﻿ማዝሙረ.
145.
ዳዊታ ጋላታ ማዝሙረ ታ ፆሳዉ፥ ታ ካዋዉ፥ ታ ነና ግታያና፤ ነ ሱንꬃ መርናዉ ጋላታና። 
ታኒ ነና ኡባ ጋላስ ሳባና፤ ነ ሱንꬃ መርናዉ ጋላታና። 
ጎዳይ ግታ፤ አꬎ ጋላት እያዉ በሴስ፤ እያ ግታተꬃይ አሳ ቆፋፐ አꬌስ። 
እስ የለታይ ሀራ የለታስ ነ ኦሱዋ ኦዳና፤ ነ ማላልስያ ኦሶታ አዋጃና። 
ኤንቲ ነ ቦንቹዋ፥ ነ ቴማነ ነ ግታተꬃ ኦዳና። ታኒ ነ ማላልስያ ኦሱዋ ዛራ ዛራዳ ቆፓና። 
ማላልስያ ግታ ነ ኦሱዋባ ኦዳና፤ ታኒ ነ ግታተꬃ አዋጃና። 
ኤንቲ ነ ኬሀተꬃ ዳሮተꬃ ኦዳና፤ ነ ፅሎተꬃባ ኡፋይሳን የፃና። 
ጎዳይ ኬሀነ ቃተይሳ፤ ሀንቀታናዉ ኤለሰና፤ ሲቆን ኩምዳይሳ። 
ጎዳይ ኡባስ ኬሀ፤ እ ባ መተꬃ ኡባስ ቃቴስ። 
ጎዳዉ፥ መተꬃ ኡባይ ነና ጋላታና፤ ነ አሳ ኡባይ ነና ሳባና። 
ኤንቲ ነ ካዎተꬃ ቦንቹዋባ ኦዳና፤ ነ ዎልቃባ ኦዳና። 
ሄሳን ኤንቲ ነ ዎልቃማ ኦሱዋባነ ነ ካዎተꬃ ቦንቾ ቴማባ ኤርሳና። 
ነ ካዎተꬃይ መርና ካዎተꬅ፤ ነ ማታይ የለታ ኡባ ሃሬስ። ጎዳይ ባ ግዳ ቃላ ኡባን አማነቴስ፤ ባ ኦሶ ኡባን ኬሀ። 
ጎዳይ ኩንዳናዉ ገድጋደይሳታ ካትሴስ፤ ኩንድዳይሳታ ደንꬄስ። 
ኡባ አይፈይ ነና ፄሌስ፤ ኤንታዉ ኮሽያ ዎደን ካꬅ እማሳ። 
ኔኒ ነ ኩሽያ ምጫዳ፥ መተꬃ ኡባ አሞ አላሳ። 
ፆሳይ ባ ኦገ ኡባን ፅሎ፤ ባ ኦሶ ኡባን ኬሀ። 
ጎዳይ ባና ፄግያ ኡባስ፥ ቱማን ባና ፄግያ ኡባስ ማታን ደኤስ። 
እ ባዉ ያየይሳታ አሙዋ ኩንꬄስ፤ ኤንታ ዋሱዋ ስእድ አሼስ። 
ጎዳይ ባና ዶሰይሳታ ኡባ ናጌስ፤ ሽን ኢታታ ኡባ ꬋይሳና። 
ታኒ ታ ዶናን ጎዳ ጋላታና፤ መተꬃ ኡባይ እያ ጌሻ ሱንꬃ መርናዉ ጋላቶ! 
