﻿ህዝቄላ.
19.
ጎዳይ ህዝቄላኮ፥ እስራኤለ ሀላቃታስ ሀይሳዳ ያጋዳ ዘሌላ፦ 
“ህንተ አይያ ጋሞታ ግዶን ዋንዳ ጋሞ! ያላጋ ጋሞታ ግዶን ዝንአዳ፥ ባ ማራታ ድቻሱ። 
እያ ባ ማራታፐ እሱዋ ድችን፥ እ ዎዳላ ጋሞ ግድስ፤ ሻንካ ታማርስ፤ አሰ ሙሱ ዶምስ። 
ካዎተꬃት ኡባይ እያባ ስእዶሶና፤ ኤንቲ ቦክዳ ኦላን ገልድ ኦይከትስ፤ ሲን ዎዶሮ አꬅድ ግብፀ ቢታ ኤፍዶሶና። 
እያ አይያ ናግዳይስ ሀኖና እፅን፥ እ ኡፋይሳይ ꬋይዳይሳ በእዳ ዎደ፥ ባ ማራታፐ እሱዋ ድቻዳ፥ ዎዳላ ጋሞ ከሳሱ። 
እ ዎዳላ ጋሞ ግድድ፥ ሀራ ጋሞታራ ስመረትስ፤ እ ሻንካ ታማርስ፤ አሰ ሙሱ ኦይክስ። 
እ ኤንታ ሚፃ መንረꬅስ፤ ካታማታ ꬋይስስ፤ እ ጉድያ ዎደ ቢታን ደእያ አሳ ኡባይ ዳጋሜስ። 
እያ ዩሹዋን ደእያ ካዎተꬃት ኡባይ እያ ኦይካናዉ ፅሄ ዎꬅዶሶና፤ ባንታ ግትያ ምጭዶሶና፤ ኤንታ ኦላን እ ኦይከትስ፤ 
ኤንቲ እያ ስን ዎዶሮ አꬅድ ሆን የግድ፥ ባብሎነ ካዋኮ ኤፍዶሶና። እ ጉደይስ ዛሪድ እስራኤለን ስኤቶና መላ ኤንቲ እያ ቃሾ ኬꬃን የግዶሶና። 
ነ አይያ ሃꬃ ዶናን ቶከትዳ ዎይነ መላ፤ ዳሮ ሃꬅ ደእያ ግሾ ዎይነይ ዳሻንነ አይፈን ኩምድ ደኤስ። 
እያ ታሸት ምኖ ግድያ ግሾ ካዎታ ፃምአ ግድዶሶና። ዎይነይ ዎራን ደእያ ምꬃታፐ አꬍድ ድጭስ፤ ባ ታሽያ ዳሮተꬃንነ አዱሳተꬃን ኡባፈ ቦላራ በንትስ። 
ሽን ሄ ዎይነይ ሀንቆን ሾደትድ ሳአን የገትስ፤ ዶሎሀ ጫርኮይ እያ አይፍያ መልስስ፤ እያ ምኖ ታሸይ መልን ታም ምስ። 
ሀእ እ ሃꬅ ባይና መላ ቢታን ቶከትስ። 
ታም እያ ኡባፈ ከይድ፥ እያ አይፍያነ ታሽያ ምስ። ካዎታ ፃምአ ግዳና ምኖ ታሸይ፥ እያ ቦላ በንትቤና። ሀይስ ዬሆ ዘለልስ፤ ሀይሳ ዘለልስ ከስያ ዎደ ጎኤታናዉ በሴስ” ያግስ። 
