 8:8 ሄ ካታማን ደእያ አሳይ ዳሮ ኡፋይትዶሶና።
ACT 8:9 ሽን ስሞና ጌተትያ እስ ኡራይ ሄ ካታማን ደኤስ። እ፥ “ባና ግታ” ግድ ሳማረ አሳ ማሮተꬃን ማላልስሸ ጋምእስ።
ACT 8:10 ጉꬃፈ ግታ ጋካናዉ ደእያ አሳ ኡባይ፥ “ግታ ፆሳ ዎልቃይ ሀይሳ” ግድ እያባ ስኦሶና።
ACT 8:11 ዳሮ ዎደፐ ዶምድ ማሮትሸ ሳማረ አሳ ማላልስዳ ግሾ አሳይ እያባ ስኦሶና።
ACT 8:12 ሽን ፍልጶስ ፆሳ ካዎተꬃባነ የሱስ ክርስቶሳ ሱንꬃባ አደታስነ ማጫታስ ኦድን፥ ኤንቲ እያባ አማንድ ፃማቀትዶሶና።
ACT 8:13 ቃስ ስሞንካ ባ ሁጰን አማንድ ፃማቀትስ። ፍልጶሳራ እስፈ ብዳ በሳ ኡባን ኦሰትያ ግታ ማላታታ በእድ ማላለትስ።
ACT 8:14 የሩሳላመን ደእያ ሀዋረት ሳማረ አሳይ ፆሳ ቃላ ኤክዳይሳ ስእዳ ዎደ ጰፅሮሳነ ዮሃንሳ ኤንታኮ የድዶሶና።
ACT 8:15 ጰፅሮስነ ዮሃንስ ብድ፥ አማነይሳት ጌሻ አያና ኤካና መላ ኤንታዉ ፆሳ ዎስዶሶና።
ACT 8:16 አይስ ጊኮ፥ ሳማረ አሳት ጎዳ የሱሳ ሱንꬃ ፃላላን ፃማቀትዶሶናፐ አትሽን፥ ኤንታፈ እሱዋ ቦላካ ጌሻ አያናይ ዎꬍቤና።
ACT 8:17 ሄ ዎደ ጰፅሮስነ ዮሃንስ ባንታ ኩሸ ኤንታ ቦላ ዎꬅን፥ ኤንቲ ጌሻ አያና ኤክዶሶና።
ACT 8:18 ሀዋረት ባንታ ኩሸ ኤንታ ቦላ ዎꬅን፥ ኤንታዉ ጌሻ አያናይ እመትዳይሳ ስሞን በእዳ ዎደ ጰፅሮሳስነ ዮሃንሳስ ሚሸ ኤህድ፥
ACT 8:19 “ታንካ ታ ኩሸ ዎꬅያ ኡባይ ጌሻ አያና ኤካና መላ ሀ ማታ ታዉ እመርከት” ያግስ።
ACT 8:20 ሽን ጰፅሮስ እያኮ፥ “ኔኒ ፆሳ እሞታ ሚሸን ሻማናዉ ቆፕዳ ግሾ ነ ሚሸይ ኔራ ꬋዮ።
ACT 8:21 ነ ዎዛናይ ፆሳ ስንꬃን ሱረ ግዶና ግሾ፥ ነዉ ሀይሳን ግሾይ ዎይኮ ቃድ ባዋ።
ACT 8:22 ህዛ፥ ሀ ነ ዎዛና ኢታተꬃ ግሾ ናጋራፐ ስማ። ነ ዎዛናን ደእያ ኢታ ቆፋ ፆሳይ አቶ ጋና መላ ፆሳ ዎሳ።
ACT 8:23 ጋሶይካ፥ ኔኒ ኢታ ቃናተንነ ናጋራ ቃሾን ደኤይሳ ታኒ በአይስ” ያግስ።
ACT 8:24 ስሞን ዛሪድ፥ “ህንተ ግዳይሳፈ እሶይካ ታና ጋኮና መላ ታዉ ፆሳ ዎስተ” ያግስ።
ACT 8:25 ጰፅሮስነ ዮሃንስ ማርካትዳፐነ ጎዳ ቃላ ኦድዳፐ ጉየ የሩሳላመ ስምዶሶና። ሳማረን ደእያ ዳሮ ጉታታን ዎንገላ ኦድዶሶና።
ACT 8:26 ጎዳ ኪታንቾይ ፍልጶሳኮ፥ “ደንዳዳ የሩሳላመፐ ጋዛ ኤፍያ መላ ቢታ ኦግያኮ ባ። ሄ ኦገይ ዱገሀ ባጋራ ደኤስ” ያግስ።
ACT 8:27 ፍልጶስ ደንድድ ብስ። ህንደከ ጌተትያ ቶጰ ካዌስ እ ሚሸ ኡባ ናግያ ቶጰ አስ ደኤስ። እካ ጎይናናዉ የሩሳላመ ብስ።
ACT 8:28 ፓራ ጋረን ኡትድ፥ የሩሳላመፐ ባ ቢታ ስምሸ ናብያ እሳያሳ ማፃፋ ናባቤስ።
ACT 8:29 ጌሻ አያናይ ፍልጶሳኮ፥ “ሄ ጋርያኮ ባዳ እያ ማት ሺቃ” ያግስ።
ACT 8:30 ያትን ፍልጶስ ዎፅ ብድ ጋክያ ዎደ ሞርናይ ናብያ እሳያሳ ማፃፋፐ ናባብሽን ስእድ፥ “ነ ናባበይስ ነዉ ገሊ?” ያግስ።
ACT 8:31 ሞርናይ፥ “ታዉ ኦድ ገልስያ አስ ባይና ዋንድ ገላኔ?” ያግስ። ባራ ጋርያን ከይድ ኡታና መላ ፍልጶሳ ዎስስ።
ACT 8:32 ሞርናይ ናባብያ ማፃፋ ክፍለይ፥ “እ ዶርሳዳ ሹከታናዉ ላገትስ፤ ዶርሳ ማር ባ እክስያ ሜደይሳታ ስንꬃን ስእ ገይሳዳ፥ እካ ባ ዶና ዶይቤና።
ACT 8:33 እ ካዉይስ፤ እያዉ ፅሎ ፕርድ ꬋይስ፤ እያ ደኦይ ሀ ሳአፐ ቃንፀትዳ ግሾ፥ እያ ሼሻባ ኦነ ኦዳናይ?” ያጌስ።
ACT 8:34 ሞርናይ ዛሪድ ፍልጶሳኮ፥ “ናበይ ኦደባ ኦዲ? ባባ ኦድየ ዎይኮ ሀራ አሳባ ኦዲ? ታዉ ኦዳርኪ” ያግስ።
ACT 8:35 ፍልጶስ፥ ፆሳ ቃላ ሄ በሳፈ ዶምድ፥ የሱሳባ ኦድያ ዎንገላ እያዉ ኦድስ።
ACT 8:36 ኤንቲ ብሸ ሃꬅ ደእያሶ ጋክዶሶና። ሞርናይ፥ “ሃ ሀይሳ በአ፤ ታ ፃማቀቶና መላ አይበ ድገይ?” ያግስ።
ACT 8:37 ፍልጶስ እያኮ፥ “ኔኒ ነ ኩመꬃ ዎዛናፐ አማንኮ ዳንዳኣሳ” ያግስ። እ ዛሪድ፥ “የሱስ ክርስቶሲ ፆሳ ናኣ ግደይሳ ታኒ አማናይስ” ያግስ።
ACT 8:38 ጋረይ ኤቃና መላ ሞርናይ ኪትን፥ ናምአይ ዎꬍድ ሃꬃን ገልዶሶና፤ ፍልጶስ እያ ፃማቅስ።
ACT 8:39 ኤንቲ ሃꬃፈ ጋፃ ከይዳ ዎደ ጎዳ አያናይ ፍልጶሳ ቆፖና ኤክስ። ናምአንꬆ ሞርናይ ፍልጶሳ በእቤና፥ ሽን ባ ኦግያ ኡፋይትሸ ብስ።
ACT 8:40 ፍልጶስ አዛፆናን ባና ደምስ። ቃስ ቅሳረ ያና ጋካናዉ ካታማታን ዩይድ ዎንገላ ማርካትስ።
ACT 9:1 ሄ ዎደ ሳኦል ጎዳ ካለይሳታ ዎꬋናዉ ማንድድ ካህነ ሀላቃኮ ብስ።
ACT 9:2 ጎዳ ኦግያ ካልያ አደነ ማጫ ደምኮ፥ ቃችሸ የሩሳላመ ኤሀናዉ፥ ዳማስቆን ደእያ አይሁደ ዎሳ ኬꬃታስ ዳብዳበ ባዉ ፃፋና መላ ዎስስ።
ACT 9:3 እ ብድ፥ ዳማስቆ ካታማ ጋካናዉ ማትሽን፥ ቆፖና ሳሎፐ ዎልቃማ ፖኦይ እያ ዩሾን ፖእስ።
ACT 9:4 እ ሳአን ኩንድዳሽን፥ “ሳኦላ፥ ሳኦላ፥ አይስ ታና ጎዳይ?” ግያ ቃላ ስእስ።
ACT 9:5 ሳኦል፥ “ጎዳዉ፥ ኔኒ ኦኔ?” ያግድ ኦይችስ። “ታኒ፥ ኔኒ ጎድያ የሱሳ” ያግስ።
ACT 9:6 ሽን ሳኦል ኮኮርሸነ ማላለትሸ፥ “ጎዳዉ፥ ታኒ አይ ኦꬃና መላ ኮያይ?” ያግስ። ጎዳይ እያኮ፥ “ደንዳዳ ካታማ ገላ፤ ኔኒ ኦꬃናዉ በሲያባይ ያን ነዉ ኦደታና” ያግስ።
ACT 9:7 ሳኦላራ ኦገ ብያ አሳት አይኮካ ኦደቶና ኤቅ አትዶሶና። ቃላ ስኦሶና፥ ሽን ኦናካ በእቦኮና።
ACT 9:8 ሳኦል ኩንድዳ በሳፈ ደንድድ ፄልያ ዎደ እያ አይፈይ ደሞና እፅስ። ሄሳ ግሾ፥ ኤንቲ እያ ኩሽያ ኦይክድ ካለꬅድ ዳማስቆ ገልስዶሶና።
ACT 9:9 ሄꬑ ጋላስ ጋካናዉ እ ፄላናዉ ዳንዳእቤና፤ አይኮካ ምቤና፤ ኡይቤና።
ACT 9:10 ዳማስቆን እስ ሀናንያ ጌተትያ የሱሳ ታማረይ ደኤስ። ጎዳይ ቆንጨꬃን፥ “ሀናንያ” ያግድ ፄግስ። ሀናን ዛሪድ፥ “ታ ጎዳዉ፥ ሀይሳን ደአይስ” ያግስ።
ACT 9:11 ጎዳይ እያኮ፥ “ደንዳዳ ሱረ ጌተትያ ኦግያ ባዳ፥ ይሁዳ ሶን ሳኦላ ጌተትያ ታርሰሳፐ ይዳ ኡራ ኮያ፤ ሳኦል ዎሴስ።
ACT 9:12 ቃስ ሀናንያ ጌተትያ አደይ ገልድ፥ ሳኦል ናምአንꬆ ፄላና መላ ባ ኩሽያ እያ ቦላ ዎꬅሽን ቆንጨꬃን በእስ” ያግስ።
ACT 9:13 ሀናን ዛሪድ፥ “ጎዳዉ፥ የሩሳላመን ነ ጌሻ አሳ ቦላ ሄ ኡራይ አይ መላ ኢታባ ኦꬅዳኮ ታኒ ዳሮ አሳፐ ስአስ።
ACT 9:14 ቃስ ዳማስቆን ነ ሱንꬃ ፄገይሳታ ኡባ ቃቻናዉ፥ ካህነ ሀላቃት እያዉ ማታ እምዶሶና” ያግስ።
ACT 9:15 ሽን ጎዳይ እያኮ፥ “ሳኦል አይሁደ ግዶና አሳ ስንꬃን፥ ካዎታ ስንꬃንነ እስራኤለ አሳ ስንꬃን፥ ታ ሱንꬃ ኤርሳናዉነ ታዉ ኦꬃናዉ ዶረትዳ ሚሸ ግድያ ግሾ ኔኒ እያኮ ባ።
ACT 9:16 አይስ ጊኮ፥ ታ ሱንꬃ ግሾ፥ እ አይ መላ ዋየ ኤካናዉ በሲያኮ ታኒ እያ በሳና” ያግስ።
ACT 9:17 ሀናን ብድ፥ ሶ ገልድ፥ ባ ኩሽያ ሳኦላ ቦላ ዎꬅድ፥ “ታ እሻ ሳኦላ፥ ኔኒ ያ ኦግያን ነዉ በንትዳ የሱሲ፥ ኔኒ ፄላና መላነ ጌሻ አያናን ኩማና መላ ጎዳይ ታና ኪትስ” ያግስ።
ACT 9:18 ኤለስድ፥ ሳኦላ አይፈፐ እስ ፖቆ መላባይ ዎꬍን፥ ሳኦል ናምአንꬆ ፄልስ። ቃስ ደንድድ ፃማቀትስ።
ACT 9:19 ካꬅ ምድ ፃልድ፥ ዳማስቆን ደእያ አማነይሳታራ ጉꬃ ጋላስ ጋምእስ።
ACT 9:20 ኤለስድ ሳኦል፥ “የሱሲ ፆሳ ናአ” ያግድ ዳማስቆን ደእያ አይሁደ ዎሳ ኬꬃታን ቃላ ታማርስስ።
ACT 9:21 ሄሳ ስእዳ ኡባይ ማላለትድ፥ “ሀይስ የሩሳላመን የሱሳ ሱንꬃ ፄገይሳታ ቃቸይሳ ግደነዬ? ቃስ ሃ ይዳይ ኤንታ ቃችድ፥ ካህነ ሀላቃታ ስን ኤፋናሳ ግደኔ?” ያግዶሶና።
ACT 9:22 ሽን ሳኦል ቃላ ኦዶን ምን ምንድ ብስ። የሱሲ፥ እ ክርስቶሳ ግደይሳ ቆንጭስድ ኦድዳ ግሾ ዳማስቆን ደእያ አይሁደት እያዉ ዛርያባ ꬋይዶሶና።
ACT 9:23 ዳሮ ጋላሳፐ ጉየ፥ አይሁደት ሺቅድ፥ ሳኦላ ዎꬋናዉ ዞረትዶሶና።
ACT 9:24 ሽን አይሁደት ባና ዎꬋናዉ ቆፕዳይሳ ሳኦል ስእስ። ኤንቲ እያ ዎꬋናዉ ቃማነ ጋላስ ካታማ ፐንገን ናጎሶና።
ACT 9:25 ሽን እያ ታማረት እያ ቃማ ኤፍድ፥ ግምበ ድርሳ ማስኮተራ ዳቾራ ዎꬍስዶሶና።
ACT 9:26 ሳኦል የሩሳላመ ጋክዳ ዎደ አማነይሳታራ ጋሄታናዉ ኮይስ። ሽን እ ክርስቶሳ አማንዳይስ ኤንታዉ ቱማ ዳኖና እፅን እያዉ ያይዶሶና።
ACT 9:27 ሽን ባርናባስ ሳኦላ ሀዋረታኮ ኤፍስ። ኦገን ጎዳይ ዋንድ ቆንጭዳኮነ ኦድስዳኮ፥ ቃስ ሳኦል ዳማስቆን የሱሳ ሱንꬃን ያዮና ዋትድ ቃላ ኦድዳኮ ኤንታዉ ጌሽድ ኦድስ።
ACT 9:28 ሳኦል የሩሳላመን ዩይድ ጎዳ ሱንꬃን ያዮና ቃላ ኦድሸ፥ ሀዋረታራ እስፈ ደእስ።
ACT 9:29 ቃስ ሳኦል ግርከ ዶናን ሃሳያ አይሁደታራ ኦደትሸ ፓላሜስ። ሽን ኤንቲ እያ ዎꬋናዉ ኮይዶሶና።
ACT 9:30 አማንያ አሳት ሄሳ ስእድ፥ ሳኦል ቅሳረ ኤፍድ ታርሰሳ የድዶሶና።
ACT 9:31 ይሁዳን፥ ጋልላንነ ሳማረ ኡባን ደእያ ዎሳ ኬꬃት ሳሮተꬃን ደእዶሶና። ቃስ ምንዶሶና፤ ጎዳስ ያይሸ ጌሻ አያና ምንꬆን ዳር ዳርድ ብዶሶና።
ACT 9:32 ጰፅሮስ ቢታ ኡባ ዩይሸ ሊዳን ደእያ አማንያ አሳታኮ ጋክስ።
ACT 9:33 ያን ሆስፑን ላይꬅ ኩመꬅ ጉንድድ አርሳን ዝንእድ ደእያ ኤንያ ጌተትያ አድያ ደምስ።
ACT 9:34 ጰፅሮስ፥ “ኤንያ፥ የሱስ ክርስቶሲ ነና ፓꬃና፤ ደንዳዳ ነ ሂፃ ደንꬃ” ያግስ። እካ ኤለስድ ደንድ ኤቅስ።
ACT 9:35 ሊዳንነ ሳሮናን ደእያ አሳ ኡባይ ኤንያ በእድ፥ ጎዳኮ ስምዶሶና።
ACT 9:36 ዮጰ ካታማን እስ ፃብቶ ጌተትያ አማንያራ ደአዉሱ። እ ሱንꬃይ አራምከ ዶናን፥ “ፃብቶ”፤ ግርከ ዶናን፥ “ዶርቃ”፤ ሄ ናምኡ ሱንꬃ ብርሸꬃይ “ገንኤ” ጉሱ። እያ ባ ደእዳ ዎደ ኡባን ሎኦባ ኦꬃሸነ ማንቆታ ማዳሸ ደአሱ።
ACT 9:37 ሄ ዎደ እያ ሀርጋዳ ሀይቅን፥ አሳይ እ አሀ ሜጭድ፥ ፖቀ ቦላ ከስድ ዝንእስዶሶና።
ACT 9:38 ሊደይ ዮጰስ ማታ። አማነይሳት ጰፅሮስ ሊዳን ደኤይሳ ስእድ፥ “ሀያና ኑኮ ኤለሳዳ ያ” ያግድ ናምኡ አሳታ እያኮ ኪትዶሶና።
ACT 9:39 ሄሳ ግሾ፥ ጰፅሮስ ደንድድ፥ ኤንታራ ብስ። ያ ጋክን፥ ፖቀ ቦላ ደእያ ክፍለ እያ ገልስዶሶና። አምኤት ጰፅሮሳ ዩሾን ኤቅድ ዬክሸ ዶርቃ ኤንታራ ፓፃ ደአሸ ኦꬅዳ ቃምሰታነ አፍላታ ኡባ ጰፅሮሳ በስዶሶና።
ACT 9:40 ጰፅሮስ ኤንታ ኡባ ካረ ከስድ፥ ጉልባትድ ዎስስ። ቃስ አሃኮ ስሚድ፥ “ፃብተ፥ ደንዳ” ያግስ። ፃብታ ባ አይፍያ ዶያዳ ጰፅሮሳ በአዳ፥ ደንዳ ኡታሱ።
ACT 9:41 ጰፅሮስ እዮ ባ ኩሸን ማድድ ደንꬅድ ኤስስ። ሄሳፈ ጉየ፥ አማነይሳታነ አምኤታ ፄግድ፥ ደንድዳሮ ኤንታ ስን ሺሽስ።
ACT 9:42 ሀ ኦዳይ፥ ዮጰ ካታማ ኡባ ጋክስ፤ ዳሮ አሳይ ጎዳ አማንዶሶና።
ACT 9:43 ጰፅሮስ ዮጰን ስሞና ጌተትያ ጋልባ ሃሸይሳ ሶን ዳሮ ጋላስ ጋምእስ።
ACT 10:1 ቅሳረን፥ “ፃለ ኦላ አሳታ” ጌተትያ ኦላንቾታ ግዶን እስ ቆርነልዮሳ ጌተትያ ማቶ ሀላቃይ ደኤስ።
ACT 10:2 ቆርነልዮስ ባ ሶ አሳራ ፆሳ ምንꬅ አማንያ አስነ ፆሳ ጎይንያ አስ። አይሁደ ማንቆታካ ዳሮ ማዴስ፥ ቃስ ፆሳ ኡባ ዎደ ዎሴስ።
ACT 10:3 እስ ጋላስ ኡዱፉን ሳተ ሄራን ፆሳ ኪታንቾይ እያኮ ይድ፥ “ቆርነልዮሳ” ግድ ፄግሽን እ ቆንጨꬃን ጌሽድ በእስ።
ACT 10:4 ቆርነልዮስ ዳጋምድ ኪታንቹዋ ትሽ ኦꬅ ፄልድ፥ “ጎዳዉ፥ እ አይቤ?” ያግስ። ኪታንቾይ ዛሪድ፥ “ነ ዎሳይነ ማንቆታ ነ ማደይስ ፆሳ ስንꬃን ሀሳየትስ።
ACT 10:5 ሀእ ዮጰ አሰ ኪታዳ፥ ጰፅሮሳ ጌተትያ ስሞና ኤህሳ።
ACT 10:6 ጰፅሮስ አባ ዶናን ጋልባ ሃሽያ ስሞና ሶን እማꬃተꬅ ሲራትስ” ያግስ።
ACT 10:7 ቆርነልዮስ ባዉ ኦድዳ ኪታንቾይ ብን፥ ባ አይለታፐ ናምአታነ ፆሳ ጎይንያ ባ ማታ ዎታዳረታፐ እሱዋ ፄግድ፥
ACT 10:8 ኤንታዉ ኡባባ ኦድድ ዮጰ ኪትስ።
ACT 10:9 ዎንተꬃ ጋላስ ኤንቲ ብድ፥ ዮጰ ካታማ ማትሽን ኡሱፑን ሳተ ሄራን ፆሳ ዎሳናዉ ጰፅሮስ ፖቀ ቦላ ከይስ።
ACT 10:10 እ ኮሻትድ ካꬅ ማናዉ ኮይስ፥ ሽን ካꬅ ካፅሽን እ ቆንጨꬅ በእስ።
ACT 10:11 ሳሎይ ዶየትን፥ ግታ አፍላ ዳንያባይ ኦይዱ ባጋራ ኦይከትድ ዎꬍሽን እ በእስ።
ACT 10:12 እያን ኦይዱ ቶሆራ ደእያ መሄት፥ ዎራ ዶአት፥ ኡሎራ ጎሸትያ መተꬃትነ ሳሎ ካፎት ኡባይ ደኤስ።
ACT 10:13 ሄ ዎደ፥ “ጰፅሮሳ፥ ደንዳ ኤቃዳ ሹካዳ ማ” ግያ ቃላይ እያኮ ይስ።
ACT 10:14 ሽን ጰፅሮስ፥ “ጎዳዉ፥ አካይ! ታ ቱናባ ኡባራካ ማ ኤርከ” ያግስ።
ACT 10:15 ቃስ፥ “ፆሳይ ጌሽዳይሳ ኔኒ ቱና ጎፓ” ግያ ቃላይ ናምአንꬆ እያኮ ይስ።
ACT 10:16 ሄስካ፥ ሄꬑ ቶሆ ሀንዳፐ ጉየ ሄ ግታ አፍላ ዳነይስ ኤለስድ ፑደ ሳሎ ኤከትስ።
ACT 10:17 ጰፅሮስ ባ በእዳ ቆንጨꬃ ብርሸꬃይ፥ “አይ ግዳንደሻ?” ግድ ባ ዎዛናን ቆፕሽን፥ ቆርነልዮስ ኪትዳ አሳት ስሞና ሶ ኦይች ደምድ ካረን ኤቅዶሶና።
ACT 10:18 ባንታ ቃላ ꬎቁ ኦꬅድ፥ “ጰፅሮሳ ጌተትያ ስሞና ጌተትያ እማꬃይ ሀይሳን ደኢ?” ያግድ ኦይችዶሶና።
ACT 10:19 ጰፅሮስ ቆንጨꬃን በእዳባ ቆፋ ቦላ ደእሽን፥ ጌሻ አያናይ እያኮ፥ “ሄኮ፥ ሄꬑ አሳት ነና ኮዮሶና።
ACT 10:20 ደንዳዳ ዎꬋ፥ ታኒ ኤንታ ኪትዳ ግሾ ስꬎና ኤንታራ ባ” ያግስ።
ACT 10:21 ጰፅሮስ አሳታኮ ዎꬍድ፥ “ህንተ ኮየይ ታና፤ አይስ ይደቲ?” ያግስ።
ACT 10:22 ኤንቲ ዛሪድ፥ “ኑና ማቶ ሀላቃይ ቆርነልዮስ ኪትስ። እ ፅሎ፥ ፆሳ ጎይንያ አስነ አይሁደ አሳ ኡባን ዳሮ ቦንቸትዳ አስ። ቆርነልዮስ፥ ነና ባ ሶ ኤህስድ ቃላ ኔፐ ስአና መላ ጌሻ ኪታንቾይ እያዉ ኦድስ” ያግዶሶና።
ACT 10:23 ጰፅሮስ አሳታ ሶ ገልስድ ሞክስ። ዎንተꬃ ጋላስ፥ ደንድድ ኤንታራ ብስ። ዮጰ ካታማን ደእያ አማነይሳታፐ እሶት እሶት እያራ እስፈ ብዶሶና።
ACT 10:24 ዎንተꬃ ጋላስ፥ ቅሳረ ጋክዶሶና። ቆርነልዮስ ባ ዳቦታነ ባ ማታ ላገታ እስፈ ፄግ ሺሽድ፥ ጰፅሮሳ ናጌስ።
ACT 10:25 ጰፅሮስ ሶ ገላና ሀንሽን፥ ቆርነልዮስ እያራ ጋሄትድ እያ ስንꬃን ኩንድድ እያዉ ጎይናናዉ ኮይስ።
ACT 10:26 ሽን ጰፅሮስ፥ “ደንዳ፥ ታካ ታ ሁጰን ነ መላ አሰ” ያግድ እያ ደንꬅስ።
ACT 10:27 ጰፅሮስ ቆርነልዮሳራ ኦደትሸ ሶ ገልያ ዎደ ዳሮ አሳይ ሺቅዳይሳ ደምስ።
ACT 10:28 እ አሳኮ፥ “አይሁደ አስ ሀራ ደረራ እስፋናዉ ዎይኮ ጋሄታናዉ ዎጋ ግዶናይሳ ህንተ ኤሬታ። ሽን ታኒ ኦናካ ቱና ዎይኮ ጌሽ ግደና ጎና መላ ፆሳይ ታና በስስ።
ACT 10:29 ሄሳ ግሾ፥ ህንተ ታኮ ኪትን እፆይ ባይና ያስ። ሀእ ታና አይስ ፄግስዳኮ ታዉ ኦድተ” ያግስ።
ACT 10:30 ቆርነልዮስ፥ “ታኒ ሀች ኦይዱ ጋላሳፐ ካሰ ሀኖደ ኡዱፉን ሳተ ዎሳ ዎስሽን፥ ጶልያ ማኦ ማእዳ አስ ታ ስንꬃን ኤቅስ።
ACT 10:31 እ ታኮ፥ ‘ቆርነልዮሳ፥ ፆሳይ ነ ዎሳ ስእስ፥ ኔኒ ማንቆታ ማድዳይሳካ ሀሳይስ።
ACT 10:32 ህዛ፥ አሰ ዮጰ ኪታዳ፥ ስሞን ጰፅሮሳ ገይሳ ፄግሳ። ስሞን ጰፅሮስ ስሞና ጌተትያ ጋልባ ሃሽያ ኡራ ሶን አባ ዶናን ሲራትስ’ ያግስ።
ACT 10:33 ሄሳ ግሾ፥ ታኒ ኔኮ ኤለሳዳ ኪታስ፤ ነ ሎኦ ያዳሳ። ህዛ፥ ፆሳይ ነና ኪትዳባ ኡባ ስአናዉ ሀእ ኑኒ ኡባይ ሀይሳን ጎዳ ስንꬃን ደኦስ” ያግስ።
ACT 10:34 ካልድካ፥ ጰፅሮስ፥ “ፆሳይ አሳ ሶምኦ በእድ አሰ አሳፐ ሻከና።
ACT 10:35 ሽን አሰ ኡባ ኦና ግድኮካ ባዉ ያየይሳነ ፅሎ ኦሶ ኦይሳን ፆሳይ ኡፋይተይሳ ታኒ ቱማ አኬካስ።
ACT 10:36 ፆሳይ፥ ኡባ ጎዳ ግድዳ የሱስ ክርስቶሳ ባጋራ ሳሮተꬃ ኦድሸ ሀ ዎንገላ እስራኤለ አሳስ ኪትዳይሳ ህንተ ኤሬታ።
ACT 10:37 ዮሃንስ ፅንቃተባ ጋልላን ሳባክዳ ዎድያፐ ዶምድ ይሁዳ ቢታ ኡባ ጋካናዉ ሀንዳባ ህንተ ኤሬታ።
ACT 10:38 ፆሳይ ናዝረተ የሱሳስ ጌሻ አያናነ ዎልቃ እሚስ። ፆሳይ እያራ ደእያ ግሾ ሎኦባ እ ኦꬅሸ ፃላሄ ኩሸን ሃረትዳ ኡባ ፓꬅሸ ዩይስ።
ACT 10:39 “አይሁደ ቢታንነ የሩሳላመን እ ኦꬅዳ ኡባባስ ኑኒ ማርካታ። ኤንቲ ማስቃልያ ቦላ ካቅድ እያ ዎꬍዶሶና።
ACT 10:40 ሽን ፆሳይ ሄꬓንꬆ ጋላሳን ሀይቆፐ እያ ደንꬅድ አሳስ ቆንጫና መላ ኦꬅስ።
ACT 10:41 ሄ ቆንጨꬃይ ፆሳይ ኮይሮ ዶርዳ ማርካታሳፈ አትሽን፥ አሳ ኡባሳ ግደና። እ ሀይቆፐ ደንድዳፐ ጉየ እያራ ምዳነ ኡይዳ።
ACT 10:42 ፆሳይ ዎንገላ አሳስ ኑኒ ኦዳና መላነ ፓፃ ደኤይሳታ ቦላነ ሀይቅዳይሳታ ቦላ ፕርዳናዉ ሹመትዳይ የሱሳ ግደይሳ ማርካታና መላ ኑና ኪትስ።
ACT 10:43 ፆሳይ እያ አማንያ ኡባ ናጋራይ፥ እያ ሱንꬃን አቶ ጌተተይሳ ናበት ማርካቶሶና” ያግስ።
ACT 10:44 ጰፅሮስ ቡሮ ሄ ኦዳ ኦንጎናሽን ቃላ ስእያ ኡባ ቦላ ጌሻ አያናይ ዎꬍስ።
ACT 10:45 ጰፅሮሳራ ዮጰፈ ይዳ አማንያ ቃፃረትዳ አይሁደ ኡባይ፥ አይሁደ ግዶናይሳት ቦላ ጌሻ አያናይ ጉክዳ ግሾ ማላለትዶሶና።
ACT 10:46 ጋሶይካ፥ ኤንቲ ዱማ ዱማ ዶናን ኦደትሽንነ ፆሳ ግታተꬃ ሳቢሽን ስእዶሶና። ሄ ዎደ ጰፅሮስ ዛሪድ፥
ACT 10:47 “ሀይሳቲ ቃስ ኑ መላ ጌሻ አያና ኤክዳይሳት ፃማቀቶና መላ ሃ ድጋናይ ኦኔ?” ያግስ።
ACT 10:48 ኤንቲ የሱስ ክርስቶሳ ሱንꬃን ፃማቀታና መላ ኤንታ ኪትስ። ሄሳፈ ጉየ፥ ኤንቲ ባንታራ ጉꬃ ጋላስ ኡታና መላ ጰፅሮሳ ዎስዶሶና።
ACT 11:1 ሀዋረትነ ይሁዳ ኡባን ደእያ አማነይሳት፥ አይሁደ ግዶናይሳትካ ፆሳ ቃላ ኤክዳይሳ ስእዶሶና።
ACT 11:2 ጰፅሮስ የሩሳላመ ብዳ ዎደ ቃፃረትዳ አማነይሳት፥
ACT 11:3 እያኮ፥ “ኔኒ ቃፃረትቦናይሳታኮ ገላዳ ኤንታራ ካꬅ አይስ ማዲ?” ያግዶሶና።
ACT 11:4 ሽን ጰፅሮስ ሀንዳባ ኮይሮፐ ዶምድ ማራን ማራን ኦድስ፦
ACT 11:5 “ታኒ ዮጰ ካታማን ፆሳ ዎሳሸ ቆንጨꬅ በአስ። ግታ አፍላ ዳንያባይ ኦይዱ ባጋራ ኦይከትድ ሳሎፐ ዎꬍሸ ታኮ ይስ።
ACT 11:6 ታኒ ትሽ ኦꬃ እያ ግዶ ፄልያ ዎደ ኦይዱ ቶሆራ ደእያ መሄታ፥ ዎራ ዶአታ፥ ኡሎራ ጎሸትያ መተꬃታነ ሳሎ ካፎታ በአስ።
ACT 11:7 ‘ጰፅሮሳ፥ ደንዳ፥ ሹካዳ ማ’ ግያ ቃላ ስአስ።
ACT 11:8 “ሽን ታኒ፥ ‘ጎዳዉ፥ አካይ፥ ቱናባይ ዎይኮ ጌዮናባይ ኡባካ ታ ዶናኮ ሺቅ ኤረና’ ያጋስ።
ACT 11:9 “ ‘ፆሳይ ጌሽዳይሳ ኔኒ ቱና ጎፓ’ ግያ ቃላይ ናምአንꬆ ሳሎፐ ይስ።
ACT 11:10 “ሄስ ሄꬑ ቶሆ ሀንን፥ ዉርሰꬃን ኡባባይ ሳሎ ፑደ ኤከትስ።
ACT 11:11 ሄ ሳተንካ ሄꬑ አሳት ቅሳረፐ ታኮ ኪተትድ ታኒ ደእያ ኬꬃ ጋክ አግዶሶና።
ACT 11:12 ስꬎና ኤንታራ ባና መላ አያናይ ታዉ ኦድስ። ቃስ ሀ ኡሱፑን እሻት ዮጰፈ ታራ ቅሳረ ብዳይሳታራ ቆርነልዮሳ ሶ ገልዳ።
ACT 11:13 ኪታንቾይ እያ ሶን ኤቅድ፥ ‘ዮጰ ኪታዳ ጰፅሮሳ ጌተትያ ስሞና ፄግሳ።
ACT 11:14 ነናነ ነ ሶ አሳ ኡባ አሽያ ቃላ እ ነዉ ኦዳና’ ግዳይሳ ቆርነልዮስ ኑስ ኦድስ።
ACT 11:15 “ታኒ ሃሳያ ዶምያ ዎደ ጌሻ አያናይ ኮይሮ ኑ ቦላ ዎꬍዳይሳዳ ኤንታ ቦላካ ዎꬍ አግስ።
ACT 11:16 ሄ ዎደ፥ ‘ዮሃንስ ሃꬃን ፃማቅስ፥ ሽን ህንተ ጌሻ አያናን ፃማቀታና’ ያግዳ ጎዳ ቃላይ ታዉ ቆፈትስ።
ACT 11:17 ፆሳይ ኑስ ጎዳ የሱስ ክርስቶሳ አማንዳይሳታስ እምዳ እሞታ አይሁደ ግዶናይሳታስካ እምኮ፥ ያትን ፆሳ ድጋናዉ ታኒ ኦኔ?” ያግስ።
ACT 11:18 ኤንቲ ሄሳ ስእዳ ዎደ ባንታ ፓላማ አግድ፥ “ያትን፥ ፆሳይ አይሁደ ግዶናይሳትካ ናጋራፐ ስሚድ ደኦን ዳናዳ ቃዳ እሚስ” ያግድ ፆሳ ጋላትዶሶና።
ACT 11:19 እስፅፋኖሰ ሀይቆስ ጋꬅዳ ጎዳ ጋሶን ላለትዳ አማነይሳት ቃላ አይሁደታ ፃላላስ ኦድሸ ስሮፍንቀ፥ ቆጵሮሳነ አንፆከ ጋካናዉ ዩይዶሶና።
ACT 11:20 ሽን ቆጵሮሳፐነ ቀሬናፐ ይዳ እስ እስ አማንያ አሳት አንፆከ ብድ፥ ጎዳ የሱሳ ዎንገላ ግርከ አሳስካ ኦድዶሶና።
ACT 11:21 ጎዳ ዎልቃይ ኤንታራ ደኤስ፤ ቃስ ዳሮ አሳይ አማንድ ጎዳኮ ስምዶሶና።
ACT 11:22 ሄ ኦዳ የሩሳላመን ደእያ ዎሳ ኬꬃይ ስእዳ ግሾ ባርናባሳ አንፆከ ኪትስ።
ACT 11:23 ባርናባስ አንፆከ ብዳ ዎደ ፆሳ አꬎ ኬሀተꬃ ኦሱዋ በእድ ኡፋይትስ። ኤንቲ ኡባይ ባንታ ኩመꬃ ዎዛናን ጎዳን ምንድ ዳና መላ ኤንታ ዞርስ።
ACT 11:24 ባርናባስ ጌሻ አያናይነ አማኖይ ኩምዳ ሎኦ አስ ግድያ ግሾ ዳሮ አሳይ ጎዳ አማንዶሶና።
ACT 11:25 ሄሳፈ ጉየ፥ ባርናባስ ሳኦላ ኮያናዉ ታርሰሳ ብስ።
ACT 11:26 ያን ሳኦላ ደምዳ ዎደ አንፆከ ኤክድ ይስ። ባርናባስነ ሳኦል ዎሳ ኬꬃ አሳራ ላይꬅ ኩመꬅ ኡትድ ዳሮ አሳ ታማርስዶሶና። አማነይሳት አንፆከን “ክርስታነ” ጌተትድ ኮይሮ ፄገትዶሶና።
ACT 11:27 ሄ ዎደ እስ እስ ናበት የሩሳላመፐ አንፆከ ዎꬍዶሶና።
ACT 11:28 ኤንታ ግዶፈ አጋቦሳ ገይስ ደንድድ ቢታ ኡባን ግታ ኮሽ ከያናይሳ አያና ዎልቃን ትንብተ ኦድስ። ሄስ ሀንዳይ ሮመ ካዋ ቃላዉድዮሳ ዎደና።
ACT 11:29 አማነይሳት ሁጰን ሁጰን ባንታ ዎልቃ መላ ሚሸ ከስድ ይሁዳን ደእያ አማነይሳታስ ማደ የዳናዉ ቆፋ ቃችዶሶና።
ACT 11:30 ኤንቲ ሄሳዳ ኦꬅድ፥ ሚሽያ ባርናባሳ ቦላነ ሳኦላ ቦላ ዎሳ ኬꬃ ጭማታስ የድዶሶና።
ACT 12:1 ሄ ዎደ ካዎይ ሄሮዲስ ዎሳ ኬꬃ አሳፐ ባጋ ጎዳ ዶምስ።
ACT 12:2 ዮሃንሳ እሻ ያይቆባ ማሻን ዎꬍስስ።
ACT 12:3 ሄስ አይሁደታ ኡፋይስዳይሳ በእድ፥ ጉጅድ ጰፅሮሳካ ኦይꬅስ። ሄስ ሀንዳይ ፓስካ ባኣለ ቦንችያ ጋላሳታና።
ACT 12:4 ጰፅሮሳ ኦይክድ ቃችስ። ፓስካ ቦንችያ ጋላሳታፐ ጉየ ደርያ ስን አꬃናዉ ቆፕድ፥ ኦይዱ ኦይዱ ዎታዳረት እያ ናጋና መላ ታማነ ኡሱፑን ዎታዳረታስ አꬅድ እሚስ።
ACT 12:5 ሄሳ ግሾ፥ ጰፅሮስ ቃሾ ኬꬃን ናገቴስ። ሽን ዎሳ ኬꬃ አሳይ እያዉ ምንꬅድ ፆሳ ዎሶሶና።
ACT 12:6 ሄሮዲስ ጰፅሮሳ አሳ ስን ሺሻናፐ ካሰ ቃማ ጰፅሮስ ናምኡ ባጋራ ናምኡ ዎታዳረታራ ሳንꬃላታን ቃሸትድ ኤንታ ግዶን ꬍስክስ። ናገይሳት ቃሾ ኬꬃ ፐንገታን ኤቅድ ናጎሶና።
ACT 12:7 አኬኮና ደእሽን ጎዳ ኪታንቾይ ቆንጭስ። ቃሾ ኬꬃን ፖኦይ ፖእስ። ኪታንቾይ ጰፅሮሳ ምያ ቦች ባርክስድ፥ “ኤለ ደንዳ” ያግስ። ኢራካ ሳንꬃላታይ እያ ኩሽያፐ ዎꬍ አግስ።
ACT 12:8 ኪታንቾይ እያኮ፥ “ነ ማኡዋ ማአ፥ ነ ጫማካ አꬃ” ያግስ። ጰፅሮስ ሄሳዳ ኦꬅስ፤ ኪታንቾይ፥ “ነ ላፃና ማአዳ ታና ካላ” ያግስ።
ACT 12:9 ጰፅሮስ ቃሾ ኬꬃፈ ከይድ ኪታንቹዋ ካልስ። እያዉ ቆንጨꬅ በእያባ ዳንስፐ አትሽን፥ ኪታንቾይ ኦꬅያባይ ቱማ ዳንቤና።
ACT 12:10 ኪታንቾይነ ጰፅሮስ ኮይሩዋነ ናምአንꬆ ዎታዳርያ አꬍድ ካታማ ኤፍያ ብራታ ፐንግያኮ ጋክዶሶና። ፐንገይ ኤንታዉ ባርካ ዶየት አግስ። ኤንቲ ከይድ እስ ኦግያራ ብሽን ኪታንቾይ አኬኮና ጰፅሮሳፐ ሻከት አግስ።
ACT 12:11 ጰፅሮሳስ ዎዛን ስምን፥ “ታና ጎዳይ ባ ኪታንቹዋ ኪትድ፥ ሄሮዲሳ ኩሸፐነ ናግድ ኡትዳ አይሁደ አሳ ኡባፈ አሽዳይሳ ሀእ ቱማ ኤራስ” ያግስ።
ACT 12:12 እ ሄሳ አኬክዳ ዎደ ዳሮ አሳይ እስፈ ሺቅድ ፆሳ ዎስያ በሳ፥ ማርቆሳ ጌተትያ ዮሃንሳ አየ ማይራም ሶ ብስ።
ACT 12:13 ያን ካረን ኤቅድ ፄግስ። እስ ሮዳ ጌተትያ ኦሳንችያ ፐንግያ ዶያናዉ ያሱ።
ACT 12:14 ሮዳ ጰፅሮሳ ቃላ ግድዳይሳ ኤርዳ ዎደ ኡፋይሳን ኩማዳ ካርያ ዶየና ጉየ ዎፃ ባዳ፥ “ጰፅሮስ ካረን ኤቅስ” ያጋዳ አሳስ ኦዳሱ።
ACT 12:15 አሳይ ኢኮ፥ “ኔኒ ጎያይ!” ያግዶሶና። ሮዳ ጰፅሮሳ ግድዳይሳ ጌሻዳ ኦዳሱ። ኤንቲ፥ “ሄስ እያ ናግያ ኪታንቹዋ” ያግዶሶና።
ACT 12:16 ሽን ጰፅሮስ ካረን ኤቅድ ፄግድ አጎና እፅን አሳይ ካርያ ዶይድ እያ በእድ ማላለትዶሶና።
ACT 12:17 ሽን ኤንቲ ስእ ጋና መላ ጰፅሮስ ባ ኩሽያን ማልድ ጎዳይ ቃሾ ኬꬃፈ እያ ዋት ከስዳኮ ኤንታዉ ቆንጭስ ኦድድ፥ “ሀይሳ ያይቆባስነ አማንያ አሳታስ ኦድተ” ግድ ያፐ ከይድ ሀራሶ ብስ።
ACT 12:18 ሳአይ ዎንትያ ዎደ፥ “ጰፅሮስ አዉ ብደ” ግድ ዎታዳረት ዎል ግዶን ዳሮ ካጭዶሶና።
ACT 12:19 ሄሮዲስ ጰፅሮሳ ኮይስን፥ እ ꬋይዳ ዎደ ናገይሳታ ቆርድ፥ ኤንታ ዎꬋና መላ ኪትስ። ሄሳፈ ጉየ፥ ሄሮዲስ ይሁዳፐ ቅሳረ ዎꬍድ ያን ጉꬃ ዎደ ኡትስ።
ACT 12:20 ሄሮዲስ ፅሮሳ አሳ ቦላነ ስዶና አሳ ቦላ ዳሮ ሀንቀትስ። ኤንታ ቢታይ ካꬅ ሄሮዲሳ ቢታፈ ደምያ ግሾ ኤንቲ እስፈ ግድድ እያ ሞርና ብላስፆሳ ባንታዉ ጭማ ኦꬅድ ጊጋናዉ ሄሮዲሳኮ ብዶሶና።
ACT 12:21 ሄሮዲስ ባርዳ ጋላሳን ባ ካዎተꬃ አፍላ ማእድ፥ አራታ ቦላ ኡትድ አሳስ ኦድስ።
ACT 12:22 አሳይ፥ “ሄስ ፆሳ ቃላ፥ አሳ ቃላ ግደና” ያግድ ዋስዶሶና።
ACT 12:23 ሄሮዲስ ፆሳ ቦንችቦና ግሾ ኢራካ ጎዳ ኪታንቾይ እያ ደችን ጉፁነን ሜተትድ ሀይቅስ።
ACT 12:24 ሽን ፆሳ ቃላይ ድጭሸነ ዳልግሸ ቤስ።
ACT 12:25 ባርናባስነ ሳኦል ባንታ ኦሱዋ ፖልድ ማርቆሳ ጌተትያ ዮሃንሳ ባንታራ ኤክድ የሩሳላመፐ ስምዶሶና።
ACT 13:1 አንፆከን ደእያ ዎሳ ኬꬃን ናበትነ አስታማረት ደኦሶና። ኤንቲ ባርናባሳ፥ ካሬꬅ ጌተትያ ስሞና፥ ቀሬናፐ ይዳ ሉክዮሳ፥ ካዋ ሄሮዲሳራ ድጭዳ ምናሄነ ሳኦላ።
ACT 13:2 ኤንቲ ጎዳ ጎይንሽንነ ፆምሽን ጌሻ አያናይ፥ “ታኒ ፄግዳ ኦሱዋስ ባርናባሳነ ሳኦላ ታዉ ዱማይተ” ያግስ።
ACT 13:3 ሄሳ ግሾ፥ ኤንቲ ፆምዳፐነ ዎስዳፐ ጉየ ባንታ ኩሽያ ኤንታ ቦላ ዎꬅድ የድዶሶና።
ACT 13:4 ሄሳ ግሾ፥ ጌሻ አያናይ ኤንታ ኪትስ። ሰለዉቀ ብዶሶና፤ ያፐ ማርካበን ገልድ ቆጵሮሳ ሃꬃን ተቀትዳ ቢታ ብዶሶና።
ACT 13:5 ኤንቲ ስልማና ጋክድ አይሁደ ዎሳ ኬꬃታን ፆሳ ቃላ ኦድዶሶና። ዮሃንስ ማድሸ ኤንታራ ደኤስ።
ACT 13:6 ኤንቲ ዩሾይ አባን ተቀትዳ ቢታ፥ ቆጵሮሳ ካንꬅድ ጳፉ ጋክያ ዎደ፥ እስ ዎርዳንቾ ናብያ፥ ባር-የሱሳ ጌተትያ አይሁደ ማሩዋ ደምዶሶና።
ACT 13:7 ሄ ማሮይ ደርያ አይስያ ሳርግዮስ ጳዉሎሳ ጌተትያ አኬካንቾ አድያራ ደኤስ። ሳርግዮስ ጳዉሎስ ባርናባሳነ ሳኦላ ባኮ ፄግድ ፆሳ ቃላ ስአናዉ ኮይስ።
ACT 13:8 ሽን ግርከ ዶናን ማሩዋ ሱንꬃይ “ኤልማሳ” ጌተቴስ። እ ደርያ ሃረይስ አማኖና መላ ድጋናዉ ኮይድ ባርናባሳራነ ጳዉሎሳራ ኤቀትስ።
ACT 13:9 ሽን ጳዉሎሳ ጌተትያ ሳኦል ጌሻ አያናን ኩምድ ማሩዋ ጫድ ፄልድ፥
ACT 13:10 “ላ፥ ፃላሄ ናአዉ፥ ኢታተꬅ ኡባይ ኩምዳይሶ፥ ፅሎተꬃ ኡባስ ሞርክያዉ፥ ሱረ ጎዳ ኦግያ ምርቀይሳ አግኪ?
ACT 13:11 ሄኮ፥ ሀእ ጎዳ ኩሸይ ነ ቦላ ደኤስ። ኔኒ ቆቀ ግዳና፤ ጉꬃ ዎደስ አዋ ፖኦ በአካ” ያግስ። ኢራ ጫጋንነ ꬉሚ እያ አይፍያ ጎዝን፥ ባ ኩሽያ ኦይክድ ካለꬅያ አስ ኮይሸ ዩይስ።
ACT 13:12 ደርያ አይሰይስ ሄሳ በእዳ ዎደ ጎዳባ ታማርስያ ትምርትያን ማላለትድ አማንስ።
ACT 13:13 ጳዉሎስነ እያራ ደኤይሳት ጳፉፐ ደንድድ፥ ጵንፍለን ደእያ ጳርገ ማርካበራ ብዶሶና። ዮሃንስ ኤንታፈ ሻከትድ የሩሳላመ ስምስ።
ACT 13:14 ሽን ኤንቲ ጳርገፈ አꬍድ ጵስደን ደእያ አንፆከ ጋክዶሶና። ሳምባታ ጋላስ አይሁደ ዎሳ ኬꬅ ገልድ ኡትዶሶና።
ACT 13:15 ሙሰ ህገይነ ናበታ ማፃፋይ ናባበትዳፐ ጉየ አይሁደ ዎሳ ኬꬃ ሀላቃት፥ “ኑ እሻቶ፥ አሳ ምንꬅያ ቃል ህንተዉ ደእያኮ አሳስ ኦደርከት” ያግድ ኤንታኮ ኪትዶሶና።
ACT 13:16 ጳዉሎስ ደንድ ኤቅድ ባ ኩሸ ማልድ፥ “እስራኤለ አሳቶነ፥ ፆሳ ጎይንያ አይሁደ ግዶና አሳዉ፥ ስእተ።
ACT 13:17 ሀ እስራኤለ አሳ ፆሳይ ኑ ማይዛታ ዶርስ። ግብፀ ቢታን እማꬃተꬃን ኤንቲ ደእሽን፥ ኤንታ ዳርስድ ባ ግታ ዎልቃን ግብፀ ቢታፈ ኤንታ ከስስ።
ACT 13:18 መላ ቢታን ኦይታሙ ላይꬃ መላ ኤንታ ዳንዳእስ።
ACT 13:19 ካናነ ቢታን አይሁደ ግዶና ላፑን ካዎተꬃታ ድግድ ኤንታ ቢታ ባ አሳ ላትስስ።
ACT 13:20 “ሄሳፈ ጉየ፥ ናብያ ሳሜላ ዎደ ጋካናዉ ኦይዱ ፄታነ እሻታሙ ላይꬃ መላ አይስያ ዳይናታ ኤንታዉ እሚስ።
ACT 13:21 ሄሳፈ ጉየ፥ ኤንቲ ባንታዉ ካዎ እማና መላ ዎስን፥ ፆሳይ ብንያመ ሼሻፐ ቂሳ ናኣ፥ ሳኦላ ኦይታሙ ላይꬅ ካዎታና መላ ኤንታዉ እሚስ።
ACT 13:22 ፆሳይ ሳኦላ ሻርዳፐ ጉየ ኤንታ ቦላ ዳዊታ ካዎꬅስ። ፆሳይ ዳዊታባ ማርካትሸ፥ ‘ታኒ ኮይያ ኡባ ታ ዎዛና መላ ኦꬅያ እሰየ ናኣ ዳዊታ ደማስ’ ያግስ።
ACT 13:23 “ፆሳይ፥ ‘ታኒ ዳዊታ ሼሻፐ እስራኤለ ደርያ አሸይሳ ኤሀና’ ግዳይሳ መላ የሱሳ ኤህስ።
ACT 13:24 የሱሲ ያናፐ ስን እስራኤለ አሳ ኡባይ ባንታ ናጋራፐ ስሚድ ፃማቀታና መላ ዮሃንስ ቃላ ኦድስ።
ACT 13:25 ቃስ ዮሃንስ ባ ኦሱዋ ዉርሳና ሀንሸ አሳኮ፥ ‘ታና ኦና ግድ ቆፔቲ? ታኒ ህንተ ናግያ ክርስቶሳ ግድከ፥ ሽን ታኒ እያ ጫማ ብርሻናዉ ታዉ በሶናይስ ታፐ ጉየራ ዬስ’ ያግስ።
ACT 13:26 “ታ እሻቶ፥ አብራሃመ ሼሻቶ፥ ቃስ ሀይሳን አይሁደ ግዶናሽን ፆሳስ ያየይሳቶ፥ ሀ አቶተꬃ ቃላይ ኑስ ኪተትስ።
ACT 13:27 አይስ ጊኮ፥ የሩሳላመን ደእያ አሳይነ ኤንታ ሀላቃት የሱሳ ኤርቦኮና። ሳምባታ ኡባን ናባበትያ ናበታ ቃላ አኬክቦና ግሾ እያ ቦላ ፕርድድ ናበት ኦድዳ ቃላ ፖልዶሶና።
ACT 13:28 የሱሳ ዎꬍሳናዉ እስ ጋሶይካ ኤንታዉ ꬋይን ጵላፆስ እያ ዎꬋና መላ ዎስዶሶና።
ACT 13:29 ኤንቲ የሱሳባይ ጌሻ ማፃፋን ፃፈትዳባ ኡባ ፖልዳ ዎደ ማስቃልያፐ እያ ዎꬍስድ ሞግዶሶና።
ACT 13:30 ሽን ፆሳይ ሀይቆፐ የሱሳ ደንꬅስ።
ACT 13:31 ሄሳፈ ጉየ፥ እ ባራ ጋልላፐ የሩሳላመ ይዳይሳታስ ዳሮ ቶሆ በንትስ። ኤንቲ ሀእ እያባ አሳስ ማርካቶሶና።
ACT 13:32 “ፆሳይ ኑ አዋታስ እማና ግዳ ዎንገላ ኑኒ ህንተዉ ኦዶስ።
ACT 13:33 ዳዊቲ ባ ማዝሙረ ማፃፋን ናምአንꬆ ሸምፑዋን፥ “ኔኒ፥ ታ ናአ፥ ታኒ ሀች ነና የላስ” ጌተትድ ፃፈትዳይሳ የሱሳ፥ ፆሳይ ሀይቆፐ ደንꬅድ ኑ ማይዛታስ እማና ግዳይሳ ኑስ ኤንታ ናይታስ ፖልስ።
ACT 13:34 እ ዎቆና መላ ፆሳይ ሀይቆፐ እያ ደንꬆን ኤርሳናዉ፥ “ ‘ታኒ ዳዊታስ እማና ግዳ አማነትዳ ጌሻ አንጁዋ ህንተዉ እማና’ ያግድ ኦድስ።
ACT 13:35 ሄሳ ግሾ፥ ማዝሙረ ማፃፋን ሀራ በሳን፥ “ ‘ነ ጌሻ ናኣ አሀ ዎቅሳካ’ ያጌስ።
ACT 13:36 “ዳዊቲ ባ ዎደ ፆሳ ቆፋ ፖልዳፐ ጉየ ሀይቅድ ባ አዋታራ ሞገትድ ዎቅስ።
ACT 13:37 ሽን ፆሳይ ሀይቆፐ ደንꬅዳይስ ዎቅቤና።
ACT 13:38 “ሄሳ ግሾ፥ ታ እሻቶ፥ ናጋራ አቶተꬃይ የሱሳ ባጋራ ካሰትድ ህንተዉ ኦደትዳይሳ ኤርተ። ሙሰ ህገይ ናጋራፐ ፅልሳናዉ ዳንዳኤና።
ACT 13:39 ሽን የሱሳ አማንያ ኡባይ ናጋራፐ ፅሌስ።
ACT 13:40 ሄሳ ግሾ፥ ናበት ግዳይስ ህንተ ቦላ ጋኮና መላ ናገትተ።
ACT 13:41 “ ‘ፆሳይ ግዳባ ለቅሰይሳቶ! በእተ! ማላለትተ! ꬋይተ! ኦንካ ኦድን፥ ህንተ አማኖና ኦሱዋ ታኒ ህንተ ዎድያን ኦꬃና’ ” ያግስ።
ACT 13:42 ጳዉሎስነ ባርናባስ አይሁደ ዎሳ ኬꬃፈ ከይሽን፥ ካልያ ሳምባታን ሄሳ ጉጅድ ኦዳና መላ አሳይ ኤንታና ዎስዶሶና።
ACT 13:43 ሺቆይ ላለትዳፐ ጉየ፥ ዳሮ አይሁደትነ አይሁደታ አማኑዋን ገልድ ፆሳ ጎይንያ ዳሮት ጳዉሎሳነ ባርናባሳ ካልዶሶና። አማንዳይሳት ፆሳ አꬎ ኬሀተꬃን ምንድ ዳና መላ ኤንታ ዞርዶሶና።
ACT 13:44 ካልያ ሳምባታን ካታማን ደእያ አሳፐ ዳሮት ፆሳ ቃላ ስአናዉ ሺቅዶሶና።
ACT 13:45 ሽን አይሁደት ዳሮ አሳ በእዳ ዎደ ጳዉሎሳ ቃናትድ እያ ሃሳያ እፅድ እያ ጫይዶሶና።
ACT 13:46 ጳዉሎስነ ባርናባስ ያዮና፥ “ፆሳ ቃላይ ኮይሮትድ ህንተዉ ኦደታናዉ ኮሼስ። ሽን ህንተ ቃላ እፅድ መርና ደኡዋ ኤካናዉ ኑስ በሰና ግድ ህንተ፥ ህንተ ሁጰን ፕርድዳ ግሾ ህዛ ኑኒ አይሁደ ግዶናይሳታኮ ስሞስ።
ACT 13:47 ጋሶይካ ጎዳይ፥ “ ‘አላመ ኩመꬃይ ነ ባጋራ አታና መላ፥ ታኒ ነና አይሁደ ግዶና ደርያስ ፖኦ ኦꬃስ’ ያግድ ኑና ኪትስ” ያግዶሶና።
ACT 13:48 አይሁደ ግዶናይሳት ሄሳ ስእዳ ዎደ ኡፋይትድ ፆሳ ቃላ ቦንችዶሶና። ቃስ መርና ደኡዋስ ዶረትዳ ኡባይ አማንዶሶና።
ACT 13:49 ጎዳ ቃላይ ሄ ቢታ ኡባ ጋክስ።
ACT 13:50 ሽን አይሁደት፥ አይሁደ ግዶና ፆሰ ጎይንያ ዱረ ማጫሳታነ ካታማን ደእያ ግታ አሳታ ጳዉሎሳ ቦላነ ባርናባሳ ቦላ ደንꬅዶሶና። ሄ አሳት ኤንታ ጎዳ ዶምድ ባንታ ቢታፈ ከስዶሶና።
ACT 13:51 ሽን ጳዉሎሳራነ ባርናባሳራ እፀይሳታስ ማላ ግዳና መላ ባንታ ቶሁዋፐ ባና ፕትድ እቆንዮነ ካታማ ብዶሶና።
ACT 13:52 ቃስ አንፆከን ደእያ አማነይሳት ጌሻ አያናንነ ኡፋይሳን ኩምዶሶና።
ACT 14:1 ካሰይሳዳካ፥ ጳዉሎስነ ባርናባስ እቆንዮነን አይሁደታ ዎሳ ኬꬅ ገልድ ዳሮ አይሁደትነ አይሁደ ግዶናይሳት አማናና ጋካናዉ ቃላ ኦድዶሶና።
ACT 14:2 ሽን አማንቦና አይሁደት፥ አይሁደ ግዶናይሳታ ዎዛና ላምድ እሻታ ቦላ ደንꬅዶሶና።
ACT 14:3 ሀዋረት ያን ዳሮ ዎደ ጋምእዶሶና። ኤንቲ ያዮና ጎዳባ ኦድዶሶና። ጎዳይ ማላታታነ ኦራꬃባ ኤንቲ ኦꬃና መላ ኤንታዉ ማታ እምድ፥ እ ባ አꬎ ኬሀተꬃ ቃላይ ቱማ ግደይሳ ቆንጭስስ።
ACT 14:4 ሽን ሄ ካታማ አሳይ ሻከትድ፥ ባጋይ አይሁደታራ ባጋይ ቃስ ሀዋረታራ ግድስ።
ACT 14:5 አይሁደ ግዶናይሳትነ አይሁደት ባንታ ሀላቃታራ እስፈ ግድድ ሀዋረታ ቆሀናዉነ ሹቻን ጫዳናዉ ኮይዶሶና።
ACT 14:6 ሀዋረት ሄሳ ኤርድ፥ ልስፅራነ ዳርበ ጌተትያ ልቃኦና ካታማታነ ኤንታ ሄራን ደእያ ቢታ ባቃትዶሶና።
ACT 14:7 ያን ዎንገላ ኦድዶሶና።
ACT 14:8 የለቶሳፐ ዶምድ ናምኡ ቶሆይ ዎቢን ሄመት ኤሮና እስ አደይ ልስፅራን ደኤስ።
ACT 14:9 ሄ አደይ ጳዉሎስ ኦድሽን ኡትድ ስኤስ። ጳዉሎስ እያ ትሽ ኦꬅ ፄልያ ዎደ ፓፃናዉ እያዉ አማኖይ ደኤይሳ በእድ፥
ACT 14:10 ባ ቃላ ꬎቁ ኦꬅድ፥ “ስት ጋዳ ነ ቶሁዋን ኤቃ” ያግስ። ያትን፥ ጉፕ ደንድ ኤቅድ ሄመꬅ ዶምስ።
ACT 14:11 ጳዉሎስ ኦꬅዳይሳ አሳይ በእድ ባንታ ቃላ ꬎቁ ኦꬅድ ልቃኦና ዶናን፥ “ፆሳት አሰ ዳንድ ኑኮ ዎꬍዶሶና” ያግዶሶና።
ACT 14:12 ባርናባሳ፥ “ድያ” ግድ፥ ጳዉሎስ ኦዳን ዋናትያ ግሾ፥ እያ፥ “ሄርመና” ግድ ሱንꬅዶሶና።
ACT 14:13 ካታማፐ ጋፃን ደእያ ኤቃ ድያ ኬꬃ ካህነይነ አሳይ ኮርማታነ አሌቆ ጪሻታ ሀዋረታስ ያርሻናዉ ኮይድ ካታማ ፐንገ ኤህዶሶና።
ACT 14:14 ሽን ባርናባስነ ጳዉሎስ ሄሳ ስእዳ ዎደ ኤንቲ ኦꬃናዉ ቆፕዳይሳ እፅድ፥ ባንታ ማኡዋ ፔꬍዶሶና። አሳ ግዶ ዎፅ ገልድ፥
ACT 14:15 ባንታ ቃላ ꬎቁ ኦꬅድ፥ “አሳዉ፥ ሀይሳ አይስ ኦቲ? ኑካ ህንተ መላ አሰ። ሀ ፓꬆናባፐ ሳሎነ ሳአ፥ አባነ ኤንታ ግዶን ደእያ ኡባባ መꬍዳ ደኦ ፆሳኮ ህንተ ስማና መላ ህንተዉ ኑኒ ዎንገላ ኦዶስ።
ACT 14:16 እ፥ በን አሳይ ባንታ ኦገ ባና መላ የድ አግስ።
ACT 14:17 ሽን እራ ሳሉዋፐ ቡክስስ፥ ካꬃካ ዎድያን ዎድያን እሚስ፥ ካꬅ እምድ ህንተና ዳሮ ኡፋይስስ፥ ያትድ ህንተዉ ሎኦባ ኦꬅድ ባዉ ማርካ ꬋይስቤና” ያግዶሶና።
ACT 14:18 ሀዋረት ሄሳ ግድ፥ ባንታዉ አሳይ ያርሾና መላ ዋይድ ድግዶሶና።
ACT 14:19 አንፆከፐነ እቆንዮነፐ ይዳ አይሁደት፥ አሳ ባንታ ባጋ ዛሪድ ሹቻን ጳዉሎሳ ጫድዶሶና። እ ሀይቅዳባ ዳንን ካታማፐ ጋፃ ጎች ኤፍድ የግዶሶና።
ACT 14:20 ሽን አማነይሳት ይድ፥ እያ ዩሾን ኤቅዳሽን እ ደንድድ ካታማ ገልስ። ዎንተꬃ ጋላስ ባርናባሳራ እስፈ ዳርበ ብስ።
ACT 14:21 ኤንቲ ዳርበ ካታማን ዎንገላ ኦድድ ዳሮታ አማንꬅዳፐ ጉየ ልስፅራ፥ እቆንዮነነ ጵስደን ደእያ አንፆከ ስምዶሶና።
ACT 14:22 ያን አማነይሳታ ምንꬅሸነ ኤንቲ አማኖን ምንድ ደአና መላ ዞርሸ፥ “ፆሳ ካዎተꬃ ገላናዉ ኑኒ ዳሮ ዋየ ኤካናዉ በሴስ” ያግድ ታማርስዶሶና።
ACT 14:23 ቃስ ዎሳ ኬꬃታስ ሁጰን ሁጰን ጭማታ ዶርዶሶና። ፆምዳፐነ ዎስዳፐ ጉየ ኤንቲ አማንዳ ጎዳስ ኤንታ ሀዳራ እምዶሶና።
ACT 14:24 ጵስደ ቢታ ካንꬅ አꬍድ ጵንፍለ ብዶሶና።
ACT 14:25 ጰርገን ቃላ ኦድዳፐ ጉየ አፃለ ብዶሶና።
ACT 14:26 ባንታ ኦሱዋ ፖልዳፐ ጉየ፥ አፃለፕ ፆሳ አꬎ ኬሀተꬃስ ኤንታ ሀዳራ እምዳ አንፆከ ማርካበራ ጉየ ስምዶሶና።
ACT 14:27 አንፆከ ጋክዳ ዎደ ዎሳ ኬꬃ አሳ ሺሽድ ፆሳይ ኤንታራ ኦꬅዳ ኦሱዋ ኡባነ አይሁደ ግዶና አሳይ አማናና መላ ኤንታዉ ዋት ፐንገ ዶይዳኮ ኦድዶሶና።
ACT 14:28 ሄሳን አማነይሳታራ ዳሮ ዎደ ጋምእዶሶና።
ACT 15:1 እስ እስ አሳት ይሁዳፐ አንፆከ ብድ፥ “ሙሰ ዎጋꬆ ህንተ ቃፃረቶና እፅኮ አታናዉ ዳንዳኤከታ” ግድ አማነይሳታ ታማርሶ ዶምዶሶና።
ACT 15:2 ሄስ ጳዉሎሳነ ባርናባሳ ኤንታራ ዳሮ ፓላማናዳነ ካጫናዳ ኦꬅስ። ሄሳ ግሾ፥ አንፆከን ደእያ እስ እስ አሳት ጳዉሎሳራነ ባርናባሳራ የሩሳላመ ብድ ሀዋረታራነ ጭማታራ ጋሄትድ ሄ ኦዳ ብላናዉ ቆፋይ ቃሸትስ።
ACT 15:3 ዎሳ ኬꬃይ ኤንታ ኪትን ብዶሶና። ኤንቲ ስሮፍንቀ ሳማረራ አꬍሸ አይሁደ ግዶናይሳት ፆሳኮ ዋንድ ስምዳኮ ኦድዶሶና። ሄስ አማነይሳታ ኡባ ዳሮ ኡፋይስስ።
ACT 15:4 ኤንቲ የሩሳላመ ጋክዳ ዎደ ዎሳ ኬꬃይ፥ ሀዋረትነ ጭማት ኤንታ ሞክዶሶና። ፆሳይ ባንታራ ኦꬅዳባ ኡባ ኦድዶሶና።
ACT 15:5 ሽን ፋርሳወታ ባጋፈ አማንዳ እስ እስ አሳት ደንድ ኤቅድ፥ “አይሁደ ግዶናሽን አማንዳ አሳት ቃፃረታናዉነ ሙሰ ህገ ናጋናዉ በሴስ” ያግዶሶና።
ACT 15:6 ሀዋረትነ ጭማት ሄሳ ዞረታናዉ ሺቅዶሶና።
ACT 15:7 ዳሮ ዞረትዳፐ ጉየ፥ ጰፅሮስ ደንድ ኤቅድ፥ “ታ እሻቶ፥ አይሁደ ግዶናይሳት ዎንገላ ቃላ ታ ዶናፐ ስእድ አማናና መላ ካሰትድ ታና ፆሳይ ህንተ ግዶፈ ዶርዳይሳ ህንተ ኤሬታ።
ACT 15:8 አሳ ዎዛና ኤርያ ፆሳይ ጌሻ አያና ኑስ እምዳይሳዳ ኤንታዉካ እምድ ቱማይስ።
ACT 15:9 አማኖን ኤንታ ዎዛና ጌሽዳ ግሾ ኑ ግዶንነ ኤንታ ግዶን ዱማተꬅ ዎꬅቤና።
ACT 15:10 ሄሳ ግሾ፥ ኑ አዋትነ ኑኒ ቶካናዉ ዳንዳእቦና ቃምባራ አማነይሳታ ሞርገን ዎꬅድ ሀእ አይስ ህንተ ፆሳ ፓጨቲ?
ACT 15:11 ጎዳ የሱስ ክርስቶሳ አꬎ ኬሀተꬃን ኤንቲ አትዳይሳዳ ኑካ አትዳይሳ አማኖስ” ያግስ።
ACT 15:12 አሳይ ስእ ግድ፥ ባርናባስነ ጳዉሎስ አይሁደ ግዶና አሳ ግዶን ባንታ ባጋራ ፆሳይ ኦꬅዳ ማላታታነ ኦራꬃባ ኡባ ኦድሽን ስኦሶና።
ACT 15:13 ኤንቲ ሃሳያ ኦንግዳፐ ጉየ ያይቆብ፥ “እሻቶ፥ ታ ገይሳ ስእተ።
ACT 15:14 ፆሳይ አይሁደ ግዶናይሳታ ግዶፈ ባ አሰ ዶራናዉ ኮይድ ኤንታና ኮይሮ ዋትድ ቆፕዳኮ ስሞን ኦድስ።
ACT 15:15 ናበታ ቃላይ ሀይሳራ እስኖ። ጌሻ ማፃፋን፥
ACT 15:16 “ ‘ሀይሳፈ ጉየ፥ ታኒ ስማና፥ ኩንድዳ ዳዊታ ካዎተꬃ ደንꬃና። ላለትዳ ኬꬃካ ዛራ ኤሳና።
ACT 15:17 አትዳ አሳ ኡባይ ታኮ ያና፥ ታኒ ፄግዳ አይሁደ ግዶና አሳ ኡባይ ታና ኮያና።
ACT 15:18 በንፐ ዶማዳ ሄስ ኤረታና መላ ኦꬅዳ ፆሳይ፥ ታኒ ያጋይስ’ ያጌስ።
ACT 15:19 “ሄሳ ግሾ፥ ታ ቆፋይ ፆሳኮ ስምያ አይሁደ ግዶናይሳታ ኑኒ ዋይሶናኮ ሎኦ።
ACT 15:20 ሽን ኤንቲ ኤቃስ ያርሸትድ ቱንዳባ ሞና መላ፥ ላይማቶና መላ፥ ባዉታ ሞና መላነ ሱꬅ ኡዮና መላ ኤንታዉ ኑኒ ዳብዳበ ፃፋናዉ ኮሼስ።
ACT 15:21 ሙሰ ህገይ በንፐ ዶምድ ሳምባታን ሳምባታን አይሁደ ዎሳ ኬꬃታን ናባበትሸ ካታማ ኡባን ሳባከቴስ” ያግስ።
ACT 15:22 ሄሳፈ ጉየ፥ ሀዋረትነ ጭማት ዎሳ ኬꬃ አሳ ኡባራ እስፈ ባንታ ግዶፈ ጉꬃ አሳታ ዶርድ ጳዉሎሳራነ ባርናባሳራ አንፆከ የዳናዉ ቆፋ ቃችዶሶና። ኤንቲ ዳሮ ቦንቸትዳ ናምኡ አሳታ ባርሳባሳ ጌተትያ ይሁዳነ ስላሰ ዶርዶሶና።
ACT 15:23 ሀይሳዳ ጌተትድ ፃፈትዳ ዳብዳበ ኤንታ ቦላ የድዶሶና፦ “ኑኒ ሀዋረትነ ጭማት ህንተ እሻት፥ አንፆከን፥ ሶረንነ ክልቀን ደእያ አይሁደ ግዶና እሻታስ ኑ ሳሮꬁዋ ኪቶስ።
ACT 15:24 “ኑኒ ኪቶና አሳት ኑ ግዶፈ ብድ፥ ‘ህንተ ቃፃረታናዉነ ህግያ ናጋናዉ በሴስ’ ግድ፥ ህንተና ዋይስዳይሳነ ይሎይዳይሳ ስእዳ።
ACT 15:25 ኑኒ ዶስያ ባርናባሳነ ጳዉሎሳ ዶረትዳ አሳታራ እስፈ ህንተኮ ኪታናዉ እስ ዎዛናን ኑ ቆፋ ቃችዳ።
ACT 15:26 ኤንቲ ኑ ጎዳ የሱስ ክርስቶሳ ግሾ ባንታ ደኡዋ አꬅድ እምዶሶና።
ACT 15:27 ሄሳ ግሾ፥ ኑኒ ፃፍዳይሳ ኤንቲ ባንታ ዶናን ጉጅድ ህንተዉ ኦዳና መላ ይሁዳነ ስላሰ ኪትዳ።
ACT 15:28 “ሀ ኮሸይሳታፐ አትሽን፥ ሀራ ቶሆ ህንተና ቶሶና መላ ኑነ ጌሻ አያናይ ኦዳ ቃችዳ።
ACT 15:29 ኤቃስ ያርሸትድ ቱንዳባ ሞፕተ፥ ሱꬁ ኡዮፕተ፥ ባዉታ ሞፕተ፥ ላይማቶፕተ። ሀ ኡባፈ ህንተ ሁጵያ ናግኮ ህንተ ሎኦባ ኦꬄታ። ህዛ፥ ሳሮ ደእተ” ያግዶሶና።
ACT 15:30 ሄሳ ግሾ፥ ኪተትዳይሳት ሞይዘትድ አንፆከ ብድ አማንያ አሳ ሺሽድ፥ ዳብዳበ እምዶሶና።
ACT 15:31 ኤንቲ ሄ ምንꬅያ ዳብዳብያ ናባብዳ ዎደ ኡፋይትዶሶና።
ACT 15:32 ቃስ ይሁድነ ስላሰይ ባንታ ሁጰን ናበ ግድያ ግሾ አማነይሳታ ሎይꬅ ዞርድ ምንꬅዶሶና።
ACT 15:33 ኤንቲ አንፆከን ጉꬃ ጋላስ ኡትዳፐ ጉየ እሻት ሎኦራ ሞይዝን ባንታና ኪትዳይሳታኮ ስምዶሶና።
ACT 15:34 [ሽን ስላሰይ ያን አታናዉ ኮይስ]።
ACT 15:35 ቃስ ጳዉሎስነ ባርናባስ ሀራ ዳሮ አሳታራ እስፈ ጎዳ ቃላ ታማርስሸነ ዎንገላ ኦድሸ አንፆከን ጋምእዶሶና።
ACT 15:36 ጉꬃ ጋላሳፐ ጉየ ጳዉሎስ ባርናባሳኮ፥ “ኑኒ ጎዳ ቃላ ኦድዳ ካታማ ኡባን አማነይሳት ዋንድ ደእያኮ ጉየ ስምሸ ፆሞስ በኦስ” ያግስ።
ACT 15:37 ባርናባስ ማርቆሳ ጌተትያ ዮሃንሳ ባንታራ ኤፋናዉ ኮይስ።
ACT 15:38 ሽን ጳዉሎስ ማርቆሳ ባንታራ ኤፋናዉ ኮይቤና። ጋሶይካ፥ እ ጵንፍለን ሻከትድ ኤንታራ ኦꬃናዉ ብቤና።
ACT 15:39 ኤንታ ግዶን ኢታ ኦሽ ከይን እሶይ እሱዋፈ ሻከትዶሶና። ባርናባስ ማርቆሳ ኤክድ ማርካበራ ቆጵሮሳ ብስ።
ACT 15:40 ሽን ጳዉሎስ ስላሰ ዶርስ፤ አማነይሳት ጳዉሎሳ ፆሳ አꬎ ኬሀተꬃስ ሀዳራ እምዳፐ ጉየ፥ እ ከይድ ብስ።
ACT 15:41 ያትድ፥ ዎሳ ኬꬃታ ምንꬅሸ ሶረራነ ክልቅያራ አꬍስ።
ACT 16:1 ጳዉሎስ ዳርበነ ልስፅራ ብስ። ያን ፅሞትዮሳ ጌተትያ አማንያ አስ ደኤስ። እያ አይያ አማንያ አይሁደ ማጫስ፥ እያ አዋይ ግርከ አስ።
ACT 16:2 ልስፅራንነ እቆንዮነን ደእያ አማነይሳት ፅሞትዮሳባ ሎይꬅድ ማርካትዶሶና።
ACT 16:3 ጳዉሎስ ፅሞትዮሳ ባራ ኤፋናዉ ኮይድ፥ እያ አዋይ ግርከ አስ ግድዳይሳ ሄ በሳን ደእያ አይሁደ ኡባይ ኤርያ ግሾ እያ ቃፃርስ።
ACT 16:4 ኤንቲ ካታማታራ ብሸ የሩሳላመን ደእያ ሀዋረትነ ጭማት ዎꬅዳ ህግያ አማነይሳት ናጋና መላ ኤንታዉ ኦድሸ አꬍዶሶና።
ACT 16:5 ሄሳ ግሾ፥ ዎሳ ኬꬃት አማኖን ምንሸ፥ ታይቦንካ ጋላስ ጋላስ ዳር ዳር ብዶሶና።
ACT 16:6 ኢሰን ቃላ ኦዶና መላ ጌሻ አያናይ ኤንታ ድግዳ ግሾ፥ ፕርገራነ ጋላትያ ቢታራ አꬍዶሶና።
ACT 16:7 ኤንቲ ሚሰ ዛዋ ጋክዳ ዎደ ብታነ ባናዉ ኮይዶሶና። ሽን የሱሳ አያናይ ኤንታ ድግስ።
ACT 16:8 ሄሳ ግሾ፥ ኤንቲ ሚሰ ማታራ አꬍሸ ፅሮኣዳ ዎꬍዶሶና።
ACT 16:9 ጳዉሎስ ቃማ ቆንጨꬃን እስ ማቀዶነ አስ ባኮ፥ “ማቀዶነ ፕናዳ ኑና ማዳርክ” ያግሸ ኤቅድ ዎስሽን በእስ።
ACT 16:10 ቆንጨꬃ እ በእዳፐ ጉየ ኤለስድ ኑኒ ማቀዶነ ባናዉ ኮይዳ። አይስ ጊኮ፥ ዎንገላ ያን ደእያ አሳስ ኦዳናዉ ፆሳይ ኑና ፄግዳይሳ ኤርዳ።
ACT 16:11 ፅሮኣዳፐ ደንድድ ማርካበን ገልድ ሳሞትራቀ ብዳ፥ ዎንተꬃ ጋላስ ናጱለ ብዳ።
ACT 16:12 ያፐ ደንድድ ማቀዶነ ቢታን ደእያ ፍልጵስዩሳ ካታማ ብዳ። ፍልጵስዩስ ሮመ አሳይ ደእያ ካታማ። ኑኒ ሄ ካታማን ጉꬃ ጋላስ ኡትዳ።
ACT 16:13 ሳምባታ ጋላስ ካታማፐ ጋፃን ሻፋ ዶናን አይሁደት ፆሳ ዎስያ በሲ ደኤይሳ ኤርድ ያ ብዳ። ሄ በሳን ሺቅዳ ማጫሳስ ቃላ ኦድዳ።
ACT 16:14 ኑና ስእያ አሳፐ እስ ሊድያ ጌተትያ ትያትሮና ካታማፐ ይዳ፥ ፆሳ አማንዳ ዞኦ አፍላ ዛልእያ፥ ማጫስያ ደአዉሱ። ጳዉሎስ ኦደይሳ እያ ስአና መላ ፆሳይ እ ዎዛና ዶይስ።
ACT 16:15 ሊድያ ባ ሶ አሳራ እስፈ ፃማቀትዳፐ ጉየ ኑኮ፥ “ህንተ ታና ጎዳ ቱማ አማናሱ ጊኮ ታ ሶ የꬍተ” ጋዳ ምንꬃዳ ዎሳሱ።
ACT 16:16 ኑኒ ፆሳ ዎስያ በሳ ብሽን ኢታ አያናይ እ ቦላ ደእድ ማሮꬅያ እስ ጌላኦ ጋꬍንዶይ ኑራ ጋሄታሱ። እያ ካያዳ ዳሮ ሚሸ ባ ጎዳታስ ኤሀዉሱ።
ACT 16:17 ጳዉሎሳነ ኑና ካላዳ፥ “ሀይሳቲ ኡባፈ ቦላ ፆሳ አይለታ! ኤንቲ ህንተ አታና ኦገ ኦደይሳታ” ጋዳ ዋሳሱ።
ACT 16:18 ኡባ ጋላስ ሄሳዳ ጋዉሱ። ሽን ጳዉሎስ ይሎትድ ጉየ ስሚድ፥ ሄ አያና፥ “የሱስ ክርስቶሳ ሱንꬃን ኔኒ ኢፐ ከያ” ግድ ኪትስ። ኢራካ ኢታ አያናይ ኢፐ ከይ አግስ።
ACT 16:19 ሽን እ ጎዳት ባንታዉ ሚሸ ደምያ ኦገይ ꬋይዳይሳ በእድ፥ ጳዉሎሳነ ስላሰ ኦይክድ፥ ዳባባ ዳይናታ ስን ጎች ኤፍዶሶና።
ACT 16:20 ዳይናታ ስን ኤንታ ኤፍድ፥ “ሀይሳቲ አይሁደ አስ ግድሸ ኑ ካታማ አሳ ዳሮ ዋይሶሶና።
ACT 16:21 ኑኒ ሮመ ቢታ አስ ግድሸ ኤካናዉነ ኦꬃናዉ ዎጋ ግዶናባ ታማርሶሶና” ያግዶሶና።
ACT 16:22 አሳይ እስ ባጋ ግድድ፥ ጳዉሎሳ ቦላነ ስላሰ ቦላ ደንድዶሶና። ዳይናት ኤንታ ማኡዋ ቃርድ ፃምአን ሾጫና መላ ኪትዶሶና።
ACT 16:23 ኤንታ ዳሮ ዋꬍዳፐ ጉየ፥ ቃሾ ኬꬅ ገልስዶሶና። ቃሾ ኬꬃ ናገይስካ ኤንታ ምንꬅ ናጋና መላ ኪትዶሶና።
ACT 16:24 ቃሾ ኬꬃ ናገይስ ሄ ኪታ ኤክድ፥ ጳዉሎሳነ ስላሰ ቃሾ ኬꬃስ ቆልአ ገልስስ። ኤንታ ቶሁዋ ዱፅስ።
ACT 16:25 ሽን ግድ ብላሄ ግድያ ዎደ ጳዉሎሳራነ ስላሰራ ዎስሸነ ማዝሙረ የፅሸ ፆሳ ጋላቶሶና። ቃሾ ኬꬃን ደእያ ሀራ አሳትካ ኤንቲ ግያባ ስኦሶና።
ACT 16:26 ቆፖና ቃሾ ኬꬃ ባሶይ ቃፃና ጋካናዉ ቢታ ቃፆይ ሀንስ። ሄ ሳተንካ ፐንገ ኡባይ ዶየትስ፤ ቃሸትዳ አሳ ኡባ ሳንꬃላታይ ብርሸት ዎꬍስ።
ACT 16:27 ቃሾ ኬꬃ ናገይስ ꬍስኮፈ ባርክዳ ዎደ ቃሾ ኬꬃ ፐንገ ኡባይ ዶየትዳይሳ በእድ ቃሾ አሳይ ከስ ኤክ ብዳባ ዳንን ባና ዎꬋናዉ ማሸ ኤክስ።
ACT 16:28 ሽን ጳዉሎስ ቃላ ꬎቁ ኦꬅድ “ኑ ኡባይ ሀይሳን ደእያ ግሾ ኔኒ ነና ቆሆፓ” ያግስ።
ACT 16:29 ቃሾ ኬꬃ ናገይስ ፆምፐ ዎስ ኤክድ ኤለስድ ጋꬅ ዎፅስ። ኮኮርሸ ጳዉሎሳ ስንꬃንነ ስላሰ ስንꬃን ጉፋንስ።
ACT 16:30 ኤንታ ካረ ከስድ፥ “ታ ጎዳቶ፥ ታኒ አታናዉ አይ ኦꬃናዉ በሲ?” ያግስ።
ACT 16:31 ጳዉሎሳራነ ስላሰራ እያኮ፥ “ጎዳ የሱስ ክርስቶሳ አማና፤ ኔራነ ነ ሶ አሳራ አታና” ያግዶሶና።
ACT 16:32 ኤንቲ እያስነ እያ ሶን ደእያ ኡባስ ጎዳ ቃላ ኦድዶሶና።
ACT 16:33 ቃማ ሄ ሳተንካ ቃሾ ኬꬃ ናገይስ ኤንታ ኤፍድ ኤንታ ማዱንꬃ ሜጭስ። ኤለስድ ባ ሶ አሳ ኡባራ ፃማቀትስ።
ACT 16:34 ጳዉሎሳነ ስላሰ ባ ሶ ኤፍድ ኤንታዉ ካꬅ አꬅስ። እ ባ ሶ አሳ ኡባራ ፆሳ አማንዳ ግሾ ኡፋይትስ።
ACT 16:35 ሳእ ዎንትን ዳይናት፥ “ሄ አሳታ ብላ” ያግድ ዎታዳረታ ሀላቃታ እያኮ ኪትዶሶና።
ACT 16:36 ቃሾ ኬꬃ ናገይስ፥ “ህንተ ብለታና መላ ዳይናት ኪትዶሶና። ህዛ፥ ከይድ ሳሮ ቢተ” ያግድ ሄ ኪታ ጳዉሎሳስ ኦድስ።
ACT 16:37 ሽን ጳዉሎስ፥ “ኑኒ ሮመ አስ ግድሽን ኤንቲ ኑና ፕርድ ባይና አሳ ስንꬃን ዋꬍድ፥ ቃሾ ኬꬃን የግዶሶና። ሀእ ኑና ጌማን ከይድ ቦ ጎና? ሀነና፥ ኤንቲ ባንታ ሁጰን ይድ ኑና ከሶ” ያግስ።
ACT 16:38 ዎታዳረ ሀላቃት ዳይናታስ ሄሳ ኦድን፥ ጳዉሎሳራነ ስላሰራ ሮመ ቢታ አሰ ግድዳይሳ ስእዳ ዎደ ያይዶሶና።
ACT 16:39 ሄሳ ግሾ፥ ዳይናት ይድ ኤንታኮ፥ “ኑኒ ህንተና ቆህዳ” ግዶሶና። ቃሾ ኬꬃፈ ካረ ኤንታ ከስድ፥ ካታማፐ ከይድ ባና መላ ዎስዶሶና።
ACT 16:40 ጳዉሎሳራነ ስላሰራ ቃሾ ኬꬃፈ ከይድ ሊድያ ሶ ብዶሶና። ያን አማነይሳታራ ጋከትድ ኤንታ ምንꬅድ ከይድ ብዶሶና።
ACT 17:1 ጳዉሎሳራነ ስላሰራ አምፍጶልሳራነ አጶሎናራ አꬍድ ተሰሎንቀ ብዶሶና። ያን አይሁደ ዎሳ ኬꬅ ደኤስ።
ACT 17:2 ጳዉሎስ ካሰይሳዳ ያ ገልስ። ሄሳን ሄꬑ ሳምንታ ፆሳ ቃላፐ አሳስ ኦድስ።
ACT 17:3 ክርስቶስ ዋየ ኤካናዉነ ሀይቆፐ ደንዳናዉ በሰይሳ ኤንታዉ ቆንጭስድ ኦድሸ፥ “የሱሲ ሀ ታኒ ህንተዉ ኦደይስ ክርስቶሳ” ያግስ።
ACT 17:4 ኤንታፈ እሶት እሶት ኦዳይ ቱማ ግደይሳ ማእድ ጳዉሎሳራነ ስላሰራ እስፍዶሶና። ሄሳዳካ፥ ፆሳ ጎይንያ ዳሮ ግርከ አሳይነ ዳሮ ቦንቸትዳ ማጫሳትካ ኤንታራ እስፍዶሶና።
ACT 17:5 ሽን አይሁደት ቃናትድ እስ እስ ኦሶይ ባይና ኢታ አሳታ ኦገፐ ሺሽዶሶና። ካታማን ቡቀꬅ ከስዶሶና፤ ጳዉሎሳነ ስላሰ አሳስ አꬅድ እማናዉ ኮይድ ያሶና ኬꬃ ተቅዶሶና።
ACT 17:6 ጳዉሎስነ ስላ ኤንታዉ በንቶና እፅን፥ ያሶናነ እስ እስ አማነይሳታ ካታማ ሀላቃታኮ ጎች ኤፍድ፥ “ሀይሳቲ ቢታ ኡባ ቡቀይሳት ሀእ ኑኮ ይዶሶና።
ACT 17:7 ያሶን ኤንታ ባ ሶን ዎꬅስ። ሀይሳቲ፥ ‘የሱሳ ጌተትያ ሀራ ካዎይ ደኤስ’ ግድ ቄሳረ ኪታ መንꬆሶና” ያግድ ꬎቁ ግዳ ቃላን ኦድዶሶና።
ACT 17:8 ሺቅዳ አሳይነ ካታማ ሀላቃት ሄሳ ስእድ ሀናናባ ꬋይዶሶና።
ACT 17:9 ሀላቃት ያሶናነ ሀራታ ዋሰራ ብልዶሶና።
ACT 17:10 አማነይሳት ጳዉሎሳነ ስላሰ ቃማራ ቤርያ የድዶሶና። ቤርያ ጋክድ፥ አይሁደ ዎሳ ኬꬅ ገልዶሶና።
ACT 17:11 ቤርያ አሳይ ተሰሎንቀ አሳፐ አꬍዳ ሱረታ። ኤንቲ ቃላ ኩመꬃ ዎዛናፐ ኤክዶሶና፤ ጳዉሎስ ግዳይስ ቱማ ግደይሳ ሻክ ኤራናዉ ጋላስ ጋላስ ጌሻ ማፃፋታ ፕልጎሶና።
ACT 17:12 ሄሳ ግሾ፥ ኤንታፈ ዳሮት፥ ግርከታፐካ ቦንቸትዳ ዳሮ ማጫሳትነ ዳሮ አደት አማንዶሶና።
ACT 17:13 ሽን ተሰሎንቀን ደእያ አይሁደት ጳዉሎስ ፆሳ ቃላ ቤርያንካ ኦድዳይሳ ስእዳ ዎደ ቤርያ ይድ አሳ ቡቅዶሶና።
ACT 17:14 ሄሳፈ ጉየ፥ አማነይሳት ኤለስድ ጳዉሎሳ አባ ማት የድዶሶና። ሽን ስላሰይነ ፅሞትዮስ ቤርያን አትዶሶና።
ACT 17:15 ጳዉሎሳ ሞይዝዳ አሳት አቴና ጋꬅዶሶና። ሄ አሳት ስላሰይነ ፅሞትዮስ ባንታዉ ዳንዳኤትዳ መላ ኤለስድ ባኮ ያና መላ ጳዉሎስ ኪትዳ ኪታ ኤክድ ቤርያ ስምዶሶና።
ACT 17:16 ጳዉሎስ አቴናን ስላሰነ ፅሞትዮሳ ናግሸ፥ ካታማን ኤቅ ኩምዳይሳ በእድ ይሎትስ።
ACT 17:17 ሄሳ ግሾ፥ አይሁደ ዎሳ ኬꬃን አይሁደታራነ ፆሳ ጎይንያ አይሁደ ግዶና አሳራ ቃስ ባራ ጋሄትያ አሳራ ኡባ ጋላስ ፓላሜስ።
ACT 17:18 ኤፕቆሮሰነ እስቶይከ ጌተትያ ጩጋታፐ እስ እስ ኤራንቾት ጳዉሎሳራ ፓላምዶሶና። ኤንታፈ እሶት እሶት፥ “ሀ ዮያማይ አይ ኦዳናዉ ኮዪ?” ያግዶሶና። ሀራት ጳዉሎስ የሱሳባነ ሀይቆፐ እ ደንድዳይሳ ባንታዉ ኦድዳ ግሾ፥ “ኦራꬃ ፆሳታባ ኦድያ ዳኔስ” ያግዶሶና።
ACT 17:19 ጳዉሎሳ ኦይክድ አርዮስፓጎሳ ጌተትያ ሺቆ በሳ ኤፍድ፥ “ሀ ኔኒ ታማርስያ ኦራꬃባይ አይበኮ ኑና ኤርስኪ?
ACT 17:20 አይስ ጊኮ፥ ኔኒ ኑስ ኦራꬃባ ኦዳሳ፤ ህዛ ሄስ አይበኮ ኑኒ ኤራናዉ ኮዮስ” ያግዶሶና።
ACT 17:21 አቴና አሳ ኡባይነ ያን ደእያ እማꬃ አሳይ ኦራꬃባ ኦደቶናነ ስኦና ፔኦኮና።
ACT 17:22 ጳዉሎስ አርዮስፓጎሳ ስንꬃን ኤቅድ፥ “አቴና አሳቶ፥ ፆሳታስ ኡባባን ህንተ ዳሮ ያየይሳ ታኒ በአይስ።
ACT 17:23 ታኒ ህንተ ካታማራ ዩያሸ ህንተ ጎይንያ በሳታ በእያ ዎደ፥ ‘ኤረቶና ፆሳስ’ ጌተትድ ፃፈትዳ ያርሾ በሳ ደማስ። ሀ ህንተ ኤሮናሽን ጎይነይሳ ታኒ ህንተዉ ኦዳይስ።
ACT 17:24 ሳአነ ሳአን ደእያ ኡባባ መꬍዳ ፆሳይ፥ ሳሎነ ሳአ ጎዳይ፥ አስ ኬፅዳ ኬꬃን ዴና።
ACT 17:25 እ ደኦ፥ ሸምፖነ ኡባባ አሳ ኡባስ እምያ ግሾ ፓጭ ደእያ አሳዳ አሳ ማደ ኮየና።
ACT 17:26 ፆሳይ አሳ ኮቸ ኡባ እስ አድያፈ መꬍድ ቢታ ኡባን ዎꬅስ። ያትድ ኤንቲ ዳና ዎድያስነ በሳስ ዛዋ እሚስ።
ACT 17:27 እ ሄሳ ኦꬅዳይ አስ እያ ኮያና መላነ ፕልግድ ደማና መላሳ። ሀንኮካ እ ኑፐ ጌምቤና።
ACT 17:28 ህንተፈ እስ እስ የፀይሳት፥ ‘ኑኒ እያ ናይታ’ ግዳይሳዳ፥ ‘ኑኒ እያን ፓፃ ደኦስ፥ ቃፆስ።’
ACT 17:29 ህዛ፥ ኑኒ ፆሳ ናይታ ግድያ ግሾ፥ ‘ፆሳይ አሳ ሂላተꬃንነ ቆፋን ዎርቃፈ ዎይኮ ብራፐ ዎይኮ ሹቻፈ ኦሰትዳባ ዳኔስ’ ያግድ ቆፓናዉ በሰና።
ACT 17:30 ሄሳ ግሾ፥ ፆሳይ በን ዎደ አሳይ ኤሮና ኦꬅዳይሳ አግድ አꬍስ። ሽን ሀእ ኡባ በሳን ደእያ አሳይ ናጋራፐ ስማና መላ ኪቴስ።
ACT 17:31 አይስ ጊኮ፥ ፆሳይ ባ ዶርዳ አድያን ሳአን ደእያ አሳ ኡባ ቦላ ፅሎ ፕርዳ ፕርዳናዉ ቃማ ጊግስ ዎꬅስ። እያ ሀይቆፐ ደንꬅድ ሄሳ አሳ ኡባስ ቱማይስ” ያግስ።
ACT 17:32 ኤንታፈ እስ እስ አሳት ሀይቆፐ ደንዶባ ጳዉሎሳፐ ስእድ፥ እያ ቦላ ቀልቅስዶሶና። ሽን ሀራት፥ “ኑኒ ሄሳ ኔፐ ጉጅድ ስአናዉ ኮዮስ” ያግዶሶና።
ACT 17:33 ሄሳ ግሾ፥ ጳዉሎስ ኤንታ ግዶፈ ከይስ።
ACT 17:34 ሽን እስ እስ አደት ጳዉሎሳራ ጋከትድ አማንዶሶና። ኤንታ ግዶፈ አርዮስፓጎሳን ሺቁዋን ደእያ ድዮናስዮሳ ጌተትያ አደይ፥ ዳማርሶ ጌተትያ እስ ማጫስያነ ሀራት ደኦሶና።
ACT 18:1 ሄሳፈ ጉየ፥ ጳዉሎስ አቴናፐ ከይድ፥ ቆሮንቶሳ ብስ።
ACT 18:2 ያን ጳንፆሳን የለትዳ እስ አይሁደ አድያ አቅላ ደምስ። አይሁደ አሳ ኡባይ ሮመፐ ከያና መላ ካዎይ ቃላዉድዮስ ኪትዳ ግሾ ጉꬃ ዎደፐ ካሰ እ ባ ማቸ ጵርስቅላራ ፃለፐ ይስ። ጳዉሎስ ኤንታራ ጋሄታናዉ ብስ።
ACT 18:3 እያ ኦሶይ ኤንታይሳዳ ዱንካነ ስኮ ግድያ ግሾ፥ ኤንታራ ኡትድ እስፈ ኦꬅስ።
ACT 18:4 ጳዉሎስ ሳምባታ ኡባን አይሁደታነ ግርከታ አማንꬃናዉ አይሁደ ዎሳ ኬꬃን ፓላሜስ።
ACT 18:5 ስላሰይነ ፅሞትዮስ ማቀዶነፐ ይዳ ዎደ ጳዉሎስ ባ ኩመꬃ ዎድያ እምድ አይሁደታስ የሱሲ እ፥ ክርስቶሳ ግድ ቃላ ኦድስ።
ACT 18:6 ሽን ኤንቲ ጳዉሎሳ እፅድ እያ ጫይን ጳዉሎስ ባ ማኡዋፐ ባና ቆቆፍሸ፥ “ህንተ ጎመይ ህንተና ኦይኮ፤ ታኒ ሄሳን ደእከ። ህዛፐ ጉየ፥ ታኒ አይሁደ ግዶና አሳኮ ባይስ” ያግስ።
ACT 18:7 ያፐ ከይድ ፆሳ ጎይንያ ትቶስ ዮስፆሳ ጌተትያ ኡራ ሶ ብስ። ዮስፆሳ ኬꬃይ አይሁደ ዎሳ ኬꬃ ማታን ደኤስ።
ACT 18:8 አይሁደ ዎሳ ኬꬃ ሀላቃይ ቃርስጶስ ባ ሶ አሳ ኡባራ ጎዳ አማንስ። ቆሮንቶሳ አሳታፐካ ዳሮት ፆሳ ቃላ ስእዳ ዎደ አማንድ ፃማቀትዶሶና።
ACT 18:9 ጎዳይ እስ ቃማ ጳዉሎሳስ ቆንጭድ፥ “ያዮፋ፤ ኦዳ፥ ስእ ጎፓ።
ACT 18:10 ታኒ ኔራ ደአይስ። ታዉ ሀ ካታማን ዳሮ አስ ደእያ ግሾ ነና ቆህድ ኢታባን የጋና አስ ኦንካ ባዋ” ያግስ።
ACT 18:11 ሄሳ ግሾ፥ ጳዉሎስ ፆሳ ቃላ አሳ ታማርስሸ እስ ላይꬅነ ኡሱፑን አጌና ኤንታራ ኡትስ።
ACT 18:12 ጋልዮስ አካያ ቢታ አይስያ ዎደ አይሁደት እስፈ ጳዉሎሳ ቦላ ደንድድ ፕርዳ ኬꬅ እያ ኤፍድ፥
ACT 18:13 “ሀ አደይ ህግያ እፅድ፥ አሳይ ፆሳ ጎይናና መላ ኦꬄስ” ያግዶሶና።
ACT 18:14 ጳዉሎስ ኦደታና ሀንሽን፥ ጋልዮስ አይሁደታኮ፥ “አይሁደቶ፥ ሄስ ኢታ ኦሶ ዎይኮ ናቆ ግድያኮ ታኒ ህንተባ ዳንዳአዳ ስአናዉ በሴስ።
ACT 18:15 ሽን ቃላስ፥ ሱንꬃስነ ህንተ ህግያስ ህንተ ፓላምያባ ግድኮ ህንተ፥ ህንተዉ ብልተ፤ ሄሳ ታኒ ፕርድከ” ያግስ።
ACT 18:16 ያትድ፥ ኤንታ ፕርዳ ኬꬃፈ ካረ ከስስ።
ACT 18:17 ሄሳፈ ጉየ፥ ግርከ አሳ ኡባይ አይሁደ ዎሳ ኬꬃ ሀላቃ ሶስተኔሳ ኦይክድ ፕርዳ ኬꬃ ስንꬃን ዋꬍዶሶና። ሽን ጋልዮስ ሄሳ ፓፃባ ግቤና።
ACT 18:18 ጳዉሎስ ዳሮ ጋላስ ቆሮንቶሳን ኡትዳፐ ጉየ አማንያ አሳ ሳሮꬅድ፥ ጵርስቅልራነ አቅላራ ማርካበን ሶረ ብስ። ሽን እ ባናፐ ስን ባዉ ጋሶይ ደእያ ግሾ ክንክራ ካታማን ባ ሁጵያ ቡሉሰትስ።
ACT 18:19 ኤንቲ ኤፈሶና ጋክዳ ዎደ ጳዉሎስ ጵርስቅሎነ አቅላ ያን አግስ። ሽን ባዉ አይሁደ ዎሳ ኬꬅ ገልድ አይሁደታራ ኦደትስ።
ACT 18:20 ኤንቲ ባንታራ ዳሮ ዎደ ኡታና መላ ጳዉሎሳ ዎስዶሶና ሽን እ እፅስ።
ACT 18:21 ኤንታፈ ሻከትሸ፥ “ታኒ ያ ባልያ የሩሳላመን ቦንቻናዉ በሴስ። ሽን ፆሲ ጊኮ ህንተኮ ስማ ያና” ያግድ ኤፈሶናፐ ማርካብያን ብስ።
ACT 18:22 ቅሳረ ጋክዳ ዎደ የሩሳላመ ብድ ዎሳ ኬꬃ አሳ ሳሮꬅዳፐ ጉየ አንፆከ ብስ።
ACT 18:23 ያን ጉꬃ ዎደ ጋምእዳፐ ጉየ አማንያ አሳታ ኡባ ምንꬅሸ ጋላትያራነ ፕርገራ አꬍስ።
ACT 18:24 እስክንድረን የለትዳ እስ አጵሎሳ ጌተትያ አይሁደ አስ ኤፈሶና ብስ። እ ኦዳ ኤርያ አስነ ፆሳ ቃላ ዳሮ ኤርያ አስ።
ACT 18:25 ጎዳ ኦግያካ ታማርስ፥ አያናን ፁገትድ የሱሳባ ሱረ ታማርሴስ። ግዶሽን፥ ዮሃንሳ ፅንቃትያ ፃላላ ኤሬስ።
ACT 18:26 እ አይሁደ ዎሳ ኬꬃን ያዮና ታማርሴስ። ጵርስቅላነ አቅል እ ኦደይሳ ስእዳ ዎደ ባንታራ ሶ እያ ኤፍድ ፆሳ ኦግያ ካሰይሳፈ ጌሽድ እያዉ ኦድዶሶና።
ACT 18:27 አጵሎስ አካያ ባናዉ ኮይን ኤፈሶናን ደእያ አማንያ አሳይ እያ ቆፋ ኤክድ አካያን ደእያ አማነይሳት እያ ሞካና መላ ኤንታዉ ዳብዳበ ፃፍዶሶና። እ ያ ጋክዳ ዎደ ፆሳ አꬎ ኬሀተꬃ ባጋራ የሱስ ክርስቶሳ አማንዳይሳታ ዳሮ ማድስ።
ACT 18:28 አይስ ጊኮ፥ የሱሲ፥ እ፥ ክርስቶሳ ግደይሳ አይሁደታስ ፆሳ ቃላፐ ቆንጭስድ ደርያ ስንꬃን ምንꬅ ኦድድ ኤንታ ላꬅስ።
ACT 19:1 አጵሎስ ቆሮንቶሳን ደእሽን፥ ጳዉሎስ ቆሞ ባጋራ አꬍድ ኤፈሶና ብስ። ያን እስ እስ አማንያ አሳታ ደምስ።
ACT 19:2 ኤንታኮ፥ “ህንተ አማንዳ ዎደ ጌሻ አያና ኤክደቲ?” ያግድ ኦይችስ። ኤንቲ፥ “አካይ፥ ኤክቦኮ፤ ሀር አቶሽን፥ ጌሻ አያን ደእያባካ ስእቦኮ” ያግዶሶና።
ACT 19:3 ጳዉሎስ ኤንታኮ፥ “ያትን፥ አይብን ፃማቀትደቲ?” ያግስ። ኤንቲ፥ “ኑኒ ዮሃንሳ ፅንቃተን ፃማቀትዳ” ያግድ ዛርዶሶና።
ACT 19:4 ጳዉሎስ፥ “ዮሃንስ ባፐ ጉየራ ያ የሱስ ክርስቶሳን አሳይ አማናና መላ አሳስ ኦድሸ፥ ናጋራፐ ስሞ በሲያ ፅንቃተን ፃማቅስ” ያግስ።
ACT 19:5 ኤንቲ ሄሳ ስእዳ ዎደ ጎዳ የሱስ ክርስቶሳ ታማረ ግዳናዉ ፃማቀትዶሶና።
ACT 19:6 ጳዉሎስ ባ ኩሽያ ኤንታ ቦላ ዎꬅዳ ዎደ ጌሻ አያናይ ኤንታ ቦላ ዎꬍን፥ ዱማ ዱማ ዶናን ኦደትዶሶና፤ ቃስ ትንብተ ኦድዶሶና።
ACT 19:7 ሄ በሳን ታማነ ናምአ ግድያ አሳት ደኦሶና።
ACT 19:8 ጳዉሎስ አይሁደ ዎሳ ኬꬅ ገልድ፥ ፆሳ ካዎተꬃባ ያዮና ፓላምሸነ ሎይꬅ ቆንጭስሸ ኤንታራ ሄꬑ አጌና ጋካናዉ ጋምእስ።
ACT 19:9 ሽን ኤንታፈ እሶት እሶት ꬉበ ግድድ ዳሮ አሳ ስንꬃን ጎዳ ኦግያ ጫይድ አማኖና እፅዶሶና። ጳዉሎስ አማነይሳታ ኤንታፈ ሻክ ኤክድ ፅራኖሳ ጌተትያ ትምርተ ኬꬃን ኡባ ጋላስ ኤንታ ታማርስስ።
ACT 19:10 ጳዉሎስ ናምኡ ላይꬅ ጋካናዉ ቃላ ኦድስ። ሄሳ ግሾ፥ ኢሰን ደእያ አሳ ኡባይ፥ አይሁደትነ አይሁደ ግዶናይሳት ጎዳ ቃላ ስእዶሶና።
ACT 19:11 ፆሳይ ጳዉሎሳ ኩሸን ዎልቃማ ማላታታ ኦꬅስ።
ACT 19:12 ሄሳ ግሾ፥ አሳይ እያ አሳተꬃ ቦችዳ ማራበ ዎይኮ ማኦ ሀርጋንቾታስ ኤፎሶና። ኤንትካ ፓፆሶና፤ ቱና አያናት ኤንታፈ ከዮሶና።
ACT 19:13 ቱና አያናታ ከስሸ ዩይያ አይሁደታፐ እሶት እሶት፥ “ጳዉሎስ ሳባክያ የሱሳ ሱንꬃን ከይተ ግድ ህንተና ኪቶስ” ያግድ፥ ቱና አያናት ኦይክዳ አሳታ ቦላ ጎዳ የሱሳ ሱንꬃ ፄግዶሶና።
ACT 19:14 ካህነ ሀላቃ አስቀዋ ጌተትያ እስ አይሁደ አድያስ ሄሳ ኦꬅያ ላፑን ናይት ደኦሶና።
ACT 19:15 ሽን ቱና አያናይ ኤንታኮ፥ “ታኒ የሱሳካ ጳዉሎሳካ ኤራይስ፥ ሽን ህንተ ኦናንቴ?” ያግስ።
ACT 19:16 ቱና አያን ኦይክዳ አደይ ኤንታ ቦላ ጉፕ ዎꬍድ፥ ኤንታ ማዱንፅስድ፥ ሄ ኬꬃፈ ካሎ ባቃታና ጋካናዉ ዎልቃምስ።
ACT 19:17 ኤፈሶናን ደእያ አይሁደትነ አይሁደ ግዶናይሳት ኡባይ ሄሳ ስእድ ዳሮ ያይዶሶና። ጎዳ የሱሳ ሱንꬃይ ዳሮ ቦንቸትስ።
ACT 19:18 አማነይሳታፐ ዳሮት ባንታ ኦꬅዳ ኢታ ኦሱዋ ፓፅሸነ ቆንጨን ኦድሸ ዮሶና።
ACT 19:19 ማሮታፐ ዳሮት ባንታ ማፃፋታ ሺሽድ አሳ ኡባ ስንꬃን ፁግዶሶና። ሄ ማፃፋታ ጋትያ ታይቦይ እሻታሙ ሙኩሉ ብራ ሳንትመ ግድስ።
ACT 19:20 ሄሳዳ ሀንድ ፆሳ ቃላይ ድጭሸነ ዳልግሸ ብስ።
ACT 19:21 ሄስ ሀንዳፐ ጉየ ጳዉሎስ፥ “ታኒ የሩሳላመ ባ ስማዳ ሮመ ባናዉ በሴስ” ያግድ ማቀዶነራነ አካያራ አꬍድ የሩሳላመ ባናዉ ቆፋ ቃችስ።
ACT 19:22 ቃስ ባና ማደይሳታፐ ናምአታ ፅሞትዮሳነ ኤራስፆሳ ማቀዶነ ኪትድ፥ ባዉ ኢሰን ጉꬃ ዎደ ጋምእስ።
ACT 19:23 ሄ ዎደ ጎዳ ኦግያ ግሾ ኤፈሶናን ዎልቃማ ካች ከይስ።
ACT 19:24 እስ ብራ ኦꬅያ ድመፅሮሳ ጌተትያ ኡራይ አርፀምስ ኤቃ ኬꬃ ምስልያ ብራፐ ኦꬅድ ዳሮ ዎ ደሜስ።
ACT 19:25 ሄሳ ግሾ፥ ሄሳ መላ ኦሶ ኦይሳታ እስፈ ሺሽድ፥ “አሳዉ፥ ኑ ዱረተꬃይ ሀ ኦሱዋን ግደይሳ ህንተ ኤሬታ።
ACT 19:26 ሀይስ ጳዉሎስ፥ ‘አሳ ኩሸን ኦሰትዳይሳት ፆሳታ ግዶኮና’ ያግድ፥ ኤፈሶናንነ ጉꬃ ቢታታፐ አትሽን፥ ኩመꬃ ኢሰ ኡባን ደእያ ዳሮ አሳ ኦድ አማንꬅዳይሳነ ባለꬅዳይሳ ህንተ በእደታነ ስእደታ።
ACT 19:27 መቶ ግድዳይ፥ ኑ ኦሶይ ካተይሳ ፃላላ ግዶናሽን፥ ኢሰነ ቢታ ኡባን ደእያ አስ ጎይንያ ግታ ፆሰ አርፀምስ ኬꬃይ ቦንቸቶና አተይሳነ እ ግታተꬃይ ኩንዳናይሳ” ያግስ።
ACT 19:28 አሳይ ሄሳ ስእዳ ዎደ ሸነን ፁገትድ፥ “ኤፈሶና አርፀምሳ ግታ” ያግድ ዋስዶሶና።
ACT 19:29 ሄ ዋሶይ ካታማ ኡባ ጋክስ። ጳዉሎሳራ ሄመትያ ማቀዶነ አሳታ፥ ጋዮሳነ አርስፅሮኮሳ ኦይክድ ጎችሸ ካሳ በሳ ዎፅዶሶና።
ACT 19:30 ጳዉሎስ አሳይ ሺቅዳ በሳ ገላናዉ ኮይስ፥ ሽን አማነይሳት እያ ድግዶሶና።
ACT 19:31 ኢሰ ቢታ ሀላቃታፐ ጳዉሎሳ ላገ ግድዳ እሶት እሶት ጳዉሎሳኮ ኪትድ፥ “ካሳ በሳ ቆንጨን ከያዳ በንቶፋ” ግድ እያ ዎስዶሶና።
ACT 19:32 ሺቅዳ አሳስ ሀናናባይ ꬋይስ፤ ዳርያ ባጋ አሳይ ሀር አቶሽን አይስ ሺቅዳኮ ኤሮና ግሾ፥ እሶይ እስባስ ዋስያ ዎደ ሀንኮይ ሀራባስ ዋሴስ።
ACT 19:33 አይሁደት እስክንድረ ጌተትያ አድያ አꬅድ በስን፥ እስ እስ አሳይ እ ጋናባ ኦድድ እያ ስን አꬅዶሶና። እ አሳይ ስእ ጋና መላ ባ ኩሸን ማል በስድ፥ አሳስ ሞተታናዉ ኤቅስ።
ACT 19:34 ሽን እስክንድረይ አይሁደ አስ ግድዳይሳ አሳይ ኤርዳ ዎደ ናምኡ ሳተ ግዳናይሳ መላ ኡባይ እስ ቃላን፥ “ኤፈሶና አርፀምሳ ግታ” ያግድ ዋስዶሶና።
ACT 19:35 ዉርሰꬃን፥ ካታማ ፃፈይ አሳ ስእ ኦꬅድ፥ “ኤፈሶና አሳዉ፥ ኤፈሶና ካታማይ ግታ አርፀምስ ኤቃ ኬꬅነ ሳሎፐ ዎꬍዳ እ ሹቻ ምስልያ ናገይ ኤፈሶና አሳ ግደይሳ ኤሮናይ ኦኔ?
ACT 19:36 ሀይሳ ካሽ ግያ አስ ባይና ግሾ፥ ህንተ ስእ ጋናዉነ ድርግድ አይኮ ኦꬆና አጋናዉ በሴስ።
ACT 19:37 ህንተ፥ ሀ አሳታ ኤቃ ኬꬃ ሚሸ ካይሶቶናሽን ዎይኮ ኑ ፆሳታ ጫይቦናሽን ጮ ሀ አሳታ ኦይክድ ኤህደታ።
ACT 19:38 ሄሳ ግሾ፥ ድመፅሮስነ እያራ ደእያ ኦሳንቾት አሳ ሞታናዉ ኮይኮ፥ ፕርዳ ኬꬃይ ዶያ ደኤስ፤ ዳይናትካ ደኦሶና፤ ኤንቲ ሞታናዉ ዳንዳኦሶና።
ACT 19:39 ሽን ህንተ ሀራ ኦዳ ኮይኮ፥ ሻንጎ ሺቆን ኦዳይ በኤቶ።
ACT 19:40 ሄሳ ግዶና እፅኮ ሀች ሀንዳባስ ሮመ ካዎተꬃይ ኑና ኦይቻና። ሀ ቡቀꬃስ ጋሶይ ባይና ግሾ፥ ኑኒ ጋሶ ኦዳናዉ ዳንዳኦኮ”
ACT 19:41 ያግድ ሺቁዋ ላልስ።
ACT 20:1 ዋሶይ ዶችዳፐ ጉየ፥ ጳዉሎስ አማንያ አሳታ ፄግስድ ኤንታ ዞርዳፐ ጉየ፥ ሳሮꬅድ ማቀዶነ ባናዉ ከይስ።
ACT 20:2 ሄ ቢታራ አꬍሸ ቃላ ኦድሸ አሳ ዳሮ ምንꬅዳፐ ጉየ ግርከ ቢታ ብስ።
ACT 20:3 እ ያን ሄꬑ አጌና ኡትድ፥ ማርካበራ ሶረ ባናዉ ቆፕድ ደእሽን፥ አይሁደት ባና ዎꬋናዉ ኮየይሳ ኤርድ ማቀዶነራ ጉየ ስማናዉ ኮይስ።
ACT 20:4 ጳዉሎሳ ሞይዝዳይሳት ቤርያፐ ጳርሁሳ ናኣ ሶጳፅሮሳ፥ ተሰሎንቀፈ አርስፅሮኮሳነ ስኮንዱሳ፥ ዳርበፈ ጋዮሳ፥ ኢሰፐ ትክቆሳ፥ ፅሮፍሞሳነ ፅሞትዮሳ።
ACT 20:5 ሄሳት ስን ብድ ኑና ፅሮኣዳን ናጎሶና።
ACT 20:6 ኑኒ ኡይꬃ ባልያ ቦንችዳፐ ጉየ፥ ፍልጵስዩሳፐ ማርካበራ ደንድድ፥ እቻሻንꬆ ጋላሳን ኤንታ ፅሮኣዳን ጋክድ ያን ላፑን ጋላስ ጋምእዳ።
ACT 20:7 ሳምንታፈ ኮይሮ ጋላሳን ኑኒ ኡይꬃ መንꬃናዉ ሺቅድ ደእሽን፥ ጳዉሎስ ዎንተ ባናዉ ቆፕዳ ግሾ፥ ኤንታዉ ቃላ ኦድሸ ግድ ብላሄ ጋካናዉ ኦዳ አዱስስ።
ACT 20:8 ኑኒ ሺቅድ ኡትዳ ፖቅያን ዳሮ ፖኦይ ደኤስ።
ACT 20:9 ኤዉፅኮሳ ጌተትያ እስ ናአተꬃይ ማስኮተ ቦላ ኡትድ፥ ባና ዶግድ ꬍስክስ። ጳዉሎስ ኦዳ አዱስዳ ዎደ ኤዉፅኮስ ꬍስኮ ኤይድ ሄꬓንꬆ ፖቅያፐ ኩንድድ ሀይቅዳይሳ አሳይ ደንꬅስ።
ACT 20:10 ሽን ጳዉሎስ ዎꬍድ፥ እያ ቦላ ጉፋንስ። እያ እድምድ፥ “እ ሀይቅቤና፥ ህርጎፍተ” ያግስ።
ACT 20:11 ሄሳፈ ጉየ፥ ፑደ ፖቅያ ቦላ ከይድ ኡይꬃ መንꬅድ ምስ። ሳአይ ዎንታና ጋካናዉ አሳስ ኦድዳፐ ጉየ ደንድድ ብስ።
ACT 20:12 ሄ ፓፅዳ ናአተꬃ ሶ ኤፍድ ዳሮ ኡፋይትዶሶና።
ACT 20:13 ሽን ጳዉሎስ ባና ያፐ ሞካና መላ ኑስ ኦድዳ ግሾ፥ ካሰትድ ማርካብያኮ ብድ፥ አሶሳ ባናዉ ደንድዳ። አይስ ጊኮ፥ እ ቶሆን ባናዉ ቆፕዳ ግሾ ኑና ሄሳꬆ ኪትስ።
ACT 20:14 እ ኑራ አሶሳን ጋሄትን ማርካብያን እያ ኤክድ ምፅልነ ብዳ።
ACT 20:15 ዎንተꬃ ጋላስ ያፐ ደንድድ ማርካበን ክዮሳ ስንꬃን ደእያ በሳ ጋክዳ፤ ቃስ ዎንተꬃ ጋላስ ሳሞሳ ፕንድ ካልያ ጋላስ ምልፀ ጋክዳ።
ACT 20:16 ጳዉሎስ ኢሰን ዳሮ ጋምኦና ኤፈሶና ማታራ አꬋናዉ ቆፕስ። ባዉ ዳንዳኤትኮ ጳንፀቆስፀ ባልያ ጋላስ የሩሳላመ ጋካናዉ ኤሶቴስ።
ACT 20:17 ጳዉሎስ ምልፀፐ ኤፈሶና ኪትድ ዎሳ ኬꬃ ጭማታ ፄግስስ።
ACT 20:18 ዎሳ ኬꬃ ጭማት እያኮ ይን፥ ኤንታኮ ሀይሳዳ ያግስ፦ “ታኒ ኢሰ ገልዳ ኮይሮ ጋላሳፐ ዶምዳ ህንተራ ደእዳ ዎደ ኡባን ዋና ደእዳኮ ህንተ ኤሬታ።
ACT 20:19 አይሁደት ዱላትድ ታ ቦላ መቶ ጋꬅኮካ ታኒ አሽከተꬃንነ ዳሮ አፉꬃን ጎዳስ ኦꬃስ።
ACT 20:20 ዳባባንካ ህንተ ኬꬃን ኬꬃን ህንተና ታማርስሸ ህንተና ማድያባፐ እስባካ ፓጭሳብከ።
ACT 20:21 ታኒ አይሁደታስነ አይሁደ ግዶናይሳታስ ናጋራፐ ፆሳኮ ስማና መላነ ኑ ጎዳ የሱሳ አማናና መላ ማርካታስ።
ACT 20:22 “ያን ታና አይብ ጋካኔኮ ኤርከ፥ ሽን ሀእ ታኒ ጌሻ አያናስ ኪተታዳ የሩሳላመ ባይስ።
ACT 20:23 ጌሻ አያናይ ቃሾይነ ዋየይ ታና ናገይሳ ካታማ ኡባን ታዉ ማርካትስ።
ACT 20:24 ሽን ታ ዎꬃ ፖላናዉነ ጎዳ የሱስ ክርስቶሳፐ ኤክዳ ኦሱዋ፥ ፆሳ አꬎ ኬሀተꬃ ዎንገላ ማርካተይሳ ፖላናዉ ታ ሸምፕዉ ፓꬆናባዳ ታይባስ።
ACT 20:25 “ታኒ ሀእካ ፆሳ ካዎተꬃ ማርካታሸ ህንተ ኡባ ግዶን ዩያስ። ህዛፐ ጉየ፥ ህንተፈ ኦንካ ታና በኦናይሳ ኤራይስ።
ACT 20:26 ሄሳ ግሾ፥ ህንተፈ እስ ኡራይ ꬋይኮካ ታ ኦይሸቶናይሳ ሀች ህንተዉ ጌሻዳ ኦዳይስ።
ACT 20:27 አይስ ጊኮ፥ ፆሳይ ኦꬃናዉ ቆፕዳባ ኡባ ህንተዉ አይብባካ አሾና ኦዳስ።
ACT 20:28 “ባ ናኣ ሱꬃን ዎዝዳ ፆሳ ዎሳ ኬꬃ ናግተ። ጌሻ አያናይ ህንተና ሀላቃ ኦꬅድ ዶርዳ ዉድያስነ ህንተ ሁጵያስ ናገትተ።
ACT 20:29 ታኒ ብዳፐ ጉየ፥ ዉድያስ ቃቶና ዎዛና ምኖ ሱꬉመት ህንተ ግዶ ገላናይሳ ታኒ ኤራይስ።
ACT 20:30 አማነይሳታ ባንታ ጌዶ ካለꬃናዉ ዎርዶ ታማርስያ አሳት ህንተ ግዶፈ ደንዳና።
ACT 20:31 ሄሳ ግሾ፥ ታኒ ሄꬑ ላይꬅ ቃማነ ጋላስ አፉꬃን ህንተና ሁጰን ሁጰን ምንꬅዳይሳ ቆፕሸ ናገትተ።
ACT 20:32 “ሀእካ ህንተና ምንꬃናዉነ ጌሻ አሳራ ላትሳናዉ ዳንዳእያ ፆሳስነ እያ አꬎ ኬሀተꬃ ቃላስ ህንተና ሀዳራ እማይስ።
ACT 20:33 “ታኒ ኦደ ብራ ዎይኮ ዎርቃ ዎይኮ አፍላ አሞታብከ።
ACT 20:34 ታኒ ታ ኩሸን ኦꬃዳ ታናነ ታራ ደኤይሳታ ኮሽዳባ ማድዳይሳ ህንተ፥ ህንተ ሁጰን ኤሬታ።
ACT 20:35 ህንተ ሀይሳዳ ዳቡርድ ኦꬅሸ ዳቡራንቾታ ማዳናይሳነ ጎዳ የሱሲ፥ ‘ኤከይሳፈ እመይስ አንጀትዳይሳ’ ግዳ ቃላ ህንተ ቆፓናዉ በሰይሳ ታኒ ህንተና ኡባባን በሳስ” ያግስ።
ACT 20:36 ጳዉሎስ ሄሳ ኦድ ኦንግድ ኤንታ ኡባራ ጉልባትድ ፆሳ ዎስስ።
ACT 20:37 ኤንቲ ኡባይካ ጳዉሎሳ እድምድ ዬክድ ዬርዶሶና።
ACT 20:38 እ ዛሪድ፥ “ታና በኤከታ” ያግዳ ቃላይ ኤንታ ዳሮ አዛንꬅስ። ኤንቲ ማርካብያ ጋካናዉ እያ ሞይዝዶሶና።
ACT 21:1 ኑኒ ኤፈሶና ጭማታፐ ሻከትዳ መላ ቆሳ ብዳ። ዎንተꬃ ጋላስ ሮዳ ጋክድ ያፐ ጳፃራ ብዳ።
ACT 21:2 ስሮፍንቀ ፕንያ ማርካበ ደምድ እያን ገልድ ባናዉ ደንድዳ።
ACT 21:3 ኑኒ ቆጵሮሳ በአናዉ ዳንዳእያ ሶ ይድ፥ ቆጵሮሳ ሀድርሳ ባጋ አግድ ሶረ ብዳ። ማርካበይ ባ ጫና ያን ዎꬃናዉ ኮይዳ ግሾ ፅሮሳ ብዳ።
ACT 21:4 ያን አማንያ አሳታ ደምድ ኤንታራ ላፑን ጋላስ ኡትዳ። ጳዉሎስ የሩሳላመ ቦና መላ ኤንቲ እያዉ አያናን ኦድዶሶና።
ACT 21:5 ኑኒ ኤንታራ ኡትያ ዎደይ ዉርን ከይድ ብዳ። ኤንቲ ኡባይ ባንታ ማጫሳታራነ ባንታ ናይታራ እስፈ ካታማፐ ካረ ከስድ ኑና ሞይዝዶሶና። ኑኒ አባ ዶናን ጉልባትድ ፆሳ ዎስዳ።
ACT 21:6 ሄሳፈ ጉየ፥ ዎል ሳሮꬅድ ኑ ማርካብያን ገልዳ፤ ኤንቲ ባንታ ሶ ስምዶሶና።
ACT 21:7 ኑኒ አባ ኦግያ ኦንግድ፥ ፅሮሳፐ ጳፀለማሳ ጋክዳ። ያን አማንያ አሳታ ሳሮꬅድ፥ ኤንታ ማታን እስ ጋላስ ፔእዳ።
ACT 21:8 ዎንተꬃ ጋላስ ከይድ፥ ቅሳረ ብዳ። ሳባክያ ፍልጶሳ ሶ ጋክድ እያ ማታን ኡትዳ። እ የሩሳላመን ካሰ ዶረትዳ ላፑናታፐ እሱዋ።
ACT 21:9 ፍልጶሳስ ናበ ግድዳ ኦይዱ ጌላኦ ናይት ደኦሶና።
ACT 21:10 ኑኒ ኡንደና ጋላስ ያን ኡትድ ደእሽን ትንብተ ኦድያ እስ አጋቦሳ ጌተትያ አደይ ይሁዳፐ ቅሳረ ይስ።
ACT 21:11 ኑኮ ይድ ጳዉሎሳ ሳቅያ ኤክድ ባ ኩሽያነ ባ ቶሁዋ ቃችድ፥ “ጌሻ አያናይ ሀ ሳቅያ ጎዳ፥ የሩሳላመን አይሁደት ሀይሳዳ ቃችድ፥ አይሁደ ግዶና አሳስ አꬅድ እማና ያጌስ” ያግስ።
ACT 21:12 ኑኒ ሄሳ ስእዳ ዎደ ኑነ ያን ደእያ አሳት ጳዉሎስ የሩሳላመ ቦና መላ ዎስዳ።
ACT 21:13 ሽን ጳዉሎስ ዛሪድ፥ “ህንተ ሀይሳዳ ዬክሸ አይስ ታ ዎዛና ሹግሴቲ? ታኒ፥ ጎዳ የሱሳ ሱንꬃ ግሾ ቃሸተꬃ ፃላላ ግዶናሽን የሩሳላመን ሀይቃናዉካ ጊገታስ” ያግስ።
ACT 21:14 ኑ ዞርያ እ ኤኮና እፅን፥ “ጎዳ ሸነይ ሀኖ” ያግድ ስእ ግዳ።
ACT 21:15 ያን ጉꬃ ዎደ ጋምእዳፐ ጉየ ጊገትድ የሩሳላመ ባናዉ ከይዳ።
ACT 21:16 ቅሳረን ደእያ አማንያ አሳታፐ ጉꬃት ኑራ ብዶሶና። ኤንቲ ኑኒ ሸምፓና በሲ ምናሶና ጌተትያ ቆጵሮሳ አድያ ሶ ኤፍዶሶና። ምናሶን ኮይሮ አማንዳ አሳፐ እሱዋ።
ACT 21:17 ኑኒ የሩሳላመ ጋክዳ ዎደ አማንያ አሳት ኑና ኡፋይሳን ሞክዶሶና።
ACT 21:18 ዎንተꬃ ጋላስ ጳዉሎስነ ኑኒ ያይቆባራ ጋሄታናዉ ብዳ። ዎሳ ኬꬃ ጭማት ኡባትካ ያን ደኦሶና።
ACT 21:19 ጳዉሎስ ኤንታ ሳሮꬅዳፐ ጉየ አይሁደ ግዶና አሳ ግዶን ባ ባጋራ ፆሳይ ኦꬅዳባ ኡባ ኤንታዉ ኦድስ።
ACT 21:20 ኤንቲ ሄሳ ስእዳ ዎደ ፆሳ ጋላትድ ጳዉሎሳኮ ሀይሳዳ ያግዶሶና፦ “ኑ እሻዉ፥ አይሁደታ ግዶን አፑን ሙኩላት ፆሳ አማንዳኮ ነ በኣሳ፤ ኤንቲ ኡባይካ ህግያ ምንꬅ ናጎሶና።
ACT 21:21 ኔኒ አይሁደ ግዶናይሳታ ቢታን ደእያ አይሁደ ኡባይ ባንታ ናይታ ቃፃሮና መላ፥ አይሁደታ ዎጋ ካሎና መላነ ሙሰ ህግያ እፃና መላ ኔኒ ታማርሰይሳ የሩሳላመን ደእያ አይሁደት ስእዶሶና።
ACT 21:22 ያትን አይብ ሎኦ? ኔኒ ይዳይሳ ዳሮት ስአና።
ACT 21:23 “ሄሳ ግሾ፥ ኑኒ ነዉ ኦደይሳ ስአ፤ ጋሶይ ደእያ ኦይዱ አሳት ኑ ማታን ደኦሶና።
ACT 21:24 ኤንታ ኤካዳ ኤንታራ ጌያ፤ ቃስ ኤንቲ ባንታ ሁጵያ ሜደታና መላ ኤንታዉ ሚሸ እማ። ኤንቲ ካሰ ነባ ስእዳይስ ቱማ ግዶናይሳነ ኔኒ ነ ሁጰንካ ህገ ናግያ አስ ግደይሳ ኡባይ ኤራና።
ACT 21:25 “ሽን አማንዳ አይሁደ ግዶና አሳታ ግድኮ፥ ኤንቲ ኤቃስ ያርሸትዳባ ሞና መላ፥ ሱꬁ ኡዮና መላ፥ ባዉታ ሞና መላነ ላይማቶና መላ፥ ኑኒ ኦዳ ቃችድ፥ ኤንታዉ ዳብዳበ ፃፍዳ” ያግዶሶና።
ACT 21:26 ሄሳፈ ጉየ፥ ጳዉሎስ ዎንተꬃ ጋላስ አሳታ ኤክድ፥ ኤንታራ ጌይስ። እ ባንታ ጌይያ ጋላሳይ አዉደ ፖለትያኮ ኤርሳናዉነ ባንታ ያርሹዋ አዉደ ያርሻነኮ ኤርሳናዉ ፆሳ ኬꬅ ገልስ።
ACT 21:27 ላፑን ጋላሳይ ዉራና ሀንሽን፥ ኢሰፐ ይዳ አይሁደት ፆሳ ኬꬃን ጳዉሎሳ በእድ፥ አሳ ኡባ ደንꬅድ ጳዉሎሳ ኦይክዶሶና።
ACT 21:28 “እስራኤለ አሳዉ፥ ኑና ማድተ፤ ሀ ኡራይ፥ ኑ ደርያ፥ ኑ ህግያነ ሀ ፆሳ ኬꬃ እፃና መላ አሳ ኡባ ታማርሴስ። ሄስካ ግዶና እፅን አይሁደ ግዶናይሳታ ፆሳ ኬꬅ ገልስድ፥ ሀ ጌሻ በሳ ቱንስስ” ያግድ ዋስዶሶና።
ACT 21:29 ኤንቲ ሄሳ ግዳይ ካሰ ኤፈሶና ፅሮፍሞሳ ጳዉሎሳራ ካታማን በእዳ ግሾ ሀእ ጳዉሎስ ፆሳ ኬꬅ እያ ኤክ ገልዳባ ኤንታዉ ዳንስ።
ACT 21:30 ካታማ ኡባይ ቡቀትስ፤ አሳ ኡባይ ሺቅድ ጳዉሎሳ ኦይክድ ፆሳ ኬꬃፈ ካረ ጎችዶሶና። ፆሳ ኬꬃ ፐንገት ኤለስድ ጎርደትዶሶና።
ACT 21:31 አሳይ ጳዉሎሳ ዎꬋና ሀንሽን፥ “የሩሳላመ ካታማይ ኩመꬅ ቡቀትስ” ግያ ኦዳይ ሮመ ሻላቃኮ ጋክስ።
ACT 21:32 ሻላቃይ ዎታዳረታነ ማቶ ሀላቃታ ኤክድ ዎፅሸ ይስ። አሳይ ሻላቃነ ዎታዳረታ በእዳ ዎደ ጳዉሎሳ ዋይሳ አጋግዶሶና።
ACT 21:33 ሄ ዎደ ሻላቃይ ሺቅድ፥ ጳዉሎሳ ኦይክድ፥ ናምኡ ሳንꬃላታን ቃሸታና መላ ኪትስ። ያትድ፥ እ ኦነኮነ አይ ኦꬅዳኮ አሳ ኦይችስ።
ACT 21:34 አሳፐ ባጋይ እስባ ግድ ዋስያ ዎደ፥ ሀራት ሀራባ ግድ ዋሴስ። ዋሶይ ዳርዳ ግሾ፥ ሻላቃይ ቱማ ሻካናዉ ዳንዳኤቶና እፅን፥ ዎታዳረት ጳዉሎሳ ባንታ ደእያሶ ኤፋና መላ ኪትስ።
ACT 21:35 ጳዉሎስ የꬍ ከይያ ደꬃ ጋክያ ዎደ አሳ ሱገꬃ ግሾ ዎታዳረት እያ ቶክዶሶና።
ACT 21:36 ዳሮ አሳይ፥ “እ ሀይቆ!” ያግድ ዋስሸ ካሎሶና።
ACT 21:37 ዎታዳረት ጳዉሎሳ ባንታ ደእያሱዋ ገልሳና ሀንሽን፥ ጳዉሎስ ሻላቃኮ፥ “ታኒ ነዉ እስባ ኦዶ?” ያግስ። እ ጳዉሎሳኮ፥ “ኔኒ ግርከ ዶና ኤራይ?
ACT 21:38 ኔኒ ሀይሳፈ ስን ቡቀꬅ መꬍድ ሸምፖ ዎꬍዳ ኦይዱ ሙኩሉ አሳታ ኤክድ ባዞ ገልዳ ግብፀ ኡራ ግድኪ?” ያግስ።
ACT 21:39 ሽን ጳዉሎስ፥ “ታኒ፥ ክልቅያን ደእያ ኤረትዳ ተርሰሴ ካታማን የለትዳ አይሁደ አስ። ሀያና ታና ኦድሳርኪ?” ያግስ።
ACT 21:40 ሻላቃይ እያኮ፥ “ኦዳ” ያግን ጳዉሎስ ደꬃ ቦላ ኤቅድ፥ አሳይ ስእ ጋና መላ ባ ኩሽያን ማልስ። አሳይ ስእ ግን እብራወꬆ ዶናን ሀይሳዳ ያግስ፦
ACT 22:1 “ታ እሻቶ፥ ታ አዋቶ፥ ታኒ ሀእ ህንተዉ እምያ ዛሩዋ ስእተ።”
ACT 22:2 ጳዉሎስ ኤንታዉ እብራወꬆ ዶናን ኦደይሳ ስእድ ካሰይሳፈ አꬅድ ስእ ግዶሶና። እ ካልድ፥
ACT 22:3 “ታኒ ክልቅያን ደእያ ተርሰሴ የለታዳ ሀ ካታማን ድጫስ። ታ አስታማረይካ ጋማልያለ፤ ታኒ ኑ አዋታ ህግያ ምንꬃ ታማርዳ፥ ሀች ህንተ ኡባይ ሀነይሳዳ ፆሳስ ምሸትያ አይሁደ አስ።
ACT 22:4 ታኒ ሀ ኦግያ ካልያ ማጫታነ አደታ ኦይካዳ ቃሾ ኬꬃን የጋሸነ ኤንታ ዎꬍሳና ጋካናዉ ዋየ በስዳ አስ።
ACT 22:5 ሄሳዳካ፥ ካህነ ሀላቃይነ ሻንጎ ኡባይ ታባ ማርካታናዉ ዳንዳኤስ። ታኒ ዳማስቆን ደእያ ኤንታ እሻታስ ኤንታፈ ዳብዳበ ኤካዳ ያን ደእያ አሳት ቃሸትድ ሴረታና መላ የሩሳላመ ኤንታ ኤሀናዉ ያ ባስ።
ACT 22:6 “ታኒ ባዳ ዳማስቆ ማትዳ ዎደ ሴታ ጋላስ ቆፖና ሳሎፐ ግታ ፖኦይ ታ ዩሹዋን ፖእስ።
ACT 22:7 ታኒ ሳአን ኩንዳ ደእሽን፥ ‘ሳኦላ፥ ሳኦላ፥ ታና አይስ የደꬃይ?’ ግያ ቃላ ስአስ።
ACT 22:8 ታኒ ዛራዳ፥ ‘ጎዳዉ፥ ኔኒ ኦኔ?’ ያጋስ። እ ዛሪድ፥ ‘ታኒ፥ ኔኒ ጎድያ ናዝረተ የሱሳ’ ያግስ።
ACT 22:9 ታራ ደኤይሳት ፖኡዋ በእዶሶናፐ አትሽን፥ ታዉ ኦደይሳ ቃላ አኬክቦኮና።
ACT 22:10 “ታኒ፥ ‘ጎዳዉ፥ ታ አይ ኦꬆ?’ ያጋስ። “ጎዳይ ታኮ፥ ‘ደንዳዳ ዳማስቆ ባ። ኔኒ ኦꬃና መላ ፆሳይ ኦꬃናዉ ቆፕዳባ ኡባይ ያን ነዉ ኦደታና’ ያግስ።
ACT 22:11 ሄ ዎልቃማ ፖኡዋ ጋሶን ታ አይፈይ ቆቅን፥ ታራ ደእያ አሳት ታ ኩሽያ ኦይክድ፥ ታና ጎችን ዳማስቆ ጋካስ።
ACT 22:12 “ዳማስቆን ደእያ አይሁደ ኡባይ ዳሮ ቦንችያ እስ ሀናንያ ጌተትያ አደይ፥ ኑ ህግያ ቦንቸይስነ ፆሳ ምንꬅ ዎሰይስ ደኤስ።
ACT 22:13 ሀናን ታኮ ይድ፥ ታ ማታን ኤቅድ፥ ‘ታ እሻዉ ሳኦላ፥ ፄላ’ ያግስ። ኤለሳዳ ታኒ እያ ፄላ አጋስ።
ACT 22:14 “እ ታኮ፥ ‘ኑ አዋታ ፆሳይ ኔኒ እያ ሸንያ ኤራና መላ፥ እያ ፅሎ ናኣ በአና መላነ እያ ዶናፐ ቃላ ስአና መላ ካሰትድ ነና ዶርስ።
ACT 22:15 ኔኒ በእዳባነ ስእዳባ አሳ ኡባ ስንꬃን እያዉ ማርካታና።
ACT 22:16 ሀእ አይስ ጋምአይ? ደንዳዳ ፃማቀታ፤ እያ ሱንꬃ ፄጋዳ ነ ናጋራፐ ሜጨታ’ ያግስ።
ACT 22:17 “ታኒ ጉየ የሩሳላመ ስማዳ ፆሳ ኬꬃን ዎስሽን፥ ታዉ ቆንጨꬅ በንትስ።
ACT 22:18 ቆንጨꬃን ጎዳይ ታኮ፥ ‘ነ ታዉ ማርካትያ ማርካተꬃ አሳይ ኤኮና ግሾ ኤለሳዳ የሩሳላመፐ ከያ’ ያግሽን ታኒ በአስ።
ACT 22:19 “ታኒ፥ ‘ጎዳዉ፥ አይሁደ ዎሳ ኬꬃ ኡባን ነና አማነይሳታ ኦይካዳ ዋꬍዳይሳነ ቃሾ ኬꬃን የግዳይሳ ኤንቲ ኤሮሶና።
ACT 22:20 ኤንቲ ነ ማርካ እስፅፋኖሰ ዎꬍያ ዎደ ታኒ ሄ ኦዳን እስፋስ። ቃስ ኤንታ ማታን ኤቃዳ እያ ዎይሳታ ማኡዋ ናጋይስ’ ያግስ።
ACT 22:21 “ጎዳይ ታኮ፥ ‘ታኒ ነና አይሁደ ግዶና አሳኮ ሃሆሶ ኪትያ ግሾ ደንዳዳ ባ’ ” ያግስ።
ACT 22:22 ጳዉሎስ ሄ ቃላ ኦድድ ኦንጋና ጋካናዉ አሳይ እ ገይሳ ስኦሶና። ሄሳፈ ጉየ፥ ባንታ ቃላ ꬎቁ ኦꬅድ፥ “ሀይሳ ቢታፈ ꬋይሳ! እ ዳናዉ በሰና” ያግዶሶና።
ACT 22:23 ኤንቲ ዎጫምሽን፥ ባንታ ማኡዋ ቦላ ሆልሽንነ ባና ቦላ ላልሽን፤
ACT 22:24 ሻላቃይ በእድ ዎታዳረት ጳዉሎሳ ባንታ ደእያሱዋ ኤፋና መላ ኪትስ። ቃስ አሳይ አይስ ሄሳዳ ዎጫምዳኮ ኤራናዉ ኮይድ ጳዉሎሳ ልሶን ጋራፍድ ፕልጋና መላ ኤንታ ኪትስ።
ACT 22:25 ሽን ዎታዳረት ጳዉሎሳ ዳፎን ምንꬅ ቃችድ ጋራፋና ሀንያ ዎደ ጳዉሎስ ባ ማታን ኤቅዳ ማቶ ሀላቃኮ፥ “ሮመ አስ ፕርድ ባይና ጋራፈይስ ህንተዉ ዎጌ?” ያግስ።
ACT 22:26 ማቶ ሀላቃይ ሄሳ ስእዳ ዎደ ሻላቃኮ ብድ፥ “ሀ አደይ ሮመ አስ። ኔኒ አይ ኦꬃናዉ ቆፓይ?” ያግድ ኦይችስ።
ACT 22:27 ሻላቃይ ጳዉሎሳኮ ሺቅድ፥ “ኔኒ ሮመ አሴ? አነ ታዉ ኦዳ” ያግስ። ጳዉሎስ፥ “ኤ” ያግስ።
ACT 22:28 ሻላቃይ ዛሪድ፥ “ታኒ ሀ ጋደተꬃ ዳሮ ሚሸን ሻማስ” ያግስ። ሽን ጳዉሎስ፥ “ታ ሀ ጋደተꬃ የለተꬃን ደማ ኤካስ” ያግስ።
ACT 22:29 ሄሳ ግሾ፥ ጳዉሎሳ ፕልጋናዉ ቆፕዳይሳት ኢራ እያፐ ሻከትዶሶና። ሻላቃይ ሮመ አስ ሳንꬃላታን ቃችዳይሳ ኤርዳ ዎደ ያይስ።
ACT 22:30 ዎንተꬃ ጋላስ ሻላቃይ፥ አይሁደት ጳዉሎሳ አይስ ሞትዳኮ ጌሽ ኤራናዉ ኮይስ። ካህነ ሀላቃትነ ሻንጎይ ኡባይ ሺቃና መላ ኪትስ፤ ቃስ ጳዉሎሳ ቃሾፐ ብልስድ ኤንታ ስንꬃን ኤስስ።
ACT 23:1 ጳዉሎስ ሺቁዋ ጫድ ፄልድ፥ “ታ እሻቶ፥ ታኒ ሀች ጋካናዉ ፆሳ ስንꬃን ታ ደኦ ኡባን ሎኦ ዎዛናን ደአስ” ያግስ።
ACT 23:2 ካህነ ሀላቃይ ሀናን፥ ጳዉሎሳ ዶናን ባቃና መላ እያ ማታን ኤቅዳይሳታ ኪትስ።
ACT 23:3 ሄ ዎደ ጳዉሎስ እያኮ፥ “ላ ሀ ቦቅንተ ትይዳ ጎዳ ዳነይሶ፥ ፆሳይ ነና ባቃና። ኔኒ ታ ቦላ ህግያꬆ ፕርዳናዉ ኡታዳ ደአሸ ህገይ ባይና ታና ባቃና መላ ኪታይ?” ያግስ።
ACT 23:4 ጳዉሎሳ ማታን ኤቅዳይሳት እያኮ፥ “ነ ፆሳ ካህነ ሀላቃ ጫያይ?” ያግዶሶና።
ACT 23:5 ጳዉሎስ፥ “ታ እሻቶ፥ እ ካህነ ሀላቃ ግድዳይሳ ታኒ ኤራብከ፤ አይስ ጊኮ ፆሳ ቃላን፥ ‘ነ ደርያ አይሰይሳ ቦላ ኢታ ቃላ ሃሳዮፓ’ ጌተትድ ፃፈትስ” ያግስ።
ACT 23:6 ሽን ጳዉሎስ ሄ በሳን ደእያ አሳፐ ባጋት ሳዱቃወታ፥ ባጋት ፋርሳወታ ግደይሳ በእድ፥ “ታ እሻቶ፥ ታኒ ፋርሳወነ ፋርሳወ ናአ፤ ‘ሀይቅዳይሳት ሀይቆፐ ደንዳና’ ጋዳ ታኒ ኡፋይሳን ናግያ ግሾ ኤንቲ ታ ቦላ ፕርዶሶና” ያግድ ኦድስ።
ACT 23:7 ጳዉሎስ ሄሳ ግዳ ዎደ ፋርሳወታ ግዶንነ ሳዱቃወታ ግዶን ኦሽ ከይን ሻከትዶሶና።
ACT 23:8 አይስ ጊኮ፥ ሳዱቃወት፥ “ሀይቅዳ አስ ደንደና፤ ኪታንቾይካ አያንካ ባዋ” ያጎሶና። ሽን ፋርሳወት ናምአይካ ደኤይሳ አማኖሶና።
ACT 23:9 ግታ ካች ከይስ፤ ፋርሳወታ ባጋ ግድዳ ህገ አስታማረት ደንድ ኤቅድ፥ “ሀ ኡራ ቦላ አይብ ባላካ ደምቦኮ፤ እያዉ አያን ዎይኮ ኪታንቾይ ሃሳዮና አገና” ያግድ ፓላምዶሶና።
ACT 23:10 ኦሻይ ዳርን አሳይ ጳዉሎሳ ሻቀረꬆና መላ ግድ፥ ሻላቃይ ባ ዎታዳረት ዎꬍድ ኤንታ ግዶፈ እያ ኤለስ ከስድ ባንታ ደእያሱዋ ኤፋና መላ ኪትስ።
ACT 23:11 ሄ ቃማ ጎዳይ ጳዉሎሳ ማታን ኤቅድ፥ “ጳዉሎሳ፥ ኔኒ ታዉ የሩሳላመን ማርካትዳይሳዳ ሮመንካ ማርካታናዉ በሴስ፤ ምና፤ አይኮይ ባዋ” ያግስ።
ACT 23:12 ዎንተꬃ ጋላስ አይሁደት፥ “ጳዉሎሳ ዎꬎና ደእሸ ሞኮ ኡዮኮ” ግድ ጫቅዶሶና።
ACT 23:13 ጳዉሎሳ ቦላ ሄሳ ማቀትዳ አሳት ኦይታማፐ ዳሮሶና።
ACT 23:14 ኤንቲ ካህነ ሀላቃታኮነ ደርያ ጭማታኮ ብድ፥ “ኑኒ ጳዉሎሳ ዎꬎና ደእሸ ካꬅ ግያባ ሞኮ ግድ ጫቀትዳ።
ACT 23:15 ህዛ፥ ህንተነ ሻንጎይ እያባ ጌሽድ ፕልግያባይ ደእያ ዳንስድ፥ ጳዉሎሳ ህንተኮ ኤሀና መላ ሻላቃ ኦይችተ። ኑኒ እ ሀ ሺቁዋ ጋካናፐ ስን እያ ዎꬋናዉ ጊግድ ኡትዳ” ያግዶሶና።
ACT 23:16 ሽን ጳዉሎሳ ምቸ ናአይ ሄ ማቁዋ ስእዳ ዎደ፥ ብድ ዎታዳረት ደእያሱዋ ገልድ፥ ጳዉሎሳስ ኦድስ።
ACT 23:17 ጳዉሎስ ማቶ ሀላቃታፐ እሱዋ ፄግድ፥ “ሀ ናአይ ሻላቃስ ኦድያባይ ደእያ ግሾ እያ ሻላቃኮ ኤፋ” ያግስ።
ACT 23:18 ማቶ ሀላቃይ ናኣ ሻላቃኮ ኤፍድ፥ “ቃሾ ኬꬃን ደእያ ጳዉሎስ ታና ባኮ ፄግድ፥ ሀ ናአይ ነዉ ኦድያባይ ደእያ ግሾ፥ እያ ኔኮ ኤሀና መላ ታና ዎስስ” ያግስ።
ACT 23:19 ሻላቃይ ናኣ ኩሽያ ኦይክድ፥ ዱማ ካረ ከስድ፥ “ኔኒ ታዉ ኦዳናባይ አይቤ?” ያግድ ኦይችስ።
ACT 23:20 ናአይ ሻላቃኮ፥ “አይሁደት ጳዉሎሳባ ካሰፐ ምንꬅ ፕልጋናዉ ኮይዳባ ዳንስድ ኔኒ ዎንቶ እያ ሺቁዋ ኤሀና መላ ነና ዎሳናዉ ዞረታ ቃችዶሶና።
ACT 23:21 ሽን ኔኒ ኤንቲ ግያባ ስኦፓ። አይስ ጊኮ፥ ኦይታማፐ ዳርያ አሳት ጳዉሎሳ ዎꬎና ደእሸ ‘ካꬅ ሞኮ፥ ሃ ኡዮኮ’ ግድ ጫቀትድ፥ ቆሰትድ እያ ናጎሶና። ሀእ ነ ግያባ ፃላላ ስአናዉ ናጎሶና” ያግስ።
ACT 23:22 ሻላቃይ ዛሪድ፥ “ሀ ኦዳ ነ ታዉ ኦድዳይሳ ሀራ ኦደስካ ኦዶፓ” ያግድ ኪትድ ናኣ ጉየ የድስ።
ACT 23:23 ሻላቃይ ማቶ ሀላቃታፐ ናምአታ ፄግድ፥ “ቃማፈ ሄꬑ ሳተን ቅሳረ ባናዉ፥ ናምኡ ፄቱ ዎታዳረታ፥ ላፑን ታሙ ፓራ አሳታነ ናምኡ ፄቱ ቶራንቾታ ጊግስተ።
ACT 23:24 ደርያ አይስያ ፍልክሳኮ ጳዉሎሳ ሳሮ ጋꬃናዉ ቶጋ መሄ ጊግስተ” ያግድ ኤንታ ኪትስ።
ACT 23:25 ሻላቃይ ፍልክሳስ ሀይሳዳ ግያ ዳብዳበ ፃፍስ፦
ACT 23:26 “ቃላዉድዮሳ ሉስዮሳፐ ደርያ አይስያ ቦንቾ ፍልክሳስ፥ ሳሮይ ነዉ ግዶ።
ACT 23:27 አይሁደት ሀ ኡራ ኦይክድ ዎꬋና ሀንሽን፥ እ ሮመ ቢታ አስ ግዶይሳ ኤራዳ ዎታዳረታራ ጋካዳ እያ አሻስ።
ACT 23:28 ኤንቲ እያ አይስ ሞትያኮ ኤራናዉ ኮያዳ ኤንታ ሺቁዋን እያ ሺሻስ።
ACT 23:29 ኤንቲ ባንታ ህግያስ እያ ሞትዳይሳፈ አትሽን፥ እያ ዎꬍስያባ ዎይኮ ቃሽስያባ ግዶናይሳ ታ ደማስ።
ACT 23:30 ኤንቲ ሀ ኡራ ቦላ ማቀትዳ ዝግርሳይ ታና ጋክን፥ ታኒ ኤለሳዳ እያ ኔኮ የዳስ። እያ ሞተይሳት ነ ስንꬃን ብድ ሞታና መላ ኪታስ” ያግስ።
ACT 23:31 ሄሳ ግሾ፥ ዎታዳረት ኪተትዳይሳዳ ጳዉሎሳ ኤክድ፥ ቃማ አንትጳፅርሳ ጋꬅዶሶና።
ACT 23:32 ዎንተꬃ ጋላስ ፓራ አሳት እያራ ባና መላ ኦꬅድ ቶሆ አሳት ጉየ ስምዶሶና።
ACT 23:33 ቶጋይ ቅሳረ ጋክድ ዳብዳብያ ደርያ አይሰይሳስ እምድ፥ ጳዉሎሳ እያ ስን አꬅዶሶና።
ACT 23:34 ደርያ አይሰይስ ዳብዳብያ ናባብዳፐ ጉየ፥ “ጳዉሎሳ፥ ነ አዉ አዉራጃ አሴ?” ግድ እያ ኦይችስ። እ ክልቅያ አስ ግዶይሳ ኤርዳ ዎደ፥
ACT 23:35 “ታኒ ነባ ነና ሞተይሳት ያ ዎደ ስአና” ያግስ። ዎታዳረት ጳዉሎሳ ሄሮዲሳ ጋꬎን ናጋና መላ ኪትስ።
ACT 24:1 እቻሹ ጋላሳፐ ጉየ ካህነ ሀላቃይ፥ ሀናን፥ ጭማታራነ ፀርፀሉሳ ጌተትያ እስ ፃባቃራ ቅሳረ ብስ። ኤንቲ ደርያ አይሰይሳ ቦላ ጳዉሎሳ ሞትዶሶና።
ACT 24:2 ጳዉሎስ ፄገትድ ገልዳ ዎደ፥ ፀርፀሉስ እያ ሀይሳዳ ያግድ ሞትስ፦ “ቦንቾ ፍልክሳ፥ ኑኒ ነ ባጋራ ዳሮ ሳሮተꬃ ደምዳ፥ ነ ሎኦ አይሱዋን ኑ ቢታይ ዳሮ ላመትስ።
ACT 24:3 ቦንቾ ፍልክሳ፥ ኑኒ አዉንካ አዉደ ግድን ዳሮ ጋላታን ሄሳ ኤኮስ።
ACT 24:4 ታኒ ነና ጋምእሶናሽን ኔኒ ነ ኬሀተꬃን ኑባ ቃንꬃን ስአና መላ ነና ዎሳይስ።
ACT 24:5 ሀ ኡራይ ꬉበ ግድድ ቢታ ኡባን ደእያ አይሁደታ ግዶን ቡቀꬅ መꬍድ ናዝራወታ ባጋ አሳ ካለይሳ ግዶይሳ ኤርዳ።
ACT 24:6 ሀር አቶሽን፥ ፆሳ ኬꬃ ቱንሳና ሀንሽን ኑኒ እያ ኦይክዳ፤ ኑ ህግያዳ እያ ቦላ ፕርዳናዉ ቆፕዳ።
ACT 24:7 ሽን ሻላቃ ሉስዮስ ይድ፥ ዎልቃን ኑ ኩሸፐ እያ ዎꬅ ኤክስ።
ACT 24:8 እያ ሞተይሳት ኔኮ ያና መላ ኪትስ። ኔኒ ነ ሁጰን ሀ ኡራ ፕልጋዳ ኑኒ እያ ሞትያ ሞቱዋ ኡባ ኤራናዉ ዳንዳኣሳ” ያግስ።
ACT 24:9 አይሁደትካ፥ “ሀ ኦዳይ ቱማ” ግድ እያ ቆፋ ማእዶሶና።
ACT 24:10 ደርያ አይሰይስ ጳዉሎሳ ኦዳ ግድ ማልስ። ጳዉሎስ ሀይሳዳ ግድ ዛርስ፦ “ኔኒ ዳሮ ዎደፐ ዶማዳ፥ ሀ አሳስ ፕርዳሸ ደኤይሳ ኤራዳ ታ ኦዳስ ኡፋይሳን ዛሮ እማይስ።
ACT 24:11 ታኒ የሩሳላመ ጎይናናዉ ከይን ታማነ ናምኡ ጋላሳፐ አꬎናይሳ ኔኒ ነ ሁጰን ኤራናዉ ዳንዳኣሳ።
ACT 24:12 አይሁደት ታና ፆሳ ኬꬃን ግድን አይሁደ ዎሳ ኬꬃን ግድን ካታማን ግድን ኦደራካ ፓላምሽን ዎይኮ አሳ ሺሻዳ ማቅሽን እስ አስካ ደምቤና።
ACT 24:13 ሀእካ ኤንቲ ታና ሞትያባስ ማርካ ደማናዉ ዳንዳኦኮና።
ACT 24:14 “ሽን ታኒ ሀይሳ እስባ አማናይስ፤ ታኒ ህገን ደእያባነ ናበት ፃፍዳ ኡባባ አማናዳ፥ ኑ አዋታ ፆሳ፥ ኤንቲ ዎርዶ ግያ ኦግያን ጎይናይስ።
ACT 24:15 ኤንቲ ባንታ ሁጰን አማነይሳ መላ ፅሎትነ ናጋራንቾት ሀይቆፐ ደንዳናይሳ ታካ አማናይስ።
ACT 24:16 ሄሳ ግሾ፥ ታኒ ፆሳ ስንꬃንነ አሳ ስንꬃን ኡባ ዎደ ሎኦ ካህ ታዉ ዳና መላ ምናይስ።
ACT 24:17 “ታኒ የሩሳላመፐ ከዮሳፐ ዳሮ ላይꬃፈ ጉየ ታ ቢታ ማንቆታስ ማደ እማናዉነ ያርሾ ያርሻናዉ የሩሳላመ ባስ።
ACT 24:18 ታኒ ፆሳ ኬꬃን ሄሳ ኦꬃዳ ጌሻ ዎጋ ፖላ ስምን ታና ደምዶሶና። ሄ ዎደ ታራ አስ ባዋ፥ ኦሽካ ከይቤና።
ACT 24:19 ሽን ኢሰፐ ይዳ እስ እስ አይሁደት ሄሳን ደኦሶና፤ ኤንቲ ታ ቦላ ኦዳ ኮይኮ ይድ ታና ነ ቦላ ሞታናዉ ዳንዳኦሶና።
ACT 24:20 ዎይኮ ታኒ ሻንጉዋ ስን ሺቅዳ ዎደ ኦꬅዳ ባል ደእኮ ሀይሳቲ ነ ስንꬃን ደኤይሳት ኦዶና።
ACT 24:21 ታኒ ኤንታ ግዶን ኤቃዳ፥ ‘ሀይቅዳይሳት ደንዳና ጋዳ ዋሳዳ ኦድዳ ግሾ ሀች ህንተ ስንꬃን ታ ቦላ ፕርዶሶና’ ጋስ፤ ሄሳፈ ሀራባ ኦꬃብከ” ያግስ።
ACT 24:22 ሽን ፍልክስ ፆሳ ኦግያባ ጌሽ ኤርዳ ግሾ፥ “ታኒ ህንተ ኦዳ ሻላቃ ሉስዮስ ያ ዎደ ፕርዳና” ያግድ ሞይዝስ።
ACT 24:23 ፍልክስ ቃስ ጳዉሎሳ ቃቾና ናጋና መላነ እያ ዳቦታፐ ኦንካ እያ ኦይቻናዉ ይሽን ድጎና መላ ማቶ ሀላቃ ኪትስ።
ACT 24:24 ጉꬃ ጋላሳፐ ጉየ፥ ፍልክስ አይሁደ ባጋ ግድዳ ባ ማቸ ድሩስላራ ይድ ጳዉሎሳ ኪት ኤህስድ የሱስ ክርስቶሳን አማኖባ እያፐ ስእስ።
ACT 24:25 ጳዉሎስ ፅሎተꬃባ፥ ባ ሁጰ ሃሮባነ ያናዉ ደእያ ፕርዳባ ኦድሽን፥ ፍልክስ ያይድ፥ “ኔኒ ሀእስ ባ፤ ታዉ እንጀትዳ ዎደ ነና ፄግሳና” ያግስ።
ACT 24:26 ሄ ዎደ ጳዉሎሳፐ ዎꬋፈ ኤካናዉ ቆፕድ፥ እያ ዛር ዛር ፄግስድ እያራ ኦደቴስ።
ACT 24:27 ናምኡ ላይꬃፈ ጉየ፥ ፍልክሳ በሳ ጶርቅዮስ ፍስፆስ ኤክስ። ፍልክስ አይሁደታ ኡፋይሳናዉ ኮይድ ጳዉሎሳ ብሎና አጋግስ።
ACT 25:1 ፍስፆስ ካዎትዳ ሄꬑ ጋላሳፐ ጉየ ቅሳረፐ የሩሳላመ ብስ።
ACT 25:2 ያን ካህነ ሀላቃትነ አይሁደታ ካለይሳት ጳዉሎሳ ሞትዶሶና።
ACT 25:3 ጳዉሎሳ የሩሳላመ ኤህሽን ኦገን ቆሰትድ እያ ዎꬋናዉ ኤንታዉ እንጀታና መላ ባንታና ማዶ ግድ ፍስፆሳ ዎስዶሶና።
ACT 25:4 ፍስፆስ ኤንታኮ፥ “ጳዉሎስ፥ ቅሳረን ቃሾ ኬꬃን ደኤስ፤ ታኒ ታ ሁጰንካ ኤለሳዳ ጉየ ስማና ሀናይስ።
ACT 25:5 እ ባልዳባይ ደእኮ ህንተ ግዶን አዋተይሳት ታራ ቅሳረ ብድ እያ ሞቶና” ያግድ ዛርስ።
ACT 25:6 ፍስፆስ ኤንታ ማታን ሆስፑን ዎይኮ ታሙ ጋላሳ መላ ጋምእዳፐ ጉየ ቅሳረ ብስ። ዎንተꬃ ጋላስ ፕርዳ ኦይደን ኡትድ ጳዉሎሳ ኤሀና መላ ኪትስ።
ACT 25:7 እ ይን የሩሳላመፐ ይዳ አይሁደት እያ ዩሹዋን ኤቅድ ኤንቲ ላꬃናዉ ዳንዳኦና ዳሮ ዴፆ ሞቶ እያ ቦላ ሺሽዶሶና።
ACT 25:8 ጳዉሎስ ዛሪድ፥ “ታኒ አይሁደ ህግያ ግድን ፆሳ ኬꬃ ዎይኮ ሮመ ካዋ ቄሳረ ናቃብከ” ያግስ።
ACT 25:9 ሽን ፍስፆስ አይሁደታ ኡፋይሳናዉ ኮይድ ጳዉሎሳኮ፥ “የሩሳላመ ባዳ ሀ ሞቱዋባ ያን ታ ስንꬃን ፕርደታናዉ ኮያይ?” ያግድ ኦይችስ።
ACT 25:10 ሽን ጳዉሎስ፥ “ታኒ ፕርደታናዉ በሲያ ቄሳረ ፕርዳ ኬꬃን ኤቃ ክቻስ። ኔኒ ሎይꬃ ኤረይሳዳ ታኒ አይሁደታ አይብንካ ናቃብከ።
ACT 25:11 ህዛ፥ ታኒ ናቅዳባይ ዎይኮ ሀይቆስ ጋꬅያባ ኦꬅዳባ ግድኮ ሀይቆፐ ታና አሻ ጊከ። ሽን ኤንቲ ታና ሞትያ ሞቶይ መላ ግድዳፐ ጉየ ኦንካ ታና ኤንታዉ አꬅድ እማናዉ ዳንዳኤና። ቄሳረይ ታባ ፕርዶ ጋዳ ኦይቻይስ” ያግስ።
ACT 25:12 ሄ ዎደ ፍስፆስ ባ ዞራንቾታራ ዞረትድ፥ “ኔኒ ቄሳረይ ታባ ፕርዶ ጋዳ ኦይቻዳሳ፤ ቄሳረኮ ባሳ” ያግድ ዛርስ።
ACT 25:13 ጉꬃ ጋላሳፐ ጉየ ካዎይ አግርጵነ ባርንቀይ ፍስፆሳ ሳሮꬃናዉ ቅሳረ ብዶሶና።
ACT 25:14 ያን ኤንቲ ዳሮ ጋላስ ጋምእን፥ ፍስፆስ ካዋስ ጳዉሎሳባ ሀይሳዳ ያግድ ኦድስ፤ “ፍልክስ ብሎና አግድ ብዳ እስ አደይ ሀይሳን ደኤስ።
ACT 25:15 ታኒ የሩሳላመ ብዳ ዎደ ካህነ ሀላቃትነ አይሁደ ጭማት እያ ቦላ ፕርዳና መላ ታና ዎስድ እያባ ታዉ ኦድዶሶና።
ACT 25:16 ታኒ፥ ‘ሞተትዳ ኡራይ ባና ሞተይሳታ ስንꬃን ኤቅድ ባ ሞትዳባስ ዛሮ እሞናሽን፥ ኦና ግድኮካ አꬍድ እመተይስ ሮመ ህገ ግደና’ ያጋዳ ኤንታዉ ዛራስ።
ACT 25:17 “ሄሳ ግሾ፥ ኤንቲ ሀይሳን ሺቅዳ ዎደ ታኒ ጋምኦና ዎንተꬃ ጋላስ ፕርዳ ኬꬃ ገላዳ ጳዉሎሳ ኤሀና መላ ኪታስ።
ACT 25:18 እያ ሞተይሳት እያ ማታን ኤቅድ፥ ኢታባን እያ ሞቶና አጎኮና ጋዳ ታኒ ቆፕዳይሳ መላ እያ ሞትቦኮና።
ACT 25:19 ሽን ኤንቲ ባንታ ሀይማኖተባነ ጳዉሎስ፥ ‘ፓፃ ደኤስ’ ግያ እስ ሀይቅዳ የሱሳ ጌተትያ አድያባ እያራ ፓላሞሶና።
ACT 25:20 ሀ ኦዳይ ታና ሻካናዉ መትዳ ግሾ፥ ጳዉሎስ የሩሳላመ ብድ፥ ያን ፕርደታናዉ ኮያኮ ጋዳ እያ ኦይቻስ።
ACT 25:21 ሽን ጳዉሎስ ባ ኦዳ ቄሳረይ እያባ በአና ጋካናዉ ቃሾ ኬꬃን ጋምአናዉ ኦይችስ። ታኒ እያ ቄሳረኮ የዳና ጋካናዉ እ ቃሸታና መላ ኪታስ” ያግስ።
ACT 25:22 ሄሳ ግሾ፥ አግርጵ ፍስፆሳኮ፥ “ታኒ ታ ሁጰንካ ሄ ኡራይ ግያባ ስአናዉ ኮያይስ” ያግስ። ፍስፆስ እያኮ፥ “ኔኒ ዎንቶ እ ግያባ ስአና” ያግስ።
ACT 25:23 ዎንተꬃ ጋላስ አግርጵነ ባርንቀይ ግታ ቦንቾን ሻላቃታራነ ካታማን ደእያ ግታ አሳታራ ይድ ፕርዳ ኬꬅ ገልዶሶና። ፍስፆስ ጳዉሎሳ ፄግስድ ኤህስ።
ACT 25:24 ፍስፆስ፥ “ካዋዉ አግርጳ፥ ሀይሳን ኑራ ደእያ አሳዉ፥ አይሁደት የሩሳላመንካ ሀይሳንካ ዋስድ፥ ‘እ ህዛፐ ጉየ ፓፃ ዳናዉ በሰና’ ያግድ፥ ታና ዎስዳ ኡራ ሀይሳ በኤታ።
ACT 25:25 ሽን እያ ሀይቆስ ጋꬅያባ አይብባካ ታኒ ደማብከ። እ ባ ሁጰን፥ ‘ቄሳረይ ታባ ፕርዶ ያጋዳ ኦይቻይስ’ ግዳ ግሾ፥ ቄሳረኮ እያ የዳናዉ ቆፋ ቃቻስ።
ACT 25:26 ታኒ እያባ ታ ጎዳ ቄሳረስ ፃፋናዉ ግድያ ጋሶይ አይብካ ባዋ። ሄሳ ግሾ፥ እያባ ህንተ በእኮ ታ ፃፍያባይ በንታነኮ ጋዳ ህንተ ስን ኡባራካ ካዋዉ፥ አግርጳ፥ ነ ስን እያ ኤሀስ።
ACT 25:27 አይስ ጊኮ፥ ቃሸትዳ አስ ቦላ ዳይናስ አꬅያ ዎደ እ አይስ ሞተትዳኮ ቆንጭሶና አገይስ ታዉ ኤያተꬅ ዳኔስ” ያግስ።
ACT 26:1 አግርጵ ጳዉሎሳኮ፥ “ኔኒ ነባ ኦዳናዉ ዳንዳኣሳ” ያግስ። ሄ ዎደ ጳዉሎስ ባ ኩሽያ ደንꬅድ ሀይሳዳ ያግስ፦
ACT 26:2 “ካዋዉ፥ አግርጳ፥ አይሁደት ታና ሞትዳባስ ዛሮ እማናዉ ሀች ነ ስንꬃን ኤቃሸ ታ ቃዳይ ሎኦ ጋዳ ቆፓይስ።
ACT 26:3 ኔኒ አይሁደ ዎጋነ ፓላማ ሎይꬃዳ ኤርያ ግሾ ታና ሳለቶና ስአና መላ ነና ዎሳይስ።
ACT 26:4 “ታኒ ናአተꬃፈ ዶማዳ ታ አሳ ግዶንነ የሩሳላመን ደእዳ ታ ደኡዋ አይሁደ ኡባይ ኤሮሶና።
ACT 26:5 ታኒ ኮይሮፐ ዶማዳ፥ ኑ ሀይማኖተ ህግያ ምንꬅድ ናግያ ፋርሳወታ ያራፐ ግደይሳ ኤንቲ ማርካታናዉ ኮይኮ ኤሮሶና።
ACT 26:6 ሀእካ ታኒ ፆሳይ ኑ አዋታስ እማና ግዳ ኡፋይሳ ናግያ ግሾ ሞተታዳ ሀይሳን ኤቃስ።
ACT 26:7 ቃስ ታማነ ናምኡ ኑ አዋታ ሼሻይ ፆሳ ቃማነ ጋላስ ምንꬅድ ጎይንሸ ፆሳይ እማና ግዳይሳ ኤካናዉ ኡፋይሳን ናጎሶና። ካዋዉ አግርጳ፥ አይሁደት ታና ሞተይ ታኒ ኡፋይሳን ሄሳ ናግያ ግሾሳ።
ACT 26:8 አይሁደቶ፥ ፆሳይ ሀይቅዳይሳታ ደንይሳ አይስ አማነከቲ?
ACT 26:9 “ካሰ ታኒ ታ ሁጰንካ ናዝረተ የሱሳ ሱንꬃ ተቃናዉ ዳንዳኤትዳባ ኡባ ኦꬃናዉ በሴስ ጋዳ ቆፓስ።
ACT 26:10 ታኒ የሩሳላመን ኦꬅዳይ ሀይሳ። ካህነ ሀላቃታፐ ማታ ኤካዳ ፆሳ አሳታፐ ዳሮታ ቃሽሳስ። ኤንታ ዎꬍያ ዎደካ ኤንታ ሀይቁዋ ዶሳስ።
ACT 26:11 ዳሮ ዎደ አይሁደ ዎሳ ኬꬃ ኡባን ኤንቲ ሴረታና መላነ የሱሳ ጫይድ ካዳና መላ ኡንኤꬃስ። ታኒ ዎግ ባይና ኤንታ ሀንቀታዳ ሀር አቶሽን፥ ሀራ ቢታ ካታማታ ጋካናዉ ኤንታ ጎዳስ።
ACT 26:12 “ታኒ ሀ ኦዳስ ካህነ ሀላቃታፐ ማታነ ኪታ ኤካዳ ዳማስቆ ባይስ።
ACT 26:13 ካዋዉ፥ ታኒ ሴታ ጋላስ ኦገን ደእሽን አዋ ፖኦፐ ዳሮ አꬍያ ፖኦይ ታ ዩሹዋንነ ታራ በይሳታ ዩሹዋን ሳሎፐ ፖእስ።
ACT 26:14 ኑኒ ኡባይካ ሳአን ኩንድዳ ዎደ እብራወꬆ ዶናን፥ ‘ሳኦላ፥ ሳኦላ፥ ታና አይስ ጎዳይ? ኔኒ፥ ነና ጫድያ ብራታ ፃምአ ቃክኮ ነና ቆሃሳ’ ያግድ ታዉ ኦድሽን ስአስ።
ACT 26:15 “ታኒ፥ ‘ጎዳዉ፥ ኔኒ ኦኔ?’ ያጋስ። “ጎዳይ፥ ‘ታኒ፥ ኔኒ ጎድያ የሱሳ፤
ACT 26:16 ሽን ደንዳ ኤቃ። ሀች ኔኒ ታና በእዳይሳንነ ስንꬃፈ ታ ነዉ በሳናይሳ ሀራታስ ማርካታና መላ ታ ኦሳንቾ ኦꬃዳ ነና ሹማናዉ ነዉ በንታስ።
ACT 26:17 እስራኤለ አሳታፐነ ታኒ ነና ኤንታኮ ኪትያ አይሁደ ግዶናይሳታፐ ነና አሻና።
ACT 26:18 ኔኒ ኤንታ አይፍያ ዶያና፥ ꬉማፐ ፖኦኮ፥ ፃላሄ ኩሸፐ ፆሳኮ ኤንታ ዛራና። ኤንቲ ታናን አማንድ ናጋራ አቶተꬃ ኤካና። ፆሳይ ዶርዳ አሳ ግዶን ባንታ ላታ ደማና’ ያግስ።
ACT 26:19 “ካዋዉ አግርጳ፥ ሄሳ ግሾ፥ ታዉ ሳሎፐ በንትዳ ቆንጨꬃስ ኪተታናይሳ እፃብከ።
ACT 26:20 ሽን ታኒ ኮይሮታዳ ዳማስቆን ሄሳፈ ጉየ የሩሳላመንነ ይሁዳ ቢታ ኡባን ደኤይሳትነ አይሁደ ግዶናይሳት ባንታ ናጋራፐ ፆሳኮ ስማና መላነ ናጋራፐ ስሙዋ በሲያ ኦሶ ኦꬃና መላ ቃላ ኦዳስ።
ACT 26:21 ሄሳ ግሾ፥ አይሁደት ታና ፆሳ ኬꬃን ኦይክድ ዎꬋናዉ ኮይዶሶና።
ACT 26:22 ሀች ጋካናዉ ፆሳ ማደይ ታፐ ሻከትቤና፤ ያንያ ግሾ፥ ጉꬃስነ ግታስ ማርካታሸ ሀይሳን ኤቃስ። ናበትነ ሙሰይ ሀናና ግድ ኦድዳይሳፈ ሀራ እስባካ ታኒ ኦድዳባይ ባዋ።
ACT 26:23 ሄስካ፥ ‘ክርስቶስ ዋየ ኤካናዉ በሴስ፤ ቃስ ሀይቆፐ ኮይሮ ደንድድ አይሁደታስነ አይሁደ ግዶናይሳታስ አቶተꬃ ፖኦ ኦዳናዉ በሴስ’ ግዳይሳ” ያግስ።
ACT 26:24 ጳዉሎስ ሄሳ ያግድ ዛርሽን፥ ፍስፆስ ባ ቃላ ꬎቁ ኦꬅድ፥ “ጳዉሎሳ፥ ነ ጎያዳሳ፤ ነ ዳሮ ትምርተይ ነና ጎሻተꬃስ ጋꬅስ” ያግስ።
ACT 26:25 ሽን ጳዉሎስ፥ “ቦንቾ ፍስፆሳ፥ ታኒ ቱማባነ በሲያባ ኦዳይስፐ አትሽን፥ ጎያብከ።
ACT 26:26 ታኒ ቆንጨን ኦድያ ኦዳ ካዎይ ኤሬስ። ሀ ኦዳይ ጌማን ኦሰትቦና ግሾ እሶይካ እያፐ ጌሞናይሳ ታኒ ጌሻዳ ኤራይስ።
ACT 26:27 “ካዋዉ አግርጳ፥ ኔኒ ናበታ አማናሳ ግድኪ? ኔኒ አማነይሳ ታኒ ኤራይስ” ያግስ።
ACT 26:28 ካዎይ አግርጵ፥ ጳዉሎሳኮ፥ “ሀ ጉꬃ ሳተን ታና ክርስታነ ኦꬃናዉ ኮያይ?” ያግስ።
ACT 26:29 ጳዉሎስ፥ “ዳሮ ዎደ ግድን ጉꬃ ዎደ ነ ፃላላ ግዶናሽን ሀች ታና ስእያ ኡባይ ሀ ቃሹዋፐ አትሽን፥ ታ መላ ግዳና መላ ፆሳ ዎሳይስ” ያግስ።
ACT 26:30 ሄሳፈ ጉየ፥ ካዎይ ፍስፆስ፥ ባርንቀይነ ኤንታራ ኡትዳ ኡባይካ ደንድዶሶና።
ACT 26:31 ያፐ ከይድ ብሸ እሶይ እሱዋራ፥ “ሀ ኡራይ ሀይቆስ ዎይኮ ቃሾስ ጋꬅያባ አይኮካ ኦꬅቤና” ያግድ ኦደትዶሶና።
ACT 26:32 አግርጵ ፍስፆሳኮ፥ “ሀ ኡራይ ‘ቄሳረይ ታባ ፕርዶ’ ጎናኮ ብለታናዉ ዳንዳኤስ ሽን” ያግስ።
ACT 27:1 ኑኒ ማርካበን ፃለ ባናዉ ቆፋ ቃችዳ ዎደ አዉግስፆሳ ዎታዳረታ ጌተተይሳታፐ እስ ዩልዮሳ ጌተትያ ማቶ ሀላቃስ ጳዉሎሳነ ሀራ ጉꬃ ቃሾ አሳታ አꬅድ እያዉ እምዶሶና።
ACT 27:2 ኢሰ ጋፃን ደእያ ቢታታ ብያ አድራምፅዮነ ማርካበን ገልድ ደንድዳ። ማቀዶነ አስ ግድዳ ተሰሎንቀ አርስፅሮኮስ ኑራ ደኤስ።
ACT 27:3 ዎንተꬃ ጋላስ ኑኒ ስዶና ጋክሽን፥ ዩልዮስ ጳዉሎሳስ ኬህድ ባ ላገታኮ ብድ ኮሽያባን ማዳና መላ ኤንታኮ እያ የድስ።
ACT 27:4 ያፐ ደንድድ ስንꬃራ ኑ ቦላ ጫርክያ ግሾ ሃꬃን ተቀትዳ ቢታ፥ ቆጵሮሳን ዘምፕድ አꬍዳ።
ACT 27:5 ክልቅያነ ጵንፍለ ማታን ደእያ አባ ፕንድ ሊቀን ደእያ ሙራ ጋክዳ።
ACT 27:6 ያን ማቶ ሀላቃይ ፃለ ብያ እስክንድረ ማርካበ ደምድ፥ እያን ኑና ገልስስ።
ACT 27:7 ኑኒ ዳሮ ጋላስ ሎዳራ ብድ፥ ዳሮ መቶን ቃንዶሳ ካታማ ማት ጋክዳ። ያራ ባናዉ ኑና ጫርኮይ ድግን ሳልሞናራ አꬍድ ሃꬃን ተቀትዳ ቢታ፥ ቃርፄሳን ዘምፕድ አꬍዳ።
ACT 27:8 ዳሮ መቶን ጋፃ ጋፃ ኦይክድ ላሳ ካታማ ማታን ደእያ አባ ዶናን “ማርካበይ ዎፑ ግድ ሸምፕያ በሲ” ጌተትያ በሳ ጋክዳ።
ACT 27:9 ኑኒ ያን ዳሮ ዎደ ጋምእዳፐ ጉየ ፆም ብለትዳ ግሾ ህዛፐ ማርካበን ቡስ መትያ ግሾ ጳዉሎስ ኤንታ ዞርስ።
ACT 27:10 “አሳዉ፥ ኑ ቡሳን ግታ ቦሽነ ዳሮ ቆሆይ ደኤይስ ታዉ በንቴስ፤ ቆሆይ ጫና ቦላነ ማርካብያ ቦላ ፃላላ ግዶናሽን ኑ ደኡዋ ቦላካ ጋካና” ያግስ።
ACT 27:11 ሽን ማቶ ሀላቃይ ጳዉሎስ ግዳይሳፈ አꬅድ ማርካብያ ላገይስነ ማርካብያ ጎዳይ ገይሳን አማንስ።
ACT 27:12 ሄ አባ ዶናን ደእያ ካታማይ ባልጎ አጌና አꬃናዉ ኤንታዉ እንጀቶና ግሾ፥ ዳርያ አሳት ባንታዉ ዳንዳኤትኮ ፍንቀ ካታማ ጋክድ ባልጎ አጌና ያን አꬃናዉ ዞረትዶሶና። ፍንቀይ ፑደሀ-ዉሎሀፐነ ዱገሀ-ዉሎሀፐ ግዶን አባ ዶናን ደእያ ካታማ።
ACT 27:13 ካዉሻ ዱገሀ ጫርኮይ ሎዳራ ጫርክዳ ዎደ ባንታ ቆፕዳይሳዳ ሀንዳባ ኤንታዉ ዳንን ደንድድ፥ ማርካበይ ቃፆና መላ ኦይክያ ብራታ ፑደ ኤክድ ቃርፄሳ ማታራ አꬍዶሶና።
ACT 27:14 ሽን ዳሮ ጋምኦና “አዉራቅስ” ጌተትያ ዎልቃማ ጎተይ ሃꬃን ተቀትዳ ቢታፈ ዱገ ኤንታ ቦላ ደንድስ።
ACT 27:15 ሄ ጎተይ ማርካብያ ሱግድ ኤፎና ድግዳ ግሾ ጫርኮይ ማርካብያ ባ ዶስዳ ሶ ኤፍስ።
ACT 27:16 ኑኒ ዩሾይ አባን ተቀትዳ ቢታ፥ ቄዳን ዘምፕድ ብሸ ዳሮ መቶተትድ ማርካብያ ዎጎሉዋ አሻናዉ ዳንዳእዳ።
ACT 27:17 ኤንቲ ዎጎሉዋ ፑደ ከስዳፐ ጉየ ዎዶሩዋን ማርካብያ ቦላ ፃፅድ፥ ምንꬅ ቃችዶሶና። ሱርትሳ ጌተትያ ሻፍያን ባንታና ዶምኤꬃና ግድ ህርግድ፥ ማርካብያ ሻራ ዎꬍስድ ማርካብያ ጮ የድ አግዶሶና።
ACT 27:18 ጎተይ ዎልቃምሸ ብን ዎንተꬃ ጋላስ ጫናፐ ባጋ አባን ሆሎ ኦይክዶሶና።
ACT 27:19 ሄꬓንꬆ ጋላስ ማርካብያ ሚሽያ ኤክድ ባንታ ኩሸን ሆልዶሶና።
ACT 27:20 ኑኒ ዳሮ ጋላስ አዋ አይፈነ ፆልንቶ በኦና ግሾነ ዎልቃማ ኡሾይ ኑ ቦላ ኡሽዳ ግሾ ስንꬃፈ ኑኒ ሸምፖራ አታና ግድ ቆፕቦኮ።
ACT 27:21 ሄ ዎደ ኤንቲ ዳሮ ጋላስ ካꬅ ሞና ጋምእዳ ግሾ ጳዉሎስ ኤንታ ግዶን ደንድ ኤቅድ፥ “አሳዉ፥ ህንተ ታ ዞርያ ኤክድ ቃርፄሳፐ ደንዶና አግዳኮ ሀ መቶይነ ቆሆይ ኑና ጋከና።
ACT 27:22 ሽን ታኒ ህንተና ያዮፍተ ጋዳ ዞራይስ፤ አይስ ጊኮ፥ ሀ ማርካበይ ꬋያናፐ አትሽን፥ ህንተፈ እስ አሳ ሸምፖይካ ꬋየና።
ACT 27:23 ዝነ ቃማ ታ እያባ ግድዳይስነ ታ ጎይንያ ፆሳይ ኪትዳ ኪታንቾይ ታ ማታን ኤቅድ፥
ACT 27:24 ‘ጳዉሎሳ፥ ያዮፋ፤ ኔኒ ሮመ ቢታ ካዋ ቄሳረ ስንꬃን ኤቃናዉ በሴስ። ሄኮ ፆሳይ ነ ግሾ ኔራ ብያ አሳ ኡባ ሸምፑዋ አሽስ’ ያግስ።
ACT 27:25 ሄሳ ግሾ፥ አሳዉ፥ ያዮፍተ። ሄ ኪታንቾይ ታዉ ኦድዳይስ ሀናናይሳ ታኒ አማናይስ።
ACT 27:26 ሽን ጫርኮይ ኑና ኤፍድ እስ ዩሾይ አባን ተቀትዳ ቢታ ጋፃን ሆላና” ያግስ።
ACT 27:27 ታማነ ኦይዳንꬆ ቃማን አድረ አባን ኑና ጫርኮይ ገደነ ሃ ሱግሽን፥ ግድ ብላሄ ግድያ ዎደ ማርካብያን ኦይሳታስ ቢታኮ ማትዳባ ዳንስ።
ACT 27:28 ኤንቲ ጪሞተꬃ ኤራናዉ ኮይድ ዎዶሮ ፄራን ዴፅያባ ቃችድ አባን የግን፥ አባይ ሆስፑን ታሙ ዋꬋ ግድስ። ጉꬅ ጋምእድ፥ ዛር የግን ኡሱፑን ታሙ ዋꬋ ግድስ።
ACT 27:29 ኤንቲ አባ ጋፃን ደእያ ሹቻን ዶምኤቶና መላ ያይድ፥ ማርካበይ ቦና መላ ኦይክያ ኦይዱ ብራታታ ማርካብያፐ ጉየራ አባን የግድ፥ ሳእ ዎንታና መላ ፆሳ ዎሶሶና።
ACT 27:30 ማርካብያን ኦይሳት ማርካብያፐ ባቃታናዉ ኮይድ፥ ማርካበይ ቦና መላ ኦይክያ ብራታታ ማርካብያፐ ስንꬃ ባጋራ አባን የግያ ዳንን ዎጎሉዋ አባን የግዶሶና።
ACT 27:31 ጳዉሎስ ማቶ ሀላቃኮነ ዎታዳረታኮ፥ “ሀይሳቲ ማርካብያን ሸምፕ ኡቶና እፅኮ ህንተ አታናዉ ዳንዳኤከታ” ያግስ።
ACT 27:32 ሄሳ ግሾ፥ ዎታዳረት ዎጎሎይ ቃሸትዳ ዎዶሩዋ ቃንፅድ የድ አግዶሶና።
ACT 27:33 ሳአይ ዎንታና ሀንሽን ኡባይ ካꬅ ማና መላ ጳዉሎስ አሳኮ፥ “ህንተ ካꬅ ሞና ናግሸ ሀችራ ታማነ ኦይዱ ጋላስ ጋምእደታ።
ACT 27:34 ሄሳ ግሾ፥ ጉꬃ ካꬅ ህንተ ማና መላ ታኒ ህንተና ዎሳይስ። ህንተ ጋሽትሳና መላ ጉꬃ ካꬅ ማናዉ ኮሼስ፤ ሀር አቶሽን ህንተ ሁጰ ብናናፐ እሶይካ ꬋየና” ያግስ።
ACT 27:35 ጳዉሎስ ሄሳ ግድ ኡይꬅ ኤክድ ኡባ ስንꬃን ፆሳ ጋላትስ፤ ኡይꬃ መንꬅድ ሙሱ ዶምስ።
ACT 27:36 ኡባይ ምነትድ ባንታዉ ካꬅ ኤክድ ምዶሶና።
ACT 27:37 ኑኒ ማርካብያን ደኤይሳት ናምኡ ፄታነ ላፑን ታማነ ኡሱፑና።
ACT 27:38 ኤንቲ ምድ ካልዳ ዎደ ጫና ግስትያ አባን የግድ ማርካብያ ዴፁዋ ካዉሽዶሶና።
ACT 27:39 ሳአይ ዎንትዳ ዎደ ማርካብያ ኦሳንቾት አዉ ቢታ ጋክዳኮ ኤሮናሽን፥ አባ ጋፃን ደእያ ሻፈነ ስልሞ በእዶሶና። ባንታዉ ዳንዳኤትኮ ማርካብያ ሄ ሻፍያኮ ሺሻናዉ ቆፕዶሶና።
ACT 27:40 ያትድ፥ ማርካበይ ቦና መላ ኦይክያ ብራታታ ብርሽድ አባን የግዶሶና። ሄ ዎደ ላግያ ምꬃ ቃችያ ዎዶሩዋ ብርሽዶሶና። ሄሳፈ ጉየ፥ ጫርኮይ ማርካብያ ስን ሱጋና መላ ማርካብያ ኤፍያ ሻራ ስንꬃ ባጋራ ꬎቁ ኦꬅድ ቡሱ ዶምዶሶና።
ACT 27:41 ሽን ማርካበይ ሻፈ ዶረን ዶምኤትድ ምተትስ። ማርካብያስ ስንꬃ ባጋይ ፁጉንድ ሻፍያ ጫድ ኦይክድ ቃፆና እፅን፥ ጉየ ባጋይ ዙልያ ሱገꬃን መቀረተꬅ ኦይክስ።
ACT 27:42 ዎታዳረት ቃሾ አሳፐ እሶይካ ሃꬃ ዋꬍድ ከስ ኤኮና መላ ኤንታ ዎꬋናዉ ዞረትዶሶና።
ACT 27:43 ሽን ማቶ ሀላቃይ ጳዉሎሳ አሻናዉ ኮይድ ዎታዳረታ ዞረታ እፅስ። ሃ ዋꬎ ኤርያ ኡባይ ማርካብያፐ ሃꬃን ጉፕ ጉፕ ዎꬍድ ካሰትድ ጋፃ ከያና መላ ኪትስ።
ACT 27:44 አትዳይሳት ሳንቃ ቦላነ፥ ማርካብያ መኡዋ ቦላ ከያና መላ ኪትስ። ሄሳዳ ሀንድ ኡባይ ጋፃ ሳሮራ ከይዶሶና።
ACT 28:1 ኑኒ ጋፃ ሳሮ ከይዳ ዎደ ጋክዳ በሳይ ዩሾይ አባን ተቀትዳ ቢታ፥ ማልታ ግደይሳ ኤርዳ።
ACT 28:2 ማልታ አሳይ ኑስ ዳሮ ኬሀ ኬህዶሶና። እር ቡክያ ግሾነ ሜግያ ግሾ ታማ ኤꬅድ ኑና ኡባ ሞክዶሶና።
ACT 28:3 ጳዉሎስ ዳሮ አፍራ ሺሽድ ታማን ዎꬅሽን፥ ሾሽ ሴላ ግሾ ከይድ እያ ኩሽያ ቦላ ፃፀትድ እያ ዱክስ።
ACT 28:4 ማልታ አሳይ ሾሽ ጳዉሎሳ ኩሸን ፃፀትዳይሳ በእዳ ዎደ እሶይ እሱዋኮ፥ “ቱማ ሀ ኡራይ ሸምፖ ዎꬍዳ አስ፤ ሀር አቶሽን አባፈ እ አትንካ ፆሳ ፕርዳፈ አትድ ፓፃ ዳናዉ ዳንዳእቤና” ያግዶሶና።
ACT 28:5 ሽን ጳዉሎስ ባ ኩሽያፐ ሾሻ ዉፃርክድ፥ ታማን የግስ፤ እያ አይኮካ ቆህቤና።
ACT 28:6 ኤንቲ፥ “እያ አሳተꬃይ ክፄስ፥ ዎይኮ አኬኮና ኩንድድ ሀይቄስ” ግድ እያ ናጎሶና። ሽን ዳሮ ዎደ ናግድ እያ አሳተꬃን አይብካ ዱማትዳባይ ꬋይን፥ “ሄስ ፆሰ” ያግድ ባንታ ቆፋ ላምዶሶና።
ACT 28:7 ሄ ሄራን ዩሾይ አባን ተቀትዳ ቢታ ሀላቃ፥ ፑፕልዮሳ ጌተተይሳስ ጋደይ ደኤስ፤ ሄꬑ ጋላስ ጋካናዉ እ ኑና ሲቆን ሞክስ።
ACT 28:8 ፑፕልዮሳ አዋይ ቆፆ፥ ምሻነ ኡሎ ኡትሶን ሀርገትድ ዝንእድ ደኤስ። ጳዉሎስ እያ ሶ ገልድ እያዉ ፆሳ ዎስስ፤ ባ ኩሽያ እያ ቦላ ዎꬅድ ፓꬅስ።
ACT 28:9 ሄሳፈ ጉየ፥ ዩሾይ አባን ተቀትዳ ቢታ፥ ማልታን ደእያ ሀርግያ ሀራ አሳትካ ይድ ፓፅዶሶና።
ACT 28:10 ኤንቲ ኑና ዳሮ ቦንቾ ቦንችዶሶና፤ ኑኒ ማርካበን ባናዉ ደንድዳ ዎደ ኦገስ ኮሽያባ ኑስ እምዶሶና።
ACT 28:11 ሄꬑ አጌናፐ ጉየ፥ ማልታን ባልጎ አꬅድ ማርካበን ገልድ እስክንድረ ባናዉ ደንድዳ። ሄ ማርካብያ ቦላ ድዮስቆሮሳ ጌተትያ መንተ ኤቃታ ምስለይ ደኤስ።
ACT 28:12 ስራኩሰ ካታማ ገልድ ያን ሄꬑ ጋላስ ኡትዳ።
ACT 28:13 ያፐ ደንድድ ረግዩመ ካታማ ጋክዳ። እስ ጋላሳፐ ጉየ፥ ዱገሀ ባጋ ጫርኮይ ጫርክን፥ ዎንተꬃ ጋላስ ፑትዮላ ካታማ ጋክዳ።
ACT 28:14 ያን ኑኒ እስ እስ አማንያ አሳታ ደምን፥ ባንታራ ሳምንታ ጋምአና መላ ኑና ዎስዶሶና። ሄሳፈ ጉየ፥ ሮመ ብዳ።
ACT 28:15 ሮመን ደእያ አማንያ አሳት ኑባ ስእድ፥ አፍዮሳ ግያን፥ ሄꬑ እማꬃ ኬꬅ ጋካናዉ ኑና ሞካናዉ ይዶሶና። ጳዉሎስ ኤንታ በእዳ ዎደ ፆሳ ጋላትድ ምነትስ።
ACT 28:16 ኑኒ ሮመ ገልዳ ዎደ ጳዉሎስ ባና ናግያ ዎታዳርያራ ባርካ ደኦ ጌተትስ።
ACT 28:17 ሄꬑ ጋላሳፐ ጉየ፥ ጳዉሎስ አይሁደታ ሀላቃታ ባኮ ፄግስስ። ኤንቲ ሺቅዳ ዎደ ኤንታኮ፥ “ታ እሻቶ፥ ታኒ ኑ አሳ ዎይኮ ኑ አዋታ ዎጋ ቦላ አይብ ቆሆካ ኦꬃብከ፥ ሽን ታና የሩሳላመን ቃችድ ሮመ አሳስ አꬅድ እምዶሶና።
ACT 28:18 ኤንቲ ታ ሞቱዋ በእድ ሀይቆስ ጋꬅያባ ታ ቦላ አይብባካ ደምቦና ግሾ ታና ብላናዉ ቆፕዶሶና።
ACT 28:19 ሽን አይሁደት ሄሳ እፅዳ ዎደ፥ ‘ታባ ቄሳረይ ፕርዶ’ ያጋስፐ አትሽን፥ ታኒ ታ ደርያ ሞትያባይ ደእን ግደና።
ACT 28:20 ታኒ ህንተና ፄግስዳይ ህንተና በአናዉነ ህንተዉ ሀይሳ ኦዳናሳ። ታኒ ሀ ሳንꬃላታን ቃሸትዳይ እስራኤለ አሳይ ናግያ ኡፋይሳ ግሾሳ” ያግስ።
ACT 28:21 አይሁደ ሀላቃት ጳዉሎሳኮ፥ “ኑስ ይሁዳፐ ነባ ፃፈትዳ ዳብዳበይ ጋክቤና። ያፐ ይዳ አሳታፐ እሶይካ ነባ ኢታ ኦድዳይ ባዋ።
ACT 28:22 ሽን ሀ ነ ካልያ አማኑዋ ዱማ ዱማ በሳን አሳይ እፀይሳ ኑኒ ኤርያ ግሾ ነ ቆፋ ስአናዉ ኮዮስ” ያግዶሶና።
ACT 28:23 ኤንቲ ባንታ ያና ጋላስ ጳዉሎሳስ ቃፃርድ፥ ሄ ጋላስ ዳርድ እ ደእያሱዋ ይዶሶና። እ ዎንታፈ ኦማርስ ጋካናዉ ፆሳ ካዎተꬃባ ኤንታዉ ማርካትስ። ቃስ ኤንቲ የሱሳባ አማናና መላ ሙሰ ህግያፈነ ናበታ ማፃፋፐ ቆንጭስድ ኤንታ ታማርስስ።
ACT 28:24 እሶት እሶት ጳዉሎስ ግዳይሳ አማንዶሶና፥ ሽን ሀራት አማንቦኮና።
ACT 28:25 ኤንቲ ባንታ ግዶን ኦዳ ማኦና እፅዳ ዎደ ጳዉሎስ እስባ ግዳፐ ጉየ ብዶሶና። እ ሀይሳዳ ያግስ፦ “ጌሻ አያናይ ኑ አዋታስ ናብያ እሳያሳ ዶናን ኦድዳይስ ቱማ።
ACT 28:26 “ ‘ኔኒ ሄ አሳኮ ባዳ፥ ህንተ ስስ ስኤታ፥ ሽን ህንተዉ ገለና፤ ህንተ በኦ በኤታ፥ ሽን ደመከታ።
ACT 28:27 አይስ ጊኮ፥ ሀ ደርያ ዎዛናይ ሙምስ፤ ኤንታ ሀይꬃይ ቱልስ፤ ኤንታ አይፈይካ ጎዘትስ። ሄስ ባይነኮ፥ ኤንቲ ባንታ አይፍያን በእድ፥ ባንታ ሀይꬃን ስእድ፥ ባንታ ዎዛናን አኬክድ፥ ታኮ ስማናሽን፤ ታካ ኤንታ ፓꬃናሽን’ ያጋ” ያግስ።
ACT 28:28 “ህዛ፥ ሀይስ ፆሳ አቶተꬃ ኪታይ አይሁደ ግዶናይሳታስ ግደይሳ ኤሬታ። ኤንትካ ስአና” ያግስ።
ACT 28:29 ጳዉሎስ ሄሳ ግዳፐ ጉየ፥ አይሁደት ባንታ ግዶን ዳሮ ፓላምሸ ከይድ ብዶሶና።
ACT 28:30 ጳዉሎስ ከራ ኬꬃን ናምኡ ላይꬅ ኩመꬅ ደእስ፤ ያን ደእሸ ባኮ ያ ኡባ ሞኬስ።
ACT 28:31 ያሽ ባይናነ ኦንካ ድጎናሽን ፆሳ ካዎተꬃባ ሳባክስ፤ ጎዳ የሱስ ክርስቶሳባ ቆንጭስድ ታማርሴስ።
ROM 1:1 የሱስ ክርስቶሳ አይለ ግድዳ፥ ሀዋረ ግዳና መላ ፄገትዳይሳፈነ ፆሳ ዎንገላ ሳባካና መላ ዶረትዳ ጳዉሎስ ኪትዳ ኪታ።
ROM 1:2 ፆሳይ ዳሮ ዎደፐ ስን ባ ናበታ ባጋራ እማና ያግዳ ፆሳ ዎንገላይ ጌሻ ማፃፋታን ፃፈትስ።
ROM 1:3 ሄ ዎንገላይ አሾን ዳዊታ ሼሻፐ የለትዳ፥ ፆሳ ናኣ፥ ኑ ጎዳ የሱስ ክርስቶሳባ።
ROM 1:4 ቃስ እ ባ ጌሻ አያናን ሀይቆፐ ደንድድ፥ ፆሳ ናኣ ግደይሳ ግታ ዎልቃን በስስ።
ROM 1:5 እያ ባጋራ አይሁደ ግዶና አሳ ኡባይ፥ አማንድ ኪተታና መላ ክርስቶሳ ሱንꬃ ግሾ፥ ፆሳይ አꬎ ኬሀተꬅነ ሀዋረተꬃ ማታ ኑስ እሚስ።
ROM 1:6 የሱስ ክርስቶሳስ ግዳና መላ ፄገትዳ አሳታፐ ባጋት ህንተና።
ROM 1:7 ሮመን ደእያ፥ ፆሳይ ሲቀይሳታስነ እያ ጌሻ ደረ ግዳና መላ ዶርዳይሳታስ። ፆሳ ኑ አዋፐነ ጎዳ የሱስ ክርስቶሳፐ አꬎ ኬሀተꬃይነ ሳሮተꬃይ ህንተዉ ግዶ።
ROM 1:8 ኡባፈ ኮይሮታዳ፥ ህንተ አማኖይ ቢታ ኡባን ስኤትዳ ግሾ፥ የሱስ ክርስቶሳ ባጋራ ህንተ ግሾ ታ ፆሳ ጋላታይስ።
ROM 1:9 ታኒ እያ ናኣ ዎንገላባ ኩመꬃ ዎዛናን ኦድያ ፆሳይ፥ ታኒ ታ ዎሳን ኡባ ዎደ ህንተና ቆፐይሳስ እ ማርካ።
ROM 1:10 ዉርሰꬃን፥ ፆሳ ሸነ ግድኮ፥ ታኒ ህንተኮ ባናዉ ኦገይ ታዉ እንጀታና መላ ኡባ ዎደ ዎሳይስ።
ROM 1:11 ታኒ ህንተዉ አያና እሙዋ ሻካናዉነ ህንተና በአናዉ ላሞታይስ።
ROM 1:12 ሄስካ፥ ታኒ ህንተ አማኑዋን፥ ቃስ ህንተ ታ አማኑዋን ምነታና መላሳ።
ROM 1:13 ታ እሻቶ፥ ታኒ አይሁደ ግዶና አሳፐ አይፈ ደምዳይሳዳ፥ ህንተፈካ አይፈ ደማናዉ ህንተኮ ባናዉ ቆፓስ፥ ሽን ድገታስ።
ROM 1:14 ታማርዳ አሳስነ ታማርቦና አሳስ ቃስ ጭንጫታስነ ኤያታስ ታዉ አጮይ ደኤስ።
ROM 1:15 ሄሳ ግሾ፥ ሮመን ደእያ ህንተዉካ ዎንገላ ኦዳናዉ አሞታይስ።
ROM 1:16 እያ አማንያ ኡባ፥ ኮይሮትድ አይሁደታ፥ ካልድ አይሁደ ግዶናይሳታ አሻናዉ ዎንገላይ ፆሳ ዎልቃ ግድያ ግሾ፥ ታ ዎንገላን ዬላትከ።
ROM 1:17 ፅሎይ አማኖን ደኦን ዳና ጌተትድ ጌሻ ማፃፋን ፃፈትስ። ዎንገላን ፆሳ ፅሎተꬃይ ቆንጭስ፤ ኮይሮፐ ዉርሰꬅ ጋካናዉ፥ አሳይ ፅለይ አማኖና።
ROM 1:18 ቱማይ ኤረቶና መላ ባንታ ኢታ ኦሶን ካምያ አሳ ቦላነ ናጋራ ኡባ ቦላ፥ ፆሳ ሀንቆይ ሳሎፐ ዎꬌስ።
ROM 1:19 ፆሳይ ኤንታዉ ቆንጫናዉ በሲያባ ቆንጭስዳ ግሾ፥ ኤንቲ ፆሳባ ኤሮሶና።
ROM 1:20 አላመይ መቶሳፐ ዶምድ፥ አሳስ በንቶና ፆሳ ካንዶይ፥ ሄስካ እያ መርና ዎልቃይነ ፆሳተꬃይ እያ መተꬃን ቆንጭድ ደእያ ግሾ፥ አሳይ ባንታ ኢታተꬃስ ጋሶያባይ ባዋ።
ROM 1:21 ኤንቲ ፆሳ ኤርሸ፥ እያ ቦንችቦኮናነ ጋላትቦኮና። ኤንታ ቆፋይ ማዶናባ ግድስ፤ ኤንታ አኬኮና ዎዛናይ ꬉምስ።
ROM 1:22 ኤንቲ ባንታና ጭንጫታ ጎሶና፥ ሽን ኤያታ።
ROM 1:23 ኤንቲ ሀይቆና ፆሳ ጎይናናይሳ አግድ፥ ሀይቅያ አሳ መꬎን፥ ካፎታ መꬎን፥ ዶአታ መꬎንነ ኡሎራ ጎሸትያባታ ዳንስድ ኦꬅዳ ምስለታ ጎይንዶሶና።
ROM 1:24 ሄሳ ግሾ፥ ኤንቲ እሶይ እሱዋራ ቦርሶባ ኦꬅድ፥ ባንታ አሳተꬃ ካዉሻና መላ ፆሳይ ኤንታ ዎዛናይ አሞትያ ቱና ኦሶስ ኤንታ የግ አግስ።
ROM 1:25 ሄስ ሀንዳይ ኤንቲ ፆሳ ቱማ ዎርዶን ላምዳ ግሾነ መꬍዳ ፆሳ አግድ፥ መተꬅ ጎይንዳ ግሾሳ። ፆሳይ መርናዉ ጋላተትዳይሳ። አምንእ።
ROM 1:26 ሄሳ ግሾ፥ ፆሳይ ኤንታና ኤንታ ቦርሶ አሙዋስ የግ አግስ። ኤንታ ማጫሳይ ባንታዉ በሲያ አደራ ጋሄተꬅ አግድ፥ በሶናባ ሀንድ ማጫስ ማጫሳራ ጋሄትዶሶና።
ROM 1:27 ሄሳዳካ፥ አደት ባንታዉ በሲያ ማጫሳራ ጋሄተꬅ አግድ፥ አደይ አደራ ጋሄትዶሶና። አደት እሶይ እሱዋራ አሞን ፁገትድ፥ ቦርሶባ ኦꬅዶሶና። ባንታ ኦꬅዳ ናጋራስ በሲያ ፕርዳ ኤክዶሶና።
ROM 1:28 ኤንቲ ፆሳ ኤርሸ፥ ሀር አቶሽን እያባ ቆፓናዉ ኮዮና እፅዳ ግሾ፥ በሶናባ ኦꬃና መላ ፆሳይ ኤንታና ፓꬆና ቆፋስ አꬅድ እሚስ።
ROM 1:29 ኤንታን ጌላተꬅ፥ ኢታተꬅ፥ ዪቀይ፥ ገነይ፥ ቃናተይ፥ ሸምፖ ዎꬎይ፥ ፓላም፥ ጭሞይነ ኢታ አሞይ ኩምስ። ኤንቲ ዝግረይሳታ፥
ROM 1:30 አሳ ሱንꬅ ኢሰይሳታ፥ ፆሳ እፀይሳታ፥ ጫየይሳታ፥ ኦቶረይሳታ፥ ጬቀተይሳታ፥ ኢታባ ኦꬃናዉ ኮየይሳታነ ባንታ አየስነ አዋስ ኪተቶናይሳታ፥
ROM 1:31 አኬኮናይሳታ፥ ጫቆ መንይሳታ፥ ሲቆይ ባይናይሳታ፥ ቃይ ባይናይሳታ።
ROM 1:32 ሀይሳታ መላ ኦይሳታስ ሀይቆይ በሴስ ግያ ፆሳ ህግያ ኤርሸ፥ ሀይሳታ ኦꬆሶና። ኤንቲ ባንታዉ ኦሶ ፃላላ ግዶናሽን፥ ኦꬅያ ሀራታካ ናሾሶና።
ROM 2:1 ሄሳ ግሾ፥ ነኖ ሀራታ ቦላ ፕርደይሶ፥ ኔኒ ጋሶያባይ ባዋ። ኔኒ ሀራታ ቦላ ፕርዳሸ፥ ሄ ኔኒ ፕርድያ ኡራ መላ ኦꬅኮ፥ ኔኒ፥ ነ ቦላ ፕርዳሳ።
ROM 2:2 ሄሳ መላ ኦሶ ኦይሳታ ቦላ ፆሳይ ፅሎ ፕርዳ ፕርደይሳ ኑ ኤሮስ።
ROM 2:3 ነኖ፥ ሄሳ መላ ኦሶ ኦይሳታ ቦላ ፕርደይሶ፥ ኤንቲ ኦይሳ መላ ኦይሶ፥ ኔኒ ፆሳ ፕርዳፈ አታናባ ዳኒ?
ROM 2:4 ዎይኮ ፆሳ ኬሀተꬃ፥ ገንጫነ ዳንዳአ ዳሮተꬃ ካꬋዬ? ፆሳይ ነዉ ኬህዳይ ነና ናጋራፐ ዛራናዉ ግደይሳ ኤርክዬ?
ROM 2:5 ሽን ህንተዉ ሹቻ ዎዛንነ ስኦና ሀይꬅ ደኤስ። ሄሳ ግሾ፥ ፆሳ ሀንቆይነ ፅሎ ፕርዳይ ቆንጭያ ጋላስ፥ ነ ቦላ ፕርዳይ ዳራና መላ ኦꬃሳ።
ROM 2:6 ፆሳይ እሱዋስ እሱዋስ እያ ኦሱዋ መላ እማና።
ROM 2:7 ሎኦ ኦሶን ምንድ፥ ጋላታ፥ ቦንቾነ ꬋዮና ደኡዋ ኮየይሳታስ ፆሳይ መርና ደኡዋ እማና።
ROM 2:8 ሽን ባንታና ሲቀይሳታ፥ ቱማ እፀይሳታነ ኢታባ ኦꬃናዉ ኮየይሳታ ቦላ ፆሳ ሀንቆይነ ፕርዳይ ያና።
ROM 2:9 ኢታባ ኦꬅያ አሳ ኡባ፥ ኮይሮትድ አይሁደታ፥ ካልድ አይሁደ ግዶና አሳ መቶይነ ዋየይ ጋካና።
ROM 2:10 ሽን ፆሳይ ሎኦ ኦሶ ኦꬅያ ኡባስ፥ ኮይሮትድ አይሁደታስ፥ ካልድ አይሁደ ግዶናይሳታስ ጋላታ፥ ቦንቾነ ሳሮተꬃ እማና።
ROM 2:11 ፆሳይ ሶምኦ በእድ አሰ ሻከና።
ROM 2:12 ህገይ ባይና ናጋራ ኦꬅዳ ኡባይ ህገይ ባይና ꬋያና። ህገይ ደእሽን፥ ናጋራ ኦꬅዳ ኡባይ ህገን ፕርደታና።
ROM 2:13 ፆሳ ስንꬃን ፅለይሳት ህገ ናገይሳታፐ አትሽን፥ ህገ ስሳ ፃላላ ስኤይሳታ ግዶኮና።
ROM 2:14 ህገይ ባይና አይሁደ ግዶና አሳይ መꬎን ህገይ ኪተይሳ ኦꬆሶና። ኤንታዉ ፃፈትዳ ህገይ ባይና እፅኮካ ኤንቲ ባንታ ዎዛናን ህግያ ኤሮሶና።
ROM 2:15 ኤንታ ሀኖታይ፥ ህገ ኪታይ ኤንታ ዎዛናን ፃፈትዳይሳ በሴስ። ቃስ ኤንታ ካሀይ ኤንታ ቦላ ማርካቴስ። ኤንታ ቆፋይ እስ እስ ቶሆ ኤንታና ባላ ጌስ፤ እስ እስ ቶሆ ኤንታና ልከ ጌስ።
ROM 2:16 ታ ታማርስዳ ዎንገላ መላ ፆሳይ የሱስ ክርስቶሳ ባጋራ አሳ ዎዛናን ጌምዳ ቆፋ ፕርድያ ዎደ ሄስ ኤረታና።
ROM 2:17 ሽን ነ ነና አይሁደ ጋሳ፤ ህገን ዘምፓሳ፤ ፆሳን ጬቃሳ።
ROM 2:18 ነ ኦꬃና መላ ፆሳይ ኮይያባይ አይበኮ ኤራሳ። ህግያ ታማርዳ ግሾ፥ ቱማ ግድያባ ዶራናዉ ኤራሳ።
ROM 2:19 ኔኒ ቆቀታ ካለይሳ፥ ቃስ ꬉማን ደኤይሳታስ ፖኦ ግደይሳ ሻካ ኤራሳ።
ROM 2:20 ኔኒ ህግያፈ ደምዳ ኤራተꬃንነ ቱማተꬃን ኤያታ ኤርሰይሳነ ዮጋታ ታማርሰይሳ ግደይሳ ኤራሳ።
ROM 2:21 ያትን፥ ነ ሀራታ ታማርሰይስ ነ ነና አይስ ታማርስኪ? ኔኒ፥ “ካይሶቶፓ” ጋሸ፥ ኔኒ ነ ሁጰን ካይሶታዬ?
ROM 2:22 ኔኒ፥ “ላሞፋ” ጋሸ፥ ኔኒ ነ ሁጰን ላማዬ? ኔኒ ኤቃ እፃሸ፥ ኤቃይ ደእያ ኬꬃ ቦንቃዬ?
ROM 2:23 ኔኒ ፆሳ ህግያን ጬቀታሳ፥ ሽን ህግያስ ኪተቶና እፃዳ ፆሳ ዬላያይ?
ROM 2:24 ጌሻ ማፃፋን፥ “ህንተ ጋሶን ፆሳ ሱንꬃይ አይሁደ ግዶና አሳታን ጫየቴስ” ጌተትድ ፃፈትስ።
ROM 2:25 ነ ህገስ ኪተትኮ፥ ነ ቃፃረተꬃስ ማደይ ደኤስ፥ ሽን ኔኒ ህግያስ ኪተቶና እፅኮ ነ ቃፃረተꬃይ ቃፃረትቦና መላ ግዴስ።
ROM 2:26 አይሁደ ግዶና አስ ቃፃረቶና ደእሸ፥ ህግያስ ኪተትኮ፥ ፆሳይ እያ ቃፃረትዳ መላ ታይበኔ?
ROM 2:27 ህንተ፥ አይሁደ አሳት፥ ህንተዉ ፃፈትዳ ህገይነ ቃፃሮይ ደእሽን፥ ህንተ ህገስ ኪተቶና እፅኮ፥ አይሁደ ግዶና አሳይ ቃፃረቶና እፅኮካ ህገስ ኪተትድ፥ ህንተ ቦላ ፕርዳና።
ROM 2:28 ህዛ፥ ሱንꬃን አይሁደ ግድዳ ኡባይ ቱማ አይሁደ ግደና። ቃስ ካረ አሳተꬃ ቃፃሮይ ቱማ ቃፃሮ ግደና።
ROM 2:29 ሽን ቱማ አይሁደተꬅ ጋꬃ ባጋን አይሁደ ግደይሳ። ቱማ ቃፃረተꬅ ፆሳ አያናን ኦሰትያ ዎዛና ቃፃረተꬃፈ አትሽን፥ ፃፈትዳ ህግያን ኦሰትያ አሳተꬃ ቃፃሮ ግደና። ሄ ኡራይ ጋላታ ፆሳፈ ኤኬስፐ አትሽን፥ አሳፐ ግደና።
ROM 3:1 ያትን፥ አይሁደ ግዶን አይ ዱማተꬅ ደኢ? ዎይኮ ቃፃረተꬃን አይ ማደይ ደኢ?
ROM 3:2 ቱማካ አይሁደ ግዶይ ዳሮ ኦገራ ማዴስ። ኡባፈ ስን ፆሳይ ባ ቃላ ሀዳራ አይሁደታስ እሚስ።
ROM 3:3 ያትን፥ ኤንታፈ እሶት እሶት ቃላ አማኖና እፅኮ፥ ኤንታ እፆይ ፆሳ አማነተꬃ ድግዬ?
ROM 3:4 ድገና! አሳ ኡባይ ዎርዳንቾ ግድኮካ ፆሳይ ቱማ ግዶ። ጌሻ ማፃፋን፥ “ነ ቃላን ነ ፅላሳ፤ ነና ሞተይሳ ፕርዳን ላꬃሳ” ጌተትድ ፃፈትስ።
ROM 3:5 ያትን፥ ኑ ናጋራይ ፆሳይ ፅሎ ግደይሳ በሲያባ ግድኮ፥ ኑ ዎይጋኔ? ፆሳይ ኑ ናጋራ ግሾ፥ ኑ ቦላ ፕርድኮ፥ ልከ ግደነዬ? ሀይሳ ታኒ አሳ ቆፋꬆ ጋይስ።
ROM 3:6 ሄስ ኡባራካ ሀነና። ሄሳዳ ሀንኮ፥ ፆሳይ ሀ አላምያ ቦላ ዋት ፕርዳኔ?
ROM 3:7 ሽን ታ ዎርዶተꬃይ ፆሳ ቱማ ቆንጭስድ፥ እያ ቦንቹዋ ዳርስ በሲያባ ግድኮ፥ ያትን፥ አይስ ታ ቦላ ናጋራንቾዳ ፕርዴቲ?
ROM 3:8 እስ እስ አሳይ፥ “ሎኦይ ያና መላ ኢታ ኦꬆስ” ያግድ ታማርስያዳ ኦꬅድ ታና ሞቶሶና። ሄሳ መላ አሳ ቦላ ያ ፆሳ ፕርዳይ ልከ።
ROM 3:9 ያትን፥ ኑኒ ዎይጋኔ? ኑ አይሁደት፥ አይሁደ ግዶናይሳታፐ አꬎናዬ? ግደና! አይሁደ ግድን፥ አይሁደ ግዶና እፅን ኡባይ ናጋራንቾ ግደይሳ ታኒ ካሰታዳ ህንተዉ ኦዳስ።
ROM 3:10 ጌሻ ማፃፋን፥ “ፅሎ አስ እሶይካ ባዋ።
ROM 3:11 አኬክያ አስ ባዋ፥ ፆሳ ኮይያ ኦንካ ባዋ።
ROM 3:12 አሳ ኡባይ ፆሳስ ዞኮ ዛርዶሶና፤ ኡባይ እስፈ ፓꬆናባ ግድዶሶና። ሎኦ ኦꬅያ ኦንካ ባዋ፤ እስ አስካ ባዋ።
ROM 3:13 ኤንታ ዶናፐ ከይያ ቃላይ፥ ዶየትዳ ዱፎፐ ከይያ ፅንቆ መላ፤ ባንታ እንፃርሳን ጭሞሶና። ኤንታ ዶናፐ አሰ ዎꬍያ፥ ሾሻ ማርዘይ ከዬስ።
ROM 3:14 ኤንታ ዶናን ጫሞ ኦዳይነ ባደꬅ ኩምስ።
ROM 3:15 ኤንቲ ሱꬅ ጉሳናዉ ኤለሶሶና።
ROM 3:16 ኤንታ ኦግያን ꬋዮይነ ቆሆይ ደኤስ።
ROM 3:17 ኤንቲ ሳሮተꬃ ኦግያ ኤሮኮና።
ROM 3:18 ባንታ ደኡዋን ፆሳስ ያዮኮና” ጌተትድ ፃፈትስ።
ROM 3:19 አሰ ኡባ ዶና ኦይꬃናዉነ ኩመꬃ አላምያ ፆሳ ፕርዳፈ ጋርሳን ሺሻናዉ፥ ህገይ እመትዳይ ህገፈ ጋርሳን አቀይሳታስ ግደይሳ ኑ ኤሮስ።
ROM 3:20 ሄሳ ግሾ፥ ኦንካ ህገስ ኪተትድ ፆሳ ስንꬃን ፅላናዉ ዳንዳኤና። ህገይ አስ ኡባይ ናጋራንቾ ግደይሳ በሴስ።
ROM 3:21 ሽን ሀእ ፆሳይ አስ ህገይ ባይናሽን ፅልያ ኦገ ቆንጭስስ። ሄ ኦግያ ሙሰ ህገይነ ናበት ማርካትዶሶና።
ROM 3:22 ሀ ፅሎተꬃ፥ ፆሳይ የሱስ ክርስቶሳ ባጋራ አሳ ኡባስ ሻኮይ ባይና እሜስ።
ROM 3:23 አሳ ኡባይ ናጋራ ኦꬅዶሶና፤ ፆሳይ ኤንታዉ እምዳ ቦንቹዋፈ ሃክድ አትዶሶና።
ROM 3:24 ሽን ኤንቲ ፆሳ አꬎ ኬሀተꬃን፥ ዎዝያ ክርስቶስ የሱሳ ባጋራ ጮ ፅልዶሶና።
ROM 3:25 ፆሳይ የሱስ ክርስቶሳ ያርሾ ኦꬅድ እምዳይ፥ እያ አማንያ ኡባይ እያ ሱꬃን ናጋራ አቶተꬅ ደማና መላሳ። ፆሳይ ሄሳ ኦꬅዳይ ባ ዳንዳአን ካሰ ናጋራ ታይቦና አግድ፥ ባ ፅሎተꬃ በሳናሳ።
ROM 3:26 ሀእ ዎድያን የሱሳ አማንያ ኡባ ፅልስድ፥ ፆሳይ ባ ሁጰን ፅሎ ግደይሳ በሴስ።
ROM 3:27 ያትን፥ ኑ ጬቀትያባይ አይብ ደኢ? አይብካ ባዋ። ኑኒ ጬቀተይ ህገስ ኪተትያ ግሾዬ? አካይ! አማኖ ግሾሳ።
ROM 3:28 ፆሳይ አሰ ፅልሰይ አማኖናፐ አትሽን፥ ህገስ ኪተተꬃን ግዶናይሳ ኑ አኬኮስ።
ROM 3:29 ዎይኮ ፆሳይ አይሁደታ ፃላላ ፆሰዬ? አይሁደ ግዶናይሳታስ ፆሰ ግደነዬ? ቱማ፥ አይሁደ ግዶናይሳታስካ እ ፆሰ።
ROM 3:30 ፆሳይ እሶ፤ አይሁደታነ አይሁደ ግዶናይሳታ አማኖን ፅልሰይ እያ።
ROM 3:31 ያትን፥ ኑኒ ህግያ አማኖ ግሾ ሻሮስ ጉሰዬ? ግደና! ህግያ ምንꬆስፐ አትሽን።
ROM 4:1 ያትን፥ ኑ ማይዛይ አብራሃመይ አይ ደምዴ?
ROM 4:2 አብራሃመይ ኦሶን ፅልዳባ ግድያኮ፥ እ ጬቀትያባይ ደኤስ፥ ግዶሽን፥ ፆሳ ስንꬃን ጬቀታናዉ ዳንዳኤና።
ROM 4:3 ጌሻ ማፃፋይ፥ “አብራሃመይ ፆሳ አማንስ፤ ፆሳይ ሄሳ እያዉ ፅሎተꬅ ኦꬅድ ኤክስ” ያጌስ።
ROM 4:4 ኦꬅያ ኡራይ ኤክያ ዳሞዘይ፥ እያ ኦሶ ዎልቃስ ጭገትያ ጋተፐ አትሽን፥ እያዉ እሞታ ግደና።
ROM 4:5 ሽን ኦሶ ኦꬆና ኦንካ ናጋራንቹዋ ፅልስያ ፆሳ አማንኮ፥ እያ አማኖይ እያዉ ፅሎተꬅ ግድድ ታይበቴስ።
ROM 4:6 ጌሻ ማፃፋን ዳዊቲ፥ ኦሶይ ባይና ፆሳይ ፅልስያ አሳት አይ መላ አንጀትዳኮ ሀይሳዳ ያግድ ቆንጭሴስ፦
ROM 4:7 “ኤንታ ባላይ አቶ ጌተትዳይሳትነ ኤንታ ናጋራይ ካመትዳይሳት አንጀትዳይሳታ።
ROM 4:8 ጎዳይ እያ ናጋራ ታይቦና አስ አንጀትዳይሳ” ያጌስ።
ROM 4:9 ያትን፥ ዳዊቲ ኦድዳ አንጆይ ቃፃረትዳ አሳ ፃላላሰዬ? ዎይኮ ቃፃረትቦና አሳሴ? ኑኒ፥ “ጌሻ ማፃፋይ፥ ‘አብራሃመይ ፆሳ አማንስ፤ ፆሳይ ሄሳ እያዉ ፅሎተꬅ ኦꬅድ ኤክስ’ ያጌስ” ግዳ።
ROM 4:10 ያትን፥ ሄስ አዉደ ሀንዴ? አብራሃመይ ቃፃረትነዬ? ዎይኮ ቃፃረቶና ደእሽኔ? ቃፃረታናፐ ስን ሀንስፐ አትሽን፥ ጉየ ግደና።
ROM 4:11 አብራሃመይ ቃፃረታናፐ ስን እያ አማኖይ እያዉ ፅሎተꬅ ግድድ ታይበትዳይሳ ኤርሳናዉ፥ እያ ቃፃሮይ ማላታ ግድስ። ሄሳ ግሾ፥ አብራሃመይ ቃፃረቶና አማነይሳታስነ አማኖን ፅለይሳታ ኡባስ አዋ ግድስ።
ROM 4:12 እ ቃፃረትዳይሳታስካ አዋ። አብራሃመይ ኤንታዉ አዋ ግድዳይ ኤንቲ ቃፃረትዳ ግሾ፥ ፃላላስ ግዶናሽን፥ እ ቃፃረታናፐ ስን አማንዳ አማኑዋ ኤንቲ ካልዳ ግሾሳ።
ROM 4:13 አብራሃመስነ እያ ሼሻስ፥ “አላምያ ታ ህንተዉ እማና” ያግዳ ኡፋይሳይ፥ አብራሃመይ አማኖን ፅልዳ ግሾሳፈ አትሽን፥ ህገ ናግድ ፖልዳ ግሾ ግደና።
ROM 4:14 ህገስ ኪተትዳይሳት ፆሳይ እማና ግዳ ኡፋይሳ ላተይሳታ ግድኮ፥ አሳ አማኖይ ማደና፤ ፆሳ ኡፋይሳይ ሀዳ ግድስ።
ROM 4:15 ህገ መንꬆይ ፆሳ ሀንቆ ኤሄስ፥ ሽን ህገይ ባይናሶን ህገ መንꬆይ ባዋ።
ROM 4:16 ሄሳ ግሾ፥ ፆሳይ እምዳ ኡፋይሳይ አማኖን ኤከቴስ። ሀ ኡፋይሳይ አብራሃመ ሼሻ ኡባስ ፆሳ አꬎ ኬሀተꬃ ባጋራ እመትዳይሳ ቆንጭሴስ። ሄስካ ህገ ናገይሳታ ፃላላስ ግዶናሽን፥ አብራሃመዳ አማንዳ ኡባሳ። አብራሃመይ ኑ ኡባስ አዋ።
ROM 4:17 ጌሻ ማፃፋን፥ “ታ ነና ዳሮ ካዎተꬃታስ አዋ ኦꬃስ” ጌተትድ አብራሃመ ግሾ፥ ፃፈትስ። ሀ ኡፋይሳይ አብራሃመስ እመትዳይ ሀይቅዳይሳታስ ደኦ እመይስነ ኦራꬃባ ኦꬅያ ፆሳይ እያ ግደይሳ እ አማንዳ ግሾሳ።
ROM 4:18 ፆሳይ አብራሃመስ ዳሮ ኮቸ እማናይሳ ጫቅስ። ኡፋይስ ኦꬃናዉ አይኮካ ዳንዳኤቶና ዎደ አብራሃመይ ፆሳን አማንዳ ግሾነ ኡፋይስ ኦꬅዳ ግሾ፥ ዳሮ ካዎተꬃታስ አዋ ግድስ።
ROM 4:19 አብራሃመስ ፄቱ ላይꬅ ኩማና ሀንኮካ፥ ባ ዳቡርዳ አሳተꬃነ ሳራ ናአ የላናዉ ዳንዳኦናይሳ ኤርሸ ባ አማኑዋን ዳቡርቤና።
ROM 4:20 ግዶሽን፥ እ ባ አማኑዋን ምንድ ፆሳስ ቦንቾ እሚስፐ አትሽን፥ ፆሳይ እምዳ ኡፋይሳ አማኖና እፅድ፥ ስꬍቤና።
ROM 4:21 አብራሃመይ፥ ፆሳይ ጫቅዳ ጫቁዋ ፖላናይሳ ባ ኩመꬃ ዎዛናን አማንስ።
ROM 4:22 ሄሳ ግሾ፥ ፆሳይ እያ አማኑዋ ፅሎተꬃን ታይብስ።
ROM 4:23 ሽን፥ “እያዉ ፅሎተꬃን ታይብስ” ግያ ቃላይ አብራሃመ ፃላላስ ፃፈትቤና።
ROM 4:24 ሄ ቃላይ ኑ ጎዳ የሱሳ ሀይቆፐ ደንꬅዳ ፆሳ አማንያ ኑስካ ኑ አማኖይ ፅሎተꬃን ታይበታና መላ ፃፈትስ።
ROM 4:25 ፆሳይ እያ ኑ ናጋራ ግሾ፥ ሀይቆስ አꬅድ እሚስ፤ እ ኑና ፅልሳናዉ ሀይቆፐ ደንድስ።
ROM 5:1 ህዛ፥ ኑ አማኖን ፅልዳ ግሾ፥ ኑ ጎዳ የሱስ ክርስቶሳ ባጋራ ፆሳራ ኑስ ሳሮተꬅ ደኤስ።
ROM 5:2 ኑኒ እያ ባጋራ ሀእ ኑ ኤቅዳ አꬎ ኬሀተꬃ ግዶ አማኖን ገልዳ። ሄሳ ግሾ፥ ኑ ፆሳ ቦንቹዋ ሻከታናዉ ደእያ ኡፋይሳን ጬቀቶስ።
ROM 5:3 ሄሳ ፃላላ ግዶናሽን፥ መቶይ ዳንዳአ ኤሄይሳ ኑ ኤርያ ግሾ፥ ኑ መቱዋንካ ጬቀቶስ።
ROM 5:4 ቃስ ዳንዳአይ ገንጫ፥ ገንጫይ ኡፋይስ እመይሳ ኑ ኤሮስ።
ROM 5:5 ኑስ እምዳ ጌሻ አያና ባጋራ ፆሳይ ባ ሲቁዋ ኑ ዎዛናን ጉስዳ ግሾ ሄ ኡፋይሳይ ኑና ዬላየና።
ROM 5:6 ኑኒ ቡሮ ዳቡራንቾታ ግድድ ደእሽን፥ ፆሳ ዎደይ ጋክን፥ ክርስቶስ ናጋራንቾታ ግሾ ሀይቅስ።
ROM 5:7 ፅሎ አሳ ግሾ ሀይቃና አስ ደማናይስ ዳሮ መቶ፥ ሽን ኬሀ አሳ ግሾ ሀይቃና አስ ኦን ኤር በንቶና አገና።
ROM 5:8 ሽን ኑኒ ቡሮ ናጋራንቾ ግድድ ደእሽን፥ ክርስቶስ ኑ ግሾ ሀይቅስ። ሄስ ፆሳይ ኑና አይ መላ ሲቅያኮ እያ ሲቁዋ በሴስ።
ROM 5:9 ህዛ፥ ኑኒ ክርስቶሳ ሱꬃን ፅልዳባ ግድኮ፥ ኡባፈ አꬅድ እያ ባጋራ ፆሳ ሀንቁዋፈ አታና።
ROM 5:10 ኑኒ ፆሳራ ካሰ ሞርከ፥ ሽን እያ ናኣ ሀይቁዋን እያራ ስገትዳ። ሄሳፈ አꬅድ፥ ሀእ ኑኒ ፆሳራ ስገትዳፐ ጉየ፥ እያ ናኣ ደኡዋ ጋሶን ኑኒ አታና።
ROM 5:11 ሄሳ ፃላላ ግዶናሽን፥ ሀእ ኑና ፆሳራ ስገꬅዳ ኑ ጎዳ የሱስ ክርስቶሳ ባጋራ ኑ ፆሳን ጬቀቶስ።
ROM 5:12 አዳመ ባጋራ ናጋር ሀ አላምያ ገልስ። ሄ ናጋራ ባጋራ ሀይቆይ ይስ። አስ ኡባይ ናጋራ ኦꬅዳ ግሾ ሀይቆይ አሳ ዛረ ኡባ ጋክስ።
ROM 5:13 ህገይ እመታናፐ ስን አላመን ናጋር ደኤስ፥ ሽን ህገይ ባይና ዎደ ናጋር ናጋራ ግድድ ታይበተና።
ROM 5:14 ሽን አዳመፐ ሙሰ ጋካናዉ ሀይቆይ አሳ ኡባ ሃርስ። ሀር አቶሽን፥ አዳመዳ ህገስ ኪተቶና እፅድ፥ ናጋራ ኦꬅቦናይሳታ ቦላካ ሀይቆይ ካዎትስ። አዳመይ ያና የሱሳስ ሌምሶ።
ROM 5:15 ሽን ፆሳ አꬎ ኬሀተꬃይ አዳመ ናጋራ መላ ግደና። እስ አሳ ናጋራ ባጋራ ዳሮ አሳይ ሀይቅስ። ሽን የሱስ ክርስቶሳ ባጋራ ፆሳ አꬎ ኬሀተꬃይ አሳ ኡባስ ዳርድ እመትስ።
ROM 5:16 አዳመ ናጋራ ግዶንነ ፆሳ እሞታ ግዶን ዳሮ ዱማተꬅ ደኤስ። እስ አሳ ናጋራ ጋሶን ፆሳይ እያ ቦላ ፕርድስ። ሽን አሳይ ዳሮ ናጋራ ኦꬅንካ ፆሳ አꬎ ኬሀተꬃይ ፅሎተꬃ ኤህስ።
ROM 5:17 እስ አሳ ናጋራ ጋሶን ሀይቆይ አሳ ኡባ ቦላ ካዎትስ። ሽን የሱስ ክርስቶሳ ባጋራ ፆሳ አꬎ ኬሀተꬃነ ፅሎተꬃ እሞታ ኤክያ ኡባይ፥ ፆኖ ደኦን ደኦሶና።
ROM 5:18 ህዛ፥ እስ አስ ናጋራ ኦꬅዳ ጋሶን አሳ ኡባ ቦላ ፕርድ ይዳይሳዳ እስ አስ ፅሎ ኦꬅዳ ጋሶን፥ ፆሳይ አሰ ኡባ ፅልስድ ኤንታዉ ደኦ እሜስ።
ROM 5:19 እስ አስ ኪተቶና እፅዳ ጋሶን፥ ዳሮ አሳይ ናጋራንቾ ግድዳይሳዳ እስ አሳ ኪተተꬃን ዳሮ አሳይ ፅላና።
ROM 5:20 አሳይ ናጋራ ዎልቃ ኤራና መላ ህገይ ይስ፥ ሽን ናጋራ ዎልቃይ ዳርዳ ዎደ ፆሳ አꬎ ኬሀተꬃይ አꬍድ ዳርስ።
ROM 5:21 ናጋር ሀይቆ ዎልቃን ካዎትዳይሳ መላ ፆሳ አꬎ ኬሀተꬃይ ፅሎተꬃ ዎልቃን ካዎትድ፥ ኑ ጎዳ የሱስ ክርስቶሳ ባጋራ ኑና መርና ደኡዋኮ ካለꬄስ።
ROM 6:1 ያትን፥ ኑኒ ዎይጋኔ? ፆሳ አꬎ ኬሀተꬃይ ዳራና መላ ናጋራን ምንድ ደእኖ?
ROM 6:2 አካይ፥ ኑኒ ናጋራስ ሀይቅዳባ ግድኮ፥ ያትን፥ ኑኒ ህዛፐ ዋንድ ናጋራን ዳኔ?
ROM 6:3 ኑ ኡባይ ክርስቶስ የሱሳራ እስፋናዉ ፃማቀትዳ ዎደ እያ ሀይቁዋን እያራ እስፋናዉ ፃማቀትዳይሳ ኤረከትዬ?
ROM 6:4 ኑ ፃማቀትዳ ዎደ ክርስቶሳራ ሀይቅዳነ ሞገትዳ። ክርስቶስ ፆሳ አዋ ቦንቾ ዎልቃን ሀይቆፐ ደንድዳይሳ መላ ኑካ ኦራꬃ ደኦን ዳና።
ROM 6:5 ኑ እያ ሀይቁዋን እያራ እስኖ ግድኮ፥ ሄሳዳካ፥ እያ ደንዱዋን እያራ እስኖ ግዳና።
ROM 6:6 ኑ ህዛፐ ናጋራስ አይለ ግዶና መላነ ኑ ናጋራንቾ አሳተꬃ ዎልቃይ ꬋያና መላ ኑ ጭማ አሳተꬃይ ክርስቶሳራ ካቀትዳይሳ ኤሮስ።
ROM 6:7 እስ አስ ክርስቶሳን ሀይቅዳባ ግድኮ፥ እ ናጋራ ዎልቃፈ ላአ ከይስ።
ROM 6:8 ኑኒ ክርስቶሳራ ሀይቅኮ፥ እያራ ደኦን ዳናይሳ አማኖስ።
ROM 6:9 ክርስቶስ ሀይቆፐ ደንድዳ ግሾ፥ ዛር እ ሀይቆናይሳነ ሀይቆይ ስንꬃፈ እያ ሃሮናይሳ ኑ ኤሮስ።
ROM 6:10 እ ሀይቅዳ ዎደ ናጋራስ እስቶሆ ዉርሰꬅ ጋካናዉ ሀይቅስ፥ ሽን ሀእ ደኦን ፆሳስ ደኤስ።
ROM 6:11 ሄሳዳካ፥ ህንተ ናጋራስ ሀይቅድ፥ ጎዳ ክርስቶስ የሱሳ ባጋራ ፆሳስ ደኦን ደኤይሳ ቆፕተ።
ROM 6:12 ሄሳ ግሾ፥ ህንተ፥ ህንተ አሳተꬃ አሙዋስ ኪተቶና መላ ሀይቅያ ህንተ አሳተꬃ ናጋር ሃሮፖ።
ROM 6:13 ቃስ ህንተ አሳተꬃ ናጋራ ኦꬃናዉ ጌላተꬃ ሚሸ ኦꬅድ እሞፍተ። ሽን ህንተ ሀይቆፐ ደንድድ፥ ደኦን ደእያ አሳዳ ህንተ አሳተꬃ ፆሳስ እምተ። ቃስ ህንተ ኩመꬃ አሳተꬃ ፅሎ ኦሶ ኦꬃናዉ ፆሳስ አꬅድ እምተ።
ROM 6:14 ህንተ ፆሳ አꬎ ኬሀተꬃ ጋርሳን ደኤታፐ አትሽን፥ ህገፈ ጋርሳን ደኦና ግሾ ናጋር ህንተና ሃራናዉ በሰና።
ROM 6:15 ያትን፥ ኑ ዎይጋኔ? ህገፈ ጋርሳን ግዶናሽን፥ ፆሳ አꬎ ኬሀተꬃ ጋርሳን ደእያ ግሾ ናጋራ ኦꬃነዬ? አካይ፥!
ROM 6:16 ህንተ እስ አሳስ ኪተታናዉ ህንተና አይለ ኦꬅድ እምያ ዎደ ሄ ህንተ ኪተተይሳስ አይለ ግደይሳ ኤሬታ። ሄሳዳካ፥ ህንተ ናጋራስ ኪተትኮ፥ ህንተዉ ሀይቆ ኤህያ ናጋራስ አይለ ግዴታ። ዎይኮ ህንተ ፆሳስ ኪተትኮ ፅሎተꬅ ኤህያ ፆሳስ አይለ ግዴታ።
ROM 6:17 ካሰ ህንተ ናጋራስ አይለ፥ ሽን ሀእ ህንተ ኤክዳ ቱማ ትምርትያስ ኩመꬃ ዎዛናፐ ኪተትዳ ግሾ ፆሳስ ጋላት ግዶ።
ROM 6:18 ህንተ ናጋራ አይለተꬃ ቃሾፐ ብለትድ ፅሎተꬃ አይለ ግድደታ።
ROM 6:19 ህንተ ህንተ ቆፋን ዳቡራንቾ ግድያ ግሾ፥ ታኒ ኦደስካ ገልያ ኦገን ኦዳይስ። ካሰ ህንተ፥ ህንተ አሳተꬃ ቱናነ ኢታባ ኦꬃናዉ አይለ ኦꬅድ እምዳይሳ መላ ሀእ ህንተ አሳተꬃ ጌሽ ግዳና መላ ፅሎተꬃ አይለ ኦꬅድ እምተ።
ROM 6:20 ህንተ ናጋራስ አይለትድ ደእያ ዎደ ፅሎተꬃስ ሃረተከታ።
ROM 6:21 ህንተና ሀእ ዬላይያ በን ህንተ ኢታ ኦሱዋፐ አይ ማደ ደምደቲ? ሄ ኦሶታ ዉርሰꬃይ ሀይቆ።
ROM 6:22 ሽን ህንተ ናጋራ አይለተꬃ ቃሾፐ ብለትድ፥ ፆሳስ አይለ ግድደታ። ሄስ ህንተና ጌሽ ኦꬅድ መርና ደኡዋኮ ካለꬄስ።
ROM 6:23 ናጋራ ጋተይ ሀይቆ። ሽን ፆሳይ፥ ኑ ጎዳ ክርስቶስ የሱሳ ባጋራ እምያ እሞታይ መርና ደኦ።
ROM 7:1 ታ እሻቶ፥ ታኒ ኦደይ ህገ ኤርያ አሳታሳ። ህገይ እስ አስ ፓፃ ደእያ ዎደ ኡባን እያ ሃሬስ።
ROM 7:2 ሌምሶስ፥ አዝና ገልዳ ማጫስያ እ አዝናይ ፓፃ ደእያ ዎደ ህገን እያራ ቃሸታሱ። ሽን እ አዝናይ ሀይቅኮ እያራ እያ ጫቅዳ ጫቆይ እዮ ሃረና።
ROM 7:3 ሄሳ ግሾ፥ እያ ባ አዝናይ ፓፃ ደእሽን፥ ሀራ አደ ገልኮ፥ እያ ላምዳሮ ጌተታዉሱ። ሽን እ አዝናይ ሀይቅኮ፥ ጫቆይ እዮ ሃሮና ግሾ እያ ሀራ አዝና ገልኮ፥ እያ ላምዳሮ ጌተቱኩ።
ROM 7:4 ሄሳ ግሾ፥ ታ እሻቶ፥ ህንተ ክርስቶሳ አሳተꬃ ባጋራ ህገ ዎልቃስ ሀይቅድ፥ ፆሳስ አይፈ አይፋናዉ ሀይቆፐ ደንድዳ ክርስቶሳስ ግድደታ።
ROM 7:5 ኑ አሾ አሞይ ኑና ሃርን፥ ኑ ደእያ ዎደ ህገይ ጉጅ ናጋራ ኦꬃና መላ ኑና ደንꬄስ። ኑ አሳተꬃ ግዶን ኢታ አሞተꬅ ደእያ ግሾ ኑኒ ሀይቆ አይፈ አይፋና መላ ኦꬅስ።
ROM 7:6 ሽን ሀእ ኑኒ ኑና ቃችዳ ህግያስ ሀይቅዳ ግሾ ኑኒ ህገ ቃሾፐ ብለትዳ። ሄሳ ግሾ፥ ጌሻ አያና ኦገን ፆሳስ ኪተቶስፐ አትሽን፥ ፃፈትዳ ጭማ ህግያስ ኪተቶኮ።
ROM 7:7 ያትን፥ ኑኒ ዎይጋኔ? ህገይ ባ ሁጰን ናጋሬ? ግደና! ሽን ህገይ ናጋር አይበኮ ታና ኤርስስ። ህገይ፥ “አሞቶፋ” ጎናኮ፥ አሞተꬅ አይበኮ ታኒ ኤርከ።
ROM 7:8 ሽን ታ ኡባባ አሞታና መላ ናጋር ህገ ባጋራ ታናን ኦገ ደምስ። ህገይ ባይነኮ ናጋር ሀይቅዳይሳ።
ROM 7:9 ካሰ ህገይ ባይና ዎደ ታ ፓፃ፥ ሽን ህገይ እመትዳ ዎደ ናጋር ፓፅን ታ ቃስ ሀይቃስ።
ROM 7:10 ታኒ ደኦን ዳና መላ ፆሳይ እምዳ ህገይ ታዉ ሀይቆ ኤህስ።
ROM 7:11 ናጋር ህገ ባጋራ ታና ጭምያ ኦግያ ደምድ፥ ዎꬍስ።
ROM 7:12 ሄሳ ግሾ፥ ህገይ ጌሽ፤ እያን ፃፈትዳ ኪታይካ ጌሽ፥ ፅሎነ ሎኦ።
ROM 7:13 ያትን፥ ሎኦ ግድዳባይ ታ ቦላ ሀይቆ ኤህደዬ? ግደና! ሽን ናጋር ናጋራ ግደይስ ቆንጫና መላ ሎኦባን ማደትድ ታዉ ሀይቆ ኤህስ። ሄሳ ግሾ፥ ናጋራ ናጋራተꬃይ ህገ ባጋራ አꬍድ ኤረትስ።
ROM 7:14 ኑኒ ህገይ አያናባ ግደይሳ ኤሮስ። ሽን ታኒ ናጋራስ ባይዘትዳ አሾ አስ።
ROM 7:15 ታኒ ኦꬅያባ አኬክከ፤ ታኒ ዶስያባ ኦꬃናይሳ አጋዳ ታ እፅያባ ኦꬃይስ።
ROM 7:16 ታኒ እፅያባ ኦꬅያ ግድኮ፥ ህገይ ሎኦ ግደይሳ ታ ማአይስ።
ROM 7:17 ሄሳ ግድኮ፥ ሄ ኦሱዋ ታናን ደእያ ናጋራይ ኦꬃይስፐ አትሽን፥ ታ ኦꬅከ።
ROM 7:18 ታናን፥ ሄስካ ታ አሹዋን ሎኦባይ ባይናይሳ ኤራይስ። ሎኦባ ኦꬅያ አሞተꬅ ታናን ደኤስ፥ ሽን ሎኦባ ኦꬃናዉ ዳንዳእከ።
ROM 7:19 ታኒ እፅያ ኢታባ ኦꬃይስፐ አትሽን፥ ታ ዶስያ ሎኦባ ኦꬅከ።
ROM 7:20 ታኒ እፅያባ ኦꬅያ ግድኮ፥ ሄሳ ታናን ደእያ ናጋራይ ኦꬄስፐ አትሽን፥ ኦይ ታና ግድከ።
ROM 7:21 ህዛ፥ ታ ሎኦባ ኦꬃናዉ ዶስሽን፥ ኢታባ ኦሶይ ዎጋ ግደይሳ ደማስ።
ROM 7:22 ታኒ ታ ዎዛናን ፆሳ ህግያን ኡፋይታይስ።
ROM 7:23 ሽን ታ አሳተꬃ ግዶን ደእያ ታ ቆፋ ህግያራ ኦለትያ ዱማ ህገ በአይስ። ሄ ህገይ ታ አሳተꬃ ግዶን ኦꬅያ ናጋራ ህግያስ ታና አይለ ኦꬅድ እሚስ።
ROM 7:24 ታኒ ዋንዳ ይባታ አሴ? ሀይቆስ ኤፍያ ሀ አሳተꬃፈ ታና አሻናይ ኦኔ?
ROM 7:25 ኑ ጎዳ የሱስ ክርስቶሳ ባጋራ ታና አሽያ ፆሳስ ጋላታይ ግዶ። ህዛ፥ ታኒ ታ ቆፋን ፆሳ ህግያስ ሃረታይስ፤ ሽን ታ አሳተꬃን ታና ናጋራ ኦስስያ ህግያስ ሃረታይስ።
ROM 8:1 ሄሳ ግሾ፥ ክርስቶስ የሱሳን ደኤይሳት ሀእ ፕርደቶኮና።
ROM 8:2 ክርስቶስ የሱሳ ባጋራ ኑስ ደኦ እምያ ጌሻ አያና ህገይ፥ ታና ናጋራነ ሀይቆ ህገ አይለተꬃፈ ከስስ።
ROM 8:3 ኑ ናጋራ አሳተꬃ ጋሶን፥ ህገይ ዳቡራንቾ ግድያ ግሾ ኑና አሻናዉ ዳንዳእቤና። ፆሳይ ባ ናኣ ናጋራንቾ አሳ ሌምሶን ናጋራስ ያርሾ ግዳና መላ ኪትድ ሄሳ ኦꬅስ። ያትድ፥ ፆሳይ ክርስቶሳ አሹዋ ባጋራ ናጋራ፥ ናጋራንቾ አሳ ግዶን ፕርድስ።
ROM 8:4 ፆሳይ ሄሳ ኦꬅዳይ፥ ኑ አሾ አሞይ ኮየይሳዳ ግዶናሽን፥ ጌሻ አያናይ ኮየይሳዳ ደእያ ኑ ቦላ ህግያ ፅሎ ኪታይ ፖለታና መላሳ።
ROM 8:5 ባንታ አሾ አሙዋ ካልድ ደኤይሳት ባንታና ኡፋይስያባ ቆፖሶና። ሽን ጌሻ አያና ሸነን ደኤይሳት ጌሻ አያና ኡፋይስያባ ቆፖሶና።
ROM 8:6 ኑ ቆፋይ አሾ አሞስ ሃረትኮ ሀይቆ ኤሄስ፥ ሽን አያና አሞስ ሃረትኮ ደኦነ ሳሮተꬅ ኤሄስ።
ROM 8:7 አሾ አሞስ ሃረትያ አስ ፆሳ ህግያስ ኪተታናዉ ኮዮና ግሾነ ኪተታናዉ ዳንዳኦና ግሾ፥ ፆሳራ ሞርከ።
ROM 8:8 ባንታ አሾ አሙዋስ ሃረተይሳት ፆሳ ኡፋይሳናዉ ዳንዳኦኮና።
ROM 8:9 ሽን ፆሳ አያናይ ህንተናን ደእኮነ ህንተና ሃርኮ፥ ህንተ አያና ሸነን ደኤታፐ አትሽን፥ ህንተ አሾ አሙዋስ ሃረተከታ። ክርስቶሳ አያናይ ባይና ኦንካ ክርስቶሳባ ግደና።
ROM 8:10 ሽን ክርስቶስ ህንተናን ደእኮ፥ ህንተ አሳተꬃይ ናጋራ ጋሶን ሀይቅዳይሳ። ሽን ህንተ አያናይ ፅሎተꬃ ጋሶን ደኦን ደኤስ።
ROM 8:11 ሽን የሱሳ ሀይቆፐ ደንꬅዳ ፆሳ አያናይ ህንተናን ደእኮ፥ ክርስቶሳ ሀይቆፐ ደንꬅዳ ፆሳይ፥ ህንተናን ደእያ ባ ጌሻ አያናን ሀይቅያ ህንተ አሳተꬃስ ደኦ እማና።
ROM 8:12 ህዛ፥ ታ እሻቶ፥ ኑኒ ኑ አሾ አሙዋ ካልድ ዳናዉ በሰና።
ROM 8:13 ህንተ፥ ህንተ አሾ አሙዋስ ደእኮ ሀይቃና፥ ሽን ጌሻ አያና ዎልቃን ናጋራ ኦሱዋ ዎꬍኮ ህንተ ደኦን ዳና።
ROM 8:14 ፆሳ አያናይ ካለꬅያ ኡባይ ፆሳ ናይታ።
ROM 8:15 ኑኒ፥ “አባ፥ ታ አዋዉ” ያግድ ፄግያ፥ ፆሳ ናይታ ኦꬅያ ጌሻ አያና ኤክዳፐ አትሽን፥ ዛሪድ ያሻን ዳናዉ አይለ ኦꬅያ አያና ኤክቦኮ።
ROM 8:16 ፆሳ አያናይ ኑ አያናራ ግድድ ኑኒ ፆሳ ናይታ ግደይሳ ማርካቴስ።
ROM 8:17 ኑኒ እያ ናይታ ግድኮ ፆሳ አንጁዋ ላታና፤ ክርስቶሳራ ዎላ ሄ አንጁዋ ላታና። ቃስ ኑኒ ክርስቶሳራ መቱዋ ኤክኮ እያራ ዎላ እያ ቦንቹዋን ሻከታና።
ROM 8:18 ኑኒ ሀእ ዋየትያ ዋይያ፥ ስንꬃፈ ኑስ ቆንጫና ቦንቹዋራ ጋꬅ በእኮ፥ ግንሳናዉ ዳንዳኤተና ጋዳ ቆፓይስ።
ROM 8:19 መተꬃ ኡባይ ፆሳ ናይታ ቆንጨꬃ ዳሮ ላሞትድ ናጎሶና።
ROM 8:20 መተꬃ ኡባይ ሀዳ ግድስ፤ ሄስካ፥ መተꬃ ዶሮን ግዶናሽን፥ ኡፋይሳን ናጋና መላ ኦꬅዳ ፆሳ ሸነን ሀንስ።
ROM 8:21 መተꬃይ ባ ሁጰን ꬋዮ አይለተꬃፈ ዎዘትድ፥ ፆሳ ናይታራ ዎላ ቦንቾ ላአ ሻከታና።
ROM 8:22 መተꬃይ እስፈ ሀኖ ጋካናዉ እቀꬅ ኦይክዳ ማጫሳዳ ኦለንነ ኡንአን ደኤይሳ ኑ ኤሮስ።
ROM 8:23 ቃስ ሄሳ መተꬃ ፃላላ ግዶናሽን፥ ጌሻ አያና ባይራ እሞታዳ ኤክዳ ኑኒ፥ ኑ ሁጰን ኑ አሳተꬃስ ዎዞ ግድዳ ፆሳ ናይታ ግዳና ኡፋይሳ ናግሸ ኑ አሳተꬃን ኦሎስ።
ROM 8:24 ሀ ኡፋይሳን ኑኒ አትዳ። ሽን ኑኒ ኡፋይስ ኦꬅያባይ በንትያ ግድኮ ሄሳ ኦን ኡፋይስ ኦꬂ?
ROM 8:25 ሽን ኑ በኦናባ ደማና ግድ ኡፋይሳን ናግኮ ሄሳ ዳንዳአን ናጎስ።
ROM 8:26 ሄሳዳ ጌሻ አያናይ ኑ ዳቡራን ማዴስ። ኑኒ ፆሳ ዋት ዎሳናዉ በሲያኮ ኤሮኮ፥ ሽን ጌሻ አያናይ ባ ሁጰን፥ አስ ኦዳናዉ ዳንዳኤቶና ቃላን ኑስ ጋናቴስ።
ROM 8:27 ቃስ አሳ ዎዛና ኤርያ ፆሳይ ጌሻ አያና ቆፋይ አይበኮ ኤሬስ። ጌሻ አያናይ ፆሳ ሸንያዳ ጌሻታስ ጋናቴስ።
ROM 8:28 ፆሳ ሲቀይሳታስነ እያ ሸንያዳ ፄገትዳይሳታስ ፆሳይ ኡባ ሎኦስ ኦይሳ ኤሮስ።
ROM 8:29 ፆሳይ ኮይሮትድ ኤርዳይሳት ባ ናኣ ዳናና መላነ ናአይካ አማነይሳታ ግዶን ባይራ ግዳና መላ ኤንታ ዱማይድ ዎꬅስ።
ROM 8:30 ፆሳይ ኮይሮትድ ዱማይዳይሳታ ፄግስ፤ ሄ ፄግዳይሳታ ፅልስስ፤ ሄ ፅልስዳይሳታ ቃስ ቦንችስ።
ROM 8:31 ያትን፥ ኑ ሀ ኡባስ ዎይጋኔ? ፆሳይ ኑ ባጋ ግድኮ ኑራ ኦነ ኤቀታናይ?
ROM 8:32 እ ሀር አቶሽን፥ ባ ናኣስ ቃቶናሽን፥ ኑ ግሾ አꬅድ እሚስ። ያትን፥ ባ ናኣ ኑስ አꬅድ እምዳይስ ዋንድ ኡባባ ጮ እመኔ?
ROM 8:33 ፆሳይ ኤንታና ፅልስዳ ግሾ እ ዶርዳይሳታ ኦነ ሞታናይ?
ROM 8:34 ያትን፥ ኤንታ ቦላ ፕርዳናዉ ዳንዳኤይ ኦኔ? ኦንካ ባዋ። ሀይቆፐ ደንድድ ፆሳ ኡሻቻን ኡትዳ፥ ክርስቶስ የሱሲ፥ እ ኑስ ጋናቴስ።
ROM 8:35 ህዛ፥ ኑና ክርስቶሳ ሲቁዋፐ ሻካናይ ኦኔ? ዋየየ ዎይኮ መቶየ ዎይኮ ጎደየ ዎይኮ ኮሸየ ዎይኮ ካሎተየ ዎይኮ ያሸየ ዎይኮ ኦለዬ?
ROM 8:36 ጌሻ ማፃፋን፥ “ኑኒ ነ ግሾ ኩመꬃ ጋላስ ሀይቆስ፤ ሹካስ ኤፍያ ዶርሳዳ ታይበትዳ” ጌተትድ ፃፈትዳይሳ መላ ግድስ።
ROM 8:37 ሽን ኑኒ፥ ኑና ሲቅዳ ክርስቶሳን ሀ ኡባ ፖሎ ፆኖስ።
ROM 8:38 ሄሳ ግሾ፥ ሀይቆ ግድን ደኦ ግድን ኪታንቾታ ግድን ሃረይሳታ ግድን ሀእ ደኤይሳ ግድን ስንꬃፈ ያናይሳ ግድን ዎልቃማታ ግድን፥
ROM 8:39 ሳሎ ዎልቃ ግድን ሳአ ዎልቃ ግድን አይ መተꬅ ግድን ኑ ጎዳ፥ ክርስቶስ የሱሳን ደእያ ፆሳ ሲቁዋፐ ኑና ሻካናዉ ዳንዳኦናይሳ ታኒ ኤራስ።
ROM 9:1 ታኒ ክርስቶሳን ቱማ ኦዳይስ፥ ዎርዶትከ። ጌሻ አያናይ ካለꬅያ ታ ካሀይ ታኒ ዎርዶቶናይሳ ታዉ ማርካቴስ።
ROM 9:2 ታ ዎዛናን እስራኤለታስ ዳሮ ቃታይስነ ቃማ ጋላስ ቆፓይስ።
ROM 9:3 ታኒ፥ ታ እሻታ ግሾ፥ ክርስቶሳፐ ሻከታዳ ፆሳ ባደꬃፈ ጋርሳን ደእዳኮ ዶሳይስሽን።
ROM 9:4 ኤንቲ እስራኤለታ፥ ፆሳይ ኤንታ ባ ናይታ ኦꬅስ፥ ባ ቦንቹዋ ኤንታዉ ቆንጭስስ። ኤንታራ ጫቅስ፤ ህግያ ኤንታዉ እሚስ። ኤንቲ ፆሳ ጎይናና ቱማ ኦግያ በስስ፤ ፆሳይ ኡፋይሳ ቃላ ኤንታዉ እሚስ።
ROM 9:5 ኤንቲ የለተꬃን ማይዛታ ኮቸ፤ ቃስ ክርስቶስ አሾን ኤንታ ኮቸ ግድድ ይስ። ኡባፈ ቦላ ግድዳ ፆሳይ መርናዉ ጋላተቶ። አምንእ!
ROM 9:6 ግዶሽን፥ ፆሳይ ገልዳ ቃላይ ፖለቶና አትስ ጉሱ ግደና። እስራኤለ አሳ ኡባይ ፆሳ አስ ግዶኮና።
ROM 9:7 ቃስ አብራሃመ ዛረ ኡባይ አብራሃመ ናይታ ግዶኮና። ፆሳይ አብራሃመስ፥ “ነ ኮቻይ ይሳቃ ባጋራ ፄገታና” ያግስ።
ROM 9:8 ሄሳ ጉሳይ አሾን የለትዳ ናይት ኡባይ ፆሳ ናይታ ግዶኮና። ሽን ቱማ እስራኤለ ናይት ፆሳይ አብራሃመስ ገልዳ ቃላዳ የለትዳ ናይታ።
ROM 9:9 ፆሳይ እማና ግድ ገልዳ ቃላይ፥ “ታኒ ዎንቶ ላይꬅ ሀኖደ ያና፤ ሳራካ አደ ናአ የላና” ያገይሳ።
ROM 9:10 ሄሳ ፃላላ ግዶናሽን፥ እርብቅነ ይሳቅ የልዳ መንተ አደ ናይታባ አኬክተ።
ROM 9:11 ኤንቲ የለታናፐ ዎይኮ ኢታ ዎይኮ ሎኦ ኦꬃናፐ ስን ፆሳ ዶሮይ ኦሶን ግዶናሽን ፄሳን ግደይሳ ቆንጭሳናዉ፥
ROM 9:12 “ባይራይ ካሉዋስ ኪተታና” ያግድ ጎዳይ እርብቃስ ኦድስ።
ROM 9:13 ሄስካ ጌሻ ማፃፋን፥ “ያይቆባ ዶሳስ፥ ኤሳዌ እፃስ” ጌተትድ ፃፈትስ።
ROM 9:14 ያትን፥ ኑኒ ዎይጋኔ? ፆሳይ አሰ አሳፐ ሻክዬ? ግደና።
ROM 9:15 ጎዳይ ሙሰኮ፥ “ታ ማራናዉ ኮይዳይሳታ ማራና፤ ታ ቃታናዉ ኮይዳይሳታስ ቃታና” ያግስ።
ROM 9:16 ህዛ፥ ፆሳ ዶሮይ አሳ ሸነን ዎይኮ ኦሶን ግዶናሽን እያ ማሮተꬃና።
ROM 9:17 ጌሻ ማፃፋን፥ ግብፀ ካዋኮ፥ “ታኒ፥ ታ ዎልቃ ነናን በሳናዉነ ታ ሱንꬃይ አላመ ኡባን ኤረታና መላ ሄሳስ ነና ካዎꬃስ” ጌተትድ ፃፈትስ።
ROM 9:18 ህዛ፥ ፆሳይ ማራናዉ ኮየይሳ ማሬስ፤ ዎዛና ሙምሳናዉ ኮየይሳ ዎዛና ሙምሴስ።
ROM 9:19 ህንተፈ እሶይ፥ “ያትን፥ ፆሳይ አሰ ኢታ ኦሶ ግሾ አይስ ቦሪ? ፆሳ ሸንያ እፃስ ጋናይ ኦኔ?” ያግድ ኦይቻናዉ ዳንዳኤስ።
ROM 9:20 ሽን ታ እሻዉ፥ ፆሳራ ፓላማናዉ ኔኒ ኦኔ? ኡርቃፈ መትዳ ሚሸይ ባና መꬍዳይሳ፥ “ታና ሀይሳዳ ኦꬃዳ አይስ መꬋዲ?” ግድ ኦይቻናዉ ዳንዳኢ?
ROM 9:21 ዎይኮ ኡርቃ መይስ እስ ኡርቃፈ እሱዋ ቦንቾ ሚሸ፥ ሀንኩዋ ቃስ ቶሸ ሚሸ ኦꬅድ መꬋናዉ ማት ባዌ?
ROM 9:22 ፆሳይ ባ ሀንቁዋ በሳናዉነ ባ ዎልቃ ኤርሳናዉ ኮይድ፥ ፕርዳስ ጊግዳ ሀንቆ ናይታ ዳሮ ገንጫን ዳንዳእዳኮ ነ አይ ኤራይ?
ROM 9:23 ሄሳ እ ኦꬅዳይ ኮይሮትድ ቦንቾስ ጊግስዳ፥ ባ ዶርዳ ናይታስ ባ ቦንቹዋ ቆንጭሳናሳ።
ROM 9:24 አይሁደ ግድን፥ ዎይኮ አይሁደ ግዶና አሳ ኡባይ ፆሳን ዶረትዳ።
ROM 9:25 ናብያ ሆሰ ማፃፋን፥ “ታ አሰ ግዶናይሳታ፥ ‘ታ አሰ’ ጋዳ ፄጋና። ታ ሲቃቦና ደርያ፥ ‘ሲቀትዳይሳታ’ ጋዳ ፄጋና።
ROM 9:26 ኤንቲ፥ ‘ታ አሰ ግደከታ’ ጌተትድ ፄገትዳ በሳን፥ ‘ደኦ ፆሳ ናይታ’ ጌተትድ ፄገታና” ያጌስ።
ROM 9:27 ናብያ እሳያስ እስራኤለ አሳባ፥ “እስራኤለ አሳይ አባ ጋፃን ደእያ ሻፈዳ ዳርኮካ፥ ኤንታፈ ጉꬃ አሳ ፃላል አታና።
ROM 9:28 ጎዳይ አላምያ ኡባ ቦላ ኤለስድ ፖሎ ፕርዳ ፕርዳና።”
ROM 9:29 ቃስካ እሳያስ፥ “ኡባፈ ዎልቃማ ጎዳይ ኑስ ጉꬃ ኮቸ አሾናባ ግድያኮ፥ ኑኒ ሶዶመነ ጋሞራ ካታማዳ ꬋያናሽን” ያግድ ኮይሮትድ ኦድስ።
ROM 9:30 ያትን፥ ኑ ዎይጋኔ? ፅሎተꬃ ኮይቦና አይሁደ ግዶና አሳይ አማኖን ፅሎተꬅ ደምዶሶና።
ROM 9:31 ሽን ፅሎተꬃኮ ጋꬅያ ህገይ ደእያ እስራኤለ አሳይ ፅሎተꬅ ደምቦኮና።
ROM 9:32 አይስ ደምቦኮና? ኤንቲ ፅሎተꬃ አማኖን ግዶናሽን፥ ኦሶን ኤካናዉ ኮይዳ ግሾሳ። ያንያ ግሾ፥ ኤንቲ፥ “ꬉብያ ሹቻን” ꬉበትዶሶና።
ROM 9:33 ጌሻ ማፃፋን፥ “ታኒ ፅዮነን ꬉቢ ኩንድስያ ሹቻ ዎꬃና። እያን አማንያ ኦንካ ዬላተና” ጌተትድ ፃፈትስ።
ROM 10:1 ታ እሻቶ፥ ታ ኩመꬃ ዎዛናን ታ አሞተይነ ፆሰ ዎሰይ እስራኤለይ አታና መላሳ።
ROM 10:2 ኤንቲ ፆሳስ ምሸቶሶናሽን፥ ቱማ ኤራተꬃን ምሸቶናይሳ ታ ማርካታይስ።
ROM 10:3 ኤንቲ ፆሳ ፅሎተꬃ ኦግያ ኤሮና እፅድ፥ ባንታ ሁጰ ፅሎተꬃ ካልዶሶናፐ አትሽን፥ ፆሳ ፅሎተꬃ ኮይቦኮና።
ROM 10:4 አስ ኡባይ አማኖን ፅላና መላ ክርስቶስ ህግያ ፖልስ።
ROM 10:5 አስ ህገ ናግድ ኤክያ ፅሎተꬃባ ሙሰይ ፃፍሸ፥ “ህገ ናግያ ኦንካ ሄ ህግያ ናግዳ መላ ደኤስ” ያግስ።
ROM 10:6 ሽን አማኖን ኤክያ ፅሎተꬃባ ጌተትዳይ ሀይሳ፦ “ነ ዎዛናን፥ ‘ኦን ሳሎ ከያኔ?’ ያጎፓ፤ ሄስ ክርስቶሳ ዎꬍሳናሳ።
ROM 10:7 ዎይኮ፥ ‘ዱገ ሳአ ጋርስ ዎꬋናይ ኦኔ?’ ጎፓ፤ ሄስ ክርስቶሳ ዱፎፐ ከሳናሳ።
ROM 10:8 ሽን ያግድ ፃፈትስ፦ ‘ፆሳ ቃላይ ነ ማታና፤ ነ ዶናንነ ነ ዎዛናን ደኤስ’ ኑኒ ህንተዉ ኦድያ አማኖ ቃላይ ሀይሳ።
ROM 10:9 “የሱሲ ጎዳ” ጋዳ ነ ዶናን ማርካትኮነ ፆሳይ እያ ሀይቆፐ ደንꬅዳይሳ ነ ዎዛናን አማንኮ፥ ነ አታና።
ROM 10:10 አስ ባ ዎዛናን አማንድ ፅሌስ፤ ባ ዶናን ማርካትድ አቴስ።
ROM 10:11 ጌሻ ማፃፋይ፥ “እያን አማንያ ኦንካ ዬላተና” ያጌስ።
ROM 10:12 እስ ፆሳይ ኡባ ጎዳ ግድያ ግሾ፥ አይሁደታ ግዶንነ አይሁደ ግዶና አሳ ግዶን ዱማተꬅ ባዋ። እ ባና ፄግያ ኡባስ ዳሮ ኬሀ።
ROM 10:13 ጌሻ ማፃፋይ፥ “ጎዳ ሱንꬃ ፄግያ ኦንካ አታና” ያጌስ።
ROM 10:14 ያትን፥ ኤንቲ አማኖና ደእሸ ዋንድ እያ ፄጋናዉ ዳንዳኦና? ኤንቲ እያባ ስኦና ደእሸ ዋትድ እያ አማናናዉ ዳንዳኦና? ቃስ ኤንታዉ ቃላ ኦድያ አስ ባይና ደእሽን፥ ዋንድ ስአናዉ ዳንዳኦና?
ROM 10:15 ኪተትዳ አስ ባይና ደእሽን፥ ቃላይ ዋንድ ኦደታናዉ ዳንዳኢ? ጌሻ ማፃፋን፥ “ኡፋይሳ ዎንገላ ኦድያ አሳ ቶሆት ዋንድ ሎኦና!” ያግድ ፃፈትስ።
ROM 10:16 ሽን እሳያስ፥ “ጎዳዉ፥ ኑ ማርካተꬃ ኦን አማንዴ?” ያግዳይሳዳ፥ ኡባይ ዎንገላ አማንቦኮና።
ROM 10:17 ሄሳ ግሾ፥ አማኖይ ስሳፈ ዬስ፤ ስስ ክርስቶሳ ቃላፐ ዬስ።
ROM 10:18 ግዶሽን፥ እስራኤለ አሳይ ቃላ ስእቦኮና ጉሰዬ? አካይ፥ ስእዶሶና። ጌሻ ማፃፋን፥ “ኤንታ ቃላይ ቢታ ኡባን ስኤትስ፥ ኤንታ ኦዳይ ሳኣ ጋፃ ጋክስ” ያገትስ።
ROM 10:19 ሽን እስራኤለ አሳይ ኤርቦኮና ጉሰዬ? ሙሰይ ካሰ፥ “ታኒ ህንተና ለቀትዳ አሳን ቂሮይሳና፤ ቃስ ኤያ አሳን ህንተና ይሎያና” ያግስ።
ROM 10:20 ቃስ እሳያስ፥ “ታና ኮይቦና አሳስ በንታስ፤ ታና ኦይችቦና አሳስ ቆንጫስ” ያግድ ያዮና ኦድስ።
ROM 10:21 ሽን እሳያስ እስራኤለታባ ኦድሸ፥ “ኡባ ጋላስ ኪተቶና አሳስነ ታና እፅያ አሳስ ታ ኩሽያ ምጫስ” ያጌስ።
ROM 11:1 አነ ታ ኦይቻይስ፦ ያትን፥ ፆሳይ ባ አሳ አግደዬ? አግቤና! ታኒ ታ ሁጰን እስራኤለ፤ አብራሃመ ሼሽ፤ ብንያመ ኮቸ።
ROM 11:2 ፆሳይ ኮይሮ ዶርዳ ባ አሳታ የገና። ጌሻ ማፃፋን፥ ኤልያስ እስራኤለታ ፆሳ ስንꬃን ዋት ሞትዳኮ፥ ህንተ ኤረከቲ?
ROM 11:3 ኤልያስ፥ “ጎዳዉ፥ ኤንቲ ነ ናበታ ዎꬍዶሶና፥ ነ ያርሾ በሳካ ላልዶሶና። ታ ታርካ አታስ፤ ኤንቲ ታናካ ዎꬋናዉ ኮዮሶና” ያግስ።
ROM 11:4 ፆሳይ እያዉ ዎይግድ ዛርዴ? “ባኣለ ጌተትያ ኤቃስ ጎይንቦና ላፑን ሙኩሉ አሳ ታዉ አሻስ” ያግስ።
ROM 11:5 ሄሳዳካ፥ ሀ ዎድያን ፆሳይ ባ አꬎ ኬሀተꬃን ዶርዳ ጉꬃ እስራኤለት ደኦሶና።
ROM 11:6 እ ኤንታ ዶርዳይ ባ አꬎ ኬሀተꬃናፐ አትሽን፥ ኤንታ ኦሶን ግደና። ዶሮይ ኦሶን ግድኮ፥ እያ አꬎ ኬሀተꬃይ ቱማ አꬎ ኬሀተꬅ ግደና።
ROM 11:7 ያትን፥ ዋንዴ? እስራኤለት ባንታ ኮያባ ደምቦኮና፥ ሽን ፆሳይ ዶርዳ ጉꬃት ደምዶሶና። አትዳይሳት ባንታ ዎዛና ሙምስዶሶና።
ROM 11:8 ሄስካ፥ ጌሻ ማፃፋን፥ “ኤንቲ ባንታ አይፍያን በኦናዳ ባንታ ሀይꬃን ስኦናዳ፥ ሀኖ ጋካናዉ ኤንታዉ ፆሳይ አዛላ አያና እሚስ” ጌተትድ ፃፈትዳይሳዳ ሀንስ።
ROM 11:9 ቃስ ዳዊቲ፥ “ኤንቲ ምያ ጋይታይ ኤንታ ፅሄዳ ኦይኮ፤ ኤንታ ጉፋንꬅያ አፎ ግዶ፤ ኤንታ ኢታተꬃይ ኤንታ ቦላ ጋኮ።
ROM 11:10 ኤንቲ ፄሎናዳ ኤንታ አይፈይ ጎዘቶ፤ ኡባ ዎደ መቶን ኤንቲ ኩንድ ደኦ” ያግስ።
ROM 11:11 ያትን፥ አይሁደት ዛር ደንዶና መላ ኩንድዶናዬ? ግደና! ኤንታ ኩንደꬃይ አይሁደ ግዶና አሳይ አታና መላ ጋሶ ግድስ። ሄስካ አይሁደት ኤንታ ቦላ ቃናታናዳ ኦꬅስ።
ROM 11:12 አይሁደታ ናጋራይ አላምያስ ዳሮ አንጆ ኤህስ፤ ቃስ ኤንታ ኩንደꬃይ አይሁደ ግዶና አሳስ ዳሮ አንጆ ግድስ። ያትን፥ ዶረትዳ አይሁደት ኩመꬅ አትያ ዎደ አንጆይ አይ መላ ዳራንዴሻ!
ROM 11:13 ታኒ፥ ሀእ ህንተዉ አይሁደ ግዶና አሳስ ኦዳይስ። አይሁደ ግዶና አሳስ ሀዋረ ግዳዳ ኦይሳን ታኒ ዳሮ ጬቀታይስ።
ROM 11:14 ታ ሄሳ ኦꬅዳይ ታዉ አሾን ኮቸ ግድዳ እስራኤለታ ቂሮያዳ ኤንታፈ ጉꬃታ አሻናሳ።
ROM 11:15 ፆሳይ ኤንታ የግዳ ዎደ፥ ሀ አላመይ ፆሳራ ስገትስ። ፆሳይ ኤንታ ሺሽ ኤክያ ዎደ ሀይቅዳ አስ ሀይቆፐ ደንድዳ መላ ግዴስ።
ROM 11:16 ኮይሮ መንꬅዳ ባሶ ኡይꬃይ ፆሳስ ያርሸትድ ጌሽ ግድኮ፥ ሙመ ኡይꬃይካ ጌሽ። ምꬃስ ፃጶይ ጌሽ ግድኮ፥ ታሸይካ ጌሽ።
ROM 11:17 ጋደን ቶክዳ ሻማሆ ታሸ ግድዳ አይሁደት ካረትን፥ ህንተ ባዞን ዶልዳ ሻማሆ ታሸ ግድዳ አይሁደ ግዶናይሳት ኤንታ በሳን ꬋንትድ ኤንታ አንጁዋነ ዱረተꬃ ሻከትደታ።
ROM 11:18 ህዛ፥ ህንተ ታሸዳ ካረትድ ዎꬍዳ አይሁደታ ቦላ ኦቶርቶፍተ። ህንተ ኦቶርትያባ ግድኮ፥ ፃጶይ ህንተና ቶከስፐ አትሽን፥ ህንተ ፃጱዋ ቶኮናይሳ አኬክተ።
ROM 11:19 ኔኒ፥ “ሄ ታሸት ካረትዳይ፥ ታ ኤንታ በሳን ꬋንታና መላሳ” ጋናዉ ዳንዳኣሳ።
ROM 11:20 ሄስ ቱማ። ኤንቲ አማንቦና ግሾ ካረትዶሶና። ኔኒ አማንዳ ግሾ ሄ በሳን ኤቃዳሳ። ኔኒ ያያናዉ በሴስፐ አትሽን፥ ኦቶራናዉ በሰና።
ROM 11:21 ፆሳይ መꬎን ታሸ ግድዳ አይሁደታስ ቃቶና እፅኮ ህንተዉካ ቃተና።
ROM 11:22 ህዛ፥ ፆሳይ አይ መላ ኬሄኮነ አይ መላ ያሽያኮ በአ። እ ያሸይ ኪተቶናይሳታ፥ ቃስ እ ኬሄይ እያ አማንድ ምንድ ኤቅዳይሳታሳ። ምንድ ኤቆና እፅኮ ህንተካ ካረታና።
ROM 11:23 አይሁደት አማንኮ፥ ካሰ ኤንቲ ደእያ በሳ ስማና። ፆሳይ ኤንታ ዛሪድ፥ ዎꬃናዉ ዳንዳኤስ።
ROM 11:24 ህንተና ባዞን ደእያ ሻማሆ ግድዳ አይሁደ ግዶናይሳታ ቃንፅድ፥ ጋደን ቶከትዳ ሻማሁዋ ቦላ ህንተና ቶክኮ፥ መꬎን ጋደ ሻማሆ ግድዳ አይሁደታ ባንታ ኮይሮ በሳን ዛር ቶካናዉ ዋንድ ዳንዳኤተኔ?
ROM 11:25 ታ እሻቶ፥ ህንተ ህንተና ኤራንቾ ግድ ጬቀቶፍተ። ታ ህንተዉ ኦድያ እስ ፁር ደኤስ። ሄስካ እስራኤለታፐ ባጋይ ስኦና እፅዳይ ዉርሰꬅ ጋካናዉ ግዶናሽን፥ አታናዉ ደእያ አይሁደ ግዶና አሳይ ኩመꬅ ፆሳኮ ያና ጋካናሳ።
ROM 11:26 ሄሳዳካ፥ እስራኤለ አሳ ኡባይ አታና። ጌሻ ማፃፋን፥ “ኑና አሸይስ ፅዮነፐ ያና፤ ያይቆባ ኮቻፈ ኢታ ኡባ ድጋና።
ROM 11:27 ታኒ ኤንታ ናጋራ አቶ ግያ ዎደ ኤንታራ ጫቃና ጫቆይ ሀይሳ” ጌተትድ ፃፈትስ።
ROM 11:28 አይሁደት ዎንገላ ኤኮና እፅድ፥ ህንተ ግሾ ፆሳራ ሞርከ ግድዶሶና። ግዶሽን፥ ሀእካ ኤንቲ ዶረትዳይሳታ፥ ፆሳይ ኤንታ አዋታ ግሾ ኤንታ ዶሴስ።
ROM 11:29 ፆሳይ ባ እሙዋንነ ባ ፄሳን ቂሮተና።
ROM 11:30 ህንተ አይሁደ ግዶናይሳት ካሰ ፆሳስ ኪተትበከታ። ሽን ሀእ አይሁደት ኪተቶና እፅን፥ ህንተ ፆሳ ማሮተꬃ ኤክደታ።
ROM 11:31 ሄሳዳካ፥ ህንተ ኤክዳ ማሮተꬃ አይሁደት ኤካና መላ ሀእ ፆሳስ ኪተቶና እፅዶሶና።
ROM 11:32 ፆሳይ አሳ ኡባ ባ ማሮተꬃ በሳናዉ ኮይድ፥ አስ ኡባይ ኪተቶና እፃና መላ ኦꬅስ።
ROM 11:33 ፆሳ ዱረተꬃ፥ ጭንጫተꬃነ ኤራተꬃ አኬክድ ኦዳናይ ኦኔ? እያ ፕርዳይ ፕልገተና፥ እያ ኦገይ ኤረተና።
ROM 11:34 ጌሻ ማፃፋን፥ “ጎዳ ቆፋ ኤረይ ኦኔ? እያ ዞራናዉ ዳንዳኤይ ኦኔ?
ROM 11:35 ፆሳስ ታልኤይነ ታልእያ ዛሪድ ኤከይ ኦኔ?” ያጌስ።
ROM 11:36 ኡባ እ መꬍስ፤ ኡባይ እያን ደኤስ፤ ኡባይ እያ ቦንቾሳ። ፆሳስ መርናዉ ቦንቾይ ግዶ። አምንእ።
ROM 12:1 ህዛ፥ ታ እሻቶ፥ ህንተ፥ ህንተ አሳተꬃ ፆሳ ኡፋይስያ፥ ደኦነ ጌሻ ያርሾ ኦꬅድ፥ እማና መላ ታኒ ህንተና ፆሳ ማሮተꬃን ዎሳይስ። ፆሳ ህንተ ጎይናናዉ በሲያ ቱማ ኦገይ ሄሳ።
ROM 12:2 ሎኦ፥ ኡፋይሰይሳነ ፖሎ ግድዳ ፆሳ ሸንያ ህንተ ሻክ ኤራናዉ ህንተ ቆፋን ላመትተፐ አትሽን፥ ሀ አላምያ ዳኖፕተ።
ROM 12:3 ፆሳይ ህንተ እሱዋስ እሱዋስ እምዳ አማኑዋ መላ ዎዛናማ አሳዳ ቆፕተ። ቆፓናዉ በሰይሳፈ አꬅድ ህንተና ዱማይድ፥ ኦቶሮን ቆፖፍተ ጋዳ ታዉ እመትዳ አꬎ ኬሀተꬃን ህንተዉ ኦዳይስ።
ROM 12:4 ኑ እስ አሳተꬃ ግዶን ዱማ ዱማ ክፍለት ደኦሶና፤ ሄ ዱማ ዱማ ክፍለታስ ዱማ ዱማ ኦሶይ ደኤስ።
ROM 12:5 ሄሳዳ፥ ኑኒ ዳሮ አስ ግድኮካ፥ ክርስቶሳን እስ አሳተꬅ ግድዳ። ኑኒ እስ አሳተꬅ ግድድ ዱማ ዱማ ክፍለት እሶይ እሱዋራ ኦይከትዳ።
ROM 12:6 ኑስ እመትዳ አꬎ ኬሀተꬃን ዱማ ዱማ እሞታት ደኦሶና። ኑ እሞይ ትንብት ኦዶ ግድኮ፥ ኑስ ደእያ አማኑዋ መላ ኦዳናዉ በሴስ።
ROM 12:7 ኑ እሞይ ሀራታ ማደ ግድኮ፥ ሄ ኦሱዋን ምናናዉ በሴስ፤ ታማርሶ ግድኮ፥ ሄ ታማርሱዋን ምናናዉ በሴስ።
ROM 12:8 ኑ እሞይ ሀራታ ምንꬆ ግድኮ፥ ምንድ ምንꬃናዉ በሴስ። ኑ እሞይ ኑስ ደእያባፐ ሀራታስ እሞ ግድኮ፥ ዎዛናፐ እማናዉ በሴስ። ኑ እሞይ አይሶ ግድኮ፥ ምንድ አይሳናዉ በሴስ። ኑ እሞይ ሀራታስ ኬሆ ግድኮ፥ ኡፋይሳን ኬሀናዉ በሴስ።
ROM 12:9 ህንተ ሲቆይ ቆፐ ቆሞን ግዳናዉ በሰና። ኢታባ እፅተ፤ ሎኦባ ምንꬅድ ኦይክተ።
ROM 12:10 እሶይ እሱዋራ እሻዳ ሲቀትተ፤ እሶይ እሱዋ ቦንችተ።
ROM 12:11 አዛሎፍተ፤ ህንተ አያናን ምንድ፥ ጎዳስ ኦꬅተ።
ROM 12:12 ፆሳይ እምዳ ኡፋይሳን ኡፋይትተ፤ መቱዋ ዳንዳእተ፤ ኡባ ዎደ ፆሳ ዎስተ።
ROM 12:13 አማንያ ጌሻታ ኮሽያባን ማድተ፤ እማꬃታ ሞክተ።
ROM 12:14 ህንተና ጎደይሳታ አንጅተ፤ አንጅተፐ አትሽን፥ ባዶፍተ።
ROM 12:15 ኡፋይተይሳታራ ኡፋይትተ፤ ዬከይሳታራ ዬክተ።
ROM 12:16 እሶይ እሱዋራ እስ ቆፋን ደእተ። ኦቶሮ ቆፋ አግድ፥ ህንተና ካዉሽድ፥ ካዉሻ ኦሶ ኦꬅተ። ህንተ ህንተና ጭንጫ ግድ ቆፖፍተ።
ROM 12:17 ኦንካ ህንተዉ ኢታባ ኦꬅኮ፥ ሄ ኡራስ ኢታ ዛሮፕተ። አሳ ኡባ ስንꬃን ናሽስያ ሎኦ ኦሶ ኦꬅተ።
ROM 12:18 አሳ ኡባራ ሳሮን ዳናዉ ህንተዉ ዳንዳኤትያ ኡባ ኦꬅተ።
ROM 12:19 ታ እሻቶ፥ ህንተ፥ ህንተ ሁጰን አሳስ ሀሎ ከዮፕተ። ፆሳይ ሀሎ ከሳና መላ እያዉ አጋግተ። ጌሻ ማፃፋን፥ “ታኒ ሀሎ ከሳና፤ ታኒ ኩሸ ዛራና” ያጌስ ጎዳይ፥ ጌተትድ ፃፈትስ።
ROM 12:20 ሽን ጌሻ ማፃፋን፥ “ነ ሞርከይ ኮሻትኮ ሙዛ፤ እ ሳሞትኮ ኡሻ። ኔኒ ሄሳ ኦꬅኮ እያ ሁጰን ዬላ ታማ ቦንቆ ቆላሳ” ጌተትድ ፃፈትስ።
ROM 12:21 ኢታ ሎኦን ፆናፐ አትሽን፥ ኢታን ፆነቶፋ።
ROM 13:1 ፆሳ ሸነ ግዶናሽን ማት እመቶና ግሾነ ሀእ ደእያ ሹማትካ ፆሳ ሸነን ሹመትዳ ግሾ አስ ኡባይ ደርያ አይሰይሳታስ ኪተታናዉ በሴስ።
ROM 13:2 ሄሳ ግሾ፥ ማታራ ደኤይሳታስ ኪተቶና እፅያ ኦንካ ፆሳ ኪታ እፄስ። ኪተቶና እፅያ ኦንካ ባ ቦላ ፕርዳ ኤሄስ።
ROM 13:3 አይሰይሳት ኢታ ኦይሳታፐ አትሽን፥ ሎኦ ኦይሳታ ያሾኮና። አይሰይሳታስ ያዮና አጋናዉ ኮያይ? ያኮ ሎኦ ኦꬃ፤ ኤንቲ ነና ጋላታና።
ROM 13:4 ኤንቲ ነዉ ሎኦባ ኦꬃናዉ ሹመትዳ ፆሳ አይለ። ሽን ኔኒ ኢታባ ኦꬅኮ፥ ኤንቲ ኢታባ ኦꬅዳይሳ ሴርያ ግሾ እያዉ ያያ። ኤንቲ ኢታ ኦይሳታ ሴርድ፥ ፆሳ ሀንቁዋ ቆንጭስያ ፆሳ አይለ።
ROM 13:5 ሄሳ ግሾ፥ ፆሳ ሀንቁዋ ፃላላስ ግዶናሽን፥ ህንተ ካሀይ ማርካትያ ግሾ ደርያ አይሰይሳታስ ኪተታናዉ በሴስ።
ROM 13:6 ህንተ ጊራ ጊረይካ ሄሳሳ። ደርያ አይሰይሳት ሄ ኦሱዋ ኦይ፥ ኤንቲ ፆሳ አይለታ ግድዳ ግሾሳ።
ROM 13:7 እሱዋስ እሱዋስ በሰይሳ እምተ። ጊራ ጊራናዉ በሰይሳስ ጊርተ፤ ቃራፃ ቃንፃናዉ በሰይሳስ ቃራፃ ቃንፅተ፤ ያያናዉ በሰይሳስ ያይተ፤ ቦንቾይ በሰይሳ ቦንችተ።
ROM 13:8 እሶይ እሱዋራ ሲቀትተ። ሲቆ አጮፐ አትሽን፥ ህንተ ቦላ ሀራ አጮይ ዶፖ። አሰ ሲቅያ ኦንካ ህገይ ገይሳ ፖልስ።
ROM 13:9 “ላሞፋ፤ ዎꬎፓ፤ ካይሶቶፓ፤ አሞቶፋ” ግያ ኪታይነ ሀራ ኪታ ኡባይ፥ “አሰ ነ ሁጰዳ ዶሳ” ግያ ኪታን ቃሸትስ።
ROM 13:10 አሰ ሲቅያ ኦንካ እያ ቦላ ኢታባ ኦና። ሄሳ ግሾ፥ አሰ ሲቀይስ ህገ ኪታ ፖልስ።
ROM 13:11 ꬍስኮፈ ህንተ ባርክያ ዎደይ ሀእ ግደይሳ አኬክድ ሄሳ ኦꬅተ። ኑ አታና ዎደይ ኮይሮ ኑ አማንዳ ዎድያፐ ሀእ ኑኮ ማትስ።
ROM 13:12 ꬉማ ዎደይ አꬋናዉ ሀኔስ፤ ዎንታይ ማትስ። ህዛ፥ ኑኒ ꬉማ ኦሶ አግድ ፖኦ ኦላ ሚሸ ኦይኮስ።
ROM 13:13 አነ ጋላስ ፖኦን ደእያ አሳዳ ማራን ደኦስ። ማꬆንነ ላይማተꬃራ ጋሄትያ ዱማ ዱማ ቱና ኦሶታን፥ ፓላማንነ ቃናተን ግዶፖ።
ROM 13:14 ጎዳ የሱስ ክርስቶሳ ካንዱዋ ማእተ፤ ህንተ ናጋራንቾ አሳተꬃይ ባ አሙዋ ፖላና መላ እያዉ ቆፖፍተ።
ROM 14:1 አማኖን ዳቡርዳ ኦናካ ሺሽ ኤክተፐ አትሽን፥ እያ ቆፋ ቦላ ፕርዶፍተ።
ROM 14:2 ሌምሶስ፥ አማኖን ምንዳ እስ አስ አይ ካꬅካ ማናዉ ዳንዳኤስ። ሽን አማኖን ዳቡርያ አስ አታክልተ ፃላላ ሜስ።
ROM 14:3 ኡባባ ምያ አስ ሞና ኡራ ካꬎፖ። ኡባባ ሞና አስ ምያ ኡራ ቦላ ፕርዶፎ። ፆሳይ ኡባ ምያ ኡራ ሺሽ ኤክስ።
ROM 14:4 ሀራ አሳ አይለ ቦላ ፕርደይ ኔኒ ኦኔ? እ ዳቡርን ዎይኮ ምንን ባ ጎዳሳ። ጎዳይ እያ ኤሳናዉ ዳንዳእያ ግሾ እ ምንድ ኤቃና።
ROM 14:5 ቃስ “እስ ጋላሳይ ሀራ ጋላሳፐ አꬌስ” ያግድ ቆፕያ አስ ደኤስ። ሀራይ ቃስ፥ “ጋላሳት ኡባይ እስ መላ” ግድ ቆፔስ። ሽን እሶይ እሶይ ባ ቆፋ አኬክድ ቃቾ።
ROM 14:6 እስ ጋላሳ ሀራ ጋላሳታፐ አꬅድ ቦንችያ ኦንካ ጎዳ ቦንቾስ ግድ ኦꬄስ። ኡባ ካꬅ ምያ አስ ጎዳ ቦንቾስ ግድ ሜስ። እ ምያ ሄ ካꬃ ግሾ፥ ፆሳ ጋላቴስ። ኡባ ካꬅ ሞና አስ ጎዳ ቦንቾስ ሞና አጌስ፤ ቃስ ሞና አጎን ፆሰ ጋላቴስ።
ROM 14:7 ኑፐ ኦንካ ባዉ ዴና፤ ቃስ ኑ ግዶፈ ኦንካ ባዉ ሀይቀና።
ROM 14:8 ኑ ደኦን ደእኮ ጎዳስ ደኦስ፤ ቃስ ሀይቅኮካ ጎዳስ ሀይቆስ። ህዛ፥ ኑ ደኦን ደእን ዎይኮ ሀይቅን ጎዳሳ።
ROM 14:9 ክርስቶስ ሀይቅድ ሀይቆፐ ደንድዳይ፥ ደኦን ደኤይሳታስነ ሀይቅዳይሳታስ ጎዳ ግዳናሳ።
ROM 14:10 ያትን፥ ኔኒ ነ እሻ ቦላ አይስ ፕርዳይ? ዎይኮ ኔኒ ነ እሻ አይስ ካꬋይ? ኑኒ ኡባይ ፆሳ ፕርዳ አራታ ስንꬃን ኤቃና።
ROM 14:11 ጌሻ ማፃፋን ጎዳይ፥ “ታኒ ደኦን ደአይስ፤ አሳ ኡባይ ታ ስንꬃን ጉልባታና፤ ታኒ ፆሳ ግደይሳ ማርካታና” ያጌስ።
ROM 14:12 ህዛ፥ ኑ ኦꬅዳባስ ኑ ሁጰን ሁጰን ፆሳ ስንꬃን ሺቅድ ዛሮ እማና።
ROM 14:13 ሄሳ ግሾ፥ ኑኒ እሶይ እሱዋ ቦላ ፕርደይሳ አጎስ። ሽን ህንተ እሻ ꬉብስድ ዎይኮ ቃፅድ ናጋራን ገልስያባ ኦꬆናዳ ናገትተ።
ROM 14:14 ጎዳ የሱሳ አማንያ አሳዳ፥ ባ ሁጰን ቱና ግድዳ ካꬅ ባይናይሳ ታኒ ጌሻዳ ኤራይስ። ሽን እስ አስ እስባ ቱና ግድ ቆፕኮ ሄስ እያዉ ቱና ግዴስ።
ROM 14:15 ነ ምያ ካꬃ ግሾ ነ እሻ ꬉብያባ ግድኮ፥ ክርስቶሳን ደእያ ነ እሻ ሲቃካ። ክርስቶስ እያ ግሾ ሀይቅዳ ኡራ ነ ምያ ካꬃን እያ አያና ደኡዋ ꬋይሶፋ።
ROM 14:16 ህዛ፥ ህንተዉ ደእያ ላአተꬃ ሀራት ቦራና መላ ኦꬆፍተ።
ROM 14:17 ፆሳ ካዎተꬃይ ጌሻ አያናይ እምያ ፅሎተꬅ፥ ሳሮተꬅነ ቱማ ኡፋይስፈ አትሽን፥ ሙሳባነ ኡሻባ ግደና።
ROM 14:18 ሄሳዳ ክርስቶሳስ ኦꬅያ አስ ፆሳ ኡፋይሴስ፤ አሳንካ አንጀቴስ።
ROM 14:19 ሄሳ ግሾ፥ አነ ኑኒ ሳሮተꬅ በንትያ ኦግያነ እሱዋ እሱዋ አማኖን ምንꬅያ ኦግያ ኮዮስ።
ROM 14:20 ካꬃ ግሾ ጋዳ ፆሳ ኦሱዋ ꬋይሶፋ። ኡባ ካꬅ ሜተቴስ፥ ሽን ሀራ አስ ናጋራን ꬉብስያ ካꬅ ሙስ ኢታ።
ROM 14:21 ነ እሻይ ꬉበቶና መላ አሾ ሞና ዎይኮ ኡሹ ኡዮና ዎይኮ ነ እሻ ꬉብያ ሀራባ ኦꬆና አጎይ ሎኦ።
ROM 14:22 ህዛ፥ ሀ ነ አማኑዋ ነ ግዶንነ ነ ፆሳ ግዶን ናጋ። ልከ ግድ ቆፕዳባ ኦꬅያ ዎደ እያ ካሀይ ሞቶና ኡራይ አንጀትዳይሳ።
ROM 14:23 ሽን ስꬍሸ ምያ ኡራስ እያ ሙሳይ አማኖን ግዶና ግሾ ፕርደቴስ። አማኖይ ባይና ኦሰትዳ ኦሶ ኡባይ ናጋራ።
ROM 15:1 ኑኒ አማኖን ምንዳይሳት ዳቡራንቾታ ቶሁዋ ቶካናዉ በሴስ። ኑኒ ኑና ኡፋይሳናዉ በሰና።
ROM 15:2 ኑኒ ኑ እሻ አማኖን ምንꬃናዉ እያ ማዳናዉነ ኡፋይሳናዉ በሴስ።
ROM 15:3 ክርስቶስ ባና ኡፋይስቤና። ሽን ጌሻ ማፃፋን፥ “አሳይ ነና ጫይዳ ጫሻይ ታና ጋክስ” ጌተትድ ፃፈትዳይሳዳ ሀንስ።
ROM 15:4 ጌሻ ማፃፋይ እምያ ገንጫንነ ምንꬁዋን ኑ ኡፋይሳ ኤካና መላ ጌሻ ማፃፋን ፃፈትዳ ኡባይ ኑና ታማርሳናዉ ፃፈትስ።
ROM 15:5 ገንጫነ ምኖተꬅ እምያ ጎዳይ ህንተ ክርስቶስ የሱሳ ካልያ ዎደ እስፈተꬅ ህንተዉ እሞ።
ROM 15:6 ሄስካ፥ ኑ ጎዳ የሱስ ክርስቶሳ አዋ፥ ፆሳ፥ እስ ዎዛናንነ እስ ቃላን ህንተ ቦንቻና መላሳ።
ROM 15:7 ክርስቶስ ህንተና ኤክዳይሳዳ ፆሳ ቦንቾስ እሶይ እሱዋ ኤክተ።
ROM 15:8 ፆሳይ በን አዋታስ እምዳ ኡፋይሳይ ፖለታና መላነ እያ ቱማተꬃይ ኤረታና መላ ክርስቶስ አይሁደታ አይለ ግድድ ይዳይሳ ታ ህንተዉ ኦዳይስ።
ROM 15:9 ክርስቶስ አይሁደታ አይለ ግድዳ ሀራ ጋሶይ ቃስ አይሁደ ግዶና አሳት ፆሳ እያ ማሮተꬃ ግሾ ጋላታና መላሳ። ጌሻ ማፃፋን፥ “ታ ነና አይሁደ ግዶና አሳ ግዶን ጋላታና፤ ነ ሱንꬃ ሳባና” ጌተትድ ፃፈትዳይሳዳ ሀንስ።
ROM 15:10 ቃስ፥ “አይሁደ ግዶና አሳቶ፥ ፆሳ ደርያራ ኡፋይትተ” ያገትስ።
ROM 15:11 ቃስ ዛሪድ፥ “አይሁደ ግዶና አሳቶ፥ ጎዳ ጋላትተ፤ ካዎተꬃ ኡባይ እያ ሳቢተ” ያገትስ።
ROM 15:12 ሄሳዳ እሳያስ፥ “እሰየ ኮቻፈ የለትያ እሶይ ያና፤ እ ካዎተꬃ ኡባ ሃራና። ኤንቲ ባንታ ኡፋይሳ እያ ቦላ ዎꬃና” ያጌስ።
ROM 15:13 ጌሻ አያና ዎልቃን ህንተ ድጫና መላ ኡፋይስ እምያ ፆሳይ፥ ህንተ አማኑዋ ጋሶን ህንተዉ ኡፋይስነ ሳሮተꬅ ኩመꬅ እሞ።
ROM 15:14 ታ እሻቶ፥ ህንተናን ሎኦተꬅነ ኤራተꬅ ኩምዳይሳ ቃስ እሶይ እሱዋ ዞራናዉ ዳንዳኤይሳ ታ ጌሻዳ ኤራይስ።
ROM 15:15 ታኒ ህንተና እስ እስባ ጉጃ አኬክሳናዉ ኮያዳ ያዮና ሀ ዳብዳብያ ህንተዉ ፃፋስ።
ROM 15:16 ታኒ ክርስቶስ የሱሳ አይለ ግዳዳ፥ አይሁደ ግዶና አሳስ ካህነዳ ኦꬃዳ፥ ዎንገላ ኦዳና መላ ፆሳይ ታዉ አꬎ ኬሀተꬃ እሚስ። አይሁደ ግዶና አሳይ ጌሻ አያናን ጌይድ፥ ፆሳ ኡፋይስያ ያርሾ ግዳና መላ ፆሳይ ሄሳ ኦꬅስ።
ROM 15:17 ታኒ ክርስቶስ የሱሳን ግዳዳ ፆሳስ ኦꬅያ ኦሱዋን ጬቀታይስ።
ROM 15:18 አይሁደ ግዶና አሳይ ፆሳስ ኪተታናዳ፥ ክርስቶስ ታ ቃላነ ታ ኦሱዋ ባጋራ ኦꬅዳ ኦሱዋፐ አትሽን፥ ሀር ታ ጬቀትያባይ ባዋ።
ROM 15:19 ፆሳይ ሄሳ ማላታንነ ጌሻ አያና ዎልቃን ዋት ኦꬅዳኮ ታ ህንተዉ ኦዳና። ታኒ የሩሳላመፐ ዶማዳ፥ እልዋርቆነ ጋካናዉ ክርስቶሳ ዎንገላ ሳባካስ።
ROM 15:20 ታኒ ሀራ አስ ባስዳ በሳን ኬፃናዉ ኮይከ። ክርስቶሳ ሱንꬃይ ፄገትቦና በሳን ዎንገላ ኦዳናዉ አሞታይስ።
ROM 15:21 ጌሻ ማፃፋን፥ “እያባይ ኦደትቦና አሳት እያ በአና፤ እያባ ስእቦና አሳት አኬካና” ጌተትድ ፃፈትስ።
ROM 15:22 ሄሳ ጋሶን፥ ታኒ ህንተኮ ያናዉ ዳንዳአብከ።
ROM 15:23 ሽን ታኒ ሀእ ሀ ሄራን ታ ኦሱዋ ኦንግዳ ግሾነ ዳሮ ላይꬃፈ ዶማዳ ህንተና በአናዉ ላሞትዳ ግሾ፥
ROM 15:24 ታኒ እስፔነ ባሸ ህንተና በአናዉ ቆፓስ። ቃስ ጉꬃ ዎደ ህንተራ ኡፋይትዳፐ ጉየ፥ እስፔነ ብያ ዎደ ህንተ ታ ኦግያስ ታና ማዳና መላ ኮያይስ።
ROM 15:25 ሽን ሀእ ታኒ ፆሳ አሳታ ማዳናዉ የሩሳላመ ባይስ።
ROM 15:26 ማቀዶነነ አካያን ደእያ ፆሳ አሳት፥ የሩሳላመን ደእያ ማንቆታ ሚሸን ማዳናዉ ኮይዳ ግሾሳ።
ROM 15:27 ኤንቲ ማንቆታ ማዳናይስ ኤንታዉ አቶናባ ግድዳ ግሾ ባንታ ሁጰን ሄሳ ኦꬃናዉ ቆፋ ቃችዶሶና። አይሁደት አይሁደ ግዶናይሳታራ አያና አንጁዋ ሻከትኮ፥ ኤንቲ ቃስ ባንታዉ ደእያባን አይሁደታ ማዳናዉ በሴስ።
ROM 15:28 ሄሳ ግሾ፥ ታኒ ሄ ሺቅዳ ሚሽያ ኤንታዉ እምዳፐ ጉየ፥ እስፔነ ባሸ ህንተ ማታራ አꬋና።
ROM 15:29 ታኒ ህንተኮ ብያ ዎደ ክርስቶሳ አንጁዋን ኩማዳ ባናይሳ ኤራይስ።
ROM 15:30 ታ እሻቶ፥ ታዉ ፆሳ ዎስሸ ታ ባፅያን ታራ ኤቃና መላ ጎዳ የሱስ ክርስቶሳንነ ጌሻ አያና ሲቁዋን ህንተና ዎሳይስ።
ROM 15:31 ፆሳይ ታና ይሁዳን ደእያ አማኖና አሳታፐ አሻናዳነ የሩሳላመን ታ ኦꬃና ኦሶይ ፆሳ አሳታ ማታን ኤከታና መላ ታዉ ዎስተ።
ROM 15:32 ቃስ ፆሳይ ጊኮ፥ ታኒ ህንተኮ ባዳ ኡፋይሳን ህንተራ ሸምፓና መላ ታዉ ዎስተ።
ROM 15:33 ሳሮተꬃ ፆሳይ ህንተ ኡባራ ግዶ። አምንእ።
ROM 16:1 ክንክረ ካታማን ደእያ ዎሳ ኬꬃን ኦꬅያ ኑ ምችያ ፌበና ሎኦ ማጫስ ግደይሳ ህንተ ኤራና መላ ኮያይስ።
ROM 16:2 ህንተ እዮ አማንያ አሳት ጎዳ ሱንꬃን ሞካናዉ በሲያ አማንያ አሳታፐ እሱዋዳ ሞክተ። እያ ህንተፈ ኮያባ ኡባ እዮ ማድተ። እያ ባ ሁጰን ዳሮ አሳ ማዳሱ፤ ቃስ ታና ታ ሁጰንካ ዳሮ ማዳሱ።
ROM 16:3 ክርስቶስ የሱሳ ኦሱዋ ታራ እስፈ ኦꬅያ ጵርስቅላነ አቅላ ሳሮ ጊተ።
ROM 16:4 ኤንቲ ታ ግሾ ባንታ ሸምፑዋ አꬅድ እምዶሶና። ታ ፃላላ ግዶናሽን፥ አይሁደ ግዶና አሳ ዎሳ ኬꬃ ኡባይ ኤንታ ጋላቴስ።
ROM 16:5 ኤንታ ሶን ሺቅያ አማንያ አሳ ሳሮ ጊተ። ኢሰ ቢታን ክርስቶሳ ኮይሮ አማንዳ፥ ታ ዶስያ ኤጳነፆሳስ ታ ሳሮꬁዋ ኦድተ።
ROM 16:6 ህንተ ግሾ ኦሶን ዳሮ ዳቡርዳ ማይራሞ ሳሮ ጊተ።
ROM 16:7 ታራ ቃሾ ኬꬃን አꬅዳ ታ አይሁደ ላገታ አንድራንቆሳነ ዩንያሳ ሳሮ ጊተ። ኤንቲ የሱሳ ሀዋረታ ግዶን ኤረትዳይሳታ። ቃስ ኤንቲ ክርስቶሳ ታፐ ስን አማንዶሶና።
ROM 16:8 ጎዳን አማንያ ታ ሲቆ ላግያ፥ ጵልያፆና ሳሮ ጊተ።
ROM 16:9 ክርስቶሳ ኦሱዋ ኑራ እስፈ ኦꬅያ ኡርባኖሳነ ታ ዶስያ እስታኩሳ ሳሮ ጊተ።
ROM 16:10 ክርስቶሳን አማንꬅያ አይልያ አጰልሳስ ታ ሳሮꬁዋ ኦድተ። አርስፆቡሎሳ ሶ አሳስ ታ ሳሮꬁዋ ኦድተ።
ROM 16:11 ታ አይሁደ ላግያ ሄሮድዮና ሳሮ ጊተ። ናርስሳስነ እያ ሶ አሳፐ ክርስቶሳ አማንዳይሳታ ሳሮ ጊተ።
ROM 16:12 ጎዳ ኦሱዋን ዳቡርያ ትሩፋይናነ ትሩፎሳ ሳሮ ጊተ። ቃስ ጎዳስ ዳሮ ዳቡራዳ ኦꬅያ፥ ታ ዶስያ ፃርስዶ ሳሮ ጊተ።
ROM 16:13 ጎዳ ኦሱዋን ዳሮ ኤረትዳ ሩፎሳስነ ታና ባ ናአዳ በእያ እያ አየስ ታ ሳሮꬁዋ ኦድተ።
ROM 16:14 አስቃርፆናስ፥ አፍለሶንጳስ፥ ሄርሜሳስ፥ ጳፅሮባናስ፥ ሄርማስነ ኤንታራ ደእያ አማንያ እሻታ ኡባስ ታ ሳሮꬁዋ ኦድተ።
ROM 16:15 ፍሎሎጉሳ፥ ዩላ፥ ኔራ፥ እያ ምችዉ፥ አልንፆሳነ ኤንታራ ደእያ አማንያ አሳ ኡባ ሳሮ ጊተ።
ROM 16:16 ጌሻ ዬረተꬅ ዬረትሸ፥ እሶይ እሱዋ ሳሮꬅተ። ክርስቶሳ ዎሳ ኬꬃ ኡባይ ህንተና ሳሮ ያጎሶና።
ROM 16:17 ታ እሻቶ፥ ህንተ ታማርዳ ትምርትያ እፅድ፥ ህንተ ግዶን ሻከተꬅነ መቶ መꬍያ አሳታፐ ናገትተ። ኤንታፈ ሃክተ።
ROM 16:18 ሄሳ መላ አሳት ባንታዉ ኦꬆሶናፐ አትሽን፥ ኑ ጎዳ ክርስቶሳስ ኦꬆኮና። ባንታ ማልእያ ዶናንነ ሳጶꬅያ ቃላን አይኮ ኤሮና አሳ ዎዛና ባለꬆሶና።
ROM 16:19 ዎንገላስ ህንተ ኪተትዳይሳ አሳ ኡባይ ስእዳይስ ታና ኡፋይሴስ። ሽን ህንተ ሎኦባ ኤራና መላነ ኢታባፐ ሃካና መላ ታ ኮያይስ።
ROM 16:20 ሳሮተꬃ ፆሳይ ፃላህያ ህንተ ቶሁዋፐ ጋርሳን ጋጭ የጋና። ኑ ጎዳ የሱስ ክርስቶሳ አꬎ ኬሀተꬃይ ህንተራ ግዶ።
ROM 16:21 ታራ ኦꬅያ ፅሞትዮስ ህንተና ሳሮ ያጌስ። ሄሳዳካ፥ ታ ዳቦት ሉቅዮስ፥ ያሶንነ ሶስጳፅሮስ ህንተና ሳሮ ያጎሶና።
ROM 16:22 ታኒ፥ ሀ ዳብዳብያ ፃፍዳ፥ ፃርፅዮስ፥ ህንተና ጎዳ ሱንꬃን ሳሮ ያጋይስ።
ROM 16:23 ታና ሞክዳይነ ዎሳ ኬꬃ ኡባይ እያ ሶን ሺቅያ ጋዮስ፥ ህንተና ሳሮ ያጌስ። ካታማ ሚሽያ ኦይክያ ኤራስፆስነ ኑ እሻ ቃርፆስ ህንተና ሳሮ ያጎሶና።
ROM 16:24 [ኑ ጎዳ የሱስ ክርስቶሳ አꬎ ኬሀተꬃይ ህንተ ኡባራ ግዶ። አምንእ።]
ROM 16:25 ጋላታይ ፆሳስ ግዶ። ታኒ፥ የሱስ ክርስቶሳባ ኦድያ ዎንገላ ቃላነ ዳሮ ዎደፐ ቆሰትድ ጋምእዳ ቱማተꬃን፥ ፆሳይ ህንተና አማኖን ምንꬅድ ኤሳናዉ ዳንዳኤስ።
ROM 16:26 ሽን ሀእ ሄ ቱማይ ቆንጭስ። ካዎተꬃ ኡባይ አማንድ ኪተታና መላ መርና ፆሳ ኪታን ናበት ሄ ቱማባ ፃፍዶሶና።
ROM 16:27 የሱስ ክርስቶሳ ባጋራ ጭንጫተꬅ እያ ፃላላስ ደእያ፥ እስ ፆሳስ መርናዉ ቦንቾይ ግዶ። አምንእ።
1CO 1:1 ፆሳ ሸንያን የሱስ ክርስቶሳ ሀዋረ ግዳናዉ ፄገትዳ ጳዉሎስነ፥ ኑ እሻ ሶስተኔስ፥
1CO 1:2 ቆሮንቶሳን ደእያ ፆሳ ዎሳ ኬꬃስ፥ የሱስ ክርስቶሳን ጌይዳይሳታስነ ጌሽ ግዳና መላ ፄገትዳይሳታስ፤ ቃስ ኤንታዉነ ኑስ ጎዳ ግድያ ኑ ጎዳ የሱስ ክርስቶሳ ሱንꬃ ኡባ በሳን ፄግያ ኡባስ።
1CO 1:3 ፆሳይ፥ ኑ አዋይነ ጎዳይ የሱስ ክርስቶሲ ህንተዉ አꬎ ኬሀተꬃነ ሳሮተꬃ እሞ።
1CO 1:4 ፆሳይ ክርስቶስ የሱሳ ባጋራ ህንተዉ እምዳ አꬎ ኬሀተꬃ ግሾ፥ ታኒ ኡባ ዎደ ፆሳ ጋላታይስ።
1CO 1:5 እያን ኦዳንነ ኤራተꬃ ኡባን ህንተ ዱረትደታ።
1CO 1:6 ታኒ ክርስቶሳባ ማርካትዳይስ ቱማ ግደይሳ ሄስ ቆንጭሴስ።
1CO 1:7 ሄሳ ግሾ፥ ህንተ ኑ ጎዳ የሱስ ክርስቶሳ ዩሳ ናግሸ ደእሽን፥ አይ አያና እሞይካ ህንተዉ ፓጨና።
1CO 1:8 ኑ ጎዳ የሱስ ክርስቶሲ ስምያ ዎደ ህንተ ቦረቶናይሳታ ግዳና መላ ዉርሰꬅ ጋካናዉ እ ህንተና ምንꬃና።
1CO 1:9 ባ ናአ፥ ኑ ጎዳ፥ የሱስ ክርስቶሳራ እስፈተꬅ ዳና መላ ህንተና ፄግዳ ፆሳይ አማነትዳይሳ።
1CO 1:10 ታ እሻቶ፥ ህንተ ግዶን ሻከተꬅ ዶና መላነ ህንተ እስ ዎዛናንነ እስ ቆፋን እሶ ግድድ ዳና መላ፥ ኑ ጎዳ የሱስ ክርስቶሳ ሱንꬃን ህንተና ዎሳይስ።
1CO 1:11 ታ እሻቶ፥ ቀሎኤ ሶ አሳይ ህንተ ግዶን ኦሽ ደኤይሳ ታዉ ኦድዶሶና።
1CO 1:12 ታ ህንተዉ ኦደይስ ሀይሳ፦ ህንተፈ እሶት እሶት፥ “ታኒ ጳዉሎሳሳ፤ ታኒ አጵሎሳሳ፤ ታኒ ጰፅሮሳሳ፤ ታኒ ክርስቶሳሳ” ያጌታ።
1CO 1:13 ክርስቶስ ሻከትደዬ? ህንተ ግሾ፥ ማስቃልያ ቦላ ካቀትዳይ ጳዉሎሰዬ? ዎይኮ ህንተ ጳዉሎሳ ሱንꬃን ፃማቀትደትዬ?
1CO 1:14 ታኒ ቃርስጶስነ ጋዮስ አትሽን፥ ህንተፈ ኦናካ ፃማቃቦና ግሾ፥ ፆሰ ጋላታይስ።
1CO 1:15 ሄሳ ግሾ፥ ኦንካ ህንተና ታ ሱንꬃን ፃማቀትደታ ጋናዉ ዳንዳኤና።
1CO 1:16 [ቃስ እስፅፋኖሰ ሶ አሳካ ታ ፃማቅዳይሳ አኬካይስ፥ ሽን ሀራ ኦና ፃማቅዳኮ ሀሳይከ።]
1CO 1:17 ክርስቶስ ታና ኪትዳይ ዎንገላ ኦዳና መላሳፈ አትሽን፥ ፃማቃና መላ ግደና። ክርስቶስ ማስቃለይ ሀዳ ግዶና መላ ታኒ አሳ ጭንጫተꬃ ቃላን ኦድከ።
1CO 1:18 ክርስቶሳ ማስቃላ ቃላይ ꬋየይሳታስ ኤያተꬅ፥ ሽን ኑስ አተይሳታስ ፆሳ ዎልቃ።
1CO 1:19 ጌሻ ማፃፋን፥ “ታኒ ጭንጫታ ጭንጫተꬃ ꬋይሳና፤ አኬካንቾታ አኬካ ባለꬃና” ያጌስ።
1CO 1:20 ያትን፥ ጭንጭ አዉን ደኢ? ህገ አስታማረይ አዉኔ? ዎይኮ ሀ ሳአ ኤራንቾይ አዉን ደኢ? ፆሳይ ሀ ሳኣ ጭንጫተꬃ ኤያተꬅ ኦꬅቤኔ?
1CO 1:21 ሀ ሳኣ አሳይ ባንታ ጭንጫተꬃን ፆሳ ኤሮና መላ ባ ጭንጫተꬃን ድግድ፥ ኤያተꬃን ታይበትያ፥ ኑኒ ኦድያ ቃላን አማነይሳታ አሻናዉ ፆሳ ሸነ ግድስ።
1CO 1:22 አይሁደት ማላታ በአናዉ ኮዮሶና፤ ቃስ ግርከት ጭንጫተꬅ ኮዮሶና።
1CO 1:23 ሽን ኑኒ ማስቃለ ቦላ ካቀትዳ ክርስቶሳ ሳባኮስ። ሄስ አይሁደታስ ꬉበ፤ ቃስ ግርከታስ ኤያተꬅ ግድስ።
1CO 1:24 ሽን ፆሳይ ፄግዳይሳታስ፥ አይሁደ ግድን፥ ግርከ ግድን ክርስቶስ ፆሳ ዎልቃነ እያ ጭንጫተꬃ።
1CO 1:25 ፆሳ ኤያተꬅ አሳ ጭንጫተꬃፈ አꬌስ፤ ቃስ ፆሳ ዳቡራይ አሳ ምኖተꬃፈ ምኔስ።
1CO 1:26 ህዛ፥ ታ እሻቶ፥ ፆሳይ ህንተና ፄግያ ዎደ ህንተ አይ መላ አሴኮ ቆፕተ። አሳ ቆፋን፥ ህንተ ግዶፈ ዳሮት ጭንጫ፥ ዎልቃማነ ꬎቃ ኮቸ ግደከታ።
1CO 1:27 ሽን ፆሳይ ጭንጫታ ዬላያናዉ አላመን ደእያ ኤያታ ዶርስ፤ ቃስ ምኖታ ዬላያናዉ አላመን ደእያ ዳቡራንቾታ ዶርስ።
1CO 1:28 ሀ አላምያን ግታ ጌተትዳባ ꬋይሳናዉ፥ ፆሲ፥ ሀ ሳኣ ካዉሻባ፥ ካትዳባነ ፓꬆናባ ዶርስ።
1CO 1:29 ፆሳ ስንꬃን ኦንካ ጬቀቶና መላ ሄሳ ኦꬅስ።
1CO 1:30 ሽን፥ ህንተዉ ክርስቶስ የሱሳራ እስፈተꬅ ዳና መላ ፆሳይ ሄሳ ኦꬅስ። እ፥ ኑስ ፆሳፈ ጭንጫተꬅ፥ ፅሎተꬅ፥ ጌሻተꬅነ አቶተꬅ ግድስ።
1CO 1:31 ሄሳ ግሾ፥ ጌሻ ማፃፋን፥ “ጬቀትያ ኦንካ ጎዳን ጬቆ” ያጌስ።
1CO 2:1 ታ እሻቶ፥ ታኒ ኮይሮ ፆሳ ቃላ ህንተዉ ኦዳሸ ይዳ ዎደ፥ ዶና ብላተꬃንነ ጭንጫተꬃን ያቢከ።
1CO 2:2 ታኒ ህንተራ ደእያ ዎደ ማስቃልያ ቦላ ካቀትዳ የሱስ ክርስቶሳፐ አትሽን፥ ሀራባ ኤራናዉ ኮይከ ጋዳ ታ ቆፋ ቃቻስ።
1CO 2:3 ታ ህንተራ ደእያ ዎደ ዳቡራን፥ ያሻንነ ዳሮ ኮኮርሳን ደአስ።
1CO 2:4 ታ ኪታይነ ታ ትምርተይ ዶና ብላተꬃንነ ጭንጫተꬃን ግዶናሽን፥ ጌሻ አያና ዎልቃ ቆንጭሰꬃና።
1CO 2:5 ሄስካ፥ ህንተ አማኖይ ፆሳ ዎልቃናፐ አትሽን፥ አሳ ጭንጫተꬃን ዘምፖና መላሳ።
1CO 2:6 አያና ደኦን ድጭዳይሳታስ ኑኒ ጭንጫተꬃ ቃላን ኦዶስ። ሽን ሄ ጭንጫተꬃይ፥ ሀ ሳአ ጭንጫተꬅ ዎይኮ ꬋያናዉ ደእያ ሀ ሳአ ሃረይሳታ ጭንጫተꬅ ግደና።
1CO 2:7 ሽን ኑኒ ኦድያ ጭንጨተꬃይ፥ ዳሮ ዎደፐ ስን ፆሳይ ኑ ቦንቹዋስ ጊግስዳይሳነ ጌምድ ደእያ ፁራ ጭንጫተꬅ።
1CO 2:8 ሀ ሳኣ ሃረይሳታፐ ኦንካ ሀ ጭንጫተꬃ ኤርቦኮና። ኤንቲ ኤርዳባ ግድያኮ፥ ቦንቾ ጎዳ ማስቃልያ ቦላ ካቆኮና።
1CO 2:9 ሽን ጌሻ ማፃፋን፥ “አይፈይ በእቦናባ፥ ሀይꬅ ስእቦናባ፥ ዎዛን ቆፕቦናባ፥ ፆሳይ ባና ዶሰይሳታስ ጊግስስ” ያጌስ።
1CO 2:10 ፆሳይ ባ ፁራ ባ አያና ባጋራ ኑስ ቆንጭስስ። ጌሻ አያናይ ሀር አቶሽን፥ ጌምዳ ፆሳ ፁራ ኡባ ፕልጌስ።
1CO 2:11 አሳን ደእያ አሳ አያናፐ አትሽን፥ አሳባ ኦንካ ኤረና። ሄሳዳካ፥ ፆሳባ፥ ፆሳ አያናፐ አትሽን፥ ኦንካ ኤረና።
1CO 2:12 ፆሳይ ኑስ ጮ እምዳባ ኑ ኤራና መላ ፆሳ አያና ኤክዳፐ አትሽን፥ ሀ ሳአ አያና ኤክቦኮ።
1CO 2:13 ኑኒ አያናባ፥ አያና አሳታስ አሳ ጭንጫተꬃን ግዶናሽን፥ ፆሳ አያናይ እምያ ጭንጫተꬃን ታማርሶስ።
1CO 2:14 ጌሻ አያን ባይና አስ ፆሳ አያና እሞታታ ኤከና። ሄስ እያዉ ኤያተꬅ፤ ኡባይ ጌሻ አያናን ፕልገትያ ግሾ፥ እ ኤራናዉ ዳንዳኤና።
1CO 2:15 ጌሻ አያን ደእያ አስ ኡባባ ፕልጌስ፥ ሽን እያ ኦንካ ፕልገና።
1CO 2:16 ጌሻ ማፃፋን፥ “ጎዳ ዎዛና ኤረይ ኦኔ? እያ ዞራናዉ ዳንዳኤይ ኦኔ?” ጌተትድ ፃፈትዳይሳ መላ። ሽን ኑስ ክርስቶሳ ዎዛን ደኤስ።
1CO 3:1 ታ እሻቶ፥ ህንተ ክርስቶሳን ቡሮ ዮጋነ አማኖና አሳꬆ ደእያ ግሾ፥ ታኒ አያናባ ህንተዉ ኦዳናዉ ዳንዳአብከ።
1CO 3:2 ህንተ ምኖ ካꬅ ማናዉ ዳንዳእቦና ግሾ፥ ታኒ ህንተና ማꬅ ፓሀስ፤ ሀእካ ዳንዳእቤከታ።
1CO 3:3 ሀእካ ህንተ አማኖና አሳዳ ደኤታ። ህንተ ግዶን ደእያ ቃናተይነ ኦሽ ህንተ አማኖና አሳዳ ደኤይሳ ኤርሰኔ? ህንተ አማኖና አሳዳ ሀኔታ።
1CO 3:4 ህንተፈ እሶይ፥ “ታኒ ጳዉሎሳሳ” ሀራይ ቃስ፥ “ታኒ አጵሎሳሳ” ጊኮ፥ አማኖና አሳ መላ ግደከቲ?
1CO 3:5 ያትን፥ አጵሎስ ኦኔ? ጳዉሎስ ኦኔ? ኑኒ ህንተና አማንꬅዳ ፆሳ ኦሳንቾታ። ፆሳይ እሱዋስ እሱዋስ እምዳ እሞታ መላ ኦꬅያ ኦሳንቾታ ግዶኮናዬ?
1CO 3:6 ታኒ ቶካስ፤ አጵሎስ ሃ ኡሽስ፥ ሽን ድቸይ ፆሰ።
1CO 3:7 ሄሳ ግሾ፥ ድችያ ፆሳፈ አትሽን፥ ቶከይካ ሃ ኡሸይካ አይኮካ ግደና።
1CO 3:8 ቶከይነ ሃ ኡሸይ ዎል መላ፥ ሽን እሶይ እሶይ ባ ኦሱዋ መላ ፆሳይ እምያ ዎይቱዋ ኤካና።
1CO 3:9 ኑኒ እስፈ ፆሳስ ኦꬅያ እያ ኦሳንቾታ ግድያ ግሾ፥ ህንተ ፆሳ ሾቃ፤ ፆሳ ኬꬅ።
1CO 3:10 ፆሳይ ታዉ እምዳ አꬎ ኬሀተꬃ መላ ሂላንቾ አናፀዳ ባሶ የጋስ። ሀራ አስ እያ ቦላ ኬፄስ። ሽን እያ ቦላ ኬፅያ ኦንካ ዋትድ ኬፅያኮ፥ ባዉ ናገቶ።
1CO 3:11 እስ ቶሆ የገትዳ ባሶፐ ሀራ ባሶ የጋናዉ ኦንካ ዳንዳኤና። ሄ ባሶይካ የሱስ ክርስቶሳ።
1CO 3:12 ሽን ሀ ባሱዋ ቦላ ኦንካ ዎርቃን ዎይኮ ብራን ግድን፥ አልኦ ሹቻን ዎይኮ ምꬃን ግድን፥ ማታን ዎይኮ ማቃን ኬፅኮ፥
1CO 3:13 እስ እስ አስ ሄ ባሱዋ ቦላ አይብን ኬፅዳኮ ፕርዳ ጋላስ ታማን ፓጨትድ ቆንጫና።
1CO 3:14 ኦንካ ሄ ባሱዋ ቦላ ኬፅዳ ኬꬃይ ታማን ፁገቶና አትኮ፥ ባ ዎይቱዋ ኤካና።
1CO 3:15 ሽን ኦደ ኦሶይካ ታማን ፁገትኮ፥ ሄ ኡራስ ዎይቶይ ባዋ። ግዶሽን፥ እ ባ ሁጰን ታማፐ ከስ ኤክዳ አሳዳ አታና።
1CO 3:16 ህንተ ፆሳ ኬꬅ ግደይሳነ ፆሳ አያን ህንተናን ደኤይሳ ኤረከቲ?
1CO 3:17 ኦንካ ፆሳ ኬꬅ ላልኮ፥ ፆሲ እያ ላላና። ፆሳ ኬꬅ ጌሽ፤ ሄ ኬꬃይካ ህንተና።
1CO 3:18 ኦንካ ባና ጭሞፎ። ሀ ሳኣ ጭንጫተꬃን ባና ጭንጫ ኦꬅድ ኤክያ ኦንካ ፆሳ ስንꬃን ጭንጫ ግዳናዉ ኤያ ግዶ።
1CO 3:19 ሀ ሳአ ጭንጫተꬃይ ፆሳ ስንꬃን ኤያተꬅ። ጌሻ ማፃፋን፥ “ፆሳይ ጭንጫታ ኤንታ ገነ ቆፋን ኦይኬስ” ያጌስ።
1CO 3:20 ቃስ፥ “ጭንጫታ ቆፋይ ማዶናባ ግደይሳ ጎዳይ ኤሬስ” ያጌስ።
1CO 3:21 ሄሳ ግሾ፥ ኡባይ ህንተባ ግድያ ግሾ፥ ኦንካ አሳን ጬቀቶፎ።
1CO 3:22 ጳዉሎስ፥ አጵሎስነ ጰፅሮስ፥ ሀ አላመይ፥ ደኦይ፥ ሀይቆይ፥ ሀእ ደኤይ፥ ስንꬃፈ ያናይስ፥ ኡባይ ህንተሳ።
1CO 3:23 ህንተ ክርስቶሳሳ፤ ክርስቶስ ፆሳሳ።
1CO 4:1 አሳይ ኑና ክርስቶሳ አይለዳነ ፆሳ ፁራ ቆንጭሳናዉ ሀዳር እመትዳ አሳዳ ኦꬅድ ቆፖ።
1CO 4:2 ሀዳራ ኤክዳ አሳት ባንታ ጎዳስ አማነትዳይሳታ ግዳናዉ በሴስ።
1CO 4:3 ሽን ህንተ ዎይኮ ሀር ታና ፕርድኮ፥ ታዉ አይኮካ ግደና። ሀር አቶሽን፥ ታካ ታ ቦላ ፕርድከ።
1CO 4:4 ታ ካሀይ ጌሽ፥ ሽን ሄስ ታኒ ፖሎ ፅሎ ግደይሳ በሰና። ታ ቦላ ፕርዳናይ ጎዳ ፃላላ።
1CO 4:5 ሄሳ ግሾ፥ ዎደይ ጋኮና፥ ጎዳይ ዮና ኦደ ቦላካ ፕርዶፍተ። እ ꬉማን ጌምዳባ ፖኦን ከሰና፤ አሳ ዎዛናን ቆሰትዳ ቆፋ ቆንጭሳና። ሄ ዎደ፥ እሶይ እሶይ ፆሳፈ ጋላታ ኤካና።
1CO 4:6 ታ እሻቶ፥ ህንተ ግሾ፥ ታናነ አጵሎሳ፥ ህንተዉ ሌምሶ ኦꬃዳ ኦዳስ። ሄሳ ታ ኦꬅዳይ፥ “ፃፈትዳይሳፈ አꬎፋ” ግያ ዞርያ ህንተ ኑፐ ታማራና መላሳ። ሄሳ ግሾ፥ ኦንካ እሱዋ ሳብድ ሀንኩዋ ካꬋናዉ በሰና።
1CO 4:7 ነ ሀራታፐ አይብን አꬋይ? ኔኒ ኤካቦናባይ አይብ ደኢ? ኔኒ ኤክዳባ ሀራ አሳፐ ኤክዳ ግድኮ፥ ያትን፥ ኤክቦና አሳዳ አይስ ጬቀታይ?
1CO 4:8 ሀእ ህንተ ካልደታ። ሀእ ህንተ ዱረትደታ። ኑኒ ባይና ህንተ ፃላላ ካዎትደታ። ህንተ ቱማ ካዎትዳባ ግድያኮ፥ ኑካ ህንተራ ካዎታናሽን።
1CO 4:9 ታዉ፥ ፆሳይ ኑና ሀዋረታ፥ ሀይቆስ ፕርደትዳ አሳዳ፥ አሳ ኡባፈ ኑና ጉየ አꬅዳ ዳኔስ። ኑኒ ሀ አላምያስ፥ ኪታንቾታስነ አሳስ ካሳባ ግድዳ።
1CO 4:10 ኑኒ ክርስቶሳ ግሾ ኤያ ግድዳ፥ ሽን ህንተ ክርስቶሳን ጭንጫታ ግድደታ። ኑኒ ዳቡራንቾ፥ ሽን ህንተ ምኖ ግድደታ። ህንተ ቦንቸትደታ፥ ሽን ኑኒ ቶሸትዳ።
1CO 4:11 ሀእ ጋካናዉ ኑ ኮሻቶስ፥ ሳሞቶስ፥ ካሎቶስ፥ ዋቶስ፤ ዳና ሶ ꬋይድ ቶይላቶስ።
1CO 4:12 ኑኒ ኑ ኩሸን ኦꬅድ አቆስ። ኑና አስ ባድያ ዎደ አንጆስ፤ ኑና ጎድያ ዎደ ዳንዳኦስ።
1CO 4:13 ኑ ቦላ ኢታባ ኦደትያ ዎደ ሎኦ ቃላ ዛሮስ። ኑ ሀእ ጋካናዉ ሀ አላምያ ፕቶነ ዎራ የገትያ ቡረ ግድዳ።
1CO 4:14 ታኒ ሄሳ ፃፍዳይ፥ ታ ዶስያ ናይታዳ፥ ህንተና ዞራናዉ ፃፋስፐ አትሽን፥ ዬላያናዉ ግደና።
1CO 4:15 ክርስቶሳን ህንተና ድችያ ታይቦፐ ቦላ ግድዳ ካለይሳት ደእኮካ፥ ህንተዉ ዳሮ አዋት ዶኮና። ታ ህንተና ክርስቶስ የሱሳ ዎንገላን የላስ።
1CO 4:16 ህዛ፥ ህንተ ታና ሌምሶ ኦꬅድ ካላና መላ ህንተና ዎሳይስ።
1CO 4:17 ሄሳ ግሾ፥ አማነትዳ፥ ታ ዶስያ፥ ጎዳን ታ ናአ፥ ፅሞትዮሳ ህንተኮ ኪታይስ። እ ዱማ ዱማ በሳን ደእያ ዎሳ ኬꬃን ታኒ ታማርስዳ፥ ክርስቶሳ የሱሳን ደእያ፥ ታ ኦግያ ህንተና ሀሳይሳና።
1CO 4:18 ታኒ ህንተኮ ዮናባ ዳንን፥ ኦቶርትያ እስ እስ አሳት ደኦሶና።
1CO 4:19 ሽን ጎዳይ ጊኮ፥ ማታ ዎደ ታኒ ህንተኮ ባና። ሄ ዎደ ኦቶራንቾታ ሃሳያ ፃላላ ግዶናሽን፥ ኤንታ ዎልቃካ ኤራና።
1CO 4:20 ፆሳ ካዎተꬃይ ኦዳ ግዶናሽን፥ ዎልቃ።
1CO 4:21 ታኒ ህንተኮ ፃምአራ ቦየ ዎይኮ ሲቆራነ አሽከ አያናራ ቦ? አዉሳ ዶረቲ?
1CO 5:1 ህንተ ግዶን ላይማተꬅ ደኤይስ ዝግረቴስ። ሄሳ መላ ላይማተꬅ ሀር አቶሽን፥ አማኖና አሳይካ ኦꬆኮና። ህንተ ግዶን ባ አዋ ማቸራ ቱንዳ አስ ደኤስ።
1CO 5:2 ህንተ ሄሳን ቂሮታናዉነ ዬላታናዉ በሰነ፥ ሽን ኦቶርትደታ። ሄሳ መላ ቦርሶባ ኦꬅዳ ኡራ ህንተ ግዶፈ ከሳናዉ በሰኔ?
1CO 5:3 ታኒ አሾን ህንተራ ዶና እፅኮካ አያናን ታ ህንተራ ደአይስ። ታኒ ህንተራ ደእያ አሳዳ ሀናዳ ሄሳ መላ ኦሱዋ ኦꬅዳ ኡራ ቦላ ፕርዳስ።
1CO 5:4 ኑ ጎዳ የሱስ ክርስቶሳ ሱንꬃን ህንተ ሺቅያ ዎደ ታኒ አያናን ህንተራ ዳና። ሄሳን ጎዳ የሱስ ክርስቶሳ ዎልቃይ ህንተራ ግዳና።
1CO 5:5 ሄ ኡራ ናጋራ አሾይ ꬋይድ፥ እያ አያናይ ጎዳ የሱሳ ፕርዳ ጋላሳን አታና መላ እ፥ ፃላሄስ አꬍድ እመቶ።
1CO 5:6 ህንተ ጬቆይ ሎኦ ግደና። ጉꬃ እርሾይ ሙኑቃ ኡባ ደንይሳ ኤረከትዬ?
1CO 5:7 ህንተ ሀእ እርሾይ ባይና ሙኑቃ ግዳና መላ፥ ህንተፈ ናጋራ እርሾ ከስተ። ኑስ ፓስካ ዶርሰ ግድዳ ክርስቶስ ያርሸትስ።
1CO 5:8 ሄስ ግሾ፥ ገነይነ ኢታተꬅ ደእያ እርሾራ ግዶናሽን፥ ቱማተꬅነ ጌሻተꬅ ደእያ ኡይꬃራ ኑ ባልያ ቦንቾስ።
1CO 5:9 ታ ካሰ ፃፍዳ ዳብዳብያን ህንተ ላይማትያ አሳራ ጋሄቶና መላ ህንተዉ ኦዳስ።
1CO 5:10 ሄሳ ጉሳይ ሀ አላምያን ደእያ ላይማተይሳታራ ዎይኮ ኡዘታራ ዎይኮ ካይሶታራ ዎይኮ ኤቃ ጎይነይሳታራ ፖሎ ጋሄቶፍተ ጉሱ ግደና። ሄሳ ግድኮ፥ ሀ አላምያፐ ህንተ ከያናዉ በሴስ ሽን አትስ።
1CO 5:11 ሽን አማናይስ ያግሸ ላይማተይሳታራ ዎይኮ ኡዘታራ ዎይኮ ኤቃ ጎይነይሳታራ ዎይኮ ጫየይሳታራ ዎይኮ ማꬆተይሳታራ ዎይኮ ካይሶታራ ጋሄቶፍተ ጋዳ ህንተዉ ኦዳይስ። ሄሳ መላ አሳራ ሀር አቶሽን፥ ካꬅካ ሞፕተ።
1CO 5:12 ዎሳ ኬꬃፈ ካረራ ደኤይሳታ ቦላ ፕርዳናዉ ታና አይበ ጋይ? ዎሳ ኬꬃን ደኤይሳታ ቦላ ህንተ ፕርደከትዬ?
1CO 5:13 ሽን ካረራ ደኤይሳታ ቦላ ፆሳይ ፕርዳና። ሄ ኢታባ ኦꬅያ ኡራ ህንተ ግዶፈ ከስተ።
1CO 6:1 ህንተ ግዶፈ እሶይ እሱዋራ ሞቶይ ደእኮ፥ ሄሳ አማንያ አሳ ስንꬃን ፕርደታናይሳ አግድ፥ አማኖና አሳ ስንꬃን ፕርደታናዉ ዋንድ ቢ?
1CO 6:2 አማንያ አሳይ አላመ ቦላ ፕርዳናይሳ ህንተ ኤረከቲ? ያትን፥ ህንተ አላመ ቦላ ፕርድያባ ግድኮ፥ ሀይሳ መላ ጉꬃባ ፕርዳናዉ ዋንድ ዳንዳኤከቲ?
1CO 6:3 ኑኒ ኪታንቾታ ቦላ ፕርዳናይሳ ኤረከቲ? ያትን፥ ሀ ሳአ ዱሳባ ቦላ ፕርዳናይስ ህንተና ዋንድ ፆኒ?
1CO 6:4 ያትን፥ ሄሳ መላ መቶይ ህንተ ግዶን መትኮ፥ ዎሳ ኬꬃ አይፈን ካትዳ አሳ ስንꬃን ፕርደታናዉ ዋትድ ኤፌቲ?
1CO 6:5 ታኒ ህንተና ዬላያናዉ ሄሳ ጋይስ። ህንተ ግዶን ካጨትዳ እሻታ ስገꬃናዉ ዳንዳእያ አኬካ አስ ባዌ?
1CO 6:6 ያትን፥ እስ አማንያ እሻይ ሀንኮ አማንያ እሻ ፕርዳ ኬꬃን አማኖና አሳ ስንꬃን ሞታናዉ በሲ?
1CO 6:7 ህዛ፥ ህንተ እሶይ እሱዋ ሞትያባ ግድኮ ሄስ ህንተ ኩንደꬃ በሴስ። ሄሳፈ ህንተ ቆሄትኮ ኬሄኔ? ህንተ ጭመትኮ ሎኤኔ?
1CO 6:8 ሽን ህንተ ዎል ግዶን አማነይሳት፥ እሶይ እሱዋ ቆሄታነ ጭሜታ።
1CO 6:9 ጌላት ፆሳ ካዎተꬅ ላቶናይሳ ህንተ ኤረከቲ? ህንተና ጭሞፍተ፤ ላይማተይሳት ዎይኮ ኤቃ ጎይነይሳት ዎይኮ ላመይሳት ዎይኮ አደራ አደራ ጋሄተይሳት፥
1CO 6:10 ዎይኮ ካይሶት ዎይኮ ኡዘት ዎይኮ ማꬆተይሳት ዎይኮ ጫየይሳት ዎይኮ ቦንቀይሳት ፆሳ ካዎተꬅ ላቶኮና።
1CO 6:11 ህንተፈ እስ እስ አሳት ካሰ ሄሳ መላ። ሽን ሀእ፥ ህንተ ጎዳ የሱስ ክርስቶሳ ሱንꬃንነ ፆሳ አያናን ሜጨትደታ፤ ጌይደታ፤ ፅልደታ።
1CO 6:12 ህንተ፥ “ኑ ኮይዳባ ኦꬃናዉ ዳንዳኦስ” ያጌታ። ሽን ኡባይ ማደና። “ታኒ ኮይዳባ ኡባ ኦꬃናዉ ዳንዳአይስ” ያጌታ። ሽን አይብካ ታና ሃረና።
1CO 6:13 ህንተ፥ “ካꬅ ኡሎሳ፤ ኡሎይካ ካꬃሳ” ያጌታ። ሽን ፆሲ ኡሎካ ካꬅካ ꬋይሳናይሳ ታ ህንተዉ ኦዳይስ። ኑ አሳተꬃይ ጎዳሳፈ አትሽን፥ ላይማተꬃስ ግደና። ጎዳይካ ኑ አሳተꬃሳ።
1CO 6:14 ፆሳይ ጎዳ ሀይቆፐ ደንꬅዳይሳዳ፥ ኑናካ ሀይቆፐ ባ ዎልቃን ደንꬃና።
1CO 6:15 ህንተ አሳተꬃይ ክርስቶሳ አሳተꬃፈ እስ ባጋ ግደይሳ ኤረከቲ? ያትን፥ ታኒ ክርስቶሳ አሳተꬃፈ እስ ባጋ ኤፋዳ ላይማተꬃ አሳተꬅ ግዳና መላ ኦꬆ? ሀነና!
1CO 6:16 ላይማትያ አደይ፥ እ ጋሄትያ ማጫሴራ እስ አሳተꬅ ግደይሳ ኤረከቲ? ጌሻ ማፃፋን፥ “ኤንቲ ናምአይ እስ አሳተꬅ ግዳና” ጌተትድ ፃፈትስ።
1CO 6:17 ሽን ጎዳራ እስፍያ አስ እያራ አያናን እስኖ ግዴስ።
1CO 6:18 ላይማተꬃፈ ሃክተ። እስ አስ ኦꬅያ ሀራ ናጋር እያ አሳተꬃፈ ካረራ ኦሰቴስ፥ ሽን ላይማትያ አስ ባ አሳተꬃ ቦላ ናጋራ ኦꬄስ።
1CO 6:19 ህንተ አሳተꬃይ፥ ፆሳይ ህንተዉ እምዳ ህንተናን ደእያ ጌሻ አያና ኬꬅ ግደይሳ ኤረከቲ? ህንተ ህንተባ ግደከታ።
1CO 6:20 ፆሳይ ህንተና ጋተን ሻምስ። ሄሳ ግሾ፥ ህንተ አሳተꬃን ፆሰ ቦንችተ።
1CO 7:1 ህንተ ታዉ ፃፍዳ ዳብዳብያስ ዛሮይ ሀይሳ። እስ አስ ማጫስ ቦቾና አግኮ ሎኦ።
1CO 7:2 ሽን ላይማተꬃፈ አታናዉ እስ እስ አደይ ማቾ ኤኮ፤ ቃስ እስ እስ ማጫሳስ አዝን ደኦ።
1CO 7:3 አዝናይ ባ ማቼስ፥ ቃስ ማችያ ባ አዝናስ በሲያባ ኩንꬆ።
1CO 7:4 ማቼስ ባ አሳተꬃ ቦላ ማት ባዋ፥ ሽን ማት እ አዝናሳ። ሄሳዳካ፥ አዝናስ ባ አሳተꬃ ቦላ ማት ባዋ፥ ሽን ማት ማቸሳ።
1CO 7:5 ህንተ ዎሳን ጉꬃ ዎደ ጋምአናዉ ዞረተꬃን ግዶና እፅኮ፥ እሶይ እሱዋ ድጎፍተ። ሄሳ ጋሶን ህንተናተꬃ ሃራናዉ ፆነትን፥ ፃላሄይ ህንተና ፓጮና መላ እስፈ ደእተ።
1CO 7:6 ሽን ታኒ ህንተና ዞራናዉ ሀይሳ ጋይስፐ አትሽን፥ ኪታ ግደና።
1CO 7:7 አስ ኡባይ ታዳ ማቾ ኤኮና ደእያኮ ዶሳይስ፥ ሽን ፆሲ እሱዋስ እሱዋስ እምዳ ዱማ እሞት ደኤስ። እሱዋስ ሀይሳ መላ ሀንኩዋስ ሄሳ መላ እሞት ደኤስ።
1CO 7:8 ማቾ ኤክቦናይሳታስነ አዝና ገልቦናይሳታስ ቃስ አምኤታስ ታኒ ኦደይ፥ ታዳ ደእተ ጋዳ ዞራይስ።
1CO 7:9 ሽን አሞን ፁገተይሳፈ ኤከይስነ ገለይስ ሎኦ ግድያ ግሾ፥ ኤንቲ ባንታና ሃራናዉ ዳንዳኦና እፅኮ፥ ኤኮነ ገሎ።
1CO 7:10 ታኒ ኤክዳይሳታነ ገልዳይሳታ ሀይሳዳ ጋዳ ዞራይስ፤ ታና ግድከ ጎዳይ ኪቴስ፤ ማችያ ባ አዝናፐ ሻከቶፎ።
1CO 7:11 ሽን ሻከትኮ ሀራ አዝና ገሎና ባርካ ደኦ ዎይኮ ባ አዝናራ ስገቶ። አዝን ባ ማችዉ ብሎፎ።
1CO 7:12 ሽን ሀራታስ ጎዳ ግዶናሽን፥ ታኒ ሀይሳዳ ጋይስ። አማኖና ማቻ ደእያ አማንያ አዝን ደእኮ፥ እያ ማችያ እያራ እስፈ ዳናዉ ኮይኮ እዮ ብሎፎ።
1CO 7:13 ቃስ አማኖና አዝን ደእያ አማንያ ማቻ ደእኮ፥ እ አዝናይ ኢራ እስፈ ዳናዉ ኮይኮ እያፐ ብለቶፎ።
1CO 7:14 አማኖና አዝን ባ አማንያ ማቸ ባጋራ ፅሌስ፤ ቃስ አማኖና ማችያ ባ አማንያ አዝና ባጋራ ፅላዉሱ። ሄስ ባይነኮ፥ ህንተ ናይት ቱና ግዶሶና፥ ሽን ሀእ ኤንቲ ጌሽ።
1CO 7:15 ሽን አማኖና አዝናይ ዎይኮ ማችያ ብላናዉ ኮይኮ ብሎ። አማንያ ማችያ ዎይኮ አዝናይ ሄሳ መላባን ቃሸቶኮና። ፆሲ ኑና ሳሮተꬃን ዳና መላ ፄግስ።
1CO 7:16 ነኖ፥ አማንያ ማቸተ፥ ኔኒ አማኖና ነ አዝና አሻነኮ አይ ኤራይ? ዎይኮ አማንያ አዝናዉ፥ ኔኒ አማኖና ነ ማችዉ አሻነኮ አይ ኤራይ?
1CO 7:17 እስ እስ አስ ጎዳይ እያዉ እምዳ እሞታዳነ ፆሳይ እያ ፄግዳይሳዳ ደኦ። ዎሳ ኬꬃ ኡባን ታኒ ታማርስያ ዎጋይ ሀይሳ።
1CO 7:18 ኦንካ ቃፃረትድ ፄገትዳባ ግድኮ፥ ቃፃረቶናዳ ሀኖፖ። ቃፃረቶና ፄገትዳ ኦንካ ደእኮ፥ ቃፃረታናዉ ኮዮፖ።
1CO 7:19 ፆሳ ኪታ ፖላናዉ በሴስፐ አትሽን፥ ቃፃረትን ቃፃረቶና አግን አይኮካ ማደና።
1CO 7:20 እስ እስ አስ ፆሳይ ባና ፄግያ ዎደ ደኤይሳዳ ደኦ።
1CO 7:21 ፆሳይ ነና ፄግያ ዎደ ኔኒ አይሌ? አይኮይ ባዋ ሄሳስ ኡንኤቶፋ። ሽን ኔኒ አይለተꬃፈ ላአ ከያናዉ ዳንዳእኮ ላአ ከያ።
1CO 7:22 አይለ ግድድ ደእሸ ጎዳን ፄገትዳ አስ ጎዳን አይለተꬃፈ ላአ ከይስ። ሄሳዳካ፥ አይለ ግዶና ደእሸ፥ ጎዳን ፄገትዳ አስ ክርስቶሳ አይለ።
1CO 7:23 ፆሳይ ህንተና ጋተን ሻምዳ ግሾ አሳ አይለ ግዶፕተ።
1CO 7:24 ታ እሻቶ፥ ህንተ እሶይ እሶይ ፄገትያ ዎደ ደእያ ደኡዋን ፆሳራ እስፈ ደእተ።
1CO 7:25 ጌላኦታባ ጎዳይ ታና ኪትዳባይ ባዋ። ሽን ጎዳይ ታዉ እምዳ ማሮተꬃ መላ ታኒ ህንተና ዞራይስ።
1CO 7:26 ህዛ፥ ሀእ መቱዋ ግሾ፥ ኤኮና ዎይኮ ገሎና ዱስ ታዉ ሎኦ ዳኔስ።
1CO 7:27 ነ ማቾ ኤክዳባ ግድኮ፥ ሻከታናዉ ኮዮፓ። ኔኒ ማቾ ኤካቦናባ ግድኮ፥ ኤካናዉ ኮዮፓ።
1CO 7:28 ሽን ነ ማቾ ኤክኮ ናጋር ባዋ። ሄሳዳ ጌላእያ አዝና ገልኮ ናጋር ባዋ። ሽን ኤክያ ገልያ አሳስ ሀ ሳአን ዳሮ መቶይ ደእያ ግሾ ህንተ ሄሳፈ አታና መላ ታኒ ኮያይስ።
1CO 7:29 ታ እሻቶ፥ ታ ገይ ሄሳ፤ ዎደይ ዉርስ። ህዛፐ ጉየ ማቻ ደኤይ ማቾ ኤኮናዳ ደኦ።
1CO 7:30 ዬከይሳት ዬኮናዳ፥ ኡፋይተይሳት ኡፋይቶናዳ፥ ሻመይሳት አይኮይካ ባይናዳ ባንታና ታይቦ።
1CO 7:31 ሀ ሳኣ ሻሎን ማደተይሳት ማደትቦናዳ ሀኖ። ሀ አላምያ ማላይ አꬋና።
1CO 7:32 ህንተ ህርግ ባይና ዳና መላ ታ ዶሳይስ። ማቾ ኤክቦናይስ ጎዳ ኡፋይሳናዉ ኮያ ግሾ፥ ጎዳባ ቆፔስ።
1CO 7:33 ሽን ማቾ ኤክዳይስ ባ ማችዉ ኡፋይሳናዉ ኮያ ግሾ፥ ሀ ሳአባ ቆፔስ።
1CO 7:34 እያ ቆፋይ ናምአን ሻከቴስ። አዝና ገላቦና ጌላእያ ባ አሳተꬃንነ ባ ሸምፑዋን ጌያዳ ጎዳ ኡፋይሳናዉ ኮያ ግሾ፥ ጎዳባ ቆፓዉሱ። ሽን አዝና ገልዳራ ባ አዝና ኡፋይሳናዉ ኮያ ግሾ፥ ሳአባ ቆፓዉሱ።
1CO 7:35 ታኒ ሄሳ ህንተዉ ኦደይ፥ ህንተ ማደታና መላሳፈ አትሽን፥ ህንተና ኡንኤꬃናዉ ግደና። ሽን ህንተ ቆፋይ ሻከቶና ማራን ደእድ ጎዳ ኡፋይስያባ ህንተ ኦꬃና መላ ታኒ ኦዳይስ።
1CO 7:36 ኦንካ ባ ኦይችዳ ጌላኤስ ገሎ ዎደይ አꬍስ ግድ እዮ አጋናዉ ቆፕኮ፥ ሄስ ቃስ እዉ ሎኦ ግዶናይስ እያዉ ስኤትኮ፥ ባ ኮይዳይሳ ኦꬆ፤ ኤንቲ ኤከቶ፥ ገለቶ፤ ሄሳን ናጋር ባዋ።
1CO 7:37 ሽን እስ አስ ኡንኤꬅያባይ ꬋይን፥ ባ ዎዛናን ምንድ፥ ባና ሃርድ፥ ባ ኦይችዳ ጌላእዉ ኤከናዉ አጋናዉ ኮይኮ ሎይꬅስ።
1CO 7:38 ሄሳ ግሾ፥ ጌላእዉ ኤክያ ኡራይ ሎይꬅስ፤ ቃስ ኤኮና ኡራይ ዳሮ ሎይꬅስ።
1CO 7:39 ማችያ ባ አዝናይ ፓፃ ደእያ ዎደ ኡባን እያራ ቃሸታሱ። ሽን እ አዝናይ ሀይቅኮ፥ ባ ዶስዳ አዝና ገላናዉ ዳንዳአዉሱ። ግዶሽን፥ እያ ገልያ አደይ አማንያ አስ ግዳናዉ በሴስ።
1CO 7:40 ታ ቆፋን ግድኮ፥ እያ ገሎና ደእኮ ኡፋይሳን ዳና። ቃስ ታዉ፥ ታ ቦላ ፆሳ አያን ደእያ ዳኔስ።
1CO 8:1 ኤቃስ ያርሸትያ ካꬃባ ግድኮ ኑ ኡባይ ኤሮስ። ኤራተꬅ ኦቶርሴስ፥ ሽን ሲቆይ ድቼስ።
1CO 8:2 ኦንካ ባና ኤራይስ ግድ ቆፕኮ፥ እ ቡሮ ኤራናዉ በሰይሳ ኤርቤና።
1CO 8:3 ሽን ኦንካ ፆሰ ሲቅኮ፥ እ ፆሳ ማታን ኤረትዳይሳ።
1CO 8:4 ሄሳ ግሾ፥ ኤቃስ ያርሸትዳ ካꬅ ሙሳባ ግድኮ፥ ሀ አላምያን ጎድ እስ ፆሳፈ አትሽን፥ ሀር ባይና ግሾ፥ ኤቅ ፓꬆናባ ግደይሳ ኑኒ ኤሮስ።
1CO 8:5 ፆሰ ግዶናሽን፥ ሳሎንነ ሳአን ፆሰ ጌተትድ ፄገትያ ዳሮ ፆሳትነ ጎዳት ደእኮካ፥
1CO 8:6 ኡባባ መꬍዳ፥ ኑ እያባ ግድዳ፥ እስ ፆሲ፥ አው፥ ኑስ ደኤስ ። ኡባይ እያ ባጋራ መትዳ፥ ኑካ እያ ባጋራ ደኦ ደምዳ እስ ጎዳይ፥ የሱስ ክርስቶሲ ኑስ ደኤስ።
1CO 8:7 ሽን ሀ ኤረይ ኡባ ማታን ዴና። እስ እስ አሳይ ኤቃ ጎይኖራ ሜዘትዳ ግሾ፥ ካꬅ ምያ ዎደ ኤቃስ ያርሸትዳባ ኦꬅድ ኤኮሶና። ሄ ዎደ ኤንታ ካሀይ ዳቡራ ግድያ ግሾ ቱኔስ።
1CO 8:8 ሽን ካꬅ ኑና ፆሳራ ዳቦየና። ኑ ሞና አግድ አይኮካ ቆሄቶኮ፤ ቃስ ምድ ዱማ ጎኤቶኮ።
1CO 8:9 ሽን ህንተ ኮይዳባ ማናዉ ማት ህንተዉ ደእኮካ ሄስ አማኖን ምኖና አሳታ ꬉቦና መላ ናገትተ።
1CO 8:10 ኔኒ ነና ኤራንቾ ጋዳ ኤቃስ ያርሸትዳ ካꬅ ማናዉ ኤቃ ኬꬃን ኡትዳሽን፥ አማኖን ምኖና አስ ነና በእኮ፥ ሄስ ኤቃስ ያርሸትዳ ካꬅ እ ማና መላ ደንነዬ?
1CO 8:11 ህዛ፥ ነ ኤራተꬃ ጋሶን ክርስቶስ እያ ግሾ ሀይቅዳ፥ አማኖን ምኖና ነ እሻይ ꬋይስ።
1CO 8:12 ሄሳዳ ኦꬅድ፥ አማኖን ምኖና ህንተ እሻታ ቆህሸነ ኤንታ ካሀ ማዱንፅስሸ ክርስቶሳ ቆሄታ።
1CO 8:13 ሄሳ ግሾ፥ ካꬅ ታ እሻ ꬉብያባ ግድኮ፥ እ ꬉበቶና መላ ኡባራካ አሾ ሚከ።
1CO 9:1 ታኒ የዳ ደእያ አስ ግድክና? ታ ሀዋረ ግድክና? ታኒ ኑ ጎዳ የሱስ ክርስቶሳ በአብክና? ህንተ ጎዳን ታ ዳቡራ አይፈ ግደከቲ?
1CO 9:2 ህንተ ጎዳባ ግድያ ግሾ፥ ታ ሀራታስ ሀዋረ ግዶና እፅኮካ፥ ህንተዉ ሀዋረ ግደይሳስ ህንተ ማርካ።
1CO 9:3 ታና ሀዋረ ግደና ገይሳታስ ታኒ እምያ ዛሮይ ሀይሳ።
1CO 9:4 ኑ ህንተፈ ማናዉነ ኡያናዉ ቱማ ኑስ ማት ባዌ?
1CO 9:5 ሀንኮ ሀዋረታዳ፥ ጎዳ እሻታዳነ ጰፅሮሳዳ፥ አማንያ ኑ ማቸታ ኤክድ ሄመታናዉ ኑስ ማት ባዌ?
1CO 9:6 ዎይኮ ኦꬅድ አቃናዉ በሰይ ታራነ ባርናባሳ ፃላሌ?
1CO 9:7 ባ ሚሸን ዎታዳረታꬅ ኦይ ኦኔ? ዎይኮ ዎይነ ቶክድ፥ እያፐ አይፈ ሞናይ ኦኔ? ዎይኮ ዉደ ሄምሸ፥ ሄ ዉድያፐ ማꬅ ኡዮናይ ኦኔ?
1CO 9:8 ታኒ ሄሳ አሳ ቆፋꬆ ጋይናዬ? ሙሰ ህገይ ሄሳ ጌነዬ?
1CO 9:9 ሙሰ ህግያን፥ “ዉዱማን ካꬅ የꬍያ ቦራ ዶና ቃቾፋ” ጌተትድ ፃፈትስ። ያትን ፆሳይ ሄሳ ቦራስ ቆፕድ ኦድዴ?
1CO 9:10 ፆሳይ ሄሳ ግዳይ ኑስ ቆፕድ ግደኔ? ኤ፥ ኑ ግሾሳ። ቢታ ጎየይስነ ካꬃ ጌሸይስ ባና ጋከይሳ ኤካና ግድ ኡፋይሳን ኦꬃናዉ በሴስ ጌተትድ ቱማ ኑ ግሾ ፃፈትስ።
1CO 9:11 ኑኒ ህንተ ግዶን አያና ዘረꬅ ዘርዳ ግድኮ፥ አሾስ ኮሽያባ ኑ ህንተፈ ኤክኮ፥ ሄስ ግታባዬ?
1CO 9:12 ሀራት ሄሳ ህንተፈ ኤካናዉ ኤንታዉ ማት ደእኮ፥ ኑስ ኤንታፈ አꬍያ ማት ዴኔ? ሽን ኑኒ ክርስቶሳ ዎንገላስ ꬉበ ግዶና መላ፥ ኡባባ ገንጮስፐ አትሽን፥ ሄ ማታን ጎኤትቦኮ።
1CO 9:13 ፆሳ ኬꬃን ኦꬅያ አሳት ባንታ ካꬃ ፆሳ ኬꬃፈ ኤከይሳ ኤረከቲ? ቃስ ያርሾ በሳን ኦꬅያ አሳት ያርሹዋፈ ኤከይሳ ኤረከቲ?
1CO 9:14 ሄሳዳካ፥ ዎንገላ ማርካተይሳት ዱሳስ ኮሽያባ ዎንገላፐ ኤካና መላ ጎዳይ ኪትስ።
1CO 9:15 ሽን ታኒ ሀ ማታ ኡባን አይኮካ ጎኤታብከ። ታኒ ሄሳ ፃፍዳይ ታ ማታ ቦንችሳናዉ ኮያዳ ግደና። ኦንካ ታ ጬቁዋ ሀዳ ኦꬃናፐ ሀይቆይ ታዉ ሎኦ።
1CO 9:16 ታኒ ዎንገላ ኦደይ ኪተትዳ ግሾሳፈ አትሽን፥ ታና ጬቅስያባ ግደና። ዎንገላ ኦዶና እፅኮ፥ ታና አየ!።
1CO 9:17 ታኒ ዎንገላ ዶሳዳ ኦድኮ፥ ታዉ ዎይቶይ ደኤስ። ሽን ታኒ ዎንገላ ዶሶና ኦድያባ ግድኮ፥ ሄሳ ፆሲ ታዉ ሀዳራ እሚስ።
1CO 9:18 ያትን፥ ታ ዎይቶይ አይቤ? ታኒ ዎንገላ ኦድያ ዎደ ታ ማታን ጎኤቶና፥ ዎንገላ ጋተይ ባይና ኦደይስ ታዉ ዎይቶ።
1CO 9:19 ታኒ ኦደስካ አይለ ግድከ፥ ሽን ዳሮታ ማዳናዉ ኡባስ አይለ ግዳስ።
1CO 9:20 ታኒ አይሁደታ ማዳናዉ ኤንታራ ኤንታ ግዳስ። ታ ሁጰን ህገፈ ጋርሳን ደእከ፥ ሽን ህገፈ ጋርሳን ደኤይሳታ ማዳናዉ ህገፈ ጋርሳን ደእያ አስ ግዳስ።
1CO 9:21 ፆሳ ህግያፈ ካረ ከዮና፥ ክርስቶሳ ህግያስ ኪተታሸ፥ ህገይ ባይናይሳታ ማዳናዉ ህገይ ባይና አሳዳ ሀናስ።
1CO 9:22 ታኒ ዳቡራንቾታ ማዳናዉ ዳቡራንቾ ግዳስ። ታኒ እሶታ እሶታ ማዳናዉ ኡባራ ኡባባ ሀናስ።
1CO 9:23 ታኒ ዎንገላ አንጁዋ ሻከታናዉ፥ ዎንገላ ግሾ፥ ሀ ኡባ ሀናስ።
1CO 9:24 ዎꬃን ጋደትያ ኡባይ ዎፄስ፥ ሽን እሱዋ ፃላል ዎይቶ ኤከይሳ ኤረከቲ? ሄሳዳ ህንተካ ዎይቶ ኤካናዉ ዎፅተ።
1CO 9:25 ጋደትያ አሳ ኡባይ ኡባባን ባንታና ሃሬስ። ኤንቲ ሄሳ ዳቡረይ ꬋይያ ዎይቶ ኤካናሳ። ሽን ኑኒ ዳቡረይ መርና ዎይቶ ኤካናሳ።
1CO 9:26 ሄሳ ግሾ፥ ታኒ ቆፍ ባይና አሳዳ ዎፅከ። ጫርኮ ይምፕያ አሳዳ ጮ ኩሸ የድከ።
1CO 9:27 ሽን ታኒ ሀራታስ ዎንገላ ኦድዳፐ ጉየ፥ ታኒ ታ ሁጰን የገትዳ አስ ግዶና መላ ታ አሳተꬃ ዎልቃን ሃራዳ ታዉ ኪተታና መላ ኦꬃይስ።
1CO 10:1 ታ እሻቶ፥ ታኒ ህንተ ሀይሳ አኬካና መላ ኮያይስ። ኑ ማይዛት ኡባይ ሻራፐ ጋርሳራ ሄመትዶሶና፤ ኡባይ አባ ፕንዶሶና።
1CO 10:2 ኤንቲ ሙሰራ እስፋናዉ ሻራንነ አባን ፃማቀትዶሶና።
1CO 10:3 ኤንቲ ኡባይ እስ አያና ካꬅ ምዶሶና።
1CO 10:4 ቃስ ኡባይ እስ አያና ኡሻ ኡይዶሶና። ኤንቲ ባንታና ካልያ አያና ዛላፈ ፑልትዳ ኡሻ ኡይዶሶና፤ ሄ ዛላይካ ክርስቶሳ።
1CO 10:5 ሽን ፆሳይ ኤንታፈ ዳሮታን ኡፋይትቦና ግሾ፥ ኤንታ አሀይ መላ ቢታን ዎꬍድ አትስ።
1CO 10:6 ኤንቲ ኢታባ አሞትዳይሳዳ፥ ኑካ ኢታባ አሞቶና መላ ሄ ኡባይ ኑስ ሌምሶ ግድስ።
1CO 10:7 ጌሻ ማፃፋን፥ “አሳይ ማናዉነ ኡያናዉ ኡትዶሶና፤ ቃስ የፃናዉ ደንድዶሶና” ጌተትዳይሳዳ ኤንታፈ እሶት እሶት ኤቃ ጎይንዳይሳ መላ ህንተ ኤቃ ጎይኖፍተ።
1CO 10:8 ኤንታፈ እሶት እሶት ላይማትዳይሳዳ ኑ ላይማታናዉ በሰና። ሄሳ ጋሶን ኤንታፈ እስ ጋላስ ላታማነ ሄꬑ ሙኩላይ ሀይቅስ።
1CO 10:9 ኤንታፈ እሶት እሶት ጎዳ ፓጭድ ሾሻን ዱከትድ ሀይቅዳይሳዳ ኑ ጎዳ ፓጫናዉ በሰና።
1CO 10:10 ኤንታፈ እሶት እሶት ዙዙምድ ሀይቆ ኤህያ ኪታንቹዋን ꬋይዳይሳዳ ህንተካ ዙዙሞፍተ።
1CO 10:11 ሀ ኤንታ ቦላ ጋክዳ ኡባይ ኑ ናገታና መላ ኑስ ሌምሶ ግድስ። ቃስ ዎደ ዉርሰꬃ ቦላ ደእያ ኑስ ትምርተ ግዳና መላ ሀ ኡባይ ፃፈትስ።
1CO 10:12 ሄሳ ግሾ፥ ታ ኤቃስ ግያ ኦንካ ኩንዶና መላ ባና ናጎ።
1CO 10:13 አሰ ኡባ ጋክያ ፓጨፐ አትሽን፥ ዱማ ፓጨይ ህንተና ጋክቤና። ህንተ ዎልቃይ ዳንዳኤይሳፈ አꬍያ ፓጨን ህንተ ፓጨቶና መላ አꬅድ እሞና ፆሳይ አማነትዳይሳ። ህንተና ፓጨይ ጋክያ ዎደ ሄ ፓጭያ እ ህንተና ዳንዳእሳና። ቃስ ሄ ፓጭያፐ ህንተ ከያና ኦግያ እ ጊግሳና።
1CO 10:14 ህዛ፥ ታ አልኦ እሻቶ፥ ኤቃ ጎይኖፈ ሃክተ።
1CO 10:15 ህንተ ዎዛናማ አስ ግድዳ ግሾ ታ ሀይሳ ኦዳይስ። ታኒ ገይስ ቱማ ግደይሳ ህንተ ህንተ ሁጰን ፕርድተ።
1CO 10:16 ኑኒ ፆሳ ጋላትድ ሻከትያ አንጆ ፁአይ ክርስቶሳ ሱꬃራ እስፈተꬅ ደኤይሳ ግደነዬ? ቃስ ኑኒ ባꬅያ ኡይꬃይ ክርስቶሳ አሹዋራ እስፈተꬅ ደኤይሳ ግደነዬ?
1CO 10:17 ኑኒ ዳሮ ግድኮካ ኡይꬃይ እስኖ፥ ኑ ሄ እስ ኡይꬃ ሻከትያ ግሾ እስ አሳተꬅ።
1CO 10:18 አነ እስራኤለ አሳይ ኦꬅዳይሳ አኬክተ። ያርሸትዳ ያርሹዋ መይሳት ያርሾ በሳራ እስፈተꬅ ባወዬ?
1CO 10:19 ታኒ አይ ጋናዉ ኮያዳ ጋይና? ኤቃስ ያርሸትዳ ካꬃይ ዎይኮ ኤቃይ ፓꬅያባ ጉሰዬ?
1CO 10:20 ግደና፥ ኤንቲ ያርሸይ ፆሳስ ግዶናሽን፥ ቱና አያናታሳ። ሄሳ ግሾ፥ ህንተዉ ቱና አያናታራ እስፈተꬅ ዳና መላ ኮይከ።
1CO 10:21 ህንተ ጎዳ ፁአፐ ኡይሸ፥ ቃስ ቱና አያናታ ፁአፐ ኡያናዉ ዳንዳኤከታ። ጎዳ ጋይታፐ ምሸ ቃስ ቱና አያናታ ጋይታፐ ማናዉ ዳንዳኤከታ።
1CO 10:22 ኑኒ ሄሳ ኦꬅድ ጎዳ ይሎይኖ? ኑኒ እያፐ አꬍያ ምኖዬ?
1CO 10:23 ህንተ፥ “ኡባባ ኦꬆና መላ ድግያባይ ባዋ” ጌታ፥ ሽን ኡባይ ማደና። ህንተ፥ “ኡባባ ኦꬆና መላ ድግያባይ ባዋ” ጌታ፥ ሽን ኡባይ ድቸና።
1CO 10:24 እስ እስ አስ፥ ሀራ አስ ማድያባ ቆፓናዉ በሴስፐ አትሽን፥ ባና ማድያባ ፃላላ ቆፖፎ።
1CO 10:25 ህንተ ካሀ ስን ገልስያ ኦይሻ ደንꬆና ግያን ባይዘትያ አሹዋ ጮ ሚተ።
1CO 10:26 አይስ ጊኮ፥ ሳእነ ሳአን ደእያ ኡባይ ጎዳባ።
1CO 10:27 እስ አማኖና አስ ህንተና እማታናዉ ኮይድ ፄግኮ ባናዉ ኮይኮ ቢተ። ህንተ ካሀን መትያ ኦይሻን ስꬎና ህንተ ስን አꬅያባ ኡባ ሚተ።
1CO 10:28 ሽን እስ አስ፥ “ሀይስ ኤቃስ ያርሸትዳባ” ጊኮ፥ ሄ ህንተዉ ኦድዳ አድያ ግሾነ ካሀ ግሾ ሄ ካꬃ ሞፕተ።
1CO 10:29 ታኒ፥ ካሀ ግሾ ገይ፥ ሄ ህንተዉ ኦድዳ ኡራ ካሀ ጉሱፈ አትሽን፥ ህንተ ካሀ ግደና። ሀራ አሳ ካሀ ግሾ ጋዳ ታኒ ታ ላአተꬃ ቦላ አይስ ፕርዶ?
1CO 10:30 ታኒ ምያ ካꬃ ፆሳ ጋላታዳ ሚኮ ባልዳዳ አይስ ቦረትያና?
1CO 10:31 ህዛ፥ ህንተ አይ ሚኮ አይ ኡይኮ፥ ዎይኮ አይ ኦꬅኮካ ኡባባ ፆሳ ቦንቾስ ኦꬅተ።
1CO 10:32 አይሁደታ ግድን ግርከታ ግድን ዎይኮ ፆሳ ዎሳ ኬꬅ ግድን ኦደስካ ꬉበ ግዶፕተ።
1CO 10:33 ታኒ ኡባ ዎደ ዳሮታ አሻናዉ ኤንቲ ማደትያ ኦገ ኮያይስፐ አትሽን ታና ማድያ ኦገ ኮይከ።
1CO 11:1 ታኒ ክርስቶሳ ሌምሱዋ ካለይሳዳ፥ ህንተካ ታና ካልተ።
1CO 11:2 ህንተ ኡባባን ታና ቆፕያ ግሾነ ታኒ ታማርስዳ ትምርትያ ምንꬅድ ናግዳ ግሾ ታኒ ህንተና ጋላታይስ።
1CO 11:3 ሽን ክርስቶስ አደ ኡባስ ሁጰ፥ አደይ ማጫሳስ ሁጰ፥ ቃስ ፆሲ ክርስቶሳስ ሁጰ ግደይሳ ህንተ ኤራና መላ ኮያይስ።
1CO 11:4 ባ ሁጵያ ጉሉንትድ ፆሰ ዎስያ ዎይኮ ትንብተ ኦድያ አደይ ኡባይ ሁጰ ግድዳ ክርስቶሳ ቶቼስ።
1CO 11:5 ባ ሁጵያ ቃጮና ፆሰ ዎስያ ዎይኮ ትንብተ ኦድያ ማጫስያ ሁጰ ግድዳ ባ አዝና ቶቻዉሱ። ባ ሁጵያ ቃጮና ማጫስያ ባ ሁጵያ ሜደትዳ ማጫሳ መላ።
1CO 11:6 ማጫስ ባ ሁጰ ካሞና እፅኮ፥ ባ ሁጵያ ቃንፀቶ። ሽን እዉ ሁጰ ቃንፆይ ዎይኮ ሜዶይ ቦርሶ ግድኮ፥ ባ ሁጵያ ቃጮ።
1CO 11:7 አደይ ፆሳ ሌምሶነ ፆሳ ቦንቾ ግድያ ግሾ፥ ባ ሁጵያ ካማናዉ በሰና፥ ሽን ማጫስ አደስ ቦንቾ።
1CO 11:8 ማጫስ አደፈ መታሱፐ አትሽን፥ አደይ ማጫሳፐ መትቤና።
1CO 11:9 ማጫስ አደስ መትስፐ አትሽን፥ አደይ ማጫሳስ መትቤና።
1CO 11:10 ሀይሳ ግሾነ ኪታንቾታ ግሾ ማጫስ ባዉ ማት ደኤይሳ በሲያ ማላ ባ ሁጰን ቃጫናዉ በሴስ።
1CO 11:11 ሽን ጎዳ ቆፋን ማጫስ አደይ ባይና ዴና፤ አደይካ ማጫስ ባይና ዴና።
1CO 11:12 ማጫስ አደፈ መትዳይሳዳ አደይካ ማጫሳፐ የለትስ። ሽን ኡባይካ ፆሳፈ መትስ።
1CO 11:13 አነ ህንተ ፕርድተ፤ ማጫስ ባ ሁጰ ካሞና ፆሳ ዎሳናዉ በሲ?
1CO 11:14 አደይ ባ ሁጵያ ድችኮ እያዉ ቦርሶ ግደይሳ ሀር አቶሽን መተꬅ ህንተና ታማርሰኔ?
1CO 11:15 ሽን ማጫስ ባ ሁጰ ድችኮ እዉ ቦንቾ ግደኔ? ማጫሳስ ሁጰይ እመትዳይ እያ ባና ካማና መላሳ።
1CO 11:16 ሽን ሀይሳ ቦላ ፓላማናዉ ኮያ አስ ደእኮ፥ ኑስ ግድን ዎይኮ ፆሳ ዎሳ ኬꬃታስ ግድን ሀይሳፈ ሀራ ዎግ ባዋ።
1CO 11:17 ህንተ እስፈ ሺቀይ ጎአስ ግዶናሽን ቆሆስ ግድያ ግሾ፥ ሀእ ታኒ እምያ ኪታን ህንተና ናሽከ።
1CO 11:18 ታኒ ኮይሮ ስእዳይ፥ ዎሳ ኬꬃን ሺቅያ ዎደ ህንተ ግዶን ሻከተꬅ ደኤይሳ። ሀ ታ ስእዳይስ ቱማ ግደይሳ አማናይስ።
1CO 11:19 ህንተ ግዶፈ ቱም ደኤይሳት ኦናንተኮ ኤረታና መላ ህንተ ግዶን ሻሆይ ዳናይስ አተና።
1CO 11:20 ህንተ እስፈ ሺቅያ ዎደ ህንተ ሺቀይ ጎዳ ካሁዋ ማናሳ ግደና።
1CO 11:21 ህንተ ካꬅ ምያ ዎደ እሶይ እሱዋ ናጎና ባይሳ ባይሳ ምያ ግሾ፥ እሶይ ኮሻቴስ ሀንኮይ ቃስ ማꬆቴስ።
1CO 11:22 ቱማ ህንተ ማናዉነ ኡያናዉ ህንተዉ ኬꬅ ባዌ? ዎይኮ ፆሳ ዎሳ ኬꬅ ካꬌቲ? አይኮይ ባይና ማንቆታ ዬላየቲ? ታ ህንተና ዎይጎ? ሀይሳስ ታ ህንተና ናሾዬ? ናሽከ።
1CO 11:23 ታኒ ህንተዉ እምዳ ትምርትያ ጎዳፐ ኤካስ። ጎዳይ የሱሲ አꬍድ እመትያ ቃማ ኡይꬁ ኤክድ፥
1CO 11:24 ፆሳ ጋላትስ። ኡይꬃ ባꬅድ “ሄእተ፤ ሚተ። ሀይስ ህንተዉ እመትያ ታ አሹዋ። ሀይሳ ምሸ ታና ሀሳይተ” ያግስ።
1CO 11:25 ሄሳዳካ፥ ካሁዋ ምድ ስምን፥ ፁኣ ኤክድ፥ “ሀይስ ፁአይ ታ ሱꬃን ኤቅያ ኦራꬃ ጫቁዋ። ህንተ እያፐ ኡያ ዎደ ኡባን ታና ሀሳይተ” ያግስ።
1CO 11:26 ህንተ ሀ ኡይꬃ ምያ ዎደነ ሀ ፁአ ኡያ ዎደ ኡባን ጎዳይ ያና ጋካናዉ እያ ሀይቁዋ ኦዴታ።
1CO 11:27 ሄሳ ግሾ፥ በሶና ኦገን ጎዳ ኡይꬃ ምያ ዎይኮ ጎዳ ፁአ ኡያ ኦንካ እያ አሹዋነ ሱꬃ ቶችዳ ግሾ ባ ናጋራን ኦይሸቴስ።
1CO 11:28 ሽን አስ ባና ፓጮ። ያትድ ኡይꬃ ሞ፤ ፁአፐ ኡዮ።
1CO 11:29 ጎዳ አሹዋባ ሻክድ ኤሮና፥ ኡይꬃ መይነ ፁአፐ ኡየይ፥ ባ ቦላ ፕርዳ ሜስነ ኡዬስ።
1CO 11:30 ሄሳ ግሾ፥ ህንተ ግዶፈ ዳሮት ዳቡርዶሶና፤ ሀርግዶሶና፤ ቃስ ኡንደና አሳት ሀይቅዶሶና።
1CO 11:31 ሽን ኑኒ ኑና ፓጭድ በእዳባ ግድያኮ፥ ኑ ቦላ ፕርደታናሽን።
1CO 11:32 አላመይ ፕርደትያ ዎደ ኑኒ አላምያራ ፕርደቶና መላ ሀእ ጎዳይ ኑና ሴሬስ።
1CO 11:33 ሄሳ ግሾ፥ ታ እሻቶ፥ ጎዳ ካሁዋ ኤካናዉ ህንተ ሺቅያ ዎደ እሶይ እሱዋ ናግድ ኤክተ።
1CO 11:34 ህንተ ሺቆይ ፕርዳስ ግዶና መላ ኮሻትዳ ኦንካ ደእኮ፥ ባ ሶን ሞ። አትዳባ ታኒ ያ ባዳ ህንተዉ ኦዳና።
1CO 12:1 ታ እሻቶ፥ ጌሻ አያና እሞታታባ ህንተ ኤራና መላ ታ ኮያስ።
1CO 12:2 ህንተ ፆሳ አማኖና ዎደ ዶን ባይና ኤቃታን ጎሸትድ፥ ህንተ ኤሮና ሶ ብዳይሳ ኤሬታ።
1CO 12:3 ፆሳ አያናይ ካለꬅያ አስ ኦንካ፥ “የሱሲ ባደቶ” ያገና። ቃስ ጌሻ አያናይ ካለꬆና ደእሽን፥ ኦንካ፥ “የሱሲ ጎዳ” ጋናዉ ዳንዳኦናይሳ ህንተ ኤራና መላ ኮያይስ።
1CO 12:4 ዱማ ዱማ አያና እሞታት ደኦሶና፥ ሽን እሞታታ እምያ አያናይ እሱዋ።
1CO 12:5 ኑ ጎዳስ ኦꬅያ ዱማ ዱማ ኦሶት ደኦሶና፥ ሽን ጎዳይ እሱዋ።
1CO 12:6 ኑ ጎዳስ ኦꬅያ ዱማ ዱማ ኦገት ደኦሶና፥ ሽን ሄ ኦገታን ኦꬅያ አሳ ኡባን ኦꬅያ ፆሳይ እሱዋ።
1CO 12:7 ሽን እሱዋስ እሱዋስ እመትዳ እሞታታን ሀራታ ማዳና መላ ጌሻ አያናይ ቆንጬስ።
1CO 12:8 ጌሻ አያናይ እሱዋስ ጭንጫተꬅ ኩምዳ ቃላ እሜስ፤ ቃስ እሱዋስ ኤራተꬅ ኩምዳ ቃላ እሜስ።
1CO 12:9 ሄ ጌሻ አያናይ እሱዋስ አማኖ፥ ሀንኩዋስ ቃስ ፓꬅያ ዎልቃ እሜስ።
1CO 12:10 ጌሻ አያናይ እሱዋስ ማላታ ኦꬅያ ዎልቃ፥ እሱዋስ ትንብተ ኦድያ ዎልቃ እሜስ። እሱዋስ አያናፐ አያና ሻክ ኤርያ ዎልቃ፥ እሱዋስ ዱማ ዱማ ዶናን ኦድያ ዎልቃ፥ ቃስ እሱዋስ ዱማ ዱማ ዶናን ኦደትዳይሳ ብርሽያ ዎልቃ እሜስ።
1CO 12:11 ሽን ሀ ኡባ ኦይ ሄ እስ ጌሻ አያና። እ ኮይያ መላ እስ እስ አሳስ ዱማ ዱማ እሞታ እሜስ።
1CO 12:12 እስ አሳተꬃን ዳሮ ብልተት ደኦሶና፥ ሽን ሄ ዱማ ዱማ ብልተት እስ አሳተꬅ ግዶሶና። ሄሳዳካ፥ ክርስቶስ ዱማ ዱማ ብልተት ደእያ አሳተꬃ መላ።
1CO 12:13 ኑኒ አይሁደ ግድን ግርከ ግድን አይለ ግድን ዎማኖ ግድን፥ ኡባይ እስ አሳተꬅ ግዳናዉ ጌሻ አያናን ፃማቀትዳ። ቃስ ኑ ኡባይ እስ ጌሻ አያና ኤክዳ።
1CO 12:14 ኑ አሳተꬃን ዱማ ዱማ ብልተት ደኦሶናፐ አትሽን፥ እስ ብልተ ግደና።
1CO 12:15 ቶሆይ፥ “ታኒ ኩሸ ግዶና ግሾ ብልተ ግድከ” ጊኮ፥ እ ሄሳ ግዳ ግሾ ብልተተꬃይ አትዬ?
1CO 12:16 ሀይꬅ፥ “ታኒ አይፈ ግዶና ግሾ ብልተ ግድከ” ጊኮ፥ እ ሄሳ ግዳ ግሾ አሳተꬃፈ እስ ብልተ ግደይስ አትዬ?
1CO 12:17 አሳተꬃ ኡባይ አይፈ ፃላላ ግድዳኮ፥ ኑ አይብን ስአኔ? ቃስ አሳተꬅ ኡባይ ሀይꬃ ፃላላ ግድዳኮ ኑ አይብን ስንጋኔ?
1CO 12:18 ሽን ፆሳይ ባ ኮይዳይሳዳ፥ አሳተꬃ ግዶን ዱማ ዱማ ብልተታ ዎꬅስ።
1CO 12:19 ኡባይ እስ ብልተ ግድዳኮ አሳተꬅ ዋንድ ዳኔ?
1CO 12:20 ሽን ብልተት ዳሮ ግድኮካ፥ አሳተꬃይ እሱዋ።
1CO 12:21 አይፈይ ኩሸኮ፥ “ነ ታዉ ኮሻካ” ጋናዉ ዳንዳኤና። ዎይኮ ሁጰይ ቶሆኮ፥ “ነ ታዉ ኮሻካ” ጋናዉ ዳንዳኤና።
1CO 12:22 ሽን ዳቡራ ዳንያ አሳተꬃ ብልተት ኑስ አꬍድ ኮሾሶና።
1CO 12:23 ቦንቾ ኮሸና ግድ ኑ ቆፕያ ኑ ብልተታፐ ባጋታ ዳሮ ቦንቾስ። ቃስ ኑ ቦርሰትያ ኑ አሳተꬃ ብልተታ አꬅድ ቦንችድ ናጎስ።
1CO 12:24 ኑ በእን ቦርሶና አሳተꬃ ብልተታስ ቦንቾ ኮሸና። ሽን ፆሳይ ኑ አሳተꬃ ብልተታ ዎልራ ጋሰꬅድ ቦርስያ ብልተታስ አꬍያ ቦንቾ እሚስ።
1CO 12:25 አሳተꬃ ብልተት እሶይ እሱዋራ ሻኮ መꬎና ዎልስ ቆፓና መላ ኦꬅድ መꬍስ።
1CO 12:26 አሳተꬃ ብልተታፐ እሶይ ሳከትኮ ብልተት ኡባይ እያራ ሳከቶሶና። አሳተꬃ ብልተታፐ እሶይ ቦንቸትኮ ብልተት ኡባይ እያራ ኡፋይቶሶና።
1CO 12:27 ህንተ ኡባይ ክርስቶሳ አሳተꬅ፤ ቃስ ህንተ እሶይ እሶይ እያ ብልተታ።
1CO 12:28 ዎሳ ኬꬃን ፆሳይ፥ ኮይሮ ሀዋረታ፥ ናምአንꬆ ናበታ፥ ሄꬓንꬆ አስታማረታ፥ ካልድ ማላታ ኦይሳታ፥ ፓይሳታ፥ ሀራታ ማደይሳታ፥ ዎሳ ኬꬃ አይሰይሳታነ፥ ዱማ ዱማ ዶናን ኦደተይሳታ ዎꬅስ።
1CO 12:29 ኡባይ ሀዋሬ? ኡባይ ናቤ? ኡባይ አስታማሬ? ኡባይ ማላታ ኦꬂ?
1CO 12:30 ኡባይ ፓꬅዬ? ኡባይ ዱማ ዱማ ዶናን ኦዴቲ? ኡባይ ዱማ ዱማ ዶናን ኦደቶይሳ ብርሺ?
1CO 12:31 ሽን ኡባፈ አꬍያ እሞታ ምንꬅድ ኮይተ። ቃስ ኡባፈ አꬍያ ኦግያ ታ ህንተና በሳና።
1CO 13:1 ታኒ አሳ ቃላነ ኪታንቾ ቃላ ኦደታናዉ ዳንዳእኮካ፥ ታዉ ሲቆይ ꬋይኮ፥ ጮ ጊርያ ዳላ መላ።
1CO 13:2 ትንብተ ኦድያ እሞት ታዉ ደእኮካ፥ ፁራ ኡባ ኤርኮካ፥ ኤራተꬅ ኡባይ ደእኮካ፥ ቃስ ደርያ ደንꬅድ ሀራሶ ኤፍያ አማኖይ ታዉ ደእኮካ፥ ሲቆይ ꬋይኮ፥ ታ አይኮካ ግድከ።
1CO 13:3 ታዉ ደእያባ ኡባ ማንቆታስ እምኮካ፥ ሀር አቶሽን፥ ታና ታማስ አꬃ እምኮካ፥ ሲቆይ ꬋይኮ ታና አይኮካ ማደና።
1CO 13:4 ሲቆይ ዳንዳአንቾ። ሲቆይ ኬሀ። ሲቆይ ቃናተና። ሲቆይ ጬቀተና። ሲቆይ ኦቶረና።
1CO 13:5 ሲቆይ በሶናባ ኦና። ሲቆይ ኡዘተና። ሲቆይ ይሎተና። ሲቆይ ባ ቆሆ ፓይደና።
1CO 13:6 ሲቆይ ቱማን ኡፋይተስፐ አትሽን፥ ዎርዶን ኡፋይተና።
1CO 13:7 ሲቆይ ኡባ ዳንዳኤስ፤ ኡባ አማኔስ፤ ሎኦባይ ሀናና ግድ፥ ኡፋይሳን ናጌስ፤ ኡባ ገንጬስ።
1CO 13:8 ሲቆይ ዉርሰꬅ ጋካናዉ ꬋየና። ሽን ትንብተይ አታና፤ ዱማ ዱማ ዶናን ኦደተይስ አታና፤ ኤራተꬅካ አꬋና።
1CO 13:9 ኑ ኤራተꬃፈ ጉꬅ ኤሮስ፤ ትንብተፐ ባጋ ኦዶስ።
1CO 13:10 ሽን ፖሎ ግድዳይስ ያ ዎደ ፖሎ ግዶናይስ አታና።
1CO 13:11 ታኒ ናአ ደእያ ዎደ ናአዳ ሃሳይስ፤ ናአዳ ቆፓይስ፤ ናአዳ አኬካይስ። ታ ካሃምዳ ዎደ ናአተꬃ ሀኑዋ አጋስ።
1CO 13:12 ሀእ ፖኦይ ባይና ሶን ማስቶተን በኤይሳዳ በኦስ፥ ሽን ሄ ዎደ ኑ ቆንጨን በአና። ሀእ ኑ ኤራተꬃፈ ጉꬃ ኤሮስ፥ ሽን ሄ ዎደ ፆሳይ ኑና ኤረይሳዳ ፖሎ ኤራና።
1CO 13:13 ህዛ፥ አማኖይ፥ ኡፋይስነ ሲቆይ፥ ሀ ሄꬓት ኤቅድ ዳና። ሽን ሀይሳታፐ አይ ሲቆ።
1CO 14:1 ሲቆ ካልተ። አያና እሞታታ ምንꬅድ ኮይተ፤ ኡባፈ አꬅድ፥ ትንብተ እሞታ ምንꬅድ ኮይተ።
1CO 14:2 ዱማ ዱማ ዶናን ኦደትያ አስ ፆሳስ ኦዴስፐ አትሽን፥ አሳስ ኦደና። ሽን አሳስ ቆንጭቦና ፁራ አያና ዎልቃን ኦደትያ ግሾ፥ ኦንካ እ ኦደተይሳ አኬከና።
1CO 14:3 ሽን ትንብተ ኦደይሳት አሰ ድቻናዉ፥ ምንꬃናዉነ ምንꬃናዉ አሳስ ኦዴስ።
1CO 14:4 ዱማ ዱማ ዶናን ኦድያ አስ ባና ድቼስ። ሽን ትንብተ ኦድያ አስ ዎሳ ኬꬃ ድቼስ።
1CO 14:5 ህንተ ኡባይ ዱማ ዱማ ዶናን ኦደትያኮ ታ ዶሳይስ፥ ሽን ትንብተ ኦዳናይሳ አꬃዳ ዶሳይስ። ዱማ ዱማ ዶናን ኦደተይሳ ዎሳ ኬꬅ ድቻናዉ ብርሽያ አስ ꬋይኮ፥ ዱማ ዱማ ዶና ኦደተይሳፈ ትንብተ ኦደይስ አꬌስ።
1CO 14:6 ሽን ታ እሻቶ፥ ታኒ ህንተኮ ባዳ፥ ቆንጨꬃን ዎይኮ ኤራተꬃን ዎይኮ ትንብተ ኦዶን ዎይኮ ትምርተን ግዶናሽን፥ ዱማ ዱማ ዶናን ኦደትኮ ህንተና አይ ማዳኔ?
1CO 14:7 ዱማ ዱማ የꬃ ሚሸታስ እስ ቆሞ ግርስ ደእኮ፥ ሱሱልኤ ግርስነ ዲꬃ ግርስ ዋትድ ሻክ ኤራኔ?
1CO 14:8 ቃስ ሞይዘ ፑኖይ ጌይድ ኤረቶና እፅኮ ኦላስ ጊገተይ ኦኔ?
1CO 14:9 ሄሳዳካ፥ ዱማ ዱማ ዶናን ህንተ ኦደተይስ ቆንጨ ግዶና እፅኮ ህንተ ኦደይሳ ኦን ኤራኔ? ሄስ ጫርኮስ ኦድያ መላ።
1CO 14:10 ሀ አላምያን ዳሮ ዶናት ደኦሶና፤ ሄ ኡባስ ብርሸꬅ ደኤስ።
1CO 14:11 ሽን እስ አስ ኦደትያ ዶና ታኒ ኤሮና እፅኮ እ ታዉ እማ ግዴስ፤ ታካ እያዉ እማ ግዳይስ።
1CO 14:12 ሄሳዳካ፥ ጌሻ አያና እሞታ ህንተ ኤካናዉ ምንꬅድ ኮይኮ፥ ዎሳ ኬꬅ ድቻናዉ ኡባፈ አꬍያ እሞታ ኮይተ።
1CO 14:13 ዱማ ዱማ ዶናን ኦደትያ አስ ባ ኦዳ ብርሻናዉ ብርሸꬃ እሞታይ እመታና መላ ፆሳ ዎሶ።
1CO 14:14 ታኒ ዱማ ዱማ ዶናን ፆሳ ዎስኮ፥ ታ አያናይ ዎሴስ፥ ሽን ታ ዎዛናይ አይኮካ ጎኤተና።
1CO 14:15 ያትን፥ ታ አይ ኦꬃናዉ ኮሺ? ታኒ ታ አያናን ዎሳይስ፤ ታ ዎዛናንካ ዎሳይስ። ታኒ ታ አያናን የፃይስ፤ ታ ዎዛናንካ የፃይስ።
1CO 14:16 ሄሳ ግዶና እፅኮ ኔኒ ነ አያናን ፆሳ ጋላትያ ዎደ ሄ በሳን ኔኒ ገይሳ ኤሮና አስ ነ ጋላተይሳ ዎይግድ፥ “አምንእ” ጋኔ?
1CO 14:17 ኔኒ ፆሳ ጋላተይስ ሎኦ፥ ሽን ሀራ አስ ማደና።
1CO 14:18 ታ ህንተ ኡባፈ አꬃዳ ዱማ ዱማ ዶናን ኦደትያ ግሾ ፆሳ ጋላታይስ።
1CO 14:19 ሽን ታኒ ዎሳ ኬꬃን ሀራታ ታማርሳናዉ ዱማ ዱማ ዶናን ታሙ ሙኩሉ ቃላ ኦደታናፐ እቻሹ ቃላ ኤረትያ ዶናን ኦደታናዉ ዶሳይስ።
1CO 14:20 ታ እሻቶ፥ ህንተ ቆፋን ናይታዳ ሀኖፕተ። ህንተ ኢታባስ ናይታዳ ሀንተፐ አትሽን፥ ህንተ ቆፋን ካሃማታ ግድተ።
1CO 14:21 ጎዳይ፥ ጌሻ ማፃፋን፥ “ታኒ ሀ አሳስ፥ ዱማ ዱማ ዶናን ኦደትያ አሳንነ እማꬃ እንፃርሳን ኦደትያ አሳን ኦዳና። ሽን ሄስ ሀንንካ ታና ስኦኮና” ያጌስ።
1CO 14:22 ህዛ፥ ዱማ ዱማ ዶናን ሃሳዮይ፥ አማኖና አሳስ ማላ ግዴስፐ አትሽን፥ አማንያ አሳሳ ግደና። ትንብተይ አማንያ አሳስ ማላ ግዴስፐ አትሽን፥ አማኖና አሳሳ ግደና።
1CO 14:23 ዎሳ ኬꬃ አሳይ እስፈ ሺቅያ ዎደ፥ ኡባይ ዱማ ዱማ ዶናን ኦደትኮ ኤሮና ዎይኮ አማኖና አሳይ ህንተ ሺቁዋ ይድ፥ “ሀይሳቲ ጎዮሶና” ጎኮናዬ?
1CO 14:24 ሽን ኤሮና ዎይኮ አማኖና አሳይ ዎሳ ኬꬅ ያ ዎደ አሳይ ትንብተ ኦድሽን፥ ስእኮ ባ ናጋራ አኬካና፤ ቃስ እ ስእዳ ቃላን ፕርደታና።
1CO 14:25 ኤንቲ እያ ዎዛናን ጌምዳ ቆፋ ቆንጭሳና። ሄሳዳካ፥ “ቱማ ፆሳይ ህንተ ግዶን ደኤስ” ያግድ ማርካትድ፥ ጉፋንድ ፆሳስ ጎይናና።
1CO 14:26 ታ እሻቶ፥ ኑ ዎይግኖ? ህንተ እስፈ ሺቅያ ዎደ እሱዋስ ማዝሙረይ ደኤስ፤ እሱዋስ ታማርሶ እሞት ደኤስ፤ እሱዋስ ቆንጨꬅ ደኤስ፤ እሱዋስ ዱማ ዱማ ዶናን ሃሳዮይ ደኤስ፤ እሱዋስ ብርሸꬃ እሞት ደኤስ። ሄ ኡባይ ዎሳ ኬꬅ ድችያባ ግዳናዉ በሴስ።
1CO 14:27 ዱማ ዱማ ዶናን ኦደትያ አሳት ደእኮ፥ ናምአ ዎይኮ ዳርኮ ሄꬓ ግድድ ማራን ማራን ኦደታናዉ በሴስ። ኤንቲ ኦደተይሳ ሀራ አስ ብርሾ።
1CO 14:28 ሽን ብርሽያ አስ ꬋይኮ፥ ዱማ ዱማ ዶናን ኦደተይስ ዎሳ ኬꬃን ስእ ጎ። ባዉነ ባ ፆሳስ ኦዶ።
1CO 14:29 ትንብተ ኦደይሳት ናምአ ዎይኮ ሄꬓ ግድድ ኦዶ። ቃስ ሀራት ኤንቲ ግያባ ፕርዶና።
1CO 14:30 ሄ ሺቁዋን ደእያ ሀራ አሳስ እስባይ ቆንጭኮ ካሰ ኦደተይስ ስእ ጎ።
1CO 14:31 ኡባይ ታማራና መላነ ኡባይ ምናና መላ ማራን ማራን ትንብተ ኦዳናዉ ዳንዳኤታ።
1CO 14:32 ናበታ አያናይ ናበታስ ኪተቴስ።
1CO 14:33 ጌሻታ ዎሳ ኬꬃ ኡባይ ሜዘትዳይሳዳ ፆሳይ ሳሮተꬃ ፆሳፈ አትሽን፥ ቡቀꬅ መꬍያ ፆሲ ግደና።
1CO 14:34 ማጫስ ዎሳ ኬꬃን ስእ ጎ። ሙሰ ህገይ ገይሳዳ ኤንቲ ሃረቶፈ አትሽን፥ ዎሳ ኬꬃን ኦዳናዉ ኤንታዉ ማት ባዋ።
1CO 14:35 ማጫስ ዎሳ ኬꬃን ሃሳዮይ ቦርሶ ግድያ ግሾ እስባ ኤራናዉ ኮይኮ ሶን ባንታ አዝናታ ኦይቾና።
1CO 14:36 ፆሳ ቃላ ኮይሮ ህንተ ኤህደቲ? ዎይኮ ፆሳ ቃላይ ህንተ ፃላላኮ ይዴ?
1CO 14:37 ኦንካ ባና ናበ ዎይኮ ባና ፆሳ አስ ግድ ቆፕኮ፥ ታኒ ህንተዉ ፃፈይስ ጎዳ ኪታ ግደይሳ አኬኮ።
1CO 14:38 ሽን ኦንካ አኬኮና እፅኮ እካ አኬከቶፎ።
1CO 14:39 ሄሳ ግሾ፥ ታ እሻቶ፥ ትንብተ ኦዳናዉ ምንꬅድ አሞትተ፤ ቃስ ዱማ ዱማ ዶናን ኦደተይሳካ ድጎፍተ።
1CO 14:40 ሽን ኡባይካ ዎጋንነ ማራን ግዶ።
1CO 15:1 ታ እሻቶ፥ ታ ህንተዉ ማርካትዳ ዎንገላ ህንተ ኤክዳይሳነ ህንተ አማኖይ እያን ኤቅዳይሳ ህንተ አኬካና መላ ታኒ ኮያይስ።
1CO 15:2 ታ ታማርስዳ ዎንገላ ምንꬅድ ኦይክኮ ህንተ እያን አታና። ሄስ ሀኖና እፅኮ ህንተ አማኖይ ሀዳ ግዳና።
1CO 15:3 ታኒ ኤክዳ ኡባፈ አꬍያ ኪታ ካሰታዳ ህንተዉ እማስ። ሄስካ፥ ጌሻ ማፃፋይ ገይሳዳ፥ ክርስቶስ ኑ ናጋራ ግሾ ሀይቅስ።
1CO 15:4 ሞገትስ፤ ጌሻ ማፃፋይ ገይሳዳ፥ ሄꬓንꬆ ጋላሳን ሀይቆፐ ደንድስ።
1CO 15:5 ጰፅሮሳስ ቆንጭስ። ሄሳፈ ጉየ፥ ታማነ ናምኡ ሀዋረታስ ቆንጭስ።
1CO 15:6 ሄሳፈ ጉየ፥ እቻሹ ፄታፐ ዳርያ አሳስ እስቶሆ ቆንጭስ። ኤንታፈ ዳርያ ባጋይ ሀእ ጋካናዉ ፓፃ ደኦሶና፥ ሽን ጉꬃት ሀይቅዶሶና።
1CO 15:7 ሄሳፈ ጉየ፥ ያይቆባስ ቆንጭስ፤ ጉየፐ ባ ሀዋረታ ኡባስ ቆንጭስ።
1CO 15:8 ቃስ ዉርሰꬃን አዉጫያ መላ ግድዳ ታዉ ቆንጭስ።
1CO 15:9 ታኒ የሱሳ ሀዋረታ ኡባፈ ላፋ። ታኒ ፆሳ ዎሳ ኬꬃ ጎድዳ ግሾ የሱሳ ሀዋረ ጌተታዳ ፄገታናዉ በሶናይሳ።
1CO 15:10 ሽን ፆሳ አꬎ ኬሀተꬃን ታ ሀእ ግድዳይሳ ግዳስ፤ እ ታዉ እምዳ አꬎ ኬሀተꬃይ መላ አትቤና። ታኒ ሀንኮ ሀዋረታፐ አꬃዳ ዳቡራስ። ሽን ታራ ደእያ ፆሳ አꬎ ኬሀተꬃይ ኦꬅስፐ አትሽን፥ ታና ግድከ።
1CO 15:11 ህዛ፥ ታና ግድን ኤንቲ፥ ኑ ኡባይ ታማርሰይ ሄሳ፤ ህንተካ ሄ ኪታ አማንደታ።
1CO 15:12 ክርስቶስ ሀይቆፐ ደንድዳይሳ ኑ ሳባክያ ዎደ ህንተፈ እሶት እሶት ያትን፥ ዎይግድ፥ “ሀይቆፐ ደንዶይ ባዋ” ያጎና?
1CO 15:13 ሀይቆፐ ደንዶይ ባይናባ ግድኮ ክርስቶስ ሀይቆፐ ደንድቤና ጉሱ።
1CO 15:14 ክርስቶስ ሀይቆፐ ደንድቦናባ ግድኮ ኑ ትምርተይ ቃስ ህንተ አማኖይካ ሀዳ።
1CO 15:15 ሀይቆፐ ደንዶይ ባይናሽን፥ ኑኒ ፆሳይ፥ “ክርስቶሳ ሀይቆፐ ደንꬅስ” ያግድ ሳባክሸ ፆሳ ዎርዳንቾ ማርካታ ግድዳ ጉሱ።
1CO 15:16 ሀይቅዳ አሳይ ሀይቆፐ ደንድቦናባ ግድኮ ህዛ፥ ክርስቶስ ሀይቆፐ ደንድቤና።
1CO 15:17 ክርስቶስ ሀይቆፐ ደንዶናባ ግድኮ፥ ህንተ አማኖይ ሀዳ፤ ቃስ ህንተ ሀእ ጋካናዉ ህንተ ናጋራን ደኤታ።
1CO 15:18 ህዛ፥ ክርስቶሳ አማንድ ሀይቅዳይሳትካ ꬋይዶሶና ጉሱ።
1CO 15:19 ኑኒ ሀ አላምያ ደኡዋ ፃላላስ ክርስቶሳን ኡፋይስ ኦꬅዳባ ግድኮ፥ ሀ ሳአን ደእያ አሳ ኡባፈ ኑባይ አꬍዳ ይባታ።
1CO 15:20 ሽን ክርስቶስ ሀይቅዳይሳታስ ሀይቆፐ ደንዶን ባይራ ግድድ ቱማ ደንድስ።
1CO 15:21 ሀይቆይ እስ አሳ ባጋራ ሀ አላምያ ይዳይሳዳ ሀይቆፐ ደንዶይ እስ አሳ ባጋራ ይስ።
1CO 15:22 አዳመ ባጋራ አሳ ኡባይ ሀይቅዳይሳዳ ክርስቶሳ ባጋራ አሳ ኡባይ ደኦን ዳና።
1CO 15:23 ሽን እሶይ እሶይ ባ ማራን ማራን ደንዳና። ክርስቶስ ኡባፈ ካሰትድ ደንድስ፤ ሄሳፈ ጉየ፥ ክርስቶሳይሳት እ ያ ዎደ ደንዳና።
1CO 15:24 ሄሳፈ ጉየ፥ ክርስቶስ ሀላቃተꬅ፥ ማታነ ዎልቃ ኡባ ꬋይስድ፥ ካዎተꬃ ፆሳ አዋስ እምያ ዎደ ዎድያ ዉርሰꬃይ ያና።
1CO 15:25 ፆሳይ እያ ሞርከታ ኡባ እያ ቶሁዋፐ ጋርሳን ዎꬃና ጋካናዉ ክርስቶስ ሃራናዉ በሴስ።
1CO 15:26 ዉርሰꬃን እ ꬋይሳናዉ ደእያ ሞርከይ ሀይቆ።
1CO 15:27 ጌሻ ማፃፋን፥ “ፆሳይ ኡባባ እያ ማታፐ ጋርሳን ሃርስስ” ጌተትድ ፃፈትስ። ሽን ኡባ እያ ማታፐ ጋርሳን ሃርስስ ገይስ፥ ኡባባ እያ ማታፐ ጋርሳን ሃርስዳ ፆሳ ጉጀና።
1CO 15:28 ኡባባይ ክርስቶሳ ማታፐ ጋርሳን ሃረትዳፐ ጉየ ክርስቶስ ቃስ ባ ሁጰን ኡባባ ባዉ ሃርስዳ ፆሳስ ሃረታና። ሄ ዎደ ፆሳይ ባ ፃላላ ኡባ ሃራና።
1CO 15:29 ሀይቅዳይሳት ደንዶናባ ግድኮ ኤንታ ግሾ ፃማቀትያ አሳስ አይባ ዎይ ደኢ? ሀይቅዳይሳት ደንዶናባ ግድኮ ያትን፥ አይስ፥ አሳይ ሀይቅዳይሳታ ግሾ ፃማቀቶና?
1CO 15:30 ያትን፥ ኑኒ አይስ ኡባ ዎደ ኑናተꬃ መቶስ አꬅድ እሞና?
1CO 15:31 ታ እሻቶ፥ ታ ጋላስ ጋላስ ሀይቆስ አꬋዳ እመታይስ። ሄስካ፥ ጎዳ ክርስቶስ የሱሳን ደእያ ደኡዋ እስፈተꬃን ህንተናን ጬቅያ ግሾሳ።
1CO 15:32 አሳ ቆፋꬆ ግድኮ፥ ታኒ ኤፈሶናን ዶአራ ቡተትዳይስ ታና አይ ማዲ? ሀይቅዳይሳት ሀይቆፐ ደንዶናባ ግድኮ፥ “ዎንቶ ኑ ሀይቅያ ግሾ ሀች ማና ኡያና” ግያ አሳ መላ ግዶስ።
1CO 15:33 ጭመቶፍተ! ኢታ ላገተꬅ ሎኦ አማለ ኢሴስ።
1CO 15:34 ህንተ አኬካኮ ስምተ። ናጋራ ኦꬆፍተ። ህንተፈ እስ እስ አሳይ ፆሳ ኤሮኮና። ታኒ ህንተና ዬላያናዉ ሄሳ ጋይስ።
1CO 15:35 እስ አስ፥ “ሀይቅዳ አሳይ ዋንድ ደንዳኔ? ኤንቲ አይ መላ አሳተꬃራ ያኔ?” ያጎና አገና።
1CO 15:36 ነኖ ኤያዉ፥ ኔኒ ቢታን ዘርያ ዘረꬃይ ሀይቆና ዶለና።
1CO 15:37 ኔኒ ዘረይ ግስተ ግድን ዎይኮ ሀራ ካꬃ ቆሞ አይፈ ፃላላ ዘራሳፐ አትሽን፥ ዶልዳ ዶላ ግደና።
1CO 15:38 ሽን ፆሳይ ዘረꬃስ ባ ዶስዳ መላ መተꬅ እሜስ። ዱማ ዱማ ዘረꬃስ ዱማ ዱማ አሳተꬅ እሜስ።
1CO 15:39 መተꬃ ኡባ አሾይ እሶ ግደና። ሽን አሳ አሾይ እሱዋ፤ መሄ አሾይ ዱማ፤ ካፎታ አሾይ ዱማ፤ ቃስ ሞሎ አሾይ ዱማ።
1CO 15:40 ሳሎ አሳተꬅ ደኤስ፤ ቃስ ሳአ አሳተꬅ ደኤስ። ሽን ሳሎ አሳተꬃ ቦንቾይ ዱማ፤ ቃስ ሳአ አሳተꬃ ቦንቾይ ዱማ።
1CO 15:41 አዋ ቦንቾይ ዱማ፤ አጌና ቦንቾይ ዱማ፤ ፆልንቶታ ቦንቾይ ዱማ፤ እስ ፆልንቶይ ሀንኮ ፆልንቱዋፈ ቦንቾን ዱማቴስ።
1CO 15:42 ሀይቅዳይሳት ሀይቆፐ ደንድያ ዎደ ሄሳዳ ሀናና። ሀይቅያ አሳተꬃይ ዘረቴስ፤ ሀይቆና አሳተꬅ ግድድ ደንዴስ።
1CO 15:43 ቶሸን ዘረትድ፥ ቦንቾን ደንዳና፤ ዳቡራን ዘረትድ፥ ዎልቃን ደንዳና።
1CO 15:44 መተꬃ አሳተꬃይ ዘረትድ፥ አያና አሳተꬅ ግድድ ደንዳና። መታ አሳተꬅ ደእኮ፥ አያና አሳተꬅ ደኤስ።
1CO 15:45 ሄሳዳካ፥ ጌሻ ማፃፋን፥ “ኮይሮ አደይ፥ አዳመይ፥ ፓፃ ደእያ አሰ ግድድ መትስ” ያጌስ። ሽን ዉርሰꬃ አዳመይ፥ ክርስቶስ፥ ደኦ እምያ አያና ግድስ።
1CO 15:46 ሽን መታ አስ ኮይሮ ይን፥ ጉየፐ አያና አስ ይስፐ አትሽን፥ አያና አስ ኮይሮ ይቤና።
1CO 15:47 ኮይሮ አዳመይ ቢታፈ መትዳ ቢታ አስ፤ ናምአንꬆ አዳመይ ሳሎፐ ይዳ ሳሎ አስ።
1CO 15:48 ቢታፈ መትዳይሳት ቢታፈ መትዳይሳ ዳኖሶና። ሳሎይሳት ሳሎፐ ይዳይሳ ዳኖሶና።
1CO 15:49 ኑኒ ቢታፈ መትዳ አድያ ዳነይሳ መላ ሳሎፐ ይዳ አድያ ዳናና።
1CO 15:50 ታ እሻቶ፥ ታ ገይስ ሄሳ፤ ሀእ ኑ ማእዳ አሳተꬃይ ፆሳ ካዎተꬃ ላታናዉ ዳንዳኤና። ዎቅያ አሳተꬃይ ዎቆና አሳተꬃ ላተና።
1CO 15:51 ታ ህንተዉ እስ ፁራ ኦዳና። ኑ ኡባይ ሀይቆኮ፥ ሽን ዉርሰꬃን ኡባይ ላመታና።
1CO 15:52 ሞይዘይ ፑነትያ ዎደ፥ አይፈይ ቅጵ ፄላናዉ ሀሳዮና ላመታና። ሀይቅዳ አሳይ ዎቆና አስ ግድድ ደንዳና፤ ኑካ ላመታና።
1CO 15:53 ሀይስ ዎቀይስ ዎቆናይሳ፥ ሀይስ ሀይቀይስ ሀይቆናይሳ ማአናዉ በሴስ።
1CO 15:54 ሀይስ ዎቀይስ ዎቆናይሳ፥ ቃስ ሀይስ ሀይቀይስ ሀይቆናይሳ ማእያ ዎደ፥ ጌሻ ማፃፋን፥ “ሀይቆይ ፆኖን ምተትስ” ግያ ቃላይ ፖለታና።
1CO 15:55 ሄሳዳካ፥ “ሀይቆ፥ ነ ፆኖይ አዉን ደኢ? ሀይቆ፥ ነ ቆህያ ዎልቃይ አዉን ደኢ?” ግዳ ቃላይ ፖለታና።
1CO 15:56 ሀይቆይ ዱክያ ዎልቃይ ናጋራ፤ ቃስ ናጋራ ዎልቃይ ህገ።
1CO 15:57 ሽን ኑ ጎዳ የሱስ ክርስቶሳ ባጋራ ኑስ ፆኖ እምያ ፆሳ ጋላት ጋኮ።
1CO 15:58 ሄሳ ግሾ፥ ታ ሲቆ እሻቶ፥ ቃፆና ምንድ ኤቅተ። ጎዳ ኦሱዋን ህንተ ዳቡረይስ ጮ ግዶናይሳ ኤርድ ኡባ ዎደ ጎዳ ኦሱዋ አዛሎና ኦꬅተ።
1CO 16:1 አማንያ አሳስ ሚሸ ሺሾባ ጋላትያ ዎሳ ኬꬃታስ ታኒ ኪትዳይሳዳ ህንተካ ኦꬅተ።
1CO 16:2 ሚሽያ ሺሾይ ታ ህንተኮ ብያ ዎደ ግዶና መላ እሶይ እሶይ ሳምንታፈ ኮይሮ ጋላስ፥ ዎጋ ዎደ፥ ዎጋ ዎደ፥ ባ ደመይሳፈ ከስድ ባ ሶን ዳጋዮ።
1CO 16:3 ታኒ ያ ብዳ ዎደ ሚሽያ የሩሳላመ ጋꬃና መላ ህንተ ዶርያ አሳስ ዳብዳበ እማዳ ኤንታ የሩሳላመ ኪታና።
1CO 16:4 ኤንታራ ታ ቡሳይ ኮሽያባ ግድኮ ኤንቲ ታራ ባናዉ ዳንዳኦሶና።
1CO 16:5 ታኒ ማቀዶነራ አꬋናዉ ቆፕዳ ግሾ፥ ያ ባዳ ህንተኮ ያና።
1CO 16:6 ታ ብያ በሳ አዉ ግድኮካ፥ ታ ቡሳን ህንተ ታና ማዳና መላ ህንተ ማታን ጉꬃ ዎደ ጋምኦና አግከ። ባልጎ አጌናታ ህንተ ማታን አꬆና ዋያ አጋና።
1CO 16:7 ታኒ ኦገራ አꬋሸ ህንተና በአናዉ ኮይከ። ጎዳይ ጊኮ፥ ህንተ ማታን ጉꬃ ዎደ ታካናዉ ቆፓይስ።
1CO 16:8 ሽን ታኒ ጳንፀቆስፀ ባለይ ጋካናዉ ኤፈሶናን ጋምአና።
1CO 16:9 ታዉ ኦሶይ ኩምዳ ዳልጋ ፐንገይ ዶየትስ፥ ሽን ዳሮ ኤቀትያ ሞርከት ደኦሶና።
1CO 16:10 እ ታ መላ ጎዳ ኦሶ ኦꬅያ አስ ግድያ ግሾ፥ ፅሞትዮስ ህንተኮ ቢኮ፥ ህንተ ማታን እ ህርጎና ዳና መላ ኦꬅተ።
1CO 16:11 ኦንካ እያ ካꬎፖ። እ ታኮ ሳሮ ስማና መላ እያ ማድድ ሞይዝተ። ታኒ እ ሀንኮ አማነይሳታራ ስማናይሳ ናጋይስ።
1CO 16:12 ኑ እሻ አጵሎስ ሀንኮ አማነይሳታራ ህንተኮ ባና መላ ታ እያ ምንꬃ ዎሳስ። ሀእ ህንተኮ ባናዉ ኮይቤና፥ ሽን እያዉ እንጀትያ ዎደ ህንተኮ ባና።
1CO 16:13 ባርክተ፤ አማኖን ኤቅተ፤ ፃልተ፤ ምንተ።
1CO 16:14 ኦሶ ኡባ ሲቆን ኦꬅተ።
1CO 16:15 ታ እሻቶ፥ እስፅፋኖሰይነ እያ ሶ አሳይ አካያን ኤንቲ ኮይሮ አማንዳይሳታ ግደይሳነ አማነይሳታ ማዳናዉ ባንታና አꬅድ እምዳይሳ ህንተ ኤሬታ።
1CO 16:16 ህንተካ ኤንታ መላ አሳስነ፥ ኤንታራ ኦሶን ዳቡርያ ኡባስ ኪተታና መላ ታ ህንተና ዎሳይስ።
1CO 16:17 እስፅፋኖሰይ፥ ፈርዶናፅስነ አካይቆስ ታኮ ይዳይስ ታና ኡፋይስስ። ህንተ ባይና በሳን ኤንቲ ህንተና ግድድ ታ ፓጫ ኩንꬅዶሶና።
1CO 16:18 ኤንቲ ህንተና ኡፋይስዳይሳዳ ታናካ ኡፋይስዶሶና። ሄሳ መላ አሳታ ዶጎፕተ።
1CO 16:19 ኢሰ ዎሳ ኬꬃ አሳይ ህንተና ሳሮ ጎሶና። አቅልነ ጵርስቅላ ባንታ ሶን ሺቅያ ዎሳ ኬꬃ አሳራ እስፈ ህንተና ጎዳ ሱንꬃን ዎዛናፐ ሳሮꬆሶና።
1CO 16:20 አማንያ እሻት ኡባይ ህንተና ሳሮ ያጎሶና። ጌሻ ዬረተꬅ ዬረትሸ እሶይ እሱዋ ሳሮꬅተ።
1CO 16:21 ታኒ፥ ጳዉሎስ፥ ሀ ሳሮꬁዋ ታ ኩሸን ፃፋስ።
1CO 16:22 ጎዳ ዶሶና አስ ደእኮ፥ ባደትዳይሳ ግዶ። ኑ ጎዳዉ፥ ሃያ!
1CO 16:23 ጎዳ የሱስ ክርስቶሳ አꬎ ኬሀተꬃይ ህንተራ ግዶ።
1CO 16:24 ታ ሲቆይ ክርስቶስ የሱሳን ደእያ ህንተ ኡባራ ግዶ። አምንእ።
2CO 1:1 ፆሳ ሸነን የሱስ ክርስቶሳ ሀዋረ ግድዳ ጳዉሎስነ፥ ኑ እሻ ፅሞትዮስ፥ ቆሮንቶሳን ደእያ ፆሳ ዎሳ ኬꬃስነ አካያ ቢታን ደእያ ፆሳ አሳ ኡባስ ፃፍዳ ኪታ።
2CO 1:2 ፆሳ ኑ አዋፐነ ጎዳ የሱስ ክርስቶሳፐ፥ አꬎ ኬሀተꬃይነ ሳሮተꬃይ ህንተዉ ግዶ።
2CO 1:3 ማሮተꬃ አዋስ፥ ኡባ ዎደ ኑና ምንꬅያ ፆሳስ፥ ኑ ጎዳ የሱስ ክርስቶሳ አዋስ ጋላት ግዶ።
2CO 1:4 ፆሳይ ኑስ እምዳ ምንꬁዋን፥ መቶን ደኤይሳታ ኑ ምንꬃና መላ ፆሳይ ኑና ኑ መቶ ኡባን ምንꬄስ።
2CO 1:5 ኑኒ ክርስቶሳ ዳሮ ዋይያ ሻከትዳይሳዳ ቃስ ኑኒ እያ ዳሮ ምንꬁዋን ምናና።
2CO 1:6 ኑኒ ዋየትኮ ሄስ ህንተና ምንꬃናሳነ ህንተና አሻናሳ። ቃስ ኑኒ ምነትኮ ኑኒ ገንጭዳ ዋይያ መላ ህንተካ ገንጭድ፥ ፆሳይ ህንተዉ እምያ ምንꬁዋን ምናና።
2CO 1:7 ህንተ ኑ ኤክዳ መቱዋ መላ ኤክድ፥ ኑ ምንꬁዋን ሻከታናይሳ ኑ ኤርያ ግሾ ኑ ኡፋይሳይ ህንተናን ምኖ።
2CO 1:8 ኑ እሻቶ፥ ኢሰ ቢታን ኑና ጋክዳ መቱዋ ህንተ ኤራና መላ ኮዮስ። ሄ ኑና ጋክዳ መቶይ ኑ ዎልቃፈ ዳርን፥ ሀይቆና አቶኮ ግድ ኡፋይስ ቃንፅዳሽን።
2CO 1:9 ኑኒ ኑ ቦላ ሀይቆ ፕርድ ፕርደትዳ መላ ቆፕዳ። ሽን ኑኒ ኑ ሁጰን ግዶናሽን፥ ሀይቅዳይሳታ ደንꬅያ ፆሳን አማነታና መላ ሄስ ሀንስ።
2CO 1:10 ፆሳይ ሄሳ መላ ኢታ ሀይቆፐ ኑና አሽስ፤ ሀእካ አሻና፤ ስንꬃፈካ እ ኑና አሻና ግድ እያን ኡፋይስ ዎꬆስ።
2CO 1:11 ዎሳን ኑና ማድተ። ዳሮ ዎሳ ጋሶን ፆሳ ማዱዋ ኑ ደምያ ዎደ ዳሮ አሳይ ኑ ግሾ ፆሳ ጋላቶሶና።
2CO 1:12 ኑኒ ኑ ጌሻ ካሀን ጬቀቶስ። ኑኒ ሀ አላምያን ደእዳ ደኡዋን ኡባራካ ህንተራ ኑ ደእዳ ደኡዋን ቱማተꬃንነ ሱረተꬃን ህንተራ ደእዳ። ሄስካ፥ ሀ አላምያ ጭንጫተꬃን ግዶናሽን፥ ፆሳ አꬎ ኬሀተꬃና።
2CO 1:13 ኑ ህንተዉ ፃፍዳ ዳብዳበይ ህንተ ናባባናዉነ አኬካናዉ ዳንዳእያባፐ አትሽን፥ ሀራ ግደና። ህንተ እያ አኬካናዉ ዳንዳኤይሳ ታ አማናይስ።
2CO 1:14 ሀእ ህንተ ኑና ሀንዳ ኬና ኤሬታ፥ ሽን ስንꬃፈ ኩመꬅ ኤራናይሳ ታ አማነታይስ። ኑ ጎዳ የሱሲ ስምያ ዎደ ኑኒ ህንተናን ጬቀትዳይሳዳ ህንተካ ኑናን ጬቀታና።
2CO 1:15 ሄሳ ታኒ ሎይꬃ ኤርዳ ግሾ፥ ህንተ ናምአንꬆ ጎኤታና መላ ካሰታዳ ህንተኮ ባናዉ ቆፋ ቃቻስ።
2CO 1:16 ታኒ ማቀዶነ ባሸነ ያፐ ስማሸ ህንተና በአና። ታኒ ያፐ ይሁዳ ብያ ዎደ ህንተ ታና ታ ኦግያን ማዳና ጋዳ ቆፓስ።
2CO 1:17 ታኒ ሄሳ ጋሸ አይ ኦꬃናዉ በሲያኮ ኤሮና አስ ዳንያና? ዎይኮ ታኒ ታ ቆፋ ቃችያ ዎደ አሳ ቆፋዳ፥ እስ ቶሆ “ኤ” ቃስ እስ ቶሆ “አካይ” ግያ አሳ መለዬ?
2CO 1:18 ሽን ፆሳይ አማነተይሳ ግድያ ግሾ፥ ኑ ህንተዉ ኦድያ ቃላይ “ኤ” ዎይኮ “አካይ” ገይሳ ግደና።
2CO 1:19 ታኒ፥ ስላሰይነ ፅሞትዮስ ህንተዉ ማርካትዳ ፆሳ ናአይ፥ የሱስ ክርስቶሲ ኡባ ዎደ “ኤፐ” አትሽን፥ “ኤ” ነ “አካይ” ግደና።
2CO 1:20 ፆሳይ እማና ግዳ ኡባይ ክርስቶሳ ባጋራ “ኤ” ግዴስ። ኑኒ ክርስቶሳ ባጋራ ፆሳ ቦንቾስ፥ “አምንእ” ገይ ሄሳ ግሾሳ።
2CO 1:21 ኑነ ህንተ ክርስቶሳን ምንድ ኤቃና መላ ኦꬅዳይነ ባ ኦሱዋስ ዶርዳይ ፆሳ።
2CO 1:22 ኑኒ እያባ ግደይሳ ኤርሳናዉ ባ ማታምያ ኑ ቦላ ዎꬅስ፤ ቃስ ባ ጌሻ አያና ኦይꬅ ኦꬅድ ኑ ዎዛናን ዎꬅስ።
2CO 1:23 ታኒ ቆሮንቶሳ ቦና አግዳይ ህንተ አዛኖና አታና መላሳ፤ ሄስ ዎርዶ ግድኮ ፆሳይ ታ ሸምፑዋ ታፐ ኤኮ።
2CO 1:24 ህንተ፥ ህንተ አማኑዋን ምንድ ደእያ ግሾ፥ ኑ ህንተና ኡፋይሳናዉ ህንተራ እስፈ ኦይሳታፐ አትሽን፥ ህንተና ዎልቃን አማንይሳታ ግዶኮ።
2CO 2:1 ታኒ ናምአንꬆ ህንተኮ ቢከ ጋዳ ቆፋ ቃችዳይ ህንተና አዛንꬆና አጋናሳ።
2CO 2:2 ታኒ ህንተና አዛንꬅኮካ ታ አዛንꬅዳ ህንተፈ ሀር ታና ኡፋይሳናዉ ደኤይ ኦኔ?
2CO 2:3 ታኒ ህንተዉ ሄ ዳብዳብያ ፃፍዳይ፥ ታ ህንተና በአናዉ ብያ ዎደ ታና ኡፋይሳናዉ በሲያ አሳን ታ አዛናናዉ ኮዮና ግሾሳ። ታ ኡፋይትያ ዎደ ህንተ ኡባይካ ኡፋይታናይሳ ታ አማናይስ።
2CO 2:4 ታኒ ዳሮ ዋየንነ ኡንአን ቃስ ዳሮ አፉꬃን ፃፍዳይ፥ ህንተና አዛንꬃናሳ ግዶናሽን፥ ታኒ ህንተና ኡባ አይ መላ ዶስያኮ ህንተና ኤርሳና መላሳ።
2CO 2:5 አሰ አዛንꬅዳ ኦንካ ደእኮ ታ እያ ናቁዋ ዳርሳናዉ ኮይከፈ አትሽን፥ ታና ግዶናሽን፥ ህንተፈ ዳሮታ አዛንꬅስ።
2CO 2:6 ህንተፈ ዳርያ አሳይ ሄ ኡራ ሴርዳ ሴራይ እያዉ ግዳና።
2CO 2:7 ሄሳ ግሾ፥ ሄ ኡራይ ዳሮ አዛንድ፥ ኡፋይስ ቃንፆና መላ ህንተ እያ ማራናዉነ ምንꬃናዉ በሴስ።
2CO 2:8 ህንተ እያ ሲቀይሳ ዛር እያዉ ቆንጭሳና መላ ታ ህንተና ዎሳይስ።
2CO 2:9 ታ ሄ ዳብዳብያ ህንተዉ ፃፍዳይ፥ ህንተ ፓጨትድ፥ ኡባባን ታዉ ኪተተይሳ ኤራናዉ ኮይዳ ግሾሳ።
2CO 2:10 ህንተ ማርያ ኡራ ታካ ማራና። ታኒ ማራናባይ አይብ ደእኮካ፥ ክርስቶሳ ስንꬃን ህንተ ግሾ ጋዳ ማራስ።
2CO 2:11 ታኒ ሄሳ ኦꬅዳይ ፃላህያ ጭሞ ኦሱዋ ኑ ኤርያ ግሾ፥ ፃላሄን ጭመቶና አታና መላሳ።
2CO 2:12 ታኒ ክርስቶሳ ዎንገላ ሳባካናዉ ፅሮኣዳ ብዳ ዎደ፥ ጎዳይ ያን ታዉ ኦሶ ኦገ ጊግስድ ዎꬅስ።
2CO 2:13 ሽን ታኒ ታ እሻ ትቶ ያን ደማቦና ግሾ ታ ዎዛናይ ሸምፕቤና። ሄሳ ግሾ፥ ያን ደእያ አሳ ሳሮꬃዳ እያ ኮያናዉ ማቀዶነ ባስ።
2CO 2:14 ሽን ክርስቶሳ ባጋራ ኡባ ዎደ ኑና ፆኖን ካለꬅያነ ሽቶ መላ ሳውያ ክርስቶሳባ ኑ ኤርያ ትምርትያ ኡባ በሲ ጋꬃና መላ ኦꬅያ ፆሳ ጋላት ጋኮ።
2CO 2:15 ኑኒ አትያ አሳ ግዶንነ ꬋይያ አሳ ግዶን ክርስቶሳ ባጋራ ፆሳስ እመትዳ ሳውያ ሽቶ መላ።
2CO 2:16 ꬋያ አሳስ ሀይቆኮ ኤፍያ ሀይቆ ፔኖ፤ ቃስ አትያ አሳስ ደኦኮ ኤፍያ ደኦ ሳዎ፤ ያትን፥ ሄሳ መላ ኦሶስ ግዳናይ ኦኔ?
2CO 2:17 ኑኒ ፆሳ ቃላ ዎ ደማናዉ ኮይድ ዋላክድ ዛልእያ ዳሮ አሳ መላ ግዶኮ። ሽን ፆሳይ ኪትዳ ሱረ አሳታ መላ ክርስቶሳን ደእድ ፆሳ ስንꬃን ቃላ ኦዶስ።
2CO 3:1 ኑኒ ዛሪድ ኑና ሳቢኖዬ? ዎይኮ ሀራ አሳዳ፥ ሳባ ዳብዳብያ ህንተዉ የዳናዉ ዎይኮ ህንተፈ ኤካናዉ ኑና ኮሽዬ?
2CO 3:2 አስ ኡባይ ህንተና ኤራና መላነ ናባባና መላ ህንተ ኑ ዎዛናን ፃፈትድ ደእያ ኑ ዳብዳበ።
2CO 3:3 ህንተ ቃላመን ግዶናሽን፥ ደኦ ፆሳ አያናን፥ ሹቻ ቦላ ግዶናሽን፥ አሳ ዎዛናን ፃፈትዳይሳታነ ኑናን ሀጋዘትዳ ክርስቶሳ ዳብዳበ ግደይሳ በስደታ።
2CO 3:4 ኑ ሄሳ ግዳይ፥ ክርስቶሳ ባጋራ ፆሳን አማኖይ ኑስ ደእያ ግሾሳ።
2CO 3:5 ኑ ሄሳ ኦꬃናዉ ዳንዳእዳይ ፆሳ ዎልቃናፐ አትሽን፥ ኑኒ ኑ ዎልቃን አይኮካ ኦꬃናዉ ዳንዳኦኮ።
2CO 3:6 ኑ ኦራꬃ ጫቁዋ ኦሳንቾታ ግዳና መላ ፆሳይ ኑና ዳንዳእስስ። ሄ ኦራꬃ ጫቆይ ጌሻ አያናን በንትዳይሳፈ አትሽን፥ ፃፈትዳ ህገን ግደና። ህገይ ዎꬌስ፥ ሽን ጌሻ አያናይ ደኦ እሜስ።
2CO 3:7 ሹቻ ቦላ ፃፈትዳ ህገይ እመትያ ዎደ ፆሳ ቦንቾይ ቆንጭስ። ሙሰ ሶምኡዋን ደእያ ቦንቾይ ꬋይሸ ብያባ ግድኮካ፥ እስራኤለ አሳይ እያ ሶምኡዋ ትሽ ኦꬅድ ፄላናዉ ዳንዳእቦኮና። ህዛ፥ ሀይቆ ኤህያ ህገይ ሄሳ መላ ቦንቾን ቆንጭኮ፥
2CO 3:8 ያትን፥ ጌሻ አያናን ኦሰትያ ኦሱዋ ቦንቾይ ዋንድ አኔ?
2CO 3:9 አሳ ቦላ ፕርዳ ኤህያ ህገይ ቦንቾ ግድኮ ያትን፥ አሰ ፅልስያ ኦራꬃ ኦገይ ዋንድ አꬍድ ቦንቸተኔ?
2CO 3:10 ካሰ ቦንቾ ግድዳይሳ ሀእ አꬍያ ቦንቾይ ደኤይሳራ ጋꬅ በእያ ዎደ ቦንቾይ ባይናባ ግድስ።
2CO 3:11 ጉꬃ ዎደስ ቆንጭድ ጉየፐ ꬋይዳይስ ሀይሳዳ ቦንቸትኮ፥ መርናዉ ደኤይስ ዋንድ አꬍድ ቦንቸተኔ?
2CO 3:12 ኑስ ሀይሳ መላ ኡፋይሳይ ደእያ ግሾ፥ ዬላቶና ኦደቶስ።
2CO 3:13 ኑኒ፥ እስራኤለ አሳይ ꬋይሸ ብያ ቦንቹዋ ዉርሰꬃ በኦና መላ ባ ሶምኡዋ ካምዳ ሙሰ መላ ግዶኮ።
2CO 3:14 ሽን ኤንታ ዎዛናይ ዶጭስ። ሀች ጋካናዉ ኤንቲ ጋልአ ጫቁዋ ናባብያ ዎደ ኤንታ ዎዛናይ ሄ ካማን ካመትድ ደኤስ። ሄ ካማይ ክርስቶሳ ፃላላን ቃረቴስ።
2CO 3:15 ሽን ሀች ጋካናዉካ ኤንቲ ሙሰ ማፃፋ ናባብያ ዎደ ኡባን ሄ ካማይ ኤንታ ዎዛና ካሜስ።
2CO 3:16 ሽን ኦንካ ጎዳኮ ስምያ ዎደ አዉደካ ሄ ካማይ ቃረቴስ።
2CO 3:17 ጎዳይ አያና፤ ጎዳ አያናይ ደእያ በሳን ላአተꬅ ደኤስ።
2CO 3:18 ኑኒ ኡባይ ካመትቦና ሶምኦን ጎዳ ቦንቹዋ በአና። ኑኒ አያና ግድዳ ጎዳ ማላ ዳናናዉ ቦንቾፈ ቦንቾን ላመታና።
2CO 4:1 ህዛ፥ ፆሳይ ባ ማሮተꬃን ሀ ኦሱዋ ኑስ እምዳ ግሾ፥ ኑኒ ኡፋይስ ቃንፆኮ።
2CO 4:2 ኑኒ ዬላያ ጌማ ኦሶ ኡባ አግዳ፤ ገነ ኦሶ ኦꬆኮ፤ ፆሳ ቃላ ዎርዶራ ዋላኮኮ። ቱማ ቆንጨን ሃሳይሸ፥ አሳ ኡባ ካሀይ ኑና ኤካና መላ ፆሳ ስንꬃን ኑና ሺሾስ።
2CO 4:3 ኑ ኦድያ ዎንገላይ ጌምዳባ ግድኮካ፥ ጌምዳይ ꬋዮ ኦገን ደእያ አሳሳ።
2CO 4:4 ሀ አላምያ ሃርያ ፆሳይ አማኖና አሳ ዎዛና ጎዝስ። ኤንቲ ፆሳ መላ ግድዳ ክርስቶሳ ቦንቾ ዎንገላ ፖኡዋ በኦና መላ ድግስ።
2CO 4:5 ኑኒ፥ የሱስ ክርስቶሲ ጎዳ ግደይሳነ ኑ እያ ግሾ ህንተ ኦሳንቾ ግደይሳ ኦዶስፐ አትሽን፥ ኑባ ኦዶኮ።
2CO 4:6 “ꬉማን ፖኦይ ፖኦ” ግዳ ፆሳይ፥ ክርስቶሳ ሶምኡዋን ፖእያ ፆሳ ቦንቹዋ ኤራ ፖኡዋ እማናዉ ባ ፖኡዋ ኑ ዎዛናን ፖእስስ።
2CO 4:7 ሽን ኡባፈ አꬍያ ዎልቃይ ኑባ ግዶናሽን፥ ፆሳባ ግደይሳ በሳናዉ ሀ ቦንቾ ሻሎይ መቃ ሚሸ ግድዳ ኑ አሳተꬃን ደኤስ።
2CO 4:8 ኑ ኡባ ባጋራካ ዋየትዳ፥ ሽን መቀረትቦኮ። ኑስ ሀድርስ ግድስ፥ ሽን ኡፋይስ ቃንፅቦኮ።
2CO 4:9 ኑ፥ ሞርከታን ጎደትዳ፥ ሽን ላገ ꬋይቦኮ። ኑ ሞርከታን ሾጨትድ ኩንድዳ፥ ሽን ꬋይቦኮ።
2CO 4:10 የሱሳ ደኦይ ኑ አሳተꬃን ቆንጫና መላ እያ ሀይቁዋ ኡባ ዎደ ኑ አሳተꬃን ቶክድ ዩዮስ።
2CO 4:11 የሱሳ ደኦይ ሀይቅያ ኑ አሳተꬃን ቆንጫና መላ ፓፃ ደእያ ኑኒ እያ ግሾ፥ ኡባ ዎደ ሀይቆስ አꬍድ እመቶስ።
2CO 4:12 ህዛ፥ ሀይቆይ ኑናን ኦꬅያ ዎደ ደኦይ ህንተናን ኦꬄስ።
2CO 4:13 ጌሻ ማፃፋን፥ “ታ አማናስ፤ ሄሳ ግሾ ኦዳስ” ያገትስ። ሄሳ መላ አማኖይ ኑስ ደእያ ግሾ ሃሳዮስ።
2CO 4:14 ጎዳ የሱሳ ሀይቆፐ ደንꬅዳ ፆሳይ፥ ኑናካ የሱሳራ ሀይቆፐ ደንꬃናይሳነ ህንተራ እስፈ ባ ስን ሺሻናይሳ ኤሮስ።
2CO 4:15 ሄስ ኡባይ ሀንዳይ ህንተ ግሾሳ። ፆሳ አꬎ ኬሀተꬃይ ዳሮ አሳ ጋክያ ዎደ አሳይ ፆሳ ቦንቹዋስ ዳሮ ጋላታ እማና።
2CO 4:16 ሄሳ ግሾ፥ ኑኒ ኡፋይስ ቃንፆኮ። ኑ በንትያ አሳተꬃይ ዳቡርሸ ብያባ ግድኮካ፥ ኑ አያና አሳተꬃይ ጋላስ ጋላስ ኦራፄስ።
2CO 4:17 ሀእስ ኑኒ ዋየትያ ሀ ካዉሻ ዋየይ፥ ኡባፈ ኬህ ግታትያ መርና ቦንቹዋ ኑስ እምሳና።
2CO 4:18 ኑኒ በንትያባ ግዶናሽን፥ በንቶናባ ፄሎስ። በንትያባይ ሀእሳ፥ ሽን በንቶናባይ መርናሳ።
2CO 5:1 ሀእ ኑ ደእያ ዱንካነ ዳንያ ሀ ሳአ አሳተꬃይ ላለትኮካ፥ አስ ኬፅቦና፥ ፆሳይ ኬፅዳ መርና ኬꬃይ ኑስ ሳሎን ደኤይሳ ኤሮስ።
2CO 5:2 ሳሎ አሳተꬃ ማአናዉ አሞትሸ ሀእ ሀ ሳአን ደእሸ ኦሎስ።
2CO 5:3 ኑኒ ሄሳ ማእያ ዎደ ካሎቶኮ።
2CO 5:4 ዱንካነ ዳንያ ሀ ሳአ አሳተꬃን ኑ ደእሸ ዴፀትድ ኦሎስ። ሀይቅያ ኑ አሳተꬃይ ደኦን ላመታና መላ ሳሎ አሳተꬃ ማአናዉ ኮዮስፐ አትሽን፥ አሹዋፐ ሻከታናዉ ኮይድ ግደና።
2CO 5:5 ኑና ሀይሳስ ጊግስዳይ ፆሳ። ቃስ ስንꬃፈ ያናባስ ኦይꬅ ኦꬅድ ባ አያና ኑስ እሚስ።
2CO 5:6 ሄሳ ግሾ፥ ኑኒ ሀ ሳአ አሳተꬃን ደእያ ዎደ ኡባን ጎዳፐ ሃክድ ደኤይሳ ኤርኮካ ኡባ ዎደ አማነትድ ደኦስ።
2CO 5:7 ኑኒ ደኤይ አማኖናፐ አትሽን፥ በእያባን ግደና።
2CO 5:8 ኑ ሀ ሳአ አሳተꬃፈ ሻከትድ፥ ኑ ሶ ብድ ጎዳራ እስፈ ዳናዉ አሞትያ ግሾ፥ አማነትድ ደኦስ።
2CO 5:9 ሄሳ ግሾ፥ ኑ ሀ አሳተꬃን ደእን ዎይኮ ሀ አሳተꬃፈ ሻከትን፥ ኑ አሞይ እያ ኡፋይሳናይሳ።
2CO 5:10 ኑኒ እሶይ እሶይ ሀ ሳአን ደእሸ ሎኦ ግድን ዎይኮ ኢታ ግድን፥ ኦꬅዳ ኦሱዋስ በሲያ ፕርዳ ኤካናዉ ክርስቶሳ ፕርዳ አራታ ስንꬃን ሺቃና።
2CO 5:11 ህዛ፥ ጎዳስ ያሺ አይ ጉሰኮ ኑኒ ኤርያ ግሾ፥ አሳይ ኑ ኦደይሳ ኤካና መላ ዞሮስ። ፆሳይ፥ ኑኒ ኦነኮ ኑና ኤሬስ፤ ቃስ ህንተካ ህንተ ካሀን ኑ ኦነኮ ኤሬታ ያጋዳ ቆፓይስ።
2CO 5:12 ዎዛናን ግዶናሽን፥ ማላን ጬቀትያ አሳ ዶና ኦይꬃናዉ ህንተ ኑናን ጬቀታና መላ ህንተዉ ጋሶ ግዳናዉ ኮዮስፐ አትሽን፥ ኑ ኑና ዛሪድ ናሻናዉ ኮዮኮ።
2CO 5:13 ኑ ጎሽ ግድኮ ፆሳ ቦንቾሳ፤ ዎዛናማ ግድኮ ህንተሳ።
2CO 5:14 እሶይ ኡባስ ሀይቅዳይሳነ ኡባይ ቃስ እያራ ሀይቅዳይሳ ኑ ኤርያ ግሾ፥ ክርስቶሳ ሲቆይ ኑና ሃሬስ።
2CO 5:15 ደኦን ደኤይሳት ህዛፐ ጉየ ባንታዉ ግዶናሽን፥ ኤንታዉ ሀይቅዳይሳስነ ሀይቆፐ ደንድዳይሳስ ዳና መላ ክርስቶስ አሳ ኡባ ግሾ ሀይቅስ።
2CO 5:16 ህዛፐ ጉየ፥ ኑኒ ኦናካ አሳ ቆፋን ፕርዶኮ። ሀይሳፈ ካሰ ኑኒ ክርስቶሳካ አሳ ቆፋን በእዳባ ግድኮካ፥ ህዛፐ ሄሳዳ ቤኦኮ።
2CO 5:17 ሄሳ ግሾ፥ ኦንካ ክርስቶሳን ደእኮ ኦራꬃ መተꬅ፤ ጋልአ መተꬃይ አꬍስ፤ ኡባይካ ኦራꬅ ግድስ።
2CO 5:18 ሄሳ ኡባ ፆሳይ ኦꬅስ። እ ክርስቶሳ ባጋራ ኑና ባራ ስገꬅስ። ቃስ ሀራታ ባራ ስገꬃና መላ ኑስ ስገꬆ ኦሶ እሚስ።
2CO 5:19 ፆሳይ ክርስቶሳ ባጋራ አሳ ኡባ ባራ ስገꬄስ። ኤንታ ናጋራ ታይብቤና፤ ቃስ አሳ ባራ ስገꬅያ ቃላ ኑስ እሚስ።
2CO 5:20 ፆሳይ አሳ ኑ ባጋራ ፄግያ ግሾ፥ ኑ ክርስቶሳን ኪተትድ አሳ ፆሳራ ስገትተ ግድ ክርስቶሳ ግሾ፥ ዎሶስ።
2CO 5:21 ኑኒ ፆሳ ፅሎተꬃ ክርስቶሳ ባጋራ ኤካና መላ፥ ናጋራ ኤሮና ክርስቶሳ ኑ ግሾ፥ ናጋራንቾ አሳዳ ኦꬅስ።
2CO 6:1 ኑኒ ፆሳራ እስፈ ኦꬅያ አስ ግደይሳዳ፥ ህንተ ኤክዳ አꬎ ኬሀተꬃ ሀዳ ኦꬆና መላ ኑ ህንተና ዎሶስ።
2CO 6:2 ፆሳይ፥ “ታ ነና ስአና ዎደን ስአስ፤ አቶተꬃ ጋላሳን ነና ማዳስ” ያጌስ። ሄኮ፥ ታ ስእያ ዎደይ ሀእ፤ አቶተꬃ ጋላሳይ ሀች።
2CO 6:3 ኦንካ ኑ ኦሱዋ ቦራና መላነ ኑናን ꬉበታና መላ ኮዮኮ።
2CO 6:4 ግዶሽን፥ ኑ ቱማ ፆሳ ኦሳንቾታ ግደይሳ ኑ ኦꬅያ ኡባባን በስዳ። ዳሮ ገንጫን፥ ዋየን፥ መቶን፥ ኡንአን፥
2CO 6:5 ጋራፈተꬃን፥ ቃሾን፥ እፆን ኩምዳ ዎጫማን፥ ዳቡራን፥ ꬍስኮ ꬋዮን፥ ፆማን፥
2CO 6:6 ጌሻተꬃን፥ ኤራተꬃን፥ ዳንዳአን፥ ኬሀተꬃን፥ ጌሻ አያናን፥ ቱማ ሲቆን፥
2CO 6:7 ቱማ ኦዳንነ ፆሳ ዎልቃን ኑኒ እያ ኦሳንቾታ ግደይሳ በስዳ። ቃስ ፅሎተꬃይ ኑስ ቶራነ ጎንዳለ።
2CO 6:8 ኑኒ ቦንቸትዳነ ቶሸትዳ፤ ጫየትዳነ ጋላተትዳ። ቱማ ሃሳዮስ፥ ሽን አሳይ ኑና ዎርዳንቾ ግዶሶና።
2CO 6:9 ኑ አሳን ኤረትዳ አስ፥ ሽን ኤረቶና አሳ መላ ግድዳ። ሀይቅዶሶና ያገትዳ፥ ሽን ፓፃ ደኦስ፤ ሾጨትዳ፥ ሽን ሀይቅቦኮ።
2CO 6:10 ኑኒ አዛንኮካ ኡባ ዎደ ኡፋይቶስ። ኑ ማንቆ ዳኖስ፥ ሽን ዳሮ አሳ ዱረዮስ። ቃስ አይኮይካ ባይና አስ ዳኖስ፥ ሽን ኡባይ ኑባ።
2CO 6:11 ቆሮንቶሳ አሳቶ፥ ኑ ህንተዉ ቆንጨን ኦድዳ፤ ኑ ኡሉዋ ህንተና በስዳ።
2CO 6:12 ህንተ ኑና ህንተ ሲቁዋ በሶና ድግደታፐ አትሽን፥ ኑኒ ኑ ሲቁዋ ህንተና ድግቦኮ።
2CO 6:13 አዉ ባ ናይታስ ኦደይሳዳ ታ ህንተዉ ኦዳይስ፤ ኑ ህንተና ኑ ኡሉዋ በስዳይሳዳ፥ ህንተካ ህንተ ኡሉዋ ኑና በስተ።
2CO 6:14 አማኖና አሳራ በሶና ኦገን ዋፀቶፍተ። ፅሎተꬃስነ ናጋራስ አይብ ጋሄተꬅ ደኢ? ፖኦስነ ꬉማስ አይብ እስፈተꬅ ደኢ?
2CO 6:15 ክርስቶሳነ ፃላሄ እስፈ ጋꬅያባይ አይቤ? ቃስ አማነይስነ አማኖናይስ እስፈ ኮፅያባይ አይቤ?
2CO 6:16 ፆሳ ኬꬃስ ኤቃታራ አይብ እስፈተꬅ ደኢ? ፆሳይ፥ “ታኒ ኤንታ ግዶን ደአና፥ ኤንታ ግዶን ሄመታና። ታኒ ኤንታ ፆሳ ግዳና፤ ኤንትካ ታ አሰ ግዳና” ግዳይሳዳ፥ ኑኒ ደኦ ፆሳ ኬꬅ።
2CO 6:17 ሄሳዳካ፥ ጎዳይ፥ “ኤንታ ግዶፈ ሻከትድ ከይተ፤ ቱና ግድዳባ ቦቾፍተ፤ ታ ህንተና ኤካና።
2CO 6:18 ታ ህንተዉ አዋ ግዳና፤ ህንተ ታዉ አደ ናይታነ ማጫ ናይታ ግዳና፤ ያጌስ ኡባፈ ዎልቃማ ጎዳይ” ያግስ።
2CO 7:1 ህዛ፥ ታ ሲቆቶ፥ ሀ ኡፋይሳይ ኑስ ደእያ ግሾ፥ ኑ አሹዋነ ኑ ሸምፑዋ ቱንስያባ ኡባፈ ኑና ጌሾስ። ፆሳስ ያይድ ኑ ጌሻተꬃ ፖሎ ኦꬆስ።
2CO 7:2 ህንተ ኡሉዋ ኑና በስተ። ኑኒ ኦናካ ናቅቦኮ፤ ኦናካ ቆህቦኮ፤ ኦናካ ጭምቦኮ።
2CO 7:3 ታኒ ሄሳ ህንተ ቦላ ፕርዳናዉ ጊከ። ሀይሳፈ ካሰ ታ ህንተዉ ኦድዳይሳዳ፥ ህንተ ኑ ዎዛናን ደኤታ፤ ኑ ፓፃ ደእንካ ሀይቅንካ ህንተፈ ሻከቶኮ።
2CO 7:4 ታ ኦድያባ ህንተፈ ቆትከ፤ ታ ህንተናን ጬቀታይስ፤ ኑ ዋየ ኡባን ምነታይስ፤ ቃስ ግታ ኡፋይስ ኡፋይታይስ።
2CO 7:5 ኑኒ ማቀዶነ ብዳ ዎደ፥ ኡባ ባጋራ ዋየትዳፐ አትሽን ሸምፕቦኮ። ካረራ ሞርከታን፥ ኑ ጋꬃን ያሻን ኡንኤትዳ።
2CO 7:6 ሽን አዛንዳይሳታ ምንꬅያ ፆሳይ፥ ትቶ ዩሳን ኑና ምንꬅስ።
2CO 7:7 ኑና ምንꬅዳይ ትቶ ዩሳ ፃላላ ግዶናሽን፥ ህንተካ እያ ምንꬅዳይሳ። ህንተ ታና ላሞተይሳ፥ ታዉ አዛነይሳነ ታዉ ቆፐይሳ ታ ስእዳ ዎደ ታና ዳሮ ኡፋይስስ።
2CO 7:8 ታ ዳብዳበይ ህንተና አዛንꬅኮካ አይስ ፃፋድናሻ ጋዳ ቂሮትከ። ታ ቂሮትዳይ ታ ፃፍዳ ዳብዳበይ ህንተና ጉꬃ ዎደስ አዛንꬅዳ ግሾሳ።
2CO 7:9 ሀእ ታኒ ኡፋይትዳይ፥ ታ ህንተና አዛንꬅዳ ግሾ ግዶናሽን፥ ህንተ አዛኖይ ህንተና ህንተ ናጋራፐ ዛርዳ ግሾሳ። ፆሳይ ባ ሸንያዳ ህንተና አዛንꬅስፐ አትሽን ኑ ህንተና አይብንካ ቆህቦኮ።
2CO 7:10 ፆሳይ ኮያ አዛኖይ፥ አቶተꬃኮ ጋꬅያ ናጋራፐ ስሞ ኤሄስ፤ እያን ቂሮያባይ ባዋ። ሽን ሀ ሳአ አዛኖይ ሀይቆ ኤሄስ።
2CO 7:11 ህንተ አዛኖይ ህንተናን አይፍስዳ አይፍያ በእተ። ሄ አዛኖይ ህንተና አይ መላ ደንꬅዳኮ፥ አይ መላ ዛሮ እማናዳ ጊግስዳኮ፥ ሄ ኡራ ቦላ አይ መላ ሀንቀꬅዳኮ፥ አይ መላ ታዉ ያያና መላ ኦꬅዳኮ፥ አይ መላ አሞይዳኮ፥ ሄ ኡራ ሴራናዉ አይ መላ ጊግዳኮ በእተ። ሀ ኡባባን ህንተ ጌሽ ግደይሳ ማርካይደታ።
2CO 7:12 ሄሳ ግሾ፥ ታኒ ሀ ዳብዳብያ ህንተዉ ፃፍዳይ፥ ናቅዳ ኡራ ዎይኮ ናቀትዳ ኡራ ግሾ ግደና። ሽን ህንተ ኑስ አይ መላ ቆፕያኮ ፆሳ ስንꬃን ህንተ፥ ህንተና በአና መላ ፃፋስ።
2CO 7:13 ኑኒ ኡፋይትዳይ ሄሳ ግሾሳ። ኑ ኡፋይሳፈ አꬍድ ኑና ዳሮ ኡፋይስዳይ፥ ህንተ ትቶ ኡፋይስዳይሳነ እያ ዎዛና ሸምፕስዳይሳ።
2CO 7:14 ታኒ ህንተና ናሻዳ እያዉ ኦድን፥ ህንተ ታና ዬላይበከታ። ሽን ኑኒ ኡባ ዎደ ህንተዉ ቱማ ኦድዳ፤ ሄሳዳካ ኑኒ ትቶ ስንꬃን ህንተና ናሽዳይስ ቱማ ግድስ።
2CO 7:15 ህንተ እያዉ ያሻን ኮኮርድ፥ እያ ሞክዳይሳ ቃስ እያዉ አይ መላ ኪተትዳኮ፥ እ ቆፕያ ዎደ ህንተዉ ደእያ ሲቆይ ምንሸ ብስ።
2CO 7:16 ታኒ ኡባባን ህንተናን አማነትያ ግሾ ኡፋይታይስ።
2CO 8:1 ኑ እሻቶ፥ ፆሳይ ማቀዶንያን ደእያ ዎሳ ኬꬃታስ እምዳ አꬎ ኬሀተꬃባ ህንተ ኤራና መላ ኑ ኮዮስ።
2CO 8:2 ኤንቲ ግታ መቶን ፓጨትዶሶና፥ ሽን ኤንታ ኡፋይሳይ ዎልቃማ። ኤንታ ማንቆተꬃስ ዛው ባዋ፥ ሽን ባንታ እሙዋን ዳሮ ኬህዶሶና።
2CO 8:3 ኤንቲ ባንታ ዎልቃ መላነ ባንታ ዎልቃፈ አይሳ ዶስድ እምዳይሳስ ታ ማርካ።
2CO 8:4 ኤንቲ ፆሳ አሰ ማድያ ሎኦ ኦሶ ኑራ ኦꬃናዉ ኮይድ ኑና ዳሮ ዎስዶሶና።
2CO 8:5 ኤንቲ ኑኒ ቆፕዳይሳፈ አꬅድ ኦꬅዶሶና። ፆሳ ሸንያዳ፥ ኮይሮትድ ባንታና ጎዳስ እምዶሶና፤ ካልድ፥ ባንታና ኑስ አꬅድ እምዶሶና።
2CO 8:6 ሀ ሎኦ ኦሱዋ ዶምዳ ትቶይ፥ ጉጅድ ኦꬃናዳነ ህንተና ማድድ፥ ሄ ኦሱዋ ፖልሳናዳ እያ ዎስዳ።
2CO 8:7 ሽን ህንተ ኡባባን፥ አማኖን፥ ኦዳን፥ ኤራተꬃን፥ ግታ አሞን፥ ኑና ዶሶንነ ኡባባን ዱረትዳይሳዳ ሀ ሎኦ ኦሱዋንካ ህንተ ኬሀ ግዳና መላ ኑ ኮዮስ።
2CO 8:8 ታኒ ሄሳ ኪታናዉ ጊከ። ሽን ሀራታ ግታ አሙዋ ህንተ ሲቁዋራ ጋꬃ በአዳ፥ ህንተ አይ ኬና ቱሜኮ ኤራናዉ ጋይስ።
2CO 8:9 ህንተ፥ ኑ ጎዳ የሱስ ክርስቶሳ አꬎ ኬሀተꬃ ኤሬታ። ክርስቶስ ዱረ ግድ ኡትድ፥ ህንተ እያ ማንቆተꬃን ዱረታናዳ ህንተ ግሾ ማንቅስ።
2CO 8:10 ታኒ ሀ ኦዳን ህንተና ማድያ ዞረ ዞራናዉ ኮያይስ። ህንተ ዝላይꬅ እማናዉ ፃላላ ግዶናሽን፥ ሄሳ ኦꬃናዉ አሞትሸካ ህንተ ኮይሮ።
2CO 8:11 ህንተ ኦꬃናዉ ዶምዳ ኦሱዋ ሀእ ፖልተ። ህንተ ህንተዉ ደኤይሳ ኬና እምኮ፥ ሄስ ህንተ እማናዉ ዳሮ አሞተይሳ ቆንጭሴስ።
2CO 8:12 እስ አስ እማናዉ አሞትኮ፥ እያ እሞይ ፆሳ ስንꬃን ኤከተይ፥ እ ባዉ ደእዳይሳ ኬና እምናፐ አትሽን፥ ባይናባፐ እማናዉ ኡንኤትን ግደና።
2CO 8:13 ታኒ ሄሳ ገይ፥ ህንተ ኡባይ እስ ግና ግዳና መላሳፈ አትሽን፥ ሀራት ዋያፐ ሸምፕን፥ ህንተ ዋየታና መላሳ ግደና።
2CO 8:14 ዎደ ኤንታ ፓላሀይ ህንተ ፓጫ ኩንꬃና መላ፥ ሀእ ህንተ ፓላሀይ ኤንታ ፓጫ ኩንꬆ። ሄሳን ህንተ ግና ግዳና።
2CO 8:15 ጌሻ ማፃፋን፥ “ዳሮ ሺሽዳይሳስ ፓላህቤና፤ ጉꬃ ሺሽዳይሳስ ፓጭቤና” ጌተትድ ፃፈትዳይሳ መላ።
2CO 8:16 ኑኒ ህንተዉ ቆፐይሳዳ ትቶይካ ህንተዉ ቆፓና መላ ኦꬅዳ ፆሳይ ጋላተቶ።
2CO 8:17 ትቶይ ህንተኮ ብዳይ፥ ኑኒ እያ ደንꬅዳ ግሾ ፃላላ ግዶናሽን፥ እ ባ ሸነን ባናዉ አሞትዳ ግሾሳ።
2CO 8:18 ዎንገላ ማርካተꬃን ዎሳ ኬꬃ ኡባን ዳሮ ኤረትዳ እሻ፥ ኑኒ ትቶራ እስፈ ኪቶስ።
2CO 8:19 ሄሳ ቦላ ኑኒ ሀ ኬሀ እሞታ ኤፍያ ዎደ ኑራ ባና መላ፥ ሀ ሎኦ ኦሱዋን ጎዳ ቦንቻናዉነ ሀራታ ማዳናዉ ደእያ አሙዋ በሳናዉ እ ዎሳ ኬꬃታን ዶረትስ።
2CO 8:20 ሀ እመትዳ ኬሀ እሙዋ፥ ኑኒ ኦሶ ቦላ ፔሽያ ዎደ ቦረቶና መላ ናገቶስ።
2CO 8:21 ኑኒ ጎዳ ስንꬃን ፃላላ ግዶናሽን፥ አሳ ስንꬃንካ ሎኦ ግድዳባ ኦꬆስ።
2CO 8:22 ቃስ ዳሮ ዎደ ፓጨን ምንድ አꬍዳ ኑ እሻ፥ ኤንታራ ህንተኮ ኪትዳ። እ ህንተናን ዳሮ አማነትያ ግሾ፥ ሀእ ህንተና ማዳናዉ ዳሮ አሞቴስ።
2CO 8:23 ትቶባ ኤራናዉ ኮይኮ፥ ህንተና ማዳናዉ ታራ ኦꬅያ ታ ኦሶ ላገ። ሀንኮ እሻታባ ግድኮ ዎሳ ኬꬃት ኪትዳይሳታ፤ ቃስ አሳይ ኤንታ ዱሳ በእድ ክርስቶሳ ቦንቾሶና።
2CO 8:24 ሄሳ ግሾ፥ ዎሳ ኬꬃት ህንተ ሲቁዋነ ኑ ህንተና ናሽያ ናሾይ ቱማ ግደይሳ ቆንጭሳናዉ ህንተ ሲቁዋ ሀ አሳታ በስተ።
2CO 9:1 አማንያ አሳስ ከስያ ሚሽያባ ታ ህንተዉ ፃፋናዉ ኮሸና።
2CO 9:2 ህንተ ማዳናዉ ኬህ አሞተይሳ ታ ኤራይስ። ህንተ አካያ አሳይ፥ ዝላይꬃፈ ዶምድ ማዳናዉ ጊገትዳይሳ ታኒ ማቀዶነ አሳስ ዶና ኩንꬃዳ ኦዳስ። ህንተ ግታ አሞይካ ኤንታፈ ዳሮታ ደንꬅስ።
2CO 9:3 ሀ ኦሱዋን ህንተናን ኑ ጬቀትያ ጬቆይ ሀዳ ግዶና መላ ኮይሮ ህንተባ ታ ኦድዳይሳዳ ህንተ ጊገትድ ናጋና መላ ሀ እሻታ ህንተኮ ኪታስ።
2CO 9:4 ማቀዶነ አሳይ ታራ ብድ፥ ህንተ ጊገቶና ደእሽን፥ ደምኮ፥ ኑ ህንተናን ዬላታና፤ ቃስ ህንተ ኑፐ አꬎ ዬላታና።
2CO 9:5 ሄሳ ግሾ፥ ሀ እሻት ታፐ ስንꬃትድ ህንተኮ ብድ፥ ህንተ እማና ግዳ እሙዋ ካሰትድ ጊግሳና መላ ታ ኤንታና ኪታስ። ታኒ ጋክያ ዎደ ሄ እሞይ ጊግድ ኡቴስ። ሄ ዎደ ሄ ኬሀተꬃ እሞይ ዎልቃን ግዶናሽን፥ ዶሳን ግደይሳ ኤርሴስ።
2CO 9:6 ሀይሳ አኬክተ፤ ጉꬁ ዘርዳይ ጉꬁ ጫካና፤ ዳሮ ዘርዳይ ዳሮ ጫካና።
2CO 9:7 ፆሳይ ኡፋይሳን እምያ ኡራ ዶስያ ግሾ፥ ዎልቃን ዎይኮ ዶስ ባይና ግዶናሽን፥ እስ እስ አስ ባ ዎዛናን ቆፕዳይሳዳ ዶሳን እማናዉ በሴስ።
2CO 9:8 ኡባ ዎደ ኡባባን ኮሽያባ ኡባ ደምድ ሎኦ ኦሶ ኡባ ኦꬃናዉ ዳንዳአና መላ ፆሳይ ህንተዉ ባ አንጁዋ ዳርሳና።
2CO 9:9 ጌሻ ማፃፋን፥ “እ ባ ሻሉዋ ማንቆታስ ላልስ፤ እያ ፅሎተꬃይ መርናዉ ደአና” ያጌስ።
2CO 9:10 ዘረይሳስ ዘረꬅ፥ ማናዉ ካꬅ እምያ ጎዳይ፥ ህንተ ዘርያ ዘረꬅ ዳርስድ እማና። ህንተ ፅሎተꬃ አይፍያካ ዳርሳና።
2CO 9:11 ዳሮ አሳይ ህንተ እምያ እሙዋ ኑፐ ኤክድ፥ ፆሳ ጋላታናዳ፥ ህንተ ኡባ ዎደ ዳርስድ እመይሳታ ግዳና መላ ፆሳይ ህንተና ኡባ ባጋራ ዱረያና።
2CO 9:12 ሀ ህንተ እምያ እሞይ አማንያ አሳ ፓጫ ኩንꬆ ፃላላ ግዶናሽን፥ አሳይ ፆሳ ጋላታናዉ ጋሶ ግዴስ።
2CO 9:13 ሀ ህንተ ኦሶይ ህንተ አማኑዋ ኤርስድ ክርስቶሳ ዎንገላ ህንተ አማንድነ እያዉ ኪተትድ ህንተዉ ደእያባ ኤንታራነ ሀራታራ ሻከትዳ ግሾ ኡባይ ፆሳ ቦንቻና።
2CO 9:14 ፆሳይ ህንተዉ እምዳ አꬎ ኬሀተꬃ ግሾ ኤንቲ ህንተዉ ፆሳ ዎስሸ ህንተና በአናዉ ላሞቶሶና።
2CO 9:15 ዛው ባይና ፆሳ እሙዋስ ፆሳይ ጋላተቶ።
2CO 10:1 ታኒ ህንተራ ደእያ ዎደ፥ “ሹጎ”፥ ቃስ ህንተፈ ሃክያ ዎደ “ኑ ቦላ ምኔስ” ያገትዳ፥ ጳዉሎስ፥ ኬሀነ አሽከ ግድዳ ክርስቶሳ ሱንꬃን ህንተና ዎሳይስ።
2CO 10:2 ታኒ ህንተኮ ብያ ዎደ ኑ አሾ ቆፋራ ስመረትያ አስ ኦꬅድ ቆፕያ አሳ ቦላ ምኖ ቃላን ኦደታናዉ ቆፋ ቃቻስ። ህንተ ቦላ ሄሳዳ ኦደታና መላ ህንተ ታና ኦꬆናዳ ህንተና ዎሳይስ።
2CO 10:3 ኑኒ ሀ ሳአን ደእኮካ ሀ ሳኣ አሳዳ ኦለቶኮ።
2CO 10:4 ኑ ኦላ ሚሸይ ሀ ሳአባ ግደና። ሽን ሚፃ ላላናዉ ዎልቃራ ደእያ ፆሳ ቶራ። ቱማራ ኤቀትያ ፓላማነ፥
2CO 10:5 ፆሳ ኤራተꬃ ቦላ ኦቶሮን ደንድያ ፓላማነ ሀዳ ቆፋ ኡባ ላሎስ። አሳ ቆፋ ኡባ ድእድ ክርስቶሳስ ኪተታና መላ ኦꬆስ።
2CO 10:6 ህንተ ኪተተꬃይ ፖሎ ግድያ ዎደ ኑኒ ኪተተꬃ እፆ ኡባ ሴራናዉ ጊገታና።
2CO 10:7 ህንተ አይፈይ በእዳ መላ ፕርደታ። ኦንካ ባና ክርስቶሳባ ግድ ቆፕያባ ግድኮ፥ ኑካ ክርስቶሳባ ግደይሳ ኤሮ።
2CO 10:8 ጎዳይ ታዉ እምዳ ማታን ጬቀትኮካ ሄሳን ዬላትከ። ሄ ማታይ ታዉ እመትዳይ ህንተና ድቻናሳፈ አትሽን፥ ቆሀናሳ ግደና።
2CO 10:9 ታኒ ታ ዳብዳብያን ህንተና ያሽሳናዉ ኮያዳ ፃፍዳባ ዳኖፖ።
2CO 10:10 እስ እስ አሳይ፥ “ጳዉሎሳ ዳብዳበይ ዴፆነ ዎልቃማ፥ ሽን እያ ሶምኦን በእያ ዎደ እ ዳቡራንቾ፤ እያ ኦዳይካ ፓና” ያጎሶና።
2CO 10:11 ሄ አሳት ኑ ሃሆን ደእሸ ፃፍያ ዳብዳብያንነ ማታን ህንተራ ደእሸ ኦꬅያ ኦሱዋ ግዶን ዱማተꬅ ባይናይሳ አኬኮ።
2CO 10:12 ኑኒ ባንታና ናሽያ አሳታራ ኑና ግናያናዉ ዎይኮ ጋደያናዉ ኮዮኮ። ሽን ኤንቲ ባንታና ባንታራ ግናይድ ዎይኮ ጋደይድ በእሸ ኤያ።
2CO 10:13 ሽን ኑኒ ፆሳይ ኑስ እምዳ ꬋሳን ጬቀቶስፐ አትሽን፥ ዛዋ ፕንድ ጬቀቶኮ፤ ሄ ዛዋይ ህንተኮካ ጋኬስ።
2CO 10:14 ኑኒ በሰይሳፈ አꬅድ ጬቀቶኮ፥ ሽን ክርስቶሳ ዎንገላ ህንተኮ ጋꬅዳይሳን ጬቀቶስ።
2CO 10:15 ኑኒ ፆሳይ ኤስዳ ዛዋፐ ፕንድ፥ ሀራት ኦꬅዳ ኦሶን ጬቀቶኮ። ግዶሽን፥ ህንተ አማኖይ ድጫና መላ ፆሳይ እምዳ ዛዋን ህንተ ግዶን ኑ ኦꬅያ ኦሶይ ዳልጋና ግድ ቆፖስ።
2CO 10:16 ኑኒ ሀራ አስ ባ ዛዋን ኦꬅዳ ኦሶን ገልድ ጬቀቶኮ፥ ሽን ህንተፈ ፕንድ ሀራታስ ዎንገላ ማርካታናዉ ዳንዳኦስ።
2CO 10:17 ሽን፥ ጌሻ ማፃፋን፥ “ጬቅያ ኡባይ ጎዳ ሎኦተꬃን ጬቆ” ያግድ ፃፈትስ።
2CO 10:18 ጎዳይ ናሽያ ኡራፐ አትሽን፥ ባና ባዉ ናሽያ ኡራይ ናሸተና።
2CO 11:1 ታ ጉꬃ ኤያተꬃ ህንተ ሀእካ ዳንዳአና ጋዳ ቆፓይስ፤ ሀያና ዳንዳእተ።
2CO 11:2 ፆሳይ ህንተዉ ቆፕዳይሳዳ፥ ታካ ህንተዉ ቆፓይስ። ታኒ ህንተና ጌሻ ጌላእዳ እስ አድያ፥ ክርስቶሳስ እማናዉ ኦይቻ ዎꬃስ።
2CO 11:3 ሽን ሾሻይ ባ ገንያን ሄዋኖ ባለꬅዳይሳዳ ኦን ኤር ህንተ ዎዛናይ ኢትድ ክርስቶሳስ ደእያ ህንተ ሱረተꬃነ ጌሻተꬃ አጋንደት ጋዳ ህርጋይስ።
2CO 11:4 እስ አስ ይድ፥ ኑኒ ህንተዉ ማርካትዳ የሱሳፐ ሀራ የሱሳ ህንተዉ ማርካትኮ፥ ዎይኮ ህንተ ኤክዳ አያናፐነ ዎንገላፐ ሀራ አያናነ ዎንገላ ህንተዉ ኦድኮ፥ ስእ ግድ ኤኬታ።
2CO 11:5 ሽን ታኒ የሱሲ ኪትዳ “ግታ ሀዋረታ” ገተትድ ፀገተይሳታፐ ጉፃይስ ጋዳ ቆፕከ።
2CO 11:6 ታኒ ኦዳ ኤሮና አስ ግድኮካ፥ ኤራተꬅ ታዉ ደኤስ። ሄሳ ታ ህንተዉ ዳሮ ኦገን ቆንጭሳስ።
2CO 11:7 ታኒ ሚሸ ኦይቾና ፆሳ ዎንገላ ህንተዉ ጮ ኦድዳይስነ ህንተና ꬎቁ ኦꬃዳ ታና ቶችዳይስ ታዉ ናጋራ ግዲ?
2CO 11:8 ታኒ ህንተዉ ኦꬃናዉ ሀራ ዎሳ ኬꬃታፐ ሚሸ ቦንቃ ኤካስ።
2CO 11:9 ታ ህንተራ ደእያ ዎደ ታና መትንካ ህንተፈ እስ አስካ ዋይሳብከ። ማቀዶነፐ ይዳ አማነይሳት ታና ኮሽያባ ኡባን ማድዶሶና። ሀች ጋካናዉ ታ ህንተዉ ቶሆ ግዳብከ ስንꬃስካ ቶሆ ግድከ።
2CO 11:10 ክርስቶሳ ቱማተꬃይ ታናን ደእሽን፥ ታ ጬቁዋ አካያ ቢታን ታና ኦንካ ድገና።
2CO 11:11 ታ ሀይሳ አይስ ጋይና? ህንተና ዶሶና ግሾዬ? ታኒ ህንተና ዶሰይሳ ፆሳይ ኤሬስ።
2CO 11:12 “ኑካ ህንተ መላ ኦꬆስ” ያግድ ጬቅያ ሀንኮ ሀዋረታ ጬቁዋ ጋሱዋ ꬋይሳናዉ ሀእ ታ ኦይሳ ስንꬃስካ ኦꬃና።
2CO 11:13 ሀይሳ መላ አሳት ክርስቶሳ ሀዋረ ዳናናዉ ባንታና ላምያ ዎርዳንቾ ሀዋረታነ ጭምያ ኦሳንቾታ።
2CO 11:14 ሄስ ማላልስያባ ግደና፤ አይስ ጊኮ፥ ፃላሄይ ፖኦ ኪታንቾ ዳናናዉ ባና ላሜስ።
2CO 11:15 ሄሳ ግሾ፥ ፃላሄ ኦሳንቾት ፅሎተꬃ ኦሳንቾታ ዳናናዉ ባንታና ላምኮ ሄስ ግታባ ግደና። ኤንቲ ዉርሰꬃን ባንታ ኦሱዋዳ ኤካና።
2CO 11:16 ኦንካ ታና ኤያ ግድ ቆፖና መላ ዛራዳካ ኦዳይስ። ታ ህንተዉ ኤያ ዳንኮካ ታ ጉꬃራ ጬቀታና መላ ታና ኤያ ኦꬅድ ኤክተ።
2CO 11:17 ታኒ ሀይሳዳ ጬቀታዳ ኦደተይ፥ ጎዳይ ኮየይሳዳ ግዶናሽን፥ ኤያተꬃን ኦዳይስ።
2CO 11:18 ዳሮ አሳይ ሀ ሳአባን ጬቀትያ ግሾ፥ ታካ ጬቀታና።
2CO 11:19 ህንተ ዎዛናማ ግድያ ግሾ፥ ኤያ አሳባ ኡፋይሳን ዳንዳኤታ።
2CO 11:20 ኦንካ ህንተና አይለይኮ ዎይኮ ህንተና ቦንቅኮ ዎይኮ ባዉ ማደታናዉ ህንተኮ ሺቅኮ ዎይኮ ህንተ ቦላ ኦቶርትኮ ዎይኮ ህንተና ባቅኮ ህንተ ዳንዳኤታ።
2CO 11:21 ኑኒ ሄሳ ኦꬃናዉ ዳሮ ዳቡራንቾ ግደይሳ ዬላታሸ ታ ኦዳይስ። ሽን ኦንካ ምንድ ጬቀትኮ፥ ታካ ጬቀታናዉ ምናይስ። ታኒ ሄሳ ኤያ አሳዳ ኦደታይስ።
2CO 11:22 ኤንቲ እብራዌ? ታካ እብራወ። ኤንቲ እስራኤሌ? ታካ እስራኤለ። ኤንቲ አብራሃመ ሼሼ? ታካ አብራሃመ ሼሽ።
2CO 11:23 ኤንቲ ክርስቶሳ ኦሳንቾ? ታኒ ጎሻ አሳዳ ኦዳይስ፥ ኤንታፈ አꬍያ ክርስቶሳ ኦሳንቾ። ታኒ ኦሶን ዳሮ ዳቡራስ፤ ዳሮ ዎደ ቃሸታስ፤ ጋራፈታስ፤ ዳሮ ዎደ ሀይቆፐ አታስ።
2CO 11:24 አይሁደት ታና ሀስታማነ ኡዱፉና እቻሹ ቶሆ ጋራፍዶሶና።
2CO 11:25 ሄꬑ ቶሆ ፃምአን ሾጨታስ፤ እስ ቶሆ ሹቻን ጫደታስ፤ ማርካበይ ሄꬑ ቶሆ መእስ፤ አባ ግዶን እስ ቃማ ኩመꬅ አቃዳ ፔአስ።
2CO 11:26 ታኒ ዳሮ ኦግያ ዳቡራን ሄመታስ። ክፃ ሃꬃፈነ ፓንጋፈ አታስ። አይሁደትነ አይሁደ ግዶና አሳይ ታ ቦላ መቶ ጋꬅዶሶና። ካታማይ፥ ባዞይ፥ አባይ፥ ታና ያሽስ፤ አማንያ ዳንያ አሳት ታና ዋይስዶሶና።
2CO 11:27 ታኒ ኦሶን ዳቡራስነ ጫዋታስ፥ ዳሮ ቶሆ ꬍስኮ ꬋያስ፥ ኮሻታስ፥ ሳሞታስ፥ ዳሮ ቶሆ ፆማስ፥ ሜገታስ፥ ካሎታስ።
2CO 11:28 ሀራባ ኡባ ታይቦና ኡባ ዎደ ታና ቆፍሰይ ዎሳ ኬꬃታባ።
2CO 11:29 እስ አስ ዳቡርያ ዎደ እያራ ታ ዳቡራብክና? እስ አስ ናጋራን ꬉበትያ ዎደ ታ አዉደ ቂሮቶና አጋድና?
2CO 11:30 ታ ጬቀታናዉ ኮሽያባ ግድኮ ታኒ ዳቡራንቾ ግደይሳ ኤርስያባን ጬቀታና።
2CO 11:31 መርናዉ ቦንቸትዳ ፆሳይ፥ ኑ ጎዳ የሱስ ክርስቶሳ አዋይ፥ ታ ዎርዶቶናይሳ ኤሬስ።
2CO 11:32 ዳማስቆ ካታማን ካዋ አርስፆሳፐ ጋርሳራ ሃረይስ ታና ኦይꬃናዉ ኮይድ ዳማስቆ ካታማ ፐንግያ ናግስስ።
2CO 11:33 ሽን አሳይ ታና ዳቾን የግድ፥ ካታማ ድርሳ ማስኮትያራ ዎꬍስን ታኒ እያ ኩሽያፐ አታስ።
2CO 12:1 ጬቀተꬃስ ጎእ ባይናይሳ ኤራይስ። ሽን ጬቀታናዉ ኮሽኮ፥ ጎዳፐ ኤክዳ ቆንጨꬃን ጬቃና።
2CO 12:2 ታማነ ኦይዱ ላይꬃፈ ካሰ፥ ክርስቶሳ አማንያ እስ ኡራይ ሄꬓንꬆ ሳሉዋ ብዳይሳ ታ ኤራይስ። ሄ ኡራይ አሾን ዎይኮ አሾፐ ካረራ ብዳኮ ታ ኤርከ፤ ፆሳይ ኤሬስ።
2CO 12:3 ሄ ኡራይ ሄꬓንꬆ ሳሉዋ ኤከትዳይሳ ኤራይስ። ሽን እ አሾን ዎይኮ አሾፐ ካረራ ኤከትዳኮ ታ ኤርከ፤ ፆሳይ ኤሬስ።
2CO 12:4 ሄ ኡራይ ጋናተ ኤከትድ አስ ቆንጭሳናዉነ አስ ኦዳናዉ ዳንዳኦናባ ስእስ።
2CO 12:5 ታኒ ሄ አድያባን ጬቀታና፥ ሽን ታኒ ታ ዳቡራፐ አትሽን፥ ታናን ጬቀትያባይ ባዋ።
2CO 12:6 ታኒ ቱማ ኦደትያ ግሾ፥ ጬቀታናዉ ኮይኮካ ኤያ ግድከ። ሽን አስ ታ ኦይሳ በኤይሳፈነ ስኤይሳፈ አꬅድ ቆፖና መላ ጋዳ ጬቀተꬅ አጋይስ።
2CO 12:7 ታዉ ቆንጭዳ ግታ ቆንጨꬃን ታ ኦቶርቶና መላ ታና ዋይሳናዉ ታ አሹዋን ጫድያ ፃላህያ ኪታንቾይ ታዉ እመትስ።
2CO 12:8 ሀ ዋይስያባ ታፐ ድጋና መላ ታኒ ጎዳ ሄꬑ ቶሆ ዎሳስ።
2CO 12:9 ሽን ጎዳይ፥ “ታ ዎልቃይ ነ ዳቡራን ቆንጭያ ግሾ ታ አꬎ ኬሀተꬃይ ነዉ ግዳና” ያግስ። ክርስቶሳ ዎልቃይ ታናን ቆንጫና መላ ታ ዳቡራን ኡፋይታሸ ጬቀታይስ።
2CO 12:10 ታኒ ክርስቶሳ ግሾ፥ ዳቡርያ ዎደ ጫየትያ ዎደ ዋየትያ ዎደ ጎደትያ ዎደ መቶትያ ዎደ ታ ዳቡራን ኡፋይታይስ። አይስ ጊኮ፥ ታ ዳቡርያ ዎደ፥ ሄ ዎደ ምናይስ።
2CO 12:11 ታኒ ኤያ አሳዳ ጬቀታስ። ሄሳዳ ታ ጬቀታና መላ ኦꬅዳይ ህንተና። ታ፥ ታ ሁጰን ኤረቶና አስ ግድኮካ፥ “ግታ ሀዋረታ” ጌተተይሳታፐ ጉፅከ። ሄሳ ታዉ ማርካታናዉ በሰይ ህንተናሽን።
2CO 12:12 ታ ህንተ ግዶን ደአሸ ዳንዳአን ኦꬅዳ ማላታትነ ማላት ታ ቱማ ሀዋረ ግደይሳ በሶሶና።
2CO 12:13 ታ ህንተዉ ቶሆ ግዶናይሳፈ አትሽን፥ ሀራ ዎሳ ኬꬃታፐ ህንተ አይብን ጉፅደቲ? ሄስ ባላ ግድኮ ታና ማርተ።
2CO 12:14 ታኒ ህንተኮ ባናዉ ጊገትሽን ሀይስ ታዉ ሄꬓንꬆ። ታ ህንተናፐ አትሽን፥ ህንተዉ ደእያባ ኮዮና ግሾ ህንተና ዋይሳናዉ ኮይከ። የልዳይሳት ባንታ ናይታስ ሻሎ ምንጆሶናፐ አትሽን፥ ናይት ባንታና የልዳይሳታስ ሻሎ ምንጆኮና።
2CO 12:15 ታ ህንተ ግሾ፥ ታዉ ደእያባነ ታና አꬃ እምንካ ታና ኡፋይሴስ። ያትን፥ ታኒ ህንተና ሄሳዳ ኬሀ ሲቅያ ዎደ ህንተ ታና ጉꬃራ ሲቀቲ?
2CO 12:16 ግድኮካ፥ ታ ህንተዉ ቶሆ ግድከ፤ ዋይሳብከ፤ ሽን ህንተና ጭሞንነ ገነን ኦይክዳባ ህንተዉ ዳኖና አገና።
2CO 12:17 ሀር አቶሽን፥ ታ ህንተኮ ኪትዳ አሳታፐ ህንተና ጭምዳ አስ ደኢ?
2CO 12:18 ትቶይ ህንተኮ ባና መላ ታኒ ዎሳስ፤ ቃስ አማንያ እሻካ እያራ የዳስ። ያትን፥ ትቶይ ህንተና ጭምዴ? ኑኒ ኑ ኦሱዋ እስ አያናን ኦꬅቦኮ? ቃስ ኑ ሀኖይካ እስኖ ግደኔ?
2CO 12:19 ኑ ኡባ ዎደ ህንተ ስንꬃን ኑና ፅልሳናዉ ሞተትያባ ህንተዉ ዳኒ? ኑ ክርስቶሳን ደእድ ፆሳ ስንꬃን ሀእ ጋካናዉ ኦዶስ። ኑ ሲቆ እሻቶ፥ ኑ ሀ ኡባ ኦይ ህንተና ድቻናሳ።
2CO 12:20 ታ ህንተኮ ብያ ዎደ ኦን ኤር ህንተ ታ ኮየይሳዳ ሀኖና፥ ቃስ ታካ ህንተ ኮየይሳዳ ሀኖና ጋሄቶና አጎኮ ጋዳ ያያይስ። ቃስ ኦን ኤር ህንተ ግዶን ፓላም፥ ቃናተይ፥ ሀንቆይ፥ ዪቀይ፥ ዝግርስ፥ አሳ ሱንꬁ ኢሶይ፥ ኦቶሮይነ ካች ዶና አገና ጋዳ ያያይስ።
2CO 12:21 ታኒ ናምአንꬆ ህንተኮ ብያ ዎደ ፆሳይ ህንተ ስንꬃን ታና ካዉሻና ጋዳ ያያይስ። ካሰ ናጋራ ኦꬅድ ሄ ባንታ ኦꬅዳ ቱናተꬃፈ፥ ላይማተꬃፈነ ዬላይያ ኦሱዋፐ ስምቦና አሳታ በአዳ አዛኖና አግከ ጋዳ ያያይስ።
2CO 13:1 ታ ህንተኮ ብሽን ሀይስ ሄꬓንꬆ። አይ ሞቶይካ ናምኡ ዎይኮ ሄꬑ ማርካን ምኔስ።
2CO 13:2 ታኒ ናምአንꬆ ህንተራ ጋሄትዳ ዎደ ህንተ ግዶን ካሰ ናጋራ ኦꬅዳ ኡራነ ሀራታ ኡባ ሴሮና አግከ ጋዳ ኦዳ ዎꬃስ። ሀእ ታ ሃካዳ ደእኮካ ስማዳ ህንተኮ ብያ ዎደ ኦደስካ ቃትከ።
2CO 13:3 ታናን ደእድ ኦደይ ክርስቶሳ ግደይሳ ህንተ ኤራናዉ ኮዬታ። እ ህንተራ ሃሳያ ዎደ ዎልቃማፐ አትሽን፥ ህንተ ግዶን ዳቡራንቾ ግደና።
2CO 13:4 ክርስቶስ ማስቃለ ቦላ ዳቡራን ካቀትስ፥ ሽን ፆሳ ዎልቃን ደኦን ደኤስ። እ ዳቡራንቾ ግድዳይሳዳ፥ ኑካ ዳቡራንቾ። ሽን ህንተና ሀጋዛናዉ ፆሳ ዎልቃን እያራ ደኦን ዳና።
2CO 13:5 አማኖን ምንድ ደእያኮ ህንተና ህንተዉ ፓጭድ በእተ። ፓጨን ህንተ ኩንዶና አትኮ፥ ክርስቶስ ህንተናን ደኤይሳ ህንተ ኤሬታ። ሽን ክርስቶስ ህንተናን ዶና እፅኮ ህንተ ኩንዴታ።
2CO 13:6 ኑኒ ፓጨን ኩንዶናይሳ ህንተ ኤሬታ ጋዳ አማናይስ።
2CO 13:7 ህንተ ኢታባ ኦꬆና መላ ኑኒ ፆሳ ዎሶስ። ኑኒ ምኖ ግደይሳ አሳይ በአና መላ ግዶናሽን፥ ኑኒ ምኖ ግዶና እፅኮካ፥ ህንተ ሎኦ ኦꬃና መላ ኑኒ ዎሶስ።
2CO 13:8 ኑኒ ቱማስ ኦꬆስፐ አትሽን፥ ቱማራ ኤቀትያባ አይባካ ኦꬆኮ።
2CO 13:9 ኑ ዳቡርያ ዎደ ህንተ ቃስ ምንያ ዎደ ኑና ኡፋይሴስ። ህንተ ቦረይ ባይናይሳታ ግዳና መላ ኑ ህንተዉ ፆሳ ዎሶስ።
2CO 13:10 ታኒ ህንተፈ ሃካዳ ደአሸ ፃፍዳይ ሄሳ ግሾሳ። ታኒ ህንተኮ ብያ ዎደ ጎዳይ ታዉ እምዳ ማታን ዘምፓዳ ህንተ ቦላ ጎዳታናዉ ኮይከ። ጎዳይ ታዉ ማታ እምዳይ፥ ህንተና ማዳናሳፈ አትሽን፥ ቆሀናሳ ግደና።
2CO 13:11 ዉርሰꬃን ታ እሻቶ፥ ሳሮ ደእተ። ቦረይ ባይና ደእተ፤ ታ ዞርያ ስእተ። እስ ዎዛናን ግድድ ደእተ፤ ሳሮተꬃን ደእተ። ሲቆነ ሳሮ እምያ ፆሳይ ህንተራ ግዶ።
2CO 13:12 ጌሻ ዬረተꬅ ዬረትሸ፥ እሶይ እሱዋ ሳሮꬅተ።
2CO 13:13 ፆሳ አሳ ኡባይ ህንተና ሳሮ ሳሮ ያጎሶና።
2CO 13:14 ጎዳ የሱስ ክርስቶሳ አꬎ ኬሀተꬃይ፥ ፆሳ ሲቆይ፥ ጌሻ አያና እስፈተꬃይ ህንተ ኡባራ ግዶ።
GAL 1:1 አሳፐ ዎይኮ አሳ ባጋራ ግዶናሽን፥ የሱስ ክርስቶሳፐነ እያ ሀይቆፐ ደንꬅዳ ፆሳ አዋፐ ሀዋረ ግዳና መላ ኪተትዳ ታ ጳዉሎስ፥
GAL 1:2 ታራ ደእያ አማንያ እሻት ኡባይ፥ ጋላትያን ደእያ ዎሳ ኬꬃታስ ኪትዳ ኪታ።
GAL 1:3 ፆሳይ ኑ አዋይነ ኑ ጎዳ የሱስ ክርስቶሲ ህንተዉ አꬎ ኬሀተꬃነ ሳሮተꬃ እሞ።
GAL 1:4 ሀ ኢታ ዎድያፐ ኑና አሻናዉ፥ ኑ ፆሳ፥ ኑ አዋ ሸነን ክርስቶስ ኑ ናጋራ ግሾ ባና አꬅድ እሚስ።
GAL 1:5 ፆሳስ መርናፐ መርና ጋካናዉ ቦንቾይ ግዶ። አምንእ።
GAL 1:6 ክርስቶሳ አꬎ ኬሀተꬃን ህንተና ፄግዳ ፆሳ አግድ፥ ሀራ ዎንገላኮ፥ ህንተ ኤለስድ፥ ዋንድ ስምዳኮ ታና ማላልሴስ።
GAL 1:7 ህንተና ባለꬃናዉነ ክርስቶሳ ዎንገላ ዎብሳናዉ ኮይያ ጉꬃ አሳት ደኦሶናፐ አትሽን፥ ቱማ ዎንገላይ እስኖ።
GAL 1:8 ሽን ኑና ግድን ዎይኮ ሳሎ ኪታንቾ ግድን ኑኒ ህንተዉ ኮይሮ ኦድዳ ዎንገላፐ ዱማትያ ሀራ ዎንገላ ህንተዉ ኦድያባ ግድኮ፥ እ ባደትዳባ ግዶ።
GAL 1:9 ሀይሳፈ ስን ኑኒ ግዳይሳዳ ሀእካ ዛራዳ ጋይስ። ህንተ ኤክዳ ዎንገላፐ ዱማትያ ዎንገላ ኦንካ ህንተዉ ኦድኮ ሄ ኡራይ ባደትዳባ ግዶ።
GAL 1:10 ያትን፥ ታና አስ ናሻና መላ ኮያናዬ? ዎይኮ ፆሲ ናሻና መላ ኮያይና? ዎይኮ ታ አሰ ኡፋይሳናዉ ኮያይና? ታ አሰ ኡፋይሳናዉ ኮያባ ግድኮ፥ ክርስቶሳ አይለ ግድከ።
GAL 1:11 ታ እሻቶ፥ ታ ህንተዉ ኦድዳ ዎንገላይ አሳፐ ግዶናይሳ ህንተ ኤራና መላ ታ ኮያይስ።
GAL 1:12 ታዉ ሀ ዎንገላ የሱሲ ክርስቶስ ቆንጭስስፐ አትሽን፥ አሳፐ ኤካብከ ዎይኮ አስ ታና ታማርስቤና።
GAL 1:13 ታ ካሰ አይሁደ አማኖን ደእያ ዎደ ዋና ደእዳኮ፥ ህንተ ስእደታ። ታ ዎሳ ኬꬃ ቃይ ባይና ጎዳናዉነ ꬋይሳናዉ ባፀታስ።
GAL 1:14 አይሁደ አማኖ ናጎን፥ ታ ዎደን ደእያ አይሁደ እሻታፐ አꬋይስ። ኑ አዋታ ዎጋስ አꬋዳ ምሸታይስ።
GAL 1:15 ሽን ታ ቡሮ ታ አየ ኡሎን ደእሽን ፆሳይ ታና ዶርስ፤ ባ አꬎ ኬሀተꬃን ታና ፄግስ።
GAL 1:16 አይሁደ ግዶና አሳስ ዎንገላ ኦዳና መላ ፆሳይ ባ ናኣ ታዉ ቆንጭስዳ ዎደ ታ ኦደራካ ዞረታብከ።
GAL 1:17 ዎይኮ ታፐ ስን ሀዋረ ግድዳይሳታራ ጋሄታናዉ የሩሳላመ ባብከ። ሽን ታ ካሰታዳ አራበ ቢታ ባስ፤ ሄሳፈ ስማዳ ዳማስቆ ካታማ ያስ።
GAL 1:18 ሄꬑ ላይꬃፈ ጉየ፥ ጰፅሮሳራ ጋሄታናዉ የሩሳላመ ባዳ እያራ ታማነ እቻሹ ጋላስ ኡታስ።
GAL 1:19 ሽን ጎዳ እሻ ያይቆባፐ አትሽን፥ ሀንኮ ሀዋረታ በአብከ።
GAL 1:20 ታ ህንተዉ ፃፍይዳይስ ዎርዶ ግዶናይሳ ፆሳ ስንꬃን ህንተዉ ቆንጭሳይስ።
GAL 1:21 ሄሳፈ ጉየ፥ ታኒ ሶረ ቢታነ ክልቅያ ቢታ ባስ።
GAL 1:22 ይሁዳን ደእያ ዎሳ ኬꬃ አሳይ ታና በእድ ኤርቦኮና።
GAL 1:23 ሽን ኤንቲ፥ “ካሰ ኑና ጎድያ ኡራይ፥ ሀእ ሄ እ ꬋይሳናዉ ኮይያ አማኑዋባ ሳባኬስ” ያገይሳ ስእዶሶና።
GAL 1:24 ስእዳ ኡባይ ታ ጋሶን ፆሳ ጋላትዶሶና።
GAL 2:1 ታማነ ኦይዱ ላይꬃፈ ጉየ፥ ባርናባሳራ ዛራዳ የሩሳላመ ባስ። ሄ ዎደ ትቶ ታራ ኤካዳ ባስ።
GAL 2:2 ፆሳይ ታዉ ቆንጭስዳ ቆንጨꬃን ያ ባዳ አይሁደ ግዶና አሳ ግዶን ታ ሳባክያ ዎንገላ ኤንታዉ ቆንጭሳስ። ካሰ ታ ዎፅዳ ዎꬃይነ ሀእካ ታ ዎፅያ ዎꬃይ ሀዳ ግዶና መላ ጋዳ ካለይሳታ ዱማ ሺሻዳ ኤንታዉ ኦዳስ።
GAL 2:3 ሀር አቶሽን፥ ታራ ደእያ ትቶይ ግርከ አስ ግድኮካ፥ ቃፃረቶ ግድ ኡንኤꬅቦኮና።
GAL 2:4 ግዶሽን፥ አማንያ እሻታ ዳንድ ኑ ግዶ ገልዳ እሶት እሶት እ ቃፃረታና መላ ኮይዶሶና። ሄ አሳት ክርስቶስ የሱሳን ኑስ ደእያ ላአተꬃ ዎችድ በአናዉ ጌማን ኑ ግዶ ገልድ ዛሪድ ኑና አይለ ኦꬃናዉ ኮዮሶና።
GAL 2:5 ሽን ቱማ ዎንገላይ ህንተናን ምንድ ዳና መላ ኑኒ ሀር አቶሽን፥ ጉꬃ ዎደስካ ኤንታዉ ኩሸ እምቦኮ።
GAL 2:6 ሽን ሀላቃ ዳንያ አሳታ ኦናተꬃይ ታዉ አይኮካ ግደና። ፆሳይ አሳ ሶምኦ በእድ ፕርደና። ሀ አሳት ታ ማርካትያ ዎንገላ ቦላ ጉጅዳባይ ባዋ።
GAL 2:7 ሽን ጰፅሮስ፥ አይሁደታስ ዎንገላ ኦዳና መላ ፆሳይ እያዉ ሀዳራ እምዳይሳዳ ታዉካ አይሁደ ግዶና አሳስ ዎንገላ ኦድያ ሀዳራ እምዳይሳ ኤንቲ ጉየፐ በእዶሶና።
GAL 2:8 ህዛ፥ ጰፅሮስ አይሁደታ ሀዋረ ግዳና መላ ኦꬅዳ ፆሳይ፥ ታካ አይሁደ ግዶና አሳስ ሀዋረ ግዳና መላ ኦꬅስ።
GAL 2:9 ቃስ ቱሱ ዳንድ በንትያ ያይቆብ፥ ጰፅሮስነ ዮሃንስ፥ ታዉ እመትዳ አꬎ ኬሀተꬃ በእዳ ዎደ ኑራ እስፍዳይሳ ቆንጭሳናዉ ታ ኩሽያነ ባርናባሳ ኩሽያ ኦይክዶሶና። ኑኒ አይሁደ ግዶና አሳኮ፥ ቃስ ኤንቲ አይሁደ አሳኮ ባናዉ ጊግዶሶና።
GAL 2:10 ኤንቲ ኑና ምንꬅድ ሀዳራ ግዳይ፥ ኑኒ ማንቆታስ ቆፓናይሳ። ካሰካ ታ ሄሳ ኦꬃናዉ አሞታይስ።
GAL 2:11 ጰፅሮስ አንፆከ ካታማ ይዳ ዎደ እ ባልዳ ግሾ ታኒ እያ ሶምኦን “ኔኒ ባላዳሳ” ጋስ።
GAL 2:12 ያይቆብ ኪትዳ ጉꬃ አሳይ ያናፐ ስን እ አይሁደ ግዶና አሳራ ሜስ፥ ሽን ኤንቲ ይዳፐ ጉየ፥ “አይሁደ ግዶና አሳፐ አማንዳይሳት ቃፃረታናዉ በሴስ” ግያ አሳስ ያይድ ኤንታፈ ሻከትስ።
GAL 2:13 ቃስ ሀንኮ አማንዳ አይሁደት ጰፅሮሳ ሀኑዋ ካልዶሶና። ሀር አቶሽን፥ ባርናባስካ እያ ቆፋን ጎሸትስ።
GAL 2:14 ሽን ኤንቲ ዎንገላ ቱማተꬃን ሱረ ሄመቶናይሳ በአዳ፥ ጰፅሮሳ አሳ ኡባ ስንꬃን፥ “ኔኒ አይሁደ ግዳሸ፥ አይሁደ ዎጋꬆ ግዶናሽን፥ አይሁደ ግዶና አሳዳ ደኣሳ፤ ያትን፥ ዋናዳ አይሁደ ግዶናይሳታ፥ ‘አይሁደ ዎጋን ደእተ ጋዳ ዎልቃታይ?’ ” ያጋስ።
GAL 2:15 ኑኒ የለታን አይሁደ፥ ሽን ናጋራንቾ ግድዳ አይሁደ ግዶና አሳ መላ ግዶኮ።
GAL 2:16 ሽን አስ የሱስ ክርስቶሳ አማንድ ፅሌስፐ አትሽን፥ ህገ ናግድ ፅሎናይሳ ኤሮስ። ኦንካ ህገ ናግድ ፅሎና ግሾ፥ ኑካ ህገ ናግድ ግዶናሽን፥ ክርስቶሳን አማንድ ፅላና መላ ክርስቶስ የሱሳ አማንዳ።
GAL 2:17 ኑ አይሁደትካ ክርስቶሳ ባጋራ ፅላናዉ ኮሼስ። ሄሳ ግድኮ ኑካ ሀራ አሳዳ ናጋራንቾ ግደይሳ በኦስ። ያትን፥ ኑ ናጋራ ኦꬃና መላ ደንይ ክርስቶሳ ጉሰዬ? ኡባካ ግደና!
GAL 2:18 ህዛ፥ ታ ላልዳይሳ ዛራዳ ኬፅያባ ግድኮ ታኒ ታ ሁጰን ህገ መንይሳ ግደይሳ ቆንጭሳይስ።
GAL 2:19 ታኒ ፆሳስ ዳና መላ ህገ ባጋራ ህገስ ሀይቃስ።
GAL 2:20 ታኒ ክርስቶሳራ ማስቃልያ ቦላ ካቀታስ። ታኒ ህዛፐ ታዉ ደእከ፥ ሽን ክርስቶስ ታናን ደኤስ። ታ ሀእ ደእያ ደኦይ፥ ታና ዶስድ ታ ግሾ ባና አꬅድ እምዳ ፆሳ ናኣ አማናዳ ደአይስ።
GAL 2:21 ታኒ ፆሳ አꬎ ኬሀተꬃ ሀዳ ኦꬅከ። ፅሎተꬅ አሳስ ህገ ባጋራ በንትያባ ግድያኮ፥ ክርስቶስ ጮ ሀይቅስ ጉሱ።
GAL 3:1 ህንተኖ፥ አኬክ ባይና ጋላትያ አሳቶ፥ ህንተ አይፍያ ስንꬃን ክርስቶስ ማስቃለ ቦላ ካቀትዳ ምስለዳ ቆንጭድ በንቴስ። ያትን፥ ቱማስ ህንተ ኪተቶና መላ ህንተና ብትዳይ ኦኔ?
GAL 3:2 ታ እስባ ኤራናዉ ኮያይስ፤ ህንተ ጌሻ አያና ኤክዳይ ህገ ናግድየ ዎይኮ ህንተ ስእዳ ዎንገላ አማንድ ኤክደቲ?
GAL 3:3 ህንተ ሄሳ መላ ኤዬ? ህንተ ፆሳ አያናን ዶምድ፥ ሀእ ዎልቃን ፖላናዉ ኮዬቲ?
GAL 3:4 ህንተ ዎንገላ ጋሶን ዳሮ ዋየትዳይ መሌ? ሄ ዋየ ኡባይ ጮ ግድዴ?
GAL 3:5 ፆሳይ ህንተዉ ጌሻ አያና እመይነ ህንተ ግዶን ማላታታ ኦይ፥ ህንተ ህገ ናግዳ ግሾየ ዎይኮ ዎንገላ ስእድ አማንዳ ግሾ?
GAL 3:6 አነ አብራሃመ በእተ፥ “እ ፆሳ አማንስ፤ ፆሳይ እያዉ ሄሳ ፅሎተꬅ ኦꬅድ ኤክስ” ጌተትድ ፃፈትስ።
GAL 3:7 ህዛ፥ አማነይሳት አብራሃመ ናይታ ግደይሳ ኤርተ።
GAL 3:8 ፆሳይ አይሁደ ግዶና አሳ አማኖን ፅልሳናይሳ ጌሻ ማፃፋይ በእድ፥ “ካዎተꬃ ኡባይ ነናን አንጀታና” ያግድ፥ ዎንገላ አብራሃመስ ካሰትድ ኦድስ።
GAL 3:9 ሄሳ ግሾ፥ አማንያ ኡባይ አማንዳ አብራሃመራ እስፈ አንጀትዶሶና።
GAL 3:10 ህገ ናግድ ፅላና ግያ ኦንካ ባደትዳይሳ። አይስ ጊኮ፥ ጌሻ ማፃፋን፥ “ህገ ማፃፋን ፃፈትዳ ኡባ ናጎና ኦንካ ባደትዳይሳ ግዶ” ጌተትድ ፃፈትስ።
GAL 3:11 “ፅሎይ አማኖን ዳና” ጌተትድ ፃፈትዳ ግሾ፥ ኦንካ ፆሳ ስንꬃን ህገ ናግድ ፅሎናይስ ኤረትዳባ።
GAL 3:12 ህገይ አማኖን ዘምፐና። ሽን፥ “ህግያ ናግያ ኦንካ ህግያን ደኦን ዳና” ያጌስ።
GAL 3:13 “ምꬃ ቦላ ካቀትድ ሀይቅያ ኦንካ ባደትዳይሳ” ጌተትድ ፃፈትዳ ግሾ፥ ክርስቶስ ኑ ግሾ ባደትዳይሳ ግድድ፥ ኑና ህገ ባደꬃፈ ዎዝስ።
GAL 3:14 ፆሳይ አብራሃመስ እምዳ አንጆይ፥ የሱስ ክርስቶሳ ባጋራ አይሁደ ግዶና አሳ ጋካና መላነ ፆሳይ እማና ግዳ ጌሻ አያና ኑኒ አማኖን ኤካና መላ ሄሳ ኦꬅስ።
GAL 3:15 ታ እሻቶ፥ ታ ህንተዉ አሳ ደኦን ሜዘ ግድድ ደእያባ ሌምሶ ኦꬃዳ ኦዳይስ። አስ ጫቅዳ ጫቆይ ምንዳፐ ጉየ፥ ኦንካ ሄ ጫቁዋ ሻራናዉ ዎይኮ እያ ቦላ ሀራ ጉጃናዉ ዳንዳኤና።
GAL 3:16 ፆሳይ ሄ ኬከ ቃላ አብራሃመስነ እያ ዘረꬃስ እሚስ። ጌሻ ማፃፋይ፥ ዳሮ አሳስ ኦድያዳ፥ “ነ ዘረꬃታስ” ጌና። ሽን እስ አሳስ ኦድያዳ፥ “ነ ዘረꬃስ” ያጌስ፤ እካ ክርስቶሳ።
GAL 3:17 ታኒ ገይ ሀይሳ፤ ኦይዱ ፄታነ ሀስታሙ ላይꬃፈ ጉየ እመትዳ ህገይ፥ ኮይሮ ፆሳይ ምንꬅዳ ጫቁዋ ሻርድ ኡፋይሳ ቃላ ꬋይሳናዉ ዳንዳኤና።
GAL 3:18 ፆሳይ እምያ ላታይ ህገን ኤከትያባ ግድያኮ ፆሳይ እምዳ ኡፋይሳ ባጋራ ግደይስ አቴስ። ሽን ፆሳይ ባ አꬎ ኬሀተꬃን ላታ አብራሃመስ ኡፋይሳ ቃላ ባጋራ እሚስ።
GAL 3:19 ያትን፥ ህገይ አይስ እመትዴ? ህገይ እመትዳይ፥ አብራሃመስ ኡፋይሳ ቃል እመትዳ ኮቻይ ያና ጋካናዉ ኢታ ኦሶይ አይበኮ ኤርሳናሳ። ህገይ ኪታንቾታ ባጋራ እመትድ፥ ግዶ ግድድ ስገꬅያ እስ አሳ ባጋራ ኦሶ ቦላ ፔእስ።
GAL 3:20 ግዶ ግድድ ስገꬅያ ኡራይ እስ አሳ ፃላላስ ግደና፥ ሽን ፆሳይ እስኖ።
GAL 3:21 ያትን፥ ህገይ ፆሳ ኡፋይሳ ቃላራ ኤቀትዬ? አካይ፥ ግደና! ህገይ እመትዳይ አሳስ ደኦ እማናዉ ግድያኮ፥ ፅሎተꬅ ህገ ባጋራ በንታናሽን።
GAL 3:22 ሽን የሱስ ክርስቶሳ አማንን በንትያ ኡፋይሳ ቃላይ አማነይሳታስ እመታና መላ ኩመꬃ አላመይ ናጋራስ ሃረትድ ደኤይሳ ጌሻ ማፃፋይ ኦዴስ።
GAL 3:23 ሽን አማኖይ ያናፐ ካሰ ህገይ ኑና ቃች ዎꬅስ። ሄ አማኖይ ቆንጫና ጋካናዉ ህገይ ኑ ቦላ ጎርድ ዎꬅስ።
GAL 3:24 ሄሳ ግሾ፥ ኑኒ አማኖን ፅላና መላ ክርስቶስ ያና ጋካናዉ ህገይ ናአ ናግያ አሳ መላ ኑና ናገይሳ ግድስ።
GAL 3:25 ሽን ሀእ አማኖይ ይዳ ግሾ፥ ህገይ ህዛፐ ጉየ ናአ ናግያ አሳ መላ ኑና ናገይስ አትስ።
GAL 3:26 ህንተ ኡባይ የሱስ ክርስቶሳ አማንድ ፆሳ ናይታ ግድደታ።
GAL 3:27 ክርስቶሳራ እስኖ ግዳናዉ ፃማቀትዳ ኡባይ ክርስቶሳ ማኦዳ ማእደታ።
GAL 3:28 ህንተ ኡባይ ክርስቶሳን እስኖ ግድያ ግሾ፥ አይሁደ አሳ ግዶንነ ግርከ አሳ ግዶን፥ አይለ ግዶንነ ዎማኖ ግዶን፥ አደ ግዶንነ ማጫሳ ግዶን ዱማተꬅ ባዋ።
GAL 3:29 ህዛ፥ ህንተ ክርስቶሳባ ግድኮ ህንተ አብራሃመ ዛረ። ፆሳ ኡፋይሳ ቃላዳ ህንተ ላተይሳታ።
GAL 4:1 ታ ገይስ ሀይሳ። ላተይ ናኣ ግድ ደእሸ፥ ሻሎ ኡባይ እያባ ግድኮካ፥ እ አይለፈ አይኮካ ዱማተና።
GAL 4:2 ሽን እያ አዋይ ግዳ ዎደይ ጋካናዉ እ ሀዳራ ኤክዳይሳታ ኩሸንነ ናገይሳታ ኩሸን ደኤስ።
GAL 4:3 ሄሳዳካ፥ ኑኒ ናአተꬃን ደእያ ዎደ አላምያ ዎጋስ አይለትድ ደእዳ።
GAL 4:4 ሽን ዎደይ ጋክዳ ዎደ ፆሳይ ህገፈ ጋርሳን፥ ማጫሳፐ የለትዳ ባ ናኣ ኪትስ።
GAL 4:5 እ ሄሳ ኦꬅዳይ፥ ህገስ ሃረትድ ደኤይሳታ ዎዛናዉነ ኑና ባ ናይታ ኦꬃናሳ።
GAL 4:6 ኑ ፆሳ ናይታ ግድያ ግሾ፥ “አባ፥ አዋዉ” ግድ ፄግያ ባ ናኣ አያና ኑ ዎዛና ግዶ ኪትስ።
GAL 4:7 ሄሳ ግሾ፥ ህዛፐ ኔኒ ፆሳ ናአፐ አትሽን፥ አይለ ግዳካ። ኔኒ እያ ናአ ግድኮ፥ ፆሳ ላተይሳ ግዳዳሳ።
GAL 4:8 ህንተ ካሰ ፆሳ ኤሮና ዎደ ፆሰ ግዶናይሳታስ አይለ ግድድ ሃረትደታ።
GAL 4:9 ሽን ሀእ ህንተ ፆሳ ኤርደታ፤ ኡባራካ ፆሳን ኤረትደታ። ያትን ፓꬆናነ ጎኦና አላመ ዎጋታኮ ጉየ ዋንድ ስመቲ? ዎꬍ ኤቅድ፥ ዋንድ ኤንታዉ አይለ ግዳናዉ ኮዬቲ?
GAL 4:10 ዱማ ግድዳ ጋላሳታ፥ አጌናታ፥ ዎደታነ ላይꬃታ ህንተ ሎይꬅ ቦንቸታ።
GAL 4:11 ታና ህንተባይ ያሼስ፤ ታ ህንተዉ ጮ ዳቡራድናሻ?
GAL 4:12 ታ እሻቶ፥ ታ ህንተዳ ሀንዳ ግሾ፥ ህንተካ ታዳ ሀንተ ጋዳ ህንተና ዎሳይስ። ህንተ ታና አይብንካ ቆህቤከታ።
GAL 4:13 ታኒ ኮይሮ ሀርገታሸ ህንተዉ ዎንገላ ኦድዳይሳ ህንተ ኤሬታ።
GAL 4:14 ታ ሀርገይ ህንተዉ ፓጨ ግድኮካ፥ ታና ሳለትበከታ፤ እፅበከታ። ሽን ታና ፆሳ ኪታንቾ ዎይኮ ክርስቶስ የሱሳ ሞከይሳዳ ሞክደታ።
GAL 4:15 ያትን፥ ሄ ህንተዉ ደእያ ኡፋይሳይ ኡባይ አዉ ብዴ? ህንተዉ ዳንዳኤትዳኮ፥ ህንተ ታዉ፥ ህንተ አይፍያ ከስድ እምያኮ እፆናይሳ ታ ማርካታይስ።
GAL 4:16 ያትን፥ ታ ህንተዉ ቱማ ኦድዳ ግሾ ህንተዉ ሞርከ ግዳድናዬ?
GAL 4:17 ሄ አሳት ህንተና ባንታኮ ዛራናዉ ኮዮሶና፥ ሽን ኤንታ ቆፋይ ሎኦሳ ግደና። ኤንታ ቆፋይ ህንተና ሻካናሳነ ህንተ ኤንታዉ ቆፓና መላ ኦꬃናሳ።
GAL 4:18 ሎኦባ ኦꬃናዉ አሞትኮ ሎኦ፥ ሽን ሄስ ታ ህንተራ ደእያ ዎደ ፃላላ ግዶናሽን ኡባ ዎደ ግዶ።
GAL 4:19 ታ ሲቆ ናይቶ፥ ክርስቶስ ህንተናን ምስለታና ጋካናዉ ማጫስ የሎስ እቀተይሳዳ ታ ህንተ ግሾ እቀታይስ።
GAL 4:20 ህንተባይ ታዉ ሀድርን ታ ኡንኤታስ፤ ሀእ ህንተ ግዶን ታ በንታዳ ሸነታዳ ኦድያኮ አይ መላ ዶሳይናሽን።
GAL 4:21 ሙሰ ህገን ሃረትድ ዳናዉ ኮየይሳቶ፥ አነ ታዉ ኦድተ፤ ህገይ አይ ግያኮ ኤረከቲ?
GAL 4:22 ጌሻ ማፃፋይ፥ “አብራሃመስ ጋꬍንደፈነ ጎዳተፈ የለትዳ ናምኡ ናይት ደኦሶና” ያጌስ።
GAL 4:23 ጋꬍንደ ናአይ አስ ናአ የልያ ማራን የለትስ፥ ሽን ጎዳተ ናአይ ፆሳ ኡፋይሳ ቃላን የለትስ።
GAL 4:24 ሀ ማጫሳት ናምኡ ጫቆታስ ሌምሶ ግድድ ኤከቶሶና። ኤንታፈ እስንያ፥ ሲና ዙማፐ ይዳራ፥ ባ ናይታ አይለተꬃስ የላሱ፤ እያካ አጋሮ።
GAL 4:25 አጋራ አራበ ቢታን ደእያ ሲና ዙማን ሌምሰታዳ ሀእ ደእያ የሩሳላመ ዳናዉሱ። አይስ ጊኮ፥ እያ ባ ናይታራ አይለተꬃን ደአዉሱ።
GAL 4:26 ሽን ሳሎን ደእያ የሩሳላመይ አይለተꬃን ደኡኩ፤ እያ ኑ ኡባስ አዮ።
GAL 4:27 ጌሻ ማፃፋይ፥ “ናተ፥ የሎና ማይንተ ኡፋይታ፤ ናተ እቀታ ኤሮናረ እልላ። አዝናራ ደእያ ማጫሴፐ፥ አዝን ባይና ማጫሴስ ናይት ዳሮ” ያጌስ።
GAL 4:28 ታ እሻቶ፥ ህንተ ይሳቃዳ ፆሳ ኡፋይሳ ቃላን የለትዳ ናይታ።
GAL 4:29 ሽን ሄ ዎደ አሳ ማራዳ የለትዳይስ፥ አያና ዎልቃን የለትዳይሳ ጎድስ። ሀችካ ሄሳ መላ።
GAL 4:30 ሽን ጌሻ ማፃፋይ ዎይጊ? “ጋꬍንደ ናአይ ጎዳተ ናኣራ እስፈ ላቶና ግሾ፥ አይልዉ እ ናኣራ ዎላ ከሳ የዳ” ያጌስ።
GAL 4:31 ሄሳ ግሾ፥ ታ እሻቶ፥ ኑኒ ጎዳተ ናይታፐ አትሽን፥ ጋꬍንደ ናይታ ግዶኮ።
GAL 5:1 ኑኒ ላአተꬃን ዳና መላ ክርስቶስ ኑና አይለተꬃፈ ከስስ። ህዛ፥ ምንድ ኤቅተ፤ ዛሪድ አይለተꬃ ቃምባራን ገሎፕተ።
GAL 5:2 ታ፥ ጳዉሎስ፥ ገይሳ ስእተ። ህንተ ቃፃረታናዉ ኮይኮ፥ ክርስቶስ ህንተና አይኮካ ማደና።
GAL 5:3 ቃፃረትያ ኦንካ ህገይ ኪትያ ኡባ ፖላናዉ በሰይሳ ጉጃዳ ታ ኦዳይስ።
GAL 5:4 ህገ ናግድ ፅላናዉ ኮየይሳቶ፥ ክርስቶሳፐ ሻከትደታ፤ ፆሳ አꬎ ኬሀተꬃፈ ኩንድደታ።
GAL 5:5 ሽን ኑኒ ፆሳ አያና ባጋራ አማኖን ፅላናዉ ኡፋይሳን ናጎስ።
GAL 5:6 ህዛ፥ ክርስቶስ የሱሳን ደእኮ፥ ሲቆን ቆንጭያ አማኖፐ አትሽን፥ ቃፃረትን፥ ቃፃረቶና አግን ኑና አይኮካ ማደና።
GAL 5:7 ካሰ ህንተ ሎኦ ዎፄታ፥ ሽን ሀእ ቱማስ ኪተቶና መላ ህንተና ድግዳይ ኦኔ?
GAL 5:8 ሀይሳ መላ ኢታ ጭሞይ ህንተና ፄግዳ ፆሳፈ ይቤና።
GAL 5:9 ሄስካ፥ “ጉꬃ እርሾይ ሙኑቃ ኡባ ደንꬄስ” ጌተትድ ፃፈትዳይሳ መላ።
GAL 5:10 ህንተዉ ሀራ ቆፍ ባይናይሳስ ታ ጎዳን አማነታይስ። ሽን ህንተና ቡቅያ ኦንካ ፆሳፈ ባ ፕርዳ ኤካና።
GAL 5:11 ታ እሻቶ፥ ታ ሀእ ጋካናዉ ቃፃአረተꬅ ሳባክያባ ግድኮ፥ ያትን ታና አይስ ጎዶና? ሄስ ቱማ ግድያኮ ክርስቶሳ ማስቃልያባ ታማርሶይ አሳስ ꬉበ ግደናሽን።
GAL 5:12 ህንተና ቡቀይሳት ቃፃረተꬃ ፃላላ ግዶናሽን፥ ባንታና ቃራትያኮካ ታ ዶሳይስ።
GAL 5:13 ታ እሻቶ፥ ህንተ ላአ ዳናዉ ፄገትደታ። ግዶሽን፥ ህንተ ላአተꬃይ አሾ አሞ ፖላናዉ ህንተዉ ጋሶ ግዶፖ፤ ሄሳፈ አꬅድ እሶይ እሱዋ ሲቆን ማድተ።
GAL 5:14 ህገ ኡባይ፥ “አሰ ኔዳ ዶሳ” ግያ እስ ቃላን ቃሸትስ።
GAL 5:15 ሽን ህንተ እሶይ እሱዋራ ሳፀትያባነ ሜተትያባ ግድኮ፥ ህንተ ዎል ዉርሶና መላ ናገትተ።
GAL 5:16 ህዛ፥ ታ ህንተዉ ኦዳይስ፤ አያናን ደእተ፤ ህንተ አሾ አሙዋ ፖሎፕተ።
GAL 5:17 አሾ አሞይ አያና አሙዋራ ሞርከ፤ ቃስ አያና አሞይካ አሾ አሙዋራ ሞርከ። ኤንቲ እሶይ እሱዋራ እፀትያ ግሾ ህንተ ዶስያባ ኦꬃናዉ ዳንዳኤከታ።
GAL 5:18 ሽን አያናይ ህንተና ካለꬅያባ ግድኮ ህገይ ህንተና ሃረና።
GAL 5:19 አሾ ኦሶት ኤረትዳይሳታ፤ ኤንትካ፥ ላይማተꬅ፥ ቱናተꬅ፥ ቃይፀ፥
GAL 5:20 ኤቃ ጎይኖ፥ ብታ፥ ሞርከተꬅ፥ ካች፥ ቃናተ፥ ሀንቆ፥ ባና ዶሶ፥ ሻከተꬅ፥ ኢታ ቶቦ
GAL 5:21 ገነ፥ ማꬆ፥ የꬅነ ሄሳ ሄሳ መላታ። ካሰ ታ ህንተዉ ኦድዳይሳዳ ሀእካ ታ ህንተዉ ኦዳይስ። ሀይሳ መላባታ ኦይሳት ፆሳ ካዎተꬃ ላቶኮና።
GAL 5:22 ሽን አያና አይፈይ፥ ሲቆ፥ ኡፋይስ፥ ሳሮተꬅ፥ ዳንዳአ፥ ኬሀተꬅ፥ ሎኦተꬅ፥ አማኖ፥
GAL 5:23 አሽከተꬅ፥ ባና ሃሮ። ሀይሳ መላባታ እፅያ ህገይ ባዋ።
GAL 5:24 ክርስቶስ የሱሳባ ግድዳይሳት ባንታ አሹዋ እያ ኢታ ቆፋራነ እያ አሙዋራ እስፈ ማስቃልያ ቦላ ካቅዶሶና።
GAL 5:25 ኑ አያናን ደእያባ ግድኮ፥ ኑና አያናይ ካለꬆ።
GAL 5:26 አነ እሶይ እሱዋ ይሎይሸነ ቃናትሸ ጮ ጬቀተይሳ አጎስ።
GAL 6:1 ታ እሻቶ፥ እስ አስ ናጋራን ኩንድኮ፥ አያናን ደእያ ህንተ ሄ ኡራ አሽከተꬃን ሱርስተ። ሽን ኔኒ ሄሳ መላባን ፓጨቶና መላ ነና ናጋ።
GAL 6:2 እሶይ እሱዋ ዴፆ ቶሁዋ ቶክተ። ያትኮ ክርስቶሳ ህግያ ፖሌታ።
GAL 6:3 እስ አስ አይኮይካ ባዋሽን፥ ባና ሀራታፐ ሎኦ ግድ ቆፕኮ፥ እ ባና ጭሜስ።
GAL 6:4 ሽን እስ እስ አስ ባ ኦሱዋ ፓጮ። ሄሳፈ ጉየ፥ ሀራታራ ባና ጋደየይሳ አግድ ባዉ ጬቀትያባ ደሜስ።
GAL 6:5 እስ እስ አስ ባ ቶሁዋ ባዉ ቶካናዉ በሴስ።
GAL 6:6 ፆሳ ቃላ ታማርያ ኦንካ ሎኦባ ኡባ ባ አስታማርያራ ሻከቴስ።
GAL 6:7 ህንተ፥ ህንተና ጭሞፍተ። አስ ባ ዘርዳባ ዛሪድ ጫክያ ግሾ ፆሳ ቦላ ቀልቅሶፕተ።
GAL 6:8 ባ አሾ አሙዋ ኩንꬃናዉ ዘርያ ኦንካ፥ ባ አሾ አሙዋፐ ሀይቆ ቡጫና። ሽን አያና ኡፋይሳናዉ ዘርያ ኦንካ አያናፐ መርና ደኦ ጫካና።
GAL 6:9 አነ ሎኦ ኦሶ ኦꬃናዉ አዛለይሳ አጎስ። ኑኒ አዛሎና እፅኮ ዎደይ ጋክያ ዎደ ኑ ዘርዳይሳ ጫካና።
GAL 6:10 ኑ እንጀ ዎደ ደምኮ፥ አሳ ኡባስ፥ አꬅድካ አማንያ አሳስ ሎኦባ ኦꬆስ።
GAL 6:11 ታኒ ታ ኩሸን፥ አይ መላ ግታ ፕዳለን ህንተዉ ፃፍዳኮ በእተ።
GAL 6:12 አሳ ስንꬃን ሎኦ ግድድ በንታናዉ ኮይያ አሳት ህንተ ቃፃረታና መላ ኮዮሶና። ሽን ሄሳ ኤንቲ ኦይ፥ ክርስቶሳ ማስቃልያ ግሾ ኤንታና ጎድ ጋኮና መላሳ።
GAL 6:13 ኤንቲ ህንተ ቃፃረተꬃን ጬቀታናዉ ኮይድ ህንተና ቃፃረቶ ጎሶናፐ አትሽን፥ ቃፃረትዳይሳትካ ባንታ ሁጰን ህግያ ናጎኮና።
GAL 6:14 ሽን አላመይ ታዉ ካቀትዳይሳፈነ ታንካ አላምያስ ካቀትዳ፥ ጎዳ የሱስ ክርስቶሳ ማስቃልያፐ አትሽን፥ ሀራ ጬቆይ ታፐ ሃኮ።
GAL 6:15 ህዛ፥ ቃፃረትን ቃፃረቶና አግን አይኮካ ማደና። ማደይ ኦራꬃ መተꬅ ግዶ።
GAL 6:16 ሀ ዎጋ ካልያ ኡባስነ ፆሳ ደረ ግድዳ እስራኤለስ ሳሮተꬅነ ማሮተꬅ ግዶ።
GAL 6:17 ታኒ የሱሳስ ማዱንፅዳ ቤታ ታ አሳተꬃን ቶክዳ ግሾ፥ ህዛፐ ታና ኦንካ ዋይሶፖ።
GAL 6:18 ታ እሻቶ፥ ኑ ጎዳ የሱስ ክርስቶሳ አꬎ ኬሀተꬃይ ህንተራ ግዶ። አምንእ።
EPH 1:1 ፆሳ ሸነን ክርስቶስ የሱሳ ሀዋረ ግድዳ ጳዉሎሳፐ፥ ኤፈሶናን ደእያ ጌሻታስነ ክርስቶስ የሱሳ አማነይሳታስ ፃፈትዳ ኪታ።
EPH 1:2 ፆሳ ኑ አዋፐነ ጎዳ የሱስ ክርስቶሳፐ አꬎ ኬሀተꬃይነ ሳሮተꬃይ ህንተዉ ግዶ።
EPH 1:3 ሳሎን ደእያ አያና አንጆ ኡባን ክርስቶሳ ባጋራ ኑና አንጅዳ፥ ኑ ጎዳ የሱስ ክርስቶሳ አዋይ፥ ፆሳይ ጋላተቶ።
EPH 1:4 ኑኒ እያ ስንꬃን ጌሻታነ ቦረይ ባይናይሳታ ግዳና መላ ፆሳይ አላመይ መታናፐ ካሰ ክርስቶሳ ባጋራ ባ ሲቁዋን ኑና ዶርስ።
EPH 1:5 ፆሳይ ባ ሸንያን ባ ዶስዳይሳዳ የሱስ ክርስቶሳ ባጋራ ኑና ባ ናይታ ኦꬃናዉ ካሰትድ ቆፕ ዎꬅስ።
EPH 1:6 ፆሳይ ባ ሲቅያ ናኣ ባጋራ ኑስ ጮ እምዳ አꬎ ኬሀተꬃይ ቦንቸታና መላ ሄሳ ኦꬅስ።
EPH 1:7 ፆሳ አꬎ ኬሀተꬃ ዱረተꬃዳ ክርስቶሳ ሱꬃን ዎዘትድ ናጋራ አቶተꬃ ደምዳ።
EPH 1:8 ባ አꬎ ኬሀተꬃ ጭንጫተꬃንነ ኤራተꬃን ኩንꬅድ ኑስ እሚስ።
EPH 1:9 ፆሳይ ባ ዶስዳይሳዳ ክርስቶሳ ባጋራ እያ ሸንያ ፁራ ኑ ኤራና መላ ኦꬅስ።
EPH 1:10 ዎደይ ጋክያ ዎደ ፆሳይ ፖላናዉ ቆፕዳ ቆፋይ፥ ሳሎንነ ሳአን ደእያ መተꬃ ኡባይ ክርስቶሳፐ ጋርሳን ግዳና መላሳ።
EPH 1:11 ኡባባ ባ ሸንያዳ ኦꬅያ ፆሳይ፥ ካሰትድ ሀልችዳይሳ ክርስቶሳ ባጋራ ኑኒ እያባ ግዳና መላ ኑና ዶርስ።
EPH 1:12 ሄሳ እ ኦꬅዳይ፥ ክርስቶሳን ኡፋይስ ዎꬅድ ናጎን ኮይሮ ግድዳ ኑኒ ፆሳ ቦንቹዋ ጋላታን ቆንጭሳና መላሳ።
EPH 1:13 ህንተካ ህንተ አቶተꬃ ዎንገላ፥ ሄስካ ቱማ ቃላ ስእዳ ዎደ ክርስቶሳ አማንደታ። ፆሳይ ህንተዉ እማና ግዳ ጌሻ አያናን ህንተ አታመትደታ።
EPH 1:14 ፆሳ ቦንቾይ ጋላተታና መላ ፆሳይ ባ አሳ ዎዛና ጋካናዉ ጌሻ አያና ኑስ ኦይꬁ ኦꬅድ እሚስ።
EPH 1:15 ሄሳ ግሾ፥ ጎዳ የሱሳ ህንተ አማነይሳነ ጌሻታ ኡባ ህንተ ሲቀይሳ ታ ስእዳ ዎደ
EPH 1:16 ታ ዎሳን ህንተና ቆፓሸ ህንተ ግሾ ፆሳ ጋላተይሳ አጋብከ።
EPH 1:17 ጎዳ የሱስ ክርስቶሳ ፆሳይ፥ ቦንቾ አዋይ፥ ፆሳ ህንተ አꬅድ ኤራናዳ ጭንጫተꬃነ ቆንጨꬃ አያና ህንተዉ እማናዳ ታኒ ፆሳ ዎሳይስ።
EPH 1:18 ፆሳይ ህንተና ፄግዳ ኡፋይሳይነ ጌሻት ላትያ ቦንቾ ላታይ አይ መላ ዳሮኮ ህንተ ኤራና መላ ፆሳይ ህንተ ዎዛና አይፍያ ዶያና መላ ታኒ ፆሳ ዎሳይስ።
EPH 1:19 ቃስ እያ አማንያ ኑናን ኦꬅያ እያ ዎልቃይ አይ መላ አꬍዳ ግቴኮ ህንተ ኤራና መላ ዎሳይስ። ሄ ዎልቃይ ፆነቶናነ ዳቡሮና ዎልቃ። ሀ ኑናን ደእድ ኦꬅያ ዎልቃይነ፥
EPH 1:20 ክርስቶሳ ሀይቆፐ ደንꬅድ፥ ሳሎን ፆሳፈ ኡሻቻ ባጋራ ኡትስዳ ግታ ዎልቃይ እስኖ።
EPH 1:21 እያ ሱንꬃይ፥ አይሰይሳታፐነ ማታ አዋታፐ፥ ሃረይሳታፐነ ጎዳታፐ፥ ቦላ ግድድ ሀ አላምያ ፃላላን ግዶናሽን፥ ስንꬃፈ ያና አላምያንካ ሀራ ሱንꬃታ ኡባፈ ꬎቃ።
EPH 1:22 ፆሳይ ኡባ ክርስቶሳ ቶሆፐ ጋርሳን ሃርስስ፤ ቃስ ዎሳ ኬꬃን፥ ኡባባን ጎዳ ግዳና መላ እያ ሹምስ።
EPH 1:23 ዎሳ ኬꬅ ክርስቶሳ ኩመꬅ ኦꬅያ እያ አሳተꬅ። መተꬃይ ደእያ በሳ ኡባን ክርስቶስ ባ ሁጰን ኡባባ ኩንይሳ።
EPH 2:1 ሀይሳፈ ካሰ ህንተ፥ ህንተ ናጋራነ ህንተ ቆሁዋ ጋሶን ሀይቅዳይሳታ።
EPH 2:2 ሄ ዎደ ህንተ ሀ አላምያ ኢታ ኦግያ ካልደታ። ጫርኩዋ ቦላ ደእያ አያና ዎልቃታ ሀላቃስነ ሀእካ ፆሳስ ኪተቶና አሳ ሃርያ አያናስ ኪተትደታ።
EPH 2:3 ኑ ኡባይካ ካሰ ሄ አሳታ ግዶን ኑ አሾ አሙዋነ ኑ ዎዛና ሸንያ ካልድ ደእዳ። ኑካ ሀራታ መላ ኑ መተꬃን ፆሳ ሀንቁዋ ኤካናዉ ደኤይሳታ።
EPH 2:4 ሽን ፆሳ ግታ ማሮተꬃፈነ ኑስ ደእያ ግታ ሲቁዋፐ ደንድዳይሳን፥
EPH 2:5 ሀር አቶሽን ኑኒ ኑ ቆሁዋን ሀይቅድ ደእሽን ክርስቶሳ ባጋራ ኑስ ደኦ እሚስ። ህንተካ አትዳይ ፆሳ አꬎ ኬሀተꬃና።
EPH 2:6 ፆሳይ ኑና ክርስቶሳራ እስፈ ሀይቆፐ ደንꬅድ ሳሎን እያራ እስፈ ዎꬅስ።
EPH 2:7 እ ሄሳ ኦꬅዳይ፥ ክርስቶስ የሱሳ ባጋራ ኑስ ቆንጭስዳ ባ ኬሀተꬃነ ዛው ባይና ባ አꬎ ኬሀተꬃ ዱረተꬃ ያና ላይꬃን ኑና በሳናሳ።
EPH 2:8 ህንተ አꬎ ኬሀተꬃን አማኖን አትደታ። ሄስካ፥ ፆሳ እሞታፐ አትሽን፥ ህንተ ኦሶን በንትዳባ ግደና።
EPH 2:9 ኦንካ ጬቀቶና መላ አቶተꬃይ በንትዳይ ኦሶን ግደና።
EPH 2:10 ኑኒ ፆሳ መተꬅ፤ እ ኑስ ካሰትድ ጊግስ ዎꬅዳ ሎኦ ኦሶታ ኦꬃና መላ ክርስቶስ የሱሳ ባጋራ ኦራꬅ መትዳ።
EPH 2:11 ሄሳ ግሾ፥ ህንተኖ የለታን አይሁደ ግዶናይሳቶ፥ አይሁደት ባንታዉ አሳ ኩሸን ቃፃረትድ፥ ህንተና ቃስ ቃፃረትቦናይሳታ ግድ ፄገይሳ አኬክተ።
EPH 2:12 ሄ ዎደ ህንተ ክርስቶሳፐ ሻከት ደእዳይሳ፥ እስራኤለ አሳስ አላጋ ግድድ ደእዳይሳ፥ ፆሳ ኡፋይሳ ቃላፐ ሃክድ ደእዳይሳነ ሀ አላምያን ኡፋይስነ ፆሲ ባይና ደእዳይሳ አኬክተ።
EPH 2:13 ሽን ህንተ ካሰ ሃክድ ደእዳይሳት፥ ሀእ ክርስቶስ የሱሳን ደእድ ክርስቶሳ ሱꬃን ማታ ሺቅደታ።
EPH 2:14 ክርስቶስ ኑ ሳሮተꬃ፤ እ አይሁደነ አይሁደ ግዶና አሳ ትምድ፥ ናምኣ ሻክ ዎꬅዳ ሞርከተꬃ ጎዳ ላልስ።
EPH 2:15 እ ባናን ሀ ናምኡ ኮቻታፐ እስ ኦራꬃ አሰ መꬍድ፥ ህግያ እያ ኪታራነ ዎጋታራ እስፈ ባ አሳተꬃን ꬋይስድ ሳሮተꬅ እሚስ።
EPH 2:16 ክርስቶስ ማስቃልያ ቦላ ሀይቅድ ሞርከተꬃ ꬋይስስ፤ ቃስ ናምኡ ኮቻታ እስ አሳተꬅ ኦꬅድ ፆሳራ ስገꬅስ።
EPH 2:17 ክርስቶስ ይድ፥ ፆሳፈ ሃክድ ደእያ ህንተዉ፥ ቃስ ማትድ ደእያ ኤንታዉ ሳሮተꬃ ዎንገላ ኦድስ።
EPH 2:18 ኑ ኡባይ እያ ባጋራ እስ አያናን አዋ ስን ሺቃናዉ ዳንዳኦስ።
EPH 2:19 ህዛፐ ህንተ አላጋ ዎይኮ እማ ግደከታ፥ ሽን ህንተ ሀእ ጌሻታ ቢታ አስነ ፆሳ ሶ አስ።
EPH 2:20 ህንተ ሀዋረትነ ናበት ባስዳ ባሱዋ ቦላ ኬፀትደታ። ጎዳ ፃጱዋ ምንꬅያ ሹቻይ ክርስቶስ የሱሳ።
EPH 2:21 እያን ኬꬃ ኡባይ እስፈ ኦይከትድ ጎዳን ጌሻ ፆሳ ኬꬅ ግዳናዉ ድጬስ።
EPH 2:22 ህንተ ቃስ ፆሳይ ባ አያናን ደእያ ኬꬅ ግዳናዉ ክርስቶሳን እስፈ ኬፀተታ።
EPH 3:1 ሄሳ ግሾ፥ ታኒ፥ ጳዉሎስ፥ አይሁደ ግዶና ህንተ ግሾ ክርስቶስ የሱሳን ቃሾ አስ ግዳስ።
EPH 3:2 ታ ህንተና ማዳና መላ ፆሳይ ባ አꬎ ኬሀተꬃን ታዉ እምዳ ሀ ኦሱዋባ ህንተ ሎይꬅ ስእደታ።
EPH 3:3 ታ ህንተዉ ካሰ ቃንꬃን ፃፍዳይሳዳ ፆሳይ ባ ፁራ ቆንጨꬃን ታዉ ቆንጭስስ።
EPH 3:4 ታ ፃፍዳይሳ ህንተ ናባብያ ዎደ ክርስቶሳ ፁራ ታ አይ መላ ኤርዳኮ ህንተ አኬካናዉ ዳንዳኤታ።
EPH 3:5 ሀ ፁራይ ጌሻ ሀዋረታስነ ናበታስ ሀእ አያና ባጋራ ቆንጭዳይሳዳ በን ዎደ አሳስ ሄሳዳ ቆንጭስቤና።
EPH 3:6 ፁራይ ሀይሳ: አይሁደ ግዶና አሳይ ዎንገላ ባጋራ እስራኤለታራ እስፈ ፆሳ አንጁዋ ላቶሶና። እስራኤለታራ እስ ኬꬃ አስ ግዶሶና፤ ክርስቶስ የሱሳ ባጋራ ፆሳ ኡፋይሳ ቃላ ኤኮሶና።
EPH 3:7 ፆሳይ ባ ኦꬅያ ዎልቃ ባጋራ ታዉ እምዳ አꬎ ኬሀተꬃን ሀ ዎንገላስ ኦሳንቾ ግዳስ።
EPH 3:8 ታኒ ጌሻታ ኡባፈ ላፋ ግድኮካ አይሁደ ግዶና አሳስ ዛው ባይና ክርስቶሳ ዱረተꬃ ዎንገላ ኦዳና መላ ሀ አꬎ ኬሀተꬃይ ታዉ እመትስ።
EPH 3:9 ቃስ ካሰ ዎድያን ኡባ መꬍዳ ፆሳን ቆሰትድ ደእያ ፁራስ፥ ፆሳ ቆፋይ አይበኮ ቆንጭሳናዉ አꬎ ኬሀተꬃይ ታዉ እመትስ።
EPH 3:10 ፆሳይ ሄሳ ኦꬅዳይ ሀእ ዎድያን ዎሳ ኬꬃ ባጋራ ሳሎን ደእያ ሀላቃታስነ ሃረይሳታስ ባ ዱማ ዱማ ቆንጨꬃ ኤርሳናሳ።
EPH 3:11 ፆሳይ ባ መርና ቆፋ ኑ ጎዳ ክርስቶስ የሱሳ ባጋራ ፖላናዉ ሄሳ ኦꬅስ።
EPH 3:12 ኑ አማኖን ያሽ ባይና ፆሳኮ ሺቃና መላ ክርስቶስ ኑስ ምኖተꬅነ ላአተꬅ እሚስ።
EPH 3:13 ታኒ ህንተ ግሾ ዋየ ኤክያ ግሾ፥ ህንተ ታ ዋያን ዬላቶናዳ ህንተና ዎሳይስ፤ ታኒ ህንተ ቦንቹዋስ ዋየታይስ።
EPH 3:14 ታኒ አዋ ስንꬃን ጉልባታዳ ዎሰይ ሄሳ ግሾሳ።
EPH 3:15 ሳሎንነ ሳአን ደእያ እስ እስ ሶ አሳይ እያን ሱንቴስ።
EPH 3:16 ፆሳይ ባ ቦንቾ ዱረተꬃፈ ህንተ ጋርሳ አሳተꬃ ምንꬅያ ዎልቃ ባ አያና ባጋራ እማና መላ ህንተዉ ዎሳይስ።
EPH 3:17 ቃስ አማኖን ክርስቶስ ህንተ ዎዛናን ዳና መላነ ህንተ ሲቆን ፃጶ የድድ ምንድ ዳና መላ ዎሳይስ።
EPH 3:18 ሄሳዳካ፥ ክርስቶሳ ሲቆይ አይ መላ ዳልገኮ፥ አዱሰኮ፥ ꬎቀኮነ ጪሞኮ ጌሻታ ኡባራ፥ ህንተ አኬካና ዎልቃ ደማና መላ ዎሳይስ።
EPH 3:19 ኤራተꬃፈ አꬍያ ክርስቶሳ ሲቁዋ ህንተ ኤራና መላ ቃስ ደኦ እምያ ፆሳ ዎልቃን ህንተ ኩማና መላ ታ ዎሳይስ።
EPH 3:20 ህዛ፥ ኑ ግዶን ኦꬅያ ባ ዎልቃ ባጋራ ኑኒ ዎሰይሳፈ ዎይኮ ቆፐይሳፈ አꬅድ ኦꬃናዉ ዳንዳእያ ፆሳስ፥
EPH 3:21 ዎሳ ኬꬃንነ ክርስቶስ የሱሳን ዎደ ኡባን መርናፐ መርና ጋካናዉ ቦንቾይ ግዶ። አምንእ።
EPH 4:1 ህዛ፥ ጎዳ ግሾ ቃሸትዳ ታኒ፥ ህንተ ፄገትዳ ፄሳስ በሲያ ደኦ ዳና መላ ህንተና ዎሳይስ።
EPH 4:2 ህንተ ኡባ ዎደ አዳታነ ሀዮ ግድተ፤ እሶይ እሱዋ ዳንዳእተነ ሲቆን ደእተ።
EPH 4:3 ሳሮተꬃን ቃሸትድ አያናይ እምያ እስፈተꬃ ናጋናዉ ምንተ።
EPH 4:4 ፆሳይ ህንተና ፄግዳ ዎደ እስ ኡፋይሳስ ፄግዳይሳዳ እስ አሳተꬅነ እስ አያን ደኤስ።
EPH 4:5 እስ ጎዳይ፥ እስ አማኖይነ እስ ፅንቃተይ ደኤስ።
EPH 4:6 ኡባፈ ቦላ ግድዳ፥ ኡባ ባጋራ ኦꬅያነ ኡባ ግዶን ደእያ እስ ፆሳይ፥ ኡባ አዋይ ደኤስ።
EPH 4:7 ሽን ክርስቶስ እማናዉ ኮይዳይሳዳ ኑ እሶይ እሶይ ዱማ ዱማ እሞታ ኤክዳ።
EPH 4:8 ሄሳ ግሾ፥ ፆሳ ቃላይ፥ “እ ፑደ ከይዳ ዎደ ድኤትዳ ዳሮታ ባራ ኤክድ ብስ፤ አሳስካ እሞታ እሚስ” ያጌስ።
EPH 4:9 ያትን፥ “ፑደ ከይስ” ጉሳይ ዎይ ጉሴ? እ ኮይሮ ዱገ፥ ሳኣ ዝቃ በሳ ዎꬍስ ጉሱ ግዶና እፅኮ አይ ጉሴ?
EPH 4:10 ሀ ዱገ ዎꬍዳይስ፥ ኡባ በሳን በንታናዉ ኡባፈ ꬎቃ ሳሉዋ ከይዳይስ እያ።
EPH 4:11 እ እሶታ እሶታ ሀዋረታ፥ እሶታ እሶታ ናበታ፥ እሶታ እሶታ ዎንገላ ሳባከታ፥ እሶታ እሶታ ዎሳ ኬꬅ ሄመይሳታ፥ እሶታ እሶታ አስታማረታ ኦꬅድ እሚስ።
EPH 4:12 እ ሄሳ ኦꬅዳይ ክርስቶሳ አሳተꬅ ግድዳ ዎሳ ኬꬅ ድቻናዉነ አማንያ አሳ ፆሳ ኦሶስ ጊግሳናሳ።
EPH 4:13 ሄሳዳካ፥ ኑ ኡባይ ፆሳ ናኣ ኤርድ አማኖን በንትያ እስፈተꬃኮ ጋክድ፥ ክርስቶሳ አያና ደኡዋ ኩመꬅ ጋክድ ድጫና መላሳ።
EPH 4:14 ህዛፐ ጉየ፥ አሳ ገነ ጭሞን ጊግዳ ባለꬅያ ዎርዶ ትምርተ ጫርኮንነ ሆበን ገደነ ሃ ኩሎ ካእያ ናይታ መላ ግዳናዉ በሰና።
EPH 4:15 ሽን ኑኒ ቱማ ሲቆን ኦድሸ፥ አሳተꬃስ ሁጰ ግድያ ክርስቶሳራ ደእያ እስፈተꬃ ጉጅ ጉጅ ድቾስ።
EPH 4:16 ኩመꬃ አሳተꬃይ ክርስቶሳ ቦላ ዘምፔስ ቃስ ዱማ ዱማ አሳተꬃ ብልተት እሶይ እሱዋራ ኦይከትድ ኡትስ። እስ እስ አሳተꬃ ክፍለይ ባ ኦሱዋ ኦꬅያ ዎደ ኩመꬃ አሳተꬃይ ሲቆን ድጬስ።
EPH 4:17 ሄሳ ግሾ፥ ታኒ ሀይሳ ህንተዉ ጎዳ ሱንꬃን ኦዳይስነ ማርካታይስ። ጎእ ባይና ቆፋ ቆፕያ አይሁደ ግዶና አሳታዳ ደኦፕተ።
EPH 4:18 ኤንታ ቆፋይ ꬉምስ፤ ባንታ ዎዛና ሙምስዶሶና። ኤንቲ ኤራተꬃ ꬋዮንነ እፃስ ግድ ፆሳይ እምያ ደኡዋፐ ሃክዶሶና።
EPH 4:19 ኤንቲ ዬላ ግያባ ኤሮኮና፤ ኤንቲ ላይማተꬃስ ባንታና አꬅድ እምዶሶና፤ ቃስ ቱናባ ኡባ ጉየ ጎና ኦꬆሶና።
EPH 4:20 ሽን ህንተ ክርስቶሳ ኤርዳይ ሄሳ መላ ኦገን ግደና።
EPH 4:21 እያባ ቱማ ስእደታ። ቃስ የሱሳን ደእያ ቱማ መላ እያፐ ታማርደታ።
EPH 4:22 ህንተ ካሰ ደእዳ ደኦ ኦግያ አግተ። ቃስ ባ ጭምያ አሞን ꬋይያ ህንተ ጬጋ አሳተꬃ ድግተ።
EPH 4:23 ህንተ ዎዛና ቆፋን ኦራፅተ።
EPH 4:24 ቱማ ፅሎተꬃንነ ጌሻተꬃን ፆሳ ሌምሶን መትዳ ኦራꬃ አሳተꬃ ማእተ።
EPH 4:25 ህዛ፥ ዎርዶ ኦደቶፍተ። ኑኒ ኡባይ ክርስቶሳ አሳተꬃ ብልተታ ግድያ ግሾ አሳ ኡባራ ቱማ ኦደትተ።
EPH 4:26 ሀንቀትተ፥ ሽን ህንተ ሀንቁዋን ናጋራ ኦꬆፍተ። ህንተ ሀንቀት ደእሽን አው ዉሎፎ።
EPH 4:27 ፃላሄስ በሰ እሞፍተ።
EPH 4:28 ካይሶትያ ኡራይ ህዛፐ ጉየ ካይሶቶፖ። ሽን ማንቆታ ማድያባይ እያዉ ዳና መላ ባ ኩሸን ሎኦባ ኦꬆ።
EPH 4:29 ህንተ ዶናፐ ኢታ ቃል ከዮፖ። ሽን ስኤይሳታ ጎአና መላነ ሀራታ ምንꬅያ ኮሽያ ሎኦ ቃል ህንተ ዶናፐ ከዮ።
EPH 4:30 ፆሳይ ህንተና ዎዝያ ጋላሳስ ህንተና አታምድ ዎꬅዳ ፆሳ አያና አዛንꬆፍተ።
EPH 4:31 ጫመተꬅ፥ ይሎ፥ ሀንቆ፥ ዋሶ፥ ጫሸነ ኢታ ኡባ ህንተፈ ሃስተ።
EPH 4:32 አꬅድ እሶይ እሱዋስ ኬሀነ ቃተይሳታ ግድተ። ፆሳይ ክርስቶሳ ባጋራ ህንተዉ አቶ ግዳይሳዳ ህንተካ ዎልስ አቶ ጊተ።
EPH 5:1 ህዛ፥ ፆሳይ ዶስያ ናይታዳ እያ ዳንተ።
EPH 5:2 ክርስቶስ ኑና ዶስድ ባና ኑ ግሾ ፆሳስ ሳውያ እሞነ ያርሾ ኦꬅድ እምዳይሳዳ ህንተካ ሲቆን ደእተ።
EPH 5:3 ሽን ላይማተꬅ፥ ቱናተꬅነ ኡዘተꬅ አማንያ አሳስ በሶና ግሾ ህንተ ግዶን ኡባራካ ስኤቶፎ።
EPH 5:4 ፆሳ ጋላትተፐ አትሽን፥ ዬላያባይነ ኤያ ኦድ ዎይኮ ቅይ ህንተዉ በሶና ግሾ ህንተ ግዶን ኡባካ ደኦፖ።
EPH 5:5 ሀይሳ ኤርተ፤ ኦንካ ላይማተይ ዎይኮ ቱናባ ኦይ ዎይኮ ኡዘተይ ክርስቶሳ ካዎተꬃነ ፆሳ ካዎተꬃ ላታናዉ ዳንዳኤና። ኡዘተꬅ ኤቃ ጎይኖ መላ።
EPH 5:6 ሀይሳታ ጋሶን ፆሳ ሀንቆይ ኪተቶና አሳ ቦላ ያና ግሾ ኦንካ ህንተና ፓꬆና ኦዳን ጭሞፎ።
EPH 5:7 ሄሳ መላ አሳራ እስፈተꬅ ኦꬆፍተ።
EPH 5:8 ካሰ ህንተ ꬉማን ደእደታ፥ ሽን ሀእ ጎዳ ባጋራ ፖኦን ደኤታ። ህዛ፥ ፖኦ አሳዳ ፖኦን ስመረትተ።
EPH 5:9 ፖኦይ ሎኦተꬅ፥ ፅሎተꬅነ ቱማተꬅ አይፌስ።
EPH 5:10 ጎዳ ኡፋይስያባ ኦꬃናዉ ኮይተ።
EPH 5:11 ጎእ ባይና ꬉማ ኦሶ ቆንጭስተፐ አትሽን፥ እያራ እስፎፕተ።
EPH 5:12 ኤንቲ ጌማን ኦꬅያ ኦሱዋ ሀር አቶሽን ኦዳናዉካ ዬላዬስ።
EPH 5:13 ሽን ኡባባይ ፖኦን ከይያ ዎደ ቆንጨን በንቴስ።
EPH 5:14 ፖኦይ ኡባባ ቆንጨን በሴስ። ሄሳ ግሾ፥ “ነኖ ꬍስከይሶ ባርካ፤ ሀይቆፐ ደንዳ፤ ክርስቶስ ነ ቦላ ፖአና” ያገትስ።
EPH 5:15 ህዛ፥ ህንተ ዋንድ ደእያኮ አኬክ በእተ። ጭንጫታ ግድተፐ አትሽን፥ ኤያታ ግዶፕተ።
EPH 5:16 ላይꬃይ ኢታ ግድያ ግሾ እንጀትያ ዎደ ኡባ ጎኤትተ።
EPH 5:17 ሄሳ ግሾ፥ ጎዳ ሸነይ አይበኮ አኬክተፐ አትሽን፥ ኤዮፕተ።
EPH 5:18 ጌሻ አያናን ጋላስ ጋላስ ኩምተፐ አትሽን፥ ꬋዮኮ ህንተና ካለꬅያ ግሾ ዎይነ ኡሻን ማꬆቶፍተ።
EPH 5:19 ማዝሙረን፥ ሳባንነ አያና የꬃን፥ እሶይ እሱዋራ ኦደትተ። ቃስ ህንተ ዎዛናን የፅሸነ ሳቢሸ ጎዳ ጋላትተ።
EPH 5:20 ኑ ጎዳ የሱስ ክርስቶሳ ሱንꬃን ኡባ ዎደ ፆሳ አዋ ኡባባስ ጋላትተ።
EPH 5:21 ክርስቶሳ ቦንቹዋስ ግድ እሶይ እሱዋስ ሃረትተ።
EPH 5:22 ማቸቶ፥ ጎዳስ ሃረተይሳዳ ህንተ አዝናታስ ሃረትተ።
EPH 5:23 ክርስቶስ ዎሳ ኬꬃስ ሁጰ ግደይሳዳ አዝንካ ባ ማቼስ ሁጰ። ቃስ ክርስቶስ ባ አሳተꬅ ግድዳ ዎሳ ኬꬃ አሸይሳ።
EPH 5:24 ሽን ዎሳ ኬꬃይ ክርስቶሳስ ሃረተይሳዳ ማቸት ባንታ አዝናታስ ኡባባን ሃረታናዉ በሴስ።
EPH 5:25 አዝናቶ፥ ክርስቶስ ዎሳ ኬꬃ ዶስድ ባና እዉ እምዳይሳዳ ህንተካ ህንተ ማቸታ ዶስተ።
EPH 5:26 እ ዎሳ ኬꬃ ባ ቃላ ባጋራ ሃꬃን ሜጭድ ጌሽስ።
EPH 5:27 ክርስቶስ ዎሳ ኬꬃ ቅት ዎይኮ ሶምኦ ቱስ ዎይኮ ሄሳ መላባይ ባይና እ ኩመꬃ ቦንቹዋራ ጌሽነ ቦረቶናሮ ኦꬅድ ባኮ ሺሻናዉ ኮይድ ሄሳ ኦꬅስ።
EPH 5:28 ሄሳዳካ፥ አዝናት ባንታና ዶሰይሳዳ ባንታ ማቸታ ዶሳናዉ በሴስ። ባ ማችዉ ዶሰይስ ባና ዶሴስ።
EPH 5:29 ባና እፅያ አስ ኦንካ ባዋ፥ ሽን ክርስቶስ ዎሳ ኬꬃስ ኦይሳዳ ባ አሳተꬃ ሙዜስነ ናጌስ።
EPH 5:30 ኑኒ ክርስቶሳ አሳተꬃ ብልተታ።
EPH 5:31 ፆሳ ቃላይ፥ “ሄሳ ግሾ፥ አስ ባ አዋነ ባ አይዉ አግድ፥ ባ ማቸራ እስፈ ዳና፤ ኤንቲ ናምአይካ እስ አሾ ግዳና” ያጌስ።
EPH 5:32 ሀይስ ግታ ፁራ፥ ሽን ታኒ ሄሳ ክርስቶሳባነ ዎሳ ኬꬃባ ሌምሶ ኦꬃዳ ኦዳይስ።
EPH 5:33 ግዶሽን፥ ህንተ እሶይ እሶይ ህንተ ማቸታ ህንተ፥ ህንተና ዶሰይሳዳ ዶስተ። እስ እስ ማቻ ባ አዝና ቦንቻናዉ በሴስ።
EPH 6:1 ናይቶ፥ ህንተ ጎዳባ ግድያ ግሾ ህንተና የልዳይሳታስ ኪተትተ። ሄስ ህንተዉ በሲያባ።
EPH 6:2 “ነ አይዉነ ነ አዋ ቦንቻ።” ሄስ ኡፋይሳ ቃል ደእያ ኮይሮ ኪታ።
EPH 6:3 “ነ ሄሳ ፖልያባ ግድኮ ኡባይ ነዉ እንጀታና፤ ነ ላይꬃይ ሳአ ቦላ አዱቃና።”
EPH 6:4 አዋቶ፥ ህንተ ናይታ ጎዳ ቃላ ታማርሶንነ ኤንታ ካለሶን ድችተፐ አትሽን፥ ኤንታና ጫምሶፕተ።
EPH 6:5 አይለቶ፥ ክርስቶሳስ ኪተተይሳዳ ህንተ ሳአ ጎዳታስ ያሻን፥ ቦንቾንነ ሱረ ዎዛናን ኪተትተ።
EPH 6:6 ኤንታ ስንꬃን ሳባ ደማናዉ ኤንቲ በእያ ዎደ ፃላላ ኦꬆፍተ። ሽን ክርስቶሳ አይለታዳ ፆሳ ሸንያ ዎዛናፐ ፖልተ።
EPH 6:7 አሳስ ግዶናሽን፥ ጎዳስ ግድ ህንተ ኩመꬃ ዎዛናፐ ኦꬅተ።
EPH 6:8 አይለ ግድን ዎይኮ ጎዳ ግድን እሶይ እሶይ ባ ኦꬅዳ ሎኦ ኦሱዋስ ጎዳፐ ዎይቶ ኤካናይሳ ኤሬታ።
EPH 6:9 ጎዳቶ፥ አሳ ሶምኦ በእድ ማዶና ጎዳይ፥ ሳሉዋን ደኤይሳ ኤሬታ። ሄሳ ግሾ፥ ህንተ አይለታ ማንደይሳ አግድ ኤንቲ ህንተዉ ቦንቾን ኪተተይሳ መላ ህንተ ኤንታዉ ሎኦባ ኦꬅተ።
EPH 6:10 ዉርሰꬃን፥ ጎዳንነ እያ ግታ ዎልቃን ምንተ።
EPH 6:11 ፃላሄ ጭሙዋ ኤቀታናዉ ዳንዳአና መላ ፆሳይ ህንተዉ እምዳ ኦላ ሚሽያ ኡባ ማእተ።
EPH 6:12 ኑ ኦላይ አሳራ ግዶናሽን፥ ሳሎን ደእያ ቱና አያና ኦላንቾታራ፥ ማታ አዋታራ፥ ሃረይሳታራነ ሀ ꬉማ አላምያ ዎልቃታራ።
EPH 6:13 ሄሳ ግሾ፥ ኢታ ጋላሳ ተቃናዉነ ኡባ ፖልድ፥ ምንድ ኤቃናዉ ህንተ ዳንዳአና መላ ፆሳ ኦላ ሚሸታ ኡባ ማእተ።
EPH 6:14 ቱማ ፄሳን ዳንጮዳ ዳንጭድ፥ ፅሎተꬃ ፁሩረዳ ትራን ዎꬅድ፥ ሳሮተꬃ ዎንገላ ህንተ ቶሁዋን ጫማዳ አꬅድ ምንድ ኤቅተ።
EPH 6:16 ሄ ኡባፈ አꬅድ፥ ፃላሄይ የድያ ላፅያ ታማ ዶንገ ኡባ ቶይሳናዉ ዳንዳእያ አማኑዋ ኡባ ዎደ ጎንዳለዳ ኦይክተ።
EPH 6:17 ፆሳ አቶተꬃ ብራታ ባርኔፃዳ ህንተ ሁጰን ዎꬅተ፤ ቃስ ጌሻ አያና ማሻ እካ፥ ፆሳ ቃላ ኦይክተ።
EPH 6:18 ዎሳ አጎፍተ፤ ሀራታስካ ጋናትተ፤ ኡባ ዎደ አያናን ዎስተ። ሄሳን፥ ጌሻታስ ሳለቶና ምንድ ኡባ ዎደ ዎስተ።
EPH 6:19 ታኒ ዎንገላ ፁራ ያሽ ባይና ቆንጭሳዳ ኦዳና መላ ፆሳይ ታዉ ቃላ እማና መላ ዎስተ።
EPH 6:20 ታኒ ሄሳ ኦꬃናዉ ኪተታስ ሀእካ ቃሾን ደኤይ ሄ ዎንገላ ግሾሳ። ያንያ ግሾ፥ ታኒ ያሽ ባይና በሰይሳዳ ኦዳና መላ ታዉ ዎስተ።
EPH 6:21 ታኒ ዋና ደእያኮነ አይ ኦꬅያኮ ህንተ ኤራና መላ ኑ ሲቆ እሻይ፥ ጎዳ ኦሱዋን አማነትዳ ኦሳንቾይ፥ ትክቆስ፥ ታባ ኡባ ህንተዉ ኦዳና።
EPH 6:22 ኑኒ ኡባይ ዋንድ ደእያኮ ህንተዉ ኦዳና መላነ ህንተና ምንꬃና መላ ታኒ እያ ህንተኮ ኪታስ።
EPH 6:23 ፆሳ አዋፐ፥ ጎዳ የሱስ ክርስቶሳፐ ሳሮተꬃይነ ሲቆይ አማኖራ እስፈ አማንያ ኡባስ ግዶ።
EPH 6:24 እርፆና ሲቆን ኑ ጎዳ የሱስ ክርስቶሳ ሲቅያ ኡባራ ፆሳ አꬎ ኬሀተꬃይ ግዶ።
PHI 1:1 ክርስቶስ የሱሳራ እስፍዳ ግሾ፥ ፆሳባ ግድዳ፥ ፍልጵስዩሳ ካታማን ደእያ ዎሳ ኬꬃ ጭማታስነ ዳቆነታ ኡባስ። የሱስ ክርስቶሳ አይለ ግድዳ፥ ጳዉሎሳፐነ ፅሞትዮሳፐ ኪተትዳ ኪታ።
PHI 1:2 ኑ አዋ ፆሳፈነ ጎዳ የሱስ ክርስቶሳፐ አꬎ ኬሀተꬃይነ ሳሮተꬃይ ህንተዉ ግዶ።
PHI 1:3 ታኒ ህንተና ቆፕያ ዎደ ኡባን፥ ታ ፆሳ ጋላታይስ።
PHI 1:4 ታኒ ህንተ ኡባስ ፆሳ ዎስያ ዎደ ኡፋይሳን ዎሳይስ።
PHI 1:5 ህንተ ኮይሮ ጋላሳፐ ሀእ ጋካናዉ፥ ዎንገላ ማርካተይሳን ታራ እስፈ ግድድ፥ ታና ማድዳ ግሾ፥ ፆሳ ጋላታይስ።
PHI 1:6 ህንተ ግዶን ሎኦ ኦሶ ዶምዳ ፆሳይ፥ ክርስቶስ የሱሲ ስምያ ጋላሳይ ጋካናዉ፥ ፖላናይሳ ኤራይስ።
PHI 1:7 ህንተ ኡባ ዎደ ታ ዎዛናን ደኤታ። ታኒ ኡባ ዎደካ ሄሳዳ ቆፓናዉ በሴስ። ሀእ ታኒ ቃሾን ደአሸነ ቃሸታናፐ ስን ዎንገላ ናጎንነ ዎንገላ ምንꬃ ኤሶን ፆሳይ ታዉ ቃድዳ ቃዳ ህንተካ ታራ ሻከትደታ።
PHI 1:8 ታኒ ህንተና ኡባ ክርስቶስ የሱሳ ሲቁዋን አይ መላ ላሞትያኮ ፆሳይ ታዉ ማርካ።
PHI 1:9 ህንተ ሲቆይ ቱማ ኤራተꬃራነ አኬካራ እስፈ ጉጅ ጉጅ ድጫና መላ ፆሳ ዎሳይስ።
PHI 1:10 ሄሳን ህንተ ሎኦባ ሻክድ፥ ዶረይሳታ፥ ክርስቶስ ስምያ ጋላሳን ጌሻታነ ቦረቶናይሳታ ግዳና።
PHI 1:11 ህንተ ደኦይ ፆሳ ቦንቹዋስነ ጋላታስ የሱስ ክርስቶሳ ባጋራ በንትያ ፅሎተꬃ አይፍያን ኩምድ አይፋና።
PHI 1:12 ታ እሻቶ፥ ታና ጋክዳ ኡባይ ዎንገላይ ዳልጋና መላ ቱማ ማድዳይሳ ህንተ ኤራና መላ ኮያይስ።
PHI 1:13 ታኒ ክርስቶሳ ግሾ ቃሸትዳይሳ፥ ካዎ ጋꬎ ናገይሳትነ ሀይሳን ደእያ ሀራት ኡባይ ኤሮሶና።
PHI 1:14 ታ ቃሹዋ ጋሶን ኑ እሻታፐ ዳሮት ጎዳን ኬህ አማነትዶሶና። ሄሳ ግሾ፥ ፆሳ ቃላ ያሽ ባይና ካሰፐ ምንድ ኦዳና መላ ምኖተꬅ ደምዶሶና።
PHI 1:15 ግዶሽን፥ እሶት እሶት ቃናተንነ ፓላማን ክርስቶሳባ ኦዶሶና፥ ሽን ሀራት ሱረ ዎዛናፐ ኦዶሶና።
PHI 1:16 ሱረ ዎዛናፐ ኦደይሳት፥ ፆሳይ ታዉ ዎንገላ ናጋና መላ ሀዳራ እምዳይሳ ኤርያ ግሾ፥ ሲቆን ኦዶሶና።
PHI 1:17 ሽን ታና ቃናተይሳት ታ ቃሹዋ ቦላ ሀራ መቶ ኤሀናባ ኤንታዉ ዳንን ባንታና ዶስድ ክርስቶሳባ ኦዶሶናፐ አትሽን፥ ቱማ ዎዛናፐ ኦዶኮና።
PHI 1:18 ሄስ አይኮካ መተና። ቱማ ኦገን ግድን ዎይኮ ዎርዶ ኦገን ግድን ሄ ኡባን ክርስቶስ ሳባከቴስ። ታና ሄስ ኡፋይሴስ። ቃስ ሀራባይ ታና ኡፋይስያባይ፥
PHI 1:19 ታኒ ህንተ ዎሳንነ የሱስ ክርስቶሳ አያና ማዱዋን አታናይሳ ኤርያ ግሾ ታና ኡፋይሴስ።
PHI 1:20 ታ ግታ አሞይነ ኡፋይሳን ናግያ ናጎይ ታ ዬላቶና አታናይሳ። ሽን ኡባ ዎደ ኦይሳዳ፥ ሀእካ ታኒ ፓፃ ደእን ዎይኮ ሀይቅን ያዮና ታ ኩመꬃ አሳተꬃን ክርስቶስ ቦንቸታና ጋዳ ምኖተꬃን ኦዳይስ።
PHI 1:21 ታ ደእኮካ ክርስቶሳ ፃላላስ ደአይስ፤ ቃስ ታ ሀይቅኮካ ታዉ አꬍዳ ዎ።
PHI 1:22 ሽን ታ ፓፃ ደእኮ አይፈይ ደእያ ኦሶ ኦꬃና። ሽን ፓፃ ደኤይሳፈነ ሀይቆፐ አዉሳ ዶራነኮ ታዉ ኤረተና።
PHI 1:23 ታኒ ሀ ናምአታፐ አዉሳ ዶራነኮ ኡንኤታስ። ሀ ደኡዋፐ ሻከታዳ ክርስቶሳራ እስፈ ዳናዉ አሞታይስ፤ ክርስቶሳራ እስፈ ደኤይስ ኡባፈ አꬍዳ ሎኦ።
PHI 1:24 ሽን ታኒ ህንተ ግሾ ፓፃ ደኤይስ ህንተዉ ዳሮ ኮሽያባ።
PHI 1:25 ሄሳ ታኒ ጌሻዳ ኤራይስ፤ ታኒ፥ ህንተ አማኖን ድጫናዳነ ኡፋይታናዳ ህንተራ ፓፃ ዳና።
PHI 1:26 ሄሳ ግሾ፥ ታኒ ህንተኮ ስማዳ ያ ዎደ፥ ክርስቶስ የሱሳራ ህንተ ደእያ ደኡዋን ታናን ደእያ ጬቀተꬃይ ህንተዉ ዳራና።
PHI 1:27 ኡባፈ አꬅድ፥ ህንተ ክርስቶሳ ዎንገላስ ቦንቾ ኤህያ ደኦ ደእተ። ታ ህንተና በእን ዎይኮ በኦና እፅን፥ ህንተ እስ ቆፋን ምን ኤቅድ፥ ሀራት ዎንገላን አማናና መላ እስ ዎዛናን ግድድ እስፈ ባፀተይሳ ታ ስአና።
PHI 1:28 ህንተ ሞርከታስ ያዮፍተ። ኤንቲ ህንተራ ኤቀትያባ ግድኮ ሄስ ህንተዉ አቶተꬃስ፥ ኤንታዉ ꬋዮስ ፆሳፈ ግድዳ ማላ።
PHI 1:29 ክርስቶሳስ ኦꬅያ ቃዳይ ህንተዉ እመትዳይ፥ ህንተ እያ አማናና መላ ፃላላ ግዶናሽን ህንተ እያ ግሾ መቶ ኤካና መላሳ።
PHI 1:30 ሄሳ ግሾ፥ ህንተ ታ ዋይያ ካሰ በእደታ፤ ሀእካ ታ ዋየተይሳ ስኤታ። ህንተካ ታ ዋይያ መላ ዋየተታ።
PHI 2:1 ክርስቶሳን ህንተ ደእያ ደኦይ ህንተና ምንꬄስ፤ ቃስ እያ ሲቆይካ ህንተና ምንꬄስ። ጌሻ አያናራ ህንተዉ እስፈተꬅ ደኤስ፤ ህንተ ሀራታስ ኬሄታነ ቃተታ።
PHI 2:2 ህዛ፥ ህንተ እስ ቆፋን፥ ሲቆን፥ እስ ዎዛናንነ አያናን እስኖ ግድድ ታና ፖሎ ኡፋይስተ።
PHI 2:3 ህንተና ዶሶን ዎይኮ ጬቀትያ ሀዳ አሞን እስባካ ኦꬆፍተ። ሽን ህንተ እሶይ እሱዋፈ ግታታይስ ያግድ ቆፖና ህንተና ካዉሽተ።
PHI 2:4 ህንተ እሶይ እሶይ፥ ሀራ አስ ማድያባ ኮይተፐ አትሽን፥ ህንተና ማድያባ ፃላላ ኮዮፕተ።
PHI 2:5 ክርስቶስ የሱሳን ደእያ ቆፋይ ህንተናን ዳናዉ በሴስ።
PHI 2:6 እያዉ ኡባ ዎደ ፆሳ ሀኖት ደኤስ። ግዶሽን፥ እያ ፆሳራ እስኖ ኦꬅያ ሀኖታ፥ ዎልቃን ኤካናዉ ኮይቤና።
PHI 2:7 ግዶሽን፥ እ ባዉ ደእያ ቦንቹዋ ኡባ አግድ፥ አይለ መታ ኤክስ፤ አሰ ዳንድ ቆንጭስ።
PHI 2:8 እ ባና ካዉሽስ፤ ሀይቃና ጋካናዉ፥ ሀር አቶሽን ማስቃልያ ቦላ ሀይቃናዉ ኪተትስ።
PHI 2:9 ሄሳ ግሾ፥ ፆሳይ እያ ዳሮ ꬎቁ ꬎቁ ኦꬅስ፤ ቃስ ሱንꬃ ኡባፈካ አꬍያ ꬎቃ ሱንꬃ እሚስ።
PHI 2:10 ሳሎንነ ሳአን፥ ሳአፐ ጋርሳን ደእያ ኡባይ፥ የሱሳ ሱንꬃ ቦንቹዋስ ጉልባታና።
PHI 2:11 አሳ ኡባይ ባንታ እንፃርሳን፥ የሱስ ክርስቶሳ ጎዳ ያግድ፥ ፆሳ አዋ ቦንቹዋስ ማርካታና።
PHI 2:12 ታ እሻቶ፥ ታኒ ህንተራ ደእያ ዎደ ኡባን ህንተ ኪተትዳይሳዳ፥ ሀእ ታኒ ህንተ ማታፐ ሃክንካ፥ ካሰይሳፈ አꬅድ፥ ኪተታናዉ በሴስ። ፆሳስ ያሻንነ ኮኮርሳን ህንተ አቶተꬃ ፖላናዉ ኦꬅተ።
PHI 2:13 ፆሳይ፥ ህንተ እያዉ ኤሮ ግድ ኪተታና መላ ኡባ ዎደ ህንተ ግዶን ኦꬄስ።
PHI 2:14 አይ ኦሶ ኦꬅሸካ ዙዙሞና ዎይኮ ፓላሞና ኦꬅተ።
PHI 2:15 ጌላነ ናጋራንቾ አሳ ግዶን ቦረቶናይሳታ፥ ጌሻታነ ፖኮይ ባይና ፆሳ ናይታዳ ግድተ። ህንተ ኤንታ ግዶን ሳሎ ፆልንቶዳ ፖእሸ፥
PHI 2:16 ደኦ እምያ ኪታ ኤንታዉ ኦድተ። ሄ ዎደ ታ ዳቡርሳይነ ታ ኦሶይ መላ አትቦና ግሾ፥ ክርስቶስ ያ ጋላስ ታ ህንተናን ጬቀታና።
PHI 2:17 ህንተ ፆሳስ እምያ አማኖ እሞታ ቦላ ታ ሱꬃይ ኡሻ ያርሾዳ ጉክኮካ ታና ኡፋይሴስ። ህንተካ ታራ ኡፋይታና።
PHI 2:18 ሄሳዳ ህንተካ ኡፋይትድ ታናካ ኡፋይሳናዉ በሴስ።
PHI 2:19 ታኒ ህንተ ደኡዋባ ስአዳ ኡፋይታናዉ ፅሞትዮሳ ህንተኮ ኤለሳዳ የዳና መላ ጎዳ የሱሲ ታና ማዳናይሳ አማነታይስ።
PHI 2:20 ህንተ ደኡዋስ ዎዛናፐ ቆፕያ እያ መላ አስ ሀር ኦንካ ባዋ።
PHI 2:21 ሀራት ባንታና ጎእያባ ኮዮሶናፐ አትሽን፥ የሱስ ክርስቶሲ ኮያባ ኦꬆኮና።
PHI 2:22 እ ታራ እስፈ ግድድ ናእ ባ አዋስ ኦይሳዳ ዎንገላ ኦሶ ኦꬅዳይሳነ አማነትያ አስ ግደይሳ ህንተ ኤሬታ።
PHI 2:23 ሄሳ ግሾ፥ ታባይ ሀንያባ በአዳ ኤለሳዳ እያ ህንተኮ የዳና ጋዳ ቆፓይስ።
PHI 2:24 ታኒ፥ ታ ሁጰን ማታ ዎደን ህንተኮ ባናይሳ ጎዳን አማነታይስ።
PHI 2:25 ሄሳዳካ፥ ታኒ፥ ታ እሻ ኤጳፍራድቱሳ፥ ታራ እስፈ ታ ባጋ ግድድ ኦꬅዳይሳ፥ ኦለትዳይሳነ፥ ታና ማዳናዉ ህንተዉ ኪተትዳይሳ፥ ህንተኮ ኪታናዉ ቆፓስ።
PHI 2:26 እ ህንተና ኡባ በአናዉ ዳሮ ላሞቴስ። ቃስ እ ሀርገትዳይሳ ህንተ ስእዳ ግሾ፥ ባ ዎዛናን ዳሮ ኡንኤትስ።
PHI 2:27 እ ቱማ ሀርገትድ፥ ሀይቅ ክችድ አትስ። ሽን ፆሳይ እያዉ ቃትስ። እያ ፃላላስ ግዶናሽን፥ አዛኖይ አዛኖ ቦላ ጉዠቶናዳ ታዉካ ቃትስ።
PHI 2:28 ህዛ፥ ህንተ እያ ዛር በእድ ኡፋይታናዳ ታዉካ ታ ዎዛና ሴላይ እርፃናዳ ታኒ እያ ኤለሳዳ ህንተኮ የዳናዉ አሞታይስ።
PHI 2:29 ጎዳስ ሀጋዝያ አሳዳ እያ ኩመꬃ ኡፋይሳን ሞክተ። ቃስ እያ መላ አሳ ኡባ ቦንችተ።
PHI 2:30 ህንተ ታ ማታን ግድድ ኦꬃናዉ ዳንዳኦና ማድያ ማድድ ክርስቶሳ ኦሱዋ ግሾ፥ ባ ሸምፑዋስ ምሸቶና እፅድ ሀይቅ ክችድ አትስ።
PHI 3:1 ዉርሰꬃን፥ ታ እሻቶ፥ ህንተ ጎዳባ ግድያ ግሾ፥ ኡፋይትተ። ታኒ ካሰ ፃፍዳይሳ ዛራዳ ፃፋናይስ ታና ዋይሰና፥ ሽን ህንተና ባላፐ ናጋና።
PHI 3:2 ኢታባ ኦꬅያ ካናታፐ፥ ቃስ ቃፃረታናዉ ኮሼስ ግያ ኢታ አሳታፐ ናገትተ።
PHI 3:3 ኑኒ ፆሳ ጌሻ አያናን ጎይንያ ግሾነ ኑ ደኡዋን ክርስቶስ የሱሳን ጬቀትያ ግሾ፥ ቱማ ቃፃሮ ቃፃረትዳይሳታ። ኑኒ ካረ አሳተꬃ ቦላ ኦሰትያባን ጬቀቶኮ።
PHI 3:4 ታ ካረ አሳተꬃን ጬቀታናዉ ኮሽኮ ታ ዳሮባን ጬቀታናዉ ዳንዳአይስ። አይ አስካ ባ ካረ አሳተꬃን ጬቀትያባይ ባዉ ደኤስ ግድ ቆፕኮ፥ ታኒ እያፐ ዳሮ አꬋዳ ጬቀትያባይ ደኤስ።
PHI 3:5 ታኒ የለትዳ ሳምንታራ ቃፃረታስ። ታኒ የለታን እስራኤለ፤ ታኒ ብንያመ ኮቸ፤ ታኒ ዋላክ ባይና አይሁደ አሰ። አይሁደ ህገ ናጎን ግድኮ ታኒ ፋርሳወ።
PHI 3:6 አይሁደ አማኑዋስ ምሸተꬃን ግድኮ ታኒ ዎሳ ኬꬃ የደꬃስ። እስ አስ ህገ ናግድ ፅልያባ ግድኮ፥ ታናን ቦረይ በንትቤና።
PHI 3:7 ሽን ካሰ ታና ማዴስ ጋዳ ቆፕዳባ ኡባ፥ ክርስቶሳ ግሾ ጋዳ ማዶናባ ኦꬃዳ ታይባስ።
PHI 3:8 ሄሳ ፃላላ ግዶናሽን፥ ታኒ ታ ጎዳ ክርስቶስ የሱሳ ኤረይስ ሀራባ ኡባፈ ዳሮ አꬍያ ግሾ፥ ሄ ኡባ ዎይ ባይናባዳ ታይባስ። ታኒ እያ ግሾ ኡባባ ꬋያስ። ክርስቶሳ ደማናዉ ኡባባ ዎራ ሆለትዳ ቡረዳ ታይባይስ። ታኒ የሱሳራ እስኖ ግዳስ።
PHI 3:9 ታኒ ህገስ ኪተታዳ ደምያ ታ ሁጰ ፅሎተꬅ ታዉ ባዋ። ክርስቶሳ አማንን በንትያ ፅሎተꬃይ፥ ፆሳ ማታፐ ያ ፅሎተꬃይ ሀእ ታዉ ደኤስ።
PHI 3:10 ታኒ ክርስቶሳነ እያ ደንዶ ዎልቃ ኤራናዉ ኮያይስ። ታኒ እያ መቱዋ እያራ ሻከታናዉነ እያ ሀይቁዋን እያ ዳናናዉ አሞታይስ።
PHI 3:11 ሄሳዳካ፥ ሀይቆፐ ደንዳዳ መርናዉ ደኦን ዳናይሳ ኡፋይስ ኦꬃይስ።
PHI 3:12 ታኒ ሀእ ጋፃ ጋካስ ዎይኮ ታናን ባል ባዋ ጊከ። ሽን ክርስቶስ የሱሲ ታና ኦይክዳ ግሾ ታኒ ታ ስንꬃን ደእያ ዎይቱዋ ኦይካናዉ ዎፃይስነ ቡተታይስ።
PHI 3:13 ታ እሻቶ፥ ታኒ ሄሳ ደማስ ጋዳ ቆፕከ፥ ሽን ታኒ እስባ ኦꬃይስ። ታፐ ጉየራ ደኤይሳ ዶጋዳ ስንꬃን ደኤይሳ ኦይካናዉ ዛቱራይስ።
PHI 3:14 ሄሳ ግሾ፥ ታኒ ጋፃ ጋካናዉ ዎፃይስ። ፆሳይ ክርስቶስ የሱሳ ባጋራ ሳሎ ደኡዋስ ፄግዳ ዎይቱዋ ኤካናዉ ዳቡራይስ።
PHI 3:15 ህዛ፥ ኑኒ አያናን ጋሽትዳ ኡባይ ሄሳ ቆፓናዉ በሴስ። ህንተፈ ባጋታስ ዱማትያ ቆፍ ደእኮ፥ ሄሳካ ፆሳይ ህንተዉ ቆንጭሳና።
PHI 3:16 ግድኮካ፥ ኑኒ ሀኖ ጋካናዉ ደእዳ ደኡዋን፥ አነ ስን ቦስ።
PHI 3:17 ታ እሻቶ፥ ታና ዳንተ፤ ሄሳዳካ፥ ኑ ሌምሱዋ ካልያ አሳታ አኬክድ በእተ።
PHI 3:18 ታኒ ሄሳ ህንተዉ ካሰ ዳሮ ቶሆ ኦዳስ፥ ሽን ሀእካ ዛራዳ አፉꬃን ኦዳይስ። ክርስቶሳ ማስቃልያስ ባንታና ሞርከ ኦꬅዳ ዳሮ አሳት ደኦሶና።
PHI 3:19 ኤንታ ዉርሰꬃይ ꬋዮ፤ ኤንታ ኡሎይ ኤንታዉ ፆሰ። ዬላታናዉ በሲያባን ኤንቲ ጬቀቶሶና፤ ቃስ ሀ ሳአባ ፃላላ ቆፖሶና።
PHI 3:20 ኑ ቢታይ ሳሉዋና። ሳሎፐ ይድ ኑና አሽያ ጎዳ የሱስ ክርስቶሳ ናጎስ።
PHI 3:21 ክርስቶስ ኡባባ ባ ማታፐ ጋርሳን ኦꬃናዉ ዳንዳእያ ባ ዎልቃን ኑ ዳቡራንቾ አሳተꬃ ላምድ ባ ቦንቾ አሳተꬃ ዳንሳና።
PHI 4:1 ታ እሻቶ፥ ታ ዶሰይሳቶ፥ ታ ላሞተይሳቶ፥ ታና ኡፋይሰይሳቶ፥ ታና ግታየይሳቶ፥ ህዛ፥ ጎዳን ምንድ ኤቅተ።
PHI 4:2 ኤዎዳነ ስንፅካ፥ ህንተ ናምአይ፥ እስ ቆፋን፥ ምችዳ ጎዳን ዳናዳ ታኒ ህንተና ዞራይስ።
PHI 4:3 ታራ ኦꬅያ አማንይሶ፥ ኔኒ ሀ ማጫሳታ ማዳና መላ ታ ነና ዎሳይስ። ሀ ማጫሳት ታራ፥ ቀለምንፆሳራነ ኤንታ ሱንꬃይ ፆሳ ደኦ ማፃፋን ፃፈትዳ ሀራታራ እስፈ ዎንገላ ኡባ በሳ ጋꬃናዉ ዳቡርዶሶና።
PHI 4:4 ጎዳራ ህንተ ደእያ ደኡዋን ኡባ ዎደ ኡፋይትተ። ታኒ ሄሳ ጉጃዳካ ኦዳይስ፤ ኡፋይትተ።
PHI 4:5 አስ ኡባይ ህንተ አሽከተꬃ ኤሮ፤ ጎዳይ ማታን ያና።
PHI 4:6 ህንተ ፆሳ ዎስያ ዎደ ኡባን እያ ጋላትሸ፥ ህንተና ኮሽያባ ኡባስ ዎስተፐ አትሽን፥ አይብባስካ ህርጎፍተ።
PHI 4:7 አሳ ኤራተꬃ ኡባፈ አꬍያ ፆሳ ሳሮተꬃይ፥ ህንተ ዎዛናነ ህንተ ቆፋ ጎዳ የሱስ ክርስቶሳ ባጋራ ናጋና።
PHI 4:8 ዉርሰꬃን፥ ታ እሻቶ፥ ህንተ ዎዛናን ሎኦባነ ጋላትስያባ ቆፕተ። ቱማ ግድያባ ኡባ፥ ቦንቾባ ኡባ፥ ቆሆ ግዶናባ ኡባ፥ ጌሻባ ኡባ፥ ሲቆባ ኡባነ ኡፋይስያባ ኡባ ቆፕተ።
PHI 4:9 ህንተ ታፐ ታማርዳባ፥ ኤክዳባ፥ ስእዳባነ በእዳባ ኡባ ኦꬅተ። ሳሮተꬅ እምያ ፆሳይ ህንተራ እስፈ ግዳና።
PHI 4:10 ዳሮ ዎደፐ ጉየ፥ ህንተ ታባ ዛሪድ ቆፓናዉ ዶምዳ ግሾ ታኒ ጎዳን ዳሮ ኡፋይታይስ። ሄሳ ጉሳይ፥ ታዉ ቆፓናዉ ህንተዉ እንጀቶና እፅዳይሳፈ አትሽን፥ ታዉ ቆፋ አግበከታ።
PHI 4:11 ታኒ ሄሳ ታና መትዳ ግሾ ጊከ፤ ታዉ ደእያባይ ግዳና ጉሱ ታማራስ።
PHI 4:12 ታኒ መቶተትድ ደእያ ዱስ ኤራይስ፤ ቃስ ዱረትድ ደእያ ዱስካ ኤራይስ። አዉን ግድን ቃስ አይ ዎደካ ታኒ ካሎነ ኮሻ፥ ፓጨነ ፓላሀ ታማራስ።
PHI 4:13 ክርስቶስ ታዉ እምያ ዎልቃን ኡባባ ኦꬃናዉ ዳንዳአይስ።
PHI 4:14 ግድኮካ፥ ህንተ ታ መቱዋ ታራ ኤክዳይሳን ሎኦ ኦꬅደታ።
PHI 4:15 ፍልጵስዩሳ አሳቶ፥ ዎንገላ ኮይሮ ኦዳናዉ ታኒ ማቀዶነፐ ከይያ ዎደ እምያባንካ ኤክያባንካ ህንተ ዎሳ ኬꬃፈ አትሽን፥ ሀር ታና ማድቦናይሳ ህንተ ኤሬታ።
PHI 4:16 ተሰሎንቀን መቶይ ጋክዳ ዎደካ ታና ዛር ዛሪድ ማድደታ።
PHI 4:17 ታኒ፥ ህንተፈ እሞታ ኤካናዉ ኮያዳ ግዶናሽን፥ እሞፐ ያ አንጁዋ ህንተ ኤካና መላሳ።
PHI 4:18 ታኒ፥ ህንተ እምዳ ኡባነ ግድድ ፓላሄይሳ ኤካስ። ህንተ የድዳ ኡባ ኤጳፍራድቱሳፐ ኤካስ፤ ኮሽያባ ኡባይ ታዉ ደኤስ። ህንተ ታዉ የድዳ እሞይ ፆሳስ ሳዎ ቶንኩ ግያ፥ እ ዶስያ፥ እ ኡፋይትያ ያርሾ መላ።
PHI 4:19 ታ ፆሳይ ባ ቦንቾ ዱረተꬃፈ፥ ክርስቶስ የሱሳ ባጋራ ህንተዉ ኮሽያባ ኡባ እማና።
PHI 4:20 ኑ አዋ ፆሳስ መርናፐ መርና ጋካናዉ ቦንቾይ ግዶ። አምንእ።
PHI 4:21 ክርስቶስ የሱሳ ባጋራ ፆሳባ ግድዳ ኡባ ሳሮ ጊተ። ታራ ደእያ እሻት ህንተና ሳሮ ጎሶና።
PHI 4:22 ፆሳባ ግድዳ አሳ ኡባይ፥ ኡባፈ አꬅድ ካዋ ቄሳረ ኬꬃን ደኤይሳት ህንተና ሳሮ ጎሶና።
PHI 4:23 ጎዳ የሱስ ክርስቶሳ አꬎ ኬሀተꬃይ ህንተራ ግዶ።
COL 1:1 ፆሳ ሸነን ክርስቶስ የሱሳ ሀዋረ ግድዳ ጳዉሎስነ ኑ እሻ ፅሞትዮስ፥
COL 1:2 ቆላስያሳ ካታማን ደእያ ክርስቶሳን ጌሻታስነ አማነትዳ አሳስ ፃፍዳ ኪታ። ፆሳ ኑ አዋፐ አꬎ ኬሀተꬃይነ ሳሮተꬃይ ህንተዉ ግዶ።
COL 1:3 ኑኒ ህንተዉ ዎስያ ዎደ ፆሳ ኑ ጎዳ፥ የሱስ ክርስቶሳ አዋ ኡባ ዎደ ጋላቶስ።
COL 1:4 ኑኒ ክርስቶስ የሱሳን ደእያ ህንተ አማኑዋነ ጌሻታ ኡባስ ደእያ ህንተ ሲቁዋ ስእዳ።
COL 1:5 ሄሳ ህንተ ኦꬅዳይ ህንተ ኡፋይሳይ ሳሎን ህንተዉ ናገትዳ ግሾሳ። ህንተ ቱማ ኪታ ግድዳ ዎንገላ ኮይሮ አማንዳ ዎደ ሄ ኡፋይሳ ስእደታ።
COL 1:6 ህንተ ሄ ዎንገላ ስእዳ ዎደነ ፆሳ አꬎ ኬሀተꬃ ቱማ ሻክ ኤርዳ ዎደፐ ዶምድ ህንተ ግዶን ሀንዳይሳዳ ቢታ ኡባን ድጭሸነ አይፍሸ ደኤስ።
COL 1:7 ህንተ ሄሳ ኑራ እስፈ ክርስቶሳስ ኦꬅያ አማነትዳ፥ ዶሰትዳ ኤጳፍራፐ ታማርደታ።
COL 1:8 እ ሄሳ ቦላ ጉጅድ አያናይ ህንተዉ እምዳ ሲቁዋባ ኑስ ኦድስ።
COL 1:9 ሄሳ ግሾ፥ ኑኒ ህንተባ ስእዳ ጋላሳፐ ዶምድ፥ ፆሳይ ባ ሸንያ ህንተና በሳና መላነ፥ ጌሻ አያናይ እምያ ኤራተꬃንነ ጭንጫተꬃ ኡባን ህንተና ኩንꬃና መላ ኡባ ዎደ ህንተዉ ፆሳ ዎሶስ።
COL 1:10 ሄሳዳካ፥ ህንተ፥ ጎዳይ ኮየይሳዳ ዳና መላ፥ ኡባ ዎደ እያ ኡፋይሳና መላ፥ ሎኦ ኦሶ ኡባን ህንተ አይፈ አይፋና መላነ ፆሳ አꬅድ ኤርሸ ድጫና መላ ፆሳ ዎሶስ።
COL 1:11 ፆሳ ቦንቾ ዎልቃይ ህንተ ኡባባ ገንጫናዳነ ዳንዳአናዳ ባ ምኖተꬃ እምድ ህንተና ኡፋይሶ።
COL 1:12 ቃስ ጌሻታ ፖኦ ካዎተꬃ ላታና መላ ህንተና ኦꬅዳ አዋ ጋላትተ።
COL 1:13 እ ኑና ꬉማ ዎልቃፈ አሽድ ባ ዶስያ ናኣ ካዎተꬃኮ ኤህስ።
COL 1:14 እያን ዎዘትድ እያ ሱꬃን ናጋራ አቶተꬅ ደምዳ።
COL 1:15 ክርስቶስ በንቶና ፆሳስ ቱማ ሌምሶ። እ መተꬃ ኡባፈ ባይራ።
COL 1:16 ኡባባይ እያ ባጋራ መትስ። በንትያባትነ በንቶናባት፥ ዎልቃትነ ጎዳት፥ ሃረይሳትነ ማታ አዋት፥ ሳሎንነ ሳአን ደእያ ኡባይ እያዉነ እያ ባጋራ መትስ።
COL 1:17 እ ኡባባፐ ካሰ ደኤስ። ኡባባይ እያን ባ በሳን በሳን ኦይከትድ ደኤስ።
COL 1:18 እ ባ አሳተꬅ ግድዳ ዎሳ ኬꬃስ ሁጰ። እ ኡባፈ ቦላ ግዳናዉ ሀይቆፐ ደንዶን ስንነ ባይራ።
COL 1:19 ፆሳይ ባ ኩመꬃ ፆሳተꬃራ እያን ዳናዉ ኮይስ።
COL 1:20 ቃስ ማስቃልያ ቦላ ጉስዳ ባ ናኣ ሱꬃን ሳሮተꬅ መꬍድ ሳሎንነ ሳአን ደእያ ኡባ እያ ባጋራ ባራ ስገꬅስ።
COL 1:21 ሀይሳፈ ካሰ ህንተ ቆፋ ኢታተꬃይ ህንተና ፆሳፈ ሻክስነ እያራ ሞርከ ኦꬅስ፤ ህንተ ኦሶይካ ኢታ።
COL 1:22 ሽን ሀእ ክርስቶስ አሾን ሀይቅዳ ሀይቁዋ ባጋራ ፆሳይ ህንተና ባራ ስገꬅድ፥ ጌሻታ፥ ቦረይ ባይናይሳታነ ፅሎታ ኦꬅስ።
COL 1:23 ህንተ፥ ህንተ አማኑዋን ቃፆና ምንድነ ፃጵድ ዳናዉ በሴስ። ህንተ ዎንገላ ቃላ ስእዳ ዎደ ኤክዳ ኡፋይሳ ምንꬅ ኦይክተ። ሄ ዎንገላይ ህንተ ስእዳይሳነ ቢታ ኡባን ሳባከትዳይሳ። ታ፥ ጳዉሎስካ ሀ ዎንገላስ ኦሳንቾ ግዳስ።
COL 1:24 ታኒ ህንተ ግሾ ሀእ ኤክያ ዋያን ኡፋይታይስ። ክርስቶስ እያ አሳተꬅ ግድዳ ዎሳ ኬꬃስ ኤክዳ ዋይያ ታኒ ታ አሹዋን ፖላይስ።
COL 1:25 ፆሳ ቃላ ህንተዉ ፖላዳ ኦዳና መላ ታዉ እመትዳ ማታን ዎሳ ኬꬃስ ኦሳንቾ ግዳስ።
COL 1:26 ሀ ቃላይ ካሰ አꬍዳ ዎድያን የለተꬃ ኡባፈ ጌምድ ደእስ። ሽን ሀእ ፆሳይ ሀ ፁራ አማንያ ኡባስ ቆንጭስስ።
COL 1:27 ፆሳይ አይሁደ ግዶና አሳ ግዶን ሀ ፁራ ቦንቾ ዱረተꬃ ቆንጭስስ። እካ ቦንቾ ኡፋይስ ግድዳ ህንተ ግዶን ደእያ ክርስቶሳ።
COL 1:28 ሄሳ ግሾ፥ እስ እስ አስ ክርስቶሳን ኩመꬃ አስ ኦꬅድ ሺሻናዉ ጭንጫተꬃ ኡባን አሳ ታማርሶንነ ዞረን ክርስቶሳባ ሳባኮስ።
COL 1:29 ፆሳይ ባ ግታ ዎልቃን ታናን ኦꬅያ ግሾ፥ ሀእ ጋካናዉ እያ ዎልቃን ባፀታይስነ ዳቡራይስ።
COL 2:1 ታ ህንተዉነ ሎዶቀ ካታማን ደእያ አሳስ፥ ሄሳዳካ ታና አይፈን በእቦና አሳ ኡባስ አይ መላ ባፀትያኮ ህንተ ኤራና መላ ኮያይስ።
COL 2:2 ታ ባፀትያ ጋሶይካ ኤንቲ ባንታ ዎዛናን ምንድ፥ ሲቆን ቃሸትድ፥ ፖሎ ግድዳ ኩመꬃ አኬካ ዱረተꬃ ደምድ ፆሳ ፁራ ክርስቶሳ ኤራና መላሳ።
COL 2:3 እያን ፆሳይ ምንጅዳ ኤራይነ ጭንጫተꬃ ኡባይ ደኤስ።
COL 2:4 ታ ሄሳ ኦንካ ህንተና ጭሞ ቃላን ባለꬆና መላ ኮያዳ ጋይስ።
COL 2:5 ታ ህንተፈ ሃካዳ ደእኮካ አያናን ህንተራ ደአይስ። ህንተ ዱሳ ማራነ ክርስቶሳ ህንተ ምንድ አማነይሳ በአዳ ኡፋይታይስ።
COL 2:6 ህንተ ጎዳ ክርስቶስ የሱሳ ኤክዳይሳዳ እያን ደእተ።
COL 2:7 እያን ፃጶ የድተ፤ እያን ኬፀትተ። ህንተ ታማርዳይሳዳ አማኖን ምንተ፤ ፆሳስ ኩምድ ፓላህዳ ጋላታ እምተ።
COL 2:8 ክርስቶሳፐ ግዶናሽን፥ አሳ ዎጋንነ ሀ አላምያ ጮ ዎጋን ካትዳ ትምርተንነ አሳፐ ይዳ ኤራተꬃን ኦንካ ህንተና ጭም ባለꬅድ ድኦና መላ ናገትተ።
COL 2:9 ፆሳ ፆሳተꬃይ ክርስቶሳ አሳተꬃን ኩመꬅ ደኤስ።
COL 2:10 ህንተካ ማታስነ ዎልቃ ኡባስ ሁጰ ግድያ ክርስቶሳን ኩምደታ።
COL 2:11 ህንተ ክርስቶሳ አማንድ ቃፃረትደታ። ሄስካ አሳ ኩሸን ግዶናሽን፥ ህንተና ኢታ ሀኖተꬃፈ ድግያ ክርስቶሳን ኦሰትዳ ቃፃረተꬅ።
COL 2:12 ህንተ ፃማቀትዳ ዎደ ክርስቶሳራ እስፈ ሞገትድ፥ ክርስቶሳ ሀይቆፐ ደንꬅዳ ፆሳ ዎልቃ አማንድ፥ ክርስቶሳራ እስፈ ደንድደታ።
COL 2:13 ህንተ፥ ህንተ ናጋራ ግሾነ ህንተ ጬጋ አሳተꬃ ቃፃረቶና ግሾ ሀይቅድ ደእሽን፥ ፆሳይ ህንተ ናጋራ አቶ ግስ። ክርስቶሳራ ህንተዉ ደኦ እሚስ።
COL 2:14 እ ኑና ሞትያነ ኑራ ኤቀትያ፥ ኑ ቦላ ፃፈትዳ አጩዋ ዳክድ ማስቃልያ ቦላ ꬍሽድ ኦገፐ ድግስ።
COL 2:15 ክርስቶስ ዎልቃታነ ማታታ ማስቃልያን ፆንድ፥ ኤንታ ኦላ ዳንጩዋ ብልስድ፥ ድኤትዳ አሳዳ ኤንታ ቆንጨን ዩሽ በስስ።
COL 2:16 ሄሳ ግሾ፥ ምያባን ዎይኮ ኡያባን፥ ባኣለ ጋላስ ዎይኮ አጌን ፄርያ ቃማ ቦንቾን ኦንካ ህንተ ቦላ ፕርዶፎ።
COL 2:17 ሀይሳቲ ስንꬃፈ ያናዉ ደእያባታስ ኤሾ፥ ሽን ቱማይ ክርስቶሳ።
COL 2:18 ቆፐ ቆሞ አሽከተꬃንነ ኪታንቾ ጎይኖን ጬቀትያ ኦንካ ህንተና ህንተ ዎይቱዋፐ አሾፎ። ሄሳ መላ አስ ባ በእዳ ቆንጨꬃን ናሸትሸ ባ አሾ ቆፋን ጮ ኦቶርቴስ።
COL 2:19 ሄሳ መላ አሳስ ሁጰ ግድዳ ክርስቶሳራ ጋሄተꬅ ባዋ። እ አሳተꬃ ኡባ ሻያንነ ከሶን ከሶን ጋꬅ ኦይꬅድ ሙዝድ ድቼስ። ፆሳይ ሄሳ መላ ኦገን አሳተꬃ ኡባስ ድች እሜስ።
COL 2:20 ህንተ ክርስቶሳራ ሀይቅድ ሀ አላምያ ሃርያ አያናታ ዎልቃፈ ላአ ከይደታ። ያትን፥ አይስ ሻከቶና አሳዳ ግድድ ሀ ዎጋታስ ሀረተቲ?
COL 2:21 ሄ ዎጋት፥ “ኦይኮፋ፤ ላጮፋ፤ ቦቾፋ” ጌተተይሳታ።
COL 2:22 ሀ ኡባይ አሳ ዎጋነ ትምርተ ግድያ ግሾ ኦሶ ቦላ ፔእዳፐ ጉየ ꬋያና።
COL 2:23 ሀ ኪታት ቦንቾነ ጭንጫተꬅ ዳንድ በንታናዉ ዳንዳኦሶና። ሀ ዎጋት ፆሰ ዳሮ ዶስስያባ፥ አሽከነ ህንተ አሳተꬃ ሃርስያባ ዳኖሶና፥ ሽን ኑ ኢታ አሞተꬃ ቦላ ኤንታዉ ዎልቅ ባዋ።
COL 3:1 ህዛ፥ ህንተ ክርስቶሳራ ሀይቆፐ ደንድዳይሳዳ፥ ፆሳፈ ኡሻቻ ባጋን ኡትዳ ክርስቶስ ደእያ በሳን፥ ሳሎን ደእያባታ ኮይተ።
COL 3:2 ሳሎን ደኤይሳታ ቦላ ህንተ ቆፋ ዎꬅተፐ አትሽን፥ ሳአን ደእያባታ ቦላ ዎꬆፍተ።
COL 3:3 ህንተ ሀይቆን ሻከትዳ መላ ሀ አላምያፐ ሻከትደታ። ህንተ ደኦይ ክርስቶሳራ እስፈ ፆሳን ጌምስ።
COL 3:4 ህንተዉ ደኦ ግድዳ ክርስቶስ ቆንጭያ ዎደ ሄ ዎደ ህንተካ እያራ ቦንቾን ቆንጫና።
COL 3:5 ሄሳ ግሾ፥ ህንተናን ደእያ አላመ አሞታ ዎꬍተ። ሄሳትካ ላይማተꬅ፥ ቱናተꬅ፥ ላይማታናዉ አሞተꬅ፥ ኤቃ ጎይኖ መላ ግድዳ ኡዘተꬅ።
COL 3:6 ሀይሳታ ጋሶን ፆሳ ሀንቆይ ኪተቶና አሳ ቦላ ያና።
COL 3:7 ህንተካ ካሰ ሄ ኢታ ኦግያን ብያ አሳ ግዶን ደእሸ ሀይሳታ ኦꬅደታ።
COL 3:8 ሀእ ህንተ ሄሳታ ኦꬆፍተ። ቃስ ሀንቆ፥ እፆ፥ ካች፥ ዝግርስነ ቦርሶ ኦዳ ህንተፈ ድግት።
COL 3:9 ጬጋ አሳተꬃ እያ ኦሱዋራ ህንተፈ ቃርዳ ግሾ፥ እሶይ እሱዋስ ዎርዶቶፕተ።
COL 3:10 ፆሳ መꬎ ዳንያ፥ ኤራተꬃን ላመትዳ ኦራꬃ አሳተꬃ ማእተ።
COL 3:11 ሀ ኦራꬃ መተꬃን፥ ግርከ አስ ዎይኮ አይሁደ አስ፥ ቃፃረትዳይ ዎይኮ ቃፃረቶናይ፥ ባርባረ አስ ዎይኮ እስኩተ አስ አይለይ ዎይኮ ዎማኖይ ባዋ። ክርስቶስ ኡባ፤ እ ኡባን ደኤስ።
COL 3:12 ሄሳ ግሾ፥ ፆሳን ዶረትዳ አሳዳ ጌሻታነ ዶሰትዳይሳታ ግድድ፥ ማሮተꬃ፥ ኬሀተꬃ፥ አሽከተꬃነ ዳንዳአ ማእተ።
COL 3:13 እሶይ እሱዋ ዳንዳእተ። ኦንካ ባ ላግያን ቆሄትዳባይ ደእኮ እያዉ አቶ ጎ። ጎዳይ ህንተዉ አቶ ግዳይሳዳ ህንተካ ዎልስ አቶ ጊተ።
COL 3:14 ሄ ኡባ ቦላ ኡባባ እስፈ ሺሽድ ቃችያ ሲቆ ማእተ።
COL 3:15 ፆሳይ ህንተና እስ አስ ኦꬅድ ፄግዳይ፥ ሳሮተꬃስ ግድያ ግሾ ክርስቶሳ ሳሮተꬃይ ህንተ ዎዛና ሃሮ።
COL 3:16 ክርስቶሳ ቃላይ ህንተ ዎዛናን ኩምድ ደኦ። ጭንጫተꬃ ኡባን እሶይ እሱዋ ታማርስተነ ዞርተ። ማዝሙረን፥ ሳባንነ አያና የꬃን ፆሳ ዎዛናፐ ጋላትሸ የፅተ።
COL 3:17 ፆሳ አዋ የሱሳ ባጋራ ጋላትሸ ህንተ ኦደትያባ ዎይኮ ኦꬅያባ ኡባ ጎዳ የሱሳ ሱንꬃን ኦꬅተ።
COL 3:18 ማቸቶ፥ አማንያ አሳስ በሲያባ ግድያ ግሾ፥ ህንተ አዝናታስ ሃረትተ።
COL 3:19 አዝናቶ፥ ህንተ ማቸታ ሲቅተ፤ ኤንታዉ ኢቶፕተ።
COL 3:20 ናይቶ፥ ህንተና የልዳይሳታስ ኡባባን ኪተትተ፤ ሄስ ጎዳ ኡፋይስያባ።
COL 3:21 አዋቶ፥ ህንተ ናይት ኡፋይስ ቃንፆና መላ ኤንታ ጫመꬆፍተ።
COL 3:22 አይለቶ፥ ሳአን ህንተዉ ጎዳ ግድዳይሳታስ ኡባባን ኪተትተ። ጎዳ ቦንችሸ ሱረ ዎዛናፐ ኪተትድ ኤንታ ኡፋይስተፐ አትሽን፥ አስ በኦ ግድ ኦꬆፍተ።
COL 3:23 ህንተ ኦꬅያ ኦሶ ኡባ አሳስ ግዶናሽን፥ ጎዳስ ኦꬅያ መላ ዎዛናፐ ኦꬅተ።
COL 3:24 ጎዳፐ ላታ ዎይቶ ኦꬅድ ህንተ ኤከይሳ ኤርተ፤ ህንተ ጎዳ ክርስቶሳ ሀጋዜታ።
COL 3:25 ፆሳይ አሳ ሶምኦ በእድ ፕርዶና ግሾ፥ ኦንካ ኢታ ኦሶ ኦꬅኮ ባ ኢታ ኦሱዋ ግሾ ዛሮ ኤካና።
COL 4:1 ጎዳቶ፥ ህንተዉካ ቃስ ሳሎን ጎዳይ ደኤይሳ ኤርድ፥ ህንተ አይለታስ ፅሎተꬃንነ እሱዋ እሱዋፈ ሻኮና ኮሽያባ ኦꬅተ።
COL 4:2 ፆሳ ባርክድ ጋላትሸ ቃንፆና ዎስተ።
COL 4:3 ፆሳይ ባ ቃላስ ፐንገ ዶያና መላነ ታኒ ሄሳ ጋሶን ቃሾን ደእያ ክርስቶሳ ፁራ አዋጃና መላ ኑስካ ዎስተ።
COL 4:4 ቃስ ታካ በሰይሳዳ ቃላ ቆንጭሳዳ ኦዳና መላ ታዉ ፆሳ ዎስተ።
COL 4:5 እንጀትያ ዎደ ኡባ ጎኤትሸ አማኖና አሳ ማታን ጭንጫተꬃን ደእተ።
COL 4:6 ህንተ አሳ ኡባስ ኮሽያ ዛሮ እሞ ኤራና መላ ህንተ ኦዳይ ኡባ ዎደ አꬎ ኬሀተꬃን ኩምዳይሳነ ማፅነዳ ማልእያባ ግዳናዉ በሴስ።
COL 4:7 ኑ ሲቆ እሻይ ትክቆስ፥ ታራ እስፈ ጎዳ ኦሱዋን አይለ ግድዳ፥ አማነትያ ኦሳንቾይ፥ ታ ደኡዋባ ህንተዉ ኦዳና።
COL 4:8 ታኒ እያ ህንተኮ ኪትዳይ፥ ኑ ዋንድ ደእያኮ ህንተዉ ኦድድ ህንተና ምንꬃና መላሳ።
COL 4:9 አናስሞስ፥ አማነትያ ሲቆ እሻይ፥ ህንተ ባጋይ፥ እያራ ህንተኮ ቤስ። ኤንቲ ሀይሳን ሀንያባ ኡባ ህንተዉ ኦዳና።
COL 4:10 ታራ ቃሸትዳ አርስፅሮኮስነ ባርናባሳ እሻ ናአይ ማርቆስ፥ ህንተና ሳሮ ያጎሶና። ታ ህንተዉ ካሰ ኦድዳይሳዳ ማርቆስ ህንተኮ ቢኮ እያ ሞክተ።
COL 4:11 የሱሳ ጌተትያ ያስፆስ ህንተና ሳሮ ሳሮ ያጌስ። ፆሳ ካዎተꬃ ግሾ ታራ ኦꬅያ አሳታ ግዶፈ አይሁደ ግድዳይሳት ሀ ሄꬓታ፤ ኤንቲ ታና ዳሮ ምንꬅዶሶና።
COL 4:12 ህንተ ባጋይ፥ ክርስቶስ የሱሳ አይለይ፥ ኤጳፍር ህንተና ሳሮ ሳሮ ያጌስ። እ ህንተ ፆሳ ስንꬃን ምንድ ኤቃናዳነ ፆሳ ሸንያ ኤርድ ፖላና መላ ኡባ ዎደ ፆሳ ህንተ ግሾ ዎሴስ።
COL 4:13 እ ህንተ ግሾነ ሎዶቀንነ ህራፖልሳ ካታማን ደእያ አሳ ግሾ ዳሮ ዳቡርዳይሳ ታ ማርካታይስ።
COL 4:14 ኑ ሲቆ እሻይ ዶቶረይ ሉቃስነ ዴማስ፥ ህንተና ሳሮ ሳሮ ያጎሶና።
COL 4:15 ሎዶቀን ደእያ ኑ እሻታስ፥ ንምፋስነ እ ኬꬃን ሺቅያ አሳስ ኑ ሳሮꬁዋ ኦድተ።
COL 4:16 ሀ ዳብዳብያ ህንተ ናባብዳፐ ጉየ፥ ሎዶቀ ዎሳ ኬꬃን ናባብስተ። ህንተካ ሎዶቀ ዎሳ ኬꬃይ ህንተዉ የድያ ዳብዳብያ ናባብተ።
COL 4:17 ቃስ አርክጳሳ፥ “ጎዳይ ነዉ እምዳ ኦሱዋ ፖላናይሳ ዶጎፓ” ያግድ ቆፍስተ።
COL 4:18 ታኒ፥ ጳዉሎስ፥ ሀ ሳሮꬁዋ ታ ኩሸን ፃፋስ። ታ ቃሹዋ ቆፕተ። ፆሳ አꬎ ኬሀተꬃይ ህንተራ ግዶ።
1TH 1:1 ጳዉሎስ ስላሰይነ ፅሞትዮስ ተሰሎንቀ ዎሳ ኬꬃን ደእያ፥ ፆሳ አዋባነ ጎዳ የሱስ ክርስቶሳባ ግድዳ አሳስ ፃፍዳ ኪታ። አꬎ ኬሀተꬃይነ ሳሮይ ህንተዉ ግዶ።
1TH 1:2 ኑኒ ፆሳ ዎስያ ዎደ ኡባን ህንተና ቆፕሸ ህንተ ግሾ ኡባ ዎደ ፆሳ ጋላቶስ።
1TH 1:3 ፆሳ ኑ አዋ ስንꬃን አማኖን ህንተ ኦꬅዳ ኦሱዋ፥ ሲቆን ህንተ ዳቡርዳ ዳቡራነ የሱስ ክርስቶሳን ደእያ ኡፋይሳ ኤካናዉ ህንተ ምንድ ኤቅዳ ኤቁዋ ኡባ ዎደ ኑኒ ቆፖስ።
1TH 1:4 ኑ እሻቶ፥ ፆሳይ ህንተና ዶሰይሳነ ባ አሰ ኦꬅድ ህንተና ዶርዳይሳ ኑኒ ኤሮስ።
1TH 1:5 አይስ ጊኮ፥ ኑኒ ዎንገላ ዶና ፃላላን ግዶናሽን፥ ዎልቃን፥ ጌሻ አያናንነ ዎንገላ ቱማ አማኖን ህንተዉ ኤህዳ። ኑኒ ህንተራ ጋምእዳ ዎደ ኡባን ህንተ ግሾ ዋንድ ደእዳኮ ህንተ ኤሬታ።
1TH 1:6 ህንተ ዳሮ መቶ ኤክኮካ ጌሻ አያናይ እምያ ኡፋይሳን ኪታ ኤክደታ፤ ኑናነ ጎዳ ዳንደታ።
1TH 1:7 ሄሳ ግሾ፥ ማቀዶነነ አካያ ቢታን ደእያ አማንያ ኡባስ ሌምሶ ግድደታ።
1TH 1:8 ጎዳ ቃላይ ህንተፈ ከይድ፥ ማቀዶነንነ አካያ ፃላላን ግዶናሽን፥ ፆሳ ህንተ አማነይስ ኡባሶን ስኤትስ። ህዛ፥ ኑኒ ጋናባይ አይኮይካ ባዋ።
1TH 1:9 ኑኒ ህንተኮ ብዳ ዎደ ህንተ ኑና ሞክዳ ሞኩዋነ ህንተ፥ ህንተ ኤቃ አግድ ቱማነ ደኦ ፆሳ ሀጋዛናዉ ህንተ ስምዳይሳ ኤንቲ ባንታ ሁጰን ኦዶሶና።
1TH 1:10 ቃስ ፆሳ ናአይ፥ የሱሲ፥ ፆሳይ ሀይቆፐ ደንꬅዳይስ፥ ስንꬃፈ ያና ፆሳ ሀንቁዋፈ ኑና አሻናይስ፥ ሳሎፐ ያናይሳ ህንተ ናገይሳ ኤንቲ ማርካቶሶና።
1TH 2:1 ታ እሻቶ፥ ኑኒ ህንተኮ ብዳይ መላ ግዶናይሳ ህንተ፥ ህንተ ሁጰን ኤሬታ።
1TH 2:2 ሽን ኑኒ ህንተኮ ተሰሎንቀ ያናፐ ስን ፍልጵስዩሳ ካታማን ዋየትዳይሳነ ጫየትዳይሳ ህንተ ኤሬታ። ዳሮ እፆይ ደእኮካ ህንተዉ እያ ዎንገላ ኦዳና መላ ፆሳይ ኑስ ምኖተꬅ እሚስ።
1TH 2:3 ኑኒ ህንተና ዞርዳይ ባለꬆን ዎይኮ ጭሞን ዎይኮ ገነን ግደና።
1TH 2:4 ሽን ፆሳይ ኑናን አማነትድ ባ ዎንገላ ኦዳና መላ ኑስ ሀዳራ እምዳ ግሾ ኦዶስ። ኑ ሄሳ ኦይ ኑ ዎዛና በእያ ፆሳ ኡፋይሳናሳፈ አትሽን፥ አሰ ኡፋይሳናሳ ግደና።
1TH 2:5 ኑ ሚሸ ያርድ ዎርዶ ህንተና ሳቢሸ ህንተኮ ዮናይሳ ሎይꬅድ ኤሬታ፤ ፆሳይ ኑስ ማርካ።
1TH 2:6 ኑኒ ህንተፈ ግድን ዎይኮ ሀራ አሳ ኦደፈካ ቦንቾ ኮይቦኮ።
1TH 2:7 ኑኒ ክርስቶሳ ሀዋረ ግደይሳዳ ኑስ ኮሽያባ እምተ ግድ ኤካናዉ ዳንዳኦስ፥ ሽን አይያ ባ ናይታ ድቸይሳ መላ ህንተ ግዶን አሽከ ግድዳ።
1TH 2:8 ኑ ህንተና ዶስዳ ግሾ ፆሳ ዎንገላ ህንተዉ ሻኮ ፃላላ ግዶናሽን፥ ኑ ደኡዋካ ህንተዉ እማናዉ ጊግዳ። ህንተ ኑስ ዳሮ አልኦ።
1TH 2:9 ኑ እሻቶ፥ ኑ ኦሱዋነ ኑ ዳቡራ ኤሬታ። ህንተዉ ፆሳ ዎንገላ ኦድሸ፥ ህንተና ዋይሶና መላ ቃማነ ጋላስ ኦꬅዳ።
1TH 2:10 ኑ ደኦይ ህንተ አማነይሳታ ማታንነ ፆሳ ስንꬃን ጌሽ፥ ፅሎነ ቦረቶናይሳ ግደይሳስ ህንተ ማርካ።
1TH 2:11 ኑኒ ህንተዉ ሁጰን ሁጰን የልዳይሳት ባንታ ናይታስ ሀነይሳዳ ሀንዳይሳ ኤሬታ።
1TH 2:12 ኑ ህንተና ዞርዳ፥ ምንꬅዳ። ቃስ ባ ካዎተꬃነ ባ ቦንቹዋ ሻካናዉ ህንተና ፄግያ ፆሳ ኡፋይስያ ደኦ ህንተ ዳና መላ ህንተዉ ምንꬅድ ኦድዳ።
1TH 2:13 ህንተዉ ኑኒ ፆሳ ቃላ ኦድዳ ዎደ አሳ ቃላዳ ግዶናሽን፥ ፆሳ ቃላዳ ስእድ ኤክዳ ግሾ ኑኒ ኡባ ዎደ ፆሳ ጋላቶስ። እ ቱማ ፆሳ ቃላ፤ ፆሳ ቃላይ አማንያ ህንተናን ኦꬄስ።
1TH 2:14 ታ እሻቶ፥ ህንተ ይሁዳ ቢታን ደእያ ዎሳ ኬꬃታነ ያን ክርስቶስ የሱሳ ካልያ አሳታዳ ሀንደታ። ኤንታ አይሁደት ዋይስዳይሳዳ ህንተናካ ህንተ ቢታ አሳይ ዋይስዶሶና።
1TH 2:15 ሄ አይሁደት ጎዳ የሱሳነ ናበታ ዎꬍዶሶና፤ ቃስ ኑና ጎድዶሶና። ኤንቲ ፆሳ ኡፋይሶናይሳታነ አሰ ኡባ እፀይሳታ።
1TH 2:16 ኤንቲ ሀር አቶሽን፥ አይሁደ ግዶና አሳይ አታና መላ ኑኒ ኤንታዉ ቃላ ኦደይሳ ድጎሶና። ሄሳዳ ሀንድ ኤንታ ናጋራ ፁአይ ኩማና ጋካናዉ ኡባ ዎደ ናጋራ ኦꬆሶና። ዉርሰꬃን፥ ፆሳ ሀንቆይ ኤንታ ቦላ ዎꬌስ።
1TH 2:17 ሽን ኑ እሻቶ፥ ኑኒ ኑ ቆፋን ግዶናሽን፥ አሾን ህንተፈ ሻከትድ ጉꬃ ዎደ ጋምእዳይሳን ህንተና ዳሮ ላሞትድ በአናዉ ኮይዳ።
1TH 2:18 ኑ ስም ህንተኮ ባናዉ ኮይዳ። ታኒ ታ ሁጰን ህንተኮ ባናዉ ኮያስ፥ ሽን ፃላሄይ ኑና ድግስ።
1TH 2:19 ህዛ፥ ኑ ጎዳ የሱስ ክርስቶሲ ያ ዎደ፥ ኑ ኡፋይሳይ ዎይኮ ኑ ጬቀትያ ኑ ካላቻይ ኦኔ? ህንተና ግደከትዬ?
1TH 2:20 ቱማ ህንተ ኑ ቦንቾነ ኑ ኡፋይስ።
1TH 3:1 ሄሳ ግሾ፥ ኑስ ገንጫናዉ ዳንዳኤቶና እፅን፥ አቴና ካታማን ኑርካ አታናዉ ቆፋ ቃችዳ።
1TH 3:2 ህንተና ዞራናዳነ አማኖን ህንተና ምንꬃናዳ ኑራ እስፈ ፆሳስ ኦይሳነ ክርስቶሳ ዎንገላ ኦድያ ኑ እሻ ፅሞትዮሳ ህንተኮ ኪትዳ።
1TH 3:3 ህንተና ጋክዳ ጎዳን ህንተፈ ኦንካ ጉየ ስሞፎ። ሄ ጎዳይ ኑስ ፆሳ ሸነ ግደይሳ ህንተ፥ ህንተ ሁጰን ኤሬታ።
1TH 3:4 ኑ ህንተራ ደእያ ዎደ ጎድ ጋካናይሳ ህንተዉ ኮይሮትድ ኦድዳ። ህንተ ኤረይሳ መላ ሄሳዳ ሀንስ።
1TH 3:5 ሄሳ ግሾ፥ ታዉ ገንጫናዉ ዳንዳኤቶና እፅን፥ “ኦን ኤር ፃላሄይ ኤንታ ፓጭድ ኑ ዳቡራ መላ አሾና አገና” ጋዳ ህንተ አማኑዋባ ኤራናዉ ፅሞትዮሳ ህንተኮ ኪታስ።
1TH 3:6 ሀእ ፅሞትዮስ ህንተ ማታፐ ይድ፥ ህንተ አማኑዋባነ ህንተ ሲቁዋባ ሎኦ ዎረ ኑስ ኦድስ። ቃስ ህንተ ኡባ ዎደ ኑስ ሎኦ ቆፐይሳነ ኑኒ ህንተና በአናዉ ላሞተይሳዳ ህንተካ ኑና በአናዉ ላሞተይሳ እ ኑስ ኦድስ።
1TH 3:7 ታ እሻቶ፥ ኑና ጋክያ ዋያንነ ኑ መቶ ኡባን ህንተ አማኑዋ ግሾ ህንተናን ምነትዳ።
1TH 3:8 ህንተ ጎዳን ምንድ ደእኮ ኑካ ደኦን ደኦስ።
1TH 3:9 ህዛ፥ ኑኒ ህንተ ጋሶን ደምዳ ኡፋይሳስ ፆሳ ዋት ጋላትኖ?
1TH 3:10 ኑኒ ህንተና በአናዉነ ህንተ አማኑዋን ፓጭዳባ ኩንꬃናዉ ቃማነ ጋላስ ኑ ኩመꬃ ዎዛናን ፆሳ ዎሶስ።
1TH 3:11 ፆሳይ ኑ አዋይ ባ ሁጰንነ ኑ ጎዳይ የሱስ ክርስቶሲ ኑ ህንተኮ ባና ኦግያ ጊግሶ።
1TH 3:12 ኑ ህንተና ዳሮ ዶሰይሳዳ ጎዳይ ህንተ እሶይ እሱዋ ሲቅያ ሲቆነ አሰ ኡባ ሲቅያ ሲቆ ህንተዉ ዳርሶነ ጉጆ።
1TH 3:13 ኑ ጎዳይ የሱስ ክርስቶሲ ባ ጌሻታራ ያ ዎደ ፆሳ፥ ኑ አዋ ስንꬃን ህንተ ዎዛናይ ጌሽነ ቦረይ ባይናይሳ ኦꬅድ እ ህንተና ምንꬃና።
1TH 4:1 ዉርሰꬃን፥ ታ እሻቶ፥ ፆሳ ኡፋይሳናዉ ህንተ ዋንድ ዳናዉ በሲያኮ ኑፐ ታማርደታ። ሄስ ህንተ ኮይሮፐ ደእዳ ደኡዋ፥ ሽን ሀእ ህንተ ካሰይሳፈ አꬅድ ኦꬃናዳ ጎዳ የሱሳ ሱንꬃን ህንተና ዎሶስነ ዞሮስ።
1TH 4:2 ኑኒ ጎዳ የሱሳ ማታን ህንተና ኪትዳ ኪታይ አዉሰኮ ኤሬታ።
1TH 4:3 ፆሳይ፥ ህንተ ጌሽ ግዳና መላነ ላይማቶና መላ ኮዬስ።
1TH 4:4 ህንተ እሶይ እሶይ፥ ህንተ ማቸታራ ጌሻተꬃንነ ቦንቾን ዳናዉ በሴስ።
1TH 4:5 ፆሳ ኤሮናነ አማኖና አሳዳ ላይማተꬃ አሞን ፁገቶፍተ።
1TH 4:6 ኑ ካሰ ህንተዉ ኦድዳይሳዳነ ምንꬅ ዞርዳይሳዳ ጎዳይ ሄሳ መላባ ኦꬅያ ኡባ ፕርድያ ግሾ፥ ኦንካ ሀይሳታን ባ አማንያ እሻ ናቃናዉነ ጭማናዉ በሰና።
1TH 4:7 ፆሳይ ኑና ጌሻተꬃን ዳና መላ ፄግስፐ አትሽን፥ ቱናተꬃን ዳና መላ ፄግቤና።
1TH 4:8 ሄሳ ግሾ፥ ሀ ትምርትያ እፅያ ኦንካ ህንተዉ ጌሻ አያና እምያ ፆሳ እፄስፐ አትሽን፥ አሰ ግደና።
1TH 4:9 ህንተ እሶይ እሱዋ ዋት ሲቃነኮ ፆሳይ ህንተና ታማርስዳ ግሾ፥ ሀእ ሲቆባ ኑ ህንተዉ ፃፋናዉ ኮሸና።
1TH 4:10 ቃስ ማቀዶነ ቢታን ደእያ አማንያ እሻታ ኡባ ቱማ ህንተ ዶሴታ። ሽን ኑ እሻቶ፥ ሀእካ ህንተ ኤንታ አꬅድ ዶሳና መላ ህንተና ዎሶስ።
1TH 4:11 ኑኒ ካሰ ህንተዉ ኦድዳይሳዳ ዎፑ ግዳ ደኡዋ ደእተ። ህንተ፥ ህንተ ኦሶ ኦꬅድ ህንተዉ ዱሳስ ኮሽያባ ደምተ።
1TH 4:12 ሄሳዳ ሀንኮ፥ አማኖናይሳታ ማታን ህንተ ቦንቸታና፤ ቃስ ህንተና ኮሽያባስ ኦናካ አዳሸከታ።
1TH 4:13 ኑ እሻቶ፥ አማንድ ሀይቅዳ አሳት ሀናናባ ህንተ ኤራና መላ ኑ ኮዮስ። ህንተ ኤንታ ግሾ ኡፋይስ ባይና አሳዳ ካዮቶፍተ።
1TH 4:14 ኑኒ፥ የሱሲ ሀይቅዳይሳነ ቃስ ሀይቆፐ ደንድዳይሳ አማኖስ። ሄሳዳካ፥ ፆሳይ የሱሳ አማንድ ሀይቅዳይሳታ እያራ ዎላ ኤሀናይሳ አማኖስ።
1TH 4:15 ጎዳይ ኑስ ኦድዳይሳዳ ጎዳይ ያ ጋላስ እያራ ጋሄታናዉ ኑኒ ፓፃ ደኤይሳት፥ ሀይቅዳይሳታፐ ስንꬃቶኮ።
1TH 4:16 ጎዳይ ዎልቃማ ኪታራ፥ ኪታንቾታ ሀላቃ ግርሳራ፥ ፆሳ ሞይዘ ፑኖራ፥ ሳሎፐ ዎꬋና። ክርስቶሳ አማንድ ሀይቅዳይሳት ኮይሮትድ ሀይቆፐ ደንዳና።
1TH 4:17 ሄሳፈ ጉየ፥ ሄ ዎደ ኑኒ ፓፃ ደኤይሳት፥ ጎዳራ ሻራን ጋሄታናዉ ኤንታራ እስፈ ሳሎ ኤከታና። ሄሳፈ ጉየ፥ ኑኒ ጎዳራ እስፈ መርናዉ ዳና።
1TH 4:18 ሄሳ ግሾ፥ ሀ ቃላን እሶይ እሱዋ ምንꬅተ።
1TH 5:1 ታ እሻቶ፥ ሀ ሀኖት ሀናና ዎድያነ አጌና ህንተዉ ፃፋናዉ ኮሸና።
1TH 5:2 ጎዳ ጋላሳይ ካይሶይ ቃማ የይሳዳ ያናይሳ ህንተ ሎይꬅ ኤሬታ።
1TH 5:3 አሳይ፥ “ሳእ ሳሮ፥ አይኮይካ ሀነና” ያግሽን፥ ማጫስ እቀꬅ ኦይከይሳዳ ꬋዮይ ኤንቲ ቆፖና ኤንታ ቦላ ያና። ኤንቲ አይ ኦገንካ ከስ ኤኮኮና።
1TH 5:4 ሽን ኑ እሻቶ፥ ሄ ጋላሳይ ህንተዉ ካይሶይ የይሳዳ ያናዉ ህንተ ꬉማን ደኤከታ።
1TH 5:5 ህንተ ኡባይ ፖኦ አስነ ጋላሳን ደእያ አስ፤ ኑኒ ቃማ አስ ዎይኮ ꬉማ አስ ግዶኮ።
1TH 5:6 ሄሳ ግሾ፥ ኑኒ ሀራት ꬍስከይሳዳ ꬍስካናዉ በሰና፤ ኑኒ ባርካናዉነ ጊግድ ዳናዉ በሴስ።
1TH 5:7 ꬍስከይሳት ቃማ ꬍስኮሶና፤ ማꬆተይሳት ቃማ ማꬆቶሶና።
1TH 5:8 ሽን ኑኒ ጋላሳ አስ ግድያ ግሾ ጊግድ ዳናዉ በሴስ። አማኖነ ሲቆ ፁሩረዳ ትራን ማእድ፥ አቶተꬃ ኡፋይሳ ሁጰን ዎꬅያ ኦላ ብራታ ባርኔፃዳ ዎꬅድ ዳናዉ በሴስ።
1TH 5:9 ፆሳይ ኑና ኑ ጎዳ የሱስ ክርስቶሳ ባጋራ ኩመꬃ አቶተꬅ ኤካና መላ ዶርስፐ አትሽን፥ ሀንቆስ ዶርቤና።
1TH 5:10 ኑኒ ፓፃ ደእን ዎይኮ ሀይቅን፥ ክርስቶስ ያ ዎደ እያራ እስፈ ዳና መላ ክርስቶስ ኑ ግሾ ሀይቅስ።
1TH 5:11 ሄሳ ግሾ፥ ህንተ ካሰ ኦይሳዳ፥ እሶይ እሱዋ ምንꬅተነ ድችተ።
1TH 5:12 ኑ እሻቶ፥ ህንተ ግዶን ኦይሳታ፥ ህንተና ካለꬃና መላነ ዞራና መላ ጎዳይ ዶርዳይሳታ ቦንቻና መላ ህንተና ዎሶስ።
1TH 5:13 ኤንቲ ኦꬅያ ኦሱዋ ግሾ፥ ኤንታ ዳሮ ቦንችተነ ሲቅተ። እሶይ እሱዋራ ሳሮተꬃን ደእተ።
1TH 5:14 ኑ እሻቶ፥ ኑኒ ህንተና ዞሮስ። ቦዛታ ሀንቅተ፤ ባበይሳታ ምንꬅተ፤ ዳቡራንቾታ ማድተ፤ አሰ ኡባ ዳንዳእተ።
1TH 5:15 ኦንካ ኢታ ግሾ ኢታ ዛሮና መላ ናገትተ። ህንተ ዎልስነ አሳ ኡባስ ሎኦባ ኦꬃናዉ ምንተ።
1TH 5:16 ኡባ ዎደ ኡፋይትተ።
1TH 5:17 ኡባ ዎደ ፆሳ ዎስተ።
1TH 5:18 ኡባባን ጋላትተ። ክርስቶስ የሱሳ ባጋራ ፆሳይ ህንተፈ ኮየይ ሄሳ።
1TH 5:19 ጌሻ አያና ኦሱዋ ቶይሶፕተ።
1TH 5:20 ትንብተ ቃላ ካꬎፕተ።
1TH 5:21 ኡባባ ፓጭተ፤ ሎኦባ ኤክተ።
1TH 5:22 ኢታ ኦሶ ኡባፈ ሃክተ።
1TH 5:23 ሳሮ እምያ ፆሳይ ባ ሁጰን ህንተና ፖሎ ጌሾ። ኑ ጎዳይ የሱስ ክርስቶሲ ያና ጋላሳስ፥ ፆሳይ ህንተ አያና፥ ህንተ ሸምፑዋነ ህንተ ኩመꬃ አሳተꬃ ቦረይ ባይና ናጎ።
1TH 5:24 ህንተና ፄገይስ አማነትዳይሳ ግድያ ግሾ፥ ሄሳ እ ፖላና።
1TH 5:25 ኑ እሻቶ፥ ኑስ ፆሳ ዎስተ።
1TH 5:26 አማንያ አሳ ኡባ ጌሻ ዬረተꬃን ሳሮꬅተ።
1TH 5:27 ህንተ ሀ ኪታ አማንያ አሳ ኡባስ ናባባናዳ ጎዳ ሱንꬃን ህንተና ዎሳይስ።
1TH 5:28 ኑ ጎዳ የሱስ ክርስቶሳ አꬎ ኬሀተꬃይ ህንተራ እስፈ ግዶ። አምንእ።
2TH 1:1 ጳዉሎስ፥ ስላሰይነ ፅሞትዮስ ተሰሎንቀ ዎሳ ኬꬃን ደእያ፥ ፆሳ አዋባነ ጎዳ የሱስ ክርስቶሳባ ግድዳ አሳስ ፃፈትዳ ኪታ።
2TH 1:2 ፆሳ ኑ አዋፐነ ጎዳ የሱስ ክርስቶሳፐ አꬎ ኬሀተꬃይነ ሳሮተꬃይ ህንተዉ ግዶ።
2TH 1:3 ኑ እሻቶ፥ ህንተ አማኖይነ ህንተ እሶይ እሱዋነ ሀራታ ሲቅያ ሲቆይ ዳሮ ድጭያ ግሾ፥ ኑኒ ሄሳስ ፆሳ ኡባ ዎደ ጋላታናዉ በሴስ።
2TH 1:4 ህንተና ጋክዳ ጎዳንነ ዋየ ኡባን ገንጫንነ አማኖን ምንድ ኤቅዳ ግሾ፥ ኑኒ ኑ ሁጰን ፆሳ ዎሳ ኬꬃታን ህንተባ ማርካትሸ ህንተናን ጬቀቶስ።
2TH 1:5 ህንተ እያ ግሾ ግድ መቶ ኤክያ ፆሳ ካዎተꬃስ በሰይሳታ ግድድ ታይበታና መላ ፆሳ ፅሎ ፕርዳስ ሀይስ ማላ።
2TH 1:6 ፆሳይ ቱማ ፕርዳ ፕርዳና። ፆሳይ ህንተና ዋይሰይሳታ ቦላ ዋየ ኤሀና።
2TH 1:7 ጎዳይ የሱሲ ባ ዎልቃማ ኪታንቾታራ፥ ታማ ላጮራ ሳሎፐ ያ ዎደ ዋየትያ ህንተናነ ኑና ሸምፕሳና።
2TH 1:8 ቃስ ፆሳይ ባና ኤሮናይሳታነ ኑ ጎዳ የሱስ ክርስቶሳ ዎንገላስ ኪተቶናይሳታ ፕርዳና።
2TH 1:9 ኤንቲ ጎዳ ስንꬃፈነ እያ ቦንቹዋ ዎልቃፈ ሻከትድ መርና ꬋዩዋን ፕርደታና።
2TH 1:10 ሄ ጋላስ፥ እ ባ ጌሻ አሳንነ ባና አማንያ ኡባን ቦንቸታናዉነ ሳበታናዉ ያ ዎደ ኑ ህንተዉ ኦድዳ ኪታ ህንተ አማንዳ ግሾ፥ ህንተ እያ ቦንቸይሳታ ግዶንነ ሳበይሳታ ግዶን ዳና።
2TH 1:11 ኑኒ ህንተዉ ኡባ ዎደ ፆሳ ዎሰይ ሄሳሳ። ኑ ፆሳይ ህንተና ፄግዳ ደኡዋስ በሰይሳታ ግድድ ታይበታና መላ ኑኒ ዎሶስ። ህንተ ሎኦባ ኦꬃናዉ አሞትያ አሙዋነ ህንተ አማኖ ኦሱዋ እ ባ ዎልቃን ፖሎ።
2TH 1:12 ሄሳን ኑ ፆሳነ ኑ ጎዳ የሱስ ክርስቶሳ አꬎ ኬሀተꬃን፥ ጎዳ የሱሳ ሱንꬃ ህንተ ቦንቻና፤ ህንተናካ እ ቦንቻና።
2TH 2:1 ኑ እሻቶ፥ ኑ ጎዳ የሱስ ክርስቶሳ ዩሳባነ ኑ እያራ ጋሄታናዉ ሺቃናባስ ኑ ህንተና ዎሶስ።
2TH 2:2 ትንብተን ዎይኮ ሀራ አሳፐ ስእዳ ቃላን ዎይኮ ኑፐ ኤክዳ ኪታዳ ኦꬅድ፥ “ጎዳ ጋላሳይ ጋክስ” ግድ ህንተ ዎዛናይ ዳጋሞፎነ ዋባቆፖ።
2TH 2:3 ህንተና ኦንካ አይ ኦገንካ ባለꬆፎ። ካሰትድ ጌላተꬃይ ቆንጮናነ ꬋዮይ በሲያ ጌላ ኡራይ ዮና ደእሽን፥ ጎዳ ጋላሳይ ጋከና።
2TH 2:4 አስ ጎይንያባነ ፆሳያባ ኡባ እ እፃናነ ባና ꬎቁ ኦꬃና። ሀር አቶሽን፥ ፆሳ ኬꬅ ገል ኡትድ፥ “ታኒ ፆሰ” ጋና።
2TH 2:5 ታኒ ህንተራ ደአሸ ህንተዉ ኦድዳይሳ አኬከከቲ?
2TH 2:6 እ ባ ጋላሳን ያናፐ አትሽን፥ ሀእ ያናይሳ አይብ እያ ተቅያኮ ህንተ ኤሬታ።
2TH 2:7 አሳስ ቆንጭቦና ጌላተꬃ ፁራ ዎልቃይ ሀእካ ኦꬄስ፥ ሽን ሀእ እያ ተቀይስ ደኤስ። እያ ተቀይስ ኦገፐ ክቻና ጋካናዉ እ ቆንጨና።
2TH 2:8 ሄሳፈ ጉየ፥ ጌላ ኡራይ ቆንጫና፥ ሽን ጎዳ የሱሲ ባ ዶናፐ ከይያ ሸምፑዋን፥ ባ ቦንቾ ዩሳን እያ ዎꬋና።
2TH 2:9 ጌላ ኡራይ፥ ፃላሄ ዎልቃን ይድ ዎርዶ ማላታታነ ማላልስያባታ ኦꬃና።
2TH 2:10 ሄሳዳካ፥ ꬋዮስ ደእያ አሳታ ዱማ ዱማ ጭምያ ኢታ ኦሶን ባለꬃና። ኤንቲ ꬋይዳይ አሽያ ቱማ ዶስድ ኤኮና እፅዳ ግሾሳ።
2TH 2:11 ሄሳ ግሾ፥ ኤንቲ ዎርዶ ግድያባ አማናና መላ ፆሳይ ዎልቃማ ባለሶ ኤንታ ቦላ የዳና።
2TH 2:12 ሄስካ፥ ቱማ አማኖና አሳት፥ ናጋራ ኦሶን ኡፋይተይሳት ኡባይ ፕርደታና መላሳ።
2TH 2:13 ጎዳይ ዶስያ ኑ እሻቶ፥ ኑኒ ፆሳ ህንተ ግሾ፥ ኡባ ዎደ ጋላታናዉ በሴስ። ህንተ አታና መላ ፆሳይ ጌሻ አያና ዎልቃን ህንተና ጌሽዳይሳነ ህንተካ ቱማ አማንዳይሳን እ ህንተና ባይራዳ ዶርስ።
2TH 2:14 ፆሳይ፥ ኑ ህንተዉ ኦድዳ ዎንገላ ባጋራ ህንተና ፄግዳይ፥ ህንተ ኑ ጎዳ የሱስ ክርስቶሳራ እስፈ ቦንቸታናሳ።
2TH 2:15 ህዛ፥ ኑ እሻቶ፥ ምንድ ኤቅተ። ኑኒ ህንተና ኑ ዶናን ግድን ዎይኮ ዳብዳብያን ግድን ታማርስዳ ትምርትያ ኦይክተ።
2TH 2:16 ፆሳይ ኑ አዋይ ኑና ዶሴስ። እ ኑስ ኬሀ፤ እ መርና ምንꬆነ ሎኦ ኡፋይሳ ኑስ እሚስ። ህንተ ኡባ ዎደ ሎኦባ ኦꬃናዉነ ኦደታናዉ ምንꬃና መላነ ማዳና መላ ኑ ጎዳ የሱስ ክርስቶሳነ ፆሳ ኑ አዋ ዎሶስ።
2TH 3:1 ዉርሰꬃን ኑ እሻቶ፥ ጎዳ ቃላይ ህንተ ግዶን ኤለስድ ዳልጋናዳነ ቦንቸታናዳ ኑስ ዎስተ።
2TH 3:2 ሄሳዳካ፥ አስ ኡባይ ቃላ ስእድ አማኖና ግሾ፥ ፆሳይ ጌላታፐነ ኢታ አሳታፐ ኑና አሻና መላ ኑስ ዎስተ።
2TH 3:3 ሽን ጎዳይ አማነትዳይሳ፤ እ ህንተና ምንꬃናነ ፃላሄፐ ናጋና።
2TH 3:4 ኑኒ ህንተና ኪተይሳ ሀእካ ስንꬃፈካ ህንተ ኦꬃናይሳስ ጎዳን ኑኒ አማነቶስ።
2TH 3:5 ጎዳይ ህንተ ዎዛና ፆሳ ሲቁዋኮነ ክርስቶሳ ዳንዳኣኮ ካለꬆ።
2TH 3:6 ኑ እሻቶ፥ ህንተ ኑፐ ኤክዳ ኪታ ካሎናይሳታፐነ ኦሶ ብልያ አዛላ አማንያ አሳታፐ ህንተ ሻከታናዳ ጎዳ የሱስ ክርስቶሳ ሱንꬃን ህንተና ኪቶስ።
2TH 3:7 ኑዳ ሀንድ ዳናዉ በሰይሳ ህንተ፥ ህንተ ሁጰን ኤሬታ። ኑኒ ህንተራ ደእያ ዎደ ኦሶ ብልቦኮ።
2TH 3:8 ኑኒ ኦደፈካ ካꬅ መላ ምቦኮ። ኑስ ዳንዳኤትዳ መላ ቃማነ ጋላስ ኦꬅ ዳቡርድ ደእዳፐ አትሽን፥ ኦደስካ ቶሆ ግድቦኮ።
2TH 3:9 ኑኒ ሄሳ ኦꬅዳይ፥ ህንተዉ ሌምሶ ግዳናሳፈ አትሽን፥ ህንተፈ ማደ ኦይቻናዉ ኑስ ማት ꬋይና ግደና።
2TH 3:10 ኑ ህንተራ ደእያ ዎደካ፥ “ኦꬃናዉ ኮዮና አስ ኦንካ ሞፖ” ያግድ ኪትዳ።
2TH 3:11 ኑኒ ሄሳ ግዳይ፥ ህንተ ግዶን እስ እስ አዛላት ደኤይሳ ስእዳ ግሾሳ። ሄ አሳት ገልሶናባን ገልድ ሀራታ ኦሶ ብልሶሶናፐ አትሽን፥ አይኮካ ኦꬆኮና።
2TH 3:12 ኑኒ ሄሳ መላ አሳት ማራ ደኦ ዳናዳነ ባንታና ኮሽያባ ኦꬅድ ደማናዳ ጎዳ የሱስ ክርስቶሳ ሱንꬃን ኤንታ ኪቶስነ ዞሮስ።
2TH 3:13 ሽን ኑ እሻቶ፥ ሎኦ ኦሶ ኦꬃናዉ አዛሎፍተ።
2TH 3:14 ሀእ ኑኒ ሀ ዳብዳብያን ኪትዳ ኪታስ ኪተቶና አስ ኦንካ ደእኮ ሄ ኡራ ኤርተ። እ ዬላታና መላ እያፐ ሻከትተ።
2TH 3:15 ሽን እያ እሻዳ ሴርተፐ አትሽን፥ ሞርከዳ ፄሎፍተ።
2TH 3:16 ሳሮ እምያ ጎዳይ፥ ባ ሁጰን ህንተዉ ኡባ ዎደነ ኡባ ባጋራ ሳሮ እሞ። ጎዳይ ህንተ ኡባራ ግዶ።
2TH 3:17 ታኒ ጳዉሎስ፥ ሀ ኪታ ታ ኩሸን ፃፋስ። ታ ኪታ ኡባስ ማላይ ሀይሳ፤ ታኒ ሄሳዳ ፃፋይስ።
2TH 3:18 ኑ ጎዳ የሱስ ክርስቶሳ አꬎ ኬሀተꬃይ ህንተ ኡባራ ግዶ።
1TI 1:1 ኑና አሽያ ፆሳንነ ኑ ኡፋይሳን ናግያ የሱስ ክርስቶሳን ኪተትዳ፥ የሱስ ክርስቶሳ ሀዋረ ግድዳ፥ ጳዉሎሳፐ፥
1TI 1:2 አማኖን ታዉ ቱማ ናአ ግድዳ ፅሞትዮሳስ። ፆሳ ኑ አዋ፥ ኑ ጎዳ ክርስቶሳ አꬎ ኬሀተꬃይ፥ ማሮተꬃይነ ሳሮተꬃይ ነዉ ግዶ።
1TI 1:3 ታኒ ማቀዶነ ባሸ ነና ሀዳርዳይሳዳ፥ እስ እስ አሳት ዎርዶ ትምርትያ ታማርሰይሳ ድጋናዉ ነ ኤፈሶናን ጋምአና መላ ኮያይስ።
1TI 1:4 ኤንቲ ጎእ ባይና ሀይሰ ኦዳነ ባንታ ኮቻ ታይቡዋ አጋናዳ ኦዳ። ሄሳ መላባይ ፓላማ ካለꬄስፐ አትሽን፥ አማኖን ኦሰትያ ፆሳ ኦሱዋስ ማደና።
1TI 1:5 ሀ ኪታ ሁጰ ቆፋይ ጌሻ ዎዛናፐ፥ ሎኦ ካሀፐነ ቱማ አማኑዋፐ በንትያ ሲቁዋ ደንꬃናሳ።
1TI 1:6 እስ እስ አሳት ሀይሳ አግድ፥ ፓꬆና ኦዳኮ ስምዶሶና።
1TI 1:7 ኤንቲ ፆሳ ህግያ አስታማረ ግዳናዉ ኮዮሶና። ሽን ኤንቲ አይ ኦድያኮ ዎይኮ ቱማ ኦꬅድ ኦደይስ እ አይበኮ ኤሮኮና።
1TI 1:8 አስ በሰይሳዳ ህግያን ጎኤትኮ ህገይ ሎኦ ግደይሳ ኤሮስ።
1TI 1:9 እስባ አኬካናዉ ኮሼስ። ህገይ ሎኦ አሳስ መትቤና። ሽን ህገይ፥ ህገ መንይሳታ፥ ዎራንꬖታ፥ ፆሰ ያዮናይሳታ፥ ሸምፖ ዎይሳታ፥ ናጋራንቾታ፥ ጌሻተꬅ ባይናይሳታ፥ ቱናታ፥ ሀር አቶሽን ባንታ አይዉ ዎይኮ አዋ ዎይሳታ፥
1TI 1:10 ላመይሳታ፥ አደይ አደራ ላይማተይሳታ፥ አሰ ባይዘይሳታ፥ ዎርዳንቾታ፥ ዎርዶን ጫቀይሳታ፥ ዎይኮ ቱማ ትምርትያራ ጋሄቶና አይ ኦሶ ኦይሳታ ሴራናዉ ከይስ።
1TI 1:11 ሄ ትምርተይ ቦንቾነ አንጀትዳ ፆሳይ ታኒ አዋጃና መላ ታዉ ሀዳራ እምዳ ዎንገላ ግዶን ደኤስ።
1TI 1:12 ታኒ ኦꬅያ ኦሱዋን ታዉ ዎልቃ እምዳ ኑ ጎዳ ክርስቶስ የሱሳ ጋላታይስ። ታና ባ ኦሱዋስ ሹምድ ሄ ኦሱዋስ በሰይሳ ግድ ታይብዳ ግሾ እያ ጋላታይስ።
1TI 1:13 ታኒ ሀይሳፈ ካሰ እያ ጫየይሳ፥ እያ የደይሳነ መቶይሳ ግድኮካ ታኒ ሄሳ ኤሮናነ አማኖና ኦꬅዳ ግሾ ፆሳይ ታና ማርስ።
1TI 1:14 ኑ ጎዳይ ባ አꬎ ኬሀተꬃ ታ ቦላ ጉስድ፥ ሄ አꬎ ኬሀተꬃራ አማኖነ ሲቆ ክርስቶስ የሱሳ ባጋራ ታዉ እሚስ።
1TI 1:15 “ክርስቶስ የሱሲ ናጋራንቾታ አሻናዉ ሀ አላምያ ይስ” ግያ ቃላይ አማንይሳነ አሳ ኡባይ ኤካናዉ በሰይሳ። ኡባፈ አꬍዳ ናጋራንቾይ ታና።
1TI 1:16 ሽን መርና ደኡዋ ኤካናዉ እያ አማንያ አሳስ ታኒ ሌምሶ ግዳና መላ የሱስ ክርስቶሲ ዳሮ ዳንዳእስ። ታዉ ኡባፈ አꬍዳ ናጋራንቹዋስ ፆሳይ ባ ማሮታ ዳርስስ።
1TI 1:17 አይፈን በንቶናይሳስ፥ እስ ፆሳስ፥ ሀይቆናይሳስ፥ መርና ካዋስ፥ መርናፐ መርና ጋካናዉ ጋላታይነ ቦንቾይ ግዶ። አምንእ።
1TI 1:18 ፅሞትዮሳ፥ ታ ናአዉ፥ ካሰ ነባ ናበት ኦድዳ ቃላ ቦላ ኤቃዳ ሀ ኪታ ሀዳራ ነዉ እማይስ። ነ ሄ ቃላ ካልኮ ሎኦ ኦላ ኦለታና።
1TI 1:19 አማኖይነ ሎኦ ካህ ነዉ ደኦ። እሶት እሶት ካሀ ꬋይድ ማርካበይ ሆበን ꬋየይሳዳ ባንታ አማኑዋ ꬋይስዶሶና።
1TI 1:20 ሄሳ ሀንዳይሳታ ግዶን ሄመነዮስነ እስክንድረይ ደኦሶና። ኤንቲ ታማርድ ፆሳ ጫየይሳ አጋና መላ ታኒ ፃላሄስ ኤንታና አꬃ እማስ።
1TI 2:1 ኡባፈ ስንꬃታዳ፥ አሳ ኡባስ ፆሳ ኦይቻናዉ፥ ዎሳናዉ፥ ጋናታናዉነ ጋላታናዉ በሰይሳ ታኒ ነና አኬክሳይስ።
1TI 2:2 ኑኒ ቱማ አያና ደኦንነ ጌሻተꬃን ፆሳ ጎይንሸ ሳሮተꬃንነ ዎፑ ግዳ ደኦን ዳና መላ ካዎታስነ ሹማታ ኡባስ ዎስተ።
1TI 2:3 ሄሳ መላ ዎሳይ ኑና አሽያ ፆሳ ስንꬃን ሎኦነ ኡፋይስያባ።
1TI 2:4 ፆሳይ አስ ኡባይ አታናዳነ ቱማ ኤራናዳ ኮዬስ።
1TI 2:5 እስ ፆሲ ደኤስ። ፆሳፈነ አሳፐ ግዶን ግድድ ስገꬅያ እሶይ ደኤስ፤ እካ አሰ ግድዳ ክርስቶስ የሱሳ።
1TI 2:6 እ አሳ ኡባ ዎዛናዉ ባና አꬅድ እሚስ። ፆሳይ ባ ዎድያን አሳ ኡባ ዎዛናዉ ኮየይሳ በሲያ ማርካይ ሀይሳ።
1TI 2:7 ፆሳይ ታና ዎንገላስ አስታማረነ ሀዋረ ኦꬅድ ዶርዳይ ሄሳሳ። ታኒ ቱማ ኦዳይስ፤ ዎርዶትከ፤ አማኖንነ ቱማን አይሁደ ግዶና አሳስ ማርካታና መላ ፆሳይ ታና ሹምስ።
1TI 2:8 ሄሳ ግሾ፥ ኡባ በሳን ደእያ አደት፥ ባንታና ፆሳስ ዱማይድ፥ ሀንቆነ ፓላማ ድግድ፥ ባንታ ኩሽያ ፑደ ደንꬅድ ፆሳ ዎሳና መላ ኮያይስ።
1TI 2:9 ሄሳዳ ማጫሳይ ባንታና ሃርዳይሳ ቆንጭስያ፥ ቦንቾይነ ማር ደእያ ማኡዋ ማአናዉ በሴስ። ኤንቲ ማር ባይና ሁጰ ዳꬃን፥ ዎርቃን ዎይኮ እንቆን፥ ዎይኮ አልኦ አፍላን ባንታና አሌቅሶፖ።
1TI 2:10 ሽን ፆሳስ ጎይናይስ ግያ ማጫሳይ ባንታዉ በሰይሳዳ ሎኦባ ኦꬆና።
1TI 2:11 ማጫስ ኪተተꬃን ስእ ግድ ታማሮ።
1TI 2:12 ታኒ ማጫሳይ ታማርሳና መላ ዎይኮ አደ ቦላ አዋታና መላ ግዶናሽን፥ ስእ ግድ ዳና መላ ኮያይስ።
1TI 2:13 አዳመይ ኮይሮ መትስ፤ ጉየፐ ሄዋና መታሱ።
1TI 2:14 ቃስ ጭመታዳ ፆሳ ህግያ መንꬅዳይ ማጫስፐ አትሽን፥ አዳመ ግደና።
1TI 2:15 ሽን ማጫስ አማኖን፥ ሲቆንነ ጌሻተꬃን ባንታና ሃርድ ደእኮ ናይታ የሎን አታና።
1TI 3:1 ኦንካ፥ “ዎሳ ኬꬅ ካለꬅያ አስ ግዳናዉ ኮይኮ ሎኦባ አሞቴስ” ግያ ኦዳይ ቱማ።
1TI 3:2 ዎሳ ኬꬃ ካለꬅያ አስ ቦረቶናይሳ፥ እስ ማቸ ፃላል ደኤይሳ፥ ማራን ደኤይሳ፥ ባና ሃረይሳ፥ በሰይሳዳ ኦይሳ፥ እማ ሞከይሳ፥ ታማርሳናዉ ዳንዳኤይሳ፥
1TI 3:3 ማꬆቶናይሳ፥ ኦየቶናይሳ፥ ፓላሞናይሳ፥ ሚሸ ሲቆናይሳ፥
1TI 3:4 እያ ናይት እያዉ ኪተተይሳነ ቦንቸይሳ፥ ባ ኬꬃ አይሳናዉ ዳንዳኤይሳ ግዳናዉ በሴስ።
1TI 3:5 እስ አስ ባ ኬꬃ አይሳናዉ ዳንዳኦና እፅኮ፥ ፆሳ ዎሳ ኬꬅ ዋት አይሳናዉ ዳንዳኢ?
1TI 3:6 ኦቶሮን ሱገትድ፥ ፃላሄይ ፆሳ ፕርዳን ኩንድዳይሳዳ ኩንዶና መላ፥ ኦራꬅ አማንዳ አስ ግዳናዉ በሰና።
1TI 3:7 ቦረንነ ፃላሄ ፅሄን ገሎና መላ ሄ ኡራይ አማኖና አሳ ማታን ናሸተይሳ ግዳናዉ በሴስ።
1TI 3:8 ሄሳዳ ቃስ ዎሳ ኬꬃ ዳቆነት ቦንቸትዳይሳታ፥ ናምኡ ዶና ኦደቶናይሳታ፥ ዳሮ ዎይነ ኡሹ ኡዮናይሳታ፥ ሚሸ ያረቶናይሳታ፥
1TI 3:9 አማኑዋ ፁራ ጌሻ ካሀን ናገይሳታ ግዳናዉ በሴስ።
1TI 3:10 ኤንቲ ኮይሮትድ ፓጨታናዉ ኮሼስ፤ ኤንታ ቦላ ቦረይ ባይና እፅኮ፥ ዎሳ ኬꬃ ዳቆነ ግድድ ኦꬆ።
1TI 3:11 ሄሳዳካ፥ ኤንታ ማጫሳት ቦንቸትዳይሳታ፥ ዝግሮናይሳታ፥ ማራን ደኤይሳታ፥ ኡባባን አማነተይሳታ ግዳናዉ በሴስ።
1TI 3:12 ዎሳ ኬꬃ ዳቆነት እስ ማች ፃላል ደኤይሳ ግዶ። ባ ናይታነ ባ ኬꬃ ሎይꬅ አይሰይሳ ግዳናዉ በሴስ።
1TI 3:13 ዎሳ ኬꬃ ዳቆነ ግድድ፥ ሎኦ ኦሶ ኦይሳት፥ ኤንታዉ ግታ ቦንቾ ቃስ ክርስቶስ የሱሳን ባንታዉ ደእያ አማኑዋባ ኦዳናዉ ዳሮ ምኖተꬅ ደማና።
1TI 3:14 ታኒ ሀ ኪታ ነዉ ፃፋሸ፥ ኤለሳዳ ኔኮ ባና ጋዳ ኡፋይስ ዎꬃይስ።
1TI 3:15 ሽን ታኒ ቦና ጋምእኮ፥ ፆሳ ኬꬃን አሳይ ዋንድ ዳናዉ በሲያኮ ኤራና መላ ሀይሳ ነዉ ፃፋይስ። ደኦ ፆሳ ኬꬃይ ቱማተꬃስ ቱስነ ባሶ።
1TI 3:16 ኑ አማኑዋ ፁራይ ስይ ባይና ግታ። ክርስቶስ አሾ ማእድ ቆንጭስ፤ እያ ቱማተꬃ ጌሻ አያናይ ማርካትስ። ኪታንቾታስ በንትስ፤ እ ካዎተꬃ ኡባስ ሳባከትስ። አላመን ደእያ አሳን አማነትስ፤ ቦንቾን ሳሎ ኤከትስ።
1TI 4:1 ያና ዎድያን ባለꬅያ አያናታነ ቱና አያናታ ትምርተ ካልድ፥ እስ እስ አሳይ አማኑዋ ካዳናይሳ ጌሻ አያናይ ቆንጭስድ ኦድስ።
1TI 4:2 ሄሳ መላ ትምርተይ ኤንታ ካሀይ ዶጭን፥ አሳ ባለꬅያ ዎርዳንቾ አስታማረታፐ ዬስ።
1TI 4:3 ሄሳ መላ አሳት ኤኮነ ገሎ ቃስ እስ እስ ካꬃታ ሞና መላ ድጎሶና። ሽን አማነይሳትነ ቱማ ኤረይሳት ፆሳ ጋላት ዎስድ ማና መላ ፆሳይ ካꬅ መꬍስ።
1TI 4:4 ፆሳይ መꬍዳ ኡባባይ ሎኦ። ፆሳ ጋላትድ ሚኮ ዎራ ዎꬍያባይ አይብካ ባዋ።
1TI 4:5 ኡባባይ ፆሳ ቃላንነ ዎሳን ጌሽ ግዴስ።
1TI 4:6 ሄሳ ግሾ፥ ኔኒ ሀ ትምርትያ አማነይሳታ ታማርስኮ፥ ኑ አማኑዋንነ ሎኦ ትምርትያ ኪተታዳ ድጭዳ፥ ክርስቶስ የሱሳ ሎኦ አይለ ግዳና።
1TI 4:7 ሽን ጎእ ባይና ቱማ ግዶና ኦዳፐነ ጭማ ማጫሳ ሀይሰፐ ባቃታ። ቱማ አያና ደኦን ዳናዉ ነና ሎህሳ።
1TI 4:8 አስ ባ አሳተꬃ ምንꬃናዉ ኦꬅያ ኦሶይ ጉꬃስ ማዴስ። ሽን ቱማ አያና ደኦን ባና ሎህሶይ ሀእስካ መርናዉካ ደኦ እምያ ኡፋይስ ደእያ ግሾ፥ ኡባስ ማዴስ።
1TI 4:9 ሀ ቃላይ አሳ ኡባይ ኤካናዉ በሲያ ቱማ ኦዳ።
1TI 4:10 ኑኒ አሳ ኡባ፥ ኡባፈ አꬅድ አማነይሳታ አሽያ ደኦ ፆሳፈ ኤካና ግድ ኡፋይሳን ናግያ ግሾ፥ ሄሳስ ኑኒ ኦሶን ዳቡሮስነ ባፀቶስ።
1TI 4:11 ሀይሳ ኪታነ ታማርሳ።
1TI 4:12 ኔኒ ያላጋ ግድያ ግሾ፥ ነና ኦንካ ካꬎፖ። ሽን አማነይሳታስ ኔኒ ኦዳን፥ ኦሶን፥ ሲቆን፥ አማኖንነ ጌሻተꬃን ሌምሶ ግዳ።
1TI 4:13 ታኒ ያና ጋካናዉ አሳስ ጌሻ ማፃፋ ናባቦን፥ ሳባኮንነ ታማርሶን ምና።
1TI 4:14 ትንብተይ ኦደትን፥ ጭማት ባንታ ኩሽያ ነ ቦላ ዎꬅዳ ዎደ ኔኒ ኤክዳ፥ ነናን ደእያ ጌሻ አያና እሞታ ካꬎፓ።
1TI 4:15 ነ ድቻይ አሳ ኡባስ ቆንጫና መላ ሄሳ ምንꬃ ቆፓ፤ ሀይሳ ኡባ ዎደ ኦꬃ።
1TI 4:16 ነ ሁጵያስነ ነ ትምርትያስ ናገታ። ኔኒ ሄሳ ኡባ ዎደ ኦꬅኮ ነናነ ነና ስኤይሳታ አሻሳ።
1TI 5:1 ጭማ አደታ ነ አዋዳ ቦንቻፈ አትሽን፥ ሀንቀቶፋ። ያላጋ አደታ ነ እሻዳ ኦꬃዳ ፄላ።
1TI 5:2 ጭማ ማጫሳታ ነ አይዳ፥ ያላጋ ማጫሳታ ነ ምችዳ፥ ፖሎ ጌሻተꬃን ኦይካ።
1TI 5:3 አዝን ሀይቅዳ ቱማ አምኤታ ቦንቻ።
1TI 5:4 ሽን አምኤስ ናይት ዎይኮ ናይታ ናይት ደእኮ፥ ሄ ናይት ቱማ አያና ደኦን ደኤይሳ በሳናዉ ባንታና የልዳይሳታነ፥ ባንታ ዎጋ አይዉነ ዎጋ አዋ ማድድ ኩሸ ዛሮ ታማሮ። ሄስ ፆሳ ኡፋይስያባ።
1TI 5:5 ባርካ ደእያ ቱማ አምእያ ፆሳፈ ማደ ደማናዉ ኡፋይሳን ናጋሱ። ጋላስነ ቃማ ፆሳይ ባና ማዳና መላ ዎሳዉሱነ ኦይቻዉሱ።
1TI 5:6 ሽን ሀ አላምያን ሎኦ ዱሳ ፃላላ ኮይያ አምእያ ፓፃ ደአሸ ሀይቅዳሮ።
1TI 5:7 ኦንካ ኤንታ ቦሮና መላ ሀ ኪታ ኤንታዉ እማ።
1TI 5:8 ሽን ባ ዳቦታስ፥ ኡባፈ አꬅድ ባ ሶ አሳስ ቆፖና ኦንካ ባ አማኑዋ ካድዳይሳ፤ አማኖና አሳፐካ አꬍዳ ኢታ።
1TI 5:9 ላይꬅ ኡሱፑን ታሙ ኩምቦና አምኤ ሱንꬃ ማዝጋበን ፃፎፓ። ቃስ ሄሳ ቦላ እያ ባ አዝናስ አማነትዳሮ ግዳናዉ ኮሼስ።
1TI 5:10 ናይታ ድሾን፥ እማꬃ ሞኮን፥ ጌሻታ ቶሁዋ ሜቻን፥ መቶትያ አሳ ማደን፥ ሎኦ ኦሶ ኡባስ ባና አꬃ እምዳሮነ ሎኦ ኦሶን ኤረትዳሮ ግዳናዉ በሴስ።
1TI 5:11 ሽን ያላጋ አምኤታ ሱንꬃ ማዝጋበን ፃፎፓ። ኤንታና አዝና ገሎ ገሎ ግያ አሾ አሞይ ኦይክያ ዎደ ክርስቶሳ አጋና።
1TI 5:12 ኤንቲ ኮይሮ ገልዳ ቃላ መንꬅዳ ግሾ ፕርደታና።
1TI 5:13 ሄሳ ቦላ ኤንቲ ኦሶ ꬋይድ ኬꬃፈ ኬ ዩያና። ዩሻ ፃላላ ግዶናሽን፥ ዝግርሳንነ ባንታና ጋꬆናባን ገልድ በሶናባ ኦደቶሶና።
1TI 5:14 ሄሳ ግሾ፥ ኑ ሞርከት ኑ ቦላ ኦደትያ ኢታባ ደሞና መላ ያላጋ አምኤት አዝና ገልድ፥ ናአ የልድ፥ ባንታ ኬꬃ አይሳና መላ ዞራይስ።
1TI 5:15 ሀይሳፈ ካሰ ጉꬃ አምኤት ፃላሄ ካላናዉ ጉየ ስምዶሶና።
1TI 5:16 እስ አማንያ ማጫሴስ ሶ አሳ ግዶን አምኤት ደእኮ፥ እያ ኤንታ ማዳናዉ በሴስ። ሄሳዳ ኦꬅኮ፥ ዎሳ ኬꬃስ ቶሆይ ካዉዬስ። ሄ ዎደ ዎሳ ኬꬃይ ማደ በሲያ ቱማ አምኤታ ማዳናዉ ዳንዳኤስ።
1TI 5:17 ዎሳ ኬꬅ ሎይꬅ ሄምያ ጭማት፥ ኡባፈ አꬅድ፥ ቃላ ሳባኮንነ ታማርሶን ዳቡረይሳት ዳኮ ቦንቾ ኤካናዉ በሴስ።
1TI 5:18 ጌሻ ማፃፋይ፥ “ዉዱማን ካꬃ የꬍያ ቦራ ዶና ቃቾፋ” ሄሳዳካ፥ “ኦሳንቾይ ባ ዳሞዝያ ኤካናዉ በሴስ” ያጌስ።
1TI 5:19 ናምኡ ዎይኮ ሄꬑ ማርክ ባይና፥ ዎሳ ኬꬃ ጭማ ሞትያባ ስኦፓ።
1TI 5:20 ሀራት ያያና መላ ናጋራ ኦꬅያ ኦናካ አሳ ኡባ ስንꬃን ሀንቀታ።
1TI 5:21 ኔኒ አሳ ሶምኦ በኦና፥ እሱዋ እሱዋፈ ዱማዮና ሀ ኪታ ናጋና መላ ፆሳ፥ ጎዳ የሱስ ክርስቶሳነ ዶረትዳ ኪታንቾታ ስንꬃን ታ ነና ዞራይስ።
1TI 5:22 ኦደ ቦላካ ነ ኩሽያ ዎꬃዳ ሹማናዉ ኤለሶፓ። ሀራታ ናጋራን ገሎፓ፤ ነና ጌሻተꬃን ናጋ።
1TI 5:23 ኔኒ ኡባ ዎደ ሀርገትያ ግሾነ ነ ኡሎ ሀርግያ ግሾ ሃꬃ ፃላላ ኡዮፓ፤ ጉꬃ ዎይነ ኡያ።
1TI 5:24 እስ እስ አሳታ ናጋራይ ቆንጨ፤ ኤንታ ናጋራይ ኤንታ ፕርዳናዉ ኤንታፈ ስን አꬌስ፥ ሽን ሀራታ ናጋራይ ጉየፐ ጋምእድ ቆንጬስ።
1TI 5:25 ሄሳዳ፥ ሎኦ ኦሶይካ ቆንጨ፤ ቆንጮና እፅኮካ ጌማናዉ ዳንዳኤና።
1TI 6:1 ፆሳ ሱንꬃይነ ኑ ትምርተይ ጫየቶና መላ አይለተꬃን ደኤይሳት ባንታና ሃርያ ጎዳታ ቦንቾ።
1TI 6:2 አማንያ ጎዳት ደእያ አይለት፥ ኤንታ ጎዳት ኤንታዉ እሻ ግድያ ግሾ ኤንታ ካꬎፖ። ኤንታ ኦሱዋን ማደትያ ጎዳት፥ አማነይሳታነ ዶሰትዳይሳታ ግድያ ግሾ ኤንቲ ካሰፐ አꬅድ ኦꬃናዉ በሴስ። ኔኒ ሀይሳ ታማርሳናዉነ ኤንቲ ኦꬃና መላ ዞራናዉ በሴስ።
1TI 6:3 ኦንካ ዱማ ትምርተ ታማርስያባ ግድኮ፥ ኑ ጎዳ የሱስ ክርስቶሳ ቱማ ቃላራነ ኑ አማኖ ትምርትያራ ጋሄተና።
1TI 6:4 ሄ ኡራይ ኦቶሮን ሱገቴስፐ አትሽን፥ አይኮካ ኤረና። ኤንታዉ እስ ቆፋ ቦላ ፓላማናዉነ ኦየታናዉ ኢታ አሞይ ደኤስ። ሄስ ቃናተ፥ ኦሽ፥ ጫሸ፥ ኢታ ስነ፥
1TI 6:5 ጊጎና ፓላማ ካለꬄስ። ቃስ ኤንታዉ ኢታ ዎዛን ደኤስ፤ ቱማ ባልዶሶና፤ ኤንቲ ፆሳ አማኖይ ዱረተꬃስ ኦገ ግድ ቆፖሶና።
1TI 6:6 ሽን ታዉ ደእያባይ ግዳና ግያ አሳስ ቱማ አያና ደኦይ ግታ ዎ።
1TI 6:7 ኑኒ ሀ አላምያ አይኮካ ኤህቦኮ፤ ቃስ እያፐ አይኮካ ኤክድ ቦኮ።
1TI 6:8 ኑስ ካꬅነ ማኦይ ደእኮ ሄስ ግዳና።
1TI 6:9 ሽን ዱረተꬅ ኮየይሳት ፓጨንነ ፅሄን ገሎሶና። ቃስ ኤንታና ዱገ ዳፍያነ ꬋይስያ ኤያተꬅነ ቆህያ አሞን ኩንዶሶና።
1TI 6:10 ሚሸ ሲቆይ ኢታተꬃ ኡባስ ፑልቶ። እሶት እሶት ሚሸ አሞትሸ አማኖፐ ባለትድ ዳሮ መቶን ባንታና የግዶሶና።
1TI 6:11 ሽን ነኖ፥ ፆሳ አሶ፥ ሄሳፈ ባቃታ። ፅሎተꬃ፥ ፆሳ ዳኖ፥ አማኖ፥ ሲቆ፥ ዳንዳአነ አሽከተꬅ ካላ።
1TI 6:12 አማኖ ባፅያ ሎይꬃ ባፀታ። ዳሮ አሳ ስንꬃን ነ ማርካትዳ ነ አማኑዋባ፥ ፆሳይ ነና እያዉ ፄግዳ መርና ደኡዋ ኦይካ።
1TI 6:13 ኡባስ ደኦ እምያ ፆሳ ስንꬃንነ፥ ጰንፀ ጵላፆሳ ስንꬃን ሎኦ ማርካ ማርካትዳ ክርስቶስ የሱሳ ስንꬃን ታ ነና ኪታይስ።
1TI 6:14 ኑ ጎዳ የሱስ ክርስቶሲ ቆንጫና ጋካናዉ ሀ ኪታ ባልነ ቦረይ ባይና ናጋ።
1TI 6:15 ባ ፃላላ ኡባ ሃርያ ቦንቾ ፆሳይ፥ ካዎታ ካዎይ፥ ጎዳታ ጎዳይ፥ ባ ቆፕዳ ቃማን የሱስ ክርስቶሳ ዛር ኪታና።
1TI 6:16 እስ እያ ፃላል ሀይቀና። ኦንካ ሺቃናዉ ዳንዳኦና ፖኦን ደኤስ። ኦንካ እያ በእቤና፤ ቃስ በአናዉካ ዳንዳኤና። ቦንቾይነ መርና ዎልቃይ እያዉ ግዶ። አምንእ።
1TI 6:17 ሀ አላምያ ዱረት ጮ ꬋይያ ሻሎን ኦቶርቶና መላነ ጬቆና መላ ኦዳ። ኑስ ኮሽያባ ፓላህስድ እምያ ኑና አንጅያ፥ ዱረ ፆሳን አማነታና መላ ኤንታ ኪታ።
1TI 6:18 ኤንቲ ሎኦ ኦሶ ኦꬃናዳ ሎኦ ኦሶን ዱረታናዳ፥ ኬሀታነ ሀራታስ ሻከይሳታ ግዳና መላ ኪታ።
1TI 6:19 ሄስ ኤንታዉ ስንꬃስ ምኖ ባሶ ግድያ ግሾ፥ ሄ ዎደ ኤንቲ ቱማ ደኦይ አይ ዳንያኮ ኤራና።
1TI 6:20 ፅሞትዮሳ፥ እስ እስ አሳይ፥ “ኤራተꬅ” ግያ ኤያ ፓላማፐነ ሀዳ ኦዳፐ ባቃታ፤ ነዉ እመትዳ ሀዳራ ናጋ።
1TI 6:21 እሶት እሶት ኑስ ኤራተꬅ ደኤስ ያግሸ አማኑዋ አግዶሶና። ፆሳ አꬎ ኬሀተꬃይ ህንተ ኡባራ ግዶ።
2TI 1:1 ፆሳ ሸነን፥ የሱስ ክርስቶሳን በንትዳ ደኦ ኡፋይሳ ማርካታናዉ የሱስ ክርስቶሳ ሀዋረ ግድዳ ጳዉሎሳፐ፥
2TI 1:2 ታ ዶስያ ናኣ ፅሞትዮሳስ ኪተትዳ ኪታ። ፆሳ አዋፐነ ኑ ጎዳ ክርስቶስ የሱሳፐ አꬎ ኬሀተꬃይ፥ ማሮተꬃይነ ሳሮተꬃይ ነዉ ግዶ።
2TI 1:3 ታኒ፥ ታ ዎሳን ቃማነ ጋላስ ነና ቆፓይስ። ታኒ ዎስያ ዎደ ታ ማይዛታ ፆሳነ ታኒ ሎኦ ካሀን ሀጋዝያ ፆሳ ነ ግሾ ጋላታይስ።
2TI 1:4 ታኒ ነ አፉꬃ ቆፓይስ፤ ነና በአዳ ኡፋይታናዉ ዳሮ ላሞታይስ።
2TI 1:5 ቃስ ነዉ ደእያ ቱማ አማኑዋ ኤራይስ። ሄ አማኖይ በን ነ ዎጋ አየ ሎይድንነ ነ አየ ኤዉንቅን ደእያ አማኑዋ መላ።
2TI 1:6 ሄሳ ግሾ፥ ታኒ ታ ኩሽያ ነ ቦላ ዎꬅዳ ዎደ ፆሳይ ነዉ እምዳ እሞታ ኔኒ ዛራ ኤꬃና መላ አኬክሳይስ።
2TI 1:7 አይስ ጊኮ፥ ፆሳይ ኑስ ዎልቃ፥ ሲቆነ ኑ ሁጰ ሃርያ አያና እሚስፐ አትሽን፥ ያሻ አያና እምቤና።
2TI 1:8 ህዛ፥ ኑ ጎዳስ ማርካታናዉ ዬላቶፓ፤ ቃስ እያ ግሾ ቃሸትዳ ታናንካ ዬላቶፓ። ሽን ፆሳይ ነዉ እምያ ዎልቃን ዎንገላ ግሾ፥ ታራ መቶ ኤካ።
2TI 1:9 ፆሳይ ባ ሸነንነ ባ አꬎ ኬሀተꬃን ኑና አሽድ፥ ባ ጌሻ ደረ ኦꬃናዉ ኑና ዶርስፐ አትሽን፥ ኑኒ ኦꬅዳ ኦሱዋ ግሾ ግደና። ሀ አꬎ ኬሀተꬃ ክርስቶስ የሱሳ ባጋራ መርና ዎደታፔ ስን ኑስ እሚስ።
2TI 1:10 ሀእ ሀ አꬎ ኬሀተꬃይ ኑና አሽያ ክርስቶስ የሱሳ ዩሳን ቆንጭስ። እ ሀይቆ ዎልቃ ꬋይስድ፥ ዎንገላ ባጋራ ꬋዮና ደኦ ኑስ ቆንጭስስ።
2TI 1:11 ታኒ ዎንገላ ሳባከ፥ ሀዋረነ አስታማረ ግዳና መላ ፆሳይ ታና ዶርስ።
2TI 1:12 ታኒ ሄሳ ግሾ ሀ መቱዋ ኤካይስ፤ ሽን ታ አማነይ ኦነኮ ኤርያ ግሾ ዬላትከ። ታዉ እመትዳ ሀዳራ ሄ ጋላሳይ ጋካናዉ እ ናጋናዉ ዳንዳኤይሳ ኤራይስ።
2TI 1:13 ታኒ ነና ታማርስዳ ቱማ ቃላ ሌምሶ ኦꬃ ኦይካዳ ክርስቶስ የሱሳ ባጋራ ኑባ ግድዳ አማኑዋንነ ሲቁዋን ደአ።
2TI 1:14 ኑ ግዶን ደእያ ጌሻ አያና ዎልቃን ነዉ እመትዳ ሎኦ ሀዳራ ናጋ።
2TI 1:15 ኢሰ ቢታን ደእያ ኡባይ ታፐ ሃክዳይሳ ኤራሳ፤ ኤንታ ግዶን ፍገሉስነ ሄርሞገኔስ ደኦሶና።
2TI 1:16 አነስፎር ታና ዳሮ ዎደ ምንꬅዳ ግሾ ጎዳይ እያ ሶ አሳስ ቃቶ። ታኒ ቃሾ ኬꬃን ደእያ ዎደ እ ታናን ዬላትቤና።
2TI 1:17 ሄሳ ቦላ እ ሮመ ካታማ ይዳ ዎደ ታና ምንꬅ ኮይድ ደምስ።
2TI 1:18 ዉርሰꬃ ጋላሳን ጎዳይ እያዉ ቃታና መላ ታኒ ጎዳ ዎሳይስ። ኤፈሶና ካታማን እ ታና አይ መላ ማድዳኮ ነ ሎይꬃ ኤራሳ።
2TI 2:1 ህዛ፥ ታ ናአዉ፥ ክርስቶስ የሱሳን ደእያ ማሮተꬃን ምና።
2TI 2:2 ዳሮ ማርካታ ስንꬃን ታኒ ነና ታማርስዳ ትምርትያ፥ ሀራታ ታማርሳናዉ ዳንዳእያ አማነትዳ አሳስ ሀዳራ እማ።
2TI 2:3 የሱስ ክርስቶሳስ አማንꬅያ ዎታዳረ ግዳዳ ታራ መቶ ኤካ።
2TI 2:4 ኦላ ዎታዳረይ ባ ቶራ ሞጮና ኡፋይሳናዉ ጊገቴስፐ አትሽን፥ ሀራ ኦሶን ባና ፔሸና።
2TI 2:5 ሄሳዳካ፥ ጋደ ዎፅያ ኦንካ በሲያ ኦገራ ጋደቶና እፅኮ ዎይቶ ኤከና።
2TI 2:6 ጎሻን ዳቡርያ ጎሻንቾይ ባ ዳቡራ አይፍያፐ ምያ ኮይሮ አስ ግዳናዉ በሴስ።
2TI 2:7 ነ አኬካና መላ ጎዳይ ነና ማዳና ግሾ፥ ታ ነዉ ኦድዳባ ነ ዎዛናን ናጋ።
2TI 2:8 ታኒ ማርካትያ ዎንገላ መላ ሀይቆፐ ደንድዳ፥ ዳዊታ ኮቸ ግድዳ የሱስ ክርስቶሳ ቆፓ።
2TI 2:9 ታኒ ዎንገላ ኦድያ ግሾ፥ ኢታባ ኦꬅዳ አሳዳ፥ ቃሸታዳ መቶ ኤካይስ። ሽን ፆሳ ቃላይ ቃሸተና።
2TI 2:10 ሄሳ ግሾ፥ ፆሳይ ዶርዳ አሳት ክርስቶስ የሱሳን ደእያ አቶተꬃ መርና ቦንቹዋራ ኤካና መላ ኤንታ ግሾ ኡባባን ዋየታይስ።
2TI 2:11 ሀይሳዳ ግያ ቱማ ቃል ደኤስ፤ “ኑኒ እያራ ሀይቅዳባ ግድኮ፥ እያራ እስፈ ደአና።
2TI 2:12 ኑኒ ገንጭኮ፥ እያራ እስፈ ካዎታና። ኑኒ እያ ካድኮ፥ እ ኑና ካዳና።
2TI 2:13 ኑኒ አማነቶና እፅኮ፥ እ አማነትዳይሳ ግድድ ዳና። አይስ ጊኮ፥ እ ባና ካዳናዉ ዳንዳኤና” ያጌስ።
2TI 2:14 ኔኒ ኤንታ ሀይሳ አኬክሳ፤ ኤንቲ ቃላታ ጋሶን ፓላሞና መላ፥ ጎዳ ስንꬃን ኤንታ ዞራ። ሄስ ስኤይሳታ ꬋይሰስፐ አትሽን፥ አይኮካ ማደና።
2TI 2:15 ኔኒ ቱማ ቃላ ሱረተꬃን ታማርሰይሳነ ዬላዮና ኦሳንቾ ግዳዳ፥ ፆሳይ ናሽያ አሳዳ፥ ነናተꬃ እያዉ እማናዉ ምና።
2TI 2:16 ሽን ሀ አላምያስ እንጀትያ ጎኦና ኦዳፐ ባቃታ። ሄሳ መላ ኦዳይ አሰ ፆሳፈ ሃሴስ።
2TI 2:17 ሄሳ መላ ኦዳይ አሳተꬅ ምድግያ ፓፆና ዎይዛዝረ ማዱንꬃ መላ። ሄሳ መላ ኦዳ ኦደተይሳታ ግዶፈ ሄመነዮስነ ፍልፆስ ደኦሶና።
2TI 2:18 ሀ አሳት ቱማ ኦግያ አግድ፥ “ሀይቅዳ አሳይ ሀይቆፐ በን ደንድዶሶና” ያግድ ጉꬃ አሳታ አማኑዋ ꬋይስዶሶና።
2TI 2:19 ግዶሽን፥ ፆሳይ ምኖ ዛላ ሂፅዳ ግሾ ቃፃናዉ ዳንዳኤና። እያ ቦላ፥ “ጎዳይ ባ አሳ ኤሬስ። ጎዳ ሱንꬃ ፄግያ ኦንካ ኢታ ኦሶፐ ሃኮ” ግያ ቃላይ ፃፈትስ።
2TI 2:20 እስ ግታ ኬꬃን ዎርቃፈ ዎይኮ ብራፐ ኦሰትዳ ሚሸታ ፃላላ ግዶናሽን፥ ምꬃፈ ዎይኮ ኡርቃፈ ኦሰትዳ ሚሸትካ ደኦሶና። ሄሳታፐ ባጋት ቦንቾ ኦሶስ፥ ቃስ ባጋት ቶሸትያ ኦሶስ ፔኦሶና።
2TI 2:21 ሄሳ ግሾ፥ ኦንካ ኢታ ኡባ አግኮነ ባና ጌሽኮ፥ ቦንቾ ኦሶ ኦꬅያ ሚሸ ግዳና። ኤንታ ደኦይ ጌሽነ ጎዳ ኡፋይስያባ፥ ቃስ ኤንቲ ሎኦ ኦሶ ኡባ ኦꬃናዉ ዳንዳኤይሳታ ግዳና።
2TI 2:22 ናአተꬃ ኢታ አሙዋፐ ባቃታ። ጌሻ ዎዛናን ጎዳ ፄግያ አሳታራ እስፈ፥ ፅሎተꬃ፥ አማኑዋ፥ ሲቆነ ሳሮተꬃ ካላ።
2TI 2:23 ሽን ኦሽ መይሳ ኤራዳ ኤያተꬅነ ሀዳ ግድዳ ፓላማፐ ሃካ።
2TI 2:24 ጎዳ ኦሳንቾይ አሳ ኡባስ ኬሀ፥ ሎኦ ታማርሰይሳነ ዳንዳአንቾ ግዳናዉ በሴስፐ አትሽን፥ ኦየታናዉ በሰና።
2TI 2:25 እ ባራ ኤቀተይሳታ አሽከተꬃን ሴረይሳ ግዳናዉ በሴስ። ኤንቲ ባንታ ናጋራፐ ስሚድ ቱማ ኤራናዳ ፆሳይ ኦꬃነኮ ኦን ኤር።
2TI 2:26 ኤንቲ ባንታ ዎዛናኮ ስሚድ ባ ሸንያ ኦꬃና መላ ኤንታ ኦይክዳ ፃላሄ ፅህያፐ ከስ ኤካና።
2TI 3:1 ዉርሰꬃ ጋላሳን ኡንኤꬅያ ዎደይ ያናይሳ ኤራ።
2TI 3:2 አሳይ ባንታና ዶሰይሳታ፥ ሚሸ ሲቀይሳታ፥ ጬቀተይሳታ፥ ኦቶረይሳታ፥ ጫየይሳታ፥ ባንታና የልዳይሳታስ ኪተቶናይስታ፥ ጋላቶናይስታ፥ ጌሻተꬅ ባይናይሳታ፥
2TI 3:3 ሲቆይ ባይናይሳታ፥ ማሮተꬅ ኤሮናይሳታ፥ ዝግረይሳታ፥ ባንታና ሃሮናይሳታ፥ ዎዛና ምኖታ፥ ሎኦ ዶሶናይሳታ፥
2TI 3:4 ሞርኬስ አꬅድ እመይሳታ፥ ቆፍ ባይናይሳታ፥ ኦቶሮን ሱገተይሳታ፥ ፆሳፈ አꬅድ አሾ ኡፋይሳናዉ ዶሰይሳታ ግዳና።
2TI 3:5 ኤንቲ አማንያ ዳኖሶናፐ አትሽን፥ አማኖ ዎልቃ ካዶሶና፤ ኔኒ ሄሳ መላ አሳታፐ ባቃታ።
2TI 3:6 ኤንታፈ እሶት እሶት አሳ ኬꬃ ገልድ ናጋራን ኦይከትዳይሳታነ ዱማ ዱማ አሞን ሱገትያ ዳቡራንቾ ማጫሳታ ቦላ ጎዳቶሶና።
2TI 3:7 ሄ ማጫሳት ኡባ ዎደ ታማሮሶናሽን፥ ቱማ ኤራናዉ ዳንዳኦኮና።
2TI 3:8 ያነስነ ያምባሬስ ሙሰራ ኤቀትዳይሳዳ ሀ አሳት ጉገይ ኦꬆናይሳታነ አማኖን ኩንድዳ አሳታ ግድያ ግሾ ቱማራ ኤቀቶሶና።
2TI 3:9 ሽን ያነሳነ ያምባሬሳ ኤያተꬃይ ቆንጭዳይሳዳ ኤንታ ኤያተꬃይካ አሳ ኡባ ስንꬃን ቆንጫና ግሾ ኤንታዉ ሀነና።
2TI 3:10 ሽን ኔኒ ታ ትምርትያ፥ ታ ዱሳ፥ ታ ቆፋ፥ ታ አማኑዋ፥ ታ ዳንዳኣ፥ ታ ሲቁዋ፥ ታ ገንጫ፥
2TI 3:11 ታ ጎደተꬃነ ታ መቱዋ ኤራሳ። አንፆከ፥ እቆንዮነን፥ ልስፅራ ካታማታን ታና ጋክዳባነ ታኒ ዳንዳእዳ መቱዋ ኤራሳ፤ ጎዳይ ታና ሄ ኡባፈ አሽስ።
2TI 3:12 ክርስቶስ የሱሳን ፆሳ ኡፋይስያ ደኦ ዳናዉ ኮይያ ኡባይ ጎደታና።
2TI 3:13 ኢታ አሳትነ ባለይሳት ባንታዉ ባለትሸነ ሀራታ ባለꬅሸ ካሰፐ ኢት ኢት ባና።
2TI 3:14 ሽን ነ ታማርዳ ቱማንነ ነ አማንዳ አማኑዋን ኤቃ። ነ ኦደፈ ታማርዳኮ ኤራሳ።
2TI 3:15 ኔኒ ነ ናአተꬃፈ ዶማዳ ክርስቶሳ የሱሳ አማናዳ፥ አቶተꬅ ደምያ ጭንጫተꬅ እማናዉ ዳንዳእያ ጌሻ ማፃፋታ ኤራዳሳ።
2TI 3:16 ጌሻ ማፃፋ ኡባይ ፆሳፈ እመትዳ ቃላ። ሄ ማፃፋይ ቱማ ታማርሳናዉ፥ ባልዳይሳታ ሴራናዉ፥ ሱርሳናዉነ ፅሎተꬃ ዱሳስ ኮሽያ ዞረ እማናዉ ማዴስ።
2TI 3:17 ፆሳ አስ ፖሎነ ሎኦ ኦሶ ኡባ ኦꬃናዉ ጊግዳይሳ ግዳና መላ ማዴስ።
2TI 4:1 ታኒ ነና ፆሳ ስንꬃንነ፥ ካዎ ግድድ ሃራናዉ ቆንጭያ ዎደ ፓፃታነ ሀይቅዳይሳታ ፕርዳናዉ ደእያ ክርስቶስ የሱሳ ስንꬃን ዞራይስ።
2TI 4:2 ቃላ ኦዳ፤ ዎደይ እንጀትን እንጀቶና እፅን ምናዳ ኦዳ። ዳሮ ዳንዳአንነ ታማርሶን አሳ ዞራ ሴራነ ደንꬃ።
2TI 4:3 አሳይ ቱማ ትምርትያ ስኦና እፅያ ዎደይ ያና። ኤንቲ ባንታ አሙዋ ካልድ፥ ባንታዉ ስአናዉ ኡፋይስያባ ኦድያ አስታማረታ ሺሾሶና።
2TI 4:4 ኤንቲ ቱማ ትምርትያ አግድ፥ ቱማ ግዶና ኦዳ ስአናዉ ባንታ ሀይꬃ ዛሮሶና።
2TI 4:5 ሽን ኔኒ ኡባባን ነና ሃራ። መቶ ዳንዳአ። ዎንገላ ማርካተꬃ ኦሱዋ ኦꬃ። ነዉ እመትዳ ፆሳ ኦሶ ኡባ ፖላ።
2TI 4:6 ታኒ ያርሸትያ ዎደይ ጋክስ፤ ሀ አላምያ አጋዳ ብያ ዎደይ ማትስ።
2TI 4:7 ታኒ ሎኦ ኦላ ኦለታስ፤ ታ ጋድያ ዎፃዳ ዉርሳስ፤ አማኑዋ ናጋስ።
2TI 4:8 ስንꬃፈ ፅሎተꬃ ካላቻይ ታና ናጌስ። ሄሳ ፅሎ ፕርዳ ፕርድያ ጎዳይ ሄ ጋላስ ታዉ እማና። ሄሳ ታ ፃላላስ ግዶናሽን፥ እያ ቆንጨꬃ አሞትያ ኡባስ እማና።
2TI 4:9 ኤለሳ ያዳ ታና በአ።
2TI 4:10 ዴማስ ሀእ አላምያ ዶስድ፥ ታና አግድ፥ ተሰሎንቀ ካታማ ብስ። ቀርቅስ ጋላትያ ቢታ፥ ቃስ ትቶይ ድልማፀ ቢታ ብስ።
2TI 4:11 ሉቃሳ ፃላል ታራ ደኤስ። ማርቆስ ፆሳ ኦሶን ታና ማዳናዉ ዳንዳእያ ግሾ፥ ኔራ ኤካዳ ያ።
2TI 4:12 ታኒ ትክቆሳ ኤፈሶና ካታማ ኪታስ።
2TI 4:13 ኔኒ ያሸ፥ ፅሮኣዳ ካታማን ካርፖሳ ማታን አጋዳ ይዳ ታ ኮትያነ ማፃፋታ ታዉ ኤካዳ ያ። ኡባካ ጋልባን ፃፈትዳ ማፃፋታ ኤኮና ዮፓ።
2TI 4:14 ብራታ ቆፅያ እስክንድረይ ታና ዳሮ ቆህስ፤ ጎዳይ እያ ኦሱዋዳ እያዉ ዛራና።
2TI 4:15 እ ኑ ትምርትያ ዳሮ እፅያ ግሾ እያፐ ነና ናጋ።
2TI 4:16 ኮይሮ ታ ሞተትያ ዎደ ኡባይ አግድ ብዶሶናፐ አትሽን፥ ኦንካ ታና ማድቤና። ፆሳይ ሄ ናቁዋ ኤንታዉ ታይቦፖ።
2TI 4:17 ሽን ታኒ ኩመꬃ ኪታ አይሁደ ግዶና አሳ ኡባስ ማርካትን፥ ኤንቲ ስአና መላ ጎዳይ ታ ማታን ኤቅድ ታዉ ዎልቃ እሚስ። ቃስ ኮሻትዳ ጋሞዳ ዶና ዶይዳ ሀይቁዋፐ ታና አሽስ።
2TI 4:18 ጎዳይ ታና ኢታ ኡባፈ አሽድ ባ ሳሎ ካዎተꬃ ሳሮን ኤፋና። እያዉ መርናፐ መርና ጋካናዉ ቦንቾይ ግዶ። አምንእ።
2TI 4:19 ጵርስቅላስ፥ አቅላስነ አነስፎራ ሶ አሳስ ታ ሳሮꬁዋ ኦዳ።
2TI 4:20 ኤራስፆስ ቆሮንቶሳ ካታማን አትስ። ፅሮፍሞስ ሀርገትዳ ግሾ፥ ምልፀ ካታማን አጋስ።
2TI 4:21 ባልጎይ ገላናፐ ስን ኤለሳዳ ያ። ኤዉቡሉስ፥ ጱዴስ፥ ልኑስ፥ ቅላደይነ ሀራ አማንያ አሳት ኡባይ ነና ሳሮ ጎሶና።
2TI 4:22 ጎዳይ የሱስ ክርስቶሲ ነ አያናራ ግዶ። ፆሳ ማሮተꬃይ ህንተ ኡባራ ግዶ።
TIT 1:1 የሱስ ክርስቶሳ ሀዋረይነ ፆሳ አይለይ፥ ጳዉሎስ፥ ፃፍዳ ዳብዳብያ። ፆሳይ ዶርዳ አሳ አማኑዋ ድቻናዳነ ቱማ አያና ደኡዋ ዋንድ ዳነኮ በሲያ ቱማ ኤራኮ ኤንታ ካለꬃናዉ ታኒ ኪተታስ።
TIT 1:2 ሄ አማኖይነ ኤራተꬃይ መርና ደኡዋ ኡፋይሳ ቦላ ዘምፕስ። ሄሳ ዳሮ ዎደፐ ስን ዎርዶቶና ፆሳይ ኑስ እማና ግድ ቃላ ገልስ።
TIT 1:3 ኑና አሽያ ፆሳይ ባ ዎደን ሀ ኪታ ኦዳና መላ ታዉ ሀዳራ እሚስ።
TIT 1:4 ኑ ኮ አማኑዋን ታ ቱማ ናኣ ግድዳ ትቶ፥ ፆሳ አዋፐነ ኑና አሽያ የሱስ ክርስቶሳፐ አꬎ ኬሀተꬃይ፥ ማሮተꬃይነ ሳሮተꬃይ ነዉ ግዶ።
TIT 1:5 ታኒ ነና ቃርፄሳን አጋዳ ይዳይ፥ ኔኒ አትዳባ ጊግሳናዳነ ታኒ ኪትዳይሳዳ ካታማ ኡባን ዎሳ ኬꬃ ጭማታ ዶራና መላሳ።
TIT 1:6 ጭም ቦረቶናይሳ፥ እስ ማቸ አዝና፥ ማራ ꬋዮን ዎይኮ ኪተተꬃ እፆን አስ ቦሮና አማንያ ናይት ደእያ አስ ግዳናዉ በሴስ።
TIT 1:7 ዎሳ ኬꬃ ጭም ፆሳ ኦሱዋ ሀዳራ ኤክዳ ግሾ፥ ቦረቶናይሳ፥ ኦቶርቶናይሳ፥ ኤለ ይሎቶናይሳ፥ ማꬆቶናይሳ፥ ኦዳ መꬎናይሳነ በሶና ጎአስ ዳፈቶናይሳ ግዳናዉ በሴስ።
TIT 1:8 ሽን እማ ሞከይሳ፥ ሎኦባ ኡባ ዶሰይሳ፥ አኬካንቾ፥ ፅሎ፥ ጌሽነ ባና ሃረይሳ ግዳናዉ በሴስ።
TIT 1:9 ሀራታ ሱረ ትምርትያን ምንꬃናዉነ ሄ ትምርትያ እፀይሳታ ዛራናዉ ባ ታማርዳ ቱማ ቃላን ምንድ ኤቃናዉ በሴስ።
TIT 1:10 ኪተቶናይሳት፥ ፓꬆና ኦዳ ኦደተይሳት፥ ጭመይሳት ኡባካ ቃፃረተꬃ ዎጋ ናግያ ዳሮ አሳት ደኦሶና።
TIT 1:11 ኤንቲ በሶና ኦገን ሚሸ ደማናዉ ኮይድ፥ ታማርሳናዉ በሶናባ ታማርስሸ ኬꬃ አሳ ኡባ ኢስያ ግሾ ኤንታ ትምርትያ ተቃናዉ በሴስ።
TIT 1:12 ኤንታ ናበታፐ እሶይ፥ “ቃርፄሳ አሳይ ኡባ ዎደ ዎርዶ ኦደቶሶና፤ ኢታ ዶአታነ አዛላ ያራምባታ” ያግስ።
TIT 1:13 ሀ ማርካተꬃይ ቱማ ማርካተꬅ። ሄሳ ግሾ፥ ኤንታዉ ቱማ አማኖይ ዳና መላ ኤንታ ሀንቀታ።
TIT 1:14 ቱማ እፅያ አሳ ትምርትያነ አይሁደታ ፓꬆና ቶስያ ስኦና መላ ኤንታ ሴራ።
TIT 1:15 ባንታዉ ጌሽ ግድዳይሳታስ ኡባይ ጌሽ፥ ሽን ቱናታስነ አማኖናይሳታስ ኤንታ ቆፋይነ ካሀይ ቱንዳ ግሾ፥ ኤንታዉ አይብካ ጌሽ ግደና።
TIT 1:16 ኤንቲ ኑ ፆሳ ኤሮስ ጎሶና፥ ሽን ባንታ ኦሱዋን እያ ካዶሶና። ኤንቲ ፆሳን እፀትዳይሳታ፥ ኪተቶናይሳታነ ሎኦ ኦሶ ኡባስ ግዶናይሳታ።
TIT 2:1 ሽን ኔኒ ሱረ ትምርትያ ጳልቆና ትምርተ ታማርሳናዉ በሴስ።
TIT 2:2 ጭማ አደት ባንታና ሃረይሳታ፥ ዎፑ ግዳይሳታ፥ ቦንቸትዳይሳታ፥ አማኖን፥ ሲቆንነ ዳንዳአን፥ ምኖ ግዳና መላ ዞራ።
TIT 2:3 ሄሳዳካ፥ ጭማ ማጫሳይ ባንታ ዱሳን ጌሻታ፥ ዝግሮናይሳታ፥ ዎይነ ኡሻን ሃረቶናይሳታነ ሎኦባ ታማርሰይሳታ ግዳና መላ ታማርሳ።
TIT 2:4 ኤንቲ ሄሳዳ ሀንኮ ያላጋ ማጫሳይ ባንታ አዝናታነ ባንታ ናይታ ሲቃና መላ ታማርሳናዉ ዳንዳኦሶና።
TIT 2:5 ፆሳ ቃላይ ቦረቶና መላ ባንታና ሃረይሳታ፥ ጌሻታ፥ ባንታ ሶን ኦይሳታ፥ ኬሀታነ ባንታ አዝናታስ ኪተተይሳታ ግዳና መላ ያላጋ ማጫሳ ታማርሶና።
TIT 2:6 ሄሳዳካ፥ ዶንꬓ አደት ባንታና ሃራና መላ ዞራ።
TIT 2:7 ኔኒ ነ ሁጰን ሎኦ ኦሶ ኡባን ኤንታዉ ሌምሶ ግዳ። ኔኒ ነ ትምርትያን ኤቅዳይሳነ አማነትዳይሳ ግዳ።
TIT 2:8 ኑ ሞርከት ኑና ዝግራናዉ ጋሶያባይ ኤንታዉ ꬋይን ኤንቲ ዬላታና መላ ኔኒ ቦረቶና ሎኦ ኦዳ ኦዴታ።
TIT 2:9 አይለት ኡባባን ባንታ ጎዳታስ ኪተታና መላ ኤንታ ኡፋይሳና መላነ ኤንታራ ፓላሞና መላ ዞራ።
TIT 2:10 ኤንቲ ባንታ ጎዳታፐ ካይሶቶፖ። ሄስካ፥ ኑና አሽያ ፆሳ ትምርተይ፥ ኡባ ኦገን ዶሰትዳይሳ ግዳና መላ ባንታ ኦꬅያ ኦሱዋን አማነተይሳታ ግደይሳ በሳና መላ ኤንታ ዞራ።
TIT 2:11 አሰ አሽያ ፆሳ አꬎ ኬሀተꬃይ አሳ ኡባስ ቆንጭስ።
TIT 2:12 ሄ አꬎ ኬሀተꬃይ፥ ኑ ናጋራነ ሀ አላምያ አሙዋ አግድ፥ ሀ ዎድያን ኑና ሃርድ፥ ቱማ አያና ደኡዋንነ ፅሎተꬃን ዳና መላ ኑና ታማርሴስ።
TIT 2:13 ኑኒ አንጀትዳ ኡፋይሳ ግድዳ ግታ ፆሳነ ኑና አሽያ የሱስ ክርስቶሳ ቦንቾ ቆንጨꬃ ናጎስ።
TIT 2:14 ኢታ ኦሶ ኡባፈ ኑና ዎዛናዉነ ሎኦባ ኦꬃናዉ አሞትያ ባ ጌሻ አስ ከሳናዉ ኑ ግሾ ባና አꬅድ እሚስ።
TIT 2:15 ኔኒ ሀይሳ ታማርሳ፤ ኩመꬃ ማታን ዞራ፥ ሴራ፤ ኦንካ ነና ካꬎፖ።
TIT 3:1 አሳይ ደርያ ሃረይሳታስ፥ አዋተꬃይ ደኤይሳታስ ሃረታናዉ፥ ኪተታናዉነ ሎኦ ኦሶ ኡባ ኦꬃናዉ ጊገትዳይሳታ ግዳና መላ አኬክሳ።
TIT 3:2 ቃስ ኤንቲ ኦደ ቦላካ ኢታ ኦደቶና መላ፥ ሳሮ አስ ግዳና መላ፥ አሽከታነ አሳ ኡባስ ቃተይሳታ ግዳና መላ ዞራ።
TIT 3:3 ኑኒ ካሰ ኤያታ፥ ኪተቶናይሳታ፥ ባለትዳይሳታ፥ ዱማ ዱማ አሾ ኡፋይሳስነ አሞስ አይለትዳይሳታ። ኑኒ ኢታተꬃንነ ቃናተን ኩምዳይሳታ፤ ኑ አሰ እፀይሳታ፥ አስካ ኑና እፀይሳታ።
TIT 3:4 ሽን አሽያ ፆሳ ኬሀተꬃይነ ሲቆይ ቆንጭዳ ዎደ፥
TIT 3:5 ኑ ኦꬅዳ ፅሎ ኦሱዋ ግሾ ግዶናሽን፥ ባ ማሮተꬃ ግሾ ኑና አሽስ። ኑና እ አሽዳይ፥ ናምአንꬆ የለተꬃ ሜቻንነ ጌሻ አያና ባጋራ እምዳ ኦራꬃ ደኡዋና።
TIT 3:6 ሄ አያና፥ ፆሳይ ኑና አሽያ የሱስ ክርስቶሳ ባጋራ ኑ ቦላ ዳርስድ ጉስስ።
TIT 3:7 ባ አꬎ ኬሀተꬃ ባጋራ ኑና ፅልስድ መርና ደኡዋ ላታ ኡፋይሳ ኦይካና መላ ሄሳ ኦꬅስ።
TIT 3:8 ሀ ቃላይ አማነትዳ ቃላ። ፆሳ አማነይሳት ሎኦ ኦሶ ኦꬃናዉ ጊግዳይሳታ ግዳና መላ ነ ሀ ቃላ ምንꬃዳ ኦዳና መላ ታ ኮያይስ። ሀይሳቲ አሰ ኡባስ ሎኦነ ጎኤይሳታ።
TIT 3:9 ሽን ኤያተꬃ ፓላማፐ፥ ኮቻ ታይቦፐ፥ ካቻፈነ ህገ ጋሶን ደንድያ ኦሻፈ ናገታ። ሄስ ጎእነ ዎይ ባይናባ።
TIT 3:10 ሻሄተꬅ መꬍያ ኡራ ኮይሮ ዞራ፤ ናምአንꬆ ሀንቀታ፥ ሄሳፈ ጉየ፥ እያፐ ሃካ።
TIT 3:11 ሄሳ መላ አስ ጌላነ ናጋራንቾ፤ እ ባ ቦላ ፕርደይሳ ኤራ።
TIT 3:12 ታኒ ባልጎ ያን ሻጫናዉ ቆፕዳ ግሾ፥ አርፀማሳ ዎይኮ ትክቆሳ ኔኮ ኪትያ ዎደ ነ ታኮ ንቆጵልዮና ያናዉ ምና።
TIT 3:13 ህገ ኤርያ ዜማስነ አጵሎስ ኦገ ብያ ዎደ ኤንታዉ ኮሽያባይ ፓጮና መላ ኤንታ ማዳ።
TIT 3:14 ኑ አሳይካ ፓꬆና አስ ግድድ አቶና መላ ባንታዉ ኮሽያባ ደማና መላ ሎኦ ኦሶ ኦꬃናዉ ምንድ ታማሮ።
TIT 3:15 ታራ ደእያ ኡባይ ነና ሳሮ ጎሶና፤ አማኖን ኑና ሲቅያ አሳ ሳሮ ጋ። ፆሳ አꬎ ኬሀተꬃይ ህንተ ኡባራ ግዶ። አምንእ።
PHM 1:1 ታኒ ጳዉሎስ፥ የሱስ ክርስቶሳ ግሾ ቃሾን ደኤይስነ ኑ እሻ ፅሞትዮስ፥ ኑራ ኦꬅያ ኑኒ ዶስያ ፍልሞናስ፥
PHM 1:2 ነ ሶን ሺቅያ ዎሳ ኬꬃታስ፥ ኑ ምቸ አፍብያስነ ኑራ እስፈ ደእያ ዎታዳረ አርክጳሳስ ፃፍዳ ኪታ።
PHM 1:3 ፆሳ ኑ አዋፐነ ኑ ጎዳ የሱስ ክርስቶሳፐ አꬎ ኬሀተꬃይነ ሳሮተꬃይ ህንተዉ ግዶ።
PHM 1:4 ኔኒ ጌሻታ ዶሰይሳነ ጎዳ የሱሳ አማነይሳ ታኒ ስእያ ግሾ፥ ፆሳ ዎሳሸ ነና ቆፕያ ዎደ ኡባን ታ ፆሳ ጋላታይስ።
PHM 1:6 ኔኒ ነ አማኑዋ ሀራታስ ሻከይስ ኑስ ክርስቶስ የሱሳ ባጋራ ያ ሎኦባ ኡባ ኤርሳና መላ ታኒ ፆሳ ዎሳይስ።
PHM 1:7 ጌሻታ ዎዛናይ ነ ኦሱዋን ምንዳ ግሾ፥ ታ እሻዉ፥ ታኒ ነ ሲቁዋን ዳሮ ኡፋይስነ ምንꬆ ደማስ።
PHM 1:8 ሄሳ ግሾ፥ ኔኒ ኦꬃናዉ በሲያባ ኦꬃና መላ ነና ኪታናዉ ክርስቶሳ ባጋራ ታዉ ምኖተꬃይ ደኤስ።
PHM 1:9 ታኒ፥ ጭማይ ጳዉሎስ፥ ክርስቶስ የሱሳስ ሀእካ ቃሾን ደኤይስ፥ ሲቆን ነና ዎሳይስ።
PHM 1:10 ታኒ ቃሾን ደአሸ እያዉ ዞርያ አዋ ግዳዳ ታ ናኣ አናስሞሳ ግሾ ነና ዎሳይስ።
PHM 1:11 እ ካሰ ነና ማደና፥ ሽን ሀእ ነናካ ታናካ ቱማ ማድያ አስ።
PHM 1:12 ታኒ ዎዛናፐ ዶስያ አናስሞሳ ኔኮ የዳይስ። ታኒ ዎንገላ ግሾ ቃሸትዳሽን፥ ነ ግሾ ታዉ ኦꬅድ ታና ማዳና መላ ታ ማታን እያ አሻናዉ ኮያስ።
PHM 1:14 ሽን ነ ሸነዳ ኦꬃናዉ ኮያስፐ አትሽን፥ ኔራ ዞረቶና ዎልቃን አይኮካ ኦꬃናዉ ኮይከ።
PHM 1:15 አናስሞስ ጉꬃ ዎደ ኔፐ ሻከትዳይስ፥ ኦን ኤር ስሚድ ኡባ ዎደ ኔራ ደኦና አገና።
PHM 1:16 ህዛ፥ ሀይሳፈ ጉየ አናስሞስ አይለ ግዶናሽን፥ አይለፈ እ ዳሮ አꬌስ። እ ታዉ አይ መላ ሲቆ እሸ! ቃስ እ ነዉ አሳ ባጋራካ ጎዳ ባጋራካ አꬍዳ እሻ።
PHM 1:17 ህዛ፥ ኔኒ ታና ነ ላገ ግያባ ግድኮ ታና ሞከይሳዳ እያ ሞካ።
PHM 1:18 እ ነና ቆህዳባይ ዎይኮ እ አጮትዳባይ ደእኮ ታፐ ኤካ።
PHM 1:19 ሄ አጩዋ ታ ቃንፃና ጋዳ ታኒ ጳዉሎስ፥ ታ ኩሸን ፃፋይስ። ኔኒ ታዉ ነ ሸምፑዋ አጮታ ኡትዳይሳ ታኒ ነና አኬክሳናዉ ኮሸና።
PHM 1:20 ታ እሻዉ፥ ጎዳ ባጋራ ኔፐ ማደ ደማናዉ ኮያይስ። ክርስቶሳ ባጋራ ታና ምንꬃ።
PHM 1:21 ታኒ ግዳይሳፈ ዳሮ ኔኒ ኦꬃናይሳ ኤራዳ ቃስ ነ ታዉ ኪተታናይሳ አማናዳ ሀይሳ ፃፋይስ።
PHM 1:22 ፆሳይ ህንተ ዎሳ ስእድ ታና ህንተኮ ጉየ ዛራና ጋዳ ቆፕያ ግሾ፥ ታዉ እማꬅ ሸምፕያ ኬꬅ ጊግሳ።
PHM 1:23 ክርስቶስ የሱሳ ግሾ ታራ ቃሾን ደእያ ኤጳፍር ነና ሳሮ ሳሮ ጌስ።
PHM 1:24 ቃስ ታራ እስፈ ኦꬅያ ማርቆስ፥ አርስፅሮኮስ፥ ዴማስነ ሉቃስ ነና ሳሮ ጎሶና።
PHM 1:25 ጎዳ የሱስ ክርስቶሳ አꬎ ኬሀተꬃይ ህንተ አያናራ ግዶ።
HEB 1:1 ካሰ ፆሳይ፥ ኑ አዋታስ ናበታ ባጋራ ዱማ ዱማ ኦገን ዳሮ ዎደ ኦድስ።
HEB 1:2 ሽን ሀ ዉርሰꬃ ዎድያን ኡባ እያ ላትስዳ ቃስ አላመ እያ ባጋራ መꬍዳ ባ ናኣ ባጋራ ኑስ ኦድስ።
HEB 1:3 ናአይ ፆሳ ቦንቹዋ ጶለꬃነ ኩመꬃ ፆሳ ፆሳተꬃ ኤክድ፥ ባ ዎልቃማ ቃላን ሀ አላምያ ካትስድ ኦይክስ። አሳ ኤንታ ናጋራፐ ጌሽዳፐ ጉየ ኡባፈ ቦላ ፆሳ ኡሻቻ ባጋን ሳሉዋን ኡትስ።
HEB 1:4 እያዉ እመትዳ ሱንꬃይ ኪታንቾታ ሱንꬃፈ ቦላ ግደይሳዳ እ ኤንታፈ ቦላ።
HEB 1:5 ህዛ፥ ፆሳይ ኪታንቾታፐ ኦደኮ፥ “ኔኒ ታ ናአ፤ ታ ሀች ነዉ አዋ ግዳስ” ግዴ? ዎይኮ ቃስ ኦደኮ፥ “ታኒ እያዉ አዋ ግዳና፤ እካ ታዉ ናአ ግዳና” ግዴ?
HEB 1:6 ቃስ ፆሳይ ባ ባይራ ናኣ ሀ አላምያ ኪትሸ፥ “ፆሳ ኪታንቾት ኡባይ እያዉ ጎይኖ” ያግስ።
HEB 1:7 ፆሳይ ኪታንቾታባ ኦድሸ፥ “ፆሳይ ባ ኪታንቾታ ጫርኮ፥ ባ አይለታ ታማ ላጮ ኦꬄስ” ያጌስ።
HEB 1:8 ሽን ባ ናአባ ኦድሸ፥ “ፆሳዉ፥ ነ አራታይ መርናዉ ደኤስ። ነ ካዎተꬃ ነ ፅሎተꬃን አይሳሳ።
HEB 1:9 ኔኒ ፅሎተꬅ ዶሳዳሳ፤ ኢታ እፃዳሳ። ፆሳይ፥ ነ ጎዳይ፥ ነና ነ ላገታፐ አꬅድ ዶርስ፥ ኡፋይሳ ዛይተ ነና ትይስ” ያጌስ።
HEB 1:10 ፆሳይ ዛሪድ፥ “ጎዳዉ፥ ኮይሮ ኔኒ ሳአ መꬋዳሳ፤ ሳሎት ነ ኩሸ ኦሶ።
HEB 1:11 ሄሳት ኡባይ ꬋያና፤ ሽን ኔኒ ዳና። ኤንቲ ኡባይ አፍላዳ ዉራና።
HEB 1:12 ኔኒ ኤንታ ሳሌናዳ ፃፃና፤ ቃስ ኤንቲ አፍላዳ ላመታና። ሽን ኔኒ ኡባ ዎደ ነና፤ ነ ላይꬃይካ ዉረና” ያጌስ።
HEB 1:13 ሽን ፆሳይ ኪታንቾታፐ ኦደኮ፥ “ታኒ ነ ሞርከታ ነ ቶሆይ የꬍያሶ ኦꬃና ጋካናዉ፥ ሀይሳን ታፐ ኡሻቻ ባጋን ኡታ” ግዴ?
HEB 1:14 ኪታንቾት ኡባይ አቶተꬅ ደማናዉ ደእያ አሳታ ማዳናዉ ፆሳይ ኪትዳ አያናታ ግዶኮናዬ?
HEB 2:1 ሄሳ ግሾ፥ ኑኒ ስእዳ ቱማፐ ሀራሶ ኤከቶና መላ ሄ ስእዳይሳ ምንꬅድ ናጋናዉ በሴስ።
HEB 2:2 ህዛ፥ ኪታንቾታ ባጋራ ኦደትዳ ቃላይ ቱማ ግድኮ፥ እያ ናቆይነ ኪተቶና እፆይ ፕርዳ ኤህያባ ግድኮ፥
HEB 2:3 ያትን፥ ኑኒ ሀይሳ መላ ግታ አቶተꬃ እፃስ ጊኮ፥ ዋንድ አታኔ? ኮይሮ ጎዳይ ባ ሁጰን ሄ አቶተꬃ ኦድስ፤ ቃስ እያፐ ስእዳይሳት ኑስ ጌሽድ ማርካትዶሶና።
HEB 2:4 ቃስ ፆሳይ ማላታታን፥ ኦራꬃባታን፥ ዱማ ዱማ ማላታንነ ባ ሸንያዳ እምዳ ጌሻ አያና እሞታታን ማርካተꬃ ምንꬅስ።
HEB 2:5 ፆሳይ ሀ ኑኒ ኦድያ ስንꬃፈ ያና አላምያ፥ ኪታንቾታስ ሃርስቤና።
HEB 2:6 ጌሻ ማፃፋይ እስ በሳን ሀይሳዳ ያጌስ፦ “ኔኒ አሳስ ቆፓናዉ አስ አይቤ? ዎይኮ ኔኒ እያ ናጋናዉ እ አይቤ?
HEB 2:7 ነ እያ ኪታንቾታፐ ጉꬃ ዎደስ ጉꬃዳሳ፤ እያ ሁጰን ቦንቾነ ሳባ ካላቻ ዎꬃዳሳ።
HEB 2:8 ቃስ ኡባባ እያ ቶሁዋፐ ጋርሳን ዎꬃዳሳ” ያጌስ። ፆሳይ ኡባባ እያዉ ሃርስያ ዎደ እያዉ ሃረትቦናባይ አይብካ ባዋ። ሽን ሀእ ኡባባይ እያዉ ሃረትሽን ኑኒ በእቦኮ።
HEB 2:9 ሽን ኑኒ ኪታንቾታፐ ጉꬃራ ጉፅዳ የሱሳ በኦስ። ፆሳ አꬎ ኬሀተꬃ ጋሶን የሱሲ አሳ ኡባስ ሀይቅስ። እ ዋየ ሀይቆ ሀይቅዳ ግሾ፥ ቦንቾነ ሳባ ካላቻ እያ ሁጰን ዎꬅስ።
HEB 2:10 ኡባባይ እያዉነ እያ ጋሶን መትዳ ፆሳይ፥ ዳሮ ናይታ ባራ ቦንችሳናዉ ኤንታ አቶተꬃ ሁጵያ፥ የሱሳ ዋየን ፖሎ ኦꬃናዉ እያዉ በሴስ።
HEB 2:11 የሱሲነ ሄ እ ጌሽዳ አሳ ኡባይ እስ አዋ ናይታ። የሱሲ ኤንታ፥ “ታ እሻታ” ግድ ፄጋናዉ ዬላቶናይ ሄሳሳ።
HEB 2:12 የሱሲ፥ “ታኒ ነ ሱንꬃ ታ እሻታስ አዋጃና፤ ደርያ ሺቁዋን ነና ጋላታና” ያጌስ።
HEB 2:13 ቃስ እ፥ “ታኒ ታ አማኑዋ እያ ቦላ ዎꬃና” ቃስካ፥ “ፆሳይ ታዉ እምዳ ናይታራ ታ ሀይሳን ደአይስ” ያጌስ።
HEB 2:14 ናይት አሾይነ ሱꬅ ደኤይሳታ ግድያ ግሾ፥ የሱሲካ ኤንታዳ አሰ ግድስ። እ ሄሳ ኦꬅዳይ፥ ሀይቆ ቦላ ዎልቅ ደእያ ፃላህያ ባ ሀይቁዋን ꬋይሳናሳ።
HEB 2:15 ቃስ ባንታ ደኦ ላይꬃ ኡባን ሀይቆ ያሻን አይለትድ ደኤይሳታ አይለተꬃፈ ዎዛናሳ።
HEB 2:16 ቱማ የሱሲ ይዳይ አብራሃመ ኮቸ ማዳናሳፈ አትሽን፥ ኪታንቾታ ማዳናሳ ግደና።
HEB 2:17 አሳ ናጋራይ አቶ ጌተታና መላ ፆሳ ስንꬃን ማርያነ አማነትዳ ካህነ ሀላቃ ግድስ። ሄሳ ግሾ፥ እ ኡባባን ባ እሻታ ዳናናዉ በሴስ።
HEB 2:18 እ ባ ሁጰን ፓጨን ዋየትዳ ግሾ ፓጨተይሳታ ማዳናዉ ዳንዳኤስ።
HEB 3:1 ሄሳ ግሾ፥ ፆሳይ ፄግዳ ጌሻ እሻቶ፥ ኑ አማኖን ጎዳ ግድ ፄግያ ሀዋርያነ ካህነ ሀላቃ የሱሳ በእተ።
HEB 3:2 ሙሰይ ፆሳ ኬꬃ ኡባን አማነትዳይሳዳ የሱሲካ ባና ዶርዳ ፆሳስ አማነትዳይሳ።
HEB 3:3 ኬ ኬፀይስ ኬꬃፈ አꬍድ ቦንቸተይሳዳ የሱሲ ሙሰፐ አꬍያ ቦንቾ ኤካናዉ በሴስ።
HEB 3:4 እስ እስ ኬꬃ ኬፅዳ አስ ደኤስ፥ ሽን ኡባ ጊግስዳይ ፆሳ።
HEB 3:5 ሙሰይ ፆሳ ኬꬃ ኡባን አማነትዳ አይለ ግድድ፥ ፆሳይ ስንꬃፈ ጋናባስ ማርካ ግድስ።
HEB 3:6 ሽን ክርስቶስ ፆሳ ኬꬃን ናአዳ አማነትዳይሳ። ኑኒ ኤካና ግድ ናግያ ኡፋይሳ ምንꬅድ ናግኮ ፆሳ ኬꬅ ግዶስ።
HEB 3:7 ሄሳ ግሾ፥ ጌሻ አያናይ ገይሳዳ፥ “ሀች ህንተ ፆሳይ ገይሳ ስእያ ዎደ፥
HEB 3:8 መላ ቢታን ፓጭያ ጋላስ፥ ህንተ አዋት ማካልዳይሳዳ፥ ህንተ ዎዛና ምንꬆፍተ።
HEB 3:9 ህንተ አዋት ታና ፓጭዶሶና፤ ኦይታሙ ላይꬅ ታ ኦሱዋ በእዶሶና።
HEB 3:10 ሄሳ ግሾ፥ ታ ሄ የለተꬃ ሀንቀታዳ፥ ‘ኤንቲ ኡባ ዎደ ባንታ ዎዛናን ባሎሶና፤ ታ ኦግያ ኤርቦኮና’ ያጋስ።
HEB 3:11 ሄሳ ግሾ፥ ታኒ ታ ሀንቁዋን ጫቃዳ፥ ‘ታ ሸምፖ በሳ ኡባካ ገሎኮና’ ያጋስ” ያጌስ።
HEB 3:12 ታ እሻቶ፥ ህንተፈ ኦደንካ፥ ደኦ ፆሳፈ ህንተና ሻክያ ኢታነ አማኖና ዎዛን ዶና መላ ናገትተ።
HEB 3:13 ህንተፈ ኦናካ ናጋር ባለꬅን፥ ባ ዎዛና ምንꬆና መላ “ሀች” ያገትድ ፄገትሽን ጋላስ ጋላስ እሶይ እሱዋራ ዞረትተ።
HEB 3:14 ኑ ኮይሮ አማኑዋ ኑኒ ዉርሰꬅ ጋካናዉ ምንꬅድ ናግኮ፥ ክርስቶሳራ እስፈ ላታና።
HEB 3:15 ጌሻ ማፃፋን፥ “ሀች ፆሳይ ገይሳ ህንተ ስእያ ዎደ፥ ሄ ዎደ ኤንቲ ማካላተꬃን ሀንዳይሳዳ፥ ህንተ ዎዛና ምንꬆፍተ” ያግስ።
HEB 3:16 ፆሳይ ግያባ ስእድ ማካልዳይ ኦኔ? ሙሰይ ግብፀፈ ካለꬅ ከስዳ ኡባ ግዶኮናዬ?
HEB 3:17 ፆሳይ ኦይታሙ ላይꬅ ኦና ሀንቀትዴ? ናጋራ ኦꬅዳይሳታነ ኤንታ አሀይ መላ ቢታን ዎꬍ አትዳ አሳታ ግዶኮናዬ?
HEB 3:18 ቃስ ፆሳይ፥ “ታ ሸምፖ በሳ ገለከታ” ያግድ ጫቅዳይ፥ እያዉ ኪተቶና እፅዳ አሳፐ አትሽን፥ ኦደሴ?
HEB 3:19 ህዛ፥ ኤንቲ ሄ ሸምፖ በሳ ገሎና አትዳይ አማንቦና ግሾ፥ ግደይሳ ኑ በኦስ።
HEB 4:1 ህዛ፥ ፆሳይ ኑና ባ ሸምፖ በሳ ገልሳና ግዳ ቃላይ ቡሮ ስንꬃፈ ደእያ ግሾ፥ ህንተፈ ኦንካ ሄ ሸምፖ በሳ ገሎና አቶና መላ ናገቶስ።
HEB 4:2 ኤንታዉ ዎንገላይ ሳባከትዳይሳዳ፥ ኑስካ ሳባከትስ። ሽን ኤንቲ ስእዳባ አማንድ ኤክቦና ግሾ ኤንታ ጎእቤና።
HEB 4:3 ግዶሽን፥ አላመይ መቶሳፐ ዶምድ ፆሳ ኦሶይ ፖለትዳይሳ ግድኮካ፥ ፆሳይ፥ “ታኒ ታ ሀንቁዋን ጫቃዳ፥ ታ ሸምፖ በሳ ኡባካ ገሎኮና” ግዳይሳዳ፥ ኑኒ አማንዳይሳት እያ ሸምፖ በሳ ገላና።
HEB 4:4 ላፑንꬃ ጋላሳባ እስ በሳን፥ “ፆሳይ ላፑንꬃ ጋላሳን ባ ኦሶ ኡባፈ ሸምፕስ” ያግስ።
HEB 4:5 ቃስካ ሄ በሳን፥ “ኤንቲ ታ ሸምፖ በሳ ኡባራካ ገሎኮና” ያግስ።
HEB 4:6 ኮይሮ ዎንገላ ስእዳይሳት ኪተቶና እፅድ ሸምፖ በሳ ገልቦኮና። ያንያ ግሾ፥ ሀእካ ሄ ሸምፖ በሳ ገላና እስ እስ አሳት ደኦሶና።
HEB 4:7 ሄሳ ግሾ፥ ፆሳይ፥ “ሀች” ግድ ፄግሸ እስ ጋላስ ኑስ ቃንፅስ። ዳሮ ዎደፐ ጉየ ፆሳይ ዳዊታ ባጋራ፥ “ፆሳይ ግያባ ሀች ህንተ ስእያ ዎደ፥ ህንተ ዎዛና ምንꬆፍተ” ያግድ ኦድስ።
HEB 4:8 እያሱይ ኤንታዉ ሸምፑዋ እምዳባ ግድያኮ፥ ፆሳይ ሀራ ጋላሳባ ጉየፐ ኦደናሽን።
HEB 4:9 ህዛ፥ ፆሳ አሳስ ሳምባታ ሸምፖይ ናገትድ ደኤስ።
HEB 4:10 ፆሳ ሸምፖ በሳ ገልያ ኦንካ፥ ፆሳይ ባ ኦሱዋፐ ሸምፕዳይሳዳ እካ ባ ኦሱዋፐ ሸምፓና።
HEB 4:11 ሄሳ ግሾ፥ ኦንካ ሄ አሳ ኪተተꬃ እፁዋ ካልድ፥ ኩንዶናዳ ፆሳ ሸምፖ በሳ ገላናዉ ምኖስ።
HEB 4:12 ፆሳ ቃላይ ደኦነ ኦይሳ። ናምኡ ባጋራ ቃራትዳ ማሻፈካ አꬍድ ኦጮ። እ ሸምፖ፥ አያና፥ ፃጶነ ኮልዘ ጋካናዉ ካንꬅድ ጫዴስ። ቃስ አሳ ዎዛናን ደእያ ጌምዳ ቆፋነ አሙዋ ሻክድ ፕርዴስ።
HEB 4:13 ፆሳ ስንꬃፈ ቆሰትያባይ አይባ መተꬅካ ባዋ። እያ አይፈ ስንꬃን ኡባባይ ቆንጨነ ካሎ ደኤስ። ኑኒ ዛሮ እማናዉ በሰይ እያ ስንꬃና።
HEB 4:14 ህዛ፥ ሳሎ ከይዳ ግታ ካህነ ሀላቃይ፥ ፆሳ ናአይ የሱሲ፥ ኑስ ደእያ ግሾ፥ ኑ አማኑዋ ምንꬅድ ናጎስ።
HEB 4:15 ኑ ካህነ ሀላቃይ ኑ ዳቡርያ ዎደ ኑስ ቃታናዉ ዳንዳኤይሳ። እ ኑዳ ኡባባን ፓጨትስፐ አትሽን፥ ናጋራ ኦꬅቤና።
HEB 4:16 ህዛ፥ ማሮተꬃ ኤካናዉነ ማደ ኮሽያ ዎደ አꬎ ኬሀተꬃ ደማናዉ አꬎ ኬሀተꬃይ ደእያሱዋ ፆሳ አራታኮ ያዮና ሺቆስ።
HEB 5:1 እስ እስ ካህነ ሀላቅ አሳ ግዶፈ ዶረትድ፥ ፆሳራ ጋꬅያባን አሳ ግሾ እሞታነ ናጋራ ያርሾ ያርሻናዉ ሹመቴስ።
HEB 5:2 እ ባ ሁጰን ዳቡራንቾ ግድያ ግሾ፥ ኤሮናይሳታስነ ባለይሳታስ ቃታናዉ ዳንዳኤስ።
HEB 5:3 እ ባ ናጋራ ግሾነ አሳ ኡባ ናጋራ ግሾ ያርሾ ያርሻናዉ በሰይ ሄሳሳ።
HEB 5:4 ኦንካ ሀ ቦንቹዋ ባዉ ኤካናዉ ዳንዳኤና፥ ሽን አሮን ካህነ ሀላቃ ግዳናዉ ፄግዳይሳዳ ፆሳን ፄገታናዉ በሴስ።
HEB 5:5 ሄሳዳካ፥ ክርስቶስ ካህነ ሀላቃ ግድያ ቦንቹዋ ባዉ ኤክቤና። ሽን ፆሳይ እያ፥ “ኔኒ ታ ናአ፤ ሀች ታ ነዉ አዋ ግዳስ” ያጌስ።
HEB 5:6 ቃስ ሀራሶን፥ “ማልከፃደቅ ካህነ ግድዳይሳዳ፥ ኔኒ መርናዉ ካህነ ግዳና” ያጌስ።
HEB 5:7 የሱሲ አሰ ግድድ ሀ አላምያን ደእያ ዎደ ባና ሀይቆፐ አሻናዉ ዳንዳእያ ፆሳ ዳሮ ዬሆንነ አፉꬃን ዎስስ። እ፥ እያ ቦንችድ ኪተትዳ ግሾ ፆሳይ እያ ዎሳ ስእስ።
HEB 5:8 የሱሲ ፆሳ ናአ ግድኮካ ባ ዋየትዳ ዋያን ኪተተꬅ ታማርስ።
HEB 5:9 ሄሳንካ፥ የሱሲ ባ ኦሱዋ ፖልዳፐ ጉየ ባዉ ኪተትያ ኡባይ መርና አቶተꬃ ደማና መላ ጋሶ ግድስ።
HEB 5:10 ፆሳይ ማልከፃደቃ ሹምዳይሳዳ ካህነ ሀላቃ ኦꬅድ እያ ሹምስ።
HEB 5:11 ሀ ኑ ኦዳ ቦላ ጉጅ ኦዳናባይ ዳሮባይ ደኤስ፥ ሽን ህንተ አኬካይ ጉꬃ ግድያ ግሾ ህንተዉ ኦድ ገልሳናዉ ዋይሴስ።
HEB 5:12 ህንተ ሀኖደ አስታማረ ግዳናዉ በሴስ፥ ሽን ፆሳ ቃላ ኮይሮ ትምርትያ ህንተና ዛር ታማርስያ ሀራ አስ ኮሼስ። ህንተ ምኖ ካꬅ ማናዉ ዳንዳኦና ግሾ ማꬅ ኮሼስ።
HEB 5:13 ማꬅ ፓሄትያ ኦንካ ዮጋ ናአ ግድያ ግሾ፥ ሎኦነ ኢታ ሻክ ኤረና።
HEB 5:14 ሽን ምኖ ካꬅ ሎኦነ ኢታ ሻክ ኤርያ ካሃማ አሳሳ።
HEB 6:1 ህዛ፥ ክርስቶሳባ ታማርስያ ኮይሮ ትምርትያ አግድ ክርስቶሳን ካሃማተꬃኮ ቦስ። ሀይቆ ኦሶፐ ስሞባነ ፆሳ አማኖባ ኮይሮ ትምርትያኮ ጉየ ስሞኮ።
HEB 6:2 ሄሳዳካ፥ ፅንቃተታባ፥ ኩሸ ዎሶባ፥ ሀይቆፐ ደንዶባነ መርና ፕርዳባ ዛር ታማሮኮ።
HEB 6:3 ፆሳይ ጊኮ ኑ ሄሳ ኦꬃና።
HEB 6:4 እስ ቶሆ ፖኦይ ፖእዳይሳታ፥ ሳሎ እሞታ ኤክዳይሳታ፥ ጌሻ አያናን ሻከትዳይሳታ፥
HEB 6:5 ሎኦ ፆሳ ቃላነ ስንꬃፈ ያና አላምያ ዎልቃ በእዳይሳታ፥
HEB 6:6 ጉየፐ ካድዳይሳታ ናጋራፐ ናምአንꬆ ዛራናዉ ዳንዳኤተና። አይስ ጊኮ፥ ኤንቲ ባንታ ꬋዩዋስ ፆሳ ናኣ ዛር ካቅያ መላ ማስቃልያ ቦላ እያ ካቆሶናነ አሳ ስንꬃን ካዉሾሶና።
HEB 6:7 ኡባ ዎደ እ ቦላ ቡክያ እራ ኡያዳ፥ ጎይዳ ኡራ ማድያ ካꬅ እምያ ቢትያ ፆሳን አንጀትዳሮ።
HEB 6:8 ሽን አጉንꬅነ ክንቾተ ዶልያ ቢትያ አይብባካ ማዱኩ፤ እዉ ባደꬃይ ማታትስ፤ ዉርሰꬃን ፁገታና።
HEB 6:9 ኑ ሲቆ እሻቶ፥ ኑኒ ሀይሳዳ ኦድያባ ግድኮካ፥ ህንተና አቶተꬃኮ ካለꬅያ ሎኦባይ ህንተዉ ደኤይሳ ኤሮስ።
HEB 6:10 ፆሳይ ሱረ ፕርደይሳ። ፆሳይ፥ ህንተ ኦꬅዳ ኦሱዋነ ካሰ ግድን ሀእካ አማነይሳታ ማድድ፥ እያዉ ደእያ ሲቁዋ በስዳይሳ ዶገና።
HEB 6:11 ህንተ ኡባይ ኡፋይሳን ናገይሳ ደማና ጋካናዉ ሀ ምኖተꬃ ዉርሰꬅ ጋካናዉ በሳና መላ ኑ አሞቶስ።
HEB 6:12 ህንተ አማኖንነ ዳንዳአን ናግያ ኡፋይሳ ላትያ አሳ ዳናና መላፐ አትሽን፥ አዛላ ግዳና መላ ኮዮኮ።
HEB 6:13 ፆሳይ አብራሃመስ እማና ግድ ጫቅዳ ዎደ ባፐ አꬍያ ሀር ግት ባይና ግሾ ባ ሁጰን ጫቅስ።
HEB 6:14 እያኮ፥ “ታኒ ነና አንጃና፤ ነ ዘረꬃካ ዳርሳና” ያግስ።
HEB 6:15 አብራሃመይ ዳንዳአን ናግድ ፆሳይ እማና ግዳ ኡፋይሳ ኤክስ።
HEB 6:16 አስ ጫቅሸ ባፐ ግታትያ ኡራን ጫቄስ፤ ሄ ጫቆይ ጌተትዳባ ምንꬅድ፥ ፓላማ ኡባ ተቄስ።
HEB 6:17 ሄሳ ግሾ፥ ፆሳይ ባ ላመቶና ቆፋ ኡፋይሳ ቃላ ላተይሳታስ ቆንጭሳናዉ ኮይዳ ግሾ ጫቆን ምንꬅስ።
HEB 6:18 ፆሳይ ዎርዶተና። እያ ኡፋይሳ ቃላይነ ጫቆይ፥ ናምአይካ ላመቶኮና። ሀ ናምኡባታን ኑ ስንꬃን ደእያ ኡፋይሳ ኦይካናዉ ዳንዳአና መላ ገሸ ደማናዉ እያኮ ባቃትዳ ኑኒ፥ ዎልቃማ ምንꬆ ደማና።
HEB 6:19 ሀ ኡፋይሳይ ኑ ሸምፑዋ፥ ማርካበይ ቃፆናዳ ምንꬅ ኦይክያ ብራታ መላ። ሄ ኡፋይሳይ ማጋራጁዋፈ ጉየ ባጋን ደእያ ጌሻ በሳ ገልስ።
HEB 6:20 የሱሲ ማልከፃደቃ ሹማተꬃዳ መርናዉ ካህነ ሀላቃ ግድድ፥ ኑ ግሾ ኑፐ ስንꬃትድ ሄ በሳ ገልስ።
HEB 7:1 ማልከፃደቀይ፥ ሳሌማ ካዎይ፥ ኡባፈ ቦላ ፆሳ ካህነ። ሄ ማልከፃደቅ አብራሃመይ ካዎታ ኦል ፆንድ ስምሽን እያራ ጋሄትድ እያ አንጅስ።
HEB 7:2 አብራሃመይ ባ ድእዳባ ኡባፈ እያዉ አስራታ ከስድ እሚስ። ማልከፃደቃ ሱንꬃይ ኮይሮ “ፅሎተꬃ ካዋ”፥ ናምአንꬆ፥ “ሳሌማ ካዎ” ብርሸꬃይካ “ሳሮተꬃ ካዋ” ጉሱ።
HEB 7:3 ማልከፃደቃስ አይያ ዎይኮ አዉ ዎይኮ ኮቻ ፓይዶይ ባዋ። እያ የለተꬃስ ዶመꬅ ዎይኮ እያ ደኡዋስ ዉርሰꬅ ባዋ፥ ሽን ፆሳ ናአ ዳንድ መርናዉ ካህነ ግድስ።
HEB 7:4 ማልከፃደቅ አይ መላ ግቴኮ በእተ። ኑ አዋታ ማይዛይ፥ አብራሃመይ፥ ባ ደእዳባፐ እያዉ አስራታ እሚስ።
HEB 7:5 ካህነ ግድያ ሌወ ኮቻይ እስራኤለ አሳፐ፥ ሄስካ አብራሃመ ኮቸ ግድዳ ባንታ እሻታፐ አስራታ ኤካና መላ ህገይ ኪቴስ።
HEB 7:6 ማልከፃደቅ ሌወ ኮቸ ግዶና እፅኮካ አብራሃመፐ አስራታ ኤክስ፤ ኡፋይሳ ቃል ደእያ አብራሃመ አንጅስ።
HEB 7:7 ጉꬃይ ግታን አንጀተይስ ፓላንና።
HEB 7:8 እስ ባጋራ፥ አስራታ ኤከይሳት ሀይቅያ አሳታ፥ ሽን ሀራ ባጋራ አስራታ ኤከይስ ደኦን ደኤስ ያግድ ኦደትዳይሳ።
HEB 7:9 ህዛ፥ አስራታ ኤክያ ሌወይ፥ አብራሃመ ባጋራ አስራታ እሚስ ጋናዉ ዳንዳኤቴስ።
HEB 7:10 አይስ ጊኮ፥ ማልከፃደቅ አብራሃመራ ጋሄትያ ዎደ ሌወይ የለትቦናባ ግድኮካ፥ ባ ማይዛ አብራሃመ ጉልባታን ደኤስ።
HEB 7:11 እስራኤለ አሳስ ህገይ ሌወ ካህነተꬃ ባጋራ እመትስ። ሀ ሌወ ካህነተꬃይ ፖሎ ግድዳባ ግድያኮ አሮናይሳ መላ ግዶናሽን፥ ማልከፃደቃ መላ ሀራ ካህነ ሹማናዉ አይስ ኮሽዴ?
HEB 7:12 ህዛ፥ ካህነት ላመትያ ዎደ ህገይካ ቃስ ላመታናዉ በሴስ።
HEB 7:13 ሀ ኑ እያባ ኦድያ ኡራይ ሀራ ኮቸ፤ እያ ሼሻፐ ኦንካ ያርሾ በሳን ካህነተꬃን ኦꬅቤና።
HEB 7:14 ኑ ጎዳይ ይሁዳ ሼሻፐ ይዳይስ ኤረትዳይሳ። ግዶሽን፥ ሙሰይ ካህነተባ ኦድሸ ይሁዳ ኮቻባ አይባካ ኦድቤና።
HEB 7:15 ማልከፃደቃ መላ ሀራ ካህነይ ይዳባ ግድያኮ ሀ ኑ ኦድያባይ አꬍድ ቆንጫና።
HEB 7:16 እ ካህነ ግድዳይ ꬋዮና ደኦ ዎልቃናፐ አትሽን፥ እያ ማይዛ ህገንነ ዎጋን ግደና።
HEB 7:17 ጌሻ ማፃፋይ፥ “ማልከፃደቃ ካህነተꬃ መላ፥ ኔኒ መርናዉ ካህነ” ያግድ ማርካቴስ።
HEB 7:18 ኮይሮ ህገይ ዳቡራንቾነ ማዶናባ ግድያ ግሾ ሻረትስ።
HEB 7:19 ሙሰ ህገይ አይብንካ ፖሎ ኦꬃናዉ ዳንዳእቤና። ሽን ኑኒ እያ ባጋራ ፆሳኮ ሺቅያ ኡባፈ አꬍያ ኡፋይሳ ቃላይ ኑስ እመትስ።
HEB 7:20 ክርስቶስ ካህነ ግድያ ዎደ ፆሳይ ጫቅስ፥ ሽን ሀራት ካህነ ግድዳ ዎደ ሄሳ መላ ጫቆይ ባዋ።
HEB 7:21 ሽን የሱሲ ጫቆን ካህነ ግድስ። ፆሳይ ያግድ ጫቅስ፤ “ጎዳይ ጫቅስ፤ እ ባ ቆፋ ላመና፤ ‘ኔኒ መርና ካህነ’ ” ያግስ።
HEB 7:22 ሀ ጫቁዋ ጋሶን የሱሲ ኑስ ኡባፈ አꬍያ ቃላ ጫቁዋስ ዋሰ ግድስ።
HEB 7:23 ካህነተꬃን ኦꬆና መላ ሀይቆይ ኤንታ ድግዳ ግሾ ኮይሮ ካህነታ ታይቦይ ዳሮ።
HEB 7:24 ሽን የሱሲ መርናዉ ደእያ ግሾ እያ ካህነተꬃ ሀሪ ላተና።
HEB 7:25 ሄሳ ግሾ፥ እ ኡባ ዎደ ኤንታ ግሾ ጋናታናዉ መርናዉ ደእያ ግሾ ፆሳኮ እያ ባጋራ የይሳታ ፖሎ አሻናዉ ዳንዳኤስ።
HEB 7:26 ህዛ፥ ኑስ ኮሽያባ እምያ፥ ጌሻይ፥ ቦረይነ ቱን ባይናይስ፥ ናጋራንቾታፐ ሻከትዳይስነ ሳሉዋፐ አꬍድ ꬎቅዳ ካህነ ሀላቃይ ኑስ ኮሼስ።
HEB 7:27 እ ሀንኮ ካህነ ሀላቃታ መላ ኮይሮ ባ ናጋራ ግሾ፥ ካልድ አሳ ናጋራ ግሾ ጋላስ ጋላስ ያርሾ ያርሻናዉ ኮሸና። እ ባና ያርሽዳ ዎደ ዛረꬆና ኦገን እስ ቶሆ ባና ያርሽስ።
HEB 7:28 ሙሰ ህገይ ዳቡራንቾ አሳ ካህነ ሀላቃ ኦꬅድ ሹሜስ። ሽን ህግያፈ ጉየ ይዳ ጫቆ ቃላይ መርናዉ ፖሎ ግድዳ ፆሳ ናኣ ሹምስ።
HEB 8:1 ኑኒ ሃሳያ ግታባይ ሄሳ። ሳሉዋን ኡባፈ ቦላ ፆሳ አራታፐ ኡሻቻ ባጋን ኡትዳ ሀይሳ መላ ካህነ ሀላቃይ ኑስ ደኤስ።
HEB 8:2 እ አሳን ግዶናሽን፥ ጎዳን ኤቅዳ ቱማ ዱንካንያን ፆሳ ኬꬃን ኦꬄስ።
HEB 8:3 ካህነ ሀላቃ ኡባይ እሞነ ያርሾ ያርሻናዉ ሹመቴስ። ሄሳ ግሾ፥ ሀ ካህነይ ያርሻናዉ እስባይ ዳናዉ ኮሼስ።
HEB 8:4 ህገይ ኪተይሳዳ ያርሽያ ካህነት ደእያ ግሾ፥ ክርስቶስ ሳአን ደእያባ ግድያኮ እ ካህነ ግደና።
HEB 8:5 ኤንቲ ካህነተꬃን ኦꬅያ ዱንካነይ ሳሎን ደኤይሳስ ሌምሶነ ኩያ። ሙሰይ ዱንካንያ ኤስያ ዎደ ፆሳይ እያኮ፥ “ታኒ ነና ዙማ ቦላ በስዳ ሌምሱዋ ካላዳ ኦꬃ” ያግስ።
HEB 8:6 ሽን የሱሲ ግዶ ግድድ ስገꬅያ ጫቆይ፥ ኮይሮ ጫቁዋፐ አይሳዳ እ ኤክዳ ኦሶይ ኤንታይሳፈ አꬌስ። ሄስ ኤቅዳይ አꬍያ ጫቆ ቃላና።
HEB 8:7 ኮይሮ ጫቁዋን ባል ባይናባ ግድያኮ ናምአንꬆ ጫቆ ኮሸና።
HEB 8:8 ሽን ጎዳይ ኤንታ ቦርድ፥ ሀይሳዳ ያግስ፦ “ታኒ እስራኤለ አሳራነ ይሁዳ አሳራ ኦራꬃ ጫቆ ጫቅያ ዎደይ ያና።
HEB 8:9 ሄ ጫቆይ ታ ኤንታ አዋታ ግብፀ ቢታፈ ኩሽያ ኦይካዳ፥ ጎቻ ከስዳ ዎደ ኤንታራ ጫቅዳ ጫቁዋ መላ ግደና። ኤንቲ ታ ጫቁዋን አማነትቦና ግሾ፥ ታኒ ኤንታ የጋ አጋስ ያጌስ ጎዳይ።
HEB 8:10 ሽን ህዛፐ ጉየ እስራኤለ አሳራ ታ ጫቃና ጫቆይ ሀይሳ ያጌስ ጎዳይ። ታኒ ታ ህግያ ኤንታ ጉግያን ዎꬃና፤ ኤንታ ዎዛናን ፃፋና። ታኒ ኤንታ ፆሳ ግዳና፤ ኤንትካ ታ አሰ ግዳና።
HEB 8:11 ኤንታፈ ኦንካ ባ ሾሩዋ ዎይኮ ባ እሻ፥ ‘ጎዳ ኤራ’ ያግድ ታማርሰና። ኤንቲ ጉꬃፈ ግታ ጋካናዉ ኡባይ ታና ኤራና።
HEB 8:12 ታኒ ኤንታ ናቁዋ አቶ ጋና፤ ኤንታ ናጋራ ዛራ ቆፕከ” ያጌስ።
HEB 8:13 ፆሳይ ሀ ጫቁዋ “ኦራꬅ” ግድ ፄግሸ ኮይሮይሳ ጋልእስስ። ህዛ፥ ጋልአይነ ጬጋይ ꬋይያ ዎደይ ጋክስ።
HEB 9:1 ኮይሮ ጫቁዋስ ፆሳ ጎይንያ ዎጋይነ ሳአ ፆሳ ኬꬃይ ደኤስ።
HEB 9:2 ዱንካነይ ኤቅስ። እያን ፆምፐ ዎꬅያ ኮጫይ፥ ፃርጴዛይነ ጎዳ ስንꬃን ዎꬅያ ኡይꬃይ ደኤስ፤ ሄ በሳይ ጌሻ በሳ ጌተቴስ።
HEB 9:3 ናምአንꬆ ማጋራጁዋፈ ጉየ ባጋራ ደእያ በሳይ ኡባፈ ጌሻ በሳ ጌተቴስ።
HEB 9:4 እያ ግዶን እፃነ ጩይስያ ዎርቃ ሳፅነይነ ዎርቃን ሜሸትዳ ጫቆ ታቦተይ ደኤስ። ሄ ጫቆ ታቦትያን ማናይ ደእያ ዎርቃ ፃሮይ፥ አጭዳ አሮና ፃምአይነ ሙሰ ህገይ ፃፈትዳ ናምኡ ሎቸ ሹቻት ደኦሶና።
HEB 9:5 ሄ ታቦትያፐ ቦላ ባጋራ አቶተꬃ ካማ ባንታ ቀፍያን ገንꬅያ ቦንቾ ክሩበት ደኦሶና። ሽን ሀእ ሄ ኡባ ቆንጭስድ ኦዳናዉ ዳንዳኦኮ።
HEB 9:6 ሀ ኡባይ ሀይሳዳ ጊግዳፐ ጉየ፥ ካህነት ኡባ ዎደ ባንታ ኦሱዋ ኦꬃናዉ ዱንካንያስ ኮይሮ ክፍልያ ገሎሶና።
HEB 9:7 ሽን ካህነ ሀላቃ ፃላል ዱንካንያስ ናምአንꬆ ክፍልያ ላይꬃፈ እስ ቶሆ ገሌስ። እ ያ ገልሸ ባ ናጋራ ግሾነ አሳይ ኤሮና ኦꬅዳ ናጋራ ግሾ ሱꬃ ያርሾ ኤኮና ገለና።
HEB 9:8 ኮይሮ ዱንካነይ ኤቅድ ደእሽን፥ ኡባፈ ጌሻ በሳ ኤፍያ ኦገይ ቡሮ ዶየትቦናይሳ ጌሻ አያናይ ሄሳን ኤርሴስ።
HEB 9:9 ሄስ ሀ ዎድያስ ሌምሶ፤ ፆሳስ እመትያ እሞይነ ያርሾይ ጎይንያ ኡራ ካሀ ጌሻናዉ ዳንዳኦናይሳ ሀይስ በሴስ።
HEB 9:10 ሄሳት ሙሳባ፥ ኡሻባነ ዱማ ዱማ ሜቻ ዎጋታ ኦደይሳታ። ኤንቲ ኦራꬃ ዎጋይ ያና ጋካናዉ ኦሰትያ ካረ ባጋ ዎጋታ።
HEB 9:11 ሽን ክርስቶስ ሀእ ኑ ደምዳ ሎኦባታስ ካህነ ሀላቃ ግድድ ይስ። እ ገልዳ ዱንካነይ ግታነ ፖሎ ግድዳይሳ። ሄ ዱንካነይ አሳ ኩሸን ኦሰትቤና ቃስ ሀ አላምያባ ግደና።
HEB 9:12 ክርስቶስ ኡባፈ ጌሻ በሳ ገልያ ዎደ ዴሻ ሱꬅነ ማር ሱꬅ ኤክድ ገልቤና። ሽን መርና አቶተꬃ እማናዉ ባ ሱꬃ ኤክድ ዛረꬆና ኦገን እስ ቶሆ ገልስ።
HEB 9:13 ዴሻ ሱꬃይነ ኮርማ ሱꬃይ፥ ፁገትዳ ኡሳ ብዶይ፥ ቱንዳ አሳ ቦላ ꬋርጨትድ ኤንታና ጌሽያባ ግድኮ፥
HEB 9:14 መርና ጌሻ አያና ባጋራ ቦረይ ባይና ያርሾ ኦꬅድ፥ ፆሳስ ባና እምዳ ክርስቶሳ ሱꬃይ፥ ደኦ ፆሳ ጎይናና መላ ሀይቆ ካለꬅያ ኦሱዋፐ ኑ ካሀ ዋት አꬅድ ጌሸኔ?
HEB 9:15 ሄሳ ግሾ፥ ፄገትዳይሳት ፆሳይ እምዳ መርና ላታ ኤካና መላ ክርስቶስ ኦራꬃ ጫቁዋስ ግዶ ግድድ ስገይሳ ግድስ። ሄስ ሀንዳይ አሳይ ኮይሮ ጫቁዋፐ ጋርሳን ደእያ ዎደ ኦꬅዳ ናጋራፐ ኤንታና ዎዛናዉ እ ሀይቅዳይሳና።
HEB 9:16 ህዛ፥ ኬከይ ደእኮ፥ ሄ ኬክዳ ኡራ ሀይቆይ ኤረታናዉ ኮሼስ።
HEB 9:17 ኬክዳ ኡራይ ሀይቅኮ እያ ኬከይ ምኔስ። ኬክዳ ኡራይ ሀይቆና አትኮ እያ ኬከይ ኦና።
HEB 9:18 ሀር አቶሽን፥ ኮይሮ ጫቆይካ ሱꬅ ባይና ምንቤና።
HEB 9:19 ሙሰይ ህገ ኪታ ኡባ አሳስ ኦድዳፐ ጉየ ማራ ሱꬅነ ዴሻ ሱꬅ ሃꬃራ ዋላክድ፥ ዞኦ ዶርሳ እክሰነ ህሶጰ ውርጮ ኤክድ፥ ማፃፋ ቦላነ አሳ ቦላ ዉርፅስ።
HEB 9:20 ሙሰይ አሳኮ፥ “ህንተ ናጋና መላ ፆሳይ ኪትዳ ሱꬃ ጫቆይ ሀይሳ” ያግስ።
HEB 9:21 ሄሳዳካ፥ ዱንካንያ ቦላነ ኦꬅያ ሚሸ ኡባ ቦላ ሱꬃ ዉርፅስ።
HEB 9:22 ቱማካ ህገይ ገይሳዳ ጉꬃባታፐ አትሽን፥ ኡባባይ ሱꬃን ጌዬስ። ሱꬅ ጉኮናሽን አቶተꬅ ባዋ።
HEB 9:23 ሳሉዋባስ ሌምሶ ግድዳይሳት ኡባይ መሄ ያርሾን ጌያናዉ ኮሼስ። ሽን ሳሎባት ባንታ ሁጰን ሄሳፈ አꬍያ ያርሹዋን ጌያናዉ ኮሼስ።
HEB 9:24 ክርስቶስ ቱማ ፆሳ ኬꬃስ ሌምሶ ግድዳ፥ አሳ ኩሸን ኦሰትዳ ኡባፈ ጌሻ በሳ ገልቤና። ሽን እ ሀእ ኑ ግሾ፥ ፆሳ ስንꬃን በንታናዉ ሳሉዋ ገልስ።
HEB 9:25 ካህነ ሀላቃይ ላይꬃን ላይꬃን ባ ሱꬅ ግዶናይሳ ኤክድ፥ ኡባፈ ጌሻ በሳ ገሌስ። ሽን ክርስቶስ ዳሮ ቶሆ ባና ያርሻናዉ ሳሎ ገልቤና።
HEB 9:26 ሄሳዳ ሀንዳባ ግድያኮ፥ ክርስቶስ አላመይ መቶሳፐ ዶምድ ዳሮ ቶሆ ዋየታናዉ ኮሼስ። ሽን ሀእ ዎድያ ዉርሰꬃን ናጋራ ድጋናዉ ባና ያርሽድ ዛረꬆና ኦገን እስ ቶሆ በንትስ።
HEB 9:27 አስ ኡባይ እስ ቶሆ ሀይቃናዉ ሄሳፈ ጉየ ፕርደታናዉ በሴስ።
HEB 9:28 ሄሳዳካ፥ ክርስቶስ ዳሮ አሳ ናጋራ ድጋናዉ እስ ቶሆ ያርሸትስ። ሽን እ ናጋራ ቶካናዉ ግዶናሽን፥ ባና ናገይሳታ አሻናዉ ናምአንꬆ ቆንጫና።
HEB 10:1 ሙሰ ህገይ ያናዉ ደእያ ሎኦባታስ ኩያፐ አትሽን፥ ባ ሁጰን ዋና ግደና። ሄሳ ግሾ፥ ላይꬃን ላይꬃን ፓጨይ ባይና ያርሸትያ ያርሾይ ጎይናናዉ ሺቅያ አሳ ፖሎ ኦꬃናዉ ዳንዳኤና።
HEB 10:2 ህገይ ኤንታ ፖሎ ኦꬃናዉ ዳንዳእዳባ ግድያኮ ኤንቲ ያርሾ ያርሸይሳ አጋናሽን። ቃስ ጎይናናዉ ሺቅያ አሳይ ባንታ ናጋራፐ ጌያና፤ ኤንታ ካሀይካ ኤንታና ባላ ግድ ሞተና።
HEB 10:3 ሽን ሄ ያርሾት ላይꬃን ላይꬃን ናጋራ ቆፍሶሶና።
HEB 10:4 አይስ ጊኮ፥ ኮርማ ሱꬅነ ዴሻ ሱꬅ ናጋራ ድጋናዉ ዳንዳኤና።
HEB 10:5 ሄሳ ግሾ፥ ክርስቶስ ሀ አላምያ ይዳ ዎደ ሀይሳዳ ያግስ: “ኔኒ ያርሾነ እሞ ኮያባካ፤ ሽን ታዉ አሾ ጊግሳዳሳ።
HEB 10:6 ኔኒ ፁሳ ያርሾንነ ናጋራ ያርሾን ኡፋይታባካ።
HEB 10:7 ሄ ዎደ፥ ‘ታ ግሾ ማፃፋን ፃፈትዳይሳዳ፥ ጎዳዉ፥ ታኒ ነ ሸንያ ኦꬃናዉ ያስ’ ያጋስ” ያግስ።
HEB 10:8 ያርሾይ ያርሸታና መላ ህገይ ኪትያባ ግድኮካ፥ ክርስቶስ ኮይሮ፥ “ኔኒ ያርሾነ እሞ፥ ፁሳ ያርሾነ ናጋራ ያርሾ ኮያባካ፤ ኤንታን ኡፋይታባካ” ያግስ።
HEB 10:9 ካልድካ እ፥ “ጎዳዉ፥ ሄኮ ታኒ ነ ሸንያ ኦꬃናዉ ያስ” ያግስ። ሄሳ ግሾ፥ ክርስቶስ ናምአንꬁዋ ኤሳናዉ ኮይሮይሳ ሻርስ።
HEB 10:10 የሱስ ክርስቶሲ ፆሳ ሸንያ ኦꬅድ፥ ዛረꬆና ኦገን እስ ቶሆ ባ አሹዋ ያርሽዳ ግሾ ኑኒ ጌይዳ።
HEB 10:11 ካህነ ኡባይ፥ ናጋራ ድጋናዉ ዳንዳኦና ሄ ያርሾታ ጋላስ ጋላስ ያርሽሸ ኤቅድ ባ ኦሱዋ ኦꬄስ።
HEB 10:12 ሽን ክርስቶስ ኡባ ዎደስ ግድያ እስ ናጋራ ያርሹዋ ያርሽድ፥ ፆሳፈ ኡሻቻ ባጋን ኡትስ።
HEB 10:13 ሄ ዎድያፐ ዶምድ እያ ሞርከት እያ ቶሆይ የꬍያባ ኦꬃና ጋካናዉ ናጌስ።
HEB 10:14 እ ዛረꬆና ኦገን እስ ቶሆ ባና ያርሽዳ ያርሹዋን ጌሻታ መርናዉ ፖሎ ኦꬅስ።
HEB 10:15 ቃስ ጌሻ አያናይ ኑስ ሀይሳ ማርካቴስ። ኮይሮ ሀይሳዳ ያግስ፦
HEB 10:16 “ሄ ጋላሳታፐ ጉየ፥ ታኒ ኤንታራ ጫቅያ ጫቆይ ሀይሳ፦ ታኒ ታ ህግያ ኤንታ ቆፋን ዎꬃና፤ ኤንታ ዎዛናን ፃፋና” ያጌስ።
HEB 10:17 ካልድካ፥ “ታኒ ኤንታ ናጋራነ ኤንታ ኢታ ኦሱዋ ዛራ ቆፕከ” ያጌስ።
HEB 10:18 ህዛ፥ ናጋር አቶ ጌተትዳፐ ጉየ ናጋራስ ያርሸትያ ያርሾ ኮሸና።
HEB 10:19 ህዛ፥ ታ እሻቶ፥ ኑኒ የሱሳ ሱꬃ ባጋራ ኡባፈ ጌሻ በሳ ገላናዉ ኑስ ምኖተꬅ ደኤስ።
HEB 10:20 ኑ ገላናይ ክርስቶስ ባ ማጋራጁዋ፥ ሄስካ ባ አሹዋ ባጋራ ኑስ ዶይዳ ኦራꬅነ ደኦ ግድዳ ኦግያና።
HEB 10:21 ኑስ ፆሳ ኬꬃ ቦላ ሹመትዳ ግታ ካህነ ሀላቃይ ደኤስ።
HEB 10:22 ኑኒ ኢታ ካሀፐ ጌያናዉ ኑ ዎዛና ዉርፀትድ፥ ኑ አሳተꬃ ፅሎ ሃꬃን ሜጨትድ፥ ሱረ ዎዛናንነ ፖሎ አማኖን ፆሳኮ ሺቆስ።
HEB 10:23 ኑስ ኡፋይሳ ቃላ እምዳ ፆሳይ አማነትዳይሳ ግድያ ግሾ ኑ ማርካትያ ኡፋይሳ ኡሻች ሀድርስ ጎና ምንꬅድ ኦይኮስ።
HEB 10:24 እሶይ እሱዋ ሲቆስነ ሎኦ ኦሶስ ዋት ደንꬃነኮ አነ ቆፖስ።
HEB 10:25 እሶት እሶት ሜዘ ኦꬅድ ሺቀይሳ አግዳይሳዳ ኑኒ እስፈ ሺቀይሳ አጎኮ። ሽን ጎዳ ጋላሳይ ማታትዳይሳ ህንተ በእያ ግሾ ሄሳ ካሰይሳፈ አꬅድ ኦꬅተ።
HEB 10:26 ኑኒ ቱማ ኤራተꬃ ኤክዳፐ ጉየ ኤርሸ ናጋራ ኦꬅኮ፥ ህዛፐ ኑ ናጋራ ግሾ ያርሸታና ያርሾይ ባዋ።
HEB 10:27 ሽን ህዛ አትዳይ ያሽያ ፕርዳነ ፆሳ ሞርከታ ፁጋናዉ ጊግዳ ዎልቃማ ታማ።
HEB 10:28 ሙሰ ህግያ ኪተቶና እፅዳ ኦንካ ናምኡ ዎይኮ ሄꬑ አስ እያ ቦላ ማርካትኮ ቃይ ባይናሽን ሀይቄስ።
HEB 10:29 ያትን፥ ፆሳ ናኣ ካꬍዳ ኡራይ፥ ባና ጌሽዳ ፆሳ ጫቆ ሱꬃ ቱናባዳ ቆፕዳ ኡራይ፥ ቃስ አꬎ ኬሀተꬃ አያና ጫይዳ ኡራይ፥ አይ መላ ኢታ ፕርዳ ኤካናዉ በሲያኮ አነ ቆፕተ።
HEB 10:30 ህዛ፥ “ሀሎ ከሶይ ታባ፥ ታ ኩሸ ዛራና” ግዳይሳ ኑ ኤሮስ። ቃስካ፥ “ጎዳይ ባ አሳ ፕርዳና” ያግስ።
HEB 10:31 ደኦ ፆሳ ኩሸን ኩንደꬅ ዳሮ ያሼስ።
HEB 10:32 ህንተዉ ፆሳ ፖኦይ ፖእዳፐ ጉየ ህንተ ዳሮ ዋየን፥ ግታ ባፀን ገንጭዳ በን ዎድያ ቆፕተ።
HEB 10:33 እስ እስ ቶሆ ህንተ አሳ ስንꬃን ጫየትደታ፤ ጎደትደታ፤ እስ እስ ቶሆ ሄሳ መላ ዋየይ ጋክዳ አሳራ እስፈ ዋይደታ።
HEB 10:34 ቃሾን ደእያ አሳስካ ቃትደታ። ህንተዉ ሎኦነ ꬋዮና ሻሎይ ሳሎን ደኤይሳ ህንተ ኤርዳ ግሾ ህንተ ሻሎይ ቦንቀትያ ዎደ ኡፋይሳን ዳንዳእደታ።
HEB 10:35 ሄሳ ግሾ፥ ግታ ዎይቶይ ደእያ ህንተ ምኖተꬃ የጎፍተ።
HEB 10:36 ፆሳ ሸንያ ፖልድ፥ እ ህንተዉ እማና ግዳ ኡፋይሳ ኤካና ጋካናዉ ገንጫናዉ ኮሼስ።
HEB 10:37 ህዛ፥ ጌሻ ማፃፋን፥ “እ፥ ያና ግዳይስ ያና፤ ጋምኤና።
HEB 10:38 ሽን ታ ፅሎይ፥ ታናን አማነትድ ዳና፤ ኦንካ ጉየ ስምኮ ታና ኡፋይሰና” ያጌስ።
HEB 10:39 ኑኒ አማንድ አትያ አሳ ባጋፈ አትሽን፥ ጉየ ስሚድ ꬋይያ አሳ ባጋ ግዶኮ።
HEB 11:1 አማኖ ጉሳይ፥ ደማና ግድ ኡፋይሳን አማነትድ ናግያባነ ኑ በኦናባ በእያዳ ኦꬅድ ኤክያባ።
HEB 11:2 በን አዋት አማኖን ፆሳፈ ማርካተꬅ ኤክዶሶና።
HEB 11:3 አላመይ ፆሳ ቃላን መትዳይሳ ኑ አማኖን ኤሮስ። ቃስ በንትያባይ በንቶናባፐ መትስ።
HEB 11:4 አበል ቃየላፐ አꬍያ ያርሾ ፆሳስ ያርሽዳይ አማኖና። ፆሳይ አበላ እሙዋ ኡፋይትድ ኤክዳ ዎደ እ ፅሎ ግድዳይሳ ማርካትስ። አበል ሀር አቶሽን፥ ሀይቅድካ ባ አማኑዋን ሀእ ጋካናዉ ኦዴስ።
HEB 11:5 ሄኖከይ ሀይቆና ሳሎ ብዳይ አማኖና። ፆሳይ እያ ኤክዳ ግሾ ኦንካ እያ በአናዉ ዳንዳእቤና። ሄኖከይ ሳሎ ኤከታናፐ ስን እ ፆሳ ኡፋይስዳ አስ ግደይስ ኦደትስ።
HEB 11:6 አማኖይ ባይና ኦንካ ፆሳ ኡፋይሳናዉ ዳንዳኤና። ፆሳኮ ያ ኦንካ ፆሳይ ደኤይሳነ ባና ኮየይሳታስ ዎይቶ እመይሳ አማናናዉ ኮሼስ።
HEB 11:7 ኖሄይ ቡሮ በንቶናባስ ፆሲ እያዉ ኦድዳ ዎደ ፆሳስ ያይድ፥ ባናነ ባ ሶ አሳ አሻናዉ አማኖን ማርካበ ኬፅስ። ያትድ ባ አማኑዋን አላመ ፕርድድ፥ አማኖን በንትያ ፅሎተꬅ ፆሳፈ ኤክስ።
HEB 11:8 አብራሃመይ ላታ ኦꬅድ ኤካና ቢታ ባና መላ ፆሳይ እያ ፄግዳ ዎደ ሀር አቶሽን፥ እ አዉ ብያኮ ኤሮና እፅኮካ ኪተትዳይ አማኖና።
HEB 11:9 አብራሃመይ ፆሳይ እያዉ እማና ግዳ ቢታን በተ አሳዳ ደእዳይ አማኖና። ፆሳይ ሄ እማና ግዳይሳ እያራ እስፈ ላታናው ደእያ ይሳቃራነ ያይቆባራ ዎላ ዱንካነን ደእስ።
HEB 11:10 እ፥ ፆሳይ ቆፕድ ኬፅዳ ፃላ ባሶይ ደእያ ካታማ ናጌስ።
HEB 11:11 ሳራ ባ ሁጰን ጭምዳባ ግድኮካ ኡፋይስ እምዳ ፆሳይ አማነትዳይሳ ግደይሳ ኤርዳ ግሾ ቃንꬃታናዉ ዎልቃ ደምዳይ አማኖና።
HEB 11:12 ሄሳ ግሾ፥ ሀይቅዳ አስ ዳንያ እስ አድያፈ ሳሎ ፆልንቶ መላነ አባ ጋፃን ደእያ ታይቦይ ባይና ሻፈ መላ ዘረꬃይ የለትዶሶና።
HEB 11:13 ሄ አሳ ኡባይ ባንታዉ ጌተትዳ ኡፋይሳ ቃላ ኤኮና አማኖን ሀይቅዶሶና። ሽን ሃሆራ ሄሳ በእድ፥ ደምዳዳ ኦꬅድ፥ ኡፋይሳን ኤክዶሶና። ቃስ ኤንቲ ሳአን እማነ በተ አስ ግደይሳ ኤርዶሶና።
HEB 11:14 ሄሳዳ ግያ አሳይ ባንታ ቢታ ናገይሳ ቆንጨን በሴስ።
HEB 11:15 ኤንቲ ሄ አግድ ከይዳ ቢታ ጉየ ቆፕዳባ ግድያኮ ጉየ ስማናዉ ዳንዳኦሶና።
HEB 11:16 ሽን ሀእ አꬍድ ሎእያ ሳሎ ቢታ ላሞቶሶና። ሄሳ ግሾ፥ ፆሳይ ኤንታዉ ካታማ ጊግስዳ ግሾ፥ “ኤንታ ፆሳ” ጌተትድ ፄገታናዉ ዬላተና።
HEB 11:17 አብራሃመይ ፓጨትዳ ዎደ ይሳቃ ያርሽዳይ አማኖና። ሄ ኡፋይሳ ቃላ ኤክዳ አብራሃመይ ባ እስ ናኣ ያርሻናዉ ጊግስ።
HEB 11:18 ፆሳይ አብራሃመኮ፥ “ነ ዘረꬃይ ይሳቃ ባጋራ ፄገታና” ያግድ ኦድስ።
HEB 11:19 ፆሳይ ሀይቆፐ ደንꬃናዉ ዳንዳኤይሳ አብራሃመይ አማንዳ ግሾ፥ ይሳቃ ሀይቆፐ ፓፅ ደንድዳዳ ኦꬅድ ዛር ኤክስ።
HEB 11:20 ይሳቅ ዎደፐ ሀናናባ ኤርድ ያይቆባነ ኤሳዌ አንጅዳይ አማኖና።
HEB 11:21 ያይቆብ ሀይቃና ሀንሸ፥ እስ እስ ዮሰፋ ናይታ አንጅዳይነ ጉፈ ቦላ ካትድ ጎይንዳይ አማኖና።
HEB 11:22 ዮሰፍ ሀይቃናዉ ማትዳ ዎደ እስራኤለ አሳይ ግብፀፈ ከያናይሳ ኦድዳይነ ባ መቀꬃ ኦꬃናባ ኤንታ ኪትዳይ አማኖና።
HEB 11:23 ሙሰይ የለትዳፐ ጉየ እያ አያነ እያ አዋይ ማላ ሎኦ ናአ ግድዳይሳ በእድ ሄꬑ አጌና ቆትዳይ አማኖና፤ ኤንቲ ካዋ አዋጁዋ ባብቦኮና።
HEB 11:24 ሙሰይ ድጭዳፐ ጉየ ግብፀ ካዋ ናኤ ናአ ጌተታናይሳ እፅዳይ አማኖና።
HEB 11:25 ሙሰይ ናጋራን ጉꬃ ዎደስ ኡፋይታናፐ፥ ፆሳ አሳራ ዋየ ኤካናይሳ ዶርስ።
HEB 11:26 እ ዎደፐ ደማና ዎይቱዋ ትሽ ኦꬅድ ፄልዳ ግሾ፥ ግብፀ ሻሉዋፐ አꬅድ ክርስቶሳ ግሾ ቦረታናይስ ዳሮ አꬍያ ዱረተꬅ ግድዳይሳ ኤርስ።
HEB 11:27 ሙሰይ ካዋ ሀንቁዋ ያዮና፥ ግብፀፈ ከይዳይ አማኖና። በንቶና ፆሳ በእዳ አሳዳ ሀንድ ባ ቆፋን ገንጭስ።
HEB 11:28 ሀይቆ ኤህያ ኪታንቾይ እስራኤለ አሳ ባይራ ናይታ ዎꬎና መላ ሙሰይ ፓስካነ ሱꬃ ዉርፀꬃ ዎጋ ኦꬅዳይ አማኖና።
HEB 11:29 እስራኤለ አሳይ መላ ቢታራ ሄመትያዳ ሄመትድ፥ ዞኦ አባ ፕንዳይ አማኖና። ሽን ግብፀ አሳይ ገላናዉ ፓጭድ በእያ ዎደ ሃꬃይ ኤንታ ምትስ።
HEB 11:30 እስራኤለ አሳይ እያርኮ ካታማ ሹቻ ድርሳ ላፑን ጋላስ ዩይድ፥ ኩንድስዳይ አማኖና።
HEB 11:31 ላይምያ ራኣባ ቢታ ዎቸይሳታ ሞክዳ ግሾ፥ ኪተቶና አሳራ ሀይቆና አትዳይ አማኖና።
HEB 11:32 ህዛ፥ ሀራ ታ አይ ጎ? ገድዮናባ፥ ባራቃባ፥ ሳምሶናባ፥ ዮፍታሄባ፥ ዳዊታባ፥ ሳሜላባ፥ ቃስ ናበታባ ኦዳናዉ ታዉ ዎደይ ግደና።
HEB 11:33 ኤንቲ አማኖን ካዎተꬃታ ፆንዶሶና፤ ፅሎተꬃን አይስዶሶና፤ ፆሳይ እማና ግዳ ኡፋይሳ ኤክዶሶና፤ ጋሞታ ዶና ጎርድዶሶና፤
HEB 11:34 ታማ ዎልቃ ቶይስዶሶና፤ ሞርከታ ማሻፈ አትዶሶና፤ ባንታ ዳቡራን ምንዶሶና፤ ኦላን ዎልቃማ ግድዶሶና፤ አላጋ ቶራ ጎድዶሶና።
HEB 11:35 ማጫሳት ባንታ ሀይቅዳይሳታ ሀይቆፐ ፓፅን ኤክዶሶና። ቃስ ሀራት አꬍያ ሀይቆፐ ደንዱዋ ኤካናዉ ኮይድ ቃሾፐ ብለታናይሳ እፅዶሶና።
HEB 11:36 ሀራት አሳን ቦረትድ ልሶን ጋራፈትዶሶና፤ ሀራት ሳንꬃላታን ቃሸትድ ቃሾ ኬꬃን የገትዶሶና።
HEB 11:37 ኤንቲ ሹቻን ጫደትዶሶና፤ ማጋዘን ናምአ ከይድ ጳልቀትዶሶና፤ ፓጨትዶሶና፤ ማሻን ሀይቅዶሶና፤ ኤንታዉ ኡባባይ ꬋይን መቶትዶሶና። ዶርሳ እተነ ዴሻ እተ ማእድ ዩይዶሶና።
HEB 11:38 ኤንታዉ ሀ አላመይ ጊጎና እፅን መላ ቢታን፥ ደረ ቦላ፥ ጎንጎሎንነ ኦላ ግዶን ዩይዶሶና።
HEB 11:39 ፆሳይ ኤንታ አማኑዋባ ማርካትኮካ፥ ሄ ኡባይ ጌተትዳ ኡፋይሳ ቃላ ኤክቦኮና።
HEB 11:40 ፆሳይ ኑስ ሎኦባ ቆፕ ዎꬅዳ ግሾ ኤንቲ ኑኒ ባይና ፖሎ ግዶኮና።
HEB 12:1 ህዛ፥ ሻራዳ ኑ ዩሹዋን ዳርዳ ሀይሳ መላ ማርካት ኑ ማታን ደእያ ግሾ ኑና ꬉብያ ኡባነ ኦይክድ ሃርያ ናጋራ ድግድ፥ ኑ ስንꬃን ደእያ ጋደ ዎꬃ ገንጫን ዎፆስ።
HEB 12:2 ኑ አማኑዋስ ኦገ ዶይዳይሳነ ኑ ዉርሰꬃ ፖሉዋኮ ኑና ጋꬅያ የሱሳ ቦላ ኑ አይፍያ ዎꬆስ። የሱሲ ዎደፐ ደእያ ኡፋይሳ ግሾ ማስቃልያ ዋይያ ዳንዳእድ፥ ዬላ ሀይቁዋ ካꬍድ፥ ፆሳፈ ኡሻቻ ባጋን ኡትስ።
HEB 12:3 ህዛ፥ ህንተ ዶጭድ ኡፋይስ ቃንፆና መላ ናጋራንቾታ እፁዋ ዳንዳእዳ የሱሳ ቆፕተ።
HEB 12:4 ናጋራራ ደእያ ባፅያን ቡሮ ሱꬁ ጉሳና ጋካናዉ ኤቀትበከታ።
HEB 12:5 ፆሳይ ባ ቃላን፥ ባ ናይታዳ ህንተና ዞርዳይሳ ዶግደታ። “ታ ናአዉ፥ ፆሳ ሴራ ለቆፋ፤ እ ነና ሴርያ ዎደ ኡፋይስ ቃንፆፋ።
HEB 12:6 ጎዳይ ባ ዶስያ ኡራ ሴሬስ፤ ቃስ ባ ናአዳ ኤክያ ኡባ ጋራፈስ” ያጌስ።
HEB 12:7 ፆሳይ ህንተና ባ ናይታዳ ሴርያ ዎደ ገንጭተ፤ አዋይ ሴሮና ናእ ኦኔ?
HEB 12:8 ፆሳይ ባ ናይታ ኡባ ሴሬስ፤ ህንተ ሴረቶና እፅኮ ቱማ እያ ናይታ ግዶናሽን ባላኮ ናይታ።
HEB 12:9 ቃስ ኑና የልዳ ኑ አዋት ኑና ሴሮሶና፤ ኑካ ኤንታና ቦንቾስ። ያትን፥ ኑኒ ኑ አያና አዋስ ዋንድ አꬅድ ሃረቶኮ?
HEB 12:10 ህዛ፥ ኑ አዋት ባንታዉ ሎኦ ዳንዳ መላ ጉꬃ ዎደስ ኑና ሴርዶሶና። ሽን ፆሳይ ኑ ጎአስ፥ ኑ እያ ጌሻተꬃን ሻከታና መላ ሴሬስ።
HEB 12:11 ኑኒ ሴረትያ ዎደ ይሎዬስፐ አትሽን፥ ኡፋይሰና። ሽን ጉየፐ ሴረተꬅ ሜዘትዳ አሳስ ሴራይ፥ ሳሮይ ኩምዳ ፅሎተꬃ አይፈ አይፍሴስ።
HEB 12:12 ህዛ፥ ህንተ አርጋጭዳ ቀስያነ ህንተ ዳቡርዳ ጉልባታ ምንꬅተ።
HEB 12:13 ዎበይ ፓፃና መላፐ አትሽን፥ አꬅድ መቆና መላ ህንተ ቶሁዋስ ሱረ ኦገ ጊግስተ።
HEB 12:14 አሳ ኡባራ ሳሮ ዳናዉነ ጌሻተꬃን ዳናዉ ምንተ፤ ጌሻተꬅ ባይና ኦንካ ጎዳ በአናዉ ዳንዳኤና።
HEB 12:15 ህንተፈ ኦደስካ ፆሳ አꬎ ኬሀተꬃይ ፓጮናዳ፥ ቃስ ጫሞ አይፈ አይፍድ ዳሮ አሳ ቱንስያነ ꬋይስያ ዘረꬃዳ ግዶና መላ ናገትተ።
HEB 12:16 ህንተ ግዶን ላይማትያ አስ ዎይኮ እስ ቶሆ ምያ ካꬃስ ባ ባይራተꬃ ቶችድ ባይዝዳ ኤሳዌ መላ አስ ዶና መላ ናገትተ።
HEB 12:17 ጉየፐ ኤሳዌይ ሄ አንጁዋ ኤካናዉ ኮይዳ ዎደ ድገትዳይሳ ኤሬታ። እ ሄ አንጁዋ አፉꬃን ምንድ ኮይኮካ፥ ደማናዉ ዳንዳእቤና፤ እ ናጋራፐ ስማናዉ ቃዳ ደምቤና።
HEB 12:18 ህንተ ኩሸን ቦሸትያ ሲና ደርያኮ፥ ኤፅያ ታማኮ፥ ꬉማኮ፥ ጫጋናኮ፥ ጎትያኮ፥
HEB 12:19 ሞይዘ ፑኑኮ ዎይኮ ቃላይ ስኤትያ በሳኮ ይቤከታ። ሄ ቃላ ስእዳ አሳይ ሀራ ጉዣ ቃላ ስኦና መላ ዎስዶሶና።
HEB 12:20 አይስ ጊኮ፥ “ሀር አቶሽን፥ ዶእ ሄ ዙማ ቦችኮ፥ ሹቻን ጫደትድ ሀይቆ” ያግዳ ኪታ ኤንቲ ቶካናዉ ዳንዳእቦኮና።
HEB 12:21 ሄ ሀንያባይ ዳሮ ዳጋንꬅያባ ግድዳ ግሾ ሙሰይካ፥ “ታኒ ያሻን ኮኮራስ” ያግስ።
HEB 12:22 ሽን ህንተ ፅዮነ ዙማኮ፥ ደኦ ፆሳይ ደእያ የሩሳላመ ካታማኮ፥ እስፈ ሺቅድ ኡፋይትያ ዳሮ ሙኩሉ ኪታንቾታኮ ሳሉዋ ይደታ።
HEB 12:23 ኤንታ ሱንꬃይ ሳሎን ፃፈትዳ ዎሳ ኬꬃ ባይራ ናይታኮ፥ አሳ ኡባ ዳይና ግድዳ ፆሳኮ፥ ፖሎ ግድዳ ፅሎ አሳ አያናታኮ ይደታ።
HEB 12:24 ኦራꬃ ጫቁዋስ ግዶ ግድድ ስገꬅያ የሱሳኮ፥ አበላ ሱꬃፈ አꬍያባ ኦድያ ዉርፀትዳ ሱꬃኮ ይደታ።
HEB 12:25 ህንተዉ ኦድያ ኡራ ቃላ እፃስ ጎና መላ ናገትተ። ካሰይሳት ሳአን ግድድ ኦድዳ ኪታ ስኦና እፅድ፥ ከስ ኤክቦናባ ግድኮ፥ ያትን፥ ሳሎን ግድድ ኦድያ ቃላ ኑኒ እፃስ ጊኮ ዋንድ ከስ ኤካኔ?
HEB 12:26 ሄ ዎደ እያ ቃላይ ሳአ ቃꬅስ። ሽን ሀእ ታኒ፥ “ሳአ ፃላላ ግዶናሽን፥ እስ ቶሆ ዛራዳ ሳሉዋካ ቃꬃና” ያግስ።
HEB 12:27 “እስ ቶሆ ዛራዳ” ግያ ቃላይ ቃፆናባይ ምንድ ዳናይሳ፥ ቃስ ቃፅያ መትዳባት ꬋያናይሳ በሴስ።
HEB 12:28 ኑኒ ቃፃናዉ ዳንዳኦና ካዎተꬃ ኤክያ ግሾ ፆሳ ጋላቶስ፤ ፆሳ ኡፋይስያ ኦገን ቦንቾንነ ያሻተꬃን እያ ጎይኖስ።
HEB 12:29 ህዛ፥ ኑ ፆሳይ ቱማ ፁግያ ታማ።
HEB 13:1 አማንያ አሳዳ እሶይ እሱዋራ ፖሎ ሲቀትተ።
HEB 13:2 እማ ሞከይሳ ዶጎፕተ። እስ እስ አሳት ሄሳዳ ኦꬅሸ ኤሮና ኪታንቾታ ሞክዶሶና።
HEB 13:3 ቃሾን ደኤይሳታ ህንተካ ኤንታራ እስፈ ቃሾን ደእያዳ ኦꬅድ ኤንታና ቆፕተ። ዋየ ኤክያ አሳራ እስፈ ህንተካ ዋየ ኤክያዳ ኦꬅድ ኤንታና ቆፕተ።
HEB 13:4 ኤኮይነ ገሎይ አሳ ኡባ ማታን ቦንቸትዳባ ግዶ። ቃስ ፆሳይ ላይማተይሳታነ ላመይሳታ ፕርዳናዉ ደእያ ግሾ አዝናይነ ማችያ እሶይ እሱዋስ አማነታናዉ በሴስ።
HEB 13:5 ሚሸ ሲቆፐ ህንተና ናግተ፤ ህንተዉ ደእያባን አልተ። ፆሳይ፥ “ታኒ ነና ኡባራካ የግከ ዎይኮ አግከ” ያግስ።
HEB 13:6 ሄሳ ግሾ፥ ኑኒ አማነትድ፥ “ጎዳይ ታና ማደይሳ፤ ታ ያይከ፤ አስ ታና አይ ኦꬃኔ?” ያጎስ።
HEB 13:7 ፆሳ ቃላ ኮይሮ ህንተዉ ኦድዳ ህንተና ካለይሳታ ቆፕተ። ኤንቲ ዋንድ ደእዳኮ ኤንታ ዱሳ በእድ ኤንታ አማኑዋ ካልተ።
HEB 13:8 የሱስ ክርስቶሲ ዝነካ ሀችካ መርናዉካ ላመተና።
HEB 13:9 ዱማ ዱማ ኦራꬃ ትምርተን ሀራሶ ብድ ꬋዮፕተ፤ ቦፕተ። ኑ ዎዛናይ ፆሳ አꬎ ኬሀተꬃን ምናናዉ በሴስፐ አትሽን፥ ምን ጎኦና ካꬃን ዎጋ ፖሎን ግዶፖ።
HEB 13:10 ሽን ዱንካንያ ግዶን ኦꬅያ ካህነት ሄ ያርሾ ካꬃፈ ማናዉ ኤንታዉ ማት ባይና ያርሾ በሳይ ኑስ ደኤስ።
HEB 13:11 ካህነ ሀላቃይ ናጋራ ያርሾስ መሄ ሱꬅ ኤክድ ያርሻናዉ ኡባፈ ጌሻ በሳ ገሌስ። ሽን ሄ መህያ አሹዋ ድርሳፈ ካረን ፁጌስ።
HEB 13:12 ሄሳዳካ፥ የሱሲ ደርያ ናጋራፐ ባ ሱꬃን ጌሻናዉ ካታማ ፐንግያፈ ካረን ዋየትስ።
HEB 13:13 ህዛ፥ ኑኒ ቦርያ ቶክድ ድርሳፈ ካረ እያኮ ከዮስ።
HEB 13:14 ህዛ፥ ኑስ ሀይሳን መርናዉ ደእያ ካታም ባዋ፥ ሽን ኑኒ ያና ካታማ ናጎስ።
HEB 13:15 ህዛ፥ የሱሳ ባጋራ ኡባ ዎደ እያ ሱንꬃስ ማርካትያ መተርሻ ጋላታ ያርሾ ፆሳስ እሞስ።
HEB 13:16 ሎኦባ ኦሶነ ህንተዉ ደእያባፐ መቶትዳ አሳስ እሞ ዶጎፕተ። ህዛ፥ ሄሳ መላ ያርሾይ ፆሳ ኡፋይሴስ።
HEB 13:17 ህንተና ካለይሳታስ ኪተትተ፤ ኤንቲ ግያባ ኦꬅተ። ኤንቲ ባንታ ኦꬅያባስ ፆሳ ስንꬃን ኦይሸታናዉ ደእያ ግሾ፥ ህንተና ሄሞሶና። ህንተ ኤንታዉ ኪተትኮ፥ ባንታ ኦሱዋ ኡፋይትድ ኦꬃና፤ ሄስ ሀኖና እፅኮ፥ ኤንቲ አዛንሸ ኦꬃና፤ ሄስ ህንተና አይብባካ ማደና።
HEB 13:18 ኑስ ፆሳ ዎስተ። ኑ ካሀይ ጌሽ፤ ኑ ኡባ ዎደ ሎኦባ ኦꬃናዉ ኮዮስ።
HEB 13:19 ታኒ ህንተኮ ኤለሳዳ ያና መላ ህንተ ታዉ ምንꬅድ ፆሳ ዎሳና መላ ታ ህንተና ሀዳራ ጋይስ።
HEB 13:20 ሳሮተꬃ ፆሳይ፥ ዶርሳ ሄምያ ኑ ጎዳ የሱሳ፥ ባ መርና ጫቆ ሱꬃን ሀይቆፐ ደንꬅዳይስ፥
HEB 13:21 እያ ሸንያ ኦꬃና መላ ሎኦባ ኡባን እ ህንተና ዳንጭሶ። እያ ኡፋይስያባ የሱስ ክርስቶሳ ባጋራ ኑናን ፆሳይ ኦꬆ። የሱስ ክርስቶሳ ባጋራ ፆሳስ መርናፐ መርና ጋካናዉ ቦንቾይ ግዶ። አምንእ።
HEB 13:22 ታ እሻቶ፥ ታ ሀ ዳብዳብያ ህንተዉ ቃንꬃን ፃፍዳ ግሾ፥ ህንተ ታ ዞርያ ሳለቶና ኤካና መላ ታ ህንተና ዎሳይስ።
HEB 13:23 ኑ እሻይ፥ ፅሞትዮስ ቃሾፐ ብለትዳይሳ ኤርተ። እ ኤለስድ ታኮ ዪኮ ታ እያራ ህንተና ባዳ በአና።
HEB 13:24 ህንተና ካለይሳታነ አማንያ ኡባ ሳሮ ጊተ። ፃለፐ ይዳ አማንያ አሳይ ህንተና ሳሮ ያጎሶና።
HEB 13:25 ፆሳ አꬎ ኬሀተꬃይ ህንተ ኡባራ ግዶ። አምንእ።
JAM 1:1 ፆሳነ ጎዳ የሱስ ክርስቶሳ አይለይ፥ ያይቆብ፥ ቢታ ኡባን ላለትዳ ታማነ ናምኡ ሼሻታስ ኪትዳ ኪታ። ሳሮ፥ አይ መላ ደኤቲ?
JAM 1:2 ታ እሻቶ፥ ህንተና ዱማ ዱማ ፓጨይ ጋክያ ዎደ ህንተ ሎኦባ ደምዳዳ ኩመꬃ ኡፋይሳን ኤክተ።
JAM 1:3 ህንተ አማኑዋ ፓጨተꬃይ ዳንዳአ ህንተዉ እመይሳ ኤሬታ።
JAM 1:4 ህንተ ዉርሰꬅ ጋካናዉ ዳንዳእኮ አይብ ፓጨይ ባይና ፖሎነ ኩመꬅ ግደታ።
JAM 1:5 ህንተፈ ኦደስካ ጭንጫተꬅ ꬋይኮ ፆሳ ዎሶ። እያዉ እመታና። ፆሳይ ኦናካ ቦሮና ኡባስ ኬሀተꬃን እምያ ፆሰ።
JAM 1:6 ሽን እ ዎስያ ዎደ ስꬎና አማኖን ፆሳ ዎሶ። ስꬍያ ኦንካ ጫርኮይ ሱግን ቃፅያ አባ ዙለ መላ።
JAM 1:7 ናምኡ ቆፍ ደኤይነ ባ ኦግያን ኤቆና ኦንካ ጎዳፐ አይኮካ ደማና ግድ ቆፖፎ።
JAM 1:9 አማንያ ማንቆ አሳት፥ ፆሳይ ኤንታና ꬎቁ ኦꬅያ ዎደ ኡፋይቶ።
JAM 1:10 ቃስ አማንያ ዱረ አሳት ፆሳይ ኤንታና ዝቅ ኦꬅያ ዎደ ኡፋይቶ። ዱረ አሳት ጪሻዳ ꬋያና።
JAM 1:11 አዋይ ባ ምሻራ ከይድ ማታ መልስን፥ ጪሻይ ቆለቴስ፤ እያ ሎኦተꬃይካ ꬋዬስ። ሄሳዳካ፥ ዱረ አሳት ባንታ ኦሱዋን ዳቡርሸ ꬋያና።
JAM 1:12 መቱዋ ፆንድ አꬍዳፐ ጉየ፥ ፆሳይ ባና ሲቀይሳታስ እማና ግድ ቃላ ገልዳ ደኦ ካላቻ ኤካና ግሾ፥ መቶን ገንጭያ አስ አንጀትዳይሳ።
JAM 1:13 ኦንካ ፓጨትያ ዎደ፥ “ታና ፆሳይ ፓጬስ” ጎፖ። ፆሳይ ኢታን ፓጨተና፤ ቃስ እ ኦናካ ፓጨና።
JAM 1:14 ሽን እስ እስ አስ ባ ኢታ አሙዋን ጎሸትያ ዎደነ ጭመትያ ዎደ ፓጨቴስ።
JAM 1:15 ሄሳፈ ጉየ፥ አሞተꬅ ቃንꬃትድ ናጋራ የሌስ፤ ቃስ ናጋር ድጭድ ሀይቆ የሌስ።
JAM 1:16 ታ ሲቆ እሻቶ፥ ጭመቶፍተ።
JAM 1:17 ሎኦ እሞይነ ኩመꬃ አንጆ ኡባይ ሳሎፐነ ሳሉዋ ፖኡዋ መꬍዳ ፆሳ አዋፐ ዬስ። ፆሳይ ኩያዳ ኡባ ዎደ ላመተና።
JAM 1:18 ኑኒ፥ እያ መተꬃስ ኮይሮ ግዳና መላ ኑና ቱማ ቃላን ባ ሸነን የልስ።
JAM 1:19 ታ ሲቆ እሻቶ፥ ሀይሳ አኬክተ። አስ ኡባይ ስአናዉ ኤለሶ፥ ሽን ኦደታናዉነ ሀንቀታናዉ ኤለሶፖ።
JAM 1:20 አሳ ሀንቆይ ፆሳይ ኮይያ ፅሎተꬃ ኤሄና።
JAM 1:21 ሄሳ ግሾ፥ ቱና ሀኖታነ ኢታተꬃ ኡባ ድግድ፥ ፆሳይ ህንተ ዎዛናን ቶክዳ ህንተ ሸምፑዋ አሻናዉ ዳንዳእያ ቃላ አዳተꬃን ኤክተ።
JAM 1:22 ሽን ፆሳ ቃላ ኦሶን ፔሽተፐ አትሽን፥ ስሳ ፃላላን ህንተና ጭሞፍተ።
JAM 1:23 ቃላ ስእድ ኦꬆና አስ፥ እ ባ ሶምኡዋ ማስቶተን በእያ አሳ መላ።
JAM 1:24 እ ባ ሶምኡዋ በእድ ቤስ፥ ሽን እ አይ ዳንያኮ ኤለስ ዶጌስ።
JAM 1:25 ሽን ኦንካ አይለተꬃፈ ከስያ ፖሎ ህግያ አኬካን በእድ፥ ካልድ ናገይ፥ ስእዳይሳ ዶጎና ኦሶን ፔሽያ ኡራይ፥ ባ ኦሶ ኡባን አንጀታና።
JAM 1:26 ባ እንፃርሳ ናጎና አማናይስ ግያ ኡራይ ባና ጭሜስ፤ እያ አማኖይ ሀዳ።
JAM 1:27 ፆሳ አዋ ስንꬃን ቦረይ ባይና ጌሻ አማኖይ ሀይሳ፦ አይያ አዉ ባይና ናይታነ አምኤታ ማዶነ አላምያ ቱናፐ ባና ናጎ።
JAM 2:1 ታ እሻቶ፥ ህንተ ኑ ቦንቾ ጎዳ የሱስ ክርስቶሳ አማንያባ ግድኮ፥ አሳ ሶምኦ ፄልድ አሰ ቦንቾፍተ።
JAM 2:2 ሌምሶስ፥ ዎርቃ ምግዶ አꬅድ፥ ሎኦ ማኦ ማእዳ ዱረ አስ ህንተ ሺቁዋ ይስ። ቃስ ጩርቃ ማኦ ማእዳ ማንቆ አስካ ይስ።
JAM 2:3 ሎኦ ማኦ ማእዳ አድያ ህንተ አꬅድ ቦንችድ፥ “ነ ሀይሳን ሎእያ ኦይድያን ኡታ” ግድ፥ ቃስ ማንቆ አድያ፥ “ነ ያን ኤቃ ዎይኮ ሀይሳን ታ ቶሁዋ ማታን ሳአን ኡታ” ጌታ።
JAM 2:4 ያትን፥ ህንተ፥ ህንተ ግዶን ሻከተꬅ መይሳታነ ኢታ ቆፋራ ደእያ ዳይናታ መላ ግደከትዬ?
JAM 2:5 ታ ሲቆ እሻቶ፥ ስእተ። አማኖን ዱረ ግዳና መላነ ባና ሲቀይሳታስ እማና ግዳ ሳሎ ካዎተꬃ ላታና መላ ሀ ሳአን ደእያ ማንቆታ ፆሳይ ዶርበነዬ?
JAM 2:6 ሽን ህንተ ማንቆታ ቶቸታ። ህንተና ኡንኤይሳት ዱረታ ግዶኮናዬ? ህንተና ዳይና ስን ጎቸይሳት ኤንታ ግዶኮናዬ?
JAM 2:7 ህንተ ፄገትዳ ሎኦ ጎዳ ሱንꬃ ጫየይሳት ኤንታ ግዶኮናዬ?
JAM 2:8 ሽን ጌሻ ማፃፋን፥ “አሰ ኡባ ነና ነ ዶሰይሳዳ ዶሳ” ጌተትድ ፃፈትዳ ፆሳ ካዎተꬃ ህግያ ህንተ ፖልኮ ሎኦ ኦꬄታ።
JAM 2:9 ሽን ህንተ አሳ ሶምኦ ፄልድ ቦንችኮ፥ ናጋራ ኦꬄታ ቃስ ህገይ ህንተና ህገ መንꬅዳ አሳዳ ፕርዳና።
JAM 2:10 ኦንካ ህገ ኡባፈ እሱዋ መንꬅድ፥ አትዳ ኡባ ናግኮ ኡባ መንꬅዳዳ ታይበቴስ።
JAM 2:11 “ላሞፋ” ግዳ ጎዳይ፥ ቃስ “ዎꬎፓ” ግስ። ሽን ኔኒ ላሞና አጋዳ ዎꬍዳባ ግድኮ፥ ህግያ መንꬃዳሳ።
JAM 2:12 አይለተꬃፈ ከስያ ህግያ ስንꬃን ፕርዳ ኤካናዉ ደእያ አሳዳ ኦደትተነ ኦꬅተ።
JAM 2:13 አሰ ማሮና ኦናካ ፆሳይ ማሮና ፕርዳና። ሽን ማሮተꬃይ ፕርዳ ፆኔስ።
JAM 2:14 ታ እሻቶ፥ ህንተፈ እስ አስ ታዉ አማኖይ ደኤስ ግድ፥ ባ አማኑዋ ኦሶን በሶና እፅኮ እያ አይ ማዳኔ? እያ አማኖይ እያ አሻናዉ ዳንዳኢ?
JAM 2:15 ሌምሶስ እስ እሻይ ዎይኮ እስ ምችያ ካሎትኮነ ኤንታዉ ምያባይ ꬋይኮ፥
JAM 2:16 ህንተፈ እስ አስ ኤንታኮ፥ “ሳሮ ቢተ! ታማ ካይተ! ካልድ ሚተ!” ግድ፥ ኮሽያባ ኤንታዉ እሞና እፅኮ ኤንታ አይ ማዲ?
JAM 2:17 ሄሳ ግሾ፥ ኦሶይ ባይና አማኖይ ባርካ ሀይቅዳይሳ።
JAM 2:18 ሽን እስ አስ፥ “ነዉ አማኖይ ደኤስ፤ ቃስ ታዉ ኦሶይ ደኤስ። ኔኒ ነ አማኑዋ ነ ኦሱዋፐ ሻካዳ ታና በሳ፤ ታካ ታ አማኑዋ ታ ኦሱዋን ነና በሳና” ጋና።
JAM 2:19 ኔኒ፥ እስ ፆሳይ ደኤይሳ አማናሳ፤ ሄስ ሎኦ። ቱና አያናትካ አማኖሶና፤ ያሻን ኮኮሮሶና።
JAM 2:20 ነኖ ኤያዉ! አማኖይ ኦሶፐ ሻከትድ ማዶናይሳ ኤራናዉ ኮያይ?
JAM 2:21 ኑ አዋ አብራሃመይ፥ ባ ናኣ ይሳቃ ያርሾ በሳ ቦላ ዎꬅዳ ዎደ ባ ኦሱዋን ፅልቤኔ?
JAM 2:22 እያ አማኖይነ እያ ኦሶይ እስፈ ኦꬅዳይሳ በእኪ? እያ አማኖይ እያ ኦሱዋን ፖለትስ።
JAM 2:23 ጌሻ ማፃፋይ፥ “አብራሃመይ ፆሳ አማንስ። ፆሳይ ሄሳ እያዉ ፅሎተꬅ ኦꬅድ ታይብስ” ግዳይስ ፖለትስ። ቃስ እ ፆሳ ዳቦ ጌተትድ ፄገትስ።
JAM 2:24 አስ አማኖ ፃላላን ግዶናሽን፥ ኦሶን ፅለይሳ በኣሳ።
JAM 2:25 ሄሳዳካ፥ ላይምያ ራኣባ እስራኤለፐ ኪተትዳይሳታ ሞካዳ ሀራ ኦገራ ኤንታ ሞይዝዳ ዎደ ባ ኦሱዋን ፅላቤኬ?
JAM 2:26 ሸምፖይ ሻከትዳ አሳተꬃይ ሀይቆ ግደይሳዳ፥ ኦሶይ ሻከትዳ አማኖይካ ሀይቅዳይሳ።
JAM 3:1 ታ እሻቶ፥ ህንተፈ ዳሮት አስታማረ ግዶፖ። ኑ፥ አስታማረት ሀራታፐ አꬍያ ፕርዳ ኤካናይሳ ህንተ ኤሬታ።
JAM 3:2 ኑ ኡባይ ዳሮባን ባለቶስ። ባ ኦዳን ባለቶና ኦንካ ባናተꬃ ናጋናዉ ዳንዳእያ ፖሎ አስ።
JAM 3:3 ፓራት ኑስ ኪተታና መላ ብፃላ ባርስድ ኑኒ ኮይያ በሲ ኡባ ኤፎስ።
JAM 3:4 ማርካበይ ሄሳ መላ ግታ ግድሸ ዎልቃማ ጫርኩዋን ሱገትኮካ፥ ኤንታ ላገይስ ባ ኮይያ በሲ ዛሪድ ላግያ ጉꬃ ምꬃን ላገትድ ቤስ።
JAM 3:5 ሄሳዳ እንፃርስ አሳተꬃ ግዶን ጉꬃ ግድኮካ ዳሮ ግታባን ጬቀቴስ። ጉꬃ ታም ዳሮ ግታ ዎራ ፁጌስ።
JAM 3:6 እንፃርስ ታማ መላ። እንፃርስ ኑ አሳተꬃ ግዶን ኢታን ኩምዳ አላመ፤ አሳተꬃ ኡባ ቱንሴስ። ጋናመፐ ከይያ ታማዳ ኑ ደኡዋ ዎꬃ ኡባ ፁጌስ።
JAM 3:7 ዶአታነ ካፎታ፥ ኡሎራ ጎሸተይሳታነ አባን ደእያ መተꬃታ ኡባ አስ ሃሬስ፤ ኤንትካ ሃረትዶሶና።
JAM 3:8 ሽን ኦንካ እንፃርስ ሃራናዉ ዳንዳእቤና። እንፃርስ ዎꬍያ ማርዘይ ኩምዳ ሃረቶና ኢታ መተꬅ።
JAM 3:9 ኑ እንፃርሳን፥ ኑ፥ ጎዳነ ፆሳ ጋላቶስ። ቃስ እያራ ፆሳ ሌምሶን መትዳ አሳ ባዶስ።
JAM 3:10 እስ ዶናፐ ጋላትነ ባደꬅ ከዬስ። ታ እሻቶ፥ ሄሳዳ ሀናናዉ በሰና።
JAM 3:11 ፑልቶይ እስ ኦላፈ ማልእያ ሃꬅነ ጫምያ ሃꬅ ፑልታናዉ ዳንዳኢ?
JAM 3:12 ታ እሻቶ፥ ባላሰ ምꬅ ሻማሆ አይፋናዉ ዳንዳኢ? ዎይኮ ዎይነ ምꬅ ባላሰ ምꬃ አይፈ አይፋናዉ ዳንዳኢ? ጫሞ ሃꬃፈ ማልኦ ሃꬅ ከያናዉ ዳንዳኤና።
JAM 3:13 ህንተ ግዶን ጭንጭነ አኬካንቾይ ኦኔ? ባ ሎኦ ደኡዋ፥ አሽከተꬃንነ ጭንጫተꬃን ኦሰትዳ ኦሶን በሶ።
JAM 3:14 ሽን ህንተ ዎዛናን ጫምያ ቅናተይነ ባና ዶሶይ ደእኮ ጬቀቶፍተ፤ ቱማ ቦላ ዎርዶቶፕተ።
JAM 3:15 ሄሳ መላ ጭንጫተꬃይ ሳሎፐ ይዳባ ግዶናሽን፥ ሄስ አሳባ፥ አላመባ፥ ፃላሄባ።
JAM 3:16 ቅናተይነ ባና ዶሶይ ደእያ ሶን ኦሽነ ኢታ ኦሶ ኡባይ ደኦሶና።
JAM 3:17 ሽን ቦላፈ ያ ጭንጫተꬃይ ኡባፈ ስን ጌሽ። ቃስ ሳሮተꬅ፥ አዳተꬅ፥ ስእድ ኤከይሳ፥ ቃተይሳ፥ ሎኦ አይፈይ ኩምዳይሳ፥ አሰ ሻኮናይሳነ ጩቦተꬅ ባይናይሳ።
JAM 3:18 ሳሮተꬃ ዶሰይሳት ሳሮተꬅ ዘርድ ፅሎተꬅ ቡጮሶና።
JAM 4:1 ኦሽነ ኦል ህንተ ግዶ አዉፐ ዪ? ኤንቲ የይ ህንተ አሳተꬃ ሃራናዉ ኦለትያ ህንተ አሾ አሙዋፐ ግደነዬ?
JAM 4:2 ህንተ አሞቴታ፥ ሽን ደመከታ፤ ሄሳ ግሾ፥ ዎꬌታ። ምንꬅ ኮዬታ፥ ሽን ደማናዉ ዳንዳኤከታ፤ ሄሳ ግሾ፥ ኦየቴታነ ኦለቴታ። ህንተ ፆሳ ዎሶና ግሾ ኮያባ ደመከታ።
JAM 4:3 ህንተ ዎሰታ፥ ሽን ደመከታ። ህንተ አሾ አሙዋ ፖላናዉ ዎበ ኦገን ዎስያ ግሾ ደመከታ።
JAM 4:4 ህንተኖ፥ ላይማተይሳቶ! ሀ አላምያ ዶሰይ ፆሳራ ሞርከ ግደይሳ ኤረከቲ? ሀ አላምያራ ዳቦታናዉ ኮየይ ኦንካ ፆሳራ ሞርከ።
JAM 4:5 ጌሻ ማፃፋይ፥ “ፆሳይ ኑናን ዳና መላ ኦꬅዳ አያናይ፥ ኑኒ እያዉ ቡዞ ግዳና መላ አሞቴስ” ግዳይሳ ጮ ግዳባ ዳኒ?
JAM 4:6 ሽን ጌሻ ማፃፋይ፥ “ፆሳይ ኦቶራንቾታ እፄስ፥ ሽን አሽከታስ ማሮተꬅ እሜስ” ግያ ግሾ፥ ፆሳይ ማሮተꬅ ዳርስድ እሜስ።
JAM 4:7 ሄሳ ግሾ፥ ፆሳስ ሃረትተ፤ ፃላህያራ ኤቀትተ፤ እ ህንተፈ ሃካና።
JAM 4:8 ፆሳኮ ሺቅተ፤ እ ህንተኮ ሺቃና። ህንተኖ፥ ናጋራንቾቶ፥ ህንተ ኩሽያ ሜጨትተ፤ ናምኡ ቆፍ ደኤይሳቶ፥ ህንተ ዎዛና ጌሽተ።
JAM 4:9 ካዮትተ፥ ዬክተነ አፉፅተ። ህንተ ሚቻይ ዬሆን፥ ህንተ ኡፋይሳይ አዛኖን ላመቶ።
JAM 4:10 ጎዳ ስንꬃን ህንተናተꬃ ካዉሽተ፤ ህንተና ꬎቁ ꬎቁ ኦꬃና።
JAM 4:11 ታ እሻቶ፥ እሶይ እሱዋ ዝግሮፕተ። ባ እሻ ዝግረይነ እያ ቦላ ፕርደይ ህገ ዝግረስነ ህገ ቦላ ፕርዴስ። ኔኒ ህገ ቦላ ፕርድኮ ህገ ቦላ ፕርደይሳ ግዳሳፐ አትሽን፥ ህገ ፖለይሳ ግዳካ።
JAM 4:12 ህገ እመይነ ፕርደይ ፆሳ ፃላላ። አሻናዉነ ꬋይሳናዉ ዳንዳኤይ እያ። ያትን፥ ነ አሳ ቦላ ፕርደይ ኔኒ ኦኔ?
JAM 4:13 ህንተ፥ “ኑኒ ሀች ዎይኮ ዎንቶ ያ ካታማ ዎይኮ ሀ ካታማ ባና፤ ያን ላይꬅ ኡታና፤ ዛልእድ ዎꬍሳና” ያገይሳቶ፥ ስእተ።
JAM 4:14 ዎንቶ አይብ ሀናኔኮ ህንተ ኤረከታ። ህንተ ደኦይ ዋናነኮ ኤረይ ኦኔ? ህንተ ጉꬃ ዎደ በንትድ ꬋይያ አካ መላ።
JAM 4:15 ሄሳ አግድ፥ “ጎዳይ ጊኮ ኑኒ ዳና፤ ሀይሳ ዎይኮ ሄሳ ኦꬃና” ያጋናዉ በሴስ።
JAM 4:16 ሽን ህንተ ሀእ ኦቶርተታነ ጬቀተታ። ሄሳ መላ ጬቆ ኡባይ ኢታ።
JAM 4:17 ሄሳ ግሾ፥ ሎኦባ ኦꬃናዉ ኤርሸ ኦꬆና ኡራስ ሄስ ናጋራ።
JAM 5:1 ህንተኖ፥ ዱረቶ፥ ህንተ ቦላ ኢታ መቶይ ያ ግሾ ዬክተነ ዘሌልተ።
JAM 5:2 ህንተ ሻሎይ ቡቅስ፤ ህንተ አፍላይካ ብላን ሜተትስ።
JAM 5:3 ህንተ ዎርቃይነ ህንተ ብራይ ሽእስ። ሄ ሽአይ ህንተ ቦላ ማርካ ግዳና። እ ህንተ አሳተꬃ ታማዳ ማና። ህንተ ሀ ዉርዳ ቃማታን ህንተዉ ሻሎ ዳጋዬታ።
JAM 5:4 ህንተ ጋደን ኦꬅ ፔእዳ አሳ ኡነ ሚሽያ ቃንፅበከታ። ሄስ ህንተ ቦላ ዋሴስ። ሄ አሳታ ዋሶይ ዎልቃማ ጎዳ ሀይꬃን ስኤትስ።
JAM 5:5 ሀ ሳአን ህንተ ኡሎ ፃላላስ ቆፕድ፥ እንጀን ደእደታ። ሹካስ ጊገትዳ መሄዳ ህንተና ꬍክደታ።
JAM 5:6 ህንተራ ኤቀታናዉ ዳንዳኦና ፅሎ አሳ ቦላ ፕርድደታ እያ ዎꬍደታ።
JAM 5:7 ታ እሻቶ፥ ጎዳይ ያና ጋካናዉ ገንጭተ። ጎሻንቾይ ቶርቸ እራይነ ስላ እራይ ያና ጋካናዉ ገንጭድ አልኦ ካꬃ ናግድ ዋት ጋꬅ ኤክያኮ ቆፕተ።
JAM 5:8 ሄ ጎሻንቹዋዳ ህንተካ ገንጭተ። ጎዳ ዩሳይ ማታትዳ ግሾ ኡፋይሳን ናግተ።
JAM 5:9 ታ እሻቶ፥ ፆሳይ ህንተ ቦላ ፕርዶና መላ እሶይ እሱዋ ቦላ ዙዙሞፍተ። ፕርደይስ ፐንገን ኤቅስ።
JAM 5:10 ታ እሻቶ፥ ዋያን ገንጭዳ፥ ጎዳ ሱንꬃን ኦድዳ ናበታ ሌምሶ ኦꬅድ ኤክተ።
JAM 5:11 ዳንዳአን ገንጭዳይሳታ ኑኒ አንጀትዳይሳታ ጎስ። እዮብ ዋንድ ገንጭዳኮ ህንተ ስእደታ። ጎዳይ ዉርሰꬃን እያ ዋት ማድዳኮ በእደታ። እ ማሮትነ ቃይ ኩምዳ ጎዳ ግድያ ግሾ ሄሳ ኦꬅስ።
JAM 5:12 ሽን ኡባፈ ስን፥ ታ እሻቶ፥ ሳሉዋን ግድን ዎይኮ ሳአን ግድን ዎይኮ ሀራ አይብንካ ጫቆፍተ። ፆሳ ፕርዳን ህንተ ገሎናዳ ህንተ ኦዳይ ኤ ግድኮ፥ “ኤ” ጊተ፤ አካይ ግድኮ፥ “አካይ” ጊተ።
JAM 5:13 ህንተ ግዶን መቶ ኤክያ ኦንካ ደእኮ ፆሳ ዎሶ። ኡፋይትያ ኦንካ ደእኮ ጋላታን የፆ።
JAM 5:14 ህንተፈ ሀርገትያ ኦንካ ደእኮ ዎሳ ኬꬃ ጭማታ ፄጎ። ኤንቲ ጎዳ ሱንꬃን ሻማሆ ዛይተ ትይድ እያዉ ፆሳ ዎሶ።
JAM 5:15 አማኖን ዎስዳ ዎሳይ ሀርጋንቹዋ ፓꬃና። ጎዳይ እያ፥ ሀርግያፈ ደንꬃና፤ እ ናጋራ ኦꬅዳባ ግድኮካ ጎዳይ እያ ማራና።
JAM 5:16 ሄሳ ግሾ፥ ህንተ ፓፃና መላ ህንተ ናጋራ እሶይ እሱዋስ ፓፅተነ እሶይ እሱዋስ ዎስተ። ፅሎ አሳ ዎሳይ ዎልቃማ ኦሶ ኦꬄስ።
JAM 5:17 ኤልያስ ኑ መላ አሰ። እር ሳአን ቡኮና መላ ምንꬅድ ፆሳ ዎስን ሄꬑ ላይꬅነ ኡሱፑን አጌና ሳአን እር ቡክቤና።
JAM 5:18 ዛሪድ እ ፆሳ ዎስን ሳሎፐ እር ቡክስ፤ ሳእካ ካꬅ ዶልሰስ።
JAM 5:19 ታ እሻቶ፥ ህንተፈ ኦንካ ቱማ ኦግያፐ ቡትኮ፥ ሀራይ እያ ቱማኮ ዛርኮ፥
JAM 5:20 ናጋራንቹዋ እያ ባላ ኦግያፐ ዛርያ ኦንካ፥ እያ ሸምፑዋ ሀይቆፐ አሸይሳነ እያ ዳሮ ናጋራስ ማሮታ እመይሳ ኤሮ።
1PE 1:1 ታኒ፥ የሱስ ክርስቶሳ ሀዋረይ ጰፅሮስ፤ ጳንፆሳን፥ ጋላትያን፥ ቃጳዶቃን፥ ኢሰንነ ብታነን በታንቾዳ ላለትድ ደእያ ፆሳይ ዶርዳ፥ አሳስ ሀ ዳብዳብያ ፃፋስ።
1PE 1:2 የሱስ ክርስቶሳስ ህንተ ኪተታና መላነ እያ ሱꬃን ጌያና መላ፥ ፆሳ አዋይ ባ ካሰ ኤራን ዶርዳይሳታስነ ጌሻ አያናን ጌይዳ፥ ህንተዉ አꬎ ኬሀተꬃይነ ሳሮተꬃይ ግዶ።
1PE 1:3 የሱስ ክርስቶሳ ሀይቆፐ ደንꬅድ ባ ግታ ማሮተꬃን ናምአንꬆ የለተꬃነ ꬋዮና ኡፋይሳ እምዳ ኑ ጎዳ የሱስ ክርስቶሳ አዋይ፥ ፆሳይ ጋላተቶ።
1PE 1:4 ቃስ ፆሳይ ህንተዉ ꬋዮና፥ ኢቶናነ ቡቆና ላታ ሳሎን ጊግስስ።
1PE 1:5 ሄ ላታይ ዎደ ዉርሰꬃን ቆንጫናዉ ደእያ አቶተꬃስ ፆሳ ዎልቃን አማኖን ህንተዉ ናገትድ ደኤስ።
1PE 1:6 ሀእ ጉꬃ ዎደስ ህንተ ዱማ ዱማ ፓጨን ኡንኤትኮካ ሄሳን ኡፋይትተ።
1PE 1:7 ሄ ፓጨይ ህንተና ጋክዳይ፥ ታማን የግን ꬋይያ ዎርቃፈ ህንተ አማኖይ አꬎነ ቱማ ግደይሳ በሳናሳ። ሄ ፓጨትዳ አማኑዋን የሱስ ክርስቶሲ ቆንጭያ ዎደ ጋላታ፥ ቦንቾነ ሳባ ህንተ ኤካና።
1PE 1:8 ህንተ የሱሳ በእቤከታ፥ ሽን እያ ሲቀታ። ህንተ ሀእ እያ በእቦናባ ግድኮካ፥ እያ አማነታ። ቃስ ኦዳን ቆንጭሳናዉ ዳንዳኤቶና ኡፋይሳንነ ቦንቾን ኩምደታ።
1PE 1:9 ህንተ አማኖን ናግያ ህንተ ሸምፑዋ አቶተꬃ ኤካና።
1PE 1:10 አꬎ ኬሀተꬃ ባጋራ ህንተዉ ጊግዳ ሀ አቶተꬃባ ናበት ኤራናዉ ግታ ኮሻንነ ናጎን ኮይዶሶና።
1PE 1:11 ኤንታን ደእያ ክርስቶሳ አያናይ እያ ዋያባነ ሄሳፈ ጉየ ያና ቦንቹዋባ ካሰትድ ማርካትሸ፥ አዉደ ዎይኮ ዋንድ ሀናኔኮ አኬካን ፕልግዶሶና።
1PE 1:12 ናበት ኦድዳ ትንብተይ ባንታዉ ግዶናሽን፥ ህንተዉ ግደይሳ ፆሳይ ህንተዉ ቆንጭስስ። ሀእ አሳይ ህንተዉ ኦድዳ ዎንገላ ሳሎፐ ኪተትዳ ጌሻ አያና ዎልቃን ህንተዉ ኦድዶሶና። ኪታንቾትካ ሄሳ በአናዉ አሞትዶሶና።
1PE 1:13 ሄሳ ግሾ፥ ኦሶስ ህንተና ጊግስተ፤ ህንተና ሃርተ። የሱስ ክርስቶሲ ቆንጭያ ዎደ ህንተ ኤካና አꬎ ኬሀተꬃ ኡፋይሳን ናግተ።
1PE 1:14 ፆሳ ናይታዳ እያዉ ኪተትተ፤ ህንተ ካሰ ኤሮና ኦꬅዳ ኢታ አሙዋ ካሎፍተ።
1PE 1:15 ሽን ህንተና ፄግዳ ፆሳይ ጌሽ ግድዳይሳዳ ህንተካ ህንተ ዱሳ ኡባን ጌሽ ግድተ።
1PE 1:16 ጌሻ ማፃፋን፥ “ታኒ ጌሽ ግድዳ ግሾ ህንተካ ጌሽ ግድተ” ጌተትድ ፃፈትስ።
1PE 1:17 አሳ ሶምኦ በኦና እያ ኦሱዋዳ ፕርድያ ፆሳ፥ “ኑ አዋዉ” ግድ ፄግያባ ግድኮ፥ ሀ ሳኣ እማꬃተꬃ ዱሳ ያሻን ደእተ።
1PE 1:18 ህንተ፥ ህንተ አዋታፐ ላትዳ ፓꬆና ደኡዋፐ ዎዘትዳይስ፥ ꬋይያ ብራን ዎይኮ ዎርቃን ግዶናይሳ ኤሬታ።
1PE 1:19 ቦረይ ዎይኮ ቦርሶይ ባይና ዶርሳ ሱꬃዳ አልኦ ግድዳ ክርስቶሳ ሱꬃን ዎዘትደታ።
1PE 1:20 ፆሳይ አላመይ መታናፐ ካሰ ክርስቶሳ ዶርስ፥ ሽን ሀ ዉርሰꬃ ዎድያን ክርስቶስ ህንተ ግሾ ቆንጭስ።
1PE 1:21 ህንተ አማኖይነ ህንተ ኡፋይሳይ ፆሳን ግዳና መላ እያ ሀይቆፐ ደንꬅድ፥ ቦንችዳ ክርስቶሳ ባጋራ ፆሳን አማነታ።
1PE 1:22 ህንተ ቱማተꬃስ ኪተትድ ህንተናተꬃ ጌሽደታ። ህንተ እሶይ እሱዋ ዎዛናፐ ሲቀታ፥ ሽን ሀእካ ቱማ ዎዛናፐ ምንꬅድ ሲቅተ።
1PE 1:23 ህንተ ናምአንꬆ የለትዳይ ꬋይያ ዘረꬃፈ ግዶናሽን፥ መርናዉ ደእያ ፆሳ ቃላን ꬋዮና ኮቻፈ የለትደታ።
1PE 1:24 ፆሳ ቃላይ፥ “አስ ኡባይ ማታ መላ፤ እያ ቦንቾ ኡባይ ጪሻ መላ። ማታይ መሌስ፥ ጪሻይካ ቆለቴስ።
1PE 1:25 ሽን ጎዳ ቃላይ መርናዉ ደኤስ” ያጌስ። ህንተዉ ኦደትዳ ዎንገላ ቃላይ ሀይሳ።
1PE 2:1 ህዛ፥ ኢታተꬅ ኡባ፥ ጭሞ ኡባ፥ ጩቦተꬅ ቃናተነ ዝግርስ ኡባ ህንተፈ ድግተ።
1PE 2:2 ጎዳይ ኬሀ ግደይሳ ህንተ ኤርድ ሜዘትዳይሳዳ ሀእ የለትዳ ጉꬃ ናይታዳ ህንተ አቶተꬃን ድጭሸ ባናዉ ፆሳ ጌሻ ቃላ ማꬃ ኡባ ዎደ አሞትተ።
1PE 2:4 አሳን ቦረትድ ፆሳን ዶረትዳ አልኦ ግድዳ ደኦ ሹቻ፥ ጎዳ የሱሳኮ ሺቅተ።
1PE 2:5 ህንተ አያና ኬꬅ ኬፀትያ ደኦ ሹቻታ። ህንተ የሱስ ክርስቶሳ ባጋራ ፆሳ ኡፋይስያ አያና ያርሾ ያርሽያ ጌሻ ካህነታ።
1PE 2:6 ጌሻ ማፃፋን፥ “ሄኮ፥ ታኒ ፅዮነ ካታማን ጎዳ ፃጱዋ ምንꬅያ፥ ዶረትዳ፥ አልኦ ሹቻ ዎꬃስ፤ እያን አማንያ ኦንካ ዬላተና” ያጌስ።
1PE 2:7 ሀ ሹቻይ ህንተዉ አማነይሳታስ አልኦ፥ ሽን አማኖናይሳታስ፥ “ግምበይሳት ካꬍድ እፅዳ ሹቻይ ጎዳ ፃጱዋ ምንꬅያ፥ ኡባፈ አꬍያ ሹቹ ግድስ።”
1PE 2:8 ቃስካ፥ “ሀ ሹቻይ አሰ ꬉብያ ሹቻነ አሰ ኩንድስያ ዛላ” ያጌስ። ኤንቲ ሄሳስ ቃደትዳ ግሾ ፆሳ ቃላ ኪተቶና እፅድ ꬉበትዶሶና።
1PE 2:9 ሽን ፆሳይ ꬉማፐ ማላልስያ ባ ፖኡዋኮ ህንተና ፄግዳይ፥ ህንተ እያ ሎኦተꬃ ሀራታስ ኦዳናዉ ዶረትዳ ኮቸ፥ ካዎ ካህነ፥ ጌሻ ደረነ ፆሳ ዱማ ደረ።
1PE 2:10 ህንተ ካሰ ፆሳ ደረ ግደከታ፥ ሽን ሀእ ህንተ እያ ደረ። ህንተ ካሰ ማሮተꬅ ደምበከታ፥ ሽን ሀእ ማሮተꬅ ደምደታ።
1PE 2:11 ታ እሻቶ፥ ህንተ ሀ ሳአን እማነ በተ አስ ግድዳይሳዳ ህንተ ሸምፑዋ ኦልያ አሾ አሞፐ ሃካና መላ ታኒ ህንተና ዎሳይስ።
1PE 2:12 አማኖና አሳይ ህንተና ኢታ ኦꬅያ አሳዳ ዝግርያ ዎደ ፆሳይ ኑና በአናዉ ያ ጋላስ፥ ኤንቲ ህንተ ሎኦ ኦሱዋ በእድ ፆሳ ጋላታና መላ ህንተዉ ሎኦ ደኦይ ደኦ።
1PE 2:13 ጎዳ ግሾ ግድ ማታራ ደእያ አሳታስ ሃረትተ፤ ኡባፈ ቦላ ግድያ ግሾ ካዋስካ ሃረትተ።
1PE 2:14 ኤንቲ ኢታ ኦይሳታ ሴራናዉነ ሎኦ ኦይሳታ ሳባናዉ ካዉዋፐ ኪተትዳ ግሾ ደርያ አይሰይሳታስ ሃረትተ።
1PE 2:15 ህንተ፥ ህንተ ሎኦ ኦሱዋን ኤሮና ኤያ አሳ ዶና ኦይꬃናይስ ፆሳ ሸነ።
1PE 2:16 ፆሳ አይለ ግድድ ላአተꬃን ደእተፐ አትሽን፥ ህንተ ላአተꬃ ኢታ ኦሶስ ካማ ኦꬆፍተ።
1PE 2:17 አሳ ኡባ ቦንችተ፤ አማንያ አሳ ሲቅተ፤ ፆሳ ያይተ፤ ካዎ ቦንችተ።
1PE 2:18 አይለቶ ሎኦ ጎዳታስነ ኬሀ ጎዳታ ፃላላስ ግዶናሽን፥ ኢታታስካ ቦንቾን ሃረትተ።
1PE 2:19 አስ ፆሳ ግሾ ግድ በሶና ዋየ ዋየትኮ ፆሳይ እያ አንጃና።
1PE 2:20 ሽን ህንተ ናጋራ ኦꬅን ህንተና ደችያ ዎደ ህንተ ዳንዳእኮ ህንተዉ አይ ጋላት ደኢ? ሽን ሎኦባ ኦꬅድ ዋየ ዳንዳእኮ ፆሳይ ህንተና ሄሳስ አንጃና።
1PE 2:21 ፆሳይ ህንተና ፄግዳይ ሄሳ ግሾሳ፤ ክርስቶስ ህንተዉ ዋየትስ፤ ህንተ እያ ካላና መላ፥ ህንተዉ ሌምሶ ግድስ።
1PE 2:22 እ ናጋራ ኦꬅቤና፤ እያ ዶናን ዎርዶይ በንትቤና።
1PE 2:23 ኤንቲ እያ ጫይያ ዎደ፥ ዛሪድ ጫይቤና። ሽን ዋየ ኤክሸ ፅሎ ፕርድያ ፆሳስ ባ ፕርዳ አጋግስፐ አትሽን፥ ማንድቤና።
1PE 2:24 ኑኒ ናጋራስ ሀይቅድ ፅሎተꬃስ ዳና መላ ክርስቶስ ባ አሹዋን ኑ ናጋራ ማስቃልያ ቦላ ቶክስ፤ ህንተ እያ ማዱንꬃን ፓፅደታ።
1PE 2:25 ካሰ ህንተ ኦገ ባልድ ꬋይዳ ዶርሳታ መላ፥ ሽን ሀእ ህንተ ሸምፑዋ ሄመይሳኮነ ናገይሳኮ ስምደታ።
1PE 3:1 ሄሳዳካ፥ ማቸቶ፥ ህንተ አዝናታፐ ፆሳ ቃላስ ኪተቶናይሳት ደእኮካ አይኮካ ኦደቶናሽን፥ ህንተ ያሻተꬃነ ህንተ ጌሻ ደኡዋ በእድ አማናና መላ ኤንታዉ ሃረትተ።
1PE 3:3 ህንተ፥ ህንተ ሁጰ ፕፆንነ ዎርቃ አሌቆን ዎይኮ ሎኦ ማኦን ህንተ ቦላ አሳተꬃ ሎይሶን ግዶፖ።
1PE 3:4 ሽን ህንተ ዎዛና ግዶን ደእያ የገልሳተꬃይ ፆሳ ስንꬃን ህንተዉ ዳሮ አልኦ ግድድ ꬋዮና፥ አሽከነ ዎፑ ግዳ አያና ግዶ።
1PE 3:5 ፆሳይ እማና ግዳይሳ አማንዳ ጌሻ ማጫሳት በን ዎደ ባንታ አዝናታስ ሃረትድ፥ ባንታና ሄሳዳ ዳሮ ሎይꬅዶሶና።
1PE 3:6 ሄሳዳ ሳራ አብራሃመ፥ “ታ ጎዳዉ” ያጋዳ ፄጋሸ፥ እያዉ ኪተታሱ፤ ህንተካ አይኮካ ያዮና ሎኦባ ኦꬅኮ እ ናይታ።
1PE 3:7 አዝናቶ፥ ህንተ ማቸት ህንተፈ ዳቡራንቾ መታ ግደይሳ ኤርድ፥ ኤንታና ቦንችተ፤ ህንተ ዎሳ ꬉቦና መላ ፆሳይ እምዳ ደኡዋ ኤንቲ ህንተራ እስፈ ላትያ ግሾ ኤንታ ቦንችተ።
1PE 3:8 ዉርሰꬃን፥ ኡባይ እስ ቆፋን ደእተ። እሶይ እሱዋስ ቃትሸ፥ እሻዳ ሲቀትተ፤ ቃስ እሶይ እሱዋስ ኬሀታነ አሽከታ ግድተ።
1PE 3:9 ኢታ ግሾ ኢታ ዎይኮ ጫሻ ግሾ ጫይድ ዛሮፕተ፤ ሄሳ አግድ፥ ፆሳይ ህንተዉ አንጁዋ እማናዉ ህንተና ፄግዳ ግሾ አንጅተ።
1PE 3:10 አይስ ጊኮ፥ ጌሻ ማፃፋይ፥ “ደኦ ዶሰይነ ሎኦ ዎደ በአናዉ ኮየይ ኦና ግድኮካ ባ እንፃርሳን ኢታባነ ዎርዶ ኦደተይሳ አጎ።
1PE 3:11 ኢታባ ኦይሳ አግድ ሎኦባ ኦꬆ፤ ሳሮተꬃካ ኬህ ኮዮነ ካሎ።
1PE 3:12 ጎዳ አይፈይ ፅሎታኮ ፄሌስ፤ ቃስ እ ኡባ ዎደ ኤንታ ዎሳ ሀይዜስ። ሽን ጎዳይ ኢታባ ኦይሳታ ባ ሀንቆ ሶምኡዋን ፄሌስ” ያጌስ።
1PE 3:13 ህንተ ሎኦባ ኦꬃናዉ አሞትኮ ህንተና ቆሀናይ ኦኔ?
1PE 3:14 ሀር አቶሽን፥ ፅሎተꬃ ግሾ ህንተ ዋየትኮ አንጀትዳይሳታ። አሳስ ያዮፍተነ ህርጎፍተ።
1PE 3:15 ክርስቶሳ ህንተ ዎዛናን ቦንችተነ ጎዳይተ። ፆሳይ ህንተዉ እምዳ ኡፋይሳስ ጋሶ ኦይችያ ኦደስካ ዛሮ እማናዉ ኡባ ዎደ ጊግድ ኡትተ፥ ሽን ሄሳ አሽከተꬃንነ ያሻን ኦꬅተ።
1PE 3:16 ቃስ ክርስቶሳን ህንተ ደእያ ሎኦ ደኡዋ ኢታባ ኦꬅዳባዳ፥ ህንተና ጫይያ አሳይ ዝግርያባን ዬላታና መላ ህንተ ካሀይ ጌሽ ግዶ።
1PE 3:17 ፆሳይ ግዳባ ግድኮ ኢታባ ኦꬅዳ ግሾ ዋየ ኤከይሳፈ ሎኦባ ኦꬅዳ ግሾ ዋየ ኤከይስ ሎኦ።
1PE 3:18 ክርስቶስ ኑና ፆሳኮ ሺሻናዉ ባዉ ፅሎ ግድድ ደእሸ፥ ናጋራንቾታ ግሾ እስ ቶሆ ናጋራ ኡባስ ሀይቅስ፤ እ ባ አሳተꬃን ሀይቅስ፥ ሽን አያናን ፓፅስ።
1PE 3:19 ቃስ ሄ አያናን እ ብድ ቃሾን ደእያ ሸምፖታስ ቃላ ኦድስ።
1PE 3:20 ኖሄይ ማርካብያ ኬፅያ ዎደ ሄ ሸምፖት ፆሳስ ኪተቶና እፅዶሶና፥ ሽን ፆሳይ ኤንታና ዳንዳእ ጋምእስ። ሆስፑን አሳ ፃላል ማርካብያን ገልድ፥ ꬋዮ ሃꬃፈ አትዶሶና።
1PE 3:21 ሄ ꬋዮ ሃꬃይ ሀእ ህንተና አሽያ ፅንቃተ ሌምሶ ግድስ። ሀ ፅንቃተይ ቦላ ቅታ ሜጮ ግዶናሽን፥ ሎኦ ካሀ ፆሳፈ ኤካናዉ እያ ዎስያ ኦገ ግድድ፥ ክርስቶሳ ደንዱዋ ባጋራ ህንተና አሼስ።
1PE 3:22 እ ሳሎ ብድ ፆሳ ኡሻቻን ኡትድ፥ ኪታንቾታ፥ ማታ አዋታነ ዎልቃማታ ሃሬስ።
1PE 4:1 ሄሳ ግሾ፥ ክርስቶስ ባ አሹዋን ኑስ ዋየትዳ ግሾ ህንተካ ሄ ቆፋን ህንተና ዳንጭስድ ምንድ ኤቅተ። ክርስቶሳ ግሾ ግድ ባ አሹዋን ዋየ ኤክዳ ኡራይ ናጋራ ኦꬅከ ግድ ቃንፅዳ አስ።
1PE 4:2 ሄ ኡራይ ባ አትዳ ላይꬃን ፆሳ ሸነ ኦꬃናዉ ኮዬስፐ አትሽን፥ ኢታ አሾ አሞን ዴና።
1PE 4:3 ካሰ ህንተ አማኖና አሳይ ደእዳይሳዳ ደእደታ። ህንተ ኢታ አሞን፥ ላይማተꬃን፥ ማꬆን፥ ቱናተꬅ ደንꬅያ የꬃን፥ ፖክያ ኤቃ ጎይኖን ካሰ ደእዳ ዱሳይ ግዳና።
1PE 4:4 አማኖና አሳራ ህንተ ሾር ባይና ኦሱዋ ኦꬆና ግሾ ማላለትድ ህንተና ጫዮሶና።
1PE 4:5 ሽን ኤንቲ ፓፃታ ቦላነ ሀይቅዳ አሳ ቦላ ፕርዳናዉ ደእያ ፆሳስ ዛሮ እማና።
1PE 4:6 ሀይቅዳ አሳስ ዎንገላይ ሳባከትዳይ ሀይሳ ግሾሳ። ኤንቲ አሳꬆ ባንታ አሹዋን ፕርደታና ቃስ ባንታ አያናን ፆሳꬆ ደኦን ዳና።
1PE 4:7 ህዛ፥ ኡባባስ ዉርሰꬃይ ማታትስ። ሄሳ ግሾ፥ ዎሳናዉ ዳንዳኤታና መላ ዎፑ ግዳ ዎዛን ደኦ፤ ማራራ ደእተ።
1PE 4:8 ሲቆይ ዳሮ ናጋራ ካምያ ግሾ፥ ኡባፈ አꬅድ እሶይ እሱዋራ ዎዛናፐ ሲቀትተ።
1PE 4:9 ዙዙሞና እሶይ እሱዋ እማꬃተꬃን ሞክተ።
1PE 4:10 ህንተ ፆሳፈ ዱማ ዱማ አꬎ ኬሀተꬃ እሞታ ኤክዳይሳዳ ህንተ እሶይ እሶይ ሄ እሙዋ በሲያዳ ኦይክድ እሶይ እሱዋ ሀጋዝተ።
1PE 4:11 የሱስ ክርስቶሳ ባጋራ ኡባባን ፆሳይ ጋላተታና መላ ኦንካ ኦድያባ ግድኮ ፆሳፈ ቃላ ኤክዳዳ ኦዶ። ቃስ ኦንካ ማድያባ ግድኮ ፆሳይ እያዉ እምያ ዎልቃዳ ማዶ። ቦንቾይነ ዎልቅ መርናፐ መርና ጋካናዉ እያዉ ግዶ። አምንእ።
1PE 4:12 ታ እሻቶ፥ ህንተ ታማዳ ፁግያ ዋየ ፓጭያ ግዶራ አꬍያ ዎደ ኦራꬃባይ ሀንዳዳ ማላለቶፍተ።
1PE 4:13 ሽን እያ ቦንቾይ ቆንጭያ ዎደ ህንተ ኡፋይሳይ ግታ ግዳና መላ ክርስቶሳ ዋይያ ህንተ ኤከይሳን ኡፋይትተ።
1PE 4:14 ክርስቶሳ ሱንꬃ ግሾ አስ ህንተና ጫይያ ዎደ፥ ፆሳ ቦንቾ አያናይ ህንተ ቦላ ሸምፕያ ግሾ ህንተ አንጀትዳይሳታ።
1PE 4:15 ህንተፈ ዋየ ኤክያ ኦንካ ሸምፖ ዎꬍዳዳ ዎይኮ ካይሶትዳዳ ዎይኮ ኢታ ኦꬅዳዳ ዎይኮ ገልሶናባን ገልዳዳ ሀንድ ዋየቶፎ።
1PE 4:16 ግዶሽን፥ ክርስታነ ግድያ ግሾ ዋየትኮ ክርስቶሳ ሱንꬃ ግሾ ፆሳ ጋላቶፐ አትሽን፥ ዬላቶፖ።
1PE 4:17 ፕርድ ፆሳ አሳ ቦላ ዶምያ ዎደይ ጋክስ። ህዛ፥ ሄ ፕርዳይ ኮይሮ ኑ ቦላ ዶምያባ ግድኮ፥ ፆሳ ዎንገላስ ኪተቶና አሳ ዉርሰꬃይ አይ ግዳኔ?
1PE 4:18 ፅሎይ ኡንአን አትያባ ግድኮ፥ ማካላንቾይነ ናጋራንቾይ ያትን ዋናኔ?
1PE 4:19 ሄሳ ግሾ፥ ፆሳ ሸነዳ ዋየ ኤከይሳት ባንታ ሸምፑዋ ባንታና መꬍዳ፥ አማንꬅያ ፆሳስ ሀዳራ እምሸ ሎኦባ ኦꬆ።
1PE 5:1 ህዛ፥ ዎሳ ኬꬃ ጭማታራ ጭማ ግድዳይስ፥ ክርስቶሳ ዋይያ ማርካተይስነ ቆንጫናዉ ደእያ ቦንቹዋ ሻከታናዉ ደእያ ታኒ፥ ህንተ ግዶን ደእያ ጭማታ ዞራይስ።
1PE 5:2 ህንተ አዋተꬃፈ ጋርሳን ደእያ ፆሳ ዉድያ ሄምተ። ፆሳይ ኮየይሳዳ ዶሳናፐ አትሽን፥ ኡንኤትድ ሄሞፍተ። ቃስ ሚሸ ኮሻን ግዶናሽን፥ ሀጋዛናዉ ደእያ ሎኦ ቆፋን ሄምተ።
1PE 5:3 ህንተ አዋተꬃፈ ጋርሳን ደእያ ዉድያስ ሌምሶ ግድተፐ አትሽን፥ ጎዳቶፕተ።
1PE 5:4 ሄመይሳታ ሀላቃይ ቆንጭያ ዎደ ቆለቶና ቦንቾ ካላቻ ህንተ ኤካና።
1PE 5:5 ሄሳዳካ፥ ያላጋቶ፥ ጭማታስ ሃረትተ። ህንተ እሶይ እሱዋስ አሽከ ግድተ። ጌሻ ማፃፋን፥ “ፆሳይ ኦቶራንቾታ እፄስ፥ ሽን አሽከታስ አꬎ ኬሀተꬃ እሜስ” ያጌስ።
1PE 5:6 ፆሳይ ባ ዎደ ህንተና ቦንቻና መላ ዎልቃማ ፆሳ ኩሽያፐ ጋርሳን ህንተና ካዉሽተ።
1PE 5:7 እ ህንተዉ ቆፕያ ግሾ ህንተና ህርግስያ ኡባ እያ ቦላ የግተ።
1PE 5:8 ህንተ ሞርከይ ፃላሄይ፥ ምትያባ ኮይድ፥ ጋሞዳ ጉድሸ ህንተ ማታራ ዩይያ ግሾ ህንተና ሃርተነ ባርክተ።
1PE 5:9 አላመን ደእያ ህንተ እሻት ሄሳዳ ዋየ ኤከይሳ ኤርድ፥ አማኖን ምንድ፥ ፃላህያራ ኤቀትተ።
1PE 5:10 ባ መርና ቦንቹዋስ ክርስቶስ የሱሳ ባጋራ ህንተና ፄግዳ አꬎ ኬሀተꬃ ኡባ ፆሳይ፥ ጉꬃ ዎደስ ህንተ ዋየትዳፐ ጉየ፥ እ ባ ሁጰን ህንተና ሺሻና፥ ካትሳና፥ ምንꬅድ ኤሳና፥ ፃልሳና።
1PE 5:11 መርናፐ መርና ጋካናዉ ፆሳይ ካዎቶ። አምንእ።
1PE 5:12 አማነትዳ እሻ ጋዳ ታ ኤክያ ስላሰ ባጋራ ሀ ዳብዳብያ ህንተዉ ቃንꬃን ፃፋስ። ታ ሄሳ ህንተዉ ፃፍዳይ፥ ህንተና ዞራናዉነ ፆሳ አꬎ ኬሀተꬃይ ቱማ ግደይሳ ማርካታናሳ። ሄ አꬎ ኬሀተꬃን ምንድ ኤቅተ።
1PE 5:13 ህንተራ እስፈ ዶረትዳ ባብሎነን ደእያ ዎሳ ኬꬃ አሳይነ ታ ናኣ ማርቆስ ህንተና፥ “ሳሮ ሳሮ” ያጌስ።
1PE 5:14 ሲቆ ዬረተꬃ ዬረትሸ፥ እሶይ እሱዋ ሳሮꬅተ። ክርስቶሳን ደእያ ህንተ ኡባስ ሳሮይ ግዶ። አምንእ።
2PE 1:1 የሱስ ክርስቶሳ ሀዋረይነ እያ አይለይ፥ ታኒ፥ ስሞን ጰፅሮስ፥ ኑ ፆሳነ ኑና አሽያ የሱስ ክርስቶሳ ፅሎተꬃ ባጋራ ኑይሳ መላ አልኦ አማኖ ኤክዳይሳታስ ሀ ዳብዳብያ ፃፋስ።
2PE 1:2 ፆሳነ ኑ ጎዳ የሱሳ ኤሮን አꬎ ኬሀተꬃይነ ሳሮይ ህንተዉ ኩሞ።
2PE 1:3 ባ ቦንቾንነ ሎኦተꬃን ኑና ፄግዳ እያ ኤሮን ደኦስነ ፆሳ ዳንድ ዳናዉ ኮሽያባ ኡባ ፆሳይ ባ ዎልቃን ኑስ እሚስ።
2PE 1:4 ህንተ ኢታ አሞ ጋሶን መትያ ሀ አላምያን ደእያ ꬋዮፐ ከስ ኤካናዳነ ፆሳ ፆሳተꬃን ሻከታናዳ፥ ሀ እሞታታ ባጋራ ዳሮ አልኦነ ግታ ኡፋይሳ ኑስ እሚስ።
2PE 1:5 ሄሳ ግሾ፥ ምንድ፥ ህንተ አማኑዋ ቦላ ሎኦተꬅ፥ ሎኦተꬃ ቦላ ኤራተꬅ፥
2PE 1:6 ኤራተꬃ ቦላ ባና ሃሮ፥ ባና ሃሮ ቦላ ገንጫ፥ ገንጫ ቦላ ፆሳ ዳኖ፥
2PE 1:7 ፆሳ ዳኖ ቦላ እሻተꬃ ኬሀተꬅ፥ እሻተꬃ ኬሀተꬃ ቦላ ሲቆ ጉጅተ።
2PE 1:8 ሀይሳቲ ህንተዉ ዳርድ ደእያባ ግድኮ፥ ጎዳ የሱስ ክርስቶሳ ኤሮን ማድያ አስነ አይፈራ ደእያ አስ ኦꬃና።
2PE 1:9 ሽን ሄሳት ባይና ኦንካ ማታን ደእያባ ፃላላ በእያ ቆቀ። እ ባ ካሰ ናጋራፐ ጌይዳይሳ ዶግስ።
2PE 1:10 ሄሳ ግሾ፥ ታ እሻቶ፥ ህንተ ፄሳነ ህንተ ዶሩዋ ምንꬃናዉ ካሰይሳፈ አꬅድ ምንተ። ህንተ ሄሳታ ኦꬅያባ ግድኮ፥ ꬉበተከታ።
2PE 1:11 ሄሳን ኑ ጎዳነ ኑና አሽያ የሱስ ክርስቶሳ መርና ካዎተꬃ ገልያ ኩመꬃ ማታይ ህንተዉ እመታና።
2PE 1:12 ሄሳ ግሾ፥ ህንተ ሀይሳታ ኤርያባነ ሄ ኦይክዳ ቱማን ምንድ ደእያባ ግድኮካ፥ ታኒ ሀይሳታ ኡባ ዎደ ህንተና ሀሳይሶ አግከ።
2PE 1:13 ታኒ ሸምፖራ ደእዳ ዎደ ኡባን ህንተና ሀሳይሳናይስ ኮሽያባ ጋዳ ቆፓይስ።
2PE 1:14 ኑ ጎዳ የሱስ ክርስቶሲ ታዉ ቆንጭሳዳይሳዳ ታኒ ሀ ሀይቅያ አሳተꬃ ጋምኦና ቃራ የጋዳ ባናይሳ ኤራይስ።
2PE 1:15 ታኒ ህንተፈ ሻከትኮካ ህንተ ሀይሳታ ኡባ ዎደ አኬካና መላ ታዉ ዳንዳኤትያባ ኡባ ኦꬃና።
2PE 1:16 ኑኒ ጎዳ ክርስቶሳ ዎልቃነ እያ ዩሳባ ህንተዉ ኦደይ፥ እያ ግታ ቦንቹዋ በእድፐ አትሽን፥ መꬍ ከስዳ ሀይሰ ግደና።
2PE 1:17 ዳሮ ዎልቃማ ቦንቹዋፈ፥ “ታኒ ኡፋይትያ፥ ታ ዶስያ ናአይ ሀይሳ” ግያ ቃላይ ይዳ ዎደ፥ ፆሳ አዋፐ ቦንቾነ ጋላታ ኤክስ።
2PE 1:18 ኑኒ ጌሻ ዙማ ቦላ እያራ ደእያ ዎደ ሄ ቃላይ ሳሎፐ ይሽን ስእዳ።
2PE 1:19 ኑስ ሄሳፈ አꬍያ አማነትዳ ትንብተ ቃል ደኤስ። ሳእ ዎንታና ጋካናዉነ ባካል ህንተ ዎዛናን ዶላና ጋካናዉ፥ ꬉማን ፖእያ ፖኦ አስ ናገይሳዳ፥ ህንተ ሄ ቃላ ናግኮ ሎኦ ኦꬄታ።
2PE 1:20 ኡባፈ ካሰትድ ሀይሳ ኤርተ። ጌሻ ማፃፋን ፃፈትዳ ትንብተ ቃላ ኦንካ ባ ዶስዳዳ ብርሻናዉ ዳንዳኤና።
2PE 1:21 ትንብተ ኡባ፥ ፆሳይ ኪትዳ አሳት ጌሻ አያናይ ካለꬅን፥ ኦድዶሶናፐ አትሽን፥ አሳ ሸነን ኦድቦኮና።
2PE 2:1 ሽን ዎርዶ ናበት ካሰ አሳ ግዶን ደኤይሳ መላ ሀእካ ዎርዶ አስታማረት ህንተ ግዶን ደንዳና። ኤንቲ ባንታና ዎዝዳ፥ ጎዳ ካድድ፥ ꬋይስያ ዎርዶ ትምርትያ ኤሀና። ሄሳን ኤንቲ ባንታ ቦላ ኤለስድ ꬋዮ ኤሆሶና።
2PE 2:2 ዳሮ አሳይ ዬላይያ ኤንታ ኢታ ኦግያ ካላና፤ ኤንታ ጋሶን ቱማ ኦገይ ጫየታና።
2PE 2:3 ዎርዶ አስታማረት ሚሸ ያርድ ባንታዉ መꬍ ከስዳ ሀይሰን ህንተና ቦንቃና። በንፐ ዶምድ ኤንታ ፕርዳይ ጊግድ ኡትስ፤ ኤንታ ꬋዮይካ ኤንታና ናግድ ኡትስ።
2PE 2:4 ናጋራ ኦꬅዳ ኪታንቾታስ ፆሳይ ቃቶና፥ ፕርዳ ጋላስ ጋካናዉ ጋናመ ꬉማ ኦላን ኤንታ ቃች የግስ።
2PE 2:5 ሄሳዳካ፥ ፆሳይ ፅሎተꬃባ ኦድያ ኖሄነ ሀራ ላፑን አሳታ አሽድ፥ ፆሳ ጎይኖና አሳይ ደእያ በን አላምያ ቃቶና ꬋዮ ሃꬃን ꬋይስስ።
2PE 2:6 ጌላታስ ሌምሶ ግዳና መላ ፆሳይ ሶዶመነ ጋሞራ ካታማታ ብዶ ኦꬅድ ፁግድ ꬋይስስ።
2PE 2:7 ህገስ ኪተቶና ላይማትያ አሳታ ግዶን ዋየትሸ ደእዳ ፅሎ ሎፀ ፆሳይ አሽስ።
2PE 2:8 ሄ ፅሎ አደይ ኤንታ ግዶን ደእሸ፥ ኤንቲ ኦꬅያ ኢታ ኦሱዋ ጋላስ ጋላስ በእዳ ዎደነ ስእዳ ዎደ እያ ሎኦ ዎዛናይ ኡንኤቴስ።
2PE 2:9 ሄሳ ግድኮ፥ ጎዳይ፥ ባና ጎይንያ አሳታ ፓጨፐ ዋት አሻነኮ፥ ቃስ ናጋራንቾታ ፕርዳ ጋላሳስ ጋካናዉ ዋትድ ሴርሸ ናግሳኔኮ ኤሬስ።
2PE 2:10 ኡባፈ አꬅድ ቱና አሞን አሾ ቆፋ ካለይሳታነ ማታ አዋታ ካይሳታ፥ ፕርዳ ጋላስ ጋካናዉ ጎዳይ ናግስስ። ሄ አሳት ጋንጀ ምኖነ ኦቶራንቾ ግድያ ግሾ፥ ሳሎ መተꬃታ ጫይሸ ያዮኮና።
2PE 2:11 ሽን ኪታንቾት ዎርዶ አስታማረታፐ ዎልቃንነ ምኖተꬃን ዳሮ አꬎሶናሽን ጎዳ ስንꬃን ሳሎ መተꬃታ ጫዮኮና።
2PE 2:12 ሽን ሄ አሳት ባንታ ኤሮናባን ገልድ ጫዮሶና። ኤንቲ ኦይከታናዉነ ሀይቃናዉ የለትዳ፥ ዎዛን ባይና ዶአ መላ ሀኖሶና፤ ኤንትካ ዎራ ዶአዳ ጮ ꬋያና።
2PE 2:13 ኤንቲ ጋꬅዳ መቱዋዳ ዛር መቶታና። ሴታ ጋላስ የፅሸ ጉፐይሳ ኡፋይስያባ ግድ ቆፖሶና። ኤንቲ ካዉሻታነ ቱናታ ግድ ደእሸ ህንተራ ሻከትያ ሲቆ እማቱዋን ኡፋይቶሶና።
2PE 2:14 ላይማትያ ማጫስ ፄልድ አጎና አይፈይ ኤንታዉ ደኤስ፤ ቃስ ናጋራ ኦይሳ አጎኮና። አማኖን ምንቦና አሳ ጭሞሶና። ኤንታዉ ኡባ ዎደ አሞትያ ዎዛን ደኤስ፤ ኤንቲ ባደትዳይሳታ።
2PE 2:15 ኤንቲ ሱረ ኦገ አግድ፥ ማካላ ሚሸ ሲቅድ ባልዳ፥ ብኦራ ናኣ ባላማ ኦግያ ካልዶሶና።
2PE 2:16 እ ባ ናጋራ ጋሶን ሀንቀትስ፤ ዶን ባይና ሀረይ አሳዳ ሃሳይድ ናብያ ጎሻተꬃ ተቅስ።
2PE 2:17 ሄ አሳት መልዳ ፑልቶታ መላነ ጫርኮይ ቶክድ ኤፍያ ሻራ መላ፤ ኤንታ ናገይ ሳካና ꬉማ።
2PE 2:18 ኤንቲ ሀዳነ ኦቶሮ ኦዳ ኦደትሸ ባላን ደእያ አሳ ግዶፈ ከስ ኤክድ ቡሮ ምንቦና አሳታ ላይማተꬃ አሾ አሞን ጭምድ ባለꬆሶና።
2PE 2:19 ኤንቲ ባንታዉ ꬋዮ አይለተꬃን ደእሸ ሀራታኮ፥ “ህንተ አይለተꬃፈ ከያና” ያጎሶና። አይስ ጊኮ፥ አስ ባ ፆነትዳባ ኡባስ አይለ።
2PE 2:20 ኤንቲ አሽያ ኑ ጎዳ የሱስ ክርስቶሳ ኤርድ ሀ አላምያ ቱናተꬃፈ ከስ ኤክዳፐ ጉየ፥ ዛር ቃፀትድ ፆነትኮ ካሰ ደእያ ደኡዋፐ ጉየይስ ኤንታዉ ኢታ ግዳና።
2PE 2:21 ኤንቲ ፅሎተꬃ ኦግያ ኤር ስሚድ አገይሳፈ ኮይሮትድ ጌሻ ኪታ ኤሮናኮ ኤንታዉ ሎኦሽን።
2PE 2:22 “ካን ባ ጮሻኮ ጉየ ስሜስ” ቃስ፥ “ሜጨትዳ ጉዱንꬆይ ጉየ ስሚድ ኡርቃን ጎንዶረቴስ” ግያ ሌምሶይ ቱማ ግደይስ ኤንታ ቦላ ኦꬄስ።
2PE 3:1 ታ ሲቆ እሻቶ፥ ሀይስ ታ ህንተዉ ፃፍዳ ዳብዳበይ ናምአንꬆ። ታኒ ሀ ናምኡ ዳብዳበታካ ህንተዉ ፃፍዳይ፥ ህንተ ሱረ ቆፋ ቆፓናዳ ህንተና ደንꬃናሳ።
2PE 3:2 ቃስ ጌሻ ናበት በን ኦድዳ ቃላነ ኑና አሽያ ጎዳይ፥ ሀዋረታ ባጋራ ኪትዳ ኪታ ህንተ ሀሳያና መላ ኮያይስ።
2PE 3:3 ኡባፈ ካሰትድ፥ ዎደ ዉርሰꬃን ባንታ አሙዋ ካልድ አሰ ቶቸይሳት፥ ቶችሸ ያናይሳ ኤርተ።
2PE 3:4 ኤንቲ፥ “ታ ያና ግዳይስ አዉን ደኢ? ኑ አዋት ሀይቅዶሶና፥ ሽን ኡባባይ ሳእ መቶሳፐ ዶምድ ደኤይሳዳ ደኤስ” ያጎሶና።
2PE 3:5 ዳሮ ዎደፐ ካሰ ሳሎይ ፆሳ ቃላን መትዳይሳ፤ ቃስ ሳእ ሃꬃፈነ ሃꬃን መትዳይሳ ኤርሸ ካዶሶና።
2PE 3:6 ሄ ዎደ ደእያ ሳአይ ሃꬃን ምተትድ ꬋይስ።
2PE 3:7 ሽን ሀእ ደእያ ሳሎይነ ሳእ፥ ጌላት ፕርደትያ ጋላሳይነ ꬋይያ ጋላሳይ ጋካናዉ ሄ ቃላን ታማስ ናገትድ ደኦሶና።
2PE 3:8 ሽን ታ ሲቆ እሻቶ፥ ሀ እስባ ዶጎፕተ። ጎዳ ማታን እስ ጋላስ ሙኩሉ ላይꬃ መላ ግደይሳነ ሙኩሉ ላይꬅ እስ ጋላሳ መላ ግደይሳ ዶጎፕተ።
2PE 3:9 እሶት እሶት ጋምእስ ግድ ቆፐይሳዳ፥ ጎዳይ ባ ኡፋይሳ ቃላ ግሾ ጋምኤና። ሽን ኦንካ ꬋዮና መላ ኮይድ፥ ኡባይ ባንታ ናጋራፐ ስማና መላ ህንተ ግሾ ግድ ገንጬስ።
2PE 3:10 ሽን ጎዳ ጋላሳይ ካይሶዳ ያና። ሄ ጋላሳን ሳሎት ዎልቃማ ጉንꬃን ꬋያና፤ ሳሎ መተꬃት ታማን ፁገታና፤ ሳእነ እያ ቦላ ደእያ ኡባይ ꬋያና።
2PE 3:11 ህዛ፥ ኡባባይ ሄሳዳ ሀንዳ ꬋይያባ ግድኮ ህንተ አይ መላ አስ ግዳናዉ በሲ? ህንተ ጌሽነ ፆሳ ዳንያ ደኦ ዳናዉ በሴስ።
2PE 3:12 ህንተ ስንꬃራ ያ ፆሳ ጋላሳ ናግሸ ህንተዉ ዳንዳኤትያባ ኡባ ኦꬅድ ሄ ጋላሳ ኤሶይተ። ሄ ጋላስ ሳሎትነ እያን ደእያባይ ታማን ፁገታና፤ ዎልቃማ ሱላን ትልአና።
2PE 3:13 ሽን ኑኒ ፅሎተꬅ ሃርያ ኦራꬃ ሳሎነ ኦራꬃ ሳአ ፆሳ ኡፋይሳ ቃላዳ ናጎስ።
2PE 3:14 ሄሳ ግሾ፥ ታ ሲቆ እሻቶ፥ ኑ ሄ ጋላሳ ናግያ ግሾ ፖኮይነ ቦረይ ባይናይሳታ ግድድ፥ ጎዳራ ሳሮን ዳናዉ ምንተ።
2PE 3:15 አስ ኡባይ አታና መላ ኮይድ ጎዳይ ዳንዳኤይሳ ዶጎፕተ። ቃስ ኑ ሲቆ እሻይ፥ ጳዉሎስ፥ ፆሳይ እያዉ እምዳ ጭንጫተꬃን ሄሳዳ ህንተዉ ፃፍስ።
2PE 3:16 እ ባ ዳብዳበታ ኡባን ሄሳታባ ፃፍስ። እያ ዳብዳበታ ግዶን አኬካናዉ ዋይስያ ቆፋት ደኦሶና። ታማርቦናነ ምንቦና አሳት ሀራ ፆሳ ቃላ ምርቀይሳዳ ሀ ኪታታካ ꬋያናዉ ማችድ ምርቆሶና።
2PE 3:17 ሄሳ ግሾ፥ ታ ሲቆ እሻቶ፥ ህንተ ሄሳ ኤርያ ግሾ ማካላታ ባላን ጭመትድ፥ ꬋዮና መላነ ምንድ ደእያ በሳፈ ኩንዶና መላ ናገትተ።
2PE 3:18 ሽን ህንተ ኑና አሽያ ኑ ጎዳ፥ የሱስ ክርስቶሳ አꬎ ኬሀተꬃንነ ኤራተꬃን ድጭተ። እያዉ ሀእካ መርናዉካ ቦንቾይ ግዶ። አምንእ።
1JO 1:1 ኑኒ ኮይሮፐ ዶምድ ደእያ፥ ኑ ሀይꬃን ስእዳ፥ ኑ ፄልዳ፥ አይፈን በእዳ፥ ኑ ኩሸን ቦችዳ ደኦ ቃላባ ህንተዉ ፃፎስ።
1JO 1:2 ሄ ደኦይ ቆንጭን፥ ኑኒ እያ በእድ፥ እያባ ማርካቶስ። አዋ ማታን ደእያ ኑስ ቆንጭዳ፥ መርና ደኡዋባ ህንተዉ አዋጆስ።
1JO 1:3 ኑራ ህንተዉ እስፈተꬅ ዳና መላ ኑኒ በእዳይሳነ ስእዳይሳ ህንተዉ ኦዶስ። ህንተዉ ኑራ እስፈተꬅ ደእያ ግሾ፥ አዋራነ እያ ናኣ የሱስ ክርስቶሳራ እስፈተꬅ ደኤስ።
1JO 1:4 ኑ ኡፋይሳይ ፖሎ ግዳና መላ ሄሳ ህንተዉ ፃፎስ።
1JO 1:5 ኑኒ ደኦ ግድዳ እያፐ ስእድ፥ ህንተዉ ኦድያ ኪታይ ሀይሳ፦ “ፆሳይ ፖኦ፤ እያን ꬉም ባዋ” ያገይሳ።
1JO 1:6 ኑስ እያራ እስፈተꬅ ደኤስ ያግሸ ꬉማን ደእኮ፥ ኑ ኦዳንነ ኑ ኦሱዋን ዎርዶቶስ።
1JO 1:7 ሽን ፖኦን እ ደኤይሳዳ፥ ኑካ ፖኦን ደእኮ፥ ኑስ ዎል ግዶን እስፈተꬅ ደኤስ። እያ ናኣ፥ የሱሳ ሱꬃይ ናጋራ ኡባፈ ኑና ጌሼስ።
1JO 1:8 ኑኒ፥ ኑናን ናጋር ባዋ ጊኮ ኑ ኑና ጭሞስ፤ ኑናን ቱም ባዋ።
1JO 1:9 ሽን ፆሳስ ኑ ናጋራ ፓፅኮ፥ እ ኑ ናጋራ አቶ ጋናዉነ ኑ ቆሆ ኦሶ ኡባፈ ኑና ጌሻናዉ፥ አማነትዳይሳነ ቱማ።
1JO 1:10 ኑኒ ናጋራ ኦꬅቦኮ ጊኮ ፆሳ ዎርዳንቾ ከሶስ፤ እያ ቃላይካ ኑናን ዴና።
1JO 2:1 ታ ናይቶ፥ ናጋራ ህንተ ኦꬆና መላ ታኒ ሀይሳ ህንተዉ ፃፋይስ። ሽን ኦንካ ናጋራ ኦꬅኮ አዋ ማታን ኑስ ጋናትያ ፅሎይ፥ የሱስ ክርስቶሲ፥ ደኤስ።
1JO 2:2 ኑ ናጋራይ ክርስቶሳ ባጋራ አቶ ጌተቴስ። እ ኑ ናጋራ ፃላላስ ግዶናሽን፥ አሳ ኡባ ናጋራስ ያርሸትስ።
1JO 2:3 ኑኒ ፆሳ ኪታ ናግኮ፥ ስይ ባይናሽን፥ ቱማ ኑ እያ ኤሮስ።
1JO 2:4 ኦንካ፥ “ታኒ እያ ኤራይስ” ያግሸ፥ እያ ኪታ ናጎና እፅኮ ሄ ኡራይ ዎርዳንቾ፤ ቱማተꬅ እያን ባዋ።
1JO 2:5 ሽን እያ ቃላስ ኑ ኪተትያባ ግድኮ ሄ ኡራይ ፆሳ ሲቅያ ሲቆይ ፖሎ ግዴስ። ኑኒ ፆሳን ደኤይሳስ ሄስ ባዉ ቱማ ማርካ።
1JO 2:6 ታኒ፥ “ፆሳን ደአይስ” ግያ ኦንካ ክርስቶስ ደእዳይሳዳ ዳናዉ በሴስ።
1JO 2:7 ታ ሲቆ እሻቶ፥ ታኒ ህንተዉ ኮይሮፐ ደእያ ጋልአ ኪታ ፃፋይስፐ አትሽን፥ ኦራꬃ ኪታ ፃፍከ። እካ ህንተ ስእዳ ሄ ጋልአ ኪታ።
1JO 2:8 ግድኮካ፥ ክርስቶሳንነ ህንተናን ቱማ ግድድ ደእያ፥ ኦራꬃ ኪታ ፃፋይስ። ꬉማይ ክችን፥ ሀእ ቱማ ፖኦይ ፖኤስ።
1JO 2:9 “ፖኦን ደአይስ” ግሸ ባ እሻ እፅያ ኦንካ፥ ሀእካ ꬉማን ደኤስ።
1JO 2:10 ባ እሻ ዶስያ ኦንካ ፖኦን ደኤስ። ሄ ኡራን ሀራ አስ ꬉብያባይ ባዋ።
1JO 2:11 ሽን ባ እሻ እፅያ ኦንካ ꬉማን ደኤስ፤ ꬉማን ሄመቴስ። ꬉማይ እያ አይፍያ ቆቅስዳ ግሾ አዉ ብያኮ ኤረና።
1JO 2:12 ታ ናይቶ፥ ክርስቶሳ ሱንꬃ ባጋራ ህንተ ናጋራይ አቶ ጌተትዳ ግሾ ታኒ ህንተዉ ፃፋይስ።
1JO 2:13 አዋቶ፥ ኮይሮፐ ደእያ፥ እያ ህንተ ኤርዳ ግሾ ህንተዉ ፃፋይስ። ያላጋቶ፥ ፃላህያ ህንተ ፆንዳ ግሾ ህንተዉ ፃፋይስ።
1JO 2:14 ጉꬃ ናይቶ፥ ፆሳ ህንተ ኤርዳ ግሾ ህንተዉ ፃፋይስ። አዋቶ፥ ኮይሮፐ ደእያ እያ ህንተ ኤርዳ ግሾ ህንተዉ ፃፋይስ። ያላጋቶ፥ ህንተ ምኖ ግድያ ግሾ፥ ፆሳ ቃላይ ህንተናን ደእያ ግሾነ ፃላህያ ህንተ ፆንዳ ግሾ ህንተዉ ፃፋይስ።
1JO 2:15 አላመ ዎይኮ አላመን ደእያባ ዶሶፕተ። አላምያ ዶስያ ኦንካ ፆሳ ዶሰና።
1JO 2:16 አላመን ደእያ ኡባባይ፥ አሾ አሞተꬅ፥ አይፈን በእድ አሞትያባይነ ሚሸን ጬቀተꬅ አላመባፐ አትሽን፥ ፆሳፈ ግደና።
1JO 2:17 አላመይነ አላመን አስ አሞትያ ኡባይ አꬋና፥ ሽን ፆሳ ሸነ ፖልያ ኦንካ መርናዉ ዳና።
1JO 2:18 ታ ናይቶ፥ ዎድያ ዉርሰꬃይ ማታትስ። ክርስቶሳ ሞርከይ ስንꬃፈ ያናይሳ ህንተ ስእዳይሳዳ ሀር አቶሽን፥ ሀእካ እያ ሞርከት ዳሮት ደንድዶሶና። ሄሳ ግሾ፥ ዎድያ ዉርሰꬃይ ማታትዳይሳ ኑኒ ሄሳን ኤሮስ።
1JO 2:19 ሄ ሞርከት ኑ ባጋ ግዶና ግሾ ኑ ግዶፈ ከይዶሶና። ኤንቲ ኑ ባጋ ግድያኮ ኑ ግዶን ደአና፥ ሽን ኤንታፈ ኦንካ ኑ ባጋ ግዶናይስ ኤረታና መላ ኑ ግዶፈ ከይዶሶና።
1JO 2:20 ሽን ክርስቶስ ህንተ ቦላ ጌሻ አያና ጉስስ፤ ቃስ ህንተ ኡባይ ቱማ ኤሬታ።
1JO 2:21 ቱማ ህንተ ኤርያ ግሾነ ቱማን አይባ ዎርዶይ ባይናይሳ ህንተ ኤርያ ግሾ፥ ታኒ ህንተዉ ፃፋይስፐ አትሽን፥ ቱማ ህንተ ኤሮና ግሾ ግደና።
1JO 2:22 የሱሲ፥ ፆሳይ ዶርዳይሳ ግደና ግድ ካድያ አሳፐ ሀር ዎርዳንቾይ ኦኔ? ሄሳ መላ አስ ክርስቶሳ ሞርከ። እ ናኣ ካድኮ አዋካ ካዴስ።
1JO 2:23 ናኣ ካድያ ኦደስካ አዋይ ባዋ፤ ቃስ ናኣስ ማርካትያ ኦደስካ አዋይ ደኤስ።
1JO 2:24 ሄሳ ግሾ፥ ኮይሮ ህንተ ስእዳ ቃላ ህንተ ዎዛናን ምንꬅድ ናግተ። ኮይሮ ስእዳይሳ ህንተ ናግኮ ህንተዉ ናአራነ አዋራ እስፈተꬅ ዳና።
1JO 2:25 ናአይ ኑስ መርና ደኡዋ እማና ግድ ቃላ ገልስ።
1JO 2:26 ህንተና ባለꬅያ አሳ ግሾ ታኒ ሀይሳ ህንተዉ ፃፋስ።
1JO 2:27 ሽን ክርስቶስ ህንተ ቦላ ባ ጌሻ አያና ጉስስ። ጌሻ አያናይ ህንተናን ደእያ ግሾ ኦንካ ህንተና ታማርሶ ኮሸና። እያ ጌሻ አያናይ ህንተና ቱማ ታማርሰስፐ አትሽን፥ ዎርዶ ግደና። ጌሻ አያናይ ህንተና ታማርስዳይሳዳ ክርስቶሳን ደእተ።
1JO 2:28 ህዛ፥ ታ ናይቶ፥ እ ቆንጭያ ዎደ ኑኒ ያሽ ባይናነ እያ ዩሳ ጋላስ እያ ስንꬃን ኑ ዬላን ቆሰቶና መላ እያን ደእተ።
1JO 2:29 ክርስቶስ ፅሎ ግደይሳ ህንተ ኤርኮ ፅሎ ኦꬅያ ኡባይ ፆሳ ናአ ግደይሳ ኤርተ።
1JO 3:1 ኑኒ ፆሳ ናይታ ጌተትድ ፄገታና መላ ፆሳይ ኑና አይ መላ ዶስዳኮ በእተ። ኑኒ ቱማካ ፆሳ ናይታ። ሀ አላመይ ፆሳ ኤሮና ግሾ ኑናካ ኤረና።
1JO 3:2 ታ ሲቆ እሻቶ፥ ሀእ ኑኒ ፆሳ ናይታ፤ ኑኒ አይ ሀናኔኮ ቡሮ ኤረትቤና። ሽን ክርስቶስ ቆንጭያ ዎደ ኑኒ እያ ዳናናይሳ ኤሮስ። እ ቱማ ደኤይሳ ኑኒ በአና።
1JO 3:3 ክርስቶሳ በአና ግድ ኡፋይሳን ናግያ ኦንካ፥ ክርስቶስ ጌሽ ግድዳይሳዳ ባና ጌሼስ።
1JO 3:4 ናጋር ህገ መንꬆ ግድያ ግሾ ናጋራ ኦꬅያ ኡባይ ፆሳ ህገ መንꬄስ።
1JO 3:5 ክርስቶስ አሳ ናጋራ ꬋይሳናዉ ቆንጭዳይሳ ህንተ ኤሬታ፤ እያን ናጋር ባዋ።
1JO 3:6 ክርስቶሳን ደእያ ኦንካ ናጋራን ዴና። ቃስ ናጋራን ደእያ ኦንካ እያ በእቤና ዎይኮ ኤርቤና።
1JO 3:7 ታ ናይቶ፥ ህንተና ኦንካ ባለꬆፎ። ክርስቶስ ፅሎ ግድዳይሳዳ ፅሎ ኦꬅያ ኦንካ ፅሎ።
1JO 3:8 ፃላሄይ ኮይሮፐ ናጋራ ኦꬅዳ ግሾ ናጋራ ኡባ ዎደ ኦꬅያ ኦንካ ፃላሄ ዳቦ። ሄሳ ግሾ፥ ፆሳ ናአይ ፃላሄ ኦሶ ꬋይሳናዉ ቆንጭስ።
1JO 3:9 ፆሳ ናአ ግድያ ኦንካ ፆሳ አያናይ እያን ደእያ ግሾ፥ እ ኡባ ዎደ ናጋራን ዴና። ፆሳይ እያ አዋ ግድያ ግሾ ናጋራን ዴና።
1JO 3:10 ፆሳ ናይታ ግዶንነ ፃላሄ ናይታ ግዶን ደእያ ዱማተꬃይ ሄሳን ኤረቴስ፤ ፅሎ ኦꬆና አስ ዎይኮ ባ እሻ ዶሶና አስ ፆሳ ናአ ግደና።
1JO 3:11 ኮይሮፐ ህንተ ስእዳ ኪታይ፥ “እሶይ እሱዋ ዶሳናዉ በሴስ” ግያ ኪታ።
1JO 3:12 ኑኒ ቃየላ መላ ግዳናዉ በሰና። ቃየላ ፃላሄ ዳቦ ግድድ ባ እሻ ዎꬍስ። እ ባ እሻ አይስ ዎꬍዴ? እያ ኦሶይ ኢታ ግድዳ ግሾነ እያ እሻ ኦሶይ ሎኦ ግድዳ ግሾ ዎꬍስ።
1JO 3:13 ታ እሻቶ፥ ሀ አላምያ አሳይ ህንተና እፅኮ ማላለቶፍተ።
1JO 3:14 ኑኒ ኑ እሻታ ሲቅያ ግሾ፥ ሀይቆፐ ደኦ ፕንዳይሳ ኤሮስ። ባ እሻ ዶሶና ኦንካ ሀይቆ ኩያን ደኤስ።
1JO 3:15 ባ እሻ እፅያ ኦንካ ሸምፖ ዎꬌስ። ቃስ ሸምፖ ዎꬍያ ኦደስካ መርና ደኦይ ባይናይሳ ህንተ ኤሬታ።
1JO 3:16 ክርስቶስ ባ ሸምፑዋ ኑ ግሾ አꬅድ እምዳይሳን ሲቆይ አይበኮ ኑኒ ኤርዳ። ኑካ ኑ እሻታ ግሾ ኑ ሸምፑዋ አꬅድ እማናዉ በሴስ።
1JO 3:17 ሽን ዱረ ግድዳ ኦንካ መቶታንቹዋ በእሸ፥ እያዉ ቃቶና እፅኮ ባ ዎዛናን ፆሳ ሲቆይ ደኤስ ጋናዉ ዋንድ ዳንዳኢ?
1JO 3:18 ታ ናይቶ፥ ኑኒ ኦሶንነ ቱማተꬃን ኑ ሲቁዋ ቆንጭሳናዉ በሴስፐ አትሽን፥ ጮ ኦዳ ፃላላን ዎይኮ ዶና ፃላላን ሲቀታናዉ በሰና።
1JO 3:19 ኑኒ እሶይ እሱዋ ሲቅኮ፥ ኑ ቱማ ባጋ ግደይሳ ኤሮስ፤ ሄሳስ ፆሳ ስንꬃን ዬላቶኮ።
1JO 3:20 ኑ ዎዛናይ ኑ ቦላ ፕርድያባ ግድኮ፥ ፆሳይ ኑ ዎዛናፐ ግታ ግደይሳ ኤሮስ፤ እ ኡባባ ኤሬስ።
1JO 3:21 ታ ሲቆ እሻቶ፥ ኑ ዎዛናይ ኑ ቦላ ፕርዶናባ ግድኮ ኑኒ ፆሳ ስንꬃን ያዮኮ።
1JO 3:22 ኑኒ እያ ኪታ ናግያ ግሾነ እያ ኡፋይስያባ ኦꬅያ ግሾ ዎስያባ ኡባ እያፐ ኤኮስ።
1JO 3:23 ክርስቶስ ኑና ኪትዳይሳዳ ፆሳ ናኣ የሱስ ክርስቶሳ ሱንꬃን አማናናዳነ እሶይ እሱዋ ሲቃናዳ ፆሳይ ኑና ኪትስ።
1JO 3:24 ፆሳ ኪታ ናግያ ኦንካ ፆሳን ደኤስ፤ ፆሳይካ እያን ደኤስ። ፆሳይ ኑስ እምዳ ጌሻ አያና ባጋራ እ ኑናን ደኤይሳ ኤሮስ።
1JO 4:1 ታ ሲቆ እሻቶ፥ አያናታ ኡባ አማኖፕተ፥ ሽን ኤንቲ ፆሳፈ ይዳኮ ፓጭድ በእተ። አይስ ጊኮ፥ ዳሮ ዎርዶ ናበት አላመን ደንድዶሶና።
1JO 4:2 ፆሳ አያና ግደይሳ ህንተ ሀይሳን ኤራና፤ “የሱስ ክርስቶሲ አሰ ግድድ ይዳይሳ ማርካታይስ” ግያ አያና ኡባይ ፆሳፈ ዬስ።
1JO 4:3 ክርስቶስ አሰ ግድድ ይዳይሳ አማናይስ ጎና አያና ኡባይ ፆሳፈ ግደና። ሄስ ክርስቶሳ እፅያ አያና። ህንተ ሄ አያናይ ያናይሳ ካሰ ስእደታ፤ እ ሀር አቶሽን ሀእካ አላመን ደኤስ።
1JO 4:4 ታ ናይቶ፥ ህንተ ፆሳሳ። ህንተ ግዶን ደእያ ጌሻ አያናይ አላመን ደእያ አያናፐ ዳሮ ዎልቃማ ግድያ ግሾ ዎርዳንቾ ናበታ ህንተ ፆንደታ።
1JO 4:5 ኤንቲ ሀ አላምያ አሰ ግድያ ግሾ፥ ሀ አላምያባ ኦዶሶና፤ ሀ አላምያ አሳይ ኤንታ ኦዳ ስኦሶና።
1JO 4:6 ኑኒ ፆሳፈ የለትዳ፤ ፆሳ ኤርያ ኦንካ ኑና ስኤስ። ፆሳ ኤሮና ኦንካ ኑና ስኤና። ኑኒ ቱማ አያናነ ዎርዶ አያና ሄሳን ሻኮስ።
1JO 4:7 ታ ሲቆ እሻቶ፥ ሲቆይ ፆሳፈ ያ ግሾ፥ አነ እሶይ እሱዋራ ሲቀቶስ። ሲቅያ ኦንካ ፆሳ ናአ፤ እ ፆሳ ኤሬስ።
1JO 4:8 ፆሳይ ሲቆ ግድያ ግሾ ሲቆና ኦንካ ፆሳ ኤረና።
1JO 4:9 ኑኒ ክርስቶሳ ባጋራ ደኡዋ ደማና መላ ፆሳይ ባ እስ ናኣ ሀ አላምያ ኪትስ። ፆሳይ ኑና ባ ሲቁዋ ሄሳን በስስ።
1JO 4:10 ቱማ ሲቆ ጉሳይ ሀይሳ፦ ኑኒ ፆሳ ሲቅዳ ግሾ ግዶናሽን፥ ፆሳይ ኑና ሲቅዳ ግሾነ ኑ ናጋራፐ ኑና ማራናዉ ባ ናኣ ኪትዳ ግሾሳ።
1JO 4:11 ታ ሲቆ እሻቶ፥ ፆሳይ ኑና ሀይሳዳ ሲቅኮ፥ ኑካ እሶይ እሱዋ ሲቃናዉ በሴስ።
1JO 4:12 ፆሳ በእዳይ ኦንካ ባዋ። ኑኒ እሶይ እሱዋ ሲቅኮ ፆሳይ ኑናን ደኤስ፤ እያ ሲቆይካ ኑናን ፖሎ ግዴስ።
1JO 4:13 ፆሳይ ባ ጌሻ አያና ኑስ እምዳ ግሾ፥ ኑኒ ፆሳን ደኤይሳነ እካ ኑናን ደኤይሳ ኤሮስ።
1JO 4:14 አዋይ ባ ናኣ፥ ሀ አላምያ አሸይሳ ግዳና መላ ኪትዳይሳ ኑኒ በእድ ማርካቶስ።
1JO 4:15 የሱሲ ፆሳ ናኣ ግደይሳ ማርካትያ ኦደንካ ፆሳይ ደኤስ፤ እካ ፆሳን ደኤስ።
1JO 4:16 ፆሳይ ኑና ሲቀይሳ ኑኒ ኤሮስነ አማኖስ። ፆሳይ ሲቆ። ሲቆን ደእያ ኦንካ ፆሳን ደኤስ፤ ፆሳይካ እያን ደኤስ።
1JO 4:17 ኑ ደኦይ ሀ አላምያን ክርስቶስ ደእዳይሳ መላ ግድያ ግሾ፥ ፕርዳ ጋላስ ያዮና እያ ስን ሺቃናዉ እያ ሲቆይ ኑናን ፖሎ ግዴስ።
1JO 4:18 ሲቆን ያሽ ባዋ፥ ቱማ ሲቆይ ያሽ ከስ ሆሌስ። ያሽነ ፕርድ እስፈ ብያ ግሾ፥ ያይያ ኡራ ሲቆይ ፖሎ ግደና።
1JO 4:19 ፆሳይ ኮይሮ ኑና ሲቅዳ ግሾ ኑ ሲቆስ።
1JO 4:20 ኦንካ፥ “ፆሳ ሲቃይስ” ግሸ ባ እሻ እፅኮ፥ እ ዎርዳንቾ። አይስ ጊኮ፥ በእያ ባ እሻ ሲቆና ኦንካ በእቦና ፆሳ ሲቃናዉ ዋንድ ዳንዳኢ?
1JO 4:21 ክርስቶስ ኑስ እምዳ ኪታይ ሀይሳ፤ “ፆሳ ሲቅያ ኦንካ ባ እሻ ሲቃናዉ በሴስ” ያገይሳ።
1JO 5:1 የሱሳ፥ እ ክርስቶሳ ያግድ፥ አማንያ ኦንካ ፆሳ ናአ። አዋ ሲቅያ ኦንካ እያ ናኣካ ሲቄስ።
1JO 5:2 ኑኒ ፆሳ ሲቅያ ግሾነ እያ ኪታ ናግያ ግሾ ፆሳ ናይታ ሲቀይሳ ኤሮስ።
1JO 5:3 ኑኒ ፆሳ ሲቅኮ፥ እያ ኪታታ ናጎስ። እያ ኪታት ዴፆ ግዶኮና።
1JO 5:4 አይስ ጊኮ፥ ፆሳ ናአ ግድያ ኦንካ ሀ አላምያ ፆናናዉ ዳንዳኤስ። ኑኒ ሀ አላምያ ፆናናይ ኑ አማኑዋና።
1JO 5:5 አላምያ ፆናናዉ ዳንዳኤይ ኦኔ? የሱሲ ፆሳ ናኣ ግደይሳ አማንያ አሳ ፃላል ፆናና።
1JO 5:6 የሱስ ክርስቶሲ ሃꬃ ፅንቃትያራነ ባ ሀይቁዋ ሱꬃራ ይስ። እ፥ ሃꬃራነ ሱꬃራ ይስፐ አትሽን፥ ሃꬃ ፃላላራ ይቤና። ጌሻ አያናይ ቱማ ግድያ ግሾ፥ ሄስ ቱማ ግደይሳ ማርካቴስ።
1JO 5:7 ሄꬑ ማርካት ደኦሶና።
1JO 5:8 ሄሳት፥ ጌሻ አያና፥ ሃꬃነ ሱꬃ። ሀ ሄꬓታ ማርካተꬃይ እስኖ።
1JO 5:9 ኑ አሳይ ማርካተይሳ አማኖስ። ሽን ፆሳ ማርካተꬃይ አሳይሳፈ ዳሮ አꬌስ። ፆሳይ ባ ናኣስ ማርካትዳ ማርካተꬃይ ሀይሳ።
1JO 5:10 ፆሳ ናኣ አማንያ ኡራ ዎዛናን ሀ ማርካተꬃይ ደኤስ። ፆሳ አማኖና ኦንካ ፆሳይ ባ ናኣስ ማርካትዳ ማርካተꬃ አማንቦና ግሾ፥ ፆሳ ዎርዳንቾ ኦꬄስ።
1JO 5:11 ህዛ፥ ማርካተꬃይ ሀይሳ፤ ፆሳይ ኑስ መርና ደኦ እሚስ፤ ሄ ደኦይካ እያ ናአን ደኤስ ያገይሳ።
1JO 5:12 ፆሳ ናአይ ደእያ ኦደስካ ደኦይ ደኤስ። ፆሳ ናአይ ባይና ኦደስካ ደኦይ ባዋ።
1JO 5:13 ፆሳ ናአን አማንያ ህንተዉ መርና ደኦይ ደኤይሳ ህንተ ኤራና መላ ሀይሳ ህንተዉ ፃፋስ።
1JO 5:14 ፆሳ ሸንያዳ አይብባካ እያ ዎስኮ፥ እ ስኤይሳ ኑኒ ኤርያ ግሾ እያን አማነቶስ።
1JO 5:15 ኑኒ ዎስያ ኡባ እ ስኤይሳ ኤርኮ፥ ኑኒ ዎስያባ እ እማናይሳ ኤሮስ።
1JO 5:16 ኦንካ ባ እሻይ ሀይቆ በሶና ናጋራ ኦꬅሽን በእኮ፥ ፆሳ እያዉ ዎሳናዉ በሴስ። ሀይቆ በሶና ናጋራ ኦꬅዳይሳታስ ፆሳይ ደኦ እማና። ሀይቆ በሲያ ናጋር ደኤስ። ታኒ ህንተና ሄሳስ ፆሳ ዎስተ ጊከ።
1JO 5:17 ኢታ ኦሶ ኡባይ ናጋራ፥ ሽን ሀይቆ በሶና ናጋር ደኤስ።
1JO 5:18 ፆሳ ናአይ እያ ናግያ ግሾ፥ ፆሳ ናአ ግድዳ ኦንካ ናጋራን ኡባ ዎደ ደኦናይሳ ኑኒ ኤሮስ። ፃላሄይ እያ ቆሀናዉ ዳንዳኤና።
1JO 5:19 ኑኒ ፆሳሳ ግደይሳነ ሀ ኩመꬃ አላመይ ፃላሄን ሃረተይሳ ኤሮስ።
1JO 5:20 ኑኒ ቱማ ፆሳ ኤራናዳ ፆሳ ናአይ ይዳይሳነ ኑስ አኬካ እምዳይሳ ኤሮስ። ኑኒ እያ ናአ፥ የሱስ ክርስቶሳ ባጋራ ቱማ ፆሳን ደኦስ። የሱሲ ቱማ ፆሳነ መርና ደኡዋ።
1JO 5:21 ታ ናይቶ፥ ኤቃታፐ ህንተ ሃክተ።
2JO 1:1 ታ ጭማይ ዶረትዳ ጎዳተስነ እ ናይታስ ኪትዳ ኪታ። ታ ፃላላ ግዶናሽን፥ ቱማ ኤርያ ኡባይ ህንተና ዶሶሶና።
2JO 1:2 ሀ ቱማይ ኑናን ደእያ ግሾነ መርናዉ ኑራ ዳና ግሾ ታኒ ህንተና ቱማ ዶሳይስ።
2JO 1:3 ፆሳ ኑ አዋነ እያ ናኣ የሱስ ክርስቶሳ አꬎ ኬሀተꬃይ፥ ማሮተꬃይነ ሳሮተꬃይ ቱማንነ ሲቆን እስፈ ኑራ ግዶ።
2JO 1:4 አዋይ ኑና ኪትዳይሳዳ፥ ነ ናይታፐ ባጋት፥ ቱማስ ኪተተይሳ በአዳ ታኒ ዳሮ ኡፋይታስ።
2JO 1:5 ጎዳተ፥ ሀእካ ኑኒ ኡባይ እሶይ እሱዋ ሲቃና መላ ታኒ ነና ዎሳይስ። ሀ ኪታይ ኮይሮፐ ኑራ ደእያ ኪታፐ አትሽን፥ ታኒ ነዉ ኦራꬃ ኪታ ፃፍከ።
2JO 1:6 ቱማ ሲቆይ ኑኒ ፆሳ ኪታ ናግድ ዳናይሳ። ቃስ ኮይሮፐ ህንተ ስእዳይሳዳ እያ ኪታይ፥ ህንተ ኡባይ ሲቆን ዳና መላሳ።
2JO 1:7 የሱስ ክርስቶሲ አሰ ግድድ ይዳይሳ አማኖና፥ ዳሮ ባለꬅያ አሳት፥ አላመን ደንድዶሶና። ሄሳ መላ አስ ኦንካ ባለይሳነ ክርስቶሳ ሞርከ።
2JO 1:8 ህንተ ኦꬅዳ ኩመꬃ ዎይቱዋ ኤካናዉ ምንተ። ህንተ ኦꬅዳይስ ꬋዮና መላ ናገትተ።
2JO 1:9 ክርስቶሳ ትምርትያን ዶናይሳስነ እያፐ ሃክያ ኡራስ ፆሳይ ባዋ። ክርስቶሳ ትምርትያን ደእያ ኡራስ አዋይነ ናአይ ደኦሶና።
2JO 1:10 ኦንካ ህንተኮ ይሸ ሀ ትምርትያ ኤሆና እፅኮ፥ ህንተ ሶ ገልሶፍተ፤ ሳሮካ ጎፕተ።
2JO 1:11 እያ ሳሮ ግያ ኦንካ እያ ኢታ ኦሱዋን እያራ ሻከቴስ።
2JO 1:12 ታኒ ህንተዉ ፃፋናዉ ኮይዳ ዳሮባይ ደኤስ፥ ሽን ዎርቃተንነ ቃላመን ፃፋናዉ ኮይከ። ኑ ኡፋይሳይ ፖለታና መላ ህንተራ ሶምኦን ጋሄታዳ ኦደታናዉ ህንተኮ ባና ጋዳ ቆፓይስ።
2JO 1:13 ፆሳይ ዶርዳ ነ ምቸ ናይት ነና ሳሮ ያጎሶና።
3JO 1:1 ታኒ ጭማይ፥ ቱማ ዶስያ ጋዮሳስ ኪትዳ ኪታ።
3JO 1:2 ታ ሲቁዋዉ፥ ኔኒ ነ ሸምፑዋን ሎኦ ደኤይሳ ታ ኤረይሳዳ ነዉ ፓያተꬅ ዳና መላነ ነ ኦꬅያባይ ሱራና መላ ነዉ ፆሳ ዎሳይስ።
3JO 1:3 ጉꬃ አማንያ አሳት ይድ፥ ኡባ ዎደ ኔኒ ቱማን ደኤይሳነ ነ ቱማተꬃባ ማርካትዳ ዎደ ታኒ ዳሮ ኡፋይታስ።
3JO 1:4 ታ ናይት ቱማተꬃን ደኤይሳ ስኤይሳፈ አꬍድ፥ ታና ኡፋይስያባይ ባዋ።
3JO 1:5 ታ ሲቁዋዉ፥ ኤንቲ ነዉ እማ ግድኮካ፥ ኔኒ አማንያ አሳታስ አማንꬅያ ኦሶ ኦꬃሳ።
3JO 1:6 ኤንቲ ነ ሲቁዋባ ዎሳ ኬꬃን ማርካቶሶና። ሀእካ ኤንቲ ብያ ኦግያን ፆሳይ ዶሰይሳዳ ኦꬃዳ ኤንታ ማድኮ ሎኦ ኦꬃሳ።
3JO 1:7 ኤንቲ ክርስቶሳ ሱንꬃ ግሾ ከይሸ፥ አማኖና አሳታፐ አይኮካ ኤክቦኮና።
3JO 1:8 ኑኒ ቱማ ኦሱዋ ኤንታራ እስፈ ኦꬃናዉ ሀይሳ መላ አሳታ ማዳናዉ በሴስ።
3JO 1:9 ታኒ ዎሳ ኬꬃታስ ዳብዳበ ፃፋስ፥ ሽን ኤንታ ሀላቃ ግዳናዉ ኮይያ ድዮትራፍስ ኑኒ ገይሳ ኤከና።
3JO 1:10 ሄሳ ግሾ፥ ታኒ ያ ብያ ዎደ እ ኑ ቦላ ኦደትያ ኢታ ኦዳነ እ ኦꬅዳ ኦሱዋ ኦዳና። እ ሄስ ጉፅስ ግድ፥ ኑ እሻት ያ ዎደ ሞከና። ሀር አቶሽን፥ ኤንታ ሞካናዉ ኮየይሳታካ ድግድ ዎሳ ኬꬃፈ ከሴስ።
3JO 1:11 ታ ሲቁዋዉ፥ ሎኦባ ዳናፐ አትሽን፥ ኢታባ ዳኖፓ። ሎኦባ ኦꬅያ ኦንካ ፆሳ አስ፥ ሽን ኢታባ ኦꬅያ ኦንካ ፆሳ በእቤና።
3JO 1:12 ድመፅሮስ ሎኦ አስ ግደይሳ አሳ ኡባይ ማርካቴስ። ቱማይ ባ ሁጰን እያባ ማርካቴስ፤ ኑካ እያባ ማርካቶስ፤ ኑ ማርካተꬃይ ቱማ ግደይሳ ህንተ ኤሬታ።
3JO 1:13 ታኒ ነዉ ፃፋናዉ ኮይዳ ዳሮባይ ደኤስ፥ ሽን ቃላመንነ ዎርቃተን ፃፋናዉ ኮይከ።
3JO 1:14 ሽን ታኒ ማታራ ኔራ ጋሄታናዉ ቆፓይስ፤ ሄ ዎደ ኑኒ ኦደታና።
3JO 1:15 ሳሮይ ነዉ ግዶ። ነ ዳቦት ነና ሳሮ ያጎሶና። ኑ ዳቦታ ኡባ ኤንታ ሱንꬃ ሱንꬃ ፄጋዳ ታና “ሳሮ ግስ” ያጋ።
JUD 1:1 ታኒ ይሁድ፥ የሱስ ክርስቶሳ አይለይ፥ ያይቆባ እሻይ፥ ፆሳይ ፄግዳይሳታስ፥ ፆሳ አዋይ ዶሰይሳታስነ የሱስ ክርስቶሳን ናገትዳይሳታስ ሀ ዳብዳብያ ፃፋይስ።
JUD 1:2 ማሮተꬅ፥ ሳሮተꬅነ ሲቆይ ህንተዉ ኩሞ።
JUD 1:3 ታ ሲቆ እሻቶ፥ ኑኒ እስፈ ሻከትያ አቶተꬃባ ህንተዉ ፃፋናዉ ታኒ ዳሮ አሞታስ። ሽን አማንያ አሳስ እስቶሆነ ዉርሰꬅ ጋካናዉ እመትዳ አማኑዋስ ኦለታና መላ ህንተና ዞራሸ ፃፋናይስ ታዉ ኮሽያባ ግድስ።
JUD 1:4 ኤንታ ፕርዳይ በንፐ ፃፈትድ ኡትዳ፥ እስ እስ አሳት ኦንካ ኤሮና ህንተ ግዶ ገልዶሶና። ኤንቲ ፆሳ ኤሮናይሳታ፥ ኑ ፆሳ አꬎ ኬሀተꬃ ላይማታናዉ ጎኤትያ ኦገ ኦꬅድ ኤኮሶና። ባ ፃላላ ካዎ ግድዳ፥ ኑ ጎዳ የሱስ ክርስቶሳ ካዶሶና።
JUD 1:5 ሽን ህንተ ሀ ኡባ ኤርያባ ግድኮካ፥ ጎዳይ እስራኤለ አሳ ግብፀ ቢታፈ ዋት ከስዳኮ፥ ቃስ ጉየፐ አማኖናይሳታ ꬋይስዳይሳ ታ ህንተና አኬክሳናዉ ኮያይስ።
JUD 1:6 ባንታ ደእያሱዋ አግድ፥ ባንታዉ እመትዳ ማታ ናግቦና ኪታንቾታ፥ ግታ ፕርዳ ጋላሳይ ጋካናዉ ፆሳይ ኤንታ ꬉማፐ ጋርሳን መርና ሳንꬃላታን ቃች ዎꬅስ።
JUD 1:7 ሄሳዳ፥ ሶዶመነ ጋሞራ አሳይነ ኤንታ ማታን ደእያ ካታማታን ደእያ አሳይ ላይማትዶሶና፤ ላይማተꬃራ ጋሄትያ ቱናተꬅ ኦꬅዶሶና። ኤንቲ መርና ታማን ፕርደታናይሳታስ ሌምሶ ግድዶሶና።
JUD 1:8 ሄሳዳካ፥ ሀ አሙሀንቾት ባንታ አሳተꬃ ቱንሶሶና፤ ማታ አዋታ ካꬎኦሶና፤ ሳሎ መተꬃታ ጫዮሶና።
JUD 1:9 ሽን ኪታንቾታ ሀላቃይ ምካኤል ሙሰ አሃስ ፃላሄራ ፓላምዳ ዎደ፥ “ጎዳይ ነና ሴሮ” ያግስፐ አትሽን፥ እያ ቦላ ጫሻ ቃላ ኦድድ ሞታናዉ ኮይቤና።
JUD 1:10 ሽን ሀ አሳት ባንታዉ ኤሮናባ ኡባ ጫዮሶና፤ ቃስ ኤንቲ ዎዛን ባይና መሄዳ መꬎን ኤርያ ኤራይ፥ እ ኤንታና ꬋይሳና።
JUD 1:11 ኤንታና አየ! ኤንቲ ቃየላ ኦግያን ብዶሶና። ሚሸ ኮይድ ባላማ ባላን ኩንድዶሶና። ቆረ ጌተትያ አደይ ፆሳ ቦላ ደንድዳይሳዳ ኤንቲ ፆሳ ቦላ ደንድድ ꬋይዶሶና።
JUD 1:12 ሀ አሳት፥ ህንተ ሲቆ ግብራ ምያ በሳን ህንተራ ኡትያ ዎደ ዬል ባይና ካዉሻታ። ኤንቲ ባንታና ፃላላ ሄመይሳታ። ኤንቲ ጫርኮይ ኤፍያ እር ባይና ሻራ መላ። ቃስ አይፈ ዎደን አይፈ አይፎና፥ ፃጶራ ሾደትድ፥ ናምኡ ቶሆ መልዳ ምꬃ መላ።
JUD 1:13 ኤንቲ ሀንቀትዳ አባ ዙልያ መላ ባንታ ፖኩዋ ጎፖንተይሳታ። ኤንቲ መርናዉ ሳካና ꬉማይ ናግያ ቶይላትያ ፆልንቶታ።
JUD 1:14 አዳመፐ ዶምድ፥ ላፑንꬃ የለታ ግድዳ ሄኖከይ፥ ሀ አሳታባ ትንብተ ኦድሸ፥ “ሄኮ፥ ጎዳይ፥ ባ ዳሮ ሙኩሉ ጌሻታራ ያና።
JUD 1:15 አሳ ኡባ ፕርዳና፤ ጌላታ ኡባ ኤንቲ ኦꬅዳ ኢታ ኦሶ ኡባ ግሾነ ማካላተꬃን ኤንቲ ፆሳ ቦላ ኦደትዳ ኢታ ኦዳ ኡባ ግሾ ፕርዳና” ያግስ።
JUD 1:16 ሄ አሳት ኡባ ዎደ ዙዙመይሳታነ ኦዳ ኮየይሳታ። ቃስ ባንታ ኢታ አሙዋ ካሎሶና፤ ባንታናን ጬቆሶናነ ባንታና ጎእያባ ደማናዉ ሀራታ ሳቦሶና።
JUD 1:17 ሽን ታ እሻቶ፥ ኑ ጎዳ የሱስ ክርስቶሳ ሀዋረት ካሰ ህንተዉ ኦድዳ ቃላ አኬክተ።
JUD 1:18 ኤንቲ፥ “ዉርሰꬃ ዎድያን፥ ባንታ አሙዋ ካልድ ቶቸይሳት ያና” ያግዶሶና።
JUD 1:19 ሄ አሳት አሳ ግዶን ሻሄተꬅ መይሳታ፥ ባንታ አሾ አሙዋስ ሃረተይሳታነ ጌሻ አያናይ ባይናይሳታ።
JUD 1:20 ሽን ታ እሻቶ፥ ጌሽ ግድዳ ህንተ አማኑዋን ህንተና ድቻናዉ ምንተ፤ ቃስ ጌሻ አያና ዎልቃን ዎስተ።
JUD 1:21 ህንተና መርና ደኡዋኮ ጋꬅያ ኑ ጎዳ የሱስ ክርስቶሳ ማሮተꬃ ናግሸ ህንተና ፆሳ ሲቁዋን ናግተ።
JUD 1:22 ስይ ደእያ አሳስ ቃትተ።
JUD 1:23 እስ እስ አሳታ ታማፐ ከስ ኤክተ። ቃስ ኢታ አሞን ቱንዳ ኤንታ ማኡዋ እፅሸ ሀራታስ ያሻን ቃትተ።
JUD 1:24 ህንተ ኩንዶና መላ ናጋናዉ ቦረይ ባይናይሳታነ ግታ ኡፋይሳን ኩምዳይሳታ ኦꬅድ ባ ቦንቹዋ ስንꬃን ህንተና ሺሻናዉ ዳንዳእያ፥
JUD 1:25 ኑና አሽያ እስ ፆሳስ፥ ኑ ጎዳ የሱስ ክርስቶሳ ባጋራ ቦንቾይ፥ ግታተꬅ፥ ዎልቅነ ማት፥ ካሰካ፥ ሀእካ፥ መርናዉካ እያዉ ግዶ። አምንእ።
REV 1:1 ኤሶን ሀናናዉ ደእያባ ባ አይለታ በሳና መላ ፆሳይ እያዉ እምዳ የሱስ ክርስቶሳ ቆንጨꬃይ ሀይሳ። የሱሲ ባ ኪታንቹዋ ኪትድ፥ ባ አይልያ ዮሃንሳስ ቆንጭስስ።
REV 1:2 ዮሃንስ ፆሳ ኪታ፥ የሱስ ክርስቶሲ ኦꬅዳባነ ኦድዳባ ኡባ ማርካትስ።
REV 1:3 ሀ ኡባይ ሀናናዉ ዎደይ ማትዳ ግሾ፥ ሀ ትንብተ ቃላ ናባብያ ኦንካ አንጀትዳይሳ፤ ቃስ ሀ ቃላ ስኤይሳትነ ፃፈትዳ ኪታ ናግያ ኡባይ አንጀትዳይሳታ።
REV 1:4 ሀ ዳብዳበይ፥ ዮሃንሳፐ፥ ኢሰ ቢታን ደእያ ላፑን ዎሳ ኬꬃታስ ፃፈትስ። ካሰካ፥ ሀእካ ደእያ፥ ስንꬃፈካ ያናዉ ደእያ ፆሳፈ፥ ቃስ እያ አራታ ስንꬃን ደእያ ላፑን አያናታፐ፥ ሄሳዳካ፥ ሀይቆፐ ደንዶን ኮይሮ ግድዳይሳፈ፥ ሳኣ ካዎታ ሃርያ አማነትያ ማርካ ግድዳ የሱስ ክርስቶሳፐ፥ አꬎ ኬሀተꬃይነ ሳሮተꬃይ ህንተዉ ግዶ። የሱሲ ኑና ሲቄስ፥ ቃስ ባ ሱꬃን ናጋራ አይለተꬃፈ ኑና ላአ ከስስ።
REV 1:6 ኑኒ ፆሳ እያ አዋስ ኦꬃና መላ ኑና ካዎተꬃ ካህነ ኦꬅስ። እያዉ መርናፐ መርና ጋካናዉ ቦንቾይነ ዎልቃይ ግዶ። አምንእ።
REV 1:7 ሄኮ፥ የሱሲ ሻራራ ዬስ። አሳ ኡባይ ሀር አቶሽን፥ እያ ጫድዳ አሳይካ እያ በአና። ሳአን ደእያ አሳ ኡባይ እያ ግሾ ዬካና። ሄስ ቱማ ሀናና! አምንእ።
REV 1:8 “ካሰካ፥ ሀእካ ደኤይስ፥ ስንꬃፈካ ያና ጎዳይ፥ ኡባፈ ዎልቃማ ፆሳይ፥ አልፋነ ኦመግ ታና” ያጌስ ጎዳ ፆሳይ።
REV 1:9 ታኒ፥ ዮሃንስ፥ ህንተ እሻይ፥ ህንተራ እስፈ የሱሳን ዋይያ፥ እያ ካዎተꬃነ እያ ዳንዳኣ በአስ። ታኒ ፆሳ ቃላ ግሾነ የሱሳባ ማርካትዳ ግሾ፥ ዩሾይ አባን ተቀትዳ ቢታን፥ ፓፅሞን ደአይስ።
REV 1:10 ጎዳ ጋላሳን ታ ጌሻ አያናን ሃረታዳ ደአይስ፤ ታፐ ጉየራ ሞይዘ ፑኖ መላ ግታ ግርስ ስአስ።
REV 1:11 ሄ ግርሳይ ታና፥ “ነ በኤይሳ ማፃፋን ፃፋዳ፥ ኢሰን ደእያ ላፑን ዎሳ ኬꬃታስ:- ኤፈሶና፥ ሳምርኔሳ፥ ጳርጋሞና፥ ትያትሮና፥ ሳርዴሳ፥ ፍላደልፍያነ ሎዶቀ የዳ” ያግስ።
REV 1:12 ታኒ ታዉ ኦድያ ግርሳ በአናዉ ጉየ ስማዳ ፆምፐ ዎꬅያ ላፑን ዎርቃ ኮጫታ በአስ።
REV 1:13 ሄ ኮጫታ ግዶን አሳ ናአ ዳነይሳ በአስ። እ አዱሳ አፍላ ባ ቶሁዋ ጋꬅ ማእስ፥ ዎርቃ ዳንጮን ባ ትራ ዳንጭስ።
REV 1:14 እያ ሁጰይነ እያ ብናናይ ቦꬃ ዶርሳ እክሰ መላ ዎይኮ ሻቻ መላ ቦꬅ፤ እያ አይፈይ ታማ ላጮ ዳኔስ።
REV 1:15 እያ ቶሆይ ታማን ሴርድ ዞእዳ ናሰ ብራታ ዳኔስ፤ እያ ግርሳይካ ግታ ሻፋ ኮሽንቻ መላ።
REV 1:16 እ ባ ኡሻቻ ኩሸን ላፑን ፆልንቶታ ኦይክስ። እያ ዶናፐ ናምኡ ባጋራ ቃራትዳ ማሻይ ከዬስ። እያ ሶምኦይ ሴታ ጋላሳ አዋ አይፈ ዳኔስ።
REV 1:17 ታኒ እያ በእዳ ዎደ ሀይቅዳ አሳዳ ሀናዳ እያ ቶሁዋ ማታን ኩንዳስ። እ ባ ኡሻቻ ኩሽያ ታ ቦላ ዎꬅድ፥ “ያዮፋ፤ ኮይሮይነ ዉርሰꬃይ ታና።
REV 1:18 ታኒ ደኦን ደአይስ፤ ታኒ ሀይቃስ፥ ሽን ሄኮ መር መርናዉካ ደኦን ደአይስ። ሀይቆነ ስኦለ ቁልፐይ ታ ኩሸና።
REV 1:19 ህዛ፥ ሀእ ሀንያባነ ስንꬃፈ ሀናናባ ነ በእዳባ ፃፋ።
REV 1:20 ኔኒ ታ ኡሻቻ ኩሸን በእዳ ላፑን ፆልንቶታነ ላፑን ዎርቃ ኮጫታ ብርሸꬃይ ሀይሳ፦ ላፑን ፆልንቶት ላፑን ዎሳ ኬꬃታ ኪታንቾታ፤ ላፑን ዎርቃ ኮጫት ላፑን ዎሳ ኬꬃታ።”
REV 2:1 “ኤፈሶና ዎሳ ኬꬃ ኪታንቹዋስ ሀይሳዳ ያጋዳ ፃፋ። ባ ኡሻቻ ኩሸን ላፑን ፆልንቶታ ኦይክዳይስነ ላፑን ዎርቃ ኮጫታ ግዶራ ሄመተይስ ሀይሳዳ ያጌስ፦
REV 2:2 ታኒ ነ ኦሱዋ፥ ነ ዳቡራነ ነ ገንጫ ኤራይስ። ኔኒ ኢታ አሳታባ ገንጫናዉ ዳንዳአቦናይሳ ኤራይስ። ቃስ ሀዋረ ግዶናሽን ባንታና፥ ሀዋረ ገይሳታ ፕልጋ ኤራዳ ኤንቲ ዎርዳንቾ ግደይሳ ደምዳይሳ ታ ኤራይስ።
REV 2:3 ኔኒ ገንጫዳሳ፤ ታ ሱንꬃ ግሾ መቶ ዳንዳአዳሳ፤ ፆነታባካ።
REV 2:4 ግዶሽን፥ ሀእ ታ ነና ቦርያባይ ደኤስ፤ ሄስካ ኔኒ፥ ነ ኮይሮ ሲቁዋ አጋዳሳ።
REV 2:5 ህዛ፥ ነ አይ መላ ꬎቃ በሳፈ ኩንድዳኮ አኬካ! ነ ናጋራፐ ስማ፤ ኔኒ ካሰ ኦꬅያ ኦሱዋ ኦꬃ። ኔኒ ነ ናጋራፐ ስሞና እፅኮ፥ ነ ፆምፐ ዎꬅያ ኮጫ እያ በሳፈ ኤካና።
REV 2:6 ሀእ ታ ነና ናሽያ እስባይ ደኤስ፤ ታ እፅያ ንቆላዌታ ኦሱዋ ነካ እፃዳሳ።
REV 2:7 ጌሻ አያናይ ዎሳ ኬꬃታስ ግያባ ስአናዉ ሀይꬅ ደእያ ኦንካ ስኦ። ፆንያ ኦንካ ፆሳ ጋናትያን ደእያ ደኦ ምꬄ አይፈፐ ማና መላ ማታ እማና።”
REV 2:8 ሳምርኔሳ ዎሳ ኬꬃ ኪታንቹዋስ ሀይሳዳ ያጋዳ ፃፋ። “ኮይሮይነ ዉርሰꬃይ፥ ሀይቅዳይስነ ሀይቆፐ ደንድዳይስ ሀይሳዳ ያጌስ፦
REV 2:9 ታኒ ነ ዋያነ ነ ማንቆተꬃ ኤራይስ፤ ግዶሽን ኔኒ ዱረ። አይሁደ ግዶናሽን ባንታና አይሁደ ገይሳት ጫይያ ጫሻ ታ ኤራይስ፥ ሽን ኤንቲ ፃላሄ ማባራን ደኦሶና።
REV 2:10 ኔኒ ኤካናዉ ደእያ ዋይያ ባቦፋ። ፃላሄይ ህንተፈ እሶታ እሶታ ፓጫናዉ ቃሾ ኬꬃን የጋና፤ ታሙ ጋላስ ጋካናዉ ህንተ ዋየታና። ሀይቃና ጋካናዉ አማነትዳይሳ ግዳ፤ ታ ነዉ ደኦ ካላቻ እማና።”
REV 2:11 “ጌሻ አያናይ ዎሳ ኬꬃታስ ግያባ ስአናዉ ሀይꬅ ደእያ ኦንካ ስኦ። ፆንያ ኦንካ ናምአንꬆ ሀይቁዋን ቆሄተና።”
REV 2:12 “ጳርጋሞና ዎሳ ኬꬃ ኪታንቹዋስ ሀይሳዳ ያጋዳ ፃፋ። ናምኡ ባጋራ ቃራትዳ ማሻይ ደኤይስ ሀይሳዳ ያጌስ፦
REV 2:13 ታኒ ነ ደእያ በሳ ኤራይስ፤ ኔኒ ፃላሄ አራታይ ደእያ በሳን ደኣሳ፤ ታ ሱንꬃ ምንꬃ ናጋዳሳ። ሀር አቶሽን፥ ፃላሄይ ደእያ ህንተ ካታማን ሀይቅዳ ታ አማነትዳ ማርካይ፥ አንትጳስ፥ ደእያ ዎደካ አማኑዋ አጋባካ።
REV 2:14 ግዶሽን፥ ታ ነና ቦርያ ጉꬃባት ደኦሶና። ሄስካ እስራኤለ አሳይ ኤቃስ ያርሸትዳ ካꬃ ምድ ቱናና መላነ ላይማተꬃ ናጋራ ኦꬃና መላ ባላቃ ታማርስዳ ባላማ ትምርትያ ኤክዳ እስ እስ አሳት ኔራ ደኦሶና።
REV 2:15 ሄሳዳካ፥ ንቆላዌታ ትምርትያ ታማርያ አሳት ኔራ ደኦሶና።
REV 2:16 ሄሳ ግሾ፥ ኔኒ ነ ናጋራፐ ስማ። ሄስ ሀኖና እፅኮ፥ ታ ኔኮ ኤለሳ ያዳ ሄ አሳታ ታ ዶናፐ ከይያ ማሻን ኦላና።”
REV 2:17 ጌሻ አያናይ ዎሳ ኬꬃታስ ግያባ ስአናዉ ሀይꬅ ደእያ ኦንካ ስኦ። ፆንያ ኦደስካ ቆሰትድ ደእያ ማናፈ እማና። ቃስ ኤክያ ኡራፐ አትሽን፥ ሀራ አስ ኤሮና ኦራꬃ ሱንꬃይ ፃፈትዳ ቦꬃ ሹቹ ታኒ እያዉ እማና።
REV 2:18 “ትያትሮና ዎሳ ኬꬃ ኪታንቹዋስ ሀይሳዳ ያጋዳ ፃፋ። ታማ ላጮ ዳንያ አይፈይ ደኤይስ፥ ቃስ ታማን ሴርዳ ናሰ ብራታ ዳንያ ቶሆይ ደኤይስ፥ ፆሳ ናአይ፥ ሀይሳዳ ያጌስ፦
REV 2:19 ታኒ ነ ኦሱዋ፥ ነ ሲቁዋ፥ ነ አማኑዋ፥ ነ ኦሱዋነ ነ ገንጫ ኤራይስ። ኔኒ ኮይሮ ኦይሳፈ ሀእ አꬃዳ ኦይሳካ ኤራይስ።
REV 2:20 ግዶሽን፥ ታ ነና ቦርያ እስባይ ደኤስ፤ ባና ናበ ግያ ማጫስዉ፥ ኤልዛቤሎ፥ አይኮካ ጋባካ። ሄ ማጫስያ ኤቃስ ያርሸትዳ ካꬃ ምድ ቱናናዳነ ላይማታናዳ ኦꬃዳ ታ አይለታ ባለꬃሱ።
REV 2:21 እያ ባ ናጋራፐ ስማና መላ ታ እዉ ዎደ እማስ፥ ሽን እያ ስማናዉ ኮያቡኩ።
REV 2:22 ኤንቲ እ ባላ ኦግያፐ ስሞና እፅኮ፥ ታ እዮ ኢታ ሀርገን የጋና፤ ኢራ ላይማተይሳትካ ኢታ ዋየ ዋየታና።
REV 2:23 ታኒ እ ናይታ ዎꬋና፤ ቃስ ዎሳ ኬꬃ ኡባይ ታ አሳ ቆፋነ አሳ ዎዛና ኤረይሳ ግደይሳ ኤራና። ታ እሱዋስ እሱዋስ ህንተ ኦሱዋዳ ኦሱዋዳ እማና።”
REV 2:24 ሽን ትያትሮናን ደእያ ሀራታ፥ ሄ ኢታ ትምርትያ ኤክቦናይሳታነ፥ “ፃላሄ ግታ ፁራ” ጌተትያ ሀ ትምርትያ ታማርቦና ህንተና ሀራ ዴፆ ቶሆ ቶስከ።
REV 2:25 ግዶሽን፥ ታ ያና ጋካናዉ ህንተዉ ደእያባ ምንꬅ ናግተ።
REV 2:26 ፆነይሳስነ ዉርሰꬅ ጋካናዉ ታዉ ኪተትያ ኦደስካ ካዎተꬃታ ሃራና መላ ማታ እማና።
REV 2:27 “እ ኤንታ ብራታ ፃምአን ሃራና፤ መቃ ሚሸዳካ መንረꬃና።” ሄ ማታይ ታኒ ታ አዋፐ ኤክዳ ማታ መላ።
REV 2:28 ቃስ ታ እያዉ ባካላ ፆልንቶ እማና።
REV 2:29 ጌሻ አያናይ ዎሳ ኬꬃታስ ግያባ ስእያ ሀይꬅ ደእያ ኦንካ ስኦ።
REV 3:1 “ሳርዴሳ ዎሳ ኬꬃ ኪታንቹዋስ ሀይሳዳ ያጋዳ ፃፋ። ላፑን ፆሳ አያናታነ ላፑን ፆልንቶታ ኦይክዳይስ ሀይሳዳ ያጌስ፦ ታኒ ነ ኦሱዋ ኤራይስ፤ አስ ነና ፓፃ ደኤስ ጊኮካ፥ ነ ሀይቃዳሳ።
REV 3:2 ባርካ፤ አትዳ ጉꬃባነ ሀይቃናዉ ማትዳባ ምንꬃ። ነ ኦሶይ ፆሳ ስንꬃን ፖሎ ግዶናይሳ ደማስ።
REV 3:3 ህዛ፥ ነ ኤክዳባነ ስእዳባ አኬካ፤ ናጋ፤ ነ ናጋራፐ ስማ። ኔኒ ባርኮና እፅኮ ታ ካይሶዳ ያና፤ ታ አይ ዎደ ያነኮ ነ ኤራካ።
REV 3:4 ሽን ባንታ ማኡዋ ቅታዮና ጉꬃ አሳት ሳርዴሳን ደኦሶና። ኤንታዉ በሲያባ ግድያ ግሾ ቦꬃ ማኦ ማእድ ኤንቲ ታራ ሄመታና።
REV 3:5 ፆንያ ኦንካ ኤንታይሳዳ ቦꬃ ማኦ ማአና። ታኒ እያ ሱንꬃ ደኦ ማፃፋፐ ቁችከ። ታኒ ታ አዋ ስንꬃንነ እያ ኪታንቾታ ስንꬃን እ ታባ ግደይሳ ማርካታና።
REV 3:6 ጌሻ አያናይ ዎሳ ኬꬃታስ ግያባ ስእያ ሀይꬅ ደእያ ኦንካ ስኦ።
REV 3:7 “ፍላደልፍያ ዎሳ ኬꬃ ኪታንቹዋስ ሀይሳዳ ያጋዳ ፃፋ። ጌሻይነ ቱማንቾይ፥ ዳዊታ ቁልፕያ ባ ኩሸን ኦይክዳይስ፥ ሀይሳዳ ያጌስ፦ እ ጎርድን ኦንካ ዶያናዉ ዳንዳኤና፤ ቃስ እ ዶይን ኦንካ ጎርዳናዉ ዳንዳኤና።
REV 3:8 ታኒ ነ ኦሱዋ ኤራስ፤ ሄኮ ታ ነ ስንꬃን ኦንካ ጎርዳናዉ ዳንዳኦና ዶያ ፐንገ ዎꬃስ። ነ ዎልቃይ ጉꬃ ግድኮካ፥ ታ ቃላ ናጋዳሳ፤ ታና ካዳባካ።
REV 3:9 አይሁደ ግዶናሽን፥ ባንታና አይሁደ ግያ ዎርዶታነ ፃላሄ ባጋታ ኔኮ ኤሀናነ ነ ስንꬃን ጉልባትሳና። ታ ነና ዶሰይሳ ኤንታና ኤርሳና።
REV 3:10 ኔኒ፥ ‘ገንጫ’ ጋዳ ታ ኪትዳ ኪታ ናግዳ ግሾ፥ ኩመꬃ አላምያ ፓጫናዉ ያ ዋየ ዎድያፐ ታኒ ነና ናጋና።
REV 3:11 ታኒ ኤለሳዳ ያና፤ ኦንካ ነ ካላቻ ኤኮና መላ ነዉ ደእያባ ምንꬃዳ ኦይካ።
REV 3:12 ፆንዳይሳ ታ ፆሳ ኬꬃን ቱሱ ኦꬃና፤ እ ያን መርናዉ ዳና። ታኒ ታ ፆሳ ሱንꬃነ ታ ፆሳ ካታማ ሱንꬃ እያ ቦላ ፃፋና፤ እያካ ታ ፆሳ ማታፐ ዎꬍያ ኦራꬃ የሩሳላመ። ቃስ ታኒ ታ ኦራꬃ ሱንꬃካ እ ቦላ ፃፋና።
REV 3:13 ጌሻ አያናይ ዎሳ ኬꬃታስ ግያባ ስእያ ሀይꬅ ደእያ ኦንካ ስኦ።
REV 3:14 “ሎዶቀ ዎሳ ኬꬃ ኪታንቹዋስ ሀይሳዳ ያጋዳ ፃፋ። አምንእ ግድዳ አማነትዳ ቱማ ማርካይ፥ ፆሳ መተꬃ ሃረይስ ሀይሳዳ ያጌስ፦
REV 3:15 ታኒ ነ ኦሱዋ ኡባ ኤራይስ፤ ኔኒ እርፃ ዎይኮ ምሻ ግዳካ፤ ኔኒ ናምኣፈ እሱዋ ግድኮ ሎኦ!
REV 3:16 ኔኒ እርፃ ዎይኮ ምሻ ግዶናሽን፥ ቦልኦ ግድያ ግሾ ታ ነና ታ ዶናፐ ጩታና ሀናይስ።
REV 3:17 ህዛ፥ ኔኒ፥ ‘ታኒ ዱረ፥ ሻሎራ ደአይስ፥ ታዉ አይብባይካ ፓጭቤና’ ያጋሳ። ሽን ኔኒ መቶታንቾ፥ ማንቆ፥ ቆቀነ ካሎትዳ አስ ግደይሳ ኤራካ።
REV 3:18 ሄሳ ግሾ፥ ነ ዱረታናዉ ታማን ጌይዳ ዎርቃ፥ ነ ዬላ ካሉዋ ካማናዉ ቦꬃ ማኦነ ሎይꬃ ፄላናዉ ዳንዳእስያ አይፈ ꬋለ ታፐ ሻማና መላ ነና ታ ዞራይስ።
REV 3:19 ታ ዶሰይሳ ሴራይስነ ሀንቃይስ፤ ህዛ ምና፤ ነ ናጋራፐ ስማ።
REV 3:20 ሄኮ፥ ታ ካረን ኤቃዳ ፄጋይስ። ኦንካ ታ ፄሳ ስእድ፥ ዉላ ዶይኮ፥ እያኮ ገላና፤ እያራ እስፈ ካꬅ ማና፤ እካ ታራ እስፈ ማና።
REV 3:21 ታ ፆናዳ ታ አዋራ እያ አራታን ኡትዳይሳዳ ፆንዳይ ታራ ታ አራታን ኡታና መላ ማታ እማና።
REV 3:22 ጌሻ አያናይ ዎሳ ኬꬃታስ ግያባ ስእያ ሀይꬅ ደኤይ ኦንካ ስኦ” ያግስ።
REV 4:1 ሄሳፈ ጉየ፥ ታኒ ሳሎ ፄልያ ዎደ ዶየትዳ ፐንገ በአስ። ቃስ ታ ካሰ ስእዳ ሞይዘ ግርሳ መላይ ታኮ፥ “ሀ ከያ፤ ሀይሳፈ ጉየ፥ ሀናናዉ ደእያባ ታ ነና በሳና” ያግስ።
REV 4:2 ሄ ዎደ ታ አያናን ሃረታዳ ደአይስ። ሄኮ፥ ሳሉዋን አራታ ቦላ እሶይ ኡትዳይሳ በአስ።
REV 4:3 ሄ ኡትዳይሳ ማላይ ያስጰደነ ሳርድዮነ አልኦ ሹቻ መላ። እያ አራታ ዩሹዋን አልኦ ማርግደ ሹች ዳንያ ዙል ደኤስ።
REV 4:4 ሄ አራታ ዩሹዋን ላታማነ ኦይዱ አራታት ደኦሶና፤ ኤንታ ቦላ ቦꬃ ማኦ ማእድ፥ ሁጰን ዎርቃ ካላቻ ዎꬅዳ ላታማነ ኦይዱ ጭማት ኡትዶሶና።
REV 4:5 አራታፐ ዎልአንꬅ፥ ጉንꬅነ ደሾይ ከዬስ። አራታ ስንꬃን ላፑን ፖእያ ፆምፐት ደኦሶና፤ ኤንቲ ላፑን ፆሳ አያናታ።
REV 4:6 አራታ ስንꬃን ብርለ ዳንያ ጶልያ ቡርጩኮ አባይ ደኤስ። ስንꬃራነ ጉየራ አይፈይ ደእያ ኦይዱ ደኦራ ደእያ መተꬃት አራታ ዩሹዋንነ አራታ ግዶን ደኦሶና።
REV 4:7 ኮይሮ መተꬃ መꬎይ ጋሞ ዳኔስ፤ ናምአንꬆይ ቦር ዳኔስ፤ ሄꬓንꬆይ አሰ ዳኔስ፤ ቃስ ኦይዳንꬆይ ፕራꬍያ አርጋንꬅ ዳኔስ።
REV 4:8 ኦይዱ መተꬃታ ኡባስ ኡሱፑን ቀፈይ ደኤስ፤ ኤንታ አሳተꬃ ኡባይ አይፈን ኩምስ። ኤንቲ ቃማነ ጋላስ ቃንፆና፥ “ጌሻዉ፥ ጌሻዉ፥ ጌሻዉ፥ ጎዳዉ፥ ኡባፈ ዎልቃማ ፆሳዉ፥ ካሰካ፥ ሀእካ ደኤይሶ፥ ስንꬃፈ ያናይሶ” ያጎሶና።
REV 4:9 ሄ መተꬃት አራታን ኡትዳይሳስነ መርናዉ ደኤይሳስ ሳባ፥ ቦንቾነ ጋላታ እምዳ ዎደ፥
REV 4:10 ላታማነ ኦይዱ ጭማት አራታን ኡትዳይሳነ መርናዉ ደኤይሳ ስንꬃን ጉፋንድ ጎይንዶሶና፤ ባንታ ካላቻ አራታ ስንꬃን ዎꬅድ፥
REV 4:11 “ኑ ጎዳዉ፥ ኑ ፆሳዉ፥ ኔኒ ቦንቾ፥ ሳባነ ዎልቃ ኤካናዉ በሳሳ። ኔኒ ኡባ መꬋዳሳ፤ ኡባባይ ነ ሸንያዳ ሀንስ፥ መትስ” ያግዶሶና።
REV 5:1 ሄሳፈ ጉየ፥ አራታ ቦላ ኡትዳይሳ ኡሻቻ ኩሸን ግዶራነ ካረራ ፃፈትዳ ላፑን ማታመን ጎርደትዳ ፃꬃ ማፃፋ በአስ።
REV 5:2 እስ ምኖ ኪታንቾይ ባ ቃላ ꬎቁ ኦꬅድ፥ “ማታምያ ብላናዉነ ማፃፋ ዶያናዉ በሰይ ኦኔ?” ያግድ አዋጅሽን በአስ።
REV 5:3 ሽን ሳሎን ግድን ሳአን ዎይኮ ሳአፐ ጋርሳን ግድን ሄ ፃꬃ ማፃፋ ብላናዉነ ግዱዋ በአናዉ ዳንዳኤይ ኦንካ በንትቤና።
REV 5:4 ፃꬃ ማፃፋ ብላናዉነ እያ ግዱዋ በአናዉ በሲያ አስ ꬋይዳ ግሾ ታ ዳሮ ዬካስ።
REV 5:5 ያትን፥ ጭማታፐ እሶይ ታኮ፥ “ዬኮፋ! ሄኮ፥ ይሁዳ ኮቸ ግድያ ጋሞይ፥ ዳዊታ ሼሻይ፥ ላፑን ማታመታ ብላናዉነ ማፃፋ ዶያናዉ ዳንዳእስ” ያግስ።
REV 5:6 ሄሳፈ ጉየ፥ ሹከትዳ ዶርሳይ አራታስ፥ ኦይዱ ደኦን ደእያ መተꬃታስነ ጭማታስ ግዶን፥ ኤቅዳይሳ በአስ። እያዉ ላፑን ካጨትነ ላፑን አይፈት ደኦሶና። ሄሳት ሳአ ኡባ ኪተትዳ ፆሳ ላፑን አያናታ።
REV 5:7 ሄ ዶርሳይ ብድ፥ አራታ ቦላ ኡትዳይሳ ኡሻቻ ኩሸፐ ፃꬃ ማፃፋ ኤክስ።
REV 5:8 እ ሄ ፃꬃ ማፃፋ ኤክዳ ዎደ፥ ደኦን ደእያ ኦይዱ መተꬃትነ ላታማነ ኦይዱ ጭማት ዶርሳ ስንꬃን ኩንድዶሶና። ኤንቲ እሶይ እሶይ ዲꬅነ ጌሻታ ዎሳ ግድዳ እፃነይ ኩምዳ ዎርቃ ሻተ ኦይክዶሶና።
REV 5:9 ኤንቲ፥ “ፃꬃ ማፃፋ ኤካናዉ፥ ማታመታ ብላናዉ ነዉ በሴስ። አይስ ጊኮ፥ ኔኒ ሹከታዳሳ፤ ኮቸ ኡባፈ፥ ዱማ ዱማ ዶናፐ፥ ያራታፐነ ካዎተꬃታ ኡባፈ ነ ሱꬃን ፆሳስ ዎዛዳሳ።
REV 5:10 ኤንቲ እያ ፆሳ አዋስ ኦꬃና መላ ኤንታና ካህነ ካዎተꬅ ኦꬃዳሳ። ኤንትካ ቢታ ኡባ ሃራና” ያግድ ኦራꬃ ማዝሙረ የፅዶሶና።
REV 5:11 ታ በእያ ዎደ ሙኩሉ ቶሆ ሙኩሉነ ታሙ ሙኩሉ ቶሆ ታሙ ሙኩሉ ግድያ ኪታንቾታ ግርሳ ስአስ። ኤንትካ አራታ፥ ኦይዱ ደኦን ደእያ መተꬃታነ፥ ጭማታ ዩሹዋን ኤቅዶሶና።
REV 5:12 ሄ ኪታንቾት ꬎቁ ግዳ ቃላን፥ “ሹከትዳ ዶርሳይ ዎልቃ፥ ዱረተꬅ፥ ጭንጫተꬅነ ምኖተꬅ፥ ቦንቾ፥ ሳባነ ጋላታ ኤካናዉ በሴስ” ያግዶሶና።
REV 5:13 ሄሳፈ ጉየ፥ ሳአን፥ ሳሎን፥ ሳአፐ ጋርሳንነ አባ ግዶን ደእያ መተꬅ ኡባይ፥ “አራታ ቦላ ኡትዳይሳስነ ዶርሳስ፥ ጋላታይ፥ ቦንቾይ፥ ሳብነ ዎልቅ፥ መር መርናዉ ግዶ” ያግድ የፅሽን ስአስ።
REV 5:14 ኦይዱ ደኦን ደእያ መተꬃት፥ “አምንእ” ያግዶሶና፤ ቃስ ጭማት ጉፋንድ ጎይንዶሶና።
REV 6:1 ዶርሳይ ላፑን ማታመታፐ እሱዋ ዶይሽን በአስ። ቃስ ኦይዱ ደኦን ደእያ መተꬃታፐ እሶይ፥ ዳዳ ደሾ ዳንያ ግርሳን፥ “ሃያ!” ያግሽን ስአስ።
REV 6:2 ሄኮ ቦꬃ ፓራ በአስ። ሄ ፓራ ቶግዳይስ ዶንገ ኦይክስ፤ እያ ሁጰን ካላች ደኤስ። እካ ፆንሸ ፆናናዉ ከይስ።
REV 6:3 ቃስ ዶርሳይ ናምአንꬆ ማታምያ ዶይዳ ዎደ ደኦን ደእያ ናምአንꬆ መተꬃይ፥ “ሃያ!” ያግሽን ስአስ።
REV 6:4 ቃስ ሀራ ስሀ ዞኦ ፓር ከይስ። ሄ ፓራ ቶግዳይሳስ ሳአፐ ሳሮ ꬋይሳና መላነ አሳይ ዎል ዉርሳና መላ ማትነ ግታ ማሻይ እመትስ።
REV 6:5 ዶርሳይ ሄꬓንꬆ ማታምያ ዶይዳ ዎደ ደኦን ደእያ ሄꬓንꬆ መተꬃይ፥ “ሃያ!” ያግሽን ስአስ። ሄኮ ካሬꬃ ፓራ በአስ፤ እካ ባ ኩሸን ምዛነ ኦይክስ።
REV 6:6 ኦይዱ ደኦን ደእያ መተꬃታ ግዶፈ፥ “እስ ጋላሳ ኦሶስ ዳሞዘ፥ ባጋ ክሎ ግስተ፤ ቃስ እስ ጋላሳ ኦሶስ ዳሞዘ፥ እስ ክሎነ ባጋ ባንጋ ግዶ። ሽን ዛይትያነ ዎይንያ ቆሆፓ” ያግሽን ስአስ።
REV 6:7 ዶርሳይ ኦይዳንꬆ ማታምያ ዶይዳ ዎደ ኦይዳንꬆ ደኦን ደእያ መተꬃይ፥ “ሃያ!” ያግሽን ስአስ።
REV 6:8 ሄኮ ዋንጮ ፓራ በአስ። ሄ ፓራ ቶግዳይሳ ሱንꬃይ ሀይቆ፤ እያ ጌዶ ስኦለይ ካሌስ። ኤንታዉ አላመፐ ኦይዳንꬆ ኩሽያ ኦላን፥ ኮሻን፥ ጋዶንነ ዶአን ዎꬍሳና መላ ማት እመትስ።
REV 6:9 ዶርሳይ እቻሻንꬆ ማታምያ ዶይዳ ዎደ ኤንቲ ፆሳ ቃላ ኦድዳ ግሾነ ባንታ ማርካተꬃን አማነትዳ ግሾ ሹከትዳ አሳ ሸምፖታ ያርሾ በሳፈ ጋርሳን በአስ።
REV 6:10 ኤንቲ ባንታ ቃላ ꬎቁ ኦꬅድ፥ “ኡባ ሃርያ ጎዳዉ፥ ጌሻዉ፥ ቱማንቹዋዉ፥ ሳአን ደእያ አሳ ቦላ ነ ፕርዳናይነ ኑ ሱꬃ ግሾ ሀሎ ከያናይ አዉዴ?” ያግዶሶና።
REV 6:11 ኤንታ እሱዋስ እሱዋስ ቦꬃ ማኦይ እመትስ። ኤንታይሳዳ ሀንድ ሀይቃናዉ በሲያ ኤንታ ላገታ ታይቦይ ኩማና ጋካናዉ ጉꬃ ዎደ ሸምፓና መላ ኤንታዉ ኦደትስ።
REV 6:12 ዶርሳይ ኡሱፑንꬆ ማታምያ ዶይዳ ዎደ ታ በአስ፤ ዎልቃማ ቢታ ቃፆይ ሀንስ። አዋ አይፈይ ካሬፅድ ካዮ ማኦ መላ ግድስ። አጌናይካ ዞእድ ሱꬁ ዳንስ።
REV 6:13 ዎልቃማ ጫርኮይ ጫርክድ ባላሰ ምꬃ ቃዉኤ አይፍያ ቆቆፈይሳዳ ሳሉዋ ፆልንቶት ሳአን ቆቆፈትዶሶና።
REV 6:14 ሳሎይ ፃꬃ ማፃፋዳ ፃፀትድ አꬍስ፤ ዙማይነ ዩሾይ አባን ተቀትዳ ቢታት ባንታ በሳፈ ꬋይዶሶና።
REV 6:15 ቢታ ካዎት፥ ደርያ ሃረይሳት፥ ኦላ ካለይሳት፥ ዱረት፥ ዎልቃማት፥ አይለትነ፥ ዎማኖት ጎንጎሎንነ ደረ ቦላ ደእያ ዛላ ሆምኦን ቆሰትዶሶና።
REV 6:16 ኤንትካ ዙማኮነ ዛላኮ፥ “ኑ ቦላ ዎꬍተ፤ ኑና ቆስተ፤ አራታን ኡትዳይሳ አይፍያፐነ ዶርሳ ሀንቁዋፈ ኑና ገንꬅተ።
REV 6:17 ህዛ፥ ግታ ሀንቆ ጋላሳይ ጋክስ፤ ዳንዳእድ ኤቃናይ ኦኔ?” ያግዶሶና።
REV 7:1 ሄሳፈ ጉየ፥ ኦይዱ ኪታንቾት ኦይዱ ሳኣ ጋፃን ኤቅዳይሳታ በአስ። ሄ ኪታንቾት ሳአ ቦላ ዎይኮ አባ ቦላ ዎይኮ አይ ምꬃ ቦላ ጫርኮይ ኦይዱ ሳኣ ጋፃፐ ጫርኮና መላ ተቅዶሶና።
REV 7:2 ቃስ ደኦ ፆሳ ማታምያ ኦይክዳ ሀራ ኪታንቾይ ዶሎሀ ባጋፈ ከየይሳ በአስ። ሄ ኪታንቾይ ባ ቃላ ꬎቁ ኦꬅድ፥ ሳኣነ አባ ቆሀናዉ ዎልቅ እመትዳ ኦይዱ ኪታንቾታ፥
REV 7:3 ፄግድ፥ “ኑኒ ፆሳ አይለታ ሶምኦን ማታምያ ዎꬃና ጋካናዉ ቢታ ዎይኮ አባ ዎይኮ ምꬃ ቆሆፕተ” ያግስ።
REV 7:4 ያትን፥ ታኒ ፆሳ ማታመይ ሶምኦን ዎሰትዳይሳታ ፓይዱዋ ስአስ። እስራኤለ ማይዛታ ኡባፈ 144,000 አሳስ ሶምኦን ማታመ ዎꬅስ።
REV 7:5 ይሁዳ ኮቻፈ ታማነ ናምኡ ሙኩሉ፥ ሮቤላ ኮቻፈ ታማነ ናምኡ ሙኩሉ፥ ጋደ ኮቻፈ ታማነ ናምኡ ሙኩሉ፥
REV 7:6 አሴራ ኮቻፈ ታማነ ናምኡ ሙኩሉ፥ ንፍታለመ ኮቻፈ ታማነ ናምኡ ሙኩሉ፥ ምናሰ ኮቻፈ ታማነ ናምኡ ሙኩሉ፥
REV 7:7 ስሞና ኮቻፈ ታማነ ናምኡ ሙኩሉ፤ ሌወ ኮቻፈ ታማነ ናምኡ ሙኩሉ፥ ይሳኮራ ኮቻፈ ታማነ ናምኡ ሙኩሉ፥
REV 7:8 ዛብሎና ኮቻፈ ታማነ ናምኡ ሙኩሉ፥ ዮሰፋ ኮቻፈ ታማነ ናምኡ ሙኩሉ፥ ብንያመ ኮቻፈ ታማነ ናምኡ ሙኩሉ፥ አሳ ሶምኦን ማታመ ዎꬅስ።
REV 7:9 ሄሳፈ ጉየ፥ ኮቸ ኡባፈ፥ ካዎተꬃ ኡባፈ፥ ያራ ኡባፈነ ዱማ ዱማ ዶናፐ ዛው ባይና ዳሮ አሳ በአስ። ሄ አሳይ ቦꬃ ማኦ ማእድ፥ ዛምባ ሀይꬅ ባንታ ኩሸን ኦይክድ፥ አራታ ስንꬃንነ ዶርሳ ስንꬃን ኤቅዶሶና።
REV 7:10 ኤንቲ ባንታ ቃላ ꬎቁ ኦꬅድ፥ “አቶተꬃይ አራታን ኡትዳ ኑ ፆሳፈነ ዶርሳፈ ዬስ” ያግዶሶና።
REV 7:11 ኪታንቾት ኡባይ አራታ፥ ጭማታነ ኦይዱ መተꬃታ ዩሹዋን ኤቅዶሶና። ኤንቲ አራታ ስንꬃን ጉፋንድ ፆሳ ጎይንዶሶና።
REV 7:12 “አምንእ! አንጆይ፥ ቦንቾይ፥ ጭንጫተꬅ፥ ጋላት፥ ሳብ ዎልቅ፥ ምኖተꬅ መር መርናዉ ኑ ፆሳስ ግዶ። አምንእ!” ያግዶሶና።
REV 7:13 ጭማታፐ እሶይ ታኮ፥ “ሀ ቦꬃ ማኡዋ ማእዳ አሳት ኦናንቴ? ኤንቲ አዉፐ ይዶና?” ያግድ ኦይችስ።
REV 7:14 ታኒ ዛራዳ፥ “ጎዳዉ፥ ነ ኤራሳ” ያጋስ። እካ ታኮ፥ “ሀይሳቲ ዳሮ ዋየ ዋይድ አꬍዳይሳታ። ኤንቲ ባንታ ማኡዋ ዶርሳ ሱꬃን ሜጭድ ጌሽዶሶና።
REV 7:15 ሄሳ ግሾ፥ ኤንቲ ፆሳ አራታ ስንꬃን ግድድ ቃማነ ጋላስ እያ ኬꬃን ኦꬆሶና፤ አራታ ቦላ ኡትዳይስ ኤንታዉ ኩያ ግዳና።
REV 7:16 ህዛፐ ጉየ፥ ኤንቲ ኮሻቶኮና፥ ሳሞቶኮና። አው ዎይኮ ምሽ ኤንታ ሜና።
REV 7:17 አራታ ግዶን ኡትዳ ዶርሳይ ኤንታ ሄማና። ደኦ ፑልቶ ሃꬃኮ ኤንታ ካለꬃና። ፆሳይ ኤንታ አይፈፐ አፉꬃ ኡባ ቁቻና” ያግስ።
REV 8:1 ዶርሳይ ላፑንꬃ ማታምያ ዶይዳ ዎደ ባጋ ሳተ ግደይሳ መላ ሳሎይ ስእ ግስ።
REV 8:2 ሄሳፈ ጉየ፥ ታኒ ላፑን ሞይዘት እመትዳ ላፑን ኪታንቾታ ፆሳ ስንꬃን ኤቅዳይሳታ በአስ።
REV 8:3 እፃነ ጩይስያ ዎርቃ ሻተ ኦይክዳ ሀራ ኪታንቾይ ይድ፥ ያርሾ በሳ ማታን ኤቅስ። እ አራታ ስንꬃን ደእያ ዎርቃ ያርሾ በሳ ቦላ ጌሻታ ኡባ ዎሳራ ጉጅድ ያርሻና መላ እያዉ ዳሮ እፃነይ እመትስ።
REV 8:4 እፃንያ ጩያይ ጌሻታ ዎሳራ እስፈ ኪታንቹዋ ኩሸፐ ፑደ ፆሳኮ ከይስ።
REV 8:5 ሄሳፈ ጉየ፥ ኪታንቾይ እፃነ ጩይስያ ሻትያ ኤክድ፥ እያን ያርሾ በሳፈ ቦንቆ ታማ ኩንꬅድ ሳአ ዱገ ሆልስ። ያትን ደሾይ፥ ዎልአንꬅ፥ ግርስነ ቢታ ቃፆይ ሀንስ።
REV 8:6 ሄሳፈ ጉየ፥ ላፑን ኪታንቾት ባንታ ሞይዝያ ፑናናዉ ጊገትዶሶና።
REV 8:7 ኮይሮ ኪታንቾይ ባ ሞይዝያ ፑንያ ዎደ ሻችነ ሱꬃራ ዋላከትዳ ታም ሳሎፐ ቡክስ። ሳኣፐ ስኮይ ፁገትስ፤ ምꬃፈ ስኮይ ፁገትስ፤ ጭልኦ ማታ ኡባይ ፁገትስ።
REV 8:8 ናምአንꬆ ኪታንቾይ ባ ሞይዝያ ፑንዳ ዎደ ዎልቃማ ዙማ ዳንያባይ ታማን ኤፅሸ አባን የገትስ። ያትን፥ አባፈ ስኮይ ሱꬁ ግድስ።
REV 8:9 አባን ደኦን ደእያ መተꬃፈ ስኮይ ሀይቅስ፤ ማርካበታፐ ስኮይ ꬋይስ።
REV 8:10 ሄꬓንꬆ ኪታንቾይ ባ ሞይዝያ ፑንዳ ዎደ ፆምፐዳ ኤፅያ ዎልቃማ ፆልንቶይ ሻፋፐ ስኩዋ ቦላነ ፑልቶታ ቦላ ሳሎፐ ዎꬍስ።
REV 8:11 ሄ ፆልንቱዋ ሱንꬃይ ጫሞ ጌተቴስ። ሃꬃፈ ስኩዋ ጫምስስ፤ ሃꬃይ ጫምዳ ግሾ፥ ዳሮ አሳይ ሄ ሃꬃ ኡይድ ሀይቅዶሶና።
REV 8:12 ኦይዳንꬆ ኪታንቾይ ባ ሞይዝያ ፑንስ። አዋፐ፥ አጌናፐነ ፆልንቶታፐ ስኩዋ ደችስ፤ ኤንታ ፖኡዋፐ ስኮይ ꬉምስ። ጋላሳፐ ስኮይ፥ ቃማፈካ ስኮይ ꬉምስ።
REV 8:13 እስ አርጋንꬅ ሳሎ ꬎቁ ግድ፥ ፕራꬍሽን በአስ። ሄ አርጋንꬃይ ባ ቃላ ꬎቁ ኦꬅድ፥ “አትዳ ሄꬑ ኪታንቾት ባንታ ሞይዝያ ፑናናዉ ደእያ ግሾ፥ ሳአን ደእያ አሳ አየ! አየ! አየ!” ያግሽን ስአስ።
REV 9:1 ሄሳፈ ጉየ፥ እቻሻንꬆ ኪታንቾይ ባ ሞይዝያ ፑንን ሳሎፐ ዱገ ሳአ ኩንድዳ ፆልንቶ በአስ። ሄ ፆልንቱዋስ ዎልቃማ ኦላ ቁልፐይ እመትስ።
REV 9:2 ፆልንቶይ ኦላ ዶይዳ ዎደ ዳልጋ ጮጨፐ ከይያ ጩያ መላ ጩያይ ሄ ኦላፈ ከይስ። ሄ ኦላፈ ከይዳ ጩያን አውነ ሳሎይ ꬉምዶሶና።
REV 9:3 ሄ ጩያፐ ቦለይ ከይድ ሳአን ዎꬍስ። ሳአን ደእያ ኮርነታስ ደእያ ዎልቃ መላ ዎልቃይ ቦለታስ እመትስ።
REV 9:4 ፆሳ ማታመይ ሶምኦን ባይና አሳ ፃላላፐ አትሽን፥ ሳአን ደእያ ማታ ዎይኮ ምꬅ ዎይኮ አይ ጭልኦባ ግድን ቆሆና መላ ቦለታስ ኦደትስ።
REV 9:5 ቦለት አሳ እቻሹ አጌና ጋካናዉ ፓፃ ካአና መላ ማት እመትስፐ አትሽን፥ አሳ ዎꬋና መላ ግደና። ኮርነይ አሰ ዱክን ዛመይሳ መላ ቦለይ ዱክድ ዛምሴስ።
REV 9:6 ሄ ጋላሳታን አሳይ ሀይቆ ኮያና፥ ሽን ደመና። ኤንቲ ሀይቃናዉ አሞታና፥ ሽን ሀይቆይ ኤንታፈ ሃካና።
REV 9:7 ቦለይ ኦላስ ጊግድ ኡትዳ ፓራ ዳኔስ። ቦልያ ሁጰን ዎርቃ ካላች ደኤስ፤ ኤንታ ሶምኦይካ አሳ ሶምኦ ዳኔስ።
REV 9:8 እያ ብናናይ ማጫሳ ብናና መላ አዱሰ። ኤንታ አቻይካ ጋሞ አች ዳኔስ።
REV 9:9 ኤንታዉ ትራ ቦላ ዎꬅያ ብራታ ፁሩረይ ደኤስ፤ ኤንታ ቀፍያ ግርሳይ ኦለታናዉ ጋላብያ ፓራነ ፓራ ጋርያ ግርሳ መላ።
REV 9:10 ኤንታዉ ኮርነ ጎይና ዳንያ ጎይንነ ዱክያ ዪሽ ደኤስ። ሄ ጎይናን እቻሹ አጌና አሳ ቆሀና መላ ማት እመትስ።
REV 9:11 ኤንታና ሃርያ ካዎይ ደኤስ፤ ሄ ካዎይ ኦላ ኪታንቹዋ። እያ ሱንꬃይ እብራወꬆ ዶናን አብዶና፤ ቃስ ግርከ ዶናን አጶልዮና ጌተቴስ። እያ ሱንꬃ ብርሸꬃይ “ꬋይሰይሳ” ጉሱ።
REV 9:12 ኮይሮ አየይ አꬍስ፤ ሄኮ፥ ቡሮ ሀራ ናምኡ አየት ኤሶን ሀናና።
REV 9:13 ኡሱፑንꬆ ኪታንቾይ ባ ሞይዝያ ፑንስ። ፆሳ ስንꬃን ኤቅዳ፥ ዎርቃ ያርሾ በሳን ደእያ ኦይዱ ካጨታፐ እስ ግርስ ስአስ።
REV 9:14 ሄ ግርሳይ ሞይዘ ኦይክዳ ኡሱፑንꬆ ኪታንቹዋኮ፥ “ኤፍራፂሳ ጌተትያ ግታ ሻፋን ቃሸትዳ ኦይዱ ኪታንቾታ ብርሻ” ያግስ።
REV 9:15 ቢታ ቦላ ደእያ አሳፐ ስኩዋ ዎꬋና መላ ሄ ሳትያስ፥ ሄ ጋላሳስ፥ ሄ አጌናስነ ሄ ላይꬃስ ጊግድ ኡትዳ ኦይዱ ኪታንቾት ብርሸትዶሶና።
REV 9:16 ኦላ ፓራ ቶግያ ኦላንቾታ ፓይዶይ ዳሮ ፄቱ ምሎነ ግደይሳ ስአስ።
REV 9:17 ቃስ ታ ቆንጨꬃን ፓራታነ ሄ ፓራታ ቶግዳ አሳ በአስ። ሄ አሳይ ትራን ዎꬅያ ብራታ ፁሩረይ ታማ ቦንቆ መላ ዞኦ፥ ያክንተ መላ፥ ካሬꬃ ካሎሰ መላነ ዲነ መላ ጭሊሎ። ፓራታ ሁጰይ ጋሞ ሁጰ መላ፤ ኤንታ ዶናፐ ታም፥ ጩይነ ዲነይ ከይስ።
REV 9:18 ፓራታ ዶናፐ ከይዳ ታማን፥ ጩያንነ ዲንያን ሄ ሄꬑ ጋዶታን ሳአን ደእያ አሳፐ ስኮይ ሀይቅስ።
REV 9:19 ሄ ፓራታ ዎልቃይ ኤንታ ዶና ግዶንነ ጎይናን ደኤስ። ኤንታ ጎይናይካ ሾሻ ሁጰ መላ፤ ኤንቲ እያራ አሳ ቆሆሶና።
REV 9:20 ሀ ጋዶታፐ አትዳይሳት ባንታ ኩሸ ኦሱዋፐ ስምቦኮና። ኤንቲ ቱና አያናን ዎርቃፈ፥ ብራፐ፥ ናሰ ብራታፐነ ሹቻፈ ኦሰትዳ ኤቃስ ጎይኖሶና። ፄላናዉ፥ ስአናዉ፥ ሄመታናዉ ዳንዳኦና ኤቃታስ ጎይነይሳ አግቦኮና።
REV 9:21 አሳይ ዎይሳ፥ ብተይሳ፥ ላይማተይሳነ ካይሰይሳ አግድ ማሮታ ኦይችቦኮና።
REV 10:1 ሄሳፈ ጉየ፥ ታ ሀራ ዎልቃማ ኪታንቾይ ሳሎፐ ሳአ ዎꬍሽን በአስ። እ ሻራ ማእስ፤ እያ ሁጵያ ቦላ ዙል ደኤስ። እያ ሶምኦይ አዋ መላ፤ እያ ቶሆይ ታማ ቱሳ መላ።
REV 10:2 ሄ ኪታንቾይ ዶያ ደእያ እስ ጉꬃ ፃꬃ ማፃፋ ባ ኩሸን ኦይክድ፥ ባ ኡሻቻ ቶሁዋ አባ ቦላ፥ ባ ሀድርሳ ቶሁዋ ቢታ ቦላ ኤስስ።
REV 10:3 ጉድያ ጋሞዳ ባ ቃላ ꬎቁ ኦꬅድ ዋስስ። እ ዋስዳ ዎደ ላፑን ዳዳት ባንታ ጉንꬃ ስስዶሶና።
REV 10:4 ላፑን ዳዳት ኦደትዳ ዎደ ታ ፃፋናዉ ጊገታስ። ሽን ሳሎፐ፥ “ላፑን ዳዳት ኦድዳይሳ ማታመን ጎርዳፈ አትሽን፥ ፃፎፓ” ግያ ግርሳ ስአስ።
REV 10:5 ያትድ፥ አባ ቦላነ ቢታ ቦላ ኤቅዳ፥ ታ በእዳ ኪታንቾይ፥ ባ ኡሻቻ ኩሽያ ሳሎ ፑደ ምጭስ።
REV 10:6 እ ምጭድ ሳሎንነ እያ ግዶን ደእያ ኡባ፥ ሳአንነ እያ ግዶን ደእያ ኡባ፥ አባነ እያ ግዶን ደእያ ኡባ መꬍዳ፥ መርናዉ ደእያ ፆሳ ሱንꬃን ጫቅድ፥ “ህዛፐ ጉየ፥ ፆሳይ ጋምኤና።
REV 10:7 ሽን ላፑንꬃ ኪታንቾይ ባ ሞይዝያ ፑንያ ዎደ ፆሳይ ባ አይለ ግድዳ ናበታ ባጋራ ቆንጭስዳ ፁራ ቆፋይ ፖለታና” ያግስ።
REV 10:8 ሄሳፈ ጉየ፥ አባ ቦላነ ቢታ ቦላ ኤቅድ፥ “እያ ኩሸን ዶየትድ ደእያ ፃꬃ ማፃፋ ኪታንቹዋ ኩሸፐ ኤካ” ያግድ ናምአንꬆ ታዉ ኦድሽን ስአስ።
REV 10:9 ታኒ ሄ ኪታንቹዋኮ ባዳ፥ ጉꬃ ፃꬃ ማፃፋ እማ ጋዳ ኦይቻስ። እ ታኮ፥ “ኤካዳ ማ፤ እ ነ ኡሎን ጫማና፥ ሽን ነ ዶናን ኤሳዳ ማልአና” ያግስ።
REV 10:10 ታኒ ኪታንቹዋ ኩሸፐ ሄ ጉꬃ ፃꬃ ማፃፋ ኤካዳ ማስ፤ ታ ዶናን ኤሳዳ ማልእስ፥ ሽን ታ ኡሎን ጫምስ።
REV 10:11 ሄሳፈ ጉየ፥ ታኮ፥ “ኔኒ ያራ ኡባስ፥ ደረ ኡባስ፥ ዱማ ዱማ ዶናን ኦደተይሳታስነ ካዎታስ ትንብተ ዛራ ኦዳናዉ በሴስ” ያግስ።
REV 11:1 ሄሳፈ ጉየ፥ ታዉ ዋꬋ ፃምአ እምድ፥ “ባዳ ፆሳ ኬꬃነ ያርሾ በሳ ዋꬋ፤ ያን ጎይንያ አሳታካ ፓይዳ።
REV 11:2 ሽን ፆሳ ኬꬃ ካረ ዳባባይ አይሁደ ግዶና አሳስ እመትዳ ግሾ ዋꬎና አጋጋ። አይሁደ ግዶና አሳይ ጌሻ ካታማ ኦይታማነ ናምኡ አጌና ሃራና።
REV 11:3 ታኒ ካዮ ማኦ ማእዳ ታ ናምኡ ማርካታ ኪታና፤ ኤንቲ 1,260 ጋላስ ትንብተ ኦዳና” ያግስ።
REV 11:4 ሄ ናምኡ ማርካት አላምያ ጎዳ ስንꬃን ኤቅያ ናምኡ ሻማሆ ምꬃታነ ናምኡ ፆምፐ ዎꬅያ ኮጫታ።
REV 11:5 ኦንካ ኤንታ ቆሀናዉ ኮይኮ ኤንታ ዶናፐ ታም ከይድ፥ ኤንታ ሞርከታ ꬋይሴስ። ኤንታ ቆሀናዉ ኮይያ ኦንካ ሄሳዳ ሀይቃና።
REV 11:6 ኤንቲ ትንብተ ኦድያ ዎደ እር ቡኮና መላ ሳሉዋ ጎርዳናዉ ኤንታዉ ማት ደኤስ። ኤንታዉ ሃ ሱꬅ ከሳናዉ፥ ቃስ ኤንቲ ኮይዳ መላ ቢታ ዱማ ዱማ ጋዶን ꬋይሳናዉ ኤንታዉ ማት ደኤስ።
REV 11:7 ኤንቲ ባንታ ማርካተꬃ ኦንግዳፐ ጉየ፥ ኦላፈ ከይያ ዶአይ ኤንታና ኦላና። ሄ ዶአይ ኤንታ ፆናና፤ ዎꬋና።
REV 11:8 ኤንታ ጎዳይ ማስቃልያ ቦላ ካቀትዳ ግታ ካታማ ኦግያ ቦላ ኤንታ አሀይ የገታና። ሄ ካታማይ ሌምሶን ሶዶመ ዎይኮ ግብፀ ጌተትድ ፄገቴስ።
REV 11:9 ቃስ ኮቸ ኡባፈ፥ ያራ ኡባፈ፥ ዱማ ዱማ ዶናፐነ ካዎተꬅ ኡባፈ ይዳ አሳይ ኤንታ አሀ ሄꬑ ጋላስነ ባጋ ጋካናዉ በአና። ኤንታ አሀይ ሞገቶና መላ አሳይ ድጋና።
REV 11:10 ሀ ናምኡ ናበት ሳአን ደእያ አሳ ዋይስዳ ግሾ አሳይ ኤንታ ሀይቁዋን ኡፋይታና። ባንታ ኡፋይሳ በሳናዉ እሶይ እሱዋስ እሞታ እማና።
REV 11:11 ሄꬑ ጋላስነ ባጋፈ ጉየ፥ ደኦ አያናይ ፆሳ ማታፐ ይድ ኤንታን ገልን፥ ኤንቲ ደንድ ኤቅዶሶና። ኤንታ በእዳ ኡባይ ግታ ያሽ ያይዶሶና።
REV 11:12 ሄሳፈ ጉየ፥ ሄ ናምኡ ናበት፥ “ሃ ፑደ ከይተ” ግያ ቃላ ሳሎፐ ስእዶሶና። ኤንታ ሞርከት ኤንታና በእሽን፥ ኤንቲ ሻራን ገልድ ፑደ ሳሎ ብዶሶና።
REV 11:13 ሄ ሳትያን ቢታይ ዎልቃማ ቃፆ ቃፅን፥ ካታማፐ ታማንꬆ ኩሸይ ꬋይስ። ቃስ ቢታ ቃፆን ላፑን ሙኩሉ አሳይ ሀይቅስ። አትዳ አሳይ ዳሮ ኮኮርድ ባብድ፤ ሳሎ ፆሳስ ቦንቾ እምዶሶና።
REV 11:14 ናምአንꬆ አየይ አꬍስ፥ ሽን ሄኮ ሄꬓንꬆ አየይ ኤሶን ያና።
REV 11:15 ላፑንꬃ ኪታንቾይ ባ ሞይዝያ ፑንስ። ሳሎፐ፥ “ሳኣ ካዎተꬃይ ኑ ጎዳስነ ክርስቶሳስ ግድስ፤ እ መርናፐ መርና ጋካናዉ ሃራና” ግያ ዎልቃማ ቃላይ ስኤትስ።
REV 11:16 ያትን፥ ፆሳ ስንꬃን፥ ባንታ አራታን ኡትዳ ላታማነ ኦይዱ ጭማት ጉፋንድ፥ ፆሳስ ጎይንድ፥
REV 11:17 “ሀእካ ካሰካ ደኤይሶ፥ ጎዳዉ፥ ኡባፈ ዎልቃማ ፆሳዉ፥ ኔኒ ግታ ዎልቃ ኦይካዳሳ። ኔኒ ሃራናዉ ዶምዳ ግሾ፥ ኑኒ ነና ጋላቶስ።
REV 11:18 አይሁደ ግዶና አሳይ ሀንቀትዶሶና፥ ሽን ነ ሀንቆይ ይስ። ሀይቅዳይሳታ ቦላ ነ ፕርድያ ዎደይ ጋክስ፤ ኔኒ ነ አይለታ፥ ናበታስ ጌሻታስነ ነ ሱንꬃስ ያየይሳታስ፥ ጉꬃታስነ ግታታስ፥ ኤንታ ኦሱዋዳ እምያ ዎደይ ጋክስ። አላምያ ꬋይሰይሳታ ꬋይስያ ዎደይ ይስ” ያግዶሶና።
REV 11:19 ሳሎን ደእያ ፆሳ ኬꬃይ ዶየትስ፤ እያ ግዶን ፆሳ ጫቆ ታቦተይ በንትስ። ቃስ ዎልአንꬅ ዎልአምስ፥ ደሾይ ደችስ፤ ዳዳይ ꬉቅስ፤ ቢት ቃፅስ፤ ሻች ቡክስ።
REV 12:1 ሄሳፈ ጉየ፥ ሳሎን ዎልቃማ ማላት በንትስ። አዋ ማአዳ፥ አጌና ቦላ ኤቃዳ፥ ታማነ ናምኡ ፆልንቶ ካላቻ ባ ሁጰን ዎꬅዳ ደእያ፥ እስ ማጫስያ በንታሱ።
REV 12:2 ሄ ማጫስያ ቃን፤ ሽን እዮ እቀꬅ ኦይክን ኡንኤታዳ ዋሳሱ።
REV 12:3 ቃስ ሀራ ማላት ሳሎን በንትስ። ላፑን ሁጰትነ ታሙ ካጨት ደእያ ግታ ዞኦ ዳወይ በንትስ። እ ባ ሁጰታ ቦላ ላፑን ካላቻ ዎꬅስ።
REV 12:4 ሄ ዳወይ ባ ጎይናን ፆልንቶታፐ ስኩዋ ሳሎፐ ዳፍድ ሳአን የግስ። ሄ ዳወይ ናአይ የለት ዎꬍዳ መላ ምታናዉ ኮይድ፥ የላናዉ ኤቀትያ ማጫሰ ስንꬃን ኤቅስ።
REV 12:5 ሄ ማጫስያ ካዎተꬃ ኡባ ብራታ ፃምአን ሃራናዉ ደእያ አደ ናአ የላሱ። ናአይ ፆሳኮነ እያ አራታኮ ፑደ ኤከትስ።
REV 12:6 ማጫስያ 1,260 ጋላስ ጋካናዉ እዮ ናጋና መላ ፆሳይ እዉ ጊግስ ዎꬅዳ በሳ መላ ቢታ ባቃታሱ።
REV 12:7 ሳሎን ኦል መትስ። ምካኤል ባ ኪታንቾታራ ዳውያራ ኦለትስ፤ ዳወይ ባ ኪታንቾታራ ግድድ ዛር ኦለትስ።
REV 12:8 ሽን ዳወይ ፆነትድ ሳሎን ኤንታዉ ደእያ በሲ ꬋይዶሶና።
REV 12:9 ግታ ዳወይ፥ በን ሾሻይ፥ ሳአን የገትስ። እካ ዳቡሎሳ ዎይኮ ፃላሄ ጌተትያ አላምያ ባለይሳ። እ ባ ኪታንቾታራ እስፈ ዱገ አላምያ የገትስ።
REV 12:10 ሄሳፈ ጉየ፥ ሳሎን ሀይሳዳ ግያ ቃላ ስአስ። “ሀእ አቶተꬃይ፥ ዎልቃይነ ካዎተꬃይ፥ ኑ ፆሳሳ፤ ማታይ ክርስቶሳስ ግድስ። ህዛ፥ ቃማነ ጋላስ ፆሳ ስንꬃን፥ ኑ እሻታ ሞተይስ ሳሎፐ ዱገ ሆለትስ።
REV 12:11 ኤንቲ ዶርሳ ሱꬃንነ ባንታ ማርካተꬃ ቃላን፥ እያ ኦልድ ፆንዶሶና። ኤንቲ ባንታ ሸምፑዋስ ምሸቶና ባንታና ሀይቆስ አꬅድ እምዶሶና።
REV 12:12 ሄሳ ግሾ፥ ሳሎንነ እያ ግዶን ደኤይሳቶ ኡፋይትተ። ሽን ቢታነ አባ አየ! ህዛ፥ ፃላሄይ ባዉ ጉꬃ ዎደይ አትዳይሳ ኤርዳ ግሾ፥ ዎልቃማ ሀንቆን ህንተኮ ዎꬍስ” ያግስ።
REV 12:13 ቃስ ዳወይ ባና ሳአ የግዳይሳ በእዳ ዎደ አደ ናአ የልዳ ማጫስዉ ጎድስ።
REV 12:14 ማጫስዉ ሾሻይ ቆሆና መላ ሄꬑ ላይꬅነ ባጋ ማሸነ ኡያሸ እያ ናገትያ በሲ መላ ቢታ ፕራꬋዳ ባና መላ ናምኡ ዎልቃማ አርጋንꬃ ቀፈይ እዉ እመትስ።
REV 12:15 ያትድ፥ ማጫስዉ ድኦይ ድእድ ኤፋና መላ ዳወይ ሻፋ ሃꬃ መላ ባ ዶናፐ ማጫሰ ጉየራ ጮይስ።
REV 12:16 ሽን ቢታይ ማጫስዉ ማድስ፤ ቢታይ ባ ዶና ዶይድ ዳውያ ዶናፐ ከይዳ ሃꬃ ምትስ።
REV 12:17 ሄ ዳወይ ማጫሰ ቦላ ዳሮ ሀንቀትድ፥ እ ኮቻታ፥ ፆሳ ኪታ ናገይሳታነ የሱሲ ቆንጭስዳ ቱማስ አማነትዳይሳታ ኦላናዉ ብድ።
REV 12:18 አባ ጋፃን ደእያ ሻፍያን ኤቅስ።
REV 13:1 ሄሳፈ ጉየ፥ እስ ዶአይ አባፈ ከይሽን በአስ። እያዉ ታሙ ካጨይነ ላፑን ሁጰይ ደኤስ። ሄ ታሙ ካጨታ ቦላ ታሙ ካላቻት ደኦሶና። ሄ ሁጰታ ቦላ ፆሳ ጫሻ ሱንꬃት ፃፈትድ ኡትስ።
REV 13:2 ታ በእዳ ዶአይ ማሄ ዳኔስ፤ እያ ቶሆይ ባባንꬃ ቶሆ መላ፤ እያ ዶናይካ ጋሞ ዶና ዳኔስ። ዳወይ ባ ዎልቃ፥ ባ አራታነ ባ ግታ ማታ ሄ ዶኣስ እሚስ።
REV 13:3 ሄ ዶኣ ሁጵያፐ እሱዋ ቦላ ሀይቆስ ጋꬅያ ማዱንꬅ በአስ፥ ሽን ሄ ማዱንꬃይ ፓፅስ። አላምያ አሳ ኡባይ ማላለትድ ሄ ዶኣ ካልስ።
REV 13:4 ዳወይ ባ ማታ ዶኣስ እምዳ ግሾ አሳ ኡባይ ዳውያ ጎይንዶሶና። ቃስ አሳይ፥ “ዶኣ መል ኦኔ? እያራ ኦለታናዉ ዳንዳኤይ ኦኔ?” ያግድ ዶኣስ ጎይንዶሶና።
REV 13:5 ሄ ዶኣስ ኦቶርታና መላነ ጫያና መላ ዶን እመትስ፤ ኦይታማነ ናምኡ አጌና ሃራና መላ ማት እያዉ እመትስ።
REV 13:6 ሄ ዶአይ ፆሳ፥ እያ ሱንꬃ፥ እ ደእያ በሳነ ሳሎን ደእያ ኡባ ባደꬅ ኦይክስ።
REV 13:7 ሄ ዶአይ ጌሻታራ ኦለትድ፥ ኤንታና ፆናና መላ ዎልቅ እያዉ እመትስ። ያራ ኡባ፥ ደረ ኡባ፥ ዱማ ዱማ ዶና ኡባ ቦላነ ኮቸ ኡባ ቦላ ማት እያዉ እመትስ።
REV 13:8 አላመይ መቶሳፐ ዶምድ፥ ሹከትዳ ዶርሳ ደኦ ማፃፋን ኤንታ ሱንꬃይ ፃፈቶና ሀ ሳአን ደእያ አሳ ኡባይ ሄ ዶኣስ ጎይናና።
REV 13:9 ስእያ ሀይꬅ ደእያ አስ ስኦ።
REV 13:10 ኦንካ ድኤታናዉ ደኤይ ድኤቴስ። ማሻን ሀይቃናዉ ደኤይ ማሻን ሹከታና። ሄሳንካ ጌሻታ ዳንዳአይነ አማኖይ ኤረታና።
REV 13:11 ቃስካ፥ ሀራ ዶእ ሳአፐ ከይሽን በአስ። እያዉ ዶርሳ ካጨ ዳንያ ናምኡ ካጨይ ደኤስ፤ እያ ኦዳይ ዳወ ኦዳ መላ።
REV 13:12 ሄ ዶአይ ኮይሮ ዶኣ በሳን፥ እያ ማታን ኦꬄስ። እካ ሀይቆስ ጋꬅያ ማዱንꬃፈ ፓፅዳ ኮይሮ ዶኣስ፤ ቢታን ደእያ አሳ ኡባይ ጎይናና መላ ኦꬄስ።
REV 13:13 ሄ ናምአንꬆ ዶአይ ሀር አቶሽን፥ ታማ ሳሎፐ አሳ ኡባ ስንꬃን ዎꬍሳና ጋካናዉ ግታ ማላታታ ኦꬅስ።
REV 13:14 ኮይሮ ዶኣ በሳን ኦꬃና መላ፥ እያዉ እመትዳ ማላታታን ሳአን ደእያ አሳ ኡባ እ ባለꬅስ። ማሻን ማዱንፅድ ፓፅዳ ዶኣ ቦንቾስ ምስለ ጊግሳና መላ ኤንታና ኪትስ።
REV 13:15 ናምአንꬆ ዶአይ ኮይሮ ዶኣ ምስልያስ ሸምፖ እምድ ኦደታና መላነ እያዉ ጎይኖናይሳት ሀይቃና መላ ኦꬅያ ማት እመትስ።
REV 13:16 ሄ ናምአንꬆ ዶአይ ግትነ ጉꬅ፥ ማንቆይነ ዱረይ፥ ዎማኖይነ አይለይ ባ ኡሻቻ ኩሸን ዎይኮ ባ ሶምኦን ማላ ዎꬃና መላ ኦꬅስ።
REV 13:17 ሄ ዶኣ ሱንꬃይ ዎይኮ እያ ሱንꬃ ፓይዱዋ ማላይ ባይና አስ ኦንካ ባይዛናዉነ ሻማናዉ ዳንዳኤና።
REV 13:18 ጭንጫተꬅ ኮሸይ ሄሳና። ኤራተꬅ ደእያ ኦንካ ሄ ዶኣ ፓይዱዋ ብርሸꬃ ኤሮ፤ ሄ ፓይዶይ አሳ ሱንꬅ። ሄ ፓይዶይ ኡሱፑን ፄታነ ኡሱፑን ታማነ ኡሱፑና።
REV 14:1 ሄሳፈ ጉየ፥ ዶርሳይ ፅዮነ ዙማ ቦላ ኤቅዳይሳ በአስ። እያራ እያ ሱንꬃይነ እያ አዋ ሱንꬃይ ኤንታ ሶምኦን ፃፈትዳ፥ 144,000 አሳይ ደኤስ።
REV 14:2 ሳሎፐ ግታ ሃꬃ ጉንꬁነ ዳዳ ጉንꬁ ዳንያ ዎልቃማ ግርስ ስአስ። ቃስ ታ ስእዳ ግርሳይ ዲꬅ ዲፅሽን ስኤትያ ግርሳ መላ።
REV 14:3 144,000 አሳይ አራታ ስንꬃን፥ ኦይዱ ደኦን ደእያ መተꬃታ ስንꬃንነ ጭማታ ስንꬃን ኤቅድ ኤንታፈ ሀራ ኦንካ ታማራናዉ ዳንዳኦና ኦራꬃ ማዝሙረ የፅዶሶና።
REV 14:4 ሀይሳቲ ማጫሳራ ባንታና ቱንሶና ናግዳ ጌሻታ። ኤንቲ ዶርሳይ ብያ በሲ ኡባ ካሎሶና። ኤንቲ ፆሳስነ ዶርሳስ ባይራ ግድድ፥ ሺቃናዉ ሳአ አሳ ግዶፈ ዎዘትዶሶና።
REV 14:5 ኤንቲ ዎርዶይነ ቦረይ ባይና አሳታ።
REV 14:6 ሄሳፈ ጉየ፥ መርና ዎንገላ ሳአ ቦላ ደእያ ካዎተꬃ ኡባስ፥ ኮቸ ኡባስ፥ ያራ ኡባስነ ዱማ ዱማ ዶና ኡባስ ማርካታናዉ ሳሎራ ፕራꬍያ ሀራ ኪታንቾ በአስ።
REV 14:7 ሄ ኪታንቾይ ባ ቃላ ꬎቁ ኦꬅድ፥ “ፆሳይ አላምያ ፕርድያ ሳተይ ጋክዳ ግሾ ፆሳስ ያይተ፤ እያ ቦንችተ። ሳሎ፥ ሳኣ፥ አባነ ፑልቶ ሃꬃ መꬍዳ ፆሳ ጎይንተ” ያግስ።
REV 14:8 ኮይሮይሳ ካልድ ሀራ ናምአንꬆ ኪታንቾይ፥ “ደረ ኡባ ቱናነ ማꬆይያ ዎይነ ኡሽዳ፥ ግታ ባብሎነይ ኩንዳሱ! ኩንዳሱ!” ያግድ ዋስስ።
REV 14:9 ሄꬓንꬆ ኪታንቾይ ኤንታ ካልድ፥ ባ ቃላ ꬎቁ ኦꬅድ፥ “ዶኣነ እያ ምስልያ ጎይንያ ቃስ እያ ማላ ባ ሶምኦን ዎይኮ ባ ኩሸን ዎꬅያ ኦንካ ደእኮ፥
REV 14:10 እያ ሀንቆ ፁአን ኩምዳ ፆሳ ሀንቆ ዎይንያ ኡያና። ኤንቲ ጌሻ ኪታንቾታ ስንꬃንነ ዶርሳ ስንꬃን ኤፅያ ዲነ ታማን ዋየታና።
REV 14:11 ኤንታ ዋይያ ጩያይ መር መርናዉ ጩይሸ ዳና። ዶኣነ እያ ምስልያ ጎይነይ ቃስ ሄ ዶኣ ሱንꬃ ማላይ ደእያ ኦንካ ቃማነ ጋላስ ሸምፖይ ባይና ካኤታና” ያግስ።
REV 14:12 ፆሳ ኪታ ናገይሳትነ የሱሳ አማነተይሳት ገንጭያ ምኖተꬃይ ቆንጭያ ዎደይ ሄሳ።
REV 14:13 ሄሳፈ ጉየ፥ “ህዛፐ ጎዳን ሀይቀይሳት አንጀትዳይሳታ” ግያ ቃላ ሳሎፐ ስአስ። አያናይ፥ “ኤ ቱማ፥ ኤንታ ኦሶይ ኤንታ ካልያ ግሾ፥ ኤንቲ ባንታ ዳቡራፐ ሸምፓና” ያጌስ።
REV 14:14 ሄሳፈ ጉየ፥ ቦꬃ ሻራ ቦላ ኡትዳ አሳ ናአ ዳነይሳ በአስ። እ ባ ሁጰን ዎርቃ ካላቻ ዎꬅስ፤ ቃስ ባ ኩሸን ባጫ ኦይክስ።
REV 14:15 ሀራ ኪታንቾይ ፆሳ ኬꬃፈ ከይድ፥ ሻራ ቦላ ኡትዳይሳኮ ባ ቃላ ꬎቁ ኦꬅድ፥ “ካꬃ ሺሾ ዎደይ ጋክዳ ግሾ ነ ባጫ የዳዳ ካꬃ ጫካ፤ ሳአን ደእያ ካꬃይ ጋክስ” ያግስ።
REV 14:16 ያትን ሻራ ቦላ ኡትዳይስ ባ ባጫ ሳአ የድድ፥ ሳአን ደእያ ካꬃ ጫክስ።
REV 14:17 ቃስካ ሳሎን ደእያ ፆሳ ኬꬃፈ ሀራ ኪታንቾይ ከይስ፤ እያዉካ ኦጮ ባጭ ደኤስ።
REV 14:18 ታማ ቦላ ማት ደእያ ሀራ ኪታንቾይ ያርሾ በሳፈ ከይስ። እ ባ ቃላ ꬎቁ ኦꬅድ ኦጮ ባጫ ኦይክዳ ኪታንቹዋኮ፥ “ዎይነ አይፈይ ቴርዳ ግሾ ኔኒ ኦጮ ባጫ የዳዳ፥ ሳአን ደእያ ዎይንያፐ ቃንፃ” ያግስ።
REV 14:19 ሄ ኪታንቾይ ባ ባጫ የድድ፥ ሳአን ደእያ ዎይንያፐ ቃንፅድ፥ ፆሳ ግታ ሀንቁዋ ጉምእያ በሳን የግስ።
REV 14:20 ኤንቲ ካታማፐ ጋፃን ደእያ ዎይነ አይፈ ጉምእያ በሳን የትዶሶና። ሱꬅ ዎይነ ጉምእያ በሳፈ ከይድ እስ ሙኩሉነ ኡሱፑን ፄቱ ክሎ ምትረ መላ ሃክድ፥ ፓራ ፑሎ ጋክድ፥ ꬎቁ ግድ ኤልስ።
REV 15:1 ታኒ ሳሎን ሀራ ግታነ ማላልስያ ማላታ በአስ። ፆሳ ዉርሰꬃ ሀንቁዋ ቆንጭስያ ላፑን ቦሻታ ኦይክዳ ላፑን ኪታንቾት ደኦሶና።
REV 15:2 ቃስ ታማራ ዋላከትዳ ቡርጩኮ አባ ዳነይሳ በአስ። ሄ አባ ጋፃን ዶኣ፥ እያ ምስልያነ እያ ሱንꬃ ታይቡዋ ፆንዳይሳታ በአስ። ፆሳይ ኤንታዉ እምዳ ዲꬃ ኦይክድ ኤቅዶሶና።
REV 15:3 ኤንቲ ፆሳ አይልያ ሙሰ ማዝሙርያነ ዶርሳ ማዝሙርያ ሀይሳዳ ያግድ የፆሶና። “ጎዳዉ፥ ኡባፈ ዎልቃማ ፆሳዉ፥ ነ ኦሶይ ግታነ ማላልስያባ። ደረ ኡባ ካዋዉ፥ ነ ኦገይ ፅሎነ ቱማ።
REV 15:4 ጌሽ ነ ፃላላ ግድያ ግሾ፥ ጎዳዉ፥ ነዉ ያዮናይነ ነ ሱንꬃ ቦንቾናይ ኦኔ? ነ ፅሎ ኦሶይ አሳ ኡባስ ቆንጨ ግድያ ግሾ፥ ካዎተꬅ ኡባይ ነ ስን ይድ ጎይናና” ያግድ የፆሶና።
REV 15:5 ሄሳፈ ጉየ፥ ሳሎን ዶየትድ ደእያ ፆሳ ኬꬃ፥ እካ ማርካተꬃ ዱንካንያ በአስ።
REV 15:6 ላፑን ቦሻታ ኦይክዳ ላፑን ኪታንቾት ፆሳ ኬꬃፈ ከይዶሶና። ኤንቲ ጌሽነ ጶልያ ሊኖ ማኦ ማእዶሶና፤ ባንታ ትራን ዎርቃ ዳንጮ ዳንጭዶሶና።
REV 15:7 ኦይዱ መተꬃታፐ እሶይ፥ መርናዉ ደእያ ፆሳ ሀንቆይ ኩምዳ ላፑን ዎርቃ ፁአታ ላፑን ኪታንቾታስ እሚስ።
REV 15:8 ፆሳ ቦንቹዋፈነ እያ ዎልቃፈ ደንዶይሳን ፆሳ ኬꬃይ ጩያን ኩምስ። ላፑን ኪታንቾት ኦይክዳ ላፑን ቦሻት ፖለታና ጋካናዉ ፆሳ ኬꬃ ኦንካ ገላናዉ ዳንዳእቤና።
REV 16:1 ሄሳፈ ጉየ፥ ፆሳ ኬꬃፈ ላፑን ኪታንቾታኮ፥ “ብድ ፆሳ ሀንቁዋ ላፑን ፁአታፐ ሳአን ጉስተ” ያግድ፥ ኦድያ ዎልቃማ ቃላ ስአስ።
REV 16:2 ኮይሮ ኪታንቾይ ብድ፥ ባ ፁአን ደኤይሳ ሳአን ጉስን፥ ዶኣ ማላይ ደኤይሳታ ቦላነ እያ ምስልያ ጎይንዳይሳታ ቦላ ኢታነ ዛምያ ማዱንꬅ ከይስ።
REV 16:3 ናምአንꬆ ኪታንቾይ ባ ፁአን ደኤይሳ አባን ጉስን፥ አባይ ሀይቅዳ አሳ ሱꬅ ዳንስ። ቃስ አባን ደእያ መተꬃ ኡባይ ሀይቅስ።
REV 16:4 ሄꬓንꬆ ኪታንቾይ ባ ፁአን ደኤይሳ ሻፋታንነ ፑልቶ ሃꬃታን ጉስን፥ ሃꬃት ሱꬅ ግድዶሶና።
REV 16:5 ሄሳፈ ጉየ፥ ሃꬃ ቦላ ማት ደእያ ኪታንቾይ ሀይሳዳ ያግሽን ስአስ። “ሀእካ በንካ ደእያ ጌሻዉ፥ ሀይሳዳ ነ ፕርድዳ ግሾ ኔኒ ፅሎ።
REV 16:6 ኤንቲ ጌሻታ ሱꬃነ ናበታ ሱꬃ ጉስዳ ግሾ፥ ኤንቲ ሱꬁ ኡያና መላ ኦꬃዳሳ። ኤንቲ ባንታዉ በሲያባ ኤክዶሶና” ያግስ።
REV 16:7 ያርሾ በሳፈ፥ “ጎዳዉ፥ ኡባፈ ዎልቃማ ፆሳዉ፥ ነ ፕርዳይ ቱማነ ፅሎ” ግያ ቃላ ስአስ።
REV 16:8 ኦይዳንꬆ ኪታንቾይ ባ ፁአን ደኤይሳ አዋ ቦላ ጉስን፥ አዋይ ባ ሴላን አሳ ፁጋና መላ አዋስ ዎልቅ እመትስ።
REV 16:9 አሳይ ዎልቃማ ሴላን ፁገትድ፥ ሄ ቦሻታ ቦላ ማት ደእያ ፆሳ ሱንꬃ ባድዶሶና፤ ባንታ ናጋራፐ ስሚድ ፆሳ ቦንችቦኮና።
REV 16:10 እቻሻንꬆ ኪታንቾይ ባ ፁአን ደኤይሳ ዶኣ አራታ ቦላ ጉስን፥ ሄ ዶኣ ካዎተꬃይ ꬉምስ። አሳይ ኡንኣ ግሾ፥ ባንታ እንፃርሳ ሳፆሶና።
REV 16:11 ቃስ አሳይ ኡንኣ ግሾነ ማዱንꬃ ግሾ፥ ሳሎ ፆሳ ባድዶሶና፤ ባንታ ኦꬅዳ ናጋራፐ ስምቦኮና።
REV 16:12 ኡሱፑንꬆ ኪታንቾይ ባ ፁአን ደኤይሳ ግታ ኤፍራፂሳ ሻፋን ጉስን፥ ዶሎሀ ባጋፈ ያና ካዎታስ ኦገይ ጊጋና መላ ሃꬃይ መልስ።
REV 16:13 ሄሳፈ ጉየ፥ ሾ ዳንያ ሄꬑ ቱና አያናት ዳውያ ዶናፐ፥ ዶኣ ዶናፐነ ዎርዶ ናብያ ዶናፐ ከይሽን በአስ።
REV 16:14 ኤንቲ ማላታታ ኦꬅያ ቱና አያናታ። ሄ ሄꬑ ቱና አያናት ኡባፈ ዎልቃማ ፆሳ ግታ ጋላሳን ሀናናዉ ደእያ ኦላስ ሺሻናዉ አላመ ካዎታ ኡባኮ ባና።
REV 16:15 “ሄኮ፥ ታ ካይሶዳ ያና! አሳ ስንꬃን ካሎቶናዳነ ዬላቶናዳ ባርክድ፥ ባ ማኡዋ ናግያ ኡራይ አንጀትዳይሳ!” ያግስ።
REV 16:16 ሄ ቱና አያናት ካዎታ እብራወꬆ ዶናን አርማገዶነ ጌተትያ በሳን ሺሽዶሶና።
REV 16:17 ላፑንꬃ ኪታንቾይ ባ ፁአን ደኤይሳ ጫርኮ ቦላ ጉስን፥ ፆሳ ኬꬃን ደእያ አራታፐ፥ “ፖለትስ” ግያ ዎልቃማ ቃላይ ይስ።
REV 16:18 ሄሳፈ ዎልአንꬅ ዎልአምስ፤ ዳዳይ ꬉቅስ፥ ቢታይ ቃፅስ። አስ ሳአን መቶሳፐ ቢት ሄሳ መላ ቃፆ ቃፅቤና። ሄስ ኡባፈ አꬍዳ ቃፆ።
REV 16:19 ግታ ካታማይ ሄꬓ ከይድ ሻከትስ፤ ቢታ ኡባን ደእያ ካታማት ꬋይዶሶና። ፆሳይ ግታ ካታማ ባብሎነ ቆፕድ፥ ባ ኢታ ሀንቆ ዎይነ ኡሻይ ኩምዳ ፁኣ እዉ እሚስ።
REV 16:20 ዩሾይ አባን ተቀትዳ ቢታት ꬋይዶሶና፤ ደረትካ በንትቦኮና።
REV 16:21 አሳ ቦላ ኦይታማነ እቻሹ ክሎ ግራመ መላ ዴፅያ ዎልቃማ ሻች ሳሎፐ ቡክስ። ቦሻይ ዳሮ ኢታ ግድያ ግሾ አሳይ ሻቻ ቦሻ ግሾ ፆሳ ባድዶሶና።
REV 17:1 ላፑን ፁአታ ኦይክዳ ላፑን ኪታንቾታፐ እሶይ ታኮ ይድ፥ “ሃያ፤ ዳሮ ሃꬃታ ቦላ ኡትዳ ግታ ላይማትያ ማጫሰ ቦላ ያናዉ ደእያ ፕርዳ ታ ነና በሳና።
REV 17:2 አላምያ ካዎት ኢራ ላይማትዶሶና፤ አላመን ደእያ አሳይካ እ ላይማተꬃ ዎይንያ ኡይድ ማꬆትዶሶና” ያግስ።
REV 17:3 ሄ ኪታንቾይ ታና ጌሻ አያናን መላ ቢታ ኤፍስ። ያን እስ ማጫስያ ጫሻ ሱንꬃይ እ ቦላ ኡባን ፃፈትድ ኡትዳ፥ ዞኦ ዶኣ ቶግዳሮ በአስ፤ ሄ ዶኣስ ላፑን ሁጰይነ ታሙ ካጨይ ደኤስ።
REV 17:4 ሄ ማጫስያ ካሎሰ ማኦነ ዞኦ ማኦ ማአሱ፤ እያ ዎርቃን፥ ቦንቾ ሹቻንነ እንቆ ጌተትያ አልኦ ሹቻን አሌቀታሱ። እያ ባ ኩሸን ቦርስያባነ ላይማተꬃ ቱናተꬃን ኩምዳ ዎርቃ ፁአ ኦይካሱ።
REV 17:5 እ ሶምኦን ፁራ ኦሶ ብርሸꬃይ ደእያ ሱንꬃይ፥ “ግታ ባብሎነይ፥ ላይማተꬃስነ ሳአን ደእያ ቱናባ ኡባስ አዮ” ግያ ፁፈይ ፃፈትድ ኡትስ።
REV 17:6 ቃስ ሄ ማጫስያ ጌሻታ ሱꬃነ የሱሳስ ማርካትሸ ሀይቅዳይሳታ ሱꬃ ኡያዳ ማꬆትዳሮ ታ በአዳ ማላለታስ።
REV 17:7 ኪታንቾይ ታኮ፥ “ኔኒ አይስ ማላለታይ? ታኒ ነዉ ማጫሰ ፁራ ኦዳነ እያ ቶክዳ ላፑን ሁጰይነ ታሙ ካጨይ ደእያ ዶኣ ፁራ ኦዳ ኦዳና።
REV 17:8 ኔኒ በእዳ ዶአይ ኮይሮ ደኤስ፥ ሽን ሀእ ባዋ። ሄ ዶአይ ጪሞ ኦላፈ ከይድ ꬋዮስ ባና። ሳእ መቶሳፐ ዶምድ፥ ደኦ ማፃፋን ኤንታ ሱንꬃይ ፃፈትቦና ሳአን ደእያ አሳይ፥ ዶኣ በእድ ማላለታና። ህዛ፥ እ ካሰ ደኤስ፤ ሀእ ባዋ፥ ሽን ስንꬃፈ ያና።
REV 17:9 “ሀይስ ጭንጫተꬅነ አኬካ ኮዬስ። ላፑን ሁጰት ማጫስያ ኡትያ ላፑን ደረታ፤ ሄሳት ቃስ ላፑን ካዎታ።
REV 17:10 ኤንታፈ እቻሹ ካዎት ኩንድዶሶና። እሶይ ሀእ ጋካናዉ ሃሬስ፤ ሀንኮ ካዎይ ይቤና። እ ይድ ጉꬃ ዎደ ታካናዉ በሴስ።
REV 17:11 ስን ደእዳ ዶአይ፥ ሀእ ባይናይስ፥ እ ባ ሁጰን ሆስፑንꬆ ዶኣ። እ ላፑን ዶአታፐ እሱዋ፤ እ ꬋያናዉ ቤስ።
REV 17:12 “ኔኒ በእዳ ታሙ ካጨት ሃሮ ዶምቦና ታሙ ካዎታ። ሽን ኤንቲ ዶኣራ እስፈ እስ ሳተ ካዎትድ ሃራናዉ ኤንታዉ ማት እመታና።
REV 17:13 ኤንታ ኡባስ እስ ቆፋይ ደኤስ፤ ኤንቲ ባንታ ዎልቃነ ባንታ ማታ ዶኣስ እማና።
REV 17:14 ኤንቲ ዶርሳራ ኦለታና፥ ሽን ዶርሳይ ጎዳታ ጎዳነ ካዎታ ካዎ ግድያ ግሾ፥ እ ፄግዳይሳት፥ ዶርዳይሳትነ አማነትዳይሳት ሄ ካዎታ ፆናና” ያግስ።
REV 17:15 ኪታንቾይ ቃስካ ታኮ፥ “ላይማትያራ ኡትዳ ሄ ኔኒ በእዳ ሃꬃት ያራታ፥ ካዎተꬃታ፥ ዘረꬃታነ ዱማ ዱማ ዶናን ኦደተይሳታ።
REV 17:16 ቃስ ኔኒ በእዳ ታሙ ካጨይነ ዶአይ ላይማትያሮ እፃና። ኤንቲ እዉ ደእያ ኡባባ ኤካና። ቃስ እዮ ካሎ አሻናነ እ አሹዋ ምድጋና፤ ያትድ ኤንቲ እዮ ታማን ፁጋና።
REV 17:17 ህዛ፥ ፆሳ ቃላይ ፖለታና ጋካናዉ ኤንታ ቆፋይ እስኖ ግዳና መላ ኤንቲ ባንታ አይስያ ዎልቃ ዶኣስ እማናዳነ ፆሳይ ቆፕዳይሳ ኤንቲ ኦꬃናዳ ኤንታ ዎዛናን ፆሳይ አሞ ዎꬅስ።
REV 17:18 ሄ ኔኒ በእዳ ማጫስያ ሳአ ካዎታ ሃርያ ግታ ካታምዉ” ያግስ።
REV 18:1 ያትድ፥ ግታ ማት ደእያ ሀራ ኪታንቾይ ሳሎፐ ዎꬍሽን ታ በአስ። ሄ ኪታንቹዋ ቦንቾይ ሳአ ፖእስስ።
REV 18:2 ሄ ኪታንቾይ ባ ቃላ ꬎቁ ኦꬅድ፥ “እያ ኩንዳሱ! ግታ ባብሎነይ ኩንዳሱ! ባብሎነይ ቱና አያናት አቅያ በሲ ግዳሱ። ዱማ ዱማ ኢታባታስ ኬ ግዳሱ፤ ቱና ካፎትነ ዶአት ሸምፕያ በሲ ግዳሱ።
REV 18:3 አሳ ኮቸ ኡባ ባ ላይማተꬃ ዎይንያ ኡሻሱ። ሳኣ ካዎት ኢራ ላይማትዶሶና። እ ሚኮተꬃፈ ደንዶይሳን ቢታን ደእያ ዛልአንቾት ዱረትዶሶና” ያግስ።
REV 18:4 ሄሳፈ ጉየ፥ ታ ሳሎፐ ሀይሳዳ ግያ ሀራ ቃላ ስአስ። “እ ናጋራ ኢራ ኮፆና መላነ፥ እያ ኤካናዉ ደእያ ሴራ ህንተ ኤኮና መላ፥ ታ ደርያዉ ኢፐ ከይተ።
REV 18:5 ህዛ፥ እ ናጋራይ ሳሎ ጋካናዉ ዶረትስ። ፆሳይ እ ናቁዋ አኬክስ።
REV 18:6 እያ እምዳይሳ መላ ዛሪድ እዉ እምተ። እያ ኦꬅዳ ኦሱዋስ ናምኡ ኩሸ እዉ ዛርተ። እያ ጊግስዳ ኡሻ ቦላ ህንተ ናምኡ ኩሸ ማꬆይያ ኡሻ እ ፁአን ኩንꬅተ።
REV 18:7 እያ ባዉ ቦንቸትዳይሳዳነ እዉ እንጀትዳይሳ መላ፥ እዮ መቶꬅተነ ካዮይተ። እያ ባ ዎዛናን፥ ‘ታኒ ካዌዳ ኡታስ፤ ታ አዝን ባይና ማጫስ ግድከ፤ ታኒ ኡባካ ካዮትከ’ ያጋሱ።
REV 18:8 ሄሳ ግሾ፥ ቦሻ ኡባይ፥ ሀርገይ፥ ካዮይነ ኮሽ እዮ እስ ጋላስ ኦይካና። ቃስ እያ ታማን ፁገታና፤ አይስ ጊኮ፥ እ ቦላ ፕርድያ ፆሳይ ዎልቃማ” ያግስ።
REV 18:9 “ኢራ ላይማትዳይሳትነ እ ሚኮተꬃን ደእዳ፥ አላምያ ካዎት ሄ ካታምያ ፁገትን ከይያ ጩያ በእዳ ዎደ እዉ ዋስድ ዬካና።
REV 18:10 ኤንቲ ሄ ካታመ ዋይያ በእድ ያይዳ ግሾ፥ ሃክ ኤቅድ፥ “ ‘ሀ ግታ ካታመ! ዎልቃማ ካታመ! ባብሎነ፥ ነና አየ! ኔኒ እስ ሳተ ግዶን ነ ፕርዳ ኤካዳሳ’ ያጋና።
REV 18:11 “ኤንታ ማርካብያ ጫና ህዛፐ ሻምያ አስ ባይና ግሾ፥ ሳአን ደእያ ዛልአንቾት ሄ ካታማስ ዋሳናነ ካዮታና።
REV 18:12 ኤንታ ዎርቃ፥ ብራ፥ ቦንቾ ሹቹ፥ አልኦ ሹቻ፥ ካሎሰ ማኦ፥ ሊኖ ማኦ፥ ሃረ ማኦ፥ ዞኦ ማኦ፥ ዱማ ዱማ ሳዎ ምꬅ፥ ዳንጋርሳ ዛለ፥ አልኦ ምꬅ፥ ናሰ ብራታ፥ ጎለ ሹቹ፥
REV 18:13 ቃራፋ፥ ቅማመ፥ እፃነ፥ ካርበ፥ ሽቶ፥ ዎይነ፥ ዛይተ፥ ሎኦ ꬊለ፥ ግስተ፥ መሄ፥ ዶርሰ፥ ፓራ፥ ፓራ ጋረ፥ አይለታነ ሀራ አሳታ ሻምያ ኦንካ ባዋ።
REV 18:14 “ዛልአንቾት ማጫሴኮ፥ ‘ኔኒ አሞትዳ ሎኦባ ኡባይ ኔፐ ꬋይስ። ነ አቆይነ አሌቀትዳባ ኡባይ ኔፐ ሃክስ። ኔኒ ዛራዳ ኤንታ ኡባ ደማካ’ ያግዶሶና።
REV 18:15 ሄ ካታማን ዛልእድ ዱረትዳ ዛልአንቾት እ መቱዋ ባብድ ኢፐ ሃክድ ኤቃና። ኤንቲ ዬካናነ ካዮታና።
REV 18:16 ቃስ፥ “ ‘ሊኖ፥ ካሎሰ ማኦነ ዞኦ ማኦ ማአዳ፥ ዎርቃን፥ ቦንቾ ሹቻንነ እንቆ ጌተትያ አልኦ ሹቻን አሌቀትዳ፥ ሄ ግታ ካታሜስ አየ!
REV 18:17 ሀይሳ መላ ግታ ሻሎ ኡባይ እስ ሳተ ግዶን ꬋይስ’ ያግዶሶና። “ማርካብያ ላግያ ኡባይ፥ ማርካብያን ብያ ኡባይ፥ ማርካብያ ቦላ ኦꬅያ ኡባይነ አባን ዛልእያ ኡባይ ሃክ ኤቅዶሶና።
REV 18:18 ሄ ካታምያ ፁገትን ከይያ ጩያ በእዳ ዎደ፥ ‘ሀ ግታ ካታምዉ ዳንያ ሀራ ካታም ደእሻ?’ ያግዶሶና።
REV 18:19 ኤንቲ ባንታ ሁጰን ባና ቆልድ፥ ዋስዶሶናነ ካዮትዶሶና። “ ‘አባ ቦላ ማርካበት ደእያ ኡባይ፥ እ ሻሉዋን ዱረትዳ ኡባይ፥ ሄ ካታምያ እስ ሳተን ꬋይዳ ግሾ፥ አየ! አየ!
REV 18:20 ሳሉዋዉ፥ እ ꬋዩዋን ኡፋይታ! ጌሻቶ፥ ሀዋረቶ፥ ናበቶ፥ ፆሳይ ህንተ ግሾ እ ቦላ ፕርድዳ ግሾ ኡፋይትተ’ ያግዶሶና።”
REV 18:21 ያትን፥ ምኖ ኪታንቾይ ዎፃ ዳንያ ግታ ሹቹ ደንꬅድ አባን ሆልሸ፥ “ግታ ካታምያ ባብሎነይ ዎልቃን ሆለታዳ ሀይሳዳ ኩንዳና፤ እያ ሀችፈ ጉየ ኡባካ በንቱኩ።
REV 18:22 ዲꬅ ዲፀይሳትነ የፀይሳት፥ ሱሱልኤነ ሞይዘ ፑነይሳት፥ ህዛፐ ጉየ ነ ግዶን ኡባካ ስኤቶኮና። አይ ኮቻ ዛልኤ ዛልእያ አስካ ነ ግዶን በንተና። ዎፃ ግርስ ህዛፐ ጉየ ነ ግዶን ስኤተና።
REV 18:23 ፆምፐ ፖኦይ ዛሪድ ነ ግዶን ፖኤና። ማቾ ኤከይስነ አዝና ገልያር ቃል ህዛፐ ጉየ ነ ግዶን ስኤተና። ነ ዛልአንቾት ቢታ ኡባን ኤረትዳ ዎልቃማታ። ነ ብታን ካዎተꬃታ ኡባ ጭማዳሳ” ያግስ።
REV 18:24 ናበታ ሱꬃይ፥ ጌሻታ ሱꬃይነ ቢታ ቦላ ሀይቅዳ አሳ ኡባ ሱꬃይ እ ግዶን በንትዳ ግሾ ባብሎነይ ፕርደታሱ።
REV 19:1 ያትን፥ ሳሎን ዳሮ አሳይ፥ “ፆሳይ ጋላተቶ! አቶተꬃይ፥ ቦንቾይነ ዎልቃይ ኑ ፆሳስ ግዶ።
REV 19:2 እያ ፕርዳይ ቱማነ ፅሎ። ሳኣ ቱንስዳ ኢታ ላይምዉ ፆሳይ ፕርድስ። ፆሳይ ባ አይለታ ሱꬃ ኢፐ አችስ” ያግሽን ስአስ።
REV 19:3 ሄ አሳይ ዛሪድ ባንታ ቃላ ꬎቁ ኦꬅድ፥ “ፆሳ ጋላት ጋኮ። ሄ ካታምያ መርናዉ ጩያሸ ዳና” ያግዶሶና።
REV 19:4 ላታማነ ኦይዱ ጭማትነ ደኦን ደእያ ኦይዱ መተꬃት አራታን ኡትዳ ፆሳስ ጉፋንድ፥ “አምንእ! ፆሳ ጋላት ጋኮ” ያግድ ጎይንዶሶና።
REV 19:5 ያትን፥ “ፆሳ አይለት፥ ፆሰ ያይያ ጉꬅነ ግት ኡባይ፥ ኑ ፆሳ ጋላትተ” ግያ ቃላይ አራታፐ ከይስ።
REV 19:6 ያትን፥ ዳሮ አሳዳ ዎጫምያ፥ ዎልቃማ ሻፋዳ ጉምያ፥ ዳዳዳ ደችያ ግርሳይ፥ “ፆሳ ጋላት ጋኮ፤ ኑ ጎዳይ፥ ኡባፈ ዎልቃማ ፆሳይ ካዎትስ።
REV 19:7 ዶርሳ ያጋኖይ ጋክዳ ግሾነ እያ ገልያራ ጊግዳ ግሾ፥ ኑ ኡፋይቶስ፥ ጋላቶስነ ዶርሳ ቦንቾስ።
REV 19:8 ገሎስ ጊግዳራ ጶልያነ ጌሽ ግድዳ ሊኖ ማአና መላ እዉ እመትስ” ያግሽን ታ ስአስ። (ሊኖ ማኦይ ጌሻታ ፅሎ ኦሶ ሌምሶ።)
REV 19:9 ሄሳፈ ጉየ፥ ኪታንቾይ ታኮ፥ “ዶርሳ ያጋኖ ፄገትዳይሳት አንጀትዳይሳታ” ጋዳ ፃፋ። ሄ ኪታንቾይ ጉጅድ፥ “ሀይስ ፆሳ ቱማ ቃላ” ያግስ።
REV 19:10 ሄ ዎደ ታ እያ ጎይናናዉ እያ ቶሁዋ ቦላ ኩንዳስ። ሽን እ፥ “ሄሳ ኦꬆፋ! ታኒ የሱሳባ ማርካትያ ነ መላነ ነ እሻታ መላ። ነ ፆሳ ጎይና” ያግስ። ህዛ፥ የሱሳባ ማርካትዳይሳታስ ናበተꬃ አያን ደኤስ።
REV 19:11 ያትን፥ ሳሎይ ዶየትን፥ ያን ቦꬃ ፓር ደኤይሳ በአስ። ሄ ፓራ ቶግዳይስ አማነትዳይሳነ ቱማንቾ ጌተቴስ። እ ፅሎተꬃን ፕርደስነ ኦለቴስ።
REV 19:12 እያ አይፈይ ታማ ላጮ ዳኔስ፤ እያ ሁጰን ዳሮ ካላች ደኤስ። እያ ቦላ እ አትሽን፥ ሀር ኦንካ ኤሮና ፃፈትዳ ሱንꬅ ደኤስ።
REV 19:13 እ ሱꬃን ሙከትዳ ማኦ ማእስ፤ እያ ሱንꬃይካ ፆሳ ቃላ።
REV 19:14 ጶልያነ ጌሽ ግድዳ ሊኖ ማእዳ ሳሎ ኦላንቾት ቦꬃ ፓራታ ቶግድ እያ ጌዶ ካሎሶና።
REV 19:15 ካዎተꬃታ ቃንፅያ ቃራ ማሻይ እያ ዶናፐ ከዬስ። እ ብራታ ፃምአን አሳ ሃራና። ኡባፈ ዎልቃማ ፆሳ ሀንቆ ዎይነ ኡሻ ጉምእያ በሳ እ የꬋና።
REV 19:16 እያ ማኡዋ ቦላነ እያ ዎድርያ ቦላ፥ “ካዎታ ካዋነ ጎዳታ ጎዳ” ግያ ሱንꬃይ ፃፈትስ።
REV 19:17 ሄሳፈ ጉየ፥ እስ ኪታንቾይ አዋ ቦላ ኤቅዳይሳ በአስ። ሄ ኪታንቾይ ሳሎራ ፕራꬍያ ካፎ ኡባስ ባ ቃላ ꬎቁ ኦꬅድ፥ “ሃ ዪተ! ፆሳ ግብራ ማናዉ እስ በሲ ሺቅተ።
REV 19:18 ይድ ካዎታ አሹዋ፥ ሻላቃታ አሹዋ፥ ዎታዳረታ አሹዋ፥ ፓራታ አሹዋ፥ ፓራታ ቶገይሳታ አሹዋ፥ አሳ ኡባ አሹዋ፥ አይለታ አሹዋ፥ ዎማኖታ አሹዋ፥ ግታታነ ጉꬃታ አሹዋ ሚተ” ያግስ።
REV 19:19 ዶአይ፥ ፓራ ቶግዳይሳራነ እያ ኦላንቾታራ ኦለታናዉ ሳአ ካዎትነ ኤንታ ኦላንቾት እስ በሲ ሺቅዳሽን በአስ።
REV 19:20 ሽን ሄ ዶአይነ እያ ሱንꬃን ማላታታ ኦꬅዳ ዎርዶ ናበይ እያራ እስፈ ኦይከትስ። ሄ ማላታታን ዶኣ ማላይ ደኤይሳታነ እያ ምስልያ ጎይነይሳታ እ ባለꬅስ። ዶአይነ ዎርዶ ናበይ ናምአይካ ዲነን ኤፅያ ታማ አባን ፓፃ የገትዶሶና።
REV 19:21 አትዳይሳት ፓራ ቶግዳይሳ ዶናፐ ከይያ ማሻን ሀይቅዶሶና። ካፎት ኡባይ ኤንታ አሹዋ ምድ ካልዶሶና።
REV 20:1 ዛው ባይና ኦላ ቁልፕያነ ግታ ሳንꬃላታ ባ ኩሸን ኦይክዳ እስ ኪታንቾይ ሳሎፐ ዎꬍሽን በአስ።
REV 20:2 እ ዳውያ ኦይክድ ሙኩሉ ላይꬃስ ቃችስ። ሄ ዳወይ ኮይሮ ሾሻ፥ ዳቡሎሳ ዎይኮ ፃላሄ።
REV 20:3 ኪታንቾይ ዛው ባይና ኦላን እያ የግድ፥ ሙኩሉ ላይꬅ ዉራና ጋካናዉ ካዎተꬃታ ዛር ባለꬆና መላ ቁልፐን ጎርድድ አታምስ። ሄሳፈ ጉየ፥ ዳወይ ጉꬃ ዎደስ ብለታናዉ በሴስ።
REV 20:4 ሄሳፈ ጉየ፥ አራታታነ አራታታ ቦላ ኡትድ ፕርዳና መላ ማት እመትዳይሳታ በአስ። የሱሳስ ማርካትዳ ግሾነ ፆሳ ቃላ ኦድዳ ግሾ ባንታ ቆꬍያ ጎይረትዳ አሳ ሸምፑዋ በአስ። ኤንቲ ዶኣ ዎይኮ ዶኣ ምስልያ ጎይንቦኮና። ኤንቲ ዶኣ ማላ ባንታ ሶምኦን ዎይኮ ባንታ ኩሸን ዎꬅቦኮና። ኤንቲ ሀይቆፐ ደንድድ ክርስቶሳራ እስፈ ሙኩሉ ላይꬅ ሃርዶሶና።
REV 20:5 ሀይስ ኮይሮ ደንዱዋ፤ አትዳ ሀንኮ ሀይቅዳይሳት ሙኩሉ ላይꬃይ ዉራና ጋካናዉ ሀይቆፐ ደንድቦኮና።
REV 20:6 ኮይሮ ደንዱዋስ ቃድ ደኤይሳት አንጀትዳይሳታነ ጌሻታ። ኤንታ ቦላ ናምአንꬆ ሀይቁዋስ ዎልቅ ባዋ። ኤንቲ ፆሳስነ ክርስቶሳስ ካህነ ግዳና፤ እያራ እስፈ ሙኩሉ ላይꬅ ሃራና።
REV 20:7 ሙኩሉ ላይꬃይ ዉርዳፐ ጉየ ፃላሄይ ቃሾፐ ብለታና።
REV 20:8 እ ሳኣ ጋፃፐ ጋፃ ጋካናዉ ደእያ ካዎተꬃታ፥ ኤንትካ፥ ጎገነ ማጎገ ጌተተይሳታ ባለꬅድ ኦላስ ሺሻናዉ ከያና። ኤንታ ፓይዶይ አባ ጋፃን ደእያ ሻፈ መላ።
REV 20:9 ኤንቲ ቢታ ኡባን ላለትድ፥ ጌሻታ ሄራነ ፆሳይ ዶስያ ካታማ ተቅዶሶና። ሽን ታም ሳሎፐ ዎꬍድ ኤንታና ምስ።
REV 20:10 ኤንታ ባለꬅዳ ፃላሄይ፥ ዶአይነ ዎርዶ ናበይ የገትዳ ኤፅያ ዲነ ታማ አባን የገትስ። ኤንቲ ቃማነ ጋላስ መርናዉ ፓፃ ካኤታና።
REV 20:11 ሄሳፈ ጉየ፥ ግታ ቦꬃ አራታ ቦላ ኡትዳይሳ በአስ። ሳእነ ሳሎይ እያ ስንꬃፈ ባቃትዶሶና፤ ኤንቲ ዛር በንትቦኮና።
REV 20:12 ሀይቅዳይሳት፥ ግታትነ ጉꬃት አራታ ስንꬃን ኤቅዳይሳታ በአስ፤ ማፃፋት ዶየትዶሶና፤ ቃስ ደኦ ማፃፋ ግድዳ ሀራ ማፃፍ ዶየትስ። ሀይቅዳይሳት ማፃፋን ፃፈትዳ ባንታ ኦሱዋዳ ፕርዳ ኤክዶሶና።
REV 20:13 አባይ ባ ግዶን ደእያ ሀይቅዳይሳታ እሚስ፤ ሀይቆይነ ስኦለይ ባንታ ግዶን ደእያ ሀይቅዳይሳታ እምዶሶና። እስ እስ አስ ባ ኦሱዋዳ ፕርዳ ኤክስ።
REV 20:14 ያትን፥ ሀይቆይነ ስኦለይ ታማ አባን የገትዶሶና። ሄ ታማ አባይ ናምአንꬆ ሀይቆ።
REV 20:15 ደኦ ማፃፋን እያ ሱንꬃይ ፃፈትቦና አስ ኦንካ ታማ አባን የገትስ።
REV 21:1 ታኒ ኦራꬃ ሳሎነ ኦራꬃ ሳአ በአስ። ኮይሮ ሳሎይነ ኮይሮ ሳእ ꬋይስ፤ አባይካ ꬋይስ።
REV 21:2 ጌሻ ካታምያ፥ ኦራꬃ የሩሳላመይ፥ አዝና ገላናዉ አሌቀታዳ ጊጋዳ ደእያ ማጫሳዳ ሳሎፐ ፆሳ ማታፐ ዱገ ዎꬍሽን በአስ።
REV 21:3 አራታፐ ሀይሳዳ ያግድ፥ ኦድያ ግታ ቃላ ስአስ፤ “ፆሳ ኬꬃይ አሳራ ደኤስ፤ ፆሳይ ባ ቦንቹዋራ አሳራ እስፈ ዳና። ኤንቲ እያ ደረ ግዳና፤ ፆሳይ ባ ሁጰን ኤንታራ ዳና፤ እ ኤንታ ፆሳ ግዳና።
REV 21:4 ፆሳይ ኤንታ አይፈፐ አፉꬃ ኡባ ቁቻና። ህዛፐ ሀይቆይ ዎይኮ ካዮይ ዎይኮ ዋሶይ ዎይኮ ዋየይ ዴና። ጋልአይ ኡባይ አꬍስ” ያግስ።
REV 21:5 አራታ ቦላ ኡትዳይስ፥ “ታኒ ኡባ ኦራꬅ ኦꬃና” ያግስ። ቃስ ዛሪድ ታኮ፥ “ታኒ ኦደይስ አማንይሳነ ቱማ ግድያ ግሾ ፃፋ” ያግስ።
REV 21:6 ቃስ ታኮ፥ “ፖለትስ! ታኒ አልፋነ ኦመጋ፤ ዶመꬅነ ፖሎ። ሳሞትዳ ኦናካ ደኦ ሃꬃ ፑልቶፈ ጋተ ቃንፆና ጮ ኡሻና።
REV 21:7 ፆንያ ኦንካ ሄሳ ኡባ ላታና፤ ታኒ እያዉ ፆሳ ግዳና፤ እካ ታ ናአ ግዳና።
REV 21:8 ሽን ያሻንቾታ፥ አማነቶናይሳታ፥ ቱናታ፥ ሸምፖ ዎይሳታ፥ ላይማተይሳታ፥ ብተይሳታ፥ ኤቃ ጎይነይሳታነ ዎርዳንቾታ ቃዳይ ዲነይ ኤፅያ ታማ አባን ግዳና። ሄስ ናምአንꬆ ሀይቆ” ያግስ።
REV 21:9 ላፑን ዉርሰꬃ ቦሻት ኩምዳ ላፑን ፁአታ ኦይክዳ ላፑን ኪታንቾታፐ እሶይ ታኮ ይድ፥ “ሃያ፥ ታኒ ነና ገሎስ ጊግዳ ዶርሳ ማችዉ በሳና” ያግስ።
REV 21:10 ኪታንቾይ ታና ዙማ ሁጰ ጌሻ አያናን ከስድ፥ ጌሻ ካታማይ፥ የሩሳላመይ፥ ሳሎፐ ፆሳ ማታፐ ዱገ ዎꬍሽን በስስ።
REV 21:11 ሄ ካታማይ ፆሳ ቦንቾን ፖኤስ። ሄ ካታማ ፖኦይ ያስጵደ ጌተትያ አልኦ ሹቻ መላ፤ ጌሻ ብርለዳ ጶሌስ።
REV 21:12 ሄ ካታማ ድርሳይ ዎልቃማነ አዱሰ። እያዉ ታማነ ናምኡ ፐንገትነ ሄ ፐንገታ ናግያ ታማነ ናምኡ ኪታንቾት ደኦሶና። ፐንገታ ቦላ ታማነ ናምኡ እስራኤለ ዘረꬃታ ሱንꬃይ ፃፈትስ።
REV 21:13 ዶሎሀ ባጋራ ሄꬑ ፐንገት፥ ፑደሀ ባጋራ ሄꬑ ፐንገት፥ ዱገሀ ባጋራ ሄꬑ ፐንገትነ ዉሎሀ ባጋራ ሄꬑ ፐንገት ደኦሶና።
REV 21:14 ካታማ ግምበ ድርሳይ ታማነ ናምኡ ሹቻ ባሶታ ቦላ ኤቅስ። ኤንታ ቦላ ታማነ ናምኡ ዶርሳ ሀዋረታ ሱንꬃይ ፃፈትስ።
REV 21:15 ታዉ ኦድያ ኪታንቹዋስ፥ ካታማ፥ እያ ፐንገታነ እያ ድርሳ ዋꬍያ ዎርቃ ፃምአይ ደኤስ።
REV 21:16 ካታማስ ኦይዱ ማዛነት ደኦሶና፤ ካታማ ጌሳይነ ጎምፓይ እስ ግና። ኪታንቾይ ካታማ ባ ፃምአን ዋꬍን፥ ካታማይ ታማነ ናምኡ ሙኩሉ ክሎ ምትረ ግድስ፤ ካታማ ጌሳይ፥ ጎምፓይነ ꬎቃተꬃይ እስ ግና።
REV 21:17 ኪታንቾይ ቃስ ድርሳ ዋꬍን፥ ኪታንቾይ ጎኤትያ አሳ ኩሸን እስ ፄታነ ኦይታማነ ኦይዱ ዋꬋ ግድስ።
REV 21:18 ካታማ ድርሳይ ያስጵደ ጌተትያ ሹቻን ድረትስ። ካታማይ ማስቶተዳ ጶልያ ዋላህ ባይና ዎርቃን ኦሰትስ።
REV 21:19 ካታማ ድርሳ ባሶይ ኡባ ቆሞ ቦንቸትዳ ሹቻን አሌቀትስ። ኮይሮ ሂፀትዳ ሹቻይ ያስጵደ፥ ናምአንꬆይ ሳንፓረ፥ ሄꬓንꬆይ ከልቀዶነ፥ ኦይዳንꬆይ ባሉረ፥
REV 21:20 እቻሻንꬆይ ሳርዶንክሳ፥ ኡሱፑንꬆይ ሳርድዮነ፥ ላፑንꬆይ ክርስትሎበ፥ ሆስፑንꬆይ ብርለ፥ ኡዱፉንꬆይ ቶጳዘ፥ ታማንꬆይ ክርስጵራስሰ፥ ታማነ እስንꬆይ ያክንተ፥ ታማነ ናምአንꬆይ አመተስፅኖሳ።
REV 21:21 ታማነ ናምኡ ፐንገታስ ታማነ ናምኡ አልኦ ሹች ደኤስ። እስ እስ ፐንገይ እስ አልኦ ሹቻን ኦሰትስ። ካታማ ዎጋ ኦገይ ማስቶተዳ ጶልያ ዋላህ ባይና ዎርቃፈ ኦሰትስ።
REV 21:22 ጎዳይ፥ ኡባፈ ዎልቃማ ፆሳይነ ዶርሳይ ካታማስ ኬ ግድያ ግሾ፥ ታ ሄ ካታማን ፆሳ ኬꬅ በአብከ።
REV 21:23 ፆሳ ቦንቾይ ሄ ካታማስ ፖእያ ግሾነ ዶርሳይ እያዉ ፆምፐ ግድያ ግሾ ካታማስ አዋ ዎይኮ አጌና ፖኦ ኮሸና።
REV 21:24 ካዎተꬃት ሄ ካታማ ፖኦን ሄመታና፤ ካዎትካ ባንታ ቦንቹዋ ያ ኤሀና።
REV 21:25 ቃም ያን ባይና ግሾ ካታማ ፐንገት ኡባ ጋላስ ዶያ ግዳና፤ ኡባራካ ጎርደቶኮና።
REV 21:26 ካዎተꬃታ ግታተꬃይነ ቦንቾይ ሄ ካታማ ያና።
REV 21:27 ዶርሳ ደኦ ማፃፋን ሱንꬃይ ፃፈትዳይሳታ ፃላል አትሽን፥ ቱናባ ዎይኮ ዬላያባ ኦይ ዎይኮ ዎርዶተይ ኦንካ ሄ ካታማ ገለና።
REV 22:1 ያትድ፥ ኪታንቾይ ታና ፆሳ ካዎተꬃ አራታፐነ ዶርሳ ካዎተꬃ አራታፐ ጎግያ ማስቶተዳ ጶልያ ደኦ ሃꬃ ሻፋ በስስ።
REV 22:2 ሄ ሻፋይ ካታማ ኦግያ ግዶራ ዱገ ጎጌስ። ሻፋፐ ሄፍንꬃ ባጋራነ ሀፍንꬃ ባጋራ አጌናን እስ ቶሆ፤ ላይꬃን ታማነ ናምኡ ቶሆ አይፍያ ደኦ ምꬅ ደኤስ። ሄ ምꬃ ቦንጮይ ካዎተꬃታ ኡባ ሀርገፈ ፓꬄስ።
REV 22:3 ሄ ካታማን አይብ ባደꬅካ ዴና። ፆሳ ካዎተꬃ አራታይነ ዶርሳ ካዎተꬃ አራታይ ሄ ካታማን ዳና። ፆሳ አይለት ፆሳስ ኦꬃና።
REV 22:4 ኤንቲ እያ ሶምኡዋ በአና፤ እያ ሱንꬃይ ኤንታ ሶምኦን ፃፈታና።
REV 22:5 ህዛፐ ቃም ዴና፤ ጎዳ ፆሳይ ኤንታዉ ፆምፐ ግድያ ግሾ ኤንታዉ ፆምፐ ዎይኮ አዋ ፖኦ ኮሸና። ኤንቲ መር መርናዉ ካዎታና።
REV 22:6 ኪታንቾይ ታኮ፥ “ሀ ታ ኦድያ ቃላይ ቱማነ አማንይሳ። ጎዳይ፥ ናበታ ባ ጌሻ አያናን ኪትያ ፆሳይ፥ ማታን ሀናናባ ባ አይለታ በሳናዉ ባ ኪታንቹዋ ኪትስ” ያግስ።
REV 22:7 የሱሲ፥ “ሄኮ ታ ኤለሳዳ ያና፤ ሀ ማፃፋን ደእያ ትንብተ ቃላ ናግያ ኦንካ አንጀትዳይሳ” ያግስ።
REV 22:8 ታኒ፥ ዮሃንስ፥ ሄ ኡባባ ስአስ፤ በአስ። ታኒ ሄሳ ስእዳ ዎደነ በእዳ ዎደ ሄሳ ታና በስዳ ኪታንቹዋ ጎይናናዉ እያ ቶሁዋ ቦላ ኩንዳስ።
REV 22:9 ሽን ኪታንቾይ ታኮ፥ “ሄሳ ኦꬆፋ! ታኒ ኔዳ፥ ናበታዳ ነ እሻታዳነ ሀ ማፃፋን ደእያ ኡባ ኪተትያ አይለታ መላ፤ ፆሳ ጎይና” ያግስ።
REV 22:10 ኪታንቾይ ዛሪድ፥ “ሀ ኡባይ ፖለትያ ዎደይ ማታትዳ ግሾ ሀ ማፃፋን ፃፈትዳ ትንብተ ቃላ ማታመን ጎርዶፋ።
REV 22:11 ኢታ ኦይ ጉጅድ ኢታ ኦꬆ፤ ቱነይ ጉጅድ ቱኖ። ሎኦ ኦይ ጉጅድ ሎኦ ኦꬆ፤ ጌየይ ጉጅድ ጌዮ” ያግስ።
REV 22:12 የሱሲ፥ “ሄኮ፥ ታኒ ኤለሳዳ ያና። እሱዋስ እሱዋስ እያ ኦሱዋዳ እማናዉ ታ ዎይቶይ ታራ ደኤስ።
REV 22:13 ታኒ አልፋነ ኦመጋ፤ ኮይሮነ ዉርሰꬅ፤ ዶመꬅነ ፖሎ።
REV 22:14 “ባንታ ማኡዋ ሜጭድ ጌሸይሳት አንጀትዳይሳታ። ደኦ ምꬄ አይፍያ ማናዉነ ካታማ ፐንግያራ ገላናዉ ኤንታዉ ማት እመትስ።
REV 22:15 ሽን ካናት፥ ብተይሳት፥ ላይማተይሳት፥ ሸምፖ ዎይሳት፥ ኤቃ ጎይነይሳት፥ ዎርዶ ዶሰይሳትነ ኦይሳት ካረን ደኦሶና።
REV 22:16 “ታኒ፥ የሱሲ፥ ሀ ማርካተꬃ ህንተዉ፥ ዎሳ ኬꬃታስ ኦዳና መላ ታ ኪታንቹዋ ኪታስ። ታኒ ዳዊታ ሼሽነ ኮቸ። ታኒ ፖእያ ጉራ ባካላ” ያግስ።
REV 22:17 ጌሻ አያናይነ ገላናዉ ጊግዳ ማጫስያ፥ “ሃያ” ያጎሶና። ቃስ ሀይሳ ስእያ ኦንካ፥ “ሃያ” ያጎ። ሳሞትዳ ኦንካ ሃዮ፤ ደኦ ሃꬃ ኮይያ ኦንካ ጮ ኤኮ።
REV 22:18 ታኒ ሀ ማፃፋን ፃፈትዳ ትንብተ ቃላ ስእያ ኦናካ ዞራይስ። ኦንካ ሀ ቃላ ቦላ እስባ ጉጅኮ፥ ፆሳይ ሀ ማፃፋን ፃፈትዳ ቦሻ እያ ቦላ ጉጃና።
REV 22:19 ኦንካ ማፃፋን ደእያ ትንብተ ቃላፐ እስባ ፓጭስኮ፥ ፆሳይ ሀ ማፃፋን ፃፈትዳ ደኦ ምꬃ አይፍያፐነ ጌሻ ካታማፐ እያ ቃዳ ፓጭሳና።
REV 22:20 ሀ ኡባ ማርካተይስ፥ “ቱማ፥ ታኒ ኤለሳዳ ያና” ያጌስ። አምንእ፤ ጎዳ የሱሳ፥ ሃያ።
REV 22:21 ጎዳ የሱስ ክርስቶሳ አꬎ ኬሀተꬃይ ህንተ ኡባራ ግዶ። አምንእ።
