﻿ማዝሙረ.
65.
ዛማረታ ሀላቃስ የፀትዳ ዳዊታ ማዝሙረ አቤት ፆሳዉ፥ ፅዮነን ነዉ ጋላት በሴስ፤ ኑኒ ኑ ቃንገꬃ ነዉ ጋꬃና። 
ኔኒ ዎሳ ስእያ ግሾ፥ አሳ ኡባይ ኔኮ ዮሶና። 
ኑ ናጋራይ ኑና ሙክዳ ዎደ፥ ነ ኑስ አቶተꬅ እማዳሳ። 
ነ ዶርዳይሳትነ ነ ዳባባን ዳና መላ ኔኮ ሺሽዳ አስ አንጀትዳይሳ። ኑኒ ነ ሶን፥ ነ ጌሻ ዱንካንያን ደእያ ሎኦባን ካሎስ። 
አቤት ኑ አቶተꬃዉ፥ ማላልስያ ነ ፅሎ ኦሱዋን ኑስ ዛራ። ሳኣ ጋፃፐ ጋፃ ጋካናዉ፥ ሃሆን ደእያ ኡባስ ነ ኡፋይስ። 
ኔኒ ነ ዎልቃን ደረታ ምንꬃዳሳ፤ ነ ዎልቃ ዳንጫዳሳ። 
ኔኒ አባ ግርሳነ ቤታ ጉንꬃ ስእ ኦꬃሳ፤ ያርክያ አሳ ዋሱዋ እርፅሳሳ። 
ነ ኦꬅዳ ማላታ ግሾ፥ ሳኣ ጋፃ ጋካናዉ ደእያ አሳ ኡባይ ነዉ ያያና፤ ዶሎሀፐ ዉሎሀ ጋካናዉ ደእያ አሳ ኡባ ኡፋይሳዳሳ። 
ነ እራ እማዳ ቢታ ናጋሳ፤ ዳሮ ዱረያሳ፤ አሳስ ካꬃይ ዶላና መላ ፆሳ ሻፋይ ሃꬃን ኩምዳይሳ፤ ሄሳዳ ኦꬃዳ ነ ጊግሳዳሳ። 
ጎሻስ ሃ እማሳ፤ ቢታ ሹግሳዳ ኦላ ኩንꬃሳ። ነ እራን ዛራዳ እርፅሳሳ፤ ካꬃይ ዶላና ድጫና መላ አንጃሳ። 
ላይꬃ ካሎ ላይꬅ ኦꬃሳ፤ ነ አꬍያ በሳ ኡባይ ኩምድ ፓላሀና። 
ሄንꬃ በሳታ ማታን ኩንꬃሳ፤ ዙማታ ኡፋይስ ማይዛሳ። 
ነ ሄንꬃ በሳታ ዶርሳታ ኩንꬃሳ፤ ዛንጋራ ቢታን ካꬅ ኩንꬃሳ፤ ኤንቲ ኡፋይሳን እልልሸ የፆሶና። 
