﻿ማዝሙረ.
86.
ዳዊታ ዎሳ ጎዳዉ፥ ታኒ ማንቆነ መቶታንቾ ግድያ ግሾ፥ ታ ዎሳ ስአዳ ታና አላ። 
ታ ነዉ ዱማትዳ አስ ግድያ ግሾ፥ ታና ደኦን ዎꬃ፤ ነናን አማነትያ ታና፥ ነ አይልያ አሻ፤ ኔኒ ታ ፆሳ። 
ጎዳዉ፥ ጋላስ ኩመꬅ ታ ኔኮ ዋስያ ግሾ፥ ታዉ ቃታ። 
ጎዳዉ፥ ታ ሸምፖይ ኔኮ ዋስያ ግሾ፥ ታና፥ ነ አይልያ ኡፋይሳ። 
ጎዳዉ፥ ኔኒ ኬሀነ አቶ ገይሳ፤ ነና ፄግያ ኡባስ ነ ሲቆይ ዳሮ። 
አቤት ጎዳዉ፥ ታ ዎሳ ስአ፤ ታ ዋሱዋ ሀይዛ። 
ነ ታ ዎሳስ ዛሮ እምያ ግሾ፥ ታ መቱዋ ጋላሳን ታ ኔኮ ዋሳና። 
ጎዳዉ፥ ፆሳታ ግዶን ነ መል ባዋ፤ ነ ኦሱዋራ ግነይ ባዋ። 
ጎዳዉ፥ ኔኒ መꬍዳ ካዎተꬃት ይድ፥ ነ ስንꬃን ጉልባታና፤ ነ ሱንꬃ ቦንቻና። 
ኔኒ ግታ፤ ነ ማላልስያ ኦሶ ኦꬅያ ግሾ ፆሲ ነ ፃላላ። 
ጎዳዉ፥ ታ ነ ቱማን ሄመታና መላ፥ ታና ነ ኦግያ ታማርሳ። ታኒ ነ ሱንꬃስ ያያና መላ፥ ታዉ እስ ዎዛና እማ። 
ጎዳዉ ታ ፆሳዉ፥ ታኒ ነና ታ ኩመꬃ ዎዛናን ጋላታና፤ ነ ሱንꬃ መርናዉ ቦንቻና። 
ነ ሲቆይ ታዉ ዳሮ፤ ታና ዱፎፐ አሻዳሳ። 
ፆሳዉ፥ ኦቶራንቾት ታ ቦላ ደንድዶሶና፤ ኢታ አሳታ ጩጋይ ታና ዎꬋናዉ ኮዬስ፤ ኤንቲ ነና ዉዳ ጎኮና። 
ሽን አቤት ጎዳዉ፥ ኔኒ ቃትያነ ማርያ ፆሰ። ኔኒ ሀንቀታናዉ ጋምኣሳ፤ ሲቆይነ አማነተꬅ ዳርዳይሳ። 
ታኮ ስማዳ ታዉ ቃታ፤ ነ አይልያስ ዎልቃ እማ፤ ነ ጋꬍንደ ናኣ ታና አሻ። 
ጎዳዉ፥ ነ ኬሀተꬃ ማላታ ታና በሳ፤ ነ ታና ማደይሳነ ምንይሳ በእያ ዎደ፥ ታ ሞርከት ዬላታና። 
