﻿ሶሎሞነ ማዝሙረ ማፃፋ.
1.
ማዝሙረ ኡባፈ አꬍያ ሶሎሞነ ማዝሙረይ ሀይሳ። 
ነ ሲቆይ ዎይነፐ አꬍድ ኡፋይስያ ግሾ ታና ዛራ ዛራ ዬራ። 
ነ ትየትያ ሽቶይ ዋንድ ሳዊ! ነ ሱንꬃይ ጎግያ ሽቶ መላ፤ ጌላኦት ነና ሲቀይ ሄሳሳ። 
ታና ኔራ ኤካዳ ባ፤ አነ እስፈ ዎፆስ! ካዋዉ፥ ታና ነ ቁሩፁዋን ገልሳ። ነናን ኑ ኡፋይቶስ፤ ነ ሲቁዋ ዎይነ ኡሻፈ አꬅድ ናሾስ። ማጫስ ኡባይ ነና ሲቀይሳ በሳ። 
ህንተኖ፥ የሩሳላመ ማጫሳቶ ስእተ፤ ታኒ ካሬꬅ ግድኮካ ማላ ሎኦ። ታ ካሬꬃተꬃይ ቀዳረ ዱንካነ መላ፤ ሽን ታ ማላይ ሶሎሞነ ማጋራጆታ መላ። 
ታ ማላ ካሬꬅዳይ አዋ፤ ታኒ ካሬꬅ ግድዳ ግሾ ታና ቦሮፕተ። ታ እሻት፥ ታ አየ ናይት ታራ ኦየትድ፥ ታና ዎይነ ጋደ ናግስዶሶና፤ ሄሳ ግሾ ታ ዎይንያ ናጋብከ። 
ታ ሲቁዋዉ፥ አነ ታዉ ኦዳ፤ ነ ዶርሳ ዉድያ አዉን ሄማይ? ሴታ ጋላስ ኤንታ አዉን ሸምፕሳይ? ነና ደማናዉ ነ ላገታ ዉድያ ካላዳ፥ አይስ ጉሉንታዳ ብያ ማጫስ ግዶ? 
ማጫሳ ኡባፈ ሎእያረ፥ በሳ ኤሮና እፅኮ ዶርሳታ ጌዶ ካላ። ነ ዴሻ ማራታ ሄንꬃንቾታ ዱንካንያ ማታን ሄማ። 
ታ ሲቀ! ግብፀ ካዎ ፓራ ጋረታ ጎችያ፥ ፓራታ ግዶን ደእያ ማጋየዳ ሎኣሳ። 
ነ ሀይꬃን ደእያ አሌቁዋራ ሺቅድ፥ ነ ሻካላይ ዋንድ ሎእ! ነ ቆይ አልኦ ሹቻን አሌቀትስ። 
ኑኒ ነዉ ብራን ጫደትዳ፥ ዎርቃ አሌቁዋ ኦስሳና። 
ካዎይ ጋይታ ቦላ ኡትዳሽን፥ ታ ሽቱዋ ሳዎይ ኬꬃን ቶንኩ ግስ። 
ታ ሲቆይ ታ ꬋንꬃታ ግዶን ደእያ፥ ፁንተትዳ ሳውያ ካርበ ዳኔስ። 
ታ ሲቆይ፥ ኤንጋዳ ዎይነ ጋደን፥ ዶልዳ ሄና ጪሻ መላ። 
ታ ሲቀ፥ ኔኒ ዋና ሎአይ! ኔኒ ዋና ሎአይ! ነ አይፈት ሆለ አይፈዳ ሎኦሶና። 
ታ ሲቁዋዉ፥ ኔኒ ዋና ሎአይ! አይባ ኡፋይሳይ፤ ኑ አርሳይ ጭልኦ ማታ መላ ኡፋይሴስ። 
ኑ ኬꬃ ቱሳይ ዝጋ፤ ኑ ካራይ ፂዳን ኦይከትስ። 
