﻿ማዝሙረ.
44.
ቆረ ናይት ዛማረ ሀላቃስ ፃፍዳ ማዝሙረ አኬካን ፃፍዳ ግንፆ ፆሳዉ፥ በን ዎደ ነ ኦꬅዳባ ኑ ስእዳ፤ ኑ አዋታ ዎደ ነ ኦꬅዳባ ኑስ ኦድዶሶና። 
ካዎተꬃታ ነ ኩሸን ጎዳ ከሳዳሳ፤ ኑ አዋታ ኤንታ ቢታን ቶካዳሳ። ሀራ ካዎተꬃታ ሴራዳሳ፤ ሽን ኑ አዋታ አክሳዳሳ። 
ኤንቲ ባንታ ማሻን ኦልድ ሄ ቢታ ላትቦኮና፤ ኤንቲ ባንታ ምኖተꬃን ፆንቦኮና። ሽን ኔኒ ኤንታ ዶስዳ ግሾ፥ ኤንታ ነ ኡሻቻ ኩሸይ፥ ነ ቀሰይነ ነ ሶምኡዋ ፖኦይ ፆንስስ። 
ያይቆባ ኮቻስ ፆኖ ኪትያ፥ ታ ካዎይነ ታ ፆሳይ ነና። 
ነናን ግድድ ኑ ሞርከታ ፆናና፤ ነ ሱንꬃን ኑና እፀይሳታ የꬋና። 
ታኒ ታ ቶራን አማነትከ፤ ታ ማሻይ ታና አሸና። 
ሽን ነ ኑና ኑ ሞርከታፐ አሻሳ፤ ኑና እፀይሳታ ኔኒ ካዉሻሳ። 
ኑኒ ኡባ ዎደ ፆሳን ጬቀታና፤ ነ ሱንꬃ መርናዉ ጋላታና። ሳላሀ። 
ሽን ሀእ ኑና አጋዳሳ፤ ካዉሻዳሳ፤ ኑ ኦላንቾታራ እስፈ ኦላስ ከያካ። 
ኑ ሞርከታ ስንꬃፈ ኑና ባቃትሳዳሳ፤ ኑ እፀይሳት ኑና ቦንቅዶሶና። 
ኑና ዶርሳዳ ሹሀስ አꬃ እማዳሳ፤ ካዎተꬃታ ግዶን ኑና ላላዳሳ። 
ኔኒ ነ አሳ ላፋ ጋተን ባይዛዳሳ፤ አይ ዎካ ደማባካ። 
ኑ ሾሮት ኑና ቦራናዳ ኦꬃዳሳ፤ ኑ ሄራን ደኤይሳት ኑና ቅልቅሳናዳነ ኑ ቦላ ሚጫናዳ ኦꬃዳሳ። 
ኑና ካዎተꬃታ ግዶን ሀይሰስ አጋዳሳ፤ ኤንቲ ባንታ ሁጵያ ኑ ቦላ ቃꬃና መላ ኦꬃዳሳ። 
ጋላስ ኩመꬅ ታኒ ቶሸታስ፤ ታ ሶምኡዋ ዬል ካምስ። 
ሄስ ሀንዳይ ታና ጫየይሳታነ ቦረይሳታ ጋሶንነ፥ ታ ሞርከታነ ታና ማንደይሳታ ጋሶና። 
ኑኒ ነና ዶጎና ደእሽን፥ ነ ጫቁዋ መንꬆና ደእሽን፥ ሀ ኡባይ ኑና ጋክስ። 
ኑ ዎዛናይ ነና አግቤና፤ ኑ ቶሆይ ነ ኦግያፐ ካረ ከይቤና። 
ሽን ኔኒ ኑና መንረꬃዳ ዶአ ኦላን የጋዳሳ፤ ሳካና ꬉማን ካማዳሳ። 
ኑ፥ ፆሳ ሱንꬃ ዶግዳባ ግድያኮ፥ ሀራ ፆሳታኮ ኑ ኩሽያ ምጭዳባ ግድያኮ፥ 
ዎዛና ፁራ ፆሳይ ኤርያ ግሾ፥ እ ሀይሳ ፄልድ ደመኔ? 
ግዶሽን፥ ነ ግሾ ኡባ ጋላስ ሀይቆስ፤ ሹካናዉ ኤፍያ ዶርሳዳ ታይበትዳ። 
ጎዳዉ፥ ደንዳ፥ አይስ ꬍስካይ? ደንዳ፥ መርናዉ ኑና አጎፋ። 
ነ ሶምኡዋ ኑፐ አይስ ገንꬃይ? ኑ ቆሁዋነ ኑ ኡንኣ አይስ ዶጋይ? 
ኑኒ ባናን የገትዳ፤ ኑ አሳተꬃይ ቢታራ ኦይከትስ። 
ጎዳዉ፥ ደንዳ፥ ኑና ማዳ፤ ነ ሲቁዋ ግሾ ጋዳ ኑና ዎዛ። 
