﻿ማዝሙረ.
50.
አሳፋ ማዝሙረ ዎልቃማ ጎዳይ፥ ፆሳይ ኦዴስ፤ ዶሎሀፐ ዉሎሀ ጋካናዉ ቢታ ኡባ ፄጌስ። 
መꬎን ፖሎ የገልስ ግድዳ ፅዮነፐ ፆሳይ ፖኤስ። 
ኑ ፆሳይ ያና፤ ስእ ጌና፤ ኤፅያ ታማይ እያ ስንꬃና፤ ዎልቃማ ጎተይ እያ ዩሹዋና። 
ፆሳይ ባ አሳ ፕርድያ ዎደ፥ ሳሎታነ ሳኣ ፄጌስ። 
“ያርሾን ታራ ጫቅዳ፥ ታ ጌሻታ ታኮ ሺሽተ” ያግስ። 
ፆሳይ ፕርድያ ግሾ፥ ሳሎት እያ ፅሎተꬃ አዋጆሶና። ሳላሀ 
“ታ አሳዉ፥ ስእተ፤ ታ ህንተዉ ኦዳይስ፤ እስራኤለ አሳዉ፥ ታ ነ ቦላ ማርካታና፤ ታኒ ፆሳይ፥ ነ ፆሳ። 
ነ ያርሹዋ ግሾነ ነ ፁሳ ያርሹዋ ግሾ፥ ነና ቦርከ። 
ነ ዳራፐ ኮርማታ፥ ነ ግርብያፈ ኮለ ኤካናዉ ኮይከ። 
ዎራን ደእያ ዶአት ኡባይ ታባ፤ ሙኩሉ ዙማ ቦላ ደእያ መሄትካ ታሳ። 
ታኒ ꬎቃ ደርያን ደእያ ካፎታ ኡባ ኤራይስ፤ ደንባን ደእያ መተꬃት ታይሳታ። 
ታና ኮሻይኮካ ነና ኦይችከ፤ ሳእነ ሳአን ኩምዳባ ኡባይ ታባ። 
ታኒ ኮርማታ አሹዋ ማይናዬ? ዎይኮ ዴሻታ ሱꬃ ኡያናዬ? 
ፆሳስ ጋላታ ያርሾ እማ፤ ኡባፈ ꬎቃ ፆሳስ ነ ቃንገꬃ ጋꬃ። 
መቶ ጋላስ ታና ፄጋ፤ ታ ነና አሻና፤ ነካ ታና ቦንቻና” ያጌስ። 
ሽን ፆሳይ ኢታ አሳ ሀይሳዳ ያጌስ፤ “ታ ህግያ ነ ናባባናዉ ነዉ አይ ማት ደኢ? ዎይኮ ታ ጫቁዋ ነ ዶናን ቆንጭሳናዉ ነዉ አይ ማት ደኢ? 
ኔኒ ታ ትምርትያ እፃዳሳ፤ ታ ቃላ ጉየ የጋዳሳ። 
ካይሱዋ በእዳ ዎደ ኔኒ እያራ ዳቦታዳሳ፤ ላይማተይሳታ ማባራን ገላዳሳ። 
ነ ዶና ኢታባ ኦደታናዉ ብላ የዳዳሳ፤ ነ እንፃርሳይ ዎርዶ ሃሳያ ሜዘትስ። 
ኡታዳ ነ እሻ ዝግራዳሳ፤ ነ አየ ናኣ ቦላ ኢታባ ኦደታዳሳ። 
ነ ሀይሳ ኡባ ኦꬅያ ዎደ፥ ታኒ ስእ ግዳ ግሾ ታና ነ መላ ጋዳ ቆፓዳሳ። ሽን ሀእ ታ ነና ሀንቃና፤ ነ ናጋራ ነ ስንꬃን ታይባና። 
ህንተኖ፥ ፆሳ ዶገይሳቶ፥ ሀይሳ አኬክተ፤ ሄስ ሀኖና እፅኮ ታ ህንተና መንረꬃና፤ ሄ ዎደ ህንተና አሻናይ ባዋ። 
ታዉ ጋላታ ያርሸይ ታና ቦንቼስ፤ ባ ኦግያ ሱርስዳ አሳስ ታኒ ፆሳ አቶተꬃ በሳና” ያጌስ። 
