﻿ማዝሙረ.
103.
ዳዊታ ማዝሙረ ታ ሸምፐ ጎዳ ጋላታ! ታ ኩመꬃ አሳተꬃዉ፥ እያ ጌሻ ሱንꬃ ጋላታ። 
ታ ሸምፐ ጎዳ ጋላታ! እ ነዉ ኦꬅዳ ኬሀተꬃ ኡባ ዶጎፓ። 
እ ነ ናጋራ ኡባ አቶ ጌስ፤ ነ ሀርገ ኡባፈ ነና ፓꬄስ። 
እ ነና ሀይቆፐ አሼስ፤ ሲቆንነ ማሮታን ነና አንጄስ። 
ነ ያላጋተꬃይ አርጋንꬃዳ ኦራፃና መላ፥ ነ ደኡዋ ሎኦባን ካልሴስ። 
ጎዳይ ቆሄትዳይሳታስ ፅሎተꬃንነ ሱረን ፕርዴስ። 
እ ባ ኦግያ ሙሰ፥ ባ ኦሱዋ እስራኤለ አሳ ኤርስስ። 
ጎዳይ ቃተይሳነ ማረይሳ፤ ሀንቀታናዉ ኤሶተና፤ እያ ሲቆይ ዳሮ። 
እ ኡባ ዎደ ሴረና፤ መርናዉ ሀንቀተና። 
እ ኑስ ኑ ናጋራዳ ኦና፤ ኑ ኢታተꬃ መላ ዛረና። 
ሳሎይ ሳአፐ ꬎቀይሳዳ፥ ጎዳ ያየይሳታስ እያ ሲቆይ ግታ። 
ዶሎሀፐ ዉሎህ ሃከይሳዳ፥ ጎዳይ ኑ ናጋራ ኑፐ ሃሴስ። 
አው ባ ናይታስ ቃተይሳዳ፥ ጎዳይ ባዉ ያየይሳታስ ቃቴስ። 
ኑኒ አይብፐ መትዳኮ እ ኤሬስ፤ ኑኒ ቢታ ግደይሳ እ አኬከስ። 
አስ ባዉ ማታ መላ፤ እ ባዞ ጪሻዳ ጭዬስ። 
ጫርኮይ እያ ቦላ ጫርክያ ዎደ ꬋዬስ፤ እ ዶልዳ በሳይ ዛሪድ ኤረተና። 
ሽን ጎዳስ ያየይሳታስ እያ ሲቆይ መርናፐ መርና ጋካናሳ፤ እያ ፅሎተꬃይ ናአ ናአ ጋካናሳ። 
ሄስ ሀነይ እያ ጫቁዋ ናገይሳታነ እያ ኪታ ፖላናዉ ምነይሳታሳ። 
ጎዳይ ሳሎታን ባ አራታ ኤስስ፤ እያ ካዎተꬃይ ኡባ ሃሬስ። 
ህንተኖ፥ እያ ኪታንቻቶ፥ እያ ኪታ ናግያ ዎልቃማቶ፥ እ ኦድያባ ስኤይሳቶ፥ ጎዳ ጋላትተ! 
ህንተኖ ሳሎን ደእያ ምኖቶ፥ እያ ሸንያ ፖለይሳቶ፥ ጎዳ ጋላትተ! 
ህንተኖ፥ እ ሃርያ በሳ ኡባን፥ ደእያ መተꬃቶ፥ ጎዳ ጋላትተ! ታ ሸምፐ ጎዳ ጋላታ! 
