﻿ምላልሳ.
3.
ጎዳ ሸነ ፃምአን መቶ በእዳ አስ ታና። 
ታና ባ ስንꬃፈ ከስድ፥ ፖኦይ ባይና ꬉማን ዎꬅስ። 
ጋላስ ኩመꬅ ታና ሾጫናዉ ዛር ዛር ባ ኩሽያ ደንꬅስ። 
እ፥ ታ ጋልባነ ታ አሹዋ ጭምስስ፤ ታ መቀꬃ መንꬅስ። 
እ፥ ታ ዩሹዋ መቶንነ ዳቡራን ድርስ። 
በን ሀይቅዳ አሳዳ ታና ꬉማን ዎꬅስ። 
ታ ከሳ ኤኮና መላ፥ ታ ዩሹዋ ድርስ፤ ዴፆ ዱꬃን ታና ዱፅስ። 
ታኒ ማደ ኮያዳ እያ ፄግን፥ እያኮ ዋስን፥ ታና ስኦና እፅስ። 
ታ ኦግያ ዎልቃማ ሹቻን ጎርድስ፤ ታ ኦግያ ጌላይስ። 
እ፥ ታዉ ዙግድ ናግያ ባባንꬃ መላ፥ ቆሰትድ ናግያ ጋሞ መላ ግድስ። 
እ፥ ታና ታ ኦግያፐ ከስድ ዱሰረꬅስ፤ ታና አስ ባይና በሳን የግ አግስ። 
ባ ዶንግያ ዳፍድ፥ ታና ዱካናዉ ማልስ። 
ባ ዶንግያ ዳፍድ፥ ታ ዎዛና አይፈን ጫድስ። 
ታኒ አሳ ኡባስ ሚቻስ አታስ፤ ጋላስ ኩመꬅ ቦረ የꬃስ ግዳስ። 
እ፥ ታና መቶን ጫምስስ፤ ጫሞ ጎዳረ ኡꬅ ታና ኡሽድ ካልስስ። 
እ፥ ታ አቻ አጨን መንꬅስ፤ ታና ባናን የꬍስ። 
ሳሮይ ታፐ ሃክስ፤ ታኒ እንጀ ዱሱ ዶጋስ። 
ሄሳ ግሾ፥ “ታ ዎልቃይ ታፐ ኤከትስ፤ ታኒ ጎዳን ዎꬅዳ ኡፋይሳ ኡባይ ꬋይስ” ያጋስ። 
ታ መቱዋነ ታ ኡንኣ ሀሳይን ደኦይ ታና ጫምስ። 
ታ ሄሳ ኩመꬅ ዶግከ፤ ታ ሸምፖይ አዛኔስ። 
ግዶሽን፥ ታ እስባ ታ ዎዛናን ቆፕያ ዎደ ታ ኡፋይሳን ኩማይስ። 
ሄስካ፥ ኑኒ ꬋይቦናይ ጎዳ ሲቁዋፐ ደንዶይሳና፤ እያ ቃይ ዉር ኤረና። 
ኤንቲ ዎንታ ዎንታ ኦራꬅ፤ ነ ዳሮ አማንꬃሳ። 
ጎዳይ ታ ሳማ፤ ሄሳ ግሾ፥ ታ እያን ኡፋይስ ዎꬃና። 
እያን ባንታ ኡፋይሳ ዎይሳታስነ እያ ኮየይሳታስ ጎዳይ ሎኦ። 
አስ ስእ ግድ ጎዳ አቶተꬃን ናግኮ ሎኦ። 
አስ ባ ናአተꬃን መቶ ዳንዳአ ታማርኮ ሎኦ። 
ጎዳይ መቶ ኤህያ ዎደ ስእ ግድ ኡቶ። 
እያዉ ስንꬃፈ ኡፋይስ ዳናዉ ዳንዳእያ ግሾ ባና ዝቅ ኦꬆ። 
እ ባ ሻካላ ባቀይሳስ እሞ፤ ጫሸ ካሎ። 
ጎዳይ አሰ መርናዉ የገና። 
እ አሳ ቦላ መቶ ኤህኮካ፥ ባ መርና ሲቁዋ ዳሮተꬃን ዛሪድ ቃቴስ። 
እ አሳ ቦላ መቶ ዎይኮ ኡንአ ኤህድ ኡፋይተና። 
ብታን ደኢያ ቃሾ አሳታ የያ ዎደ፥ 
ኡባፈ ዎልቃማ ፆሳ ስንꬃን አሳ ማት የትያ ዎደ፥ 
ፅሎ ፕርድ ꬋይያ ዎደ ጎዳይ ሄሳ ኡባ በኤነዬ? 
ጎዳይ ኪቶናሽን ኦድድ ፖልሳናዉ ዳንዳኤይ ኦኔ? 
ኢታባ ግድን ሎኦባ ኦድ ፖለይ ኡባፈ ꬎቃ ፆሳ ግደነዬ? 
ያትን፥ አስ ደኦን ደእሸ ባ ናጋራ ግሾ ሴረትያ ዎደ አይስ ዙዙሚ? 
አነ ኑ ኦግያ ፓጮስ፤ ጎዳኮ ስሞስ። 
ኑ ዎዛና ኑ ኩሽያራ ሳሎን ደእያ ፆሳኮ ደንꬅድ ሀይሳዳ ያጎስ፦ 
ኑ ነና ናቅዳ፤ ነዉ ማካልዳ፤ ነካ ኑስ አቶ ጋባካ። 
ነ ሀንቁዋን ካመታዳ ኑና የደꬃዳ፤ ነ ኑስ ቃቶና ኑና ዎꬋዳሳ። 
ኑ ዎሳይ ኔኮ ጋኮናዳ፥ ነናተꬃ ሻራን ካማዳሳ። 
አሳ ግዶን ኑና ፕቶነ ቡረ ኦꬃዳሳ። 
ኑ ሞርከት ኡባይ ኑ ቦላ ባንታ ዶና ዶይዶሶና። 
ኑ ዳጋማንነ ግተን ገልዳ፤ መቶንነ ኡንአን ላለትዳ። 
ታ አሳ ጋክዳ ዋይያ ጋሶን ታ አይፈፐ አፉꬁ ሻፋዳ ጎጌስ። 
ታ አይፈይ አጎና አፉፄስ። 
ጎዳይ ሳሎፐ ዱገ በአና ጋካናዉ ሄስ ሀኔስ። 
ታ ካታማን ደእያ ማጫሳታ ቦላ ጋክዳባ ታ አይፈይ በእዳ ዎደ ታ ዎዛናይ አዛንስ። 
ጮ ታና ሞርከይሳት ካፎ ሻንካትያዳ ታና ሻንካትዶሶና። 
ታ ፓፃ ደእሽን ታና ኦላን የግድ፥ ኦላ ዶና ሹቻን ጎርድዶሶና። 
ሃꬅ ኩምድ ታ ሁጰራ ጎግያ ዎደ ታ ꬋያስ ጋዳ ቆፓስ። 
አቤት ጎዳዉ፥ ታ ጪሞ ኦላን ደአሸ ነ ሱንꬃ ፄጋስ። 
ታ ዋሱዋ ስአናዳ ታ ነና ዎስያ ዎደ ታና ስአዳሳ። 
ታኒ ነና ፄግዳ ዎደ ታኮ ሺቃዳ፥ “ባቦፋ” ያጋዳሳ። 
አቤት ጎዳዉ ነ ታ ሞቱዋ ሞተታዳ ታና ዎዛዳሳ። 
አቤት ጎዳዉ፥ ነ ታ ኡንኣ በአዳሳ፤ ሄሳ ግሾ፥ ነ ታዉ ፕርዳ። 
ኤንቲ ሀሎ ከያናዉ ታ ቦላ ማቀትያ ማቁዋ ኡባ በአዳሳ። 
አቤት ጎዳዉ፥ ኤንቲ ታና ጫይያ ጫሻነ ታ ቦላ ማቀትያ ማቁዋ ኡባ ስአዳሳ። 
ታ ሞርከት ጋላስ ኩመꬅ ታ ቦላ ዙዙመይሳነ ካልካሸይሳ ስአዳሳ። 
ኤንቲ ኡትሸነ ኤቅሸ ታና ቦርድ የፆሶና። 
አቤት ጎዳዉ፥ ኤንቲ ኦꬅዳ ኦሱዋስ በሲያ ዛሩዋ ኤንታዉ ቃንፃ! 
ኤንታ ዎዛና ኤይሳ፤ ነ ባደꬃይ ኤንታ ጋኮ። 
አቤት ጎዳዉ፥ ነ ኤንታ ነ ሀንቁዋን የደꬃ፤ ሳሎፐ ጋርሳን ኤንታ ꬋይሳ። 
