﻿ማዝሙረ.
56.
ፍልስፄመ አሳይ ጌተ ካታማን ዳዊታ ኦይክዳ ዎደ ዳዊቲ ዛማረታ ሀላቃስ ፃፍዳ ዎሳ “ሃሆ በሳን ዎላ ቦላ ኡትዳ ሆሌስ” ጌተትያ ዲꬃ ጩꬃን የፀትዳ ዎሳ አቤት ፆሳዉ፥ አሳይ ታና ኡንኤꬅያ ግሾነ ኡባ ዎደ ታ ሞርከት ታና የደꬅያ ግሾ ታዉ ቃታ። 
ታ ሞርከት ኩመꬃ ጋላስ ታና የꬎኦሶና፤ ኦቶሮን ታና ኦልያ አሳይ ዳሮ። 
ታና ያሽያ ዎደ ታ ነናን አማነታይስ። 
ታኒ ፆሳን አማነታይስ፤ ያይከ፤ እያ ቃላ ጋላትያ ፆሳን አማነታይስ፤ አስ ታና አይ ኦꬃኔ? 
ኩመꬃ ጋላሳን ታ ሞርከት ባላ ኮዮሶና፤ ታና ቆሀናዉ ኡባ ዎደ ቶቦሶና። 
ኤንቲ ታ ቦላ ማቀቶሶና፤ ታና ቆሀናዉ ጌዶሶና። ታ ታንጎ ኡባ ካሎሶና፤ ታና ዎꬋናዉ ኮዮሶና። 
ኤንቲ አይ ኦገራካ ከስ ኤካና መላ ኦꬆፋ፤ ነ ሀንቁዋን ሄ ካዎተꬃታ ካዉሻ። 
ታ ዋይያ ታይባ፤ ነ ታ አፉꬃ ማካዳሳ፤ ኤንቲ ነ ማዝጋብያን ደኦኮና? 
ታ ነና ፄግያ ዎደ፥ ታ ሞርከት ጉየ ስማና፤ ፆሳይ ታ ባጋ ግደይሳ ታ ሄሳን ኤራይስ። 
ታ እያ ቃላ ጋላትያ ፆሳን፥ ታ እያ ቃላ ጋላትያ ጎዳን፥ 
ታ ሄ ፆሳን አማነታይስ፤ ያይከ። አስ ታና አይ ኦꬃኔ? 
አቤት ፆሳዉ ታ ነዉ ቃንግዳባይ ደኤስ፤ ሄሳ ጋላታ ያርሾ ኦꬃዳ ታ ነዉ እማና። 
ደኦን ደኤይሳታ ቦላ ፖእያ ፖኡዋን ፆሳ ስንꬃን ስመረታና መላ፥ ታ ሸምፑዋ ሀይቆፐ፥ ታ ቶሁዋ ꬉበፐ አሻዳሳ። 
