﻿ሆሰ ማፃፋ.
1.
ኦዝያን፥ እዮአታም፥ አካዝነ ህዝቅያስ ካል ካል ይሁዳን ካዎትዳ ዎደ ቃስ ዮኣሳ ናአይ እዮርባም እስራኤለን ካዎትዳ ዎደ ብኤራ ናኣ ሆሰኮ ይዳ ጎዳ ቃላይ ሀይሳ። 
ጎዳይ ኮይሮ ሆሰ ባጋራ ኦድዳ ዎደ “ታ አሳይ ታፐ ሃክድ ኢታ ላይማተꬅ ኦꬅዳ ግሾ፥ ኔኒ ባዳ፥ ላይማ ማጫስ ኤካዳ ላይማ ናይታ ኢፐ የላ” ያግስ። 
ሄሳ ግሾ፥ ሆሰይ ብድ፥ ድብላይማ ናእዉ ጎመሮ ኤክን፥ እያ ቃንꬃታዳ አደ ናአ የላሱ። 
ያትን፥ ጎዳይ ሆሰኮ ነ ናአ ሱንꬃ፥ “እዝራኤለ” (ላላና ዎይኮ ዘራና) ያጋዳ ሱንꬃ። አይስ ጊኮ፥ እዝራኤለን ጉክዳ ሱꬃ ግሾ ታኒ እዩ ኮቻ ቃንꬃ ዎደን ፕርዳና፤ እስራኤለ ካዎተꬃካ ꬋይሳና። 
ሄ ጋላስ ታኒ እዝራኤላ ዛንጋራን እስራኤለ ኦላንቾታ መንረꬃና። 
ጎመራ ናምአንꬆ ቃንꬃታዳ፥ ማጫ ናአ የላሱ። ያትን፥ ጎዳይ ሆሰኮ፥ “እ ሱንꬃ ሎሩሃማ (ማሮተꬅ ደሞናሮ) ያጋዳ ሱንꬃ። አይስ ጊኮ፥ ህዛፐ ጉየ ታኒ እስራኤለ አሳስ ቃትከ፤ ኤንታዉ አቶ ጊከ። 
ሽን ታኒ ይሁዳ አሳስ ቃታና፤ ታኒ ኤንታ ዶንገን ዎይኮ ማሻን ዎይኮ ኦላን ዎይኮ ፓራታን ዎይኮ ፓራ አሳታን ግዶናሽን፥ ታኒ ጎዳይ፥ ኤንታ ፆሳይ፥ ታ ዎልቃን ኤንታ አሻና” ያግስ። 
ጎመራ ሎሩሃሞ ꬋንꬅ ዱꬅዳፐ ጉየ ቃንꬃታዳ ሀራ አደ ናአ የላሱ። 
ያትን፥ ጎዳይ ሆሰኮ፥ “እያ ሱንꬃ ሎኣማ (ታ አሰ ግደና) ያጋዳ ሱንꬃ። አይስ ጊኮ፥ ህንተ ታ አሰ ግደከታ፤ ታካ ህንተ ፆሰ ግድከ። 
“ግዶሽን፥ እስራኤለ አሳይ ማካናዉነ ታይባናዉ ዳንዳኤቶና አባ ሻፍያ መላ ግዳና። ኤንቲ፥ ‘ህንተ ታ አሰ ግደከታ’ ጌተትድ ፄገትዳ በሳን ህንተ ‘ደኦ ፆሳ ናይታ’ ጌተታና። 
ይሁዳ አሳይነ እስራኤለ አሳይ እስፈ ሺቅድ ባንታዉ እስ ሀላቃ ዶርድ ድኤትዳ ቢታፈ ስማናነ እንጀትድ ዳና። ሄ ጋላሳይ እዝራኤለስ ግታ ጋላስ ግዳና። 
