﻿ሶሎሞነ.
2.
ታኒ ሳሮናን ዶልያ ጪሻነ ዛንጋራን ዶልያ ሱፈ ጪሻ መላ። 
ታ ሲቅያ ማጫሳ ግዶን በእያ ዎደ፥ አጉንꬃ ግዶን በንትያ ሱፈ ጪሻ መላ። 
ታ ሲቆይ ሀራ ፓንꬃታ ግዶን ፄልያ ዎደ ዎራን ደእያ አፕለ ምꬃ መላ። ታና ዳሮ ኡፋይስን፥ እያ ኩያ ግዶን ኡታስ፤ እያ አይፈይ ምን ታና ማልኤስ። 
እ ታና ግብራ ምያ ኬꬅ ገልስስ፤ ባ ሲቁዋ ባንድራዳ ታ ቦላ ꬎቁ ꬎቁ ኦꬅስ። 
ታኒ እያ ሲቁዋን ኦይከታዳ ሀርግዳ ግሾ፥ ዛብበ አይፈ ሙዝድ ታና ጋሽትስተ፤ አፕለ ሙዝድ ታ ዎልቃ ምንꬅተ። 
ባ ሀድርሳ ኩሽያ ታና ቦርኮትስስ፤ ባ ኡሻቻ ኩሽያን ታና ቆምስ። 
ህንተኖ፥ የሩሳላመ ያላጋ ማጫሳዉ፥ ሲቆይ ባዉ ዶስድ ደንዳና ጋካናዉ፥ እያ ህንተ ባርከꬆና መላ፥ ታ ህንተና ገንኤንነ ዎራ ዎሽኤን አማታይስ። 
ታ ሲቁዋ ግርሳይ ደርያ ቦላራ ጉፕሸነ፥ ዙማ ቦላራ ፆንገትሸ የይስ ስኤቴስ። 
ታ ሲቆይ ዎሽኤ ዎይኮ ገንኤ ማር ዳኔስ፤ ሄኮ፥ ኑ ኬꬃ ማታን ኤቅስ፤ ማስኮተራ ሶ ፄሌስ፤ ማጋራጁዋ ግዶራ ፄሌስ። 
ታ ሲቆይ፥ ሀይሳዳ ያጌስ፤ “ታ ሲቀ፥ ደንዳ! ታ የገልሰ፥ ሃያ፥ እስፈ አነ ቦስ። 
ሄኮ፥ ባልጎይ አꬍስ፤ እራይካ ኤቅስ። 
ቢታን ጪሽ ጪይስ፤ የꬅ የፅያ አጌናይ ጋክስ፤ ሆለ የꬅ ኑ ቢታን ስኤትስ። 
ባላሰ ምꬃይ አይፈ ዶምስ፤ ዎይነይ ጪይስ፤ ጪሻ ሳዎይ ቢታን ቶንኩ ጌስ። ታ ሲቀ፥ ደንዳ፤ ታ የገልሰ፥ ሃያ፤ አነ እስፈ ቦስ።” 
አፎ ዶናን ዛላ ቆጶን፥ ቆሰትዳ ሆለ ዳንያረ፤ አነ እስ ቶሆ ታና ነ ሶምኡዋ በሳ፤ ነ ግርሳ ስሳ። ነ ቃላይ ታና ማልኤስ፤ ነ ሶምኦይ ዳሮ ሎኤስ። 
ኑ ዎይነይ ጪይስ፤ ኑ ዎይነ ጋድያ ኢስያ ዎርካናታ፥ ሄ ጉꬃ ቡታለታ ፅሄን ኦይክተ። 
ታ ሲቆይ ታባ፤ ታንካ እያባ፤ ጪሻታ ግዶን እ ባ ዉድያ ሄሜስ። 
ሳእ ጌያና ጋካናዉ፥ ኩያይ ꬋያና ጋካናዉ፥ ታ ሲቁዋዉ፥ ገንኤዳ ዎይኮ ዎሽኤ ማራዳ፥ አፎትያ ደርያራ ዎፃሸ ሃ ስማ። 
