﻿ሶሎሞነ.
8.
ነ ታዉ ታ አየ ꬋንꬅ ꬋምዳ ታ እሻ ግድዳኮ አይበ! ታ ነና ኦገን ደማዳ ዬርዳኮ፥ ታና ኦንካ ቦረናሽን። 
ታኒ ነና ካለꬃዳ፥ ታና ታማርስዳ ታ አየ ሶ ገልሳርክናሽን። ማልእያ ኦሮማነ ጉምኤꬃነ ሎእያ ዎይነ ኡሻ ታ ነና ያን ኡሻርክና። 
ታና ነ ሀድርሳ ኩሸይ ቦርኮትሴስ፥ ነ ኡሻቻ ኩሸይ ታና ቆመስ። 
ህንተኖ፥ የሩሳላመ ጌላኦቶ፥ ታ ሲቆይ ባ ዎደ ደንዳና ጋካናዉ፥ ኮይሮትድ ህንተ እያ ደንꬆናዳ ሀዳራ ጋይስ። 
ባ ሲቁዋ ሀሸን ዘምፓዳ፥ መላ ቢታፈ ያራ ሀና ኦኔ? በን ነ አይያ ነና እቀታዳ የልዳ፥ አፕለ ምꬃ ጋርሳን ነ ዝንእዳሽን፥ ነና ታ ባርክሳስ። 
መርና ሲቁዋን ታና ነ ዎዛናን አታማ፤ ነ ቀስያን ማታመዳ ታ ፃላላ ኦይካ። ሲቆይ ሀይቆ መላ ምኖ፤ ቃናተይ ስኦለ መላ ኢታ፤ እያ ላጮይ ፆሳ ታማ ላጮ መላ። 
ዳሮ ሃꬅ ሲቆ ታማ ቶይሳናዉ ዳንዳኤና፤ ድኦይካ ሜጭድ ኤፋናዉ ዳንዳኤና። አስ ሲቆ ሻማናዉ ባዉ ደእያ ኡባ እምኮካ፥ ሲቆይ ሚሸን ሻመቶና ግሾ፥ አስ እያ ካꬌስ። 
ꬋንꬅ ትራን ኡትቦና ምቻ ኑስ ደአዉሱ፤ አዝን እዮ ኦይችኮ፥ ኑ እዉ አይ ኦꬃኔ? 
እያ ግምበ ድርስ ግድያኮ፥ ኑኒ እ ቦላ አዱሳ ብራ ግምበ ግምባና፤ እያ ድርሳ ፐንገ ግድያኮ ዝጋ እብ መꬋና። 
ታኒ ድርሳ ግምበ፤ ታ ꬋንꬃይ ግምበ ቦላ ደእያ ሻኮ መላ፤ ታኒ ታ ሲቁዋራ ደእያ ዎደ እ ታናን ኡፋይቴስ። 
ሶሎሞነስ ባኣል-ሀሞናን ዎይነ ጋደይ ደኤስ፤ ሄ ዎይነ ጋድያ ኡነ ኦይሳታስ እሚስ። ከራ ኤክዳይሳት አይፍያ ግሾ፥ እሶይ እሶይ ሙኩሉ ብራ እያዉ ኤሆሶና። 
ሽን ታዉ ታ ቡዞ ዎይነ ጋደይ ደኤስ፤ ሶሎሞነ፥ ኔኒ ሙኩሉ ብራ ኤካ፤ ኡነ ኤክድ ኦይሳት ናምኡ ፄቱ ብራ ኤኮ። 
ነኖ፥ አታክልትያ ግዶን ደእያ ታ ሲቀ፥ ነ ላገት ነ ቃላ ስአናዉ ኮዮሶና፤ ነ ቃላ ታናካ ስሳ። 
ታ ሲቁዋዉ፥ ታኮ ኤለ ያ! ሽቶ ማታይ ዶልያ ደረታ ቦላራ፥ ጉፕያ ገንኤ ዎይኮ ዎሽኤ ማራዳ ሀና። 
