﻿ማዝሙረ.
94.
ጎዳዉ፥ ኔኒ ሀሎ ከይያ ፆሲ፤ ኩሸ ዛርያ ፆሳዉ፥ ነ ቦንቹዋ በሳ። 
አቤት ሳኣ ፕርድያ ፆሳዉ ደንዳ፤ ኦቶራንቾታስ በሲያ ሴራ እማ። 
ጎዳዉ፥ አዉደ ጋካናዉ ጋምአይ? ኢታት አዉደ ጋካናዉ ኡፋይታኔ? 
ኢታ ኦይሳት ኦቶሮ ቃላ ሃሳዮሶና፤ ኤንቲ ጮ ጬቀቶሶና። 
ጎዳዉ፥ ኤንቲ ነ አሳ ሊቅሶሶና፤ ኤንቲ ነ ላታ ናቆሶና። 
አምኤታነ በታንቾታ ዎꬎኦሶና፤ አው ባይና ናይታ ሙጮሶና። 
ኤንቲ፥ “ጎዳይ ኑና በኤና፤ ያይቆባ ፆሳይ አኬከና” ያጎሶና። 
ህንተኖ፥ አሳ ግዶፈ ኤያቶ፥ አኬክተ! ህንተኖ፥ ኤያቶ ህንተ ጭንጫ ግዳናይ አዉዴ? 
ሀይ ኦꬅዳ ፆሳይ ስኤኔ? አይፈ መꬍዳ ጎዳይ በኤኔ? 
ካዎተꬃታ ሴርያ ፆሳይ ሴረኔ? አሰ ኤራተꬅ ታማርስያ እ፥ ኤረኔ? 
ጎዳይ አሳ ቆፍ ፓꬆናባነ ሀዳ ግደይሳ ኤሬስ። 
አቤት ጎዳዉ፥ ኔኒ ሴርያ አስነ ነ ህግያ ታማርስያ አስ አንጀትዳይሳ። 
ኢታት ኩንድያ ኦላይ ቦከታና ጋካናዉ፥ መቶ ጋላስ ኔኒ እያ ሸምፕሳሳ። 
ፆሳይ ባ አሳ የገና፤ እ ባ ላታ አገና። 
ፕርድ ስሚድ ፅሎተꬃ ቦላ ኤቃና፤ ዎዛና ሱረት ኡባይ ፅሎ ፕርዳ ካላና። 
ማካላንቾታ ቦላ ታ ግሾ ደንደይ ኦኔ? ኢታ ኦይሳታራ ታ ግሾ ኤቀተይ ኦኔ? 
ጎዳይ ታና ማዶናኮ፥ ታኒ ኤሶን ዱፎ ገላዳ አታናሽን። 
ታኒ፥ “ታ ቶሆይ ሀልፅስ” ግዳ ዎደ፥ ነ ሲቆይ ታና ካትስስ። 
ታ ዎዛናን ኡንኤተꬅ ኩምዳ ዎደ፥ ኔኒ ታና ዎፑ ኦꬃዳ ኡፋይሳሳ። 
ህገ ሻርያ ጌላ ዳይናታራ ጌላ አሳራ ኔኒ ሃሼታይ? 
ፅሎታ ዎꬋናዉ ኤንቲ ቶቦሶና፤ ሱረታ ቦላ ሀይቆ ፕርዶሶና። 
ግዶሽን ጎዳይ ታ ሚፃ፤ ታ ፆሳይ ታኒ ቆሰታዳ አትያ ዛላ። 
ኤንታ ኢታተꬃ ግሾ እ ኤንታ ሴራና፤ ኤንታ ናጋራ ግሾ እ ኤንታ ꬋይሳና፤ ጎዳይ ኑ ፆሳይ ኤንታ ꬋይሳና። 
