﻿ማዝሙረ.
119.
ባንታ ኦግያን ቦረይ ባይናይሳትነ ጎዳ ዎጋዳ ሄመተይሳት አንጀትዳይሳታ። 
እያ ኪታ ናገይሳትነ ባንታ ኩመꬃ ዎዛናን እያ ኮየይሳት አንጀትዳይሳታ። 
ኤንቲ ባላ ኦꬅድ ኤሮኮና፤ ጎዳ ኦግያን ሄመቶሶና። 
ነ ኪታ አማነትድ ናጋና መላ፥ ኔኒ ኑና ኪታዳሳ። 
ነ ዎጋ ናጋዳ ታ ኦገይ ምናና መላ ኮያይስ። 
ነ ኪታ ኡባ አኬካዳ፥ ታ ፖሎ ዬላትከ። 
ነ ፅሎ ፕርዳ ታ ታማርዳ ዎደ፥ ታ ነና ሱረ ዎዛናን ጋላታና። 
ታ ነ ህግያ ናጋና፤ ታና ፖሎ የጎፋ። 
ያላጋይ ባ ኦግያ ዋትድ፥ ጌሻተꬃን ናጋናዉ ዳንዳኢ? ነ ቃላ ኪተትኮ ዳንዳኤስ። 
ታ ኩመꬃ ዎዛናን ነና ኮያስ፤ ነ ኪታፐ ካረ ከዮናዳ ታና ናጋ። 
ታኒ ነ ቦላ ናጋራ ኦꬆና መላ ነ ቃላ ታ ዎዛናን ቆሳስ። 
አቤት ጎዳዉ፥ ነ ጋላተታ፤ ነ አዋጁዋ ታና ታማርሳ። 
ነ ዶናፐ ከይያ ፕርዳ ኡባ ታኒ ታ እንፃርሳን ኦዳና። 
ዱረተꬃን ኡፋይተይሳፈ አꬃዳ፥ ታ ነ ህግያን ኡፋይታይስ። 
ነ ዎጋታ ዛራ ዛራዳ ቆፓይስ ነ ኦግያ ሎይꬃዳ አኬካይስ። 
ታኒ ነ ህግያን ኡፋይታይስ፤ ነ ቃላ ዶግከ። 
ታኒ ደኦን ዳና መላነ ነ ቃላ ኪተታና መላ ታዉ ነ አይልያስ ሎኦባ ኦꬃ። 
ነ ህግያን ደእያ ማላልስያ ቱማተꬃ ታ በአና መላ ታ አይፍያ ዶያ። 
ታኒ ሀ ሳአን እማ፤ ነ ኪታ ታፐ ገንꬆፋ። 
ታ ሸምፕያ ኡባ ዎደ ነ ፕርዳ ላሞታሸ ሀይቃሱ። 
ኦቶረይሳታ፥ ባደትዳይሳታነ፥ ነ ኪታፐ ካረ ከየይሳታ ነ ሴራሳ። 
ታኒ ኔኒ ኦድዳይሳ ኦꬅዳ ግሾ፥ ኤንታ ጫሻነ ቦርያ ታ ቦላፈ ድጋ። 
ሀር አቶሽን ሀላቃት ሺቅድ፥ ታ ቦላ ማቀትኮካ፥ ታኒ፥ ነ ኦሳንቾይ፥ ነ አዋጁዋ ዛራ ዛራዳ ቆፓና። 
ነ ማርካተꬃይ ታና ኡፋይሴስ፤ እ ታና ዞሬስ። 
ታኒ ሀይቃና ሀናይስ፤ ነ ግዳ ቃላዳ ታና አሻ። 
ታኒ ታ ኦግያባ ነዉ ኦድን፥ ነ ታና ስአዳሳ፤ ህዛ ነ አዋጁዋ ታና ታማርሳ። 
ነ ዎጋ ታና አኬክሳ፤ ማላልስያ ኦሱዋ ታኒ ዛራ ዛራዳ ቆፓና። 
አዛኖይ ዳርዳ ግሾ ታ ሸምፖይ ዳቡርስ፤ ኔኒ ግዳ ቃላዳ ታና ምንꬃ። 
ዎርዶ ኦገ ታፐ ሃሳ፤ ነ ኬሀተꬃን ነ ህግያ ታና ታማርሳ። 
ታኒ ቱማ ኦገ ዶራስ፤ ነ ፕርዳ ሀይዛስ። 
አቤት ጎዳዉ፥ ታ ነ ህግያ ምንꬃዳ ኦይካስ፤ ህዛ ታና ዬላዮፓ! 
ታ ዎዛና ላአ ከስዳ ግሾ፥ ታኒ ነ ህግያ ኦግያን ዎፃይስ። 
አቤት ጎዳዉ፥ ነ አዋጁዋ ብርሸꬃ ታና ታማርሳ፤ ታኒ ዉርሰꬅ ጋካናዉ እያ ናጋና። 
ታኒ ነ ህግያ ናጋና መላነ ታ ኩመꬃ ዎዛናፐ እያዉ ክተታና መላ፥ ነ ታዉ አኬካ እማ። 
ታኒ እያን ኡፋይትያ ግሾ፥ ነ ኪታ ኦግያን ታና ካለꬃ፤ 
ታ ዎዛና አሙዋኮ ግዶናሽን፥ ነ ህግያኮ ታና ዛራ። 
ፓꬆናባ ፄሎና መላ፥ ታ አይፈታ ተቃ፤ ነ ኦግያን ታ ደኡዋ ኦራፅሳ። 
ነዉ ያያና መላ፥ ነ ገልዳ ቃላ፥ ታዉ ነ አይልያስ፥ ፖላ። 
ታና ያሽያ ጫሻ ታፐ ድጋ፤ ነ ፕርዳይ አይ መላ ሎኦ! 
ታኒ ነ ዎጋ ናጋናዉ አሞታይስ፤ ኔኒ ፅሎ ግድያ ግሾ፥ ታ ደኡዋ ኦራፅሳ። 
አቤት ጎዳዉ፥ ነ ሲቁዋ ታና በሳ፤ ኔኒ ገልዳ ቃላዳ ታና አሻ። 
ታኒ ነ ቃላን አማነትያ ግሾ፥ ታና ጫየይሳታ ዛራናዉ ዳንዳአይስ። 
ታኒ ነ ፕርዳ ኡፋይስ ኦꬅዳ ግሾ፥ ታ እንፃርሳፈ ቱማተꬃ ቃላ ꬋይሶፋ። 
ታኒ መሪ መርናዉ ነ ህግያ ኪተታና። 
ታኒ ነ ዎጋ ፖልያ ግሾ፥ አሆን ሄመታና። 
ታኒ ካዎታ ስንꬃን ኤቃዳ፥ ኔኒ ግዳባ ኦዳሸ ዬላትከ። 
ታኒ ነ ኪታታ ዶሳይስ፥ ኤንታን ኡፋይታይስ። 
ታኒ ዶስያ ነ ኪታ ቦንቻይስ፤ ነ አዋጁዋ ዛራ ዛራዳ ቆፓና። 
ኔኒ ታዉ፥ ነ አይልያስ፥ እምዳ ቃላ ቆፓ፤ ነ ቃላን ታኒ ኡፋይስ ኦꬃይስ። 
ነ ቃላይ ታና ደኦን ዎꬄስ፤ እ መቶ ዎደ ታና ምንꬄስ። 
ኦቶራንቾት ታና ልከፈ አꬅድ ጫዮሶና፤ ሽን ታኒ ነ ህግያፈ ሸርእ ጊከ። 
አቤት ጎዳዉ፥ በንፐ ደእያ ነ ፕርዳ ታኒ ሀሳያይስ፤ ሄሳን ታኒ ምነታይስ። 
ኢታት ነ ህግያ ኪተቶናይሳ በእን፥ ታና ይሎይ ዎꬍስ። 
ታኒ ደእያ አላጋ ቢታን ነ አዋጆይ ታዉ የꬅ ግድስ። 
አቤት ጎዳዉ፥ ታኒ ቃማ ነ ሱንꬃ ቆፓይስ፤ ነ ህግያ ናጋይስ። 
ታ ነ ዎጋ ናጋና፤ እ ታዉ ኦሶ ግድስ። 
አቤት ጎዳዉ፥ ታ ሳማይ ነና፤ ታ ነ ህግያ ናጋናዉ ቃንፃስ። 
ታ ኩመꬃ ዎዛናን ነና ዎሳይስ፤ ነ ገልዳ ቃላዳ ታዉ ቃታ። 
ታኒ ታ ኦግያ አኬካ ፄላዳ፥ ነ ህግያ ካላናዉ ስማስ። 
ታኒ ነ ኪታ ናጋናዉ፥ ኤሶታናፐ አትሽን፥ ጋምእከ። 
ኢታት ታዉ ፅሄ የግኮካ፥ ታኒ ነ ህግያ ዶግከ። 
ነ ፅሎ ፕርዳ ግሾ፥ ነና ጋላታናዉ፥ ታኒ ግድ ብላሄ ደንዳይስ። 
ታኒ ነዉ ያየይሳታ ኡባስነ ነ ዎጋ ናገይሳታ ዳቦ። 
አቤት ጎዳዉ፥ ሳእ ነ ሲቁዋን ኩምስ፤ ነ አዋጁዋ ታና ታማርሳ። 
አቤት ጎዳዉ፥ ነ ገልዳ ቃላዳ ታዉ ነ አይልያስ ኬሀባ ኦꬃዳሳ። 
ታኒ ነ ኪታታን አማነትያ ግሾ፥ ሎኦ ፕርዳነ ኤራተꬅ ታና ታማርሳ። 
ታኒ ሴረታናፐ ካሰ ካረ ሄመታስ፤ ሽን ሀእ ነ ቃላስ ኪተታይስ። 
ኔኒ ኬሀ፤ ኔኒ ኬሀባ ኦꬃሳ፤ ነ አዋጁዋ ታና ታማርሳ። 
ኦቶራንቾት ታ ሱንꬃ ዎርዶን ኢሶሶና፤ ሽን ታ ነ ዎጋ ታ ኩመꬃ ዎዛናን ናጋና። 
ኤንታ ዎዛናይ ኩምꬅ ዶጭስ፤ ሽን ታኒ ነ ህግያን ኡፋይታይስ። 
ነ ህግያ ታማራና መላ ነ ታና ሴርዳይስ ታዉ ሎኦ ግድስ። 
ዳሮ ዎርቃፈነ ብራፐ፥ ነ ዶናፐ ከይያ ህገይ ታዉ አꬌስ። 
ታና ነ ኩሸይ መꬍስ፤ ነ ኩሸይ ጊግስስ፤ ነ ኪታ ታማራና መላ ታዉ አኬካ እማ። 
ታኒ ነ ቃላን ኡፋይስ ኦꬅዳ ግሾ፥ ነና ቦንቸይሳት ታና በእድ ኡፋይቶ። 
አቤት ጎዳዉ፥ ነ ፕርዳይ ፅሎ ግደይሳ ኤራስ፤ ነ ታና ሴርዳይ አማነተꬃን ግደይሳ ታ አኬካስ። 
ታዉ ነ አይልያስ ግዳ ቃላዳ፥ ነ ሲቆይ ታና ምንꬆ። 
ነ ህገይ ታና ኡፋይስያ ግሾ፥ ታኒ ደኦን ዳና መላ ታዉ ቃታ። 
ኦቶራንቾት ታና ዎርዶን ሞትያ ግሾ ዬላቶ፤ ታኒ ነ ዎጋ ዛራ ዛራዳ ቆፓይስ። 
ነዉ ያየይሳትነ ነ ማርካተꬃ ኤረይሳት ታኮ ዮ። 
ታ ዬላቶና መላ፥ ታ ዎዛናይ ነ ህግያን ቦረይ ባይናይሳ ግዶ። 
ኔኒ ታና አሻና መላ፥ ታኒ ናጋሸ ዳቡራስ፤ ታኒ ነ ቃላን ኡፋይስ ኦꬃይስ። 
ኔኒ ግዳ ቃላይ ፖለትን በአናዉ ናግሽን ታ አይፈይ ተልጁምስ። “ነ ታና አዉደ ምንꬃነ” ያጋስ። 
ጩያን ካቀትዳ ኦጎሮዳ ጉንዳስ፤ ግዶሽን ነ አዋጁዋ ባላቢከ። 
ታኒ ነ አይለይ አዉደ ጋካናዉ ናጎ? ታና የደይሳታ ነ አዉደ ፕርዳኔ? 
ነ ህግያ ናጎና ኦቶራንቾት ታና ኦይካናዉ ኦላ ቦኮሶና። 
ነ ኪታ ኡባይ አማንይሳታ፤ ጋሶይ ባይና አሳይ ታና የደꬅያ ግሾ ታና ማዳ። 
ኤንቲ ታና ዎꬍ ድግድ አግዶሶና፤ ሽን ታ ነ ዎጋ አጋብከ። 
ነ ሲቁዋን ታ ደኡዋ ናጋ፤ ታ ነ ኪታ ናጋና። 
አቤት ጎዳዉ፥ ነ ቃላይ መርናሳ፤ እ ሳሎን ምንድ ደኤስ። 
የለታፐ የለታ ጋካናዉ ነ አማነታሳ፤ ነ ሀ ሳኣ ምንꬃዳ ኤሳዳሳ፤ እካ ምንድ ደኤስ። 
ኡባይ ነ አይለ ግድያ ግሾ፥ ሀች ጋካናዉ ኡባይ ነ ኪታዳ ምንድ ደኤስ፤ 
ነ ህገይ ታና ኡፋይሶናባ ግድያኮ፥ ታ ዋያን ታ ꬋያናሽን። 
ታኒ ነ ዎጋ ኩመꬅ ዶግከ፤ ኔኒ እያን ታና ደኦን ዎꬃዳሳ። 
ታኒ ነባ ግድያ ግሾ ታና አሻ፤ ታኒ ነ ዎጋ ናጋናዉ ኮያይስ። 
ኢታት ታና ꬋይሳናዉ ዙግድ ናጎሶና፤ ሽን ታኒ ኔና ቆፓይስ። 
ፖሎ ጌተትዳባ ኡባስ ዛው ደኤይሳ ታ በአስ፤ ሽን ፖሎ ግድዳ ህግያስ ዛው ባዋ። 
ታኒ ነ ህግያ ዋናዳ ዶስያና! ኩመꬃ ጋላስ ታኒ እያ ቆፓይስ። 
ነ ኪታይ ኡባ ዎደ ታራ ደእያ ግሾ፥ ታ ሞርከታፐ አꬅድ ታና አኬካ ከሶሶና። 
ታኒ ኔ ህግያ ቆፕያ ግሾ፥ ታ አስታማረታፐ አꬍዳ ጭንጫተꬅ ታዉ ደኤስ። 
ታኒ ነ ዎጋ ኪተትያ ግሾ፥ ጭማታፐ አꬃዳ አኬካይስ። 
ታኒ ነ ቃላ ኪተታናዉ ኮይያ ግሾ፥ ታ ቶሁዋ ኢታ ኦገ ኡባፈ ናጋስ። 
ኔኒ ታና ታማርስዳ ግሾ፥ ታ ነ ህግያፈ ጋፃ ከይከ። 
ነ ቃላይ ዋንድ ማልእ! እልሎ ኤሳፈ አꬍድ ማልኤስ። 
ነ ዎጋፐ አኬካ ደማስ፤ ሄሳ ግሾ፥ ጌላ ኦገ ኡባ እፃስ። 
ነ ቃላይ ታ ቶሁዋስ ፆምፐ፥ ታ ኦግያስ ፖኦ። 
ነ ፅሎ ፕርዳዳ ዳናዉ፥ ታ ጫቅዳ ጫቁዋ ምንꬃና። 
አቤት ጎዳዉ፥ ታ ዋየይ ዳሮ፤ ነ ኡፋይሳ ቃላዳ ታና ደኦን ዎꬃ። 
አቤት ጎዳዉ፥ ታ ጋላታ ያርሹዋ ኤካ፤ ታና ነ ፕርዳ ታማርሳ። 
ታ ሸምፖይ ኡባ ዎደ መቶን ደኤስ፤ ሽን ታኒ ነ ህግያ ዶግከ። 
ኢታት ታዉ ግተ የግዶሶና፤ ሽን ታኒ ነ ዎጋፐ ካረ ከያብከ። 
ነ ህገይ ታዉ መርና ሻሎ፤ እ ታ ዎዛናስ ኡፋይስ እሜስ። 
ታ ሀይቃና ጋካናዉ ነ አዋጁዋዳ ኦꬃናዉ ቆፋ ቃቻስ። 
ታኒ ናምኡ ቆፍ ደእያ አሳ እፃይስ፤ ሽን ነ ህግያ ዶሳይስ። 
ነ ታዉ ጎንዳለነ ቆሰታዳ አትያ በሰ ታኒ ነ ቃላን ኡፋይስ ኦꬃይስ። 
ታኒ ታ ፆሳ ኪታ ናጋና መላ፥ ህንተኖ፥ ኢታ ኦꬅያ ኡባይ ታፐ ሃክተ። 
ታኒ ደኦን ዳና መላ ነ ኡፋይሳ ቃላዳ ታና ምንꬃ፤ ታ ኡፋይሳ ꬉምሶፓ። 
ታ ሳሮ ዳና መላ ታና ዘምፕሳ፤ ታ ኡባ ዎደ ነ አዋጁዋ ስአና። 
ነ አዋጁዋፈ ሃከይሳታ ነ ኮያካ፤ ኤንታ ጭሞይ ሀዳ። 
ኢታታ ኡባ ነ ፕቶዳ ታይባሳ፤ ሄሳ ግሾ፥ ታኒ ነ ኪታ ዶሳይስ። 
ታ አሳተꬃይ ያሻን ነዉ ኮኮሬስ፤ ታ ነ ህግያ ዳሮ ያያይስ። 
ታ ሱረነ ፅሎ ኦꬃስ፤ ታና ታ ሞርከታስ አꬃዳ እሞፋ። 
ታና ነ አይልያ ማዳናዉ ጫቃ፤ ታና ኦቶራንቾት ኡንኤꬃና መላ ኦꬆፋ። 
ነ ታና አሻና ጋዳ ታ ፄልሽን፥ ነ ፅሎ ቃላ ታ ናግሽን፥ ታ አይፈይ ተልጁምስ። 
ታዉ ነ አይልያስ፥ ነ ሲቁዋዳ ኦꬃ፤ ነ ህግያ ታና ታማርሳ። 
ታና ነ አይልያ ነ ሲቁዋ በሳ፤ ነ ዎጋ ኤራና መላ ታዉ አኬካ እማ። 
አቤት ጎዳዉ፥ አሳይ ነ ህግያ መንꬅዳ ግሾ፥ ነ ፕርዳና ዎደይ ሀእ ጋክስ። 
ታኒ ነ ኪታ ዎርቃፈ አꬃዳ ዶሳይስ፤ ኤ፥ ዋላህ ባይና ዎርቃፈ አꬃዳ ዶሳይስ። 
ሄሳ ግሾ፥ ታ ነ ዎጋታ ኡባ ካላይስ፤ ጌላ ኦገ ኡባ እፃስ። 
ነ ዎጋ ኡባይ ማላልስያባ፤ ሄሳ ግሾ፥ ታ እያ ኪተታይስ። 
ነ ቃላ ብርሸꬃይ ፖኦ እሜስ፤ ጭንጫተꬅ ፓጭዳይሳታስ አኬካ እሜስ። 
ታኒ ነ ኪታ ሳሞታዳ፥ ታ ዶና ዶያስ። 
ሃ ታኮ ስማ፤ ነና ዶሰይሳታስ ነ ኦይሳዳ ታዉ ቃታ። 
ነ ኡፋይሳ ቃላዳ ታ ሄመꬃ ሱርሳ፤ ናጋር ታና ሃራና መላ ኦꬆፋ። 
ታ ነ ዎጋ ኪተታና መላ ታና ኡንኤይሳታ ኩሸፐ ዎዛ። 
ነ አይልያ ታ ቦላ ነ ሶምኡዋ ፖእሳ፤ ነ ህግያ ታማርሳ። 
አሳይ ነ ህግያ መንꬅዳ ግሾ፥ ታ አፉꬃይ ሃꬃዳ ጎጌስ። 
አቤት ጎዳዉ፥ ነ ፅሎ፤ ነ ፕርዳይ ሱረ። 
ነ ህገይ ፅሎ፤ አይ ዎደካ አማነቴስ። 
ታ ሞርከት ነ ቃላ ቶችዳ ግሾ፥ ታ ምሻይ ታማዳ ኤፅድ ከይስ። 
ነ ኡፋይሳ ቃላይ ዳሮ አማነቴስ፤ ታ ነ አይለይ ዳሮ ዶሳይስ። 
ታኒ ፓꬆናነ ካትዳ አስ፤ ግዶሽን ታ ነ ዎጋ ዶግከ። 
ነ ፅሎተꬃይ መርናዉ ደኤስ፤ ነ ህገይ ቱማ። 
መቶይነ ኡንእ ታና ጋክስ፤ ሽን ነ ኪታት ታና ኡፋይሶሶና። 
ነ ዎጋይ መርናዉ ፅሎ፤ ታ ደኦን ዳና መላ ታዉ አኬካ እማ። 
አቤት ጎዳዉ፥ ታ ኩመꬃ ዎዛናፐ ኔኮ ዋሳስ፤ ታና አላ፤ ታ ነ አዋጁዋ ናጋና። 
ታ ኔኮ ዋሳስ፤ ታና አሻ፤ ታ ነ ህግያ ናጋና። 
ፃልቀይ ጫሮና ዎንታ ደንዳዳ፥ ታና ማዳ ጋዳ ኔኮ ዋሳይስ፤ ነ ገልዳ ቃላን ኡፋይስ ዎꬃይስ። 
ነ ቃላባ ዛራ ዛራ ቆፓናዉ፥ ቃማ ኡታ አቃይስ። 
አቤት ጎዳዉ፥ ነ ሲቁዋ ግሾ፥ ታና ስአ፤ ነ ፅሎ ፕርዳዳ ታና ደኦን ዎꬃ። 
ታና የደꬅያ ኢታት ታኮ ማቶሶና፤ ሽን ኤንቲ ነ ህግያፈ ሃኮሶና። 
ሽን አቤት ጎዳዉ፥ ነ ታዉ ማታን ደኣሳ፤ ነ ኪታ ኡባይ ቱማ። 
ታኒ በንፐ ዶማዳ፥ ነ ህግያ ታማራስ፤ ነ እያ መርናዉ ምንꬃዳ ኤሳዳሳ። 
ታ ነ ህግያ ዶጎና ግሾ፥ ታ መቱዋ በአዳ ታና አሻ፤ 
ታ ግሾ ሞተታዳ ታና ዎዛ፤ ነ ኡፋይሳ ቃላዳ ታና ደኦን ዎꬃ። 
ነ ህግያ ኤንቲ ኤኮና ግሾ፥ ኢታት አቶተꬅ ደሞኮና። 
አቤት ጎዳዉ፥ ነ ቃይ ዳሮ፤ ነ ፅሎ ፕርዳዳ ታና ደኦን ዎꬃ። 
ታና እፀይሳትነ የደይሳት ዳሮ፤ ሽን ታ ነ ህግያፈ ጋፃ ከይከ። 
ኤንቲ ነ ኪታ ናጎና ግሾ፥ ታ ነና ካደይሳታ በአዳ ሻተታስ። 
አቤት ጎዳዉ፥ ታ ነ ዎጋ ዶሰይሳ በአ፤ ነ ሲቁዋዳ ታና ደኦን ዎꬃ። 
ነ ቃላይ ቱማ፤ ነ ፅሎ ፕርዳይ መርናዉ ደኤስ። 
ሀላቃት ታና ጮ የደꬆሶና፤ ሽን ታ ዎዛናይ ነ ቃላ ያዬስ። 
ዳሮባ ድእዳ አስ ኡፋይተይሳዳ፥ ነ ኡፋይሳ ቃላን ታ ኡፋይታይስ። 
ታኒ ዎርዶ እፃይስ፤ ሻተታይስ፤ ሽን ነ ህግያ ዶሳይስ። 
ነ ፅሎ ፕርዳ ግሾ፥ ታ ነና ጋላስ ላፑን ቶሆ ጋላታይስ። 
ነ ህግያ ዶሰይሳታስ ፖሎ ሳሮተꬅ ደኤስ፤ ኤንታ አይብካ ꬉበꬃናዉ ዳንዳኤና። 
አቤት ጎዳዉ፥ ታ ነ አቶተꬃ ኡፋይሳን ናጋይስ፤ ነ ኪታ ካላይስ። 
ታኒ ነ ህግያ ናጋይስ፤ ታ ኩመꬃ ዎዛናፐ ዶሳይስ። 
ታ ኦገ ኡባ ነ በእያ ግሾ፥ ታኒ ነ ህግያነ ነ ዎጋ ናጋና፤ 
አቤት ጎዳዉ፥ ታ ዋሶይ ነ ስን ጋኮ፤ ነ ኡፋይሳ ቃላዳ ታዉ አኬካ እማ። 
ታ ዎሳይ ነ ስን ጋኮ፤ ነ ኡፋይሳ ቃላዳ ታና አሻ። 
ኔኒ ነ አዋጁዋ ታና ታማርስያ ግሾ፥ ታ ዶናፐ ጋላት ፑልታና። 
ነ ኪታ ኡባይ ፅሎ ግድያ ግሾ፥ ታ እንፃርሳይ ነ ቃላባ የፃና። 
ታኒ ነ ዎጋ ዶርዳ ግሾ፥ ነ ኩሸይ ታና ማዳናዉ ጊግዳይሳ ግዶ። 
አቤት ጎዳዉ፥ ነ አሻና መላ ታ ላሞታይስ፤ ነ ህገይ ታና ኡፋይሴስ። 
ታኒ ነና ጋላታና መላ፥ ታና ደኦን ዎꬃ፤ ነ ፕርዳይ ታና ማዶ። 
ታኒ ꬋይዳ ዶርሳዳ ቶይላታስ፤ ታና ነ አይልያ ኮያ፤ ታ ነ ኪታ ዶግከ። 
