﻿ማዝሙረ.
77.
አሳፍ ዛማረታ ሀላቃ ኤዶታመስ ፃፍዳ ማዝሙረ ታኒ ፆሳ ማጋናይስ፤ ታና ስአ ጋዳ እያኮ ዋሳይስ። 
ታ መቱዋ ጋላሳን ጎዳ ኮያስ፤ ቃማ ኩመꬅ ሸምፖይ ባይና ታ ኩሽያ ምጫስ፤ ግዶሽን፥ ታ ሸምፕያ ምናናዉ ዳንዳአቡኩ። 
ታኒ ፆሳባ ቆፕያ ዎደ ኦላይስ፤ ታኒ ዎꬃ ደንꬅዳ ዎደ ታ ሸምፖይ ዳቡሬስ። ሳላሀ 
ቃማ ኩመꬅ ታና ꬍስኮ ድጋዳ አይሳዳሳ፤ ታ ኡንኤትዳ ግሾ ኦደታናዉ ዳንዳአብከ። 
ታኒ አꬍዳ ጋላሳታ ቆፓስ፤ ካሰ ላይꬃታ ሀሳያስ። 
ታኒ ቃማ ግታ ቆፋን አቃስ፤ ታ ዎዛናን ዎꬃ ደንꬃሸ፥ ሀይሳዳ ያጋዳ ታና ኦይቻስ፤ 
“ፆሳይ ኑና መርናዉ አግደዬ? ህዛፐ ጉየ እ ኑስ ኬሄነዬ? 
እያ ሲቆይ አትደዬ? እ ኦድዳ ቃላ መርናዉ ፖለነዬ? 
ፆሳይ ባ ማሮታ ዶግደዬ? ባ ቃꬍያ ሀንቆን ላምደዬ?” ያጋዳ ኦይቻስ። ሳላሀ 
ኡባፈ ꬎቃ ፆሳዉ፥ ታና ኡንኤꬅዳይ፥ ነ ኡሻቻ ኩሽያን ኑና ማዶ አግዳይሳ። 
ጎዳ ኦሶታ ታኒ ቆፓና፤ እ በን ኦꬅዳ ማላልስያ ኦሶታ ሀሳያና። 
ነ ኦሶታ ታኒ ዛራ ዛራዳ ቆፓና፤ ነ ዎልቃማ ኦሶታ ታኒ ዎꬃ ደንꬃና። 
አቤት ፆሳዉ፥ ነ ኦገይ ጌሽ፤ ነ መላ ግታ ፆሲ ኦኔ? 
ኔኒ ማላልስያባ ኦꬅያ ፆሳ፤ አሳ ግዶን ነ ዎልቃ ቆንጭሳሳ። 
ነ አሳ፥ ያይቆባነ ዮሰፋ ኮቻ ነ ቀስያን ዎዛዳሳ። ሳላሀ 
አቤት ፆሳዉ፥ ሃꬃት ነና በእድ ያይዶሶና፤ አባ ጪሞትካ ኮኮርዶሶና። 
ሻራት ሃ ዱገ ትግዶሶና፤ ዳዳይ ሳሎን ጉምስ፤ ነ ዎልአንꬃይ ያን ሀን ዎልአምስ። 
ነ ዳዳ ጉንꬃይ ኡሹዋ ግዶን ጉምስ፤ ነ ዎልአንꬃይ ሳኣ ፖእስስ፤ ቢታይ ቃፅስ፤ ኮኮርስ። 
ኔኒ አባ ግዶራ ሄመታሳ፤ ጪሞ አባ ግዶራ ካንꬃሳ፤ ሽን ነ ቶሆይ የꬍዳ በሳይ በንተና። 
ሙሰ ኩሸንነ አሮና ኩሸን ነ አሳ ዶርሳ ዉደዳ ካለꬃዳሳ። 
