﻿ዛካርያሳ ማፃፋ.
1.
ዳርዮስ ካዎትዳ ናምአንꬆ ላይꬃን፥ ሆስፑንꬆ አጌናን፥ ጎዳ ቃላይ እዶ ናኣ፥ ባራካ ናኣ፥ ናብያ ዛካርያሳኮ ይስ። 
“ጎዳይ ህንተ ማይዛታ ቦላ ዳሮ ሀንቀትስ። 
ሽን ሀእ አሳስ ሀይሳዳ ያጋዳ ኦዳ፦ ‘ታኮ ስምተ፤ ታኒ ህንተኮ ስማና’ ያጌስ ኡባፈ ዎልቃማ ጎዳይ። 
ካሰ ናበት፥ ህንተ አዋታኮ፥ ‘ህንተ ኢታ ኦግያፐነ ኢታ ኦሱዋፐ ስምተ’ ያግድ ኦድን፥ ስኦና እፅድ፥ ባንታ ኢታ ኦግያፐነ ኦሱዋፐ ስሞና እፅዳ፥ ህንተ ማይዛታዳ ሀኖፕተ” ያጌስ ኡባፈ ዎልቃማ ጎዳይ። 
ህንተ ማይዛት ሀእ አዉን ደኦና? ሄ ናበት መርናዉ ፓፃ ደኦና? 
ግዶሽን፥ ናበታ፥ ታ አይለታ ባጋራ ታኒ ኦድዳ ኪታትነ ህገት ኡባይ ህንተ ማይዛታ ቦላ ጋክቤኔ? ያትን፥ ኤንቲ ባንታ ናጋራ ፓፅድ፥ “ኡባፈ ዎልቃማ ጎዳይ ኑ ኦግያዳነ ኑ ኦሱዋዳ ኑስ እማና ግዳይሳዳ ባ ኦሱዋ ኦꬅስ” ያግዶሶና። 
ዳርዮስ ካዎትዳ ናምአንꬆ ላይꬃን፥ ሻባፃ ጌተትያ ታማነ እስንꬆ አጌናን፥ ላታማነ ኦይዳንꬆ ጋላሳን፥ ጎዳ ቃላይ እዶ ናኣ፥ ባራካ ናኣ፥ ናብያ ዛካርያሳኮ ይስ። 
ታኒ ቃማ ቆንጨꬃን፥ ዞኦ ፓራ ቶግዳ እስ አስ በአስ። እ ዛንጋራን ደእያ ባርሰኔተ ጌተትያ ምꬃታ ጋርሳን ኤቅስ፤ እያፐ ጉየ ባጋራ ዞኦ፥ ዳማነ ቦꬃ ፓራት ደኦሶና። 
ያትን ታኒ፥ “ታ ጎዳዉ፥ ሀይሳቲ አይቤ?” ያጋዳ ኦይቻስ። ታራ ሃሳያ ኪታንቾይ፥ “ሀይሳቲ አይበኮ ታኒ ነና በሳና” ያግስ። 
ባርሰኔተ ምꬃ ጋርሳን ኤቅዳ ኡራይ፥ “ሀይሳቲ ሳኣ ኡባ ዩይድ ዎቻና መላ ጎዳይ ኪትዳይሳታ” ያግስ። 
ኤንቲ ባርሰኔተ ምꬃ ጋርሳን ኤቅዳ ጎዳ ኪታንቹዋኮ፥ “ኑኒ ሳአ ኡባ ዩይድ ዎችዳ፤ ሳእ ዎፑ ግድ ሳሮ ደኤስ” ያግዶሶና። 
ሄሳፈ ጉየ፥ ጎዳ ኪታንቾይ፥ “አቤት ኡባፈ ዎልቃማ ጎዳዉ፥ ኔኒ ሀንቀትን ሀእ ላፑን ታሙ ላይꬅ ኩምስ፤ ያትን፥ ኔኒ የሩሳላመነ ይሁዳ ካታማታ ማሮና አዉደ ጋካናዉ ጋምአኔ?” ያግስ። 
ጎዳይ ታራ ሃሳያ ኪታንቻዋስ ሎኦነ ምንꬅያ ቃላን ዛሮ እሚስ። 
ታራ ሃሳያ ኪታንቾይ ታኮ፥ “ሀ ቃላ አዋጃ! ኡባፈ ዎልቃማ ጎዳይ፥ ‘ታኒ የሩሳላመስነ ፅዮነስ ዳሮ ምሸታይስ። 
ኑኒ ሳሮ ደኦስ ግድ ቆፕያ ሀራ ካዎተꬃታ ቦላ ታኒ ዳሮ ሀንቀታስ። ታኒ ታ አሳ ቦላ ጉꬃራ ሀንቀታስ፥ ሽን ኤንቲ አꬅድ ታ ደርያ ቆህዶሶና።’ 
ሄሳ ግሾ፥ ታኒ የሩሳላመኮ ማሮታን ስማና፤ ታ ኬꬃይ ዛሪድ ያን ኬፀታና፤ የሩሳላመ ካታማ ቦላ ዋꬋ ዎዶሮ የጋና” ያጌስ ኡባፈ ዎልቃማ ጎዳይ። 
ጉጃዳ ሀይሳዳ ያጋዳ አዋጃ፦ “ታ ካታማታ ዱረተꬃይ ኩምድ ፓላሀና፤ ታኒ ጎዳይ ፅዮነ ዛራ ምንꬃና፤ የሩሳላመ ዛራ ዶራና” ያጌስ ኡባፈ ዎልቃማ ጎዳይ። 
ታኒ ቆንጨꬃን ኦይዱ ካጨታ በአስ። 
ታራ ሃሳያ ኪታንቹዋ፥ “ሀይሳቲ አይቤ?” ያጋዳ ኦይቻስ። እ ዛሪድ፥ “ሀ ካጨት ይሁዳ፥ እስራኤለነ የሩሳላመ ላልዳ ካዎተꬃታ” ያግስ። 
ሄሳፈ ጉየ፥ ጎዳይ ታና ብራታ ቆፅያ ኦይዱ ሂላንቾታ በስስ። 
ታኒ፥ “ሀይሳቲ አይ ኦꬃናዉ ይዶና?” ያጋዳ ኦይቻስ። እ ዛሪድ፥ “ሀይሳቲ ኦንካ ዛር ደንꬆና መላ ይሁዳ ቢታ ላልዳ ካጨታ ካዉሻናዉነ ꬋይሳናዉ ይዶሶና። ኤንቲ ይሁዳ ቢታ ላላናዉ ባንታ ካጭያ ደንꬅዳ ሀራ ካዎተꬃታ ካጭያ ሾጭድ ሳአን የጋናዉ ይዶሶና” ያግስ። 
