﻿1 ቆሮንቶሳ.
2.
ታ እሻቶ፥ ታኒ ኮይሮ ፆሳ ቃላ ህንተዉ ኦዳሸ ይዳ ዎደ፥ ዶና ብላተꬃንነ ጭንጫተꬃን ያቢከ። 
ታኒ ህንተራ ደእያ ዎደ ማስቃልያ ቦላ ካቀትዳ የሱስ ክርስቶሳፐ አትሽን፥ ሀራባ ኤራናዉ ኮይከ ጋዳ ታ ቆፋ ቃቻስ። 
ታ ህንተራ ደእያ ዎደ ዳቡራን፥ ያሻንነ ዳሮ ኮኮርሳን ደአስ። 
ታ ኪታይነ ታ ትምርተይ ዶና ብላተꬃንነ ጭንጫተꬃን ግዶናሽን፥ ጌሻ አያና ዎልቃ ቆንጭሰꬃና። 
ሄስካ፥ ህንተ አማኖይ ፆሳ ዎልቃናፐ አትሽን፥ አሳ ጭንጫተꬃን ዘምፖና መላሳ። 
አያና ደኦን ድጭዳይሳታስ ኑኒ ጭንጫተꬃ ቃላን ኦዶስ። ሽን ሄ ጭንጫተꬃይ፥ ሀ ሳአ ጭንጫተꬅ ዎይኮ ꬋያናዉ ደእያ ሀ ሳአ ሃረይሳታ ጭንጫተꬅ ግደና። 
ሽን ኑኒ ኦድያ ጭንጨተꬃይ፥ ዳሮ ዎደፐ ስን ፆሳይ ኑ ቦንቹዋስ ጊግስዳይሳነ ጌምድ ደእያ ፁራ ጭንጫተꬅ። 
ሀ ሳኣ ሃረይሳታፐ ኦንካ ሀ ጭንጫተꬃ ኤርቦኮና። ኤንቲ ኤርዳባ ግድያኮ፥ ቦንቾ ጎዳ ማስቃልያ ቦላ ካቆኮና። 
ሽን ጌሻ ማፃፋን፥ “አይፈይ በእቦናባ፥ ሀይꬅ ስእቦናባ፥ ዎዛን ቆፕቦናባ፥ ፆሳይ ባና ዶሰይሳታስ ጊግስስ” ያጌስ። 
ፆሳይ ባ ፁራ ባ አያና ባጋራ ኑስ ቆንጭስስ። ጌሻ አያናይ ሀር አቶሽን፥ ጌምዳ ፆሳ ፁራ ኡባ ፕልጌስ። 
አሳን ደእያ አሳ አያናፐ አትሽን፥ አሳባ ኦንካ ኤረና። ሄሳዳካ፥ ፆሳባ፥ ፆሳ አያናፐ አትሽን፥ ኦንካ ኤረና። 
ፆሳይ ኑስ ጮ እምዳባ ኑ ኤራና መላ ፆሳ አያና ኤክዳፐ አትሽን፥ ሀ ሳአ አያና ኤክቦኮ። 
ኑኒ አያናባ፥ አያና አሳታስ አሳ ጭንጫተꬃን ግዶናሽን፥ ፆሳ አያናይ እምያ ጭንጫተꬃን ታማርሶስ። 
ጌሻ አያን ባይና አስ ፆሳ አያና እሞታታ ኤከና። ሄስ እያዉ ኤያተꬅ፤ ኡባይ ጌሻ አያናን ፕልገትያ ግሾ፥ እ ኤራናዉ ዳንዳኤና። 
ጌሻ አያን ደእያ አስ ኡባባ ፕልጌስ፥ ሽን እያ ኦንካ ፕልገና። 
ጌሻ ማፃፋን፥ “ጎዳ ዎዛና ኤረይ ኦኔ? እያ ዞራናዉ ዳንዳኤይ ኦኔ?” ጌተትድ ፃፈትዳይሳ መላ። ሽን ኑስ ክርስቶሳ ዎዛን ደኤስ። 
