﻿ማዝሙረ.
116.
ጎዳይ ታ ዋሱዋነ ታ ዎሳ ስእዳ ግሾ፥ ታኒ እያ ዶሳይስ። 
እ ባ ሀይꬃ ታኮ ዛርዳ ግሾ፥ ታ ደኦ ላይꬃ ኡባን እያ ፄጋና። 
ሀይቆይ ፅሄዳ ታና ተቅስ፤ ዱፎ ህርጋይ ታና ኦይክስ፤ ኡንእነ መቶይ ታና ቃችስ። 
ሄ ዎደ፥ “አቤት ጎዳዉ፥ ታና አሻ” ያጋዳ ጎዳ ሱንꬃ ፄጋስ። 
ጎዳይ ኬሀነ ፅሎ፤ ኑ ፆሳይ ቃቴስ። 
ጎዳይ አሽከታ ናጌስ፤ ታ መቶትዳ ዎደ ታና አሽስ። 
ጎዳይ ነዉ ኬሀ ግድያ ግሾ፥ ህዛ ታ ሸምፐ፥ ዎፑ ጋ። 
ጎዳይ ታ ሸምፑዋ ሀይቆፐ፥ ታ አይፍያ አፉꬃፈ፥ ታ ቶሁዋ ꬉበፐ አሽስ። 
ታኒ ደኦን ደኤይሳታ ግዶን፥ ጎዳ ስንꬃን ሄመታይስ። 
ታኒ፥ “ዳሮ ዋየታስ” ግዳ ዎደ፥ ታ አማኑዋ አጋብከ። 
ታዉ ሳእ ሀድርዳ ዎደ፥ “አስ ኡባይ ዎርዳንቾ” ያጋስ። 
እ ታዉ ኬህዳ ኬሀተꬃ ግሾ ጎዳስ አይ ቃንፃናዉ ዳንዳእያና? 
ጎዳይ ታና አሽዳ ግሾ ጋላታና፥ ፁአ ዎይነ ኡሻ ያርሾ ኦꬃዳ ሺሻና። 
እያ አሳ ኡባ ስንꬃን ታ ቃንገꬃ ጎዳስ ጋꬃና። 
ጌሻታ ሀይቆይ ጎዳ ስንꬃን፥ ዳሮ አልኦ። 
አቤት ጎዳዉ፥ ታኒ ነ አይለ፤ ታኒ ነ አይለ፥ ነ ጋꬍንደ ናኣ፤ ታና ቃሾፐ ነ ብርሻዳሳ። 
ጎዳዉ፥ ታ ጋላታ ያርሾ ነዉ ያርሻና፤ ነ ሱንꬃ ፄጋና። 
አሳ ኡባ ስንꬃን ታ ቃንገꬃ ጎዳስ ጋꬃና። 
የሩሳላመን ደእያ ፆሳ ኬꬃ ዳባባን፥ ታ ቃንገꬃ ጋꬃና። ጎዳ ጋላትተ። 
