﻿ህዝቄላ.
16.
ጎዳ ቃላይ ሀይሳዳ ያግሸ ታኮ ይስ። 
“አሳ ናአዉ፥ የሩሳላመ እያ ቱና ኦሶታ ኤርሳ። 
ኡባ ሃርያ ጎዳይ የሩሳላመኮ ሀይሳዳ ያጌስ። ነ ማይዛነ ነ ሼሻይ ካናነ ቢታና፤ ነ አዋይ አሞረ፤ ነ አይያ ህተ አስ። 
ነ የላትያ ጋላስ ነ ጉልአይ ቃንፀትበና፤ ዎይኮ ነና ጌሻናዉ ሃꬃን ሜጨታባካ፤ ዎይኮ ማፅነን ጎርፐታዳ ጩርቃን ፃፀታባካ። 
ሀ ጌተትዳይሳታፐ ሀር አቶሽን እሱዋ ኦꬃናዉ ነዉ ምሸትዳይ ባዋ። ነ የለትዳ ጋላስ ቦረትዳ ግሾ ዎራ የገታዳሳፐ አትሽን፥ ነዉ ኦንካ ቃትቤና። 
“ታ ያራ አꬍያ ዎደ ኔኒ ነ ሱꬃን ኢታዳ ዞሄትሽን በአዳ፥ ኔኒ ነ ሱꬃን ዝንእዳ ደእሽን፥ ‘ደኦን ደአ’ ያጋስ። 
ታ ነና አራዳ ቢታን ደእያ ካꬃዳ ድቻስ። ኔኒ ድጫ አዱቃዳ፥ ጋማ ጋካዳሳ። ነ ꬋንꬃይ ኡትስ፤ ነ ሁጰይ ድጭስ፤ ሽን ነ ካሎ ደኣሳ። 
“ዛራዳ ታ ያራ አꬋሸ ነና ፄልያ ዎደ፥ ኔኒ ገሎስ ጋካዳ፥ ካሎ ቦርሰትያ አሰ ግዳዳሳ። ታ አፍላ ማጫራ ነ ቦላ የጋዳ፥ ነ ካሉዋ ካማስ፤ ታ ኔራ ጫቃዳ ነና ታዉ ቡዞ ኦꬃስ” ያጌስ ኡባ ሃርያ ጎዳይ። 
“ሱꬃን ኢትዳ ነ አሳተꬃ ሃꬃን ሜጫ ጌሻዳ፥ ዛይተን ትያስ። 
ታኒ ነና አሌቆ ማኦ ማይዛስ፤ ሎኦ ጋልባፈ ኦሰትዳ ጫማ አስሳስ፤ ሊኖ ሻሸ ነና ቃጭሳስ፤ አልኦ ኩታ ጉልንትሳስ። 
ነና አሌቆን አሌቅሳስ፤ ነ ኩሸን ሳጋዮ አꬃስ፤ ነ ቆꬍያ ዎርቃን ማይዛስ። 
ነ ስንነ፥ ነ ሀይꬃን ዎርቃ፥ ነ ሁጰን ሎኦ ካላቻ ዎꬃስ። 
ነ ዎርቃንነ ብራን አሌቀታዳሳ፤ ነ ማኦ ኡባይ አልኦ ሊኖ፥ አልኦ ኩታነ አሌቆ ቃምሰ። ነ ምያ ካꬃይ ሎኦ ꬊለ፥ ኤስነ ዛይተ። ኔኒ ዳሮ ፑላታዳ፥ ካዎ ግዳናዉ ጋካዳሳ። 
ታ ነዉ እምዳ ቦንቹዋ ጋሶን፥ ነ ዳሮ ፑላትዳ ግሾ ካዎተꬃታ ኡባን ኤረታዳሳ” ያጌስ ኡባ ሃርያ ጎዳይ። 
“ሽን ኔኒ ነ ፑላን አማነታዳ፥ ሀራታን ኤረትዳ ግሾ ኦገራ አꬍያ ኡባስ ነና አꬃ እማዳሳ። 
ነ ማኡዋፐ ባጋ ኤካዳ፥ ነ ጎይኖ በሳታ አሌቅሳዳሳ፤ ያን ላይማታዳሳ። ሄሳ መላባይ ሀይሳፈ ካሰ ሀንቤና፤ ስንꬃፈካ ሀናናዉ በሰና። 
ታ ነዉ እምዳ ዎርቃፈነ ብራፐ ኦሰትዳ ሎኦ አሌቆ፥ አደ ምስለታ ኦꬃዳ ኤንታራ ላይማታዳሳ። 
ታ እምዳ አሌቆ ማኡዋ ሄ ምስለታ ማይዛዳሳ፤ ታ ዛይትያነ ታ እፃንያ ኤንታዉ ሺሻዳሳ። 
ታ ነዉ እምዳ ሎኦ ꬊልያ፥ ዛይትያነ ኤሳ ኤንታ ስንꬃን ሳዎ ቶንኩ ግያ ያርሾ ኦꬃዳ ሺሻዳሳ” ያጌስ ኡባ ሃርያ ጎዳይ። 
ነ ላይማተꬃይ ጉፅቤናሽን፥ ነ ታዉ የልዳ አደ ናይታነ ማጫ ናይታ ኤፋዳ፥ ኤቃታስ ያርሻዳሳ። 
ነ ታ ናይታ ሹካዳ፥ ኤቃታስ ታማን ያርሻዳሳ። 
ነ ቱናተꬃንነ ነ ላይማተꬃን ኡባን ደአሸ፥ ካሰ ነ ያላጋተꬃ ላይꬃ፥ ካሎ ሱꬃን ሙከታዳ ዞሄትያ ዎድያ ዶጋዳሳ። 
ኡባ ሃርያ ጎዳይ፥ “አየ! ነና አየ!” ያጌስ። ሀ ኢታተꬃ ኡባ ቦላ ጉጃዳ፥ 
ዳባባ ኡባን ꬎቃ ኤቃ ጎይንያ በሳታ ነዉ ጊግሳዳሳ። 
ኦገ ዶናን ላይማትያ በሳታ ኬፃዳ፥ ነ ፑላ ቱንሳዳሳ፤ ኦገራ አꬍያ ኡባስ ነ አሳተꬃ አꬃ እማዳ፥ ላይማተꬅ ዳርሳዳሳ። 
ኔኒ አሞን ኩምዳ፥ ነ ሾሮ ግድዳ ግብፀታራ ላይማታዳሳ፤ ነ ላይማተꬃን ታና ይሎያዳሳ። 
ሄሳ ግሾ፥ ታኒ ታ ኩሽያ ነ ቦላ ደንꬃስ፤ ነና ጋክያ ነ አንጁዋ ጉꬃስ። ታኒ ነና ነ ፖኮ ሀኖታን ዬላትያ፥ ነና ሞርክያ ፍልስፄመታስ አꬃዳ እማስ። 
ነ አሎና አስ ግድያ ግሾ፥ አሶረ አሳራ ላይማታዳሳ። ሄ ኡባን ታዉ ግዳና ጋባካ። 
ዛልኤን አቅያ ካልዳወታራ ላይማታዳሳ፥ ሽን ሄስ ታዉ ግዳና ጋባካ። 
ኡባ ሃርያ ጎዳይ፥ “ኔኒ ዬል ባይና ላይማ ማጫሳዳ ሀንያራ፥ ነ አይብ ላፋ አሰ! 
ኔኒ ኦገ ዶናን ላይማትያ በሳታ ነዉ ኬፅያ ዎደነ ዳባባ ኡባን ኤቃስ ጎይንያ በሳታ ጊግሳዳሳ። ግዶሽን፥ ሀራ ላይማ ማጫሳት ኤክያ ሚሸ ኤካባካ። 
ኔኒ ባ አዝናይ ደእሽን፥ አላጋ አደታራ ላይማትያ ማጫሳ መላ። 
ላይማ ማጫሳስ ሚሸይ ቃንፀቴስ፥ ሽን ኔኒ ነ ላገꬆታስ እሞታ እማሳ፤ ኤንቲ ኡባ በሳፈ ኔኮ ያና መላ ኤንታዉ ሚሸ እማሳ። 
ኔኒ ላይማትያ ሀራ ማጫሳታፐ ዱማ፤ ኔራ ላይማታናዉ ነና ካልያ ኦንካ ባዋ። ኔኒ ገደ እሞታ እማሳፐ አትሽን፥ ሃ ኤካካ፤ ኔኒ ሀራታፐ ዱማ” ያጌስ። 
ነኖ፥ ላይማ የሩሳላመ ጎዳ ቃላ ስአ። 
ኡባ ሃርያ ጎዳይ ሀይሳዳ ያጌስ፤ “ኔኒ ነ ላይማተꬃ አሙዋን ነ ላገꬆታስ ነ አሳተꬃ ቃርዳ ግሾ፥ ነ ኤቃታ ኡባ ግሾነ ነ ናይታ ሱꬃ ነ ኤንታዉ ጉስዳ ግሾ፥ 
ነ ኤንታን ኡፋይትዳ ነ ላገꬆታ ኡባ፥ ነ ዶሰይሳታነ ነ እፀይሳታ ታ ነዉ ሞርከ ኦꬃዳ ሺሻና። ታኒ ኤንታ ዱማ ዱማ በሳፈ ነ ዩሹዋን ሺሻዳ፥ ኤንታ ስንꬃን ነና ቃራና፤ ኤንቲ ነ ካሉዋ በአና። 
ታኒ ላይማ ማጫሳታ ቦላነ ሱꬁ ጉስያ ማጫሳታ ቦላ ፕርደይሳዳ ነ ቦላ ፕርዳና፤ ታ ሀንቁዋንነ ታ ቃናትያን ነ ቦላ ሀይቆ ኤሀና። 
ታ ነና ነ ላገꬆታስ አꬃዳ እማና፤ ኤንቲ ነ ላይማትያ በሳታነ ኤቃ ጎይኖ በሳታ ላላና። ኤንቲ ነ ማኡዋ ቃርድ፥ ነ ሎኦ አሌቁዋ ኤክድ፥ ነና ፅረ ካሎ አሻና። 
ነና ሹቻን ጫድድ፥ ማሻን ቃንፀረꬅድ ዎꬍያ አሳ ነ ቦላ ኤንቲ ደንꬃና። 
ኤንቲ ነ ኬꬃ ፁግድ፥ ዳሮ ማጫሳ ስንꬃን ነ ቦላ ፕርዳና። ታ ነ ላይማተꬃ አግሳና፤ ነ ላገꬆታስ ገደ ሚሸ ቃንፃካ። 
ሄሳን ነ ቦላ ደእያ ታ ይሎይ እርፃና፤ ታ ቃናትያ ኔፐ ሃሳና፤ ህዛፐ ስእ ጋና፤ ዛራዳ ሀንቀትከ። 
ኔኒ ነ ናአተꬃ ላይꬃ ዶጋዳ፥ ሀ ኢታ ኦሶ ኡባን ታና ሀንቀꬃዳሳ። ሄሳ ግሾ፥ ነ ኦꬅዳባ ኡባ ታ ነ ቦላ ዛራና። ነ ቱና ኦሶ ኡባ ቦላ ላይማተꬅ አይስ ጉጃዲ?” ያጌስ ኡባ ሃርያ ጎዳይ። 
“የሩሳላመ፥ አሳይ ነና፥ ‘ናእያ አየ ማላ’ ግድ ሌምሳና። 
ቱማ ኔኒ ባ አዝናነ ባ ናይታ ሻተትያ ነ አየ መላ፤ ባንታ አዝናታነ ባንታ ናይታ ሻተትያ ነ ምቸታ መላ፤ ነ አይያ ህተ አስ፤ ነ አዋይ አሞረ አስ። 
ነ ባይራ ምችያ፥ ባ ጉታራ ኔፐ ፑደሀ ባጋን ደእያ ሳማረነ እ ማጫ ናይታ፤ ነ ካሎ ምችያ ባ ጉታራ ኔፐ ዱገሀ ባጋን ደእያ ሶዶመነ እ ማጫ ናይታ። 
ነ ኤንታ ኦግያ ካላዳ ኤንታ ቱና ኦሶታ ፖሎ ፃላላ ግዶናሽን፥ ጉꬃ ዎደን ኤንታፈ አꬋዳ ኢታ ኦꬃዳሳ። 
“ታኒ ኡባ ሃርያ ጎዳይ ታ ደኡዋን ጫቃስ። ኔንነ ነ ጉታን ደኤይሳት ኦꬅዳይሳዳ ነ ምችያ ሶዶመነ እ ማጫ ናይት ኦꬅቦኮና። 
ነ ምችያ ሶዶመ ኦꬅዳ ናጋራይ ሀይሳ፦ እያነ እ ማጫ ናይት ኦቶራንቾ፥ ኤንቲ ካልዳይሳታነ እንጀ ዱሱ ደእኮካ ኤንቲ መቶታንቾታነ ማንቆታ ማድቦኮና። 
ኤንቲ ኦቶራንቾ ግድድ፥ ታ ስንꬃን ቱና ኦሶ ኦꬅዶሶና። ሄሳ ግሾ፥ ህንተ በእዳይሳታ ታ ኤንታ ꬋይሳስ። 
“ሳማረይ ነ ኦꬅዳ ናጋራስ ባጋካ ኦꬃቡኩ፤ ነ ኢፐ አꬋዳ ሻትያ ቱና ኦꬃዳሳ። ነ ኦꬅዳ ቱና ኦሶታ ኡባ ጋሶን ነ ምቸት ፅሎ አዛና መላ ኦꬃዳሳ። 
ኔኒ ነ ምቸታ ሱረ አስ ከስዳ ግሾ ዬላ ማአ። ነ ናጋራይ ኤንታይሳፈ አꬍድ ኢትን፥ ኤንቲ ኔፐ ፅሎ ዳንዶሶና። ሄሳ ግሾ፥ ካዉያዳ ዬላ ማአ። 
“ግዶሽን፥ ሶዶመነ እ ማጫ ናይታ፥ ሳማረነ እ ማጫ ናይታ ታኒ ኤንታ ሻሉዋ ዛርያ ዎደ ነ ሻሉዋካ ዛራና። 
ነባን ኔኒ ዳሮ ዬላታና፤ ነ ካዉሻተꬃይ ዳሮ ግድያ ግሾ ነ ምቸት ሄሳን ምነታና። 
ነ ምቸት፥ ሶዶመ ባ ጉታታራነ ሳማርያ ባ ማጫ ናይታራ ባንታ ካሰ ዱሳኮ ስማና፤ ነካ ነ ማጫ ናይታራ ካሰ ነ ዱሳኮ ስማና። 
ነ ኦቶርትያ ዎደ ነ ምቸ ሶዶም ቦላ ቀልቅሳብኪ? 
ሄስ ሀንዳይ ነ ናጋራይ ቆንጫናፐ ካሰ ግደኔ? ሀእ ኔኒ ነ ዩሹዋን ደእያ ኤዶመስ ምቾታስነ እ ሾሮታስ፥ ፍልስፄመስነ እ ምቸ ናይታስ፤ ሄሳዳካ ነና እፅያ ኡባስ ቦረስ አታዳሳ። 
ነ ላይማተꬃ ግሾነ ነ ቱና ኦሶታ ግሾ ነ ሴረታና” ያጌስ ጎዳይ። 
ኡባ ሃርያ ጎዳይ ሀይሳዳ ያጌስ፤ “ኔኒ ኡፋይሳ ቃላ መንꬃዳ፥ ጫቁዋ ላልዳ ግሾ ነ ኦꬅዳ ኦሱዋዳ ታ ነዉ ኦꬃና። 
ግዶሽን፥ ታ ነ ናአተꬃ ዎድያን ኔራ ጫቅዳ ጫቆ ቃላ ሀሳያና፤ መርናዉ ኔራ ጫቃና። 
ነ ባይራነ ነ ካሎ ምቸታ ታ ኔኮ ኤህያ ዎደ ኔኒ ነ ሄመꬃ ሀሳያዳ ዬላታና። ሽን ሄስ ታ ኔራ ጫቅዳ ጫቁዋ መላ ግዶና እፅኮካ፥ ታ ኤንታ ነዉ ናአ ኦꬃዳ እማና። 
ታኒ ታ ጫቁዋ ኔራ ኦራꬃና፤ ሄ ዎደ ታ ጎዳ ግደይሳ ነ ኤራና። 
ነ ኦꬅዳ ናጋራ ኡባ ታኒ አቶ ግያ ዎደ ነ ኦꬅዳባ ሀሳያዳ፥ ዬላስ ነ ዶና ኦይካና” ያጌስ ኡባ ሃርያ ጎዳይ። 
