﻿ሌምሶ.
7.
ታ ናአዉ፥ ታ ቃላ ናጋ፤ ታ ኪታ ነ ዎዛናን ዎꬃ። 
ደኦን ዳናዉ ታ ኪታ ኦꬃ፤ ታ ትምርትያ ነ አይፈ ናኤዳ ናጋ። 
ነ ኩሸን ኤንታ ቃቻ፤ ነ ዎዛናን ኤንታ ፃፋ። 
ጭንጫተꬅ ነ ምችዳ፥ አኬካ ነ ማታ ዳቦዳ ፄላ። 
ኤንቲ ነና ላይማ ማጫሳፐነ ባ ቃላን ጭምያ ሀራ ማጫሳፐ ናጋና። 
እስ ጋላስ ታ ማስኮተራ ካረ ፄላስ። 
ኤራተꬅ ፓጭዳ ናአተꬃታ በአስ፤ ኤንታ ግዶፈ እሶይ ዳሮ ኤያ። 
ሄ ናአተꬃይ ኦገራ ብሸ፥ እስ ላይማ ማጫሰ ኬꬃ ማታራ አꬌስ፤ እ ሶ ኤፍያ ኦግያ ስሚድ እ ሶኮ ብስ። 
ሄ ዎደ ሳእ ላዴስ። 
ማጫስያ እያ ደማሱ፤ እያ ላይማ ግደይሳ እ ማኦይ ኤርሴስ፤ እያ አሳ ጭማናዉ ሀልቻዳ ከያሱ። 
እያ ፃልታማነ ዬል ባይና ማጫስ፤ ሶን ዎፑ ጋዳ ኡቱኩ። 
እያ እስ ቶሆ ኦገን፥ እስ ቶሆ ግያን፥ እስ ቶሆ ዳባባን ኤቃዳ ናጋዉሱ። 
እያ ሄ ናአተꬃ ቆማዳ ዬራሱ፤ እያ ትሽ ኦꬃዳ ፄላሸ ሀይሳዳ ያጋሱ፤ 
“ታኒ ታ ያርሹዋ ያርሻዳ፥ ታ ቃንገꬃ ሀች ጋꬃስ። 
ያታዳ ነና ሞካናዉ ከያስ፤ ነና ዳሮ ኮያስ፤ ህዛ ነና ደማስ። 
ታኒ ግብፀፈ ይዳ፥ አሌቀትዳ አፍላ ሂፃስ። 
ታኒ ታ ሂፃ፥ ካርበፈ፥ አልሙነፐነ ቃራፋፐ፥ ኦሰትዳ ሽቱዋ ፑካስ። 
ሃያ፤ ዎንታና ጋካናዉ ሲቆ አሎስ፤ ቆመትድ ኡፋይቶስ። 
ታ አዝናይ ሶን ዴና፤ ሃሆ ቢታ ብስ። 
ሚሸ ካርፂታ ኩንꬅድ ብዳ ግሾ፥ አጌና ኩሞና ሶ ስመና” ያጋሱ። 
ባ ማልኦ ኦዳን እያ ባለꬃሱ፤ ባ ሊቆ እንፃርሳን እያ ጭማሱ። 
ቦር ሹከታናዉ በይሳዳ፥ ጋር ኤሶትድ ፅሄን ገለይሳዳ፥ እ እዮ ካልድ ብስ። 
ቶር እያ ዎዛና ጫድዳዳ ሀንስ፤ ግተ ግዶ ገልዳ ካፎ ዳንስ፤ ሄስ ኡባይ እያ ሸምፑዋ ꬋይሳናዉ ሀነይሳ ኤርቤና። 
ህዛ ታ ናአዉ፥ ታና ስአ፤ ታ ዶናፐ ከይያ ቃላ ሀይዛ። 
ነ ዎዛናይ ማጫሳ ጌዶ ቦፖ፤ እ ኦግያን ገላዳ ꬋዮፓ። 
እያ ጫዳ የግዳይሳት ዳሮ፤ እያ ዎꬍዳይሳት ጉꬃ ግዶኮና። 
እ ሶይ ዱፎኮ ኤፍያ ኦገ፤ ሀይቆኮ ካለꬅያ ሆሮጋ። 
