﻿ማዝሙረ.
141.
ዳዊታ ማዝሙረ ጎዳዉ፥ ታኒ ነና ፄጋይስ፤ ታና ማዳናዉ ኤለሳ፤ ታ ኔኮ ዋስያ ዎደ ታና ስአ! 
ታ ዎሳይ እፃነዳ ነ ስን ሺቆ፤ ታ ኩሸ ምጨꬃይ ኦማርሳ ያርሾ መላ ግዶ። 
ጎዳዉ፥ ታ ዶና ናግያ አስ ዎꬃ፤ ታ መተርሻ ፐንግያ ናጋ። 
ኢታ ኦꬅያ አሳታራ ኢታ ኦꬆና መላ፥ ታ ዎዛና ኢታኮ ዛሮፓ፤ ኤንታ ግብራ ታና ሙዞፓ። 
ፅሎ አስ ታና ሴሮ፥ ሄስ ታዉ ኬሀተꬅ፥ እ ታና ሀንቀቶ፥ ሄስ ታ ሁጰን ዛይተ ትዮ መላ። ታ ዎዛናይ ሄሳ እፀና፤ ታ ዎሳይ ኡባ ዎደ ኤንታ ኢታ ኦሱዋ ቦላና። 
ኤንታ ዳይናት አፎ ሆለትያ ዎደ፥ ታ ቃላይ ቱማ ግደይሳ ኤንቲ ኤራና። 
ኤንቲ፥ “አስ ቢታ ጎየይሳዳነ ጳሻ ላለይሳዳ፥ ኑ መቀꬃይ ዱፎ ዶናን ላለታና” ያጎሶና። 
ኡባ ሃርያ ጎዳዉ፥ ታ አይፈይ ነና ፄሌስ። ታኒ ኔኮ ባቃታይስ፤ ታና ሀይቆስ አꬃዳ እሞፋ። 
ኤንቲ ታዉ የግዳ ግትያፐነ ኢታ ኦይሳታ ፅህያፐ ታና ናጋ። 
ታኒ ሳሮ አꬍን፥ ኢታት ባንታ ዎꬅዳ ግትያን ኦይከቶ። 
