﻿ማዝሙረ.
132.
ፑደ ከይሸ የፅያ ማዝሙረ ጎዳዉ፥ ዳዊታነ እ ዳንዳእዳ መቱዋ ኡባ ቆፓ። 
ጎዳስ እ ጫቅዳይሳ፥ ዎልቃማ ግድዳ ያይቆባ ፆሳስ፥ እ ኦድዳይሳ ሀሳያ። 
ጎዳስ በሰ ጊግሳና ጋካናዉ፥ ዎልቃማ ግድዳ ያይቆባ ፆሳስ፥ ኬ ኬፃና ጋካናዉ፥ ታ ሶ ገልከ፤ ታ ሂፃን ዝንእከ። ታ አይፈይ ቅልምኤና፥ ዎይኮ ታና ꬍስኮይ ኤከና። 
ኑኒ ታቦትያባ ኤፍራታን ስእዳ፤ ይኣርመ ቢታን እያ ደምዳ። 
“አነ እ ደእያ በሳ ቦስ፤ እያ ቶሆይ የꬍያ በሳን እያ ጎይኖስ።” 
ጎዳዉ፥ ደንዳ! ነ ምኖተꬃ ማላ ግድዳ ነ ታቦትያራ ነ ኬꬃ ገላ። 
ነ ካህነት ፅሎተꬅ ማኦ፤ ነ አሳይ ኡፋይሳን የፆ። 
ነ አይልያ ዳዊታ ግሾ፥ ኔኒ ትይዳ ካዋ አጎፋ። 
ጎዳይ ዳዊታስ ላመቶና ጫቆ ሀይሳዳ ያግድ ጫቅስ፤ “ነ ጉልባታፐ ከይዳ፥ ነ ናይታፐ እሱዋ ነ አራታን ኡትሳና። 
ነ ናይት ታ ጫቁዋነ ታ ታማርስያ ትምርትያ ናግኮ፥ ኤንታ ናይት ነ አራታን መርናዉ ኡታና” ያግስ። 
ጎዳይ ፅዮነ ዶርስ፤ ባዉ ደእያ በሲ ኦꬃናዉ አሞትድ፥ ሀይሳዳ ያግስ፤ 
“ሀይስ ታ መርናዉ ደእያ በሰ፤ ታኒ አሞትዳ ግሾ ሀይሳን ዳና። 
ታኒ ዳሮ ካꬅ እማዳ ፅዮነ አንጃና፤ እያን ደእያ ማንቆታካ ካꬅ ካልሳና። 
እያን ደእያ ካህነታ አቶተꬅ ማይዛና፤ እያን ደእያ ፅሎት ኡፋይሳን የፃና። 
ሄ በሳን ዳዊታ ዘርያፐ ካዎ ከሳና፤ ታኒ ትይዳ ካዋ ካዎተꬃን ጋምእሳና። 
ታኒ እያ ሞርከታ ዬላ ማይዛና፤ ሽን እያ ሁጰን ደእያ ካላቻይ ጶላና” ያጋስ። 
