﻿እዩኤላ ማፃፋ.
1.
ባቱኤላ ናኣ እዩኤላኮ ጎዳይ ኪትዳ ቃላይ ሀይሳ። 
ህንተኖ ጭማቶ፥ ሀይሳ ስእተ! ይሁዳ ቢታን ደእያ አሳ ኡባይ ስእተ! ሀይሳ መላባይ ህንተ ዎደ ዎይኮ ህንተ አዋታ ዎደ ሀን ኤሪ? 
ሀይሳ ህንተ ናይታስ ኦድተ፤ ህንተ ናይት ባንታ ናይታስ ኦዶ፤ ኤንታ ናይት ካልያ የለታስ ኦዶ። 
ጎንዶፈ አትዳ ካꬃ ቦለይ ምስ፤ ቦለፐ አትዳ ካꬃ ጉዶይ ምስ፤ ጉዶፈ አትዳ ካꬃ ፃቆይ ምስ። 
ማልእያ ዎይነይ ህንተፈ አትዳ ግሾ፥ ህንተኖ፥ ማꬆተይሳቶ ባርክተ ዬክተ! ህንተኖ፥ ዎይነ ኡያ ኡባት ዘሌልተ! 
ታይቦይ ባይና ቦለይ ታ ቢታ ኦይክስ፤ ኤንታ አቻይ ጋሞ አቻ መላ፤ ኤንታ ጋጮይ ማጫ ጋሞ ጋጮ መላ። 
ኤንቲ ታ ዎይንያ ꬋይስዶሶና፤ ታ ባላስያ ምꬃ ꬎግዶሶና። ኤንቲ ፖቅድ ምዳ ግሾ፥ ዎይንያነ ባላስያ ታሸት ፑፁ ግስ። 
ጌላእያ፥ ባ ጊግዳ አዝናይ ሀይቅን፥ ካዮ ማኦ ማአዳ ዬከይሳዳ ህንተካ ዬክተ! 
ካꬃ ያርሾይነ ኡሻ ያርሾይ ጎዳ ኬꬃን ꬋይዳ ግሾ፥ ጎዳ ኬꬃን ኦꬅያ ካህነት ዬኮሶና። 
ጎሻይ መላ አትስ፤ ቢታይ ዬኬስ፤ ካꬃይ ꬋይስ፤ ዎይነይነ ዛይተይ መልስ። 
ጋደን ደእያ ግስተይነ ባንግ ꬋይዳ ግሾ፥ ህንተኖ ጎሻንቾቶ፥ ካዮትተ፤ ህንተኖ ዎይነ ቶከይሳቶ፥ ዘሌልተ! 
ዎይነይ መልስ፤ ባላሰይ ሹልስ፤ ኦሮማነይ፥ ተምረይ፥ አፕለይ፥ ጋደን ደእያ ሀራ ምꬅ ኡባይ መልስ፤ ሄሳ ግሾ፥ አሳፐ ኡፋይስ ሃክስ። 
ህንተኖ ካህነቶ፥ ካዮ ማኦ ማእድ ዬክተ፤ ህንተኖ ያርሾ በሳ ስንꬃን ኦይሳቶ፥ ዘሌልተ። ህንተኖ ታ ፆሳ ስንꬃን ኦይሳቶ፥ ፆሳ ኬꬅ ገልድ ካዮ ማኦ ማእድ አቅተ። ካꬃ ያርሾይነ ኡሻ ያርሾይ፥ ፆሳ ኬꬃን ያርሽያባይ ባዋ። 
ፆማ አዋጅተ፤ ጌሻ ሺቆ ፄግተ። ጭማታነ ቢታን ደእያ አሳ ኡባ ጎዳ ህንተ ፆሳ ኬꬃን ሺሽተ፤ ያን ጎዳኮ ዋስተ። 
ጎዳ ጋላሳይ ማትስ፤ ሄ ጋላሳ አየ! ሄ ጋላሳይ ኡባ ዳንዳእያ ፆሳ ሀንቆ ጋላስ ግድድ ዬስ። 
ኑ ስንꬃፈ ካꬅ፥ ኑ ፆሳ ኬꬃፈ፥ ኡፋይስነ እልልስ ꬋይስ ግደኔ? 
ዘረትዳ ዘረꬃይ ቢታ ግዶን ቡቅስ፤ ካꬃይ ꬋይዳ ግሾ ኤለይ ካሎትስ፤ ሻለይ ላለትስ። 
ሄምያ በሲ ባይና ግሾ፥ መሄይ ዋሴስ። ሀር አቶሽን ዶርሳ ዉደይካ ማታ ꬋይድ ኡንኤቴስ። 
አቤት ጎዳዉ፥ ባዙዋ ታም ምዳ ግሾ፥ ፃራግ ደንባን ደእያ ማታ ፁግዳ ግሾ፥ ዎራ ምꬃ ታማ ላጮይ ꬋይስዳ ግሾ፥ ታኒ ኔኮ ዋሳይስ። 
ጎግያ ሃꬅ መልዳ ግሾ፥ ታም ባዞን ደእያ ማታ ምድግዳ ግሾ፥ ባዞ ዶአትካ ኔኮ ዋሶሶና። 
