﻿ማዝሙረ.
139.
ዳዊታ ማዝሙረ ጎዳዉ፥ ኔኒ ታና ፕልጋዳ ኤራዳሳ። 
ኔኒ ታ ኡተꬃነ ታ ኤቁዋ ኤራሳ፤ ታ ቆፋ ኡባ ሃሆን አኬካሳ። 
ታኒ ብያ በሳነ ሸምፕያ በሳ ፆሞሳሳ፤ ታ ኦገታ ኡባ ኤራሳ። 
ጎዳዉ፥ ታኒ ታ እንፃርሳን እስ ቃላ ኦደታናፐ ስን፥ ታ ቆፋ ኡባ ኤራሳ። 
ኔኒ ታ ዩሹዋን ደኣሳ፤ ነ ኩሽያ ታ ቦላ ዎꬃሳ። 
ነ ኤራተꬃይ ታና ዳሮ ማላልሴስ፤ ታ አኬካፐ ꬎቃ። 
ታ ነ አያናፐ አዉ ባቃታኔ? ነ ስንꬃፈ አዉ ባኔ? 
ፑደ ሳሎ ከይኮ ነ ያን ደኣሳ! ዱገ ስኦለ ዎꬍኮካ ነ ያን ደኣሳ። 
ዶሎሀ ባጋ ፓላዳ ቢኮ፥ ዎይኮ ዉሎሀ ባጋን ሃካዳ ደእኮ፥ 
ያን ነ ኩሸይ ታና ካለꬄስ፤ ነ ኡሻቻ ኩሸይ ታና ዘምፕሴስ። 
“ꬉማዉ ታና ገንꬃ፤ ጋላሳዉ ቃማ ላመታ” ግያኮካ፥ 
ሳካና ꬉም ነዉ ꬉመና፤ ቃም ጋላሳዳ ፖኤስ፤ ነዉ ꬉም ፖኦ መላ። 
ኔኒ ታ ግዶ አሳተꬃ መꬋዳሳ፤ ታ አየ ኡሎን ታና ኔኒ ትላዳሳ። 
ኔኒ ታና ማላልስያባነ የገልስ ኦꬃዳ መꬍዳ ግሾ፥ ታኒ ነና ጋላታይስ። ነ ኦሶት ማላልሴስ! ታኒ ሄሳ ሎይꬃዳ ኤራይስ። 
ታኒ ጌማ በሳን መትያ ዎደ፥ ታ መቀꬃይ ኔፐ ጌምቤና። ታ አሳተꬃይ ታ አየ ኡሎን ጪሞ ግዶን ሂላን አሌቀትድ ኦሰትያ ዎደ፥ 
ነ አይፈት ጊጎና ታ አሳተꬃ በእዶሶና። ቡሮ እሶይካ ዶመቶና ደእሽን፥ ነ ታዉ ቡዞይዳ ጋላሳ ኡባይ ነ ማዝጋበን ፃፈትዶሶና። 
ፆሳዉ፥ ነ ታዉ ቆፕያ ቆፋይ ዋንዳ ቦንቾ! ኤንታ ታይቦይ ዋንድ ዳርደ! 
ታኒ ኤንታ ታይብያኮ ሻፈፐ ዳሮ፤ ታኒ ባርክያ ዎደ ሀእካ ኔራ ደአስ። 
ፆሳዉ፥ ኔኒ ኢታታ ዎꬍያኮ አይበ! ሱꬁ ጉስያ አሳት ታፐ ሃኮ! 
ኤንቲ ነ ቦላ ኢታባ ሃሳዮሶና፤ ነ ሞርከት ነ ሱንꬃ ኢሶሶና። 
ጎዳዉ፥ ነና እፀይሳታ ታ እፅክና? ነ ቦላ ደንደይሳታ ታ ሻተትክና? 
ታኒ ኤንታ ኩመꬅ እፃይስ፤ ኤንታ ታኒ ታ ሞርከዳ ታይባይስ። 
ፆሳዉ፥ ታና ፕልጋዳ ታ ዎዛና ኤራ፤ ታና ኡንኤꬅዳ ታ ቆፋ በአ። 
ታናን ኢታባይ ደእኮ ፄላ፤ መርና ኦግያን ታና ካለꬃ። 
