﻿ማዝሙረ.
26.
ዳዊታ ማዝሙረ አቤት ጎዳዉ፥ ታ ሱረተꬃን ሄመትዳ ግሾነ ስይ ባይና ነናን አማነትዳ ግሾ፥ ታዉ ፕርዳ። 
አቤት ጎዳዉ፥ ታና ፓጫ፤ ታና ፕልጋዳ በአ፤ ታ ዎዛና ፆሞሳ። 
ነ ሲቆይ ታ ስንꬃን ደእያ ግሾ፥ ታ ኡባ ዎደ ነ ቱማ ኦግያን ሄመታይስ። 
ጭምያ አሳራ ታ ኡትከ፤ ጩቦታ ማባራን ገልከ። 
ኢታታ ዱላታ ታ እፃይስ፤ ማካላቾታራ እስፈ ኡትከ። 
አቤት ጎዳዉ፥ ታ ፅሎተꬃ በሳናዉ ታ ኩሽያ ሜጫይስ፤ ነ ያርሾ በሳ ዩያይስ። 
ጋላታ ማዝሙረ የፃሸ ነ ማላልስያ ኦሶ ኡባ ኦዳና። 
አቤት ጎዳዉ፥ ነ ኬꬃነ፥ ነ ቦንቾይ አቅያ በሳ ታ ዶሳይስ። 
ታና ናጋራንቾታራ እስፈ ፕቶፋ፤ አሳ ሱꬁ ጉሰይሳታራ ታ ሸምፑዋ ꬋይሶፋ። 
ኤንታ ኩሸን ኢታ ሀልቾይ ደኤስ፤ ኤንታ ኡሻቻ ኩሸን ዎꬋፈይ ኩምስ። 
ሽን ታ ሱረተꬃን ሄመታና፤ ታና ዎዛ፤ ታዉ ቃታ። 
ታ ቶሆይ ደምባ በሳን ኤቅስ፤ ግታ ሺቁዋን ጎዳ ጋላታና። 
