﻿ማዝሙረ.
31.
ዛማረታ ሀላቃስ ፃፈትዳ ዳዊታ ማዝሙረ አቤት ጎዳዉ፥ ታ ኔኮ ባቃታይስ፤ አዉደካ ታና ዬላዮፓ፤ ነ ፅሎተꬃን ታና አሻ። 
ነ ሀይꬃ ታኮ ዛራ፤ ኤለሳዳ ታና አሻ። ኔኒ ታዉ ጌምያ ዛላ፤ ታና አሽያ ምኖ ሚፃ ግዳ። 
ኤ፥ ነ ታዉ ዛላነ ሚፃ፤ ነ ሱንꬃ ግሾ ታና ካለꬃ፤ ኦግያ በሳ። 
ነ ታዉ ጌምያ በሰ ግድያ ግሾ፥ ኤንቲ ቆትድ ዎꬅዳ ፅሄፐ ታና ናጋ። 
አቤት ጎዳዉ፥ ቱማ ፆሳዉ፥ ታ ሸምፑዋ ነ ኩሸን ዎꬃይስ፤ ነ ታና ዎዛ። 
ፓꬆና ኤቃታ ጎይነይሳታ ታ እፃይስ፤ ግዶሽን ታኒ ጎዳን አማነታይስ። 
ታ መቱዋነ ታ ኡንአ ነ በእዳ ግሾ ታኒ መርናዉ ነ ሲቁዋን ኡፋይታና። 
ነ ታና ሞርከ ኩሸን አꬃዳ እማባካ፤ ታ ቶሆታ ዳልጋ በሳን ኤሳዳሳ። 
አቤት ጎዳዉ፥ ታኒ መቶን ገልዳ ግሾ ታዉ ቃታ፤ ታ ዳሮ አዛንዳ ግሾ ታ አይፈይ ሙልጫትስ፤ ታ አሾይነ ታ ሸምፖይ ዳቡርስ። 
ታ ደኦይ አዛኖን፥ ታ ላይꬃይ ኦለን ዉርስ፤ ዋየ ዳሮተꬃን ታ ዎልቃይ ዉርስ፤ ታ መቀꬃት አርጋጭዶሶና። 
ታ ሞርከታ ኡባስ ቅስ አታስ፤ ታ ሾሮታስ ዬላ ግዳስ። ታ ላገታስ ዳጋንꬅያባ ግዳስ፤ ታና በኤይሳት ታፐ ሃክዶሶና። 
ታ ሀይቅዳ አሳዳ ዶገታስ፤ መቃ ሚሸዳ ዎራ የገታስ። 
ታኒ ዳሮታ ካልካሻ ስአስ፤ ኡባ በሳራ ዳጋም ደኤስ። ኤንቲ ታ ቦላ ቶቦሶና፤ ታና ዎꬋናዉ ማቀቶሶና። 
ሽን ጎዳዉ፥ ታ ነናን አማነታና፤ ኔኒ ታ ፆሳ። 
ታ ደኦ ላይꬃይ ነ ኩሽያና፤ ታና የደꬅያ ታ ሞርከታ ኩሸፐ አሻ። 
ነ አይልያ ቦላ ነ ሶምኡዋ ፖእሳ፤ ነ ማሮተꬃን ታና አሻ። 
አቤት ጎዳዉ፥ ታ ነና ፄግያ ግሾ፥ ታና ዬላዮፓ። ሽን ኢታት ዬላቶ፤ ዱፎን ገልድ ስእ ጎ። 
ኦቶሮንነ ቦረን ፅሎታ ቦላ ምንድ ሃሳያ ግሾ፥ ኤንታ ዎርዶ እንፃርሳ ስእ ኦꬃ። 
ነና ያየይሳታስ ነ ምንጅዳ፥ ኔኮ ባቃተይሳታስ ነ ጊግስዳ፥ ኬሀተꬃይ አይ መላ ዳሮ! 
ኔኒ ኤንታ ነ ስንꬃን፥ ጌማ በሳን ገንꬃ ዎꬃዳሳ፤ አሳ ኢታ ማቁዋፈ አሻሳ፤ ኢታ እንፃርሳፈ ነ ዱንካንያን ቆሳዳሳ። 
ሞርከይ ተቅዳ ካታማ ግዶን፥ ማላልስያ ባ ማሮተꬃ ታና በስዳ፥ ጎዳይ ጋላተቶ። 
ታ ዳጋማዳ፥ “ነ ስንꬃፈ ሃካስ” ጋስ፤ ሽን ታ ማዶ ኮያዳ ኔኮ ዋስዳ ዎደ፥ ታ ዋሱዋ ነ ስአዳሳ። 
ህንተኖ፥ ፆሳ አሳዉ፥ ጎዳ ዶስተ፤ ጎዳይ አማነተይሳታ ናጌስ፤ ሽን ኦቶራንቾታስ ኤንታ ጋትያ ቃንፄስ። 
ህንተኖ፥ ጎዳን ኡፋይስ ኦይሳቶ፥ ምንተ፤ ገንጭተ። 
