﻿ማዝሙረ.
57.
ዳዊቲ ሳኦላፐ ባቃትድ ጎንጎሎን ቆሰትዳ ዎደ ዛማረታ ሀላቃስ ፃፍዳ ዎሳ “ꬋይሶፋ” ጌተትያ ዲꬃ ጩꬃን የፀትዳ ዎሳ ታና ማራ፤ አቤት ፆሳዉ፥ ታና ማራ፤ ታ ኔኮ ባቃታይስ። ꬋዮይ አꬋና ጋካናዉ፥ ነ ቀፍያ ጋርሳን ቆሰታይስ። 
ታኒ ኡባፈ ꬎቃ ፆሳኮ፥ ባ ቆፋꬆ ኦꬅያ ፆሳኮ ዋሳይስ። 
ፆሳይ ሳሎፐ ማዶ ኪትድ ታና አሻና፤ ታና የይሳታ ካዉሻና፤ ፆሳይ ባ ሲቁዋነ ባ አማነተꬃ ታዉ ኪታና። ሳላሀ 
ታኒ ታ ሞርከታፐ ግዶን፥ አሰ ምያ ጋሞታፐ ግዶን ደአይስ። ኤንታ አቻይ ቶራነ ዶንገ ቶራ መላ፤ ኤንታ እንፃርሳይ ቃራ ማሻ መላ። 
አቤት ፆሳዉ፥ ነ ሳሎፐ አꬋዳ ꬎቁ ꬎቁ ጋ፤ ነ ቦንቾይ ሳአ ኡባ ካሞ። 
ኤንቲ ታ ቶሁዋስ ፅሄ ዎꬅዶሶና፤ ታኒ ኡንኤታዳ ሆካስ። ኤንቲ ታ ኦግያን ኦላ ቦክዶሶና፤ ሽን ሄ ኦላን ባንታዉ ኩንድዶሶና። ሳላሀ 
ታ ዎዛናይ ምኖ፤ አቤት ፆሳዉ፥ ታ ዎዛናይ ምኖ፤ ታኒ ነና ማዝሙረን ሳባና። 
ታ ሸምፐ፥ ባርካ፤ ዲꬅነ ማስንቆይ ደንድተ፤ ታኒ ጉራ ባርካና። 
አቤት ጎዳዉ፥ ታ ነና አሳ ግዶን ጋላታና፤ ካዎተꬃታ ግዶን ነና ሳባና። 
ነ ሲቆይ ሳሎታፐ ꬎቃ፤ ነ አማነተꬃይ ሻራፐ ቦላ። 
አቤት ፆሳዉ፥ ነ ሳሎፐ አꬋዳ ꬎቁ ꬎቁ ጋ፤ ነ ቦንቾይ ሳአ ኡባ ካሞ። 
