﻿ማዝሙረ.
40.
ዛማረታ ሀላቃስ ዳዊቲ ፃፍዳ ማዝሙረ ታኒ ጎዳ ዳንዳአን ናጋስ፤ እ ታኮ ስሚድ ታ ዋሱዋ ስእስ። 
ꬋዮ ኦላፈ፥ ስልሞ ኡርቃፈ ታና ከስስ፤ ታ ቶሁዋ ዛላ ቦላ ኤስስ፤ ታ ሄመꬃ ምንꬅስ። 
ታ ዶናን ኦራꬃ የꬅ ዎꬅስ፤ ሄስካ ኑ ፆሳይ ጋላተቶ ያገይሳ፤ ዳሮት በእድ ያያና፤ ጎዳን አማነታና። 
ጎዳን አማነትያ፥ ኦቶራንቾታ ፄሎናይ፥ ዎርዶታራ ሄመቶናይ፥ አንጀትዳ አስ። 
ጎዳዉ፥ ታ ፆሳዉ፥ ኔኒ ዳሮ ማላልስያባ ኦꬃዳሳ፤ ኔራ ልከተይ ኦንካ ባዋ! ኔኒ ኑስ ቆፕዳ ሎኦ ቆፋ፥ ኦንካ ታይባናዉ ዳንዳኦና፤ ሄስ ታኒ ኦድን ዉርያባ ግደና። 
ኔኒ ያርሾነ እሞ ኮያባካ፤ ሽን ነና ስአና መላ ታ ሀይꬃ ዶያዳሳ፤ ፁሳ ያርሾነ ናጋራ ያርሾ ኮያባካ። 
ሄሳ ግሾ ታኒ፥ “ፃꬃ ማፃፋን ታባይ ፃፈትዳይሳዳ ታኒ ያስ። 
ታ ፆሳዉ፥ ታኒ ነ ሸንያ ኦꬃናዉ ዶሳይስ፤ ነ ህገይ ታ ዎዛናን ደኤስ” ያጋስ። 
ግታ ሺቆን፥ ነ ፅሎተꬃ ኦዳና፤ ጎዳዉ ኔኒ ኤረይሳዳ፥ ታኒ ማርካተይሳ አግከ። 
ታ ነ ፅሎተꬃ ታ ዎዛናን ቆሳብከ፤ ነ አማነተꬃነ ነ አሹዋ ኦዳስ። ነ ሲቁዋነ ነ ቱማተꬃ፥ ግታ ሺቁዋን ገንꬃብከ። 
ጎዳዉ፥ ነ ማሮተꬃ ታፐ ሃሶፋ፤ ነ ሲቆይነ ነ ቱማተꬃይ፥ ታና ኡባ ዎደ ናጎ። 
ታይቦይ ባይና ኢታባይ ታና ተቅስ፤ ታ ባላይ ታና ጎዝስ፤ ታ ፄላናዉ ዳንዳእከ ታ ናጋራይ ታ ሁጰ ብናናፐ ዳርስ፤ ታ ዎዛናይ ታ ግዶን ትልእስ። 
ጎዳዉ፥ ታና አሻናዉ ኤሮ ጋ፤ ታ ጎዳዉ፥ ታና ማዳናዉ ኤለሳ። 
ታና ዎꬋናዉ ኮየይሳት ዬላቶ፥ ካዉዮ፤ ታ ቆሄተꬃ አሞተይሳት ካዉይድ ጉየ ስሞ። 
ታኮ፥ “እያዉ ሀሹ፥ ሀሹ” ገይሳት ፆነትድ ዬላቶ። 
ሽን ነና ኮይያ ኡባይ፥ ነናን ኡፋይቶ፤ ሀሹ ጎ። ነ አቶተꬃ ዶስያ ኡባይ፥ “ጎዳይ ግታ” ያጎ። 
ታኒ ማንቆነ መቶታንቾ፤ ሽን ጎዳይ ታባ ቆፖ! ታና ማደይ አሸይ ነና፤ ታ ፆሳዉ፥ ጋምኦፋ። 
