﻿ማዝሙረ.
147.
ጎዳ ጋላትተ! ኑ ፆሳ ሳቦይ ሎኦ፤ እያ ሳቦይ ኡፋይስያባነ በሲያባ። 
ጎዳይ የሩሳላመ ኦራꬃና፤ እስራኤለፐ ድኤትዳይሳታ ሺሻና። 
ዎዛን መቅዳይሳታ ኮሌስ፤ ኤንታ ማዱንꬃ ፓꬄስ። 
እ ፆልንቶታ ታይቡዋ ኤሬስ፤ ኤንታ ኡባ ኤንታ ሱንꬃን ሱንꬃን ፄጌስ። 
ኑ ጎዳይ ግታ፤ እ ዎልቃማ፤ እያ አኬካስ ዛው ባዋ። 
ጎዳይ አዳታ ዘምፕሴስ፤ ሽን ኢታታ ሳአን የጌስ። 
ጎዳስ ጋላታ የꬅ የፅተ፤ ኑ ፆሳስ ዲꬃን የፅተ። 
እ ሳሉዋ ሻራ ማይዜስ፤ ቢታስ እራ እሜስ፤ ዙማታ ቦላ ማታ ዶልሴስ። 
መሄታስ ካꬅ፥ ኮሻትድ ዋስያ ቁሮ ናይታስ ምያባ እሜስ። 
እ ፓራታ ዎልቃንነ ቶራንቾታ ምኖተꬃን ኡፋይተና። 
ሽን ጎዳይ ባዉ ያየይሳታንነ እያ ማሮታን አማነተይሳታን ኡፋይቴስ። 
የሩሳላመ፥ ጎዳ ጋላታ! ፅዮነ፥ ነ ፆሳ ጋላታ! 
እ ነ ፐንግያ ኮበታ ምንꬃና፤ ነ ግዶን ደእያ ነ አሳ አንጃና። 
እ ነ ዛዋ ሳሮተꬃን ናጋና፤ ነና ሎኦ ግስተን ካልሳና። 
እ ባ ኪታ ቢታስ የዴስ፤ እያ ቃላይ ኤሶን ጋኬስ። 
እ ሻች ቡሉኮዳ ምጬስ፤ ጫጋና ብዶዳ ላሌስ። 
እ ሻቻ ሹቻዳ ሆሌስ፤ እያ ሜጉዋን ኦንካ ኤቃናዉ ዳንዳኤና። 
እ ባ ቃላ ኪትድ ሻቻ ማይሴስ። እ ጫርኩዋ ኪትን ሃꬅ ጎጌስ። 
እ ባ ቃላ ያይቆባስ፥ ባ ህግያነ ዎጋ እስራኤለስ አዋጄስ። 
እ ሀራ ካዎተꬃታስ ሄሳ ኦꬅቤና፤ ኤንቲ እያ ህግያ ኤሮኮና። ጎዳ ጋላትተ! 
