﻿ማዝሙረ.
27.
ዳዊታ ማዝሙረ ጎዳይ ታዉ ፖኦነ ታና አሸይሳ፤ ያትን፥ ታ ኦና ያያኔ? ጎዳይ፥ ታ ደኦይ ናገትያ ሚፃ፤ ያትን፥ ታ አይስ ዳጋማኔ? 
ኢታ አሳት፥ ታና እፀይሳትነ ታ ሞርከት ታና ዎꬋናዉ ሆርዶፍያ ዎደ፥ ባንታዉ ꬉበትድ ኩንዳና። 
ሞርከ ቶር ታና ተቅኮ ታ ዎዛናይ ያየና። ኦል ታ ቦላ ደንድያኮካ፥ ታኒ ጎዳን አማነታይስ። 
ታ ጎዳ እስባ ኦይቻስ፤ ሄስካ፥ ታ ደኦ ላይꬃ ኡባን ጎዳ ኬꬃን ደአናሳ፤ ጎዳ ሎኦተꬃ በአናሳነ እያ ኬꬃን እያ ኮያናሳ። 
መቶ ጋላስ ታና ባ ደእያ በሳን ገንꬃና፤ ባ ዱንካንያን ታና ቆሳና፤ ታና ꬎቃ ዛላ ቦላ ኤሳና። 
ሄ ዎደ ታኒ ታና ተቅዳ ታ ሞርከታፐ አꬋዳ፥ ꬎቁ ꬎቁ ጋና። ታኒ እያ ዱንካንያን ኡፋይታሸ ያርሾ ያርሻና፤ ጎዳ ማዝሙረን ጋላታና። 
አቤት ጎዳዉ፥ ታ ነና ፄግያ ዎደ ነ ታዉ ኮያ፤ ታዉ ቃታ፤ ታና ስአ። 
ኔኒ፥ “ታ ሶምኡዋ ኮይተ” ጋዳሳ፥ ታ ዎዛናይ አቤት ጎዳዉ፥ “ታ ነ ሶምኡዋ ኮያና” ያግስ። 
ነ ሶምኡዋ ታፐ ገንꬆፋ፤ ታና ማደይሶ፤ ነ ሸነታዳ ታና ነ አይልያ ጉየ ዛሮፓ። አቤት ታና አሽያ ፆሳዉ፥ ታና የጎፋ፤ አጎፋ። 
ታ አዋይነ ታ አይያ ታና አግኮካ ጎዳይ ታና ሺሽድ ኤካና። 
አቤት ጎዳዉ፥ ታና ነ ኦግያ ታማርሳ፤ ታ ሞርከታ ግሾ ታና ሱረ ኦገ ካለꬃ። 
ታና ማንድያ ዎርዶ ማርካት ታ ቦላ ዎልቃን ደንድዳ ግሾ፥ ታና ታ ሞርከታ አሙዋስ አꬃዳ እሞፋ። 
ታኒ ደኦን ደአሸ፥ ጎዳ ኬሀተꬃ በአናይሳ አማናይስ። 
ጎዳን ኡፋይስ ኦꬃ፤ ምና፥ ያዮፋ፤ ጎዳን ኡፋይስ ኦꬃ። 
