﻿ማዝሙረ.
92.
ሳምባታ ጋላሳ ማዝሙረ ጎዳ ጋላቶይ ሎኦ፤ ኡባፈ ꬎቃ ፆሳዉ፥ ነ ሱንꬃ ሳቦይ ሎኦ። 
ዎንታ ዎንታ ነ ሲቁዋ ኦዶይ፥ ቃማ ነ አማነተꬃ አዋጆይ ሎኦ። 
ታሙ ሻያን ዋፀትዳ ዲꬃን ማስንቆ ካእሸ ነና ጋላቶይ ሎኦ። 
ታኒ ነ ኦሱዋን ኡፋይትዳ ግሾ፥ ነ ኩሸ ኦሱዋ ግሾ ነና ጋላታይስ። 
ጎዳዉ፥ ነ ኦሶይ አይ መላ ግተ! ነ ቆፋይ አይ መላ ጪሞ! 
ኤያ አስ ኤራናዉ ዳንዳኤና፤ ዎዛን ባይና አስ አኬካናዉ ዳንዳኤና። 
ኢታት ማታዳ ድጭኮካ፥ ኢታ ኦይሳት ዳይኮካ፥ ኤንቲ መርናዉ ꬋያና። 
ሽን አቤት ጎዳዉ፥ ኔኒ መርናዉ ኡባፈ ꬎቃ። 
አቤት ጎዳዉ፥ ቱማ ነ ሞርከት ꬋያና፤ ኢታ ኦꬅያ ኡባይ ፕስክ ጋና። 
ታ ካጭያ መንꬃ ካጨዳ ꬎቁ ኦꬃዳሳ፤ ሎኦ ዛይተ ታ ሁጰን ትያዳሳ። 
ታ ሞርከት ፆነትሽን ታ አይፈን በአስ፤ ታና ኡንኤይሳት ዋስሽን ታ ሀይꬃን ስአስ። 
ፅሎት ዛምባዳ ድጫና፤ ልባኖሰ ዝጋዳ ዳያና። 
ኤንቲ ጎዳ ኬꬃን ቶከትዳ ምꬃ መላ፤ ኤንቲ ኑ ፆሳ ዳባባን ዳና። 
ኤንቲ ጬግድካ አይፋና፤ ኤንቲ እርፃነ ጭልኦ ግድድ ዳና። 
ኤንቲ፥ “ጎዳይ ሱረ፤ እ ታ ዛላ፤ እያን ኢታተꬅ ባዋ” ያጋና። 
