﻿ዮናሳ.
2.
ዮናስ ሞሉዋ ኡሎን ደእሸ፥ ባ ጎዳ ፆሳ ሀይሳዳ ያግድ ዎስስ። 
“ታኒ ታ ዋያን ደአሸ ነና ፄጋስ፤ ነካ ታዉ ስአዳሳ። ታኒ ስኦለ ጪሙዋ ግዶን ደአሸ፥ ማዶ ኮያዳ ኔኮ ዋሳስ ነካ ታ ዋሱዋ ስአዳሳ። 
ኔኒ ታና አባ ጪሙዋን ዱገ የጋዳሳ። ሃꬅ ታ ዩሹዋ ተቅስ፤ ዎልቃማ ዙለይ ታ ቦላራ አꬍስ። 
‘ታኒ ነ ስንꬃፈ ዎራ ሆለታስ፥ ሽን ነ ጌሻ ኬꬃ ዛራዳ በአና’ ጋዳ ቆፓስ። 
ሃꬅ ታዉ ቆ ጋክስ፥ አባ ጪሞይ ታና ምትስ። አባን ደእያ ማታይ ታ ሁጰን ፃፀትስ። 
ታኒ ሃꬃ ጋርሳን ደእያ ደረታ ባሱዋ ጋካዳ ምተታስ፥ ቢታ ዉላይ መርናዉ ታ ቦላ ጎርደትስ፥ ሽን ታ ጎዳዉ ፆሳዉ፥ ኔኒ ታ ሸምፕዉ ኢታ ኦላፈ ከሳዳሳ። 
ታ ሸምፕያ ዶጭዳ ዎደ፥ ጎዳዉ ታ ነና ቆፓስ፤ ታ ዎሳይ ኔኮ ነ ጌሻ ኬꬃ ጋክስ። 
ሀዳ ግድዳ ኤቃ ፆሳታ ቦላ ዘምፐይሳት፥ ነዉ ደእያ ባንታ አማነተꬃ አጎሶና። 
ሽን ታኒ ጋላታ ማዝሙረ ነዉ ያርሻና። ታ ቃንግዳባካ ነዉ ጋꬃና። አይስ ጊኮ፥ አቶተꬃይ ፆሳፈ” ያግስ። 
ሄሳፈ ጉየ፥ ጎዳይ ሞሉዋ ኪትስ። ሞሎይ ዮናሳ መላ ቢታ ቦላ ጮይስ። 
