﻿ማርቆሳ ዎንገላ.
1.
ሀይስ ፆሳ ናአ የሱስ ክርስቶሳ ዎንገላ ዶመꬅ። 
ናብያ እሳያስ ፃፍዳ ማፃፋን ፆሳይ፥ “ሄኮ፥ ታኒ ታ ኪታንቹዋ ታኒ ኔፐ ስን የዳና። እ ነ ኦግያ ጊግሳና። 
እሶይ መላ ቢታን ባ ቃላ ꬎቁ ኦꬅድ፥ ‘ጎዳ ኦግያ ጊግስተ፤ እ ሄመታና ሆሮጋ እያዉ ሱርስተ ግስ’ ” ያጌስ። 
ፃማቅያ ዮሃንስ አሳ ፃማቅሸ፥ “ህንተ ናጋራፐ ስሚድ ፃማቀትተ፤ ፆሳይ ህንተ ናጋራ አቶ ጋና” ያግድ ቃላ ኦድሸ መላ ቢታፈ ይስ። 
ይሁዳ ቢታን ደእያ አሳ ኡባይነ የሩሳላመ ካታማ አሳ ኡባይ ዮሃንሳኮ ዮሶና። ባንታ ናጋራ ፓፅን፥ ዮሃንስ ኤንታ ዮርዳኖሰ ሻፋን ፃማቄስ። 
ዮሃንስ ግማለ እክሰፐ ዳደትዳ አፍላ ማኤስ። ባ ፄሳን ዳፎ ዳንጬስ፤ ቃስ ቦለነ ደገራ ኤስ ሜስ። 
ዮሃንስ ቃላ ኦድሸ፥ “ታፐ ጉየራ ዳሮ ምነይስ ዬስ። ሀር አቶሽን፥ ታኒ እያ ጫማ ዎዶሩዋ ሆካዳ ብላናዉ በስከ። 
ታኒ ህንተና ሃꬃን ፃማቃይስ፥ ሽን እ ህንተና ጌሻ አያናን ፃማቃና” ያግስ። 
የሱሲ ሄ ዎደ ጋልላ ቢታን ደእያ ናዝረተ ካታማፐ ይን፥ ዮሃንስ ዮርዳኖሰ ሻፋን እያ ፃማቅስ። 
የሱሲ ሃꬃፈ ከይያ ዎደ ሳሎይ ዶየትን፥ ጌሻ አያናይ ባ ቦላ ሆለዳ ዎꬍሽን በእስ። 
ቃስ ሳሎፐ፥ “ታኒ ዶስያ ታ ናአይ ነና፤ ታ ነናን ኡፋይታይስ” ግያ ቃላይ ይስ። 
ኢራ ጌሻ አያናይ የሱሳ መላ ቢታ ኤፍስ። 
የሱሲ መላ ቢታን ፃላሄን ፓጨትሸ ኦይታሙ ጋላስ ጋምእስ። ዶአታራ ደእስ፥ ሽን ኪታንቾት ይድ እያ ማድዶሶና። 
ዮሃንስ ቃሸትዳፐ ጉየ፥ የሱሲ ፆሳ ካዎተꬃ ዎንገላ ኦድሸ ጋልላ ቢታ ብስ። 
ያን፥ “ዎደይ ጋክስ፤ ፆሳ ካዎተꬃይ ማታትስ። ህንተ ናጋራፐ ስሚድ፥ ዎንገላን አማንተ” ያግስ። 
የሱሲ ጋልላ አባ ማታራ አꬍሸ፥ ሞሎ ኦይክያ፥ ስሞናነ እያ እሻ እንድርያሳ፥ ባንታ ግትያ አባን የገይሳታ በእስ። 
ኤንታኮ፥ “ታና ካልተ፤ ታኒ ህንተና አሰ ኦይꬁ ታማርሳና” ያግስ። 
ኤንቲ ኤለስድ ባንታ ግትያ የግ አግድ የሱሳ ካልዶሶና። 
የሱሲ ጉꬅ ስን ብድ፥ ናምኡ እሻታ ዛብድዮሳ ናይታ፥ ያይቆባነ ዮሃንሳ ዎጎሉዋ ግዶን ባንታ ግትያ ጊግሰይሳታ በእስ። 
እ ኤንታ በእዳ መላ ፄግስ። ኤንቲ ባንታ አዋ ዛብድዮሳ፥ እያ ኦሳንቾታራ ዎጎሉዋ ግዶን የግ አግድ የሱሳ ካልድ ብዶሶና። 
ኤንቲ ቅፍርናሆማ ካታማ ገልዶሶና። ሳምባት ገልዳ መላ የሱሲ ኤለስድ አይሁደ ዎሳ ኬꬅ ገልድ ታማርሶ ኦይክስ። 
ማታራ ደእያ አሳዳ ታማርሰስፐ አትሽን፥ ህገ አስታማረታꬆ ታማርሶና ግሾ፥ አሳይ እያ ትምርትያን ማላለትዶሶና። 
ሄ ዎደ ቱና አያናይ ኦይክዳ እስ ኡራይ አይሁደ ዎሳ ኬꬅ ገልድ ባ ቃላ ꬎቁ ኦꬅድ፥ 
“ናዝረተ የሱሳ፥ ኔኒ ኑፐ አይ ኮያይ? ኑና ꬋይሳናዉ ያዲ? ኔኒ ኦነኮ ታ ኤራይስ፤ ኔኒ ፆሳ ጌሻ ግድኪ?” ያግስ። 
የሱሲ ሄ ቱና አያና፥ “ሀይዛ፥ ሀ አድያፈ ከያ” ግድ ኪትስ። 
ቱና አያናይ ኡራ ዳፈረꬅድ፥ ዋስድ እያፐ ከይስ። 
አሳ ኡባይ ማላለትድ፥ “ሀይስ አይቤ? ሀ ኡራይ ባ ማታን ሀር አቶሽን ቱና አያናታካ ኪቴስ። ኤንቲ እያዉ ኪተቶሶና፤ ሀይስ አይብ ኦራꬃ ትምርቴ?” ግድ፥ ባንታ ግዶን እሶይ እሱዋ ኦይችዶሶና። 
የሱሳ ሱንꬃይ ኤለስድ ጋልላ ቢታን ደእያ ሄራ ኡባን ከይስ። 
የሱሲ አይሁደ ዎሳ ኬꬃፈ ከይድ፥ ያይቆባራነ ዮሃንሳራ ስሞና ሶነ እንድርያሳ ሶ ብስ። 
ስሞና ማቸ አይያ ቆፆ ምሻ ሀርጋዳ ዝንእዳሮ የሱሲ ያ ጋክያ ዎደ እያዉ ኦድዶሶና። 
እ ኢኮ ሺቅድ፥ እ ኩሽያ ኦይክድ፥ እዮ ደንꬅድ ኤስስ። ቆፆይነ ምሻይ አግን እያ ኤንታ ሞካሱ። 
ሀርግዳ አሳ ኡባነ ቱና አያናት ኦይክዳ አሳ ኡባ ኦማርስ አዋይ ዉልዳፐ ጉየ፥ እያኮ ኤህዶሶና። 
ካታማን ደእያ አሳ ኡባይ ሄ ኬꬃ ካረ ሺቅዶሶና። 
የሱሲ ዱማ ዱማ ሀርገን ኦይከትዳ ዳሮ አሳ ፓꬅድ፥ ዳሮ ቱና አያናታ ከስስ። እ ኦነኮ ቱና አያናት ኤርዳ ግሾ፥ ኤንታ ኦድሶና ድግስ። 
የሱሲ ዎንታ ጉራ ደንድድ፥ አስ ባይና በሲ ብድ፥ ያን ፆሳ ዎስስ። 
ስሞንነ እያራ ደኤይሳት እያ ኮይሸ ብዶሶና። 
ኤንቲ እያ ደምድ፥ “አሳ ኡባይ ነና ኮዬስ” ያግዶሶና። 
የሱሲ ቃስ ኤንታ፥ “ሄ ሄራን ደእያ ሀራ ካታማታ የꬍተ። ታኒ ይዳይ ዎንገላ ኦዳናዉ ግድያ ግሾ ያንካ ቃላ ኦዳናዉ በሴስ” ያግስ። 
አይሁደ ዎሳ ኬꬃታን ቃላ ኦድሸነ ቱና አያናታ ከስሸ፥ ጋልላ ቢታ ኡባን ዩይስ። 
ባሮይ ኦይክዳ እስ ኡራይ የሱሳኮ ይድ፥ እያ ስንꬃን ጉልባትድ፥ “ኔኒ ኮይኮ ታና ጌሻናዉ ዳንዳኣሳ” ያግድ ዎስስ። 
የሱሲ እያዉ ቃትድ፥ ባ ኩሽያ የድድ እያ ቦችድ፥ “ታኒ ኮያይስ፥ ጌይያ” ያግስ። 
ኤለስድ ባሮይ ኡራ የድን ኡራይ ፓፅስ። 
የሱሲ ኡራ ምንꬅ ናግስድ ከስ የድስ። 
የሱሲ እያ፥ “ነና ኤራ፥ ሀይሳ ኦደስካ ኦዶፓ። ሽን ባዳ ነ አሳተꬃ ካህነ በሳ። ኔኒ ሀእ ጌሽ ግድዳይሳ አሳ ኤርሳናዉ፥ ሙሰይ ኪትዳ ያርሹዋ ያርሻ” ያግስ። 
ሽን ኡራይ ብድ፥ ጉታ ኡባን አሳ ኡባስ ኦድስ። ሄሳ ግሾ፥ የሱሲ ቆንጨ ከይድ፥ ካታማ ገላናዉ ዳንዳእቤና። ሽን አስ ባይና በሳን ጋፃን ደእስ፤ ቃስ አሳይ ኡባ በሳፈ እያኮ ዮሶና። 
