﻿ሶፎናሳ ማፃፋ.
1.
አሞነ ናአይ እዮስያስ ይሁዳን ካዎትዳ ዎደ ሶፎንያሳኮ ይዳ ጎዳ ቃላይ ሀይሳ። ሶፎንያስ ኩሻ ናኣ፤ ኩሽ ጋዳላ ናአ፤ ጋዳል አማረ ናአ፤ አማረይ ህዝቅያሳ ናኣ። 
“ታኒ ቢታ ቦላ ደእያባ ኡባ ꬋይሳና። 
አሰነ መሄ፥ ሳሎ ካፎታነ አባ ሞሎታ ꬋይሳና። ኢታ አሳታ ሽራ የጋና፤ አሳ ዛረ ቢታ ቦላፈ ꬋይሳና” ያጌስ ጎዳይ። 
“ይሁዳንነ የሩሳላመን ደእያ ኡባ ሴራናዉ ታ ኩሽያ ደንꬃና። ባኣለ ኤቃ ጎይነይሳታነ እያ ሀጋዝያ ካህነታ ሄ በሳፈ ꬋይሳና። 
ኬꬃ ቦላ ከይድ አዋስ፥ አጌናስነ ፆልንቶታስ ጎይነይሳታ ታኒ ꬋይሳና። ጎዳ ጎይንሸነ እያ ሱንꬃን ጫቅሸ ሞሎካ ጌተትያ ኤቃ ሱንꬃን ጫቀይሳታ ታኒ ꬋይሳና። 
ታና ካሎ አግድ ጉየ ስምዳይሳታ፥ ታና ኮይቦናይሳታነ ታና ኦይችቦናይሳታ ታኒ ꬋይሳና” ያጌስ ጎዳይ። 
ጎዳ ጋላሳይ ማትዳ ግሾ፥ ኡባ ሃርያ ጎዳ ስንꬃን ስእ ጊተ! ጎዳይ ያርሹዋ ጊግስስ፤ ቃስ ባ ፄግዳ እማꬃታ ጌሽስ። 
“ጎዳ ያርሹዋ ጋላስ ሀላቃታ፥ ካዋ ናይታነ አላጋ ቢታ ማኦ ማእዳ ኡባ ታኒ ሴራና። 
ሄ ጋላስ አላጋ ቢታ አሳታዳ፥ ኤቃ ጎይነይሳታነ ባንታ ጎዳ ኬꬃ ጌላተꬃንነ ጭሞን ኩንይሳታ ታኒ ሴራና” ያጌስ ጎዳይ። 
“ሄ ጋላስ ሞሎ ፐንግያ ባጋራ ዋሶይ፥ ካታማስ ናምአንꬆ ሻሁዋን ዬሆነ ዙማታ ቦላ ግታ ዶምኤ ግርስ ስኤታና። 
ህንተኖ፥ ካታማስ ጋርሳ ባጋን ደኤይሳቶ፥ ዬክተ። ያን ዛልእያ ኡባይ ꬋይዶሶና፤ ብራ ኦይክዳይሳት ሀይቅ ዉርዶሶና። 
ሄ ጋላስ ታኒ ፆምፐ ኦይꬃዳ የሩሳላመ ግዱዋ ኮያና። ህርግ ባይና ዎꬍ ኡትድ ባንታ ዎዛናን፥ ‘ጎዳይ ሎኦካ ኢታካ’ ገይሳታ ታኒ ሴራና። 
ኤንታ ሻሎይ ቦንቀታና፤ ኤንታ ኬꬃይ ላለታና። ኤንቲ ኬ ኬፃና፥ ሽን ሄ ኬꬃን ዶኮና፤ ዎይነ ቶካና፥ ሽን ሄ ዎይንያ ኡዮኮና” ያጌስ ጎዳይ። 
“ጎዳ ግታ ጋላሳይ ማትስ፤ ኤለስድ ጋክስ። ጎዳ ጋላሳይ ጫሞ ጋላስ፤ ሄ ጋላስ ምኖ ኦላንቾትካ ዋሶ ጎቻና። 
ሄ ጋላሳይ ሀንቆ ጋላስ፥ ሄ ጋላሳይ መቶነ ኡንአ ጋላስ፥ ꬋዮነ ላለተꬃ ጋላስ፥ ꬉማነ ጫጋና ጋላስ፥ ሻራነ ሳካና ꬉማ ጋላስ ግዳና። 
ሄ ጋላሳይ ድረትዳ ካታማታ ቦላ፥ አዱሳ ግምበታ ቦላ ኦላ ሞይዘይ ፑነታና፤ ጊገታ ግያ ዋሶይ ስኤታና። 
ኤንቲ ታና ቆህዳ ግሾ፥ ቆቀዳ ታታፋና ጋካናዉ፥ ኤንታ ቦላ መቶ ኤሀና። ኤንታ ሱꬃይ ድኦዳ ጎጋና፤ ኤንታ አሀይ ፕቶዳ የገታና። 
ጎዳ ሀንቆ ጋላስ ኤንታ ብራይነ ኤንታ ዎርቃይ ኤንታ አሸና። እ ሳአን ደእያ ኡባ ቆፖና ꬋይሳና፤ ቢታ ኡባይ እያ ሀንቁዋ ታማን ሜተታና” ያጌስ ጎዳይ። 
