﻿ምክያሳ.
2.
ኢታባ ሀልቸይሳታ፥ ቃስ ባንታ ሂፃን ደእሸ፥ ገነ ዋት ኦꬃነኮ ቆፐይሳታ አየ! ዎልቃይ ኤንታ ኩሸን ደእያ ግሾ፥ ሳእ ዎንትያ ዎደ ባንታ ቆፋ ፖሎሶና። 
ኤንቲ ጎሻ ጋደ ኮይኮ፥ ዎልቃን ኤኮሶና፤ ኬ ኮይኮ ዎልቃን ኦይኮሶና። አሳ ማታ የꬍድ፥ እያ ላታ ጮ ቦንቆሶና። 
ሄሳ ግሾ፥ “ሄኮ፥ ታኒ ህንተ ቦላ ኢታባ ኤሀናዉ ቆፓስ፤ ህንተ ከስ ኤካናዉ ዳንዳኤከታ። እ ኢታ ዎደ ግድያ ግሾ፥ ህንተ ኦቶሮን ስመረታናዉ ዳንዳኤከታ። 
“ሄ ዎደ ኤንቲ ህንተ ቦላ ሌምሶን ቀልቅሳና፤ ቃስ ሀይሳዳ ያግድ ዘሌልሸ ህንተና ኦዳ ጫዳና። ‘ኑኒ ኡባይ ቱማ ꬋይዳ፤ ጎዳይ ኑ ቢታ ኤክድ፥ ኑና ድእዳይሳታስ ሻክድ እሚስ’ ” ያጌስ ጎዳይ። 
ሄሳ ግሾ፥ ጋደይ ሳማን ሻከትያ ዎደ ጎዳ አሳ ግዶን ነ ሳማ ከስያ አስ ꬋያና። 
አሳይ ታኮ፥ “ኑ ቦላ ትንብተ ኦዶፓ፤ ህንተ ቦላ ሀይሳ መላባይ ጋካና ጋዳ ኑ ቦላ ትንብተ ኦዶፓ። ሄሳ መላ ካዉሻባይ ኑና ጋከና” ያጎሶና። 
ታኒ ኤንታኮ፥ “ያይቆባ ኮቻቶ፥ ጎዳ ዳንዳአይ ዉርደዬ? እ ሄሳ ማላባ ኦꬅዬ? ሱረ ኦገን በይሳታስ ታ ቃላይ ሎኦባ ኦኔ? ያግድ ህንተ ኦይቻናዉ በሲ? ያጋስ። 
ሽን ማታ ዎደፐ ዶምድ፥ ታ አሳይ ታ ቦላ ሞርከዳ ደንድስ። ህርግ ባይና ህንተ ግዶራ አꬍያ ሳሮ አሳ ኦላፐ ቃረትድ ስምያ አሳዳ ኦꬅደታ። 
ታ አሳ ግዶን ደእያ ማጫሳታ ኤንታ ሎኦ ኬꬃፈ ላግድ ከሴታ፤ ታ አንጁዋ ኤንታ ናይታፐ መርናዉ ኤክደታ። 
ሀ በሳይ ቱናተꬃ ጋሶን ኢትዳ ግሾ፥ ደንድድ ቢተ። ሀይስ ህንተዉ ሸምፖ በሲ ግደና። 
እስ ጭምያ ዎርዳንቾይ ይድ፥ ‘ህንተ ስንꬃፈ ዎይነ ኡሻንነ ማꬆይያ ኡሻን ኡፋይታና’ ያግድ ዎርዶ ትንብተ ኦድኮ፥ እ ህንተዉ ናበ ግዳና። 
“ያይቆባ ኮቻቶ፥ ታኒ ህንተና ኡባ ሺሻና፤ ታኒ እስራኤለ አሳፐ አትዳይሳታ ቱማ እስፈ ሺሻና። ዶርስ ግርበን ሺቀይሳዳነ ዉደይ ሄንꬃ በሳን ሺቀይሳዳ፥ ታኒ ኤንታ እስፈ ሺሻና። ሄ በሳይ ዳሮ አሳን ኩማና። 
ኤንታዉ ኦገ ዶይድ ካለይስ ኤንታፈ ስንꬃትድ ከያና፤ ኤንትካ ፐንግያ መንꬅድ፥ ከያና። ጎዳይ፥ ኤንታ ካዎይ ባ ሁጰን ኤንታዉ ኤንታ ስን አꬍድ ኤንታ ካለꬃና” ያጌስ። 
