﻿ቆላስያሳ ኪታ.
1.
ፆሳ ሸነን ክርስቶስ የሱሳ ሀዋረ ግድዳ ጳዉሎስነ ኑ እሻ ፅሞትዮስ፥ 
ቆላስያሳ ካታማን ደእያ ክርስቶሳን ጌሻታስነ አማነትዳ አሳስ ፃፍዳ ኪታ። ፆሳ ኑ አዋፐ አꬎ ኬሀተꬃይነ ሳሮተꬃይ ህንተዉ ግዶ። 
ኑኒ ህንተዉ ዎስያ ዎደ ፆሳ ኑ ጎዳ፥ የሱስ ክርስቶሳ አዋ ኡባ ዎደ ጋላቶስ። 
ኑኒ ክርስቶስ የሱሳን ደእያ ህንተ አማኑዋነ ጌሻታ ኡባስ ደእያ ህንተ ሲቁዋ ስእዳ። 
ሄሳ ህንተ ኦꬅዳይ ህንተ ኡፋይሳይ ሳሎን ህንተዉ ናገትዳ ግሾሳ። ህንተ ቱማ ኪታ ግድዳ ዎንገላ ኮይሮ አማንዳ ዎደ ሄ ኡፋይሳ ስእደታ። 
ህንተ ሄ ዎንገላ ስእዳ ዎደነ ፆሳ አꬎ ኬሀተꬃ ቱማ ሻክ ኤርዳ ዎደፐ ዶምድ ህንተ ግዶን ሀንዳይሳዳ ቢታ ኡባን ድጭሸነ አይፍሸ ደኤስ። 
ህንተ ሄሳ ኑራ እስፈ ክርስቶሳስ ኦꬅያ አማነትዳ፥ ዶሰትዳ ኤጳፍራፐ ታማርደታ። 
እ ሄሳ ቦላ ጉጅድ አያናይ ህንተዉ እምዳ ሲቁዋባ ኑስ ኦድስ። 
ሄሳ ግሾ፥ ኑኒ ህንተባ ስእዳ ጋላሳፐ ዶምድ፥ ፆሳይ ባ ሸንያ ህንተና በሳና መላነ፥ ጌሻ አያናይ እምያ ኤራተꬃንነ ጭንጫተꬃ ኡባን ህንተና ኩንꬃና መላ ኡባ ዎደ ህንተዉ ፆሳ ዎሶስ። 
ሄሳዳካ፥ ህንተ፥ ጎዳይ ኮየይሳዳ ዳና መላ፥ ኡባ ዎደ እያ ኡፋይሳና መላ፥ ሎኦ ኦሶ ኡባን ህንተ አይፈ አይፋና መላነ ፆሳ አꬅድ ኤርሸ ድጫና መላ ፆሳ ዎሶስ። 
ፆሳ ቦንቾ ዎልቃይ ህንተ ኡባባ ገንጫናዳነ ዳንዳአናዳ ባ ምኖተꬃ እምድ ህንተና ኡፋይሶ። 
ቃስ ጌሻታ ፖኦ ካዎተꬃ ላታና መላ ህንተና ኦꬅዳ አዋ ጋላትተ። 
እ ኑና ꬉማ ዎልቃፈ አሽድ ባ ዶስያ ናኣ ካዎተꬃኮ ኤህስ። 
እያን ዎዘትድ እያ ሱꬃን ናጋራ አቶተꬅ ደምዳ። 
ክርስቶስ በንቶና ፆሳስ ቱማ ሌምሶ። እ መተꬃ ኡባፈ ባይራ። 
ኡባባይ እያ ባጋራ መትስ። በንትያባትነ በንቶናባት፥ ዎልቃትነ ጎዳት፥ ሃረይሳትነ ማታ አዋት፥ ሳሎንነ ሳአን ደእያ ኡባይ እያዉነ እያ ባጋራ መትስ። 
እ ኡባባፐ ካሰ ደኤስ። ኡባባይ እያን ባ በሳን በሳን ኦይከትድ ደኤስ። 
እ ባ አሳተꬅ ግድዳ ዎሳ ኬꬃስ ሁጰ። እ ኡባፈ ቦላ ግዳናዉ ሀይቆፐ ደንዶን ስንነ ባይራ። 
ፆሳይ ባ ኩመꬃ ፆሳተꬃራ እያን ዳናዉ ኮይስ። 
ቃስ ማስቃልያ ቦላ ጉስዳ ባ ናኣ ሱꬃን ሳሮተꬅ መꬍድ ሳሎንነ ሳአን ደእያ ኡባ እያ ባጋራ ባራ ስገꬅስ። 
ሀይሳፈ ካሰ ህንተ ቆፋ ኢታተꬃይ ህንተና ፆሳፈ ሻክስነ እያራ ሞርከ ኦꬅስ፤ ህንተ ኦሶይካ ኢታ። 
ሽን ሀእ ክርስቶስ አሾን ሀይቅዳ ሀይቁዋ ባጋራ ፆሳይ ህንተና ባራ ስገꬅድ፥ ጌሻታ፥ ቦረይ ባይናይሳታነ ፅሎታ ኦꬅስ። 
ህንተ፥ ህንተ አማኑዋን ቃፆና ምንድነ ፃጵድ ዳናዉ በሴስ። ህንተ ዎንገላ ቃላ ስእዳ ዎደ ኤክዳ ኡፋይሳ ምንꬅ ኦይክተ። ሄ ዎንገላይ ህንተ ስእዳይሳነ ቢታ ኡባን ሳባከትዳይሳ። ታ፥ ጳዉሎስካ ሀ ዎንገላስ ኦሳንቾ ግዳስ። 
ታኒ ህንተ ግሾ ሀእ ኤክያ ዋያን ኡፋይታይስ። ክርስቶስ እያ አሳተꬅ ግድዳ ዎሳ ኬꬃስ ኤክዳ ዋይያ ታኒ ታ አሹዋን ፖላይስ። 
ፆሳ ቃላ ህንተዉ ፖላዳ ኦዳና መላ ታዉ እመትዳ ማታን ዎሳ ኬꬃስ ኦሳንቾ ግዳስ። 
ሀ ቃላይ ካሰ አꬍዳ ዎድያን የለተꬃ ኡባፈ ጌምድ ደእስ። ሽን ሀእ ፆሳይ ሀ ፁራ አማንያ ኡባስ ቆንጭስስ። 
ፆሳይ አይሁደ ግዶና አሳ ግዶን ሀ ፁራ ቦንቾ ዱረተꬃ ቆንጭስስ። እካ ቦንቾ ኡፋይስ ግድዳ ህንተ ግዶን ደእያ ክርስቶሳ። 
ሄሳ ግሾ፥ እስ እስ አስ ክርስቶሳን ኩመꬃ አስ ኦꬅድ ሺሻናዉ ጭንጫተꬃ ኡባን አሳ ታማርሶንነ ዞረን ክርስቶሳባ ሳባኮስ። 
ፆሳይ ባ ግታ ዎልቃን ታናን ኦꬅያ ግሾ፥ ሀእ ጋካናዉ እያ ዎልቃን ባፀታይስነ ዳቡራይስ። 
