﻿አሞፀ ማፃፋ.
1.
ኦዝያን ይሁዳ ቢታን፥ እዮኣሳ ናአይ እዮርባም እስራኤለ ቢታን ካዎትዳ ላይꬃን ታቆሀ ቢታን መሄ ሄመይሳታፐ እሶይ፥ አሞፀይ፥ ቢት ቃፃናፐ ናምኡ ላይꬃፈ ስን እስራኤለባ ኦድዳ ትንብተይ ሀይሳ፦ 
እ፥ “ጎዳይ ፅዮነ ዙማ ቦላ ጉዴስ፤ የሩሳላመ ካታማን ደቼስ። መሄ ሄምያ በሳት መሎሶና፤ ቃርመሎሳ ዙማ ቦላ ደእያ እርፃይ ሹሌስ” ያግስ። 
ጎዳይ፥ “ዳማስቆ አሳይ ዛር ዛር ኦꬅዳ ናጋራ ግሾ፥ ታኒ ኤንታ ሴሮና አግከ። ኤንቲ ጋላዳ ቢታ አሳ ብራታ አች ደእያ ጋረን ጎንዶርስድ የꬍዶሶና። 
ሄሳ ግሾ፥ ታኒ ካዋ ሀዛኤላ ኬꬃን ታማ የዳና፤ ሄ ታማይ ካዋ በን-ሀዳዳ ሚፃታ ማና። 
ታኒ ዳማስቆ ካታማ ፐንግያ መንꬃና፤ አዌና ዛንጋራን ደእያ አሳ የደꬃናነ ካዎታ ፃምኣ ኦይክዳይሳታ ቤት-ኤደናፐ ꬋይሳና፤ ሶረ አሳይ ደኤትድ፥ ቂራ ባና” ያጌስ። 
ጎዳይ፥ “ጋዛ ካታማ አሳይ ዛር ዛር ኦꬅዳ ናጋራ ግሾ፥ ታ ኤንታ ሴሮና አግከ። ኤንቲ ቢታን ደእያ አሳ ኡባ ድእድ፥ ኤዶመ ቢታ አሳስ ባይዝዶሶና። 
ሄሳ ግሾ፥ ታኒ ጋዛ ካታማ ድርሳን ታማ የዳና፤ ሄ ታማይ ካታማ ሚፃታ ማና። 
አሽዶዳን ደእያ አሳ ታኒ የደꬃናነ ካዎታ ፃምኣ ኦይክዳይሳታ አስቃሎናፐ ꬋይሳና። ኤቅሮና ካታማን ደእያ አሳ ሴራና፤ ፍልስፄመ አሳፐ አትዳይሳት ሀይቃና። ታኒ ኡባ ሃርያ ጎዳይ ሄሳ ኦዳይስ” ያጌስ። 
ጎዳይ፥ “ፅሮሳ ካታማ አሳይ ዛር ዛር ኦꬅዳ ናጋራ ግሾ፥ ታኒ ኤንታ ሴሮና አግከ። ኤንቲ ጫቅዳ እሻተꬃ ጫቁዋ መንꬅድ፥ ደኤትዳ አሳ ኡባ ኤዶመ አሳስ ባይዝዶሶና። 
ሄሳ ግሾ፥ ታኒ ፅሮሳ ካታማ ድርሳን ታማ የዳና፤ ሄ ታማይ ካታማ ሚፃታ ማና” ያጌስ። 
ጎዳይ፥ “ኤዶመ አሳይ ዛር ዛር ኦꬅዳ ናጋራ ግሾ፥ ታኒ ኤንታ ሴሮና አግከ። ኤንቲ ባንታ እሻ እስራኤለ ማሻን የደꬅዶሶና፤ ኤንቲ ኤንታዉ ቃትቦኮና፤ ኤንታ ይሎይ መርናዉ እርፀና። 
ሄሳ ግሾ፥ ታኒ ተማና ካታማ ቦላ ታማ የድን፥ ሄ ታማይ ቦሶራ ካታማ ሚፃታ ማና” ያጌስ። 
ጎዳይ፥ “አሞነ አሳይ ዛር ዛር ኦꬅዳ ናጋራ ግሾ፥ ታኒ ኤንታ ሴሮና አግከ። ኤንቲ ባንታ ዛዋ አሳናዉ ጋላዳ ቢታን ደእያ ቃንꬃትዳ ማጫሳታ ኡሉዋ ዳክዶሶና። 
ሄሳ ግሾ፥ ታኒ ራባ ካታማ ድርሳን ታማ የዳና፤ ሄ ታማይ ካታማ ሚፃታ ማና። ሄሳፈ ጉየ፥ ኦላ ጋላስ ዋሶይ ዳራና፤ ኦላንቾት ጎተዳ ዎልቃማና። 
ኤንታ ካዎይነ እያራ ኦꬅያ ሀላቃት ኡባይ ደኤትድ ባና” ያጌስ። 
