﻿ፍልሞና ኪታ.
1.
ታኒ ጳዉሎስ፥ የሱስ ክርስቶሳ ግሾ ቃሾን ደኤይስነ ኑ እሻ ፅሞትዮስ፥ ኑራ ኦꬅያ ኑኒ ዶስያ ፍልሞናስ፥ 
ነ ሶን ሺቅያ ዎሳ ኬꬃታስ፥ ኑ ምቸ አፍብያስነ ኑራ እስፈ ደእያ ዎታዳረ አርክጳሳስ ፃፍዳ ኪታ። 
ፆሳ ኑ አዋፐነ ኑ ጎዳ የሱስ ክርስቶሳፐ አꬎ ኬሀተꬃይነ ሳሮተꬃይ ህንተዉ ግዶ። 
ኔኒ ጌሻታ ዶሰይሳነ ጎዳ የሱሳ አማነይሳ ታኒ ስእያ ግሾ፥ ፆሳ ዎሳሸ ነና ቆፕያ ዎደ ኡባን ታ ፆሳ ጋላታይስ። 
ኔኒ ነ አማኑዋ ሀራታስ ሻከይስ ኑስ ክርስቶስ የሱሳ ባጋራ ያ ሎኦባ ኡባ ኤርሳና መላ ታኒ ፆሳ ዎሳይስ። 
ጌሻታ ዎዛናይ ነ ኦሱዋን ምንዳ ግሾ፥ ታ እሻዉ፥ ታኒ ነ ሲቁዋን ዳሮ ኡፋይስነ ምንꬆ ደማስ። 
ሄሳ ግሾ፥ ኔኒ ኦꬃናዉ በሲያባ ኦꬃና መላ ነና ኪታናዉ ክርስቶሳ ባጋራ ታዉ ምኖተꬃይ ደኤስ። 
ታኒ፥ ጭማይ ጳዉሎስ፥ ክርስቶስ የሱሳስ ሀእካ ቃሾን ደኤይስ፥ ሲቆን ነና ዎሳይስ። 
ታኒ ቃሾን ደአሸ እያዉ ዞርያ አዋ ግዳዳ ታ ናኣ አናስሞሳ ግሾ ነና ዎሳይስ። 
እ ካሰ ነና ማደና፥ ሽን ሀእ ነናካ ታናካ ቱማ ማድያ አስ። 
ታኒ ዎዛናፐ ዶስያ አናስሞሳ ኔኮ የዳይስ። ታኒ ዎንገላ ግሾ ቃሸትዳሽን፥ ነ ግሾ ታዉ ኦꬅድ ታና ማዳና መላ ታ ማታን እያ አሻናዉ ኮያስ። 
ሽን ነ ሸነዳ ኦꬃናዉ ኮያስፐ አትሽን፥ ኔራ ዞረቶና ዎልቃን አይኮካ ኦꬃናዉ ኮይከ። 
አናስሞስ ጉꬃ ዎደ ኔፐ ሻከትዳይስ፥ ኦን ኤር ስሚድ ኡባ ዎደ ኔራ ደኦና አገና። 
ህዛ፥ ሀይሳፈ ጉየ አናስሞስ አይለ ግዶናሽን፥ አይለፈ እ ዳሮ አꬌስ። እ ታዉ አይ መላ ሲቆ እሸ! ቃስ እ ነዉ አሳ ባጋራካ ጎዳ ባጋራካ አꬍዳ እሻ። 
ህዛ፥ ኔኒ ታና ነ ላገ ግያባ ግድኮ ታና ሞከይሳዳ እያ ሞካ። 
እ ነና ቆህዳባይ ዎይኮ እ አጮትዳባይ ደእኮ ታፐ ኤካ። 
ሄ አጩዋ ታ ቃንፃና ጋዳ ታኒ ጳዉሎስ፥ ታ ኩሸን ፃፋይስ። ኔኒ ታዉ ነ ሸምፑዋ አጮታ ኡትዳይሳ ታኒ ነና አኬክሳናዉ ኮሸና። 
ታ እሻዉ፥ ጎዳ ባጋራ ኔፐ ማደ ደማናዉ ኮያይስ። ክርስቶሳ ባጋራ ታና ምንꬃ። 
ታኒ ግዳይሳፈ ዳሮ ኔኒ ኦꬃናይሳ ኤራዳ ቃስ ነ ታዉ ኪተታናይሳ አማናዳ ሀይሳ ፃፋይስ። 
ፆሳይ ህንተ ዎሳ ስእድ ታና ህንተኮ ጉየ ዛራና ጋዳ ቆፕያ ግሾ፥ ታዉ እማꬅ ሸምፕያ ኬꬅ ጊግሳ። 
ክርስቶስ የሱሳ ግሾ ታራ ቃሾን ደእያ ኤጳፍር ነና ሳሮ ሳሮ ጌስ። 
ቃስ ታራ እስፈ ኦꬅያ ማርቆስ፥ አርስፅሮኮስ፥ ዴማስነ ሉቃስ ነና ሳሮ ጎሶና። 
ጎዳ የሱስ ክርስቶሳ አꬎ ኬሀተꬃይ ህንተ አያናራ ግዶ። 
