﻿ሶሎሞነ.
6.
ማጫሳ ኡባፈ ሎእያረ፥ ነ ላገይ አዉ ብዴ? ኑ ኔራ ኮያና መላ እ ብዳ ግና ኑስ ኦዳ። 
ታ ሲቆይ ዶርሳ ዉደ ሄማናዉ፥ ሎኦ ጪሻ ሺሻናዉ፥ ሽቶ ማታይ ደእያ አታክልትያ ግዶ ብስ። 
ታኒ ታ ሲቁዋባ፤ ታ ሲቆይ ታባ፤ እ ሱፈ ጪሻ ግዶን ዉደ ሄሜስ። 
ታ ሲቀ፥ ነ ትርሳ ካታሜዳ ሎኣሳ፤ የሩሳላመዳ ዳሮ ሎኣሳ። ባንድራ ኦይክድ ሳልፕያ፥ ኦላንቾዳ ያሻሳ። 
ኤንቲ ታና ኡንኤꬅዳ ግሾ፥ ሀያና ነ አይፍያ ታፐ ደንꬃ። ነ ብናናይ ጋላዳ ዙማፐ ዎꬍያ፥ ዴሻ ዉደ ዳኔስ። 
ነ አቻይ ሜጨትድ ከይያ፥ ኡባይ መንተ የልያ፥ ኤንታ ግዶን አዉጫየይ ባይና ዶርሳ ዉደ መላ። 
ነ ናምኡ ሻካላይ ጉሉንꬃ ግዶራ ፄልያ ዎደ፥ ናምኡ ከስድ ጳልቅዳ ኦሮማነ ዳኖሶና። 
ኡሱፑን ታሙ ማጫ ካዎት፥ ሆስፑን ታሙ ላገꬆት፥ ታይቦይ ባይና ጌላኦት ደኦሶና። 
ሽን ቦረይ ባይና ታ ሆልያ ታዉ ዱማ፤ እያ ባ አየስ እስኖ። እዮ የልዳ አይያ ኡባፈ አꬃዳ እዮ ዶሳዉሱ፤ ጌላኦት እዮ በእድ፥ “ሀና አንጀትዳሮ” ያጎሶና፤ ማጫ ካዎትነ ላገꬆት እዮ ሳቦሶና። 
ሀና ዎንታ ፃልቀዳ ዶልያራ፥ አጌናዳ ፖእያራ፥ ፃልቀዳ ጫድያራ፥ ባንድራ ኦይክድ ሳልፐ ከይዳ፥ ኦላንቾዳ ያሽያራ ሀና ኦኔ? 
ታኒ ዛንጋራን ቶከትዳ ምꬃታ በአናዉ፥ ዎይነይ አጭዳኮ ኦሮማነይ አይፍዳኮ ፄላናዉ፥ ዱገ ኦቾሎነ ጋደ ዎꬋስ። 
ታ ቆፖና ደእሽን ታ አሞይ ታና ኤፍድ፥ ካዋ አሳ ፓራ ጋረታ ግዶን ታና ኡትስስ። 
ነኖ ሱላማፐ ይዳረ፥ ሃያ፤ ሃ ስማ፤ ኑ ነና ሎይꬅድ ፄላና መላ ሃ ስማ። ዳሮ አሳ ስንꬃን የፅያ አሳዳ፥ ታና አይስ ፄሌቲ? 
