﻿ማዝሙረ.
66.
ዛማረታ ሀላቃስ የፀትያ ሳባ ማዝሙረ ቢታ ኡባይ ህንተ ቃላ ꬎቁ ኦꬅድ፥ ኡፋይሳን ፆሳ ጋላትተ። 
ፆሳ ሱንꬃስ ቦንቾን የፅተ፤ ቦንቾ ጋላታ እያዉ እምተ። 
ፆሳስ ሀይሳዳ ያግተ፤ “ነ ኦሶት ዋንድ ማላልሲ? ነ ዎልቃይ ዳርዳ ግሾ፥ ነ ሞርከት ያሻን ነ ስንꬃን ኮኮሮሶና። 
ቢታ ኡባይ ነና ጎይኔስ፤ ነና ሳቤስ፤ ነ ሱንꬃስ ጋላታን የፆሶና” ያግተ። ሳላሀ 
ሃይተ፤ ፆሳይ ኦꬅዳባ በእተ፤ አሳ ግዶን ማላልስያ ኦሶ ኦꬅስ። 
እ አባ ሃꬃ ሻክድ፥ ካሰ ኑ አዋት ዮርዳኖሰ ሻፋ ባንታ ቶሆን የꬍድ መላ ቢታራ ፕንዶሶና። ሄሳን እ ኦꬅዳባን ኑኒ ኡፋይትዳ። 
እ ባ ዎልቃን መርናዉ ሃሬስ። ካዎተꬃታ ባ አይፈን ፄሌስ፤ ሄሳ ግሾ፥ ማካለይሳት እያ ቦላ ደንዶፎ። ሳላሀ 
አሳዉ፥ ኑ ፆሳ ጋላትተ፤ ህንተ እያ ጋላትያ ጋላታይ ስኤቶ። 
እ ኑና ፓፃ ዎꬅስ፤ ኑ ኩንዶና መላ ናግስ። 
አቤት ፆሳዉ ነ ኑና ፓጫዳሳ፤ ብር ታማን ፓጨትድ ጌየይሳዳ ነ ኑና ጌሻዳሳ። 
ነ ኑና ፅሄን ገልሳዳሳ፤ ኑ ዞኮን ዴፆ ቶሆ ዎꬃዳሳ። 
ሞርከት ኑ ሁጰራ ቶግድ አꬋናዳ ኦꬃዳሳ፤ ኑ ሃꬃ ግዶራነ ታማ ግዶራ አꬍዳ፤ ሽን ሀእ ኑና እንጀ በሲ ኤሀዳሳ። 
ታ ፁሳ ያርሾ ኤካዳ ነ ኬꬃ ገላና፥ ታ ቃንገꬃ ጋꬃና። 
ታ መቶትዳ ዎደ ታ ዶናይ ግዳ ቃላ፥ ታ እንፃርሳፈ ከይዳ ቃንገꬃ ጋꬃና። 
ታ ነዉ ሞꬉዋ፥ ፁሳ ያርሾ ኦꬃዳ ሺሻና። ማራዘታ ሳዎ ቶንኩ ግያ ያርሾ ኦꬃዳ ሺሻና፤ ኮርማነ ኮለታ ነዉ ያርሻና። ሳላሀ 
ህንተኖ፥ ፆሳስ ያየይሳቶ፥ ኡባይ ሃ ይድ፥ ስእተ፤ ፆሳይ ታዉ ኦꬅዳባ ታ ህንተዉ ኦዳና። 
ታ ቃላ ꬎቁ ኦꬃዳ ዎሳስ፤ ታ እንፃርሳን እያ ጋላታስ። 
ታኒ ዎዛን ኤርሽን ናጋራ ገንꬅዳባ ግድያኮ፥ ጎዳይ ታና ስኤና። 
ሽን ፆሳይ ቱማ ታና ስእስ፤ ታ ኦይሻ ዛርስ። 
ፆሳይ ታ ዎሳ እፅቦና ግሾ፥ ባ መርና ሲቁዋ ታና ድግቦና ግሾ ጋላተቶ። 
